Luận tạng Tây Tạng (Tengyur) — Tập 108

། འདི་ལྟར། ཡན་ལག་ལྷག་མ་རྣམས་སོ། །དེ་ལ་རི་མོའི་ལས་ལ་མཚོན་བྱེད་པའི་རིགས་པས། ཉོན་མོངས་པ་ནི་ཡང་སྲིད་སྒྲུབ་པའི་རྒྱུར་འགྱུར་བ་ཡིན་ནོ། །རི་མོར་བྱེད་པའི་འཐད་པས། ལས་ནི་དམན་པ་དང་གྱ་ནོམ་པ་ཐ་དད་པ་བྱེད་པ་ཡིན་ནོ། །བྲིས་པའི་
གཟུགས་ཀྱི་རིགས་པས། རྣམ་པར་སྨིན་པ་ནི་ལས་དང་ཉོན་མོངས་པ་མངོན་པར་གྲུབ་པ་ཡོད་པའི་རྐྱེན་གྱིས་འཇུག་པའོ། །ཡན་ལག་གཉིས་ནི་འདས་པ་སྟེ་འདི་ལྟར། མ་རིག་པ་དང་འདུ་བྱེད་དོ། །གཉིས་ནི་མ་འོངས་པ་སྟེ། འདི་ལྟར། སྐྱེ་བ་དང་། རྒ་ཤིའོ། །བརྒྱད་ནི་ད་ལྟར་བ་སྟེ། དེ་

འདི་ལྟར། ལྷག་མ་རྣམས་སོ། །དུས་གསུམ་བཟུང་བ་འདིས་ནི་ཐོག་མ་དང་ཐ་མ་མེད་པ་འཁོར་བའི་ལམ་རྗེས་སུ་འབྲེལ་པར་བསྟན་པའོ། །གང་ཡན་ལག་བཅུ་གཉིས་དེ་རྣམས་ནི་རིམ་པ་བཞིན་དུ་ཕན་ཚུན་རྒྱུ་ཉིད་དང་། བྱེད་པོ་ཉིད་དང་། ཕན་འདོགས་པ་ཉིད་དང་། འདི་ནི་རྐྱེན་ཉིད་དོ་ཞེས་པ་འདི་
ནི་རྟེན་ཅིང་འབྲེལ་པ་འབྱུང་བའོ། །རྟེན་ཅིང་འབྲེལ་པར་འབྱུང་བའི་ཆོས་ནི་ཡན་ལག་བཅུ་གཉིས་སོ། །རྟེན་ཅིང་འབྲེལ་པར་འབྱུང་བ་འདི་ནི་འདུ་བྱེད་རྣམ་པར་འགྱུར་བ་ཡོངས་སུ་རྫོགས་པ་མ་ཡིན་པ་ཞེས་བརྗོད་པར་བྱ་བ་མ་ཡིན། འདུས་བྱས་ཞེས་བརྗོད་པར་བྱ་བ་མ་ཡིན། འདུས་མ་བྱས་
ཞེས་བརྗོད་པར་བྱ་བ་མ་ཡིན་ནོ། །རྟེན་ཅིང་འབྲེལ་པར་འབྱུང་བའི་ཆོས་ནི། འདུ་བྱེད་ཡོངས་སུ་རྫོགས་པ་འདུས་བྱས་སོ་ཞེས་པ་འདི་ནི་དེ་དག་གི་ཐ་དད་པའི་རྒྱུའོ། །གང་གི་ཚེ་རྣམ་པ་དང་མཚན་ཉིད་གང་གིས་མ་རིག་པ་འདུ་བྱེད་ཀྱི་རྐྱེན་དུ་འགྱུར་བའི་རྣམ་པ་དེ་དང་མཚན་ཉིད་དེ་དག་དང་རྐྱེན་
གཞན་དང་གཞན་དག་འཕགས་པ་རྣམས་ཀྱི་ཤེས་རབ་ཀྱི་སྤྱན་གྱིས་མངོན་དུ་མཁྱེན་ཏོ། །དེ་བཞིན་དུ་ཐམས་ཅད་ལའོ། །འདི་ནི་རྟེན་ཅིང་འབྲེལ་པར་འབྱུང་བ་དེའི་ཐབ་པ་ཉིད་དོ། །ཕྱོགས་གཞན་ནི། རྟེན་ཅིང་འབྲེལ་བར་འབྱུང་བ་འདི་དག་རྣམ་པ་བདུན་དུ་བལྟ་བར་བྱ་སྟེ། འདི་ལྟར། མཚམས་
གསུམ་དང་། མདོར་བསྡུས་པ་བཞི་དང་། རྣམ་པ་ཉི་ཤུ་དང་། འཁོར་ལོ་དང་། ཚུལ་ལུགས་དང་། རྣམ་པར་དབྱེ་བ་དང་། བསྡུ་བའོ། །དེ་ལ་མཚམས་ནི་གསུམ་སྟེ། འདི་ལྟར། འདུ་བྱེད་དང་། རྣམ་པར་ཤེས་པའི་བར་ནི་མཚམས་དང་པོའོ། །ཚོར་བ་དང་སྲེད་པའི་བར་ནི་མཚམས་གཉིས་
པའོ། །སྲིད་པ་དང་སྐྱེ་བའི་བར་ནི་མཚམས་གསུམ་པའོ། །དེ་ལ་འདས་པའི་ལས་དང་ཉོན་མོངས་པ་ནི་ད་ལྟར་གྱི་རྣམ་པར་སྨིན་པའི་རྐྱེན་ཏེ་མཚམས་དང་པོའོ། །ད་ལྟར་གྱི་ལས་དང་ཉོན་མོངས་པ་ནི་ད་ལྟར་གྱི་རྣམ་པར་སྨིན་པའི་རྐྱེན་ཏེ་མཚམས་གཉིས་པའོ། །ད་ལྟར་གྱི་ལས་དང་ཉོན་མོངས་པ་
ནི་མ་འོངས་པའི་རྣམ་པར་སྨིན་པའི་རྐྱེན་ཏེ་མཚམས་གསུམ་པའོ། །ཡང་ན་དང་པོ་དང་གསུམ་པ་ནི་རྒྱུ་འབྲས་ཀྱི་མཚམས་སོ། །གཉིས་པ་ནི་འབྲས་བུའི་མཚམས་སོ། །སྲིད་པའི་མཚམས་ནི་མེད་དོ། །སྲིད་པའི་མཚམས་ཞེས་པར་དོན་ཅི་ཞེ་ན། བརྗོད་པར་བྱ་སྟེ། ཤི་ནས་དེ་མ་ཐག་ཏུ་འཕོ་བ་

མ་ཡིན་པའི་ཕུང་པོ་སྐྱེ་མཆེད་ཁམས་རྣམས་ལ་ཡང་སྲིད་མངོན་པར་གྲུབ་པ་འདི་ནི་སྲིད་པའི་མཚམས་ཞེས་བརྗོད་དོ། །སྲིད་པའི་མཚམས་དེ་ཅི་ལྟར་འགྱུར་ཞེ་ན། བརྗོད་པར་བྱ་སྟེ། བྱིས་པ་སོ་སོའི་སྐྱེ་བོ་དེ་དག་མ་རིག་པར་གྱུར་པ་སྲེད་པ་དང་ལྡན་པ་བསོད་ནམས་དང་
སྡིག་པ་བསགས་པ་སྟེ། གང་གི་ཚེ་འདི་ཉིད་འཆི་བའི་མཐའ་ཅན་གྱི་ཚོར་བས་ཟིལ་གྱིས་མནན་ཅིང་འཆི་བ་ལ་ལྷག་པར་མ་ཉེ་བ་དེའི་ཚེ་འབྱུང་བར་འགྱུར་ཏེ། འདི་ལྟར། འཇིག་རྟེན་འདི་མི་མཐོང་ཞིང་རྨོངས་པས་དྲན་པ་མི་རྙེད་པར་གྱུར་བཞིན་པ་ན། ཚོར་བས་ནོན་ཅིང་དྲན་པ་དང་བློ་གྲོས་ཡོངས་སུ་
ཉམས། ལུས་ཀྱི་སྟོབས་དང་ནུས་པ་ཡོངས་སུ་ཉམས། དབང་པོ་རྣམས་ཉེ་བར་འགགས། ཏ་ལའི་ལོ་མ་སྐམས་པ་བཞིན་དུ་ལུས་ཀྱི་མཐའ་གཉིས་ནས་སྲོག་གི་དབང་པོ་ཉེ་བར་སྐམས་པར་འགྱུར་རོ། །དེའི་ཚེ་དེའི་རྨི་ལམ་དུ་གྱུར་པ་བཞིན་དུ། ལས་ཀྱི་ཆོས་བཞི་ཉེ་བར་གནས་པར་འགྱུར་
ཏེ། འདི་ལྟར། ལས་དང་། ལས་ཀྱི་མཚན་མ་དང་། འགྲོ་བ་དང་། འགྲོ་བའི་མཚན་མའོ། །དེ་ལ་ལས་ཞེས་བྱ་བ། གང་བསོད་ནམས་དང་བསོད་ནམས་མ་ཡིན་པ་བྱས་པ་དང་། ལྕི་བ་འམ་ཡང་བའམ། ཉེ་བ་འམ་སྔོན་བྱས་སམ། ལས་དེ་རྣམས་ཉེ་བར་གནས་པར་འགྱུར་རོ། །ལས་ཀྱི་
མཚན་མ་ཞེས་པ་དངོས་པོ་གང་ལ་བརྟེན་ནས་ལས་བྱས་པར་གྱུར་པ། དེའི་དངོས་པོ་ཉེ་བར་གནས་པར་འགྱུར་རོ། །དེ་དེའི་ཚེ་ལས་བྱེད་པ་བཞིན་དུ་འབྱུང་ངོ་། །འགྲོ་བ་ཞེས་པ་བསོད་ནམས་ཀྱི་ལས་བདེ་འགྲོར་ཉེ་བར་གནས་པ་དང་། བསོད་ནམས་མ་ཡིན་པ་ལས་ངན་འགྲོའོ། །འགྲོ་བའི་
མཚན་མ་ཞེས་བྱ་བ་མངལ་དུ་སྐྱེ་བ་རྣམས་ནི་དུས་དང་ལྡན་ཞིང་ཁྲག་དང་ལྡན་པའི་མའི་ལྟོ་བར་ཉེ་བར་གནས་པར་འགྱུར་རོ། །རྫུས་ཏེ་སྐྱེ་བ་རྣམས་ནི་གང་དང་གང་དུ་སྐྱེ་བ་དེ་དང་དེའི་གོ་སྐབས་ཉེ་བར་གནས་པར་འགྱུར་ཏེ། གཞལ་ཡས་ཁང་ངམ། སེམས་ཅན་ནམ། ནགས་སམ། ཤིང་ངམ།
འགྲོ་བ་དེ་དང་འདྲ་བ་དང་ལྡན་པའི་མཚན་མ་ཉེ་བར་གནས་པའོ། །དེའི་ཚེ་དེ་རྣམས་སུ་བྱིན་པ་ལྟ་བུ་དང་བཞེངས་པ་དང་བསྡད་པ་དང་ཉལ་བ་ལྟ་བུ་དང་། མཐོང་བ་བཞིན་དུ་དང་། ལེན་པ་བཞིན་དུ་འབྱུང་ངོ་། །དེའི་ཚེ་ལས་སམ་ལས་ཀྱི་མཚན་མ་དང་། འགྲོ་བ་འམ་འགྲོ་བའི་མཚན་མ་ལ་དམིགས་

པ་བྱས་ཏེ་སྐྱེ་བར་འགྱུར་རོ་ཞེས་པ་ལ་སོགས་པ་རྒྱས་པར་རོ། །མདོར་བསྡུས་བཞི་ནི་འདི་ལྟར། འདས་པའི་ལས་དང་ཉོན་མོངས་པས་བསྡུས་པ་དང་། ད་ལྟར་གྱི་རྣམ་པར་སྨིན་པས་བསྡུས་པ་དང་། ད་ལྟར་གྱི་ལས་དང་ཉོན་མོངས་པས་བསྡུས་པ་དང་། མ་འོངས་པའི་རྣམ་པར་སྨིན་པས་
བསྡུས་པའོ། །དེ་ལ་མ་རིག་པ་དང་འདུ་བྱེད་ནི། འདས་པའི་ལས་དང་ཉོན་མོངས་པས་བསྡུས་པའོ། །རྣམ་པར་ཤེས་པ་མིང་དང་གཟུགས་སྐྱེ་མཆེད་དྲུག་རེག་པ་ཚོར་བ་རྣམས་ནི་ད་ལྟར་གྱི་རྣམ་པར་སྨིན་པས་བསྡུས་པའོ། །སྲེད་པ་དང་ལེན་པ་དང་སྲིད་པ་ནི་ད་ལྟར་གྱི་ལས་དང་ཉོན་
མོངས་པས་བསྡུས་པའོ། །སྐྱེ་བ་དང་རྒ་ཤི་ནི་མ་འོངས་པའི་རྣམ་པར་སྨིན་པས་བསྡུས་པའོ། །རྣམ་པ་ཉི་ཤུ་ནི་འདི་ལྟར། མ་རིག་པ་བཟུང་བས་འདས་པའི་སྲེད་པ་དང་ཉེ་བར་ལེན་པས་བཟུང་བ་ཡིན་ཏེ། ཉོན་མོངས་པའི་མཚན་ཉིད་དུ་མཚུངས་པས་སོ། །འདུ་བྱེད་གཟུང་བས་འདས་པའི་
སྲེད་པ་བཟུང་བ་ཡིན་ཏེ། ལས་ཀྱི་མཚན་ཉིད་ཡིན་པས་སོ། །རྣམ་པར་ཤེས་པ་དང་མིང་དང་གཟུགས་དང་སྐྱེ་མཆེད་དྲུག་དང་རེག་པ་དང་། ཚོར་བ་བཟུང་བས་ད་ལྟར་གྱི་སྐྱེ་བ་དང་རྒ་ཤི་བཟུང་བ་ཡིན་ཏེ། རྣམ་པར་སྨིན་པའི་མཚན་ཉིད་ཡིན་པས་སོ། །སྲེད་པ་དང་ཉེ་བར་ལེན་པ་བཟུང་བས་ད་
ལྟར་གྱི་མ་རིག་པ་བཟུང་བ་ཡིན་ཏེ། ཉོན་མོངས་པའི་མཚན་ཉིད་ཡིན་པས་སོ། །སྲིད་པ་བཟུང་བས་ད་ལྟར་གྱི་འདུ་བྱེད་བཟུང་བ་ཡིན་ཏེ། ལས་ཀྱི་མཚན་ཉིད་ཡིན་པས་སོ། །སྐྱེ་བ་དང་རྒ་ཤི་བཟུང་བས་མ་འོངས་པའི་རྣམ་པར་ཤེས་པ་དང་མིང་དང་གཟུགས་དང་སྐྱེ་མཆེད་དྲུག་དང་རེག་པ་དང་ཚོར་བ་
བཟུང་བ་ཡིན་ཏེ། རྣམ་པར་སྨིན་པའི་མཚན་ཉིད་ཡིན་པས་སོ། །ཆོས་ཉི་ཤུ་བཞི་པོ་འདི་རྣམས་ཡོངས་སུ་རྫོགས་པ་བཟུང་བས་ཉི་ཤུར་འགྱུར་རོ། །འདི་ལྟ་སྟེ། ཆོས་མངོན་པ་ལས། སྔོན་གྱི་ལས་ཀྱི་སྲིད་པ་ལ་མ་རིག་པ་དང་འདུ་བྱེད་དང་སྲེད་པ་དང་ཉེ་བར་ལེན་པ་དང་སྲིད་པ་སྟེ་ཆོས་ལྔ་པོ་འདི་ནི།
འདིར་ཉིང་མཚམས་སྦྱོར་བའི་རྐྱེན་ནོ། །འདིར་རྣམ་པར་ཤེས་པ་དང་མིང་དང་གཟུགས་དང་། སྐྱེ་མཆེད་དྲུག་དང་རེག་པ་དང་ཚོར་བ་སྟེ་ཆོས་ལྔ་པོ་འདི་ནི། འདིར་སྐྱེ་བའི་སྲིད་པ་ལ་སྔོན་བྱས་པའི་ལས་ནི་རྐྱེན་ནོ། །འདིར་སྐྱེ་མཆེད་ལ་སོགས་པ་རྣམས་ཡོངས་སུ་སྨིན་པས། མ་རིག་པ་དང་འདུ་བྱེད་

དང་སྲེད་པ་དང་ཉེ་བར་ལེན་པ་དང་སྲིད་པ་སྟེ་ཆོས་ལྔ་པོ་འདི་ནི། འདིར་ལས་ཀྱི་སྲིད་པ་ལ་མ་འོངས་པའི་ཉིང་མཚམས་སྦྱོར་བའི་རྐྱེན་ནོ། །སླད་མའི་རྣམ་པར་ཤེས་པ་དང་མིང་དང་གཟུགས་དང་སྐྱེ་མཆེད་དྲུག་དང་རེག་པ་དང་། ཚོར་བ་སྟེ་ཆོས་ལྔ་པོ་འདི་ནི། མ་འོངས་པར་སྐྱེ་བའི་
སྲིད་པ་ལ། འདིར་བྱས་པའི་ལས་ནི་རྐྱེན་ནོ། །བཞི་པ་ལྔ་ནི་རྣམ་པ་ཉི་ཤུ་ཡིན་ནོ། །འཁོར་ལོ་ཞེས་པ་ནི་མ་རིག་པའི་རྐྱེན་ལས་འདུ་བྱེད་ཞེས་པ་ནས་སྐྱེ་བའི་རྐྱེན་ལས་རྒ་ཤི་ཞེས་པའོ། །དེ་བཞིན་དུ་སྡུག་བསྔལ་གྱི་ཕུང་པོ་ཆེན་པོ་འབའ་ཞིག་འབྱུང་བ་ཉིད་དོ། །དེ་བཞིན་དུ་ཡང་མ་རིག་པའི་རྐྱེན་ལས་
འདུ་བྱེད་ཞེས་པ་ལ་སོགས་པའོ། །ཡང་དེ་བཞིན་དུ་སྟེ་རྟེན་འབྲེལ་གྱི་འཁོར་ལོའི་རིམ་པ་མཐའ་མེད་པའོ། །ཚུལ་ལུགས་ཞེས་པ་ནི་ཚུལ་གཉིས་ཏེ་འདི་ལྟར། མ་རིག་པ་ལ་སོགས་པའི་ཚུལ་དང་། རྒ་ཤི་ལ་སོགས་པའི་ཚུལ་ལོ། །དེ་ལ་མ་རིག་པ་ལ་སོགས་པའི་ཚུལ་ནི། མ་རིག་པའི་རྐྱེན་ལས་
འདུ་བྱེད་དང་། ཅི་སྲིད་དུ་རྒ་ཤི་མྱ་ངན་དང་སྨྲེ་སྔགས་འདོན་པ་སྡུག་བསྔལ་ཡིད་མི་བདེ་བ་འཁྲུག་པ་ལ་སོགས་པ་རྣམས་འབྱུང་བར་འགྱུར་རོ། །རྒ་ཤི་ལ་སོགས་པའི་ཚུལ་ནི། རྒ་ཤི་འགགས་པས་སྐྱེ་བ་འགག །སྐྱེ་བ་འགགས་པས་སྲིད་པ་འགག་ཅེས་པ་ནས་འདུ་བྱེད་འགགས་པས་མ་རིག་པ་
འགག་ཅེས་པའི་བར་དུའོ། །ཡང་ན་མ་རིག་པ་ལ་སོགས་པའི་ཚུལ་ནི། ཕྱི་མའི་མཐའ་ཡོངས་སུ་ཆད་པའི་སྒོ་སྟེ་མ་འོངས་པའི་ཆ་ཤས་ཤེས་པའི་ལམ་མོ། །རྒ་ཤི་ལ་སོགས་པའི་ཚུལ་ནི་སྔོན་གྱི་མཐའ་ཡོངས་སུ་ཆད་པའི་སྒོ་སྟེ་འདས་པའི་ཆ་ཤས་ཤེས་པའི་ལམ་མོ། །རྣམ་པར་དབྱེ་བ་ཞེས་པ་ནི།
རྟེན་ཅིང་འབྲེལ་པར་འབྱུང་བ་ནི་གཉིས་ཏེ། འཇིག་རྟེན་པ་དང་འཇིག་རྟེན་ལས་འདས་པའོ། །དེ་ལ་འཇིག་རྟེན་པ་ནི། མ་རིག་པའི་རྐྱེན་ལ་འདུ་བྱེད་ནས་འདི་འབའ་ཞིག་གི་སྡུག་བསྔལ་གྱི་ཕུང་པོ་ཆེན་པོ་ཀུན་དུ་འབྱུང་བར་འགྱུར་རོ་ཞེས་པའི་བར་དུའོ། །འཇིག་རྟེན་ལས་འདས་པ་ཡང་སྡུག་བསྔལ་དང་།
སྡུག་བསྔལ་གྱི་རྐྱེན་ལས་དད་པ་དང་། དད་པའི་རྐྱེན་ལས་མཆོག་ཏུ་དགའ་བ་དང་། མཆོག་ཏུ་དགའ་བའི་རྐྱེན་ལས་དགའ་བ་དང་། དགའ་བའི་རྐྱེན་ལས་ཤིན་ཏུ་སྦྱངས་པ་དང་། ཤིན་ཏུ་སྦྱངས་པའི་རྐྱེན་ལས་བདེ་བ་དང་། བདེ་བའི་རྐྱེན་ལས་ཏིང་ངེ་འཛིན་དང་། ཏིང་ངེ་འཛིན་གྱི་རྐྱེན་ལས་ཡང་དག་

པ་ཅི་ལྟ་བའི་ཡེ་ཤེས་མཐོང་བ་དང་། ཡང་དག་པ་ཅི་ལྟ་བའི་ཡེ་ཤེས་མཐོང་བའི་རྐྱེན་ལས་ཡིད་འབྱུང་བ་དང་། ཡིད་འབྱུང་བའི་རྐྱེན་ལས་འདོད་ཆགས་དང་བྲལ་བ་དང་། འདོད་ཆགས་དང་བྲལ་བའི་རྐྱེན་ལས་རྣམ་པར་གྲོལ་བ་དང་། རྣམ་པར་གྲོལ་བའི་རྐྱེན་ལས་ཟད་པར་ཤེས་པའོ། །གཞན་
དག་ཏུ་ཡང་གསུངས་པ། རྟེན་ཅིང་འབྲེལ་བར་འབྱུང་བ་ལ་རྣམ་པ་བཞི་ནི་འདི་ལྟ་སྟེ། ལས་དང་ཉོན་མོངས་པའི་རྒྱུ་ལས་བྱུང་བ་དང་། ས་བོན་གྱི་རྒྱུ་ལས་བྱུང་བ་དང་། མངོན་པར་འདུ་བྱེད་པ་ལས་བྱུང་བ་དང་། ཐུན་མོང་གི་ལས་ཀྱི་རྒྱུ་ལས་བྱུང་བའོ། །དེ་ལ་ལས་དང་ཉོན་མོངས་པའི་རྒྱུ་ལས་བྱུང་བ་
ནི། མ་རིག་པའི་རྐྱེན་ལས་འདུ་བྱེད་ནས་འདི་དག་འབའ་ཞིག་གི་སྡུག་བསྔལ་གྱི་ཕུང་པོ་ཆེན་པོ་འབྱུང་བར་འགྱུར་རོ་ཞེས་པའི་བར་དུའོ། །ས་བོན་དང་མྱུ་གུ་ལ་སོགས་པའི་རྒྱུན་གྱི་ངོ་བོ། །མངོན་པར་འདུ་བྱེད་པ་ལས་བྱུང་བ་ན་སྤྲུལ་པའི་གཟུགས་ལ་སོགས་པའོ། །ཐུན་མོང་གི་ལས་ཀྱི་རྒྱུ་ལས་
བྱུང་བ་ནི་ས་དང་ཁ་བ་ཅན་དང་རྒྱ་མཚོ་དང་ཟླ་བ་དང་ཉི་མ་ལ་སོགས་པའོ། །བསྡུ་བ་ཞེས་པ་ནི་བསྡུ་བ་རྣམ་པ་བཞི་སྟེ་འདི་ལྟར། ཕུང་པོས་བསྡུས་པ་དང་། སྐྱེ་མཆེད་ཀྱིས་བསྡུས་པ་དང་། ཁམས་ཀྱིས་བསྡུས་པ་དང་། བདེན་པས་བསྡུས་པའོ། །དེ་ལ་ཕུང་པོས་བསྡུས་པ་ནི་འདི་ལྟར། ཡན་
ལག་དྲུག་ནི་འདུ་བྱེད་ཀྱི་ཕུང་པོས་བསྡུས་པའོ། །འདི་ལྟ་སྟེ། མ་རིག་པ་དང་། འདུ་བྱེད་དང་། རེག་པ་དང་། སྲེད་པ་དང་། ཉེ་བར་ལེན་པ་དང་། སྲིད་པའོ། །རྣམ་པར་ཤེས་པ་ནི་རྣམ་པར་ཤེས་པའི་ཕུང་པོས་བསྡུས་པའོ། །མིང་དང་གཟུགས་ནི་ཕུང་པོ་ལྔས་བསྡུས་པའོ། །སྐྱེ་མཆེད་དྲུག་
ནི་གཟུགས་དང་རྣམ་པར་ཤེས་པའི་ཕུང་པོ་དག་གིས་བསྡུས་པའོ། །ཚོར་བའི་ཡན་ལག་ནི་ཚོར་བའི་ཕུང་པོས་བསྡུས་པའོ། །སྐྱེ་བ་དང་རྒ་ཤི་ནི་གཟུགས་ཀྱི་ཕུང་པོ་དང་འདུ་བྱེད་ཀྱི་ཕུང་པོ་དག་གིས་བསྡུས་པའོ། །སྐྱེ་མཆེད་ཀྱིས་བསྡུས་པ་ནི་འདི་ལྟར། ཡན་ལག་དགུ་ནི་ཆོས་ཀྱི་སྐྱེ་
མཆེད་ཀྱིས་བསྡུས་པའོ། །འདི་ལྟར། མ་རིག་པ་དང་། འདུ་བྱེད་དང་། རེག་པ་དང་། ཚོར་བ་དང་། སྲེད་པ་དང་། ཉེ་བར་ལེན་པ་དང་། སྲིད་པ་དང་། སྐྱེ་བ་དང་། རྒ་ཤིའོ། །རྣམ་པར་ཤེས་པའི་ཡན་ལག་ནི་ཡིད་ཀྱི་སྐྱེ་མཆེད་ཀྱིས་བསྡུས་པའོ། །མིང་དང་གཟུགས་ནི་ཡིད་ཀྱི་སྐྱེ་མཆེད་དང་ཆོས་ཀྱི་སྐྱེ་མཆེད་དང་

ཕྱི་རོལ་གྱི་སྐྱེ་མཆེད་ལྔས་བསྡུས་པའོ། །སྐྱེ་མཆེད་དྲུག་ནི་ནང་གི་བདག་ཉིད་ཀྱི་སྐྱེ་མཆེད་དྲུག་གིས་བསྡུས་པའོ། །ཁམས་ཀྱིས་བསྡུས་པ་ནི་འདི་ལྟར། ཡན་ལག་དགུ་ནི་ཆོས་ཀྱི་ཁམས་ཀྱིས་བསྡུས་པའོ། །འདི་ལྟར། མ་རིག་པ་དང་། འདུ་བྱེད་དང་། རེག་པ་དང་།
ཚོར་བ་དང་། སྲེད་པ་དང་། ཉེ་བར་ལེན་པ་དང་། སྲིད་པ་དང་། སྐྱེ་བ་དང་། རྒ་ཤིའོ། །རྣམ་པར་ཤེས་པའི་ཡན་ལག་ནི་རྣམ་པར་ཤེས་པའི་ཁམས་ཀྱིས་བསྡུས་པའོ། །མིང་དང་གཟུགས་ནི་ཁམས་བདུན་གྱིས་བསྡུས་པ་སྟེ། འདི་ལྟར། གཟུགས་ཀྱི་ཁམས་དང་། སྒྲའི་ཁམས་དང་།
དྲིའི་ཁམས་དང་། རོའི་ཁམས་དང་། རེག་བྱའི་ཁམས་དང་། ཡིད་ཀྱི་ཁམས་དང་། ཆོས་ཀྱི་ཁམས་སོ། །སྐྱེ་མཆེད་དྲུག་ནི་ཁམས་བཅུ་གཉིས་ཀྱིས་བསྡུས་པའོ། །འདི་ལྟར། མིག་གི་ཁམས་ཀྱིས་དང་། རྣ་བའི་ཁམས་ཀྱིས་དང་། སྣའི་ཁམས་ཀྱིས་དང་། ལྕེའི་ཁམས་ཀྱིས་དང་། ལུས་
ཀྱི་ཁམས་ཀྱིས་དང་། ཡིད་ཀྱི་ཁམས་ཀྱིས་དང་། མིག་གི་རྣམ་པར་ཤེས་པའི་ཁམས་ཀྱིས་དང་། རྣ་བའི་རྣམ་པར་ཤེས་པའི་ཁམས་ཀྱིས་དང་། སྣའི་རྣམ་པར་ཤེས་པའི་ཁམས་ཀྱིས་དང་། ལྕེའི་རྣམ་པར་ཤེས་པའི་ཁམས་ཀྱིས་དང་། ལུས་ཀྱི་རྣམ་པར་ཤེས་པའི་ཁམས་ཀྱིས་དང་། ཡིད་
ཀྱི་རྣམ་པར་ཤེས་པའི་ཁམས་ཀྱིས་སོ། །བདེན་པས་བསྡུས་པ་ནི་འདི་ལྟར། ཡན་ལག་གསུམ་ནི་ཀུན་འབྱུང་གི་བདེན་པས་བསྡུས་པ་སྟེ། འདི་ལྟར། མ་རིག་པ་དང་། སྲེད་པ་དང་། ཉེ་བར་ལེན་པའོ། །ལྷག་མ་ཡན་ལག་དགུ་ནི་སྡུག་བསྔལ་གྱི་བདེན་པས་བསྡུས་པ་སྟེ། འདི་ལྟར་འདུ་བྱེད་དང་།
རྣམ་པར་ཤེས་པ་དང་། མིང་དང་གཟུགས་དང་། སྐྱེ་མཆེད་དྲུག་དང་། རེག་པ་དང་། ཚོར་བ་དང་། སྲིད་པ་དང་། སྐྱེ་བ་དང་། རྒ་ཤིའོ། །འཇིག་རྟེན་ལས་འདས་པའི་རྟེན་ཅིང་འབྲེལ་པར་འབྱུང་བ་ལ། སྡུག་བསྔལ་ནི་སྡུག་བསྔལ་གྱི་བདེན་པས་བསྡུས་པའོ། །ཡན་ལག་བཅུ་ནི་ལམ་གྱི་བདེན་
པས་བསྡུས་པ་སྟེ། འདི་ལྟར། དད་པ་དང་། རབ་ཏུ་རངས་པ་དང་། དགའ་བ་དང་། ཤིན་ཏུ་སྦྱངས་པ་དང་། བདེ་བ་དང་། ཏིང་ངེ་འཛིན་དང་། ཡང་དག་པ་ཅི་ལྟ་བའི་ཡེ་ཤེས་མཐོང་བ་དང་། ཡིད་འབྱུང་བ་དང་། འདོད་ཆགས་དང་བྲལ་བ་དང་། རྣམ་པར་གྲོལ་བའོ། །ཟད་པ་ཤེས་པ་ནི་འགོག་པའི་

བདེན་པས་བསྡུས་པའོ། །རྣམ་པ་དེ་ལྟ་བུ་རྣམས་ཀྱིས་རྟེན་ཅིང་འབྲེལ་པར་འབྱུང་བ་ལ་མཁས་པའི་ཤེས་པ་སྐྱེས་པ་ནི། རྟེན་ཅིང་འབྲེལ་པར་འབྱུང་བ་ལ་མཁས་པའོ། །པཎྜི་ཏ་ཆེན་པོ་སྟོབས་བཅུ་དཔལ་བཤེས་གཉེན་གྱིས་བསྡུས་པ་འདུས་བྱས་དང་འདུས་མ་བྱས་རྣམ་པར་ངེས་པ་ལས་
གནས་བརྟན་པའི་སྡེ་པའི་ཚུལ་གྱི་རྟེན་ཅིང་འབྲེལ་པར་འབྱུང་བ་རྣམ་པར་ངེས་པ་ཞེས་བྱ་བ་ལེའུ་བཅུ་བཞི་པའོ།། །།འཕགས་པའི་བདེན་པ་ལ་མཁས་པ་བརྗོད་པར་བྱ་སྟེ། དེ་ལྟར་ཡང་། འཕགས་པའི་བདེན་པ་ནི་བཞི་སྟེ། སྡུག་བསྔལ་འཕགས་པའི་བདེན་པ་དང་། ཀུན་འབྱུང་འཕགས་
པའི་བདེན་པ་དང་། སྡུག་བསྔལ་འགོག་པ་འཕགས་པའི་བདེན་པ་དང་། སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པའོ། །དེ་ལ་སྡུག་བསྔལ་གྱི་བདེན་པ་གང་ཞེ་ན། བརྗོད་པར་བྱ་སྟེ། སྐྱེ་བ་ཡང་སྡུག་བསྔལ། རྒས་པ་ཡང་སྡུག་བསྔལ། འཆི་བ་ཡང་སྡུག་བསྔལ། མྱ་ངན་
སྨྲེ་སྔགས་འདོན་པ་ཡང་སྡུག་བསྔལ། ཡིད་མི་བདེ་བ་འཁྲུག་པ་ཡང་སྡུག་བསྔལ་ལོ། །མི་སྡུག་པ་དང་ཕྲད་པ་ཡང་སྡུག་བསྔལ། སྡུག་པ་དང་བྲལ་བ་ཡང་སྡུག་བསྔལ་ལོ། །གང་འདོད་པ་ཡོངས་སུ་ཚོལ་བར་བྱེད་པ་ན་མི་རྙེད་པ་དེ་ཡང་སྡུག་བསྔལ། མདོར་བསྡུས་པས་ཉེ་བར་ལེན་པའི་
ཕུང་པོ་ལྔ་སྡུག་བསྔལ་ལོ། །དེ་ལ་སྐྱེ་བ་ནི་སེམས་ཅན་གྱི་རིས་རྣམས་ཀྱི་ཕུང་པོ་སྔར་མེད་པ་བྱུང་བའོ། །དེ་ཡང་སྡུག་བསྔལ་ཐམས་ཅད་ཉེ་བར་སོགས་པར་བྱེད་པས་སྡུག་བསྔལ་ལོ། །རྒ་བ་ནི་སྐྱེས་པའི་ཁམས་རྣམས་ཡོངས་སུ་སྨིན་པའོ། །དེ་འང་དམིགས་པ་དང་ཁ་དོག་དང་
བྱ་བ་དང་དབང་པོ་དང་དྲན་པ་དང་བློ་གྲོས་རྣམས་ཉམས་པར་བྱེད་པའི་དོན་གྱིས་ན་སྡུག་བསྔལ་ལོ། །འཆི་བ་ནི་འཚོ་བ་དང་བྲལ་བ་སྟེ། དེ་ནི་འཇིགས་པ་ཆེན་པོ་བྱེད་པའི་དོན་གྱིས་ན་སྡུག་བསྔལ་ལོ། །མྱ་ངན་ནི་སྡུག་བསྔལ་དུ་སོན་པའི་སེམས་ཡོངས་སུ་འཆང་བའོ། །དེ་ནི་ནང་དང་ཕྱི་རོལ་
སྲེད་པར་བྱེད་པའི་དོན་གྱིས་ན་སྡུག་བསྔལ་ལོ། །སྨྲེ་སྔགས་འདོན་པ་ནི་སྡུག་བསྔལ་དུ་གྱུར་པའི་ངག་གིས་བརྗོད་པའོ། །དེ་དག་ནི་ཕྱི་ནང་སྲེག་པར་བྱེད་པའི་དོན་གྱིས་ན་སྡུག་བསྔལ་ལོ། །སྡུག་བསྔལ་ནི་ལུས་ཀྱི་སྟེ། དེ་ནི་ལུས་ཡོངས་སུ་མནར་བའི་དོན་གྱིས་སྡུག་བསྔལ་ལོ། །ཡིད་མི་བདེ་

བ་ནི་སེམས་ཀྱི་སྡུག་བསྔལ་ཏེ། སེམས་ཡོངས་སུ་གཟིར་བར་བྱེད་པའི་དོན་གྱིས་སྡུག་བསྔལ་ལོ། །འཁྲུག་ངལ་ནི་སྡུག་བསྔལ་དུ་འགྱུར་བའི་འཇིགས་པ་རྒྱས་པ་སྟེ། དེ་ནི་ཀུན་དུ་རྨོངས་པར་བྱེད་པའི་དོན་གྱིས་སྡུག་བསྔལ་ལོ། །མི་སྡུག་པ་དང་ཕྲད་པ་ནི་
མི་འདོད་པའི་སེམས་ཅན་གྱི་འདུ་བྱེད་དང་མཉམ་དུ་འཚོགས་པ་སྟེ། དེ་སྡུག་བསྔལ་བྱེད་པའི་དོན་གྱིས་སྡུག་བསྔལ་ལོ། །སྡུག་པ་དང་བྲལ་བ་ནི་འདོད་པའི་སེམ་པ་ཅན་གྱི་འདུ་བྱེད་དང་བྲལ་བ་སྟེ། མྱ་ངན་དང་སྨྲེ་སྔགས་འདོན་པར་བྱེད་པའི་དོན་གྱིས་སྡུག་བསྔལ་ལོ། །གང་འདོད་
པ་མ་རྙེད་པ་ཞེས་པ་ནི་མི་འདོད་པ་དང་བྲལ་བ་དང་འདོད་པ་དང་ཕྲད་པ་དོན་དུ་གཉེར་བར་བྱེད་པ་ན་དེ་དག་མ་རྙེད་པ་སྟེ། དེ་ཡང་བསམ་པ་ཉམས་པའི་དོན་གྱིས་སྡུག་བསྔལ་ལོ། །མདོར་བསྡུས་ན་ཉེ་བར་ལེན་པའི་ཕུང་པོ་ལྔ་ནི་སྡུག་བསྔལ་ལོ་ཞེས་པ་ནི། ཉེ་བར་ལེན་པའི་ཕུང་པོ་ལྔ་ལ་
སྡུག་བསྔལ་དང་མི་ལྡན་པ་ཡོད་པ་མ་ཡིན་ཏེ། དེའི་ཕྱིར་བསྡུས་ན་ཉེར་ལེན་གྱི་ཕུང་པོ་ལྔ་སྡུག་བསྔལ་ལོ། །དེ་ལ་སྡུག་བསྔལ་རྣམ་པ་གཉིས་ནི་འདི་ལྟར། དངོས་པོ་སྡུག་བསྔལ་དང་། རང་རྟགས་ཀྱི་སྡུག་བསྔལ་ལོ། །དེ་ལ་དངོས་པོ་ནི་སྐྱེ་ཡང་སྡུག་བསྔལ་ཞེས་པ་ནས་མདོར་ན་ཉེ་བར་ལེན་
པའི་ཕུང་པོ་ལྔ་ནི་སྡུག་བསྔལ་ལོ་ཞེས་པའི་བར་དུའོ། །རང་རྟགས་ཀྱི་སྡུག་བསྔལ་ནི། མྱ་ངན་དང་སྨྲེ་སྔགས་འདོན་པ་དང་སྡུག་བསྔལ་དང་ཡིད་མི་བདེ་བ་དང་འཁྲུག་པ་ནི་སྡུག་བསྔལ་ལོ་ཞེས་པའོ། །ཡང་སྡུག་བསྔལ་རྣམ་པ་གསུམ་ནི་འདི་ལྟར། སྡུག་བསྔལ་གྱི་སྡུག་བསྔལ་དང་།
ཡོངས་སུ་འགྱུར་བའི་སྡུག་བསྔལ་དང་། འདུ་བྱེད་ཀྱི་སྡུག་བསྔལ་ལོ། །དེ་ལ་ལུས་ཀྱི་དང་ངག་གི་སྡུག་བསྔལ་ནི་སྡུག་བསྔལ་གྱི་སྡུག་བསྔལ་ལོ། །ཟག་པ་དང་བཅས་པའི་བདེ་བ་མྱོང་བ་དེའི་དངོས་པོ་ཡོངས་སུ་འགྱུར་བ་ནི་ཡོངས་སུ་འགྱུར་བའི་སྡུག་བསྔལ་ལོ། །ཉེ་བར་ལེན་པའི་ཕུང་པོ་ལྔ་ནི་
འདུ་བྱེད་ཀྱི་སྡུག་བསྔལ་ལོ། །འདིས་ནི་སྡུག་བསྔལ་འཕགས་པའི་བདེན་པ་ཞེས་བརྗོད་དོ། །སྡུག་བསྔལ་ཀུན་འབྱུང་བ་འཕགས་པའི་བདེན་པ་གང་ཞེ་ན། གང་སྲེད་པ་ཡང་སྲིད་པར་བྱེད་པ་དགའ་བའི་ཆགས་པ་དང་ལྡན་པ་དེ་དང་དེ་རུ་མངོན་པར་དགའ་བ་ཅན་ནོ། །དེ་དང་དེ་རུ་མངོན་པར་དགའ་

བ་ཅན་ནི། གང་དང་གང་དུ་བདག་གི་དངོས་པོ་མངོན་པར་འགྲུབ་པ་དེ་དང་དེ་རུ་མངོན་པར་དགའ་བའོ། །ཡང་གང་དང་གང་དུ་མཛའ་བའི་རང་བཞིན་ནམ་བདེ་བའི་ངོ་བོ་ཡོད་པ་དེ་དང་དེ་རུ་མངོན་པར་དགའ་བའོ། །དེའང་རྣམ་པ་གསུམ་སྟེ་འདི་ལྟར། འདོད་པའི་སྲེད་པ་དང་། སྲིད་པའི་སྲེད་པ་དང་།
སྲིད་བྲལ་གྱི་སྲེད་པའོ། །དེ་ལ་སྲིད་པའི་སྲེད་པ་དང་སྲིད་བྲལ་གྱི་སྲེད་པ་དག་མ་གཏོགས་པ། སྲེད་པ་ཐམས་ཅད་ནི་འདོད་པའི་སྲེད་པའོ། །རྟག་པར་ལྟ་བ་དང་ལྡན་པའི་སྲེད་པ་ནི་སྲིད་པའི་སྲེད་པའོ། །ཆད་པར་ལྟ་བ་དང་ལྡན་པའི་སྲེད་པ་ནི་སྲིད་བྲལ་གྱི་སྲིད་པའོ། །འདི་ནི་སྡུག་བསྔལ་
ཀུན་འབྱུང་བ་འཕགས་པའི་བདེན་པ་ཞེས་བརྗོད་དོ། །སྡུག་བསྔལ་འགོག་པ་འཕགས་པའི་བདེན་པ་གང་ཞེ་ན། གང་སྲེད་པ་དེ་ཉིད་མ་ལུས་པར་འདོད་ཆགས་དང་བྲལ་བ་དང་འགགས་པ་དང་སྤངས་པ་དང་ངེས་པར་སྤངས་པ་དང་། གྲོལ་བ་དང་གནས་མེད་པ་སྟེ། འདི་ནི་སྡུག་བསྔལ་འགོག་
པ་འཕགས་པའི་བདེན་པ་ཞེས་བརྗོད་དོ། །སྡུག་བསྔལ་འགོག་པར་འགྲོ་བའི་ལམ་འཕགས་པའི་བདེན་པ་གང་ཞེ་ན། འདི་ནི་འཕགས་པའི་ལམ་ཡན་ལག་བརྒྱད་དེ། འདི་ལྟར། ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། ཡང་དག་པའི་ངག་དང་། ཡང་དག་པའི་ལས་ཀྱི་མཐའ་
དང་། ཡང་དག་པའི་འཚོ་བ་དང་། ཡང་དག་པའི་རྩོལ་བ་དང་། ཡང་དག་པའི་དྲན་པ་དང་། ཡང་དག་པའི་ཏིང་ངེ་འཛིན་ནོ། །དེ་ལ་ཡང་དག་པའི་ལྟ་བ་ནི་བདེན་པ་བཞིའི་ཤེས་པའོ། །ཡང་དག་པའི་རྟོག་པ་ནི་དགེ་བ་ལ་ཀུན་དུ་རྟོག་པའོ། །ཡང་དག་པའི་ངག་ནི་གང་དག་གི་ཉེས་པར་སྤྱོད་པ་
བཞི་ལས་ལྡོག་པའོ། །ཡང་དག་པའི་ལས་ཀྱི་མཐའ་ནི་ལུས་ཀྱི་ཉེས་པར་སྤྱོད་པ་གསུམ་ལས་ལྡོག་པའོ། །ཡང་དག་པའི་འཚོ་བ་ནི་གང་ལོག་པའི་འཚོ་བ་ལས་ལྡོག་པའོ། །ཡང་དག་པའི་རྩོལ་བ་ནི་ཡང་དག་པའི་སྤོང་བ་རྣམ་པ་བཞིའོ། །ཡང་དག་པའི་དྲན་པ་ནི་དྲན་པ་ཉེ་བར་གཞག་པ་
བཞིའོ། །ཡང་དག་པའི་ཏིང་ངེ་འཛིན་ནི་བསམ་གཏན་བཞིའོ། །ཡང་ན། གང་དེ་དག་འཕགས་པའི་ལམ་བསྒོམས་པ་ལས་མྱ་ངན་ལས་འདས་པ་ཡེ་ཤེས་མཐོང་བ་འདི་ནི་ཡང་དག་པའི་ལྟ་བའོ། །མྱ་ངན་ལས་འདས་པ་དེ་ཉིད་ལ་རྣམ་པར་རྟོག་པ་ནི་ཡང་དག་པའི་རྟོག་པའོ། །དེ་ཉིད་ཀྱི་

ལོག་པའི་ངག་སྤངས་པ་ནི་ཡང་དག་པའི་ངག་གོ། །དེ་ཉིད་ཀྱི་ལོག་པའི་ལས་ཀྱི་མཐའ་སྤངས་པ་ནི་ཡང་དག་པའི་ལས་ཀྱི་མཐའོ། །དེ་ཉིད་ཀྱི་ལོག་པའི་འཚོ་བ་སྤངས་པ་ནི་ཡང་དག་པའི་འཚོ་བའོ། །དེ་ཉིད་ཀྱི་བརྩོན་འགྲུས་ནི་ཡང་དག་པའི་རྩོལ་བའོ། །
མྱ་ངན་ལས་འདས་པ་དེ་ཉིད་ལ་དྲན་པ་ནི་ཡང་དག་པའི་དྲན་པའོ། །མྱ་ངན་ལས་འདས་པ་དེ་ཉིད་ལ་སེམས་རྩེ་གཅིག་པ་ནི་ཡང་དག་པའི་ཏིང་ངེ་འཛིན་ནོ། །ཡང་ཤེས་རབ་ཀྱི་དབང་པོ་དང་ཤེས་རབ་ཀྱི་སྟོབས་དང་དཔྱོད་པའི་རྫུ་འཕྲུལ་གྱི་རྐང་པ་དང་ཆོས་རྣམ་པར་འབྱེད་པ་ཡང་དག་བྱང་ཆུབ་
ཀྱི་ཡན་ལག་ནི་ཡང་དག་པའི་ལྟ་བའི་ནང་དུ་གཏོགས་པའོ། །བརྩོན་འགྲུས་ཀྱི་དབང་པོ་དང་བརྩོན་འགྲུས་ཀྱི་སྟོབས་དང་བརྩོན་འགྲུས་རྫུ་འཕྲུལ་གྱི་རྐང་པ་དང་འདུན་པའི་རྫུ་འཕྲུལ་གྱི་རྐང་པ་དང་། བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་དང་། ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་
ཡན་ལག་དང་། ཡང་དག་པའི་སྤོང་བ་བཞི་ནི་ཡང་དག་པའི་རྩོལ་བའི་ནང་དུ་གཏོགས་པའོ། །དྲན་པའི་དབང་པོ་དང་དྲན་པའི་སྟོབས་དང་དྲན་པ་ཡང་དག་བྱང་ཆུབ་ཀྱི་ཡན་ལག་དང་དྲན་པ་ཉེ་བར་གཞག་པ་བཞི་ནི་ཡང་དག་པའི་དྲན་པའི་ནང་དུ་གཏོགས་པའོ། །ཏིང་ངེ་འཛིན་གྱི་དབང་པོ་དང་
ཏིང་ངེ་འཛིན་གྱི་སྟོབས་དང་སེམས་ཀྱི་རྫུ་འཕྲུལ་གྱི་རྐང་པ་དང་། དད་པའི་དབང་པོ་དང་དད་པའི་སྟོབས་དང་ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་དང་དགའ་བ་ཡང་དག་བྱང་ཆུབ་ཀྱི་ཡན་ལག་དང་བཏང་སྙོམས་ཡང་དག་བྱང་ཆུབ་ཀྱི་ཡན་ལག་ནི་ཡང་དག་པའི་ཏིང་ངེ་འཛིན་གྱི་ནང་དུ་གཏོགས་
པའོ། །དེ་ལྟར་འཕགས་པའི་ལམ་ཡན་ལག་བརྒྱད་ཀྱི་ནང་དུ་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་འདུས་པར་འགྱུར་རོ། །འདི་ནི་སྡུག་བསྔལ་འགོག་པར་འགྲོ་བ་ལམ་འཕགས་པའི་བདེན་པ་ཞེས་བརྗོད་དོ། །འདི་རྣམས་ནི་འཕགས་པའི་བདེན་པ་བཞི་རྣམས་སོ། །འདིར་སྨྲས་པ།
འཕགས་པའི་བདེན་པ་བཞི་ཡིན་ཞིང་གསུམ་མ་ཡིན། ལྔ་མ་ཡིན་པ་ག་ལས་ཤེ་ན། དེ་ལ་བརྗོད་པར་བྱ་སྟེ། འཇིག་རྟེན་དང་འཇིག་རྟེན་ལས་འདས་པའི་འབྲས་བུ་དང་རྒྱུ་བཞིའོ་འདི་ལྟ་སྟེ། སྡུག་བསྔལ་ནི་འཇིག་རྟེན་གྱི་འབྲས་བུའོ། །ཀུན་འབྱུང་འཇིག་རྟེན་གྱི་རྒྱུའོ། །འགོག་པ་ནི་འཇིག་རྟེན་ལས་འདས་པའི་

འབྲས་བུའོ། །ལམ་ནི་འཇིག་རྟེན་ལས་འདས་པའི་རྒྱུའོ། །དེས་ན་བཞིའོ། །ཡང་ན། ཡོངས་སུ་ཤེས་པར་བྱ་བ་དང་སྤང་བར་བྱ་བ་དང་མངོན་དུ་བྱ་བ་དང་བསྒོམ་པར་བྱ་བ་དང་བཞི་ཡིན་པས་བདེན་པ་བཞིའོ། །ཡང་ན་འཕགས་པའི་བདེན་པ་བཞི་པོ་དེ་རྣམས་ནི་རྣམ་པ་བཅུ་གཅིག་གིས་ཁྱད་པར་སོ་སོ་
ཤེས་པར་བྱའོ། །འདི་ལྟར། ཚིག་གི་དོན་དང་། མཚན་ཉིད་དང་། གོ་རིམས་དང་། མདོར་བསྡུ་བ་དང་། དཔེར་བྱ་བ་དང་། རྣམ་པར་དབྱེ་བ་དང་། བསྡོམ་པར་བྱ་བ་དང་། གཅིག་ཉིད་དང་། སྣ་ཚོགས་པ་ཉིད་དང་། མཐར་ཆགས་ཀྱིས་སངས་རྒྱས་པར་བསྟན་པ་དང་བསྡུ་བའོ། །དེ་ལ་ཚིག་གི་དོན་ནི་
བཞི་ཞེས་པ་གྲངས་ནི་ཡོངས་སུ་ཆད་པའོ། །འཕགས་པའི་བདེན་པ་ཞེས་པ་ནི་འཕགས་པས་བསྟན་པའི་བདེན་པ་ཡིན་པས་སམ། དེ་དག་མངོན་དུ་བྱས་པ་ལ་འཕགས་པར་འགྱུར་བས་སོ། །དེ་བཞིན་ཉིད་ཀྱི་ལ་ཡང་དེ་བཞིན་ཉིད་རང་གི་མཚན་ཉིད་ཀྱིས་མི་སླུ་བའི་དོན་གྱིས་ན་འཕགས་པའི་
བདེན་པའོ། །སྡུག་བསྔལ་ཞེས་པ་ནི་མནར་བའི་དོན་གྱིས་སོ། །ཀུན་འབྱུང་ཞེས་པ་ནི་བསྐྱེད་པའི་དོན་གྱིས་སོ། །འགོག་པ་ཞེས་པ་ནི་རྗེས་སུ་འགོག་པའི་དོན་གྱིས་སོ། །ལམ་ཞེས་པ་ནི་དམ་པའི་དོན་གོམས་པར་བྱེད་པས་སོ། །མཚན་ཉིད་ཞེས་པ་ནི་སྡུག་བསྔལ་ནི་ཉེས་པའི་མཚན་ཉིད་དང་། ཀུན་
འབྱུང་ནི་རྒྱུའི་མཚན་ཉིད་དང་། འགོག་པ་ནི་མི་སྐྱེ་བའི་མཚན་ཉིད་དང་། ལམ་ནི་ཐབས་ཀྱི་མཚན་ཉིད་དོ། །ཡང་ན། སྡུག་བསྔལ་ནི་གཟིར་བའི་མཚན་ཉིད་དང་། ཀུན་དུ་གདུང་བའི་མཚན་ཉིད་དང་། འདུས་བྱས་ཀྱི་མཚན་ཉིད་དང་། ཡོངས་སུ་འགྱུར་བའི་མཚན་ཉིད་དོ། །ཀུན་འབྱུང་ནི་འཕེན་པར་
བྱེད་པའི་མཚན་ཉིད་དང་། བཞིའི་མཚན་ཉིད་དང་། ཀུན་དུ་ཚོགས་པའི་མཚན་ཉིད་དང་། ཡོངས་སུ་སྤགས་པའི་མཚན་ཉིད་དོ། །འགོག་པ་ནི་ངེས་པར་འབྱུང་བའི་མཚན་ཉིད་དང་། དབེན་པའི་མཚན་ཉིད་དང་། འདུས་མ་བྱས་ཀྱི་མཚན་ཉིད་དང་། མི་འཆི་བའི་མཚན་ཉིད་དོ། །ལམ་ནི་ངེས་
པར་འབྱིན་པར་བྱེད་པའི་མཚན་ཉིད་དང་། ཡང་དག་པར་ཐོབ་པར་བྱེད་པའི་མཚན་ཉིད་དང་། མཐོང་བའི་མཚན་ཉིད་དང་། ལྷག་པའི་བདག་པོའི་མཚན་ཉིད་དོ། །གོ་རིམས་ངེས་པ་ནི་རགས་པའི་དོན་གྱིས་དང་། རྐྱེན་གྱི་དོན་གྱིས་དང་པོ་སྡུག་བསྔལ་བསྟན་ཏོ། །འདིས་ནི་སྡུག་བསྔལ་སྐྱེད་

པར་བྱེད་པའོ་ཞེས་གཉིས་པ་ཀུན་འབྱུང་བསྟན་པའོ། །ཀུན་འབྱུང་འདི་འགགས་པས་སྡུག་བསྔལ་འདི་འགག་གོ་ཞེས་གསུམ་པ་འགོག་པའི་བདེན་པ་བསྟན་ཏོ། །འདི་ནི་ཀུན་འབྱུང་འགོག་པའི་ཐབས་སོ་ཞེས་བཞི་པ་ལམ་གྱི་བདེན་པ་བསྟན་ཏོ། །དཔེར་ན་
སྨན་པ་མཁས་པས་དང་པོ་ནད་ཤེས་པར་བྱེད། དེ་ནས་ནད་ཀྱི་རྒྱུ་ཡོངས་སུ་ཚོལ་བ་དང་། དེ་ནས་ནད་བྱང་བ་དང་རྗེས་སུ་མཐུན་པའི་སྨན་སྟོན་པའོ། །དེ་ཁོ་ན་བཞིན་དུ་ཅི་ལྟར་ནད་དེ་ལྟར་སྡུག་བསྔལ་ལོ། །ཅི་ལྟར་ནད་ཀྱི་གཞི་དེ་བཞིན་དུ་ཀུན་འབྱུང་ངོ་། །ཅི་ལྟར་ན་ནད་བྱང་བ་དེ་བཞིན་དུ་
འགོག་པའོ། །ཅི་ལྟར་སྨན་དེ་བཞིན་དུ་ལམ་དུ་བལྟ་བར་བྱའོ། །མདོར་བསྡུ་བ་ནི། འཇུག་པ་ནི་སྡུག་བསྔལ་ལོ། །འཇུག་པར་བྱེད་པ་ནི་ཀུན་འབྱུང་ངོ་། །ལྡོག་པ་ནི་འགོག་པའོ། །ལྡོག་པར་བྱེད་པ་ནི་ལམ་མོ། །ཉོན་མོངས་པའི་དངོས་པོ་ནི་སྡུག་བསྔལ་ལོ། །ཉོན་མོངས་པ་ནི་ཀུན་
འབྱུང་ངོ་། །ཉོན་མོངས་པ་སྤངས་པ་ནི་འགོག་པའོ། །ཉོན་མོངས་པ་སྤོང་བའི་ཐབས་ནི་ལམ་མོ། །སྡུག་བསྔལ་རྣམ་པར་བཞག་པ་ནི་འཇིག་ཚོགས་ལ་ལྟ་བ་ཡང་དག་པར་འཇོམས་པའི་སྒོའོ། །ཀུན་འབྱུང་རྣམ་པར་བཞག་པ་ནི་ཆད་པའི་ལྟ་བ་ཡང་དག་པར་འཇོམས་པའི་སྒོའོ། །འགོག་པ་
རྣམ་པར་བཞག་པ་ནི་སྡུག་བསྔལ་ཐམས་ཅད་ཡང་དག་པར་འཇོམས་པའི་སྒོའོ། །ལམ་རྣམ་པར་བཞག་པ་ནི་བྱ་བ་མ་ཡིན་པའི་ལྟ་བ་ཡང་དག་པར་འཇོམས་པའི་སྒོའོ། །དཔེར་བྱ་བ་ནི། དཔེར་ན་དུག་གི་སྡོང་པོ་བཞིན་དུ་སྡུག་བསྔལ་བལྟ་བར་བྱའོ། །དཔེར་ན་ས་བོན་བཞིན་དུ་ཀུན་
འབྱུང་ངོ་། །དཔེར་ན་ས་བོན་བསྲེགས་པ་བཞིན་དུ་འགོག་པའོ། །དཔེར་ན་མེ་བཞིན་དུ་ལམ་དུ་བལྟ་བར་བྱའོ། །དཔེར་ན་ཚུ་རོལ་དུ་དོགས་པ་དང་བཅས་པ་དང་འཇིགས་པ་དང་བཅས་པ་བཞིན་དུ་སྡུག་བསྔལ་བལྟ་བར་བྱའོ། །དཔེར་ན་ཆུ་བོ་བཞིན་དུ་ཀུན་འབྱུང་ངོ་། །དཔེར་ན་ཕ་རོལ་
འགྲམ་ན་འཇིགས་པ་མེད་པ་བཞིན་དུ་འགོག་པའོ། །དཔེར་ན་གྲུ་བཞིན་དུ་ལམ་དུ་ལྟའོ། །དཔེར་ན་ཁུར་ཁུར་བ་བཞིན་དུ་སྡུག་བསྔལ་བལྟ་བར་བྱའོ། །དཔེར་ན་ཁུར་ལེན་པ་བཞིན་དུ་ཀུན་འབྱུང་ངོ་། །དཔེར་ན་ཁུར་བོར་བ་བཞིན་དུ་འགོག་པའོ། །དཔེར་ན་ཁུར་བོར་བའི་ཐབས་བཞིན་དུ་ལམ་བལྟ་

བར་བྱའོ། །རྣམ་པར་དབྱེ་བ་ཞེས་པ་ནི་བདེན་པ་ནི་རྣམ་པ་བཞི་སྟེ། འདི་ལྟར་ངག་བདེན་པ་དང་། སོ་སོར་བདེན་པ་དང་། དོན་དམ་པའི་བདེན་པ་དང་། འཕགས་པའི་བདེན་པའོ། །དེ་ལ་བདེན་པ་ཁོ་ན་སྨྲ་ཞིང་མི་བདེན་པ་ནི་མ་ཡིན་ནོ་ཞེས་པ་ནི་ངག་བདེན་པའོ། །ལྟ་བར་སོང་བ་ནི་སོ་སོར་བདེན་པའོ། །
དེ་ནི་དགེ་སློང་གང་བརྫུན་དང་རྨོངས་པའི་ཆོས་དེ་དག་ནི་མི་བདེན་པའོ། །གང་རྨོངས་པ་མེད་པའི་ཆོས་དེ་ནི་མྱ་ངན་ལས་འདས་པ་ཞེས་པ་ནི་དོན་དམ་པའི་བདེན་པའོ། །འཕགས་པ་རྣམས་ཀྱི་བསྒོམ་པར་བྱ་བ་ཡིན་པས་ཞེས་པ་ནི་འཕགས་པའི་བདེན་པའོ། །འདིར་ནི་འཕགས་པའི་བདེན་པ་ལ་
མངོན་པར་འདོད་པའོ། །བསྡོམ་པར་བྱ་བ་ནི་སྲིད་པ་མ་གཏོགས་པའོ། །འདོད་པ་གཟུགས་དང་གཟུགས་མེད་པའི་ས་གསུམ་གྱི་དགེ་བ་དང་མི་དགེ་བ་དང་ལུང་མ་བསྟན་གྱི་ཆོས་རྣམས་ནི་སྡུག་བསྔལ་བདེན་པའོ། །སྲེད་པ་ནི་ཀུན་འབྱུང་བདེན་པའོ། །སྲེད་པ་སྤངས་པ་ནི་འགོག་པའི་བདེན་པའོ། །
འཕགས་པའི་ལམ་ཡན་ལག་བརྒྱད་ནི་ལམ་གྱི་བདེན་པའོ། །ཚུལ་གཞན་ཡང་། སྲེད་པ་དང་ལྷག་མའི་ཉོན་མོངས་པ་ནི་མ་གཏོགས་ཏེ། འདོད་པ་ལ་སོགས་པའི་ས་གསུམ་གྱི་དགེ་བ་དང་། མི་དགེ་བ་དང་ལུང་དུ་མ་བསྟན་པའི་ཆོས་ནི་སྡུག་བསྔལ་བདེན་པའོ། །སྲེད་པ་དང་ལྷག་མ་ཉོན་མོངས་པ་
ནི་ཀུན་འབྱུང་བདེན་པའོ། །སྲེད་པ་དང་ལྷག་མ་ཉོན་མོངས་པ་དག་སྤངས་པ་ནི་འགོག་པའོ། །འཕགས་པའི་ལམ་ཡན་ལག་བརྒྱད་ནི་ལམ་གྱི་བདེན་པའོ། །ཡང་ཚུལ་གཞན། སྲེད་པ་དང་ལྷག་མའི་ཉོན་མོངས་པ་དང་མི་དགེ་བ་ཐམས་ཅད་མ་གཏོགས་ཏེ། ས་གསུམ་གྱི་དགེ་བ་དང་ལུང་དུ་མ་
བསྟན་པའི་ཆོས་ནི་སྡུག་བསྔལ་གྱི་བདེན་པའོ། །སྲེད་པ་དང་ལྷག་མ་ཉོན་མོངས་པ་དང་མི་དགེ་བ་ཐམས་ཅད་ནི་ཀུན་འབྱུང་བདེན་པའོ། །སྲེད་པ་ལ་སོགས་པ་རྣམས་སྤངས་པ་ནི་འགོག་པའོ། །ལམ་གྱི་བདེན་པ་དེ་ཉིད་དོ། །ཚུལ་གཞན། སྲེད་པ་དང་ལྷག་མ་ཉོན་མོངས་པ་དང་མི་དགེ་བ་
ཐམས་ཅད་དང་ས་གསུམ་གྱི་དགེ་བ་རྣམས་མ་གཏོགས་ཏེ། ས་གསུམ་གྱི་ལུང་མ་བསྟན་གྱི་ཆོས་ནི་སྡུག་བསྔལ་གྱི་བདེན་པའོ། །སྲེད་པ་དང་ལྷག་མ་ཉོན་མོངས་པ་དང་མི་དགེ་བ་ཐམས་ཅད་དང་ས་གསུམ་གྱི་དགེ་བ་ནི་ཀུན་འབྱུང་ངོ་། །སྲེད་པ་ལ་སོགས་པ་སྤངས་པ་ནི་འགོག་པའི་བདེན་པའོ། །ལམ་

གྱི་བདེན་པ་ནི་དེ་ཉིད་དོ། །དེ་ལ་སྲིད་པའི་རོ་མྱོང་བ་དོན་དུ་གཉེར་བ་གཙོ་བོར་གྱུར་པའི་དོན་གྱིས་སྲེད་པ་ནི་ཀུན་འབྱུང་ངོ་། །སྲིད་པར་ཀུན་དུ་སྦྱོར་བ་གཙོ་བོར་གྱུར་པའི་དོན་གྱིས་ལྷག་མ་ཉོན་མོངས་པ་ནི་ཀུན་འབྱུང་ངོ་། །སྤང་བར་བྱ་བའི་དོན་གྱིས་དང་སྲིད་པ་ཀུན་དུ་སྦྱོར་བའི་
དོན་གྱིས་མི་དགེ་བ་ཐམས་ཅད་ནི་ཀུན་འབྱུང་ངོ་། །སྲིད་པ་སྐྱེད་པའི་དོན་གྱིས་ས་གསུམ་གྱི་དགེ་བའི་ཆོས་རྣམས་ཀུན་འབྱུང་ངོ་། །དེས་ན་སྲེད་པ་དང་ལྷག་མ་ཉོན་མོངས་པ་དང་མི་དགེ་བ་ཐམས་ཅད་དང་ས་གསུམ་གྱི་དགེ་བ་རྣམས་ནི་སྡུག་བསྔལ་གྱི་བདེན་པར་འགྱུར་ཏེ། མནར་བ་དང་ཀུན་དུ་
གདུང་བ་དང་འདུས་བྱས་དང་ཡོངས་སུ་འགྱུར་བའི་མཚན་ཉིད་ཡིན་པའི་ཕྱིར་རོ། །སྲེད་པ་ལ་སོགས་པ་དེ་ཉིད་ཀུན་འབྱུང་གི་བདེན་པར་འགྱུར་ཏེ། སྡུད་པར་བྱེད་པ་དང་ལེན་པ་དང་སྤགས་པ་ཀུན་དུ་སྦྱོར་བའི་མཚན་ཉིད་ཡིན་པའི་ཕྱིར་རོ། །གཅིག་པ་ཉིད་ནི། འཕགས་པའི་བདེན་པ་བཞི་ནི་
རྣམ་པ་བཞིས་གཅིག་པ་ཉིད་དེ། འདི་ལྟར་བདེན་པའི་དོན་གྱིས་དང་། དེ་བཞིན་གྱི་དོན་གྱིས་དང་། ཆོས་ཀྱི་དོན་གྱིས་དང་། རིགས་པའི་དོན་གྱིས་སོ། །སྣ་ཚོགས་པ་ཉིད་ནི། །བདེན་པ་གཉིས་ནི་འཇིག་རྟེན་པ་དང་། ཟག་པ་དང་བཅས་པ་དང་། ཀུན་དུ་སྦྱར་བ་དང་། མདུད་པར་བྱ་བ་དང་། རྒྱུན་
རྒྱུ་བ་དང་། སྦྱོར་བར་བྱ་བ་དང་། སྒྲིབ་པར་བྱ་བ་དང་། མཆོག་ཏུ་སྤྱོད་པ་དང་། ཉེ་བར་ལེན་པ་དང་། ཉོན་མོངས་པ་ཅན་ཏེ། འདི་ལྟར། སྡུག་བསྔལ་བདེན་པ་དང་། ཀུན་འབྱུང་བདེན་པའོ། །བདེན་པ་གཉིས་ནི་འཇིག་རྟེན་ལས་འདས་པ་དང་། ཟག་པ་མེད་པ་དང་། ཀུན་དུ་སྦྱོར་བ་མ་ཡིན་པ་དང་།
བཅིང་བར་བྱ་བ་མ་ཡིན་པ་དང་། རྒྱུན་རྒྱུ་བ་མ་ཡིན་པ་དང་། སྦྱོར་བར་བྱ་བ་མ་ཡིན་པ་དང་། བསྒྲིབ་པར་བྱ་བ་མ་ཡིན་པ་དང་། མཆོག་ཏུ་སྤྱོད་བྱ་མ་ཡིན་པ་དང་། ཉེ་བར་ལེན་པ་མ་ཡིན་པ་དང་། ཉོན་མོངས་པ་ཅན་མ་ཡིན་པ་སྟེ་འདི་ལྟར། འགོག་པའི་བདེན་པ་དང་། ལམ་གྱི་བདེན་པའོ། །
བདེན་པ་གསུམ་ནི་འདུས་བྱས་སོ། །འགོག་པ་ནི་འདུས་མ་བྱས་སོ། །བདེན་པ་གསུམ་ནི་གཟུགས་ཅན་མ་ཡིན་པ་དང་། སྡུག་བསྔལ་གྱི་བདེན་པ་ནི་གཟུགས་དང་གཟུགས་མ་ཡིན་པའོ། །ཀུན་འབྱུང་གི་བདེན་པ་ནི་མི་དགེ་བའོ། །དགེ་བ་ནི་ལམ་གྱི་བདེན་པའོ། །ལུང་དུ་མ་བསྟན་པ་ནི་

འགོག་པའི་བདེན་པའོ། །དགེ་བ་དང་མི་དགེ་བ་དང་ལུང་དུ་མ་བསྟན་པ་ནི་སྡུག་བསྔལ་གྱི་བདེན་པའོ། །སྡུག་བསྔལ་ཤེས་པར་བྱ་བ་དང་། ཀུན་འབྱུང་སྤང་བར་བྱ་བ་དང་འགོག་པ་མངོན་དུ་བྱ་བ་དང་། ལམ་བསྒོམ་པར་བྱ་བའོ། །མཐར་ཆགས་ཀྱིས་རྒྱས་པར་བཤད་པ་ནི། རྣམ་པ་གཅིག་གིས་ནི་
རྣམ་པར་ཤེས་པ་དང་ལྡན་པའི་ལུས་ནི་སྡུག་བསྔལ་ལོ། །ངའོ་སྙམ་པའི་ང་རྒྱལ་ནི་ཀུན་འབྱུང་ངོ་། །ངའོ་སྙམ་པའི་ང་རྒྱལ་སྤངས་པ་ན་འགོག་པའོ། །ལུས་སུ་གཏོགས་པ་དྲན་པ་ནི་ལམ་མོ། །རྣམ་པ་གཉིས་ཀྱིས་ནི། མིང་དང་གཟུགས་དག་ནི་སྡུག་བསྔལ་ལོ། །མ་རིག་པ་དང་སྲེད་པ་ནི་ཀུན་
འབྱུང་ངོ་། །དེ་དག་སྤངས་པ་ནི་འགོག་པའོ། །ཞི་གནས་དང་ལྷག་མཐོང་ནི་ལམ་མོ། །རྣམ་པ་གསུམ་གྱིས་ནི་སྡུག་བསྔལ་གསུམ་ནི་སྡུག་བསྔལ་བདེན་པའོ། །མི་དགེ་བའི་རྩ་བ་གསུམ་ནི་ཀུན་འབྱུང་བདེན་པའོ། །དེ་རྣམས་སྤངས་པ་ནི་འགོག་པའོ། །ཚུལ་ཁྲིམས་དང་ཏིང་ངེ་འཛིན་དང་ཤེས་
རབ་ནི་ལམ་མོ། །རྣམ་པ་བཞིས་ནི། བདག་གི་ངོ་བོའི་དངོས་པོ་བཞི་ནི་སྡུག་བསྔལ་ཏེ། འདི་ལྟར། སྐྱེ་བའི་སྡུག་བསྔལ་དང་། རྒ་བའི་སྡུག་བསྔལ་དང་། འཆི་བའི་སྡུག་བསྔལ་དང་། ན་བའི་སྡུག་བསྔལ་ལོ། །ཕྱིན་ཅི་ལོག་བཞི་ནི་ཀུན་འབྱུང་ངོ་། །དེ་རྣམས་སྤངས་པ་ནི་འགོག་པའོ། །དྲན་པ་
ཉེ་བར་གཞག་པ་བཞི་ནི་ལམ་མོ། །རྣམ་པ་ལྔས་ནི། འགྲོ་བ་ལྔ་ནི་སྡུག་བསྔལ་ལོ། །སྒྲིབ་པ་ལྔ་ནི་ཀུན་འབྱུང་ངོ་། །དེ་རྣམས་སྤངས་པ་ནི་འགོག་པའོ། །དབང་པོ་ལྔ་ནི་ལམ་མོ། །རྣམ་པ་དྲུག་གིས་ནི། རེག་པའི་སྐྱེ་མཆེད་དྲུག་ནི་སྡུག་བསྔལ་ལོ། །འདི་ལྟ་སྟེ། མིག་གི་འདུས་ཏེ་རེག་པ་དང་།
རྣ་བའི་འདུས་ཏེ་རེག་པ་དང་། སྣའི་འདུས་ཏེ་རེག་པ་དང་། ལྕེའི་འདུས་ཏེ་རེག་པ་དང་། ལུས་ཀྱི་འདུས་ཏེ་རེག་པ་དང་། ཡིད་ཀྱི་འདུས་ཏེ་རེག་པའོ། །སྲེད་པའི་ཚོགས་ནི་ཀུན་འབྱུང་ངོ་། །གཟུགས་ཀྱི་སྲེད་པ་དང་། སྒྲའི་སྲེད་པ་དང་། དྲིའི་སྲེད་པ་དང་། རོའི་སྲེད་པ་དང་། རེག་བྱའི་སྲེད་པ་དང་། ཆོས་ཀྱི་
སྲེད་པའོ། །དེ་རྣམས་སྤངས་པ་ནི་འགོག་པའོ། །ཀུན་དུ་ཆགས་པར་བྱ་བའི་ཆོས་དྲུག་ནི་ལམ་མོ། །དེ་ལ་ཀུན་དུ་ཆགས་བྱའི་ཆོས་དྲུག་ནི་འདི་ལྟར། ནང་གི་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་འདི་ནི་ཀུན་དུ་ཆགས་པར་བྱ་བའི་ཆོས་དང་པོའོ། །དེ་བཞིན་དུ་ཕྱི་རོལ་ལམ། དེ་ཁོ་ན་བཞིན་དུ་ཕྱི་ནང་

ངམ། ཀུན་དུ་སྐྱེ་བ་ལ་རྗེས་སུ་ལྟ་བའམ་ཆོས་ལ་ཆོས་དང་མཐུན་པར་ལྟ་ཞིང་གནས་པའོ། །དེ་བཞིན་དུ་འགག་པའི་ཆོས་ལ་རྗེས་སུ་ལྟ་བའམ། དེ་བཞིན་དུ་སྐྱེ་བ་དང་འགག་པ་ལ་རྗེས་སུ་ལྟ་ཞིང་གནས་པ་ནི་ཀུན་དུ་ཆགས་པར་བྱ་བའི་ཆོས་དྲུག་པའོ། །རྣམ་པ་གསུམ་གྱིས་
ནི། རྣམ་པར་ཤེས་པའི་གནས་པ་བདུན་ནི་སྡུག་བསྔལ་ལོ། །སེམས་ཅན་ལུས་ཐ་དད་པ་འདུ་ཤེས་ཐ་དད་པ་ཡོད་དོ་ཞེས་པ་ནི་རྣམ་པར་ཤེས་པའི་གནས་པ་དང་པོའོ། །སེམས་ཅན་ལུས་ཐ་དད་ལ་འདུ་ཤེས་གཅིག་པ་ཉིད་ཡོད་དོ་ཞེས་པ་འདི་ནི་གཉིས་པའོ། །སེམས་ཅན་ལུས་གཅིག་ཉིད་
ཡིན་ལ་འདུ་ཤེས་ཐ་དད་པ་ཡོད་པ་འདི་ནི་གསུམ་པའོ། །སེམས་ཅན་ལུས་གཅིག་ལ་འདུ་ཤེས་གཅིག་པ་ཡོད་དོ་ཞེས་པ་ནི་བཞི་པའོ། །གཟུགས་མེད་པ་རུ་ནམ་མཁའི་འདུ་ཤེས་འདི་ནི་ལྔ་པའོ། །རྣམ་ཤེས་ཀྱི་འདུ་ཤེས་འདི་ནི་དྲུག་པའོ། །ཅི་ཡང་མེད་པའི་འདུ་ཤེས་ནི་བདུན་པའོ། །བག་
ལ་ཉལ་བདུན་ནི་ཀུན་འབྱུང་སྟེ། འདི་ལྟར། འདོད་པའི་འདོད་ཆགས་བག་ལ་ཉལ་དང་། ཁོང་ཁྲོ་བག་ལ་ཉལ་དང་། ང་རྒྱལ་བག་ལ་ཉལ་དང་། ལྟ་བ་བག་ལ་ཉལ་དང་། ཐེ་ཚོམ་བག་ལ་ཉལ་དང་། སྲིད་པའི་ཆགས་པ་བག་ལ་ཉལ་དང་། མ་རིག་པ་བག་ལ་ཉལ་ལོ། །དེ་དག་སྤངས་པ་ནི་འགོག་
པའོ། །བྱང་ཆུབ་ཡན་ལག་བདུན་ནི་ལམ་མོ། །རྣམ་པ་བརྒྱད་ཀྱིས་ན། འཇིག་རྟེན་ཆོས་བརྒྱད་ནི་སྡུག་བསྔལ་ལོ། །ལོག་པ་བརྒྱད་ནི་ཀུན་འབྱུང་ངོ་། །འདི་ལྟར། ལོག་པའི་ལྟ་བ་དང་། ལོག་པའི་རྟོག་པ་དང་། ལོག་པའི་ངག་དང་། ལོག་པའི་ལས་ཀྱི་མཐའ་དང་། ལོག་པའི་འཚོ་བ་དང་། ལོག་
པའི་རྩོལ་བ་དང་། ལོག་པའི་དྲན་པ་དང་། ལོག་པའི་ཏིང་ངེ་འཛིན་ཏོ། །དེ་རྣམས་སྤངས་པ་ནི་འགོག་པའོ། །ཡང་དག་པ་བརྒྱད་ནི་ལམ་མོ། །འདི་ལྟར། ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། ཡང་དག་པའི་ངག་དང་། ཡང་དག་པའི་ལས་ཀྱི་མཐའ་དང་། ཡང་དག་པའི་
འཚོ་བ་དང་། ཡང་དག་པའི་རྩོལ་བ་དང་། ཡང་དག་པའི་དྲན་པ་དང་། ཡང་དག་པའི་ཏིང་ངེ་འཛིན་ཏོ། །རྣམ་པ་དགུ་ནི། སེམས་ཅན་གྱི་གནས་དགུ་ནི་སྡུག་བསྔལ་ལོ། །འདི་ལྟར། ལུས་ཐ་དད་ཅིང་འདུ་ཤེས་ཐ་དད་པ་ནི། འདི་ལྟར་མི་རྣམས་དང་ལྷ་ཁ་ཅིག་གོ། །འདི་ནི་སེམས་ཅན་གྱི་གནས་དང་

པོའོ། །ལུས་གཅིག་ལ་འདུ་ཤེས་ཐ་དད་པ་ནི་འདི་ལྟར། ཚངས་རིས་ཀྱི་ལྷ་དང་པོར་བྱུང་བ་རྣམས་སོ། །འདི་ནི་གཉིས་པའོ། །ལུས་ཐ་དད་པ་འདུ་ཤེས་གཅིག་པ་ནི་འདི་ལྟར་འོད་གསལ་གྱི་ལྷ་རྣམས་སོ། །འདི་ནི་གསུམ་པའོ། །ལུས་གཅིག་ལ་འདུ་ཤེས་གཅིག་ནི་འདི་ལྟར་དགེ་རྒྱས་ཀྱི་
ལྷ་རྣམས་སོ། །འདི་ནི་བཞི་པའོ། །ནམ་མཁའ་མཐའ་ཡས་སྐྱེ་མཆེད་དང་། རྣམ་ཤེས་མཐའ་ཡས་སྐྱེ་མཆེད་དང་། ཅི་ཡང་མེད་པའི་སྐྱེ་མཆེད་དང་། འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་དང་། འདུ་ཤེས་མེད་པའི་སེམས་ཅན་ཏེ། སེམས་ཅན་གྱི་གནས་དགུའོ། །སྲེད་པའི་
རྩ་བ་ཅན་གྱི་ཆོས་དགུ་ནི་ཀུན་འབྱུང་སྟེ། འདི་ལྟར། དེ་དག་སྤངས་པ་ནི་འགོག་པའོ། །ཚུལ་བཞིན་ཡིད་ལ་བྱེད་པའི་རྩ་བ་ཅན་གྱི་ཆོས་དགུ་ནི་ལམ་སྟེ། འདི་ལྟར། རྣམ་པ་བཅུས་ནི། ཕྱོགས་བཅུའི་འདུ་བྱེད་རྣམས་ནི་སྡུག་བསྔལ་ལོ། །ཀུན་དུ་སྦྱོར་བ་བཅུ་ནི་ཀུན་འབྱུང་སྟེ། འདི་ལྟར།
འདོད་པའི་ཆགས་པ་ཀུན་དུ་སྦྱོར་བ་དང་། ཁོང་ཁྲོ་བ་ཀུན་དུ་སྦྱོར་བ་དང་། ང་རྒྱལ་ཀུན་དུ་སྦྱོར་བ་དང་། ལྟ་བ་ཀུན་དུ་སྦྱོར་བ་དང་། ཐེ་ཚོམ་ཀུན་དུ་སྦྱོར་བ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་ཀུན་དུ་སྦྱོར་བ་དང་། སྲིད་པའི་ཆགས་པ་ཀུན་དུ་སྦྱོར་བ་དང་། ཕྲག་དོག་
ཀུན་དུ་སྦྱོར་བ་དང་། སེར་སྣ་ཀུན་དུ་སྦྱོར་བ་དང་། མ་རིག་པ་ཀུན་དུ་སྦྱོར་བའོ། །དེ་དག་སྤངས་པ་ནི་འགོག་པའོ། །འདུ་ཤེས་བཅུ་ནི་ལམ་མོ། །འདི་ལྟར། མི་རྟག་པའི་འདུ་ཤེས་དང་། དོན་མེད་པའི་འདུ་ཤེས་དང་། མི་སྡུག་པའི་འདུ་ཤེས་དང་། སྐྱོན་དང་བཅས་པའི་འདུ་ཤེས་དང་། སྲོག་
ཆགས་ཀྱི་འདུ་ཤེས་དང་། འདོད་ཆགས་དང་བྲལ་བའི་འདུ་ཤེས་དང་། འགོག་པའི་འདུ་ཤེས་དང་། འཇིག་རྟེན་ཐམས་ཅད་ལ་མངོན་པར་དགའ་བ་མ་ཡིན་པའི་འདུ་ཤེས་དང་། འདུ་བྱེད་ཐམས་ཅད་ལ་མངོན་པར་མི་དགའ་བའི་འདུ་ཤེས་དང་། དབུགས་ཕྱི་ནང་དུ་རྒྱུ་བའི་འདུ་ཤེས་དང་བཅུའོ། །
ཅི་ལྟར་བསྡུ་ཞེ་ན། བསྡུ་བ་རྣམ་པ་གསུམ་སྟེ། ཕུང་པོར་བསྡུ་བ་དང་། སྐྱེ་མཆེད་དུ་བསྡུ་བ་དང་། ཁམས་སུ་བསྡུ་བའོ། །དེ་ལ་སྡུག་བསྔལ་བདེན་པ་ནི་ཕུང་པོ་ལྔས་བསྡུས་པའོ། །ཀུན་འབྱུང་དང་ལམ་གྱི་བདེན་པ་ནི་འདུ་བྱེད་ཀྱི་ཕུང་པོས་བསྡུས་པའོ། །འགོག་པའི་བདེན་པ་ནི་ཕུང་

པོས་བསྡུས་པ་མ་ཡིན་པའོ། །སྡུག་བསྔལ་གྱི་བདེན་པ་ནི་སྐྱེ་མཆེད་བཅུ་གཉིས་ཀྱིས་བསྡུས་པའོ། །བདེན་པ་གསུམ་ནི་ཆོས་ཀྱི་སྐྱེ་མཆེད་ཀྱིས་བསྡུས་པའོ། །སྡུག་བསྔལ་གྱི་བདེན་པ་ནི་ཁམས་བཅོ་བརྒྱད་ཀྱིས་བསྡུས་པ་ཉིད་དོ། །བདེན་པ་གསུམ་ནི་ཆོས་ཀྱིས་
བསྡུས་པའོ། །གང་དེ་རྣམས་ཀྱིས་འཕགས་པའི་བདེན་པ་ལ་མཁས་པའི་ཤེས་པ་སྐྱེས་པ་ནི་འཕགས་པའི་བདེན་པ་ལ་མཁས་པ་ཞེས་བརྗོད་དོ། །འབྲས་བུ་སྙོམས་པར་འཇུག་པ་བརྗོད་པར་བྱ་སྟེ། མཚན་མའི་འདུ་བྱེད་ཐམས་ཅད་ལས་འདས་ཏེ། མྱ་ངན་ལས་འདས་པ་དམིགས་པར་
བྱས་ནས་རིགས་སྤྱོད་ཡེ་ཤེས་སྐྱེའོ། །དེ་ལ་དོན་གང་གིས་རིགས་སྤྱོད་ཅེ་ན། བརྗོད་པར་བྱ་སྟེ། སོ་སོ་སྐྱེ་བོའི་ཆོས་རྣམས་ཟིལ་གྱིས་གནོན་པས་རིགས་སྤྱོད་དོ། །རིགས་ནི་བརྗོད་པར་བྱ་སྟེ། མྱ་ངན་ལས་འདས་པ་སྟེ། དེ་དག་ཟ་བར་བྱེད་པས་རིགས་སྤྱོད་དོ། །ཆོས་མངོན་པ་ལས་གསུངས་པ། སྐྱེ་
བ་རྣམས་ཟིལ་གྱིས་གནོན་པ་འདི་ནི་རིགས་སྤྱོད་དོ། །མི་སྐྱེ་བ་ཟ་བ་འདི་ནི་རིགས་ཟའོ། །མཚན་མར་འཇུག་པ་རྣམས་ཟིལ་གྱིས་གནོན་པ་འདི་ནི་རིགས་ཟའོ། །མཚན་མར་འཇུག་པ་མ་ཡིན་པ་བགྲོད་པ་འདི་ནི་རིགས་ཟའོ། །དང་པོ་མྱ་ངན་ལས་འདས་པ་ཡིད་ལ་བྱེད་པ་དང་ལྡང་འཇུག་གི་ཤེས་རབ་ནི་
རིགས་སྤྱོད་ཡེ་ཤེས་སོ། །རིགས་ཟ་ཡེ་ཤེས་དེས་སྡུག་བསྔལ་ཡོངས་སུ་ཤེས་པར་བྱས། ཀུན་འབྱུང་སྤངས། འགོག་པ་མངོན་དུ་བྱས། ལམ་བསྒོམས་པས། བྱང་ཆུབ་ཀྱི་ཕྱོགས་ཀྱི་ཆོས་འཁོར་དང་བཅས་པ་ཐམས་ཅད་དང་ལྷན་ཅིག་ཏུ་རྒྱུན་དུ་ཞུགས་པའི་ལམ་ཤེས་པར་སྐྱེའོ། །དེའི་ཚེ་དེས་སྲིད་
པའི་མཐར་ཐུག་པ་འདུས་མ་བྱས་འཆི་མེད་ཀྱི་བདུད་རྩིའི་དབྱིངས་སུ་མཐོང་ངོ་། །མཐོང་བའི་སྐད་ཅིག་དེ་ལ་ཡེ་ཤེས་འདིས་སྔོན་མ་ཡིན་ཅིང་ཕྱིས་མ་ཡིན་པ་བདེན་པ་བཞི་མངོན་དུ་རྟོགས་སོ། །འདི་ལྟ་སྟེ། སྡུག་བསྔལ་ཡོངས་སུ་ཤེས་པའི་མངོན་པར་རྟོགས་པ་དང་། ཀུན་འབྱུང་སྤངས་པའི་
མངོན་པར་རྟོགས་པ་དང་། འགོག་པ་མངོན་དུ་བྱས་པའི་མངོན་པར་རྟོགས་པ་དང་། ལམ་བསྒོམས་པའི་མངོན་པར་རྟོགས་པའོ། །འདིར་གྲུ་དཔེར་བསྟན་པ་ནི། འདི་ལྟར། ཆུ་ལ་གྲུ་བསྐྱོད་པའི་སྐད་ཅིག་ལ་སྔོན་མ་ཡིན་ཕྱིས་མ་ཡིན་པའི་བྱ་བ་བཞི་བྱེད་དེ། འདི་ལྟར། ཚུ་རོལ་གྱི་འགྲམ་

འདོར་བ་དང་། ཆུ་བོ་གཅོད་པ་དང་། ཕ་རོལ་འགྲམ་ཐོབ་པ་དང་། སྣོད་རྣམས་བསྒྲོད་པའོ། །དེ་བཞིན་དུ་གྲངས་བཞིན་དུ། སྡུག་བསྔལ་ཡོངས་སུ་ཤེས་པའི་མངོན་རྟོགས་དང་། ཀུན་འབྱུང་སྤངས་པའི་མངོན་རྟོགས་དང་། འགོག་པ་མངོན་དུ་བྱས་པའི་མངོན་རྟོགས་དང་། ལམ་བསྒོམས་
པའི་མངོན་རྟོགས་སོ། །ཡང་སྒྲོན་མེའི་དཔེ་བསྟན་ཏེ་འདི་ལྟར། སྒྲོན་མེ་བྱུང་བའི་སྐད་ཅིག་ལ་ལྷན་ཅིག་ཏུ་སྔོན་མིན་གྱི་བྱ་བ་བཞི་བྱེད་དེ་འདི་ལྟར། སྡོང་བུ་སྲེག་པ་དང་། མུན་པ་སེལ་བ་དང་། སྣུམ་ཟད་པ་དང་། སྣང་བ་སྟོན་པའོ། །དེ་ལྟར་གྲངས་བཞིན་དུ་སྡུག་བསྔལ་ལ་སོགས་པའི་
བདེན་པ་རྣམས་ཀྱིས་ངས་སུ་ཤེས་པའི་མངོན་པར་རྟོགས་པ་ལ་སོགས་པ་བཞིའོ། །ཡང་ཉི་མའི་དཔེ་བསྟན་ཏེ། འདི་ལྟར། ཉི་མ་ཤར་བའི་སྐད་ཅིག་དུ་སྔོན་མིན་ཕྱིས་མིན་གྱི་བྱ་བ་བཞི་བྱེད་དེ། འདི་ལྟར། གཟུགས་སུ་རྟོགས་པ་རྣམས་སྟོན་པ་དང་། མུན་པའི་རྣམ་པ་འཇོམས་པ་དང་།
བསིལ་བ་འགོག་པར་བྱེད་པ་དང་། སྣང་བ་སྟོན་པར་བྱེད་པའོ། །དེ་བཞིན་དུ་གྲངས་བཞིན་དུ་སྡུག་བསྔལ་ལ་སོགས་པ་བདེན་པ་རྣམས་ཀྱི་ཡོངས་སུ་ཤེས་པའི་མངོན་པར་རྟོགས་པ་ལ་སོགས་པ་བཞིའོ། །དེ་ལ་བདེན་པ་མངོན་པར་རྟོགས་པ་འདི་དོན་ཅི་ཞེ་ན། བརྗོད་པར་བྱ་སྟེ། འཕགས་
པའི་བདེན་པ་བཞི་པོ་རྣམས་སྐད་ཅིག་ལ་མཉམ་དུ་རྟོགས་པ་དེ་ནི་བདེན་པ་མངོན་པར་རྟོགས་པ་ཞེས་བརྗོད་དོ། །དེའི་དུས་སུ་ལམ་དེ་དང་ལྡན་པ་ལ། བདག་པོའི་དོན་གྱིས་དབང་པོ་རྣམས་ཡང་དག་པར་ངེས་པར་ཉེ་བར་ལྡན་པར་འགྱུར་རོ། །མི་སྐྱོད་པའི་དོན་གྱིས་སྟོབས་དང་། །ངེས་པར་
འབྱིན་པའི་དོན་གྱིས་བྱང་ཆུབ་ཡན་ལག་དང་། རྒྱུའི་དོན་གྱིས་ལམ་གྱི་ཡན་ལག་དང་། ཉེ་བར་གནས་པའི་དོན་གྱིས་དྲན་པ་ཉེ་བར་གཞག་པ་དང་། གཙོ་བོས་དོན་གྱིས་ཡང་དག་པའི་སྤོང་བ་དང་། འབྱོར་པའི་དོན་གྱིས་རྫུ་འཕྲུལ་རྐང་པ་དང་། དེ་ལྟ་བུའི་དོན་གྱིས་བདེན་པ་དང་། གཡེང་བ་མེད་པའི་
དོན་གྱིས་ཞི་གནས་དང་། རྗེས་སུ་མཐོང་བའི་དོན་གྱིས་ལྷག་མཐོང་དང་། དེ་དག་ལས་མི་འདའ་བས་ཟུང་དུ་འཇུག་པའོ། །སྡོམ་པ་ཡིན་པའི་དོན་གྱིས་ཚུལ་ཁྲིམས་རྣམ་པར་དག་པ་དང་། མི་གཡེང་བའི་དོན་གྱིས་སེམས་རྣམ་པར་དག་པ་དང་། མཐོང་བའི་དོན་གྱིས་ལྟ་བ་རྣམ་པར་དག་པ་དང་།

གྲོལ་བའི་དོན་གྱིས་རྣམ་པར་ཐར་པ་དང་། མངོན་དུ་བྱེད་པའི་དོན་གྱིས་རེག་པ་དང་། ཡོངས་སུ་བཏང་བའི་དོན་གྱིས་དམ་པར་གྲོལ་བ་དང་། ཀུན་དུ་ཆུད་པའི་དོན་གྱིས་ཟད་པ་ཤེས་པ་དང་། རྩ་བ་ཡིན་པའི་དོན་གྱིས་འདུན་པ་དང་། ཀུན་ནས་ལྡང་བའི་དོན་གྱིས་ཡིད་
ལ་བྱེད་པ་དང་། ཡང་དག་པར་ཕྲད་པའི་དོན་གྱིས་རེག་པ་དང་། ཡང་དག་པར་གཞོལ་བའི་དོན་གྱིས་ཚོར་བ་དང་། མངོན་དུ་ཕྱོགས་པའི་དོན་གྱིས་ཏིང་ངེ་འཛིན་དང་། བདག་པོའི་དོན་གྱིས་དྲན་པ་དང་། བར་མེད་པའི་དོན་གྱིས་ཤེས་རབ་དང་། མཐར་ཕྱིན་པའི་དོན་གྱིས་བདུད་རྩིར་ཞུགས་པའོ། །
འགོག་པ་དང་མྱ་ངན་ལས་འདས་པ་ཡང་དག་པ་ངེས་པ་ཞེས་པར་ལྡན་པར་འགྱུར་རོ། །དེས་དེ་ལྟར་ཤེས་ཤིང་དེ་ལྟར་མཐོང་བ་ན། ཀུན་དུ་སྦྱོར་བ་གསུམ་རབ་ཏུ་སྤོང་བར་འགྱུར་ཏེ། འདི་ལྟར། འཇིག་ཚོགས་ལ་ལྟ་བ་དང་། ཐེ་ཚོམ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་
པའོ། །དེ་དང་གཅིག་ཏུ་གནས་པའི་ཉོན་མོངས་པའོ། །དེ་ལ་འཇིག་ཚོགས་ལ་ལྟ་བ་ནི། འདིར་ཐོས་པ་དང་མི་ལྡན་པའི་སོ་སོ་སྐྱེ་བོས། གཟུགས་ནི་བདག་དུ་ཡང་དག་པར་རྗེས་སུ་ལྟ་བ་དང་། བདག་ནི་གཟུགས་དང་ལྡན་པ་དང་། གཟུགས་ལ་བདག་ཡོད་པའོ། །དེ་བཞིན་དུ་ཚོར་བ་དང་། འདུ་
ཤེས་དང་། འདུ་བྱེད་དང་། རྣམ་པར་ཤེས་པ་ནི་བདག་དུ་ཡང་དག་པར་རྗེས་སུ་ལྟ་བ་དང་། བདག་ནི་རྣམ་པར་ཤེས་པ་དང་ལྡན་པ་དང་། བདག་ལ་རྣམ་པར་ཤེས་པ་ཡོད་པ་དང་། རྣམ་པར་ཤེས་པ་ལ་བདག་ཡོད་པ་ཡང་དག་པར་རྗེས་སུ་ལྟ་བ་འདི་ནི་འཇིག་ཚོགས་ལ་ལྟ་བ་ཞེས་བརྗོད་དོ། །དེ་
འདིས་སྤོང་བར་བྱེད་དོ། །དེ་སྤངས་པ་ལས་འཇིག་ཚོགས་ལ་ལྟ་བ་ལ་སོགས་པའི་ལྟ་བར་གཏོགས་པ་དྲུག་ཅུ་རྩ་གཉིས་སྤོང་བར་འགྱུར་རོ། །སྡུག་བསྔལ་ལམ་ཀུན་འབྱུང་ངམ་འགོག་པ་འམ་ལམ་མམ་སངས་རྒྱས་སམ་ཆོས་སམ། དགེ་འདུན་ནམ་སྔོན་གྱི་མཐའ་འམ་ཕྱི་མའི་མཐའ་རྐྱེན་
འདི་ལས་རྟེན་ཅིང་འབྲེལ་པར་འབྱུང་བའི་ཆོས་ལ་ཐེ་ཚོམ་ཟ་བ་སྟེ། མཐའ་གཅིག་ཏུ་མ་ངེས་པའོ། །འདི་ནི་ཐེ་ཚོམ་ཞེས་བརྗོད་དེ། འདི་ཡང་སྤོང་བར་འགྱུར་རོ། །ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་ཉིད་དོ། འདི་ལྟར། སྲེད་པ་དང་ལྡན་པར་གྱུར་པ་དང་། རྨོངས་པ་དང་ལྡན་པར་གྱུར་

པའོ། །དེ་ལ་བདག་གིས་ཚུལ་ཁྲིམས་སམ་བརྟུལ་ཞུགས་སམ་དཀའ་ཐུབ་བམ་ཚངས་པར་སྤྱོད་པས་ལྷ་གཞན་གང་ཡང་རུང་བར་འགྱུར་བར་བྱའོ་ཞེས་པ་འདི་ནི་སྲེད་པ་དང་ལྡན་པའི་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའོ། །འདི་ལས་ཕྱི་རོལ་དུ་གྱུར་པ་ནི། དགེ་སྦྱོང་ངམ་བྲམ་ཟེ་
རྣམས་ཀྱིས། ཚུལ་ཁྲིམས་ཀྱི་དག་པའམ། བརྟུལ་ཞུགས་ཀྱི་དག་པའམ་ཚུལ་ཁྲིམས་དང་བརྟུལ་ཞུགས་ཀྱི་དག་པའོ་ཞེས་གང་དེ་ལྟ་བུའི་ཚུལ་གྱིས་ལྟ་བ་མཆོག་ཏུ་འཛིན་པ་འདི་ནི་རྨོངས་པའི་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའོ། །དེ་འདིས་སྤོང་བར་འགྱུར་རོ། །ངན་སོང་དུ་
འགྲོ་བར་འགྱུར་བའི་འདོད་ཆགས་དང་། ཞེ་སྡང་དང་གཏི་མུག་ནི་དེ་དང་གཅིག་ཏུ་གནས་པའི་ཉོན་མོངས་པ་ཞེས་བརྗོད་དོ། །དེ་འདིས་སྤོང་བར་འགྱུར་རོ། །དེ་འདི་སྲིད་དུ་རྒྱུན་དུ་ཞུགས་པའི་འབྲས་བུ་མངོན་དུ་བྱ་བའི་ཕྱིར་ཆེད་དུ་ཞུགས་པ་ཡིན་གྱི། དེ་སྲིད་དུ་རྒྱུན་དུ་ཞུགས་པ་ནི་མ་ཡིན་ནོ། །
ཆེད་དུ་ཞུགས་པའི་སའམ། བརྒྱད་པའི་སའམ། མཐོང་བའི་སའམ། ངེས་པར་གྱུར་པའམ་གཉི་ག་ལ་ལྡང་ཞིང་འཇུག་པའི་ཤེས་རབ་བམ་རྒྱུན་དུ་ཞུགས་པའི་ལམ་ཤེས་པ་སྟེ། དེ་རྣམས་ནི་མིང་གི་རྣམ་གྲངས་ཀྱི་ཚིག་གོ། །རྒྱུན་དུ་ཞུགས་པའི་ལམ་གྱི་དེ་མ་ཐག་ཏུ་ལམ་དང་མཚུངས་པའི་
ཆོས་དང་མི་ལྡན་པར་འདུས་མ་བྱས་ལ་དམིགས་པ་བྱས་ཏེ། རྒྱུན་དུ་ཞུགས་པའི་འབྲས་བུ་ཤེས་པ་སྐྱེ་བར་འགྱུར་ཏེ། འབྲས་བུ་སེམས་གཉིས་སམ་གསུམ་མམ་བར་མེད་པར་འཇུག་པའི་ཕྱིར་དང་། ཀུན་དུ་སྦྱོར་བ་གསུམ་རྣམས་སྤངས་པའི་ཕྱིར་རོ། །དེ་ནས་བར་མེད་པར་སྲིད་པའི་ཡན་ལག་ཏུ་
འཕོའོ། །སྲིད་པའི་ཡན་ལག་ལས་ལངས་ཏེ་ལམ་ལ་སོ་སོར་རྟོག་གོ། །འབྲས་བུ་ལ་སོ་སོར་རྟོག་པར་བྱེད་དོ། །མྱ་ངན་ལས་འདས་པ་ལ་སོ་སོར་རྟོག་གོ། །སྤངས་པའི་ཉོན་མོངས་པ་ལ་སོ་སོར་རྟོག་གོ། །ལྷག་མའི་ཉོན་མོངས་པ་ལ་སོ་སོར་རྟོག་གོ། །དེ་ལ་ནི་རྒྱུན་དུ་ཞུགས་པ་ཞེས་བརྗོད་དོ། །
ངན་འགྲོ་མེད་པའི་ཆོས་དང་། རྫོགས་པའི་བྱང་ཆུབ་ལ་ངེས་པར་གཞོལ་བ་དང་། མངོན་པར་རྟོགས་པ་དང་ལྡན་པའི་འབྲས་བུ་འོངས་པ་དང་། བཅོམ་ལྡན་འདས་ཀྱི་ཐུགས་ཀྱི་སྲས་དང་། ཞལ་ལས་སྐྱེས་པ་དང་། ཆོས་ལས་སྐྱེས་པ་དང་། ཆོས་ཀྱི་སྤྲུལ་པ་དང་། ཆོས་ཀྱི་བགོ་སྐལ་ལ་དབང་བ་དང་། ཟང་

ཟིང་གི་བགོ་སྐལ་ལ་མི་དབང་བ་དང་། དེ་ལ་ནི་ལྟ་བ་ཕུན་སུམ་ཚོགས་པ་ཞེས་ཀྱང་བྱའོ། །མཐོང་བ་ལ་ཡང་དག་པར་ཞུགས་པ་ཡང་ངོ་། །ཆོས་འདི་ཆུབ་པ་དང་ཆོས་ཀྱི་མཐོང་བ་དང་། སློབ་པའི་ཡེ་ཤེས་དང་ཡང་དག་པར་ལྡན་པ་ཞེས་ཀྱང་ངོ་། །སློབ་པའི་རིག་པ་དང་ཡང་
དག་པར་ལྡན་པ་ཞེས་ཀྱང་ངོ་། །ཆོས་ཀྱི་སྲོལ་དུ་ཡང་དག་པར་ཞུགས་པ་དང་། འཕགས་པ་དང་། ངེས་པར་འབྱེད་པ་དང་། ཤེས་རབ་དང་། བདུད་རྩིའི་སྒོ་ཀུན་དུ་བསྒྲུབས་ཏེ་གནས་པ་དང་། དེས་ན་བརྗོད་པར་བྱ་སྟེ། རང་ཉིད་ས་སྟེང་རྒྱལ་པོའམ། །བདེ་འགྲོར་བདག་ཉིད་བགྲོད་ཕྱིར་རམ། །
འཇིག་རྟེན་ཀུན་གྱི་བདག་པོའི་ཕྱིར། །རྒྱུན་དུ་ཞུགས་པའི་འབྲས་བུ་མཆོག །ཅེས་སོ། །ས་དེ་ལ་གནས་པ་དེ། ལན་ཅིག་ཕྱིར་འོང་བའི་འབྲས་བུ་མངོན་དུ་བྱ་བའི་ཕྱིར། གོང་མ་ལ་མངོན་པར་སྒྲུབ་པར་བྱེད། སྐྱེ་བ་དང་འགག་པ་ལ་རྗེས་སུ་ལྟ་བ་དང་པོར་བྱས་ཏེ། བསྟན་པའི་ཚུལ་བཞིན་དུ་ལྟའོ། །
ཅི་ལྟར་མཐོང་བའི་དབང་པོ་སྟོབས། །བྱང་ཆུབ་ཡན་ལག་རྣམས་ཡང་དག་པར་བླངས་པ་དང་། དེ་བཞིན་དུ་བདེན་པ་མངོན་པར་རྟོགས་པའི་ལམ་རྣམས་སྒོམ་པར་བྱེད་དོ། །དེ་ལྟར་ཆེད་དུ་ཞུགས་པ་དེའི་འདོད་པ་རགས་པ་འདོད་ཆགས་དང་། གནོད་སེམས་དང་དེ་དང་ལྷན་ཅིག་པའི་ཉོན་མོངས་པ་
རྣམས་སྤོང་བར་འགྱུར་རོ། །ལམ་གྱི་དེ་མ་ཐག་ཏུ་ལན་ཅིག་ཕྱིར་འོང་བའི་འབྲས་བུ་མངོན་དུ་བྱེད་དོ། །ས་དེ་ལ་གནས་ཏེ་ཕྱིར་མི་འོང་བའི་འབྲས་བུ་མངོན་དུ་བྱ་བའི་ཕྱིར་གོང་མ་ལ་མངོན་པར་སྒྲུབ་པར་བྱེད་དོ། །སྐྱེ་འགག་ལ་རྗེས་སུ་ལྟ་བ་དང་པོར་བྱས་ཏེ། བསྟན་པའི་ཚུལ་བཞིན་དུ་ལྟའོ། །
ཅི་ལྟར་མཐོང་བའི་དབང་པོ་དང་སྟོབས་དང་བྱང་ཆུབ་ཡན་ལག་རྣམས་ཡང་དག་པར་བླངས་ཏེ། དེ་བཞིན་དུ་བདེན་པ་མངོན་པར་རྟོགས་པའི་ལམ་རྣམས་སྒོམ་པར་བྱེད་དོ། །འདོད་པའི་ཕྲ་མོ་དང་ལྡན་པའི་འདོད་ཆགས་དང་གནོད་སེམས་དང་། དེ་དང་གཅིག་ཏུ་གནས་པའི་ཉོན་མོངས་པ་རྣམས་
སྤོང་བར་འགྱུར་རོ། །དེ་ནས་ལམ་དེའི་དེ་མ་ཐག་ཏུ་ཕྱིར་མི་འོང་བའི་འབྲས་བུ་མངོན་དུ་བྱེད་དོ། །ས་དེ་ལ་གནས་པ་དེ་དགྲ་བཅོམ་པའི་འབྲས་བུ་མངོན་དུ་བྱ་བའི་ཕྱིར་གོང་མ་ལས་མངོན་པར་སྒྲུབ་པར་བྱེད་དོ། །སྐྱེ་འགག་ལ་རྗེས་སུ་ལྟ་བ་དང་པོར་བྱས་ཏེ། བསྟན་པའི་ཚུལ་བཞིན་དུ་རྣམ་པར་ལྟའོ། །

ཅི་ལྟར་མཐོང་བའི་དབང་པོ་དང་སྟོབས་དང་བྱང་ཆུབ་ཡན་ལག་དང་། དེ་བཞིན་དུ་བདེན་པ་མངོན་པར་རྟོགས་པ་རྣམས་ཡང་དག་པར་བླངས་ཏེ་ལམ་སྒོམ་པར་བྱེད་དོ། །དེ་ལྟར་ཆེད་དུ་ཞུགས་པ་དེའི་གཟུགས་ཀྱི་འདོད་ཆགས་དང་། གཟུགས་མེད་པའི་འདོད་ཆགས་དང་། ང་རྒྱལ་དང་རྒོད་པ་དང་། མ་
རིག་པ་དང་། ལྷག་མའི་ཉོན་མོངས་པ་རྣམས་ལྷག་མ་མ་ལུས་པར་སྤངས་ཏེ། དེ་ནས་ལམ་དེའི་དེ་མ་ཐག་ཏུ་དགྲ་བཅོམ་པ་ཉིད་མངོན་དུ་བྱེད་དོ། །ལམ་དེ་ལ་སོ་སོར་རྟོག་གོ། །འབྲས་བུ་དང་མྱ་ངན་ལས་འདས་པ་སྤངས་པའི་ཉོན་མོངས་པ་རྣམས་ལ་སོ་སོར་རྟོག་གོ། །དེ་ནི་དགེ་སློང་དགྲ་
བཅོམ་པ་ཟག་པ་ཟད་པ་ཚངས་སྤྱོད་དུ་གནས་པ་བྱེད་པ་བྱས་པ་ཁུར་བོར་བ་བདག་གི་དོན་རྗེས་སུ་ཐོབ་པ་ཀུན་དུ་སྦྱོར་བ་ཡོངས་སུ་ཟད་པ་ཡང་དག་པའི་ཀུན་ཤེས་པས་སེམས་ཤིན་ཏུ་རྣམ་པར་གྲོལ་བ་ཡན་ལག་ལྔ་རབ་ཏུ་སྤངས་པ། ཡན་ལག་དྲུག་དང་ཡང་དག་པར་ལྡན་པ། གཅིག་ཀུན་ཏུ་
སྲུང་བ། རྟེན་ཐ་མ་ལ་སོ་སོར་བདེན་པ་རབ་ཏུ་སྤངས་པ་འདོད་ཚོལ་ལ་ཡང་དག་པར་ཀུན་དུ་དོར་བ། ཀུན་དུ་རྟོག་པའི་རྙོག་པ་མེད་པ། ལུས་ཀྱི་འདུ་བྱེད་ཤིན་ཏུ་སྦྱངས་པ། སེམས་ཤིན་ཏུ་རྣམ་པར་གྲོལ་བ། ཤེས་རབ་ཤིན་ཏུ་རྣམ་པར་གྲོལ་བ། ཚངས་པར་སྤྱོད་པ་གཅིག་ཏུ་གནས་པ་དང་ལྡན་པ།
སྐྱེས་བུ་མཆོག་ཐོབ་པ་དམ་པ་ཐོབ་པར་གྱུར་པའོ། །དེ་ནི་ཡོངས་སུ་འཁྲུག་པ་སྤངས་པ་དང་། དབའ་ཀློང་འཁྲུགས་པ་ལ་ཡང་དག་པར་རྒལ་བ་དང་། བག་ཚ་བས་ཚོལ་བ་མེད་པ། སྒོ་གཏན་མེད་པ། འཕགས་པའི་རྒྱལ་མཚན་བསྒྲེངས་པ། ལོ་འདབ་ཀྱི་ཁུར་དང་མི་ལྡན་པ། བྲམ་ཟེ་དག་བྱེད།
རིག་བྱེད་པ་གཙང་མ་མཆོད་འོས་རྒལ་པ་དུལ་བ། གྲོལ་བ། ཞི་བ་ཞེས་ཀྱང་བྱའོ། །དེ་ལ་གང་གི་ཚེ་ཡང་རྒྱུན་དུ་ཞུགས་པ་དེའི་རིགས་ཀྱིས། གོང་མ་ལ་འབད་པ་བྱེད་པར་མི་འགྱུར་བ། དེ་ནི་རྣམ་པ་གསུམ་གྱི་མཐའ་རྗེས་སུ་ཐོབ་པོ། །དེ་ལྟར་ཡང་། རྒྱུན་དུ་ཞུགས་པ་ནི་གསུམ་ཡིན་ཏེ། འདི་ལྟར།
དབང་པོ་རྟུལ་པོ། །རེ་ལྟར་ཐོགས་ན་ལན་བདུན་པར་འགྱུར་བ་དང་། དབང་པོ་འབྲིང་། རིགས་ནས་རིགས་སུ་འགྱུར་བ་དང་། དབང་པོ་རྣོན་པོ། བར་ཆད་གཅིག་པུ་པར་འགྱུར་བའོ། །ཡང་གང་གི་ཚེ་ལན་ཅིག་ཕྱིར་འོང་བ་དེའི་རིགས་ཀྱིས་གོང་མ་ལ་འབད་པར་བྱེད་པར་མི་འགྱུར་ན། འདི་

ནས་འཕོས་ཏེ། མིའི་ནང་འདིར་ལན་ཅིག་འོངས་ནས་སྡུག་བསྔལ་མཐར་བྱེད་པར་འགྱུར་རོ། །ཡང་གང་གི་ཚེ་ཕྱིར་མི་འོང་བ་དེའི་རིགས་ཀྱིས་གོང་མ་ལ་འབད་པར་བྱེད་པར་མི་འགྱུར་ན། འདི་ནས་འཕོས་ན་ས་གཙང་མའི་གནས་སུ་སྐྱེ་བར་འགྱུར་ཏེ། དེ་དེར་དབང་
པོའི་བྱེ་བྲག་གིས་མཐར་ཐུག་པ་རྗེས་སུ་ཐོབ་པ་རྣམ་པ་ལྔར་འགྱུར་རོ། །ཕྱིར་མི་འོང་བ་ལྔ་ནི་འདི་ལྟར། བར་དོར་མྱ་ངན་ལས་འདས་པ་དང་། སྐྱེས་ནས་ཡོངས་སུ་མྱ་ངན་ལས་འདས་པ་དང་། འདུ་བྱེད་མེད་པར་ཡོངས་སུ་མྱ་ངན་ལས་འདས་པ་དང་། འདུ་བྱེད་དང་བཅས་པར་ཡོངས་སུ་མྱ་ངན་
ལས་འདས་པ་དང་། གོང་དུ་འཕོ་བ་སྟེ་འོག་མིན་དུ་འགྲོ་བའོ། །ཕྱིར་མི་འོང་བ་ལྔ་པོ་འདི་ནི། མི་ཆེ་བ་ལ་སོགས་པའི་ས་གཞི་ལ་ལྔ་ལྔ་སྟེ་ཉི་ཤུའོ། །འོག་མིན་དུ་གོང་དུ་འཕོ་བ་མེད་པས་ཕྱིར་མི་འོང་བ་བཞིའོ། །དེས་ན་ཕྱིར་མི་འོང་བ་ཉི་ཤུ་ཉེར་བཞིར་འགྱུར་རོ། །དགྲ་བཅོམ་པ་ནི། ཉོན་མོངས་པ་
ཐམས་ཅད་མ་ལུས་པ་ཡང་དག་པར་བཅད་པའི་ཕྱིར། ཡང་སྲིད་མེད་པ་ཉིད་དེ་རྒྱུ་མེད་པའི་ཕྱིར་རོ། །དགྲ་བཅོམ་པ་ནི་ཚེའི་དུས་ཅི་སྲིད་པར་གནས་ཤིང་། ཚེའི་འདུ་བྱེད་ཡོངས་སུ་ཟད་ནས་འདི་ཉིད་སྡུག་བསྔལ་འགགས་ཏེ། གཞན་དུ་སྐྱེ་བ་མེད་དོ། །འདི་ཉིད་ལ་སྡུག་བསྔལ་གྱི་མཐའ་ཞེས་བྱའོ། །
དེས་ན་བརྗོད་དེ། རིགས་ཀྱི་ཚོར་བས་འབར་བ་ཡི། །ལྕགས་ཀྱི་གོང་བུ་ཉམས་པ་ཉིད། །རིམ་གྱིས་ཉེ་བར་ཞི་འགྱུར་གྱི། །འགྲོ་བ་ཤེས་པར་བྱ་མིན་ལྟར། །དེ་བཞིན་འདོད་པའི་འདམ་ཀླུང་ལ། །བགལ་ཞིང་ཡང་དག་རྣམ་གྲོལ་གྱི། །མི་གཡོ་གོ་འཕང་ཐོབ་རྣམས་ཀྱིས། །གཤེགས་པ་གདུགས་སུ་
ངེས་པར་མེད། །དེའི་ཕྱིར། འཕགས་པའི་ས་ལ་གཉིས་ཏེ། དེ་ལ་མཐོང་བའི་ས་ནི་རྒྱུན་དུ་ཞུགས་པའི་འབྲས་བུའི་ལམ་མོ། །ལྷག་མ་ལམ་གསུམ་དང་དགེ་སྦྱོང་གི་འབྲས་བུ་བཞི་ནི་བསྒོམ་པའི་ལམ་མོ། །དེ་ལ་ལམ་གསུམ་ནི། འདི་ལྟར། ལན་ཅིག་ཕྱིར་འོང་བའི་འབྲས་བུའི་ལམ་དང་། ཕྱིར་མི་
འོང་བའི་འབྲས་བུའི་ལམ་དང་། དགྲ་བཅོམ་པའི་འབྲས་བུའི་ལམ་མོ། །དགེ་སྦྱོང་གི་འབྲས་བུ་བཞི་ནི་འདི་ལྟར། རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། དགྲ་བཅོམ་པའི་འབྲས་བུའོ། །དེ་ལ་སྔོན་མ་མཐོང་བའི་བདེན་པ་མཐོང་བ་མཐོང་

བའི་ས་དང་། ཅི་ལྟར་མཐོང་བ་དེ་ལྟར་བསྒོམས་པས་བསྒོམ་པའི་སའོ། །ཡང་ས་གཉིས་ཏེ་འདི་ལྟར། སློབ་པའི་ས་དང་། མི་སློབ་པའི་སའོ། །དེ་ལ་ལམ་བཞི་དང་དགེ་སྦྱོང་གི་འབྲས་བུ་གསུམ་ནི་སློབ་པའི་སའོ། །དེ་ལ་ལམ་བཞི་ནི་འདི་ལྟར། རྒྱུན་དུ་ཞུགས་པའི་འབྲས་བུའི་ལམ་དང་།
ལན་ཅིག་ཕྱིར་འོང་བའི་འབྲས་བུའི་ལམ་དང་། ཕྱིར་མི་འོང་བའི་འབྲས་བུའི་ལམ་དང་། དགྲ་བཅོམ་པའི་འབྲས་བུའི་ལམ་མོ། །དགེ་སྦྱོང་གི་འབྲས་བུ་གསུམ་ནི་རྒྱུན་དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བ་དང་། ཕྱིར་མི་འོང་བའོ། །དགྲ་བཅོམ་པའི་འབྲས་བུ་ནི་མི་
སློབ་པའི་སའོ། །འཇིག་རྟེན་ལས་འདས་པའི་དབང་པོ་གསུམ་ནི་འདི་ལྟར། མི་ཤེས་པ་ཀུན་ཤེས་པར་འགྱུར་བའི་དབང་པོ་དང་། ཀུན་ཤེས་པའི་དབང་པོ་དང་། ཀུན་ཤེས་པ་ཉིད་ཀྱི་དབང་པོའོ། །དེ་ལ་རྒྱུན་དུ་ཞུགས་པའི་འབྲས་བུའི་ལམ་ཤེས་པ་ནི། སྔོན་མ་ཤེས་པའི་ཆོས་ཤེས་པས་མི་
ཤེས་པ་ཀུན་ཤེས་པའི་དབང་པོའོ། །ལམ་གསུམ་གྱི་ཡེ་ཤེས་དང་། དགེ་སྦྱོང་གི་འབྲས་བུ་གསུམ་གྱི་ཡེ་ཤེས་ནི་ཀུན་ཤེས་པའི་དབང་པོ་སྟེ། ཤེས་པའི་ཆོས་རྣམས་ཤེས་པའི་ཕྱིར་རོ། །དགྲ་བཅོམ་པའི་ཡེ་ཤེས་ནི། ཆོས་རྣམས་ལྷག་མ་མེད་པར་ཤེས་པས་ཀུན་ཤེས་པ་ཉིད་ཀྱི་དབང་པོའོ། །
རྣམ་པར་གྲོལ་བ་ནི་གསུམ་སྟེ། འདི་ལྟར། མཚན་མ་མེད་པ་རྣམ་པར་ཐར་པའི་སྒོ་དང་། སྨོན་པ་མེད་པ་རྣམ་པར་ཐར་པའི་སྒོ་དང་། སྟོང་པ་ཉིད་རྣམ་པར་ཐར་པའི་སྒོའོ། །དེ་ལ་ལམ་དང་ཡང་དག་པར་ལྡན་པའི་ཤེས་པས་མཚན་མར་མི་བྱེད་པས་མཚན་མར་མི་བྱེད་པ་ནི་མཚན་མ་མེད་པའི་རྣམ་
པར་ཐར་པའི་སྒོའོ། །སྨོན་པ་མི་བྱེད་པ་ནི་སྨོན་པ་མེད་པ་རྣམ་པར་ཐར་པའི་སྒོའོ། །མངོན་པར་ཞེན་པ་མི་བྱེད་པ་ནི་སྟོང་པ་ཉིད་རྣམ་པར་ཐར་པའི་སྒོའོ། །རྣམ་པར་ཐར་པའི་དང་རྣམ་པར་ཐར་པའི་སྒོ་དག་ཐ་དད་པའི་རྒྱུ་ཅི་ཞེ་ན། བརྗོད་པར་བྱ་སྟེ། ལམ་ཤེས་པ་དེ་ཉིད་ཉོན་མོངས་པ་ལས་རྣམ་
པར་གྲོལ་བ་ནི་རྣམ་པར་ཐར་པའོ། །ཡེ་ཤེས་དེ་ཉིད་བདུད་རྩིའི་སྒོར་གྱུར་པའི་དོན་གྱིས་རྣམ་པར་ཐར་པའི་སྒོའོ། །ལམ་གསུམ་གྱིས་ཉོན་མོངས་པ་ཉི་ཤུ་སྤོང་བར་འགྱུར་ཏེ། འདི་ལྟར། མི་དགེ་བའི་རྩ་བ་དང་། འདོད་ཚོལ་དང་། ཟག་པ་དང་། མདུད་པ་དང་། ཆུ་བོ་དང་། སྦྱོར་བ་དང་། ཉེ་

བར་ལེན་པ་དང་། འགྲོ་བ་མ་ཡིན་པར་བགྲོད་པ་དང་། སེར་སྣ་དང་། སྒྲིབ་པ་དང་། རྩོད་པའི་གཞི་དང་། བག་ལ་ཉལ་དང་། འཇིག་རྟེན་གྱི་ཆོས་དང་། ང་རྒྱལ་དང་། ཉོན་མོངས་པའི་དངོས་པོ་དང་། མི་དགེ་བ་དང་། ཀུན་དུ་སྦྱོར་བ་དང་། ལོག་པ་ཉིད་དང་། ཕྱིན་ཅི་
ལོག་དང་། མི་དགེ་བར་སེམས་བསྐྱེད་པའོ། །དེ་ལ་མི་དགེ་བའི་རྩ་བ་ལ་གསུམ་ནི་འདི་ལྟར། ཆགས་པ་དང་། ཞེ་སྡང་དང་། རྨོངས་པའོ། །འདི་རྣམས་ལ་གང་ཞེ་སྡང་ནི་ལམ་གཉིས་ཀྱིས་སྲབ་པར་བྱས་ཏེ། ཕྱིར་མི་འོང་བའི་ལམ་གྱིས་ལྷག་མ་མེད་པའི་སྤོང་བར་འགྱུར་རོ། །ཆགས་
པ་དང་གཏི་མུག་ནི་ལམ་གསུམ་གྱིས་སྲབ་པར་བྱས་ཏེ། དགྲ་བཅོམ་པའི་ལམ་གྱིས་ལྷག་མ་མེད་པར་སྤོང་བར་འགྱུར་རོ། །འདོད་ཚོལ་ལ་གསུམ་སྟེ་འདི་ལྟར། འདོད་པའི་ཚོལ་བ་དང་། སྲིད་པའི་ཚོལ་བ་དང་། ཚངས་པར་སྤྱོད་པའི་ཚོལ་བའོ། །དེ་ལ་ཚངས་པར་སྤྱོད་པའི་ཚོལ་བ་ནི།
རྒྱུན་དུ་ཞུགས་པའི་འབྲས་བུའི་ལམ་གྱིས་ལྷག་མ་མེད་པར་སྤོང་ངོ་། །འདོད་པའི་ཚོལ་བ་ནི་ཕྱིར་མི་འོང་བའི་ལམ་གྱིས་སོ། །སྲིད་པའི་ཚོལ་བ་ནི་དགྲ་བཅོམ་པའི་ལམ་གྱིས་སོ། །ཟག་པ་ལ་བཞི་སྟེ། འདི་ལྟར། འདོད་པའི་ཟག་པ་དང་། སྲིད་པའི་ཟག་པ་དང་། ལྟ་བའི་ཟག་པ་དང་། མ་རིག་པའི་
ཟག་པའོ། །དེ་ལ་ལྟ་བའི་ཟག་པ་ནི་རྒྱུན་དུ་ཞུགས་པའི་འབྲས་བུའི་ལམ་གྱིས་སྤོང་ངོ་། །འདོད་པའི་ཟག་པ་ནི། ཕྱིར་མི་འོང་བའི་ལམ་གྱིས་སོ། །སྲིད་པའི་ཟག་པ་དང་མ་རིག་པའི་ཟག་པ་ནི་དགྲ་བཅོམ་པའི་ལམ་གྱིས་སྤོང་ངོ་། །མདུད་པ་ནི་བཞི་སྟེ་འདི་ལྟར། བརྣབ་སེམས་ཀྱི་ཚོགས་ཀྱི་མདུད་པ་
དང་། གནོད་སེམས་ཀྱི་ཚོགས་ཀྱི་མདུད་པ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་ཚོགས་ཀྱི་མདུད་པ་དང་། འདི་ནི་བདེན་ཞེས་མངོན་པར་ཞེན་པའི་ཚོགས་ཀྱི་མདུད་པའོ། །འདི་རྣམས་ལ་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་ཚོགས་ཀྱི་མདུད་པ་དང་
འདི་ནི་བདེན་པ་ཞེས་མངོན་པར་ཞེན་པའི་ཚོགས་ཀྱི་མདུད་པ་ནི། རྒྱུན་དུ་ཞུགས་པའི་འབྲས་བུའི་ལམ་གྱིས་སྤོང་ངོ་། །གནོད་སེམས་ཚོགས་ཀྱི་མདུད་པ་ནི་ཕྱིར་མི་འོང་བའི་ལམ་གྱིས་སོ། །བརྣབ་སེམས་ཚོགས་ཀྱི་མདུད་པ་ནི་དགྲ་བཅོམ་པའི་ལམ་གྱིས་སྤོང་ངོ་། །ཆུ་བོ་ལ་བཞི་ནི་འདི་ལྟར།

འདོད་པའི་ཆུ་བོ་དང་། སྲིད་པའི་ཆུ་བོ་དང་། ལྟ་བའི་ཆུ་བོ་དང་། མ་རིག་པའི་ཆུ་བོའོ། །སྦྱོར་བ་ལ་བཞི་ནི། འདི་ལྟར་འདོད་པའི་སྦྱོར་བ་དང་། སྲིད་པའི་སྦྱོར་བ་དང་། ལྟ་བའི་སྦྱོར་བ་དང་། མ་རིག་པའི་སྦྱོར་བའོ། །འདི་རྣམས་ནི་ཟག་པ་བཞི་བཞིན་དུ་སྤོང་བའོ། །ཉེ་བར་ལེན་པ་བཞི་ནི་འདི་ལྟར།
འདོད་པའི་ཉེ་བར་ལེན་པ་དང་། ལྟ་བའི་ཉེ་བར་ལེན་པ་དང་། ཚུལ་ཁྲིམས་དང་བརྟུལ་ཞུགས་ཉེ་བར་ལེན་པ་དང་། བདག་ཏུ་སྨྲ་བའི་ཉེ་བར་ལེན་པའོ། །འདི་རྣམས་ལ་ཉེ་བར་ལེན་པ་གཉིས་ནི་རྒྱུན་དུ་ཞུགས་པའི་འབྲས་བུའི་ལམ་གྱིས་སྤོང་བའོ། །འདོད་པའི་ཉེ་བར་ལེན་པ་ནི་ཕྱིར་མི་འོང་བའི་
ལམ་གྱིས་སོ། །བདག་ཏུ་སྨྲ་བའི་ཉེ་བར་ལེན་པ་ནི་དགྲ་བཅོམ་པའི་ལམ་གྱིས་སོ། །འགྲོ་བ་མ་ཡིན་པར་བགྲོད་པ་ནི་བཞི་སྟེ། འདི་ལྟར། འདུན་པ་ལས་འགྲོ་བ་མ་ཡིན་པར་བགྲོད་པ་དང་། ཞེ་སྡང་ལས་འགྲོ་བ་མ་ཡིན་པར་བགྲོད་པ་དང་། འཇིགས་པ་ལས་འགྲོ་བ་མ་ཡིན་པར་བགྲོད་པ་དང་།
གཏི་མུག་ལས་འགྲོ་བ་མ་ཡིན་པར་བགྲོད་པའོ། །བཞི་ཀ་ཡང་རྒྱུན་དུ་ཞུགས་པའི་འབྲས་བུས་སྤོང་བའོ། །སེར་སྣ་ལ་ལྔ་ནི་འདི་ལྟ་སྟེ། གནས་ཀྱི་སེར་སྣ་དང་། རིགས་ཀྱི་སེར་སྣ་དང་། རྙེད་པའི་སེར་སྣ་དང་། བསྔགས་པའི་སེར་སྣ་དང་། ཆོས་ཀྱི་སེར་སྣའོ། །ཐམས་ཅད་ནི་ཕྱིར་མི་འོང་བའི་ལམ་
གྱིས་སྤོང་ངོ་། །སྒྲིབ་པ་ནི་ལྔ་སྟེ། འདི་ལྟར། འདོད་པ་ལ་འདུན་པ་དང་། གནོད་སེམས་དང་། རྨུགས་པ་དང་། གཉིད་དང་། རྒོད་འགྱོད་དང་། ཐེ་ཚོམ་མོ། །འདི་རྣམས་ལ། ཐེ་ཚོམ་ནི་རྒྱུན་དུ་ཞུགས་པའི་ལམ་གྱིས་སྤོང་བའོ། །འདོད་པ་ལ་འདུན་པ་དང་། གནོད་སེམས་དང་འགྱོད་པ་ནི་ཕྱིར་མི་འོང་བའི་
ལམ་གྱིས་རབ་ཏུ་སྤོང་ངོ་། །རྨུགས་པ་དང་གཉིད་དང་རྒོད་པ་ནི་དགྲ་བཅོམ་པའི་ལམ་གྱིས་སོ། །གཉིས་རྩོད་པའི་གཞི་ལ་དྲུག་སྟེ་འདི་ལྟར། ཁྲོ་བ་དང་། འཆབ་པ་དང་། ཕྲག་དོག་དང་། གཡོ་དང་། སྡིག་པའི་འདོད་པ་དང་། རང་ཉིད་ཀྱི་ལྟ་བ་མཆོག་ཏུ་འཛིན་པའོ། །འདི་རྣམས་ལ་གཡོ་དང་སྡིག་པ་
འདོད་པ་དང་རང་ཉིད་ཀྱི་ལྟ་བ་མཆོག་ཏུ་འཛིན་པ་ནི་རྒྱུན་དུ་ཞུགས་པའི་འབྲས་བུའི་ལམ་གྱིས་རབ་ཏུ་སྤོང་ངོ་། །ཁྲོ་བ་དང་འཆབ་པ་དང་། ཕྲག་དོག་ནི་ཕྱིར་མི་འོང་བའི་ལམ་གྱིས་རབ་ཏུ་སྤོང་ངོ་། །བག་ལ་ཉལ་བ་ལ་བདུན་ནི་འདི་ལྟར། འདོད་པའི་འདོད་ཆགས་བག་ལ་ཉལ་དང་། ཁོང་ཁྲོ་བག་ལ་ཉལ་དང་།

ང་རྒྱལ་བག་ལ་ཉལ་དང་། ལྟ་བ་བག་ལ་ཉལ་དང་། ཐེ་ཚོམ་བག་ལ་ཉལ་དང་། སྲིད་པའི་འདོད་ཆགས་བག་ལ་ཉལ་དང་། མ་རིག་པ་བག་ལ་ཉལ་ལོ། །འདི་རྣམས་ལ་ལྟ་བའི་བག་ལ་ཉལ་དང་ཐེ་ཚོམ་བག་ལ་ཉལ་ནི་རྒྱུན་དུ་ཞུགས་པའི་འབྲས་བུའི་ལམ་གྱིས་རབ་ཏུ་སྤོང་
བའོ། །འདོད་པའི་འདོད་ཆགས་བག་ལ་ཉལ་དང་ཁོང་ཁྲོ་བག་ལ་ཉལ་དག་ནི་ཕྱིར་མི་འོང་བའི་ལམ་གྱིས་རབ་ཏུ་སྤོང་བའོ། །ང་རྒྱལ་བག་ལ་ཉལ་དང་སྲིད་པའི་འདོད་ཆགས་བག་ལ་ཉལ་དང་མ་རིག་པ་བག་ལ་ཉལ་ནི་དགྲ་བཅོམ་པའི་ལམ་གྱིས་རབ་ཏུ་སྤོང་ངོ་། །འཇིག་རྟེན་ཆོས་བརྒྱད་ནི་འདི་ལྟ་
སྟེ། རྙེད་པ་དང་། མ་ཐོབ་པ་དང་། སྙན་པ་དང་། མི་སྙན་པ་དང་། སྨོད་པ་དང་། བསྟོད་པ་དང་། བདེ་བ་དང་། སྡུག་བསྔལ་ལོ། །འདི་རྣམས་ལ་མི་འདོད་པའི་དངོས་པོ་རྙེད་པ་ལ་སོགས་པ་ལ་ཞེ་སྡང་བ་ནི་ཕྱིར་མི་འོང་བའི་ལམ་གྱིས་སྤོང་བའོ། །འདོད་པའི་དངོས་པོ་རྙེད་པ་ལ་སོགས་པ་ལ་རྗེས་སུ་
ཆགས་པ་ནི་དགྲ་བཅོམ་པའི་ལམ་གྱིས་རབ་ཏུ་སྤོང་བའོ། །ང་རྒྱལ་ལ་དགུ་ནི་འདི་ལྟ་སྟེ། ང་ནི་མཆོག་ལས་ཀྱང་མཆོག་གོ་སྙམ་པའི་ང་རྒྱལ་དང་། ང་ནི་མཆོག་དང་འདྲ་བའོ་སྙམ་པའི་ང་རྒྱལ་དང་། ང་ནི་མཆོག་ལས་དམན་པའོ་སྙམ་པའི་ང་རྒྱལ་དང་། ང་ནི་མཉམ་པ་ལས་མཆོག་གོ་སྙམ་པའི་ང་
རྒྱལ་དང་། ང་ནི་མཉམ་པ་དང་མཉམ་པའོ་སྙམ་པའི་ང་རྒྱལ་དང་། ང་ནི་མཉམ་པ་ལས་དམན་པའོ་སྙམ་པའི་ང་རྒྱལ་དང་། ང་ནི་དམན་པ་ལས་མཆོག་གོ་སྙམ་པའི་ང་རྒྱལ་དང་། ང་ནི་དམན་པ་དང་མཉམ་མོ་སྙམ་པའི་ང་རྒྱལ་དང་། ང་ནི་དམན་པ་ལས་དམན་པའོ་སྙམ་པའི་ང་རྒྱལ་ལོ། །ང་རྒྱལ་
དགུ་ཆར་ཡང་དགྲ་བཅོམ་པའི་ལམ་གྱིས་རབ་ཏུ་སྤོང་ངོ་། །ཉོན་མོངས་པའི་དངོས་པོ་ལ་བཅུ་ནི་འདི་ལྟར། ཆགས་པ་དང་། ཞེ་སྡང་དང་། གཏི་མུག་དང་། ང་རྒྱལ་དང་། ལྟ་བ་དང་། ཐེ་ཚོམ་དང་། རྨུགས་པ་དང་། རྒོད་པ་དང་། ངོ་ཚ་མི་ཤེས་པ་དང་། ཁྲེལ་མེད་པའོ། །འདི་རྣམས་ལ་ལྟ་བ་དང་ཐེ་ཚོམ་
དག་རྒྱུན་དུ་ཞུགས་པའི་ལམ་གྱིས་རབ་ཏུ་སྤོང་ངོ་། །ཞེ་སྡང་ནི་ཕྱིར་མི་འོང་བའི་ལམ་གྱིས་སོ། །ལྷག་མ་བདུན་ནི་དགྲ་བཅོམ་པའི་ལམ་གྱིས་རབ་ཏུ་སྤོང་ངོ་། །མནར་སེམས་ཀྱི་དངོས་པོ་ནི་བཅུ་སྟེ་འདི་ལྟར། བདག་གིས་དོན་མེད་པ་སྤྱད་དོ་ཞེས་མནར་སེམས་སྐྱེ་བ་དང་། སྤྱོད་དོ་ཞེས་མནར་

སེམས་སྐྱེ་བ་དང་། སྤྱོད་པར་འགྱུར་རོ་ཞེས་མནར་སེམས་སྐྱེ་བ། དེ་བཞིན་དུ་བདག་གིས་མཛའ་སྡུག་གི་དོན་མ་ཡིན་པ་སྤྱད་དོ། །སྤྱོད་དོ། །སྤྱོད་པར་འགྱུར་རོ། །བདག་གིས་མི་མཛའ་མི་གཅུགས་པའི་དོན་སྤྱད་དོ། །སྤྱོད་དོ། །སྤྱོད་པར་འགྱུར་རོ། །གནས་མལ་ལ་ཡང་མནར་སེམས་སྐྱེ་བའོ། །
མནར་སེམས་དངོས་པོ་བཅུ་ཆར་ཡང་ཕྱིར་མི་འོང་བའི་ལམ་གྱིས་རབ་ཏུ་སྤོང་ངོ་། །མི་དགེ་བའི་ལས་བཅུ་ནི། འདི་ལྟར། སྲོག་གཅོད་པ་དང་། མ་བྱིན་པར་ལེན་པ་དང་། འདོད་པས་ལོག་པར་སྤྱོད་པ་དང་། བརྫུན་དུ་སྨྲ་བ་དང་། ཚིག་རྩུབ་པོ་དང་། དབྱེན་དང་། ངག་ཀྱལ་པ་དང་། བརྣབ་སེམས་
དང་། གནོད་སེམས་དང་། ལོག་པར་ལྟ་བའོ། །འདི་རྣམས་ལ་སྲོག་གཅོད་པ་དང་མ་བྱིན་པར་ལེན་པ་དང་། འདོད་པས་ལོག་པར་སྤྱོད་པ་དང་བརྫུན་དུ་སྨྲ་བ་དང་ལོག་པར་ལྟ་བ་རྣམས་ནི་རྒྱུན་དུ་ཞུགས་པའི་འབྲས་བུའི་ལམ་གྱིས་རབ་ཏུ་སྤོང་ངོ་། །རྩུབ་པོ་དང་། དབྱེན་དང་གནོད་སེམས་རྣམས་
ནི་ཕྱིར་མི་འོང་བའི་ལམ་གྱིས་སོ། །ངག་ཀྱལ་པ་དང་བརྣབ་སེམས་རྣམས་ནི་དགྲ་བཅོམ་པའི་ལམ་གྱིས་རབ་ཏུ་སྤོང་ངོ་། །ཀུན་དུ་སྦྱོར་བ་བཅུ་ནི། འདི་ལྟར། འདོད་ཆགས་དང་། ཁོང་ཁྲོ་དང་། ང་རྒྱལ་དང་། ལྟ་བ་དང་། ཐེ་ཚོམ་དང་། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པ་དང་། སྲིད་པའི་
འདོད་ཆགས་དང་། ཕྲག་དོག་དང་། སེར་སྣ་དང་། མ་རིག་པའོ། །འདི་རྣམས་ལ་ལྟ་བ་དང་ཐེ་ཚོམ་དང་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའི་ཀུན་དུ་སྦྱོར་བ་རྣམས་ནི་རྒྱུན་དུ་ཞུགས་པའི་ལམ་གྱིས་རབ་ཏུ་སྤོང་ངོ་། །འདོད་པའི་འདོད་ཆགས་དང་། ཁོང་ཁྲོ་དང་ཕྲག་དོག་དང་སེར་སྣ་
ཀུན་དུ་སྦྱོར་བ་རྣམས་ནི་ཕྱིར་མི་འོང་བའི་ལམ་གྱིས་སོ། །ང་རྒྱལ་དང་སྲིད་པའི་ཆགས་པ་མ་རིག་པའི་ཀུན་དུ་སྦྱོར་བ་རྣམས་ནི་དགྲ་བཅོམ་པའི་ལམ་གྱིས་སྤོང་ངོ་། །ལོག་པ་ཉིད་ནི་བཅུ་སྟེ། འདི་ལྟར། ལོག་པར་ལྟ་བ་དང་། ལོག་པར་ཀུན་དུ་རྟོག་པ་དང་། ལོག་པའི་ངག་དང་། ལོག་པའི་ལས་ཀྱི་
མཐའ་དང་། ལོག་པའི་འཚོ་བ་དང་། ལོག་པའི་རྩོལ་བ་དང་། ལོག་པའི་དྲན་པ་དང་། ལོག་པའི་ཏིང་ངེ་འཛིན་དང་། ལོག་པའི་ཡེ་ཤེས་དང་། ལོག་པའི་རྣམ་པར་གྲོལ་བའོ། །འདི་རྣམས་ལ་ལོག་པར་ལྟ་བ་དང་བརྫུན་དུ་སྨྲ་བའི་མཚན་ཉིད་ལོག་པའི་ངག་དང་ལོག་པའི་ལས་ཀྱི་མཐའ་དང་ལོག་པའི་འཚོ་བ་

དང་ལོག་པའི་ཡེ་ཤེས་དང་ལོག་པའི་རྣམ་པར་གྲོལ་བ་རྣམས་ནི་རྒྱུན་དུ་ཞུགས་པའི་ལམ་གྱིས་རབ་ཏུ་སྤོང་ངོ་། །ལོག་པའི་ཀུན་དུ་རྟོག་པ་དང་རྩུབ་པོ་དང་དབྱེན་གྱི་མཚན་ཉིད་ལོག་པའི་ངག་རྣམས་ནི་ཕྱིར་མི་འོང་བའི་ལམ་གྱིས་སོ། །ངག་ཀྱལ་པའི་མཚན་ཉིད་ལོག་པའི་ངག་
དང་ལོག་པའི་རྩོལ་བ་དང་ལོག་པའི་དྲན་པ་དང་ལོག་པའི་ཏིང་ངེ་འཛིན་ནི་དགྲ་བཅོམ་པའི་ལམ་གྱིས་རབ་ཏུ་སྤོང་ངོ་། །ཕྱིན་ཅི་ལོག་ལ་བཅུ་གཉིས་ནི་འདི་ལྟར། མི་རྟག་པ་ལ་རྟག་གོ་ཞེས་པའི་འདུ་ཤེས་ཕྱིན་ཅི་ལོག་དང་། སེམས་ཕྱིན་ཅི་ལོག་དང་། ལྟ་བ་ཕྱིན་ཅི་ལོག་དང་། དེ་ལྟར་སྡུག་བསྔལ་
ལ་བདེ་བའོ་ཞེས་འདུ་ཤེས་ཕྱིན་ཅི་ལོག་དང་། སེམས་ཕྱིན་ཅི་ལོག་དང་། ལྟ་བ་ཕྱིན་ཅི་ལོག་དང་། མི་སྡུག་པ་ལ་མཛེས་པའོ་ཞེས་འདུ་ཤེས་ཕྱིན་ཅི་ལོག་དང་། སེམས་ཕྱིན་ཅི་ལོག་དང་། ལྟ་བ་ཕྱིན་ཅི་ལོག་དང་། བདག་མེད་པ་ལ་བདག་གོ་ཞེས་པ་འདུ་ཤེས་ཕྱིན་ཅི་ལོག་དང་། སེམས་ཕྱིན་ཅི་
ལོག་དང་། ལྟ་བ་ཕྱིན་ཅི་ལོག་གོ། །འདི་རྣམས་ལ་མི་རྟག་པ་ལ་རྟག་པ་ཞེས་པའི་ཕྱིན་ཅི་ལོག་གསུམ་དང་། མི་སྡུག་པ་ལ་སྡུག་པ་ཞེས་ལྟ་བ་ཕྱིན་ཅི་ལོག་དང་། སྡུག་བསྔལ་ལ་བདེ་བ་ཞེས་ལྟ་བ་ཕྱིན་ཅི་ལོག་དང་། བདག་མེད་པ་ལ་བདག་གོ་ཞེས་ལྟ་བ་ཕྱིན་ཅི་ལོག་རྣམས་ནི་རྒྱུན་དུ་ཞུགས་
པའི་ལམ་གྱིས་སྤོང་ངོ་། །མི་སྡུག་པ་ལ་སྡུག་པར་འདུ་ཤེས་པ་དང་སེམས་ཕྱིན་ཅི་ལོག་པ་ནི་ཕྱིར་མི་འོང་བའི་ལམ་གྱིས་སོ། །སྡུག་བསྔལ་ལ་བདེ་བ་ཞེས་འདུ་ཤེས་ཕྱིན་ཅི་ལོག་དང་སེམས་ཕྱིན་ཅི་ལོག་དང་། བདག་མེད་པ་ལ་བདག་གོ་ཞེས་འདུ་ཤེས་ཕྱིན་ཅི་ལོག་དང་སེམས་ཕྱིན་ཅི་ལོག་
རྣམས་ནི་དགྲ་བཅོམ་པའི་ལམ་གྱིས་རབ་ཏུ་ཟད་པར་བྱེད་དོ། །མི་དགེ་བའི་སེམས་བསྐྱེད་པ་ནི་བཅུ་གཉིས་ཏེ། འདི་ལྟར། ཡིད་བདེ་བ་དང་ལྡན་ཞིང་ལྟ་བར་འགྱུར་བ་དང་ལྡན་པ་འདུ་བྱེད་ལས་བྱུང་བ་མ་ཡིན་པའི་སེམས་བསྐྱེད་པ་དང་། འདུ་བྱེད་དང་། བཅས་པ་ལས་བྱུང་བའི་སེམས་བསྐྱེད་པ་
དང་། ཡིད་བདེ་བ་དང་ལྡན་ཞིང་ལྟ་བར་གྱུར་པ་དང་མི་ལྡན་པ་འདུ་བྱེད་ལས་བྱུང་བ་མ་ཡིན་པའི་སེམས་བསྐྱེད་པ་དང་། འདུ་བྱེད་དང་བཅས་པ་ལས་བྱུང་བའི་སེམས་བསྐྱེད་པ་དང་། བཏང་སྙོམས་དང་ལྡན་ཅིང་ལྟ་བར་རྟོགས་པ་དང་ལྡན་པ་འདུ་བྱེད་ལས་བྱུང་བ་མ་ཡིན་པའི་སེམས་བསྐྱེད་པ་དང་།

འདུ་བྱེད་ལས་བྱུང་བའི་སེམས་བསྐྱེད་པ་དང་། བཏང་སྙོམས་དང་ལྡན་པ་ལྟ་བར་གྱུར་པ་དང་མི་ལྡན་པ་འདུ་བྱེད་ལས་བྱུང་བ་མ་ཡིན་པའི་སེམས་བསྐྱེད་པ་དང་། འདུ་བྱེད་དང་བཅས་པ་ལས་བྱུང་བའི་སེམས་བསྐྱེད་པ་