Luận tạng Tây Tạng (Tengyur) — Tập 180

ེའི་ངོ་བོ་ཉིད་ཀྱིས་བྱེ་བྲག་ཏུ་འབྱེད་པ་མ་ཡིན་ནོ། །དབྱིབས་ལ་བུམ་པ་ཉིད་ལ་སོགས་པར་བྱེ་བྲག་ཏུ་འབྱེད་པར་བྱེད་པ་ཡིན་ནོ་ཞེ་ན། འདི་ཡང་ཁ་དོག་ལ་ཡང་མཚུངས་ཏེ། ཁ་དོག་འཛིན་པ་ན་ཡང་ཉེ་བ་ན་གནས་པ་ལ་སོགས་པའི་དབྱིབས་
ཙམ་འཛིན་པའི་ཕྱིར་རྫས་འཛིན་པ་ཡང་མ་ཡིན་ལ། དབྱིབས་ཙམ་ནི་དོན་བྱེད་པ་མ་ཡིན་ནོ། །རྫས་ཀྱང་དེ་ལས་གཞན་པ་ལས་ཐ་དད་པ་མ་ཡིན་པར་མ་དམིགས་པ་མ་ཡིན་ནམ། ཇི་ལྟར་དོན་བྱེད་པ་ཡིན། དབྱིབས་དང་དེ་ལ་རྗེས་སུ་དཔོག་པའི་ཁ་དོག་གིས་ཁྱད་པར་ཅན་གྱི་དོན་
བྱེད་པ་ཡིན་ནོ་ཞེ་ན། མི་རིགས་ཏེ། དཔག་བྱ་ཁ་དོག་དང་ཁྱད་པར་ཅན་གྱི་དབྱིབས་ལས་ཐ་དད་པའི་རྫས་མ་དམིགས་པའི་ཕྱིར་རོ། །སྣང་བའི་ཁ་དོག་དང་ཁྱད་པར་ཅན་ཉིད་ཀྱང་རྫས་བཞིན་དུ་དབྱིབས་ལ་ཡང་འཁྲུལ་པའི་ཕྱིར། མཁས་པ་མ་ཡིན་པའི་དེ་ནི་བརྫུན་པ་ཡིན་
ལ། མཁས་པ་རྣམས་ཀྱི་ཐ་དད་པའི་བློ་ཡིན་ནོ་ཞེས་བྱ་བའི་རིགས་པས་སོ། །ཅི་ལས་ཤེས་ཞེས་བྱ་བ་ནི་རེ་ཞིག་དབང་པོ་ལས་ཀྱང་མ་ཡིན་ལ། ཐག་རིང་བ་ཉིད་དང་། རབ་རིབ་དང་། ཉེ་བར་བསྒྱུར་བ་ལས་ཀྱང་མ་ཡིན་ཏེ། མི་དམིགས་པའི་རྒྱུ་ཡིན་པའི་ཕྱིར་རོ། །མི་
དམིགས་པའི་རྒྱུ་ཡིན་ན་གསལ་བར་དམིགས་པ་ཡིན་ལ། ཉེ་བར་བསྒྱུར་བ་ལ་སོགས་པ་དམིགས་པའི་རྒྱུ་ཡོད་ན་ཆེས་ཤིན་ཏུ་དམིགས་པར་འགྱུར་རོ། །ཡོན་ཏན་ཡིན་པའི་ཕྱིར་ཁ་དོག་དང་དབྱིབས་ཉིད་རྟེན་པ་ཉིད་ཡིན་པས་རྟེན་གྱི་རྫས་འཕེལ་བ་ཡིན་པར་བསྟན་པ་ནི། དེ་དག་
ལས་ནི་གཞན་པ་ཡིན་ཞེས་བྱ་བ་སྟེ། དབྱིབས་ཀྱི་དངོས་པོ་ལས་གཞན་པ་མ་དམིགས་པའི་ཕྱིར་མི་རྟེན་པ་ཉིད་ཡིན་ཏེ། དམིགས་པར་བྱ་བ་ནི་ཡོན་ཏན་ཡིན་པའི་ཕྱིར་རོ། །ཁྱབ་པར་བྱེད་པ་དང་འགལ་བ་མངོན་སུམ་པ་ཡིན་ཏེ། དེ་སྒྲུབ་པར་བྱེད་པ་ནི་མིག་མ་ཡིན་པའི་མངོན་སུམ་

པ་ཉིད་ལ་སོགས་པ་གནོད་པ་ཅན་ཡིན་ཏེ། སྤྱི་ལ་སོགས་པས་མེ་ངེས་པ་མ་ཡིན་ནོ། །དེ་ལས་གཞན་པ་ཉིད་ཀྱིས་ཁྱད་པར་ལ་ཡང་བློ་ཡིན་པར་འགྲུབ་པའི་གཏན་ཚིགས་ཉིད་ཡིན་གྱི་དུ་བ་བཞིན་དུ་དངོས་སུ་བ་ནི་མ་ཡིན་ནོ་ཞེས་བྱ་བའི་དོན་ཏོ། །ལྗང་གུ་དང་སེར་པོ་ལ་སོགས་
པའི་ཁ་དོག་དང་ཆུང་ངུ་དང་ཆེན་པོ་ཉིད་ལ་སོགས་པའི་དབྱིབས་ཀྱང་གཞན་དང་གཞན་དུ་འགྱུར་བ་མ་ཡིན་ནམ། རྒྱ་ལྟར་གྱི་འབྲས་བུ་ནི་མ་ཡིན་ཏེ། དེ་ཉིད་ནི་གནས་སྐབས་ཐམས་ཅད་དུ་དམིགས་པའི་ཕྱིར་རོ། །གང་ཞིག་འགྱུར་ན་ཡང་གང་མི་འགྱུར་བ་དེ་ནི་དེ་ལས་ཐ་དད་པ་ཡིན་ལ།
ཁ་དོག་དང་དབྱིབས་འགྱུར་ཡང་རྫས་ནི་མི་འགྱུར་བ་ཡིན་པའི་ཕྱིར་རྗེས་སུ་འགྲོ་བ་དང་ལྡོག་པའི་ཚད་མ་ཡིན་ནོ་སྙམ་དུ་སེམས་པ་ལ། སྔོན་པོ་ཉིད་ལ་སོགས་པའི་ཁ་དོག་གི་རང་བཞིན་ཉིད་ཅེས་བྱ་བ་སྨོས་ཏེ། སྔོན་པོའི་ཁ་དོག་དང་དབྱིབས་དམིགས་པའི་དུས་སུ་དེའི་ཡན་ལག་བཞིན་དུ་
རྫས་དམིགས་པ་ཅན་ནི་མ་ཡིན་ནོ། །དེ་བཞིན་དུ་སེར་བོ་ལ་སོགས་པའི་ཁ་དོག་དང་དབྱིབས་དམིགས་པའི་དུས་སུ་དོན་གཞན་ལ་དམིགས་པ་ནི་ཡང་དག་པ་མ་ཡིན་པར་བསྟན་པར་བྱ་བ་ཡིན་ལ། རྗེས་སུ་འགྲོ་ལྡོག་དག་ཀྱང་ཡིན་ཏེ། དེའི་དོན་གཅིག་བྱེད་པའི་བྱེད་པ་པོ་ཉིད་དམ།
དེ་སྒྲ་གཅིག་གི་བརྗོད་བྱ་ཉིད་ཡིན་ཡང་དོན་གཞན་ལ་སྦྱོར་བ་དག་གི་མ་ཡིན་ཏེ། དེ་ལྟ་མོད་ཀྱི་དེ་དོན་གཅིག་བྱེད་པའི་བྱེད་པ་པོ་ཉིད་ནི་མང་པོ་རྣམས་ལ་ཡང་གཅིག་ཉིད་ཀྱི་ཐ་སྙད་ཀྱི་རྒྱུ་མཚན་ཡིན་ཏེ། ནགས་དང་བ་ལང་གི་སྒྲ་ལ་སོགས་པ་ཡང་རྣམ་པ་མང་པོ་ཡིན་པར་འཇིག་རྟེན་དུ་སྣང་
བ་ཡིན་ཏེ། གྲངས་དང་། ནགས་དང་། དམག་ལ་སོགས་པའི་སྒྲ་རྣམས་ཀྱི་བརྗོད་བྱ་ལ། བྱེ་བྲག་མེད་པར་ལྟུང་བའི་ཕྱིར་དང་། དོན་བྱེད་པའི་ཡུལ་ཡིན་པའི་ཕྱིར་ཡང་། གྲངས་ཀྱང་བགྲང་བྱ་ལ་དགོས་པ་ཉིད་དུ་ཉེ་བར་བླངས་ནས། མང་པོ་རྣམས་ལ་ཚིག་མང་པོར་ཐལ་
བར་འགྱུར་རོ། །རྫས་བཞིན་དུ་གྲངས་ལ་སོགས་པ་ལ་ཡང་ཁ་དོག་དང་དབྱིབས་ལས་ཐ་དད་པ་ཅན་མ་ཡིན་ཏེ། དེ་འཛིན་པའི་མངོན་སུམ་ལ་དེ་དང་འདྲ་བའི་སྣང་བ་མེད་པའི་ཕྱིར་ཡོད་པ་མ་ཡིན་ཏེ། རྒྱུ་མཚན་དེ་དག་ཉིད་ཐ་དད་པར་རྣམ་པར་འབྱེད་པ་དང་། ཚིག་གི་དབྱེ་བ་

ལ་སོགས་པ་རྣམས་ནི་བརྗོད་པར་འདོད་པའི་ཡུལ་ལ་རྣམ་པར་གནས་པ་ཡིན་ནོ། །ཁ་དོག་དང་དབྱིབས་ནི་ཐ་དད་པར་མི་དམིགས་པ་ཡིན་ལ། ཕྱིས་མངོན་སུམ་གྱི་དུས་སུ་དེ་ཉིད་དང་། རྗེས་སུ་འབྲེལ་པའི་ངོ་བོར་མ་ཡིན་ནམ། རྗེས་སུ་འཇུག་པ་ཉིད་ཀྱི་རྫས་ཡིན་ལ། དེ་ཉིད་
ལས་ལོག་པ་ཉིད་ཀྱི་གནས་སྐབས་ནི་ཡོན་ཏན་ཡིན་ནོ་སྙམ་དུ་སེམས་ལ། དེ་ལས་ཐ་དད་པའི་རྫས་གཞན་ཞེས་བྱ་བའོ། །དེའི་རྗེས་སུ་འགྲོ་བའི་ངོ་བོར་རྫས་མ་ཡིན་ནམ། དབྱིབས་དང་ཁ་དོག་གི་རྟེན་ཡིན་ལ། དེ་ལ་བརྟེན་པ་དེ་དག་ནི་ཀུན་དུ་དམིགས་པ་ཡིན་པའི་ཕྱིར་ལ་དེ་བཞིན་
དུ་མ་དམིགས་པ་ཡང་གྲུབ་པ་ཡིན་ནོ་སྙམ་དུ་སེམས་པས། འོན་ཏེ་ཁ་དོག་དང་དབྱིབས་དང་ལྡན་པའི་རྫས་ཡིན་ནོ་ཞེ་ན། ལན་དུ་མ་ཡིན་ཏེ། དེ་ལས་ཐ་དད་པར་ཞེས་བྱ་བ་སྟེ། ལྗང་གུ་དང་སེར་པོའི་ཁ་དོག་དང་དེའི་དབྱིབས་སུ་སྣང་བའི་དུས་སུ་སྣང་བ་ཡིན་ནོ། །སྔར་མཐོང་བ་ངོ་ཤེས་པ་
ཡང་མཐོང་བའི་ཡུལ་ལ་ཡིན་ལ། དེའི་ཡུལ་དང་ལོག་པར་འཛིན་པའི་ཕྱིར་མཐོང་བ་ཉིད་ཀྱིས་གནོད་པ་ཡིན་ནོ། །གནོད་པར་བྱེད་པ་ལས་ཀྱང་ཁྱད་པར་གྱི་རྣམ་པའི་ངེས་པ་མ་བཟུང་བའི་ཁྱད་པར་ཙམ་མམ། ཐག་རིང་བ་ཉིད་ཀྱང་སྣང་བ་ཡིན་གྱི་རྫས་སམ་ཅིག་ཤོས་ནི་མ་ཡིན་ནོ། །དེའི་
གནས་སྐབས་ན་ཡོད་བཞིན་པ་གནས་སྐབས་གཞན་དུ་འགྱུར་བ་མ་ཡིན་པར་བསྟན་པ་ནི། གསལ་བ་དང་མི་གསལ་བ་ཞེས་བྱ་བ་ལ་སོགས་པ་སྟེ། སྔ་མའི་ཁ་དོག་དང་དབྱིབས་གཞན་ཡིན་པ་ཉིད་དམ། གཞན་དུ་ཡང་རྟོགས་པ་ནི་མི་གསལ་བ་ཉིད་དུ་ཐ་སྙད་འདོགས་པ་མེད་པར་
ཐལ་བར་འགྱུར་རོ་ཞེས་བྱ་བའི་དོན་ཏོ། །མཐོང་བ་དང་ཕྲད་པར་བྱེད་པ་མཐོང་བ་ནི་ཚད་མ་ཡིན། ཕྲད་པར་བྱེད་པ་ཡང་རེག་པའི་དབང་པོས་འཛིན་པ་མ་ཡིན་ནམ། དེའི་ཕྱིར་མཐོང་བ་དང་རེག་པ་དག་གིས་དོན་གཅིག་འཛིན་པ་ཡིན་པའི་ཕྱིར་གཟུགས་དང་རེག་བྱ་ལ་སོགས་པ་གཅིག་པུ་
ནི་རྫས་ཡིན་ཏེ། དེ་མེད་ན་མངོན་སུམ་ཉིད་ཚད་མ་ཉིད་དུ་མི་འགྱུར་རོ་སྙམ་དུ་སེམས་པས། འོན་ཏེ་ཡང་ཁ་དོག་དེ་ནི་ཐོབ་པ་མིན་ཞེས་བྱ་བའོ། །ལན་ནི། དེ་ཉིད་དུ་ན་གལ་ཏེ་དེ། །ཞེས་བྱ་བའོ། །ཇི་ལྟར་ཡང་མཐོང་བ་ལ་གཟུགས་དང་དབྱིབས་ཀྱང་སྣང་བ་ཡིན་ལ། རྫས་ཀྱང་

དེའི་རྟོགས་བྱ་ཡིན་པའི་ཕྱིར་དེ་ཁོ་ན་བཞིན་དུ་སྣང་བར་འགྱུར་རོ། །དེ་བཞིན་དུ་རེག་པས་དམིགས་པར་བྱ་བ་ཡིན་ན། འཇམ་པ་དང་རྩུབ་པ་ལ་སོགས་པ་བཞིན་དང་། དེའི་དཔག་བྱ་ཁ་དོག་དང་དབྱིབས་བཞིན་དུ་དེ་ལས་གཞན་པའི་རྫས་སུ་དམིགས་པར་འགྱུར་ཏེ། རང་
གི་ངོ་བོ་དེ་བཞིན་དུ་མ་དམིགས་པ་ལ་དམིགས་པ་ཡིན་པར་སྨྲ་བར་མི་རིགས་སོ་ཞེས་བྱ་བའི་དོན་ཏོ། །དེ་ལྟ་ཡིན་ན་རེག་བྱ་ཐོབ་བྱེད་ཡིན་པས་མཐོང་བ་ཇི་ལྟར་ཚད་མ་ཡིན་སྙམ་དུ་སེམས་པ་ལ། རྗེས་སུ་སྦྱོར་བ་ནི་ཞེས་བྱ་བ་སྨོས་ཏེ། ཡུལ་གཟུགས་མཐོང་བ་ནི་ཐོབ་བྱ་རང་གི་འབྲས་བུའི་
ངོ་བོ་ལ་དེ་ཉིད་ལ་དེའི་འབྲས་བུ་ཉིད་དུ་སྒྲོ་བཏགས་པས་དེ་ཉིད་མཐོང་ངོ་ཞེས་མངོན་པར་ཞེན་པས་ཐོབ་པར་བྱ་བ་ཡིན་ལ། རེག་བྱ་ལ་ནི་དེ་དང་ཚོགས་པ་གཅིག་པའི་འབྲས་བུ་ཡིན་པ་ཉིད་ཀྱིས་རྣམ་པར་རྟོག་པས་སྤྲུལ་པའི་ཡུལ་གཅིག་པ་ཉིད་ཀྱིས་ཐ་སྙད་པ་ཡིན་གྱི་རྫས་ནི་ཡུལ་མ་ཡིན་
ཏེ། འོ་ན་ཅི་ཞེ་ན། ཡུལ་ནི་གཟུགས་དང་རེག་བྱ་དག་ཡིན་ཏེ། དེ་ལྟར་ངེས་པ་ཡིན་པའི་ཕྱིར་རོ། །དེ་ཡང་། ཁ་དོག་སོ་སོར་སྣང་བ་ལས། །འདི་ནི་བུམ་མིན་ཤེས་པ་ལ། །ཞེས་གསུངས་པའོ། །འདི་ཉིད་ཀྱི་དགོངས་པས་ནི་དེ་འཛིན་པ་མེད་ན་དེའི་ཤེས་པ་མེད་དོ་ཞེས་
གསུངས་པའོ། །དེ་ནི་རྗེས་སུ་འགྲོ་བའི་མཐར་ཐུག་པ་ཡིན་ཏེ། ཐལ་བར་འགྱུར་བ་དང་ཕྱིན་ཅི་ལོག་པ་ལ་བརྟེན་པའི་ཕྱིར་རོ། །དེས་ན་དེའི་ཁ་དོག་དང་དབྱིབས་འཛིན་པ་ན། དེ་དང་དེ་མ་ཡིན་པའི་བདག་ཉིད་ཀྱི་བློ་ནི་གཅིག་གི་བློ་ཡིན་ཏེ། ཐ་དད་པ་དང་ཐ་དད་པ་མ་ཡིན་པའི་
རྫས་སམ་གཞན་ཡང་རུང་བའི་བློ་ནི་མ་ཡིན་ཏེ། གཅིག་ཉམས་སུ་མྱོང་བ་གང་ཡིན་པ་འདི་དེ་ཉིད་ཁ་དོག་དང་དབྱིབས་ཉམས་སུ་མྱོང་བ་ཡིན་ནོ་ཞེས་བྱ་བའི་དོན་ཏོ། །དཀར་པོ་དང་དུང་ནི་རྣམ་པར་གཅད་བྱ་དང་རྣམ་པར་གཅོད་བྱེད་ཡིན་པས་རྫས་དང་ཡོན་ཏན་དག་མངོན་སུམ་ཡིན་པས།
དང་པོའི་དབང་པོའི་དུས་དེ་ཉིད་དུ་སྣང་བ་ཡིན་པའི་ཕྱིར། རྫས་མི་དམིགས་པ་མ་གྲུབ་པ་ཡིན་ནོ་སྙམ་དུ་སེམས་པ་ལ། སྔར་བསྟན་པའི་རིམ་པས་དབྱིབས་ལས་གཞན་པ་གཅིག་པུའི་བྱེ་བྲག་ཏུ་བྱ་བའམ། ཐུན་མོང་བའི་ངོ་བོ་མེད་པའི་ཕྱིར་ཁྱད་པར་གྱི་རྣམ་པའི་ངེས་པ་

མི་འཛིན་པ་ཉིད་སྤྱི་ཡིན་ནོ་ཞེས་ཉེ་བར་བསྡུས་པ་ཡིན་ནོ། །དེའི་ཕྱིར་ཐུན་མོང་བ་ཞེས་བྱ་བའོ། །མཆོད་སྦྱིན་ལ་སོགས་པའི་བྱེ་བྲག་རྣམས་ཀྱིས་བྱེད་པའི་དོན་ནི་ངེས་པར་འཛིན་པ་མེད་པ་ཁོ་ན་ཡིན་པར་བསྟན་པ་ནི། དེ་བས་ན་བྱེད་པ་ཞེས་བྱ་བའོ། །ངེས་པར་སྦྱོར་བའི་ཡུལ་གྱི་
སྐད་ཀྱི་དབྱིངས་ཀྱི་དོན་དང་། བྱེད་པའི་དོན་དག་ནི་རྟོགས་པས་ཕྱེ་བ་ཡིན་ནོ། །དེ་ལྟ་མོད་ཀྱི་ཡུལ་མེད་པ་ནི་མ་ཡིན་ནོ་སྙམ་དུ་སེམས་པ་ལ། རང་གི་བྱ་བ་དང་ཞེས་བྱ་བ་སྨོས་ཏེ། སྔ་མའི་བག་ཆགས་དང་དོན་ཡང་ཤེས་པ་དེའི་རྒྱུ་མཚན་ཡིན་གྱི། རེ་རེའི་ནི་མ་
ཡིན་ནོ། །གཏན་མེད་པའི་དོན་ལ་སྒྲ་ནི་ཤེས་པའི་བྱེད་པ་ཡིན་ནོ་སྙམ་དུ་སེམས་པས་སྨྲ་བ་ནི། མངོན་སུམ་ནི་ཞེས་བྱ་བ་སྟེ། གཏན་མེད་བ་ཞེས་བྱ་བ་ནི་ད་ལྟར་བ་མ་ཡིན་པ་འབྱུང་བར་འགྱུར་བ་དང་བྱུང་ཟིན་པའི་ངོ་བོ་ཞེས་བྱ་བའི་དོན་ཏོ། །ལན་དུ་མཐོང་བ་མེད་པའི་དོན་དེ་ནི་ཞེས་
བྱ་བ་སྟེ། ད་ལྟར་བ་མ་ཡིན་པའི་ཡུལ་ལ་ཡང་སྒྲའི་ཤེས་པ་འབྱུང་བ་ནི་དོན་ཡོད་པའི་ངོ་བོར་གྲུབ་པ་ཡིན་ན་ནི་བདེན་ན། རྟོགས་པ་འདི་ཉིད་ལ་དོན་ཡོད་པ་ནི་མ་ཡིན་ཏེ། རང་གི་ངོ་བོར་རིག་པའི་ཕྱིན་མཐོང་བ་མེད་པ་ཞེས་བྱ་བའི་དོན་ཡིན་ནོ། །འབྲས་བུ་ལ་བྱ་བ་བྱེད་པ་པོའི་ངོ་བོ་མི་ཤེས་
པ་ཡིན་ན། དེའི་བྱེད་པ་མེད་ལ་སྦྱིན་སྲེག་བྱས་པས་མཐོ་རིས་ཐོབ་པོ་ཞེས་བྱ་བའི་ཤེས་པ་རྟོགས་པར་བྱེད་པ་མ་ཡིན་པར་བསྟན་པ་ནི། མེའི་སྦྱིན་སྲེག་ལ་སོགས་པ་ལ་ནི་འབྲས་བུའི་རྒྱུ་ཉིད་ཅེས་བྱ་བའོ། །མི་འཇུག་པ་འཇུག་པར་བྱེད་པ་ངེས་སྦྱོར་མ་ཡིན་ནམ། སྐྱེས་བུ་ནི་དེ་ལ་སྦྱར་
བྱ་ཡིན་པ་ཉིད་ཀྱིས་དེ་དང་འབྲེལ་པ་ཅན་ཡིན་གྱི་བྱེད་པ་པོ་ཉིད་ཀྱིས་ནི་མ་ཡིན་ནོ། །སྐད་ཀྱི་དབྱིངས་ཀྱི་དོན་ནི་ཡུལ་ཉིད་ཀྱི་འབྲེལ་པ་ཅན་ཡིན་གྱི་བྱེད་པ་ཉིད་ཀྱིས་མ་ཡིན་ལ། དེ་ལིང་ལ་སོགས་པའི་བྱ་བ་ནི་མ་ཡིན་ཏེ། འཛུད་པར་བྱེད་པའི་བྱ་བ་ཉིད་དང་། ཚད་མ་གཞན་གྱི་སྤྱོད་
ཡུལ་ཡིན་པའི་ཕྱིར་དང་། མ་བཅད་པ་གཅོད་པ་པོ་ཉིད་མེད་པར་ཐལ་བར་འགྱུར་རོ། །འདི་ནི་རྫོགས་བྱ་ཉིད་ཀྱི་འབྲས་བུ་ཡང་ཡིན་ལ། འཇུག་པ་ལ་ཕྱོགས་པའི་གེགས་བྱེད་པས་དགག་པ་ཡང་ཡིན་ཏེ། སྐྱེས་བུའི་འཛུད་བྱེད་དང་། སྒྲིབ་བྱེད་དག་གི་བསྒྲུབ་པ་དང་དགག་པའི་

དོན་དག་ནི་དེ་ཙམ་གྱིས་ཀྱང་རྫོགས་པ་ཡིན་གྱི། འབྲས་བུ་དང་བྱ་བ་ལ་སོགས་པའི་རྟོགས་པ་བྱེད་པ་ནི་མ་ཡིན་ནོ་སྙམ་དུ་སེམས་པ་ནི། འོན་ཏེ་བདག་གི་ནུས་པ་ཞེས་བྱ་བ་སྟེ། བྱ་བའི་འབྲས་བུའི་བྱེད་པ་པོ་དང་། དེ་དང་འབྲེལ་པ་དང་མཚན་ཉིད་མི་མཐུན་པའི་ལིང་གི་
དོན་ཏེ། རྟོགས་བྱ་ཡིན་པས་འབྲས་བུ་ཡིན་པ་ནི་ངེས་སྦྱོར་ཡིན་ནོ་ཞེས་བྱ་བའི་དོན་ཏོ། །འབྲས་བུའི་རྒྱུ་ཉིད་མི་ཤེས་པ་ཡིན་ལ། བསྐུལ་ཡང་རྟོགས་པ་དང་ལྡན་པ་རྣམས་འཇུག་པར་མི་འགྱུར་བར་བསྟན་པ་ནི། གལ་ཏེ་དེ་ནི་མཐོ་རིས་ཀྱི་རྒྱུ་མིན་པར་ནི་ཞེས་བྱ་བའོ། །འབྲས་བུ་
ཉིད་ནི་སྔ་མའི་རྗེས་སུ་འབྲངས་ནས། ལུང་ཐམས་ཅད་དུ་རྟོགས་པའམ་ཕྱིར་རིག་བྱེད་དང་རིག་བྱེད་མ་ཡིན་པ་དག་ལ་བྱེ་བྲག་ཅི་ཡང་མེད་པ་ཡིན་ལ། སྐྱེས་བུས་བྱས་པ་ལ་ནི་དེ་ལྟ་བུའི་ལས་མེད་པ་མ་ཡིན་ནོ་ཞེས་བྱ་བའི་དོན་ཏོ། །འབྲེལ་པ་ནི་སྐྱེས་བུས་བྱས་པ་ཡིན་པའི་ཕྱིར་རིག་བྱེད་རང་
ཉིད་ཀྱི་ཤེས་པ་སྐྱེད་པར་བྱེད་པ་མ་ཡིན་པས་སྐྱེས་བུས་བྱས་པའི་འབྲེལ་པའི་རྗེས་སུ་འབྲངས་པས་རྟོགས་པ་ཡིན་ན། ཐེ་ཚོམ་ཅན་ཡིན་གྱི། འབའ་ཞིག་གིས་ནི་མ་ཡིན་ནོ། །མཐོང་བྱ་དང་བརྟག་བྱ་དག་གི་དོན་གཅིག་ཏུ་བྱས་ནས་འཇུག་པར་བྱེད་པའི་ཕྱིར་འཁྲུལ་པ་ཉིད་ཡིན་པར་བསྟན་པ་
ནི་སྣང་བ་དང་། རྣམ་པར་བརྟག་པ་གཅིག་ཏུ་བྱས་ནས་ཤེས་པར་བྱའོ། །མངོན་སུམ་ལ་སོགས་པའི་ཤེས་པ་ནི་རྒྱུ་ཡོད་ལ་རྐྱེན་མེད་པ་ཡིན་ན། ཚད་མ་ཉིད་སྐྱེད་པར་བྱེད་པ་མ་ཡིན་ནམ། རིག་བྱེད་ལ་ཡང་དེ་དག་ཙམ་གྱིས་སྦྱོར་བར་བྱེད་པ་ནི་ཡོད་པ་ཉིད་ཡིན་ལ། སྐྱོན་རྣམས་ནི་ཚད་མ་
ཉིད་མ་ཡིན་པ་ལ་སྦྱོར་བར་བྱེད་པ་ཡིན་ཏེ། སྐྱེས་བུས་མ་བྱས་པ་ཉིད་ཀྱི་ཕྱིར་མི་སྲིད་པ་ཡིན་ནོ། །མངོན་སུམ་ལ་སོགས་པས་རྟོགས་པའི་དོན་ཉིད་ནི་ཚད་མ་ཉིད་ལ་སྦྱོར་བར་བྱེད་པ་མ་ཡིན་པ་དེས་ན་དེ་མེད་ཀྱང་སྐྱོན་མེད་པ་ཡིན་ནོ། །དོན་ཇི་ལྟ་བ་བཞིན་ལ་ངེས་པ་ཡིན་ན་སྐྱོན་མེད་པ་མ་ཡིན་
ནམ། ངེས་པ་ཡང་དོན་བྱེད་པ་ལ་མི་བསླུ་བ་ཉིད་ཀྱི་ཕྱིར་ཏེ། སྔ་མ་ལ་སྐྱོན་མི་དམིགས་པ་ཙམ་ནི་ཐེ་ཚོམ་གྱི་རྒྱུ་ཡིན་ན། མི་བསླུ་བ་ཡང་སྐྱེས་བུའི་དོན་ཉིད་ལ་འཇུག་པའི་མཚམས་ཡིན་པའི་ཕྱིར་ཐེ་ཚོམ་ཟ་བ་ཡིན་ན་ཚད་མ་ཉིད་ལ་སྦྱོར་བར་བྱེད་པ་མ་ཡིན་ནོ། །སྔར་གྱི་གནོད་པ་མེད་པ་

ཅན་ཡང་སྔ་མ་བཞིན་དུ་ཐེ་ཚོམ་ཅན་ཡིན་ནོ། །འཇུག་པ་ལ་ཡང་སླུ་བ་ཅན་ཉིད་ཡིན་ན། མི་བསླུ་བ་དང་སླུ་བ་དག་ཁོ་ན་ཚད་མ་ཉིད་དང་། ཚད་མ་མ་ཡིན་པ་ཉིད་ལ་སྦྱོར་བར་བྱེད་པ་ཉིད་ཡིན་གྱི། རིག་བྱེད་ལ་ནི་ཚད་མ་ཉིད་ལ་སྦྱོར་བར་བྱེད་པའི་ཚད་མ་གཞན་མི་བསླུ་བ་ཡོད་པ་མ་ཡིན་ལ།
དེའི་ཚེ་སླུ་བ་ཉིད་ནི་ཡོད་པ་ཡིན་ཏེ། འབྱུང་བར་འགྱུར་བ་ལ་ཡང་མ་འཁྲུལ་བའི་རྒྱུ་མཚན་མེད་པའི་ཕྱིར་སྲིད་པ་ཡིན་ནོ། །སྐྱེས་བུས་བྱས་པ་མ་ཡིན་པ་ཉིད་ལ་ནི་མི་བསླུ་བ་ལ་སྦྱོར་བར་བྱེད་པ་དང་། རང་བཞིན་པའི་ཡང་འབྲེལ་པ་མེད་པའི་ཕྱིར་ནམ་མཁའ་བཞིན་དུ་གོ་བར་བྱེད་པ་
ཉིད་མ་ཡིན་ནོ། །དེས་ན་ཡང་། སྐྱོན་མེད་ཤེས་པ་ལས་བྱུང་བའི། །མངོན་སུམ་གྱིས་བསྒྲུབས་སྐྱེས་བུ་ནི། །མིན་པའི་བྱེ་བྲག་སྐུལ་བྱེད་བློའི། །བརྗོད་བྱ་མེད་སྨྲ་རྣམས་ཀྱི་ཡིན། །ཞེས་བྱ་བ་ནི་མི་རིགས་པ་ཉིད་ཡིན་པའི་ཉེ་བར་བསྡུ་བ་ནི། དེའི་ཕྱིར་འཆད་པ་པོའི་བྱེད་པའི་ཡུལ་
ཞེས་བྱ་བ་སྟེ་འདི་སྐད་བསྟན་པར་འགྱུར་ཏེ། རེ་ཞིག་ཚད་མ་ཉིད་ཤེས་པ་ནི་དབང་པོ་ལ་སོགས་པའི་རྒྱུའི་ངོ་བོས་བསྐྱེད་པར་བྱ་བ་མ་ཡིན་ཏེ། རང་ལས་ཚད་མ་ཐམས་ཅད་ཀྱིས། །ཚད་མ་ཉིད་དུ་གཟུང་བྱ་ཡིན། །རང་ལས་ཏེ་བདག་ཉིད་ཀྱི་རྒྱུ་ཁོ་ན་ལས་ཡིན་གྱི། རྒྱུ་གཞན་ལས་ནི་མ་
ཡིན་ཏེ། རྒྱུ་ཡི་རང་གི་ངོ་བོ་ནི། །ཚད་མ་མིན་ལ་འང་ཡོད་པའི་ཕྱིར། །ཞེས་གང་གསུངས་པའོ། །ཚད་མ་ཉིད་དུ་ཡང་མ་ཤེས་པ་ནི་དོན་ཡོངས་སུ་གཅོད་པའི་འབྲས་བུའམ། འཇུག་པའི་ངོ་བོའི་འབྲས་བུ་ཡང་བྱེད་པ་མ་ཡིན་ཏེ། ཤེས་པའི་སྔ་རོལ་དུ་བྱུང་བ་དང་ཕྱིས་འབྱུང་བ་ལ་
ཡང་བྱེ་བྲག་མེད་པའི་ཕྱིར་ཏེ། དངོས་པོ་རྣམས་ཀྱི་བདག་ཉིད་འཐོབ་ལ་རྒྱུ་ལ་ལྟོས་པ་ཉིད་ཡིན་ཏེ། བདག་ཉིད་འཐོབ་པ་རང་འབྲས་ལ། །རང་ཉིད་ཁོ་ན་འཇུག་པར་འགྱུར། །ཞེས་སྨོས་པས། ཡོངས་སུ་གཅོད་པ་ཙམ་ནི་ཚད་མ་ཡིན་པ་ཙམ་ལ་ཡང་ཡོད་པའི་ཕྱིར་རོ། །དེ་ལྟར་ཡང་།
དེ་ཕྱིར་བློའི་བདག་ཉིད་ཀྱིས་ནི། །བློ་ཡིས་ཚར་མ་ཉིད་འཐོབ་ན། །དོན་གཞན་ཉིད་རྒྱུ་ལས་བྱུང་བའི། །སྐྱོན་ཤེས་པ་ལས་སེལ་པ་ཡིན། །ཞེས་སྨོས་པའོ། །དམིགས་ཀྱིས་བསལ་བའི་ཡུལ་བཏང་ནས་སྤྱིར་བཏང་བ་ལ་འཇུག་པར་བྱ་སྟེ། དེས་ན་ཤེས་པའི་རྒྱུའི་བྱེ་བྲག་ཅན་ཚད་

མ་མ་ཡིན་པ་མེད་པ་ཅན་གྱིས་ཚད་མ་ཉིད་བསྐྱེད་པར་བྱ་བ་ཡིན་གྱི་བྱེ་བྲག་དེ་ཡང་ཤེས་པའི་རང་གི་ངོ་བོ་བྱེད་པ་ནི་མ་ཡིན་ཏེ། དེ་མེད་པར་ཡང་འབྱུང་བའི་ཕྱིར་རོ། །དེ་ཉིད་ཀྱིས་ནི་རང་གི་ངོ་བོ་ཡོངས་སུ་གཅོད་པ་ཙམ་ནི་ཚད་མ་ཉིད་ཀྱི་འབྲས་བུ་མ་ཡིན་ཏེ། ཚད་མ་མ་ཡིན་
པ་ལ་ཡང་ཡོད་པས་ཐེ་ཚོམ་ཅན་ཡིན་པའི་ཕྱིར་རོ། །བྱེ་བྲག་མ་མཐོང་ན་ཐག་རིང་པོ་ལ་མཐོ་ཡོར་དང་མིར་ལྟ་བ་པོ་རྣམ་པར་དཔྱོད་པ་ན། སྐྱོན་གྱིས་ཤེས་པ་མ་སྐྱེས་ཕྱ་ན། །ཚད་མ་ཡིན་པའི་དོགས་པ་མེད། །ཅེས་བྱ་བ་ཙམ་གྱིས་བསལ་བར་ནུས་པ་མ་ཡིན་ནོ། །དེ་ལྟ་བུའི་ཡུལ་རང་
ཉིད་ཁོ་ན་སྐྱེ་བར་རྣམ་པར་དཔྱོད་པ་ཡིན་ནོ་ཞེ་ན། ཡོངས་སུ་གཅོད་པ་ཙམ་ལ་ཡང་ཁྱད་པར་མ་མཐོང་བར་བྱེ་བྲག་མེད་པ་ཡིན་ཏེ། དང་པོ་ནི་གནོད་པ་ཅན་མེད་པའི་ཁྱད་པར་དུ་མ་ངེས་པ་ཡིན་ལ། དུས་ཕྱིས་འཇུག་པའི་དུས་སུ་ནི་ཡོད་པ་མ་ཡིན་པའི་ཕྱིར་ཐེ་ཚོ་མ་ཡིན་ནོ། །གོམས་པའི་
ཡུལ་ལ་ནི་ལན་ཅིག་མིན་པར་འཇུག་པ་པོ་འཐོབ་པའི་ཡོད་པ་དང་མེད་པ་དག་གིས་མཚོན་པ་ནི་མ་འཁྲུལ་བའམ། ཅིག་ཤོས་ཀྱི་ངོ་བོ་ཉིད་ན་ཁྱད་པར་ཡོད་པའི་ཕྱིར་ཐེ་ཚོམ་སྐྱེ་བ་མ་ཡིན་ནོ། །གནོད་པ་ཅན་མ་དམིགས་པ་ཙམ་ལས་ནི། གནོད་པ་ཅན་ཡོད་པ་དང་མེད་པའི་ཐུན་མོང་བ་
ལས་མ་ཡིན་ནོ། །དེ་ལྟར་ན། རྒྱུའི་སྐྱོན་མ་དམིགས་པ་ལ་ཡང་བརྗོད་བྱ་འཇུག་པ་ཡིན་ཏེ། དང་པོ་རྒྱུའི་སྐྱོན་མ་དམིགས་པའི་མ་ངེས་པ་ཡིན་ལ། ཕྱིས་ནི་སྔ་མ་མ་གྲུབ་པ་ཡིན་ནོ། །ཁ་ཅིག་ཏུ་ལན་ཅིག་མིན་པར་འཇུག་པ་དང་། ཐོབ་པ་དག་གིས་ཤེས་པ་ནི་མ་འཁྲུལ་པའི་ངོ་བོ་ཉིད་ཡིན་པ་ནི་བྱེ་
བྲག་ཡིན་པའི་ཕྱིར་དེ་མཐོང་བ་ལ་འཇུག་པ་ནི་གནོད་པར་བྱེད་པའི་རྒྱུ་སྐྱོན་མ་དམིགས་པ་ལས་འཇུག་པ་མ་ཡིན་ཏེ། དེའི་ཕྱིར་དང་པོར་ཡོངས་སུ་བཅད་པ་ནི་དོན་དང་དོན་མ་ཡིན་པའི་ཐུན་མོང་བ་ཡིན་པའི་ཕྱིར་ཐེ་ཚོམ་ཡིན་ཡང་། དེའི་ཚེ་དེ་ཉིད་ལ་འཇུག་པ་ཡིན་ཏེ། དེ་ལྟར་འཇུག་པར་ཡང་མཐོང་བའི་
ཕྱིར་རོ། །དུས་ཕྱིས་ནི་མ་འཁྲུལ་པའི་ཤེས་པ་ལས། ཤེས་པའི་རང་གི་ངོ་བོ་ཉིད་ཁོ་ན་ལས་འཇུག་པ་ཡིན་ཏེ། རང་གི་ངོ་བོ་འཛིན་པར་བྱེད་པའམ། དོན་བྱེད་པ་འཛིན་པར་བྱེད་པ་ལ་གཞན་ལ་ལྟོས་པ་ཡིན་ཡང་ཐུག་པ་མེད་པ་མ་ཡིན་ཏེ། དོན་བྱེད་པའི་བདེ་བ་ལ་སོགས་པའི་ངོ་བོ་ཉིད་ཡིན་པ་

དང་། རང་གི་ངོ་བོ་ཤེས་པ་ལས་ཐ་དད་པ་མ་ཡིན་པ་དང་། རང་རིག་པའི་མངོན་སུམ་ཡིན་པ་ཉིད་ཀྱིས་ཐེ་ཚོམ་བསལ་བའི་ཕྱིར་རོ། །མངོན་སུམ་ལ་ཡང་རེ་ཞིག་དོན་གྱི་རང་གི་ངོ་བོ་སྣང་བ་ཅན་ལ་སོགས་པ་མེད་ན་ཐེ་ཚོམ་ཁོ་ན་ཡིན་ན། རིག་བྱེད་ལ་ནི་དོན་གྱི་རང་གི་ངོ་བོ་ལ་རེག་པར་བྱེད་པ་མ་ཡིན་པ་
རྣམ་པར་རྟོག་པ་ཙམ་ལ་ནི་སྨོས་ཀྱང་ཅི་དགོས་ཏེ། དབང་པོ་ལས་འདས་པའི་ཡུལ་ཅན་ཉིད་ཀྱིས་གོམས་པ་མི་སྲིད་པའི་ཕྱིར། དེ་དག་ཙམ་གྱི་རྒྱུ་བསྐྱེད་པར་བྱ་བའི་ཤེས་པ་ནི་དོན་བྱེད་པ་མ་ཡིན་པ་ཉིད་ཀྱིས། དང་པོའི་ཤེས་པ་ལས་ཁྱད་པར་མེད་པའི་ཕྱིར་རིག་བྱེད་ལ་ཡང་རྗོད་པར་བྱེད་པའི་རྗེས་སུ་
འཇུག་པའི་བློ་ནི་རྣམ་པ་བརྒྱར་འགྱུར་བའི་ཕྱིར་ཕ་རོལ་པོའི་ཕྱོགས་ནི་རྗེས་སུ་མཐུན་པ་མ་ཡིན་ལ། ཕ་རོལ་པོ་རྣམས་ཀྱིས་མི་བསླུ་བ་ཤེས་པ་ཞན་པ་ཙམ་ནི་དེ་དག་ཙམ་གྱི་རྒྱུ་བསྐྱེད་བྱར་བརྗོད་པ་མ་ཡིན་ནོ། །དེ་ལྟ་མོད་ཀྱི་གྲང་བ་ལྡོག་པར་བྱེད་པ་ལ་སོགས་པ་རང་ཉིད་རིག་པར་བྱ་བ་ཡིན་ནོ། །དེས་
ན་ཕ་རོལ་པོའི་དངོས་པོས་སྟོང་པ་འདྲེན་པར་འདོད་པ་ཙམ་ནི་གུས་པར་བྱ་བ་མ་ཡིན་ནོ། །གོམས་པ་མེད་པའི་དུས་ཀྱི་ཚད་མ་ཉིད་ནི་གཞན་གྱི་རྗེས་སུ་འབྲང་བའི་བདག་ཉིད་ཅན་གྱི་འབྲས་བུ་ཅན་ཡིན་ཏེ། འབྲས་བུ་དང་རྒྱུ་ཙམ་དུ་ནི་ཚད་མ་དང་ཅིག་ཤོས་མཚུངས་པ་དེས་ན་ཕྲད་པར་བྱ་བ་མེད་ན་མི་
འབྱུང་བའི་ངོ་བོ་ནི་གོམས་པ་ལས་རྟོགས་པ་ཡིན་ལ། མཐར་ཐུག་པར་གནོད་པ་མཐོང་བའམ། གཞན་ཡང་རུང་བ་ལ་འགྲུབ་པ་ལ་འཁྲུལ་པ་མ་ཡིན་པ་ཉིད་ཀྱི་ཕྱིར། དེ་ཉིད་མ་རྟོགས་ལས་བྱུང་བ། །སྤྱི་ཡིན་སྨྲ་རྣམས་འདི་ལ་གནས། །རྒྱལ་བ་ཅན་དེའི་ཇི་ལྟར་ཡིན། །ཚིག་ཏུ་བརྗོད་པ་དེ་སྨྲ་
ཡིན། །ཞེས་བྱ་བའོ། །བཅོམ་ལྡན་འདས་ཉིད་ཆོས་ལ་སོགས་པ་རྣམས་ལ་ཐ་སྙད་པ་མ་ཡིན་པའི་ཚད་མ་ཡིན་གྱི། ཅིག་ཤོས་ནི་མ་ཡིན་ནོ་ཞེས་དང་པོར་ཁས་བླངས་པ་མ་ཡིན་ནམ། གང་གི་ཕྱིར་དེ་ནི་དབང་ཕྱུག་ལ་སོགས་པའི་ཡུལ་ཉིད་ཡིན་ནོ་སྙམ་སེམས་པ་ཡིན་ན། དེ་ནི་དགག་པར་བྱ་བ་
ཡིན་ནོ། །ཀུན་རྫོབ་ནི་མི་འདོད་ཅེས་བྱ་བ་ཇི་ལྟར་ཡིན། སྔར་མཐོང་བ་ངོ་ཤེས་པ་ནི་ཆོས་ལ་སོགས་པའི་ཡུལ་ཉིད་ཡིན། དེ་དང་བསྒྲུབ་པ་མ་ཡིན་ཏེ། རྟོགས་པ་ཉིད་ཡིན་པས་སྐབས་མ་ཡིན་པ་མ་ཡིན་ཏེ། མངོན་སུམ་དང་རྗེས་སུ་དཔག་པའི་ངོ་བོ་ཉིད་དག་གིས་གཉི་གའི་ངོ་བོ་ཡིན་པའི་

ཕྱིར་དང་། བཅོམ་ལྡན་འདས་ཀྱང་ལས་དང་འབྲས་བུ་འབྲེལ་བ་མཁྱེན་པ་ལ་རྣམ་པར་རྟོག་པ་གཙོ་བོ་ཡིན་པའི་ཕྱིར། དོར་བ་ལ་སོགས་པའི་རྣམ་པར་རྟོག་པ་མེད་པར་ཉམས་སུ་མྱོང་བ་ཙམ་གྱིས་འཇུག་པ་མ་ཡིན་པའི་ཕྱིར་ཡང་རྗེས་སུ་མཐུན་པ་ཡང་ཡིན་ནོ། །འོན་ཏེ་ཉམས་
སུ་མྱོང་བའི་ངོ་བོའི་བཅོམ་ལྡན་འདས་ནི་བདག་ཉིད་དམ། གཞན་ཡང་རུང་བའི་དུས་སུ་རིག་པ་ཡིན་ལ། རྣམ་པར་རྟོག་པ་ནི་དེ་དང་དེ་མ་ཡིན་པའི་དུས་སུ་རིག་པར་བྱེད་པ་ཡིན་པའི་ཕྱིར་དེ་དང་འགལ་བ་ཅན་ཡིན་པའི་ཕྱིར་གསལ་བར་བྱ་བ་ཡིན་ནོ། །མ་ཡིན་ཏེ། ཉམས་སུ་མྱོང་བ་དེ་མ་ཡིན་
པའི་ཡུལ་ཅན་ཉིད་ཡིན་ན། དེ་ལ་རག་ལས་པའི་རྣམ་པར་རྟོག་པ་ཡང་འཛིན་པར་བྱེད་པར་མི་འགྱུར་རོ། །དེ་ལ་རག་མི་ལས་པ་ཉིད་ཡིན་ན་དེ་ཡོད་ན་འབྱུང་བ་ནི་སྔོན་པོའི་རྣམ་པར་རྟོག་པ་བཞིན་དུ་མི་འགྱུར་བའི་ཕྱིར་ཉམས་སུ་མྱོང་བ་ཡང་ཞེན་པའི་བདག་ཉིད་ཁོ་ན་ཡིན་པར་ཤེས་པར་བྱའོ། །དེ་མ་ཡིན་པའི་དུས་སུ་རིག་པ་
ནི་ཤེས་པ་ཉིད་ཁོ་ན་ཉིད་ཡིན་ནོ། །གོམས་པར་བྱ་བའི་ཡུལ་ལ་རྗེས་སུ་འཇུག་པ་ལ་སྦྱངས་པ་ཡིན་ན། མིག་ཕྱེ་བའི་མོད་ལ་དེ་ཉིད་རྟོགས་པ་རྣམ་པར་རྟོག་པ་ཅན་མ་ཡིན་པ་ཡོད་པ་ཡིན་ཏེ། དེ་ལ་དྲན་པའི་རྗེས་སུ་འཇུག་པ་ལ་སོགས་པ་སྲིད་པ་མ་ཡིན་ནོ། །མའམ་ཕ་ལ་ཡང་ཐ་སྙད་ལ་བསླབས་པ་
ལ་སོགས་པས་གོམས་པར་གྱུར་པ་ནི་མཐོང་བ་ཙམ་གྱིས་མི་ཤེས་པ་མ་ཡིན་ནོ། །དེ་ནི་འདྲ་བར་རྟོགས་པ་ཡིན་ཞེས་བྱ་བར་ནི་མི་རིགས་ཏེ། སྦྱངས་པའི་ཟིན་པོ་མ་ཡིན་ན་འདྲ་བར་རྟོགས་པ་མེད་པའི་ཕྱིར། དེ་ལ་ཟིན་པོ་ཡིན་ན་འདྲ་བར་རྟོགས་པ་བཞིན་དུ་དེ་ཁོ་ན་ཉིད་རྟོགས་པ་བསལ་བར་བྱས་པ་མ་ཡིན་པ་ཉིད་ཡིན་
ནོ། །སྔ་མའི་རྗེས་སུ་འབྲངས་པ་མེད་ན་འདྲ་བར་རྟོགས་པ་ཡིན་ནོ། །སྔར་ཉམས་སུ་མྱོང་བའི་ཡུལ་ཉིད་འཛིན་པ་ཁོ་ན་ཡིན་པ་འདི་ནི་དེ་ཁོ་ན་ཉིད་ཤེས་པ་ཡིན་ཞེས་བྱ་བའི་རྣམ་པར་རྟོག་པ་མེད་པ་ཅན་ནི་སྔར་མཐོང་བ་ངོ་ཤེས་པ་ཡིན་ལ། རྣམ་པར་རྟོག་པ་ཡང་དེའི་འོག་ཏུ་དེ་ཉིད་འདི་
ཡིན་ནོ་ཞེས་བྱ་བ་ནི་སྔོན་པོར་ཉམས་སུ་མྱོང་བའི་རྣམ་པར་རྟོག་པ་ཁོ་ན་བཞིན་དུ་སྔར་མཐོང་བ་ངོ་ཤེས་པ་ནི་རྣམ་པ་གཉིས་ཏེ། རྣམ་པར་རྟོག་པ་དང་ཅིག་ཤོས་ཀྱི་ངོ་བོས་ཡིན་པའི་ཕྱིར་ཉམས་སུ་མྱོང་བའི་བདག་ཉིད་བཅོམ་ལྡན་འདས་ནི་སྐད་ཅིག་མ་ཉིད་ལ་སོགས་པར་རིག་པ་པ་མ་ཡིན་

ཞིང་། རྣམ་པར་རྟོག་པ་ཡང་མ་ཡིན་པའི་ཕྱིར་ཚད་མ་མ་ཡིན་ལ་སྒྲ་ནི་ཡིན་ཏེ། སྔར་མཐོང་བ་ངོ་ཤེས་པ་ལས་སྒྲ་དང་དོན་དག་གི་རྟག་པ་ཉིད་དུ་གྲུབ་པས་འབྲེལ་པ་ཡོད་པའི་ཕྱིར་རོ། །ཡང་ན་ཉམས་སུ་མྱོང་བ་ནི་རང་གི་དུས་སུ་རིག་པ་ཡིན་གྱི་དུས་གཞན་དུ་ནི་མ་ཡིན་ལ། རྣམ་པར་རྟོག་པ་ནི་དེ་
དང་དེའི་དུས་མ་ཡིན་པར་ཡང་རིག་པར་བྱེད་པ་ཡིན་ཏེ། ཉམས་སུ་མྱོང་བ་ལས་ནི་འབའ་ཞིག་འབྱུང་བ་ཡིན་གྱི། དེའི་བྱ་བའི་ཡུལ་ལ་ཡུལ་དུ་བྱེད་པ་ནི་མ་ཡིན་ཏེ། དེ་ཡང་། དང་པོ་དག་པའི་དངོས་པོ་ལས། །བྱུང་བའི་མིག་གི་རྣམ་ཤེས་ཡོད། །ཅེས་སྨོས་པའོ། །དང་པོ་ཞེས་བྱ་བ་ནི་རྒྱུ་
མཚན་ཡིན་ཏེ། རང་གི་ཡུལ་ལ་གཏོད་པར་བྱེད་པ་ནི་མ་ཡིན་ཏེ། དེ་ནི་དག་པའི་དངོས་པོ་ལས་སྐྱེས་པ་ཞེས་ཟེར་བའོ། །རྣམ་པར་རྟོག་པ་ནི་ཡུལ་གཞན་ལ་ཡིན་ཏེ། དེ་ཡི་འོག་ཏུ་དངོས་དེ་ཡང་། །རིགས་སྩོགས་རྣམས་ཀྱི་ཆོས་རྣམས་དང་། །བཅོས་པའི་བློ་གང་གིས་ངེས་པ། །དེ་ཡང་
ཚད་མ་ཉིད་དུ་འདོད། །ཅེས་བྱ་བ་སྟེ། མངོན་སུམ་མ་ཡིན་ཞིང་རྟགས་མེད་པའི་ཕྱིར་རྗེས་སུ་དཔག་པ་ཡང་མ་ཡིན་ནོ། །ཉམས་སུ་མྱོང་བ་ཁྱད་པར་ཅན་རིག་པ་དང་འགལ་བ་ཡང་མ་ཡིན་ཏེ། དེས་བསྒྲུབ་པ་ཉིད་རྣམ་པར་རྟོག་པས་བརྟགས་པ་ཉིད་དུ་རྟོགས་པའི་ཕྱིར་རོ། །རྟག་པར་
རིགས་པས་ཀྱང་ཉམས་སུ་མྱོང་བ་དེ་དང་འགལ་བ་ཡང་མ་ཡིན་ཏེ། དངུལ་གྱི་ཤེས་པ་ལ་ཡང་ཉ་ཕྱིས་ཀྱི་ཤེས་པ་ལྟ་བུའོ། །དེ་ལྟར་དང་པོ་ལ་གནོད་པ་མེད་པས་ཕྱི་མ་སྐྱེ་བར་ཡང་རིགས་པའི་ཕྱིར་གཉི་གའི་བདག་ཉིད་ཅན་གྱི་དངོས་པོ་ལ་ཉམས་སུ་མྱོང་བས་མི་རྟག་པར་རྟོགས་ལ། རྣམ་པར་
རྟོག་པས་རྟག་པར་རྟོགས་པའི་ཕྱིར་རྗེས་སུ་དཔག་པ་ལས་གཞན་པའི་ཚད་མ་གཉིས་གྲུབ་པ་ཡིན་ནོ། །མངོན་སུམ་དང་སྔར་མཐོང་བ་ཡང་ངོ་། །འདི་སྐད་བསྟན་པར་འགྱུར་ཏེ། ཉམས་སུ་མྱོང་བ་ཉིད་རྣམ་པར་རྟོག་པར་འགྱུར་ལ། ཕྱིས་ནི་དྲན་པ་གཞག་པར་ནི་མི་འཐད་པར་ཤེས་པས་རང་
ཉིད་ཀྱང་གོམས་པར་བྱས་པའི་ཡུལ་རྟོགས་པ་ཡིན་ཏེ། དེ་ཡང་ད་ལྟར་བ་ཙམ་འཛིན་པ་ཅན་རྟོག་པ་མེད་པ་ཡིན་ལ། དེའི་ནུས་པ་ལས་རྣམ་པར་རྟོག་པ་གཞན་སྔར་མཐོང་བ་ངོ་ཤེས་པ་ཡིན་ནོ། །སྔ་མ་དང་ཕྱི་མའི་ཤེས་པ་ཐམས་ཅད་དུ་གཞི་མཐུན་པར་མཚུངས་པ་ཉིད་དུ་རྟོགས་པ་ལ་བསྙོན་

པར་ནུས་པ་མ་ཡིན་ནོ་སྙམ་དུ་སེམས་པ་ལ། གལ་ཏེ་དོན་བྱེད་པར་གནས་པ་ཞེས་བྱ་བ་སྨོས་ཏེ། སྔར་མཐོང་བ་ངོ་ཤེས་པ་ཞེས་བྱ་བ་ལ་སོགས་པའི་སྒྲས་ནི་ཡན་ལག་ཅན་ལ་སོགས་པའི་ཤེས་པ་བཟུང་ངོ་། །ལན་ནི། འདིར་བརྗོད་པ་ཞེས་བྱ་བ་སྟེ། །རེ་ཞིག་ཉམས་སུ་
མྱོང་བ་ཉིད་ངེས་པ་པའི་བདག་ཉིད་ཅན་ཡིན་པར་གང་སྨྲས་པ་དེ་ནི་མི་རིགས་ཏེ། རྟའི་རྣམ་པར་རྟོག་པ་མཐོང་བའི་དུས་སུ་ཡང་བ་ལང་མཐོང་བ་ལས་རྟ་ཡིན་པར་རྣམ་པར་རྟོག་པའི་ཕྱིར་དང་མཐོང་བ་དང་རྟོགས་པ་དག་བྱེ་བྲག་མེད་པར་ཐལ་བར་འགྱུར་བའི་ཕྱིར་དང་། བྱེ་བྲག་ཀྱང་རྟོགས་པ་ལས་གྲུབ་
པའི་ཕྱིར་དང་། དོན་གྱིས་གོ་བ་ཡིན་པའི་ཕྱིར་ཡང་ངོ་། །ཇི་ལྟར་མཐོང་བ་དེ་བཞིན་དུ་རྣམ་པར་གཞག་པ་ཡིན་ན། གནོད་པ་མེད་པ་ཡིན་ཏེ། མཐོང་བ་སྒྲིན་པོ་ཉིད་ཡིན་ན་དྲན་པ་སྐྱེ་བའི་ཕྱིར་མཐོང་བ་ནི་རྣམ་པ་གཉིས་ཏེ། ཆེས་མང་རྟུལ་བ་འགྲོ་བ་པོའི་རྩའི་རེག་པ་བཞིན་དུ་མ་གོམས་
པའི་དུས་སུ་དང་། དེ་ལས་བཟློག་པ་ཆེས་ཟིན་བོ་ཡིན་པའོ།། །དེ་ལ་ཡང་དེའི་མཚན་ཉིད་ཀྱི་དྲན་པ་སྐྱེ་བོ་ལ་མཚན་ཉིད་ཁོ་ན་ནི་ངེས་པ་མ་ཡིན་ཏེ། དྲན་པ་དང་ཅིག་ཤོས་དག་གི་མཐོང་བ་དང་ཀུན་རྫོབ་དག་ཐ་དད་པའི་ཕྱིར་རོ། །འོན་ཏེ་གོམས་པ་ལ་ཕ་ལ་སོགས་པར་སྦྱངས་པའི་
ཟིན་པོ་ཡིན་པའི་ཕྱིར་དང་པོ་ཉིད་སྣང་བ་ན་མཐོང་བ་ཙམ་གྱིས་གོ་བ་ཡིན་ནོ། །དེ་ལ། དེ་ཉིད་འདི་ཡིན་ནོ་སྙམ་པ་ཞེས་བྱ་བ་སྨོས་ཏེ། ཕ་ལ་སོགས་པ་དང་པོ་ཉིད་མཐོང་བ་ལས་རྟོགས་པ་དང་། དེ་ལ་དགོས་པར་རྟོགས་པ་ཡང་མ་ཡིན་ཏེ། དང་པོ་བཞིན་དུ་ཉེ་བ་གནས་པ་ཉིད་ཀྱིས་ཕ་ནི་
རྟོགས་པ་ལ་སོགས་པའི་ཡུལ་ཡིན་ཏེ། དང་པོ་ཕ་ལ་སོགས་པའི་ཐ་སྙད་ལ། སྔ་མ་ཉིད་ལྟོས་པ་མ་ཡིན་ལ། དེ་ལ་དགོས་པ་ཡང་ལྟོས་པ་མ་ཡིན་ནོ། །རྣམ་པར་རྟོག་པ་ནི་དེར་ཉེ་བ་ན་གནས་པའི་ཕ་ལ་སོགས་པའི་ཡུལ་ལ་གཟུང་བ་ལ་འཛིན་པ་ཡིན་ཏེ། ཉེ་བ་ན་གནས་པ་མཐོང་བའི་ཡུལ་
ཅན་ཡིན་པའི་ཕྱིར། དེ་ཉིད་འདི་ཡིན་ནོ་ཞེས་བྱ་བ་དེ་ལ་ཡང་ཕ་ཡིན་པར་རྟོགས་པ་འདི་ལ་ཡང་ཡིན་ནོ་ཞེས་བྱ་བའི་དོན་ཏོ། །ཡང་ན་དེ་ཉིད་འདི་ཡིན་ནོ་ཞེས་བྱ་བ་ནི་དེ་དང་འདྲ་བ་ཡིན་ནོ་ཞེས་བྱ་བའི་དོན་ཏོ། །འདྲ་བ་ཉིད་ཀྱི་རྒྱུ་མཚན་ལས་དེ་ཉིད་འདི་ཡིན་ནོ་ཞེས་བྱ་བར་འགྱུར་བ་ཡིན་ནམ།

བ་ལང་དང་འདྲ་བ་ནི་བ་མེན་ནོ་ཞེས་བྱ་བ་ལྟ་བུའོ། །བདེན་ཏེ། དེ་ཉིད་འདི་ཡིན་ནོ་ཞེས་བྱ་བ་བླུན་པོ་རྣམས་ལ་ནི་འདྲ་བ་ཉིད་ལ་དེ་ལྟ་བུའོ་ཞེས་བྱ་བར་འགྱུར་ཏེ། བ་ལང་ལྟ་བུའི་བ་ལང་མ་ཡིན་ནོ་ཞེས་བྱ་བ་ལྟ་བུའོ། །ཤིན་ཏུ་འདྲ་བ་ཉིད་ལ་དེ་ཉིད་འདི་ཡིན་ནོ་ཞེས་བྱ་བ་ནི་སྐྲ་དང་སེན་མོ་ལ་སོགས་པ་
བྲེག་པ་ཡང་སྐྱེ་བ་ལྟ་བུའོ། །དེ་ལ་བར་ཚིགས་སུ་མགོ་ཟླུམ་དུ་མཐོང་བ་ནི་གཅིག་པ་ཉིད་ལ་གནོད་པ་ཅན་ཡིན་ལ། འདི་ལ་ཡང་སྔ་མ་དང་ཕྱི་མ་དག་གི་མཐོང་བ་དག་ལ་མཐར་ཐུག་པ་དང་འཛིན་པ་གནོད་པ་བྱེད་པ་ཡིན་གྱི་མ་ཡིན་ནོ་ཞེས་བྱ་བ་ནི། བྱེད་པ་འཛིན་པ་ཉིད་ཀྱིས་རྗེས་སུ་བསྒྲུབ་བྱར་
བྱེད་པ་ཡིན་ནོ། །འདྲ་བའི་ཤེས་པ་ཡང་མཐོང་བ་ཙམ་ལ་མེད་པ་ཡིན་ལ། སྦྱངས་པའི་ཟིན་པོ་ལ་ནི་འབྱུང་བ་ཡིན་ནོ། །ཟིན་པོ་དེ་ལ་དེ་དང་གཅིག་པ་ཉིད་དུ་འཛིན་པར་ཅིས་མི་བྱེད་པ་ཡིན། རང་གི་དུས་སུ་འཛིན་པ་ཉིད་ནི་གོམས་པ་ཡོད་པ་ལ་ཡང་མཐོང་བའི་ཆོས་ཡིན་ལ། འདྲ་བ་ཡང་
ཡིན་ནོ། །རང་གི་དུས་སུ་དང་འདྲ་བ་ལ་ཞེས་བྱ་བ་མཐོང་བ་ལ་ཇི་ལྟར་ཡིན་ཞེ་ན། དེ་ལྟ་བུ་མེད་ཀྱང་འདྲ་བར་རྟོགས་པ་ལ་སྔོན་པོ་ལྟ་བུའོ། །དེ་ཁོ་ན་ཉིད་དུ་ནི་དེའི་ཡུལ་མ་ཡིན་པའི་ཕྱིར་བརྒྱར་གོམས་པས་ཀྱང་རྟོགས་པ་མ་ཡིན་ཏེ། མི་མཐུན་པའི་མཚན་ཉིད་དང་། མཐུན་པའི་མཚན་ཉིད་དག་
གི་གོམས་པ་ཡིན་ཡང་བཟང་པོ་མ་ཡིན་པའི་མཚན་ཉིད་དང་མི་མཐུན་པ་མ་ཡིན་པའི་མཚན་ཉིད་ཀྱང་འདྲ་བར་བརྗོད་པ་ནི་མ་ཡིན་ནོ། །དེ་ཉེ་བ་ཡིན་ཡང་དེའི་གཅིག་པ་ཉིད་ནི་ཉེ་བ་མ་ཡིན་ལ། དེ་དང་མཚན་ཉིད་མི་མཐུན་པའི་མ་ཡིན་པ་ཉེ་བ་ཡིན་ཡང་། དེ་ནི་མ་ཡིན་པའི་ཕྱིར་དེ་དག་
འཛིན་པ་མ་ཡིན་ན། མངོན་སུམ་ཇི་ལྟར་རྟོགས་པ་ཡིན། དེ་བཞིན་དུ་མཚན་ཉིད་མི་མཐུན་པ་ཡང་ངོ་། །དངོས་པོ་ཀུན་ལ་ཐ་དད་དང་། ཐ་དད་མིན་གཞན་ལྡོག་པ་ཉིད་ནི་རང་གི་ངོ་བོ་ཙམ་རིག་པ་ལས་སོ། །དེས་ན་ཡང་རྫས་རེ་རེ་ཞིང་ཐ་དད་པའི་ངོ་བོར་དམིགས་པའི་ཕྱིར་འདི་ཡོངས་སུ་
ཉམས་པར་འགྱུར་རོ། །དེའི་ཕྱིར་གཟུང་བ་འཛིན་པ་ལས་སྔ་མ་དང་ཕྱི་མའི་ཡུལ་ཅན་ཡིན་པའི་ཕྱིར་མཐོང་བ་ཀུན་རྫོབ་མ་ཡིན་པ་ནི་རྣམ་པར་རྟོག་པ་མ་ཡིན་པར་དགོངས་པའོ། །དེ་ཉིད་ལ་འདི་ཡིན་ནོ་ཞེས་བྱ་བར་རྟོགས་པར་བྱེད་པ་ཡིན་ཞིང་འདི་ཡིན་ནོ་ཞེས་བྱ་བ་ཡང་དེ་ཉིད་ཡིན་ནོ། །དེས་

ན་ཤེས་པ་གཉིས་དག་གི་ཡུལ་གཅིག་ཉིད་ཡིན་ན་ཇི་ལྟར་འདྲ་བའི་ཡུལ་ཅན་ཉིད་དམ། མཚན་ཉིད་མི་མཐུན་པའི་ཡུལ་ཅན་ཉིད་ཡིན་ཤེས་པའི་གཅིག་པ་ཉིད་དམ་དུ་མ་ཉིད་ཀྱང་དགོངས་པ་ཅན་མ་ཡིན་ཏེ། རྟོགས་བཞིན་པ་ནི་གཅིག་པ་ཉིད་ལ་ལོག་པར་རྟོགས་པའི་ཕྱིར་དེ་ཡང་
བསལ་བ་ཡིན་པ་ནི་འོན་ཏེ་སྔ་མ་དང་ལྷན་ཅིག་གཅིག་ཏུ་རྟོགས་སོ་ཞེས་ཟེར་བ་ལ། ལན་དུ། དེ་ནི་མི་རིགས་ཏེ་ཞེས་བྱ་བ་སྟེ། གཅིག་པ་ཉིད་དུ་རྟོགས་པ་ནི་མངོན་སུམ་དུ་མི་འགྱུར་རོ་ཞེས་བསྟན་པ་ནི། མངོན་སུམ་ལས་སྔོན་རིག་མེད་ན་ཞེས་བྱ་བའོ། །རྣམ་པར་རྟོག་པ་ནི་ཡིན་ཏེ།
གོམས་པ་ཡིན་ན་སྔ་མ་སྔ་མ་བརྫུན་པའི་བག་ཆགས་ཀྱི་དབང་གིས་དོན་གཅིག་བྱེད་པ་ཉིད་ཀྱིས་རྒྱུ་མཚན་བྱས་ནས། ཡི་གེ་ག་ལ་སོགས་པ་རྣམས་ལ་གོ་བའི་སྒྲར་ཤེས་པ་ལྟ་བུའོ། །དེ་ལ་ཡང་ཡི་གེ་ག་ལ་སོགས་པ་ལས་ལྡོག་པར་དམིགས་པ་ཉིད་ནི་གནོད་པ་ཅན་ཡིན་ལ། དེ་ནི་འདི་ལ་ཡང་བྱེ་བྲག་མེད་པར་ཡིན་པ་ཅན་
བསྟན་པ་ནི། དེས་ན་སྔ་མ་སྔ་མ་ཡི། །རྟོགས་ལ་ཀུན་རྫོབ་པ་ཞེས་བྱ་བ་སྟེ། རྣམ་པར་རྟོག་པ་ནི་གཅིག་པར་རུང་བ་ཉིད་མ་ཡིན་ཏེ་གཅིག་པ་ནི་དངོས་པོའི་ཆོས་ཡིན་པའི་ཕྱིར་ལ། དེ་ཡང་བདག་ཉིད་ཐམས་ཅད་ཀྱིས་མངོན་པར་རུང་བའི་ཕྱིར་ཞེས་བྱ་བའི་དོན་ཏོ། །འདི་སྐད་བསྟན་པར་འགྱུར་ཏེ། སྔོན་པོ་མཐོང་བའི་འོག་ཏུ་སྔོན་
པོའོ་ཞེས་པའི་རྣམ་རྟོག་ནི་གཟུང་བ་ཙམ་ལ་འཛིན་པ་ཡིན་ལ། བུམ་པའོ་ཞེས་བྱ་བ་ཡང་བརྡའི་བག་ཆགས་ལ་བརྟན་ནས་མཐོང་བ་ཉིད་ཀྱིས་གཟུགས་ལ་སོགས་པ་ཚོགས་པ་ལ་རྣམ་པར་རྟོག་པར་བྱེད་པ་ཡིན་ཏེ། ཕ་ལ་སོགས་པར་ཡང་གོམས་པ་ལ་དེ་ཉིད་དུ་མཐོང་བ་ཉིད་ཡིན་པར་ནི།
གཟུང་བ་འཛིན་པའི་ཕྱིར་ཞེས་བྱ་བ་ལ་སོགས་པས་བསྟན་ཏོ། །སྔ་མ་སྔ་མའི་བག་ཆགས་ཙམ་ལས་འབྱུང་བའི་རྣམ་པར་རྟོག་པར་གོ་བར་བྱེད་པ་ཉིད་ཀྱི་དགོངས་པས་གསུངས་པ་ནི། ཀུན་རྫོབ་ནི་ཞེས་བྱ་བ་ལ་སོགས་པའོ། །རྣམ་པར་རྟོག་པ་ཁ་ཅིག་ནི་ཚད་མ་མ་ཡིན་ཏེ། གང་གི་ཕྱིར་
གཟུང་བ་ལ་འཛིན་པ་སྟེ་ཀུན་རྫོབ་པ་ཞེས་བྱ་བའི་དོན་ཏོ། །གཞན་ཡང་ནི་མ་ཡིན་ནོ། །ཡང་ན་མངོན་སུམ་ནི་མཐོང་བ་ཙམ་ལས་ཚད་མ་མ་ཡིན་ཏེ། མཐོང་བ་རྣམ་པ་ཐམས་ཅད་ཡུལ་ཡིན་པ་ཉིད་ཀྱི་བྱེ་བྲག་མེད་པའི་ཕྱིར་རོ། །ཁྱད་པར་ཅན་གྱི་རྣམ་པར་ངེས་པ་ནི་ཡུལ་ཉིད་ཡིན་ནོ། །ངེས་

པ་ཡང་ཆོས་དང་རྟགས་དང་འབྲེལ་པ་ལ་སོགས་པ་རྣམས་ཀྱི་མངོན་སུམ་མ་ཡིན་པ་ཉིད་ཀྱི་རྗེས་སུ་དཔག་པ་ལས་ཡིན་ནོ། །མངོན་སུམ་ནི་ཐ་དད་པ་མ་ཡིན་པར་ངེས་པ་མེད་ཀྱང་སོ་སོར་སྣང་བཞིན་པའི་དོན་ལ་ངེས་པ་སྐྱེད་པར་བྱེད་པའི་ཕྱིར་ཚད་མ་ཡིན་ནོ། །འདི་མཐོང་ངོ་ཞེས་བྱ་བ་ནི་མངོན་སུམ་
གྱི་བྱ་བ་ནི་མངོན་སུམ་གྱི་བྱ་བའི་རྗེས་སུ་འབྲང་བས་ཉེ་བར་རྟོགས་པའི་བྱ་བ་བཏང་ནས་རྣམ་པར་རྟོག་པ་སྐྱེ་བ་ནི། འདི་ནི་སྔོན་པོ་ཡིན་གྱི་སེར་པོ་ནི་མ་ཡིན་ནོ་ཞེས་ལྡོག་པ་གཅིག་གསལ་པོར་བྱེད་ཀྱི་གཞན་ནི་མ་ཡིན་ཏེ་ངེས་པ་མེད་པའི་ཕྱིར་རོ། །མངོན་སུམ་ནི་དེ་སྐྱེད་པར་བྱེད་པ་ལས་ཚད་མ་ཡིན་
ཏེ། དེ་གསལ་བར་བྱེད་པ་རྣམས་ཀྱི་ཡུལ་དུ་དེ་གནས་པ་ཡིན་ན་ཞེས་བྱ་བ་ནི་ལྡོག་པ་གཅིག་ལ་ངེས་པའི་མཐར་ཐུག་པ་ཡིན་ལ། འདིའི་ཡང་བྱ་བ་ནི་རྗེས་སུ་དཔག་པ་ཡིན་ནོ། །གཞན་དུ་ན་སྔོན་པོའི་ཡོད་པ་ཉིད་སྐད་ཅིག་མ་ཡིན་པ་ཉིད་ཁོ་ན་ངེས་པའི་ཕྱིར་སྐད་ཅིག་མ་ཉིད་དུ་སྒྲུབ་པར་
བྱེད་པར་མི་འགྱུར་ཏེ་འགལ་བའི་ཕྱིར་རོ། །འགའ་ཞིག་ཀྱང་མ་ཡིན་ཏེ། མ་གྲུབ་པའི་ཕྱིར་དེ་སྐད་ཅིག་མ་ཉིད་དང་བྲལ་བ་ནི་ཚད་མར་ངེས་པ་མ་རྟོགས་པ་གཅིག་ལ་ཐུག་པ་ཅན་ནི་ཚད་མའི་བྱ་བ་ལ་དོན་བྱེད་ནུས་པའི་ཆ་ཡུལ་ལ་འཇུག་པར་བྱེད་པ་ཡིན་གྱི་ཡུལ་གཞན་ལ་ནི་མ་ཡིན་ནོ། །དེས་ན་
ཡུལ་གྱི་ཆ་སྔོན་པོ་ལ་འཇུག་པར་བྱེད་པ་ཡིན་པའི་ཕྱིར་སྐད་ཅིག་མ་མ་ཡིན་པ་ཉིད་དུ་ངེས་པ་ཅན་ཡང་དེའི་ཡུལ་མ་ཡིན་ནོ། །དེས་ན་ཚད་མ་གཞན་གྱིས་གནོད་པར་བྱ་བ་ཡིན་ནོ། །དེ་ལྟར་ན་མངོན་སུམ་དང་འགལ་བ་ཡང་མ་ཡིན་ཏེ། འདིའི་ནུས་པའི་ཆའི་མཐར་ཐུག་པ་ཡིན་པའི་ཕྱིར་རོ། །
མངོན་སུམ་ནི་ཡུལ་ལ་རྣམ་པར་རྟོག་པའི་གཞན་ཡིན་ལ། བཅོམ་ལྡན་འདས་ཀྱང་མངོན་སུམ་གྱི་བདག་ཉིད་ཡིན་གྱི། རྣམ་པ་ཐམས་ཅད་ཀྱི་ཡུལ་ལ་མཐོང་བ་ཁོ་ན་བཞིན་དུ་ནི་མ་ཡིན་ནོ་སྙམ་དུ་སེམས་པ་ལ། ཤེས་དེ་དག་གི་བཟུང་དོན་ལ། །ཞེས་བྱ་བ་སྨོས་ཏེ། རྣམ་པར་རྟོག་པ་ཉིད་ནི་
མཐོང་བའི་གཞན་དབང་ཡིན་གྱི། མཐོང་བས་རྣམ་པར་གཞག་པ་མ་ཡིན་པའི་ཆ་ལ་ནི་དེའི་མིང་ལ་སོགས་པ་དྲན་པ་མེད་ན། དེ་ལ་སྦྱོར་བ་བྱེད་པའི་བདག་ཉིད་རྣམ་པར་རྟོག་པ་མི་འབྱུང་ངོ་། །མ་མཐོང་བ་ནི་སྦྱོར་བར་བྱེད་པ་མ་ཡིན་པའི་ཕྱིར་རྣམ་པ་ཐམས་ཅད་པའི་ཡུལ་མཐོང་བ་ཡིན་

ཡང་། ཆེས་ཟིན་པ་ནི་རྣམ་པ་གང་དང་གང་ལ་དེའི་མིང་ལ་སོགས་པ་དྲན་པ་ཉིད་ཀྱིས་ངེས་པར་སྐྱེད་པར་བྱེད་པ་ནི་རྣམ་པ་དེ་ལ་ཚད་མ་ཡིན་གྱི། རྣམ་པ་ཚོགས་པ་རྣམས་ལ་ཚད་མ་གཅིག་ཉིད་མ་ཡིན་ནོ། །གང་གིས་དོན་བྱེད་པའི་ནུས་པ་ཅན་ཉིད་དུ་མཐོང་བ་ཡོད་པ་ཡང་
སྐད་ཅིག་མ་མ་ཡིན་པ་ཉིད་དུ་ངེས་པ་ཡིན་ལ། ཡོད་པ་ཉིད་དང་སྐད་ཅིག་མ་མ་ཡིན་པ་ཉིད་དུ་ཡང་སོ་སོར་ངེས་པ་ཁོ་ན་ཡིན་པའི་ཕྱིར་ཇི་ལྟར་ཡོད་པ་འབའ་ཞིག་གི་གཏན་ཚིགས་མ་ཡིན་ཞིང་ཇི་ལྟར་འགལ་བ་ཉིད་ཡིན་ཏེ། སྐད་ཅིག་མ་མ་ཡིན་པར་ངེས་པ་ལ་ཚད་མས་གནོད་པའི་ཕྱིར་རོ། །
གང་ཆ་ཤས་མཐོང་བ་ལ་མི་ཟིན་པ་དེ་ལ་ངེས་པའི་རྒྱུ་མཚན་རྗེས་སུ་དཔག་པ་ཡིན་ལ། དེ་ལ་རྟགས་མེད་ན་ཚད་མ་མ་ཡིན་པའི་ཕྱིར་རོ། །རང་ཉིད་དམ་གཞན་ཡང་རུང་བའི་རྗེས་སུ་དཔག་པས་ངེས་པའི་དངོས་པོ་ལ་གོམས་པ་ཕུལ་དུ་བྱུང་པས། རིམ་གྱིས་རྣམ་པ་ཐམས་ཅད་པའི་མངོན་སུམ་
རྟོགས་པ་མེད་པ་དེ་ལྟ་བ་བཞིན་དུ་འབྱུང་བར་འགྱུར་རོ། །མཐོང་བའི་བྱ་བ་ནི་ཡན་ལག་མེད་པའི་ཕྱིར་གཅིག་ཡིན་ཡང་དུ་མ་ཉིད་དུ་རྣམ་པར་གཞག་པར་བྱ་བ་སྟེ། ངེས་པ་སྐྱེད་པར་བྱེད་པ་དང་མི་བྱེད་པ་བཞིན་དུའོ་ཞེས་བྱ་བའི་དོན་ཏོ། །དེ་ལྟར་ན་དེ་གནས་སྐབས་པའི་ཚད་མ་ཉིད་དང་འགལ་བ་
ཉིད་ཀྱིས་རྣམ་པར་རྟོག་པ་ཚད་མ་མ་ཡིན་པར་བསྟན་ནས། དེ་མེད་ཀྱང་དེ་དང་རྗེས་སུ་མཐུན་པ་མཐོང་བ་ལ་ཡིན་ཏེ། ཚད་མ་ཉིད་མཐོང་བའི་ཕྱིར་རོ་སྙམ་དུ་སེམས་པ་ཟློག་པར་བྱེད་པ་སྨྲ་བ་ནི། གལ་ཏེ་སྔ་མ་དང་ཕྱི་མ་ཞེས་བྱ་བ་ལ་སོགས་པའོ། །མཐོང་བ་ནི་གོམས་པ་མེད་ན་འཇུག་
པར་བྱེད་པ་མ་ཡིན་ལ། རྣམ་པར་རྟོག་པ་ནི་མཐོང་བ་ལ་སྔ་མ་གཅིག་པ་ཉིད་དུ་འཛིན་པ་ཅན་ནི་འཇུག་པར་བྱེད་པ་མ་ཡིན་ནམ། དེ་ཡང་ཡུལ་དེ་ལ་དེ་བཞིན་དུ་གོམས་པ་ན་མཐོང་བའི་ཡུལ་དུ་གྱུར་པ་ཡིན་ན་གོམས་པས་འཇུག་པར་བྱེད་པ་ཡིན་གྱི། མཐོང་བ་ནི་མ་ཡིན་ཏེ། སྔ་མ་བཞིན་དུ་
བྱེ་བྲག་མེད་པའི་ཕྱིར་རོ། །བརྟག་བྱ་འཛིན་པ་ལས་གཞན་པ་དེའི་བྱེ་བྲག་ནི་འཇུག་པའི་ཡན་ལག་མ་ཡིན་ཏེ། རྣམ་རྟོག་འབའ་ཞིག་ནི་གོམས་པ་མེད་ན་རང་ཉིད་ཁོ་ན་འཇུག་པའི་ཡུལ་རྟོགས་པར་བྱེད་པ་ཡིན་ལ། གོམས་པ་ན་ནི་དེའི་ཡུལ་ཉིད་འཛིན་པར་ནུས་པ་མཐོང་བར་སྒྲོ་འདོགས་པ་

ལོག་པའི་ཕྱིར་གཉི་ག་ལ་ཡང་འཇུག་པའི་རྣམ་པར་རྟོག་པའི་ནུས་པ་ཡིན་གྱི། མཐོང་བའི་ནི་མ་ཡིན་ཏེ། བརྟག་བྱ་ཡུལ་མ་ཡིན་པ་ཉིད་ཀྱིས་རྗེས་སུ་འགྲོ་བ་ལ་སོགས་མེད་པའི་ཕྱིར་གོམས་པ་ན་ཡང་ད་ལྟར་བ་ཙམ་འཛིན་པར་བྱེད་པའི་ཕྱིར་མཐོང་བའི་སྔ་མ་དང་གཅིག་ཏུ་ཇི་ལྟར་སྣང་བར་བྱེད་པ་
ཡིན། གོམས་པའི་ཡུལ་ཡིན་པ་ལས་གོམས་བྱ་ཡང་དེ་ཉིད་ཡིན་ལ་གོམས་པ་ནི་སྔ་མའི་ཤེས་པ་དེའི་ཡུལ་མཐོང་བ་ལ་དེ་ཉིད་མཐོང་ཞེས་བྱ་བར་བརྗོད་པ་ཡིན་གྱི། གཞན་ལ་གོམས་པ་ལས་གཞན་མཐོང་ཞེས་བྱ་བ་ནི་མི་རིགས་ཏེ། སྔར་མཐོང་བ་ལོག་ན་དེས་མཐོང་བྱ་ཉིད་དམ། དེའི་
དུས་ཀྱི་དེ་ཉིད་ལྡོག་པ་ཡིན་གྱི། ད་ལྟར་བའི་ཡུལ་ཇི་ལྟར་ཡིན། ཡང་ཇི་ལྟར་མ་འཁྲུལ་པ་མ་ཡིན། དངོས་པོ་མེད་པ་མ་ཡིན་པ་ལས་རྟོགས་པ་གྲུབ་པའི་ཕྱིར་དང་། གནོད་པ་ཅན་མེད་པའི་ཕྱིར་ཞེས་བྱ་བ་ནི་དངོས་པོ་མེད་པ་མ་ཡིན་པ་ལས་ནི་མ་འཁྲུལ་པ་ཉིད་མ་ཡིན་ལ། མ་འཁྲུལ་པ་
ལས་ཀྱང་དེ་མེད་པ་མ་ཡིན་པ་ཡིན་པའི་ཕྱིར་གཅིག་པ་ལ་གཅིག་པ་ཡིན་ན། ད་ལྟར་གྱི་ཡུལ་མཐོང་བ་དེའི་ཡུལ་ཅན་ཇི་ལྟར་ཡིན། དེ་ལ་གོམས་པ་ཡིན་ན་རྣལ་འབྱོར་པའི་ཤེས་པ་བཞིན་དུ་འདས་པ་ལ་སོགས་པའི་ཡུལ་ཉིད་མཐོང་བ་ལ་འགལ་བ་མེད་དོ། །རྣལ་འབྱོར་བའི་ཤེས་པ་ནི་
གཞལ་བྱ་དེ་ལ་དེ་བཞིན་དུ་འཛིན་པར་བྱེད་པ་ཡིན་ལ། མཐོང་བ་ཡང་རྣམ་པར་རྟོག་པའི་ཕྱིར་བྱེ་བྲག་མེད་དོ། །རྣམ་པར་རྟོག་པ་ནི་རྗེས་སུ་དཔག་པ་ཡང་མ་ཡིན་ཏེ། རྟགས་ལས་སྐྱེས་པ་མ་ཡིན་པའི་ཕྱིར་རོ། །དེ་ཉིད་ནི་དེའི་དོན་བྱེད་པའི་བྱེད་པ་པོ་ཉིད་ནི་དེའི་ངོ་བོ་མཐོང་བ་ལས་གྲུབ་པའི་
ཕྱིར་གཞལ་བྱ་ཉིད་ཡིན་ནོ། །མ་ཡིན་ཏེ། དེའི་ངོ་བོ་འཛིན་པ་ཉིད་རྣམ་པར་རྟོག་པ་ཡིན་པའི་ཕྱིར་དེ་ཡང་གཞལ་བྱ་ཉིད་ཡིན་ན་ཐུག་པ་མེད་པར་འགྱུར་རོ། །དེ་དང་འདྲ་བས་དེ་ཡིན་ནོ་ཞེ་ན། མ་ཡིན་ཏེ། དེ་ཉིད་འཛིན་པ་མ་ཡིན་ན་དེ་དང་འདྲ་བ་ཡང་འཛིན་པ་མ་ཡིན་པའི་ཕྱིར་རོ། །རྟགས་
འཛིན་པ་ལ་རྟགས་ལས་བྱུང་བ་གྲུབ་པ་ཡིན་པ་དང་དབང་པོ་ལས་སྐྱེས་པ་མ་ཡིན་པའི་ཕྱིར་མངོན་སུམ་ཡང་མ་ཡིན་ཏེ། དབང་པོ་ནི་སེམས་པ་ཅན་མ་ཡིན་པའི་ཕྱིར་སྔ་མ་དྲན་པ་མ་ཡིན་ལ་སྦྱོར་བར་བྱེད་པ་ཡང་མ་ཡིན་ནོ། །སྐྱེས་བུ་ནི་ཐག་ཉེ་བ་ལ་དེ་བཞིན་དུ་འཛིན་པར་བྱེད་པ་ཡིན་ཏེ། སེམས་

པ་ཅན་ཡིན་པའི་ཕྱིར་ཞེས་བྱ་བ་ནི་བདག་ལས་སྐྱེས་པའི་རྣམ་པར་རྟོག་པ་ཡིན་ནོ། །དེ་ཡང་བདག་ལ་གནས་ཤེས་ནི། །དེ་འདིར་རྟོགས་བྱེད་ཡིན་ཞེས་བྱ། །དྲན་པ་ལ་ཡང་ནུས་ལྡན་ཞིང་། །འབྲེལ་པ་སོགས་དང་ལྡན་པའང་ཡིན། །ཞེས་སྨོས་པའོ། །སྔ་མ་དང་ཕྱི་མ་
མཐོང་བའི་བག་ཆགས་ལས་བྱུང་བའི་ཕྱིར་ཡིན་ནོ། །བདག་ལས་སྐྱེས་པ་ཉིད་དམ་ཡིད་ཉིད་ཀྱང་རུང་ཐམས་ཅད་དུ་ཐལ་བ་མ་ཡིན་ཏེ། རྣལ་འབྱོར་པའི་ཤེས་པ་བཞིན་དུ་འམ་རྗེས་སུ་དཔག་པ་བཞིན་དུ་འཇུག་པར་བྱེད་པ་ཉིད་ཀྱིས་མི་བསླུ་བའི་ཕྱིར་ཡང་ཁ་ཅིག་ཁོ་ན་ཚད་མ་ཡིན་པའི་ཕྱིར་གཞན་དུ་
མཐོང་བ་གཞན་དུ་རྣམ་པར་བརྟག་པར་བྱ་བ་ཡིན་ནོ། །མེད་པའི་རྟོག་པ་ཇི་ལྟ་བུ་ཡིན་ཞེ་ན། མཐོང་བ་སྔ་མ་དང་ཕྱི་མའི་མཐོང་བྱ་ཉིད་གཅིག་ཉིད་དུ་རྟོག་པའི་ཕྱིར་སྐྱོན་མེད་དོ། །གཅིག་པ་ཉིད་དུ་མཐོང་བ་ལ་ཇི་ལྟར་རྟོག་པར་བྱེད་པ་ཡིན། མཐོང་བྱ་མ་ཡིན་པ་ཡང་འབྲས་བུ་ཉིད་བཞིན་དུ་བརྟག་
བྱ་ཡིན་པའི་ཕྱིར་མཐོང་བྱ་ཡིན་ནོ། །དེས་ན་དེ་དག་ཙམ་གྱིས་ནི་མཐོང་བའི་ཡུལ་གྱི་ཁྱད་པར་དུ་འགྱུར་བ་ཡིན་གྱི། ཅིག་ཤོས་ནི་མ་ཡིན་ལ། རྣམ་པར་རྟོག་པ་ལ་ཁྱད་པར་མེད་པ་ཡིན་ན། གོམས་པ་ལ་ནི་འབྲས་བུ་ཉིད་ཁོ་ན་བཞིན་དུ་མཐོང་བའི་ཡུལ་ཡང་བྱེ་བྲག་མ་ཡིན་ནོ། །དེའི་འབྲས་
བུ་ཉིད་ནི་ཉེ་བའི་ཕྱིར་སྣང་བ་ཡིན་ནོ་ཞེ་ན། དེའི་བྱེ་བྲག་མ་ཡིན་པ་ཡང་ཉེ་བ་ཡིན་པའི་ཕྱིར་བྱེ་བྲག་མེད་དོ། །དེ་ནི་ཉེ་བ་མ་ཡིན་ནོ་ཞེ་ན། དེའི་འབྲས་བུ་ཉིད་ལ་ཡང་མཚུངས་སོ། །འབྲས་བུ་ཉིད་ནི་ཉེ་བ་ཡིན་ནོ། །བྱེ་བྲག་མ་ཡིན་པ་ཡང་དེ་ལྟ་བུ་ཡིན་པའི་ཕྱིར་བྱེ་བྲག་མེད་དོ། །གོམས་པ་ཡིན་ཡང་
མཐོང་བས་དེ་འཛིན་པ་མ་ཡིན་ན། དེ་དོན་དུ་གཉེར་བ་པོ་རྣམས་འཇུག་པར་མི་འགྱུར་ཏེ། རྣམ་པར་རྟོག་པ་ཡང་དེ་འཛིན་པར་བྱེད་པ་མ་ཡིན་པའི་ཕྱིར་རོ། །དེ་ལྟ་ཡིན་ན་དེ་འཛིན་པ་མ་ཡིན་ཡང་རྗེས་སུ་དཔག་པ་བཞིན་དུ་འཇུག་པར་བྱེད་པ་མི་རིགས་ཏེ། རྗེས་སུ་དཔག་པ་ནི་དེ་ལ་ངེས་པ་ལས་
འཇུག་པའི་ཕྱིར་འཛིན་པ་དང་། ངེས་པ་པ་དག་ཡུལ་ལ་འཇུག་པའི་ཡན་ལག་ཡིན་ནོ། །གོམས་པ་མ་ཡིན་པ་ལ་ནི་དེ་གཉི་ག་ཡང་མེད་པའི་ཕྱིར་འཇུག་པར་མི་འགྱུར་རོ། །དེའི་ཕྱིར་གོམས་པ་ཡིན་ན། མཐོང་བ་དེ་འཛིན་པར་བྱེད་པ་ཡིན་ཏེ། འཇུག་པར་བྱེད་པའི་ཕྱིར་རོ། །རྗེས་སུ་

བརྗོད་པ་ཉིད་མ་ཡིན་ཏེ། དེ་ཉིད་ད་ལྟར་མི་འཛིན་པའི་ཕྱིར་རོ། །ད་ལྟར་བ་ཡི་ཡོད་པ་ཉིད། །སྔ་མའི་བློ་ཡིས་རྟོགས་པ་མིན། །སྙམ་དུ་སེམས་པ་ལ། གང་དེ་ཡང་འབྱུང་བར་འགྱུར་བའི་ཞེས་བྱ་བ་སྨོས་ཏེ། སྔོན་མཐོང་བ་ཇི་ལྟ་བ་ཉིད་ད་ལྟ་མཐོང་བ་མ་ཡིན་ལ་དེ་བཞིན་དུ་གོམས་པ་ལ་
ཡང་སྔོན་གྱི་ཉིད་ད་ལྟར་བའི་མ་ཡིན་ཏེ། ད་ལྟར་བའི་ཡུལ་ཉིད་ཡིན་པས་བྱེ་བྲག་མེད་པའི་ཕྱིར་རོ། །གོམས་པ་མཐོང་བའི་ཡུལ་ནི་འབྲས་བུ་ཉིད་དུ་ཡིན་ནོ་ཞེ་ན། མ་ཡིན་ཏེ། འབྲས་བུ་ཉིད་ནི་ཉེ་བ་ཡིན་པའི་ཕྱིར་རོ། །དེ་ལ་ངེས་པའི་ངོ་བོའི་འབྲས་བུ་ནི་གཞན་ལ་ལྟོས་པ་ཡིན་གྱི།
འདི་ཉིད་ཀྱི་གཅིག་པ་ཉིད་ནི་དེ་བཞིན་དུ་མ་ཡིན་ཏེ། ཉེ་བ་ཉིད་ནི་གཅིག་པ་ཉིད་དེ་ཉིད་ཀྱི་ངོ་བོ་ཡིན་པའི་ཕྱིར་ཐམས་ཅད་དུ་ཉེ་བ་འཛིན་པར་བྱེད་པར་མཐོང་བའི་ཡུལ་ནི་དེ་ཉིད་མ་ཡིན་ནོ། །གོམས་པ་ལས་བྱུང་བའི་རྣལ་འབྱོར་བའི་ཤེས་པ་ནི་མཐོང་བར་བྱེད་པ་ཡིན་ཡང་ཇི་ལྟར་འདས་པ་འཛིན་པ་
ཡིན། དེ་ཡང་ཉེ་བ་ཉིད་མཐོང་བར་བྱེད་པ་ཡིན་ལ། འདས་པ་ལ་སོགས་པ་དེའི་ཡུལ་ཉིད་ཡིན་པ་ནི་འུ་བུ་ཅག་ལ་སོགས་པ་ལ་ལྟོས་ནས་ཡིན་ནོ་ཞེས་འཆད་པར་འགྱུར་རོ། །འདས་པ་ལ་སོགས་པ་མི་འཛིན་པ་ཡིན་ན་ཇི་ལྟར་འཇུག་པར་བྱེད། ཇི་ལྟར་འདས་པ་དང་ད་ལྟར་བ་ལ་ཡང་འཇུག་
པ་མ་ཡིན་ནམ། ཕྲད་པར་འདོད་པ་པོ་ནི་ད་ལྟར་བ་ལ་མེད། དེ་དང་གཅིག་པ་ཉིད་དུ་ཤེས་པ་ཡིན་ན་འཇུག་པ་ཡིན་ནོ་ཞེ་ན། མ་ཡིན་ཏེ། ཕྲད་པ་ནི་རྟོགས་པའི་ངོ་བོ་ཉིད་ཡིན་པའི་ཕྱིར་ལ། དེ་ནི་གྲུབ་ཟིན་པའི་ཕྱིར་དོན་དུ་གཉེར་བ་མ་ཡིན་ནོ། །འབྱུང་བར་འགྱུར་བ་རྟོགས་པའི་དོན་དུ་འཇུག་
པ་ཡིན་ནོ་ཞེ་ན། དེ་ལྟ་ཡིན་པ་ནི་བདེན་ན། དེ་ད་ལྟར་ནི་མེད་པ་ཡིན་ན། ཇི་ལྟར་མཐོང་བས་འཛིན་པར་བྱེད། སྔོན་མཐོང་བ་དེའི་ངོ་བོ་མ་མཐོང་བ་ལས་འདིར་རྗེས་སུ་རྟོགས་པར་བྱེད་པ་ཡིན་ནོ་ཞེ་ན། མི་རིགས་ཏེ། དེའི་ངོ་བོ་འཛིན་པ་ན་དེ་རྟོགས་པར་མ་མཐོང་བའི་ཕྱིར་རོ། །དེ་ནི་འབྱུང་བར་
འགྱུར་བ་དེ་ལ་ཡིན་ནོ་ཞེ་ན། དེ་དེ་ལྟ་ཡིན་ན། གོམས་པ་ཡོད་པའི་མཐོང་བའམ། གཞན་གྱིས་ཀྱང་རྟོགས་པ་ཇི་ལྟར་འཇུག་པའི་ཡུལ་ཡིན། འདི་སྐད་བསྟན་པར་འགྱུར་ཏེ། ད་ལྟར་བ་མཐོང་བ་ནི་སྔོན་མཐོང་བ་མ་ཡིན་ཏེ། ཐེ་ཚོམ་ཡིན་པའི་ཕྱིར་ལ། གཉིས་པ་ལ་ཡང་གོམས་

པ་མེད་པ་ཡིན་ན། དེ་ཉིད་ཡིན་པའི་རྣམ་པར་རྟོག་པས་འཇུག་པར་བྱེད་པར་མི་འགྱུར་ཏེ། ཐོབ་ཟིན་པ་ཉིད་ཀྱི་ཕྱིར་རོ། །ཐོབ་པ་ནི་རྟོགས་པའི་ངོ་བོ་ཡིན་པའི་ཕྱིར་དེ་ནི་འབྱུང་བར་འགྱུར་བ་ཉིད་ཀྱི་རྣམ་པར་རྟོག་པས་འཇུག་པ་མ་ཡིན་ཏེ། འབྱུང་བར་འགྱུར་བ་ཉིད་ལ་ཡང་
ཐོབ་པ་ཉིད་དོན་དུ་གཉེར་བ་མ་ཡིན་པའི་ཕྱིར་རོ། །དོན་བྱེད་པ་ཡང་དེ་ཉིད་དཔགས་པ་ཡིན་ན། ཇི་ལྟར་འཇུག་པའི་ཡུལ་ཡིན། དོན་བྱེད་པ་ནི་གཞན་དེ་དང་འདྲ་བ་ཡིན་ལ། དེས་ན་དོན་དུ་གཉེར་བ་པོའི་ངོ་བོ་ལ་ཡང་སྔ་མ་ལས་གཞན་པ་ཉིད་ཡིན་ནོ་ཞེ་ན། ད་ལྟར་ནི་གཅིག་པ་ཉིད་ཀྱི་གཏམ་
ཙམ་ཡང་མེད་པར་སོང་ཡང་ཁོ་བོ་ཅག་གི་ངོ་བོ་དེ་ཉིད་དོན་བྱེད་པ་ཡིན་པར་སྨྲའོ། །མ་གོམས་པ་ལ་རྣམ་པར་རྟོག་པས་དེ་ཉིད་མི་འཛིན་པའི་ཕྱིར་འཇུག་པའི་ནུས་པ་མེད་པ་ཡིན་ན། གོམས་པ་ལ་ཡང་མཐོང་བས་ནུས་པར་སྒྲོ་བཏགས་ཀྱང་འཇུག་པར་བྱེད་པ་ཉིད་ག་ལ་ཡིན། མཐོང་བ་ནི་དོན་བྱེད་པ་
ཡང་དེའི་ཚེ་མི་རིགས་པ་ཡིན་ལ། རྗེས་སུ་དཔག་པ་ཡང་དེ་རིག་པར་བྱ་བ་མ་ཡིན་པའི་ཕྱིར་དེ་དོན་དུ་གཉེར་བ་པོ་རྣམས་ཇི་ལྟར་འཇིག་པ་ཡིན། དེ་དང་འབྲེལ་པ་ཅན་ཉིད་ཤེས་པ་ལས་ཡིན་ནོ་ཞེ་ན། མཐོང་བ་ནི་དེ་དང་འབྲེལ་པ་ཅན་ཉིད་རིག་པ་མ་ཡིན་ནོ། །གོམས་པ་ཡིན་ན་རྗེས་སུ་
དཔག་པ་ཡིན་ནོ་ཞེ་ན། དེ་ཉིད་མེད་ལ་དེ་ཉིད་ཀྱི་རྟོགས་པ་ཡིན་པར་འགྱུར་རོ། །མ་གོམས་པའི་དུས་སུ་དེ་ཡོད་པར་འགྱུར་བ་ཡིན་ནོ་ཞེ་ན། དེ་ལྟ་ཡིན་ན་ཤི་ཟིན་པའི་ཁྱིམ་བྱ་ཡང་སྒྲ་སྒྲོགས་པར་འགྱུར་རོ། །གང་གི་ཚེ་དེ་ཡོད་པ་དེའི་ཚེ་དེ་རིག་པ་ཡིན་གྱི་གཞན་གྱི་ཚེ་ཇི་ལྟར་ཡིན། དེས་འཕགས་
པའི་སྦྱངས་པས་མཐོང་བ་ནི་དེ་རིག་པ་ཡིན་ནོ་ཞེ་ན། མ་ཡིན་ཏེ། ཡུལ་མ་ཡིན་པ་ལ་མི་འཇུག་པའི་ཕྱིར་རོ། །གཞན་དུ་ན་གོམས་པ་ལ་དུ་བ་ལས་ཐག་རིང་བའི་མེ་ནི་རྗེས་སུ་དཔག་པས་རྟོགས་པ་ཡིན་ཏེ། གོམས་པ་ལ་ནི་མངོན་སུམ་གྱིས་ཡིན་ནོ། །འདི་ཉིད་ནི་དེ་དང་འབྲེལ་པ་ཅན་ཉིད་ཉེ་བ་
ཡིན་པའི་ཕྱིར་རོ། །རྗེས་སུ་དཔག་པ་ལ་ཡང་མཚུངས་པ་ཡིན་པར་བརྗོད་དོ། །དུ་བ་ཐུ་པའི་ངོ་བོ་ནི་མེའི་བསྐྱེད་བྱ་ཡིན་གྱི། གོམས་པ་ལ་ནི་མཐོང་བས་ངེས་པ་ཡིན་ཡང་མེའི་ངོ་བོ་ནི་མ་ཡིན་ནོ། །དེ་བཞིན་དུ་འདི་ལ་ཡང་དོན་བྱེད་པས་བསྐྱེད་བྱའམ། སྐྱེད་བྱེད་ཀྱི་ངོ་བོ་མཐོང་བ་ཉིད་ཁོ་ན་ལས་

གོམས་པ་ཡིན་ན། དོན་བྱེད་པར་ངེས་པ་མ་ཡིན་པ་ལ་སྐྱོན་མེད་དོ། །རྟོགས་པ་མེད་ན་ཇི་ལྟར་ངེས་པ་ཡིན། མ་ཡིན་ཏེ། ངེས་པའི་སྒྲས་ནི་ཡོངས་སུ་གསལ་བར་རྗོད་པར་བྱེད་པའི་ཕྱིར་རོ། །རྗེས་སུ་དཔག་པས་ནི་དོན་བྱེད་པའི་རང་གི་ངོ་བོ་ཉིད་ངེས་པ་ཡིན་ལ། མཐོང་བས་ནི་དེའི་
བསྐྱེད་བྱ་དང་སྐྱེད་བྱེད་ཀྱང་ཡིན་ནོ་ཞེས་བྱ་བའི་ཁྱད་པར་རོ། །རང་གི་ངོ་བོ་ངེས་པ་ལས་རྗེས་སུ་དཔག་པ་འཇུག་པར་བྱེད་པ་ཡིན་ལ། རང་གི་ངོ་བོ་དང་འབྲེལ་བར་ངེས་པ་ལས་ནི་མཐོང་བ་ཡིན་ནོ་ཞེས་བྱ་བའི་དོན་ཏོ། །རྗེས་སུ་དཔག་པ་ལ་ནི་རང་གི་ངོ་བོ་འཛིན་པ་མེད་དོ། །རང་གི་ངོ་བོ་ལས་ངེས་
པ་ནི་ཡོད་དོ་ཞེ་ན། འདི་ལ་ཡང་རང་གི་ངོ་བོ་དང་འབྲེལ་པར་ངེས་པ་ཡོད་པའི་ཕྱིར་འཇུག་པར་བྱེད་པ་ཉིད་ཉམས་པ་མ་ཡིན་ནོ། །རྣམ་པར་རྟོག་པ་མེད་ཀྱང་ཞེས་བྱ་བ་ནི་རྣམ་པར་རྟོག་པའི་བག་ཆགས་མེད་པར་ཡང་ཞེས་བྱ་བའི་དོན་ཏོ། །ཅི་ལས་ཤེས་ཤེ་ན། གོམས་པ་མེད་པ་གང་ཡིན་
པ་དེར་ཞེས་བྱ་བ་སྨོས་སོ། །རྗེས་སུ་དཔག་པ་ནི་རྣམ་པར་རྟོག་པ་ཁོ་ན་མ་ཡིན་ནམ། དེའི་ཕྱིར་དེར་རྗེས་སུ་དཔག་པ་ཉིད་ཅེས་བྱ་བ་ཇི་ལྟར་ལན་ཡིན། འདི་སྐད་བསྟན་པར་འགྱུར་ཏེ། དེ་ཉིད་འཛིན་པའི་རྣམ་པར་རྟོག་པ་ཡིན་གྱི། དེ་ཉིད་ཡོད་པ་ནི་མ་ཡིན་ལ་འཇུག་པར་བྱེད་པ་ཡང་མ་ཡིན་ཏེ།
ཡུལ་ཐོབ་པའི་ཕྱིར་རོ། །དེ་ཡང་གཟུང་བ་ལ་འཛིན་པའི་ཕྱིར་ཞེས་བསྟན་པ་ཡིན་ནོ། །དེས་ན་དེའི་ནུས་པས་མཐོང་བ་སྤངས་པ་ནི་མ་ཡིན་ཏེ། དེས་ན་གོམས་པ་ལ་ཡང་རྣམ་པར་རྟོག་པ་ནི་འཇུག་པར་བྱེད་པ་མ་ཡིན་པའི་ཕྱིར་རྣམ་པར་རྟོག་པ་ནི་ནུས་པ་ཅན་མ་ཡིན་ནོ། །མ་གོམས་པ་ལ་
ནི་རྗེས་སུ་དཔག་པ་ལ་ལྟོས་ནས་གཞན་དུ་ཡང་དེ་ཉིད་མིན་ཞེས་བྱ་བའི་མི་རིགས་ཏེ། མཐོང་བ་དང་རྗེས་སུ་དཔག་པ་དག་གི་ཡུལ་ནི་ཐ་དད་པ་ཡིན་པའི་ཕྱིར་བློ་ཉིད་འཇུག་པར་བྱེད་པའི་ཕྱིར་ཚད་མ་ཡིན་ནོ། །མི་བསླུ་བ་ཅན་ཉིད་ཚད་མ་ཉིད་དུ་བསྟན་པ་ཡིན་ནམ། དེ་ཡང་རྣམ་པར་རྟོག་པ་ནི་མ་
ཡིན་ཏེ། ཕྲད་པ་དང་ཕྲད་པར་བྱེད་པ་ཡིན་པའི་ཕྱིར་རོ། །སྔ་མ་དང་ཕྱི་མའི་མཐོང་བས་ཡུལ་དུ་བྱས་པ་ནི་དེ་དག་ཉིད་ཕྲད་པར་བྱེད་པ་ཡིན་ལ། དེ་དག་གི་གཅིག་པ་ཉིད་ནི་རྣམ་པར་རྟོག་པས་ཡིན་ནོ། །བློའི་ནི་མ་ཐོབ་པའི་དོན་བྱེད་པའི་ངོ་བོ་ཐོབ་པར་བྱེད་པའི་ཕྱིར་ཚད་མ་ཉིད་ཡིན་པར་བསྟན་

པར་བྱ་བ་ཡིན་ན། འཇུག་ལ་དེ་གཙོ་ཡིན་ཕྱིར་དང་། །ཞེས་ཅིའི་ཕྱིར་བསྟན། འཇུག་པར་བྱེད་པ་ཉིད་ནི་གནས་སྐབས་མ་ཡིན་ཏེ། དེ་འགེགས་པར་བྱེད་པ་ལ་ཡང་དེ་ཉིད་རབ་ཏུ་བསྒྲུབ་པར་བྱ་བ་ཡིན་ནོ། །བདེན་ཏེ། མི་བསླུ་བ་ཅན་ཉིད་དེ་ཁོ་ན་འཇུག་པར་བྱེད་པ་ཡིན་ན་ནི་
འགྱུར་གྱི། རྣམ་པར་རྟོག་པ་ལ་ནི་དེ་མེད་པ་ཡིན་ཏེ། ཕྲད་པ་དང་ཕྲད་པར་བྱེད་པ་ཡིན་པའི་ཕྱིར་ཞེས་བྱ་བའི་བསམས་པས་སྐྱོན་མེད་དོ། །དེ་བསྟན་པ་ནི། དེ་ལྟར་ན་རེ་ཞིག་ཅེས་བྱ་བའོ། །དེ་ཉིད་དམ་མི་བསླུ་བའི་རྒྱུ་མཚན་འཇུག་པར་བྱེད་པ་ཉིད་ནི་རྟོག་པའི་ངོ་བོའི་འབྲས་བུའི་ཡུལ་གྱི་
རྣམ་པར་དབྱེ་བས་གོ་བར་བྱེད་པའི་དོན་དུ་ཡུལ་གྱི་རྣམ་པའི་དབྱེ་བས་ཤེས་གསུངས་པ་ཡིན་ནོ་ཞེས་ཁ་ཅིག་ཟེར་བ་ནི་དམ་པ་མ་ཡིན་ཏེ། རེ་ཞིག་ཅིག་ནི་རྣམ་པར་རྟོག་པ་ལས་བློ་མཚན་ཉིད་མི་མཐུན་པ་ཉིད་ནི་ཐ་སྙད་པ་ཡིན་པར་བསྟན་ནས། ད་ནི་མཚན་ཉིད་མི་མཐུན་པ་གཞན་རྟོགས་པ་ཐ་དད་པའི་
བློ་ཉིད་ཀྱིས་ཀྱང་རྣམ་པར་རྟོག་པ་ལས་ནི་མ་ཡིན་ནོ། །འདི་དག་ཙམ་དུ་བསམས་པ་ཡིན་ཏེ། དེ་ཡང་འཇུག་པར་བྱེད་པ་ཉིད་ཀྱི་རྒྱུ་མཚན་ནམ། ཅིག་ཤོས་ཀྱང་ཞེས་བྱ་བ་ནི་འདིར་སྐབས་མ་ཡིན་ནོ། །ཡོངས་སུ་བཅད་ནས་འཇུག་བཞིན་པ་ཞེས་བྱ་བ་ལ་སོགས་པ་ལ་ཡང་རྒྱུ་མཚན་ཉིད་རྟོགས་
པར་བྱེད་པ་ནི་རྣམ་པར་རྟོག་པ་ལ་སོགས་པ་ལས་མཚན་ཉིད་མི་མཐུན་པ་ཁོ་ན་ཡིན་པར་བསམས་ཏེ། ཚད་མ་གཞན་དགག་པའི་སྐབས་ཉིད་ཡིན་པའི་ཕྱིར་ཞེས་བྱ་བའི་དགོངས་པས། ད་ནི་རྟོགས་པའི་འབྲས་བུ་ཞེས་བྱ་བ་སྨོས་སོ། །གལ་ཏེ་རྣམ་པར་རྟོག་པ་ནི་སྣང་བཞིན་པའི་དོན་ལ་སྔ་མ་ཉིད་
འཛིན་པར་བྱེད་པ་ལས་འཇུག་པ་མ་ཡིན་པའི་ཕྱིར་ཚད་མ་ཉིད་མ་ཡིན་ནོ། །བློ་ནི་འཇུག་པར་བྱེད་པ་ཉིད་ཀྱིས་ཚད་མ་ཉིད་ཡིན་པའི་ཕྱིར་རྣམ་པར་རྟོག་པ་ལས་མཚན་ཉིད་མི་མཐུན་པ་ཉིད་ཡིན་ན། གང་གི་ཚེ་འཇུག་པར་མི་བྱེད་པ་དེའི་ཚེ་ཚད་མར་མི་འགྱུར་རོ་སྙམ་དུ་སེམས་པས། མཚན་ཉིད་
མི་མཐུན་པ་ཉིད་གཞན་རྟོགས་པར་བྱེད་པ་ཡང་ཡུལ་གྱི་རྣམ་པ་ཞེས་བྱ་བ་ལ་སོགས་པ་ལ་འཇུག་པར་བྱ་བ་ཡིན་པར་བསྟན་པ་ནི། འཇུག་པར་བྱེད་པ་ལས་ནི་ཚད་མ་མ་ཡིན་གྱི་ཞེས་བྱ་བ་ལ་སོགས་པའོ། །གལ་ཏེ་ཤེས་པ་ལ་ཡུལ་གྱི་རྣམ་པ་ཡིན་ན་དེ་ཡང་ཡུལ་བཞིན་དུ་རྟོགས་པ་མ་ཡིན་

པའི་ངོ་བོར་འགྱུར་རོ་ཞེས་བྱ་བ་ནི་གླེན་ཆེན་གྱི་གཏམ་རྒྱུད་ལྟ་བུ་འགེགས་པར་བྱེད་པ་བསྟན་པ་ནི། འདིའི་ཡུལ་གྱི་རྣམ་པ་ལྟ་བུ་ཞེས་བྱ་བའོ། །འབྲེལ་པ་གང་གིས་མིག་ལ་སོགས་པའི་ཚོགས་པས་བསྐྱེད་པར་བྱ་བའི་ཤེས་པ་ནི་ཡུལ་ཉིད་ཀྱི་རྗེས་སུ་བྱེད་པ་མ་ཡིན་ནམ། མིག་ལ་སོགས་
པའི་ནི་མ་ཡིན་ནོ། །བུ་ནི་ཟ་བ་བོར་ནས་ཕ་མ་དག་གི་རྗེས་སུ་བྱེད་པ་ལྟ་བུའོ། །དེས་ནི་ཡུལ་ཉིད་འཛིན་པར་བྱེད་པ་ཡིན་ནོ། །དེ་བཞིན་དུ་དང་པོ་རྣམ་པར་རིག་པ་ཡིན་ལ། དེ་ནས་ཡུལ་རིག་པར་བྱེད་པའམ། རྣམ་པར་རིག་པར་བྱེད་པ་ཉིད་ཀྱང་རུང་། དེ་རིག་པར་བྱེད་པ་ཡིན་པའི་ཕྱིར་
གཅིག་ནས་གཅིག་ཏུ་བརྒྱུད་པས་དུབ་པ་དང་ཉེ་བར་བཏགས་པ་ཡང་སྤངས་པ་ཡིན་ཏེ། བརྒྱུད་པའམ་ཉེ་བར་བཏགས་པ་ནན་གྱིས་སྒྲོ་འདོགས་པ་འགའ་ཡང་མེད་དེ། དེ་ལྟ་མོད་ཀྱི་དངོས་པོའི་ཉམས་སུ་མྱོང་བ་ལ་དཔྱོད་པར་བྱེད་པ་ཡིན་ནོ། །སྔོན་པོ་ནི་བདེ་བ་བཞིན་དུ་རང་རིག་པར་བྱེད་པས་
རྟོགས་པ་ཡིན་གྱི། གཞན་གྱིས་ནི་མ་ཡིན་ཏེ་མི་དམིགས་པའི་ཕྱིར་རོ། །དེས་ན་དེའི་ཤུགས་ལས་དེ་ཉིད་ཡུལ་རིག་པར་བྱེད་པ་ཁོ་བོ་ཅག་སྨྲའོ། །ཡུལ་དང་འདྲ་བ་ཉིད་ཅེས་བྱ་བ་ཇི་ལྟར་ཡིན། འདྲ་བའི་ཕྱིར་རྣམ་པར་ཤེས་པའི་ཡུལ་ལ་འཛིན་པར་བྱེད་པ་མ་ཡིན་ཏེ་ཐལ་ཆེས་པའི་ཕྱིར་རོ། །
གཟུགས་ཀྱི་ཤེས་པ་ནི་རེག་བྱ་ལ་ཚད་མར་མི་འགྱུར་ཏེ་མི་འདྲ་བའི་ཕྱིར་རོ། །དེའི་ཕྱིར་དོན་ནི་འདི་ཡིན་ཏེ། གཟུགས་ཀྱི་ཤེས་པ་ནི་ཕྲད་བྱ་ཡུལ་གཟུགས་སམ་རེག་བྱ་ལས་འབྱུང་བས་སྔོན་པོའོ་ཞེས་བྱ་བའམ་མེའོ་ཞེས་བྱ་བར་དེ་ཉིད་ཡིན་པར་སྒྲོ་འདོགས་པར་བྱེད་པ་ཡིན་ནོ། །དེས་བསྐྱེད་པར་བྱ་
བ་ཡིན་པའི་ཕྱིར་ནག་པའི་བུ་ལ་དེར་ཤེས་པ་ལྟ་བུ་དང་། བྲེགས་པ་ལས་སྐྱེས་པའི་སྐྲ་ལ་སོགས་པ་བཞིན་དུ་འདྲ་བ་ཉིད་ལ་དེ་ཉིད་ཡིན་པར་བསམ་པའི་ཕྱིར་སྐྱོན་མེད་དོ། །དེའི་ཕྱིར་གང་གི་ཡུལ་གྱི་རྣམ་པ་ཡིན་པ་དེ་ནི་ཡུལ་གྱི་རྣམ་པ་ཡིན་ནོ་ཞེས་བསྟན་པ་ཡིན་ནོ། །ཡུལ་གྱི་རྣམ་པ་དང་འདྲ་བའི་
རྣམ་པ་གང་གི་ཡིན་པ་དེ་ནི་ཡུལ་གྱི་རྣམ་པ་ཡིན་ཏེ། ཡུལ་གྱི་བསྐྱེད་པར་བྱ་བ་ཉིད་ཡིན་པ་ནི་དེ་ཉིད་དུ་སྒྲོ་འདོགས་པའི་རྒྱུ་མཚན་ཡིན་ཞེས་བྱ་བའི་དོན་ཏོ། །ཤེས་པ་ནི་གལ་ཏེ་བདག་ཉིད་ལ་གནས་པའི་ཡུལ་གྱི་རྣམ་པས་ཡུལ་རིག་པར་བྱེད་པ་ཡིན་ན། ཡུལ་གྱི་རྣམ་པ་ཇི་ལྟར་རིག་པ་ཡིན།

གཟུང་བྱའི་རྣམ་པ་ཅན་ནི་འཛིན་པར་བྱེད་པ་མ་ཡིན་ལ། རྣམ་པ་གཞན་དུ་རྟོག་པ་ཡིན་ན་ཐུག་པ་མེད་དོ་སྙམ་དུ་སེམས་པ་ལ། དེ་ཐ་དད་པ་ནི་ཡུལ་གྱི་རྣམ་པ་ཐ་དད་ཅེས་བྱ་བ་སྨོས་ཏེ། བདག་ཉིད་ཀྱི་རྣམ་པ་ཁོ་ནས་ཡིན་གྱི་རྣམ་པར་གཞན་ལ་ལྟོས་པ་ནི་མ་ཡིན་ནོ་ཞེས་བྱ་བའི་དོན་ཏོ། །
ཡང་ན་གལ་ཏེ་དེས་བསྐྱེད་བྱ་ཉིད་ལ་དེ་ཉིད་དུ་སྒྲོ་འདོགས་པའི་རྒྱུ་མཚན་གྱིས་རང་གི་ངོ་བོས་བསྐྱེད་པར་བྱ་བའི་ཤེས་པ་ནི་མ་ཡིན་ཏེ། ཇི་ལྟར་དེ་ཉིད་དུ་སྒྲོ་འདོགས་པ་ཡིན་ཞེས་བྱ་བ་དེ་ལ་ཡུལ་ལྟ་བུའི་རྣམ་པ་ཐ་དད་པ་ནི་ཞེས་བྱ་བ་སྨོས་ཏེ། ཡུལ་ལ་མངོན་པར་ཕྱོགས་པ་ཉིད་ནི་རང་གི་ངོ་བོ་ལ་མངོན་
པར་ཕྱོགས་པ་ཉིད་ཡིན་ཏེ། རང་གི་ངོ་བོ་རྟོགས་པ་ཞེས་བྱ་བའི་དོན་ཏོ། །ཡང་ན་གཟུགས་ཀྱི་ཤེས་པ་ནི་ཕྲད་བྱ་གཟུགས་ཀྱི་ཚད་མ་ཡིན་ཞེས་འདི་ལ་དང་པོ་སྦྱར་བར་བྱ་ཞིང་། རེག་བྱ་ལ་སོགས་པ་ལ་ཚད་མ་ཡིན་ཞེས་བྱ་བ་འདི་ལ་གཉིས་པའོ། །ཡུལ་དང་འདྲ་བ་ཉིད་དམ་ཡུལ་ལ་མངོན་དུ་
ཕྱོགས་པའམ་ཞེས་མངོན་དུ་ཕྱོགས་པ་དེ་ལ་དེས་བསྐྱེད་བྱ་ཡིན་པས་དེ་ཉིད་དུ་སྒྲོ་འདོགས་པ་ཡིན་ནོ། །དེ་ཉིད་བསྟན་པ་ནི། ཡུལ་གྱི་རྣམ་པ་དེ་ཡང་ཤེས་པའི་བདག་ཉིད་དུ་གྱུར་པ་ཡིན་ཏེ་ཞེས་བྱ་བ་སྟེ། ཡུལ་གྱི་རྣམ་པ་ནི་ཕྲད་པར་བྱ་བའི་རྣམ་པ་སྟེ། ཕྲད་བྱ་ཉིད་ཅེས་བྱ་བའི་དོན་ཏོ། །
བྱ་བ་དང་བྱེད་པ་པོ་དག་གི་རང་གི་ངོ་བོའི་རྣམ་པ་ཡང་གནས་པའི་ཕྱིར་རྣམ་པར་གཞག་བྱ་དང་རྣམ་པར་འཇོག་བྱེད་ཀྱི་ངོ་བོས་ཚད་མ་དང་འབྲས་བུ་ཉིད་ནི་ཐ་དད་པ་ལ་ཡང་འགལ་བ་མེད་པ་ཡིན་གྱི། འབྲས་བུ་དང་རྒྱུའི་ངོ་བོ་ཉིད་ནི་མ་ཡིན་ནོ། །དེས་ན། ཇི་ལྟར་སེང་ལྡེང་བཅད་པ་ན། །པ་ལ་ཤ་ཡི་འཆད་
པ་མིན། །དེ་བཞིན་སྟ་རེ་དང་གཅད་བྱ། །འཇིག་རྟེན་ལ་ནི་གཅིག་པ་མིན། །ཞེས་བྱ་བ་ཡང་སུན་འདོན་པ་མ་ཡིན་ཏེ། འབྲས་བུ་དང་རྒྱུའི་ངོ་བོ་ཡང་བྱ་བ་དང་འབྲས་བུ་དག་ལས་འབྱེད་པ་མ་ཡིན་ཏེ། བྱུང་བ་གང་རྣམས་ཀྱི་བྱ་བ། །དེ་ཉིད་བྱེད་པོ་ཉིད་དུ་བརྗོད། །ཅེས་བྱ་བ་ནི་འགལ་བ་མེད་
དོ། །ཡུལ་མངོན་པར་ཕྱོགས་པ་ཉིད་ཀྱི་ཤེས་པ་ནི་དེའི་རྣམ་པ་མ་ཡིན་ནམ། ཡུལ་གྱིས་བསྐྱེད་པར་བྱ་བའི་ཤེས་པའི་བདག་ཉིད་ནི་དེ་ཉིད་ཀྱི་རིག་པ་ལས་གཞན་པ་དེ་ལས་མངོན་པར་ཕྱོགས་པ་ཉིད་མ་ཡིན་ཏེ། རིག་བྱའི་དེ་ཉིད་ཚད་མ་ཡིན་ལ། ཡུལ་རིག་པ་ནི་འབྲས་བུ་ཡིན་ཞེས་བྱ་བ་

ནི་རྣམ་པར་དབྱེ་བའོ། །ཡུལ་དང་འབྲེལ་བ་ཅན་ཉིད་མི་བསླུ་བ་ཅན་ཉིད་མ་ཡིན་ནམ། དེ་ཡང་བསྐྱེད་བྱ་ཉིད་དེ་དེ་ཉིད་དུ་སྒྲོ་འདོགས་པའི་ཡུལ་ཡིན་པའི་ཕྱིར་མི་བསླུ་བ་ལས་གཞན་པའི་ཡུལ་གྱི་རྣམ་པ་ཉིད་མ་ཡིན་ནོ། །བདེན་པ་ཡིན་མོད་ཀྱི་དེའི་བསྐྱེད་བྱ་ཉིད་མི་བསླུ་བ་ཅན་ཉིད་དང་། དེ་
ཉིད་དུ་སྒྲོ་བཏགས་པ་ནི་དེའི་རྣམ་པ་ཉིད་ཡིན་ཞེས་བྱ་བ་ནི་བསྡུས་པའོ། །མིག་ལ་སོགས་པ་རྣམས་འབྲས་བུ་སྐྱེད་པར་བྱེད་པ་ཉིད་ཡིན་ན་ཐམས་ཅད་ཡུལ་ཡིན་པའི་ཕྱིར་ཐལ་ཆེས་པ་ནི་ཚད་མ་སྐྱེད་པར་བྱེད་པ་པོ་ཉིད་ལ་ཡང་མཚུངས་པ་ཡིན་ནོ་སྙམ་པའི་བསམ་པས་ཟེར་བ་ནི། ཇི་ལྟར་དེ་རྣམ་པར་ཤེས་པ་
ལ་བདག་ཉིད་ཅེས་བྱ་བ་སྟེ། ཐམས་ཅད་དུ་སྐྱེད་པར་བྱེད་པ་ཞེས་བྱ་བ་ནི་དུས་ཐམས་ཅད་དུ་རྨི་ལམ་ལ་སོགས་པ་ལ་དམིགས་པ་ཡོད་པའི་ཕྱིར་འབྲས་བུར་འགྱུར་རོ་ཞེས་བྱ་བ་ནི་ཐལ་ཆེས་པའི་དོན་ཡིན་ཏེ། ཡུལ་ལ་ནི་མ་ཡིན་ནོ། །ཤེས་པ་གཞན་ཡོད་ན་ཐམས་ཅད་དུ་འབྱུང་བ་ཡིན་ཞེས་བྱ་བ་
ནི་རྣམ་པའི་བྱེ་བྲག་ཡིན་པར་བསྟན་པ་ནི། དེ་ཡོད་ན་འདི་ཡོད་པ་ཉིད་ཅེས་བྱའོ། །ཚད་མ་མི་བསླུ་ཅན་ཤེས་པ། །ཞེས་བྱ་བ་དེར་ནི་ཤེས་པ་ཙམ་བྱེ་བྲག་ཏུ་བསྟན་པ་ཡིན་ལ། འདིར་ནི་དེའི་རྣམ་པའི་ཁྱད་པར་ཡིན་ནོ་ཞེས་བྱ་བ་ནི་བྱེ་བྲག་གོ། །རྟོགས་པ་ཙམ་ནི་ཚད་མ་མ་ཡིན་ཞིང་དེ་སྒྲུབ་པར་
བྱེད་པ་ཡང་མ་ཡིན་ཏེ། ཐལ་ཆེས་པའི་ཕྱིར་རོ། །ཕྲད་བྱའི་མཐར་ཐུག་པ་ཡིན་ན་ནི་འགྱུར་ཏེ། བྱེ་བྲག་མཐོང་བ་ནི་ཕྲད་བྱའི་བདག་ཉིད་དམ། དེ་དང་འབྲེལ་པ་ཅན་གྱི་བདག་ཉིད་ཡིན་ཏེ། མི་བསླུ་བ་ཅན་ཡིན་པའི་ཕྱིར་ཐ་དད་པ་མ་ཡིན་ནོ། །གལ་ཏེ་དེ་ལས་གཞན་པ་ཡིན་ན་ནི་དེ་ཚད་མ་
མ་ཡིན་པར་ཚད་མ་མི་བསླུ་བ་ཅན་ཞེས་བྱ་བས་བསྟན་པ་ཡིན་ནོ། །ད་ནི་དེ་ཡང་རང་ལས་སམ་གཞན་ལས་ཡིན་ཞེས་རྣམ་པར་དཔྱད་པར་བྱ་བ་ཡིན་ཏེ། བསྐྱེད་པ་ལ་ལྟོས་ནས་ཚད་མར་གྱུར་པ་ལས་ཞེས་བྱ་བ་དེར་རྣམ་པར་དཔྱད་ཟིན་ཏོ། །མི་བསླུ་བ་ཅན་ཉིད་ནི་རྟོགས་པ་ཡིན་ན་རང་གི་འབྲས་བུ་
བྱེད་པ་ཉིད་ཡིན་ལ། དེའི་ཤེས་པ་ཡང་རང་ཉིད་ལས་མ་གྲུབ་པ་ཡིན་ན་གཞན་ལ་ལྟོས་པ་ཡིན་ཞེས་བྱ་བ་ཡང་ཚད་མ་མི་བསླུ་བ་ཅན་ཞེས་བྱ་བ་འདིས་མཚོན་པ་ཉིད་ཡིན་ན། ད་ལྟར་ལྷག་པ་ཅི་བྱར་ཡོད། །གང་ལས་རང་དངོས་རང་ལས་རྟོགས་པ་ཅན། །ཞེས་བྱ་བ་ལ་སོགས་པས་སེམས་པར་

བྱེད་པ་ཡིན། རང་རིག་པའི་ཤེས་པའི་བདག་ཉིད་ནི་ཚད་མ་ཡིན་ལ། དེས་ན་རང་ཉིད་ལས་རིག་པ་ཉིད་ནི་དེ་ཉིད་ཡིན་ནོ་ཞེས་རྟོགས་པ་ཡིན་ནོ། །རང་གི་ངོ་བོ་ཡིན་ཞེས་བྱ་བ་ནི་མི་རིགས་ཏེ། ཚད་མ་མི་བསླུ་བ་ཅན་ཞེས་བྱ་བ་འདིས་གཞན་ལས་ཚད་མ་ཉིད་དུ་སྒྲུབ་པར་བྱེད་པ་དང་
འགལ་བའི་ཕྱིར་རོ། །དེས་ནི་ཚད་མ་ཉིད་ཀྱི་ངོ་བོ་བསྟན་པ་ཡིན་ལ། གཞན་ལས་ཤེས་ཞེས་བྱ་བས་ནི་ཐ་སྙད་ལས་ནི་ཚད་མ་ཉིད་དེ་དོན་བྱེད་པའི་ངོ་བོས་ངེས་པར་བྱེད་པའོ། །དེ་ལྟ་ན་ཡང་རང་གི་ངོ་བོས་ཞེས་བྱ་བ་ནི། རང་ལས་ཤེས་པ་རྗོད་པར་བྱེད་པ་ཉམས་པ་ཡིན་ནོ། །རྟོགས་པ་ལ་ལྟོས་
ནས་རང་ཉིད་ཅེས་རྗོད་པར་བྱེད་པ་ཡིན་ལ། ངེས་པ་ལ་ལྟོས་ན་ཅིག་ཤོས་ཞེས་བྱ་བ་ལ་ནི་འགལ་བ་མེད་དོ། །དེ་ལྟ་ན་ཡང་གཞན་ལས་ཞེས་བརྗོད་པ་ཉིད་ཀྱིས་རང་གི་ངོ་བོ་རྟོགས་པ་ཡིན་པའི་ཕྱིར་དེའི་དོན་དུ་ཚད་མ་མི་བསླུ་བ་ཅན་ཞེས་བྱ་བ་ཚིག་ལྷག་ཏུ་སོང་ངོ་སྙམ་དུ་སེམས་པ་ལ། རང་ལས་
རང་གི་ངོ་བོས་རྟོགས། །ཞེས་བྱ་བ་ལ་སོགས་པས་དོན་གཞན་ཉིད་དོགས་པ་སྔོན་དུ་འགྲོ་བས་སྨྲ་བ་ནི། གལ་ཏེ་ཤེས་པ་འདི་ཐོབ་པར་བྱེད་པ་ཡིན་ནོ་ཞེས་བྱ་བ་ལ་སོགས་པ་ནས། མངོན་སུམ་དང་ནི་རྗེས་དཔག་ལས། །གཞན་གྱི་ཚད་མ་ཡོད་མ་ཡིན། །ཞེས་བྱ་བའི་བར་གྱིས་ཚད་
མ་གཉིས་པོ་མ་རྟོགས་པ་ལས་ནི་དོན་དམ་པ་པའི་ཚད་མ་ཉིད་མ་ཡིན་ནོ་སྙམ་དུ་སེམས་པ་ལ། ལན་ནི། འདིར་སྨྲས་པ། ཞེས་བྱ་བ་ལ་སོགས་པའོ། །ཇི་ལྟར་མཐོང་བ་ལས་དེ་ཉིད་དུ་རྣམ་པར་གཞག་པའི་ཕྱིར་དེ་ཉིད་དོན་དམ་པ་པ་མ་ཡིན་པ་ཉིད་དུ་ཁས་ལེན་པ་ཡིན་ཏེ། ཐ་སྙད་པ་རྣམས་ཀྱིས་
འདའ་བར་མི་བྱ་བ་ཡིན་པའི་ཕྱིར་རོ། །དེའི་ཕྱིར་མི་བསླུ་བ་ཅན་ནམ་ཅིག་ཤོས་ཀྱི་ཤེས་པ་ཡང་རང་རིག་པ་འབྱུང་བའི་དུས་སུ་ཤེས་པར་བྱེད་པ་མ་ཡིན་པར་བསྟན་པ་ནི། རང་རིག་པའི་མངོན་སུམ་གྱིས་ཞེས་བྱ་བ་ལ་སོགས་པ་ནས་ཐེ་ཚོམ་དུ་ཡང་མི་འགྱུར་རོ་ཞེས་བྱ་བའི་བར་དུ་སྟེ། དེ་བཞིན་དུ་གནོད་
པ་མེད་པ་ཉིད་ཀྱི་མཚན་ཉིད་ཀྱང་རང་ལས་ཡིན་ནོ་སྙམ་པ་སྔོན་དུ་འགྲོ་བས་ཟེར་བ་ནི་འོན་ཏེ་གནོད་པ་མེད་པ་ཉིད་ཅེས་བྱ་བ་ལ་སོགས་པ་ནས། ཚད་མ་གཞན་ནི་ཡོད་མ་ཡིན། །ཞེས་བྱ་བའི་བར་གྱིས་སོ། །དོན་གྱིས་གོ་བས་ཤེས་པ་དེའི་ཞེས་བྱ་བ་ནི་དོན་ཡོངས་སུ་བཅད་པ་ལ་གཞན་དུ་མི་

འཐད་པར་རྟོགས་པའི་ཤེས་པ་ནི། ཚད་མར་གྱུར་པ་ཉིད་དུ་ཤེས་པ་ཡིན་ཞེས་བྱ་བའི་དོན་ཏོ། །ཚད་མ་ཉིད་ཀྱིས་ཤེས་པ་བཞིན་དུ་དངོས་པོ་ཡང་རང་ཉིད་ཁོ་ན་ལས་ཡིན་ནོ་ཞེས་ཟེར་བ་ནི། གཞན་ཡང་རྣམ་པར་ཤེས་པ་ནི་རྒྱུ་ལས་སྐྱེས་པ་ཡིན་ལ་ཞེས་བྱ་བའོ། །རང་ཉིད་ལས་ཞེས་བྱ་བ་
ནི་ཤེས་པའི་བདག་ཉིད་ཁོ་ནའི་རྒྱུ་ལས་ཡིན་ནོ་ཞེས་བྱ་བའི་དགོངས་པས། གལ་ཏེ་རང་ལས་ཚད་མ་ཉིད། །ཅེས་བྱ་བ་སྨོས་ཏེ། དབང་པོ་ལ་སོགས་པའི་རང་གི་ངོ་བོའི་ཤེས་པ་བཞིན་དུ་ཚད་མ་ཉིད་ལ་ཡང་བྱ་བ་ཡིན་ནོ་ཞེས་བྱ་བའི་དོན་ཏོ། །འོན་ཏེ་རྟག་པའི་རང་བཞིན་ཡིན་པས་རང་ཉིད་
ལས་ཡིན་གྱི། རྒྱུ་ལས་ནི་མ་ཡིན་ནོ་ཞེས་བྱ་བའི་བསམ་པས། དེ་ལ་ཡང་སྨྲ་བ་ནི། ཅི་སྟེ་བདག་ཤེས་རང་བཞིན་ཕྱིར། །ཞེས་བྱ་བ་ལ་སོགས་པ། །དེ་གཞན་དུ་འགྱུར་ཡོད་མ་ཡིན། །ཞེས་བྱ་བའི་བར་དུ་སྟེ། རྒྱུའི་སྐྱོན་ལ་སོགས་པའི་དབང་གིས་རྟག་པ་གཞན་ཉིད་དུ་འགྱུར་བ་
མ་ཡིན་ཞེས་བྱ་བའི་དོན་ཏོ། །སྐྱོན་ལྷན་ཅིག་བྱེད་པ་ཅན་ཡིན་པའི་དབང་པོ་རྗེས་སུ་འགྲོ་བ་དང་ལྡོག་པའི་རྗེས་སུ་བྱེད་པའི་རྣམ་པར་འགྱུར་བ་ནི་ཚད་མ་ཉིད་མ་ཡིན་པའི་དངོས་པོ་ཡིན་ལ། དེ་ནི་རྟག་པ་ལ་ཡང་མིན་པའི་ཕྱིར་གཞན་དུ་འགྱུར་བའི་ཤེས་པའི་ངོ་བོ་རྟག་པ་ཉིད་ཡིན་ན་ཡང་འགལ་བ་
མེད་དོ་ཞེས་ཟེར་བ་ནི། གལ་ཏེ་སྐྱོན་ཅན་རྒྱུ་ཡོད་པས། །ཞེས་བྱ་བའོ། །རྗེས་སུ་འགྲོ་བ་དང་ལྡོག་པའི་བྱེ་བྲག་ལས་ཚད་མ་ཉིད་ཀྱང་ཡོན་ཏན་གྱིས་བྱས་པར་འགྱུར་བར་བསྟན་པ་ནི། ཡོན་ཏན་ལྡན་རྒྱུ་དང་འབྲེལ་ཕྱིར། །ཞེས་བྱ་བའོ། །ཡོན་ཏན་རྣམས་ཀྱི་བྱ་བ་ལས་ནི་སྐྱོན་མེད་
པ་ཉིད་དང་གཞན་དུ་གྲུབ་པ་ནི། རྗེས་སུ་འགྲོ་བ་དང་ལྡོག་པ་དག་ཡིན་ནོ་ཞེས་ཟེར་བ་ནི། གལ་ཏེ་ཉེས་པ་མེད་པའི་ཕྱིར། །ཞེས་བྱ་བའོ། །སྐྱོན་རྣམས་ཀྱི་བྱ་བ་ལས་ནི་ཡོན་ཏན་མེད་པ་ཉིད་དང་། གཞན་དུ་འགྲུབ་པ་ནི་རྗེས་སུ་འགྲོ་བ་དང་ལྡོག་པ་དག་ཡིན་པར་བསྟན་པ་ནི། ཡོན་ཏན་མེད་
ཕྱིར་ཚད་མིན་པར། །ཞེས་བྱ་བའོ། །རྟོགས་པའི་ངོ་བོ་ཉིད་ཀྱིས་བདག་ཉིད་ཀྱིས་དམིགས་པ་ཡིན་ན་རྟག་པའི་ཕྱིར་གཉིད་ལོག་པ་ལ་སོགས་པ་ཡང་མི་ལྡོག་པའི་ཕྱིར་རིག་པར་བྱེད་པར་འགྱུར་བར་བསྟན་པ་ནི། གལ་ཏེ་དེ་རྟོགས་བ་དག་འདོན་ན། །ཞེས་བྱ་བའོ། །གལ་ཏེ་རང་ལ་མི་བསླུ་བ་

ཅན་ཉིད་དུ་ཤེས་པ་མ་ཡིན་ལ། ཤེས་པ་གཞན་ལས་ནི་ཤེས་པར་བྱེད་པ་ཉིད་ཡིན་པར་བསྟན་པ་ནི། གལ་ཏེ་མི་བསླུ་བའི་ཤེས་པ་དེ་ཞེས་བྱ་བའོ། །སྒྲུབ་པར་བྱེད་པའི་ཤེས་པ་ནི་རང་ཉིད་ཁོ་ན་ལས་ཚད་མ་ཡིན་ཏེ། རྟོགས་པའི་བྱ་བ་རྫོགས་པའི་ཕྱིར་མ་ཡིན་ནམ། དེའི་
འོག་གི་ཐེ་ཚོམ་ནི་དེ་དང་འགལ་བ་ཅན་མ་ཡིན་ཏེ། གང་གི་ཕྱིར་རིམ་གྱིས་ངེས་པའི་དོན་འཛིན་པ་ནི་ཐེ་ཚོམ་ཡིན་ནོ། །འབའ་ཞིག་ནི་དོན་བྱེད་པའི་ཤེས་པ་ལས་ལྡོག་པ་ཡིན་སྙམ་དུ་སེམས་པ་ལ། སྒྲུབ་པར་བྱེད་པའི་ཤེས་པའི་ཡང་ཞེས་བྱ་བ་སྨོས་ཏེ། འདིའི་ཡུལ་ནི་ཐེ་ཚོམ་ཡིན་ལ་དེའི་ངོ་བོ་ཉིད་ཡིན་པ་དེའི་ཕྱིར་ཐེ་ཚོམ་
དུ་བྱ་བ་ཡིན་པས་ཐེ་ཚོམ་ཡིན་ཏེ། དོན་ལ་དོན་བྱེད་པ་ཉིད་དུ་ངེས་པར་འཛིན་པ་ཡིན་ན། ངེས་པར་མི་འཛིན་པའི་བདག་ཉིད་ནི་ཐེ་ཚོམ་ཡིན་ལ། ཅུང་ཟད་ཀྱང་རྣམ་པར་འཇོག་པར་བྱེད་པ་མ་ཡིན་ཞེས་བྱ་བའི་དོན་ཏོ། །གནོད་པ་མེད་པའི་དོན་ཞེས་བྱ་བར་ཡང་ཉེ་བར་དགོད་པ་ནི། བཙུན་པའི་
འདོད་པའི་དབང་གིས་ཡིན་ནོ། །གཞན་སྒྲུབ་པར་བྱེད་པའི་རིགས་པ་བཞིན་དུ་དོན་བྱེད་པ་རིག་པ་ཡང་ཡོད་པ་དང་མེད་པ་མཚུངས་པའི་ཕྱིར་མཐོ་ཉིད་བཞིན་དུ་མི་ཉིད་ཡིན་པ་ལ་ཐེ་ཚོམ་ཟ་བ་ངེས་པ་མ་བཟུང་བའི་བདག་ཉིད་ཅན་ཁོ་ན་ཡིན་པར་བསྟན་པ་ནི། ཚད་མ་སྔར་གྲུབ་མེད་པ་གང་། །ཞེས་བྱ་
སྟེ། ཇི་ལྟར་རྟོགས་པའི་བདག་ཉིད་སྒྲུབ་པར་བྱེད་པའི་ཤེས་པ་ནི་ཡོད་པ་དང་མེད་པར་རམ་བྱེ་བྲག་མེད་པའི་ཕྱིར་ཡུལ་རྣམ་པར་འཇོག་པར་བྱེད་པ་ཅན་མ་ཡིན་པ་དེ་བཞིན་དུ་དོན་བྱེད་པའི་ཤེས་པ་ཡང་དོན་བྱེད་པ་དང་ཅིག་ཤོས་ཐུན་མོང་བའི་ཕྱིར་ཞེས་བྱ་བའི་དོན་ཏོ། །དེ་ནི་ཞེས་བྱ་བ་ཚད་མའི་ཐུན་
མོང་བ་ཉིད་ཀྱིས་ཐེ་ཚོམ་གྱི་ཡུལ་ཅན་གྱིའོ། །དེ་ལས་ཞེས་བྱ་བ་ནི་ཐུན་མོང་བ་ཉིད་ཀྱིས་ཐེ་ཚོམ་གྱི་ཡུལ་ཅན་དོན་བྱེད་པའི་ཤེས་པ་ལས་སོ། །གལ་ཏེ་ཚད་མ་སྔར་གྲུབ་ན་ཞེས་བྱ་བ་ལ་སོགས་པས་ནི་མེ་དང་དུ་བ་བཞིན་དུ་གོ་བྱ་གོ་བྱེད་ཀྱང་ངོ་། །དེས་ན་རང་དབང་དུ་ཚད་མར་གྲུབ་པ་ཡིན་གྱི་གཞན་དུ་
ནི་མ་ཡིན་ནོ། །ལྐོག་ཤལ་ལ་སོགས་པ་ལས་བ་ལང་ཉིད་བཞིན་དུ་དོན་བྱེད་པ་ལས་ཚད་མ་ཉིད་དུ་ཉེ་བར་མཚོན་པ་ཡིན་གྱི། གོ་བར་བྱ་བ་མ་ཡིན་པ་དེས་ན་འབྲེལ་པ་འཛིན་པ་ལ་ལྟོས་པ་མ་ཡིན་ནོ་སྙམ་དུ་སེམས་པས་སྨྲ་བ་ནི། དོན་བྱེད་པ་ལས་ཤེས་དེ་ནི། །ཞེས་བྱ་བའོ། །ཚད་མ་དང་

ཅིག་ཤོས་ཐུན་མོང་བའི་དོན་བྱེད་པ་ནི་ཚད་མར་ཉེ་བར་མཚོན་པར་བྱེད་པ་མ་ཡིན་པར་བསྟན་པ་ནི། དོན་བྱེད་པར་ནི་བྱུང་བ་དེ། །ཞེས་བྱ་བ་སྟེ། ཚད་མ་མིན་པར་རྟོགས་པ་ནི་ཐ་ན་རེག་པའི་ཤེས་པ་ལས་སོ། །ཚད་མ་ཁོ་ན་ལས་དོན་བྱེད་པ་ཡིན་གྱི་སེར་པོའི་ཤེས་པ་ལས་ནི་མ་ཡིན་ཏེ། ཇི་ལྟར་མཐོང་བ་
དང་ཕྲད་པ་མ་ཡིན་ནོ་སྙམ་དུ་སེམས་པ་ནི། དེ་ལས་དོན་བྱེད་དེ་མིན་ན། །ཞེས་བྱ་བའོ། །ཚད་མ་ལས་འཇུག་པའི་དོན་བྱེད་པ་བཞིན་དུ་ཚད་མ་མ་ཡིན་པ་ལས་ཀྱང་འགྱུར་རོ་ཞེས་བསྟན་པ་ནི། གཞན་ལས་ཀྱང་ཇི་ལྟར་འདོད་ཅེས་བྱ་བ་སྟེ། གཞན་དུའང་ཞེས་བྱ་བ་ནི་ཚད་མ་ལ་ཡང་ཁ་
ཅིག་ཏུ་མ་ཕྲད་པ་ཡོད་དོ་ཞེས་བྱ་བའི་དོན་ཏོ། །སྔར་མེད་ན་མི་འབྱུང་བའི་ངོ་བོར་མཐོང་བ་ཡིན་ན་གོམས་པར་འགྱུར་གྱི། གཞན་དུ་ནི་མ་ཡིན་ནོ་ཞེས་ཟེར་བ་ནི། གོམས་ལས་རྣམ་པ་མི་མཐུན་པ། །ཞེས་བྱ་བའོ། །མངོན་སུམ་ལས་མེད་པ་མི་འབྱུང་བའི་ངོ་བོ་མཐོང་བ་མ་ཡིན་དུ་ཟིན་ཀྱང་
རྗེས་སུ་དཔག་པ་ལས་ཡིན་ནོ་ཞེས་ཟེར་བ་ནི། དེ་མཐོང་ཉིད་ན་ཞེས་བྱ་བའོ། །མངོན་སུམ་མེད་ན་འབྲེལ་པ་འཛིན་པ་མེད་པའི་ཕྱིར་རྗེས་སུ་དཔག་པ་ཡང་མི་སྲིད་དོ་ཞེས་བསྟན་པ་ནི། རྗེས་དཔག་དེ་ཡང་ཞེས་བྱ་བའོ། །འོན་ཏེ་རིག་པ་ལས་གཞན་པའི་རིག་བྱ་མེད་པ་ཡིན་ལ། དེས་ན་སྒྲུབ་པར་
བྱེད་པ་དང་དོན་བྱེད་པ་ཡང་རིག་པའི་ཁོངས་སུ་གཏོགས་པ་ཉིད་ཡིན་པའི་ཕྱིར་དེ་དང་འབྲེལ་པ་བདེ་བར་གཤེགས་པ་ཉིད་ཡིན་ནོ་སྙམ་དུ་སེམས་པ་ལ། རང་དངོས་རང་དམིགས་རྣམ་པ་ནི། །ཞེས་བྱ་བ་སྨོས་ཏེ། རང་གི་ངོ་བོ་ཙམ་རིག་པ་དག་གི་གཞན་དང་གཞན་དུ་རིག་པ་མ་ཡིན་པ་ལས་དེ་གཉིས་ལས་
ཡོད་པའི་འབྲེལ་པ་རིག་པར་བྱེད་པ་ནི་མ་ཡིན་ནོ་ཞེས་བྱ་བའི་དོན་ཏོ། །འབའ་ཞིག་ནི་འབྲེལ་པ་འཛིན་པར་མི་ནུས་པ་མངོན་སུམ་འབའ་ཞིག་ནི་མ་ཡིན་ལ། དེའི་ཁྱད་པར་འཛིན་པར་མི་ནུས་པ་ཡིན་པར་བསྟན་པ་ནི། ཡུལ་དང་དུས་གཞན་ཁྱབ་པར་ནི། །ཞེས་བྱ་བ་སྟེ། གང་དུ་འབྲེལ་པ་འཛིན་པར་
བྱེད་པ་ཡིན་པ་དེར་ཡང་ཁྱབ་པ་མ་བཟུང་བ་ལས་ཚད་མ་མ་ཡིན་ན། གང་དུ་འབྲེལ་པ་ཡང་མི་འཛིན་པ་ལ་ནི་སྨོས་ཀྱང་ཅི་དགོས་ཞེས་བྱ་བའི་དགོངས་པས། ཁྱབ་མིན་ལྷན་ཅིག་འགྱུར་གང་ཡིན། །ཞེས་སྨོས་སོ། །ལྷན་ཅིག་པ་ཉིད་དུ་རེ་ཞིག་འདི་དག་གིས་མཐོང་བ་མ་ཡིན་ནམ། གང་དུ་ཡང་

འཁྲུལ་པར་ནི་མ་མཐོང་ངོ་། །མཐོང་བར་འགྱུར་བ་ཡིན་ནོ་ཞེ་ན། ངེས་པ་མེད་དོ། །དེ་ཉིད་ཀྱིས་ན་ཐེ་ཚོམ་ཡིན་ནོ་ཞེ་ན། འཁྲུལ་པར་མ་མཐོང་བ་ཁྱད་པར་ཅན་དང་ལྷན་ཅིག་པ་མ་མཐོང་བ་མང་པོ་ལས་དེ་ལྟར་འགྱུར་བ་མ་ཡིན་ནོ། །འདི་ནི་འདི་ལ་ངེས་པ་ཡིན་ནོ་ཞེས་ངེས་པ་
ཡིན་པ་དེས་ན། དོན་གྱིས་གོ་བ་དང་ལྷན་ཅིག་པའི་མངོན་སུམ་ལ་ཁྱབ་པ་ངེས་པར་འགྱུར་བ་ཡིན་ནོ་སྙམ་དུ་སེམས་པ་ལ། ཡུལ་སོགས་བཟུང་བ་མེད་པར་ནི། །ཞེས་བྱ་བ་སྨོས་ཏེ། འཁྲུལ་པ་ནི་གལ་ཏེ་མ་བཟུང་བ་ཡིན་ཡང་ཡུལ་མ་བཟུང་བ་ཡིན་ན་དེའི་མེད་པ་ཉིད་རིག་པར་བྱེད་པ་མ་
ཡིན་ནོ། །ཡོད་ཀྱང་རིག་བྱ་ནི་མ་ཡིན་ནོ། །དེ་ཉིད་ཀྱིས་ན་ཐེ་ཚོམ་ཡིན། །ཞེས་བྱ་བའི་དོན་ཏོ། །དེའི་བྱ་བ་ནི་ཡུལ་ལ་སོགས་པའོ། །དེ་ལྟ་ན་ཡང་ཐ་སྙད་པ་རྣམས་ཀྱིས་འདའ་བར་བྱ་བ་མ་ཡིན་པའི་ཕྱིར་རྟོགས་པར་བྱེད་པ་ཉིད་དང་། དེ་ལས་བཟློག་པ་ཚད་མ་མ་ཡིན་པ་ཉིད་ལས་
གཞན་པ་མ་མཐོང་བའི་ཕྱིར་ཁས་བླང་བར་བྱ་བ་ཡིན་པར་ཚིགས་སུ་བཅད་པ་གཉིས་ཀྱིས་གོ་རིམས་བཞིན་དུ་བསྟན་པ་ནི། དེ་ཕྱིར་རང་ལས་ཚད་མ་ཉིད། །ཅེས་བྱ་བའོ། །དེ་ལ་རེ་ཞིག་གནོད་པ་མེད་པའི་རྟོགས་པ་ཉིད་ཚད་མ་ཡིན་ན། སྐྱེས་པའི་དུས་སུ་ཚད་མ་དང་ཅིག་ཤོས་དག་མཚུངས་
པ་ཡིན་པར་བསྟན་པ་ནི། གནོད་པ་མེད་པ་ཙམ་གྱིས་ནི། །ཞེས་བྱ་བ་སྟེ། འཇུག་པའི་དུས་ཕྱིས་གནོད་པ་མེད་པ་ཉིད་དུ་ནི་སྔར་མ་ངེས་པ་ཡིན་ན། ཇི་ལྟར་འཇུག་པའི་རྒྱུར་འགྱུར་ཞེས་བསྟན་པ་ནི། ཐོབ་པའི་དུས་སུ་འང་ཞེས་བྱ་བའོ། །དོན་བྱེད་པ་ལ་མི་བསླུ་བ་ཉིད་ཀྱང་ཚད་མ་ཡིན་
ལ། འཇུག་པའི་སྔ་རོལ་དུ་ངེས་པ་མེད་པ་ནི་འཇུག་པའི་ཡན་ལག་མ་ཡིན་པ་ཁོ་ནའོ་ཞེ་ན། དེ་ཡང་རང་དངོས་སོ་ཞེས་བྱ་བ་སྨོས་སོ། །ཐ་སྙད་པ་རྣམས་ཀྱིས་འདའ་བར་མི་བྱ་བ་ཉིད་ཡིན་ཞེས་བྱ་བ་ལ་རིགས་པ་ཅིར་ཡང་མེད་ལ། རིགས་པས་བརྟགས་པ་ན་རང་ལས་སམ་གཞན་ལས་ཀྱང་
རུང་ཚད་མ་ཉིད་དུ་རྣམ་པར་གནས་པ་མ་ཡིན་ཞེས་པ་ནི་ཕྱོགས་སྔ་མའོ། །གྲུབ་པའི་མཐའ་ནི་ཤེས་པའི་རང་གི་ངོ་བོ་སྐད་ཅིག་མ་ཉིད་དུ་ཤེས་པ་ཙམ་ཉིད་ལ་སོགས་པ་ལ། ཐར་པ་འདོད་པ་རྣམས་ཀྱིས་གཞལ་བྱ་ལ། གཞན་ལ་ལྟོས་པ་མེད་པ་ཉིད་ཀྱིས་རང་རིག་པས་ངེས་པ་ནི་རང་ཉིད་ལས་

ཏེ་དོན་དམ་པ་པའི་ཚད་མ་ཉིད་ཡིན་ནོ། །ཕྱི་རོལ་ལ་ནི་ཐོབ་བྱ་དང་འབྲེལ་པ་ལ་སོགས་པ་གཞན་ལ་ལྟོས་པའི་ཕྱིར་རང་རིག་པ་མ་ཡིན་པ་ལ་ཐོག་མ་མེད་པའི་བག་ཆགས་ལས་སྐྱེས་པའི་ཐ་སྙད་ཀྱི་མིང་ཅན་གྱི་རྣམ་པར་རྟོག་པ་དེ་གཙོ་བོར་འགྱུར་བའི་རྗེས་སུ་དཔག་པས་རྟོགས་པ་ནི་གཞན་ལས་ཏེ།
དོན་དམ་པ་མ་ཡིན་པ་སྟེ། མངོན་སུམ་ལ་སོགས་པའི་ཚད་མས་རྟོགས་པ་མ་ཡིན་པའི་ཕྱིར་རོ། །འདི་ལས་ནི་ཇི་ལྟར་མཐོང་བ་ལས་དེ་ཁོ་ན་ཉིད་དུ་རྣམ་པར་གཞག་པའི་ཕྱིར་གཉི་ག་ཙུག་ཀྱང་རིགས་པ་ཡིན་པར་བསྟན་པ་ནི། འདིར་བསྟན་པ། རང་ལས་རང་གི་ངོ་བོ་རྟོགས། །ཞེས་བྱ་བའོ། །ཤེས་
པའི་རང་གི་ངོ་བོ་ཉིད་ཚད་མར་གྲུབ་པ་ཡིན་པར་ནི་མི་རིགས་ཏེ། གཞན་གྱི་ངོ་བོའི་ཡང་སྔོན་པོ་ལ་སོགས་པར་ནི་བདེ་བ་ལ་སོགས་པ་རིགས་པའི་དུས་སུ་རིག་པའི་ཕྱིར་རོ། །བདེ་བ་བཞིན་དུ་ཤེས་པའི་རང་གི་ངོ་བོ་རིག་པ་ཉིད་ནི་སྔོན་པོ་ལ་སོགས་པའི་དོན་བྱེད་པ་མ་ཡིན་ཏེ