Luận tạng Tây Tạng (Tengyur) — Tập 180

ི་ལྷན་ཅིག་བྱེད་པ་ཉིད་ཀྱིས་ཕན་འདོགས་པར་བྱེད་པ་ཉིད་ཀྱི་ཡན་ལག་ཡིན་པའི་ཕྱིར་སྙིང་རྗེ་དང་ལྡན་པ་ཡིན་ནོ། །འདི་ཉིད་ལས་བྱ་བ་ནི་ཆགས་པའི་ངོ་བོའི་སྲེད་པ་ནི་ཐམས་ཅད་ལ་ཕན་འདོགས་པར་བྱེད་པ་ཉིད་ཀྱིས་ལྷན་ཅིག་བྱེད་པ་ཉིད་དུ་བརྗོད་པའི་

ཕྱིར་རོ། །གལ་ཏེ་སྲེད་པ་མེད་པས་མེད་པའི་ཕྱིར། རྟེན་འབྲེལ་ཉིད་ཡིན་ན་ལུས་མེད་ན་ཡང་སྐྱེ་བ་མེད་པར་འགྱུར་རོ། །ཇི་སྐད་དུ། འབྱུང་རྔུབ་དབང་པོ་བློ་ཞེས་བྱ་བའི་ཚིགས་སུ་བཅད་པའི་དོན་བསྟན་པ་ནི། གལ་ཏེ་རྐྱེན་ཉིད་ཀྱང་ཞེས་བྱ་བའོ། །ཇི་ལྟར་འདོད་ཆགས་དང་བྲལ་བ་ཞེས་བྱ་བ་ནི་ཚིག་
གི་དོན་བཤད་པ་ཡིན་ནོ། །རིགས་པ་འདི་ཉིད་ནི་ཞེས་བྱ་བ་ནི་དེ་མེད་ན་མེད་པའོ། །རྒྱུ་མཚན་ཁས་བླངས་ཕྱིར་ཞེས་བྱ་བའི་དོན་བསྟན་པ་ནི། འདོད་ཆགས་མེད་ཀྱང་ཞེས་བསྟན་པའོ། །འདི་ཞེས་བྱ་བ་ནི་ལུས་རྒྱུ་མཚན་ཉིད་ཅེས་བྱ་བའི་ཚིག་ནི་ཉེ་བར་ལེན་པ་ཉིད་ཀྱི་ཚིག་ལ་གནོད་པ་ཡིན་ནོ། །ཟོས་
པ་ནི་གསོལ་པའོ། །དཔྱད་པ་ནི་ངེས་པར་བརྟག་པའོ། །བློ་གྲོས་འབར་བས་ནི་ཁྱེད་ཀྱིས་སོ། །སྐྱེ་བ་སྟེ་ལུས་དང་ལྷན་ཅིག་འབྱུང་བ་ནི་འདོད་ཆགས་དང་དུས་མཚུངས་པར་འབྱུང་བའི་ཕྱིར་རྒྱུ་ཉིད་མ་ཡིན་ཏེ། སྔར་ཡོད་པ་ཉིད་རྒྱུ་ཡིན་པའི་ཕྱིར་རོ་ཞེ་ན། ལྷན་ཅིག་འབྱུང་བའི་ངེས་པ་བཤད་
པའི་དོན་དུ། རྫས་ཡོན་ཏན་དང་བཅས་པ་ཉིད་རྒྱུ་མཚན་ཡིན་ནོ་ཞེས་ཟེར་བ་ནི། གལ་ཏེ་ཡོན་ཏན་དང་བཅས་པ་ཞེས་བྱ་བ་སྟེ། འདི་ཉིད་བཤད་པ་ནི། གལ་ཏེ་སྐྱེ་བ་ཞེས་བྱ་བ་སྟེ། སྐྱེ་བའི་སྔ་རོལ་མ་མཐོང་བའི་ཕྱིར་ད་ལྟར་མཐོང་བ་ལས་ལྷན་ཅིག་འབྱུང་བར་ངེས་པ་ཡིན་ལ། དེ་ལས་ཀྱང་
ཡོན་ཏན་དང་བཅས་པའི་རྫས་སྐྱེ་བའི་རྒྱུ་མཚན་ཡིན་ནོ་ཞེས་བྱ་བའི་དོན་ཏོ། །འདི་ལ་བརྗོད་པ་ནི། སྐལ་མཉམ་སྐྱེ་ལས་ཞེས་བྱ་བ་སྟེ། ཇི་ལྟར་ལྷན་ཅིག་འབྱུང་བའི་འདོད་ཆགས་སྐྱེ་བའི་རྒྱུ་མ་ཡིན་པ་དེ་བཞིན་དུ་སྐྱེ་བ་ཡང་ལྷན་ཅིག་འབྱུང་བའི་ཕྱིར་འདོད་ཆགས་ཀྱི་རྒྱུ་མ་ཡིན་པའི་ཕྱིར་རྒྱུ་སྔར་བྱུང་
བར་རྟོགས་པ་ན། འཚོ་བའི་གནས་སྐབས་སུ་མཐོང་བའི་ཕྱིར་སྐལ་པ་མཉམ་པ་ཉིད་དེ། འདྲ་བ་ཉིད་ཚུལ་བཞིན་མ་ཡིན་པ་ཡིད་ལ་བྱེད་པ་ཉིད་རྒྱུར་བཏགས་པ་ཡིན་ནོ་ཞེས་བྱ་བའི་དོན་ཏོ། །བདག་དང་བདག་གིར་ལྟ་བའི་ཆགས་པའི་སྙིང་པོ་ཅན་རྒྱུ་མ་ཡིན་ནམ། ཆགས་པ་ནི་མ་ཡིན་ནོ། །
འདི་བསྟན་པ་ནི་བདག་དང་བདག་གིར་འཛིན་པས་བྱས་པའི་ཆགས་པས་ཞེས་བྱ་བ་ལ་སོགས་པ་ཡིན་ནོ། །དེའི་ཕྱིར་དེར་ལྟ་བ་ཡང་རྒྱུ་ཁོ་ན་ཡིན་གྱི་སྲེད་པ་ནི་མ་ཡིན་ནོ་སྙམ་དུ་སེམས་པ་ལ། རྒྱུ་ཡིན་ཡང་ཞེས་བྱ་བ་སྟེ། སྒྲིབ་པར་བྱེད་པའི་བདག་ཉིད་ཡིན་པས་འཛུད་བྱེད་མ་ཡིན་པའི་ཕྱིར་རོ། །

དེའི་ཕྱིར་མི་ཤེས་པ་སྟེ་མ་རིག་པ་ནི་ཀུན་འབྱུང་བའི་བདེན་པ་ལ་མ་བརྗོད་པ་ཡིན་ནོ། །སྲེད་པ་ནི་འཛུད་བྱེད་ཡིན་པའི་ཕྱིར་བརྗོད་པ་ཡིན་པར་བསྟན་པ་ནི། བཤད་པ་ཞེས་བྱ་བའོ། །གསུམ་རྒྱུ་ཡིན་པའི་ཕྱིར་ཞེས་བྱ་བ་ནི་རྟེན་ཅིང་འབྲེལ་པར་འབྱུང་བའི་ཡན་ལག་
རྣམས་ལ་མ་རིག་པ་དང་ལས་དག་ཀྱང་བརྗོད་པའི་ཕྱིར་ཞེས་བྱ་བའི་དོན་ཏོ། །བར་དུ་མ་ཆོད་པས་ཞེས་བྱ་བ་ནི་ཉེས་བྱས་སོ། །དེ་མ་ཐག་ཉིད་དུ་སྒྲུབ་པར་བྱེད་པ་ནི་གཏི་མུག་དང་ལས་དག་ཅེས་བྱ་བའོ། །སྲེད་པ་མེད་ན་ལས་ལ་ནུས་པ་མེད་པར་བསྟན་པ་ནི། དེ་ཡོད་པ་ན་ཞེས་བྱ་བའོ། །ལས་
ཀྱིས་སྦྱར་བ་ཞེས་བྱ་བ་ནི་འདི་ཉིད་ཀྱི་བཤད་པ་ཡིན་ནོ། །སྲེད་པ་མེད་པས་ཡོངས་སུ་འདོར་བ་མ་ཡན་གྱི། འོན་ཀྱང་ལས་གཞན་གྱིས་བྱས་པ་ཁོ་ན་དེ་ཡང་ཡིན་པའི་ཕྱིར་གྲོལ་བའི་བདག་ཉིད་ཅན་རྣམས་ཀྱི་སྐྱེ་བ་མེད་པ་ཡང་ལས་མེད་པས་བྱས་པ་ཁོ་ན་ཡིན་གྱི་སྲེད་པ་མེད་པ་ཉིད་ཀྱིས་བྱས་པ་
མ་ཡིན་པར་བསྟན་པ་ནི། གལ་ཏེ་བློ་ཞེས་བྱ་བའོ། །རེ་ཞིག་སྲིད་པ་མེད་ན་འབྱུང་བ་ཡོངས་སུ་འདོར་བ་ནི་ལས་གཞན་གྱི་ནུས་པས་འཕངས་པ་མ་ཡིན་ཏེ། གཞན་དུ་ཡང་ཡིན་པའི་ཕྱིར་རོ། །འོན་ཏེ་སྲེད་པ་མེད་ན་ལས་ཉིད་མི་འབྱུང་བ་དེའི་ཕྱིར་ལས་མེད་པས་བྱས་པའི་ཡོངས་སུ་འདོར་བ་ཡིན་
གྱི་ལས་གཞན་གྱིས་བྱས་པ་མ་ཡིན་ནོ། །འདི་ལ་ཡང་བརྗོད་པ། སྲེད་པ་དང་ནི་རྣམ་བྲལ་ན། །ཞེས་བྱ་བ་ནི་ལས་མེད་པའི་སྒོ་ནས་སྲེད་པ་ཉིད་དེར་བྱ་བ་བྱེད་པ་ཡིན་ནོ། །དེའི་ཕྱིར་སྲིད་པ་གཙོ་བོ་ཡིན་ཏེ་མེད་པ་ཁོ་ན་ལ་སྦྱོར་བར་བྱེད་པའི་ཕྱིར་རོ། །འོན་ཏེ་ལས་མེད་པ་ཉིད་སྦྱོར་བྱེད་ཡིན་ཏེ། སྲེད་
པ་ཡོད་ཀྱང་དེ་མེད་ན་ཡོད་པའི་ཕྱིར་རོ། །དེ་མ་གྲུབ་པ་ཡིན་ཏེ། དེ་ཡོད་ན་དེ་མེད་པ་ཉིད་འགྲུབ་པའི་ཕྱིར་རོ་ཞེས་བསྟན་པ་ནི། འོན་ཏེ་འདི་ལ་སྲེད་ཡོད་ན། །ཞེས་བྱ་བའོ། །སྡུག་བསྔལ་དེ་གཏན་དུ་བ་མ་ཡིན་པ་དང་མི་བརྟན་པ་ཡིན་ཏེ། རེས་འགའ་དམིགས་པའི་ཕྱིར་ཞེས་བསྟན་པ་དེ་ཅི་
ལས་ཡིན་ཞེས་ཟེར་བ་ལ། དེ་ནི་གཏན་དུ་བ་ཡིན་ཏེ། རྒྱུ་ལ་སྟེ་ཀུན་འབྱུང་བའོ། །གེགས་བྱེད་པ་ནི་འགལ་བ་ཅན་གྱི་ལམ་མོ། །སོགས་པའི་སྒྲས་ནི་ལྷན་ཅིག་བྱེད་པ་མ་ཚང་བ་བསྡུ་བའོ། །འདིས་ནི་རྒྱུ་མེད་པ་བསྟན་པ་ཡིན་ནོ། །དེ་ལྟར་ན་འགོག་པའི་བདེན་པ་ཡང་འགོག་པ་ཉིད་

ཅེས་བསྟན་པར་འགྱུར་བར་བསྟན་པ་ནི་ད་ནི་ཞེས་བྱ་བའོ། །འདུས་བྱས་པ་ཅན་གྱི་ཕུང་པོའི་ངོ་བོ་གང་ཡིན་པ་དེ་རྒྱུ་ཚང་བ་ལ་སོགས་པ་དང་ལྡན་པ་མ་ཡིན་ནམ། ཇི་ལྟར་འདི་འགོག་པ་ཡིན། འགོག་པ་ཡིན་ནོ། ཇི་ལྟར་འཁོར་བ་པ་ཡིན་སྙམ་དུ་སེམས་པ་ནི་འཁོར་ཕྱིར་ཞེས་བྱ་བའོ། །མ་ཡིན་
ཞེས་བྱ་བ་ནི་ཕྱོགས་སྔ་མ་འགེགས་པའོ། །ཅི་ལས་ཡིན་ཞེ་ན། འདོད་པའི་ཕྱིར་ཏེ་འཁོར་བ་པ་གང་ཡིན་པ་དེ་གྲོལ་བ་མ་ཡིན་ཞེས་བྱ་བ་འདི་ནི་འདོད་པ་ཡིན་ནོ། །འཁོར་བ་པ་དང་འགོག་པ་ཡིན་པ་ནི་སྐད་ཅིག་མ་ལ་ལྟོས་ནས་འགལ་བ་ཡིན་ལ། རྒྱུན་ལ་ལྟོས་ནས་འགལ་བ་མ་གྲུབ་པར་
བསྟན་པ་ནི། མ་གྲུབ་ཕྱིར་ཞེས་བྱ་བའོ། །བདག་ཅེས་བྱ་བ་ནི་སྔ་མ་དང་ཕྱི་མ་ཅན་དུ་གྱུར་པ་ནི་འཁོར་བ་པ་ཡིན་ཏེ། རྒྱུ་དང་ལྡན་པའི་ཕྱིར་རོ། །འཁོར་བ་པ་མ་ཡིན་པ་ནི་དེ་དང་བྲལ་བའི་ཕྱིར་ཞེས་བྱ་བ་གྲུབ་པོ། །འགར་ཡང་ཡོད་པ་མ་ཡིན་ནོ། །ཞེས་བྱ་བ་ནི་འདི་སྐད་ཅིག་མ་ལ་ལྟོས་ནས་
འགལ་བ་ཉིད་བཤད་པ་ཡིན་ནོ། །འོན་ཀྱང་སེམས་ཀྱི་རྒྱུན་ཞེས་བྱ་བ་ལ་སོགས་པས་འགལ་བ་ཉིད་རྒྱུན་ལ་ལྟོས་ནས་ནི་འགལ་བ་མི་འགྲུབ་པོ་ཞེས་བསྟན་པ་ཡིན་ནོ། །མ་གྲུབ་ཕྱིར་ཞེས་བྱ་བ་ཉིད་ཀྱི་དོན་ཡང་བསྟན་པ་ནི། དོན་དམ་པར་ནི་ཞེས་བྱ་བ་སྟེ། དོན་དམ་པར་ཡོངས་སུ་དཔྱད་པ་འཁོར་
བ་པ་ཉིད་མ་གྲུབ་པ་ཡིན་ལ། ཀུན་རྫོབ་ཏུ་ནི་འཁོར་བ་པའི་ཕུང་པོ་ནི་སྡུག་བསྔལ་ཉིད་ཡིན་པ་ལ་འགལ་བ་མེད་དོ། །གལ་ཏེ་གཞན་བཅིངས་པ་ཡིན་ལ་གཞན་གྲོལ་བ་ཡིན་ན་གཞན་འགའ་ཞིག་གི་རྒྱུད་དམ། གཞན་ཡང་བཅིངས་པ་དང་གྲོལ་བ་དག་ལ་གནས་པ་མ་ཡིན་པ་དེ་ལྟ་ན་ཆད་པ་དང་
རྒྱུ་མེད་པར་སྨྲ་བ་དག་ཡིན་ཏེ། སྐད་ཅིག་སྔ་མ་ནི་བདག་ཉིད་ཐམས་ཅད་ཀྱིས་འགགས་པ་ཡིན་ལ། ཕྱི་མ་ཡང་རྒྱུ་མེད་པས་མི་འབྱུང་བའི་ཕྱིར་རོ། །དེ་ལྟར་ཡོངས་སུ་ཤེས་ན་རྟོགས་པ་དང་ལྡན་པ་ནི་ཚངས་པར་སྤྱོད་པ་ལ་གནས་པ་མ་ཡིན་པ་དེ་ལྟ་ན་ཆད་པ་དང་རྒྱུ་མེད་པར་སྨྲ་བར་མི་འགྱུར་ཞིང་།
དྲང་སྲོང་ཆེན་པོས་གསུངས་པ་ཡང་དོན་མེད་པར་འགྱུར་བར་བསྟན་པ་ནི་གལ་ཏེ་བཅིངས་པ་ཞེས་བྱ་བ་སྟེ། འཇིག་རྟེན་པའི་བཟང་པོ་མང་པོ་བདག་མི་འདོད་པ་ལ་ནུབ་པར་འགྱུར་ཏེ། རྒྱུ་མཚན་གང་གིས་གང་ལ་ཡང་འཇུག་པ་མེད་པའི་ཕྱིར་རོ་ཞེས་དཔེ་མང་པོ་བསྟན་པ་ཡིན་ནོ། །བདག་ཏུ་སྨྲ་བ་

ཡང་བདག་ཡོད་པ་ཁོ་ནས་འཇུག་པ་དང་ལྡོག་པར་བྱེད་པ་མ་ཡིན་ནོ། །འོ་ན་ཅི་ཞེ་ན། དེའི་བསྐྱེད་པ་ཡིན་ན་དེ་འདི་ནི་བདག་མེད་པར་སྨྲ་བ་ལ་མཚུངས་པར་བསྟན་པ་ནི། ཇི་སྲིད་བདག་ཆགས་ཏེ། ཆགས་པའི་སྙིང་པོ་ཅན་གྱི་ཤེས་པ་ཇི་སྲིད་དུ་བཅོམ་པར་མ་གྱུར་
པ་དེ་སྲིད་དུ་བདག་སྡུག་བསྔལ་ཅན་འཁོར་བ་པར་སྒྲོ་བཏགས་ནས་ནི་ཀུན་དུ་བཏགས་ནས་སོ། །ཡོངས་སུ་གདུང་བ་ནི་སྡུག་བསྔལ་བས་གནས་པ་དང་ལྡན་པར་འགྱུར་ལ། དེ་ནས་སྡུག་བསྔལ་དེ་གཞོམ་པའི་དོན་དུ་ཐབས་རྗེས་སུ་སྒྲུབ་པས་དཀྲིགས་པ་ནི་བདེ་བར་གནས་པ་ཉིད་འཐོབ་
པ་མ་ཡིན་ནོ། །དེའི་ཕྱིར་བདག་ལ་ཆགས་པའི་མཚན་ཉིད་དེ་ཁོ་ན་ལོག་པར་སྒྲོ་འདོགས་པ་གཞོམ་པའི་ཕྱིར་རྩོམ་པ་ནི་དྲང་སྲོང་ཆེན་པོས་གསུངས་པའི་རྗེས་སུ་བསྒྲུབ་པ་ཡང་ཡིན་ཏེ། གྲོལ་པོ་མེད་ན་ཡང་ཞེས་བྱ་བ་ནི་བདག་མེད་ཀྱང་ངོ་། །དེའི་ཕྱིར་ཚངས་པར་སྤྱོད་པ་ལ་གནས་པ་
འབྲས་བུ་མེད་པ་མ་ཡིན་ནོ། །འདི་ཉིད་བསྟན་པ་ནི། འོན་ཏེ་དེ་ལྟ་བུ་ཞེས་བྱ་བའོ། །གལ་ཏེ་དེ་ཁོ་ན་ཉིད་མཐོང་བ་པོ་ནི་དོན་བྱས་པ་ཡིན་པའི་ཕྱིར། རང་གི་དོན་ལ་འཇུག་པ་མ་ཡིན་གྱི་གཞན་གྱི་དོན་ཁོ་ན་ལ་འཇུག་པ་ཡིན་ན། འདིའི་ཆེད་དུ་ལམ་འདི་ཁོ་བོས་བསྟན་པར་བྱའོ་ཞེས་རྟོགས་
པར་མི་བྱེད་ན་ཇི་ལྟར་འབད་པ་བྱེད་པ་ཡིན་སྙམ་དུ་སེམས་པ་ནི། འོན་ཏེ་གལ་ཏེ་ཞེས་བྱ་བའོ། །ཀུན་རྫོབ་ཏུ་ཐ་སྙད་ཡོད་ཅེས་བྱ་བ་ནི། སློབ་མ་ལ་རྫོགས་པ་ཡིན་པའི་ཕྱིར་རོ། ཇི་ལྟར་དོན་དམ་པའི་ཐ་སྙད་དུ་འགྱུར་ཞེས་བྱ་བ་ནི་སྟོན་པ་པོ་རྫོགས་པའི་ཕྱིར་རོ། །རེ་ཞིག་སློབ་མ་ཡང་སྟོན་པ་པོ་བདག་
ཉིད་ལ་ཡང་གཅིག་ཡིན་པར་བསྟན་པ་ནི། གཅིག་ཉིད་ཀུན་རྫོབ་པ་ཞེས་བྱ་བའོ། །སྟོན་པ་པོ་ནི་རྣམ་པར་རྟོག་པ་མེད་ཀྱང་སྔ་མའི་ཤུགས་ཀྱིས་འཇུག་པ་ནི་དེ་ཁོ་ན་ཉིད་དུ་གཅིག་པ་ཉིད་དམ། ཐ་སྙད་དུ་ཡང་མཐོང་བ་མ་ཡིན་ནོ་ཞེས་བསྟན་པ་ནི། ཇི་ལྟར་དེ་ཉིད་ཅེས་བྱ་བའོ། །སྟོན་པ་པོ་ལ་ལྟོས་
ནས་འབད་པ་པོའི་རྟོགས་པ་ཡང་རང་རིག་པ་ཙམ་ནི་འདོད་ཆགས་དང་བྲལ་བ་ཡིན་པར་བསྟན་པ་ནི། འབད་པའང་ཞེས་བྱ་བའོ། །ས་བོན་ལ་སོགས་པ་ལ་རྟོག་པ་མེད་ཀྱང་མྱུ་གུ་འབྱུང་བ་ཇི་ལྟ་བ་དེ་ཁོ་ན་བཞིན་དུ་ཡོངས་སུ་རྫོགས་པ་རྣམ་པར་རྟོག་པ་མི་མངའ་བ་ལས་ཀྱང་སྔོན་གྱི་འདུ་བྱེད་ལས་ཐ་

སྙད་འབྱུང་བ་བསྟན་པ་ནི། རྒྱུ་དང་འབྲས་བུའི་ཡོངས་སུ་རྫོགས་པ་མ་ཡིན་པ་ཡང་འབྲས་བུ་ཉིད་ནི་རྣམ་པར་རྟོག་པ་ལས་གཞན་པ་ཚད་མ་མ་ཡིན་པར་རྟོགས་པ་ནི་ཡོད་མིན་ཞེས་བྱ་བ་སྟེ། གནོད་པ་ཞེས་བྱ་བ་ནི་རྣམ་རྟོག་གོ། །སྐད་ཅིག་མ་རིག་པ་མངོན་སུམ་ནི་རྫོགས་པ་དང་མ་རྫོགས་པའི་
སྙིང་རྗེ་དང་རྣམ་པར་རྟོག་པ་དག་གི་འཇུག་པར་བྱེད་པ་ཡིན་པར་བསྟན་པ་ནི། ཁས་བླངས་ནས་ཀྱང་ཞེས་བྱ་བའོ། །སངས་རྒྱས་བཅོམ་ལྡན་འདས་རྣམས་ནི་ཐུགས་རྗེས་འགྲོ་བ་ཇི་སྲིད་པར་བཞུགས་པ་ཡིན་ལ། ཉན་ཐོས་རྣམས་ནི་ལུས་ཀྱི་དུས་ཉུང་ཟད་པ་ཡིན་ཡང་། ཚེ་རིང་པོར་འཕེལ་བའི་ལས་
ཡོད་པ་ཁོ་ན་ཡིན་ནོ། །ཚིགས་སུ་བཅད་པ་འདི་ཉིད་རྒོལ་བ་ནི། དམ་པའི་དོན་རྟོགས་པ་ཞེས་བྱ་བའོ། །འདི་ཉིད་ལ་ལན་འདེབས་པ་ཉིད་ཀྱིས་ཚིགས་སུ་བཅད་པའི་དོན་ལ་སྦྱོར་བར་བྱེད་པ་ནི་དཔྱོད་པའི་ཡུལ་ཅན་གྱི་ཤེས་པ་དེ་རྟོགས་པ་ནི་རང་རིག་པའི་ངོ་བོ་ཉིད་དོ། །དེ་ལས་ཡང་བསྐལ་པ་གྲངས་
མེད་པ་གསུམ་དུ་བསགས་པའི་ཚེ་འཕེལ་བར་བྱེད་པའི་བསོད་ནམས་ཀྱི་ཚོགས་དང་ལྡན་པའི་ཕྱིར་བཅོམ་ལྡན་འདས་ཉིད་ལ་ལྟོས་ནས་སོ། །ཡང་ན་ལས་ཀྱིས་ཞེས་རྣམ་པར་བརྟག་པར་རིགས་པ་ཡིན་པ་ནི། ཇི་ལྟར་རྒྱལ་པོ་སྐྱེ་དགུ་ལ། །ཞེས་བྱ་བའོ། །རང་རྒྱུད་ལ་ནི་བུ་ལའོ། །བརྩོན་ལྡན་
ནི་རྗེས་སུ་སྟོན་པ་ལ་སོགས་པས་སོ། །འདོད་བཞིན་པའི་འབྲས་བུ་ནི་བསོད་ནམས་རྣམས་ཡིན་ལ། དེའི་ཕྱིར་བཅོམ་ལྡན་འདས་མཐའ་མི་མངའ་བར་བསྟན་པ་ནི། སྨོན་ལམ་ཞེས་བྱ་བ་སྟེ། རྒྱུན་མཐའ་མེད་པར་འགྲུབ་པ་ཁོ་ནར་འདོད་པ་ཉིད་ནི་ལས་ཀྱི་འབྲས་བུ་ཡིན་ནོ་ཞེས་བྱ་བའི་དོན་ཏོ། །
རྣམ་པ་དེ་ལྟ་བུའི་ཞེས་བྱ་བ་ནི་བདག་གི་སྡུག་བསྔལ་ཅན་ནོ་ཞེས་བྱ་བ་ལ་སོགས་པ་གཅིག་པ་ཉིད་དུ་སྒྲོ་བཏགས་པའོ། །གལ་ཏེ་ལས་ཀྱི་ཞེས་བྱ་བའི་རྒོལ་བ་ལ་ལྷན་ཅིག་བྱེད་པ་ཟད་ཕྱིར་རོ་ཞེས་བྱ་བ་ལན་ཡིན་ལ། འོན་ཏེ་དགྲ་བཅོམ་པའི་ལས་ལ་ནུས་པ་མེད་ན་ཞེས་བྱ་བ་ལ་ནི་འཕངས་བ་ལྡོག་
མེད་ཅེས་བྱ་བ་འདིས་སོ། །གལ་ཏེ་བརྩེ་བ་ནི་ཞེས་བྱ་བ་ནི་འདོད་ཆགས་དང་བྲལ་བས་སེམས་ཅན་མཐོང་བ་སྒྲུབ་པ་ལས་འབྲས་བུའི་གཏན་ཚིགས་མ་ཡིན་ནམ། བརྗོད་པ་ནི་སྡུག་བསྔལ་ཤེས་ལ་ཞེས་བྱ་བ་སྟེ། གཞན་གྱི་སྡུག་བསྔལ་ཤེས་ན་ཞེས་བྱ་བ་འདིས་ནི་ཕྱི་རོལ་གྱི་རྒྱུ་བསྟན་པ་

ཡིན་ནོ། །འགྲེལ་པ་མཛད་པས་ནི་སྲེད་པ་མེད་པར་བརྗོད་པ་ཡིན་ལ། དེས་ན་འགལ་བ་མེད་པ་ཞེས་བྱ་བ་ནི་སྡང་བ་ཅན་མ་ཡིན་ལ། སྲེད་པ་དང་བཅས་པ་ནི་འགའ་ཞིག་ཏུ་དེ་ལ་གནོད་པར་བྱེད་པ་ལ་སྡང་བར་འགྱུར་རོ། །འདིས་ནི་མི་མཐུན་པའི་ཕྱོགས་མི་མངའ་བར་
བསྟན་པ་ནི་སྔ་མ་ཞེས་བྱ་བ་སྟེ། ནང་གི་རྒྱུ་བསྟན་པ་ཡིན་ནོ། །དངོས་ཆོས་ཞེས་བྱ་བས་ནི་འདོད་པ་དང་གཏི་མུག་ལ་སོགས་པ་ལ་ལྟོས་པ་མེད་པ་ཉིད་དུའོ། །སེམས་ཅན་རྗེས་འབྲེལ་ཅན་མ་ཡིན། །ཞེས་བྱ་བ་ནི་སེམས་ཅན་དུ་ལྟ་བ་ལ་བརྟེན་པ་མ་ཡིན་ནོ། །སྡུག་བསྔལ་གསུམ་ནི་སྡུག་བསྔལ་གྱི་
སྡུག་བསྔལ་དང་། འདུ་བྱེད་ཀྱི་སྡུག་བསྔལ་དང་། འགྱུར་བའི་སྡུག་བསྔལ་གྱི་ངོ་བོ་ཡིན་ནོ། །མཉམ་པ་ཉིད་ཅེས་བྱ་བ་ནི་དེ་རྣམས་བདག་ཁོ་ན་ཡིན་གྱི་གཞན་ནི་མ་ཡིན་པར་རོ། །སེམས་ཅན་ཐམས་ཅད་ལ་རྟག་ཏུ་བྱམས་པའི་སེམས་ནི་བདག་གོ་ཞེས་སམ། འོན་ཏེ་བདག་ཉིད་ཡིན་པ་མེད་ཀྱང་
བུ་སྡུག་ལ་མའི་ཚིག་རྩུབ་བཞིན་དུ་ཇི་ལྟར་འཇུག་པར་འགྱུར་ཞེས་བྱ་བའོ། །སེམས་ཅན་མཐོང་བ་ནི་འཁོར་བའི་རྒྱུ་ཡིན་པའི་ཕྱིར། སྡུག་བསྔལ་གྱི་རྒྱུ་མ་ཡིན་ནམ་ཞེས་ཟེར་བ་ལ། དེ་ལྟར་བུར་གྱུར་པ་ཞེས་བྱ་བའོ། །བརྩེ་བ་ནི་སེམས་ཅན་དུ་ལྟ་བ་དང་འགལ་བ་དམིགས་པ་ཡིན་པར་བསྟན་པ་
ནི། དེ་ཡང་ཞེས་བྱ་བའོ། །བརྩེ་བ་ནི་ཆགས་པའི་བདག་ཉིད་ཡིན་པའི་ཕྱིར་བདག་ལ་ཆགས་པ་མེད་ཀྱང་སེམས་ཅན་རྣམས་ལ་བདག་གི་བར་ཆགས་པ་ཡིན་པའི་ཕྱིར་དེ་མེད་པའི་ངོ་བོ་ནི་འདིའི་འདོད་ཆགས་དང་བྲལ་བ་ཉིད་མ་ཡིན་ནོ་ཞེས་ཟེར་བ་ནི་གལ་ཏེ་འདོད་ཆགས་དང་ཞེས་བྱ་བའོ། །བདག་
ལའམ་དེ་དང་འབྲེལ་པ་ཅན་ཡང་རུང་བ་ལ་ཆགས་པ་ནི་འདོད་ཆགས་ཡིན་ནོ་ཞེས་བསྟན་པ་ནི། དེ་བདག་མིན་པ་ཞེས་བྱ་བའོ། །བདག་དང་འབྲེལ་པ་ཅན་གྱི་བདེ་བ་སྒྲུབ་པ་ཉིད་ཀྱིས་སེམས་ཅན་གྱི་ཕུང་པོ་དང་གཟུར་བ་ལ་ནི་མ་ཡིན་པར་བསྟན་པ་ནི། སྡུག་བསྔལ་གྱི་རྒྱུ་ན་ནི་གཞན་གྱི་སྟེ། རེག་པ་
ནི་འཛིན་པ་ཡིན་ལ་དེ་ཉིད་འབའ་ཞིག་ན་དེ་ཙམ་སྟེ། སེམས་ཅན་ལ་ཆགས་པ་ཙམ་ནི་བདག་དང་འབྲེལ་པ་དང་བྲལ་བའི་བརྩེ་བ་ཡིན་ནོ། །གལ་ཏེ་ཡང་བདེ་བ་དང་འབྲེལ་པ་ཅན་ཉིད་ཀྱིས་བདག་ཏུ་མི་འཛིན་པ་ཡང་བྱེད་པ་ཉིད་ཀྱིས་གཞན་གྱི་བདེ་བ་རྣམས་ལ་བདག་ཏུ་སྒྲོ་འདོགས་པར་འགྱུར་བ་

ཁོ་ན་ཡིན་ནོ་སྙམ་དུ་སེམས་པ་ནི། གལ་ཏེ་བདག་གི་ཞེས་བྱ་བའོ། །བདག་ལ་བདེ་བ་གནས་པ་ཡིན་ན་ངེས་པར་བདག་ཏུ་སྒྲོ་འདོགས་པར་འགྱུར་བར་བསྟན་པ་ནི། གལ་ཏེ་བདག་དོན་ཞེས་བྱ་བའོ། །གཞན་ལ་གནས་པ་ཡིན་ན་ཅིས་བདག་ཏུ་སྒྲོ་འདོགས་པ་ཡིན་ཞེས་བསྟན་པ་ནི། གཞན་
དོན་ཙམ་ལ་ཞེས་བྱ་བའོ། །ཇི་ལྟར་ཆེད་ཀ་ཆེ་བ་མ་ཡིན་ཞེས་ཟེར་བ་ལ། རྒྱལ་པོའི་དཔེ་ཞེས་བྱ་བ་སྟེ། གཞན་གྱི་དོན་ལ་འཇུག་པ་ཡིན་ཞེས་བྱ་བའི་དོན་ཏོ། །རྣམ་རྟོག་མི་མངའ་བ་ཡང་སྔོན་གྱི་མཛད་པའི་ཤུགས་ཀྱིས་འཇུག་པ་ཡིན་པར་བསྟན་པ་ནི། སྔ་མ་སྔ་མ་ལས་ཞེས་བྱ་བའོ། །དེ་
ཉིད་གསལ་བར་བྱེད་པ་ནི། ཡོད་མིན་ཞེས་བྱ་བ་སྟེ། མངོན་སུམ་གྱི་ཡུལ་མ་ཡིན་པའི་ཕྱིར་རོ། །གནས་པ་མ་ཡིན་པ་ནི་སེམས་ཅན་གྱི་དོན་གྱིས་སྟོང་པ་ཉིད་དུའོ། །ཁྱེད་ཅག་ཅེས་བྱ་བ་ནི་འཁོར་བ་པའོ། །འཁྲུལ་པ་ཞེས་བྱ་བ་ནི་རྣམ་པར་རྟོག་པ་ཁོ་ན་སྟེ། མངོན་སུམ་མ་ཡིན་པའོ། །
བདག་ལ་གནོད་པ་བྱེད་པ་ལ་རྒྱབ་ཀྱིས་ཕྱོགས་པ་ནི་ཞེ་སྡང་ཡིན་པ་ལ་བདག་དང་བདག་གིར་ལྟ་བའི་སྙིང་པོ་ཅན་གྱིས་རྒྱབ་ཀྱིས་ཕྱོགས་པ་མ་ཡིན་དུ་ཟིན་ཀྱང་། །ཕྱོགས་པ་ཙམ་ཡོད་པ་ཡིན་ནོ་ཞེས་ཟེར་བ་ལ་བསྟན་པ་ནི། མི་གཙང་བ་ལ་སོགས་པ་མཐོང་བ་ལས་ཞེས་བྱ་བའོ། །ཞེ་སྡང་གི་རང་
བཞིན་དུ་ཞེས་བྱ་བ་ནི། ཞེ་སྡང་གི་ཡུལ་གཅིག་ལ་ཀུན་དུ་སྦྱོར་བའི་ཕྱིར་རོ། །འདི་ལ་ཡང་། བྱམས་སོགས་རྨོངས་དང་འགལ་མེད་ཕྱིར། །ཤིན་ཏུ་ཉེས་པ་ཚར་གཅོད་མིན། །ཞེས་འཆད་པར་འགྱུར་བའི་ལན་བསྟན་པ་ནི། མི་སྡུག་པ་བསྒོམ་པས་ཞེས་བྱ་བའོ། །མི་རྟག་པ་ལ་སོགས་པར་
ལྟ་བ་ལ་ཡང་ཅིའི་ཕྱིར་མི་འགྱུར་ཞེས་ཟེར་བ་ལ། བདག་ཡོད་ན་ནི་ཞེས་བྱ་བའོ། །མི་རྟག་པ་ཉིད་དུ་ལྟ་བར་འཁྲུལ་པ་དང་འགལ་བར་བསྟན་པ་ནི། གང་གི་ཚེ་རྒྱུ་ལ་རག་ལས་པ་ཞེས་བྱ་བའོ། །འདོད་ཆགས་དང་བྲལ་བ་རྣམས་ལ་བདག་ཏུ་ལྟ་བ་མེད་པའི་ཕྱིར། བདག་ཏུ་ལྟ་བའི་སྙིང་
པོ་ཅན་གྱི་ཞེ་སྡང་མི་སྲིད་དེ། །དེའི་ཕྱིར་དེ་རྣམས་ཞེ་སྡང་དང་ལྡན་པ་ཅན་ཡིན་གྱི་སྙིང་རྗེ་མ་ཡིན་པར་བསྟན་པ་ནི། གཏི་མུག་ཉེས་པའི་རྩ་བ་སྟེ། ཞེས་བྱ་བའོ། །ཉེས་རྒྱུ་ལ་ནི་གནོད་པར་བྱེད་པ་ལའོ། །ཉེས་མེད་ནི་ཉེས་པ་དང་ལྡན་པ་མ་ཡིན་པའོ། །གལ་ཏེ་འདོད་ཆགས་དང་བྲལ་བའི

བཅོམ་ལྡན་འདས་འཁོར་བ་ཇི་སྲིད་པར་བཞུགས་པ་ཡིན་ན། ལུས་ཀྱི་འཆིང་བ་ཡོད་པའི་ཕྱིར་མ་གྲོལ་བར་འགྱུར་རོ་སྙམ་དུ་སེམས་པ་ནི། གལ་ཏེ་འདོད་ཆགས་དང་བྲལ་བ་ཞེས་བྱ་བའོ། །ཐུགས་རྗེས་འཁོར་བ་ཇི་སྲིད་པར་བཞུགས་པའི་སྐུ་མངའ་ནས་ཡང་འདོད་
ཆགས་ལ་སོགས་པའི་དྲི་མ་སྤངས་པ་ཡིན་པའི་ཕྱིར་ཐུགས་གྲོལ་བ་ཁོ་ན་ཡིན་པར་བསྟན་པ་ནི། ཉེས་པ་དང་བྲལ་བའི་ཐུགས་ཞེས་བྱ་བའོ། །གྲོལ་མེད་མ་ཡིན་ཞེས་བྱ་བ་ནི་བཅོམ་ལྡན་འདས་ལ་ལྟོས་ནས་གྲོལ་བ་མེད་པ་མ་ཡིན་གྱི་འོན་ཀྱང་གྲོལ་བ་ཁོ་ན་ཡིན་ནོ། །མ་གྲོལ་བའི་ངོ་བོ་ནི་འདི་
ཡིན་ཏེ་སྔོན་གྱི་འདུ་བྱེད་པའི་ཕུང་པོ་རྣམས་ཟད་པ་ཡིན་ན་གཞན་དག་མཚམས་སྦྱོར་བ་ཡིན་ལ། འདི་ཡང་སངས་རྒྱས་བཅོམ་ལྡན་འདས་ལ་མི་མངའོ། །དེའི་ཕྱིར་མ་གྲོལ་བ་མ་ཡིན་ནོ། །ཡང་བྱང་ཆུབ་སེམས་དཔའ་རྣམས་ནི་མཚམས་སྦྱོར་བ་དང་ལྡན་པ་ཡིན་ཡང་། སྙིང་རྗེའི་དབང་གིས་ཉེས་པ་
མེད་པ་ཁོ་ན་ཡིན་གྱི། འཁོར་བ་བའི་འགྲོ་བ་ལྟ་བུ་མ་ཡིན་པར་བསྟན་པ་ནི། ནུས་པ་མ་ཟད་པ་སྟེ། སྔ་མ་ཟད་ཀྱང་གཞན་འབྱུང་བའི་ཕྱིར་བཞུགས་པ་ནི་འཚོ་བའོ། །ཡང་ན་སྔ་མ་ནི་ཉན་ཐོས་ལ་ལྟོས་པའོ། །ཕྱི་མ་ནི་བཅོམ་ལྡན་འདས་ལ་ལྟོས་པའོ། །འདུ་བྱེད་ཀྱི་སྒྲ་ནི་དགེ་བའི་གནས་པ་
ཡིན་ནོ། །འདུ་བྱེད་པ་ཡོད་པ་དང་མེད་པ་དག་ཁོ་ནས་གནས་པ་དང་གནས་པ་མ་ཡིན་པ་འབའ་ཞིག་ནི་མ་ཡིན་ཏེ། སྙིང་རྗེ་ཡོད་པ་དང་མེད་པ་དག་ལས་ཀྱང་འབྱུང་བ་ཡིན་པར་བསྟན་པ་ནི། དམན་པ་ཉིད་ཕྱིར་ཞེས་བྱ་བའོ། །སེམས་ཅན་གཞན་གྱི་ངོ་བོར་ནི་གཞན་གྱི་དབང་གིས་སོ། །བདག་
ཏུ་ལྟ་བ་ཁོ་ན་གཏི་མུག་མ་ཡིན་ཏེ། རྒྱུན་དུ་ཞུགས་པ་ལས་དེ་མེད་ཀྱང་གཏི་མུག་ཁས་ལེན་པའི་ཕྱིར་རོ་སྙམ་དུ་སེམས་པ་ནི། གལ་ཏེ་ལམ་གྱི་ནུས་པ་ཡིན་ན་ཞེས་བྱ་བའོ། །འདི་ལ་རྒོལ་བ་རྗེས་སུ་བརྗོད་ནས་ལན་བརྗོད་པ་ནི། རྒྱུན་དུ་ཞུགས་པ་ལ་ལྷན་ཅིག་སྐྱེས་པའི་བདག་ཏུ་ལྟ་བ་ཡོད་ཀྱང་།
གཏི་མུག་གཞན་དུ་ཡོད་པར་རྟོག་པ་ལ་ཚད་མ་མེད་དོ་ཞེས་བསྟན་པ་ནི། ལྷན་ཅིག་སྐྱེས་པ་མ་སྤངས་ཕྱིར། །ཞེས་བྱ་བ་ནི། བདག་ཏུ་ལྟ་བ་ཡང་མངོན་པར་སྦྱངས་པ་ནི་རྒྱུན་དུ་ཞུགས་པའི་ལམ་གྱིས་སྤང་བྱ་ཡིན་གྱི། ལྷན་ཅིག་སྐྱེས་པས་ནི་མ་ཡིན་ནོ། །དེའི་ཕྱིར་རྣམ་པ་གཉིས་པོ་འདི་

ནི་གཏི་མུག་གཞན་དུ་རྟོག་པ་འཇོམས་པར་བྱེད་པ་ཡིན་ནོ་ཞེས་བྱ་བའི་དོན་ཏོ། །དབང་པོ་རྣོན་པོའི་ཡང་རྣོན་པོ་ཁ་ཅིག་ནི་དང་པོའི་ལམ་ཉིད་དུ་གཏི་མུག་གཉི་ག་སྤངས་པ་ཉམས་སུ་མྱོང་བ་ཡིན་པས་སྲེད་པ་མེད་པ་ཡིན་པར་བསྟན་པ་ནི། སྤངས་ན་ཡང་ཞེས་བྱ་བའོ། །ལམ་གྱི་དང་པོ་ལ་གསལ་པོ་
མ་ཡིན་པར་བསྟན་པ་ནི། བདེ་བ་མཐོང་བ་ཙམ་ཉིད་ལ། །ཞེས་བྱ་བའོ། །བཟློག་པ་ནི་བདག་མེད་པའོ། །བསྟན་པ་ནི་ཆེན་པོར་འགྱུར་བའོ། །བསྒོམ་པའི་ལམ་ཉིད་ཀྱིས་ཞེས་བྱ་བ་ནི་གོམས་པ་ལས་བྱུང་བའི་བསྟན་པ་ཉིད་ཀྱིས་སོ། །གང་གི་འདོད་པས་ཞེས་བྱ་བ་ནི་དབང་པོ་རྣོན་པོའི་ཡང་རྣོན་པོ་སྟེ།
དེ་བསྟན་པ་ནི། ཤེས་རབ་རྣོན་པོའི་ཞེས་བྱ་བའོ། །མངོན་པར་སྦྱངས་པ་ལས་ལྷན་ཅིག་སྐྱེས་པའི་དངོས་པོ་མེད་ན་རྒྱུ་དང་རྣམ་པ་དག་གིས་ཐ་མི་དད་པ་ཡིན་ནོ་ཞེས་ཟེར་བ་ནི། གལ་ཏེ་སེམས་ཅན་དུ་ལྟ་བ་ལྷན་ཅིག་སྐྱེས་པ་ཞེས་བྱ་བའོ། །རྣམ་པ་ཐ་མི་དད་ཀྱང་བག་ཆགས་ཙམ་ལས་བྱུང་བ་ཉིད་ཀྱིས་
རྒྱུ་ཉེ་བར་སྟོན་པ་པོ་ཐ་དད་པ་ལས་ལྷན་ཅིག་སྐྱེས་པ་ཐ་དད་པར་བསྟན་པ་ནི། བདེ་བར་གྱུར་བ་འམ་ཞེས་བསྟན་པའོ། །དེ་བཞིན་དུ་མངོན་པར་སྦྱངས་པའི་ལས་ནི་མ་ཡིན་ཏེ། དེ་མེད་ཀྱང་བསྟན་བཅོས་ཤེས་པ་རྣམས་དང་རྒྱུན་དུ་ཞུགས་པའང་ཡོད་པའི་ཕྱིར་རོ། །འོན་ཏེ་དེ་རྣམས་ཉེ་བར་སྟོན་པ་
མེད་པས་བདག་གོ་ཞེས་བྱ་བ་ཁོ་ནར་མི་འགྱུར་རོ་ཞེས་ཟེར་བ་ལ། ངང་ཞེས་མཐོང་བ་མེད་པར་ནི་དེ་རྣམས་ཀྱི་བདག་ཏུ་ལྟ་བའི་རྣམ་པའི་བདག་ལ་ཆགས་པ་ཉིད་ཉམས་སུ་མྱོང་བ་གྲུབ་པོ་ཞེས་བྱ་བའི་དོན་ཏོ། །ཆགས་པ་ཉམས་སུ་མྱོང་བ་ལ་བྱེད་པ་ནི་འབྲས་བུའི་རྟགས་ཡིན་པར་བསྟན་པ་ནི།
བདག་ལ་སྲེད་པ་མེད་པར་ཡང་། །ཞེས་བྱ་བའོ། །རྒྱུའི་དབྱེ་བ་ཉིད་བསྟན་པ་ནི། ཐོག་མ་མེད་པའི་བག་ཆགས་ཀྱི་དབང་གིས་ཞེས་བྱ་བའོ། །ལམ་གྱི་དང་པོ་ལ་ལྷན་ཅིག་སྐྱེས་པ་མ་སྤངས་པས་ཐར་པ་མ་ཡིན་ཞེས་ཟེར་བས་ཐར་པ་ལ་ཉོན་མོངས་པ་མེད་པར་བརྗོད་པ་ཡིན་པར་བསྟན་པ་ནི། འདིས་ནི་
ཞེས་བྱ་བའོ། །བདག་ཏུ་སྨྲ་བ་ཡོངས་སུ་མགུ་བ་མེད་པས་གྱ་ནོམ་པ་མ་ཡིན་པའི་ཐར་པ་ཡིན་ནོ། །དེའི་ཕྱིར་བདག་ཁས་ལེན་པ་ཉིད་གྱ་ནོམ་པའི་ཐར་པ་ཡིན་ནོ་སྙམ་དུ་སེམས་པ་ནི། གལ་ཏེ་བདག་ཡོད་ན་ཞེས་བྱ་བའོ། །བདག་ཁས་ལེན་ན་ཐར་པ་ཉིད་དུ་མི་འགྱུར་བ་བསྟན་པ་ནི། སྡུག་བསྔལ་སྐྱེ་

བའི་ཞེས་བྱ་བ་སྟེ། འཁོར་བ་སྐྱེ་བའོ། །བཅིངས་པ་དང་ཐར་པ་དག་གིས་བདག་དང་འབྲེལ་པ་ནི་རྒྱུ་ཉིད་ཁོ་ན་ཡིན་ལ། དེ་ནི་རྟག་པ་ལ་མི་སྲིད་དོ། །འདུ་བ་དང་ཕྲད་པ་དག་ཀྱང་དེ་ཡོད་པ་དང་མེད་པའི་དུས་དག་ལ་ཁྱད་པར་མེད་པས་མེད་པ་ཁོ་ན་ཡིན་ནོ་ཞེས་བྱ་བའི་དོན་
ཏོ། །རྟོགས་པ་དང་ལྡན་པ་ཡང་རྨོངས་པའི་དབང་གིས་བྱེད་པ་ཡིན་ནོ་ཞེས་ཟེར་བ་ནི། འོན་ཏེ་འདི་ཞེས་བྱ་བའོ། །བདག་ཤེས་པ་ནི་དེ་ཉིད་ཤེས་པ་ཡིན་ཏེ། རྨོངས་པའི་དུས་ན་གལ་ཏེ་མེད་པ་ཡིན་ན་མི་དམིགས་པ་ཉིད་འདིའི་མེད་པ་སྒྲུབ་པ་ཡིན་པར་བསྟན་པ་ནི། དེའི་ཚེ་བདག་ཉིད་ཅེས་བྱ་
བའོ། །དེའི་རང་བཞིན་ནི་གཏི་མུག་ཉིད་དོ། །སྡུག་བསྔལ་བ་ཡང་གཏི་མུག་གིས་མ་ཡིན་ཏེ། འོན་ཀྱང་ལས་ཀྱིས་བསྟན་པ་ཡིན་ནོ་ཞེས་ཟེར་བ་ནི། འོན་ཏེ་བདག་ཉིད་ཤེས་ཀྱང་ཞེས་བྱ་བའོ། །རྣམ་པར་རྟག་པ་མི་འཐད་པའི་ཕྱིར་བཅིངས་པ་མ་ཡིན་པར་བསྟན་པ་ནི། གལ་ཏེ་འདི་
ཞེས་བྱ་བའོ། །གཞན་གྱི་དངོས་པོ་མེད་ཀྱང་ཞེས་བྱ་བ་ནི་སྡུག་བསྔལ་མེད་པའི་རང་བཞིན་མེད་པ་ནི་སྡུག་བསྔལ་གྱི་རང་བཞིན་ཉིད་དོ། །རིག་པ་མ་ཡིན་པས་བདག་དང་བདག་ཅེས་བྱ་བའི་འཁྲུལ་པ་མ་གཏོགས་པའི་བདག་རིགས་པ་མ་ཡིན་ནོ། །གལ་ཏེ་ཡོད་པའི་བདག་ཉིད་ཀྱི་མཐའ་
ཐམས་ཅད་དུ་རྗེས་སུ་འཇུག་པ་ཡིན་ནོ་ཞེས་ཟེར་བ་ནི། དེའི་རང་བཞིན་རིག་ཅེ་ན། ཞེས་བྱ་བའོ། །དགའ་བའི་ངོ་བོ་ཚངས་པ་ཡིན། །ཞེས་བྱ་བ་འདི་ལ། གལ་ཏེ་ཐར་ཀྱང་བདེ་ཉིད་ལ། ཞེས་སྨོས་སོ། །བདག་མེད་པ་ཁས་ལེན་པ་གྱ་ནོམ་པ་ཉིད་ཡིན་པར་བསྟན་པ་ནི། ཡོངས་སུ་ཚིམ་
པ་ཞེས་བྱ་བ་སྟེ། ནོན་པ་མེད་པ་ནི་བདག་དང་བདག་གིར་སྒྲོ་འདོགས་པ་མེད་པའི་ཕྱིར་རོ། །མི་རིགས་པ་མེད་པ་ནི་རྟག་པ་ཉིད་མེད་པའི་ཕྱིར་རོ། །གལ་ཏེ་ང་སྔོན་གྱུར་ཏོ་ཞེས་བྱ་བ་ནི་དཔེར་ན་སྐྱེ་བོ་ལ་ཕན་པའི་རྒྱལ་པོ་ཞེས་བྱ་བར་རོ། །རྟག་པ་བཞིན་དུ་བརྗོད་བྱ་མ་ཡིན་པ་ཡང་ཁས་བླངས་པར་འོས་
པ་མ་ཡིན་ཏེ། རིགས་པ་དང་འགལ་བའི་ཕྱིར་རོ་ཞེས་བསྟན་པ་ནི། མི་རྟག་པ་ཉིད་དུ་ཞེས་བྱ་བ་སྟེ། རྟག་པ་ཉིད་ལ་སོགས་པ་དང་འགལ་བའི་རིམ་པ་དང་ཅིག་ཅར་བ་ཉིད་ཀྱིས་བྱེད་པ་པོ་ལ་ཁྱབ་པ་ནི་མི་རྟག་པ་ཉིད་དུ་རྣམ་པར་གནས་པ་ཡིན་པའི་ཕྱིར་མི་རྟག་པ་ཉིད་ཀྱིས་ཀྱང་ཁྱབ་པ་ཡིན་ཞེས་བྱ་བའི་

དོན་ཏོ། །འོན་ཏེ་བཅིངས་པ་དང་ཐར་པ་དག་ཅེས་བྱ་བ་ལ་སོགས་པ་ནི་གཉི་གའི་བདག་ཉིད་མེད་པའི་རྒྱུ་ཡིན་ནོ་སྙམ་དུ་སེམས་པའོ། །གཉི་གའི་བདག་ཉིད་ཀྱིས་ཏེ་བཟློག་པ་ལ་ནི་གཞན་དུ་གྲུབ་པ་ཉིད་ཀྱི་གཏན་ཚིགས་བསྟན་པ་ནི། རྟག་དང་མི་རྟག་ཅེས་བྱ་བའོ། །མི་འཇིག་པ་འཇིག་པ་དང་
འགལ་བ་ཡིན་པར་བསྟན་པ་ནི། གང་གི་རང་བཞིན་ཞེས་བྱ་བའོ། །གལ་ཏེ་ཁོ་བོ་ཅག་གི་འདོད་པ་ལས་བཟློག་པ་བརྗོད་པར་བྱ་བར་ངེས་པ་ཡིན་ནོ། །རྟག་པ་ཡིན་ཞེས་བྱ་བར་བརྗོད་བྱ་ཡིན་པར་བསྟན་པ་ནི། དེ་ནི་རྟག་པ་ཞེས་བྱ་བའོ། །རྟག་པ་དང་ཅིག་ཤོས་འགལ་བར་ཚད་མས་གྲུབ་པར་བྱེད་
པར་འདོད་པས་བསྟན་པ་ནི། ཞིག་པ་དང་མ་དམིགས་པ་ཞེས་བྱ་བ་ལ་སོགས་པའོ། །གལ་ཏེ་སྔོན་མཐོང་བ་ད་ལྟར་སྣང་བཞིན་བ་དང་གཅིག་པ་ཉིད་དུ་དེ་ཉིད་ཡིན་ནོ་ཞེས་ཤེས་བཞིན་དུ་ཇི་ལྟར་གཞན་དུ་མ་ཡིན་སྙམ་དུ་སེམས་པ་ནི། གཅིག་ཉིད་དུ་རྟོགས་བཞིན་པ་ནི་ཞེས་བྱ་བའོ། །གང་ཞིག་
ཅེས་བྱ་བ་ནི་མཐོང་བའིའོ། །གཅིག་ཉིད་དུ་ཞེས་བྱ་བ་ནི་སྣང་བཞིན་པ་དང་། ལྷན་ཅིག་རྟོགས་པ་དེ་ཉིད་འདི་ཡིན་ཞེས་བྱ་བའོ། །དེ་ནི་མཐོང་བའོ། །མ་རྟོགས་པ་ཞེས་བྱ་བ་ནི་མེད་པ་དང་མ་སྐྱེས་པའི་ངོ་བོ་ནི་འགལ་བ་ཡིན་ཏེ། མཐོང་བ་ལས་མ་རྟོགས་པ་ནི་མཐོང་བ་ནི་མ་རྟོགས་པ་ཡིན་ནོ་ཞེས་ཟེར་བ་ནི།
འོན་ཏེ་གཞན་རྟོགས་པ་ཞེས་བྱ་བའོ། །ལན་ནི་དེས་ན་མ་རྟོགས་པ་ནི་ཡོད་པ་མ་ཡིན་ནོ་ཞེས་བྱ་བ་སྟེ། གཞན་རྟོགས་པའི་ངོ་བོ་ཡིན་ཏེ། གཅིག་ཉིད་དུ་རྟོགས་པར་ཁས་བླངས་པའི་ཕྱིར་ཞེས་བྱ་བའི་དོན་ཏོ། །དེ་ཞེས་བྱ་བ་ནི་ད་ལྟར་བའོ། །གཞན་ཞེས་བྱ་བ་ནི་རྟོགས་པ་ཉིད་དོ། །དེའི་མཐོང་བ་མ་
རྟོགས་པ་ཞེས་རྒོལ་བའོ། །འདི་ཡང་ད་ལྟར་བ་ཉིད་མཐོང་བ་ཡིན་པ་ཞེས་བྱ་བ་འདིས་འགལ་བ་ཡིན་པར་བསྟན་པ་ནི། དེ་ལྟར་ན་འོ་ན་ཞེས་བྱ་བ་སྟེ། སྔ་མ་གང་ཡིན་པ་དེ་ཉིད་འདི་ཡིན་ན། དེ་ལ་ལྟོས་ནས་ཀྱང་གཞན་ཡིན་པའི་རང་ཉིད་ཁོ་ན་ལ་ལྟོས་ནས་དེ་གཞན་ཡིན་ནོ་ཞེས་བྱ་བའི་དོན་ཏོ། །དེ་
ཡང་མི་རུང་ངོ་ཞེས་བྱ་བ་ནི་འགལ་བའོ། །འགལ་བ་ཉིད་བསྟན་པ་ནི་གཞན་པ་ཉིད་དུ་ཞེས་བྱ་བ་སྟེ། གཞན་པ་ཉིད་ནི་དབྱེ་བའོ། །གལ་ཏེ་འདི་སྔར་མཐོང་བ་ལས་གཞན་པ་ཡིན་ན། གཞན་མ་ཡིན་པ་ཁོ་ནར་མི་འགྱུར་ཞེས་བྱ་བ་ནི་དབྱེ་བ་ཡིན་ཏེ། གཅིག་ཉིད་དེ་རྟོགས་པ་ནི་མ་ཡིན་ནོ། །གཞན་

དུ་ཞེས་བྱ་བ་ནི་དམིགས་པའོ། །འོན་ཏེ་སྔ་མ་དང་ཕྱི་མ་དག་གི་ཁྱད་པར་ཐ་དད་པ་དག་ལ་གཅིག་ཏུ་རྗེས་སུ་འཇུག་པའི་ངོ་བོ་ནི་དེ་དང་མ་བྲལ་བར་རྟོགས་པ་ཡིན་ནོ་སྙམ་དུ་སེམས་པ་ནི། གཅིག་ཉིད་ཅེས་བྱ་བའོ། །བྲལ་བ་ཞེས་བྱ་བ་ནི་དུས་གཅིག་ལ་གཞན་མེད་པའོ། །དེ་ཉིད་ཀྱི་
ཞེས་བྱ་བ་ནི་རྒོལ་བའོ། །ལན་ནི་ཇི་ལྟར་གཅིག་ཅན་ཞེས་བྱ་བའོ། །དེ་བཞིན་ཞེས་བྱ་བ་ནི་མ་བྲལ་བ་དང་བྲལ་བའི་ངོ་བོ་སྟེ། སྔ་མའི་ངོ་བོ་དང་མཚན་ཉིད་མི་མཐུན་པའི་ངོ་བོ་དང་ལྡན་པ་ཉིད་དེ་དང་བྲལ་བ་ཡིན་ཏེ། རིམ་གྱིས་འབྱུང་བ་ཡིན་པའི་ཕྱིར་དེ་དག་ལ་རིམ་པ་མེད་པ་རིམ་གྱིས་འབྱུང་བར་མི་རིགས་
སོ་ཞེས་བྱ་བའི་དོན་ཏོ། །རིམ་པ་མ་ཡིན་པ་ཡང་སྣང་བཞིན་པ་ནི་དུས་དང་ཡུལ་གཅིག་པ་མ་ཡིན་པའི་ཕྱིར། སྔ་མ་དང་ཕྱི་མའི་ངོ་བོ་ལ་ཁྱབ་པར་བྱེད་པ་ཉིད་ཡིན་ནོ་སྙམ་དུ་སེམས་པ་ལ། སྔ་ཕྱིའི་རང་བཞིན་མ་རྟོགས་ན། །ཞེས་བྱ་བ་ནི་སྔ་མ་དང་ཕྱི་མའི་ངོ་བོ་དང་ལྡན་པའི་བདག་ཉིད་དང་བྲལ་བའི་
ངོ་བོ་སྣང་བ་ཉིད་དེ་ལས་གཞན་པའི་སྣང་བ་ཡིན་ཏེ། ཉེ་བར་སྣང་བའི་ངོ་བོ་ཡིན་ཞེས་བྱ་བའི་དོན་ཏོ། །སྔ་མའི་ངོ་བོ་དང་ལྡན་པ་ཕྱི་མའི་ངོ་བོ་དང་ལྡན་པར་མཐོང་བའི་དུས་སུ་མ་མཐོང་བ་ནི་ཐ་དད་པའི་ཐ་སྙད་ཀྱི་ཡུལ་ཡིན་ཏེ། ཐ་སྙད་དེའི་རྒྱུ་མཚན་ནི་དེ་ཙམ་ཡིན་པའི་ཕྱིར་རོ་ཞེས་བསྟན་པ་ནི། མཐོང་བ་
དང་མ་མཐོང་བར་ཞེས་བྱ་བ་སྟེ། མཐོང་བ་ཞེས་བྱ་བ་ནི་མཐོང་བའི་ངོ་བོའོ། །མཐོང་བའི་ཡུལ་གྱི་དངོས་པོ་ནི་བཟློག་པ་དང་འགལ་བ་ཡིན་པར་བསྟན་པ་ནི། གཅིག་ཕྱིར་ཞེས་བྱ་བ་སྟེ། རྟག་པ་མེད་པ་ལ་དགོངས་པའོ། །དེ་ནི་འདི་ཡིན་ནོ་ཞེས་བྱ་བའི་རྣམ་པར་རྟོག་པ་ནི་མཐོང་བ་དང་། སྣང་བཞིན་པ་
དག་ལ་གཅིག་ཏུ་ཞེན་པ་ནི་དྲན་པའི་མངོན་སུམ་གྱི་ངོ་བོ་ཡིན་ལ། དྲན་པ་དང་དབང་པོ་ལ་སོགས་པའི་ཚོགས་པ་ལས་བྱུང་བ་ཡིན་ན་ཞེས་བྱ་བའི་བསམ་པས་དོགས་པ་ནི། ཡང་ནས་ཡང་དུ་ཞེས་བྱ་བའོ། །ལན་ནི། དྲན་པ་ཚད་མ་མ་ཡིན་པའི་ཕྱིར་ཞེས་བྱ་བའོ། །གཟུང་བ་ཙམ་འཛིན་པ་ནི་དྲན་པ་ཡིན་
ལ། འདི་ནི་དེ་ལྟ་མ་ཡིན་ཏེ། མ་བཟུང་བ་ཡང་སྔ་མ་དང་ཕྱི་མ་དག་གཅིག་ཏུ་འཛིན་པའི་ཕྱིར་རོ་སྙམ་དུ་སེམས་པ་ལ། མ་རྟོགས་པ་ནི་ཞེས་བྱ་བ་སྟེ། འདི་ཡང་སྔར་མཐོང་བ་ཉིད་ཀྱིས་བཟུང་བ་ཡིན་ཏེ། གཅིག་ཡིན་པའི་ཕྱིར་རོ་ཞེས་བྱ་བའི་དོན་ཏོ། །དངོས་པོ་གཅིག་ཡིན་པ་དང་སྔར་བཟུང་བ་ཉིད་དུ་ནི་བདེན་

མོད་ཀྱི། དེ་ནི་ད་ལྟར་གྱི་དུས་ན་ཡོད་པ་ཉིད་སྔར་བཟུང་བ་མ་ཡིན་ཏེ། དེའི་དུས་ན་མེད་པའི་ཕྱིར་རོ་སྙམ་དུ་སེམས་པ་ནི། གལ་ཏེ་ད་ལྟར་ཡོད་པ་ཉིད། །ཅེས་བྱ་བའོ། །སྔོན་དང་ཕྱིས་འབྱུང་བའི་དུས་ཞེས་བྱ་བ་འགའ་ཡང་མེད་དོ། །འོ་ན་ཅི་ཞེ་ན། དཔྱིད་དང་དགུན་ལ་སོགས་པ་ཉིད་ཡིན་ལ།
དཔྱིད་དང་འབྲེལ་པའི་དངོས་པོ་འཛིན་པ་ཡིན་ན་དགུན་དང་འབྲེལ་པ་འཛིན་པ་མ་ཡིན་ཏེ། ཅིག་ཅར་བ་མ་ཡིན་པའི་ཕྱིར་རོ། །འབྲེལ་པ་ཅན་མ་བཟུང་ན་འབྲེལ་པ་འཛིན་པ་མ་ཡིན་ནོ་ཞེས་བྱ་བའི་དོན་ཏོ། །དེ་དངོས་པོའི་ཆ་དྲན་པའི་ཕྱིར་སྔར་ཉིད་བཟུང་བ་ཡིན་པས་དེ་ལ་དྲན་པ་དང་འབྲེལ་པ་ལ་ཚད་མ་
གཞན་མངོན་སུམ་ཉིད་ཡིན་པའི་ཕྱིར་ཇི་ལྟར་སྔར་མཐོང་བ་ངོ་ཤེས་པའི་ཚད་མ་ཡིན་ནོ། །དེ་བསྟན་པ་ནི། ཐ་དད་མེད་ཕྱིར་ཞེས་བྱ་བ་སྟེ། དངོས་པོའི་ཆ་དྲན་པ་ཁོ་ན་ཡིན་ཞེས་བྱ་བའི་དོན་ཏོ། །སྔ་མ་འམ་ཕྱི་མ་རུང་བ་མཐོང་བ་ནི་དུས་རིང་མོ་ཡིན་པས་དངོས་པོ་རྟོགས་པའི་ནུས་པ་མེད་པའི་ཕྱིར་མི་
རྟོགས་པ་མ་ཡིན་ནམ། འོན་ཀྱང་རང་གི་དུས་ནི་ཡིན་ཏེ་གཅིག་པ་ཉིད་དུ་སྔར་མཐོང་བ་ངོ་ཤེས་པ་ཉིད་ཀྱིས་རྟོགས་པ་ཡིན་ནོ་སྙམ་དུ་སེམས་པ་ལ། མཐོང་ཟིན་ཉིད་ཅེས་བྱ་བ་སྟེ། སྔར་དང་ཕྱིས་མཐོང་བ་དག་གིས་རང་གི་དུས་ཀྱི་ངོ་བོ་རྣམ་པར་འཇིག་པ་ཡིན་པའི་ཕྱིར། དེས་གནོད་པའི་སྔར་མཐོང་བ་
ངོ་ཤེས་པ་ནི་བག་ཆགས་ཀྱི་ནུས་པ་ལ་བརྟེན་པ་ཡིན་གྱི་གཅིག་ཉིད་དུ་སྡུད་པ་མ་ཡིན་ནོ་ཞེས་བྱ་བའི་དོན་ཏོ། །སྔར་མཐོང་བ་ངོ་ཤེས་པ་ནི་སྔར་དང་ཕྱིས་མཐོང་བ་དག་ཅིག་ཅར་རྟོགས་པས། སྔ་མ་དང་ཕྱི་མ་དག་ཉིད་རྟོགས་པ་མ་ཡིན་ནམ། དེའི་ཕྱིར་དེ་དག་གིས་འདི་ལ་གནོད་པ་མ་ཡིན་ཏེ། འགལ་
བ་མེད་པའི་ཕྱིར་རོ་སྙམ་དུ་སེམས་པ་ནི། སྔ་ཕྱིའི་ཤེས་པ་ལས་ཤེ་ན་ཞེས་བྱ་བའོ། །ཤེས་བྱ་བཞིན་དུ་ཤེས་པ་ཡང་སྔར་མཐོང་བ་ངོ་ཤེས་པ་ལས་ངོ་ཤེས་པ་གཅིག་ཉིད་ཡིན་པའི་ཕྱིར། སྔ་མ་དང་ཕྱི་མ་དག་ཏུ་རྟོགས་པ་ནི་ཚད་མ་ལས་མ་ཡིན་པར་བསྟན་པ་ནི། དེ་དག་ཅེས་བྱ་བའོ། །རང་རིག་པ་ལ་ནི་སྔ་མ་
དང་ཕྱི་མ་ཉིད་ཤེས་པའམ་ཤེས་བྱ་ལ་མི་སྲིད་པར་བསྟན་པ་ནི་རྟོགས་མི་འགྱུར་ཞེས་བྱ་བའོ། །གཞན་གྱི་ཞིག་པ་ཡིན་ཡང་ཉེ་བར་འཛིན་པའི་ཕྱིར་སྔ་མས་ཕྱི་མའམ། དེས་སྔ་མ་འཛིན་པ་མ་ཡིན་པར་བསྟན་པ་ནི། མེད་པ་ནི་ཞེས་བྱ་བའོ། །མེད་པ་ནི་འཛིན་པར་བྱེད་པའི་དུས་ན་ཉེ་བ་མ་ཡིན་པའོ། །སྔ་མའམ་

ཕྱི་མ་ཡང་རུང་ཕན་ཚུན་ཐ་དད་པ་མ་ཡིན་པ་མ་ཡིན་ནམ། གཅིག་ཉིད་ཡིན་པའི་ཕྱིར་རོ་སྙམ་དུ་སེམས་པ་ནི། མྱོང་བ་དེ་དག་གཅིག་ཡིན་ན། ཞེས་བྱ་བའོ། །གལ་ཏེ་ཡང་མངོན་སུམ་བྱད་པ་ལ་སྔ་མ་དང་ཕྱི་མ་ཉིད་མ་ཡིན་ཡང་རྣམ་པར་རྟོག་པ་ལ་སྣང་བ་ཁོ་ན་ཡིན་ནོ་སྙམ་དུ་སེམས་
པ་ནི། གལ་ཏེ་སྔ་མ་ཉིད་མེད་ན། །ཞེས་བྱ་བའོ། །རྣམ་པར་རྟོག་པ་ནི་མངོན་དུ་བྱེད་པའི་ངོ་བོ་རྟོགས་པ་མ་ཡིན་ལ། དྲན་པའི་ངོ་བོ་ནི་བག་ཆགས་ཀྱི་སྟོབས་ཁོ་ན་ལས་དམིགས་པ་ཡིན་པར་བསྟན་པ་ནི། མངོན་དུ་བྱེད་ཉིད་མ་ཡིན་པས། །ཞེས་བྱ་བའོ། །ཞེན་པས་འཛིན་པ་ནི་རྣམ་པར་རྟོག་པ་
རྣམས་ལ་ཡོད་པ་ཁོ་ན་ཡིན་ནོ་སྙམ་དུ་སེམས་པ་ལ། ལན་ནི་སྔོན་དུ་བྱེད་པ་ཉིད། །ཅེས་བྱ་བ་སྟེ། ཕྱིན་ཅི་ལོག་ཏུ་ཞེན་པས་ནི་མ་ཡིན་ནོ། །རྒྱུ་ཉིད་ནི་གཟུང་བ་ཉིད་ཡིན་ལ་འབྲས་བུ་ཉིད་ནི་འཛིན་པ་ཉིད་མ་ཡིན་ནམ་རིག་པ་ཤེས་པ་བཟུང་བ་ནི། རྒྱུ་ཉིད་ཁོ་ནར་རྟོགས་པ་ཡིན། །ཞེས་བྱ་བའོ། །དེ་འདི་
ནི་དྲན་པ་ལ་ཡང་མ་ཉམས་པ་ཡིན་ནོ་སྙམ་དུ་སེམས་པ་ལ། དོན་ལས་དྲན་པ་ཞེས་བྱ་བ་སྟེ། དྲན་པ་ལ་ནི་མྱོང་བ་ཁོ་ན་ནུས་པ་ཅན་ཡིན་ཏེ། དེའི་བག་ཆགས་དང་རྗེས་སུ་འབྲེལ་པ་ཡིན་པའི་ཕྱིར་ཞེས་བྱ་བའི་དོན་ཏོ། །མྱོང་བ་ནུས་པ་ལས་བྱུང་བའི་དྲན་པ་དེ་ནི་དེའི་བྱ་བའི་ཡུལ་ཙམ་ལས་ཞེན་པ་ཡིན་གྱི།
སྔ་མ་ཉིད་ལ་སོགས་པ་ཉིད་ནི་མ་ཡིན་ཏེ། འདི་ནི་མྱོང་བས་འཛིན་པ་ཡིན་པའི་ཕྱིར་རོ་ཞེས་བསྟན་པ་ནི་དེ་མྱོང་བ་སྔ་མས་ཞེས་བྱ་བའོ། །དེའི་ཕྱིར་སྔ་མ་ཉིད་ལ་སོགས་པར་ཐོག་མ་མེད་པའི་བག་ཆགས་ལས་བྱུང་བའི་རྣམ་པར་རྟོག་པས་རྟོགས་པར་བྱ་བ་ཡིན་པར་བསྟན་པ་ནི། འདས་པ་མངོན་དུ་བྱས་པ་ཞེས་
བྱ་བའོ། །འདི་ཙམ་གྱིས་སྔ་མ་དང་ཕྱི་མ་དག་གི་རྗེས་སུ་འཇུག་པ་གཅིག་གི་ངོ་བོ་བསལ་ནས། ད་ནི་སྔ་མ་དང་ཕྱི་མ་ལ་གནས་པའི་གཅིག་ཉིད་དུ་འདོད་པ་ཚད་མ་ཅན་མ་ཡིན་པའི་ཕྱིར་སེལ་བར་བྱེད་པ་བསྟན་པ་ནི། འོན་ཏེ་སྐྱེ་འཇིག་ཅེས་བྱ་བའོ། །འདི་ཉིད་ཀྱི་འབྲེལ་པ་ཉིད་ཅེས་བསྟན་པ་ནི། གང་ཚེ་ཞིག་པ་
ཞེས་བྱ་བའོ། །ཡོད་པ་ནི་སྐྱེ་བ་དང་ལྡན་པ་ཡང་ཞིག་པ་མེད་པ་སྟེ། རབ་ཏུ་ཉམས་པར་འགལ་བ་ཡིན་ཞེས་བྱ་བའི་དོན་ཏོ། །སྔར་རྟོགས་པའི་བརྟན་པ་དང་སྐྱེ་བ་དག་ལ་ཡུལ་ཉེ་བའི་མངོན་སུམ་གྱིས་བསྟན་པར་མི་རིགས་པ་ཁོ་ན་ནི་བརྟན་ལའང་ཞེས་བྱ་བའོ། །ལམ་གྱི་ཞར་ལ་ཞེས་བྱ་བ་ནི་

ལམ་བསྟན་པས་ཞར་ལ་འགོག་པའི་རྣམ་པ་བཞི་པ་སྟེ། ངེས་པར་འབྱུང་བ་འདི་ལྟ་བུའི་ངོ་བོ་བསྟན་པ་ཡིན་ནོ། །བསྟན་ཟིན་ཞེས་བྱ་བ་ནི་དེའི་གནོད་བྱེད་ནི་བདག་མེད་མཐོང་བ་འགལ་བ་ཡིན་ཞེས་བྱ་བ་ངེས་སོ། །བདག་དང་བདག་གིར་འཛིན་པས་བྱས་པའི་ཆགས་པ་གཞོམ་པར་ནི་གནས་གྱུར་པ་
ནི་བདག་མེད་པ་མཐོང་བ་གོམས་པ་ལས་གྱུར་པ་ཡིན་པར་བསྟན་པ་ནི། དེ་གོམས་པ་ལས་ཞེས་བྱ་བའོ། །ཇི་ལྟར་བདག་དང་བདག་གིར་འཛིན་པ་གོམས་པ་བདག་ཏུ་གྱུར་པ་ཁོ་ན་ཡིན་ཡང་། བདག་མེད་པ་དང་འགལ་བ་ཅན་ཡིན་པ་དེ་བཞིན་དུ། འདི་བདག་ཏུ་གྱུར་པ་ཡིན་ཡང་བདག་ལ་སོགས་པ་
འཛིན་པ་དང་འགལ་བར་འགྱུར་བ་ཁོ་ན་ཡིན་ན། ཇི་ལྟར་གནས་གྱུར་པ་ཡིན་ཏེ་འགལ་བར་ཁྱད་པར་མེད་དོ་སྙམ་དུ་སེམས་པ་ནི་བདག་གྱུར་ཀྱང་ཞེས་བྱ་བ་སྟེ། ལམ་གྱི་སྐྱོན་བདག་ཏུ་འཛིན་པ་ལ་སོགས་པ་རྣམས་འབྱུང་བ་ནི་སྐྱོན་གྱི་བདག་ཉིད་དུ་གྱུར་པ་ལ་ལམ་ལྟ་བུའོ། །ནུས་པ་མེད་པ་ནི་
བདག་ཏུ་འཛིན་པ་ལ་སོགས་པ་ཁྱབ་བདག་མ་ཡིན་པའི་ཕྱིར་རོ། །ལམ་ནི་དེ་ལས་བཟློག་པ་ཡིན་པའི་ཕྱིར་ལམ་ཡོད་ན་སྐྱོན་འབྱུང་བ་མི་རིགས་སོ་ཞེས་བྱ་བ་བཟློག་པ་ནི་ཡོན་ཏན་རྣམས་ལ་སྐྱོན་ཡོད་པས་གནོད་པའོ། །ཡོན་ཏན་རྣམས་ནི་ཞེས་བྱ་བ་ནི་བདག་མེད་པ་མཐོང་བའོ། །དངོས་པོའི་རང་བཞིན་
ཡིན་པའི་ཕྱིར་ནི་དངོས་པོའི་ཡུལ་ཉིད་ཀྱིས་སོ། །ཉེས་པ་རྣམས་ནི་ཞེས་བྱ་བ་ནི་བདག་ཏུ་འཛིན་པ་ལ་སོགས་པ་རྣམས་སོ། །བདག་ལ་སོགས་པར་འཛིན་པ་ཡང་རྣམ་པར་ཤེས་པ་ཡིན་ཏེ། ཐོག་མ་མེད་པའི་བག་ཆགས་ལས་བྱུང་བའི་ཕྱིར་རྒྱུ་དང་བཅས་པ་ཡིན་ལ་བདག་མེད་པར་མཐོང་བའི་དམིགས་
པའི་རྒྱུ་ཅན་ལས་ཐ་མི་དད་པ་མ་ཡིན་ནམ། དམིགས་པ་དང་བདག་པོའི་རྐྱེན་དག་ལ་ཁྱད་པར་ཅི་ཡང་མེད་ན། གང་གིས་གཅིག་གནོད་པ་ཅན་ཡིན་ལ་ཅིག་ཤོས་རྒྱུ་དང་བཅས་པ་ཡིན་ཡང་མ་ཡིན་ཞེས་འདྲི་བ་ནི། ཇི་ལྟར་ཞེ་ན་ཞེས་བྱ་བའོ། །ཁྱད་པར་བསྟན་པ་ནི་རྣམ་ཤེས་ཡུལ་འཛིན་པའི་ཆོས་ནི་རང་
བཞིན་ཡིན་ཏེ། གནོད་བྱ་མ་ཡིན་པའི་ཕྱིར་རོ། །ཉ་ཕྱིས་འཛིན་པ་བཞིན་དུ་ཡུལ་དང་བྲལ་བ་འཛིན་པའི་རྒྱུ་དང་བཅས་པ་ཡིན་ཡང་དངུལ་གྱི་ཤེས་པ་བཞིན་དུ་སྐྱེས་ནས་ཞིག་པ་ཡིན་ལ་རང་བཞིན་འདི་ནི་དེ་ལྟ་མ་ཡིན་ནོ། །ཅི་ལས་ཡིན་ཞེ་ན། ཇི་ལྟར་ཡོད་དེ་འཛིན་པ་དང་། །ཞེས་འཆད་པར་འགྱུར་བའོ་ཞེས་བྱ་བ་

ནི་གང་གི་ཕྱིར་ཞེས་བྱ་བ་དོན་དུ་ཡང་སྦྱར་རོ། །འདིས་ཀྱང་རྣམ་ཤེས་ལ་ཡོད་པ་གནོད་བྱ་མ་ཡིན་པ་ཉིད་ཀྱི་རྒྱུ་མཚན་བསྟན་པ་ཡིན་ནོ། །ཡུལ་ལ་ཡོད་པ་ཡང་བསྟན་པ་ནི། དེས་ཏེ་ཡུལ་འདིའི་སྟེ་རྣམ་ཤེས་ཀྱི་སྐྱེད་པར་བྱེད་པ་ཡིན་ནོ། །འཁྲུལ་པ་ལ་ཡང་དེ་མཚུངས་
ཡིན་པའི་ཕྱིར་ཁྱད་པར་དུ་བྱེད་པ་ནི་ཡོད་པའི་ནི་བདག་ཉིད་ཀྱི་སྟེ་རང་གི་བདག་ཉིད་རང་གི་རྣམ་པ་རྒོད་པས་སོ། །འཁྲུལ་པ་ལ་སྐྱེད་བྱེད་ཡིན་ཡང་རང་གི་བདག་ཉིད་ཀྱི་སྐྱེད་བྱེད་མ་ཡིན་ནོ། །འང་གི་སྒྲ་ནི་ཤེས་པ་ལ་ཡོད་པའི་རྒྱུ་མཚན་ལ་ལྟོས་པ་སྡུད་པའོ། །ཡིན་ཞེས་བྱ་བ་ནི་གང་གི་ཕྱིར་ཞེས་བྱ་བའི་
དོན་ཏོ། །བདག་མེད་པ་མཐོང་བ་ལ་ཡང་རྒྱུ་མཚན་གཉིས་ཡོད་པའི་ཕྱིར་རང་བཞིན་ཁོ་ནར་བསྟན་པ་ནི། འདི་ཡང་ཞེས་བྱ་བའི་ཡང་གི་སྒྲར་བལྟ་བྱའོ། །འགྲེལ་པར་ཡང་འདི་ལྟ་བུར་གཏོང་བ་ཁོ་ནར་སྦྱར་བར་བྱའོ། །རྒྱུ་མཚན་འདི་གཉིས་དང་བྲལ་བའི་འཛིན་པ་ཙམ་ནི་གནོད་བྱ་ཡིན་པའི་ཕྱིར་
རང་བཞིན་མ་ཡིན་པར་བསྟན་པ་ནི། གཞན་ནི་དེའི་རང་བཞིན་ནོ་ཞེས་བྱ་བ་དང་སྦྱར་རོ། །རྐྱེན་གཞན་ཞེས་བྱ་བ་ནི་ཡུལ་ལ་ཡོད་པའི་རྒྱུ་མཚན་མེད་པར་བསྟན་པ་ཡིན་ནོ། །གོལ་འགྱུར་ཞེས་བྱ་བ་ནི་ཤེས་པ་རང་ལ་ཡོད་པའི་རྒྱུ་མཚན་མེད་པར་བསྟན་པ་ཡིན་ནོ། །བཟློག་པ་ལ་རྒྱུ་མཚན་འདི་གཉིས་
ཅི་ལས་རྟོགས་པ་ཡིན་ཞེས་ཟེར་བ་ལ། །ལྡོག་པ་ལ་ནི་སྟེ། ལྡོག་པའི་རྒྱུ་མཚན་དུའོ། །གང་གི་ཕྱིར་གནོད་པ་ཅན་གྱི་རྐྱེན་ལ་ལྟོས་པ་དེའི་ཕྱིར་མི་བརྟན་པ་ནི་རང་བཞིན་མ་ཡིན་པ་སྟེ་ངོ་བོ་མ་ཡིན་པའོ། །རང་བཞིན་མ་ཡིན་པའི་དཔེ་ནི། སྦྲུལ་གྱི་བློ་བཞིན་ཞེས་བྱ་བའོ། །རྩ་བ་མེད་པ་ཅན་ཡིན་པའི་
ཕྱིར་ཞེས་བྱ་བས་ནི་རང་གི་བདག་ཉིད་ཀྱིས་སྐྱེད་བྱེད་ཀྱི་ཡུལ་མེད་པར་བསྟན་པའོ། །བདག་ལ་སོགས་པར་འཛིན་པ་རང་བཞིན་མ་ཡིན་ན་སྐྱེད་པར་བྱེད་པ་མེད་པའི་ཕྱིར་མི་སྐྱེ་བ་ཁོ་ན་འགྱུར་བ་ཡིན་ནོ་ཞེས་ཟེར་བ་ནི། གལ་ཏེ་ཐག་པ་ལ་སྦྲུལ་གྱི་བློ་ཞེས་བྱ་བའོ། །འདི་ལ་ཞེས་བྱ་བ་ནི་རྒོལ་བ་ལ་བཤད་
པ་ནི་ཕྱོགས་གཞན་ནས་བསྟན་པའི་ལན་ཏེ། མི་རྟག་པ་ཉིད་ཅེས་བྱ་བ་ལ་སོགས་པ་ཡོད་པ་ལ་དམིགས་པར་བྱེད་པའི་ཕྱིར་ཡོད་པ་དམིགས་པ་ནི་ཐོག་མ་མེད་པའི་མ་རིག་པས་འདུས་བྱས་པ་དེས་ནང་གི་འཁྲུལ་པའི་རྒྱུ་བསྟན་པ་ཡིན་ནོ།། །དེ་ལྟར་ནི་མཐོང་བའི་ཡོད་པའོ། །དེ་དོགས་པ་ནི་དེས་

བསླུས་པ་ལམ་དེའི་རྒྱུ་ཡུལ་ལ་ཡོད་པར་བསྟན་པ་ནི། འདྲ་བ་ཞེས་བྱ་བའོ། །འམ་གྱི་སྒྲ་ནི་དང་གི་དོན་ཏོ། །ཁོ་བོ་སྨྲ་བ་ནི་གང་གི་ཚེ་མིག་མ་བཙུམས་པས་མཐོང་བ་དེའི་ཚེ། འདྲ་བ་གཞན་འབྱུང་བས་བསླུས་པ་ནི་མི་རྟག་པ་ཉིད་དུ་ངེས་པར་བྱེད་པ་མ་ཡིན་ནོ། །གནས་སྐབས་དེའི་འོག་ཏུ་ད་ལྟར་ཡུན་
རིང་པོར་འཚོ་བ་ཉིད་ཀྱི་རྟགས་མཐོང་བ་བཞིན་དུ་ཡོད་པ་ལ་དམིགས་པའི་ཕྱིར་ཡོད་པ་དམིགས་པར་དེས་ཏེ་དེ་ཡོད་པར་དོགས་པ་སྲིད་པ་ནི་རྗེས་སུ་དཔག་པ་ཡིན་ལ་དེས་བསླུས་པ་ཡིན་ནོ། །ཡོད་པས་ནི་ད་ལྟར་བ་ཉིད་ཀྱིས་དམིགས་པས་གཞན་དུ་མི་འཐད་པའི་ཕྱིར་སྔོན་ཡང་བྱུང་བར་གྱུར་ཏོ་ཞེས་བྱ་བས་དེ་ཡོད་པར་རྗེས་
སུ་དཔོག་པར་བསླུས་པ་ཡིན་ནོ། །རྟག་ཏུ་ཞེས་བྱ་བ་ནི་སྔོན་དང་ཕྱིས་ཀྱང་ངོ་། །ཡོད་པ་དམིགས་པ་ནི་ད་ལྟར་དམིགས་པས་རྒྱུ་འམ་འབྲས་བུ་ཉིད་དུ་སྲིད་པར་བྱེད་པས་མི་རྟག་པ་ཉིད་དུ་ངེས་པར་བྱེད་པ་མ་ཡིན་ནོ། །འགྲེལ་པ་མཛད་པས་ནི་གང་གི་ཚེ་སྔར་མཐོང་བའི་དངོས་པོའི་བར་དུ་མ་མཐོང་ལ་ཡང་སྣང་བ་དེའི་ཚེ་བར་དུ་
ཡོད་པ་སྲིད་པའི་ཕྱིར་མི་རྟག་པ་ཉིད་དུ་ངེས་པར་བྱེད་པ་མ་ཡིན་པར་བསྟན་པ་ནི། གང་གི་ཚེ་ཇི་སྲིད་དུ་ཞེས་བྱ་བའོ། །ཐ་སྙད་པ་རྣམས་ལ་ཡང་སོ་སོར་སྣང་བ་ཐ་དད་པ་ཡོད་པ་མ་ཡིན་ནམ། བདེན་མོད་ཀྱི་ཡོད་ཀྱང་ཐ་སྙད་པ་རྣམས་མཆོག་ཏུ་འཛིན་པ་མ་ཡིན་ཏེ། དགོས་པ་མེད་པའི་ཕྱིར་རོ་ཞེས་བསྟན་པ་ནི། ཐ་སྙད་པ་ཞེས་
བྱ་བ་སྨོས་ཏེ། འདིས་ནི་དོན་བྱེད་པ་ཙམ་གྱིས་ཚིམ་པའི་ཕྱིར་སོ་སོར་སྣང་བ་ཐ་དད་པ་མཆོག་ཏུ་འཛིན་པ་མ་ཡིན་པ་ནི་དེ་ཁོ་ན་ཉིད་མ་མཚོན་པའི་རྒྱུ་ཡིན་པར་བསྟན་པ་ཡིན་ནོ། །འདྲ་བ་གཞན་དུ་འབྱུང་བ་ཡང་རྒྱུ་ཡིན་པར་བསྟན་པ་ནི། འདྲ་བ་གཞན་ཞེས་བྱ་བ་སྟེ། འདྲ་བ་ཉིད་ལ་གཅིག་ལ་སྒྲོ་འདོགས་པའི་རྒྱུ་མཚན་གྱི་དཔེ་
ནི་མཚེ་མ་ཞེས་བྱ་བའོ། །ཡོད་པ་ལས་དམིགས་པས་ཞེས་བྱ་བ་འདི་ལ་ཡང་འདྲ་བ་གཞན་འབྱུང་བ་ཡོད་པ་མ་ཡིན་པར་བསྟན་པ་ནི། སྔ་མར་ནི་ཞེས་བྱ་བའོ། །འདྲ་བ་གཞན་འབྱུང་བ་མེད་པ་ཉིད་འདོད་པའི་དབྱེ་བས་བསྟན་པ་ནི། གཞན་དང་གཞན་ཞེས་བྱ་བའོ། །འདོད་པ་གཞན་གྱིས་འདྲ་བ་གཞན་བྱུང་བ་བསྟན་
པ་ནི། ཡང་ན་མེ་དེ་ཉིད་ཅེས་བྱ་བ་སྟེ། མཐོང་བའི་རྗེས་སུ་འབྲང་བས་རྗེས་སུ་དཔག་པའི་ཕྱིར་ཞེས་བྱ་བའི་དོན་ཏོ། །རྩྭ་ལ་སོགས་པ་གཞན་དང་གཞན་ཉེ་བར་ལེན་པ་ཡིན་པའི་ཕྱོགས་ལ་མེ་ལ་སོགས་པ་ཅི་ལས་སྐྱེ་བ་ཡིན་སྙམ་དུ་སེམས་པ་ནི། རིགས་མི་མཐུན་པ་ལས་ཞེས་བྱ་བའོ། །

འདོད་པ་འདི་གཉིས་ལ་བརྟེན་ནས་འདྲ་བ་གཞན་བྱུང་བས་བསླུས་པ་འམ་ཞེས་བྱ་བ་བརྟགས་པ་ཡིན་པར་བསྟན་པ་ནི། དེ་ཉིད་ཀྱི་ཕྱིར་ཞེས་བྱ་བའོ། །ཡང་ན་དེ་མ་ཡིན་པ་མེད་པ་ཞེས་བྱ་བ་ལ་སོགས་པ་ཉམས་པ་དང་རྟག་ཏུ་རྒྱུན་མི་འཆད་པར་དམིགས་པ་ཞེས་བྱ་བ་
ཡང་ཡོད་པ་ལ་དམིགས་པ་ཞེས་བྱ་བ་དེའི་ཁྱད་པར་ཡིན་ལ། དམིགས་པ་ནི་བར་དུ་མ་དམིགས་ན་གང་གི་ཚེ་ཡང་དམིགས་པ་དེའི་ཚེ། འདྲ་བ་ལ་ཞེས་བྱ་བ་ལ་སོགས་པར་བལྟ་བར་བྱ་བ་ཡིན་པར་བསྟན་པ་ནི། གང་གི་ཚེ་བར་དུ་ཞེས་བྱ་བ་ལ་སོགས་པའོ། །ཤེས་པ་ཚད་མ་མ་ཡིན་པའི་ཕྱིར་
ཞེས་བྱ་བ་ནི་རྒྱུན་ཆད་པ་མཐོང་བས་རྣམ་པར་རྟོག་པའི་བག་ཆགས་ཙམ་ལས་བྱུང་བ་ལ་གནོད་པའི་ཕྱིར་རོ། །དོན་བྱེད་པར་དམིགས་པ་འབའ་ཞིག་གམ། འདྲ་བ་གཞན་འབྱུང་བ་ཡང་རུང་སྟེ། དེ་ཉིད་མི་མཚོན་པའི་རྒྱུ་མ་ཡིན་ཏེ། འོ་ན་ཅི་ཞེ་ན། ཐོག་མ་མེད་པའི་མ་རིག་པའི་འདུ་བྱེད་ཉིད་ཀྱང་
ཡིན་པར་ཉེ་བར་བསྡུ་བ་ནི། དེའི་ཕྱིར་ནང་གི་ཞེས་བྱ་བའོ། །བདག་ཏུ་འཛིན་པ་ཡང་རང་བཞིན་ཁོ་ན་མ་ཡིན་ནམ། གང་གི་ཕྱིར་སེམས་ཉིད་ཡུལ་དང་དུས་རྣམ་པར་འཆད་པ་མ་ཡིན་པ་ནི་བདག་གམ་གཞན་པའི་ཕུང་པོ་དང་མཚན་ཉིད་མི་མཐུན་པ་ཡིན་ནོ་སྙམ་དུ་སེམས་པ་ལ། སེམས་འདིའི་ཞེས་
བྱ་བ་སྨོས་ཏེ། སྔ་མ་ཉིད་དང་ཕྱི་མ་དང་བྲལ་བའོ། །ཅི་ལས་ཤེ་ན། འདི་ནི་ཞེས་བྱ་བ་ནི་ཉེ་བ་མངོན་སུམ་པའོ། །རང་རིག་པ་ལ་ནི་དུས་ལ་སོགས་པ་མ་ཆད་པ་མ་ཡིན་ལ། འདིའི་གཟུང་བ་དེ་ཁོ་ན་འདྲ་བ་ཡིན་ཏེ། གཞན་དུ་ནི་དེས་རྟོགས་པར་མི་ནུས་པའི་ཕྱིར། དེ་ལྟ་ཡིན་ན་འདིའི་གྲུབ་པ་ཡིན་པར་བསྟན་པ་
པ་ནི། དྲི་མ་རྣམས་ནི་གློ་བུར་བ། །ཞེས་བྱ་བ་སྟེ། རང་བཞིན་མ་ཡིན་པའོ། །དྲི་མ་ནི་བདག་ཏུ་འཛིན་པ་ལ་སོགས་པའོ། །རྩ་བ་མེད་པ་ཅན་ནི་ཡུལ་མེད་པས་སོ། །གླེན་པའི་རྒྱ་ཙམ་དུ་ཟད་པ་ཡིན་པའི་ཕྱིར་ནི་མ་དཔྱད་པའི་མངོན་པར་འདོད་པ་ཙམ་ཡིན་པའི་ཕྱིར་ཏེ། རྣམ་པར་དཔྱད་ན་རང་རིག་
པ་ཙམ་ཉིད་ཡིན་པས་སྒྲོ་འདོགས་པ་མེད་པའི་ཕྱིར་ཞེས་བྱ་བའི་དོན་ཏོ། །བདག་ཏུ་གྱུར་པ་ལ་ཡང་སྐྱོན་ཡོད་དོ་ཞེས་བྱ་བ་ལ་སོགས་པའི་རྒོལ་བ་སྤངས་པར་ཉེ་བར་བསྡུ་བ་ནི། དེ་ཕྱིར་སྔར་ཡང་ཞེས་བྱ་བ་སྨོས་ཏེ། བདག་གྱུར་པའི་སྔར་ནི་ཚུ་རོལ་མཐོང་བའི་གནས་སྐབས་ན་ཡང་ངོ་། །བདག་ཏུ་

གྲུབ་པའི་ལམ་གང་ལ་ཡང་ཁ་ཅིག་ཏུ་སྐྱོན་ཡིན་པ་ནི་དེ་ལ་ཡང་གནས་པ་ཅན་མ་ཡིན་ཏེ། གང་ལས་ཕུལ་དུ་བྱུང་བ་ཐོབ་པའི་ལམ་དེ་ཉིད་ཀྱིས་གནོད་པ་ཡིན་པའི་ཕྱིར་རོ་ཞེས་བསྟན་པ་ནི། ནུས་ཡོད་ན་ཡང་ཞེས་བྱ་བ་སྟེ། གནོད་པ་ཅན་ནི་ལམ་མོ། །ནུས་པ་ཉིད་ནི་ནུས་མཐུ་སྟེ་བག་ཆགས་ཀྱི་འདུ་
བྱེད་ཅེས་བྱ་བའི་དོན་ཏོ། །དེའི་སྙིང་པོ་ཅན་དངོས་ལ་ནི་སེམས་ལ་སྟེ། ནུས་པ་ཡང་སྐྱེས་པ་ཙམ་གྱིས་སོ། །ཡུན་དུ་ནི་རྒྱུན་གྱིས་འཕེལ་བའི་ནུས་པ་ཡིན་ཞེས་བྱ་བར་སྦྱར་རོ། །གལ་ཏེ་དད་པ་ཞེས་བྱ་བའི་རྒོལ་བ་ལ་ཚིགས་སུ་བཅད་པ་བཤད་པ་ནི་གལ་ཏེ་དེ་ཡང་ཞེས་བྱ་བའོ། །ཇི་ལྟར་བདག་
ཏུ་འཛིན་པ་ལ་སོགས་པའི་དྲི་མ་རྣམས་ནི་གོམས་པ་ལས་བྱུང་བ་ཡིན་ལ། འབད་པས་བཟློག་པར་བྱ་བ་ཡིན་པ་དེ་བཞིན་དུ་གོམས་པས་བདག་ཏུ་གྱུར་པའི་ལམ་ཡང་འབད་པས་བཟློག་བྱར་འགྱུར་རོ་ཞེས་ཟེར་བ་ལ་འཚེ་བ་མེད་པ་ཞེས་བྱ་བ་ནི་སྐྱོན་མེད་པའོ། །སྐྱོན་མཐོང་ན་གསལ་བའི་འབད་
རྩོལ་འབྱུང་བ་ཡིན་ན་དེ་ཡང་ཡོད་པ་མ་ཡིན་པའི་ཕྱིར་རྒྱུ་མེད་པ་ཡིན་ནོ། །ཡང་དག་དོན་དང་རང་བཞིན་ཞེས་བྱ་བའི་ཚིག་གཉིས་ནི་གསལ་བར་མི་ནུས་པ་ཉིད་དང་འབད་པ་མེད་པ་ལ་རྒྱུ་བསྟན་པ་ཡིན་ནོ། །ཕྱིན་ཅི་ལོག་གིས་ནི་མི་མཐུན་པའི་ཕྱོགས་ཀྱིས་ཏེ་བདག་ཏུ་འཛིན་པ་ལ་སོགས་པ་རྣམས་ཀྱིས་
སོ། །གསལ་བ་ལ་འབད་པ་ཉིད་དགག་པ་ལ་རྒྱུ་འགལ་བའི་ཡོན་ཏན་མཐོང་བའི་དམིགས་པ་བསྟན་པ་ནི། དེའི་ཕྱོགས་ཞེས་བྱ་བའོ། །དེ་བཤད་པ་ནི། ཕྱོགས་སུ་ལྷུང་བས་ན་ཞེས་པའོ། །བྲལ་བའི་ཆོས་ཅན་གྱི་དགྲ་བཅོམ་པ་ལ་སྦྱོར་བར་བྱེད་པ་ནི། དངོས་པོ་མ་ལུས་པ་ཞེས་བྱ་བ་སྟེ། སྐྱོན་
རྣམས་ལ་འཇུག་བཞིན་པ་ཡང་དེ་ལ་གནོད་པ་ཁོ་ནའི་ཕྱིར་འབད་པ་མེད་པ་ཡིན་ན། ཡོན་ཏན་རྣམས་ལ་འཇུག་བཞིན་པ་ལྟ་ཅི་སྨོས་ཞེས་བྱ་བའི་དོན་ཏོ། །ནང་གི་ཆོས་ནི་འགལ་བ་ཅན་གྱི་ཁོང་ཁྲོས་འདོད་ཆགས་བཞིན་དུ་འགག་པ་ཡིན་ཡང་། ཡང་སྐྱེ་བ་ཡིན་ནོ། །བདག་ཏུ་འཛིན་པ་ཡང་ནང་ཁོ་ན་
ཡིན་ནོ་ཞེས་ཟེར་བ་ནི། གལ་ཏེ་འདོད་ཆགས་དང་ཞེ་སྡང་དག་ཅེས་བྱ་བའོ། །འདོད་ཆགས་དང་ཁོང་ཁྲོ་དག་ནང་གི་ཡིན་པའི་ཕྱིར་སྐྱེས་པ་མ་ཡིན་ཡང་འོན་ཀྱང་རྒྱུ་གཅིག་ཡིན་པའི་ཕྱིར་རོ། །བདག་ཏུ་འཛིན་པ་ནི་འདི་དག་གིས་རྒྱུ་ཡིན་ལ། རྒྱུ་དང་འབྲས་བུའི་དངོས་པོའི་ཕྱིར་ཡང་ཡིན་གྱི་དེ་བཞིན་དུ་བདག་ཏུ་

འཛིན་པ་དང་། བདག་མེད་པར་མཐོང་བ་དག་ནི་རྒྱུ་གཅིག་པའམ་རྒྱུ་དང་འབྲས་བུ་ཉིད་ཀྱང་མ་ཡིན་ནོ། །ནང་ཉིད་དམ་ཕྱི་རོལ་ཡང་འགལ་པ་ལ་ཁྱད་པར་དུ་བྱེད་པ་མ་ཡིན་ཞེས་བྱ་བའི་དོན་བསྟན་པ་ནི། བདག་འཛིན་རྒྱུ་གཅིག་ཅན་ཞེས་བྱ་བའོ། །གང་ཁོ་ནའི་ཕྱིར་འདོད་
ཆགས་ལ་སོགས་པ་བདག་ཏུ་འཛིན་པའི་རྒྱུ་ཡིན་པ་དེ་ཁོ་ནའི་ཕྱིར་བདག་ཏུ་འཛིན་པ་དང་འགལ་བ་ཅན་བདག་མེད་བར་མཐོང་བ་ཉིད་ལ་མ་ཡིན་གྱི། དེ་དང་འགལ་བ་ཅན་མ་ཡིན་པའི་བྱམས་པ་ལ་སོགས་པ་མ་ཡིན་པར་བསྟན་པ་ནི་དེ་ཉིད་ཀྱི་ཕྱིར་ཞེས་བྱ་བའོ། །ཆགས་པར་བྱ་བ་དང་འཁྲུག་པར་
བྱ་བར་ཀུན་དུ་རྟོག་པ་ཉིད་གཏི་མུག་མ་ཡིན་ནམ། དེ་ཡང་བྱམས་པ་ལ་སོགས་པས་ལྡོག་པ་ཉིད་ཡིན་པའི་ཕྱིར་འདི་ཇི་ལྟར་ལམ་མ་ཡིན་སྙམ་དུ་སེམས་པ་ལ། དེ་ཡང་ཞེས་བྱ་བ་སྟེ། ཆགས་པར་བྱ་བ་ཀུན་དུ་རྟོག་པ་ཡང་བདག་ལ་ཕན་བྱེད་པ་ཉིད་དུ་འཛིན་པ་ཁོ་ན་ཡིན་ལ། དེའི་ཕྱིར་བདག་ཏུ་འཛིན་
པ་ཉིད་ནི་གཏི་མུག་ཡིན་ནོ་ཞེས་བྱ་བའི་དོན་ཏོ། །ཆོས་སུ་འཛིན་པ་ཡང་གཏི་མུག་ཁོ་ན་མ་ཡིན་ནམ་དེ་ཡང་ཇི་ལྟར་འཇིག་ཚོགས་ལ་ལྟ་བ་ཡིན་སྙམ་དུ་སེམས་པ་ལ། ཉོན་མོངས་པ་ཅན་གྱི་ཞེས་བྱ་བ་སྟེ། འདོད་ཆགས་དང་ཁོང་ཁྲོ་དག་གི་རྒྱུ་གཏི་མུག་ནི་འདིར་གནས་སྐབས་ཡིན་ནོ། །མ་རིག་
པའི་རྐྱེན་གྱིས་འདུ་བྱེད་རྣམས་ཞེས་གསུངས་པས་མ་རིག་པ་ནི་རིག་པ་མེད་པ་ཙམ་གྱི་གཏི་མུག་མ་ཡིན་ནམ། །འཇིག་ཚོགས་ལ་ལྟ་བ་ནི་མ་ཡིན་ནོ་ཞེས་ཟེར་བ་ལ། །རིག་པའི་ཞེས་བྱ་བའོ། །དགག་པ་ནི་མི་བདེན་པ་དང་ཆོས་མ་ཡིན་པ་ལ་སོགས་པ་བཞིན་དུ་འགལ་བ་རྗོད་པར་བྱེད་པ་ཡིན་པའི་ཕྱིར་
མེད་པ་གཏི་མུག་མ་ཡིན་ནོ། །སོ་སོར་རྟོག་པ་མེད་པའི་རང་བཞིན་གཏི་མུག་ལ་མཐོང་བ་དང་འགལ་བ་ཡིན་ནོ་ཞེས་ཟེར་བ་ནི། སོ་སོར་རྟོག་མེད་རང་བཞིན་ནི་ཤིན་ཏུ་ཁྱབ་པར་བྱེད་པ་ཡིན་པའི་ཕྱིར་མཚན་ཉིད་མ་ཡིན་པར་བསྟན་པ་ནི། འོན་ཏེ་ཞེས་བྱ་བའོ། །རིག་པའི་མི་མཐུན་ཕྱོགས་ཉིད་ཕྱིར། །
ཞེས་བྱ་བ་འདི་བཤད་པ་ནི། རིགས་དང་འགལ་བའི་ཕྱིར་ཞེས་བྱ་བའོ། །མི་བདེན་པ་ཉིད་དུ་མི་འགྱུར་ལ་ཞེས་བྱ་བ་ནི་ཇི་ལྟར་རྟོགས་པར་བྱེད་པའི་དངོས་པོ་མེད་པའི་ཕྱིར་ཡང་དག་པར་རྟོགས་པར་བྱེད་པ་ལ་བསམ་བ་གཞན་པ་ཉིད་ཀྱིས་མི་བདེན་པ་ཉིད་འདོད་པར་མི་འགྱུར་རོ་ཞེས་བྱ་བའི་དོན་ཏོ། །མེད་

པ་ལ་ཡོད་པར་རློམ་པ་ནི་ཡོད་དོ་ཞེས་རྟོགས་པར་བྱེད་ན་བསམ་པ་ལ་མི་སླུ་བ་ཡིན་ཡང་། དོན་དེ་བཞིན་དུ་མེད་པའི་ཕྱིར་བརྫུན་དུ་སྨྲ་བར་འགྱུར་རོ་ཞེས་ཟེར་བ་ནི། མེད་པ་ལ་ཞེས་བྱ་བའོ། །འདི་ལ་ཡང་སེམས་པ་ཞེས་བྱ་བའི་དེ་མ་ཐག་ཏུ་ཡོད་དོ་ཞེས་བྱ་བར་རྟོགས་པར་བྱེད་པ་དང་སྦྱར་བར་བྱའོ། །
སྔ་མས་ནི་མི་འདོད་པ་ཐོབ་པ་དང་། ཕྱི་མས་ནི་འདོད་པ་མི་འཐོབ་པར་བསྟན་པ་ཡིན་ནོ། །བསམ་པ་ལ་ཡོད་པ་ཉིད་ནི་ཡང་དག་པ་ཉིད་དམ་ཡང་དག་པ་མ་ཡིན་པ་ཉིད་ཡིན་གྱི་དོན་ལ་ཡོད་པ་ནི་མ་ཡིན་ནོ་ཞེས་བསྟན་པ་ནི། སྒྲ་རྣམས་རྣམ་རྟག་ཡུལ་ཅན་ཏེ། །ཞེས་བྱ་བའོ། །བྱང་ཆུབ་སེམས་དཔའ་རྣམས་
ནི་དོན་ཇི་བཞིན་པའི་བསམ་པ་ཇི་བཞིན་པའི་ཚིག་ནི་བདེན་པ་ཡིན་ལ། ཅིག་ཤོས་མི་བདེན་པར་བསྟན་པ་ནི། བྱང་ཆུབ་སེམས་དཔའ་རྣམས་ལ་ནི། །ཞེས་བྱ་བའོ། །དམིགས་པའི་ཕྱིར་ནི་དམིགས་པའི་ངོ་བོ་ཡིན་པའི་ཕྱིར་རོ། །དེ་ནི་དབང་པོའོ། །རྣམ་པ་ནི་བློའི་རྣམ་པའོ། །རྫས་ནི་ཤེས་པ་གཅིག་
གོ། མཚུངས་པར་ལྡན་པ་ནི་རེ་རེ་ཞེས་བྱ་བའོ། །ཤེས་པར་ནི་སྒྲོ་འདོགས་པ་དང་བྲལ་བའི་ངོ་བོའོ། །དེ་ལས་བཟློག་པ་ཉིད་དུ་རྟོགས་པ་ནི་སྒྲོ་འདོགས་པ་ཁོ་ན་ཡིན་ནོ། །གསུངས་པ་གཞན་ཡང་བསྟན་པ་ནི། དེ་བཞིན་དུ་ཞེས་བྱ་བའོ། །ལྟ་བ་ནི་འཇིག་ཚོགས་ལ་ལྟ་བ་ཡིན་ལ། དེ་ཡང་བདག་ཏུ་
མངོན་པར་ཞེན་པའོ། །བདག་ཏུ་མངོན་པར་ཞེན་པ་ལས་བྱུང་བའི་ཕྱིར་བདག་ཏུ་མངོན་པར་ཞེན་པའི་སྒྲས་དེ་དང་མཚུངས་པར་ལྡན་པ་ནི་མ་རིག་པ་ཉིད་དུ་བརྗོད་དོ་ཞེས་རྒོལ་བ་མ་རིག་ཡན་ལག་ཅེས་བྱ་བ་ནི་ཡན་ལག་བཅུ་གཉིས་དང་ལྡན་པའི་མ་རིག་པའི་ཡན་ལག་ཡིན་ལ། དེ་རང་གི་ངོ་བོར་བརྗོད་པར་བྱ་
བ་ཡིན་ན་ཉེ་བར་བཏགས་པས་ཅི་དགོས་ཞེས་བྱ་བའི་དོན་ཏོ། །བཟློག་པ་ལ་ནི་ཚད་མ་དག། །ཅེས་བྱ་བ་ནི་འཇིག་ཚོགས་ལ་ལྟ་བ་ཉིད་མ་རིག་པ་ཡིན་ཞེས་བྱ་བ་འདི་ལ་སོ་སོར་རྟོག་པ་མེད་པའི་སྐྱོན་ཚད་མ་ཡིན་ནོ། །ཁྱད་པར་གྱི་སྒྲ་ཞེས་བྱ་བ་ནི་འཇིག་ཚོགས་ལ་ལྟ་བའི་སྒྲའོ། །མ་རིག་པ་ལ་ལྟ་བ་ལ་དབྱེ་
བ་མེད་པ་ཡིན་ན་སོ་སོར་རྟོག་པའི་ཚིག་དབྱེ་བའི་ཡུལ་དུ་མི་འགྱུར་རོ་སྙམ་དུ་སེམས་པ་ནི། དེ་བཞིན་དུ་གལ་ཏེ་ཞེས་བྱ་བ་འདི་དང་འགལ་བར་བྱེད་པ་ཡིན་པའི་ཕྱིར། འགལ་བ་ནི་འགལ་བ་ཅན་གྱི་ཚིག་ཡིན་ནོ། །བཤད་བྱ་ཞེས་བྱ་བ་ནི་སྤྱི་དང་ཁྱད་པར་གྱི་རྟོག་པས་ཏེ་མ་རིག་པ་ཞེས་བྱ་བ་ནི་སྤྱི་ཡིན་ལ།

ལྟ་བ་ཞེས་བྱ་བ་ནི་ཁྱད་པར་ཡིན་ནོ། །གཅིག་ལ་ཡང་ཐ་སྙད་ཅན་ཉིད་ཀྱིས་ཐ་དད་པར་ཉེ་བར་བཏགས་པ་ཡིན་ཞེས་བྱ་བ་ནི་གཞན་གྱིའོ། །དེའི་བདག་ཉིད་ཀྱིས་ཀུན་དུ་སྦྱོར་བར་འགྱུར་ཞེས་བྱ་བ་ནི་དེ་ལས་གཞན་པའིའོ། །དེ་བཞིན་དུ་བདག་མེད་པ་མཐོང་བ་ནི་ཡུལ་ལ་སོགས་
པའི་དབང་གིས་སྟོབས་དང་ལྡོག་བྱ་མ་ཡིན་པ་ཉིད་ཀྱང་བསྟན་ནས། བདག་ཏུ་ལྟ་བ་ལ་ཡང་ལྡོག་བྱ་མ་ཡིན་པའི་རྒྱུ་མཚན་ནམ། སྲོག་ཆགས་ཀྱི་རང་བཞིན་ནི། རང་བཞིན་འདི་ཡིན་འདི་ལས་ཏེ། །རྐྱེན་གཞན་གྱིས་ནི་གོལ་འགྱུར་ཞིང་། །ཞེས་བྱ་བས་བཀག་པ་ཡིན་པར་བསྟན་པ་ནི། ཟད་མིན་ཏེ་
ལྡོག་པ་མ་ཡིན་པ་མ་ཡིན་པའོ། །སྲོག་ཆགས་ཆོས་ཉིད་ཕྱིར་ཞེས་བྱ་བ་ནི་སྲོག་ཆགས་ཀྱི་རང་བཞིན་ཕྱིར་རོ། །བདག་ཏུ་འཛིན་པ་ནི་ཐོག་མ་མེད་པའི་བག་ཆགས་ཙམ་ལས་བྱུང་བ་ཉིད་ཀྱིས་སྲོག་ཆགས་ཀྱི་རང་བཞིན་ཉིད་དུ་མ་གྲུབ་པའི་ཕྱིར་རོ། །བདག་ཏུ་འཛིན་པ་ཡང་མི་ལྡོག་པ་ཉིད་དུ་དམ་
བཅའ་བ་ནི་མེ་དྲོ་བ་མ་ཡིན་ནོ་ཞེས་བྱ་བ་བཞིན་དུ་མངོན་སུམ་དང་འགལ་བ་ཅན་ཡིན་པར་བསྟན་པ་ནི་འབྲེལ་བ་ན་ནི་མངོན་པར་ཕྱོགས་པ་ཡིན་ནའོ། །གཉེན་པོའི་ཕྱོགས་དང་ཞེས་བྱ་བ་ནི་བདག་མེད་པར་ལྟ་བ་དང་ངོ་། །བདག་མེད་པར་ལྟ་བས་བདག་ཏུ་འཛིན་པ་ལྡོག་ཀྱང་མེ་དང་ཕྲད་པ་ལས་
ཟངས་ཀྱི་སྲ་བ་བཞིན་དུ་ཡང་འབྱུང་བར་འགྱུར་ཞེས་བྱ་བའི་བསམ་པས་དམ་བཅའ་བ་མངོན་སུམ་དང་འགལ་བ་ཡིན་ནོ་སྙམ་དུ་སེམས་པ་ལ་ངེས་པ་ནི་བདག་ཏུ་འཛིན་པ་ཡིན་ལ་འགལ་བ་ནི་བདག་མེད་པར་ལྟ་བ་སྟེ། དེའི་བདག་ཉིད་ཀྱི་འབྲེལ་པ་མེད་པ་ནི་ཉེ་བའི་ཕྱིར་རོ། །མེ་དང་ཕྲད་པ་ནི་དེ་ལྟར་རྟག་ཏུ་
གནས་པ་མ་ཡིན་ནོ། །འབྲེལ་ན་ཡང་དེས་ལྡོག་པར་ཐམས་ཅད་དུ་སླར་འབྱུང་བ་མ་ཡིན་ཏེ། མེ་ལྡོག་པའི་ཐལ་བ་བཞིན་དུ་ཡང་སྔ་མར་མི་ལྡོག་པའི་ཕྱིར་རོ་ཞེས་བསྟན་པ་ནི། མ་ངེས་ཕྱིར་ཞེས་བྱ་བའོ། །དེ་ལྟར་བདག་མེད་པར་ལྟ་བའི་ལམ་ལ་བདག་ཏུ་འཛིན་པ་དགོངས་པ་ཅན་མ་ཡིན་པར་བསྟན་ནས།
ལམ་ཉིད་ཡིན་ནོ་སྙམ་དུ་སེམས་པ་བསལ་བ་ནི། གལ་ཏེ་བདག་བསྒོམས་པས་ཀྱང་ཞེས་བྱ་བའོ། །བདག་བསམ་པར་བྱ་ཞེས་བྱ་བ་ལ་སོགས་པའི་སྒྲས་ཤེས་པར་བྱ་བ་དང་དམིགས་པར་བྱ་བ་ཡིན་པའི་ཕྱིར་ཚིག་གཉིས་སྨོས་པ་ཡིན་ནོ། །དེའི་ཕྱིར་བདག་བསམ་པར་བྱ་ཞེས་བྱ་བ་ནི་ལུས་དང་དབང་པོ་ལ་

སོགས་པ་འབྱུང་བ་ཆེན་པོ་མ་གཏོགས་པ་འབྱུང་བ་ཆེན་པོ་ལས་ཐ་དད་པར་བསམ་པར་བྱ་བ་དང་། བློ་ལ་སོགས་པ་ལས་ཐ་དད་པར་དམིགས་པར་བྱ་ཞེས་བྱ་བར་ཡང་འདོད་དོ། །ཡུལ་འཛིན་པའི་བདག་ཉིད་ཀྱི་ངོ་བོ་དང་བྲལ་བས་སེམས་དགའ་བའི་ངོ་བོ་གཅིག་པུའི་བདག་གི་དེ་ཁོ་ན་ཉིད་བསྒོམ་བྱ་ཡིན་
པར་བསྟན་པ་ཡིན་ནོ། །གལ་ཏེ་རེ་ཞིག་རིགས་པ་ཅན་ལ་སོགས་པ་ཐ་དད་པར་སྨྲ་བ་པོ་དེ་སྐད་སྨྲ་ན། དེའི་བདག་ཏུ་ལྟ་བ་ནི་བདག་གི་བའི་རྗེས་སུ་འཇུག་པ་ཁོ་ན་ཡིན་ཏེ། ཆགས་པའི་ངོ་བོ་ཡིན་པའི་ཕྱིར། །ཞེས་བསྟན་པ་ནི། གང་ཞིག་བདག་མཐོང་བ་ཞེས་བྱ་བ་ནི་དེ་ལ་ནི་བདག་ལའོ། །འདི་
ཞེས་བྱ་བ་ནི་སྨྲ་བ་པོའོ། །ང་ཞེས་བྱ་བ་ནི་ཆགས་པའི་བདག་ཉིད་ཁོ་ནར་མཐོང་བའོ། །བདག་ནི་རིགས་པ་ཉིད་དང་མ་བྲལ་བའི་ཕྱིར་དེར་ལྟ་བ་ཡང་ཆགས་པའི་སྙིང་པོ་ཅན་དང་བྲལ་བ་མ་ཡིན་པ་ཁོ་ནར་བསྟན་པ་ནི། རྟག་ཏུ་ཞེས་བྱ་བ་སྟེ་ཆགས་པ་ཡོད་ན་ཆགས་པའི་ཡུལ་ཕན་འདོགས་པར་བྱེད་པ་
རྣམས་ལ་དང་། དེ་སྒྲུབ་པར་བྱེད་པ་རྣམས་ལ་ཡང་སྲེད་པ་ཡིན་ལ། དེས་དེ་རྣམས་ལ་སྡུག་བསྔལ་དང་རྗེས་སུ་འབྲེལ་པའི་སྐྱོན་གྱིས་ཆ་བསྒྲིབས་པའི་ཕྱིར་དེ་ཉིད་མཐོང་བ་ཁོ་ན་མི་འཐོབ་པ་ནི་ཆགས་པ་དང་བྲལ་བར་མི་འགྱུར་རོ་ཞེས་བྱ་བའི་དོན་ཏོ། །འོན་ཏེ་བདག་གཉིས་སུ་མེད་པར་སྨྲ་བ་ནི་
བདག་མཐོང་བ་འབའ་ཞིག་ལ་ཐར་པའི་བདག་ཉིད་ཡིན་པའི་ཕྱིར། ཐར་པའི་ལམ་དེ་ལྟ་བུར་རྟོགས་པར་བྱེད་ན་འཁོར་བ་པའི་འགྲོ་བར་གྲུབ་པའི་སྤྲོས་པ་ཐམས་ཅད་འཁྲུལ་པའི་ཕྱིར་ཡིན་ན། འདི་ལ་ཡང་གང་ཞིག་བདག་མཐོང་ཞེས་བྱ་བ་ཉིད་རྗེས་སུ་འཇུག་པ་ཡིན་ནོ། །བདེ་བ་རྣམས་དང་
བདེ་བ་སྒྲུབ་པར་བྱེད་པ་རྣམས་ཇི་ལྟ་བ་དེ་ལྟ་བ་རྣམས་ལ་སྲེད་པར་བྱེད་པ་ཡིན་ལ། སྟོབས་དང་ལྡན་པའི་ཆ་དེ་ཉིད་ཀྱིས་འཁྲུལ་པ་ཉིད་ཀྱི་ངོ་བོའི་སྐྱོན་ནམ། དེའི་མཐོང་བ་ཡང་མ་མཐོང་བས་འདོད་ཆགས་དང་བྲལ་བ་ཉིད་མི་ཐོབ་པ་ཡིན་ཞེས་བྱ་བའི་དོན་ཏོ། །བདག་ཏུ་ལྟ་བ་ལས་གཞན་
པའི་ཆགས་པའི་དབང་དུ་བྱས་ནས་རྒོལ་བ་ནི། གལ་ཏེ་བདག་ཏུ་མཐོང་བ་ལས། །ཞེས་བྱ་པའོ། །འདི་ཉིད་ལ་ལན་ནི། ཐ་དད་པར་མཐོང་བས་བུད་མེད་གཞན་ལ་སོགས་པ་ལ་བདག་ལ་ཕན་འདོགས་པར་བྱད་པ་ནི་ཆགས་པ་ཡིན་ལ། གལ་ཏེ་བདག་ལ་ཆགས་པ་མེད་ན་གཞན་དུ་མི་

འགྱུར་རོ་ཞེས་བྱ་བའི་དོན་བསྟན་པ་ནི། གང་ཞིག་གཞན་ལ་ཞེས་བྱ་བའོ། །བདག་ཏུ་ལྟ་བ་ཁོ་ན་ཆགས་པའི་སྙིང་པོ་ཅན་ཡིན་པར་བསྟན་པ་ནི། གང་ཞིག་བདག་ལ་ཞེས་བྱ་བའོ། །བདག་ཏུ་ལྟ་བས་བདག་ལས་གཞན་པ་ལ་ཕན་འདོགས་པར་བྱེད་པ་ནི་མ་བརྟགས་
པ་ཁོ་ན་ཡིན་པར་བསྟན་པ་ནི། གལ་ཏེ་བདག་ཉིད་ཆེན་པོ་ཞེས་བྱ་བའོ། །རང་ལས་བྱུང་བའི་འབྲས་བུ་མེད་ན་གཞན་ལ་ཕན་པ་ཙམ་ལ་འཇུག་པ་ནི་བྱོལ་སོང་རྣམས་བུ་ལ་སྤུད་པ་བཞིན་དུ་གཏི་མུག་ལས་བྱུང་བ་ཁོ་ན་ཡིན་ཞེས་བྱ་བའི་དོན་ཏོ། །རང་གི་དོན་ལ་གནས་པ་ཞེས་བྱ་བ་ནི་བདག་ཏུ་ལྟ་
བའོ། །བདག་ཁོ་ན་དགའ་བའི་ངོ་བོ་ཉིད་ཀྱིས་ཉེ་བ་ཡིན་པའི་ཕྱིར་སྲེད་པ་ནི་མ་འོངས་པའི་བདེ་བ་མངོན་པར་འདོད་པའི་ངོ་བོ་མ་ཡིན་ནམ་སྙམ་དུ་སེམས་པ་ལ། ཡོན་ཏན་མཐོང་བ་ཞེས་བྱ་བ་སྟེ། བུད་མེད་ལ་སོགས་པ་དེ་དང་དེ་སྒྲུབ་པར་བྱེད་པ་ལས་བྱུང་བའི་བདེ་བ་དེ་མེད་ན་ཡིད་ཙམ་
གྱིས་ནི་འགྲུབ་པ་མ་ཡིན་ལ། མངོན་པར་གསལ་བར་བྱ་བ་ཡང་གསལ་བར་བྱེད་པ་མེད་ན་མི་འབྱུང་བའི་ཕྱིར་གསལ་བྱེད་དམ་དེའི་སྒྲུབ་བྱེད་བླང་བྱ་ཁོ་ནར་འགྱུར་རོ་ཞེས་བྱ་བའི་དོན་ཏོ། །བདག་ཏུ་སྨྲ་བ་རྣམས་ལ་བདག་ཏུ་ལྟ་བ་ཡོད་ན་བདག་གི་བ་བཞིན་དུ་བདག་དང་གཞན་དུ་འབྱེད་པ་དང་། ཕྱེ་བ་ལས་བྱུང་བའི་སྐྱོན་
དུ་ཡང་འགྱུར་རོ་ཞེས་བསྟན་པ་ནི། བདག་ཡོད་ན་ནི་ཞེས་བྱ་བ་བདག་དང་བདག་གིར་ལྟ་བ་བཞིན་དུ་རང་དང་གཞན་དུ་འབྱེད་པ་ཡང་སྐྱོན་གྱི་རྒྱུར་འགྱུར་བ་ཁོ་ན་ཡིན་ནོ་ཞེས་བྱ་བའི་དོན་ཏོ། །འཛིན་པ་ནི་འདོད་ཆགས་སོ། །བདག་ཏུ་ལྟ་བ་ནི་ཆགས་པའི་ངོ་བོ་ཡིན་པར་མི་རིགས་པ་མ་ཡིན་ནམ། སྔོན་
པོའི་སྣང་བ་བཞིན་དུ་བདག་གི་དངོས་པོའི་སྣང་བ་ཡང་ཆགས་པ་མ་གཏོགས་པར་ཡོད་པའི་ཕྱིར་དེའི་སྣང་བ་ཡོད་ན་དེ་ཉིད་དངོས་པོར་འགྱུར་བ་མ་ཡིན་ནོ། །དེ་བཞིན་དུ་བདག་གི་བར་ཆགས་པ་ཡང་མ་ཡིན་ཏེ། ལྟ་བ་འབའ་ཞིག་ཁོ་ན་ཡིན་ལ་དེ་འཆིང་བ་མ་ཡིན་ནོ་སྙམ་དུ་སེམས་པ་ནི། འོན་ཏེ་
བདག་ཁོ་ན་ཞེས་བྱ་བའོ། །བདག་ཁོ་ན་ལ་ཆགས་པ་ཞེས་བྱ་བ་ནི་ཚིག་གི་ལ་དོར་བ་ཡིན་ཏེ། སེམས་རང་རིག་པ་ནི་བདག་མ་ཡིན་ཏེ། སྐད་ཅིག་མ་ཉིད་ཡིན་པའི་ཕྱིར་རོ། །གཞན་ཡང་རྣམ་པར་མི་རྟོག་པའི་ཤེས་པའི་རྟོགས་བྱ་ཇི་ལྟར་ཉམས་སུ་མྱོང་བ་ནི་སྐད་ཅིག་མ་ཁོ་ན་ཡིན་ནོ། །འོན་ཀྱང་

ཁར་རྩང་གི་ཡང་བདག་ཉིད་ཁོ་ན་ཡིན། དེ་རིང་གི་བདག་ཉིད་ཡིན་པའི་རྣམ་པར་རྟོག་པའི་རྟོགས་བྱ་ཡིན་ན། རྣམ་པར་རྟོག་པ་ཡང་དེ་ལྟར་འཇུག་བཞིན་པ་ཆགས་པ་ལས་གཞན་མ་ཡིན་པར་བསྟན་པ་ནི། ངེས་པར་བདག་ལ་ཞེས་བྱ་བའོ། །བདག་ཏུ་རྟོག་པ་ཉིད་བདག་ལ་ཆགས་པ་འདོར་བ་
ཡིན་གྱི་བདག་ནི་མ་ཡིན་ནོ། །དེས་ན་རྣམ་རྟོག་ཡོངས་སུ་བོར་བའི་ཕྱིར་འདོད་ཆགས་དང་བྲལ་བ་མེད་པ་མ་ཡིན་ལ། བདག་ཡོད་པས་ཐར་པ་མེད་པ་ནི་མ་ཡིན་ནོ་སྙམ་དུ་སེམས་པ་ལ། ཉེས་མེད་བདག་ལ་ཆགས་པ་ནི་བདག་ལ་ཚད་མས་གྲུབ་པ་ཉིད་དུ་བློ་ལ་ཡོད་པ་ཡིན་ན་བློ་དེ་ཁོ་ན་ཆགས་པ་
ཡིན་ཏེ། ཚད་མ་ལ་སོགས་པ་མེད་ན་བདག་མེད་པ་བཞིན་དུ་འགྱུར་རོ་ཞེས་བྱ་བའི་དོན་ཏོ། །བདག་དང་བདག་གིར་ལྟ་བ་ལས་གཞན་པ་ཉིད་ཆགས་པར་ཁས་ལེན་པ་མ་ཡིན་ནམ། དེ་ཡང་འཁོར་བའི་རྒྱུ་ཡིན་པའི་ཕྱིར་སྐྱོན་ཅན་དོར་བྱ་ཡིན་ནོ་སྙམ་དུ་སེམས་པ་ནི། འོན་ཏེ་བདག་དང་ཞེས་བྱ་
བའོ། །འདིར་ཞེས་བྱ་བ་ནི་ཁས་ལེན་པ་ལའོ། །གལ་ཏེ་ཆགས་པ་སྐྱོན་བཅས་ན། །ཞེས་བྱ་བའོ། །ཐ་དད་པ་ཁས་ལེན་ན་ཡང་འདོད་པ་ཅུང་ཟད་ཀྱང་གྲུབ་པ་མེད་པར་བསྟན་པ་ནི། དེ་ལས་ཅིར་ཏེ་ཅུང་ཟད་ཀྱང་མེད་དོ་ཞེས་བྱ་བའི་དོན་ཏོ། །ཐ་དད་པའི་ཆགས་པ་ནི་དོར་བར་ནུས་པ་ཁོ་ན་ཡིན་ནོ་
སྙམ་དུ་སེམས་པ་ནི་དེ་སྤོང་སྟེ་ཆགས་པའིའོ། །ཐ་དད་པའི་ཆགས་པ་ཡང་ཡུལ་གྱི་སྐྱོན་མཐོང་བ་ཁོ་ན་ལས་འདོར་བ་ཡིན་གྱི་གཞན་དུ་མ་ཡིན་པར་བསྟན་པ་ནི། སྔོན་བྱུང་མེད་པར་ཞེས་བྱ་བའོ། །སྐྱོན་གཞན་གྱིས་ནི་སྐྱོན་གཞན་གྱིས་ཏེ་རང་གི་སྐྱོན་གྱིས་ཞེས་བྱ་བའི་ཤུགས་ཀྱིས་སྐྱོན་
ཅན་མ་ཡིན་ཞེས་བྱ་བ་ནི་བདག་གི་ཡུལ་ལའོ། །བདེ་བའི་རྒྱུ་ཞེས་བྱ་བ་ནི་བདག་གི་བའི་རྒྱུ་ལའོ། །ཆགས་པ་ནི་བུམ་པ་ལ་སོགས་པའི་དངོས་པོ་བཞིན་དུ་འདོད་པ་དང་ཞེ་སྡང་དག་གིས་ལེན་པར་བྱེད་པའམ། འདོར་བར་བྱེད་པ་མ་ཡིན་ནམ། དེ་ལ་ཡུལ་གྱི་ཡོན་ཏན་དང་སྐྱོན་ལ་བརྟེན་
པ་ཡིན་ནོ་སྙམ་དུ་སེམས་པ་ལ། འདོད་དང་སྡང་སོགས་སྤངས་པ་སྟེ། །ཡུལ་གྱི་ཡོན་ཏན་དང་སྐྱོན་དང་རྗེས་སུ་འབྲེལ་པ་དང་ཞེས་བྱ་བར་སྦྱར་རོ། །ཡུལ་གྱི་ཡོན་ཏན་དང་སྐྱོན་དེ་དག་མཐོང་བ་མེད་པ་ནི་འདོར་བ་ནི་ཡུལ་གྱི་ཡོན་ཏན་མཐོང་བ་ལ་སོགས་པ་དང་། སྐྱོན་མཐོང་བ་ལས་ཞེ་སྡང་

མི་འདོར་བ་མི་འབྱུང་བ་ཡུལ་གྱི་ཡོན་ཏན་དང་སྐྱོན་མཐོང་བའི་རྒྱུ་མི་སྐྱེ་བའི་ངོ་བོ་ནི་ཕྱི་རོལ་གྱི་བུམ་པ་ལ་སོགས་པའི་ཡུལ་རྣམས་ལ་ཡོན་ཏན་དང་སྐྱོན་མཐོང་བ་ལས་ཉེ་བར་ལེན་པ་དང་འཇོམས་པའི་ཆགས་པའོ། །ཡུལ་ནི་བདག་དང་བདག་གི་སྟེ་དེའི་དངོས་པོ་ཉིད་དེ་
ཡོན་ཏན་དང་ལྡན་པ་ཞེས་བྱ་བ་དང་སྦྱར་རོ། །དེ་མེད་པའི་ཕྱིར་ནི་ཡོན་ཏན་དང་ལྡན་པ་མེད་པའོ། །དེའི་ཕྱིར། རིགས་པ་འདི་ཆགས་པ་མ་ཡིན་པར་བསྟན་པ་ནི་ཞེན་པ་ཞེས་བྱ་བའོ། །ཕྱི་ཚུལ་གང་ཡིན་མིན་ཞེས་བྱ་བ་འདི་གསལ་བར་བྱེད་པ་ནི། ཆགས་ཡོན་ཏན་གྱི་ཆགས་མིན་གྱི། །ཞེས་བྱ་བའོ། །
རིགས་པས་བརྗོད་ནས་རྣལ་མ་ལ་སྦྱོར་བར་བྱེད་པ་ནི་བདག་དང་བདག་གི་བ་ལ་མ་ཚང་བ་མེད་པའི་ཡོན་ཏན་མཐོང་བ་ཡིན་ན་བདག་ཏུ་ལྟ་བའི་འབྲས་བུ་ཆགས་པ་མི་ལྡོག་པར་བསྟན་པ་ནི། མ་ཚང་མེད་རྒྱུ་ཞེས་བྱ་བའོ། །འདོད་དང་སྡང་སོགས་སྤོང་བ་ནི། ཞེས་བྱ་བ་འདི་དང་། དེ་བཞིན་དུ།
ཉེས་མེད་བདག་ལ་ཆགས་པ་དང་། །བྲལ་བའི་རྒྱུ་ཡང་ཡོད་མ་ཡིན། །ཞེས་བྱ་བ་འདིས་ཀྱང་། ཆགས་ཡོན་ཏན་གྱི་ཆགས་མིན་གྱིས། །ཞེས་བྱ་བའི་དོན་རྟོགས་པའི་ཕྱིར། མ་ཚང་མེད་རྒྱུ་དེ་ལ་ནི། །འབྲས་བུ་གང་གིས་ཟློག་པར་བྱེད། །ཅེས་བྱ་བའི་དགོངས་པས་བསྡུ་བའི་ཚིགས་སུ་བཅད་པའོ་
ཞེས་བྱ་བའོ། །ཁོ་བོས་ཇི་ལྟར་བཤད་པས་ནི་དེས་རྟོགས་པའི་དོན་མ་ཡིན་ནོ། །ཉེས་མེད་བདག་ལ་ཞེས་བྱ་བ་འདིས་བདག་ཏུ་ལྟ་བ་དང་ཆགས་པ་དག་ཐ་མི་དད་པར་དགོངས་པ་ཡིན་ལ། མ་ཚང་མེད་རྒྱུ་ཞེས་བྱ་བ་ནི་ཐ་དད་པར་དགོངས་པ་ཡིན་ནོ། །ཆགས་པ་སྐྱོན་དང་ལྡན་པ་ཉིད་ཡིན་པ་ནི་སྡུག་
བསྔལ་གྱི་རྒྱུ་ཡིན་པ་ཉིད་ཀྱིས་སྡུག་བསྔལ་གྱི་རྟེན་ཡིན་ནོ། །དེ་འདི་བདག་ལ་ཡང་སྡུག་བསྔལ་དང་འདུ་བ་ཅན་ཉིད་མིན་པའི་ཕྱིར། འདོད་ཆགས་དང་བྲལ་བ་མཚུངས་པ་ཡིན་ནོ། །བདག་ནི་བདེ་བ་དང་སྡུག་བསྔལ་ཐམས་ཅད་སྒྲུབ་པར་བྱེད་པའི་ཤེས་པ་དང་དེའི་འབྲས་བུ་ཟ་བ་པོ་ཡིན་ལ། དེའི་ཕྱིར་
བདག་ཁོ་ན་བཞིན་དུ་ཡིན་ལ། ཆགས་པ་ཡང་བདག་གིར་ལྟ་བའི་ཡུལ་ཉིད་ཡིན་པའི་ཕྱིར། འདོད་ཆགས་དང་བྲལ་བའི་ཡུལ་དུ་མི་འགྱུར་བར་བསྟན་པ་ནི། སྐྱོན་ཡང་གང་ཞིག་མཐོང་ཞེས་བྱ་བའོ། །བདག་ཀྱང་སྡུག་བསྔལ་སྒྲུབ་པར་བྱེད་པའི་ཤེས་པ་པོ་དང་ཟ་བ་པོ་ཉིད་ཡིན་པས་འདོད་ཆགས་

དང་བྲལ་བའི་ཡུལ་ཁོ་ནར་འདོད་པ་མ་ཡིན་ནམ། དེ་ལྟར་ཡིན་ན་འདིའི་ངོ་བོ་གཞན་མེད་པའི་ཕྱིར་ཐར་པ་འདོད་པས་ཇི་ལྟར་བདག་ཤེས་པར་བྱ་བ་དང་འདོད་པར་བྱ་བ་དང་དམིགས་པར་བྱ་བ་ཞེས་བྱ་བ་ཡིན། དོར་བྱ་ཉིད་དུ་ཤེས་པར་བྱ་བ་ཡིན་ན་བདག་མེད་པར་ལྟ་བ་ཐར་པ་སྒྲུབ་པར་བྱེད་པ་འཐོབ་
པར་འགྱུར་རོ། །བདག་ཡོད་ན་ཞེས་བྱ་བ་ནི་ཐམས་ཅད་ཀྱི་ཤེས་པ་པོ་དང་ཟ་བ་པོའི་འདུ་བ་ཅན་གྱི་རྒྱུ་ཡོད་ནའོ། །ཆགས་པ་ལ་སོགས་པ་བསྐྱེད་བྱ་སྡུག་བསྔལ་གྱི་བདག་དང་དུ་བ་འབའ་ཞིག་ཡིན་གྱི་བདག་ནི་སྡུག་བསྔལ་གྱི་རྒྱུ་ཡིན་ཏེ། དེ་ཡོད་ན་འབྱུང་བ་ཉིད་དུ་མི་ཤེས་པའི་ཕྱིར་རོ་སྙམ་
དུ་སེམས་པ་ནི་འོན་ཏེ་འདི་སྙམ་དུ་བདག་གི་ཞེས་བྱ་བའོ། །དེ་ཉིད་ཟེར་བ་ནི། གལ་ཏེ་དེ་མེད་ཅེས་བྱ་བའོ། །འདུ་བ་ཅན་བདག་ཡོད་ན་ཆགས་པ་ལ་སོགས་པ་སྡུག་བསྔལ་གྱི་རྒྱུ་ཇི་ལྟར་ཡིན། དེའི་ཕྱིར་སྐྱོན་ཅན་དུ་མི་འགྱུར་ཏེ། འདོད་ཆགས་དང་བྲལ་བ་མི་སྲིད་པ་ཡིན་ཏེ། ཡུལ་མེད་པའི་
ཕྱིར་རོ། །བདག་སྡུག་བསྔལ་གྱི་རྒྱུ་ཡིན་ཡང་དོར་བྱ་མ་ཡིན་པ་མ་ཡིན་ནམ། འདོར་བ་ནི་སྡུག་བསྔལ་སྒྲུབ་པར་བྱེད་པ་ཡིན་ལ། སྡུག་བསྔལ་དང་འབྲེལ་པ་ནི་སྡུག་བསྔལ་བསྒོམས་པས་ཡིན་ཏེ། དེ་ལྟར་ན་སྡུག་བསྔལ་མི་སྐྱེ་བའི་ཕྱིར་བདག་ཀྱང་དེ་དང་འདུ་བ་ཅན་ཉིད་དང་བྲལ་བ་ཡིན་
ནོ་སྙམ་དུ་སེམས་པ་ལ། སྡུག་བསྔལ་བསྒོམས་པས་ཞེས་བྱ་བའོ། །བདག་གི་བ་ཉིད་ཀྱི་བློས་བྱས་པ་ནི་བདག་མི་འདོར་བའི་ཡུལ་ཉིད་ཡིན་ན་བདག་གི་བ་ལ་ཡང་མཚུངས་པའི་ཕྱིར། སྡུག་བསྔལ་བསྒོམས་པ་འདོར་བའི་རྒྱུ་ཇི་ལྟར་ཡིན་ཞེས་བྱ་བའི་དོན་བསྟན་པ་ནི། བདག་གི་བའི་བློ་བཅོམ་པས་
འདིར་འདོར་བས་ཞེས་བྱ་བའོ། །དེ་བཅོམ་ན་ཇི་ལྟར་བྲལ་བ་ཡིན་ཡང་ལེན་པ་ཁོ་ན་ཡིན་པར་བསྟན་པ་ནི་ཞེས་བྱ་བའོ། །བདག་གི་ཉིད་ཀྱི་བློ་ཁོ་ན་དེ་ལ་མེད་པ་ཡིན་པར་མི་རིགས་ཏེ། དེའི་ལོངས་སྤྱོད་ཀྱི་གནས་ནི་ལུས་ཡིན་ལ། ལོངས་སྤྱོད་སྒྲུབ་པར་བྱེད་པ་ནི་དབང་པོ་ཡིན་ཞེས་སྨྲས་པའི་ཕྱིར་རོ་ཞེས་བསྟན་
པ་ནི། ལོངས་སྤྱོད་ཀྱི་རྟེན་ཉིད་དུ་ནི་གཟུང་བ་ལ་ཞེས་བྱ་བ་སྟེ། སྡུག་བསྔལ་བསྒོམ་པ་དང་འགལ་བ་ཡིན་ན། བདག་བཞིན་དུ་བདག་གི་བ་ལ་ཡང་འགྱུར་རོ་ཞེས་བྱ་བའི་དོན་ཏོ། །སྡུག་བསྔལ་བསྒོམས་པས་ཅིར་འགྱུར་ན་ཞེས་བྱ་བ་འདྲི་བའི་དོན་ཟེར་བ་ནི། གལ་ཏེ་བདེ་བའི་རྒྱུ་ཉིད་ནི། །ཞེས་བྱ་བའོ། །

དེ་ལས་བཟློག་པ་ནི་སྡུག་བསྔལ་གྱི་རྒྱུ་ཉིད་ཡོད་པ་ལས་སོ། །ལུས་ལ་སོགས་པ་རང་ཉིད་ཀྱི་བློ་ཁས་ལེན་པར་གྲུབ་པ་འབའ་ཞིག་ནི་མ་ཡིན་གྱི་མངོན་སུམ་གྱིས་གྲུབ་པ་ཡིན་པར་བསྟན་པ་ནི། མངོན་སུམ་ཡིན་ཞེས་བྱ་བའོ། །མའི་མིང་ཅན་བཞིན་དུ་ལུས་དང་དབང་པོ་ལ་སོགས་པ་
རྣམས་ལ་བདག་གི་ཡིན་པ་ལ། བདག་གི་མའི་མིང་ཅན་ལ་གནས་པས་སྡུག་བསྔལ་བསྒོམས་པས་སྡུག་བསྔལ་བཅོམ་པ་ཐོབ་པ་ཡིན་ནོ་སྙམ་དུ་སེམས་པ་ལ། འདུ་སོགས་འབྲེལ་པ་ལས་ཞེས་བྱ་བའོ། །ལུས་དང་དབང་བོ་ལ་སོགས་པ་ཀུན་དུ་དམིགས་ནས་སྡུག་བསྔལ་བསྒོམ་པ་བསྙད་
པར་བྱེད་ལ་དེ་ལ་དམིགས་པ་ཡང་ལོངས་སྤྱོད་ཀྱི་རྟེན་ཉིད་ལ་སོགས་པའི་ངོ་བོ་ཡིན་གྱི་དེ་ཡང་འདུ་བ་ལ་སོགས་པ་དང་འབྲེལ་པ་ནི་བདག་གི་བའི་བློའི་ཡུལ་ཡིན་པའི་ཕྱིར། སྡུག་བསྔལ་བསྒོམ་པ་ཐོབ་བཞིན་པ་ཇི་ལྟར་བདག་གིར་འཛིན་པའི་བློ་དང་བྲལ་བ་ཡིན། ལོངས་སྤྱོད་ཀྱི་རྟེན་ལ་སོགས་པ་བློ་
ཉིད་དང་འབྲེལ་པའི་བློ་ཉིད་ཀྱིས་བདག་གི་བའི་བློ་ཡིན་པའི་ཕྱིར་མཐོང་དུ་ཟིན་ཀྱང་ནི་སྡུག་བསྔལ་གྱི་རྒྱུ་ཉིད་ཤེས་ཀྱང་ངོ་། །མའི་འདུ་ཤེས་ནི་མཐོང་བའི་མའི་ངོ་བོར་སྒྲོ་བཏགས་པས་ཡིན་ལ། སྡུག་བསྔལ་ནི་འབྲེལ་པ་དང་བྲལ་བ་མ་དམིགས་པའི་ཕྱིར་སྒྲོ་བཏགས་པ་མ་ཡིན་ནོ། །འོན་ཏེ་ཕན་འདོགས་
པ་ཉིད་ཁོ་ན་ལུས་ལ་སོགས་པ་དང་འབྲེལ་པ་ཡིན་ལ། ཕྲད་པ་དང་འདུ་བ་ལ་སོགས་པ་ཉིད་མ་ཡིན་ན་དེ་ལྟ་ཡིན་ན་བདག་གི་བའི་ཕན་འདོགས་པའི་བློའི་རྒྱུ་མཚན་ཐམས་ཅད་ལ་ཡིན་པའི་ཕྱིར་དེ་དང་བྲལ་བ་ལ་སྡུག་བསྔལ་ཉིད་མ་མཐོང་བས་གཙོ་བོ་ཉིད་མེད་པའི་ཕྱིར་རོ་ཞེས་བསྟན་པ་ནི། འདུ་བ་ལ་
སོགས་མེད་ན་ཡང་། །ཞེས་བྱ་བ་སྟེ་ཀུན་ལ་ཞེས་བྱ་བ་ནི་གཙོ་བོ་མེད་པའི་ཕྱིར་ཞེས་དགོངས་པའོ། །གལ་ཏེ་གཙོ་བོ་གཞན་གྱིས་ཅི་ཞིག་བྱ་བ་དག་གི་ལུས་དང་དབང་པོ་ལ་སོགས་པ་ཉིད་སྡུག་བསྔལ་གྱི་རྒྱུ་ཡིན་པའི་ཕྱིར་བདག་གི་ཡིན་ཡང་བདག་གི་བློའི་ཡུལ་དུ་མི་འགྱུར་ཏེ། སྤྲུལ་གྱིས་ཟོས་པའི་
མངར་མོ་བཞིན་དུ་ཡིན་ལ། དེ་ཡང་བདག་གི་བློ་ཁོ་ན་བདག་གི་བ་མ་ཡིན་པར་འགྱུར་བ་ཡིན་ནོ་སྙམ་དུ་སེམས་པ་ནི། སྡུག་བསྔལ་བསྐྱེད་ཕྱིར་ཞེས་བྱ་བའོ། །ལུས་དང་དབང་པོ་ལ་སོགས་པ་ནི་དེ་ནི་གཅིག་ཏུ་སྡུག་བསྔལ་མ་ཡིན་ཏེ། སྡུག་བསྔལ་ཁོ་ན་མ་ཡིན་ཞིང་ཕལ་ཆེ་བ་ཡང་མ་ཡིན་ནོ། །

དུག་དང་འདྲེས་པའི་བཟའ་བ་ཇི་ལྟ་བ་ཡིན་པར་བསྟན་པ་ནི། གཅིག་ཏུ་དེ་ནི་སྡུག་བསྔལ་མིན། །སྡུག་བསྔལ་ཁོ་ནའམ་སྡུག་བསྔལ་ཕལ་ཆེ་བ་ཁོ་ན་མ་ཡིན་དུ་ཟིན་ཀྱང་བདེ་བའི་ངོ་བོ་ཁོ་ན་ཕལ་ཆེ་བར་ཡོད་པའི་ཕྱིར་ལ། དེ་ལྟ་ན་ཡང་སྡུག་བསྔལ་གྱིས་སུན་ཕྱུང་བ་ཡིན་པའི་ཕྱིར་དུག་དང་
བཅས་པའི་བཟའ་བ་བཞིན་དུ་བླང་བྱ་མ་ཡིན་པ་ཁོ་ནར་འགྱུར་རོ། །ལུས་མཛེས་པ་ཡང་མཛེ་ནད་གཅིག་པུས་སྐལ་བ་ངན་པ་ཡིན་ནོ་ཞེས་བྱ་བའི་རིགས་པ་ལས་སོ་སྙམ་དུ་སེམས་པ་ལ། ཁྱད་པར་ཅན་ནི་སྡུག་བསྔལ་གྱི་ཆ་ཡང་མེད་པས་ལྷག་པ་ནི་གཅིག་ཏུ་བདེ་བའི་ངོ་བོ་ཡོད་པའི་ཕྱིར་རོ། །
དེ་དང་འགལ་བ་ནི་སྡུག་བསྔལ་གྱི་ཆ་དང་འདྲེས་པ་དང་ཁྱད་པར་ཡོད་པ་ལ་དུག་དང་བཅས་པ་བཞིན་དུ་ཆགས་པ་དང་བྲལ་བ་ཉིད་ནི་རྒྱབ་ཀྱིས་ཕྱོགས་པར་འགྱུར་རོ། །དེ་མེད་ན་ནི་བདག་ཆགས་པ་དང་ལྡན་པ་དག་ཇི་ལྟར་རྙེད་པ་ལ་འཇུག་པ་ཡིན་པར་བསྟན་པ་ནི། མ་རྙེད་ན་ཞེས་བྱ་བ་སྟེ། འདོད་
ཆགས་ཀྱིས་ནོན་པ་ཁྱད་པར་ཅན་གྱི་བུད་མེད་མ་རྙེད་ན་མོ་ཙམ་ལ་འཇུག་པ་ཡིན་ནོ། །རྒྱུའི་སྟོབས་ལས་ཞེས་བྱ་བ་ནི་སྔ་མ་སྔ་མའི་བདེ་བ་ལ་གོམས་པའི་དབང་གིས་སོ། །སྡུག་བསྔལ་གྱི་ཆ་དང་ལྡན་པ་ཁོ་ན་བདེ་བ་ཉེ་བར་ལེན་པ་མ་ཡིན་ནམ། འགྲོ་ས་གཞན་མེད་པའི་ཕྱིར་རོ། །བདེ་བའི་ཁྱད་པར་
མེད་པའི་ཕྱིར་དེ་ལ་ལྟོས་ནས་རིགས་པ་ཡིན་གྱི་ཤིན་ཏུ་བའི་སྡུག་བསྔལ་ལས་གྲོལ་བའི་བདག་གི་ངོ་བོ་ལ་ལྟོས་ནས་ནི་མི་རིགས་སོ། །ཤིན་ཏུ་བའི་སྡུག་བསྔལ་ལས་གྲོལ་བ་ནི་སྡུག་བསྔལ་བསྒོམས་པས་དེ་ཁོ་ན་ཉིད་མཐོང་བར་འགྱུར་བ་ཡིན་ནོ་སྙམ་དུ་སེམས་པ་ལ། བདག་བསྒོམ་པ་ནི་མི་སྲིད་པ་ཉིད་
དོ་ཞེས་བྱ་བ་ལ་སོགས་པ་ནས། དེ་ནི་འགར་ཡང་གཞན་འགྱུར་ཕྱིར། །མིར་ཞེས་བྱ་བའི་བར་དུའོ།། །དོན་འདི་ཁོ་ན་ལ་རྣམ་འགྲེལ་དང་སྦྱོར་བ་ནི། དེ་ཉིད་ཀྱི་ཕྱིར་ཞེས་བྱ་བ་སྟེ། སྡུག་བསྔལ་གྱིས་བྱས་པའི་ངོ་བོ་ལས་གཞན་པ་ཁོ་ན་དེ་མེད་པས་བྱས་པ་ཡིན་པའི་ཕྱིར་དེ་ལ་ལྟོས་ནས་སྔ་མའི་ཞིག་པ་ཁོ་
ན་ཡིན་ནོ་ཞེས་བྱ་བའི་དོན་ཏོ། །གང་གི་ཞེས་བྱ་བ་ནི་རྣལ་འབྱོར་པའིའོ། །འདོད་པ་ནི་ཆགས་པའི་ཡུལ་ལོ། །དེ་ཞེས་བྱ་བ་ནི་བདག་གོ། །དེ་ནི་ཞེས་བྱ་བ་ནི་རྣལ་འབྱོར་པའོ། །གང་གི་བདག་སྟེ་བདག་གི་རང་གི་ངོ་བོ་ཡིན་ཏེ། ཆགས་པ་ཡུལ་ཡིན་ལ། དེའི་ནི་རང་གི་ངོ་བོའིའོ། །དེ་ཞེས་བྱ་བའི་བདག་གོ། །

འདོད་ཆགས་ལ་སོགས་པས་ནི་བདག་ལ་འགར་ཡང་ཕན་མི་འདོགས་པ་མ་ཡིན་ནམ། འོ་ན་ཅི་ཞེ་ན། །སྦྱོར་བ་ཙམ་ཡིན་ལ་ཐར་པ་ལ་ནི་དེ་དང་བྲལ་བ་ཙམ་ཡིན་ནོ། །དེའི་ཕྱིར་བདག་ཞིག་པ་ཐར་པ་མ་ཡིན་ནོ་སྙམ་དུ་སེམས་པ་ལ། སྐྱོན་ཅན་ཞེས་བྱ་བ་ནི། མིན་ཞེས་བྱ་བ་
དང་སྦྱར་རོ། །དེ་ལྡན་བས་ནི་འདོད་ཆགས་ལ་སོགས་བ་དང་ལྡན་པས་སོ། །རང་ནི་རང་གི་ངོ་བོས་སོ། །བདག་ནི་ལོག་པ་ཁོ་ན་ཡིན་ཏེ་དེ་དང་གཅིག་པ་ཉིད་དུ་མི་འགྱུར་བ་ཡིན་ཞེས་བྱ་བའི་དོན་ནི། དབྱུག་པ་ཅན་ནི་དབྱུག་པ་མིན། །ཞེས་བྱ་བའོ། །གལ་ཏེ། མྱོང་ཕྱིར་དེ་ནི་ཆགས་བྲལ་ཏེ། །ཞེས་
བྱ་བ་ནི་རྒོལ་བའོ། །དེ་ཉིད་སྒྲུབ་པར་བྱེད་པ་ནི་མྱོང་བ་ལས་མ་ཡིན་ཞེས་བྱ་བ་ལ་སོགས་པ་སྟེ། བདག་གིས་འདོད་ཆགས་ལ་སོགས་པར་རང་རིག་པར་ཡིན་ན་འདོད་ཆགས་ལ་སོགས་པ་ཉིད་ཁོ་ནར་འགྱུར་བའི་ཕྱིར་ཐམས་ཅད་གཞན་རིག་ཁོ་ན་ཡིན་གྱི་རང་རིག་པ་ནི་མ་ཡིན་ནོ། །དེ་ལྟར་བུད་
མེད་ལ་སོགས་པ་རིག་པས་དེའི་ངོ་བོ་ཉིད་དུ་ཐལ་བར་འགྱུར་ཞེས་ལན་དུ་ཟེར་བ་ནི། བུད་མེད་ཅེས་བྱ་བ་ལ་སོགས་པའོ། །དེ་ལྟར་ན་འདོད་ཆགས་ཅན་ཇི་ལྟར་ཡིན་ཞེས་ཟེར་བ་ལ། འབྲེལ་ཕྱིར་ཞེས་བྱ་བའོ། །རིགས་པ་དེ་དང་ལྡན་པ་ཉིད་ཡིན་ན་རྣལ་འབྱོར་པ་ཡང་དེ་དང་ལྡན་པ་ཉིད་དུ་འགྱུར་
རོ། །དེའི་ཕྱིར་རིག་པ་ཡིན་ཡང་འདོད་ཆགས་མེད་པ་ཉིད་དུ་འདོད་པ་འགལ་བ་ཡིན་ནོ་ཞེས་ཟེར་བ་ནི། ཆགས་སོགས་མྱོང་བས་རྣལ་འབྱོར་པ། །ཞེས་བྱ་བའོ། །གྲུབ་པའི་མཐའ་བསྟན་པ་ནི། ཐ་དད་པ་