Luận tạng Tây Tạng (Tengyur) — Tập 79

གས་གཞན་ལ་གུས་པ་དང་། །ཕྱག་དང་མཆོད་པ་
རྣམས་མི་བྱ། །ཞེས་སོ། །བརྒྱད་སྟོང་པ་ལས་ཀྱང་ལྷ་གཞན་རྣམས་ལ་མེ་ཏོག་དང་བདུག་སྤོས་དང་མར་མེ་རྣམས་སྦྱིན་པར་མི་བྱ་རི་མོར་མི་བྱ་ཞེས་སོ། །དེ་ནས་ན་མཿས་མནྟ་པྲ་བྷ་རཱ་ཛཱ་ཡ་ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷཱ་ཡ། ན་མོ་མཉྫུ་ཤྲཱི་ཀུ་མཱ་ར་བྷཱུ་ཏཱ་ཡ་བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་
རུ་ཎི་ཀཱ་ཡ། ཏདྱ་ཐཱ། ཨོཾ་ནི་རཱ་ལམྦྷེ་ནི་རཱ་བྷཱ་སེ། ཛ་ཡེ་ཛ་ཡ་ལབྡྷེ་མ་ཧཱ་མ་ཏེ་དཀྵེ་དཀྵི་ཎཱཾ་པ་རི་ཤོ་དྷཱ་ཡ་སྭཱ་ཧཱ། གང་གཟུངས་འདི་ལན་གཅིག་རྗོད་པར་བྱེད་པ་དེ་རི་རབ་ཙམ་གྱི་བསོད་ནམས་ཡང་ཡོངས་སུ་སྦྱོང་བར་འགྱུར་རོ་ཞེས་པ་བསོད་ནམས་ཡོངས་སུ་སྦྱོང་བའི་གཟུངས་བརྗོད་པར་བྱའོ། །མཚན་
མོའི་དང་པོ་མི་ཉལ་བར་དམ་པའི་ཆོས་ཀྱི་ཁ་ཏོན་དང་བཟླས་པ་ལ་སོགས་པ་བྱས་ནས་ཉལ་བ་ན་མལ་དུ་ཡན་ལག་ཐམས་ཅད་བཏུད་པས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་བྱ་ཞིང་གསོལ་བ་ཡང་བཏབ་ནས་ཉལ་ཏེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་
ཀྱིས་བདག་ལ་བྱིན་ཀྱིས་བརླབ་ཏུ་གསོལ། བླ་ན་མེད་པའི་དངོས་གྲུབ་དང་མཆོག་བདག་ལ་སྩོལ་ཅིག །ཉེ་བར་འཚེ་བ་ཐམས་ཅད་ཀྱང་མེད་པར་མཛད་དུ་གསོལ་ཞེས་པ་དང་། རང་གི་འདོད་ལྷའི་རྣལ་འབྱོར་དང་ལྡན་པས། ན་མོ་བྷ་ག་བ་ཏེ་ཨཱརྱ་པྲཛྙཱ་པཱ་ར་མི་ཏ་ཡེ། སརྦ་ཏ་ཐཱ་ག་ཏཱ་པ་

རི་མི་ཏཱ་པཱུ་རི་ཏ་ཡེ། ཏདྱ་ཐཱ། ཨོཾ་སིདྡྷི་སིདྡྷི། བུདྡྷ་བུདྡྷ། བོ་དྷ་ཡ་བོ་དྷ་ཡ། ཙ་ལ་ཙ་ལ། ཏིཥྛ་ཏིཥྛ། ཧི་ཀཾ་པ་ཀཾ་པ། བཱ་ར་བཱ་ར། གཙྪ་གཙྪ། ཨཱ་གཙྪ་ཨཱ་གཙྪ་བྷ་ག་བ་ཏི་མཱ་བི་ལམྦ་སྭཱ་ཧཱ། གཟུངས་འདིས་ལག་པ་གཡས་པ་ལ་ལན་ཉི་ཤུ་རྩ་གཅིག་ཡོངས་སུ་
བཟླས་ཏེ། དེའི་སྟེང་དུ་མགོ་གཞག་སྟེ་སེང་གེའི་ཉལ་སྟབས་ཀྱིས་ཉལ་ལོ། །མཚན་མོ་ཐ་མ་ནས་དེ་བཞིན་དུ་ཡི་དམ་ཡེངས་པ་དང་རྒྱུན་ཆད་པ་མེད་པར་ཡི་དམ་མཐའ་དག་བྱའོ། །དེ་ལྟར་ཉིན་རེ་ཞིང་བྱས་ན་རིགས་ཀྱི་བུའམ་རིགས་ཀྱི་བུ་མོ་མྱུར་དུ་བྱང་ཆུབ་ཏུ་འགྱུར་རོ། །དེ་ཡང་གསུངས་པ།
སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་ལ་སོགས་རྟག་བརྟེན་བྱ། །དུས་ནི་ཡུན་མི་རིང་བ་ཡིས། །བྱང་ཆུབ་མཆོག་ནི་ཐོབ་པར་འགྱུར། །ཞེས་སོ། །གཞུང་བསྡུས་པ་ཡི་བསོད་ནམས་ལས་ཀྱིས་ནི། །བདག་ཅག་བྱང་ཆུབ་གཞུང་ལམ་འདི་བརྟེན་ནས། །སྤྲོ་བས་སྣ་ཚོགས་
སྤྱོད་པ་སྤྱད་ནས་ནི། །སྐྱེ་བོས་བླ་མེད་གོ་འཕང་ཐོབ་པར་ཤོག །བྱང་ཆུབ་གཞུང་ལམ་ཞེས་བགྱི་བ་སློབ་དཔོན་མཁས་པ་ཆེན་པོ་འཇིགས་མེད་འབྱུང་གནས་སྦས་པས་མཛད་པ་རྫོགས་སོ།། །།ཇི་ལྟར་མཐོང་བ་བཞིན་བསྡུས་པ་སྟེ་གཞུང་གི་ཚད་ནི་ཤློ་ཀ་སུམ་བརྒྱ་ཉི་ཤུ་རྩ་ལྔའོ། །དང་པོའི་
ལས་ཀྱི་བྱ་བ་མ་བརྟེན་པར། །ངེས་པར་བྱང་ཆུབ་མཆོག་ཐོབ་མི་ནུས་ཀྱང་། །རྩོད་དུས་སྐྱེ་བོ་སྟོང་པ་ཉིད་སྨྲ་ཞིང་། །གཞུང་ལམ་དང་པོའི་ལས་ཀྱི་བྱ་བ་རྣམས། །མི་ཤེས་མི་ནུས་མི་བྱེད་པ་རྣམས་མཐོང་། །སྤྱོད་འདོད་མི་ཤེས་འགྲོ་ལ་ཕན་འདོད་ནས། །ཐུབ་པའི་དགེ་སློང་ཆག་སྟོན་ལོ་ཙཱ་བས། །
བྱང་ཆུབ་གཞུང་ལམ་འདི་ནི་འབད་པས་བསྒྱུར། །ཉེས་ཀུན་བཟོད་གསོལ་དགེ་བས་བདག་གཞན་རྣམས། །སྒྲིབ་བྲལ་ཚོགས་གཉིས་རྫོགས་པའི་སངས་རྒྱས་ཤོག །ཁ་ཆེའི་མཁན་པོ་ཆེན་པོ་ཆོས་ཀྱི་རྗེ་ཤཱཀྱ་ཤྲཱི་བྷ་དྲ་ལས་མཉན་ནས་བོད་ཡུལ་དབུས་ཀྱི་སྡེ་སྣོད་འཛིན་པ་ཆག་ལོ་ཙཱ་བ་དགེ་
སློང་དགྲ་བཅོམ་གྱིས་བསྒྱུར་བའོ།། ༄༅༅། །རྒྱ་གར་སྐད་དུ། མཎྜལ་བི་དྷིཿ། བོད་སྐད་དུ། མཎྜལ་གྱི་ཆོ་ག །ཐུགས་རྗེ་ཆེན་པོ་རྣམ་པར་སྐྱོབ་ལ་ཕྱག་འཚལ་ལོ། །དཀྱིལ་འཁོར་བཟང་པོ་ས་ཉིད་དང་། །རིན་ཆེན་རང་བཞིན་ངོས་མཉམ་ལ། །དྲི་ཞིམ་པ་ཡི་བྱུག་

པས་བྱུག །མུ་ཏིག་མེ་ཏོག་ནོར་བུ་དགོད། །དབུས་སུ་འདབ་བརྒྱད་འདབ་བཞི་ཡི། །མེ་ཏོག་དམར་པོ་ས་བོན་ཅན། །བཞག་ལ་དེ་སྟེང་ཐུབ་པ་བཞུགས། །གདུགས་དཀར་གྱིས་ནི་སྟེང་ནས་དབུབ། །སྒྲུབ་པོ་པདྨའི་ཕྲེང་བ་ཡི། །ང་རྒྱལ་འཛིན་པས་རྡོ་རྗེའི་ལག །གཉིས་གཤིབས་
གྱེན་དུ་བསྐྱོད་པའི་རྒྱས། །ས་གསུམ་གཙོ་བོ་སྤར་བར་བྱ། །རབ་ཏུ་དབྱིབས་ལེགས་ཁ་དོག་མཛེས། །དྲི་བསུང་རོ་མཆོག་རེག་བཟང་བའི། །མེ་ཏོག་སྤུངས་པས་གོ་རིམས་བཞིན། །གླིང་སོགས་བཀོད་པ་ཇི་བཞིན་བརྟག །ཨོཾ་ཨཱཿབཛྲ་ཙ་ཏུར་དྭཱི་པ་ཧཱུཾ། ཨོཾ་ཨཱཿབཛྲ་པ་ཡཱཥྚ་དྭཱི་པ་ཧཱུཾ།
ཨོཾ་ཨཱཿབཛྲཱཥྚ་རཏྣ་ཧཱུཾ། ཨོཾ་ཨཱཿབཛྲཱཥྚ་མངྒ་ལ་ཧཱུཾ། ཨོཾ་ཨཱཿབཛྲ་སིདྡྷི་བིཾ་ཤ་ཏི་ཧཱུཾ། ཨོཾ་ཨཱཿབཛྲ་སཱུརྱ་ཙནྡྲ་ཧཱུཾ། རྣམ་དག་ཞིང་དུ་ཕུན་ཚོགས་གླིང་དང་རིན་ཆེན་དང་། །བཀྲ་ཤིས་གྲུབ་པ་རིམ་གསུམ་ཕྲེང་བ་ལེགས་བཀོད་ལ། །གསལ་བྱེད་སྒྲོན་མ་འབར་བ་གཉིས་ཀྱིས་བརྒྱན་གྱུར་པ། །སྔགས་
འཆང་རྡོ་རྗེ་རོལ་པའི་གར་གྱི་བསྟབས་པས་དབུལ། །དེ་ནས་ལུས་ཅན་ཐམས་ཅད་ལ། །འཇིག་རྟེན་མགོན་པོ་ཉེར་མཁོའི་གཟུགས། །དཔག་མེད་རྣམ་པར་འཕྲུལ་པ་ཡིས། །ཞིང་རྣམས་ཀུན་དུ་དོན་ཡོད་སྤྱོད། །ཇི་སྲིད་སྙིང་པོ་བྱང་ཆུབ་བར། །དེ་དག་ནམ་ཡང་འདྲེན་པའི་མཐུས། །ངན་
འགྲོའི་སྒྲ་ཡང་མི་གྲག་ཅིང་། །རྟག་ཏུ་དགའ་སྐྱིད་འཚོ་བར་བྱེད། །གལ་ཏེ་བློ་གསལ་སྤོབས་སྤྱོད་ན། །སྐུ་གསུང་ལ་སོགས་གང་བཤད་པ། །ཆོ་ག་དེ་དག་འདས་པ་ཡང་། །གདོན་མི་ཟ་བར་བྱ་བ་ཉིད། །གང་ཚེ་བསྡུ་བར་འདོད་པ་ན། །སེ་གོལ་བརྡབས་པས་སྤར་བྱས་ལ། །བཟོད་པར་
གསོལ་དང་སྨོན་ལམ་གདབ། །དྲན་པའི་རྒྱུ་ཡིས་གཟུངས་གདབ་བྱ། །མཎྜལ་གྱི་ཆོ་ག་ཁ་ཆེའི་པཎ་ཆེན་གྱིས་མཛད་པ་རྫོགས་སོ།། །།གནུབས་བྱམས་པའི་དཔལ་གྱིས་བསྒྱུར་རོ།། ༄། །དེ་ཁོ་ན་ཉིད་བསྡུས་པའི་མན་ངག་བཞུགས།། ༄༅༅། །བཅོམ་ལྡན་འདས་རྡོ་རྗེ་སེམས་
དཔའ་ལ་ཕྱག་འཚལ་ལོ། །དེ་ལ་གང་ཟག་གཅིག་གི་ཉིན་ཞག་གཅིག་གི་བྱ་བ་བརྗོད་པར་བྱ་སྟེ། དང་པོ་ཐོ་རངས་ཀྱི་ཆ་ནས་བརྩམས་ཏེ་ཇི་སྲིད་ཉལ་བ་ལ་ཐུག་པའི་བར་ལ་བྱ་བ་བསྡུས་པ་ནི་རྣམ་པ་བརྒྱད་དེ། གོས་དང་ཁྲུས་དང་བླ་མ་མཆོད། །ཟས་དང་སྐོམ་དང་སྤྱོད་ལམ་དང་། །ཏིང་འཛིན་ཉལ་

བའི་མཐར་ཐུག་པ། །བརྒྱད་པོ་འདི་ནི་བསྡུས་པའོ། །ཞེས་སྤྲིན་ལས་གྲོལ་བས་གསུངས་ཏེ་མདོར་བསྡུས་པའོ། །ད་ནི་དེ་དག་གི་མཚན་ཉིད་རེ་རེ་ནས་རྒྱས་པར་བཤད་པར་བྱ་སྟེ་དེ་ལ་དང་པོར་གོས་དང་ཞེས་པ་ནི། ཐོག་མར་མལ་ནས་ལངས། གོས་བགོ་བའི་ཕྱིར་གོས་ཀྱི་
རྣལ་འབྱོར་བྱ་སྟེ་རང་གིས་བྱིན་གྱིས་བརླབས་པའམ། མ་བརླབས་པ་ཡང་རུང་སྟེ་གོས་ཅུང་ཟད་སྟོང་པ་ཉིད་དུ་བསམས་ཏེ། རང་གི་སྙིང་ག་ནས་འོད་འཕྲོས་པས་བཅོམ་ལྡན་འདས་རྡོ་རྗེ་འཆང་གི་ཐུགས་ཀར་ཕོག་སྟེ་དེ་ལས་ཡི་གེ་ཧཱུཾ་དཔག་ཏུ་མེད་པ་བཀུག་སྟེ་རང་གི་གོས་ལ་བསྟིམ། དེ་ཞུ་རྡོ་
རྗེ་རྒྱ་གྲམ་དུ་གྱུར། །རང་གི་སྔགས་བརྗོད་གོས་གྱུར་ཏེ། །རང་ལྷའི་ང་རྒྱལ་ལ་གནས་པས། །བགོས་པས་བར་ཆད་རྣམས་སེལ་དང་། །མ་འོངས་པ་ན་རྡོ་རྗེ་འཆང་། །འགྲོ་བའི་དོན་རྣམས་བྱེད་པར་འགྱུར། །དེ་ཕྱིར་ནན་ཏན་ཐམས་ཅད་ཀྱིས། །དང་པོ་དབང་བསྐུར་དུས་དག་
ཏུ། །གོས་ཀྱི་དབང་བསྐུར་བྱ་བ་གཅེས། །ཁྲུས་དང་ཞེས་པ་ནི། དེ་ནས་ཁྲུས་ཀྱི་དུས་དག་ཏུ། །རང་གི་ལྷ་ཡི་ང་རྒྱལ་གྱིས། །བུམ་པའམ་གཞན་ཡང་རུང་བ་ནི། །ཆུ་ཡིས་བཀང་སྟེ་མདུན་བཞག་ནས། །ཐུགས་ཀའི་ཧཱུཾ་ལས་འོད་འཕྲོས་པས། །དབང་བསྐུར་བླ་མའི་ཐུགས་ཀར་
ཕོག །དེ་ལས་ཀྱང་འོད་འཕྲོས་པ་ལས། །ཕྱོགས་བཅུར་བཞུགས་པའི་སངས་རྒྱས་དང་། །རང་འདོད་ལྷ་ཡི་འོད་ཟེར་ལས། །སྒྲ་བྱུང་གསོལ་བ་བཏབ་པར་བསམ། །བྱང་ཆུབ་རྡོ་རྗེས་སངས་རྒྱས་ལ། །ཇི་ལྟར་མཆོད་ཆེན་བགྱིས་པ་ལྟར། །བདག་ཀྱང་རབ་ཏུ་བསྒྲལ་སླད་དུའོ། །ནམ་
མཁའ་རྡོ་རྗེ་དེང་བདག་སྩོལ། །ཞེས་བསྐུལ་བས་དེ་དག་གི་ཐུགས་ཀ་ནས། བགེགས་རྣམས་མ་ལུས་ཚར་གཅོད་པའི། །རིག་པའི་རྒྱལ་པོ་མ་ལུས་དང་། །བྱང་ཆུབ་སེམས་དཔའ་གྲངས་མེད་རྣམས། །ཇི་ལྟར་བལྟམས་པ་ཙམ་གྱིས་ནི། །ལྷ་རྣམས་ཀྱིས་ནི་ཁྲུས་གསོལ་ལྟར། །ལྷ་ཡི་ཆུ་
ནི་དག་པ་ཡིས། །དེ་བཞིན་བདག་གིས་ཁྲུས་བྱའོ། །ཨོཾ་སརྦ་ཏ་ཐཱ་ག་ཏ་ཀ་ལ་ཤ་ཨ་བྷི་ཥེ་ཀ་ས་མ་ཡ་ཤྲི་ཧཱུཾ། ཞེས་བརྗོད་མཁའ་ལ་སྤྲིན་ཕུང་བཞིན། །ལྷ་མོ་ཕྱག་ན་བུམ་པ་ནི། །བདུད་རྩིས་གང་བ་པད་ཀོར་གྱི། །ཕྱག་རྒྱས་གཟུང་སྟེ་གླུ་འདི་ལེན། །དབང་བསྐུར་རྡོ་རྗེ་ཆེན་པོ་ནི། །ཁམས་

གསུམ་ཀུན་གྱིས་ཕྱག་བྱས་པ། །གསང་གསུམ་གནས་ལས་བྱུང་བ་འདི། །སངས་རྒྱས་ཀུན་གྱིས་བྱིན་པ་ཡིན། །ཞེས་པས་བདག་ལ་དབང་བསྐུར་བསམ། །ལུས་ཀྱི་དྲི་མ་དག་པ་ལྟར། །སྒྲིབ་པ་རྣམས་ནི་དག་པར་བསམ། །ཆུ་ཡི་ཟེར་མ་འཕྲོས་པ་ལས། །མཐའ་ཡས་སེམས་ཅན་
མ་ལུས་པའི། །སྒྲིབ་པ་རྣམས་ནི་དག་པར་བསམ། །རང་གི་ཁྲུས་ཟིན་སྤྱི་བོར་ནི། །མི་བསྐྱོད་བསམ་ཞིང་སྔགས་འདི་བཟླས། །ཨོཾ་བཛྲ་སྣཱ་ན་ཧཱུཾ། བླ་མ་མཆོད་ཅེས་པ་ནི། དེ་ནས་བླ་མ་མཆོད་པ་ནི། །དད་ལ་མཎྜལ་བྱུག་བྱ་ཞིང་། །བྱིན་གྱིས་བརླབ་པར་བྱ་བ་སྟེ། །ལྕི་བ་ཆུ་དང་
བཅས་པ་ཡིས། །བཛྲ་རེ་ཁེ་ཞེས་བརྗོད་ཅིང་། །ར་རི་ཡ་ཡོ་མེད་པར་བྱུག །དེ་ནས་རང་སྙིང་ས་བོན་ལས། །ཡི་གེ་ཏྲཱཾ་འཕྲོས་མཎྜལ་སྟེང་། །གནས་ལ་སྔགས་འདི་བརྗོད་པར་བྱ། །ཨོཾ་ཏྲཱཾ་རཏྣ་མཎྜལ་བཛྲ་རེ་ཁེ་ཧཱུཾ། ལན་བདུན་གསུམ་མམ་གཅིག་ཀྱང་རུང་། །བརྗོད་པས་ཞུ་སྟེ་
ས་གཞི་ནི། །རིན་པོ་ཆེ་ཡི་རང་བཞིན་གྱུར། །དེ་ཡི་སྟེང་དུ་ཨ་དཀར་འཕྲོས། །སྔགས་འདི་བཟླས་ལ་ཟླ་བར་བསམ། །ཨོཾ་ཙནྡྲ་མཎྜལ་ལ་བཛྲ་རེ་ཁེ་ཧཱུཾ། དེ་ཡི་སྟེང་དུ་ཙནྡན་གྱི། །ཆུས་གཏོར་ཡི་གེ་ཧཱུཾ་གྱུར་ཏེ། །སྔགས་འདི་བཟླས་ཞུ་དྲི་ཞིམ་པའི། །རང་བཞིན་མཎྜལ་གྱུར་པར་
བྱ། །ཨོཾ་དྷཱུཾ་པ་ར་ཡ་རཏྣ་མཎྜལ་བཛྲ་རེ་ཁེ་ཧཱུཾ། དེ་ནས་ནོར་བུའམ་སྨན་ནམ་འབྲུ། །མེ་ཏོག་ཉིད་ཀྱིས་དགྲམ་བྱ་སྟེ། །རང་གི་འདོད་པའི་བྱེ་བྲག་གིས། །ཇི་སྙེད་འདོད་པའི་ཚོམ་བུ་བྱ། །དེ་དག་པཾ་བསམ་སྔགས་འདིས་ཞུ། །པདྨའི་གདན་དུ་གྱུར་པར་བསམ། །ཨོཾ་པཾ་པདྨ་མཎྜལ་
བཛྲ་རེ་ཁེ་ཧཱུཾ། དེ་ཡི་སྟེང་དུ་བྷྲཱུཾ་ཡིག་བསམ། །ཨོཾ་བྷྲཱུཾ་བི་ཤྭ་བི་ཤུདྡྷེ་མཎྜལ་བཛྲ་རེ་ཁེ་ཧཱུཾ། རིན་ཆེན་ལས་བྱུང་གཞལ་ཡས་ཁང་། །མཛེས་པ་ཉིད་དུ་གྱུར་པར་བསམ། །དེ་དབུས་བླ་མ་ཡི་དམ་ལྷ། །ཕྱོགས་བཅུར་བཞུགས་པའི་སངས་རྒྱས་རྣམས། །སྲས་དང་བཅས་པ་སྤྱན་
དྲངས་ལ། །དང་པོར་ལུས་ངག་ཡིད་ཀྱིས་ནི། །གུས་པ་ཡིས་ནི་ཕྱག་འཚལ་ཏེ། །ཕྱི་ནང་གསང་བ་བླ་མེད་པའི། །མཆོད་པའི་སྤྲིན་གྱིས་མཆོད་པར་བྱ། །བླ་མ་དཀོན་མཆོག་གསུམ་པོ་དང་། །ཞེས་པ་ལ་སོགས་ཚིག་རྣམས་ཀྱིས། །སྡིག་བཤགས་སྡོམ་པ་གཟུང་བར་བྱ། །དེ་

ཡིས་རང་རྒྱུད་དག་འགྱུར་ཏེ། །བདུད་རྩིའི་སྣོད་དེ་འགྱུར་བ་ཡིན། །དེ་ནས་ཡི་གེ་བརྒྱ་བརྗོད་ཅིང་། །བཟོད་གསོལ་ཨོཾ་ཨཱཿཧཱུཾ་མུཿཡིས། །གཤེགས་གསོལ་སྨོན་ལམ་གདབ་པར་བྱ། །ཟས་དང་ཞེས་པ་ནི། དེ་ནས་ཟས་ཀྱི་དུས་དག་ཏུ། །སྦྱང་བ་རྣམ་པ་བཞི་བྱ་སྟེ། །
ཟས་སྦྱང་གཏོར་མ་དང་མཐུན་ནོ། །དེ་ནས་ལྟེ་བའི་ལྐོག་ཏུ་ཡཾ། །ཞུ་བས་རླུང་གི་དཀྱིལ་འཁོར་བསམ། །དེ་སྟེང་རཾ་ལས་ཙཎྜ་ལཱི། །མར་མེའི་རྩེ་མོ་ལྟ་བུར་གསལ། །དེ་ནི་ལྟོ་བ་སྦྱང་བའོ། །དེ་ནས་རླུང་གིས་མེ་སྦར་བས། །སྙིང་ནས་ལྷ་དང་ཕུང་པོ་ཁམས། །སྐྱེ་མཆེད་ལ་སོགས་ལྷར་
གསལ་བྱ། །དེ་ནི་སྙིང་གར་སྦྱར་བར་འདོད། །གལ་ཏེ་ལ་ལ་འདི་སྐད་དུ། །སྙིང་གའི་ལྷ་ཉིད་གསལ་བ་ནི། །སྙིང་ག་སྦྱང་བར་རིགས་མོད་ཀྱི། །ཕུང་པོ་ཁམས་ལ་སོགས་པ་ལ། །སྙིང་ག་སྦྱང་ཞེས་ཅི་ཡི་ཕྱིར། །ཞེ་ན་དེ་ནི་གཙོ་བོ་སྟེ། །དང་པོ་དབང་བསྐུར་དུས་ན་ནི། །ཡེ་ཤེས་ལྷ་ནི་དུ་
མ་དག །ལུས་ལ་བཅུག་ཅིང་བྱིན་བརླབས་ལ། །སྙིང་ག་གཅིག་པུར་བཅུག་པ་ནི། །མཐོང་དང་ཐོས་པ་མེད་ཕྱིར་དང་། །རྣལ་འབྱོར་རྒྱུད་ནི་དུ་མ་ལས། །ཕུང་པོ་ཁམས་དང་སྐྱེ་མཆེད་སོགས། །ལྷ་ཉིད་ཡིན་པར་གསུངས་ཕྱིར་རོ། །དེ་ནས་ཁ་ནི་ཐབ་ཁུང་ལ། །ལྕེ་ལ་མེ་ལྷ་རྣམ་
པར་བསམ། །དེ་ནས་ལག་གཉིས་དགང་བླུགས་ཀྱིས། །ཟས་ཟ་སྦྱིན་སྲེག་ཡིན་པར་འདོད། །ཡང་ན་ལྕེ་ལ་རྡོ་རྗེ་ལ། །རྐན་ལ་པདྨ་རབ་བསམས་ཏེ། །དེ་གཉིས་སྦྱོར་བ་བྱས་པ་ལས། །བྱང་ཆུབ་སེམས་བྱུང་ལྷ་རྣམས་ཀུན། །ཚིམ་པར་བྱེད་པ་ལ་ལ་འདོད། །དེ་ནི་ལྕེ་ལྐོག་སྦྱང་
བའོ། །དེ་ནས་ལུས་ཀྱི་དཀྱིལ་འཁོར་ནི། །ཚིམ་པར་བྱ་ཕྱིར་མ་ཡེངས་པར། །ཟ་བ་འདི་ནི་མཆོག་ཡིན་ནོ། །སྐོམ་དང་ཞེས་པ་ནི། དེ་ནས་སྐོམ་གྱི་རྣལ་འབྱོར་ནི། །རང་ཉིད་ལྷ་ཡི་རྣལ་འབྱོར་གྱིས། །ལག་མཐིལ་གཡས་པར་ཉི་མ་ནི། །མཾ་ལས་སྐྱེས་པ་བལྟ་བར་བྱ། །དེ་སྟེང་
ཆང་སྣོད་ཨ་ལས་ནི། །ཐོད་པ་ཆང་གིས་བཀང་བ་ཡི། །ཁ་ནི་ཟླ་བས་མནན་པའོ། །དེ་ནང་ཧ་ཞུ་ཁ་དོག་སྦྱངས། །ཧོས་ནི་རོ་ཡི་རྟོག་པ་སྦྱངས། །ཧྲཱིཿས་ནི་བདུད་རྩི་ཆེན་པོར་ཞུ། །དེ་ནས་ཡེ་ཤེས་དབབ་པའི་ཕྱིར། །སྲིན་ལག་ཚིགས་ནི་དང་པོ་ལ། །མཐེ་བོ་རྩེ་མོ་སྦྱར་བྱས་ཏེ། །སུཾ་

ལས་སྲིན་ལག་རི་རབ་བསྐྱེད། །ཧཱུཾ་ལས་མཐེ་བོང་ས་གཞིར་བསམ། །བར་དུ་མཾ་དམར་བསམ་བྱས་ཏེ། །དེ་ལས་འོད་འཕྲོས་འོག་མིན་དུ། །རང་འདོད་ལྷ་ཡི་སྨིན་མཚམས་ཕོག །ཡབ་ཡུམ་སྙོམས་ཞུགས་བདུད་རྩི་དབབ། །ཐོད་པར་བབ་སྟེ་ས་གཞི་དང་། །རི་རབ་བཅས་པ་
དཀྲུགས་པས་ནི། །ས་གཞི་རི་རབ་ཉིད་ཀྱང་ཞུ། །ཨོཾ་ཨཱཿཧཱུཾ་ངམ་ཧ་ཧོ་ཧྲཱིཿ། །ལན་གསུམ་བདུན་སོགས་བཟླས་པར་བྱ། །དེ་ཡི་ནང་དུ་ཆོས་འབྱུང་དང་། །ཟླ་བ་ལྟ་བུ་བྲི་བྱ་ལ། །དེ་སྟེང་བླ་མ་ཡི་དམ་ལྷ། །གཞན་སོགས་བསམས་ཏེ་མཆོད་པའམ། །ཡང་ན་མདུན་གྱི་བར་སྣང་ལ། །དེ་
དག་བསམས་ལ་མཆོད་པར་བྱ། །རང་རང་སྔགས་ལ་བདུད་རྩིའི་སྔགས། །བཏགས་པས་ལུས་ངག་ཡིད་གསུམ་དང་། །བླ་མ་ལ་ནི་དབུལ་བར་བྱ། །དེ་ནས་གོང་དུ་བཤད་མཆོད་བྱ། །དེ་ནས་ཇི་རན་གནོད་མེད་པར། །ཚོད་ཟིན་པར་ནི་བཏུང་བར་བྱ། །ཚོགས་ཀྱི་མཆོད་པའི་
དུས་སུ་ནི། །ནད་ལ་གནོད་པར་གྱུར་ན་ཡང་། །ཐིགས་པ་གསུམ་ནི་དམ་ཚིག་གོ། །དེ་ལྟར་མ་བྱས་གླང་པོ་ཆེ། །སྨྱོན་པ་བཞིན་དུ་འཐུང་བྱེད་ན། །སྐྱེ་བ་ལྔ་བརྒྱར་སྨྱོན་པར་འགྱུར། །སྤྱོད་ལམ་དང་ཞེས་པ་ནི། དེ་ནས་སྤྱོད་ལམ་གྱི་དུས་སུ་སོ་སོར་བརྟག་པ་རྣམ་པ་གཉིས་ཏེ། སྣོད་
ཀྱི་འཇིག་རྟེན་གཞལ་ཡས་ཁང་། །བཅུད་ཀྱི་སེམས་ཅན་བྱེ་བྲག་གི །ལྷ་དང་ལྷ་མོར་མོས་པར་བྱ། །རང་གི་བྱ་བ་ཅི་བྱེད་ཀྱང་། །ལྷ་ཡི་ང་རྒྱལ་ལ་གནས་ནས། །ཤེས་རབ་ཕ་རོལ་ཕྱིན་ལ་སོགས། །པོ་ཏི་ཀློག་པའི་ཚེ་བདག་ཉིད། །ལྕེ་ལ་རྔ་རྡུང་རྡོ་རྗེ་བསམ། །རྐན་ལ་རྔ་ཆེན་
རབ་བསམས་ཏེ། །རྡོ་རྗེས་རྔ་ལ་རབ་བརྡུངས་པས། །སྒྲ་སྐད་ཆེན་པོས་ཕྱོགས་བཅུར་ཁྱབ། །མཐའ་ཡས་སེམས་ཅན་མ་ལུས་ཀྱི། །རྣ་བར་གང་དང་གང་མོས་ལ། །དེ་དང་དེ་ལྟར་རྟོགས་པར་བསམ། །ཡང་ན་མཐའ་ཡས་སེམས་ཅན་རྣམས། །མ་ལུས་མདུན་དུ་བཀུག་བྱས་
ལ། །བདག་གི་སྐད་ནི་གང་མོས་པར། །སོ་སོར་གོ་བར་ཆོས་བཤད་ལ། །རྟག་ཏུ་དག་པར་བསྒྲག་པར་བྱ། །འདིར་མང་སྨྲ་བས་ཅི་ཞིག་བྱ། །གང་བྱེད་ལྷ་ཡི་ང་རྒྱལ་གྱིས། །བདག་དང་གཞན་གྱིས་བྱང་ཆུབ་ནི། །ཐོབ་པར་བསམ་ཞིང་བྱ་བའོ། །ཏིང་ངེ་འཛིན་ཞེས་པ་ནི། དེ་ནས་ཕྱི་དྲོའི་

ཐུན་དག་ལ། །རང་གི་རྟོག་པའི་དོན་ལ་ནི། །བློ་གཞག་ལྷ་ཡི་ང་རྒྱལ་ནི། །ཆོ་ག་ལྔའམ་ཆོ་ག་གསུམ། །སྐད་ཅིག་བསྡུས་རྒྱས་ཤིན་ཏུ་བསྡུས། །གང་མོས་པ་ལ་བློ་བཞག་ལ། །ཐུན་མོང་དངོས་གྲུབ་འདོད་པའམ། །ངག་གི་སྒྲིབ་པ་སྦྱོང་འདོད་པས། །བཟླས་པ་གང་མོས་
ལས་བཞི་ལ། །མི་སྐྱོའི་བར་དུ་བཟླས་པར་བྱ། །བཟླས་པས་སྐྱོ་ན་རྫོགས་རིམ་ནི། །སྟེང་དང་འོག་གི་སྒོ་དག་ལ། །བསྟེན་ནས་བསྒོམ་པར་བྱ་བའོ། །དེ་ནས་གལ་ཏེ་གཏོང་འདོད་ན། །མན་ངག་བཞིན་དུ་གཏོར་མ་ནི། །བྱིན་གྱིས་བརླབས་ཏེ་དབུལ་བར་བྱའོ། །དེ་ནས་བསྟོད་དང་
བཤགས་པ་དང་། །ཕྲིན་ལས་བཅོལ་ལ་གཤེགས་སུ་གསོལ། །རང་གི་ཡེ་ཤེས་གཤེགས་པར་བྱའོ། །དེ་ནས་སྨོན་ལམ་གདབ་པ་དང་། །སྟོང་པ་ཉིད་ཀྱི་རྒྱས་གདབ་བྱ། །ཉལ་བའི་མཐར་ཐུག་ཞེས་པ་ནི། །དེ་ནས་ཉལ་ན་རྣམ་གསུམ་སྟེ། །སྟོང་པ་ཉིད་ཀྱིས་ཉལ་བ་དང་། །བསྐྱེད་
པའི་རིམ་པའི་ཉལ་ལུགས་དང་། །འཆི་བ་སླུ་བའི་ཉལ་ལུགས་སོ། །སྟོང་པ་ཉིད་ཀྱིས་ཉལ་བ་ནི། །སྣོད་ཀྱི་འཇིག་རྟེན་བཅུད་ལ་བསྡུ། །བཅུད་ཀྱི་སེམས་ཅན་ཡུམ་ལ་བསྡུ། །ཡུམ་ཡང་བདག་ལ་བསྡུས་ནས་ནི། །བདག་ཉིད་ཡེ་ཤེས་སེམས་དཔའ་ལའོ། །ཡེ་ཤེས་སེམས་དཔའ་རྡོ་རྗེ་
ལའོ། །རྡོ་རྗེ་ཧཱུཾ་སྟེ་ཧཱུཾ་རིམ་གྱིས། །ནཱ་དའི་བར་དུ་བསྡུ་བའོ། །ནཱ་ད་སྟོང་པ་ཉིད་ལ་བསྡུ། །དེ་ཡི་ངང་ལ་ཉལ་བའོ། །བསྐྱེད་པའི་རིམ་པའི་ཉལ་ལུགས་ནི། །ཡེ་ཤེས་ལྷ་རྣམས་གཤེགས་གསོལ་ཏེ། །དམ་ཚིག་སེམས་དཔའི་ང་རྒྱལ་གྱིས། །གཉིད་ཀྱིས་དུབ་པ་བསལ་བ་དང་། །སྔ་བར་
ལྡང་ཞིང་སྣང་བ་ཡི། །དྲན་པ་ཡིད་ལ་བཞག་པས་ཉལ། །འཆི་བ་སླུ་བ་ཀ་པཱ་ལ། །སྐམ་པོ་དམིགས་ཏེ་ཉལ་བའོ། །བརྒྱད་པ་འདི་ནི་བསྡུས་པའོ། །ཞེས་པའི་དོན་ནི། ནང་པར་ལངས་ཏེ་སྔ་མ་བཞིན། །གོས་ནས་བརྩམས་ཏེ་ཉལ་བའི་བར། །བྱ་བ་བརྒྱད་པོ་རྫོགས་པར་བྱ། །འདི་
ལྟའི་བྱ་བ་བརྒྱད་པོ་ནི། །དབང་བསྐུར་ཐོབ་ཅིང་དམ་ཚིག་སྐྱོང་། །བླ་མ་ལ་གུས་གཏོང་ཕོད་ཆེ། །དད་ལྡན་བརྩོན་འགྲུས་ཆེ་བ་དང་། །ལུས་ངག་སྤྱོད་པ་མཛེས་པ་ཡིས། །བླ་མ་རྡོ་རྗེ་སྤུན་ལ་གུས། །ང་རྒྱལ་ཆུང་ཞིང་བཤགས་ལ་བརྩོན། །གསོང་པོར་སྨྲ་ཞིང་གཞན་དོན་བྱེད། །དེ་

ལྟ་བུ་ལ་སྦྱིན་བྱ་ཡི། །བླ་མ་མི་བསྟེན་དམ་ཚིག་མེད་དང་རྣམ་པར་སྨིན་ལ་མི་འཛེམ་རང་ཚུལ་དྲེགས། །ཐོས་བསམ་བསྒོམ་ལ་མ་སྦྱངས་བློ་ནི་རྟོག་པའི་དྲ་བས་རྣམ་པར་གཡེངས། །ཙནྡན་ཤིང་བཞིན་ཡོན་ཏན་ཆུང་ལ་ང་རྒྱལ་ཆེ་ཕྱིར་བླ་མ་རྡོ་རྗེ་སྤུན་སོགས་ལ། །བཀུར་སྟིའི་སེམས་བྲལ་
འཇིག་རྟེན་གྲགས་པ་དོན་དུ་གཉེར་ཞིང་གཞན་ཚིག་ཁྱད་དུ་གསོད། །འདི་འདྲའི་གང་ཟག་རྣམས་དང་སྟན་གཅིག་ལ་ཡང་མི་འདུག་པོ་ཏིའང་མི་བསྟན་ན། །བཤད་དང་གདམས་ངག་སྦྱིན་པར་བྱ་བ་ཡིད་ཀྱིས་ཀྱང་ནི་བསམ་པར་མི་བྱ་དངོས་སུ་སྨོས་ཅི་དགོས། །དེ་ཁོ་ན་ཉིད་བསྡུས་པའི་མན་ངག་
སློབ་དཔོན་ཤཱི་ལ་སམྦྷ་བས་ལས་དང་པོའི་ངོར་བསྡུས་ཏེ་མཛད་པ་རྫོགས་སོ།། ༄༅༅། །རྒྱ་གར་སྐད་དུ། ནཱ་ནཱ་ཏནྟྲ་ཨུདྡྷྲྀ་ཏོ་བ་ལིཾ་བི་དྷིཿ། བོད་སྐད་དུ། རྒྱུད་སྣ་ཚོགས་ལས་བཏུས་པའི་གཏོར་མའི་ཆོ་ག །ཨོཾ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཡེ་ཤེས་ལྔ་ཡི་
རང་བཞིན་ཅན། །སྐུ་མཆོག་རང་གི་སྣང་བས་འཁྱུད། །སྐྱོབ་པ་མ་ལུས་སྤྲོ་མཛད་པ། །རྡོ་རྗེ་སེམས་དཔའ་ཕྱག་འཚལ་ནས། །དེ་བཞིན་གཤེགས་རྣམས་རབ་སྟེར་བ། །ལྷ་མོ་ཆོས་དབྱིངས་དབང་ཕྱུག་མ། །མ་ལུས་རྒྱལ་བ་རྣམས་ཀྱི་ཡུམ། །འགྲོ་བ་སྐྱོབ་ལ་རབ་བཏུད་ནས། །
གང་གི་སྐུ་དྲིན་ཆེན་པོ་ཡིས། །གསུང་ནི་བླ་མེད་ཐོབ་འགྱུར་བ། །འཇམ་པའི་དབྱངས་ཀྱི་ཞབས་པདྨ། །ཆུ་སྐྱེས་གཉིས་ལ་ཕྱག་འཚལ་ལོ། །གང་གིས་རེག་པས་འཁོར་བ་ཡི། །གདུང་བ་དག་ནི་ཞི་འགྱུར་བ། །བླ་མའི་ཞལ་སྔ་ནས་ཀྱི་ཞབས། །པདྨ་དང་འབྲེལ་རྡུལ་བསྟོད་ནས། །
སེམས་ཅན་རྣམས་ལ་ཕན་པའི་ཕྱིར། །གཏོར་མའི་སྒྲུབ་ཐབས་བདུད་རྩི་མཚུངས། །སྣ་ཚོགས་རྒྱུད་ཀྱི་རྒྱ་མཚོ་ལས། །ཡང་དག་བཏུས་ནས་བདག་གིས་བཤད། །སྔོན་གྱི་དུས་སུ་བཅོམ་ལྡན་གྱིས། །ཞལ་གྱི་མན་ངག་གསུངས་པར་གྱུར། །དེ་ཙམ་ཁོ་ནས་སེམས་ཅན་རྣམས། །གྲུབ་
གྱུར་གླེགས་བམ་དག་ལས་མིན། །དེ་ནས་གསུམ་ལྡན་དུས་གྱུར་ནས། །རྩ་བའི་རྒྱུད་རྣམས་སྤེལ་བར་འགྱུར། །དེ་ལས་དོན་གྱི་འབྲེལ་རྟོགས་ནས། །བསམས་ཏེ་སྐྱེ་བོས་དངོས་གྲུབ་ཐོབ། །གཉིས་ལྡན་དུ་ནི་གཙོར་རྒྱལ་བས། །བཤད་པ་རྒྱ་ཆེན་མཛད་པར་འགྱུར། །དེ་དོན་རྟོགས་

པ་ཉིད་ཀྱིས་ནི། །མཁས་པས་དངོས་གྲུབ་ཐོབ་པར་འགྱུར། །རྩོད་པའི་དུས་གྱུར་དེང་སང་ནི། །གསུང་རབ་ཡན་ལག་བཅུ་གཉིས་པོ། །བཅོམ་ལྡན་འདས་ཀྱིས་མང་དུ་གསུངས། །འོན་ཀྱང་སྐྱེ་བོ་ཞི་མི་གྱུར། །ཅི་ཕྱིར་འདི་ལྟར་སེམས་ཅན་རྣམས། །རྟག་ཏུ་ཚེ་དང་
བརྩོན་འགྲུས་ཆུང་། །ཆགས་སོགས་ཉོན་མོངས་གདུང་བ་ཡིས། །རྟག་ཏུ་རང་གི་སེམས་གདུངས་གྱུར། །རང་གི་ལྟོ་བ་དག་ལ་བརྩོན། །འབའ་ཞིག་ལྷུར་ལེན་ཡིད་ལྡན་པ། །རྒྱལ་པོ་མཉེས་སོགས་བྱ་བ་དག །ཐོ་རངས་ལངས་ནས་སྤྱོད་པ་བྱེད། །ནང་པར་བཤང་གཅིག་དག་
གིས་ཏེ། །ཉི་མ་ཕྱི་འཕྲེད་ཟས་སྐོམ་གྱིས། །ཚིམ་ནས་འདོད་པས་གནོད་འགྱུར་ཏེ། །སྐྱེ་བོ་མཚན་མོ་གཉིད་ཀྱིས་སོ། །རེ་ཞིག་ལོ་ནི་བརྒྱ་ཐུབ་པ། །ཚེ་ཡི་མཆོག་ཏུ་བརྗོད་པར་བྱ། །སེམས་ཅན་དེ་དག་ཉིད་ཀྱིས་ནི། །ཕྱེད་ནི་ཡོངས་སུ་ཟད་པར་འགྱུར། །བྱིས་པ་རྒས་པ་ནད་
རྣམས་ཀྱིས། །དེ་ལས་ཀྱང་ནི་ཕྱེད་ཟད་འགྱུར། །ཚེ་ཡི་ཆ་ཤས་ལྷག་མ་ཡི། །ནང་དུ་དགེ་བ་ཇི་སྙེད་བྱེད། །འོན་ཀྱང་གལ་ཏེ་དགེ་བ་ཡི། །ལས་ལ་བརྩོན་འགྲུས་དང་བཅས་འགྱུར། །སངས་རྒྱས་ཉིད་ནི་འཐོབ་འགྱུར་ན། །དེ་མིན་གཞན་གྱི་དབང་གྱུར་པས། །འདོད་ངན་ཁ་ཅིག་
བུད་མེད་ཀྱི། །དབང་པོའི་ཆུ་སྒོ་ཉམ་ང་རུ། །ལྷུང་བར་གྱུར་ན་འཁོར་བ་ཡི། །རྒྱ་མཚོར་རབ་ཏུ་ནུབ་པར་འགྱུར། །ཆོས་ཀྱི་ལམ་ལས་ཡོངས་ཉམས་ཤིང་། །སྐད་ཅིག་ལོངས་སྤྱོད་ལ་བསྐུལ་བརྩོན། །རང་ཉིད་ཉམས་པའི་གྲོགས་ངན་གྱིས། །ཁ་ཅིག་རྣམ་པར་ཉམས་པར་འགྱུར། །
ཁ་ཅིག་ཚོལ་བའི་སྡུག་བསྔལ་ཉེན། །བཟའ་བཏུང་དག་ནི་བཙལ་བའི་ཕྱིར། །རྨོངས་པ་འབད་པ་དང་ལྡན་པས། །ཕྱོགས་བཅུ་དག་ཏུ་འཁྱམས་པར་འགྱུར། །ཉིན་མཚན་གཉིད་ནི་མི་ལོག་ཅིང་། །རྒྱལ་པོ་མཉེས་སོགས་ཉོན་མོངས་ཀྱིས། །ཡོངས་གདུངས་པ་ཡི་སེམས་
ལྡན་པ། །གཞན་དག་འབྲས་བུ་མེད་པར་འགྱུར། །དེ་ལྟར་སེམས་ཅན་རྣམ་དཔྱད་ནས། །རྟག་ཏུ་མི་ཁོམ་པ་ཡི་ཚོགས། །བརྩོན་འགྲུས་མི་ལྡན་དེ་བས་ན། །བདག་གིས་ངལ་འདི་འབྲས་བུར་བཅས། །སེམས་ཅན་ལ་ནི་ཕན་འདོད་པས། །རྟོགས་པར་སླ་ཞིང་གཞུང་ཉུང་ལ། །

རབ་ཏུ་དོན་མང་ཡིད་འོང་བ། །གཏོར་མའི་ལས་ཀྱི་ཆོ་ག་བཤད། །འདི་ན་ཁ་ཅིག་ཕྱོགས་སྔ་མ། །རབ་ཏུ་བྱེད་པ་འདི་ལྟ་སྟེ། །ཆོས་རྣམས་དག་ནི་མ་སྐྱེས་ཤིང་། །གཉིས་ཀྱིས་སྟོང་ལ་སྔགས་རིག་པས། །ཇི་ལྟར་གཏོར་སྦྱིན་གང་ཞིག་ལ། །ཡང་དག་པར་ནི་བགེགས་གང་ཡོད། །
བྱུང་ནས་རབ་ཏུ་ཞིག་འགྱུར་ན། །སྔགས་ཀྱིས་གང་ཞིག་རབ་རྒྱས་བྱེད། །རང་བཞིན་གྱིས་ནི་སྐལ་བ་ཡི། །ལྷ་ཚོགས་རྣམས་ལ་གཏོར་མ་ནི། །དེ་ཉིད་རིག་པས་ཇི་ལྟར་གཏང་། །དེ་རྣམས་དེ་ནི་ཇི་ལྟར་ཟ། །མཚན་མ་གཅིག་སོགས་གནས་སུ་ནི། །གཏོར་མ་ཇི་ལྟར་དོར་བར་བྱ། །
གཞན་དུ་མིན་ཞིང་དེར་གཏོར་ཡང་། །དེ་རྣམས་ཀྱིས་དེ་ཇི་ལྟར་འཁྱེར། །གཞན་ཡང་ཤིན་ཏུ་ཉུང་བ་ཡི། །ཆུ་དང་བཟའ་བ་ལ་སོགས་པས། །ནམ་མཁའ་དང་མཚུངས་གྲངས་མེད་པའི། །འབྱུང་པོ་ཀུན་ནི་ཇི་ལྟར་ཚིམ། །ཡི་དགས་ལ་སོགས་གང་འགའ་ཞིག །ཁྲག་གི་བཏུང་བ་
འཐུང་བྱེད་པ། །སྔགས་པས་གཏོར་མ་ཙམ་གྱིས་ནི། །དེ་དག་ཇི་ལྟར་མགུ་བར་འགྱུར། །གཟོད་ནས་མ་སྐྱེས་རྫོགས་བྱང་ཆུབ། །ཐོབ་པའི་སྐྱོབ་པ་རྣམས་དང་ནི། །མཁའ་འགྲོ་མ་དང་དེ་རྣམས་ལ། །གཏོར་སྦྱིན་རིགས་པ་ཅི་ཞིག་ཡོད། །དེ་ཙམ་གྱིས་ནི་མཉེས་གྱུར་ནས། །བསྐལ་
པ་མང་པོར་རྣལ་འབྱོར་པ། །ཐོབ་འགྱུར་འདོད་པའི་དངོས་གྲུབ་གང་། །མི་རྣམས་ལ་ནི་ཇི་ལྟར་སྟེར། །འདིར་ནི་བརྗོད་བྱ་རང་བཞིན་གྱིས། །ཆོས་རྣམས་རེ་ཞིག་བདག་མེད་ཅིང་། །སྒྱུ་མ་སྨིག་རྒྱུ་དྲི་ཟ་ཡི། །གྲོང་ཁྱེར་དང་ནི་རྨི་ལམ་མཚུངས། །འོན་ཀྱང་སངས་རྒྱས་རྣམས་ཀྱིས་
ནི། །འགྲོ་འདི་བདེན་པ་གཉིས་སུ་བསྟན། །རྣམ་རྟོག་དང་བཅས་ཅིག་ཤོས་ལས། །ཀུན་རྫོབ་དང་ནི་དོན་དམ་མོ། །ཆོས་ཉིད་ལ་ནི་རབ་ཞུགས་པ། །གཉིས་མེད་རེག་པའི་རྣལ་འབྱོར་པས། །རེ་ཞིག་གཏོར་མ་དག་གི་ལས། །དམ་པའི་དོན་དུ་ཇི་ལྟར་བྱ། །འོན་ཀྱང་ཀུན་རྫོབ་
ཕྱོགས་བརྟེན་ནས། །བསོད་ནམས་ཚོགས་ནི་འཕེལ་བྱའི་ཕྱིར། །དེ་ལ་དང་པོའི་ལས་ཅན་གྱིས། །གཏོར་མའི་ལས་ནི་བྱ་བ་ཡིན། །དེ་ཉིད་ཀྱི་ནི་རིམ་གྱིས་འདིར། །བགེགས་རྣམས་ཀུན་དུ་འབྱུང་བ་ཡོད། །དེ་བས་དེ་རབ་ཞི་བྱའི་ཕྱིར། །མཁས་པ་རྣམས་ཀྱིས་གཏོར་མ་

བསྔགས། །དངོས་རྣམས་སྐད་ཅིག་ཉིད་ཡིན་ཡང་། །སྔགས་རྣམས་ལ་ནི་ནུས་པ་ཡོད། །དུག་འཇོམས་པ་ཡི་སྔགས་བཞིན་དུ། །དེ་དག་མངོན་སུམ་ཉིད་དུ་འགྲུབ། །སྔགས་རྣམས་ནུས་པ་འདི་འདྲ་སྟེ། །མི་སྣང་ལྷ་ཚོགས་གང་ཡིན་པ། །དེ་ཉིད་རེ་ཞིག་
སྤྱན་དྲངས་པས། །མིག་གི་མངོན་སུམ་ཉིད་དུ་འགྱུར། །ཤིང་གཅིག་དྲུང་ལ་སོགས་པ་ཡང་། །དངོས་གྲུབ་གནས་སུ་བཅོམ་ལྡན་གསུངས། །དེས་ན་རྣམ་པ་དེ་ལྟ་བུ། །གཏོར་མའི་གནས་སུ་གསུངས་པར་གྱུར། །ལྷ་རྣམས་རང་མཐུས་གཏོར་མ་ལས། །རོ་དག་མྱོང་བར་བྱེད་པ་
ཉིད། །དེས་ན་སྣང་བར་གྱུར་ཀྱང་ནི། །ཉེས་པ་ཡོད་པ་མ་ཡིན་ནོ། །གཞན་ཡང་དངོས་གྲུབ་མཆོག་ཐོབ་བའི། །རྣལ་འབྱོར་ལག་ནས་གཏོར་མ་ནི། །བླངས་ན་ལྷ་རྣམས་ཟ་བར་བྱེད། །ནགས་སུ་ཀླུ་ཡི་བྱང་ཆུབ་བཞིན། །སྔགས་ཀྱིས་བདུད་རྩི་ལྔར་བྱས་ནས། །མཁས་པ་
རྣམས་ཀྱིས་གཏོར་མ་གཏོང་། །དེ་ཡི་མཐུ་ཡིས་ལྷ་ཚོགས་རྣམས། །མཉེས་འགྱུར་ཆུང་བའི་ཉེས་པ་མེད། །ཟང་ཟིང་ལ་སོགས་རབ་དབྱེ་བ། །དེ་བཞིན་གཤེགས་པས་སྦྱིན་རྣམ་བཞི། །གསུངས་ཏེ་དེ་བས་ཡི་དགས་ཀྱི། །གཏོར་མ་ལ་ནི་ཆོས་བཤད་གྱུར། །འདི་ལྟར་འདམ་
གྱིས་རྙོགས་པ་དང་། །བྲལ་བའི་ཆུ་བོ་དག་གི་རྒྱུན། །མཐོང་ནས་ཀྱང་ནི་ཁྱེད་རྣམས་ཁྲག །ལག་པ་དག་གིས་ཅི་ཕྱིར་འཐུང་། །དེས་ན་མ་བྱིན་བླངས་པ་ཡིས། །འདི་ཡི་རྣམ་སྨིན་མི་བཟད་ཡིན། །དེ་བས་ཚིམ་བྱེད་གཏོར་མ་འདི། །ཁྱེད་རྣམས་ཀྱིས་ནི་བླང་བར་གྱིས། །དེ་ལྟར་
རིམ་པ་འདི་བཞིན་དུ། །རྣལ་འབྱོར་པ་འདིས་ཡི་དགས་རྣམས། །ཆོས་འདོད་པར་ནི་དེ་བས་སྐྱོན། །ཅུང་ཟད་ཙམ་ནི་ཡོད་མ་ཡིན། །བཅོམ་ལྡན་འདས་དང་མ་མོ་ལ། །ཅུང་ཟད་དོགས་པ་མེད་མོད་ཀྱི། །འོན་ཀྱང་བསོད་ནམས་ཚོགས་དག་ལ། །དང་པོའི་ལས་ཅན་བསྐུལ་
བར་བྱ། །རིམ་གྱིས་ཡེ་ཤེས་ཚོགས་དག་ཀྱང་། །ཐོབ་ནས་རྣལ་འབྱོར་པ་དག་ནི། །རྫོགས་པའི་བྱང་ཆུབ་སྡོད་འགྱུར་ཏེ། །དེས་ན་དངོས་གྲུབ་ཅིས་མི་འཐོབ། །གྲངས་མེད་བསྐལ་བས་བྱང་ཆུབ་ནི། །ཐོབ་འགྱུར་འདི་ནི་བདེན་མོད་ཀྱང་། །ཐབས་དང་མ་ཚང་ཉིད་གྱུར་པ། །རིམ་

འདི་ཐེག་པ་ཆེན་པོ་ཡིན། །སྔགས་ཚུལ་ཆེན་པོའི་རྣལ་འབྱོར་པས། །སྐད་ཅིག་གཅིག་གིས་ངེས་པ་རུ། །རྡོ་རྗེ་འཆང་ནི་ཆེན་པོའི་གནས། །ཐོབ་འགྱུར་བློ་ཡི་ཁྱད་པར་གྱིས། །དེ་ལྟར་ཕྱོགས་རྣམས་བརྩམས་ནས་ནི། །གཏོར་མའི་ཆོ་གའི་གཞུང་ལུགས་འགྲུབ། །ཡང་དག་བྱང་
ཆུབ་འདོད་རྣམས་ཀྱིས། །དེ་ཡང་མགུ་བར་བྱ་བ་ཡིན། །ཉིན་དང་མཚན་དུ་རྣལ་འབྱོར་པས། །དེ་ཐུན་གསུམ་མམ་བཞི་དག་ཏུ། །བསོད་ནམས་ཚོགས་དང་ཡེ་ཤེས་ཀྱི། །ཚོགས་ནི་སྤེལ་ཕྱིར་བྱ་བ་ཡིན། །ཚོགས་ཀྱི་འཁོར་ལོའི་ཆོ་ག་གང་། །དེ་ནི་གཏོར་མ་ཆེན་པོར་བཤད། །གང་
ཕྱིར་དཀྱིལ་འཁོར་འཁོར་ལོ་ཡི། །རྣམ་པ་དང་བཅས་རབ་མཉེས་ཕྱིར། །རེ་ཞིག་དེ་ཡི་རིམ་པ་འདི། །ཇི་ལྟར་དཀྱིལ་འཁོར་འཁོར་ལོ་ཡི། །ཕྱི་རོལ་མཁས་པས་ཚིམ་བྱ་བ། །མཁས་པ་རྣམས་ཀྱིས་མཉེན་པར་གྱིས། །རེ་ཞིག་དང་པོ་རྣལ་འབྱོར་བས་རང་གི་འདོད་པའི་ལྷའི་ང་རྒྱལ་
དང་ལྡན་པས་དང་པོ་སྦྱོར་བ་ལ་སོགས་པའི་ཏིང་ངེ་འཛིན་གྱི་བར་ལ་ལངས་ཏེ། སྔར་བསྡུས་པ་པུལླཱི་ར་མཱ་ལ་སོགས་པ་གནས་ཉི་ཤུ་རྩ་བཞིའི་མཁའ་འགྲོ་མའི་འཁོར་ལོ་སྣ་ཁུང་གཡས་པ་དང་གཡོན་པའི་སྲོག་དང་རྩོལ་བས་བསྐུལ་བ་ཇི་ལྟ་བ་བཞིན་དུ་རྗེས་སུ་འོད་ཟེར་སྤྲོ་བའི་སྦྱོར་བ་སའི་རྡུལ་
ཚོན་ལ་སོགས་པས་སྤྲུལ་པའི་ཕྱི་རོལ་གྱི་དཀྱིལ་འཁོར་འཁོར་ལོར་སོ་སོའི་གནས་སུ་རྣམ་པར་སྤྲོས་ཏེ་བཀོད་ལ་མཆོད་པའི་ཆོ་གའི་རིམ་པ་བཞིན་དུ་ཡང་དག་པར་མཆོད་དེ་གཏོར་མའི་ལས་བྱའོ། །དེ་ལ་རེ་ཞིག་དང་པོ་དཀྱིལ་འཁོར་གྱི་ཕྱི་རོལ་ན་གནས་པའི་ལྷ་དང་། ཀླུ་དང་། གནོད་སྦྱིན་
དང་། འབྱུང་པོ་རྣམས་ལ་རིམ་པ་འདིས་གཏོར་མ་སྦྱིན་པར་བྱའོ། །དེ་ལ་འཇིག་རྟེན་པའི་ལྷ་རྣམས་དཀྱིལ་འཁོར་གྱི་ཕྱི་རོལ་དུ་རྣམ་པར་དགོད་པའི་རིམ་པ་ནི་འདི་ཡིན་ཏེ། ནང་གི་དཀྱིལ་འཁོར་ལས་ཕྱི་རོལ་གྱི་རྡོ་རྗེའི་ར་བ་ལས་ཕྱི་རོལ་གྱི་ཤར་དུ་དུར་ཁྲོད་མ་དང་། དྲ་མི་ཏྲི་དང་། གཏུམ་
མོ་བདུད་རྩིའི་ཆུའི་སྣོད་ལག་ན་ཐོགས་པ་དཀར་མོ་དང་། སེར་མོ་དང་། དམར་མོའི་བདག་ཉིད་ཅན་དགོད་པར་བྱའོ། །བྱང་དུ་དྲག་མོ་དང་། ཁྲག་མ་དང་། ཤ་ཟ་མ་ལྕགས་ཀྱུ་ལྔས་གང་བའི་སྣོད་ལག་ན་ཐོགས་པ་སེར་མོ་དང་དཀར་མོ་དང་། དམར་མོའི་མདོག་ཅན་རྣམས་སོ། །ནུབ་

ཏུ་མི་བཟད་མ་དང་། འབར་མ་དང་། འཇིགས་རུང་མ་ལག་ན་གཏོར་མའི་སྣོད་ཐོགས་པ་དམར་མོ་དང་། སེར་མོ་དང་། སྔོན་མོའི་མདོག་ཅན་རྣམས་སོ། །ལྷོ་རུ་ཐོད་པ་མོ་དང་། རྡོ་རྗེ་མ་དང་། བུམ་པ་མ་བཟའ་བ་དང་བཏུང་བ་ལ་སོགས་པས་གང་བའི་སྣོད་ཐོགས་པ་
ནག་མོ་དང་། དམར་མོ་དང་། དཀར་མོའི་མདོག་ཅན་རྣམས་སོ། །དབང་ལྡན་གྱི་ཕྱོགས་སུ་སྒེག་མོ་དང་། དྲི་མ་དཀར་མོ་དང་། སེར་མོའི་མདོག་གོ། །མེའི་ཕྱོགས་སུ་པི་ཝང་མ་དང་། མེ་ཏོག་མ་དཀར་མོ་དང་། ནག་མོའི་མདོག་ཅན་རྣམས་སོ། །བདེན་བྲལ་གྱི་ཕྱོགས་སུ་གླུ་མ་
དང་། བདུག་པ་མ་ནག་མོ་དང་། དམར་མོ་དག་གོ། །རླུང་གི་ཕྱོགས་སུ་གར་མ་དང་། མར་མེ་མ་དམར་མོ་དང་། སེར་མོ་དག་གོ། །དེ་དག་ཐམས་ཅད་འབར་བའི་ཕྲེང་བས་ཁྱབ་པའི་འོད་དང་ལྡན་པ། སྐྲ་བཤིག་པ་སྦྲུལ་རྣམས་ཀྱིས་བརྒྱན་པ། གོས་དང་རྒྱན་སྣ་ཚོགས་ཀྱིས་བརྒྱན་
པ་བཟང་པོའི་འདུག་སྟངས་ཀྱིས་གནས་པ་རྣམས་སོ། །དེ་ནས་ཕྱི་རོལ་གྱི་ས་གཞིའི་གཡས་ཕྱོགས་ནས་བསྐོར་བར་འཆད་པར་འགྱུར་བའི་གཏོར་མའི་སྔགས་ཀྱི་རྗེས་སུ་འབྲངས་ནས་ཞིང་སྐྱོང་བརྒྱད་ཡོངས་སུ་བརྟག་སྟེ། ཕྱོགས་བརྒྱད་དུ་དྲག་པོ་ནག་པོ་ལ་སོགས་པ་ཞིང་གི་
བདག་པོ་རྣམས་བློ་ཡིས་དགོད་པར་བྱའོ། །དེ་ལ་རིམ་པ་འདི་ཡིན་ཏེ། ཤར་དུ་དྲག་པོ་ནག་པོ། བྱང་དུ་དྲག་པོ་ཆེན་པོ། ནུབ་ཏུ་ལྷ་སྦྱིན། ལྷོ་རུ་དྲག་པོ། དབང་ལྡན་གྱི་ཕྱོགས་སུ་གཙིགས་པ། མེའི་ཕྱོགས་སུ་འཇིགས་སུ་རུང་བ། བདེན་བྲལ་གྱི་ཕྱོགས་སུ་རྣོན་པོ། རླུང་གི་
ཕྱོགས་སུ་ལོག་འདྲེན་ཏེ་དེ་དག་ཐམས་ཅད་ཀྱང་མིག་གསུམ་པ། ལག་པ་བཞི་པ། གདོང་གཅིག་པ། ཇི་སྐད་བཤད་པའི་ཕྱག་མཚན་དང་གོས་དང་རྒྱན་གྱིས་བརྒྱན་པ་ནག་པོ་དང་སེར་པོ་དང་དཀར་པོ་དང་དམར་པོའི་མདོག་ཅན་དང་། དབང་ལྡན་ལ་སོགས་པའི་མཚམས་རྣམས་ཀྱི་
ནི་དཀར་ནག་དང་། དཀར་སེར་དང་། དམར་སེར་དང་། དམར་ནག་རྣམས་ཏེ་འཁོར་དང་བཅས་པ་དག་གོ། །ནག་པོ་དྲག་པོའི་མདུན་དུ་ཙཱ་མུཎྜཱི། གཡོན་དུ་དྲག་མོ། རྒྱབ་ཏུ་འཇིགས་སུ་རུང་མ། གཡས་སུ་ལྷ་མོ་ཨུ་མ་བསམ་པར་བྱའོ། །ལྷ་མོ་དེ་དག་ཀྱང་མཁའ་འགྲོ་མ་ལ་

སོགས་པའི་མདོག་ཅན་མཆོད་པ་རྣམ་པ་ལྔ་ལ་སོགས་པས་ལག་པ་བྲེལ་བ་མཆོད་པ་རྣམ་པ་ལྔ་ཁོ་ནས་ཡང་དག་པར་མཆོད་པར་བྱེད་པའོ། །དེ་བཞིན་དུ་བྱང་དུ་རྒྱལ་མ་དང་། རྣམ་པར་རྒྱལ་མ་དང་། རྒྱལ་བྱེད་མ་དང་། གཞན་གྱིས་མི་ཐུབ་མ་ཞེས་བྱ་བ་དྲག་པོ་ཆེན་པོའི་འཁོར་
རྣམས་ཏེ་ཐུགས་ཀྱི་འཁོར་ལོའི་མཁའ་འགྲོ་མ་རྣམས་ཀྱི་མདོག་ཅན་ནོ། །དེ་བཞིན་དུ་ནུབ་ཏུ་ནག་མོ་ཆེན་མོ་དང་། ནག་མོ་སྦོམ་མ་དང་། རྣལ་འབྱོར་མ་དང་། ལྷ་སྦྱིན་གྱི་མཁའ་འགྲོ་མ་གསུང་གི་འཁོར་ལོའི་མཁའ་འགྲོ་མའི་མདོག་ཅན་རྣམས་བསམ་པར་བྱའོ། །དེ་བཞིན་དུ་ལྷོ་
རུ་དབང་མ་དང་། ཟླ་བ་མ་དང་། དྲག་མོ་དང་། གདུག་པ་ཞི་བྱེད་མ་དང་། འཕྱང་མ་དང་། ལྷའི་དབང་ཕྱུག་མ་ཞེས་བྱ་བ་ནག་མོའི་ལྷ་མོ་སྐུའི་འཁོར་ལོའི་མཁའ་འགྲོ་མའི་མདོག་ཅན་རྣམས་སོ། །དབང་ལྡན་གྱི་ཕྱོགས་སུ་ཀམ་པོ་ཛི་མ་དང་། འབར་མ་དང་། འཇིབ་མ་དང་། གྲོང་
ན་ཀུན་དུ་གནས་པའི་རྣལ་འབྱོར་མ་གཙིགས་པའི་མཁའ་འགྲོ་མ་ཁྭའི་གདོང་ཅན་མའི་མདོག་ཅན་རྣམས་སོ། །མེའི་ཕྱོགས་སུ་དྲག་པོའི་གཟུགས་ཅན་མ་དང་། མཆེ་བའི་གཟུགས་ཅན་མ་དང་། གཙིགས་མ་ཞེས་བྱ་བ་འཇིགས་སུ་རུང་བའི་མཁའ་འགྲོ་མ་འུག་པའི་གདོང་ཅན་
མའི་མདོག་ཅན་རྣམས་སོ། །བདེན་བྲལ་གྱི་ཕྱོགས་སུ་ཐོད་པའི་ཕྲེང་བ་ཅན་མ་དང་། ཕྲེང་ལྡན་མ་དང་། མགོ་ཅན་མ་དང་། མཐུ་ཆེན་མ་ཞེས་བྱ་བ་རྣོན་པོའི་མཁའ་འགྲོ་མ་ཁྱིའི་གདོང་ཅན་མའི་མདོག་ཅན་རྣམས་སོ། །རླུང་གི་ཕྱོགས་སུ་ལག་ན་རལ་གྲི་མ་དང་། ལག་ན་
དགྲ་སྟ་མ་དང་། རྡོ་རྗེ་མ་དང་། ལག་ན་གཞུ་ཐོགས་མ་ཞེས་བྱ་བ་ལོག་འདྲེན་གྱི་མཁའ་འགྲོ་མ་ཕག་གི་གདོང་ཅན་མའི་མདོག་ཅན་རྣམས་སོ། །དེ་ནས་ཤར་གྱི་སྒོར་ཁྱབ་འཇུག་དབྱིག་པ་ཐོགས་པ། ལྷོར་ཚངས་པ་རྔ་ཡབ་ཐོགས་པ། ནུབ་ཏུ་དྲག་པོ་མཚན་ནས་སྒྲོགས་པ་ལྷུར་
ལེན་པ། བྱང་དུ་དབང་པོ་གདུགས་ཐོགས་པ། དེ་བཞིན་དུ་ལྷོའི་སྣམ་བུ་ལ་དབང་ལྡན་གྱི་ཕྱོགས་སུ་བརྒྱ་བྱིན། མེའི་ཕྱོགས་སུ་ལུས་ངན་པོ། བདེན་བྲལ་གྱི་ཕྱོགས་སུ་འབྱུང་པོའི་བདག་པོ། ཀླུའི་ཕྱོགས་སུ་རླུང་གི་བདག་པོའོ། །དེ་རྣམས་བུ་དང་ཆུང་མ་དང་འཁོར་དང་བཅས་པ་

སྟེ། ཁ་དོག་དང་ལག་པ་དང་ཕྱག་མཚན་ནི་སྒྲུབ་ཐབས་གཞན་གྱི་རྗེས་སུ་འབྲང་བར་བྱའོ། །དེ་ལ་ཕྱི་རོལ་གྱི་ཁྱམས་ཀྱི་ཤར་གྱི་ཆར་རུས་གོང་འཇིགས་བྱེད་དང་། ཁ་ཊྭཱཾ་ག་དང་ལྡན་པའི་ཚོགས་ཀྱི་སྲིན་པོ་དང་། ཚོགས་ཀྱི་དབང་ཕྱུག་དང་། དྲིལ་བུའི་རྣ་བ་ཅན་
ཞེས་བྱ་བ་མཁའ་འགྲོ་མ་ལ་སོགས་པའི་མདོག་ཅན་རྣམས་བསམ་པར་བྱའོ། །དེ་བཞིན་དུ་བྱང་དུ་གཏུམ་མོའི་དབང་ཕྱུག་དང་། འདུན་སའི་ལྷ་དང་། རྒན་པོའི་དབང་ཕྱུག་དང་། སིལ་སྒྲས་འཇིགས་བྱེད་ཅེས་བྱ་བ་ལ་སོགས་པའི་མདོག་ཅན་རྣམས་སོ། །ལྷོ་རུ་ནི་གཏུམ་བུ་རའི་དབང་
ཕྱུག་དང་། སྒྲ་ཆེན་དང་། མཆེ་བ་གཙིགས་པ་དང་། གཞུ་འཛིན་ཞེས་བྱ་བ་ཀམ་པོ་ཛི་མ་ལ་སོགས་པའི་མདོག་ཅན་རྣམས་སོ། །དེ་བཞིན་དུ་ནུབ་ཏུ་ནི་འདོད་པ་དྲག་པོ་དང་། གནས་ཀྱི་དབང་ཕྱུག་དང་། ཅང་ཏེའུ་འདུལ་བ་དང་། རྔའི་སྒྲས་འཇིགས་བྱེད་ཅེས་བྱ་བ་འཇིག་བྱེད་མ་ལ་
སོགས་པའི་མདོག་ཅན་རྣམས་སོ། །འདི་རྣམས་ཀྱང་ལག་པ་བཞི་པ་ཁ་ཊྭཱཾ་ག་ཐོགས་པ་ལྷ་མོ་ལ་འཁྱུད་ཅིང་ལག་ན་རྩེ་གསུམ་ཐོགས་པ་མིག་གསུམ་པ་སྟག་གི་པགས་པའི་ཤམ་ཐབས་ཅན་སྦྲུལ་གྱི་རྒྱན་གྱིས་བརྒྱན་པ་ཐོད་པའི་ཕྲེང་བ་ཅན་རྣམས་སོ། །དེ་ནས་ཕྱི་རོལ་གྱི་མུ་ཁྱུད་ཀྱི་ས་གཞི་ལ་
འབྱུང་པོ་དང་། ཤ་ཟ་ལ་སོགས་པ་ཅ་ཅོའི་སྒྲ་སྒྲོགས་པ་རྣམས་དང་། དེ་དག་གི་འཁོར་རྣམས་ཀྱང་བལྟ་བར་བྱའོ། །དྲག་པོ་ལ་སོགས་པ་དང་། རུས་གོང་འཇིགས་བྱེད་ལ་སོགས་པ་རྣམས་ཀྱི་ཆོས་ཀྱི་ཡི་གེ་ནི་རང་གི་མིང་གི་དང་པོའི་ཡི་གེ་དེ་ཁོ་ན་ཡིན་ནོ། །རྡོ་རྗེ་ཁུ་ཚུར་གཉིས་
བཅིངས་ཏེ་གུང་མོ་དང་མཛུབ་མོ་དག་བརྐྱང་ནས་ལྕགས་ཀྱུའི་རྣམ་པར་སྦྱར་བར་བྱའོ། །ཨོཾ་ཨཱ་ཀཪྵ་ཡ་ཧཱུཾ་ཕཊ་ཅེས་བྱ་བ་ནི་འཇིག་རྟེན་པའི་ལྷ་རྣམས་སྤྱན་དྲང་བའི་སྔགས་སོ། །ཨོཾ་ཡུཾ་སྭཱ་ཧཱ་ཞེས་བྱ་བ་དང་། རྩེ་གསུམ་གྱི་ཕྱག་རྒྱ་ནི་དུར་ཁྲོད་མ་ལ་སོགས་པ་རྣམས་ཀྱི་དམ་ཚིག་གི་ཕྱག་རྒྱ་
དང་སྔགས་སོ། །ཐལ་མོ་སྦྱར་ནས་དེ་ཉིད་གཡས་སུ་ཕབ་སྟེ་གཟུང་བར་བྱ་ཞིང་། ཨོཾ་གྷྲཾ་སྭཱ་ཧཱ་ཞེས་བྱ་བ་ནི་དྲག་མོ་ལ་སོགས་པ་རྣམས་ཀྱིའོ། །རྡོ་རྗེ་ཐལ་མོ་བཅིངས་ནས་དབྱེ་བར་བྱ་ཞིང་། ཨོཾ་ཀུ་རུ་ཀུ་རུ་སྭཱ་ཧཱ་ཞེས་བྱ་བ་ནི་གཙིགས་མ་ལ་སོགས་པ་རྣམས་ཀྱིའོ། །ལག་པ་གཡས་

པ་བརྐྱང་ནས་རྒྱབ་གཉིས་སྦྱར་ཏེ་སོར་མོ་རྣམས་སོ་སོར་བཅིངས་ཞིང་། ཨོཾ་བེ་ཏཱ་ལཱི་ཧཱུཾ་སྭཱ་ཧཱ་ཞེས་བྱ་བ་ནི་མི་བཟད་མ་ལ་སོགས་པ་རྣམས་ཀྱིའོ། །རྡོ་རྗེ་ཁུ་ཚུར་གཉིས་བཅིངས་ཏེ་དཀུ་དག་ཏུ་གཟུང་ཞིང་། ཨོཾ་ཧཱུཾ་སྭཱ་ཧཱ་ཞེས་བྱ་བ་ནི་སྒེག་མོའི་འོ། །གཡོན་པ་བརྐྱང་སྟེ་མཐེ་བོང་དང་སྲིན་ལག་
སྦྱར་ནས་གཡས་པས་གཟུང་བར་བྱ་ཞིང་། ཨོཾ་སུ་པྲི་ཡ་གནྡྷེ་ཧཱུཾ་ཞེས་བྱ་བ་ནི་དྲི་མའི་འོ། །པི་ཝང་གི་ཟློས་གར་དང་། ཨོཾ་ཧཱུཾ་ཧོ་སྭཱ་ཧཱ་ཞེས་བྱ་བ་ནི་པི་ཝང་མའི་འོ། །ཐལ་མོ་སྦྱར་བ་སྤྱི་བོར་གཞག་ནས། ཨོཾ་ཤྲཱི་སྭཱ་ཧཱ་ཞེས་བྱ་བ་ནི་མེ་ཏོག་མའི་འོ། །རྡོ་རྗེ་ཁུ་ཚུར་གཉིས་བཅིངས་ནས་
མཛུབ་མོ་བསྒྲེངས་ཏེ་ཁར་བསྐྱོད་ནས་ཧཱུཾ་ཧཱུཾ་ཧཱུཾ་སྭཱ་ཧཱ་ཞེས་བྱ་བ་ནི་གླུ་མའི་འོ། །རྡོ་རྗེ་ཁུ་ཚུར་གཉིས་བཅིངས་ཏེ་ལག་པ་བསྐྱོད་པའི་ཚིགས་སུ་གཟུང་ཞིང་། ཨོཾ་ཨི་སྭཱ་ཧཱ་ཞེས་པ་ནི་བདུག་པ་མའི་འོ། །ལག་པ་གཡོན་པས་གཡས་ཀྱི་རྐེད་པའི་ཆར་སྒེག་པ་དང་བཅས་པར་བཞག་ནས་གཡས་
ཕྲག་པར་གཞག་ཅིང་། ཨོཾ་སུ་ནིརྟེ་སྭཱ་ཧཱ་ཞེས་བྱ་བ་ནི་གར་མའི་འོ། །ཐལ་མོ་སྦྱར་བ་སྤྱི་བོར་གཟུང་ཞིང་། ཨོཾ་ཀྵུཾ་སྭཱ་ཧཱ་ཞེས་བྱ་བ་ནི་མར་མེ་མའི་འོ། །གཡས་པ་ཁུ་ཚུར་བཅིངས་ནས་མཛུབ་མོ་དང་གུང་མོ་དག་བསྒྲེངས་ཏེ་དཔྲལ་བར་རེག་པར་བྱ་ཞིང་། ཨོཾ་མུ་མུ་ཧཱུཾ་སྭཱ་ཧཱ་ཞེས་བྱ་བ་ནི་བརྒྱ་
བྱིན་གྱིའོ། །རྡོ་རྗེ་བསྡམས་པ་བཅིངས་ནས་མཛུབ་མོ་གཉིས་རིན་པོ་ཆེའི་རྣམ་པར་སྦྱར་ཞིང་། ཨོཾ་རཏྣེ་གྲེ་སྭཱ་ཧཱ་ཞེས་བྱ་བ་ནི་ནོར་སྦྱིན་གྱིའོ། །གཡས་པ་རྡོ་རྗེ་ཁུ་ཚུར་བཅིངས་ཏེ་སྡིགས་མཛུབ་བསྒྲེངས་ནས། ཨོཾ་གཱ་ཏ་ནི་ཧཱུཾ་ཕཊ་ཅེས་བྱ་བ་ནི་འབྱུང་པོའི་བདག་པོའི་འོ། །གཡས་པ་ཁུ་
ཚུར་བཅིངས་ཏེ། ཨོཾ་བྷུར་བྷུ་བ་སྭཱ་ཧཱ་ཞེས་བྱ་བ་ནི་ཀླུའི་བདག་པོའི་འོ། །རྡོ་རྗེ་ཁུ་ཚུར་སྤྱི་བོར་བཞག་ཅིང་། ཨོཾ་ཁ་ས་སྭཱ་ཧཱ་ཞེས་བྱ་བ་ནི་ཁྱབ་འཇུག་གིའོ། །གཡས་པའི་བ་དན་གསུམ་སྤྱི་བོར་བཞག་ནས། ཨོཾ་ཧཱུཾ་སྭཱ་ཧཱ་ཞེས་བྱ་བ་ནི་དྲག་པོའི་འོ། །གཡས་པའི་ཁུ་ཚུར་སྙིང་གར་བསྐྱོད་
ཅིང་། ཨོཾ་སྭཱ་ཧཱ་ཞེས་བྱ་བ་ནི་ཚངས་པའི་འོ། །ལག་པ་གཡས་པ་བརྐྱང་སྟེ་ཁ་སྦུབས་ནས་གཡོན་པའི་ཁུ་ཚུར་གྱི་ཁྲོ་བོའི་སོར་མོ་བརྐྱང་སྟེ་དབུས་སུ་སྦྱར་ཞིང་གདུགས་ཀྱི་རྣམ་པར་བྱས་ནས། ཨོཾ་མུ་སྭཱ་ཧཱ་ཞེས་བྱ་བ་ནི་དབང་པོའི་འོ། །དྲག་པོ་ནག་པོ་ལ་སོགས་པ་རྣམས་དང་། རུས་གོང་

འཇིགས་བྱེད་ལ་སོགས་པ་རྣམས་ཀྱི་ནི་དྲག་པོའི་དམ་ཚིག་གི་སྔགས་དང་ཕྱག་རྒྱ་ཁོ་ན་ཡིན་ནོ། །དེ་ལ་ལྷ་རྣམ་པར་བཀོད་པའི་རྗེས་ཐོགས་ལ་མཆོད་པ་རྣམ་པ་ཉི་ཤུས་ཡང་དག་པར་མཆོད་དེ། སྒེག་མོའི་ཕྱག་རྒྱ་བཅིངས་ཏེ་ཡི་གེ་ཧཱུཾ་གི་སྒྲ་བརྗོད་ནས། ཧཱུཾ་ཧཱུཾ་ཧཱུཾ་གྷུཾ་ཊུཾ་ཧཱུཾ་ཧཱུཾ་
ཧཱུཾ། ཨོཾ་གྷེ་གྷེ་གྷེ་ཧཱུཾ། ཨོཾ་གྷེ་ཏྱ་གྷེ་ཏྱ་ཧཱུཾ་སྭཱ་ཧཱ་ཞེས་བྱ་བའི་སྔགས་འདིས་ཤིན་ཏུ་མཉེས་པར་བྱའོ། །དེ་ནས། རྡོ་རྗེ་དེ་ཉིད་ཀྱིས་བཟུང་ནས། །དྲིལ་བུ་ཆོས་ཀྱིས་དཀྲོལ་བར་བྱ། །རྡོ་རྗེ་ཁུ་ཚུར་གཉིས་བཅིངས་ནས། །རྒྱབ་ཏུ་རྒྱབ་ནི་སྦྱར་བར་བྱ། །མཐེའུ་ཆུང་གཉིས་ནི་བཅིངས་བྱས་ནས། །
ཅུང་ཟད་དུ་ནི་བཅིང་བར་བྱ། །ཨོཾ་བཛྲ་གྷཎྜེ་ཧོ། །དེ་ནས་ཨོཾ་བཛྲ་གྷཎྜེ། ར་ཎ་ར་ཎ། པྲ་ར་ཎ་པྲ་ར་ཎ། སཾ་པྲ་ར་ཎ་སཾ་པྲ་ར་ཎ། སརྦ་བུདྡྷེ་ཀྵེ་ཏྲ་པྲ་ཙ་ནི་ཏེ། པྲཛྙཱ་པཱ་ར་མི་ཏཱ་ནཱཾ་སམྦྷ་བེ། བཛྲ་ཧྲྀད་ཡཾ་སནྟོ་ཥ་ནི་ཧཱུཾ་ཧཱུཾ་སྭཱ་ཧཱ་ཞེས་བྱ་བའི་སྔགས་ཀྱིས་དྲིལ་བུ་བཟུང་སྟེ། དཔལ་མཆོག་དང་པོའི་
རྒྱུད་ལས་གསུངས་པའི་མཚན་བརྒྱ་རྩ་བརྒྱད་ཀྱིས་ཡང་དག་པར་བསྟོད་ལ་རྡོ་རྗེའི་གླུ་བླངས་ཏེ། དེ་བཞིན་དུ་རྣམ་པ་སྣ་ཚོགས་པའི་བསྟོད་པ་དང་མཆོད་པ་བྱས་ལ། ཡང་དག་པར་མཉེས་པར་བྱ་བའི་ཕྱིར་དྲིལ་བུ་དཀྲོལ་བར་བྱའོ། །དེ་ནས་སྙིང་གར་རྡོ་རྗེ་ཐལ་མོ་བཅིངས་ཏེ་སྙིང་གར་
གཞག་ལ། ཨོཾ་ཤུདྡྷེ་དྷརྨེ་ཧཱུཾ་ཨཱ་ཨཱ་ཨོཾ་ཨ་ཞེས་བྱ་བ་བརྗོད་པས་ལྷའི་ང་རྒྱལ་བརྟན་པར་བྱས་ལ་ཕྱི་རོལ་གྱི་ལྷ་རྣམས་ལ་གཏོར་མ་སྦྱིན་པར་བྱའོ། །ཇི་སྐད་བཤད་པའི་གོས་དང་རྒྱན་གྱིས་རྣམ་པར་བརྒྱན་པ། རྡོ་རྗེ་དང་དྲིལ་བུ་ཐོགས་པ། བརྒྱ་བྱིན་ལ་སོགས་པའི་འཁོར་དང་ལྡན་པའི་
སློབ་དཔོན་རྐང་པ་གཡས་པ་སེམས་དཔའི་སྐྱིལ་མོ་ཀྲུང་དུ་གནས་པ་གཡོན་བརྐྱང་བས་རོལ་པའི་ཚུལ་དུ་གནས་པས་རྫས་དྲི་ཞིམ་པོ་རྣམས་ཀྱིས་དཀྱིལ་འཁོར་གྲུ་བཞིར་བྱས་ལ། ཁ་དོག་དཀར་པོ་ལ་སོགས་པའི་མེ་ཏོག་ལ་སོགས་པས་ཡང་དག་པར་མཆོད་དེ། འབྲས་སཱ་ལུ་དྲི་ཞིམ་
པོའི་འབྲས་ཆན་ཞོ་དང་ཤ་ཁ་ར་དང་། སྦྲང་རྩི་དང་། མར་ནག་དག་བསྲེས་པ་ཟངས་ལ་སོགས་པ་ལས་བྱས་པའི་སྣོད་རྣམས་སུ་གཞག་པས་ཤར་གྱི་སྒོར་གཏོར་མ་སྦྱིན་པར་བྱའོ། །འདོད་པའི་རྒྱལ་པོའི་ཕྱག་རྒྱ་བཅིངས་ལ། ཨོཾ་བཏྟ་ལེ་མ་ཧཱ་བཏྟ་ལི། ཧཱུཾ་ཧཱུཾ་ཧཱུཾ་ཛཿསྭཱ་ཧཱ་ཞེས་བྱ་བའི་

སྔགས་འདིས་ལྷ་རྣམས་དགུག་པར་བྱའོ། །ཨོཾ་ཝ་ཧི་ནཱི་མ་ཧཱ་ཝ་ཧི་ནི་སཱུརྱ་ཙནྡྲ་སིདྡྷྱ་མུ་ཁི། ཛ་ཡ་ར་ཛི་སཽ་མ་ཛི་ཨུ་མ་དེ་བི་ག་ག་སུ་རུ་པི་ཏ་ར་ཡ། ས་ཏོད་གྲ་ཧ་ག་ཎ་སརྦེ་ག་ཎ་པ་ཏི་ཀརྟི་ཀ་ཤྲི་ཤ་ཤྲི་དེ་བཱི་དེ་ག་ལོ་ཨ་སུ་ར་ས་རོ་ཙེ། པུཀྐ་སཱི། མ་ཧཱ་པུཀྐ་སཱི་ཧཱུཾ་ཧེ་ཧོ། ཨཱ་ཀཱཪྵ་ཡ་ཨཱ་ཀཱཪྵ་ཡ། ས་
མ་ཡ་དེ་བཱི་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། སྤྱན་དྲང་བའི་ཕྱག་རྒྱ་མཛུབ་མོ་གཉིས་བསྒྲེང་བ་དང་། ཨོཾ་བྷཀྵ་ཡ་བྷཀྵ་ཡ། ས་མ་ཡེ་ཏིཥྛ་ཛྲཾ་ཧྲི་བ་ཧཱུཾ་ཕཊ་སྭཱ་ཧཱ། ཞེས་བྱ་བས་མཉེས་པར་བྱས་ཏེ་སེ་གོལ་གསུམ་བརྡབས་ལ་གཏང་བར་བྱའོ། །དེ་ནས་ཤར་གྱི་ཕྱོགས་སུ་ས་གཙང་མར་དོར་བར་བྱའོ། །དེ་ནི་
ལྷའི་གཏོར་མའོ། །དེ་ནས་སྔར་བཤད་པའི་ཆོ་ག་བཞིན་དུ་བྱས་པའི་དཀྱིལ་འཁོར་འོ་མ་ལ་སོགས་པ་ལས་བྱས་པའི་ལྷ་བཤོས་ཀྱིས་ཡོངས་སུ་བསྐོར་བར་མངར་གསུམ་དང་བསྲེས་པའི་འོ་ཐུག་གིས་བཀང་བའི་གསེར་ལ་སོགས་པ་ལས་བྱས་པའི་སྣོད་དུ་བཞག་སྟེ། སྔགས་དང་ཕྱག་རྒྱ་
དེ་ཉིད་ཀྱིས་མཐའ་ཡས་དང་། ནོར་རྒྱས་དང་། འཇོག་པོ་དང་། སྟོབས་ཀྱི་རྒྱུ་དང་། པདྨ་དང་། པདྨ་ཆེན་པོ་དང་། དུང་སྐྱོང་དང་། རིགས་ལྡན་དང་། ལྔ་ལྡན་དང་། ལྔ་ལྡན་ཆེན་པོ་དང་། ཟླ་བ་དང་། གཙུག་ཏོར་དང་། གཙུག་ཏོར་ཆེན་པོ་དང་། དབྱིག་པ་ཐོགས་པ་དང་། ཧུ་
ལུ་ཏ་དང་། དགའ་བོ་དང་། ཉེ་དགའ་བོ་དང་། རྒྱ་མཚོ་ཆེན་པོ་དང་། གདུང་བ་དང་། གདུང་བ་ཆེན་པོ་དང་། དཔལ་འོད་དང་། འོད་ཆེན་དང་། རིན་པོ་ཆེའི་འོད་དང་། གཟུགས་བཟང་དང་། གཟུགས་ཆེན་དང་། སྦྲུལ་བཟངས་དང་། གསུས་པོ་ཆེ་དང་། ཛི་ལི་དང་། མ་ཧཱ་
ཛི་ལི་བོ་སྟེ། ཨོཾ་ཨཱ་གཚྪ་ཨཱ་གཚྪ། མ་ཧཱ་ནཱ་ཨ་དྷི་པ་ཏི་སརྦ་བྷུར་བྷུ་ཕྲུཾ་ཕྲུཾ་ཕྲུཾ་ཕུ། རྡོ་རྗེ་ཁུ་ཚུར་བཅིངས་ནས་ནི། །མཐེ་བོང་དང་ནི་མཐེའུ་ཆུང་སྦྱར། །དབུས་ཀྱི་སོར་མོ་དག་བརྐྱང་ནས། །གདེངས་ཀའི་རྣམ་པར་སྦྱར་བར་བྱ། །དེ་ལྟ་བུ་འདིས་སྲིན་ལག་གཟུང་སྟེ་གཏད་པར་བྱའོ། །
བྱང་ཕྱོགས་སུ་ཆུ་བོ་ལ་དོར་བར་བྱའོ། །ཀླུའི་གཏོར་མའོ། །དེ་ནས་ནུབ་ཕྱོགས་སུ་མངོན་པར་ཕྱགས་པའི་རྣལ་འབྱོར་པ་དཀྱིལ་འཁོར་གྱི་འགྲམ་ན་གནས་པས་ཙནྡན་དམར་པོ་ལ་སོགས་པ་ལས་བྱས་པའི་དཀྱིལ་འཁོར་གྲུ་གསུམ་མེ་ཏོག་དམར་པོ་ལ་སོགས་པས་མཛེས་པར་བྱས་ལ། སྔ་མ་

བཞིན་དུ་ཞོ་དང་སྦྲང་རྩི་དང་བཅས་པའི་འབྲས་ཆན་བདུད་རྩི་ལྔ་དང་ཡང་དག་པར་ལྡན་པའི་སྣོད་མདུན་དུ་བཞག་ལ་སྔ་མ་བཞིན་དུ་ནོར་བུ་བཟང་པོ་དང་། གང་བ་བཟང་པོ་དང་། རྒྱལ་བ་བཟང་པོ་ལ་སོགས་པ་གནོད་སྦྱིན་གྱི་བདག་པོ་རྣམས་བོས་ཏེ། རྡོ་རྗེ་བསྡམས་པ་སྙིང་
གར་བཅིངས་ལ་བཟུང་ཞིང་། ཨོཾ་ནཱ་གཱ་དྷི་པ་ཏི་བ་ཏ་ལི་ཧཱུཾ་སྭཱ་ཧཱ་ཞེས་བྱ་བའི་སྔགས་འདིས་མཉེས་པར་བྱའོ། །དེ་ཁོ་ན་བཞིན་དུ་བཏང་ནས་ལྷོའི་ཕྱོགས་སུ་ཤིང་གཅིག་པར་དོར་བར་བྱའོ། །དེ་ནི་གནོད་སྦྱིན་གྱི་གཏོར་མའོ། །ཡང་དེ་ཁོ་ན་བཞིན་དུ་ལྷོ་རུ་མངོན་པར་ཕྱོགས་བར་གནས་པ་རྡོ་རྗེའི་
འགྲོས་དང་ལྡན་པས་ཙནྡན་དམར་པོ་ལ་སོགས་པ་ལས་བྱས་པའི་དཀྱིལ་འཁོར་གྲུ་གསུམ་མེ་ཏོག་དམར་པོ་ལ་སོགས་པ་བཀྲམ་པར་ལྷ་བཤོས་ལ་སོགས་པ་ཡང་ཕུལ་ཏེ། ཉ་ཤ་སྐམ་པོ་དང་། སྒོག་པ་དང་། བཙོང་དང་། ཁྲག་དང་། ཏིལ་དང་། བག་ཕྱེ་ལ་སོགས་པའི་ཁུར་བ་དང་།
བདུད་རྩི་ལྔ་དང་། བཟའ་བ་དང་། བཅའ་བ་དང་། བཏུང་བ་དང་། མྱང་བ་དང་། གཞིབ་པ་རྣམ་པ་ཐ་དད་པ་དང་ཉའི་གཟུགས་བརྙན་གྱིས་གང་བའི་སྣོད་མདུན་དུ་བཞག་ལ། སྔགས་དང་ཕྱག་རྒྱ་དེ་རྣམས་ཀྱིས་སྣོད་ལ་རེག་སྟེ། གདན་བཞི་པའི་རྒྱུད་ལས་གསུངས་པའི་ཨེ་ཀ་
བྲྀཀྵ་ཞེས་བྱ་བ་ལ་སོགས་པའི་སྔགས་བརྗོད་ལ་འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་བཅིངས་ཏེ་མཛུབ་མོ་གཉིས་ལུ་གུ་རྒྱུད་བྱས་ལ་ཕྱག་རྒྱ་དེ་དང་། ཨོཾ་ཏིཥྛ་ཏིཥྛ་ཧཱུཾ། བྷཀྵ་བྷཀྵ་ཛཿཕཊ་སྭཱ་ཧཱ། ཞེས་བྱ་བའི་སྔགས་ཀྱིས་མགུ་བར་བྱས་ཏེ་བཏང་ལ་རྔ་ལ་སོགས་པའི་སྒྲ་
དང་། དྲིལ་བུའི་སྒྲ་དང་། འབྱུང་པོའི་གཏོར་མ་ཡོ་བྱད་ཀྱི་སྔགས་དང་། ཕྱག་རྒྱ་ཉིད་ཀྱིས་གང་ན་དཀྱིལ་འཁོར་གྱི་གཞི་ཡོད་པ་དེ་ལ་ཕྱི་རོལ་གྱི་མཚམས་ཀྱི་ཕྱོགས་བརྒྱད་དུ་གཏོར་མ་དོར་བར་བྱའོ། །དེ་ནི་འབྱུང་པོའི་གཏོར་མའོ། །གཏོར་མ་དེ་དག་ཐམས་ཅད་ལ། །སྔགས་པ་
བཟང་པོས་གཏོང་དུས་སུ། །དགེ་བསྙེན་གྱི་ནི་སྤྱི་བོ་རུ། །ལན་གསུམ་དུ་ནི་བསྐོར་བར་བྱ། །གཏོར་མ་སྐྱེལ་བྱེད་དད་ལྡན་གང་། །འཕགས་པ་འཁྱིལ་པའི་སྔགས་ཀྱིས་ནི། །དེ་ལ་བསང་གཏོར་བྱ་བ་ཉིད། །མིན་ན་དེ་རྣམས་ཀྱིས་ཟོས་འགྱུར། །ནང་གི་དཀྱིལ་འཁོར་དག་གི་ནི། །

གཏོར་མ་དག་གིས་རྣལ་འབྱོར་པས། །དངོས་གྲུབ་མཆོག་ནི་འགྲུབ་འགྱུར་བ། །དེ་ནས་ཡང་དག་བཤད་བྱ་བ། །སྒྱུ་མའི་རྒྱུད་ལས་ཇི་སྐད་བཤད་པ་བཞིན། །སྐྲ་བཤིག་རྐང་པ་ཡིས་ནི་གར་ཐབས་བྱས། །གཅེར་བུ་ལྷོ་ཕྱོགས་གནས་པའི་བདག་ཉིད་ཀྱིས། །ཐུན་མཚམས་ཀུན་དུ་
གཏོར་མ་རབ་སྦྱིན་བྱ། །དང་པོར་ཕྱོགས་ནི་བརྒྱད་རྣམས་སུ། །ཁྲོ་མོ་མཁའ་འགྲོ་མ་བསམ་བྱ། །དེ་རྣམས་ལ་ནི་བློ་རྒྱ་ཆེས། །བདུད་རྩི་ལྔ་ལྡན་གཏོར་མ་སྦྱིན། །བདུད་རྩི་ལྔ་དང་ཡང་དག་ལྡན། །ཐུན་བཞི་རུ་ནི་རབ་ཏུ་བྱ། །སྔ་དྲོ་རྡོ་རྗེ་མཁའ་འགྲོ་ལ། །མཁའ་སྤྱོད་རྣམས་ལ་ཉིན་
ཕྱེད་ན། །མཚན་དུས་ས་སྤྱོད་རྣམས་ལའོ། །མཁའ་འགྲོ་མ་ལ་མཚན་ཕྱེད་ན། །གཡས་བརྐྱང་གནས་པས་མཁའ་འགྲོ་ལ། །གཡོན་བརྐྱང་བ་ཡིས་མཁའ་སྤྱོད་ལ། །ས་སྤྱོད་རྣམས་ལ་ཁྱད་པར་དུ། །རྐང་པ་མཉམ་པར་བྱ་བ་ཡིན། །པདྨ་བསྐོར་བའི་སྦྱོར་བ་ཡིས། །གཅེར་བུ་
གར་དང་ཡང་དག་ལྡན། །དྲག་པོའི་ལྟ་སྟངས་དང་ལྡན་པ། །མིག་ནི་གཡོན་པ་དག་གིས་བལྟ། །རུས་སྦལ་ཕྱག་རྒྱ་བཅིངས་ནས་ནི། །དཔྲལ་བའི་སྟེང་དུ་ཡང་དག་གཞག །སྐད་ཅིག་རྣམ་པའི་ཚུལ་གྱིས་ནི། །ཧེ་རུ་ཀ་ཡི་གཟུགས་སུ་བྱ། །ཅིག་ཅར་སྔགས་ནི་བརྗོད་བྱ་ཞིང་། །ཅིག་
ཅར་ཕྱོགས་ནི་རྒྱས་གདབ་ཅིང་། །དུར་ཁྲོད་དམ་ནི་ཆུ་བོའི་འགྲམ། །མཚན་མ་གཅིག་གམ་བཞི་མདོ་རུ། །འདོད་པའི་འབྲས་བུ་རབ་སྟེར་བ། །རྣལ་འབྱོར་རྒྱལ་པོས་རྟག་ཏུ་སྦྱིན། །བདུད་རྩིས་ཁ་ནི་བཀང་ནས་སུ། །རུས་གོང་སྟེང་དག་གནས་བྱས་ལ། །ཕྱག་རྒྱ་ལྔ་ནི་འཆིང་བ་
ཡིས། །སྔགས་ནི་བརྗོད་ཅིང་གཏོར་མ་སྦྱིན། །ཨོཾ་སརྦ་ཀྲོ་དྷཌཱ་ཀི་ནྱ་ཨི་མཾ་བ་ལིཾ་པྲ་ཏཱི་ཙྪནྟུ་ཧཱུཾ་ཕཊ་སྭཱ་ཧཱ། དེ་ནས། གཏོར་མ་དུར་ཁྲོད་ལ་སོགས་སུ། །རྣལ་འབྱོར་སྐྱེས་མཆོག་དག་གིས་དོར། །དེ་ནས་མེ་ཏོག་མགོར་བཞག་སྟེ། །རང་གི་གནས་སུ་འཇུག་པར་བྱ། །དེ་ནི་ནང་གི་རྡོ་རྗེ་
མཁའ་འགྲོ་མ་རྣམས་ཀྱི་གཏོར་མའོ། །གྲངས་ནི་བཞི་རུ་གྱུར་པ་ཡི། །རྒྱལ་ཆེན་ཇི་ལྟར་ཚིམ་གྱུར་པ། །གཏོར་མའི་ལས་ནི་ཡིད་འོང་བ། །དེ་ཡི་རྗེས་ལ་བཤད་པར་བྱ། །རྩ་བའི་དཀྱིལ་འཁོར་ཤར་སོགས་ཀྱི། །ཕྱོགས་རྣམས་སུ་ནི་འཁོར་ལོ་བཞི། །རྣམ་པར་བསྒོམས་

ནས་གང་བའི་སྣོད། །བཞི་ནི་དེ་རུ་གཞག་པར་བྱ། །ཡུལ་འཁོར་སྐྱོང་གི་སྣོད་གང་ཡིན། །དེ་ནི་བཟའ་བ་ཆང་སྤངས་པས། །ཡོངས་སུ་གང་བར་རབ་ཏུ་བྱ། །དེ་བཞིན་རྣམ་ཐོས་སྲས་ཀྱི་ནི། །ཤ་དང་ཆང་ལ་སོགས་པས་དགང་། །དེ་བཞིན་ལུས་འཕགས་
པོ་ཡི་སྣོད། །ཁྲག་གིས་གང་བར་གྱུར་པར་བྱ། །མིག་མི་བཟང་གི་སྣོད་དག་ནི། །འོ་མ་དག་གིས་དགང་བར་བྱ། །དེར་ནི་སྣོད་ཀྱི་ཆོ་གའི་རིམ། །བྱས་ནས་རྒྱལ་པོ་ཆེན་པོ་ནི། །བསྐྱེད་པའི་ཕྱིར་ནི་བསྒོམ་པར་བྱ། །དང་པོའི་ཡི་གེ་ལས་བྱུང་བའི། །རྒྱལ་པོ་ཆེན་པོ་བཞི་པོ་ནི། །
ཡི་གེ་གསུམ་གྱིས་བྱིན་བརླབས་ཤིང་། །ཡེ་ཤེས་སེམས་དཔའ་དང་ལྡན་བསྒོམ། །ཧེ་རུ་ཀ་ཡི་སྐུར་གནས་ཏེ། །ལག་ན་རྡོ་རྗེ་དྲིལ་བུ་ཐོགས། །བརྟུལ་ཞུགས་བཟང་པོས་སྔགས་འདི་ཡིས། །དེ་རྣམས་སོ་སོར་གཏོར་མ་སྦྱིན། །ཨོཾ་དྷྲྀ་ཏ་རཱཥྚཱ་ཡ་གནྡྷརྦྷ་སེ་ནཱ་དྷི་པ་ཏ་ཡེ་ཨི་མཾ་
བ་ལིཾ་པྲ་ཏཱིཙྪ་ས་མ་ཡ་མ་ནུ་སྨ་ར་ཨཱཿཧཱུཾ་ཧཱུཾ་ཕཊ་སྭཱ་ཧཱ། ཨོཾ་ན་མོ་བཻ་ཤྲ་བ་ཎཱ་ཡ་ཡཀྵ་སེ་ནཱ་དྷི་པ་ཏ་ཡེ་ཨི་མཾ་བ་ལིཾ་པྲ་ཏཱིཙྪ་ས་མ་ཡ་མ་ནུ་སྨ་ར་ཨཱཿཧཱུཾ་ཧཱུཾ་ཕཊ་སྭཱ་ཧཱ། ཨོཾ་བི་རཱུ་ཌྷ་ཀཱ་ཡ་མ་ཧཱ་ཀུ་བེ་རཱདྷི་པ་ཏ་ཡེ་ཨི་མཾ་བ་ལིཾ་པྲ་ཏཱི་ཙྪ་ས་མ་ཡ་མ་ནུ་སྨ་ར་ཨཱཿཧཱུཾ་ཧཱུཾ་ཕཊ་སྭཱ་ཧཱ། ཨོཾ་བི་རཱུ་པཱཀྵཱ་ཡ་མ་ཧཱ་
ན་གཱ་དྷི་པ་ཏ་ཡེ་ཨི་མཾ་བ་ལིཾ་པྲ་ཏཱིཙྪ་ས་མ་ཡ་མ་ནུ་སྨ་ར་ཨཱཿཧཱུཾ་ཧཱུཾ་ཕཊ་སྭཱ་ཧཱ། སྔགས་ཚིག་བླ་མེད་འདི་རྣམས་ཀྱིས། །སྣོད་བཞི་བྱིན་གྱིས་བརླབས་ནས་ནི། །རྣལ་འབྱོར་པ་ཡིས་རིམ་བཞིན་དུ། །ཤར་ལ་སོགས་པར་དོར་བར་བྱ། །དེ་ནི་རྒྱལ་པོ་ཆེན་པོ་བཞིའི་གཏོར་མའི་ཆོ་གའོ།། །།
བདེ་མཆོག་ཆོ་ག་ལས་གསུངས་པའི། །སྐྱེ་བོ་རྣམས་ནི་མཆོད་འགྱུར་བ། །གཏོར་མ་འབྱུང་པོ་ཐམས་ཅད་ལ། །དེ་ནས་ཡང་དག་རབ་བཤད་བྱ། །དམ་ཚིག་འཁོར་ལོའི་ཕྱི་རོལ་དུ། །ཧཱུཾ་གི་ས་བོན་ལས་བྱུང་བ། །ཤིང་གཅིག་དང་བཅས་དུར་ཁྲོད་བརྒྱད། །རྣལ་འབྱོར་རིག་
པས་བསམ་པར་བྱ། །གནོད་སྦྱིན་སྲིན་པོ་འབྱུང་པོ་དང་། །དེ་བཞིན་ཡི་དགས་ཤ་ཟ་དང་། །གྲུལ་བུམ་བརྗེད་བྱེད་མཁའ་འགྲོ་དང་། །མཁའ་འགྲོ་མ་ཡི་ཚོགས་ཉིད་དག །ཤིང་དྲུང་གཅིག་ནི་བརྒྱད་པོ་ཡི། །རྩེ་མོར་དྲག་པོ་རྣམས་བསམ་བྱ། །ཤིང་གི་རྩ་རུ་དེ་མཚུངས་པའི། །

འཁོར་དག་རྣམ་པར་བསམ་པར་བྱ། །ཁྭ་ཡི་གདོང་ཅན་ལ་སོགས་པའི། །འཁོར་གྱི་རང་གི་གཟུགས་དག་ནི། །ཐམས་ཅད་ཧཱུཾ་ལས་ཡང་དག་བྱུང་། །མཚོན་ཆ་སྣ་ཚོགས་དག་ཐོགས་པ། །ཆང་དང་ཤ་དང་བཙོང་ལ་སོགས། །ཁུ་བ་དེ་བཞིན་ཤ་ཡི་གཟུགས། །སྣོད་དུ་བཅུག་ནས་
དེ་ཉིད་ནི། །བདུད་རྩིའི་རང་བཞིན་ཉིད་དུ་བྱ། །སྔར་བཞིན་སྐྲ་བཤིག་ལ་སོགས་ལྡན། །གཡོན་བརྐྱང་ལ་སོགས་སྦྱོར་བྱས་པ། །བརྟུལ་ཞུགས་བཟང་པོས་སྔགས་འདི་ཡིས། །དེ་རྣམས་ཉིད་ནི་བོད་པར་བྱ། །ཨོཾ་བཛྲ་ཨ་ར་ལི་ཧོ་ཛཿཧཱུཾ་བཾ་ཧོཿ། བཛྲ་ཌཱ་ཀི་ནཱི་ས་མ་ཡ་སྟྭཾ་དྲྀ་ཤྱ་
ཧོཿ། སྔགས་འདི་ལན་གསུམ་བརྗོད་ནས་ནི། །རང་ཉིད་ཀྱི་ནི་སྙིང་གར་ཡང་། །སྣོད་ཀྱི་ཕྱག་རྒྱ་ལན་གསུམ་དུ། །བསྐོར་ནས་གཏོར་མ་སྦྱིན་པར་བྱ། །མཁའ་སྤྱོད་ཕྱག་རྒྱ་བཅིངས་ནས་ནི། །ཁྲོ་ཚིག་མཚན་གཅིག་ལ་སོགས་སུ། །སྒྲུབ་བ་པོ་ཡིས་སྔགས་འདི་ཡིས། །དོགས་
པ་མེད་པར་གཏོར་མ་གཏང་། །ཨོཾ་ཁ་ཁ་ཁཱ་ཧི་ཁཱ་ཧི། སརྦ་ཡཀྵ་རཱཀྵ་ས་བྷཱུ་ཏ་བྲེ་ཏ་པི་ཤ་ཙོནྨ་ད་ཨ་པ་སྨ་ར་ཌཱ་ཀ་ཌཱ་ཀི་ནྱ་ད་ཡ་ཨི་མཾ་བ་ལིཾ་གྲྀ་ཧྞནྟུ་ས་མ་ཡ་རཀྵནྟུ་མ་མ་སརྦ་སིདྡྷི་མྨེ་པྲ་ཡ་ཙྪནྟུ། ཡ་ཐཻ་བཾ། ཡ་ཋེ་ཥྚཾ། བྷུཉྫ་ཐ་པི་པ་ཐ། མཱ་ཏི་ཀྲ་མ་ཐ་མ་མ་སརྦ་ཀརྟ་ཡ་སཏ་སུ་ཁ་བི་ཤུདྡྷ་ཡེ།
ས་ཧ་ཡི་ཀ་བྷ་བནྟུ་ཧཱུཾ་ཧཱུཾ་ཕཊ་སྭཱ་ཧཱ། དེ་འདྲའི་སྔགས་ཆེན་བརྗོད་བྱས་ནས། །དུར་ཁྲོད་དུ་ནི་གཏོར་མ་སྦྱིན། །འཇིགས་བྱེད་སེམས་ཅན་དྲག་པོའི་བདག །སྙིང་རྗེར་ལྡན་པས་གཏོར་མ་དོར། །དེ་ལྟ་བུ་ཡི་རིམ་འདི་ཡིས། །འདི་ནི་འབྱུང་པོ་ཐམས་ཅད་བརྗོད། །བགེགས་རྣམས་ཞི་
བར་བྱ་ཕྱིར་ཡང་། །གཏོར་མ་འདི་ནི་བསྔགས་པ་ཡིན། །དེ་ནི་འབྱུང་པོ་ཐམས་ཅད་པའི་གཏོར་མའི་ཆོ་གའོ།། །།གཞན་ཡང་རྡོ་རྗེ་མཁའ་འགྲོ་མ། །གུར་ལས་གསུངས་པའི་གཏོར་མའི་ལས། །ཁམས་གསུམ་དག་ཏུ་ཅིག་ཅར་དུ། །ཚིམ་པར་བྱ་ཕྱིར་ཡང་དག་བྱ། །ནམ་
མཁའི་དབྱིངས་ཀྱི་དབུས་སུ་ནི། །ཆུ་སྐྱེས་འདབ་བརྒྱད་དབུས་སུ་བསྒོམ། །དབང་པོ་ཤར་གྱི་འདབ་མར་བསམ། །གཤིན་རྗེ་ལྷོ་རུ་དགོད་པར་བྱ། །ཆུ་ལྷ་ནུབ་ཀྱི་འདབ་མར་ཏེ། །བྱང་དུ་གནོད་སྦྱིན་དགོད་པར་བྱ། །མེ་ཡི་ཕྱོགས་སུ་མེ་ཆེན་པོ། །བདེན་བྲལ་ཕྱོགས་སུ་བདེན་བྲལ་

ཏེ། །རླུང་གི་ཕྱོགས་སུ་རླུང་ལྷ་བསམ། །འབྱུང་པོའི་བདག་པོ་དབང་ལྡན་དུ། །ཟླ་བ་ཉི་མ་ཚངས་ལ་སོགས། །ཚངས་རིས་དམ་པ་རྣམས་དང་ནི། །ཚངས་པའི་འདུན་ན་འདོན་བདག་ཉིད། །དགའ་ལྡན་མཐའ་བྲལ་ན་གནས་དང་། །རྒྱལ་པོ་ཆེན་པོ་ཀུན་དུ་
སྐྱེས། །གཞན་འཕྲུལ་དབང་བྱེད་དག་དང་ནི། །འཕྲུལ་དགའ་ཡི་ནི་ལྷ་རྣམས་དང་། །གང་དག་གཙང་མའི་གནས་འདུག་དང་། །བདེ་བ་ཅན་ན་ཀུན་དུ་གནས། །འོག་མིན་ན་ནི་གནས་པ་དང་། །འོད་ཅན་འཇིག་རྟེན་ཁམས་གནས་དང་། །སུམ་ཅུ་རྩ་གསུམ་ན་གནས་པ། །
དེ་དག་ཐམས་ཅད་སྟེང་དུ་བསམ། །སྟོབས་རྒྱུ་དང་ནི་དུང་སྐྱོང་དང་། །མཐའ་ཡས་དེ་བཞིན་ནོར་རྒྱས་དང་། །འཇོག་པོ་དང་ནི་རིགས་ལྡན་ཉིད། །པདྨ་ཆེ་དང་པདྨ་ནི། །ཆོས་འབྱུང་གི་ནི་དབུས་ན་གནས། །ལྷ་མ་ཡིན་དང་སེམས་དམྱལ་དང་། ཆོས་འབྱུང་གི་ནི་འོག་ཏུའོ། །ཨོཾ་
ལས་ཚངས་པ་ལ་སོགས་པ། །ཡི་གེ་ཧཱུཾ་ལས་དབང་པོ་སོགས། །ཨ་ལས་སྟོབས་རྒྱུ་ལ་སོགས་པ། །ཞལ་གཅིག་ཕྱག་ནི་གཉིས་པའོ། །སྟེང་གི་ལྷ་ནི་ཤིན་ཏུ་དཀར། །དབང་པོ་ལ་སོགས་མདོག་སྔོན་པོ། །སྟོབས་རྒྱུ་ལ་སོགས་ཤིན་ཏུ་དམར། །རང་སྣང་རིག་མས་ཡན་ལག་འཁྱུད། །
རྡོ་རྗེ་དྲིལ་བུས་ཕྱག་བྲེལ་བ། །གཡས་བརྐྱང་བ་ཡི་གནས་པས་གནས། །ཆངས་སོགས་རྟག་པས་རྒྱས་གདབ་ཅིང་། །རྡོ་རྗེ་ཅན་གྱིས་བརྒྱ་བྱིན་སོགས། །ལྟོས་འགྲོ་ལ་སོགས་གར་དབང་གིས། །ཐམས་ཅད་རིགས་ལས་བྱུང་བ་ཡི། །གཽ་རཱི་ཡིས་ནི་དགུག་པར་བྱ། །རྐུན་མོས་གཞུག་
པར་བྱ་བ་སྟེ། །རོ་ལངས་མ་ཡིས་ཞགས་པས་བཅིངས། །དྲིལ་བུ་ཟ་ཕོད་མས་དབང་བྱ། །དེ་ནས་མཆོད་ཡོན་ཞལ་བསིལ་དབུལ། །དེ་བཞིན་མེ་ཏོག་བདུག་པ་སོགས། །མཉམ་པར་གཞག་པའི་སེམས་ཀྱིས་ནི། །སྔགས་འདི་ཡིས་ནི་ཚིམ་པར་བྱ། །ཨོཾ་ཨཱཿཧཱུཾ། གསང་
སྔགས་འདི་དག་ཉིད་ཀྱིས་ནི། །སྔར་བཞིན་རྫས་ཀྱིས་གང་བ་ཡི། །ཐོད་པ་དེ་རྣམས་དག་ལ་དབུལ། །མཚན་གཅིག་ལ་སོགས་རྣམས་སུ་དོར། །གཏོར་མའི་ཆོ་ག་བཞིན་བྱས་ནས། །དོགས་པ་མེད་པའི་སེམས་ཀྱིས་ནི། །དེ་ནས་འཐོར་འཐུང་ཕུལ་བྱས་ནས། །སྔགས་འདི་ཡིས་

ནི་གཤེགས་སུ་གསོལ། །ཨོཾ་བཛྲ་ཌཱ་ཀི་ས་མ་ཡ་མ་ནུ་པཱ་ལ་ཡ། བཛྲ་ཌཱ་ཀི་ཏྭེ་ནོ་པ་ཏིཥྛ་དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སུ་པོ་ཥྱོ་མེ་བྷ་བ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿཀུ་རུ་ཧཱུཾ་ཧ་ཧ་ཧ་ཧ་ཧོཿ། བྷ་ག་བཱན་སརྦ་ཏ་ཐཱ་ག་ཏ་མཱ་མེ་མུཉྩ་ཌཱ་ཀི་བྷ་བ་མ་ཧཱ།
ས་མ་ཡ་ས་ཏྭ་ཨཿམུཿ། དེ་ནས་གཏོར་མའི་ལས་བྱས་ནས། །དཀྱིལ་འཁོར་རང་གི་ཡན་ལག་ལ། །བསྡུ་བ་བྱས་ནས་སྔར་རིམ་བཞིན། །ཡེ་ཤེས་འཁོར་ལོ་གཤེགས་སུ་གསོལ། །སྔ་དྲོའི་ཐུན་ལ་དེ་བཞིན་དུ། །ཐམས་ཅད་མཉམ་པར་གཞག་པས་བྱ། །ཐུན་བཞི་དག་ནི་ཐམས་
ཅད་ལ། །སྐད་ཅིག་གིས་ནི་བསྒོམ་པར་བྱ། །དེ་ལྟར་གུར་གྱི་རྒྱུད་གསུངས་པ། །ཅིག་ཅར་འབྱུང་པོ་ཐམས་ཅད་ནི། །ཚིམ་པ་རུ་ནི་བྱེད་པའི་མཆོག །གཏོར་མ་བདག་གིས་བཤད་པ་ཡིན། །དེ་ནི་དུས་གཅིག་ཏུ་ཁམས་གསུམ་པ་ཚིམ་པར་བྱེད་པའི་གཏོར་མའི་ཆོ་གའོ།། །།
གང་ཚེ་རྣལ་འབྱོར་སྔར་བཤད་པའི། །གཏོར་མའི་ཆོ་ག་བྱེད་པས་ནི། །གནོད་པ་བྱ་བྱེད་བགེགས་མཐོང་བ། །དེ་ཚེ་དེ་རབ་ཞི་བྱའི་ཕྱིར། །གཏོར་མ་བྱ་བ་དེ་རིམ་པ། །དཔལ་ལྡན་རྒྱུད་དྲ་དགྱེས་རྡོ་རྗེ། །རྒྱུད་གཉིས་ཀྱི་ནི་རྗེས་འབྲངས་ནས། །བདག་གིས་བཟང་པོར་བཤད་པར་
བྱ། །རེ་ཞིག་དང་པོར་རྣལ་འབྱོར་པས་ཆོས་ཐམས་ཅད་སྟོང་པ་ཉིད་དུ་བསམས་ཏེ། དེ་ནས་རཾ་ལས་བྱུང་བའི་ཉི་མའི་དཀྱིལ་འཁོར་གྱི་སྟེང་དུ་ཡི་གེ་ཧཱུཾ་ཁ་དོག་སྔོན་པོ་ལས་བྱུང་བའི་བཅོམ་ལྡན་འདས་རྡོ་རྗེ་ཧཱུཾ་མཛད་ཞལ་གསུམ་པ་ཕྱག་དྲུག་པ་ཕྱག་གཡས་པ་ན་རལ་གྲི་དང་། རྡོ་རྗེ་དང་། རྩེ་
གསུམ་བསྣམས་པ། གཡོན་པ་ན་དྲིལ་བུ་དང་། དགྲ་སྟ་དང་ཐོ་བ་བསྣམས་པ། མཆེ་བ་གཙིགས་པ། ལྗགས་བསྐྱོད་པ། དབུ་སྐྲ་སེར་པོ། སྤྱན་དམར་པོ། མགུལ་པ་སྦྲུལ་གྱིས་བརྒྱན་པ། གཡོན་པ་བརྐྱང་པས་སའི་སྟེང་མནན་པ། ཁྲོ་བོ་འབར་བའི་ཕྲེང་བ་འཕྲོ་བ།
སྙིང་གར་ཡི་གེ་ཧཱུཾ་གིས་མཚན་པ། ཧ་ཧ་ཞེས་སྒྲོགས་པར་བདག་ཉིད་བསྒོམས་ལ། དེ་ནས་མདུན་དུ་ཅི་ནུས་པར་རྡུལ་ཚོན་ལ་སོགས་པས་དཀྱིལ་འཁོར་ཀུན་དུ་བྲིས་ཏེ། བུམ་པ་སྲོག་ཆགས་མེད་པའི་ཆུ་དྲི་བཟང་པོ་དང་ལྡན་པས་ཡོངས་སུ་བཀང་བ་ལྕུག་མས་ཁ་རྒྱན་བྱས་པ། གོས་

ཀྱིས་མགྲིན་པ་དཀྲིས་པ། ནང་དུ་འབྲུ་དང་། རིན་པོ་ཆེ་དང་། སྨན་བཅུག་པ་བཅུའམ་ལྔའམ་གཅིག་དེ་ཉིད་དུ་བཞག་ལ། གཡོན་དུ་མཆོད་ཡོན་གྱི་སྣོད་དང་། གཡས་སུ་མེ་ཏོག་ལ་སོགས་པའི་ཡོ་བྱད་བཞག་སྟེ། མཆོད་ཡོན་གྱི་སྣོད་ལ་རང་གི་འདོད་པའི་ལྷའི་
སྔགས་ལན་ཉི་ཤུ་རྩ་གཅིག་བཟླས་པར་བྱའོ། །ལས་ཐམས་ཅད་པའི་སྣོད་ལ་ཡང་བདུད་རྩི་འཁྱིལ་པའི་སྔགས་དེ་ཁོ་ན་བཞིན་དུ་ཡོངས་སུ་བཟླས་པར་བྱའོ། །དེ་ནས་ཟླ་བ་དང་རྡོ་རྗེ་ལ་སོགས་པའི་རིམ་པ་མདོར་བསྡུས་པས་བུམ་པ་རྣམས་སུ་རྡོ་རྗེ་སེམས་དཔའ་ལ་སོགས་པ་བདུད་རྩི་འཁྱིལ་
པ་ལ་ཐུབ་པའི་གཟུགས་བསྐྱེད་ལ་རྗེ་བཙུན་གྱི་ཡི་གེ་བརྒྱ་པ་ལན་གསུམ་བརྗོད་ནས་ཨོཾ་ཨཱཿཧཱུཾ་ཞེས་བྱ་བའི་སྔགས་ཀྱིས་རྡོ་རྗེ་ཡང་དག་པར་མཆོད་དེ། ཨོཾ་བཛྲ་གྷཎྜེ་ར་ཎ་ཞེས་བྱ་བའི་སྔགས་ཀྱིས་མཆོད་ལ་སྤོས་ཀྱིས་བདུགས་ཏེ། ཨོཾ་བཛྲ་དྷྲྀཀ་ཅེས་བྱ་བ་ལ་སོགས་པའི་སྔགས་ཀྱིས་
བུམ་པ་དག་སྤྱན་དྲང་བར་བྱའོ། །དེ་ནས་མེ་ཏོག་དང་སྤོས་དང་ཡོན་ཆབ་དང་དྲི་དང་ལྷ་བཤོས་ཕུལ་ལ། རང་རང་གི་སྔགས་རྣམས་ཡི་གེ་བརྒྱ་པ་འདོན་པ་སྔོན་དུ་འགྲོ་བ་ཅན་རྡོ་རྗེ་རྩེ་གསུམ་པའི་ཕྱག་རྒྱས་བུམ་པ་རྣམས་ལ་བརྒྱ་རྩ་བརྒྱད་ཡོངས་སུ་བཟླས་ཏེ་རས་ལ་སོགས་པ་ལ་
བཞུགས་པའི་བཅོམ་ལྡན་འདས་ཁྲུས་བྱའོ། །རི་མོ་བྲིས་པ་རྣམས་ལ་ནི་མེ་ལོང་ལ་སྐུ་གཟུགས་རྣམས་ནི་དངོས་སུའོ། །སྐུ་ཁྲུས་ཀྱི་ཡོ་བྱད་འབྲུ་ལ་སོགས་པ་རྣམས་ནི་ཁྲུས་ཀྱི་ཆོ་ག་ལས་བསྟན་ཏེ་དེ་ཉིད་ལས་ཤེས་པར་བྱའོ། །དེ་ནས་རང་གི་སྔགས་ཀྱིས་དཀྱིལ་འཁོར་གྱི་བུམ་
པ་དག་གིས་དབང་བསྐུར་ལ་དཀྱིལ་འཁོར་མཆོད་པ་ལྔ་ལ་སོགས་པས་མཆོད་པར་བྱའོ། །དེའི་རྗེས་ལ་ཕྱོགས་བཅུ་ན་གནས་པའི་སྤྲིན་ནག་པོ་དང་མཚུངས་པའི་གནོད་སྦྱིན་དང་སྲིན་པོ་དང་ཤ་ཟ་ལ་སོགས་པ་ལག་ན་རལ་གྲི་དང་ཐོ་བ་དང་མདའ་བོ་ཆེ་ལ་སོགས་པ་ཐོགས་
པ་རྣམས་བསམས་ཏེ། ནམ་མཁའ་ལ་ཡང་པཾ་ལས་བྱུང་བའི་པདྨ་ཆེན་པོ་དེའི་འདབ་མ་བརྒྱད་ལ་འཇིག་རྟེན་སྐྱོང་བ་བརྒྱད་ཁ་དོག་དང་དབྱིབས་དང་ཆ་བྱད་ཇི་ལྟ་བ་བཞིན་དང་ལྡན་པ། ལྟེ་བའི་དབུས་སུ་བགེགས་ཀྱི་རྒྱལ་པོ་ལོག་འདྲེན་མདོག་དམར་པོ་གླང་པོ་ཆེའི་གདོང་ཅན་

གདོང་གཅིག་པ། ལག་པ་བཞི་པ། ལག་པ་གཡས་ན་དགྲ་སྟ་དང་རལ་གྲི་ཐོགས་པ། ལག་པ་གཡོན་ན་ཕྲེང་བ་དང་ལ་དུ་ཐོགས་པ། གསུས་པ་འཕྱང་བ་གར་བྱེད་པ། ཚངས་པའི་རྒྱབ་ཏུ་རྐང་པ་གཉིས་ཀྱིས་མནན་པ། གླང་པོ་ཆེའི་སྒྲས་གང་བའི་མཆུའི་རྩེ་མོའི་
སྒྲས་ཕྱོགས་བཅུའི་གཏོས་ཀྱི་ནང་འགེངས་པ། མེ་ཏོག་གི་མཆེ་བ་ཅན་གྱི་ཚོགས་ཀྱིས་རྐང་པའི་པདྨ་གཉིས་ལ་ཕྱག་བྱས་པ་རྣམ་པར་བསྒོམས་ལ། ཨོཾ་བཛྲ་ཨ་ར་ལི་ཧོ་ཛཿཧཱུཾ་བཾ་ཧོཿ། །བཛྲ་ཌཱ་ཀི་ནི་ས་མ་སྟྭཾ་དྲྀ་ཤྱ་ཧོ་ཞེས་བྱ་བའི་སྔགས་ཀྱིས་བོས་ལ། དཀྱིལ་འཁོར་གྱི་ཕྱོགས་
བཅུ་ཀུན་དུ་བསམ་པར་བྱའོ། །དེ་ནས་ཡི་གེ་ཧཱུཾ་གི་སྒྲ་འཇིགས་སུ་རུང་བ་བརྗོད་ནས་འཁྱིལ་པའི་སྔགས་ཀྱིས་ཉུངས་ཀར་བྱིན་གྱིས་བརླབས་ཏེ་བགེགས་ཐམས་ཅད་ལ་དམིགས་ནས་ཨོཾ་རི་རི་ཏི་ཏི་ཕཊ་སྭཱ་ཧཱ་ཞེས་བྱ་བའི་སྔགས་དང་། ཨོཾ་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ་ཞེས་བྱ་བའི་སྔགས་
ཀྱིས་མེའི་སྣོད་དུ་གཞུག་པར་བྱའོ། །དེ་ནས་བགེགས་རྣམས་ཀྱི་སྤྱི་བོ་དང་སྙིང་ཨརྫ་ཀའི་དོག་པ་བཞིན་དུ་འགས་པར་འགྱུར་རོ། །གལ་ཏེ་དམ་ཚིག་ལ་གནས་པར་མི་བྱེད་ན་དེའི་ཚེ་བག་ཕྱེ་ལས་བགེགས་རྣམས་ཀྱི་གཟུགས་བརྙན་བྱས། དཀྱིལ་འཁོར་གྱི་དབུས་སུ་གསོར་
བའི་རྡོ་རྗེས་ཕྱེ་མར་བྱས་ན་སྐད་ཅིག་དེ་ཉིད་ལ་དེ་རྣམས་དམ་ཚིག་ལ་གནས་པར་འགྱུར་རོ། །དེ་ནས་སུམྦྷ་ནི་སུམྦྷ་ཞེས་བྱ་བ་ལ་སོགས་པས་ཕུར་བུ་གདབ་ཅིང་། དེ་བཞིན་དུ་སྔགས་རྐང་པ་ཕྱི་མས་བརྡུང་བར་བྱའོ། །དེའི་རྗེས་ལ་ས་ལ་སོགས་པའི་བུམ་པའམ་ཕྲུ་
བ་ཚད་ཆེན་པོ་དང་ལྡན་པ་ཆུས་ཡོངས་སུ་གང་བར་བྱ་སྟེ་ཉའི་ཤ་རློན་པ་དང་། བཙོས་པ་དང་། བསེགས་པའི་དབྱེ་བ་རྣམ་པ་གསུམ་དང་། དེ་བཞིན་དུ་པྲི་ཡང་ཀུ་དང་ཀོ་ལདྠ་དང་ཙ་ན་ཀ་དང་། འབྲེང་བུའི་ཆུན་པོ་དང་། འབྲས་ཡོས་དང་། སྟར་ཀའི་འབྲས་བུ་དང་།
སྣུམ་ཁུར་དང་། ཤ་དང་། མ་ཡོ་སྟ་དང་། ཐུག་པ་དང་། བཙོང་དང་། སྒོག་སྐྱ་དང་། ཀེའུ་དང་། ཁབ་དང་། འགྲོན་བུ་དང་། སྙེ་མའི་འབྲུ་དང་། གོང་བུའི་འབྲུ་དང་། ལན་ཚྭ་དང་། སྦྲང་རྩི་དང་། འབྲུའི་ཆང་དང་། རྒུན་ཆང་དང་། གོས་སྔོན་པོ་དང་། སྒྲོན་

བུའི་ཚོགས་ཀྱིས་གང་བར་བྱས་ལ་ཁྲོ་བོ་བདུད་རྩི་འཁྱིལ་པའི་སྔགས་བརྒྱ་རྩ་བརྒྱད་ཡོངས་སུ་བཟླས་པར་བྱའོ། །འདིར་སྔགས་ནི་འདི་ཡིན་ཏེ། ཨོཾ་ན་མཿས་མནྟ་ཀཱ་ཡ་ཝཱཀ་ཙིཏྟ་བཛྲཱ་ཎཱཾ་ན་མོ་བཛྲ་ཀྲོ་དྷ་ཡ་མ་ཧཱ་དཾ་ཥྚྲོད་ཀ་ཊ་བྷཻ་ར་བཱ་ཡ། ཨ་སི་མུ་ས་ལ་པ་ལ་ཤུ་པཱ་ཤ་
ཧསྟཱ་ཡ། ཨོཾ་ཨ་མྲྀ་ཏ་ཀུཎྜ་ལི་ཁ་ཁ་ཁཱ་ཧི་ཁཱ་ཧི། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། གརྫ་གརྫ། བི་སྥོ་ཊ་ཡ། བི་སྥོ་ཊ་ཡ། སརྦ་བིགྷྣཱ་བི་ནཱ་ཡ་ཀན་མ་ཧཱ་ག་ཎ་པ་ཏི་ཛཱི་བི་ཏ་ཨནྟ་ཀ་རཱ་ཡ་སྭཱ་ཧཱ། དེའི་རྗེས་ལ་རྗེ་བཙུན་ཡི་གེ་བརྒྱ་པས་མེ་ཏོག་དང་སྤོས་རྣམས་
ཀྱིས་མཆོད་ལ། གཡས་བརྐྱང་བའི་འདུག་སྟངས་ཉེ་བར་བཅིངས་ཏེ་དྲིལ་བུ་དཀྲོལ་ཞིང་རྡོ་རྗེ་གསོར་བས་སྔགས་འདི་བརྗོད་པར་བྱའོ། །ཨོཾ་ཨིནྡ། ཛ་མ། ཛ་ལ། ཛཀྑ། བྷཱུ་ཏ། བཧྣི། བཱ་ཨུ། རཀྑ། ཙནྡ། སུཛྫ། མཱ་ད། པཔྤ། ཏ་ལ་པཱ་ཏཱ་ལེ། ཨཊྛ་སཔྤ་སྭཱ་ཧཱ། ཨི་དཾ་བ་ལིམྦྷུཉྫ། ཛིགྷ། ཕུལླ། དྷཱུ་པྤ།
མཱཾ་ས། པིཾ་གྷ། ཨཾ་བྷ། སཔྤ། ཀཛྫ། སཱ་ད། ཁནྟི། ཁུ་ཎི། ཕེ་ཌ། གཱ་ད། དེ་བཞིན་དུ་ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱཱ་ནུཏྤནྣ་ཏྭཱ་ཏཏ་ཨོཾ་ཨཱཿཧཱུཾ་ཕཊ་སྭཱ་ཧཱ། ཡང་ན་སྔགས་སོ་སོས་གཏོར་མ་སྦྱིན་པར་བྱའོ། །འདི་ལྟ་སྟེ། ཨོཾ་ཨིནྡྲེ་ཡེ་སྭཱ་ཧཱ། དབང་པོའི་ཕྱོགས་སུའོ། །བེ་བ་སྭ་ཡེ་སྭཱ་ཧཱ། གཤིན་
རྗེའི་ཕྱོགས་སུའོ། །ཨོཾ་ཨ་པཱཾ་པ་ཏ་ཡེ་སྭཱ་ཧཱ། ཆུའི་ཕྱོགས་སུའོ། །ཨོཾ་ཡཀྵ་བིརྱ་དྷ་རི་སྭཱ་ཧཱ། ལུས་ངན་པོའི་ཕྱོགས་སུའོ། །ཨོཾ་རུ་དྲཱ་ཡ་སྭཱ་ཧཱ། དབང་ལྡན་གྱི་ཕྱོགས་སུའོ། །ཨོཾ་ཨགྣཱ་ཡ་སྭཱ་ཧཱ། མེའི་ཕྱོགས་སུའོ། །ཨོཾ་རཀྵ་སིདྡྷི་པ་ཏ་ཡེ་སྭཱ་ཧཱ། བདེན་བྲལ་གྱི་ཕྱོགས་སུའོ། །
ཨོཾ་ཝ་ཡ་བེ་སྭཱ་ཧཱ། རླུང་གི་ཕྱོགས་སུའོ། །ཨོཾ་ཀཾ་ཀ་རི་སྭཱ་ཧཱ། སྲིན་པོ་རྣམས་ཀྱིའོ། །ཨོཾ་པི་ཙི་པི་ཙི་སྭཱ་ཧཱ། ཤ་ཟ་རྣམས་ཀྱིའོ། །ཨོཾ་གྷུཾ་གྷུཾ་སྭཱ་ཧཱ། འབྱུང་པོ་རྣམས་ཀྱིའོ། །ཨོཾ་ག་ར་ལ་ཡེ་སྭཱ་ཧཱ། ལྷ་མ་ཡིན་རྣམས་ཀྱིའོ། །ཨོཾ་མ་ཏི་བྷྱོ་སྭཱ་ཧཱ། མ་མོ་རྣམས་ཀྱིའོ། །ཨོཾ་བི་
ཤུདྡྷ་སྭཱ་ཧཱ་བ་ཧི་ནི་སྭཱ་ཧཱ། དྲི་ཟ་རྣམས་ཀྱིའོ། །ཨོཾ་ཡཀྵ་ཤྲ་ཡ་སྭཱ་ཧཱ། གནོད་སྦྱིན་རྣམས་ཀྱིའོ། །ཨོཾ་པི་ཤཱ་ཙ་ག་ཏི་སྭཱ་ཧཱ། ཤ་ཟ་རྣམས་ཀྱིའོ། །ཨོཾ་གྲ་ཧེ་སརྫ་པྲབྟ་ཛྱོ་ཏི་མ་ཡ་སྭཱ་ཧཱ། རྒྱུ་སྐར་རྣམས་ཀྱིའོ། །རིམ་པ་འདི་ཁོ་ན་བཞིན་དུ་སྔགས་འདི་རྣམས་ཀྱིས་ཆུ་སྙིམ་པ་གསུམ་

སྦྱིན་པར་བྱའོ། །དེ་ནས་ཐམས་ཅད་ཕུར་བུ་ལས་ཐར་བར་འགྱུར་རོ། །འདིར་ཕྱག་རྒྱ་ཡང་འབྱུང་སྟེ། མཛུབ་མོ་འདུས་བྱས་གུང་མོ་སྦྱར། །མཐེ་བོང་རྡོ་རྗེ་བརྟན་པོར་སྦྱར། །དེ་ནི་དཔྲལ་བའི་དབུས་བཞག་ནས། །བསྐོར་ཞིང་བསྐོར་ནས་བསྐྱོད་པར་བྱ། །ལྷོ་རུ་ལུས་ནི་
བལྟས་བྱས་ནས། །གཅེར་བུ་སྐྲ་ནི་བཤིག་གྱུར་ཅིང་། །དྲག་ཅིང་ཁྲོས་པའི་སེམས་ལྡན་པས། །ཐུན་གསུམ་དུ་ནི་གཏོར་མ་སྦྱིན། །ཡང་ན་རྐེད་པའི་ཕྱོགས་སུ་ལག་པ་གཡོན་པ་དྲིལ་བུ་དང་བཅས་པ་བཞག་ལ་གཡས་པས་བསྙེམས་ཚུལ་དང་བཅས་པའི་རྡོ་རྗེ་གསོར་ཞིང་གཏོར་
མ་སྦྱིན་པར་བྱའོ། །ཡང་ན་གུང་མོ་དང་སྲིན་ལག་དག་བཀུག་ནས་དེ་དག་གི་རྩ་བར་མཐེ་བོང་བཅུག་སྟེ་མཛུབ་མོ་དང་མཐེའུ་ཆུང་དག་ལྕགས་ཀྱུའི་རྣམ་པར་བྱ་ཞིང་ལག་པ་གཡོན་པའི་ཚིགས་རྒྱབ་ཏུ་ལག་པ་གཡས་པའི་རྒྱབ་ཚིགས་གཞག་སྟེ་སྙིང་གའི་གནས་སུ་གཞག་པར་བྱའོ། །དེ་ལྟ་བུ་དེ་
ཡང་གཏོར་མའི་ཕྱག་རྒྱ་ཡིན་ནོ། །ཐུན་མཚམས་ཐམས་ཅད་དུ་རྒྱུའི་རྒྱུད་ལས་གསུངས་པའི་ཆོ་ག་བཞིན་དུ་གཏོར་མ་སྦྱིན་པར་བྱའོ། །དེ་ནས་སྒྲུབ་པའི་གྲོགས་མཆོག་གིས་ཨོཾ་ཨ་མྲྀ་ཏེ་ཧཱུཾ་ཕཊ་ཅེས་པའི་སྔགས་བརྗོད་པས་སྒྲུབ་པ་པོས་སྲུང་བ་བྱས་ནས་ཐོར་ཚུགས་བཅིང་བར་བྱས་ཏེ་ཤིང་གཅིག་གམ།
ལམ་གྱི་བཞི་མདོའམ། སུམ་མདོའམ། མཚན་མ་གཅིག་པའམ། ཆུ་བོ་དག་ཏུ་གཏོར་མ་དོར་བར་བྱ་བའམ་བཀྲེས་པ་རྣམས་ལ་སྦྱིན་པར་བྱའོ། །དེ་ནས་དཀྱིལ་འཁོར་གྱི་རྡུལ་ཚོན་ཆུ་བོ་ལ་དབོ་བར་བྱའོ། །དཀྱིལ་འཁོར་གྱི་ས་གཞི་བའི་ལྕི་བས་བྱུགས་ལ་བཅོམ་ལྡན་འདས་མ་ཤེས་རབ་ཀྱི་ཕ་
རོལ་ཏུ་ཕྱིན་མ་བཀླག་པར་བྱའོ། །བསོད་ནམས་ཡོངས་སུ་བསྔོས་ཏེ། དེ་བཞིན་གཤེགས་པ་ཐམས་ཅད་ལ་ཕྱག་བྱས་ནས་བསྐོར་བ་བྱས་ཏེ་ལངས་ནས་ཁྱེད་ཀྱིས་ཞེས་བྱ་བ་ལ་སོགས་པ་དང་། ངོ་མཚར་གྱི་ཕྱག་རྒྱས་བཏབ་ལ་རང་གི་ལྷའི་ང་རྒྱལ་གྱིས་སྤྱོད་ལམ་རྣམ་བཞིའི་སྒོ་ནས་
ཇི་ལྟར་འདོད་པས་གནས་པར་བྱའོ། །དེ་ནི་བགེགས་རབ་ཏུ་ཞི་བར་བྱེད་པའི་གཏོར་མའི་ཆོ་གའོ།། །།གདོན་དང་ཕྱོགས་སྐྱོང་ཚིམ་བྱའི་ཕྱིར། །དཔུང་བཟངས་རྒྱུད་ལས་ཇི་སྐད་གསུངས། །གཏོར་མའི་ལས་ནི་ལུང་བཞིན་དུ། །དེ་ནས་དང་པོར་རབ་བཤད་བྱ། །རེ་ཞིག་དང་

པོར་སྔར་བཤད་པའི་བཟའ་བ་དང་བཅའ་བ་ལ་སོགས་པ་ཉེ་བར་བསོགས་ཏེ་ཆ་གཉིས་སུ་བྱས་ནས་ཆ་གཅིག་ལ་གདོན་རྣམས་ཚིམ་པར་བྱ་བའི་ཕྱིར་ཚིགས་སུ་བཅད་པ་འདི་རྣམས་བརྗོད་པར་བྱའོ། །ལྷ་དང་ལྷ་མིན་གནོད་སྦྱིན་ལྟོ་འཕྱེ་གྲུལ། །ནམ་མཁའ་ལྡིང་དང་
འདབ་བཟང་ལུས་སྲུལ་པོ། །དྲི་ཟ་སྲིན་པོ་གདོན་གྱི་རིགས་རྣམས་དང་། །གང་དག་ས་ལ་གནས་པའི་རྫུ་འཕྲུལ་ཅན། །བདག་ཅག་པུས་མོ་ས་ལ་བཙུགས་ནས་ནི། །ཐལ་སྦྱར་ཁྱེད་རྣམས་ལ་ཡང་གསོལ་འདེབས་ན། །བུ་སྨད་བཅས་ཤིང་གཡོག་འཁོར་བཅས་པ་རྣམས། །གསན་
ནས་ཕན་འདོགས་སླད་དུ་འདིར་སྤྱོན་ཅིག །འབྱུང་པོ་གང་དག་རི་རབ་སྟེང་གནས་དང་། །དགའ་བའི་ཚལ་དང་ལྷ་ཡུལ་ཀུན་གནས་དང་། །ཤར་ནུབ་རི་དང་ཉི་ཟླའི་ཁྱིམ་རྣམས་དང་། །གྲོང་ཁྱེར་ཀུན་ན་གང་དག་གནས་པ་དང་། །ཆུ་བོ་ཀུན་དང་ཆུ་བོའི་ངོགས་རྣམས་དང་། །རིན་
ཆེན་གནས་ན་ལྷག་པར་གང་གནས་དང་། །རྫིང་དང་མཚོ་དང་ལུ་མ་ལྟེང་ཀ་དང་། །ཁྲོན་པ་དང་ནི་ངམ་གྲོག་ཆུ་མིག་དང་། །གྲོང་དང་ཕྱུགས་ལྷས་དང་ནི་ནགས་ཚལ་དང་། །ཁང་སྟོང་དང་ནི་ལྷ་ཡི་ཁང་པ་དང་། །གང་དག་གཙུག་ལག་ཁང་དང་མཆོད་རྟེན་གནས། །སོ་ནམ་
ཁྱིམ་དང་གླང་པོའི་ཁང་རྣམས་དང་། །གང་དག་རྒྱལ་པོའི་དཀོར་ཁང་གནས་པ་དང་། །སྲང་དང་ཁྱམས་དང་གྲོང་དང་འདུན་ས་དང་། །གང་དག་ཤིང་གཅིག་དྲུང་དང་ལམ་ཆེན་གནས། །དུར་ཁྲོད་དང་ནི་ནགས་ཚལ་ཆེ་གནས་དང་། །སེང་གེ་གླང་ཆེན་དྲེད་ཀྱི་གནས་རྣམས་
དང་། །འཇིགས་སུ་རུང་བའི་དགོན་པ་ཆེ་གནས་དང་། །ཆུ་གླིང་མཆོག་དག་ཏུ་ནི་གནས་བཅས་དང་། །གང་དག་འབྲོག་དགོན་དུར་ཁྲོད་གནས་ན་གནས། །དགའ་ཞིང་མགུ་ནས་དྲི་དང་མེ་ཏོག་ཕྲེང་། །སྤོས་དང་མེ་ཏོག་མར་མེ་གུས་ཕུལ་བ། །འདི་དག་བསྣམས་ཏེ་
སོ་སོར་བཞེས་ནས་ཀྱང་། །ལས་འདི་དག་གི་འབྲས་བུ་མཆིས་པར་མཛོད། །གདོན་ལ་མཆོད་པ་བྱ་བའི་ཕྱིར་དེ་ལྟར་བྱ་སྟེ། དེ་ནས་ཆ་གཅིག་ལ་ཕྱོགས་སྐྱོང་རྣམས་ལ་མཆོད་པར་བྱ་བའི་ཕྱིར་ཚིགས་སུ་བཅད་པ་འདི་རྣམས་བརྗོད་པར་བྱའོ། །ཤར་ཕྱོགས་རྡོ་རྗེ་ཅན་

ཏེ་ལྷ་ཚོགས་བཅས། །གཏོར་མ་ཕུལ་བ་འདི་དག་བཞེས་སུ་གསོལ། །མེ་དང་གཤིན་རྗེ་བདེན་བྲལ་སྲིན་པོའི་བདག །ཆུ་བདག་རླུང་བདག་ནོར་གྱི་བདག་པོ་དང་། །སྟེང་གི་ཉི་ཟླ་ཚངས་པ་ཆེན་པོ་དང་། །ལྷ་རྣམས་མ་ལུས་ས་ཡི་ཀླུ་དག་དང་། །རི་ཡི་ལྷ་དང་གསང་བའི་ཚོགས་
འདུས་ལ། །སོ་སོ་སོ་སོར་གཏོར་མ་ཕུལ་བ་རྣམས། །རང་རང་གི་ནི་ཕྱོགས་སུ་བཞུགས་ནས་ཀྱང་། །རང་གི་བུ་སྨད་གྲོགས་དང་གཡོག་འཁོར་བཅས། །དཔུང་དང་སྡེ་བཅས་མཉེས་ནས་བཞེས་སུ་གསོལ། །སྤོས་དང་མེ་ཏོག་གཏོར་མ་ལྷ་བཤོས་ནི། །འདི་དག་བཞེས་ཤིང་སོ་
སོར་བསྣམས་ནས་ཀྱང་། །བྱ་བ་འདི་ནི་འབྲས་བུ་མཆིས་པར་མཛོད། །འདི་ནི་བགེགས་ཉེ་བར་ཞི་བར་བྱེད་པའི་དོན་དུའམ། དགོས་པ་གཞན་འདོད་པའི་མཁས་པ་རྣམས་ཀྱིས་བསྒྲུབ་པར་བྱའོ། །གཏོར་མ་འདི་ལ་སྔགས་རྣམས་ནི། །ཀུན་དུ་འབྱུང་བ་མེད་མོད་ཀྱི། །འོན་ཀྱང་
ཚིགས་བཅད་ཙམ་གྱིས་ནི། །འདིར་ནི་གདོན་སོགས་རིམ་པར་འགྱུར། །དཀའ་ཐུབ་མཐུ་དང་བདེན་པ་རྣམས། །ལྷག་པར་ཡང་དག་ཐོབ་འགྱུར་བ། །བཅོམ་ལྡན་འདས་ཀྱི་བཀའ་ལུང་ནི། །འདི་ལྟར་སྔགས་དང་མཚུངས་པར་འདོད། །སླུ་བ་མེད་པའི་ཚིག་གང་ཡིན། །དེ་ནི་
གསང་སྔགས་ཉིད་དུ་འདོད། །མུ་སྟེགས་ཀྱིས་ནི་བསྟན་པའི་སྔགས། །དེ་ཉིད་ཕྱིར་ན་ཚད་མ་མིན། །དེ་བས་དངོས་གྲུབ་ཐོབ་རྣམས་ཀྱི། །ཚིག་གང་དེ་སྔགས་ཉིད་ཡིན་ཏེ། །སྤྱོད་ལམ་བཞི་པོ་དེ་དག་ནི། །ཕྱག་རྒྱ་ཉིད་དུ་བཤད་པ་ཡིན། །དེ་བས་གཏོར་མའི་ལས་འདི་ལ། །ཚིགས་བཅད་
གསང་སྔགས་ཉིད་དུ་འགྲུབ། །དེ་བས་འདིར་ནི་སྭཱ་ཧཱ་སོགས། །སྤེལ་བའི་སྔགས་ནི་དགོས་པ་མེད། །དེ་ནི་གདོན་དང་ཕྱོགས་སྐྱོང་རྣམས་ཀྱི་གཏོར་མའི་ཆོ་གའོ།། །།དཀྱིལ་འཁོར་ཐམས་ཅད་ཚིམ་བྱའི་ཕྱིར། །དུས་ཀྱི་འཁོར་ལོ་ལས་གསུངས་པ། །གཏོར་མའི་ལས་ནི་ཤིན་ཏུ་གསང་། །དེ་
བཞིན་གཤེགས་དང་ལྷ་མོ་རྣམས། །དཀྱིལ་འཁོར་གྱི་ནི་འཁོར་རྣམས་དང་། །ཁྲོ་བོ་མཁའ་འགྲོ་མ་རྣམས་ཀྱིས། །སུམ་ཅུ་དྲུག་གི་བར་གསལ་བར། །དེ་ནས་གཞན་ཡང་རབ་བཤད་བྱ། །དང་པོ་སྦྱོར་བ་སོགས་དབྱེ་བས། །ཏིང་ངེ་འཛིན་ནི་གསུམ་དུ་འདོད། །དེ་ཡི་མཐའ་མར་རྣལ་འབྱོར་པས། །ཕྱི་

རོལ་དཀྱིལ་འཁོར་ཚིམ་པར་བྱ། །ཡེ་ཤེས་འཁོར་ལོ་རང་སྙིང་ནས། །སྣ་ཡི་བུ་ག་གཡས་དང་གཡོན། །གཉིས་ནས་ཀུན་དུ་སྤྲོ་བྱ་ཞིང་། །དཀྱིལ་འཁོར་ལ་ནི་ཡང་དག་དགོད། །ཆོས་ཀྱི་འཁོར་ལོའི་ཕྱོགས་ཀྱི་མཐའ། །བཞི་པོ་ལས་ཀྱང་མཁའ་འགྲོ་སོགས། །གནས་
ནི་ཉི་ཤུ་རྩ་བཞི་ལས། །རབ་ཏུ་གཏུམ་མོ་ལ་སོགས་སྤྲོ། །ཁྭ་ཡི་གདོང་ཅན་ལ་སོགས་པ། །ཐམས་ཅད་ཟ་བྱེད་མཁའ་འགྲོ་མ། །རུལ་བའི་དྲི་ལྡན་ལ་སོགས་སྒོ། །དུར་ཁྲོད་རྣམས་ནས་ཡང་དག་སྤྲོ། །འཁོར་ལོའི་དཀྱིལ་འཁོར་ནང་དུ་ནི། །མཁའ་འགྲོ་མ་ཡི་དཀྱིལ་འཁོར་མཆོག །མཐོང་
ནས་མཆོད་ཡོན་ཞབས་བསིལ་སོགས། །སྔར་བཞིན་རྣལ་འབྱོར་སོ་སོར་དབུལ། །དེ་ནས་སྔར་བཞིན་ཆུ་སྐྱེས་སོགས། །རྣལ་འབྱོར་པས་ནི་རྣམ་པར་བསམ། །བདུད་རྩི་ལྔ་ཡང་བསམ་པར་བྱ། །རང་གི་ས་བོན་བྱིན་བརླབས་ཤིང་། །འོད་ཀྱི་ཚོགས་ནི་རྣམ་པར་འཕྲོ། །བྱང་ཆུབ་སེམས་
ཀྱི་རང་བཞིན་དུ། །དེ་དག་བརྟུལ་ཞུགས་ཆེན་པོས་བསམ། །དེ་ནས་རྣམ་པར་སྦྱང་བ་ལ་སོགས་པའི་སྔགས་ཀྱི་ཚིག་ནི་འདི་རྣམས་ཡིན་ནོ། །ཨོཾ་ན་མཿཤྲཱི་བཛྲ་ཌཱ་ཀི་ཡ་ཨོཾ་ཨཱཿཧཱུཾ། ཡི་གེ་ཨོཾ་གྱིས་སྦྱང་བར་བྱའོ། །ཡི་གེ་ཨཱཿཡིས་སྤེལ་བར་བྱའོ། །ཡི་གེ་ཧཱུཾ་གིས་བདུད་རྩིར་བྱའོ། །
ལག་པ་གཡོན་པས་སྦྱང་བར་བྱའོ། །ལག་པ་གཡས་པས་རྟོགས་པར་བྱའོ། །ཐལ་མོ་བཀབ་ནས་སྤར་བར་བྱའོ། །ནམ་མཁའ་ལྡིང་གི་ཕྱག་རྒྱས་ཟླ་བཞུ་བའི་རང་བཞིན་དུ་བདུད་རྩིར་བྱའོ། །དེ་ནས་གཡོན་པའི་སྲིན་ལག་གིས་དབུས་ནས་ཐིག་ལེ་བླངས་ཏེ་ས་ལ་ཆོས་འབྱུང་གྲུ་གསུམ་བྱ་
ཞིང་། དེའི་ནང་དུ་ཟླུམ་པོའི་ཐིག་ལེའི་གཟུགས་ཅན་བྱའོ། །དེའི་ནང་དུ་མེ་ལོང་གི་གཟུགས་བརྙན་བཞིན་དུ་གསལ་བའི་དཀྱིལ་འཁོར་གྱི་འཁོར་ལོ་བསམ་ཞིང་དེ་ཚིམ་པར་བྱའོ། །ཨོཾ