Luận tạng Tây Tạng (Tengyur) — Tập 180

འབྲེལ་པ་ལ་སྦྱོར་བར་བྱེད་པ་མ་ཡིན་ཏེ། མ་ངེས་པ་ཡང་ཡིན་པར་བསྟན་པ་ནི། སྐྱེ་གཉིས་པ་དག་ཀྱང་ཞེས་བྱ་བའོ། །དེ་རྣམས་ནི་འཁྲུལ་པ་མི་སྲིད་པའི་ཕྱིར་རོ་ཞེ་ན། སྡིག་པ་ལ་ཞེས་བྱ་བ་སྨོས་ཏེ།
དེ་ཁོ་ན་ཉིད་ཤེས་པ་དང་། འཁྲུལ་པ་ནི་འགལ་བ་ཡིན་གྱི་རིགས་གསུམ་པོ་ཉིད་ཀྱི་འཁྲུལ་པ་ནི་བཀག་པ་མ་ཡིན་ནོ། །ལུང་གཞན་འཁྲུལ་པ་ཉིད་ཡིན་པས་ཚད་མ་ཉིད་མ་ཡིན་ལ། འཇུག་པ་རྣམས་ནི་སྐྱེ་གཉིས་པ་ཉིད་མ་ཡིན་ནོ་ཞེ་ན། ཕན་ཚུན་བརྟེན་པ་ཡིན་ནོ་ཞེ་ན། བསྟན་པ་ནི་སྡིག་
ལས་ཞེས་བྱ་བའོ། །འཁྲུལ་པ་ཉིད་དང་ཁྱད་པར་ཅན་གྱི་རིགས་གསུམ་པོ་ཉིད་དུ་མི་འགྲུབ་སྟེ། ཚད་མ་མེད་པའི་ཕྱིར་རོ་ཞེས་བསྟན་པ་ནི། རིགས་དང་རུས་དང་ཞེས་བྱ་བ་སྟེ། རྣམ་པ་འཆོལ་པ་ཞེས་བྱ་བ་ནི་རལ་པ་ཅན་དང་། འདམ་འབྱིན་ལ་སོགས་པའོ། །རུས་ཀྱི་མཚན་
ཉིད་སྐྱེ་བ་གཉིས་པ་ཉིད་ཡིན་པ་ཉིད་གསལ་བ་ཡིན་ནོ། །ཐུ་ཡུ་ཞེས་བྱ་བ་ལ་སོགས་པ་ལ་གདམས་ངག་ལ་ལྟོས་པས་མངོན་སུམ་དུ་ངེས་པ་མ་ཡིན་པར་བསྟན་པ་ནི། མངོན་སུམ་དོན་ལ་གཞན་གྱི་ནི། །ཞེས་བྱ་བ་སྟེ། ས་འོག་དང་འདྲ་བར་ནམ་མཁའ་མཐོང་ངོ་ཞེས་བྱ་བའི་
རིགས་པ་ལས་སོ། །མངོན་སུམ་ནི་ངེས་པར་བྱེད་པ་མ་ཡིན་ལ། གདམས་ངག་ནི་གདམས་ངག་ཏུ་བྱ་བ་ལ་ངེས་པ་ཡིན་གྱི། དེ་བཞིན་དུ་ནི་མ་ཡིན་ནོ་སྙམ་དུ་སེམས་པ་ལ། གདམས་ངག་ཡོད་པའི་ཞེས་བྱ་བ་སྨོས་ཏེ། མངོན་སུམ་ཙམ་བཞིན་དུ་གདམས་ངག་ཡོད་པ་ཙམ་ཡང་
ཐེ་ཚོམ་ཅན་ཉིད་ཡིན་ནོ་ཞེས་བྱ་བའི་དོན་ཏོ། །གདམས་ངག་གི་བྱེ་བྲག་ངེས་པ་ཅན་ཡིན་ན། མངོན་སུམ་གྱི་བྱེ་བྲག་ཀྱང་ཡིན་པར་བསྟན་པ་ནི། གལ་ཏེ་བྲམ་ཟེ་ཞེས་བྱ་བའོ། །མངོན་སུམ་ཙམ་དུ་སེམས་ན་གདམས་ངག་ཙམ་ཡང་མཚུངས་པ་ཡིན་ནོ་ཞེས་བྱ་བ་བསྟན་པ་ནི། དེ་ལྟ་ཡིན་

ནོ་ཞེ་ན་ནི་ཞེས་བྱ་བའོ། །དེ་ལྟ་ན་ཡང་ཨུཏྤལ་སྔོན་པོ་བཞིན་དུ་གཉི་ག་ཡིན་ན་མ་འཁྲུལ་པ་ཅན་ཡིན་ནོ་སྙམ་དུ་སེམས་པ་ལ། དེ་ཉིད་ཀྱི་ཕྱིར་ཞེས་བྱ་བ་སྨོས་སོ། །ཨུཏྤལ་དང་སྔོན་པོ་དག་ནི་ཕན་ཚུན་ལྟོས་པ་མ་ཡིན་ཏེ། རང་གི་ཡུལ་ལ་རྣམ་པར་འཇོག་པ་ཡིན་ཡང་མངོན་སུམ་དང་
གདམས་ངག་དག་ནི་དེ་ལྟ་མ་ཡིན་ཏེ། ཡུལ་ངེས་པ་མ་ཡིན་པའི་ཕྱིར་རོ་ཞེ་ན། གདམས་ངག་མེད་པར་ཞེས་བྱ་བ་སྨོས་སོ། །མངོན་སུམ་ལ་ངེས་པ་མ་ཡིན་པའི་སྐད་ཅིག་མ་ཡང་སྔོན་པོས་ངེས་པ་ལ་རྗེས་སུ་དཔོག་པར་བྱེད་དོ། །དེ་བཞིན་དུ་རིགས་ཀྱང་སྐྱེས་བུ་མངོན་སུམ་
དུ་གྱུར་པ་ལས་དེར་མ་ངེས་པ་གདམས་ངག་ལས་དཔོག་པར་བྱེད་པ་ཡིན་ནོ་སྙམ་དུ་སེམས་པ་ལ་གལ་ཏེ་དོན་གྲུབ་ཅེས་བྱ་བ་སྨོས་ཏེ། མངོན་སུམ་གྱི་སྔོན་པོ་ཙམ་དུ་ངེས་པ་ལ། དེ་སྐད་ཅིག་མ་ཉིད་དུ་མ་ངེས་པ་ལ་རྗེས་སུ་དཔག་པས་སྐད་ཅིག་མ་ཉིད་དུ་དཔོག་པར་བྱེད་པ་མ་ཡིན་
ཏེ། སྐད་ཅིག་མ་ཉིད་མ་ཡིན་པ་བཞིན་དུ་དེ་དང་འགལ་བས་གཞི་མ་གྲུབ་པ་བཞིན་དུ་གོ་བར་བྱེད་པ་མ་ཡིན་པའི་ཕྱིར་རོ། །དེ་བཞིན་དུ་རིགས་པ་དང་བྲལ་བའི་དངོས་པོ་མངོན་སུམ་པ་དང་དེ་སྒྲུབ་པར་བྱེད་པའི་གདམས་ངག་འགལ་བ་ཅན་ཡིན་ཞེས་བྱ་བའི་དོན་ཏོ། །མངོན་སུམ་གྱི་
དངོས་པོ་ཙམ་དུ་རྟོགས་པ་ལ་རྗེས་སུ་དཔག་པ་དང་གདམས་ངག་གིས་སྐད་ཅིག་མ་ཉིད་དང་། སྐྱེ་བ་གཉིས་པ་ཉིད་དུ་ཡང་རྟོག་པར་བྱེད་དོ་ཞེས་བྱ་བ་མ་ཉམས་པར་ཅིས་མི་འགྱུར་སྙམ་དུ་སེམས་པ་ལ། རེ་ཞིག་དང་པོར་ཞེས་བྱ་བ་སྨོས་ཏེ། སྐད་ཅིག་མ་ཉིད་དང་རིགས་དང་
བྲལ་བར་ཡང་རྟོགས་པ་ཡིན་ན་མངོན་སུམ་གྱིས་སམ་གཞན་གྱིས་ཀྱང་རུང་སེར་པོ་ལས་སྔོན་པོ་བཞིན་དུ་དེ་དང་ལྡན་པར་རྟོགས་པར་མི་ནུས་སོ་ཞེས་བྱ་བའི་དོན་ཏོ། །དེས་ན་གཞན་གྱིས་ཞེས་བྱ་བ་དེ་དང་འགལ་བས་ཚད་མ་གཞན་ལ་ལྟོས་པ་ཡིན་ནོ་ཞེས་བྱ་བའི་དོན་ཏོ། །དེའི་
ཕྱིར་རྗེས་སུ་དཔག་པའམ་གདམས་ངག་ཀྱང་རུང་མངོན་སུམ་གྱིས་བཅད་པ་ཉིད་ལ་ངེས་པར་བྱེད་པ་ཡིན་གྱི་དེ་དང་འགལ་བ་ཅན་ནི་མ་ཡིན་ཏེ། མི་ནུས་པའི་ཕྱིར་རོ་ཞེས་བསྟན་པ་ནི། གལ་ཏེ་མངོན་སུམ་གྱིས་མ་རྟོགས་ན་ཞེས་བྱ་བའོ། །འོན་ཏེ་གདམས་ངག་ལས་དབང་པོ་

ལས་འདས་པའི་རིགས་ཁོ་ན་ཅན་རྟོགས་པ་ཡིན་ནོ་ཞེ་ན། མ་ཤེས་པར་ཞུགས་པ་ཞེས་བྱ་བ་སྨོས་ཏེ། སྐྱེས་བུས་བྱས་པ་མ་ཡིན་པ་ལས་དོན་རྟོགས་པ་མ་ཡིན་ཏེ། ངེས་པ་མེད་པའི་ཕྱིར་རོ། །སྐྱེས་བུས་བྱས་པ་ནི་མངོན་སུམ་ལ་སོགས་པ་ལ་མ་ལྟོས་
པར་དོན་རྣམས་ལ་ཚད་མ་མ་ཡིན་ཏེ། ནུས་པ་མེད་པའི་ཕྱིར་རོ་ཞེས་བྱ་བའི་དོན་ཏོ། །རིགས་རྒྱུན་མ་ཆད་པར་ནི་དྲན་པ་རྣམ་པར་མ་ཆད་པ་ལས་ཤེས་པ་མ་ཡིན་ནམ། བུ་ནི་ཕ་ལས་པ་ཡང་རང་གི་ཕ་ལས་དེ་ཡང་རང་གི་ཕ་ལས་ཡིན་ནོ་སྙམ་དུ་སེམས་ན། རུས་ནི་རྣམ་པར་མ་
འཆད་པའང་། །ཞེས་བྱ་བ་སྨོས་ཏེ། དེས་མ་ཡིན་ནི་ངེས་པར་མ་གྱུར་པའོ། །རང་ཉིད་ཀྱི་ཕ་ཉིད་ཀྱང་དབང་པོ་ལས་འདས་པ་ཡིན་པའི་ཕྱིར་སུ་ཡིན་པའི་ངེས་པ་མེད་ན་དེའི་རུས་ཇི་ལྟར་ངེས་པ་ཡིན། དྲན་པ་ནི་སྒྲོ་བཏགས་པ་ལ་སོགས་པ་འགའ་ལས་ཀྱང་འཁྲུལ་པ་ཡིན་པའི་
ཕྱིར་སྒྲུབ་པར་བྱེད་པ་མེད་པ་ཡིན་ནོ། །རིགས་འཆོལ་བར་གསལ་བ་ཉིད་ནི་རྣམ་པ་ཆད་པ་ཡིན་པར་བསྟན་པ་ནི། སུ་ཏཱ་ཞེས་བྱ་བ་སྟེ་དེ་མཐོང་བ་ལས་མ་འོངས་པའི་ཕྱིར་མ་མཐོང་བ་ལ་ཡང་ཐེ་ཚོམ་ཟ་བ་ཁོ་ན་ཡིན་པར་བསྟན་པ་ནི་ཞེས་བྱ་བའོ། །འདི་ལས་འདི་སྐྱེས་པར་དེའི་མས་
ཤེས་སོ་ཞེ་ན། དེ་ཇི་ལྟར་རང་གི་སྐྱོན་བསལ་བར་སྟོན་པར་བྱེད། དེའི་ཕྱིར་དེའི་ཚིག་ནི་ཡིད་ཆེས་པར་བྱ་བ་མ་ཡིན་པར་བསྟན་པ་ནི། འདི་ནི་ཐོགས་མེད་ཅེས་བྱ་བའོ། །རིག་བྱེད་ཀྱི་དོན་དང་འབྲེལ་པ་མ་ཡིན་པ་ཕྱིས་འབྲེལ་པ་ཡིན་ན། སྒྲ་དང་དོན་རྟག་པ་ཡིན་ལ།
དེ་ཇི་སྲིད་གནས་པར་འབྲེལ་པ་ཡང་རྟག་པར་འགྱུར་བའི་ཕྱིར་འགལ་བ་ཉིད་ཡིན་པར་བསྟན་པ་ནི། དོན་མེད་པའི་རིག་བྱེད་ཅེས་བྱ་བ་སྟེ། བརྡར་བྱས་པ་ཅན་ཡང་ཕྱིས་ཇི་ལྟར་འགྱུར། འབྲེལ་པ་ཅན་མ་ཡིན་པ་ཡང་བརྡ་འམ་གཞན་ལས་ཀྱང་རུང་། འབྲེལ་པ་ཅན་དུ་
མི་འགྱུར་རོ་སྙམ་དུ་སེམས་པ་ལ། བྱ་བ་མེད་པའི་རང་བཞིན་ནི་ཞེས་སྨོས་སོ། །བརྡ་ལས་འབྲེལ་པ་ཅན་དུ་འགྱུར་རོ་ཞེས་སྨྲ་བ་མ་ཡིན་ནམ། འོ་ན་ཇི་ལྟ་ཞེ་ན། བརྡ་ཡོད་པ་ཡིན་ན་དེའི་བག་ཆགས་སད་པས་བརྡར་བྱས་པའི་ཡུལ་དྲན་པར་འགྱུར་བ་ཡིན་ནོ། །སད་

པ་ཡང་སྒྲ་ཁོ་ན་ལས་ནི་མ་ཡིན་ཏེ་གཞན་འགའ་ལས་འབད་པ་ལ་སོགས་པ་ལས་ཀྱང་འབྱུང་བའི་ཕྱིར་རོ། །དེ་ལྟར་ཡང་ཚད་མ་རྣམ་པར་ངེས་པ་ལས། དེ་ལས་འདི་རྣམས་ལ་ལར་ཅུང་ཟད་ཀྱང་མ་གྲུབ་པ་ཉེ་བར་བླངས་པ་མེད་དོ་ཞེས་སྨོས་པའོ། །མི་རྟག་པ་ནི་རེས་འགའ་བར་རང་བཞིན་
གྱིས་འགྱུར་བ་ཡིན་པར་བསྟན་པ་ནི། དོན་ཡོད་པ་དང་མེད་པ་ན་ཞེས་བྱ་བ་སྟེ། རིག་བྱེད་ལས་དོན་བྱེད་པ་ལ་དོན་ནི་དོན་དམ་པའོ། །ཚུལ་ནི་ལམ་མོ། །བྱེད་པ་ནི་བྱེད་བཞིན་པ་ཞེས་བྱ་བ་ཇི་ལྟར་ཐ་སྙད་མི་བསླུ་བ་ཡིན། མ་རྟོགས་པའི་དོན་གསལ་བར་བྱེད་པ་ཉིད་དོ། །འགའ་
ཞིག་ནི་ཞེས་བྱ་བ་ནི་རིགས་གསུམ་པོ་ལས་གཞན་པ་ནི་དེ་ཁོ་ན་ཉིད་དུ་དོན་དང་འབྲེལ་པ་སྒྲུབ་པར་བྱེད་པ་མ་ཡིན་ཏེ། མ་ངེས་པའི་ཕྱིར་རོ་ཞེས་བྱ་བའི་དོན་ཏོ། །མངོན་དུ་བྱེད་པ་དང་འབྲེལ་པ་རྟོགས་པ་མེད་ན་རྟོགས་པ་ཙམ་ཡིན་པའི་ཕྱིར་ཚད་མ་མ་ཡིན་ནོ་ཞེས་བསྟན་པ་ནི། ཡོངས་སུ་མ་
བརྟགས་པའི་ཕྱིར་ཞེས་བྱ་བའོ། །སྤྱི་ལས་རྟོགས་པ་ཡིན་ན་བྱེ་བྲག་ལས་རྗེས་སུ་བསྒྲུབ་པར་བྱ་བ་ཡིན་ཞེས་བྱ་བ་ལ་སོགས་པ་ནི་གསལ་བ་ཡིན་ཞེས་བསྟན་པ་ནི། གྲུབ་པ་ནི་གཞན་ལ་ཞེས་བྱ་བ་སྟེ། གཞན་དུ་རྟོགས་པ་ལ་གཞན་ལ་རྗེས་སུ་བསྒྲུབ་པ་མ་ཡིན་ལ། རྟོགས་པ་
ཉིད་རང་གི་ངོ་བོས་རྗེས་སུ་བསྒྲུབ་པ་ཡང་མ་ཡིན་ཏེ། གྲུབ་པའི་ཕྱིར་རོ་ཞེས་འཆད་པར་གྱུར་པ་ལ་ཡང་བལྟ་བར་བྱ་བའོ། །མཐར་ཐུག་པ་མེད་ན་འཇུག་པའི་མཚམས་མེད་པའི་ཕྱོགས་དོན་མེད་པ་ཡིན་ནོ་ཞེས་ཟེར་བ་ནི། འོན་ཏེ་ཞེས་བྱ་བ་ལ་སོགས་པ་སྟེ། མི་བསླུ་བར་བྱ་བ་
ཉིད་ག་ལས་ཤེ་ན། ངེས་པར་སྦྱར་བ་དང་བྲལ་བ་ཞེས་བྱ་བ་སྟེ། རྟོགས་པའི་དུས་སུ་ཡང་ཡུལ་ངེས་པར་སྦྱར་བྱ་ཉིད་རྟོགས་པར་བྱེད་ཅེས་བྱ་བའི་དོན་ཏོ། །ཡུལ་ངེས་པར་སྦྱར་བྱ་མ་གཏོགས་པར་ངེས་པར་སྦྱོར་བར་མི་འགྱུར་བར་ཅི་ལས་ཤེས་ཤེ་ན། སྨྲས་པ། གང་ཕྱིར་ངེས་
སྦྱོར་འཛུད་བྱེད་ཀྱི། །ཞེས་བྱ་བ་སྟེ། ཡུལ་ལ་འཛུད་པར་བྱེད་པར་འགྱུར་པ་ནི་འབྲས་བུ་ཉིད་དོ། །རྟོགས་བཞིན་པ་ནི་འཛུད་པར་བྱེད་པས་བྱས་པ་ཡིན་པ་དེས་ན། དེ་ནི་གཟུད་པར་བྱ་བ་ལ་ལྟོས་པ་ཡིན་ཏེ། འབྲས་བུ་མཐོང་བ་ལས་ཞེས་ཟེར་བ་ནི། ངེས་པར་སྦྱར་བྱའང་ཞེས་བྱ་བ་

སྟེ། དེ་ལྟ་བུའི་ངེས་པར་སྦྱོར་བ་དེ་ཡང་ཞེས་བྱ་བ་ནས་མི་འགྱུར་རོ་ཞེས་བྱ་བའི་བར་ནི་རྒོལ་བ་སྟེ། རང་གི་བྱ་བ་སྒྲུབ་པར་བྱེད་པར་བསྒྲུབ་པ་ཡིན་ནོ། །ཕན་ཚུན་འབྲེལ་པ་ཡང་འཇུག་པ་འཕེན་པར་བྱེད་པ་ཉིད་ཀྱིས་ངེས་པར་སྦྱོར་བ་ལ་ངེས་པར་སྦྱོར་བ་གཞན་གྱི་
དོན་རྟོགས་པར་འགྱུར་རོ་ཞེས་བསྟན་པ་ནི། ཁམས་ཀྱི་དོན་ལ་སོགས་པ་ཞེས་བྱ་བའོ། །གཞན་གྱི་ངོ་བོས་ནི་ཐུན་མོང་བས་སམ་སྒྲོ་བཏགས་པས་ཀྱང་རུང་རྟོགས་པ་ཡིན་ནོ་ཞེ་ན། གཞན་གྱི་ངོ་བོར་ཞེས་བྱ་བ་སྨོས་ཏེ། གཞན་གྱི་ངོ་བོ་ཞེས་བྱ་བ་ནི་སྤྱི་རྟོགས་པ་ནི་མ་ཡིན་ཞེས་སྤྱི་ནི་
དངོས་པོ་ཐམས་ཅད་ཀྱི་ཞེས་བྱ་བ་དེར་བསྟན་ཟིན་ཏོ། །སྒྲོ་བཏགས་པ་ནི་དངོས་པོ་ཡོད་པ་མ་ཡིན་པ་ལ་རྣམ་པར་རྟོག་པས་བྱས་པའི་ཞེས་པས་ཕྱི་རོལ་དུ་རྟོགས་པ་མ་ཡིན་ནོ་ཞེས་བྱ་བ་འདི་ལ་ཡང་སྤྱི་བཞིན་དུ་ཐལ་བར་འགྱུར་རོ། །གཟུང་བྱའི་རྣམ་པའི་རང་རིག་པས་རྟོགས་པ་ཡིན་ཡང་
དེའི་རྟོགས་པ་མ་ཡིན་པར་བསྟན་པ་ནི། གཞན་ནི་གཞན་ངོ་བོར་ཞེས་བྱ་བའོ། །འདི་ནི་ཆུ་ཡོད་ཅེས་བྱ་བའི་གཟུང་བའི་རྣམ་པའི་དེ་ཁོ་ན་ཉིད་དུ་མངོན་པར་སེམས་པར་བྱེད་པ་ནི་རྟོགས་པས་ཡིན་པར་སྨྲ་བ་ནི་དེ་ལྟ་ཡིན་དང་ཞེས་བྱ་བའོ། །དེ་རྣམས་རྟོགས་པས་བསྲེས་པ་ཡིན་
ཞེས་པའི་རིགས་པས་རྟོགས་པ་ཉིད་དེ་ལྟ་བུའི་བྱ་བ་རྣམས་གཟུང་བའི་རྣམ་པ་ལས་ཤེས་པར་བྱ་བའི་ཁོངས་སུ་གཏོགས་པ་ཡིན་ཞེས་བྱ་བའི་དོན་ཏོ། །དེ་བཞིན་དུ་བྱ་བ་རྟོགས་པ་ཡིན་ན་ཕྱི་རོལ་དུ་སྣང་བ་མ་ཡིན་ཡང་དེ་ལས་གཞན་པར་མངོན་པར་ང་རྒྱལ་བ་མེད་པའི་ཕྱིར་གཞན་སེལ་
བ་རྟོགས་པ་ཡིན་པར་བསྟན་ཏོ། །དེས་ན་ཡང་ཕྱི་རོལ་ལ་འཇུག་པར་བསྟན་པ་ནི་གཞན་སེལ་བའི་ཞེས་བྱ་བའོ། །གཟུང་བའི་རྣམ་པ་ཡང་རང་རིག་པ་མ་ཡིན་ནམ། ཕྱི་རོལ་བཞིན་དུ་མངོན་པར་བརྗོད་པ་ལས་བྱུང་བའི་ཤེས་པའི་ཡུལ་ནི་མ་ཡིན་ནོ། །ཕྱི་རོལ་ཉིད་དུ་ཞེན་
པའི་ཡུལ་ཉིད་དུ་ཞེན་པས་སྒྲོ་བཏགས་པའི་བརྗོད་བྱ་ཡིན་ཏེ། ཚད་མ་རྣམ་པར་ངེས་པ་ལས། རང་གི་སོ་སོར་སྣང་བ་ནི་དོན་མ་ཡིན་པ་ལ་དོན་དུ་ཞེན་པ་ཞེས་སྨོས་ཏེ། དོན་མ་ཡིན་པ་ཉིད་ནི་སྒྲོ་བཏགས་པ་ཉིད་ནི་གཟུང་བའི་རྣམ་པ་ལས་གཞན་མ་ཡིན་ནོ་ཞེས་བསྟན་པ་ནི།

མཆོད་སྦྱིན་ལ་སོགས་པ་གྱིས་ཤིག་ཅེས་བྱ་བའོ། །ཕྱི་རོལ་གྱི་དོན་བྱེད་པ་ནི་སྒྲ་ལས་ངེས་པར་བྱེད་པ་ཡིན་གྱི་སྒྲོ་བཏགས་པ་ནི་མ་ཡིན་ནོ། །དེ་ཉིད་ཀྱིས་ནི་འཇུག་པ་ཡིན་གྱི་སྒྲོ་བཏགས་པས་རང་དབང་དུ་གཏོགས་པ་ཡིན་ན་ནི་ཕྱི་རོལ་ལ་འཇུག་པ་མ་ཡིན་ནོ། །ཚད་མ་རྣམ་པར་ངེས་པ་ལས།
འདི་ནི་བུམ་པ་ཞེས་ཤེས་ལ་ཁ་དོག་སྣང་ཕྱིར་རོ་ཞེས་སྨོས་པའོ། །སྣ་ཚོགས་པ་ཉིད་མ་རྟོགས་པ་ནི་སྒྲོ་བཏགས་པའི་ཕྱི་རོལ་ཉིད་དོ་ཞེས་པའི་མངོན་པར་ཞེན་པས་འཇུག་པ་ཡིན་ན། གཟུང་བའི་རྣམ་པ་ཉིད་ཀྱི་ཕྱི་རོལ་དུ་ཞེན་པ་ནི་བཏགས་པ་པ་ཡིན་ལ། གཞན་གྱི་ནི་ཕྱི་རོལ་ཉིད་དུ་སྒྲོ་
བཏགས་པ་ཉིད་ཡིན་ཡང་དེ་ལ་ཡང་གཞན་ཉིད་ཡིན་གྱི་ཕྱི་རོལ་ནི་མ་ཡིན་ལ། སླར་ཡང་བཏགས་པ་ཡང་གཞན་ཉིད་ཡིན་ན་ཐུག་པ་མེད་པའི་ཕྱིར་རྟོགས་པ་མེད་པས་ཕྱི་རོལ་ལ་འཇུག་པ་མེད་དོ། །རྟོགས་པ་ཡིན་ན་ཡུལ་ནི་དེའི་བདག་ཉིད་ཀྱིས་ཕྲད་པ་ཡིན་ཞེས་བྱ་བའི་དོན་ཏོ། །
ཕྱི་རོལ་གྱི་ཤེས་པ་ཡིན་ན་དེ་ཉིད་རྟོགས་པ་དང་འཇུག་པའི་ཡུལ་ཡིན་དུ་ཟད་མོད། གཟུང་བའི་རྣམ་པ་འཛིན་པས་ཅི་ཞིག་བྱ་བ་བསྟན་པ་ནི་བྱེད་པ་པོ་ཉིད་ཀྱང་ཞེས་བྱ་བ་སྟེ། རྟོགས་པ་པོ་ཙམ་ཡིན་གྱི་ཉེ་བ་ན་གནས་པ་མ་ཡིན་ཞེས་བྱ་བའི་དོན་ཏོ། །གང་དག་བྱུང་གྱུར་དེ་ཉིད་ལས་
ཞེས་བྱ་བའི་རིགས་པས་དེ་ཉིད་ཇི་ལྟར་མ་ཡིན་ཞེ་ན། རྟོགས་པའི་དུས་ན་ཞེས་བྱ་བ་སྨོས་ཏེ། བྱེད་པ་པོ་མ་ཡིན་པ་ལས་ཅིག་ཤོས་ནི་གཞན་ཡིན་ནོ་ཞེས་བྱ་བའི་དོན་ཏོ། །དེ་ལྟ་མིན་ན་བྱ་བའི་དངོས་པོ་ཉེ་བ་མ་ཡིན་པ་ཉིད་རྟོགས་པར་བྱེད་པ་ནི་སྒྲ་ཡིན་ཏེ། དེ་ཡང་། ཡང་ན་གང་
ཞིག་སྨྲ་བ་པོ། །ཞེས་རང་དབང་དུ་བརྗོད་པ་སྟེ་སྙམ་དུ་སེམས་པ་ལ། སྒྲས་སྔར་མ་རྟོགས་པ་ཞེས་བྱ་བ་སྨོས་ཏེ། འབྲེལ་པ་མ་བཟུང་བར་ནི་སུས་ཀྱང་སྒྲ་ལས་དོན་རྟོགས་པ་མ་ཡིན་ནོ། །འོན་ཏེ་ཚིག་ཉིད་ནི་ངག་མ་ཡིན་ཏེ། ཚིག་གི་དོན་ལས་འབྲེལ་པ་མི་ཤེས་པ་རྣམས་ཐེ་ཚོམ་
དང་ལྡན་པ་རྣམས་ལས་ངག་གི་དོན་ཤེས་པ་ཡིན་གྱི། དེའི་འབྲེལ་པ་འཛིན་པ་ལ་ལྟོས་པ་ནི་མ་ཡིན་ནོ་སྙམ་དུ་སེམས་པ་ན། གང་གིས་སྔར་ཞེས་བྱ་བ་སྨོས་སོ། །བྱེད་པ་པོའི་ཚིག་ལས་བྱ་བ་དང་བཅས་པའི་ཚིག་གི་དོན་སྔར་རྟོགས་པ་ཁོ་ན་རྟོགས་བྱ་ཡིན་གྱི་གཞན་དུ་ནི་མ་

ཡིན་ཏེ། བྱེད་པ་པོ་ཉིད་དུ་མི་འཐད་པའི་ཕྱིར་རོ། །དེ་ལྟ་ཡིན་དང་བྱེད་པ་པོ་ཡང་འཕངས་པ་ཡིན་ནོ། །དེ་ལྟར་སྔར་དམིགས་པའི་ཕྱིར་རོ། །དེ་བཞིན་དུ་འཕངས་པའི་བྱེ་བྲག་ཅན་ནི་ཉེ་བ་ན་གནས་པའི་བྱ་བ་འཕེན་པ་ཡིན་པར་ཅི་ལས་ཤེས་ཤེ་ན། དེ་བཞིན་
དུ་སྔར་དམིགས་པའི་ཕྱིར་ཏེ། དེ་ལྟ་ན་ཉེ་བ་ནི་གནས་པ་དང་རུང་བ་ལ་ལྟོས་པ་ཉིད་ནི་ཚོགས་པ་སྟེ། དེ་ཉིད་ནི་དེ་ལས་གཞན་པ་ལས་ཐ་དད་པ་ཡིན་ཞེས་བྱ་བ་ནི་སྔོན་དང་ཕྱི་མ་ཉིད་དོ། །དེས་ན་ངག་གི་དོན་ཡང་སྔར་མཐོང་བ་ལ་བརྟེན་པ་ཉིད་དུ་ཤེས་པར་བྱ་ཞེས་བྱ་བའི་དོན་ཏོ། །སྔར་
མཐོང་བའི་རྗེས་སུ་འབྲང་བ་མེད་ན་སྒྲ་ལས་རྟོགས་པ་ཡང་མེད་པ་ཁོ་ན་ཡིན་པའི་ཕྱིར་སྒྲོ་བཏགས་པའམ། ཕྱི་རོལ་ཡང་རུང་རང་དབང་དུ་འཛིན་པ་མ་ཡིན་པར་བསྟན་པ་ནི་གཞན་ནི་མ་ཡིན་ནོ་ཞེས་བྱ་བའོ། །སྔ་མའི་རྗེས་སུ་འབྲངས་ནས་མཐོང་བ་དང་སྣང་བཞིན་པ་ཐུན་མོང་པ་ཉིད་
ཀྱིས་རྟོགས་པ་ཡིན་གྱི། ཐུན་མོང་མ་ཡིན་པའི་ཡུལ་ཅན་ནི་མ་ཡིན་ཏེ། ཐུན་མོང་མ་ཡིན་པ་ནི་དངོས་པོ་ཡིན་ཏེ། དེ་མ་ཐག་ཏུ་དམིགས་པ་དང་གཞན་པའི་དངོས་པོའི་དོན་བྱེད་པར་མཐོང་བའི་ཕྱིར་རོ། །དེ་ཡང་དེ་མ་ཡིན་པ་ལས་ལོག་པའི་ངོ་བོའི་རྗེས་སུ་འབྲང་བ་ཅན་ནི་ཐུན་
མོང་བའི་ཤེས་པ་ཡིན་ཏེ། རང་གི་སྣང་བའི་རྣམ་པ་དོན་མེད་པ་དོན་ལས་གཞན་པ་ལ་གཅིག་ནས་གཅིག་ཏུ་བརྒྱུད་པ་དོན་མཐོང་བ་ལས་འོངས་པ་ལ་དོན་ཉིད་དུ་མངོན་པར་ཞེན་པས་སྐྱེས་བུ་འཇུག་པར་བྱེད་པའི་ཕྱིར་ཆ་གང་གིས་དངོས་པོར་འགྱུར་བ་མ་ཡིན་པ་དེས་དེར་མངོན་
པར་ཞེན་པས་འཇུག་པར་བྱེད་པ་ཡིན་པའི་ཕྱིར་གཞན་སེལ་བའི་ཡུལ་ཅན་དུ་བསྟན་པ་ཡིན་ནོ་ཞེས་བསྟན་པ་ནི། སྔ་མའི་རྗེས་སུ་འབྲངས་ནས་ཞེས་བྱ་བ་སྨོས་སོ། །ངེས་པ་ཅན་ལས་སྐྱེས་པའམ། ངེས་པ་ཅན་གྱི་སྒྲ་ལས་སྐྱེས་པ་ཡང་རུང་བའི་རྣམ་པར་ཤེས་པ་ཡང་གཞན་
ལས་ལོག་པའི་ངོ་བོས་འཇུག་པའི་ཡུལ་ནི་དངོས་པོ་ཡིན་པར་རྣམ་པར་གཞག་པ་ཡིན་ན་གཞན་སེལ་བའི་ཡུལ་ཅན་དུ་འགྱུར་རོ། །འདི་ནི་ཚིག་ཙམ་ལས་བྱུང་བ་དངོས་པོ་ལ་རེག་པ་མ་ཡིན་པའི་སྣང་བ་ནི་འཇུག་པའི་ཡུལ་ལ་དེ་ལྟར་རྗོད་པར་བྱེད་པའི་ཕྱིར་ཇི་ལྟར་གཞན་སེལ་བའི་

ཡུལ་ཅན་ཡིན་སྙམ་དུ་སེམས་པ་ལ་མི་འདའོ་ཞེས་བྱ་བ་སྨོས་ཏེ། ངེས་པ་ཅན་ལས་བྱུང་བ་ལ་སོགས་པ་ཉིད་གཞན་སེལ་བའི་ཡུལ་ཅན་ཡིན་པར་ནི་བདེན་མོད་ཀྱི། འདི་ནི་དེ་ལྟ་བུ་མ་ཡིན་ཡང་བརྒྱུད་པས་དངོས་པོ་མཐོང་བ་སྔོན་དུ་འགྲོ་བ་ཅན་ཡིན་པའི་ཕྱིར་དེ་ལྟར་བསྟན་པར་ནུས་པ་
ཡིན་ནོ་ཞེས་བྱ་བའི་དོན་ཏོ། །སྔར་མཐོང་བའི་དངོས་པོ་རྣམས་བསྒྲུབ་བྱ་ཉིད་དམ། སྒྲུབ་བྱེད་ཉིད་ཀྱིས་རྗེས་སུ་འབྲངས་ནས་ཚིག་གི་དངོས་པོ་ལ་རེག་པས་དངོས་སུ་བྱ་བའི་བསྒྲུབ་བྱ་དང་། སྒྲུབ་བྱེད་ཉིད་ཀྱིས་ངོ་བོས་རྟོགས་པར་བྱེད་པ་མ་ཡིན་ནམ། དེ་དག་ཙམ་གྱིས་ལྟོས་པ་དང་
བཅས་པ་འཇུག་པ་ཡིན་གྱི་འཇུག་པའི་ཡུལ་མཐོ་རིས་སྒྲུབ་པར་བྱེད་པ་ལ། དེའི་བྱེད་པ་པོ་ཉིད་དམ་ཚད་མར་བསྟན་པ་ལ་མི་འཇུག་པ་ནི་མ་ཡིན་ནོ་སྙམ་དུ་སེམས་པ་ལ་ཐམས་ཅད་དུ་ཞེས་བྱ་བ་སྨོས་ཏེ། གལ་ཏེ་ཡང་འདོད་པར་བྱ་བ་ཡིན་པའི་ཕྱིར་མཐོ་རིས་ནི་བསྒྲུབ་བྱ་ཉིད་ཡིན་ལ་སྐྱེས་བུའི་
བྱ་བའི་བྱེ་བྲག་ཡིན་པའི་ཕྱིར་མཆོད་སྦྱིན་ནི་སྒྲུབ་བྱེད་ཉིད་ཡིན་པར་སྔར་རྟོགས་པ་ཡིན་ཡང་། འདི་དག་ཕན་ཚུན་འབྲེལ་པའམ། རང་བཞིན་གཅིག་པའི་འབྲེལ་པ་ཡང་རུང་བ་སྔོན་དུ་མངོན་སུམ་ལས་སམ། གཞན་ལས་ཀྱང་རྟོགས་པ་མ་ཡིན་ཏེ། དེ་ཉིད་ཀྱིས་ན་འདོད་པ་ཙམ་
གྱིས་བསྡུས་པའི་ཚིག་གི་དོན་རྣམས་ཀྱི་ཚོགས་པ་འདི་ནི་འཁྲུལ་པ་ཡིན་ཏེ། མོ་གཤམ་གྱི་བུ་འགྲོ་བ་བཞིན་དུ་སྣང་བ་ཙམ་ཡིན་ནོ། །སྐྱེས་བུས་བྱས་པ་མ་ཡིན་པ་ལ་བསྡུས་པ་མ་ཡིན་པར་ཇི་ལྟར་ཤེས་པ་ཡིན་ཞེ་ན། ཚིག་གི་དོན་རྣམས་ནི་འཇིག་རྟེན་གྱི་རྗེས་སུ་འབྲངས་ནས་
རྟོགས་པ་ཉིད་ནི་བསྡུས་པ་རྟོགས་པའི་རྒྱུ་མཚན་ཉིད་ཡིན་གྱི། རིག་བྱེད་སྐྱེས་བུས་བྱས་པ་མ་ཡིན་པ་ནི་མ་ཡིན་ཏེ། དོན་གྱི་བྱེ་བྲག་ལ་རྗེས་སུ་སྦྱོར་བ་མ་ཡིན་པའི་ཕྱིར་ཞེས་བྱ་བའི་དོན་ཏོ། །ཐམས་ཅད་དུ་ཞེས་བྱ་བ་ནི་སྐྱེས་བུས་བྱས་པའམ་སྐྱེས་བུ་བྱས་པ་མིན་པ་ཡང་ཞེས་བྱ་བའི་
དོན་ཏོ། །བྱེད་པ་པོར་རྟོགས་པ་ཞེས་བྱ་བ་ནི་མཐོང་བའི་རྗེས་སུ་འཇུག་པའི་ཚིག་གི་དོན་རྟོགས་པ་ཡིན་གྱི། འདུས་པའི་བྱེ་བྲག་ནི་མ་ཡིན་ཏེ། དེ་ལ་མངོན་སུམ་ལ་སོགས་པའི་ཚད་མ་མི་འཇུག་པས་སོ་ཞེས་བྱ་བའི་དོན་ཏོ། །བྱེད་པ་པོ་ཉིད་ལ་སོགས་པ་རྣམས་ཀྱི་ཡང་ཚིག་དོན་

དུ་བསྟན་པ་ནི་མངོན་སུམ་ལ་སོགས་པའི་ཡུལ་ཉིད་ཡིན་པའི་ཕྱིར་སྔར་མཐོང་བའི་རྗེས་སུ་འཇུག་པ་ཅན་མ་ཡིན་པར་བསྟན་པ་ནི་མངོན་སུམ་ལས་ནི་སྔར་བྱེད་པ་པོ་ཉིད་དུ་རྟོགས་པ་ཡང་མ་ཡིན་ཏེ་ཞེས་བྱ་བའོ། །ཉེ་བ་ན་གནས་པའི་དངོས་པོའི་རང་བཞིན་ཙམ་
འཛིན་པའི་མངོན་སུམ་ཡིན་པའི་ཕྱིར་ཡུལ་དང་དུས་གཞན་དུ་འབྱུང་བར་འགྱུར་བ་ནི་གཞན་བྱེ་བྲག་ཅན་གྱི་ངོ་བོའི་བསྒྲུབ་བྱ་ཉིད་དམ། སྒྲུབ་བྱེད་ཉིད་དུ་མི་རུང་བས་དེའི་བྱེ་བྲག་གི་ངོ་བོ་ཡང་མི་རུང་བའི་ཕྱིར་འཛིན་པ་ཡང་མ་ཡིན་ཞེས་བྱ་བའི་དོན་ཏོ། །གལ་ཏེ་ཡང་མངོན་སུམ་གྱི་
བྱ་བ་ནི་དོན་མཐོང་བར་བྱེད་པ་ལ་གནས་པ་ཡིན་པའི་ཕྱིར། དོན་བྱེད་ནུས་པའམ་གཞན་དེ་མེད་པ་ཡང་མཐོང་བར་བྱེད་པ་མ་ཡིན་ཏེ། དོན་མཐོང་བ་ཡིན་ཡང་གཞན་ལས་མི་སྲིད་པ་ཐུན་མོང་མ་ཡིན་པའི་དོན་བྱེད་པ་དམིགས་པ་གཉིས་པོ་དེ་དག་གིས་བྱ་བའི་རྗེས་སུ་འབྲང་བའི་
ངེས་པས་དམིགས་པའི་དོན་ནི་ནུས་པ་ཅན་ཉིད་ཡིན་པར་རྣམ་པར་འཇོག་པར་བྱེད་ལ། དུས་གཞན་དུ་དོན་བྱེད་པར་མི་དམིགས་པ་ཡང་དེ་ཉིད་ཀྱི་ངོ་བོའི་རྗེས་སུ་འབྲང་བ་རྣམས་ནུས་པ་ཅན་ཡིན་པར་ངེས་པར་བྱེད་པ་ནི་གནོད་པ་ཅན་མེད་ནའོ། །ཡོད་ན་ནི་ནུས་པ་ཅན་མ་ཡིན་ཏེ། རྨི་ལམ་
ལྟ་བུ་ཡིན་ནོ་སྙམ་དུ་སེམས་པ་ལ། ཐ་སྙད་པའི་མངོན་སུམ་ཞེས་བྱ་བ་སྨོས་ཏེ། ཉམས་སུ་མྱོང་བའི་དོན་ཙམ་ནི་བྱ་བའི་མཐར་ཐུག་པ་ཡིན་ཏེ། ཡོད་པའམ་མེད་པའི་རྣམ་པར་དབྱེ་བ་བྱེད་པ་ནི་མ་ཡིན་གྱི། དབྱེ་བ་བྱེད་པ་ནི་དེའི་རྗེས་སུ་འབྲང་བའི་ངེས་པ་པ་ཡིན་ལ་དེ་ཉིད་དབྱེ་བ་བྱེད་
པ་ཡིན་ཞེས་སྨྲ་བ་ནི། བཏགས་པ་པའི་ཉམས་སུ་མྱོང་བས་གྲུབ་པ་ཉིད་དུ་སྨྲས་པར་འགྱུར་རོ་ཞེས་བྱ་བའི་དོན་ཏོ། །ངེས་པར་སྦྱོར་བ་ནི་རང་དབང་དང་ཅིག་ཤོས་ཉིད་ཀྱིས་རྣམ་པར་དཔྱོད་ནས་རང་གི་ངོ་བོས་དཔྱོད་པ་ནི་རུང་བ་ཉིད་ནི་དབང་བྱེད་པ་ཅན་ཉིད་མ་ཡིན་ཏེ། འོན་ཀྱང་ངེས་པར་
སྦྱར་བ་ཉིད་ཡིན་ནོ་སྙམ་དུ་སེམས་པ་ལ། དཔྱོད་པའི་ཡུལ་ལས་ཞེས་བྱ་བ་སྨོས་ཏེ། རྣམ་དཔྱོད་ལ་ནི་དཔྱོད་རྣམས་ཀྱི། །ཞེས་བྱ་བ་ནི། ལུང་ཕོག་པའི་སྒྲུབ་པས་འཕངས་པའི་རྣམ་པར་དཔྱོད་པ་ལ་འཇུག་པ་ལ་ཡང་སློབ་དཔོན་གྱི་མན་ངག་ལ་སོགས་པ་ཐབས་མ་ཡིན་པ་ཉིད་

ཀྱིས་གུས་པར་བྱ་བ་ཉིད་མ་ཡིན་ཞེས་བྱ་བའི་དོན་ཏོ། །འབྲས་བུ་དག་པའི་ཞེས་བྱ་བ་ལ་སོགས་པས་ནི་ངེས་པར་སྦྱོར་བའི་རྣམ་པར་རྟོག་པ་རྣམ་པ་བཅུ་གཉིས་ཏེ། སྐྱེས་བུའི་འཇུག་པ་འཕེན་པར་བྱེད་པ་ཉིད་དུ་ངེས་པར་སྦྱོར་བའི་མཚན་ཉིད་ལ་བྱེ་བྲག་མེད་པའི་ཕྱིར་རོ། །དེ་ཡང་སྐུལ་བྱེད་
ཅེས་བྱ་བ་ལ་འཇུག་པར་བྱེད་པ་ཚིག་ཡིན་ཏེ་ཞེས་བྱ་བ་ནི་འདིའི་དོན་ཏོ། །དེས་ན་ཡང་འབྲས་བུ་མངོན་པར་བརྗོད་པ་ཉིད་ངེས་སྦྱོར་ཡིན་པར་འཇིག་རྟེན་དུ་རྟོགས་པ་ཞེས་བྱ་བ་ནི་དེ་ལས་དེ་ཐ་སྙད་ལས་སོ། །ད་ལྟར་བའི་འབྲས་བུའི་ཡུལ་ལ་ངེས་པར་སྦྱར་བ་དང་འབྲེལ་པ་སྒྲུབ་ཅེས་བྱ་བའི་དོན་
ཡིན་ལ། དེ་ལ་མངོན་པར་རྗོད་པར་བྱེད་པ་འདིས་ངེས་པར་སྦྱོར་བར་བྱེད་པ་ནི། ངེས་སྦྱོར་ཏེ་ལིང་ང་ལ་སོགས་པའོ། །དེས་ན་ཡང་ཞེས་པའི་ཡང་ནི་གོ་རིམས་བཟློག་པས་འཇིག་རྟེན་དུ་ཡང་ཞེས་བྱ་བར་སྦྱར་རོ། །དེས་ན་འཇིག་རྟེན་དུ་རིག་བྱེད་ལ་ཡང་ཞེས་གསལ་བར་བྱེད་པ་ཡིན་
ནོ། །དེ་ཉིད་བསྟན་པ་ནི། གང་ཕྱིར་ངེས་སྦྱོར་རྐྱེན་དོན་དང་། །ཞེས་བྱ་བའོ། །འཇུག་པའི་ཡུལ་ཡིན་པའི་ཕྱིར་འབྲས་བུའི་སྒྲས་བརྗོད་པ་ཡིན་པར་སྨྲས་པ་ནི་འབྲས་བུའི་རང་བཞིན་ཞེས་བྱ་བའོ། །ལིང་ང་ལ་སོགས་པའི་དོན་ནི་འཛུད་པར་བྱེད་པ་ལ་སོགས་པའི་ངོ་བོ་མ་ཡིན་
ནམ། གཞན་ནི་མ་ཡིན་ནོ་ཞེ་ན། དེ་ཡི་ཁྱད་པར་གཞན་དག་ནི། །ཞེས་བྱ་བ་སྨོས་ཏེ། དེའི་བྱ་བའི་ངོ་བོ་འཛུད་བྱེད་ནི་དེ་ལས་ཐ་མི་དད་པ་ཡིན་ཏེ། ཤིང་གི་འབར་བ་ལྟ་བུའོ། །དེ་ནི་འཛུད་པར་བྱེད་པ་ལ་སོགས་པ་བཞིན་དུ་བྱེ་བྲག་ཉིད་ནི་འབྲས་བུའི་ཁོངས་སུ་གཏོགས་པ་
མ་ཡིན་ནོ་ཞེས་ཟེར་བ་ནི། འདིར་ནི་དེའི་ཁྱད་པར་དུ། །འདོད་པའི་འཛུད་བྱེད་ཅེས་བྱ་བ་སྨོས་ཏེ། འཛུད་པར་བྱེད་པའི་དངོས་པོའི་བྱ་བ་ནི་འཛུད་བྱེད་ཡིན་ཞེས་བྱ་བའི་དོན་ཏོ། །འཛུད་བྱེད་ཉིད་ནི་སྐྱེས་བུའི་བྱ་བ་སྟེ། བྱ་བར་འོས་པ་ཉིད་ཀྱི་ཁོངས་སུ་གཏོགས་པ་ཡིན་ཏེ།
འབྲས་བུ་ནི་ངེས་སྦྱོར་མ་ཡིན་ཏེ། དེའི་རང་བཞིན་མེད་པའི་ཕྱིར་རོ་ཞེས་ཟེར་བ་ནི། འཛུད་བྱེད་དག་པ་ངེས་སྦྱོར་དུ། །ཞེས་བྱ་བ་སྟེ། ཐམས་ཅད་དུ་གཏོང་བ་དང་། མཆོད་སྦྱིན་གྱི་ཞེས་བྱ་བ་ལ་སོགས་པ་ལིང་ང་དང་ལ་སོགས་པ་ཡང་ངོ་། །འཛུད་བྱེད་དང་དེའི་བདག་ཉིད་

ཀྱིས་འབྲེལ་པ་ཉིད་འབྲས་བུའི་གཙོ་བོ་ཡིན་པའི་ཕྱིར་ངེས་སྦྱོར་དུ་བརྗོད་དོ་ཞེས་ཟེར་བ་ནི། འདི་ནི་ངའི་འབྲས་བུ་ཞེས་བྱ་བའོ། །འབྲས་བུ་དང་དེའི་བདག་ཉིད་ཀྱིས་འབྲེལ་པས་གཙོ་བོ་ཡིན་པ་ནི་ངེས་སྦྱོར་ཡིན་ནོ་ཞེས་ཟེར་བ་ནི། འདིར་ནི་འགར་ཡང་འབྲས་མེད་པར། །
སྐྱེས་བུས་བསྐུལ་བར་བྱ་བ་མིན། །ཞེས་བྱ་བའོ། །ད་ནི་སྒྲུབ་པའི་དོན་ལས་གཞན་པའི་བསྒྲུབ་བྱ་དེ་ཉིད་ཀྱིས་འབྲས་བུའི་སྒྲའི་བརྗོད་བྱ་བཟུང་བ་ཉིད་ཡིན་ཞེས་ཟེར་བ་ནི། འབྲས་བུ་འཛུད་བྱེད་ཡུལ་ཡིན་གྱི། །ཞེས་བྱ་བ་སྟེ། བསྒྲུབ་པའི་དོན་གྱི་བྱ་བའི་ཡུལ་ནི་ལས་ཡིན་པའི་ཕྱིར་འབྲས་བུ་
ཡིན་ཏེ། ཡུལ་གྱི་ངོ་བོ་ཉིད་དུ་སྒྲོ་བཏགས་པ་ཉིད་ཅེས་བྱ་བའི་དོན་ཏོ། །དེ་ཉིད་ཀྱིས་ན་ཡུལ་ལ་ཡུལ་ཅན་དུ་ཉེ་བར་བཏགས་ནས་ཡིན་པར་བལྟ་བར་བྱའོ། །སྒྲུབ་པའི་དོན་ནི་རང་གི་བྱ་བ་ནི་བྱ་བ་དང་དེ་དང་ལྡན་པ་དག་ཐ་དད་པ་ལས་ཐ་དད་པའི་རང་གི་བྱ་བའི་ཡུལ་ལམ། གཞན་ཡང་རུང་བ་ལ་ལྟོས་ནས་
འཇུག་པའི་ཡུལ་ཉིད་ཀྱང་དེ་ལྟ་དེ་ལྟར་བསྟན་པ་ཡིན་གྱི། དེ་བཞིན་ལིང་ལ་སོགས་པ་རྣམས་ཀྱིས་རྟོགས་པ་ནི་མ་ཡིན་ནོ། །དེའི་ཕྱིར་ཡོད་པ་གཅིག་པོ་དེ་ངེས་སྦྱོར་ཐ་མ་ཐམས་ཅད་ཀྱི་རྗེས་སུ་འཇུག་པ་ཡིན་ཏེ། ལིང་ལ་སོགས་པའི་བརྗོད་བྱ་མ་ཡིན་ཞེས་ཟེར་བ་ནི། གང་ཕྱིར་གྲུབ་
ཅིག་ཚངས་པ་ནི། །ཞེས་བྱ་བའོ། །ཡུལ་ལ་བརྟེན་པའི་སྐྱེས་བུ་ནི་འཁྲུལ་འཁོར་ལ་གནས་པར་བསྟན་པ་ཡིན་ནམ་དེ་ཉིད་ཀྱང་། འདི་ནི་ང་ཡི་སྤྱད་བྱ་ཞེས། །ཞེས་བྱ་བར་ཡང་རྟོགས་པར་བྱེད་པ་ཡིན་ནོ་སྙམ་དུ་སེམས་པས། ལོངས་སྤྱད་བྱ་བ་སྐྱེས་བུ་ལ། །ལྟོས་ནས་
བསྒྲུབ་བྱ་ཉིད་དུ་གནས། །དེ་ཉིད་ཀྱིས་ནི་གཉིས་ལས་གཅིག །འཇུག་བྱེད་ཡིན་པ་ནི་གཞན་ལས་མ་ཡིན་པའི་ཕྱིར་ཟློས་པ་མ་ཡིན་ནོ་ཞེས་ཟེར་བ་ནི། འདི་ནི་ང་ཡི་སྤྱད་བྱ་ཞེས། །ཞེས་བྱ་བའོ། །དེ་བཞིན་དུ་ལོངས་སྤྱད་པར་བྱ་བ་ལ་ལྟོས་ནས་ལོངས་སྤྱོད་པར་བྱེད་པའི་སྐྱེས་
བུ་བསྟན་པ་ཡིན་ཞེས་ཟེར་བ་ནི་འདི་ངའི་འབྲས་བུ་ཞེས་བྱ་བའོ། །གཟུད་པར་བྱ་བ་ལ་སོགས་པ་ལ་གཅིག་གི་ངོ་བོ་ཡང་ངེས་པ་ཅན་དུ་གོ་བར་བྱ་བ་མ་ཡིན་ནོ། །དེས་ན་རྣམ་པ་བརྒྱད་དུ་འགྱུར་བའི་ཕྱིར་རྣམ་རྟོག་གིས་བྱས་པ་ཡིན་ནོ་ཞེས་བསྟན་པ་ནི། ངེས་པར་སྦྱོར་བ་ཚད་མའམ་ཅི་

ཞེས་བྱ་བ་སྟེ། དེ་ལྟ་བུའི་རྣམ་པར་རྟོག་པ་རྣམས་ལས་གཅིག་གི་ངོ་བོ་ཡང་འགལ་བ་ཅན་དུ་མ་མཐོང་བ་ཡིན་ཞེས་བྱ་བའི་དོན་ཏོ། །འབྲས་བུ་དག་པ་ལ་སོགས་པའི་ཕྱོགས་བསལ་ནས་བསྡུས་པའི་ངེས་སྦྱོར་གྱི་ཕྱོགས་སུན་དབྱུང་བའི་དོན་དུ། འབྲས་བུ་འཛུད་བྱེད་དང་བྲལ་བ་
ཞེས་བྱ་བ་སྨོས་ཏེ། འཛུད་པར་བྱེད་པ་ནི་སྐད་ཀྱི་དབྱིངས་ཀྱི་ཡུལ་ཉིད་ཀྱིས་འཛུད་པར་བྱ་བ་ཚོགས་པར་བྱེད་པ་ཉིད་ཀྱི་འཇུག་པ་ལ་ལྟོས་པར་བྱེད་པ་ཉིད་ཡིན་ནོ། །ཡན་འགར་བ་ནི་འཇུག་པར་བྱེད་པ་ཡང་ཡིན་པའི་ཕྱིར་འབྲས་བུ་དག་པ་ནི་འཛུད་བྱེད་དང་བྲལ་བ་ཉིད་ཀྱིས་འཇུག་
པར་བྱེད་པར་བརྗོད་པའི་ངེས་པར་སྦྱོར་བའི་སྒྲས་བསྟན་པ་ཡིན་ནོ་ཞེས་ཟེར་བ་ནི། གང་ཚེ་འབྲས་བུ་དག་པ་ལ། །ཞེས་བྱ་བའོ། །དེ་བཞིན་དུ་གཟུད་བྱ་དང་བྲལ་བའི་འབྲས་བུ་ནི་གང་ལ་ལྟོས་ནས་འཇུག་པའི་འཇུག་པར་བྱེད་པ་ཡིན་ཞེས་ཟེར་བ་ནི། གང་དུ་སྐྱེས་བུ་འབྲས་བུ་ལ། །
ཞེས་བྱ་བའོ། །འབྲས་བུ་ཉིད་ལ་འཛུད་པར་བྱེད་པ་ནི་སྐྱེས་བུའི་ཆོས་ཡིན་ལ། འབྲས་བུ་རྟོགས་པ་དག་ནི་རྟོགས་པ་ལས་སོ་ཞེས་ཟེར་ན། འཇིག་རྟེན་རྟོག་པའི་ངེས་སྦྱོར་འདི། །ཞེས་བྱ་བ་སྨོས་སོ། །འཛུད་པ་པོ་ནི་འཛུད་པར་བྱེད་པར་བྱ་བའི་ངོ་བོ་ཡིན་པའི་ཕྱིར་ཆོས་ཡིན་ལ།
དེ་ལྟ་ན་ཡང་དེ་ནི་འཕེན་བྱེད་མ་ཡིན་ཏེ། དག་པ་ཉིད་ཉམས་པར་ཐར་བར་འགྱུར་བའི་ཕྱིར་རོ། །འབྲས་བུའི་མིང་མིང་ཅན་ལ་འཛུད་པ་པོའི་ཆོས་ནི་འཛུད་བྱེད་ཡིན་ནོ་ཞེས་བྱ་བའི་དོན་ཏོ། །འཛུད་པ་པོའི་བྱ་བ་ངེས་སྦྱོར་རྫོགས་པར་བྱ་བ་ཉིད་ནི་འབྲས་བུར་བརྗོད་པ་ཡིན་ནོ་ཞེས་ཟེར་བ་ནི།
དེ་ཉིད་འབྲས་བུ་ཉིད་ཡིན་ཞེ་ན་ཞེས་བྱ་བའོ། །གྲུབ་པ་ཡིན་ཡང་ཡུལ་མཐར་ཐུག་པ་ཉིད་ཀྱིས་ངེས་སྦྱོར་བསྒྲུབ་བྱ་ཡིན་གྱི། རང་ཉིད་འགྲུབ་པ་ལ་སྐྱེས་བུ་འཇུག་པ་ལ་ལྟོས་པར་བྱེད་པ་ཉིད་ནི་ངེས་སྦྱོར་དུ་བསྟན་པ་ཡིན་ནོ་ཞེས་ཟེར་བ་ནི། བསྒྲུབ་བྱ་ཉིད་དུ་ཉེར་བརྗོད་ཅེས་བྱ་བའོ། །
འབྲས་བུ་ངེས་སྦྱོར་གྱི་ཡུལ་ལ་ཉེ་བར་བཏགས་པ་ཉིད་དུ་འགྱུར་རོ་ཞེས་བསྟན་པ་ནི། དེ་ཡི་ཡུལ་ལ་ཉེར་བཏགས་པས། །ཞེས་བྱ་བ་སྟེ། བཏགས་པའི་ངེས་སྦྱོར་ཉིད་ཀྱང་འབྲས་བུ་ཡིན་པ་ཁོ་ནས་རི་བོང་གི་རྭ་བཞིན་དུ་ཡོད་པ་མ་གྲུབ་པ་ཡིན་པས་འཛུད་པ་པོ་འགའ་ཡང་མེད་པར་

བསྟན་པ་ནི། དེ་ནི་མ་གྲུབ་པ་ཡིན་ན་ཞེས་བྱ་བའོ། །རྟོགས་པ་ནི་མངོན་དུ་བྱེད་པ་ཡིན་ལ་རང་གི་ངོ་བོ་མ་གྲུབ་པ་ལ་ནི་མི་སྲིད་པ་ཡིན་པར་བསྟན་པ་ནི། བསྒྲུབ་བྱ་རབ་ཏུ་མ་གྲུབ་དང་། །ཞེས་བྱ་བའོ། །ཤེས་པ་ཞེས་བྱ་བ་ནི་རྣམ་པར་རྟོག་པའོ། །བསྒྲུབ་པའི་
དོན་དང་དེའི་བྱ་བ་དག་གི་ངོ་བོ་འཛུད་པ་པོ་དང་འཛུད་པ་དག་གིས་རེ་རེས་བསྡུས་པའི་ཕྱོགས་བསལ་ནས་ད་ནི་ངེས་སྦྱོར་དེ་གལ་ཏེ་ཚད་མ་ཡིན་ན་གཞལ་བྱ་ཡིན་པར་མི་རིགས་ལ། འོན་ཏེ་གཞལ་བྱ་ཡིན་ན་ཚད་མ་མ་ཡིན་ཏེ། འགལ་བའི་ངོ་བོ་གཉིས་སུ་དུས་གཅིག་པར་མི་རིགས་པའི་
ཕྱིར་རོ་ཞེ་ན་བསྟན་པ་ནི། གལ་ཏེ་ངེས་སྦྱོར་དག་དོན་ན། །ཞེས་བྱ་བའོ། །ཇི་སྟེ་ངག་གི་དོན་ཡིན་པ་དེས་གཞལ་བྱ་ཡིན་ན་སྐྱེས་བུ་ནི་རྫོགས་པར་བྱེད་པ་ཉིད་ཡིན་པས་དེའི་བྱ་བ་སྐད་ཀྱི་དབྱིངས་ཀྱི་དོན་གྱི་ཡུལ་རྟོགས་པར་བྱེད་པ་ཉིད་ཀྱིས་མཆོད་སྦྱིན་ལ་སོགས་ནི་དེའི་ཐབས་ཡིན་པ་
ཉིད་ཀྱིས་འཛིན་པ་ཡིན་ལ། ངེས་སྦྱོར་ནི་འཛིན་པར་བྱེད་པ་ཉིད་ཡིན་པས་ཚད་མར་ཡང་འགྱུར་བ་ཡིན་ནོ་སྙམ་དུ་སེམས་པ་ལ། གལ་ཏེ་ངེས་སྦྱོར་དེ་ཉིད་དུ། །སྐྱེས་བུའི་ཞེས་བྱ་བ་སྨོས་ཏེ། ལིང་ང་ལ་སོགས་པའི་སྒྲ་དང་། འཛུད་བྱེད་དང་སྐྱེས་བུའི་བྱ་བ་མ་གཏོགས་པ་དེ་
རྣམས་ཀྱིས་བསྒྲུབ་པའི་དོན་འཛིན་པ་པོ་ནི་རང་དབང་ངམ་གཞན་དབང་ཡང་རུང་རྟོགས་པར་བྱེད་པ་གཞན་ནི་མེད་དོ་ཞེས་བྱ་བའི་དོན་ཏོ། །སྐྱེས་བུའི་བྱ་བ་ངེས་སྦྱོར་ནི་བསྒྲུབ་བྱ་ཡིན་པའི་ཕྱིར་སྒྲའི་བྱ་བ་ནི་འཇུག་པའི་ཡུལ་གྲུབ་པར་བྱ་བ་ཉིད་ཡིན་པའི་ཕྱིར་ལ། སྒྲའི་བྱ་བ་ནི་དེ་ཉིད་ཀྱི་
ཚེ་སྒྲ་ཉིད་ཀྱིས་སྒྲུབ་པར་བྱེད་པ་ཉིད་ཀྱི་ཕྱིར་དེའི་སྒྲུབ་བྱེད་དུ་ཡང་མི་རིགས་པར་བསྟན་པ་ནི། དེ་ནི་སྒྲ་ཉིད་ལས་འགྱུར་བས་ཞེས་བྱ་བའོ། །འོན་ཏེ་འཛུད་པར་བྱེད་པའི་བྱ་བ་ནི་སྒྲའི་མ་ཡིན་ཏེ། འོ་ན་ཅི་ཞེ་ན། སྒྲའི་བརྗོད་བྱའི་བསྒྲུབ་པའི་དོན་གྱི་ཡིན་ནོ་སྙམ་དུ་སེམས་པ་ལ།
འདི་ནི་ཇི་ལྟར་སྒྲ་ལས་ནི། །ཞེས་བྱ་བ་སྨོས་ཏེ། སྒྲ་ལས་ནི་དེའི་བརྗོད་བྱ་འཛུད་པར་བྱེད་པའི་བྱ་བ་དང་ལྡན་པ་གཞན་དམིགས་པ་མེད་པ་ཉིད་ཅེས་བྱ་བའི་དོན་ཏོ། །འབྲས་བུའི་མཐར་ཐུག་པའི་སྒྲའི་བྱ་བ་ནི་ངེས་སྦྱོར་ཡིན་པའི་ཕྱོགས་ལ་ཡང་དམིགས་བྱ་མེད་པ་ཉིད་ཡིན་པར་བསྟན་

པ་ནི། སྒྲ་ཡིས་བསྐུལ་ན་དེ་ཡི་བློ། །ཞེས་བྱ་བ་སྟེ། ཤེས་པའི་དུས་སུ་ལོངས་སྤྱད་པར་བྱ་བ་མེད་པའི་ཕྱིར་ལོངས་སྤྱོད་པར་བྱེད་པ་པོ་ཡང་དེའི་མཐར་ཐུག་པའི་ངོ་བོར་མེད་པའི་ཕྱིར་དེའི་རྟོགས་པ་ནི་དམིགས་བྱ་མེད་པ་ཉིད་ཡིན་ནོ། །གཞན་ཡང་དེ་ནི་མ་གྲུབ་པ་ཡིན་ན། ཇི་ལྟར་
སྒྲུབ་བྱེད་རང་བཞིན་ཡིན། །ཞེས་བྱ་བ་ལ་སོགས་པ་སུན་དབྱུང་བ་རྒྱས་པར་བསྟན་པ་ནི། དེ་བཞིན་དུ་འཁྲུལ་འཁོར་དུ་ཞུགས་པ་ལ་སོགས་པ་ཞེས་བྱ་བའོ། །གལ་ཏེ་འབྱུང་བར་འགྱུར་བའི་རྟོགས་པར་བྱ་བ་ནི་དེའི་ཚེ་མེད་པའི་ཕྱིར་འཇུག་པར་མི་བྱེད་པ་ཡིན་ལ། དེའི་རྟོགས་པ་
ཡང་དམིགས་བྱ་མེད་པ་ཡིན་ན། མངོན་སུམ་དང་རྗེས་སུ་དཔག་པ་ལས་ཀྱང་འབྱུང་བར་འགྱུར་བའི་ཕྲད་བྱ་ལ་སྣང་བཞིན་པར་ཞེན་པ་ནི་སྣང་བ་རྟོགས་པ་ཉིད་ལ་དེ་རྟོགས་པ་ཡིན་པར་ཞེན་པས་འཇུག་པར་མི་འགྱུར་ཏེ། དེ་ནི་མེད་པ་ཉིད་ཀྱིས་དམིགས་པར་བྱ་བ་མེད་དོ་སྙམ་དུ་སེམས་
པས་སྨྲས་པ་ནི། རྟོགས་པའི་དུས་ན་ཐམས་ཅད་ནི། །ཞེས་བྱ་བའོ། །དེར་ཡང་འབྱུང་བར་འགྱུར་བའོ། །ཡོད་པ་མ་ཡིན་པ་ནི་བདེན་མོད་ཀྱི་ངེས་པ་ཉེ་བར་དམིགས་པར་མཐོང་བ་འབའ་ཞིག་གི་རྗེས་སུ་འབྲངས་ནས། ངེས་པའི་ཡུལ་དུ་ངེས་པར་བཟུང་བས་འཇུག་པ་ན་མི་
བསླུ་བ་དང་འབྲེལ་པ་ཅན་ཡིན་ནོ། །དེས་ཐ་སྙད་པའི་ཚད་མ་ཉིད་དུ་འདི་དག་ཏུ་གནས་པ་ཡིན་ནོ། །རིག་བྱེད་ལ་ནི་དེ་ལྟ་བུའི་ངེས་པ་ཅུང་ཟད་ཀྱང་མཐོང་བ་མེད་པས་ཐ་སྙད་པའི་ཚད་མ་ཉིད་དུ་འདོད་པ་ཡང་མ་ཡིན་ནོ་ཞེས་བྱ་བའི་དོན་ཏོ། །ངེས་སྦྱོར་སུན་དབྱུང་བ་ནི་བྱ་བ་ལ་ཡང་ཡིན་ཏེ།
ཕྱོགས་སྔ་མར་སྔ་མ་བསྟན་པའི་ཕྱིར་སྦྱར་བའི་ཆེད་དུ། ད་ནི་བྱ་བ་དཔྱད་པར་བྱའོ་ཞེས་བྱ་བ་སྨོས་ཏེ། སྒྲའི་བདག་ཉིད་ཀྱི་བྱ་བ་ནི། ཀུན་གྱི་སྐྱེས་བུའི་དོན་ཏེ། བསྒྲུབ་པར་བྱ་བ་གང་ཡིན་པ་དེ་ལ་དེ་སྐད་ཅེས་བརྗོད་དོ། །བསྒྲུབ་པའི་རྫོགས་པའི་ཆ་ཉིད་ཀྱིས་རྗེས་སུ་སྒྲུབ་པར་
འོས་པ་ཡིན་པ་ནི་བྱ་བའི་ངག་གི་དོན་ཡིན་ནོ། །དགག་པ་ཡང་འདོད་ཆགས་ལ་སོགས་པ་ལ་འཇུག་པ་བཀག་པ་ལ་ཡལ་བར་གནས་པར་མི་བྱ་ཞེས་ཟེར་བ་ནི། སྒྲས་ནི་སྐྱེས་བུའི་བྱ་བ་ཞེས་བྱ་བའོ། །སྒྲའི་བྱ་བ་ནི་འབྲས་བུའམ་བརྗོད་བྱ་ཞེས་བྱ་བའི་རྣམ་པར་རྟོག་པ་གཉིས་པོ་

སྒྲའི་བརྗོད་བྱ་ཞེས་བྱ་བ་ལ་སོགས་པ་དང་། ཅི་སྟེ་རྟོགས་པར་བྱེད་པ་པོ་ཞེས་བྱ་བ་ལ་སོགས་པས་གོ་རིམས་བཞིན་དུ་བསྟན་པ་ལས་འབྲས་བུའི་ཕྱོགས་སུན་དབྱུང་བ་བསྟན་པ་ནི། གལ་ཏེ་སྒྲའི་བྱ་བ་ཡིན་ན་ཞེས་བྱ་བ་སྟེ། འབྲེལ་པ་འཛིན་པ་ནི་འདི་ལ་དུ་བ་
བཞིན་དུ་ཤེས་པར་བྱེད་པའི་ཡན་ལག་ལ་ལྟོས་པར་བྱེད་པ་ཡིན་ཏེ། སྒྲ་ནི་ཁྱེད་ཅག་གི་འདི་ལ་བྱ་བའི་བྱེད་པ་པོ་མ་ཡིན་ཞེས་བྱ་བའི་དོན་ཏོ། །ཅི་སྟེ་འབྲེལ་པ་འཛིན་པ་ནི་འཛུད་བྱེད་ལ་ལྟོས་པ་ཡིན་ལ། འཛུད་བྱེད་དེ་ཡང་སྒྲ་ཉེ་བ་ཡིན་པར་རྟོགས་པ་ཡིན་གྱི་འདས་པ་མ་ཡིན་ཞིང་
རྟག་པ་མ་ཡིན་ལ་གཞན་ལས་སྐྱེས་པ་ཡང་མ་ཡིན་ཏེ། སྒྲ་ལས་སྐྱེས་པ་ཡིན་ཏེ། དེས་ན་བྱེད་པ་པོ་ཉིད་ཀྱང་ཤེས་པར་བྱེད་པ་ཡིན་པའི་ཕྱིར་འབྲེལ་པ་རྟོགས་པ་ལ་ལྟོས་པ་ཡིན་ནོ་ཞེས་བྱ་བའི་བསམ་པས། འཛུད་པར་བྱེད་པ་དང་གསོལ་བ་འདེབས་པ་དག་ཁོ་ན་ལིང་ལ་སོགས་
པ་ལ་ལྟོས་པ་ཡིན་པའི་ཕྱིར་དེ་དག་ཀྱང་སྐྱེས་བུའི་བསམ་པ་ཡིན་པའི་ཕྱིར་སྒྲ་ལས་སྐྱེས་པ་མ་ཡིན་ཞིང་། བྱེད་པ་པོ་ཉིད་ཀྱི་ཡན་ལག་གི་བརྡ་འཛིན་པ་ཡང་མ་ཡིན་ལ། གང་གི་ཕྱིར་བརྡ་འཛིན་པ་མ་ཡིན་པར་བསྟན་པ་ནི་འཛུད་པར་བྱེད་པ་ནི་སྒྲའི་བྱེད་པ་ཡིན་ལ། བྱ་བའི་སྐྱེས་བུའི་
བྱེད་པ་ལ་འཇུག་པའི་བསམ་པ་ཅན་ནི་བྱེད་པ་པོ་མ་ཡིན་ནོ། །འཛུད་པར་བྱེད་པ་ལས་བཟློག་པ་ནི་གསོལ་བ་འདེབས་པ་ཡིན་ནོ། །འཛུད་བྱེད་ལ་སོགས་པ་ནི་བྱེ་བྲག་ཡིན་ཏེ། ཐུ་ཡུ་ལྟ་བུ་མ་ཡིན་ནམ་ལིང་གི་དོན་ནི་སྤྱི་ཡིན་ཏེ་བ་ལང་ཉིད་ལྟ་བུའོ། །དེ་ཡང་། འཇུག་བྱེད་ཉིད་ནི་
སྒྲ་ཡི་དོན། །ཐམས་ཅད་དུ་ནི་མ་བོར་ཕྱིར། །ཞེས་སྨོས་པའོ། །འདི་ལ། དེ་མ་རྟོགས་ན་ཞེས་བྱ་བ་སྨོས་ཏེ། བ་ལང་ཉིད་ཀྱང་ཐུ་ཡུ་ལ་སོགས་པ་ལས་གཞན་པ་མ་ཡིན་ཏེ། སྒྲ་རྣམས་ཀྱི་ཕྱི་རོལ་གྱི་དོན་ལ་དེ་མ་ཡིན་པ་ལས་ལོག་པའི་ཕྱིར་རོ་ཞེས་བྱ་བའི་དགོངས་པའོ། །གསོལ་
བ་འདེབས་པ་ལ་སོགས་པ་རྣམས་ཀྱིས་གནོད་བཞིན་པ་ཡིན་ནོ་ཞེས་བྱ་བའི་དོན་ཏོ། །ཡང་ན། དེ་མ་རྟོགས་པ་ཞེས་བྱ་བ་ནི་པགས་པ་ཅན་དུ་ཕྱུགས་ཉིད་ལ་བྱེ་བྲག་མེད་ཀྱང་། བྱེད་པ་པོ་ཉིད་འཇུག་པ་མེད་པའི་ཕྱིར་ལ། རིག་བྱེད་ལ་ནི་སྐྱེས་བུ་མེད་པས་བསམ་པ་མེད་པའི་ཕྱིར་དེའི་

བྱེ་བྲག་ངེས་པར་སྦྱོར་བ་ཉིད་མེད་ཅེས་བྱ་བའི་དོན་ཏོ། །ད་ནི་འཇུག་པར་འདོད་པའི་བསམ་པ་ཅན་གྱི་ཡུལ་ཡང་འབྲས་བུའི་བྱ་བ་བྱེད་པའི་གོ་སྐབས་ཀྱི་ངོ་བོ་དེའི་ཚེ་མེད་དེ། འབྱུང་བར་འགྱུར་བ་ཉིད་ཡིན་པར་བསྟན་པ་ནི་ངེས་པར་སྦྱོར་བ་ཉིད་ཅེས་བྱ་བའོ། །ཡུལ་དང་ད་ལྟར་བ་མ་
ཡིན་པའི་ཕྱིར་མངོན་སུམ་ད་ལྟར་བའི་ཡུལ་ཅན་མ་ཡིན་དུ་ཆུག་ཀྱང་དེར་ཡང་ཤེས་པ་གཞན་དུ་འགྱུར་བ་ཡིན་པའི་ཕྱིར་ཇི་ལྟར་འབྲས་བུ་མེད་པ་ཡིན་སྙམ་དུ་སེམས་ན། ཇི་ལྟར་རབ་ཏུ་སྦྱོར་བྱེད་དེ། །ཞེས་བྱ་བ་སྨོས་ཏེ། རྗེས་སུ་དཔག་པ་ལ་ནི་འབྱུང་བར་འགྱུར་བ་ཡང་མེད་
པ་མི་འབྱུང་བས་འཇུག་པར་བྱེད་པ་ཡིན་ལ། སྒྲ་ལས་བྱུང་བ་ནི་སྐྱེས་བུའི་བྱ་བ་མེད་པ་མ་ཡིན་ནོ། །དེ་ལྟ་མོད་ཀྱི་རྟོགས་པར་བྱེད་པ་ཡིན་གྱི་རྟོགས་པའི་དུས་ན་དེ་ཡོད་པ་ནི་མ་ཡིན་ལ། འདིར་མེད་ན་མི་འབྱུང་བ་ཡང་མ་ཡིན་ནོ། །སྐྱེས་བུས་བྱས་པ་མ་ཡིན་པ་ཉིད་ལ་ཡང་མེད་ན་མི་
འབྱུང་བར་མ་ངེས་པ་ཡིན་ཏེ། དེ་ལྟར་ཁས་ལེན་པ་ནི་ལུང་ཐམས་ཅད་ཀྱི་ཐུན་མོང་ཡིན་པའི་ཕྱིར་རོ། །སྐྱེས་བུས་བྱས་པ་ཡང་དོན་དང་འབྲེལ་པ་མ་ཡིན་པས། རིག་བྱེད་རྣམས་ནི་གོ་བར་བྱེད་པ་མ་ཡིན་པའི་ཕྱིར་ལ་གོ་བ་ཡང་སྐྱེས་བུས་བྱས་པ་དང་འབྲེལ་པའི་རྒྱུ་མཚན་ཡིན་པ་ཉིད་ཀྱིས་
དེའི་ཚིག་གི་དོན་རྣམས་དོན་དམ་པ་པ་མ་ཡིན་པའི་ཕྱིར་དང་། དེའི་རྗེས་སུ་འཇུག་པའི་ངོ་བོ་ཡིན་པའི་ཕྱིར་ངག་གི་དོན་ཡིན་ནོ། །དེ་ཡང་ཚིག་གི་དོན་གྱི་སྒོ་ནས་སྐྱེས་བུ་བློ་ཉིད་ཀྱི་བྱ་བ་ཡིན་ནོ། །རིག་བྱེད་ནི་ཚིག་དང་ངག་གི་བདག་ཉིད་ཅན་ཉིད་ཀྱི་ཉེ་བ་ཡིན་ལ། ཚིག་གི་དོན་
རྣམས་ནི་ཉེ་བ་ཅན་དུ་རུང་བ་ཉིད་ཡིན་ཡང་ཕན་ཚུན་མི་ལྟོས་པའི་ཕྱིར་སྒྲ་རྣམས་ནི་ཕྱི་རོལ་གྱི་དོན་ལ་ཚད་མ་ཉིད་ཡིན་ནོ་སྙམ་དུ་དགོངས་པས་སོ། །གནོད་བྱ་རྟོགས་པ་ཅན་ཡིན་ན་ཞེས་བྱ་བ་ནི་མངོན་སུམ་དང་འགལ་བས་འབྲེལ་པ་མེད་པ་ཡིན་ཏེ། རྟོགས་པར་བྱ་བཞིན་པ་མེད་ཀྱང་
འབྱུང་བས་ཞེས་བྱ་བའི་དོན་ཏོ། །འབྲས་བུ་ལ་བྱ་བ་མེད་པའི་གནས་སྐབས་དེའི་ཚེ་མེད་པ་ཡིན་ཞིང་། འབྱུང་བར་འགྱུར་བ་ལ་འབྲེལ་པ་འཛིན་པ་ཡང་མེད་པ་ཡིན་ཞེས་བྱ་བའི་དོན་ཏོ། །རྟོགས་བཞིན་པ་མེད་ན་ལྷན་ཅིག་བྱེད་པ་མེད་པར་རྟོགས་པའི་ཤེས་པ་ཅུང་ཟད་ཀྱང་ཇི་

ལྟར་སྐྱེ་ཞེ་ན། སྒྲ་ནི་བློ་དོན་ཞེས་བྱ་བ་སྨོས་ཏེ། དེ་ཉིད་གསལ་བར་བྱེད་པ་ནི། ཇི་ལྟར་རབ་ཏུ་སྦྱོར་བར་བྱེད་པའི་ཞེས་བྱ་བའོ། །རབ་ཏུ་སྦྱོར་བར་བྱེད་པ་རྟོགས་པ་ནི་ངེས་སྦྱོར་རྟོགས་པ་ཡིན་ནོ། །རབ་ཏུ་སྦྱོར་བར་བྱེད་པ་ཞེས་བྱ་བ་ནི་གང་ན་སྨྲ་བ་པོ་ཡོད་པའོ། །
རབ་ཏུ་སྦྱོར་བར་བྱེད་པ་རྟོགས་པ་ཞེས་བྱ་བ་ནི་གང་ན་དེ་མེད་པའོ། །འདི་ལྟར་བདག་གིས་རྟོགས་ཞེས་བྱ་བ་ལ་སོགས་པས་འཆད་པ་པོ་དང་ཉན་པ་པོའི་ཞེན་པའི་དབང་གིས་ཏེ། སྒྲ་ལས་བྱུང་བའི་སྒྲའི་དོན་གྱི་རྗེས་སུ་དཔག་པ་ཉིད་ཡིན་གྱི་གཞན་གྱི་དོན་གྱི་རྗེས་སུ་དཔག་པ་ནི་
མ་ཡིན་ཏེ། ཕྱི་རོལ་མེད་པའི་ཕྱིར་རོ་ཞེས་སྟོན་པར་བྱེད་པ་ནི། བདག་གིས་ནི་རེ་ཞིག་འདི་ལྟར་རྟོགས་སོ་ཞེས་བྱ་བ་ནི། སྐྱེས་བུས་བྱས་པ་མ་ཡིན་པའི་ཡུལ་ལ། སྐྱེས་བུས་བྱས་པའི་བྱེ་བྲག་ནི་རིག་བྱེད་ལ་ཡང་མཐོང་བའི་ཕྱིར་སྐྱེས་བུས་བྱས་པ་ཉིད་ཡིན་ཏེ། རིག་བྱེད་ཀྱི་དོན་ནི་
སྐྱེས་བུའི་བློ་ལས་བྱུང་བ་ཡིན་པར་བསྟན་པ་ནི། ཡང་ན་བརྗོད་པ་དེ་ཉིད་ལས་ཤེས་བྱ་སྟེ། དེ་ཞེས་བྱ་བ་ནི་གང་འཇིག་རྟེན་ལ་འདིའོ། །དེ་བརྗོད་ཅེས་བྱ་བ་ནི་དེ་བསྟན་པ་ལས་ཞེས་བྱ་བ་སྟེ། འཇིག་རྟེན་པའི་ངག་གི་བྱེ་བྲག་འབྲེལ་པ་ཉིད་རིག་བྱེད་དུ་བསྟན་པ་ཡིན་ནོ། །ཡང་
ན་དེ་དང་ཁྱད་པར་མེད་པའི་ཕྱིར་ཞེས་བྱ་བ་ལ་སོགས་པས་ཀྱང་སྐྱེས་བུས་མ་བྱས་པ་ཉིད་ནི་རྒྱུ་དོན་མེད་པར་ཡང་འབྱུང་བའི་ཕྱིར་མ་ངེས་པ་ཉིད་ཡིན་པར་བསྟན་པ་ནི། སྐྱེས་བུས་བྱས་པ་དབང་པོ་ལས་འདས་པའི་ཕྱིར་ཚིག་དེ་ནི་སྐྱེས་བུས་མ་བྱས་པ་ཞེས་བྱ་བ་ནི་སངས་རྒྱས་པ་ལ་སོགས་
པའོ། །སྐྱེས་བུས་མ་བྱས་པ་ཉིད་ཡིན་ན་བཅོམ་ལྡན་འདས་ཀྱིས་ཆོས་བསྟན་ཏོ་ཞེས་ཐོས་པ་དོན་མེད་པར་འགྱུར་ཏེ། བརྗོད་བྱས་སྟོང་བའི་ཕྱིར་རོ་ཞེ་ན། དོན་མེད་པར་ཡང་དེ་བཞིན་དུ་འགྱུར་བའི་ཕྱིར་ཞེས་བྱ་བ་ནས། དེ་ལ་ཞེས་བྱ་བའི་བར་དུའོ། །ལན་དུ་ཡང་རིག་བྱེད་ལ་ཡང་
འདི་མཚུངས་ཞེས་བྱ་བའོ། །ངེས་བརྗོད་རིག་བྱེད་རི་བོང་བྱས། །སྙན་ཚིག་རིག་བྱེད་མཉམ་རིག་ཅེས། །ཞེས་བྱ་བ་དང་། ངེས་བརྗོད་དང་སྙན་ཚིག་ཤེས་པ་རྣམས་ཀྱི་ཚིག་ཡིན་པར་དྲང་སྲོང་པྲ་བ་ཧ་ནའི་བུ་འདོད་པ་ཡིན་ནོ་ཞེས་བྱ་བ་ཡང་མི་རྟག་པའི་འབྲེལ་པར་ཐོས་པ་ཡོད་

ལ། སྐྱེས་བུས་མ་བྱས་པ་ཡིན་ན། དེ་ལ་དོན་མེད་པ་ཡིན་ནོ། །ཐ་སྙད་པ་རྣམས་ཀྱི་ནན་ཏན་དུ་བྱ་བ་དོན་དུ་གཉེར་བ་ཡིན་པའི་ཕྱིར་ནན་ཏན་དུ་བྱ་བ་བསྟན་པ་ནི་དོན་གཞན་ཡིན་ལ། ནན་ཏན་དུ་བྱ་བ་ལ་གནས་པར་བསྟན་པ་དོན་གཞན་ཡིན་ན་དེ་དང་རྗེས་སུ་མཐུན་པའི་རྟོགས་པར་བྱེད་པ་
ཡིན་ལ། དེས་ན་ཤེས་པ་ཡིན་ཞེས་བྱ་བ་ནི་བསྟོད་པ་ཙམ་ཡིན་གྱི། དྲང་སྲོང་པྲ་བ་ཧ་ནའི་བུ་ཞེས་བྱ་བ་ཡང་པྲ་བ་ཧ་ནའི་བུ་མ་ཡིན་མོད་ཀྱི་རྟག་པ་ཉིད་ཅུང་ཟད་ཡོད་པའི་ཕྱིར་དོན་མེད་པ་མ་ཡིན་ནོ། །འདི་ལ་དོན་གཞན་ཉིད་ལ་རྟོག་ན་ནི་ཞེས་སྨོས་ཏེ། བཅོམ་ལྡན་འདས་ཀྱིས་
གསུངས་པ་དེ་ལ་ཡང་དྲན་པ་ཡིན་ཞེས་བྱ་བ་འདི་ཡང་། བཅོམ་ལྡན་འདས་དང་འབྲེལ་པ་ཉིད་ཀྱིས་དམ་པའི་ཆོས་ལ་ཡང་བསྟོད་པ་ཁོ་ན་ཡིན་ཏེ། རིགས་པ་མཚུངས་པའི་ཕྱིར་ཞེས་བྱ་བའི་དོན་ཏོ། །དོན་མེད་པ་ཉིད་དང་། སྐྱེས་བུས་བྱས་པ་མ་ཡིན་པ་ཉིད་དང་། རྟོགས་
པ་ཉིད་དང་དོན་གཞན་གྱི་ཡུལ་ལ་ཞེས་བྱ་བ་རེ་རེ་ལ་དང་ཞེས་བྱ་བར་སྦྱར་བར་བྱའོ། །དོན་གཞན་དུ་བརྟག་ན་ཞེས་བྱ་བའི་དྲི་བ་དེ་ཉིད་ལ་ལན་གཞན་ཡིན་པའི་ཕྱིར་ཟློས་པ་མ་ཡིན་ནོ། །རིག་བྱེད་ཀྱི་དང་པོའི་དོན་གྱི་བྱ་བ་ལ་བརྟེན་ནས་རྟོགས་པར་བྱ་བ་ཡིན་ལ། དེས་ན་དེའི་དོན་ནི་
དང་པོའི་ཤེས་པ་བཞིན་དུ་དབང་པོའི་བྱ་བ་ཡིན་ལ། གཉིས་པ་ནི་རིགས་པ་རྗེས་སུ་དྲན་པའི་ངོ་བོའི་རྣམ་པར་དཔྱོད་པ་ལ་བརྟེན་ནས་རྣམ་པར་རྟོག་པའི་ཤེས་པ་བཞིན་དུ་བརྡ་དྲན་པ་ལས་ཡིན་ལ། དེས་ན་རིག་བྱེད་ཀྱི་དོན་མ་ཡིན་ནོ་ཞེས་ཟེར་བ་ནི་འདི་ལྟར་དང་པོའི་ཞེས་བྱ་བའོ། །ཅི་
སྟེ་ཡང་སྐྱེས་བུས་བྱས་པ་མ་ཡིན་པའི་རིག་བྱེད་ནི་ཐོག་མ་མེད་པ་མ་ཡིན་པའི་ཕྱིར་རྒྱུད་པའི་རྗེས་སུ་འབྲངས་ནས། དང་པོ་དང་བཅས་པའི་དོན་ཉིད་དུ་མི་རིགས་པས་རང་ཉིད་ཀྱི་དོན་གཞན་ཉིད་ཡིན་ནོ། །སྔོན་དང་ཕྱི་མ་དྲན་པ་ནི། །སྒྲ་ཡི་བློ་གཞན་བྱས་པ་ཡིན། །ཞེས་བྱ་བ་
ལ་སོགས་པའི་རིགས་པ་ལས་འགྱུར་བ་ཡིན་ནོ་སྙམ་དུ་སེམས་པ་ལ། དེ་ཡང་རིག་བྱེད་དོན་ཡིན་ཞེས། །ཞེས་བྱ་བ་སྨོས་ཏེ། ཐོས་བཞིན་པའི་དོན་གྱི་རྗེས་སུ་འབྲངས་ནས་དང་པོ་དང་ལྡན་པ་ཉིད་དང་སྒྲུབ་པའི་དོན་བརྗོད་པ་དག་ལས་གཅིག་ལ་ཡང་གནོད་པ་མེད་པར་

བསྟན་པ་ནི། ཁྱེད་ཀྱི་འདི་ལ་ཚད་མ་མེད། །ཅེས་བྱ་བ་སྨོས་སོ། །དང་པོ་མ་ཡིན་པ་ཉིད་དུ་གོ་བ་ཡིན་ན་དོན་འདི་ཡང་གོ་བར་བྱེད་པ་ཡིན་ནོ་ཞེས་བྱ་བའི་བསམ་པ་ནི། རིག་བྱེད་དབང་གི་སྐྱེས་པའི་ཕྱིར་ཞེས་བྱ་བའོ། །དེའི་ཚེ་ཡང་རིག་བྱེད་ཀྱི་བྱ་བ་ལས་དང་
པོར་རྟོགས་པར་བྱེད་པ་ཡིན་ལ། དེ་ལ་ལྟོས་པས་དམིགས་བྱ་ཉིད་མེད་པ་ཁོ་ནར་བསྟན་པ་ནི། དང་པོ་ཅི་ཕྱིར་མིན་ཞེས་བྱ་བ་ལ་སོགས་པ་སྨོས་སོ། །དོན་གཞན་དུ་རྟོགས་པ་ལ་ནི་བདེན་པ་དང་མི་བདེན་པ་དང་ཕྲད་པར་མཐོང་བ་ལས། མེ་ལ་སྦྱིན་སྲེག་ལ་སོགས་པ་དོན་གཅིག་པའི་
ངག་རྣམས་ལ་ཡང་ཐེ་ཚོམ་ཟ་བས་ཚད་མ་ཉིད་མ་ཡིན་པར་བསྟན་པ་ནི། དེ་ལྟ་ཡིན་ཡང་ཞེས་བྱ་བའོ། །ཅི་སྟེ་ཐེ་ཚོམ་ཟ་བ་ཡིན་ཞེ་ན། རིག་བྱེད་ཀྱི་དོན་ཞེས་བྱ་བ་སྨོས་སོ། །གལ་ཏེ་ཉི་མ་གཉའ་ཤིང་ཡིན་ལ་ཞེས་བྱ་བ་ལ་སོགས་པ་ལ། དང་པོ་པའི་དོན་བོར་ནས་དོན་གཞན་
དུ་རྟོགས་པ་ནི། དོན་གཞན་ཉིད་ཀྱིས་སྟོན་པའི་དོན་ཡིན་པའི་ཕྱིར་འགལ་བ་མེད་པ་ཡིན་ལ། བསྒྲུབ་པ་ཉེ་བར་བསྟན་པ་ནི་དོན་གཞན་ཉིད་ཀྱིས་སྟོན་པ་མ་ཡིན་པ་དེས་ན་ཇི་ལྟར་དང་པོ་པའི་དོན་ཡོངས་སུ་འདོར་བ་ཡིན་ངེས་པ་རྟོགས་པ་ཡིན་པ་ནི་དེ་ལྟ་བུའི་མི་བདེན་པའི་དོན་ལ་
དམིགས་པ་མ་ཡིན་པའི་ཕྱིར་ཇི་ལྟར་ཐེ་ཚོམ་པ་ཡིན་སྙམ་དུ་སེམས་པ་ལ། ད་ལྟར་བའི་བ་ལང་ཁྲ་བོ་ནི་མཆོད་སྦྱིན་གྱིས་ཞེས་བྱ་བའི་སྐུལ་བྱེད་ནི་དོན་མེད་པར་མཐོང་སྟེ། ཆར་དབབ་པར་འདོད་པས་ལག་པས་བཞོས་པའི་འོ་མ་ཕོ་བ་བཞིན་དུ། འདི་ཡང་ད་ལྟར་བའི་ཡིན་གྱི་
འཇིག་རྟེན་ཕ་རོལ་གྱི་འབྲས་བུ་ནི་མ་ཡིན་ནོ། །ངེས་སྦྱོར་ལས་བྱུང་བའི་འབྲས་བུ་ནི་དེ་མ་ཐག་ཏུ་སྒྲུབ་བྱེད་མེད་པས་མངོན་སུམ་དུ་མ་དམིགས་པའི་ཕྱིར་གནོད་བྱེད་མེད་པ་མ་ཡིན་ཏེ། ལོ་ཐོག་སྐམས་པ་ལྟར་གསོ་བའི་ཕྱིར་ཆར་དབབ་པས་ཡོངས་སུ་འཕེལ་བར་བྱ་བར་འདོད་པའི་
ཆོ་ག་ལ་དུས་མ་ངེས་པ་ཉིད་ནི་མི་རིགས་སོ། །རྒྱལ་པོ་ནི། རྒྱལ་བུ་སྐྱེ་བའི་མཆོད་སྦྱིན་བྱེད། །ཅེས་བྱ་བ་ལ་སོགས་པ་རིགས་ཀྱི་བྱེ་བྲག་དང་རྗེས་སུ་འབྲེལ་པ་ལ་བརྟེན་པ་བཞིན་དུ་དུས་ཀྱི་བྱེ་བྲག་ལ་བརྟེན་ནས་དེ་མ་ཐག་པའི་འབྲས་བུ་ཉིད་ཁོ་ན་ཡིན་ན། འདི་ལ་ནི་དེ་ལྟ་

བུའི་འབྲས་བུ་འབྱུང་བ་མ་ཡིན་ནོ་ཞེས་བསྟན་པ་ནི། ཕྱུགས་འདོད་པས་བ་ཁྲ་བོའི་མཆོད་སྦྱིན་བྱའོ་ཞེས་བྱ་བའོ། །མ་ཡིན་ཏེ། ཚད་མ་མེད་པའི་ཕྱིར་རོ་ཞེས་བྱ་བ་འདི་ལ་དོན་ནི་འདི་ཡིན་ཏེ། རྒྱུའི་དངོས་པོ་ནི་ཚད་མ་འགའ་ཞིག་གི་དུ་བའི་མེ་བཞིན་དུ་རྟོགས་ལ། འབྲས་
བུ་མེད་པ་ཡིན་ན་རྗེས་སུ་མཐུན་པ་མ་ཡིན་པར་རྟོགས་པར་བྱེད་པ་ཡིན་ཏེ། ཕྱུགས་ལ་བ་ལང་ཁྲ་བོ་རྒྱུ་ཉིད་ཡིན་པ་ནི་ཚད་མས་གྲུབ་པ་མ་ཡིན་ནོ། །ངག་དེ་ཉིད་དེ་མ་ཐག་པའི་འབྲས་བུ་མེད་པས་ད་དུང་དུ་ཡང་ཚད་མ་ཉིད་མ་ཡིན་པ་དང་ཚད་མ་གཞན་ཡང་མ་དམིགས་པའི་ཕྱིར་
རོ། །བདེན་ཏེ། ད་ལྟར་བ་ཉིད་དེ་མ་ཐག་པར་ཡང་རེས་འགའ་མཐོང་བའི་ཕྱིར་འབྲས་བུ་སྒྲུབ་པར་བྱེད་པ་ནི་མངོན་སུམ་དང་འགལ་བ་མ་ཡིན་ནོ། །རེས་འགའ་དེ་ཡོད་ཀྱང་མི་འབྱུང་བ་ནི་འགའ་ཞིག་གི་ཕྱེད་ཟོས་པ་ན་སྔོན་གྱི་ལས་ཀྱིས་གེགས་བྱས་པའི་ཕྱིར་ཞེས་བྱ་བའི་རིགས་
པས་ལས་གཞན་གྱིས་གེགས་བྱས་པ་ཡིན་པའི་ཕྱིར་དེ་དང་བྲལ་ན་འབྱུང་བ་ཡིན་ནོ། །དེ་ཉིད་ཀྱིས་ན་མ་བྱས་པའི་ལས་རྣམས་ཀྱི་ཡང་དེའི་འབྲས་བུ་འབྱུང་བ་ཡིན་གྱི། འདི་དག་ཙམ་གྱིས་ད་ལྟར་བ་ཉིད་འཇོམས་པ་ནི་མ་ཡིན་ནོ། །ཡོད་ན་འབྱུང་བ་ཙམ་གྱིས་དེ་སྒྲུབ་པར་བྱེད་
པ་ནི་མ་ཡིན་ཏེ། འོ་ན་ཅི་ཞེ་ན། དེ་མེད་ན་མི་འབྱུང་བ་ལས་ཡིན་ལ། བ་ལང་ཁྲ་བོ་ལ་སོགས་པ་ལ་ནི་དེ་དག་མེད་པ་ཡིན་ཏེ། ད་ལྟར་བའི་འབྲས་བུ་ལ་ཡང་སྒྲ་ཁོ་ན་སྒྲུབ་བྱེད་ཀྱི་དངོས་པོར་མཐོང་བར་བྱེད་པ་མ་ཡིན་ཏེ། དེ་ལྟ་བུའི་དངོས་པོ་ནི་མངོན་སུམ་གྱི་ཡང་ཡུལ་ཡིན་པའི་
ཕྱིར་རོ། །གཞན་དུ་ན་ད་ལྟར་བ་ཉིད་མེད་པར་ཐར་པར་འགྱུར་བའི་ཕྱིར་རིག་བྱེད་ལ་སླུ་བའི་མངོན་སུམ་གནོད་པ་ཅན་དུ་གྲུབ་པོ། །དེ་ལྟར་གནས་པ་ཡིན་ལ་ངེས་སྦྱོར་ལས་བྱུང་བའི་འབྲས་བུ་དུས་མ་ངེས་པ་ཅན་དུ་འགྱུར་རོ་ཞེས་བྱ་བ་ལ་སོགས་པ་ཐམས་ཅད་སྐྱེས་བུའི་བློ་ལས་བྱུང་
བ་ཁོ་ན་ཡིན་པར་བསྟན་པ་ནི། དོན་གཞན་རྟོགས་པ་ནི་ཞེས་བྱ་བའོ། །རྟགས་དང་སྒྲ་མ་གཏོགས་པར་རྗེས་སུ་དྲན་པ་ཙམ་ལས་ཏེ། སྔ་མ་རྗེས་སུ་དྲན་པའི་ངོ་བོ་ལས་དང་པོའི་དོན་རྟོགས་པ་ཡང་ཡིན་པར་བསྟན་པ་ནི། རིག་བྱེད་ལས་བདག་ཉིད་ཅེས་བྱ་བའོ། །སྒྲ་ནི་དབང་

པོ་བཞིན་དུ་རང་བཞིན་གྱིས་དོན་གོ་བར་བྱེད་པ་མ་ཡིན་ཏེ། འོ་ན་ཅི་ཞེ་ན། དོན་གྱི་དེ་མ་ཐག་ཉིད་ཀྱིས་འཛིན་པ་ཡིན་ནའོ། །དེ་ལྟར་འཛིན་པ་ཡང་འཕེལ་བ་དང་། ཡོན་ཏན་ལ་སོགས་པ་བཞིན་དུ་སྔར་ཞུགས་པ་ལ་བརྟེན་པ་ཡིན་ཏེ། རིག་བྱེད་རྟོགས་པ་ནི་སྐྱེས་
བུའི་བློའི་ནུས་པ་ལས་ཡིན་ཏེ། སྒྲའི་ནུས་པ་ལས་ནི་མ་ཡིན་ནོ་ཞེས་བྱ་བའི་དོན་ཏོ།། །ངེས་པར་སྦྱོར་བ་ནི་ཞེས་བྱ་བ་ལ་སོགས་པས་ནི་ངེས་སྦྱོར་དང་བྱ་བ་དག་མཚུངས་པར་སུན་བཏོན་པ་ཡིན་ཡང་ངེས་སྦྱོར་སུན་བཏོན་པའི་དུས་སུ་མ་བསྟན་པ་བརྗོད་པར་བྱ་སྟེ། འདི་ལ་དོན་གྱི་རིགས་
པ་འབའ་ཞིག་འགལ་བ་ཅན་མ་ཡིན་ཏེ། འོན་ཀྱང་སྒྲའི་རིགས་པ་ཡང་ངོ་ཞེས་བྱ་བའི་དོན་ཏོ། །ཡང་དེ་ཕྱིས་དེ་ལས་ཏེ་བྱ་བ་རྟོགས་པ་ལས་སོ། །གལ་ཏེ་ལྷ་སྦྱིན་དང་མཆོད་སྦྱིན་དག་གིས་རེ་ལྡེ་བྱེད་ཅེས་བྱ་བ་འདི་ལ། ལས་ཏེ་བྱ་བ་གཅིག་པའི་ཕྱིར་བྱ་བ་གཅིག་པ་ཉིད་དེ་ཚིག་གཅིག་
གི་རྒྱུ་མཚན་དུ་ཁས་ལེན་པར་བྱེད་པ་དེ་ལྟ་ན་རེ་ལྡེ་བྱེད་པ་དག་ཅེས་པ་འདི་ལ་ཡང་གཅིག་གི་ཚིག་ཏུ་འགྱུར་བར་བསྟན་པ་ནི། གཅིག་ཕྱིར་ཞེས་བསྟན་པའོ། །འོན་ཏེ་འདི་ལ་བྱེད་པ་པོ་ཐ་དད་པས་བྱ་བ་ཐ་དད་པའི་ཕྱིར་གཉིས་ཀྱི་ཚིག་ཡིན་ན་བྱེད་དོ་ཞེས་བྱ་བ་འདི་ལ་ཡང་ཐ་དད་པས་ཐ་
དད་པའི་ཚིག་ཏུ་འགྱུར་བར་བསྟན་པ་ནི། དེ་འདྲའི་དབྱེ་བས་ཞེས་བྱ་བ་ནི་ཐ་དད་པ་ལས་སོ། །ལྷ་སྦྱིན་དང་མཆོད་སྦྱིན་དག་ཅེས་བྱ་བའི་སྐད་ཀྱི་དབྱིངས་ཀྱི་དོན་ནི་ལས་ཀྱི་བྱ་བ་ཡིན་གྱི། བྱེད་པ་པོའི་བྱ་བ་ནི་མ་ཡིན་ཏེ། དེ་ཡང་བྱེད་པ་པོ་ཐ་དད་པ་ལས་འབྱེད་པ་ནི་མ་ཡིན་ཏེ།
དེའི་བྱ་བ་མ་ཡིན་པའི་ཕྱིར་འདིར་ནི་ལས་བྱེད་པའི་ཡི་གེ་ལས་ཡིན་ཏེ། ལྷ་སྦྱིན་དང་མཆོད་སྦྱིན་དག་གི་འདུག་པའོ་ཞེས་བྱ་བ་ལྟ་བུ་ཡིན་ནོ་ཞེས་ཟེར་བ་ནི། སྐད་ཀྱི་དབྱིངས་ཀྱི་དོན་ཐ་མི་དད་པའི་ཕྱིར་ཞེས་བྱ་བའོ། །སྐད་ཀྱི་དབྱིངས་ནི་བྱེད་པ་པོའི་བྱ་བ་མ་ལུས་པའི་རྗོད་བྱེད་མ་ཡིན་ནམ།
སྒྲ་དང་སྐྱེས་བུ་དག་གི་ཡང་བྱ་བ་རྗོད་པར་བྱེད་པ་ཡིན་ཏེ། དེས་ན་ཇི་ལྟར་བྱེད་པ་པོ་ཐ་དད་པ་ལས་ཐ་དད་པ་མ་ཡིན་སྙམ་པའི་བསམ་པས། ལིང་ལ་སོགས་པའི་སྒྲའི་བྱ་བ་ནི་རེ་ཞིག་སྐད་ཀྱི་དབྱིངས་ཀྱི་དོན་ལ་མི་འབྱུང་སྟེ། ལིང་ལ་སོགས་པ་མེད་ཅིང་སྐད་ཀྱི་དབྱིངས་ཀྱང་མེད་པར་

ཡང་འབྱུང་བའི་ཕྱིར་རོ། །དེས་ན་ལིང་ལ་སོགས་པའི་བརྗོད་བྱ་ནི་རྐྱེན་ཡིན་ནོ་ཞེས་ཟེར་བ་ནི། དེ་ཡང་ཞེས་བྱ་བའི་ཡང་གི་སྒྲ་ངེས་པར་སྦྱོར་བའི་ཞེས་པའི་མཐར་སྦྱར་ལ། མ་ཡིན་ཞེས་བྱ་བ་ཡང་དེ་ཞེས་བྱ་བའི་མཐར་བལྟ་བར་བྱའོ། །དེས་ན་དོན་ནི་འདི་ཡིན་ཏེ་ངེས་པར་སྦྱོར་བ་ཡང་
དེ་མ་ཡིན་པའི་སྐད་ཀྱི་དབྱིངས་ཀྱི་དོན་ཏོ། །འོ་ན་ཅི་ཞེ་ན། དེ་ལས་གཞན་པའོ། །དེ་ལྟ་ཡིན་ན། སྐྱེས་བུའི་བྱ་བ་སྐད་ཀྱི་དབྱིངས་ཀྱི་དོན་ཡིན་ཏེ། །དེ་སྐད་དུ་ཡང་གཙོ་བོ་ཉིད་ཡིན་པས་སྐད་ཀྱི་དབྱིངས་ཀྱིས་བསྟན་པའི་བྱ་བ་དང་ལྡན་པ་ནི་བྱེད་པ་པོ་ཡིན་ནོ་ཞེ་ན། དེ་ཡང་
སྟེ་ཞེས་བྱ་བ་ནི་བྱེད་པ་པོ་བསྒྲུབ་བྱ་ཡིན་པས་ཞེས་བྱ་བའོ། །རེ་ཞིག་ངེས་སྦྱོར་ནི་བསྒྲུབ་བྱ་མ་ཡིན་ཏེ། རང་གི་ངོ་བོར་གྲུབ་པའི་ཕྱིར་དང་། བྱེད་པ་པོ་ལས་བྱ་བ་གཞན་ཡིན་པའི་ཕྱིར་ཡང་ངོ་། །དེ་ཉིད་ཀྱིས་ནི་སྐད་ཀྱི་དབྱིངས་ཀྱི་དོན་མ་ཡིན་ནོ། །དེ་ལ་གནས་པ་ཡང་དེ་དང་དེ་
མ་ཡིན་པའི་བྱ་བ་ཡིན་པའི་ཕྱིར་རོ། །བྱ་བ་གཞན་ལས་བཏུས་པའི་དེའི་བྱ་བ་ཡུལ་ཅན་དུ་བྱེད་པ་ཡང་བདག་ཉིད་བཞིན་དུ་རྐྱེན་གྱི་བརྗོད་བྱ་ཉིད་ཡིན་ལ། དེ་ཡང་བྱེད་པ་པོ་ཐ་དད་པ་ལས་ཐ་དད་པ་ཡིན་ཏེ། དེས་ན་གཉིས་ཀྱི་ཚིག་ཡིན་ལ་དེས་ན་སྐད་ཀྱི་དབྱིངས་ཀྱི་དོན་དང་། སྐྱེས་
བུའི་བྱ་བ་དག་གི་བརྗོད་བྱ་དག་ཐ་དད་པའི་ཕྱིར་བྱེད་དོ་ཞེས་བྱ་བ་དང་། བྱེད་པ་དག་གོ་ཞེས་བྱ་བར་འགྱུར་ལ། བྱ་བ་ཡན་འགར་བ་ཞེས་བྱ་བ་ནི། རང་གིས་བསྡུས་པའི་ཐ་དད་པ་དང་བྲལ་བ་ཞེས་བྱ་བའི་དོན་ཏོ། །ཡང་ན་དངོས་པོ་བཤད་པས་བརྗོད་པ་ཡིན་པའི་ཕྱིར་བཤད་པ་
ཐམས་ཅད་ལས་འབྱུང་བའི་སྐྱེས་བུའི་བྱ་བ་ནི་ལིང་ལ་སོགས་པ་ཡོད་ན་བསྒྲུབ་བྱ་རྟོགས་པ་ཡིན་གྱི། རང་ཉིད་འགྲུབ་པ་ནི་སྐྱེས་བུས་འཕངས་པ་ཡིན་པའི་ཕྱིར་ངེས་སྦྱོར་དུ་བརྗོད་དོ། །དེས་ན་རྐྱེན་ནི་བརྗོད་བྱ་ཡིན་ནོ། །བྱེད་པ་པོ་ཐ་དད་པ་ལས་བྱ་བ་ཐ་དད་པ་ཡིན་ན། སྐད་ཀྱི་
དབྱིངས་ཀྱི་དོན་ལ་ཡང་ཐ་དད་པར་འགྱུར་ཏེ། དེ་སྒྲུབ་པར་བྱེད་པའི་སྒོ་ནས་བྱ་བ་བསྒྲུབ་བྱ་ཡིན་པར་བསྟན་པ་ནི། གལ་ཏེ་འབྲེལ་ཕྱིར་ཐ་དད་ན། །ཞེས་བྱ་བའོ། །བྱེད་པ་པོ་མ་བསྟན་པའི་དབང་དུ་བྱས་ནས་བྱེད་པ་པོའི་གསུམ་པར་མི་འགྱུར་ཞེས་བྱ་བའི་དོན་ཏོ། །བརྗོད་འདོད་

གཞན་དབང་ཕྱིར་ཞེས་བྱ་བ་ལ་སོགས་པ་བསྡུ་བ་བསྟན་པ་ནི། གང་ཚེ་བྱ་བའི་དོན་དེ་ནི་ཞེས་བྱ་བ་ལ་སོགས་པའི་ཚིགས་སུ་བཅད་པ་གཉིས་སོ། །དེ་ཡང་སྐད་ཀྱི་དབྱིངས་ཀྱི་དོན་ངེས་སྦྱོར་ཡིན་ཞེས་བྱ་བ་ལ་སོགས་པས་ངེས་སྦྱོར་གཙོ་བོའི་དོན་ཡིན་པས་རྐྱེན་གྱི་དོན་ཉིད་ཡིན་ལ་བྱ་བ་ནི་དེའི་ཡུལ་
ཉིད་ཡིན་པས་དེའི་ཡན་ལག་ཉིད་ཡིན་ནོ་སྙམ་དུ་སེམས་པ་ལ། ད་ནི་བྱ་བ་ཉིད་འཇུག་པའི་ཡུལ་ཉིད་ཡིན་པས་གཙོ་བོའི་དོན་ཉིད་ཡིན་ལ། ངེས་སྦྱོར་ནི་དེ་ལ་སྐྱེས་བུ་འཇུག་པར་བྱེད་པ་ཉིད་ཀྱིས་སྦྱོར་བར་བྱེད་པ་ཉིད་ཡིན་པའི་ཕྱིར་ཡན་ལག་ཡིན་ནོ། །དེ་ལྟར་ཡང་བྱ་བ་རྐྱེན་གྱི་དོན་ཉིད་ཡིན་
ན་ཡན་ལག་དང་ཡན་ལག་ཅན་ཉིད་རིགས་པ་ཡིན་ཏེ། གཞན་དུ་ནི་མ་ཡིན་ནོ་སྙམ་དུ་སེམས་པ་ལ། གང་གི་ཚེ་བྱེད་པ་པོའི་བྱ་བ་ཞེས་བྱ་བ་སྨོས་སོ། །གལ་ཏེ་འཇུག་པའི་ཡུལ་རང་གི་བྱ་བ་རྐྱེན་རྟོགས་པར་བྱེད་པ་ཡིན་ལ། དེ་ཉིད་ལས་འཇུག་པར་འགྱུར་བ་ཉིད་ཡིན་ན་ངེས་སྦྱོར་
གྱིས་ཅི་ཞིག་བྱ་སྙམ་པའི་བསམ་པས་ཟེར་བ་ནི། བྱ་བ་ནི་ངེས་པར་སྦྱོར་བ་ཁྱད་པར་ཅན་ཡིན་པའི་ཕྱིར་ཞེས་བྱ་བ་སྟེ། ངེས་པར་སྦྱོར་བ་མེད་ན་བྱ་བ་ནི་བསྒྲུབ་བྱ་ཉིད་མ་རྟོགས་བཞིན་འཇུག་པ་མ་ཡིན་ཞེས་བྱ་བའི་དོན་ཏོ། །སྐྱེས་བུའི་དོན་མ་རྟོགས་པར་ངེས་པར་སྦྱོར་བ་པོ་ཡང་ཇི་
ལྟར་འཇུག་པ་ཡིན་སྙམ་པའི་བསམ་པས་འབྲས་བུ་འབའ་ཞིག་ཁོ་ན་རྟོགས་པ་དང་ལྡན་པའི་འཇུག་པར་བྱེད་པ་པོ་མ་ཡིན་ཏེ། འོན་ཀྱང་རང་གི་བྱ་བ་ཤེས་པ་ཡང་ཡིན་ནོ་ཞེས་ཟེར་བ་ནི། འདི་རང་གི་བྱ་བ་རྟོགས་པ་ཞེས་བྱ་བའོ། །ངེས་པར་སྦྱོར་བ་ཡོད་ཀྱང་ངའི་བྱ་བ་འདི་ཡིན་
ཞེས་འབྲས་བུ་དང་འབྲེལ་པ་མེད་ན་མི་ཤེས་པ་ཡིན་པར་བསྟན་པ་ནི་འབྲས་བུ་མེད་པར་ངེས་པར་ངའི་བྱ་བ་ཉིད་ཅེས་བྱ་བ་སྟེ། དེ་ལྟར་རེ་ཞིག་བྱ་བའི་ངག་གི་དོན་ཉིད་ཁས་ལེན་པས་དེ་དང་དེ་བསྟན་ནས། ད་ནི་བྱ་བ་ཚད་མས་རྟོགས་པ་མ་ཡིན་པར་བསྟན་པར་འདོད་ནས། སྦྱིན་
བྱེད་ཅེས་བྱ་བ་སྨོས་ཏེ། སྦྱིན་བྱེད་ནི་མཆོད་སྦྱིན་ནོ། །གྲུབ་ཟིན་པའི་ཕྱིར་ཡོད་ཀྱང་ལས་མེད་པ་ཅན་ཡིན་པ་ཉིད་ཀྱིས་རབ་ཏུ་སྦྱར་བར་བྱ་བའི་བརྗོད་བྱ་ཉིད་ཀྱིས། སྦྱོར་བར་བྱེད་པ་པོའི་བྱ་རྒྱུའི་བྱ་བ་མེད་པའི་ཕྱིར་སྒྲ་ལས་གཞན་ལས་ཀྱང་རུང་། སྐད་ཀྱི་དབྱིངས་ཀྱི་དོན་ལས་

ཐ་དད་པའི་བྱ་བ་རྟོགས་པ་མ་ཡིན་ཞེས་བྱ་བའི་དོན་ཏོ། །གལ་ཏེ་མཆོད་སྦྱིན་ལ་སོགས་པ་ལས་ཐ་དད་པའི་བྱ་བ་མེད་པ་ཡིན་ན། མཐོ་རིས་འདོད་པས་མཆོད་སྦྱིན་གྱིས་ཞེས་བྱ་བའི་མཐོ་རིས་དང་། མཆོད་སྦྱིན་དག་བསྒྲུབ་བྱ་དང་། སྒྲུབ་བྱེད་དག་གི་དེ་ཉིད་ཀྱིས་རྟོགས་བཞིན་པ་དག་གི་
ཡང་བསྒྲུབ་བྱ་གཞན་ལས་དང་། སྒྲུབ་བྱེད་གཞན་ལས་རྣམ་པར་བཅད་ནས་འབྲེལ་པར་བྱེད་པ་པོ་མེད་པའི་ཕྱིར་ཕན་ཚུན་འབྲེལ་པ་མེད་པར་འགྱུར་བ་ཞིག་ན། དེ་ཡང་མཐོང་བའི་ཕྱིར་འབྲེལ་པ་ཅན་གྱི་བྱ་བ་ནི་དོན་ཤུགས་ཀྱིས་འཕངས་པ་ཡིན་ནོ། །དེ་ལྟ་ནི་མ་ཡིན་ཏེ། མཆོད་
སྦྱིན་དང་མཐོ་རིས་དག་གི་རུང་བ་ཡིན་ན། ཉེ་བ་ན་གནས་པའི་བྱེ་བྲག་གིས་རང་བཞིན་གྱིས་འབྲེལ་པ་ཁོ་ན་ཡིན་པའི་ཕྱིར་བྱ་བ་འཕེན་པར་བྱེད་པ་མ་ཡིན་ཏེ། གཞན་དུ་ན་དེ་དང་ལྷན་ཅིག་པའི་འབྲེལ་པ་བྱེད་པ་པོ་གཞན་ཡིན་ལ། དེའི་ཡང་གཞན་ཡིན་པའི་ཕྱིར་ཐུག་པ་མེད་དོ། །
འགྱུར་ཡང་སྐྱོན་ཅི་ཡོད་ཅེ་ན། འདི་ཡང་མི་རིགས་ཏེ་རང་གི་ངོ་བོ་རྟོགས་པ་མེད་ན་རྟོགས་པ་ཙམ་ཡིན་ཏེ། དེ་ཡང་བརྟག་བྱ་མ་གྲུབ་ན། །དེ་ལ་དབང་བའི་གཞི་མ་གྲུབ་པའི་ཕྱིར་དེ་ཡང་མི་རིགས་པའི་ཕྱིར་ཐུག་པ་མེད་པ་ནི་སྐྱོན་ཡིན་ནོ་ཞེས་བྱ་བའི་དོན་ཏོ། །སྒྲ་གཞན་ཉིད་ཀྱིས་
དོན་གཞན་ཉིད་ལ་ཡིན་ན་ཐུག་པ་མེད་པ་ནི་བཤད་པ་ལས་བསྟན་པ་ཡིན་ནོ། །ཅི་བྱེད་ཅེས་པའི་དོན་ཅི་ཞིག་ཡིན་ཞེས་ཐེ་ཚོམ་ཟ་བའི་ཡུལ་རྣམས་ལ་མཆོད་སྦྱིན་ལ་སོགས་པ་རྣམས་ལ་གྲོང་ལ་སོགས་པ་རྣམས་སུ་བཞིན་དུ་འགྲོ་བར་བྱེད་ཅེས་བྱ་བའི་དོན་གྱི་ཡུལ་ཅན་དུ་རྟོགས་པར་བྱེད་
པ་ཡིན་ལ་དེ་ཉིད་བྱ་བ་ཡིན་པ་བརྗོད་དོ། །གལ་ཏེ་ཅི་བྱེད་ཅེས་འདྲི་བར་བྱེད་པ་ན་ལན་དུ། བྱེད་དོན་མཆོད་སྦྱིན་བྱེད་དོན་དག །ཅེས་བྱ་བ་སྟེ། རྐྱེན་གྱི་དོན་ནི་བྱ་བ་བྱེད་པ་ཡིན་ནོ་ཞེས་བྱ་བ་འདི་ལ་ཡང་། མཆོད་སྦྱིན་བྱེད་ཅེས་བྱ་བ་ལ་སོགས་པ་བཞིན་དུ་སྐད་ཀྱི་དབྱིངས་ཀྱི་དོན་
ཡིན་ཏེ། དེས་ན་ཞེས་བྱ་བའི་ཚིག་གི་དོན་ནི་སྐད་ཀྱི་དབྱིངས་ཀྱིས་གྲི་ཉའི་དོན་ཞེས་བྱ་བ་ཉིད་དོ། །གལ་ཏེ། ཐེ་ཚོམ་ཟ་ན་འཚེད་པར་བྱེད། །ཅེས་བྱ་བ་ལ་སོགས་པ་ཇི་ལྟར་ལན་དུ་རྗོད་པར་བྱེད་ཅེས་བྱ་བའི་དོན་ཏོ། །ཡང་ན་ཅི་བྱེད་ཅེས་བྱ་བའི་གྲི་ཉའི་དོན་གྱི་ཡུལ་ཉིད་

ལ་ཐེ་ཚོམ་ཟ་བའི་ངོ་བོ་ནི་ཅི་ཞེས་བྱ་བ་ནི་དོན་དུ་བསྟན་ཏེ། མཆོད་སྦྱིན་ལ་སོགས་པ་ལ་ཐེ་ཚོམ་ཟ་བ་ཞེས་བྱ་བའི་དོན་ཏོ། །སྤྱིའི་རང་བཞིན་ཞེས་བྱ་བ་ནི་ཁྱད་པར་གྱི་ཡུལ་ལ་ཡང་ཐེ་ཚོམ་ཟ་བ་ནི། སྤྱིའི་ཡིན་པར་ཐ་སྙད་འདོགས་པ་ཡིན་ཏེ། ཁྱད་པར་མ་འཁྲུལ་
པས་ཐ་མི་དད་པར་བཏགས་ནས་ཞེས་བྱ་བའི་དོན་ཏོ། །གལ་ཏེ་ཡང་སྤྱི་རྟོགས་པ་ཙམ་ལས་མ་འཁྲུལ་པ་མ་ཡིན་ན། ཁྱད་པར་མ་རྟོགས་པ་ལ་ཡང་ཐེ་ཚོམ་ཟ་བ་ཡིན་ན། ཐལ་ཆེས་པར་བསྟན་པ་ནི། ཁྱབ་པར་མེད་པར་སྤྱི་ཡིན། །ཞེས་བྱ་བའོ། །མ་འཁྲུལ་པས་ཀྱང་
དུ་བ་ལས་མེ་བཞིན་དུ་སྤྱི་ལས་ཁྱད་པར་རྟོགས་པ་ལས་ཐེ་ཚོམ་ཟ་བར་མི་རིགས་པ་བསྟན་པ་ནི། དེ་ལྟ་ན། དེ་ཡང་ཞེས་བྱ་བའོ། །འབྲེལ་བ་ཅན་ཡང་མཐོང་བ་ཉིད་ལ་སོགས་པའི་སྤྱི་དང་འགལ་བ་ཁྱབ་པར་མི་དམིགས་པ་ནི་ཉེ་བར་བཞག་པ་ལ་ཐེ་ཚོམ་ཟ་བའི་རྒྱུ་མཚན་ཡིན་པར་
བསྟན་པ་ནི། སྤྱི་དེ་ཉིད་ཅེས་བྱ་བའོ། །ཐམས་ཅད་མཁྱེན་པ་ལ་སོགས་པ་བཞིན་དུ་ཁྱད་པར་མེད་པའི་དམིགས་པ་ཙམ་ནི་ཡོད་པ་དང་མེད་པ་ཐུན་མོང་བ་ཡིན་པའི་ཕྱིར་ཐེ་ཚོམ་གྱི་རྒྱུ་མཚན་ཡིན་གྱི། སྤྱི་ནི་མངོན་སུམ་ཉིད་མ་ཡིན་པར་བསྟན་པ་ནི། སྤྱིར་མི་དམིགས་པ་ཞེས་བྱ་བ་ལ་
སོགས་པས་སོ། །དམིགས་པའི་རིགས་བྱར་གྱུར་པ་ཞེས་བྱ་བ་འདིས་ནི་བྱེ་བྲག་མེད་པའི་མི་དམིགས་པའི་མེད་པ་སྨྲ་བ་ཡིན་ནོ། །ཁྱད་པར་གྱི་ངེས་པ་མ་བཟུང་བའི་དྲན་པ་ཉིད་ནི་ཐེ་ཚོམ་ཟ་བ་ཡིན་ནོ་ཞེས་ཟེར་བ་ནི་ཁྱད་པར་དྲན་པའི་ཕྱིར་ཞེས་བྱ་བའོ། །ཁྱད་པར་དྲན་པ་ལ་སོགས་
པའི་ཚོགས་པ་ལས་བྱུང་བ་ཡིན་པར་དེ་ལ་བྱེ་བྲག་མེད་པའི་ཕྱིར་ཞེས་བསྟན་པ་ནི། ཁྱད་པར་དྲན་པ་ལས་ཐེ་ཚོམ་གཞན་མ་ཡིན་ཏེ་ཞེས་བྱ་བའོ། །དེའི་ཁྱད་པར་ངེས་པར་མ་བཟུང་བའི་ཕྱིར་སྤྱི་ཡིན་པར་བསྟན་པ་ནི། དེའི་ཕྱིར་བྱེད་པ་ཞེས་བྱ་བ་དེ་ཉིད་ཅེས་བྱ་བ་སྟེ། ཁྱད་པར་
ངེས་པ་མ་བཟུང་བ་ཐུན་མོང་གི་ཚིག་ཡིན་པར་དགོངས་པའོ་ཞེས་བྱ་བའི་དོན་ཏོ། །ཡུལ་ངེས་པ་ཅན་མ་ཡིན་པའི་མི་དམིགས་པ་ཙམ་ལས་ནི་ངེས་པར་བཟུང་བ་མེད་པ་ཡིན་ལ། ཡུལ་ངེས་ཅན་ནི་སྤྱི་མངོན་སུམ་དུ་གྱུར་པ་ཉིད་ལས་མ་ཡིན་སྙམ་དུ་སེམས་པ་ལ། ལ་ལར་ནི་དངོས་པོ་

དང་དངོས་པོ་མེད་པའི་ཞེས་བྱ་བ་སྨོས་ཏེ། སྣང་བ་མི་གསལ་བའམ་ཐག་རིང་བ་ལ་ཡང་རྣམ་པ་མི་གསལ་བ་ཡིན་ལ། དེའི་གནས་སྐབས་ཀྱི་མི་སྣང་བའི་བྱེ་བྲག་གིས་དབེན་པའི་བློ་འདི་ཉིད་ནི་མི་དམིགས་པ་ཡིན་ནོ་ཞེས་བྱ་བའི་དོན་ཏོ། །ས་ཕྱོགས་ལ་སོགས་པ་འགའ་ཞིག་ཏུ་མི་སྣང་
བའི་དངོས་པོ་ས་དབེན་པ་དམིགས་པའི་དངོས་པོ་ཡང་མི་དམིགས་པ་ཡིན་པར་བསྟན་པ་ནི། དམིགས་པར་བྱ་བའི་དོན་གྱི་རང་བཞིན་ཞེས་བྱ་བ་སྟེ། མ་འཁྲུལ་པ་ཉིད་ཀྱི་དུ་བ་དང་མེ་བཞིན་དུ་སྤྱི་ལས་བྱེ་བྲག་རྟོགས་པ་ཡིན་ནོ། །གལ་ཏེ་སྔོན་པོ་དམིགས་པ་ཡོད་ན་དེའི་མིང་དྲན་པ་
ལས་སྔོན་པོའི་ཞེས་བྱ་བའི་རྣམ་པར་རྟོགས་པ་ཡིན་པ་དེ་བཞིན་དུ། ངེས་པ་མ་བཟུང་བའི་དམིགས་པ་ལ་དེའི་མིང་ལ་སོགས་པ་དྲན་པ་ལས། མཐོ་ཡོར་ཡིན་པའམ། གཞན་ཡིན་པའི་རྣམ་པར་རྟོག་པའི་ཡིད་ནི་ངེས་པར་གཟུང་བ་མེད་པར་འབྱུང་བ་ཡིན་ནོ། །མ་ཡིན་ཏེ། དང་པོ་ཉིད་
ནི་དེའི་མིང་ལ་སོགས་པ་དྲན་པ་མེད་པའི་ཕྱིར་རོ། །དང་པོ་ཡང་ངེས་པར་གཟུང་བ་མེད་པར་ཁྱད་པར་མ་དྲན་པའི་ཡུལ་དེ་ལ་ཇི་ལྟར་འགྱུར་བ་ཡིན། ཁྱད་པར་དྲན་པ་ཡིན་ན་འགྱུར་རོ་ཞེ་ན། དེ་ཉིད་ཁྱད་པར་དྲན་པ་ངེས་པར་གཟུང་བ་མེད་ན་ཐེ་ཚོམ་ཟ་བ་མ་ཡིན་ནམ། དེ་ལས་གཞན་པ་ནི་
མ་ཡིན་ཏེ། འདི་ནི་ཁྱད་པར་ངེས་པ་མ་བཟུང་བའི་བདག་ཉིད་ཡིན་པའི་ཕྱིར་རོ། །དེས་ན་ཁྱད་པར་དྲན་པ་དང་ལྷན་ཅིག་པའི་དབང་པོ་ས་དེ་ཡིན་པ་ནི་མི་རིགས་ཏེ། དེ་ཉིད་ཁྱད་པར་དྲན་པ་ངེས་པར་གཟུང་བ་མེད་པར་ཅི་ལས་འབྱུང་བ་ཡིན། ཁྱད་པར་གཉིས་ཐུན་མོང་བའི་ངོ་བོ་ཉིད་
དམིགས་པ་ལས་ཡིན་ཏེ། རྟག་པ་དང་མི་རྟག་པ་དག་གཞལ་བྱ་ཡིན་པ་ལྟ་བུའོ། །དེ་ལྟ་མོད་ཀྱི་མཐོན་པོ་མ་ཡིན་པ་ལས་ལོག་པར་ནི་ངེས་པ་ཅན་ཡིན་ལ། མཐོ་ཡོར་ལ་སོགས་པའི་བྱེ་བྲག་ངེས་པར་མ་བཟུང་བ་ནི་དྲན་པའི་རྒྱུར་འགྱུར་བ་ཡིན་ནོ། །དེ་ཉིད་ལས་ངེས་པ་ཅན་ཉིད་མ་ཡིན་
ནམ། ཅི་ལ་ཐེ་ཚོམ་ཟ་བ་ཡིན། སྔོན་པོར་ངེས་པ་ལ་ནི་སེར་པོར་ཐེ་ཚོམ་ཟ་བའམ། དེའི་རྒྱུ་ཡང་མ་ཡིན་ནོ། །མི་དམིགས་པ་ལས་ཀྱང་མཐོ་ཡོར་རམ། མི་དག་ཁོ་ནར་ཐེ་ཚོམ་ཟ་བ་མ་ཡིན་ནོ། །འོ་ན་ཅི་ཞེ་ན། གཅིག་པ་དེ་བོར་ནས་ཐམས་ཅད་འགྱུར་རོ། །འབྲེལ་

པ་ལས་ནི་དེའི་ཁྱད་པར་ལ་ངེས་པ་ཡིན་གྱི་སྤྱི་ནི་མ་ཡིན་ཏེ། ཐག་རིང་བ་བཞིན་དུ་ཉེ་བ་ལ་ཡང་དེའི་ཤེས་པར་ཐལ་བར་འགྱུར་བའི་ཕྱིར་རོ། །དེའི་ཕྱིར་མི་དམིགས་པ་ལ་ལོག་པ་ཅན་མཐོ་ཡོར་ཉིད་དམ། མི་ཉིད་དུ་ངེས་པ་ཅན་མ་ཡིན་པས་ངེས་པ་མ་བཟུང་བའི་ཕྱིར་ངེས་
པར་བཟུང་བ་མེད་པའི་བདག་ཉིད་ནི་སྤྱི་ཡིན་ལ་དེའི་ཤེས་པ་ཡང་ཐེ་ཚོམ་ཡིན་ནོ། །ཁམས་གསུམ་པོ་ལ་ཐལ་བར་འགྱུར་བ་མ་ཡིན་ཏེ། དེ་མ་ཡིན་པ་ལས་ལྡོག་པར་བྱེད་པ་ཉིད་དུ་ངེས་པས་ཁྱད་པར་ཅན་ཡིན་གྱི་ཡུལ་དུ་ངེས་པ་མ་བཟུང་བ་ནི་ཁོངས་སུ་གཏོགས་པ་ཡིན་པའི་ཕྱིར་རོ། །དེ་ཉིད་ཀྱིས་ན་བློ་ཉིད་ཅེས་བསྟན་
པ་དེའི་རྣམ་པ་མ་ཡིན་པས་དབེན་པ་ནི་ཐེ་ཚོམ་གྱི་ཤེས་པ་ཡིན་ནོ། །དེ་མ་ཡིན་པ་ལས་ལྡོག་པར་བྱེད་པ་ཡིན་ཡང་ཡུལ་ངེས་པ་ཅན་གྱི་ཁྱད་པར་གྱི་ངེས་པ་མ་བཟུང་བ་ཡིན་ཏེ། དངོས་པོ་དང་དངོས་པོ་མེད་པ་ཐུན་མོང་གི་བདག་ཉིད་ཅན་ནི་ཐེ་ཚོམ་སྟེ། ཡིད་གཉིས་ཀྱི་རྒྱུ་ཡིན་པའི་ཕྱིར་
ཐེ་ཚོམ་ཡིན་ནོ་ཞེས་པའི་དོན་ཏོ། །དེ་ཡང་དེ་མ་ཡིན་པ་ལས་ལྡོག་པར་བྱེད་པའི་ངོ་བོས་སྣང་བ་མི་དམིགས་པ་ཡིན་པའམ། དེའི་ཁྱད་པར་ལ་ལྟོས་ནས་ཀྱང་སྣང་བ་མི་དམིགས་པ་ཡིན་ནོ། །དམིགས་པར་བྱ་བའི་དོན་གྱི་རང་བཞིན་ཞེས་བྱ་བ་སྟེ། རྟོགས་པར་བྱ་བའམ།
མི་དེ་མ་ཡིན་པ་ལས་ལྡོག་པར་བྱེད་པ་ཁྱད་པར་ངེས་པ་མ་བཟུང་བ་སྣང་བ་དང་ཅིག་ཤོས་ཀྱི་མི་དམིགས་པའི་བདག་ཉིད་ནི་ཐེ་ཚོམ་ཟ་བའི་རྒྱུ་ཡིན་པའི་ཕྱིར་ཐེ་ཚོམ་ཡིན་ནོ། །དེ་ལྟ་ན་ཐེ་ཚོམ་གྱི་ཤེས་པ་ནི་དབང་པོའི་དོན་ལས་འབྱུང་བར་མ་གྱུར་ཏམ། དེ་ལྟ་ནི་མ་ཡིན་ཏེ། དོན་
བྱེད་པ་ཅན་གྱི་དབང་པོའི་དོན་ཉེ་བ་ན་གནས་པར་རུང་བ་ཉིད་ཀྱི་སྟོབས་ལས་སྐྱེས་པ་ཞེས་བསྟན་པས། དོན་བྱེད་པ་ཅན་མ་ཡིན་པ་ཐག་རིང་བ་ན་གནས་པའི་སྟོབས་ལས་བྱུང་བ་ལས། ཐེ་ཚོམ་ཟ་བར་ཐལ་བར་འགྱུར་བ་མ་ཡིན་ཏེ། ཐག་རིང་པོ་ནས་གནས་པ་ཉིད་ནི་རབ་རིབ་བཞིན་དུ་
འདི་ལྟ་བུ་ཤེས་པ་ལ་ནུས་པ་ཡིན་ལ། དབང་པོའི་དོན་ནི་དེའི་རྗེས་སུ་འཇུག་པས་ཉེ་བ་ན་གནས་པ་ཙམ་ལ་ནུས་པ་ཅན་ཡིན་ནོ། །དེ་ཡང་མིག་གིས་ནི་ཐག་རིང་པོ་ལ་མ་ཡིན་ཞེས་བསྟན་པ་ཡིན་ནོ། །དོན་མཐོང་ན་ཞེས་བྱ་བ་ནི་མི་རིགས་ཏེ། དེ་ལ་དོན་བྱེད་པ་ཅན་མ་མཐོང་བའི་ཕྱིར་རོ། །

གང་དུ་དེ་བྱེད་པ་ཅན་གྱི་ས་ཕྱོགས་ལ་སོགས་པ་མཐོང་བ་ཡིན་ན། དེ་ལྟར་ལྐོག་ཏུ་གྱུར་པའི་མེ་ལ་སོགས་པ་ལས་སྐྱེས་བུས་ཐེ་ཚོམ་ཟ་བ་མ་ཡིན་ལ། གང་དུ་དངོས་པོ་གཞན་ལ་འཇུག་པ་མ་ཡིན་པའི་བྱེ་བྲག་གིས་དངོས་པོའི་མི་དམིགས་པ་དང་། མི་དྲན་པ་ཡིན་ལ། དེ་དང་འདྲ་བ་ཉིད་
ཀྱི་དོན་བྱེད་པ་ནི་དེ་བྱེད་པ་ཅན་མ་ཡིན་པ་ལས་ལྡོག་པར་བྱེད་པ་ཡང་དམིགས་པ་ཡིན་ན་ནི། དེ་ལ་ཕྱིན་ཅི་ལོག་པ་ཡིན་ཏེ། ཉ་ཕྱིས་ལ་དངུལ་གྱི་ཤེས་པ་ལྟ་བུའོ། །གང་གི་ཚེ་འདྲ་བ་ལ་དམིགས་པ་དེའི་ཚེ་ཐ་དད་པར་མཐོང་བའི་ཕྱིར་དེ་ཉིད་དུ་སྒྲོ་འདོགས་པ་མེད་པ་མ་ཡིན་ནམ། འོན་ཏེ་
དེ་ཉིད་ཡིན་པར་དམིགས་པ་ཡིན་ན་དབང་པོ་ལས་སྐྱེས་པ་ཇི་ལྟར་ཕྱིན་ཅི་ལོག་མ་ཡིན། དོན་བྱེད་པ་ཅན་དུ་ཉམས་སུ་མྱོང་བ་ཅུང་ཟད་མཐོང་ན་ནི་ཕྱིན་ཅི་ལོག་མ་ཡིན་ལ། གཉི་ག་ཉིད་དུ་ངེས་པ་མ་བཟུང་ན་ནི་སྣང་བ་མ་ཡིན་ཏེ། གང་ཡང་རུང་བ་མེད་པར་ངེས་པའི་ཕྱིར། ངེས་པ་མེད་པ་ནི་
ཐེ་ཚོམ་ཟ་བར་ཐལ་བར་འགྱུར་རོ། །འདྲ་བའོ་ཞེས་བྱ་བའམ་དེ་ཉིད་དོ་ཞེས་བྱ་བར་དམིགས་པ་མ་ཡིན་དུ་ཟིན་ཀྱང་། འོན་ཀྱང་འདྲ་བའི་དམིགས་པ་དང་འདྲ་བ་ཡིན་པའི་ཕྱིར། འདྲ་བ་ཉིད་དུ་མ་དམིགས་པ་ལ་དགོས་པ་ཅི་ཞིག་ཡོད། སྔོན་པོ་ཞེས་ཉེ་བར་མཚོན་པ་མ་ཡིན་པའི་སྔོན་
པོར་མཐོང་བ། སྔོན་པོའི་ཤེས་པ་སྐྱེད་པར་བྱེད་པ་ཇི་ལྟར་ཡིན་པ་དེ་བཞིན་དུ་འདྲ་བ་མཐོང་བ་ཡང་འདྲ་བའོ་ཞེས་བྱ་བར་སྐྱེད་པར་བྱེད་པར་འགྱུར་རོ། །ཁྱད་པར་ཉེ་བར་མཚོན་པ་ཡིན་པ་ལ་ནི་དེ་དང་འདྲ་བ་ཞེས་བྱ་བ་མེད་པའི་ཕྱིར་དེ་ལས་འདི་ཇི་ལྟར་ཡིན། དེའི་ངོ་བོ་མཐོང་བའི་བག་ཆགས་
ལས། ཟིན་པོར་གྱུར་པའི་དེ་འདིའོ་ཞེས་བྱ་བར་འགྱུར་བ་ནི་དབང་པོ་ལས་སྐྱེས་པ་མ་ཡིན་པ་སྟེ། དབང་པོ་ལས་སྐྱེས་པས་ནི་འདྲ་བའི་དོན་བྱེད་པར་མཐོང་བ་ལས། དེའི་ངོ་བོ་ནི་ཡིད་ཀྱིས་སྒྲོ་བཏགས་པས་བརྡ་ཡོད་ན་དེ་འདི་ཡིན་ནོ་ཞེས་ཐ་སྙད་འདོགས་པ་ཡིན་གྱི་གཞན་དུ་ནི་མ་ཡིན་ནོ། །
གཉི་གའི་བྱེ་བྲག་མ་མཐོང་བ་དེ་མཐོང་བའི་བག་ཆགས་ལས་ཟིན་པོར་གྱུར་པ་མ་ཡིན་པ་ལ་ནི། ཐག་རིང་བ་ཉིད་ལ་སོགས་པའི་དབང་གིས་དབང་ལས་སྐྱེས་པ་ཉིད་རྣམ་པར་རྟོག་པའི་མཐོང་བ་ཡིན་ཏེ། གཉི་གའི་བྱེ་བྲག་དང་མཚན་ཉིད་མི་མཐུན་པའི་ཆའི་དོན་བྱེད་པ་གཉི་ག་མ་ཡིན་པ་ཐ་དད་པ་

ཅན་དངོས་པོ་ལ་མེད་པའི་ཕྱིར་རོ། །ཚད་མའི་ཡུལ་དུ་གྱུར་པའི་སྔོན་པོ་ལ་སོགས་པ་སྐད་ཅིག་མ་དང་སྐད་ཅིག་མ་མ་ཡིན་པའི་ངོ་བོར་མ་ངེས་པ་ཡང་དོན་བྱེད་པའི་གཞལ་བྱ་ཉིད་མངོན་སུམ་པ་ཡིན་ནོ། །མ་ངེས་པ་སྐད་ཅིག་མ་ཉིད་ལ་སོགས་པའི་ངེས་པ་མེད་པའི་
བདག་ཉིད་ཅན་ནི་ཐེ་ཚོམ་འདིའི་རྒྱུ་ཡིན་ནོ་ཞེས་བྱ་བ་ནི་རྣམ་པར་དབྱེ་བའོ། །དེ་ལྟ་བུའི་བློའི་གོ་བར་བྱ་བ་ནི། དེ་མ་ཡིན་པ་ལས་ལོག་པར་བྱེད་པའི་དབྱིབས་མ་ཡིན་ནམ། གཉིས་ཀྱི་བྱེ་བྲག་ངེས་པར་མ་བཟུང་བ་ཡིན་ཡང་དོན་བྱེད་པའི་ངོ་བོ་དངོས་པོ་ལས་ཐ་དད་པར་མངོན་སུམ་པ་ཡིན་
ཏེ། སྐད་ཅིག་མ་ལ་སོགས་པའི་བྱེ་བྲག་ངེས་པར་མ་བཟུང་བ་ཡང་སྔོན་པོ་ལ་སོགས་པའི་ངོ་བོ་བཞིན་དུ་ཡོད་པ་ཉིད་ན། དེ་ཡོད་པའི་ཕྱིར་དེ་ཇི་ལྟར་དབང་པོ་ལས་སྐྱེས་པ་མ་ཡིན་པར་ཐེ་ཚོམ་ཟ་བ་ཡིན་ཞེས་པའི་བསམ་པས། གལ་ཏེ་དབྱིབས་ཞེས་བྱ་བ་ལ་ལན་དུ་སྐྱེས་བུ་དང་མཐོ་
ཡོར་གྱི་ཞེས་བྱ་བ་སྟེ། གལ་ཏེ་དེ་དོན་བྱེད་པ་ཡིན་ན་ཐག་རིང་བའམ། ཉེ་བ་ལ་ཡང་སྔོན་པོ་བཞིན་དུ་ཁྱད་པར་ངེས་པར་མ་བཟུང་བ་དམིགས་པར་འགྱུར་བ་ཡིན་ནོ། །ཐག་ཉེ་བ་ལ་ནི་དེ་ལྟ་བུར་དམིགས་པ་མ་ཡིན་ཏེ། དེས་ན་ཁྱད་པར་གྱི་རྣམ་པ་ངེས་པར་མ་བཟུང་བའི་ཁྱད་པར་སྣང་བ་
ཉིད་དེ་ཡིན་ནོ། །ཁྱད་པར་གྱི་ངེས་པ་རྣམ་པར་མ་བཟུང་བའི་ཁྱད་པར་དུ་སྣང་བ་ཉིད་དེ་ཡིན་པར་བསྟན་པ་ནི། སྤྱིའི་དོན་གཞན་པ་ཉིད་ཡིན་ན་ཞེས་བྱ་བའོ། །གལ་ཏེ་ཁྱད་པར་གྱི་རྣམ་པའི་ངེས་པ་མ་བཟུང་བ་ཡིན་ན་སྣང་བ་དེ་ཇི་ལྟར་དེའི་ཡིན་སྙམ་དུ་སེམས་པས། གལ་ཏེ་ཁྱེད་ཀྱི་
ཕྱོགས་ལ་ཡང་། །ཞེས་བྱ་བ་ལ་སོགས་པ་ནས། དོན་མི་གསལ་བར་སྣང་བ་མིན། །ཞེས་བྱ་བའི་བར་དུའོ། །ལན་དུ། གལ་ཏེ་དེ་རྣམས་ཅན་མིན་པའི། །ཞེས་བྱ་བ་སྟེ། དེ་སྟེ། ངེས་པ་བཟུང་བ་འདིའི་རྣམ་པ་སྟེ། གང་ལ་རྣམ་པ་དེ་ཡོད་པ་མ་ཡིན་པ་སྟེ།
ལས་དེ་ཁྱད་པར་ལས་ཐག་རིང་བ་ཉིད་ཀྱི་ལྷན་ཅིག་བྱེད་པ་དེ་ལས་སྐྱེས་པར་འགྱུར་བ་ཉིད་ཀྱིས་དེ་ལས་སྐྱེ་བས་དེ་འཛིན་པ་ཉིད་དུ་བརྗོད་དོ། །འདི་སྐད་བསྟན་པ་ཡིན་ཏེ། ཁྱད་པར་གྱི་རྣམ་པ་ངེས་པ་མ་བཟུང་བའི་ཁྱད་པར་འཛིན་པ་ཅན་ནི། །ཁྱད་པར་གྱི་རྣམ་པའི་ཀུན་དུ་

བཟུང་བ་ལ་ལྟོས་ན་མི་གསལ་བ་ཡིན་པར་བརྗོད་དོ། །དེ་ལྟ་བུའི་བློ་ནི་རྒྱུ་མེད་པའི་ཕྱིར་ཉེ་བ་ལས་མི་སྐྱེ་བ་ཡིན་ཡང་ཐག་རིང་པའི་ལྷན་ཅིག་བྱེད་པའི་ཁྱད་པར་ལས་སྐྱེ་བ་ཡིན་ལ། སྤྱི་ནི་རྫོགས་པ་ཡིན་ཏེ་ཐག་རིང་པོར་ཡང་རང་གི་ངོ་བོ་དམིགས་པ་ཡིན་ནོ། །ཉེ་བ་ལས་ནི་ཆོས་ཤིན་ཏུ་
གསལ་བར་དམིགས་པར་འགྱུར་རོ། །མི་དམིགས་པའི་རྒྱུ་ཡོད་ན་དམིགས་པར་དང་དམིགས་པའི་རྒྱུ་ཡོད་ན་མི་དམིགས་པར་ནི་མི་རིགས་ཏེ། ཁྱད་པར་དང་སྤྱི་དག་གི་དམིགས་པར་བྱེད་པ་ལ་ནི་བྱེ་བྲག་ཅུང་ཟད་ཀྱང་མེད་དོ། །ཁྱད་པར་ལས་སྤྱི་གཞན་མ་ཡིན་པ་ནི་བདེན་ཏེ།
གཞན་གྱི་སྣང་བ་ནི་གཞན་ལ་མི་གསལ་བར་བརྗོད་པ་ནི་མ་ཡིན་ཏེ། དེ་ལྟ་མོད་ཀྱི་ཁྱད་པར་གྱི་རྣམ་པ་མ་བཟུང་བའི་བྱེ་བྲག་གི་ངོ་བོ་ནི་ཁྱད་པར་གྱི་རྣམ་པ་དང་ཐུན་མོང་བ་ཡིན་པའི་ཕྱིར་སྤྱི་ཡིན་པར་བརྗོད་པར་བྱ་བ་ཡིན་ནོ་སྙམ་དུ་སེམས་པ་ལས། འོན་ཏེ་དེ་ཉིད་སྤྱི་ཡིན་ན་ཞེས་ཟེར་བ་
ལ། ལན་ནི། བློ་དེ་ལས་ཞེས་བྱ་བ་ལ་སོགས་པས་བསྟན་པ་ཡིན་ཏེ། ཁྱད་པར་ངེས་པར་མ་བཟུང་བ་ནི་གཞན་ལས་མ་ཡིན་པའོ། །གཞན་ཡང་གཞན་ལས་ཀྱང་འདིར་བརྗོད་པར་བྱ་སྟེ། བྱེ་བྲག་ངེས་པར་མ་བཟུང་བའི་ཁ་དོག་དང་དབྱིབས་བློ་ལ་སྣང་བ་དེ་དང་བྲལ་བ་ནི་སྤྱི་ཡིན་
པར་འདོད་པ་ཡིན་ནོ། །དོན་གང་དག་ཁོ་བོས་མཐོང་བ་དེ་དག་གི་མཐོང་བ་ཉིད་ཀྱི་ཚད་ཀྱི་ཆོས་གང་དག་ཡིན་པའི་ཕྱིར་དེ་དང་འདྲ་བ་ནི་ཆོས་འདི་ཡིན་ཏེ། འདྲ་བའི་རྣམ་པ་བསྐྱེད་པར་བྱ་བ་ནི་དམིགས་པར་བྱ་བ་སྟེ། དེ་དག་གི་དོན་ལ་ཐེ་ཚོམ་ཟ་བ་ཡིན་ལ། འདྲ་བ་དོན་ནི་སྤྱིའི་དོན་ཡིན་
ནོ་སྙམ་དུ་སེམས་པས། གལ་ཏེ་སྣང་བ་ནི་ཁ་དོག་དང་དབྱིབས་ཉིད་ཡིན་ལ་ཞེས་བྱ་བ་སྟེ། ཐུན་མོང་ཡིན་པའི་ཕྱིར་ཞེས་བྱ་བ་སྟེ་འདྲ་བའི་ཕྱིར་རོ། །ལན་དུ། ཁ་དོག་དབྱིབས་དེའི་རང་བཞིན་ནི། །ཞེས་བྱ་བ་སྟེ། དེའི་འདྲ་བ་ནི་འདིའི་ཆོས་ཡིན་གྱི། དེ་ཉིད་ནི་མ་ཡིན་ན་
ཇི་ལྟར་དེ་ལས་དེ་དག་ལ་ཐེ་ཚོམ་ཟ་བ་ཡིན། གཉི་གའི་ཐུན་མོང་བ་ལ་གཅིག་པ་མེད་པའི་ཕྱིར་འདྲ་བ་ཉིད་ཁོ་ནར་སྒྲོ་བཏགས་པས་དེ་ཉིད་འདི་ཡིན་ནོ་ཞེས་ཟེར་བ་ནི་མི་རིགས་ཏེ། འཁྲུལ་པ་ཉིད་དུ་ཐལ་བར་འགྱུར་བའི་ཕྱིར་རོ་ཞེས་བསྟན་པ་ནི། བློ་ནི་འཁྲུལ་པར་ཐལ་བར་འགྱུར། །

ཞེས་བྱ་བ་སྟེ། ཆོས་དག་གི་གཅིག་པ་ཉིད་དུ་འཛིན་པར་བྱེད་པའོ། །དེས་ན་གཉི་གའི་ཐུན་མོང་བ་ལ་གཅིག་ཏུ་སྣང་བ་གཉི་ག་མི་དམིགས་པ་ཡིན་ལ། གཉི་ག་ལ་ངེས་པར་འཛིན་པ་མེད་པར་བྱེད་པར་མི་འགྱུར་རོ་ཞེས་བྱ་བར་ཉེ་བར་བསྡུ་བ་ནི། གལ་ཏེ་ཁ་དོག་དང་
དབྱིབས་གཞན་དུ་རྟོགས་ན་ཞེས་བྱ་བའོ། །ཡང་ན་མཐོ་བ་ཉིད་ནི་སྤྱི་མ་ཡིན་ཏེ། མཐོ་བའི་ཚད་དུ་གནས་པ་ཅན་ཡིན་པའི་ཕྱིར། དེ་ཡང་ངེས་པར་བཟུང་བའི་ཕྱིར་རོ། །མཐོ་བ་ཉིད་ཀྱི་ཆོས་ཀྱང་མ་ཡིན་ཏེ། དེ་ནི་ཐ་དད་པ་ལས་སྤྱིའི་ངོ་བོ་མ་ཡིན་པའི་ཕྱིར་རོ། །ཁ་དོག་དང་དབྱིབས་
ཀྱི་སྤྱི་ནི་གཅིག་པ་ཡིན་ཏེ། བདག་ཉིད་དུ་འགྱུར་བའི་ཁྱད་པར་གཉི་ག་ཐུན་མོང་བ་ཡིན་པའི་ཕྱིར་དང་། སྤྱི་ནི་ཐེ་ཚོམ་དུ་བྱེད་པ་ཡིན་ནོ་སྙམ་དུ་སེམས་པས། ཁ་དོག་དང་དབྱིབས་དག་གི་དེ་ཉིད་ཅེས་ཟེར་བ་ལ། ལན་ནི། ཁ་དོག་དབྱིབས་དེའི་རང་བཞིན་ནི། །ཞེས་བྱ་བ་ལ་གཞན་པས་
ཏེ། ཐ་དད་པའི་རང་བཞིན་ལས་མཐོ་ཡོར་དང་མི་ལ་ཡོད་པའི་ཁ་དོག་དང་། དབྱིབས་རྟོགས་པ་ལ་ཐ་མི་དད་པ་འདིས། དེ་ལས་དེ་དག་གཅིག་པ་ཉིད་ཇི་ལྟར་མ་འཁྲུལ་པ་ཡིན། དེས་ན་སྤྱི་ནི་མངོན་སུམ་པ་མ་ཡིན་ལ། མངོན་སུམ་ནི་འཁྲུལ་པ་ཅན་མ་ཡིན་ནོ། །དེའི་ཕྱིར་མཐོ་
ཡོར་དང་མི་ལ་ཡོད་པའི་ཁ་དོག་དང་དབྱིབས་ཐ་དད་པའི་ངེས་པ་མ་བཟུང་བ་ལ་སོགས་པ་ལས་སྤྱི་མ་ཡིན་པར་བརྗོད་དེ། དུས་མ་ཡིན་པའི་ཕྱིར་དང་། མི་དམིགས་པ་ཡིན་པའི་ཕྱིར་དང་། འཁྲུལ་པ་ཉིད་དུ་ཐལ་བར་འགྱུར་བའི་ཕྱིར་ཡང་ངོ་། །ཁ་དོག་དང་དབྱིབས་གཅིག་པ་མ་ཡིན་
དུ་ཟིན་ཀྱང་། ཡན་ལག་ཅན་ཡིན་ལ་དེ་ཡང་བར་མཚམས་སུ་ནི་གཅིག་ཏུ་སྣང་བ་ཡིན་ལ། དེའི་ཡང་འཁྱོག་པོ་བུ་ག་ཅན་ལ་སོགས་པའི་བྱེ་བྲག་ཏུ་བྱེད་པ་གང་ཡིན་པ་རྣམས་དང་། ལག་པ་ལ་སོགས་པ་དེ་རྣམས་སུ་ཐག་རིང་བ་ལ་སོགས་པ་མཐོང་བ་མ་ཡིན་ལ། ཁ་དོག་ལ་སོགས་
པའི་ཁྱད་པར་ནི་ཡན་ལག་ཅན་མ་ཡིན་ཏེ། དེ་མི་འཛིན་པ་ཡང་དངོས་པོའི་ཉེ་བར་བསྒྱུར་བས་ཡན་ལག་ཅན་ཤེལ་དུ་འཛིན་པའི་ཕྱིར་ལ། ཤེལ་ནི་གཞན་པ་ཉིད་དུ་དེར་སྐྱེས་པ་མ་ཡིན་ཏེ། དེའི་ཚེ་ཡང་སྔ་མ་ཉིད་དུ་ངོ་ཤེས་པའི་ཕྱིར་ཏེ། དེས་ན་བྱེ་བྲག་ངེས་པར་མ་བཟུང་བ་ཉིད་

སྤྱི་ཡིན་པར་མི་རིགས་སོ་སྙམ་དུ་སེམས་པས། འོན་ཏེ་དེར་ཡན་ལག་ཅན་སྣང་བ་ཞེས་བྱ་བ་ལ་སོགས་པ་སྨྲས་པ་ལ། ལན་ནི། ཁ་དོག་དབྱིབས་ཀྱི་རང་བཞིན་ལས། །ཞེས་བྱ་བ་སྟེ། ཁ་དོག་ཙམ་ནི་རྫས་མ་ཡིན་ཏེ། ཐམས་ཅད་ཀྱང་དེའི་ངོ་བོ་ཉིད་དུ་བྱེ་བྲག་མེད་པར་ཐལ་བར་
འགྱུར་བའི་ཕྱིར་ལ། རྫས་ཀྱང་ད