Luận tạng Tây Tạng (Tengyur) — Tập 108

། བཅུ་དགུས་སྟོངས་པར་འགྱུར་རོ། །འཇིག་རྟེན་ཞིག་ནས་བར་གྱི་
བསྐལ་པ་ཉི་ཤུར་གནས་པའི་བར་གྱི་བསྐལ་པ་བརྒྱད་ཅུ་ལ་བསྐལ་པ་ཆེན་པོའོ། །འཕགས་པ་མང་པོས་བཀུར་བའི་སྡེ་པའི་ལུང་ལས་ཀྱང་འདི་ལྟར་རྣམ་པར་གཞག་སྟེ། འདི་ལྟ་སྟེ། འཇིག་རྟེན་ཆགས་བཞིན་པ་ན་དང་པོ་ཉིད་དུ་ཚངས་པའི་གཞལ་ཡས་ནི་འོད་གསལ་ནས་བྱུང་བའོ། །དེའི་རྗེས་སུ་འོད་

གསལ་གྱི་ལྷའི་རིས་ནས་ལྷའི་བུ་གཞན་དག་འཕོས་ནས་རང་གི་ལས་ལས་སྐྱེས་པ་སྐུ་ལུས་དཀར་བ་ཚངས་པ་ཞེས་པ་ཚངས་པའི་གཞལ་ཡས་དེ་ཉིད་དུ་སྐྱེས་སོ། །དེའི་ཚེ་དེ་བར་གྱི་བསྐལ་པ་བཅུར་བསམ་གཏན་ལ་སྙོམས་པར་ཞུགས་པར་གྱུར་ཏོ། །དེ་ནས་བསྐལ་པ་ཉི་ཤུའི་མཐའ་རུ་ཚངས་པ་དེ་གཅིག་པུ་སྐྱེ་
བར་གྱུར་པས། ཀྱེ་མ་འདི་ཉིད་དུ་སེམས་ཅན་གཞན་དག་ཀྱང་སྐྱེ་བར་འགྱུར་རོ་ཞེས་བསམས་པ་དང་། དེས་བསམས་པ་ཉིད་ཀྱིས་དེ་མ་ཐག་ཏུ་རང་རང་གི་ལས་ཀྱིས་དེ་དག་ཏུ་ཚངས་པའི་འཁོར་གྱི་ལྷ་རབ་ཏུ་མང་བ་ཀུན་དུ་བྱུང་ངོ་། །དེ་ཡང་ཚངས་པ་རང་གིས་བསམས་མ་ཐག་ཉིད་དུ་བྱུང་བ་དེ་རྣམས་
མཐོང་ནས། བདག་ནི་འདི་རྣམས་ཀྱི་སྐྱེད་བྱེད་ཞེས་ལོག་པའི་ང་རྒྱལ་སྐྱེས་པར་གྱུར་ཏོ། །དང་པོར་སྐྱེས་པ་རྫུ་འཕྲུལ་ཆེན་པོ་དང་ལྡན་པའི་ཚངས་པ་དེ་དག་ཚངས་འཁོར་གྱི་ལྷ་རྣམས་ཀྱིས་མཐོང་ནས་ཀྱང་འདིས་བདག་སྐྱེད་པས་བདག་གི་བྱེད་པ་པོ་ཞེས་ཁས་བླངས་སོ། །ཚངས་འཁོར་གྱི་ལྷ་དེ་ཡང་
བསྐལ་པ་གཅིག་ཏུ་གནས་སོ། །དེའི་འོག་ཏུ་བསྐལ་པ་གཅིག་གིས་ཚངས་རིས་ཀྱི་ལྷ་རྣམས་བྱུང་ངོ་། །དེ་ནས་བསྐལ་པ་གཅིག་གིས་ཚངས་པ་མདུན་ན་འདོན་གྱི་ལྷའོ། །དེ་ནས་བསྐལ་པ་གཅིག་གིས་འདོད་པའི་གནས་སའི་རྩེ་མོ་གཞན་འཕྲུལ་དབང་བྱེད་ཀྱི་ལྷའོ། །དེ་ནས་བསྐལ་པ་གཅིག་གིས་
འཕྲུལ་དགའི་ལྷའོ། །དེ་ནས་བསྐལ་པ་གཅིག་གིས་དགའ་ལྡན་གྱི་ལྷའོ། །དེ་ནས་བསྐལ་པ་གཅིག་གིས་འཐབ་བྲལ་གྱི་ལྷའོ། །འདི་རྣམས་ཐམས་ཅད་ནི་རང་རང་གི་ལས་ཀྱིས་གཞལ་ཡས་ཁང་དང་བཅས་ནས་གྲུབ་པའོ། །དེའི་ཕྱི་ནས་འཐབ་བྲལ་གྱི་ལྷ་རྣམས་ཀྱིས་སྐྱེ་བ་སྔོན་དང་སྔོན་
དུ་བྱུང་བའི་མཐའ་རྣམས་ཡང་དག་པར་དྲན་ནས། སྔོན་དང་སྔོན་དུ་ཉམས་སུ་མྱོང་བར་གྱུར་པའི་རི་རབ་ལ་སོགས་པ་རྣམས་མཐོང་བར་འདོད་པས། རང་གི་གཞལ་ཡས་ནས་འོག་ཏུ་འོངས་ཏེ། ནམ་མཁའི་ཕྱོགས་འདི་ན་ནི་རི་རབ་ཡོད་པར་གྱུར་ལ། རི་རབ་ཀྱི་སྟེང་འདི་ན་ནི་བརྒྱ་བྱིན་ལྷ་
རྣམས་ཀྱི་དབང་པོའི་གྲོང་ཁྱེར་བྱུང་བར་གྱུར་ཏོ། །འདི་རུ་གཉའ་ཤིང་འཛིན་ལ་སོགས་པའི་རི་བོ་རྒྱུད་བདུན་བྱུང་བར་གྱུར་ཏོ། །འདི་རུ་རྒྱ་མཚོ་བྱུང་བའོ། །འདི་རུ་ནི་འཛམ་བུའི་གླིང་གནས་པ་ཡིན་ཞེས་པ་རྣམས་དྲན་པ་སྔོན་དུ་འགྲོ་བས་འདི་ནས་དེ་ནས་འཆགས་པ་ནས་ལུས་ལས་རླུང་བྱུང་

ནས་སྟེང་འོག་དང་འཁོར་བར་རབ་ཏུ་བརྐྱང་སྟེ་ཤིན་ཏུ་ཆེ་བ་འཕེལ་བར་སོང་བར་གྱུར་ཏོ། །དེའི་ཚེ་སྟེང་ནས་སེམས་ཅན་རྣམས་ཀྱི་ཐུན་མོང་གི་ལས་ལས་སྐྱེས་པའི་སྤྲིན་མི་ཟད་པའི་སྒྲ་སྒྲོགས་པ་གློག་གི་ཕྲེང་བ་དང་ལྡན་པ་ལས་ཤིན་ཏུ་ཆེས་མང་བའི་ཆུ་འབབ་པར་གྱུར་ཏོ། །
དེའི་ཚེ་རླུང་དེ་ཟབ་པ་གཏིང་དཔག་དཀའ་བ་དེས་ཀྱང་ཆུའི་ཕུང་པོའི་འོག་དང་སྟེང་དང་ཁོར་ཡུག་ཏུ་བསྐོར་ཏེ་གཞི་རྟེན་བྱས་སོ། །དེ་ནས་རིམ་གྱིས་འབྱུང་བ་ཆེན་པོའི་སྙིང་པོར་གྱུར་པ་ལ་ཆུའི་སྟེང་དུ་འདམ་གྱི་ཡོལ་བ་བྱུང་བར་གྱུར་ཏོ། །འོ་མ་བསྐོལ་བའི་སྤྲིས་མ་བཞིན་ནོ། །དེའི་འོག་ཏུ་རླུང་དེས་ཁུ་བའི་རང་བཞིན་
འདམ་གྱིས་གཡོགས་པར་གྱུར་པའི་འདག་པ་ལས། རི་རབ་དང་རི་བོ་རྒྱུད་བདུན་དང་ཁོར་ཡུག་དང་རོལ་མཚོ་བདུན་དང་ས་དང་རྒྱ་མཚོ་ལ་སོགས་པའི་རང་བཞིན་སྣོད་ཀྱི་འཇིག་རྟེན་བཟོས་པར་གྱུར་ཏོ། །དེ་ནས་ཕྱོགས་བཞིར་ཡོངས་སུ་བརྟགས་པ་ཉིད་དོ། །དེ་ལ་ལྷོ་ཕྱོགས་སུ་འཛམ་བུ་གླིང་དང་། ནུབ་ཕྱོགས་སུ་
བ་ལང་སྤྱོད་ཀྱི་གླིང་དང་། བྱང་ཕྱོགས་སུ་བྱང་གི་སྒྲ་མི་སྙན་དང་། ཤར་ཕྱོགས་སུ་ཤར་གྱི་ལུས་འཕགས་སོ། །དེ་ནས་རིམ་གྱིས་ལས་ལས་སྐྱེས་པའི་རླུང་གིས་སྲ་བ་ཉིད་དུ་བྱས་ཏེ། རི་རབ་ལ་སོགས་པ་རི་བོ་དགུ་རྣམས་རིན་པོ་ཆེ་སྣ་ཚོགས་ཀྱི་རང་བཞིན་དུ་སྐྱེས་སོ། །ས་གཞི་ནི་འདག་པའི་རང་བཞིན་ཁོ་
ནའོ། །དེའི་རྗེས་སུ་མཐོ་བ་དང་དམའ་བར་གྱུར་ཏེ་སྣོད་མ་ལུས་པ་རྣམས་ཀྱི་བར་བར་དུ་སྟོང་པར་གྱུར་པས་སོ། །ཡང་ཐུན་མོང་གི་ལས་ལས་སྐྱེས་པའི་སྤྲིན་ལས་བྱུང་བའི་ཆུ་བོའི་རྒྱུན་གྱིས་ཡོངས་སུ་གང་བར་གྱུར་ཏོ། །དེ་ནས་རི་རབ་ཀྱི་སྟེང་གྲུ་བཞི་རུ་མཐོན་དུ་ལངས་པའི་ཅོག་བཞི་ཡང་དག་པར་གྲུབ་པོ། །
དེའི་རྗེས་སུ་རྒྱལ་པོ་ཆེན་པོ་པའི་ལྷ་རྣམས་རི་རབ་ཀྱི་སྟེང་ཐོབ་པར་མི་འགྱུར་བ་བསོད་ནམས་ཆུང་བ་རྣམས་འབྱུང་བར་འགྱུར་བ་དག་གནས་པའི་ཕྱིར། རི་རབ་ཀྱི་ལོགས་ལ་བསྐོར་བའི་རྣམ་པས་འཁོར་མོ་བཞིའོ། །མིང་གཞན་བང་རིམ་ཞེས་བརྗོད་དོ། །དེའི་རྗེས་སུ་ཐུན་མོང་བའི་ལས་ལས་རི་རབ་ཀྱི་སྟེང་
དུ་དབང་པོ་དང་བཅས་པའི་ལྷ་རྣམས་ཡང་དག་པར་བྱུང་ངོ་། །དེའི་རྗེས་སུ་རི་རབ་ཀྱི་སྟེང་དུ་བརྒྱ་བྱིན་ལྷའི་དབང་པོའི་གནས་གྲོང་ཁྱེར་བལྟ་ན་སྡུག་ཅེས་པ་བྱུང་ངོ་། ཆོས་བཟང་ལྷའི་འདུན་ས་ལ་སོགས་པ་རྣམ་པ་སྣ་ཚོགས་པ་མཐའ་མེད་པ་བྱུང་བར་གྱུར་ཏོ། །གཉའ་ཤིང་འཛིན་ལ་སོགས་པའི་རི་རྣམས་

ལ་ཡང་རྒྱལ་ཆེན་པའི་ལྷ་རྣམས་གནས་པ་དང་། ཡུལ་འཁོར་སྐྱོང་ལ་སོགས་པ་རྒྱལ་པོ་བཞིས་ནང་དུ་བརྒྱན་པའི་འཁོར་མོ་བཞི་ཀུན་དུ་བྱུང་ངོ་། །འདི་དག་ཐམས་ཅད་བསྐལ་པ་གཅིག་གིས་ཏེ་བཅོ་བརྒྱད་ཀྱིས་ཆགས་སོ། །དེའི་རྗེས་སུ་རང་རང་གི་ལས་ལས་ཡང་དག་པར་བྱུང་བ་ནམ་མཁའ་ལ་
སྤྱོད་པ་བུད་མེད་སྐྱེས་པ། མ་ནིང་གི་རྣམ་པར་དབྱེ་བ་སྤངས་པ་རང་འོད་དང་ལྡན་པའི་མི་རྣམས་སྐྱེས་སོ། །དེ་ནས་དུས་རིང་བ་ན་རང་འོད་ཅན་གང་ཡང་རུང་བས་ས་གཞི་ཞག་གི་རང་བཞིན་ཁྱད་པར་ཅན་ཡིད་དུ་འོང་བའི་དྲི་དང་ལྡན་པ་མཐོང་སྟེ་ཆགས་པར་གྱུར་པས་ས་ཞག་དེ་རྣམས་ལ་མངོན་
པར་འཚལ་ལོ། །དེ་དང་འདྲ་བར་རང་འོད་ཅན་གཞན་གྱིས་ཀྱང་མངོན་པར་འཚལ་ལོ། །དེ་ནས་ཁ་ཟས་ཀྱི་སྦྱོར་བ་དེ་དང་འདྲ་བར་ལུས་ཀྱི་འོད་ཟད་པར་གྱུར་ཅིང་ལུས་ལྕི་བ་ཉིད་དུ་གྱུར་ཏོ། །ས་ལ་སྤྱོད་པ་ཡང་གྱུར་ཏོ། །དེའི་ཚེ་མུན་པ་ཆེན་པོར་གྱུར་པ་ལ། སེམས་ཅན་རྣམས་ཀྱི་ཐུན་
མོང་གི་ལས་ཀྱིས་དུས་གཅིག་ཏུ་ཤར་གྱི་ལུས་འཕགས་སུ་རྒྱུ་སྐར་སྐག་དང་ལྡན་པར་ཉི་མ་དང་། བ་ལང་སྤྱོད་དུ་རྒྱུ་སྐར་གྲོ་བཞིན་དང་ལྡན་པར་ཟླ་བ་ཡང་དག་པར་བྱུང་ངོ་། །འདི་ཙམ་གྱི་བསྐལ་པ་གཉིས་རྫོགས་ཏེ་བསྐལ་པ་ཉི་ཤུས་འཆགས་པའི་གནས་སྐབས་རྫོགས་སོ།། །།
འདི་ནས་བཟུང་སྟེ་ཆགས་པའི་གནས་སྐབས་བརྗོད་པར་བྱ་སྟེ། དེ་བཞིན་དུ་ས་ལ་སྤྱོད་པ་རྣམས་ལ་ཉི་མ་དང་ཟླ་བས་སྣང་བར་བྱེད་དོ། །སའི་བཅུད་ཞག་སྦྲང་རྩི་ལྟ་བུ་མང་དུ་ཟོས་པས་ཁ་དོག་ངན་པར་གྱུར་ཏོ། །ཉུང་ངུ་ཟོས་པས་ཁ་དོག་བཟང་དུ་གྱུར་ཏོ། །དེ་ལ་ཁ་དོག་བཟང་བའི་མིས་
ཁ་དོག་ངན་པའི་མི་རྣམས་ལ་བརྙས་པ་བྱས་སོ། །དེའི་ཚེ་ཡང་ཞག་ནུབ་པར་གྱུར་ཅིང་། སའི་ཞག་ཁུར་བ་ལྟ་བུ་བྱུང་ངོ་། །སའི་ཞག་ཁུར་བ་ཟ་ཡང་གང་མང་དུ་ཟ་བ་དེ་དམན་པར་གྱུར་ལ། ཉུང་ངུ་ཟ་བ་མཆོག་ཏུ་གྱུར་ཏོ། །དེ་ཁོ་ན་བཞིན་དུ་ཡིད་དགའ་བར་གྱུར་པས། ང་རྒྱལ་འཕེལ་ཞིང་གྱ་ནོམ་
པར་གྱུར་ཏོ། །ང་རྒྱལ་སྟོབས་ལྡན་དུ་གྱུར་པས་ས་ཞག་ཁུར་བ་ཡང་ལོག་པར་གྱུར་ཏོ། །དེའི་རྗེས་སུ་ས་གཞི་ལས་སྦྲང་རྩི་ལྟ་བུའི་ཚལ་བྱུང་ངོ་། །དེ་ཡང་སྐྱེ་བོས་ཟོས་པས་ང་རྒྱལ་འཕེལ་བར་གྱུར་ཏོ། །དེ་ནས་ས་ཞག་ཚལ་ཡང་ལོག་པར་གྱུར་ཏོ། །དེ་རྗེས་སུ་སྦུན་མ་མེད་པ་མ་ཆགས་པ་དྲི་བཟང་བ་ཤིན་ཏུ་འཇམ་

པ་ཆེས་མྱང་བདེ་བ་སྦྲང་རྩི་ལྟ་བུ་དཀར་བ་མ་རྨོས་པའི་འབྲས་སཱ་ལུ་རྣམས་ས་ལས་སྐྱེས་སོ། །སཱ་ལུ་དེ་ལས་ཟོས་པས་སྐྱེས་པ་དང་བུད་མེད་ཐ་དད་དུ་བྱེད་པའི་རྟགས་ཀྱི་གཞི་བྱུང་བར་གྱུར་ཏོ། །དེའི་ཚེ་བུད་མེད་ཀྱི་རྟགས་བྱུང་བ་མཐོང་བས་སྐྱེ་བོ་གཞན་རྣམས་སྨོད་པར་གྱུར་ཏོ། །
དེའི་ཚེ་ངོ་ཚ་དང་བཅས་པའི་སྐྱེས་པ་དང་བུད་མེད་རྣམས་རྟགས་སྒྲིབ་པའི་ཕྱིར་ཡིད་བཞིན་གྱི་ན་བཟའ་རྣམས་བྱུང་ངོ་། །དེ་ནས་སྐྱེས་པ་བུད་མེད་རྣམས་ཕན་ཚུན་རྣམས་མཐོང་བས་གཉིས་སྤྲོད་ཀྱི་ཆགས་པ་སྐྱེས་སོ། །གཞན་དེ་རྣམས་ལ་ཤིན་ཏུ་ཆགས་པས་འཁྲིག་པ་བསྟེན་པར་བྱས་སོ། །འཁྲིག་པ་བསྟེན་
པའི་མི་དེ་དག་ལ་གཞན་རྣམས་ཤིན་ཏུ་ཆེས་སྨོད་པར་བྱེད་དོ། །དེ་ནས་འཁྲིག་པའི་ཐ་སྙད་རབ་ཏུ་རྒྱས་པས་འཁྲིག་པའི་དོན་དུ་སྒྲིབ་པའི་ཕྱིར་ཁང་པ་བྱས་སོ། །སྐྱེ་བོ་རྣམས་ཀྱིས་སྔ་བར་བཟའ་བའི་ཕྱིར་སཱ་ལུ་སྔ་བར་ལེན་ནོ། །དགོངས་མོ་བཟའ་བའི་དོན་དུ་དགོངས་མོ་ལེན་ནོ། །དེའི་བསོད་ནམས་དགོངས་
མོ་རྔས་པ་ནང་པར་སྐྱེ་བར་གྱུར་ཏོ། །ནང་པར་རྔས་པ་དགོངས་མོ་སྐྱེ་བར་གྱུར་ཏོ། །དེ་ལྟར་མི་རྣམས་ཁྱིམ་དུ་གནས་པའི་མི་རྣམས་ཁ་ཅིག་གིས་མི་གཞན་རྣམས་ལ་སྨྲས་པ། བཟའ་བའི་དུས་སུ་འཚོགས་ཞེས་སྨྲའོ། །དེའི་ཚེ་ལེ་ལོའི་རིགས་ཅན་མི་འགའ་ཞིག་གིས་ཡང་འབྲས་སཱ་ལུ་མང་དུ་བླངས་ཏེ།
ཁྱིམ་གང་བར་བྱས་སོ། །དེ་མཐོང་ནས་གཞན་རྣམས་ཀྱིས་ཀྱང་དེ་བཞིན་དུ་བྱས་སོ། །གཞན་རྣམས་ཀྱིས་ཡང་སྨྲས་པ། གང་གིས་དང་པོ་ཉིད་དུ་སཱ་ལུ་རྣམས་བླངས་ཞེས་སོ། །གཞན་གྱིས་ཡང་སྨྲས་པ། འདིས་སོ་ཞེས་སོ། །དེ་བཞིན་དུ་ཐམས་ཅད་ཀྱིས་དེ་བཞིན་དུ་བྱས་པས་འབྲས་སཱ་ལུ་ཡང་ནུབ་
པར་གྱུར་ཏོ། །དེ་ནས་གྲངས་བཞིན་མི་རྣམས་ཀྱིས། །བསྐལ་པ་གཉིས་གཉིས་བགྲོད་པ་ནི། །ཞག་ཁུར་ཚལ་དང་སཱ་ལུའི་ཟས། །དེས་ན་བསྐལ་པ་བརྒྱད་སོང་ངོ་། །དེ་ནས་བསྐལ་པ་དགུ་པ་འཇུག་པ་ན། ཤིན་ཏུ་ཆགས་པས་འབྲས་སཱ་ལུ་དཀར་པོ་མེད་ཅིང་སྦུན་མ་དང་བཅས་པ་ཆགས་པ་དང་བཅས་པ་ལུས་ལ་ཡང་
ཤིན་ཏུ་ཕན་པ་མ་ཡིན་པ་བྱུང་བར་གྱུར་ཏོ། །དེའི་ཚེ་སྐྱེ་བོ་རྣམས་ཀྱིས་འབྲས་སཱ་ལུ་དཀར་བ་མ་ཡིན་པ་ལ་སོགས་པ་སྐྱོན་མཐོང་བས་སྨོད་པར་བྱེད་དེ། ངན་པ་འདི་བདག་ཅག་རྣམས་ཀྱི་ཚུལ་མ་ཡིན་པ་ཡིན་ནོ་ཞེས་སོ། །དང་པོ་ཉིད་དུ་སྦྲང་རྩི་ལས་ཆེས་ལྷག་པའི་སའི་བཅུད་ཞག་མེད་པར་གྱུར། དེ་ནས་

སྦྲང་རྩི་ལས་ལྷག་པའི་སའི་བཅུད་ཁུར་བ་མེད་པར་གྱུར། དེ་ནས་སྦྲང་ཆུང་རྩི་ལྟ་བུའི་ཚལ་ཡང་ནུབ་པར་གྱུར། ཤིན་ཏུ་ཆགས་པས་མཆོག་ཏུ་དཀར་བ་ལ་སོགས་པའི་ཡོན་ཏན་དང་ལྡན་པ་འབྲས་སཱ་ལུ་ཡང་རྣམ་པར་ཉམས་སོ། །ཀྱི་ཧུད་བདག་ནི་ཆགས་པས་རྣམ་པར་ཉམས་སོ། །བདག་ད་ནི་ལེགས་
པར་ཆར་བྱས་ཏེ་བགོ་བར་བྱས་ན་ཕུན་སུམ་ཚོགས་པ་བསྟན་པར་འགྱུར་རོ་ཞེས་སོ། །དེ་ནས་དབང་པོའི་དཀྱིལ་དུ་ཁྱིམ་བྱས་ཏེ་ས་རྣམ་པར་བགོ་བར་བྱས་སོ། །དེའི་སའི་བགོ་བ་བྱས་པ་ན། སྐྱེས་བུ་རེ་རེ་དཔག་ཚད་དྲུག་གི་ཚད་ཙམ་ཞིང་བདག་གིར་བཟུང་ངོ་། །ཡང་ས་ཆེན་པོ་ལ་དཔག་ཚད་བཞི་
བཞི་རེ་རེ་ལ་བྱིན་ཏོ། །དེ་ནས་ཡང་ཆོས་མ་ཡིན་པ་ལ་གཞོལ་བས་ཡིད་བཞིན་གྱི་ན་བཟའ་ནུབ་པར་གྱུར་ཏོ། །དེའི་ཚེ་དེ་རྣམས་ཀྱི་ཐུན་མོང་གི་ལས་ལས་རས་བལ་སྐྱེས་སོ། །དེ་ནས་ཆགས་པའི་རིགས་ཅན་མི་འགའ་ཞིག་གིས་གཞན་གྱི་སཱ་ལུ་རྐུ་བ་བྱས་སོ། །སཱ་ལུ་རྐུ་བར་བྱེད་པ་དེ་ལ།
མི་འགའ་ཞིག་གིས་ཡང་སྨྲས་པ། ཀྱེ་ཁྱོད་ཀྱིས་སྤྱོད་པ་ངན་པ་དང་འཇུག་ཚུལ་ངན་པ་བྱས་སོ། །སྐྱེ་བོ་ཐམས་ཅད་ནི་ལུགས་ངེས་པས་གནས་ཏེ། ཁྱོད་ལ་ཡང་ཞིང་རྨོས་པ་སཱ་ལུ་ཡོད་དོ། །དེས་ན་ཚུལ་མ་ཡིན་པ་འདི་ལས་ལོག་ཅེས་སོ། །སཱ་ལུ་རྐུ་བྱེད་དེ་ཡང་སཱ་ལུ་རྐུ་བར་མི་བྱའོ་ཞེས་
དམ་བཅས་ཀྱང་། ཡང་དང་ཡང་དུ་གཞན་རྣམས་ཀྱི་སཱ་ལུ་རྐུ་བར་བྱེད་དོ། །དེས་དེ་བཞིན་དུ་བྱས་པས་སྐྱེས་བུ་དེ་ལ་སྐྱེས་བུ་གཞན་རྣམས་ཀྱིས་ཤིན་ཏུ་རྣམ་པར་བཙོགས་སོ། །དེའི་ཚེ་སྐྱེ་བོ་ཐམས་ཅད་ཀྱིས་རྐ་ལག་ལ་སོགས་པར་མཚོན་ཆས་བརྒྱབ་པའི་རྐུན་པོའི་ལུས་དེ་མཐོང་བས། སྐྱེ་བོ་
གཞན་རྣམས་ཀྱིས་སྨོད་པར་བྱེད་དོ། །གཞན་གྱི་ནོར་ཕྲོག་པར་བྱེད་པ་ནི་སྡུག་བསྔལ་ལོ། །དེའི་རྒྱུ་མཚན་གྱིས་ཕན་ཚུན་རྩོད་པའོ། །རྒྱུ་དེ་ལས་ཅ་ཅོ་ཆེན་པོ་ཡང་བྱུང་ངོ་། །དེའི་ཚེ་ཡང་མི་རྣམས་ཐམས་ཅད་ཀྱིས་མི་བདེ་བས་འཚོགས་ཏེ་ཕན་ཚུན་བཀའ་གྲོས་མཛད་དོ། །དེ་ནི་འདི་ལྟར་བྱེད་པར་རིགས་
ཏེ། འདི་ལྟར་མི་གང་ཞིག་དགེ་བའི་ཚུལ་ལུགས་ངེས་པ་དེ་ལས་མི་འདའ་བའི་སྐྱེས་བུ་ཤིན་ཏུ་ཁྱད་པར་ཅན་མི་རྣམས་ཀྱི་བདག་པོར་བྱའོ། །གང་དང་རྗེས་སུ་མཐུན་པའི་ཚར་གཅོད་བྱེད་པ་ནམ་ཡང་རྣམ་པར་མི་འགྱུར་བའོ། །སྐྱེ་བོ་ཐམས་ཅད་ཀྱི་འཐད་པ་ཇི་ལྟ་བ་བཞིན་དུ་ཚར་གཅོད་པ་དང་།

རྗེས་སུ་འཛིན་པ་བྱེད་པ་དེའི་ཚུལ་ལུགས་མ་ཡིན་པས་གོས་པར་མ་གྱུར་པ་ཡོན་ཏན་ཐམས་ཅད་ཀྱིས་ལུས་ཅན་རྣམས་ཀྱི་བླ་མར་གྱུར་པའོ། །ཐམས་ཅད་འདི་དག་གི་རྗེས་སུ་ཡི་རང་ཞིང་རྗེས་སུ་འདུན་པར་གྱུར་ཏོ། །དེ་ནས་སྐྱེས་བུ་དེས་དམ་པ་འགའ་ཞིག་གི་དྲུང་དུ་སྨྲས་པ། གང་ལས་
མི་རྣམས་ད་ལྟར་འཐད་པ་མ་ཡིན་པ་ལ་འཇུག་པའི་སྐྱོན་དང་། གང་ཡང་ཉིན་རེ་བཞིན་དུ་འབྱོར་པ་ཉམས་པར་གྱུར་པ་ནི་ཁྱོད་ཀྱིས་མཁྱེན་ནོ། །འདི་ལྟ་བུ་མི་རྣམས་ཀྱི་མི་འཐད་པ་བཟློག་པ་ལ་ཁྱོད་མ་གཏོགས་པ་འགའ་ལ་ནུས་པ་མེད་དོ། །སྐྱེ་བོ་འདི་རྣམས་ཀྱི་འབྲས་སཱ་ལུ་དྲུག་ཆ་ཁྱོད་ལ་སྟེར་བར་
འགྱུར་རོ། །ཁྱོད་ཀྱིས་མི་འདི་རྣམས་འཐད་པ་ཅི་ལྟ་བ་བཞིན་དུ་ཡོངས་སུ་སྐྱོངས་ཤིག །ས་འདི་ཡང་སྲུངས་ཤིག །དེའི་ཚེ་སྐྱེས་བུ་ཤིན་ཏུ་ཁྱད་པར་ཅན་དེ། ཚིག་དེ་དག་ཁས་བླངས་ཤིང་སྐྱེ་བོ་དེ་རྣམས་ཀྱི་བསམ་པའི་དོན་ཡོངས་སུ་རྫོགས་པར་བྱའོ། །དེ་མ་ཐག་ཏུ་མི་དེ་རྣམས་ཀྱིས་སྐྱེས་བུ་མཆོག་
དེ་ལ་རྒྱལ་པོར་དབང་བསྐུར་བས་མངོན་པར་བཀུར་རོ། །དེ་སྐྱེ་བོའི་ཚོགས་ཆེན་པོས་ཡང་དག་པར་འདུན་པ་དང་། དགའ་བར་མཛད་པས་རྒྱལ་པོའོ། །ཚིག་བར་མ་ཕྱིས་ཏེ་མང་པོས་བཀུར་བ་ཆེན་པོ་ཞེས་པའི་རྒྱལ་པོ་བྱུང་བར་གྱུར་ཏོ། །དེའི་མིང་ཞིང་རྣམས་ཀྱི་བདག་པོ་ཡིན་པ་ཉིད་ཀྱིས་ཀྵེ་ཏྲི་ཡ་ཞེས་
པར་གྱུར་ཏོ། །རྒྱལ་པོའི་དཔལ་འབྱོར་ཀུན་དུ་ཐོབ་བོ། །མི་སྲུན་པའི་སྐྱེ་བོ་ཚར་གཅོད་ཅིང་ཞི་ལེགས་སྐྱེ་བོ་རྗེས་སུ་འཛིན་པར་བྱེད་ཅིང་། ས་རྣམས་ཀྱི་བདག་པོར་གྲགས་ནས་མི་ཕན་པ་སྤོང་ཞིང་ཕན་པ་སྒྲུབ་པོ། །ཚུལ་མ་ཡིན་པ་བཏང་ཞིང་རྣམ་པར་འཛིན་ནོ། །དེ་ནས་སྐྱེ་བོ་གཞན་ཡང་ཚུལ་མ་
ཡིན་པ་བྱེད་ཅིང་གཞན་དག་ཚུལ་བཞིན་བྱེད་དོ། །དེའི་རྗེས་སུ་སྐྱེ་བོ་རྣམས་སྐྱོན་རྣམས་ཀྱི་འབྱུང་གནས་འདོད་ཆགས་སྐྱེས་སོ། །དེའི་རྗེས་སུ་ཁོང་ཁྲོ་སྐྱེས་སོ། །དེའི་རྗེས་སུ་ང་རྒྱལ་ཡང་དག་པར་བྱུང་ངོ་། །དེའི་རྗེས་སུ་དགེ་བའི་རྗེས་སུ་མཐུན་པ་ཡང་དག་པ་ཇི་ལྟ་རྣམས་སྦེད་པར་བྱེད་པའི་རྨོངས་
པ་བྱུང་ངོ་། །དེ་རྗེས་སུ་མ་བྱིན་པར་ལེན་པ་བྱུང་ངོ་། །དེ་ནས་གཞན་གྱི་བུད་མེད་ལ་འགྲོ་བའོ། །དེ་ནས་བརྫུན་སྨྲ་བའོ། །དེ་རྗེས་སུ་དབེན་ནོ། །དེ་ནས་ཚིག་རྩུབ་པའོ། །དེ་ནས་ཚིག་ཀྱལ་པའོ། །དེ་ནས་གཞན་མནར་བའི་མཚན་མ་གནོད་སེམས་སོ། །དེ་ནས་གཞན་གྱི་ནོར་བསླུ་

བའི་མཚན་མ་བརྣབ་སེམས་སོ། །དེ་ནས་ལྟ་བ་ལོག་པ་བྱུང་ངོ་། །རྣམ་པ་དེ་ལྟ་བུར་འཚེ་བ་ལ་སོགས་པ་སྐྱོན་རྣམས་ཡོངས་སུ་འཛིན་པའི་ཚོགས་པ་ལས་བྱུང་ངོ་། །དེ་ལྟར་ཁ་ཅིག་ཕྱོགས་ཀྱི་འཕེལ་བ་མཐོང་ནས་སེམས་སྐྱོ་བས་ཡོངས་སུ་འཛིན་པ་སྤངས་ཏེ་ནགས་སུ་གནས་པར་གྱུར་
ཏོ། །དེ་ནི་སྡིག་པ་ཀུན་མི་སྐྱེད་པས་པྲ་ཧྨ་ཎ་ཞེས་འཇིག་རྟེན་རྣམས་བརྗོད་དོ། །དེ་རྣམས་ཀྱི་ནང་ནས་གང་ཞིག་བསམ་གཏན་ཡོངས་སུ་སྤངས་ཏེ། རང་ཉིད་ཀྱིས་སྔགས་ཀྱི་ཚིག་སྤྲོས་ནས་འདོན་པ་དེ་ལས་འདོན་བྱེད་ཅེས་པའི་མིང་ཐོབ་པར་གྱུར་ཏོ། །གང་ཞིག་ནགས་སུ་གནས་པར་མི་དགའ་
བ་ལྷག་པར་ཆེས་གནས་ལ་དགའ་བ་ཞིང་གི་ལས་ལ་ཤིན་ཏུ་སྤྱོད་པ་དེ་ལ་དམངས་རིགས་ཞེས་འཇིག་རྟེན་གྱི་མིང་དུ་བཏགས་སོ། །གཞན་དག་ཁྱིམ་ལ་དགའ་ཞིང་བཟོའི་ཆ་སྣ་ཚོགས་ལ་རབ་ཏུ་སྦྱོར་བ་དེ་ལ་གདོལ་རིགས་ཞེས་འཇིག་རྟེན་གྱི་མིང་དུ་བྱས་སོ། །དེ་ལྟར་རིགས་བཞི་རྣམས་
ལ་གང་ཞིག་རྐུ་བ་དེ་ལ་གཅིག་ཏུ་དགའ་བ་དེ་ལ་གཏུམ་པོ་ཞེས་པའི་དེ་རྣམས་ཀྱིས་གནོད་པ་བྱེད་པས་གཏུམ་པོ་ཞེས་འཇིག་རྟེན་གྱི་མིང་དུ་བཏགས་སོ། །དེ་རྗེས་སུ་འབྲས་སཱ་ལུ་རྣམས་བཅུད་ཉམས་པས་སྨད་པར་བྱ་བར་འགྱུར་རོ། །དེ་རྗེས་སུ་སཱ་ལུ་བརྔས་པའི་ས་ཕྱོགས་སུ་རྗེས་སུ་བཟའ་བ་རྣམ་པ་སྣ་
ཚོགས་བྱུང་བར་གྱུར་ཏོ། །འདི་ལྟ་སྟེ། ནས་དང་གྲོ་དང་ཏིལ་དང་རྒྱ་སྲན་དང་མོན་སྲན་རྡེའུ་དང་མོན་སྲན་གྲེའུ་ལ་སོགས་པའོ། །དེ་ལ་ཏིལ་ནི་བཅུད་ཀྱིས་ཤིན་ཏུ་གང་བ་དང་ལྡན་པས་ཆང་བས་བཟང་བས་མར་ནག་གི་རྒྱུན་གསུམ་འཛག་པར་གྱུར་ཏོ། །ནས་ལ་སོགས་པ་རྣམས་ཀྱང་སེམས་ཅན་དེ་རྣམས་
ཀྱི་བསོད་ནམས་ལས་དེ་དང་རྗེས་སུ་མཐུན་པའི་བཅུད་བྱུང་བར་གྱུར་ཏོ། །དེའི་རྗེས་སུ་པགས་པ་དང་ལོ་མ་ལ་སོགས་པ་དང་བྲལ་བ་གྱ་ནོམ་པ་མངར་བ་རྗེས་སུ་མཐུན་པའི་བཅུད་ཅན་བུ་རམ་ཤིང་མཆོག་གིས་ས་སྟེང་རྣམ་པར་བརྒྱན་པར་གྱུར་ཏོ། །དེ་རྗེས་སུ་རྫུས་སྐྱེས་ཀྱི་བ་མོ་རང་ཉིད་ཀྱིས་འོ་མའི་རྒྱུན་རབ་ཏུ་
འབབ་པ་བྱུང་ངོ་། །དེའི་ཚེ་འོ་མའི་རྒྱུན་འབབ་པའི་གཡོ་བས་འོ་མ་ལས་མར་སར་བྱུང་བར་གྱུར་ཏོ། །མར་གསར་ལས་མར་གྱི་ཉིང་ཁུ་བྱུང་ངོ་། །ཞུན་མར་ལས་མར་གྱི་སྙིང་པོ་བྱུང་ངོ་། །དེ་རྗེས་སུ་རང་དུལ་བ་གླང་པོ་ཆེ་དང་རྟ་ལ་སོགས་པ་ཐེག་པའི་ཁྱད་པར་རྣམས་བྱུང་བར་གྱུར་ཏོ། །དེའི་ཚེ་དཔལ་

ལྡན་མང་པོས་བཀུར་བའི་མི་བདག་ལ་རིན་པོ་ཆེ་བདུན་བྱུང་བར་གྱུར་ཏོ། །འདི་ལྟ་སྟེ། བུད་མེད་རིན་པོ་ཆེ་དང་། སྐྱེས་བུ་རིན་པོ་ཆེ་དང་། རྟ་རིན་པོ་ཆེ་དང་། གླང་རིན་པོ་ཆེ་དང་། འཁོར་ལོ་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བློན་པོ་རིན་པོ་ཆེའོ། །དེའི་ཚེ་རྒྱལ་
པོ་མང་པོས་བཀུར་བ་ཆེན་པོ་ཕན་འདོགས་པ་མ་ལུས་པ་དང་ལྡན་པས། སྐྱེ་བོ་མ་ལུས་པའི་འདོད་པ་མ་ཡིན་པའི་རྣམ་པ་རྣམས་ནུབ་པར་གྱུར་ཏོ། །དེས་ན་འབངས་རྣམས་ཡོ་བྱད་ཐམས་ཅད་ཕུན་སུམ་ཚོགས་པས་ཤིན་ཏུ་རིང་བ་ཉིད་དུ་བདེ་བར་གྱུར་ཏོ། །སེམས་ཅན་དེ་རྣམས་ཀྱི་ལུས་དབྱིབས་
ལ་ཆ་མཛེས་པ་དགེ་བའི་སྣང་བའི་འོད་ཀྱི་ཚུལ་གྱིས་རྣམ་པར་བརྒྱན་པར་གྱུར་ཏོ། །སེམས་ཅན་དེ་རྣམས་མྱུར་དུ་འཆི་བ་ཡང་བྱུང་ངོ་། །དེ་ནས་དུས་རིང་དུ་གྱུར་པ་ན་རྒྱལ་པོ་ཆེན་པོ་མང་པོས་བཀུར་བ་ཤི་བར་གྱུར་ཏོ། །དེའི་བུ་དང་ཚ་བོ་ལ་སོགས་པ་རྒྱལ་བུ་མང་དུ་བྱུང་ཞིང་ཤི་བར་གྱུར་ཏོ། །
དེ་ནས་དེའི་འཁོར་རྣམས་ཐམས་ཅད་ཤིའོ། །མི་བདག་ལ་མི་བདག་རྣམས་ཀྱིས་དབང་རྣམས་བསྐུར་ནས་མི་ཡི་བདག་པོའི་རྒྱུད་ནི་དེང་སང་གི་བར་དུ་ཡང་རྗེས་སུ་འཇུག་གོ། །དེ་ལྟར་ས་རྣམས་དག་ཀྱང་རིམ་གྱིས་རྙིངས་པར་གྱུར་ཅིང་རྙིངས་པར་གྱུར་ནས་ཕུན་སུམ་ཚོགས་པ་ཡོངས་སུ་སྤངས་ཤིང་
ཡོངས་སུ་སྤངས་ནས་གསར་བ་འགྲིབ་པར་འགྱུར་བ་དང་འབྲེལ་ལོ། །ཡང་གསུངས་ཏེ། དེ་ལྟར་ཡང་། བདག་པོ་དང་བྲལ་བུད་མེད་ལྟ་བུ་པ་རྣམས་ནི། །ལྷག་པའི་དཔལ་དང་རྣམ་པར་བྲལ་ཞིང་རྙིངས་པར་གྱུར། །ཞེས་སོ། །དེའི་ཚེ་ལུས་ཅན་ལྷག་མ་རྣམས་ཀྱིས་ཆོས་དང་བྲལ་བར་ཉེ་བར་
འོངས་པ་དང་། ཡོ་བྱད་ཀྱི་ཚོགས་པ་ཟད་པ་མཐོང་ནས་ཐོང་ལྕགས་དང་བཅས་པའི་གཤོལ་སྟོབས་ཀྱི་གླང་པོ་ལྟ་བུར་བདག་ཉིད་ཀྱིས་ཁུར་ཏེ་བརྩོན་པར་བྱེད་དོ། །དེའི་ཚེ་སྟོབས་ཀྱི་གླང་པོའི་ཚོགས་ཀྱིས་བདག་པོའི་མི་དེ་རྣམས་ལ་འདི་སྐད་སྨྲས་སོ། །གཤོལ་ཐོང་འདི་དག་ནི་སྤོངས་ཤིག་
བདག་ཉིད་ཀྱིས་བསྐུར་བར་བྱའོ། །འབྲས་བུའི་དུས་སུ་འབྲས་བུའི་རྣམ་པའི་ཆ་རྣམས་བྱིན་ཅིག་ཅེས་སོ། །དེ་བཞིན་དུ་ཁས་བླངས་པ་བྱས་ནས་དེ་ནས་དེ་དག་ཞིང་པ་ལྟར་ཞིང་རྨོ་བར་བྱེད་དོ། །མི་རྣམས་ཀྱིས་སྟོབས་ཀྱི་གླང་པོ་ལ་བགོས་པའི་ཆ་སྟེར་རོ། །དེ་བཞིན་དུ་རྟ་དང་གླང་པོ་ཆེ་ལ་

སོགས་པ་རྣམས་ཀྱང་ཅི་དང་ཅི་མཐོང་བ་དེ་དང་དེ་ལྟར་སྨྲས་ཏེ་མི་རྣམས་ཀྱི་ཞོན་པ་ལ་སོགས་པ་རྣམས་སུ་གྱུར་ཏོ། །དེའི་ཚེ་བ་རྣམས་ཀྱི་འོ་མ་རང་ཉིད་ཀྱིས་མི་སྟེར་ཞིང་སྦྱོར་བ་དེ་དང་དེར་འོ་མ་བབས་པར་གྱུར་ཅིང་མི་རྣམས་འཚོགས་ནས་འཇོ་བར་བྱེད་པར་གྱུར་ཏོ། །བུ་རམ་ཤིང་ཡང་ལོ་མས་རང་
གི་ལུས་ལ་བསྒྲིབས་པའི་རྣམ་པར་གྱུར་ཏོ། །ཏིལ་ལ་སོགས་པའི་འབྲུ་རྣམས་ཀྱང་རིམ་གྱིས་བཅུད་ཉམས་པ་ཉིད་དུ་གྱུར་ཏོ། །དེ་ལྟར་བཟའ་སྟོན་རྣམས་ཀྱང་རྣམ་པར་ཉམས་པས་མི་རྣམས་ཀྱི་ཚེ་ལ་སོགས་པ་ཡང་འགྲིབ་པར་གྱུར་ཏོ། །དེའི་རྗེས་སུ་ཤིན་ཏུ་རྒྱས་པས་སྟོབས་ཀྱི་གླང་པོ་ལ་ཞིང་
ཐོག་གི་བགོས་པའི་སྐལ་བ་མི་སྟེར་བར་གྱུར་ཏོ། །དེ་ནས་ལོ་ཐོག་གི་བགོས་པའི་ཆ་མ་ཐོབ་པར་གྱུར་པས་སྟོབས་ཀྱི་གླང་པོ་གཤོལ་ཐོང་ཁུར་བ་ལ་གཡོ་སྒྱུ་རྣམ་པར་འཛིན་པར་གྱུར་ཏོ། །མི་རྣམས་ཀྱིས་སྟོབས་ལྡན་གླང་རྣམས་ཀྱི་གཡོ་སྒྱུ་མཐོང་ནས་དེ་རྣམས་ཀྱི་སྣ་ཕུག་གོ། །དེའི་ཚེ་
སྟོབས་ལྡན་གླང་རྣམས་ཀྱི་སྨྲ་བ་ཡང་ནུབ་པར་གྱུར་ཏོ། །དེའི་སྟོབས་ཀྱིས་ཁྱུ་མཆོག་རྣམས་སྙིང་རྗེ་མེད་པའི་མི་རྣམས་ཀྱི་དབང་དུ་སོང་བར་གྱུར་ཅིང་བསྐུར་དཀའ་བའི་ཐོང་གཤོལ་དང་གཞན་ཡང་ཁུར་ཁུར་བར་བྱེད་དོ། །དེ་བཞིན་དུ་རྟ་དང་གླང་པོ་ལ་སོགས་པ་ཡང་རང་ཉིད་ཀྱིས་དུལ་བ་མེད་
པར་གྱུར་ཏོ། །ངེས་པ་དང་མ་ངེས་པའི་དབྱུ་གུ་བསྣུན་པས་ཁ་ཕྱིར་ཕྱོགས་པར་གྱུར་ཏེ་བརྟན་པོར་གྱུར་པའི་ཐག་གུས་བཅིངས་སོ། །དེ་ནས་སྔོན་སྟེར་བ་སྔོན་དུ་འགྲོ་བས་བ་གླང་སྐྱོང་གིས་བ་གླང་འཇོ་བར་གྱུར་ཏོ། །བུ་རམ་ཤིང་ཡང་ལྕགས་པས་གཡོགས་ཤིང་རབ་ཏུ་བརྩོན་པས་བཅུད་ཁུ་བ་བྱུང་
བར་གྱུར་ཏོ། །ཏིལ་ལ་སོགས་པ་ཡང་ཆེས་བཅུད་དང་བྲལ་བར་གྱུར་ཏོ། །དེ་བཞིན་དུ་ཡང་འཇིག་རྟེན་མི་རྣམས་དེ་འདྲ་བར་བཟའ་བ་ལ་སོགས་པ་རོ་དང་ཆེས་བྲལ་བར་གྱུར་ཅིང་མི་རྣམས་ཡང་དང་ཡང་དུ་ཟད་པར་གྱུར་པ་ཐོབ་བོ། །དེའི་རྗེས་སུ་རིམ་གྱིས་སྙིགས་མ་ལྔས་སུན་ཕྱུང་བའི་འཇིག་རྟེན་ནི་རབ་ཏུ་
འཇུག་སྟེ། གང་སྐྱེས་བུ་དམ་པར་འདུན་པ་མཐུན་པའི་སྐྱེས་བུ་དེ་ལྟ་བ་ལོག་པས་དྲེགས་པ་ཆོས་མ་ཡིན་པའི་ལམ་མི་རྣམས་ལ་སྟོན་པར་བྱེད་དོ། །མི་དེ་རྣམས་ཀྱང་ཆོས་མ་ཡིན་པ་རྗེས་སུ་འགྲོ་བའི་ཕོངས་པས་གདུངས་པ། འཚོ་བའི་ཡོ་བྱད་དོན་དུ་ཆེས་སྲེད་པ་ཞིང་ལས་དང་ཕྱུགས་སྐྱོང་དང་གཡོག་དང་ཉོ་

ཚོང་ལ་སོགས་རབ་ཏུ་སྒྲུབ་པར་འགྱུར་རོ། །དེ་རྗེས་སུ་ཡོ་བྱད་ཚོགས་པ་རྣམས་ཆེས་ཤིན་ཏུ་རྣམ་པར་ཉམས་སོ། །ངལ་བ་ཆེན་པོས་བདེ་བའི་ཆ་ཙམ་ཅི་ལྟར་ཡང་སྒྲུབ་པར་མ་གྱུར་ཏོ། །ངལ་བ་ཆེན་པོས་བསྐྱེད་པའི་ཏིལ་དང་བུ་རམ་ཤིང་ལ་སོགས་པ་དང་། བ་ལང་དང་མ་ཧེ་མི་ལ་
སོགས་པ་ངལ་བ་ཆེན་པོས་བཅུད་རྣམས་ཕྱུང་བར་གྱུར་ཏོ། །ངལ་བ་ཆེན་པོས་བསྐྱེད་པའི་འབྲུ་ལ་སོགས་པ་ཡང་སྲ་བ་ལ་སོགས་པའི་སྐྱོན་དང་ལྡན་པ་ཉིད་དུ་བྱུང་བར་གྱུར་ཏོ། །དེ་ནས་མི་རྣམས་བཟའ་བ་དམའ་བས་བགྲོད་པས་ཚེ་ལ་སོགས་པ་ཤིན་ཏུ་ཆེས་ཡོངས་སུ་ཉམས་པ་རབ་ཏུ་བྱུང་ངོ་། །དེ་རྗེས་
སུ་ཡུལ་དང་ཡུལ་དུ་ཆེས་རིང་བར་གྲོང་དང་གྲོང་ཁྱེར་དང་གྲོང་རྡལ་ལ་སོགས་པ་མི་རྣམས་ཀྱི་གནས་ཀྱི་རྣམ་པར་སྤྲས་སོ། །དེ་ལྟར་དུས་དང་དུས་རྣམས་ཡོངས་སུ་འགྱུར་བར་གྱུར་པ་ཉིད་ན། སངས་རྒྱས་བཅོམ་ལྡན་འདས་འཁོར་བ་འཇིག་ཅེས་པ་བྱུང་བར་གྱུར་ཏོ། །དེ་ནས་དེ་དག་ཡོངས་སུ་མྱ་
ངན་ལས་འདས་ནས་དུས་ཆེས་རིང་བ་ན་དེ་བཞིན་གཤེགས་པ་གསེར་ཐུབ་བྱུང་ངོ་། །དེ་ནས་དེ་དག་ཡོངས་སུ་མྱ་ངན་ལས་འདས་ནས་དུས་ཆེས་རིང་བར་གྱུར་པ་ན་ཐུབ་པ་ཆེན་པོ་འོད་སྲུངས་ཞེས་པ་བྱུང་བར་གྱུར་ཏོ། །དེ་དག་ཡོངས་སུ་མྱ་ངན་ལས་འདས་ནས་ཆེས་རིང་བ་ན་རྩོད་ལྡན་གྱི་དུས་
ཞེས་པ་དུས་ཐ་མ་ལ་བདག་ཅག་གི་སྟོན་པ་དེ་བཞིན་གཤེགས་པ་ཤཱཀྱ་ཐུབ་པ་ཞེས་བྱ་བ་འཇིག་རྟེན་དུ་བྱུང་ངོ་། །སྟོན་པ་བཅོམ་ལྡན་འདས་ཤཱཀྱ་ཐུབ་པ་དེ་ནི་འགྲོ་བ་རྣམས་ཀྱི་སྡིག་པའི་སྒྲུབ་པ་མཆོག་ཏུ་འཆགས་པའོ། །བཅོམ་ལྡན་འདས་དེ་ཡང་འགྲོ་བ་རྣམས་ཀྱི་འགྲོ་བ་དྲུག་གི་
འཁོར་བའི་སྡུག་བསྔལ་རྣམ་པར་ཉམས་པར་བྱེད་པའི་ཐར་པའི་ལམ་རབ་ཏུ་གསལ་བར་བྱེད་པའོ། །ལམ་དེས་མཐའ་མེད་པའི་དམ་པའི་སྐྱེ་བོའི་ཚོགས་རྣམས་ཀྱི་སྡུག་བསྔལ་མ་ལུས་པ་ཉེ་བར་ཞི་བའི་རང་བཞིན་ཐར་པའི་གྲོང་སྟོན་པར་བྱེད་པའོ། །དེ་ལྟར་གྱུར་པའི་ལམ་མཆོག་ཏུ་གྱུར་པ་ལྷ་
དང་མི་རྣམས་ལ་ཉེ་བར་བསྟན་ཏོ། །དེ་བཞིན་གཤེགས་པ་སྒྲོན་མ་དེས་དམ་པའི་ཆོས་ཀྱི་སྒྲོན་མ་རྒྱུད་དུ་བཞག་ནས་རང་ཉིད་ཡོངས་སུ་མྱ་ངན་ལས་འདས་སོ། །དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་ཟླ་བ་གཉིས་པ་ཨཱ་པརྷའི་ཟླ་བ་དཀར་པོའི་ཕྱོགས་ཀྱི་བཅུ་གསུམ་ལས་

འདོད་ཆགས་དང་བྲལ་བའི་དགེ་སློང་ལྔ་བརྒྱས་སངས་རྒྱས་ཀྱི་བསྟན་པ་ལོ་མ་བདུན་པའི་ཕུག་ཏུ་ཡང་དག་པར་བསྡུ་བར་མཛད་དོ། །ཡང་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་ལོ་བརྒྱར་གྱུར་པ་ན་འདོད་ཆགས་དང་བྲལ་བ་དགེ་སློང་བདུན་བརྒྱས་ཆོས་ཡང་དག་པར་བསྡུ་
བ་མཛད་དོ། །ཡང་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་ལོ་བཞི་བརྒྱ་ན་དཀའ་ཐུབ་ཀྱི་དགེ་འདུན་ལ་དགེ་འདུན་ཐ་དད་དུ་གྱུར་པས་རང་རང་གི་སྡེ་པར་གནས་པ་ལ་གནས་མ་བུ་པཱ་ར་བཱཏྶི་པུ་ཏྲས་སྡེ་པ་གཅིག་གི་ཚེ་བསྡུས་སོ། །དེ་ནས་བཟུང་སྟེ་སྡེ་པ་དེ་ལས་ཆོས་སྨྲ་བྱེད་བཱཏྶི་
པུ་ཏྲ་ཞེས་བརྗོད་དོ། །ཡང་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ནས་ལོ་བདུན་བརྒྱ་ན་གནས་བརྟན་ཐུབ་པ་མང་པོས་བཀུར་བས་སྡེ་པ་དེའི་ལུང་ཉིད་བསྡུ་བ་མཛད་དོ། །དེ་ནས་བཟུང་སྟེ་སྡེ་པ་དེ་ལ་མང་པོས་བཀུར་བའི་སྡེ་པ་ཞེས་བརྗོད་དོ། །ཡང་དེ་བཞིན་གཤེགས་པ་ཡོངས་
སུ་མྱ་ངན་ལས་འདས་ནས་ལོ་བརྒྱད་བརྒྱ་ན་གནས་བརྟན་བྷུ་ཏི་ཀ་དང་སངས་རྒྱས་བཤེས་གཉེན་གྱིས་སྡེ་པ་དེའི་ལུང་རྣམས་བསྡུ་བ་ཉིད་དུ་བྱས་སོ། །འདི་ནི་མང་པོས་བཀུར་བའི་སྡེ་པའི་ཆོས་བསྡུ་བ་ལན་ལྔ་ཞེས་བརྗོད་དོ། །བྷུ་ཏི་ཀ་དང་སངས་རྒྱས་བཤེས་གཉེན་དེ་གཉིས་ཀྱིས། སྦུན་པ་བྱུང་
བ་ནས་བཟུང་སྟེ། འདི་ནི་ཆགས་པའི་བསྐལ་པ་དགུ་པོའི་ཞེས་གསུངས་སོ། །གཙོ་བོའི་དོན་བརྗོད་པར་བྱ་སྟེ། ད་ལྟ་ནི་ད་ནི་ཏིལ་བུར་ཤིང་ཞོ་ལ་སོགས་པ་ལས་རིམ་པ་བཞིན་དུ་མར་ནག་ཁུ་བ་མར་ལ་སོགས་པའི་སྙིང་པོ་རྣམས་ཤིན་ཏུ་ཆེས་ཉུང་བ་སྐྱེ་བར་འགྱུར་རོ། །ཏིལ་ལ་སོགས་པ་
རྣམས་སེམས་ཅན་གྱི་སྐལ་བའི་དབང་ལས་དིང་སང་ཡང་འབྱུང་བར་ཤེས་པར་བྱའོ། །མ་འོངས་པའི་བསྐལ་པའི་མཐའ་རུ་མུ་གེ་ནད་མཚོན་ཞེས་པ་འཇིག་པ་གསུམ་གྱི་མེ་འབྱུང་བར་འགྱུར་བའི་དུ་བ་འཐུལ་བ་ལྟ་བུ་ད་ལྟ་མཚོན་པའོ། །ད་ལྟ་ད་ནི་ཡང་མི་རྣམས་བདག་ཉེ་བར་མནར་བའི་ཕྱིར་
སེར་སྣ་ཉེས་སྤྱོད་ཁྲོ་བ་ལ་སོགས་པའི་བུད་ཤིང་གིས་འཇིག་པའི་མེ་དེ་རྣམས་ཀུན་དུ་འབར་བར་བྱེད་དོ། །གང་ལས་ད་ནི་ཆར་ཆེ་བ་ཆར་མེད་པ་ཕྱོགས་གཅིག་ཏུ་འབབ་པ་དུས་མ་ཡིན་པའི་ཆར་ལ་སོགས་པ་དེ་དག་གིས་མུ་གེ་འཕེལ་བར་བྱེད་དོ། །དེས་ན་མུ་གེའི་འཇིག་པ་ངེས་པར་འབྱུང་

བར་འགྱུར་རོ། །ནད་དང་མཚོན་གྱི་འཇིག་པ་ནི་འདི་དག་གི་ལྷན་ཅིག་པའི་འཁོར་ཡིན་ནོ། །དེ་ལ་མུ་གེ་ཅན་གྱི་འཇིག་རྟེན་ན་བཟའ་བ་ལ་སོགས་པ་ཆེས་རྙེད་དཀའ་བ་འབྱུང་བར་འགྱུར་རོ། །དེའི་ཚེ་ཡང་གཞན་གྱི་ནོར་ལེན་པ་དང་ལུས་ཅན་རྣམས་བསད་ནས་ཤས་འཚོ་
བའི་བསྐལ་པ་འབྱུང་བར་འགྱུར་རོ། །ཡུལ་ལྗོངས་གྲོང་ཁྱེར་གྲོང་རྡལ་ལ་སོགས་པ་ནི་གནས་པའི་འཇིག་རྟེན་ཡང་ཡོ་བྱད་སྒྲུབ་པར་དཀའ་བ་དང་རིམ་གྱིས་ཟད་པར་འགྱུར་རོ། །དེ་ཕྱིས་མི་འཐད་པ་འཇུག་པའི་མི་རྣམས་ཀྱིས་དུས་དྲུག་པོ་སྤང་བར་གྱུར་ཅིང་ཀུན་དུ་སྤྱོད་པས་ཡོ་བྱད་སུན་འབྱིན་པར་འགྱུར་རོ། །
དེ་ནས་ཉེ་བར་འཚེ་བ་དང་ལྡན་པའི་སྡིག་པ་ཡོངས་སུ་སྨིན་པ་ཐོབ་པས་ཤ་ཟའི་ཚོགས་རྗེས་སུ་སྤྱོད་པས་ན་ནད་རྣམ་པ་སྣ་ཚོགས་པ་འབྱུང་བར་འགྱུར་རོ། །དེས་ན་གང་གི་ཚེ་ནད་སྣ་ཚོགས་དང་ཤ་ཟ་སྣ་ཚོགས་ཀྱིས་རབ་ཏུ་གཙེས་པའི་མི་རྣམས་དེའི་ཚེ་ནད་ལ་སོགས་པ་ཞི་བའི་དོན་དུ། འཚེ་བའི་བདག་ཉིད་ཀྱིས་སྦྱིན་
སྲེག་བྱས་པས་ཉེ་བར་འཚེ་བ་འཕེལ་བར་འགྱུར་རོ། །འདིར་ཡུལ་འཁོར་གྲོང་ཁྱེར་ལ་སོགས་པ་རྣམས་སུ་ནད་ཀྱིས་མི་རྣམས་ཟད་པར་འགྱུར་རོ། །འདི་ཕྱིས་ཉེ་བར་ལོངས་སྤྱོད་པ་ཚོལ་བའི་མི་རྣམས་ཕན་ཚུན་འཚེ་བའི་སེམས་པས་མཚོ་ཆེན་པོ་ལྡང་བར་འགྱུར་རོ། །འདི་ལྟ་སྟེ། ཤར་དང་
བྱང་ན་ཡོད་པ་དང་། ནུབ་དང་ལྷོ་ན་ཡོད་པའི་མིའི་བདག་པོ་རྣམས་ཀྱིས། ཕན་ཚུན་ཉེ་བར་ཉེད་པའི་དོན་དུ་མངོན་པར་བགྲོད་པ་འབྱུང་བར་འགྱུར་རོ། །རྒྱལ་པོ་རྣམས་ནི་ཕན་ཚུན་ཀུན་དུ་འཁྲུག་པ་བྱས་ཏེ་རྒྱལ་བ་དང་ཕམ་པ་ཡང་དང་ཡང་དུ་ཉམས་སུ་ལེན་པར་འགྱུར་རོ། །ཆགས་
པའི་བུད་ཤིང་གིས་བསླང་བའི་ཁྲོ་བའི་མེས་རྒྱལ་པོ་རྣམས་ཕན་ཚུན་བསྲེག་ཅིང་། རང་གི་དགེ་བ་རྣམས་ཡོངས་སུ་ཟད་ཅིང་རྣམ་པར་ཉམས་པར་བྱེད་དོ། །ལྷག་མ་ཡུལ་དང་གྲོང་དང་རྒྱུད་རྣམས་ཕན་ཚུན་རྣམ་པར་ཉམས་པར་བྱེད་དོ། །ལས་ངན་པ་ལས་སྐྱེས་པས་རྩྭ་ལ་སོགས་པ་ལ་རེག་
པས་མཚོན་དུ་འགྱུར་བ་ན་གཉིས་གསུམ་མམ་ལྔ་དྲུག་ཡང་ཕན་ཚུན་སྤུན་པར་འགྱུར་རོ། །ལོ་དང་། ཟླ་བ་དང་ཉི་མ་རྣམས་རིམ་པ་བཞིན་དུ་བདུན་བདུན་བདུན་མུ་གེ་དང་ནད་དང་མཚོན་གྱི་འཇིག་པ་གསུམ་མོ། །དེ་ནས་འཇིག་པ་གསུམ་གྱི་དེ་མ་ཐག་ཏུ་ལྷག་མ་ལུས་པའི་མི་རྣམས་

གཟུགས་སྲིད་དུ་དང་ཞེང་དུ་དང་སྟོབས་ལ་སོགས་པ་རྣམས་ཉམས་པས་ཚེ་ལོ་བཅུ་པ་ལོ་བདུན་ཅུར་གནས་པར་འགྱུར་རོ། །འདིས་ན་སྡིག་པ་ལ་གཅིག་ཏུ་གཞོལ་བའི་མིའི་འཇིག་རྟེན་རབ་ཏུ་མང་བ་རྣམས་ཆེས་ཆེར་དམན་པའི་ངན་འགྲོར་འགྲོ་བར་འགྱུར་རོ། །འཇིག་པ་གསུམ་པོ་རྣམས་
འདིར་ཉེ་བར་འདས་ནས། མི་རྣམས་ཀྱི་ནང་ན་ཁ་ཅིག་འགའ་ཞིག་ཏུ་གཞན་རྣམ་པར་བྲལ་བར་མཐོང་ནས། མི་རྣམས་བྱམས་པའི་བསམ་པ་སྐྱེ་བར་འགྱུར་རོ། །སྡིག་པ་ཆེན་པོའི་དུས་སུ་ཡང་ལེགས་པའི་ལམ་མ་དོར་བ་འགའ་ཞིག་གིས་ཀྱང་ལྷག་མ་ལུས་པ་མཐོང་ནས་སྐྱེ་བོ་རྒྱུན་
ཆད་པར་གྱུར་ཅིག་ཅེས་བསམ་ཞིང་དེ་རྣམས་བསྲུང་བར་འགྱུར་རོ། །དེའི་ཚེ་མི་དེ་རྣམས་བྱམས་པའི་རང་བཞིན་གྱིས་སེམས་བསྐྱེད་པས་བསྐལ་པའི་མཐའ་ཡང་རྒྱས་པར་མི་འགྱུར་རོ། །དེའི་རྗེས་སུ་བསྐལ་པ་བཅུ་པ་མགོ་འཛུག་པར་འགྱུར་རོ། །དེའི་ཚེ་མི་རྣམས་གྲོགས་ལྟར་ཕན་
ཚུན་མཐོང་བས་དགའ་བ་དང་ལྡན་པར་འགྱུར་རོ། །མི་དེ་རྣམས་ཡང་དག་པར་འཛིན་པར་བྱེད་པ་བསྐལ་པ་བཅུ་པར་འབྱུང་བར་འགྱུར་རོ། །དེའི་ཚེ་གདོན་ཡང་དགེ་བའི་ལམ་ལ་བགྲོད་པར་འགྱུར་རོ། །དུས་ཚིགས་ཀྱང་ཉེས་པ་དང་བྲལ་བ་འབྱུང་བར་འགྱུར་རོ། །དེ་བཞིན་དུ་ནང་གི་
བདག་ཉིད་ཀྱི་དངོས་པོ་རྣམས་རང་བཞིན་མཉམ་པར་གྱུར་པ་ན་ཆོས་ཀྱི་དབང་ཕྱུག་འབྱུང་བར་འགྱུར་རོ། །བདེ་བ་ཡང་ཕུན་སུམ་ཚོགས་པར་འགྲོ་བར་འགྱུར་རོ། །དེ་ལས་མི་ལས་མི་སྐྱེ་བར་འགྱུར་རོ། །དེ་ལས་མི་གཞན། དེ་ལས་ཡང་མི་གཞན་ནོ། །དེ་ལས་ཡང་ནི་གཞན་ཏེ་རིམ་གྱིས་མི་རྣམས་
ཚེ་ལོ་སྟོང་ཕྲག་ཉི་ཤུར་འབྱུང་བར་འགྱུར་རོ། །འདི་ནི་ཡར་འཕེལ་ཆུང་ངུའོ། །དེ་ནས་རིམ་གྱིས་སྟོང་ཕྲག་བཞི་བཅུ་པའི་མི་འབྱུང་བར་འགྱུར་རོ། །འདི་ནི་ཡར་འཕེལ་འབྲིང་པོའོ། །ཡང་རིམ་གྱིས་ཚེ་ལོ་སྟོང་ཕྲག་བརྒྱད་ཅུ་པའི་མི་རྣམས་འབྱུང་བར་འགྱུར་རོ། །འདི་ནི་ཡར་འཕེལ་ཆེན་པོའོ། །དེ་ལ་ཡར་
འཕེལ་རྩེ་མོར་ཕྱིན་པའི་མི་རྣམས་ཀྱི་ཁྱིམ་ནི་དཔལ་མོ་བཞིན་དུ་འཕེལ་བ་ཉིད་དོ། །བུ་མོ་ལོ་ལྔ་བརྒྱ་ན་ཁྱོ་ལ་གཏོང་བར་འགྱུར་རོ། །མི་དེ་རྣམས་ཚེ་ལོ་དང་མཐུན་པ་འབྱུང་བའི་གཟུགས་ལ་སོགས་པ་ལེགས་པར་འབྱུང་བར་འགྱུར་རོ། །དེའི་ཚེ་ཁྱིམ་བྱའི་བརྗོད་པའི་ཡུལ་མི་རྣམས་ཀྱི་གནས་ས་གཞི་

མ་ལུས་པ་གྲོང་དང་གྲོང་ཁྱེར་ལ་སོགས་པ་ཡོངས་སུ་གང་བར་འབྱུང་བར་འགྱུར་རོ། །ས་ཆེན་པོས་མི་གཙང་བ་འོག་ཏུ་བྱུང་སྟེ་གཙང་སྦྲ་ཅན་འབྱུང་བར་འགྱུར་རོ། །མི་རྣམས་བདེ་བ་དང་ལྷན་ཅིག་པའི་ཕུན་སུམ་ཚོགས་པས་ཡང་དག་པར་ཚིམ་པར་འགྱུར་ཞིང་སྡུག་བསྔལ་དྲན་
པར་མི་འགྱུར་རོ། །བསིལ་དྲོ་ལ་སོགས་པ་བཀྲེས་རྒས་ཡོངས་སུ་ལོངས་སྤྱོད་པ་རྣམས་འདོད་པ་ཙམ་བྱེད་པ་སྟེ། སྡུག་བསྔལ་ཡིན་ཡང་དེའི་ཚེ་སྡུག་བསྔལ་གྱི་ཐ་སྙད་ཙམ་མོ། །འདི་ནི་མི་རྣམས་ཡར་འཕེལ་ཆེན་པོ་ཐོབ་པ་སྟེ། ལོ་སྟོང་དང་དཔག་ཏུ་མེད་པ་འཕེལ་བར་འགྱུར་རོ། །ཡང་དེ་ནས་ཡར་
འཕེལ་ཆེན་མོ་ནས་མི་རྣམས་ཀྱི་ཚེ་ཉམས་པར་འགྱུར་རོ། །དེ་ནས་མི་རྣམས་ཆོས་མ་ཡིན་པས་ཆེས་ཉམས་པས་ཡང་སྔོན་བཞིན་དུ་ཚེ་ལོ་བཅུ་པ་ཉིད་ཐོབ་པར་འགྱུར་རོ། །དེའི་ཚེ་ཡང་བསྐལ་པ་བཅུ་པར་རྒྱབ་ཏུ་གྱུར་པ་འབྱུང་བར་འགྱུར་རོ། །ཅི་ལྟར་བསྐལ་པ་བཅུ་པ་ཐོག་མཐའ་བདེ་སྡུག་ལྡན་པ་དེ་བཞིན་དུ་གཞན་ཡང་
འབྱུང་བར་འགྱུར་བ་བསྐལ་པ་བཅུ་རྣམས་སོ་སོར་ཐོག་མཐའ་བདེ་སྡུག་ལྡན་པ་འབྱུང་བར་འགྱུར་རོ། །དེས་ན་ཉི་མ་ཤར་བ་ནས་བཟུང་སྟེ། བསྐལ་པ་ཉི་ཤུ་ནི་ཆགས་པའི་འཇིག་རྟེན་གནས་པའོ་ཞེས་རྣམ་པར་གཞག་པའོ། །འཆགས་པའི་བསྐལ་པ་ཉི་ཤུའི་ཐ་མ་ལ་བར་གྱི་འཇིག་པ་གསུམ་གྱི་དེ་མ་ཐག་ཏུ་ལྷག་
མ་ལུས་པའི་མི་རྣམས་ཕན་ཚུན་དགའ་བའི་བསམ་པ་འབྱུང་བར་འགྱུར་རོ། །དེའི་ཚེ་བྱམས་པས་ཉེ་བར་བསགས་པའི་ལས་དབང་ལས་ཕྱི་རོལ་གྱི་དངོས་པོ་ཡང་ཆེས་ཉམས་དགའ་བར་འབྱུང་བར་འགྱུར་རོ། །བྱམས་པས་ཀུན་དུ་བསྐྱེད་པའི་ཕུན་སུམ་ཚོགས་པ་མེའི་དུས་ལས་སྔོན་དུ་ཉམས་སུ་མྱོང་བར་འགྱུར་
རོ། །ངན་འགྲོའི་སེམས་ཅན་རྣམས་ཀྱང་ཕན་ཚུན་བྱམས་པ་ཆེན་པོ་བསྐྲུན་ཏེ། ཁ་ཅིག་ལྷ་རྣམས་སུ་ཉེ་བར་སྐྱེ་བར་འགྱུར་རོ། །དེའི་ཚེ་འཆད་པར་བྱེད་པའི་མི་མུ་སྟེགས་ཀྱི་ཚོགས་ཀྱིས་སམ། འོད་གསལ་གྱི་ལྷ་ཡང་སྨྲ་བར་འགྱུར་ཏེ། ཆོས་ཀྱི་རྒྱལ་པོ་སྐྱེས་བུ་བཞིན་ནོ། །དེ་ལས་ཆོས་ཐོས་ཏེ་འདོད་པ་ལ་
རྣམ་པར་སྨད་དེ་དགའ་བ་དང་ལྡན་པའི་བསམ་གཏན་གཉིས་པ་ཡང་དག་པར་བསྐྱེད་དེ། བསམ་གཏན་གཉིས་པའི་ས་ལས་གཞན་ཏིང་ངེ་འཛིན་རྣམ་པར་སྤངས་ཏེ། ལྷའི་རིས་དེ་ཉིད་དུ་འོད་གསལ་དུ་འགྲོ་བར་འགྱུར་རོ། །འདི་ནི་བསྐལ་པ་བཅུས་སྟོང་གི་འཇིག་རྟེན་གྱི་སེམས་ཅན་རྣམས་འཇིག་རྟེན་

པར་འགྱུར་བའོ། །དེའི་རྗེས་སུ་བསྐལ་པ་ཕྱེད་དང་བཅས་པའི་གཅིག་ཏུ་སྣོད་ཀྱི་འཇིག་རྟེན་སྟོང་པར་རོ། །ལྷ་རྣམས་ཆར་འབེབས་པར་མི་འགྱུར་རོ། །དེའི་ཚེ་ཤིང་གེལ་པ་ཉལ་སྟོང་ལ་སོགས་པ་ཡོངས་སུ་སྐམས་པར་འགྱུར་རོ། །དེ་རྗེས་སུ་སུམ་ཅུ་རྩ་གསུམ་པའི་ལྷའི་རིས་སུ་ཉི་མ་གཉིས་པ་སྔོན་མའི་
གཉིས་འགྱུར་གྱི་ཚད་ཀུན་དུ་ཤར་ཏེ་འོག་ཏུ་མ་ལུས་པ་སྲེག་པ་ནི་ཕྱེད་དང་བཅས་པའི་བསྐལ་པ་གཅིག་གིས་སོ། །དེའི་ཚེ་འབབ་ཆུ་ལ་སོགས་པ་ཆུ་བཞི་ཐམས་ཅད་སྐམས་པར་འགྱུར་རོ། །དེ་རྗེས་སུ་འཐབ་བྲལ་ལྷའི་རྩེ་མོ་རུ་ཉི་མ་གསུམ་པ་ཉི་མ་གཉིས་པའི་ཉིས་འགྱུར་གྱི་ཚད་འོག་ཏུ་སྲེག་པ་ནི་
ཕྱེད་དང་བཅས་པའི་བསྐལ་པ་གཅིག་གིས་སོ། །དེའི་ཚེ་མཚོ་ཆེན་པོ་མ་དྲོས་པ་ལ་སོགས་པ་ཡོངས་སུ་སྐམས་པར་འགྱུར་རོ། །དེའི་རྗེས་སུ་ཉི་མ་བཞི་པ་ཉི་མ་གསུམ་པའི་ཉིས་འགྱུར་གྱི་ཚད་དགའ་ལྡན་གྱི་རྩེ་མོ་རུ་ཀུན་དུ་ཤར་ཏེ་ཕྱེད་དང་བཅས་པའི་བསྐལ་པ་གཅིག་གིས་འོག་ཏུ་སྲེག་པར་
བྱེད་དོ། །དེའི་ཚེ་ཆུ་བོ་ཆེན་པོ་བདུན་རྣམ་པར་སྐམས་པར་འགྱུར་རོ། །དེའི་རྗེས་སུ་ཉི་མ་ལྔ་པ་ཉི་མ་བཞི་པའི་ཉིས་འགྱུར་གྱི་ཚད་འཕྲུལ་དགའི་རྩེ་མོ་རུ་ཀུན་དུ་ཤར་ཏེ་ཕྱེད་དང་བཅས་པའི་བསྐལ་པ་གཅིག་གིས་འོག་ཏུ་སྲེག་པར་བྱེད་དོ། །དེའི་ཚེ་རྒྱ་མཚོ་ཆེན་པོ་ཐམས་ཅད་ལྷག་མ་དང་བཅས་པ་
རྣམ་པར་སྐམས་པར་འགྱུར་ཏེ། རིམ་གྱིས་གན་རྐྱལ་གྱི་ལུས་སུ་འབྱུང་བར་འགྱུར་རོ། །དེའི་རྗེས་སུ་ཉི་མ་དྲུག་པ་ཉི་མ་ལྔ་པའི་ཉིས་འགྱུར་གྱི་ཚད་གཞན་འཕྲུལ་དབང་བྱེད་ཀྱི་རྩེ་ལ་ཀུན་དུ་ཤར་ཏེ་ཕྱེད་དང་བཅས་པའི་བསྐལ་པ་གཅིག་གིས་འོག་ཏུ་སྲེག་པར་བྱེད་དོ། །དེའི་ཚེ་རི་རབ་ལ་སོགས་པའི་
རི་རྣམས་དང་ས་ཆེན་པོ་རྣམས་ལས་དུ་བ་འཐུལ་བར་འགྱུར་རོ། །དེའི་རྗེས་སུ་ཉི་མ་བདུན་པ་ཉི་མ་དྲུག་པའི་ཉིས་འགྱུར་གྱི་ཚད་བསམ་གཏན་དང་པོའི་རྩེ་མོ་ལ་ཤར་ཏེ། བསྐལ་པ་གཅིག་གིས་འོག་ཏུ་ཐམས་ཅད་ལྷག་མ་དང་བཅས་པ་སྲེག་པར་བྱེད་དོ། །དེའི་ཚེ་བསམ་གཏན་དང་པོའི་བར་དུ་
ཐལ་བའི་ལྷག་མ་ཡང་མ་ལུས་པར་འགྱུར་རོ། །དེ་ལྟར་ཐམས་ཅད་བསྲེགས་ཏེ་རང་ཉིད་ཀྱིས་ཉེ་བར་ཞི་བར་འགྱུར་ཏེ། བུད་ཤིང་མ་ཚང་བའི་མེ་བཞིན་ནོ། །དུས་གཅིག་ཏུ་སྟོང་གི་འཇིག་རྟེན་གྱི་ཁམས་འཇིག་པར་འགྱུར་རོ། །མེ་ཆུ་རླུང་གི་འཇིག་པ་གསུམ་ནི་བར་ཆད་མེད་པར་

རིམ་གྱིས་གསུམ་ཀ་འབྱུང་བའི་ངེས་པ་མེད་དེ། མེའི་འཇིག་པ་འབྱུང་བའི་ཚེ་ཆུ་རླུང་གི་འཇིག་པ་མི་འབྱུང་ལ། ཆུས་འཇིག་པ་ན་མེ་རླུང་གི་འཇིག་པ་མི་འབྱུང་བའི་ཕྱིར་རོ། །དེ་བཞིན་དུ་རླུང་ཡང་ངོ་། །འཇིག་པ་རེ་རེ་ལ་བར་གྱི་བསྐལ་པ་ཉི་ཤུའོ། །དེས་ན་བར་གྱི་བསྐལ་
པ་ཉི་ཤུ་འཇིག་པའི་བསྐལ་པ་ཆེན་པོའོ། །དེ་བཞིན་དུ་གསུངས་ཏེ། ཚངས་པ་གཅིག་པུ་བསྐལ་པ་བཅུ་རུ་གནས། །དེ་ཡི་འཁོར་གནས་བསྐལ་པ་གཅིག་གིས་བཞེངས། །ཚངས་རིས་ནས་ནི་འཐབ་བྲལ་མཐར་ཐུག་པ། །སོ་སོར་བསྐལ་པ་རེ་རེས་འབྱུང་བར་འགྱུར། །ས་གཞི་རི་སོགས་
བསྐལ་པ་གཅིག་གིས་བཞེངས། །རང་ཉིད་འོད་ཟེར་བསྐལ་པ་གཉིས་ཀྱིས་བཞེངས། །ཉི་མ་ཤར་བ་ལ་ནི་རབ་ཏུ་རེག །འདི་ལྟར་འཆགས་བཞིན་པ་སྟེ་ཉི་ཤུའོ། །ས་ཡི་ཞག་དང་ཁུར་བ་ཚལ་དང་ནི། །སཱ་ལུ་འབྲས་ཏེ་འདི་རྣམས་བདེ་གནས་ནི། །བརྒྱད་དེ་གཞན་ཡང་ཐོག་མཐའ་བདེ་སྡུག་
འགྱུར། །སྤུན་མ་བྱུང་བ་ལ་སོགས་བཅུ་གཉིས་ནི། །འདི་རྣམས་ཆགས་ནས་འཇིག་པ་ཉི་ཤུའོ། །དེ་ནས་བསྐལ་པ་བཅུ་ཡིས་སེམས་ཅན་རྣམས། །བདེ་བ་ལྡན་པར་ཀུན་དུ་འཇིག་པར་འགྱུར། །དེ་ནས་ཕྱེད་བཅས་བསྐལ་པར་ཆར་མེད་དོ། །དེ་ནས་གཞན་དུ་ཉི་མ་ལྔ་རྣམས་ལ། །སོ་སོ་ལ་ནི་བསྐལ་
པ་གཅིག་དང་ཕྱེད། །རྩེ་ལ་ཤར་ཏེ་འོག་ཏུ་སྲེག་པར་བྱེད། །བསྐལ་པ་གཅིག་གིས་བསྐལ་པ་བདུན་པ་ཡི། །ཐམས་ཅད་སྲེག་པར་བྱེད་དེ་ཉི་ཤུའོ། །ཀུན་དུ་འཇིག་པར་འགྱུར་ཏེ་འདི་རྣམས་ནི། །དེས་ན་འཇིག་པའི་བསྐལ་པ་ཉི་ཤུ་ཉིད། །དེའི་རྗེས་སུ་དེ་ལྟར་གནས་རྣམས་སྟོང་པ་ནམ་མཁའ་
ཙམ་དུ་བསྐལ་པ་ཉི་ཤུ་ཉིད་དུ་གནས་པར་འགྱུར་རོ། །དེ་ནས་ཡང་སྔོན་བཞིན་དུ་འཆགས་པ་ལ་སོགས་པ་ཐམས་ཅད་དོ། །དེ་རྗེས་སུ་འགའ་ཞིག་གི་ཚེ་བསམ་གཏན་གཉིས་ན་གནས་པའི་སེམས་ཅན་རྣམས་དགའ་བ་དང་བཅས་པ་དོན་གྱི་འདོད་པ་སུན་ཕྱུང་སྟེ། བསམ་གཏན་གསུམ་པ་ཡང་དག་
པར་བསྐྱེད་དེ། དེ་ནས་འཕོས་ཏེ་བསམ་གཏན་གསུམ་པར་ཀུན་དུ་སྐྱེའོ། །དེ་རྗེས་སུ་དེ་རུ་ཟླ་བ་བདུན་འཆར་བར་འགྱུར་རོ། །ཟླ་བ་ཤར་བའི་རྐྱེན་གྱིས་ཆུ་ཀུན་དུ་འཁོར་བར་རབ་ཏུ་འཕེལ་ཏེ། བསམ་གཏན་གཉིས་པ་ཁོར་ཡུག་ཏུ་ཉམས་པར་འགྱུར་རོ། །དེ་རྗེས་སུ་བདེ་བ་དང་བཅས་པའི་

འདོད་པ་ནི་སྐྱོན་མང་བ་སྣང་བ་ཞེས་རིག་སྟེ། བསམ་གཏན་གསུམ་པ་གནས་པའི་སེམས་ཅན་རྣམས་བསམ་གཏན་བཞི་པ་ཡང་དག་པར་བསྐྱེད་དེ། དེའི་རྐྱེན་གྱིས་ཡང་བསམ་གཏན་གསུམ་པ་ནས་འཕོས་ཏེ། བསམ་གཏན་བཞི་པ་འཇིག་པའི་རྩེ་མོ་འབྲས་བུ་ཆེ་བ་ཞེས་པའི་ལྷའི་རིས་སུ་ཀུན་
དུ་ཉེ་བར་སྐྱེའོ། །དེའི་ཚེ་སྣོད་ཀྱི་འཇིག་རྟེན་མ་ལུས་པར་ཞིག་པར་གྱུར་པ་ན། ཤིན་ཏུ་དྲག་པའི་རླུང་ཀུན་དུ་འཁོར་བར་རབ་ཏུ་རྒྱུའོ། །རླུང་དེས་ཐམས་ཅད་རྣམ་པར་བཤིག་ནས་འཇིག་པ་གསུམ་རྫོགས་པར་འབྱུང་བར་འགྱུར་རོ། །འདི་ལྟ་སྟེ། མེས་འཇིག་པ་དང་། ཆུས་འཇིག་པ་དང་། རླུང་གིས་
འཇིག་པའོ། །འཇིག་པ་གསུམ་པོ་འདིས་ནི་འཇིག་པ་གཉིས་རྫོགས་པར་གྱུར་ཏེ། འདི་ལྟ་སྟེ། སེམས་ཅན་འཇིག་པ་དང་། སྣོད་འཇིག་པའོ། །དེ་ལྟར་འཇིག་པ་ལྷག་མ་ལ་མི་མཇེད་ཅེས་པའི་འཇིག་རྟེན་གྱི་ཁམས་ལྷག་མ་དང་བཅས་པ་རྣམ་པར་རླག་པར་བྱེད་དོ། །འཇིག་རྟེན་གྱི་ཁམས་
གཞན་ཡང་དུས་ཅི་ལྟ་བ་བཞིན་དུ་དེ་བཞིན་དུ་འཇིག་པ་དང་འཆགས་པའི་ཆོས་ཅན་ནོ། །ཡང་གསུངས་ཏེ། འཇིག་རྟེན་གསུམ་གྱི་མི་མཇེད་ཅེས་པའི་གནས་དང་སེམས་ཅན་མ་ལུས་པ། །ཀུན་ཀྱང་མེད་པར་འགྱུར་ཞིང་གང་འདི་འཇིག་པ་རྣམ་གསུམ་གཡང་གི་དབང་། །དེ་ལྟར་གཞན་ཡང་
ཁམས་དང་སེམས་ཅན་མཐའ་མེད་གནས་རྣམས་ཟད་པར་འགྱུར། །དེས་ན་འདུས་བྱས་བརྟན་ཡོད་མིན་ཞེས་ཐུབ་པའི་བསྟན་པ་བདེན་པ་ཉིད་ཅེས་སོ། །བསྐལ་པའི་ཚད་ཀྱང་། འཕང་དང་ལོགས་ལ་རྒྱང་གྲགས་གཉིས་ཡོངས་སུ་གཞལ་བའི་རྒྱུ་བཞི་པ་བྱས་ཏེ། ཉུངས་ཀར་གྱིས་སྤྱི་
ཕུད་མེད་པར་ཡོངས་སུ་གང་བར་བྱས་ནས། གནས་དེ་ནས་ལོ་བརྒྱ་བརྒྱར་གྱུར་པ་ན། ཉུངས་ཀར་རེ་རེ་ཕྱུང་བས་ཉུངས་ཀར་ཐམས་ཅད་ཡོངས་སུ་ཟད་པ་ཙམ་གྱིས་འཛད་པར་འགྱུར་བའི་དུས་དེ་བར་གྱི་བསྐལ་པའོ། །བར་གྱི་བསྐལ་པ་དེས་འཇིག་པ་དང་ཆགས་པའི་རྣམ་པར་གཞག་པ་ནི་
བར་གྱི་བསྐལ་པ་བརྒྱད་ཅུར་འགྱུར་བ་ཡིན་ནོ། །བར་གྱི་བསྐལ་པ་བརྒྱད་ཅུ་ནི་བསྐལ་པ་ཆེན་པོའོ། །ཡང་ན་བསྐལ་པ་ཆེན་པོ་ཡོངས་སུ་གཞལ་བ་ནི་འདི་ལྟ་སྟེ། འཕང་དང་འཁོར་བར་དཔག་ཚད་ཀྱིས་ཡོངས་སུ་གཞལ་བའི་གནས་སྤྱི་ཕུད་དུ་ཉུངས་ཀར་གྱིས་ཡོངས་སུ་གང་བར་བྱས་ཏེ།

གནས་དེ་ལས་ལོ་བརྒྱ་བརྒྱ་ན་ཉུངས་ཀར་རེ་རེ་ཕྱུང་བས་ཉུངས་ཀར་མ་ལུས་པར་ཟད་པར་དུས་ཅི་སྲིད་ཀྱིས་འགྱུར་བའི་དུས་དེ་སྲིད་ལ་བསྐལ་པ་ཆེན་པོའོ་ཞེས་སོ། །དེ་བཞིན་དུ་བཟང་པོ་ལ་སོགས་པའི་བསྐལ་པ་ཆེན་པོ་ནི་གྲངས་ཀྱིས་གནས་གཞན་དྲུག་ཅུར་སོན་པ་རྗེས་
སུ་ཐོབ་པ་ནི་གྲངས་མེད་ཅེས་བརྗོད་དོ། །དེ་ལ་གནས་དྲུག་ཅུ་ནི་འདི་ལྟ་སྟེ། གཅིག་གཅིག་བཅུ་ལ་བཅུའོ། །བཅུ་བཅུ་ལ་བརྒྱའོ། །བརྒྱ་བཅུ་ལ་སྟོང་ངོ་། །སྟོང་བཅུ་ལ་ཁྲིའོ། །ཁྲི་བཅུ་ལ་འབུམ་མོ། །འབུམ་བཅུ་ལ་ས་ཡའོ། །ས་ཡ་བཅུ་ལ་བྱེ་བའོ། །བྱེ་བ་བཅུ་ལ་དུང་ཕྱུར་རོ། །
དུང་ཕྱུང་བཅུ་ལ་ཐེར་འབུམ་མོ། །ཐེར་འབུམ་བཅུ་ལ་ཐེར་འབུམ་ཆེན་པོའོ། །ཐེར་འབུམ་ཆེན་པོ་བཅུ་ལ་ཁྲག་ཁྲིག་གོ། །ཁྲག་ཁྲིག་བཅུ་ལ་ཁྲག་ཁྲིག་ཆེན་པོའོ། །ཁྲག་ཁྲིག་ཆེན་པོ་བཅུ་ལ་ཕྱལ་ཕྱོལ་ལོ། །ཕྱལ་ཕྱོལ་བཅུ་ལ་ཕྱལ་ཕྱོལ་ཆེན་པོའོ། །ཕྱལ་ཕྱོལ་ཆེན་པོ་བཅུ་ལ་རབ་བཀྲམ་མོ། །དེ་
བཅུ་ལ་རབ་བཀྲམ་ཆེན་པོའོ། །དེ་བཅུ་ལ་གཏམས་པའོ། །དེ་བཅུ་ལ་གཏམས་པ་ཆེན་པོའོ། །དེ་བཅུ་ལ་མི་སྤྱོད་པའོ། །དེ་བཅུ་ལ་མི་སྤྱོད་པ་ཆེན་པོའོ། །དེ་བཅུ་ལ་ཁྱད་ཕྱིན་ནོ། །དེ་བཅུ་ལ་ཁྱད་ཕྱིན་ཆེན་པོའོ། །དེ་བཅུ་ལ་ཡང་སྟེངས་སོ། །དེ་བཅུ་ལ་ཡང་སྟེངས་ཆེན་པོའོ། །དེ་བཅུ་ལ་དེང་འདྲེན་
ནོ། །དེ་བཅུ་ལ་དེང་འདྲེན་ཆེན་པོའོ། །དེ་བཅུ་ལ་པད་མའོ། །དེ་བཅུ་ལ་པད་མ་ཆེན་པོའོ། །དེ་བཅུ་ལ་མཐའ་སྣང་ངོ་། །དེ་བཅུ་ལ་མཐའ་སྣང་ཆེན་པོའོ། །དེ་བཅུ་ལ་རྒྱུ་རིག་གོ། །དེ་བཅུ་ལ་རྒྱུ་རིག་ཆེན་པོའོ། །དེ་བཅུ་ལ་འོད་མཛེས་སོ། །དེ་བཅུ་ལ་འོད་མཛེས་ཆེན་པོའོ། །དེ་བཅུ་ལ་དབང་པོའོ། །
དེ་བཅུ་ལ་དབང་པོ་ཆེན་པོའོ། །དེ་བཅུ་ལ་རྒྱ་མཚོའོ། །དེ་བཅུ་ལ་རྒྱ་མཚོ་ཆེན་པོའོ། །དེ་བཅུ་ལ་ལེགས་བྱིན་ནོ། །དེ་བཅུ་ལ་ལེགས་བྱིན་ཆེན་པོའོ། །དེ་བཅུ་ལ་རྟོགས་འགྲོའོ། །དེ་བཅུ་ལ་རྟོགས་འགྲོ་ཆེན་པོའོ། །དེ་བཅུ་ལ་གཟུགས་སྐྱེས་སོ། །དེ་བཅུ་ལ་གཟུགས་སྐྱེས་ཆེན་པོའོ། །དེ་བཅུ་
ལ་དགྲ་རླབས་སོ། །དེ་བཅུ་ལ་དགྲ་རླབས་ཆེན་པོའོ། །དེ་བཅུ་ལ་རྒྱ་རྟགས་སོ། །དེ་བཅུ་ལ་རྒྱ་རྟགས་ཆེན་པོའོ། །དེ་བཅུ་ལ་སྟོབས་འཁོར་རོ། །དེ་བཅུ་ལ་སྟོབས་འཁོར་ཆེན་པོའོ། །དེ་བཅུ་ལ་བརྡ་ཤེས་སོ། །དེ་བཅུ་ལ་བརྡ་ཤེས་ཆེན་པོའོ། །དེ་བཅུ་ལ་རིན་མཆོག་

གོ། །དེ་བཅུ་ལ་རིན་མཆོག་ཆེན་པོའོ། །དེ་བཅུ་ལ་ཤང་ཀུའོ། །དེ་བཅུ་ལ་ཤང་ཀུ་ཆེན་པོའོ། །དེ་བཅུ་ལ་རྣམ་འབྱུང་ངོ་། །དེ་བཅུ་ལ་རྣམ་འབྱུང་ཆེན་པོའོ། །དེ་བཅུ་ལ་སྟོབས་མིག་གོ། །དེ་བཅུ་ལ་སྟོབས་མིག་ཆེན་པོའོ། །ཞེས་གནས་དྲུག་ཅུ་པའོ། །ཁ་ཅིག་གྲངས་མེད་ནི་
གནས་བཅོ་བརྒྱད་པ་ལས་འདས་པའོ་ཞེས་ཟེར་རོ། །འཕགས་པ་གནས་བརྟན་པ་ནི་གཅིག་ནས་བཟུང་སྟེ་སྔོན་བཞིན་དུ་ལྔ་བརྒྱ་རྩ་ལྔ་པའི་གྲངས་ཀྱི་གནས་སུ་ཕྱིན་པ་འདི་ནི་བསྐལ་པ་གྲང་མེད་ཆུང་ངུའོ། །དེ་ནས་བསྐལ་པ་གྲངས་མེད་ཆུང་ངུ་དང་པོའི་གནས་གཅིག་ཏུ་བགྲངས་ཏེ། དེ་ཁོ་ན་བཞིན་དུ་ལྔ་བཅུ་རྩ་
ལྔ་པའི་གནས་སུ་སོན་པ་ནི་བསྐལ་པ་གྲངས་མེད་པའོ་ཞེས་ཟེར་རོ། །འཕགས་པ་མང་པོས་བཀུར་བ་ནི། ཤཱཀྱ་ཐུབ་པ་འདིས། གྲངས་མེད་དང་པོ་ལ་སྔོན་གྱི་སངས་རྒྱས་ཤཱཀྱ་ཐུབ་པ་ནས་བཟུང་སྟེ། སངས་རྒྱས་སྟོང་ཕྲག་བདུན་ཅུ་རྩ་བདུན་དང་། གྲངས་མེད་གཉིས་པ་ལ་སངས་རྒྱས་སྟོང་
ཕྲག་བདུན་ཅུ་རྩ་དྲུག་དང་། གྲངས་མེད་གསུམ་པ་ལ་སངས་རྒྱས་སྟོང་ཕྲག་བདུན་ཅུ་རྩ་ལྔ་པ་སངས་རྒྱས་དབང་པོ་རྒྱལ་མཚན་གྱི་མཐར་ཐུག་པ་རྣམས་མཉེས་པར་བྱས་ཏེ། ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་བྱང་ཆུབ་པོ་ཞེས་གསུངས་སོ། །ཁ་ཆེ་བྱེ་བྲག་ཏུ་སྨྲ་བ་
ན་རེ། ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་འབྱུང་བར་འགྱུར་རོ། །གང་གི་དྲུང་དུ་བདག་ཅག་གི་སྟོན་པ་བཅོམ་ལྡན་འདས་བྱང་ཆུབ་སེམས་དཔར་གྱུར་པས། རྣམ་པ་འདི་ལྟ་བུ་ཁོ་ནར་བདག་སངས་རྒྱས་སུ་གྱུར་ཅིག་ཅེས་དང་པོ་སྨོན་ལམ་མཛད་དོ། །དེ་ནས་བཟུང་སྟེ།
བཅོམ་ལྡན་འདས་ཤཱཀྱ་ཐུབ་པས་བསྐལ་པ་གྲངས་མེད་དང་པོ་ལ་ཡང་དག་པར་རྫོགས་པའི་སངས་རྒྱས་རིན་ཆེན་གཙུག་ཏོར་གྱི་མཐར་ཐུག་པ་སངས་རྒྱས་སྟོང་ཕྲག་བདུན་ཅུ་རྩ་ལྔ་མཉེས་པར་བྱའོ། །དེ་ནས་བསྐལ་པ་གྲངས་མེད་གཉིས་པ་ལ་རྫོགས་པའི་སངས་རྒྱས་རིན་ཆེན་གཙུག་ཏོར་གྱི་དེ་
མ་ཐག་གི་སངས་རྒྱས་ནས་བཟུང་སྟེ། སངས་རྒྱས་མར་མེ་མཛད་ཀྱི་མཐར་ཐུག་པ་སངས་རྒྱས་སྟོང་ཕྲག་བདུན་ཅུ་རྩ་དྲུག་མཉེས་པར་བྱས་སོ། །དེ་ནས་བསྐལ་པ་གྲངས་མེད་གསུམ་པ་ལ་སངས་རྒྱས་མར་མེ་མཛད་ཀྱི་དེ་མ་ཐག་གི་སངས་རྒྱས་ནས་བཟུང་སྟེ། སངས་རྒྱས་སྟོང་ཕྲག་བདུན་ཅུ་

རྩ་བདུན་མཉེས་པར་བྱས་སོ། །དེའི་ཚེ་རྫོགས་པའི་བྱང་ཆུབ་ཏུ་ངེས་པར་འགྱུར་རོ། །དེ་ནས་ཕུག་ཅིག་ཏུ་དེ་བཞིན་གཤེགས་པ་སྐར་རྒྱལ་གཟི་བརྗིད་ཀྱི་དབྱིངས་སུ་མཉམ་པར་ཞུགས་པ་མཐོང་ཞིང་རབ་ཏུ་དང་བ་ཆེན་པོས་བརྩོན་འགྲུས་བརྩམས་ནས་རྐང་པ་གཅིག་
གིས་གནས་ཏེ། ལྷའི་ཡུལ་དང་ཞེས་པ་ལ་སོགས་པའི་ཚིགས་སུ་བཅད་པ་གཅིག་གིས་ཉི་མ་བདུན་དུ་སྡོད་པས། བསྐལ་པ་ཆེན་པོ་དགུ་ཕྱིར་བཟློག་པར་གྱུར་ཏོ། །དེའི་རྗེས་སུ་སངས་རྒྱས་རྣམ་པར་གཟིགས་ལ་སོགས་པ་ནས་འོད་སྲུངས་ཀྱི་མཐར་ཐུག་པར་མཉེས་པར་བྱས་ནས། བསྐལ་པ་ཆེན་པོ་
དགུ་བཅུ་རྩ་གཅིག་ཏུ་མཚན་བཟངས་ཀྱི་ལས་མཛད་དེ། བསྐལ་པ་ཆེན་པོ་དགུ་བཅུ་རྩ་གཅིག་གི་རྩེ་མོ་ལ་དགའ་ལྡན་གྱི་གནས་སུ་གནས་པ་ལ་སོགས་པ་རྣམ་པར་བཟུང་སྟེ། བཅོམ་ལྡན་འདས་ཤཱཀྱ་ཐུབ་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་བྱང་ཆུབ་པའོ་ཞེས་ཟེར་རོ། །འཕགས་པ་གནས་བརྟན་ན་
རེ། ཤཱཀྱ་ཐུབ་པས་བསྐལ་པ་གྲངས་མེད་པ་ཆེན་པོ་ཉི་ཤུ་དང་བསྐལ་པ་འབུམ་ཕྲག་གཅིག་ལྷག་པས་ཐམས་ཅད་མཁྱེན་པ་རབ་ཏུ་བསྒྲུབས་སོ་ཞེས་ཟེར་རོ། །དེ་ལ་བཅོམ་ལྡན་འདས་བྱང་ཆུབ་སེམས་དཔར་གྱུར་པས་བསྐལ་པ་གྲངས་མེད་བདུན་གྱིས་སངས་རྒྱས་སྟོང་ཕྲག་ཉི་ཤུ་རྩ་ལྔ་ལྷག་པའི་འབུམ་ཕྲག་གཅིག་མཉེས་
པར་བྱས་ཤིང་བསམ་པ་ཙམ་ཉིད་ཀྱིས་བྱང་ཆུབ་དོན་དུ་སྨོན་ལམ་མཛད་དོ། །བསྐལ་པ་གྲངས་མེད་གཞན་དགུས་སངས་རྒྱས་སྟོང་ཕྲག་བརྒྱད་ཅུ་རྩ་བདུན་པའི་འབུམ་ཕྲག་གསུམ་མཉེས་པར་བྱས་ཏེ། བྱང་ཆུབ་སེམས་དཔའི་སྤྱད་པ་ལ་སྤྱོད་ཅིང་སེམས་དང་ངག་གིས་སྨོན་ལམ་མཛད་དོ། །བསྐལ་པ་གྲངས་མེད་
གཞན་བཞིས་སངས་རྒྱས་བཅུ་གཉིས་མཉེས་པར་བྱས་ཤིང་བྱང་ཆུབ་དོན་དུ་སྤྱད་པ་ལ་སྤྱོད་ཅིང་ལུས་དང་ངག་དང་ཡིད་ཀྱིས་བྱང་ཆུབ་དོན་དུ་སྨོན་པ་མཛད་དོ། །བསྐལ་པ་འབུམ་ཕྲག་གཅིག་གིས་བཅོམ་ལྡན་འདས་བྱང་ཆུབ་སེམས་དཔར་གྱུར་པས་སངས་རྒྱས་བཅོ་ལྔ་མཉེས་པར་བྱས་ཏེ། བྱང་ཆུབ་
སེམས་དཔའི་སྤྱད་པ་ལ་སྤྱོད་ཅིང་ལུས་དང་ངག་དང་ཡིད་ཀྱི་ལས་ཕྲན་ཐམས་ཅད་རྫོགས་པར་བྱས་ཏེ། བསྐལ་པ་འབུམ་ཕྲག་གི་རྩེ་མོ་ལ་སྟོན་པས་ཐམས་ཅད་མཁྱེན་པ་ཐོབ་པར་གྱུར་ཏོ། །རབ་ཏུ་སྤྲོས་པ་ནི་དགའ་བ་ཞེས་བྱ་བའི་བསྐལ་པ་གྲངས་མེད་དང་པོ་ལ་བཅོམ་ལྡན་འདས་ལྷག་པའི་ལྷ་ཞེས་

བྱ་བ་འཁོར་ལོས་སྒྱུར་བ་མིའི་བདག་པོར་གྱུར་པས་ཐོག་མ་མེད་པའི་འཁོར་བ་རུ་སྔོན་མ་མཐོང་བ་སངས་རྒྱས་ཚངས་པའི་ལྷ་མཐོང་བས་རྣམ་པ་འདི་ལྟ་བུར་བདག་སངས་རྒྱས་ཉིད་དུ་གྱུར་ཅིག་ཅེས་བསམས་པ་ཙམ་གྱིས་མངོན་པར་འདོད་དོ། །གྲངས་མེད་དགའ་བ་དེ་ལ་སངས་རྒྱས་ཚངས་པའི་ལྷ་ལ་སོགས་
པས་སངས་རྒྱས་ལྔ་སྟོང་མཉེས་པར་བྱས་སོ། །གྲངས་མེད་གཉིས་པ་མཛེས་དགའ་ལ་སངས་རྒྱས་སྟོང་ཕྲག་དགུ་མཉེས་པར་བྱས་སོ། །གྲངས་མེད་གསུམ་པས་གཞིའི་མིང་ཅན་ལ་སངས་རྒྱས་སྟོང་ཕྲག་བཅུ་མཉེས་པར་བྱས་སོ། །གྲངས་མེད་བཞི་པ་སྙིང་པོ་ཞེས་པ་ལ་སངས་རྒྱས་སྟོང་ཕྲག་བཅུ་
གཅིག་མཉེས་པར་བྱས་སོ། །གྲངས་མེད་ལྔ་པ་འཛིན་གཟུགས་ཞེས་པའི་མིང་ཅན་སངས་རྒྱས་སྟོང་ཕྲག་ཉི་ཤུ་མཉེས་པར་བྱས་སོ། །གྲངས་མེད་དྲུག་པ་རྒྱ་མཚོ་ཞེས་པ་ལ་སངས་རྒྱས་སྟོང་ཕྲག་སུམ་ཅུ་མཉེས་པར་བྱས་སོ། །གྲངས་མེད་པདྨ་དཀར་པོ་ལ་སངས་རྒྱས་སྟོང་ཕྲག་བཞི་བཅུ་མཉེས་
པར་བྱས་སོ། །ཐམས་ཅད་བཟང་པོ་ཞེས་གྲངས་མེད་བརྒྱད་པ་ལ་སྔོན་གྱི་ཤཱཀྱ་ཐུབ་པ་ལ་སོགས་པ་སངས་རྒྱས་སྟོང་ཕྲག་ལྔ་བཅུ་མཉེས་པར་བྱས་སོ། །གྲངས་མེད་པདྨ་དཀར་པོའི་དེ་མ་ཐག་ཏུ་ཐམས་ཅད་བཟང་པོའི་དང་པོར་འཁོར་ལོ་རྒྱ་མཚོ་ཞེས་པའི་བྱང་ཆུབ་སེམས་དཔར་གྱུར་པས་སྔོན་གྱི་
སངས་རྒྱས་ཤཱཀྱ་ཐུབ་པ་མཐོང་ནས་རབ་ཏུ་དང་བ་ཆེན་པོས་ཡིད་དང་ངག་གིས་འདི་ལྟ་བུར་གྱུར་པ་བཞིན་དུ་བདག་སངས་རྒྱས་སུ་གྱུར་ཅིག་ཅེས་སྨོན་ལམ་མཛད་དོ། །དེའི་རྗེས་སུ་ཐམས་ཅད་བཟང་པོ་ཞེས་པའི་གྲངས་མེད་བརྒྱད་པ་ལ་སྔོན་གྱི་ཤཱཀྱ་ཐུབ་པ་ལ་སོགས་པ་སངས་རྒྱས་སྟོང་ཕྲག་ལྔ་བཅུ་
མཉེས་པར་བྱས་སོ། །ཐམས་ཅད་རྒྱས་པ་ཞེས་པའི་གྲངས་མེད་དགུ་པ་ལ་སངས་རྒྱས་སྟོང་ཕྲག་དྲུག་ཅུ་མཉེས་པར་བྱས་སོ། །ཐམས་ཅད་རིན་ཆེན་ཞེས་པའི་གྲངས་མེད་བཅུ་པ་ལ་སངས་རྒྱས་སྟོང་ཕྲག་བདུན་ཅུ་མཉེས་པར་བྱས་སོ། །ཕུང་པོ་གཙོ་བོ་ཞེས་པ་གྲངས་མེད་བཅུ་གཅིག་པ་ལ་སངས་
རྒྱས་སྟོང་ཕྲག་བརྒྱད་ཅུ་མཉེས་པར་བྱས་སོ། །ནོར་བུ་བཟང་པོ་ཞེས་པའི་གྲངས་མེད་བཅུ་གཉིས་པ་ལ་སངས་རྒྱས་སྟོང་ཕྲག་དགུ་བཅུ་མཉེས་པར་བྱས་སོ། །པདྨ་ཞེས་པའི་གྲངས་མེད་བཅུ་གསུམ་པ་ལ་སངས་རྒྱས་སྟོང་ཕྲག་ཉི་ཤུ་མཉེས་པར་བྱས་སོ། །ཁྱུ་མཆོག་ཅེས་པའི་གྲངས་མེད་

བཅུ་བཞི་པ་ལ་སངས་རྒྱས་སྟོང་ཕྲག་བཅུ་མཉེས་པར་བྱས་སོ། །བཤེས་གཉེན་དམ་པ་ཞེས་པའི་གྲངས་མེད་བཅོ་ལྔ་པ་ལ་སངས་རྒྱས་སྟོང་ཕྲག་ལྔ་མཉེས་པར་བྱས་སོ། །ཐམས་ཅད་སྐྱོང་ཞེས་པའི་གྲངས་མེད་བཅུ་དྲུག་པ་ལ་སངས་རྒྱས་སྟོང་ཕྲག་གཉིས་མཉེས་
པར་བྱས་སོ། །དེའི་རྗེས་སུ་ཐམས་ཅད་སྐྱོབ་ཅེས་པའི་གྲངས་མེད་ཀྱི་མཐའ་མ་རི་བོ་ཞེས་པའི་གྲངས་མེད་ཀྱི་སྔོན་སྙིང་པོ་མཆོག་གི་བསྐལ་པ་སངས་རྒྱས་རྟ་རྣ་ཀར་དང་། ཡིད་གཞུངས་མཛད་དང་། སྐྱབས་གཡོགས་མཛད་རྣམས་མཉེས་པར་བྱས་ཤིང་། བསྐལ་པ་དེ་ཉིད་ལ་བཅོམ་ལྡན་
འདས་དྲང་སྲོང་ཡིད་གཞུངས་མཆོག་ཏུ་གྱུར་པས་སངས་རྒྱས་མར་མེ་མཛད་མཉེས་པར་མཛད་དེ། སངས་རྒྱས་མར་མེ་མཛད་དེ་ཉིད་ལས་ངེས་པའི་ལུང་བསྟན་པ་སོ་སོར་ཐོབ་བོ། །གྲངས་མེད་བདུན་པ་རི་བོ་ཞེས་པ་ལ་སངས་རྒྱས་མེད་པ་ངན་འགྲོ་ལྟ་བུ་ཞེས་བརྗོད་དོ། །གྲངས་མེད་རི་བོའི་
མཐའ་མ་གྲངས་མེད་སྣང་བའི་སྔོན་དུ་སྙིང་པོ་ཞེས་པའི་བསྐལ་པ་ལ་བཅོམ་ལྡན་འདས་འཁོར་ལོས་སྒྱུར་བའི་རྒྱལ་པོ་རྣམ་པར་རྒྱལ་བར་གྱུར་པས་སངས་རྒྱས་ཀཽཎྜི་ནྱ་མཉེས་པར་མཛད་དོ། །དེའི་རྗེས་སུ་གྲངས་མེད་སྣང་བ་ཡང་སངས་རྒྱས་ཀྱིས་སྟོང་པ་ངན་འགྲོར་འགྱུར་རོ། །གྲངས་མེད་སྣང་བའི་
མཐའ་མ་གྲངས་མེད་རྒྱལ་བའི་ལས་སྔོན་དུ་སྙིང་པོ་མཆོག་གི་བསྐལ་པ་ལ་བྲམ་ཟེ་མཛེས་པར་གྱུར་པས་སངས་རྒྱས་བཀྲ་ཤིས་མཉེས་པར་བྱས་སོ། །ཀླུའི་རྒྱལ་པོ་མཉམ་མེད་དུ་གྱུར་པས་སངས་རྒྱས་ཡིད་རབ་ཅེས་པ་བསྙེན་བཀུར་བ་དང་ལྡན་པར་འགྱུར་རོ། །བྲམ་ཟེ་ལྷག་པའི་ལྷར་གྱུར་པས་སངས་
རྒྱས་རེ་བ་ཏ་མཉེས་པར་བྱས་སོ། །བྲམ་ཟེ་ལྷག་པའི་ལྷར་གྱུར་པས་སངས་རྒྱས་མཛེས་པ་མཉེས་པར་བྱས་སོ། །དེ་རྗེས་སུ་གྲངས་མེད་རྒྱལ་བ་ལ་སངས་རྒྱས་མེད་པ་ངན་འགྲོ་ཞེས་བརྗོད་དོ། །གྲངས་མེད་རྒྱལ་བའི་མཐའ་མ་གྲངས་མེད་མཛེས་པ་ལས་སྔོན་དུ་བསྐལ་པ་མཆོག་ཅེས་པ་ལ་གནོད་སྦྱིན་སྡེ་
དཔོན་དུ་གྱུར་པ་ན་སངས་རྒྱས་ཀུན་སྣང་མཐོང་ཞེས་པ་མཉེས་པར་བྱས་སོ། །སེང་གེར་གྱུར་པས་སངས་རྒྱས་པདྨ་མཉེས་པར་བྱས་སོ། །དྲང་སྲོང་རབ་བྱུང་དུ་གྱུར་པས་སངས་རྒྱས་ནཱ་ར་དམ་མཉེས་པར་བྱས་སོ། །གྲངས་མེད་མཛེས་པ་ལ་སངས་རྒྱས་མེད་པ་ངན་འགྲོ་ཞེས་བརྗོད་དོ། །གྲངས་

མེད་མཛེས་པའི་མཐའ་མ་བསྐལ་པ་སྙིང་པོ་ཞེས་པ་ལ་བཅོམ་ལྡན་འདས་ཡུལ་ལྗོངས་ཐམས་ཅད་པ་ཞེས་པའི་རལ་པ་ཅན་དུ་གྱུར་པ་སངས་རྒྱས་པདྨའི་བླ་མ་མཉེས་པར་བྱས་སོ། །དེ་རྗེས་སུ་བསྐལ་པ་ཆེན་པོ་སྟོང་ཕྲག་སུམ་ཅུར་སངས་རྒྱས་མེད་པའི་ངན་འགྲོར་གྱུར་ཏོ། །དེ་རྗེས་སུ་བསྐལ་པ་
མཎྜ་ཞེས་པ་ལ་ཁྱེའུ་བླ་མར་གྱུར་པས་སངས་རྒྱས་ཡིད་གཞུངས་མཆོག་མཉེས་པར་བྱས་སོ། །འཁོར་ལོས་སྒྱུར་བའི་རྒྱལ་པོ་ཟླ་བ་བཟང་པོར་གྱུར་པས་སངས་རྒྱས་དོན་མཐོང་ལ་བསྙེན་བཀུར་བྱས་སོ། །ལྷའི་དབང་པོ་བརྒྱ་བྱིན་དུ་གྱུར་པས་སངས་རྒྱས་ཆོས་མཐོང་མཉེས་པར་བྱས་སོ། །དེ་ནས་བར་
མེད་པར་བསྐལ་པ་དགུ་བཅུ་རྩ་བཞིར་སངས་རྒྱས་མེད་པའི་ངན་འགྲོར་འགྱུར་རོ། །དེ་མ་ཐག་ཏུ་བསྐལ་པ་སྙིང་པོ་ལ་མ་ཀུ་ལ་ཞེས་པའི་དཀའ་ཐུབ་པར་གྱུར་པས་སངས་རྒྱས་དོན་གྲུབ་བསྟེན་པ་དང་ལྡན་ནོ། །དེ་དང་བར་མེད་པར་བསྐལ་པ་དགུ་བཅུ་རྩ་གཉིས་སུ་སངས་རྒྱས་མེད་པའི་ངན་འགྲོར་འགྱུར་
རོ། །དེ་དང་བར་མེད་པར་སྙིང་པོ་མཆོག་གི་བསྐལ་པ་ལ་རྗེའུ་རིགས་བཟང་པོ་སྐྱེས་སུ་གྱུར་པས་སངས་རྒྱས་སྐར་རྒྱལ་མཉེས་པར་བྱས་སོ། །རྗེའུ་རིགས་རྣམ་པར་རྒྱལ་བར་གྱུར་པས་སངས་རྒྱས་རྒྱལ་མཉེས་པར་བྱས་སོ། །དེ་དང་བར་མེད་པའི་བསྐལ་པ་དགུ་བཅུ་རྩ་གཅིག་གོ། །དེ་དང་
བར་མེད་པར་བསྐལ་པ་སྙིང་པོ་ཞེས་པ་ལ་ཀླུའི་རྒྱལ་པོ་མཉམ་མེད་དུ་གྱུར་པས་སངས་རྒྱས་རྣམ་པར་གཟིགས་མཉེས་པར་བྱས་སོ། །དེ་དང་བར་མེད་པར་བསྐལ་པ་སུམ་ཅུ་རྩ་གཅིག་ཏུ་སངས་རྒྱས་མེད་པའི་ངན་འགྲོར་འགྱུར་རོ། །དེ་མ་ཐག་ཏུ་སྙིང་པོ་མཆོག་གི་བསྐལ་པ་ལ་རྒྱལ་པོ་དགུ་འདུལ་དུ་གྱུར་པས་
སངས་རྒྱས་གཙུག་ཏོར་ཅན་མཉེས་པར་བྱས་སོ། །རྒྱལ་པོ་བལྟ་ན་སྡུག་ཏུ་གྱུར་པས་སངས་རྒྱས་ཐམས་ཅད་སྐྱོབ་མཉེས་པར་བྱས་སོ། །དེ་མ་ཐག་ཏུ་བསྐལ་པ་བཟང་པོ་ལ་རྒྱལ་པོ་བཟོད་པར་གྱུར་པས་སངས་རྒྱས་འཁོར་བ་འཇིག་མཉེས་པར་བྱས་སོ། །རྒྱལ་པོ་རི་བོ་ཞེས་པར་གྱུར་པས། སངས་
རྒྱས་གསེར་ཐུབ་མཉེས་པར་བྱས་སོ། །སྣང་བ་གསལ་བ་སྐྱོང་དུ་གྱུར་པས་སངས་རྒྱས་འོད་སྲུངས་མཉེས་པར་བྱས་སོ། །དེའི་རྗེས་སུ་དཔལ་གཞོན་ནུ་དོན་ཐམས་ཅད་གྲུབ་པར་གྱུར་པས་རང་ཉིད་ཀྱིས་ཐམས་ཅད་མཁྱེན་པ་ཉིད་མངོན་དུ་མཛད་དེ། ཤཱཀྱ་ཐུབ་པ་ཞེས་པའི་མིང་ཅན་སངས་རྒྱས་སུ་

གྱུར་ཏོ། །ད་ནི་དེ་མ་ཐག་ཏུ་དུས་མི་རིང་བར་བྱང་ཆུབ་སེམས་དཔའ་བྱམས་པ་རྒྱལ་བ་མི་ཕམ་པ་ཞེས་བྱ་བའི་སངས་རྒྱས་འབྱུང་བར་འགྱུར་རོ། །བདག་ཅག་གི་སྟོན་པ་འདིའི་རྣམ་པར་གཞག་པ་ནི་དེ་ལྟ་བུའོ། །གཞན་གྱི་ནི་གཞན་དུ་སྟེ། །ཡང་གཞན་རྣམས་ནི་
གཞན་དུ་རིག་པར་བྱའོ། །འདི་ལྟ་སྟེ། གང་ཟག་ནི་གསུམ་སྟེ། འདི་ལྟ་སྟེ། ལྷག་པའི་དད་པ་ཅན་དང་། ལྷག་པའི་བརྩོན་འགྲུས་ཅན་དང་། ལྷག་པའི་ཤེས་རབ་ཅན་ནོ། །དེ་ལ་ལྷག་པའི་དད་པ་ཅན་ནི་གོ་བར་ངེས་པར་འགྱུར་བ་ཡིན་ནོ། །ལྷག་པའི་བརྩོན་འགྲུས་ཅན་ནི་རྣམ་པར་སྤྲོས་པས་གོ་བར་
འགྱུར་རོ། །ལྷག་པའི་ཤེས་རབ་ཅན་ནི་མགོ་སྨོས་པས་གོ་བར་འགྱུར་རོ། །དེ་ལ་ལྷག་པའི་དད་པ་ཅན་ནི་ལུང་བསྟན་པ་ཐོབ་པ་ནས་བཟུང་སྟེ། བསྐལ་པ་སྟོང་ཕྲག་བརྒྱ་ལྷག་པའི་བསྐལ་པ་གྲངས་མེད་བཅུ་དྲུག་གིས་ཐམས་ཅད་མཁྱེན་པ་མངོན་དུ་བྱེད་པའོ། །ལྷག་པའི་བརྩོན་འགྲུས་ཅན་ནི་ལུང་
བསྟན་པ་ཐོབ་པ་ནས་བཟུང་སྟེ། བསྐལ་པ་འབུམ་ཕྲག་གཅིག་ལྷག་པའི་བསྐལ་པ་གྲངས་མེད་བརྒྱད་ཀྱིས་ཐམས་ཅད་མཁྱེན་པ་མངོན་དུ་ཐོབ་པར་འགྱུར་རོ། །ཤེས་རབ་ལྷག་པ་ཅན་ནི་ལུང་བསྟན་ཐོབ་པ་ནས་བཟུང་སྟེ། བསྐལ་པ་སྟོང་ཕྲག་བརྒྱ་ལྷག་པའི་བསྐལ་པ་གྲངས་མེད་བཞིས་ཐམས་ཅད་
མཁྱེན་པ་མངོན་དུ་བྱེད་དོ་ཞེས་རྣམ་པར་གཞག་པའོ། །ཡང་བྱང་ཆུབ་སེམས་དཔའི་ཐེག་པ་པ་བསྐལ་པ་གྲངས་མེད་གསུམ་གྱིས་སངས་རྒྱས་ཉིད་དུ་འབྱུང་བའོ་ཞེས་ཟེར་རོ། །དེ་ལྟར་ཡང་བསྐལ་པ་གྲངས་མེད་དང་པོས་ཚོགས་ཀྱི་ས་ནས་བརྩམས་ཏེ་ཅི་སྲིད་དུ་ས་དང་པོ་རྫོགས་པར་འགྱུར་རོ། །བསྐལ་
པ་གྲངས་མེད་གཉིས་པས་དྲི་མ་མེད་པ་ལ་སོགས་པ་ས་དྲུག་རྫོགས་པར་འགྱུར་རོ། །བསྐལ་པ་གྲངས་མེད་གསུམ་པས་མི་གཡོ་བའི་ས་ནས་བརྩམས་ཏེ་སངས་རྒྱས་ཀྱི་སའི་བར་དུ་རྫོགས་པར་འགྱུར་རོ་ཞེས་མདོ་སྡེ་ལ་སོགས་པ་ལས་སོ། །ཁ་ཅིག་ན་རེ་བྱང་ཆུབ་སེམས་དཔའི་ཐེག་པ་ཉིད་
གསུམ་དུ་ཆོས་མཐུན་པ་ལས་བསྐལ་པ་གྲངས་མེད་གསུམ་གྱིས་སངས་རྒྱས་ཉིད་ཐོབ་སྟེ། ཡང་དོན་དམ་པར་ནི་མ་ཡིན་ནོ་ཞེས་ཟེར་རོ། །དེ་ཡང་འདི་ལྟར་བྱང་ཆུབ་སེམས་དཔའ་ཚོགས་ཀྱི་ས་ཀུན་དུ་རྫོགས་པ་ནི་བསྐལ་པ་གྲངས་མེད་གཅིག་འདའ་བར་འགྱུར་རོ། །དེ་རྗེས་སུ་མོས་པས་

སྤྱོད་པའི་ས་ཡོངས་སུ་རྫོགས་པར་འགྱུར་བ་ནི་བསྐལ་པ་གྲངས་མེད་གཉིས་འདའོ། །དེའི་རྗེས་སུ་ས་དང་པོ་རབ་ཏུ་དགའ་བ་ནས་བཟུང་སྟེ་ས་བཅུ་པ་ཆོས་ཀྱི་སྤྲིན་གྱིས་ཇི་སྲིད་དུ་སོ་སོར་བསྐལ་པ་གྲངས་མེད་གསུམ་གྱིས་རྫོགས་པར་བྱས་ཏེ། སངས་རྒྱས་ཀྱི་ས་ཀུན་དུ་བཟང་པོ་སྒྲུབ་པར་བྱེད་
པར་འགྱུར་རོ། །དེ་ལྟར་བསྐལ་པ་གྲངས་མེད་སུམ་ཅུ་རྩ་གསུམ་གྱིས་སངས་རྒྱས་ཉིད་ཐོབ་པོ་ཞེས་ཟེར་རོ། །སངས་རྒྱས་འབྱུང་བ་ཡང་། སྐྱེ་བོ་རྣམས་ཚེ་ལོ་སྟོང་ཕྲག་བརྒྱད་ཅུ་ལས་འགྲིབ་པ་ནས་བརྩམས་ཏེ། ཅི་སྲིད་དུ་མི་རྣམས་ཚེ་ལོ་བརྒྱར་འགྱུར་བ་འདིའི་བར་དུ་འབྱུང་བ་ཡིན་ནོ། །སྔོན་མི་
རྣམས་ཀྱི་ཚེ་ལོ་འཕེལ་བ་ན་མི་འབྱུང་སྟེ་ཀུན་དུ་སྐྱོ་བ་མེད་པའི་ཕྱིར་རོ། །ཕྱིས་སྐྱེ་བོ་རྣམས་ཀྱི་ཚེ་ཐུང་བ་ལ་ཡང་མ་ཡིན་ཏེ། གང་ལས་དེའི་ཚེ་སྙིགས་མ་རྒྱས་པར་འགྱུར་བས་སོ། །འདི་ལྟ་སྟེ། ཚེའི་སྙིགས་མ་དང་། བསྐལ་པའི་སྙིགས་མ་དང་། ལྟ་བའི་སྙིགས་མ་དང་། ཉོན་མོངས་པའི་སྙིགས་མ་དང་།
སེམས་ཅན་གྱི་སྙིགས་མའོ། །དང་པོས་ནི་འཚོ་བ་རྒུད་པར་བྱེད་དོ། །གཉིས་པས་ནི་ཕན་པའི་ཚོགས་པ་རྒུད་པར་བྱེད་དོ། །གསུམ་པ་དང་བཞི་པས་ནི་དགེ་བའི་ཕྱོགས་རྒུད་པར་བྱེད་དོ། །ལྔ་པས་ནི་བདག་གི་དངོས་པོ་རྒུད་པར་བྱེད་དོ། །ཚད་གཟུགས་ནད་མེད་པ་སྟོབས་བློ་དྲན་པ་བརྟན་པ་རྣམས་ཉམས་
པར་འགྱུར་བས་སོ། །རང་སངས་རྒྱས་ནི་ཡར་འཕེལ་ལ་ཡང་དང་མར་འགྲིབ་ལ་ཡང་འབྱུང་བར་འགྱུར་རོ། །འཁོར་ལོས་སྒྱུར་བ་ནི་མི་རྣམས་ཀྱི་ཚེ་དཔག་ཏུ་མེད་པ་དང་ཅི་སྲིད་དུ་ལོ་སྟོང་ཕྲག་བརྒྱད་ཅུ་པ་ལ་འབྱུང་བར་འགྱུར་རོ། །མངལ་སྐྱེས་སམ། རྫུས་སྐྱེས་སམ། པདྨའི་སྙིང་པོ་ལས་
སྐྱེས་པ་ཡང་འབྱུང་ངོ་། །དེ་ལ་འཁོར་ལོས་སྒྱུར་བའི་རྒྱལ་པོ་ནི་བཞི་སྟེ། འདི་ལྟ་སྟེ། གླིང་གཅིག་གི་བདག་པོ་དང་། གླིང་གཉིས་ཀྱི་མངའ་བདག་དང་། གླིང་གསུམ་གྱི་མགོན་པོ་དང་། གླིང་བཞིའི་དབང་ཕྱུག་གོ། །འདི་རྣམས་གྲངས་ཅི་ལྟ་བ་བཞིན་དུ་བར་སྣང་ལས་འོངས་པའི་
ལྕགས་ཀྱི་འཁོར་ལོ་དང་། ཟངས་ཀྱི་འཁོར་ལོ་དང་། དངུལ་གྱི་འཁོར་ལོ་དང་། གསེར་གྱི་འཁོར་ལོའོ། །འཁོར་ལོ་ཅན་འདི་ཐམས་ཅད་ཀྱི་རིན་པོ་ཆེ་སྣ་བདུན་ནི་འདི་ལྟ་སྟེ། འཁོར་ལོ་རིན་པོ་ཆེ་དང་། གླང་པོ་རིན་པོ་ཆེ་མཆེ་བ་དྲུག་ལྡན་གླང་པོའི་རིགས་ལས་འོངས་པ་གླང་པོ་ཆེ་

ཐམས་ཅད་ཀྱི་གོང་མའོ། །རྟ་རིན་པོ་ཆེ་དང་། ནོར་བུ་རིན་པོ་ཆེ་དང་། བུད་མེད་རིན་པོ་ཆེ་དང་། ཁྱིམ་བདག་རིན་པོ་ཆེ་དང་། བློན་པོ་རིན་པོ་ཆེའོ། །འཕགས་པ་གནས་བརྟན་ན་རེ། འཁོར་ལོ་རིན་པོ་ཆེ་ནི་ཤར་གྱི་རྒྱ་མཚོ་ལས་འོངས་པས་རྩིབས་སྟོང་དང་ལྡན་པ་ལྟེ་
བ་དང་བཅས་པ་མུ་ཁྱུད་དང་བཅས་པའོ། །གླང་པོ་རིན་པོ་ཆེ་ནི་གླང་པོ་ཆེ་གསོ་སྦྱོང་འཕགས་ཀྱི་རིགས་ལས་འོངས་པ་གླང་པོ་ཆེན་པོ་རྣམས་ཀྱི་གཙོ་བོའོ། །རྟ་རིན་པོ་ཆེ་ནི་སྤྲིན་གྱི་ཤུགས་ཅན་གྱི་རྟའི་རིགས་ལས་འོངས་པའོ། །ནོར་བུ་རིན་པོ་ཆེ་ནི་རི་བོ་ཡངས་པ་ལས་འོངས་པའོ། །བུད་མེད་རིན་
པོ་ཆེ་ནི་བྱང་གི་སྒྲ་མི་སྙན་ལས་འོངས་པའོ། །ཁྱིམ་བདག་རིན་པོ་ཆེ་ནི་འཛམ་བུ་གླིང་གིའོ། །བུ་ཐུ་བོ་ནི་བློན་པོ་རིན་པོ་ཆེའོ་ཞེས་ཟེར་རོ། །དེ་ལ་གླང་པོ་རིན་པོ་ཆེའི་རིགས་བཅུ་ནི་འདི་ལྟ་སྟེ། གླང་པོ་ཆེ་ནག་པོ་དང་། གླང་པོ་ཆེ་དམར་སེར་དང་། གླང་པོ་ཆེ་དམར་སྐྱ་དང་། ཟངས་ཀྱི་གླང་པོ་ཆེ་དང་།
གླང་པོ་ཆེ་སེར་སྐྱའི་རིགས་དང་། སྤོས་ཀྱི་གླང་པོའི་རིགས་དང་། གླང་པོ་ཆེ་བཀྲ་ཤིས་ཀྱི་རིགས་དང་། གླང་པོ་ཆེ་གསེར་གྱི་རིགས་དང་། གླང་པོ་ཆེ་གསོ་སྦྱོང་འཕགས་ཀྱི་རིགས་དང་། གླང་པོ་ཆེ་མཆེ་བ་དྲུག་ལྡན་གྱི་རིགས་སོ། །གླང་པོ་ཆེ་རིགས་བཅུ་པོ་འདི་རྣམས་ཐམས་ཅད་ནི་སོ་སོར་ཕྱི་མ་བཅུ་
འགྱུར་གྱི་སྟོབས་སོ། །གླང་པོ་ཆེ་མཆེ་བ་དྲུག་ལྡན་གྱི་རིགས་སྟོང་ཕྲག་དགུའི་སྟོབས་ནི་སྲིད་པ་ཐ་མའི་བྱང་ཆུབ་སེམས་དཔའ་སྟོབས་ཀྱི་གླང་པོ་སྟོང་ཕྲག་དགུའི་སྟོབས་ཞེས་བརྗོད་དོ། །རྟའི་རིགས་ནི་བཞིའོ། །འདི་ལྟ་སྟེ། ཁ་ཌའི་རྟའི་རིགས་དང་། རྣམ་པར་སྨིན་པའི་རྟའི་རིགས་དང་། ཅང་
ཤེས་ཀྱི་རྟའི་རིགས་དང་། སྤྲིན་གྱི་ཤུགས་ཅན་གྱི་རྟའི་རིགས་སོ་ཞེས་སོ། །ཁ་ཅིག་ཏུ་གླིང་བཞི་དབང་ཕྱུག་གི་འཁོར་ལོས་སྒྱུར་བ་འགའ་ཞིག་ལྷའི་འཇིག་རྟེན་དུ་འགྲོ་བར་ཡང་འགྱུར་རོ་ཞེས་ཟེར་རོ། །ལྷའི་འཇིག་རྟེན་དུ་འགྲོ་བའི་འཁོར་ལོས་སྒྱུར་བའི་རྒྱལ་པོ་དེ་ཡང་རྣམ་པ་དྲུག་སྟེ། འདི་ལྟ་
སྟེ། རྒྱལ་ཆེན་བཞི་པའི་ལྷའི་འཇིག་རྟེན་དུ་འགྲོ་བ་དང་། སུམ་ཅུ་རྩ་གསུམ་པའི་ལྷའི་འཇིག་རྟེན་དུ་འགྲོ་བ་དང་། འཐབ་བྲལ་གྱི་ལྷའི་འཇིག་རྟེན་དུ་འགྲོ་བ་དང་། དགའ་ལྡན་གྱི་ལྷའི་འཇིག་རྟེན་དུ་འགྲོ་བ་དང་། འཕྲུལ་དགའི་ལྷའི་འཇིག་རྟེན་དུ་འགྲོ་བ་དང་། གཞན་འཕྲུལ་དབང་བྱེད་ཀྱི་ལྷའི་

འཇིག་རྟེན་དུ་འགྲོ་བའོ། །གླིང་བཞི་པ་འཇིག་རྟེན་གྱི་ཁམས་གཅིག་ཏུ་འཁོར་ལོས་སྒྱུར་བ་གཉིས་དུས་གཅིག་ཏུ་འབྱུང་བ་མ་ཡིན་ཏེ། འགྲན་བཟོད་མེད་པའི་ལས་བྱས་པའི་ཕྱིར་རོ། །སངས་རྒྱས་བཞིའོ། །ཞིང་གཅིག་ཏུ་སངས་རྒྱས་གཉིས་འབྱུང་བ་མ་ཡིན་ཏེ། སངས་རྒྱས་ཀྱི་སྐུ་གཟུགས་འདུས་ནས་གདུལ་བར་བྱ་བའི་
སྐྱེ་བོ་མི་སྲིད་པའི་ཕྱིར་དང་། མྱུར་བར་གུས་པའི་དོན་གྱི་ཕྱིར་རོ། །སངས་རྒྱས་གཅིག་ལ་ཤིན་ཏུ་ཆེས་གུས་པར་འགྱུར་ཏེ། འདི་འདྲ་བ་རྙེད་དཀའ་བའོ་ཞེས་བསམས་ནས་བསྟན་པ་སྒྲུབ་པ་ལ་ཤིན་ཏུ་ཆེས་གུས་པར་འགྱུར་རོ། །འདི་ནི་གཤེགས་པའི་མ་ཡོངས་སུ་མྱ་ངན་ལས་འདས་པ་ན་བདག་
དོན་མེད་པར་འགྱུར་ཞེས་སོ། །སྟོང་གསུམ་གྱི་འཇིག་རྟེན་ཁམས་གཞན་དུ་འང་སངས་རྒྱས་ཡོད་པ་ཉིད་དེ། གང་ལས་ཚོགས་བསགས་པ་ལ་འཇུག་པ་མང་དུ་མཐོང་བ་དང་། ཞིང་གཅིག་ཏུ་མང་པོ་རྣམས་ཅིག་ཅར་དུ་སྐྱེ་བ་མི་འཐད་པའི་ཕྱིར་རོ། །སྟོང་གསུམ་གཞན་དུ་སངས་རྒྱས་འབྱུང་
བ་ཡོད་པ་གེགས་ཡོད་པ་མ་ཡིན་ནོ། །སྟོང་གསུམ་གྱི་སྟོང་ཆེན་པོ་གཞན་དུ་ཡང་སངས་རྒྱས་འབྱུང་ངོ་ཞེས་པ་ནི་ངེས་པའོ། །བུད་མེད་ཀྱང་འཁོར་ལོས་སྒྱུར་བ་དང་བརྒྱ་བྱིན་ལ་སོགས་པ་ཐོབ་པར་འགྱུར་བ་ཡིན་ཏེ། བུད་མེད་ནི་གཞན་དབང་དུ་གྱུར་པ་དང་། བུད་མེད་ལ་སོགས་པའི་རིན་
པོ་ཆེ་རྣམས་ཉེ་བར་ལོངས་སྤྱོད་པའི་ནུས་པ་མེད་པས་སོ། །རང་སངས་རྒྱས་དང་བླ་ན་མེད་པའི་བྱང་ཆུབ་ཏུ་ལྷག་པར་འགྲོ་བ་ཡང་མ་ཡིན་ནོ། །དེ་ཡང་རིམ་པ་བཞིན་དུ་བསེ་རུ་ལྟ་བུར་འགྲོགས་པ་དང་། འཇིག་རྟེན་གསུམ་གྱི་སྟོན་པ་ཉིད་མི་སྲིད་པའི་ཕྱིར་རོ། །དེ་ཡང་སྐྱེ་བོ་དམུ་རྒོད་
བགྲོད་བྱ་ཡིན་པ་དང་ཤེས་རབ་ཆུང་བ་དང་། སློབ་དཔོན་མེད་པར་རྫོགས་པར་བྱང་ཆུབ་པ་མི་རུང་བའི་ཕྱིར་དང་། ཀུན་སྤྱོད་ལ་ཡང་གཞན་དབང་ཡིན་པའི་ཕྱིར་རོ། །དེ་ནས་བསྐལ་པ་གང་ལ་སངས་རྒྱས་གང་འབྱུང་ཞེ་ན། བསྐལ་པ་བཟང་པོ་འདི་ཉིད་ལ་སངས་རྒྱས་ལྔ་འབྱུང་ངོ་ཞེས་ཁ་ཅིག་
གོ། །ལྔ་བརྒྱ་ཉིད་དོ་ཞེས་གཞན་དག་གོ། སངས་རྒྱས་སྟོང་ངོ་ཞེས་ཡང་གཞན་དག་གོ། །བསྐལ་པ་བཟང་པོའི་མདོ་ལས་བྱང་ཆུབ་སེམས་དཔའི་ཚུལ་ལུགས་གསུངས་ཏེ། བསྐལ་པ་བཟང་པོས་འདི་ལ་ཕྱིས་སངས་རྒྱས་མེད་པའི་བསྐལ་པ་སྟོང་ཕྲག་དྲུག་ཅུ་འབྱུང་བར་

འགྱུར་རོ། །དེ་ནས་ཕྱིས་བསྐལ་གྲངས་པ་ཆེན་པོ་ཞེས་བྱ་བ་འབྱུང་བར་འགྱུར་རོ། །བསྐལ་པ་གཅིག་པོ་དེ་ལ་སངས་རྒྱས་སྟོང་ཕྲག་བརྒྱད་ཅུ་འབྱུང་བར་འགྱུར་རོ། །བསྐལ་པ་སྐར་མ་ལྟ་བུའི་དེ་མ་ཐག་ཏུ་བསྐལ་པ་བརྒྱ་ཕྲག་གསུམ་དུ་སངས་རྒྱས་འབྱུང་བར་མི་འགྱུར་
རོ། །དེ་ནས་ཕྱིས་བསྐལ་པ་ཡོན་ཏན་བཀོད་པ་ཞེས་བྱ་བ་འབྱུང་བར་འགྱུར་རོ། །བསྐལ་པ་གཅིག་པོ་དེ་ལ་སངས་རྒྱས་སྟོང་ཕྲག་བརྒྱད་ཅུ་རྩ་བཞི་འབྱུང་བར་འགྱུར་རོ། །འཕགས་པ་གནས་བརྟན་པ་ན་རེ། སངས་རྒྱས་སྤྱན་གྱི་བསྐལ་པ་ལྔ་ཉིད་དེ། འདི་ལྟ་སྟེ། སྙིང་པོ་ཞེས་པའི་བསྐལ་
པ་དང་། སྙིང་པོ་མཆོག་ཅེས་པའི་བསྐལ་པ་དང་། མཆོག་རབ་ཅེས་པའི་བསྐལ་པ་དང་། སྙིང་པོའི་སྙིང་པོ་ཞེས་པའི་བསྐལ་པ་དང་བསྐལ་པ་བཟང་པོའོ། །དེ་ལ་སྙིང་པོའི་བསྐལ་པ་ལ་སངས་རྒྱས་གཅིག་ཉིད་འབྱུང་བར་འགྱུར་རོ། །སྙིང་པོ་མཆོག་གི་བསྐལ་པ་ལ་སངས་རྒྱས་གཉིས་ཉིད་
འབྱུང་བར་འགྱུར་རོ། །མཆོག་རབ་ཀྱི་བསྐལ་པ་ལ་སངས་རྒྱས་གསུམ་ཉིད་འབྱུང་བར་འགྱུར་རོ། །སྙིང་པོའི་སྙིང་པོ་བསྐལ་པ་ལ་སངས་རྒྱས་བཞི་ཉིད་འབྱུང་བར་འགྱུར་རོ། །བསྐལ་པ་བཟང་པོ་ལ་སངས་རྒྱས་ལྔ་ཉིད་འབྱུང་བར་འགྱུར་རོ། །སངས་རྒྱས་དྲུག་ལ་སོགས་པའི་བསྐལ་པ་
རྣམ་པ་ཐམས་ཅད་དུ་སྲིད་པར་མི་འགྱུར་རོ་ཞེས་ཟེར་རོ། །པཎྜི་ཏ་ཆེན་པོ་སྟོབས་བཅུ་དཔལ་བཤེས་གཉེན་གྱིས་བསྡུས་པ་འདུས་བྱས་དང་འདུས་མ་བྱས་རྣམ་པར་ངེས་པ་ལས་བསྐལ་པ་རྣམ་པར་ངེས་པ་ཞེས་བྱ་བ་ལེའུ་བརྒྱད་པའོ།། །།སེམས་ཅན་གྱི་འཇིག་རྟེན་འདི་ནི།
འགའ་ཞིག་ཏུ་ཕུང་པོའི་སྒོ་ནས་རྣམ་པར་གཞག་པར་བྱེད་ལ། འགའ་ཞིག་ཏུ་སྐྱེ་མཆེད་ཀྱི་སྒོ་ནས་རྣམ་པར་གཞག་པར་བྱེད་ཅིང་། འགའ་ཞིག་ཏུ་ཁམས་ཀྱི་སྒོ་ནས་སོ། །དེ་ལ་ཕུང་པོ་ནི་ལྔ་སྟེ། འདི་ལྟ་སྟེ། གཟུགས་ཀྱི་ཕུང་པོ་དང་། ཚོར་བའི་ཕུང་པོ་དང་། འདུ་ཤེས་ཀྱི་ཕུང་
པོ་དང་། འདུ་བྱེད་ཀྱི་ཕུང་པོ་དང་། རྣམ་པར་ཤེས་པའི་ཕུང་པོའོ། །སྤུངས་པའི་དོན་གྱིས་ན་ཕུང་པོའོ། །དེ་ལ་གཟུགས་ནི་རྣམ་པ་གསུམ་སྟེ། འདི་ལྟ་སྟེ། དབང་པོའི་གཟུགས་དང་། ཡུལ་གྱི་གཟུགས་དང་། རྣམ་པར་རིག་བྱེད་མ་ཡིན་པའི་གཟུགས་སོ། །དེ་ལ་དབང་པོའི་

གཟུགས་ནི་རྣམ་པ་ལྔའོ། །འདི་ལྟ་སྟེ། མིག་གི་དབང་པོ་དང་། ཉན་པའི་དབང་པོ་དང་། སྣའི་དབང་པོ་དང་། ལྕེའི་དབང་པོ་དང་། ལུས་ཀྱི་དབང་པོའོ། །ཡུལ་གྱི་གཟུགས་རྣམ་པ་ལྔ་སྟེ། འདི་ལྟ་སྟེ། ཡུལ་གཟུགས་དང་། ཡུལ་སྒྲ་དང་། ཡུལ་དྲི་དང་། ཡུལ་རོ་
དང་། ཡུལ་རེག་བྱའོ། །དེ་ལ་ཡུལ་གཟུགས་ལ་རྣམ་པ་གཉིས་ཏེ། འདི་ལྟ་སྟེ། ཁ་དོག་ལས་དང་། དབྱིབས་ལས་སོ། །དེ་ལ་ཁ་དོག་ལ་ནི་རྣམ་པ་བཞི་སྟེ། འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོའོ། །དེ་ལས་ཕྱེ་བས་མང་དུ་འགྱུར་རོ། །དབྱིབས་
ལ་རྣམ་པ་བདུན་ཏེ། འདི་ལྟ་སྟེ། ཐུང་བ་དང་། རིང་བ་དང་། རྡོག་པོ་དང་། ཟླུམ་པོ་དང་། མཐོ་བ་དང་། དམའ་བ་དང་། མི་མཉམ་པའོ། །ཡང་གཟུགས་ནི་རྣམ་པ་ཉི་ཤུ་སྟེ། འདི་ལྟ་སྟེ། ཁ་དོག་བཞི་དང་། དབྱིབས་བརྒྱད་དང་། སྤྲིན་དང་། དུ་བ་དང་། རྡུལ་དང་། ཁུག་རྣ་དང་།
གྲིབ་མ་དང་། ཉི་འོད་དང་། སྣང་བ་དང་། མུན་པའོ། །ཡང་གཟུགས་ལ་རྣམ་པ་གསུམ་སྟེ། འདི་ལྟ་སྟེ། བསྟན་དུ་ཡོད་ཅིང་ཐོགས་པ་དང་བཅས་པའི་གཟུགས་དང་། བསྟན་དུ་མེད་ཅིང་ཐོགས་པ་མེད་པའི་གཟུགས་སོ། །དེ་ལ་བསྟན་དུ་ཡོད་ཅིང་ཐོགས་པ་དང་བཅས་པའི་གཟུགས་
ནི་གཅིག་གོ། །འདི་ལྟ་སྟེ། མིའི་གཟུང་བྱའི་གཟུགས་སོ། །བསྟན་དུ་མེད་ཅིང་ཐོགས་པ་དང་བཅས་པའི་གཟུགས་ནི་དགུ་སྟེ། འདི་ལྟ་སྟེ། མིག་ལ་སོགས་པའི་དབང་པོ་ལྔ་དང་། སྒྲ་ལ་སོགས་པའི་ཡུལ་བཞིའོ། །བསྟན་དུ་མེད་ཅིང་ཐོགས་པ་མེད་པའི་གཟུགས་ནི་གཅིག་སྟེ།
འདི་ལྟ་སྟེ། རྣམ་པར་རིག་བྱེད་མ་ཡིན་པའི་གཟུགས་སོ། །ཡང་གཟུགས་ནི་རྣམ་པ་གཉིས་ཏེ། འདི་ལྟ་སྟེ། འབྱུང་བ་ཆེན་པོའི་གཟུགས་དང་། འབྱུང་བ་ཆེན་པོ་ཉེ་བར་བླང་བྱའི་གཟུགས་སོ། །དེ་ལ་འབྱུང་བ་ཆེན་པོ་ནི་བཞི་སྟེ། འདི་ལྟ་སྟེ། ས་དང་། ཆུ་དང་།
མེ་དང་། རླུང་ངོ་། །དེ་ལ་སའི་ཆོས་བཞི་ལ་འདི་ལྟ་སྟེ། སྲིད་རུང་དང་། སྲ་བ་དང་། མཁྲང་བ་དང་། འཛིན་པའི་ལས་སོ། །ཆུའི་ཆོས་གསུམ་ལ་འདི་ལྟ་སྟེ། གཤེར་བ་དང་། སྣུམ་པ་དང་། སྡུད་པའི་ལས་སོ། །མེའི་ཆོས་གཉིས་ལ་འདི་ལྟ་སྟེ། ཚ་བ་དང་། སྨིན་ཅིང་

སྐམས་པར་བྱེད་པའི་ལས་སོ། །རླུང་གི་ཆོས་གསུམ་ལ་འདི་ལྟ་སྟེ། ཡང་བ་དང་། གཡོ་བ་དང་། འཕེལ་ཞིང་རབ་ཏུ་རྒྱས་པར་བྱེད་པའི་ལས་སོ། །འབྱུང་བ་ཆེན་པོ་ཉེ་བར་བླང་བའི་གཟུགས་ལ་རྣམ་པ་བཅུ་སྟེ། འདི་ལྟ་སྟེ། དབང་པོ་ལྔ་དང་། ཡུལ་
ལྔའོ། །སྒྲ་ལ་རྣམ་པ་གཉིས་ནི་འདི་ལྟ་སྟེ། ཟིན་པའི་འབྱུང་བ་ཆེན་པོའི་རྒྱུ་ལས་བྱུང་བ་དང་། མ་ཟིན་པའི་འབྱུང་བ་ཆེན་པོའི་རྒྱུ་ལས་བྱུང་བའོ། །དེ་ལ་ཟིན་པའི་འབྱུང་བ་ཆེན་པོའི་རྒྱུ་ལས་བྱུང་བ་ལ་རྣམ་པ་གཉིས་ནི་འདི་ལྟ་སྟེ། སེམས་ཅན་དུ་སྟོན་པ་དང་། སེམས་ཅན་དུ་སྟོན་པ་མ་ཡིན་ནོ། །མ་
ཟིན་པའི་འབྱུང་བ་ཆེན་པོའི་རྒྱུ་ལས་བྱུང་བ་ལ་རྣམ་པ་གཉིས་ནི་འདི་ལྟ་སྟེ། སེམས་ཅན་དུ་སྟོན་པ་དང་། སེམས་ཅན་དུ་སྟོན་པ་མ་ཡིན་པའོ། །ཡང་བཞི་པོ་འདི་རྣམས་ལ་སོ་སོར་ཡིད་དུ་འོང་བ་དང་ཡིད་དུ་མི་འོང་བའི་དབྱེ་བས་རྣམ་པ་བརྒྱད་དོ། །དྲི་ལ་རྣམ་པ་གསུམ་སྟེ། འདི་ལྟ་སྟེ། དྲི་བཟང་
པོ་དང་། དྲི་ངན་པ་དང་། དྲི་མཉམ་པའོ། །རོ་ལ་དྲུག་སྟེ་འདི་ལྟ་སྟེ། མངར་བ་དང་། སྐྱུར་བ་དང་། ལན་ཚྭ་དང་། ཚ་བ་དང་། ཁ་བ་དང་། བསྔལ་བའོ། །རེག་བྱ་རྣམ་པ་བཅུ་གཅིག་ནི་འདི་ལྟ་སྟེ། ས་དང་། ཆུ་དང་། མེ་དང་། རླུང་དང་། འཇམ་པ་དང་། རྩུབ་པ་དང་། ལྕི་བ་དང་། ཡང་བ་དང་།
བསིལ་བ་དང་། བཀྲེས་པ་དང་། སྐོམ་པའོ། །རྣམ་པར་རིག་བྱེད་མ་ཡིན་པའི་གཟུགས་ལ་རྣམ་པ་གསུམ་སྟེ། འདི་ལྟ་སྟེ། སྡོམ་པ་དང་རྗེས་སུ་འབྲེལ་པའི་གཟུགས་དང་། སྡོམ་པ་མ་ཡིན་པ་དང་རྗེས་སུ་འབྲེལ་པའི་གཟུགས་དང་། སྡོམ་པ་དང་སྡོམ་པ་མ་ཡིན་པ་དང་རྗེས་སུ་འབྲེལ་པའི་གཟུགས་
སོ། །ཚོར་བའི་ཕུང་པོ་ལ་རྣམ་པ་གཉིས་ཏེ་འདི་ལྟ་སྟེ། ལུས་ལས་བྱུང་བའི་ཚོར་བ་དང་། སེམས་ལས་བྱུང་བའི་ཚོར་བའོ། །དེ་ལ་ལུས་ལས་བྱུང་བའི་ཚོར་བ་ལྔ་ནི་འདི་ལྟ་སྟེ། མིག་གི་འདུས་ཏེ་རེག་པའི་རྐྱེན་ལས་བྱུང་བའི་ཚོར་བ་དང་། རྣ་བའི་འདུས་ཏེ་རེག་པའི་རྐྱེན་ལས་སྐྱེས་པའི་དང་།
སྣའི་འདུས་ཏེ་རེག་པའི་རྐྱེན་ལས་སྐྱེས་པའི་དང་། ལྕེའི་འདུས་ཏེ་རེག་པའི་རྐྱེན་ལས་བྱུང་བའི་དང་།