Tạng Tây Tạng (Tibetan Canon)Nguyên tác: Tây Tạng
Luận tạng Tây Tạng (Tengyur) — Tập 79
Văn bản gốc(Tây Tạng)
Trang 15 / 15 (50.000 ký tự/trang)
ི་ཕྱིར་རོ། །
བྱིན་གྱིས་བརླབས་དང་ཞེས་པ་ནི་སྟོང་པ་ཉིད་ཀྱིས་གཟུང་བ་སྟེ་དེ་ཉིད་ཀྱིས་བྱིན་གྱིས་བརླབས་སོ། །དེ་སྐད་དུ་བྱིན་གྱི་རླབས་མེད་པའི་ཚུལ་ཁྲིམས་དེ་བྱིན་གྱིས་བརླབས་སོ་ཞེས་གསུངས་སོ། །དེ་ཉིད་ནི་མཐུ་ཡང་ཡིན་ནོ། །བདག་གི་བསམ་པ་ཞེས་པ་ནི་བདག་གི་བསམ་པ་སྟེ་སེམས་ཅན་
ཐམས་ཅད་ཀྱི་དོན་དུ་ཆོས་ལ་ཞུགས་པའོ། །དེ་ཉིད་ནི་རྣམ་པར་དག་པ་སྟེ་བྱང་ཆུབ་ཆེན་པོ་ལ་ཡོངས་སུ་གཞོལ་བར་གྱུར་པའི་སྟོབས་ཀྱིས་སོ། །དེ་རྣམས་ཀྱིས་ཇི་ལྟར་གྱུར་པར་བསམ་ཞེ་ན་འཕགས་པ་ཐམས་ཅད་ཅེས་པ་ལ་སོགས་པའོ། །འཕགས་པ་ཞེས་པ་ནི་སྔ་མ་བཞིན་དུ་
སྦྱར་རོ། །ཐམས་ཅད་ཅེས་པ་ནི་སྔོན་དུ་ཞུགས་པ་ལ་སོགས་པ་ཡང་བསྡུའོ། །ཕོ་བྲང་ཞེས་པ་ནི་བཞུགས་པའི་གནས་ཏེ་འོག་མིན་ཆེན་པོའི་གནས་ལ་སོགས་པའོ། །སེམས་ཅན་ཐམས་ཅད་ནི་སྔ་མ་དང་འདྲའོ། །གནས་དང་ཞེས་པ་ནི་ལྕགས་ཁང་ལ་སོགས་པའོ། །སེམས་
ཀྱི་རྒྱུད་ཅེས་པ་ནི་ནང་འདུ་བྱེད་ཀྱི་ཕུང་པོ་སྟེ་ཟག་པ་དང་བཅས་པ་རྣམས་སོ། །ལ་ནི་གནས་ཀྱི་དོན་ཏོ། །དེ་རྣམ་པ་དུ་འབྱུང་ཞེ་ན་ཆོས་དང་ཞེས་པ་ལ་སོགས་པ་སྨོས་སོ། །ཆོས་དང་ཞེས་པ་ནི་ཆོས་ཀྱི་སྦྱིན་པ་སྟེ་དེ་ཡང་རྣམ་པ་གཉིས་སོ། །དེ་ཡང་གང་ཞེ་ན་འཇིག་རྟེན་པ་དང་འདས་པའི་ཆོས་ཀྱི་
སྦྱིན་པའོ། །འཇིག་རྟེན་པའི་ཆོས་ནི་བསམ་གཏན་དང་ཚད་མེད་པ་དང་སྙོམས་པར་འཇུག་པ་དང་དགེ་བཅུ་ལ་སོགས་པ་སྟེ། དེ་གང་ལ་སྟོན་པ་ནི་འཇིག་རྟེན་པའི་ཆོས་ཀྱི་སྦྱིན་པའོ། །འཇིག་རྟེན་ལས་འདས་པ་ནི་འཕགས་པའི་ལམ་ཡན་ལག་བརྒྱད་དང་། དེ་བཞིན་གཤེགས་པའི་སྟོབས་
བཅུ་དང་། མ་འདྲེས་པའི་ཆོས་ལ་སོགས་པ་སྟེ་དེ་གང་ལ་སྟོན་པ་ནི་ཆོས་ཀྱི་སྦྱིན་པ་སྟེ་ཟས་དང་སྐོམ་དང་གསེར་དང་མུ་ཏིག་ལ་སོགས་པའོ། །དེ་ཡང་ཇི་སྐད་དུ་སྦྱིན་པ་ནི་རྣམ་པ་གཉིས་ཏེ་ཆོས་ཀྱི་སྦྱིན་པ་དང་ཟང་ཟིང་གི་སྦྱིན་པའོ། །ཆོས་ཀྱི་སྦྱིན་པ་གང་ཞེ་ན། འཇིག་རྟེན་དང་འཇིག་རྟེན་ལས་
འདས་པའི་ཆོས་ཀྱི་སྦྱིན་པའོ་ཞེས་རྒྱས་པར་གསུངས་སོ། །ལོངས་སྤྱོད་ཅེས་བྱ་བ་ནི་གོང་མ་ཉིད་རྣམས་ཏེ་སེམས་ཀྱི་རྒྱུད་ཚིམ་པར་བྱེད་པའི་ཕྱིར་རོ། །དཔག་ཏུ་མེད་པ་ཞེས་བྱ་བ་དང་བསམ་གྱིས་མི་ཁྱབ་ཅེས་བྱ་བ་དང་། བརྗོད་ཀྱིས་མི་ལང་བ་ཞེས་བྱ་བ་དང་། གོ་རིམས་བཞིན་དུ་ལུས་དང་ངག་དང་
ཡིད་ཀྱི་སྤྱོད་ཡུལ་ལས་འདས་པ་ཞེས་བྱ་བའི་ཐ་ཚིག་གོ། །འབྱུང་ཞིང་རྒྱས་པར་གྱུར་ཅིག་ཅེས་བྱ་བ་ནི་འཕགས་པ་ལ་ནི་ཆོས་ཀྱི་ལོངས་སྤྱོད་མཐའ་ཡས་པ་འབྱུང་བ་དང་། སེམས་ཅན་རྣམས་ལ་ནི་ཟང་ཟིང་གི་སྦྱིན་པའི་ལོངས་སྤྱོད་མཐའ་ཡས་པར་གྱུར་ཅིག་ཅེས་པའོ། །དེ་སྐད་དུ་འཕགས་པ་རྣམས་
ཆོས་ལ་ལོངས་སྤྱོད་པའོ། །སེམས་ཅན་རྣམས་ཟང་ཟིང་ལ་ཉེ་བར་ལོངས་སྤྱོད་པའོ་ཞེས་གསུངས་སོ། །འདི་སྐད་སྟོན་ཏེ། བསྔོ་བའི་གནས་ནི་གཉིས་ཡིན་པའི་ཕྱིར་ཚིག་དེ་སྐད་ཅེས་བརྗོད་དེ། བསྔོ་བའི་འབྲས་བུ་རྣམ་པ་ཡོངས་སུ་གཟུང་ཞིང་ཐབས་དམ་པ་ལ་འཇུག་གོ་ཞེས་པའི་དོན་ཏོ། །
གོང་གི་སྤེལ་བའི་སྔགས་ལན་གསུམ་བརྗོད་པ་ནི་ནམ་མཁའ་མཛོད་ཀྱི་སྔགས་གྲུབ་པར་བྱེད་པའི་ཡན་ལག་གོ། །དེ་ནས་ཡོངས་སུ་བསྔོ་བ་བྱས་པའི་རྗེས་ཐོགས་ལ་བདེན་པའི་སྟོབས་བརྗོད་པའི་ཕྱིར། དེ་ནས་བདེན་པ་བདར་ཏེ་ཞེས་པ་ལ་སོགས་པ་སྨོས་སོ། །དེ་ནས་ཞེས་པ་
ནི་ཡོངས་སུ་བསྔོ་བ་བྱས་པའི་རྗེས་ཐོགས་ལ་བདེན་པ་བདར་ཏེ་ཞེས་པ་ནི་འོག་ནས་འབྱུང་བ་རྣམས་སོ། །དེ་ཡང་གང་ཞེ་ན། སངས་རྒྱས་ཀྱི་བདེན་པ་དང་ཞེས་སྨོས་ཏེ། སངས་རྒྱས་ཞེས་པ་ནི་གང་ལས་སྤངས་པ་དང་ཡེ་ཤེས་ཕུན་སུམ་ཚོགས་པ་ཡོད་པ་སྟེ་གོང་དུ་བཤད་པ་བཞིན་ནོ། །དེ་ཡང་
སྐུ་རྣམ་གཉིས་ཀྱི་བདག་ཉིད་ཡིན་ཏེ་དེ་ཉིད་གང་ཞེ་ན། ཆོས་ཀྱི་སྐུ་དང་། གཟུགས་ཀྱི་སྐུ་ཡིན་ཏེ། དེ་སྐད་དུ། བདག་དང་གཞན་དོན་གྲུབ་པའི་ཕྱིར། །རྣམ་པ་གཉིས་སུ་སྐུ་བསྟན་ཏོ། །ཞེས་གསུངས་སོ། །ཆོས་ཞེས་པ་ནི་འདུས་བྱས་དང་འདུས་མ་བྱས་ཀྱི་ཁམས་ཀྱིས་བསྡུས་པའོ། །དེ་ཡང་
རྣམ་པ་གསུམ་སྟེ་བསྟན་པ་དང་། སྒྲུབ་པ་དང་། དོན་དམ་པའོ། །དེ་སྐད་དུ། བསྟན་པ་ལ་སོགས་རྣམ་གསུམ་སྟེ། འབྲེལ་མེད་ཕྱིར་ན་འཆོས་པས་ཆོས། །ཞེས་གསུངས་སོ། །དགེ་འདུན་ཞེས་པ་ནི་དགེ་བ་ལ་སྲེད་པའི་ཐ་ཚིག་གོ། །མཐོང་བའི་ལམ་དང་སྒོམ་པའི་ལམ་ལ་གནས་
པ་རྣམས་སོ། །དེ་ཡང་རྒྱུན་དུ་ཞུགས་པ་རྒྱུ་ལ་ཞུགས་པ་དང་འབྲས་བུ་ལ་ཞུགས་པ་རྣམས་དང་གནས་པའི་བྱེ་བྲག་གིས་བརྒྱད་དོ། །དེ་སྐད་དུ། ཟག་པ་མེད་པ་ལས་རིམ་བཞིན་དུ་བསྐྱེད་པའི་ཕྱིར་ན་བཞིར་བཤད་དོ། །འཇུག་པ་དང་གནས་པའི་བྱེ་བྲག་གོ། །གང་ཟག་བརྒྱད་དུ་རྣམ་པར་
གྲགས། །ཞེས་གསུངས་སོ། །བདེན་པ་ཞེས་པ་ནི་དེ་རྣམས་ཀྱི་ཆེ་བའི་ཡོན་ཏན་རྣམས་ཕྱིན་ཅི་མ་ལོག་པའི་དེ་ཁོ་ན་ཉིད་དེ། དེའི་བྱིན་གྱི་རླབས་ཀྱིས་ཞེས་པ་དང་སྦྱར་རོ། །གསང་སྔགས་དང་ཞེས་པ་ལ་གསང་བ་ནི་མི་འདྲ་བ་སྟེ་ཐབས་སོ། །སྔགས་ནི་དེའི་རྒྱུ་སྟེ་ཡང་ཡང་དུ་བཟླས་ཤིང་འདའ་བར་
མི་བྱའོ། །ཅིར་འགྱུར་ཞེ་ན། ཡིད་སྐྱོབ་པའི་ཕྱིར་ན་སྔགས་ཡིན་ཏེ་ཐུན་མོང་མིན་ཕྱིར་གསང་བ་ཞེས་གསུངས་སོ། །རིག་སྔགས་ཞེས་པ་ནི་ཡེ་ཤེས། །སྔགས་ནི་དེ་གྲུབ་པར་བྱེད་པའི་རྒྱུ་སྟེ་གོང་དུ་བཤད་པ་བཞིན་ནོ། །ཕྱག་རྒྱ་ཞེས་པ་ནི་རྒྱས་འདེབས་པའི་དོན་གྱིས་ཕྱག་རྒྱ་སྟེ་ཐབས་དང་ཤེས་རབ་
གཅིག་ཏུ་སྦྱོར་ཞིང་མི་ཤིགས་པ་སྟེ། །ཉན་ཐོས་ལ་སོགས་མི་ལྡན་པས། །རྡོ་རྗེ་ལ་སོགས་མཚོན་པའོ། །དེ་སྐད་དུ། ཐབས་ཤེས་རབ་འབྱོར་པས་རྒྱས་འདེབས་པའི་ཕྱིར་ན་ཕྱག་རྒྱའོ་ཞེས་གསུངས་སོ། །ཏིང་ངེ་འཛིན་ཞེས་པ་ནི་ཡུལ་ལ་སེམས་རྩེ་གཅིག་ཏུ་གནས་པ་གང་ཡིན་པ་དེ་ལ་འདི་སྐད་ཅེས་བྱ་སྟེ།
གང་ལ་ཞེ་ན་ཐབས་དང་ཤེས་རབ་ལ་ཐ་མི་དད་པར་རྒྱས་བཏབ་པ་དེ་ལའོ། །དེ་སྐད་དུ། གསང་སྔགས་ཐབས་སུ་ཤེས་པར་བྱ། །རིག་སྔགས་ལ་ནི་ཡེ་ཤེས་བརྗོད། །དེ་སྦྱོར་རྒྱས་འདེབས་ཕྱག་རྒྱ་སྟེ། །དེ་ལ་རྩེ་གཅིག་ཏིང་འཛིན་འདོད། །ཅེས་གསུངས་སོ། །འདི་སྐད་སྟོན་ཏེ་ཐབས་དང་ཤེས་
རབ་འབྲེལ་པས་རྒྱས་བཏབ་ལ་དེ་ལ་རྣལ་འབྱོར་པས་སེམས་རྩེ་གཅིག་ཏུ་བྱའོ་ཞེས་པའི་དོན་ཏོ། །བྱིན་གྱིས་བརླབས་པ་ནི་དེ་ལས་བྱུང་བའི་ནུས་མཐུའོ། །བདེན་པ་ཞེས་པ་ནི་དེ་ཕྱིན་ཅི་མ་ལོག་པ་སྟེ་གྱུར་ཅིག་ཅེས་པ་དང་སྦྱར་རོ། །དམ་ཚིག་ཅན་གྱི་མཐུ་དང་ཞེས་པ་ནི་མི་འདའ་བའི་དམ་ཚིག་ཐོབ་པ་སྟེ་
དཔལ་ཚངས་པ་ལ་སོགས་པའོ། །དེ་རྣམས་ཀྱི་སྟོབས་ཀྱི་མཐུའོ། །བདེན་པ་ཉིད་དུ་ཐོབ་པ་ནི་བདེན་པའོ། །བྱིན་གྱི་རླབས་ཀྱིས་ཞེས་པ་ནི་དེ་བཞིན་འབྱུང་བ་ནི་བྱིན་གྱི་རླབས་སོ། །དེ་ཅི་ཞིག་འབྱུང་ཞེ་ན། ཆོས་དང་ཟང་ཟིང་ཞེས་པ་ལ་སོགས་པ་སྨོས་ཏེ་ཆོས་ཀྱི་ལོངས་སྤྱོད་ནི་འོག་ནས་བྱུང་བ་རྣམས་
སོ། །ཟང་ཟིང་གི་ལོངས་སྤྱོད་ནི་འདོད་པའི་ཡོན་ཏན་ལྔའོ། །འདི་ཞེས་བྱ་བ་ནི་སྙིང་ག་འདི་སྟེ་གཏོར་མ་ཡིན་ནོ་ཞེས་པའོ། །སྣོད་རིན་པོ་ཆེ་སྣ་ཚོགས་ལས་གྲུབ་པ་ཞེས་པ་ནི་གསེར་དང་པདྨ་རཱ་ག་ལས་མཛེས་པར་བྱས་པའོ། །བཅུད་ལྷ་དང་མིའི་ལོངས་སྤྱོད་ཅེས་པ་ནི་ལྷ་རྣམས་དང་མི་རྣམས་ལ་ཡོད་
པ་སྟེ་བཟའ་བ་དང་བགོ་བ་ལ་སོགས་པ་སྟེ་ལོངས་སྤྱོད་ཅེས་པ་ནི་ཚངས་པ་རིག་པ་གཞན་དུ་མེད་པའོ། །བཟའ་ཡིས་མི་ཟད་ཅེས་པ་ནི་ཟས་རྣམས་སོ། །བགོ་ཡིས་མི་དེངས་ཞེས་པ་ནི་གོས་རྣམས་སོ། །གཞན་ཡང་དབང་པོ་ལྔ་ཚིམ་པར་བྱེད་པ་སྨོས་པ་རྣམས་གཟུང་ངོ་། །དེ་དག་རྒྱུ་ཅི་ལས་ཤེ་ན་ཕྱེ་
དང་སྨན་ལ་སོགས་པ་རྣམས་ལས་སོ། །སྨན་ལ་སོགས་པ་ཇི་ལྟར་ཅིའི་ཕྱིར་འགྱུར་ཞེ་ན་སངས་རྒྱས་ལ་སོགས་པའི་བདེན་པའི་བྱིན་གྱི་རླབས་ཀྱིས་ཏེ། རྣལ་འབྱོར་པའི་ཏིང་ངེ་འཛིན་གྱི་སྟོབས་ཀྱིས་སོ། །གང་ལས་འབྱུང་ཞེ་ན། སེམས་ཅན་དང་འཕགས་པ་རྣམས་ལའོ། །དེས་ཅིར་འགྱུར་
ན་ལུས་དང་སེམས་ཚིམ་པར་བྱེད་པ་ལ་སོགས་པ་སྨོས་ཏེ། ལུས་ཚིམ་པ་ནི་འབྱུང་བ་རྒྱས་པ་སྟེ་རེག་བྱའི་ཁྱད་པར་རྙེད་པའོ། །སེམས་ཚིམ་པར་བྱེད་པ་ནི་ཉོན་མོངས་པའི་དབང་དུ་མི་འགྱུར་བ་སྟེ་ཚོར་བ་བདེ་བ་དང་ལྡན་པའོ། །རྒྱུ་དང་ཞེས་པ་ནི་གོང་དུ་གཞི་མེད་པར་ཚིམ་པར་གྲུབ་པའོ། །
རྐྱེན་ཞེས་པ་ནི་སྟོབས་ཉམས་པ་ལས་ལྷག་པའི་སྟོབས་རྙེད་པའོ། །གྱུར་ཅིག་ཅེས་པ་ལ་སོགས་པ་ནི་སངས་རྒྱས་ལ་སོགས་པའི་བདེན་པ་དང་མཐུན་པ་ཡིན་ཞེས་བྱ་བར་སྙེག་གོ། །དེ་ནི་འདི་སྐད་སྟོན། རྒྱུ་རྐྱེན་གང་ལ་བརྟེན་ནས་འཕགས་པ་རྣམས་དང་སེམས་ཅན་རྣམས་ལ་ཏིང་ངེ་འཛིན་ལ་
སོགས་པའི་ཡན་ལག་རྣམས་ཀྱིས་ཆོས་དང་ཟང་ཟིང་ཡོངས་སུ་འབྱུང་བར་གྱུར་ཅིག་པའོ། །ཟང་ཟིང་ནི་གོང་དུ་སྨོས་པ་རྣམས་ཡིན་ནོ། །ད་ནི་ཆོས་ཀྱི་ལོངས་སྤྱོད་བསྟན་པའི་ཕྱིར་གཞན་ཡང་ཞེས་བྱ་བ་ལ་སོགས་པ་སྨོས་ཏེ། གཞན་ཞེས་བྱ་བ་ནི་ཟང་ཟིང་ལས་གཞན་པའོ། །དེ་གང་ཡིན་ཞེ་ན།
ཆོས་ཀྱི་ལོངས་སྤྱོད་ཅེས་བྱ་སྟེ་ཆོས་ནི་རྣམ་པར་དཀར་བའི་ཕྱིར་རོ། །ལོངས་སྤྱོད་ཅེས་པ་ནི་འཕགས་པའི་ནོར་བདུན་དང་ལྡན་པའི་ཕྱིར་རོ། །དེ་ཉིད་བསྟན་པའི་ཕྱིར་བྱང་ཆུབ་ཀྱི་ཕྱོགས་དང་ཞེས་པ་སྟེ་བྱང་ཆུབ་ནི་སྟོང་པ་ཉིད་དོ། །ཕྱོགས་ནི་དེ་དང་རྗེས་སུ་མཐུན་པའི་རྒྱུ་རྣམས་ཏེ་དྲན་པ་ཉེ་བར་གཞག་
པ་ལ་སོགས་པ་སྟེ་དེ་སྐད་དུ་ཡང་། བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་དང་ལམ་བཞི་དག་གིས་བསྡུས་པ་ཡིན་ཞེས་སོ། །ཕ་རོལ་ཏུ་ཕྱིན་པ་སྟེ་སྦྱིན་པ་ལ་སོགས་པ་བཅུ་ཡིན་ནོ། །དེ་སྐད་དུ། སྦྱིན་པ་ནས་བརྩམས་ཡེ་ཤེས་ལ། །ལམ་བཞི་དག་གིས་བསྡུས་པ་ཡིན། །ཞེས་པས་
སོ། །ལ་སོགས་པའི་སྒྲ་ནི་བསྡུ་བའི་དངོས་པོ་རྣམས་དང་ཚད་མེད་པ་ལ་སོགས་པ་རྣམ་པར་དག་པ་སྟེ། ལམ་དྲི་མ་མེད་པ་ལ་སྨོས་པ་རྣམས་བསྡུས་པའོ། །དེ་དག་གིས་ཅི་ཞིག་འགྲུབ་ཅེ་ན། སེམས་རྒྱུད་རྣམ་པར་སྦྱོང་ཞིང་ཞེས་བྱ་བ་སྨོས་ཏེ། སེམས་ཀྱི་རྒྱུད་ནི་ཕུང་པོ་དང་ཁམས་
དང་སྐྱེ་མཆེད་དག་གིས་བསྡུས་པ་སྟེ། དེ་ནི་ཀུན་ནས་ཉོན་མོངས་པ་དང་རྣམ་པར་སྦྱོང་བའི་རྒྱུ་དང་རྟེན་དུ་གྱུར་པའི་རྒྱུད་དོ། །རྣམ་པར་སྦྱོང་ཞེས་པ་ནི་ཉོན་མོངས་པ་ལ་སོགས་པ་སྒྲིབ་པ་རྣམས་སོ། །གང་གིས་སྦྱང་ཞེ་ན་དྲན་པ་ཉེ་བར་གཞག་པ་ལ་སོགས་པ་གོང་དུ་སྨོས་པ་རྣམས་
ཀྱིས་སོ། །ཚུལ་ཇི་ལྟར་སྦྱང་ཞེ་ན། དེ་རྣམས་ལ་གོམས་པར་བྱས་ཤིང་གོང་ནས་གོང་དུ་རྣམ་པར་ཐར་པས་སོ། །སྦྱང་བར་བྱ་བ་དེ་ཉིད་བསྡུས་ནས་བསྟན་པའི་ཕྱིར་མདོར་ན་ཞེས་པའོ། །དེ་གང་ལ་རྣམ་པར་བསྟན་པ་ནི། འཕགས་པ་དང་སེམས་ཅན་གྱི་རྒྱུད་ཅེས་
སྨོས་ཏེ། །འཕགས་པ་ཞེས་པ་ནི་ཁམས་གསུམ་ལས་རིང་དུ་འཕགས་པར་སོང་བ་སྟེ་མཐོང་བ་དང་སྒོམ་པའི་ལམ་ལ་གནས་པའི་ཕྱིར་རོ། །རྒྱུད་ནི་གོང་དུ་སྨོས་ཤིང་བཤད་པ་བཞིན་ནོ། །ལ་ཞེས་པ་ནི་བདུན་པའི་དོན་ཏོ། །སྦྱངས་པའི་དངོས་པོ་དེ་ཉིད་བསྟན་པ་ནི་ཉོན་མོངས་པ་ཤེས་
བྱའི་སྒྲིབ་པ་ཐམས་ཅད་ཅེས་པ་སྨོས་ཏེ། ཉོན་མོངས་པ་རྣམས་ནི་འདོད་ཆགས་ལ་སོགས་པ་རྣམས་སོ། །སྒྲིབ་པ་ཞེས་པ་ནི་ཐར་པ་ལ་བར་དུ་གཅོད་པའོ། །ཤེས་བྱའི་སྒྲིབ་པ་ནི་སྤྱིའི་མཚན་ཉིད་དེ་སངས་རྒྱས་ཀྱི་སྤྱོད་ཡུལ་ལོ། །སྒྲིབ་པ་ཐམས་ཅད་མཁྱེན་པ་ཉིད་ལའོ། །དེ་སྐད་དུ་འདོད་ཆགས་ལ་སོགས་པ་
མངོན་དུ་གྱུར་པ་དང་བག་ལ་ཉལ་གྱི་ཉོན་མོངས་པ་ཅན་མེད། གཉིས་སུ་སྣང་བ་སྟེ་ཐར་པ་དང་ཐམས་ཅད་མཁྱེན་པ་གོ་རིམས་བཞིན་ནོ་ཞེས་གསུངས་སོ། །རྣམ་པར་བྱང་ཞིང་དག་པར་ཞེས་པ་ནི་རྡུལ་ཙམ་ཡང་མི་གནས་པ་སྟེ་སྤངས་པའོ། །དེ་ནས་འབྲས་བུའི་ཁྱད་པར་གཞན་བསྟན་པ་ནི་དེ་བཞིན་གཤེགས་
པ་ཞེས་བྱ་བ་ལ་སོགས་པ་སྨོས་ཏེ། དེ་བཞིན་དུ་སོང་བ་ནི་དེ་བཞིན་གཤེགས་པའོ། །ཐམས་ཅད་ཅེས་བྱ་བ་ནི་མ་ལུས་པར་གཟུང་བ་སྟེ་རྣམ་པར་སྣང་མཛད་ལ་སོགས་པའོ། །སྐུ་དང་ཞེས་པ་ནི་དེ་རྣམས་ཀྱི་ཕྱག་རྒྱ་ཆེན་པོར་གསུངས་པ་སྟེ་ཆོས་ཀྱི་ཕྱག་རྒྱའོ། །ཐུགས་ནི་དེ་རྣམས་ཀྱི་ཐུགས་ཏེ་
དམ་ཚིག་གི་ཕྱག་རྒྱའོ། །ཡང་ན་སྐུ་ནི་སྤྲུལ་པ་ལ་སོགས་པ་གསུམ་མོ། །གསུང་ནི་བསྟན་པའི་ཆོས་ཏེ་མདོའི་སྡེ་ལ་སོགས་པའོ། །ཐུགས་ནི་མེ་ལོང་ལྟ་བུའི་ཡེ་ཤེས་སོ། །དེ་ཡང་ཇི་སྐད་དུ། སྐུ་ལ་སོགས་པ་ཕྱག་རྒྱ་སྟེ། །རྣམ་གསུམ་གྱིས་ནི་འབྱེད་པའོ། །སྤྲུལ་པ་ལ་སོགས་དབྱེ་བ་
ཡིས། །རྣམ་པ་གཞན་དུ་འང་འདོད་པ་ཡིན། །ཞེས་གསུངས་སོ། །རྡོ་རྗེ་ལྟ་བུའི་ཞེས་པ་ནི་སྐུ་གསུང་ཐུགས་དབྱེར་མེད་པའི་རྡོ་རྗེ་ལྟ་བུ་སྟེ་སྟོང་པ་ཉིད་དུའོ། །དམ་ཚིག་ཅེས་པ་ནི་འདའ་བར་བྱ་བ་མ་ཡིན་ཏེ། སྟོང་པ་ཉིད་ལས་སོ། །གང་གིས་མི་འདའ་ཞེ་ན། སྐུ་གསུང་ཐུགས་རྡོ་རྗེ་དང་ལྡན་པ་
དེས་སོ། །ལྡན་ཏེ་ཞེས་པ་ནི་འཕགས་པ་རྣམས་དང་སེམས་ཅན་རྣམས་ཀྱི་ཚོགས་ཏེ་གོང་དུ་བཤད་པའི་ཆོ་གའི་རིམ་གྱིས་ལྡན་ནོ། །དེ་ནས་དེའི་འབྲས་བུ་བསྟན་པའི་ཕྱིར་སྡུག་བསྔལ་ཞེས་པ་ལ་སོགས་པ་སྨོས་ཏེ། སྡུག་བསྔལ་ཞེས་པ་ནི་བྱུང་ནས་བྲལ་བར་འདོད་པའི་
མཚན་ཉིད་ཀྱིས་ཚོར་བ་སྟེ་ཁམས་གསུམ་གྱི་མི་འདོད་པ་རྣམས་སོ། །གསུམ་ཞེས་པ་ནི་འདུ་བྱེད་ཀྱི་སྡུག་བསྔལ་ལ་སོགས་པའོ། །བརྒྱད་ཅེས་པ་ནི་འདོད་པའི་དངོས་པོ་མི་རྙེད་པ་ལ་སོགས་པའོ། །ཡང་ན་རབ་ཏུ་ཚ་བ་ལ་སོགས་པ་དང་ཆུ་བུར་ཅན་ལ་སོགས་པ་དེ་དག་ཉིད་སྤངས་ཏེ་གང་ལ་མི་
གནས་པ་དེ་ནི་བྲལ་བའོ། །མཐར་ཞེས་པ་ནི་ཐབས་ཀྱི་ཆོ་ག་བརྒྱུད་པའི་རིམ་པ་ནི་མཐའ་སྟེ་མི་སློབ་པའི་ལམ་མོ། །དེ་ཉིད་དུ་སྨོས་པ་ནི་བླ་ན་མེད་པའི་སངས་རྒྱས་སུ་ཞེས་བྱ་བ་སྨོས་ཏེ། བླ་ན་མེད་པ་ཞེས་པ་ནི་ཉན་ཐོས་དང་རང་སངས་རྒྱས་རྣམས་ལས་མཆོག་ཏུ་གྱུར་པའི་བླ་ན་མེད་པའོ། །དེ་ཉིད་ནི་
མཐོང་བ་དང་བསྒོམ་པས་སྤང་བར་བྱ་བའི་ཉོན་མོངས་པ་སྤངས་ཤིང་ཡེ་ཤེས་བཞི་དང་ལྡན་པའི་ཕྱིར་སངས་རྒྱས་སོ། །གྲུབ་པར་གྱུར་ཅིག་ཅེས་པ་ནི་སངས་རྒྱས་ཀྱི་གོ་འཕང་དེ་ཐོབ་ཅིང་དེ་དང་ལྡན་པར་གྱུར་ཅིག་པའོ། །བརྗོད་དོ་ཞེས་པ་ནི་རྣལ་འབྱོར་པས་བདེན་པའི་སྟོབས་ཀྱིས་སྨོས་པ་བརྗོད་པའོ། །
དེ་ནི་འདི་སྐད་དུ། ཐབས་གང་གིས་སོ་སོའི་སྐྱེ་བོའི་ས་ལ་གནས་པ་རྣམས་ནི་ཟང་ཟིང་གི་སྦྱིན་པ་འབྱུང་བ་དང་། ཉོན་མོངས་པའི་གཉེན་པོར་འགྱུར་བ་དང་། ཆོས་ཀྱི་ལོངས་སྤྱོད་ཀྱི་ཕྱོགས་སུ་འགྱུར་བ་དང་། འཕགས་པའི་ས་ལ་གནས་པ་རྣམས་ལ་ཤེས་བྱའི་སྒྲིབ་པའི་གཉེན་པོའི་ཕྱོགས་ཆོས་ཀྱི་ལོངས་
སྤྱོད་འབྱུང་ཞིང་རྣམ་པར་གྱུར་པ་དེའི་ལམ་དམ་པ་སྟེ་དེ་ལ་ངེས་པར་འཇུག་པར་བྱའོ་ཞེས་སྟོན་པ་ཡིན་ནོ། །ཡང་དེ་རྣམས་ལ་ཆོས་ཀྱི་སྦྱིན་པས་ཤེས་པའི་རྒྱུད་བརླན་པར་བྱས་པའི་ཕྱིར་རོ། །ཞལ་ནས་གསུངས་པའི་མདོ་གདོན་ནོ་ཞེས་སྨོས་ཏེ། ཞལ་ནས་གསུངས་པ་ཞེས་པ་ནི་བདེ་བར་གཤེགས་
པའི་བར་དུའོ། །དེ་ཉིད་ནི། ཆོས་རྣམས་ཐམས་ཅད་རྒྱུ་ལས་བྱུང་། །དེ་རྒྱུ་དེ་བཞིན་གཤེགས་པས་གསུངས། །དེ་ལ་འགོག་པ་གང་ཡིན་པ། །དགེ་སྦྱོང་ཆེན་པོས་འདི་སྐད་གསུངས། །ཞེས་པ་ལ་སོགས་པ་གཅིག་དང་གཉིས་ལ་སོགས་པ་བསྟན་པའོ། །སིངྒ་ལ་ཡི་ཡུལ་དུ་སྐྱེས་པ་
དེ་ཡི་མཚན། །འགྲོ་བ་སྐལ་ངན་རྣམས་ལ་མར་མེ་ལྟར་སྣང་མཛད། །ཆོས་རྣམས་རྫོགས་པར་འགྲོ་བ་ཀུན་དཔལ་འབྱུང་། །ཤེས་བྱ་རྣམས་ལ་ཐོགས་མེད་ཡེ་ཤེས་མཚན། །དེ་ཡི་ཀུན་བཟང་སྙིང་རྗེས་བསྐྱེད་པའི་རླབས། །བོད་ཡུལ་མཐིལ་དུ་ལོག་པར་སྤྱོད་པ་མཐོང་། །དེ་ཡི་དོན་དུ་བདག་
ཉིད་རབ་འབད་དེ། །འགྲོ་ཀུན་འཆི་མེད་བདུད་རྩིའི་ཆུ་འདི་རབ་གཏོར་བས། །ལོངས་སྤྱོད་དབང་གིས་སྐྱེ་ཤིང་གདུངས་པ་རྣམས། །ཡང་དག་ལྟ་རྣམས་སྐྱེ་ཤི་རྒྱུན་ཆད་དེ། །ཐེག་ཆེན་རྡོ་རྗེ་ཐེག་པའི་ལམ་བགྲོད་ནས། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག །བདུད་རྩི་འབྱུང་བ་
ཞེས་བྱ་བའི་གཏོར་མའི་ཆོ་ག་རྫོགས་སོ།། །།རྒྱ་གར་གྱི་མཁན་པོ་དཱི་པཾ་ཀ་ར་ཤྲཱི་ཛྙཱ་ནས་མཛད་ཅིང་བསྒྱུར་བ་སྟེ་ལོ་ཙཱ་བ་ཁུ་དངོས་གྲུབ་ཀྱིས་གཏན་ལ་ཕབ་པའོ།། {D3779 ༄། །ཆུ་གཏོར་གྱི་ཆོ་ག་བཞུགས། ༄༅༅། །ཐུགས་རྗེ་ཆེན་པོ་ལ་ཕྱག་འཚལ་ལོ། །
ཆུ་གཏོར་གྱི་ཡོ་བྱད་རྣམས་མདུན་དུ་སྟ་གོན་བྱས་ལ་རང་དང་པོར་སྒྲུབ་ཐབས་བཞིན་ལྷའི་རྣལ་འབྱོར་དུ་བྱས་ལ། ལུས་དང་ངག་དང་ཡིད་གསུམ་བྱིན་གྱིས་བརླབ་པར་བྱའོ། །དེ་ནས་ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ་ཞེས་བརྗོད་དོ། །རང་མ་གཏོགས་པའི་སྣོད་བཅུད་ཐམས་ཅད་སྟོང་
པ་ཉིད་དུ་བསམས་ཏེ། དེ་ནས་སྟོང་པ་ཉིད་ཀྱི་ངང་ལས་མདུན་དུ་སྣོད་དུ་ཡོད་ཀྱི་ཐད་ཀར་པཾ་ལྗང་གུ་རེ་བསམས་ལ། དེ་དག་ཡོངས་སུ་གྱུར་པ་ལས་རིན་པོ་ཆེ་སྣ་ཚོགས་ལས་གྲུབ་པའི་སྣོད་རེ་རེ་བསམ། སྣོད་བྱིན་གྱིས་བརླབ་པའོ། །བཅུད་ནི་སྣོད་རེ་རེའི་ནང་དུ་བདུད་རྩིའི་རང་བཞིན་དང་།
སྨན་སྣ་ཚོགས་ལས་གྲུབ་པའི་ལྗོན་ཤིང་དང་། རིན་པོ་ཆེ་སྣ་ཚོགས་ལས་གྲུབ་པའི་གཏེར་གྱི་བུམ་པ་དང་། དར་ལ་སོགས་པ་གོས་སྣ་ཚོགས་པ་བསམ་མོ། །སྨན་ཤིང་ལྗོན་པ་དེ་རྩ་བ་ཕུན་སུམ་ཚོགས་པར་ཟུག་པ། ལོ་མ་བཟང་བ་དང་། ཡལ་ག་བཟང་བ་རྒྱས་པ་དང་། མེ་ཏོག་
དང་འབྲས་བུ་མང་བ་ཕུན་སུམ་ཚོགས་པ་བསམས་ལ། ལྗོན་ཤིང་དེའི་ལུས་ལ་སྐུ་གསུང་ཐུགས་ཡེ་ཤེས་ཀྱི་རང་བཞིན་ཅན་གྱི་ཨོཾ་ཨཱཿཧཱུྃ་ཧོ་རྣམས་རིམ་པ་བཞིན་དུ་དགོད་དོ། །དམ་ཚིག་གི་གཏོར་མ་སྦྱང་བའོ། །ཡི་གེ་དེ་རྣམས་ལས་འོད་ཟེར་འཕྲོས་པས་ཕྱོགས་བཅུའི་བདེ་བར་གཤེགས་
པ་ཐམས་ཅད་ཀྱི་ཐུགས་དམ་བསྐུལ་ནས་དེ་དག་གི་ཐུགས་ཀ་ནས་ཡེ་ཤེས་ཀྱི་བདུད་རྩི་མདོག་འོ་མའི་རྒྱ་མཚོ་ལྟ་བུའི་ཆུའི་རྒྱུན་བཀུག་ནས་འོངས་པ་དང་། དེ་དག་ཐམས་ཅད་རོ་གཅིག་ཏུ་གྱུར་པས་དྲི་རོ་གཅིག་པ་ནུས་པ་ཕུན་སུམ་ཚོགས་པར་བལྟའོ། །
ཡེ་ཤེས་ཀྱི་གཏོར་མ་དགུག་པའོ། །དེ་ནས་སྒྲུབ་པ་པོ་བདག་ཉིད་ཀྱི་སྙིང་ག་ནས་འོད་ཟེར་ལྕགས་ཀྱུ་དང་ཞགས་པ་ལྟ་བུ་བྱུང་ནས་འགྲོ་བ་རིགས་ལྔ་སོ་སོ་རང་རང་གི་གཟུགས་ཀྱིས་མདུན་གྱི་བར་སྣང་ལ་དགུག་གོ། །མགྲོན་སྤྱན་དྲངས་པའོ། །རྡོ་རྗེ་ཐལ་མོ་བཅའ་བའམ་རྩེ་གསུམ་པའི་ཕྱག་རྒྱ་དང་
སྔགས་འདིས་བསྟབ་པར་བྱའོ། །ཨོཾ་ན་མཿསརྦ་ཏ་ཐཱ་ག་ཏ་ཨ་བ་ལོ་ཀི་ཏེ་སམྦྷ་ར་སམྦྷ་ར་ཧཱུཾ་འདིས་ཁ་དྲག་ཞན་མེད་པར་མཉམ་པོར་ཐོབ་པར་བསམ་མོ། །ཨོཾ་རུ་རུ་སྥུ་རུ་ཛྭ་ལ་ཏིཥྛ་སིདྡྷ་ལོ་ཙཱ་ནེ་སརྦ་ཨརྠ་སཱ་དྷ་ནེ་སྭཱ་ཧཱ། སྔགས་འདི་གཉིས་ལན་བདུན་བདུན་བཟླས་ལ་བསྟབ་པོ། །སྔགས་འོག་
མས་ནི་སེམས་ཅན་ཐམས་ཅད་ཀྱི་བསམ་པ་ལ་ཅི་དང་ཅི་འདོད་པའི་ལོངས་སྤྱོད་དང་འདོད་པའི་ཡོན་ཏན་ལྔ་ལ་སོགས་པའི་སོ་སོའི་རྣམ་པར་རིག་པ་དང་མཐུན་པ་ཐོབ་པར་བསམ་མོ། །དེ་ནི་ཟང་ཟིང་གི་སྦྱིན་པའོ། །དེ་ནས་ཆོས་ཀྱི་སྦྱིན་པ་ནི་ཞལ་ནས་གསུངས་པའི་མདོ་ཚིགས་སུ་བཅད་པ་ཅི་ནུས་ཅི་
ལྕོགས་ཀྱིས་བྱའོ། །དེ་ནས་སྨོན་ལམ་གདབ་པོ། །དེ་ནས་བདེན་པ་བདར་བ་ནི། སངས་རྒྱས་ཀྱི་བདེན་པ་དང་། ཆོས་ཀྱི་བདེན་པ་དང་། དགེ་འདུན་གྱི་བདེན་པ་དང་། གསང་སྔགས་དང་། རིག་སྔགས་དང་། ཕྱག་རྒྱ་དང་། ཏིང་ངེ་འཛིན་དང་། བདག་གི་བསམ་པ་རྣམ་པར་དག་པའི་
སྟོབས་ཀྱིས་སོ་སོའི་སེམས་ཅན་གྱི་གནོད་པ་ཐམས་ཅད་ཞི་ནས་བར་ཆད་དང་གནོད་འགལ་སྤངས་ཏེ་དམ་ཚིག་ལ་གནས་པར་གྱུར་ཅིག །དེ་ནས་སྨོན་ལམ་ནི། དམ་ཆོས་བདུད་རྩི་ཐམས་ཅད་མཁྱེན་པ་ཡི། །ཞལ་ནས་གསུངས་པ་བསིལ་བའི་རོ་འདི་ཡིས། །ཉོན་མོངས་འབར་བའི་མེ་ཡིས་
གདུངས་པ་ཡི། །འགྲོ་ཀུན་རྟག་ཏུ་སྡུག་བསྔལ་ཞི་བྱེད་ཤོག །ཅེས་བྱ་བ་ལ་སོགས་པ་གདབ་པོ། །དེ་ནས་སེམས་ཅན་ཐམས་ཅད་ཀྱི་ལུས་ངག་ཡིད་གསུམ་གྱི་སྒྲིབ་པ་བྱང་ནས་ཚོགས་གཉིས་རྫོགས་ཏེ་སོ་སོའི་བསམ་པ་དང་མཐུན་པའི་ལོངས་སྤྱོད་རྒྱ་ཆེན་པོ་ཐོབ་ནས་དམ་ཚིག་ལ་གནས་ཤིང་
རྣམ་པར་མི་རྟོག་པའི་ཡེ་ཤེས་རྟོགས་ནས་བདག་ལ་ཕན་འདོགས་པའི་བསམ་པས་ཨོཾ་མུཿཞེས་བརྗོད་ནས་སེ་གོལ་གཏོགས་ནས་སོ་སོའི་གནས་སུ་སོང་བར་བལྟའོ། །རྐྱེན་དང་བར་ཆད་ཐམས་ཅད་ཟློག་པར་བྱེད་པ་ཡོན་ཏན་ཐམས་ཅད་ཉེ་བར་སྡུད་པར་བྱེད་པ་ཆུ་གཏོར་དྲི་མ་མེད་པའི་གཞུང་སློབ་དཔོན་དཔལ་
མར་མེ་མཛད་ཡེ་ཤེས་ཀྱིས་མཛད་པ་རྫོགས་སོ།། །།སློབ་དཔོན་དེ་ཉིད་ལ་ཞུ་བ་པོ་ཀན་སྟོན་ལེགས་པའི་ཤེས་རབ་ཀྱིས་ཚོགས་བསག་པའི་ཡན་ལག་ཏུ་ཞུས་ནས་མང་ཡུལ་གྱི་གྲོང་དུ་གཞུང་བྲིས་སོ། །པཎྜི་ཏ་དེ་ཉིད་དང་ལོ་ཙཱ་བ་ཚུལ་ཁྲིམས་རྒྱལ་བས་བསྒྱུར་བའོ།། །།
༄༅༅། །རྒྱ་གར་སྐད་དུ། ནཱ་ག་བ་ལིཾ་བི་བྷིཿ བོད་སྐད་དུ། ཀླུ་གཏོར་གྱི་ཆོ་ག །རྗེ་བཙུན་མ་འཕགས་མ་སྒྲོལ་མ་ལ་ཕྱག་འཚལ་ལོ། །རང་ཉིད་ལྷ་ཡི་ང་རྒྱལ་གྱིས། །བྱམས་དང་སྙིང་རྗེ་བྱང་ཆུབ་སེམས། །ཡང་དང་ཡང་དུ་བསྒོམས་བྱས་ལ། །མདུན་དུ་པཾ་ལས་པདྨ་
ནི། །ཁ་དོག་དམར་པོ་འདབ་བརྒྱད་སྟེང་། །ཕུཿབརྒྱད་ལས་ནི་ཀླུ་བརྒྱད་བསྐྱེད། །དེ་ནས་སྙིང་གའི་འོད་ཟེར་དང་། །ཨོཾ་ཕེ་ཕུ་ཞེས་པས་ཀླུ་ཆེན་བརྒྱད། །འཁོར་དང་བཅས་པ་བཀུག་ལ་བསྟིམ། །དཀར་གསུམ་མངར་གསུམ་བདུད་རྩིར་བཅས། །དམ་ཚིག་ཡེ་ཤེས་ཀླུ་རྣམས་མཆོད། །
དེ་ནས་གཏོར་མ་བྱིན་བརླབས་ཏེ། །སྣོད་ནི་ཧཾ་ལས་རིན་པོ་ཆེ། །ཤིན་ཏུ་མཛེས་ཤིང་བལྟ་ན་སྡུག །ཡངས་ལ་རྒྱ་ནི་ཆེ་བར་བསམ། །རིན་ཆེན་སྣོད་མཆོག་དེ་ནང་དུ། །དཀར་གསུམ་མངར་གསུམ་བདུད་རྩིར་བཅས། །སྣོད་ནི་ཤིན་ཏུ་གང་བར་བསམ། །དེ་ཡི་སྟེང་དུ་ཡི་གེ་
གསུམ། །ཁ་དོག་དྲི་དང་རོ་སྦྱངས་ནས། །བདུད་རྩིའི་རོ་མཆོག་བརྒྱ་དང་ལྡན། །གཡས་པ་མཆོག་སྦྱིན་ཕྱག་རྒྱ་ལ། །ཧ་ཧོ་ཧྲི་པཾ་དག་ལས་ནི། །དཔག་བསམ་ཤིང་ནི་བསམ་བྱས་ལ། །ལོ་མ་ཡལ་ག་ཐམས་ཅད་ལ། །རིན་ཆེན་བུམ་པ་བདུད་རྩིས་བཀང་། །དཔག་
ཏུ་མེད་པ་བསམས་ནས་ནི། །བྷྲཱུྃ་ལས་བདུད་རྩིའི་ཆར་བབ་པས། །གཏོར་མས་ཡོངས་སུ་གང་བར་བསམ། །ཨོཾ་ཨཱཿཧཱུྃ་ཞེས་ལན་གསུམ་བརྗོད། །མགྲོན་རྣམས་ཐམས་ཅད་ལྕེ་ལས་ནི། །ཧཱུཾ་ལས་རྡོ་རྗེའི་སྦུ་གུས་རྔུབ། །ཨོཾ་ཨ་ནནྟ་བ་ལིཾ་ཨི་དཾ་ཁ་ཁ་ཁཱ་ཧི་ཁཱ་ཧི། ཨོཾ་ཏཀྵ་
ཀ། ཨོཾ་ཀུ་ལི་ཀ །ཨོཾ་བཱ་སུ་ཀི །ཨོཾ་ཤཾ་ཁ་པཱ་ལ། ཨོཾ་མ་ཧཱ་པདྨ། ཨོཾ་བ་རུ་ཎ། ཨོཾ་ནནྡ་ནཱ་གརཱ་ཛཱ་ཡ། ཨོཾ་ཕེཾ་ཀླུའི་རྒྱལ་པོ་སོག་མ་མེད། །བ་ལིཾ་ཨི་དཾ་ཁ་ཁ་ཁཱ་ཧི་ཁཱ་ཧི། མཐའ་ཡས་དང་ནི་འཇོག་པོ་དང་། །སྟོབས་ཀྱི་རྒྱུ་དང་རིགས་ལྡན་དང་། །ནོར་རྒྱས་དང་ནི་
དུང་སྐྱོང་དང་། །པདྨ་དང་ནི་ཆུ་ལྷ་དང་། །དགའ་བོ་དང་ནི་ཉེ་དགའ་བོ། །རྒྱ་མཚོ་དང་ནི་རྒྱ་མཚོ་ཆེ། །དཔལ་གྱི་འོད་དང་འོད་པོ་ཆེ། །གཟུགས་ཆེན་སྦྲུལ་བཟངས་སྟོབས་པོ་ཆེ། །ཀླུ་ཆེན་བརྒྱད་པོ་འཁོར་དང་བཅས། །འདིར་གཤེགས་མཆོད་སྦྱིན་གཏོར་མ་བཞེས། །མཛེས་པའི་
དཀར་གསུམ་གཏོར་མ་འདི། །མངར་གསུམ་འོ་མའི་རྒྱ་མཚོར་བཅས། །རིན་ཆེན་ཕྲེང་བའི་ཐེམ་སྐས་ཅན། །ཀླུ་ཡི་གནོད་པ་སྐྱོབ་བྱེད་པ། །མཐུན་པའི་རྫས་སུ་འདི་གྱུར་ཅིག །མཆོད་སྦྱིན་གཏོར་མ་འདི་སྣོམས་ལ། །བདག་ཅག་འཁོར་དང་བཅས་རྣམས་ལ། །ཀླུ་ལས་གྱུར་
པའི་ནད་རྣམས་ནི། །མཐོང་བའི་དུག་དང་ཁ་ཟས་དུག །བསམས་པའི་དུག་ལ་སོགས་པ་ཀུན། །དེ་དག་ཐམས་ཅད་ཞི་གྱུར་ཅིག །བདག་པས་གཅེས་པའི་རྫས་ཁྱེར་ལ། །བདག་ལ་གནོད་པ་མ་བྱེད་པར། །རྟག་ཏུ་བྱམས་པའི་སེམས་དང་ནི། །ཕ་མ་ལྟ་བུའི་སེམས་ཀྱིས་
ལྟོས། །གཞན་ཡང་ལས་ལས་སྐྱེས་པ་ཡི། །བཀའ་དང་དམ་ལས་མ་ཐོགས་པའི། །གདུག་པ་ཅན་གྱི་ཀླུ་ཚོགས་ཀུན། །བཀའ་ཡི་ཕ་འབབ་འདི་སྣོམས་ལ། །སོ་སོ་རང་རང་གནས་སུ་དེངས། །དེའི་རྗེས་ལ་གཏོར་མ་གཏང་། བདེན་པ་བདར། ཆོས་བཤད་བྱའོ། །
ཀླུའི་གཏོར་ཆེན་སྒྲོལ་མའི་ཞབས་ཀྱི་རྡུལ་ལ་རེག་པའི་མཁས་པ་ཆེན་པོ་དཔལ་མར་མེ་མཛད་ཡེ་ཤེས་ཀྱིས་མཛད་པ་རྫོགས་སོ།། །།ལོ་ཙཱ་བ་རིན་ཆེན་བཟང་པོས་བསྒྱུར་བའོ།། ༄། །དཀོན་མཆོག་གསུམ་གྱི་བཀྲ་ཤིས་ཀྱི་ཚིགས་སུ་བཅད་པ་བཞུགས་སོ།། །།
༄༅༅། །དཀོན་མཆོག་གསུམ་ལ་ཕྱག་འཚལ་ལོ། །བཀྲ་ཤིས་གང་ཞིག་རྒྱལ་བ་རྣམས་ཀྱི་ཆོས་ཀྱི་སྐུ། །གཅིག་ཉིད་དང་ནི་དུ་མ་ཉིད་ཀྱང་རྣམ་སྤངས་པའི། །མ་གོས་གཟུགས་མེད་རྡུལ་དང་བྲལ་བ་གང་ཡིན་པའི། །བཀྲ་ཤིས་དེ་ཡིས་ཁྱེད་ལ་རྟག་ཏུ་བདེ་ལེགས་ཤོག །བཀྲ་
ཤིས་གང་ཞིག་སངས་རྒྱས་སྲས་ཀྱིས་ཡོངས་བསྐོར་ཞིང་། །ལོངས་སྤྱོད་རྫོགས་སྐུ་དམ་ཆོས་ཀྱི་ནི་གསུང་དང་བཅས། །མཚན་དང་དཔེ་བྱད་བཟང་པོས་ཡོངས་སུ་བརྒྱན་གྱུར་པ། །བཀྲ་ཤིས་དེ་ཡིས་ཁྱེད་ལ་རྟག་ཏུ་བདེ་ལེགས་ཤོག།།བཀྲ་ཤིས་གང་ཞིག་ནགས་ཀྱི་མེ་ནི་མཆེད་པ་ལྟར། །
འཇུག་དང་འབར་དང་ཡོངས་སུ་མྱ་ངན་འདས་པ་ཡིས། །སྤྲུལ་པའི་སྐུ་མཆོག་གཞན་གྱི་དོན་ནི་མཛད་པ་པོ། །བཀྲ་ཤིས་དེ་ཡིས་ཁྱེད་ལ་རྟག་ཏུ་བདེ་ལེགས་ཤོག །བཀྲ་ཤིས་གང་ཞིག་སེམས་ཅན་ཀུན་ལ་ཕན་བྱེད་པའི། །སངས་རྒྱས་རྣམ་དག་བློ་ལྡན་ཉེས་པའི་ཚོགས་དང་བྲལ། །ཤེས་
རབ་ཡན་ལག་འདུས་པས་མཛེས་པ་བདེ་བའི་བདག །བཀྲ་ཤིས་དེ་ཡིས་ཁྱེད་རྣམས་ལ་ནི་དབང་མཆོག་བསྐུར་བའོ། །བཀྲ་ཤིས་གང་ཞིག་ལྷ་དང་ལྷ་མིན་མིས་མཆོད་པ། །དེ་ཡི་བསྟན་པའི་དམ་ཆོས་བླ་ན་མེད་པ་ནི། །བདག་མེད་འཇིག་རྟེན་གསུམ་ལ་རབ་ཏུ་གྲགས་པ་ཡི། །བཀྲ་ཤིས་དེ་
ཡིས་ཁྱེད་རྣམས་ལ་ནི་དབང་མཆོག་བསྐུར། །བཀྲ་ཤིས་གང་ཞིག་རབ་མཆོག་དམ་ཆོས་རྟག་ཏུ་འཛིན། །བཟང་པོའི་སར་ཞུགས་སངས་རྒྱས་སྲས་པོ་ཚོགས་ཀྱི་མཆོག །རྣམ་པ་ཀུན་དུ་སེམས་ཅན་དོན་མཛད་བཀྲ་ཤིས་བཟང་། །བཀྲ་ཤིས་དེ་ཡིས་ཁྱེད་རྣམས་ལ་ནི་དབང་མཆོག་
བསྐུར། །ཞེས་བྱ་བ་ནི་སློབ་དཔོན་སྣང་བྱེད་ཟླ་བས་མཛད་པ་སངས་རྒྱས་སྐུ་གསུམ་ཆོས་དང་དགེ་འདུན་དང་བཅས་པའི་བཀྲ་ཤིས་ཚིགས་སུ་བཅད་པའོ།། ༄༅༅། །རྒྱ་གར་སྐད་དུ། པཉྩ་ཏ་ཐཱ་ག་ཏ་མཾ་ག་ལ་གཱ་ཐཱ། བོད་སྐད་དུ། དེ་བཞིན་གཤེགས་
པ་ལྔའི་བཀྲ་ཤིས་ཚིགས་སུ་བཅད་པ། དཀོན་མཆོག་གསུམ་ལ་ཕྱག་འཚལ་ལོ། །རྣམ་པར་སྣང་མཛད་ཡེ་ཤེས་དམ་པ་མཚོ་ཆེན་ལྡན། །ཟླ་བ་ཉ་འདྲའི་སྐུ་མངའ་སྲིད་པའི་མཐར་ཕྱིན་པ། །དགོངས་པ་མཐའ་དག་རྫོགས་པའི་བཀྲ་ཤིས་གང་ཡིན་པ། །བཀྲ་ཤིས་དེས་
ནི་སྐྱེ་དགུ་རྣམས་ལ་ཞི་བྱེད་ཤོག །མི་འཁྲུགས་རྒྱལ་པོ་སྲིད་དང་གཏི་མུག་རྣམ་སྦྱོང་བ། །མགོན་པོ་ཡོན་ཏན་ཐམས་ཅད་རྫོགས་པས་བཀྲ་ཤིས་པ། །དགེ་མཉམ་བསམ་སེམས་ལྡན་པའི་བཀྲ་ཤིས་གང་ཡིན་པ། །བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་ཤོག །
སངས་རྒྱས་ཡོན་ཏན་ཀུན་གྱི་རྒྱན་གྱིས་རྒྱན་མཛད་ཅིང་། །ཡང་དག་བདེན་པའི་འབྱོར་པ་སྦྱིན་མཛད་མི་སླུ་བ། །རིན་ཆེན་འབྱུང་ལྡན་ཞེས་བྱའི་བཀྲ་ཤིས་གང་ཡིན་པ། །བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་ཤོག།། །བསམ་གཏན་ཏིང་འཛིན་ཡེ་ཤེས་ཕ་རོལ་
ཕྱིན་པའི་གནས། །ཡེ་ཤེས་པདྨའི་སྟེང་བཞུགས་དཔག་མེད་ཚེ་ལྡན་ཞིང་། །ཚེ་གྲངས་མེད་པར་བྱིན་གྱིས་རློབ་པའི་བཀྲ་ཤིས་གང་ཡིན་པ། །བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་ཤོག །སེམས་ཅན་དོན་གྱི་ལས་ལ་ཐུགས་ནི་སྦྱོར་མཛད་ཅིང་། །འགྲོ་བ་ཀུན་གྱི་འཆིང་
བའི་བཅིངས་ལས་གྲོལ་མཛད་པ། །ཐུབ་མཆོག་དོན་ཡོད་གྲུབ་པའི་བཀྲ་ཤིས་གང་ཡིན་པ། །བཀྲ་ཤིས་དེས་ནི་སྐྱེ་དགུ་རྣམས་ལ་ཞི་བྱེད་ཤོག །དེ་བཞིན་གཤེགས་པ་ལྔའི་བཀྲ་ཤིས་ཚིགས་སུ་བཅད་པ་རྫོགས་སོ།། །།
༄། །བཀྲ་ཤིས་ཀྱི་ཚིགས་སུ་བཅད་པ་བཞུགས།། ༄༅༅། །དཔལ་རྣལ་འབྱོར་གྱི་རྒྱུད་ཀྱི་དཀྱིལ་འཁོར་གྱི་ལྷ་དེ་བཞིན་གཤེགས་པ་རིགས་ལྔ་འཁོར་དང་བཅས་པ་ལྷ་སུམ་ཅུ་རྩ་བདུན་གྱི་བཀྲ་ཤིས་ཚིགས་སུ་བཅད་པ། དཔལ་རྡོ་རྗེ་སེམས་དཔའ་ལ་ཕྱག་འཚལ་
ལོ། །བཅོམ་ལྡན་རྣམ་པར་སྣང་མཛད་རྒྱལ་བ་མི་བསྐྱོད་པ། །རིན་ཆེན་འབྱུང་ལྡན་འོད་དཔག་མེད་དང་དོན་ཡོད་གྲུབ། །རིགས་ལྔ་བདེ་གཤེགས་རྣམས་ཀྱི་བཀྲ་ཤིས་གང་ཡོད་པ། །བཀྲ་ཤིས་དམ་པ་དེས་ཀྱང་དེང་འདིར་བཀྲ་ཤིས་ཤོག །རྡོ་རྗེ་སེམས་མ་དང་ནི་རིན་
ཆེན་སེམས་མ་དང་། །ཆོས་ཀྱི་སེམས་མ་དང་ནི་ལས་ཀྱི་སེམས་མར་བཅས། །བཅོམ་ལྡན་ཡུམ་མཆོག་རྣམས་ཀྱི་བཀྲ་ཤིས་གང་ཡོད་པ། །བཀྲ་ཤིས་དམ་པ་དེས་ཀྱང་དེང་འདིར་བཀྲ་ཤིས་ཤོག །རྡོ་རྗེ་སེམས་དཔའ་དང་ནི་རྡོ་རྗེ་རྒྱལ་པོ་དང་། །རྡོ་རྗེ་ཆགས་པ་
དང་ནི་རྡོ་རྗེ་ལེགས་པར་བཅས། །བཅོམ་ལྡན་མི་བསྐྱོད་འཁོར་གྱི་བཀྲ་ཤིས་གང་ཡོད་པ། །བཀྲ་ཤིས་དམ་པ་དེས་ཀྱང་དེང་འདིར་བཀྲ་ཤིས་ཤོག །རྡོ་རྗེ་རིན་ཆེན་དང་ནི་རྡོ་རྗེ་གཟི་བརྗིད་དང་། །རྡོ་རྗེ་རྒྱལ་མཚན་དང་ནི་རྡོ་རྗེ་བཞད་པར་བཅས། །བཅོམ་ལྡན་རིན་འབྱུང་འཁོར་
གྱི་བཀྲ་ཤིས་གང་ཡོད་པ། །བཀྲ་ཤིས་དམ་པ་དེས་ཀྱང་དེང་འདིར་བཀྲ་ཤིས་ཤོག །རྡོ་རྗེ་ཆོས་རབ་དང་ནི་རྡོ་རྗེ་རྣོན་པོ་དང་། །རྡོ་རྗེ་འཁོར་ལོ་དང་ནི་རྡོ་རྗེ་སྨྲ་བར་བཅས། །བཅོམ་ལྡན་སྣང་མཐའི་འཁོར་གྱི་བཀྲ་ཤིས་གང་ཡོད་པ། །བཀྲ་ཤིས་དམ་པ་དེས་ཀྱང་དེང་འདིར་
བཀྲ་ཤིས་ཤོག །རྡོ་རྗེ་ལས་རབ་དང་ནི་རྡོ་རྗེ་སྲུང་བ་དང་། །རྡོ་རྗེ་གནོད་སྦྱིན་དང་ནི་རྡོ་རྗེ་ཁུ་ཚུར་བཅས། །བཅོམ་ལྡན་དོན་གྲུབ་འཁོར་གྱི་བཀྲ་ཤིས་གང་ཡོད་པ། །བཀྲ་ཤིས་དམ་པ་དེས་ཀྱང་དེང་འདིར་བཀྲ་ཤིས་ཤོག །ལྷ་མོ་སྒེག་མོ་དང་ནི་ལྷ་མོ་ཕྲེང་བ་མ། །ལྷ་མོ་གླུ་མ་
དང་ནི་ལྷ་མོ་གར་མར་བཅས། །ནང་གི་མཆོད་པའི་ལྷ་མོའི་བཀྲ་ཤིས་གང་ཡོད་པ། །བཀྲ་ཤིས་དམ་པ་དེས་ཀྱང་དིང་འདིར་བཀྲ་ཤིས་ཤོག །ལྷ་མོ་བདུག་སྤོས་མ་དང་ལྷ་མོ་མེ་ཏོག་མ། །ལྷ་མོ་མར་མེ་མ་དང་ལྷ་མོ་དྲི་མར་བཅས། །ཕྱི་ཡི་མཆོད་པའི་ལྷ་མོའི་བཀྲ་ཤིས་
གང་ཡོད་པ། །བཀྲ་ཤིས་དམ་པ་དེས་ཀྱང་དིང་འདིར་བཀྲ་ཤིས་ཤོག །སྒོ་བ་ལྕགས་ཀྱུ་དང་ནི་སྒོ་བ་ཞགས་པ་དང་། །སྒོ་བ་ལྕགས་སྒྲོག་དང་ནི་སྒོ་བ་དྲིལ་བུར་བཅས། །བཅོམ་ལྡན་སྒོ་སྲུང་རྣམས་ཀྱི་བཀྲ་ཤིས་གང་ཡོད་པ། །བཀྲ་ཤིས་དམ་པ་དེས་ཀྱང་དིང་འདིར་
བཀྲ་ཤིས་ཤོག །དཔལ་རྣལ་འབྱོར་གྱི་རྒྱུད་ཀྱི་དཀྱིལ་འཁོར་གྱི་ལྷ་དེ་བཞིན་གཤེགས་པ་རིགས་ལྔ་འཁོར་དང་བཅས་པ་ལྷ་སུམ་ཅུ་རྩ་བདུན་གྱི་བཀྲ་ཤིས་ཚིགས་སུ་བཅད་པ་རྫོགས་སོ།། ༄༅༅། །རྒྱ་གར་སྐད་དུ། མཾ་ག་ལ་ཨཥྚ་
ཀ །བོད་སྐད་དུ། བཀྲ་ཤིས་བརྒྱད་པ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འཇམ་པའི་དཔལ་དང་འཇིག་རྟེན་མགོན་པོ་རྒྱལ་བ་མཆོག་གི་ཅོད་པན་དང་ནི་ཛམྦྷ་ལ། །རྡོར་སེམས་བྱམས་པ་ཕྱག་ན་རྡོ་རྗེ་ལག་ན་ཨུཏྤལ་བཟང་སྐྱོང་དང་ནི་སྒྲ་
གཅན་འཛིན། །སངས་རྒྱས་རྣམ་པར་སྣང་མཛད་ལ་སོགས་ས་གསུམ་ཕྱག་རྒྱས་ཉེས་པ་མ་ལུས་ཟད་གྱུར་པ། །དགྱེས་པ་རྣམས་ཀྱིས་དྲི་མེད་ཡིད་བདེ་དོན་ཀུན་གྲུབ་པའི་བཀྲ་ཤིས་ཁྱོད་ལ་སྩལ་དུ་གསོལ། །རྡོ་རྗེ་ཧཱུྃ་མཛད་ཕྱུགས་བདག་འདུལ་བྱེད་རྡོ་རྗེ་དྲིལ་བུ་པདྨའི་ལག་པ་ཅན་དང་
ནི། །ཧ་ལཱ་ཧ་ལཱ་སེར་པོ་དག་དང་དགྲ་ཡི་ཚོགས་འཇོམས་ཌཀྐིའི་རྒྱལ་པོ་བདག་ཉིད་ཆེ། །མི་བསྐྱོད་པ་དང་སྤོས་ཀྱི་གླང་པོ་རིན་ཆེན་ཏོག་དང་རབ་འཇིགས་མི་གཡོ་གཤིན་རྗེའི་དགྲ། །དགྱེས་པ་རྣམས་ཀྱིས་དྲི་མེད་ཡིད་བདེ་དོན་ཀུན་གྲུབ་པའི་བཀྲ་ཤིས་ཁྱོད་ལ་སྩལ་
དུ་གསོལ། །ཡོན་ཏན་ཚོགས་མངའ་བྱང་ཆུབ་སེམས་ཀྱིས་སེམས་བརྒྱན་དགེ་འདུན་འཇིག་རྟེན་གསུམ་གྱིས་ཕྱག་བྱས་དང་། །དགའ་བ་རབ་གྲུབ་སངས་རྒྱས་རྩོད་པའི་དྲི་མ་ལས་རྒྱལ་ཧེ་རུ་ཀ་དང་དབྱིག་སྔོན་ཅན། །སངས་རྒྱས་སཱ་ལའི་དབང་པོ་རྒྱལ་པོ་རྒྱལ་བའི་ཡོན་རིགས་སེམས་
ཅན་ཀུན་ལ་རྗེས་བརྩེ་བ། །དགྱེས་པ་རྣམས་ཀྱིས་དྲི་མེད་ཡིད་བདེ་དོན་ཀུན་གྲུབ་པའི་བཀྲ་ཤིས་ཁྱོད་ལ་སྩལ་དུ་གསོལ། །ཤེས་རབ་སྐུལ་བྱེད་སྒྲོལ་མ་དག་དང་ཡེ་ཤེས་ཚོགས་ནི་བསགས་པར་གྱུར་པའི་ཁྲོ་གཉེར་ཅན། །བདུད་ཀྱི་བདུད་གྱུར་འོད་ཟེར་ཅན་མ་ཞལ་གསུམ་
མདོག་སེར་འཇིགས་པ་མཐའ་དག་རབ་འཇོམས་མ། །རྨ་བྱ་ཆེན་མོ་མཱ་མ་ཀཱི་དང་དགྲ་ཡི་ཚོགས་འཇོམས་གོས་དཀར་མོ་དང་སངས་རྒྱས་སྤྱན། །དགྱེས་མ་རྣམས་ཀྱིས་དྲི་མེད་ཡིད་བདེ་དོན་ཀུན་གྲུབ་པའི་བཀྲ་ཤིས་ཁྱོད་ལ་སྩལ་དུ་གསོལ། །གནྡྷ་རི་དང་ལག་ན་ལྟོས་འགྲོ་ཞགས་པ་
ལྕགས་ཀྱུ་རལ་གྲི་འཛིན་བྱེད་དུག་སེལ་མ། །རྡོ་རྗེ་ལག་པ་མ་དང་ཕག་མོ་དགྲ་སྟ་རལ་གྲི་འཛིན་བྱེད་ཆོས་ཀྱི་དབང་ཕྱུག་མ། །བདེ་མཆོག་ལས་བྱུང་ཡེ་ཤེས་དཔའ་བོ་དཔུང་རྒྱན་ཕྱག་དྲུག་རྒྱལ་མཚན་རབ་ཏུ་འཆང་བྱེད་པ། །དགྱེས་པ་རྣམས་ཀྱིས་དྲི་མེད་ཡིད་བདེ་དོན་ཀུན་གྲུབ་པའི་
བཀྲ་ཤིས་ཁྱོད་ལ་སྩལ་དུ་གསོལ། །རྒྱལ་བ་མཆོད་བྱེད་པི་ཝང་ཕྲེང་མ་གླུ་མ་དང་ནི་རི་ཁྲོད་བདུག་སྤོས་རྡོ་རྗེ་མ། །རོ་ལངས་མར་མེ་དྲི་ཡི་རྡོ་རྗེ་རབ་ཏུ་བཞད་གདོང་བདེ་འགྲོ་དག་དང་མི་ཕམ་མ། །སངས་རྒྱས་བྱང་ཆུབ་དཔལ་མོ་དང་ནི་རྒྱལ་བ་མཐའ་དག་མཉེས་པར་བྱེད་པའི་དབྱངས་
ཅན་མ། །དགྱེས་མ་རྣམས་ཀྱིས་དྲི་མེད་ཡིད་བདེ་དོན་ཀུན་གྲུབ་པའི་བཀྲ་ཤིས་ཁྱོད་ལ་སྩལ་དུ་གསོལ། །རྒྱལ་བ་མཆོག་གིས་ཆོས་འཁོར་བསྐོར་གྱུར་ཡངས་པ་ཅན་དང་བྱ་རྒོད་ཕུང་པོའི་རི་བོ་དང་། །ལུམ་བི་ནི་དང་མཉན་ཡོད་དང་ནི་ས་ཡི་སྟེང་གནས་ཀོ་ཀ་མེད་དང་བྱང་
ཆུབ་ཤིང་། །དཔལ་གྱི་བེའུ་དང་ཨ་ཤད་འདབ་མ་ཞོལ་འབྲས་མེ་ཏོག་དཔལ་འབྲས་དུང་དང་འཁོར་ལོ་ཅན། །དགྱེས་པ་རྣམས་ཀྱིས་དྲི་མེད་ཡིད་བདེ་དོན་ཀུན་གྲུབ་པའི་བཀྲ་ཤིས་ཁྱོད་ལ་སྩལ་དུ་གསོལ། །གདུགས་དང་དཱུར་བ་པདྨ་དང་ནི་རྒྱལ་མཚན་དག་དང་ཉ་དང་པི་
ཝང་སིལ་སྙན་འཛིན། །ཕེག་པ་དག་དང་རབ་གང་བུམ་པ་ཐུབ་པ་གསུང་མཆོག་རྡོ་རྗེ་དྲིལ་བུའི་སྒྲ་དང་ནི། །སངས་རྒྱས་ཆོ་འཕྲུལ་འཇོ་སྒེག་བཞད་འགྲོས་རྣམ་པར་རོལ་པ་ལྷ་དང་མི་ཡིས་ཕྱག་བྱས་པ། །དགྱེས་པ་རྣམས་ཀྱིས་དྲི་མེད་ཡིད་བདེ་དོན་ཀུན་གྲུབ་པའི་བཀྲ་ཤིས་ཁྱོད་
ལ་སྩལ་དུ་གསོལ། །རྗེ་བཙུན་འཕགས་མ་སྒྲོལ་མས་གསུངས་པའི་བཀྲ་ཤིས་བརྒྱད་པ་རྫོགས་སོ།། །།རྒྱ་གར་གྱི་མཁན་པོ་བི་ན་ཡ་ཤྲཱི་མི་ཏྲ་དང་། ལོ་ཙཱ་བ་ལྡན་མ་ཚུལ་ཁྲིམས་སེང་གེས་བསྒྱུར་བའོ།། ༄༅༅། །རྒྱ་གར་སྐད་དུ།
མཾ་ག་ལ་གཱ་ཐཱ། བོད་སྐད་དུ། བཀྲ་ཤིས་ཀྱི་ཚིགས་སུ་བཅད་པ། དཀོན་མཆོག་གསུམ་ལ་ཕྱག་འཚལ་ལོ། །དམ་པ་ཏོག་དཀར་དགའ་ལྡན་ཕོ་བྲང་དམ་པ་རུ། །མི་ཕམ་མགོན་ལ་རྒྱལ་ཚབ་དམ་པར་དབང་བསྐུར་ཞིང་། །འཛམ་གླིང་ཉིད་དུ་གླང་ཆེན་ཐལ་ཀ་
ལྟར་གཤེགས་གང་། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །སེར་སྐྱའི་གནས་ཀྱི་གྲོང་ཁྱེར་དམ་པར་ཟས་གཙང་སྲས། །བུད་མེད་སྐྱོན་བྲལ་གཡོ་སྒྱུ་སྤངས་པ་ལྷ་མཛེས་ཡུམ། །ལྷུམས་སུ་ཟླ་བཅུར་བློ་གྲོས་ལྡན་པ་ཤཱཀྱའི་རིགས། །བཀྲ་ཤིས་དམ་པ་
དེས་ཀྱང་དེང་འདིར་བདེ་ལེགས་ཤོག །ལུམ་བིའི་ཚལ་ནི་དབེན་ཞིང་ཉམས་དགའ་པླ་ཀྵ་ཡི། །ཡལ་ག་ནས་བཟུང་བལྟམས་གྱུར་ཚངས་དང་བརྒྱ་བྱིན་འདུད། །མཁའ་ལ་གཤེགས་ཏེ་ཕྱོགས་བཅུར་པདྨ་བྱུང་གྱུར་གང་། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་
ཤོག །གཞལ་མེད་ཁང་མཛེས་དམ་པར་དྲང་སྲོང་འདུན་མཛད་ནས། །མཚན་ལྟས་ཤིས་པར་བརྗོད་དེ་སྟོན་པར་འབྱུང་འགྱུར་དང་། །ཤཱཀ་རིགས་བུད་མེད་འཁོར་ལྡན་ཀུན་བསུས་རྒྱན་བཏགས་གང་། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །གཞོན་ནུའི་སྟོབས་ནི་
སྒྱུ་རྩལ་ཡིག་རྩིས་འཕོང་ལ་སོགས། །ཀུན་ལས་མཐར་བྱུང་ལྷ་མི་ལ་སོགས་ཀུན་གྱིས་མཆོད། །ཤཱཀྱའི་རིགས་འཁྲུངས་ལོག་རྟོག་བསལ་ཕྱིར་བཙུན་མོའི་འཁོར། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །ཕོ་བྲང་ནས་བྱུང་རྒ་ན་ཤི་བ་ལ་
སོགས་གཟིགས། །མི་རྣམས་རྨོངས་མཛད་ལྷ་ཡིས་མདུན་བདར་མཁའ་ལ་ནི། །སྲིད་གསུམ་དག་ལས་རྒལ་ཕྱིར་མཐོན་མཐིང་དབུ་སྐྲ་བྲེགས། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །ལྷ་རྣམས་རྫུ་འཕྲུལ་གྱིས་ནི་ངུར་སྨྲིག་གོས་རྣམས་ཕུལ། །ནཻ་རཉྫ་ནའི་ཆུ་
བོར་དཀའ་ཐུབ་མ་ལུས་རྫོགས། །ཐུབ་པ་བསམ་གཏན་ལས་བཞེངས་བཀྲ་ཤིས་འོ་ཐུག་བཞེས། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །པདྨ་ལས་བྱུང་ཁྱུ་མཆོག་བྱང་ཆུབ་ཤིང་དྲུང་དུ། །སྐྱིལ་མོ་ཀྲུང་བཅས་མི་གཡོ་མཆོག་གིས་བདུད་བཏུལ་ནས། །ཐོ་རངས་
བདུད་བཏུལ་མི་འགྱུར་ཕུན་སུམ་སངས་རྒྱས་པ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །བཱ་རཱ་ཎ་སཱིར་ཆོས་ཀྱི་འཁོར་ལོ་མགོན་པོས་བསྐོར། །ཀུན་ཤེས་ལ་སོགས་ལྔ་སྡེ་བཟང་ལ་བདེན་བཞི་བསྟན། །ལྷ་ཀླུ་ལྷ་མིན་མི་དང་མི་མིན་འདུན་གྱུར་གང་། །བཀྲ་ཤིས་
དམ་པ་དེས་ཀྱང་དེང་འདིར་བདེ་ལེགས་ཤོག །ང་རྒྱལ་སྙེམས་པར་ལྡན་པའི་སྟོན་པ་དྲུག་བཏུལ་ཅིང་། །གླང་ཆེན་རབ་སྨྱོ་མི་བཟད་ལྷ་སྦྱིན་གྱིས་རྦད་བཏུལ། །དྲང་སྲོང་མཆོག་ལ་སྤྲེའུ་རྒྱལ་ཅང་ཤེས་སྦྲང་རྩི་ཕུལ། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །པདྨོ་གཞོན་ནུ་
ལྟ་བུའི་མཚན་ལྟས་ཤཱཀྱའི་རིགས། །ཟས་གཙང་སྲས་སུ་རྒྱལ་རིགས་འཁོར་ལོས་སྒྱུར་རྒྱལ་དུ། །བལྟམས་པ་ནས་བཟུང་ལྷ་ཡི་ཚལ་དུ་མ་ལུས་རྫོགས། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །བྱམས་པའི་སྟོབས་ནི་འགྲོ་བ་མ་ལུས་སྒྲོལ་མཛད་ཅིང་། །
སེམས་ཅན་མཐའ་ཡས་ཞི་བདེའི་ལམ་ལ་བཀོད་གྱུར་ཏེ། །གྲོང་ཁྱེར་རྩྭ་མཆོག་དམ་པར་དགོངས་པ་ཡོངས་རྫོགས་གང་། །བཀྲ་ཤིས་དམ་པ་དེས་ཀྱང་དེང་འདིར་བདེ་ལེགས་ཤོག །བཀྲ་ཤིས་ཀྱི་ཚིགས་སུ་བཅད་པ་རྫོགས་སོ།། །།