Luận tạng Tây Tạng (Tengyur) — Tập 79

མོ་རཏྣ་ཏྲ་ཡཱ་ཡ། ཨོཾ་མ་ཎི་བྷ་དྲཱ་ཡ། མ་ཧཱ་ཡཀྵ་སེ་ནཱ་པ་ཏ་ཡེ། ཨོཾ་ཛཾམྦྷ་ལ་ཛ་ལེནྡྲ་ཡེ་སྭཱ་ཧཱ། ཞེས་ལན་བདུན་ནམ་བརྒྱ་རྩ་བརྒྱད་ཀྱི་བར་དུ་བཟླས་ཏེ་ཇི་ལྟར་འདོད་པའི་དོན་ལ་གསོལ་བ་གདབ་པོ། །དེ་ནས་ཡང་མཆོད་པས་གཏང་རག་ཕུལ་ཏེ་མེ་ཏོག་

དབུ་ལ་བཞག་ནས་ཡི་གེ་བརྒྱ་པས་ལྷག་ཆད་ཁ་བསྐང་ལ་རྟེན་སྤྱི་བོ་དང་ཆུའི་ཕུད་སྲིན་ལག་གིས་རེག་སྟེ་ལྕེ་ལ་བཞག་ཅིང་། ཆུའི་ཚོགས་རྒྱ་མཚོར་འཇུག་པའི་ངོགས་སུ་དོར་བར་བྱའོ། །དེ་ལྟར་ཟླ་བ་དྲུག་ལ་སོགས་པར་ཉིན་ལན་གསུམ་མཚན་ལན་གསུམ་དུ་བར་མ་ཆད་པར་ཆུ་སྦྱིན་པ་ལ་བརྩོན་
པར་བྱེད་ན། དེས་ཇི་ལྟར་མངོན་པར་འདོད་པའི་འབྱོར་པ་ཐམས་ཅད་གདོན་མི་ཟ་བར་འགྲུབ་པར་འགྱུར་རོ། །དབང་ཕྱུག་སྙིང་པོ་གཏེར་བུམ་ལས། །ལྕགས་ཀྱུས་ལྕག་བཏབ་ཟས་ནོར་སྟེར། །བྲམ་ཟེའི་ཚངས་སྐྱོགས་ལྔ་ཚན་ལྔས། །བཀང་ཏེ་བཅུད་བསྡུས་དངོས་གྲུབ་ལེན། །རིན་ཆེན་
སྙིང་པོ་ཉི་ཟླ་དང་། །པདྨ་རབ་སྦྱངས་བདེ་ཆེན་ཐོབ། །རིམ་བཞིན་གནོད་སྦྱིན་ནེེའུ་ལེ་མོ། །ཐོད་ཁྲག་པུར་ལིང་སྦྱོར་བར་བཤད། །དབྱར་དགུན་སྟོན་ཟླ་ཐ་ཆུངས་དང་། །དཔྱིད་ཟླ་འབྲིང་ལ་རྟེན་བཞེངས་ནས། །འདི་ཉིད་རྒྱལ་བའི་ཏིང་འཛིན་གྱིས། །དམ་ཚིག་ཡེ་ཤེས་མཉམ་སྦྱོར་
བྱ། །རྣ་བ་མནན་དང་མདངས་འཕྲོག་དང་། །དགྲ་བོ་བྱིས་པའི་གཟུགས་འཇིགས་པས། །རིགས་ངན་གདུག་པའི་ལས་གསུམ་བྱེད། །ཁྲོ་ཞལ་ཕྲིན་ལས་བགེགས་སྐྲོད་ཡིན། །ཀླུ་རྒྱལ་གདོན་འགྲོལ་ཆར་འབེབས་བྱེད། །ནོར་བདག་གཟིར་བས་ནོར་རྣམས་འཕྲོག །རིག་
འཛིན་དགུག་དང་གཏེར་འབྱེད་དང་། །འཇིགས་སྐྱོབ་རྐུན་པོ་སྲུང་བ་ཉིད། །བུ་སྟེར་ཚེ་ནི་བསྲིང་བ་དང་། །ཕྱུགས་སྐྱོང་བསྐྱེད་ཅིང་གཟུགས་པ་དང་། །དབང་བསྐུར་བཀྲ་ཤིས་གསོལ་བ་སྟེ། །རིམ་བཞིན་ཨོཾ་ནས་སྭཱ་ཧཱའི་བར། །འོད་དང་ལྷན་ཅིག་རྗེས་འགྲོ་དང་། །སླར་བཟློག་ཡི་
གེ་བཅུ་ཡིས་སོ། །རྡོ་རྗེ་ཧཱུྃ་མཛད་ཁྲོས་པ་ཡིས། །ཚ་བ་དུག་དང་ཁྲག་སྐེ་ཚེ། །མར་ཁུས་ལུས་བྱུགས་པུར་ལིང་གདུང་། །བདུན་ཕྲག་གཅིག་གིས་སྤོགས་ན་འགྲུབ། །ཡེ་ཡ་དྷ་ན་མེ་དྷེ་བཾ་སྭཱ་ཧཱ། སྙིགས་དུས་སྒྲུབ་རྣམས་རབ་དབུལ་ཉེན་རྣམས་ཀྱིས། །ཕན་འདོད་བཞིན་ཡང་རང་གཞན་
དོན་ཉམས་པར། །མཐོང་ནས་རྨུགས་འཛིན་ཆོ་ག་ཚུལ་བཞིན་བྲིས། །དགེ་བས་ཀུན་ལ་འདོད་སྦྱིན་སྟེར་གྱུར་ཅིག །དཔལ་རྨུགས་འཛིན་འཆོལ་བ་ནག་པོའི་སྒྲུབ་ཐབས་གསང་བ་ལས་ཀྱང་ཆེས་གསང་བ་སྦས་པའི་བུམ་པ་འཁྱིལ་བ་ཞེས་བྱ་བ། སློབ་དཔོན་ནོར་སྦྱིན་གྱིས་མཛད་

པ་རྫོགས་སོ།། །།དཔལ་ཆོས་ཀྱི་རྗེ་སའི་སྟེང་ན་འགྲན་ཟླ་དང་བྲལ་བའི་པཎྜི་ཏ་ཆེན་པོ་ཤཱཀྱ་ཤྲཱི་བྷ་དྲ་དང་། བོད་ཀྱི་ལོ་ཙཱ་བ་བྱམས་པའི་དཔལ་གྱིས། བོད་ཡུལ་གྱི་དབུས། ངམ་ཤོད་ཀྱི་མཐིལ། བསམ་ཡས་ལྷུན་གྱིས་གྲུབ་པའི་གཙུག་ལག་ཁང་རྒྱལ་པོའི་ཕོ་བྲང་ཡིད་
བཞིན་ནོར་བུའི་མཛོད་དབུ་རྩེ་རིམ་གསུམ་ལྷ་ཁང་གི་སྟེང་དུ་བཀྲ་ཤིས་པའི་ཉི་མ་ལ་བསྒྱུར་ཅིང་གཏན་ལ་ཕབ་པའོ།། ༄༅༅། །རྒྱ་གར་སྐད་དུ། ཨཱརྱ་ཛམྦྷ་ལ་ཀྲྀཥྞ་སཱ་དྷ་ནཾ། བོད་སྐད་དུ། འཕགས་པ་ཛམྦྷ་ལ་ནག་པོ་སྒྲུབ་པའི་ཐབས། འཕགས་པ་ཛམྦྷ་ལ་ལ་ཕྱག་འཚལ་
ལོ། །འཕགས་པ་ཛམྦྷ་ལ་བསྒྲུབ་པར་འདོད་པས། ཡིད་དང་མཐུན་པའི་གནས་སུ་སྟན་བདེ་བ་ལ་འདུག་སྟེ། སངས་རྒྱས་དང་བྱང་ཆུབ་སེམས་དཔའི་གོ་འཕང་ཐོབ་པར་བྱས་ཏེ། སེམས་ཅན་ཐམས་ཅད་མཐོ་རིས་དང་ཐར་པའི་བདེ་བ་ལ་དགོད་པར་བྱ། དེའི་ཆེད་དུ་ཛམྦྷ་ལ་ལ་ཆུ་ཕུལ་ལ་
མཆོད་པར་བྱ་སྙམ་དུ་སེམས་བསྐྱེད་ལ། གནས་དང་བདག་དང་རྣལ་འབྱོར་སྲུང་བ་ནི་གཞན་དང་མཐུན། རང་གི་སྙིང་གར་ཡི་གེ་ཨ་དཀར་པོ་འོད་ཟེར་འཕྲོ་བ་དང་བཅས་པ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར། དེའི་སྟེང་དུ་ཡི་གེ་ཧཱུྃ་ནང་ནག་ལ་ཕྱི་སེར་བ། འོད་ཟེར་སེར་པོ་
འཕྲོ་བ་བསམས་ལ། དེ་ཡོངས་སུ་གྱུར་པ་ལས་རྡོ་རྗེ་རྩེ་དགུ་པ་ཧཱུྃ་དང་ཁ་དོག་མཚུངས་པ་བསྒོམ། དེའི་ལྟེ་བའི་ནང་དུ་ཧཱུྃ་བསམ། ཧཱུྃ་དེ་ལས་འོད་ཟེར་ཕྱོགས་བཅུར་འཕྲོས་ཤིང་། །ངག་ཏུ་ཨོཾ་ཨ་ཞེས་བརྗོད་པས། ཕྱོགས་མཚམས་ཐམས་ཅད་ནས་སེམས་ཅན་གྱི་དོན་བྱེད་པའི་ཨུ་ཙུཥྨ་
བསམ་གྱིས་མི་ཁྱབ་པ་སྤྱན་དྲངས་ནས་མདུན་གྱི་ནམ་མཁའ་ལ་བཞུགས་པ་ལ། དད་ཅིང་གུས་པས་ཕྱག་འཚལ་དངོས་སུ་འབྱོར་པ་དང་ཡིད་ལས་བྱུང་བའི་མཆོད་པ་སྔོན་དུ་འགྲོ་བའི་བདུན་རྣམ་དག་བྱ། ཚད་མེད་པ་བཞི་བསྒོམ་པ་ནི་བསོད་ནམས་ཀྱི་ཚོགས་སོགས་པ་ཡིན། དེ་ནས་ཡང་
རྡོ་རྗེ་ཧཱུྃ། ཟླ་བ་རྣམས་ལས་འོད་འཕྲོས་པས་སྣོད་བཅུད་ལ་ཕོག །དེ་འོད་དུ་ཞུ་སླར་འོད་ཀྱི་གནས་ལ་ཐིམ། མདུན་གྱི་འཕགས་པའང་ཨོཾ་ཨ་ཞེས་བརྗོད་པས་རྡོ་རྗེ་དང་ཧཱུྃ་དང་ཐ་མི་དད་དུ་གྱུར། རང་ལུས་ཀྱང་འོད་དུ་ཞུ་ནས་རྡོ་རྗེ་ལ་སོགས་པ་ལ་ཐིམ། དེ་རྣམས་རྨི་ལམ་སྒྱུ་མ་ལྟར་བསམ། དེ་

ཡེ་ཤེས་ཀྱི་ཚོགས་སོགས་པ་ཡིན། རྡོ་རྗེ་ཧཱུྃ་ཟླ་བ་ཨུཙུཥྨ་ཧཱུྃ་གི་འོད་ཟེར་དེ་ལྔ་པོ་ཡོངས་སུ་གྱུར་པ་ལས། སྣ་ཚོགས་པདྨ་དང་ཟླ་བའི་སྟེང་དུ་རྣམ་ཐོས་ཀྱི་བུ་སྐུ་མདོག་སེར་པོ་མགོ་གཡས་སུ་བསྟན་པ། གན་རྐྱལ་དུ་ཉལ་བ། ཁ་ནས་རིན་པོ་ཆེ་སྣ་ཚོགས་སྐྱུགས་པ། དབུ་རྒྱན་ལ་སོགས་པ་རིན་པོ་ཆེ་
སྣ་ཚོགས་ཀྱིས་བརྒྱན་པ། དེའི་མགོ་ཐུར་དུ་མནན་པ། འོད་ཟེར་ཕྲེང་བ་འཁྲུག་ཅིང་འཕྲོ་བའི་གདན་གྱི་ལྟེ་བར། དབང་པོ་སྦས་པ་ལྟར་གནག་པའི་ཛ་ཡིག་ཡོངས་སུ་གྱུར་པ་ལས། ཨུཙུཥྨ་བྱིས་པའི་གཟུགས་ཅན་ཤིན་ཏུ་ནག་པ། རྣ་བ་མ་ཕུག་པ། རྣ་བ་ཐུང་བ། སྐྲ་ཁམ་པ་གྱེན་
དུ་བརྫེས་པ། ལུས་ཐུང་བ་མཐུག་པ། གསུས་པ་ཆེ་བ། མཆེ་བ་གཙིགས་པ། སྤྱན་དམར་བ། ཁྲོ་གཉེར་བསྙེར་བ། སྤྱན་ཟླུམ་པ། ཕྱག་གཉིས་ཀྱི་གཡས་པ་ན་ཁྲག་གིས་བཀང་བའི་ཐོད་པ་ནུ་མ་གཡས་པ་ལ་བརྟེན་ཅིང་ཞལ་དུ་གསོལ་བའི་ཚུལ་གྱིས་བསྣམས་པ། གཡོན་པ་ན་
རིན་པོ་ཆེ་སྣ་ཚོགས་སྐྱུགས་པའི་ནེའུ་ལེ་པུས་མོ་གཡོན་གྱི་སྟེང་དུ་བཟུང་བ། ཞབས་གཡས་བསྐུམ་པས་གདན་གྱི་མགོ་བོ་མནན་པ། གཡོན་བརྐྱང་བས་རྐང་པ་མནན་པ། མི་བསྐྱོད་པས་དབུ་བརྒྱན་པ། གཅེར་བུ་ཐོར་ཚུགས་ལ་ཀླུ་མཐའ་ཡས་ནག་པོས་དཀྲིས་པ། རྣ་བ། དོ་ཤལ། ཚངས་
སྐུད། དཔུང་པ། ལག་པ། རྐེད་པ། རྐང་པ་རྣམས་ལ་རིམ་པ་ལྟར། འཇོག་པོ་དམར་པོ། པདྨ་ཆེན་པོ་དཀར་པོ། སྟོབས་ཀྱི་རྒྱུ་སྔོན་པོ། རིགས་ལྡན་ཁྲ་བོ། དུང་སྐྱོང་སེར་པོ། བ་སུ་ཀི་དཀར་པོ། པདྨ་དཀར་པོ་སྟེ་ཀླུ་ཆེན་བརྒྱད་ཀྱིས་བརྒྱན་པའོ། །དེའི་ཐུགས་ཀར་ཟླ་བའི་གདན་ལ་
རྡོ་རྗེ་རྩེ་དགུ་པ། དེའི་ལྟེ་བར་ཟླ་བའི་གདན་ལ་ཧཱུྃ། དཔྲལ་བར་ཨོཾ། ལྕེ་ལ་ཛཾ། དཔུང་པ་གཡས་ལ་བྷ། གཡོན་ལ་ལ། ཐུགས་ཀར་ཛ། ལྟེ་བ་ལ་ལེན། ངར་གདོང་གཡས་ལ་དྲ། གཡོན་ལ་ཡེ། བོལ་གོང་གཡས་ལ་སྭཱ། གཡོན་ལ་ཧཱ། ཡི་གེ་དེ་རྣམས་ཟླ་བའི་གདན་དང་བཅས་
པའོ། །ཁ་དོག་གནག་ཅིང་འོད་སེར་པོ་འཕྲོ་བའོ། །ཡི་གེ་དེ་རྣམས་དང་ཐུགས་ཀའི་རྡོ་རྗེའི་ལྟེ་བའི་ནང་གི་ཧཱུཾ་ཟླ་བའི་གདན་རྣམས་ལས་འོད་འཕྲོས་ཏེ། སེམས་ཅན་ལ་རེག་པས་ཐམས་ཅད་ཛམྦྷ་ལར་གྱུར་ནས་ཡིད་ཀྱིས་ཧཱུྃ་ལ་བསྡུ། ཡང་དེ་རྣམས་ལས་འོད་འཕྲོས། རིན་པོ་ཆེ་ཐམས་ཅད་

བསྡུས་ཏེ་རླུང་ནང་དུ་རྔུབས་པས་ཀླུ་ཆེན་བརྒྱད་དང་། རྣམ་ཐོས་བུ་དང་། ནེའུ་ལེའི་ཁ་ནང་དུ་སོང་། ཕྱིར་རྒྱུ་བས་དེ་རྣམས་ཀྱི་ཁ་ནས་སྐྱུགས་ནས་རིན་པོ་ཆེའི་ཕུང་པོ་ཆེན་པོ་བྱུང་། ཡང་ཟོས་ཡང་སྐྱུགས་པ་ལན་མང་དུ་བསྒོམ། དེ་རྗེས་སུ་རང་གི་ལག་པ་གཡས་པར་ཨོཾ་ལས་
ཌཱ་ཀིའི་གཟུགས་ཀྱི་ལག་པའི་མཐིལ་དུ་བཾ་ཡིག་ལས་འོད་ཟེར་འཕྲོས་པས་སྐྱེས་བུའི་བུམ་པ་བཟང་པོའི་ལག་པར་བསམས་པའི་བུམ་ནང་དུ་ཛཾ། མཁྲིག་མ་ལ་ཨོཾ། མཛུབ་མོ་ལ་བྷ། གུང་མོ་ལ་ལ། སྲིན་ལག་ལ་ཛ། མཐེའུ་ཆུང་ལ་ལེན། མཐེ་བོང་ལ་དྲ། མཁྲིག་མའི་མཚམས་སུ་ཡེ།
གཡོན་ལ་སྭཱ། གཡས་ལ་ཧཱ། རེ་རེ་ལ་ཟླ་བའི་གདན་རེའོ། །དེ་ནས་ཟངས་གཞོང་ལ་སོགས་པའི་ནང་དུ་རྟེན་ཡོད་ན་བཞུགས། མེད་ན་རང་དང་འདྲ་བའི་རྟེན་མདུན་དུ་བསྐྱེད་ལ། ཆུ་ཁྱོར་བ་གང་ལ། ཨོཾ་ཨིནྡྲ་ནི་མུ་ཁཾ་བྷྲ་མ་རི་སྭཱ་ཧཱ། ཞེས་པ་ལན་བདུན་གྱིས་བྱིན་གྱིས་བརླབ། ཆུ་ཁྱོར་བ་གང་
ཁར་བླུགས་པར་བསམས་ཏེ་ཕུལ་བ་ཁར་སོང་བས། ཁོང་ནང་གི་ཛཾ་གྱིས་སེར་པོར་གྱུར་སྙིང་གའི་ཧཱུྃ་ལ་སོགས་པའི་ནུས་པས་བདུད་རྩིར་གྱུར་པ་སླར་གྱེན་དུ་ལོག་སྟེ་རང་གི་ལག་པའི་མཐིལ་དུ་བྱུང་བ། མདུན་གྱི་ཛམྦྷ་ལའི་ཞལ་དུ་ཕུལ་བར་བསམ་ཞིང་། ཨོཾ་ཛླུཾ་སྭཱ་ཧཱ་ཞེས་པ་ལན་རེ་དང་ཆུ་
ཁྱོར་བ་བརྒྱ་རྩ་བརྒྱད་རིམ་པ་འདི་གཉིས་སོ། །མཇུག་ཏུ། ན་མོ་རཏྣ་ཏྲ་ཡཱ་ཡ། ན་མོ་མ་ཎི་བྷ་དྲཱ་ཡ། མ་ཧཱ་ཡཀྵ་སེ་ནཱ་པ་ཏ་ཡེ། ཨོཾ་ཛམྦྷ་ལ་ཛ་ལེནྡྲ་ཡེ་སྭཱ་ཧཱ་ཞེས་ལན་བདུན་བརྗོད་ལ་ཆུ་ཁྱོར་བ་བདུན་དབུལ། འདི་ཉིད་གཏོར་མའི་སྔགས་ཀྱང་ཡིན། དེ་ནས་རྟེན་ཆུ་ནང་ནས་བཏོན་ཏེ་ལོགས་
སུ་བཞུགས། བསྐྱེད་པ་ཡིན་ན་བཛྲ་མུཿས་གཤེགས། གཏོར་མ་གཙང་སར་གཏང་། རྒྱུན་དུ་སྔགས་ཟློས་ལ། ཨོཾ་ཛམྦྷ་ལ་ཛ་ལེནྡྲ་ཡེ་སྭཱ་ཧཱ་ཞེས་པ་དང་ན་མོ་རཏྣ་ཏྲ་ཡཱ་ཡ་ལ་སོགས་སྔགས་ཕྲེང་འདམ་ཁ་ཡིན་གསུང་། ཟླ་བ་དྲུག་གིས་ངེས་པར་འགྲུབ་པར་ཐེ་ཚོམ་མི་དགོས་གསུང་།
རྗེས་སུ་བདག་གཞན་ཐམས་ཅད་ཀྱི་ཚེ་དང་བསོད་ནམས་འཕེལ་བ་དང་། དཔལ་འབྱོར་རྒྱས་པ་དང་། འཁོར་དང་ཆབ་སྲིད་འཕེལ་བ་དང་། འདོད་པའི་དོན་ཅི་དང་ཅི་བསམས་པ་ཐམས་ཅད་མྱུར་དུ་འགྲུབ་པར་མཛད་དུ་གསོལ་ཞེས་གསོལ་བ་གདབ་བསྔོ་བ་དང་སྨོན་ལམ་བྱའོ། །ཛམྦྷ་ལ་ནག་

པོའི་སྒྲུབ་ཐབས་བསྡུས་པ་པཎ་ཆེན་ཤཱཀྱ་ཤྲཱིའི་ཞལ་ནས་གསུངས་པ། གནུབས་ལོ་ཙཱ་བ་བྱམས་པའི་དཔལ་གྱིས་བསྒྱུར་བའོ། །ས་བརྒྱད་དབང་ཕྱུག་ལྷ་ཡི་ལྷ། །མགོན་པོ་འགྲོ་ཀུན་ཕོངས་པ་སེལ། །མིའུ་ཐུང་གཟུགས་ཅན་ནག་པོ་ཆེ། །ཨུ་ཙུཥྨ་ལ་ཕྱག་འཚལ་ལོ། །ཞེས་པའི་
བསྟོད་པས་བསྟོད་པར་བྱའོ།། ༄༅༅། །རྒྱ་གར་སྐད་དུ། ཨཱརྱ་ཛམྦྷ་ལ་ཛ་ལེནྡྲ་ཡེ་བི་ཤེ་ཥ་སྟོད་ཏྲ་ན་མ། བོད་སྐད་དུ། འཕགས་པ་རྨུགས་འཛིན་ཆུའི་དབང་པོ་ལ་ཁྱད་པར་གྱི་བསྟོད་པ་ཞེས་བྱ་བ། འཇིག་རྟེན་དབང་ཕྱུག་ལ་ཕྱག་འཚལ་ལོ། །ནོར་གྱི་དབང་ཕྱུག་རིན་
ཆེན་གཏེར་མངའ་བ། །ལྕགས་ཀྱུས་ལྕག་བཏབ་འདོད་དགུ་སྦྱིན་པར་བྱེད། །ཉི་ཤུ་དྲུག་ལྡན་གསང་སྔགས་ཡི་གེ་ཡིས། །ལྷ་མིན་ལྷ་དང་མིའམ་ཅིས་འདུད་རྒྱལ། །ཉི་ཤུ་ལྔ་ཡི་སྨན་མཆོག་གིས་གང་བའི། །ཚངས་སྐྱོགས་ལས་གྲུབ་དངོས་གྲུབ་བདུད་རྩིའི་རྒྱུན། །རབ་འབབ་བཅུད་
ཀྱི་རིལ་བུ་སྦྱིན་མཛད་གང་། །ནོར་རྒྱུན་ལྷ་མོས་ལེགས་བསྟན་ཁྱེད་ལ་འདུད། །ཐབས་ཆེན་ཤེས་རབ་ཟབ་སྦྱངས་རིན་ཆེན་གྱི། །སྙིང་པོ་ཉི་ཟླའི་སྦྱོར་བ་ལས་བྱུང་བ། །དགའ་ཆེན་ཡེ་ཤེས་བཞི་ཡི་སམ་བུ་ཏི། །མཆོག་བརྙེས་རྨུགས་འཛིན་ཁྱེད་ཞབས་རྟག་ཏུ་འདུད། །ཛཾ་ཡིག་ལས་
སྐྱེས་ལྷ་ཆེན་ཡི་གེ་བཞིས། །ལེགས་དྲངས་རྡོ་རྗེའི་ཐུགས་གསུང་སྐུར་ལྡན་པ། །སུམ་ཅུ་རྩ་གཉིས་མཚན་བརྒྱ་རབ་ལྡན་པ། །ཉམས་དགུའི་གར་གྱིས་བརྒྱན་ལ་ཕྱག་འཚལ་ལོ། །ཥྚོཾ་པ་ཎི་རོ་དྷའི་རྣ་བ་མནན། །ཕུ་བརྒྱད་ཁ་ཡིས་དགྲ་བོའི་མདངས་འཕྲོག་བྱེད། །ལུགས་བཟློག་
ལུགས་འབྱུང་བཞི་གཉིས་ཡི་གེ་ཡིས། །བྱིས་པའི་སྲོག་དང་གཟུགས་འཇིག་མཛད་ལ་འདུད། །ཀླུ་བརྒྱད་རྒྱན་གྱིས་ནོར་བུའི་གདོན་འགྲོལ་ཞིང་། །ཆུ་འཛིན་སྤྲིན་འདྲའི་ལུས་ལ་ཆར་ཆེན་འབེབས། །ཁྱོད་ནི་ནོར་བདག་གཟིར་བས་ས་གསུམ་གྱི། །ནོར་འཕྲོག་ཞལ་བཞིས་
བགེགས་འཇོམས་མཛད་ལ་བསྟོད། །སྟོབས་བཅུ་མངའ་བ་ཁྱོད་ཀྱི་ཡི་གེ་བཅུས། །རིག་འཛིན་དགུག་དང་གཏེར་འབྱེད་འཇིགས་ལས་སྐྱོབ། །རྐུན་པོ་སྲུང་དང་བུ་སྟེར་ཚེ་བསྲིང་དང་། །ཕྱུགས་སྐྱོང་སྐྱེད་ཤིང་དབང་བསྐུར་ཤིས་མཛད་འདུད། །གང་ཕྱིར་ས་གསུམ་སྐྱེ་བོ་རྨུགས་

བྱེད་པའི། །ནོར་འཛིན་ས་བརྒྱད་དབང་ཕྱུག་ཡུད་ཙམ་ཞིག །མཐོང་ནས་གུས་འཕེལ་ཉི་ཤུས་བསྟོད་བགྱིས་པས། །སྒྲུབ་རྣམས་ཕྲིན་ལས་ཉི་ཤུས་རྒྱལ་གྱུར་ཅིག །འཕགས་པ་རྨུགས་འཛིན་ཆུའི་དབང་པོ་ལ་ཕྲིན་ལས་ཉི་ཤུའི་སྒོ་ནས་ཁྱད་པར་གྱི་བསྟོད་པ་ཞེས་བྱ་
བ། སློབ་དཔོན་ཆེན་པོ་ནོར་འཛིན་དཔལ་གྱི་ཞབས་ཀྱིས་མཛད་པ་རྫོགས་སོ།། །།པཎྜི་ཏ་ཆེན་པོ་བུདྡྷ་ཤྲཱི་ཛྙཱ་ན་དང་ལོ་ཙཱ་བ་བྱམས་པའི་དཔལ་གྱིས་མང་ཡུལ་གྱི་གྲོང་དུ་འཕགས་པ་ཝ་ཏིའི་ཕོ་བྲང་དུ་བསྒྱུར་བའོ།། ༄༅༅། །རྒྱ་གར་སྐད་དུ། ཨཱརྱ་ཛམྦྷ་ལ་སྟོ་ཏྲ། བོད་སྐད་དུ།
འཕགས་པ་རྨུགས་འཛིན་ལ་བསྟོད་པ། བཅོམ་ལྡན་འདས་ཛམྦྷ་ལ་ལ་ཕྱག་འཚལ་ལོ། །མཆོད་སྦྱིན་བརྒྱ་པ་མེ་ལྷ་གདོང་བཞི་དང་། །སེང་གེ་འཕྲོག་བྱེད་ཉིན་མོར་བྱེད་རྣམས་ཀྱིས། །ཞབས་གཉིས་ལ་བཏུད་བཅོམ་ལྡན་སྡུག་བསྔལ་བ། །བདག་ལ་པད་ལྟར་ཡངས་པའི་སྤྱན་རས་
གཟིགས། །བཅོམ་ལྡན་ཆབ་ཁྱོར་གང་གིས་མཉེས་འགྱུར་ན། །ཐུགས་རྗེ་མངའ་བ་གཞན་གང་ལགས་པ་གསུངས། །དེ་ཕྱིར་མཆོད་པ་བཤམས་ལ་མི་རྩི་ཞིང་། །ཁྱོད་དང་འདྲ་བ་ཕལ་ཆེར་རྙེད་པར་དཀའ། །བརྩེ་བས་འབད་པའི་སྒོ་ནས་བཙལ་བཙལ་ནས། །ཕོངས་པར་གྱུར་པ་
བདག་ལ་བདེ་མཛད་ན། །ཁོ་བོ་མཆི་མ་དག་གིས་གདོང་སྦགས་པ། །སྤྱན་སྔར་མཆིས་ཀྱང་ཅི་སྟེ་གཟིགས་མ་ལགས། །ཨེ་མའོ་རབ་ཏུ་རྒྱས་པ་ཐུགས་རྗེ་ཡི། །གཞུ་མོ་མངའ་བ་ཁྱོད་ལྟ་བཞུགས་གྱུར་ཀྱང་། །སྐྱེ་ཚོགས་བཟློག་དཀའ་སྡུག་བསྔལ་ཆོམ་རྐུན་གྱི། །སྡེ་ཡིས་རྣམ་
པར་འཇོམས་པར་ཇི་ལྟར་ལགས། །སེམས་ཅན་སྨན་སླད་ནོར་བུ་རིན་པོ་ཆེ། །རྣམ་པ་སྣ་ཚོགས་དགུང་ཆར་འབེབས་དྲག་ན། །ཁོ་བོ་ཁྱོད་ཉིད་གཅིག་པུའི་མཐར་ཐུག་པ། །ཅི་སྟེ་ཐིགས་པ་ཡང་ནི་འབེབས་མ་ལགས། །ཁྱོད་བཞུགས་བཞིན་དུ་མེ་ཡིས་འབར་བ་ལྟར། །ཁོ་བོ་ཕོངས་
པས་ཤིན་ཏུ་ཆེར་བསྲེག་ན། །ཁྱོད་ཀྱིས་ལྟ་ཞིག་ཐུགས་རྗེ་འཇོ་བའི་བ། །ས་གསུམ་ཁུར་དུ་ཁུར་བ་གང་དུ་ཐལ། །བུམ་པ་དཔག་བསམ་ཤིང་དང་ཡིད་བཞིན་གྱི། །ནོར་བུ་སེམས་དཔའ་དང་ལྡན་མ་ལགས་པ། །དེ་དག་གིས་ཀྱང་སེམས་ཅན་ཕན་བགྱིད་ན། །ཐུགས་རྗེའི་བདག་

ཅན་བཅོམ་ལྡན་སྨོས་ཅི་འཚལ། །གང་ཞིག་རྨུགས་འཛིན་ཆུ་ཡི་དབང་པོ་ཞེས། །སྐད་ཅིག་ཀྱང་ནི་ཁྱོད་ཀྱི་མཚན་སྨོས་པ། །དེ་ལ་པདྨའི་འབྱུང་གནས་ལེགས་བཞིན་དུ། །པད་རྒྱས་དཔལ་ནི་འཇུག་པར་བགྱིད་པ་ལགས། །དེ་ལྟར་བཅོམ་ལྡན་སྲིད་འཇོམས་ཁྱོད་སྤྱན་སྔར། །ཆོ་
ངེས་བཏབ་པའི་བསོད་ནམས་འབྱམ་ཀླས་པ། །གང་ཡིན་དེ་ཡིས་སྐྱེ་བོ་ཁྱོད་བཞིན་དུ། །མངོན་པར་འདོད་པའི་འབྲས་བུ་འབྱིན་པར་ཤོག །བཅོམ་ལྡན་འདས་རྨུགས་འཛིན་ལ་བསྟོད་པ་སློབ་དཔོན་ཆེན་པོ་བཙུན་པ་ཟླ་བས་མཛད་པ་རྫོགས་སོ།། །།རྒྱ་གར་གྱི་མཁན་པོ་མུ་ཏི་ཏ་
ཤྲཱི་ཛྙཱ་ནའི་ཞལ་སྔ་ནས་དང་། བོད་ཀྱི་ལོ་ཙཱ་བ་པ་ཚབ་ཉི་མ་གྲགས་ཀྱིས་ལེགས་པར་བསྒྱུར་བའོ།། ༄༅༅། །རྒྱ་གར་སྐད་དུ། ཨཱརྱ་ཛམྦྷ་ལ་སྟོ་ཏྲ། བོད་སྐད་དུ། འཕགས་པ་རྨུགས་འཛིན་ལ་བསྟོད་པ། འཕགས་པ་ཛམྦྷ་ལ་ལ་ཕྱག་འཚལ་ལོ། །དཔལ་ལྡན་ཆུ་
དབང་མགོན་པོ་ནི། །ཞལ་གཅིག་ཕྱག་གཉིས་བརྗིད་པའི་སྐུ། །སྐུ་མདོག་སྔོ་ནག་འོད་ཟེར་འཕྲོ། །མི་བསྐྱོད་སངས་རྒྱས་དབུ་ལ་བཞུགས། །ཀླུ་ཆེན་བརྒྱད་ཀྱི་རྒྱན་གྱིས་བརྒྱན། །དགོས་འདོད་འབྱུང་ལ་ཕྱག་འཚལ་བསྟོད། །ཕྱག་གཡས་ཐོད་པ་ཁྲག་བཀང་བསྣམས། །གཡོན་པ་
གཏེར་གྱི་ནེའུ་ལེ་འཛིན། །འགྲོ་བ་དབུལ་བས་རབ་གདུངས་པའི། །རེ་འདོད་སྐོང་ལ་ཕྱག་འཚལ་བསྟོད། །ཁྲོ་བོའི་ཆ་ལུགས་དབུ་སྐྲ་གྱེན་དུ་བརྫེས། །མིའུ་ཐུང་བྱིས་པ་གཞོན་པའི་ཤ་རྒྱས་པ། །ནོར་བདག་གདན་ལ་བརྐྱང་བསྐུམ་ཚུལ་དུ་བཞུགས། །དགོས་འདོད་མ་ལུས་
འབྱུང་ལ་ཕྱག་འཚལ་བསྟོད། །མཆེ་བ་རབ་གཙིགས་ཧཱུྃ་སྒྲས་མ་རུངས་གདུལ། །དྲན་པ་ཙམ་གྱིས་ཅི་བསམས་འགྲུབ་པར་མཛད། །ཡིད་བཞིན་ནོར་བུ་ཡོན་ཏན་ཀུན་ལྡན་པ། །དཔལ་ལྡན་ཆུ་དབང་ཁྱོད་ལ་ཕྱག་འཚལ་བསྟོད། །ཨུ་ཙུཥྨ་ལ་གུས་པས་བསྟོད་པ་ཡིས། །བསོད་ནམས་
མཐའ་ཡས་དམ་པ་གང་ཐོབ་དེས། །བདག་དང་སེམས་ཅན་མ་ལུས་ཐམས་ཅད་ཀྱི། །དབུལ་ཕོངས་སྡུག་བསྔལ་འཆིང་ལས་གྲོལ་བར་ཤོག །འཕགས་པ་རྨུགས་འཛིན་ལ་བསྟོད་པ་པཎྜི་ཏ་ཛྙཱ་ན་བཛྲས་མཛད་པ་རྫོགས་སོ།། །།༄༅༅། །རྒྱ་གར་སྐད་དུ། ཛམྦྷ་ལ་སྟོ་ཏྲ།

བོད་སྐད་དུ། ཛམྦྷ་ལའི་བསྟོད་པ། ཛམྦྷ་ལ་ལ་ཕྱག་འཚལ་ལོ། །ལྷ་དང་ལྷ་མིན་དྲི་ཟ་མིའམ་ཅི་རྣམས་ཀྱི། །ཅོད་པན་འོད་ཀྱིས་ཞབས་ཀྱི་ཁྲི་ནི་གསལ་མཛད་པ། །བྱང་ཆུབ་མཆོག་ཏུ་ངེས་མཛད་གནོད་སྦྱིན་དབང་ཕྱུག་ལ། །སེམས་ཅན་རྣམས་ལ་སྨན་པའི་བསམ་
པས་བདག་གིས་གསོལ། །གང་ཞིག་བརྩེ་བའི་བདག་ཉིད་བྱང་ཆུབ་སྦྱིན་མཛད་ཁྱོད། །སྙིང་རྗེའི་རྩ་བ་སེམས་ཅན་དོན་དུ་རབ་ཏུ་གྲགས། །མགོན་ཁྱོད་སེམས་ཅན་རྣམས་ལ་བརྩེ་བར་མི་མཛད་ན། །ཁྱོད་ཀྱིས་སངས་རྒྱས་དྲན་པར་གང་གི་འགྱུར་ཏེ་འཚལ། །ཤིན་ཏུ་མི་བཟད་
དབུལ་བའི་སྡུག་བསྔལ་ནང་དུ་ནི། །འགྲོ་རྣམས་ལྷུང་བ་ཁྱོད་ཀྱིས་མཐོང་བར་མ་གྱུར་ཏམ། །རིན་ཆེན་གཏེར་ཆེན་རྣམས་ཀྱི་མཚན་ནས་བཟུང་བྱས་ནས། །ཁྱོད་ཀྱིས་ཆུ་བོ་ཡང་ནི་རྫིང་གིས་བཅིང་བར་མཛོད། །ཤིན་ཏུ་དབུལ་བའི་བྱིན་ཟ་མི་བཟད་དྲག་པོ་ཡིས། །འགྲོ་བ་གང་ཞིག་
ཉིན་དང་མཚན་དུ་སྲེག་པར་བྱེད། །བརྩེ་བ་ཉིད་ཀྱིས་སེར་སྣ་རྣམ་པར་སྤོང་མཛོད་ལ། །རིན་ཆེན་བདུད་རྩིའི་ཆར་གྱི་ཆར་རྒྱུན་དྲག་ཏུ་ཕོབ། །ཁྱོད་ནི་རྒོད་པས་བརྒྱ་བྱིན་གྱིས་ནི་རྒྱལ་སྲིད་དང་། །སྤྱན་ཟུར་ཙམ་གྱིས་ཁྱབ་འཇུག་གིས་ནི་དཔལ་མོ་དང་། །མཉེས་པས་དབང་ཕྱུག་
གིས་ནི་གངས་རིའི་གནས་ཀྱང་ཐོབ། །མགོན་པོ་སྡུག་ཕོངས་འགྲོན་བུ་ཙམ་ཡང་མི་སྟེར་རམ། །འགྲོ་བའི་དབང་ཕྱུག་རྣམས་ལ་དཔག་མེད་བདེ་བ་རྣམས། །རྟག་ཏུ་ཁྱོད་སྟེར་སྡུག་བསྔལ་ཅན་ལ་དེ་ལྟ་མིན། །ཁྱོད་ཀྱིས་སྔོན་མ་མཐོང་བ་སྙིང་རྗེའི་ཡུལ་གྱུར་པའི། །དབུལ་བའི་སྡུག་
བསྔལ་ཅན་ལ་ཇི་ལྟར་ཁྱོད་འཇིགས་སམ། །ནོར་གྱིས་ནོར་སློང་གུས་ལྡན་རྣམས་ལ་ཁྱོད་འགེངས་ཀྱི། །ཡང་དག་སྐལ་མེད་སྡིག་བྱས་རྣམས་ལ་ཁྱོད་མིན་ཞིང་། །ནོར་གཏོང་ནོར་གྱིས་ནོར་ལྡན་པར་ནི་འཛིན་གྱུར་ཏེ། །མགོན་པོ་སློང་བའི་ཚོགས་རྣམས་ངེས་པར་སྤོང་བྱེད་དམ། །གལ་ཏེ་
ཁྱོད་ཀྱིས་ནོར་གཏོང་རྣམས་ལ་ཁྱོད་ཀྱིས་སྟེར། །སྐྱེ་བོ་ཚིག་ངན་རྣམས་ལ་ཇི་ལྟར་ཁྱོད་འཇིགས་སམ། །རབ་ཏུ་འབད་པས་ངེས་པར་སྨྲ་བ་དེ་ཡིས་མཆོག །གནོད་སྦྱིན་རྒྱལ་པོ་བདག་གིས་གསོལ་བ་གསན་དུ་གསོལ། །རབ་ཏུ་འབད་བྱས་དེ་འདྲའི་ནོར་དང་ལྡན་གྱུར་ནས། །ཇི་ལྟར་

དབུལ་པོའི་སྒྲ་ནི་ཐོས་པར་མ་གྱུར་ཅིག །དབུལ་པོའི་མེ་ནི་རབ་ཏུ་འབར་བས་འགྲོ་བ་རྣམས། །སྲེག་པར་ངེས་མཐོང་ཡིད་ཀྱིས་ངོ་མཚར་ཉིད་དུ་གྱུར། །གང་ཞིག་བདག་གིས་སྨྲས་པའི་ཚིག་རྩུབ་ཚིག་རྣམས་ནི། །ཆུ་ཡི་དབང་པོས་བརྩེ་ཕྱིར་འདི་རྣམས་བཟོད་པར་མཛོད། །གང་ཞིག་
བསྟོད་པ་འདི་ཡིས་ནི། །རྟག་ཏུ་འབད་པས་ཛཾ་ལ་བསྟོད། །དེས་ནི་དབུལ་པོར་མི་འགྱུར་ཞིང་། །ཤིན་ཏུ་མི་གཡོའི་དཔལ་ཐོབ་ཤོག །མིའི་དབང་པོ་ཉི་མ་རྣམ་པར་གནོན་པས་ཛམྦྷ་ལ་ལ་བསྟོད་པ་མཛད་པ་རྫོགས་སོ།། །།ཀལྱཱ་ཎ་མི་ཏྲ་གཞོན་ནུ་ཤེས་རབ་ཀྱིས་བསྐུལ་ནས།
རྒྱ་གར་གྱི་མཁན་པོ་དྷརྨྨ་དྷཱ་ར་དང་ཡར་ལུངས་པ་གྲགས་པ་རྒྱལ་མཚན་གྱིས་དཔལ་ས་སྐྱའི་གཙུག་ལག་ཁང་དུ་བསྒྱུར་བའོ།། ༄༅༅། །རྒྱ་གར་སྐད་དུ། ཨུ་ཙུཥྨ་ཛམྦྷ་ལ་ཨུ་པ་དེ་ཤ་སྟོ་ཏྲ། བོད་སྐད་དུ། རྨུགས་འཛིན་འཆོལ་བའི་མན་ངག་གི་བསྟོད་པ། དཔལ་རྡོ་རྗེ་
སེམས་དཔའ་ལ་ཕྱག་འཚལ་ལོ། །མགོན་པོ་ནམ་མཁའི་མདོག་ཅན་ནོར་གྱི་ཆར་འབེབས་པ། །མ་སྐྱེས་རང་བཞིན་དག་པས་སྐུ་མདོག་ནག་པོར་བཞུགས། །ཁྱོད་ནི་རྡོ་རྗེ་སེམས་དཔའ་ཉིད་དེ་བདག་དྲན་ན། །ཁྱོད་ལ་འདུད་ཀྱིས་ཐུགས་རྗེས་ཅི་ཡི་ཕྱིར་མི་གཟིགས། །ལོ་དྲུག་བྱིས་པའི་
གཟུགས་ལ་གཞོན་པའི་ཤ་རྒྱས་པ། །འཛུམ་ལ་ཁྲོ་ལ་བྱམས་པའི་མཆེ་བ་དཀར་པོ་གཙིགས། །ཁྲོ་གཉེར་དཔྲལ་བར་བསྙེར་ཞིང་རལ་པ་དམར་སེར་ལངས། །དབུལ་བ་སེལ་མཛད་སྤྱན་ཡངས་སྙིང་རྗེ་ཅན་ལ་འདུད། །མི་བསྐྱོད་དབུ་ལ་བཞུགས་པས་ཐུགས་ཀྱི་རིག་འཛིན་ཅིང་། །
བྱམས་པས་ཀུན་ལ་ཁྲོས་ཏེ་གཅེར་བུ་སྦྲུལ་གྱིས་བརྒྱན། །ཨོཾ་ཨ་ལས་སྐྱེས་ནོར་སྦྱིན་གདན་ལ་བཞུགས་ཤིང་འགྱིང་། །རེ་བ་སྐོང་མཛད་དཔག་བསམ་ཤིང་འདྲ་ཁྱོད་ལ་འདུད། །ཕྱག་གཡས་སྙིང་རྗེས་དོན་མཛད་ཐོད་པ་ཁྲག་གིས་བཀང་། །ཕྱག་གཡོན་ནོར་སྦྱིན་མ་བཟུང་ནེའུ་ལེས་
རིན་ཆེན་འབེབས། །གཡས་གཡོན་ཞབས་ཀྱིས་རྣམ་ཐོས་སྲས་ཀྱི་རྐང་པ་བརྫིས། །ནོར་བདག་གན་རྐྱལ་གནོན་ཅིང་བརྐྱང་བསྐུམ་བཞུགས་ལ་འདུད། །རྣ་བ་མ་ཕུག་རིགས་ངན་ཆ་ལུགས་ལྷག་མ་ཟ། །ལག་ནས་ཁ་རུ་འོ་མའི་བདུད་རྩི་རྩ་ལམ་རྡོ་རྗེ་ནས་བྱུང་སྟེ། །གུར་གུམ་

མདོག་འདྲ་ཞལ་དུ་ཕུལ་བས་མཉེས་མཛོད་ལ། །ཉིད་ཀྱིས་བདག་གི་བསམ་མཁྱེན་རེ་བ་མྱུར་དུ་སྐོངས། །ཡི་གེ་བཅུ་པས་བྱིན་བརླབས་མེ་ཏོག་དང་བཅས་པས། །ཨོཾ་ལས་འོད་འཕྲོས་གདུབ་བུ་རིན་ཆེན་སྤྲས་པས་བརྒྱན། །ཨོཾ་ལས་བྱུང་བའི་བུམ་པ་བཟང་པོས་
ཆུ་ཕུལ་ནས། །བཅོམ་ལྡན་མགོན་པོ་ཅི་ཕྱིར་རེ་བ་མི་བསྐོང་ལགས། །འགྲོ་དྲུག་ཀུན་ལ་རེ་བསྐོང་ནོར་གྱི་ཆར་པ་དག །ཅི་འདོད་མང་པོ་འབེབས་པའི་ཐུགས་རྗེ་གྲགས་ལགས་ན། །བདག་གིས་མོས་པས་ཁྱོད་ཀྱི་ཡོན་ཏན་རྟག་ཏུ་བརྗོད། །ཐིགས་པ་གཅིག་ཀྱང་མི་སྩོལ་སྐལ་བ་མེད་དམ་
ཅི། །ཉི་མ་རེ་རེ་བཞིན་དུ་རྟག་ཏུ་ཁྱོད་འབོད་ན། །བདག་ནི་ཡི་ཆད་སྒྱིད་ལུགས་གདོང་པ་དག་མོད་ཀྱང་། །ཁྱོད་ཀྱི་སྔོན་གྱི་དམ་བཅས་ཐུགས་རྗེ་གང་དུ་ཐལ། །གཏེར་ཆེན་སྐལ་བ་མེད་ཀྱང་ལོག་འཚོ་མེད་ཙམ་བྱིན། །བདག་གིས་སྙིང་ནས་སྨྲས་ཀྱང་ད་དུང་མ་གཟིགས་ན། །ས་གསུམ་
ཀུན་ལ་སྙོམས་པར་དམ་ནི་མ་བཅས་སམ། །བདག་ལ་སྐལ་བ་མེད་ཀྱང་ཐུགས་རྗེས་ཅིས་མི་གཟིགས། །སེམས་ཅན་མིན་ནམ་དབུལ་པའི་སྡུག་བསྔལ་བྲལ་བར་མཛོད། །བདག་གིས་བོས་པས་ཁྱོད་ཀྱི་ཐུགས་རྗེའི་ཞགས་པ་ཡིས། །སྲིད་འདིར་དབུལ་བ་སོལ་བ་བདེ་ཆེན་གནས་སུ་
དྲོངས། །འཇིགས་ལ་འཇིགས་པར་མི་བྱེད་ཁྱོད་ཀྱིས་བྱིན་བརླབས་ཏེ། །འདི་དང་ཕ་རོལ་གཉིས་ཀར་རྟག་ཏུ་བསྐྱབ་པར་མཛོད། །རྨུགས་འཛིན་འཆོལ་བའི་མན་ངག་གི་བསྟོད་པ་བླ་མ་དྷ་བྱང་ཆུབ་སེམས་དཔས་མཛད་པ་རྫོགས་སོ།། །།ཁ་ཅིག་སློབ་དཔོན་ཉི་མ་སྦས་པས་མཛད་དོ་ཞེས་
ཀྱང་ཟེར་སྐད་དོ།། ༄༅༅། །རྒྱ་གར་སྐད་དུ། དེ་བཱི་བ་སུ་དྷ་རཱི་སྟོ་ཏྲ། བོད་སྐད་དུ། ལྷ་མོ་ནོར་རྒྱུན་མ་ལ་བསྟོད་པ། ལྷ་མོ་ནོར་རྒྱུན་མ་ལ་ཕྱག་འཚལ་ལོ། །ཨེ་མ་བུམ་པ་རིན་ཆེན་གཏེར་ལྡན་སྟེང་། །དེ་སྟེང་སྐྱོན་བྲལ་ཉི་མའི་དཀྱིལ་འཁོར་ལ། །གདོད་ནས་དག་
པས་སྐུ་མདོག་གསེར་ལྟ་བུ། །མ་བཅོས་རང་བཞིན་བྱིས་པའི་གཟུགས་འདྲ་བ། །སྙན་མགུར་ཕྱག་ཞབས་རིན་ཆེན་ཕྲེང་བས་བརྒྱན། །ཟླ་རྒྱས་ལྟར་མཛེས་འཕགས་མའི་སྐུ་ལ་འདུད། །བརྩེ་ལྡན་སྦྱིན་པ་གྲུབ་པའི་ཚུལ་མངའ་བ། །པདྨའི་ཞབས་མངའ་འགག་མེད་སེང་གེའི་

སྒྲས། །འགྲོ་བའི་སྡུག་བསྔལ་མ་ལུས་སེལ་བྱེད་མ། །དཔལ་ལྡན་ལྷ་མོ་ཁྱོད་འདྲའི་གསུང་ལ་འདུད། །ཚོགས་གཉིས་མཐར་ཕྱིན་ས་བཅུ་རིམ་བགྲོད་ནས། །ཐུགས་རྗེའི་དབང་གིས་སེམས་ཅན་རེ་འདོད་སྐོང་། །སྤྲོས་པའི་མཐའ་བྲལ་བདེ་བ་ཆེན་པོའི་ངང་། །ཡང་དག་དོན་རྟོགས་ལྷ་
མོའི་ཐུགས་ལ་འདུད། །ཕྱག་གཡས་མཆོད་སྦྱིན་བཱི་ཛ་ཕ་ལ་ཡིས། །འཇིགས་པ་བརྒྱད་སྐྱོབ་འགྲོ་རྣམས་དབང་དུ་སྡུད། །དབུལ་བ་སེལ་ཞིང་ལོག་འདྲེན་འཇོམས་མཛད་པ། །གཡོན་པ་ཐུགས་ཀར་རིན་ཆེན་སྙེ་མ་འཛིན། །དགོས་འདོད་རེ་སྐོང་དཔག་བསམ་ཤིང་ལྟ་བུ། །ཡིད་བཞིན་
ནོར་འདྲ་ཁྱོད་ལ་ཕྱག་འཚལ་འདུད། །བདག་གིས་ཁྱོད་ལ་རྟག་ཏུ་མཆོད་བྱེད་ཅིང་། །གུས་དང་བཅས་པའི་སེམས་ཀྱིས་རབ་བསྟོད་ན། །གདོང་ལ་མཆི་མས་རབ་ཏུ་གོས་གྱུར་ཀྱང་། །དབུལ་བའི་སྡུག་བསྔལ་སྐད་ཅིག་མ་འདོར་ན། །སྔོན་གྱི་ཐུགས་རྗེའི་སྨོན་ལམ་གང་དུ་ཐལ། །ལས་
ཀྱི་འཕྲོ་མེད་སྦྱིན་ཤུགས་ཟད་པ་ཡིས། །ཕུན་སུམ་ཚོགས་པའི་སྐལ་བ་མེད་གྱུར་ཀྱང་། །ཚེ་འདིར་ཕོངས་པས་ལོག་འཚོ་སྤོང་ཙམ་གྱི། །ཐུགས་རྗེའི་ཐིགས་པ་འགའ་ཙམ་ཅིས་མི་སྦྱིན། །དུས་འདི་ནས་བཟུང་ཚེ་རབས་ཐམས་ཅད་དུ། །འཕགས་མ་ནོར་རྒྱུན་མ་ལ་མཆོད་བྱེད་ཅིང་། །
ཐེག་ཆེན་གསང་སྔགས་ཆོས་ལ་སྤྱོད་པ་དང་། །བླ་མ་རྡོ་རྗེ་འཛིན་པའི་བཀའ་ཉན་ཅིང་། །དབྱེར་མེད་ཕྱག་རྒྱ་ཆེན་པོའི་དོན་རྟོགས་ཤོག །རྟ་དང་གླང་པོ་རིན་ཆེན་གོས་རྣམས་དང་། །ཁྲུས་ཀྱི་རྫིང་བུ་རིན་ཆེན་བང་མཛོད་དང་། །འདོད་འཇོའི་བ་དང་མ་རྨོས་འཁྲུངས་རྣམས་ལ། །རྟག་
ཏུ་ཆོས་དང་ལྡན་པའི་ལོངས་སྤྱོད་ཤོག །པཎྜི་ཏ་ཛ་མཱ་རིས་ལྷ་མོ་ནོར་རྒྱུན་མ་ལ་བསྟོད་པ་རྫོགས་སོ།། ༄༅༅། །རྒྱ་གར་སྐད་དུ། ཤྲཱི་བ་སུ་དྷཱ་རཱ་དེ་བྱཱ་མཎྜལ་སྱ་བི་དྷིཿ། བོད་སྐད་དུ། དཔལ་ལྷ་མོ་ནོར་རྒྱུན་མའི་དཀྱིལ་འཁོར་གྱི་ཆོ་ག །ཨོཾ་བཅོམ་ལྡན་འདས་མ་
དཔལ་ལྡན་འཕགས་མ་ནོར་རྒྱུན་མ་ལ་ཕྱག་འཚལ་ལོ། །དང་པོར་རེ་ཞིག་ཁ་ལ་སོགས་པ་དག་པར་བྱས་ནས་བཅོམ་ལྡན་འདས་མ་འཕགས་མ་ནོར་རྒྱུན་མའི་བརྟུལ་ཞུགས་བླངས་ཏེ། མགོ་བཀྲུས་ཤིང་གོས་གཙང་མ་བགོས་ནས་མེ་ཏོག་དང་བདུག་པ་དང་མར་མེ་དང་དྲི་དང་ཞལ་ཟས་

ལ་སོགས་པ་བཤམས་ཏེ། རེ་ཞིག་དང་པོར་མེ་ཏོག་སྦྱར་བར་བྱའོ། །ཨོཾ་ན་མོ་བྷ་ག་ཝ་ཏེ་པུཥྤ་ཀེ་ཏུ་རཱ་ཛཱ་ཡ་ཏ་ཐཱ་ག་ཏཱ་ཡཱརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་པུཥྤེ་པུཥྤེ། མ་ཧཱ་པུཥྤེ་སུ་པུཥྤེ། པུཥྤོདྦྷ་བེ། པུཥྤ་སཾ་བྷ་ཝེ། པུཥྤྰ་བ་ཀཱིརྞེ་སྭཱ་ཧཱ། ཞེས་པ་ལན་གསུམ་
གྱི་མེ་ཏོག་སྦྱང་ངོ་། །ཨོཾ་བཛྲཱ་ས་ནེ་ཧཱུྃ། སྟན་བྱིན་གྱིས་བརླབ་པའི་སྔགས་སོ། །ཨོཾ་བཛྲ་བཱ་ས་སེ་ཧཱུྃ། གོས་བྱིན་གྱིས་བརླབ་པའི་སྔགས་སོ། །ཨོཾ་ཨཱཿཧཱུྃ། ཞེས་པ་ལུས་དང་ངག་དང་སེམས་བྱིན་གྱིས་བརླབ་པའི་སྔགས་སོ། །དེ་ནས་ཨོཾ་མ་ཎི་དྷ་རི་བཛྲི་ཎི་མ་ཧཱ་པྲ་ཏི་སཱ་རེ་སརྦ་བིགྷྣཱན་ཨུཏྶཱ་ར་
ཡ་ཨུཏྶཱ་ར་ཡ་ཧཱུྃ་ཕཊ་སྭཱ་ཧཱ། ཞེས་པས་མེ་ཏོག་སྤྱི་བོར་བཞག་སྟེ་བསྲུང་ངོ་། །དེ་ནས་ཨོཾ་བཛྲ་བྷཱུ་མི་ཧཱུྃ། ས་ཡོངས་སུ་བཟུང་བ་སྟེ་འདིས་སའི་སྟེང་དུ་མེ་ཏོག་མ་ཉམས་པ་བཞག་གོ། །དེ་ནས་ཨོཾ་བིགྷྣཱནྟ་ཀ་སརྦ་བིགྷྣཱན་ཨུཏྶཱ་ར་ཡ་ཨོཾ་བིགྷྣཱནྟ་ཀ་སརྦ་བིགྷྣཱན་ཨུཏྶཱ་ར་ཡ་ཧཱུྃ་སྭཱ་ཧཱ། ཞེས་པས་
བགེགས་བསྐྲད་དོ། །ཨོཾ་བཛྲ་རེ་ཁེ་སུ་རེ་ཁེ་སརྦ་ཏ་ཐཱ་ག་ཏ་ཨ་དྷི་ཏིཥྛནྟུ་སྭཱ་ཧཱ། ཞེས་པས་རེ་ཁཱ་བྱིན་གྱིས་བརླབ་བོ། །དེ་ལྟར་རིམ་པ་འདི་སྔོན་དུ་འགྲོ་བས་བླ་མའི་མཎྜལ་བཞིན་དུ་མཎྜལ་བྱས་ནས། ཕྱིས་ནོར་རྒྱུན་མའི་མཎྜལ་གྲུ་བཞི་པ་བྱའོ། །དེ་ནས་དབུས་སུ་མེ་ཏོག་དགོད་དེ། ཨོཾ་
ཤྲཱི་བ་སུ་དྷཱ་རེ་སྭཱ་ཧཱ། ཨོཾ་ཤྲཱི་ལཀྵྨཱི་བྷཱུ་ཏ་ལ་བཱ་སི་ནཱི་སེ་སྭཱ་ཧཱ། དེ་ནས་ཨོཾ་མ་ཎི་བྷ་དྲཱ་ཡ་སྭཱ་ཧཱ། ཤར་དུའོ། །ཨོཾ་པཱུརྞྞ་བྷ་དྲཱ་ཡ་སྭཱ་ཧཱ། ལྷོ་རུའོ། །ཨོཾ་དྷ་ན་དཱ་ཡ་སྭཱ་ཧཱ། ནུབ་ཏུའོ། །ཨོཾ་བཻ་ཤྲ་བ་ཎཱ་ཡ་སྭཱ་ཧཱ། བྱང་དུའོ། །ཨོཾ་པི་ཙི་ཀུཎྜ་ལི་ནེ་སྭཱ་ཧཱ། མེ་རུའོ། །ཨོཾ་ཀེ་ལི་མཱ་ལི་ནེ་སྭཱ་ཧཱ། བདེན་བྲལ་
དུའོ། །ཨོཾ་མུ་ཁེནྡྲཱ་ཡ་སྭཱ་ཧཱ། རླུང་དུའོ། །ཨོཾ་ཙ་རེནྡྲཱ་ཡ་སྭཱ་ཧཱ། དབང་ལྡན་དུའོ། །སླར་ཡང་ནང་དུ་ཨོཾ་ཨི་ལཱ་དེ་བྱཻ་སྭཱ་ཧཱ། ཤར་དུའོ། །ཨོཾ་མ་ཎི་པདྨེ་སྭཱ་ཧཱ། ལྷོ་རུའོ། །ཨོཾ་བཛྲ་དྷ་ར་སཱ་ག་ར་ནིརྒྷོ་ཥཱ་ཡ་སྭཱ་ཧཱ། ནུབ་ཏུའོ། །ཨོཾ་བཛྲ་དྷརྨེ་ཧཱུྃ་སྭཱ་ཧཱ། བྱང་དུའོ། །ཨོཾ་ཏ་བྷ་དེ་བྱཻ་སྭཱ་ཧཱ། མེ་
མཚམས་སུའོ། །ཨོཾ་གུཔྟ་དེ་བྱཻ་སྭཱ་ཧཱ། བདེན་བྲལ་དུའོ། །ཨོཾ་ས་ར་སྭ་ཏཱི་དེ་བྱཻ་སྭཱ་ཧཱ། རླུང་དུའོ། །ཨོཾ་ཙནྡྲ་ཀཱནྟ་དེ་བྱཻ་སྭཱ་ཧཱ། དབང་ལྡན་དུའོ། །ཨོཾ་ཕུཿཤཾ་ཁ་པཱ་ལ་ནཱ་ག་རཱ་ཛཱ་ཡ་སྭཱ་ཧཱ། ཨི་ལཱ་མའི་རྒྱབ་ཏུའོ། །ཨོཾ་ཛམྦྷ་ལ་ཛ་ལེནྡྲཱ་ཡ་སྭཱ་ཧཱ། དེའི་གཡས་སུའོ། །དེ་ནས་ཉེར་སྤྱོད་

ལྔའི་མཆོད་པ་སྟེ། ཨོཾ་བ་སུ་དྷེ་སྭཱ་ཧཱ། མེ་ཏོག་གོ། །ཨོཾ་བ་སུ་དྷཱ་རི་ཎི་སྭཱ་ཧཱ། བདུག་སྤོས་སོ། །ཨོཾ་བ་སུ་མ་ཏི་ཤྲི་ཡེ་སྭཱ་ཧཱ། དྲི་ཆབ་བོ། །ཨོཾ་བ་སུ་དྷཱ་རི་ཎི་སྭཱ་ཧཱ། སྒྲོན་མེའོ། །ཨོཾ་བ་སུ་དྷཱ་ར་དྷཱ་རི་ཎྱཻ་སྭཱ་ཧཱ། ཞལ་ཟས་སོ། །དེ་ནས་བསྟོད་པ་བརྗོད་པར་བྱ་སྟེ། ཨོཾ་བཅོམ་ལྡན་འདས་མ་
འཕགས་མ་ནོར་རྒྱུན་མ་ལ་ཕྱག་འཚལ་ལོ། །གང་ཞིག་དྲན་པས་ཤིན་ཏུ་ཡུན་རིང་རྗེས་འབྲེལ་བའི། །དབུལ་བའི་སྡུག་བསྔལ་མི་རྣམས་ལ་ནི་ཞི་མཛད་པ། །ནོར་རྒྱུན་ཞེས་བྱ་དཔག་བསམ་ཤིང་དང་འདྲ་དེ་ལ། །འགྲོ་ལ་ཕན་ཕྱིར་གུས་པས་སྤྱི་བོས་ཕྱག་བགྱིའོ། །ཨོཾ་ཛམྦྷ་ལ་ལ་
ཕྱག་འཚལ་ལོ། །ཤ་ཏ་མ་ཁ་སྲེག་བྱེད་གདོང་བཞི་སེང་གེ་འཕྲོག་བྱེད་དང་། །ཉིན་མོར་བྱེད་པ་རྣམས་ཀྱིས་ཞབས་ཟུང་ལ་ནི་ཕྱག་བྱས་པའི། །བཅོམ་ལྡན་ཀ་ཡེ་སྡུག་བསྔལ་ལྡན་པ་བདག་ལ་ཐུགས་བརྩེའི་ཕྱིར། །དེ་ཡི་གཟིགས་པ་རྣམ་པར་ངེས་པ་འཇུག་པ་ཉིད་དུ་མཛོད། །ཁྱོར་
བའི་ཆུ་ཡིས་ཀྱང་ནི་ཁྱོད་མཉེས་ན། །བརྩེ་ལྡན་གཞན་ལ་དགའ་བ་ལྟ་ཅི་སྨོས། །བགྲང་མེད་མཆོད་པའི་ཆོ་ག་མང་པོ་ཡིས། །ཁྱོད་དང་འདྲ་བ་རྙེད་པར་དཀའ་བ་ཉིད། །མདུན་དུ་གནས་ཀྱང་ལྟོས་ཞེས་གསུངས་མིན་པ། །ཅི་ཞེས་བདག་གདོང་མཆི་མའི་དྲི་ལྡན་དང་། །གང་ཞིག་བདེ་དང་ངན་འགྲོར་ལྷུང་བ་
རྣམས། །འབད་པས་རྗེས་ཚོལ་བརྩེ་བས་གཟིགས་པར་མཛོད། །སྙིང་རྗེ་རབ་ཏུ་རྒྱས་པའི་ནོར་ལྡན་པ། །བཅོམ་ལྡན་ཁྱོད་ཉིད་བཞུགས་པར་གྱུར་ཀྱང་ནི། །སྡུག་བསྔལ་ཆོམ་རྐུན་བཟློག་དཀའ་འདི་དག་གིས། །སྡུག་བསྔལ་གྱུར་པ་ཨེ་མ་བླུན་པ་ཉིད། །མགོན་པོ་སེམས་ཅན་རྣམས་ལ་སྨན་སླད་དུ། །སྣ་
ཚོགས་རིན་ཆེན་ཆར་པ་འབེབས་ཞེས་གྲག །བདག་ལ་ཁྱོད་ཀྱི་ཡོན་ཏན་མཐའ་གཅིག་ཏུ། །བབ་པ་ཐིགས་པ་ཙམ་ཡང་སོན་མ་གྱུར། །ཁྱོད་ཀྱིས་རྒུད་པ་ཡང་དག་འཇོམས་མཛད་པས། །བདག་གི་རྒུད་པ་ཆུ་ཡིས་མེ་བཞིན་མཛོད། །སྲིད་པ་གསུམ་གྱི་ཁུར་ནི་བཟུང་གྱུར་པ། །ཐུགས་རྗེའི་འདོད་འཇོ་གང་
དེ་ཁྱོད་ལས་སུ། །སེམས་དང་མི་ལྡན་བུམ་པ་བཟང་པོ་དང་། །དཔག་བསམ་རྐང་འཐུང་དང་ནི་ཡིད་བཞིན་ནོར། །དེ་དག་ཀྱང་ནི་སེམས་ཅན་བདེ་བྱེད་ན། །བཅོམ་ལྡན་བརྩེ་བས་བདག་མཛད་ལྟ་ཅི་སྨོས། །རྨུགས་འཛིན་ཆུ་དབང་ཞེས་ནི་གང་གི་མཚན། །འཛིན་པར་བྱེད་པ་དེ་ནི་མོད་ལ་ཡང་། །པདྨའི་

འབྱུང་གནས་ཀྱི་ནི་པདྨ་བཞིན། །དེ་ཡི་ཕུན་སུམ་ཚོགས་པ་རྒྱས་པར་འགྱུར། །དེ་ལྟར་བཅོམ་ལྡན་ཁྱོད་ནི་མདུན་བྱས་ནས། །སྨྲེ་སྔགས་རྣམ་པར་བཏོན་ལས་བསོད་ནམས་གང་། །དེ་ཡི་འབྲས་བུ་ཉེ་བར་སྦྱིན་པ་ཡིན། །འགྲོ་བ་བཅོམ་ལྡན་ཁྱོད་བཞིན་འགྱུར་བར་ཤོག །དེ་ལྟར་རྨུགས་
འཛིན་ཆུའི་དབང་པོ་ལ་བསྟོད་པའི་རྒྱལ་པོས་བསྟོད་དེ། དེ་ནས་གསེར་ལ་སོགས་པའི་སྣོད་འོ་མས་ཡོངས་སུ་བཀང་སྟེ་བཱི་ཛ་པཱུ་ར་ཀ་དང་བཅས་པའི་མཆོད་ཡོན་དབུལ་བར་བྱའོ། །ཨོཾ་ཨུཀྐེ་ཨུཀྐེ། བྷུཀྐེ་བྷུཀྐེ། ཙུཀྐེ་ཙུཀྐེ། བཱཪྵ་ཎི་པྲ་བཪྵ་ཎི། ནིཿཔཱ་ད་ནི་སྭཱ་ཧཱ། མཆོད་ཡོན་གྱི་སྔགས་སོ། །ཉེ་བར་སྤྱོད་པ་ལྔས་མཆོད་
པར་བྱ་ཞིང་། དེ་ལྟར་ཐམས་ཅད་ཕུལ་ནས་ཆུའི་སྣོད་དུ་མེ་ཏོག་དཀར་པོ་དཱུརྦ་དང་བཅས་པ་སྙིང་པོའི་སྔགས་ལ་སྭཱ་ཧཱ། མཐར་སྦྱར་བས་དོར་བར་བྱའོ། །དེ་ནས་རྗེ་བཙུན་ཛམྦྷ་ལ་ལ་འབྲས་སོ་བས་མཆོད་པར་བྱ་སྟེ། སྭཱ་ཧཱའི་ཡི་གེ་མཐར་སྦྱར་བས་སོ། །འདི་ལྟ་སྟེ། ཨོཾ་ཤྲཱི་སཽ་མྱེ་སྭཱ་ཧཱ། ཨོཾ་ཤྲཱི་དི་བྱ་རཱུ་པེ་སྭཱ་ཧཱ། ཨོཾ་ཤྲཱི་དཱིཔྟ་རཱུ་
པེ་སྭཱ་ཧཱ། ཨོཾ་ཤྲཱི་བ་ཧུ་རཱུ་པེ་སྭཱ་ཧཱ། ཨོཾ་ཤྲཱི་ཛྙཱ་ན་རཱུ་པེ་སྭཱ་ཧཱ། ཨོཾ་ཤྲཱི་པྲཱཛྙཱ་པཱ་ར་མི་ཏེ་སྭཱ་ཧཱ། ཨོཾ་ཤྲཱི་བཛྲ་སཏྭ་ཧྲྀ་ད་ཡེ་སྭཱ་ཧཱ། ཨོཾ་ཤྲཱི་བྷ་དྲེ་སྭཱ་ཧཱ། ཨོཾ་ཤྲཱི་སུ་བྷ་དྲེ་སྭཱ་ཧཱ། ཨོཾ་ཤྲཱི་བྷ་དྲ་མཱ་ཏ་རེ་སྭཱ་ཧཱ། ཨོཾ་ཤྲཱི་མངྒ་ལེ་སྭཱ་ཧཱ། ཨོཾ་ཤྲཱི་ཨཱ་མངྒ་ལེ་སྭཱ་ཧཱ། ཨོཾ་ཤྲཱི་ཨ་ཙ་ལེ་ཨ་ཙ་ལེ་སྭཱ་ཧཱ། ཨོཾ་ཤྲཱི་ཙ་ལེ་ཙ་ལེ་སྭཱ་ཧཱ། ཨོཾ་ཤྲཱི་ཨ་ཙ་ལེ་སྭཱ་
ཧཱ། ཨོཾ་ཤྲཱི་ཨུཙྪཱ་ཊ་ནི་སྭཱ་ཧཱ། ཨོཾ་ཤྲཱི་ཨུདྦྷེ་ད་ནི་སྭཱ་ཧཱ། ཨོཾ་ཤྲཱི་ས་ཏྱ་བ་ཏི་སྭཱ་ཧཱ། ཨོཾ་ཤྲཱི་ཤ་སྱ་བ་ཏི་སྭཱ་ཧཱ། ཨོཾ་ཤྲཱི་དྷ་ན་བ་ཏི་སྭཱ་ཧཱ། ཨོཾ་ཤྲཱི་དྷཱ་ནྱ་བ་ཏི་སྭཱ་ཧཱ། ཨོཾ་ཤྲཱི་པྲ་བྷཱ་བ་ཏི་སྭཱ་ཧཱ། ཨོཾ་ཤྲཱི་ཨ་མ་ལེ་སྭཱ་ཧཱ། ཨོཾ་ཤྲཱི་བི་མ་ལེ་སྭཱ་ཧཱ། ཨོཾ་ཤྲཱི་ནིརྨ་ལེ་སྭཱ་ཧཱ། ཨོཾ་ཤྲཱི་མ་ལ་ནཱ་ཤ་ནི་སྭཱ་ཧཱ། ཨོཾ་ཤྲཱི་སུ་རཱུ་པ་བི་མ་ལེ་སྭཱ་ཧཱ། ཨོཾ་
ཤྲཱི་ཨ་ན་ནསྟེ་སྭཱ་ཧཱ། ཨོཾ་ཤྲཱི་བི་ན་ནསྟེ་སྭཱ་ཧཱ། ཨོཾ་ཤྲཱི་བི་མ་ལ་ནསྟེ་སྭཱ་ཧཱ། ཨོཾ་ཤྲཱི་སུ་ཀེ་ཤི་སྭཱ་ཧཱ། ཨོཾ་ཤྲཱི་བི་ཤུདྡྷེ་ན་ཁི་སྭཱ་ཧཱ། ཨོཾ་ཤྲཱི་བི་ཤུདྡྷེ་ཤྲཱི་ལེ་སྭཱ་ཧཱ། ཨོཾ་ཤྲཱི་ཨཾ་ཀུ་རེ་སྭཱ་ཧཱ། ཨོཾ་ཤྲཱི་མཾ་ཀུ་རེ་སྭཱ་ཧཱ། ཨོཾ་ཤྲཱི་པྲ་བྷཾ་ཀུ་རེ་སྭཱ་ཧཱ། ཨོཾ་ཤྲཱི་ཨ་མོ་གྷངྐུ་རེ་སྭཱ་ཧཱ། ཨོཾ་ཤྲཱི་ཛཿཧཱུཾ་བཾ་ཧོཿསྭཱ་ཧཱ། ཨོཾ་ཤྲཱི་ཨཱ་ཀཪྵ་ཎི་སྭཱ་ཧཱ།
ཨོཾ་ཤྲཱི་ཡཱ་དེ་བི་སྭཱ་ཧཱ། ཨོཾ་ཤྲཱི་རི་རི་མེ་སྭཱ་ཧཱ། ཨོཾ་ཤྲཱི་རུ་རུ་མེ་སྭཱ་ཧཱ། ཨོཾ་ཤྲཱི་དྷུ་དྷུ་མེ་སྭཱ་ཧཱ། ཨོཾ་ཤྲཱི་ཏ་ར་ཏ་ར་སྭཱ་ཧཱ། ཨོཾ་ཤྲཱི་ཏ་ཏ་ར་ཏ་ཏ་ར་སྭཱ་ཧཱ། ཨོཾ་ཤྲཱི་ཏཱ་ར་ཡ་ཏུ་མཱཾ་སརྦ་སཏྭཱཾ་ཤྩ་བྷ་ག་བ་ཏི་བ་སུ་དྷཱ་རི་ཎི་མ་ཧཱ་མཱ་ཡེ་རཀྵ་པ་ར་ཎ་གུཔྟིཾ་ཀ་རི་སྭཱ་ཧཱ། ཨོཾ་ཤྲཱི་བཛྲ་དྷ་ར་སཱ་ག་ར་ནིརྒྷོ་ཥ་སྱ་ཙ་ཏ་ཐཱ་ག་ཏ་སྱ་ཙ་ས་ཏྱ་མ་ནུ་སྨ་ར་སྭཱ་ཧཱ།

ཨོཾ་ཤྲཱི་དུདྡྷ་ས་ཏྱ་མ་ནུ་སྨ་ར་སྭཱ་ཧཱ། ཨོཾ་ཤྲཱི་དྷརྨ་ས་ཏྱ་མ་ནུ་སྨ་ར་སྭཱ་ཧཱ། ཨོཾ་ཤྲཱི་སཾ་གྷ་ས་ཏྱ་མ་ནུ་སྨ་ར་སྭཱ་ཧཱ། ཨོཾ་ཤྲཱི་གུརྦི་ཎཱི་སུ་ཁེ་ན་པྲ་སཱུ་ཏཱ་མ་ཧཱ་ཏེ་ཛཱཿཧྲཱིཿསྭཱ་ཧཱ། ཨོཾ་ཤྲཱི་མ་ཧཱ་ཤཱནྟཾ་མ་ཏི་སྭཱ་ཧཱ། ཨོཾ་ཤྲཱི་མ་ཧཱ་པཽཥྚི་མ་ཏི་སྭཱ་ཧཱ། ཨོཾ་ཤྲཱི་སརྦ་ཛ་ན་བ་ཤཾ་ཀ་རི་སྭཱ་ཧཱ། ཨོཾ་ཤྲཱི་སརྦ་དུཥྚཱ་ནི་ཀྲྀནྟ་ནི་སྭཱ་ཧཱ། ཨོཾ་ཤྲཱི་སརྦ་དུཥྚ་ཤ་ཏྲུ་
བི་ནཱ་ཤ་ནི་སྭཱ་ཧཱ། ཧཱུཾ་ཕཊ་ཨོཾ་ཨཱཿསྭཱ་ཧཱ། ཨོཾ་ཤྲཱི་ཨཱ་གཙྪ་ཨཱ་གཙྪ་ས་མ་ཡ་མ་ནུ་སྨ་ར་སྭཱ་ཧཱ། ཨོཾ་ཤྲཱི་ཨཱ་བ་ར་ཎ་མ་ནུ་སྨ་ར་སྭཱ་ཧཱ། ཨོཾ་ཤྲཱི་ཨཱ་དྷཱ་ར་མ་ནུ་སྨ་ར་སྭཱ་ཧཱ། ཨོཾ་ཤྲཱི་བྷཱུ་ཏི་མ་ནུ་སྨ་ར་སྭཱ་ཧཱ། ཨོཾ་ཤྲཱི་ཛ་ཡ་མ་ནུ་སྨ་ར་སྭཱ་ཧཱ། ཨོཾ་ཤྲཱི་བི་ཛ་ཡ་མ་ནུ་སྨ་ར་སྭཱ་ཧཱ། ཨོཾ་ཤྲཱི་སརྦ་སཏྭ་ས་མ་ཡ་མ་ནུ་སྨ་ར་སྭཱ་ཧཱ། ཨོཾ་ཤྲཱི་བ་སུནྡྷ་
རེ་སྭཱ་ཧཱ། ཨོཾ་ཤྲཱི་ལཀྵྨཱི་བྷཱུ་ཏ་ལ་ནི་བཱ་སི་ནཱི་ཡེ་སྭཱ་ཧཱ། ཨོཾ་ཤྲཱི་བ་སུནྡྷ་རི་སྭཱ་ཧཱ། ཨོཾ་བ་སུ་དྷཱ་རི་ཎི་སྭཱ་ཧཱ། ཨོཾ་ཤྲཱི་བ་སུ་དྷཱ་རི་ཎི་ཡེ་སྭཱ་ཧཱ། ཨོཾ་ཤྲཱི་ཤྲཱི་ཀ་ར་དྷ་ནི་ཀ་རི་དྷཱ་ནྱ་ཀ་རི་སྭཱ་ཧཱ། ཨཱ་གཙྪ་ཨཱ་གཙྪ་ཤྲཱི་སྭཱ་ཧཱ། ཨོཾ་ཤྲཱི་ཨུཀྐེ་ཏུཀྐེ་བྷུཀྐེ་བྷུཀྐེ་བཪྵ་ཎི་པྲ་བཪྵ་ཎི་སྭཱ་ཧཱ། ཨོཾ་ཤྲཱི་བ་སུ་དྷེ་སྭཱ་ཧཱ། ཨོཾ་ཤྲཱི་བ་སུ་དྷཱ་དཱིཔྟ་ཡེ་སྭཱ་ཧཱ། ཨོཾ་ཤྲཱི་
ས་མ་ཡེ་སཽ་མྱེ་ས་མ་ཡངྐ་རི་མ་ཧཱ་ས་མ་ཡེ་སྭཱ་ཧཱ། ཨོཾ་ཤྲཱི་བ་སུ་དྷཱ་ར་ཨེ་ཧྱེ་ཧི་བྷ་ག་བ་ཏི་ས་མ་ཡེ་ས་མ་ཡ་མ་ནུ་སྨ་ར་སིདྡྷིཾ་ཀུ་རུ་སྭཱ་ཧཱ། ཨོཾ་ཤྲཱི་སརྦ་ལོ་ཀ་པཱ་ལཱ་ཡ་ན་མཿསྭཱ་ཧཱ། ཨོཾ་ཤྲཱི་སརྦ་མཱ་ཏ་རཱི་བྷྱོ་ན་མཿསྭཱ་ཧཱ། ཨོཾ་ཤྲཱི་སརྦ་ཤྲིཾ་གཱ་རཱི་བྷྱོ་ན་མཿསྭཱ་ཧཱ། ཨོཾ་ཤྲཱི་སརྦ་བྷཱུ་ཏི་ནི་བྷྱོ་ན་མཿསྭཱ་ཧཱ། ཨོཾ་ཤྲཱི་སརྦ་ཡཀྵི་ཎཱི་བྷྱོ་ན་མཿསྭཱ་ཧཱ།
ཨོཾ་ཤྲཱི་གུ་ཧྱ་ས་ཀ་ཊི་ཀེ་སརྦ་དུཥྚཱ་ནཱ་ཀཪྵ་ཡ་ཨཱ་ཀཪྵ་ཡ་ཧཱུཾ་སྭཱ་ཧཱ། ཨོཾ་ཤྲཱིཿཧཱུཾ་ཙཾ་སཿསྭཱ་ཧཱ། ཨོཾ་ཤྲཱི་ཛམྦྷ་ལ་ཛ་ལེནྡྲཱ་ཡ་སྭཱ་ཧཱ། ཨོཾ་ཤྲཱི་ཨཱཪྻཱ་བ་ལོ་ཀི་ཏེ་ཤྭ་རཱ་ཡ་སྭཱ་ཧཱ། ཨོཾ་ཤྲཱི་མ་ཎི་པདྨེ་ཧཱུཾ་སྭཱ་ཧཱ། ཨོཾ་ཤྲཱི་བཛྲ་དྷ་རཱ་ཡ་ཧཱུཾ་སྭཱ་ཧཱ། ཨོཾ་ཤྲཱི་མ་ཎི་བྷ་དྲཱ་ཡ་སྭཱ་ཧཱ། ཨོཾ་ཤྲཱི་པཱུརྞྞ་བྷ་དྲཱ་ཡ་སྭཱ་ཧཱ། ཨོཾ་ཤྲཱི་དྷ་ན་དཱ་ཡ་སྭཱ་ཧཱ། ཨོཾ་ཤྲཱི་བཻ་
ཤྲ་བ་ཎཱ་ཡ་སྭཱ་ཧཱ། ཨོཾ་ཤྲཱི་ཙི་པི་ཀུཎྜ་ལི་ནེ་སྭཱ་ཧཱ། ཨོཾ་ཤྲཱི་ཀེ་ལི་མཱ་ལི་ནེ་སྭཱ་ཧཱ། ཨོཾ་ཤྲཱི་མུ་ཁེནྡྲཱ་ཡ་སྭཱ་ཧཱ། ཨོཾ་ཤྲཱི་ཙ་རེནྡྲཱ་ཡ་སྭཱ་ཧཱ། ཨོཾ་ཤྲཱི་ཕུཿཤཾ་ཁ་པཱ་ལ་ནཱ་ག་རཱ་ཛཱ་ཡ་སྭཱ་ཧཱ། ཨོཾ་ཨི་ལཱ་དེ་བྱཻ་སྭཱ་ཧཱ། ཨོཾ་མ་ཎི་པདྨེ་སྭཱ་ཧཱ། ཨོཾ་བཛྲ་དྷ་ར་སཱ་ག་ར་ནིརྒྷོ་ཥཱ་ཡ་སྭཱ་ཧཱ། ཨོཾ་བཛྲ་དྷརྨེ་ཧཱུཾ་སྭཱ་ཧཱ། ཨོཾ་ཏ་བྷ་དེ་བྱཻ་སྭཱ་ཧཱ། ཨོཾ་ཤྲཱི་གུཔྟ་
དེ་བྱཻ་སྭཱ་ཧཱ། ཨོཾ་ཤྲཱི་ས་ར་སྭ་ཏཱི་དེ་བྱཻ་སྭཱ་ཧཱ། ཨོཾ་ཤྲཱི་ཙནྡྲ་ཀཱནྟཱ་དེ་བྱཻ་སྭཱ་ཧཱ། ཨོཾ་ཤྲཱི་ཤཾ་ཁ་ནི་དྷཱ་ནཱ་ཡ་སྭཱ་ཧཱ། ཨོཾ་ཤྲཱི་པདྨ་ནེ་དྷཱ་ནཱ་ཡ་སྭཱ་ཧཱ། ཨོཾ་ཤྲཱི་ཨཥྚཽ་མ་ཧཱ་ཡཀྵི་ཎཱི་བྷྱོ་ན་མཿསྭཱ་ཧཱ། ཐམས་ཅད་མཆོད་པའི་དོན་དུ་ཧཱུཾ་སྭཱ་ཧཱའོ། །ཨོཾ་བཅོམ་ལྡན་འདས་མ་དཔལ་ནོར་རྒྱུན་མ་ཡེ་ཤེས་ཀྱི་སྐུ་མངའ་བ་ལ་ཕྱག་འཚལ་

ལོ། །ནམ་མཁར་འགྲོ་མ་ཐད་ཀར་མཛེས་ཤིང་ཡིད་དུ་འོང་བ་སྐྱེ་གནས་མཉམ་པ་མེད་པའི་ཡོན་ཏན་གྱི་གཏེར་གསེར་དང་རིན་པོ་ཆེ་འཁྱོག་པ། སྐྱེ་བོ་མང་པོའི་ནོར་སྤེལ་བའི་རྒྱ་མཚོའི་རིན་པོ་ཆེའི་ཆར་ལྟ་བུ། མཆོག་ཏུ་དྲི་མ་མེད་པའི་གཟི་བརྗིད་མཐའ་ཡས་མཛད་མ། རྒྱལ་བ་དང་བཀྲ་ཤིས་པའི་
གླུ་དབྱངས་ངེས་པར་སྒྲོག་པར་མཛད་མ། ཆུ་བོའི་གསེར་མདོག་བཟང་པོའི་གཟུགས་འཛིན་མ། ནོར་བུའི་རྣ་ཆ་དང་དོ་ཤལ་དང་སྐེ་རགས་འཛིན་མ། གསེར་བཟང་པོའི་རྒྱན་འཛིན་མ། སྲིད་པའི་བཙོན་རའི་སྡུག་བསྔལ་རྣམ་པར་སེལ་བར་མཛད་པའི་ལྷ་མོ་ཁྱོད་ཀྱི་ཞབས་ཟུང་ལ་ཕྱག་འཚལ་ལོ། །དེ་ནས་ཡི་གེ་
བརྒྱ་པ་དང་མཚན་བརྒྱ་རྩ་བརྒྱད་པའི་བསྟོད་པ་ཡང་བརྗོད་པར་བྱའོ། །དེ་ནས་སྨོན་ལམ་བརྗོད་དེ། བསོད་ནམས་འདི་ཡིས་སེམས་ཅན་ཀུན། །རྟག་ཏུ་དབུལ་བའི་ནད་སྤངས་ནས། །བཅོམ་ལྡན་ཐུབ་དབང་ཡེ་ཤེས་ནི། །མྱུར་བ་ཉིད་དུ་ཐོབ་པར་ཤོག །ན་མོ་རཏྣ་ཏྲ་ཡཱ་ཡ། བྷ་ག་བ་ཏི་བ་སུ་དྷཱ་རེ། གརྦྷ་ཛཱི་
བ་སཾ་རཀྵ་ཎི། ཕ་ལ་ཧསྟེ། དི་བྱ་རཱུ་པེ། བ་སུ་དྷེ། བ་ར་དེ། ཤི་བཾ་ཀ་རི། ཤཱནྟིཾ་ཀ་རི། པུཥྚིཾ་ཀ་རི། བ་ལ་བརྡྷ་ནི། བྷ་ཡ་ནཱ་ཤ་ནི། སརྦ་དུཥྚཱན་བྷཉྫ་བྷཉྫ། སྟམྦྷ་སྟམྦྷ། ཨ་མི་ཏོདྦྷ་བེ། མ་མ་ཀཱཪྻཾ་ཀུ་རུ་ཀུ་རུ། སིདྡྷི་བ་སུ་དྷཱ་རེ་སྭཱ་ཧཱ། དཔལ་ལྷ་མོ་ནོར་རྒྱུན་མའི་དཀྱིལ་འཁོར་གྱི་ཆོ་ག་རྫོགས་སོ།། །།
ཆོས་ཀྱི་རྣམ་གྲངས་འདི་ལྷ་དང་བཅས་པའི་སྐྱེ་དགུའི་ཡོན་གནས་དམ་པ། རྗེ་བཙུན་གནས་བརྟན་ཆེན་པོ་དཔལ་ཞྭ་དམར་ཅོད་པན་འཛིན་པ་བཞི་པའི་ཞལ་སྔ་ནས་ཀྱི་བཀའ་བཞིན། ཞ་ལུ་ལོ་ཙཱ་བ་དགེ་སློང་དྷརྨ་པཱ་ལ་བྷ་དྲས་བསྒྱུར་བའོ།། ༄༅༅། །རྒྱ་གར་སྐད་དུ། མ་ཧཱ་ཡཀྵ་ཨ་པ་ར་ཛེ་
ཏ་སཱ་དྷ་ནཾ་ཏནྟྲ། བོད་སྐད་དུ། གནོད་སྦྱིན་ཆེན་པོ་གཞན་གྱིས་མི་ཐུབ་པའི་སྒྲུབ་ཐབས་ཀྱི་རྒྱུད། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །དེ་ནས་བཅོམ་ལྡན་འདས་ཀྱིས་ནོར་བདག་གི་སྒྲུབ་ཐབས་འདི་གསུངས་སོ། །ནོར་རྒྱས་པར་འདོད་པ་གང་དག་གིས་གནས་དབེན་ཞིང་ཉམས་དགའ་བའི་སར་
མཎྜལ་ལེགས་པར་བྱས་ཏེ། དེར་མེ་ཏོག་དང་། སྤོས་དང་། མར་མེ་དང་། བྱུག་པ་དང་། བཤོས་དང་། སིལ་སྙན་བཀོད་པའི་དབུས་སུ་བུམ་པ་མཛེས་པ་འོ་མ་དང་། སྨན་དང་། འབྲུ་དང་། རིན་པོ་ཆེ་དང་། སྤོས་དང་། སྙིང་པོ་དང་། ཆུས་བཀང་སྟེ་ལྡུམ་ལྕུག་དང་བཅས་པ་སྣམ་བུ་གཙང་མས་

དཀྲིས་ཏེ། སྲད་བུ་སྔོན་པོ་བཏགས་ལ་ཕྱག་ན་རྡོ་རྗེ་བསྙེན་པར་བྱ་སྟེ། ཡིད་བཞིན་ནོར་བུ་འབུམ་དུ་བཟླས་ལ་བདག་ཉིད་ལ་དབང་བསྐུར་བར་བྱའོ། །ཨོཾ་ཙཎྜ་མ་ཧཱ་རོ་ཥ་ཎ་ཧཱུཾ་ཕཊ། དེ་ནས་ནོར་ལྷ་ཉིད་བསྒྲུབ་པ་ནི་ཁང་བུ་ཤིན་ཏུ་དབེན་པར་དཀྱིལ་འཁོར་གྲུ་བཞི་ལ་བའི་རྣམ་ལྔས་བྱུགས་ཏེ། དེ་ལ་
པདྨ་འདབ་བརྒྱད་ལྟེ་བ་དང་བཅས་པ་བྲི། ལྟེ་བ་དཀར་པོ་འདབ་མ་བརྒྱད་སེར་པོར་བྱའོ། །དེ་ལ་རིན་པོ་ཆེའི་མེ་ཏོག་དགྲམ། དབུས་སུ་བུམ་པ་དགོད། སྟེང་དུ་སྐུ་གཞག །མདུན་དུ་ཟན་དཀར་པོའི་གཏོར་མ་དཀར་གསུམ་དང་། མངར་གསུམ་ཚོད་མ་སྣ་ཚོགས་དང་དྲི་དང་རྩི་སྨན་གྱིས་བརྒྱན་ཏེ་གཞག་
གོ། །མཆོད་པའི་རྫས་དག་ཀྱང་དགོད་ལ། དང་པོ་བྱང་ཆུབ་ཏུ་སེམས་བསྐྱེད་དེ། དཔལ་ཕྱག་ན་རྡོ་རྗེ་བསྐྱེད་རིམ་ཇི་ལྟ་བ་བཞིན་བསྒོམས་པའི་མདུན་དུ་པཾ་ལས་རིན་པོ་ཆེའི་པདྨའི་ལྟེ་བ་ལ་ཧྲཱིཿདཀར་དམར་ལས་སྐྱེས་པའི་ནོར་ལྷ་ཞལ་གཅིག་ཕྱག་གཉིས་པ། དཀར་ཞིང་དམར་བའི་མདངས་དང་ལྡན་པ་
ཕྱག་གཡས་པས་རྡོ་རྗེ་ལྕགས་ཀྱུ་འཛིན་པ། གཡོན་གྱིས་རིན་ཆེན་བཻ་ཌཱུརྱའོ། །རིན་པོ་ཆེའི་གདན་ལ་འབབ་བཞུགས་ཀྱིས་སྐྱིལ་ཀྲུང་དུ་བཞུགས་པ། གསུས་པོ་ཆེ་བྱིས་པའི་གཟུགས་ལྟ་བུ་ཅན། བཞིན་མཛེས་པ་སྤྱན་འབུར་ལ་ཆེ་བ། རིན་པོ་ཆེའི་རྒྱན་གྱིས་ཀུན་དུ་བཀླུབས་པའི་དམ་ཚིག་གི་གནོད་
སྦྱིན་ཆེན་པོ་གཞན་གྱིས་མི་ཐུབ་པ་བསམས་ལ། བདག་དང་གཡོག་པོའི་དཔྲལ་བར་ཨོཾ། མགྲིན་པར་ཧྲིཾ། སྙིང་གར་ཕྲིཾ། ལྟེ་བར་ཧཱུཾ། གསང་བར་ཕཊ་ཀྱིས་བསྲུངས་ཏེ་ཡེ་ཤེས་དགུག་གཞུག་བྱའོ། །ཚུར་གཤེགས་ཚུར་གཤེགས་འབྱུང་པོ་ཀུན་གྱི་རྒྱལ། །གནོད་སྦྱིན་ཆེན་པོ་གཞན་གྱིས་མི་ཐུབ་
པ། །གནས་འདིར་མཆོད་པ་འབུལ་གྱིས་མྱུར་དུ་སྤྱོན། །བདག་ལ་ཟས་ནོར་སྩོལ་ཞིང་བཞུགས་སུ་སྤྱོན། །ཨེ་ཧྱེ་ཧི་ཡཀྵ་ཨ་པ་རཱ་ཛི་ཏ་ས་པ་རི་ཝཱ་ར་ཨཱ་གཙྪ་ཡ་ཨཱ་གཙྪ་ཡ་ཧཱུཾ་ཛ། དེས་ནི་མདུན་དུ་བྱོན་པར་བལྟས་ཏེ། བདུད་བསལ་བའི་ཕྱིར་རྡོ་རྗེ་རྩེ་གཅིག་པའི་ཕྱག་རྒྱའམ་ཡུངས་ཀར་འཕང་ཞིང་
ཨོཾ་ཨཱཿབི་གྷྣཱན་ཏ་ཀྲྀཏ་ཧཱུཾ་ཕཊ་ཅེས་པས་རྣམ་པར་ཕྱེ་ནས་མཆོད་ཡོན་ཕུལ་ཏེ། དམ་ཚིག་ལ་མངོན་པར་བཅུག་ལ་མཆོད་པ་ཕུལ་ནས་བསྟོད་པ་བྱས་ཏེ། ཨོཾ་གནོད་སྦྱིན་ཆེན་པོ་གཞན་གྱིས་མི་ཐུབ་པ། །ཞལ་གཅིག་ཕྱག་གཉིས་བྱིས་པའི་གཟུགས་འདྲ་ཅན། །ཕྱག་གཡོན་ཡིད་བཞིན་རིན་ཆེན་

བཻ་ཌཱུརྱ། །ཐུགས་ཀར་འཛིན་མཛད་མི་ཟད་ནོར་གྱི་བདག །ཕྱག་གཡས་ལྕགས་ཀྱུ་འཛིན་ཞིང་རྒྱལ་པོ་དང་། །བཙུན་མོ་ལ་སོགས་དགུག་དང་དབང་དུ་མཛད། །དུང་མདོག་འོད་འཕྲོ་རིན་ཆེན་རྒྱན་མཛེས་ལྡན། །རིན་ཆེན་གདན་ལ་རྒྱལ་སྲས་སྐྱིལ་ཀྲུང་བཞུགས། །འཇིག་རྟེན་
ཟས་ནོར་ཀུན་གྱི་བདག་པོ་སྟེ། །གང་གིས་ཁྱོད་བསྒྲུབ་ཕོངས་པའི་འཇིགས་སེལ་མཛོད། །ནོར་ལྷའི་རྒྱལ་པོ་བཀྲ་ཤིས་འབྱུང་བའི་གནས། །འཇམ་པའི་རྡོ་རྗེ་ཁྱོད་ལ་ཕྱག་འཚལ་ལོ། །དེའི་རྗེས་ལ་རྒྱལ་བ་སྲས་བཅས་མཆོད་ལ། དེ་དག་གིས་ལྷ་མོ་མངོན་པར་སྦྲུལ་ཏེ་བུམ་པ་ལྷའི་བདུད་རྩིས་
བཀང་བས་མངོན་པར་བཀྲུས་པར་བསམ་མོ། །སྤྱི་བོར་དཔལ་ཕྱག་ན་རྡོ་རྗེས་རྒྱས་གདབ་བོ། །དེ་ནས་སྙིང་པོའི་སྔགས་འདི། སྐད་ཆེ་བར་མ་ཡིན་ཆུང་བར་མ་ཡིན་མྱུར་བར་མ་ཡིན་བུལ་བར་མ་ཡིན་པར་སྨྲ་བ་བཅད་ཅིང་རྣམ་པར་གཡེང་བ་ལ་སོགས་པ་སྤངས་ཏེ་བཟླས་སོ། །ཨོཾ་ཧྲིཾ་ཕྲིཾ་ཨ་པ་ར་ཛི་ཏ་
ཛ་ཛ་ཧཱུཾ་ཕཊ། བཟླས་པ་གཏོང་བའི་དུས་སུ་མཆོད་པ་ཕུལ་ལ་གཏོར་མ་ཡང་སྦྱིན་ཏེ། གཏོར་སྣོད་བྷྲཱུཾ་ལས་རིན་པོ་ཆེར་བསམ། གཏོར་མ་ཨོཾ་གྱིས་སྦྱངས། ཨཱཿཡིས་སྦར། ཧཱུཾ་གིས་བདུད་རྩིར་བསྒྱུར་ཏེ་ཕྱག་ན་རྡོ་རྗེ་ལ་རང་སྔགས་ཀྱིས་དབུལ། གནོད་སྦྱིན་ནོར་ལྷ་ལ་སྔགས་ཨོཾ་ཧྲི་ཛ་ཡཀྵ་ཨ་པ་ར་
ཛི་ཏ་ས་པ་རི་ཝཱ་ར་ཨ་མྲྀ་ཏ་བ་ལིཾ་ཁ་ཁ་ཁཱ་ཧི་ཁཱ་ཧི་ཨི་དཾ་བ་ལིཾ་བྷཀྵ་ཡཾ། མ་མ་བ་སུ་པུཥྚིཾ་ཀུ་རུ་སརྦ་ཛ་ག་བ་ཤིངྐུ་རུ་ཡེ་སྭཱ་ཧཱ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུཏྤན་ན་ཏྭཱཏ་ཨོཾ་ཨཱཿཧཱུཾ་ཕཊ་སྭཱ་ཧཱ་ཞེས་པ་དང་། ཚིགས་སུ་བཅད་པས་ཀྱང་བསྔོས་ལ། བསྟོད་པ་བྱ་ཆོས་བཤད་དེ་ཕྲིན་ལས་བཅོལ། ཨོཾ་བྷཱུ་ཏ་
ཧྲི་ཨ་པ་ར་ཛི་ཏ་རཏྣ་ན་མ་སརྦ་ཏྲི་སམྤ་ཏི་སྭཱ་ཧཱ་ཞེས་པ་བརྒྱ་རྩ་བརྒྱད་བཟླས་ཏེ་བསྐུལ་ལོ། །དེ་ནས་དགེ་བ་བསྔོས་ལ་ཨ་པ་ར་ཛི་ཏ་བཛྲ་མུཿ། ཞེས་པས་གཤེགས་སུ་གསོལ་ལོ། །ཐུན་གཉིས་པ་ལ་སོགས་པ་ལ་དམ་ཚིག་ཆིག་རྫོགས་སུ་བསྐྱེད་ལ། ཡེ་ཤེས་དགུག་པ་ལ་སོགས་པ་སྔར་བཞིན་དུ་བྱའོ། །
ཚེས་གཅིག་ནས་བཅོ་ལྔའི་བར་དུ་བསྒྲུབ་བོ། །བཅོ་ལྔའི་ཞག་གི་དང་པོ་ནས་ཐོ་རངས་ཀྱི་བར་དུ་སྔགས་རྒྱུན་མ་ཆད་པར་བཟླས། ལྕེ་པོག་དཀར་པོའི་བདུག་པ་དབུལ། ཐོ་རངས་གྲུབ་པའི་རྟགས་སྣང་བ་ནི་རབ་གཟུགས་མངོན་སུམ་དུ་སྟོན་ཏེ་བདག་གིས་ཇི་ལྟར་བྱ་ཟེར་ཏེ་སྒྲུབ་པ་པོས་བདག་གི་བཀའ་ཉོན་

ཅིག་བྱའོ། །མནའ་བསྒག་དམ་ཆུ་བླུད་ཅི་འདོད་པ་བཅོལ། རྒྱལ་མཚན་གྱི་ཕྱག་རྒྱ་བསྟན་ཏེ་ཕན་ཆད་བཀའ་ཉན་ཏེ་དེ་ལ་ཞོན་ནས་ཚངས་པའི་འཇིག་རྟེན་མཐོང་ངོ་། །ལྷའི་གནས་སུ་བསྐྱལ་ནས་ལྷའི་དབང་པོས་དབང་སྐུར་བར་བྱེད་དོ། །འབྲིང་སྒྲ་དང་དུཾག་ཆེན་འོང་། གཟུགས་སྒྲ་གང་བྱུང་ཡང་
སྐྲག་པར་མི་བྱའོ། །དེ་ལྟ་བུའི་མཚན་མ་མ་བྱུང་ན་ནམ་ལངས་པའི་དུས་སུ་རྨི་ལམ་བརྟག །དེས་མ་གྲུབ་ན་ཕྱི་མའི་ཟླ་བ་ལ་དེ་བཞིན་དུ་བསྒྲུབ། དེས་ཀྱང་མ་གྲུབ་ན་ཡང་ཕྱི་མའི་ཟླ་བ་ལ་བསྒྲུབ་བོ། །དེ་ནས་དངོས་གྲུབ་ནི་རབ་རིག་པའི་རྒྱལ་པོའི་དབང་ཐོབ་བོ། །འདོད་པའི་དོན་ཐམས་ཅད་འགྲུབ་བོ། །ལྷ་
དང་། མི་དང་། གདོན་ཐམས་ཅད་དབང་དུ་འགྱུར། དགྲ་དང་ནད་ཐམས་ཅད་ཞི་བར་བྱེད་དོ། །ཚེ་རིང་བ་བསྐལ་པ་བདུན་ཐུབ་པར་འགྱུར། ནོར་མང་བ་ཟད་པ་མེད་ཅིང་དཔག་ཏུ་མེད་པ་བརྗོད་ཀྱིས་མི་ལང་བར་འབྱོར་རོ། །གལ་ཏེ་གནོད་པར་བྱེད་པ་བྱུང་ན་ཡང་ཁྲོས་པ་ཙམ་གྱིས་དེ་མ་ཐག་ཏུ་འཆི་
བར་བྱེད་དོ། །འབྲིང་ནི་ལྟ་སྒོམ་གྱི་ཉམས་མྱོང་སྐྱེ། བུད་མེད་ཐམས་ཅད་དབང་དུ་འགྱུར་ཞིང་ནོར་གྱིས་ཕྱུག་པར་འགྱུར། བཀྲ་ཤིས་པར་བྱེད་པ་དང་དགྲ་འཆི་བར་ཡང་བྱེད་དོ། །ཐ་མ་ཡང་ནོར་འཕེལ་བར་བྱེད་ཅིང་དགྲ་འཆི་བར་འགྱུར་རོ། །གྲུབ་ནས་རྟག་ཏུ་བསྟེན་པ་ནི་ཟླ་བ་ཉ་གང་བ་ཐམས་ཅད་ལ་
གཏོར་མ་གཏང་བར་བྱའོ། །དངོས་གྲུབ་གང་བྱུང་བ་དེ་ཆ་དྲུག་ཏུ་བགོས་ཏེ་བླ་མ་དང་དཀོན་མཆོག་གསུམ་སྤྱི་དང་། སེམས་ཅན་དག་ལ་ཆ་རེ་རེ་སྦྱིན། ཕྱེད་ཀྱིས་སྒྲུབ་པ་པོའི་འཚོ་བ་བྱའོ། །སྒྲུབ་པའི་དུས་སུ་ཟས་དཀར་གསུམ་བཟའ་ཞིང་གཙང་སྦྲ་དང་ལྡན་པར་བྱའོ། །རྟག་ཏུ་ཁྲུས་ལ་བརྩོན་པར་
བྱའོ། །འདི་གྲུབ་ན་ཡོན་ཏན་དཔག་ཏུ་མེད་དོ། །འདི་ལ་གདེང་བཞི་དང་ལྡན་པས་འགྲུབ་སྟེ། མགོ་གནོན་ཡེ་ཤེས་བསྙེན་པའི་གདེང་། ཡང་དག་ལྟ་བའི་གདེང་། མི་ཉམས་པ་དམ་ཚིག་གི་གདེང་། ཐེ་ཚོམ་མེད་པ་ངེས་པའི་གདེང་ངོ་། །དེ་ལ་ལྟ་བ་ནི་ཆོས་ཐམས་ཅད་སྒྱུ་མ་ལྟ་བུར་ཤེས་པར་བྱའོ། །
དམ་ཚིག་ནི་བླ་མ་མཉེས་པར་བྱ་ཞིང་གསང་ལ་སྒྲུབ་སྟེ། གཞན་ལ་ཐབས་འདི་བསྟན་པར་མི་བྱའོ། །གནོད་སྦྱིན་ཆེན་པོ་གཞན་གྱིས་མི་ཐུབ་པའི་སྒྲུབ་ཐབས་ཀྱི་རྒྱུད་རྫོགས་སོ།། །།རྒྱ་གར་གྱི་བླ་མ་ཛཱ་མཱ་རིས་བསྒྱུར་བའོ།། ༄༅༅། །རྒྱ་གར་སྐད་དུ། བཛྲ་ཀུ་ལ་ཏནྟྲ་ཀརྨ་མཎྜལ་

སཔྟ་ཀྲ་མ་ཨ་ཏྲི་སཱ་དྷ་ནཾ་ནཱ་མ། བོད་སྐད་དུ། རྡོ་རྗེ་བཀོད་པའི་རྒྱུད་ལས་དཀྱིལ་འཁོར་བདུན་པའི་རིམ་པ་རྣམ་པར་ཕྱེ་བའི་སྒྲུབ་ཐབས་ཞེས་བྱ་བ། བཅོམ་ལྡན་འདས་དཔལ་སྒྲོལ་བྱེད་ཐུགས་རྗེའི་རྒྱལ་པོ་ཤིན་ཏུ་རྣམ་པར་གྲོལ་བ་ཉིད་ལ་ཕྱག་འཚལ་ལོ། །ཧཱུཾ་ཁྲོ་ལ་ཁྲོས་པའི་རྒྱལ་པོ་
ཡིས། །ཁྲོ་བ་ཉེ་བར་ཞི་མཛད་པ། །དེ་བཞིན་གཤེགས་པ་ཀུན་ཞི་མཛད། །ཁྲོ་ཞི་ཆེ་ལ་ཕྱག་འཚལ་ཏེ། །དགོངས་པ་འདུས་པའི་རྒྱུད་དག་ལས། །དཀྱིལ་འཁོར་བདུན་པའི་རིམ་པ་དག །སེམས་ཅན་ཡེ་ཤེས་བསྐྱེད་པའི་ཕྱིར། །ལེགས་པར་བསྡུས་ཏེ་བསྟན་པར་བྱ། །སློབ་དཔོན་མཉེས་པར་
མ་བྱས་པའི། །དབང་རྣམས་ཐོབ་པར་མ་བྱས་ན། །ཉན་པ་ལ་སོགས་རྩོམ་པ་རྣམས། །འབྲས་བུ་མེད་ཅིང་བརླག་པར་འགྱུར། །ཡི་གེའི་སྒྲས་བཏགས་མིང་ཚོགས་ལས། །བརྟེན་པའི་ཚིག་གིས་རབ་མཚོན་ཏེ། །ཁོང་ནས་གབ་སྦས་དོན་འབྱིན་པ། །སྟོན་པ་རྡོ་རྗེའི་ཐུགས་ལ་གནས། །འདི་
ནི་གསང་ཆེན་ངེས་པ་ཡི། །འབྲས་བུ་ལམ་དུ་གྱུར་པ་ཡིན། །རྒྱལ་བའི་དཀྱིལ་འཁོར་མ་ལུས་ལ། །འདི་ལས་གསང་བའི་ངེས་དོན་མེད། །ཀུན་གྱི་ཕྱག་རྒྱ་རྫོགས་ཆེན་མཆོག །སྣོད་ལྡན་ངང་ཚུལ་བཟང་ལ་སྦྱིན། །གཞན་དུ་ནམས་ཀྱང་སྦྱིན་མི་བྱ། །རྨོངས་ལ་འཕྱར་བས་གཞན་དུ་མིན། །དུས་
མིན་པར་ནི་སྲོག་ཟད་ནས། །བསྲེག་དང་སྒྲིབ་ལ་ཡུན་རིང་གནས། །འདས་པའི་དུས་ན་སྔོན་བྱུང་བ། །བདག་ཉིད་ཆེན་པོ་རྟག་པ་ཡི། །དེ་བཞིན་གཤེགས་པའི་གསུང་རབ་ལ། །འགྲོ་བའི་ཚུལ་དུ་སྔོན་བྱུང་བ། །དེ་ཚེ་སེམས་ཅན་ཐམས་ཅད་ནི། །སྟོང་ཉིད་ཐེར་ཟུག་འགོག་པ་དང་། །ཁྲོ་གཏུམ་
ལོག་ལྟ་བརྐམ་ཞིང་འཇུངས། །ལེ་ལོ་གཏི་མུག་ཆགས་སོགས་པས། །ལོག་ལྟ་དགུ་པོས་དེ་མྱོས་འགྱུར། །དེ་དག་རྣམ་པར་དགྲོལ་བྱའི་ཕྱིར། །རྒྱལ་བས་དཀྱིལ་འཁོར་བདུན་དུ་གསུངས། །དེ་རྩོམ་གང་ཟག་ལྔར་འདོད་དེ། །བདུན་པ་དང་ནི་རིགས་ཆེན་བྱེད། །དབུགས་ཆེན་འབྱིན་དང་ལུང་
ཆེན་ཐོབ། །རྩལ་ཆེན་རྫོགས་པའི་རྣལ་འབྱོར་པས། །དྲག་ཤུལ་ཅན་ཞེས་བྱ་བའི་གནས། །དགོན་པ་ཆེན་པོའི་གནས་ཆེན་ནི། །ཡེ་ཤེས་སྙིང་པོ་ཅན་རྣམས་ཀྱི། །ཐེག་ཆེན་གསང་བ་འབྱུང་བས་ན། །དམ་པ་རྣམས་ཀྱིས་བསྔགས་པ་ཡིན། །དེ་གནས་ངེས་དོན་དགོད་པ་ནི། །ཇི་བཞིན་ཉིད་ཀྱི་

དཀྱིལ་འཁོར་ལས། །ཕྱག་རྒྱ་དངོས་གྲུབ་དཀྱིལ་འཁོར་དང་། །བྱང་ཆུབ་སེམས་ཀྱི་དཀྱིལ་འཁོར་མཆོག །བསོད་ནམས་ཚོགས་ཀྱི་དཀྱིལ་འཁོར་སྤྲིན། །བཀའ་སྟོད་ཕོ་ཉའི་དཀྱིལ་འཁོར་དྲག །འབྲུབ་ཁུང་ལས་ཀྱི་དཀྱིལ་འཁོར་ཆེ། །གཏད་ཁྲམ་མནན་པའི་དཀྱིལ་འཁོར་རོ། །དེ་ནི་དབྱེ་
བའི་སྒོ་ནས་གསུངས། །མི་བསྐྱོད་ཞིང་ཁམས་མངོན་དགའ་ན། །དགེ་སློང་ཐུབ་དཀའ་གཞོན་ནུ་ཡིས། །ཁྱིམ་བདག་ཀཻ་ཤི་ཀའི་བུ། །དགེ་སློང་ཐར་པ་ནག་པོ་དང་། །གཡོག་པོ་དན་འཕགས་གཉིས་པོ་ལ། །ཇི་བཞིན་ཉིད་ཀྱི་དཀྱིལ་འཁོར་གསུངས། །ཇི་བཞིན་ཉིད་དེ་མ་བཅོས་ན། །དངོས་
པོ་བཞི་ལ་གནས་སྤྱད་ཀྱང་། །ནམ་མཁའ་ལ་ནི་སྤྲིན་བཞིན་དུ། །འདི་ནི་རྣལ་འབྱོར་དམ་པའི་ལམ། །ཇི་བཞིན་ཉིད་ཀྱི་དཀྱིལ་འཁོར་རོ། །ཕྱག་རྒྱ་དངོས་གྲུབ་དཀྱིལ་འཁོར་ནི། །མི་འཁྲུགས་པ་ཡི་ཞིང་ཁམས་ན། །སྒྱུ་འཕྲུལ་དྲ་བའི་རྒྱུད་དག་ལས། །དྲག་པོ་རྡོ་རྗེ་སེམས་དཔའ་ཡིས། །མི་
འཁྲུགས་རྒྱལ་པོ་ཉིད་ལ་གསུངས། །གནས་ཆེན་དམ་པ་དག་ཏུ་ནི། །ཚུལ་དང་ལྡན་པའི་རྫས་བསོགས་ནས། །མཎྜལ་ལ་སོགས་མཛེས་བྱས་ལ། །ཁྲུས་བྱས་སྙིང་གར་ཉི་དཀྱིལ་ཧཱུཾ། །འོད་ཀྱི་སྣང་བས་དཀོན་མཆོག་རྣམས། །སྤྱན་དྲངས་དཀོན་མཆོག་བསྐོར་ཕྱག་འཚལ། །དེ་ནས་མཆོད་
པ་དབུལ་བ་ནི། །ཨོཾ་ན་མཿསརྦ་ཏ་ཐཱ་ག་ཏ་བཛྲ་ཧེ་རུ་ཀ་བཛྲ་ད་རི་མ་ཧཱ་ཛྙཱ་ན་མཎྜལ་བཛྲ་ཨཱ་ཧ་ར་པཱུ་ཛ་ཧཱུཾ་སྭཱ་ཧཱ། དེ་བཞིན་དུ་བཛྲ་དྷཱུ་པེ་པུཥྤེ་ཨཱ་ལོ་ཀེ་གནྡྷེ་ནཻ་བི་དྱེ་པཱུ་ཛ་ཧཱུཾ་སྭཱ་ཧཱ། ཨོཾ་ཨཱཿཧཱུཾ་སྭཱ་ཧཱ། ཞེས་བྱིན་གྱིས་བརླབ། དེ་ནས་རཀྟ་སྦྲེང་ཞིང་བདུད་རྩིས་ཚོགས་མཆོད་དེ་རཀྟ་ཁཱ་ཧི། བ་ལིཾ་ཏ་ཁཱ་ཧི། ཨ་མྲྀ་ཏ་
ཁཱ་ཧི། ཀོ་རོ་ཙ་ན་ཁཱ་ཧི། བ་སུ་ཏ་ཁཱ་ཧི། ཙིཏྟ་ཁཱ་ཧི་ཞེས་བརྗོད་དེ། ཐུགས་ཀ་ནས་བྱུང་ལྷ་མོས་མཆོད་རྗེས་ལ། ཧཱུཾ་བདག་འདྲ་ལོག་པའི་སྟོབས་ལྡན་པས། །ཐོག་མ་མེད་པའི་དུས་མཐའ་ནས། །སྲིད་པའི་འཁོར་བར་འཁྱམས་པར་ངེས། །སྐྱེ་བ་མང་པོར་ལུས་བླངས་པར། །སུས་ཀྱང་མ་བྱས་
རང་གི་ལས། །དེ་ཙམ་ཆ་གཅིག་དོན་སྤྱད་ན། །ད་ཙམ་དོན་གྱི་སངས་རྒྱས་ཟིན། །རང་ལུས་གཏོང་བར་མ་ཕོད་ཅིང་། །ཆགས་པའི་མཐའ་ལ་མངོན་ཞེན་པས། །ཟུག་རྔུའི་ནད་ཀྱིས་ཟིན་པ་ཡིན། །སྲིད་པའི་བཙོན་རར་ཆུད་པ་འདི། །མཁའ་ལ་འདུད་པས་ཉེས་པར་ངེས། །འཁོར་བའི་རླུང་

སྒོར་ལྟུང་བ་འདི། །ལས་ཀྱི་རླུང་གིས་ཉེས་པར་ངེས། །དུས་གསུམ་རྒྱལ་བ་མ་ལུས་ལ། །འདི་དག་མི་འཆབ་མཐོལ་ལོ་བཤགས། །རྡོ་རྗེ་སེམས་དཔའི་དམ་ཚིག་རྗེས་སུ་བསྲུང་། །ཡེ་ཤེས་སེམས་དཔའ་ཉེ་བ་ཉིད་དུ་བྱོན། །རིག་པའི་རྒྱལ་པོ་བདག་ལ་རྟག་པར་
དགོངས། །གསང་བའི་དབང་ཕྱུག་བདག་ལ་དགོངས་པར་གསོལ། །རྟོགས་པ་མཆོག་སྦྱིན་བདག་ལ་དགྱེས་པར་དགོངས། །འདོད་པ་ཀུན་བྱེད་བདག་ལ་ཆགས་པར་དགོངས། །དང་པོ་མཉམ་ཉིད་སངས་རྒྱས་ཐུགས་རྗེ་ཅན། །ལས་རྣམས་ཀུན་བྱེད་བདག་སེམས་དགེ་འགྱུར་བ། །དུས་གསུམ་
དགེ་བཤེས་དག་དང་ཐམས་ཅད་དང་། །རྡོ་རྗེ་ཅན་དང་དམ་ཚིག་སེམས་དཔར་བསྒྲུབ། །བདག་ཀྱང་རྡོར་སེམས་གཏན་དུ་མི་གཏོང་ན། །རྡོ་རྗེ་སེམས་དཔས་གཏན་དུ་བདག་མ་གཏོང་། །རྗེས་སུ་ཡི་རང་བསྐུལ་དང་སྐྱབས་འགྲོ་དང་། །ལམ་བརྟན་བསྔོ་དང་སེམས་བསྐྱེད་དང་། །ཚངས་པར་
གྱུར་པའི་ལས་རྣམས་ཀྱིས། །འགྲོ་རྣམས་ཀུན་བྲལ་ཞིང་དུ་སྨོན། །ཏ་ཀེ་མ་ཏ་ཀེ་མ་ཕཊ། ཧ་ལ་ཧ་ལ་རཾ་ཏིག་སྣ་ཏིག་སྣ་ཁཾ། ཀྲོ་ཏ་ཀྲོ་ཏ་ཡཾ་ཞེས་དངོས་པོ་ཐམས་ཅད་སྟོང་པར་སྦྱངས། ཨེ་མའོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་
པ་ཉིད་ནས་སྐྱེ་བ་མེད། །སྟོང་ཉིད་རབ་ཏུ་གསལ་བ་ཡི། །སྙིང་རྗེ་ཡུམ་ནི་བསྒོམ་པར་བྱའོ། །ངེས་པ་ལས་ནི་རྡོ་རྗེ་གུར། །བྷྲཱུཾ་བི་ཤ་བི་ཤུདྡྷེ་ཞེས་བཟླས། དུར་ཁྲོད་ཆེན་པོ་རབ་འཇིགས་པའི། །ཁྲག་གི་རྒྱ་མཚོ་འཁྲུག་ཅིང་འཁྱིལ། །ཀེང་རུས་ཆེན་པོ་རི་རབ་ཀྱི། །སྟེང་དུ་འབར་བའི་ཀློང་དཀྱིལ་ན། །
ཡེ་ཤེས་འབར་བའི་གཞལ་ཡས་ཁང་། །ཕྱོགས་བཅུར་རྒྱ་ཡངས་མ་ཆད་པ། །ཕྱི་དང་ནང་མེད་ཀུན་དུ་སྣང་། །འབར་བའི་འཁོར་ལོ་རྩིབས་བཞི་པ། །གྲུ་ཆད་བཞི་ཡིས་རྣམ་པར་བརྒྱན། །གྲུ་བཞི་སྒོ་ཁྱུད་བཞི་དང་ལྡན། །འབར་བའི་བར་ཁྱམས་གཉིས་ཀྱིས་མཛེས། །ཐོད་སྦྲུལ་སྣ་ཚོགས་ཉི་མས་
བརྗིད། །འབར་བའི་ཁྲོ་བོ་མང་པོ་འཁྲུག །ཁྱུ་མཆོག་མ་ཧེ་གཟིག་དང་སྟག །གཏུམ་པོ་དོམ་གྱིས་སྦར་བས་ནི། །དབང་ཕྱུག་ལྷ་ཆེན་ལ་སོགས་གཟུང་། །དབུས་ཀྱི་ཉི་མའི་སྙིང་པོ་ལ། །ཧཱུཾ་ལས་རི་ལུའི་སྒྲ་གྲགས་པས། །སེམས་དཔའི་སྐུ་རུ་གྱུར་པ་ཡི། །རང་གི་ངང་ཚུལ་དེ་བཟུང་ལ། །ལྷུན་གྱིས་

གྲུབ་པར་བྱ་བའི་ཕྱིར། །ཁྲོ་རྒྱལ་རྣམས་ལ་བསྐུལ་བར་བྱ། །བདག་འདྲ་སེམས་ཅན་མ་ལུས་ཀུན། །མཆོག་ཉིད་སྒྲུབ་པར་སྦྱོར་བས་ན། །རྒྱལ་བ་རྒྱ་མཚོ་ཀུན་འདུས་པས། །སྐུ་ཡི་དབྱིག་ཏུ་བདག་སྐྱེད་ཅིག །དེ་ནས་ཕྱོགས་འདུས་ཁྲོ་རྒྱལ་གྱིས། །སེམས་དཔའ་བདག་ལ་དེར་དབང་བསྐུར། །
རིམ་པ་གསུམ་གྱིས་སྐུ་རུ་བསྐྱེད། །དེ་ནས་བཅོམ་ལྡན་དགྱེས་ཆེན་པོ། །དབུ་དང་ཕྱག་ཞབས་སྟོང་ཁམས་ཀྱི། །རྡུལ་སྙེད་མཚོན་ཆ་འཛིན་པ་སྟེ། །གཡས་དཀར་གཡོན་དམར་དབུས་མཐིང་ཞལ། །རྡོ་རྗེ་ཁ་ཊྭཱཾ་རྔེའུ་ཆུང་གཡས། །གཡོན་དྲིལ་དུང་དམར་རྒྱུ་ཞགས་འཛིན། །འབར་ཆེན་ཀློང་དཀྱིལ་
འཁོར་ལོའི་དཀྱིལ། །དབང་ཕྱུག་ཆེ་དང་དུར་ཁྲོད་ཀྱི། །སྟེང་ན་ཞབས་བཞི་བརྐྱང་བསྐུམ་བཞུགས། །དུར་ཁྲོད་རྒྱན་ཅན་གར་གྱིས་རོལ། །བདག་ཉིད་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་རྡོ་རྗེ་བདག །ཁྲོ་རྒྱལ་ཡེ་ནས་ཡིན་པའི་ཕྱིར། །དེ་བཞིན་ཉིད་ཀྱི་དབྱིངས་ལས་ནི། །ཁྲོ་
མོ་དབང་ཕྱུག་མངོན་ཕྱུང་སྟེ། །ཧེ་ཧི་དགྱེས་པའི་གཟི་མདངས་ཀྱིས། །རིན་ཆེན་པདྨ་རྒྱས་མཛད་དེ། །ཧཱུཾ་ཧཱུཾ་རོལ་པའི་འོད་ཟེར་གྱིས། །བདེ་ཆེན་ཐུགས་མཚན་བྱིན་བརླབས་ནས། །གཉིས་མེད་དགྱེས་པ་འཁྲིལ་བས་ཐིམ། །རྡོ་རྗེ་ལམ་བྱུང་ཡུམ་གྱི་མཁའ། །ཆོས་སྐུ་བྱང་ཆུབ་སེམས་སུ་
གནས། །ལྷ་རྣམས་སོ་སོའི་སྙིང་པོའི་སྒྲ། །ཧཱུཾ་དང་ཧེ་ཧེ་ཕཊ་བྱུང་ནས། །གསུང་གི་ཕྱག་རྒྱ་ཉིད་རྫོགས་ཏེ། །འོད་ཟེར་སྤྲོ་བསྡུའི་སྦྱོར་བ་ཡིས། །ཐུགས་ཀྱི་ཕྱག་རྒྱ་རབ་ཏུ་འབར། །དེ་ལས་ཕྲ་མོའི་སྐུ་སྤྲོས་བསྡུས། །ཕྱག་རྒྱ་ཆེན་པོའི་སྐུ་རྫོགས་ནས། །ཕྱོགས་བཅུའི་རྡུལ་སྙེད་འཐོན་པར་འགྱུར། །
སེམས་ཅན་རྒྱལ་བའི་སྲས་བྱས་ནས། །སླར་བསྡུས་རང་གི་གནས་འཁོད་པ། །དཔལ་ནི་ཁྲག་འཐུང་ཆེན་པོ་དང་། །རིན་པོ་ཆེ་དང་པདྨ་དང་། །ལས་སུ་གྱུར་ཏེ་སོ་སོར་བཞུགས། །དེ་ཀུན་འཇིགས་བྱེད་ཆེན་པོ་ཡི། །ཆ་ལུགས་རྔམ་པའི་ང་རོ་ཡིས། །འབར་བའི་ཀློང་ན་དབུ་གསུམ་པ། །ཕྱག་དྲུག་
ཞབས་བཞིས་དྲི་ཟ་དང་། །གནོད་སྦྱིན་ཆུ་བདག་གཤིན་རྗེ་སོགས། །དྲེགས་པ་ཁྱོ་ཤུག་སྟན་ལ་བཞུགས། །བཙུན་མོ་ཁྲག་འཐུང་ཆེན་མོ་རྣམས། །སོ་སོའི་སྐུ་ལ་འཁྲིལ་ཏེ་འཁོད། །དཀར་མོའི་ཚོགས་དང་རྐུན་མོ་དང་། །རྨོངས་མ་དང་ནི་ཐལ་བྱེད་མ། །སྦོས་མོ་དང་ནི་གཏུམ་མོ་དང་། །སྨེ་ཤ་ཅན་

དང་ཙཎྜ་ལཱི། །སྒོ་ཡི་ཁྱམས་ཀྱི་ནང་དུ་འཁོད། །སེང་གེ་གདོང་ཆེན་མོ་ཡི་ཚོགས། །སྟག་དང་ཙ་དང་ཁྱི་དང་བཞད། །ཀང་ཀ་དུར་བྱ་འུག་གདོང་ཆེ། །འཁོར་བར་རྔམ་པའི་མདངས་དཀྱིལ་འཁོར། །རྡོ་རྗེ་སྲིང་འགྲོ་མ་ཚོགས་དང་། །གདོང་མི་འཇིག་རྟེན་རོ་ལངས་མའི། །སྒོ་
བཞིར་རྔམ་པའི་གཟུགས་ཀྱིས་གནས། །སྲིན་པོ་སྨུག་ནག་ལ་སོགས་པའི། །འཇིག་རྟེན་མ་མོ་ཉི་ཤུ་བརྒྱད། །གསང་བའི་དཀྱིལ་འཁོར་ཕྱི་རོལ་ན། །བྲན་གྱི་ཚུལ་དུ་གནས་ཤིང་འཁོད། །དེ་ལྟར་གསལ་བར་དགོད་པའི་སྔགས། །ཨོཾ་སརྦ་ཏ་ཐཱ་ག་ཏ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་ས་དུཥྚཱན་ཏ་ཀ་ཧ་ན་ད་ཧ་པ་ཙ་ཧཱུཾ་
ཧཱུཾ་ཧཱུཾ་ཕཊ། ཨོཾ་བཛྲ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚཱན་ཏ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ཨོཾ་རཏྣ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚཱན་ཏ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ཨོཾ་པདྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜ་སརྦ་དུཥྚཱན་ཏ་ཀ་ཧ་ན་ད་ཧ་པ་ཙ་ཧཱུཾ་ཧཱུཾ་ཧཱུཾ་ཕཊ། ཨོཾ་ཀརྨ་མ་ཧཱ་ཤྲཱི་ཧེ་རུ་ཀ་མ་ཧཱ་ཙཎྜི་སརྦ་དུཥྚཱན་ཏ་ཀ་ཧ་ན་ད་ཧ་
པ་ཙ་ཧཱུཾ་ཧཱུཾ་ཧཱུཾ་ཕཊ། ཨོཾ་སརྦ་ཏ་ཐཱ་ག་ཏ་མ་ཧཱ་ཀྲོ་ཏི་ཤྭ་རི་སརྦ་དུཥྚཱན་ཧཱུཾ། ཨོཾ་བཛྲ་ད་ར་མ་ཧཱ་ཀྲོ་ཏི་ཤྭ་རི་ཛྭ་ལ་ཧཱུཾ་ཕཊ། ཨོཾ་མ་ཧཱ་སཱུརྱ་རཏྣ་མ་ཧཱ་ཀྲོ་ཏི་ཤྭ་རི་བི་ད་མ་ཧཱུཾ། ཨོཾ་དྷི་ཤྭ་བི་མུ་ཀ་མ་ཧཱ་ཀྲོ་ཏི་ཤྭ་རི་ཁའི་ཧཱུཾ་ཕཊ། ཨོཾ་སརྦ་ཨ་མོ་ཀ་མ་ཧཱ་ཀྲོ་ཏི་ཤྭ་རི་ཧཱུཾ་ཕཊ། བཛྲ་ཀཽ་རི་ཧ། བཛྲ་ཙཽ་རི་ཧ། བཛྲ་པྲ་མོ་ཧ། བཛྲ་བེཏྟ་
ལི་ཧ། བཛྲ་པུཀྐ་སི་ཧ། བཛྲ་གྷསྨ་རི་ཧ། བཛྲ་སྨ་ཤ་ནི་ཧ། བཛྲ་ཙཎྜ་ལི་ཧ། བཛྲ་སིངྷ་མུ་ཁ་ཧེ། བཛྲ་བྱ་གྷྲྀ་མུ་ཁ་ཧེ། བཛྲ་སྲྀ་ལ་མུ་ཁ་ཧེ། བཛྲ་ཤོ་ན་མུ་ཁ་ཧེ། བཛྲ་ཀྲི་ཏ་མུ་ཁ་ཧེ། བཛྲ་ཀངྐ་མུ་ཁ་ཧེ། བཛྲ་ཁ་ཁ་མུ་ཁ་ཧེ། བཛྲ་ཧུ་ལུ་མུ་ཁ་ཧེ། བཛྲ་ཨརྱ་ཏེ་ཛ་ཏེ་ཛ། བཛྲ་ཨ་མུ་ཀ་ཧཱུཾ། བཛྲ་ལོ་ཀ་བཾ། བཛྲ་
པ་སྨ་པ་ལ་ཡ་བ་དེ་ཧོ། བཛྲ་མ་ནུ་རགྴ་སི་བྷྱོ། པྲ་མོ་ནི་བྷྱོ། རཽ་ཏྲི་བྷྱོ། པེ་སྣ་པི་བྷྱོ། ཀཽ་མ་རི་བྷྱོ། ཨེ་ན་ཏྲ་ཡོ་བྷྱོ། བཛྲ་པིངྒ་ལཾ་བྷྱོ། ཨ་མྲྀ་ཏཾ་བྷྱོ། སཽ་མེ་བྷྱོ། ད་ན་ཏཾ་བྷྱོ། བག་རག་ཤ་སི་བྷྱོ། བག་ཤཾ་སི་བྷྱོ། ར་ཏི་བཛྲ་ཧཾ་བྷྱོ། ཨེ་ཀ་ཛ་རཾ་བྷྱོ། སི་ཏི་ཀ་བྷྱོ། བ་ཡ་བེ་བྷྱོ། མ་ཧཱ་མ་ར་ན་བྷྱོ། ཨགྣ་ཡེ་བྷྱོ། པ་
ར་ཧི་བྷྱོ། ཙ་མུནྟྲི་བྷྱོ། པུ་ཏ་ནི་བྷྱོ། བ་ར་ན་བྷྱོ། བཛྲ་མ་ཧཱ་ཀཱ་ཧ་ལ་བྷྱོ། བཛྲ་ཙ་ཀ་སུཾ་ས་ག་ར་ན་བྷྱོ། བཛྲ་ལཾ་པོ་ད་ར་བྷྱོ། དེ་དག་གིས་ནི་དཀྱིལ་འཁོར་བསྐྱེད། །དམ་ཚིག་དཀྱིལ་འཁོར་ཡོངས་སུ་རྫོགས། །ད་ནི་ཡེ་ཤེས་འཁོར་ལོ་ནི། །རང་གི་སྙིང་ག་ནས་འོད་འཕྲོས། །དབྱངས་དང་ལྡན་པའི་ལྷ་

མོ་ཡིས། །ཕྱོགས་བསྡུས་དཀྱིལ་འཁོར་བདག་ཉིད་ཆེ། །མི་དམིགས་ཐུགས་ཀྱི་དཀྱིལ་འཁོར་ནས། །དཀྱིལ་འཁོར་ཐམས་ཅད་སྤྱན་དྲང་ངོ་། །དམིགས་མེད་མཁའ་ལྟར་དག་པས་ཁྱབ་པའི་སྐུ། །སྤྱན་དྲང་གཤེགས་སུ་གསོལ་བར་མི་དམིགས་ཀྱང་། །ཐུགས་རྗེའི་ངང་གིས་ཆོས་སྐུ་དག་པ་
ལས། །ཡེ་ཤེས་སྒྱུ་མར་རོལ་ཅིང་གཤེགས་སུ་གསོལ། །རུ་ལུ་རུ་ལུ་ཧཱུཾ་ཨེ་ཧྱེ་ཧི་བཛྲ་ཛ་ཛ། བཛྲ་ཀྲོ་ཏ་ས་མ་ཡ་ཧཱུཾ་ཞེས་བརྗོད་ནས་ཕྱག་བྱས་ཏེ། བདག་མེད་ཕྱོགས་བྲལ་དོན་དམ་ཐུགས་ཆུད་ཅིང་། །བྱམས་དང་སྙིང་རྗེའི་འགྲན་ཟུར་མི་མངའ་ཡང་། །ཐུགས་རྗེ་ཆེན་པོས་གདུག་པ་འདུལ་མཛད་པ། །འཇིགས་
བྱེད་ཧེ་རུ་ཀ་ལ་ཕྱག་འཚལ་ལོ། །ནམ་མཁའི་ལུས་ཅན་གར་ཡང་ཐོགས་མེད་ཅིང་། །འདོད་དགུར་བསྒྱུར་བའི་གཟུགས་ཅན་འཕྲུལ་མོ་ཆེ། །མ་སྲིང་བྱམས་པའི་ཚུལ་གྱིས་གྲོགས་མཛད་མ། །ཕྱི་ནང་མཁའ་འགྲོའི་ཚོགས་ལ་ཕྱག་འཚལ་ལོ། །འཇིག་རྟེན་འཁོར་ལོས་སྒྱུར་བའི་དབང་ཕྱུག་མ། །ཅི་བགྱི་
བཀའ་ཉན་ཡང་སྤྲུལ་བསམ་མི་ཁྱབ། །བདུད་འདུལ་ཡེ་ཤེས་ཕོ་ཉ་དྲུག་ཅུའི་ཚོགས། །འཁོར་བཅས་རབ་འབར་ཀུན་ལ་ཕྱག་འཚལ་ལོ། །ཨ་ཏི་པུ་ཧོ་པྲ་ཏི་ཛ་ཧོ་སརྦ་ཏ་ཐཱ་ག་ཏ་བྷནྡྷ་ནཾ་ཀ་རོ་མི། ཨི་དཾ་དྷཱུ་བ་པུཥྤ་བ་ལིཾ་པྲ་ཏཱི་ཙྪ་ཧོ། ཤྲཱི་བན་ཡོ་གི་ན་ཧོ། ཏ་ཀི་ན་ཧོ་ཞེས་གུས་བྱས་ལ། ཧཱུཾ་ཁྲོ་ལ་ཁྲོས་པས་ཞི་
མཛད་པ། །ཐུགས་རྗེས་ཁྲོས་པ་རྔམ་པའི་ཚོགས། །འབར་བའི་བྱིན་རླབས་རྨད་པོ་ཆེ། །དེ་ཉིད་དུ་ནི་བདག་ལ་སྩོལ། །བཛྲ་ཀྲོ་ཏ་ས་མ་ཡ་ཧཱུཾ། བཛྲ་ཀྲོ་ཏ་ས་མ་ཡ་ཕཊ། བཛྲ་ཀྲོ་ཏ་ས་མ་ཡ་ཧོ། དེར་བསྟིམ་ལུས་ཀྱི་དཀྱིལ་འཁོར་རྫོགས། །སྐུ་གསུང་ཐུགས་ཀྱི་ཕྱག་རྒྱར་ལྡན། །སོ་སོ་རིགས་ཀྱི་འབྲས་བུར་
གྱུར། །སྙིང་གར་མི་བསྐྱོད་རྡོ་རྗེས་མཚན། །དེ་ལས་མ་མོ་བརྒྱད་སྤྲོས་ཏེ། །ཕྱི་རོལ་མཆོད་པ་བྱིན་གྱིས་བརླབ། །དབྱངས་དང་ལྡན་པས་དབུལ་བྱས་ཏེ། །དད་ལ་ཐུན་མོང་རྫས་ལྔས་མཆོད། །དེ་ནས་ཁྱད་པར་རྫས་ཀྱིས་མཆོད། །བདུད་རྩི་སྨན་གྱིས་མཆོད་རྗེས་ལ། །སྦྲེང་ཞིང་བསྟབས་པར་བྱ་བ་ནི། །
བླ་མེད་མཆོག་གི་མཆོད་པ་དམ་པ་སྦྱར་བ་འདི། །ཡེ་ཤེས་ལྔ་ཡི་འོད་ཟེར་རྣམ་པར་འཕྲོ། །འདོད་པའི་ཡོན་ཏན་ལྔ་ཡིས་རབ་བརྒྱན་ཏེ། །དམ་ཆོས་གསང་བའི་མཆོད་པ་བཞེས་སུ་གསོལ། །ཧེ་རུ་ཀ་ཡི་གནས་བཅུ་དང་། །དུར་ཁྲོད་ཆེན་པོའི་གནས་བརྒྱད་ནས། །དཔལ་ཆེན་འཁོར་བཅས་

སྤྱན་དྲངས་ཏེ། །དུར་ཁྲོད་མཆོག་གི་གནས་ཆེན་འདིར། །ཞིང་ཆེན་གཡང་གཞི་སྟི་རར་བཅས། །དམར་གྱི་ཨརྒྷ་རྒྱ་མཚོར་འཁྱིལ། །མཁའ་འགྲོ་འབར་བའི་ཚོགས་བཅས་ཀྱིས། །མ་ལུས་བཞེས་ནས་བསྣམས་སུ་གསོལ། །ཧཱུཾ་མཉམ་པའི་གྲུབ་རྫས་ཆེན་པོ་འདི། །བདག་
དང་མཉམ་པའི་ཚོགས་ལ་འབུལ། །བཟའ་དང་བཅའ་དང་བཏུང་དང་བགོ །ལོངས་སྤྱོད་ལྔར་ལྡན་མཆོད་པ་འདི། །དཀྱིལ་འཁོར་ལ་ནི་དཀྱིལ་འཁོར་ཐིམ། །མཆོད་པ་དམ་པ་བཞེས་སུ་གསོལ། །ཁཱ་ཧི་མ་ཧཱ་མཱཾ་ས་ཁཱ་ཧི། མ་ཧཱ་རགྟ་ཁཱ་ཧི། དེ་ནས་འཁྲིལ་ཏེ་སྙོམས་ཞུགས་པས། །དགྱེས་
མཉམ་མཆོག་གི་མཆོད་པར་རོལ། །མི་དམིགས་ཐུགས་ཀྱི་མཆོད་པ་འདི། །རྡོ་རྗེ་སེམས་དཔའ་ཉིད་ཀྱི་ངང་། །དེ་ནས་ཕྱི་རོལ་འཐོན་པ་ལས། །མ་མོ་རྣམས་ཀྱི་བསྟོད་པ་ནི། །ཧཱུཾ་གཏུམ་ཆེན་དུས་མཐའི་མེ་ལྟར་འབར། །འོད་ཟེར་ཉི་མ་འབུམ་གྱི་གཟི། །ཁྲོ་གཉེར་གློག་སྟོང་འགྱུ་བ་བཞིན། །
མཆེ་བ་ཟང་ཡག་ཟ་བྱེད་ཆེ་ཧོ། །ཧཱུཾ་རྔམ་པའི་ང་རོ་འབྲུག་སྟོང་དི་རི་རི། །ཐུག་ཆེམ་རི་རབ་འབུམ་སྙིལ་སྐད། །ཧ་ཧ་ཧ་ལ་གད་རྒྱངས་ཆེ། །དབྱུག་པ་འཁོར་ལོ་གཡེང་བ་ཆེ་ཧོ། །ཧཱུཾ་ཁྲོ་བོ་ཤེས་རབ་འོད་པོ་ཆེ། །ཡེ་ཤེས་དཀྱིལ་འཁོར་ཀུན་ལ་གསལ། །འབར་བའི་ཡེ་ཤེས་ཀུན་ལ་འཇོམས། །སྣ་ཚོགས་
ཡེ་ཤེས་ཐིག་ལེ་ཆེ་ཧོ། །ཧཱུཾ་ཁྲོ་བོ་རྒྱལ་པོ་སྤྲིན་ཆེན་པོ། །ཁྲོས་པའི་དཀྱིལ་འཁོར་ཆར་ཆེན་འབེབས། །དཀྱིལ་འཁོར་ཡིད་བཞིན་འབྱུང་བའི་གཏེར། །སྣ་ཚོགས་ཁྲོས་པའི་ཐིག་ལེ་ཆེ་ཧོ། །ཧཱུཾ་བདུད་ཀུན་གྱི་ནི་བདུད་ཆེན་པོ། །བདུད་ཀྱི་བདུད་དེ་བདུད་རྣམས་འཇོམས། །འཇིགས་པའི་ཚོགས་ཀྱང་
འཇིགས་པར་བྱེད། །འཇིགས་བྱེད་ཆེན་པོ་ཐིག་ལེ་ཆེ་ཧོ། །ཧཱུཾ་རྡོ་རྗེ་བྲག་ཆེན་སྲ་བ་ཆེ། །རྡོ་རྗེ་ཆུ་བོ་སྡུད་ཆེན་པོ། །རྡོ་རྗེ་མེ་སྟེ་ཀུན་འབར་ཆེ། །རྡོ་རྗེ་རླུང་འཐོར་གཡེང་བ་ཆེ་ཧོ། །ཧཱུཾ་སྒེག་པ་དཔའ་བ་འཇིགས་སུ་རུང་བ་དང་། །རྒོད་དང་གཤེ་དང་འཇིགས་པར་བྱེད་པ་དང་། །སྙིང་རྗེ་རྔམ་དང་ཞི་བ་ལ་སོགས་
པ། །སྐུ་ཡི་དངོས་པོ་ཤིན་ཏུ་བསྒྱུར་བ་ཡིན། །གར་གྱི་ཕྱག་རྒྱ་འབར་བའི་དབང་ཕྱུག་གནོན། །ཧྲཱི་མྱོས་བྱེད་སྟོང་པས་ལྷག་པར་འདོད་པའི་གཟུགས། །གདུལ་བའི་དབང་གིས་གཤིན་རྗེ་སྟོང་པས་ལྷག་པར་འཇིགས་ཚུལ་སྟོན། །ཞི་བའི་སྐུར་ཡང་ཚངས་པ་སྟོང་པས་ལྷག་པར་སྟོན། །ཐམས་ཅད་

དཀྱིལ་འཁོར་གསུམ་དུ་སྣང་བར་མཛོད། །ཧྲཱི་རྣམ་པར་འདུལ་བའི་ངོ་འཐོན་ཐབས་ཀྱིས་ནོན་པས་གནོན། །ཧོ་ཧོ་ཧ་ཧ་ཧེ་ཧེ་ཧི་ཧི། དགྱེས་པའི་གད་མོ་ཁོང་། དབང་ཕྱུག་ཐམས་ཅད་རབ་བཤིག་རབ་ཏུ་བཤིག །རབ་ཀྱི་རྩལ་གྱིས་ངོ་མཚར་རྨད་བྱུང་བ། །རྟོག་པ་མང་པོ་རྒྱུན་གྱི་གདུལ་བྱ་མ་ལུས་པ། །ཡེ་
ཤེས་སྒྱུ་མ་མ་འདྲེས་ཡོངས་སུ་རྫོགས་པར་བསྟོད། །དེ་རྗེས་སྔོན་གྱི་གནས་སུ་བཞུགས་ཐིམ་ནས། །རང་གི་ཕྱག་རྒྱའི་ང་རྒྱལ་ནི། །སྔོན་དུ་གསུངས་པའི་ཁྲོ་བོའམ། །ཡང་ན་སྤྱན་རས་གཟིགས་སྤྲུལ་པའི། །ཁྲོ་བོ་འབར་བ་དབུ་དགུ་པ། །ཕྱག་ནི་བཅོ་བརྒྱད་ལྟ་བུ་ཡི། །སྙིང་གར་དྲག་པོའི་འཁོར་ལོ་
བསམ། །རུ་ལུ་རྩ་བའི་སྔགས་དག་ནི། །འབུམ་མམ་བྱེ་བའི་བར་དུ་བཟླས། །ཕྱག་རྒྱ་དངོས་གྲུབ་དཀྱིལ་འཁོར་རོ། །ཐུན་མཚམས་མཉམ་པར་གཞག་པ་དང་། །རང་གི་ནོར་བུ་རིན་པོ་ཆེ། །ཡོད་པར་མ་ཤེས་སྟོར་བར་དྲན། །ཚོལ་བར་འདོད་ན་འདི་ལྟར་བསམ། །བྱང་ཆུབ་སེམས་ཀྱི་དཀྱིལ་
འཁོར་ནི། །ཆོས་འཛིན་རིགས་ཀྱི་གྲུབ་གནས་སུ། །ཐུགས་རྗེས་ས་ལ་མངོན་སྤྲུལ་གཤེགས། །བྱང་ཆུབ་སེམས་ཀྱི་དཀྱིལ་འཁོར་མཆོག །བྱམས་མགོན་དམ་པ་ཞིག་གིས་བསྟན། །ཨེ་མ་ཁྱེད་ཀྱིས་མ་ཤེས་སམ། །མཐུན་ཡུན་ཀུན་དུ་བདེ་བ་ཡིན། །སྒྲོན་མེས་མུན་ཁུང་གསེར་ཚོལ་ལྟར། །གསང་
བའི་སྙིང་པོ་མཛོད་བརྟོལ་ཏེ། །ཐིག་ལེ་གཅིག་གིས་ཀུན་ལ་ཁྱབ། །ཐམས་ཅད་ལུང་ཆེན་ངེས་པར་བསྟན། །འཇིག་རྟེན་གཡོ་རྡུལ་མི་ཡི་རང་བཞིན་རྣམས། །འབར་བ་ལྔ་བཅུའི་ཁྲོ་བོ་ངང་དུ་སྣང་། །མྱ་ངན་འདས་དང་འཁོར་བའི་རང་བཞིན་རྣམས། །བཙལ་མེད་མ་བཅོས་དེ་ཉིད་རྣམ་དག་
ནས། །ཐིག་ལེ་ཉུངས་ཀར་ཙམ་ཞིག་གསལ་བར་བསྒོམ། །དེ་ལས་འོད་ཟེར་རྡུལ་སྙེད་སྤྲོས། །མུན་གསལ་དངོས་པོ་ཀུན་སྦྱངས་ཏེ། །ཐམས་ཅད་མ་བཅོས་སྐུ་རུ་གསལ། །སླར་འདུས་ཐིག་ལེ་ལ་ཐིམ་ནས། །འོད་དུ་ཞུ་ནས་རིམ་གྱིས་བསྡུས། །རྡོ་རྗེ་སེམས་དཔའི་སྙིང་གི་ནང་། །ཨ་གཟུགས་
པདྨ་འདབ་བཞིར་གནས། །དེ་སྟེང་གསང་བ་ནང་གནས་ས་རླུང་དང་། །སྙིང་ག་ནང་གནས་ཆུ་རླུང་གཉིས། །རྣམ་པར་དགེ་ལས་ཟླ་བ་སྟེ། །རྡོ་རྗེ་རིན་ཆེན་གཉིས་རང་བཞིན། །དེ་སྟེང་རྡོ་རྗེ་སེམས་དཔའ་ནི། །ཐིག་ལེ་འོད་ཟེར་ལྔ་ལྡན་པས། །དེ་སྟེང་མགྲིན་གནས་མེ་རླུང་དག །མགོ་བོའི་ནང་

གནས་རླུང་དཀྱིལ་གཉིས། །དག་པས་ཉི་མའི་དཀྱིལ་འཁོར་སྟེང་། །པདྨའི་རིགས་དང་ལས་རིགས་སོ། །ཁ་སྦྱར་དབུས་སུ་ཐིག་ལེ་བསམ། །ཡང་དང་ཡང་དུ་འདྲིས་བསམས་པས། །ཡར་འགྲོ་མར་འགྲོ་གཉིས་འགོག་གོ། །འགོག་པ་བཞིན་དུ་མཚན་མ་སྟེ། །ལཾ་སྐྱེ་འགག་
མེད་པའི་ཆོས་ཉིད་ཀྱི་རྣམ་པར་སྣང་བའི་སྒོའོ། །མཾ་མི་ཟད་པ་ཆོས་ཉིད་རྣམ་པར་སྣང་བའི་སྒོའོ། །པཾ་གཉིས་སྐྱོན་མེད་པ་ཆོས་ཉིད་རྣམ་པར་སྣང་བའི་སྒོའོ། །ཏཾ་ཐོགས་པ་མེད་པ་ཆོས་ཉིད་རྣམ་པར་སྣང་བའི་སྒོའོ། །མུཾ་བརྗོད་པ་ལས་འདས་པའི་ཆོས་ཉིད་རྣམ་པར་སྣང་བའི་སྒོའོ། །ཧཱུཾ་མི་གཡོ་བའི་ཆོས་
ཉིད་ཡོངས་སུ་སྣང་བའི་སྒོའོ། །ཨོཾ་ཅིར་ཡང་སྣང་བའི་ཆོས་ཉིད་རྣམ་པར་སྣང་བའི་སྒོའོ། །ས་ནི་ཆུ་ལ་ཐིམ་པས་ནི། །ཀུན་དུ་མཉམ་བྲོས་ཟག་མེད་པའི། །ལས་ཀྱི་ཡེ་ཤེས་དང་པོར་སྐྱེ། །ཆུ་ནི་མེ་ལ་ཐིམ་པས་ན། །སེམས་ལ་དབང་ཐོབ་དུ་བ་འདྲ། །མེ་ནི་རླུང་ལ་ཐིམ་པས་ན། །ཏིང་འཛིན་འབའ་
ཞིག་ལྡན་པ་སྟེ། །རླུང་གི་རྣམ་པ་ལྟ་བུར་མཐོང་། །རླུང་ནི་རྣམ་པར་རིག་པ་ལ། །ཐིམ་པས་འདོད་པ་རྣམས་བྲལ་ཏེ། །མར་མེ་ལྟ་བུར་མཐོང་བའོ། །རྣམ་པར་རིག་པའི་འོད་གསལ་ལ། །ཐིམ་པ་ཐམས་ཅད་སྣང་བ་ནི། །ཕྱི་ནང་མུན་པ་ཐམས་ཅད་སྦྱངས། །ནམ་མཁའ་ལྟ་བུར་མཐོང་བའོ། །ཨེ་
མའོ་དངོས་པོ་མེད་པ་ལས། །སྨོན་དང་སྙིང་རྗེའི་དབང་གིས་ནི། །ཇི་ལྟར་སྣང་བ་མ་བཀག་པའོ། །འདུན་པའི་དུས་ན་རིགས་ཀྱི་བུ། །ཡིད་ལ་བྱེད་པ་ཞེས་ཐོབ་སྟེ། །སེམས་གསུམ་བསྐྱེད་ཅིང་མཐའ་བཅུ་གྲོལ། །བརྟེན་པས་གཞི་ཡི་ས་པར་གནས། །རིགས་ཆེན་འབྱེད་པའི་རྣལ་འབྱོར་ལ། །འཕྲོ་
འདུ་གཅིག་པའི་ཏིང་འཛིན་ཐོབ། །སེམས་བཞི་རྫོགས་ཏེ་མཐའ་བཅུ་ཤེས། །བདག་ཉིད་ཡི་གེའི་ཕྲེང་བར་ནི། །སྣང་བའི་ལྟས་མཐོང་བསོད་ནམས་གཏེར། །དབུགས་ཆེན་འབྱིན་པའི་རྣལ་འབྱོར་ལ། །སེམས་གཅིག་རྫོགས་ཏེ་མཐའ་ཆུབ་ནས། །འཇིགས་པ་ལྔ་ཡང་ཁྱད་པར་ས། །ཡོངས་སུ་
མི་ལྡོག་ཏིང་འཛིན་ས། །འཇིག་རྟེན་ནོར་བུ་རིན་ཆེན་གྱིས། །གང་བར་སྤྱོད་པའི་ལྟས་མཐོང་འགྱུར། །སྒྱུ་མ་སྦྱོར་བའི་སྐྱེས་བུ་སྟེ། །འཁོར་ལོས་སྒྱུར་བའི་ཆ་བྱད་དུ། །རིན་ཆེན་བདུན་དང་དཔུང་ཚོགས་ཀྱིས། །དབང་བསྒྱུར་ཐབས་ཀྱི་ཐེག་པ་སྟོན། །ལུང་ཆེན་ཐོབ་པའི་སྐབས་སུ་ནི། །སེང་གེ་དག་ལ་

ཞོན་ནས་ནི། །ཐམས་ཅད་གནོན་པའི་ལྟས་མཐོང་འགྱུར། །སེམས་བདུན་རྫོགས་པའི་ས་པར་གནས། །འབྲས་བུ་ཉིད་ལ་ལམ་ཤེས་པས། །ལམ་གྱི་ཡན་ལག་བདེ་རྫོགས་ཏེ། །གཞན་དག་སྨིན་པར་བྱ་བའི་ཕྱིར། །ཇི་ལྟར་འདོད་ལྟར་ཐབས་མཆོག་སྦྱོར། །རྩལ་ཆེན་རྫོགས་པའི་སྐབས་སུ་ནི། །
ཀུན་སྣང་ཏིང་འཛིན་ཉིད་ཐོབ་སྟེ། །དེས་ནི་ཉི་ཟླའི་ཆ་བསྐོར་བས། །ཐབས་དང་གསལ་བར་བྱེད་ལྟས་མཐོང་། །སེམས་གསུམ་བསྐྱེད་ཅིང་མཐའ་དྲུག་ཆུབ། །གདེང་དུ་གྱུར་པའི་ངོ་བོ་ལས། །དེ་ནས་རྒྱལ་མཚན་སྐྱེས་བུ་དེ། །ཆོས་ཀྱི་རྒྱལ་པོ་གང་དེ་ཡི། །གདུང་འཚོབ་དགའ་ལྡན་ཐེག་ཆེན་སྟོན། །
མི་གནས་བཅུ་དུས་ཆོ་འཕྲུལ་སྣང་། །བཤེས་གཉེན་དམ་པས་བཀའ་སྩལ་པ། །ས་བཅུ་པ་ལ་གནས་པ་ཡང་། །ཆོས་ཉིད་དུ་འཇོག་སྤྱོད་པར་བྱེད། །མི་རྟོག་ངང་དུ་མི་གནས་ཏེ། །རྫོགས་པའི་སངས་རྒྱས་མི་བྱེད་དོ། །ཨེ་མ་སྐྱེས་བུ་དམ་པ་ཀློང་། །གང་གིས་ངོ་བོ་ཅི་ཕྱིར་ལགས། །སྐྱེས་བུ་
དམ་པས་བཀའ་སྩལ་པ། །གསང་སྔགས་དངོས་པོ་བརྒྱད་ཀྱིས་བཅིངས། །མཉམ་པར་མ་བཞག་བར་དུ་ནི། །སངས་རྒྱས་དགོངས་པ་མྱོང་མ་ཡིན། །སྐྱེས་བུ་དམ་པ་ཁྱོད་ཅི་གུ། །གང་ཞིག་མོས་པ་སུ་ཞིག་གིས། །ཇི་ལྟར་གྲོལ་འགྱུར་ངོ་བོ་ཅི། །སྐྱེས་བུ་དམ་པས་བཀའ་སྩལ་པ། །གྲོལ་བར་
འདོད་པས་བླ་མ་བསྟེན། །རིགས་པ་རང་བྱུང་རང་བཞིན་ནི། །བྱང་ཆུབ་སེམས་ཀྱི་དཀྱིལ་འཁོར་རོ། །བསོད་ནམས་ཚོགས་ཀྱི་དཀྱིལ་འཁོར་ནི། །ཞིང་ཁམས་རིན་ཆེན་ཡོད་པ་ན། །རྒྱལ་བ་ཀུན་དུ་བཟང་པོ་ཡི། །སྲས་མཆོག་འཇམ་དཔལ་ཆེན་པོ་ལ། །ཇི་ལྟར་རིམ་གྱིས་བརྒྱུད་པ་བཞིན། །དེ་
བཞིན་འབྱོར་པའི་ཡོ་བྱད་ལ། །རྣམ་གསུམ་ཚུལ་དུ་ནན་ཏན་བྱ། །བསོད་ནམས་ཚོགས་ཀྱི་དཀྱིལ་འཁོར་རོ། །བཀའ་སྟོད་ཕོ་ཉའི་དཀྱིལ་འཁོར་ནི། །སངས་རྒྱས་མི་བསྐྱོད་པ་ཡི་ནི། །ཞིང་ཁམས་མངོན་པར་དགའ་བ་ན། །རྒྱལ་ཚབ་སྐྱེས་བུ་ཀུན་གྱིས་གསུངས། །དེ་ཡི་གདམས་ངག་མདོར་བཀོད་
པའོ། །རྟགས་དང་རྟེན་ནི་གཞུང་ལྟར་བཤམ། །དུར་ཁྲོད་ཆེན་པོ་རབ་འཇིགས་པའི། །མཚོ་ནི་རྐོང་རྐང་ཐང་དམར་ན། །རི་ནི་བྱིན་ལག་མཆོངས་ཀྱི་རྩེ། །སྟེང་ན་འདབ་ཆགས་རྒྱལ་པོ་གནས། །ཀེང་རུས་ཐོད་པ་མཁར་དུ་བརྩིགས། །རུ་ལས་ཚོགས་བདག་བསྐྱེད་ནས་ནི། །ཉེ་གནས་ཀྲོ་ཏི་ཤྭ་

རི་མ། །རང་གི་འཁོར་ཚོགས་ལྡན་པ་བསྐྱེད། །དེ་ནས་དཔའ་བོ་ཆེན་པོ་ཡི། །རུ་ལུ་ཧཱུཾ་གི་འོད་ཟེར་སྤྲོས། །དྲག་པོའི་གནས་ནས་གདུག་པ་དགུག །ཞལ་དུ་རྔུབས་ཏེ་སྣ་ནས་བཏོན། །གཞོན་ནུ་སྨེ་བརྩེགས་ཞེས་གྱུར་ཏེ། །བསྐྱེད་དང་གཉིས་སུ་མེད་པར་བྱས། །དེ་ལ་མིང་
དང་མཚན་བཏགས་པ། །གང་གི་རྒྱལ་པོ་ཞེས་ཀྱང་བྱ། །ལྷ་ཆེན་ལེགས་ལྡན་ནག་པོ་སྟེ། །ལྷ་ཡི་སྡེ་དཔོན་ཀ་རུ་ན། །ཚོགས་བདག་ཆེན་པོ་བདུད་ཀྱི་རྗེ། །དགེ་སློང་ཐར་པ་ནག་པོ་ཡིན། །ཚོགས་བདག་ཆེན་པོ་དེ་གསོལ་ལ། །དཔའ་བོ་ཆེན་པོ་གཤེགས་སུ་གསོལ། །བདག་ཅག་སྐལ་ལྡན་
འདུས་པའི་ཚོགས། །སྒོ་འདིར་འཇུག་པར་འཚལ་ལགས་ན། །རྒྱལ་བའི་སྲས་སུ་གཟུང་དུ་གསོལ། །དཔའ་བོ་ཆེན་པོས་བཀའ་སྩལ་པ། །ཧཱུཾ་ཧཱུཾ་ཧཱུཾ་བི་ཤྭ་བཛྲ་ཀྲོ་ཏ་བཛྲ་མཎྜལ་ཕཊ། ཏ་ཀེཾ་ཏ་ཀེཾ་ཕཊ། ཧ་ལ་ཧ་རཾ། ཏིག་སྣ་ཏིག་སྣ་ཁཾ། ཀྲོ་ཏ་ཀྲོ་ཏ་ཡཾ། ཨོཾ་ཧཱུཾ་མུཾ། སྐལ་ལྡན་འདུས་པའི་ཚོགས་
ཆེན་ཁྱེད། །བདེ་བར་འོངས་སོ་ལེགས་པར་འོངས། །གྲུབ་པའི་རླུང་སྒོ་གསང་སྒོ་འདིར། །སུ་དག་འོངས་པ་སླར་མི་ལྡོག །ཚོགས་བད