Luận tạng Tây Tạng (Tengyur) — Tập 138

་ནི་དོན་དམ་པའོ། །གཞན་གྱི་དབང་གི་ཤེས་པ་ཡིས། །ཕུང་པོ་ལ་སོགས་ཀུན་བརྟགས་པ། །ཡང་དག་ཤེས་ལ་སྣང་མ་ཡིན། །སྣང་བ་ཡོངས་སུ་གྲུབ་པ་ཡིན། །ཕུང་པོ་ལ་སོགས་པའི་ཆོས་ཇི་ལྟར་རིགས་
པ་བཞིན་གཟུང་བ་དང་འཛིན་པའི་མཚན་ཉིད་དེ་དག་ནི་ཡོད་པ་མ་ཡིན་ཏེ་ཡོད་པར་མ་རིག་པའི་ཕྱིར་དང་། གཅིག་དང་དུ་མ་བྲལ་བའི་ཕྱིར་རོ། །འོ་ན་ཇི་ལྟར་སྣང་ཞེ་ན། གང་གི་ཕྱིར་འཁྲུལ་པའི་བག་ཆགས་ལས་སྐྱེས་པའི་ཕྱིར་གཞན་གྱི་དབང་གི་ཤེས་པ་འཁྲུལ་པས་ཀུན་ཏུ་བརྟགས་པ་ཡིན་ཏེ།
ཕུང་པོ་ལ་སོགས་པ་མེད་པའི་བདག་ཉིད་དེ་སྣང་བའི་ཕྱིར་རོ། །དེ་ཉིད་ཀྱི་ཕྱིར་ཡང་དག་པའི་ཤེས་པ་ལ་དེ་དག་སྣང་བ་མ་ཡིན་ཏེ། ཡང་དག་པ་དང་བརྫུན་པ་གཉིས་གཅིག་པ་ཉིད་དུ་འགལ་བའི་ཕྱིར་རོ། །དེ་ནི་སྣང་བས་དེའི་སྟོང་པ་ཉིད་ཀྱི་མཚན་ཉིད་ནི་ཡོངས་སུ་གྲུབ་པ་ཉིད་ཀྱི་རང་བཞིན་དེ་དག་
ཡང་དག་པའི་ཤེས་པ་ལ་སྣང་སྟེ། དེའི་ཕྱིར་དེ་ལ་འཁྲུལ་པ་མི་མངའོ། །ཀླུ་སྒྲུབ་ཀྱི་ཞལ་སྔ་ནས་ཀྱིས་ཀྱང་འདི་སྐད་དུ། འབྱུང་བ་ཆེ་ལ་སོགས་བཤད་པ། །རྣམ་པར་ཤེས་སུ་ཡང་དག་འདུ། །དེ་ཤེས་པས་ནི་བྲལ་གྱུར་ན། །ལོག་པར་རྣམ་བརྟགས་མ་ཡིན་ནམ། །ཞེས་གསུངས་

པའི་དོན་ནི་འདི་དག་ཡིན་ཏེ། །འབྱུང་བ་ཆེན་པོ་ལ་སོགས་པ་ནི་ས་ལ་སོགས་པ་སྟེ། བཅོམ་ལྡན་འདས་ཀྱིས་གང་གསུངས་པ་དེ་དག་རྣམ་པར་ཤེས་པ་ཡང་དག་པ་མ་ཡིན་པའི་ཀུན་ཏུ་རྟོག་པ་ལ་སྣང་བ་ནི་འདུ་བ་ཡང་དག་པར་འདུས་པ་ཡིན་ཏེ། ཡང་དག་པ་མ་ཡིན་པའི་བདག་ཉིད་
དེས་དེ་སྣང་བའི་ཕྱིར་རོ། །དེ་ཉིད་ཀྱི་ཕྱིར་ཡང་དག་པ་ཤེས་པ་བསྒོམས་པའི་སྟོབས་ལས་བྱུང་བའི་བྲལ་བ་ནི་ནུབ་པ་སྟེ། མི་སྣང་བར་གྱུར་པ་ཡིན་ནོ། །གང་གི་ཕྱིར། ལོག་པར་རྣམ་བརྟགས་མ་ཡིན་ནམ། ཞེས་བྱ་བ་ནི་ལོག་པའི་ཤེས་པ་ཉིད་ལ་སྣང་བ་ནི་ཡང་དག་པའི་ཤེས་
པ་མ་ཡིན་ནོ། །འདིར་ས་ལ་སོགས་པ་རྣམ་པར་ཤེས་པར་བསྡུ་བའི་ཚིག་ཡིན་པའི་ཕྱིར་དང་། ཡང་དག་པའི་ཤེས་པ་སྐྱེས་པ་ལ་འཁྲུལ་པ་བཟློག་པའི་ཚིག་ཡིན་པའི་ཕྱིར་རོ། །གང་ཞིག་ཕྱི་རོལ་གྱི་རང་གི་གཟུགས་ཀྱི་ཕུང་པོ་འདོད་པ་དང་། གཞན་ཕུང་པོ་གཞི་ཟད་པའི་མཚན་ཉིད་འཁྲུལ་
པ་བཟློག་པར་འདོད་པ་དེ་དག་ནི། ཀླུ་སྒྲུབ་ཀྱི་སློབ་མ་མ་ཡིན་ཏེ། ཤེས་པ་ཡོད་པ་ལ་སོགས་པ་དགག་པར་བརྗོད་པའི་ཕྱིར་དང་། ས་ལ་སོགས་པ་སྒྲོ་བཏགས་པར་བསྟན་པའི་ཕྱིར་རོ། །ཡང་གང་ཞིག་སྔོན་པོ་ལ་སོགས་པ་དང་། དེ་ཤེས་པ་གཉིས་བརྫུན་པར་འདྲ་བ་ཉིད་དང་། གནས་
པར་འདྲ་བར་སྨྲ་བ་དེ་དག་ཀྱང་། ཀླུ་སྒྲུབ་ཀྱི་སློབ་མ་མ་ཡིན་ནོ། །འཇིག་རྟེན་པའི་ཚད་མའི་དབང་དུ་བྱས་ནས། ཚིགས་སུ་བཅད་པ་བདུན་སྟོན་ཏེ། དཀར་པོ་ལ་སོགས་སྣང་བས་བསྒྲུབ། །མི་སྣང་དེ་ཉིད་བཀག་པ་ཡིན། །ཤེས་པ་དེ་ཉིད་རང་རིག་སྟེ། །གཞན་དུ་ཐུག་པ་མེད་པར་
འགྱུར། །དཀར་པོ་དང་། སེར་པོ་དང་། དམར་པོ་ལ་སོགས་པ་སྣང་བར་གྲུབ་སྟེ། དཀར་པོ་དང་སེར་པོ་ལ་སོགས་པ་སྣང་བ་ཉིད་ནི། ངེས་པའི་ཕྱིར་རོ། །གང་སྣང་བ་མེད་པར་གང་ཞིག་སྨྲ་བ་ནི། སྣང་བ་དེ་ཉིད་རང་དང་འགལ་ལོ། །རྟོགས་པ་ནི་རྟོགས་པ་མེད་པ་དང་འགལ་ལོ་ཞེས་
གང་གསུངས་པ་ཡིན་ནོ། །སྣང་བ་དེ་ཉིད་ཤེས་པ་ཡིན་ཏེ། འདི་ལྟར་སྣང་བ་ནི་གསལ་བའོ། །དེ་གང་གི་ངོ་བོ་མ་ཡིན་པ་དེས། བདག་ཉིད་ཤེས་པ་མ་ཡིན་ཏེ། དེ་གསལ་བ་དང་འབྲེལ་པ་མེད་པའི་ཕྱིར་རོ། །གཞན་དང་འབྲེལ་པའི་སྣང་བ་ལས་ཀྱང་མ་ཡིན་ཏེ། གཞན་དང་འབྲེལ་པ་མེད་པའི་ཕྱིར་

ཤེས་པ་ཉིད་དུ་མི་འགྱུར་རོ། །དེའི་ཕྱིར་ཤེས་པ་ཉིད་སྣང་བ་ཡིན་ཏེ། དེ་ཉིད་ཀྱང་རང་རིག་པ་ཡང་ཡིན་ཏེ། གང་གི་ཕྱིར་སྣང་བའི་ངོ་བོ་ཉིད་ཀྱིས་ཡང་དག་པར་རིག་པ་ཡིན་གྱི། ཤེས་པའང་རང་རིག་པ་མ་ཡིན་ཏེ། དོན་བཞིན་ནོ། །འོན་ཀྱང་ཤེས་པ་གཞན་
གྱིས་རིག་པ་ཡིན་ནོ་ཞེས་ཟེར་ན། དེ་ལྟར་ཡིན་ན་དེ་ཡང་ཤེས་པ་གཞན་གྱིས་རིག་པར་བྱ་དགོས་པས་ཐུག་པ་མེད་པར་ཐལ་བར་འགྱུར་རོ། །དེ་བས་ན་ཤེས་པ་དེ་ཉིད་རང་རིག་པ་ཡིན་ནོ། །ཚད་མ་དེ་ཡང་སླུ་མེད་ཕྱིར། །མི་སླུ་བ་ནི་འབྲེལ་པའི་ཕྱིར། །རྟོགས་པའི་དངོས་དེས་ནུས་པར་ཡོད། །དེ་ཡི་བདག་ཉིད་
མཚན་ཉིད་དོ། །ཤེས་པ་དེ་ཡང་མི་སླུ་བ་ཡོད་ན་ཚད་མར་འགྱུར་རོ། །མི་སླུ་བ་ནི་དོན་ལ་འཁྲུལ་པ་མེད་དེ། དེ་ཡང་མི་སླུ་བའི་ཕྱིར་རོ། །འབྲེལ་པ་ནི་རག་ལུས་པ་སྟེ། དེ་ནི་རྣམ་པ་གཉིས་ཏེ། དེའི་བདག་ཉིད་ཀྱི་མཚན་ཉིད་དང་། དེ་ལས་བྱུང་བའི་མཚན་ཉིད་དོ། །དེའི་བདག་ཉིད་གང་ལ་
ཡོད་པ་དེ་ནི་དེའི་བདག་ཉིད་དོ། །ཡང་གང་གི་བདག་ཉིད་གང་ཡིན་པ་དེས་ཇི་ལྟར་སྤོང་། གང་ཞིག་གང་ལས་སྐྱེས་པ་དེ་དེ་ལས་བྱུང་བའི་མཚན་ཉིད་དེ་ཇི་ལྟར་སྤོང་བར་འགྱུར། དེ་ལ་དེས་ཞེས་བྱ་བ་ནི་ཤེས་པའི་རང་གི་ངོ་བོ་རྟོགས་པ་དང་། ནུས་པ་ཡང་ཡོད་ན་དེའི་བདག་ཉིད་ཀྱི་འབྲེལ་པའི་
མཚན་ཉིད་ཡོད་དོ། །དེ་ལས་ཡང་གང་ཞིག་ཡིན་ཞེ་ན། སྨྲས་པ། ནུས་དང་ཤེས་པའི་བདག་ཉིད་པས། །དེ་ཕྱིར་མངོན་སུམ་ཚད་མ་ཡིན། །སྔོན་པོ་ལ་སོགས་པར་རིགས་པ་ནི་འཁྲུལ་པ་སྟེ། དེ་ནི་མེད་པར་སྣང་བའི་ཕྱིར་རོ། །གལ་ཏེ་དེ་མེད་པར་ཡང་སྣང་ན། ཡོད་པའི་སྔོན་
པོ་ལ་སོགས་གང་། །ཕྱི་རོལ་ཅི་ཡི་ཕྱིར་མི་སྣང་། །སྔོན་པོ་ལ་སོགས་པ་ནི་མེད་པ་སྟེ། གཅིག་དང་དུ་མ་དང་བྲལ་བའི་ཕྱིར་རོ། །གཞན་ཡང་། ཕྱི་རོལ་མངོན་སུམ་མིན་གཞན་ཕྱིར། །འགུགས་པ་མིན་ཕྱིར་འཁྲུལ་མ་ཡིན། །དེ་ལ་རེ་ཞིག་ཕྱི་རོལ་གྱི་སྔོན་པོ་ལ་སོགས་པ་ཤེས་
པའི་མངོན་སུམ་དུ་འགྱུར་བ་མི་འོས་ཏེ། ཤེས་པ་ལས་དོན་གཞན་ཤེས་པར་གནས་པའི་གསལ་བ་དང་འབྲེལ་པ་མེད་པའི་ཕྱིར་རོ། །འཁྲུལ་པ་ཡང་མ་ཡིན་ཏེ། འདི་ལྟར་ཆུར་འཁྲུལ་པའི་ཡུལ་སྨིག་རྒྱུ་ཡིན་ནམ་ཆུ་ཡིན། དེ་ལ་རེ་ཞིག་སྨིག་རྒྱུ་ནི་མ་ཡིན་ཏེ། དེ་མི་སྣང་བའི་ཕྱིར་རོ། །

ཆུ་ཡང་མ་ཡིན་ཏེ། དེ་ལ་དེ་མེད་པའི་ཕྱིར་རོ། །སྨིག་རྒྱུ་ཉིད་ཆུའི་དངོས་པོར་སྣང་ངོ་ཞེས་ཟེར་ན་མེད་པ་སྣང་བ་ཉིད་དུ་འགྱུར་རོ། །ཆུ་མེད་པ་ཡང་མ་ཡིན་ཏེ། གཞན་ན་ཡོད་པའི་ཕྱིར་རོ་ཞེས་ཟེར་ན། མ་བཀུག་པར་དེ་ཅི་ལྟར་སྣང་། བཀུག་ན་ནི་འཁྲུལ་པ་ཡིན་ནོ། །བདག་བརྒྱ་
བྱིན་ལ་སོགས་པ་ཡིན་ནོ་ཞེས་སེམས་པས་ཀྱང་བརྒྱ་བྱིན་ལ་སོགས་པ་ཐོབ་པར་འགྱུར་རོ། །དེ་ལྟ་བས་ན་མ་བཀུག་པའི་ཕྱིར་ཡང་ཕྱིའི་དོན་ལ་འཁྲུལ་པ་མི་རིགས་སོ། །སླུ་བ་མེད་པའི་རྣམ་པར་མི་རྟོག་པ་བཤད་ཟིན་ཏོ། །རྟོག་པ་ཅན་བཤད་པར་བྱ་སྟེ། རྣམ་རྟོག་ཁ་ཅིག་དོན་གཞན་
ལ། །གང་ཕྱིར་ཞེན་པས་སླུ་བ་མེད། །རྣམ་པར་རྟོག་པ་ཁ་ཅིག་དོན་གཞན་ལ་མི་སླུ་མོད་ཀྱི་དོན་གཞན་ལ་ཡང་དག་པར་མི་རིགས་པ་མ་ཡིན་ནམ། དེ་ལ་ཇི་ལྟར་མི་སླུ་བ་ཡིན་ཞེ་ན། མངོན་པར་ཞེན་པའི་ཕྱིར་རོ། །དོན་གཞན་ཡང་དག་པ་མ་རྟོགས་ཀྱང་དེས་གཞན་པ་ཡིན་ཏེ།
དེ་དེར་དེ་ལས་བྱུང་བའི་གཞན་དང་བརྒྱུད་པས་འབྲེལ་པ་ཡོད་དེ། དེ་བས་ན་དེ་ལ་མི་སླུ་བ་ཡིན་ནོ། །འོ་ན་ནི་དེ་ལ་དོན་གཞན་སྣང་བ་མ་ཡིན་ཏེ། མི་སྣང་བ་ལ་ཡང་ཞེན་པ་མ་ཡིན་ཏེ། ཤིན་ཏུ་ཐལ་བར་འགྱུར་བའི་ཕྱིར་རོ། །དེ་ལྟ་བས་ན་དེ་ཇི་ལྟར་ཞེན་པར་འགྱུར། འདི་ནི་ཉེས་པ་མེད་
དེ། བ་ལང་མ་ཡིན་པ་ལས་ལྡོག་པ་ནི་རྣམ་པར་རྟོག་པ་ལ་སྣང་སྟེ། དེ་ཁྲ་བོ་ལ་ཡང་ཡོད་པས་དེ་ལ་ཡང་དག་པར་རིག་པ་ལ་ཞེན་པར་རིགས་སོ། །དོན་དང་ཤེས་པ་ཤིན་ཏུ་ཐ་དད་པའི་ཕྱིར་དེ་གཉིས་ངོ་བོ་གཅིག་པ་མ་ཡིན་ནོ་ཞེས་ཟེར་ན། དེ་ཉིད་མེད་ཕྱིར་བརྫུན་པ་ནི། །ཇི་ལྟར་སྣང་བཞིན་
རྣམ་པར་གཞག །སྒྲ་དང་རྣམ་པར་རྟོག་པའི་དོན་གཉིས་ནི་བརྫུན་པ་ཡིན་ཏེ། བརྫུན་པ་ལ་ནི་དེ་ཁོ་ན་ཉིད་མེད་དོ། །ཇི་ལྟར་རྟོགས་པ་འབའ་ཞིག་དེའི་དེ་ཁོ་ན་ཡིན་གྱི། ཇི་ལྟ་བ་བཞིན་དེ་ཁོ་ན་ཉིད་མ་ཡིན་ནོ། །བ་ལང་གི་རྣམ་པར་རྟོག་པ་ལས་བ་ལང་མ་ཡིན་པ་ལས་ལྡོག་པ་རྟོགས་པ་
ཡོད་པས། འདི་ལ་རིགས་པས་གནོད་པ་མེད་དོ། །དཔེ་བསྟན་པར་བྱ་སྟེ། ཇི་བཞིན་ཡང་དག་དྲན་པ་དང་། །ཇི་ལྟར་མངོན་སུམ་རྗེས་སྐྱེས་ནི། །ཡང་དག་པར་དྲན་པ་ནི་ཡང་དག་པར་དྲན་པའོ། །མངོན་སུམ་གྱི་རྗེས་ལས་སྐྱེས་ཞེས་བྱ་བ་ནི་མངོན་སུམ་གྱི་སྟོབས་ལས་སྐྱེས་པའི་རྣམ་

པར་རྟོག་པའོ། །དེ་ཡང་ཚད་མ་མ་ཡིན་ཏེ། དེ་དག་གཟུང་བ་དང་འཛིན་པའི་ཕྱིར་རོ། །གལ་ཏེ་ཡང་རྣམ་པར་རྟོག་པ་འདི་དག་མི་སླུ་བ་ཙམ་གྱིས་ནི་ཚད་མ་མ་ཡིན་ཏེ། གཟུང་བ་དང་འཛིན་པའི་ཕྱིར་རོ། །ཇི་ལྟར་གཟུང་བ་དང་འཛིན་པའི་ཕྱིར་དྲན་པ་ཚད་
མ་མ་ཡིན་པ་དེ་བཞིན་དུ་མངོན་སུམ་གྱི་རྗེས་ལས་སྐྱེས་པའི་རྣམ་པར་རྟོག་པའི་ཡང་ཡིན་ཏེ། ཁྱད་པར་མེད་པའི་ཕྱིར་རོ། །རྣམ་པར་མི་རྟོག་པས་དངོས་པོ་བཟུང་ནས་དེའི་རྗེས་ལས་སྐྱེས་པའི་རྣམ་པར་རྟོག་པས་རིགས་ལ་སོགས་པའི་ཁྱད་པར་འཛིན་ཏེ། རིགས་ལ་སོགས་པ་བ་ལང་
དང་བ་ལང་དཀར་པོར་འགྲོ་བ་བཞིན་ནོ་ཞེས་ཟེར་ན། ཐམས་ཅད་རིགས་མཐུན་པ་དང་། མི་མཐུན་པ་ལས་ལྡོག་པའི་དངོས་པོའི་ངོ་བོ་ཡིན་ཏེ། དེ་རྣམ་པར་མི་རྟོག་པས་གཟུང་བས་བ་ལང་མ་ཡིན་པ་ལས་ལྡོག་པ་བ་ལང་དང་། དཀར་པོ་མ་ཡིན་པ་ལས་ལོག་པའི་དཀར་པོ་དང་། མི་
འགྲོ་བ་ལས་ལོག་པའི་འགྲོ་བའི་ཤེས་པས་ཇི་ལྟར་མ་བཟུང་བ་འཛིན་པ་ཡིན། གཞན་ཡང་བ་ལང་མཐོང་ན་བ་ལང་ཡིན་ནོ་ཞེས་ངེས་པ་ནི་མངོན་སུམ་གྱི་ཚད་མ་མ་ཡིན་ཏེ། དངོས་པོའི་ངོ་བོ་ཡང་དག་པར་མ་རེག་པའི་ཕྱིར་རོ། །གལ་ཏེ་རེག་ན་ཐམས་ཅད་ཀྱི་བདག་ཉིད་ངེས་པར་
ཐལ་བར་འགྱུར་རོ། །དེ་བས་ན་འདི་ནི་ཡང་དག་པར་རིག་པ་མ་ཡིན་པའི་དངོས་པོའི་ངོ་བོ་ལ་མངོན་པར་ཞེན་པ་ཡིན་པའི་ཕྱིར་མངོན་སུམ་གྱི་ཚད་མ་མ་ཡིན་ནོ། །རྟགས་མེད་པའི་ཕྱིར་རྗེས་སུ་དཔག་པ་ཡང་མ་ཡིན་ནོ། །བ་ལང་ངོ་ཞེས་པའི་རྣམ་པར་རྟོག་པས་ཀྱང་བ་ལང་གི་རང་གི་ངོ་
བོ་ཉམས་སུ་མྱོང་བ་ཡིན་ནོ་ཞེས་ཟེར་ན། ཡང་རྟར་རྣམ་པར་རྟོག་པས་བ་ལང་མཐོང་བ་དེ་བཞིན་ནོ། །རྣམ་པར་མི་རྟོག་པས་བ་ལང་མཐོང་བ་ནི་རྒྱུ་མ་ཚང་བ་མེད་པའི་ཕྱིར་དེས་བསྐྱེད་པ་དང་བ་ལང་གི་རྣམ་པར་རྟོག་པ་དེ་བྱེ་བྲག་མེད་པར་འཁྲུལ་པ་ཡིན་ཏེ། འདི་ལྟར་ཞེན་པ་དང་ཡུལ་གཅིག་
ཡིན་པའི་ཕྱིར་རོ། །རྟར་རྣམ་པར་རྟོག་པ་མ་ཡིན་ཏེ་བཟློག་པའི་ཕྱིར་རོ། །དེ་ལྟ་ཡིན་ན་རྗེས་སུ་དཔག་པ་ནི་ཚད་མ་ཡིན་པར་མི་འགྱུར་ཏེ། ཁྱད་པར་རྗེས་འགྲོ་མེད་པ་དང་། །སྤྱི་ནི་གྲུབ་པ་སྒྲུབ་པ་ཡིན། །ཁྱད་པར་ནི་བསྒྲུབ་པར་བྱ་བ་མ་ཡིན་ཏེ། དེའི་དཔེ་ལ་རྗེས་སུ་འགྲོ་བ་མེད་པའི་

ཕྱིར་རོ། །སྤྱི་ཉིད་བསྒྲུབ་པར་བྱ་བ་ཡིན་ན་ནི་དེའི་ཕྱིར་གཟུང་བ་དང་འཛིན་པར་འགྱུར་རོ། །འདིར་སྨྲས་པ། གང་ཕྱིར་ཁྱད་པར་འཛིན་པའི་ཕྱིར། །རྗེས་སུ་དཔག་པ་ཚད་མ་ཡིན། །ཆོས་ཅན་མ་འབྲེལ་རྣམ་གཅོད་པས། །སྤྱི་ཡང་འཛིན་པར་བྱེད་པ་ཡིན། །སྤྱི་ནི་གྲུབ་པ་སྒྲུབ་པ་
ཡིན། །ཞེས་གང་སྨྲས་པ་ལ། སྤྱི་གང་དུ་གྲུབ། དཔེའི་ཆོས་ཅན་ལའོ་ཞེས་ཟེར་ན། དེ་ལྟ་ཡིན་ན་དཔེའི་ཆོས་ཅན་ཁྱད་པར་དང་ལྡན་པ་དེ་ཇི་ལྟར་སྤྱིར་འགྱུར། འོན་ཏེ་དེ་ཁྱད་པར་དང་ལྡན་པ་ཡང་སྤྱི་ཉིད་ཡིན་ན་བསྒྲུབ་པར་བྱ་བའི་ཆོས་ཅན་གྱི་ཁྱད་པར་ཇི་ལྟར་སྤྱི་མ་ཡིན། དེ་བས་ན་
འདི་ལྟར་བརྗོད་པར་བྱ་སྟེ། གལ་ཏེ་གཞན་དང་ལྡན་པ་རྣམ་པར་གཅོད་པས་ཁྱད་པར་དུ་བྱས་པ་དཔེའི་ཆོས་ཅན་ཉིད་གང་ཡིན་པ་དེ་ཉིད་ནི་སྤྱི་ཡིན་པར་མི་འགྱུར་རོ། །འདིར་མ་འབྲེལ་པ་རྣམ་པར་གཅོད་པས་ཁྱད་པར་དུ་བྱས་པར་འདོད་དེ། དཔེའི་ཆོས་གང་ཡིན་པ་དེ་ཉིད་ཡང་བདག་
ཅག་ནི་མ་འབྲེལ་བར་རྣམ་པར་གཅོད་པས་མེའི་ཕྱོགས་ཁྱད་པར་དུ་བྱས་པས་རྗེས་སུ་འགྲོ་བ་ལ་ཉེས་པ་མེད་དོ། །དེ་ཉིད་ཀྱི་ཕྱིར་ཆོས་ཅན་དང་མ་འབྲེལ་པ་རྣམ་པར་གཅོད་པས་སྤྱི་ཡང་བཟུང་ལ་དེ་མ་འབྲེལ་པ་རྣམ་པར་གཅོད་པའི་མཚན་ཉིད་ཀྱང་ཁྱད་པར་འཛིན་ཏོ། །དེ་བས་ན་རྗེས་སུ་
དཔག་པ་ནི་ཚད་མར་རིགས་ཏེ། མ་བཟུང་བ་འཛིན་པའི་ཕྱིར་རོ། །གང་དེ་རང་གི་ཡུལ་དང་འབྲེལ་པ་ཡིན་ནམ་ཞེ་ན། དེ་བརྒྱུད་དེ་ལས་བྱུང་བ་ནི། །རྗེས་དཔག་བློ་ཡི་འབྲེལ་པ་ཡིན། །བརྒྱུད་པས་རྗེས་སུ་དཔག་པའི་ཤེས་པའི་ཡུལ་དང་། དེ་ལས་བྱུང་བའི་མཚན་ཉིད་ཀྱི་འབྲེལ་པ་ཡིན་
ནོ། །འདི་ལྟར་རྗེས་སུ་དཔག་པར་བྱ་བ་ནི། །རྟགས་ལས་ཤེས་ཏེ་རྗེས་དཔག་ཡིན། །རྗེས་སུ་དཔག་པར་བྱ་བའི་དོན་ལས་དེའི་རྟགས་ངེས་པ་ནི་བརྒྱུད་པ་ཡིན་ནོ། །རྟགས་ངེས་པ་ལས་རྗེས་སུ་དཔག་པ་ནི་འཇིག་རྟེན་པའི་ཚད་མ་མཚན་ཉིད་ཡིན་ནོ། །ཀུན་ནས་ཉོན་མོངས་དམིགས་པ་དང་། །
གང་ཞིག་དམིགས་པ་ཅན་དག་ནི། །ཀུན་རྫོབ་དང་ནི་དོན་དམ་སྟེ། །དེ་གཉིས་བདེན་དང་གོ་རིམས་བཞིན། །ཀུན་ནས་ཉོན་མོངས་པའི་དམིགས་པ་གང་ཡིན་པ་དེ་ནི་ཀུན་རྫོབ་ཀྱི་བདེན་པའོ། །རྣམ་པར་དག་པའི་དམིགས་པ་གང་ཡིན་པ་དེ་ནི་དོན་དམ་པའི་བདེན་པའོ། །དེ་ཡང་གང་ཞིག་

ཡིན་ཞེ་ན། སྨྲས་པ། ཡང་དག་མ་ཡིན་ཀུན་རྟོག་གིས། །བཏགས་པའི་བདག་ཉིད་ཀུན་རྫོབ་ཡིན། །དེ་ཉིད་སྟོང་པའི་བདག་ཉིད་ནི། །དམ་པའི་དོན་དུ་ཤེས་པར་བྱ། །ཐེག་པ་ཆེན་པོ་ལས་ཡོད་པ་རྣམ་པ་བཞིར་བཞེད་དེ། དེ་བསྟན་པའི་ཕྱིར་
སྨྲས་པ། བདེན་པ་དེ་ཉིད་ཀུན་རྫོབ་དང་། །དམ་པའི་དོན་དུ་ཡོད་པར་བཞེད། །བརྟགས་པར་ཡོད་དང་རྫས་ཡོད་དང་། །བརྟགས་དང་ཡང་དག་མིན་ཀུན་རྟོག །ཀུན་རྫོབ་ཀྱི་བདེན་པ་ཉིད་ནི་ཀུན་རྫོབ་ཏུ་ཡོད་པའོ། །དོན་དམ་པའི་བདེན་པ་ཉིད་ནི་དོན་དམ་པར་ཡོད་པའོ། །
ཀུན་བརྟགས་པའི་ངོ་བོ་ནི་བརྟགས་པར་ཡོད་པ་ཡིན་ཏེ། ཐ་སྙད་ཙམ་ཡིན་པའི་ཕྱིར་རོ། །གཞན་གྱི་དབང་གི་ངོ་བོ་ནི་རྫས་སུ་ཡོད་པ་ཡིན་ཏེ། རྟེན་ཅིང་འབྲེལ་པར་འབྱུང་བ་ཡིན་པའི་ཕྱིར་རོ། །དེ་དག་ནི་བདེན་པ་གཉིས་སོ། །གང་ཞིག་བདག་ཅག་རྣམས་ཀྱི་དང་། །ཐམས་
ཅད་བརྫུན་སྨྲའི་ཤེས་བྱེད་དང་། །དེ་རྗེས་རྟོགས་ཕྱིར་དེ་དག་གི །ཤིང་རྟ་ཆེན་པོས་ལམ་དུ་གསུངས། །མདོ་གང་གིས་ཆ་བདག་ཅག་གི་ཤེས་པར་བྱེད་པ་དང་། ཡང་གང་གཞན་དག་གི་ཡང་དག་པའི་དོན་རྟོགས་པར་བྱ་བའི་ཕྱིར་ཤིང་རྟ་ཆེན་པོ་ནི་འཕགས་པ་བྱམས་པ་དང་།
ཐོགས་མེད་དང་། ཀླུ་སྒྲུབ་དང་། དབྱིག་གཉེན་རྣམས་ཀྱིས་ལམ་གང་ཡིན་པ་དེ་གསུངས་ཏེ། དེ་དག་གིས་ཡང་དག་པར་བསྟན་པའི་ཕྱིར་རོ། །དེ་ལ་བདག་ཅག་རྣམས་ཀྱིས་ཞེས་བྱ་བ་ནི་རང་བཞིན་གསུམ་གྱི་ཚུལ་གྱིས་ཤེས་པར་བྱེད་པ་དགོངས་པ་ངེས་པར་འགྲེལ་པ་ལ་སོགས་
པའི་མདོའི་ཆ་རྣམས་ཡིན་ནོ། །ཀུན་གྱི་མཆོག་ཆོས་ཆེན་པོའི་མེ་ལོང་ལྟ་བུ་ཞེས་བྱ་བའི་ཆོས་ཀྱི་རྣམ་གྲངས་ཀྱི་དཔེའི་དོན་དེ་ཉིད་བསྟན་པར་བྱ་སྟེ། དེ་ནི་ཐེག་པ་ཆེན་པོའི་ཆོས་ཀྱི་མེ་ལོང་ཆེན་པོ་ཡིན་ཏེ། དེ་ཡང་དོན་བསྡུས་ནས་དོན་གཙོ་ཆེར་བཤད་ཀྱི། གདོན་མི་ཟ་བར་ཚིག་
ནི་མ་ཡིན་ནོ། །དེ་ལས་བྱང་ཆུབ་སེམས་དཔའ་སྒྲ་ཇི་བཞིན་དུ་ཚུལ་བཞིན་མ་ཡིན་པར་ཆོས་ལ་རྣམ་པར་དཔྱོད་པས་ཡང་དག་པ་མ་ཡིན་པའི་ལྟ་བ་ཉི་ཤུ་རྩ་བརྒྱད་འབྱུང་སྟེ། འདི་ལྟ་སྟེ། མཚན་མའི་ལྟ་བ་དང་། བརྟགས་པ་ལ་སྐུར་པ་འདེབས་པའི་ལྟ་བ་དང་། ཀུན་དུ་བརྟགས་

པ་ལ་སྐུར་པ་འདེབས་པའི་ལྟ་བ་དང་། དེ་ཁོ་ན་ཉིད་ལ་སྐུར་པ་འདེབས་པའི་ལྟ་བ་དང་། ཡོངས་སུ་འཛིན་པར་ལྟ་བ་དང་། ཡོངས་སུ་སྒྱུར་བའི་ལྟ་བ་དང་། ཡོངས་སུ་ཁ་ན་མ་ཐོ་བ་མེད་པར་ལྟ་བ་དང་། ངེས་པར་འབྱུང་བའི་ལྟ་བ་དང་། བརྙས་པའི་ལྟ་བ་དང་། རབ་ཏུ་ཁྲོ་བའི་ལྟ་བ་དང་། ཕྱིན་
ཅི་ལོག་གི་ལྟ་བ་དང་། སྐྱེད་པར་ལྟ་བ་དང་། ཁས་མི་ལེན་པའི་ལྟ་བ་དང་། ངན་གཡོའི་ལྟ་བ་དང་། བཀུར་སྟི་བྱེད་པའི་ལྟ་བ་དང་། རྨོངས་པ་བརྟན་པའི་ལྟ་བ་དང་། རྩ་བའི་ལྟ་བ་དང་། ལྟ་བ་མེད་པའི་ལྟ་བ་དང་། རབ་ཏུ་སྦྱོར་བ་འགེགས་པའི་ལྟ་བ་དང་། ངེས་པར་འབྱུང་བ་མེད་
པའི་ལྟ་བ་དང་། བསྒྲིབས་པས་སྩོགས་པའི་ལྟ་བ་དང་། བསོད་ནམས་མ་ཡིན་པ་སྐྱེད་པའི་ལྟ་བ་དང་། འབྲས་བུ་མེད་པར་ལྟ་བ་དང་། ངེས་པར་འཛིན་པའི་ལྟ་བ་དང་། མི་བདེན་པའི་ལྟ་བ་དང་། མི་སྨྲ་བའི་ལྟ་བ་དང་། ལྟ་བ་ཆེན་པོ་དང་། མངོན་པའི་ང་རྒྱལ་གྱི་ལྟ་བ་ཞེས་
བྱ་བའོ། །དེ་རྣམས་ཀྱི་མཚན་ཉིད་དེ་ལས་གསུངས་ཏེ། དེ་ཡང་མདོར་བསྟན་པས་གཙོ་ཆེར་རང་གི་ཚིག་གིས་བསྟན་པར་བྱ་སྟེ། ཆོས་ཐམས་ཅད་རང་བཞིན་མེད་པ་དང་། མ་སྐྱེས་པ་དང་། མ་འགགས་པ་དང་། གཟོད་མ་ཉིད་ནས་ཞི་བ་དང་། རང་བཞིན་གྱིས་ཡོངས་སུ་
མྱ་ངན་ལས་འདས་པའོ་ཞེས་བྱའོ་ཞེས་བཅོམ་ལྡན་འདས་ཀྱིས་དགོངས་པས་གསུངས་པ་ཡིན་ཏེ། དགོངས་པ་དེ་ཡང་དགོངས་པ་ངེས་པར་འགྲེལ་པ་ལ་སོགས་པའི་མདོས་གསལ་བར་བྱས་ཏེ། རང་བཞིན་མེད་པ་ཡང་རྣམ་པ་གསུམ་གསུངས་ཏེ། རང་གི་མཚན་ཉིད་ངོ་བོ་
ཉིད་མེད་པ་དང་། སྐྱེ་བ་ངོ་བོ་ཉིད་མེད་པ་དང་། དོན་དམ་པ་ངོ་བོ་ཉིད་མེད་པའོ། །དེ་ལ་རང་བཞིན་ནི་རང་གི་མཚན་ཉིད་དེ། དེའི་རང་བཞིན་མེད་པ་ནི་ཀུན་ཏུ་བརྟགས་པའོ། །རང་ལས་བྱུང་བ་ནི་སྐྱེས་པ་སྟེ། དེའི་རང་བཞིན་མེད་པ་ནི་གཞན་གྱི་དབང་ངོ་། །དེ་ནི་དོན་དམ་པ་ཡང་
ཡིན་ལ་ངོ་བོ་ཉིད་མེད་པ་ཡང་ཡིན་པས་དོན་དམ་པའི་ངོ་བོ་ཉིད་མེད་པའོ། །དེའི་ངོ་བོ་ཉིད་མེད་པ་ནི་ཡོངས་སུ་གྲུབ་པའིའོ། །ཇི་ལྟར་རང་བཞིན་མེད་པ་དེ་བཞིན་དུ་མ་སྐྱེས་པ་དང་། མ་འགགས་པ་དང་། གཟོད་མ་ཉིད་ནས་ཞི་བ་དང་། རང་བཞིན་གྱིས་མྱ་ངན་ལས་འདས་

པ་ཡང་ཡིན་ནོ། །ཡང་དེའི་དགོངས་པ་ནི་ཡོངས་སུ་མི་ཤེས་པས་རང་གི་རྣམ་པར་དཔྱོད་པ་ལ་གནས་ནས་སྐྱེ་བ་མེད་པ་ཉིད་ནི་མེད་པ་ཉིད་དོ་ཞེས་སྒྲ་ཇི་བཞིན་པར་བཅོམ་ལྡན་འདས་ཀྱིས་བསྟན་པ་ཡིན་ནོ་ཞེས་དངོས་པོ་མེད་པའི་མཚན་མ་ལ་མངོན་པར་ཞེན་པ་དེ་དག་ནི་
མཚན་མར་ལྟ་བའོ། །དེ་བཞིན་དུ་ཆོས་རྣམས་ཀྱི་རང་བཞིན་གསུམ་ལ་སྐུར་པ་འདེབས་པས་དེ་ལ་སྐུར་པ་འདེབས་པའི་ལྟ་བ་གསུམ་འབྱུང་སྟེ། བཏགས་པ་ལ་སྐུར་པ་འདེབས་པའི་ལྟ་བ་དང་། ཀུན་བརྟགས་པ་ལ་སྐུར་པ་འདེབས་པའི་ལྟ་བ་དང་། དེ་ཁོ་ན་ཉིད་ལ་སྐུར་པ་འདེབས་པའི་ལྟ་བའོ། །
དེས་དེ་ཁོ་ན་ཉིད་ལ་སྐུར་པ་འདེབས་པའི་ལྟ་བ་རྣམ་པར་གཞག་པའི་ཕྱིར་རིགས་པ་གང་ཡང་རུང་བ་ཉིད་ཀྱིས་ཡོངས་སུ་འཛིན་པ་དང་། ངེས་པའི་དོན་གྱི་མདོ་སྡེ་གཞན་དུ་ཡོངས་སུ་བསྒྱུར་བ་སྟེ། དེ་གཉིས་ནི་ཡོངས་སུ་འཛིན་པའི་ལྟ་བ་དང་། ཡོངས་སུ་སྒྱུར་བའི་ལྟ་བའོ། །དེ་ལ་ལྟ་
བ་ནི་ཡང་འདི་ལྟར་ལྟ་བ་དག་ཡིན་ཏེ། ལྟ་བ་འདི་ལ་ངེས་པར་བརྟེན་པས་དགེ་བ་ཐམས་ཅད་འཐོབ་པ་དང་། སྔོན་གྱི་ལས་ཀྱི་སྒྲིབ་པ་ལས་ངེས་པར་གྲོལ་བར་འགྱུར་རོ། །ལྟ་བ་གཉིས་པོ་དེ་དག་ནི་ཁ་ན་མ་ཐོ་བ་མེད་པར་ལྟ་བ་དང་། ངེས་པར་འབྱུང་བའི་ལྟ་བའོ། །གསུང་རབ་
ཡན་ལག་བཅུ་གཉིས་ལས་ཉན་ཐོས་ཀྱི་སྡེ་སྣོད་ལ་བཀུར་སྟི་མི་བྱེད་པ་དང་། སྐུར་པ་འདེབས་པའི་ལྟ་བ་ལ་མི་མོས་པ་ལ་རང་སྣང་བ་སྟེ། ལྟ་བ་གཉིས་པོ་དེ་དག་ནི་བརྙས་པའི་ལྟ་བ་དང་། རབ་ཏུ་ཁྲོ་བའི་ལྟ་བའོ། །དེ་རང་གི་ལྟ་བའི་རྗེས་སུ་འབྲངས་ཏེ། སྟོང་པ་ཉིད་དང་། མཚན་མ་
མེད་པ་དང་། སྨོན་པ་མེད་པ་ལ་སོགས་པ་ཕྱིན་ཅི་ལོག་གི་མཚན་ཉིད་དུ་འཇོག་པར་བྱེད་པ་དང་། འདི་ལྟར་ལྟ་བར་འགྱུར་བ་ཡང་ཡིན་ཏེ། གང་ཞིག་ཆོས་ཉིད་འདི་ལ་འཇུག་པའམ། འཇུག་པར་བྱེད་པ་དེ་དག་ཐམས་ཅད་དཔག་ཏུ་མེད་པའི་བསོད་ནམས་སྐྱེད་པར་འགྱུར་རོ། །ལྟ་བ་
གཉིས་པོ་དེ་དག་ནི་ཕྱིན་ཅི་ལོག་ཏུ་ལྟ་བ་དང་། སྐྱེད་པར་ལྟ་བའོ། །དེས་ཀྱང་དེ་ལ་སྐུར་པ་འདེབས་པའི་ལྟ་བའི་དབང་དུ་བྱས་ནས་ཕ་རོལ་པོས་བརྒལ་བ་ན་རང་ཅུང་ཟད་ཀྱང་ཁས་མི་ལེན་པ་དང་། ཚིག་དོར་དང་ལྟག་ཆོད་ཀྱིས་གཞན་ལ་ལན་འདེབས་པ་སྟེ། ལྟ་བ་གཉིས་པོ་དེ་དག་ནི་

ཁས་མི་ལེན་པའི་ལྟ་བ་དང་། ངན་གཡོའི་ལྟ་བའོ། །དེ་འདོད་པས་འདི་ལྟར་རབ་ཏུ་བཟུང་སྟེ། དེས་ཡང་དག་པར་རྫོགས་པའི་སངས་རྒྱས་བཅོམ་ལྡན་འདས་མཆོད་པར་བྱེད་པས་དེ་ལྟ་བུ་ནི་བཀུར་སྟི་བྱེད་པའི་ལྟ་བའོ། །ལུང་དང་རིགས་པ་ལ་མཁས་པས་ལྟ་བ་ངན་པ་དེ་ལས་ཡང་
དག་པར་འབྱེད་པར་བྱེད་ཀྱང་དེ་མི་སྤོང་ཞིང་འདི་ཉིད་བདེན་གྱི། གཞན་ནི་བརྫུན་ནོ་ཞེས་འཛིན་པ་དེ་ནི་རྨོངས་པ་བསྟན་པའི་ལྟ་བའོ། །ལྟ་བ་དེ་དག་ཐམས་ཅད་ཀྱི་བག་ཆགས་ཀྱི་གནས་ངན་ལེན་ནི་རྩ་བའི་ལྟ་བའོ། །ལྟ་བ་བཅུ་བདུན་པོ་དེ་དག་ཉིད་མདོར་བསྡུས་ན་ལྟ་བ་བཅུར་འགྱུར་ཏེ། འདི་
ལྟར་མཚན་མའི་ལྟ་བ་འདི་ཉིད་ལ་ལྟ་བ་མེད་པར་ལྟ་བ་སྟེ། གང་ཞིག་མཚན་མའི་ལྟ་བ་དེ་ལ་ལྟ་བ་མེད་པའི་ལྟ་བའོ། །བཏགས་པ་ལ་སྐུར་པ་འདེབས་པའི་ལྟ་བ་དང་། ཀུན་ཏུ་བརྟགས་པ་ལ་སྐུར་པ་འདེབས་པའི་ལྟ་བ་དང་། དེ་ཁོ་ན་ཉིད་ལ་སྐུར་པ་འདེབས་པའི་ལྟ་བ་ནི་རབ་ཏུ་སྦྱོར་བ་
འགེགས་པར་བྱེད་པའི་ལྟ་བ་སྟེ། རྒྱུ་དང་འབྲས་བུའི་རབ་ཏུ་སྦྱོར་བ་ལ་སྐུར་པ་འདེབས་པའི་ཕྱིར་རོ། །ཡོངས་སུ་འཛིན་པའི་ལྟ་བ་དང་སྒྱུར་བའི་ལྟ་བ་ནི་ངེས་པར་འབྱུང་བ་མེད་པར་ལྟ་བ་ཡིན་ཏེ། ཐབས་མ་ཡིན་པ་ལ་འཇུག་པས་དེས་འབྲས་བུ་མི་ཐོབ་པའི་ཕྱིར་རོ། །ཁ་ན་མ་ཐོ་བ་མེད་པའི་
ལྟ་བ་དང་། ངེས་པར་འབྱུང་བ་མེད་པའི་ལྟ་བ་ནི་སྒྲིབ་པ་ལ་སོགས་པའི་ལྟ་བ་སྟེ། བརྫུན་དུ་རྟོགས་པས་སྒྲིབ་པ་ཟད་པ་མེད་པའི་ཕྱིར་རོ། །བརྙས་པའི་ལྟ་བ་དང་། རབ་ཏུ་ཁྲོ་བའི་ལྟ་བ་ནི་བསོད་ནམས་མ་ཡིན་པ་སྐྱེད་པའི་ལྟ་བ་ཡིན་ཏེ། དམ་པའི་ཆོས་ལ་བརྙས་པ་དང་། ཚངས་པར་
སྤྱོད་པ་དང་ལྡན་པ་ལ་སྡང་བ་དང་ལྡན་པས་བསོད་ནམས་མ་ཡིན་པ་བསྐྱེད་པའི་ཕྱིར་རོ། །ཕྱིན་ཅི་ལོག་ཏུ་ལྟ་བ་དང་། སྐྱེད་པར་ལྟ་བ་ནི་འབྲས་བུ་མེད་པར་ལྟ་བ་ཡིན་ཏེ། ཡང་དག་པ་མ་ཡིན་པའི་ལྟ་བས་ཡང་དག་པའི་ཆོས་ཉིད་རྣམ་པར་གཞག་པ་དང་། འཛིན་པ་དང་། འཛིན་དུ་
འཇུག་པའི་ཁྱད་པར་མི་ཤེས་པའི་ཕྱིར་རོ། །ཁས་མི་ལེན་པའི་ལྟ་བ་དང་། ངན་གཡོའི་ལྟ་བ་ནི་ངེས་པར་འཛིན་པའི་ལྟ་བ་ཡིན་ཏེ། རིགས་པ་མ་ཡིན་པས་རྩོད་པས་རྒྱལ་བ་མེད་པའི་ཕྱིར་རོ། །བཀུར་སྟི་བྱེད་པའི་ལྟ་བ་ནི་མི་བདེན་པའི་ལྟ་བ་ཡིན་ཏེ། བདེན་པ་མ་ཡིན་པ་ལ་དེས་སྒྲོ་

འདོགས་པའི་ཕྱིར་རོ། །རྨོངས་པ་བརྟན་པའི་ལྟ་བ་ནི་མི་སྨྲ་བའི་ལྟ་བ་ཡིན་ཏེ། ཕྱིན་ཅི་ལོག་ལ་མངོན་པར་ཞེན་པ་དང་བཅས་པས་དོན་མེད་པར་སྨྲ་བ་བཀག་པའི་ཕྱིར་རོ། །རྩ་བའི་ལྟ་བ་ནི་ལྟ་བ་ཆེན་པོ་ཡིན་ཏེ། དེ་ལས་ལྟ་བ་ཐམས་ཅད་འབྱུང་བའི་ཕྱིར་རོ། །ལྟ་བ་ཉི་
ཤུ་རྩ་བདུན་པོ་དེ་དག་ཉིད་མངོན་པའི་ང་རྒྱལ་གྱི་ལྟ་བ་ཡིན་ཏེ། ཡང་དག་པ་མ་ཡིན་པ་ལ་མངོན་པར་ཞེན་པས་ཀུན་ཏུ་བསྐྱེད་པའི་ཕྱིར་རོ། །གང་འདི་ལྟར་བཅོམ་ལྡན་འདས་ཀྱིས་འཕགས་པ་ལང་ཀར་གཤེགས་པ་ལས། བློ་གྲོས་ཆེན་པོ་ཆོས་ཐམས་ཅད་ནི་སྐྱེ་བ་མེད་པ་ཡིན་ཏེ། ཡོད་པ་
དང་མེད་པ་ལས་སྐྱེ་བ་མེད་པའི་ཕྱིར་རོ་ཞེས་གསུངས་ཏེ། དེའི་དོན་ཇི་ལྟར་ཡིན་ཞེ་ན། ཆོས་རྣམས་ཀྱི་རང་བཞིན་གསུམ་སྟེ། དེ་ལ་གཉིས་ཀྱི་རང་བཞིན་ནི་སྐྱེ་བ་མེད་པ་ཡིན་ཏེ། ཐམས་ཅད་ནི་མ་ཡིན་ནོ་ཞེས་བྱ་བའི་དོན་ཏོ། །དེ་ཇི་ལྟར་ཆུ་ཟ་བ་དང་རླུང་ཟ་བའོ་ཞེས་ངེས་པར་བཟུང་བས་
རྟོགས་པ་དེ་ལྟར་འདིར་ཡང་གང་ཞིག་ཡོད་པ་ཉིད་ནི་རེས་འགའ་ཡོད་པ་མ་ཡིན་ཏེ། ཡོངས་སུ་གྲུབ་པའི་རང་བཞིན་ནོ། །གང་ཞིག་མེད་པ་དེ་ནི་རེས་འགའ་ཡང་ཡོད་པ་མ་ཡིན་ཏེ། ཀུན་ཏུ་བརྟགས་པའི་རང་བཞིན་ནོ། །དེ་དག་ཡོད་པ་དང་མེད་པ་ནི་མ་སྐྱེས་པའི་ཕྱིར་སྐྱེ་བ་མེད་པ་
ཡིན་ཏེ། ཡང་གཞན་གྱི་དབང་ནི་མ་ཡིན་ནོ། །འདི་ལྟར་དེ་ཉིད་ལས། སེམས་ཙམ་ཉིད་དུ་རྣམ་གཞག་པས། །སྐྱེ་བ་མེད་པར་ངས་བཤད་དོ། །ཞེས་གསུངས་སོ། །སློབ་དཔོན་ཀླུ་སྒྲུབ་ཀྱི་ཞལ་སྔ་ནས་ཀྱིས་ཀྱང་། སྐྱེ་བ་དང་ནི་འགག་པ་ནི། །ཤེས་པ་འབའ་ཞིག་ཁོ་ནའོ། །
ཞེས་གསུངས་སོ། །གང་འདི་སྐད་དུ་དེ་ལ་མྱུ་གུ་ནི་རང་གིས་བྱས་པ་མ་ཡིན། གཞན་གྱིས་བྱས་པ་མ་ཡིན། གཉི་གས་བྱས་པ་མ་ཡིན། དབང་ཕྱུག་གིས་བྱས་པ་མ་ཡིན། དུས་འགྱུར་བས་མ་ཡིན། རྒྱུ་མེད་པ་ལ་ཀུན་ཏུ་འབྱུང་བ་ཡང་མ་ཡིན། འོན་ཀྱང་ས་བོན་ལ་
སོགས་པའི་ཚོགས་པ་ཡོད་ན་མྱུ་གུ་འབྱུང་གི། མེད་ན་ནི་མི་འབྱུང་སྟེ། དེའི་ཕྱིར་ས་བོན་ལས་མྱུ་གུ་འབྱུང་ངོ་ཞེས་གསུངས་ཏེ། དེའི་དོན་གང་ཡིན་ཞེ་ན། དོན་ནི་འདི་ཡིན་ཏེ། རང་གིས་བྱས་པ་མ་ཡིན་ཞེས་བྱ་བ་ནི་ཉེ་བར་ལེན་པ་ཙམ་གྱིས་མ་ཡིན་པའོ། །གཞན་གྱིས་མ་བྱས་

ཞེས་བྱ་བ་ནི་ལྷན་ཅིག་བྱེད་པ་ཙམ་གྱིས་མ་ཡིན་པའོ། །གཉི་གས་མ་བྱས་ཞེས་བྱ་བ་ནི་བྱེད་པ་པོ་གཉིས་ཀྱང་མི་རིགས་པའི་ཕྱིར་རོ། །དབང་ཕྱུག་གིས་མ་བྱས་ཞེས་བྱ་བ་ནི་དེ་ཡང་ནུས་པ་བྱས་པ་ཐམས་ཅད་ཀྱི་རྒྱུ་གཞན་དབང་ཕྱུག་ཡིན་པའི་ཕྱིར་དང་། བྱ་བ་བྱེད་པར་མི་རིགས་པའི་
ཕྱིར་དང་། སེམས་མེད་པ་ཡང་གཡོ་བ་དང་བྲལ་བའི་ཕྱིར་རོ། །དུས་འགྱུར་བས་མ་ཡིན་ཞེས་བྱ་བ་ནི་དུས་ཀྱི་རྫས་དང་གནས་སྐབས་པ་ཡང་མི་རིགས་པའི་ཕྱིར་རོ། །རྒྱུ་མེད་པ་ལས་ཀྱང་མ་ཡིན་ཞེས་བྱ་བ་ནི་རྒྱུ་མེད་པ་ལས་སྐྱེ་བ་མ་ཡིན་ཏེ། རྒྱུ་ལ་ལྟོས་པ་མེད་པར་རེས་འགའ་ཡང་མི་
རིགས་པའི་ཕྱིར་རོ། །ཇི་ལྟར་ས་བོན་ལ་མྱུ་གུ་འབྱུང་ཞེས་བྱ་ཞེ་ན། དེ་ལ་སྨྲས་པ། འོན་ཀྱང་ཞེས་བྱ་བ་ལ་སོགས་པ་ནི་རྟོགས་པར་སླའོ། །འོ་ན་ནི་འདི་ལ་མུ་སྟེགས་པ་རྣམས་ཀྱི་ཕྱོགས་གཅིག་སྟོང་པའི་ཉེས་པར་ཇི་ལྟར་མི་འགྱུར་ཞེ་ན། གང་གི་ཕྱིར་ཆོས་ཐམས་ཅད་ཀུན་ཏུ་བརྟགས་པའི་
རང་བཞིན་གྱིས་སྟོང་པ་ཉིད་ཡིན་ཏེ། དེ་ཉིད་ཀྱི་ཕྱིར་གང་དུ་ཡང་དག་པའི་ཤེས་པས་ཀྱང་སྟོང་པ་ཉིད་དུ་བསྟན་པ་དེར་ཀུན་ཏུ་བརྟགས་པའི་རང་བཞིན་ཉིད་བྱིས་པས་གཟུང་བར་ཤེས་པར་བྱ་སྟེ། དོན་དམ་པར་གྱུར་པས་ནི་མ་ཡིན་ནོ། །ཡང་དག་པར་ནི་བྱིས་པ་རྣམས་ལ་མེད་དེ། ངོ་བོ་གང་
ཞིག་རྟོག་གེ་བས་མཐོང་བ་དེ་ནི་ཡང་དག་པའི་ཀུན་རྫོབ་ཅེས་བྱ་སྟེ། འཕགས་པ་ལང་ཀར་གཤེགས་པ་ལས་གང་འདི་སྐད་དུ། བློ་ཡིས་རྣམ་པར་གཞིགས་ན་ནི། རང་གི་ངོ་བོ་གཟུང་དུ་མེད། །གང་ཕྱིར་བརྗོད་དུ་མེད་པ་དང་། །རང་བཞིན་མེད་ཅེས་བསྟན་པའང་ཡིན། །བློ་ཡིས་
རྣམ་པར་གཞིགས་ན་ནི། །གཞན་དབང་མེད་ཅིང་ཀུན་བརྟགས་མེད། །གྲུབ་པའི་ངོ་བོའང་ཡོད་མིན་ན། །ཅི་ལྟར་བློ་ཡིས་རྣམ་པར་བརྟག །རང་བཞིན་མེད་ཅིང་རྣམ་རིག་མེད། །དངོས་པོ་མེད་ཅིང་ཀུན་གཞི་མེད། །རོ་མཚུངས་བྱིས་པའི་རྟོག་གེ་བ། །ངན་པ་རྣམས་ཀྱིས་འདི་
དག་བརྟགས། །མཚན་མ་དངོས་པོ་རྣམ་རིག་དང་། །ཡིད་ཀྱི་གཡོ་བ་གང་ཡིན་ལས། །ང་ཡི་སྲས་རྣམས་རབ་འདས་ནས། །དེ་དག་རྣམ་པར་མི་རྟོག་དཔྱོད། །ཅེས་བྱ་བའི་དོན་ཇི་ལྟར་ཡིན་ཞེ་ན། སྨྲས་པ། ཚིགས་སུ་བཅད་པ་དང་པོའི་དོན་ནི་ཐོས་པའི་རང་བཞིན་གྱི་ཤེས་རབ་

དང་། བསམ་པའི་རང་བཞིན་གྱི་ཤེས་རབ་པོ། །འདི་ལྟར། བློ་ཡིས་རྣམ་པར་གཞིགས་ན་ནི། །ཞེས་བྱ་བ་ནི་ཚད་མས་དཔྱད་ན་ཆོས་རྣམས་ཀྱི་རང་གི་ངོ་བོ་ནི་རང་གི་མཚན་ཉིད་དོ། །གང་ཞིག་བྱིས་པ་རྣམས་ཀྱི་བློ་གཟུང་བ་ཉིད་གཟུགས་ལ་སོགས་པ་དང་། འཛིན་
པ་ཉིད་དུ་ཚོར་བ་ལ་སོགས་པར་སྣང་བ་དེ་དག་གི་རང་བཞིན་གཟུང་དུ་མེད་པ་ནི་ཡང་དག་པ་མ་ཡིན་པའི་ཀུན་ཏུ་རྟོག་པ་ཉིད་དུ་ཡོངས་སུ་ཤེས་པའི་ཕྱིར་དང་། དེ་ཡང་གཟུང་བ་དང་འཛིན་པར་མི་རིགས་པའི་ཕྱིར་དང་། གཅིག་དང་དུ་མ་དང་བྲལ་བའི་ཕྱིར་རོ། །དེ་ལྟ་ཡིན་ན་དེ་དག་ནི་ཡང་དག་པ་
མ་ཡིན་པའི་རང་བཞིན་ཀུན་ཏུ་བརྟགས་པར་ཡོད་པའོ། །བྱིས་པའི་བློ་དེ་ནི་ཡང་དག་པ་མ་ཡིན་པའི་ཀུན་ཏུ་རྟོག་པའོ། །དེའི་ཕྱིར་རང་བཞིན་མེད་པ་ཞེས་བྱ་བ་ནི་དེ་དག་གི་རང་བཞིན་མེད་པ་སྟེ། ཡོངས་སུ་གྲུབ་པའི་རང་བཞིན་ནོ། །ཡང་གི་སྒྲ་ནི་བརྗོད་དུ་མེད་པ་ཡང་ཡིན་ཞེ་ན་རིམ་པ་བཞིན་
དུ་སྦྱར་རོ། །དེ་ནི་རང་བཞིན་གྱིས་རྣམ་པར་རྟོག་པའི་སྤྱོད་ཡུལ་མ་ཡིན་པའི་ཕྱིར་རོ། །དེ་ལྟ་བུའི་རིགས་པས་ནི་བསམ་པའི་རང་བཞིན་གྱི་ཤེས་རབ་བསྟན་ཏོ། །དེ་ལྟར་བཅོམ་ལྡན་འདས་མ་ལས་གསུངས་སོ། །འདིས་ནི་ཐོས་པའི་རང་བཞིན་གྱི་ཤེས་རབ་ཀྱང་བསྟན་ཏོ། །འོ་ན་ནི་
བརྗོད་དུ་མེད་པ་ཞེས་བསྟན་པ་ཡང་མི་རིགས་ཏེ། འདི་ལྟར་ཡང་དག་པའི་སོ་སོར་རྟོག་པ་ཉིད་རྣམ་པར་མི་རྟོག་པའི་ཡེ་ཤེས་ཀྱི་རྒྱུ་ཡིན་གྱི། ཡང་དག་པ་མ་ཡིན་པའི་ཀུན་དུ་རྟོག་པ་ནི་མ་ཡིན་ཏེ། མི་མཐུན་པའི་ཕྱོགས་ཡིན་པའི་ཕྱིར་རོ། །རྣམ་པར་མི་རྟོག་པའི་ཡེ་ཤེས་ནི་མ་ཡིན་ཏེ།
དེ་སྔ་ན་མེད་པའི་ཕྱིར་རོ། །དེ་ལྟ་བས་ན་ཡང་དག་པ་ཡང་རྣམ་པར་བརྟགས་པ་མ་ཡིན་པའི་ཕྱིར་བརྗོད་དུ་མེད་པ་ཡང་མི་རིགས་སོ། །འདིར་ཡང་བློ་ཡིས་ཞེས་བྱ་བ་ལ་སོགས་པ་སྨྲས་པ་ལས། བློ་ཡིས་ཞེས་བྱ་བ་ནི་ཡང་དག་པའི་སོ་སོར་རྟོག་པས་སོ། །རྣམ་པར་གཞིགས་ཞེས་བྱ་བ་ནི་
མེད་པ་དང་ཡོད་པ་དང་དོན་དམ་པ་ཉིད་ལ་སོགས་པའི་རྣམ་པས་ཡང་དག་པར་སོ་སོར་རྟོག་པར་བྱ་བ་གསུམ་མོ། །ཇི་ལྟར་བློ་ཡིས་རྣམ་པར་བརྟགས། །ཞེས་བྱ་བ་ནི་ངེས་པ་ཉིད་མེད་དེ་ཞེས་བྱ་བའི་དོན་ཏོ། །ངེས་པ་ནི་གཞན་སེལ་བའི་ཡུལ་ཅན་ཡིན་པའི་ཕྱིར་དང་། གཞན་སེལ་བའི་ཡང་

དེ་ཁོ་ན་ཉིད་མ་ཡིན་ནོ་ཞེས་དགོངས་པའི་ཕྱིར་རོ། །འོ་ན་ཇི་ལྟར་སོ་སོར་རྟོག་པ་ཡིན་ཞེ་ན། ཡང་དག་པའི་ཀུན་རྫོབ་ཀྱིས་སོ། །འོ་ན་ནི་བདག་དང་ཆོས་རྣམས་ཀྱང་ཡང་དག་པ་ཉིད་དུ་འཇིག་རྟེན་ལ་གྲགས་པ་དང་། སེར་སྐྱ་དང་གཟེགས་ཟན་ལ་སོགས་པ་ཚད་མར་གྱུར་པ་རྣམས་ཀྱིས་
ཡོངས་སུ་བཅད་པ་དེ་དག་ཇི་ལྟར་མེད་ཅེས་བྱ་ཞེ་ན། མིན་ཞེས་བྱ་བ་ལ་སོགས་པ་སྨྲས་ཏེ། རང་བཞིན་ནི་བདག་གི་རྫས་སོ། །རྣམ་རིག་ནི་རྣམ་པར་ཤེས་པ་དྲུག་གི་ཚོགས་སོ། །དངོས་པོ་ནི་ཡུལ་ལོ། །ཀུན་གཞི་ནི་གཞི་སྟེ། དབང་པོ་དྲུག་གོ། །དེ་དག་ཐམས་ཅད་མེད་པ་
ནི་གཏན་ཚིགས་ཇི་སྐད་བསྟན་པས་སོ། །གང་གི་ཕྱིར་ཞེ་ན། བྱིས་པ་ནི་བདེན་པ་མ་མཐོང་བས་འདི་དག་བརྟགས་པ་ནི་བརྫུན་པར་བརྟགས་པའོ། །དེ་དག་ཀྱང་འདི་ཇི་ལྟ་བུ་ཞིག་ཅེ་ན། རོ་མཚུངས་བྱིས་པའི་རྟོག་གེ་བ། །ཞེས་བྱ་བ་ལ་ཡང་གི་དོན་རྟོགས་པར་བྱ་སྟེ། རྟོག་པ་མེད་
པ་དང་། ལོག་པར་རྟོགས་པ་ནི་གཟེགས་ཟན་ལ་སོགས་པ་ཡིན་ནོ་ཞེས་བྱ་བའི་དོན་ཏོ། །འོ་ན་ཇི་ལྟར་རྣལ་འབྱོར་པ་རྣམས་རྣམ་པར་མི་རྟོག་པར་འགྱུར་ཞེ་ན། སྨྲས་པ། མཚན་མ་ཞེས་བྱ་བ་ནི་མིང་དང་མཚན་མ་དག་གོ། །དངོས་པོ་ཞེས་བྱ་བ་ནི་ཡུལ་དང་དབང་པོ་རྣམས་སོ། །རྣམ་རིག་
ཅེས་བྱ་བ་ནི་རྣམ་པར་ཤེས་པ་དྲུག་གི་ཚོགས་སོ། །དེ་དག་ཐམས་ཅད་དུ་སྣང་བ་ནུབ་པས་རབ་ཏུ་འདས་པ་ཉིད་དོ། །དེ་ལྟར་ཐམས་ཅད་དུ་གཉིས་སུ་སྣང་བ་ནུབ་པས་ཡིད་ཀྱི་གཡོ་བ་གང་ཡིན་པ་མེད་དོ། །གཉིས་མེད་པའི་ཤེས་པའི་ངོ་བོ་གཅིག་པོ་ལ་རིག་པར་བྱ་བ་དང་། སོ་སོ་རང་གིས་
རིག་པ་པོར་ཞེན་པ་དོན་དང་སོ་སོར་སྣང་བ་དེ་གཉིས་ཀ་ལས་ཀྱང་ཤིན་ཏུ་འདས་པའོ། །སྲས་ཞེས་བྱ་བ་ནི་བྱང་ཆུབ་སེམས་དཔའོ། །དེ་དག་ཅེས་བྱ་བ་ནི་གང་ཞིག་ཐོས་པ་དང་བསམ་པ་དང་ཞི་གནས་དང་ལྷག་མཐོང་རྣམས་ཀྱིས་ཡང་དག་པའི་ཤེས་པ་ལ་རབ་ཏུ་སྦྱོར་བ་ཡིན་ནོ། །དེ་ལ་འདིར་
རྣམ་པར་མི་རྟོག་པའི་ཤེས་པ་ནི་རྣམ་པ་བཞིར་གསུངས་སོ། །རྣམ་པར་མི་རྟོག་པ་ལ་འཇུག་པའི་གཟུངས་ལས་རྣམ་པ་དྲུག་ཏུ་གསུངས་ཏེ། རིགས་ཀྱི་བུ་རྒྱུ་འདིས་རྣམ་པར་མི་རྟོག་པའི་དབྱིངས་ལ་རྣམ་པར་མི་རྟོག་པ་ཞེས་བསྟན་ཏེ། རྣམ་པར་རྟོག་པ་ཐམས་ཅད་ཀྱི་དཔྱོད་པ་ལས་ཡང་དག་པར་

འདས་པ་ཉེ་བར་ལེན་པ་དང་། བསྟན་པ་ཐམས་ཅད་མཐོང་བ་ལས་ཡང་དག་པར་འདས་པ་ཉེ་བར་ལེན་པ་དང་། དབང་པོའི་རྣམ་པར་རྟོག་པ་ཐམས་ཅད་ལས་ཡང་དག་པར་འདས་པ་ཉེ་བར་ལེན་པ་དང་། ཡུལ་གྱི་རྣམ་པར་རྟོག་པ་ཐམས་ཅད་ལས་ཡང་དག་
པར་འདས་པ་ཉེ་བར་ལེན་པ་དང་། རྣམ་པར་རིག་པ་ཐམས་ཅད་ལས་ཡང་དག་པར་འདས་པ་ཉེ་བར་ལེན་པ་དང་། ཉོན་མོངས་པ་དང་། ཉེ་བའི་ཉོན་མོངས་པ་དང་། ཤེས་བྱའི་སྒྲིབ་པ་ཐམས་ཅད་ལ་དམིགས་པ་མེད་པ་ཉིད་ཉེ་བར་ལེན་པའོ། །དེའི་ཕྱིར་རྣམ་པར་མི་རྟོག་པ་དང་། དངོས་པོ་
མེད་པ་དང་། མཐོང་བ་མེད་པ་དང་། རབ་ཏུ་མི་གནས་པ་དང་། སྣང་བ་མེད་པ་དང་། རྣམ་པར་རིག་པ་མེད་པ་དང་། གཞི་མེད་པ་ཞེས་གསུངས་ཏེ། གཟུངས་ལ་སོགས་པ་རྣམ་པ་དྲུག་གི་རྣམ་པར་རྟོག་པ་ཐམས་ཅད་ལས་འདས་པའི་ཕྱིར་རྣམ་པར་མི་རྟོག་པ་ཞེས་བྱ་བའི་དོན་ཏོ། །རྣམ་པར་
དཔྱད་པས་ན་གཟུགས་ཏེ། རྣམ་པར་རྟོག་པ་ཐམས་ཅད་ཀྱི་རང་དཔྱོད་པ་དེ་ལས་ཡང་དག་པར་འདས་པའི་ཕྱིར་གཟུགས་མེད་པའོ། །བསྟན་པ་ལ་སོགས་པ་ཐམས་ཅད་ཀྱིས་གཞན་ལ་གསལ་བ་ནི་ངེས་པར་མཐོང་བ་སྟེ། དེ་ལས་ཡང་དག་པར་འདས་པ་ནི་མཐོང་བ་མེད་དོ། །དབང་པོ་
ཐམས་ཅད་ཉིད་རྣམ་པར་རྟོག་པ་སྟེ། འཛིན་པར་བྱེད་པ་ཉིད་དུ་སྣང་བའི་ཕྱིར་རོ། །དེ་ལས་ཡང་དག་པར་འདས་པ་ནི་རབ་ཏུ་མི་གནས་པ་སྟེ། རྟེན་རབ་ཏུ་གནས་པའོ། །ཡུལ་ཐམས་ཅད་ཉིད་ནི་རྣམ་པར་རྟོག་པ་སྟེ། གཟུང་བ་ཉིད་དུ་རབ་ཏུ་སྣང་བའི་ཕྱིར་རོ། །དེ་ལས་ཡང་དག་པར་འདས་པ་
ནི་སྣང་བ་མེད་པའོ། །རྣམ་པར་རིག་པ་ནི་རྣམ་པར་ཤེས་པ་དྲུག་སྟེ། དེ་ཡང་འཛིན་པ་ཉིད་དུ་སོ་སོར་སྣང་བའི་ཕྱིར་རྣམ་པར་རྟོག་པའོ། །དེ་དག་ལས་ཡང་དག་པར་འདས་པའི་ཕྱིར་རྣམ་པར་རིག་པ་མེད་པའོ། །ཉོན་མོངས་པ་དང་ཉེ་བའི་ཉོན་མོངས་པ་ཡང་དེ་བཞིན་དུ་རྣམ་པར་རྟོག་པ་
ཡིན་ཏེ། དེ་རྣམས་གཞི་མེད་པ་ཉེ་བར་ལེན་པའི་ཕྱིར་གནས་མེད་པ་ཞེས་བསྟན་ཏོ། །དེ་ལྟ་ཡིན་ན་འཕགས་པ་ལང་ཀར་གཤེགས་པ་ལས་མངོན་པར་རྟོགས་པ་དེ་དག་གི་དོན་གང་ཡིན་ཞེ་ན། ཆོས་ཀྱི་དབྱིངས་ཀུན་ཏུ་འགྲོ་བའི་མཐར་ཕྱིན་པའི་ཕྱིར་རྣལ་འབྱོར་གྱི་ས་བཞི་པོ་དེ་དག་གི་

དོན་ཏོ། །དེ་ལ་ཕ་རོལ་ཏུ་ཕྱིན་པ་དང་། བྱང་ཆུབ་ཀྱི་ཕྱོགས་དང་། ཕྱོགས་བཅུ་དུས་གསུམ་གྱི་དབྱེ་བ་མཐའ་ཡས་མོད་ཀྱི། མདོར་བསྡུས་པའི་ཆོས་ནི་འདི་དག་ཡིན་ཏེ། ཕུང་པོ་ལྔ་དང་། སྐྱེ་མཆེད་བཅུ་གཉིས་དང་། ཁམས་བཅོ་བརྒྱད་ཅེས་བྱ་བ་འདི་དག་ནི་རྣལ་འབྱོར་གྱི་ས་དང་པོ་
ཡིན་ཏེ། སྦྱོར་བའི་དམིགས་པ་དེས་ཇི་སྙེད་ཡོད་པ་དེ་སྙེད་ཙམ་ལ་རྣམ་པར་དཔྱོད་པའི་ཕྱིར་རོ། །ས་གཞན་དག་ནི་དེ་དག་ཇི་ལྟ་བ་བཞིན་དུ་ཡོད་པའི་རང་བཞིན་དུ་གྱུར་པའི་ངོ་བོ་གཟུང་བ་ལ་སོགས་པས་སྟོང་པ་ཉིད་རྣམ་པར་འབྱེད་པའོ། །དེ་ལ་རྣལ་འབྱོར་གྱི་ས་དང་པོ་ནི་ཆོས་ཐམས་ཅད་སེམས་
སུ་དམིགས་པ་ཉིད་ཀྱིས་སེམས་ལས་ཕྱི་རོལ་དུ་སྣང་བ་མེད་དོ། །དེ་ཉིད་ཀྱི་ཕྱིར། སེམས་ཙམ་ལ་ནི་བརྟེན་ནས་སུ། །ཕྱི་རོལ་དོན་ལ་མི་རྟོག་གོ། །ཞེས་གསུངས་ཏེ། རྣལ་འབྱོར་པ་ཞེས་འོག་མ་དང་སྦྱར་རོ། །སེམས་ཙམ་དུ་སྣང་བ་ནི་སེམས་ལས་ཐ་དད་པའི་ཆོས་མ་ཡིན་ཏེ།
སེམས་ལས་ཐ་དད་པ་སྣང་བ་མི་རིགས་པའི་ཕྱིར་རོ། །གཟུང་བ་མེད་པར་ཤེས་པ་འདི་ནི་རྣལ་འབྱོར་གྱི་ས་གཉིས་པའོ། །དེ་བཞིན་ཉིད་ལ་དམིགས་ནས་ནི། །སེམས་ཙམ་ལས་ཀྱང་བཟླ་བར་བྱ། །འཛིན་པའི་མཚན་ཉིད་ནི་སེམས་ཏེ། གཟུང་བ་མེད་པས་འཛིན་པ་མེད་པའི་ཕྱིར་རོ། །
གཉིས་ཀྱིས་སྟོང་པའི་ཤེས་པ་དེ་ནི་དེ་བཞིན་ཉིད་དམིགས་པ་དེ་ལ་གནས་པ་སེམས་ཙམ་སྟེ། འཛིན་པའི་མཚན་ཉིད་དེ་ལས་འདས་ཏེ། དེ་གཉིས་ཀ་ལས་འདས་པ་ཡིན་ཏེ་རྣལ་འབྱོར་གྱི་ས་གསུམ་པའོ། །འོ་ན་དེ་བཞིན་ཉིད་ལ་དམིགས་པའི་སེམས་སྣང་བ་མེད་པ་ཡིན་ཏེ། གཟུང་
བ་དང་འཛིན་པ་མི་སྣང་བའི་ཕྱིར་རོ། །དེའི་ཕྱིར་ཅི་དེ་ཉིད་ལ་གནས་པར་བྱའམ། ཡང་ན་དེ་ལས་འདས་པ་ཡིན་ཞེ་ན། སྨྲས་པ། སེམས་ཙམ་ལས་ནི་བཟླས་ནས་ནི། །སྣང་བ་མེད་པ་བཟླ་བར་བྱ། །ཞེས་གསུངས་སོ། །དེ་ཅི་འདྲ་བ་ཞིག་ལ་བཟླ་ཞེ་ན། སྣང་བ་མེད་པ་ཞེས་
གསུངས་ཏེ། ཁྱད་པར་དུ་འཕགས་པ་ཐོབ་པའི་ཕྱིར་ཤིན་ཏུ་སྣང་བ་མེད་པ་ལ་གནས་པར་འགྱུར་རོ། །གང་དུ་མིང་དང་མཚན་མ་དང་། གཟུང་བ་དང་འཛིན་པ་ཐམས་ཅད་ནུབ་པ་དེ་ནི། ཤིན་ཏུ་སྣང་བ་མེད་པའི་ཡེ་ཤེས་དེ་ལ་གནས་པར་འགྱུར་བ་ཡིན་ནོ་ཞེས་བྱ་བ་ནི་ཚིག་གི་

ལྷག་མའོ། །དེ་ཡིས་ཐེག་པ་ཆེན་པོ་མཐོང་། །ཞེས་བྱ་བ་ནི་དེ་རྣལ་འབྱོར་གྱི་ས་བཞི་པ་ཡིན་ཏེ། ཐེག་པ་ཆེན་པོ་མངོན་སུམ་དུ་བྱས་པའི་ཕྱིར་རོ། །ཕྱིན་པར་བྱེད་པས་ན་ཐེག་པ་སྟེ། ཐེག་པ་ཡང་ཡིན་ལ་ཆེན་པོའང་ཡིན་ཏེ། བྱང་ཆུབ་སེམས་དཔའི་ལམ་
ཞེས་བྱ་བའི་དོན་ཏོ། །འོ་ན་ལམ་དེས་འགྲོ་བ་ནི་ཅི་འདྲ་བ་ཞིག །འགྲོ་བར་བྱ་བ་ནི་ཇི་ལྟ་བུ་ཞིག །སུ་ཞིག་འགྲོ་ཞེ་ན། འཇུག་པ་ལྷུན་གྱིས་གྲུབ་ཅིང་ཞེས། །སྨོན་ལམ་དག་གིས་རྣམ་པར་སྦྱངས། །ཡེ་ཤེས་དམ་པ་བདག་མེད་པར། །བྱང་ཆུབ་སེམས་དཔའ་རབ་ཏུ་འཇུག །ཅེས་
གསུངས་ཏེ། འཇུག་པ་ནི་ས་གོང་མ་གོང་མར་འཕར་བའོ། །དེ་དག་པ་འཇིག་རྟེན་པའི་སྦྱོར་བའི་ལམ་གྱི་སྒོམ་པ་རྗེས་སུ་འགྲོ་བའི་ཕྱིར་ལྷུན་གྱིས་གྲུབ་པ་ནི་ལྷུན་གྱིས་གྲུབ་པའོ། །བགྲོད་པར་བྱ་བའི་སའི་རིམ་པ་དང་བྲལ་བའི་ཕྱིར་ཞི་བའོ། །སྨོན་ལམ་དག་གིས་རྣམ་པར་སྦྱངས། །ཞེས་བྱ་བ་ནི་ཐེག་པ་
དམན་པས་ཉམས་པའི་རྒྱུར་གྱུར་པའི་ཉེས་པ་རྣམས་སྤངས་པའི་ཕྱིར་རོ། །ཡེ་ཤེས་དམ་པ་ཞེས་བྱ་བ་དེ་ནི་དེ་བཞིན་གཤེགས་པར་འོང་བ་སྟེ། དེར་འགྲོ་བར་བྱ་བ་ཡིན་ནོ། །དེ་ཡང་བདག་མེད་པ་སྟེ། བདག་ཏུ་གྱུར་པའི་མིང་དང་མཚན་མ་དང་གཟུང་བ་དང་འཛིན་པར་སྣང་བ་རྣམས་ལ་
འབྱུང་བར་མི་འགྱུར་བས་ནུབ་པའི་ཕྱིར་རོ། །རབ་ཏུ་འཇུག་ཅེས་བྱ་བ་ནི་འགྲོའོ་ཞེས་བྱ་བའི་དོན་ཏོ། །འགྲོ་བར་བྱེད་པ་ནི་བྱང་ཆུབ་སེམས་དཔའ་ཡིན་པར་བསྟན་ཏེ། ཉན་ཐོས་ལ་སོགས་པ་ནི་མ་ཡིན་ནོ་ཞེས་བྱ་བའི་དོན་ཏོ། །ཚིགས་སུ་བཅད་པ་འདིའི་དོན་ནི་བྱང་ཆུབ་སེམས་དཔའ་
མཁས་པ་ལས་བཟུང་ནས་བསྒོམ་པར་བྱའི་རང་དགར་ནི་མ་ཡིན་ནོ། །དེ་མ་རྙེད་ན་ཡང་དག་པའི་དོན་ཁོང་དུ་ཆུད་པའི་བྱང་ཆུབ་སེམས་དཔའ་ཕྱོགས་བཅུ་ན་བཞུགས་པའི་དེ་བཞིན་གཤེགས་པ་རྣམས་ལ་གདམས་ངག་མངོན་པར་མནོས་པར་བསྒོམ་མོ། །འོ་ན་རང་བཞིན་གསུམ་གྱི་ཚུལ་
ལ་དབུ་མའི་ཚུལ་ཞེས་ཇི་སྐད་བརྗོད་ཅེ་ན། སྨྲས་པ། ཡོད་པ་ཞེས་བྱ་བ་ནི་མཐའ་གཅིག་གོ། །མེད་པ་ཞེས་བྱ་བ་ནི་མཐའ་གཉིས་པའོ། །དེ་དག་གི་དབུས་སུ་གྱུར་པ་ནི་དབུ་མའི་ཚུལ་ཏེ། རང་བཞིན་རྣམས་ངེས་པར་རྟོགས་པའོ། །དེ་ཡང་གང་ཡིན་ཞེ་ན། གང་ཞིག་ཆོས་ཐམས་

ཅད་ཡོད་པ་ཡང་མ་ཡིན་མེད་པ་ཡང་མ་ཡིན་པ་སྟེ། ཀུན་ཏུ་བརྟགས་པའི་རང་བཞིན་གྱིས་ནི་ཡོད་པ་ཡང་མ་ཡིན། གཞན་གྱི་དབང་དང་ཡོངས་སུ་གྲུབ་པའི་རང་བཞིན་གྱིས་ནི་མེད་པ་ཡང་མ་ཡིན་ཏེ། གང་དབུས་དང་མཐའ་རྣམ་པར་འབྱེད་པ་ལས། ཡང་དག་མ་ཡིན་ཀུན་རྟོག་ཡོད། །དེ་ལ་གཉིས་
པོ་ཡོད་མ་ཡིན། །སྟོང་པ་ཉིད་ནི་དེ་ལ་ཡོད། །དེ་ལ་ཡང་ནི་དེ་ཡོད་དོ། །སྟོང་པ་མ་ཡིན་མི་སྟོང་མིན། །དེ་ལྟ་བས་ན་ཐམས་ཅད་བཤད། །ཡོད་པས་མེད་པས་ཡོད་པས་ན། །དེ་ནི་དབུ་མའི་ལམ་ཡིན་ནོ། །ཞེས་གསུངས་པ་ཡིན་ནོ། །དོན་དམ་པར་ནི་མེད་ལ། ཀུན་རྫོབ་ཏུ་ནི་ཡོད་པ་
དེའི་ཕྱིར། དབུ་མའི་ལམ་ཡིན་ནོ་ཞེས་ཟེར་ན། དེ་ནི་སྔར་བཀག་ཟིན་ཏོ། །གཞན་ནི་འདི་ལྟར་འདོད་དེ། ཇི་ལྟར་སྒྱུ་མའི་གླང་པོ་སྣང་བ་ནི་ཡོད་པ་མ་ཡིན་ནོ། །དེ་བཞིན་དུ་ཆོས་ཐམས་ཅད་ཀྱང་ཡོད་པ་མ་ཡིན་ཏེ། དེ་ནི་མེད་པ་སྣང་བ་ཡིན་པར་སྨྲ་སྟེ། དེ་བས་ན་སྒྱུ་མ་ལྟ་བུ་ཉིད་ཆོས་ཐམས་
ཅད་དབུ་མའི་ལམ་ཡིན་ནོ་ཞེས་ཟེར་རོ། །དེ་ཡང་བདེན་པ་མ་ཡིན་ཏེ། འདི་ལྟར་གལ་ཏེ་འདི་དག་ཚད་མ་མེད་པར་གྲུབ་ན་དེའི་ཕྱིར་འགས་ཀྱང་ཡོད་པར་སྒྲུབ་པར་ནི་མི་ནུས་སོ། །ཚད་མ་མ་ཡིན་པ་ལ་སྣང་བ་ཙམ་གྱིས་ལྟ་སྨོས་ཀྱང་ཅི་དགོས། གལ་ཏེ་ནུས་པའི་མཚན་ཉིད་དུ་ནི་ཡོད་པ་
མ་ཡིན་གྱི། སྣང་བའི་མཚན་ཉིད་དུ་ཡོད་པར་འདོད་ན་དེ་ལྟ་ན་ནི། བརྟགས་པ་ཙམ་དུ་ཡོད་པར་འགྱུར་རོ། །རི་བོང་གི་རྭ་དེ་ཡང་དེ་ཙམ་དུ་ཡོད་ཀྱི་དེ་མེད་པར་ནི་མི་འགྱུར་རོ། །འོན་ཀྱང་རི་བོང་གི་རྭ་ལ་སོགས་པ་གཅིག་ཏུ་མེད་པར་འདོད་དོ། །གཞན་ཡང་ནུས་
པའི་མཚན་ཉིད་དུ་ཡོད་པ་བཀག་ན། དོན་དང་དོན་མ་ཡིན་པ་བསྒྲུབ་པ་ལ་འཇུག་པ་དང་། ལྡོག་པ་ལ་སོགས་པ་ངེས་པར་མི་འགྱུར་བར་ཐལ་བར་འགྱུར་བས་དེ་བས་ན་ཡོད་པར་འདོད་པས་ནུས་པ་ཉིད་ཡོད་པར་རིགས་ཀྱི། སྣང་བ་ཙམ་ནི་མ་ཡིན་ནོ། །འདི་ལྟར་ཤིང་དང་
རྡོ་ལ་སོགས་པ་རང་རང་གི་ངོ་བོས་ཡོད་པ་ཡང་སྒྱུ་མ་མཁན་གྱི་བྱ་བས་གླང་པོ་ལ་སོགས་པའི་ངོ་བོ་མེད་པ་སྣང་བའི་ཕྱིར་ཤིང་ལ་སོགས་པ་ཡང་སྒྱུ་མར་སྨྲས་པ་ནི་དེའི་འདོད་པའོ། །འདི་ལྟར་ཆོས་ཐམས་ཅད་ནི་ཤེས་པའི་ངོ་བོ་ཡིན་ལ། ཐོག་མ་མེད་པའི་བག་ཆགས་ཀྱིས་བསླད་པས་སྔོན་པོ་

ལ་སོགས་པའི་ངོ་བོར་སྣང་སྟེ། དེ་བས་ན་ཆོས་འདི་དག་ཐམས་ཅད་སྒྱུ་མ་ལྟ་བུར་འདོད་དོ། །དེའི་ཕྱིར་སྔོན་པོ་ལ་སོགས་པའི་རྣམ་པ་ནི་ཡོད་པ་མ་ཡིན་ལ། འཁྲུལ་པའི་དངོས་པོ་དེ་དང་སྟོང་པ་ཉིད་ཀྱི་ངོ་བོ་མེད་པ་ནི་མ་ཡིན་ཏེ། དེ་ནི་དབུ་མའི་ལམ་ཞེས་བྱའོ། །
དེ་ལྟ་བས་ན། དེ་ཉིད་རང་བཞིན་གསུམ་འདོད་པར་གྱུར་པ་ཡིན་ཏེ། ཚུལ་འདི་ནི་དབུ་མ་པར་རིགས་སོ། །དེ་ལྟ་བས་ན་སངས་རྒྱས་པ་བཞི་ཇི་ལྟར་ཡིན། གང་ཞིག་རྣམ་པ་མེད་པའི་ཤེས་པས་སྔོན་པོ་ལ་སོགས་པའི་དོན་རིག་པར་འདོད་པ་ནི་བྱེ་བྲག་ཏུ་སྨྲ་བའོ། །གང་ཞིག་དོན་གྱིས་ཕན་
བཏགས་པས་གཟུགས་བརྙན་གྱི་རྣམ་པ་ཉམས་སུ་མྱོང་བས་དོན་རིག་པར་འདོད་པ་ཉིད་ནི་མདོ་སྡེ་པའོ། །ཡང་གང་ཞིག་རྣམ་པར་ཤེས་པ་ལས་ཕྱིའི་དོན་སྔོན་པོ་ལ་སོགས་པ་མི་འདོད་ཀྱི། འོན་ཀྱང་འདི་དག་རྣམ་པར་ཤེས་པ་ཉིད་ཡིན་མོད་ཀྱི། ཐོག་མ་མེད་པའི་བག་ཆགས་ཀྱི་སྟོབས་ཀྱིས་
སྔོན་པོ་ལ་སོགས་པ་བསྐྱེད་པ་ཡིན་པར་སྨྲ་བ་དེ་དག་ནི་རྣལ་འབྱོར་སྤྱོད་པ་པ་ཡིན་ལ་རང་བཞིན་གསུམ་དུ་སྨྲ་བ་ནི་དབུ་མ་པའོ། །ཡང་གང་ཞིག་ཐམས་ཅད་བརྫུན་པར་སྨྲ་བ་ནི་དབུ་མ་ལྟར་སྣང་བ་ཡིན་ནོ། །ཚད་མ་ལུང་དང་བསྟན་བཅོས་ཀྱིས་སྦྱར་བས། རྟོགས་པ་དེ་འདིར་དབུ་མའི་ཚུལ་ཡིན་
ཏེ། གང་ཞིག་རྒྱལ་བ་ཡི་ནི་གསུང་དོན་ལ། །མི་ཕམ་མགོན་པོ་ཇི་ལྟར་ཚད་མ་མིན། །ཕྱིན་ཅི་མ་ལོག་པ་ལ་ངེས་འཇུག་པ། །ཆོས་ཀྱི་སྐུ་ཡི་ཕྲིན་ལས་མཐའ་མར་བསྟན། །དེས་ནི་སངས་རྒྱས་ཡུམ་གྱི་དོན་དེ་ཡི། །སྣ་ཚོགས་ཕྱིན་ཅི་ལོག་ནི་ངེས་པར་འཇོམས། །ཤེས་
རབ་ཕ་རོལ་ཕྱིན་པའི་དོན་ལ་ནི། །ཚད་མའི་གཙོ་བོ་འདིར་ནི་བྱམས་པ་ཡིན། །གང་ཞིག་ཞལ་ནས་རྒྱལ་བས་གསུངས་བསྟན་པ། །ཕྱིན་ཅི་མ་ལོག་པ་ལ་ངེས་འཇུག་མཛད། །ཚད་མའི་ཚུལ་ལ་ཡང་དག་མཁས་པ་དང་། །སངས་རྒྱས་ཐེག་པའི་དོན་ལ་མཁས་པ་
རྣམས། །དབུ་མའི་རྒྱན་གྱིས་དགའ་བར་བྱ་བའི་ཕྱིར། །རིན་ཆེན་འབྱུང་གནས་ཞི་བས་སྦྱར་བ་ཡིན། །དབུ་མ་རྒྱན་གྱི་འགྲེལ་པ་དབུ་མའི་ལམ་གྲུབ་པ་ཞེས་བྱ་བ་སློབ་དཔོན་མཁས་པ་ཆེན་པོ་དཔལ་རིན་ཆེན་འབྱུང་གནས་ཞི་བའི་ཞལ་སྔ་ནས་ཀྱིས་མཛད་

པ་རྫོགས་སོ།། །།ལོ་ཙཱ་བ་ཤཱཀྱ་འོད་ཀྱིས་རང་འགྱུར་དུ་མཛད་པའོ།། །།དཔལ་རྒྱལ་པོ་འདོད་པའི་ལྷའི་རིང་ལ། དཔྱིད་ཟླར་བའི་ངོ་ལ་བརྩམས་ཏེ་ལོ་བརྒྱ་བཞི་བཅུ་ལོན་ནོ།། །།
༄༅༅། །རྒྱ་གར་སྐད་དུ། དྷྱ་ན་དཱི་པཾ་ནཱ་མོ་པ་དེ་ཤཱ། བོད་སྐད་དུ། བསམ་གཏན་གྱི་སྒྲོན་མ་ཞེས་བྱ་བའི་མན་ངག །བཅོམ་ལྡན་འདས་བདེ་བ་ཆེན་པོ་ལ་ཕྱག་འཚལ་ལོ། །སྡོམ་ནི། རྣལ་འབྱོར་ཞི་གནས་རྒྱུ་དང་གྲོགས། །སྔོན་འགྲོ་དམིགས་པ་
གཏད་པའི་ཐབས། །རྗེས་བྱ་ཁམས་ཚོད་གཟུང་དང་ཚད། །སྤྱོད་ལམ་སེམས་དཔས་བཅོས་པའི་ཐབས། །ཡོན་ཏན་རྗེས་བྱ་གོ་རིམས་དང་། །རྣམ་དབྱེ་དེ་སྦྱོར་འབྲས་བུར་བཅས། །དེ་ལ་ཞི་གནས་ཀྱི་རྣལ་འབྱོར་པ་གང་ཞེ་ན། གང་དུ་གཉིད་ཤས་ཆུང་བ་དང་། འདོད་ཆགས་
ལ་སོགས་པའི་ཉོན་མོངས་པ་ཤས་ཆུང་བ་དང་། དགེ་བ་ལ་མོས་པ་དང་། དེའུ་དང་བྲལ་བ་དང་། ལུང་དང་མན་ངག་གི་རྗེས་སུ་འཇུག་པ་སྟེ། ཇི་སྐད་དུ། ཉོན་མོངས་ཚོགས་བྲལ་སྡོམ་པ་སྲུང་ལ་མོས། །དགེ་བའི་དོན་ལ་མོས་ཤིང་བརྗེད་པ་མེད། །བསྒོ་བའི་ཚིག་ལ་ཉན་ཅིང་སྙན་
པར་སྨྲ། །མཁས་པ་ཞི་གནས་དོན་དང་ལྡན་པར་འགྱུར། །ཞེས་འབྱུང་བ་དང་། གཞན་ཡང་། སེམས་མ་འཁྲུགས་དང་ནད་དང་བྲལ། །བསྒོ་བ་འཛིན་ཅིང་ཀུན་ཏུ་གསོང་། །ཞེས་འབྱུང་བ་ལྟ་བུའོ། །དེ་ལ་ཞི་གནས་དངོས་གང་ཞེ་ན་དམིགས་པ་ལ་འཛིན་པ་དང་། སེམས་ཀུན་ཏུ་གཏོད་
པ་དང་། ཉོན་མོངས་པ་ཉུང་བ་དང་། བྱིང་བ་དང་། རྒོད་པ་སྙོམས་པ་དང་། ལྷག་མཐོང་ལ་ཕན་པར་བྱེད་པ་དང་། སེམས་དལ་བར་གྱུར་པ་དང་། ཀུན་ཏུ་མི་གཡོ་བ་དང་། བསྟན་པ་དང་། ཞི་བར་རབ་ཏུ་གནས་པ་སྟེ། ལུང་གཞན་དག་ལས། སྡུད་པར་བྱེད་དང་གཡོ་བ་མེད། །དལ་
གྱུར་ཏིང་འཛིན་ཉོན་མོངས་སྲུངས། །ཡོན་ཏན་ཀུན་གྱི་རྟེན་དུ་གྱུར། །ཞི་གནས་ཡོན་ཏན་ཀུན་ཏུ་བདེ། །ཞེས་འབྱུང་བ་དང་། སེམས་དཔའ་ཆེན་པོའི་ཞི་གནས་ནི་སེམས་འཕྲོ་བ་མེད་པའི་ཏིང་ངེ་འཛིན་དང་། སེམས་ལས་བྱུང་བ་རྣམས་སོ་ཞེས་འབྱུང་བ་དང་། གཞན་དག་ལས། ཉེས་པ་ལྔ་

སྤོང་བ་ནི་སེམས་ལས་བྱུང་བའི་འདུ་བྱེད་བརྒྱད་དོ་ཞེས་འབྱུང་བ་ལྟ་བུའོ། །དེ་ལ་ཞི་གནས་ཀྱི་རྒྱུ་གང་ཞེ་ན། གང་ཞི་གནས་སྐྱེད་པར་བྱེད་ཅིང་ཞི་གནས་ལ་ཕན་པར་བྱེད་པ་རྣམས་སོ། །དེ་དག་ཀྱང་གང་ཞེ་ན། འདི་ལྟ་སྟེ། དེ་བཞིན་གཤེགས་པའི་ལུང་དང་
དེ་ལ་བརྟེན་པ་དང་། དམིགས་པ་ཁྱད་པར་ཅན་དང་། སུན་འབྱིན་པ་དང་། གཉེན་པོ་དང་། གཞན་མཐོང་བ་དང་། ཐོས་པ་དང་། རང་གིས་ཉམས་སུ་མྱོང་བ་དང་། གནས་དང་། ཡུལ་དང་དུས་དང་ཟས་དང་སྐོམ་དང་གྲོགས་དང་རྟེན་དང་ཕྲད་པ་དང་བྲལ་བ་དང་། གཏོང་བ་དང་འཛིན་པ་དང་།
ཡོངས་སུ་སྡུད་པ་དང་སེམས་ལས་བྱུང་བའོ། །དེ་ལ་ལུང་གིས་ཇི་ལྟར་འགྱུར་ཞེ་ན། ཐེག་པ་ཆེན་པོའི་མདོའམ་རྒྱུད་དག་ལས་ཞི་གནས་དང་། དེའི་ཐབས་དང་། དེའི་ཡོན་ཏན་བརྗོད་པ་གང་གིས་གང་ཞིག་འཕེལ་བར་འགྱུར་བའི་ཕྱིར་རོ། །དེ་ལ་བརྟེན་པས་ཇི་ལྟ་ཞེ་ན། བཀའ་གང་ལ་གང་གིས་
བརྟེན་ནས་གང་ལ་བརྟེན་པ་དེས་དེ་འཕེལ་བར་འགྱུར་བའི་ཕྱིར་རོ། །དེ་ཡང་ལུང་ལས་སེམས་དཔའ་ཆེན་པོ་སྒྲ་གང་ལ་བརྟེན་ནས་སེམས་ཅན་དམན་པ་ལ་རྟོགས་པ་འབྱུང་ངོ་། །རྟོགས་པ་ལ་བརྟེན་ནས་ཞི་གནས་དང་ལྡན་པར་འགྱུར་རོ། །དེ་ལ་བརྟེན་ནས་ལྷག་མཐོང་འཕེལ་བར་འགྱུར་རོ། །
དེ་ལ་ཟུང་དུ་འབྲེལ་བའི་ཡེ་ཤེས་འབྱུང་བར་འགྱུར་རོ། །སེམས་དཔའ་ཆེན་པོ་ངན་སོང་དུ་བྱང་ཆུབ་སེམས་དཔའི་སྤྱད་པ་སྤྱོད་པའི་དུས་སུ་སངས་རྒྱས་རྣམ་པར་གཟིགས་ཀྱི་སྒྲ་ལ་བརྟེན་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ་ཞེས་བྱ་བ་ལ་
སོགས་པ་རྒྱ་ཆེར་གསུངས་སོ། །དམིགས་པས་ཇི་ལྟ་བུ་ཞེ་ན། གང་ལ་གཞན་ལས་གྱུར་པའི་དམིགས་པ་ཡོད་པ་སྟེ། ཇི་ལྟར་རྣམ་པར་བམ་པ་དང་། རྣམ་པར་བསྔོས་པ་ལ་བརྟེན་ནས་མི་སྡུག་པའི་བསམ་གཏན་ཡོངས་སུ་རྫོགས་པར་འགྱུར་རོ། །དུས་མཐའི་མེ་ལ་སོགས་པ་ལ་བརྟེན་
ནས་ཟད་པར་གྱི་ཏིང་ངེ་འཛིན་ཡོངས་སུ་རྫོགས་པར་འགྱུར་རོ་ཞེས་བྱ་བ་ལ་སོགས་པ་དང་། རིན་པོ་ཆེ་སྣ་ལྔའི་སྐུའི་སྣང་བའི་གཉེན་པོ་དང་བཅས་པས་སྐུའི་ཏིང་ངེ་འཛིན་ཡོངས་སུ་རྫོགས་པར་འགྱུར་རོ། །རྔུལ་བ་དང་ཞུ་བའི་སྟོབས་ཀྱིས་ཐིག་ལེའི་བསམ་གཏན་ཕུན་སུམ་ཚོགས་པར་འགྱུར་རོ། །སྣང་

བའི་འོད་ཅེས་བྱ་བ་ནི་འོད་ཀྱི་བསམ་གཏན་ཕུན་སུམ་ཚོགས་པར་འགྱུར་རོ། །ནམ་མཁའ་དང་བ་ལ་བརྟེན་ནས་འོད་གསལ་གྱི་ཡེ་ཤེས་ཕུན་སུམ་ཚོགས་པར་འགྱུར་རོ་ཞེས་བྱ་བ་ལ་སོགས་པ་རྒྱ་ཆེར་གསུངས་སོ། །གང་འདོད་པའི་ཡུལ་དེ་དམ་པར་འགྱུར་རོ། །སུན་འབྱིན་པས་
ཇི་ལྟར་འགྱུར་ཞེ་ན་འདི་ལྟར་འདོད་ཆགས་དང་འདོད་ཆགས་ཀྱི་ཡུལ་ལ་ཉེས་པ་དང་ཆགས་སུ་མི་རུང་བར་ལྟ་སྟེ། དང་པོའི་དུས་རྗེས་སུ་དྲན་པ་དང་མཚུངས་པར་ལྡན་པ་དང་། ཟླ་གཞན་དང་། དུས་ཕྱིས་འབྱུང་བས་ཕྱིས་རྗེས་སུ་དྲན་པ་དང་། གཙང་བ་མེད་པ་དང་། བདག་མེད་པ་དང་། རྟག་པ་མེད་པ་དང་།
རོ་བྲོ་བ་མེད་པས་གང་འདོད་པ་རྩེ་གཅིག་ཏུ་འགྱུར་རོ། །ལུང་གཞན་ལས། དང་པོའི་དུས་དང་མཚུངས་ལྡན་དང་། །ཟླ་གཞན་ཕྱིས་འབྱུང་རྗེས་དྲན་པས། །གཏི་མུག་ཆགས་དང་ཉོན་མོངས་བྲལ། །ཏིང་འཛིན་ཡོན་ཏན་ཕུན་སུམ་ཚོགས། །ཞེས་འབྱུང་བ་དང་། གཞན་ལས། རྟག་མིན་
རང་དབང་ཡོད་མིན་དང་། གཞན་སྐྱོན་གཞན་ལ་ལྡན་གྱུར་དང་། །རང་གིས་རང་གི་ཡོན་ཏན་ཉིད། །འབྱོར་པ་ཕུན་སུམ་ཚོགས་པར་འགྱུར། །ཞེས་འབྱུང་བ་ལྟ་བུའོ། །གཉེན་པོས་ཇི་ལྟ་བུ་ཞེ་ན། མ་ཆགས་པ་དང་། ཞེ་སྡང་མེད་པ་ལ་སོགས་པས་རང་གི་མི་མཐུན་པའི་ཕྱོགས་སེལ་བར་འགྱུར་
རོ། །དེ་ཅིའི་ཕྱིར་ཞེ་ན། མི་མཐུན་པ་དང་། གཉེན་པོ་དག་ལྷན་ཅིག་མི་གནས་པའི་ཕྱིར་འགལ་བ་ཡིན་ནོ། །གལ་ཏེ་དེ་ལྟར་ན་དགེ་བར་འགྱུར་བ་གང་ལྷན་ཅིག་མི་གནས་པར་འགྱུར་བའི་ཕྱིར་ཐ་དད་པ་མེད་པར་འགྱུར་རོ་ཞེ་ན། མ་ཡིན་ཏེ་ཕན་ཚུན་སྤངས་པའི་ཕྱིར་འགལ་བ་ཉིད་དོ། །དེ་བས་ན་ཆོས་དགེ་བ་
ནང་ཐ་དད་པས་གཅིག་ཏུ་མི་འགྱུར་རོ། །གཞན་མཐོང་བས་ཇི་ལྟར་འགྱུར་ཞེ་ན། དམིགས་པ་གསལ་བ་དང་བསམ་གཏན་དང་ལྡན་པ་མཐོང་ན་དད་པར་འགྱུར་རོ། །གང་ལ་དད་པར་གྱུར་པ་དེ་ལས་སེམས་རྩེ་གཅིག་པར་འགྱུར་རོ་ཞེའོ། །ཐོས་པས་ཇི་ལྟར་འགྱུར་ཞེ་ན། དེ་ཉིད་བཞིན་ནོ། །རང་གི་
ཉམས་སུ་མྱོང་བས་ཇི་ལྟར་འགྱུར་ཞེ་ན། གང་གིས་སྔ་མའི་དུས་སུ་ཟིན་པ་དང་། འགལ་བ་དང་། རབ་ཏུ་རྫོགས་པ་དང་མངོན་དུ་གྱུར་པས་གང་དུ་གཏད་པ་དེ་འཕེལ་བར་འགྱུར་ཏེ། ཇི་སྐད་དུ། སེམས་དཔའ་ཆེན་པོ་གང་གིས་དེ་ཁོ་ན་ཉིད་ཀྱི་བསམ་གཏན་ཡོངས་སུ་རྫོགས་པར་འདོད་པ་དེས་གང་

ལ་བརྟེན་ཏེ་བསླབ་པར་བྱ་བའི་ཐབས་ཡོངས་སུ་རྫོགས་པར་བྱ་བ་ནི་འདི་ལྟ་སྟེ། སྔ་མའི་དུས་ཀྱི་དམིགས་པ་རྣམ་པར་གསལ་བ་དང་། ཡོངས་སུ་རྫོགས་པ་ལ་བརྟེན་ནས་བླ་ན་མེད་པའི་ཐབས་ཆེན་པོ་ཐོབ་པར་འགྱུར་རོ། །དེ་ཅིའི་ཕྱིར་ཞེ་ན། སྔ་མའི་དུས་ཀྱི་དམིགས་
པ་དེས་ཕྱི་མའི་རྐྱེན་བྱེད་པར་འགྱུར་ཏེ། དང་པོ་ནི་རང་གི་དམིགས་པ་ལ་དྲན་པ་སྐྱེའོ། །དེ་ནས་ཕྱི་མ་ལ་མངོན་དུ་བྱེད་དོ་ཞེས་འབྱུང་བ་ལྟ་བུའོ། །གནས་ཀྱིས་ཇི་ལྟར་འགྱུར་ཞེ་ན། ལུང་ལས། འདི་ལྟར་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་དག་ཏིང་ངེ་འཛིན་ཉམས་པ་མེད་པ་འདོད་པ་དང་།
ཤེས་རབ་ཉམས་པ་མེད་པ་འདོད་པ་དང་། རྣམ་པར་གྲོལ་བ་ཉམས་པ་མེད་པ་ཐོབ་པར་འདོད་པས། ཐོག་མ་ཉིད་དུ་ནི་ཡིད་དུ་འོང་བའི་གནས་ལ་བརྟེན་པར་བྱའོ། །དེ་ཅིའི་ཕྱིར་ཞེ་ན། གནས་ཡོངས་སུ་དག་པས་ཐོག་མ་ཉིད་དུ་དམིགས་པ་མ་དག་པ་སྤོང་བར་འགྱུར་རོ། །གང་གི་ཚེ་
དམིགས་པ་མ་དག་པ་སྤངས་པས་འདོད་ཆགས་ལ་སོགས་པ་ཉོན་མོངས་པ་སྤངས་པར་འགྱུར་རོ། །གང་གི་ཚེ་ཉོན་མོངས་པ་སྤངས་པར་གྱུར་པ་དེའི་ཚེ་སེམས་རྩེ་གཅིག་པ་འཐོབ་པར་འགྱུར་རོ་ཞེས་བྱ་བ་ལ་སོགས་པ་རྒྱ་ཆེར་གསུངས་སོ། །ཡུལ་གྱིས་ཇི་ལྟ་བུ་ཞེ་ན། རིགས་ཀྱི་བུ་སེམས་ཅན་
ཚ་བའི་ནད་དང་ལྡན་པ་རྣམས་ཀྱིས་ནི་ཤིན་ཏུ་མཐོ་བར་གྱུར་པ་དང་། གྲང་བའི་རེག་པ་ཡོད་པ་དང་། ཙན་དན་གོ་ཤིཪྵ་དང་། ཙན་དན་སྦྲུལ་གྱི་སྙིང་པོ་ཅན་ལ་སོགས་པ་ཡོད་པ་གང་ཡུལ་ཁམས་སམ། འབྲོག་དགོན་པའམ། ཁམས་ཆེན་པོ་ལ་གནས་ན་དེའི་ནད་ཐམས་ཅད་ཞི་བར་
འགྱུར་རོ། །དེ་བས་ན་དེའི་བསམ་གཏན་དང་ཆོ་ག་ཕུན་སུམ་ཚོགས་པར་འགྱུར་ཏེ། འདི་ལྟར་རིན་པོ་ཆེའི་མཛོད་ཅེས་བྱ་བའི་ཏིང་ངེ་འཛིན་དང་། རིན་པོ་ཆེ་ཏོག་བརྩེགས་པ་ཞེས་བྱ་བའི་ཏིང་ངེ་འཛིན་དང་། རིན་ཆེན་སྣང་བ་ཞེས་བྱ་བའི་ཏིང་ངེ་འཛིན་དང་། རིན་ཆེན་སྙིང་པོ་ཞེས་བྱ་བ་ལ་
སོགས་པའི་ཏིང་འཛིན་ཚད་མེད་གྲངས་མེད་ཅིང་བགྲང་བ་ལས་འདས་པ་ཐོབ་པར་འགྱུར་རོ་ཞེས་བྱ་བ་ལ་སོགས་པ་རྒྱ་ཆེར་གསུངས་སོ། །དུས་ཀྱིས་ཇི་ལྟར་འགྱུར་ཞེ་ན། འདི་ལྟ་སྟེ། འདི་ནས་ཡུན་རིང་པོ་མ་ལོན་པར་བསམ་གཏན་ཕུན་སུམ་ཚོགས་པར་འདོད་ན། ཉི་མ་ལྔའམ། གཅིག་

གི་བར་དུ་ཡན་ལག་ཡོངས་སུ་སྦྱང་བ་དང་། ཕུང་པོའི་རྒྱུན་རབ་ཏུ་འཕེལ་བ་ཞེས་བྱ་བའི་ཆོ་ག་ལ་གནས་པར་བྱའོ་ཞེས་འབྱུང་བ་ལྟ་བུའོ། །ཟས་ཀྱིས་ཇི་ལྟར་འགྱུར་ཞེ་ན། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་དག་ལ། ཟས་ཀྱི་ཚོད་ཤེས་པ་དང་ཟས་ཀྱི་མཚན་ཉིད་ཤེས་པ་དང་། ཟས་
དང་མཐུན་པའི་ལུས་ཤེས་པ་དེས་ཇི་ལྟར་ཟས་ལ་སྤྱད་པ་བཞིན་དུ་བསམ་གཏན་ཕུན་སུམ་ཚོགས་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་ཟས་ལ་ལེགས་པར་བརྟེན་པས་ནི་ལུས་བདེ་བར་འགྱུར་རོ། །དེ་ནས་སེམས་བདེ་བར་འགྱུར་རོ། །དེ་ནས་ནི་བསམ་གཏན་ཕུན་སུམ་ཚོགས་
པར་འགྱུར་རོ་ཞེས་འབྱུང་བ་ལྟ་བུའོ། །ཟས་ལ་ཇི་ལྟ་བར་སྐོམ་པ་ཡང་སྦྱར་བར་བྱའོ། །གྲོགས་ཀྱིས་ཇི་ལྟར་འགྱུར་ཞེ་ན། སེམས་དཔའ་ཆེན་པོའི་བསམ་གཏན་དང་ལྡན་པའི་གང་ཟག་ལ་ལ་ཞིག་བསམ་གཏན་ལ་གནས་པར་འགྱུར་ཞིང་བསམ་གཏན་ལ་བསྔགས་པ་བརྗོད་ནས། བསམ་
གཏན་གཟུངས་སུ་འཛིན་པར་བྱེད་ན། བྱིས་པ་མ་རབས་ཀྱི་རྗེས་སུ་འཇུག་པར་མི་བྱེད་ན། བསམ་གཏན་དེ་རང་ལས་བྱུང་སྙམ་མམ། གསོལ་པ་བཅོམ་ལྡན་འདས་དེ་ནི་མ་ལགས་སོ། །བཀའ་སྩལ་པ། གལ་ཏེ་བསམ་གཏན་དེ་གཞན་ལས་བྱུང་སྙམ་མམ། གསོལ་པ། བཅོམ་ལྡན་འདས་
དེ་ནི་མ་ལགས་སོ། །བཀའ་སྩལ་པ། སེམས་དཔའ་ཆེན་པོ་དེ་དེ་བཞིན་ནོ། །དེ་དེ་བཞིན་ཏེ། སེམས་ཅན་དེ་དག་གི་བསམ་གཏན་དེ་ནི་རང་ལས་ཀྱང་བྱུང་བ་མ་ཡིན་ནོ། །གཞན་ལས་ཀྱང་བྱུང་བ་མ་ཡིན་ཏེ། རྐྱེན་གཞན་ལ་ལྟོས་ཤིང་རང་གི་ས་བོན་ལས་བྱུང་བར་རིག་པར་བྱའོ་ཞེས་འབྱུང་
བ་ལྟ་བུའོ། །གྲོགས་ལ་ཇི་ལྟར་བརྟེན་པའང་དེ་བཞིན་ནོ། །ཕྲད་པས་ཇི་ལྟར་འགྱུར་ཞེ་ན། འདི་ལྟར་ལུང་དང་ཕྲད་པ་དང་། རིགས་པ་དང་ཕྲད་པ་དང་། དགེ་བའི་གྲོགས་པོ་དང་ཕྲད་པས་ཀྱང་བསམ་གཏན་ཕུན་སུམ་ཚོགས་པར་འགྱུར་རོ། །བྲལ་བས་ཇི་ལྟར་འགྱུར་ཞེ་ན། ཇི་ལྟར་འགྲོ་བ་
བཟང་མོ་དང་བྲལ་བ་དང་། སྡིག་པ་དང་བྲལ་བ་དང་། དགྲ་དང་སྦྲུལ་གདུག་པ་དང་། སྟག་དང་སེང་གེ་ལ་སོགས་པ་བསམ་གཏན་གྱི་དགྲར་གྱུར་པ་དང་བྲལ་བར་གྱུར་པའོ། །གཏོང་བས་ཇི་ལྟ་བུ་ཞེ་ན། སྦྱིན་པ་ལ་སོགས་པ་དགེ་བའི་སྟོབས་ཀྱིས་འགྱུར་བའོ། །འཛིན་པས་ཇི་ལྟར་འགྱུར་ཞེ་

ན། གང་གི་སྡོམ་པ་དང་། སྡོམ་པའི་བདག་པོ་དང་། གྲོགས་དང་གནས་དང་མཐུན་པར་འགྱུར་བས་སོ། །སྡུད་པས་ཇི་ལྟར་འགྱུར་ཞེ་ན། བསྡུ་བའི་དངོས་པོ་བཞི་ལ་བརྟེན་ནས་བསམ་གཏན་ཕུན་སུམ་ཚོགས་པར་འགྱུར་རོ། །སེམས་ལས་བྱུང་བས་ཇི་ལྟར་འགྱུར་ཞེ་ན། དྲན་པ་དང་མོས་པ་ལ་
སོགས་པ་དང་ལྡན་པས་བསམ་གཏན་ཕུན་སུམ་ཚོགས་པར་འགྱུར་རོ། །འདི་ལའང་ཁ་ཅིག་ནི་དངོས་སུའོ། །ཁ་ཅིག་ནི་བརྒྱུད་ནས་འགྱུར་ཏེ་ཅི་རིགས་སུ་སྦྱར་རོ། །དེ་ལ་ཞི་གནས་ཀྱི་གྲོགས་གང་ཞེ་ན། དམིགས་པ་མངོན་དུ་བྱེད་པའི་དུས་ན་གང་གིས་དེ་ལ་ཕན་པར་འགྱུར་བ་ཐམས་ཅད་དོ། །སྔོན་
དུ་འགྲོ་བ་གང་ཞེ་ན། གང་གིས་དང་པོ་སྟན་བདེ་བ་ལ་འདུག་སྟེ། སྐྱིལ་མོ་ཀྲུང་ལེགས་པར་བཅས་ཏེ། ལུས་བསྲང་། སུན་འབྱིན་པ་དང་། སྤྲོ་བ་རྣམ་པ་གཉིས་བྱ་སྟེ། ཨེ་མའོ་ཁམས་གསུམ་ཀུན་གྱི་སེམས་ཅན་འདི་དག་ནི་ཅི་སྐད་དུ། ཚེ་རབས་ཐོག་མ་མེད་པ་ནས་ཉོན་མོངས་པའི་འཆིང་
བ་དང་ལྡན་པ་སྟེ། དེའི་རྒྱུ་དེའི་རྐྱེན་གྱིས་མཚམས་མེད་པའི་སྡུག་བསྔལ་སྣ་ཚོགས་མྱོང་བར་འགྱུར་རོ་ཞེས་སྤོང་བར་བསམ་པར་བྱའོ། །གཞན་ཡང་བདག་གི་ཚེ་རབས་ཐོག་མ་མེད་པའི་དུས་ནས་དོན་མེད་པའི་ལས་ཀྱིས་བཅིངས་པ་སྟེ། ཇི་སྐད་དུ། མི་རྟག་ལུས་འདིའི་དོན་གྱི་ཕྱིར། །སྡིག་དང་
དོན་མེད་ལས་རྣམས་བྱས། །ལུས་དང་སེམས་བྲལ་སོ་སོ་ནས། །ཁྱེད་ཀྱིས་ཅི་སྟེ་ཐང་དུ་གསོ། །དགེ་བྲལ་ཐབས་ནི་སྣ་ཚོགས་པས། །ཕུང་པོའི་དོན་ཕྱིར་ལས་རྣམས་བྱས། །འབྲས་བུ་བྱ་དང་ཁྱི་སྤྱང་ཟས། །བདག་ལ་དགོས་པ་མེད་དུ་ཟད། །ཅེས་པ་འདི་དག་གི་དོན་ཡང་བསམ་པར་
བྱའོ། །གཞན་ཡང་། བདག་ལུས་གཅིག་མིན་ཕྱི་ནང་གཉིས་དང་ལྡན། །ནང་གྲོལ་དོན་སྙིང་པགས་པ་གཟུགས་དང་མགོ། །རེ་རེ་ཆ་ཡིས་བྱེ་བས་སྙིང་པོ་མེད། །དེ་ཕྱིར་ལུས་ལ་མཁས་པ་སུ་ཞིག་ཆགས། །ཞེས་པ་དང་། ཁམས་གསུམ་གཅིག་མིན་སྣོད་དང་བཅུད་དུ་ལྡན། །རེ་རེ་
ཆ་ཡིས་ཕྱེ་བས་བསམ་མི་ཁྱབ། །ཕྲ་རབ་རྡུལ་ལ་དངོས་པོ་ཅི་ཡང་མེད། །དེ་ཕྱིར་ཕྱི་རོལ་གཅིག་དང་དུ་མ་བྲལ། །ཞེས་པ་འདི་ཡང་བསམ་པར་བྱའོ། །གཞན་ཡང་། དེ་ནས་བདག་ནི་འབྲས་བུ་ཅན། །འཇིག་རྟེན་དགེ་བ་ཐམས་ཅད་ཀྱིས། །བསམ་གཏན་དགེ་བའི་ཆར་མི་འགྲོ། །དེ་

ཕྱིར་བདག་ནི་དབུགས་འབྱིན་འགྱུར། །ཞེས་པ་འདི་ཡང་བསམས་ཏེ། འདི་ཡང་སྔོན་དུ་འགྲོ་བའོ། །དེ་ལ་ཞི་གནས་ཀྱི་དམིགས་པ་གང་ཞེ་ན་ཡིད་ཀྱི་རྣམ་པར་ཤེས་པ་དང་། ཏིང་ངེ་འཛིན་དང་། སེམས་ལས་བྱུང་བ་དགེ་བ་གཞན་གྱི་ཡུལ་དུ་གྱུར་པའོ། །དམིགས་པ་ལ་གཏང་བའི་
ཐབས་གང་ཞེ་ན། གང་གིས་དེའི་རྣམ་པ་ལ་སེམས་ལྷན་ནེར་འཇོག་པའོ།། །།སྡོམ་ནི། སྔོན་འགྲོ་གྲོགས་དང་དུས་དང་མཐོང་། །སྤྱི་དང་བྱེ་བྲག་དམིགས་པ་བཞིའི། །མཚན་མ་དམིགས་གཞན་གཏོང་དང་བསྟོད། །བཅིངས་དང་སུན་འབྱིན་ཚོགས་རྫོགས་པའོ། །དེ་ལ་
སྔོན་དུ་འགྲོ་བ་དང་བཅས་པས་སེམས་བཟུང་བའང་ཡོད་དེ། གང་གིས་སྔོན་དུ་འགྲོ་བ་ལེགས་པར་སྤྱད་པས་འདི་ལ་རྩེ་གཅིག་ཏུ་འགྱུར་བའོ། །གྲོགས་ཀྱི་བྱེ་བྲག་གིས་སེམས་བཟུང་བ་ཡང་ཡོད་དེ། དམིགས་པ་གང་ལ་ཏིང་ངེ་འཛིན་གྱི་ཡུལ་དུ་བྱེད་པའི་དུས་སུ་སེམས་ལས་བྱུང་བ་དྲན་པ་
ལ་སོགས་པས་སེམས་ལེགས་པར་གནས་པར་འགྱུར་བའོ། །དུས་ཀྱི་བྱེ་བྲག་གིས་སེམས་བཟུང་བའང་ཡོད་དེ། གང་དུ་དུས་ལེགས་པར་གནས་པ་སྟེ། ཇི་ལྟར་ཆུ་ཚོད་དྲུག་ཆ་ནས་བཟུང་བའོ། །གཞན་མཐོང་བའི་བྱེ་བྲག་གིས་སེམས་བཟུང་བའང་ཡོད་དེ། འདོད་པའི་བྱ་བའི་ཡུལ་གང་
ལེགས་པར་འགྱུར་སྔར་མཐོང་བའི་སྟོབས་ཀྱིས་ཕྱིས་དམིགས་པར་འགྱུར་བའོ། །དམིགས་པ་སྤྱིས་སྤྱི་ལ་སེམས་བཟུང་བའང་ཡོད་དེ། ཏིང་ངེ་འཛིན་གང་གིས་སྐུ་ལ་སོགས་པ་ཐམས་ཅད་ཡུལ་དུ་བྱས་ནས། ཐམས་ཅད་གསལ་བར་འགྱུར་བའོ། །དམིགས་པ་སྤྱིས་བྱེ་བྲག་ལ་སེམས་
བཟུང་བའང་ཡོད་དེ། སྤྱི་གཏད་པས་གསལ་པ་གང་ལ་རྩེ་གཅིག་ཏུ་འགྱུར་བའོ། །དམིགས་པ་བྱེ་བྲག་གིས་སྤྱི་ལ་སེམས་བཟུང་བའང་ཡོད་དེ། སླ་བར་གྱུར་པ་གཅིག་ལ་སེམས་བཟུང་བས་ཕྱིས་གཞན་གསལ་བར་འགྱུར་བའོ། །བྱེ་བྲག་གིས་བྱེ་བྲག་ལ་སེམས་བཟུང་བའང་ཡོད་དེ།
གང་ལ་གཏད་པ་དེ་ཉིད་གསལ་བར་འགྱུར་བའོ། །མཚན་མས་སེམས་བཟུང་བའང་ཡོད་དེ། གང་རྡོ་རྗེ་དང་རིན་པོ་ཆེ་དང་། འཁོར་ལོ་ལ་སོགས་པ་རྒྱན་གསལ་བས་དེར་འགྱུར་རོ། །དམིགས་པ་གཞན་གྱིས་གཞན་ལ་སེམས་བཟུང་བའང་ཡོད་དེ། འདི་ལྟར་ཁམས་གསུམ་

དག་པས་འགྱུར་བ་དང་། བདག་དག་པས་འགྱུར་བ་ནི་དག་པའི་སྟོབས་ཀྱིས་སོ། །འདོད་ཆགས་དང་ཞེ་སྡང་དང་བྲལ་བར་འགྱུར་བ་ནི་སྤངས་པས་འགྱུར་བའོ། །རླུང་གྱེན་དུ་འགྲོ་བ་དང་། སྣ་སྒོ་གཡས་སུ་འགྲོ་བ་དང་། གཡོན་དུ་འགྲོ་བ་དག་ལས་འབྱུང་བ་ལ་སོགས་པའི་
རིམ་པ་དང་། སྙིང་ག་དང་ལྟེ་བ་དང་གསང་བའི་གནས་སུ་སློབ་པ་ནི་དུལ་ནས་འཛིན་པའོ། །གཏོང་བའི་བྱེ་བྲག་གིས་སེམས་བཟུང་བའང་ཡོད་དེ། །གསལ་བར་གྱུར་ན་བཏང་བས་དེ་ཡོངས་སུ་གསལ་བར་འགྱུར་བའོ། །ཀུན་ཏུ་བསྟོད་པའི་བྱེ་བྲག་གིས་སེམས་བཟུང་བའང་ཡོད་དེ།
བྱིང་བར་གྱུར་ན་སེམས་བསྟོད་པས་གསལ་བར་འགྱུར་བའོ། །གཏིང་དུ་བཅིངས་པས་སེམས་བཟུང་བའང་ཡོད་དེ། སེམས་རྒོད་པར་གྱུར་ན་གང་གི་བཅིངས་བས་གསལ་བར་འགྱུར་བའོ། །སུན་འབྱིན་པས་སེམས་བཟུང་བའང་ཡོད་དེ། འཇིག་རྟེན་གྱི་ལས་ལ་ཉེས་པར་ཤེས་
པ་སྤངས་ཏེ། སེམས་རྩེ་གཅིག་པར་འགྱུར་བའོ། །ཚོགས་ཡོངས་སུ་རྫོགས་པས་སེམས་བཟུང་བའང་ཡོད་དེ། གང་གིས་སངས་རྒྱས་ཐམས་ཅད་ལ་ཕྱག་འཚལ་བ་དང་མཆོད་པ་ལ་སོགས་པའི་དགེ་བའི་སྟོབས་ཀྱིས་གང་ལ་དམིགས་ཏེ་གསལ་བར་འགྱུར་བའོ། །གཞན་ཡང་།
ཁ་དོག་དབྱིབས་དང་གྲངས་དང་ཚད། །ཡོངས་རྫོགས་དེ་ཡིས་དེ་དག་འགྲུབ། །ཅེའོ། །དེ་ནས་རྗེས་སུ་བྱ་བའི་ཆོ་ག་བཤད་པར་བྱ་སྟེ། སྡོམ་ནི། ཉམས་སུ་མྱོང་རྟོག་དེ་ལ་གང་དམིགས་དང་། །བྱིང་དང་རྒོད་རྟོག་དེ་ལ་གནས་བྱེད་དང་། །རང་ལ་རབ་སྤྲོ་བསྔོ་ལ་ཡི་རང་དང་།
ལུས་ངག་ཉམས་ལྟ་འདི་དག་རྗེས་སུ་བྱེད། །དེ་ལ་ཉམས་སུ་མྱོང་བའི་རྟོག་པ་གང་ཞེ་ན། གང་གིས་བདག་གི་གསལ་བ་དང་། ཡོངས་སུ་རྫོགས་པ་ཇི་ལྟར་གནས་པར་རྟོག་གོ། །དེ་ལ་གང་དམིགས་པ་རྟོག་ཅེ་ན། འདི་ལྟར་ཉོན་མོངས་པ་དང་བཅས་པའི་སེམས་སམ། དེ་ལས་
གཞན་པའི་སེམས་ཀྱིས་རྟོག་གོ། །བྱིང་བ་ཇི་ལྟར་རྟོག་ཅེ་ན། སེམས་མྱལ་མྱལ་པོར་འདུག་པ་དང་། གཉིད་ཀྱིས་ནོན་པ་ལྟ་བུར་འདུག་པ་དང་། བསམ་གཏན་དང་གཉིད་དབྱེ་བ་མེད་པར་འདུག་པའོ། །རྒོད་པ་ཇི་ལྟར་རྟོག་ཅེ་ན། སེམས་གཉིས་འཛིན་དུ་གནས་པ་དང་།

ཉོན་མོངས་པའི་ཡུལ་ལ་རབ་ཏུ་འཕྲོ་བའོ། །དེ་ལ་གནས་པ་གང་ཞེ་ན། རོ་མྱང་བ་དང་། ཞི་བར་ཤེས་པའོ། །རང་ལ་རབ་ཏུ་སྤྲོ་བ་ཇི་ལྟ་བུ་ཞེ་ན། རང་གི་བསམ་གཏན་འདི་མཆོག་ཏུ་གྱུར་པའོ། །འདི་ནི་ཡང་དག་པའོ་སྙམ་དུའོ། །བསྔོ་བས་ཇི་ལྟ་བུ་ཞེ་ན། བསམ་གཏན་གྱི་
དགེ་བའི་རྩ་བ་འདིས། འགྲོ་བ་ཐམས་ཅད་སངས་རྒྱས་པར་གྱུར་ཅིག་པའོ། །ཡི་རང་བས་ཇི་ལྟ་བུ་ཞེ་ན། སེམས་ཅན་གཞན་པ་དག་པ་བསམ་གཏན་དང་ལྡན་པ་ལ་ཡི་རང་བའོ། །ལུས་ཀྱི་ཉམས་ལ་ལྟ་བ་ཇི་ལྟ་བུ་ཞེ་ན། ལུས་ངག་ལ་བསམ་གཏན་ཕན་པའམ། དེ་ལས་གཞན་
དུ་ཕན་པར་གྱུར་པ་རྟག་པ་སྟེ། སྨྲ་བ་དང་སེམས་པ་ལ་ཡང་དེ་བཞིན་ནོ། །ཁམས་ཀྱི་ཚོད་བཟུང་བ་ཇི་ལྟ་བུ་ཞེ་ན། གང་དུ་བསམ་གཏན་དེ་ཁམས་ལ་གནོད་པར་འགྱུར་བ་དེ་སྲིད་དུ། ཐུན་ཐུང་ངུས་གནས་པར་བྱའོ། །གང་དུ་ཁམས་ལ་གནོད་པ་མེད་པ་དེ་སྲིད་དུ་བསྲིང་ཞིང་ཉུང་ངུ་
ཉུང་ངུས་གནས་པར་བྱའོ། །བསྒོམ་པའི་ཚད་གང་ཞིག་ཅེ་ན། རྣམ་པ་གཉིས་ཏེ། གོམས་པའི་ཚད་དང་། མཐར་ཕྱིན་པའི་ཚད་དོ། །གང་གིས་དམིགས་པ་རྩོལ་བས་གསལ་བ་དང་། རྣམ་པ་གཞན་དུ་བསྒྱུར་ནུས་པའོ། །ཡང་ཇི་ལྟར་སྣང་བ་རང་གི་བསམ་གཏན་ལས་གཞན་དུ་
མི་སྣང་བའོ། །སྤྱོད་ལམ་ཇི་ལྟ་བུ་ཞེ་ན། དེ་ནི་རྣམ་པ་གསུམ་སྟེ། ལས་དང་པོ་པའི་སྤྱོད་ལམ་དང་། བར་མའི་སྤྱོད་ལམ་དང་། ཚད་དུ་ཕྱིན་པའི་སྤྱོད་ལམ་མོ། །ལས་དང་པོ་པའི་སྤྱོད་ལམ་གང་ཞེ་ན། དང་པོ་དུས་ཀྱི་རྣལ་འབྱོར་པས། ནང་པར་ཉི་མ་རི་ལ་གནས་པའི་དུས་
སུ་བསམ་གཏན་བྱས་ཏེ། དེ་ནས་ཟས་ལེགས་པར་བཟའ་བ་དང་། སྐོམ་ལེགས་པར་བཏུང་བ་དང་། ལས་དྲག་པོ་ལ་སོགས་པ་སྤང་བ་དང་། གཟུགས་ལ་སོགས་པ་ཡུན་རིང་དུ་ལྟ་བ་སྤང་བར་བྱའོ། །གཞན་ཡང་ཐ་མལ་པར་གནས་པར་བྱའོ། །གཞན་ཡང་བདག་ཉིད་
ཀྱི་ལུས་ངག་གི་སྤྱོད་ལམ་ཅི་བདེ་བར་གནས་པར་བྱ་སྟེ། འདི་ནི་ལས་དང་པོ་པའི་སྤྱོད་ལམ་མོ། །རྣལ་འབྱོར་བར་མའི་སྤྱོད་ལམ་གང་ཞེ་ན། གང་གིས་སྣང་བ་ཐམས་ཅད་ལྷའི་དཀྱིལ་འཁོར་དུ་གནས་པ་དང་། སྣང་བ་ཉིད་སྒྱུ་མ་ཙམ་དུ་གནས་པ་དང་། གོང་མ་ཙམ་ཉིད་སྒྱུ་མ་ཙམ་

དུ་གནས་པ་སྟེ། ལུང་ལས། རྣལ་འབྱོར་མོས་པའི་ས་ལ་གནས། །གོང་དུ་གྱུར་པའི་སྤྱོད་ལམ་ནི། །སྣང་བའི་དངོས་པོ་བརྫུན་པར་འཛིན། །དེ་ཉིད་གཞན་དུ་བཟློག་པ་དང་། །གཞན་གྱུར་དངོས་པོ་སྒྱུ་མར་བལྟ། །ཡོན་ཏན་དམ་པ་ཐོབ་པར་འགྱུར། །
ཞེས་འབྱུང་བ་ལྟ་བུའོ། །རྣལ་འབྱོར་པ་མཆོག་གི་སྤྱོད་ལམ་གང་ཞེ་ན། །གང་གི་སྔོན་དུ་སྣང་བའི་ལོག་པའི་སྒྱུ་མ་ཙམ་དང་། སྟོང་པ་ཉིད་དུ་བལྟ་སྟེ། སེམས་ཅན་གྱིས་བརྟགས་པ་འཁྲུལ་པར་ཡང་ཤེས། འཁྲུལ་པ་དེ་ལའང་མ་ཆགས་བཞིན་སྤྱོད་དོ། །དངོས་པོ་ལྷའི་དཀྱིལ་
འཁོར་ཡང་སྣང་བ་ཙམ་དུ་ཤེས་ཏེ། དེ་ལའང་མ་ཆགས་བཞིན་དུ་སྤྱོད་དོ། །དེ་ནི་ལུང་ལས། རང་སྣང་གཞན་ལ་སྣང་བ་ཀུན། །སྣང་བ་འཁྲུལ་པ་ཙམ་དུ་གནས། །ཞེན་པ་མེད་བཞིན་ཀུན་ཏུ་སྤྱོད། །དེ་ལ་དངོས་གྲུབ་མཆོག་དང་ལྡན། །ཞེས་འབྱུང་བ་ལྟ་བུའོ། །དེ་ལ་དུས་ཀྱི་
སྤྱོད་ལམ་གཞན་ཡང་གསུངས་པ། གང་གིས་ཟས་དང་སྐོམ་དག་ནི། །ཀུན་ཏུ་བདུད་རྩིའི་ལོངས་སྤྱོད་ཆེ། །འཆི་ཉལ་སྟོང་པ་ཉིད་དུ་གནས། །ལངས་པའི་དུས་སུ་རང་ལྷ་ཉིད། །ཀུན་ཏུ་བདེ་བ་ཉིད་ལ་གནས། །མཐོང་བའི་ཆོས་ལ་མྱ་ངན་འདའ། །ཞེས་པ་ལ་སོགས་པ་གསུངས་
པ་ལྟ་བུའོ། །སེམས་ཉམས་དུ་ཞེ་ན། སྡོམ་ནི། མྱུར་དང་དལ་དང་བརྟན་པ་དང་། །སྲ་དང་སྙི་དང་ཐོགས་པ་དང་། །སྙམ་སེམས་པ་དང་རྒྱ་ཆེ་ཟབ། །དེ་བཞིན་རྟགས་ནི་རྣམ་པ་ལྔ། །དེ་ལ་མྱུར་ཞེས་བྱ་བ་ནི་ཤེས་པ་ཆུ་འབབ་པ་ལྟ་བུར་སྣང་བའོ། །དལ་ཞེས་བྱ་བ་ནི་ཆུ་ཀླུང་བཞིན་
ནོ། །བརྟན་པ་ཞེས་བྱ་བ་ནི་མཚོ་གཏིང་བཞིན་ནོ། །སྲ་བ་ཞེས་བྱ་བ་ནི་དམིགས་པ་ཐོགས་ཅན་དུ་གྱུར་པའོ། །སྙི་བ་ཞེས་བྱ་བ་ནི་དེ་ལས་བཟློག་པའོ། །དང་པོ་སྙི་ལ་དེ་ནས་སྲ་ན་ཐོགས་པའོ། །སྙམ་སེམས་པ་ནི་སྙམ་སེམས་པ་དང་། རིང་བ་སྙམ་སེམས་པ་དང་། ངལ་བ་སྙམ་
སེམས་པ་དང་། བྲེལ་བ་སྙམ་སེམས་པ་དང་། ཟིན་པ་སྙམ་སེམས་པ་དང་། མ་ཟིན་པ་སྙམ་སེམས་པ་དང་། སངས་རྒྱས་པ་སྙམ་སེམས་པ་དང་། མི་སྙམ་པ་སྙམ་སེམས་པ་དང་། གཞན་དུ་ཕྱིན་པ་སྙམ་སེམས་པ་དང་། མ་ཕྱིན་པ་སྙམ་སེམས་པ་དང་། ཀུན་བདེ་བ་

སྙམ་སེམས་པ་དང་། མི་བདེ་བ་སྙམ་སེམས་པའོ། །རྒྱ་ཆེ་བ་ནི་ཤེས་པ་ནམ་མཁའ་ལྟ་བུར་གྱུར་པའོ། །ཟབ་པ་ནི་མཚོ་གཏིང་ལྟ་བུའོ། །རྟགས་རྣམ་པ་ལྔ་ན། སྨིག་རྒྱུ་དུ་བ་ལྟ་བུའོ། །སྲིན་བུ་མེ་ཁྱེར་མར་མེ་བཞིན། །ལྔ་པ་ནམ་མཁའ་ལྟ་བུ་བཞིན། །འདི་ལ་དམིགས་
པའི་བྱེ་བྲག་དང་། །དམིགས་པ་པོའི་བྱེ་བྲག་དང་། དེ་ལས་གཞན་པའི་བྱེ་བྲག་གིས་གཞག་གོ། །དེ་ལ་བཅོས་པའི་ཐབས་གང་ཞེ་ན། སྡོམ་ནི། ཟས་དང་སྐོམ་དང་གནས་ལ་སོགས། །དོར་བ་དང་ནི་བླང་བ་དང་། །རིང་ཐུང་རྩོལ་བཅས་རྩོལ་མེད་དང་། །རང་ལས་བཟློག་པའི་
རྣམ་པའོ། །དེ་ལ་ཟས་སྐོམ་ལ་སོགས་པ་ཇི་ལྟ་བུ་ཞེ་ན། གོང་དུ་བཤད་པ་བཞིན་ནོ། །དོར་བས་ཇི་ལྟ་བུ་ཞེ་ན། །སེམས་ཉམས་མི་བདེ་བའོ། །བླང་བས་ཇི་ལྟ་བུ་ཞེ་ན། བདེ་བ་དང་པོ་བས་ཐ་མ་བདེ་བའོ། །རིང་བས་ཇི་ལྟ་བུ་ཞེ་ན། གང་ཤིན་ཏུ་གསལ་ལ་བརྟན་པའོ། །
ཐུང་བས་ཇི་ལྟ་བུ་ཞེ་ན། གསལ་བ་བརྟན་པའི་དུས་སོ། །རྩོལ་བ་དང་བཅས་པས་ཇི་ལྟ་བུ་ཞེ་ན། མ་ཡེངས་པར་གཏོང་བའོ། །དེ་ལས་བཟློག་པ་ནི་རྩོལ་བ་མེད་པའོ། །རང་ལས་བཟློག་པ་ཇི་ལྟ་བུ་ཞེ་ན། མྱུར་བར་གནས་པ་ནི་དལ་བར་བྱེད་དོ། །དལ་བ་ལས་བརྟན་པ་འབྱུང་ངོ་། །
བརྟན་པ་དམན་པ་ནི་མྱུར་བར་བྱེད་དོ། །སྲ་བ་ནི་སྙི་བར་བྱེད་དོ་ཞེས་བྱ་བ་ལ་སོགས་པ་ཤེས་པར་བྱའོ། །དེ་ལ་བསམ་གཏན་གྱི་ཡོན་ཏན་གང་ཞེ་ན། གང་དུ་རང་གི་སྤྱི་དམིགས་པ་གསལ་བར་འགྱུར་བ་དང་། དེ་ལས་གཞན་པའི་དམིགས་པ་འཕེལ་བར་བྱེད་པ་དང་། མི་དགེ་བའི་
ས་བོན་མ་སྐྱེས་པ་མི་སྐྱེད་པ་དང་། སྐྱེས་པ་ཉམས་པར་བྱེད་པ་དང་། དགེ་བའི་ས་བོན་མ་སྐྱེས་པ་སྐྱེད་པ་དང་། སྐྱེས་པ་འཕེལ་བར་བྱེད་པ་དང་། ངན་སོང་གི་སྐྱེ་བ་དང་བྲལ་བ་དང་། དེའི་སྡུག་བསྔལ་དང་བྲལ་བ་དང་། བསྙེན་གནས་ཀྱི་ཡོན་ཏན་ཏེ། དགེ་སློང་གི་བར་གྱི་ཡོན་ཏན་དང་
ལྡན་པ་དང་། ཡེ་ཤེས་ཀྱི་བར་གྱི་ཡོན་ཏན་དང་ལྡན་པ་དང་། ཕྱོགས་མཚམས་སུ་སྙན་པ་འཐོབ་པ་དང་། ཚོགས་ལ་བག་འཁུམས་པ་མེད་པ་དང་། མངོན་པར་ཤེས་པ་ཉམས་པ་མེད་པ་ཐོབ་པ་དང་། གཞན་དང་བ་དང་། འཇུག་པར་བྱེད་པ་དང་། མདོར་ན་བཅོམ་ལྡན་འདས་ཀྱིས་

ཡོན་ཏན་གྱི་ཚོགས་དཔག་ཏུ་མེད་པ་གསུངས་པ་དེ་བསམ་གཏན་གྱི་ཡོན་ཏན་ཏེ། ཅི་སྐད་དུ། བསྐལ་པ་སྟོང་དུ་སྦྱིན་པའི་བསོད་ནམས་ཀྱིས། །སྐད་ཅིག་མཉམ་པར་གཞག་པ་ཆར་མི་འགྲོ། །ཡེ་ཤེས་ཡོན་ཏན་དཔག་མེད་སོགས་པའི་ཕྱིར། །དགོན་
པར་སེམས་བསྡུས་བླ་མེད་ཡོན་ཏན་བླང་། །ཞེས་འབྱུང་བ་ལྟ་བུའོ། །གོ་རིམས་གང་ཞེ་ན། དང་པོ་ཕྱི་རོལ་གྱི་དམིགས་པ་རགས་པ་ལ་འཇོག་པའོ། །དེ་ནས་ནི་ཕྲ་བ་ཤིན་ཏུ་ཕྲ་བ་ལ་འཇོག་པའོ། །དེ་ནས་ནི་སྟོང་པ་ཉིད་ལ་མངོན་དུ་བྱེད་པའོ། །དེའི་རྗེས་སུ་བྱ་བའང་འདི་ལྟར་
སྟོང་པ་ཉིད་ཀྱི་ཏིང་ངེ་འཛིན་བསྒོམ་པའོ། །དེ་ལས་ལངས་ནས་བསམ་གཏན་དང་པོའི་ཏིང་ངེ་འཛིན་སྒོམ་མོ་ཞེས་བྱ་བ་ལ་སོགས་པ་གསུངས་སོ། །རྣམ་པར་དབྱེ་བ་གང་ཞེ་ན། འདི་ལྟར་ཞི་གནས་ནི་རྣམ་པ་གསུམ་སྟེ། སློབ་པའི་ཞི་གནས་དང་། གོམས་པའི་ཞི་གནས་
དང་། མངོན་དུ་གྱུར་པའི་ཞི་གནས་ཏེ། རྩོལ་བ་བྱས་ཀྱང་མི་གསལ་བ་དང་། མ་བྱས་ཀྱང་མི་གསལ་བ་དང་། བྱས་ན་གསལ་མ་བྱས་ན་མི་གསལ་བ་དང་། གཉི་གར་གསལ་བ་དང་གོ་རིམས་བཞིན་ནོ། །ལྷག་མཐོང་གང་ཞེ་ན། རྒྱུའི་ལྷག་མཐོང་དང་། སློབ་པ་དང་
མངོན་དུ་གྱུར་པ་སྟེ། ཡོངས་སུ་རྟོག་པ་དང་། བརྟགས་པ་ཡང་ནས་ཡང་དུ་བྱེད་པ་དང་། ཅི་ལྟ་བུར་རིག་པའོ། །དེའི་སྦྱོར་བ་གང་ཞེ་ན། ཞི་གནས་དང་ལྷག་མཐོང་གཉིས་སུ་མེད་པའོ། །དེའི་འབྲས་བུ་གང་ཞེ་ན། ཡོན་ཏན་གྱི་ཕྱོགས་གཅིག་པའོ། །གང་ཟག་ཞི་གནས་དང་
ལྡན་པ་ལ། གང་གིས་ཅི་ལྟར་ཡོངས་སུ་རྟོག་ཅེ་ན། འདི་ལྟར་རྟགས་ལ་བརྟེན་ནས་ཡོངས་སུ་བརྟགས་ཏེ། འདི་ལྟར་དེའི་རྟགས་ནི་གང་གིས་ཀུན་ཏུ་ཁྲོ་བ་མེད་པ་དང་། ཞེ་སྡང་མེད་པ་དང་། ང་རྒྱལ་མེད་པ་དང་། རྫས་དང་ཡུལ་དང་གཉིན་འདུན་ལ་ཆགས་པ་མེད་པ་དང་། ཏིང་ངེ་
འཛིན་དང་ལྡན་པ་གཞན་ལ་ཡི་རང་བའི་སེམས་དང་ལྡན་པ་དང་། དགོན་པ་དང་དུ་ལེན་པ་དང་། གཞན་ལ་དགོན་པའི་བསྔགས་པ་དང་། དགོན་པ་དང་དུ་ལེན་པ་ལ་ཡོན་ཏན་བརྗོད་པ་དང་། ཚོགས་ཀྱི་ནང་ན་མི་གནས་ཤིང་དེ་ལ་སྐྱོན་དུ་ལྟ་བ་དང་། སྡིག་པའི་གྲོགས་པོ་མི་བསྟེན་

པ་དང་། དགེ་བའི་གྲོགས་པོ་དང་དུ་ལེན་པ་དང་། བསམ་གཏན་ཡུན་རིང་བ་དང་། ལུས་ལ་གནོད་པ་མེད་པ་དང་། ལུས་ཀྱིས་སྤྱོད་ལམ་དྲག་པོ་མི་བྱེད་པ་དང་། ལུས་ཀྱི་མི་དགེ་བ་མེད་པ་དང་། ངག་གིས་སྨྲ་བ་དྲག་པོ་མི་བྱེད་པ་དང་། སེམས་མི་དགེ་བའི་བསམ་པ་མེད་པ་དང་། དོན་
མེད་པའི་གཡེང་བ་ལ་མི་སེམས་པ་དང་། འདུས་བྱས་ཀྱི་དགེ་བ་ཆེད་དུ་མི་བྱེད་པ་དང་། གྲོགས་ཅི་ཡང་མི་འགོག་པ་དང་། ཟས་ལ་འདུན་པ་མེད་པ་ལ་སོགས་པ་དང་། བབ་ཆོལ་གྱི་ལས་མི་བྱེད་པ་དང་། ཁེ་དང་རེ་བ་མེད་པ་དང་། རྩོད་པ་མེད་པ་དང་། ལེ་ལོ་མེད་པ་དང་བསམ་གཏན་
གྱི་ལས་ལས་གཞན་སྤྲོ་བ་དང་དུ་མི་བྱེད་པ་དང་། ཚུལ་འཆོས་དང་ཁ་གསག་དང་། སྒྱུ་དང་གཡོ་ལ་སོགས་པ་དང་བྲལ་བ་ནི་ཞི་གནས་ཀྱི་རྟགས་སུ་ཤེས་པར་བྱའོ། །ལྷག་མཐོང་གི་རྟགས་ནི་མངོན་པར་ཤེས་པ་ལ་སོགས་པའོ། །འདི་ནི་རེ་ཞིག་བསམ་གཏན་གྱི་ཆོ་གའི་ཐབས་མདོར་
བསྡུས་པའོ། །ལེགས་པའི་དོན་ཆེན་ཀུན་སྟོན་རྒྱལ་བ་ཡིས་ནི་ལེགས་གསུངས་པ། །མི་ཕམ་མགོན་པོས་མ་ནོར་བ་ལ་ལེགས་བཀོད་རང་གི་བློས། །ལྗགས་ཀྱི་རྩེར་སྟོན་ཡེ་ཤེས་སྤྱན་གྱིས་གཟིགས་ཏེ་འགྲོ་ལ་ཕན་དོན་དུ། །ལེགས་འོངས་མ་ནོར་དོན་རྣམས་ཇི་ལྟར་གསལ་བར་བཀོད་
པ་ཡིན། །འཇིག་རྟེན་ན་ནི་བླུན་པོ་ནོར་བུ་སྟོར་ལ་འགྱོད་པ་མེད་པ་བཞིན། །རྨོངས་པ་དག་ནི་སྡོམ་བྲལ་བསམ་གཏན་དག་ལ་མི་གནས་ཏེ། །ཆོས་ཀྱིས་ཁེངས་ཤིང་རང་འདོད་ཡུལ་འགྱུར་མི་དགའ་བག་ཀྱང་མེད། །དམྱལ་ཁམས་ན་ཡང་ཆོས་ཀྱི་སྙིང་པོ་ལ་སྨོད་བསྟན་
མིན་ཏེ། །རྫོགས་སངས་རྒྱས་ཀྱིས་ལེགས་གསུངས་སྨད་པའི་གང་ཟག་ལ། །ཀུན་ཏུ་དོན་སྟོན་སྨད་གྱུར་སྐྱེ་བོ་བདུད་དུ་རིག་པར་བྱ། །ཉི་མིའི་དཀྱིལ་འཁོར་པད་མས་ཁ་བྱེ་ཇི་བཞིན་དུ། །ལེགས་གསུངས་སྙིང་པོ་དཔག་མེད་སངས་རྒྱས་སྤྱོད་ཡུལ་ལོ། །བསམ་
གཏན་གྱི་སྒྲོན་མ་ཞེས་བྱ་བ་རྣལ་འབྱོར་པ་མིག་གི་སྙིང་པོ་སློབ་དཔོན་འཕགས་པ་ཐོགས་མེད་ཀྱིས་མཛད་པ་རྫོགས་སོ།། །།༄༅༅། །རྒྱ་གར་སྐད་དུ། ཡོ་ག་ཨ་བ་ཏ་ར། བོད་སྐད་དུ། རྣལ་འབྱོར་ལ་འཇུག་པ། འཕགས་པ་

འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །བསྟན་བཅོས་རྒྱ་ཆེན་པོ་ནི་ཐོས་ནས་ཀྱང་། །དོན་དམ་དེ་བཞིན་ཉིད་ནི་ངེས་བྱས་ལ། །དད་ལྡན་དེ་ནི་འཇམ་པའི་སྟན་གནས་ཏེ། །བློ་དང་ལྡན་པས་རྣལ་འབྱོར་བརྩོན་པར་བྱ། གཟུང་དང་
འཛིན་དང་གཉི་ག་གཉིས་མིན་དང་། །བདག་དང་གཞན་དང་མྱ་ངན་འདས་པ་དང་། །འཁོར་བ་ཞེས་བྱའི་རྣམ་རྟོག་མང་པོ་ནི། །རྟག་ཏུ་སྤངས་ལ་ཡིད་ནི་མཉམ་པར་གཞག །སྒྱུ་མ་དྲི་ཟའི་གྲོང་ཁྱེར་ལྟ་བུ་ནི། །ཤེས་བྱ་མ་ལུས་རྣམ་པར་བལྟས་ནས་སུ། །དེ་བཞིན་ཉིད་ཀྱི་
ཡེ་ཤེས་རྡོ་རྗེ་ཡིས། །ལུས་ཀྱི་འཁྲུལ་འཁོར་རབ་ཏུ་གཞིག་པར་བྱ། །རྣམ་པ་ཐམས་ཅད་དུ་ནི་རབ་མཛེས་ལ། །ཐོག་དང་ཐ་མའི་ཆ་བྲལ་རྣམ་མི་རྟོག །དྲི་མ་མེད་པའི་འོད་ཟེར