Luận tạng Tây Tạng (Tengyur) — Tập 108

དང་། ཡིད་མི་བདེ་བ་དང་ལྡན་པ་ཞེ་སྡང་དང་ལྡན་པ་འདུ་བྱེད་ལས་བྱུང་
བ་མ་ཡིན་པའི་སེམས་བསྐྱེད་པ་དང་། འདུ་བྱེད་དང་བཅས་པ་ལས་བྱུང་བའི་སེམས་བསྐྱེད་པ་དང་། རྒོད་པ་དང་ལྡན་པའི་སེམས་བསྐྱེད་པ་དང་། ཐེ་ཚོམ་དང་ལྡན་པའི་སེམས་བསྐྱེད་པའོ། །འདི་རྣམས་ལ་ལྟ་བར་གྱུར་པ་དང་ལྡན་པའི་སེམས་བསྐྱེད་པ་བཞི་དང་ཐེ་ཚོམ་དང་ལྡན་པའི་
སེམས་བསྐྱེད་པ་དག་ནི་རྒྱུན་དུ་ཞུགས་པའི་ལམ་གྱིས་རབ་ཏུ་སྤོང་ངོ་། །ཡིད་མི་བདེ་བ་དང་ལྡན་པའི་སེམས་བསྐྱེད་པ་གཉིས་ནི་ལམ་གཉིས་ཀྱིས་བསྲབས་པར་བྱས་ཏེ་ཕྱིར་མི་འོང་བའི་ལམ་གྱིས་ལྷག་མ་མེད་པར་སྤོང་ངོ་། །ལྟ་བར་གྱུར་པ་མི་ལྡན་པའི་སེམས་བསྐྱེད་པ་བཞི་དང་།
རྒོད་པ་དང་ལྡན་པའི་སེམས་བསྐྱེད་པ་དག་ནི་ལམ་གསུམ་གྱིས་བསྲབས་པར་བྱས་ཏེ་དགྲ་བཅོམ་པའི་ལམ་གྱིས་མ་ལུས་པར་སྤོང་ངོ་། །སོ་སོའི་སྐྱེ་བོ་དང་ཐུན་མོང་མ་ཡིན་པའི་སྙོམས་པར་འཇུག་པ་ནི་གཉིས་ཏེ། འདི་ལྟར། འབྲས་བུ་སྙོམས་པར་འཇུག་པ་དང་། འདུ་ཤེས་ཚོར་བ་འགོག་
པའི་སྙོམས་པར་འཇུག་པའོ། །དེ་ལ་དང་པོ་ལ་ནི་དྲི་བ་བཅུ་སྟེ་འདི་ལྟར། འབྲས་བུ་སྙོམས་པར་འཇུག་གང་ཡིན། །གང་ལས་འབྲས་བུ་སྙོམས་པར་འཇུག །དེ་ལ་སྙོམས་པར་འཇུག་པ་གང་། །ཅི་ཡི་དོན་དུ་སྙོམས་པར་འཇུག །ཅི་ལྟར་སྙོམས་པར་འཇུག་ཡིད་ལ་བྱེད་པ་ཅི། བསམ་གཏན་པ་
དེའི་སྙོམས་པར་འཇུག་པའི་རྐྱེན་དུ་ཡིན། གནས་པའི་རྐྱེན་དུ་ཡིན། ལྡང་བའི་ཅན་དུ་ཡིན། ཅི་བསམ་གཏན་འདི་འཇིག་རྟེན་པའམ་འཇིག་རྟེན་ལས་འདས་པའོ་ཞེ་ན། དེ་ལ་འབྲས་བུ་སྙོམས་པར་འཇུག་པ་གང་ཡིན་ཞེས་པ། དགེ་སྦྱོང་གི་འབྲས་བུའི་སེམས་མྱ་ངན་ལས་འདས་པ་མ་གཏོགས་
པ་དེ་ནི་འབྲས་བུ་སྙོམས་འཇུག་ཞེས་བརྗོད་དོ། །གང་ལས་འབྲས་བུ་སྙོམས་པར་འཇུག་པ་ཞེས་པ། དགེ་བ་མ་ཡིན། མི་དགེ་བ་མ་ཡིན། ལམ་གོང་མའི་རྣམ་པར་སྨིན་པའི་རང་བཞིན་མ་ཡིན། དེའི་ཕྱིར་འབྲས་བུ་སྙོམས་པར་འཇུག་པའོ། །དེ་ལ་སྙོམས་པར་འཇུག་པ་གང་ཞེ་ན། དགྲ་

བཅོམ་པ་དང་ཕྱིར་མི་འོང་བ་སྟེ། འདི་གཉིས་ཀྱིས་ཏིང་ངེ་འཛིན་ཡོངས་སུ་རྫོགས་པར་བྱེད་པས་སོ། །ཅིའི་དོན་དུ་སྙོམས་པར་འཇུག་ཞེས་པ་མཐོང་བའི་ཆོས་ལ་བདེ་བར་གནས་པའི་དོན་དུའོ། །དེ་བཞིན་དུའང་བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་
གང་གི་ཚེ་དེ་བཞིན་གཤེགས་པ་མཚན་མ་ཐམས་ཅད་ཡིད་ལ་མི་བྱེད་པས་ཚོར་བ་རྣམས་ཀྱི་འགའ་ཞིག་འགགས་ནས། སེམས་མཚན་མ་མེད་པའི་ཏིང་ངེ་འཛིན་ཉེ་བར་བསྒྲུབས་ཏེ་གནས་སོ། །ཀུན་དགའ་བོ་དེའི་ཚེ་དེ་བཞིན་གཤེགས་པའི་སྐུ་ལ་ཆེས་རེག་པར་འགྱུར་རོ་ཞེས་སོ། །ཅི་ལྟར་
སྙོམས་པར་འཇུག་ཅེ་ན། དེ་དབེན་པར་སོང་སྟེ། འབྲས་བུ་སྙོམས་པར་འཇུག་པའི་དོན་དུ། དེ་དབེན་པར་ཕྱིན་ཏེ། འདུག་པའམ་ཉལ་ནས་སེམས་བསྡུས་ཏེ། སྐྱེ་བ་དང་འགག་པ་ལ་རྗེས་སུ་ལྟ་བ་དང་པོར་བྱས་ནས། འདུ་བྱེད་རྣམས་ལ་རྣམ་པར་ལྟའོ། །དེའི་ཚེ་རིགས་ལ་ལོངས་སྤྱོད་པའི་ཡེ་
ཤེས་གང་ཡིན་པའོ། །རིགས་ལོངས་སྤྱོད་ཀྱི་ཡེ་ཤེས་དེའི་དེ་མ་ཐག་ཏུ་མྱ་ངན་ལས་འདས་པ་འབྲས་བུ་སྙོམས་པར་འཇུག་པ་ལ་གཏོང་བར་བྱེད་དོ། །གང་དང་གང་ལ་བརྟེན་ནས་ལམ་བསྒོམས་པར་གྱུར་པ་དེ་དང་དེ་ལ་མཉམ་པར་བཞག་སྟེ་འབྲས་བུ་སྙོམས་པར་འཇུག་པ་ཉིད་དུ་འགྱུར་རོ། །ཡིད་
ལ་བྱེད་པ་ཅི་ཞེས་པ། འདུས་མ་བྱས་བདུད་རྩིའི་དབྱིངས་ཞི་བ་ཉིད་ཡིད་ལ་བྱེད་པའོ། །བསམ་གཏན་པ་དེའི་སྙོམས་པར་འཇུག་པའི་རྐྱེན་དུ་ཞེས་པ། བསམ་གཏན་གྱི་རྐྱེན་ནི་གཉིས་ཏེ་འདི་ལྟར། མཚན་མ་ཐམས་ཅད་ཡིད་ལ་མི་བྱེད་པ་དང་། མཚན་མ་མེད་པའི་དབྱིངས་ཡིད་ལ་བྱེད་པའོ། །
གནས་པའི་རྐྱེན་དུ་ཞེས་པ། གནས་པའི་རྐྱེན་གསུམ་སྟེ། འདི་ལྟར། མཚན་མ་ཐམས་ཅད་ཡིད་ལ་མི་བྱེད་པ་དང་། མཚན་མ་མེད་པའི་དབྱིངས་ཡིད་ལ་བྱེད་པ་དང་། སྔོན་གྱི་མངོན་པར་འདུ་བྱེད་པའོ། །ལྡང་བའི་རྐྱེན་ཞེས་པ། ལྡང་བའི་རྐྱེན་གཉིས་ཏེ། འདི་ལྟར། མཚན་མ་ཐམས་ཅད་ཡིད་ལ་
བྱེད་པ་དང་། མཚན་མ་མེད་པའི་དབྱིངས་ཡིད་ལ་མི་བྱེད་པའོ། །ཅི་སྙོམས་པར་འཇུག་པ་འཇིག་རྟེན་པའམ་འོན་ཏེ་འཇིག་རྟེན་ལས་འདས་པ་ཞེས་པ་འཇིག་རྟེན་ལས་འདས་པ་ཡིན་ཏེ། འཇིག་རྟེན་པ་ནི་མ་ཡིན་ནོ། །འདུ་ཤེས་དང་ཚོར་བ་འགོག་པའི་སྙོམས་པར་འཇུག་པ་ལ་དྲི་བ་བཅོ་ལྔ་ནི་འདི་

ལྟར། འདུ་ཤེས་ཚོར་བ་འགོག་པའི་སྙོམས་པར་འཇུག་པ་གང་ཡིན་དེ་ལ་སྙོམས་པར་འཇུག་པ་དང་། སྙོམས་པར་འཇུག་པ་མ་ཡིན་པ་གང་། སྟོབས་དུ་དང་ལྡན་པས་སྙོམས་པར་འཇུག །འདུ་བྱེད་དུ་ཞིག་འགགས་ནས་སྙོམས་པར་འཇུག །བསམ་གཏན་པ་འདིའི་སྔོན་དུ་བྱ་བ་དུ་ཡིན། ཅིའི་དོན་དུ་
སྙོམས་པར་འཇུག །ཅི་ལྟར་སྙོམས་པར་འཇུག །དེ་དག་གི་ལྡང་བ་ཅི་ལྟར་འགྱུར། སེམས་གང་གིས་ལྡང་། ལངས་ནས་སེམས་ཅི་ལ་གཞོལ་བར་འགྱུར། རེག་པ་དུ་ལ་རེག་པར་འགྱུར། །དང་པོ་འདུ་བྱེད་དུ་ཞིག་འབྱུང་བར་འགྱུར། རོ་དང་འདུ་ཤེས་ཚོར་བ་འགོག་པ་ཐ་དད་པའི་རྒྱུ་ཅི། །ཅི་
སྙོམས་པར་འཇུག་པ་དེ་འདུས་བྱས་སམ་འོན་ཏེ་འདུས་མ་བྱས་ཤེ་ན། འདིར་བརྗོད་པར་བྱ་སྟེ། གང་སེམས་དང་སེམས་ལས་བྱུང་བའི་ཆོས་རྣམས་ཀྱིས་འཇུག་པ་མེད་པར་གནས་པ་དེ་ནི་འདུ་ཤེས་དང་ཚོར་བ་འགོག་པའི་སྙོམས་པར་འཇུག་པའོ། །དེ་ལ་སྙོམས་པར་འཇུག་པ་གང་ཞེས་པ།
དགྲ་བཅོམ་པ་དང་ཕྱིར་མི་འོང་བ་དག་སྙོམས་པར་འཇུག་གོ། །འདི་དག་གིས་ཏིང་ངེ་འཛིན་ཡོངས་སུ་རྫོགས་པར་བྱས་པས་སོ། །སྙོམས་པར་འཇུག་པ་མ་ཡིན་པ་གང་ཞེ་ན། སོ་སོ་སྐྱེ་བོ་དང་རྒྱུན་དུ་ཞུགས་པ་དང་ལན་ཅིག་ཕྱིར་འོང་བ་དང་གཟུགས་མེད་དུ་སྐྱེས་པའོ། །དེ་ལ་སོ་སོའི་སྐྱེ་བོ་ནི་མཉམ་
པར་འཇོག་པ་མ་ཡིན་ཏེ། ཡུལ་མ་ཡིན་པས་སོ། །རྒྱུན་དུ་ཞུགས་པ་དང་ལན་ཅིག་ཕྱིར་འོང་བ་དག་སྙོམས་པར་འཇུག་པ་མ་ཡིན་ཏེ། ཏིང་ངེ་འཛིན་གྱི་མི་མཐུན་པའི་ཕྱོགས་ཉོན་མོངས་པ་རྣམས་ཡང་དག་པར་བཅད་པ་མ་ཡིན་པས་སོ། །གཟུགས་མེད་པར་སྐྱེས་པ་ནི་སྙོམས་པར་འཇུག་པ་
མ་ཡིན་ཏེ། ཕྱིས་ལྡང་བའི་དངོས་པོ་མེད་པའི་ཕྱིར་རོ། །སྟོབས་དུ་དང་ལྡན་པས་སྙོམས་པར་འཇུག་ཅེས་པ། སྟོབས་གཉིས་ཀྱིས་ཏེ། ཞི་གནས་ཀྱི་སྟོབས་དང་། ལྷག་མཐོང་གི་སྟོབས་ཀྱིས་སོ། །དེ་ལ་ཞི་གནས་ཀྱི་སྟོབས་ཀྱིས་བསམ་གཏན་བཞི་དང་གཟུགས་མེད་པའི་སྙོམས་པར་
འཇུག་པ་བཞི་རྣམས་དབང་དུ་འགྱུར་བའོ། །ལྷག་མཐོང་གི་སྟོབས་ཀྱིས་རྗེས་སུ་ལྟ་བ་བདུན་དབང་དུ་འགྱུར་བའོ། །དེ་ལ་རྗེས་སུ་ལྟ་བ་བདུན་ནི་འདི་ལྟར། མི་རྟག་པ་རྗེས་སུ་ལྟ་བ་དང་། སྡུག་བསྔལ་རྗེས་སུ་ལྟ་བ་དང་། བདག་མེད་པ་རྗེས་སུ་ལྟ་བ་དང་། ཡིད་བྱུང་བ་རྗེས་སུ་ལྟ་བ་དང་། ཆགས་

པ་བྲལ་བ་རྗེས་སུ་ལྟ་བ་དང་། འགོག་པ་རྗེས་སུ་ལྟ་བ་དང་། ངེས་པར་སྤངས་པ་རྗེས་སུ་ལྟ་བའོ། །དེ་ལ་ཞི་གནས་ཀྱི་སྟོབས་ནི་བསམ་གཏན་གྱི་ཡན་ལག་འགོག་པའི་དོན་དུ་དང་མི་གཡོ་བ་ལ་མོས་པའི་དོན་དུའོ། །ལྷག་མཐོང་གི་སྟོབས་ནི་འཇུག་པ་རྣམས་ཉེས་དམིགས་
སུ་མཐོང་བའི་དོན་དང་། མི་འཇུག་པ་རྣམས་ལ་མོས་པའི་དོན་ཏོ། །འདུ་བྱེད་དུ་འགགས་ནས་སྙོམས་པར་འཇུག་ཞེས་པ། འདུ་བྱེད་གསུམ་འགགས་ནས་སྙོམས་པར་འཇུག་སྟེ། འདི་ལྟར། ངག་གི་འདུ་བྱེད་དང་། ལུས་ཀྱི་འདུ་བྱེད་དང་། སེམས་ཀྱི་འདུ་བྱེད་དོ། །དེ་ལ་བསམ་གཏན་གཉིས་
པ་ལ་སྙོམས་པར་ཞུགས་པ་རྣམས་ཀྱི། ངག་གི་འདུ་བྱེད་རྣམ་པར་རྟོག་པ་དང་རྣམ་པར་དཔྱོད་པ་དག་རྒྱུན་ཆད་པར་འགྱུར་རོ། །བསམ་གཏན་བཞི་པ་ལ་སྙོམས་པར་ཞུགས་པ་རྣམས་ཀྱི། ལུས་ཀྱི་འདུ་བྱེད་དང་དབུགས་དབྱུང་བ་དང་དབུགས་འཇུག་པ་དག་རྒྱུན་ཆད་པར་འགྱུར་རོ། །འདུ་ཤེས་དང་
ཚོར་བ་འགོག་པ་ལ་སྙོམས་པར་ཞུགས་པ་རྣམས་ཀྱི་སེམས་ཀྱི་འདུ་བྱེད་འདུ་ཤེས་དང་ཚོར་བ་དག་འགོག་པར་འགྱུར་རོ། །འདིའི་སྔོན་གྱི་བྱ་བ་དུ་ཡིན་ཞེས་པ། སྔོན་གྱི་བྱ་བ་ནི་བཞི་སྟེ་འདི་ལྟར། བཅིང་བ་གཅིག་པ་དང་། རྣམ་པར་འཚེ་བ་མེད་པ་དང་། དུས་ཡོངས་སུ་ཆད་པ་དང་། ལས་དང་ལས་
མ་ཡིན་པ་ལ་རྣམ་པར་གཟིགས་པའོ། །དེ་ལ་བཅིང་བ་གཅིག་པ་ཞེས་པ་ནི་ལྷུང་བཟེད་དང་ཆོས་གོས་དག་ལུས་དང་སྡོམ་པ་གཅིག་ཏུ་བྱིན་གྱིས་རློབ་པོ། །རྣམ་པར་འཚེ་བ་མེད་པ་ཞེས་པ་ནི། སྦྱོར་བ་གང་དང་གང་གིས་ལུས་འདི་ལ་ཉེ་བར་གནོད་པ་ཀུན་དུ་འབྱུང་བར་མ་གྱུར་ཅིག་ཅེས་བྱིན་གྱིས་རློབ་
པོ། །དུས་ཡོངས་སུ་ཆད་པ་ཞེས་པ་ནི། ལུས་ཀྱི་སྟོབས་ཡོངས་སུ་གཞལ་ནས་དུས་ཡོངས་སུ་གཅད་པ་བགྱིས་ཏེ་གནས་སོ། །དུས་འདི་སྲིད་འདས་པ་ལས་ལྡང་བར་བྱའོ་ཞེས་སོ། །ལས་དང་ལས་མ་ཡིན་པ་རྣམ་པར་གཟིགས་པ་ཞེས་བྱ་བ་དུས་ཡོངས་སུ་ཆད་པ་ཐོབ་པར་དགེ་འདུན་གྱི་ལས་
དང་ལས་མ་ཡིན་པ་འགའ་ཞིག་གི་དོན་དུ་འཚོགས་པ་ལ་གཎྜཱི་སྒྲོགས་པའི་སྒྲ་དེས་ལྡང་བར་བྱའོ་ཞེས་བྱིན་གྱིས་བརླབ་པོ། །ཅིའི་དོན་དུ་སྙོམས་པར་འཇུག་ཅེས་པ། མཐོང་བའི་ཆོས་ལ་བདེ་བར་གནས་པའི་དོན་དུའོ། །མཐོང་བའི་ཆོས་ལ་བདེ་བར་གནས་པ་ནི། འཕགས་པ་དེ་རྣམས་ཀྱི་ཏིང་ངེ་

འཛིན་ཚོགས་པ་རྣམས་ཤིན་ཏུ་མི་གཡོ་བར་བྱ་བའི་ཕྱིར་རམ་རྫུ་འཕྲུལ་རྣམ་པར་བསྒོམ་པའི་དོན་དུ་སྙོམས་པར་འཇུག་པའོ། །ཅི་ལྟར་སྙོམས་པར་འཇུག་ཅེས་པ་འགོག་པའི་དོན་དུ་འགོག་པའི་མངོན་པར་འདོད་པས་དེ་དག་དབེན་པའི་གནས་སུ་སོང་སྟེ། འདུག་པའམ་ཉལ་ཏེ་སེམས་
བཞུམས་ནས། བསམ་གཏན་དང་པོ་ལ་སྙོམས་པར་འཇུག་གོ། །ལངས་ནས་དེ་མ་ཐག་ཏུ་བསམ་གཏན་དེ་དག་ལ་རྣམ་པར་ལྟ་སྟེ། མི་རྟག་པ་དང་སྡུག་བསྔལ་དང་བདག་མེད་པ་ནས་འདུ་བྱེད་བཏང་སྙོམས་ཀྱི་ཡེ་ཤེས་ཀྱི་བར་དུའོ། །དེ་བཞིན་དུ་བསམ་གཏན་གཉིས་པ་དང་། བསམ་
གཏན་གསུམ་པ་དང་། བསམ་གཏན་བཞི་པ་དང་། ནམ་མཁའ་མཐའ་ཡས་སྐྱེ་མཆེད་དང་། རྣམ་ཤེས་མཐའ་ཡས་སྐྱེ་མཆེད་དང་། ཅི་ཡང་མེད་པའི་སྐྱེ་མཆེད་ལ་སྙོམས་པར་ཞུགས་ཏེ། ལངས་ནས་དེ་མ་ཐག་ཏུ་སྙོམས་པར་འཇུག་པ་དེ་ལ་རྣམ་པར་ལྟ་སྟེ། མི་རྟག་པ་དང་སྡུག་བསྔལ་དང་བདག་
མེད་པ་ནས་འདུ་བྱེད་བཏང་སྙོམས་པའི་ཡེ་ཤེས་ཀྱི་བར་དུའོ། །དེ་ནས་དེ་མ་ཐག་ཏུ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ལ་སྙོམས་པར་འཇུག་གོ། །དེ་ནས་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ལ་ལན་གཉིས་ལན་གསུམ་དུ་སེམས་བཞག་སྟེ། སེམས་ཀྱི་འཇུག་པ་མེད་ཅིང་
འགགས་པའོ། །སེམས་མི་འཇུག་པ་དང་འགགས་པ་ལ། འདུ་ཤེས་དང་ཚོར་བ་འགོག་པ་ལ་སྙོམས་པར་འཇུག་པ་ཞེས་བརྗོད་དོ། །དེའི་ལྡང་བ་ཅི་ལྟར་གྱུར་ཞེས་པ། དེ་ནི་འདི་ལྟར། བདག་ལྡང་བར་བྱའོ་ཞེས་ཡིད་ལ་བྱས་པས་སོ། །འོན་ཀྱང་སྔོན་དུ་བྱས་པའི་དུས་ཡོངས་སུ་ཆད་པ་ཐོབ་པ་ན་
ལྡང་བ་ཉིད་དོ། །སེམས་གང་གིས་ལྡང་ཞེ་ན། ཕྱིར་མི་འོང་བའི་འབྲས་བུའི་སེམས་ཀྱིས་ཕྱིར་མི་འོང་བར་ལྡང་ངོ་། །དགྲ་བཅོམ་པའི་འབྲས་བུའི་སེམས་ཀྱིས་དགྲ་བཅོམ་པར་ལྡང་ངོ་། །ལངས་ནས་སེམས་ཅི་ལ་གཞོལ་བར་འགྱུར་ཞེ་ན། དབེན་པ་ལ་གཞོལ་བའོ། །རེག་པར་བྱ་བ་དག་དུ་
ལ་རེག་པར་འགྱུར་ཞེས་པ། གསུམ་ལ་རེག་སྟེ་འདི་ལྟར། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པའོ། །དང་པོ་འདུ་བྱེད་དུ་འབྱུང་ཞེས་པ། སེམས་ཀྱི་འདུ་བྱེད་དང་། དེ་ནས་ལུས་ཀྱི་འདུ་བྱེད་དོ། །ཤི་བ་དང་འདུ་ཤེས་མེད་པའི་སྙོམས་པར་འཇུག་པ་བདག་ཐ་དད་པའི་རྒྱུ་ཅི་ཞེས་པ། །

ཤི་རོ་ནི་འདུ་བྱེད་གསུམ་འགགས་ཤིང་རྒྱུན་ཆད་པ་སྟེ། འདི་ལྟར། ཚེ་ཡོངས་སུ་ཟད་པ་དང་། དྲོ་བ་ཉེ་བར་ཞི་བ་དང་། དབང་པོ་རྣམས་ཀྱི་རྣམ་འགྱུར་ཞིག་པའོ། །འདུ་ཤེས་དང་ཚོར་བ་འགོག་པའི་སྙོམས་པར་འཇུག་པ་ནི་འདུ་བྱེད་གསུམ་མ་འགགས་ཤིང་རྒྱུན་མ་
ཆད་པ་སྟེ། འདི་ལྟར། ཚེ་ཡོངས་སུ་མ་ཟད་པ་དང་། དྲོད་མ་ཉམས་པ་དང་། དབང་པོ་རྣམས་རབ་ཏུ་དང་བའོ། །འདི་ནི་དེ་དག་ཐ་དད་པའི་རྒྱུའོ། །ཅི་འདུ་ཤེས་ཚོར་བ་འགོག་པའི་སྙོམས་པར་འཇུག་པ་འདུས་བྱས་སམ་ཡང་ན་འདུས་མ་བྱས་ཤེ་ན། སྙོམས་པར་འཇུག་པ་དེ་ནི་འདུས་བྱས་སམ་
འདུས་མ་བྱས་ཞེས་བརྗོད་དུ་མེད་དོ། །སྙོམས་པར་འཇུག་པ་དེ་ནི་ཅིའི་ཕྱིར་འདུས་བྱས་ཞེས་སམ། འདུས་མ་བྱས་ཞེས་བརྗོད་པར་བྱ་བ་མ་ཡིན་ཞེ་ན། གང་གི་ཕྱིར་སྙོམས་པར་འཇུག་པ་དེ་ལ་ནི་འདུས་བྱས་ཀྱི་ཆོས་རྣམས་མི་སྲིད་པས་དང་། འདུས་མ་བྱས་ལ་ནི་སྙོམས་པར་འཇུག་པ་དང་
ལྡང་བར་ཤེས་པར་བྱར་མེད་པའི་ཕྱིར་རོ། །དེའི་ཕྱིར་སྙོམས་པར་འཇུག་པ་དེ་འདུས་བྱས་ཞེས་སམ། འདུས་མ་བྱས་ཞེས་བརྗོད་པར་བྱ་བ་མ་ཡིན་ནོ། །འདི་ནི་འགོག་པའི་སྙོམས་པར་འཇུག་པའི་མཐའོ། །པཎྚི་ཏ་ཆེན་པོ་སྟོབས་བཅུ་དཔལ་བཤེས་གཉེན་གྱིས་བསྡུས་པ་འདུས་བྱས་དང་འདུས་
མ་བྱས་རྣམ་པར་ངེས་པ་ལས་འཕགས་པ་གནས་བརྟན་པའི་སྡེ་པའི་ཚུལ་ལུགས་ལས་འཕགས་པའི་བདེན་པ་ལ་མཁས་པ་རྣམ་པར་ངེས་པ་ཞེས་བྱ་བ་ལེའུ་བཅོ་ལྔ་པའོ།། །།འཕགས་པ་མང་པོས་བཀུར་བའི་སྡེ་པའི་ལུང་ལས་འདི་ལྟར་རྣམ་པར་གཞག་སྟེ། བག་ལ་ཉལ་མ་ཡིན་པ་ནི་རྒྱུ་
བཞིས་འགྱུར་ཏེ། འདི་ལྟར། ཆོས་རྣམ་པར་གཞག་པ་དང་། མཚན་ཉིད་རྣམ་པར་གཞག་པ་དང་། ཁམས་ཀྱི་དབྱེ་བ་དང་། སྤང་བྱའི་དབྱེ་བ་ལས་སོ། །དེ་ལ་ཆོས་རྣམ་པར་གཞག་པ་ནི་འདི་ལྟར། མ་དད་པ་དང་། ངོ་ཚ་བ་མེད་པ་དང་། སྒྱུ་དང་། གཡོ་དང་། མ་བརྟགས་པ་དང་། རྒོད་པ་དང་། བག་མེད་པ་
དང་། རྨུགས་པ་དང་། ཞུམ་པ་དང་། ཁྲེལ་མེད་པ་དང་། ཆེས་འཛིན་པ་དང་། སྙོམ་ལས་དང་། གཉིད་དང་། ཕྲག་དོག་དང་། འགྱོད་པ་དང་། འཆབ་པ་དང་། དྲེགས་པ་དང་། སེར་སྣ་དང་། མི་བཟོད་པ་དང་། ཁོན་དུ་འཛིན་པ་དང་། ཟས་ཀྱིས་རྒྱགས་པ་སྟེ་ཉེར་གཅིག་གོ། །མཚན་ཉིད་རྣམ་པར་བཞག་པ་ནི་

འདི་ལྟར། དེ་ཁོ་ན་ཉིད་ལ་ལྷག་པར་མོས་པ་མེད་པ་ནི། མ་དད་པའོ། །གང་ཞིག་འང་དེ་ཁོ་ན་ཉིད་མ་ཡིན་པ་ལ་མོས་པ་རབ་ཏུ་སྐྱེད་ཀྱང་། དེ་ཡང་དམན་པ་ཡིན་པས་དད་པ་མ་ཡིན་པར་ཤེས་པར་བྱའོ། །མངའ་བདག་མ་ཡིན་པ་བཞིན་ནོ། །དགེ་བ་སྤྱོད་པ་སྐྱེད་པ་ལ་དབང་པོ་མ་ཡིན་པའམ།
ཉོན་མོངས་པ་ཅན་གྱི་སྤྱོད་པ་སྐྱེད་པ་ལ་དབང་ཕྱུག་ཡིན་པས་སོ། །རང་ཉིད་ལ་འཛེམ་པ་མེད་པ་ནི་ངོ་ཚ་བ་མེད་པའོ། །ངོ་ཚ་མི་ཤེས་པ་མེད་པར་ནི་ཉོན་མོངས་པ་སྐྱེ་བ་མ་ཡིན་ནོ། །སྒྱུ་ནི་སླུ་བ་སྟེ། རང་དང་གཞན་ཤིན་ཏུ་བསྒྱུར་བའོ། །འདི་ལ་རང་བཞིན་གྱི་སེམས་སླུ་བར་བྱེད་པའོ། །བསླུ་བ་མེད་པ་
ལ་ཉོན་མོངས་པས་གོ་སྐབས་མི་རྙེད་དོ། །གཡོ་ནི་སེམས་གཡོ་བ་སྟེ། འདི་ནི་རང་ཉིད་གྱ་གྱུ་ཅན་དུ་གྱུར་ཅིང་། གཞན་ཡང་གྱ་གྱུ་ཅན་དུ་དྲང་བར་འདོད་པའོ། །དྲང་པོས་འགྲོ་བའི་རྒྱུད་ལ་ཉོན་མོངས་པ་སྐྱེ་བ་མ་ཡིན་ནོ། །མ་བརྟགས་པ་ནི། ཡང་དག་པར་མ་བརྟགས་པར་བྱེད་པའོ། །ཀུན་དུ་
བརྟགས་ནས་བྱེད་པའི་རྒྱུད་ལ་ཉོན་མོངས་པ་སྐྱེ་བ་མ་ཡིན་ནོ། །ཉེ་བར་མ་ཞི་བའི་སེམས་ནི་རྒོད་པའོ། །ཉེ་བར་ཞི་བའི་སེམས་ལ་ཉོན་མོངས་པ་སྐྱེ་བ་ཡོད་པ་མ་ཡིན་ནོ། །བག་མེད་པ་ནི་ཉོན་མོངས་པ་ཅན་གྱི་ཆོས་དང་རྗེས་སུ་ལྡན་པའོ། །བག་ཡོད་པའི་སེམས་ལ་ཉོན་མོངས་པ་སྐྱེ་བ་ནི་མེད་དོ། །
འདི་རྣམས་ལ་རྒྱུ་ལ་སོགས་པ་ལྔ་ནི། མཚུངས་པར་ལྡན་པ་དང་། རབ་ཏུ་མི་ལྡན་པའོ། །དེ་ལ་གང་མཚུངས་པར་ལྡན་པ་དེ་ནི་ཀུན་ནས་དཀྲིས་པ་དང་། གང་རབ་ཏུ་མི་ལྡན་པ་དེ་ནི་རྣམ་པར་རིག་བྱེད་ཀྱི་རང་བཞིན་དང་། རྣམ་པར་རིག་བྱེད་མ་ཡིན་པའི་རང་བཞིན་ནོ། །ལྔ་གང་ཞེ་ན་འདི་ལྟར། སྒྱུ་དང་།
གཡོ་དང་། གཟུ་ལུམས་དང་། རྒོད་པ་དང་། བག་མེད་པའོ། །གང་ཐམས་ཅད་དུ་ཀུན་ནས་དཀྲིས་པའི་སེམས་ལ་དེ་རྣམས་ཐམས་ཅད་ཀྱང་ཡོད་པའོ། །དེ་ལྟར་ཡང་གང་གི་ཚེ་གཞན་སླུ་བར་བྱེད་པ་དེའི་ཚེ་གཙོ་བོར་སྒྱུ་ལས་བག་ལ་ཉལ་མ་ཡིན་པའི་མཚུངས་ལྡན་ཐམས་ཅད་ཀྱང་སྒྱུ་དང་རྗེས་སུ་
འབྲེལ་པས་འདི་དག་ཀུན་ནས་དཀྲིས་པར་འགྱུར་བ་ཡིན་ནོ། །གང་ཡང་དེའི་ཚེ་རབ་ཏུ་མི་ལྡན་པ་ལུས་དང་ངག་གི་རིག་བྱེད་དེ་ཡང་སྒྱུ་ཞེས་བརྗོད་དོ། །རྣམ་པར་རིག་བྱེད་དེ་དག་ནི་རྣམ་པར་རིག་བྱེད་ཀྱི་རང་བཞིན་ནོ། །རྣམ་པར་རིག་བྱེད་འདི་རྣམས་ཀྱི་རྗེས་སུ་དང་ལྷན་ཅིག་ཏུ་གཞན་སླུ་བར་བྱེད་

པས། དེ་དག་གི་རྗེས་ནི་རྣམ་པར་རིག་བྱེད་མ་ཡིན་པའི་རང་བཞིན་ནོ། །དེ་བཞིན་དུ་གཡོ་ལ་སོགས་པ་བཞི་ལ་བརྗོད་པར་བྱའོ། །གང་ལུས་དང་སེམས་ཀྱི་ཞེན་པ་དེ་ནི་རྨུགས་པའོ། །གནས་ངན་ལེན་ཞེས་པའི་དོན་ཏོ། །དེ་ལ་གང་སེམས་ཀྱི་ཞན་པ་དེ་ནི་རྣམ་པ་
གཉིས་ཏེ། ཉོན་མོངས་པ་ཅན་དང་། ཉོན་མོངས་པ་ཅན་མ་ཡིན་པའོ། །དེ་ལ་ཉོན་མོངས་པ་ཅན་ནི་ཀུན་ནས་དཀྲིས་པའོ། །ཉོན་མོངས་པ་ཅན་མ་ཡིན་པ་ནི་གང་ལུས་ཀྱི་རྣམ་པར་རིག་བྱེད་མ་ཡིན་པའི་རང་བཞིན་དེའོ། །ཞུམ་པ་ནི་ཞན་པའི་མཚན་ཉིད་དེ། སེམས་བཀུམ་པའི་ངོ་བོའོ། །ཞན་
པ་འདི་ནི་དངོས་པོ་གང་ལ་ཆགས་པ་དེ་དག་རྒུད་པ་ལས་ཕལ་ཆེར་སྐྱེའོ། །ཁྲེལ་མེད་པ་ནི་འཇིག་རྟེན་པའི་ཆོས་ལུགས་ལ་སོགས་པ་ལ་ལྟོས་པ་མེད་ཅིང་མི་འཛེམ་པ་སྟེ། སྡིག་པ་སྤྱོད་པ་ལ་སོགས་པ་ལ་རིག་པར་བྱེད་པའོ། །ཆེས་འཛིན་པ་ནི་ལྟ་བ་མི་གཏོང་བ་སྟེ། ལྟ་བར་བགྱིས་པ་ལ་
སོགས་པ་དམ་པ་མ་ཡིན་པའི་འཛིན་པས་མི་གཏོང་བའོ། །སྙོམ་ལས་ནི་ལས་ལྕི་བ་སྟེ། ལྡང་བ་ལྕི་བ་ཉིད་དོ་ཞེས་པའི་དོན་ཏེ། དེ་ཡང་རྣམ་པ་གཉིས་ཏེ་འདི་ལྟར། གང་སེམས་ཀྱི་ལས་ལྗིད་པ་དེ་ནི་ངེས་པར་ཀུན་ནས་དཀྲིས་པའོ། །གང་ལུས་ཀྱི་རྣམ་པར་རིག་བྱེད་ཞན་པ་ནི་རྣམ་པར་རིག་བྱེད་ཀྱི་
རང་བཞིན་ནོ། །གཉིད་ནི་སེམས་སྡུད་པའོ། །དེ་ལ་གཉིད་ནི་འདི་ལྟར། སེམས་དང་བཅས་པ་དང་། སེམས་དང་མི་ལྡན་པའོ། །དེ་སེམས་དང་ལྡན་པའི་གཉིད་ལ་རྣམ་པ་གཉིས་ཏེ་འདི་ལྟར། ཉོན་མོངས་པ་ཅན་དང་། ཉོན་མོངས་པ་ཅན་མ་ཡིན་པའོ། །དེ་ལ་གཉིད་ཀྱི་བདེ་བ་ལ་མངོན་པར་དགའ་
བས་གཉིད་དུ་ཞུགས་པ་ཉིད་ཀྱི་སེམས་དེ་ནི་ཉོན་མོངས་པ་ཅན་དེ་ཀུན་ནས་དཀྲིས་པའོ། །གང་ལས་སོ་སོར་རྟོག་པའི་དྲན་པ་ཉེ་བར་བཞག་ནས་ལུས་དང་སེམས་ཉེ་བར་བརྟན་པའི་དོན་དུ་གཉེར་བ་དེ་ནི་ཉོན་མོངས་པ་མེད་པའོ། །སེམས་དང་མི་ལྡན་པའི་གཉིད་ནི་རྣམ་པ་ཐམས་ཅད་དུ་སེམས་དང་སེམས་
ལས་བྱུང་བ་སྡུད་པར་བྱེད་པའོ། །དེ་ཡང་རྣམ་པ་གཉིས་ཏེ་འདི་ལྟར། ཉོན་མོངས་པ་ལས་བྱུང་བ་དང་། ཉོན་མོངས་པ་ལས་བྱུང་བ་མ་ཡིན་པའོ། །དེ་ལ་ཉོན་མོངས་པ་ལས་བྱུང་བ་ནི། གང་ཉོན་མོངས་པ་ཅན་གྱི་སེམས་འགགས་པའི་དེ་མ་ཐག་ཏུ་སྐྱེས་པའོ། །ལྷག་མ་ནི་ཉོན་མོངས་པ་ལས་བྱུང་

བ་མ་ཡིན་པའོ། །ཕྲག་དོག་ནི་གཞན་གྱི་ཕུན་སུམ་ཚོགས་པ་མི་བཟོད་པ་ཉིད་དོ། །འགྱོད་པ་ལ་རྣམ་པ་གཉིས་ནི་འདི་ལྟར། ལགས་པ་བྱས་པ་ལའམ་བདག་གིས་མ་ལེགས་པར་བྱས་སོ་ཞེས་རྗེས་སུ་གདུང་བ་དང་བྱ་བ་ངན་པ་མ་བྱས་པའམ་བདག་གིས་མ་ལེགས་པ་བྱས་ཞེས་པ་ནི་གང་འདི་དག་མ་བྱས་པ་
ཞེས་རྗེས་སུ་གདུང་བའོ། །འདིའི་གཉིས་པ་ལ་རྣམ་པ་གཉིས་ཏེ་འདི་ལྟར་ཉོན་མོངས་ཅན་དང་ཉོན་མོངས་ཅན་མ་ཡིན་པའོ། །དེ་ལ་བྱ་བ་མ་ཡིན་པ་ལ་བྱས་པ་དང་བྱ་བ་མ་ཡིན་པ་བྱས་པ་ལ་གང་འགྱོད་ཅིང་ཡིད་ལ་གཅགས་པ་དེ་ནི་ཉོན་མོངས་པ་ཅན་ཀུན་ནས་དཀྲིས་པའོ། །གང་བྱ་བ་མ་ཡིན་པ་བྱས་པ་
དང་བྱ་བ་ཡིན་པ་མ་བྱས་པ་ལ་འགྱོད་པ་ཡིད་ལ་གཅགས་པ་དེ་ནི་ཉོན་མོངས་པ་ཅན་མ་ཡིན་ཞིང་ཀུན་ནས་དཀྲིས་པ་མ་ཡིན་པའོ། །སྡིག་པ་ཡོངས་སུ་སྦེད་པ་ནི་འཆབ་པའོ། །ནད་མེད་པ་ལ་སོགས་པས་ཁེངས་པ་ནི་དྲེགས་པ་སྟེ། ཀུན་ནས་དཀྲིས་པའོ། །གང་ཡང་ཆང་ལ་སོགས་པ་རྣམས་ཀྱིས་སེམས་
གཟེངས་བསྟོད་པའི་མཚན་ཉིད་དྲེགས་པ་སྟེ། དེ་ནི་རྣམ་པ་གཉིས་ཏེ་འདི་ལྟར། ཉོན་མོངས་པ་ཅན་དང་། ཉོན་མོངས་པ་ཅན་མ་ཡིན་པའོ། །དེ་ལ་ཉོན་མོངས་པ་ཅན་ནི་ཀུན་ནས་དཀྲིས་པ་དང་མཚུངས་པར་ལྡན་པའོ། །ཉོན་མོངས་པ་ཅན་མ་ཡིན་པ་ནི་རྣམ་པ་གསུམ་འདི་ལྟར། དགེ་བ་དང་། མི་དགེ་བ་དང་། ལུང་
དུ་མ་བསྟན་པའོ། །དེས་ན་དྲེགས་པ་ནི་མཚུངས་པར་ལྡན་པའོ། །རབ་ཏུ་མི་ལྡན་པའི་དྲེགས་པ་དང་། དྲེགས་པ་པོའི་རྣམ་པར་རིག་བྱེད་ཀྱི་རང་བཞིན་དང་། རྣམ་པར་རིག་བྱེད་མ་ཡིན་པའི་རང་བཞིན་ནོ། །སེར་སྣ་ནི་ནོར་ཡོངས་སུ་གཏོང་བར་འདོད་པ་མེད་པའོ། །མི་བཟོད་པ་ནི་སྡུག་བསྔལ་ལ་སོགས་པ་
སྲན་མི་བཟོད་པའོ། །དེ་ཡང་རྣམ་པ་གཉིས་ཏེ་འདི་ལྟར། གྲང་བ་ལ་སོགས་པའི་སྡུག་བསྔལ་མི་བཟོད་པ་ཉིད་དང་། གཞན་གནོད་པ་བྱེད་པ་ལ་མི་བཟོད་པ་ཉིད་དོ། །འདི་དག་ལ་གཞན་གནོད་པ་བྱེད་པ་ལ་མི་བཟོད་པ་ནི་ཀུན་ནས་དཀྲིས་པའོ། །གཞན་ནི་མ་ཡིན་པའོ། །ཁོན་འཛིན་ནི་གཞན་གནོད་
པ་བྱས་པ་སེམས་ལ་འཛིན་པའོ། །ཁ་ཟས་མངས་པས་མྱོས་པ་ནི་ཟས་ཀྱིས་རྒྱགས་པའོ། །དེ་ནི་རྣམ་པ་གཉིས་ཏེ་འདི་ལྟར། ལུས་ཀྱི་རྣམ་པར་རིག་བྱེད་ཀྱི་རང་བཞིན་དང་། སེམས་ལས་བྱུང་བ་ནི་ཀུན་ནས་དཀྲིས་པའོ། །དེ་རྣམས་ནི་བག་ལ་ཉལ་མ་ཡིན་པ་རྣམས་ཀྱི་མཚན་ཉིད་དོ། །ཁམས་དང་སྤང་

བྱའི་རྣམ་པར་གཞག་པ་སྟེ། འདི་ལྟ་སྟེ། མ་དད་པ་དང་། ངོ་ཚ་མེད་པ་དང་། སྒྱུ་དང་། གཡོ་དང་། མ་བརྟགས་པ་དང་། རྒོད་པ་དང་། བག་མེད་པ་དང་། དྲེགས་པ་སྟེ་བརྒྱད་པོ་རྣམས་སོ། །དེ་ལ་ཡང་དེ་རྣམས་རྣམ་པ་ལྔ་སྟེ་འདི་ལྟར། འདོད་པའི་ཁམས་སུ་སྡུག་བསྔལ་གེགས་
དང་། ཀུན་འབྱུང་གེགས་དང་། འགོག་པའི་གེགས་དང་། ལམ་གྱི་གེགས་དང་། བསྒོམ་པས་སྤང་བར་བྱ་བའོ། །འདི་ནི་བརྒྱད་པ་ལྔ་སྟེ་བཞི་བཅུ་ཐམ་པར་འགྱུར་རོ། །དེ་བཞིན་དུ་གཟུགས་ཀྱི་ཁམས་སུ་བརྒྱད་པ་ལྔ་སྟེ་བཞི་བཅུ་ཐམ་པའོ། །དེ་བཞིན་དུ་གཟུགས་མེད་པའི་ཁམས་སུ་བཞི་བཅུའོ། །བཞི་
བཅུ་ལ་གསུམ་ནི་བརྒྱ་དང་ཉི་ཤུར་འགྱུར་རོ། །ཁྲེལ་མེད་པ་དང་ཆེས་འཛིན་པ་དང་མི་སྟོན་པ་སྟེ། འདོད་པའི་ཁམས་སུ་འདི་རྣམས་ལ་རེ་རེ་ལ་ལྔ་ལྔ་སྟེ་ལྔ་པ་གསུམ་ནི་བཅོ་ལྔར་འགྱུར་རོ། །དེ་བཞིན་དུ་གཟུགས་ཀྱི་ཁམས་སུ་བཅོ་ལྔར་འགྱུར་རོ། །གཟུགས་མེད་པའི་ཁམས་ན་ནི་མེད་དོ། །རྨུགས་པ་དང་
ཞུམ་པ་དང་སྙོམ་ལས་དང་གཉིད་དང་ཕྲག་དོག་དང་འགྱོད་པ་དང་སེར་སྣ་དང་མི་བཟོད་པ་དང་ཁོན་དུ་འཛིན་པ་སྟེ། དགུ་པོ་འདི་རྣམས་ནི་འདོད་པའི་ཁམས་ཁོ་ནའོ། །དེ་བཞིན་དུ་ལྔར་ཕྱེ་སྟེ་ལྔ་པ་དགུ་ནི་བཞི་བཅུ་རྩ་ལྔར་འགྱུར་རོ། །ཟས་ཀྱིས་རྒྱགས་པའང་འདོད་པའི་ཁམས་ཀྱི་བསྒོམ་པས་སྤང་བར་བྱ་
བ་ཁོ་ནའོ། །བག་ལ་ཉལ་མ་ཡིན་པ་ནི་ཁམས་དང་སྤང་བྱའི་དབྱེ་བ་ཐ་དད་བརྒྱ་དང་དགུ་བཅུ་རྩ་དྲུག་ཏུ་འགྱུར་རོ། །ཡང་གསུངས་པ། མ་དད་ངོ་ཚ་མེད་དང་སྒྱུ། །གཡོ་དང་རྒོད་དང་མ་བརྟགས་དང་། །བག་མེད་པ་དང་དྲེགས་པ་རྣམས། །རྣམ་པ་ལྔ་སྟེ་ཁམས་གསུམ་སྐྱེས། །མི་སྟོན་ཁྲེལ་མེད་
ཆེས་འཛིན་རྣམས། །འདོད་དང་གཟུགས་སུ་རྣམ་པ་ལྔ། །སེར་སྣ་མི་བཟོད་འགྱོད་པ་དང་། །རྨུགས་དང་སྙོམ་ལས་ཁོན་དུ་འཛིན། །ཕྲག་དོག་གཉིད་དང་ཞུམ་པ་རྣམས། །རྣམ་ལྔ་འདོད་པའི་ཁམས་སུ་སྐྱེ། །ཟས་ཀྱིས་རྒྱགས་པ་བསྒོམ་སྤང་ངོ་། །ཡང་དག་ལ་ཉལ་མིན་དེ་རྣམས་རྣམ་པ་
གསུམ་སྟེ། འདི་ལྟར། ཐམས་ཅད་དུ་འགྲོ་བ་ཆེན་པོ་དང་། ཐམས་ཅད་དུ་འགྲོ་བ་ཆུང་ངུ་དང་། ས་ཆུང་ངུ་བའོ། །དེ་ལ་ཐམས་ཅད་དུ་འགྲོ་བ་ཆེན་པོ་ནི་བདུན་ཏེ། འདི་ལྟར། མ་དད་པ་དང་། ངོ་ཚ་མེད་པ་དང་། སྒྱུ་དང་། གཡོ་དང་། མ་བརྟགས་པ་དང་། རྒོད་པ་དང་། བག་མེད་པའོ། །ཐམས་ཅད་དུ་འགྲོ་བ་

ཆུང་ངུ་ནི་དྲུག་སྟེ་འདི་ལྟར། གཉིད་དང་། ཞུམ་པ་དང་། ལེ་ལོ་དང་། ཆེས་འཛིན་པ་དང་། རྨུགས་པ་དང་། ཁྲེལ་མེད་པའོ། །ས་ཆུང་ངུ་བ་ནི་བརྒྱད་དེ། འདི་ལྟར། མི་བཟོད་པ་དང་། ཁོན་དུ་འཛིན་པ་དང་། ཕྲག་དོག་དང་། འགྱོད་པ་དང་། དྲེགས་པ་དང་། སེར་སྣ་དང་། མི་སྟོན་པ་དང་། ཟས་ཀྱིས་རྒྱགས་པའོ། །
ཡང་སྤང་བྱ་ལས་རྣམ་པ་ལྔར་འགྱུར་ཏེ། ཐམས་ཅད་དུ་འགྲོ་བ་ཆེན་པོ་དང་། ཐམས་ཅད་དུ་འགྲོ་བ་ཆེན་པོ་ལྟ་བུ་དང་། ཐམས་ཅད་དུ་འགྲོ་བ་ཆུང་ངུ་དང་། ཐམས་ཅད་དུ་འགྲོ་བ་ཆུང་ངུ་དང་མཚུངས་པ་དང་། ས་ཆུང་ངུ་བའོ། །དེ་ལ་ཐམས་ཅད་དུ་འགྲོ་བ་ཆེན་པོ་ནི། བདུན་པ་དྲུག་སྟེ་འདི་ལྟར། མ་དད་པ་ལ་
སོགས་པ་བག་མེད་པའི་མཐར་ཐུག་པ་རྣམས་འདོད་པས་བསྡུས་པ་སྡུག་བསྔལ་མཐོང་བས་སྤང་བར་བྱ་བ་བདུན་དང་། ཀུན་འབྱུང་མཐོང་བས་སྤང་བར་བྱ་བ་བདུན་དང་། གཟུགས་ཀྱིས་བསྡུས་པ་སྡུག་བསྔལ་མཐོང་བས་སྤང་བར་བྱ་བ་བདུན་དང་། ཀུན་འབྱུང་མཐོང་བས་སྤང་བར་བྱ་བ་བདུན་
དང་། གཟུགས་མེད་པས་བསྡུས་པ་སྡུག་བསྔལ་མཐོང་བས་སྤང་བར་བྱ་བ་བདུན་དང་། ཀུན་འབྱུང་མཐོང་བས་སྤང་བར་བྱ་བ་བདུན་ཏེ། ཐམས་ཅད་དུ་འགྲོ་བ་ཆེན་པོའོ། །དེ་རྣམས་ཉིད་ནི་ཁམས་གསུམ་གྱི། །འགོག་པའི་གེགས་དང་། ལམ་གྱི་གེགས་ནི། བདུན་པ་དྲུག་སྟེ་ཐམས་ཅད་དུ་འགྲོ་བ་
ཆེན་པོ་ལྟ་བུའོ། །གཉིད་ལ་སོགས་པ་དྲུག་ནི། གང་སྡུག་བསྔལ་གྱི་གེགས་དང་། ཀུན་འབྱུང་གི་གེགས་རྣམས་ནི་ཐམས་ཅད་དུ་འགྲོ་བ་ཆུང་ངུའོ། །འདི་ཉིད་འགོག་པའི་གེགས་དང་། ལམ་གྱི་གེགས་ནི། ཐམས་ཅད་དུ་འགྲོ་བ་ཆུང་ངུ་དང་མཚུངས་པའོ། །བསྒོམ་པས་སྤང་བར་བྱ་བ་མི་བཟོད་པ་
ལ་སོགས་པ་བརྒྱད། བསྒོམ་པས་སྤང་བར་བྱ་བ་མ་དད་པ་ལ་སོགས་པ་བདུན་དང་། གཉིད་ལ་སོགས་པ་དྲུག་ནི་ས་ཆུང་ངུ་བའོ། །བག་ལ་ཉལ་མིང་འདི་རྣམས་ལ། །གང་ཐམས་ཅད་དུ་འགྲོ་བ་ཆེན་པོ་དེ་རྣམས་དངོས་སུ་དང་གང་ཐམས་ཅད་དུ་འགྲོ་བ་ཆུང་ངུ་དེ་ནི་དངོས་ཆགས་ལ་སོགས་པ་གཞན་
ལ་བརྟེན་ནས། གེགས་ཀྱི་སྒོ་ནས་བདེན་པའི་གེགས་བྱེད་དོ། །དེ་ལ་བདེན་པ་རྣམས་ཀྱི་གེགས་ཀྱི་སྒོ་བཅུ་ནི་འདི་ལྟར། སྡུག་བསྔལ་བདེན་པའི་གེགས་ཀྱི་སྒོ་ནི་བཞི་སྟེ། མི་རྟག་པ་ལ་སྐུར་བ་འདེབས་པའི་སྒོ་དང་། བདག་མེད་པ་ཉིད་ལ་སྐུར་པ་འདེབས་པའི་སྒོ་དང་། ཤེས་པར་བྱ་བ་ཉིད་ལ་སྐུར་བ་འདེབས་

པའི་སྒོ་དང་། ལུང་དུ་མ་བསྟན་པ་ཉིད་ལ་སྐུར་པ་འདེབས་པའི་སྒོའོ། །ཀུན་འབྱུང་གི་གེགས་ཀྱི་སྒོ་ནི་བཞི་སྟེ། རྒྱུ་ལ་སྐུར་པ་སྨྲ་བའི་སྒོ་དང་། ལས་བདག་གིར་བྱ་བ་ལ་སྐུར་པ་སྨྲ་བའི་སྒོ་དང་། ཀུན་ནས་ཉོན་མོངས་པ་ལ་སྐུར་པ་སྨྲ་བའི་སྒོ་དང་། རྣམ་པར་བྱང་བ་ལ་སྐུར་པ་སྨྲ་
བའི་སྒོའོ། །འགོག་པའི་གེགས་ཀྱི་སྒོ་གཅིག་ནི། །རྟག་པ་ཉིད་ལ་སྐུར་པ་སྨྲ་བའི་སྒོའོ། །ལམ་གྱི་གེགས་ཀྱི་སྒོ་ནི་གཅིག་སྟེ། ངེས་པར་འབྱིན་པ་ལ་སྐུར་པ་སྨྲ་བའོ། །མིག་གི་རྣམ་ཤེས་ལ་སོགས་པ་ལྔ་ཆར་ནི་ཉོན་མོངས་པ་ལྡན་པ་མ་ཡིན་ཞིང་བསྐྱེད་པ་ཡང་མ་ཡིན་ནོ། །འོན་ཀྱང་ལྷན་
ཅིག་ཏུ་ཚོར་བ་ལ་སོགས་པ་དང་ལྡན་པས་བསྐྱེད་པར་འགྱུར་བ་དང་ལྡན་པར་འགྱུར་རོ། །གང་གི་དབང་པོ་དང་བཅས་པའི་རྣམ་པར་ཤེས་པ་སྐྱེ་བ་ན། བདེན་པ་མཐོང་བས་སྤང་བར་བྱ་བའི་ཉོན་མོངས་པ་སུན་ཕྱུང་བའི་དེ་མ་ཐག་པའི་རྐྱེན་དུ་གྱུར་པ་དེ་དང་དེའི་རྣམ་པར་ཤེས་པ་ནི་བདེན་པ་མཐོང་བ་དང་
བསྒོམ་པ་དེ་དང་དེའི་སྤང་བྱའོ། །སོ་སོར་སྤྱོད་པ་ཡང་སྤང་བར་བྱ་བ་གང་གིས་རྣམ་པ་ཅི་ལྟར་སུན་ཕྱུང་བ་དེ་ལྟར་འགྱུར་རོ། །མིག་གི་རྣམ་པར་ཤེས་པ་ལ་སོགས་པ་རྣམས་ཀྱི་དག་པའམ་མ་དག་པ་ནི་འཁོར་ལོའི་ཚོགས་པས་དྲུག་པ་ཆེན་པོ་ལས་འོངས་པ་སྟེ། གང་གི་ཕྱིར་ཞེ་ན། དྲུག་པ་ཆེན་པོ་
འདི་ནི་ས་གཞིར་གྱུར་པས་སོ། །དེའི་ཕྱིར་མིག་གི་དབང་པོ་ལ་སོགས་པའི་གཟུགས་ཅན་རྣམས་ཀྱང་། དྲུག་པ་ཆེན་པོ་ལ་ལྟོས་ནས་སྦས་པའམ་སྦས་པ་མ་ཡིན་པར་འགྱུར་རོ། །འཁོར་ལོ་ཅན་གྱི་ཚོགས་པའང་ཅི་ལྟར་འགྱུར་བ་དེ་ལྟར་བཤད་པར་བྱ་སྟེ། དེ་ལྟར་ཡང་། འདོད་ཆགས་ཀྱིས་
ཆགས་པར་འདོད་པའི་སྐྱེས་བུས་མིག་གིས་གཟུགས་མཐོང་བ་ན། དེའི་མངོན་པར་ཚོགས་པ་དང་པོ་ལས་བྱུང་བའི་མིག་གི་རྣམ་པར་ཤེས་པ་ནི། རང་བཞིན་ལུང་མ་བསྟན་དུ་འགྱུར་རོ། །སྐྱེས་བུ་དེ་འདྲ་བའི་མིག་གི་རྣམ་པར་ཤེས་པ་དེའི་དེ་མ་ཐག་ཏུ་རྗེས་སུ་སྤྱོད་པ་ཞེས་པ་རྣམ་པར་ཤེས་པ་
སྐྱེའོ། །འདི་ཅིའང་ཅི་འདྲ་བ་ཞེས་དམིགས་ཀྱིས་འཛིན་པར་བྱེད་པ་སྟེ། རང་བཞིན་ལུང་དུ་མ་བསྟན་པ་ཉིད་དོ། །དེ་མ་ཐག་ཏུ་སོ་སོར་སྤྱོད་པ་ཞེས་པའི་རྣམ་པར་ཤེས་པ་སྐྱེ་སྟེ། འདི་ཞེས་བྱ་བ་འདི་ལྟ་བུ་ཞེས་ངེས་པ། རང་བཞིན་ལུང་མ་བསྟན་ཉིད་དོ། །སོ་སོར་སྤྱོད་པ་དེས་གཟུགས་དེ་ངེས་པའི་

ཕྱིར། དེ་མ་ཐག་ཏུ་དྲུག་པ་ཆེན་པོ་ཞེས་བྱ་བ་འམ་མིང་གཞན་ཡིད་ཀྱི་རྣམ་པར་ཤེས་པ་ཞེས་པ་སྡུག་པའི་མཚན་མར་འཛིན་པའི་རྣམ་པར་ཤེས་པ་སྐྱེའོ། །སྐྱེས་བུ་དེ་ནི་དྲུག་པ་ཆེན་པོ་དེས་གཟུགས་དེ་ལ་ཆགས་པར་བྱས་ཏེ་ཉོན་མོངས་པ་འདོད་ཆགས་ཞེས་པ་དེ་དང་ལྷན་ཅིག་ཏུ་མིག་གི་དབང་
པོ་སྦས་པ་མ་ཡིན་པ་མི་ལྡན་པ་སྐྱེ་བར་འགྱུར་རོ། །དྲུག་པ་ཆེན་པོ་ནི་སྦས་པ་མ་ཡིན་པ། མཚུངས་པར་ལྡན་པ་དང་རབ་ཏུ་མི་ལྡན་པའོ། །སྐྱེས་བུ་དེའི་དྲུག་པ་ཆེན་པོ་དེ་མ་ཐག་ཏུ་དེ་ལས་གཟུགས་དེ་ཉིད་མཐོང་བའམ་དེ་དང་འདྲ་བ་མཐོང་བ་ལས། དྲུག་པ་ཆེན་པོའི་ས། བདག་པོ་སུན་ཕྱུང་
བའི་ཕྱིར། མིག་གི་རྣམ་པར་ཤེས་པ་ཉོན་མོངས་པ་ཅན་དུ་འགྱུར་རོ། །སྡོམ་པ་མ་ཡིན་པ་དང་ལྡན་པའོ། །དེ་ནས་དེ་མ་ཐག་ཏུ་རྗེས་སུ་སྤྱོད་པ་དེ་ནི་སྐྱེ་བ་མ་ཡིན་ཏེ། གཟུགས་ངེས་པའི་ཕྱིར་རོ། །སོ་སོར་དཔྱོད་པ་ནི་སྐྱེ་སྟེ། གཟུགས་དེ་ཉིད་ནི་འདི་ཡིན་ནོ་ཞེས་དྲན་པ་ཙམ་ཉེ་བར་སད་པར་བྱེད་དོ། །
ཉོན་མོངས་པ་ཅན་མ་ཡིན་ཞིང་སྡོམ་པ་མ་ཡིན་པ་དང་ལྡན་པའོ། །སྐྱེས་བུ་དེའི་ཡང་དེ་ནས་དེ་མ་ཐག་ཏུ་ཉོན་མོངས་པ་ཅན་སྡོམ་པ་མ་ཡིན་པ་དྲུག་པ་ཆེན་པོ་རྣམས་སྔོན་བཞིན་དུ་དེ་ཐམས་ཅད་དུས་རིང་དུ་ཡང་དང་ཡང་དུ་རྣམ་པར་ཤེས་པ་འཁོར་ལོ་འབྱུང་སྟེ། འཁོར་ལོ་མ་ཞིག་གི་བར་དུའོ། །དེ་
བཞིན་དུ་ཞེ་སྡང་གིས་ཀྱང་སུན་འབྱིན་པར་བྱེད་དོ། །ང་རྒྱལ་གྱིས་ཀྱང་ངོ་། །གཏི་མུག་གིས་ཀྱང་ངོ་། །ཐེ་ཚོམ་གྱིས་ཀྱང་ངོ་། །ལྟ་བ་རྣམས་ཀྱིས་ཀྱང་ཅི་ལྟར་རིགས་པར་ཆ་ཤས་སུན་འབྱིན་པར་བྱེད་དོ། །ཅི་ལྟར་མིག་གི་རྣམ་པར་ཤེས་པ་སུན་ཕྱུང་བ་དེ་བཞིན་དུ་བག་ལ་ཉལ་བཅུས་རྣ་བའི་རྣམ་པར་
ཤེས་པ་སྐལ་བ་མཐུན་པའི་སྒྲ་རྣམས་སུན་འབྱིན་པར་བྱེད་དོ། །སྣ་དང་ལྕེ་དང་ལུས་ཀྱི་རྣམ་ཤེས་ནི། བསྒོམ་པས་སྤང་བར་བྱ་བ་བག་ལ་ཉལ་འདོད་ཆགས་ཁོང་ཁྲོ་ང་རྒྱལ་མ་རིག་པ་བཞིས་དྲི་དང་རོ་དང་རེག་བྱ་རྣམས་ལ་ཅི་རིགས་པར་སུན་འབྱིན་པར་བྱེད་དོ། །གཞན་གྱིས་ནི་མ་ཡིན་ནོ། །ཅི་ལྟར་
འཁོར་ལོ་ཅན་གྱི་ཚོགས་པའི་ཉོན་མོངས་པས། མིག་གི་རྣམ་པར་ཤེས་པ་ལ་སོགས་པ་དེ་རྣམས་སུན་ཕྱུང་བར་གྱུར་པ་དང་སྡོམ་པ་མ་ཡིན་པ་སྐྱེས་པ། དེ་བཞིན་དུ་རྣམ་པར་དག་པ་ཡང་འཁོར་ལོ་ཅན་གྱི་ཚོགས་པ་དགེ་བའི་རྩ་བས་ཅི་ལྟར་རིགས་པར་སྡོམ་པ་སྐྱེ་བར་རིག་པར་བྱའོ། །དེ་ལ་ཅི་ལྟར་

རིགས་པའི་དོན་ཅི་ཞེ་ན། བརྗོད་པར་བྱ་སྟེ། འཁོར་བའི་ཆགས་པ་ལས་ལྡོག་པར་འདོད་པའི་སྐྱེས་བུ་འགའ་ཞིག་མིག་གིས་གཟུགས་མཐོང་བ་ན། དེའི་མངོན་པར་ཚོགས་པ་དང་པོ་ལས་བྱུང་བ་མིག་གི་རྣམ་པར་ཤེས་པ་ནི་རང་བཞིན་ལུང་མ་བསྟན་དུ་འགྱུར་རོ། །སྐྱེས་
བུ་དེའི་མིག་གི་རྣམ་པར་ཤེས་པ་ལས་དེ་མ་ཐག་ཏུ་རྗེས་སུ་སྤྱོད་པ་སྐྱེ་བར་འགྱུར་ཏེ། འདི་ཅི་འམ་ཅི་ལྟ་བ་ཞེས་སྤྱི་ནས་འཛིན་པར་བྱེད་པ་སྟེ་རང་བཞིན་ལུང་མ་བསྟན་ཉིད་དོ། །རྗེས་སུ་སྤྱོད་པའི་དེ་མ་ཐག་ཏུ་སོ་སོར་སྤྱོད་པ་སྐྱེ་བར་འགྱུར་ཏེ། འདི་ཞེས་བྱ་བ་དང་འདི་ལྟ་བུ་ཞེས་ངེས་པ་ནི་རང་བཞིན་
ལུང་མ་བསྟན་ཉིད་དོ། །སྐྱེས་བུ་དེའི་གཟུགས་དེ་ངེས་པའི་ཕྱིར། དེ་ནས་དེ་མ་ཐག་ཏུ་མི་སྡུག་པའི་མཚན་མར་འཛིན་པ་དྲུག་པ་ཆེན་པོ་སྐྱེ་བར་འགྱུར་རོ། །མི་སྡུག་པའི་མཚན་མར་འཛིན་པའི་དྲུག་པ་ཆེན་པོ་དེས་གཟུགས་དེ་ལ་ཆགས་པ་དང་བྲལ་བར་བྱས་ཏེ། སྐྱེས་བུ་དེས་ཆགས་བྲལ་དང་ལྷན་
ཅིག་ཏུ་མིག་གི་དབང་པོ་སྦས་པ་མི་ལྡན་པ་སྐྱེ་བར་འགྱུར་རོ། །དྲུག་པ་ཆེན་པོས་ཡང་སྦས་པ་མཚུངས་པར་ལྡན་པ་དང་རབ་ཏུ་མི་ལྡན་པའོ། །སྐྱེས་བུ་དེའི་དྲུག་པ་ཆེན་པོ་ལས་དེ་མ་ཐག་ཏུ་གཟུགས་དེ་ཉིད་དམ་དེ་དང་འདྲ་བའི་གཟུགས་མཐོང་བ་ལས། སའི་བདག་པོའི་དྲུག་པ་ཆེན་པོ་དག་པ་ཡིན་
པ་ཉིད་པས། མིག་གི་རྣམ་པར་ཤེས་པ་ཉོན་མོངས་ཅན་མ་ཡིན་པ་དག་པར་འགྱུར་རོ། །སྡོམ་པ་དང་ལྡན་པའོ། །དེ་ནས་དེ་མ་ཐག་ཏུ་རྗེས་སུ་སྤྱོད་པ་ནི་མི་སྐྱེ་སྟེ། གཟུགས་ངེས་པའི་ཕྱིར་རོ། །སོ་སོར་སྤྱོད་པ་ནི་སྐྱེ་སྟེ། གཟུགས་དེ་ཉིད་ནི་འདི་ཡིན་ནོ་ཞེས་དྲན་པ་ཙམ་སད་པར་བྱེད་པ་ཉོན་མོངས་ཅན་
མ་ཡིན་པ་སྡོམ་པ་དང་ལྡན་པའོ། །སྐྱེས་བུ་དེའི་དེ་ནས་སོ་སོར་སྤྱོད་པ་ལས་ཡང་དྲུག་པ་ཆེན་པོ་ཉོན་མོངས་ཅན་མ་ཡིན་པ་སྡོམ་པར་གྱུར་པའོ། །དེ་ལྟར་སྔོན་བཞིན་དུ་ཡང་ནས་ཡང་དུ་དུས་རིང་པོར་ཡང་རྣམ་པར་ཤེས་པའི་འཁོར་ལོ་འཁོར་ཏེ་འཁོར་ལོ་མ་ཞིག་གི་བར་དུའོ། །དེ་བཞིན་དུ་མི་
སྡང་བ་དང་མ་རྨོངས་པ་དང་འདོད་ཆགས་དང་བྲལ་བ་ལ་ཡང་སྦྱར་བར་བྱའོ། །དེ་བཞིན་ལུང་དུ་མ་བསྟན་པ་ལ་སྦྱར་བར་བྱའོ། །ཡང་གསུངས་པ། འཁོལ་ལོ་བཅིང་བ་ལྔ་རྣམས་ཀྱིས། །ས་རྣམས་དག་དང་མ་དག་ཕྱིར། །དྲུག་པ་ལས་སྐྱེས་དག་མ་དག །གཟུགས་ཅན་རྣམས་ཀྱིས་སྦས་མ་

སྦས། །ཞེས་སོ། །མི་དགེ་བ་དང་དགེ་བ་དང་ལུང་དུ་མ་བསྟན་པའི་འཁོར་ལོའི་འཇུག་པ་རྣམ་པ་གསུམ་གྱི་འཇིག་པའི་རྒྱུ་ལྔ་ནི། འདི་ལྟ་སྟེ། རྣམ་པ་སྤངས་པ་དང་། དམིགས་པ་བཏང་བ་དང་། བཟུང་བ་འགྲིབ་པ་དང་། བཟུང་བ་འཕེལ་བ་དང་། དྲུག་པ་ལས་དྲུག་པར་བགྲོད་པའོ། །དེ་
ལས་སྡུག་པ་བསམས་ནས་མི་རྟག་པ་ཉིད་བསམས་པ་ལས་རྣམ་པ་སྤངས་པའོ། །བུད་མེད་ཀྱི་ལུས་བསམས་ནས་སྐྱེས་པའི་ལུས་བསམས་པ་ལས་དམིགས་པ་བཏང་བའོ། །མང་པོ་བསམས་ནས་ཉུང་ངུ་བསམས་པ་ལས་བཟུང་བ་འགྲིབ་པའོ། །ཆུང་ངུ་བསམས་ནས་ཆེན་པོ་བསམས་
པ་ལས་བཟུང་བ་འཕེལ་བའོ། །འཁོར་ལོ་འཇུག་པ་ལ་དྲུག་པ་ཆེན་པོས་མི་སྡུག་པ་བསམས་ནས་དེ་མ་ཐག་ཉིད་དུ་དྲུག་པ་ཆེན་པོ་སྐྱེ་བ་ནི་དྲུག་པ་ལས་དྲུག་པར་བགྲོད་པའོ། །དེ་ལྟར་འཁོར་ལོ་ཞིག་པ་ལའང་། ཡང་གཟུགས་དེ་ཉིད་མཐོང་བ་ལས་རང་བཞིན་གྱི་ལུང་མ་བསྟན་མིག་གི་རྣམ་པར་
ཤེས་པ་འབྱུང་ངོ་། །དེ་ལ་རྣམ་པར་སྤངས་པ་དང་དྲུག་པ་བགྲོད་པ་དག་ནི་དྲུག་པ་ཁོ་ན་ལ་སྲིད་དོ། །མིག་གི་རྣམ་ཤེས་ལ་སོགས་པ་ལྔ་ལ་ནི་མ་ཡིན་ནོ། །དམིགས་པ་བཏང་བ་དང་། བཟུང་བ་འགྲིབ་པ་དང་། བཟུང་བ་འཕེལ་བ་རྣམས་ནི། དྲུག་པའམ་མིག་གི་རྣམ་ཤེས་ལ་སོགས་པ་ལྔ་
ལ་སྲིད་པ་ཡིན་ནོ། །འཁོར་ལོ་ཐམས་ཅད་མྱུར་བར་འཇིག་པ་ནི་སེམས་འདུན་པ་ལ་ཡིན་ནོ། །འདི་ལྟ་སྟེ། དང་པོ་འཕྲད་པ་ལས་བྱུང་བའི་མིག་གི་རྣམ་ཤེས་དང་། དེ་ནས་རྗེས་སུ་སྤྱོད་པ་དང་། དེ་ནས་སོ་སོར་སྤྱོད་པ་དང་། དེ་ནས་དྲུག་པ་ཆེན་པོ་དང་། དེ་ནས་ཡང་མིག་གི་རྣམ་ཤེས་
དང་། དེ་ནས་སོ་སོར་སྤྱོད་པ་དང་། དེ་ནས་དྲུག་པ་ཆེན་པོའོ། །དྲུག་པ་ཆེན་པོའི་དུས་དེ་ལ་འཁོར་ལོ་འཇིག་གོ། །སྒྲིབ་པ་ལུང་མ་བསྟན་གྱི་འཁོར་ལོ་ཡང་། གཟུགས་ཁམས་སུ། དགེ་བའི་ཡུལ་ལ། མི་དགེ་བའི་ཡུལ་ལ། ལུང་དུ་མ་བསྟན་པའི་ཡུལ་ལ། མི་སྒྲིབ་པའི་ཡུལ་ལ། སྒྲིབ་པའི་
ཡུལ་རྣམས་ལ། སོ་སོ་ལ་སྡུག་བསྔལ་དང་ཀུན་འབྱུང་དང་འགོག་པ་དང་ལམ་དང་བསྒོམ་པས་སྤང་བར་བྱ་བ་རྣམས་ནི། འདོད་ཆགས་ལ་སོགས་པ་རྣམས་ཀྱི་སུན་འབྱིན་པ་སྦྱར་བར་བྱའོ། །དེ་བཞིན་དུ་འདོད་པའི་ཁམས་སུ་སྒྲིབ་པའི་འཁོར་ལོ་ནི་འཇིག་ཚོགས་ལ་ལྟ་བ་དང་མཐར་འཛིན་

པར་ལྟ་བ་དག་གི་སུན་འབྱིན་པའོ། །ཀུན་ནས་དཀྲིས་པས་སུན་ཕྱུང་བ་ནི། སྒྲིབ་པའི་ལུང་མ་བསྟན། མིག་གི་རྣམ་པར་ཤེས་པ་ཡིན་ནོ། །སོ་སོར་སྤྱོད་པ་ཡང་ངོ་། །མི་སྒྲིབ་པའི་ལུང་མ་བསྟན་གྱི་འཁོར་ལོ་ནི། དགེ་བའི་སྤྱོད་པ་ལ་ཞེན་པ་ཀུན་དུ་སྤྱོད་པ་ཉིད་ཀྱིས་སྒྲུབ་པ་
ཞན་པར་འགྱུར་བཞིན་པའི་དྲུག་པ་དང་ལྷན་ཅིག་ཏུ་མིག་གི་དབང་པོའི་སྦས་པ་དང་སྒྲིབ་པའི་ལུང་མ་བསྟན་སྐྱེའོ། །དྲུག་པའི་ཡང་མི་སྒྲིབ་པའི་ལུང་མ་བསྟན་དང་དགེ་བ་སྐྱེའོ། །དྲུག་པ་ལས་དེ་མ་ཐག་ཏུ་གཟུགས་དེ་ཉིད་དམ་དེ་དང་འདྲ་བ་མཐོང་བ་ལས་མིག་གི་རྣམ་ཤེས་མི་སྒྲིབ་པ་ལུང་མ་
བསྟན་སྐྱེའོ། །དེ་ནས་བར་མེད་པར་སོ་སོར་སྤྱོད་པ་ཡང་མི་སྒྲིབ་པ་ཉིད་དོ། །དེ་ནས་དྲུག་པ་མི་སྒྲིབ་པའོ། །འདི་ནི་ཟད་པར་འགྱུར་བཞིན་པ་ན། དྲུག་པ་ཉིད་སྒྲུབ་པ་ཞན་པར་འགྱུར་བ་དང་འཕེལ་བར་གྱུར་པའོ། །དགེ་བ་ཉིད་སྒྲུབ་པ་ཞན་པར་འགྱུར་བཞིན་པ་ནི་མི་སྒྲིབ་པའི་ལུང་མ་བསྟན་དུ་
འགྱུར་རོ། །ཡང་གསུངས་པ། ད་ལྟར་འདི་ཡི་གསུམ་པ་ལ། །མྱུར་དུ་ཟད་དང་སྦས་པ་དང་། །དཀར་པོ་ཉམས་པའི་འདུ་བྱེད་ནི། །མང་དུ་མི་སྒྲིབ་པར་འདོད་དོ། །ཞེས་སོ། །དེ་ལྟར་ཡང་། སྐྱེས་བུ་འགའ་ཞིག་འཁོར་བ་ལས་ལྡོག་པར་འདོད་པས་མིག་གིས་གཟུགས་མཐོང་བ་ལས། དང་པོ་མངོན་
པར་འདུས་པ་ལས་བྱུང་བའི་མིག་གི་རྣམ་པར་ཤེས་པ་རང་བཞིན་ལུང་མ་བསྟན་ཡིན་ནོ། །དེ་ནས་རྗེས་སུ་སྦྱོར་བ་རང་བཞིན་ལུང་མ་བསྟན་ཉིད་དོ། །དེ་ནས་སོ་སོར་སྤྱོད་པ་རང་བཞིན་ལུང་མ་བསྟན་ཉིད་དོ། །དེ་ནས་བཞི་པ་དྲུག་པ་ཆེན་པོ་དགེ་བའོ། །དེ་ནས་མིག་གི་རྣམ་ཤེས་དགེ་བ་ཉིད་དོ། །དེ་
ནས་བདུན་པ་དྲུག་པ་ཆེན་པོ་ལ་དགེ་བའི་འདུ་བྱེད་ཞན་དུ་གྱུར་པ་ལ། དགེ་བའི་ས་ཆེན་པོ་བ་ནི་ལོག་ཅིང་། སྡོམ་པ་འབའ་ཞིག་འཇུག་པ་ཉིད་དོ། །འདི་ནི་སྒྲུབ་པ་ཞན་པ་ཡིན་ནོ། །སྡོམ་པ་རྗེས་སུ་འཇུག་པའི་ཕྱིར་མི་སྒྲིབ་པའི་ལུང་མ་བསྟན་ནོ། །གང་གི་ཚེའང་སྡོམ་པས་ཀྱང་སྤང་བར་འགྱུར་བ་དེའི་
ཚེ་རང་བཞིན་ལུང་མ་བསྟན་ཉིད་དུ་འགྱུར་རོ། །དེ་བཞིན་དུ་སྒྲུབ་པ་ཞན་པའང་ངོ་། །གང་གི་ཚེ་རང་བཞིན་ལུང་མ་བསྟན་སེམས་གཅིག་ཉིད་ལས་དེ་མ་ཐག་ཏུ་སྟོན་པར་བྱེད་དོ། །དེ་ནས་ཡང་འདི་མི་སྒྲིབ་པའི་ལུང་མ་བསྟན་དུ་འགྱུར་རོ། །ཡང་ན་སེམས་གཅིག་གིས་བར་ཆོད་ནས་སྟོན་པར་བྱེད་ན།

དེ་ནས་དགེ་བའི་སེམས་ཉིད་དུ་འགྱུར་ཏེ། མི་སྒྲིབ་པའི་ལུང་མ་བསྟན་ནི་མ་ཡིན་ནོ། །དེ་ཡང་སྟོད་པར་བྱེད་དོ་ཞེས་པ་ནི། དྲུག་པ་ཆེན་པོ་འཕེལ་བར་འགྱུར་བ་གང་གི་ཚེ་རབ་ཏུ་བསྔགས་པ་ཉིད་ཀྱི་གནས་སྐབས་ཐོབ་པར་གྱུར་པའོ། །གང་ལས་ཡོངས་སུ་ཉམས་པ་དེ་ལས་དགེ་བར་འགྱུར་བ་ནི། དྲུག་
པ་ཆེན་པོ་འོག་མ་མིན་ཞེས་པའོ། །ཡང་གང་ལས་སྒྲུབ་པ་ཞན་པར་གྱུར། དམིགས་པ་སྒྲུབ་པ་ཞེན་པ་ཅི་ཞེ་ན། བརྗོད་པར་བྱ་སྟེ། བསྒོམ་པའི་རང་བཞིན་གྱི་སེམས་ཀྱི་སྤྱོད་པ་རེས་འགའ་འདུ་བྱེད་ཞན་པར་གྱུར་པ་ནི་སྒྲུབ་པ་ཞན་པའོ། །དེ་ཡང་དྲུག་པ་ཆེན་པོ་ཡིད་ཀྱི་རྣམ་ཤེས་སོ། །མིང་ལ་དམིགས་པ་
དང་། མཚན་མ་ལ་དམིགས་པ་དང་། ཡོངས་སུ་དག་པ་ལ་དམིགས་པ་སྒྲུབ་པ་ཞན་པ་སྟེ། དོན་ལ་དམིགས་པ་ནི་མ་ཡིན་ནོ། །ཡང་སྒྲུབ་པ་ཞན་པ་ཅི་ཡིན་ཞེ་ན། སྒྲུབ་པ་དེ་ནི་བསམ་གཏན་མ་ཡིན། བསམ་གཏན་ལམ་མ་ཡིན་ནོ། །སྒྲུབ་པ་ཞན་པ་དེ་མཚན་མ་དང་ཡོངས་སུ་དག་པ་དག་སྒྲུབ་པ་
ཞན་པར་གྱུར་པ་ཅི་སྲིད་དུ་བསྒོམ་པའི་རང་བཞིན་དུའང་འགྱུར་རོ། །མིང་ལ་དམིགས་པ་སྒྲུབ་པ་ཞན་པ་རང་བཞིན་སྤྱོད་པ་ཅན་ནི་མ་ཡིན་ནོ། །ཡང་སྒྲུབ་པ་ཞན་པ་བསམ་གཏན་མ་ཡིན་བསམ་གཏན་ལམ་མ་ཡིན་པ་ཅིའི་དོན་དུ་ཞེ་ན་བརྗོད་པར་བྱ་སྟེ། སྙོམས་པར་འཇུག་པ་དང་ལམ་ཐམས་ཅད་ནི་
ཡོངས་སུ་རྫོགས་པའི་བདེ་བའི་དངོས་པོ་དང་ལྡན་པའི་ཕྱིར་རོ། །བདེ་བའི་དོན་ཡང་དགེ་བའི་དོན་ཏོ། །བདེ་བའི་དོན་ནི་རྣམ་པ་གཉིས་ཏེ། འདི་ལྟར། ཡོངས་སུ་རྫོགས་པ་དང་ཡོངས་སུ་རྫོགས་པ་མ་ཡིན་པའོ། །དེ་ལ་གང་གི་ཚེ་ཡོངས་སུ་རྫོགས་པ་དེའི་ཚེ་དགེ་བའོ། །གང་གི་ཚེ་ཡོངས་སུ་མ་
རྫོགས་པ་དེའི་ཚེ། མི་སྒྲིབ་པའི་ལུང་མ་བསྟན་དུ་འགྱུར་རོ། །གང་གི་ཚེ་གང་དུ་དམར་བའི་དངོས་པོ་ཡོངས་སུ་རྫོགས་པ་དེ་ལ་དམར་པོ་ཞེས་བརྗོད་དོ། །གང་ཡོངས་སུ་མ་རྫོགས་པ་དེ་ནི་པདྨའི་དམར་པོ་ཞེས་བརྗོད་དོ། །གཉི་ག་དམར་པོ་ཡིན་པ་དེ་བཞིན་དུ་དགེ་བ་དང་མི་སྒྲིབ་པའི་ལུང་མ་བསྟན་
དག་རྟོགས་པར་བྱའོ། །ཡང་བདེ་བའི་དངོས་པོ་མ་ཡིན་པ་གང་ཞེ་ན། བདེ་བ་ཡིན་པའི་དངོས་པོ་དེ་དག་གང་དུ་ཡོངས་སུ་རྫོགས་པ་དེ་ནི་མི་དགེ་བའོ། །གང་དུ་ཡོངས་སུ་མ་རྫོགས་པ་དེ་ནི་སྒྲིབ་པའི་ལུང་མ་བསྟན་པའོ། །དཔེར་ན་བུང་བ་དང་ཟར་མའི་མེ་ཏོག་དག་ནག་པ་ཉིད་ཐ་དད་པ་དེ་བཞིན་ནོ། །ཡང་

གང་དུ་བདེ་བའི་དངོས་པོ་མེད་པ་བདེ་བ་མ་ཡིན་པའི་དངོས་པོ་མེད་པ་དེ་རུ་ཅི་ལྟར་ཞེ་ན། བརྗོད་པར་བྱ་སྟེ། གང་ལ་གཉི་ག་ཡང་མེད་པ་དེ་ནི་རང་བཞིན་གྱི་ལུང་དུ་མ་བསྟན་པ་ཉིད་དུ་རིག་པར་བྱའོ། །ནམ་མཁའི་ངང་བཞིན་ནོ། །དེ་ལ་བདེ་བའི་དོན་ནི་མིང་གཞན་དགེ་བའི་དོན་ཏོ། །
ཐམས་ཅད་ཀུན་ནས་དཀྲིས་པ་མ་ཡིན་ཞིང་སྡོམ་པ་ཡིན་ནོ། །བདེ་བ་མ་ཡིན་པའི་དངོས་པོ་ཉིད་ནི་མིང་གཞན་མི་དགེ་བའོ། །ཐམས་ཅད་ཀུན་ནས་དཀྲིས་པ་ཡིན་ཞིང་སྡོམ་པ་མ་ཡིན་པ་ཡིན་ནོ། །ཅི་ལྟར་འཁོར་ལོ་འདི་རྣམ་པ་བཞིར་བསྟན་པ། དེ་བཞིན་དུ་རང་བཞིན་གྱིས་ལུང་མ་བསྟན་འཁོར་
ལོ་ཡང་བརྗོད་པར་བྱའོ། །དེ་ལ་རང་བཞིན་ལུང་མ་བསྟན་འཁོར་ལོ་ལ་ཡང་སྔོན་བཞིན་དུ་རྗེས་སུ་སྤྱོད་པ་མི་སྐྱེའོ། །ཅི་ལྟར་མིག་གི་རྣམ་ཤེས་ཀྱི་དེ་བཞིན་དུ་རྣ་བའི་རྣམ་ཤེས་ལ་ཡང་འཁོར་ལོ་རྣམ་པ་ལྔ་དང་། འཁོར་ལོ་འཇིག་པ་བརྗོད་པར་བྱའོ། །འདི་ལྟར། དགེ་བའི་འཁོར་ལོ་དང་། མི་སྒྲིབ་
པའི་འཁོར་ལོ་དང་། མི་དགེ་བའི་འཁོར་ལོ་དང་། སྒྲིབ་པའི་འཁོར་ལོ་དང་། རང་བཞིན་ལུང་མ་བསྟན་གྱི་འཁོར་ལོ། །ལུས་ཀྱི་རྣམ་པར་ཤེས་པ་ནི་སྔོན་བཞིན་དུ་རྣམ་པ་ལྔའོ། །དེ་ལ་འདོད་པའི་ཁམས་སུ་སྒྲིབ་པ་སྤངས་པའོ། །གཟུགས་ཁམས་སུ་མི་དགེ་བ་སྤངས་པའོ། །གཉི་ག་གཅིག་ཏུ་
བྱས་པས་རྣམ་པ་ལྔར་འགྱུར་རོ། །དེ་ལྟ་ན་ཡང་། འདོད་པའི་ཁམས་ཀྱི་དང་གཟུགས་ཀྱི་དང་གཟུགས་ཀྱི་ཁམས་ཀྱི་དག་གཅིག་ཏུ་བྱས་ཏེ་དགེ་བ་གཅིག་གོ། །འདོད་པའི་ཁམས་ཀྱི་དང་གཟུགས་ཀྱི་ཁམས་ཀྱི་དག་གཅིག་ཏུ་བྱས་ཏེ་མི་སྒྲིབ་པ་ནི་གཉིས་པའོ། །འདོད་པའི་ཁམས་ཀྱི་མི་དགེ་བ་ནི་
གསུམ་པའོ། །གཟུགས་ཁམས་ཀྱི་སྒྲིབ་པ་ནི་བཞི་པའོ། །འདོད་པའི་ཁམས་ཀྱི་དང་གཟུགས་ཀྱི་ཁམས་ཀྱི་དག་གཅིག་ཏུ་བྱས་ཏེ། རང་བཞིན་གྱི་ལུང་མ་བསྟན་ནི་འཁོར་ལོ་ལྔ་པའོ། །ཁམས་དང་བཅས་པའི་རེག་བྱ་ལ་ལུས་ཀྱི་རྣམ་པར་ཤེས་པ་དེ་ནི་འཁོར་ལོ་རྣམ་པ་ལྔར་འགྱུར་རོ། །ཡིད་ཀྱི་
རྣམ་པར་ཤེས་པ་ལ་ཡང་རྣམ་པ་ལྔའོ། །དེའི་ཡང་རྗེས་སུ་སྤྱོད་པ་དང་སོ་སོར་སྤྱོད་པའི་རྣམ་པར་གཞག་པ་ནི་ཡོད་པ་མ་ཡིན་ཏེ། ཡིད་ཀྱི་རྣམ་པར་ཤེས་པའི་རང་རྒྱུད་ཅན་ཡིན་པའི་ཕྱིར་དང་། དྲུག་པ་ཆེན་པོ་ཉིད་ཡིན་པའི་ཕྱིར་རོ། །སྣའི་རྣམ་ཤེས་ནི་སྒྲིབ་པ་སྤངས་པས་རྣམ་པ་བཞིའོ། །ལྕེའི་རྣམ་

ཤེས་ནི། དེ་བཞིན་དུ་རྣམ་པ་ལྔའོ། །དེ་དག་འཁོར་ལོ་རྣམ་བཞིར་བྱ། །ཞེས་སོ། །ཡང་གཟུགས་ལ་སོགས་པ་ལ་དགེ་བ་ལ་སོགས་ཅི་ལྟར་འགྱུར་ཞེ་ན། བརྗོད་བྱ་སྟེ། གཟུགས་ལ་སོགས་པ་རྣམས་ཀྱི་དགེ་བ་ལ་སོགས་པ་རྣམས་ནི་སེམས་ཀྱིས་བྱས་པ་སྟེ། དེ་ལྟར་ཡང་རྣམ་པར་རིག་བྱེད་
གང་ཞིག་དགེ་བས་བྱས་པ་དེ་རྣམས་ནི་དགེ་བའོ། །དེ་བཞིན་དུ་རང་བཞིན་གྱི་སེམས་ཀྱི་སྐྱེད་པ་ནི་རང་བཞིན་ནོ་ཞེས་པའི་བར་དུའོ། །དེ་ལ་རྣམ་པར་རིག་བྱེད་ཀྱི་གཟུགས་དང་། སྒྲ་ནི་དགེ་བ་ལ་སོགས་པ་རྣམ་པ་ལྔའོ། །ལྷག་མ་གཟུགས་དང་སྒྲ་དང་དྲི་དང་རོ་དང་རེག་བྱ་དང་ཐམས་ཅད་
ནི་རང་བཞིན་གྱི་ལུང་མ་བསྟན་ཏོ། །ཆོས་ནི་དགེ་བ་ལ་སོགས་པ་རྣམ་པ་ལྔའོ། །ཡང་གསུངས་པ། གཟུགས་དང་སྒྲ་དང་ཆོས་རྣམས་ལ། །དགེ་ལ་སོགས་པ་རྣམ་པ་ལྔ། །དྲི་རོ་རེག་བྱའི་ཁམས་རྣམས་ནི། རང་བཞིན་ལུང་དུ་མ་བསྟན་པའོ། །ཞེས་སོ། །འདི་ལྟར་འང་། རྣམ་པར་ཤེས་པའི་
ཚོགས་ལྔ་པོ་འདི་རྣམས་ཀྱི་ལུས་དང་ངག་གི་རྣམ་པར་རིག་བྱེད་དག་གི་དགེ་བ་ལ་སོགས་པ་ནི་དྲུག་པས་བྱས་པའོ། །དེ་བཞིན་དུ་སྡུག་བསྔལ་ལ་སོགས་པ་མཐོང་བས་སྤང་བར་བྱ་བ་ཡང་དྲུག་པས་བྱས་པའོ། །གང་གི་ཕྱིར་ཞེ་ན། གང་དག་རྣམ་པར་རིག་བྱེད་ཀྱི་གཟུགས་དང་སྒྲ་དག་དང་། རྣམ་
པར་ཤེས་པའི་ཚོགས་རྣམས་སྡུག་བསྔལ་མཐོང་བས་སྤང་བར་བྱ་བའི་སེམས་ལས་སྐྱེས་པ་དེ་རྣམས་སྡུག་བསྔལ་མཐོང་བས་སྤང་བར་བྱ་བ་ཡིན་པས་དང་། དེ་བཞིན་དུ་བསྒོམ་པས་སྤང་བར་བྱ་བའི་སེམས་ལས་སྐྱེས་པ་ནི་བསྒོམ་པས་སྤང་བར་བྱ་བ་དང་ཟག་པ་མེད་པའི་སེམས་ལས་སྐྱེས་པ་ནི་
སྤང་བར་བྱ་བ་མ་ཡིན་པའི་བར་དུའོ། །རྣམ་པར་རིག་བྱེད་མ་ཡིན་པ་ནི་བསྒོམ་པས་སྤང་བར་བྱ་བ་ཁོ་ནའོ། །མིག་གི་རྣམ་པར་ཤེས་པ་ནི་སྤང་བྱ་ལས་རྣམ་པ་དྲུག་སྟེ། འདི་ལྟ་སྟེ། སྡུག་བསྔལ་མཐོང་བས་སྤང་བར་བྱ་བ་དང་། ཀུན་འབྱུང་མཐོང་བས་སྤང་བར་བྱ་བ་དང་། འགོག་པ་མཐོང་བས་སྤང་
བར་བྱ་བ་དང་། ལམ་མཐོང་བས་སྤང་བར་བྱ་བ་དང་། བསྒོམ་པས་སྤང་བར་བྱ་བ་དང་། སྤང་བྱ་མ་ཡིན་པའོ། །དེ་བཞིན་དུ་རྣ་བའི་རྣམ་ཤེས་དང་། ཡིད་ཀྱི་རྣམ་ཤེས་དང་། ཆོས་རྣམས་ལ་སོ་སོར་དྲུག་གོ། །ཡང་གསུངས་པ། མིག་སྣ་ཡིད་ཀྱི་སེམས་ཆོས་ལ། །ཡང་མིན་བཟུང་བས་དྲུག་ཡིན་ནོ། །

ཞེས་སོ། །མིག་གི་རྣམ་པར་ཤེས་པ་ལ་སོགས་པ་དེ་རྣམས་ཀྱི་ཡང་། གང་ཉོན་མོངས་པ་ཅན་དང་རང་བཞིན་ནི་དེ་ཉོན་མོངས་པ་ལས་འབྱུང་བ་ཞེས་བརྗོད་དོ། །དེ་ལ་རྣམ་པ་ལྔ་སྟེ་འདི་ལྟར། སྡུག་བསྔལ་གེགས་ནས་བསྒོམ་པས་སྤང་བར་བྱ་བའི་བར་དུ་ཅི་རིགས་པར་
སྲིད་པའོ། །ཡང་གང་ཉོན་མོངས་པ་མ་ཡིན་པ་དེ་ནི་བསྒོམ་པས་སྤང་བར་བྱ་བ་དང་སྤང་བྱ་མ་ཡིན་པའོ། །སྣ་དང་ལྕེ་དང་ལུས་ཀྱི་རྣམ་པར་ཤེས་པ་རྣམས་ནི་རྣམ་པ་གཉིས་ཏེ་འདི་ལྟར། བསྒོམ་པས་སྤང་བར་བྱ་བ་དང་། སྤང་བྱ་མ་ཡིན་པའོ། །ཡང་གསུངས་པ། སྣ་སོགས་སེམས་ལ་རྣམ་པ་
གཉིས། །ཞེས་སོ། །རྣམ་པར་རིག་བྱེད་ཀྱི་གཟུགས་དང་། སྒྲའི་ཕྱོགས་གཅིག་ནི་བསྒོམ་པས་སྤང་བར་བྱ་བའོ། །ཡང་གསུངས་པ། བྱ་མིན་གཟུགས་ནི་བསྒོམ་སྤང་ངོ་། །ཞེས་སོ། །ལུས་ཀྱི་རྣམ་པར་རིག་བྱེད་དང་ངག་གི་རྣམ་པར་རིག་བྱེད་དག་སྤང་བྱ་ལས་རྣམ་པ་ལྔའོ། །ཡང་གསུངས་པ།
རྣམ་པར་རིག་བྱེད་གང་རྣམ་ལྔ། །ཞེས་སོ། །སྡོམ་པ་མ་ཡིན་པ་ཡང་སྤང་བྱ་ལས་རྣམ་པ་ལྔའོ། །དེ་ལ་གཟུགས་ཅན་གྱི་དབང་པོ་ལྔ་རྣམས་ཀྱི་མི་ལྡན་པ་ཉིད་སྡོམ་པ་མ་ཡིན་པའོ། །རྣམ་པར་ཤེས་པའི་ཚོགས་ལྔ་རྣམས་ཀྱི་དང་། སོ་སོར་སྤྱོད་པའི་མཚུངས་པར་ལྡན་པ་ཉིད་སྡོམ་པ་མ་ཡིན་པའོ། །
དྲུག་པ་ཆེན་པོ་ཡང་མཚུངས་པར་ལྡན་པ་དང་རབ་ཏུ་མི་ལྡན་པའོ། །དྲི་དང་རོ་དང་རེག་བྱ་གསུམ། །འདི་རྣམས་བསྒོམ་པས་སྤང་བྱ་ཉིད། །ཅེས་སོ། །པཎྜི་ཏ་ཆེན་པོ་སྟོབས་བཅུ་དཔལ་བཤེས་གཉེན་གྱིས་བསྡུས་པ་འདུས་བྱས་དང་འདུས་མ་བྱས་རྣམ་པར་ངེས་པ་ལས་འཕགས་པ་མང་པོས་
བཀུར་བའི་སྡེ་བའི་ལུང་གི་ཚུལ་ལས་བག་ལ་ཉལ་མ་ཡིན་པ་རྣམ་པར་ངེས་པ་ཞེས་བྱ་བ་ལེའུ་བཅུ་དྲུག་པའོ།། །།བག་ལ་ཉལ་ཡང་རྣམ་པར་གཞག་པ་བཞི་སྟེ། འདི་ལྟར། ཆོས་རྣམ་པར་གཞག་པ་དང་། མཚན་ཉིད་རྣམ་པར་གཞག་པ་དང་། ཁམས་ཀྱི་དབྱེ་བ་དང་། སྤང་བྱའི་དབྱེ་བའོ། །
དེ་ལ་ཆོས་རྣམ་པར་གཞག་པ་ནི་བག་ལ་ཉལ་བཅུ་སྟེ། འདི་ལྟར། འདོད་ཆགས་དང་། ཁོང་ཁྲོ་དང་། ང་རྒྱལ་དང་། མ་རིག་པ་དང་། ལོག་པར་ལྟ་བ་དང་། རང་ལུས་ལ་ལྟ་བ་དང་། མཐར་འཛིན་པར་ལྟ་བ་དང་། ལྟ་བ་མཆོག་ཏུ་འཛིན་པ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང་།

ཐེ་ཚོམ་མོ། །མཚན་ཉིད་རྣམ་པར་གཞག་པ་ནི་འདི་ལྟ་སྟེ། འདོད་ཆགས་ནི་ཞེན་པའི་མཚན་ཉིད་དོ། །ཁོང་ཁྲོ་ནི་ཞེ་སྡང་བའི་མཚན་ཉིད་དོ། །ང་རྒྱལ་ནི་མཐོན་པོའི་མཚན་ཉིད་དོ། །མ་རིག་ནི་ཀུན་དུ་རྨོངས་པའི་མཚན་ཉིད་དོ། །ལོག་པར་ལྟ་བ་ནི་རྣམ་པ་གཉིས་ཏེ། འདི་ལྟར། སྦྱིན་པ་མེད་ཅེས་པ་ལ་
སོགས་པའི་མཚན་ཉིད་ཡོད་པ་འཇིག་པར་བྱེད་པའི་ལོག་པར་ལྟ་བ་དང་། གཟུགས་མི་རྟག་ཞེས་པ་ལ་སོགས་པ་ཕྱིན་ཅི་ལོག་ཏུ་རྟོགས་པའི་ལོག་པར་ལྟ་བའོ། །ཆོས་དང་སེམས་པ་ལ་བདག་ཏུ་བརྟགས་པ་ནི་རང་ལུས་ལ་ལྟ་བའོ། །གང་ཟག་ལ་རྟག་པ་དང་རྟག་པ་མ་ཡིན་པར་བརྟགས་
པ་ནི་མཐར་འཛིན་པར་ལྟ་བའོ། །ཟག་པ་དང་བཅས་པའི་ཆོས་ལ་མཆོག་འབའ་ཞིག་ཏུ་རྟོག་པ་ནི་ལྟ་བའི་མཆོག་ཏུ་འཛིན་པའོ། །ཟག་པ་དང་བཅས་པའི་ཆོས་ལ་དག་པར་བརྟགས་པ་ནི་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའོ། །ཐེ་ཚོམ་ནི་རྣམ་པ་གཉིས་ཏེ། བདེན་པ་ལ་སྐུར་བ་
སྨྲ་བ་དང་། རྣམ་པར་བྱ་བ་ལ་སྐུར་བ་སྨྲ་བའོ། །དེ་ལ་བདེན་པ་ལ་སྐུར་བ་འདེབས་པ་ནི་རྣམ་པ་བཞི་སྟེ། འདི་ལྟར། སྡུག་བསྔལ་ལ་སྐུར་བ་འདེབས་པ་དང་། ཀུན་འབྱུང་ལ་སྐུར་པ་དང་། འགོག་པ་ལ་སྐུར་པ་དང་། ལམ་ལ་སྐུར་བ་འདེབས་པའོ། །རྣམ་པར་བྱང་བ་ལ་སྐུར་བ་ནི་རྣམ་པ་གསུམ་སྟེ། འདི་ལྟར།
སངས་རྒྱས་ལ་སྐུར་བ་འདེབས་པ་དང་། ཆོས་ལ་སྐུར་བ་སྨྲ་བ་དང་། དགེ་འདུན་ལ་སྐུར་བ་སྨྲ་བའོ། །དེ་ལ་སངས་རྒྱས་དང་དགེ་འདུན་ལ་ཐེ་ཚོམ་ཟ་བ་ནི་སྡུག་བསྔལ་གྱི་གེགས་ཉིད་དོ། །ཆོས་ལ་ཐེ་ཚོམ་ཟ་བ་ནི་འགོག་པའི་གེགས་སོ། །བདེན་པ་ལ་སྐུར་པ་ཡང་སོ་སོར་བཞི་སྟེ་འདི་ལྟར། སྡུག་
བསྔལ་གྱི་གེགས་དང་། ཀུན་འབྱུང་གེགས་དང་། འགོག་པའི་གེགས་དང་། ལམ་གྱི་གེགས་སོ། །ཁམས་ཀྱི་དགེ་བས་རྣམ་པ་གསུམ་སྟེ་འདི་ལྟར། འདོད་པས་བསྡུས་པ་དང་། གཟུགས་ཀྱིས་བསྡུས་པ་དང་། གཟུགས་མེད་པས་བསྡུས་པའོ། །དེ་ལ་འདོད་པས་བསྡུས་པ་ནི་བཅུ་སྟེ། འདི་ལྟར།
གཟུགས་ཀྱིས་བསྡུས་པ་དགུ་སྟེ། དེ་ཉིད་ཁོང་ཁྲོ་སྤངས་པའོ། །གཟུགས་མེད་པས་སྡུས་པ་དགུ་སྟེ། དེ་ཉིད་ཁོང་ཁྲོ་སྤངས་པའོ། །སྤང་བྱའི་དབྱེ་བས་བག་ལ་ཉལ་རྣམ་པ་ལྔར་འགྱུར་རོ། །སྡུག་བསྔལ་མཐོང་བས་སྤང་བར་བྱ་བ་དང་། ཀུན་འབྱུང་མཐོང་བས་སྤང་བར་བྱ་བ་དང་། འགོག་པ་མཐོང་

བས་སྤང་བར་བྱ་བ་དང་། ལམ་མཐོང་བས་སྤང་བར་བྱ་བ་དང་། བསྒོམ་པས་སྤང་བར་བྱ་བའོ། །དེ་ལ་འདོད་པའི་ཁམས་སུ་འདོད་ཆགས་རྣམ་པ་ལྔ་སྟེ། འདི་ལྟར། སྡུག་བསྔལ་ཀུན་འབྱུང་འགོག་པ་ལམ་བསྒོམ་པས་སྤང་བྱའོ། །དེ་བཞིན་དུ་གཟུགས་ཁམས་སུ་རྣམ་པ་ལྔའོ། །
དེ་བཞིན་དུ་གཟུགས་མེད་ཁམས་སུ་རྣམ་པ་ལྔའོ། །ལྔ་པ་གསུམ་ནི་འདོད་ཆགས་བཅོ་ལྔར་འགྱུར་རོ། །དེ་བཞིན་དུ་ང་རྒྱལ་རྣམ་པ་བཅོ་ལྔ་དང་། དེ་བཞིན་དུ་རྨོངས་པ་བཅོ་ལྔ་དང་། བཅོ་ལྔ་ལ་གསུམ་ནི་བཞི་བཅུ་རྩ་ལྔར་འགྱུར་རོ། །ལོག་པར་ལྟ་བ་ནི་འདོད་པའི་ཁམས་སུ་རྣམ་པ་བཞི་སྟེ། འདི་
ལྟར། སྡུག་བསྔལ་ཀུན་འབྱུང་འགོག་པ་ལམ་མཐོང་བས་སྤང་བར་བྱ་བའོ། །དེ་བཞིན་དུ་གཟུགས་སུ་རྣམ་པ་བཞིའོ། །དེ་བཞིན་དུ་གཟུགས་མེད་པའི་ཁམས་སུ་རྣམ་པ་བཞིའོ། །འདི་ནི་ལོག་པར་ལྟ་བ་བཞི་པ་གསུམ་སྟེ་བཅུ་གཉིས་སོ། །དེ་བཞིན་དུ་ལྟ་བ་མཆོག་ཏུ་འཛིན་པ་བཅུ་གཉིས་
སོ། །ཐེ་ཚོམ་རྣམ་པ་བཅུ་གཉིས་དང་། བཅུ་གཉིས་པ་གསུམ་ནི་སུམ་ཅུ་དྲུག་གོ། །ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་ནི་འདོད་པའི་ཁམས་རྣམ་པ་གཉིས་ཏེ། འདི་ལྟར་སྡུག་བསྔལ་དང་ལམ་མཐོང་བས་སྤང་བར་བྱ་བ་དང་། དེ་བཞིན་དུ་གཟུགས་ཁམས་སུ་རྣམ་པ་གཉིས་
དང་། དེ་བཞིན་དུ་གཟུགས་མེད་པའི་ཁམས་སུ་རྣམ་པ་གཉིས་སོ། །འདི་ནི་ཚུལ་ཁྲིམས་བརྟུལ་ཞུགས་མཆོག་ཏུ་འཛིན་པ་གཉིས་པ་གསུམ་སྟེ་དྲུག་གོ། །དེ་ལ་གཟུགས་མེད་པའི་ཁམས་སུ་ཚུལ་ཁྲིམས་མེད་པས་བརྟུལ་ཞུགས་འབའ་ཞིག་ཏུ་རིག་པར་བྱའོ། །རང་གི་ལུས་ལ་ལྟ་བ་ནི་ཁམས་
གསུམ་དུ་ལུས་དམ་པར་ལྟ་བ་གསུམ་ནི་སྡུག་བསྔལ་མཐོང་བས་སྤང་བྱ་ཁོ་ནའོ། །དེ་བཞིན་མཐར་འཛིན་པར་ལྟ་བ་གསུམ་མོ། །གཉིས་པོ་འདི་ལས་ཁམས་གསུམ་དུ་དྲུག་ཏུ་འགྱུར་རོ། །ཞེ་སྡང་ནི་འདོད་པའི་ཁམས་སུ་རྣམ་པ་ལྔ་སྟེ། འདི་ལྟར། སྡུག་བསྔལ་ཀུན་འབྱུང་འགོག་པ་ལམ་
བསྒོམ་པས་སྤང་བར་བྱ་བའོ། །དེ་ལྟར་བག་ལ་ཉལ་དེ་རྣམས་ནི་ཁམས་དང་སྤང་བྱའི་དབྱེ་བས་ཕྱེ་བ་ན་དགུ་བཅུ་རྩ་བརྒྱད་དུ་འགྱུར་རོ། །ཡང་བག་ལ་ཉལ་རྣམ་པ་གསུམ་སྟེ་འདི་ལྟར། ཐམས་ཅད་དུ་འགྲོ་བ་ཆེན་པོ་དང་། ཐམས་ཅད་དུ་འགྲོ་བ་ཆུང་ངུ་དང་། ས་ཆུང་ངུ་བའོ། །ཀུན་དུ་འགྲོ་བ་ཆེན་

པོ་ནི་གཏི་མུག་སྟེ། ཁམས་རེ་རེ་ལ་སྤང་བྱའི་དབྱེ་བ་ཐ་དད་པ་རྣམ་པ་ལྔའོ། །ཀུན་དུ་འགྲོ་བ་ཆུང་ངུ་ནི་དྲུག་སྟེ། འདི་ལྟར། ལོག་པར་ལྟ་བ་དང་། རང་ལུས་ལ་ལྟ་བ་དང་། མཐར་འཛིན་པར་ལྟ་བ་དང་། ལྟ་བ་མཆོག་ཏུ་འཛིན་པ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང་། ཐེ་
ཚོམ་མོ། །ས་ཆུང་ངུ་བ་ནི་གསུམ་སྟེ། འདི་ལྟར། འདོད་ཆགས་དང་། ཁོང་ཁྲོ་དང་། ང་རྒྱལ་ལོ། །ཡང་གསུངས་པ། ཀུན་འགྲོ་ཆེན་པོ་རྨོངས་པའོ། །ཡིད་གཉིས་དང་ནི་ལྟ་བ་ལྔ། །ཀུན་འགྲོ་ཆུང་ངུའོ་ལྷག་མ་ནི། །ཉོན་མོངས་ཆུང་ངུའི་ས་པའོ། །ཞེས་སོ། །ཡང་རྣམ་པ་ལྔ་སྟེ། འདི་ལྟར།
ཐམས་ཅད་དུ་འགྲོ་བ་ཆེན་པོ་དང་། ཐམས་ཅད་དུ་འགྲོ་བ་ཆེན་པོ་དང་མཚུངས་པ་དང་། ཐམས་ཅད་དུ་འགྲོ་བ་ཆུང་ངུ་དང་། ཐམས་ཅད་དུ་འགྲོ་བ་ཆུང་ངུ་ལྟ་བུ་དང་། ས་ཆུང་ངུ་བའོ། །གང་ཀུན་དུ་འགོ་བ་ཉིད་དུ་གསུངས་པ། ཁམས་གསུམ་གྱི་སྡུག་བསྔལ་གྱི་གེགས་དང་ཀུན་འབྱུང་གི་གེགས་
དག་བག་ལ་ཉལ་དེ་ནི་ཀུན་དུ་འགྲོ་བ་ཆེན་པོ་ཉིད་དོ། །བག་ལ་ཉལ་དེ་ཉིད་འགོག་པའི་གེགས་དང་ལམ་གྱི་གེགས་དག་ནི་ཀུན་དུ་འགྲོ་བ་ཆེན་པོ་ལྟ་བུའོ། །གང་ཀུན་དུ་འགྲོ་བ་ཆུང་ངུ་གསུངས་པ། ལྟ་བ་ལྔ་དང་ཐེ་ཚོམ་དེ་ནི་སྡུག་བསྔལ་གྱི་གེགས་དང་ཀུན་འབྱུང་གི་གེགས་དག་ནི་ཀུན་དུ་འགྲོ་བ་ཆུང་
ངུའོ། །དེ་ཉིད་འགོག་པའི་གེགས་དང་ལམ་གྱི་གེགས་ཅི་ལྟར་སྲིད་པ་ནི་ཀུན་དུ་འགྲོ་བ་ཆུང་ངུ་ལྟ་བུའོ། །འདིར་ཅི་ལྟར་སྲིད་པའི་དོན་ཅི་ཞེ་ན། བརྗོད་པར་བྱ་སྟེ། རང་ལུས་ལ་ལྟ་བ་དང་མཐར་འཛིན་པར་ལྟ་བ་དང་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་ཞེས་པ་ལྟ་བ་གསུམ་ནི་ཐམས་ཅད་དུ་
ཡོད་པ་མ་ཡིན་པས་ཐམས་ཅད་དུ་འགྲོ་བ་ལྟ་བུ་ཞེས་པའི་དོན་ཏོ། །ཁམས་གསུམ་གྱི་བསྒོམ་པས་སྤང་བར་བྱ་བ་མ་རིག་པ་དང་། འདོད་པའི་ཁམས་སུ་འདོད་ཆགས་དང་ཞེ་སྡང་དང་ང་རྒྱལ་རྣམས་སྡུག་བསྔལ་དང་ཀུན་འབྱུང་དང་འགོག་པ་དང་བསྒོམ་པས་སྤང་བར་བྱ་བ་ཉིད་ཀྱིས་རྣམ་པ་ལྔའོ། །གཟུགས་
ཀྱི་ཁམས་སུ་འདོད་ཆགས་དང་ང་རྒྱལ་དག་དེ་བཞིན་དུ་རྣམ་པ་ལྔའོ། །དེ་བཞིན་དུ་གཟུགས་མེད་པའི་ཁམས་སུ་རྣམ་པ་ལྔའོ། །འདི་རྣམས་ནི་ས་ཆུང་ངུ་བའོ། །ཡང་གསུངས་པ། ཀུན་དུ་འགྲོ་བར་གསུངས་དེ་གང་། །ཀུན་འགྲོ་ཆུང་ངུ་དང་བཅས་པ། །དེ་དག་སྡུག་བསྔལ་རྒྱུ་མཐོང་བས། །སྤང་བྱར་

ཅི་ལྟར་གསུངས་ཤེས་བྱ། །དེ་འདིར་འགོག་པའི་གེགས་དང་ནི། །ལམ་གེགས་ཅི་ལྟར་སྲིད་པ་རྣམས། །ཀུན་འགྲོ་ལ་སོགས་ལྟ་བུའོ། །ལྷག་མ་གང་དེ་ས་ཆུང་བ། །ཞེས་སོ། །ཡང་འདི་རྣམས་རྣམ་པ་ལྔར་ཅི་ལྟར་གཞག་པར་བྱ་ཞེ་ན། བརྗོད་པར་བྱ་སྟེ། གང་ལས་དེ་རྣམས་
ཀྱི་བྱེད་པ་རྣམ་པ་ལྔ་སྟེ། ཡུལ་ཆེན་པོ་དང་། ཡུལ་ཆེན་པོ་དང་འདྲ་བ་དང་། ཡུལ་ཆུང་ངུ་དང་། ཡུལ་ཆུང་ངུ་དང་འདྲ་བ་དང་། ཆུང་ངུ་བའོ། །ཡུལ་ཀུན་དུ་འགྲོ་བ་ལ་སོགས་པ་དེ་རྣམས་ཀྱི་མཚན་ཉིད་བརྗོད་པར་བྱ་སྟེ། ཐམས་ཅད་དུ་འགྲོ་བ་ཆེན་པོ་རྣམས་ནི་ཆེན་པོ་ཉིད་རྣམ་པ་བཞི་སྟེ། འདི་ལྟར།
དམིགས་པ་ཆེན་པོ་ཉིད་དང་། རྒྱུ་ཆེན་པོ་ཉིད་དང་། བག་ལ་ཉལ་བ་ཆེན་པོ་ཉིད་དང་། ཀུན་དུ་ལྡན་པ་ཆེན་པོ་ཉིད་དོ། །དེ་ལ་ཐམས་ཅད་དུ་འགྲོ་བ་ཆེན་པོ་ནི། ཤེས་བྱ་ཐམས་ཅད་ཀྱང་དམིགས་པར་བྱེད་པས་འདིའི་དམིགས་པ་ཆེན་པོ་ཉིད་དོ། །ཐམས་ཅད་དུ་འགྲོ་བ་ཆེན་པོ་ནི། ཁམས་མཐུན་པ་
དང་སྐལ་བ་མཐུན་པ་དང་མི་མཐུན་པ་རྣམས་ཀྱི་རྒྱུར་གྱུར་པ་དེ་ནི་རྒྱུ་ཆེན་པོ་ཉིད་དོ། དེ་ཐམས་ཅད་དུ་རྗེས་སུ་ཉལ་བར་བྱེད་པས་འདི་ནི་བག་ལ་ཉལ་ཆེན་པོ་ཉིད་དོ། །ཐམས་ཅད་དུ་འགྲོ་བ་ནི་སྐལ་བ་མཐུན་པ་ཐམས་ཅད་ཀྱིས་ཀྱང་ཀུན་དུ་སྦྱོར་བར་བྱེད་པས་འདི་ནི་ཀུན་དུ་ལྡན་པ་ཆེན་པོ་ཉིད་དོ། །
བྱེད་པ་ཆེན་པོ་ཉིད་རྣམ་པ་བཞི་དང་ལྡན་པ་འདིས་ན། རྨོངས་པ་དྲུག་ནི་ཀུན་དུ་འགྲོ་བ་ཆེན་པོ་སྟེ། འདི་ལྟར། འདོད་པ་རུ་སྡུག་བསྔལ་གེགས་དང་། ཀུན་འབྱུང་གེགས་དང་། གཟུགས་སུ་སྡུག་བསྔལ་གེགས་དང་། ཀུན་འབྱུང་གེགས་དང་། གཟུགས་མེད་པ་ལ་སྡུག་བསྔལ་གེགས་དང་ཀུན་
འབྱུང་གེགས་སོ། །ཐམས་ཅད་དུ་འགྲོ་བ་ཆུང་ངུའི་བག་ལ་ཉལ་རྣམས་ནི་ཆེན་པོ་ཉིད་རྣམ་པ་བཞི་སྟེ་འདི་ལྟར། དམིགས་པ་ཆེན་པོ་ཉིད་དང་། རྒྱུ་ཆེན་པོ་ཉིད་དང་། བག་ལ་ཉལ་བ་ཆེན་པོ་ཉིད་དོ། །ཀུན་དུ་ལྡན་པ་ཆེན་པོ་ཉིད་མེད་པས་ཐམས་ཅད་དུ་འགྲོ་བ་ཆུང་ངུ་ཞེས་བརྗོད་དོ། །མ་རིག་པ་
འབའ་ཞིག་གི་ཀུན་དུ་ལྡན་པ་སྟེ། ཕན་ཚུན་ནི་མ་ཡིན་ནོ། །ཐམས་ཅད་དུ་འགྲོ་བ་ཆེན་པོ་ལྟ་བུ་དང་ཐམས་ཅད་དུ་འགྲོ་བ་ཆུང་ངུ་ལྟ་བུ་རྣམས་ཀྱི་ནི་ཆེན་པོ་ཉིད་ནི་གཉིས་ཏེ། འདི་ལྟར། ཁམས་གསུམ་པ་དང་སྐལ་བ་མཐུན་པ་དག་གི་རྒྱུ་ཆེན་པོ་ཉིད་དང་། བག་ལ་ཉལ་བ་ཆེན་པོ་ཉིད་དོ། །མ་རིག་པ་

ནི་ཆེན་པོ་ཉིད་གཉིས་ཏེ། འདི་ལྟར་དམིགས་པ་མེད་པ་ཆེན་པོ་ཉིད་དང་། ཀུན་དུ་སྦྱོར་བ་ཆེན་པོ་ཉིད་དོ། །ལྟ་བ་རྣམས་དང་ཐེ་ཚོམ་དག་ནི་ཆེན་པོ་ཉིད་གཅིག་སྟེ། འདི་ལྟར། དམིགས་པ་ཆེན་པོ་ཉིད་དོ། །དེ་ནས་འདི་ནི་འགོག་པ་དང་། ལམ་གེགས་རྣམས་ནི་དེ་ལྟ་བུའོ། །དེ་ལ་མ་རིག་པ་ནི་ཁམས་
གསུམ་གྱི་འགོག་པ་དང་ལམ་གྱི་གེགས་དག་ཐམས་ཅད་དུ་འགྲོ་བ་ཆེན་པོ་ལྟ་བུའོ། །རང་ལུས་ལ་ལྟ་བ་དང་མཐར་འཛིན་པར་ལྟ་བ་དང་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་ཅེས་པ་ལྟ་བ་གསུམ་དང་། ཐེ་ཚོམ་དག་འགོག་པ་དང་ལམ་གྱི་གེགས་ནི་དེ་དང་འདྲ་བ་སྟེ། ཐམས་ཅད་
དུ་འགྲོ་བ་ཆུང་ངུ་དེ་དང་མཚུངས་པའོ། །ས་ཆུང་ངུ་བའི་བག་ལ་ཉལ་རྣམས་ནི། །ཆེན་པོ་ཉིད་རྣམ་པ་བཞི་སྟེ། ཁམས་མཐུན་པ་སྐལ་བ་མཐུན་པ་ལའོ། །ས་ཅུང་ཞིག་པ་དེ་ཡང་། ཁམས་གསུམ་གྱི་བསྒོམ་པས་སྤང་བར་བྱ་བ་མ་རིག་པ་དང་འདོད་ཆགས་དང་ང་རྒྱལ་རྣམས་འདོད་པའི་ཁམས་
སུ་སྔོན་བཞིན་དུ་རྣམ་པ་ལྔའོ། །གཟུགས་ཁམས་དང་གཟུགས་མེད་པའི་ཁམས་སུ་སྔོན་བཞིན་དུ་རྣམ་པ་ལྔར་རིག་པར་བྱའོ། །བག་ལ་ཉལ་མ་ཡིན་པ་རྣམས་ནི་ཆེན་པོ་ཉིད་གསུམ་སྟེ། འདི་ལྟར། དམིགས་པ་ཆེན་པོ་ཉིད་དང་། རྒྱུ་ཆེན་པོ་ཉིད་དང་། ཀུན་དུ་ལྡན་པ་ཆེན་པོ་ཉིད་དོ། །གང་གི་ཕྱིར་དེ་
ནི་གང་དུ་རྗེས་སུ་ཉལ་བར་མི་བྱེད་ཅིང་། ཀུན་ནས་དཀྲིས་པ་ཙམ་ཉིད་ཡིན་པའི་ཕྱིར་རོ། །ཡང་གསུངས་པ། ཐམས་ཅད་ལ་ནི་དམིགས་པ་དང་། །རང་གི་ཁམས་ཀྱི་རྒྱུ་ཉིད་དང་། །རང་ལ་རྗེས་སུ་ཉལ་ཉིད་དང་། །སྐལ་མཐུན་ཀུན་གྱི་སྦྱོར་བ་ནི། །ཀུན་འགྲོ་ཆེན་པོའི་མཚན་ཉིད་ནི། །ཀུན་དུ་འགྲོ་བ་
ཆུང་ངུ་ནི། །དེ་མ་ཐག་ཏུ་རྣམ་པ་གསུམ། །ཀུན་དུ་སྦྱོར་བ་མེད་ཤེས་བྱ། །འདྲ་བ་རྣམས་དང་ཆུང་རྣམས་ཀྱི། །ཐམས་ཅད་སྐལ་བ་མཉམ་ཉིད་དེ། །མ་རིག་ཙམ་དང་ལྡན་པ་ཉིད། །རྒྱུ་དོན་བག་ལ་ཉལ་འདོན་དང་། །རང་གི་སྐལ་ལ་སྔོན་བཞིན་གཉིས། །འདོད་ཆགས་ལ་སོགས་གསུངས་
རྣམས་ཀྱི། །མཚན་ཉིད་དེ་རྣམས་ཉིད་ཡིན་ནོ། །ཞེས་སོ། །ཉོན་མོངས་པའི་བདུད་ཀྱི་སྡེ་ཚོགས་དེ་རྣམས་ནི་གང་འགྲོ་བ་མ་ལུས་པའི་ཀུན་ནས་ཉོན་མོངས་པའི་རྒྱུའོ། །པཎྜི་ཏ་ཆེན་པོ་སྟོབས་བཅུ་དཔལ་བཤེས་གཉེན་གྱིས་བསྡུས་པ་འདུས་བྱས་དང་འདུས་མ་བྱས་རྣམ་པར་ངེས་པ་ལས་

འཕགས་པ་མང་པོས་བཀུར་བའི་སྡེ་བའི་ལུང་གི་ཚུལ་ལས་བག་ལ་ཉལ་རྣམ་པར་ངེས་པ་ཞེས་བྱ་བ་ལེའུ་བཅུ་བདུན་པའོ།། །།དེ་ལྟར་གྲོལ་བ་འདོད་པས་ཉོན་མོངས་པ་རྣམས་ཀྱི་མཚན་ཉིད་དང་རྣམ་པ་དང་རྒྱུ་ཤེས་པས། བདེ་བ་འབད་པ་མེད་པ་ལ་སོགས་པ་རྣམ་
པར་བསལ་བར་བྱས་ཏེ། རྣམ་པ་མི་ལྡན་པའི་བག་ལ་ཉལ་རྣམས་མེད་པར་བྱེད་པའི་རྒྱུ་ལ་འབད་པ་བརྩམ་པར་བྱའོ། །ཅིའི་ཕྱིར་ཞེ་ན། གང་ལས་སྒྲིབ་པ་མ་ལུས་པ་རྣམ་པར་བསལ་ཡང་། རྣམ་པར་མི་ལྡན་པའི་བག་ལ་ཉལ་དང་ལྡན་པར་གྱུར་ན། ཁམས་གསུམ་པའི་ལས་རྣམས་རྒྱས་
པར་གྱུར་པ་ལས། ཡང་སྲིད་སྐྱེ་བ་ལ་ནུས་པ་ཅན་དུ་འགྱུར་རོ། །དེ་ལྟར་ཡང་། སྲོག་ཆགས་འདི་རྣམས་རྒྱུ་ཡི་འཁོར་ལོ་གཉིས་ཀྱིས་ཡང་དག་ལྡན་པ་ལས། །སྡུག་བསྔལ་རང་བཞིན་འཁོར་བའི་ཤིང་རྟ་ཉེ་བར་སྡོད་པ་མེད་པར་བསྐྱོད། །འདི་ལྟ་སྟེ། ཉོན་མོངས་པའི་འཁོར་ལོས་དང་། ཉོན་མོངས་
པ་ལས་སྐྱེས་པའི་ལས་ཀྱི་འཁོར་ལོས་སོ། །ཡང་གསུངས་པ། དེ་རྣམས་ཡོད་ལས་འཕེལ་འགྱུར་བའི། །ལས་གང་ལས་ནི་འཇིགས་པ་འབྱུང་། །འཁོར་ལོ་གཉིས་ཀྱིས་རྟག་ཏུ་ནི། །སྡུག་བསྔལ་རང་བཞིན་ཤིང་རྟ་འབྱུང་། །ཞེས་སོ། །ཉོན་མོངས་པའི་འཁོར་ལོ་ནི་སྐྱེས་བུ་བྱེད་པས་མ་
ཚང་བར་བྱེད་ནུས་ཏེ། ལས་ཀྱི་འཁོར་ལོ་རྣམས་ཡིན་ནོ། །ལས་ཀྱི་འཁོར་ལོ་ཡང་སྐྱེ་བ་སྔོན་མ་ཡིན། མངོན་པར་འདུ་བྱེད་པ་རང་ཉིད་རྣམ་པར་སྨིན་པ་ལས་མི་ཚང་བར་འགྱུར་རོ། །ཟག་པ་དང་བཅས་པའི་རྒྱུ་དང་འབྲལ་བས་གསར་དུ་སྐྱེ་བར་མི་འགྱུར་རོ། །དེ་ནི་སྡུག་བསྔལ་གྱི་མཐའ་ཉིད་དོ། །
དེ་ལ་ཉོན་མོངས་པའི་རྒྱུ། ལས་ལ་རྣམ་པ་གསུམ་སྟེ། འདི་ལྟ་སྟེ། བསོད་ནམས་དང་། བསོད་ནམས་མ་ཡིན་པ་དང་། མི་གཡོ་བའོ། །དེ་ལ་བསོད་ནམས་མ་ཡིན་པ་ནི། འདོད་པས་བསྡུས་པའི་ཉོན་མོངས་པ་ཅན་ལ་རྣམ་པ་གསུམ་ནི་འདི་ལྟར། ལུས་ཀྱི་དང་། ངག་གི་དང་། སེམས་ཀྱིའོ། །འདི་
ནི་བསོད་ནམས་མ་ཡིན་པའི་ལས་ཀྱི་ཚུལ་མདོར་བསྡུས་པའོ། །དེ་ལ་བསོད་ནམས་མ་ཡིན་པ་ནི་མི་གཙང་བ་དང་མ་དག་པ་དང་མི་དགེ་བའོ། །བསོད་ནམས་ནི་རྣམ་པ་བཞི་སྟེ། འདི་ལྟར། འདོད་པའི་ཁམས་པ་དང་། གཟུགས་ཀྱི་ཁམས་པའོ། །འདོད་པས་བསྡུས་པའི་ལས་ལ་རྣམ་པ་

གཉིས་ནི་འདི་ལྟ་སྟེ། དགེ་བའི་ལས་དང་སྒྲིབ་པ་མ་ཡིན་པའི་ལས་སོ། །གཟུགས་ཀྱིས་བསྡུས་པ་ཡང་གཉིས་ཏེ། འདི་ལྟ་སྟེ། དགེ་བ་དང་། སྒྲིབ་པ་མ་ཡིན་པའོ། །འདི་གཉི་ག་ཡང་སྒོམ་པའི་རང་བཞིན་ཏེ། གང་ན་དབུགས་འབྱུང་འཇུག་ཡོད་པ་ན་ཡོད་དོ། །འདི་ནི་བསོད་ནམས་ཀྱི་
ལས་ཀྱི་ཚུལ་མདོར་བསྡུས་པའོ། །བསོད་ནམས་ནི་གཙང་བ་དང་། དག་པ་དང་དགེ་བའོ། །གང་ན་སྒོམ་པའི་རང་བཞིན་གྱི་ལས་དབུགས་འབྱུང་འཇུག་གི་དངོས་པོ་མེད་པ་དེ་ནི་མི་གཡོ་བའི་ལས་སོ། །འདི་ནི་མི་གཡོ་བའི་ལས་ཀྱི་ཚུལ་མདོར་བསྡུས་པའོ། །སྤྱོད་པར་བྱ་བ་མེད་པའི་མི་གཡོ་
བའི་ལས་སོ། །ཡང་གསུངས་ཏེ། བསོད་མིན་བསོད་ནམས་མི་གཡོ་བ། །ལས་དེ་རྣམ་པ་གསུམ་དུ་འདོད། །དབུགས་དང་བཅས་དང་མཉམ་གཞག་དང་། །དག་པ་གང་འདི་བསོད་ནམས་སོ། །འབྱུང་དང་འཇུག་ལས་རྣམ་པར་གྲོལ། །བསྒོམ་པའི་རང་བཞིན་མི་གཡོ་བའོ། །ཞེས་སོ། །
ཡང་དེ་ནི་རྣམ་པ་ལྔ་སྟེ། འདི་ལྟ་སྟེ། སྡུག་བསྔལ་གྱིས་བསྡུས་པ་དང་། ཀུན་འབྱུང་གེགས་དང་འགོག་པའི་གེགས་དང་། ལམ་གྱི་གེགས་དང་། བསྒོམ་པས་སྤང་བར་བྱ་བའོ། །བསོད་ནམས་མ་ཡིན་པ་དང་བསོད་ནམས་དག་གི་རྒྱུ་ནི་རྣམ་པར་ཤེས་པའི་ཚོགས་དྲུག་ཀའོ། །འདི་ལྟ་སྟེ། མིག་
གི་རྣམ་པར་ཤེས་པ་ནས་ཡིད་ཀྱི་རྣམ་པར་ཤེས་པའི་བར་དུའོ། །མི་གཡོ་བའི་རྒྱུ་ནི་ཡིད་ཀྱི་རྣམ་པར་ཤེས་པ་ཁོ་ནའོ། །དེ་ལ་ལུས་ཀྱི་བསོད་ནམས་མ་ཡིན་པ་ནི་རྣམ་པ་བཞི་སྟེ། འདི་ལྟ་སྟེ། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་སྤྱོད་པ་དང་། མ་བསྡུས་པའོ། །ངག་
གི་རྣམ་པ་བཞི་ནི་འདི་ལྟ་སྟེ། བརྫུན་དུ་སྨྲ་བ་དང་། དབྱེན་དང་། ཚིག་རྩུབ་དང་། ངག་ཀྱལ་པའོ། །ཡིད་ཀྱི་ལས་ལ་རྣམ་པ་གསུམ་ནི་འདི་ལྟ་སྟེ། བརྣབ་སེམས་ཏེ་འདོད་པའི་མཚན་ཉིད་འདོད་པས་བསྡུས་པ་དང་མཚུངས་པར་ལྡན་པའི་སུན་ཕྱུང་བའི་སེམས་པའོ། །གནོད་སེམས་ཏེ་ཞེ་སྡང་གི་
མཚན་ཉིད་ཀྱི་མཚུངས་པར་ལྡན་པས་སུན་ཕྱུང་བའི་སེམས་པའོ། །ལོག་པར་ལྟ་བ་སྟེ། རྨོངས་པའི་མཚན་ཉིད་ཀྱིས་མཚུངས་པར་ལྡན་པའི་སུན་ཕྱུང་བའི་སེམས་ཏེ་ཡིད་ཀྱི་ལས་སོ། །དེ་སྐད་དུ་ཡང་། སྲོག་གཅོད་པ་དང་རྐུ་བ་དང་། །འདོད་ལོག་གཡེམ་དང་རྣམ་འཚེ་བ། །བརྫུན་དང་

དབྱེན་དང་ཚིག་རྩུབ་དང་། །དགོས་པ་མེད་པའི་བརྗོད་པ་དང་། །བརྣབ་སེམས་དང་ནི་གནོད་སེམས་དང་། །ལོག་ལྟ་དེ་རྣམས་བསོད་ནམས་མིན། །ཞེས་སོ། །ཡང་ནི། འདོད་ཁམས་ཀྱིས་བསྡུས་ཉོན་མོངས་ཅན། །ལུས་ངག་ཡིད་ནི་བསོད་མིན་ནོ། །ཞེས་སོ། །དེ་ལ་ལུས་
ཀྱི་རྣམ་པར་རིག་བྱེད་སྲོག་གཅོད་པ་ནི་མཚན་ཉིད་ལྔ་དང་ལྡན་པའོ། །འདི་ལྟ་སྟེ། རང་ལས་གཞན་ཡིན་པ་དང་། སེམས་ཅན་ཡིན་ཞིང་སེམས་ཅན་མིན་པ་མ་ཡིན་པ་དང་། སེམས་ཅན་དུ་འདུ་ཤེས་པ་ཡིན་པ་དང་། བསད་པའི་ཆེད་དུ་སྤངས་པ་དང་། ཤི་བར་གྱུར་པའོ། །སྲོག་གཅོད་པ་ནི་
གསོད་པ་པོའི་ལུས་ཀྱི་རྣམ་པར་རིག་བྱེད་དོ། །ཡང་གསུངས་པ། གཞན་གྱུར་སེམས་ཅན་དེར་འདུ་ཤེས། །སྤངས་དང་གང་ཚེ་འདིར་འདས་པའོ། །ཞེས་སོ། །ལུས་ཀྱི་རྣམ་པར་རིག་བྱེད་ན། །བྱིན་པར་ལེན་པ་ནི་མཚན་ཉིད་ལྔ་ཉིད་དེ། འདི་ལྟ་སྟེ། གཞན་གྱི་ནོར་དུ་གྱུར་པ་དང་། །གཞན་ནོར་
དུ་འདུ་ཤེས་པ་མིན་པ་དང་། རྐུ་བའི་སེམས་སྐྱེས་པ་དང་། གཡོ་ལས་གཡོས་པ་དང་། བདག་གིར་བྱས་པའོ། །ཡང་གསུངས་པ། གཞན་ནོར་དེ་བློ་རྐུ་སེམས་དང་། །འཕོས་དང་བདག་གིར་བྱས་པའོ། །ཞེས་སོ། །འདོད་པས་ལོག་པར་གཡེམ་པ་ལ་རྣམ་པ་གསུམ་ནི་འདི་ལྟ་སྟེ། བགྲོད་བྱ་
མིན་པ་ལ་མངོན་པར་བགྲོད་པའི་འདོད་པས་ལོག་པར་སྤྱོད་པ་དང་། བགྲོད་བྱ་མིན་ལ་ཅི་འགྲོ་བྱའམ་འགྲོ་བྱ་མིན་ཞེས་ཐེ་ཚོམ་ཟ་ཞིང་། གང་སུ་དག་རུང་ཞེས། བགྲོད་བྱ་མ་ཡིན་པ་ཉིད་ལ་མངོན་པར་བགྲོད་པའི་འདོད་པས་ལོག་པར་གཡེམ་པའོ། །གཞན་གྱི་བུད་མེད་དང་སྐྱེས་པ་དང་མ་ནིང་
དང་། རང་གི་ཆུང་མ་ཡང་ལུས་ལས་སྐྱེས་པ་ལས་ཡན་ལག་གཞན་དུ་ཡན་ལག་མ་ཡིན་པ་ལ་མི་ཚངས་པར་སྤྱོད་པ་སྟེ། བཤང་བའི་ལམ་ལ་སོགས་པར་མངོན་པར་བགྲོད་པའི་འདོད་པས་ལོག་པར་སྤྱོད་དོ། །ཡང་གསུངས་པ། བགྲོད་བྱ་མིན་དང་སེམས་གཉིས་དང་ནི་གནས་སྤངས་པའོ། །ཞེས་
སོ། །མ་བསྡུས་པ་ནི་ཁྲོས་པས་སམ་དྲེགས་པས་གསད་པའི་བསམ་པ་མེད་པར་སེམས་ཅན་རྣམས་ལ་གནོད་པར་བྱེད་པའོ། །དེ་ནི་རྣམ་པ་མང་ངོ་། །འདི་ལྟ་སྟེ། སེམས་ཅན་གཞན་ལ་བརྡེག་པ་དང་། །འཇོག་པ་དང་། འཇར་བ་དང་། རྐང་པ་དང་ལག་པ་གཅོད་པ་དང་། ཤིང་གདོས་དང་ལྕགས་

སྒྲོག་ལ་སོགས་པས་འཆིང་བ་དང་། བཙོན་རར་འཛུད་པ་དང་། ཆང་འཐུང་བ་དང་། ཆང་སྐྱེད་པ་དང་། ཆང་འཚོང་བ་དང་། ཆང་སྦྱིན་པ་གཏོང་བ་དང་། ཕབས་བྱེད་པ་དང་། སྲོག་ཆགས་འཚོང་བ་དང་། སྲིན་བུའི་སྦུབས་འཚོང་བ་དང་། རྒྱ་སྐྱེགས་འཚོང་བ་དང་། མ་བཏགས་པར་ཏིལ་དང་ཡུངས་ཀར་འཚོང་
བ་དང་། བགྲོད་བྱ་ལ་མི་ཚངས་པར་སྤྱོད་པ་དང་། གར་དང་། གླུ་དང་། སིལ་སྙན་དང་། རྒོད་པ་སྒྲེག་པ་དང་། འཚོང་བ་དང་། རྐྱལ་པ་དང་། སྡང་བའི་སེམས་ཀྱིས་གདོས་དང་སྒྲོག་ལ་སོགས་པ་སྦྱིན་པ་དང་། མི་ཚངས་པར་སྤྱོད་པའི་བསམ་པས་བུད་མེད་སྦྱིན་པ་དང་། མི་ཚངས་པར་སྤྱོད་པའི་བསམ་
པས་རང་གི་བུ་མོ་སྦྱིན་པ་དང་། ལོག་པར་ལྟ་བ་ཅན་ནམ། གཞན་ལ་ལོག་ལྟ་གསལ་བར་བྱེད་པའི་བསྟན་བཅོས་སྦྱིན་པ་གཏོང་བའམ་འདྲི་བའམ་བཤད་པ་ལ་སོགས་པ་དང་། བསྟན་བཅོས་དེ་ལ་ཡང་དག་པར་འཇོག་པའོ། །གང་ཅུང་ཟད་དེའི་ལས་ཀྱིས་ཡོངས་སུ་འགྱུར་བ་དེ་ཐམས་ཅད་ནི་མ་
བསྡུས་པའི་ལས་སོ། །བརྫུན་དུ་སྨྲ་བའི་གཞི་ལ་བཞི་ནི་འདི་ལྟ་སྟེ། མིག་གིས་མཐོང་བ་དང་། རྣ་བས་ཐོས་པ་དང་། སྣ་ལྕེ་ལུས་ཀྱིས་བསྣོམས་མྱངས་རེག་འདོད་པ་དང་། ཡིད་ཀྱིས་རྣམ་པར་ཤེས་པའོ། །བརྫུན་སྨྲ་བ་ལ་རྣམ་པ་བཅུ་གཉིས་ནི་འདི་ལྟ་སྟེ། མཐོང་ཞིང་མཐོང་བར་འདུ་ཤེས་ལ་མ་མཐོང་
ཞེས་སྨྲ་བ་དང་། མཐོང་ཞིང་མཐོང་བར་འདུ་ཤེས་ལ་ཡིད་གཉིས་སྨྲ་བ་དང་། མཐོང་ཞིང་བརྗོད་དོ་མ་མཐོང་བར་འདུ་ཤེས་ཏེ་མཐོང་ཞེས་སྨྲ་བ་དང་། ཡིད་གཉིས་སྨྲ་བ་དང་། མ་མཐོང་ཞིང་ཐེ་ཚོམ་ཟ་བ་མཐོང་བ་སྨྲ་བ་དང་། མ་མཐོང་བ་སྨྲ་བ་དང་། མཐོང་བ་ལ་ཡང་ཐོས་ཞེས་པ་སྨྲ་བ་དང་། མཐོང་བ་ལ་འདོད་
པར་སྨྲ་བ་དང་། མཐོང་བ་ལ་རྣམ་པར་ཤེས་པ་སྨྲ་བ་དང་། ཐོས་ལ་ཡིད་གཉིས་སྨྲ་བ་དང་། འདོད་ལ་ཡིད་གཉིས་སྨྲ་བ་དང་། རྣམ་པར་ཤེས་པ་ལ་ཡིད་གཉིས་སྨྲ་བའོ། །དེ་རྣམས་ལས་བཟློག་པས་ཡང་བརྫུན་སྨྲ་བ་རྣམ་པ་བཅུ་གཉིས་ནི་འདི་ལྟ་སྟེ། མ་མཐོང་ལ་མ་མཐོང་བར་འདུ་ཤེས་ཤིང་མཐོང་བ་
སྨྲ་བ་དང་། ཐེ་ཚོམ་སྨྲ་བ་དང་། མ་མཐོང་ཞིང་བརྗེད་དེ་མཐོང་བར་འདུ་ཤེས་ཤིང་མ་མཐོང་བ་སྨྲ་བ་དང་། ཐེ་ཚོམ་སྨྲ་བའོ། །མ་མཐོང་ལ་ཐེ་ཚོམ་ཟ་ཞིང་མ་མཐོང་བ་སྨྲ་བ་དང་། མཐོང་བ་སྨྲ་བ་དང་། མ་མཐོང་བ་ཐོས་པ་སྨྲ་བ་དང་། འདོད་པ་སྨྲ་བ་དང་། རྣམ་པར་ཤེས་ལ་སྨྲ་བ་དང་། མ་མཐོང་ལ་ཡིད་གཉིས་

སྨྲ་བ་དང་། འདོད་པ་ལ་ཡིད་གཉིས་སྨྲ་བ་དང་། རྣམ་པར་ཤེས་པ་ལ་ཡིད་གཉིས་སྨྲ་བའོ། །དེས་ན་མཐོང་བའི་རྟེན་ལ་བརྫུན་ནི་སྨྲ་བ་ཉེར་བཞིར་འགྱུར་རོ། །དེ་བཞིན་དུ་ཐོས་པ་ལ་རྟེན་པའི་ཉེར་བཞི་དང་། འདོད་པ་ལ་བརྟེན་པ་ཉེར་བཞི་དང་། རྣམ་པར་ཤེས་པ་ལ་
བརྟེན་པའི་ཉེར་བཞིའོ། །ཉི་ཤུ་བཞི་པ་བཞི་སྟེ་བརྫུན་དུ་སྨྲ་བ་དགུ་བཅུ་རྩ་དྲུག་ཏུ་འགྱུར་རོ། །དབྱེན་ནི་གང་དག་མཛའ་བ་དག་བདེན་པས་འབྱེད་པ་ཉེ་བར་སྒྲུབ་པའི་ངག་གོ། །གནད་འཇོམས་པའི་ངག་ནི་རྩུབ་པོའོ། །ངག་གསུམ་པོ་དེ་ལས་རྣམ་པར་གྲོལ་བ། གང་ཉོན་མོངས་པ་ཅན་གྱི་
ངག་དེ་ནི་ངག་ཀྱལ་པའོ། །ཡང་གསུངས་པ། འདུ་ཤེས་ཕྲོག་དང་འབྱེད་པ་དང་། །འཇོམས་དང་ཉོན་མོངས་ཅན་གྱི་སེམས། །ངག་ནི་རྣམ་པ་བཞི་ཡིན་ནོ། །ཞེས་སོ། །ཡང་རྣམ་པ་གཞན་གྱིས་སྲོག་གཅོད་པ་ལ་སོགས་པ་རྣམས་རྣམ་པ་གསུམ་ནི། དེ་ལ་སྲོག་གཅོད་པ་ནི་རྣམ་པ་གསུམ་
མོ། །འདི་ལྟ་སྟེ། སྲོག་གཅོད་པའི་བསམ་པ་དང་། སྲོག་གཅོད་པའི་ཕྱིར་གཞན་ལ་བཀའ་བསྒོ་བ་དང་། སྲོག་གཅོད་པ་ཉམས་སུ་ལེན་པའོ། །དེ་ལ་སྲོག་གཅོད་པའི་བསམ་པ་ལ་རྣམ་པ་གསུམ་མོ། །འདི་ལྟ་སྟེ། སྲོག་གཅོད་པར་འདོད་པ་དང་། སྲོག་གཅོད་པ་བྱེད་དུ་འཇུག་པར་འདོད་པ་
དང་། གཞན་གྱིས་སྲོག་གཅོད་པར་བྱས་པ་ལ་ཡང་དག་པར་མགུ་བའོ། །དེ་ལྟར་ཡང་། སྲོག་གཅོད་པ་གསད་པར་བྱའོ་ཞེས་འདོད་པ་ཙམ་གྱི་སེམས་བསྐྱེད་པའོ། །དེའི་སེམས་དེ་དང་ལྷན་ཅིག་ཏུ་སྲོག་གཅོད་པ་ལ་མི་ལྡོག་པ་སྐྱེ་སྟེ། དེ་ནས་ཀུན་དུ་མི་དགའ་བའི་བར་དུ་ནི་ཉིན་མོ་དང་མཚན་
མོ་རུ་ཉེ་བར་སྐྱེ་བའི་ངོ་བོ་མི་དགེ་བ་དང་རྗེས་སུ་འབྲེལ་པའི་རྒྱུན་གྱི་རང་བཞིན་རབ་ཏུ་འཇུག་གོ། །བྱེད་དུ་འཇུག་པར་འདོད་པ་ཡང་འདི་ལྟ་སྟེ། གཞན་གྱིས་སྲོག་གཅོད་དུ་འཇུག་པར་བགྱིའོ་ཞེས་སེམས་བསྐྱེད་པའོ། །འདི་ཡང་སྔོན་བཞིན་དུ་ལྡོག་པ་མ་ཡིན་པ་ཉིན་མཚན་དུའོ། །གཞན་གྱིས་བྱས་
པ་ལ་མགུ་བ་ནི། འདི་ལྟ་སྟེ། ཁ་ཅིག་འདིས་སྲོག་གཅོད་ཞེས་མཐོང་བའམ་ཐོས་པ་ན། གང་ལས་བསད་པ་འདི་ནི་ལེགས་པ་བྱས་སོ་ཞེས་དེ་ལ་དེ་ལས་སྐྱེས་པའི་མགུ་བ་སྐྱེའོ། །འདི་ཡིད་སྔོན་བཞིན་དུ་མི་སྤོང་བ་མ་ཡིན་པ་ཉིན་མཚན་དུའོ། །བཀའ་བསྒོ་བ་ཡང་རྣམ་པ་གསུམ་མོ། །འདི་ལྟ་སྟེ།

བསླུས་ཏེ་འཇུག་པ་དང་། ངེས་པར་སྦྱོར་བ་དང་། རྗེས་སུ་གནང་བའོ། །དེ་ལ་བསླུས་ཏེ་འཇུག་པ་ནི། འདི་ལྟ་སྟེ། གཞན་དག་ཁ་ཅིག་ལ་རང་གསོད་པའམ་གཞན་གསོད་པ་ལ་རབ་ཏུ་འཛུད་པའོ། །འདིར་ཡང་སྔོན་བཞིན་མི་ལྡོག་པ་ཉིན་མཚན་དུའོ། །ངེས་པར་སྦྱོར་བ་ནི་འདི་ལྟ་སྟེ། གཡོག་པོ་ཁ་
ཅིག་ལའམ་རྗེ་བོའམ་གཞན་ལ་སྲོག་ཆགས་ངན་པ་འདི་སོད་ཅེས་ངེས་པར་སྦྱོར་བའོ། །འདིར་ཡང་མི་ལྡོག་པའི་ངོ་བོ་སྐྱེ་བར་འགྱུར་བ་ཉིད་སྔོན་བཞིན་ནོ། །སྲོག་གཅོད་པ་རྗེས་སུ་གནང་བ་ནི་འདི་ལྟ་སྟེ། སྲོག་གཅོད་པར་འདོད་པ་ཁ་ཅིག་སྲོག་གཅད་པར་བགྱིའོ་ཞེས་སྤྱི་ནས་དྲི་བའི་མ་བརྗོད་པ་
ནི་དེ་ལྟར་མཛོད་དོ་ཞེས་རྗེས་སུ་གནང་བའམ། མི་སྨྲ་བར་གྱུར་པས་ཀྱང་རྗེས་སུ་གནང་བའོ། །དེའི་མི་སྤོང་བ་ཡང་ལེགས་པར་ཕྱིར་བཅོས་ཀྱི་བར་དུ་ཉིན་མཚན་དུའོ། །ཉམས་སུ་ལེན་པའི་སྲོག་གཅོད་པ་ནི་རྣམ་པ་གསུམ་མོ། །འདི་ལྟ་སྟེ། ལུས་ཀྱིས་སྲོག་གཅོད་པ་ཉམས་སུ་ལེན་པ་དང་། ངག་
གིས་སྲོག་གཅོད་པ་ཉམས་སུ་ལེན་པ་དང་། ཡིད་ཀྱིས་སྲོག་གཅོད་པ་རྗེས་སུ་སྒྲུབ་པའོ། །དེ་ལྟར་མ་བྱིན་པར་ལེན་པ་ལ་སོགས་པ་ངག་ཀྱལ་པའི་མཐར་ཐུག་པ་རྣམས་ལ་སོ་སོར་རྣམ་པ་གསུ