Luận tạng Tây Tạng (Tengyur) — Tập 108

སྟོབས་བཅུ་དཔལ་བཤེས་གཉེན་གྱིས་བསྡུས་པ་འདུས་བྱས་དང་འདུས་མ་བྱས་རྣམ་པར་ངེས་པ་ལས་རྒྱུ་རྣམ་པར་ངེས་པ་ཞེས་བྱ་བ་ལེའུ་གཉིས་པའོ།། །།ཆོས་འདུས་
བྱས་ནི་རྣམ་པ་གཉིས་ཏེ། འདི་ལྟ་སྟེ། སྣོད་ཀྱི་འཇིག་རྟེན་དང་། སེམས་ཅན་གྱི་འཇིག་རྟེན་ནོ། །དེ་ལ་སྣོད་ཀྱི་འཇིག་རྟེན་རྣམ་པ་མང་དུ་གྱུར་པ་ཡིན་ཡང་། འདི་ལྟ་སྟེ། ནམ་མཁའི་མཐར་ཐུག་པ་རླུང་གི་དཀྱིལ་འཁོར་རོ། །དེའི་སྟེང་ན་ཆུའི་དཀྱིལ་འཁོར་རོ། །དེའི་སྟེང་ན་དབང་ཆེན་གསེར་གྱི་དཀྱིལ་འཁོར་རོ། །
དེ་སྐད་དུ་ཡང་། དེ་ལ་སྣོད་ཀྱི་འཇིག་རྟེན་གྱི། །གནས་དབྱིབས་བཤད་དེ་འོག་དག་ན། །རླུང་གི་དཀྱིལ་འཁོར་རྔམས་སུ་ནི། །འབུམ་ཕྲག་དྲུག་ཅུ་གྲངས་མེད་དོ། །ཆུ་རྔམ་འབུམ་ཕྲག་བཅུ་གཅིག་དང་། །སྟོང་ཕྲག་དག་ནི་ཉི་ཤུའོ། །ཕྱིས་ནི་རྔམས་སུ་འབུམ་ཕྲག་བརྒྱད། །ལྷག་མ་དག་ནི་གསེར་དུ་འགྱུར། །ཞེས་
སོ། །དེ་ལ་ལྷག་མ་ཞེས་བྱ་བ་ནི་དབང་ཆེན་གསེར་གྱི་དཀྱིལ་འཁོར་རྔམས་སུ་དཔག་ཚད་སྟོང་ཕྲག་ཉི་ཤུས་ལྷག་པའི་འབུམ་ཕྲག་གསུམ་གྱི་ཚད་དོ། །རྒྱར་ཡངས་པའི་ཚད་ཀྱང་། ཆུ་དང་གསེར་གྱི་དཀྱིལ་འཁོར་ལ། །ཐད་ཀར་འབུམ་ཕྲག་བཅུ་གཉིས་དང་། །སྟོང་ཕྲག་གསུམ་དང་བརྒྱ་ཕྲག་ནི། །
ཕྱེད་དང་ལྔ་རྣམས་ཁོ་ནའོ། །ཁོར་ཡུག་ཏུ་ནི་སུམ་འགྱུར་རོ། །ཞེས་སོ། །དབང་ཆེན་གསེར་གྱི་དཀྱིལ་འཁོར་གྱི་སྟེང་དབུས་ནི་རི་རབ་རིན་པོ་ཆེ་བཞིའི་རང་བཞིན་ནོ། །དེ་ལ་རིན་པོ་ཆེ་བཞི་ནི། འདི་ལྟ་སྟེ། གསེར་དང་། དངུལ་དང་། བཻ་ཌཱུརྱ་དང་། ཤེལ་ལོ། །རི་བོ་རྒྱུད་བདུན་ནི་གསེར་རོ། །
འདི་ལྟ་སྟེ། གཉའ་ཤིང་འཛིན་དང་། གཤོལ་མདའ་འཛིན་དང་། སེང་ལྡེང་ཅན་དང་། བལྟ་ན་སྡུག་དང་། རྟ་རྣ་རི་དང་། རྣམ་པར་འདུད་དང་། མུ་ཁྱུད་འཛིན་ནོ། །དེ་ལས་ཕྱི་རོལ་ཁོར་ཡུག་རི་ནི་ལྕགས་སོ་དགུ་པའོ། །གསེར་གྱི་ས་གཞིའི་དཀྱིལ་འཁོར་གྱི་སྟེང་ན་ཆུའི་དཀྱིལ་འཁོར་རྔམས་སུ་

དཔག་ཚད་སྟོང་ཕྲག་བརྒྱད་ཅུ་དང་རི་རབ་ལ་སོགས་པ་རི་དགུ་པོ་རྣམས་བྱིང་བའོ། །དེ་སྐད་དུ་ཡང་། ལྷུན་པོ་རིན་ཆེན་བཞི་རང་བཞིན། །ཆུ་རུ་སྟོང་ཕྲག་བརྒྱད་ཅུ་ནུབ། །ཆུ་ལས་སྟེང་དུ་རི་བོ་ཡང་། །སྟོང་ཕྲག་དག་ནི་བརྒྱད་ཅུའོ། །བརྒྱད་པོ་འཕང་དུ་ཕྱེད་ཕྱེད་དབྲི། །དེ་དག་རྔམས་སུ་
འཕང་དང་མཉམ། །ཞེས་སོ། །རི་བོ་མཆོག་ལ་སོགས་པ་ནས་མུ་ཁྱུད་འཛིན་གྱི་མཐར་ཐུག་པར་རི་རྣམས་ཀྱི་བར་དང་བར་དུ་བསིལ་བ་ཞེས་པ་རྒྱ་མཚོ་བདུན་ཏེ། ཡན་ལག་བརྒྱད་དང་ལྡན་པའི་ཆུས་གང་བའོ། །དེ་ལ་ཆུའི་ཡན་ལག་བརྒྱད་ནི་འདི་ལྟ་སྟེ། བསིལ་བ་དང་། མྱང་བདེ་བ་དང་།
ཡང་བ་དང་། འཇམ་པ་དང་། དངས་པ་དང་། དྲི་ངན་པ་མེད་པ་དང་། འཐུང་བ་ན་མགྲིན་པ་མི་འགག་པ་དང་། འཐུངས་ན་ཡང་ལྟོ་བ་ལ་མི་གནོད་པའོ། །ཡང་གསུངས་ཏེ། དེ་དག་བར་བདུན་རོལ་མཚོ་ཡིན། །དང་པོ་སྟོང་ཕྲག་བརྒྱད་ཅུའོ། །དེ་ནི་ནང་གི་རྒྱ་མཚོ་ཡིན། །དེ་ཡི་ངོས་
ལ་སུམ་འགྱུར་ཏེ། །རོལ་མཚོ་གཞན་རྣམས་ཕྱེད་ཕྱེད་དོ། །ཞེས་སོ། །མུ་ཁྱུད་འཛིན་དང་ཁོར་ཡུག་དག་གི་བར་དུ་ནི་བ་ཚྭ་ཅན་གྱི་རྒྱ་མཚོ་ཆེན་པོའོ། །ཡང་གསུངས་ཏེ། ལྷག་མ་ཕྱི་ཡི་མཚོ་ཆེན་ལ། །འབུམ་ཕྲག་གསུམ་དང་སྟོང་ཕྲག་ནི། །ཉི་ཤུ་གཉིས་སོ་དེ་ལ་ནི། །ཞེས་སོ། །མུ་ཁྱུད་འཛིན་གྱི་ཕྱི་རོལ་
ཕྱོགས་བཞིར་གླིང་བཞིའོ། །འདི་ལྟ་སྟེ། ལྷོ་རུ་འཛམ་བུའི་གླིང་དང་། ནུབ་ཏུ་བ་ལང་སྤྱོད་དང་། བྱང་དུ་སྒྲ་མི་སྙན་དང་། ཤར་དུ་ལུས་འཕགས་པོའོ། །ཡང་གསུངས་ཏེ། དེ་ཡང་། འཛམ་བུའི་གླིང་ནི་ངོས་གསུམ་ལ། །སྟོང་ཕྲག་གཉིས་ཏེ་ཤིང་རྟའི་དབྱིབས། །གཅིག་ལ་དཔག་ཚད་ཕྱེད་དང་
བཞི། །ཤར་གྱི་ལུས་འཕགས་ཟླ་གམ་འདྲ། །ངོས་གསུམ་འདི་དང་འདྲ་གཅིག་ལ། །དཔག་ཚད་སུམ་བརྒྱ་ལྔ་བཅུའོ། །བ་ལང་སྤྱོད་ནི་ཟླུམ་པོ་ལ། །སྟོང་ཕྲག་ཕྱེད་དང་བརྒྱད་ཡིན་ནོ། །དབུས་ལ་སྟོང་ཕྲག་ཕྱེད་དང་གསུམ། །སྒྲ་མི་སྙན་བརྒྱད་གྲུ་བཞིར་མཉམ། །ཞེས་སོ། །བར་བར་དུ་
གླིང་བརྒྱད་དེ། འདི་ལྟ་སྟེ། འཛམ་བུའི་གླིང་གི་ལོགས་གཉིས་སུ་རྔ་ཡབ་དང་། རྔ་ཡབ་གཞན་ནོ། །བ་ལང་སྤྱོད་ཀྱི་ནི། གཡོ་ལྡན་དང་། ལམ་མཆོག་འགྲོའོ། །སྒྲ་མི་སྙན་གྱི་ནི། སྒྲ་མི་སྙན་དང་། སྒྲ་མི་སྙན་གྱི་ཟླའོ། །ཤར་གྱི་ལུས་འཕགས་ཀྱི་ནི། ལུས་དང་། ལུས་འཕགས་

པའོ། །འདིར་འཛམ་བུའི་གླིང་ལ་འཛམ་བུའི་གླིང་གི་བྱང་དུ་རི་ནག་པོ་གསུམ་སྟེ། དེ་ལས་འདས་པ་ན་ཡང་གསུམ་མོ། །ཡང་གསུམ་སྟེ་དགུའོ། །དེའི་ཕ་རོལ་ན་རི་ཁ་བ་ཅན་ཉིད་དོ། །དེའི་ཕ་རོལ་ན་ཆུ་དང་ཞེང་དུ་དཔག་ཚད་ལྔ་བཅུ་ཡོད་པ་མཚོ་མ་དྲོས་པ་ཞེས་བྱ་བ་ཡན་
ལག་བརྒྱད་དང་ལྡན་པའི་ཆུས་གང་བའོ། །དེ་ལས་ཆུ་བོ་ཆེན་པོ་བཞི་འབབ་པ་ཉིད་དོ། །འདི་ལྟ་སྟེ། གང་གཱ་དང་། སིན་དྷུ་དང་། ཤཱི་ཏ་དང་། པཀྵུའོ། །མཚོ་འདིའི་འགྲམ་བྱང་ཕྱོགས་ན་འཛམ་བུའི་ཤིང་ཡོད་དེ། མཐོ་བ་དང་རྒྱར་དཔག་ཚད་ལྔ་བཅུའི་ཚད་དང་ལྡན་པའོ། །གཞི་གང་
ཞིག་གིས་འཛམ་གླིང་ཞེས་གྲགས་པ། །གང་གི་འབྲས་བུ་མངར་དང་རོ་མཆོག་གོ། །དེའི་ཕ་རོལ་ན་རི་སྤོས་ཀྱི་དད་ལྡང་བའོ། །འཛམ་བུ་གླིང་འདིའི་དབུས། རྡོ་རྗེའི་གདན་གསེར་གྱི་རང་བཞིན་གྱི་ས་གཞི་ལས་མངོན་པར་གྲུབ་པ། མཐོ་རུ་འཛམ་བུའི་གླིང་གི་མཐའ་དང་། ཞེང་དུ་ཤིང་རྟ་འཁོར་
ལོའི་ཚད་དང་ལྡན་པ། གང་དུ་སྲིད་པ་ཐ་མའི་བྱང་ཆུབ་སེམས་དཔའ་བཞུགས་ནས་རྡོ་རྗེ་ལྟ་བུའི་ཏིང་ངེ་འཛིན་སྐྱེད་པར་བྱེད་པ་གང་ཡིན་པའོ། །འཛམ་བུའི་གླིང་འདི་ཉིད་ཀྱི་འོག །དཔག་ཚད་སྟོང་ཕྲག་ཉི་ཤུ་ན་མནར་མེད་པའི་དམྱལ་བ་ཆེན་པོ་ཡོད་དེ་རྔམས་དང་ཞེང་དག་ཏུ་དཔག་ཚད་སྟོང་ཕྲག་ཉི་ཤུའི་
ཚད་དང་ལྡན་པའོ། །དེ་ལྟར་འདི་ནས་མནར་མེད་པ་འདིའི་འོག་གི་ས་གཞི་ནི་དཔག་ཚད་སྟོང་ཕྲག་བཞི་བཅུར་འགྱུར་རོ། །མནར་མེད་པའི་སྟེང་། གོང་ནས་གོང་དུ་དམྱལ་བ་བདུན་རྣམ་པར་གནས་སོ། །འདི་ལྟ་སྟེ། རབ་ཏུ་ཚ་བ་དང་། ཚ་བ་དང་། ངུ་འབོད་ཆེན་པོ་དང་། ངུ་འབོད་དང་།
བསྡུས་འཇོམས་དང་། ཐིག་ནག་དང་། ཡང་སོས་སོ་ཞེས་མནར་མེད་པའི་ཕྱོགས་བཞི་རུ་ཕྱི་རོལ་འཁོར་ནས་གནས་སོ་ཞེས་གཞན་དག་གོ། །མནར་མེད་ལ་སོགས་པ་དེ་རྣམས་ནི་དམྱལ་བ་ཆེན་པོ་བརྒྱད་དོ། །དམྱལ་བ་ཆེན་པོ་བརྒྱད་པོ་རྣམས་སོ་སོ་ལ་ཉེ་འཁོར་གྱི་དམྱལ་བ་བཅུ་དྲུག་སྟེ། འདི་
ལྟ་སྟེ། ཀུ་ཀཱུ་ལ་དང་། ཀུ་ཎ་པ་དང་། སྤུ་གྲིས་གཏམས་པའི་ལམ་ལ་སོགས་པ་དང་། ཆུ་བོ་རབ་མེད་དོ། །ཕྱོགས་གཅིག་ལའང་ཉེ་བའི་དམྱལ་བ་བཞི་སྟེ། འདི་ལྟར་ཕྱོགས་གཞན་གསུམ་ལ་སོ་སོར་བཞི་ཁོ་ན་ཉིད་དེ་བཅུ་དྲུག་གོ། །གཞན་ཡང་གྲང་བའི་དམྱལ་བ་བརྒྱད་ནི་དམྱལ་

བ་ཆེན་པོ་རྣམས་ཀྱི་ཐད་དུ་གནས་པ་ཉིད་དོ། །འདི་ལྟ་སྟེ། ཆུ་བུར་ཅན་དང་། ཆུ་བུར་ཆེན་པོ་དང་། སོ་ཐམས་ཐམས་དང་། ཧ་ཧ་དང་། ཧུ་ཧུ་དང་། ཨུཏྤ་ལ་ལྟ་བུ་དང་། པདྨ་ལྟ་བུ་དང་། པདྨ་ཆེན་པོ་ལྟ་བུའོ། །ཉི་ཚེ་བའི་དམྱལ་བ་རྣམས་ནི་གནས་ངེས་པ་མེད་དེ། ཆུ་བོའི་འགྲམ་དང་།
རྒྱ་མཚོའི་འགྲམ་དང་རི་དང་མྱ་ངམ་ཐང་དང་ཡུལ་ངན་ལ་སོགས་པ་རྣམས་སུ་གནས་པའོ། །དུད་འགྲོ་རྣམས་ཀྱི་རྩ་བའི་གནས་ནི་རྒྱ་མཚོ་ཆེ། སྐམ་དང་ཆུ་དང་ནམ་མཁའ་ལའང་། ཞེས་སོ། །ཡི་དགས་རྣམས་ཀྱི་རྒྱལ་པོ་གཤིན་རྗེའོ། །དེ་ཡང་འདི་ནས་དཔག་ཚད་ལྔ་བརྒྱའི་འོག་གི་ཆ་ལ།
དཔག་ཚད་ལྔ་བརྒྱས་མཚམས་ཡོངས་སུ་བཅད་པ་ནི་རྒྱལ་པོའི་གནས་སའོ། །དེ་ལས་གཞན་དུ་རྣམ་པར་བརྟེན་པ་ཉིད་དོ། །ལྷ་མ་ཡིན་ནི་རི་རབ་ལ་སྟེ། བང་རིམ་འོག་མ་ལས་འོག་གི་ནད་ཆེན་པོའི་ཕུག་ན་ཀུན་དུ་གནས་སོ། །འདོད་པ་ན་སྤྱོད་པའི་ལྷ་རྣམས་ཀྱི་ས་ནི་དྲུག་སྟེ། འདི་ལྟ་སྟེ། རྒྱལ་
པོ་ཆེན་པོ་བཞིའི་རིས་ཀྱི་ལྷའི་གནས་དང་། སུམ་ཅུ་རྩ་གསུམ་པའི་ལྷའི་གནས་དང་། འཐབ་བྲལ་གྱི་གཞལ་ཡས་དང་། དགའ་ལྡན་གྱི་གཞལ་ཡས་དང་། འཕྲུལ་དགའི་གནས་དང་། གཞན་འཕྲུལ་དབང་བྱེད་ཀྱི་གཞལ་ཡས་སོ། །དེ་ལ་རྒྱལ་ཆེན་བཞིའི་གནས་ནི་རྣམ་པ་གསུམ་སྟེ། འདི་
ལྟ་སྟེ། རི་རབ་ཀྱི་བང་རིམ་བཞི་དང་། རི་བོ་རྒྱུད་བདུན་དང་། ཉི་མ་དང་ཟླ་བ་དང་སྐར་མའི་གཞལ་ཡས་རྣམས་སོ། །དེ་ལ་འདི་ནས་སྟེང་དུ་བར་སྣང་དཔག་ཚད་སྟོང་ཕྲག་བཞི་བཅུ་ན། རླུང་ནི་ཆུའི་དཀྱིལ་འཁོར་ལྟར། རི་རབ་ལ་ཡོངས་སུ་བསྐོར་ཏེ་ཟླ་བ་དང་། ཉི་མ་དང་སྐར་མ་རྣམས་ཀྱི་གཞལ་
ཡས་ཁང་རྣམས་རྒྱུ་བར་བྱེད་དོ། །དེ་ལ་ཟླ་བ་དང་ཉི་མ་དག་ལྷུན་པོའི་ཕྱེད་ནས་ཏེ། མུ་ཁྱུད་འཛིན་གྱི་རིའི་རྩེ་མོ་དང་མཉམ་པར་རྒྱུ་བར་བྱེད་དོ། །ཚད་ནི་ཟླ་བའི་དཀྱིལ་འཁོར་ལ་དཔག་ཚད་ལྔ་བཅུའོ། །ཉི་མའི་དཀྱིལ་འཁོར་ལ་དཔག་ཚད་ལྔ་བཅུ་གཅིག་གོ། །དེ་སྐད་དུ་ཡང་། ལྷུན་པོའི་ཕྱེད་ན་
ཉི་ཟླ་སྟེ། དཔག་ཚད་ལྔ་བཅུ་གཅིག་དང་བཅས། །ཞེས་སོ། །སྐར་མ་རྣམས་ཀྱི་གཞལ་ཡས་ཀྱི་ཚད་ནི། གང་དག་ཆུང་བ་དེ་ནི་རྒྱང་གྲགས་ཙམ་མོ། །ཉི་མའི་གཞལ་ཡས་ཀྱི་འོག་ཕྱི་རོལ་ནི་མེ་ཤེལ་གྱི་རང་བཞིན་ཟླུམ་པོ་སྟེ་འོད་ཟེར་ནི་ཚ་བ་དང་རབ་ཏུ་གསལ་བར་བྱེད་དོ། །ཟླ་བའི་གཞལ་

ཡས་ཁང་གི་འོག་ཀྱང་ཆུ་ཤེལ་ཟླུམ་པོ་བསིལ་བ་དང་གསལ་བར་སྣང་བར་བྱེད་དོ། །ཟླ་བ་གཅིག་གིས་གླིང་བཞིར་བྱ་བ་བྱེད་དོ། །ཉི་མ་གཅིག་གིས་ཀྱང་ངོ་། །འདི་ལྟ་སྟེ། གང་གི་ཚེ་བྱང་སྒྲ་མི་སྙན་དུ་མཚན་ཕྱེད་ཡིན་པ་དེའི་ཚེ་ཤར་གྱི་ལུས་འཕགས་སུ་ཉི་མ་ནུབ་
པའོ། །འཛམ་བུའི་གླིང་དུ་ཉི་མ་ཕྱེད་དོ། །བ་གླང་སྤྱོད་དུ་ཤར་བའོ། །དེ་བཞིན་དུ་གླིང་གཞན་ལ་ཅི་རིགས་སུ་སྦྱར་རོ། །འདིར་ཉི་མའི་འགྲོ་བའི་བྱེ་བྲག་གིས་མཚན་མོ་དང་ཉིན་མོ་དག་འཕེལ་བ་དང་འགྲིབ་པའོ། །འདི་ལྟ་སྟེ། བྷཱ་དྲ་པ་དའི་ནག་པོའི་ཕྱོགས་ཀྱི་དགུ་ནས་མཚན་མོ་འཕེལ་ལོ། །ཕཱ་ལ་
གུ་ནའི་ནག་པོའི་ཕྱོགས་ཀྱི་དགུ་ནས་མཚན་མོ་འགྲིབ་བོ། །གང་གི་ཚེ་མཚན་མོ་འཕེལ་བ་དེའི་ཚེ་ཉིན་མོ་འགྲིབ་བོ། །གང་གི་ཚེ་ཉིན་མོ་འགྲིབ་པ་དེའི་ཚེ་མཚན་མོ་འཕེལ་ལོ་ཞེས་སོ། །དཀར་པོའི་ཕྱོགས་ཀྱི་དང་པོར་ཟླ་བའི་དཀྱིལ་འཁོར་ཉམས་པར་མཐོང་བ་ཅི་ཡིན་ཞེ་ན། ཉི་མའི་འོད་ཟེར་
གྱིས་ཟླ་བའི་དཀྱིལ་འཁོར་གྱི་ངོས་གཞན་ལ་གྲིབ་མ་བབས་ཏེ་དཀྱིལ་འཁོར་མ་རྫོགས་པར་མཐོང་བ་ཡིན་ནོ་ལོ། །ཡང་ན་རྒྱུ་བའི་འཚོགས་པ་གང་ལས་དེ་དེ་འདྲ་བ་སྟེ། རེས་འགའ་ནི་ཉམས་པ་དང་ཕྱེད་དང་རྫོགས་པར་མཐོང་བ་ཡིན་ནོ་ཞེས་སྔོན་གྱི་སློབ་དཔོན་རྣམས་གསུངས་སོ། །ཉི་མ་ལ་སོགས་པའི་
གཞལ་ཡས་འདི་རྣམས་ལ་ནི། རྒྱལ་ཆེན་རིས་བཞིའི་གཞལ་ཡས་ཁང་ན་གནས་པའི་ལྷ་རྣམས་གནས་སོ། །བང་རིམ་བཞི་པ་ལ་རྒྱལ་པོ་ཆེན་པོ་བཞི་གནས་པ་ཉིད་དོ། །འདི་ལྟ་སྟེ། ཤར་དུ་ཡུལ་འཁོར་སྐྱོང་དང་། ལྷོ་རུ་འཕགས་སྐྱེས་པོ་དང་། ནུབ་ཏུ་མིག་མི་བཟང་དང་།
བྱང་དུ་ལུས་ངན་པོའོ། །ཡང་གསུངས་ཏེ། འདི་ལ་བང་རིམ་བཞི་ཡོད་དེ། །བར་གྱི་ཐག་ནི་སྟོང་ཕྲག་བཅུ། །སྟོང་ཕྲག་དག་ནི་བཅུ་དྲུག་དང་། །བརྒྱད་དང་བཞི་དང་གཉིས་ཐད་འཕགས། །དེ་ལ་ལག་ན་གཞོང་ཐོགས་དང་། །ཕྲེང་ཐོགས་དང་ནི་རྟག་མྱོས་དང་། །རྒྱལ་ཆེན་བཞི་
པའི་ལྷ་རྣམས་གནས། །རི་བོ་བདུན་པོ་རྣམས་ལ་ཡང་། །དེས་ན་དེ་ཡི་ལྷུན་པོ་ཡི། །ཕྱེད་ཀྱིས་འོག་མ་བསྒྲིབས་པའོ། །རི་རབ་ཀྱི་སྟེང་སུམ་ཅུ་རྩ་གསུམ་པའི་ལྷའི་གནས་ཆུ་དང་ཞེང་དུ་སྟོང་ཕྲག་བརྒྱད་ཅུའོ། །རི་མཆོག་གི་ལོགས་རེ་རེ་ལ་དཔག་ཚད་སྟོང་ཕྲག་ཉི་ཤུ་སྟེ་ཀུན་དུ་ཡོངས་

སུ་འཁོར་བར་བརྒྱད་ཅུའོ་ཞེས་གཞན་དག་གོ། །དེའི་དབུས་ན་གྲོང་ཁྱེར་བལྟ་ན་སྡུག་ཅེས་བྱ་བ་བརྒྱ་བྱིན་ལྷའི་དབང་པོའི་རྒྱལ་བའི་གནས་སོ། །ཡང་གསུངས་ཏེ། དབུས་ན། གྲོང་ཁྱེར་བལྟ་ན་སྡུག་ཅེས་པ། འོག་གཞི་གསེར་བཞིན་བཀྲ་ཞིང་མཉེན། །ལོགས་ལ་སྟོང་ཕྲག་ཕྱེད་
དང་གསུམ། །འཕང་དུ་དཔག་ཚད་གཅིག་དང་ཕྱེད། །ཅེས་སོ། །གྲོང་ཁྱེར་དེའི་དབུས་ན་རྣམ་པར་རྒྱལ་བ་ཞེས་བྱ་བ་ནི་ཁང་བཟངས་རིན་པོ་ཆེ་སྣ་བདུན་གྱི་རང་བཞིན་ཅན་ཡོད་དོ། །ཡང་གསུངས་ཏེ། དེ་ན་རྣམ་པར་རྒྱལ་བྱེད་དེ། །ལོགས་ལ་ཉིས་བརྒྱ་ལྔ་བཅུའོ། །ཞེས་སོ། །གྲོང་ཁྱེར་དེའི་
ཕྱོགས་བཞི་རུ་སྐྱེད་མོས་ཚལ་བཞི་རྣམས་སོ། །འདི་ལྟ་སྟེ། ཤིང་རྟ་སྣ་ཚོགས་དང་། རྩུབ་འགྱུར་དང་། འདྲེས་པའི་ནགས་དང་། དགའ་བའི་ཚལ་ལོ། །སྐྱེད་མོས་ཚལ་བཞི་པོ་དེ་རྣམས་ཀྱི་བར་དུ་ནི་ས་གཞི་བཟང་པོ་དཔག་ཚད་ཉི་ཤུར་ལྷ་རྣམས་ཀྱི་རོལ་མོའི་གནས་ཕན་ཚུན་འགྲན་པ་ལྟར་མཛེས་
པ་འཛིན་པའོ། །གྲོང་ཁྱེར་དེའི་བྱང་ཤར་གྱི་མཚམས་ན་ཤིང་ཡོངས་འདུས་བརྟོལ་ཞེས་པ་ཡོད་དོ། །དེ་ཡང་སུམ་ཅུ་རྩ་གསུམ་པའི་ལྷ་རྣམས་ཀྱི་འདོད་པའི་དགའ་བ་རབ་ཏུ་གྱུར་པའི་རྟེན་ནོ། །དེའི་རྩ་བ་སྦོམས་སུ་ཐང་ཀར་དཔག་ཚད་ལྔ་དང་འཕང་དུ་དཔག་ཚད་གཅིག་གོ། །ཡལ་ག་དང་ལོ་མ་དང་
འདབ་མ་རྒྱས་པར་གནས་པ་ལ་ནི་དཔག་ཚད་ལྔ་བཅུའོ། །དེ་ལ་ཡང་མེ་ཏོག་ཐམས་ཅད་ཡོངས་སུ་རྒྱས་པ་ན་དྲི་ནི་རྫི་ཕྱོགས་སུ་དཔག་ཚད་བརྒྱ་རུ་ངད་ལྡན་ཞིང་། རྫི་ཕྱོགས་མ་ཡིན་པར་ནི་དཔག་ཚད་ལྔ་བཅུ་ངད་ལྡང་ངོ་། །ཤིང་འདི་དག་གི་རྩ་བ་ན་ཤིན་ཏུ་ཆེས་འཇམ་པ་པཱ་ཎ་རུ་ཀམ་པ་ལ་ཞེས་པའི་
བརྒྱ་བྱིན་ལྷའི་དབང་པོ་བཞུགས་པའི་ཕྱིར་མངོན་པར་གྲུབ་པ་སྲིད་དུ་དཔག་ཚད་དྲུག་ཅུའོ། །ཞེང་དུ་དཔག་ཚད་ལྔ་བཅུའི་ཚད་ཙམ་མོ། །རྔམས་སུ་ཚད་ནི་དཔག་ཚད་བཅོ་ལྔའོ། །བལྟ་ན་སྡུག་གི་ལྷོ་ནུབ་ཀྱི་མཚམས་ན་ཆོས་བཟངས་ལྷའི་འདུན་ས་སྟེ། གང་དུ་བསྡད་ནས་སུམ་ཅུ་རྩ་གསུམ་
པའི་ལྷ་རྣམས་བྱ་བ་དང་། བྱ་བ་མ་ཡིན་པ་བཀའ་འགྲོ་བར་མཛད་པའོ། །རི་རབ་ཀྱི་སྟེང་གྲུ་བཞི་ལ་ཅོག་བཞི་སྟེ། འཕང་དུ་དཔག་ཚད་སྟོང་ཕྲག་བཅུའོ། །ཁ་ཅིག་གྲུའི་ཅོག་ནི་དཔག་ཚད་ལྔ་བརྒྱའི་ཚད་དང་ལྡན་པ་གདན་ལྷ་ཕྱག་ན་རྡོ་རྗེ་གནས་པ་གང་ཡིན་པའོ་ཞེས་སོ། །གཟུགས་

ཀྱི་ཁམས་ལ་ས་གཞི་དང་། ཀུན་འཁོར་བཞིའོ། །འདི་ལྟ་སྟེ། བསམ་གཏན་དང་པོའི་ས་དང་། བསམ་གཏན་གཉིས་པའི་ས་དང་། བསམ་གཏན་གསུམ་པའི་ས་དང་། བསམ་གཏན་བཞི་པའི་སའོ། །བསམ་གཏན་དང་པོའི་ཀུན་འཁོར་དང་། མིང་གཞན་
ནི་མི་ལྕོགས་པ་མེད་པའོ། །བསམ་གཏན་གཉིས་པའི་ཀུན་འཁོར་དང་། མིང་གཞན་ནི་བསམ་གཏན་ཁྱད་པར་ཅན་ནོ། །བསམ་གཏན་གསུམ་པའི་ཀུན་འཁོར་དང་། བསམ་གཏན་བཞི་པའི་ཀུན་འཁོར་རོ། །དེ་ལ་བསམ་གཏན་དང་པོའི་ས་ལ་གནས་གསུམ་མོ། །ཚངས་རིས་ཀྱི་
གཞལ་ཡས་ཁང་དང་། ཚངས་པ་མདུན་ན་འདོན་གྱི་གཞལ་ཡས་ཁང་དང་། ཚངས་པ་ཆེན་པོའི་གཞལ་ཡས་ཁང་ངོ་། །བསམ་གཏན་གཉིས་པའི་ས་ལ་གནས་གསུམ་མོ། །འདི་ལྟ་སྟེ། འོད་ཆུང་གི་གཞལ་ཡས་ཁང་དང་། ཚད་མེད་འོད་ཀྱི་གཞལ་ཡས་ཁང་དང་། འོད་གསལ་
གྱི་གཞལ་ཡས་ཁང་ངོ་། །བསམ་གཏན་གསུམ་པའི་གནས་ལ་གསུམ་སྟེ། འདི་ལྟ་སྟེ། དགེ་ཆུང་གི་གཞལ་ཡས་ཁང་དང་། ཚད་མེད་དགེའི་གཞལ་ཡས་ཁང་དང་། དགེ་རྒྱས་ཀྱི་གཞལ་ཡས་ཁང་ངོ་། །བསམ་གཏན་བཞི་པའི་ས་ལ་གནས་བརྒྱད་དེ། འདི་ལྟ་སྟེ། སྤྲིན་མེད་
ཀྱི་གཞལ་ཡས་ཁང་དང་། བསོད་ནམས་འཕེལ་གྱི་གཞལ་ཡས་ཁང་དང་། འབྲས་བུ་ཆེ་བའི་གཞལ་ཡས་ཁང་དང་། མི་ཆེ་བའི་གཞལ་ཡས་ཁང་དང་། མི་གདུང་བའི་གཞལ་ཡས་ཁང་དང་། གྱ་ནོམ་སྣང་བའི་གཞལ་ཡས་ཁང་དང་། ཤིན་ཏུ་མཐོང་གི་གཞལ་ཡས་ཁང་དང་། འོག་
མིན་གྱི་གཞལ་ཡས་ཁང་ངོ་། །འཐབ་བྲལ་ལ་སོགས་པ་བཞི་རྣམས་ཀྱི་གཞལ་ཡས་ཁང་གི་ཚད་ནི་ལྷུན་པོའི་སྟེང་དང་མཉམ་མོ་ཞེས་ཁ་ཅིག་གོ། །གོང་མ་ཉིས་འགྱུར་རོ་ཞེས་གཞན་དག་གོ། །བསམ་གཏན་དང་པོའི་གཞལ་ཡས་ཁང་ནི་གླིང་བཞིའི་ཚད་ཙམ་མོ། །བསམ་གཏན་གཉིས་
པའི་གཞལ་ཡས་ཁང་ནི་སྟོང་ཆུང་ངུ་འཇིག་རྟེན་གྱི་ཁམས་ཀྱི་ཚད་དོ། །བསམ་གཏན་གསུམ་པའི་གཞལ་ཡས་ཁང་ནི་སྟོང་གཉིས་ཀྱི་འཇིག་རྟེན་གྱི་ཁམས་ཀྱི་ཚད་དོ། །བསམ་གཏན་བཞི་པའི་གཞལ་ཡས་ཁང་གི་ཚད་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སོ་ཞེས་གཞན་དག་

གོ། །བསམ་གཏན་དང་པོ་ལ་སོགས་པ་གཞལ་ཡས་ཁང་གསུམ་གྱི་ཚད་ནི་སྟོང་ཆུང་ངུ་ལ་སོགས་པའི་ཚད་དོ། །བསམ་གཏན་བཞི་པའི་གཞལ་ཡས་ཁང་ནི་དཔག་ཏུ་མེད་པའོ་ཞེས་ཁ་ཅིག་གོ། །དེ་ལ་གནས་འོག་མར་སྐྱེས་པའི་ལྷ་རྣམས་ཀྱིས་གོང་མའི་གཞལ་ཡས་ཁང་མཐོང་བ་
ནི་མ་ཡིན་ནོ། །གནས་གོང་མར་སྐྱེས་པའི་ལྷ་རྣམས་ཀྱིས་འོག་མའི་གཞལ་ཡས་ཁང་མཐོང་བ་ཉིད་དོ། །རྫུ་འཕྲུལ་ལམ། རྫུ་འཕྲུལ་དང་ལྡན་པ་ལ་བརྟེན་ནས་གོང་དུ་འགྲོ་བར་འགྱུར་རོ། །གོང་དུ་སྐྱེས་པ་འོངས་ནས་མཐོང་བར་འགྱུར་ཞིང་། ཁམས་གོང་མ་ནི་མ་ཡིན་ནོ། །ས་གོང་མ་
པ་ཞེས་པ་ཡང་མཐོང་བ་མ་ཡིན་ནོ་ཞེས་སོ། །གཟུགས་མེད་པའི་ཁམས་ནི་ས་གཞི་དང་། ཀུན་འཁོར་བཞིའོ། །འདི་ལྟ་སྟེ། ནམ་མཁའ་མཐའ་ཡས་སྐྱེ་མཆེད་ཀྱི་ས་དང་། རྣམ་ཤེས་མཐའ་ཡས་སྐྱེ་མཆེད་ཀྱི་ས་དང་། ཅི་ཡང་མེད་པའི་སྐྱེ་མཆེད་ཀྱི་ས་དང་། འདུ་ཤེས་མེད་འདུ་
ཤེས་མེད་མིན་སྐྱེ་མཆེད་ཀྱི་སའོ། །ནམ་མཁའ་མཐའ་ཡས་སྐྱེ་མཆེད་ཀྱི་ཀུན་འཁོར་དང་། རྣམ་ཤེས་མཐའ་ཡས་སྐྱེ་མཆེད་ཀྱི་ཀུན་འཁོར་དང་། ཅི་ཡང་མེད་པའི་སྐྱེ་མཆེད་ཀྱི་ཀུན་འཁོར་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཀྱི་ཀུན་འཁོར་རོ། །དེ་ལྟར་གྱུར་པའི་འཇིག་རྟེན་
གྱི་ཁམས་ཀྱི་མཐའ་ནི་ཡོད་པ་མ་ཡིན་ཏེ། ནམ་མཁའི་ཁམས་ཅི་སྙེད་པ་དེ་སྙེད་འཇིག་རྟེན་གྱི་ཁམས་སོ། །རྣམ་པར་གཞག་པ་འདི་རྣམས་ནི་འཇིག་རྟེན་གྱི་ཁམས་རྣམས་ཀྱི་ཕྱོགས་བཅུ་དང་སྟེང་དང་འོག་ཏུ་གོ་སྐབས་སམ་བར་ཆོད་ནས་ཡོད་པ་མ་ཡིན་ཏེ། འཇིག་རྟེན་གྱི་ཁམས་རྣམས་ནི་འཇིག་
བཞིན་པ་དང་འཆགས་བཞིན་པ་ཡིན་པ་དང་། འོག་མིན་ལས་སྟེང་ན་ཡང་འདོད་པའི་ཁམས། འདོད་པའི་ཁམས་ལས་འོག་ཏུ་ཡང་འོག་མིན་ནོ་ཞེས་སོ། །གང་ཞིག་རྒྱལ་ཆེན་བཞིའི་ལྷའི་གནས་ལ་སོགས་པ་ནས་འོག་མིན་གྱི་མཐར་ཐུག་པ་ཉི་ཤུ་ཉེར་གསུམ་གྱི་གནས་རྣམས་ཀྱི་འོག་དང་
སྟེང་དུ་ཚད་བརྗོད་པར་བྱ་སྟེ། འདི་ལྟ་སྟེ། བང་རིམ་བཞི་པ་ནི་རྒྱལ་པོ་ཆེན་པོ་བཞིའི་རྩ་བའི་གནས་ཏེ། འདི་ནས་དཔག་ཚད་སྟོང་ཕྲག་བཞི་བཅུའོ། །དེ་ནས་འོག་གི་འཛམ་བུའི་གླིང་དུ། ཇི་སྲིད་ཡོད་པ་དེ་སྲིད་ནས་སྟེང་སུམ་ཅུ་རྩ་གསུམ་གྱི་གནས་སོ། །དེ་ལས་ཡང་འོག་ཏུ་འཛམ་

བུའི་གླིང་དུ་ཇི་སྲིད་པ་དེ་སྲིད་སྟེང་དུ་འཐབ་བྲལ་གྱི་གནས་སོ། །དེ་ལས་ཡང་འོག་འཛམ་བུའི་གླིང་དུ་ཇི་སྲིད་པ་དེ་སྲིད་དུ་དགའ་ལྡན་གྱི་གཞལ་ཡས་ཞེས་སོ། །དེ་བཞིན་དུ་རྒྱས་པར་ཐམས་ཅད་ལ་རྗེས་སུ་གཞལ་ལོ། །ཤིན་ཏུ་མཐོང་ནས་འོག་ཏུ་འཛམ་བུའི་
གླིང་དུ་ཇི་སྲིད་པ་དེ་སྲིད་སྟེང་དུ་འོག་མིན་གྱི་གནས་སོ། །དེ་སྐད་དུ་ཡང་། འོག་ཏུ་ཇི་སྲིད་གནས་ལས་གནས། །གོང་དུ་དེ་སྲིད་དེ་ལས་དེ། །ཞེས་སོ། །དེ་ལས་སྟེང་དུ་ཡང་གནས་ནི་ཡོད་པ་མ་ཡིན་ནོ། །དེ་ནས་འདི་ནི་ཐུ་བོར་གྱུར་པ་ཉིད་པས་འོག་མིན་ཞེས་བརྗོད་དོ་ཞེས་སོ། །པཎྜི་ཏ་ཆེན་
པོ་སྟོབས་བཅུ་དཔལ་བཤེས་གཉེན་གྱིས་བསྡུས་པ་འདུས་བྱས་དང་འདུས་མ་བྱས་རྣམ་པར་ངེས་པ་ལས་སྣོད་ཀྱི་འཇིག་རྟེན་རྣམ་པར་ངེས་པ་ཞེས་བྱ་བ་ལེའུ་གསུམ་པའོ།། །།སེམས་ཅན་གྱི་འཇིག་རྟེན་ནི་རྣམ་པ་གཉིས་སོ། །འདི་ལྟ་སྟེ། སོ་སོའི་སྐྱེ་བོའི་འཇིག་རྟེན་དང་།
འཕགས་པའི་འཇིག་རྟེན་ནོ། །དེ་ལ་དང་པོ་ནི་རྣམ་པ་གཉིས་སོ། །འདི་ལྟ་སྟེ། ངན་འགྲོའི་སྐྱེ་བ་དང་། བདེ་འགྲོའི་སྐྱེ་བའོ། །དེ་ལ་ངན་འགྲོའི་སྐྱེ་བ་རྣམ་པ་གསུམ་མོ། །འདི་ལྟ་སྟེ། དམྱལ་བའི་འགྲོ་བ་པ་དང་། དུད་འགྲོའི་འགྲོ་བ་པ་དང་། ཡི་དགས་ཀྱི་འགྲོ་བ་པའོ། །བདེ་འགྲོའི་
སྐྱེ་བ་ལ་ཡང་རྣམ་པ་གཉིས་ཏེ། འདི་ལྟ་སྟེ། མིའི་འགྲོ་བ་པ་དང་། ལྷའི་འགྲོ་བ་པའོ། །ཡང་རྣམ་པ་ལྔ་སྟེ། དམྱལ་བའི་འགྲོ་བ་པ་དང་། དུད་འགྲོའི་འགྲོ་བ་པ་དང་། ཡི་དགས་ཀྱི་འགྲོ་བ་པ་དང་། མིའི་འགྲོ་བ་པ་དང་། ལྷའི་འགྲོ་བ་པའོ། །འདི་རྣམས་སུ་ལྷ་མིན་གྱི་འགྲོ་བ་པ་བཅུག་སྟེ། རྣམ་པ་དྲུག་ཏུ་འགྱུར་
རོ། །དེ་ལ་དམྱལ་བའི་འགྲོ་བ་ལ་གསུམ་སྟེ། ཚ་བའི་དམྱལ་བ་བརྒྱད་གནས་པ་དང་། གྲང་བའི་དམྱལ་བ་བརྒྱད་གནས་པ་དང་། ཉི་ཚེ་བའི་དམྱལ་བ་གནས་པའོ། །ཡི་དགས་ཀྱི་འགྲོ་བ་ལ་རྣམ་པ་གཉིས་སོ། །འདི་ལྟ་སྟེ། གཟི་བརྗིད་ཆུང་བ་དང་། གཟི་བརྗིད་ཆེན་པོའོ། །དུད་
འགྲོའི་འགྲོ་བ་ལ་རྣམ་པ་གསུམ་མོ། །འདི་ལྟ་སྟེ། ཆུ་ལ་སྤྱོད་པ་དང་། སྐམ་ལ་སྤྱོད་པ་དང་། མཁའ་ལ་སྤྱོད་པའོ། །མིའི་འགྲོ་བ་ལ་རྣམ་པ་བཞིའོ། །འདི་ལྟ་སྟེ། འཛམ་བུའི་གླིང་དུ་སྐྱེས་པ་དང་། བ་གླང་སྤྱོད་ཀྱི་གླིང་དུ་སྐྱེས་པ་དང་། སྒྲ་མི་སྙན་གྱི་གླིང་དུ་སྐྱེས་པ་དང་།

ལུས་འཕགས་པོའི་གླིང་དུ་སྐྱེས་པའོ། །ལྷའི་འགྲོ་བ་པ་ནི་རྣམ་པ་གསུམ་མོ། །འདི་ལྟ་སྟེ། འདོད་པ་ན་སྤྱོད་པ་དང་། གཟུགས་ན་སྤྱོད་པ་དང་། གཟུགས་མེད་པ་ན་སྤྱོད་པའོ། །དེ་ལ་འདོད་པ་ན་སྤྱོད་པ་ལ་རྣམ་པ་དྲུག་སྟེ། འདི་ལྟ་སྟེ། རྒྱལ་ཆེན་གྱི་ལྷ་དང་། སུམ་ཅུ་རྩ་གསུམ་པའི་
ལྷ་དང་། འཐབ་བྲལ་གྱི་ལྷ་དང་། འཕྲུལ་དགའ་བ་རྣམས་ཀྱིའོ། །བལྟས་པས་ནི་འཕྲུལ་དགའི་ལྷ་དང་། གཞན་འཕྲུལ་དབང་བྱེད་ཀྱི་ལྷའོ། །ལྷ་འདི་རྣམས་ཀྱི་འཁྲིག་པ་རྣམ་པ་ལྔ་སྟེ། འདི་ལྟ་སྟེ། གཉིས་གཉིས་དང་། འཁྱུད་པ་དང་། ལག་པས་བཅངས་པ་དང་།
བཞད་པ་དང་། བལྟ་བའོ། །དེ་ལ་གཉིས་སྤྲོད་ཀྱི་འཁྲིག་པ་ནི་ས་ལ་གནས་པའི་རྒྱལ་པོ་ཆེན་པོ་པ་དང་སུམ་ཅུ་རྩ་གསུམ་པ་རྣམས་ཏེ། དཔེར་ན་མི་རྣམས་བཞིན་ནོ། །དེ་རྣམས་ནི་རླུང་གྲོལ་བ་ལས་ཡོངས་སུ་གདུང་བ་རྣམ་པར་འབྲལ་བའོ། །འཁྱུད་པས་འཁྲིག་པ་ནི་འཐབ་བྲལ་རྣམས་འཁྱུད་པ་ཙམ་
གྱིས་ཡོངས་སུ་གདུང་བ་དང་བྲལ་བའོ། །དེ་ལྟར་ལག་པས་བཅངས་པ་ནི་དགའ་ལྡན་པ་རྣམས་ཀྱིའོ། །བཞད་པས་ནི་དགའ་ལྡན་གྱི་ལྷ་དང་གཞན་འཕྲུལ་དབང་བྱེད་རྣམས་ཀྱིའོ། །འདོད་པའི་ལྷ་དྲུག་པོ་འདི་རྣམས་ནི་གྲགས་བཞིན་དུ་ལོ་ལྔ་པ་ལྟ་བུ་ནས་ཅི་སྲིད་དུ་ལོ་བཅུ་པའི་བྱིས་པ་ལྟ་བུ་སྐྱེ་བའོ། །
དེ་ལ་གཟུགས་ན་སྤྱོད་པ་རྣམས་ནི་ན་བཟའ་དང་བཅས་པ་ཡོངས་སུ་རྫོགས་པ་སྐྱེ་བར་འགྱུར་རོ། །གཟུགས་ན་སྤྱོད་པ་རྣམ་བཞི་སྟེ། འདི་ལྟ་སྟེ། བསམ་གཏན་དང་པོའི་གནས་སུ་སྐྱེས་པ་དང་། བསམ་གཏན་གཉིས་པའི་ས་རུ་སྐྱེས་པ་དང་། བསམ་གཏན་གསུམ་པའི་གནས་སུ་སྐྱེས་པ་དང་།
བསམ་གཏན་བཞི་པའི་ས་ལ་སྐྱེས་པའོ། །དེ་ལ་བསམ་གཏན་དང་པོའི་གནས་སུ་སྐྱེས་པ་ལ་རྣམ་པ་གསུམ་སྟེ། འདི་ལྟ་སྟེ། ཚངས་རིས་ཀྱི་ལྷ་དང་། ཚངས་པ་མདུན་ན་འདོན་གྱི་ལྷ་དང་། ཚངས་པ་ཆེན་པོའི་ལྷའོ། །བསམ་གཏན་གཉིས་པའི་ས་ལ་སྐྱེས་པ་ལ་རྣམ་པ་གསུམ།
འདི་ལྟ་སྟེ། འོད་ཆུང་གི་ལྷ་དང་། ཚད་མེད་འོད་ཀྱི་ལྷ་དང་། འོད་གསལ་གྱི་ལྷའོ། །བསམ་གཏན་གསུམ་པའི་ས་ལ་སྐྱེས་པ་ལ་རྣམ་པ་གསུམ། འདི་ལྟ་སྟེ། དགེ་ཆུང་གི་ལྷ་དང་། ཚད་མེད་དགེའི་ལྷ་དང་། དགེ་རྒྱས་ཀྱི་ལྷའོ། །བསམ་གཏན་བཞི་པའི་ས་ལ་སྐྱེས་པ་

ལ་རྣམ་པ་བརྒྱད། འདི་ལྟ་སྟེ། སྤྲིན་མེད་ཀྱི་ལྷ་དང་། བསོད་ནམས་འཕེལ་གྱི་ལྷ་དང་། འབྲས་བུ་ཆེ་བའི་ལྷ་དང་། འདུ་ཤེས་མེད་པའི་སེམས་ཅན་ནི་འབྲས་བུ་ཆེ་བའི་ཕྱོགས་གཅིག་ཁོ་ནའོ། །བཅུ་གཉིས་པོ་འདི་རྣམས་ནི་ཉེ་བར་སྐྱེ་བའི་གནས་སོ། །གཞན་
ལྔ་ནི་གནས་གཙང་མའི་ལྷ་སྟེ། འོག་ནས་བཤད་པའི་འཕགས་པའི་འཇིག་རྟེན་ཕྱིར་མི་འོང་བའི་ནང་དུ་བསྡུ་བར་བྱའོ། །དེ་ཡང་ཇི་ལྟར། མི་ཆེ་བའི་ལྷ་དང་། མི་གདུང་བའི་ལྷ་དང་། གྱ་ནོམ་སྣང་གི་ལྷ་དང་། ཤིན་ཏུ་མཐོང་གི་ལྷ་དང་། འོག་མིན་གྱི་ལྷའོ། །གཟུགས་མེད་པ་
ལ་སྤྱོད་པ་ནི་བཞི་སྟེ། འདི་ལྟ་སྟེ། ནམ་མཁའ་མཐའ་ཡས་སྐྱེ་མཆེད་དུ་ཉེ་བར་སོང་བའི་ལྷ་དང་། རྣམ་ཤེས་མཐའ་ཡས་སྐྱེ་མཆེད་དུ་ཉེ་བར་སོང་བའི་ལྷ་དང་། ཅུང་ཟད་མེད་པའི་སྐྱེ་མཆེད་དུ་ཉེ་བར་སོང་བའི་ལྷ་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་དུ་ཉེ་བར་སོང་བའི་ལྷའོ། །
དམྱལ་བ་ཡི་དགས་དུད་འགྲོ་དང་། །མི་རྣམས་དང་ནི་ལྷ་དྲུག་དང་། །གླིང་བཅས་དམྱལ་བའི་དབྱེ་བ་ཡིན། །འདོད་པའི་ཁམས་ལ་ཉི་ཤུའོ། །སྟེང་དུ་གཟུགས་ཁམས་བཅུ་བདུན་ནོ། །གནས་ནི་སོ་སོར་ཐ་དད་དོ། །འདིར་ནི་བསམ་གཏན་ས་གསུམ་པ། །བཞི་པ་ཡང་ནི་ས་བརྒྱད་
པའོ། །གཟུགས་མེད་ཁམས་ལ་གནས་མེད་དེ། །ཉེ་བར་སྐྱེ་བས་རྣམ་བཞིའོ། །ལྷ་རྣམས་ནི་རྣམ་པར་སྨིན་པ་གསུམ་ལས་སྐྱེས་ཏེ། འདི་ལྟ་སྟེ། ཚུལ་ཁྲིམས་རྣམ་པར་སྨིན་པ་དང་ལྡན་པས་འདོད་པ་ན་སྤྱོད་པའི་ལྷ་རྣམས་སོ། །ཏིང་ངེ་འཛིན་རྣམ་པར་སྨིན་པ་དང་ལྡན་པས་ཚངས་
རིས་ལ་སོགས་པ་གཟུགས་ན་སྤྱོད་པའི་ལྷ་བཅུ་གཉིས་སོ། །ཤེས་རབ་རྣམ་པར་སྨིན་པ་དང་ལྡན་པས་གནས་གཙང་མའི་ལྷ་ལྔའོ། །འདོད་པ་ན་སྐྱེ་བ་གསུམ་སྟེ། འདི་ལྟ་སྟེ། འདོད་པ་རྣམས་སོ་སོར་ཉེ་བར་གནས་པའི་སེམས་ཅན་ཡོད་དེ། འདི་ལྟ་སྟེ། མི་རྣམས་དང་ལྷ་འགའ་
ཞིག་གོ། །དེ་ཡང་ལྷ་གཞན་ནི། འདི་ལྟ་སྟེ། རྒྱལ་པོ་ཆེན་པོ་པ་དང་། སུམ་ཅུ་རྩ་གསུམ་པ་དང་། འཐབ་བྲལ་དང་། དགའ་ལྡན་པའོ། །འདོད་པ་རྣམས་སྤྲུལ་པའི་སེམས་ཅན་ཡོད་དེ། འདི་ལྟ་སྟེ། འཕྲུལ་དགའི་ལྷ་རྣམས་སོ། །འདོད་པ་རྣམས་གཞན་གྱི་འཕྲུལ་པའི་

སེམས་ཅན་ཡོད་དེ། འདི་ལྟ་སྟེ། གཞན་འཕྲུལ་དབང་བྱེད་ཀྱི་ལྷ་རྣམས་སོ། །བདེ་བས་ཉེ་བར་སྐྱེ་བ་གསུམ་མོ། །འདི་ལྟ་སྟེ། བསམ་གཏན་དང་པོར་ཉེ་བར་སྐྱེ་བ་དང་། བསམ་གཏན་གཉིས་པར་ཉེ་བར་སྐྱེ་བ་དང་། །བསམ་གཏན་གསུམ་པར་ཉེ་བར་སྐྱེ་བའོ། །སེམས་
ཅན་གྱི་འཇིག་རྟེན་འདི་སྐྱེ་བའི་གནས་བཞི་སྟེ། འདི་ལྟ་སྟེ། རྫུས་སྐྱེས་ཀྱི་སྐྱེ་གནས་དང་། མངལ་སྐྱེས་ཀྱི་སྐྱེ་གནས་དང་། དྲོད་གཤེར་ལས་སྐྱེ་བའི་སྐྱེ་གནས་དང་། སྒོ་ང་ལས་སྐྱེ་བའི་སྐྱེ་གནས་སོ། །དེ་ལ་མིའི་འགྲོ་བ་ནི། སྐྱེ་གནས་བཞི་ཀ་ཡང་ངོ་། །དུད་
འགྲོའི་འགྲོ་བ་ལ་སྐྱེ་གནས་བཞིའོ། །ཡི་དགས་ཀྱི་འགྲོ་བ་ནི། སྐྱེ་གནས་གཉིས་སོ། །དམྱལ་བའི་འགྲོ་བ་ནི་རྫུས་སྐྱེས་ཀྱི་སྐྱེ་གནས་གཅིག་ཁོ་ནའོ། །ལྷའི་འགྲོ་བ་ནི་རྫུས་སྐྱེས་ཀྱི་སྐྱེ་གནས་གཅིག་ཁོ་ནའོ། །ཡི་དགས་ནི་འདི་ལྟ་སྟེ། མངལ་སྐྱེས་ཀྱི་སྐྱེ་གནས་དང་།
རྫུས་སྐྱེས་ཀྱི་སྐྱེ་གནས་སོ། །སྲིད་པ་ནི་བཞི་སྟེ། འདི་ལྟ་སྟེ། འཆི་བའི་སྲིད་པ་དང་། བར་དོའི་སྲིད་པ་དང་། སྐྱེ་བའི་སྲིད་པ་དང་། སྔོན་གྱི་དུས་ཀྱི་སྲིད་པའོ། །ཡང་སྲིད་པ་གཉིས་འདི་ལྟ་སྟེ། མཐོང་བའི་ཆོས་ཀྱི་སྲིད་པ་དང་། སྐྱེ་བ་གཞན་གྱི་སྲིད་པའོ། །ཡང་སྲིད་པ་གསུམ་སྟེ། འདི་ལྟ་
སྟེ། འདོད་པའི་སྲིད་པ་དང་། གཟུགས་ཀྱི་སྲིད་པ་དང་། གཟུགས་མེད་པའི་སྲིད་པའོ། །ཡང་སྲིད་པ་བདུན་ཏེ། འདི་ལྟ་སྟེ། དམྱལ་བའི་སྲིད་པ་དང་། དུད་འགྲོའི་སྲིད་པ་དང་། ཡི་དགས་ཀྱི་སྲིད་པ་དང་། མིའི་སྲིད་པ་དང་། ལྷའི་སྲིད་པ་དང་། ལས་ཀྱི་སྲིད་པ་དང་། བར་མའི་སྲིད་པའོ། །
དེ་ཉིད་ཀྱིས་ན་ཆོས་བཞི་པོ་འདི་ཤེས་པར་ནུས་པ་མ་ཡིན་ཏེ། འདི་ལྟ་སྟེ། སེམས་ཅན་གྱི་ཕུང་པོ་དང་། ནམ་མཁའི་ཁམས་དང་། འཇིག་རྟེན་གྱི་ཁམས་དང་། སངས་རྒྱས་ཀྱི་ཡེ་ཤེས་སོ། །ཚོགས་ནི་གསུམ་སྟེ། འདི་ལྟ་སྟེ། མིང་གི་ཚོགས་དང་། ཚིག་གི་ཚོགས་དང་། ཡི་གེའི་ཚོགས་སོ། །
སྐྱོན་ནི་གསུམ་སྟེ། ལུས་ཀྱི་སྐྱོན་དང་། ངག་གི་སྐྱོན་དང་། ཡིད་ཀྱི་སྐྱོན་ནོ། །ཡོན་པོ་གསུམ་སྟེ། ལུས་དང་ངག་དང་ཡིད་དོ། །སྙིགས་མ་གསུམ་སྟེ། ལུས་དང་ངག་དང་ཡིད་ཀྱིའོ། །བག་མེད་པའི་གནས་ནི་གསུམ་སྟེ། འདོད་པའི་བདེ་བ་མྱོང་བ་དང་། བསམ་གཏན་གྱི་བདེ་བ་མྱོང་བ་དང་། མྱ་ངན་

ལས་འདས་པའི་བདེ་བ་མྱང་བའོ། །མངལ་རྣམ་པར་གནོན་པ་ནི་བཞི་སྟེ། འདི་ལྟ་སྟེ། བླུན་པོའི་སེམས་ཅན་ཐམས་ཅད་ནི་མངལ་དུ་འཇུག་པ་དང་གནས་པ་དང་འབྱུང་བ་ནི་མི་ཤེས་སོ། །འཁོར་ལོས་སྒྱུར་བ་ནི་མངལ་དུ་འཇུག་པ་ཡང་དག་པར་ཤེས་པ་ཉིད་དོ། །རང་
རྒྱལ་གྱི་བྱང་ཆུབ་ཀྱི་སྲིད་པ་ཐ་མ་པ་ནི་འཇུག་པ་དང་གནས་པ་ཡང་དག་པར་རབ་ཏུ་ཤེས་པའོ། །ཡང་དག་པར་རྫོགས་པའི་བྱང་ཆུབ་ཀྱི་སྲིད་པ་ཐ་མ་པའི་བྱང་ཆུབ་སེམས་དཔའ་ནི་མངལ་དུ་འཇུག་པ་དང་འབྱུང་བ་ཡང་དག་པར་རབ་ཏུ་མཁྱེན་པ་ཉིད་དོ། །མངལ་གྱི་གནས་སྐབས་རྣམ་པ་ལྔ་
སྟེ། འདི་ལྟ་སྟེ། ནུར་ནུར་པོའི་གནས་སྐབས་དང་། མེར་མེར་པོའི་གནས་སྐབས་དང་། ནར་ནར་པོའི་གནས་སྐབས་དང་། གོར་གོར་པོའི་གནས་སྐབས་དང་། རྐང་ལག་འགྱུས་པའི་གནས་སྐབས་སོ། །ཡང་མངལ་གྱི་གནས་སྐབས་བཅུ་སྟེ། འདི་ལྟ་སྟེ། ཁུ་བའི་ལུས་ཀྱི་གནས་
སྐབས་དང་། མེར་མེར་པོའི་ལུས་ཀྱི་གནས་སྐབས་དང་། སླེ་སླེ་པོའི་ལུས་ཀྱི་གནས་སྐབས་དང་། སྙིང་པོའི་ལུས་ཀྱི་གནས་སྐབས་དང་། ལུས་དང་རྗེས་སུ་མཐུན་པའི་ཐབས་ཀྱི་གནས་སྐབས་དང་། རང་བཞིན་དང་རྗེས་སུ་མཐུན་པའི་གནས་སྐབས་དང་། ལས་དང་བཅས་པའི་ལུས་ཀྱི་
གནས་སྐབས་དང་། ཡོངས་སུ་རྫོགས་པའི་ལུས་ཀྱི་གནས་སྐབས་ཏེ། འདི་ལ་ཕྱེ་བས་དབྱེ་བ་གསུམ་སྟེ། དབང་པོ་ཡོངས་སུ་རྫོགས་པ་དང་། རྟགས་ཡོངས་སུ་རྫོགས་པ་དང་། སྲིད་དུ་དང་ཞེང་དུ་ཡོངས་སུ་རྫོགས་པའོ། །མངལ་དུ་རྣམ་པར་གནོན་པའི་རྒྱུ་གསུམ་སྟེ། འདི་ལྟ་སྟེ།
མ་ཉིད་དགེ་བའི་དུས་ཚིགས་དང་ལྡན་པར་གྱུར་པ་དང་། ཕ་དང་མ་དག་ཆགས་པས་ཚོགས་པར་གྱུར་པ་དང་། དྲི་ཟ་ཉེ་བར་གནས་པར་གྱུར་པའོ། །སེམས་ཅན་གནས་པའི་ཆེད་དུ་ཟས་རྣམ་པ་བཞི་སྟེ། འདི་ལྟ་སྟེ། ཁམ་གྱི་ཟས་དང་། རིག་པའི་ཟས་དང་། སེམས་པའི་ཟས་དང་།
རྣམ་ཤེས་ཀྱི་ཟས་སོ། །སྡུག་བསྔལ་ཉིད་ལ་གསུམ་སྟེ། འདི་ལྟ་སྟེ། སྡུག་བསྔལ་གྱི་སྡུག་བསྔལ་དང་། འདུ་བྱེད་ཀྱི་སྡུག་བསྔལ་དང་། ཡོངས་སུ་འགྱུར་བའི་སྡུག་བསྔལ་ལོ། །ཉེ་བར་འཚེ་བ་ནི་བཅུ་སྟེ། འདི་ལྟ་སྟེ། འཆི་བ་དང་། ཀུན་ནས་ཉོན་མོངས་པ་དང་། དབུལ་བ་དང་། སྤྱོད་

པ་ངན་པ་དང་། འགྲོ་བ་ངན་པ་དང་། ཡོངས་སུ་ཚོལ་བའི་ངལ་བ་དང་། ཆོས་ཀྱིས་ཕོངས་པར་གྱུར་པའི་ལས་ཀྱི་སྒྲིབ་པ་དང་། འདོད་པ་ཉམས་པ་དང་། སྤ་ཞུམ་པ་དང་། ཐེ་ཚོམ་ཅི་དང་ཅི་ཞེས་པའོ། །འཇིག་རྟེན་གྱི་ཆོས་བརྒྱད་ནི། འདི་ལྟ་སྟེ། རྙེད་པ་དང་། མ་རྙེད་པ་དང་། བདེ་བ་དང་།
སྡུག་བསྔལ་བ་དང་། སྙན་པ་དང་། མི་སྙན་པ་དང་། སྨོད་པ་དང་། བསྔགས་པའོ། །ཕྱིན་ཅི་ལོག་རྣམ་པ་བཞི་ནི་འདི་ལྟ་སྟེ། མི་རྟག་པ་ལ་རྟག་པའོ་ཞེས་ཕྱིན་ཅི་ལོག་དང་། སྡུག་བསྔལ་ལ་བདེ་བ་ཞེས་ཕྱིན་ཅི་ལོག་དང་། མི་སྡུག་པ་ལ་སྡུག་པ་ཞེས་ཕྱིན་ཅི་ལོག་དང་། བདག་མེད་པ་ལ་
བདག་ཅེས་ཕྱིན་ཅི་ལོག་གོ། །ཕྱིན་ཅི་ལོག་འདི་རྣམས་ལ་སོ་སོར་འདུ་ཤེས་ཕྱིན་ཅི་ལོག་དང་། ལྟ་བ་ཕྱིན་ཅི་ལོག་རྣམས་སྦྱར་བས་ཕྱིན་ཅི་ལོག་བཅུ་གཉིས་སུ་འགྱུར་རོ། །ཀུན་ནས་ཉོན་མོངས་པ་ནི་རྣམ་པ་གསུམ་སྟེ། འདི་ལྟ་སྟེ། ཉོན་མོངས་པའི་ཀུན་ནས་ཉོན་མོངས་པ་དང་། ལས་ཀྱི་ཀུན་ནས་
ཉོན་མོངས་པ་དང་། སྐྱེ་བའི་ཀུན་ནས་ཉོན་མོངས་པའོ། །འཇིགས་པ་ལྔ་ནི་འདི་ལྟ་སྟེ། མྱ་ངན་གྱི་འཇིགས་པ་དང་། སྨྲེ་སྔགས་འདོན་པའི་འཇིགས་པ་དང་། སྡུག་བསྔལ་གྱི་འཇིགས་པ་དང་། ཡིད་མི་བདེ་བའི་འཇིགས་པ་དང་། འཁྲུག་པའི་འཇིགས་པའོ། །ཡང་འཇིགས་པ་བདུན་
ཏེ། འདི་ལྟ་སྟེ། བདག་རྗེས་སུ་རྩོད་པའི་འཇིགས་པ་དང་། གཞན་རྗེས་སུ་རྩོད་པའི་འཇིགས་པ་དང་། ངན་འགྲོའི་འཇིགས་པ་དང་། འཚེ་བའི་འཇིགས་པ་དང་། ཆད་པའི་འཇིགས་པ་དང་། ཚིགས་སུ་བཅད་པ་མ་ཡིན་པའི་འཇིགས་པ་དང་། འཆི་བའི་འཇིགས་པའོ། །
ཡང་འཇིགས་པ་གཅིག་སྟེ། འདི་ལྟ་སྟེ། འཇིག་རྟེན་གྱི་ཆོས་བརྒྱད་ཀྱིས་ཉེ་བར་གོས་པའི་འཇིགས་པའོ། །ཡང་འཇིགས་པ་ནི་གསུམ་སྟེ། འདི་ལྟ་སྟེ། མི་ཤེས་པའི་འཇིགས་པ་དང་། ཐེ་ཚོམ་གྱི་འཇིགས་པ་དང་། ལོག་པའི་ཤེས་པས་འཇིགས་པའོ། །མངོན་པར་ཞེན་
པ་གཉིས་ཏེ། འདི་ལྟ་སྟེ། འདོད་པ་ལ་ལྷག་པར་ཞེན་པ་དང་། ལྟ་བ་ལ་ལྷག་པར་ཞེན་པའོ། །དོགས་པ་བཞི་སྟེ། འདི་ལྟ་སྟེ། སྡུག་བསྔལ་གྱི་དོགས་པ་དང་། འཇིགས་པའི་དོགས་པ་དང་། འཇིག་རྟེན་ཆོས་བརྒྱད་ཀྱི་དོགས་པ་དང་། མི་ཤེས་པའི་དོགས་པའོ། །ཁུར་ནི་བཞི་སྟེ།

འདི་ལྟ་སྟེ། ཕུང་པོའི་ཁུར་དང་། ཉོན་མོངས་པའི་ཁུར་དང་། ཁས་བླངས་པའི་ཁུར་དང་། བརྩོན་པའི་ཁུར་རོ། །ཉེས་པ་ལྔ་སྟེ། འདི་ལྟ་སྟེ། སྡུག་བསྔལ་དང་། ལོངས་སྤྱོད་ཉམས་པ་དང་། དགའ་བ་དང་བྲལ་བ་དང་། བཅིངས་པ་དང་། སྒྲིབ་
པའོ། །ཕོངས་པ་ནི་ལྔ་སྟེ། འདི་ལྟ་སྟེ། ནད་མེད་པས་ཕོངས་པ་དང་། ལོངས་སྤྱོད་ཀྱིས་ཕོངས་པ་དང་། ཉེ་དུས་ཕོངས་པ་དང་། ཚུལ་ཁྲིམས་ཀྱིས་ཕོངས་པ་དང་། ལྟ་བས་ཕོངས་པའོ། །སྡུག་བསྔལ་ནི་དྲུག་སྟེ། འདི་ལྟ་སྟེ། སྐྱེ་བའི་སྡུག་བསྔལ་དང་། རྒས་པའི་སྡུག་
བསྔལ་དང་། འཆི་བའི་སྡུག་བསྔལ་དང་། དགའ་བ་དང་རྣམ་པར་འབྲལ་བའི་སྡུག་བསྔལ་དང་། མི་དགའ་བ་དང་ཕྲད་པའི་སྡུག་བསྔལ་དང་། འདོད་པ་རྣམ་པར་ཉམས་པའི་སྡུག་བསྔལ་ལོ། །ལོག་པ་ནི་བཅུ་སྟེ། འདི་ལྟ་སྟེ། ལོག་པའི་ལྟ་བ་དང་། ལོག་པའི་རྟོག་པ་དང་། ལོག་
པའི་ངག་དང་། ལོག་པའི་ལས་ཀྱི་མཐའ་དང་། ལོག་པའི་འཚོ་བ་དང་། ལོག་པའི་རྩོལ་བ་དང་། ལོག་པའི་དྲན་པ་དང་། ལོག་པའི་ཏིང་ངེ་འཛིན་དང་། ལོག་པའི་ཤེས་པ་དང་། ལོག་པའི་གྲོལ་བའོ། །སྒྲིབ་པ་ནི་གཉིས་ཏེ། འདི་ལྟ་སྟེ། ཉོན་མོངས་པའི་སྒྲིབ་པ་དང་། ཤེས་བྱའི་
སྒྲིབ་པའོ། །ཡང་སྒྲིབ་པ་གསུམ་སྟེ། ཉོན་མོངས་པའི་སྒྲིབ་པ་དང་། ཤེས་བྱའི་སྒྲིབ་པ་དང་། སྙོམས་པར་འཇུག་པའི་སྒྲིབ་པའོ། །ཡང་སྒྲིབ་པ་བཞི་ནི་འདི་ལྟ་སྟེ། ཤེས་བྱའི་སྒྲིབ་པ་དང་། ཉོན་མོངས་པའི་སྒྲིབ་པ་དང་། རྣམ་པར་སྨིན་པའི་སྒྲིབ་པ་དང་། གཏོང་བའི་སྒྲིབ་པའོ། །
མཐོང་བའི་གེགས་ནི་གསུམ་སྟེ། མི་ཤེས་པ་དང་། མུན་པ་དང་། མིག་གི་རབ་རིབ་པོ། །འདོད་ཚོལ་ནི་གསུམ་སྟེ། འདི་ལྟ་སྟེ། འདོད་པའི་འདོད་ཚོལ་དང་། སྲིད་པའི་འདོད་ཚོལ་དང་། ཚངས་པར་སྤྱོད་པའི་འདོད་ཚོལ་ལོ། །འགྲོ་བ་མ་ཡིན་པར་འགྲོ་བ་ནི་བཞི་སྟེ། འདི་ལྟ་
སྟེ། འདུན་པ་ལས་འགྲོ་བ་མ་ཡིན་པར་འགྲོ་བ་དང་། ཞེ་སྡང་ལས་འགྲོ་བ་མ་ཡིན་པར་འགྲོ་བ་དང་། འཇིགས་པ་ལས་འགྲོ་བ་མ་ཡིན་པར་འགྲོ་བ་དང་། རྨོངས་པ་ལས་འགྲོ་བ་མ་ཡིན་པར་འགྲོ་བའོ། །སེར་སྣ་ལྔ་ནི་འདི་ལྟ་སྟེ། གནས་ཀྱི་སེར་སྣ་དང་། རིགས་ཀྱི་སེར་སྣ་དང་།

རྙེད་པའི་སེར་སྣ་དང་། ཁ་དོག་གི་སེར་སྣ་དང་། ཆོས་ཀྱི་སེར་སྣའོ། །རྩོད་པའི་རྩ་བ་དྲུག་ནི་འདི་ལྟ་སྟེ། ཁྲོ་བ་དང་། འཆབ་པ་དང་། ཕྲག་དོག་དང་། གཡོ་དང་། སྡིག་པ་འདོད་པ་དང་། རང་གི་ལྟ་བ་མཆོག་ཏུ་འཛིན་པའོ། །རྣམ་པར་ཤེས་པའི་གནས་པ་ནི་བདུན་ཏེ།
འདི་ལྟ་སྟེ། ལུས་ཐ་དད་ལ་འདུ་ཤེས་ཐ་དད་པའི་སེམས་ཅན་ཡོད་པ་དང་། ལུས་ཐ་དད་ལ་འདུ་ཤེས་གཅིག་པའི་སེམས་ཅན་ཡོད་པ་དང་། ལུས་གཅིག་ཉིད་ལ་འདུ་ཤེས་ཐ་དད་པའི་སེམས་ཅན་ཡོད་པ་དང་། ལུས་གཅིག་ཉིད་ལ་འདུ་ཤེས་གཅིག་ཉིད་ཀྱི་སེམས་ཅན་ཡོད་པ་དང་། གཟུགས་
མེད་པ་ན་ནམ་མཁའི་འདུ་ཤེས་དང་། རྣམ་ཤེས་མཐའ་ཡས་ཀྱི་འདུ་ཤེས་དང་། ཅི་ཡང་མེད་པའི་འདུ་ཤེས་སོ། །སེམས་ཅན་གྱི་གནས་དགུ་ལ་འདི་ལྟ་སྟེ། དེ་ལྟར་རྣམ་ཤེས་ཀྱི་གནས་པ་བདུན་དང་། འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་དང་། འདུ་ཤེས་མེད་པའོ། །ཕུང་པོ་
ནི་གསུམ་ལ་འདི་ལྟ་སྟེ། ཡང་དག་པ་ཉིད་དུ་ངེས་པའི་ཕུང་པོ་དང་། ལོག་པ་ཉིད་དུ་ངེས་པའི་ཕུང་པོ་དང་། མ་ངེས་པའི་ཕུང་པོའོ། །སྙིགས་མ་ལྔ་ནི་འདི་ལྟ་སྟེ། ཚེའི་སྙིགས་མ་དང་། བསྐལ་པའི་སྙིགས་མ་དང་། ཉོན་མོངས་པའི་སྙིགས་མ་དང་། ལྟ་བའི་སྙིགས་མ་དང་། སེམས་ཅན་གྱི་སྙིགས་མའོ། །
རྣམ་པར་རྒུད་པ་བཞི་སྟེ། ཚེའི་སྙིགས་མས་འཚོ་བ་རྣམ་པར་རྒུད་པ་དང་། བསྐལ་པའི་སྙིགས་མས་ཕན་འདོགས་པ་རྒུད་པ་དང་། ཉོན་མོངས་པའི་སྙིགས་མ་དང་ལྟ་བའི་སྙིགས་མས་དགེ་བའི་ཕྱོགས་རྒུད་པ་དང་། སེམས་ཅན་གྱི་སྙིགས་མས་བདག་གི་དངོས་པོ་རྣམ་པར་རྒུད་པའོ། །དེ་ལ་བདག་གི་
དངོས་པོ་རྣམ་པར་རྒུད་པ་ལ་བརྒྱད་དེ་འདི་ལྟ་སྟེ། ཚད་ཉམས་པ་དང་། གཟུགས་ཉམས་པ་དང་། ནད་མེད་པ་ཉམས་པ་དང་། སྟོབས་ཉམས་པ་དང་། བློ་ཉམས་པ་དང་། དྲན་པ་ཉམས་པ་དང་། བརྩོན་འགྲུས་ཉམས་པ་དང་། བསྟན་པ་ཉམས་པའོ། །ཡང་ཕོངས་པ་བཞི་སྟེ། འདི་ལྟ་སྟེ།
ཚུལ་ཁྲིམས་ཀྱིས་ཕོངས་པ་དང་། ལྟ་བས་ཕོངས་པ་དང་། ཀུན་སྤྱོད་ཀྱིས་ཕོངས་པ་དང་། འཚོ་བས་ཕོངས་པའོ། །འཕོ་བ་གཉིས་ཏེ། འདི་ལྟ་སྟེ། རྣམ་པར་ཆད་པའི་འཕོ་བ་དང་། ཡོངས་སུ་འགྱུར་བའི་འཕོ་བའོ། །ཤེས་པའི་མི་མཐུན་པའི་ཕྱོགས་ནི་གསུམ་སྟེ། འདི་ལྟ་སྟེ། མི་

ཤེས་པ་དང་། ཐེ་ཚོམ་གྱི་ཤེས་པ་དང་། ལོག་པའི་ཤེས་པའོ། །སྡུག་བསྔལ་གྱི་རྟགས་ནི་ལྔ་སྟེ། འདི་ལྟ་སྟེ། མྱ་ངན་དང་། སྨེ་སྔགས་འདོན་པ་དང་། སྡུག་བསྔལ་དང་། ཡིད་མི་བདེ་བ་དང་། ཉེ་བར་འཁྲུག་པའོ། །ཀུན་ནས་མནར་སེམས་ཀྱི་དངོས་པོ་
བཅུ་སྟེ། འདི་ལྟ་སྟེ། བདག་གི་དོན་མེད་པ་སྤྱོད་ཅིང་སྤྱོད་དོ་སྤྱོད་པར་འགྱུར་རོ་ཞེས་ཀུན་ནས་མནར་སེམས་སྐྱེད་པར་འགྱུར་རོ། །བདག་གི་དགའ་ཞིང་ཡིད་དུ་འོང་བ་ལ་དོན་མེད་པ་སྤྱད་ཅིང་སྤྱོད་དོ་སྤྱོད་པར་འགྱུར་རོ་ཞེས་ཀུན་ནས་མནར་སེམས་སྐྱེ་བར་འགྱུར་རོ། །བདག་གི་མི་དགའ་བ་
ཡིད་དུ་མི་འོང་བའི་དོན་ཡོད་པ་སྤྱད་ཅིང་སྤྱོད་དོ་སྤྱོད་པར་འགྱུར་རོ་ཞེས་ཀུན་ནས་མནར་སེམས་སྐྱེ་བར་འགྱུར་རོ། །གནས་མ་ཡིན་པ་ལ་ཡང་ཀུན་ནས་མནར་སེམས་སྐྱེ་བར་འགྱུར་རོ། །རྨུགས་པ་དང་གཉིད་ཀྱི་རྒྱུ་ནི་ལྔ་སྟེ་འདི་ལྟ་སྟེ། ཁ་ཟས་ཀྱི་ཚོད་མ་རིག་པ་དང་། སྙོམ་ལས་དང་། མི་དགའ་
བ་དང་། སྙང་གླལ་དང་། སེམས་ཞུམ་པ་ཉིད་དོ། །བག་ཆགས་གསུམ་སྟེ། འདི་ལྟ་སྟེ། ལས་ཀྱི་བག་ཆགས་དང་། ཉོན་མོངས་པའི་བག་ཆགས་དང་། སྐྱེ་བའི་བག་ཆགས་སོ། །བག་ཆགས་གསུམ་པོ་འདི་ཉིང་མཚམས་སྦྱོར་བ་གསུམ་དུ་འགྱུར་ཏེ། འདི་ལྟ་སྟེ། ལས་ཀྱི་མཚམས་
སྦྱོར་བ་དང་། ཉོན་མོངས་པའི་མཚམས་སྦྱོར་བ་དང་། སྐྱེ་བའི་མཚམས་སྦྱོར་བའོ་ཞེས་པ་ལ་སོགས་པའོ། །པཎྜི་ཏ་ཆེན་པོ་སྟོབས་བཅུ་དཔལ་བཤེས་གཉེན་གྱིས་རྣམ་པར་བསྡུས་པ་འདུས་བྱས་དང་འདུས་མ་བྱས་རྣམ་པར་ངེས་པ་ལས་སེམས་ཅན་གྱི་འཇིག་རྟེན་རྣམ་པར་ངེས་པ་ཞེས་
བྱ་བ་ལེའུ་བཞི་པའོ།། །།འདིར་སེམས་ཅན་དང་སྣོད་ཀྱི་འཇིག་རྟེན་དག་གཟུགས་འདུས་པ་ཐམས་ཅད་ཀྱི་ཕྲ་བ་ནི་རྡུལ་ཕྲ་རབ་ཅེས་བརྗོད་དོ། །གང་ལས་ཆེས་ཆུང་བ་ཤེས་པར་བྱ་བ་མེད་པ་དེ་ནི་རྡུལ་ཕྲ་རབ་བོ། །འདོད་པའི་ཁམས་སུ་སྒྲ་དང་བྲལ་བ་དང་དབང་པོ་སྤངས་
པའི་རྫས་བརྒྱད་ལྡན་སྐྱེ་བར་འགྱུར་རོ། །དེ་ལ་རྫས་བརྒྱད་ནི་འདི་ལྟ་སྟེ། ས་དང་། ཆུ་དང་། མེ་དང་། རླུང་དང་། གཟུགས་དང་། དྲི་དང་། རོ་དང་། རེག་བྱའོ། །འདི་རྣམས་སུ་སྒྲ་རབ་ཏུ་བཅུག་པས་རྫས་དགུ་ལྡན་འགྱུར་རོ། །ལུས་ཀྱི་དབང་པོའི་རྡུལ་ཕྲ་རབ་ནི་རྫས་དགུ་

ལྡན་དེ། དེ་ལ་རྫས་དགུ་ནི་འདི་ལྟ་སྟེ། རྫས་བརྒྱད་པོ་དེ་ཉིད་དང་ལུས་ཀྱི་དབང་པོའི་རྫས་སོ། །སྒྲ་དང་བཅས་པ་ན་རྫས་བཅུའོ། །དབང་པོ་གཞན་རྣམས་ཀྱི་རྡུལ་ཕྲ་རབ་ནི་རྫས་བཅུ་ལྡན་ནོ། །དེ་ལ་རྫས་བཅུ་ནི་འདི་ལྟ་སྟེ། རྫས་དགུ་པོ་དེ་ཉིད་དང་དབང་པོ་རང་རང་གི་རྫས་སོ། །
སྒྲ་དང་བཅས་པ་ན་རྫས་བཅུ་གཅིག་ཏུ་འགྱུར་རོ། །གསུངས་ཏེ། འདོད་ན་ཕྲ་རབ་རྫས་བརྒྱད་དེ། །སྒྲ་མེད་པ་མིན་དབང་མེད་མིན། །ལུས་དབང་ལྡན་ལ་རྫས་དགུའོ། །དབང་པོ་གཞན་ལྡན་རྫས་བཅུའོ། །འདིས་ནི་གཟུགས་ཀྱི་ཁམས་ན་དྲི་དང་རོ་དག་མེད་པར་གསུངས་པ་དེས་ན།
དེ་དག་ན་ནི་རྡུལ་ཕྲ་རབ་དག་ནི་རིམ་པ་བཞིན་དུ་རྫས་དྲུག་དང་བདུན་བརྒྱད་དོ་ཞེས་གསུངས་པའི་ཚུལ་ཉིད་ཀྱིས་ན་ཅི་ཡང་བརྗོད་པར་མི་བྱའོ། །དེ་ལྟར་གཟུགས་འདི་ཉིད་ཀྱི་འགྲིབ་བཞིན་པ་ན་མཐར་ཐུག་པ་ནི་རྡུལ་ཕྲ་རབ་པོ། །རྡུལ་ཕྲ་རབ་ལ་སོགས་པའི་སྒྲ་བཅུ་གཅིག་ནི། གོང་མ་
བདུན་འགྱུར་ཏེ། འདི་ལྟ་སྟེ། རྡུལ་ཕྲ་རབ་བདུན་ལ་རྡུལ་ཕྲན་ནོ། །རྡུལ་ཕྲན་བདུན་ལ་ལྕགས་སོ། །ལྕགས་བདུན་ལ་རི་བོང་ངོ་། །རི་བོང་བདུན་ལ་ལུག་གོ། །ལུག་བདུན་ལ་གླང་ངོ་། །གླང་བདུན་ལ་ཉི་ཟེར་རོ། །ཉི་ཟེར་བདུན་ལ་རྡུལ་ལོ། །རྡུལ་བདུན་ལ་སྲོ་མའོ། །སྲོ་མ་བདུན་
ལ་ཤིག་གོ། །ཤིག་བདུན་ལ་ནས་སོ། །ནས་བདུན་ལ་སོར་མོའི་ཚིགས་སོ། །སོར་མོའི་ཚིགས་གསུམ་ལ་མཛུབ་མོའོ། །ལོགས་ལ་གཞལ་བས། སོར་མོ་ཉི་ཤུ་བཞི་ལ་ཁྲུ་གང་ངོ་། །ཁྲུ་བཞི་ལ་གཞུ་གང་ངོ་། །གཞུ་ལྔ་བརྒྱ་ལ་རྒྱང་གྲགས་སོ། །རྒྱང་གྲགས་བརྒྱ་ལ་དཔག་ཚད་
དོ། །འཕགས་པ་གནས་བརྟན་པའི་སྡེ་པའི་ལུང་ལས་ཀྱང་། གཞུ་འདོམ་ལྔ་བརྒྱ་རྒྱང་གྲགས་ཏེ། །རྒྱང་གྲགས་བཞི་ལ་བ་ལང་འགྲོས། །བ་ལང་འགྲོས་བཞི་དཔག་ཚད་དོ། །ཞེས་སོ། །དུས་ཀྱི་མཐའ་ནི་སྐད་ཅིག་མ་སྟེ། དེ་ཡང་དུས་ཅི་སྲིད་དུ་རྡུལ་ཕྲ་རབ་ཀྱིས་རྡུལ་ཕྲ་རབ་གཞན་བརྒལ་
བར་གྱུར་པ་དེ་སྲིད་ཀྱི་དུས་ལ་སྐད་ཅིག་ཅེས་བྱའོ། །ཡང་ན་སྟོབས་དང་ལྡན་པའི་སྐྱེས་བུས་སེ་གོལ་གཏོགས་པ་ཙམ་ལ་སྐད་ཅིག་མ་དྲུག་ཅུ་རྩ་ལྔའོ། །སུམ་ཅུ་རྩ་བདུན་ཞེས་པ་ཡང་ངོ་། །སྐད་ཅིག་བརྒྱ་ཉི་ཤུ་ལ་དེའི་སྐད་ཅིག་ཅེས་སོ། །དེའི་སྐད་ཅིག་དྲུག་ཅུ་ལ་ཐང་ཅིག་གོ། །ཐང་ཅིག་

སུམ་ཅུ་ལ་ཡུད་ཙམ་མོ། །ན་ལི་ཀ་ཞེས་ཀྱང་བརྗོད་དོ། །ཡུད་ཙམ་སུམ་ཅུ་ལ་ཉིན་ཞག་གོ། །ཉིན་ཞག་སུམ་ཅུ་ལ་ཟླ་བའོ། །ཟླ་བ་བཅུ་གཉིས་ལ་ལོ་འཁོར་བའོ། །པཎྜི་ཏ་ཆེན་པོ་སྟོབས་བཅུ་དཔལ་བཤེས་གཉེན་གྱིས་བསྡུས་པ་འདུས་བྱས་དང་འདུས་མ་བྱས་རྣམ་པར་
ངེས་པ་ལས་གཟུགས་དང་དུས་རྣམ་པར་ངེས་པ་ཞེས་བྱ་བ་ལེའུ་ལྔ་པའོ།། །།འཛམ་བུའི་གླིང་དུ་བསྐལ་པ་དང་པོ་པའི་མི་རྣམས་ཀྱི་ཚེ་ལོ་དཔག་ཏུ་མེད་པའོ། །བར་དུ་ཚེ་ལོ་ངེས་པ་མེད་པའོ། །ཐ་མར་ཚེ་ལོ་བཅུ་པའོ། །བ་གླང་སྤྱོད་དུ་མི་རྣམས་ཀྱི་ཚེ་ལོ་ལྔ་བརྒྱའོ། །བྱང་གི་སྒྲ་
མི་སྙན་གྱི་མི་རྣམས་ཀྱི་ཚེ་ལོ་སྟོང་ངོ་། །ཤར་གྱི་ལུས་འཕགས་གླིང་དུ་མི་རྣམས་ཀྱི་ཚེ་ལོ་ཉིས་བརྒྱ་ལྔ་བཅུའོ། །མི་རྣམས་ཀྱི་ཚེ་ལོ་ལྔ་བཅུ་ལ་ནི་རྒྱལ་པོ་ཆེན་པོ་པའི་ལྷ་རྣམས་ཀྱི་ཉིན་ཞག་གཅིག་གོ། །དེས་ན་ཚེ་ལོ་ལྔ་བཅུའོ། །མི་རྣམས་ཀྱི་རྩིས་ཀྱིས་ལོ་དགུ་བཅུ་ཐམ་པའོ། །མིའི་ལོ་བརྒྱ་ལ་
ནི་སུམ་ཅུ་རྩ་གསུམ་པའི་ལྷ་རྣམས་ཀྱི་ཉིན་ཞག་གཅིག་གོ། །དེས་ན་ཚེ་ལོ་སྟོང་ངོ་། །མིའི་རྩིས་ཀྱིས་ལོ་བྱེ་བ་གསུམ་དང་ལོ་འབུམ་ཕྲག་དྲུག་ཅུའོ། །མིའི་ལོ་བརྒྱ་ཕྲག་གཉིས་ལ་འཐབ་བྲལ་གྱི་ལྷ་རྣམས་ཀྱི་ཉིན་མཚན་ནོ། །དེས་ན་ལོ་སྟོང་ཕྲག་གཉིས་ཀྱི་ཚེའོ། །མི་རྣམས་ཀྱི་གྲངས་རྩིས་ཀྱིས་
ལོ་བྱེ་བ་བཅུ་བཞི་དང་འབུམ་ཕྲག་བཞི་བཅུའོ། །མི་ལོ་བརྒྱ་ཕྲག་བཞི་ལ་དགའ་ལྡན་པའི་ལྷ་རྣམས་ཀྱི་ཉིན་མཚན་ནོ། །དེས་ན་ཚེ་ནི་ལོ་སྟོང་ཕྲག་བཞིའོ། །མིའི་གྲངས་རྩིས་ཀྱིས་ལོ་བྱེ་བ་ལྔ་བཅུ་རྩ་བདུན་དང་ལོ་འབུམ་ཕྲག་དྲུག་ཅུའོ། །མིའི་ལོ་བརྒྱད་བརྒྱ་ལ་འཕྲུལ་དགའི་ལྷ་རྣམས་ཀྱི་
ཉིན་མཚན་གཅིག་གོ། །དེས་ན་ཚེ་ནི་ལོ་སྟོང་ཕྲག་བརྒྱད་དོ། །མིའི་གྲངས་རྩིས་ཀྱིས་ལོ་བྱེ་བ་ཕྲག་ཉིས་བརྒྱ་དང་ལོ་བྱེ་བ་ཕྲག་སུམ་ཅུ་དང་ལོ་འབུམ་ཕྲག་བཞི་བཅུའོ། །མིའི་ལོ་བརྒྱ་ཕྲག་བཅུ་དྲུག་ལ་གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་ཉིན་ཞག་གཅིག་གོ། །དེས་ན་ཚེ་ལོ་སྟོང་
ཕྲག་བཅུ་དྲུག་གོ། །མིའི་གྲངས་རྩིས་ཀྱིས་ལོ་བྱེ་བ་བརྒྱ་ཕྲག་དགུ་དང་ལོ་བྱེ་བ་ཕྲག་ཉེར་གཅིག་དང་ལོ་འབུམ་ཕྲག་དྲུག་ཅུའོ། །ལུས་ཀྱི་ཚད་ཀྱང་ནི། འཛམ་བུ་གླིང་པའི་མི་རྣམས་ཀྱི་ནི་ཁྲུ་ཕྱེད་དང་བཅས་པའི་གསུམ་མམ། ཁྲུ་བཞི་པའོ། །ཤར་གྱི་ལུས་འཕགས་པོའི་མི་རྣམས་ཀྱི་ནི་

ལུས་ཀྱི་ཚད་ནི་ཁྲུ་བརྒྱད་དོ། །བ་ལང་སྤྱོད་པ་རྣམས་ཀྱི་ལུས་ཀྱི་ཚད་ནི་ཁྲུ་བཅུ་དྲུག་གོ། །བྱང་སྒྲ་མི་སྙན་གྱི་མི་རྣམས་ཀྱི་ལུས་ཀྱི་ཚད་ནི་ཁྲུ་སུམ་ཅུ་རྩ་གཉིས་སོ། །རྒྱལ་ཆེན་པའི་ལྷ་རྣམས་ཀྱི་ཚད་ནི་རྒྱང་གྲགས་ཀྱི་བཞི་ཆའོ། །སུམ་ཅུ་རྩ་གསུམ་པའི་ཚད་ནི་རྒྱང་གྲགས་ཕྱེད་དོ། །འཐབ་བྲལ་བ་
རྣམས་ཀྱི་ཚད་ནི་རྒྱང་གྲགས་ཀྱི་ཆ་གསུམ་མོ། །དགའ་ལྡན་པའི་ཚད་ནི་རྒྱང་གྲགས་སོ། །འཕྲུལ་དགའི་ལྷ་རྣམས་ཀྱི་ཚད་ནི་རྐང་པ་དང་བཅས་པའི་རྒྱང་གྲགས་སོ། །གཞན་འཕྲུལ་དབང་བྱེད་ལྷ་རྣམས་ཀྱི་ཕྱེད་དང་བཅས་པའི་རྒྱང་གྲགས་ནི་ལུས་ཀྱི་ཚད་དོ། །ནུབ་ཕྱོགས་པ་བྱེ་བྲག་ཏུ་
སྨྲ་བ་ན་རེ། རྟ་སྟོང་ཕྲག་དང་ལྡན་པའི་ཤིང་རྟ་དང་། གདུགས་ཀྱི་ཚད་ནི་དཔག་ཚད་ཙམ་ཉིད་དོ། །ལྷ་རྣམས་དབང་པོ་བརྒྱ་བྱིན་གྱི། །ལུས་ཀྱི་ཚད་ནི་རྒྱང་གྲགས་གསུམ། །ཞེས་ཟེར་རོ། །ཚངས་རིས་ཀྱི་ལྷ་རྣམས་ཀྱི་ཚེ་ནི་བར་གྱི་བསྐལ་པ་ཉི་ཤུའོ། །ཚངས་པའི་མདུན་ན་འདོན་རྣམས་
ཀྱི་ཚེ་ནི་བར་གྱི་བསྐལ་པ་བཞི་བཅུའོ། །ཚངས་པ་ཆེན་པོའི་ལྷ་རྣམས་ཀྱི་ཚེ་ནི་བསྐལ་པ་ཆེན་པོ་གཅིག་གོ། །འོད་ཆུང་གི་ལྷ་རྣམས་ཀྱི་ཚེ་ནི་བསྐལ་པ་ཆེན་པོ་གཉིས་སོ། །ཚད་མེད་འོད་ཀྱི་ལྷ་རྣམས་ཀྱི་ཚེ་ནི་བསྐལ་པ་ཆེན་པོ་བཞིའོ། །འོད་གསལ་གྱི་ལྷ་རྣམས་ཀྱི་ཚེ་ནི་བསྐལ་པ་ཆེན་པོ་
བརྒྱད་དོ། །དགེ་ཆུང་གི་ལྷ་རྣམས་ཀྱི་ཚེ་ནི་བསྐལ་པ་ཆེན་པོ་བཅུ་དྲུག་གོ། །ཚད་མེད་དགེའི་ལྷ་རྣམས་ཀྱི་ཚེ་ནི་བསྐལ་པ་ཆེན་པོ་སུམ་ཅུ་རྩ་གཉིས་སོ། །དགེ་རྒྱས་ཀྱི་ལྷ་རྣམས་ཀྱི་ཚེ་ནི་བསྐལ་པ་ཆེན་པོ་དྲུག་ཅུ་རྩ་བཞིའོ། །སྤྲིན་མེད་ཀྱི་ལྷ་རྣམས་ཀྱི་ཚེ་ནི་བསྐལ་པ་ཆེན་པོ་བརྒྱ་དང་ཉི་ཤུ་
རྩ་ལྔའོ། །བསོད་ནམས་འཕེལ་གྱི་ལྷ་རྣམས་ཀྱི་ཚེ་ནི་བསྐལ་པ་ཆེན་པོ་བརྒྱ་ཕྲག་གཉིས་དང་ལྔ་བཅུའོ། །འབྲས་བུ་ཆེ་བའི་ལྷ་རྣམས་ཀྱི་ཚེ་ནི་བསྐལ་པ་ཆེན་པོ་ལྔ་བརྒྱའོ། །མི་ཆེ་བའི་ལྷ་རྣམས་ཀྱི་ཚེ་ནི་བསྐལ་པ་ཆེན་པོ་སྟོང་ངོ་། །མི་གདུང་བའི་ལྷ་རྣམས་ཀྱི་ཚེ་ནི་བསྐལ་པ་ཆེན་པོ་སྟོང་ཕྲག་གཉིས་
སོ། །གྱ་ནོམ་སྣང་གི་ལྷ་རྣམས་ཀྱི་ཚེ་ནི་བསྐལ་པ་ཆེན་པོ་སྟོང་ཕྲག་བཞིའོ། །བལྟ་ན་སྡུག་གི་ལྷ་རྣམས་ཀྱི་ཚེ་ནི་བསྐལ་པ་ཆེན་པོ་སྟོང་ཕྲག་བརྒྱད་དོ། །འོག་མིན་གྱི་ལྷ་རྣམས་ཀྱི་ཚེ་ནི་བསྐལ་པ་ཆེན་པོ་སྟོང་ཕྲག་བཅུ་དྲུག་གོ། །ནམ་མཁའ་མཐའ་ཡས་སྐྱེ་མཆེད་དང་། རྣམ་ཤེས་མཐའ་ཡས་སྐྱེ་

མཆེད་དང་། ཅི་ཡང་མེད་པའི་སྐྱེ་མཆེད་དང་། འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་རྣམས་ལ་ཚེ་ནི་གྲངས་བཞིན་དུ་བསྐལ་པ་ཆེན་པོ་སྟོང་ཕྲག་ཉི་ཤུ་དང་། སྟོང་ཕྲག་བཞི་བཅུ་དང་། སྟོང་ཕྲག་དྲུག་ཅུ་དང་། སྟོང་ཕྲག་བརྒྱད་ཅུ་རྣམས་སོ། །ལུས་ཀྱི་ཚད་ནི་ཚངས་རིས་
ཀྱི་ལྷ་ལ་སོགས་པ་རྣམས་ཀྱི་རིམ་པ་བཞིན་དུ་དཔག་ཚད་ཕྱེད་དང་། དཔག་ཚད་གཅིག་དང་ཕྱེད་དང་། དཔག་ཚད་གཉིས་དང་། དཔག་ཚད་བཞི་དང་། དཔག་ཚད་བརྒྱད་དང་། དཔག་ཚད་བཅུ་དྲུག་དང་། དཔག་ཚད་སུམ་ཅུ་རྩ་གཉིས་དང་། དཔག་ཚད་དྲུག་ཅུ་རྩ་བཞི་དང་། དཔག་ཚད་བརྒྱ་དང་ཉི་ཤུ་
རྩ་ལྔ་དང་། དཔག་ཚད་བརྒྱ་ཕྲག་གཉིས་དང་ལྔ་བཅུ་དང་། དཔག་ཚད་བརྒྱ་ཕྲག་ལྔ་དང་། དཔག་ཚད་སྟོང་དང་། དཔག་ཚད་སྟོང་ཕྲག་གཉིས་དང་། དཔག་ཚད་སྟོང་ཕྲག་བཞི་དང་། དཔག་ཚད་སྟོང་ཕྲག་བརྒྱད་དང་། དཔག་ཚད་སྟོང་ཕྲག་བཅུ་དྲུག་དང་སྦྱོར་རོ་ཞེས་སོ། །ངན་འགྲོ་རྣམས་ཀྱི་ནི་
རྒྱལ་ཆེན་པའི་ལྷ་རྣམས་ཀྱི་ཚེའི་ཚད་དག་དམྱལ་བ་ཆེན་པོ་ཡང་སོས་ཀྱི་ཉིན་ཞག་གཅིག་གོ། །དེས་ན་ཚེ་ནི་ལོ་ལྔ་བརྒྱའོ། །སུམ་ཅུ་རྩ་གསུམ་པའི་ལྷ་རྣམས་ཀྱི་ཚེའི་ཚད་ནི་ཐིག་ནག་གི་ཉིན་ཞག་གོ། །དེས་ན་ཚེ་ནི་ལོ་སྟོང་ཕྲག་གཅིག་གོ། །འཐབ་བྲལ་གྱི་ཚེའི་ཚད་ནི་དམྱལ་བ་ཆེན་པོ་བསྡུས་
འཇོམས་ཀྱི་ཉིན་མཚན་ནོ། །དེས་ན་ཚེ་ནི་ལོ་སྟོང་ཕྲག་གཉིས་སོ། །དགའ་ལྡན་གྱི་ལྷའི་ཚེའི་ཚད་ནི་ངུ་འབོད་དམྱལ་བ་ཆེན་པོའི་ཉིན་མཚན་ནོ། །དེས་ན་ཚེ་ནི་ལོ་སྟོང་ཕྲག་བཞིའོ། །འཕྲུལ་དགའི་ལྷའི་ཚེའི་ཚད་ནི་དམྱལ་བ་ཆེན་པོ་ངུ་འབོད་ཆེན་པོའི་ཉིན་མཚན་ནོ། །དེས་ན་ཚེ་ནི་ལོ་སྟོང་ཕྲག་བརྒྱད་དོ། །གཞན་
འཕྲུལ་དབང་བྱེད་ལྷའི་ཚེའི་ཚད་ནི་དམྱལ་བ་ཆེན་པོ་ཚ་བའི་ཉིན་མཚན་ནོ། །དེས་ན་ཚེ་ནི་ལོ་སྟོང་ཕྲག་བཅུ་དྲུག་གོ། །དམྱལ་བ་ཆེན་པོ་རབ་ཏུ་ཚ་བའི་ཚེ་ནི་བར་གྱི་བསྐལ་པའི་ཕྱེད་དོ། །མནར་མེད་པའི་ཚེ་ནི་བར་གྱི་བསྐལ་པ་གཅིག་གོ། །དུད་འགྲོ་རྣམས་ནི་ངེས་པ་མེད་དེ་ཚེ་མཆོག་ཏུ་རིང་བའི་དུད་
འགྲོ་རྣམས་ནི་བར་གྱི་བསྐལ་པ་སྟེ། དགའ་བོ་དང་ཉེ་དགའ་ལ་སོགས་པ་ལྟ་བུའོ། །མིའི་ཟླ་བ་གཅིག་ལ་ཡི་དགས་ཀྱི་ཉིན་ཞག་གོ། །དེས་ན་ཚེ་ནི་ལོ་ལྔ་བརྒྱའོ། །བཅོམ་ལྡན་འདས་ཀྱིས་གྲང་བའི་དམྱལ་བའི་ཚེ་ཚད་གསུངས་པ་འདི་ལྟ་སྟེ། དགེ་སློང་དག་འདིར་ཏིལ་ཁལ་ཉི་ཤུ་ཤོང་བའི་མ་

ག་དྷཱའི་བྲེ་བོ་ཆེ་རེས་ཀྱིས་རབ་ཏུ་གང་བར་བྱས་ཏེ། སྤྱི་ཕུད་དུ་འགྱུར་བ་ལ། དེ་ལས་སྐྱེས་བུ་འགའ་ཞིག་གིས་ལོ་བརྒྱར་གྱུར་པའི་ཚེ་ཏིལ་རེ་རེ་ཕྱུང་བར་གྱུར་པ་ན། དགེ་སློང་དག་ཏིལ་གྱི་ཕུང་པོ་དེ་དེ་སྲིད་དུ་རིམ་པ་འདིས་མྱུར་དུ་ཟད་ཅིང་མཐར་ཐུག་པར་འགྲོ་བར་གྱུར་པ་ལ། འདིར་ངས་ཆུ་བུར་ཅན་དུ་གྱུར་
པའི་སེམས་ཅན་རྣམས་ཀྱི་ཚེའི་ཚད་མཐར་ཐུག་པ་ནི་སྨྲ་བར་བྱ་བ་མ་ཡིན་པ་ཉིད་དོ། །ཅི་ལྟར་ཡང་དགེ་སློང་དག་ཆུ་བུར་ཅན་གྱི་ཉི་ཤུ་ནི་ཆུ་བུར་རྡོལ་བ་ཅན་གྱི་ཉིན་གཅིག་གོ། །ཆུ་བུར་རྡོལ་བ་ཅན་གྱི་ཉི་ཤུ་ནི་ཨ་ཊ་ཊའོ། །ཨ་ཊ་ཊའི་ཉི་ཤུ་ལ་ཧ་ཧའོ། །ཧ་ཧ་བ་ཉི་ཤུ་ནི་ཧུ་ཧུ་བའོ། །ཧུ་ཧུ་བ་ཉི་ཤུ་ནི་ཨུཏྤལ་
ལྟར་གས་པའོ། །དེ་ཉི་ཤུ་ལ་པདྨ་ལྟར་གས་པའོ། །པདྨ་ཉི་ཤུ་ལ་པདྨ་ཆེན་པོའོ། །སྒྲ་ངན་སྤངས་ཏེ་བར་དུ་འཆི་བ་ནི། ཐམས་ཅད་དུ་ཡོད་ལ་བྱང་ན་ནི་ངེས་པའི་ཚེ་ཚད་ཡོད་དོ་ཞེས་པའི་དོན་ཏོ། །པཎྜི་ཏ་ཆེན་པོ་སྟོབས་བཅུ་དཔལ་བཤེས་གཉེན་གྱིས་བསྡུས་པ་འདུས་བྱས་དང་འདུས་མ་བྱས་རྣམ་པར་ངེས་པ་
ལས་ལུས་དང་ཚེ་རྣམ་པར་ངེས་པ་ཞེས་བྱ་བ་ལེའུ་དྲུག་པའོ།། །།རྣམ་པར་མི་སྣང་བའི་འགྲོ་བ་པའི་སེམས་ཅན་ནི། ཆོས་མངོན་པ་མཛོད་ལས་ནི་མ་གསུངས་ཏེ། དེ་ལྟ་ན་མདོ་སྡེ་ལ་སོགས་པ་རྣམས་སུ་མང་དུ་གསུངས་པས་ནི་འདིར་བརྗོད་པར་བྱ་སྟེ། ཅི་ལྟར་བཅོམ་ལྡན་འདས་
ཀྱིས་འཆི་འཕོ་དང་སྐྱེ་བ་མཁྱེན་པའི་སྟོབས་བསྟན་པའི་སྐབས་སུ་གསུངས་ཏེ། དེ་ལ་འདི་ནི་དེ་བཞིན་གཤེགས་པའི་ལྷའི་སྤྱན་ཡིན་ཏེ། སྤྱན་གང་གིས་ཕྱོགས་བཅུའི་འཇིག་རྟེན་ཆོས་ཀྱི་དབྱིངས་ཀྱི་མཐའ། ནམ་མཁའི་དབྱིངས་ཀྱི་མཐར་ཐུག་པ་ཚད་མེད་གྲངས་མེད་པ་བགྲང་བ་ལས་ཡང་དག་
པར་འདས་པའི་སངས་རྒྱས་ཀྱི་ཞིང་དུ། སྣང་བ་དེ་དག་ཐམས་ཅད་ལ་ཞིང་ཁ་ཅིག་ནི་སྲེག་པར་བྱེད་པ་དང་འཆགས་བཞིན་པ་དང་འཇིག་བཞིན་པར་སྣང་ཞིང་མཐོང་ངོ་། །གང་སེམས་ཅན་དུ་སྣང་བ་དེ་དག་ཐམས་ཅད་ལ་ཁ་ཅིག་ནི་ཅི་ལྟར་ལས་ཀྱི་ཉེ་བར་འགྲོ་བ་ལས་འཆི་འཕོ་བ་བྱེད་པ་དང་། སྐྱེ་བར་བྱེད་པ་
དང་། བདེ་བར་བྱེད་པ་དང་། ངན་འགྲོར་ཡང་སྣང་ཞིང་མཐོང་ངོ་། །གང་བྱང་ཆུབ་སེམས་དཔར་སྣང་བ་དེ་དག་ཐམས་ཅད་ལ་ཁ་ཅིག་ནི་འཕོ་བར་བྱེད་པ་དང་། འཆགས་པར་བྱེད་བཞིན་པ་དང་། ངེས་པར་འབྱུང་བ་རྣམས་སྣང་ཞིང་མཐོང་ངོ་། །གང་སངས་རྒྱས་སུ་སྣང་བ་དེ་དག་ཐམས་ཅད་ལ་ཁ་

ཅིག་ནི་མངོན་པར་རྫོགས་པར་བྱང་ཆུབ་བཞིན་པ་དང་། ཆོས་ཀྱི་འཁོར་ལོ་བསྐོར་བཞིན་པ་དང་། ཚེའི་འདུ་བྱེད་འདོར་བ་དང་། ཡོངས་སུ་མྱ་ངན་ལས་འདའ་བ་རྣམས་སྣང་ཞིང་མཐོང་ངོ་། །གང་ཉན་ཐོས་སུ་སྣང་བ་དེ་དག་ཐམས་ཅད་ལ་ཁ་ཅིག་ངེས་པར་འགྲོལ་བཞིན་པ་དང་།
ཡོངས་སུ་མྱ་ངན་ལས་འདའ་བཞིན་པ་རྣམས་མཁྱེན་ཞིང་མཐོང་ངོ་། །གང་རང་སངས་རྒྱས་སུ་སྣང་བ་དེ་དག་ཐམས་ཅད་ལ་ཁ་ཅིག་ནི་རྫུ་འཕྲུལ་སྟོན་པ་དང་། ཡོན་ཏན་རྣམ་པར་དག་པར་བྱེད་པ་རྣམས་མཁྱེན་ཞིང་མཐོང་ངོ་། །གང་ཡང་མི་སྣང་བའི་འགྲོ་བ་པའི་སེམས་ཅན་རྣམས་ཕྱི་རོལ་
པའི་མངོན་ཤེས་ལྔ་དང་ལྡན་པ་རྣམས་ཀྱི་མིག་གི་ལམ་དུ་འགྲོ་བ་མ་ཡིན་ནོ། །ཉན་ཐོས་རྣམས་ཀྱི་མ་ཡིན། རང་སངས་རྒྱས་རྣམས་ཀྱི་མ་ཡིན། བྱང་ཆུབ་སེམས་དཔའ་རྣམས་ཀྱི་མ་ཡིན་ནོ། །དེ་ནི་དེ་བཞིན་གཤེགས་པ་རྣམས་ཀྱི་ལྷའི་སྤྱན་གྱིས་སྣང་བར་འོངས་པ་ཡིན་ནོ། །གང་དག་ཡང་དེ་
བཞིན་གཤེགས་པ་རྣམས་ཀྱིས་ཕྱོགས་འགའ་ཞིག་ཏུ་ཤིང་རྟའི་འཁོར་ལོའི་ཚད་ཙམ་དུ། མི་སྣང་བའི་འགྲོ་བ་པའི་སེམས་ཅན་རྣམས་མཐོང་བར་ཡང་དག་པར་འོངས་པ་དེ་ནི་ཤིན་ཏུ་ཆེས་མང་བ་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱི་ལྷ་དང་མི་རྣམས་ནི་དེ་ལྟ་བུ་མ་ཡིན་ནོ། །
དེ་ལྟར་རྣམ་པར་མི་སྣང་བའི་སེམས་ཅན་རྣམས་ཀྱི་ཁམས་ནི་ཚད་མེད་པའོ། །འདི་དག་ཡང་དེ་བཞིན་གཤེགས་པ་རྣམས་ཀྱི་ལྷའི་སྤྱན་གྱིས་སེམས་ཅན་སངས་རྒྱས་ཀྱི་སྤྱན་གྱིས་གདུལ་བྱར་གྱུར་པ་གང་ཡིན་ཞེས་སངས་རྒྱས་ཀྱི་ཞིང་ཐམས་ཅད་དུ་སེམས་ཅན་གྱི་ཁམས་ལ་རྣམ་པར་གཟིགས་
པར་མཛད་དོ། །ཅི་སྙེད་སངས་རྒྱས་ཀྱི་གདུལ་བྱར་གྱུར་པའི་སེམས་ཅན་དེ་སྙེད་པ་དེ་དག་རྣམས་ཀྱི་མདུན་དུ་དེ་བཞིན་གཤེགས་པ་ཡང་དག་པར་གནས་པ་ཉིད་དོ། །སེམས་ཅན་དེ་རྣམས་ནི་འདུལ་བར་བྱེད་དོ། །དེ་ལས་གཞན་སེམས་ཅན་གྱིས་ཡང་དག་པར་ཤེས་པ་མ་ཡིན་ནོ། །
འཇིག་རྟེན་གྱི་ཁམས་རྣམ་པ་གསུམ་སྟེ། འདི་ལྟ་སྟེ། སྟོང་ཆུང་ངུའི་འཇིག་རྟེན་གྱི་ཁམས་དང་། སྟོང་གཉིས་པའི་འཇིག་རྟེན་གྱི་ཁམས་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སོ། །གླིང་བཞི་དང་ཟླ་བ་ཉི་མའི་རི་རབ་འདོད་པ་ན་སྤྱོད་པའི་ལྷ་དྲུག་བསམ་གཏན་

དང་པོ་ལ་སོགས་རྣམས་སོ་སོར་སྟོང་སྟོང་ཚོགས་པ་རྣམས་ལ། སྟོང་ཆུང་ངུའི་འཇིག་རྟེན་གྱི་ཁམས་སོ། །སྟོང་ཆུང་ངུའི་འཇིག་རྟེན་དེ་རྣམས་ལ་ནི་སྟོང་གཉིས་པ་བར་མའི་འཇིག་རྟེན་གྱི་ཁམས་སོ། །སྟོང་གཉིས་པ་དེ་རྣམས་སྟོང་ལ་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་
ཁམས་སོ། །རིམ་པ་བཞིན་དུ་སྟོང་ཕྲག་གཅིག་དང་། འབུམ་ཕྲག་བཅུ་དང་། བྱེ་བ་བརྒྱའི་གླིང་བཞི་པ་ལ་སོགས་པ་རྣམས་ཅིག་ཆར་དུ་འཇིག་པ་དང་འཆགས་པ་ཡིན་ནོ། །གང་གསུངས་ཏེ། གླིང་བཞི་དང་ནི་རི་རབ་དང་། །ཉི་ཟླ་དང་ནི་འདོད་ལྷ་དང་། །ཚངས་པའི་འཇིག་རྟེན་
སྟོང་ལ་ནི། །སྟོང་ནི་ཆུང་ངུ་དག་ཏུ་འདོད། །དེ་སྟོང་ལ་ནི་སྟོང་གཉིས་པ། །བར་མའི་འཇིག་རྟེན་ཁམས་ཡིན་ནོ། །དེ་སྟོང་ལ་ནི་སྟོང་གསུམ་སྟེ། །མཉམ་དུ་འཇིག་ཅིང་ཆགས་པ་ཡིན། །ཞེས་སོ། །པཎྜི་ཏ་ཆེན་པོ་སྟོབས་བཅུ་དཔལ་བཤེས་གཉེན་གྱིས་བསྡུས་པ་འདུས་བྱས་
དང་འདུས་མ་བྱས་རྣམ་པར་ངེས་པ་ལས་སྣང་བའི་འགྲོ་བ་པའི་སེམས་ཅན་རྣམ་པར་ངེས་པ་ཞེས་བྱ་བ་ལེའུ་བདུན་པའོ།། །།བསྐལ་པ་ཡང་རྣམ་པ་བཞི་སྟེ། འདི་ལྟ་སྟེ། བར་གྱི་བསྐལ་པ་དང་། འཇིག་པའི་བསྐལ་པ་དང་། ཆགས་པའི་བསྐལ་པ་དང་། བསྐལ་པ་ཆེན་
པོའོ། །དེ་ལ་བར་གྱི་བསྐལ་པའི་ཚད་ནི་ལྕགས་ཀྱི་རང་བཞིན་གྱི་ར་བ་གྲུ་བཞི་པ་མཐོ་བ་དང་ལོགས་སོ་སོ་ལ་རྒྱང་གྲགས་རེ་རེ་ཡོད་པའི་ནང་དུ་ཏིལ་ལམ་ཉུངས་ཀར་གྱིས་བཀང་སྟེ་སྤྱི་ཕུད་དུ་བྱས་པའི་ནང་ནས་ལོ་བརྒྱ་ཚང་བ་ལས། རེ་རེ་ཕྱུང་བར་གྱུར་པ་ན་ཅི་སྲིད་དུ་ཐམས་ཅད་ཡོངས་སུ་ཟད་པའི་
དུས་སུ་གྱུར་པ་དེ་སྲིད་ཀྱི་དུས་ལ་བར་གྱི་བསྐལ་པ་ཞེས་བྱའོ། །བར་གྱི་བསྐལ་པ་བརྒྱད་ཅུ་ལ་ནི་བསྐལ་པ་ཆེན་པོའོ། །འཇིག་པའི་བསྐལ་པ་ཡང་བར་གྱི་བསྐལ་པ་ཉི་ཤུར་གྱུར་པ་ཡིན་ཏེ། དེ་ལ་འཇིག་པ་ནི་གཉིས་ཏེ། འདི་ལྟ་སྟེ། འགྲོ་བ་འཇིག་པ་དང་ཁམས་འཇིག་པའོ། །ཡང་
འཇིག་པ་ནི་གཉིས་ཏེ། འདི་ལྟ་སྟེ། སེམས་ཅན་འཇིག་པ་དང་སྣོད་འཇིག་པའོ། །ཡང་འཇིག་པ་གསུམ་སྟེ། འདི་ལྟ་སྟེ། མེས་འཇིག་པ་དང་། ཆུས་འཇིག་པ་དང་། རླུང་གིས་འཇིག་པའོ། །འདི་ལྟ་སྟེ། དེའི་དུས་དེ་འབྱུང་བར་འགྱུར་བ་ཡིན་ཏེ། དམྱལ་བ་འདིའི་སེམས་ཅན་

འཕོ་བར་འགྱུར་ལ་སྐྱེ་བར་མི་འགྱུར་བ་ན། འཇིག་པའི་བསྐལ་པ་དེ་དབུ་བརྩམས་པ་སྟེ། །རིམ་གྱིས་དམྱལ་བའི་སེམས་ཅན་གཅིག་ཀྱང་ལྷག་མ་མ་ལུས་པར་གྱུར་པར་ངེས་པ་ན་འཇིག་རྟེན་འཇིག་པར་འགྱུར་བ་ཡིན་ནོ། །འདི་ལྟ་སྟེ། དམྱལ་བའི་འགྲོ་བ་འཇིག་པའོ། །དེའི་ཚེ་
དམྱལ་བ་འདི་དག་ངེས་པར་མྱོང་བའི་ལས་འཛིན་པ་གང་དེ་སྟོང་གསུམ་གཞན་གྱི་དམྱལ་བར་སྐྱེ་བར་འགྱུར་རོ། །དེ་བཞིན་དུ་དུད་འགྲོའི་འགྲོ་བ་འཇིག་པའོ། །རྒྱ་མཚོ་ཆེན་པོར་གཏོགས་པའི་དུད་འགྲོ་རྣམས་སྔོན་དུ་འཇིག་པར་འགྱུར་བ་ཡིན་ཏེ། མི་དང་ལྷན་ཅིག་སྤྱོད་ཅིང་གནས་པའི་དུད་འགྲོ་ནི་མི་ཉིད་དང་
ལྷན་ཅིག་ཏུ་འཇིག་པ་ཡིན་ནོ། །དེ་བཞིན་དུ་ཡི་དགས་ཀྱི་འགྲོ་བ་འཇིག་པའོ། །དུས་དེ་འབྱུང་བར་འགྱུར་བ་འདི་ཡིན་ཏེ། མི་འདི་རྣམས་སུ་སེམས་ཅན་གང་ཡང་རུང་བས་རང་བཞིན་གྱིས་སློབ་དཔོན་མེད་པར་ཆོས་ཉིད་ཀྱིས་ཐོབ་པའི་བསམ་གཏན་དང་པོ་ཡང་དག་པར་སྐྱེའོ། །དེ་བསམ་གཏན་དེ་ལས་ལངས་
ནས་ཚིག་ཏུ་སྨྲ་བར་འགྱུར་ཏེ། ཀྱེ་མ་བདེ་བ་འདི་ནི་དབེན་པ་ལས་སྐྱེས་པ་དགའ་ཞིང་བདེ་བའོ། །ཀྱེ་མ་ཞི་བ་འདི་ནི་དབེན་པ་ལས་སྐྱེས་པ་དགའ་ཞིང་བདེ་བའོ་ཞེས་སོ། །སྒྲ་དེ་ཐོས་ནས་སེམས་ཅན་གཞན་ལ་ཡང་ཀུན་དུ་སྐྱེ་བར་འགྱུར་བའོ། །དུས་བྱས་ཏེ་ཚངས་པའི་འཇིག་རྟེན་དུ་སྐྱེ་བར་འགྱུར་རོ། །གང་
གི་ཚེ་འཛམ་བུའི་གླིང་དུ་སེམས་ཅན་གཅིག་ཀྱང་ལུས་པ་མེད་པར་གྱུར་པ་འདི་ཙམ་ཉིད་འདི་འཇིག་རྟེན་འཇིག་པར་འགྱུར་བ་ཡིན་ཏེ། འདི་ལྟ་སྟེ། འཛམ་བུའི་གླིང་གི་མི་རྣམས་འཇིག་པའོ། །དེ་བཞིན་དུ་ཤར་གྱི་ལུས་འཕགས་ཀྱི་མི་རྣམས་འཇིག་པའོ། །དེ་བཞིན་དུ་བ་ལང་སྤྱོད་ཀྱི་མི་རྣམས་
འཇིག་པའོ། །དེ་བཞིན་དུ་བྱང་གི་སྒྲ་མི་སྙན་གྱི་མི་རྣམས་འཇིག་པའོ། །བྱང་གི་སྒྲ་མི་སྙན་གྱི་མི་རྣམས་ནི་འདོད་པ་ན་སྤྱོད་པའི་ལྷར་སྐྱེ་བར་འགྱུར་ཏེ། དེ་རུ་སྐྱེ་བ་མི་སྲིད་པའི་ཕྱིར་རོ། །ངེས་པར་འཇིག་རྟེན་འདི་འཇིག་པར་འགྱུར་བ་ཡིན་ཏེ། འདི་ལྟ་སྟེ། མིའི་འགྲོ་བ་འཇིག་པའོ། །དེ་བཞིན་དུ་
རྒྱལ་ཆེན་བཞི་པའི་ལྷ་རྣམས་སུ་ལྷ་རྣམས་ཀྱི་བསམ་གཏན་དང་པོ་བསྐྱེད་དེ། ཚངས་པའི་འཇིག་རྟེན་དུ་སྐྱེ་བར་འགྱུར་རོ། །གང་གི་ཚེ་དེ་རུ་སེམས་ཅན་གཅིག་ཀྱང་ལྷག་མ་ལུས་པ་མེད་པར་གྱུར་པ་འདི་ཙམ་ནི་འཇིག་རྟེན་འཇིག་པར་གྱུར་པ་ཡིན་ཏེ། འདི་ལྟ་སྟེ། རྒྱལ་པོ་ཆེན་པོ་བཞིའི་ལྷའི་

འཇིག་པའོ། །དེ་བཞིན་དུ་སུམ་ཅུ་རྩ་གསུམ་པའི་ལྷའི་འཇིག་པའོ། །འཐབ་བྲལ་གྱི་ལྷའི་འཇིག་པ་ནི་དེ་བཞིན་ནོ། །དེ་བཞིན་དུ་དགའ་ལྡན་ལྷའི་འཇིག་པའོ། །དེ་བཞིན་དུ་འཕྲུལ་དགའི་ལྷའི་འཇིག་པའོ། །དེ་བཞིན་དུ་གཞན་འཕྲུལ་དབང་བྱེད་ཀྱི་ལྷའི་འཇིག་པའོ། །གང་ཚེ་འདོད་པ་ན་སྤྱོད་
པའི་ལྷ་རྣམས་གཅིག་ཀྱང་ལུས་པ་མེད་པར་གྱུར་པ་འདི་ཙམ་ནི་འཇིག་རྟེན་འཇིག་པར་འགྱུར་བ་ཡིན་ཏེ། འདི་ལྟ་སྟེ། འདོད་པ་ན་སྤྱོད་པའི་ལྷའི་འཇིག་པའོ། །ཚངས་པའི་འཇིག་རྟེན་དུ་ཡང་སེམས་ཅན་གང་ཡང་རུང་བས་ཆོས་ཉིད་ཀྱིས་ཐོབ་པའི་བསམ་གཏན་གཉིས་པ་ཡང་དག་པར་སྐྱེའོ། །
དེ་ནས་བསམ་གཏན་དེ་ལས་ལངས་ཏེ། ཚིག་ཏུ་སྨྲ་བར་འགྱུར་ཏེ། ཀྱེ་མ་བདེ་བ་འདི་ཏིང་ངེ་འཛིན་ལས་སྐྱེས་པ་དགའ་ཞིང་བདེ་བའོ། །ཀྱེ་མ་ཞི་བ་འདི་ནི་ཏིང་ངེ་འཛིན་ལས་སྐྱེས་པ་དགའ་ཞིང་བདེ་བའོ་ཞེས་པའི་སྒྲ་དེ་ཐོས་ནས་སེམས་ཅན་གཞན་ལ་ཡང་བསམ་གཏན་གཉིས་པ་ཡང་དག་པར་སྐྱེ་བར་
འགྱུར་རོ། །དུས་བྱས་ཏེ་འོད་གསལ་གྱི་ལྷ་རུ་སྐྱེ་བར་འགྱུར་རོ། །གང་ཚེ་ཚངས་པའི་འཇིག་རྟེན་དུ་སེམས་ཅན་གཅིག་ཀྱང་ལུས་པ་མེད་པར་གྱུར་པ་འདི་ཙམ་ཉིད་ནི་འཇིག་རྟེན་འཇིག་པར་འགྱུར་བ་སྟེ། འདི་ལྟ་སྟེ། སེམས་ཅན་ཀུན་དུ་འཇིག་པའོ། །དེ་ནས་སྣོད་སེམས་ཅན་གྱིས་སྟོང་པར་
གྱུར་པས། དེའི་ཚེ་འཕེན་བྱེད་ཀྱི་ལས་ཡོངས་སུ་ཟད་པས་ལྷས་ཆར་མི་འབེབས་ཤིང་། ས་བོན་གྱི་གྲོང་དང་། སྡོང་བུའི་གྲོང་དང་། འབབ་ཆུ་ཆུང་ངུ་རྣམས་སྐམས་པར་འགྱུར་རོ། །དེའི་རྗེས་སུ་ཉི་མ་གཉིས་པ་རབ་ཏུ་འབྱུང་བར་འགྱུར་རོ། །འབབ་ཆུ་ཆེན་པོ་ཐམས་ཅད་སྐམས་པར་འགྱུར་
རོ། །དེ་ལ་ཡང་ཆུ་བོ་ཆེན་པོ་བདུན་ནི་འདི་ལྟ་སྟེ། གང་གཱ། ཡ་མུ་ན། སར་བྷུ། སར་བྷུ། ཨ་ཛི་ར་བ་ཏི། མ་ཧཱི། ནི་མ་ན་གའོ། །དེ་ནས་ཉི་མ་གསུམ་པ་འབྱུང་བར་འགྱུར་རོ། །ཆུ་བོ་ཆེན་པོ་བཞི་དང་མ་དྲོས་པ་ལ་སོགས་པ་མཚོ་ཆེན་པོ་རྣམས་སྐམས་པར་འགྱུར་རོ། །དེ་ལ་ཆུ་བོ་ཆེན་
པོ་བཞི་ནི་འདི་ལྟ་སྟེ། གང་གཱ་དང་། སིན་དྷུ་དང་། པཀྵུ་དང་། ཤཱི་ཏའོ། །མཚེའུ་ཆེན་པོ་བདུན་ནི། སིང་ཧ་སྲ་སཱ་ཏཱ། ཧང་ས་སྲ་པཱ་ཏ། ར་ཐ་ཀཱ་ར། ན་ཌ་དན་ཏ། ཀུ་ནཱ་ལ། ཨ་ན་བ་ཏཱ་བ་ཏ། མན་ཏཱ་ཀི་ནཱིའོ། །དེའི་ཕྱི་ནས་ཉི་མ་བཞི་པ་འབྱུང་བར་འགྱུར་རོ། །དེའི་ཚེ་རྒྱ་མཚོ་ཆེན་པོ་ཡང་

དཔག་ཚད་བརྒྱ་ཅི་སྲིད་དུ་ཆུ་སྐམས་པར་འགྱུར་རོ། །དེ་མ་ཐག་ཏུ་ཉི་མ་ལྔ་པ་འབྱུང་བར་འགྱུར་རོ། །དེའི་ཚེ་དཔག་ཚད་བརྒྱ་ཕྲག་གཉིས་སུ་ཆུ་སྐམས་པར་འགྱུར་རོ། །དེ་ནས་ཉི་མ་དྲུག་པ་འབྱུང་བར་འགྱུར་རོ། །དེའི་ཚེ་རྒྱ་མཚོ་ཆེན་པོ་ལ་ཆུ་ཤིན་ཏུ་ཉུང་བ་ཐིགས་པ་
ཡང་ལུས་པ་མེད་པར་འགྱུར་རོ། །ས་ཆེན་པོ་དང་རི་རབ་ལས་དུ་བ་འབྱུང་བར་འགྱུར་རོ། །དེའི་རྗེས་སུ་ཉི་མ་བདུན་པ་འབྱུང་བར་འགྱུར་རོ། །དེའི་ཚེ་སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་བསྲེགས་ཏེ། ཅི་སྲིད་དུ་ཐལ་བ་ཡང་ཤེས་པར་བྱ་བ་མེད་དོ། །བསྲེགས་པ་དང་ཉི་མ་རང་ཉིད་ཀྱང་
མེད་པར་འགྱུར་ཏེ། བུད་ཤིང་མ་ཚང་བའི་མེ་བཞིན་ནོ། །དེས་ན་ཉི་མ་བདུན་གྱི་མེས་འཇིག་པ་སྟེ། བསམ་གཏན་དང་པོའི་བར་དུ་སྲེག་པར་བྱེད་དོ། །དེ་བཞིན་དུ་བ་ཚ་ཅན་གྱི་ཆུའི་ཆར་ཕབ་ནས་བསམ་གཏན་གཉིས་པ་ཉམས་པར་བྱེད་པ་ནི་ཆུས་འཇིག་པའོ། །དེའི་རྗེས་སུ་རྣམ་པར་འཁྲུགས་པའི་
རླུང་ཆེན་པོས་བསམ་གཏན་གསུམ་པ་འཐོར་བར་བྱེད་པ་ནི་རླུང་གིས་འཇིག་པའོ། །བསམ་གཏན་བཞི་པ་ལ་ནི་འཇིག་པ་མེད་དོ། །དེས་ན་འཇིག་པ་ནི་མདོར་བསྡུ་ན་གསུམ་སྟེ། འདི་ལྟ་སྟེ། མེས་འཇིག་པ་དང་། ཆུས་འཇིག་པ་དང་། རླུང་གིས་འཇིག་པའོ། །དེའི་ཕྱིར་ཡང་བསམ་གཏན་དང་
པོ་ན་མེས་འཇིག་པ་ཁོ་ན་སྲིད་པ་སྟེ། དེ་དག་གི་དྲི་མ་དང་ཆོས་མཐུན་པའི་ཕྱིར་རོ། །དེ་ཡང་འདི་ལྟར་བསམ་གཏན་དང་པོ་ན་རྣམ་པར་རྟོག་པ་དང་རྣམ་པར་དཔྱོད་པའི་དྲི་མ་ཡོད་དེ། དེ་ཡང་ཡོངས་སུ་སྲེག་པར་བྱེད་པའི་ཕྱིར་ན་མེའི་བསྐལ་པའོ། །བསམ་གཏན་གཉིས་པ་ནི་ཆུའི་འཇིག་པ་ཁོ་ན་སྟེ།
དེའི་དྲི་མ་དང་ཆོས་མཐུན་པའི་ཕྱིར་རོ། །དེ་ཡང་འདི་ལྟར་བསམ་གཏན་གཉིས་པ་ན་དགའ་བའི་དྲི་མ་ཡོད་དེ། དེ་ཡང་ཤིན་ཏུ་སྦྱོངས་པའི་སྦྱོར་བས་རྟེན་འཇམ་པར་བྱེད་པའི་ཕྱིར་ན་ཆུའི་བསྐལ་པའོ། །བསམ་གཏན་གསུམ་པ་ན་རླུང་གི་འཇིག་པ་ཁོ་ནའོ། །དེ་ཡང་འདི་ལྟར་བསམ་གཏན་གསུམ་པ་ན་
དབུགས་འབྱུང་བ་དང་། འཇུག་པའི་དྲི་མ་ཡོད་དེ། དེ་ཡང་རླུང་ཉིད་ཁོ་ནའོ། །དེས་ན་གང་ལ་ནང་གི་བདག་ཉིད་ཀྱི་བསམ་གཏན་སྙོམས་འཇུག་ཅི་འདྲ་བའི་དྲི་མ་ཡོད་པ་དེ་ལ་བསམ་གཏན་ལས་སྐྱེས་པའི་ཕྱི་རོལ་ཡང་དེ་འདྲ་བའོ། །དེ་ཉིད་ཀྱིས་ན་བསམ་གཏན་བཞི་པ་ན་རྣམ་པར་རྟོག་པ་ལ་སོགས་

པས་མི་བསྐྱོད་པས་དྲི་མ་དང་བྲལ་བའི་ཕྱིར་ན་འཇིག་པ་ནི་མེད་དོ། །གལ་ཏེ་བསམ་གཏན་བཞི་པ་ལ་འཇིག་པ་མེད་ན། ཅི་བསམ་གཏན་བཞི་པ་རྟག་པ་ཡིན་ནམ་ཞེ་ན་མ་ཡིན་ཏེ། དེ་རུ་ཡང་ལྷའི་བུ་རྣམས་སྐྱེ་བར་འགྱུར་བ་ན་གཞལ་ཡས་ཁང་དང་བཅས་ནས་སྐྱེ་བར་འགྱུར་བ་དང་། འགག་པ་ན་
ཡང་གཞལ་ཡས་ཁང་དང་བཅས་ནས་འཇིག་པར་འགྱུར་རོ། །དེས་ན་འཇིག་པའི་རྩེ་མོ་ནི་གསུམ་སྟེ། འདི་ལྟར་མེས་འཇིག་པའི་རྩེ་མོ་ནི་བསམ་གཏན་གཉིས་པའོ། །ཆུས་འཇིག་པའི་རྩེ་མོ་ནི་བསམ་གཏན་གསུམ་པའོ། །རླུང་གིས་འཇིག་པའི་རྩེ་མོ་ནི་བསམ་གཏན་བཞི་པའོ། །འཕགས་
པ་གནས་བརྟན་པའི་སྡེ་པའི་ལུང་གི་ཚུལ་ལས་ཀྱང་འཇིག་པ་ནི་དྲུག་ཅུ་རྩ་བཞི་སྟེ། དེ་ལ་མེས་འཇིག་པ་ལྔ་བཅུ་རྩ་དྲུག་གོ། །ཆུས་འཇིག་པ་ནི་བདུན་ནོ། །རླུང་གིས་འཇིག་པ་ནི་གཅིག་གོ། །འདི་ལྟ་སྟེ། བར་མེད་པར་མེས་འཇིག་པ་བདུན་ནོ། །ཆུས་གཅིག་གོ། །དེ་ནས་མེས་བདུན་ནོ། །
ཆུས་གཅིག་གོ། །དེ་ནས་མེས་བདུན་ནོ། །ཆུས་གཅིག་གོ། །དེ་ནས་མེས་བདུན་ནོ། །ཆུས་གཅིག་གོ། །དེ་ནས་མེས་བདུན་ནོ། །ཆུས་གཅིག་གོ། །དེ་ནས་མེས་བདུན་ནོ། །ཆུས་གཅིག་གོ། །དེ་ནས་མེས་བདུན་ནོ། །ཆུས་གཅིག་གོ། །དེ་ནས་མེས་བདུན་ནོ། །རླུང་གིས་འཇིག་པ་ནི་
གཅིག་གོ། །དེ་ལྟར་བསྡུས་ཏེ་འཇིག་པ་ནི་དྲུག་ཅུ་བཞིའོ། །ཡང་གསུངས་ཏེ། མེ་ཡིས་ལན་ནི་བདུན་བདུན་ལ། །བརྒྱད་པ་བརྒྱད་པ་ཆུ་ཡིས་སོ། །གང་ཚེ་རླུང་མཆོག་གཅིག་བགྲངས་ན། །དྲུག་ཅུ་བཞི་ནི་རྫོགས་པར་འགྱུར། །ཞེས་སོ། །དེ་ལྟར་དམྱལ་བ་རུ་དང་པོ་སེམས་ཅན་གྱི་འཕོ་བ་ནས་
བཟུང་སྟེ། ཅི་སྲིད་དུ་སྣོད་ཐམས་ཅད་ཡང་དག་པར་ཟད་པར་འགྱུར་བའི་དུས་འདི་ནི་འཇིག་པའི་བསྐལ་པ་སྟེ། བར་གྱི་བསྐལ་པ་ཉི་ཤུའོ། །དེའི་རྗེས་སུ་འཇིག་རྟེན་འདི་ཞིག་ན་སྟོང་པ་ནམ་མཁའ་ཙམ་ཉིད་དུ་བར་གྱི་བསྐལ་པ་ཉི་ཤུ་གནས་པར་འགྱུར་རོ། །དེའི་ཕྱི་ནས་འཆགས་པ་ནི་གཉིས་
ཏེ། འདི་ལྟ་སྟེ། སྣོད་འཆགས་པ་དང་། སེམས་ཅན་འཆགས་པའོ། །དེ་ལ་སྣོད་འཆགས་པ་ནི་སེམས་ཅན་རྣམས་ཀྱི་ལྷག་པའི་བདག་པོས་ནམ་མཁའ་ལ་རླུང་ཞན་གྱིས་ཆུང་བ་རྒྱུ་བར་འགྱུར་རོ། །དེ་ལས་ཅི་ལྟར་གསུངས་པའི་རླུང་གི་དཀྱིལ་འཁོར་ལ་སོགས་པ་ཐམས་ཅད་སྐྱེ་བར་

འགྱུར་ཏེ། འདི་ཙམ་ནི་འཇིག་རྟེན་འཆགས་པར་གྱུར་པ་ཡིན་ཏེ། སྣོད་རྣམ་པར་འཆགས་སོ། །དེ་ནས་འོད་གསལ་ནས་སེམས་ཅན་གཞན་གང་རུང་འཕོས་ནས་ཚངས་པའི་གཞལ་ཡས་སུ་སྐྱེ་བར་འགྱུར་རོ། །དེ་ལྟར་དེ་བཞིན་དུ་དེའི་འཁོར་ཡང་ངོ་། །
དེ་ཉིད་ནས་སེམས་ཅན་གཞན་དག་ཚངས་པའི་མདུན་ན་འདོན་དུ་འཕོ་བར་འགྱུར་རོ། །དེ་ཁོ་ན་བཞིན་དུ་ཚངས་རིས་དང་། གཞན་འཕྲུལ་དབང་བྱེད་རྣམས་སུ་རིམ་གྱིས་ཅི་སྲིད་དུ། སྒྲ་མི་སྙན་དུ། བ་ལང་སྤྱོད་དུ། ཤར་གྱི་ལུས་འཕགས་པོ་རུ། འཛམ་བུ་གླིང་དུ། ཡི་དགས་སུ། དུད་
འགྲོ་རུ། དམྱལ་བ་རྣམས་སུ་སྐྱེ་བར་འགྱུར་རོ། །སེམས་ཅན་འཆགས་པའོ་ཆོས་ཉིད་ཀྱིས་འདི་ལྟར་འབྱུང་བ་ཡིན་ཏེ། གང་ཕྱིས་འཇིག་པ་དེ་དག་སྔོན་དུ་འཆགས་པ་ཡིན་ནོ། །གང་གི་ཚེ་དམྱལ་བར་སེམས་ཅན་གཅིག་ཡང་བྱུང་བར་གྱུར་པ་དེའི་ཚེ་འཇིག་རྟེན་འདི་ཆགས་པ་ཡིན་ཏེ། སེམས་ཅན་
འཆགས་པའོ། །བར་གྱི་བསྐལ་པ་བཅུ་དགུས་སོ། །དེ་ནས་བཟུང་སྟེ་བར་གྱི་བསྐལ་པ་ཉི་ཤུར་ཆགས་པ་གནས་སོ། །འདིར་བསྐལ་པ་དང་པོ་པའི་མི་རྣམས་འོད་གསལ་ནས་འཕོས་ཏེ་འོངས་པ་ན་གཟུགས་ན་སྤྱོད་པ་དང་འདྲ་བར་གནས་ཤིང་། ཡིད་ཀྱི་རང་བཞིན་རང་གི་འོད་དང་ལྡན་པ་མཁའ་ལ་ཀུན་
དུ་འགྲོ་བ་དགའ་བའི་ཟས་ཅན་ནོ། །དེས་སའི་དྲི་བསྣམས་ཤིང་སའི་རོ་མྱངས་པ་དང་ལྡན་པ་དང་ཟོས་པ་ཅན་དུ་འགྱུར་རོ། །དེ་རྣམས་ཀྱི་ལུས་ལ་སྲ་རྩུབ་དང་ལྕིབས་ཀུན་དུ་ནོན་ཅིང་འོད་སྣང་བ་ཡང་ནུབ་པར་གྱུར་ཏོ། །དེ་ནས་མུན་པའི་རྣམ་པར་གྱུར་པ་ལ། ཉི་མ་ཟླ་བ་དག་བྱུང་ངོ་། །དང་པོ་སའི་བཅུད་ཞག་
གི་རྣམ་པ་དང་། དེ་ནས་ས་ཞག་ཁུར་བ་ལྟ་བུ་དང་། དེའི་རྗེས་སུ་ས་ཞག་གི་ནགས་ཚལ་རྣམས་རིམ་གྱིས་བྱུང་བར་གྱུར་ཏོ། །ཤིན་ཏུ་ཞེན་ཆགས་པས་ནུབ་པར་གྱུར་ཏོ། །དེ་མ་ཐག་ཏུ་མ་རྨོས་མ་བཙུགས་པའི་དྲི་བཟང་བ་མྱང་བདེ་བའི་འབྲས་སྐྱེས་སོ། །དེ་ལ་ཟོས་པས་བཤང་གཅིའི་ལམ་དང་སྐྱེས་པ་དང་
བུད་མེད་ཀྱི་དབང་པོ་དག་དང་ལྡན་པ་འབྱུང་བར་འགྱུར་རོ། །སྐྱེས་པ་དང་བུད་མེད་དག་གི་དབྱིངས་ཐ་དད་པར་འགྱུར་རོ། །དེའི་རྗེས་སུ་སྔོན་གོམས་པའི་དབང་གིས་ཚུལ་བཞིན་མ་ཡིན་པ་ཡིད་ལ་བྱེད་པས་འདོད་པ་ལ་ཆགས་པ་ཤིན་ཏུ་རྒྱས་པར་གྱུར་པ་ལས་སྐྱེས་པ་དང་བུད་མེད་དེ་དག་ལ་ཕན་ཚུན་རྗེས་སུ་ཆགས་

པས་སྒྲུབ་པ་མ་ཡིན་པ་སྐྱེས་པ་ཉིད་དོ། །དེའི་ཕྱི་ནས་ལེ་ལོ་ལས་ཉེ་བར་སྡུད་པར་བྱེད་པ་དང་བདག་གིར་བྱེད་པ་བགྱིས་པས་འབྲས་སཱ་ལུ་བརྔས་པ་ནི་ཡང་སྐྱེ་བ་མེད་པར་གྱུར་ཏོ། །དེ་ནས་ཞིང་རྣམས་རྣམ་པར་བགོས་ཏེ། བདག་གིར་འཛིན་པ་བྱས་ཤིང་ཕ་རོལ་གྱིར་བྱས་སོ། །དེ་ནས་སྐྱེས་བུ་ཁྱད་པར་དུ་
གྱུར་པ་ལ་བསྲུང་བའི་དོན་དུ་ཆ་དྲུག་པ་བྱིན་པར་གྱུར་ཏོ། །དེ་ཞིང་རྣམས་ཀྱི་བདག་པོ་ཡིན་པས་རྗེའུ་རིགས་ཞེས་དོན་དང་མཐུན་པར་མིང་བཏགས་སོ། །སྐྱེ་བོ་མང་པོ་འདུན་པ་མཐུན་པས་མང་པོས་བཀུར་བའོ། །འབངས་རྣམས་དགེ་བར་མཛད་པས་རྒྱལ་པོའོ། །ཁྱིམ་ལས་ཕྱི་རོལ་ཡིད་ལ་བྱེད་
པས་བྲམ་ཟེའོ་ཞེས་མིང་རྣམས་བྱུང་ངོ་། །རྒྱལ་པོས་ཉེ་བར་མནན་པའི་རྐུན་པོ་རྣམས་བདག་གིས་དེ་ལྟ་བུ་མ་བྱས་སོ་ཞེས་བརྫུན་གྱི་ཚིག་བྱུང་བར་གྱུར་ཏོ། །དེ་ལྟར་འཇིག་རྟེན་ཆགས་བཞིན་པའི་མི་རྣམས་ཀྱི་ཚེ་དཔག་ཏུ་མེད་པར་གྱུར་པ་ལས། མི་དགེ་བའི་ལས་ལམ་རྒྱས་པར་གྱུར་ནས་རིམ་གྱིས་
ཚེ་ཉམས་ཏེ་མཐར་ཚེ་ལོ་བཅུ་པ་རྣམས་ཆོས་མ་ཡིན་པ་ལ་ཆགས་པ་ཡང་བའི་འདོད་པས་ཟིལ་གྱིས་ནོན་པར་གྱུར་པ། ལོག་པའི་ཆོས་ལ་ཡོངས་སུ་ཞེན་པ་རྣམས་ཀྱི་གནོད་སེམས་ཀུན་དུ་འཕེལ་བར་གྱུར་པ་ལ། འཇིག་པའི་བསྐལ་པ་གསུམ་འབྱུང་བར་འགྱུར་ཏེ། འདི་ལྟ་སྟེ། མཚོན་གྱིས་
འཇིག་པ་དང་། ནད་ཀྱིས་འཇིག་པ་དང་། མུ་གེས་འཇིག་པའོ། །དེ་ལ་ལྕུག་མ་ལ་སོགས་པ་རྣམས་མཚོན་ཆར་འགྱུར་རོ། །དེས་སེམས་ཅན་ཕན་ཚུན་གསོད་པར་བྱེད་པ་ནི་མཚོན་གྱིས་འཇིག་པ་སྟེ། མཚོན་གྱིས་སྲོག་གཅོད་པ་ནི་ཉི་མ་བདུན་འབྱུང་བར་འགྱུར་རོ། །ཡང་སྐྱོན་དེ་ཉིད་ཀྱིས་མི་མ་ཡིན་
རྣམས་ཀྱིས་འཚེ་བ་གཏོང་བར་བྱེད་དོ། །གང་ལས་སེམས་ཅན་རྣམས་ནད་ཀྱིས་འཆི་བར་བྱེད་དོ། །འདི་ནི་ནད་ཀྱི་འཇིག་པ་སྟེ། ཟླ་བ་བདུན་དང་ཞག་བདུན་འབྱུང་བར་འགྱུར་རོ། །ཡང་སྐྱོན་དེ་ཉིད་ཀྱིས་ཆར་མི་འབབ་པས་མུ་གེ་འབྱུང་སྟེ། དེ་ཡང་མི་རྣམས་བཀྲེས་པ་དང་སྐོམ་པ་དང་ཉམ་ཆུང་བས་
འཚོགས་ནས་འཆི་བར་འགྱུར་རོ། །གཞན་དག་ནི་རུས་པ་དཀར་པོ་བསྐོལ་ནས་འཐུང་བར་བྱེད་དོ། །གཞན་དག་ནི་ཁྱིམ་གྱི་ཟང་ཟིང་རྣམ་པར་བགོས་ཏེ། ཐུར་མ་ཉེ་བར་སྟོན་པས་དེ་རིང་ནི་ཁྱིམ་བདག་ཕོའི་བཟའ་བ་བྱ་ཞིང་སང་ནི་ཁྱིམ་བདག་མོའི་ཞེས་བྱ་བ་ལ་སོགས་པའོ། །གཞན་དག་

སོ་བའི་གནས་ཀྱི་མཚམས་བུ་ག་ནས་ཐུར་མས་སོ་བའི་འབྲས་བུ་ཕྱུང་ནས་ཆུ་མང་པོ་བསྐོལ་བ་འཐུང་བར་བྱེད་པ་ནི་མུ་གེས་འཇིག་པ་སྟེ། ལོ་བདུན་དང་ཟླ་བ་བདུན་དང་ཉི་མ་བདུན་འབྱུང་བར་འགྱུར་རོ། །དེ་ལྟར་བར་གྱི་བསྐལ་པ་སོ་སོར་རྫོགས་པ་ན་འཇིག་ན་གསུམ་ཉིད་དོ། །བ་ལང་
སྤྱོད་དང་ཤར་གྱི་ལུས་འཕགས་པོའི་གནས་སུ་ནི། མཚོན་དང་ནད་དང་མུ་གེ་རྣམས་གཟུགས་བརྙན་འབྱུང་བར་འགྱུར་རོ། །མཚོན་ནི་གནོད་སེམས་དྲག་པོ་སྐྱེ་བའོ། །ནད་ནི་མདོག་ངན་པ་དང་ཉམ་ཆུང་བའོ། །མུ་གེ་ནི་བཀྲེས་པ་དང་སྐོམ་པའོ། །དེའི་ཚེ་ཡང་ཁ་དོག་དང་སྟོབས་ཆུང་
བ་དང་བཀྲེས་པ་དང་སྐོམ་པ་ལས་གནོད་སེམས་དྲག་པོ་སྐྱེ་བར་འགྱུར་རོ། །འདིར་ཆགས་པ་རྣམས་ཀྱིས་གནས་པ་ཉིད་ནི་བར་གྱི་བསྐལ་པ་དང་པོའོ། །དེ་རྣམས་ཚེ་ལོ་བཅུ་པ་ལས་ཡར་འཕེལ་དུ་འགྲོ་སྟེ། རིམ་གྱིས་ཚེ་ལོ་སྟོང་ཕྲག་བརྒྱད་ཅུར་འགྱུར་རོ། །འཕགས་པ་གནས་བརྟན་
པ་ནི་ཡར་འཕེལ་དུ་ཕྱིན་པ་ན་ཚེ་ལོ་དཔག་ཏུ་མེད་པ་ཡིན་ནོ་ཞེས་ཟེར་རོ། །ཡང་མར་འགྲིབ་དུ་ཕྱིན་པ་ན་ཚེ་ལོ་བཅུ་པའོ། །འདི་ནི་བར་གྱི་བསྐལ་པ་གཉིས་པའོ། །དེ་ལྟར་ཅི་སྲིད་དུ་ཡར་འཕེལ་དང་མར་འགྲིབ་བཅོ་བརྒྱད་དོ། །ཉི་ཤུ་པ་ལ་ནི་མར་འགྲིབ་མེད་དེ་ཡར་འཕེལ་ཁོ་ནའོ། །ཚེ་ལོ་བཅུ་པ་
ནས་ཚེ་ལོ་སྟོང་ཕྲག་བརྒྱད་ཅུ་པའི་བར་རོ། །བར་གྱི་བསྐལ་པ་འདི་རྣམས་ཀྱི་ཡར་འཕེལ་དང་མར་འགྲིབ་ཉིད་ཀྱི་དུས་ཅི་སྲིད་པ་བར་གྱི་བསྐལ་པ་དང་པོའི་མར་འགྲིབ་ཁོ་ནའི་དུས་ལའང་དེ་སྲིད་དོ། །ཐ་མའི་བར་གྱི་བསྐལ་པ་ཡར་འཕེལ་བའི་དུས་ལ་ཡང་ངོ་། །དེས་ན་བར་གྱི་བསྐལ་པ་ཐམས་ཅད་ནི་དུས་
མཉམ་པའོ། །དེ་ལ་བར་གྱི་བསྐལ་པ་གཅིག་གིས་སྣོད་ཆགས་པའོ། །བར་གྱི་བསྐལ་པ་བཅུ་དགུར་ནི་གནས་པའོ། །འཇིག་རྟེན་ཆགས་ནས་བར་གྱི་བསྐལ་པ་ཉི་ཤུར་གནས་པའོ། །གཅིག་གིས་སྣོད་རྣམ་པར་ཉམས་པར་འགྱུར་ཏེ