Luận tạng Tây Tạng (Tengyur) — Tập 185

ས་སུ་དཔག་པ་དོན་དུ་གཉེར་བ་ཡོད་པ་མ་ཡིན་གྱི། རྗེས་སུ་དཔག་པ་ལ་ནི་གདོན་མི་ཟ་བར་རོ་མངོན་སུམ་དོན་དུ་གཉེར་བ་ཡིན་ཏེ། དེ་ལྟ་མ་ཡིན་ན་རྗེས་སུ་དཔག་པས་ཅི་བྱ། འོན་ཏེ་རྗེས་སུ་དཔག་པ་ཐམས་ཅད་ནི་མངོན་སུམ་དུ་བྱ་བ་མ་ཡིན་

ནོ་ཞེ་ན། །འོ་ན་ནི་རྗེས་སུ་དཔག་པ་སྟེ་གལ་ཏེ་འབྲས་བུ་འགའ་ཞིག་གི་དབང་དུ་བྱས་ནས་བཏོན་ན་དེའི་ཚེ་དེ་ཐོབ་པ་ཉིད་ཀྱིས་དེ་འབྲས་བུ་དང་བཅས་པར་འགྱུར་ལ། ཐོབ་པ་ཡང་མངོན་སུམ་གྱི་རང་བཞིན་ཁོ་ནའོ། །འདོད་རྒྱལ་དུ་ཐོབ་པའམ། བསྙོན་པས་འཇུག་པ་ནི་བླང་བར་བྱ་བ་མ་ཡིན་པ་ཁོ་ནའོ། །དེ་ལ་
ཇི་ལྟར་འཇུག་པར་བྱེད་པའི་མངོན་སུམ་དུ་བྱ་བ་སྣང་བའི་མངོན་སུམ་གྱི་འབྲས་བུ་དང་བཅས་པ་དེ་བཞིན་དུ་རྗེས་སུ་དཔག་པ་ཡང་མངོན་སུམ་གྱིས་ཡིན་ནོ། །དེའི་ཕྱིར་བསྒྲུབ་པར་བྱ་བ་ཡིན་པས་ན་མངོན་སུམ་ནི་གཙོ་བོ་ཡིན་ལ་རྗེས་སུ་དཔག་པ་ནི་སྒྲུབ་པར་བྱེད་པ་ཉིད་ཀྱིས་ན་ཡན་ལག་ཡིན་ནོ་ཞེས་བྱ་བར་རིགས་སོ། །དེ་
ལྟ་ཡིན་དང་རྒྱུའི་གནས་སྐབས་ནི་རྗེས་སུ་དཔག་པ་ཡིན་ལ་འབྲས་བུའི་གནས་སྐབས་ནི་མངོན་སུམ་ཡིན་ནོ་ཞེས་བྱ་བ་གྲུབ་པའི་མཐའ་ཡིན་ཏེ། དེས་ན་གཉི་ག་མཚུངས་པར་ཇི་ལྟར་འགྱུར་ཞེས་དགོངས་པ་ལ་འཇུག་པ་བསྡུ་བའི་ཚུལ་གྱིས་སེལ་བ་བརྗོད་པ་ནི། དེའི་ཕྱིར་མངོན་སུམ་དང་རྗེས་སུ་དཔག་པ་གཉིས་
ཡང་ཚད་མ་ཡིན་ནོ་ཞེས་བྱ་བའོ། །དགོས་པ་ནི་འདི་ཡིན་ཏེ། དངོས་པོ་པའི་གཙོ་བོ་དང་ཕལ་པའི་དངོས་པོ་དཔྱོད་པའི་སྐབས་ནི་མ་ཡིན་གྱི་འོན་ཀྱང་ཚད་མའོ། །དེ་ལ་ནི་གཉི་ག་ཡང་དོན་རྟོགས་པ་དང་འཇུག་པའི་རྒྱུ་ཡིན་ནོ། །གཞན་སྐྱེ་བ་ལ་ཡན་ལག་ཡིན་ནོ། །ཚད་མ་ནི་གཙོ་བོ་དང་ཕལ་པའི་དངོས་པོ་ཅུང་ཟད་ཀྱང་
མེད་དོ། །ཡན་ལག་ཉིད་དུ་མཚུངས་པ་ནི་དེ་ཙམ་ཞིག་རྟོགས་པར་བྱ་བ་ལ་བརྗོད་པ་ཡིན་ནོ། །གལ་ཏེ་ཚད་མ་ལ་ཡང་ཁྱད་པར་ཡོད་པ་ཉིད་དེ་འདི་ལྟར་རྗེས་སུ་དཔག་པ་ནི་མངོན་སུམ་ཡོད་པ་ལ་འཇུག་པ་ཡིན་ཏེ། དེ་གནོད་པའམ་བསྒྲུབ་པ་ལ་དེའི་སྐབས་མེད་པའི་ཕྱིར་རོ། །མངོན་སུམ་ནི་རྗེས་སུ་དཔག་པ་ཡོད་
པ་དང་མེད་པ་ལ་མི་ལྟོས་སོ་སྙམ་དུ་དོགས་ན་རང་གི་ཡུལ་ལ་ཞེས་གསུངས་སོ། །མངོན་སུམ་ཞུགས་པའི་ཡུལ་ལ་ནི། རྗེས་སུ་དཔག་པ་འཇུག་པ་མ་ཡིན་ཏེ། ཡུལ་མ་ཡིན་པ་ཉིད་ཀྱི་ཕྱིར་རོ། །རྗེས་སུ་དཔག་པའི་ཡུལ་ལ་ནི་མངོན་སུམ་གྱིས་གནོད་པ་མ་ཡིན་ཏེ། མངོན་སུམ་དང་ལྐོག་ཏུ་གྱུར་པའི་ཡུལ་
དབྱེ་བས་གཉི་ག་རྣམ་པར་གནས་པ་ཡིན་པའི་ཕྱིར་རོ། །མངོན་སུམ་གྱིས་གནོད་པའི་ཐ་སྙད་ཀྱི་རྗེས་སུ་དཔག་པའི་ཡུལ་མ་ཡིན་པ་ཉིད་སྟོན་པ་ཡིན་ནོ། །དེའི་ཕྱིར་གཉི་ག་ཡང་ཁྱད་པར་མེད་པ་ཡང་ཚད་མ་ཉིད་ཡིན་ནོ། །གཉིས་མེད་པ་ལ་ནི་རྗེས་སུ་དཔག་པ་ལ་སོགས་པ་ཡོད་པ་ཡིན་ཏེ། དེ་ཉིད་ཀྱི་

ཕྱིར་གཙོ་བོ་དང་ཅིག་ཤོས་ཡོད་པ་མ་ཡིན་ནོ། །འདི་ཉིད་བརྗོད་པ་ནི་དེ་ཁོ་ན་ལྟར་འཇིག་རྟེན་པ་ལ་གྲགས་པའི་ཕྱིར་རོ་ཞེས་བྱ་བའོ། །ཡང་དག་པའི་ཐ་སྙད་ལ་བརྟེན་པས་གནས་པ་ཡིན་ནོ་ཞེས་བྱ་བའི་དོན་ཏོ། །འདིར་ཚུ་རོལ་མཛེས་པ་པའི་དོགས་པ་བསུ་བ་དེ་ཅི་སྟེ་ཞེས་
བྱ་བའོ། །དེ་ཞེས་བྱ་བ་ནི་རྗེས་སུ་དཔག་པའོ། །མ་ཡིན་ཏེ་ཞེས་བྱ་བ་ནི་འགོག་པའོ། །དབང་པོའི་མངོན་སུམ་ཚད་མར་འདོད་ན་རིགས་པ་མཚུངས་པས་ན་རྗེས་སུ་དཔག་པས་ཚད་མ་ཡིན་པར་ནན་གྱིས་འགྲུབ་པོ་ཞེས་སྟོན་པ་ནི། འདི་ལྟར་ཞེས་བྱ་བ་ལ་སོགས་པའོ། །མདོར་བསྡུ་ན་བརྡ་སྤྲོད་པ་ལ་
ཡང་ལན་འདི་ཉིད་ཡིན་ནོ། །ཚུ་རོལ་མཛེས་པ་ལ་ཁ་ཅིག་མ་མཐོང་བ་འཇིག་རྟེན་ཕ་རོལ་ལ་སོགས་པའི་ཡུལ་ཅན་རྗེས་སུ་དཔག་པ་ནི་འགོག་ལ། །མཐོང་བའི་ཡུལ་ཅན་དུ་བ་ལ་སོགས་པ་ལ་རྗེས་སུ་དཔག་པ་འདོད་ལ། དེ་ལ་ཡང་མཐོང་བའི་ཡུལ་ཅན་གྱི་རྗེས་སུ་དཔག་པ་དག་འཇུག་པ་མཚུངས་པ་
ཉིད་ཡིན་ཡང་ཞེས་བྱ་བ་ལ་སོགས་པར་སྦྱར་རོ། །མཐོང་བའི་ཡུལ་ཅན་གྱི་རྗེས་སུ་དཔག་པ་ཡང་ཚུལ་གསུམ་པ་ཡོངས་སུ་དག་པའི་དབང་ཉིད་ཀྱིས་འཇུག་པར་བྱེད་པ་ཡིན་ལ། དེ་ནི་མ་མཐོང་བའི་ཡུལ་ལ་ཡང་མཚུངས་སོ་ཞེས་བྱ་བའི་དོན་ཏོ། །འདིར་མངོན་སུམ་དང་ཅིག་ཤོས་གཉི་ག་ཞེས་བྱ་བ་མངོན་སུམ་
སྨོས་པ་ནི་དཔེར་བརྗོད་པའི་དོན་ཏོ། །དེ་ནི་སྤང་བར་ནུས་པ་མ་ཡིན་ཏེ་མཐོང་བ་དང་འགལ་བ་ཉིད་ཀྱི་ཕྱིར་རོ། །དེ་ལྟ་མ་ཡིན་ན་མངོན་སུམ་ཚད་མར་ཇི་ལྟར་འགྱུར། འོན་ཏེ་ཡང་ཞེས་བྱ་བ་ལ་སོགས་པས་ནི། འོ་ན་མཐོང་བའི་རྗེས་སུ་དཔག་པར་ཡོད་ཀྱང་མངོན་སུམ་ཉིད་ལ་འཇུག་པར་འགྱུར་བ་དེས་ན་
འཇུག་པ་ལ་མཚུངས་པ་ཞེས་བྱ་བ་འདི་མ་གྲུབ་པར་དོགས་པ་བསུ་བའོ། །མངོན་སུམ་མ་ཡིན་ཞེས་བྱ་བ་ནི་རྗེས་སུ་དཔག་པའོ། །དེ་ཡང་མི་བདེན་ཏེ་ཞེས་བྱ་བ་ནི་སུན་འབྱིན་པའོ། །རང་གི་ཕྱོགས་ལ་རྗེས་སུ་ཆགས་པས་ཉམས་སུ་མྱོང་བས་ཁྱད་པར་དུ་བསད་ནས། རང་གི་ཕྱོགས་བསལ་བ་ཡང་རྩིས་ཁོངས་སུ་མི་
འཇུག་སྟེ། ཉམས་སུ་མྱོང་བ་ནི་མངོན་སུམ་ཡིན་པའི་ཕྱིར་རོ། །དེ་ཉིད་དེ་ལ་ཞེས་བྱ་བ་ལ་སོགས་པས་བསྟན་པར་བྱའོ། །དེའི་ཚེ་ནི་གདོན་མི་ཟ་བར་དྲན་པའི་རང་བཞིན་གྱི་ངེས་པར་འགྱུར་བ་ཡིན་ཏེ། དེ་ནི་དེ་ཙམ་དང་རྗེས་སུ་འབྲེལ་པའི་ཕྱིར་རོ། །འགའ་ཡང་ཞེས་བྱ་བ་འདིས་ནི། འཇིག་རྟེན་དང་འགལ་བ་ཡང་

སྟོན་པར་བྱེད་པ་ཡིན་ནོ། དེ་ལྟར་རྟོགས་པའི་འགལ་བར་བསམས་པས། རྣམ་པ་གཞན་ཡང་བརྗོད་པ་ནི། །མངོན་སུམ་ལ་ཡང་ཞེས་བྱ་བ་ལ་སོགས་པའོ། །བྱ་བ་ཞེས་བྱ་བ་དེའི་ཆོས་གཞན་གྱི་རང་བཞིན་རྗེས་སུ་འགྲོ་ལྡོག་དང་བཅས་པའི་ཡོད་པ་ཉིད་ཡིན་པར་འདོད། ཕྱོགས་དང་པོར་ནི་མངོན་སུམ་
ལ་ཡང་མེད་དོ། །གཉིས་པ་ནི་རྒྱུ་ཐམས་ཅད་ཀྱི་ཐུན་མོང་བ་ནི་རྗེས་སུ་དཔག་པའི་ཡང་འཇུག་པ་ལ་ཡོད་པ་ཡིན་ནོ། །དེ་ལྟར་རྣམ་པ་ཅི་ཞིག་ལྟར་རྗེས་སུ་དཔག་པར་མ་སྐྱེས་པ་ནི། དོན་དུ་གཉེར་ཡང་རྒྱུ་ལ་མི་འཇུག་པ་ཡིན་ནོ། །གལ་ཏེ་ཡོད་པ་ལས་མ་གཏོགས་པའི་བྱེད་པ་མེད་ན། འོ་ན་རྒྱུ་འབྲས་བུ་ལ་
བྱེད་པ་དང་བཅས་པ་ཡིན་ནོ་ཞེས་ཇི་ལྟར་བརྗོད་སྙམ་ན། འདི་ནི་རྟེན་ཅིང་འབྲེལ་པར་འབྱུང་བ་ཞེས་བྱ་སྟེ། སྣ་ཚོགས་འདི་ནའོ། །སྣ་ཚོགས་ལ་སོགས་པའི་ཐ་སྙད་ནི་དེ་ཙམ་དུ་ཟད་པ་ཡིན་ནོ། །དེ་ལྟར་ནི་མི་འཐད་པ་ཡང་ཅི་ཡང་མེད་དོ། །དེ་ལྟ་མ་ཡིན་ན་བྱེད་པ་མེད་པའམ། བྱེད་པ་དང་བཅས་པ་
ལས་ཇི་ལྟར་བྱེད་པར་འགྱུར། མངོན་སུམ་གྱི་བྱེད་པས་རྗེས་སུ་དཔག་པ་ལ་བསྙོན་འདེབས་པ་རྣམ་པ་གཞན་གྱི་སྒོ་ནས་བཟློག་པའི་དོན་དུ་གཞན་ཡང་ཞེས་གསུངས་སོ། །འདིར་ཡང་ན་འཇིག་རྟེན་གཞན་ཁས་བླངས་པ་ལ་ཡང་ངོ་། །འབྲེལ་པའི་སྤྲོས་པ་ནི་གོ་བར་བླའོ། །འོ་ན་རྗེས་སུ་དཔག་པ་ཚད་མ་མ་
ཡིན་པ་ཇི་ལྟར་སྤོང་སྙམ་ན། རྗེས་དཔག་ཚད་མ་ཉིད་མིན་ན། །ཞེས་གསུངས་སོ། །རྗེས་སུ་དཔག་པ་ཚད་མར་མི་སྒྲུབ་པར་ཅིའི་ཕྱིར་སྙམ་ན། འདི་ལྟར་ཞེས་གསུངས་སོ། །གང་ཡིན་པ་ཞེས་བྱ་བ་ནི་འཇིག་རྟེན་ཕ་རོལ་ལ་སོགས་པའོ། །གཞན་མངོན་སུམ་ཡིན་པའི་ཕྱིར་གཞན་ལ་མངོན་སུམ་ཡིན་པར་
ནི་འཐད་པ་མ་ཡིན་ནོ་ཞེས་བརྗོད་པ་ནི། གཞན་ཡང་ཞེས་བྱ་བའོ། །ཇི་ལྟར་དུ་བ་མཐོང་བ་ལ་ཚད་མ་ཡིན་པ་དེ་བཞིན་དུ་ཐམས་ཅད་ལ་ཡིན་པར་འགྱུར་རོ། །དེས་ན་གལ་ཏེ་རྟགས་ཀྱི་མངོན་སུམ་གྱིས་ལྐོག་ཏུ་གྱུར་པ་ཡང་འགྲུབ་ན་ཡང་དེའི་ཚེ་ལྐོག་ཏུ་གྱུར་པ་ཐམས་ཅད་གྲུབ་པར་འགྱུར་རོ། །དེ་ལྟ་ཡིན་
ན་ཅི་སྙམ་ན། །ཐམས་ཅད་དོན་ཀུན་རིགས་པར་འགྱུར། །ཞེས་གསུངས་སོ། །འབྲེལ་པ་མེད་ཕྱིར་ཞེས་བྱ་བ་ནི་གཞན་གྱིས་དོགས་པ་སྟེ། ཐམས་ཅད་རིགས་པར་འགྱུར་བ་མིན་ནོ། །འབྲེལ་པ་མེད་པའི་ཕྱིར་ཞེས་བྱ་བའི་གཞུང་འདིས་ནི་དྲན་པ་མེད་པ་ཡང་ཉེ་བར་མཚོན་པའོ། །ལན་ནི་འོ་ན་ཞེས་བྱ་བའོ། །

དེ་ལྟར་རང་རིག་པས་ཡུལ་རྣམ་པ་གཉིས་གྲུབ་པར་དམ་བཅས་ཏེ། རྣམ་པར་རྟོག་པ་དང་མི་རྟོག་པ་གཉིས་ཐ་དད་པར་བསྒྲུབ་པས་འོངས་པ་དེའི་རང་བཞིན་གྱི་རྗེས་སུ་དཔག་པ་ལ་ལོག་པར་རྟོགས་པ་གཞན་དག་ཀྱང་བཀག་ནས་སྐབས་སུ་བབ་པ་མཇུག་སྡུད་པ་བརྗོད་པ་ནི་དེའི་ཕྱིར་
ཞེས་བྱ་བའོ། །གལ་ཏེ་ཡུལ་གྱི་དབྱེ་བ་བརྗོད་པར་བྱ་བ་ཡིན་ལ་དེ་ནི་རྣམ་པ་གཅིག་གིས་ཀྱང་འགྲུབ་པ་མ་ཡིན་ནམ། དེས་ན་ནུས་པ་ལ་སོགས་པ་རྣམ་པ་བཞི་ཉེ་བར་བཀོད་པས་ཅི་བྱ་སྙམ་དུ་བསུ་ནས་རེ་ཞིག་བརྗོད་མ་ཐག་པ་གསུམ་ནི་གཏན་ཚིགས་གསུམ་ལ་ལྟོས་ནས་ཡིན་ནོ་ཞེས་སྟོན་པ་ནི་
འདིས་ནི་ཞེས་བྱ་བ་སྟེ་འདུ་བའི་རང་བཞིན་ཉེ་བར་བཀོད་པས་སོ། །གལ་ཏེ་དཔེ་དང་འདྲ་བ་ཉིད་ཅེས་བྱ་བ་གཏན་ཚིགས་གསུམ་གའི་ཡང་ཡུལ་མ་ཡིན་ནམ། དེ་ཇི་ལྟར་ན་འདིས་ནི་འབྲས་བུའི་གཏན་ཚིགས་ཀྱི་ཡུལ་བསྟན་ཏོ་ཞེས་བརྗོད་ཅེ་ན། བདེན་ཏེ་འདྲ་བ་ནི་གཉིས་ཏེ་དངོས་པོའི་དང་ཆོས་ཙམ་གྱི་
སྟེ་ཐ་སྙད་ལས་ཡིན་ནོ། །འབྲས་བུའི་གཏན་ཚིགས་ལས་ནི་མེ་ལ་སོགས་པའི་དངོས་པོ་ཉིད་དཔེ་ལ་མཐོང་བ་དང་འདྲ་བར་རྟོག་པའི་ཕྱིར་དངོས་པོ་ལ་བརྟེན་པ་བརྗོད་ལ། རང་བཞིན་ནམ་མི་དམིགས་པ་ལ་ནི་ཆོས་ལ་བརྟེན་པ་ཉིད་དོ། །དེ་ལ་དང་པོ་ནི་ཆོས་ཅན་གྱི་རང་བཞིན་ལས་ཐ་དད་པར་རང་གི་ངོ་བོ་སྣང་
བའི་ཕྱིར་ན་དེ་ལ་བརྟེན་པའི་འདྲ་བ་ཡང་དངོས་སུ་མཐོང་བར་རྣམ་པར་གཞག་གོ། །ཆོས་ཙམ་གྱིས་ནི་དེ་ལས་བཟློག་པའི་ཕྱིར་ན་བཏགས་པ་ཙམ་ཡིན་ནོ། །གལ་ཏེ་ཡང་དེ་ཁོ་ནར་འདྲ་བ་ཐམས་ཅད་བཏགས་པ་ཁོ་ན་ཡིན་པ་དེ་ལྟ་ན་ཡང་རྟོགས་པ་དང་དངོས་པོ་ལ་བརྟེན་པར་རློམ་པའི་ཕྱིར་ན་འདྲ་བའི་བློས་ནི་
དངོས་པོ་ལ་བརྟེན་པའི་འདྲ་བ་ཉིད་དུ་ཡུལ་དུ་བྱེད་པ་ཡིན་ནོ། །དེས་ན་དེ་ཙམ་གྱི་འབྲས་བུའི་གཏན་ཚིགས་ཀྱི་དབང་དུ་བྱས་ནས་འདྲ་བའི་རྣམ་པར་བརྗོད་པར་འོས་པ་ཡིན་ནོ། །དེ་བཞིན་དུ་སྒྲའི་ཡུལ་ཉིད་ཀྱང་སྒྲ་ལས་བྱུང་བའི་ཤེས་པས་རྟོགས་པར་བྱ་བ་ཡིན་ནོ་ཞེས་བྱ་བ་ནི་ཤིང་ལ་སོགས་པའི་ཚིག་བརྗོད་པ་
ལས་ཡལ་ག་ལ་སོགས་པ་དང་ལྡན་པའི་དོན། སྒྲ་ལས་བྱུང་བའི་ཤེས་པ་ལ་རྟོག་པ་ན་དེའི་ཡུལ་དུ་རྣམ་པར་གཞག་པ་ཡིན་ནོ། །དེས་ན་དེའི་ཡུལ་ཉིད་ནི་དེའི་རྟོགས་པ་ལ་སྣང་བ་ཉིད་དེ་ཙམ་དང་རྗེས་སུ་འབྲེལ་པ་ཡིན་པས་ན། དེའི་ཁྱབ་པར་བྱེད་པ་དང་གོ་བར་བྱ་བ་ཡང་ཡིན་ནོ། །དེ་ལ་སྒྲ་ལས་བྱུང་

བའི་ཤེས་པས་རྟོགས་པར་བྱ་བ་ཞེས་བྱ་བ་ནི། སྒྲ་ལས་བྱུང་བའི་རྟོགས་པ་ལས་སྡང་བ་ཉིད་དོ་ཞེས་བྱ་བའི་དོན་ཏོ། །དེ་ཉིད་བརྗོད་པ་ནི་སྒྲ་ལས་བྱུང་བའི་ཤེས་པ་དེ་ཉིད་ཀྱང་ཞེས་བྱ་བ་སྟེ། ཆོས་ཅན་གྱི་ཆོས་སྣང་བ་བསྟན་པར་བལྟ་བར་བྱ་སྟེ། སྒྲ་ལས་བྱུང་བའི་རྟོགས་པ་ལ་སྣང་བ་ནི་སྣང་བ་ཅན་གྱི་དོན་སྒྲའི་
རྟོགས་པའི་ཡུལ་ཉིད་དུ་རྟོགས་པར་བྱེད་པ་ཡིན་ནོ། །དོན་གང་ཞིག་ཤེས་པ་གང་ལ་སྣང་བ་ཅན་དེ་ནི་དེའི་ཡུལ་ཡིན་ཏེ། དཔེར་ན་དབང་པོའི་ཤེས་པ་ལ་སྣང་བ་ཅན་གྱི་རང་གི་མཚན་ཉིད་དེའི་ཡུལ་ཡིན་པ་བཞིན་ནོ། །ཕྱིར་མངོན་པར་འདོད་པ་ལ་ཡང་སྒྲ་ལས་བྱུང་བའི་ཤེས་པ་ལ་སྣང་བ་ཅན་ཡིན་ནོ་ཞེས་བྱ་བ་ཐ་
སྙད་སྒྲུབ་པའོ། །གལ་ཏེ་མེའི་ཚིག་གི་དོན་འབྲས་བུའི་གཏན་ཚིགས་ཀྱི་ཡུལ་མ་ཡིན་ནམ། གང་གིས་ན་སྒྲའི་ཡུལ་ཉིད་ཀྱིས་རང་བཞིན་གྱི་གཏན་ཚིགས་ཁོ་ནའི་ཡུལ་དུ་བརྗོད་པར་ཁྱད་པར་ཡང་ཅི་ཞིག་ཡོད་སྙམ་ན། དེ་ལྟ་ནི་མ་ཡིན་ཏེ། གཏན་ཚིགས་གཞན་ལ་ལྟོས་ནས་ཁྱད་པར་ཡོད་པའི་
ཕྱིར་རོ། །དཔེར་ན་འདི་ན་མེ་ཡོད་དོ་ཞེས་བྱ་བ་འདིར་དུ་བ་ལ་སོགས་པ་ལ་ལྟོས་པ་དེ་བཞིན་དུ་ཤིང་ལ་སོགས་པའི་ཚིག་ཐོས་པ་ན་ནི་ཡལ་ག་དང་ལྡན་པ་ལ་སོགས་པའི་སྤྱི། དེའི་ཡུལ་ཅན་གྱི་ཐ་སྙད་དུ་བྱ་བ་ལ་གཏན་ཚིགས་གཞན་ལ་མི་ལྟོས་ཏེ་དེའི་རྣམ་པར་སྣང་བ་ཙམ་གྱིས་དེ་བཞིན་དུ་རྣམ་པར་འཇོག་པའི་
ཕྱིར་རོ། །ངག་གི་དོན་ལ་ནི་ཐམས་ཅད་དུ་སྒྲུབ་པ་དང་རྗེས་བརྗོད་པ་ཡོད་པའི་ཕྱིར་ན་རང་བཞིན་ཁྱད་པར་ཅན་གྱི་རྗེས་སུ་དཔག་པ་ཡང་གཞན་ལ་ལྟོས་པ་མེད་དོ། །དཔེར་ན་བ་ལང་འདི་ནི་དཀར་པོ་ཡིན་ནོ། །བ་ལང་ཁྱེར་ལ་ཤོག་ཅིག་ཅེས་བྱ་བ་འདིར་བ་ལང་རྗེས་སུ་བརྗོད་ནས་དཀར་པོའི་ཐ་སྙད་དུ་ཡུལ་དུ་རུང་
བར་སྒྲུབ་པའི་ཕྱིར་རོ། །རྟོགས་པ་བཞིན་ནོ། །ཁ་ཅིག་དུ་ནི་ཁྱད་པར་གཞན་ཡང་རྟོགས་ཏེ། དཔེར་ན་བ་མེན་ནི་བ་ལང་དང་འདྲའོ་ཞེས་བྱ་བ་འདིར་མིང་ཙམ་གྱིས་གྲུབ་པའི་བ་མེན་ལ་བ་ལང་དང་འདྲ་བར་རྟོགས་པར་བྱེད་དེ་བ་ལང་འདྲ་བའི་ཐ་སྙད་ཀྱི་ཡུལ་དུ་རུང་བར་བསྒྲུབ་པའི་ཕྱིར་རོ། །ཁྱད་པར་དེ་ཉིད་སྟོན་
པ་ནི་འདི་ལྟར་ཞེས་བྱ་བའོ། །ཧི་ཞེས་བྱ་བ་ནི་ལོགས་སུ་གསལ་བ་ཞེས་བྱ་བའི་དོན་འདི་ལ་ཡིན་ནོ། །ཉེ་བར་འཇལ་བ་ཞེས་བྱ་བ་ནི་ཇི་སྐད་བརྗོད་པ་ཉེ་བར་འཇལ་བ་དག་གིས་སོ། །དེ་ལྟར་སྤྱིར་ངེས་པ་ན་བ་མེན་མཐོང་བས་ཁྱད་པར་གྱི་མཐར་ཐུག་པར་བརྗོད་པ་ནི་འདི་ནི་ཞེས་བྱ་བའོ། །དེ་ལ་བ་མེན་གྱི་

རང་གི་ངོ་བོ་ལ་ཡང་རྗེས་སུ་དཔག་པ་འཇུག་པ་དང་འདྲ་བ་ལ་ཡང་མངོན་སུམ་འཇུག་པར་དོགས་པ་བཟློག་པའི་དོན་དུ་དེའི་ངོ་བོ་མངོན་སུམ་དུ་ཞེས་གསུངས་སོ། །འདི་ནི་བྲམ་ཟེའི་ལུགས་ཀྱིས་འདི་དེ་དང་འདྲ་བ་ཞེས་བྱ་བ་མི་འདྲ་བའི་ཁྱད་པར་ཅན་གྱི་བ་མེན་འཛིན་པར་བྱེད་
པ་རྣམ་པར་རྟོག་པ་དང་བཅས་པ་ནི་མངོན་སུམ་གྱི་ཚད་མ་ཉིད་ཡིན་ལ། དེ་འདི་དང་འདྲའོ་ཞེས་བྱ་བ་ནི་ཉེ་བར་འཇལ་བ་ཡིན་ཏེ། དེ་ལྐོག་ཏུ་གྱུར་པའི་ཆོས་དང་ཆོས་ཅན་རྟོགས་པའི་ཕྱིར་རོ། །དེས་ན་ཇི་ལྟར་འདྲ་བ་སྒྲ་ལས་བྱུང་བའི་ཤེས་པའི་སྤྱོད་ཡུལ་ཡིན་སྙམ་དུ་དོགས་པ་བསུ་ནས་འདི་ལྟར་
ཞེས་གསུངས་སོ། །དོན་གཅིག་པ་ཉིད་ཡིན་ལ་ཞེས་བྱ་བ་ནི་གཉིས་ཀ་ལ་བརྟེན་པའི་འདྲ་བ་སྟོན་པའི་ཕྱིར་རོ། །འོན་ཀྱང་ཚིག་ཚུལ་ཙམ་ཞིག་ཐ་དད་པ་ཡིན་ཏེ། དཔེར་ན་གཅིག་གི་སྤུན་ཟླ་ཉིད་རྟོགས་ན་གཞན་གྱི་ཡང་སྤུན་ཟླ་ཉིད་རྟོགས་པ་བཞིན་ནོ། །དེ་ལ་ཡང་གཞན་གྱི་སྤུན་ཟླ་ཉིད་དོན་གྱིས་གོ་བས་
རྟོགས་པ་ཡིན་ནོ་སྙམ་ན་མ་ཡིན་ཏེ། དོན་ཐ་དད་པའི་ཕྱིར་རོ། །རྟོགས་པའི་ཚུལ་ཐ་དད་པ་ཙམ་གྱིས་དོན་ཐ་དད་པ་ནི། ཨུ་པ་གོའི་བུ་དང་ཨུ་པ་གོ་ལས་སྐྱེས་པ་ཞེས་བྱ་བ་དང་། ཆུང་མ་དང་བཙུན་མོ་ཞེས་བྱ་བ་ལ་སོགས་པ་ལ་ཡང་དེ་ལྟར་ཐལ་བའི་ཕྱིར་རོ། །དེ་ལ་གལ་ཏེ་འདི་དེ་དང་འདྲ་བ་ཡིན་ནོ། །
ཞེས་བྱ་བ་མངོན་སུམ་ཉིད་ཡིན་ན་དེའི་ཚེ་ཡིན་ལ་རག་ན། འོན་ཀྱང་དེ་འདི་དང་འདྲ་བ་ཞེས་བྱ་བའམ་དོན་དེ་ཉིད་ཡིན་ཏེ། དེས་ན་མངོན་སུམ་གྱིས་གྲུབ་པ་ལ་ཉེ་བར་འཇལ་བས་བརྟགས་པས་ཅི་ཞིག་བྱ། གྲུབ་པའི་མཐའ་ནི་མངོན་སུམ་ནི་རྟོགས་པ་མེད་པ་ཁོ་ན་མངོན་སུམ་ཡིན་པའི་ཕྱིར་དེས་ནི་བ་ལང་ངམ་བ་
མེན་གྱི་རང་བཞིན་ངོ་བོ་ཙམ་ཞིག་རྟོགས་པ་ཡིན་ནོ་ཞེས་བྱ་བ་ནི་ཕྱེད་སྔ་མའི་དོན་ཏོ། །ཕྱེད་ཕྱིས་མ་འཆད་པ་ནི་དེའི་རྗེས་སུ་བྱེད་པའི་ཞེས་བྱ་བའོ། །འདི་ལྟར་དེའི་རྗེས་སུ་བྱེད་པ་ཞེས་བྱ་བའི་མིང་ཙམ་གྱི་འདྲ་བ་ནི་གཉི་ག་ལ་གནས་པའི་ཕྱིར་རོ། །གལ་ཏེ་དེ་ལྟ་ན་ཡང་གང་གིས་ཁྱེད་ཀྱང་རྗེས་སུ་དཔག་
པ་དོན་དུ་གཉེར་བ་མངོན་སུམ་གྱིས་ཅི་སྟེ་མི་འཛིན་སྙམ་ན་མངོན་སུམ་གྱིས་ནི་ཞེས་གསུངས་སོ། །གཅིག་གིས་སྙམ་དུ་བསམས་པ་ཡིན་ནོ། །གལ་ཏེ་ཡང་མངོན་སུམ་གཉིས་ཀྱིས་གཉི་གའི་རང་བཞིན་འཛིན་པ་དེ་ལྟ་ན་ཡང་གཉི་ག་ལ་གནས་པའི་འདྲ་བ་ནི་གཅིག་གིས་ཀྱང་རྟོགས་པར་མི་ནུས་ཏེ། གཉིས་

པ་མཐོང་བ་མེད་པའི་ཕྱིར་རོ། །དེས་ན་རང་བཞིན་གྱི་གཏན་ཚིགས་ཁོ་ནས་རྟོགས་པ་ཡིན་ནོ་ཞེས་གནས་སོ། །རྗེས་སུ་དཔག་པའི་རྣམ་པ་བརྗོད་པ་ནི། དེ་ནི་འདི་དང་འདྲ་བ་ཞེས་བྱ་བའོ། །གལ་ཏེ་དེའི་རྣམ་པ་ཡོད་པ་ཁོ་ན་འདྲ་བ་མ་ཡིན་ནམ། ཇི་ལྟར་རྟགས་དང་རྟགས་ཅན་གྱི་དངོས་པོ་ཡིན་སྙམ་ན།
འདྲ་བའི་ཐ་སྙད་ཙམ་ཞེས་སྨོས་སོ། །སྦྱོར་བ་ནི་གང་ཞིག་གང་གི་རྣམ་པར་འཛིན་པ་དེ་ནི་དེ་ཐམས་ཅད་ནི་དེ་དང་འདྲ་བའོ་ཞེས་ཐ་སྙད་དུ་བྱ་བ་ཡིན་ཏེ། དཔེར་ན་གཡས་པ་དང་གཡོན་པའི་མཛུབ་མོ་གཉིས་ཕན་ཚུན་བཞིན་ནོ། །བ་ལང་དང་བ་མེན་ཡང་དེ་བཞིན་དུ་བྱ་བའོ། །མ་ངེས་པ་ནི་མ་ཡིན་ཏེ་འདྲ་
བའི་ཐ་སྙད་ཀྱི་རྒྱུ་མཚན་དེ་ཙམ་དུ་ཟད་པའི་ཕྱིར་རོ། །སྒྲ་ལས་བྱུང་བའི་རྟོགས་པ་ལ་སྣང་བས་རྣམ་པ་འདྲེས་པར་འཛིན་པའི་ཕྱིར་མ་གྲུབ་པ་མ་ཡིན་ཏེ། ཕྱི་རོལ་གྱི་ཐ་སྙད་ཉམས་པ་ཡང་མ་ཡིན་ཏེ་སྣང་བ་དང་རྣམ་པར་བརྟགས་པ་ངག་གཅིག་ཏུ་བྱས་པའི་ཕྱིར་རོ། །འོ་ན་དེའི་ཚེ་རྣམ་པར་རྟོག་པ་ཉིད་ཀྱི་ཆོ་
འཕྲུལ་ཡིན་པའི་ཕྱིར་དངོས་པོ་མཐོང་བ་མེད་པ་ན་གང་དང་གཅིག་ཏུ་བྱེད་པ་ལས་ཐ་སྙད་བྱེད་ཅེ་ན། དེ་ལྟ་བུའི་ཤེས་པའི་ཞེས་བྱ་བ་ལ་སོགས་པའོ། །འདི་དེ་དང་འདྲ་བའོ། །དེ་འདི་དང་འདྲ་བའི་ཞེས་བྱ་བའི་རྟོགས་པ་གཉིས་ཀྱི་རྒྱུ་མཚན་དུ་གྱུར་པ་ཞེས་བྱ་བ་དྲུག་པའི་བསྡུ་བའོ། །གང་གི་ཕྱིར་ཉམས་
སུ་མྱོང་བའི་སྒོ་ནས་དེ་འདྲ་བའི་རྣམ་པར་རྟོག་པ་སྐྱེ་བར་འགྱུར་བ་གོང་དུ་གཉིས་ལ་དེ་ལྟ་བུའི་རང་བཞིན་གྱི་ཁྱད་པར་ཡོད་པ་ནི་རྒྱུའི་ཁྱད་པར་གྱི་ནུས་པ་ཉིད་ལས་ཡིན་ནོ་ཞེས་བྱ་བའི་དོན་ཏོ། །འོ་ན་འདྲ་བའི་ཐ་སྙད་ལ་ཉམས་སུ་མྱོང་བ་ཉིད་ཚད་མར་འགྱུར་མོད། འདྲ་བ་གཉིས་བདག་གིས་མཐོང་ངོ་སྙམ་
པའི་རྣམ་པར་རྟོག་པའི་རང་གི་བྱེད་པ་ནི་དེ་ཉིད་ལ་སྒྲོ་འདོགས་པའི་ཕྱིར་རོ་སྙམ་ན། བདེན་ཏེ་གསལ་བའི་གནས་སྐབས་ན་ནི་དེ་ཁོ་ནར་ཡིན་ནོ། །ལྐོག་ཤལ་ལ་སོགས་པས་བ་ལང་ཉིད་དུ་ཐ་སྙད་འདོགས་པ་ཡང་རྨོངས་པ་ཁོ་ན་མ་ཡིན་ནོ། །དེའི་ཕྱིར་བློ་གསལ་བ་ནི་མངོན་སུམ་ཁོ་ན་འདྲ་བ་འགྲུབ་
ལ་གཞན་ལ་ནི་རྗེས་སུ་དཔག་པ་ལས་ཐ་སྙད་ཙམ་སྒྲུབ་པ་ཡིན་ནོ། །དེས་ན་ཉེ་བར་འཇལ་བ་ནི་ཅི་ཡང་བྱར་མེད་དོ། །མིང་དང་མིང་ཅན་གྱི་འབྲེལ་པ་རྟོགས་པས་ནི་ཉེ་བར་བསྟན་པའི་ངག་གིས་བསྐྱེད་པ་འབྲེལ་པ་འཛིན་པའི་འདྲ་བ་ལས་ཡིན་པའི་ཕྱིར། རྗེས་སུ་དཔག་པར་གསལ་བ་ཡིན་ནོ། །དཔེ་

མེད་པའི་ཕྱིར་མ་ཡིན་ནོ་སྙམ་ན། དེ་ལྟ་མ་ཡིན་ཏེ་གང་ཞིག་བ་ལང་དང་འདྲ་བ་དེ་ནི་བ་མེན་གྱི་མིང་གི་བརྗོད་པར་བྱ་བ་ཡིན་ཏེ། དཔེར་ན་ཉེ་བར་བསྟན་པའི་ངག་གི་གནས་སྐབས་ཀྱི་རྣམ་པར་རྟོག་པ་ལ་སྣང་བ་བཞིན་ནོ། །འདི་ཡང་དེ་དང་འདྲ་བ་མིན་ཞེས་བྱ་བ་ཡིན་པའི་ཕྱིར་རོ། །
རྣམ་པར་རྟོག་པའི་ཡུལ་ཐམས་ཅད་འདོད་པའི་སྒྲས་བརྗོད་པར་རུང་བ་ནི་མི་མཐུན་པའི་ཕྱོགས་ལ་འཇུག་པའི་གནོད་བྱེད་ཡིན་ནོ། །དེ་བས་ན་མ་ངེས་པ་མ་ཡིན་ནོ། །གལ་ཏེ་དེ་ལྟ་ན་དཔེའི་དུས་བཞིན་དུ་རྣམ་པར་རྟོག་པའི་ཡུལ་ཉིད་ལ་སྒྲ་འཇུག་པར་འགྱུར་ལ། སྣང་བ་དང་རྣམ་པར་བརྟག་པར་བྱ་བ་གཅིག་ཏུ་
བྱེད་པ་ལས་འཇུག་པ་ནི་དེ་ལྟ་བུའི་ཡོད་པ་ན་མི་སླུ་བ་དང་ལྡན་པ་ཡང་ཡིན་ནོ། །དེས་ན་སྒྲ་རྣམས་ཕྱི་རོལ་གྱི་ཡུལ་ཅན་ནི་མ་ཡིན་ནོ་ཞེ་ན། འདི་ནི་དེ་བཞིན་དུ་ཡིན་ནོ་ཞེས་མཇུག་བསྡུ་བ་སྟེ། བརྗོད་པ་ནི་དེའི་ཕྱིར་སྒྲའི་ཡུལ་ནི་ཞེས་བྱ་བའོ། །གལ་ཏེ་གཞན་དོན་རྗེས་དཔག་གང་ཡིན་པ། །སྤྱི་ནི་དེ་ཡི་སྤྱིའི་ཡུལ་
ཡིན། །ཞེས་བརྗོད་པ་མ་ཡིན་ནམ། དེ་ཇི་ལྟར་ན་སྒྲ་ཙམ་གྱི་ཡུལ་སྤྱོད་ཅེ་ན། དེ་ནི་ཞེན་པའི་ཡུལ་ལ་ལྟོས་ནས་བརྗོད་པ་ཡིན་ཏེ། སྒྲ་ལས་བྱུང་བའི་རྟོག་པའི་ཡུལ་སྣང་བ་ཉིད་ནི་རང་གི་རྣམ་པ་རང་གི་མཚན་ཉིད་དུ་གྱུར་པ་ཁོ་ན་ཡིན་ནོ། །དེ་ལ་ཐ་སྙད་དུ་བྱ་བའི་སྤྱི་ནི་གཞན་གྱི་དོན་གྱི་རྗེས་སུ་དཔག་པའི་སྤྱོད་ཡུལ་
ཡིན་པའི་ཕྱིར་འགལ་བ་མེད་དོ། །རྣམ་པར་རྟོག་པ་དངོས་པོའི་ཡུལ་ཅན་ཡིན་པ་ཉིད་ནི་དངོས་སུ་འགོག་པ་མ་ཡིན་སྙམ་དུ་བརྒྱ་ལ་ཐེ་ཚོམ་ཟའོ་སྙམ་ན། སྒྲ་སྨོས་པས་ནི་ཞེས་གསུངས་སོ། །རྒྱུ་མཚན་གཞན་ཡང་ཡོད་པ་ན་ཞེས་བྱ་བ་ལ་སོགས་པ་ཞེས་བྱ་བ་ནི། དངོས་པོ་མེད་པ་སྤྱིའི་ཆོས་ནི་མི་དམིགས་
པའི་ཡུལ་ཡིན་ནོ་ཞེས་བྱ་བའི་དོན་ཏོ། །གལ་ཏེ་ཡོད་པའི་རྣམ་པར་ཤེས་པས་ནི་རེ་ཞིག་ཡོད་པ་ཉིད་དུ་ཐ་སྙད་དུ་བྱ་བ་མ་ཡིན་ནམ། མེད་པ་ནི་འགར་ཡང་ནུས་པ་ཡོད་པ་མ་ཡིན་ནམ། དེས་ན་གང་ལ་བློ་མེད་པ་ཇི་ལྟར་ཡིན་ཞེ་ན། དེ་ལ་ཞེས་གསུངས་ཏེ། བློ་མེད་པའི་ཡུལ་ལའོ། །མ་ཡིན་འཇུག་
པས་ཟླ་བའི་ཤེས་པ་ལ་མི་དམིགས་པར་བསྟན་པས་ལན་བཏབ་པ་ཡིན་ནོ། །ས་ཕྱོགས་ལ་སོགས་པའི་རང་བཞིན་གྱིས་ངེས་པའི་རྣམ་པ་ཅན་ཡིན་པའི་ཕྱིར་རོ། །དེ་ཉིད་བརྗོད་པ་ནི་དེས་ཞེས་བྱ་བའོ། །ངེས་པའི་རྣམ་པ་ཅན་གྱི་དོན་གྱིས་བསྐྱེད་པའི་ཤེས་པ་ནི་བདག་ཉིད་ངེས་པའི་རྣམ་པ་ཅན་ཁོ་ནར་

རང་རིག་པས་ཉམས་སུ་མྱོང་བ་ཡིན་པའི་ཕྱིར། འདི་ཙམ་གྱིས་འདི་མི་དམིགས་ལ་གཞན་ནི་མ་ཡིན་ནོ། །འདི་ལ་བདག་ཞུགས་ཀྱི་གཞན་ནི་མ་ཡིན་ནོ་ཞེས་བྱ་བར་སྒྲུབ་པ་དང་འགོག་པའི་རྣམ་པར་རྟོག་པ་གཉིས་འཕངས་པ་ཡིན་ནོ་ཞེས་རིགས་སོ། །འབྲས་བུ་བརྗོད་པ་ནི་དེས་ཞེས་བྱ་བའོ། །དངོས་
པོའི་རྟོགས་པ་ནི་རྣམ་པ་གཉིས་ཏེ། གཅིག་གི་རང་བཞིན་སྒྲུབ་པ་དང་། གཞན་འགོག་པའོ། །སྐབས་སུ་བབ་པའི་རྣམ་པ་གཉིས་ལ་ཡང་རྣམ་པ་གཉིས་ཏེ། ཡིན་ནོ་ཞེས་བྱ་བ་རྣམ་པ་གཞན་མེད་པར་སྟོན་པའི་དོན་དུ་ཡིན་ནོ། །འདི་སྐད་དུ་རྣམ་པ་གཞན་མེད་པར་ཡང་སྟོན་པ་ཡིན་ནོ་ཞེས་བཤད་
པ་བཞིན་ནོ། །མངོན་སུམ་ཉིད་ཀྱིས་ཞེས་བྱ་བ་ནི་སྒྲུབ་པའི་རྣམ་པར་རྟོག་པའི་མངོན་སུམ་གཞན་མ་ཡིན་ལ། དགག་པའི་རྣམ་པར་རྟོག་པ་ཡང་དངོས་པོ་མེད་པའི་ཚད་མའི་འབྲས་བུ་འམ། མངོན་སུམ་གཞན་ཉིད་མ་ཡིན་ཏེ། ལྡན་པར་འགྱུར་བའི་ཁྱད་
པར་ཅན་གྱི་དངོས་པོའི་ཉེ་བས་དངོས་པོ་མེད་པའི་གཞལ་བྱ་འཛིན་པར་བྱེད་པ་ཞེས་པའི་དོན་ཏེ། ཐ་དད་པར་སྨྲ་བའི་ཞེས་བྱ་བ་ནི་ཕྱི་རོལ་སྨྲ་བ་ཞེས་བྱ་བའི་དོན་ཏོ། །ཕྱི་རོལ་སྨྲ་བ་ལ་ཐ་དད་པར་སྨྲ་བར་བརྗོད་པ་ནི། ཕྱི་རོལ་དུ་སྨྲ་བ་མེད་ན་མི་འབྱུང་བ་ཉིད་དུ་བསྟན་པའི་དོན་དུའོ། །
ཡང་ན་བློ་ལ་ལྟོས་ནས་ཐ་དད་པའི་ཕྱིར་དེ་ལྟར་བརྗོད་དེ། བློའི་རང་བཞིན་ལ་ནི་ཁྱད་པར་བརྗོད་པར་བྱའོ་ཞེས་བྱ་བའི་དོན་ཏོ། །རྣམ་པ་གཉིས་སུ་རྟོགས་པའི་གཏན་ཚིགས་བརྗོད་པ་ནི། རྟོག་པའི་རྣམ་པ་གཞན་མེད་པའི་ཕྱིར་རོ་ཞེས་བྱ་བ་ཡིན་ནོ། །སྒྲུབ་པ་དང་དགག་པའི་རྟོགས་པ་སྤངས་ནས་བློའི་
རྣམ་པ་གཞན་ནི་ཡོད་པ་མ་ཡིན་ནོ། །ཡང་མངོན་སུམ་ཉིད་ཀྱིས་ཞེས་བྱ་བ་འདི་ལ་གཏན་ཚིགས་སུ་བརྗོད་པ་ཡིན་ཏེ། འདི་འདྲ་བའི་ཡུལ་རྟོགས་པའི་ཞེས་བྱ་བ་ངེས་པའི་ཐབས་ནི་མངོན་ལས་གཞན་ཡོད་མ་ཡིན་ཏེ། གཞན་མེད་པའི་ཕྱིར་དང་དེ་ཉིད་ཀྱིས་ནུས་པའི་ཕྱིར་རོ། །དེ་ལྟར་གང་ལ་བློ་མེད་པ་དེ་
ནི་བལྟར་རུང་བའི་ཁྱད་པར་ཅན་དུ་གྱུར་པ་ན་དངོས་པོ་མེད་པའི་སྒྲུབ་པར་བྱེད་པ་མི་དམིགས་པའི་ཡུལ་ཡིན་ལ་ཁྱད་པར་དང་བྲལ་བ་ནི་ཡོད་པའི་ཐ་སྙད་དགག་པའི་འབྲས་བུ་ཅན་ཡིན་ནོ་ཞེས་བྱ་བར་དགོངས་པའོ། །ཡང་ན་སྒྲའི་རྟོགས་པའི་ཡུལ་ནི་ཉེ་བར་མཚོན་པའི་ཕྱིར་ན་རྣམ་པ་ཐམས་ཅད་དུ་ཐ་སྙད་དུ་རུང་བ་ཉིད་

ནི་རང་བཞིན་གྱི་གཏན་ཚིགས་ཁོ་ན་ལས་ཡིན་ནོ། །འདི་སྐད་བརྗོད་པའི་གཙོ་བོར་གྱུར་པའི་འདྲ་བ་ཉིད་ནི་འབྲས་བུའི་གཏན་ཚིགས་ཁོ་ནའི་ཡུལ་ཏེ། དེས་ན་ཡུལ་ངེས་པ་རྣམ་པ་གསུམ་བརྗོད་པ་ཡིན་ནོ། །ཡང་ན་རྣམ་པ་གསུམ་པ་འདི་ཡང་སྒྲོ་འདོགས་པ་འགོག་པ་ལྷུར་བྱེད་
པའི་གཏན་ཚིགས་ཉིད་ཀྱི་ངེས་པ་ཡིན་ནོ། །འདི་ལྟར་འདྲ་བ་ཉིད་འབྲས་བུའི་ཡུལ་ཡིན་ནོ་ཞེས་བྱ་བ་ནི། དབང་ཕྱུག་ལ་སོགས་པ་མི་འདྲ་བ་དཔོག་པ་བཀག་པའི་ཕྱིར་ན་དངོས་པོ་ལ་སྒྲོ་འདོགས་པ་བཀག་པ་བསྟན་པ་ཡིན་ནོ། །ཐ་སྙད་ཉིད་ནི་རང་བཞིན་གྱི་གཏན་ཚིགས་ལས་ཡིན་ནོ་ཞེས་བྱ་བས་ནི་དངོས་
པོའི་ཆོས་སུ་སྒྲོ་འདོགས་པ་འགོག་པ་བསྟན་ཏེ། །གལ་ཏེ་སྐད་ཅིག་མ་ལ་སོགས་པ་དངོས་སུ་མ་ཡིན་ཡང་རྣམ་པར་རྟོག་པ་མེད་པའི་ཕྱིར་ན་ཐ་སྙད་སྒྲུབ་པར་བྱེད་པར་རྣམ་པར་གཞག་པ་མ་ཡིན་པ་དེ་ལྟ་ན་ཡང་རི་ལ་མེའི་རྣམ་པ་སྤངས་པ་ལྟར། དེའི་མངོན་སུམ་ནི་སྐད་ཅིག་མའི་རྣམ་པ་དང་བྲལ་བར་སྐྱེ་བ་མ་
ཡིན་ཏེ། དེས་ན་དེ་ཁོ་ན་སྐད་ཅིག་མ་ལ་སོགས་པ་སྒྲུབ་པར་བྱེད་པར་ཐ་སྙད་སྒྲུབ་པར་བྱེད་པ་ཁོ་ནའོ། །འདིས་ནི་གང་ཞིག་མངོན་སུམ་ལ་སྣང་བའི་དངོས་པོའི་རང་བཞིན་དེ་ཉིད་ཡོད་པ་མ་ཡིན་པའི་ཕྱིར་སྤྱི་ལ་སོགས་པའི་གཟུང་བ་ནི་མི་དམིགས་པས་ཟིན་པའི་ཕྱིར་མི་སྣང་བ་དགག་པར་བརྗོད་པ་ཡིན་ནོ། །
སྣང་བ་ཉིད་ཀྱང་དེས་ཟིན་པར་མ་གྱུར་ཅིག་ཅེས། གང་ལ་བློ་མེད་པ་ཉིད་མི་དམིགས་པའི་ཡུལ་ཡིན་ནོ་ཞེས་བརྗོད་པ་ཡིན་ཏེ་དེས་ན་སྐུར་པ་འདེབས་པ་བཀག་པ་བསྟན་ཏོ། །མི་དམིགས་པ་མེད་པར་ནི་དགག་པ་འགྲུབ་པ་མ་ཡིན་ནོ། །གང་ལ་མངོན་སུམ་གྱི་བཀག་པ་དེ་ལ་ནི་གཞན་མངོན་སུམ་ཡིན་པའི་
ཕྱིར་དེ་ནི་མ་ཡིན་ནོ། །དེ་ལ་ནི་དེ་ཉིད་མི་དམིགས་པ་ཡིན་ནོ། །རྨོངས་པ་ལ་ནི་དེ་ཉིད་རྟགས་སུ་ཉེ་བར་བཀོད་པ་ཡིན་ནོ། །འོ་ན་ནུས་དང་མི་ཕྱས་ཕྱིར། །ཞེས་བྱ་བ་ཅིའི་དོན་དུ་བརྗོད་ཅེ་ན། སྐབས་སུ་བབ་པ་ཉིད་དྲན་པར་བྱེད་པ་ནི་འདྲ་བ་ཞེས་གསུངས་སོ། །འདྲ་བ་ཉིད་ལ་སོགས་པ་ཆོས་སུ་
བསྟན་པ་ཡིན་ཡང་ཆོས་ཅན་ཉིད་ལ་རྟོགས་པར་བྱའོ། །དེས་ན་འདྲ་བ་ཉིད་ནི་ལྐོག་ཏུ་གྱུར་པའི་རྟོགས་པ་རྗེས་སུ་དཔག་པའི་ཡུལ་ཡིན་ལ། མི་འདྲ་བ་རང་གི་མཚན་ཉིད་ནི་ཅིག་ཤོས་མངོན་སུམ་གྱི་ཡུལ་ཡིན་ནོ། །དེ་བཞིན་དུ་སྒྲའི་ཡུལ་དང་ཡུལ་མ་ཡིན་པ་དང་རྒྱུ་མཚན་གཞན་ཡོད་ན་གང་ལ་བློ་ཡོད་

པ་དང་མེད་ཅེས་བྱ་བ་ལ་ཡང་སྦྱར་བར་བྱའོ། །དེ་ལས་ཅིར་འགྱུར་ཞེ་ན། བརྗོད་པ་དེ་ཡང་དོན་བྱེད་པར་ཞེས་བྱ་བའོ། །དངོས་སུ་ནུས་པ་ནི་རང་གི་མཚན་ཉིད་ཡིན་ལ་བརྒྱུད་པའི་ནུས་པ་ནི་སྤྱིའི་མཚན་ཉིད་དོ། །ཤེས་པ་ཡིན་ནོ་ཞེས་བྱ་བ་འདིས་ནི་ནུས་པ་མ་ངེས་པའི་རྒྱུ་མཚན་ལ་བྱའི་སྐྱེ་བ་ལ་ནི་མ་ཡིན་ནོ་
ཞེས་བྱ་བའི་དོན་ཏོ། །འདྲ་བ་དང་མི་འདྲ་བ་ཉིད་ནི་ནུས་པ་ལས་བྱུང་བ་མ་ཡིན་གྱི་འོན་ཀྱང་ཤེས་པ་ཡིན་ནོ། །དེ་ཡང་མངོན་སུམ་མམ་རྗེས་སུ་དཔག་པ་དེ་ལས་སྐྱེས་པ་ཡིན་ནོ། །རེ་ཞིག་རང་བཞིན་གྱི་གཏན་ཚིགས་ཀྱང་གཞན་ལ་མངོན་སུམ་གྱིས་དངོས་སུ་སྐྱེད་པར་བྱེད་པའི་ཡུལ་མིན་མོད། གང་གི་ཚེ་
རྣམ་པར་རྟོག་པའི་རྣམ་པ་ལ་ཐ་དད་སྒྲུབ་པར་བྱེད་པ་དེའི་ཚེ་ཚུལ་ཇི་ལྟར་ཡིན། དེའི་ཚེ་ནི་རང་རིག་པའི་མངོན་སུམ་ཉིད་ཡིན་ནོ་ཞེ་ན། དེའི་ཚེ་བྱེད་པ་དང་བཅས་པ་ཉིད་དུ་རྟོགས་པ་ཉེ་བར་གཟུང་བས་ཚད་མ་དང་འབྲས་བུ་ལ་བརྟེན་པས་སམ། རྗེས་ལས་སྐྱེས་པའི་རྣམ་པར་རྟོག་པ་ལ་ལྟོས་ནས་ཐ་སྙད་
བྱེད་པ་ལ་ཡིན་ནོ། །དེའི་སྟོབས་ཀྱིས་མངོན་སུམ་ཉིད་དུ་རྣམ་པར་འཇོག་པའི་ཕྱིར་ན་དེ་ཉིད་ལ་མངོན་སུམ་དུ་ཉེ་བར་འདོགས་པ་ཡིན་ནོ། །དེའི་དངོས་སུ་སྐྱེད་པར་བྱེད་པ་ཡིན་ལ། དེའི་དེ་མ་ཐག་པའི་ནི་བརྒྱུད་ནས་སྐྱེད་པར་བྱེད་པ་ཡིན་ནོ། །འདིས་ནི་ཤེས་པ་ཡང་དོན་བྱ་བར་ནུས་པ་ཉིད་ཀྱིས་ཡོད་པ་
ཡིན་ནོ་ཞེས་བསྟན་པ་ཡིན་ནོ། །དེས་ན་ནུས་དང་མ་ནུས་དང་། །ཞེས་བྱ་བ་འདི་ནི་སྤྱིའི་མཚན་ཉིད་ཡིན་ལ། གཞན་མ་དག་ནི་དེའི་དབྱེ་བ་ཡིན་ནོ། །དེ་ཉིད་ཀྱི་ཕྱིར་དེ་བསལ་ན་ཚད་མའི་རྣམ་པར་གཞག་ནས་དེ་རྩོད་པའི་འདི་ནི་གཞལ་བྱ་གཉིས་ཀྱིས་ཚད་མ་གཉིས་གྲུབ་པ་ལ། རྒྱས་པར་རྩོད་པ་གང་
ཡིན་པ་སྤངས་པའི་ཞར་ལ་འོངས་པ་ཡིན་ཏེ་བར་དུ་གཏན་ཚིགས་གསུམ་གྱི་ཡུལ་ངེས་པ་རྣམ་པར་གཞག་ནས་དེ་རྩོད་པའི་ལྷག་མ་བསལ་བར་རྩོམ་པ་ནི་དེ་ལ་ཞེས་བྱ་བའོ། །གང་ལ་མངོན་སུམ་ནི་མེད་པ་དེ་ཞེས་སྐབས་ལས་ཡིན་ནོ། །མངོན་སུམ་ལས་གཞན་ནི་གཞལ་བྱ་ལས་ཏེ་ལྐོག་ཏུ་གྱུར་པ་ཞེས་བྱ་བའི་
དོན་ཏོ། །མངོན་སུམ་གྱི་ཚད་མའི་རྣམ་པ་བརྗོད་པ་ནི་ངས་གསལ་ཞེས་བྱ་བ་སྟེ། མྱོང་བའི་བདག་ཉིད་མངོན་སུམ་ནི། དེ་ལྟར་བདག་ཉིད་རིགས་པ་ཉིད་ཅེས་བྱ་བར་སྦྱར་རོ། །འདི་ཙམ་ཉིད་ཀྱི་ཞེས་བྱ་བར་འདི་ཉིད་ཀྱི་དོན་བརྗོད་པ་ནི། ངེས་པ་ཉིད་དུ་ཞེས་བྱ་བའོ། །འདི་སྐད་བརྗོད་པ་ཡིན་ཏེ།

ལྐོག་ཏུ་གྱུར་པ་ཞེས་བྱ་བ་ཤ་ཟ་དང་འདྲ་བར་རིགས་ངེས་པ་ནི་ཅི་ཡང་མེད་ཀྱི་འོན་ཀྱང་གང་ཞིག་གང་གི་ཚེ་མ་དམིགས་པ་དེའི་ཚེ་ན་ལྐོག་ཏུ་གྱུར་པར་བརྗོད་པ་ཡིན་ནོ། །གཅིག་ལ་ཞུགས་པའི་མངོན་སུམ་འདི་ནི་མི་དམིགས་པ་གཞན་ནི་མ་ཡིན་ནོ་ཞེས་རྣམ་པར་རྟོག་པ་སྐྱེད་པ་ཁོ་ན་
མངོན་སུམ་དང་ལྐོག་ཏུ་གྱུར་པའི་ཡུལ་རྣམ་པར་གཞག་པ་ཡིན་ནོ། །འདི་མ་དམིགས་སོ་སྙམ་པ་ནི་རེས་འགའ་མཐོང་བ་ལ་ཡང་འགྱུར་ཏེ། མེ་ལ་སོགས་པ་ལ་འགྱུར་བ་བཞིན་ནོ། །དེ་ལ་ལྟོས་ནས་ཁྱབ་པ་འཛིན་པར་འཐད་པའི་ཕྱིར་ཇི་ལྟར་རྗེས་སུ་དཔག་པ་མི་འཇུག་པ་ཡིན། དེས་ན་མངོན་སུམ་
ཁོ་ནས་ལྐོག་ཏུ་གྱུར་པ་ཉིད་རྟོགས་སོ་ཞེས་པར་རིགས་སོ། །འོ་ན་ཇི་ལྟར་ན་ལྐོག་ཏུ་གྱུར་པ་ཉིད་ཀྱི་ཆོས་མངོན་སུམ་གྱིས་རྟོགས་པ་དེ་བཞིན་དུ་ཆོས་དེ་དང་ལྡན་པའི་དོན་ཡང་ཡིན་པར་འགྱུར་རོ་ཞེས་བྱ་བའི་དོགས་པ་བཟློག་པའི་ཕྱིར་བཤད་པ་དོན་གྱི་ངོ་བོ་ནི་ལྐོག་ཏུ་གྱུར་པ་ཉིད་དེ་ཞེས་བྱ་བའོ། །ཅིའི་ཕྱིར་ཞེ་ན་
དོན་དེ་ལ་ཞེས་བྱ་བ་ལ་སོགས་པའོ། །དེ་འཇུག་ན་ནི་འདི་མ་དམིགས་སོ་ཞེས་བྱ་བ་ཉིད་དུ་མི་འགྱུར་རོ། །མངོན་སུམ་མངོན་ཤེས་ཞེས་བྱ་བ་ལ་སོགས་པ་ནི་གཞན་གྱིའོ། །འོ་ན་ཇི་ལྟར་དེ་རིག་སྙམ་ན། དེ་རིག་ན་ནི་ཞེས་གསུངས་སོ། །ཁ་ཅིག་གི་ལྟར་ན་ཆོས་དང་ཆོས་ཅན་གྱི་དངོས་པོ་ཐ་དད་པ་ཉིད་ཡིན་
པས་དེའི་དོགས་པ་བསུ་ནས་བརྗོད་པ་ནི་ངོ་བོ་ཉིད་འགྱུར་ཞེས་བྱ་བའོ། །གང་ཞིག་གང་ལས་དོན་གཞན་ཡིན་པ་དེ་ནི་དེའི་ཆོས་མ་ཡིན་ཏེ། དཔེར་ན་གངས་ཅན་ལ་ས་མ་ལ་ཡ་བཞིན་ནོ། །ལྐོག་ཏུ་གྱུར་པ་ལས་ཀྱང་ལྐོག་ཉིད་ཐ་དད་པ་ཡིན་ནོ་ཞེས་བྱ་བ་ནི་ཁྱབ་པར་བྱེད་པ་འགལ་བ་དམིགས་པ་ཐལ་བར་
འགྱུར་རོ། །བཟློག་པ་ནི་གང་ཞིག་གང་གི་ཆོས་ཡིན་པ་དེ་ནི་དེའི་རིག་གི་ངོ་བོ་ཁོ་ན་ཡིན་ཏེ། དཔེར་ན་སྤྱིའི་ཕྱིར་རང་བཞིན་ཉིད་བཞིན་ནོ། །ལྐོག་ཉིད་ཀྱང་ལྐོག་ཏུ་གྱུར་པའི་ཆོས་ཡིན་ནོ་ཞེས་བྱ་བ་ནི་རང་བཞིན་གྱི་གཏན་ཚིགས་སོ། །ཆོས་དང་ཆོས་ཅན་གྱི་དངོས་པོ་ལ་ནི་འདི་འདིའི་ཡིན་ནོ་ཞེས་སྦྱོར་བས་
ཁྱབ་པ་ཡིན་ལ། དེའི་བདག་ཉིད་དང་བྲལ་བའི་ཡུལ་ལ་ནི་རྒྱུ་མཚན་མེད་པའི་ཕྱིར་ན་སྦྱོར་བ་ལོག་པ་ན་རིགས་ཁྱབ་པར་བྱ་བའི་ཆོས་ཆོས་ཅན་གྱི་དངོས་པོ་ལྡོག་པ་ཡིན་ཏེ། །དེས་ན་དེའི་བདག་ཉིད་ཀྱིས་ཁྱབ་པ་ཡིན་ནོ། །དེས་ན་མ་ངེས་པ་མ་ཡིན་ནོ། །དེས་ན་འབྲེལ་པའི་ཕྱིར་ཞེས་བྱ་བ་ནི་གཞན་གྱི་

དོགས་པ་བསུ་བའོ། །ཐ་དད་ཀྱང་འབྲེལ་པ་འགའ་ཞིག་ལ་བརྟེན་ནས་སྦྱོར་བར་འགྱུར་བའི་ཕྱིར་ན་ལྡོག་པ་ལ་རྒྱུ་མཚན་མེད་པ་མ་གྲུབ་པས་ན་ལྡོག་པ་མ་ཡིན་ཏེ། དེས་ན་དེའི་བདག་ཉིད་ཀྱི་ཁྱབ་པ་ག་ལ་ཡོད་དེ་དེའི་ཕྱིར་མ་ངེས་པ་ཉིད་དོ་སྙམ་ན། འདི་ལ་ལན་དུ་འོ་ན་ནི་ཞེས་བྱ་བའི་ཆོས་ཅན་གྱི་རང་བཞིན་ཅན་གྱི་
རང་བཞིན་ལས་ཐ་དད་པར་ཞེས་བྱ་བ་ནི་ངག་གི་ལྷག་མའོ། །དེའི་བདག་ཉིད་མ་ཡིན་པའི་འབྲེལ་པ་གང་ཇི་སྙེད་པ་དེ་ཐམས་ཅད་ནི་འབྲེལ་པ་ཅན་གྱི་རང་བཞིན་གཉིས་མཐོང་བ་མེད་པར་རྟོགས་པར་ནུས་པ་མ་ཡིན་ནོ། །རྣམ་པར་རྟོགས་པས་ནི་གཅིག་རྟོགས་པར་འགྱུར་བའི་ཞེས་བྱ་བ་བཟློག་པའི་མངོན་
སུམ་གྱིས་ཞེས་གསུངས་སོ། །མཐོང་བ་གཉིས་ཉིད་ལ་དངོས་པོ་པའི་འབྲེལ་པ་རྟོགས་པར་ནུས་ཀྱི་རྣམ་པར་རྟོག་པ་ནི་བག་ཆགས་ཙམ་གྱི་དབང་གིས་འབྲེལ་པ་རྟོགས་པའི་ཕྱིར་འགའ་ཡང་ཆོས་དང་ཆོས་ཅན་གྱི་རང་བཞིན་ཐ་དད་པར་རྟོག་པ་མ་ཡིན་ནོ་ཞེས་དོན་གྱིས་འཕངས་པ་ཡིན་ནོ། །དུ་བ་ཡང་རྟེན་
དང་བརྟེན་པར་གྱུར་པའི་དངོས་པོ་རྣམ་ཉིད་ལ་རྟོག་པ་ཡིན་གྱི། ཕན་ཚུན་རང་བཞིན་དབེན་པར་རྟོགས་པ་མེད་པ་ལ་ནི་འདི་ལའོ་སྙམ་པའི་བློ་སུ་ལ་ཡང་མེད་དོ། །དེའི་ཕྱིར་འགྲེལ་པ་གཞན་མི་སྲིད་པ་ཉིད་དེ། དེས་ན་བཟློག་པ་ལ་རྒྱུ་མཚན་མེད་པ་གྲུབ་བོ། །འོན་ཏེ་དེའི་བདག་ཉིད་ལ་ཡང་འདི་ནི་ཆོས་འདི་ནི་ཆོས་
ཅན་ནོ་ཞེས་རྣམ་པར་དབྱེ་བ་མེད་པའི་ཕྱིར། འདིའི་ནས་སྦྱོར་བ་མི་འཐད་པ་ཉིད་དོ་ཞེ་ན། མ་ཡིན་ཏེ་རྟོགས་པས་སྦྱར་བ་ནི་དག་པར་མི་ནུས་པའི་ཕྱིར་རོ། །གཅིག་ཡིན་ཡང་ལྡོག་པའི་དབྱེ་བ་ཡོད་པའི་སྐྱོན་མེད་དོ། །ཡང་འབྲེལ་པ་ཞེས་བྱ་བ་ནི་གཞན་གྱི་དབང་ཡིན་ལ། དེ་ཡང་རེ་ཞིག་སྐྱེ་བར་ནི་མ་ཡིན་ཏེ་
ཁས་མི་ལེན་པའི་ཕྱིར་དང་། མངོན་སུམ་དང་མི་དམིགས་པ་གསུམ་མི་འཇུག་པའི་ཕྱིར་རོ། །གནས་པས་ཀྱང་མ་ཡིན་ཏེ་ལྟུང་བའི་མེད་པའི་ཕྱིར་རོ། །དེ་མེད་ན་ནི་ལྟོས་པ་ཡང་འགའི་ཡང་མེད་དོ། །དེའི་ཕྱིར་གལ་ཏེ་རྟོགས་པའི་གཞན་གྱི་དབང་ཡང་མ་ཡིན་ན་འདི་འདིའི་ཞེས་བྱ་བ་འདི་ཞེས་བྱས་པ་ཡིན། དེ་
ཉིད་ཀྱི་ཕྱིར་འོ་ན་ནི་མངོན་སུམ་གྱིས་ཞེས་གསུངས་ཏེ། ཐམས་ཅད་ཀྱི་ཚེ་ཞེས་བྱ་བ་ལྷག་མའོ། །དེ་མེད་ཀྱང་རེས་འགའ་མཐོང་བ་དེའི་རང་བཞིན་གྱི་དབང་དུ་རྟོགས་པར་ཇི་ལྟར་འགྱུར་སྙམ་དུ་དགོངས་པའོ། །དེའི་ཕྱིར་ཁོ་བོ་ཅག་ལ་གཅིག་ཏུ་བསྒྲུབས་པས་ཅི་ཞིག་བྱ་སྟེ། ཐ་དད་ཀྱང་འགྲུབ་བྱ་འགྲུབ་པའི་

ཕྱིར་རོ་ཞེས་སྟོན་པ་ནི་དངོས་པོ་དེ་དང་འབྲེལ་པའི་ཞེས་བྱ་བའོ། །ཡང་ན་གཞན་དང་འབྲེལ་པ་ཉིད་དུ་རྟོགས་ན་ཆོས་རྟོགས་པར་འགྱུར་ལ། གཞན་དང་འབྲེལ་པར་འགྱུར་བའི་རང་བཞིན་ནི། གཞན་རྟོགས་པ་མེད་པར་མི་རྟོགས་པ་ཁོ་ནའོ། །དེས་ནི་ཆོས་མངོན་སུམ་དུ་གྱུར་པས་ཆོས་
ཅན་ཡང་མངོན་སུམ་དུ་འགྱུར་རོ་ཞེས་བྱ་བའི་དོན་ཏོ། །ལྷག་མ་ནི་རྟོགས་པར་བླའོ། །འདིར་སྨྲས་པས་ཞེས་བྱ་བའི་གྲུབ་པའི་མཐའི་ནི་འདི་ཡིན་ཏེ། ཆོས་དང་ཆོས་ཅན་གྱི་དངོས་པོ་འདི་ནི་རྟག་པ་ཉིད་ཡིན་ལ། ཆོས་གཅིག་ཉིད་ལ་ཡང་རྣམ་པར་རྟོག་པ་ཉིད་དེ། དཔེར་ན་སྔོན་པོའི་སྔོན་པོ་ཉིད་དོ་ཞེས་
རྣམ་པར་རྟོག་པ་ན་ཐ་དད་པ་ལྟ་བུ་དང་གཅིག་པ་ལྟ་བུར་སྣང་ངོ་། །དེ་བཞིན་དུ་རྣམ་པར་དཔྱོད་པས་ན་སྔོན་པོའི་རང་བཞིན་དེ་ཉིད་སྔོན་པོ་ཉིད་ཡིན་ནོ་ཞེས་རྣམ་པར་རྟོག་ན་ཐ་དད་པ་མེད་པ་ལྟ་བུ་དང་། དུ་མ་ལྟ་བུར་སྣང་ངོ་། །དེ་ལ་གལ་ཏེ་དེ་མ་ཐག་པའི་རྟོགས་པ་ལ་ལྟོས་ནས་བརྗོད་ན་ནི། དེའི་ཚེ་ཐམས་
ཅད་གྲུབ་པ་ལ་སྒྲུབ་པ་ཁོ་ནའོ། །རྟོགས་པ་དང་པོ་ལ་ལྟོས་ནས་ནི་ཐ་སྙད་དུ་བྱ་བ་གཅིག་གི་རང་བཞིན་མེད་པ་ཁོ་ན་སྟེ། མ་རིག་པའི་དབང་གིས་བསལ་བ་ལ་དངོས་པོའི་ཆར་ལྷག་པར་ཞེན་ཀྱང་དངོས་པོར་རྟོགས་པ་ལ་ལྟོས་པ་ཉིད་ནི་མ་ཡིན་ནོ། །སྔོན་པོ་ཉིད་དུ་རྟོགས་པ་ལ་ཡང་སྔོན་པོའི་དངོས་པོ་ཉིད་
རྟོགས་པ་ཡོད་པ་མ་ཡིན་ནོ། །འོན་ཏེ་སྔོན་པོ་ཉིད་དུ་རྟོགས་པ་ན་སྤྱིར་རྣམ་པར་རྟོག་པ་ཅན་འཕངས་པ་ཉིད་ཡིན་ནོ། །འོ་ན་ནི་དེ་དེ་བཞིན་དུ་ལྐོག་ཏུ་གྱུར་པ་ཉིད་རྟོགས་པ་ལ་ཡང་འཕངས་པ་ཡོད་པ་ཉིད་དོ། །དེ་བས་ན་ཁྱད་པར་ལ་སྦྱར་བའི་དོན་དེ་ཉིད་ལ་གཞན་དུ་ཚད་མ་གཞན་འཇུག་པར་རིགས་པ་ཡིན་ནོ་
ཞེས་སྟོན་པ་ནི། རང་རིག་པའི་ཞེས་བྱ་བའོ། །གཞན་མི་དམིགས་སོ་ཞེས་སྤྱིར་རྣམ་པར་རྟོག་ཅེས་པ་ནི་ལྐོག་གྱུར་ཉིད་རྟོགས་པ་ཡིན་པར་བརྗོད་པ་ཡིན་ནོ། །ཕྱིས་ནི་སེར་པོ་ལ་སོགས་པ་མཐོང་བ་ནི་སྔོན་ལྐོག་ཏུ་གྱུར་པ་ནི་འདི་ཡིན་ནོ་ཞེས་ཁྱད་པར་སྦྱོར་བར་བྱེད་དོ། །དེས་ན་འབྲེལ་པ་རྟོགས་པ་
ཡང་འཐད་པ་ཡིན་ནོ། །གལ་ཏེ་དེ་ལྟ་ན་ཡང་གཅིག་གིས་གཉིས་མི་རྟོགས་པའི་ཕྱིར་ཇི་ལྟར་འབྲེལ་པ་རྟོགས་སྙམ་ན། གཉིས་རྟོགས་ན་ཞེས་གསུངས་སོ། །མ་ཡིན་ནོ་ཞེས་བྱ་བ་ནི་གདོན་མི་ཟ་བར་ཞེས་བྱ་བ་ལ་ལྟོས་པའོ། །གཟུགས་དང་རོ་དག་རྟོགས་པ་ཡང་ཐ་དད་པ་ལ་འབྲེལ་པ་འཛིན་པ་

མེད་པ་ནི་མ་ཡིན་ནོ། །དེ་ལ་ཞེས་བྱ་བ་སྐབས་ལ་སྦྱོར་བའོ། །ཇི་ལྟར་འབྲེལ་པ་འཛིན་པའི་མངོན་སུམ་གྱི་གོ་སྐབས་ཡོད་པ་དེ་བཞིན་དུ་རྗེས་སུ་དཔག་པའི་ཡང་ཡིན་ནོ། །འདིས་ནི་བསྒྲུབ་པའི་རང་བཞིན་ཉིད་ལྐོག་ཉིད་དུ་ཉེ་བར་བཟུང་ནས་ཀླན་ཀ་སྤངས་པ་ཡིན་ནོ་ད་ནི་མངོན་སུམ་གྱི་རྟོགས་པ་
བཀག་པ་ཙམ་ལ་བརྟེན་ནས་ཀླན་ཀ་སྤང་བ་བརྗོད་པ་ནི་གཞན་ཡང་ཞེས་བྱ་བ་ལ་སོགས་པའོ། །བཟློག་པ་མིན་ཞེས་བྱ་བ་ནི་དགག་པ་ཙམ་མངོན་སུམ་གྱི་རྟོགས་པ་ལས་དངོས་པོར་རིགས་པ་མ་ཡིན་པའོ། །འགྲེལ་པའི་ཐ་མི་དད་པར་ཞེས་བྱ་བ་ནི་སོ་སོར་སྣང་བ་ཡང་རྣམ་པར་རྟོག་པ་ལ་ཞིབ་མོར་རྟོགས་པ་
མེད་པས་ན་ལྷག་པར་ཞེན་པས་ཐ་དད་པ་མི་རྟོགས་པའི་ཕྱིར་རོ། །མངོན་རྩོལ་གྱི་རྟོགས་པ་དང་བྲལ་བ་ཙམ་ལྐོག་ཏུ་གྱུར་པ་ཡིན་ན་ཆོས་ཅན་འཛིན་པ་ལྟོས་པར་ག་ལ་འགྱུར། གལ་ཏེ་དངོས་པོ་མེད་པ་ཙམ་རང་རིག་པའི་མངོན་སུམ་གྱི་ཡུལ་དུ་ཇི་ལྟར་འགྱུར། རང་རིག་པ་ནི་དངོས་པོའི་ཆོས་ཡིན་པས་དེ་ཉིད་ཡུལ་དུ་
བྱེད་པར་འགྱུར་རོ་ཞེ་ན་གཞན་དུ་ཡང་མངོན་སུམ་གྱི་དངོས་པོ་མེད་པ་འཛིན་པ་ནི་ཟླའོ་རང་བཞིན་ངེས་པ་ཉམས་སུ་མྱོང་བ་ལས་གཞན་མ་ཡིན་ནོ། །འདིས་ནི་གཉིས་མེད་པའི་དངོས་པོ་ནི། དངོས་པོ་སྟོང་པའི་མཚན་ཉིད་དོ་ཞེས་བྱ་བ་ལ་སོགས་པར་ཆོས་ཀྱི་དབྱིངས་དངོས་པོ་མེད་པ་ཙམ་དུ་བཤད་པ་ལ་མངོན་སུམ་
ཉིད་ཉམས་པ་མེད་པར་འགྲུབ་པ་སྟེ། ཐ་སྙད་པ་ལ་ནི་གཞན་མེད་པའི་རྣམ་པར་རྟོག་པ་སྐྱེ་བར་ངེས་པས་དེ་ལྟར་རྣམ་པར་གཞག་པ་ཡིན་ནོ་ཞེས་བསྟན་པ་ཡིན་ནོ། །དེ་ལྟར་དོན་མེད་པ་ཉིད་སྤངས་པ་ན་འབྲེལ་པ་འཛིན་པ་མེད་པའི་ཕྱིར་རྗེས་སུ་དཔག་པར་མི་ནུས་པར་སྔར་བརྗོད་པ་ཉིད་དྲན་པར་བྱེད་པ་ནི་ཅི་སྟེ་ཞེས་བྱ་
བ་ལ་སོགས་པའོ། །འདི་ནི་ཅུང་ཟད་ཀྱང་ཞེས་བྱ་བ་ནི་གྲུབ་པའི་མཐའོ། །འདི་ལ་ཆོས་ལྐོག་ཉིད་ལ་འབྲེལ་པ་འཛིན་པའི་མངོན་སུམ་འཇུག་གམ། དེ་སྟེ་དེ་དང་འབྲེལ་པར་རུང་བའི་དངོས་པོ་ལ་འཇུག་ཅེ་ན་རྣམ་པར་རྟོག་པ་གཉིས་སོ། །རེ་ཞིག་དང་པོ་ནི་རྗེས་སུ་དཔག་པས་ལྐོག་ཉིད་སྒྲུབ་པར་མི་འདོད་པ་དེས་
ན་དེ་ལ་འབྲེལ་པར་རུང་བའི་དངོས་པོ་ལ་འཇུག་ཅེ་ན་རྣམ་པར་རྟོག་པ་གཉིས་སོ། །རེ་ཞིག་དང་པོ་ནི་རྗེས་སུ་དཔག་པས་ལྐོག་ཉིད་སྒྲུབ་པར་མི་འདོད་པ་དེས་ན་དེ་ལ་འབྲེལ་པ་འཛིན་པའི་མངོན་སུམ་གྱིས་ཅི་ཞིག་བྱ། དབང་པོ་ལས་འདས་པ་ཉིད་ཡིན་ཡང་ཞེས་བྱ་བ་འདིས་ནི་ཕྱོགས་གཉིས་པ་མ་གྲུབ་པར་

བརྗོད་པ་ཡིན་མོད། གང་གི་ཚེ་མངོན་སུམ་ཉིད་གྱུར་པ་ཡང་ཞེས་འདོན་པ་དེའི་ཚེ་ནི་ལྐོག་ཉིད་ནི་རང་རིག་པ་ཡིན་ན་ཡང་ཞེས་བྱ་བའི་དོན་ཏོ། །ཡང་ན་སྔ་མ་བཞིན་ལ་སོགས་པའི་ཆོས་ཅན་མངོན་སུམ་དུ་གྱུར་པ་གང་ཡིན་པ་དེ་ལའོ། །ཆོས་ཅན་གྱི་རང་བཞིན་ཡང་རྗེས་སུ་དཔག་པར་ཅིའི་ཕྱིར་
འདོད་སྙམ་ན་དོན་གྱི་ཞེས་བྱ་བ་ལ་སོགས་པ་གསུངས་སོ། །དེ་བས་ན་ལྐོག་ཉིད་ལ་སྔར་ཞུགས་པ་ལ་ལྟོས་པས་ནི་ཅི་ཡང་བྱར་མེད་དོ། །ཡང་དེ་ཉིད་ཀྱང་རྣམ་པ་གཞན་གྱིས་གྲུབ་པོ་ཞེས་སྟོན་པ་ནི་གཞན་ཡང་ཞེས་བྱ་བའོ། །ཤུགས་ཀྱིས་རྣམ་པར་གནས་པ་ཞེས་བྱ་བ་ནི་རང་ཉིད་ཐ་དད་ཀྱི་ཡུལ་དུ་འགྱུར་
གྱི་ཚད་མ་གཞན་ལ་ལྟོས་པ་ནི་མ་ཡིན་ནོ་ཞེས་བྱ་བའི་དོན་ཏོ། །དེའི་ངོ་བོ་ལ་རྗེས་སུ་དཔག་པ་མི་ནུས་པ་ཉིད་ཅེས་བྱ་བ་ནི་མེ་ལ་སོགས་པ་བསྒྲུབ་པར་བྱ་བ་དེའི་རང་གི་ངོ་བོ་དེ་ལ་འཇུག་པ་དེ་ནི་ཞུགས་པ་སྟེ། དེ་ཡུལ་དུ་བྱེད་པའོ། །དེ་ལ་ནུས་པ་མེད་པའོ། །མེད་ཀྱི་བྱ་བ་ནི་ཆོས་ཙམ་ལ་འབྲས་བུ་མེད་པའི་
ཕྱིར་རོ། །འོ་ན་ཇི་ལྟར་དེ་ལ་ལྟོས་སྙམ་ན་དེ་ནི་མི་འདོད་ཀྱང་ཞེས་བྱ་བའོ། །རྗེས་སུ་དཔག་པ་གྲུབ་མོད། ཚད་མ་ནི་མ་ཡིན་ནོ་སྙམ་ན། འདིས་ནི་ཞེས་གསུངས་སོ། །རྗེས་སུ་དཔོག་པ་ལས་ལྐོག་ཏུ་གྱུར་པའི་དངོས་པོ་གྲུབ་མོད་ཚད་མ་ལ་ཅི་འབྱུང་སྙམ་ན། ལྐོག་གྱུར་ཞེས་གསུངས་སོ། །འདིའི་
ཞེས་བྱ་བ་ནི་རྗེས་སུ་དཔག་པའིའོ། །དེ་དང་འབྲེལ་པར་ཞེས་བྱ་བ་ནི་ལྐོག་ཏུ་གྱུར་པའི་དངོས་པོ་དང་འབྲེལ་བའོ། །དངོས་པོ་དང་འབྲེལ་བ་ལས་འཐོབ་པར་བྱེད་པའི་ཤེས་པ་ནི་ཚད་མ་ཡིན་ནོ། །དེ་ཡང་དངོས་པོ་དང་འབྲེལ་པའི་རྟགས་ལས་སྐྱེས་པ་ཉིད་ཀྱི་ཡིན་ནོ་སྙམ་དུ་དགོངས་པའོ། །དེ་ཉིད་འཆད་པ་ནི་
དངོས་དང་འབྲེལ་བ་ཙམ་གྱིས་ནི། །ཞེས་བྱ་བའོ། །དེའི་ཕྱིར་གང་ཞིག་དངོས་པོ་དང་འབྲེལ་བ་གྲུབ་པ་དེ་ཉིད་ཚད་མ་ཡིན་ནོ། །ཚད་མ་ཡིན་པས་ན་རྟགས་ལས་རིག་པ་ཡིན་ཏེ། ཚད་མ་ཉིད་དུ་རྣམ་པར་གནས་པར་འགྱུར་རོ་ཞེས་བྱ་བའི་དོན་ཏོ། །ལྷག་མ་དག་ཅེས་བྱ་བ་ནི་བརྒལ་བ་དང་ལྡན་ནོ། །སྔར་ཉིད་
ཞེས་བྱ་བ་ནི། ཐ་སྙད་ལས་ནི་ཚད་མ་ཉིད་ཅེས་བྱ་བ་དེར་བསྟན་ཟིན་ཏོ། །གལ་ཏེ་ཞེས་བྱ་བ་ལ་སོགས་པས་ནི་ཡང་མ་ངེས་པ་ཉིད་བརྗོད་པའི་དངོས་པོ་ཡིན་པ་ཙམ་གྱིས་ནི་འདྲ་བ་དང་མི་འདྲ་བའི་དངོས་པོ་རྩོམ་པར་བྱེད་པ་མ་ཡིན་ནོ་ཞེས་བྱ་བའི་དོན་ཏོ། །གྲུབ་པའི་མཐའི་དོན་ནི་འདི་ཡིན་ཏེ་རྣམ་པ་ཐམས་ཅད་དུ་

དེ་ལྟར་མ་ཡིན་མོད་ཚོགས་པ་ཡོད་ན་འགྱུར་བ་ཡིན་ནོ། །རྣམ་པ་གཉིས་གྲུབ་པ་སྟེ་དེ་ཙམ་གྱིས་ཀྱང་ཉམས་པ་མེད་པ་ཡིན་ནོ། །ཕྱིར་བསྟན་པར་བྱའོ་ཞེས་བྱ་བ་ནི། དེ་བཞིན་བརྡ་ལ་ལྟོས་མེད་པར། །དངོས་ནུས་ཉིད་ལ་མིག་བློར་འགྱུར། །ཞེས་བྱ་བ་དང་། འབྲེལ་པ་ཅན་གྱི་ཆོས་ལ་ནི། །ཆོས་ཅན་
ལས་ནི་རྟོགས་སྐྱེས་གང་། །ཞེས་བྱ་བར་རོ། །གཞན་ཡང་འདྲ་བ་དང་མི་འདྲ་བ་དང་ཉམས་སུ་མྱོང་བའི་རྣམ་པར་གཞག་པ་ནི་ཚད་མ་གཉིས་མེད་པར་འགྱུར་བ་མི་འོངས་སོ་ཞེས་སྟོན་པ་ནི་གཞལ་བྱ་གཉིས་གྲུབ་པས་ནི་ཞེས་བྱ་བའོ། །དེ་ལྟར་གཉི་ག་ཚད་མ་ཡིན་ནོ་ཞེས་མ་འབྲེལ་བ་རྣམ་པར་བཅད་
པ་གྲུབ་པ་ཡིན་ནོ་ཞེས་གཞན་དང་ལྡན་པ་རྣམ་པར་བཅད་པའི་དབང་དུ་བྱས་ཏེ་བཅད་པ་ནི་གང་གི་ཚེ་ཞེས་བྱ་བའོ། །གང་ཡུལ་དང་མི་ལྡན་པའི་ཤེས་པ་དེ་ནི་ཚད་མ་ཡིན་ཏེ། དཔེར་ན་རི་བོང་གི་རྭའི་ཤེས་པ་བཞིན་ནོ། །མངོན་སུམ་དང་རྗེས་སུ་དཔག་པ་ལས་ཐ་དད་པའི་ཤེས་པའི་ཡུལ་དང་ལྡན་
པ་མ་ཡིན་དོ་ཞེས་བྱ་བ་ནི་ཁྱབ་པར་བྱེད་པ་མེད་པའོ། །མ་ངེས་པ་ཉིད་སྤང་བའི་དོན་དུ་ཁྱབ་པ་བརྗོད་པ་ནི་གཞལ་བར་བྱ་བ་དང་བྲལ་བའི་ཞེས་བྱ་བ་ལ་སོགས་པའོ། །ཅིའི་ཕྱིར་ཞེ་ན། རང་གི་ངོ་བོའམ་སྟེ་ཐུན་མོང་མ་ཡིན་པ་དང་གཞན་གྱི་ངོ་བོ་ཞེས་བྱ་བ་དེ་དང་ཐུན་མོང་དུ་གྱུར་པ་དེ་བཞིན་དུ་གཞལ་བྱ་ཡང་
རྣམ་པ་གཉིས་ཀྱིས་ཁྱབ་པ་ཡིན་ནོ་ཞེས་བརྗོད་ཟིན་པ་ཉིད་དོ། །སྒྲ་ལས་བྱུང་བ་ལ་སོགས་པ་ལ་ནི་འབྲེལ་པ་མེད་པའི་ཕྱིར་ན་དོན་འགའ་ཡང་ཡོངས་སུ་གཅོད་པར་བྱེད་པ་མ་ཡིན་ཏེ། དེས་ན་ཐེ་ཚོམ་ལ་སོགས་པ་དང་། ཐུན་མོང་པ་སེམས་པ་ཅན་ཙམ་ཡོད་ཀྱང་འདིས་ཤེས་པར་བྱེད་པའི་
ཞེས་བྱ་བའི་ཤེས་པ་ནི་ཡོད་པ་མ་ཡིན་ནོ། །གཟུང་བ་དང་འཛིན་པ་ལ་སོགས་པ་དང་བྲལ་བའི་ཕྱིར་ན་དེའི་ཁྱད་པར་ནི་ཚད་མ་ཡིན་ནོ། །དེས་ན་ཤེས་པ་མེད་པའི་ཕྱིར་ན་ཚད་མའི་ཐ་སྙད་ག་ལ་ཡོད། འདིས་ནི་ཚད་མའི་ཐ་སྙད་ལ་ནི་ཡོངས་སུ་གཅོད་པའི་སྒྲུབ་པར་བྱེད་པའི་དམ་པ་ཉིད་ཀྱིས་
ཁྱབ་ལ་ཡོངས་སུ་གཅོད་པ་ཡུལ་ཡོད་པས་ཁྱབ་པ་དེས་ན་གཞལ་བྱ་མེད་ན་ཡོངས་སུ་གཅོད་པར་བྱེད་པ་ཉིད་མེད་པས་ན་ཁྱབ་པར་བྱ་བ་ཚད་མ་ཉིད་ཀྱང་ཟློག་པར་བྱེད་དོ། །དེས་ཁྱབ་པ་གྲུག་པའི་ཕྱིར་མ་ངེས་པ་ཉིད་མ་ཡིན་ནོ། །མ་གྲུབ་པ་ནི་གཉིས་ཀྱིས་ཁྱབ་པའི་གཞལ་བྱའི་ཁྱབ་པར་བྱེད་

པ་མེད་པ་ཉིད་ཀྱིས་སྤངས་པ་ཡིན་ནོ། །ཇི་སྐད་དུ་ཤེས་པ་ཉིད་མེད་པའི་ཕྱིར་གང་ཞིག་ཚད་མར་འགྱུར་ཞེས་བརྗོད་པ་དེ་ལ་ཤེས་པ་ཡོངས་སུ་གཅོད་པར་བྱེད་པ་མེད་མོད་སྙམ་དུ་བསམས་ནས་གཞན་དག་བརྗོད་པ་ནི། བདག་ཡོད་དོ་ཞེ་ན་ཞེས་བྱ་བའོ། །འཇལ་བར་བྱེད་པ་པོ་དེ་ཉིད་ཚད་མ་
ཡང་མ་ཡིན་མོད་དེས་ན་བཟློག་པ་ལ་ཚད་མ་མེད་པ་ཉིད་མ་ཡིན་ནོ་སྙམ་དུ་སེམས་པའོ། །ལན་དུ་དེ་ཉིད་ཅེས་བྱ་བ་སྟེ་བདག་གི་གལ་ཏེ་དེ་ཚད་མའི་རང་བཞིན་ཉིད་དུ་འདོད་ན་དེའི་ཚེ་འདི་ལྟར་འགྱུར་རོ། །འོན་ཏེ་རྣམ་པ་གཞན་དུ་ཡིན་ན་དེའི་ཚེ་བཟློག་པ་ལ་ཚད་མ་མེད་པ་ཉིད་དོ་ཞེས་བྱ་བ་མ་ངེས་པ་ཉིད་མ་ཡིན་ནོ། །
དེའི་ཕྱིར་ཞེས་བྱ་བ་ནི་སྐབས་ཀྱི་དོན་ཉེ་བར་སྡུད་པའོ། །རང་གི་ངོ་བོས་ཞེས་བྱ་བར་ཐུན་མོང་མ་ཡིན་གྱིས་ཏེ། གང་ལ་དངོས་སུ་བསྐྱེད་པའི་ནུས་པ་ཡོད་པའོ། །དེ་ལས་གཞན་དུ་ཞེས་བྱ་བ་ནི་ཐུན་མོང་ཉིད་དུ་སྟེ། གང་ལ་བརྒྱུད་པས་སྐྱེད་པའི་ནུས་པ་ཡོད་པའོ། །དངོས་དང་བརྒྱུད་པས་ནུས་པའི་སྒོ་ནས་ཡུལ་
རྣམ་པར་གཞག་པས་ཅི་ཞིག་བྱ་སྟེ། འདྲ་བ་དང་མི་འདྲ་བ་ཉིད་ཀྱིས་སྣང་བ་ཙམ་གྱི་འགྱུར་ལ་རག་མོད། དེ་ལ་ཡོད་པའི་ཡུལ་ཅན་ནི་མ་ཡིན་ལ། ཡོད་པ་མ་ཡིན་པའི་ཡུལ་ཅན་ནི་ཚད་མ་མ་ཡིན་པའི་ཕྱིར་སྐབས་ཉམས་པ་ཡང་མ་ཡིན་ནོ། །དེ་ལྟ་ན་འོ་ན་ཅི་དེ་ཉིད་ཡོད་པ་དང་མེད་པའི་མཚན་ཉིད་ཡིན་ནམ་
ཞེ་ན། ཁྱེད་ཀྱི་མཚན་ཉིད་ཀྱང་ཅི་ཞིག་ཡིན་ནམ་ཞེ་ན། དོགས་པ་བསུ་ནས་ཡོད་པ་དང་ལྡན་པ་ལ་སོགས་པ་གསལ་བ་གསུངས་པ་ནི་དོན་དམ་དོན་བྱེད་ཅེས་གསུངས་སོ། །དགོངས་པ་ནི་འདི་ཡིན་ཏེ། གང་གི་ཚེ་ཤེས་པ་ལ་དགོངས་སམ་བརྒྱུད་པས་ནུས་པ་ཡོད་པ་དེའི་ཚེ་དེ་ཙམ་ཉིད་ཀྱིས་ཡོད་པ་མ་ཡིན་ལ་
དོན་བྱེད་པ་གཞན་ཡོད་ན་ནི་ང་འཇུག་པར་ཡང་འགྱུར་རོ། །གང་ཞིག་ཤེས་པ་ཙམ་གྱི་དོན་བྱེད་པར་ཡང་མི་རུང་བ་དེ་ནི་མེད་པ་ཡིན་ནོ། །དོན་དམ་པའི་སྒྲའི་རྣམ་པར་བཅད་པ་བརྗོད་པ་ནི། གཞན་ནི་ཀུན་རྫོབ་ཡོད་པ་ཡིན་ཞེས་བྱ་བའོ། །འདིར་གཞན་གྱི་སྒྲ་ནི་ཟླ་བོ་རྗོད་པར་བྱེད་པའོ། །དེས་ན་རི་བོང་གི་རྭ་དང་
ཤད་ལ་སོགས་པ་ཡང་ཀུན་རྫོབ་ཏུ་བརྗོད་པ་ནི་མ་ཡིན་ནོ། །མེད་པ་ནི་ཡིན་པ་ཁོ་ནའོ། །གཞན་ཡང་གང་ལ་འཇིག་རྟེན་རྣམ་པར་དབྱེ་བ་ཡོད་པའི་ཐ་སྙད་དུ་བྱེད་པ་དང་། དོན་དམ་པར་ནི་ཤེས་པ་ཡིན་གྱི་དོན་བྱེད་པར་ནི་ནུས་པ་དེ་ནི་ཀུན་རྫོབ་ཏུ་ཡོད་པ་ཡིན་ལ། དེ་ཡང་གང་ཟག་དང་ཡན་ལག་ཅན་དང་སྤྱི་ལ་

སོགས་པ་ཡིན་ནོ་ཞེས་བྱ་བའི་དོན་ཏོ། །འདིས་ནི་ཞར་ལ་ཐ་ཤལ་གྱི་རྣམ་པར་གཞག་པ་ལ་ལྟོས་ནས་བདེན་པ་གཉིས་རྣམ་པར་གནས་པ་ཡང་སྦྱར་བ་ཡིན་ནོ། །དེ་ཉིད་ཀྱི་ཕྱིར་འདི་ནི་བར་སྐབས་ཏེ་སྐབས་ལས་སྤྲོས་པའི་ཚིགས་སུ་བཅད་པ་ཡིན་ནོ། །དེ་དག་རང་དང་སྤྱི་མཚན་བཤད། །ཅེས་བྱ་བ་ནི།
སྐབས་སུ་བབ་པ་རང་དང་སྤྱིའི་མཚན་ཉིད་བརྗོད་པ་གང་ཡིན་པ་དེ་དག་ནི་ཞེས་འདི་ནི་སྐབས་ཡོངས་སུ་རྫོགས་པར་བསྟན་པ་ཙམ་ཡིན་ནོ། །མཆོག་གི་རྣམ་པར་གཞག་པ་ལ་རྣམ་པར་གཞག་པ་བཟློག་པར་བསམས་ནས། ཇི་སྐད་བརྗོད་པའི་ཀུན་རྫོབ་དང་དོན་དམ་པའི་རྣམ་པར་དབྱེ་བ་མི་བཟོད་པའི་དབུ་
མའི་རྩོད་པ་བླང་བ་བརྗོད་པ་ནི་གལ་ཏེ་ཞེས་བྱ་བ་ལ་སོགས་པའོ། །འདིས་ནི་དངོས་སུ་ཞེས་བྱ་བ་ལ་ཉེ་བར་བརྗོད་པའོ། །དེའི་སྒོ་ནས་ཚད་མ་ལ་ཡང་ཤུགས་ཀྱིས་ཉེས་པ་འགྲུབ་བོ། །དེས་ན་སྐབས་སུ་བབ་པ་ཚད་མའི་མཚན་ཉིད་བསྟན་པ་ལ་གནོད་པ་ཡིན་ནོ། །དེ་ཉིད་འདི་ལྟར་ཞེས་བྱ་བ་ལ་
སོགས་པས་རྒྱས་པར་བསྟན་པར་བྱེད་དོ། །ཚད་མ་དང་གཞལ་བྱ་སྨོས་པ་ནི་དེ་གཉིས་སྐབས་སུ་བབ་པ་ཡིན་པའི་ཕྱིར་རོ། །རྟག་པ་དང་མི་རྟག་པ་བརྗོད་པ་ནི། བསྟན་པའམ་མི་བསྟན་པ་ཡང་རུང་སྟེ། ནུས་པ་སྲིད་པ་པ་ཡིན་ནོ་ཞེས་ཆོས་ཀྱི་སྒོ་ནས་མ་ལུས་པར་བསྟན་པའི་དོན་དུའོ། །ཤེས་པ་
དང་ཤེས་བྱ་སྨོས་པས་ནི་དངོས་པོའི་སྒོ་ནས་མ་ལུས་པར་རྟོགས་པར་བྱ་བའི་དོན་དེ་བེམས་པོ་དང་བེམས་པོ་མ་ཡིན་པའི་ཕུང་པོ་བརྗོད་པར་འདོད་པའི་ཕྱིར་རོ། །ཚད་མ་དང་གཞལ་བྱ་ནི་དེའི་ཁྱད་པར་ཡིན་ཏེ། མ་ལུས་པ་ཉིད་མ་ཡིན་ཡང་སྐབས་སུ་བབ་པ་ཡིན་པའི་ཕྱིར་བརྗོད་པ་ཡིན་ནོ། །དེ་ལྟར་གནོད་པར་
བྱེད་པའི་དམ་བཅས་པ་བྱས་ནས་སྒྲུབ་པར་བྱེད་པ་མེད་པ་ཡང་བརྗོད་པ་ནི། དོན་དུ་བྱ་བ་ཉིད་དུ་ཡང་ཞེས་བྱ་བའོ། །རེ་ཞིག་རྟག་པ་དང་མི་རྟག་པའི་རྣམ་པར་རྟོག་པ་ཉེ་བར་བཟུང་ནས་དེ་ཉིད་འདི་ལྟར་ཞེས་བྱ་བ་ལ་སོགས་པས་སྟོན་པར་བྱེད་དོ། །རྗེས་འགྲོ་ལྡོག་པ་དག་གིས་ནི། །ཞེས་བྱ་བའི་འབྲས་བུ་
ལ་གནས་པའི་རྗེས་སུ་འགྲོ་བ་དང་ལྡོག་པར་རབ་ཏུ་སྦྱོར་བར་བྱེད་པ་རྒྱུ་ལ་གནས་པའི་རྗེས་སུ་འགྲོ་བ་དང་ལྡོག་པ་གང་ཡིན་པ་དེ་དག་གིས་ཁྱབ་པ་ནི་ནུས་པ་ཡིན་ནོ། །དེ་ལ་ལྷག་པའི་སྔར་ཡང་ཡོད་པའི་ཕྱིར་ན་དེ་མེད་པས་རབ་ཏུ་སྦྱར་བ་འབྲས་བུ་མེད་པ་རྟོགས་པར་མི་ནུས་སོ། །དེ་བས་ན་རྟག་པ་ལ་ལྡོག་པ་

མེད་པ་ཡིན་ནོ། །མི་རྟག་པ་ལ་ཡང་དེ་མེད་ན་འབྲས་བུ་མེད་པ་ཡིན་མོད་ཀྱི། དེ་ཡོད་ཀྱང་རེས་འགའ་མེད་པའི་ཕྱིར་རྗེས་སུ་འགྲོ་བ་མ་ཡིན་ནོ། །འདིར་ནི་ཇི་ལྟར་གང་གི་ཚེ་རྗེས་སུ་འགྲོ་བ་དང་ལྡོག་པ་དག་མ་རྟོགས་པའི་ཕྱིར་ན་ནུས་པར་ཐ་སྙད་བྱ་བ་མ་ཡིན་ནོ་ཞེས་བྱ་བའི་ཚུལ་ཡིན་པ་དེའི་
ཚེ་སྒྲུབ་པར་བྱེད་པ་མེད་པ་ཡིན་ལ། གང་གི་ཚེ་རྗེས་སུ་འགྲོ་བ་དང་ལྡོག་པ་དག་མེད་པ་ཁོ་ན་ཡིན་ཏེ། དངོས་པོའི་ཆོས་ནི་རྟག་པ་དང་གཞན་ལས་མི་འདའ་བའི་ཕྱིར་རོ་ཞེས་བརྗོད་པར་འདོད་པ་དེའི་ཚེ་ནི་གནོད་པར་བྱེད་པ་ཉེ་བར་བཀོད་པ་ཡིན་ནོ། །དེ་བཞིན་དུ་གཞན་དག་ཏུ་ཡང་ཅི་རིགས་པར་རྟོགས་པར་བྱའོ། །
དེ་ལྟ་ཡིན་ཡང་གང་ཞིག་གང་དང་རྗེས་སུ་འགྲོ་བ་དང་ལྡོག་པ་མེད་པ་དེ་དག་ནི་དེ་དང་རྒྱུ་དང་འབྲས་བུའི་དངོས་པོ་མ་ཡིན་ནོ། །དཔེར་ན་རྔ་མོ་དང་བོང་བུ་བཞིན་ནོ། །རྟག་པ་དང་མི་རྟག་པའི་ཆོས་དག་ལ་ཡང་གང་ཡང་གང་དང་དེ་དག་ཡོད་པ་མ་ཡིན་ནོ་ཞེས་བྱ་བ་ནི་ཁྱབ་པར་བྱེད་པ་མི་དམིགས་པའོ། །ཡང་གང་གི་ཚེ་
གང་ཞིག་གང་དང་རྗེས་སུ་འགྲོ་བ་རྟོགས་པ་མེད་པ་དེ་ནི་དེ་དང་རྒྱུ་དང་འབྲས་བུའི་དངོས་པོར་རྣམ་པར་མི་གཞག་སྟེ། དཔེར་ན་རྔ་མོ་དང་བོང་བུ་བཞིན་ནོ། །རྟག་པ་དང་མི་རྟག་པའི་ཆོས་དག་ལ་ཡང་གང་ཡང་གང་དང་རྗེས་སུ་འགྲོ་བ་དང་ལྡོག་པ་རྟོགས་པ་ཡོད་པ་མ་ཡིན་ནོ་ཞེས་གང་གི་ཚེ་སྦྱར་བར་བྱས་པ་
དེའི་ཚེ་ནི་རྒྱུ་མི་དམིགས་པའོ། །གལ་ཏེ་རྒྱུ་ལ་བསྙོན་པ་ལ་རྒྱུ་མི་དམིགས་པའོ་ཞེས་བྱ་བ་འདི་ནི་ཁ་ན་མ་ཐོ་བ་དང་བཅས་པ་ཡིན་ལ། ཁྱབ་པར་བྱེད་པ་མི་དམིགས་པ་ཡང་ཁྱབ་པར་བྱ་བ་མེད་པར་རྟོགས་པའི་རྒྱུ་ཉིད་ཡིན་ན་རྟག་པ་ཉིད་དུ་གྱུར་པ་ཡིན་པའི་ཕྱིར། ཇི་ལྟར་རྒྱུ་དང་འབྲས་བུའི་དངོས་པོ་
རྣམས་ལ་བསྙོན་པར་འགྱུར་ལ། རྗེས་སུ་འགྲོ་བ་དང་ལྡོག་པས་ཁྱབ་པར་མཐོང་བའི་ནུས་པ་དེ་ཡང་གང་ཞིག་ཡིན། དེ་ལྟ་ཡིན་ན་ནི་རྣམ་པ་ཐམས་ཅད་དུ་རྒྱུ་དང་འབྲས་བུའི་དངོས་པོའི་འཇིག་པ་མ་ཡིན་ནོ་ཞེ་ན། འདི་ནི་མདུན་དུ་བཤད་པར་བྱའོ། །ལྡོག་པ་མེད་པར་བརྗོད་པ་གང་ཡིན་པ་དེ་ལ་གལ་ཏེ་
རྟག་པ་ལས་དུས་ཀྱི་ཁྱད་པར་གྱིས་ལྡོག་པ་མེད་པ་དེ་ལྟ་ན་ཡང་ཡུལ་གྱི་ཁྱད་པར་འགྱུར་རོ། །རྗེས་སུ་འགྲོ་བ་དང་ལྡོག་པ་དག་ནི་མངོན་སུམ་དང་མི་དམིགས་པ་རྣམ་པ་གསུམ་གྱིས་ངེས་པར་བྱེད་ལ། དེ་ནི་ཇི་ལྟར་དུས་ལ་ལྟོས་ནས་འགྱུར་བ་དེ་བཞིན་དུ་ཡུལ་ལ་ལྟོས་ནས་ཀྱང་ཡིན་ཏེ། ཤིང་ལ་སོགས་

པའི་ཚོགས་ཇི་སྙེད་པ་མེད་པ་གཅིག་ལ་མཐོང་བའི་དུ་བ་གང་གི་ཚེ་དེ་ཉིད་ཀྱི་ཚེ་ཕྱོགས་གཞན་དུ་མེ་དང་བྲལ་བའི་ཚོགས་པ་དེ་སྙེད་ཉིད་ལ་མ་དམིགས་པ་དེའི་ཚེ་ཇི་ལྟར་ཡུལ་ལ་ལྟོས་ནས་ཇི་ལྟར་ལྡོག་པ་མི་འགྲུབ་པ་སྙམ་པའི་དོགས་པ་བསུ་ནས་རྟག་པ་ནི་རྒྱུ་མེད་པ་ཉིད་ཀྱིས་ཏེ། ཡུལ་མ་ཁྱབ་པར་མི་སྲིད་
པར་སྟོན་པ་ནི་རྟག་པ་ཞེས་བྱ་བའོ། །རྒྱུ་ལ་རིག་པ་ནི་སོ་སོར་ངེས་པའི་རྒྱུས་ཡུལ་འགའ་ཞིག་ཏུ་ངེས་པར་བྱེད་པར་འགྱུར་གྱི། དེ་མེད་པའི་ཕྱིར་ན་གཏན་དུ་ཐམས་ཅད་ན་ཡོད་པར་འགྱུར་བའི་ཕྱིར་རེས་འགའ་ཡང་གང་དུ་ཡང་འབྲས་བུ་འཆད་པ་མ་ཡིན་ཏེ་ལྷན་ཅིག་བྱེད་པ་ལ་ལྟོས་པ་མེད་པའི་ཕྱིར་རོ། །དེ་ཉིད་
བརྗོད་པ་ལ་ནི་འབྲས་བུ་འགའ་ལ་ཡང་བྱེད་པ་མེད་པ་ནི་ཞེས་བྱ་བའོ། །གཞན་བསམ་པ་མ་རིག་ན་ཁྱབ་པ་དང་རྟག་པ་ཉིད་སུན་ཕྱུང་བ་ཉིད་ཀྱིས་ན་བཏང་སྙོམས་སུ་བཞག་སྟེ། ཉེས་པ་གཞན་བརྗོད་པ་ནི། དེའི་ཡུལ་ཁྱབ་མེད་ག་ལས་ཡིན། །ཞེས་བྱ་བའོ། །རྟོག་མེད་ལས་ཡིན་ཞེས་བྱ་བས་ནི་གཞན་
གྱིའོ། །འདི་ལྟར་སྣམ་བུ་ལ་སོགས་པའི་ཡུལ་ངེས་པ་ཉིད་དུ་ཡོངས་སུ་བཅད་པ་ཡིན་ནོ་ཞེས་བྱ་བའི་དོན་ཏོ། །ག་ལ་རྟག་ཅེས་བྱ་བ་ནི་རྒོལ་བའོ། །གལ་ཏེ་ཡུལ་གཞན་མ་ཁྱབ་པ་ལ་མ་རྟོགས་པ་ལན་ཡིན་ན། དེའི་ཚེ་དུས་གཞན་དུ་ཁྱབ་པར་ཡང་ཇི་ལྟར་བརྗོད། །དེ་ལ་ཡང་མི་རྟོགས་པ་ནི་ཡོད་
པའི་ཕྱིར་རོ། །དབང་པོའི་རྣམ་པར་ཤེས་པ་ནི་སྐད་ཅིག་མ་ཡིན་པས་ན་དེའི་དུས་ན་ཉེ་བར་གནས་པའི་དངོས་པོ་ཉིད་འཛིན་པས་ན་སྐད་ཅིག་གཞན་དང་བྲལ་བ་ཁོ་ན་འཛིན་པ་ཡིན་ནོ་ཞེས་སྟོན་པར་འགྱུར་རོ། །དེ་བརྗོད་པ་ནི་ཇི་ལྟར་ཁྱབ་བྱེད་ཅེས་བྱ་བའོ། །ད་ལྟར་རྟག་པའི་ཕྱོགས་མི་བཟོད་པར་བྱས་ནས། །
སྟོབས་དང་ལྡན་པའི་རྟག་པའི་ཕྱོགས་ལ་བརྟེན་ནས་སུན་འབྱིན་པར་རྩོམ་པ་ནི་སྐད་ཅིག་ཡིན་ཕྱིར་ཞེས་བྱ་བའོ། །མི་རྟག་པ་ཉིད་ནི་སྐད་ཅིག་མ་ཁོ་ནའི་མཐར་ཐུག་པ་ཡིན་ཏེ། དེ་ལྟ་མ་ཡིན་ན་མཐར་ཡང་འཇིག་པ་མི་འཐད་པའི་ཕྱིར་རོ། །སྐད་ཅིག་མ་བྱ་བ་བྱེད་པའི་དུས་མ་ཡིན་ནོ་ཞེས་བྱ་བ་འདི་ག་ལས་ཤེ་ན། སྐད་
ཅིག་མའི་ཞེས་བྱ་བའི་དངོས་པོ་ཙམ་ནི་སྐྱེ་བ་ཙམ་སྟེ་སྐད་ཅིག་མ་རྣམ་པར་གནས་པ་ཡིན་ཏེ། བྱེད་པའི་དུས་ལ་རེག་པ་མེད་པའི་ཕྱིར་རོ། །གལ་ཏེ་དེ་སྐྱེས་པའི་དུས་ཉིད་བྱེད་པའི་དུས་མ་ཡིན་ནམ་ཇི་ལྟར་འགའ་ཞིག་སྐྱེ་བའི་དེ་མ་ཐག་པར་དེ་སྐྱེ་བ་དེ་བཞིན་དུ་དེ་སྐྱེ་བ་དེ་མ་ཐག་ཏུ་གཞན་སྐྱེ་ཞེས་བྱ་བ་འདི་ཉིད་

རྗེས་སུ་འགྲོ་བ་ཡིན་ལ། གཞན་གྱི་ཚེ་ནི་ལྡོག་པ་ཡིན་ནོ། །ནུས་པ་ཡང་དེ་ཙམ་གྱིས་གྲུབ་པ་ཡིན་ནོ་ཞེས་སྟོན་པ་ནི་གལ་ཏེ་དེའི་དེ་མ་ཐག་ཅེས་བྱ་བའོ། །རྒོལ་བས་བརྗོད་པ་ནི་དེ་ནི་གཞན་གྱི་ཡང་དེ་མ་ཐག་པ་ཡིན་ཕྱིར། དེས་ན་འདི་ནི་བོང་བུ་ལ་སོགས་པ་གཞན་དེའི་ཡང་
འབྲས་བུར་འགྱུར་རོ། །མངོན་པར་འདོད་པས་ལས་གཞན་ཡང་རྒྱུར་ཐལ་ལོ་ཞེས་བྱ་བའི་དོན་ཏོ། །དེ་ཉིད་གསལ་བར་བྱེད་པ་ནི་དངོས་པོ་ཞེས་བྱ་བའོ། །གཞན་གྱིས་བརྗོད་པ་བོང་བུ་ལ་སོགས་པའི་སྐད་ཅིག་དེ་མེད་པར་ཡང་དུ་བ་ལ་སོགས་པ་དེ་ཡོད་པ་ཞེས་དགོངས་པས་སྐད་ཅིག་ལ་ཇི་ལྟར་ཞེས་གསུངས་
སོ། །འགྲེལ་པ་ནི་གོ་བླའོ། །ཅི་སྟེ་ཞེས་བྱ་བ་ནི་གཞན་གྱི་མ་ཡིན་ཞེས་བྱ་བ་ནི་དེ་ལྟ་མ་ཡིན་པའོ། །དེ་ལས་ཐ་དད་པའི་ཞེས་གསུངས་སོ། །ཡོད་པར་ཁས་བླངས་ནས་ཀྱང་སུན་དབྱུང་བར་བརྗོད་པ་ནི་ཡོད་ན་ཡང་ཞེས་བྱ་བའོ། །རྒྱུན་དེ་ཉིད་ཀྱི་ཡིན་གྱི་སྐད་ཅིག་རྣམས་ཀྱི་ནི་མ་ཡིན་ནོ། །དེ་ལྟ་ཡིན་མོད་ཅི་
སྐྱོན་སྙམ་ན་སྐད་ཅིག་རྣམས་ནི་ཞེས་གསུངས་སོ། །གཞན་གྱི་དེ་དང་འབྲེལ་པ་ཅན་ཞེས་སྨྲས་ཏེ། དེ་དག་གི་ཡང་ཞེས་བྱ་བ་ནི་སྐད་ཅིག་རྣམས་ཀྱིའོ། །དེས་ན་མེད་པ་མ་ཡིན་ནོ་སྙམ་དུ་བསམས་པའོ། །མ་ཡིན་ཏེ་ཞེས་བྱ་བ་ནི་དེ་ལྟ་མ་ཡིན་པའོ། །ཐ་དད་པའི་ནི་ཞེས་བྱ་བ་ནི་སྐད་ཅིག་དང་གཞན་དག་ལའོ། །
དེ་ལ་ཡང་ཞེས་བྱ་བ་ནི་རྒྱུན་ལའོ། །ཡང་བཤད་པ་ཞེས་བྱ་བ་ནི་སྐབས་ཀྱི་དོན་སྡུད་པའི་ཚིགས་སུ་བཅད་པའོ། །དེ་ལས་ཞེས་བྱ་བ་ནི་སྐད་ཅིག་རྣམས་ལས་སོ། །དེ་ཉིད་ཅེས་བྱ་བ་ནི། རྒྱུན་དེ་ཉིད་ཡིན་འགྱུར་ན་སྟེ། སྐད་ཅིག་རྣམས་ནི་མ་ཡིན་ནའོ། །སྐད་ཅིག་དེ་དང་འབྲེལ་པ་རྒྱུན་གྱིས་ནུས་པའི་
ཕྱིར་རོ། །གལ་ཏེ་ནུས་པར་རྟོག་བྱེད་ན། །ཞེས་བྱ་བ་ནི་སྐབས་ཀྱི་སྐད་ཅིག་མ་རྣམས་སོ། །འོན་ཏེ་ཡང་རྒྱུན་རྟག་པ་ནི་ལྡོག་པ་མེད་པའི་ཕྱིར་དོན་བྱེད་ནུས་པ་མ་ཡིན་གྱི། མི་རྟག་པ་ཉིད་ཀྱི་རྒྱུན་གཞན་ལ་ལྟོས་ནས་ནུས་པར་འགྱུར་རོ་སྙམ་ན། གལ་ཏེ་རྒྱུན་གཞན་དག་ཏུ་ནི་ཞེས་སྨོས་སོ། །སྐད་
ཅིག་མ་ཉིད་ཀྱི་ཕྱོགས་ལ་ནི་རྒྱུན་ལ་ཡང་གཞན་ཁས་བླངས་ལ་དེ་བཞིན་དུ་དེ་ལ་ཡང་གཞན་ཡིན་པའི་ཕྱིར་ཐུག་པ་མེད་དོ། །དེས་ན་ནུས་པ་ངེས་པ་མ་ཡིན་ནོ། །འབྲས་བུ་ཉིད་དུ་ཡང་ངེས་པར་མི་ཟིན་ཏེ། ཐུག་པ་མེད་པའི་ཉེས་པ་ཉིད་ཀྱི་ཕྱིར་རོ་ཞེས་བརྗོད་པ་ནི། རྒྱུན་ནི་འབྲས་བུ་ཉིད་ཅེས་བྱ་བའོ། །

རྒྱུན་གཞན་འབྲས་བུ་ཉིད་དུ་ཁས་ལེན་ན། སྐད་ཅིག་མ་ཞེས་བྱ་བ་སྐད་ཅིག་ཉིད་ཀྱི་ཕྱོགས་ལ་ནི་སྔ་མ་བཞིན་འབྲས་བུ་ཉིད་མེད་དོ། །དེ་ལྟ་ན་ཡང་ཐུག་པ་མེད་པར་ཇི་ལྟར་འགྱུར་སྙམ་ན། གང་གི་ཕྱིར་རྒྱུན་འདི་ཡང་རྒྱུན་གཞན་གྱི་འབྲས་བུ་ཉིད་བྱེད་པར་འགྱུར་ཏེ། རྟེན་ཡིན་པར་འགྱུར་རོ། །དེ་ལྟར་
རྟག་པ་དང་མི་རྟག་པའི་རྣམ་པར་རྟོག་པ་བཀག་པ་ན་ཤེས་པ་དང་ཤེས་བྱའི་རྣམ་པར་རྟོག་པའི་སྐབས་སུ་བབ་བོ། །དེ་ལ་ཤེས་པ་གཉིས་རྒྱུ་དང་འབྲས་བུར་འགྱུར་རམ། ཤེས་བྱ་གཉིས་སམ་ཤེས་པ་དང་ཤེས་བྱ་གཉིས་ཡིན་ཞེས་རྣམ་པར་རྟོག་པའོ། །དེ་ལ་ཤེས་བྱའི་རྣམ་པར་རྟོག་པ་ལ་ནི།
ཉེས་པའི་ཚོགས་སྔ་མ་ཉིད་ཡིན་ཏེ། རྟག་པ་དང་མི་རྟག་པའི་རྣམ་པར་རྟོག་པ་ལས་མ་འདས་པའི་ཕྱིར་རོ། །ཉེས་པ་གཞན་བརྗོད་པས་ཤེས་པ་དང་ཤེས་བྱའི་རྣམ་པར་རྟོག་པ་ལ་འཇུག་པ་ནི་གཞན་ཞེས་བྱའོ། །འདི་ལ་ས་བོན་གྱི་ཡོད་པའི་ཐ་སྙད་ནི་མྱུ་གུའི་འབྲས་བུས་བྱས་པ་ཡིན་ལ། མྱུ་གུའི་
ཡང་ལྗང་པས་ཡིན་ཏེ། དེ་བཞིན་དུ་སྔ་མ་སྔ་མའི་ཡོད་པ་ཕྱི་མ་ཕྱི་མའི་འབྲས་བུ་བྱེད་པར་ནུས་པས་ཡིན་ནོ། །དེ་ལ་རེ་ཞིག་ལྗང་པ་མེད་པའི་མྱུ་གུ་ཙམ་མོ། །དེ་སྲིད་དུ་ནི་དེ་མེད་པ་ཁོ་ནའོ། །དེ་མེད་ན་ནི་སྔ་མ་ཡང་མེད་པར་འགྱུར་ཏེ། འབྲས་བུ་མེད་པའི་ཕྱིར་རོ། །གལ་ཏེ་སྐད་ཅིག་སོ་སོ་ལ་འདྲ་བ་དང་མི་
འདྲ་བ་སྐྱེ་བ་རྒྱུན་མི་འཆད་པའི་ཕྱིར་ན་ཇི་ལྟར་འགའ་ཞིག་འབྲས་བུ་དང་འབྲལ་བར་འགྱུར་སྙམ་ན། བདེན་ཏེ་འོན་ཀྱང་རྒྱུན་ཏེ་དེ་ལ་གནས་པའི་འབྲས་བུ་ཐམས་ཅད་ནི་སྐད་ཅིག་ལ་མཐར་ཕྱིན་པ་ནི་མ་ཡིན་ཏེ། དེ་ཉིད་ཀྱི་ཚིག་གང་ལ་འབྲས་བུ་སྨིན་པ་ལོངས་སྤྱོད་པར་ཐལ་བའི་ཕྱིར་རོ། །དེས་གང་ལ་སྔོན་གྱི་
འབྲས་བུ་མེད་པ་དེ་ཁོ་ན་མེད་པར་འགྱུར་ལ། དེ་མེད་ན་ནི་དེའི་སྔ་མ་ཡང་མེད་པར་འགྱུར་བའི་ཕྱིར་རོ། །དེ་བཞིན་དུ་སྔ་མ་སྔ་མ་མེད་པར་ན་ཐམས་ཅད་ཇི་སྲིད་པ་མེད་པར་འགྱུར་རོ། །འོན་ཏེ་ཡང་འབྲས་བུ་ནི་འབྲས་བུ་གཞན་མ་མཐོང་བར་ཡང་འབྲས་བུ་ཉིད་ལས་མི་ཉམས་ཏེ་དེ་ལས་འབྱུང་བར་མཐོང་བའི་ཕྱིར་རོ། །
དེས་ན་དོན་བྱ་བའི་མཚན་ཉིད་ཀྱི་ཡོད་པ་མ་ངེས་ཀྱང་མ་བྱུང་བ་ལས་བྱུང་བ་ཉིད་དུ་གྲུབ་པ་ཁོ་ན་སྔ་མ་ནུས་པར་རྣམ་པར་འཇུག་པར་བྱེད་པ་ཡིན་ནོ་ཞེ་ན། མ་ཡིན་ཏེ་དོན་གྱི་ནུས་པ་མ་ངེས་ན་འབྲས་བུ་ཉིད་དུ་ངེས་པ་ཉིད་མི་རུང་བའི་ཕྱིར་རོ། །མ་བྱུང་བ་ལས་བྱུང་བ་ཞེས་འབྱུང་བའི་སྒྲས་ནི་ནུས་པ་ཉིད་བརྗོད་པ་ཡིན་ནོ། །

སྐྱེས་པ་ཙམ་ཡིན་ནོ་ཞེ་ན། སྐྱེས་པ་ཡང་སྔར་མེད་པ་ཡོད་པ་མ་ཐོབ་པ་ཁོ་ན་མ་ཡིན་ནམ། ཡོད་པའང་ཡོད་པ་མ་ཡིན་པའི་ཕྱིར་ལྷག་པར་སྨྲས་པས་ཅི་བྱ། རང་གི་ངོ་བོ་ཐོབ་པ་ཡིན་ནོ་ཞེ་ན། དངོས་པོའི་རང་གི་ངོ་བོ་ཞེས་བྱ་བ་ཡང་ནུས་པ་ཉིད་མ་ཡིན་ནམ་རང་གི་ངོ་བོ་ནི་སྔོན་པོ་ལ་སོགས་
པ་ཡིན་ལ། ནུས་པ་ནི་ལྡོག་པ་ཡིན་ནོ་ཞེ་ན། སྐྲ་ཤད་ལ་སོགས་པ་ཡང་རང་གི་ངོ་བོ་ཐལ་བར་འགྱུར་རོ། །ནུས་པ་ལ་མི་འཁྲུལ་པའི་སྔོན་པོ་ལ་སོགས་པ་ནི་རང་གི་ངོ་བོ་ཡིན་ནོ་ཞེ་ན། འོ་ན་ནི་ནུས་པ་མ་ངེས་ན་རང་གི་ངོ་བོ་མ་ངེས་པའི་ཕྱིར་སྒྲ་ལ་སོགས་པ་ལྟར་འབྲས་བུ་ཉིད་མ་ཡིན་ནོ་ཞེས་བྱ་བར་འགྱུར་རོ། །དེས་ན་
སྔ་མ་ལ་ནུས་པའི་མཚན་ཉིད་ཀྱི་ཡོད་པ་ཉིད་ཇི་ལྟར་འགྱུར། འོན་ཏེ་མཐའ་དག་པའི་ཕྱིར་ན་སྔ་མ་ཐམས་ཅད་ཕྱི་མ་ཕྱི་མ་ལ་ནུས་པ་ཡོད་པ་ཉིད་དོ། །འོན་ཀྱང་འབྲས་བུ་མ་མཐོང་བར་ངེས་པ་ཙམ་མི་འཇུག་པར་ཟད་པ་ཡིན་ནོ། །ངེས་པ་མེད་པ་ཉིད་ནི་དངོས་པོ་མེད་པ་ཡང་མ་ཡིན་ལ། དེ་ཡང་མཐོང་བ་ཇི་ལྟ་
བ་བཞིན་འཇུག་པ་ཡིན་ནོ། །ཐ་མའི་ནུས་པ་འབྲས་བུ་མ་མཐོང་བས་ནི། འབྲས་བུ་མཐོང་བ་སྔ་མའི་ཚོགས་མཐའ་དག་རྒྱུད་ཉིད་ལས་ཉམས་པར་བྱེད་ནུས་པ་ཡང་མ་ཡིན་གྱི་འོན་ཀྱང་ཕྱིར་ལ་དེའི་དབང་གིས་ཕྱི་མ་ལ་ཡང་ནུས་པ་ཉིད་དུ་རྟོགས་པ་ཡིན་ནོ། །ཡང་ན་གོམས་པའི་གནས་སྐབས་འཐོབ་པའི་
མངོན་སུམ་གསལ་བས་ནི་འབྲས་བུ་མ་མཐོང་ཡང་ནུས་པ་མིན་ནོ་ཞེ་ན། འདི་མཐའ་དག་ནི་གསོག་ཡིན་ཏེ། འདི་ལྟར་མཐའ་དག་པ་ཞེས་བྱ་བ་འདི་ནི་ཕྱིས་ངེས་པའི་འབྲས་བུ་ཡིན་ན། ཕྱི་མ་ཕྱི་མ་ལ་ལྟོས་ནས་ནི་ངེས་པའི་གོ་སྐབས་ཡོད་པ་མ་ཡིན་ནོ། །ངེས་པ་ཡང་མེད་ལ་ཡོད་པར་ཐ་སྙད་ཀྱང་བྱེད་དོ་
ཞེས་བྱ་བ་འདི་ནི་གཟུ་ལུམས་ཡིན་ནོ། །དེས་ན་ཐེ་ཚོམ་བསྐྱེད་པ་ཉིད་ལ་གནོད་པ་ཡིན་ཏེ། ངེས་པ་མེད་པ་ཁོ་ནར་བརྗོད་པར་འདོད་པའི་ཕྱིར་རོ། །ངེས་པ་ཡང་འགའ་ཞིག་ཏུ་འཇུག་པར་ནུས་པ་མ་ཡིན་ཏེ། ཕྱི་མ་ཕྱི་མ་ལ་ལྟོས་པའི་ཕྱིར་རོ། །ཐ་མའི་ནུས་པ་མཐོང་ན་ནི། སྔ་མ་ཐམས་ཅད་
ནུས་པ་མེད་པར་འགྱུར་བས་ཕྱི་མའི་ནུས་པ་བསྒྲུབ་པར་ཇི་ལྟར་འགྱུར། འདིས་ནི་གོམས་པའི་གནས་སྐབས་ལ་བརྟེན་པ་ཡང་བསལ་བ་ཡིན་ཏེ། འགའ་ཞིག་གི་ཚེ་མངོན་སུམ་གྱིས་བཟུང་བ་ཡང་ནས་ཡང་དུ་བཟུང་ན་གོམས་པ་ཞེས་བརྗོད་པ་ཡིན་ན་དེ་ཡང་ཡོད་པ་མ་ཡིན་ནོ། །སྔ་མ་ཡོད་པ་ཡིན་ནོ། །

དེས་ན་ཐེ་ཚོམ་འདི་ཡང་ངོ་ཤེས་པ་ལ་སོགས་པ་ལྟར་རྟོགས་པ་ཙམ་ཡིན་ནོ་ཞེས་རིགས་པ་ཡིན་ནོ། །གཉི་ག་ལ་ནུས་པ་མཚུངས་པར་འགྲུབ་པ་ཡིན་ན་འདི་རིགས་པས་ལོག་པར་རྟོགས་པ་མེད་པར་འགྱུར་བ་ཡིན་ནོ། །དེའི་ཕྱིར་ཤེས་པ་ལས་གཞན་པའི་འབྲས་བུས་ནི། སྔ་མ་ཡོད་པར་མི་འགྲུབ་པོ་ཞེས་བྱ་
བར་གནས་སོ། །འོ་ན་ཤེས་པའི་མཚན་ཉིད་ཀྱིས་འགྱུར་རོ། །དེ་ཡོད་པ་ནི་འབྲས་བུ་གཞན་ལ་ངེས་པར་ལྟོས་པ་མ་ཡིན་ནོ། །ཕྱི་རོལ་གྱི་སྐྲ་ལ་སོགས་པ་སྣང་བ་ལྟར་གསལ་བ་འབའ་ཞིག་གི་རང་བཞིན་ཅན་ཤེས་པའི་གསལ་བ་ནི་ཡོད་པ་ལ་འཁྲུལ་པ་མི་སྲིད་དོ། །གལ་ཏེ་དེའི་རྣམ་པ་ཅན་གྱི་ཤེས་པ་
ཙམ་སྐྱེས་པ་ཡིན་པའི་ཕྱིར་ན་འདི་ནི་ཕྱི་རོལ་གྱི་སྐྲ་ལ་སོགས་པ་སྣང་བ་ཉིད་མ་ཡིན་པས་དེ་ཇི་ལྟར་སྐྲར་སྣང་བ་ཡོད་པ་ལས་འཁྲུལ་བར་ཇི་ལྟར་འགྱུར། དེས་ན་གལ་ཏེ་སྣང་བ་དེ་ཡོད་པ་ལ་འཁྲུལ་ན། དེའི་ཚེ་ཤེས་པའི་ཡོད་པ་ཉིད་ལ་འཁྲུལ་པར་ཐལ་བར་འགྱུར་རོ་ཞེ་ན། བརྗོད་པ་སྐྲར་སྣང་བའི་ཤེས་པ་
གཞན་དང་ཐུན་མོང་པ་ཉིད་ཡིན་ཡང་། འདི་སྐྲར་སྣང་བ་མ་ཡིན་ནོ་ཞེས་བྱ་བ་འདི་ཇི་ལྟར་རྟོགས་པར་བྱ་ནུས་པ་མེད་པ་ཉིད་ལས་སོ། །དེས་ན་ལྷག་པར་ཞེན་པས་བྱས་ནས། སྐྲ་སྣང་བའི་ཐ་སྙད་དང་། ཡོད་པའི་ཐ་སྙད་དུ་གྱུར་པ་དེའི་ཕྱིར་ཉེས་པ་མེད་དོ། །ཤེས་པའི་རང་བཞིན་ཉིད་བརྟགས་ནས་ནི་གསལ་བ་
ཁོ་ན་ཡོད་པ་ཡིན་ཏེ་དེས་ན་ནུས་པ་མ་ངེས་པས་ཀྱང་ཡོད་པ་ལ་འཁྲུལ་པ་མེད་དོ། །གལ་ཏེ་དེའི་ཡོད་པ་ཡང་ནུས་པ་ཁོ་ན་ཡིན་པ་དེ་ལྟ་ན་ཡང་ཤེས་པའི་གསལ་བ་ཉིད་དེ་ལ་འཁྲུལ་པ་མེད་པ་ཡིན་ཏེ། དེས་ན་ཕྱི་རོལ་བཞིན་དུ་འབྲས་བུ་མཐོང་བ་ལ་ལྟོས་པ་མ་ཡིན་ནོ། །དེའི་ཕྱིར་སྔ་མའི་ཡོད་པ་ཤེས་པའི་
འབྲས་བུ་ཡིན་པ་ལ་ཐུག་པ་མེད་པའི་ཉེས་པ་མེད་དོ་ཞེ་ན། འདི་ལ་བརྗོད་པ་ནི་ཤེས་པའི་འབྲས་བུ་ཞེས་བྱ་བའོ། །ཐམས་ཅད་དུ་བསལ་བའི་དོན་དང་། ལྷན་ཅིག་རྒྱུ་དང་འབྲས་བུའི་དངོས་པོར་འགྱུར་བའི་ཕྱིར་རྨི་ལམ་ལ་སོགས་པར་མཐོང་བ་ཡང་ཡོད་པར་ཐལ་བར་འགྱུར་ན་འགའ་ཞིག་ཁོ་ན་ལ་ཡང་འདོད་
པ་ཡིན་ཏེ། འོན་ཏེ་འཁྲུལ་བའི་ཤེས་པ་ལ་སྣང་བའི་དོན་དང་ཤེས་པ་ལ་བཟུང་བ་ཉིད་མེད་དོ་སྙམ་ན་འདི་ལའང་ཞེས་གསུངས་སོ། །མ་འཁྲུལ་པའི་ཤེས་པའི་སྐྱེ་བའི་དུས་ནའོ། །ཤེས་པའི་འབྲས་བུ་དེ་དང་ལྡན་པ་ཞེས་བྱ་བ་སྟེ། རྒྱུ་ལྡན་པར་ཇི་ལྟར་རིག་པར་འགྱུར། གལ་ཏེ་རྨི་ལམ་ལ་

སོགས་པ་དོན་མེད་པ་ཉིད་ཀྱི་ཕྱིར་འབྲེལ་པ་རིག་པ་མ་ཡིན་ནོ་ཞེས་རིགས་ཀྱི་དོན་ཡོད་པར་གོ་ཇི་ལྟར་མི་འགྱུར་ཞེ་ན། ཤེས་བྱ་གཉིས་ནི་ཞེས་གསུངས་སོ། །འདི་སྙམ་དུ་གཉི་ག་སྣང་བ་ཞེས་བྱ་བ་འབྲེལ་པ་རྟོགས་པའི་སྒྲུབ་པར་བྱེད་པ་ཡིན་ལ། དེ་ནི་ཤེས་པ་དང་ཤེས་བྱ་དག་ལ་
ཡང་ཡོད་པས་ཇི་ལྟར་དེ་མི་རྟོགས་སྙམ་ན། མདུན་ན་གནས་པ་ཉིད་དུ་ནི་ཞེས་བྱ་བའོ། །ལྷུར་བྱ་བའི་དོན་ནི་འདི་ཡིན་ཏེ། ཤེས་པ་ཐམས་ཅད་ནི་བདག་རིག་པ་ཡིན་ཡང་དངོས་སུ་བདག་ལ་ཤེས་པ་སྐྱེད་པ་ནི་མ་ཡིན་ཏེ། ཞེན་པ་ཐམས་ཅད་ནི་ཁ་ཕྱིར་བལྟས་པས་འཇུག་པ་ཡིན་པའི་ཕྱིར་རོ། །དེས་ན་
གལ་ཏེ་མཐོང་བ་མྱོང་བ་མེད་པར་འདི་མཐོང་བར་འགྱུར་ཏེ་ཞེས་ཁྱད་པར་དང་བཅས་པའི་ཞེན་པར་མི་འགྱུར་བ་དེ་ལྟ་ན་ཡང་། སྔོན་པོ་འདི་མཐོང་ངོ་ཞེས་གཙོར་ཕྱི་རོལ་ཉིད་ལ་གནས་པར་བྱེད་དོ། །དེ་ལྟར་ནི་གཉིས་ལ་བརྟེན་པའི་འབྲེལ་པ་འགྲུབ་པ་མ་ཡིན་ནོ། །ཕྱི་རོལ་གྱི་གཉིས་རྟོག་པ་ལ་ནི།
གོ་སྐབས་སུ་ཡང་འགྱུར་བ་ཡིན་ན་ཤེས་པ་དང་ཤེས་བྱ་དག་རྒྱུ་དང་འབྲས་བུའི་དངོས་པོ་ཉིད་དུ་དཔྱོད་པ་ལ་ནི་དེ་སྲིད་ཀྱི་ཚུལ་ཡོད་པ་མ་ཡིན་ནོ། །གལ་ཏེ་རེ་ཞིག་རྟོགས་པ་ལ་ནི་ཡོད་པ་ཁོ་ནའོ། །དེ་ཡན་ལག་གི་དངོས་པོ་ཡིན་པ་དང་དོན་གཙོར་འགྱུར་བ་ཡིན་ནོ་ཞེས་བྱ་བས་གང་དུ་ཉེ་བར་མཁོ། །དེས་ན་དེའི་
འབྲས་བུ་ཉིད་དུ་མི་རྟོགས་པར་ཇི་ལྟར་འགྱུར་སྙམ་ན། ཤེས་པ་འབྲས་བུ་ཉིད་དུ་ནི་ཞེས་བྱ་བ་ནི་སྐབས་སྐབས་ཀྱི་དོན་ལ་ལྟོས་ནས་སོ། །དེ་ཉིད་ཀྱིས་ནི་དེ་རྟོགས་པ་མ་ཡིན་ནོ། །རྒྱུ་ཉིད་ཀྱིས་དུས་མི་མཚུངས་པའི་ཕྱིར་རོ། །གཞན་གྱིས་ཀྱང་མ་ཡིན་ཏེ། འབྲས་བུ་ཤེས་པ་ཉིད་ཤེས་པ་མེད་པའི་ཕྱིར་
རོ། །གལ་ཏེ་ཕྱི་རོལ་གྱི་གཉིས་ཀྱང་གཅིག་གིས་མི་རྟོགས་སོ་ཞེ་ན། མི་རྟོགས་མོད་དེ་ཡང་རྟོགས་པ་མེད་པ་ཁོ་ནའོ་ཞེས་མང་དུ་བཤད་ཟིན། གལ་ཏེ་དེ་ལྟ་ན་ཡང་འདྲ་བ་དང་བཅས་པའི་ཤེས་པས་བསྐྱེད་པ་ཉིད་གཟུང་བ་ཡིན་པའི་ཕྱིར་དུ་ཐ་མི་དད་པ་མི་རྟོགས་པར་ཇི་ལྟར་འགྱུར་ཞེ་ན། བདེན་ཏེ་འདི་
ནི་ལུགས་གཞན་དཔྱད་པ་ཡིན་ནོ། །རྣམ་པ་དང་བཅས་པའི་ཕྱོགས་ལ་ནི་ཕྱི་རོལ་གྱིས་སྟོང་པའི་ཕྱིར་ཤེས་པ་རྣམས་ཉིད་རྒྱུ་དང་འབྲས་བུའི་དངོས་པོར་འགྱུར་ན་དེ་ཡང་འཆད་པར་འགྱུར་ཞེ་ན། ཇི་སྐད་དུ། ཤེས་པ་འབྲས་བུ་ཉིད་དུ་ནི། །དེ་འམ་གཞན་གྱིས་རྟོགས་པ་མེད། །ཅེས་བརྗོད་པ་དེ་ལ་དེའམ་

ཞེས་བྱ་བའི་ཕྱོགས་བསལ་བར་བྱེད་པ་ནི། མངོན་སུམ་དེ་ཉིད་ལ་མིན་ཏེ། །ཞེས་བྱ་བ་ལ་སོགས་པའོ། །འཇུག་པར་ཁས་ལེན་ན་གནོད་བྱེད་བརྗོད་པ་ནི། འཇུག་ན་ཁྱོད་ཀྱི་འབྲས་མི་འགྱུར། །ཞེས་བྱ་བ་སྟེ་སྔར་མེད་པར་འབྱུང་བའི་དོན་མི་འཐད་པའི་ཕྱིར་རོ། །འོ་ན་དེ་ལས་སྔར་མེད་པའི་འབྲས་
བུ་ཉིད་དུ་འགྱུར་རོ་སྙམ་ན། གལ་ཏེ་དེ་ལྟ་ན་ཇི་ལྟར་སྔར་མེད་པ་དེ་བཞིན་དུ་དེ་ལས་སྔར་ཡང་ཡོད་པའི་རྒྱུ་མ་གཏོགས་པར་འགྱུར་ཏེ། དེས་ན་ཡང་ནས་ཡང་དུ་འཇུག་པ་ན་ཐུག་པ་མེད་པར་འགྱུར་རོ། །ཡང་ན་འཇུག་ན་དེའི་འབྲས་བུ་ཉིད་ཅེས་བྱ་སྟེ། མངོན་སུམ་འཇུག་པ་དེས་བདག་ཉིད་འབྲས་བུ་ཉིད་དུ་
རྟོགས་པ་མ་ཡིན་ཞེས་བྱ་བ་རྗེས་སུ་འཇུག་པ་སྟེ་དོན་གྱི་སྔར་ཡོད་པ་ཉིད་མ་བཟུང་བའི་ཕྱིར་རོ། །དོན་སྔར་ཡོད་པའི་བཟུང་བའི་དོན་དུ་སྔར་ཡང་འཇུག་ན་ནི་ཐུག་པ་མེད་དོ་ཞེས་བརྗོད་པ་ནི། སྔ་མ་ཡང་ནི་འཇུག་འགྱུར་ཏེ། །གསུངས་སོ། །འོ་ན་མདུན་དུ་གསལ་བཞིན་པ་དུས་མཚུངས་པའི་དོན་ཉིད་རྒྱུར་གྱུར་
ཏོ་ཞེ་ན་གལ་ཏེ་ཞེས་བྱ་བའོ། །ཧ་ཅང་ཁྱབ་ཆེས་པའི་དོགས་པ་འདི་བསུ་ནས་བཟློག་པ་ནི་གཞན་དུ་འགྱུར་བ་ན་ཞེས་བྱ་སྟེ། མཐོང་བའི་ཀ་བ་དང་བུམ་པ་དག་གཅིག་མེད་པར་གཞན་ཡོད་ན་དེ་རྒྱུ་དང་འབྲས་བུ་མ་གྲུབ་ན་དེ་ལྟ་ན་འོ་ན་ཤེས་པ་དང་། ཤེས་བྱ་ཞེས་བྱ་བ་ནི། རྣམ་པ་ཉིད་ཀྱང་འགྲུབ་མི་འགྱུར། །ཞེས་
གཉི་གར་ཡང་འབྲེལ་པར་བྱའོ། །འདི་ནི་དོགས་པ་དང་བཅས་ཏེ་བསལ་བར་བྱེད་པ་ནི་གལ་ཏེ་ཞེས་བྱ་བ་ལ་སོགས་པའོ། །འདི་ནི་གཞན་དུ་གྱུར་པ་མ་གྲུབ་པོ་ཞེས་བྱ་བ་བསལ་བར་བྱའོ། །སྐབས་སུ་བབ་པ་ལ་ཡང་མ་གྲུབ་པོ་ཞེས་བྱ་བར་སྟོན་པ་ནི་ཤེས་པའི་མཐོང་བ་གང་ཡིན་ཡང་དོན་མེད་པར་འཇུག་པར་
མི་འགྱུར་རོ། །ཅི་ཤེས་པ་ཡང་དོན་མེད་ཀྱང་མཐོང་ངོ་ཞེས་བྱ་བའི་དོན་ཏོ། །གལ་ཏེ་ཞེས་བྱ་བ་ནི་རྩོད་པའོ། །དེས་ན་ཞེས་བྱ་བ་ནི་གཞན་ཡིན་པས་ནའོ། །ལན་ནི་ཀ་བའང་ཞེས་བྱ་བའོ། །ངོ་ཤེས་སྐྱེ་བ་མཚུངས་པ་ཡིན། །ཞེས་བྱ་བ་ནི་དཔེར་ན་བུམ་པ་བུམ་པ་ཞེས་རིགས་གཅིག་ཏུ་གྲུབ་པ་ལ་བརྟེན་
ནས་འཁྲུལ་པ་དེ་བཞིན་དུ་ཤེས་པ་ཤེས་པ་ཞེས་བྱ་བར་ཡང་འགྱུར་བའི་ཕྱིར་མཚུངས་སོ། །འོ་ན་གང་གི་ཚེ་བུམ་པ་དེ་ཉིད་གཞན་དག་ཏུ་མཐོང་བས་འཁྲུལ་པ་སྨྲ་བ་དེའི་ཚེ་ཇི་ལྟར་མཚུངས་ཏེ། ཤེས་པ་ནི་རྒྱུ་གཅིག་ལ་གནས་ཀྱང་ཀ་བ་ལ་སོགས་པ་བཞིན་དུ་གསལ་བའི་ངོ་ཤེས་པ་ཡོད་པ་མ་ཡིན་ནོ། །ཤེས་པ་

ཤེས་པ་ཞེས་རིགས་ངོ་ཤེས་པ་ནི་འདིར་ཉེ་བར་མཁོ་བ་མ་ཡིན་ནོ། །རིགས་ནི་གཞན་གྱིས་འདོགས་པའམ་བཏགས་པ་ཡིན་ཡང་རུང་སྟེ། གཉི་ག་ལྟར་ཡང་ཤེས་པ་གཅིག་ནི་གསལ་བ་རང་བཞིན་མ་ཡིན་ནོ། །དེས་ན་བུམ་པ་བཞིན་འཁྲུལ་པ་ཇི་ལྟར་འགྱུར། དེས་ན་གསལ་བ་ངོ་ཤེས་པའི་
ཕྱོགས་ལ་ལན་གང་ཞིག་ཡིན་སྙམ་ན། དེར་ཡང་ཀ་བས་སྐྱེད་པས་བུམ་པ་ཉིད་གཞན་དུ་མཐོང་བ་མི་འགལ་ཏེ་རྫ་མཁན་གྱིས་སྐྱེད་པ་དེ་མེད་པར་མཐོང་བ་བཞིན་ནོ། །དེས་ན་ལྷན་ཅིག་དམིགས་པ་དག་རྒྱུ་དང་འབྲས་བུའི་དངོས་པོར་འགྱུར་བ་མི་སྤོངས་སོ། །གཞོན་ནུ་མ་ལེན་གྱིས་ལུགས་ལ་བརྟེན་ཏེ།
འདི་ཉིད་ལ་སུན་འབྱིན་པ་གཞན་བརྗོད་པ་ནི། དེ་ལྟ་ན་ནི་རྟག་འགྱུར་ན། །ཞེས་བྱ་བ་སྟེ། ཤེས་པ་དང་དངོས་པོ་དག་ཅེས་བྱ་བ་ནི་སྐབས་ཀྱིས་སོ། །དེ་ནི་བདག་སེམས་ཀྱི་རང་བཞིན་དུ་འདོད་པས། ཤེས་པའི་གསལ་བ་ངོ་ཤེས་པ་ལ་མ་བརྟེན་པར་གཞག་པར་མི་ནུས་སོ། །དེས་ན་ཤེས་པ་རྣམས་སྔ་མ་
དང་ཕྱི་མའི་རང་བཞིན་གྱིས་གཅིག་ཉིད་དུ་འཐད་པའི་ཕྱིར་ན་རྟག་པ་ཉིད་དུ་འགྱུར་རོ། །དེས་ན་ཤེས་པ་ལ་ལྟོས་ནས་འགའ་ཞིག་རྒྱུ་དང་འབྲས་བུར་ཇི་ལྟར་འགྱུར་བློ་ཞེས་བརྗོད་པ་དེའི་གནས་སྐབས་ཀྱི་ཁྱད་པར་སྐྱེ་བ་དང་འཇིག་པའི་ཆོས་ཅན་ཡིན་པ་དེ་ལ་ལྟོས་ནས་ནི་ཡུལ་རྒྱུ་ཉིད་ཡིན་ནོ་ཞེས་བྱ་བ་ཡང་མི་འཐད་དེ་
སེམས་ཀྱི་རང་བཞིན་དུ་ཁས་བླངས་པའི་ཕྱིར་རོ། །ཕྱོགས་འདི་ནི་ཐ་དད་པ་དང་མི་འཐད་པའི་རྟོག་པས་ཡང་གནོད་པ་མ་ཡིན་ནོ་ཞེས་བཤད་པ་ཡིན་ནོ། །ཕྱོགས་གཞན་ནི་བརྗོད་པར་བྱ་བ་མང་བའི་ཕྱིར་བཏང་སྙོམས་སུ་དོར་བ་ཡིན་ནོ། །གལ་ཏེ་འོ་ན་ངོ་ཤེས་ཀྱི་སྟོབས་ཀྱིས་དེའི་རང་བཞིན་གྱིས་བདག་གྲུབ་ན་
ནི་གྲུབ་ལ་རག་གོ་ཞེ་ན། དགག་པ་བརྗོད་པ་ནི་ངོ་ཤེས་ཚད་མ་ཉིད་མ་ཡིན་ནོ་ཞེས་བྱ་བ་སྟེ། འགའ་ཞིག་ཏུ་ཡང་ཞེས་བྱ་བར་བསམས་པའོ། །ཅིའི་ཕྱིར་སྙམ་ན་སྔ་མ་ཞེས་གསུངས་སོ། །གང་ཞིག་གང་གི་རང་བཞིན་ཡིན་པ་དེ་ནི། དེ་རྟོགས་ན་ངེས་པར་རྟོགས་པ་དང་ལྡན་པ་ཡིན་ཏེ་སྔོན་པོ་ལ་ཟླུམ་པོ་བཞིན་
ནོ། །སྔ་མ་དང་ཕྱི་མ་ཉིད་ཀྱང་དངོས་པོའི་རང་བཞིན་ནོ། །ཐལ་བར་འགྱུར་བའི་རང་བཞིན་གྱི་གཏན་ཚིགས་སོ། །བཟློག་པ་ནི་གང་ཞིག་གང་རྟོགས་པ་ན་མ་རྟོགས་པ་མེད་པ་དེ་ནི་དེའི་རང་བཞིན་མ་ཡིན་ཏེ། དཔེར་ན་ཨུཏྤ་ལའི་དཀར་པོ་ཉིད་བཞིན་ནོ། །སྔ་མ་དང་ཕྱི་མ་ཉིད་ཀྱང་དངོས་པོ་མངོན་སུམ་དུ་གྱུར་པ་ན།

རྟོགས་པ་ཡིན་ནོ་ཞེས་བྱ་བ་ནི་ཁྱད་པར་བྱེད་པ་མེད་པའོ། །དེ་ལྟ་མ་ཡིན་ན་ཧ་ཅང་ཐལ་བར་འགྱུར་བ་ནི་བཟློག་པ་ལ་གནོད་པར་བྱེད་པ་ཡིན་ནོ། །སྔ་མའི་ཤེས་པ་ལ་ནི་ཕྱི་མ་ལ་ཡང་སྔ་མ་ཉིད། སྣང་བ་མ་ཡིན་པའི་ཕྱིར་གཉི་ག་གྲུབ་པས་ན་མ་གྲུབ་པ་ནི་མ་ཡིན་ནོ། །དེའི་རང་བཞིན་ཉིད་ན་ནི་སྔོན་པོ་བཞིན་དུ་དེ་
གཉི་ག་སྣང་བ་ན་སྐད་ཅིག་ཙམ་མཐོང་བས་གནས་སྐབས་མཐའ་དག་མཐོང་བར་ཐལ་བར་འགྱུར་རོ། །དེས་ན་སྔ་མ་ལ་ནི་སྔ་མའི་རང་བཞིན་ཉིད་སྣང་ལ་ཕྱི་མ་ལ་ཡང་ཕྱི་མ་ཉིད་ཡིན་ནོ། །དེས་ན་སོ་སོའི་མངོན་སུམ་དག་གིས་ནི་སྔ་མ་དང་ཕྱི་མ་ཉིད་རྟོགས་པ་མ་ཡིན་ཏེ། རང་བཞིན་རེ་རེ་ཙམ་གཟུང་བའི་ཕྱིར་རོ། །
དྲན་པ་ཙམ་ནི་སྔ་མ་དང་ཕྱི་མར་ཡང་གཅིག་ཁོ་ན་བཟུང་བ་ཡིན་ནོ་ཞེས་དྲན་པ་ཙམ་ཞིག་འཇུག་པ་ཡིན་ན་དེ་ནི་མ་ཡིན་ནོ། །དེ་ནི་རང་རྒྱུད་དུ་ཚད་མར་འགྱུར་རམ། མཐོང་ངམ་རྗེས་སུ་འབྲང་བས་ཡིན་གྲང་ན། ཕྱོགས་དང་པོ་ལ་ནི་དྲན་པ་ཞེས་ཁོ་ནར་ཟད་ཀྱི་འདི་དོན་དང་འབྲེལ་པར་གོ་ཇི་ལྟར་འགྱུར། ཡང་ན་རྣམ་
པར་རྟོག་པ་ཐམས་ཅད་ཚད་མར་ཅི་སྟེ་མི་ཐལ། ཕྱོགས་གཞན་ལ་ནི་དེ་མཐོང་བའི་རྗེས་སུ་འབྲང་བ་ཁོ་ནར་འགྱུར་དགོས་སོ་ཞེས་སྟོན་པ་ནི། རྟོག་པ་སྔ་མ་ཕྱི་མ་དག །ཅེས་བྱ་བའོ། །རྟོག་པ་སྔ་མས་ནི་རང་གི་ཡུལ་གཞན་གྱི་ཡུལ་དང་མི་བསྲེལ། ཕྱི་མས་ཀྱང་མ་ཡིན་ནོ། །དེ་དག་གི་ཡུལ་མ་འདྲེས་པ་མེད་
པ་ན་སྟེ། ཐ་དད་པར་བཟུང་ན་དྲན་པ་གཅིག་ཉིད་ཤེས་པར་བྱེད་པ་མ་ཡིན་པར་རིགས་སོ་ཞེས་བྱ་བ་ནི་ལྷག་མའོ། །མེད་པ་གཅིག་གི་ལྷག་པར་ཞེན་པར་བྱེད་པའི་མངོན་སུམ་དེ་ཇི་ལྟར་མངོན་སུམ་