Sự Nghiệp Anh Hùng (Apadāna)

a, 
hessati satthu sāvako’. 
Tena kammavisesena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Sabbattha sukhito hutvā, 
saṁsaranto bhavābhave; 
Sāvatthiyaṁ pure jāto, 
kule aññatare ahaṁ. 
Nonītasukhumālaṁ maṁ, 
jātapallavakomalaṁ; 
Mandaṁ uttānasayanaṁ, 
pisācībhayatajjitā. 
Pādamūle mahesissa, 
sāyesuṁ dīnamānasā; 
‘Imaṁ dadāma te nātha, 
saraṇaṁ hohi nāyaka’. 
Tadā paṭiggahi so maṁ, 
bhītānaṁ saraṇo muni; 
Jālinā cakkaṅkitena, 
mudukomalapāṇinā. 
Tadā pabhuti tenāhaṁ, 
arakkheyyena rakkhito; 
Sabbaveravinimutto, 
sukhena parivuddhito. 
Sugatena vinā bhūto, 
ukkaṇṭhāmi muhuttakaṁ; 
Jātiyā sattavassohaṁ, 
pabbajiṁ anagāriyaṁ. 
Sabbapāramisambhūtaṁ, 
nīlakkhinayanaṁ varaṁ; 
Rūpaṁ sabbasubhākiṇṇaṁ, 
atitto viharāmahaṁ. 
Buddharūparatiṁ ñatvā, 
tadā ovadi maṁ jino; 
‘Alaṁ vakkali kiṁ rūpe, 
ramase bālanandite. 
Yo hi passati saddhammaṁ, 
so maṁ passati paṇḍito; 
Apassamāno saddhammaṁ, 
maṁ passampi na passati. 
Anantādīnavo kāyo, 
visarukkhasamūpamo; 
Āvāso sabbarogānaṁ, 
puñjo dukkhassa kevalo. 
Nibbindiya tato rūpe, 
khandhānaṁ udayabbayaṁ; 
Passa upakkilesānaṁ, 
sukhenantaṁ gamissasi’. 
Evaṁ tenānusiṭṭhohaṁ, 
nāyakena hitesinā; 
Gijjhakūṭaṁ samāruyha, 
jhāyāmi girikandare. 
Ṭhito pabbatapādamhi, 
assāsayi mahāmuni; 
Vakkalīti jino vācaṁ, 
taṁ sutvā mudito ahaṁ. 
Pakkhandiṁ selapabbhāre, 
anekasataporise; 
Tadā buddhānubhāvena, 
sukheneva mahiṁ gato. 
Punopi dhammaṁ deseti, 
khandhānaṁ udayabbayaṁ; 
Tamahaṁ dhammamaññāya, 
arahattamapāpuṇiṁ. 
Sumahāparisamajjhe, 
tadā maṁ caraṇantago; 
Aggaṁ saddhādhimuttānaṁ, 
paññapesi mahāmati. 
Satasahassito kappe, 
yaṁ kammamakariṁ tadā; 
Duggatiṁ nābhijānāmi, 
buddhapūjāyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā vakkalitthero imā gāthāyo abhāsitthāti. 
Vakkalittherassāpadānaṁ dutiyaṁ. 

Therāpadāna 
Kaccāyanavagga 
Mahākappinattheraapadāna 
“Padumuttaro nāma jino, 
sabbadhammāna pāragū; 
Udito ajaṭākāse, 
ravīva saradambare. 
Vacanābhāya bodheti, 
veneyyapadumāni so; 
Kilesapaṅkaṁ soseti, 
matiraṁsīhi nāyako. 
Titthiyānaṁ yase hanti, 
khajjotābhā yathā ravi; 
Saccatthābhaṁ pakāseti, 
ratanaṁva divākaro. 
Guṇānaṁ āyatibhūto, 
ratanānaṁva sāgaro; 
Pajjunnoriva bhūtāni, 
dhammameghena vassati. 
Akkhadasso tadā āsiṁ, 
nagare haṁsasavhaye; 
Upecca dhammamassosiṁ, 
jalajuttamanāmino. 
Ovādakassa bhikkhūnaṁ, 
sāvakassa katāvino; 
Guṇaṁ pakāsayantassa, 
tappayantassa me manaṁ. 
Sutvā patīto sumano, 
nimantetvā tathāgataṁ; 
Sasissaṁ bhojayitvāna, 
taṁ ṭhānamabhipatthayiṁ. 
Tadā haṁsasamabhāgo, 
haṁsadundubhinissano; 
‘Passathetaṁ mahāmattaṁ, 
vinicchayavisāradaṁ. 
Patitaṁ pādamūle me, 
samuggatatanūruhaṁ; 
Jīmūtavaṇṇaṁ pīṇaṁsaṁ, 
pasannanayanānanaṁ. 
Parivārena mahatā, 
rājayuttaṁ mahāyasaṁ; 
Eso katāvino ṭhānaṁ, 
pattheti muditāsayo. 
Iminā paṇipātena, 
cāgena paṇidhīhi ca; 
Kappasatasahassāni, 
nupapajjati duggatiṁ. 
Devesu devasobhaggaṁ, 
manussesu mahantataṁ; 
Anubhotvāna sesena, 
nibbānaṁ pāpuṇissati. 
Satasahassito kappe, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
Kappino nāma nāmena, 
hessati satthu sāvako’. 
Tatohaṁ sukataṁ kāraṁ, 
katvāna jinasāsane; 
Jahitvā mānusaṁ dehaṁ, 
tusitaṁ agamāsahaṁ. 
Devamānusarajjāni, 
sataso anusāsiya; 
Bārāṇasiyamāsanne, 
jāto keniyajātiyaṁ. 
Sahassaparivārena, 
sapajāpatiko ahaṁ; 
Pañca paccekabuddhānaṁ, 
satāni samupaṭṭhahiṁ. 
Temāsaṁ bhojayitvāna, 
pacchādamha ticīvaraṁ; 
Tato cutā mayaṁ sabbe, 
ahumha tidasūpagā. 
Puno sabbe manussattaṁ, 
agamimha tato cutā; 
Kukkuṭamhi pure jātā, 
himavantassa passato. 
Kappino nāmahaṁ āsiṁ, 
rājaputto mahāyaso; 
Sesāmaccakule jātā, 
mameva parivārayuṁ. 
Mahārajjasukhaṁ patto, 
sabbakāmasamiddhimā; 
Vāṇijehi samakkhātaṁ, 
buddhuppādamahaṁ suṇiṁ. 
‘Buddho loke samuppanno, 
asamo ekapuggalo; 
So pakāseti saddhammaṁ, 
amataṁ sukhamuttamaṁ. 
Suyuttā tassa sissā ca, 
sumuttā ca anāsavā’; 
Sutvā nesaṁ suvacanaṁ, 
sakkaritvāna vāṇije. 
Pahāya rajjaṁ sāmacco, 
nikkhamiṁ buddhamāmako; 
Nadiṁ disvā mahācandaṁ, 
pūritaṁ samatittikaṁ. 
Appatiṭṭhaṁ anālambaṁ, 
duttaraṁ sīghavāhiniṁ; 
Guṇaṁ saritvā buddhassa, 
sotthinā samatikkamiṁ. 
‘Bhavasotaṁ sace buddho, 
tiṇṇo lokantagū vidū; 
Etena saccavajjena, 
gamanaṁ me samijjhatu. 
Yadi santigamo maggo, 
mokkho caccantikaṁ sukhaṁ; 
Etena saccavajjena, 
gamanaṁ me samijjhatu. 
Saṅgho ce tiṇṇakantāro, 
puññakkhetto anuttaro; 
Etena saccavajjena, 
gamanaṁ me samijjhatu’. 
Saha kate saccavare, 
maggā apagataṁ jalaṁ; 
Tato sukhena uttiṇṇo, 
nadītīre manorame. 
Nisinnaṁ addasaṁ buddhaṁ, 
udentaṁva pabhaṅkaraṁ; 
Jalantaṁ hemaselaṁva, 
dīparukkhaṁva jotitaṁ. 
Sasiṁva tārāsahitaṁ, 
sāvakehi purakkhataṁ; 
Vāsavaṁ viya vassantaṁ, 
desanājaladantaraṁ. 
Vanditvāna sahāmacco, 
ekamantamupāvisiṁ; 
Tato no āsayaṁ ñatvā, 
buddho dhammamadesayi. 
Sutvāna dhammaṁ vimalaṁ, 
avocumha mayaṁ jinaṁ; 
‘Pabbājehi mahāvīra, 
nibbindāmha mayaṁ bhave’. 
‘Svākkhāto bhikkhave dhammo, 
dukkhantakaraṇāya vo; 
Caratha brahmacariyaṁ’, 
iccāha munisattamo. 
Saha vācāya sabbepi, 
bhikkhuvesadharā mayaṁ; 
Ahumha upasampannā, 
sotāpannā ca sāsane. 
Tato jetavanaṁ gantvā, 
anusāsi vināyako; 
Anusiṭṭho jinenāhaṁ, 
arahattamapāpuṇiṁ. 
Tato bhikkhusahassāni, 
anusāsimahaṁ tadā; 
Mamānusāsanakarā, 
tepi āsuṁ anāsavā. 
Jino tasmiṁ guṇe tuṭṭho, 
etadagge ṭhapesi maṁ; 
Bhikkhuovādakānaggo, 
kappinoti mahājane. 
Satasahasse kataṁ kammaṁ, 
phalaṁ dassesi me idha; 
Pamutto saravegova, 
kilese jhāpayiṁ mama. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā mahākappino thero imā gāthāyo abhāsitthāti. 
Mahākappinattherassāpadānaṁ tatiyaṁ. 

Therāpadāna 
Kaccāyanavagga 
Dabbamallaputtattheraapadāna 
“Padumuttaro nāma jino, 
sabbalokavidū muni; 
Ito satasahassamhi, 
kappe uppajji cakkhumā. 
Ovādako viññāpako, 
tārako sabbapāṇinaṁ; 
Desanākusalo buddho, 
tāresi janataṁ bahuṁ. 
Anukampako kāruṇiko, 
hitesī sabbapāṇinaṁ; 
Sampatte titthiye sabbe, 
pañcasīle patiṭṭhapi. 
Evaṁ nirākulaṁ āsi, 
suññataṁ titthiyehi ca; 
Vicittaṁ arahantehi, 
vasībhūtehi tādibhi. 
Ratanānaṭṭhapaññāsaṁ, 
uggato so mahāmuni; 
Kañcanagghiyasaṅkāso, 
bāttiṁsavaralakkhaṇo. 
Vassasatasahassāni, 
āyu vijjati tāvade; 
Tāvatā tiṭṭhamāno so, 
tāresi janataṁ bahuṁ. 
Tadāhaṁ haṁsavatiyaṁ, 
seṭṭhiputto mahāyaso; 
Upetvā lokapajjotaṁ, 
assosiṁ dhammadesanaṁ. 
Senāsanāni bhikkhūnaṁ, 
paññāpentaṁ sasāvakaṁ; 
Kittayantassa vacanaṁ, 
suṇitvā mudito ahaṁ. 
Adhikāraṁ sasaṅghassa, 
katvā tassa mahesino; 
Nipacca sirasā pāde, 
taṁ ṭhānamabhipatthayiṁ. 
Tadāha sa mahāvīro, 
mama kammaṁ pakittayaṁ; 
‘Yo sasaṅghamabhojesi, 
sattāhaṁ lokanāyakaṁ. 
Soyaṁ kamalapattakkho, 
sīhaṁso kanakattaco; 
Mama pādamūle nipati, 
patthayaṁ ṭhānamuttamaṁ. 
Satasahassito kappe, 
okkākakulasambhavo; 
Gotamo nāma gottena, 
satthā loke bhavissati. 
Sāvako tassa buddhassa, 
dabbo nāmena vissuto; 
Senāsanapaññāpako, 
aggo hessatiyaṁ tadā’. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Satānaṁ tīṇikkhattuñca, 
devarajjamakārayiṁ; 
Satānaṁ pañcakkhattuñca, 
cakkavattī ahosahaṁ. 
Padesarajjaṁ vipulaṁ, 
gaṇanāto asaṅkhiyaṁ; 
Sabbattha sukhito āsiṁ, 
tassa kammassa vāhasā. 
Ekanavutito kappe, 
vipassī nāma nāyako; 
Uppajji cārudassano, 
sabbadhammavipassako. 
Duṭṭhacitto upavadiṁ, 
sāvakaṁ tassa tādino; 
Sabbāsavaparikkhīṇaṁ, 
suddhoti ca vijāniya. 
Tasseva naravīrassa, 
sāvakānaṁ mahesinaṁ; 
Salākañca gahetvāna, 
khīrodanamadāsahaṁ. 
Imamhi bhaddake kappe, 
brahmabandhu mahāyaso; 
Kassapo nāma gottena, 
uppajji vadataṁ varo. 
Sāsanaṁ jotayitvāna, 
abhibhuyya kutitthiye; 
Vineyye vinayitvāva, 
nibbuto so sasāvako. 
Sasisse nibbute nāthe, 
atthamentamhi sāsane; 
Devā kandiṁsu saṁviggā, 
muttakesā rudammukhā. 
‘Nibbāyissati dhammakkho, 
na passissāma subbate; 
Na suṇissāma saddhammaṁ, 
aho no appapuññatā’. 
Tadāyaṁ pathavī sabbā, 
acalā sā calācalā; 
Sāgaro ca sasokova, 
vinadī karuṇaṁ giraṁ. 
Catuddisā dundubhiyo, 
nādayiṁsu amānusā; 
Samantato asaniyo, 
phaliṁsu ca bhayāvahā. 
Ukkā patiṁsu nabhasā, 
dhūmaketu ca dissati; 
Sadhūmā jālavaṭṭā ca, 
raviṁsu karuṇaṁ migā. 
Uppāde dāruṇe disvā, 
sāsanatthaṅgasūcake; 
Saṁviggā bhikkhavo satta, 
cintayimha mayaṁ tadā. 
‘Sāsanena vināmhākaṁ, 
jīvitena alaṁ mayaṁ; 
Pavisitvā mahāraññaṁ, 
yuñjāma jinasāsanaṁ’. 
Addasamha tadāraññe, 
ubbiddhaṁ selamuttamaṁ; 
Nisseṇiyā tamāruyha, 
nisseṇiṁ pātayimhase. 
Tadā ovadi no thero, 
‘buddhuppādo sudullabho; 
Saddhātidullabhā laddhā, 
thokaṁ sesañca sāsanaṁ. 
Nipatanti khaṇātītā, 
anante dukkhasāgare; 
Tasmā payogo kattabbo, 
yāva ṭhāti mune mataṁ’. 
Arahā āsi so thero, 
anāgāmī tadānugo; 
Susīlā itare yuttā, 
devalokaṁ agamhase. 
Nibbuto tiṇṇasaṁsāro, 
suddhāvāse ca ekako; 
Ahañca pakkusāti ca, 
sabhiyo bāhiyo tathā. 
Kumārakassapo ceva, 
tattha tatthūpagā mayaṁ; 
Saṁsārabandhanā muttā, 
gotamenānukampitā. 
Mallesu kusinārāyaṁ, 
jāto gabbheva me sato; 
Mātā matā citāruḷhā, 
tato nippatito ahaṁ. 
Patito dabbapuñjamhi, 
tato dabboti vissuto; 
Brahmacārībalenāhaṁ, 
vimutto sattavassiko. 
Khīrodanabalenāhaṁ, 
pañcahaṅgehupāgato; 
Khīṇāsavopavādena, 
pāpehi bahucodito. 
Ubho puññañca pāpañca, 
vītivattomhi dānihaṁ; 
Patvāna paramaṁ santiṁ, 
viharāmi anāsavo. 
Senāsanaṁ paññāpayiṁ, 
hāsayitvāna subbate; 
Jino tasmiṁ guṇe tuṭṭho, 
etadagge ṭhapesi maṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā dabbamallaputto thero imā gāthāyo abhāsitthāti. 
Dabbamallaputtattherassāpadānaṁ catutthaṁ. 

Therāpadāna 
Kaccāyanavagga 
Kumārakassapattheraapadāna 
“Ito satasahassamhi, 
kappe uppajji nāyako; 
Sabbalokahito vīro, 
padumuttaranāmako. 
Tadāhaṁ brāhmaṇo hutvā, 
vissuto vedapāragū; 
Divāvihāraṁ vicaraṁ, 
addasaṁ lokanāyakaṁ. 
Catusaccaṁ pakāsentaṁ, 
bodhayantaṁ sadevakaṁ; 
Vicittakathikānaggaṁ, 
vaṇṇayantaṁ mahājane. 
Tadā muditacittohaṁ, 
nimantetvā tathāgataṁ; 
Nānārattehi vatthehi, 
alaṅkaritvāna maṇḍapaṁ. 
Nānāratanapajjotaṁ, 
sasaṅghaṁ bhojayiṁ tahiṁ; 
Bhojayitvāna sattāhaṁ, 
nānaggarasabhojanaṁ. 
Nānācittehi pupphehi, 
pūjayitvā sasāvakaṁ; 
Nipacca pādamūlamhi, 
taṁ ṭhānaṁ patthayiṁ ahaṁ. 
Tadā munivaro āha, 
karuṇekarasāsayo; 
‘Passathetaṁ dijavaraṁ, 
padumānanalocanaṁ. 
Pītipāmojjabahulaṁ, 
samuggatatanūruhaṁ; 
Hāsamhitavisālakkhaṁ, 
mama sāsanalālasaṁ. 
Patitaṁ pādamūle me, 
ekāvatthasumānasaṁ; 
Esa pattheti taṁ ṭhānaṁ, 
vicittakathikattanaṁ. 
Satasahassito kappe, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
Kumārakassapo nāma, 
hessati satthu sāvako. 
Vicittapupphadussānaṁ, 
ratanānañca vāhasā; 
Vicittakathikānaṁ so, 
aggataṁ pāpuṇissati’. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Paribbhamaṁ bhavābhave, 
raṅgamajjhe yathā naṭo; 
Sākhamigatrajo hutvā, 
migiyā kucchimokkamiṁ. 
Tadā mayi kucchigate, 
vajjhavāro upaṭṭhito; 
Sākhena cattā me mātā, 
nigrodhaṁ saraṇaṁ gatā. 
Tena sā migarājena, 
maraṇā parimocitā; 
Pariccajitvā sapāṇaṁ, 
mamevaṁ ovadī tadā. 
‘Nigrodhameva seveyya, 
na sākhamupasaṁvase; 
Nigrodhasmiṁ mataṁ seyyo, 
yañce sākhamhi jīvitaṁ’. 
Tenānusiṭṭhā migayūthapena, 
Ahañca mātā ca tathetare ca; 
Āgamma rammaṁ tusitādhivāsaṁ, 
Gatā pavāsaṁ sagharaṁ yatheva. 
Puno kassapavīrassa, 
atthamentamhi sāsane; 
Āruyha selasikharaṁ, 
yuñjitvā jinasāsanaṁ. 
Idānāhaṁ rājagahe, 
jāto seṭṭhikule ahuṁ; 
Āpannasattā me mātā, 
pabbaji anagāriyaṁ. 
Sagabbhaṁ taṁ viditvāna, 
devadattamupānayuṁ; 
So avoca ‘vināsetha, 
pāpikaṁ bhikkhuniṁ imaṁ’. 
Idānipi munindena, 
jinena anukampitā; 
Sukhinī ajanī mayhaṁ, 
mātā bhikkhunupassaye. 
Taṁ viditvā mahīpālo, 
kosalo maṁ aposayi; 
Kumāraparihārena, 
nāmenāhañca kassapo. 
Mahākassapamāgamma, 
ahaṁ kumārakassapo; 
Vammikasadisaṁ kāyaṁ, 
sutvā buddhena desitaṁ. 
Tato cittaṁ vimucci me, 
anupādāya sabbaso; 
Pāyāsiṁ damayitvāhaṁ, 
etadaggamapāpuṇiṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kumārakassapo thero imā gāthāyo abhāsitthāti. 
Kumārakassapattherassāpadānaṁ pañcamaṁ. 
Catuvīsatimaṁ bhāṇavāraṁ. 

Therāpadāna 
Kaccāyanavagga 
Bāhiyattheraapadāna 
“Ito satasahassamhi, 
kappe uppajji nāyako; 
Mahappabho tilokaggo, 
nāmena padumuttaro. 
Khippābhiññassa bhikkhussa, 
guṇaṁ kittayato mune; 
Sutvā udaggacittohaṁ, 
kāraṁ katvā mahesino. 
Datvā sattāhikaṁ dānaṁ, 
sasissassa mune ahaṁ; 
Abhivādiya sambuddhaṁ, 
taṁ ṭhānaṁ patthayiṁ tadā. 
Tato maṁ byākari buddho, 
‘etaṁ passatha brāhmaṇaṁ; 
Patitaṁ pādamūle me, 
cariyaṁ paccavekkhaṇaṁ. 
Hemayaññopacitaṅgaṁ, 
avadātatanuttacaṁ; 
Palambabimbatamboṭṭhaṁ, 
setatiṇhasamaṁ dijaṁ. 
Guṇathāmabahutaraṁ, 
samuggatatanūruhaṁ; 
Guṇoghāyatanībhūtaṁ, 
pītisamphullitānanaṁ. 
Eso patthayate ṭhānaṁ, 
khippābhiññassa bhikkhuno; 
Anāgate mahāvīro, 
gotamo nāma hessati. 
Tassa dhammesu dāyādo, 
oraso dhammanimmito; 
Bāhiyo nāma nāmena, 
hessati satthu sāvako’. 
Tadā hi tuṭṭho vuṭṭhāya, 
yāvajīvaṁ mahāmune; 
Kāraṁ katvā cuto saggaṁ, 
agaṁ sabhavanaṁ yathā. 
Devabhūto manusso vā, 
sukhito tassa kammuno; 
Vāhasā saṁsaritvāna, 
sampattimanubhomahaṁ. 
Puna kassapavīrassa, 
atthamentamhi sāsane; 
Āruyha selasikharaṁ, 
yuñjitvā jinasāsanaṁ. 
Visuddhasīlo sappañño, 
jinasāsanakārako; 
Tato cutā pañca janā, 
devalokaṁ agamhase. 
Tatohaṁ bāhiyo jāto, 
bhārukacche puruttame; 
Tato nāvāya pakkhando, 
sāgaraṁ appasiddhiyaṁ. 
Tato nāvā abhijjittha, 
gantvāna katipāhakaṁ; 
Tadā bhīsanake ghore, 
patito makarākare. 
Tadāhaṁ vāyamitvāna, 
santaritvā mahodadhiṁ; 
Suppārapaṭṭanavaraṁ, 
sampatto mandavedhito. 
Dārucīraṁ nivāsetvā, 
gāmaṁ piṇḍāya pāvisiṁ; 
Tadāha so jano tuṭṭho, 
‘arahāyamidhāgato. 
Imaṁ annena pānena, 
vatthena sayanena ca; 
Bhesajjena ca sakkatvā, 
hessāma sukhitā mayaṁ’. 
Paccayānaṁ tadā lābhī, 
tehi sakkatapūjito; 
Arahāhanti saṅkappaṁ, 
uppādesiṁ ayoniso. 
Tato me cittamaññāya, 
codayī pubbadevatā; 
‘Na tvaṁ upāyamaggaññū, 
kuto tvaṁ arahā bhave’. 
Codito tāya saṁviggo, 
tadāhaṁ paripucchi taṁ; 
‘Ke vā ete kuhiṁ loke, 
arahanto naruttamā’. 
‘Sāvatthiyaṁ kosalamandire jino, 
Pahūtapañño varabhūrimedhaso; 
So sakyaputto arahā anāsavo, 
Deseti dhammaṁ arahattapattiyā’. 
Tadassa sutvā vacanaṁ supīṇito, 
Nidhiṁva laddhā kapaṇoti vimhito; 
Udaggacitto arahattamuttamaṁ, 
Sudassanaṁ daṭṭhumanantagocaraṁ. 
Tadā tato nikkhamitvāna ‘satthuno, 
Sadā jinaṁ passāmi vimalānanaṁ’; 
Upecca rammaṁ vijitavhayaṁ vanaṁ, 
Dije apucchiṁ ‘kuhiṁ lokanandano’. 
‘Tato avocuṁ naradevavandito, 
Puraṁ paviṭṭho asanesanāya so; 
Sasova khippaṁ munidassanussuko, 
Upecca vandāhi tamaggapuggalaṁ’. 
Tatohaṁ tuvaṭaṁ gantvā, 
sāvatthiṁ puramuttamaṁ; 
Vicarantaṁ tamaddakkhiṁ, 
piṇḍatthaṁ apihāgidhaṁ. 
Pattapāṇiṁ alolakkhaṁ, 
pācayantaṁ pītākaraṁ; 
Sirīnilayasaṅkāsaṁ, 
ravidittiharānanaṁ. 
Taṁ samecca nipaccāhaṁ, 
idaṁ vacanamabraviṁ; 
‘Kupathe vippanaṭṭhassa, 
saraṇaṁ hohi gotama’. 
‘Pāṇasantāraṇatthāya, 
piṇḍāya vicarāmahaṁ; 
Na te dhammakathākālo’, 
iccāha munisattamo. 
Tadā punappunaṁ buddhaṁ, 
āyāciṁ dhammalālaso; 
Yo me dhammamadesesi, 
gambhīraṁ suññataṁ padaṁ. 
Tassa dhammaṁ suṇitvāna, 
pāpuṇiṁ āsavakkhayaṁ; 
Parikkhīṇāyuko santo, 
aho satthānukampako. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ. 
Evaṁ thero viyākāsi, 
bāhiyo dārucīriyo; 
Saṅkārakūṭe patito, 
bhūtāviṭṭhāya gāviyā. 
Attano pubbacariyaṁ, 
kittayitvā mahāmati; 
Parinibbāyi so thero, 
sāvatthiyaṁ puruttame. 
Nagarā nikkhamanto taṁ, 
disvāna isisattamo; 
Dārucīradharaṁ dhīraṁ, 
bāhiyaṁ bāhitāgamaṁ. 
Bhūmiyaṁ patitaṁ dantaṁ, 
indaketūva pātitaṁ; 
Gatāyuṁ sukkhakilesaṁ, 
jinasāsanakārakaṁ. 
Tato āmantayī satthā, 
sāvake sāsane rate; 
‘Gaṇhatha netvā jhāpetha, 
tanuṁ sabrahmacārino. 
Thūpaṁ karotha pūjetha, 
nibbuto so mahāmati; 
Khippābhiññānamesaggo, 
sāvako me vacokaro. 
Sahassamapi ce gāthā, 
anatthapadasañhitā; 
Ekaṁ gāthāpadaṁ seyyo, 
yaṁ sutvā upasammati. 
Yattha āpo ca pathavī, 
tejo vāyo na gādhati; 
Na tattha sukkā jotanti, 
ādicco na pakāsati. 
Na tattha candimā bhāti, 
tamo tattha na vijjati; 
Yadā ca attanā vedi, 
munimonena brāhmaṇo. 
Atha rūpā arūpā ca, 
sukhadukkhā vimuccati’; 
Iccevaṁ abhaṇī nātho, 
tilokasaraṇo muni”. 
Itthaṁ sudaṁ āyasmā bāhiyo thero imā gāthāyo abhāsitthāti. 
Bāhiyattherassāpadānaṁ chaṭṭhaṁ. 

Therāpadāna 
Kaccāyanavagga 
7 Mahākoṭṭhikattheraapadāna 
“Padumuttaro nāma jino, 
sabbalokavidū muni; 
Ito satasahassamhi, 
kappe uppajji cakkhumā. 
Ovādako viññāpako, 
tārako sabbapāṇinaṁ; 
Desanākusalo buddho, 
tāresi janataṁ bahuṁ. 
Anukampako kāruṇiko, 
hitesī sabbapāṇinaṁ; 
Sampatte titthiye sabbe, 
pañcasīle patiṭṭhapi. 
Evaṁ nirākulaṁ āsi, 
suññataṁ titthiyehi ca; 
Vicittaṁ arahantehi, 
vasībhūtehi tādibhi. 
Ratanānaṭṭhapaññāsaṁ, 
uggato so mahāmuni; 
Kañcanagghiyasaṅkāso, 
bāttiṁsavaralakkhaṇo. 
Vassasatasahassāni, 
āyu vijjati tāvade; 
Tāvatā tiṭṭhamāno so, 
tāresi janataṁ bahuṁ. 
Tadāhaṁ haṁsavatiyaṁ, 
brāhmaṇo vedapāragū; 
Upecca sabbalokaggaṁ, 
assosiṁ dhammadesanaṁ. 
Tadā so sāvakaṁ vīro, 
pabhinnamatigocaraṁ; 
Atthe dhamme nirutte ca, 
paṭibhāne ca kovidaṁ. 
Ṭhapesi etadaggamhi, 
taṁ sutvā mudito ahaṁ; 
Sasāvakaṁ jinavaraṁ, 
sattāhaṁ bhojayiṁ tadā. 
Dussehacchādayitvāna, 
sasissaṁ buddhisāgaraṁ; 
Nipacca pādamūlamhi, 
taṁ ṭhānaṁ patthayiṁ ahaṁ. 
Tato avoca lokaggo, 
‘passathetaṁ dijuttamaṁ; 
Vinataṁ pādamūle me, 
kamalodarasappabhaṁ. 
Buddhaseṭṭhassa bhikkhussa, 
Ṭhānaṁ patthayate ayaṁ; 
Tāya saddhāya cāgena, 
Saddhammassavanena ca. 
Sabbattha sukhito hutvā, 
saṁsaritvā bhavābhave; 
Anāgatamhi addhāne, 
lacchase taṁ manorathaṁ. 
Satasahassito kappe, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
Koṭṭhiko nāma nāmena, 
hessati satthu sāvako’. 
Taṁ sutvā mudito hutvā, 
yāvajīvaṁ tadā jinaṁ; 
Mettacitto paricariṁ, 
sato paññāsamāhito. 
Tena kammavipākena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Satānaṁ tīṇikkhattuñca, 
devarajjamakārayiṁ; 
Satānaṁ pañcakkhattuñca, 
cakkavattī ahosahaṁ. 
Padesarajjaṁ vipulaṁ, 
gaṇanāto asaṅkhiyaṁ; 
Sabbattha sukhito āsiṁ, 
tassa kammassa vāhasā. 
Duve bhave saṁsarāmi, 
devatte atha mānuse; 
Aññaṁ gatiṁ na gacchāmi, 
suciṇṇassa idaṁ phalaṁ. 
Duve kule pajāyāmi, 
khattiye atha brāhmaṇe; 
Nīce kule na jāyāmi, 
suciṇṇassa idaṁ phalaṁ. 
Pacchime bhave sampatte, 
brahmabandhu ahosahaṁ; 
Sāvatthiyaṁ vippakule, 
paccājāto mahaddhane. 
Mātā candavatī nāma, 
pitā me assalāyano; 
Yadā me pitaraṁ buddho, 
vinayī sabbasuddhiyā. 
Tadā pasanno sugate, 
pabbajiṁ anagāriyaṁ; 
Moggallāno ācariyo, 
upajjhā sārisambhavo. 
Kesesu chijjamānesu, 
diṭṭhi chinnā samūlikā; 
Nivāsento ca kāsāvaṁ, 
arahattamapāpuṇiṁ. 
Atthadhammaniruttīsu, 
paṭibhāne ca me mati; 
Pabhinnā tena lokaggo, 
etadagge ṭhapesi maṁ. 
Asandiṭṭhaṁ viyākāsiṁ, 
upatissena pucchito; 
Paṭisambhidāsu tenāhaṁ, 
aggo sambuddhasāsane. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā mahākoṭṭhiko thero imā gāthāyo abhāsitthāti. 
Mahākoṭṭhikattherassāpadānaṁ sattamaṁ. 

Therāpadāna 
Bījanivagga 
Vidhūpanadāyakattheraapadāna 
“Padumuttarabuddhassa, 
lokajeṭṭhassa tādino; 
Bījanikā mayā dinnā, 
dvipadindassa tādino. 
Sakaṁ cittaṁ pasādetvā, 
paggahetvāna añjaliṁ; 
Sambuddhamabhivādetvā, 
pakkamiṁ uttarāmukho. 
Bījaniṁ paggahetvāna, 
satthā lokagganāyako; 
Bhikkhusaṅghe ṭhito santo, 
imā gāthā abhāsatha. 
‘Iminā bījanidānena, 
cittassa paṇidhīhi ca; 
Kappānaṁ satasahassaṁ, 
vinipātaṁ na gacchati’. 
Āraddhavīriyo pahitatto, 
Cetoguṇasamāhito; 
Jātiyā sattavassohaṁ, 
Arahattaṁ apāpuṇiṁ. 
Saṭṭhikappasahassamhi, 
bījamānasanāmakā; 
Soḷasāsiṁsu rājāno, 
cakkavattī mahabbalā. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā vidhūpanadāyako thero imā gāthāyo abhāsitthāti. 
Vidhūpanadāyakattherassāpadānaṁ paṭhamaṁ. 

Therāpadāna 
Kaccāyanavagga 
8 Uruveḷakassapattheraapadāna 
“Padumuttaro nāma jino, 
sabbalokavidū muni; 
Ito satasahassamhi, 
kappe uppajji cakkhumā. 
Ovādako viññāpako, 
tārako sabbapāṇinaṁ; 
Desanākusalo buddho, 
tāresi janataṁ bahuṁ. 
Anukampako kāruṇiko, 
hitesī sabbapāṇinaṁ; 
Sampatte titthiye sabbe, 
pañcasīle patiṭṭhapi. 
Evaṁ nirākulaṁ āsi, 
suññataṁ titthiyehi ca; 
Vicittaṁ arahantehi, 
vasībhūtehi tādibhi. 
Ratanānaṭṭhapaññāsaṁ, 
uggato so mahāmuni; 
Kañcanagghiyasaṅkāso, 
bāttiṁsavaralakkhaṇo. 
Vassasatasahassāni, 
āyu vijjati tāvade; 
Tāvatā tiṭṭhamāno so, 
tāresi janataṁ bahuṁ. 
Tadāhaṁ haṁsavatiyā, 
brāhmaṇo sādhusammato; 
Upecca lokapajjotaṁ, 
assosiṁ dhammadesanaṁ. 
Tadā mahāparisatiṁ, 
mahāparisasāvakaṁ; 
Ṭhapentaṁ etadaggamhi, 
sutvāna mudito ahaṁ. 
Mahatā parivārena, 
nimantetvā mahājinaṁ; 
Brāhmaṇānaṁ sahassena, 
sahadānamadāsahaṁ. 
Mahādānaṁ daditvāna, 
abhivādiya nāyakaṁ; 
Ekamantaṁ ṭhito haṭṭho, 
idaṁ vacanamabraviṁ. 
‘Tayi saddhāya me vīra, 
adhikāraguṇena ca; 
Parisā mahatī hotu, 
nibbattassa tahiṁ tahiṁ’. 
Tadā avoca parisaṁ, 
gajagajjitasussaro; 
Karavīkaruto satthā, 
‘etaṁ passatha brāhmaṇaṁ. 
Hemavaṇṇaṁ mahābāhuṁ, 
kamalānanalocanaṁ; 
Udaggatanujaṁ haṭṭhaṁ, 
saddhavantaṁ guṇe mama. 
Esa patthayate ṭhānaṁ, 
sīhaghosassa bhikkhuno; 
Anāgatamhi addhāne, 
lacchase taṁ manorathaṁ. 
Satasahassito kappe, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
Kassapo nāma gottena, 
hessati satthu sāvako’. 
Ito dvenavute kappe, 
ahu satthā anuttaro; 
Anūpamo asadiso, 
phusso lokagganāyako. 
So ca sabbaṁ tamaṁ hantvā, 
vijaṭetvā mahājaṭaṁ; 
Vassate amataṁ vuṭṭhiṁ, 
tappayanto sadevakaṁ. 
Tadā hi bārāṇasiyaṁ, 
rājā paccā ahumhase; 
Bhātaromha tayo sabbe, 
saṁvisaṭṭhāva rājino. 
Vīraṅgarūpā balino, 
saṅgāme aparājitā; 
Tadā kupitapaccanto, 
amhe āha mahīpati. 
‘Etha gantvāna paccantaṁ, 
sodhetvā aṭṭavībalaṁ; 
Khemaṁ vijiritaṁ katvā, 
puna dethāti bhāsatha’. 
Tato mayaṁ avocumha, 
yadi deyyāsi nāyakaṁ; 
Upaṭṭhānāya amhākaṁ, 
sādhayissāma vo tato. 
Tato mayaṁ laddhavarā, 
bhūmipālena pesitā; 
Nikkhittasatthaṁ paccantaṁ, 
katvā punarupacca taṁ. 
Yācitvā satthupaṭṭhānaṁ, 
rājānaṁ lokanāyakaṁ; 
Munivīraṁ labhitvāna, 
yāvajīvaṁ yajimha taṁ. 
Mahagghāni ca vatthāni, 
paṇītāni rasāni ca; 
Senāsanāni rammāni, 
bhesajjāni hitāni ca. 
Datvā sasaṅghamunino, 
dhammenuppāditāni no; 
Sīlavanto kāruṇikā, 
bhāvanāyuttamānasā. 
Saddhā paricaritvāna, 
mettacittena nāyakaṁ; 
Nibbute tamhi lokagge, 
pūjaṁ katvā yathābalaṁ. 
Tato cutā santusitaṁ, 
gatā tattha mahāsukhaṁ; 
Anubhūtā mayaṁ sabbe, 
buddhapūjāyidaṁ phalaṁ. 
Māyākāro yathā raṅge, 
dassesi vikatiṁ bahuṁ; 
Tathā bhave bhamantohaṁ, 
videhādhipatī ahuṁ. 
Guṇāceḷassa vākyena, 
micchādiṭṭhigatāsayo; 
Narakaṁ maggamārūḷho, 
rucāya mama dhītuyā. 
Ovādaṁ nādiyitvāna, 
brahmunā nāradenahaṁ; 
Bahudhā saṁsito santo, 
diṭṭhiṁ hitvāna pāpikaṁ. 
Pūrayitvā visesena, 
dasa kammapathānihaṁ; 
Hitvāna dehamagamiṁ, 
saggaṁ sabhavanaṁ yathā. 
Pacchime bhave sampatte, 
brahmabandhu ahosahaṁ; 
Bārāṇasiyaṁ phītāyaṁ, 
jāto vippamahākule. 
Maccubyādhijarā bhīto, 
ogāhetvā mahāvanaṁ; 
Nibbānaṁ padamesanto, 
jaṭilesu paribbajiṁ. 
Tadā dve bhātaro mayhaṁ, 
pabbajiṁsu mayā saha; 
Uruvelāyaṁ māpetvā, 
assamaṁ nivasiṁ ahaṁ. 
Kassapo nāma gottena, 
uruveḷanivāsiko; 
Tato me āsi paññatti, 
uruveḷakassapo iti. 
Nadīsakāse bhātā me, 
nadīkassapasavhayo; 
Āsī sakāsanāmena, 
gayāyaṁ gayākassapo. 
Dve satāni kaniṭṭhassa, 
tīṇi majjhassa bhātuno; 
Mama pañca satānūnā, 
sissā sabbe mamānugā. 
Tadā upecca maṁ buddho, 
katvāna vividhāni me; 
Pāṭihīrāni lokaggo, 
vinesi narasārathi. 
Sahassaparivārena, 
ahosiṁ ehibhikkhuko; 
Teheva saha sabbehi, 
arahattamapāpuṇiṁ. 
Te cevaññe ca bahavo, 
sissā maṁ parivārayuṁ; 
Sāsituñca samatthohaṁ, 
tato maṁ isisattamo. 
Mahāparisabhāvasmiṁ, 
etadagge ṭhapesi maṁ; 
Aho buddhe kataṁ kāraṁ, 
saphalaṁ me ajāyatha. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā uruveḷakassapo thero imā gāthāyo abhāsitthāti. 
Uruveḷakassapattherassāpadānaṁ aṭṭhamaṁ. 

Therāpadāna 
Kaccāyanavagga 
Rādhattheraapadāna 
“Padumuttaro nāma jino, 
sabbalokavidū muni; 
Ito satasahassamhi, 
kappe uppajji cakkhumā. 
Ovādako viññāpako, 
tārako sabbapāṇinaṁ; 
Desanākusalo buddho, 
tāresi janataṁ bahuṁ. 
Anukampako kāruṇiko, 
hitesī sabbapāṇinaṁ; 
Sampatte titthiye sabbe, 
pañcasīle patiṭṭhapi. 
Evaṁ nirākulaṁ āsi, 
suññataṁ titthiyehi ca; 
Vicittaṁ arahantehi, 
vasībhūtehi tādibhi. 
Ratanānaṭṭhapaññāsaṁ, 
uggato so mahāmuni; 
Kañcanagghiyasaṅkāso, 
bāttiṁsavaralakkhaṇo. 
Vassasatasahassāni, 
āyu vijjati tāvade; 
Tāvatā tiṭṭhamāno so, 
tāresi janataṁ bahuṁ. 
Tadāhaṁ haṁsavatiyaṁ, 
brāhmaṇo mantapāragū; 
Upecca taṁ naravaraṁ, 
assosiṁ dhammadesanaṁ. 
Paññāpentaṁ mahāvīraṁ, 
parisāsu visāradaṁ; 
Paṭibhāneyyakaṁ bhikkhuṁ, 
etadagge vināyakaṁ. 
Tadāhaṁ kāraṁ katvāna, 
sasaṅghe lokanāyake; 
Nipacca sirasā pāde, 
taṁ ṭhānaṁ abhipatthayiṁ. 
Tato maṁ bhagavā āha, 
siṅgīnikkhasamappabho; 
Sarena rajanīyena, 
kilesamalahārinā. 
‘Sukhī bhavassu dīghāyu, 
sijjhatu paṇidhī tava; 
Sasaṅghe me kataṁ kāraṁ, 
atīva vipulaṁ tayā. 
Satasahassito kappe, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
Rādhoti nāmadheyyena, 
hessati satthu sāvako. 
Sa te hetuguṇe tuṭṭho, 
sakyaputto narāsabho; 
Paṭibhāneyyakānaggaṁ, 
paññapessati nāyako’. 
Taṁ sutvā mudito hutvā, 
yāvajīvaṁ tadā jinaṁ; 
Mettacitto paricariṁ, 
sato paññāsamāhito. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Satānaṁ tīṇikkhattuñca, 
devarajjamakārayiṁ; 
Satānaṁ pañcakkhattuñca, 
cakkavattī ahosahaṁ. 
Padesarajjaṁ vipulaṁ, 
gaṇanāto asaṅkhiyaṁ; 
Sabbattha sukhito āsiṁ, 
tassa kammassa vāhasā. 
Pacchime bhave sampatte, 
giribbajapuruttame; 
Jāto vippakule niddhe, 
vikalacchādanāsane. 
Kaṭacchubhikkhaṁ pādāsiṁ, 
sāriputtassa tādino; 
Yadā jiṇṇo ca vuddho ca, 
tadārāmamupāgamiṁ. 
Pabbajati na maṁ koci, 
jiṇṇadubbalathāmakaṁ; 
Tena dīno vivaṇṇaṅgo, 
soko cāsiṁ tadā ahaṁ. 
Disvā mahākāruṇiko, 
mamamāha mahāmuni; 
‘Kimatthaṁ puttasokaṭṭo, 
brūhi te cittajaṁ rujaṁ’. 
‘Pabbajjaṁ na labhe vīra, 
svākkhāte tava sāsane; 
Tena sokena dīnosmi, 
saraṇaṁ hohi nāyaka’. 
Tadā bhikkhū samānetvā, 
apucchi munisattamo; 
‘Imassa adhikāraṁ ye, 
saranti byāharantu te’. 
Sāriputto tadāvoca, 
‘kāramassa sarāmahaṁ; 
Kaṭacchubhikkhaṁ dāpesi, 
piṇḍāya carato mama’. 
‘Sādhu sādhu kataññūsi, 
sāriputta imaṁ tuvaṁ; 
Pabbājehi dijaṁ vuḍḍhaṁ, 
hessatājāniyo ayaṁ’. 
Tato alatthaṁ pabbajjaṁ, 
kammavācopasampadaṁ; 
Na cireneva kālena, 
pāpuṇiṁ āsavakkhayaṁ. 
Sakkaccaṁ munino vākyaṁ, 
suṇāmi mudito yato; 
Paṭibhāneyyakānaggaṁ, 
tato maṁ ṭhapayī jino. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā rādho thero imā gāthāyo abhāsitthāti. 
Rādhattherassāpadānaṁ navamaṁ. 

Therāpadāna 
Kaccāyanavagga 
Mogharājattheraapadāna 
“Padumuttaro nāma jino, 
sabbalokavidū muni; 
Ito satasahassamhi, 
kappe uppajji cakkhumā. 
Ovādako viññāpako, 
tārako sabbapāṇinaṁ; 
Desanākusalo buddho, 
tāresi janataṁ bahuṁ. 
Anukampako kāruṇiko, 
hitesī sabbapāṇinaṁ; 
Sampatte titthiye sabbe, 
pañcasīle patiṭṭhapi. 
Evaṁ nirākulaṁ āsi, 
suññataṁ titthiyehi ca; 
Vicittaṁ arahantehi, 
vasībhūtehi tādibhi. 
Ratanānaṭṭhapaññāsaṁ, 
uggato so mahāmuni; 
Kañcanagghiyasaṅkāso, 
bāttiṁsavaralakkhaṇo. 
Vassasatasahassāni, 
āyu vijjati tāvade; 
Tāvatā tiṭṭhamāno so, 
tāresi janataṁ bahuṁ. 
Tadāhaṁ haṁsavatiyaṁ, 
kule aññatare ahuṁ; 
Parakammāyane yutto, 
natthi me kiñci sandhanaṁ. 
Paṭikkamanasālāyaṁ, 
vasanto katabhūmiyaṁ; 
Aggiṁ ujjālayiṁ tattha, 
daḷhaṁ kaṇhāsi sā mahī. 
Tadā parisatiṁ nātho, 
catusaccapakāsako; 
Sāvakaṁ sampakittesi, 
lūkhacīvaradhārakaṁ. 
Tassa tamhi guṇe tuṭṭho, 
paṇipacca tathāgataṁ; 
Lūkhacīvaradhāraggaṁ, 
patthayiṁ ṭhānamuttamaṁ. 
Tadā avoca bhagavā, 
sāvake padumuttaro; 
‘Passathetaṁ purisakaṁ, 
kucelaṁ tanudehakaṁ. 
Pītippasannavadanaṁ, 
saddhādhanasamanvitaṁ; 
Udaggatanujaṁ haṭṭhaṁ, 
acalaṁ sālapiṇḍitaṁ. 
Eso pattheti taṁ ṭhānaṁ, 
saccasenassa bhikkhuno; 
Lūkhacīvaradhārissa, 
tassa vaṇṇasitāsayo’. 
Taṁ sutvā mudito hutvā, 
nipacca sirasā jinaṁ; 
Yāvajīvaṁ subhaṁ kammaṁ, 
karitvā jinasāsane. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsūpago ahaṁ. 
Paṭikkamanasālāyaṁ, 
bhūmidāhakakammunā; 
Samasahassaṁ niraye, 
adayhiṁ vedanāṭṭito. 
Tena kammāvasesena, 
pañca jātisatānihaṁ; 
Manusso kulajo hutvā, 
jātiyā lakkhaṇaṅkito. 
Pañca jātisatāneva, 
kuṭṭharogasamappito; 
Mahādukkhaṁ anubhaviṁ, 
tassa kammassa vāhasā. 
Imasmiṁ bhaddake kappe, 
upariṭṭhaṁ yasassinaṁ; 
Piṇḍapātena tappesiṁ, 
pasannamānaso ahaṁ. 
Tena kammavisesena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Pacchime bhave sampatte, 
ajāyiṁ khattiye kule; 
Pituno accayenāhaṁ, 
mahārajjasamappito. 
Kuṭṭharogādhibhūtohaṁ, 
na ratiṁ na sukhaṁ labhe; 
Moghaṁ rajjaṁ sukhaṁ yasmā, 
mogharājā tato ahaṁ. 
Kāyassa dosaṁ disvāna, 
pabbajiṁ anagāriyaṁ; 
Bāvarissa dijaggassa, 
sissattaṁ ajjhupāgamiṁ. 
Mahatā parivārena, 
upecca naranāyakaṁ; 
Apucchiṁ nipuṇaṁ pañhaṁ, 
taṁ vīraṁ vādisūdanaṁ. 
‘Ayaṁ loko paro loko, 
brahmaloko sadevako; 
Diṭṭhiṁ no nābhijānāmi, 
gotamassa yasassino. 
Evābhikkantadassāviṁ, 
atthi pañhena āgamaṁ; 
Kathaṁ lokaṁ avekkhantaṁ, 
maccurājā na passati’. 
‘Suññato lokaṁ avekkhassu, 
mogharāja sadā sato; 
Attānudiṭṭhiṁ uhacca, 
evaṁ maccutaro siyā. 
Evaṁ lokaṁ avekkhantaṁ, 
maccurājā na passati’; 
Iti maṁ abhaṇi buddho, 
sabbarogatikicchako. 
Saha gāthāvasānena, 
kesamassuvivajjito; 
Kāsāvavatthavasano, 
āsiṁ bhikkhu tathārahā. 
Saṅghikesu vihāresu, 
na vasiṁ rogapīḷito; 
Mā vihāro padussīti, 
vātarogehi pīḷito. 
Saṅkārakūṭā āhitvā, 
susānā rathikāhi ca; 
Tato saṅghāṭiṁ karitvā, 
dhārayiṁ lūkhacīvaraṁ. 
Mahābhisakko tasmiṁ me, 
guṇe tuṭṭho vināyako; 
Lūkhacīvaradhārīnaṁ, 
etadagge ṭhapesi maṁ. 
Puññapāpaparikkhīṇo, 
sabbarogavivajjito; 
Sikhīva anupādāno, 
nibbāyissamanāsavo. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā mogharājā thero imā gāthāyo abhāsitthāti. 
Mogharājattherassāpadānaṁ dasamaṁ. 
Kaccāyanavaggo catupaññāsamo. 
Tassuddānaṁ 
Kaccāno vakkalī thero, 
mahākappinasavhayo; 
Dabbo kumāranāmo ca, 
bāhiyo koṭṭhiko vasī. 
Uruveḷakassapo rādho, 
mogharājā ca paṇḍito; 
Tīṇi gāthāsatānettha, 
bāsaṭṭhi ceva piṇḍitā. 

Therāpadāna 
Bhaddiyavagga 
1 Lakuṇḍabhaddiyattheraapadāna 
“Padumuttaro nāma jino, 
sabbadhammesu cakkhumā; 
Ito satasahassamhi, 
kappe uppajji nāyako. 
Tadāhaṁ haṁsavatiyaṁ, 
seṭṭhiputto mahaddhano; 
Jaṅghāvihāraṁ vicaraṁ, 
saṅghārāmaṁ agacchahaṁ. 
Tadā so lokapajjoto, 
dhammaṁ desesi nāyako; 
Mañjussarānaṁ pavaraṁ, 
sāvakaṁ abhikittayi. 
Taṁ sutvā mudito hutvā, 
kāraṁ katvā mahesino; 
Vanditvā satthuno pāde, 
taṁ ṭhānamabhipatthayiṁ. 
Tadā buddho viyākāsi, 
saṅghamajjhe vināyako; 
‘Anāgatamhi addhāne, 
lacchase taṁ manorathaṁ. 
Satasahassito kappe, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
Bhaddiyo nāma nāmena, 
hessati satthu sāvako’. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Dvenavute ito kappe, 
phusso uppajji nāyako; 
Durāsado duppasaho, 
sabbalokuttamo jino. 
Caraṇena ca sampanno, 
brahā uju patāpavā; 
Hitesī sabbasattānaṁ, 
bahuṁ mocesi bandhanā. 
Nandārāmavane tassa, 
ahosiṁ phussakokilo; 
Gandhakuṭisamāsanne, 
ambarukkhe vasāmahaṁ. 
Tadā piṇḍāya gacchantaṁ, 
dakkhiṇeyyaṁ jinuttamaṁ; 
Disvā cittaṁ pasādetvā, 
mañjunābhinikūjahaṁ. 
Rājuyyānaṁ tadā gantvā, 
supakkaṁ kanakattacaṁ; 
Ambapiṇḍaṁ gahetvāna, 
sambuddhassopanāmayiṁ. 
Tadā me cittamaññāya, 
mahākāruṇiko jino; 
Upaṭṭhākassa hatthato, 
pattaṁ paggaṇhi nāyako. 
Adāsiṁ haṭṭhacittohaṁ, 
ambapiṇḍaṁ mahāmune; 
Patte pakkhippa pakkhehi, 
pañjaliṁ katvāna mañjunā. 
Sarena rajanīyena, 
savanīyena vaggunā; 
Vassanto buddhapūjatthaṁ, 
nīḷaṁ gantvā nipajjahaṁ. 
Tadā muditacittaṁ maṁ, 
buddhapemagatāsayaṁ; 
Sakuṇagghi upāgantvā, 
ghātayī duṭṭhamānaso. 
Tato cutohaṁ tusite, 
anubhotvā mahāsukhaṁ; 
Manussayonimāgacchiṁ, 
tassa kammassa vāhasā. 
Imamhi bhaddake kappe, 
brahmabandhu mahāyaso; 
Kassapo nāma gottena, 
uppajji vadataṁ varo. 
Sāsanaṁ jotayitvā so, 
abhibhuyya kutitthiye; 
Vinayitvāna veneyye, 
nibbuto so sasāvako. 
Nibbute tamhi lokagge, 
pasannā janatā bahū; 
Pūjanatthāya buddhassa, 
thūpaṁ kubbanti satthuno. 
‘Sattayojanikaṁ thūpaṁ, 
sattaratanabhūsitaṁ; 
Karissāma mahesissa’, 
iccevaṁ mantayanti te. 
Kikino kāsirājassa, 
tadā senāya nāyako; 
Hutvāhaṁ appamāṇassa, 
pamāṇaṁ cetiye vadiṁ. 
Tadā te mama vākyena, 
cetiyaṁ yojanuggataṁ; 
Akaṁsu naravīrassa, 
nānāratanabhūsitaṁ. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Pacchime ca bhave dāni, 
jāto seṭṭhikule ahaṁ; 
Sāvatthiyaṁ puravare, 
iddhe phīte mahaddhane. 
Purappavese sugataṁ, 
disvā vimhitamānaso; 
Pabbajitvāna na ciraṁ, 
arahattamapāpuṇiṁ. 
Cetiyassa pamāṇaṁ yaṁ, 
akariṁ tena kammunā; 
Lakuṇḍakasarīrohaṁ, 
jāto paribhavāraho. 
Sarena madhurenāhaṁ, 
pūjitvā isisattamaṁ; 
Mañjussarānaṁ bhikkhūnaṁ, 
aggattamanupāpuṇiṁ. 
Phaladānena buddhassa, 
guṇānussaraṇena ca; 
Sāmaññaphalasampanno, 
viharāmi anāsavo. 
Kilesā jhāpitā mayhaṁ, 
bhavā sabbe samūhatā; 
Nāgova bandhanaṁ chetvā, 
viharāmi anāsavo. 
Svāgataṁ vata me āsi, 
buddhaseṭṭhassa santike; 
Tisso vijjā anuppattā, 
kataṁ buddhassa sāsanaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā lakuṇḍabhaddiyo thero imā gāthāyo abhāsitthāti. 
Lakuṇḍabhaddiyattherassāpadānaṁ paṭhamaṁ. 

Therāpadāna 
Bhaddiyavagga 
Kaṅkhārevatattheraapadāna 
“Padumuttaro nāma jino, 
sabbadhammesu cakkhumā; 
Ito satasahassamhi, 
kappe uppajji nāyako. 
Sīhahanu brahmagiro, 
haṁsadundubhinissano; 
Nāgavikkantagamano, 
candasūrādikappabho. 
Mahāmatī mahāvīro, 
mahājhāyī mahābalo; 
Mahākāruṇiko nātho, 
mahātamapanūdano. 
Sa kadāci tilokaggo, 
veneyyaṁ vinayaṁ bahuṁ; 
Dhammaṁ desesi sambuddho, 
sattāsayavidū muni. 
Jhāyiṁ jhānarataṁ vīraṁ, 
upasantaṁ anāvilaṁ; 
Vaṇṇayanto parisatiṁ, 
tosesi janataṁ jino. 
Tadāhaṁ haṁsavatiyaṁ, 
brāhmaṇo vedapāragū; 
Dhammaṁ sutvāna mudito, 
taṁ ṭhānamabhipatthayiṁ. 
Tadā jino viyākāsi, 
saṅghamajjhe vināyako; 
‘Mudito hohi tvaṁ brahme, 
lacchase taṁ manorathaṁ. 
Satasahassito kappe, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
Revato nāma nāmena, 
hessati satthu sāvako’. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Pacchime ca bhave dāni, 
jātohaṁ koliye pure; 
Khattiye kulasampanne, 
iddhe phīte mahaddhane. 
Yadā kapilavatthusmiṁ, 
buddho dhammamadesayi; 
Tadā pasanno sugate, 
pabbajiṁ anagāriyaṁ. 
Kaṅkhā me bahulā āsi, 
kappākappe tahiṁ tahiṁ; 
Sabbaṁ taṁ vinayī buddho, 
desetvā dhammamuttamaṁ. 
Tatohaṁ tiṇṇasaṁsāro, 
sadā jhānasukhe rato; 
Viharāmi tadā buddho, 
maṁ disvā etadabravi. 
‘Yā kāci kaṅkhā idha vā huraṁ vā, 
Sakavediyā vā paravediyā vā; 
Ye jhāyino tā pajahanti sabbā, 
Ātāpino brahmacariyaṁ carantā’. 
Satasahasse kataṁ kammaṁ, 
phalaṁ dassesi me idha; 
Sumutto saravegova, 
kilese jhāpayiṁ mama. 
Tato jhānarataṁ disvā, 
buddho lokantagū muni; 
Jhāyīnaṁ bhikkhūnaṁ aggo, 
paññāpeti mahāmati. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kaṅkhārevato thero imā gāthāyo abhāsitthāti. 
Kaṅkhārevatattherassāpadānaṁ dutiyaṁ. 

Therāpadāna 
Bhaddiyavagga 
Sīvalittheraapadāna 
“Padumuttaro nāma jino, 
sabbadhammesu cakkhumā; 
Ito satasahassamhi, 
kappe uppajji nāyako. 
Sīlaṁ tassa asaṅkheyyaṁ, 
samādhi vajirūpamo; 
Asaṅkheyyaṁ ñāṇavaraṁ, 
vimutti ca anopamā. 
Manujāmaranāgānaṁ, 
brahmānañca samāgame; 
Samaṇabrāhmaṇākiṇṇe, 
dhammaṁ desesi nāyako. 
Sasāvakaṁ mahālābhiṁ, 
puññavantaṁ jutindharaṁ; 
Ṭhapesi etadaggamhi, 
parisāsu visārado. 
Tadāhaṁ khattiyo āsiṁ, 
nagare haṁsasavhaye; 
Sutvā jinassa taṁ vākyaṁ, 
sāvakassa guṇaṁ bahuṁ. 
Nimantayitvā sattāhaṁ, 
bhojayitvā sasāvakaṁ; 
Mahādānaṁ daditvāna, 
taṁ ṭhānamabhipatthayiṁ. 
Tadā maṁ vinataṁ pāde, 
disvāna purisāsabho; 
Sarena mahatā vīro, 
idaṁ vacanamabravi. 
‘Tato jinassa vacanaṁ, 
sotukāmā mahājanā; 
Devadānavagandhabbā, 
brahmāno ca mahiddhikā’. 
Samaṇabrāhmaṇā ceva, 
namassiṁsu katañjalī; 
‘Namo te purisājañña, 
namo te purisuttama. 
Khattiyena mahādānaṁ, 
dinnaṁ sattāhikampi vo; 
Sotukāmā phalaṁ tassa, 
byākarohi mahāmune’. 
Tato avoca bhagavā, 
‘suṇātha mama bhāsitaṁ; 
Appameyyamhi buddhamhi, 
sasaṅghamhi patiṭṭhitā. 
Dakkhiṇā tāya ko vattā, 
appameyyaphalā hi sā; 
Api ce sa mahābhogo, 
ṭhānaṁ pattheti uttamaṁ. 
Lābhī vipulalābhānaṁ, 
yathā bhikkhu sudassano; 
Tathāhampi bhaveyyanti, 
lacchase taṁ anāgate. 
Satasahassito kappe, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
Sīvali nāma nāmena, 
hessati satthu sāvako’. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsūpago ahaṁ. 
Ekanavutito kappe, 
vipassī lokanāyako; 
Uppajji cārudassano, 
sabbadhammavipassako. 
Tadāhaṁ bandhumatiyaṁ, 
kulassaññatarassa ca; 
Dayito passito ceva, 
āsiṁ kammantavāvaṭo. 
Tadā aññataro pūgo, 
vipassissa mahesino; 
Parivesaṁ akārayi, 
mahantamativissutaṁ. 
Niṭṭhite ca mahādāne, 
daduṁ khajjakasañhitaṁ; 
Navaṁ dadhiṁ madhuñceva, 
vicinaṁ neva addasuṁ. 
Tadāhaṁ taṁ gahetvāna, 
navaṁ dadhiṁ madhumpi ca; 
Kammassāmigharaṁ gacchiṁ, 
tamesantā mamaddasuṁ. 
Sahassamapi datvāna, 
nālabhiṁsu ca taṁ dvayaṁ; 
Tatohaṁ evaṁ cintesiṁ, 
‘netaṁ hessati orakaṁ. 
Yathā ime janā sabbe, 
sakkaronti tathāgataṁ; 
Ahampi kāraṁ kassāmi, 
sasaṅghe lokanāyake’. 
Tadāhamevaṁ cintetvā, 
dadhiṁ madhuñca ekato; 
Madditvā lokanāthassa, 
sasaṅghassa adāsahaṁ. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Punāhaṁ bārāṇasiyaṁ, 
rājā hutvā mahāyaso; 
Sattukassa tadā duṭṭho, 
dvārarodhamakārayiṁ. 
Tadā tapassino ruddhā, 
ekāhaṁ rakkhitā ahuṁ; 
Tato tassa vipākena, 
pāpatiṁ nirayaṁ bhusaṁ. 
Pacchime ca bhave dāni, 
jātohaṁ koliye pure; 
Suppavāsā ca me mātā, 
mahāli licchavī pitā. 
Khattiye puññakammena, 
dvārarodhassa vāhasā; 
Satta vassāni nivasiṁ, 
mātukucchimhi dukkhito. 
Sattāhaṁ dvāramūḷhohaṁ, 
mahādukkhasamappito; 
Mātā me chandadānena, 
evaṁ āsi sudukkhitā. 
Suvatthitohaṁ nikkhanto, 
buddhena anukampito; 
Nikkhantadivaseyeva, 
pabbajiṁ anagāriyaṁ. 
Upajjhā sāriputto me, 
moggallāno mahiddhiko; 
Kese oropayanto me, 
anusāsi mahāmati. 
Kesesu chijjamānesu, 
arahattamapāpuṇiṁ; 
Devā nāgā manussā ca, 
paccaye upanenti me. 
Padumuttaranāthañca, 
vipassiñca vināyakaṁ; 
Yaṁ pūjayiṁ pamudito, 
paccayehi visesato. 
Tato tesaṁ visesena, 
kammānaṁ vipuluttamaṁ; 
Lābhaṁ labhāmi sabbattha, 
vane gāme jale thale. 
Revataṁ dassanatthāya, 
yadā yāti vināyako; 
Tiṁsabhikkhusahassehi, 
saha lokagganāyako. 
Tadā devopaṇītehi, 
mamatthāya mahāmati; 
Paccayehi mahāvīro, 
sasaṅgho lokanāyako. 
Upaṭṭhito mayā buddho, 
gantvā revatamaddasa; 
Tato jetavanaṁ gantvā, 
etadagge ṭhapesi maṁ. 
‘Lābhīnaṁ sīvali aggo, 
mama sissesu bhikkhavo’; 
Sabbalokahito satthā, 
kittayī parisāsu maṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sīvalithero imā gāthāyo abhāsitthāti. 
Sīvalittherassāpadānaṁ tatiyaṁ. 

Therāpadāna 
Bhaddiyavagga 
Vaṅgīsattheraapadāna 
“Padumuttaro nāma jino, 
sabbadhammesu cakkhumā; 
Ito satasahassamhi, 
kappe uppajji nāyako. 
Yathāpi sāgare ūmi, 
gagane viya tārakā; 
Evaṁ pāvacanaṁ tassa, 
arahantehi cittitaṁ. 
Sadevāsuranāgehi, 
manujehi purakkhato; 
Samaṇabrāhmaṇākiṇṇe, 
janamajjhe jinuttamo. 
Pabhāhi anurañjanto, 
loke lokantagū jino; 
Vacanena vibodhento, 
veneyyapadumāni so. 
Vesārajjehi sampanno, 
catūhi purisuttamo; 
Pahīnabhayasārajjo, 
khemappatto visārado. 
Āsabhaṁ pavaraṁ ṭhānaṁ, 
buddhabhūmiñca kevalaṁ; 
Paṭijānāti lokaggo, 
natthi sañcodako kvaci. 
Sīhanādamasambhītaṁ, 
nadato tassa tādino; 
Devo naro vā brahmā vā, 
paṭivattā na vijjati. 
Desento pavaraṁ dhammaṁ, 
santārento sadevakaṁ; 
Dhammacakkaṁ pavatteti, 
parisāsu visārado. 
Paṭibhānavataṁ aggaṁ, 
sāvakaṁ sādhusammataṁ; 
Guṇaṁ bahuṁ pakittetvā, 
etadagge ṭhapesi taṁ. 
Tadāhaṁ haṁsavatiyaṁ, 
brāhmaṇo sādhusammato; 
Sabbavedavidū jāto, 
vāgīso vādisūdano. 
Upecca taṁ mahāvīraṁ, 
sutvāhaṁ dhammadesanaṁ; 
Pītivaraṁ paṭilabhiṁ, 
sāvakassa guṇe rato. 
Nimantetvāva sugataṁ, 
sasaṅghaṁ lokanandanaṁ; 
Sattāhaṁ bhojayitvāhaṁ, 
dussehacchādayiṁ tadā. 
Nipacca sirasā pāde, 
katokāso katañjalī; 
Ekamantaṁ ṭhito haṭṭho, 
santhaviṁ jinamuttamaṁ. 
‘Namo te vādimaddana, 
namo te isisattama; 
Namo te sabbalokagga, 
namo te abhayaṁ kara. 
Namo te māramathana, 
namo te diṭṭhisūdana; 
Namo te santisukhada, 
namo te saraṇaṁ kara. 
Anāthānaṁ bhavaṁ nātho, 
bhītānaṁ abhayappado; 
Vissāmabhūmi santānaṁ, 
saraṇaṁ saraṇesinaṁ’. 
Evamādīhi sambuddhaṁ, 
santhavitvā mahāguṇaṁ; 
Avocaṁ vādisūdassa, 
gatiṁ pappomi bhikkhuno. 
Tadā avoca bhagavā, 
anantapaṭibhānavā; 
‘Yo so buddhaṁ abhojesi, 
sattāhaṁ sahasāvakaṁ. 
Guṇañca me pakittesi, 
pasanno sehi pāṇibhi; 
Eso patthayate ṭhānaṁ, 
vādisūdassa bhikkhuno. 
Anāgatamhi addhāne, 
lacchase taṁ manorathaṁ; 
Devamānusasampattiṁ, 
anubhotvā anappakaṁ. 
Satasahassito kappe, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
Vaṅgīso nāma nāmena, 
hessati satthu sāvako’. 
Taṁ sutvā mudito hutvā, 
yāvajīvaṁ tadā jinaṁ; 
Paccayehi upaṭṭhāsiṁ, 
mettacitto tathāgataṁ. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tusitaṁ agamāsahaṁ. 
Pacchime ca bhave dāni, 
jāto vippakule ahaṁ; 
Paccājāto yadā āsiṁ, 
jātiyā sattavassiko. 
Sabbavedavidū jāto, 
vādasatthavisārado; 
Vādissaro cittakathī, 
paravādappamaddano. 
Vaṅge jātoti vaṅgīso, 
vacane issaroti vā; 
Vaṅgīso iti me nāmaṁ, 
abhavī lokasammataṁ. 
Yadāhaṁ viññutaṁ patto, 
ṭhito paṭhamayobbane; 
Tadā rājagahe ramme, 
sāriputtamahaddasaṁ. 
Pañcavīsatimaṁ bhāṇavāraṁ. 
Piṇḍāya vicarantaṁ taṁ, 
pattapāṇiṁ susaṁvutaṁ; 
Alolakkhiṁ mitabhāṇiṁ, 
yugamattaṁ nidakkhitaṁ. 
Taṁ disvā vimhito hutvā, 
avocaṁ mamanucchavaṁ; 
Kaṇikāraṁva nicitaṁ, 
cittaṁ gāthāpadaṁ ahaṁ. 
Ācikkhi so me satthāraṁ, 
sambuddhaṁ lokanāyakaṁ; 
Tadā so paṇḍito vīro, 
uttariṁ samavoca me. 
Virāgasaṁhitaṁ vākyaṁ, 
katvā duddasamuttamaṁ; 
Vicittapaṭibhānehi, 
tosito tena tādinā. 
Nipacca sirasā pāde, 
‘pabbājehī’ti maṁ bravi; 
Tato maṁ sa mahāpañño, 
buddhaseṭṭhamupānayi. 
Nipacca sirasā pāde, 
nisīdiṁ satthu santike; 
Mamāha vadataṁ seṭṭho, 
‘kacci vaṅgīsa jānāsi’. 
Kiñci sippanti tassāhaṁ, 
‘jānāmī’ti ca abraviṁ; 
‘Matasīsaṁ vanacchuddhaṁ, 
api bārasavassikaṁ; 
Tava vijjāvisesena, 
sace sakkosi vācaya’. 
‘Āmoti me paṭiññāte, 
tīṇi sīsāni dassayi; 
Nirayanaradevesu, 
upapanne avācayiṁ’. 
Tadā khīṇāsavasseva, 
sīsaṁ dassesi nāyako; 
Tatohaṁ vihatārambho, 
pabbajjaṁ samayācisaṁ. 
Pabbajitvāna sugataṁ, 
santhavāmi tahiṁ tahiṁ; 
Tato maṁ kabbavittosi, 
ujjhāyantiha bhikkhavo. 
Tato vīmaṁsanatthaṁ me, 
āha buddho vināyako; 
‘Takkikā panimā gāthā, 
ṭhānaso paṭibhanti taṁ’. 
‘Na kabbavittohaṁ vīra, 
ṭhānaso paṭibhanti maṁ’; 
‘Tena hi dāni vaṅgīsa, 
ṭhānaso santhavāhi maṁ’. 
Tadāhaṁ santhaviṁ vīraṁ, 
gāthāhi isisattamaṁ; 
Ṭhānaso me tadā tuṭṭho, 
jino agge ṭhapesi maṁ. 
Paṭibhānena cittena, 
aññesamatimaññahaṁ; 
Pesale tena saṁviggo, 
arahattamapāpuṇiṁ. 
‘Paṭibhānavataṁ aggo, 
añño koci na vijjati; 
Yathāyaṁ bhikkhu vaṅgīso, 
evaṁ dhāretha bhikkhavo’. 
Satasahasse kataṁ kammaṁ, 
phalaṁ dassesi me idha; 
Sumutto saravegova, 
kilese jhāpayiṁ mama. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā vaṅgīso thero imā gāthāyo abhāsitthāti. 
Vaṅgīsattherassāpadānaṁ catutthaṁ. 

Therāpadāna 
Bhaddiyavagga 
Nandakattheraapadāna 
“Padumuttaro nāma jino, 
sabbadhammesu cakkhumā; 
Ito satasahassamhi, 
kappe uppajji nāyako. 
Hitāya sabbasattānaṁ, 
sukhāya vadataṁ varo; 
Atthāya purisājañño, 
paṭipanno sadevake. 
Yasaggapatto sirimā, 
kittivaṇṇabhato jino; 
Pūjito sabbalokassa, 
disā sabbāsu vissuto. 
Uttiṇṇavicikiccho so, 
vītivattakathaṅkatho; 
Paripuṇṇamanasaṅkappo, 
patto sambodhimuttamaṁ. 
Anuppannassa maggassa, 
uppādetā naruttamo; 
Anakkhātañca akkhāsi, 
asañjātañca sañjanī. 
Maggaññū maggavidū ca, 
maggakkhāyī narāsabho; 
Maggassa kusalo satthā, 
sārathīnaṁ varuttamo. 
Tadā mahākāruṇiko, 
dhammaṁ desesi nāyako; 
Nimugge kāmapaṅkamhi, 
samuddharati pāṇine. 
Bhikkhunīnaṁ ovadane, 
sāvakaṁ seṭṭhasammataṁ; 
Vaṇṇayaṁ etadaggamhi, 
paññapesi mahāmuni. 
Taṁ sutvāhaṁ pamudito, 
nimantetvā tathāgataṁ; 
Bhojayitvā sasaṅghaṁ taṁ, 
patthayiṁ ṭhānamuttamaṁ. 
Tadā pamudito nātho, 
maṁ avoca mahāisi; 
‘Sukhī bhavassu dīghāvu, 
lacchase taṁ manorathaṁ. 
Satasahassito kappe, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
Nandako nāma nāmena, 
hessati satthu sāvako’. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsūpago ahaṁ. 
Pacchime ca bhave dāni, 
jāto seṭṭhikule ahaṁ; 
Sāvatthiyaṁ pure vare, 
iddhe phīte mahaddhane. 
Purappavese sugataṁ, 
disvā vimhitamānaso; 
Jetārāmapaṭiggāhe, 
pabbajiṁ anagāriyaṁ. 
Nacireneva kālena, 
arahattamapāpuṇiṁ; 
Tatohaṁ tiṇṇasaṁsāro, 
sāsito sabbadassinā. 
Bhikkhunīnaṁ dhammakathaṁ, 
paṭipucchākariṁ ahaṁ; 
Sāsitā tā mayā sabbā, 
abhaviṁsu anāsavā. 
Satāni pañcanūnāni, 
tadā tuṭṭho mahāhito; 
Bhikkhunīnaṁ ovadataṁ, 
aggaṭṭhāne ṭhapesi maṁ. 
Satasahasse kataṁ kammaṁ, 
phalaṁ dassesi me idha; 
Sumutto saravegova, 
kilese jhāpayiṁ mama. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā nandako thero imā gāthāyo abhāsitthāti. 
Nandakattherassāpadānaṁ pañcamaṁ. 

Therāpadāna 
Bhaddiyavagga 
Kāḷudāyittheraapadāna 
“Padumuttaro nāma jino, 
sabbadhammesu cakkhumā; 
Ito satasahassamhi, 
kappe uppajji nāyako. 
Nāyakānaṁ varo satthā, 
guṇāguṇavidū jino; 
Kataññū katavedī ca, 
titthe yojeti pāṇine. 
Sabbaññutena ñāṇena, 
tulayitvā dayāsayo; 
Deseti pavaraṁ dhammaṁ, 
anantaguṇasañcayo. 
Sa kadāci mahāvīro, 
anantajinasaṁsari; 
Deseti madhuraṁ dhammaṁ, 
catusaccūpasañhitaṁ. 
Sutvāna taṁ dhammavaraṁ, 
ādimajjhantasobhanaṁ; 
Pāṇasatasahassānaṁ, 
dhammābhisamayo ahu. 
Ninnāditā tadā bhūmi, 
gajjiṁsu ca payodharā; 
Sādhukāraṁ pavattiṁsu, 
devabrahmanarāsurā. 
‘Aho kāruṇiko satthā, 
aho saddhammadesanā; 
Aho bhavasamuddamhi, 
nimugge uddharī jino’. 
Evaṁ pavedajātesu, 
sanarāmarabrahmasu; 
Kulappasādakānaggaṁ, 
sāvakaṁ vaṇṇayī jino. 
Tadāhaṁ haṁsavatiyaṁ, 
jātomaccakule ahuṁ; 
Pāsādiko dassaniyo, 
pahūtadhanadhaññavā. 
Haṁsārāmamupeccāhaṁ, 
vanditvā taṁ tathāgataṁ; 
Suṇitvā madhuraṁ dhammaṁ, 
kāraṁ katvā ca tādino. 
Nipacca pādamūlehaṁ, 
imaṁ vacanamabraviṁ; 
‘Kulappasādakānaggo, 
yo tayā santhuto mune. 
Tādiso homahaṁ vīra, 
buddhaseṭṭhassa sāsane’; 
Tadā mahākāruṇiko, 
siñcanto vāmatena maṁ. 
Āha maṁ ‘putta uttiṭṭha, 
lacchase taṁ manorathaṁ; 
Kathaṁ nāma jine kāraṁ, 
katvāna viphalo siyā. 
Satasahassito kappe, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
Udāyi nāma nāmena, 
hessati satthu sāvako’. 
Taṁ sutvā mudito hutvā, 
yāvajīvaṁ tadā jinaṁ; 
Mettacitto paricariṁ, 
paccayehi vināyakaṁ. 
Tena kammavipākena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Pacchime ca bhave dāni, 
ramme kapilavatthave; 
Jāto mahāmaccakule, 
suddhodanamahīpate. 
Tadā ajāyi siddhattho, 
ramme lumbinikānane; 
Hitāya sabbalokassa, 
sukhāya ca narāsabho. 
Tadaheva ahaṁ jāto, 
saha teneva vaḍḍhito; 
Piyo sahāyo dayito, 
viyatto nītikovido. 
Ekūnatiṁso vayasā, 
nikkhamitvā agārato; 
Chabbassaṁ vītināmetvā, 
āsi buddho vināyako. 
Jetvā sasenakaṁ māraṁ, 
khepayitvāna āsave; 
Bhavaṇṇavaṁ taritvāna, 
buddho āsi sadevake. 
Isivhayaṁ gamitvāna, 
vinetvā pañcavaggiye; 
Tato vinesi bhagavā, 
gantvā gantvā tahiṁ tahiṁ. 
Veneyye vinayanto so, 
saṅgaṇhanto sadevakaṁ; 
Upecca magadhe giriṁ, 
viharittha tadā jino. 
Tadā suddhodanenāhaṁ, 
bhūmipālena pesito; 
Gantvā disvā dasabalaṁ, 
pabbajitvārahā ahuṁ. 
Tadā mahesiṁ yācitvā, 
pāpayiṁ kapilavhayaṁ; 
Tato purāhaṁ gantvāna, 
pasādesiṁ mahākulaṁ. 
Jino tasmiṁ guṇe tuṭṭho, 
maṁ mahāparisāya so; 
Kulappasādakānaggaṁ, 
paññāpesi vināyako. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kāḷudāyī thero imā gāthāyo abhāsitthāti. 
Kāḷudāyittherassāpadānaṁ chaṭṭhaṁ. 

Therāpadāna 
Bhaddiyavagga 
Abhayattheraapadāna 
“Padumuttaro nāma jino, 
sabbadhammesu cakkhumā; 
Ito satasahassamhi, 
kappe uppajji nāyako. 
Saraṇagamane kiñci, 
nivesesi tathāgato; 
Kiñci sīle nivesesi, 
dasakammapathuttame. 
Deti kassaci so vīro, 
sāmaññaphalamuttamaṁ; 
Samāpattī tathā aṭṭha, 
tisso vijjā pavecchati. 
Chaḷabhiññāsu yojesi, 
kiñci sattaṁ naruttamo; 
Deti kassaci nātho so, 
catasso paṭisambhidā. 
Bodhaneyyaṁ pajaṁ disvā, 
asaṅkheyyampi yojanaṁ; 
Khaṇena upagantvāna, 
vineti narasārathi. 
Tadāhaṁ haṁsavatiyaṁ, 
ahosiṁ brāhmaṇatrajo; 
Pāragū sabbavedānaṁ, 
veyyākaraṇasammato. 
Niruttiyā ca kusalo, 
nighaṇḍumhi visārado; 
Padako keṭubhavidū, 
chandovicitikovido. 
Jaṅghāvihāraṁ vicaraṁ, 
haṁsārāmamupeccahaṁ; 
Addasaṁ varadaṁ seṭṭhaṁ, 
mahājanapurakkhataṁ. 
Desentaṁ virajaṁ dhammaṁ, 
paccanīka