Sự Nghiệp Anh Hùng (Apadāna)

sāpadānaṁ chaṭṭhaṁ. 

Therāpadāna 
Kiṅkaṇipupphavagga 
Udakadāyakattheraapadāna 
“Padumuttarabuddhassa, 
bhikkhusaṅghe anuttare; 
Pasannacitto sumano, 
pānīghaṭamapūrayiṁ. 
Pabbatagge dumagge vā, 
ākāse vātha bhūmiyaṁ; 
Yadā pānīyamicchāmi, 
khippaṁ nibbattate mama. 
Satasahassito kappe, 
yaṁ dānamadadiṁ tadā; 
Duggatiṁ nābhijānāmi, 
dakadānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā udakadāyako thero imā gāthāyo abhāsitthāti. 
Udakadāyakattherassāpadānaṁ sattamaṁ. 

Therāpadāna 
Upālivagga 
Sayanadāyakattheraapadāna 
“Siddhatthassa bhagavato, 
mettacittassa tādino; 
Sayanaggaṁ mayā dinnaṁ, 
dussabhaṇḍehi atthataṁ. 
Paṭiggahesi bhagavā, 
kappiyaṁ sayanāsanaṁ; 
Uṭṭhāya sayanā tamhā, 
vehāsaṁ uggamī jino. 
Catunnavutito kappe, 
yaṁ sayanamadāsahaṁ; 
Duggatiṁ nābhijānāmi, 
sayanassa idaṁ phalaṁ. 
Ekapaññāsito kappe, 
varako devasavhayo; 
Sattaratanasampanno, 
cakkavattī mahabbalo. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sayanadāyako thero imā gāthāyo abhāsitthāti. 
Sayanadāyakattherassāpadānaṁ sattamaṁ. 

Therāpadāna 
Buddhavagga 
Mahāmoggallānattheraapadāna 
“Anomadassī bhagavā, 
lokajeṭṭho narāsabho; 
Vihāsi himavantamhi, 
devasaṅghapurakkhato. 
Varuṇo nāma nāmena, 
nāgarājā ahaṁ tadā; 
Kāmarūpī vikubbāmi, 
mahodadhinivāsahaṁ. 
Saṅgaṇiyaṁ gaṇaṁ hitvā, 
tūriyaṁ paṭṭhapesahaṁ; 
Sambuddhaṁ parivāretvā, 
vādesuṁ accharā tadā. 
Vajjamānesu tūresu, 
devā tūrāni vajjayuṁ; 
Ubhinnaṁ saddaṁ sutvāna, 
buddhopi sampabujjhatha. 
Nimantetvāna sambuddhaṁ, 
sakaṁ bhavanupāgamiṁ; 
Āsanaṁ paññapetvāna, 
kālamārocayiṁ ahaṁ. 
Khīṇāsavasahassehi, 
parivuto lokanāyako; 
Obhāsento disā sabbā, 
bhavanaṁ me upāgami. 
Upaviṭṭhaṁ mahāvīraṁ, 
Devadevaṁ narāsabhaṁ; 
Sabhikkhusaṅghaṁ tappesiṁ, 
Annapānenahaṁ tadā. 
Anumodi mahāvīro, 
sayambhū aggapuggalo; 
Bhikkhusaṅghe nisīditvā, 
imā gāthā abhāsatha. 
Yo so saṅghaṁ apūjesi, 
buddhañca lokanāyakaṁ; 
Tena cittappasādena, 
devalokaṁ gamissati. 
Sattasattatikkhattuñca, 
devarajjaṁ karissati; 
Pathabyā rajjaṁ aṭṭhasataṁ, 
vasudhaṁ āvasissati. 
Pañcapaññāsakkhattuñca, 
cakkavattī bhavissati; 
Bhogā asaṅkhiyā tassa, 
uppajjissanti tāvade. 
Aparimeyye ito kappe, 
okkākakulasambhavo; 
Gotamo nāma gottena, 
satthā loke bhavissati. 
Nirayā so cavitvāna, 
manussataṁ gamissati; 
Kolito nāma nāmena, 
brahmabandhu bhavissati. 
So pacchā pabbajitvāna, 
kusalamūlena codito; 
Gotamassa bhagavato, 
dutiyo hessati sāvako. 
Āraddhavīriyo pahitatto, 
Iddhiyā pāramiṁ gato; 
Sabbāsave pariññāya, 
Nibbāyissatināsavo. 
Pāpamittopanissāya, 
kāmarāgavasaṁ gato; 
Mātaraṁ pitarañcāpi, 
ghātayiṁ duṭṭhamānaso. 
Yaṁ yaṁ yonupapajjāmi, 
nirayaṁ atha mānusaṁ; 
Pāpakammasamaṅgitā, 
bhinnasīso marāmahaṁ. 
Idaṁ pacchimakaṁ mayhaṁ, 
carimo vattate bhavo; 
Idhāpi ediso mayhaṁ, 
maraṇakāle bhavissati. 
Pavivekamanuyutto, 
samādhibhāvanārato; 
Sabbāsave pariññāya, 
viharāmi anāsavo. 
Dharaṇimpi sugambhīraṁ, 
bahalaṁ duppadhaṁsiyaṁ; 
Vāmaṅguṭṭhena khobheyyaṁ, 
iddhiyā pāramiṁ gato. 
Asmimānaṁ na passāmi, 
māno mayhaṁ na vijjati; 
Sāmaṇere upādāya, 
garucittaṁ karomahaṁ. 
Aparimeyye ito kappe, 
yaṁ kammamabhinīhariṁ; 
Tāhaṁ bhūmimanuppatto, 
pattomhi āsavakkhayaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā mahāmoggallāno thero imā gāthāyo abhāsitthāti. 
Mahāmoggallānattherassāpadānaṁ dutiyaṁ. 

Therāpadāna 
Kiṅkaṇipupphavagga 
8 Pulinathūpiyattheraapadāna 
“Himavantassāvidūre, 
yamako nāma pabbato; 
Assamo sukato mayhaṁ, 
paṇṇasālā sumāpitā. 
Nārado nāma nāmena, 
jaṭilo uggatāpano; 
Catuddasasahassāni, 
sissā paricaranti maṁ. 
Paṭisallīnako santo, 
evaṁ cintesahaṁ tadā; 
‘Sabbo jano maṁ pūjeti, 
nāhaṁ pūjemi kiñcanaṁ. 
Na me ovādako atthi, 
vattā koci na vijjati; 
Anācariyupajjhāyo, 
vane vāsaṁ upemahaṁ. 
Upāsamāno yamahaṁ, 
garucittaṁ upaṭṭhahe; 
So me ācariyo natthi, 
vanavāso niratthako. 
Āyāgaṁ me gavesissaṁ, 
garuṁ bhāvaniyaṁ tathā; 
Sāvassayo vasissāmi, 
na koci garahissati’. 
Uttānakūlā nadikā, 
supatitthā manoramā; 
Saṁsuddhapulinākiṇṇā, 
avidūre mamassamaṁ. 
Nadiṁ amarikaṁ nāma, 
upagantvānahaṁ tadā; 
Saṁvaḍḍhayitvā pulinaṁ, 
akaṁ pulinacetiyaṁ. 
Ye te ahesuṁ sambuddhā, 
bhavantakaraṇā munī; 
Tesaṁ etādiso thūpo, 
taṁ nimittaṁ karomahaṁ. 
Karitvā pulinaṁ thūpaṁ, 
sovaṇṇaṁ māpayiṁ ahaṁ; 
Soṇṇakiṅkaṇipupphāni, 
sahasse tīṇi pūjayiṁ. 
Sāyaṁ pātaṁ namassāmi, 
vedajāto katañjalī; 
Sammukhā viya sambuddhaṁ, 
vandiṁ pulinacetiyaṁ. 
Yadā kilesā jāyanti, 
vitakkā gehanissitā; 
Sarāmi sukataṁ thūpaṁ, 
paccavekkhāmi tāvade. 
Upanissāya viharaṁ, 
satthavāhaṁ vināyakaṁ; 
Kilese saṁvaseyyāsi, 
na yuttaṁ tava mārisa. 
Saha āvajjite thūpe, 
gāravaṁ hoti me tadā; 
Kuvitakke vinodesiṁ, 
nāgo tuttaṭṭito yathā. 
Evaṁ viharamānaṁ maṁ, 
maccurājābhimaddatha; 
Tattha kālaṅkato santo, 
brahmalokamagacchahaṁ. 
Yāvatāyuṁ vasitvāna, 
tidive upapajjahaṁ; 
Asītikkhattuṁ devindo, 
devarajjamakārayiṁ. 
Satānaṁ tīṇikkhattuñca, 
cakkavattī ahosahaṁ; 
Padesarajjaṁ vipulaṁ, 
gaṇanāto asaṅkhiyaṁ. 
Soṇṇakiṅkaṇipupphānaṁ, 
vipākaṁ anubhomahaṁ; 
Dhātīsatasahassāni, 
parivārenti maṁ bhave. 
Thūpassa pariciṇṇattā, 
rajojallaṁ na limpati; 
Gatte sedā na muccanti, 
suppabhāso bhavāmahaṁ. 
Aho me sukato thūpo, 
sudiṭṭhā marikā nadī; 
Thūpaṁ katvāna pulinaṁ, 
pattomhi acalaṁ padaṁ. 
Kusalaṁ kattukāmena, 
jantunā sāragāhinā; 
Natthi khettaṁ akhettaṁ vā, 
paṭipattīva sādhakā. 
Yathāpi balavā poso, 
aṇṇavaṁ taritussahe; 
Parittaṁ kaṭṭhamādāya, 
pakkhandeyya mahāsaraṁ. 
Imāhaṁ kaṭṭhaṁ nissāya, 
tarissāmi mahodadhiṁ; 
Ussāhena vīriyena, 
tareyya udadhiṁ naro. 
Tatheva me kataṁ kammaṁ, 
parittaṁ thokakañca yaṁ; 
Taṁ kammaṁ upanissāya, 
saṁsāraṁ samatikkamiṁ. 
Pacchime bhave sampatte, 
sukkamūlena codito; 
Sāvatthiyaṁ pure jāto, 
mahāsāle suaḍḍhake. 
Saddhā mātā pitā mayhaṁ, 
buddhassa saraṇaṁ gatā; 
Ubho diṭṭhapadā ete, 
anuvattanti sāsanaṁ. 
Bodhipapaṭikaṁ gayha, 
soṇṇathūpamakārayuṁ; 
Sāyaṁ pātaṁ namassanti, 
sakyaputtassa sammukhā. 
Uposathamhi divase, 
soṇṇathūpaṁ vinīharuṁ; 
Buddhassa vaṇṇaṁ kittentā, 
tiyāmaṁ vītināmayuṁ. 
Saha disvānahaṁ thūpaṁ, 
sariṁ pulinacetiyaṁ; 
Ekāsane nisīditvā, 
arahattamapāpuṇiṁ. 
Dvāvīsatimaṁ bhāṇavāraṁ. 
Gavesamāno taṁ vīraṁ, 
dhammasenāpatiddasaṁ; 
Agārā nikkhamitvāna, 
pabbajiṁ tassa santike. 
Jātiyā sattavassena, 
arahattamapāpuṇiṁ; 
Upasampādayī buddho, 
guṇamaññāya cakkhumā. 
Dārakeneva santena, 
kiriyaṁ niṭṭhitaṁ mayā; 
Kataṁ me karaṇīyajja, 
sakyaputtassa sāsane. 
Sabbaverabhayātīto, 
sabbasaṅgātigo isi; 
Sāvako te mahāvīra, 
soṇṇathūpassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā pulinathūpiyo thero imā gāthāyo abhāsitthāti. 
Pulinathūpiyattherassāpadānaṁ aṭṭhamaṁ. 

Therāpadāna 
Kiṅkaṇipupphavagga 
9 Naḷakuṭidāyakattheraapadāna 
“Himavantassāvidūre, 
hārito nāma pabbato; 
Sayambhū nārado nāma, 
rukkhamūle vasī tadā. 
Naḷāgāraṁ karitvāna, 
tiṇena chādayiṁ ahaṁ; 
Caṅkamaṁ sodhayitvāna, 
sayambhussa adāsahaṁ. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Tattha me sukataṁ byamhaṁ, 
naḷakuṭikanimmitaṁ; 
Saṭṭhiyojanamubbedhaṁ, 
tiṁsayojanavitthataṁ. 
Catuddasesu kappesu, 
devaloke ramiṁ ahaṁ; 
Ekasattatikkhattuñca, 
devarajjamakārayiṁ. 
Catutiṁsatikkhattuñca, 
cakkavattī ahosahaṁ; 
Padesarajjaṁ vipulaṁ, 
gaṇanāto asaṅkhiyaṁ. 
Dhammapāsādamāruyha, 
sabbākāravarūpamaṁ; 
Yadicchakāhaṁ vihare, 
sakyaputtassa sāsane. 
Ekatiṁse ito kappe, 
yaṁ kammamakariṁ tadā; 
Duggatiṁ nābhijānāmi, 
naḷakuṭiyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā naḷakuṭidāyako thero imā gāthāyo abhāsitthāti. 
Naḷakuṭidāyakattherassāpadānaṁ navamaṁ. 

Therāpadāna 
Kiṅkaṇipupphavagga 
Piyālaphaladāyakattheraapadāna 
“Migaluddo pure āsiṁ, 
vipine vicaraṁ tadā; 
Addasaṁ virajaṁ buddhaṁ, 
sabbadhammāna pāraguṁ. 
Piyālaphalamādāya, 
buddhaseṭṭhassadāsahaṁ; 
Puññakkhettassa vīrassa, 
pasanno sehi pāṇibhi. 
Ekatiṁse ito kappe, 
yaṁ phalaṁ adadiṁ tadā; 
Duggatiṁ nābhijānāmi, 
phaladānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā piyālaphaladāyako thero imā gāthāyo abhāsitthāti. 
Piyālaphaladāyakattherassāpadānaṁ dasamaṁ. 
Kiṅkaṇipupphavaggo paññāsamo. 
Tassuddānaṁ 
Kiṅkaṇī paṁsukūlañca, 
koraṇḍamatha kiṁsukaṁ; 
Upaḍḍhadussī ghatado, 
udakaṁ thūpakārako. 
Naḷakārī ca navamo, 
piyālaphaladāyako; 
Satamekañca gāthānaṁ, 
navakañca taduttari. 
Atha vagguddānaṁ 
Metteyyavaggo bhaddāli, 
sakiṁsammajjakopi ca; 
Ekavihārī vibhītakī, 
jagatī sālapupphiyo. 
Naḷāgāraṁ paṁsukūlaṁ, 
kiṅkaṇipupphiyo tathā; 
Asīti dve ca gāthāyo, 
catuddasasatāni ca. 
Metteyyavaggadasakaṁ. 
Pañcamasatakaṁ samattaṁ. 

Therāpadāna 
Kaṇikāravagga 
1 Tikaṇikārapupphiyattheraapadāna 
“Sumedho nāma sambuddho, 
bāttiṁsavaralakkhaṇo; 
Vivekakāmo sambuddho, 
himavantamupāgamiṁ. 
Ajjhogayha himavantaṁ, 
aggo kāruṇiko muni; 
Pallaṅkamābhujitvāna, 
nisīdi purisuttamo. 
Vijjādharo tadā āsiṁ, 
antalikkhacaro ahaṁ; 
Tisūlaṁ sukataṁ gayha, 
gacchāmi ambare tadā. 
Pabbatagge yathā aggi, 
puṇṇamāyeva candimā; 
Vane obhāsate buddho, 
sālarājāva phullito. 
Vanaggā nikkhamitvāna, 
buddharaṁsībhidhāvare; 
Naḷaggivaṇṇasaṅkāsā, 
disvā cittaṁ pasādayiṁ. 
Vicinaṁ addasaṁ pupphaṁ, 
kaṇikāraṁ devagandhikaṁ; 
Tīṇi pupphāni ādāya, 
buddhaseṭṭhamapūjayiṁ. 
Buddhassa ānubhāvena, 
tīṇi pupphāni me tadā; 
Uddhaṁvaṇṭā adhopattā, 
chāyaṁ kubbanti satthuno. 
Tena kammena sukatena, 
cetanāpaṇidhīhi ca; 
Jahitvā mānusaṁ dehaṁ, 
tāvatiṁsamagacchahaṁ. 
Tattha me sukataṁ byamhaṁ, 
kaṇikārīti ñāyati; 
Saṭṭhiyojanamubbedhaṁ, 
tiṁsayojanavitthataṁ. 
Sahassakaṇḍaṁ satabheṇḍu, 
dhajāluharitāmayaṁ; 
Satasahassaniyyūhā, 
byamhe pātubhaviṁsu me. 
Soṇṇamayā maṇimayā, 
lohitaṅgamayāpi ca; 
Phalikāpi ca pallaṅkā, 
yenicchakā yadicchakā. 
Mahārahañca sayanaṁ, 
tūlikāvikatīyutaṁ; 
Uddhalomikaekantaṁ, 
bibbohanasamāyutaṁ. 
Bhavanā nikkhamitvāna, 
caranto devacārikaṁ; 
Yadā icchāmi gamanaṁ, 
devasaṅghapurakkhato. 
Pupphassa heṭṭhā tiṭṭhāmi, 
uparicchadanaṁ mama; 
Samantā yojanasataṁ, 
kaṇikārehi chāditaṁ. 
Saṭṭhituriyasahassāni, 
sāyaṁ pātamupaṭṭhahuṁ; 
Parivārenti maṁ niccaṁ, 
rattindivamatanditā. 
Tattha naccehi gītehi, 
tāḷehi vāditehi ca; 
Ramāmi khiḍḍāratiyā, 
modāmi kāmakāmihaṁ. 
Tattha bhutvā pivitvā ca, 
modāmi tidase tadā; 
Nārīgaṇehi sahito, 
modāmi byamhamuttame. 
Satānaṁ pañcakkhattuñca, 
devarajjamakārayiṁ; 
Satānaṁ tīṇikkhattuñca, 
cakkavattī ahosahaṁ; 
Padesarajjaṁ vipulaṁ, 
gaṇanāto asaṅkhiyaṁ. 
Bhavābhave saṁsaranto, 
mahābhogaṁ labhāmahaṁ; 
Bhoge me ūnatā natthi, 
buddhapūjāyidaṁ phalaṁ. 
Duve bhave saṁsarāmi, 
devatte atha mānuse; 
Aññaṁ gatiṁ na jānāmi, 
buddhapūjāyidaṁ phalaṁ. 
Duve kule pajāyāmi, 
khattiye cāpi brāhmaṇe; 
Nīce kule na jāyāmi, 
buddhapūjāyidaṁ phalaṁ. 
Hatthiyānaṁ assayānaṁ, 
sivikaṁ sandamānikaṁ; 
Labhāmi sabbamevetaṁ, 
buddhapūjāyidaṁ phalaṁ. 
Dāsīgaṇaṁ dāsagaṇaṁ, 
nāriyo samalaṅkatā; 
Labhāmi sabbamevetaṁ, 
buddhapūjāyidaṁ phalaṁ. 
Koseyyakambaliyāni, 
khomakappāsikāni ca; 
Labhāmi sabbamevetaṁ, 
buddhapūjāyidaṁ phalaṁ. 
Navavatthaṁ navaphalaṁ, 
navaggarasabhojanaṁ; 
Labhāmi sabbamevetaṁ, 
buddhapūjāyidaṁ phalaṁ. 
Imaṁ khāda imaṁ bhuñja, 
imamhi sayane saya; 
Labhāmi sabbamevetaṁ, 
buddhapūjāyidaṁ phalaṁ. 
Sabbattha pūjito homi, 
yaso abbhuggato mama; 
Mahāpakkho sadā homi, 
abhejjapariso sadā; 
Ñātīnaṁ uttamo homi, 
buddhapūjāyidaṁ phalaṁ. 
Sītaṁ uṇhaṁ na jānāmi, 
pariḷāho na vijjati; 
Atho cetasikaṁ dukkhaṁ, 
hadaye me na vijjati. 
Suvaṇṇavaṇṇo hutvāna, 
saṁsarāmi bhavābhave; 
Vevaṇṇiyaṁ na jānāmi, 
buddhapūjāyidaṁ phalaṁ. 
Devalokā cavitvāna, 
sukkamūlena codito; 
Sāvatthiyaṁ pure jāto, 
mahāsāle suaḍḍhake. 
Pañca kāmaguṇe hitvā, 
pabbajiṁ anagāriyaṁ; 
Jātiyā sattavassohaṁ, 
arahattamapāpuṇiṁ. 
Upasampādayī buddho, 
guṇamaññāya cakkhumā; 
Taruṇo pūjanīyohaṁ, 
buddhapūjāyidaṁ phalaṁ. 
Dibbacakkhu visuddhaṁ me, 
samādhikusalo ahaṁ; 
Abhiññāpāramippatto, 
buddhapūjāyidaṁ phalaṁ. 
Paṭisambhidā anuppatto, 
iddhipādesu kovido; 
Dhammesu pāramippatto, 
buddhapūjāyidaṁ phalaṁ. 
Tiṁsakappasahassamhi, 
yaṁ buddhamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Kilesā jhāpitā mayhaṁ, 
bhavā sabbe samūhatā; 
Nāgova bandhanaṁ chetvā, 
viharāmi anāsavo. 
Svāgataṁ vata me āsi, 
mama buddhassa santike; 
Tisso vijjā anuppattā, 
kataṁ buddhassa sāsanaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā tikaṇikārapupphiyo thero imā gāthāyo abhāsitthāti. 
Tikaṇikārapupphiyattherassāpadānaṁ paṭhamaṁ. 

Therāpadāna 
Kaṇikāravagga 
Ekapattadāyakattheraapadāna 
“Nagare haṁsavatiyā, 
kumbhakāro ahosahaṁ; 
Addasaṁ virajaṁ buddhaṁ, 
oghatiṇṇamanāsavaṁ. 
Sukataṁ mattikāpattaṁ, 
buddhaseṭṭhassadāsahaṁ; 
Pattaṁ datvā bhagavato, 
ujubhūtassa tādino. 
Bhave nibbattamānohaṁ, 
soṇṇathāle labhāmahaṁ; 
Rūpimaye ca sovaṇṇe, 
taṭṭike ca maṇīmaye. 
Pātiyo paribhuñjāmi, 
puññakammassidaṁ phalaṁ; 
Yasānañca dhanānañca, 
aggabhūto ca homahaṁ. 
Yathāpi bhaddake khette, 
bījaṁ appampi ropitaṁ; 
Sammādhāraṁ pavecchante, 
phalaṁ toseti kassakaṁ. 
Tathevidaṁ pattadānaṁ, 
buddhakhettamhi ropitaṁ; 
Pītidhāre pavassante, 
phalaṁ maṁ tosayissati. 
Yāvatā khettā vijjanti, 
saṅghāpi ca gaṇāpi ca; 
Buddhakhettasamo natthi, 
sukhado sabbapāṇinaṁ. 
Namo te purisājañña, 
namo te purisuttama; 
Ekapattaṁ daditvāna, 
pattomhi acalaṁ padaṁ. 
Ekanavutito kappe, 
yaṁ pattamadadiṁ tadā; 
Duggatiṁ nābhijānāmi, 
pattadānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ekapattadāyako thero imā gāthāyo abhāsitthāti. 
Ekapattadāyakattherassāpadānaṁ dutiyaṁ. 

Therāpadāna 
Kaṇikāravagga 
3 Kāsumāraphaliyattheraapadāna 
“Kaṇikāraṁva jotantaṁ, 
nisinnaṁ pabbatantare; 
Addasaṁ virajaṁ buddhaṁ, 
lokajeṭṭhaṁ narāsabhaṁ. 
Pasannacitto sumano, 
sire katvāna añjaliṁ; 
Kāsumārikamādāya, 
buddhaseṭṭhassadāsahaṁ. 
Ekatiṁse ito kappe, 
yaṁ phalaṁ adadiṁ tadā; 
Duggatiṁ nābhijānāmi, 
phaladānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kāsumāraphaliyo thero imā gāthāyo abhāsitthāti. 
Kāsumāraphaliyattherassāpadānaṁ tatiyaṁ. 

Therāpadāna 
Kaṇikāravagga 
Avaṭaphaliyattheraapadāna 
“Sahassaraṁsī bhagavā, 
sayambhū aparājito; 
Vivekā vuṭṭhahitvāna, 
gocarāyābhinikkhami. 
Phalahattho ahaṁ disvā, 
upagacchiṁ narāsabhaṁ; 
Pasannacitto sumano, 
avaṭaṁ adadiṁ phalaṁ. 
Catunnavutito kappe, 
yaṁ phalaṁ adadiṁ tadā; 
Duggatiṁ nābhijānāmi, 
phaladānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā avaṭaphaliyo thero imā gāthāyo abhāsitthāti. 
Avaṭaphaliyattherassāpadānaṁ catutthaṁ. 

Therāpadāna 
Kaṇikāravagga 
5 Pādaphaliyattheraapadāna 
“Suvaṇṇavaṇṇaṁ sambuddhaṁ, 
Āhutīnaṁ paṭiggahaṁ; 
Rathiyaṁ paṭipajjantaṁ, 
Pādaphalaṁ adāsahaṁ. 
Ekanavutito kappe, 
yaṁ phalaṁ adadiṁ tadā; 
Duggatiṁ nābhijānāmi, 
phaladānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā pādaphaliyo thero imā gāthāyo abhāsitthāti. 
Pādaphaliyattherassāpadānaṁ pañcamaṁ. 

Therāpadāna 
Kaṇikāravagga 
Mātuluṅgaphaladāyakattheraapadāna 
“Kaṇikāraṁva jalitaṁ, 
puṇṇamāyeva candimaṁ; 
Jalantaṁ dīparukkhaṁva, 
addasaṁ lokanāyakaṁ. 
Mātuluṅgaphalaṁ gayha, 
adāsiṁ satthuno ahaṁ; 
Dakkhiṇeyyassa vīrassa, 
pasanno sehi pāṇibhi. 
Ekatiṁse ito kappe, 
yaṁ phalaṁ adadiṁ tadā; 
Duggatiṁ nābhijānāmi, 
phaladānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā mātuluṅgaphaladāyako thero imā gāthāyo abhāsitthāti. 
Mātuluṅgaphaladāyakattherassāpadānaṁ chaṭṭhaṁ. 

Therāpadāna 
Kaṇikāravagga 
7 Ajeliphaladāyakattheraapadāna 
“Ajjuno nāma sambuddho, 
himavante vasī tadā; 
Caraṇena ca sampanno, 
samādhikusalo muni. 
Kumbhamattaṁ gahetvāna, 
ajeliṁ jīvajīvakaṁ; 
Chattapaṇṇaṁ gahetvāna, 
adāsiṁ satthuno ahaṁ. 
Catunnavutito kappe, 
yaṁ phalaṁ adadiṁ tadā; 
Duggatiṁ nābhijānāmi, 
phaladānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ajeliphaladāyako thero imā gāthāyo abhāsitthāti. 
Ajeliphaladāyakattherassāpadānaṁ sattamaṁ. 

Therāpadāna 
Upālivagga 
8 Caṅkamanadāyakattheraapadāna 
“Atthadassissa munino, 
lokajeṭṭhassa tādino; 
Iṭṭhakāhi cinitvāna, 
caṅkamaṁ kārayiṁ ahaṁ. 
Uccato pañcaratanaṁ, 
caṅkamaṁ sādhumāpitaṁ; 
Āyāmato hatthasataṁ, 
bhāvanīyyaṁ manoramaṁ. 
Paṭiggahesi bhagavā, 
atthadassī naruttamo; 
Hatthena pulinaṁ gayha, 
imā gāthā abhāsatha. 
‘Iminā pulinadānena, 
caṅkamaṁ sukatena ca; 
Sattaratanasampannaṁ, 
pulinaṁ anubhossati. 
Tīṇi kappāni devesu, 
devarajjaṁ karissati; 
Anubhossati sampattiṁ, 
accharāhi purakkhato. 
Manussalokamāgantvā, 
rājā raṭṭhe bhavissati; 
Tikkhattuṁ cakkavattī ca, 
mahiyā so bhavissati’. 
Aṭṭhārase kappasate, 
yaṁ kammamakariṁ tadā; 
Duggatiṁ nābhijānāmi, 
caṅkamassa idaṁ phalaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā caṅkamanadāyako thero imā gāthāyo abhāsitthāti. 
Caṅkamanadāyakattherassāpadānaṁ aṭṭhamaṁ. 

Therāpadāna 
Kaṇikāravagga 
8 Amodaphaliyattheraapadāna 
“Suvaṇṇavaṇṇaṁ sambuddhaṁ, 
Āhutīnaṁ paṭiggahaṁ; 
Rathiyaṁ paṭipajjantaṁ, 
Āmodamadadiṁ phalaṁ. 
Ekanavutito kappe, 
yaṁ phalaṁ adadiṁ tadā; 
Duggatiṁ nābhijānāmi, 
phaladānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā amodaphaliyo thero imā gāthāyo abhāsitthāti. 
Amodaphaliyattherassāpadānaṁ aṭṭhamaṁ. 

Therāpadāna 
Kaṇikāravagga 
9 Tālaphaladāyakattheraapadāna 
“Sataraṁsī nāma bhagavā, 
sayambhū aparājito; 
Vivekā vuṭṭhahitvāna, 
gocarāyābhinikkhami. 
Phalahattho ahaṁ disvā, 
upagacchiṁ narāsabhaṁ; 
Pasannacitto sumano, 
tālaphalaṁ adāsahaṁ. 
Catunnavutito kappe, 
yaṁ phalaṁ adadiṁ tadā; 
Duggatiṁ nābhijānāmi, 
phaladānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā tālaphaladāyako thero imā gāthāyo abhāsitthāti. 
Tālaphaladāyakattherassāpadānaṁ navamaṁ. 

Therāpadāna 
Kaṇikāravagga 
10 Nāḷikeraphaladāyakattheraapadāna 
“Nagare bandhumatiyā, 
ārāmiko ahaṁ tadā; 
Addasaṁ virajaṁ buddhaṁ, 
gacchantaṁ anilañjase. 
Nāḷikeraphalaṁ gayha, 
buddhaseṭṭhassadāsahaṁ; 
Ākāse ṭhitako santo, 
paṭiggaṇhi mahāyaso. 
Vittisañjanano mayhaṁ, 
diṭṭhadhammasukhāvaho; 
Phalaṁ buddhassa datvāna, 
vippasannena cetasā. 
Adhigacchiṁ tadā pītiṁ, 
vipulañca sukhuttamaṁ; 
Uppajjateva ratanaṁ, 
nibbattassa tahiṁ tahiṁ. 
Ekanavutito kappe, 
yaṁ phalaṁ adadiṁ tadā; 
Duggatiṁ nābhijānāmi, 
phaladānassidaṁ phalaṁ. 
Dibbacakkhu visuddhaṁ me, 
samādhikusalo ahaṁ; 
Abhiññāpāramippatto, 
phaladānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā nāḷikeraphaladāyako thero imā gāthāyo abhāsitthāti. 
Nāḷikeraphaladāyakattherassāpadānaṁ dasamaṁ. 
Kaṇikāravaggo ekapaññāsamo. 
Tassuddānaṁ 
Kaṇikārekapattā ca, 
kāsumārī tathāvaṭā; 
Pādañca mātuluṅgañca, 
ajelīmodameva ca. 
Tālaṁ tathā nāḷikeraṁ, 
gāthāyo gaṇitā viha; 
Ekaṁ gāthāsataṁ hoti, 
ūnādhikavivajjitaṁ. 

Therāpadāna 
Phaladāyakavagga 
1 Kurañciyaphaladāyakattheraapadāna 
“Migaluddo pure āsiṁ, 
vipine vicaraṁ ahaṁ; 
Addasaṁ virajaṁ buddhaṁ, 
sabbadhammāna pāraguṁ. 
Kurañciyaphalaṁ gayha, 
buddhaseṭṭhassadāsahaṁ; 
Puññakkhettassa tādino, 
pasanno sehi pāṇibhi. 
Ekatiṁse ito kappe, 
yaṁ phalaṁ adadiṁ tadā; 
Duggatiṁ nābhijānāmi, 
phaladānassidaṁ phalaṁ. 
Kilesā jhāpitā mayhaṁ, 
bhavā sabbe samūhatā; 
Nāgova bandhanaṁ chetvā, 
viharāmi anāsavo. 
Svāgataṁ vata me āsi, 
buddhaseṭṭhassa santike; 
Tisso vijjā anuppattā, 
kataṁ buddhassa sāsanaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā kurañciyaphaladāyako thero imā gāthāyo abhāsitthāti. 
Kurañciyaphaladāyakattherassāpadānaṁ paṭhamaṁ. 

Therāpadāna 
Phaladāyakavagga 
2 Kapitthaphaladāyakattheraapadāna 
“Suvaṇṇavaṇṇaṁ sambuddhaṁ, 
Āhutīnaṁ paṭiggahaṁ; 
Rathiyaṁ paṭipajjantaṁ, 
Kapitthaṁ adadiṁ phalaṁ. 
Ekanavutito kappe, 
yaṁ phalaṁ adadiṁ tadā; 
Duggatiṁ nābhijānāmi, 
phaladānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kapitthaphaladāyako thero imā gāthāyo abhāsitthāti. 
Kapitthaphaladāyakattherassāpadānaṁ dutiyaṁ. 

Therāpadāna 
Phaladāyakavagga 
3 Kosambaphaliyattheraapadāna 
“Kakudhaṁ vilasantaṁva, 
devadevaṁ narāsabhaṁ; 
Rathiyaṁ paṭipajjantaṁ, 
kosambaṁ adadiṁ tadā. 
Ekatiṁse ito kappe, 
yaṁ phalaṁ adadiṁ tadā; 
Duggatiṁ nābhijānāmi, 
phaladānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kosambaphaliyo thero imā gāthāyo abhāsitthāti. 
Kosambaphaliyattherassāpadānaṁ tatiyaṁ. 

Therāpadāna 
Phaladāyakavagga 
Ketakapupphiyattheraapadāna 
“Vinatānadiyā tīre, 
vihāsi purisuttamo; 
Addasaṁ virajaṁ buddhaṁ, 
ekaggaṁ susamāhitaṁ. 
Madhugandhassa pupphena, 
ketakassa ahaṁ tadā; 
Pasannacitto sumano, 
buddhaseṭṭhamapūjayiṁ. 
Ekanavutito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ketakapupphiyo thero imā gāthāyo abhāsitthāti. 
Ketakapupphiyattherassāpadānaṁ catutthaṁ. 

Therāpadāna 
Phaladāyakavagga 
Nāgapupphiyattheraapadāna 
“Suvaṇṇavaṇṇaṁ sambuddhaṁ, 
Āhutīnaṁ paṭiggahaṁ; 
Rathiyaṁ paṭipajjantaṁ, 
Nāgapupphaṁ apūjayiṁ. 
Ekanavutito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā nāgapupphiyo thero imā gāthāyo abhāsitthāti. 
Nāgapupphiyattherassāpadānaṁ pañcamaṁ. 

Therāpadāna 
Phaladāyakavagga 
Ajjunapupphiyattheraapadāna 
“Candabhāgānadītīre, 
ahosiṁ kinnaro tadā; 
Addasaṁ virajaṁ buddhaṁ, 
sayambhuṁ aparājitaṁ. 
Pasannacitto sumano, 
vedajāto katañjalī; 
Gahetvā ajjunaṁ pupphaṁ, 
sayambhuṁ abhipūjayiṁ. 
Tena kammena sukatena, 
cetanāpaṇidhīhi ca; 
Jahitvā kinnaraṁ dehaṁ, 
tāvatiṁsamagacchahaṁ. 
Chattiṁsakkhattuṁ devindo, 
devarajjamakārayiṁ; 
Dasakkhattuṁ cakkavattī, 
mahārajjamakārayiṁ. 
Padesarajjaṁ vipulaṁ, 
gaṇanāto asaṅkhiyaṁ; 
Sukhette vappitaṁ bījaṁ, 
sayambhumhi aho mama. 
Kusalaṁ vijjate mayhaṁ, 
pabbajiṁ anagāriyaṁ; 
Pūjāraho ahaṁ ajja, 
sakyaputtassa sāsane. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ajjunapupphiyo thero imā gāthāyo abhāsitthāti. 
Ajjunapupphiyattherassāpadānaṁ chaṭṭhaṁ. 

Therāpadāna 
Phaladāyakavagga 
Kuṭajapupphiyattheraapadāna 
“Himavantassāvidūre, 
vasalo nāma pabbato; 
Buddho sudassano nāma, 
vasate pabbatantare. 
Pupphaṁ hemavantaṁ gayha, 
vehāsaṁ agamāsahaṁ; 
Tatthaddasāsiṁ sambuddhaṁ, 
oghatiṇṇamanāsavaṁ. 
Pupphaṁ kuṭajamādāya, 
sire katvāna añjaliṁ; 
Buddhassa abhiropesiṁ, 
sayambhussa mahesino. 
Ekatiṁse ito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā kuṭajapupphiyo thero imā gāthāyo abhāsitthāti. 
Kuṭajapupphiyattherassāpadānaṁ sattamaṁ. 

Therāpadāna 
Upālivagga 
Subhaddattheraapadāna 
“Padumuttaro lokavidū, 
āhutīnaṁ paṭiggaho; 
Janataṁ uddharitvāna, 
nibbāyati mahāyaso. 
Nibbāyante ca sambuddhe, 
dasasahassi kampatha; 
Janakāyo mahā āsi, 
devā sannipatuṁ tadā. 
Candanaṁ pūrayitvāna, 
tagarāmallikāhi ca; 
Haṭṭho haṭṭhena cittena, 
āropayiṁ naruttamaṁ. 
Mama saṅkappamaññāya, 
satthā loke anuttaro; 
Nipannakova sambuddho, 
imā gāthā abhāsatha. 
‘Yo me pacchimake kāle, 
gandhamālena chādayi; 
Tamahaṁ kittayissāmi, 
suṇātha mama bhāsato. 
Ito cuto ayaṁ poso, 
tusitakāyaṁ gamissati; 
Tattha rajjaṁ karitvāna, 
nimmānaṁ so gamissati. 
Eteneva upāyena, 
datvā mālaṁ varuttamaṁ; 
Sakakammābhiraddho so, 
sampattiṁ anubhossati. 
Punāpi tusite kāye, 
nibbattissatiyaṁ naro; 
Tamhā kāyā cavitvāna, 
manussattaṁ gamissati. 
Sakyaputto mahānāgo, 
aggo loke sadevake; 
Bodhayitvā bahū satte, 
nibbāyissati cakkhumā. 
Tadā sopagato santo, 
sukkamūlena codito; 
Upasaṅkamma sambuddhaṁ, 
pañhaṁ pucchissati tadā. 
Hāsayitvāna sambuddho, 
sabbaññū lokanāyako; 
Puññakammaṁ pariññāya, 
saccāni vivarissati. 
Āraddho ca ayaṁ pañho, 
tuṭṭho ekaggamānaso; 
Satthāraṁ abhivādetvā, 
pabbajjaṁ yācayissati. 
Pasannamānasaṁ disvā, 
sakakammena tositaṁ; 
Pabbājessati so buddho, 
aggamaggassa kovido. 
Vāyamitvānayaṁ poso, 
sammāsambuddhasāsane; 
Sabbāsave pariññāya, 
nibbāyissatināsavo’. 
Pañcamabhāṇavāraṁ. 
Pubbakammena saṁyutto, 
ekaggo susamāhito; 
Buddhassa oraso putto, 
dhammajomhi sunimmito. 
Dhammarājaṁ upagamma, 
apucchiṁ pañhamuttamaṁ; 
Kathayanto ca me pañhaṁ, 
dhammasotaṁ upānayi. 
Tassāhaṁ dhammamaññāya, 
vihāsiṁ sāsane rato; 
Sabbāsave pariññāya, 
viharāmi anāsavo. 
Satasahassito kappe, 
jalajuttamanāyako; 
Nibbāyi anupādāno, 
dīpova telasaṅkhayā. 
Sattayojanikaṁ āsi, 
thūpañca ratanāmayaṁ; 
Dhajaṁ tattha apūjesiṁ, 
sabbabhaddaṁ manoramaṁ. 
Kassapassa ca buddhassa, 
tisso nāmaggasāvako; 
Putto me oraso āsi, 
dāyādo jinasāsane. 
Tassa hīnena manasā, 
vācaṁ bhāsiṁ abhaddakaṁ; 
Tena kammavipākena, 
pacchā me āsi bhaddakaṁ. 
Upavattane sālavane, 
pacchime sayane muni; 
Pabbājesi mahāvīro, 
hito kāruṇiko jino. 
Ajjeva dāni pabbajjā, 
ajjeva upasampadā; 
Ajjeva parinibbānaṁ, 
sammukhā dvipaduttame. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā subhaddo thero imā gāthāyo abhāsitthāti. 
Subhaddattherassāpadānaṁ navamaṁ. 

Therāpadāna 
Phaladāyakavagga 
Ghosasaññakattheraapadāna 
“Migaluddo pure āsiṁ, 
araññe vipine ahaṁ; 
Addasaṁ virajaṁ buddhaṁ, 
devasaṅghapurakkhataṁ. 
Catusaccaṁ pakāsentaṁ, 
desentaṁ amataṁ padaṁ; 
Assosiṁ madhuraṁ dhammaṁ, 
sikhino lokabandhuno. 
Ghose cittaṁ pasādesiṁ, 
asamappaṭipuggale; 
Tattha cittaṁ pasādetvā, 
uttariṁ duttaraṁ bhavaṁ. 
Ekatiṁse ito kappe, 
yaṁ saññamalabhiṁ tadā; 
Duggatiṁ nābhijānāmi, 
ghosasaññāyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā ghosasaññako thero imā gāthāyo abhāsitthāti. 
Ghosasaññakattherassāpadānaṁ aṭṭhamaṁ. 

Therāpadāna 
Phaladāyakavagga 
Sabbaphaladāyakattheraapadāna 
“Varuṇo nāma nāmena, 
brāhmaṇo mantapāragū; 
Chaḍḍetvā dasa puttāni, 
vanamajjhogahiṁ tadā. 
Assamaṁ sukataṁ katvā, 
suvibhattaṁ manoramaṁ; 
Paṇṇasālaṁ karitvāna, 
vasāmi vipine ahaṁ. 
Padumuttaro lokavidū, 
āhutīnaṁ paṭiggaho; 
Mamuddharitukāmo so, 
āgacchi mama assamaṁ. 
Yāvatā vanasaṇḍamhi, 
obhāso vipulo ahu; 
Buddhassa ānubhāvena, 
pajjalī vipinaṁ tadā. 
Disvāna taṁ pāṭihīraṁ, 
buddhaseṭṭhassa tādino; 
Pattapuṭaṁ gahetvāna, 
phalena pūjayiṁ ahaṁ. 
Upagantvāna sambuddhaṁ, 
sahakhārimadāsahaṁ; 
Anukampāya me buddho, 
idaṁ vacanamabravi. 
‘Khāribhāraṁ gahetvāna, 
pacchato ehi me tuvaṁ; 
Paribhutte ca saṅghamhi, 
puññaṁ tava bhavissati’. 
Puṭakantaṁ gahetvāna, 
bhikkhusaṅghassadāsahaṁ; 
Tattha cittaṁ pasādetvā, 
tusitaṁ upapajjahaṁ. 
Tattha dibbehi naccehi, 
gītehi vāditehi ca; 
Puññakammena saṁyuttaṁ, 
anubhomi sadā sukhaṁ. 
Yaṁ yaṁ yonupapajjāmi, 
devattaṁ atha mānusaṁ; 
Bhoge me ūnatā natthi, 
phaladānassidaṁ phalaṁ. 
Yāvatā caturo dīpā, 
sasamuddā sapabbatā; 
Phalaṁ buddhassa datvāna, 
issaraṁ kārayāmahaṁ. 
Yāvatā me pakkhigaṇā, 
ākāse uppatanti ce; 
Tepi maṁ vasamanventi, 
phaladānassidaṁ phalaṁ. 
Yāvatā vanasaṇḍamhi, 
yakkhā bhūtā ca rakkhasā; 
Kumbhaṇḍā garuḷā cāpi, 
pāricariyaṁ upenti me. 
Kummā soṇā madhukārā, 
ḍaṁsā ca makasā ubho; 
Tepi maṁ vasamanventi, 
phaladānassidaṁ phalaṁ. 
Supaṇṇā nāma sakuṇā, 
pakkhijātā mahabbalā; 
Tepi maṁ saraṇaṁ yanti, 
phaladānassidaṁ phalaṁ. 
Yepi dīghāyukā nāgā, 
iddhimanto mahāyasā; 
Tepi maṁ vasamanventi, 
phaladānassidaṁ phalaṁ. 
Sīhā byagghā ca dīpī ca, 
acchakokataracchakā; 
Tepi maṁ vasamanventi, 
phaladānassidaṁ phalaṁ. 
Osadhītiṇavāsī ca, 
ye ca ākāsavāsino; 
Sabbe maṁ saraṇaṁ yanti, 
phaladānassidaṁ phalaṁ. 
Sududdasaṁ sunipuṇaṁ, 
gambhīraṁ suppakāsitaṁ; 
Phassayitvā viharāmi, 
phaladānassidaṁ phalaṁ. 
Vimokkhe aṭṭha phusitvā, 
viharāmi anāsavo; 
Ātāpī nipako cāhaṁ, 
phaladānassidaṁ phalaṁ. 
Ye phalaṭṭhā buddhaputtā, 
khīṇadosā mahāyasā; 
Ahamaññataro tesaṁ, 
phaladānassidaṁ phalaṁ. 
Abhiññāpāramiṁ gantvā, 
sukkamūlena codito; 
Sabbāsave pariññāya, 
viharāmi anāsavo. 
Tevijjā iddhipattā ca, 
buddhaputtā mahāyasā; 
Dibbasotasamāpannā, 
tesaṁ aññataro ahaṁ. 
Satasahassito kappe, 
yaṁ phalaṁ adadiṁ tadā; 
Duggatiṁ nābhijānāmi, 
phaladānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sabbaphaladāyako thero imā gāthāyo abhāsitthāti. 
Sabbaphaladāyakattherassāpadānaṁ navamaṁ. 

Therāpadāna 
Phaladāyakavagga 
10 Padumadhārikattheraapadāna 
“Himavantassāvidūre, 
romaso nāma pabbato; 
Buddhopi sambhavo nāma, 
abbhokāse vasī tadā. 
Bhavanā nikkhamitvāna, 
padumaṁ dhārayiṁ ahaṁ; 
Ekāhaṁ dhārayitvāna, 
bhavanaṁ punarāgamiṁ. 
Ekatiṁse ito kappe, 
yaṁ buddhamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā padumadhāriko thero imā gāthāyo abhāsitthāti. 
Padumadhārikattherassāpadānaṁ dasamaṁ. 
Phaladāyakavaggo dvepaññāsamo. 
Tassuddānaṁ 
Kurañciyaṁ kapitthañca, 
kosambamatha ketakaṁ; 
Nāgapupphajjunañceva, 
kuṭajī ghosasaññako. 
Thero ca sabbaphalado, 
tathā padumadhāriko; 
Asīti cettha gāthāyo, 
tisso gāthā taduttari. 

Therāpadāna 
Tiṇadāyakavagga 
Tiṇamuṭṭhidāyakattheraapadāna 
“Himavantassāvidūre, 
lambako nāma pabbato; 
Tattheva tisso sambuddho, 
abbhokāsamhi caṅkami. 
Migaluddo pure āsiṁ, 
araññe kānane ahaṁ; 
Disvāna taṁ devadevaṁ, 
tiṇamuṭṭhimadāsahaṁ. 
Nisīdanatthaṁ buddhassa, 
datvā cittaṁ pasādayiṁ; 
Sambuddhaṁ abhivādetvā, 
pakkāmiṁ uttarāmukho. 
Aciraṁ gatamattassa, 
migarājā apothayi; 
Sīhena pothito santo, 
tattha kālaṅkato ahaṁ. 
Āsanne me kataṁ kammaṁ, 
buddhaseṭṭhe anāsave; 
Sumutto saravegova, 
devalokamagañchahaṁ. 
Yūpo tattha subho āsi, 
puññakammābhinimmito; 
Sahassakaṇḍo satabheṇḍu, 
dhajālu haritāmayo. 
Pabhā niddhāvate tassa, 
sataraṁsīva uggato; 
Ākiṇṇo devakaññāhi, 
āmodiṁ kāmakāmihaṁ. 
Devalokā cavitvāna, 
sukkamūlena codito; 
Āgantvāna manussattaṁ, 
pattomhi āsavakkhayaṁ. 
Catunnavutito kappe, 
nisīdanamadāsahaṁ; 
Duggatiṁ nābhijānāmi, 
tiṇamuṭṭhe idaṁ phalaṁ. 
Kilesā jhāpitā mayhaṁ, 
bhavā sabbe samūhatā; 
Nāgova bandhanaṁ chetvā, 
viharāmi anāsavo. 
Svāgataṁ vata me āsi, 
mama buddhassa santike; 
Tisso vijjā anuppattā, 
kataṁ buddhassa sāsanaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā tiṇamuṭṭhidāyako thero imā gāthāyo abhāsitthāti. 
Tiṇamuṭṭhidāyakattherassāpadānaṁ paṭhamaṁ. 

Therāpadāna 
Tiṇadāyakavagga 
2 Mañcadāyakattheraapadāna 
“Vipassino bhagavato, 
lokajeṭṭhassa tādino; 
Ekamañcaṁ mayā dinnaṁ, 
pasannena sapāṇinā. 
Hatthiyānaṁ assayānaṁ, 
dibbayānaṁ samajjhagaṁ; 
Tena mañcakadānena, 
pattomhi āsavakkhayaṁ. 
Ekanavutito kappe, 
yaṁ mañcamadadiṁ tadā; 
Duggatiṁ nābhijānāmi, 
mañcadānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā mañcadāyako thero imā gāthāyo abhāsitthāti. 
Mañcadāyakattherassāpadānaṁ dutiyaṁ. 

Therāpadāna 
Tiṇadāyakavagga 
Saraṇagamaniyattheraapadāna 
“Āruhimha tadā nāvaṁ, 
bhikkhu cājīviko cahaṁ; 
Nāvāya bhijjamānāya, 
bhikkhu me saraṇaṁ adā. 
Ekatiṁse ito kappe, 
yaṁ so me saraṇaṁ adā; 
Duggatiṁ nābhijānāmi, 
saraṇagamane phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā saraṇagamaniyo thero imā gāthāyo abhāsitthāti. 
Saraṇagamaniyattherassāpadānaṁ tatiyaṁ. 

Therāpadāna 
Tiṇadāyakavagga 
Abbhañjanadāyakattheraapadāna 
“Nagare bandhumatiyā, 
rājuyyāne vasāmahaṁ; 
Cammavāsī tadā āsiṁ, 
kamaṇḍaludharo ahaṁ. 
Addasaṁ vimalaṁ buddhaṁ, 
sayambhuṁ aparājitaṁ; 
Padhānaṁ pahitattaṁ taṁ, 
jhāyiṁ jhānarataṁ vasiṁ. 
Sabbakāmasamiddhiñca, 
oghatiṇṇamanāsavaṁ; 
Disvā pasanno sumano, 
abbhañjanamadāsahaṁ. 
Ekanavutito kappe, 
yaṁ dānamadadiṁ tadā; 
Duggatiṁ nābhijānāmi, 
abbhañjanassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā abbhañjanadāyako thero imā gāthāyo abhāsitthāti. 
Abbhañjanadāyakattherassāpadānaṁ catutthaṁ. 

Therāpadāna 
Tiṇadāyakavagga 
Supaṭadāyakattheraapadāna 
“Divāvihārā nikkhanto, 
vipassī lokanāyako; 
Lahuṁ supaṭakaṁ datvā, 
kappaṁ saggamhi modahaṁ. 
Ekanavutito kappe, 
supaṭakamadāsahaṁ; 
Duggatiṁ nābhijānāmi, 
supaṭassa idaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā supaṭadāyako thero imā gāthāyo abhāsitthāti. 
Supaṭadāyakattherassāpadānaṁ pañcamaṁ. 

Therāpadāna 
Tiṇadāyakavagga 
Daṇḍadāyakattheraapadāna 
“Kānanaṁ vanamogayha, 
veḷuṁ chetvānahaṁ tadā; 
Ālambaṇaṁ karitvāna, 
saṅghassa adadiṁ bahuṁ. 
Tena cittappasādena, 
subbate abhivādiya; 
Ālambadaṇḍaṁ datvāna, 
pakkāmiṁ uttarāmukho. 
Catunnavutito kappe, 
yaṁ daṇḍamadadiṁ tadā; 
Duggatiṁ nābhijānāmi, 
daṇḍadānassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā daṇḍadāyako thero imā gāthāyo abhāsitthāti. 
Daṇḍadāyakattherassāpadānaṁ chaṭṭhaṁ. 
Tevīsatimaṁ bhāṇavāraṁ. 

Therāpadāna 
Tiṇadāyakavagga 
Girinelapūjakattheraapadāna 
“Migaluddo pure āsiṁ, 
vipine vicaraṁ ahaṁ; 
Addasaṁ virajaṁ buddhaṁ, 
sabbadhammāna pāraguṁ. 
Tasmiṁ mahākāruṇike, 
sabbasattahite rate; 
Pasannacitto sumano, 
nelapupphamapūjayiṁ. 
Ekatiṁse ito kappe, 
yaṁ pupphamabhipūjayiṁ; 
Duggatiṁ nābhijānāmi, 
buddhapūjāyidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā girinelapūjako thero imā gāthāyo abhāsitthāti. 
Girinelapūjakattherassāpadānaṁ sattamaṁ. 

Therāpadāna 
Upālivagga 
Cundattheraapadāna 
“Siddhatthassa bhagavato, 
lokajeṭṭhassa tādino; 
Agghiyaṁ kārayitvāna, 
jātipupphehi chādayiṁ. 
Niṭṭhāpetvāna taṁ pupphaṁ, 
buddhassa upanāmayiṁ; 
Pupphāvasesaṁ paggayha, 
buddhassa abhiropayiṁ. 
Kañcanagghiyasaṅkāsaṁ, 
buddhaṁ lokagganāyakaṁ; 
Pasannacitto sumano, 
pupphagghiyamupānayiṁ. 
Vitiṇṇakaṅkho sambuddho, 
tiṇṇoghehi purakkhato; 
Bhikkhusaṅghe nisīditvā, 
imā gāthā abhāsatha. 
‘Dibbagandhaṁ pavāyantaṁ, 
yo me pupphagghiyaṁ adā; 
Tamahaṁ kittayissāmi, 
suṇātha mama bhāsato. 
Ito cuto ayaṁ poso, 
devasaṅghapurakkhato; 
Jātipupphehi parikiṇṇo, 
devalokaṁ gamissati. 
Ubbiddhaṁ bhavanaṁ tassa, 
Sovaṇṇañca maṇīmayaṁ; 
Byamhaṁ pātubhavissati, 
Puññakammappabhāvitaṁ. 
Catusattatikkhattuṁ so, 
devarajjaṁ karissati; 
Anubhossati sampattiṁ, 
accharāhi purakkhato. 
Pathabyā rajjaṁ tisataṁ, 
vasudhaṁ āvasissati; 
Pañcasattatikkhattuñca, 
cakkavattī bhavissati. 
Dujjayo nāma nāmena, 
hessati manujādhipo; 
Anubhotvāna taṁ puññaṁ, 
sakakammaṁ apassito. 
Vinipātaṁ agantvāna, 
manussattaṁ gamissati; 
Hiraññaṁ tassa nicitaṁ, 
koṭisatamanappakaṁ. 
Nibbattissati yonimhi, 
brāhmaṇe so bhavissati; 
Vaṅgantassa suto dhīmā, 
sāriyā oraso piyo. 
So ca pacchā pabbajitvā, 
aṅgīrasassa sāsane; 
Cūḷacundoti nāmena, 
hessati satthu sāvako. 
Sāmaṇerova so santo, 
khīṇāsavo bhavissati; 
Sabbāsave pariññāya, 
nibbāyissatināsavo’. 
Upaṭṭhahiṁ mahāvīraṁ, 
aññe ca pesale bahū; 
Bhātaraṁ me cupaṭṭhāsiṁ, 
uttamatthassa pattiyā. 
Bhātaraṁ me upaṭṭhitvā, 
dhātuṁ pattamhi ohiya; 
Sambuddhaṁ upanāmesiṁ, 
lokajeṭṭhaṁ narāsabhaṁ. 
Ubho hatthehi paggayha, 
buddho loke sadevake; 
Sandassayanto taṁ dhātuṁ, 
kittayi aggasāvakaṁ. 
Cittañca suvimuttaṁ me, 
saddhā mayhaṁ patiṭṭhitā; 
Sabbāsave pariññāya, 
viharāmi anāsavo. 
Paṭisambhidānuppattā, 
Vimokkhāpi ca phassitā; 
Chaḷabhiññā sacchikatā, 
Kataṁ buddhassa sāsanaṁ”. 
Itthaṁ sudaṁ āyasmā cundo thero imā gāthāyo abhāsitthāti. 
Cundattherassāpadānaṁ dasamaṁ. 
Upālivaggo pañcamo. 
Tassuddānaṁ 
Upāli soṇo bhaddiyo, 
sanniṭṭhāpakahatthiyo; 
Chadanaṁ seyyacaṅkamaṁ, 
subhaddo cundasavhayo; 
Gāthāsataṁ satālīsaṁ, 
catasso ca taduttari. 

Therāpadāna 
Tiṇadāyakavagga 
Bodhisammajjakattheraapadāna 
“Ahaṁ pure bodhipattaṁ, 
ujjhitaṁ cetiyaṅgaṇe; 
Taṁ gahetvāna chaḍḍesiṁ, 
alabhiṁ vīsatīguṇe. 
Tassa kammassa tejena, 
saṁsaranto bhavābhave; 
Duve bhave saṁsarāmi, 
devatte cāpi mānuse. 
Devalokā cavitvāna, 
āgantvā mānusaṁ bhavaṁ; 
Duve kule pajāyāmi, 
khattiye cāpi brāhmaṇe. 
Aṅgapaccaṅgasampanno, 
ārohapariṇāhavā; 
Abhirūpo suci homi, 
sampuṇṇaṅgo anūnako. 
Devaloke manusse vā, 
jāto vā yattha katthaci; 
Bhave suvaṇṇavaṇṇo ca, 
uttattakanakūpamo. 
Mudukā maddavā sniddhā, 
sukhumā sukumārikā; 
Chavi me sabbadā hoti, 
bodhipatte suchaḍḍite. 
Yato kutoci gatīsu, 
sarīre samudāgate; 
Na limpati rajojallaṁ, 
vipāko pattachaḍḍite. 
Uṇhe vātātape tassa, 
aggitāpena vā pana; 
Gatte sedā na muccanti, 
vipāko pattachaḍḍite. 
Kuṭṭhaṁ gaṇḍo kilāso ca, 
tilakā piḷakā tathā; 
Na honti kāye daddu ca, 
vipāko pattachaḍḍite. 
Aparampi guṇaṁ tassa, 
nibbattati bhavābhave; 
Rogā na honti kāyasmiṁ, 
vipāko pattachaḍḍite. 
Aparampi guṇaṁ tassa, 
nibbattati bhavābhave; 
Na hoti cittajā pīḷā, 
vipāko pattachaḍḍite. 
Aparampi guṇaṁ tassa, 
nibbattati bhavābhave; 
Amittā na bhavantassa, 
vipāko pattachaḍḍite. 
Aparampi guṇaṁ tassa, 
nibbattati bhavābhave; 
Anūnabhogo bhavati, 
vipāko pattachaḍḍite. 
Aparampi guṇaṁ tassa, 
nibbattati bhavābhave; 
Aggirājūhi corehi, 
na hoti udake bhayaṁ. 
Aparampi guṇaṁ tassa, 
nibbattati bhavābhave; 
Dāsidāsā anucarā, 
honti cittānuvattakā. 
Yamhi āyuppamāṇamhi, 
jāyate mānuse bhave; 
Tato na hāyate āyu, 
tiṭṭhate yāvatāyukaṁ. 
Abbhantarā ca bāhirā, 
negamā ca saraṭṭhakā; 
Nuyuttā honti sabbepi, 
vuddhikāmā sukhicchakā. 
Bhogavā yasavā homi, 
sirimā ñātipakkhavā; 
Apetabhayasantāso, 
bhavehaṁ sabbato bhave. 
Devā manussā asurā, 
gandhabbā yakkharakkhasā; 
Sabbe te parirakkhanti, 
bhave saṁsarato sadā. 
Devaloke manusse ca, 
anubhotvā ubho yase; 
Avasāne ca nibbānaṁ, 
sivaṁ patto anuttaraṁ. 
Sambuddhamuddisitvāna, 
bodhiṁ vā tassa satthuno; 
Yo puññaṁ pasave poso, 
tassa kiṁ nāma dullabhaṁ. 
Magge phale āgame ca, 
jhānābhiññāguṇesu ca; 
Aññesaṁ adhiko hutvā, 
nibbāyāmi anāsavo. 
Purehaṁ bodhiyā pattaṁ, 
chaḍḍetvā haṭṭhamānaso; 
Imehi vīsataṅgehi, 
samaṅgī homi sabbadā. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā bodhisammajjako thero imā gāthāyo abhāsitthāti. 
Bodhisammajjakattherassāpadānaṁ aṭṭhamaṁ. 

Therāpadāna 
Tiṇadāyakavagga 
Āmaṇḍaphaladāyakattheraapadāna 
“Padumuttaro nāma jino, 
sabbadhammāna pāragū; 
Vuṭṭhahitvā samādhimhā, 
caṅkamī lokanāyako. 
Khāribhāraṁ gahetvāna, 
āharanto phalaṁ tadā; 
Addasaṁ virajaṁ buddhaṁ, 
caṅkamantaṁ mahāmuniṁ. 
Pasannacitto sumano, 
sire katvāna añjaliṁ; 
Sambuddhaṁ abhivādetvā, 
āmaṇḍamadadiṁ phalaṁ. 
Satasahassito kappe, 
yaṁ phalaṁ adadiṁ tadā; 
Duggatiṁ nābhijānāmi, 
āmaṇḍassa idaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā āmaṇḍaphaladāyako thero imā gāthāyo abhāsitthāti. 
Āmaṇḍaphaladāyakattherassāpadānaṁ navamaṁ. 

Therāpadāna 
Tiṇadāyakavagga 
Sugandhattheraapadāna 
“Imamhi bhaddake kappe, 
brahmabandhu mahāyaso; 
Kassapo nāma gottena, 
uppajji vadataṁ varo. 
Anubyañjanasampanno, 
bāttiṁsavaralakkhaṇo; 
Byāmappabhāparivuto, 
raṁsijālasamotthaṭo. 
Assāsetā yathā cando, 
sūriyova pabhaṅkaro; 
Nibbāpetā yathā megho, 
sāgarova guṇākaro. 
Dharaṇīriva sīlena, 
himavāva samādhinā; 
Ākāso viya paññāya, 
asaṅgo anilo yathā. 
Sa kadāci mahāvīro, 
parisāsu visārado; 
Saccāni sampakāseti, 
uddharanto mahājanaṁ. 
Tadā hi bārāṇasiyaṁ, 
seṭṭhiputto mahāyaso; 
Āsahaṁ dhanadhaññassa, 
pahūtassa bahū tadā. 
Jaṅghāvihāraṁ vicaraṁ, 
migadāyamupeccahaṁ; 
Addasaṁ virajaṁ buddhaṁ, 
desentaṁ amataṁ padaṁ. 
Visaṭṭhakantavacanaṁ, 
karavīkasamassaraṁ; 
Haṁsarutehi nigghosaṁ, 
viññāpentaṁ mahājanaṁ. 
Disvā devātidevaṁ taṁ, 
sutvāva madhuraṁ giraṁ; 
Pahāyanappake bhoge, 
pabbajiṁ anagāriyaṁ. 
Evaṁ pabbajito cāhaṁ, 
na cirena bahussuto; 
Ahosiṁ dhammakathiko, 
vicittapaṭibhānavā. 
Mahāparisamajjhehaṁ, 
haṭṭhacitto punappunaṁ; 
Vaṇṇayiṁ hemavaṇṇassa, 
vaṇṇaṁ vaṇṇavisārado. 
‘Esa khīṇāsavo buddho, 
anīgho chinnasaṁsayo; 
Sabbakammakkhayaṁ patto, 
vimuttopadhisaṅkhaye. 
Esa so bhagavā buddho, 
esa sīho anuttaro; 
Sadevakassa lokassa, 
brahmacakkappavattako. 
Danto dametā santo ca, 
sametā nibbuto isi; 
Nibbāpetā ca assattho, 
assāsetā mahājanaṁ. 
Vīro sūro ca vikkanto, 
pañño kāruṇiko vasī; 
Vijitāvī ca sa jino, 
appagabbo anālayo. 
Aneñjo acalo dhīmā, 
amoho asamo muni; 
Dhorayho usabho nāgo, 
sīho sakko garūsupi. 
Virāgo vimalo brahmā, 
vādī sūro raṇañjaho; 
Akhilo ca visallo ca, 
asamo saṁyato suci. 
Brāhmaṇo samaṇo nātho, 
bhisakko sallakattako; 
Yodho buddho sutāsuto, 
acalo mudito sito. 
Dhātā dhatā ca santi ca, 
kattā netā pakāsitā; 
Sampahaṁsitā bhettā ca, 
chettā sotā pasaṁsitā. 
Akhilo ca visallo ca, 
anīgho akathaṅkathī; 
Anejo virajo kattā, 
gandhā vattā pasaṁsitā. 
Tāretā atthakāretā, 
kāretā sampadāritā; 
Pāpetā sahitā kantā, 
hantā ātāpī tāpaso. 
Samacitto samasamo, 
asahāyo dayālayo; 
Accherasatto akuho, 
katāvī isisattamo. 
Nittiṇṇakaṅkho nimmāno, 
appameyyo anūpamo; 
Sabbavākyapathātīto, 
saccaneyyantagū jino. 
Sattasāravare tasmiṁ, 
Pasādo amatāvaho; 
Tasmā buddhe ca dhamme ca, 
Saṅghe saddhā mahatthikā’. 
Guṇehi evamādīhi, 
tilokasaraṇuttamaṁ; 
Vaṇṇento parisāmajjhe, 
akaṁ dhammakathaṁ ahaṁ. 
Tato cutāhaṁ tusite, 
anubhotvā mahāsukhaṁ; 
Tato cuto manussesu, 
jāto homi sugandhiko. 
Nissāso mukhagandho ca, 
dehagandho tatheva me; 
Sedagandho ca satataṁ, 
sabbagandhova hoti me. 
Mukhagandho sadā mayhaṁ, 
padumuppalacampako; 
Parisanto sadā vāti, 
sarīro ca tatheva me. 
Guṇatthavassa sabbantaṁ, 
Phalaṁ tu paramabbhutaṁ; 
Ekaggamanasā sabbe, 
Vaṇṇayissaṁ suṇātha me. 
Guṇaṁ buddhassa vatvāna, 
hitāya ca na sadisaṁ; 
Sukhito homi sabbattha, 
saṅgho vīrasamāyuto. 
Yasassī sukhito kanto, 
jutimā piyadassano; 
Vattā aparibhūto ca, 
niddoso paññavā tathā. 
Khīṇe āyusi nibbānaṁ, 
sulabhaṁ buddhabhattino; 
Tesaṁ hetuṁ pavakkhāmi, 
taṁ suṇātha yathātathaṁ. 
Santaṁ yasaṁ bhagavato, 
vidhinā abhivādayaṁ; 
Tattha tatthūpapannopi, 
yasassī tena homahaṁ. 
Dukkhassantakaraṁ buddhaṁ, 
dhammaṁ santamasaṅkhataṁ; 
Vaṇṇayaṁ sukhado āsiṁ, 
sattānaṁ sukhito tato. 
Guṇaṁ vadanto buddhassa, 
buddhapītisamāyuto; 
Sakantiṁ parakantiñca, 
janayiṁ tena kantimā. 
Jino te titthikākiṇṇe, 
abhibhuyya kutitthiye; 
Guṇaṁ vadanto jotesiṁ, 
nāyakaṁ jutimā tato. 
Piyakārī janassāpi, 
sambuddhassa guṇaṁ vadaṁ; 
Saradova sasaṅkohaṁ, 
tenāsiṁ piyadassano. 
Yathāsattivasenāhaṁ, 
sabbavācāhi santhaviṁ; 
Sugataṁ tena vāgiso, 
vicittapaṭibhānavā. 
Ye bālā vimatiṁ pattā, 
paribhonti mahāmuniṁ; 
Niggahiṁ te saddhammena, 
paribhūto na tenahaṁ. 
Buddhavaṇṇena sattānaṁ, 
kilese apanesahaṁ; 
Nikkilesamano homi, 
tassa kammassa vāhasā. 
Sotūnaṁ vuddhimajaniṁ, 
buddhānussatidesako; 
Tenāhamāsiṁ sappañño, 
nipuṇatthavipassako. 
Sabbāsavaparikkhīṇo, 
tiṇṇasaṁsārasāgaro; 
Sikhīva anupādāno, 
pāpuṇissāmi nibbutiṁ. 
Imasmiṁyeva kappasmiṁ, 
yamahaṁ santhaviṁ jinaṁ; 
Duggatiṁ nābhijānāmi, 
buddhavaṇṇassidaṁ phalaṁ. 
Kilesā jhāpitā mayhaṁ, 
…pe… 
viharāmi anāsavo. 
Svāgataṁ vata me āsi, 
…pe… 
kataṁ buddhassa sāsanaṁ. 
Paṭisambhidā catasso, 
…pe… 
kataṁ buddhassa sāsanaṁ”. 
Itthaṁ sudaṁ āyasmā sugandho thero imā gāthāyo abhāsitthāti. 
Sugandhattherassāpadānaṁ dasamaṁ. 
Tiṇadāyakavaggo tepaññāsamo. 
Tassuddānaṁ 
Tiṇado mañcado ceva, 
saraṇabbhañjanappado; 
Supaṭo daṇḍadāyī ca, 
nelapūjī tatheva ca. 
Bodhisammajjako maṇḍo, 
sugandho dasamoti ca; 
Gāthāsataṁ satevīsaṁ, 
gaṇitañcettha sabbaso. 

Therāpadāna 
Kaccāyanavagga 
1 Mahākaccāyanattheraapadāna 
“Padumuttaro nāma jino, 
anejo ajitaṁ jayo; 
Satasahasse kappānaṁ, 
ito uppajji nāyako. 
Vīro kamalapattakkho, 
sasaṅkavimalānano; 
Kanakācalasaṅkāso, 
ravidittisamappabho. 
Sattanettamanohārī, 
varalakkhaṇabhūsito; 
Sabbavākyapathātīto, 
manujāmarasakkato. 
Sambuddho bodhayaṁ satte, 
vāgīso madhurassaro; 
Karuṇānibandhasantāno, 
parisāsu visārado. 
Deseti madhuraṁ dhammaṁ, 
catusaccūpasaṁhitaṁ; 
Nimugge mohapaṅkamhi, 
samuddharati pāṇine. 
Tadā ekacaro hutvā, 
tāpaso himavālayo; 
Nabhasā mānusaṁ lokaṁ, 
gacchanto jinamaddasaṁ. 
Upecca santikaṁ tassa, 
assosiṁ dhammadesanaṁ; 
Vaṇṇayantassa vīrassa, 
sāvakassa mahāguṇaṁ. 
‘Saṅkhittena mayā vuttaṁ, 
vitthārena pakāsayaṁ; 
Parisaṁ mañca toseti, 
yathā kaccāyano ayaṁ. 
Nāhaṁ evamidhekaccaṁ, 
aññaṁ passāmi sāvakaṁ; 
Tasmātadagge esaggo, 
evaṁ dhāretha bhikkhavo’. 
Tadāhaṁ vimhito hutvā, 
sutvā vākyaṁ manoramaṁ; 
Himavantaṁ gamitvāna, 
āhitvā pupphasañcayaṁ. 
Pūjetvā lokasaraṇaṁ, 
taṁ ṭhānamabhipatthayiṁ; 
Tadā mamāsayaṁ ñatvā, 
byākāsi sa raṇañjaho. 
‘Passathetaṁ isivaraṁ, 
niddhantakanakattacaṁ; 
Uddhaggalomaṁ pīṇaṁsaṁ, 
acalaṁ pañjaliṁ ṭhitaṁ. 
Hāsaṁ supuṇṇanayanaṁ, 
buddhavaṇṇagatāsayaṁ; 
Dhammajaṁ uggahadayaṁ, 
amatāsittasannibhaṁ’. 
Kaccānassa guṇaṁ sutvā, 
taṁ ṭhānaṁ patthayaṁ ṭhito; 
Anāgatamhi addhāne, 
gotamassa mahāmune. 
Tassa dhammesu dāyādo, 
oraso dhammanimmito; 
Kaccāno nāma nāmena, 
hessati satthu sāvako. 
Bahussuto mahāñāṇī, 
adhippāyavidū mune; 
Pāpuṇissati taṁ ṭhānaṁ, 
yathāyaṁ byākato mayā. 
Satasahassito kappe, 
yaṁ kammamakariṁ tadā; 
Duggatiṁ nābhijānāmi, 
buddhapūjāyidaṁ phalaṁ. 
Duve bhave saṁsarāmi, 
devatte atha mānuse; 
Aññaṁ gatiṁ na gacchāmi, 
buddhapūjāyidaṁ phalaṁ. 
Duve kule pajāyāmi, 
khattiye atha brāhmaṇe; 
Nīce kule na jāyāmi, 
buddhapūjāyidaṁ phalaṁ. 
Pacchime ca bhave dāni, 
jāto ujjeniyaṁ pure; 
Pajjotassa ca caṇḍassa, 
purohitadijādhino. 
Putto tiriṭivacchassa, 
nipuṇo vedapāragū; 
Mātā ca candimā nāma, 
kaccānohaṁ varattaco. 
Vīmaṁsanatthaṁ buddhassa, 
bhūmipālena pesito; 
Disvā mokkhapuradvāraṁ, 
nāyakaṁ guṇasañcayaṁ. 
Sutvā ca vimalaṁ vākyaṁ, 
gatipaṅkavisosanaṁ; 
Pāpuṇiṁ amataṁ santaṁ, 
sesehi saha sattahi. 
Adhippāyavidū jāto, 
sugatassa mahāmate; 
Ṭhapito etadagge ca, 
susamiddhamanoratho. 
Kilesā jhāpitā mayhaṁ, 
bhavā sabbe samūhatā; 
Nāgova bandhanaṁ chetvā, 
viharāmi anāsavo. 
Svāgataṁ vata me āsi, 
mama buddhassa santike; 
Tisso vijjā anuppattā, 
kataṁ buddhassa sāsanaṁ. 
Paṭisambhidā catasso, 
vimokkhāpi ca aṭṭhime; 
Chaḷabhiññā sacchikatā, 
kataṁ buddhassa sāsanaṁ”. 
Itthaṁ sudaṁ āyasmā mahākaccāyano thero imā gāthāyo abhāsitthāti. 
Mahākaccāyanattherassāpadānaṁ paṭhamaṁ. 

Therāpadāna 
Kaccāyanavagga 
Vakkalittheraapadāna 
“Ito satasahassamhi, 
kappe uppajji nāyako; 
Anomanāmo amito, 
nāmena padumuttaro. 
Padumākāravadano, 
padumāmalasucchavī; 
Lokenānupalittova, 
toyena padumaṁ yathā. 
Vīro padumapattakkho, 
kanto ca padumaṁ yathā; 
Padumuttaragandhova, 
tasmā so padumuttaro. 
Lokajeṭṭho ca nimmāno, 
andhānaṁ nayanūpamo; 
Santaveso guṇanidhi, 
karuṇāmatisāgaro. 
Sa kadāci mahāvīro, 
brahmāsurasuraccito; 
Sadevamanujākiṇṇe, 
janamajjhe jinuttamo. 
Vadanena sugandhena, 
madhurena rutena ca; 
Rañjayaṁ parisaṁ sabbaṁ, 
santhavī sāvakaṁ sakaṁ. 
Saddhādhimutto sumati, 
mama dassanalālaso; 
Natthi etādiso añño, 
yathāyaṁ bhikkhu vakkali. 
Tadāhaṁ haṁsavatiyaṁ, 
nagare brāhmaṇatrajo; 
Hutvā sutvā ca taṁ vākyaṁ, 
taṁ ṭhānamabhirocayiṁ. 
Sasāvakaṁ taṁ vimalaṁ, 
nimantetvā tathāgataṁ; 
Sattāhaṁ bhojayitvāna, 
dussehacchādayiṁ tadā. 
Nipacca sirasā tassa, 
anantaguṇasāgare; 
Nimuggo pītisampuṇṇo, 
idaṁ vacanamabraviṁ. 
‘Yo so tayā santhavito, 
ito sattamake muni; 
Bhikkhu saddhāvataṁ aggo, 
tādiso homahaṁ mune’. 
Evaṁ vutte, mahāvīro, 
anāvaraṇadassano; 
Imaṁ vākyaṁ udīresi, 
parisāya mahāmuni. 
‘Passathetaṁ māṇavakaṁ, 
pītamaṭṭhanivāsanaṁ; 
Hemayaññopacitaṅgaṁ, 
jananettamanoharaṁ. 
Eso anāgataddhāne, 
gotamassa mahesino; 
Aggo saddhādhimuttānaṁ, 
sāvakoyaṁ bhavissati. 
Devabhūto manusso vā, 
sabbasantāpavajjito; 
Sabbabhogaparibyūḷho, 
sukhito saṁsarissati. 
Satasahassito kappe, 
okkākakulasambhavo; 
Gotamo nāma gottena, 
satthā loke bhavissati. 
Tassa dhammesu dāyādo, 
oraso dhammanimmito; 
Vakkali nāma nāmen