Luận tạng Tây Tạng (Tengyur) — Tập 77

འཚལ་བ་དང་། བསྟོད་པ་དང་། སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་།
ཡོངས་སུ་བསྔོ་བ་དང་། གསུམ་ལ་སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པ་དང་། ལམ་ལ་བརྟེན་པ་ལ་སོགས་པ་བྱས་ཏེ། ཚད་མེད་པའི་གནས་བཞི་བསྒོམས་ནས། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་པས་སྟོང་པ་ཉིད་ཀྱི་ཏིང་ངེ་འཛིན་ལ་དམིགས་ནས། དེ་
ནས་ཉི་མའི་དཀྱིལ་འཁོར་ལ་ཨོཾ་ཡིག་ལས་སྐྱེས་པའི་རྣམ་པར་སྣང་མཛད་སེང་གེའི་གདན་ལ་བཞུགས་པ་སྐུ་མདོག་དཀར་པོ་རལ་པའི་ཅོད་པན་བཅིངས་པ་བྱང་ཆུབ་མཆོག་གི་ཕྱག་རྒྱ་མཛད་པ་ཞི་བ་རྒྱན་ཐམས་ཅད་ཀྱིས་བརྒྱན་པའོ། །དེའི་ཐུགས་ཀར་ཟླ་བ་ལ་ཡི་གེ་ཉི་ཤུ་རྩ་ལྔས་ཡོངས་སུ་བསྐོར་
བའི་མཾ་ཡིག་གི་ས་བོན་ཡོངས་སུ་གྱུར་པ་ལས་སྐྱེས་པའི་མྱ་ངན་མེད་པའི་ཡལ་ག །དེའི་སྟེང་དུ་ཟླ་བ་ལ་མཾ་ཡིག་གི་ས་བོན་དེ་ཐམས་ཅད་ཡོངས་སུ་གྱུར་པ་ལས་ཇི་ལྟར་གསུངས་པའི་སྐུ་མདོག་དང་ཕྱག་ལ་སོགས་པའི་མཚན་ཉིད་ཅན་འོད་ཟེར་ཅན་གྱི་སྐུའི་བདག་ཉིད་དུ་སྐད་ཅིག་གིས་བསམས་
ནས། ཨོཾ་མཱ་རཱི་ཙྱཻ་བཏྟཱ་ལི་བ་དཱ་ལི་བ་རཱ་ལི་བཱ་རཱ་ཧཱ་མུ་ཁི་ཨཱ་ཀཪྵ་ཡ་ཛཿསྭཱ་ཧཱ། ཞེས་པ་འདིས་བཏྟཱ་ལི་ཤར་གྱི་ཕྱོགས་སུ་དགོད་པར་བྱའོ། །དེ་བཞིན་དུ་ཨོཾ་མཱ་རཱི་ཙྱཻ་བཏྟཱ་ལི་བ་དཱ་ལི་བ་རཱ་ལི་བཱ་རཱ་ཧཱ་མུ་ཁི་སརྦ་དུཥྚཱ་པྲ་དུཥྚཱ་ནཾ་མུ་ཁཾ་བནྡྷ་བནྡྷ་ཧཱུཾ་སྭཱ་ཧཱ། ཞེས་པས་ལྷོ་ཕྱོགས་སུ་བ་དཱ་ལིའོ། །དེ་

བཞིན་དུ་ཨོཾ་མཱ་རཱི་ཙྱཻ་བཏྟཱ་ལི་བ་དཱ་ལི་བ་རཱ་ལི་བཱ་རཱ་ཧཱ་མུ་ཁི་སརྦ་དུཥྚཱ་ནཾ་མུ་ཁཾ་སྟཾ་བྷ་ཡ་བཾ་སྭཱ་ཧཱ་ཞེས་པས་ནུབ་ཏུ་བ་རཱ་ལིའོ། །དེ་བཞིན་དུ་ཨོཾ་མཱ་རཱི་ཙྱཻ་བཏྟཱ་ལི་བ་དཱ་ལི་བ་རཱ་ལི་བཱ་རཱ་ཧཱ་མུ་ཁི་སརྦ་སཏྭཱ་བ་ཤ་མ་ནཱ་ཡ་ཧོཿསྭཱ་ཧཱ་ཞེས་པ་འདིས་བྱང་དུ་བཱ་རཱ་ཧཱ་མུ་ཁིའོ་ཞེས་སོ། །ཨོཾ་མཱ་རཱི་ཙྱཻ་མཱཾ་ཧཱུཾ་ཧཱུཾ་
ཕཊ་སྭཱ་ཧཱ་ཞེས་པ་ནི་བསྒོམས་པའི་རྗེས་ལ་བཟླས་པར་བྱའོ། །དེ་བཞིན་དུ་ཐུན་མཚམས་གསུམ་དུ་བྱིན་གྱིས་བརླབས་ནས་ལྷའི་རྣལ་འབྱོར་གྱིས་གནས་པར་བྱའོ། །རྟོག་པ་ལས་གསུངས་པའི་འོད་ཟེར་ཅན་གྱི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། ཀལྤོཀྟ་བིདྷི་ནཱ་སཱི་ཏ་མཱ་རཱི་ཙྱཻ་སཱ་དྷ་ནཾ། བོད་སྐད་
དུ། རྟོག་པ་ལས་གསུངས་པའི་ཆོ་ག་འོད་ཟེར་ཅན་དཀར་མོའི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །དང་པོ་རེ་ཞིག་རང་གི་སྙིང་གར་ཟླ་བ་ལ་མཾ་ཡིག་དཀར་པོའི་འོད་ཟེར་གྱིས་བཅོམ་ལྡན་འདས་མ་གདན་དྲངས་ཏེ་ཉེ་བར་སྤྱོད་པ་སྣ་ཚོགས་པས་མཆོད་ནས་སྡིག་པ་བཤགས་པ་ལ་
སོགས་པ་བྱས་ནས་ཚད་མེད་པའི་གནས་བཞི་བསྒོམས་ཏེ་ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་བརྗོད་ནས་བཾ་ཡིག་ལས་སྐྱེས་པའི་སྣ་ཚོགས་པདྨའི་སྟེང་དུ་ཟླ་བའི་དཀྱིལ་འཁོར་ལ་སླར་ཡང་མཾ་ཡིག་དཀར་པོ་ཡོངས་སུ་གྱུར་པ་ལས་འོད་ཟེར་ཅན་ཀུན་ད་དང་ཟླ་བའི་འོད་ལྟ་བུ་ཞལ་ལྔ་པ། ཕྱག་
བཅུ་པ། ཞབས་བཞི་པའི་བདག་ཉིད་དུ་སྐད་ཅིག་གིས་བསམ་པར་བྱའོ། །དེ་ལ་ཞལ་གྱི་གཙོ་བོ་སྐུའི་མདོག་ལྟ་བུ། ཞལ་གཡས་པ་ནག་པོ། ཞལ་གཡོན་པ་ཕག་ཞལ་དམར་པོ། རྒྱབ་ཞལ་ལྗང་གུ། དབུའི་སྟེང་དུ་ཞལ་སེར་པོ་རིན་པོ་ཆེ་སྣ་ཚོགས་པས་བརྒྱན་པའི་ཟུར་ཕུད་གསུམ་པ་
རལ་པའི་ཅོད་པན་ཅན། ཕྱག་གཡས་པ་ལྔ་རྣམས་ན་ཉི་མའི་དཀྱིལ་འཁོར་དང་། རྡོ་རྗེ་སྔོན་པོ་དང་། མདའ་དང་། ལྕགས་ཀྱུ་དང་། ཁབ་རྣམས་ཕྱག་ན་བསྣམས་པའོ། །ཕྱག་གཡོན་པ་ལྔ་རྣམས་ན། ཟླ་བའི་དཀྱིལ་འཁོར་དང་གཞུ་དང་། མྱ་ངན་མེད་པའི་ཤིང་གི་ཡལ་ག་དང་། ཞགས་པ་
དང་བཅས་པའི་སྡིགས་མཛུབ་དང་། སྐུད་པ་རྣམས་ཕྱག་ན་བསྣམས་པའོ། །རིན་པོ་ཆེ་སྣ་ཚོགས་པས་བརྒྱན་པའི་རྣ་རྒྱན་དང་། དཔུང་རྒྱན་དང་། གཙུག་ཕུད་དང་། དྲིལ་བུ་གཡེར་ཀའི་དྲ་བའི་སྐ་རགས་དང་། གོས་ཀྱིས་སྐུ་ལ་བརྒྱན་པ། ལང་ཚོ་གཞོན་ཞིང་ཤ་འགག་གི་སྟོད་གཡོགས་དཀར་པོ་ཅན།

མཆོད་རྟེན་གྱི་ནང་དུ་བཞུགས་ཤིང་ཕག་བདུན་གྱི་ཤིང་རྟ་ལ་བཞུགས་པ། ཁྱབ་འཇུག་དང་། དབང་པོ་དང་། བདེ་བྱེད་དང་། ཚངས་པ་རྣམས་ཞབས་བཞིས་མནན་པ། དེའི་ཡང་ཤིང་རྟའི་དབུས་སུ་གནས་པའི་ཆུ་སྲིན་མནན་པའི་བཅོམ་ལྡན་འདས་མ་དེ་ཡང་སྐུ་མདོག་ནག་མོ་ཕག་གི་ཞལ་ཅན་མ། རྡོ་རྗེ་
དང་། སྡིགས་མཛུབ་དག་གིས་གཡས་དང་། གཡོན་པའི་ཕྱག་དག་ནའོ། །གཡས་ཕྱོགས་ན་བཅོམ་ལྡན་འདས་མ་གཞན་ཏེ། དེ་ཡང་ཕག་ཞལ་དམར་མོ་ཕྱག་བཞི་པ་ལྕགས་ཀྱུ་དང་། ཁབ་དག་ཕྱག་གཡས་པ་གཉིས་ནའོ། །ཞགས་པ་དང་བཅས་པའི་སྡིགས་མཛུབ་དང་། སྐུད་པ་དག་ཕྱག་གཡོན་པ་
གཉིས་ནའོ། །མཛེས་པའི་རྒྱན་གྱིས་བརྒྱན་པའོ་ཞེས་སོ། །གཡོན་ཕྱོགས་ན་རྗེ་བཙུན་མ་གཞན་ཏེ། དེ་ཡང་སྐུ་མདོག་དམར་མོ་ཕག་པའི་ཞལ་ཅན་ནོ། །རྣ་བའི་རྩར་བཀང་བའི་གཞུ་དང་། མདའ་དང་། རྡོ་རྗེ་དང་། མྱ་ངན་མེད་པའི་ཤིང་གི་ཡལ་ག་རྣམས་གཡས་དང་གཡོན་གྱི་ཕྱག་ན་བསྣམས་པའོ། །སྣ་
ཚོགས་པའི་ན་བཟས་བརྒྱན་པའོ་ཞེས་ཏེ། ཤིང་རྟ་འདྲེན་པའི་ཕག་གི་འོག་ན་ཉི་མ་ལ་སོགས་པའི་གཟའ་དགུ་དང་ཉེ་བར་འཚེ་བའི་ནད་ཀྱི་ཚོགས་ལྷུང་ནས་མི་གཟུགས་ཀྱི་ཞི་ཞིང་དེ་ལྟ་བུའི་བཅོམ་ལྡན་འདས་མ་བསམས་ནས། སྙིང་གར་ཟླ་བ་ལ་མཾ་ཡིག་ལས་བྱུང་བའི་འོད་ཟེར་རྣམས་ཀྱིས་དེ་བཞིན་གཤེགས་
པ་རྣམས་གདན་དྲངས་ཏེ། དབང་བསྐུར་བླངས་ཤིང་། རྣམ་པར་སྣང་མཛད་ཀྱིས་དབུ་བརྒྱན་པའོ། །དེ་ནས་སྙིང་གའི་ས་བོན་ལས་ཕྲེང་བའི་རྣམ་པ་ལྟ་བུའི་སྔགས་ཀྱི་ཡི་གེ་རྣམས་ཁ་ནས་འཐོན་ནས་ལྟེ་བ། ལྟེ་བ་ནས་ཁ། ཁ་ནས་སླར་ཡང་ལྟེ་བ་ལ་སོགས་པར་འཁོར་ལོ་
འཁོར་བའི་རིམ་པ་བཞིན་དུ་སྔགས་བཟླས་པར་བྱའོ། །མཐར་གསུམ་གྱི་དེ་བཞིན་ཉིད་ཀྱང་ཡིད་ཀྱིས་བྱའོ། །དེ་ལ་སྔགས་ནི་འདི་ཡིན་ཏེ། ཨོཾ་མཱ་རཱི་ཙྱཻ་མཱཾ་ཧཱུཾ་ཕཊ་སྭཱ་ཧཱ། རང་གི་ས་བོན་གྱིས་བྱིན་གྱིས་བརླབས་ལ་ཟས་ལ་སོགས་པ་ཐམས་ཅད་ལ་རྗེས་སུ་གནས་པར་བྱའོ། །སྐྱོ་ན་ཡི་གེ་བརྒྱ་པའི་
སྔགས་བརྗོད་ལ་ཅི་བདེར་གནས་པར་བྱའོ། །ཞེས་སོ། །རྟོག་པ་ལས་གསུངས་པའི་ཆོ་ག་འོད་ཟེར་ཅན་དཀར་མོའི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། བཛྲ་དྷཱ་ཏྭཱི་ཤྭ་རཱི་མཱ་རཱི་ཙྱཻ་སཱ་དྷ་ནཾ། བོད་སྐད་དུ། རྡོ་རྗེ་དབྱིངས་ཀྱི་དབང་ཕྱུག་མ་འོད་ཟེར་ཅན་གྱི་སྒྲུབ་ཐབས། འཕགས་

མ་འོད་ཟེར་ཅན་ལ་ཕྱག་འཚལ་ལོ། །ཨོཾ་ཨཱཿཧཱུཾ་སྭཱ་ཧཱ་ཞེས་པས་སྤྱི་བོ་དང་དཔྲལ་བ་དང་། མགྲིན་པ་དང་། སྙིང་ག་དང་པུས་མོ་གཉིས་རྣམས་སུ་བདག་ཉིད་རྣམ་པར་བསྒོམས་ནས་ཨོཾ་ཡིག་གིས་ཐམས་ཅད་སྔོན་མ་བཞིན་དུ་རྣམ་པར་དག་པར་བརྗོད་པའོ། །མཐར་ཐུག་པའི་ཆོ་ག་
བྱས་ནས་ཨོཾ་ཡིག་ལས་སྐྱེས་པའི་རྡོ་རྗེ་དབྱིངས་ཀྱི་དབང་ཕྱུག་མ་འོད་ཟེར་ཅན་ཕྱག་བཅུ་གཉིས་པ། ཞལ་དམར་པོ་ལྟོ་བ་འཕྱང་བ། དབུ་སྐྲ་ཁམ་པ་གྱེན་དུ་འབར་ཞིང་བརྫེས་པ་ཐོད་པའི་ཕྲེང་བ་ཅན་སྦྲུལ་གྱི་སྐེ་རགས་བྱས་པ། སྟག་གི་པགས་པའི་ན་བཟའ་མནབས་པ། ཞབས་ཟུང་གིས་བགེགས་
དཔག་ཏུ་མེད་པ་མནན་པ། མཆོད་རྟེན་གྱི་ནང་ན་ཉི་མའི་དཀྱིལ་འཁོར་ལ་ཞབས་གཡོན་བརྐྱང་གིས་བཞུགས་པ། རྣམ་པར་སྣང་མཛད་ཀྱིས་མགོན་དང་བཅས་པ། སྣ་ཚོགས་པའི་ཕག་གཉིས་ཀྱིས་བཀུག་པའི་ཡིད་ཀྱིས་ཤིང་རྟ་ལ་ཞོན་པ། དམར་པོ་དང་། ནག་པོ་དང་། ལྗང་གུ་དང་། སེར་པོ་དང་། དཀར་པོ་
རྣམས་དང་པོ་ལ་སོགས་པའི་ཞལ་ལྔའོ། །སྟེང་དུ་ཕག་ཞལ་ནག་པོ་གཅིག་གོ །ཕྱག་གཡས་པ་རྣམས་ན་རལ་གྲི་དང་གཏུན་ཤིང་དང་། མདའ་དང་། ལྕགས་ཀྱུ་དང་། རྡོ་རྗེ་རྩེ་གཅིག་པ་དང་། དགྲ་སྟ་རྣམས་སོ། །ཕྱག་གཡོན་པ་རྣམས་ན་ཞགས་པ་དང་བཅས་པའི་སྡིགས་མཛུབ་དང་། ཐོད་པ་དང་།
མྱ་ངན་མེད་པའི་ཡལ་ག་དང་། ཚངས་པའི་མགོ་བོ་དང་། གཞུ་དང་། རྩེ་གསུམ་རྣམས་བསྣམས་པའོ། །སྤྱན་གསུམ་པ། ལྗགས་བསྐྱོད་ཅིང་ཞལ་གཙིགས་པ། ཤིན་ཏུ་འཇིགས་པར་བྱེད་པ་བསམ་པར་བྱའོ། །ཤིང་རྟའི་དབུས་སུ་ཕྱག་གཉིས་པ་སྡིགས་མཛུབ་དང་མྱ་ངན་མེད་པའི་ཡལ་ག་ཕྱག་ན་
བསྣམས་པའོ། །ཤིང་རྟ་འདྲེན་པ་གཡོན་བརྐྱང་གིས་གནས་པ་འཇིགས་པར་བྱེད་པ་བསམ་པར་བྱའོ། །སྤྲོ་བ་ལ་སོགས་པ་སྔོན་དུ་འགྲོ་བས་སེམས་ཅན་གདུག་པ་ཅན་རྣམས་རེངས་པ་དང་། འཇོམས་པར་བྱེད་པའོ། །ཨོཾ་བཛྲ་དྷཱ་ཏྭཱི་ཤྭ་རཱི་སརྦ་དུཥྚཱ་སཏྭཱན་ཧ་ན་ཧ་ན། ད་ཧ་ད་ཧ། པ་ཙ་པ་ཙ་ཨོཾ་མཱ་རཱི་ཙྱཻ་ཨོཾ་
ཧཱུཾ་སྭཱ་ཧཱ་ཞེས་པའི་སྔགས་བཟླས་པར་བྱའོ། །རྡོ་རྗེ་དབྱིངས་ཀྱི་དབང་ཕྱུག་མ་འོད་ཟེར་ཅན་གྱི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། ཨཥྚ་བྷུ་ཛ་སི་ཏཱ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། འོད་ཟེར་ཅན་ཕྱག་བརྒྱད་མ་སེར་མོའི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་

ལོ། དང་པོར་རེ་ཞིག་སྔགས་པས་སྟན་བདེ་བ་ལ་ཉེ་བར་འདུག་སྟེ། གཡོན་པ་ཁྲོ་བོའི་ཁུ་ཚུར་གྱིས་སྙིང་ག་དང་། མཛོད་སྤུ་དང་། མགྲིན་པ་དང་། སྤྱི་བོ་རྣམས་སུ་ཨོཾ་ཕཊ་ཅེས་པའི་སྔགས་ཀྱིས་ཡང་དག་པར་རེག་ནས་གཡས་པ་ཁྲོ་བོའི་ཁུ་ཚུར་བསྟོད་པས་བགེགས་མེད་པར་བསམ་པར་བྱའོ། །
དེ་ནས་ཁ་བསང་བ་ལ་སོགས་པ་བྱས་ནས་སླར་ཡང་ཉེ་བར་གནས་ཏེ། རང་གི་སྙིང་གར་མཚན་མོ་དང་ཉིན་མོའི་དབྱེ་བས་ཨ་ཡིག་དང་ཨ་ཡིག་རྫོགས་པ་ལས་ཟླ་བ་དང་ཉི་མར་བལྟས་ལ། དེའི་སྟེང་དུ་ཨོཾ་ཡིག་སེར་པོའི་རྣམ་པར་བསྒོམས་ལ་དེའི་འོད་ཟེར་ལས་སྐྱེས་པའི་བཅོམ་ལྡན་འདས་མ་
མདུན་དུ་བལྟས་ཏེ། ཇི་ལྟར་རྙེད་པའི་མེ་ཏོག་ལ་སོགས་པ་རྣམས་ཀྱིས་ཡང་དག་པར་མཆོད་ནས་དེའི་མདུན་དུ་སྡིག་པ་བཤགས་པ་ལ་སོགས་པ་བྱས་ནས་ཐམས་ཅད་སྟོང་པ་ཉིད་དུ་བསྒོམ་པར་བྱའོ། །དེ་ནས་ཨོཾ་སྭ་བྷཱ་བ་ཤུདྡྷཱསྶརྦ་དྷརྨཱཿསྭ་བྷཱ་བ་ཤུདྡྷོ྅ཧཾ་ཞེས་བརྗོད་པར་བྱའོ། །དེ་ནས་ཨོཾ་
ཡིག་ཡོངས་སུ་གྱུར་པ་ལས་འཁོར་ལོ་རྩིབས་བརྒྱད་པའོ། །དེའི་དབུས་སུ་གནས་པའི་ཨོཾ་ཡིག་ཡོངས་སུ་གྱུར་པ་ལས་བདག་ཉིད་རྣམ་པར་སྣང་མཛད་སྐུ་མདོག་སེར་པོ་རལ་པའི་ཅོད་པན་བསྣམས་པ། ཞི་བ་པདྨའི་སྙིང་པོའི་སེང་གེའི་གདན་ལ་རྡོ་རྗེ་སྐྱིལ་ཀྲུང་གིས་བཞུགས་པ་རྒྱན་ཐམས་ཅད་
ཀྱིས་བརྒྱན་པ། བྱང་ཆུབ་མཆོག་གི་ཕྱག་རྒྱ་མཛད་པར་བསམ་པར་བྱའོ། །དེའི་ཐུགས་ཀའི་ཟླ་བ་ལ་གནས་པའི་མཾ་ཡིག་ཡོངས་སུ་གྱུར་པ་ལས་མྱ་ངན་མེད་པའི་མེ་ཏོག །དེའི་སྟེང་དུ་མཾ་ཡིག །དེ་ལས་འོད་ཟེར་བྱུང་ནས་སེམས་ཅན་མ་ལུས་པའི་དོན་མཛད་ནས་དེ་ལ་དེ་བཞིན་དུ་དགུག་པ་དང་
གཞུག་པར་བྱའོ། །དེའི་མདུན་དུ་ཨོཾ་ཡིག་ཡོངས་སུ་གྱུར་པ་ལས་ཉི་མའི་དཀྱིལ་འཁོར་ལ་མཾ་ཡིག་ལས་སྐྱེས་པའི་བཅོམ་ལྡན་འདས་མ་ཕྱག་བརྒྱད་མ་འོད་ཟེར་གྱི་རང་བཞིན་ཅན་དུ་མན་ངག་གིས་བསྒོམ་པར་བྱའོ། །དེའི་རྗེས་ལ་ཨོཾ་མཾ་ཞེས་པའི་སྔགས་བརྗོད་ནས་བདག་ཉིད་མཆོད་རྟེན་གྱི་ནང་
དུ་གནས་པ་ཕག་བདུན་གྱི་ཤིང་རྟ་ལ་བཞུགས་པའི་འོད་ཟེར་ཅན་དུ་རྣམ་པར་བསྒོམ་པར་བྱའོ། །ཤིང་རྟའི་འོག་ཏུ་ཡཾ་ཡིག་ལས་སྐྱེས་པའི་རླུང་གི་དཀྱིལ་འཁོར་ལ་ཧཾ་ཡིག་ལས་སྤྲུལ་པའི་སྒྲ་གཅན་ནོ། །དེ་ལ་བཅོམ་ལྡན་འདས་མ་རིན་པོ་ཆེའི་ཅོད་པན་ཅན། ཕྱག་བརྒྱད་པ། ཞལ་གསུམ་པ། སྤྱན་

གསུམ་པ། སྐུ་མདོག་སེར་མོ་རྩ་བའི་ཞལ་ཤིན་ཏུ་སེར་མོ། །བནྡུ་ཛི་བ་ཀའི་མེ་ཏོག་ལྟ་བུ་གཡས་དམར་ཞིང་ཟླུམ་པ། གཡོན་པ་ཕག་ཞལ་ཁྲོ་བ་དང་བཅས་པའི་ནག་པོ་ལྗགས་བསྐྱོད་པ། ཞལ་མི་སྡུག་ཅིང་འཇིགས་པ། ཁྲོ་གཉེར་དང་མཆེ་བ་གཙིགས་པ། ཕྱག་གཡོན་པ་
རྣམས་ན་སྡིགས་མཛུབ་དང་བཅས་པའི་ཞགས་པ་དང་། གཞུ་དང་མྱ་ངན་མེད་པའི་མེ་ཏོག་དང་བཅས་པའི་ཡལ་ག་དང་། སྐུད་པ་རྣམས་སོ། །གཡས་པ་རྣམས་ན་ཁབ་དང་། ལྕགས་ཀྱུ་དང་། མདའ་དང་། རྡོ་རྗེ་བསྣམས་པའོ། །སྣ་ཚོགས་པའི་ཁོར་ཡུག་ལ་སོགས་པ་དང་། རྒྱན་ཐམས་ཅད་
ཀྱིས་བརྒྱན་པ་སྣ་ཚོགས་པའི་ཤ་འགག་དམར་པོའི་སྟོད་གཡོགས་ཅན། གཡོན་བརྐྱང་གིས་བཞུགས་པ་ལྷ་མོ་བཞིའི་འཁོར་གྱིས་ཡོངས་སུ་བསྐོར་བ་བསམ་པར་བྱའོ། །མདུན་དུ་བཏྟཱ་ལི་གཡས་བརྐྱང་གིས་བཞུགས་པ། ཕྱག་བཞི་པ། ཕག་ཞལ་དམར་པོ་གཅིག་པ། ཕྱག་གཡས་ན་
ཁབ་དང་། ལྕགས་ཀྱུ་བསྣམས་པ། གཡོན་ན་ཞགས་པ་དང་། མྱ་ངན་མེད་པའི་མེ་ཏོག་དང་བཅས་པའི་ཡལ་ག་བསྣམས་པའོ། །གཡས་སུ་བ་དཱ་ལི་གཡོན་བརྐྱང་གིས་བཞུགས་པ། ཕྱག་བཞི་པ། ཕག་ཞལ་ཁ་དོག་སེར་པོ་གཅིག་པ། ཕྱག་གཡས་ན་མྱ་ངན་མེད་པའི་ཡལ་ག་དང་།
ཁབ་སྐུད་བསྣམས་པ། གཡོན་ན་ཞགས་པ་དང་། རྡོ་རྗེ་བསྣམས་པའོ། །རྒྱབ་ཏུ་བ་རཱ་ལི་གཡས་བརྐྱང་གིས་བཞུགས་པ། ཕྱག་བཞི་པ་སྐུ་མདོག་སེར་མོ། ཕག་ཞལ་གཅིག་པ། གཡས་ན་རྡོ་རྗེ་དང་ཁབ་བསྣམས་པ། གཡོན་ན་ཞགས་པ་དང་། མྱ་ངན་མེད་པའི་ཡལ་ག་བསྣམས་པའོ། །དེ་
བཞིན་དུ་གཡོན་དུ་བཱ་རཱ་ཧཱ་མུ་ཁི་ཞལ་དམར་པོ། ཉི་མ་ཤར་བའི་འོད་ཟེར་འབར་བ་ལྟ་བུ་གཡོན་བརྐྱང་གིས་བཞུགས་པ། ཕྱག་བཞི་པ། གཡས་ན་མདའ་དང་། རྡོ་རྗེ་བསྣམས་པའོ། །གཡོན་ན་གཞུ་དང་མྱ་ངན་མེད་པའི་ཡལ་ག་བསྣམས་པའོ། །འདི་རྣམས་ཐམས་ཅད་མཆོད་རྟེན་གྱི་གཞལ་
ཡས་ཁང་ན་བཞུགས་པ། སྣ་ཚོགས་པའི་རྒྱན་དང་། རིན་པོ་ཆེའི་ཅོད་པན་ཅན། ཤ་འགག་དམར་པོའི་སྟོད་གཡོགས་ཅན། སྤྱན་གསུམ་པ། སྣ་ཚོགས་པའི་རྒྱན་ཅན་བསམ་པར་བྱའོ། །དེ་ནས་ཛཿཧཱུཾ་བཾ་ཧོཿཞེས་པས་ཡེ་ཤེས་སེམས་དཔའ་གཞུག་ཅིང་ཕྱག་རྒྱ་བཅིང་བར་བྱའོ། །ལག་པ་གཉིས་

པོ་མཉམ་བྱས་ནས། །ཐལ་མོ་ཡང་དག་སྦྱར་བྱས་ཏེ། །མཛུབ་མོ་གཉིས་ཀྱི་རྩེ་དག་དང་། །མཐེ་བོ་ཆེ་ནི་གཉིས་པོ་དག །གུང་མོའི་རྩེ་མོ་ཡང་དག་སྦྱར། །འཁྱིལ་པའི་རྣམ་པའི་རྟགས་ཀྱིས་ནི། །སྐྱིལ་ཀྲུང་སྟེང་དུ་བཞག་ནས་ནི། །ལྟེ་བའི་ཕྱོགས་སུ་དགོད་པར་བྱ། །དེ་ནས་བསྒོམ་པ་སྔོན་དུ་འགྲོ་བས་སྔགས་
བཟླས་པར་བྱའོ། །ཨོཾ་མཱ་རཱི་ཙྱཻ་སྭཱ་ཧཱ། ཆད་ལྷག་ཡི་གེ་བརྒྱ་པའི་ཆོ་གས་བསྐང་བར་བྱའོ། །ཨོཾ་བཛྲ་སཏྭ་ཞེས་པ་ལ་སོགས་པའོ། །དེ་ནས་གཤེགས་སུ་གསོལ་བའི་དུས་སུ་ཨོཾ་མཱ་རཱི་ཙྱཻ་མུཿཞེས་པས་རང་གི་ཕྱག་རྒྱ་དགྲོལ་བར་བྱའོ་ཞེས་སོ། །འོད་ཟེར་ཅན་སེར་མོ་ཕྱག་བརྒྱད་པའི་སྒྲུབ་ཐབས་རྫོགས་སོ།། །།
༄༅༅། །རྒྱ་གར་སྐད་དུ། ཨོ་ཌི་ཡཱ་ན་མཱ་རཱི་ཙྱཻ་སཱ་དྷ་ནཾ། བོད་སྐད་དུ། ཨོ་ཌི་ཡཱ་ནའི་འོད་ཟེར་ཅན་གྱི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །ཨོ་ཌི་ཡཱ་ནའི་འོད་ཟེར་ཅན་གྱི་སྒྲུབ་ཐབས་སུ་གྱུར་པ་ནི། དང་པོར་རེ་ཞིག་རང་གི་སྙིང་གར་ཨོཾ་ཡིག་ཡོངས་སུ་གྱུར་པ་ལས་ཉི་མའི་དཀྱིལ་
འཁོར། དེའི་སྟེང་དུ་དང་པོའི་བཅུ་གསུམ་པའི་ས་བོན་ལས་ཟླ་ཕྱེད་དང་ཐིག་ལེས་བརྒྱན་པའོ། །དེ་བཞིན་དུ་ཡང་སྡིག་པ་ཐམས་ཅད་སོ་སོར་བཤགས་པ་ལ་སོགས་པ་བྱས་ནས། དེས་དེ་བཞིན་དུ་བསྐྱེད་པའི་མཾ་ཡིག །དེ་ཡོངས་སུ་གྱུར་པ་ལས་འོད་ཟེར་ཅན་སྐུ་མདོག་དམར་མོ་ཞལ་དྲུག་པ་ཕྱག་བཅུ་
གཉིས་པ་སྟེ། ཞལ་དང་པོ་ནི་དམར་པོ། གཉིས་པ་ནི་ནག་པོ། གསུམ་པ་ནི་ལྗང་གུ། བཞི་པ་ནི་སེར་པོ། ལྔ་པ་ནི་དཀར་པོ། དབུའི་སྟེང་དུ་གནས་པ་ནི་ཕག་ཞལ་ནག་པོ་སྟེ། ཞལ་དྲུག་པའོ། །མྱ་ངན་མེད་པ་དང་། མཆོད་རྟེན་གྱིས་བརྒྱན་པའོ། །རྣམ་པར་སྣང་མཛད་སེར་པོས་མགོན་དུ་བྱས་པ། ལྟོ་བ་འཕྱང་
ཞིང་ཐོད་པའི་ཕྲེང་བས་བརྒྱན་པ། སྐྲ་ཁམ་པ་གྱེན་དུ་བརྫེས་པ། སྦྲུལ་གྱི་རྒྱན་གྱིས་བརྒྱན་པ། སྟག་གི་པགས་པའི་ཤམ་ཐབས་ཅན། གཡོན་བརྐྱང་གིས་ཕག་དང་བགེགས་མནན་པ། ཕྱག་གཡས་པ་རྣམས་ཀྱིས་རལ་གྲི་དང་། རྡོ་རྗེ་དང་། ཆང་སྣོད་དང་། མདའ་དང་། རྡོ་རྗེ་རྩེ་གཅིག་པ་དང་སྟ་གྲི་བསྣམས་
པའོ། །གཡོན་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་། གཏུན་ཤིང་དང་། མྱ་ངན་མེད་པའི་ཡལ་ག་དང་། ཚངས་པའི་མགོ་བོ་དང་། གཞུ་དང་། རྩེ་གསུམ་བསྣམས་པའོ། །སྤྱན་གསུམ་པ་དམར་ལ་ཟླུམ་པ། ཞལ་མཆེ་བ་གཙིགས་པ་ཤིང་རྟའི་དབུས་སུ་བཞུགས་པའོ། །ལྷ་མོ་གཞན་རྣམས་ནི་

ཕྱག་གཉིས་པ། སྡིགས་མཛུབ་དང་བཅས་པའི་ཞགས་པ་དང་། མྱ་ངན་མེད་པའི་ཡལ་ག་བསྣམས་པ་བསྒོམ་པར་བྱའོ། །བདག་ཉིད་བཅོམ་ལྡན་འདས་མའི་ཕྱག་རྒྱ་བཅིང་བར་བྱ་སྟེ། རྡོ་རྗེའི་ཐལ་མོ་སྦྱར་ནས་ཏིང་ངེ་འཛིན་གྱིས་གུང་མོ་དག་བཀུག་ནས་མཐེ་བོང་གཉིས་སྐྱིལ་ཀྲུང་རྩེ་མོ་
བཀུག་ནས་བཟུང་བའོ། །སྔགས་ནི་ཨོཾ་མཱ་རཱི་ཙྱཻ་མཱཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། སྐུ་མདོག་དམར་མོ་ཕྱག་བཅུ་གཉིས་པ་ཨོ་ཌི་ཡཱ་ནའི་འོད་ཟེར་ཅན་གྱི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། ཨོ་ཌི་ཡཱ་ན་མཱ་རཱི་ཙྱཻ་སཱ་དྷ་ནཾ། བོད་སྐད་དུ། ཨོ་ཌི་ཡཱ་ནའི་འོད་ཟེར་ཅན་གྱི་སྒྲུབ་ཐབས། འཕགས་མ་འོད་
ཟེར་ཅན་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་སྡིག་པ་བཤགས་པ་ལ་སོགས་པ་བྱས་ནས་སྟོང་པ་ཉིད་བསྒོམས་ཏེ། སྣ་ཚོགས་པདྨ་དང་ཉི་མ་ལ་མཾ་ཡིག་དམར་པོའི་ས་བོན་ཡོངས་སུ་གྱུར་བ་ལས། ཨོ་ཌི་ཡཱ་ནའི་འོད་ཟེར་ཅན་སྐུ་མདོག་དམར་མོ་ཞལ་དྲུག་པ། ཕྱག་བཅུ་གཉིས་པ། ཞལ་སོ་
སོ་ལ་སྤྱན་གསུམ་གསུམ་པ་དམར་པོ་དང་། ནག་པོ་དང་། དཀར་པོ་དང་། ལྗང་གུ་དང་། སེར་པོ་རྣམས་གཡས་སྐོར་གྱིས་ཞལ་ལྔའོ། །སྟེང་དུ་ཕག་པའི་ཞལ་ནག་པོའོ། །གཡས་ཀྱི་ཕྱག་དྲུག་རྣམས་ན་རིམ་པ་བཞིན་དུ་རལ་གྲི་དང་། འཁོར་ལོ་དང་། གཏུན་ཤིང་དང་། མདའ་དང་། དགྲ་སྟ་དང་། རྡོ་རྗེ་
རྩེ་གཅིག་པ་རྣམས་སོ། །ཕྱག་གཡོན་པ་རྣམས་ན་སྡིགས་མཛུབ་དང་བཅས་པའི་ཞགས་པ་དང་། ཁ་ཊྭཱཾ་ག་དང་ཐོད་པ་དང་། མྱ་ངན་མེད་པའི་ཡལ་ག་དང་། ཚངས་པའི་མགོ་བོ་དང་། གཞུ་དང་། རྩེ་གསུམ་རྣམས་སོ། །མཆོད་རྟེན་གྱི་ནང་ན་གནས་པ། ཀླུའི་དབང་པོ་བརྒྱད་ཀྱིས་སྐུ་ལ་བརྒྱན་པ། དབུ་སྐྲ་
ཁམ་པ་གྱེན་དུ་བརྫེས་ཤིང་ཞལ་མཆེ་བ་གཙིགས་པ། མགོ་བོ་སྐམ་པོ་བརྒྱད་ཀྱིས་དབུ་བརྒྱན་པ། མགོ་བོ་རློན་པའི་ཕྲེང་བ་ཕྲག་པ་ལ་འཕྱང་བ་རིན་པོ་ཆེ་སྣ་ཚོགས་པས་སྤྲས་པའི་ཤིང་རྟའི་འོག་ཏུ་སྣ་ཚོགས་པའི་ཕག་བདུན་གྱི་ཤིང་རྟ་ལ་བཞུགས་པའོ། །ཕྱི་རོལ་དུ་དུར་ཁྲོད་བརྒྱད་ཀྱིས་ཡོངས་སུ་
བསྐོར་བ། ཤིང་རྟའི་དབུས་སུ་རྡོ་རྗེ་སྐྱིལ་ཀྲུང་གིས་བཞུགས་པ། རྡོ་རྗེ་དང་། ཁབ་དང་། མྱ་ངན་མེད་པའི་ཤིང་དང་། སྡིགས་མཛུབ་མཛད་པ། འོད་ཟེར་ཅན་སྐུ་མདོག་དམར་མོ་ཤ་འགག་སེར་པོ་ཅན། རིན་པོ་ཆེ་སྣ་ཚོགས་པའི་རྒྱན་གྱིས་བརྒྱན་པ། སྟག་གི་པགས་པའི་ན་བཟའ་ཅན། དེ་བཞིན་གཤེགས་པ་

ལྔའི་འོད་ཟེར་དམར་པོ་འཕྲོ་བ་བསྒོམ་པར་བྱའོ། །དེའི་ཐུགས་ཀར་ཉི་མ་ལ་མཾ་ཡིག་གི་ས་བོན་ལས་རྣམ་པར་བྱུང་བའི་འོད་ཟེར་བརྒྱ་ཡིས་སངས་རྒྱས་དང་བྱང་ཆུབ་སེམས་དཔའ་རྣམས་ཡང་དག་པར་གདན་དྲངས་ཏེ་དབང་བསྐུར་བ་བླང་བ་ནས་རྣམ་པར་སྣང་མཛད་ཀྱིས་དབུ་བརྒྱན་པའི་བདག་ཉིད་རྣམ་པར་
བསམ་པར་བྱའོ། །དེ་ནས་རང་གི་ས་བོན་ལས་རབ་ཏུ་བསྒྲུབས་པའི་ཇི་ལྟར་རྙེད་པའི་དམ་ཚིག་གི་རྫས་དང་བསྙེན་པ་སྔོན་དུ་འགྲོ་བའི་སྔགས་པས་དེའི་ས་བོན་ལས་རྣམ་པར་བྱུང་ནས་ཡི་གེ་རྣམས་ཕྲེང་སྐུད་ཀྱི་རྣམ་པས་སྙིང་ག་ནས་འཐོན་ཏེ་ལྟེ་བ། ལྟེ་བ་ནས་སླར་ཡང་སྙིང་ག་ལ་སོགས་པར་འཁོར་
ལོ་འཁོར་བ་ལྟར་སྦྱོར་བས་སྔགས་བཟླས་པར་བྱའོ། །ཨོཾ་མཱ་རཱི་ཙྱཻ་མཱཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། བཟླས་པ་བྱས་ནས་ཕྱིས་ཀྱི་དུས་སུ་ཏིང་ངེ་འཛིན་ལ་ཉེ་བར་བསྡུས་ལ་དེ་ཉིད་ཀྱི་རྣལ་འབྱོར་གྱིས་ཇི་ལྟར་བདེ་བར་གནས་པར་བྱའོ། །སྐུ་མདོག་དམར་མོ་ཕྱག་བཅུ་གཉིས་པ་ཨོ་ཌི་ཡཱ་ནའི་འོད་ཟེར་ཅན་གྱི་སྒྲུབ་
ཐབས་རྫོགས་སོ།། །།སློབ་དཔོན་ལྷན་ཅིག་སྐྱེས་པའི་རོལ་པས་མཛད་དོ།། ༄༅༅། །རྒྱ་གར་སྐད་དུ། སྭཱ་དྷཱིཥྛཱ་ན་ཀྲ་མ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། རང་བྱིན་གྱིས་བརླབ་པའི་རིམ་པའི་འོད་ཟེར་ཅན་གྱི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །དང་པོར་རེ་ཞིག་རང་གི་སྙིང་གར་
ཉི་མའི་གདན་ལ་ཧཱུཾ་ཡིག་གི་འོད་ཟེར་གྱིས་བཅོམ་ལྡན་འདས་མ་གདན་དྲངས་ཏེ། དཔག་ཏུ་མེད་པའི་མཆོད་པ་རྣམས་ཀྱིས་ཡང་དག་པར་མཆོད་ནས་སྡིག་པ་བཤགས་པ་ལ་སོགས་པ་བྱས་ཏེ། སྟོང་པ་ཉིད་བསྒོམས་པའི་རྗེས་ལ་སྣ་ཚོགས་རྡོ་རྗེའི་རྣམ་པ་སེམས་ཀྱིས་བསམས་ཏེ། དེ་ཡོངས་སུ་
གྱུར་པ་ལས་རྡོ་རྗེའི་ས་གཞི་དང་རྡོ་རྗེའི་ར་བ་ལ་སོགས་པ་བསམས་ལ། དེའི་དབུས་སུ་དཔལ་ཨོ་ཌི་ཡཱ་ནའི་གནས་གྲུ་གསུམ་དམར་པོ་དེའི་དབུས་སུ་ཉི་མ་ལ་གནས་པའི་རྡོ་རྗེ་རྩེ་ལྔ་པ་ལྟེ་བ་ལ་ཧཱུཾ་གིས་མཚན་པ་རྣམ་པར་གནས་པ། དེ་ཡོངས་སུ་གྱུར་པ་ལས་བྱང་ཆུབ་སེམས་ཀྱི་གཟུགས་བསྐལ་པ་ཆེན་པོའི་མེ་ལྟ་བུ་
མེ་སྟག་གྱེན་དུ་འབར་བ་ཟིལ་གྱིས་མི་ནོན་པའི་གད་རྒྱངས་ཅན། ཞབས་གཡོན་བརྐྱང་གིས་བདུད་བཞི་ཟིལ་གྱིས་ཡང་དག་པར་མནན་པ། ཕྱག་བཅུ་གཉིས་པ། ཞལ་དྲུག་པ། སྤྱན་གསུམ་པ། སྐུ་མདོག་དམར་མོའོ། །གཡས་ཀྱི་ཕྱག་དྲུག་རྣམས་སུ་རལ་གྲི་དང་། སྣ་ཚོགས་རྡོ་རྗེ་དང་། རྡོ་རྗེ་རྩེ་གཅིག་དང་།

དགྲ་སྟ་དང་། མདའ་དང་། གཏུན་ཤིང་རྣམས་བསྣམས་པའོ། །ཕྱག་གཡོན་པ་རྣམས་སུ་སྡིགས་མཛུབ་དང་བཅས་པའི་ཁབ་དང་། རྩེ་གསུམ་དང་། མྱ་ངན་མེད་པའི་ཡལ་ག་དང་། གཞུ་དང་། ཞགས་པ་དང་། ཚངས་པའི་མགོ་བོ་རྣམས་བསྣམས་པའོ། །མི་མགོའི་ཕྲེང་བ་འཕྱང་བས་ཡན་ལག་
དང་ཉིང་ལག་ཐམས་ཅད་བརྒྱན་པ། སྟག་གི་པགས་པའི་སྟོད་གཡོགས་ཅན། རྩ་བའི་ཞལ་དམར་པོ། དཀར་པོ་དང་། ནག་པོ་ནི་གཡོན་པའི་ཞལ་གཉིས་སོ། །སེར་པོ་དང་། ནག་པོ་ནི་གཡས་པའི་ཞལ་གཉིས་སོ། །སྟེང་དུ་ནི་ཕག་ཞལ་ནག་པོའོ། །ལྗགས་འདྲིལ་ཞིང་སྐྲ་ཁམ་པ་གྱེན་དུ་འབར་བ། རྣམ་
པར་སྣང་མཛད་ཀྱིས་དབུ་བརྒྱན་པ། ལག་འགྲོ་དང་རུས་པའི་རྒྱན་གྱིས་བརྒྱན་པ། རང་གི་འོད་ཟེར་གྱིས་བདུད་ཐམས་ཅད་རྣམ་པར་འཇོམས་པ། ཕྱོགས་བཅུར་གནས་པའི་མཁའ་འགྲོ་མ་དང་། འབྱུང་པོ་དང་། རོ་ལངས་དང་། ཕཻཾ་ཀཱ་ར་དང་། ཧ་ཧ་ཞེས་འཇིགས་པའི་སྒྲ་སྒྲོགས་པས་ཡོངས་སུ་བསྐོར་བའི་དུར་
ཁྲོད་བརྒྱད་ཀྱིས་བརྒྱན་པ། དཔལ་ལྡན་ཨོ་ཌི་ཡཱ་ནའི་འོད་ཟེར་ཅན་གྱི་བདག་ཉིད་དུ་སྐད་ཅིག་གིས་བསྐྱེད་ལ་མགོ་བོ་དང་། མགྲིན་པ་དང་། སྙིང་ག་རྣམས་སུ། ཨོཾ་ཨཱཿཧཱུཾ་ངོ་། །ཡན་ལག་ཐམས་ཅད་ལ་ཕཊ་ཀྱི་ཡི་གེ་བསམ་པར་བྱའོ། །དེ་ནས་ལྟེ་བའི་སྟེང་དུ་སྣ་ཚོགས་ཆུ་སྐྱེས་ལ་ཟླ་བ་དང་ཉི་མ་ཡང་དག་པར་སྦྱོར་
བའི་དབུས་སུ་ཧཱུཾ་ཡིག་ལས་པདྨའི་རྩ་བའི་རང་བཞིན་སྣ་ཚོགས་ཀྱི་ཡི་གེ་བསམ་པར་བྱའོ། །ཨོཾ་བཛྲ་སཏྭེ་ཤྭ་རི་སརྦ་དུཥྚཱན་ཧ་ན་ཧ་ན། ད་ཧ་ད་ཧ། པ་ཙ་པ་ཙ། ཨོཾ་མཱ་རཱི་ཙྱཻ་མཱཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། སྙིང་པོའི་སྔགས་སོ། །ཨོཾ་ཨཱཿཧཱུཾ་བསྒོམ་པའི་སྔགས་སོ། །ཨོཾ་བཛྲ་བེ་ཏཱ་ལཱི་ཧཱུཾ་ཕཊ་བཟླས་པའི་སྔགས་སོ། །ཨོཾ་མཱ་རཱི་ཙྱཻ་ཨོཾ་
མཱཾ་ཧཱུཾ་ཧཱུཾ་ཕཊ་ཕཊ་གཉིས་པའི་བཟླས་པའི་སྔགས་སོ། །དེའི་རྗེས་སུ་ཐུན་མཚམས་བཞིར་གཏོར་མའི་སྔགས་ནི་ཨོཾ་ཨཱ་ར་ལླི་ཧོ་ཛཿཧཱུཾ་བཾ་ཧོཿཨོཾ་བཛྲ་ཌཱ་ཀཱི་ནཱི་ས་མ་ཡ་སྟྭཾ་དྲྀ་ཤྱ་ཧོཿཁ་ཁ་ཁཱ་ཧི་ཁཱ་ཧི་སརྦ་ཡཀྵ་རཱཀྵ་ས་བྷཱུ་ཏ་པྲེ་ཏ་པི་ཤཱ་ཙ་ཨུནྨ་ད་ཨ་པསྨཱ་རོ་ཌཱ་ཀི་ནྱཱ་ད་ཡ་ཨི་དཾ་བ་ལིཾ་གྲིཧྞ་ཐཱ་པི་པ་ཐཱ་མཱ་ཏི་ཀྲ་མ་ཐཱ་མ་ཧཱ་སུ་ཁ་བི་བྲྀདྡྷ་ཡེ་མ་མ་ས་ཧཱ་
ཡི་ཀ་བྷ་བ་ཐ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཟས་ལ་སོགས་པ་ལ་ཡང་ཧྲཱིཿཡིག་གམ་ཧཱུཾ་ཡིག་ལ་སོགས་པས་ཡང་དག་པར་སྦྱངས་ལ་སྤྱད་པར་བྱའོ། །སྐུ་མདོག་དམར་མོ་ཕྱག་བཅུ་གཉིས་པའི་ཨོ་ཌི་ཡཱ་ནའི་རང་བྱིན་གྱིས་བརླབ་པའི་རིམ་པའི་འོད་ཟེར་ཅན་གྱི་སྒྲུབ་ཐབས་རྫོགས་སོ།། །།

༄༅༅། །རྒྱ་གར་སྐད་དུ། ཨ་ཤྭ་ཀཱ་ཀནྟ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། མྱ་ངན་མེད་པའི་ཤིང་གི་འོད་ཟེར་ཅན་གྱི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །རང་གི་སྙིང་གར་སྣ་ཚོགས་པདྨ་ལ་ཟླ་བའི་སྟེང་དུ་མཾ་ཡིག་སེར་པོ་རྣམ་པར་བཀོད་ལ། དེ་བཞིན་དུ་ཐམས་
ཅད་སོ་སོར་སྣང་བ་ཙམ་གྱི་བདག་ཉིད་དུ་བརྟགས་ནས་ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ་ཞེས་བརྗོད་པར་བྱའོ། །དེ་ནས་དེའི་མཾ་ཡིག་ཡོངས་སུ་གྱུར་པ་ལས་མྱ་ངན་མེད་པའི་ཤིང་སླར་ཡང་མཾ་ཡིག་དེ་ཡོངས་སུ་གྱུར་པ་ལས་བཅོམ་ལྡན་འདས་མ་སྐུ་མདོག་སེར་མོ་ཞལ་གཅིག་པ་ཕྱག་
གཉིས་པ། དབུའི་ཆ་ལ་རྣམ་པར་སྣང་མཛད་ཀྱིས་ཉེ་བར་མཛེས་པ། རིན་པོ་ཆེའི་ཅོད་པན་ཅན། འགྱིང་བག་དང་བཅས་པ། གསེར་གྱི་མདོག་ལྟ་བུ། ཕག་གི་སྟེང་ན་སྣ་ཚོགས་པདྨ་དང་ཟླ་བ་ལ་རོལ་པའི་སྟབས་ཀྱིས་བཞུགས་པ། ལང་ཚོ་གཞོན་པ། མཐོ་ཞིང་སྟེང་དུ་གནས་པ། ཕྱག་གཡོན་པས་མྱ་
ངན་མེད་པའི་ཤིང་གི་ཡལ་ག་བསྣམས་པ། གཡས་པས་མཆོག་སྦྱིན་པ། སྐུ་ལ་དོ་ཤལ་ལ་སོགས་པས་རྣམ་པར་བརྒྱན་པ། ན་བཟའ་དཀར་པོ་མནབས་པ། རང་གི་སྙིང་གར་མཾ་ཡིག་ལས་དཔག་ཏུ་མེད་པའི་ཕག་གི་རྣམ་པ་འོད་ཟེར་འཕྲོ་བས་གདུག་པ་ཅན་རྣམས་འདུལ་བར་བསམ་པར་བྱའོ། །ཨོཾ་མཱ་རཱི་
ཙྱཻ་མཱཾ་སྭཱ་ཧཱ། དེ་ནས་ཇི་ལྟ་བ་བཞིན་དུ་གཤེགས་ནས་ཅི་བདེར་གནས་པར་བྱའོ། །ཡུལ་གཞན་དུ་འཇུག་པར་འདོད་ན་སྔགས་འདིས་བདག་ཉིད་ཀྱི་སྟོད་གཡོགས་ཀྱི་སྣ་བཟུང་ནས་ལན་བདུན་ཡོངས་སུ་བཟླས་ཏེ་ལྷན་ཅིག་ཏུ་གོས་ཀྱི་མཐའ་བཟུང་ནས་ཇི་ལྟ་བ་བཞིན་དུ་མདུད་པ་བྱས་ཏེ་འགྲོ་བར་བྱའོ། །
ཆོམ་པོ་ལ་སོགས་པའི་འཇིགས་པ་ལས་མ་གྲོལ་གྱི་བར་དུའོ། །མངོན་པར་འདོད་པའི་ཡུལ་ཐོབ་ནས་མདུད་པ་དགྲོལ་བར་བྱའོ་ཞེས་པ་ནི་མན་ངག་གོ། །ཇི་ལྟ་བ་བཞིན་དུ་མདུད་པ་བྱས་ཏེ་ཞེས་པ་ནི་ལན་བདུན་མངོན་པར་བསྔགས་ནས་དེ་ལ་སྟོད་གཡོགས་ཀྱི་སྣ་ནས་བཟུང་ནས་ཕྱོགས་བཅུར་རྣམ་
པར་བལྟས་ཏེ་གདུག་པ་ཅན་རྣམས་ཀྱི་མིག་བཅིང་བར་བྱའོ་ཞེས་བསམས་ཏེ། དབུགས་གཅིག་ལ་གཏམ་གྱིས་བར་མ་ཆོད་པར་བཟླས་པར་བྱས་ཏེ་ལམ་བཅིང་བར་བྱའོ་ཞེས་སོ། །མྱ་ངན་མེད་པའི་ཤིང་གི་འོད་ཟེར་ཅན་གྱི་སྒྲུབ་ཐབས་རྫོགས་སོ།། །།

༄༅༅། །རྒྱ་གར་སྐད་དུ། ཀལྤོཀྟ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། རྟོག་པ་ལས་གསུངས་པའི་འོད་ཟེར་ཅན་གྱི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །རྣམ་པར་སྣང་མཛད་རིགས་བྱུང་བའི། །འོད་ཟེར་ཅན་ལ་ཡང་དག་འདུད། །རྟོག་པ་ལས་གསུངས་ཆོ་ག་ཡིས། །
དེ་ཡི་སྒྲུབ་ཐབས་རིམ་པ་བཤད། །དེ་ལ་རེ་ཞིག་དཔལ་འོད་ཟེར་ཅན་གྱི་དཀྱིལ་འཁོར་དུ་དབང་བསྐུར་བའི་སྔགས་པས་རང་གི་དམ་ཚིག་དང་སྡོམ་པ་ཡོངས་སུ་བསྐྱང་ཞིང་དག་པའི་སེམས་ཀྱིས་སེམས་ཅན་ཐམས་ཅད་གདོན་པའི་བསམ་པས། ཨོཾ་ཕཊ་ཅེས་བརྗོད་པས་ཁྲོ་བོའི་ཁུ་ཚུར་གྱིས་སྙིང་ག་དང་།
མཛོད་སྤུ་དང་། མགོ་བོ་རྣམས་སུ་བཀོད་ནས་ཞལ་བསང་བ་ལ་སོགས་པ་བྱས་ནས། ལྷའི་ཁང་པར་རབ་ཏུ་ཞུགས་ཏེ། བྲིས་སྐུ་ལ་སོགས་པའི་བཅོམ་ལྡན་འདས་མའི་སྐུ་བཀྲམ་ནས་འོད་ཟེར་ཅན་གྱི་སྔགས་ཡོངས་སུ་བཟླས་པའི་དྲིའི་ཆུས་བགེགས་བསྐྲད་ནས་དེ་བཞིན་དུ་ཉེར་སྤྱོད་ལྔ་ལ་
སོགས་པ་རབ་ཏུ་སྦྱར་ཏེ། དེ་ལ་བགེགས་སྐྲོད་པའི་སྔགས་ནི་འདིའོ། །ཨོཾ་མཱ་རཱི་ཙྱཻ་ཧཱུཾ་སརྦ་བིགྷྣ་ནུད་སཱ་རཱ་ཡ་ཧཱུཾ་ཕཊ། དེ་ནས་རང་གི་སྙིང་གའི་དང་པོའི་ཡི་གེས་མཚན་པའི་ཟླ་བའི་དཀྱིལ་འཁོར་དང་ཉི་མའི་དཀྱིལ་འཁོར་ལ་ཨཾ་བསམས་ནས། དེའི་སྟེང་དུ་དང་པོའི་བཅུ་གསུམ་པའི་ས་བོན་ལ་ཟླ་ཕྱེད་
དང་ཐིག་ལེས་བརྒྱན་པ་ལ་ཚ་ཞིང་འོད་ཟེར་ཅན་གྱི་འོད་དང་ལྡན་པ། དེ་ལས་འོད་ཟེར་སྣ་ཚོགས་འཕྲོས་ཏེ་འོད་ཟེར་རྣམས་རྫོགས་པ་ལས་བཅོམ་ལྡན་འདས་མའི་སྐུ་དང་བླ་མ་དང་། སངས་རྒྱས་དང་བྱང་ཆུབ་སེམས་དཔའ་རྣམས་ཀྱང་དམིགས་ནས་མཆོད་ཅིང་ཕྱག་བཙལ་ནས་སྔགས་འདིའོ། །
ཨོཾ་མཱ་རཱི་ཙྱཻ་པུཥྤཾ་པྲ་ཏཱིཙྪ་སྭཱ་ཧཱ། ཨོཾ་མཱ་རཱི་ཙྱཻ་དྷཱུ་པཾ་པྲ་ཏཱིཙྪ་སྭཱ་ཧཱ། ཨོཾ་མཱ་རཱི་ཙྱཻ་སྭཱ་ཧེ་ཏྱར་གྷཾ་པ་རི་ཛ་སྱ། ཨོཾ་མཱ་རཱི་ཙྱཻ་ཨརྒྷཾ་པྲ་ཏཱིཙྪ་སྭཱ་ཧཱ། དངོས་པོ་མེད་ན་བསམ་གཏན་གྱིས་ཀྱང་ངོ་། །དེ་ནས། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་
ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་བདག་སྐྱབས་མཆི། །རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་བདག་གིས་བསྐྱེད། །བྱང་ཆུབ་མཆོག་ཏུ་སེམས་བསྐྱེད་ནས། །སེམས་ཅན་ཐམས་

ཅད་མགྲོན་དུ་གཉེར། །བྱང་ཆུབ་སྤྱོད་མཆོག་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་ཤོག །ཅེས་པ་ལན་གསུམ་བརྗོད་ནས་སྨོན་ལམ་སྔོན་དུ་འགྲོ་བས་བདག་མེད་པ་བསྒོམ་པར་བྱ་སྟེ། སྔགས་འདིས་ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་བརྗོད་ནས་ས་བོན་སྒྱུ་མའི་དཔེ་རྣམས་
བསམས་ཏེ། ཁམས་གསུམ་མ་ལུས་པ་ཡང་བལྟས་པ་དང་། རེག་པ་ཐམས་ཅད་དཔེར་ན་སྒྱུ་མ་ལྟ་བུའོ། །དམིགས་པ་མེད་པས་དེ་བཞིན་དུ་འགྲོ་བ་གནས་པ་ཐམས་ཅད་ཀྱང་སོ་སོར་སྣང་བ་ཙམ་དུ་རྟོགས་པས། དེ་ནས་ཐོག་མ་མེད་པའི་དུས་ཀྱི་རྣམ་པ་མ་ཡིན་པའི་རྣམ་པར་རྟོག་པའི་ས་
བོན་སྤངས་ནས་རང་བཞིན་དག་པ་ཞེས་ལྷག་པར་གྲོལ་བར་བྱའོ། །ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ་ཞེས་ལན་གསུམ་བརྗོད་པར་བྱའོ། །དེ་ནས་སྔོན་དུ་གསུངས་པའི་ས་བོན་རྫོགས་པ་ལས་ཟླ་བའི་སྟེང་དུ་ཨོཾ་ཡིག་དེ་ཐམས་ཅད་ཡོངས་སུ་གྱུར་པ་ལས་དཔལ་ལྡན་མགོན་པོ་རྣམ་པར་
སྣང་མཛད་པདྨའི་སྙིང་པོ་དང་སེང་གེའི་གདན་གྱི་སྟེང་ན་རྡོ་རྗེ་སྐྱིལ་ཀྲུང་གིས་བཞུགས་པ་གསེར་གྱི་མདོག་ལྟ་བུ་བྱང་ཆུབ་མཆོག་གི་ཕྱག་རྒྱ་ཅན་ཏིང་ངེ་འཛིན་ལ་སྙོམས་པར་ཞུགས་པ་རལ་པའི་ཅོད་པན་ཅན་ཞི་ཞིང་རྒྱན་ཐམས་ཅད་ཀྱིས་བརྒྱན་པ་བསམ་པར་བྱའོ། །དེ་ནས་རང་གི་སྙིང་གར་ཟླ་བའི་
དཀྱིལ་འཁོར་གྱི་སྟེང་དུ་ཡི་གེ་ཉི་ཤུ་རྩ་ལྔ་མཆོག་གི་སྙིང་པོ་དང་པོའི་གཉིས་པ་དང་ཡང་དག་པར་ལྡན་པ་ཟླ་བ་ཕྱེད་པ་དང་ཐིག་ལེས་བརྒྱན་པ་བསྒོམ་པར་བྱའོ། །དེ་ལས་སྐྱེས་པའི་མྱ་ངན་མེད་པའི་ཤིང་། དེའི་སྟེང་དུ་ཟླ་བ་ལ་གནས་པའི་མཾ་ཡིག་བསམས་ནས། དེ་ཐམས་ཅད་ཡོངས་སུ་གྱུར་པ་
ལས་བདག་ཉིད་འོད་ཟེར་ཅན་གྱི་སྐུར་བསྒོམ་པར་བྱའོ། །བདག་ཉིད་བཅོམ་ལྡན་འདས་མ་འོད་ཟེར་ཅན་ཞེས་པ་སྐུ་མདོག་ཤིན་ཏུ་སེར་བ་འཛམ་བུ་ནཱ་དའི་འོད་ལྟ་བུ་འབར་བ་མཆོད་རྟེན་གྱི་ནང་ན་གནས་པ། ན་བཟའ་དམར་པོ་མནབས་པ། ཕུ་དུང་དམར་པོའི་སྟོད་གཡོགས་ཅན། ཕྲེང་བ་
སྣ་ཚོགས་པ་དང་རྒྱན་ཐམས་ཅད་ཀྱིས་བརྒྱན་པ། རྣ་རྒྱན་གྱི་ཚོགས་དང་། རྐེད་པ་ལ་དྲིལ་བུ་གཡེར་ཀའི་དྲ་བ་དང་། རྐང་གདུབ་དང་ལྡན་པ། ཕྱག་བརྒྱད་པ། ཞལ་གསུམ་པ་སྤྱན་གསུམ་པ་འབར་ཞིང་འོད་ཟེར་གྱི་ཕྲེང་བ་འཕྲོ་བ། བནྡུ་ཛ་བའི་མེ་ཏོག་དང་མཚུངས་པ། རྣམ་པར་

སྣང་མཛད་ཀྱིས་དབུ་བརྒྱན་པ། མྱ་ངན་མེད་པའི་ཕྲེང་བས་བརྒྱན་པ། ཕྱག་གཡོན་པ་རྣམས་ཀྱིས་ཞགས་པ་དང་། སྐུད་པ་དང་། མྱ་ངན་མེད་པའི་ཤིང་དང་། གཞུ་བསྣམས་པ། གཡས་པ་རྣམས་ཀྱིས་རྡོ་རྗེ་རྒྱས་པ་དང་། ཁབ་དང་། ལྕགས་ཀྱུ་དང་། མདའ་
བསྣམས་པ། ཞལ་དང་པོ་ཞི་ཞིང་འཛུམ་པའི་ཞལ་ཤིན་ཏུ་སེར་བ་གསེར་གྱི་མདོག་ལྟ་བུ། སྤྱན་རྒྱས་པ་སིནྡུ་རས་བརྒྱན་པ། སྒེག་པའི་ཉམས་ཀྱིས་འགྱིང་བའོ། །ཞལ་གཡོན་པ་ནི་ཕག་ཞལ་ཁྲོ་བ་དང་བཅས་ཤིང་མི་སྡུག་པ་གཙིགས་ཤིང་འཇིགས་པ་ཨིནྡྲ་ནཱི་ལའི་འོད་ལྟ་བུ་ཉི་མ་
བཅུ་གཉིས་ཀྱི་འོད་དང་མཚུངས་པ། ཤིན་ཏུ་ཁྲོ་གཉེར་གཙིགས་ཤིང་ལྗགས་འདྲིལ་བ་འཇིགས་ཤིང་འཇིགས་པར་བྱེད་པ། ཞལ་གཉིས་པ་ཤིན་དུ་དམར་བ་མཛེས་ཤིང་འོད་ཟེར་འབར་བ། མྱ་ངན་མེད་པའི་ཤིང་གི་འོག་ན་གནས་པ། མེ་ཏོག་གི་ཕྲེང་བ་གཅལ་དུ་བཀྲམ་པ་དེའི་སྤྱི་བོར་རྣམ་པར་
སྣང་མཛད་ཀྱིས་མགོན་དུ་གྱུར་པ་སྔོན་དུ་གསུངས་པའི་སྐུ་མདོག་དང་ཕྱག་རྒྱ་དང་ལྡན་པ། འོག་ཏུ་ཕག་བདུན་གྱི་ཤིང་རྟའི་སྟེང་དུ་གཡོན་བརྐྱང་གིས་བཞུགས་པ། ལང་ཚོ་གཞོན་ནུར་གནས་པ་ཤིང་རྟ་འདྲེན་པའི་ཕག་གི་འོག་ཏུ་ཡཾ་ལས་བྱུང་བའི་རླུང་གི་དཀྱིལ་འཁོར་ལ་ཧཾ་ཡིག་ཡོངས་སུ་
གྱུར་པ་ལས་སྒྲ་གཅན་ལག་པ་དག་གིས་ཟླ་བ་དང་ཉི་མ་དག་འཛིན་པ། ཉིན་མོ་སྣང་བར་བྱེད་ཅིང་མཚན་མོ་ཟླ་བ་དང་མཚུངས་པ་ལྷ་མོ་བཞིས་ཡོངས་སུ་བསྐོར་བར་བསམ་པར་བྱའོ། །དེ་ལ་ཤར་དུ་ཨོཾ་མཱ་རཱི་ཙྱཻ་བཏྟཱ་ལི་བ་དཱ་ལི་བཱ་ར་ལི་བཱ་རཱ་ཧཱ་མུ་ཁི་སིདྡྷི་མཱ་ཀཪྵ་ཡ་ཛཿསྭཱ་ཧཱ་ཞེས་སོ། །དེ་ལྟར་ལྷ་
མོ་སྐུ་མདོག་དམར་མོ་ཕག་ཞལ་གཅིག་པ། ཕྱག་བཞི་པ་ཕུ་དུང་དམར་པོའི་སྟོད་གཡོགས་ཅན། ཕྱག་གཡོན་པ་ཞགས་པ་དང་། མྱ་ངན་མེད་པའི་ཤིང་བསྣམས་པ། གཡས་པ་རྡོ་རྗེའི་ལྕགས་ཀྱུ་དང་། ཁབ་བསྣམས་པ། རྒྱན་ཐམས་ཅད་ཀྱིས་བརྒྱན་པའོ། །རྟོག་པ་ལས་གསུངས་པའི་ཆོ་
གས་མངོན་པར་འདོད་པའི་དངོས་གྲུབ་འགུགས་པར་བྱེད་པར་བསམ་པར་བྱའོ། །ཨོཾ་མཱ་རཱི་ཙྱཻ་བཏྟཱ་ལི་བ་དཱ་ལི་བ་རཱ་ལི་བཱ་རཱ་ཧཱ་མུ་ཁི་སརྦ་དུཥྚཱ་པྲ་དུཥྚཱ་ནཾ་མུ་ཁཾ་བནྡྷ་བནྡྷ་ཧཱུཾ་སྭཱ་ཧཱ། ལྷ་མོ་བ་དཱ་ལི་སྔོན་དུ་གསུངས་པའི་གོས་དང་། རྒྱན་དང་སྐུ་མདོག་ལྟ་བུ་ཕྱག་གཡོན་པ་ཞགས་པ་དང་། རྡོ་རྗེ་བསྣམས་

པ། གཡས་ན་ཡལ་ག་དང་ཁབ་བསྣམས་པས་གདུག་པ་ཅན་རྣམས་ཀྱི་ཁ་མིག་འཚེམ་པར་བྱེད་པ་ལྷོ་རུ་བསམ་པར་བྱའོ། །ཨོཾ་མཱ་རཱི་ཙྱཻ་བཏྟཱ་ལི་བ་དཱ་ལི་བ་རཱ་ལི་བཱ་རཱ་ཧཱ་མུ་ཁི་སརྦ་དུཥྚཱ་ནཾ་སྟཾ་བྷ་ཡ་བཾ་སྭཱ་ཧཱ། ཞེས་པས་ལྷ་མོ་བ་རཱ་ལི་དེ་བཞིན་དུ་གོས་དང་རྒྱན་དང་ཁ་དོག་ལ། འོན་ཀྱང་ཕྱག་གཡས་ན་
རྡོ་རྗེ་དང་ཁབ་བསྣམས་པ། གཡོན་ན་ཞགས་པ་དང་། མྱ་ངན་མེད་པའི་ཤིང་བསྣམས་པ། གདུག་པ་ཅན་རྣམས་རེངས་པར་བྱེད་པ་ནུབ་ཏུ་དགོད་པར་བྱའོ། །ཨོཾ་མཱ་རཱི་ཙྱཻ་བཏྟཱ་ལི་བ་དཱ་ལི་བ་རཱ་ལི་བཱ་རཱ་ཧཱ་མུ་ཁི་སརྦ་སཏྭཱ་ན་མེ་བ་ཤ་མ་ནཱ་ཡ་ཧོཿསྭཱ་ཧཱ། ཞེས་པའི་སྔགས་ཀྱིས་ལྷ་མོ་ཕག་ཞལ་
མ་སྐུ་མདོག་དམར་མོ་དེ་བཞིན་དུ་གོས་དང་རྒྱན་དང་། ཡང་ཕྱག་གཡས་ན་རྡོ་རྗེ་དང་། མདའ་བསྣམས་པ། གཡོན་ན་མྱ་ངན་མེད་པའི་ཤིང་དང་གཞུ་བསྣམས་པ་སེམས་ཅན་ཐམས་ཅད་རྗེས་སུ་ཆགས་པར་བྱེད་པ་ཅན་བྱང་ཕྱོགས་སུ་བལྟ་བར་བྱའོ། །དེ་ནས་ལྕགས་ཀྱུ་ལ་སོགས་པའི་
ཕྱག་རྒྱ་རྣམས་དང་། དེའི་སྔགས་ཀྱིས་ཀྱང་དགུག་པ་ལ་སོགས་པ་བྱའོ། །ཡེ་ཤེས་སེམས་དཔའ་དགུག་པ་དང་། རབ་ཏུ་གཞུག་པ་དང་། བཅིང་བ་དང་། དབང་དུ་བྱ་བས་བསྒྲུབ་པར་བྱའོ། །མཛུབ་མོ་ལྕགས་ཀྱུ་བཅིངས་ལ། མཐེའུ་ཆུང་ལྕགས་ཀྱུ་ཆེན་པོ་སྟེ། ཚིགས་མང་པོའི་
རྩེ་མོ་དག་ལྕགས་སྒྲོག་རྒྱབ་ཏུ་བཙིར་བ་ལ་སོགས་པས། ཨོཾ་བཛྲ་ཨཾ་ཀུ་ཤ་ཛཿཞེས་པ་འདིས་ཡེ་ཤེས་སེམས་དཔའ་མདུན་དུ་གདན་དྲངས་ནས་མཆོད་པ་ལ་སོགས་པ་དབུལ་བར་བྱའོ། །འོད་ཟེར་ཅན་གྱི་ཕྱག་རྒྱས་དེ་ནས་ཨོཾ་བཛྲ་པཱ་ཤ་ཧཱུཾ་འདིས་གཞུག་པར་བྱའོ། །ཨོཾ་བཛྲ་སྥོ་ཊ་
བཾ་འདིས་བཅིང་བར་བྱའོ། །ཨོཾ་བཛྲ་ཨཱ་བེ་ཤ་ཧོཿའདིས་མཉེས་པར་བྱའོ། །དེ་ནས་དམ་ཚིག་གི་ལྷ་རྣམས་ཀྱིས་ལྷན་ཅིག་ཏུ་གཉིས་སུ་མེད་པར་བྱའོ། །དེ་ལ་འདིའི་ཕྱག་རྒྱ་ནི། ལག་པ་གཉིས་པོ་མཉམ་བྱས་ནས། །ཐལ་མོའི་རྣམ་པར་བསྲེས་བྱ་སྟེ། །མཐེབ་ཆེན་དང་ནི་
མིང་མེད་ཀྱི། །རྩེ་མོ་གཉིས་པོ་བྱེ་བ་ཡིས། །གུང་མོའི་སོར་མོ་ཡང་དག་འཁྱུད། །འཁྱིལ་པའི་རྣམ་པར་བཅིངས་པ་དག །སྐྱིལ་ཀྲུང་སྟེང་དུ་ཉེར་བཞག་ནས། །ལྟེ་བའི་ཕྱོགས་སུ་དགོད་པར་བྱ། །རབ་མཆོག་ཕྱག་རྒྱ་འདི་ཡིས་ནི། །ལས་རྣམས་ཀུན་ལ་ལེགས་པར་སྦྱོར། །

དེ་ནས་དབང་བསྐུར་བ་བླང་བར་བྱ་སྟེ། ཕྱག་རྒྱ་ཆེན་པོ་ནི་མཐེབ་ཆེན་སེམས་དཔའི་སྐྱིལ་ཀྲུང་བཀུག་ནས་མཛུབ་མོའི་རྩེ་མོ་བཟུང་སྟེ། འདིའི་གུང་མོ་ཨོཾ་ཡིག་ལྷག་མ་རྡོ་རྗེ་ཐལ་མོ་སྦྱར་བ་སྤྱི་བོར་བཀོད་ནས་ཨོཾ་བྷུཿཁཾ་མཾ་ཞེས་པ་དབང་བསྐུར་བའི་སྔགས་ཀྱིས་རྣམ་པར་སྣང་མཛད་གསེར་
གྱི་མདོག་ལྟ་བུ་བྱང་ཆུབ་མཆོག་གི་ཕྱག་རྒྱས་བཞུགས་པ། སྤྱི་བོར་ཨོཾ་བསམས་ནས་བསྒོམས་པས་ངལ་ན་སྔགས་བཟླས་པར་བྱའོ། །རང་གི་སྙིང་གར་ཟླ་བ་ལ་གནས་པའི་སྔགས་འབར་ཞིང་འབར་བ་དང་ལྡན་པའོ། །ཨོཾ་མཱ་རཱི་ཙྱཻ་མཱཾ་སྭཱ་ཧཱ། ཞེས་བལྟས་ལ་བཟླས་པ་བྱའོ། །ཇི་ལྟར་ནུས་པའི་བསྒོམ་པ་
སྔོན་དུ་འགྲོ་བས་ལྷ་མོ་ཐམས་ཅད་ཡང་དག་པར་རྒྱལ་བར་བལྟ་ཞིང་སྔགས་བཟླས་པར་བྱའོ། །ཕྱི་ནས་ཆད་ལྷག་བསྐང་བའི་ཆོ་ག་ཡི་གེ་བརྒྱ་པས་ཁ་བསྐང་བར་བྱའོ། །ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ། དྲྀ་ཌྷོ་མེ་བྷ་བ། སུ་ཏོཥྱོ་མེ་བྷ་བ། སུ་པོ་ཥྱོ་མེ་བྷ་བ། ཨ་ནུ་
རཀྟོ་མེ་བྷ་བ། སརྦ་སིདྡྷིཾ་མེ་པྲ་ཡཙྪ་སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿབྷ་ག་བཱན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་བ་མ་ཧཱ་ས་མ་ཡ་སཏྭ་ཨཱཿའདིས་དུས་ཐམས་ཅད་དུ་གཤེགས་སུ་གསོལ་ཞིང་དགེ་བ་ཡོངས་སུ་བསྔོ་ཞིང་མངོན་པར་འདོད་པའི་དངོས་གྲུབ་ཞུས་ཏེ་རང་གི་ཕྱག་རྒྱ་
སྤྱི་བོར་བཀྲོལ་ནས་ཨོཾ་མཱ་རཱི་ཙྱཻ་མུཿཞེས་སོ། །རང་གི་ལྷག་པའི་ལྷའི་རྣལ་འབྱོར་གྱིས་ཟས་དང་ཁྲུས་དང་། ཉལ་བ་ལ་སོགས་པ་ཐམས་ཅད་དུ་རབ་ཏུ་བརྟག་པར་བྱའོ། །དེའི་ཕྱིར་རིམ་པ་འདིས་ལུས་ངག་ཡིད་གསུམ་བསྲུང་བར་བྱས་ནས་ཅི་བདེར་གནས་པར་བྱའོ། །འཕགས་མའི་སྒྲུབ་ཐབས་
བྱས་པ་ཡིས། །དགེ་བ་ཉེར་བསགས་གང་དེ་ཡིས། །ཡེ་ཤེས་དྲི་མེད་འོད་ཟེར་ཅན། །སྐྱེ་བོས་གོ་འཕང་ཐོབ་པར་ཤོག །ཨོཾ་ཁ་ཁ་ཁཱ་ཧི་ཁཱ་ཧི་གྲྀཧྞ་གྲྀཧྞ་ཏུ་སརྦ་བྷཱུ་ཏ་ཀཱི་བ་ལིཾ་མ་མ་ཤཱནྟིཾ་ཀུ་རུ་བནྔྷུ་སྭཱ་ཧཱ། ཞེས་པའི་སྔགས་ཀྱིས་གཏོར་མ་འབུལ་ལོ། །རྟོག་པ་ལས་གསུངས་པའི་འོད་ཟེར་ཅན་
གྱི་སྒྲུབ་ཐབས་རྫོགས་སོ།། །།པཎྜི་ཏ་སློབ་དཔོན་སྙིང་པོའི་ཞབས་ཀྱིས་མཛད་པའོ།། ༄༅༅། །རྒྱ་གར་སྐད་དུ། མཱ་རཱི་ཙྱཻ་སཱ་དྷ་ནཾ། བོད་སྐད་དུ། འོད་ཟེར་ཅན་གྱི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །དང་པོ་ཉི་མའི་དཀྱིལ་འཁོར་གྱི་སྟེང་

དུ་དང་པོའི་བཅུ་གསུམ་པའི་ས་བོན་ཟླ་ཕྱེད་དང་ཐིག་ལེས་ཉེ་བར་བརྒྱན་པ་དེ་ལས་སྐྱེས་པའི་འོད་ཟེར་ཅན་སྐུ་མདོག་དམར་མོ་ཞལ་དྲུག་པ་དང་པོ་དམར་པོ། གཉིས་པ་ནག་པོ། གསུམ་པ་ལྗང་གུ་བཞི་པ་སེར་པོ། ལྔ་པ་དཀར་པོ་དྲུག་པ་ནི་སྟེང་གི་ཕག་ཞལ་ཏེ་ནག་པོའོ། །མྱ་ངན་མེད་པའི་
ཤིང་དང་མཆོད་རྟེན་གྱིས་བརྒྱན་པ། ལྟོ་འཕྱང་བ་ཐོད་པའི་ཕྲེང་བས་མཛེས་ཤིང་དབུ་སྐྲ་བརྫེས་པ་སྦྲུལ་གྱིས་རྣམ་པར་བརྒྱན་པ། སྟག་གི་པགས་པའི་ཤམ་ཐབས་ཅན། བགེགས་འཇོམས་པར་མཛད་པ། ཁ་དོག་སྣ་ཚོགས་པའི་ཕག་གི་ཤིང་རྟ་ལ་བཞུགས་པ། ཕྱག་གཡས་ན་
རལ་གྲི་དང་། རྡོ་རྗེ་དང་། གཏུན་ཤིང་དང་། མདའ་དང་། རྡོ་རྗེ་རྩེ་གཅིག་པ་དང་། དགྲ་སྟ་བསྣམས་པ། གཡོན་པ་སྡིགས་མཛུབ་དང་བཅས་པའི་ཞགས་པ་དང་། ཐོད་པ་དང་། མྱ་ངན་མེད་པའི་ཡལ་ག་དང་། ཚངས་པའི་མགོ་བོ་དང་། གཞུ་དང་། རྩེ་གསུམ་བསྣམས་པ་སྟེ། འདི་ཕྱག་
བཅུ་གཉིས་པ། སྤྱན་གསུམ་པ། ཁ་དོག་དམར་ཞིང་ཟླུམ་པ། ཞལ་གཙིགས་པའོ། །ཤིང་རྟའི་དབུས་སུ་ཕྱག་གཉིས་པ་སྡིགས་མཛུབ་དང་ཡལ་ག་བསྣམས་པ། མདུན་དུ་གཉིས་པ་བསྒོམ་པར་བྱའོ། །དེ་ནས་བདག་ཉིད་བཅོམ་ལྡན་འདས་མ་འོད་ཟེར་ཅན་གྱི་ཕྱག་རྒྱ་བཅིང་བར་བྱའོ། །
རྡོ་རྗེ་ཐལ་མོ་སྦྱར་ནས་ཏིང་ངེ་འཛིན་གྱིས་གུང་མོ་བརྐྱང་ནས་མཉམ་དུ་མྱུ་གུར་བྱས་ཏེ། མཐེབ་ཆེན་སྐྱིལ་ཀྲུང་བཅིངས་ནས་མཛུབ་མོའི་རྩེ་མོ་རྣམ་པར་གཟུང་བར་བྱའོ། །ཨོཾ་མཱ་རཱི་ཙྱཻ་མཱཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། འོད་ཟེར་ཅན་གྱི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། ཤྲཱི་མཱ་
རཱི་ཙྱཻ་པི་ཙུ་པཱ་སཱ་དྷ་ནཾ། བོད་སྐད་དུ། དཔལ་འོད་ཟེར་ཅན་པི་ཙུ་བའི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །རང་གི་རྟོག་ངན་ཆ་ཡིས་བསྐྱེད། །བར་དུ་གཅོད་པ་ཀུན་ཞི་དང་། །ཀུན་མཁྱེན་ཤེས་རབ་ཐོབ་བྱའི་ཕྱིར། །འོད་ཟེར་ཅན་ཉིད་བསྒོམ་པར་བྱ། །ཕྱོགས་ཀུན་དུས་
གསུམ་ནང་བཞུགས་པའི། །རྫོགས་སངས་རྒྱས་དང་བླ་མའི་མདུན། །བདག་ཉིད་ལྟ་ལས་ཡང་དག་མཆོད། །ཆོ་ག་བཞིན་དུ་བཤགས་ལ་སོགས། །དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་

རྒྱས་བྱང་ཆུབ་ཡིད་ཀྱིས་གཟུང་། །བདག་མེད་པ་ཡི་ངོ་བོ་ནི། །སྟོང་ཉིད་མཚན་མེད་རྒྱུ་དང་བྲལ། །དེ་ཕྱིར་སྨོན་པ་མེད་པ་དང་། །འགྲོ་རྣམས་རང་ཉིད་རྣམ་ཐར་གསུམ། །སྐུ་གདུང་མཆོད་རྟེན་ཆོས་དབྱིངས་གནས། །སྙིང་ག་སངས་རྒྱས་ལམ་ནས་ནི། །མཁའ་ཁྱབ་
སངས་རྒྱས་ཚོགས་འཕྲོ་བས། །གྲུ་བཞི་ལ་སོགས་ཡང་དག་ལྡན། །ཕྱི་དང་ནང་དུ་ཟུར་བཞི་ལ། །རྩེ་གསུམ་གྱིས་མཚན་ཟླ་བའི་དཀྱིལ། །གདུག་པའི་སེམས་ཅན་མཐིལ་དུ་མནན། །རི་ཡི་རྒྱལ་པོ་རབ་ཏུ་གནས། །དེ་ལ་མཾ་ཡིག་བསྒོམ་པར་བྱ། །མྱ་ངན་མེད་ཤིང་ལས་བྱུང་བའི། །སྒེག་
ཅིང་དཔའ་དང་བདེན་པའི་ཆར། །འཛམ་བུ་ནཱ་དའི་འོད་དང་མཚུངས། །གཡས་ཞལ་ཨིནྡྲ་ནཱི་ལའི་མདོག །མི་སྡུག་འཇིགས་ཤིང་དྲག་པོ་སྟེ། །ཅིག་ཤོས་ཞལ་ནི་ཟླ་འོད་འཕྲོ། །སྙིང་རྗེ་ལས་བྱུང་ཞི་བ་སྟེ། །ཞལ་གསུམ་རྣམ་པར་ཐར་པ་གསུམ། །ཆོས་དང་ལོངས་སྤྱོད་སྤྲུལ་པར་གསུངས། །
ཡི་གེ་སེར་པོ་གོས་བཟང་དང་། །འོད་ཟེར་གྱིས་ནི་ཞལ་གནས་མ། །ཁ་མིག་ཁབ་ཀྱིས་འཚེམ་བྱེད་ཅིང་། །ཁ་དང་མིག་དག་འཆིང་བར་བྱེད། །སྙིང་མགྲིན་ལྕགས་ཀྱུ་ཞགས་པ་དང་། །མདའ་དང་གཞུ་ཡིས་འབིགས་པར་བྱེད། །རྡོ་རྗེས་གདུག་པའི་སྙིང་འབུགས་ཤིང་། །མྱ་ངན་མེད་པས་
འབྲབ་པར་བྱེད། །རྣམ་ཐར་བརྒྱད་བརྒྱད་རྣམས་ཀྱིས་ནི། །གདུག་པ་འཇོམས་པར་རབ་ཏུ་བསྒོམ། །ཞབས་ནི་བརྐྱང་བསྐུམ་དག་གིས་ནི། །དབང་ཕྱུག་དང་ནི་གཽ་རཱི་དག །ཐབས་དང་ཤེས་རབ་ཞབས་ཀྱིས་མནན། །འོད་ཟེར་ཅན་བསྒོམ་བརྟུལ་ཞུགས་ཅན། །ཕྱོགས་ཀུན་དང་ནི་དུས་
གསུམ་དང་། །བདག་ཉིད་སྤྲོ་བསྡུ་བྱས་ནས་ནི། །ཛཿཧཱུཾ་བཾ་ཧོཿབརྗོད་ནས་ནི། །དེ་ལ་སངས་རྒྱས་ཀུན་གཞུག་བྱ། །སངས་རྒྱས་སྐུ་བསྐྱེད་རིམ་པ་ཡིས། །བདུད་རྩིའི་བུམ་པ་རྣམས་བཟུང་ནས། །རིན་ཆེན་དབུ་རྒྱན་ཅོད་པན་ཅན། །རྟག་ཏུ་དབང་བསྐུར་བལྟ་བར་བྱ། །ཕྱག་ན་མཆོད་པ་
ཀུན་ཐོགས་ནས། །མེ་ཏོག་ལ་སོགས་རྡོ་རྗེ་མས། །མཆོད་ཅིང་བསྟོད་པ་བྱས་ནས་ནི། །ཤིན་ཏུ་བཟའ་དང་ཆང་སོགས་ཀྱིས། །ལུས་ངག་ཡིད་ནི་རེངས་བྱེད་པ། །པི་ཙུའི་སྔགས་ནི་བཟླས་པར་བྱ། །སརྦ་དུཥྚཱ་པྲ་དུཥྚཱ་ནཾ། །རང་མིང་བཞི་པའི་མཐའ་ཅན་གྱིས། །ཐུན་མཚམས་བཞིའམ་

ཐུན་མཚམས་གསུམ། །སྔ་བར་བརྒྱ་དང་རྩ་བརྒྱད་བཟླས། །རིག་པ་ཆེན་མོ་བསྒོམ་པ་ཡིས། །དོན་ཆེན་ལ་ནི་སྟོང་ཕྲག་གཅིག །བཟླས་ནས་མཆོད་ཅིང་བསྟོད་པར་བྱ། །དགེ་བའི་དོན་དུ་ཞུ་བར་བྱ། །བདག་ཉིད་གནས་ནས་རྫོགས་སངས་རྒྱས། །གང་ལའང་ཆགས་པ་སྤང་བར་བྱ། །
གཤེགས་གསོལ་དང་ནི་ལྷ་གནས་ལ། །སྤྱིར་ནི་ཡི་གེ་གསུམ་དྲན་བྱ། །རབ་གནས་དུས་སུ་རྒྱུད་ལ་ནི། །ལུས་ངག་ཡིད་ནི་བསྒྲུབ་པར་བྱ། །ཐུན་མཚམས་བར་ཡང་ཆོད་པ་སོགས། །སྔོན་དུ་འགྲོ་བས་བཟླས་པར་བྱ། །དང་པོ་ཆོ་གས་སླར་ཡང་ནི། །སྔ་བར་ལྷ་མོ་གླུ་ཡིས་བསྐུལ། །རིག་པ་
འདི་དང་དེ་བཞིན་བདག །བསྒོམ་ཞིང་ཡང་དག་བཟླས་པར་བྱ། །རྒྱུད་ཀྱི་མན་ངག་ཉིད་ལས་ནི། །སྔགས་པས་མངོན་འདོད་རྟག་ཏུ་བསྒྲུབ། །པི་ཙུ་ཅུང་ཟད་ཡང་དག་བྲིས། །བསོད་ནམས་ཡང་དག་ཉེར་བསགས་པ། །དེ་ཡིས་འཇིག་རྟེན་ཐམས་ཅད་ནི། །འཇམ་པའི་རྒྱལ་པོ་ཉིད་
དུ་ཤོག །དཔལ་འོད་ཟེར་ཅན་པི་ཙུ་བའི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། མཱ་རཱི་ཙྱཻ་སཱ་དྷ་ནཾ། བོད་སྐད་དུ། འོད་ཟེར་ཅན་གྱི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །གདུག་པ་ཐམས་ཅད་འདུལ་མཛད་པའི། །ལྷ་མོ་འོད་ཟེར་
ཅན་བཏུད་ནས། །ལས་རྣམས་ཐམས་ཅད་སྒྲུབ་པ་ཡི། །དེ་ཡི་སྒྲུབ་ཐབས་བཤད་པར་བྱ། །སེམས་དཔའི་སྐྱིལ་ཀྲུང་གིས་བཞུགས་ནས། །སྙིང་གའི་ཟླ་བ་ཨོཾ་ཡིག་བརྒྱན། །འབར་ཞིང་དམར་བའི་ས་བོན་ལས། །སྣ་ཚོགས་འོད་ཟེར་ཡང་དག་འཁྲིགས། །དེས་བསྐྱེད་རྫོགས་པའི་
སངས་རྒྱས་དང་། །བླ་མ་བྱང་ཆུབ་སེམས་ཆེན་རྣམས། །ཕྱག་འཚལ་མངོན་པར་བསྔགས་ནས་མཆོད། །ཞལ་ཟས་ལ་སོགས་དབུལ་བར་བྱ། །བཛྲ་པུཥྤེ། བཛྲ་དྷཱུ་པེ། བཛྲ་དཱི་པེ། བཛྲ་གནྡྷེ། བཛྲ་ནཻ་ཝི་དྱེ་ཧཱུཾ། ཞེས་པའི་སྔགས་ཀྱིས་ཐམས་ཅད་དུའོ། །དེ་ནས། དཀོན་མཆོག་གསུམ་
ལ་བདག་སྐྱབས་མཆི། །བྱང་ཆུབ་སེམས་ཀྱང་བསྐྱེད་པར་བགྱི། །སྨོན་ལམ་སྔོན་དུ་འགྲོ་བ་ཡིས། །ཆོས་ཀུན་བདག་མེད་བསྒོམ་པར་བྱ། །འདིས་ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། དེ་ནས་བརྟན་གཡོའི་དངོས་པོ་ཀུན། །ས་བོན་རང་བཞིན་ཉིད་བསམས་ནས། །དེའི་རྗེས་སུ་

ཨོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། དེའི་ས་བོན་ལས་སྐྱེས་པའི་འཁོར་ལོ། དེའི་ལྟེ་བ་ལ་ཉི་མའི་དཀྱིལ་འཁོར་རོ། །དེའི་སྟེང་དུ་དྲུག་པའི་ལྔ་པའི་ས་བོན་ལ་ཨཾ་ཡིག་དང་ཟླ་བ་ཕྱེད་པ་དང་ཐིག་ལེས་བརྒྱན་པའོ། །དེ་ཐམས་ཅད་ཡོངས་སུ་རྫོགས་པ་ལས་འོད་
ཟེར་ཅན་གྱི་སྐུར་བདག་ཉིད་བསམ་པར་བྱའོ། །གོས་དང་སྐུ་མདོག་དམར་མོ་ཡོན་ཏན་ཉིས་འགྱུར་གྱི་ཕྱག་རོལ་ཞིང་སྟག་གི་པགས་པའི་ཤམ་ཐབས་ཅན། རལ་པ་གྱེན་དུ་བརྫེས་པ། ཅོད་པན་དམར་པོ་ཞལ་གསུམ་པ། ཞལ་གཉིས་ནི་ཕག་ཞལ་ལོ། །དང་པོའི་ཞལ་ནི་ཞི་ཞིང་ཅུང་ཟད་འཛུམ་
པའི་ཞལ་སྒེག་ཅིང་འགྱིང་བའི་ཉམས་དང་བཅས་པའོ། །ཐམས་ཅད་ལ་སྤྱན་གསུམ་པའོ། །གཡོན་པ་ནི་ཕག་ཞལ་དམར་པོ་སྟེ། རྡོ་རྗེ་ཐོ་བ་བསྣམས་པ་ལུས་མེད་ཀྱིས་ཕྱག་མཛད་པའོ། །གཡས་པ་ན་ཕག་ཞལ་དམར་སྐྱའོ། །རྡོ་རྗེའི་ཞགས་པ་བསྣམས་པའི་དབང་པོས་ཕྱག་མཛད་པ། །
མཆོད་རྟེན་གྱི་ནང་ན་ཁྲོ་བོ་ནག་པོ་གཡས་བརྐྱང་གིས་བཞུགས་པའོ། །འོག་ཏུ་ཁྱབ་འཇུག་དང་དབང་ཕྱུག་དང་ཚངས་པ་ལ་སོགས་པས་ཕྱག་མཛད་པ། ནོར་ལྷ་དང་འཇིག་རྟེན་སྐྱོང་བ་ཐམས་ཅད་འཇིགས་པས་འདུད་པ་དང་། རྗེ་བཙུན་མ་ལ་ཕྱག་འཚལ་ཞིང་བཀའ་སྒྲུབ་པར་མཛད་པས་གནས་
པའོ། །དེ་ནས་རྣ་བར་བཀང་བའི་གཞུ་དང་། མྱ་ངན་མེད་པའི་ཡལ་ག་དང་མདས་བསྒྲུབ་བྱའི་སྙིང་གར་འབུགས་པར་བསམ་པར་བྱའོ། །ཕུ་དུང་དམར་པོའི་སྟོད་གཡོགས་ཅན། རྒྱན་ཐམས་ཅད་ཀྱིས་བརྒྱན་པ་བསམ་པར་བྱའོ། །མྱ་ངན་མེད་པའི་དབུ་རྒྱན་བཅིངས་པའོ། །ཕྱག་
གཡོན་ན་མྱ་ངན་མེད་པའི་མེ་ཏོག་བསྣམས་པ། སྙིང་གར་སྡིགས་མཛུབ་ཀྱིས་གནས་པའི་རྡོ་རྗེ་ཞགས་པ་དང་། ཐོད་པ་ཆེན་པོ་དང་། སྐུད་པ་དང་། མགོ་བོ་དང་། བུམ་པ་བཟང་པོ་རྣམས་ཕྱག་ན་བསྣམས་པའོ། །གཡས་པ་རྣམས་ཀྱིས་སྐུད་པ་དང་། ལྕགས་ཀྱུ་དང་། བྷིཎྜི་པཱ་ལ་དང་། རལ་
གྲི་འཕྱར་བ་དང་། རྡོ་རྗེའི་དབྱུག་པ་དང་། རྡོ་རྗེ་བསྣམས་པའོ། །དཔལ་ལྡན་རྣམ་པར་སྣང་མཛད་སྐུ་མདོག་དཀར་པོ་རྡོ་རྗེའི་སྐྱིལ་ཀྲུང་གིས་བཞུགས་པ། བྱང་ཆུབ་མཆོག་གི་ཕྱག་རྒྱ་ཅན་ཏིང་ངེ་འཛིན་ལ་སྙོམས་པར་ཞུགས་པ་རལ་པའི་ཅོད་པན་ཅན་ཞི་བ་ཡེ་ཤེས་ཀྱི་སྤྱན་ཟིམ་བུར་མཛད་པ་སྤྱི་བོར་

རྣམ་པར་བསམས་ནས་ལས་ཐམས་ཅད་བརྩམ་པར་བྱའོ། །མན་ངག་ཇི་ལྟ་བ་བཞིན་དུ་ཡེ་ཤེས་སེམས་དཔའ་དགུག་པ་དང་། རབ་ཏུ་གཞུག་པ་དང་། བཅིང་བ་དང་། དབང་དུ་བྱ་བས་བསྒྲུབ་པར་བྱའོ། །དབང་བསྐུར་བ་དང་། གོ་ཆ་དང་། ཅོད་པན་བཅིང་བ་དང་། མཆོད་པ་དང་། བསྟོད་
པ་ཡང་བྱས་ནས་ཕྱི་ནས་བཟླས་པ་བརྩམ་པར་བྱའོ། །ཇི་ལྟར་ཉི་མ་འབར་ཞིང་རབ་ཏུ་གསལ་བ་ནི་མི་གཡོ་བ་དང་ལྡན་པའི་མེ་དང་ལྡན་པའོ། །དེ་བཞིན་དུ་ཆོས་འབར་བའི་སྐུ་ལ་རྩེ་གཅིག་པའི་སེམས་ཀྱིས་བཟླས་པར་བྱའོ། །དེ་ནས་ཕྱག་རྒྱ་བཅིང་བར་བྱ་སྟེ། མཐེབ་ཆེན་སེམས་དཔའི་སྐྱིལ་ཀྲུང་
བཅིངས་ནས་མཛུབ་མོའི་རྩེ་མོ་བཀུག་སྟེ་བཟུང་ལ། མཉམ་དུ་གུང་མོ་ཡན་ལག་མཆོག་ལ་ལྷག་མ་རྡོ་རྗེའི་ཐལ་མོ་སྦྱར་བ་སྙིང་ག་དང་མཛོད་སྤུ་དང་མགྲིན་པ་དང་སྤྱི་བོ་རྣམས་སུ་བཞག་ནས་འདིས། ཨོཾ་མཱ་རཱི་ཙྱཻ་ཧཱུཾ་སརྦ་དུཥྚཱཾ་མརྡཱ་ཡ་ཧཱུཾ་ཕཊ། བརྒྱད་པའི་གསུམ་པ་དང་བཞི་པ་དག་གི་གསུམ་པ་ལས་
བདུན་པའི་བཞི་པས་གང་བ་དང་པོའི་གཉིས་པས་བརྒྱན་པ། བཞི་པ་ལའང་དང་པོའི་གཉིས་པས་བརྒྱན་པའོ། །དཀར་པོ་དབང་པོའི་ཞལ་གྱིས་དགོངས་མོའི་ཐུན་ནས་གུང་ཐུན་བར་དུ་ཞེས་པའི་སྔགས་རབ་ཏུ་གསལ་བར་བྱ་སྟེ། ཨོཾ་མཱ་རཱི་ཙྱཻ་དེ་བ་དཏྟ་སྱ་ཤཱནྟིཾ་ཀུ་རུ་སྭཱ་ཧཱ། དང་པོའི་བཅུ་གསུམ་
པའི་ས་བོན་ཟླ་ཕྱེད་ཐིག་ལེས་བརྒྱན་པ་སྔོན་དུ་འགྲོ་བས་གུང་ཐུན་བར་དུ་སེར་པོ་ལུས་ངན་པོའི་ཞལ་གྱིས་རྒྱས་པའི་སྔགས་བཟླས་པར་བྱ་སྟེ། ཨོཾ་མཱ་རཱི་ཙྱཻ་དེ་བ་དཏྟ་སྱ་པུཥྚིཾ་ཀུ་རུ་ཨོཾ། །བརྒྱད་པའི་བཞི་པ་དང་པོའི་བཅུ་གསུམ་པ་བཅུ་དྲུག་པ་དང་ཡང་དག་པར་ལྡན་པས་ནམ་ཕྱེད་ལ་ཆུ་བདག་གི་ཞལ་
དམར་པོས་མིང་མེད་ཀྱིས་དབང་དུ་བྱ་བའི་ལས་ཀྱི་རབ་ཏུ་དབྱེ་བའོ། །ཨོཾ་མཱ་རཱི་ཙྱཻ་དེ་བ་དཏྟ་སྱ་བ་ཤ་མ་ན་ཡ་ཧོཿདྲུག་པའི་གཉིས་པ་དང་བཞི་པའི་དང་པོར་ཕྱེད་ནག་པོའི་གཤིན་རྗེའི་ཞལ་གྱིས་ཉི་མའི་གུང་ལ་མངོན་སྤྱོད་འདིའི་སྔགས་སྡིགས་མཛུབ་ཀྱིས་རབ་ཏུ་བསྐུལ་ལོ། །ཨོཾ་མཱ་རཱི་ཙྱཻ་དེ་བ་དཏྟཾ་མཱ་
ར་ཡ་ཧཱུཾ་ཕཊ། གསུམ་པའི་གསུམ་པའི་ས་བོན་ལས་བཅུ་དྲུག་པ་ཡང་དག་པར་ལྡན་པས་ཐམས་ཅད་འགུགས་པའི་མཆོག་གོ། །ཨོཾ་མཱ་རཱི་ཙྱཻ་ཨ་མུ་ཀ་སྱ་སིདྡྷི་མཱ་ཀཪྵ་ཡ་ཛཿའོད་ཟེར་ཅན་གྱི་དཀྱིལ་འཁོར་དུ་དབང་བསྐུར་ནས་བླ་མ་ལ་གུས་ཤིང་བདེན་པའི་ངག་གིས་འགྲུབ་སྟེ། དེའི་ལྷ་རྣམས་

ཀྱི་བཟླས་པས་ཐེ་ཚོམ་མེད་པར་རིག་གོ། །སྔགས་བྱེ་བ་བཟླས་པར་འགྱུར་རོ། །རས་བྲིས་ཀྱི་མདུན་དུ་ལེགས་པར་བཟླས་པ་དང་ལྡན་པས་ལས་ཐམས་ཅད་འགྲུབ་ཅིང་ཡིད་ལ་གང་འདོད་པ་འབྱུང་ངོ་། །འོད་ཟེར་ཅན་འབྱུང་རྒྱུད་ལས་ནི། །མཆོག་གི་སྒྲུབ་ཐབས་བྲིས་པ་
ཡིས། །དགེ་བའི་རྩ་བ་འདི་ཡིས་ནི། །སེམས་ཅན་བདེ་གཤེགས་འགྱུར་བར་ཤོག །འོད་ཟེར་ཅན་གྱི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། སཾ་ཀྵིཔྟ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། འོད་ཟེར་ཅན་གྱི་སྒྲུབ་ཐབས་མདོར་བསྡུས་པ། འཕགས་མ་འོད་
ཟེར་ཅན་ལ་ཕྱག་འཚལ་ལོ། །རང་གི་སྙིང་གར་ཟླ་བ་ལ་མཾ་ཡིག་བསམས་ནས། དེའི་འོད་ཟེར་རྣམས་ཀྱིས་བསྐྱེད་པའི་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་མདུན་དུ་བལྟས་ནས་ཕྱག་འཚལ་བ་དང་མངོན་པར་མཆོད་ནས་སྡིག་པ་བཤགས་པ་ལ་སོགས་པ་བྱའོ། །དེ་ནས་
ཆོས་ཐམས་ཅད་ཀྱི་བདག་ཉིད་ཀྱང་སྒྱུ་མའི་དཔེ་ལ་སོགས་པས་སོ་སོར་སྣང་བ་ཙམ་ས་བོན་ལས་བསམས་ནས་རང་བཞིན་རྣམ་པར་དག་པ་བརྗོད་པར་བྱ་སྟེ། དེ་ནས་སྟོང་པ་ཉིད་ཀྱིས་ལྷག་པར་གྲོལ་བ་ལ་སོགས་པ་བརྗོད་པར་བྱའོ། །དེ་ནས་དེའི་ས་བོན་ཡོངས་སུ་གྱུར་པ་ལས་མྱ་ངན་མེད་པའི་
ཤིང་། དེའི་སྟེང་དུ་ཟླ་བ་ལ་གནས་པའི་མཾ་ཡིག །དེ་ཐམས་ཅད་ཡོངས་སུ་གྱུར་པ་ལས་བདག་ཉིད་འོད་ཟེར་ཅན་གྱི་སྐུར་བལྟའོ། །དེ་ཡང་སྐུ་མདོག་སེར་མོ་ཞལ་གསུམ་པ། སོ་སོར་སྤྱན་གསུམ་པ། ཕྱག་བརྒྱད་པ། ན་བཟའ་དམར་པོ་མནབས་པ། ཕུ་དུང་དམར་པོའི་སྟོད་གཡོགས་
ཅན། རྒྱན་ཐམས་ཅད་ཀྱིས་བརྒྱན་པ། རྣམ་པར་སྣང་མཛད་ཀྱིས་དབུ་བརྒྱན་ཅིང་འོད་འཕྲོ་བའི་ཕྲེང་བ་འཁྲིགས་པ་བནྡྷུ་ཛི་བ་ཀའི་མེ་ཏོག་ལྟ་བུ་དང་ལྡན་པའི་ཕྱག་གཡོན་པ་རྣམས་ཀྱིས་སྡིགས་མཛུབ་ཀྱི་ཞགས་པ་དང་། གཞུ་དང་། མྱ་ངན་མེད་པའི་ཡལ་ག་དང་། སྐུད་པ་བསྣམས་པ།
གཡས་ན་རྡོ་རྗེ་དང་། མདའ་དང་། ལྕགས་ཀྱུ་དང་། ཁབ་བསྣམས་པ། མཆོད་རྟེན་གྱི་ནང་ན་གནས་ཤིང་ཕག་བདུན་གྱི་ཤིང་རྟ་ལ་ཞབས་གཡོན་བརྐྱང་གིས་བཞུགས་པ། ལང་ཚོ་གཞོན་ནུས་གནས་ཤིང་སྤྱན་རྒྱས་པ། དེའི་རྩ་བའི་ཞལ་ཞི་ཞིང་སྒེག་པ། གཡོན་ན་ཕག་ཞལ་

ནག་པོ་ཁྲོ་བ་དང་བཅས་པ་ཁྲོ་གཉེར་གཙིགས་ཤིང་འཇིགས་པར་བྱེད་པ་ལྗགས་བསྐྱོད་པའོ། །ཞལ་གཡས་པ་དམར་ཞིང་ཟླུམ་པ་པདྨ་རཱ་ག་དང་མཚུངས་པ་གཙང་ཁང་ནང་ན་བཞེངས་ཤིང་མྱ་ངན་མེད་པའི་ཤིང་གི་མེ་ཏོག་གཅལ་དུ་བཀྲམ་པ། འོག་ཏུ་རླུང་གི་དཀྱིལ་འཁོར་ལ་ཧཾ་ཡིག་ལས་བྱུང་
བའི་སྒྲ་གཅན་ཟླ་བ་དང་ཉི་མ་འཛིན་པ་ལྷ་མོ་བཞིས་ཡོངས་སུ་བསྐོར་བའི་བཅོམ་ལྡན་འདས་མ་བསམ་པར་བྱའོ། །དེ་ལ་ཤར་དུ་ལྷ་མོ་བཏྟཱ་ལི་སྐུ་མདོག་དམར་མོ་ཕྱག་བཞི་པ་ཕྱག་གཡོན་པ་དག་གིས་ཞགས་པ་དང་མྱ་ངན་མེད་པའི་ཤིང་བསྣམས་པ། གཡས་པ་དག་གིས་རྡོ་རྗེ་དང་ལྕགས་ཀྱུ་དང་།
ཁབ་བསྣམས་པའོ། །ལྷོ་རུ་ལྷ་མོ་བ་དཱ་ལི་སྐུ་མདོག་སེར་མོ་ཕྱག་བཞི་པ་གཡོན་པ་དག་གིས་ཞགས་པ་དང་རྡོ་རྗེ་གཡས་པ་དག་ན་མྱ་ངན་མེད་པའི་ཤིང་དང་། ཁབ་བསྣམས་པའོ། །ནུབ་ཏུ་ལྷ་མོ་བ་རཱ་ལི་དེའི་གཟུགས་འཆང་བ་ཕྱག་གཡོན་པ་དག་གིས་ཞགས་པ་དང་། མྱ་ངན་མེད་པའི་ཤིང་།
གཡས་པ་དག་གིས་རྡོ་རྗེ་དང་། ཁབ་བསྣམས་པའོ། །བྱང་དུ་ལྷ་མོ་བཱ་རཱ་ཧཱ་མུ་ཁི་སྐུ་མདོག་དམར་མོ་ཕྱག་བཞི་པ་ཕྱག་གཡོན་པ་དག་གིས་མྱ་ངན་མེད་པའི་ཤིང་དང་གཞུ། གཡས་པ་དག་གིས་མདའ་དང་རྡོ་རྗེ་བསྣམས་པ་བསམ་པར་བྱའོ། །ཡང་ན་ཐམས་ཅད་དཀར་མོ་རིན་པོ་ཆེའི་ཅོད་
པན་ཅན། ཕག་ཞལ་གཅིག་པ་སྤྱན་གསུམ་པ། རྒྱན་སྣ་ཚོགས་པས་བརྒྱན་པ་ཕུ་དུང་དམར་པོའི་སྟོད་གཡོགས་ཅན་བསམ་པར་བྱའོ། །དེ་ནས་རྡོ་རྗེ་ལྕགས་ཀྱུ་མ་ལ་སོགས་པ་རྣམས་ཀྱི་ཕྱག་རྒྱ་དང་སྔགས་ཀྱིས་ཡེ་ཤེས་སེམས་དཔའ་དགུག་པ་ལ་སོགས་པ་བྱའོ། །ཛཿཧཱུཾ་བཾ་ཧོཿ ཞེས་
པ་འདིས་ཡེ་ཤེས་སེམས་དཔའ་དགུག་པ་དང་གཞུག་པ་དང་བཅིང་བ་དང་དབང་དུ་བྱ་བས་མཉེས་པར་བྱའོ། །དེ་ནས་འོད་ཟེར་ཅན་གྱི་ཕྱག་རྒྱས་གཉིས་སུ་མེད་པར་བྱ་ཞིང་བསྒོམ་པ་སྔོན་དུ་འགྲོ་བས་བཟླས་པར་བྱའོ། །ཨོཾ་མཱ་རཱི་ཙྱཻ་སྭཱ་ཧཱ། དགེ་བ་ཐམས་ཅད་ཡོངས་སུ་བསྔོ་ནས་གཤེགས་
སུ་གསོལ་ལོ། །ཨོཾ་མཱ་རཱི་ཙྱཻ་མུཿཞེས་པས་གཤེགས་སུ་གསོལ་ཞེས་སོ། །འོད་ཟེར་ཅན་གྱི་སྒྲུབ་ཐབས་མདོར་བསྡུས་པ་རྫོགས་སོ།། ༄༅༅། །རྒྱ་གར་སྐད་དུ། ཨཱརྱ་མཱ་རཱི་ཙྱཻ་དྷཱ་ར་ཎི་པ་ཐོ་པ་དེ་ཤཿ། བོད་སྐད་དུ། འཕགས་མ་འོད་ཟེར་ཅན་གྱི་གཟུངས་གདོན་པའི་

མན་ངག །བཅོམ་ལྡན་འདས་འཕགས་མ་འོད་ཟེར་ཅན་ལ་ཕྱག་འཚལ་ལོ། །བློ་ལྡན་སེམས་དཔའི་སྐྱིལ་ཀྲུང་སྟེ། །དམིགས་པ་བརྩེ་བ་ཆེན་པོ་ཡིས། །སྔ་ཐུན་སྙིང་གར་ཟླ་བ་ལ། །ཨོཾ་ཡིག་དཀར་པོ་བསྒོམ་པར་བྱ། །རྣམ་སྣང་གསུངས་པའི་བདག་ཉིད་ཅན། །ཀུན་
ནས་དཀར་ཞིང་དེ་འོད་ཀྱིས། །ར་བ་ཟླུམ་ཞིང་མཆོད་རྟེན་བརྒྱན། །སྟེང་དུ་འོད་ཟེར་འབར་བ་སྟེ། །བསྲུང་བའི་དོན་དུ་མདུན་རྒྱབ་དང་། །གཡས་གཡོན་འོག་དང་སྟེང་རྣམས་སུ། །རིམ་པས་མ་སོགས་གཡོག་ལ་སོགས། །ཞང་པོ་ལ་སོགས་བུ་ལ་སོགས། །བྲིས་སྐུ་དགེ་བའི་བཤེས་
གཉེན་དང་། །པོ་ཏི་ལ་སོགས་ལས་བྱུང་བ། །དེ་ནས་ཟླ་བ་མཾ་ཡིག་སེར། །མྱ་ངན་མེད་པའི་ཡལ་གས་བྱུང་། །འཕགས་མ་འོད་ཟེར་ཅན་བསམ་བྱ། །ཁྲོ་ཞིང་ཁབ་དང་སྐུད་པ་བསྣམས། །གང་ཞིག་ལྟེ་བ་ནས་ལངས་ཏེ། །སྣ་བུག་གཡས་པ་དེ་མདུན་དུ། །གཞན་ནས་སྐུད་པས་
ཁ་མིག་བཙེམས། །གདུག་ཅན་ར་བའི་ཕྱི་རོལ་བྱ། །ལན་ཅིག་མ་ཡིན་བྱས་ནས་ནི། །བྱང་ཆུབ་མཆོག་གི་གཟུངས་བཀླག་གོ། །དེ་ནས་ཨོཾ་དང་མཱ་རཱི་ཙྱཻ་སྭཱ་ཧཱ། །སྔགས་ནི་ཇི་བཞིན་སྟོབས་ཀྱིས་བཟླས། །དེ་ནས་སྔགས་རིག་གཡོན་པ་ཡི། །སྣ་བུག་ནས་ནི་དེའི་སྙིང་གར། །གཞུག་
ཅིང་མྱ་ངན་མེད་ཤིང་གི། །འོད་ཟེར་གྱིས་བསྐྱེད་ཕག་སེར་གྱིས། །ཕྱི་རུ་གདུག་ཅན་ཡང་དག་འཇོམས། །སྣ་ཡིས་མཚམས་ནི་འཆིང་བར་བྱེད། །གསེར་གྱི་མདོག་ཅན་ཕག་ལ་བཞུགས། །གཙོ་མོ་གསེར་གྱི་མདོག་དང་ལྡན། །མི་འཇིགས་རབ་སྦྱིན་འོད་ཟེར་ཅན། །གོས་དཀར་ཅན་ལ་
བདག་ཕྱག་འཚལ། །འཕགས་མ་འོད་ཟེར་ཅན་གྱི་གཟུངས་བཀླག་པའི་མན་ངག་རྫོགས་སོ།། ༄༅༅། །རྒྱ་གར་སྐད་དུ། པརྞ་ཤ་བ་རི་སཱ་དྷ་ནཾ། བོད་སྐད་དུ། རི་ཁྲོད་ལོ་མ་ཅན་གྱི་སྒྲུབ་ཐབས། འཕགས་མ་རི་ཁྲོད་ལོ་མ་ཅན་ལ་ཕྱག་འཚལ་ལོ། །སྔོན་མ་བཞིན་དུ་ཐམས་ཅད་
བསྒྲུབས་ནས་རང་གི་སྙིང་གར་པདྨ་དཀར་པོ་དང་ཟླ་བའི་དཀྱིལ་འཁོར་ལ་པཾ་ཡིག་སེར་པོ་ལས་སྐྱེས་པའི་རྡོ་རྗེའོ། །དེའི་ལྟེ་བ་ལ་པཾ་ཡིག་གོ། །དེ་ཐམས་ཅད་ཡོངས་སུ་གྱུར་པ་ལས་བཅོམ་ལྡན་འདས་མ་སྐུ་མདོག་སེར་མོ་ཞལ་གསུམ་པ། སྤྱན་གསུམ་པ། ཕྱག་དྲུག་པ། དང་པོའི་ཞལ་སེར་

པོ། གཡས་དཀར་པོ། གཡོན་དམར་པོ་འགྱིང་ཞིང་བཞད་པ་རྒྱན་ཐམས་ཅད་ཀྱིས་བརྒྱན་པ། ལོ་མ་དང་རྨ་བྱའི་མདོངས་ཀྱི་ཤམ་ཐབས་ཅན། ལང་ཚོ་གཞོན་ཞིང་རྒྱས་པ། ཕྱག་གཡས་པ་རྣམས་ཀྱིས་རྡོ་རྗེ་དང་། དགྲ་སྟ་དང་། མདའ་རྣམས་བསྣམས་པ། ཕྱག་གཡོན་པ་
རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་། ཡལ་ག་དང་བཅས་པའི་རྨ་བྱའི་མདོངས་དང་། གཞུ་རྣམས་བསྣམས་པ། མེ་ཏོག་བཅིངས་པའི་རལ་པའི་ཅོད་པན་ལ་གནས་པའི་མི་བསྐྱོད་པ་འཆང་བ། ཉི་མའི་འོད་ཀྱི་དཀྱིལ་འཁོར་ཅན། འོག་ཏུ་བགེགས་རྣམས་མནན་པའི་པདྨ་
དཀར་པོ་དང་ཟླ་བའི་གདན་ལ་གཡོན་བརྐྱང་གིས་བཞུགས་པ། ཐུགས་ཀར་གཡོན་པའི་སྡིགས་མཛུབ་ཀྱིས་འོག་གི་བགེགས་ཀྱི་ཚོགས་སྐྲག་པར་མཛད་པའོ། །གཡས་རྡོ་རྗེའི་ཁུ་ཚུར་གྱིས་མཚོན་ཆ་འཕྱར་བའི་ཚུལ། དེ་བཞིན་དུ་ཕྱག་བཞིའི་གཡོན་པ་དག་གིས་སྡིགས་མཛུབ་དང་བཅས་
པའི་ཞགས་པ་དང་། ལོ་མ་དང་བཅས་པའི་རྨ་བྱའི་མདོངས་བསྣམས་པ། ཕྱག་གཡས་པ་དག་གིས་རྡོ་རྗེ་དང་། དགྲ་སྟ་བསྣམས་པ། ཤིན་ཏུ་འཇིགས་པ་སྟེར་བར་བསྒོམ་པར་བྱའོ། །དེ་ནས་སྔགས་བཟླས་པར་བྱ་སྟེ། ཨོཾ་པི་ཤཱ་ཙི་པརྞ་ཤ་བ་རི་སརྦ་མ་རཱི་པྲ་ཤ་མ་ཎི་སྭཱ་ཧཱ། དེ་ནས་ཇི་ལྟ་བ་བཞིན་
དུ་གཤེགས་ནས་ཅི་བདེར་གནས་པར་བྱའོ། །རི་ཁྲོད་ལོ་མ་ཅན་གྱི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། པརྞ་ཤ་བ་རི་སཱ་དྷ་ནཾ། བོད་སྐད་དུ། རི་ཁྲོད་ལོ་མ་ཅན་གྱི་སྒྲུབ་ཐབས། འཕགས་མ་རི་ཁྲོད་མ་ལོ་མ་ཅན་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་སྟོང་
པ་ཉིད་བསྒོམས་པའི་རྗེས་ལ་སྣ་ཚོགས་པདྨ་དང་ཟླ་བ་ལ་གནས་པའི་པཾ་ཡིག་ལྗང་གུ་ལས་སྐྱེས་པའི་རི་ཁྲོད་མ་ལོ་མ་ཅན་སྐུ་མདོག་ལྗང་གུ་ཞལ་གསུམ་པ། སྤྱན་གསུམ་པ། ཕྱག་དྲུག་པ། ནག་པོ་དང་། དཀར་པོ་དག་གཡས་དང་གཡོན་གྱི་ཞལ་ལོ། །ཕྱག་གཡས་པ་གསུམ་ན་རྡོ་རྗེ་དང་། དགྲ་
སྟ་དང་། མདའ་བསྣམས་པ། ཕྱག་གཡོན་པ་གསུམ་ན་གཞུ་བཀང་བ་དང་། ཡལ་ག་དང་། སྡིགས་མཛུབ་དང་བཅས་པའི་ཞགས་པ་བསྣམས་པ། ཞལ་ཁྲོ་བ་དང་བཅས་ཤིང་བཞད་པ། ལང་ཚོ་གཞོན་པ། ཕྲེང་བ་བཅིངས་ཤིང་སྟག་གི་པགས་པའི་ཤམ་ཐབས་ཅན་ཅུང་ཟད་ལྟོ་བ་འཕྱང་བ།

སྐྲ་སྟེང་དུ་བརྫེས་པ། འོག་ཏུ་མ་ལུས་པའི་ནད་དང་། བདུད་ཞབས་ཀྱིས་མནན་པ། དོན་ཡོད་གྲུབ་པས་དབུ་བརྒྱན་པའི་བདག་ཉིད་དུ་སྐད་ཅིག་གིས་བསྐྱེད་ནས་སྔགས་བཟླས་པར་བྱའོ། །ཨོཾ་པི་ཤཱ་ཙི་པརྞ་ཤ་བ་རི་སརྦ་མཱ་རི་པྲ་ཤ་མ་ཎི་ཧཱུཾ་ཕཊ། རི་ཁྲོད་ལོ་མ་ཅན་གྱི་སྒྲུབ་ཐབས་རྫོགས་
སོ།། ༄༅༅། །རྒྱ་གར་སྐད་དུ། ཨཱརྱ་པརྞ་ཤ་བ་རི་དྷཱ་ར་ཎི། བོད་སྐད་དུ། འཕགས་མ་རི་ཁྲོད་མ་ལོ་མ་ཅན་གྱི་གཟུངས། དཀོན་མཆོག་གསུམ་ལ་ཕྱག་འཚལ་ལོ། །ན་མོ་རཏྣ་ཏྲ་ཡཱ་ཡ། ན་མོ་ཨ་མི་ཏཱ་བྷཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སཾ་མྱཀྶཾ་བུདྔྷཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ།
བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ན་མོ་མ་ཧཱསྠ་མ་པྲཱཔྟཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། བཱ་མ་ནེ་ཏྭཱཾ་ན་མ་ཥྱཱ་མི་བཱ་མ་ནེ། བྷ་ག་བ་ཏཱི་པི་ཤཱ་ཙི་པརྞ་ཤ་བ་རི་པི་ཤཱ་ཙི་པཱ་ཤ་པ་ར་ཤུདྡྷ་རི་ཎི། ཡཱ་ནི་ཀཱ་ནི་ཙིཏ་བཱ་མཱ་ནི་ཨུདྤ་ཏྱནྟེ་ཡཱཿཀཱཤྩི་ཏ་མཱ་ཡོ་ཡཱཿཀཱཤྩི་དཱི་ཏ་ཡོ་ཡེ་
ཀེ་ཙིཏ་ཨུ་པ་དྲ་བ་ཡེ་ཀེ་ཙིཏ་ཨུ་པཱ་ཡཱ་པཱ་ཡེ་ཀེ་ཙིཏ་དྷྱཱཏྨི་ཀཱ་བྷ་ཡ། ཡེ་ཀེ་ཙི་དུ་པ་སརྒ་ཨུ་པ་སརྒ་སཾ་བྷ་དྷྭ་པ་ཨུ་པ་ཏྱནྟེ། སརྦ་ནི་ཏཱ་ནི་སརྦཱ་སྟཱ། སརྦ་དེ་བཱ་ལ་ཏ་ཨེ་བོཏྤ་ཏྱནྟོ་ན་པཎྜི་ཏ་ཏ་ཏ་ད་ནེ་ནི་ས་ཏྱེན་པ་ཏྱ་ན་པོ་ཏྱ་བ་ཙ་ནེ་ན་ན་སཏྱ་བ་ཀྱེ་ན། ཛཿཛཿཛཿཛཿ ཨེ་བྷིཿཔཎྜི་ཏ་མནྟྲ་པ་དཻར་མ་མ་སརྦ་སཏྭཱ་ནཱཾ་ཙ་རཀྵཾ་
ཀུ་རུ་པ་རི་ཏྲ་ཎཾ་ཀུ་རུ་པ་རི་གྲ་ཧཾ། ཀུ་རུ་པ་རི་པཱ་ལཱ་ནཾ་ཀུ་རུ་ཤཱནྟིཾ་ཀུ་རུ་སཏྱ་ཡ་ནཾ་ཀུ་རུ་དཎྜ་པ་རི་ཧཱ་རཾ་ཀུ་རུ་ཤཱསྟྲ་པ་རི་ཧཱ་ར་ཀུ་རུ་ཡཱ་བ་ཏཱ་བི་ཥ་དཱུ་ཥ་ཎཾ་ཀུ་རུ་ཨགྣི་པ་རི་ཧཱ་རཾ་ཀུ་རུ་ཨུ་ད་ཀ་པ་རི་ཧཱ་རཾ་ཀུ་རུ་ཀཱ་ཁོརྡ་ཙྪེ་ད་ནཾ་ཀུ་རུ་སཱི་མ་བནྡྷཾ་ཀུ་རུ་དྷ་རི་ཎཱི་བནྡྷཾ་ཀུ་རུ། ཏདྱ་ཐཱ། ཨ་མི་ཏེ་ཨ་མི་ཏེ་ཨ་མི་ཏོདྦྷ་བེ་ཨ་མི་ཏེ་སཾ་བྷ་བེ་ཨཱསྭ་
སྟེ་ཨཱ་སྭསྟཱཾ་གེ་མཱ་མ་རཱ་མཱ་ས་རཱ་མཱ་ས་ར་མ་པྲ་ཤ་མ་ཨུ་པ་ཤ་མ། སརྦ་བྱཱ་དྷཱ་ནི་ཨུ་པ་ཤ་མ་སརྦཱ་ཀཱ་ལ་མྲྀ་ཏྱུ་ནུ་པ་ཤ་མ་སརྦ་ནཀྵ་ཏྲ་གྲ་ཧ་ཏོ་ཥཱ་ནུ་པ་ཤ་མ་སརྦ་དཾཥྚྲི་ནཾ་ཙོ་པ་ཤ་མ་བྷ་ག་བ་ཏི་པརྞ་ཤ་བ་རི་ཏུནྣ་ཏུནྣ་བི་ཏུནྣ་ཏུ་ཎ་ཏུ་ཎ་ཏུ་མུ་ལེ་སྭཱ་ཧཱ། ཨོཾ་གཽ་རཱི་གནྡྷ་རཱི་ཙཎྜཱ་ལཱི་མཱ་ཏཾ་གཱི་པུཀྐ་སཱི་སྭཱ་ཧཱ། ཨོཾ་ཨཾ་གཱ་
རེ་མཾ་གཱ་རེ་ཀུ་ར་རེ་པརྞ་ཤ་བ་རི་སྭཱ་ཧཱ། ན་མཿསརྦ་ཤ་བ་ར་ཎཱཾ་མ་ཧཱ་པ་ཤ་བ་རཱ་ཎཱཾ་བྷ་ག་བ་ཏི་པི་ཤཱ་ཙི་པརྞ་ཤ་བ་རི་པཱ་ཤཱ་རཱི་སྭཱ་ཧཱ། ཨོཾ་པི་ཤཱ་ཙི་པརྞ་ཤ་བ་རི་ཧྲཱིཿཛཿཧཱུཾ་ཕཊ་པི་ཤཱ་ཙི་སྭཱ་ཧཱ། འཕགས་མ་རི་ཁྲོད་ལོ་མ་ཅན་གྱི་གཟུངས་རྫོགས་སོ།། །།

༄༅༅། །རྒྱ་གར་སྐད་དུ། ཤྲཱི་མ་ན་མ་ཧཱ་ཀཱ་ལ་སཱ་དྷ་ནཾ། བོད་སྐད་དུ། དཔལ་ལྡན་ནག་པོ་ཆེན་པོའི་སྒྲུབ་ཐབས། དཔལ་ལྡན་མགོན་པོ་ཆེན་པོ་ལ་ཕྱག་འཚལ་ལོ། །དེ་བཞིན་དུ་སྔོན་དུ་གསུངས་པའི་རིམ་པས་སྟོང་པ་ཉིད་བསྒོམས་པའི་རྗེས་ལ་སྣ་ཚོགས་པདྨ་དང་ཉི་མ་ལ་ཧཱུཾ་
ཡིག་ནག་པོ། དེ་ཡོངས་སུ་གྱུར་པ་ལས་དཔལ་ལྡན་རྗེ་བཙུན་ནག་པོ་ཆེན་པོ་ཕྱག་གཉིས་པ། ཞལ་གཅིག་པ། སྐུ་མདོག་ནག་པོ། སྤྱན་གསུམ་པ་འབར་བ་ཆེན་པོ། ཕྱག་གཡས་པ་དང་གཡོན་པ་དག་གིས་གྲི་གུག་དང་ཐོད་པ་བསྣམས་པ། མགོ་བོའི་ཕྲེང་བའི་དོ་ཤལ་གྱིས་
སྐུ་བརྒྱན་པ། དབུ་སྐྲ་དམར་སེར་གྱེན་དུ་བརྫེས་པ། མཆེ་བ་གཙིགས་པས་འཇིགས་པར་བྱེད་པ། སྐུ་ཐམས་ཅད་ལ་སྦྲུལ་གྱིས་བརྒྱན་པ། སྐུ་ཐུང་བ། ཞལ་ནས་ཁྲག་འཛག་པའི་བདག་ཉིད་དུ་སྐད་ཅིག་གིས་བསྐྱེད་ནས་སྔགས་བཟླས་པར་བྱའོ། །དེ་ལ་སྔགས་ནི་འདིའོ། །ཨོཾ་མ་ཧཱ་ཀཱ་ལ་ཧཱུཾ་
ཕཊ་སྭཱ་ཧཱ། དུག་དང་ཁྲག་དང་། སྒོག་པ་དང་། ཡུངས་ཀར་རྣམས་ཀྱིས་ནག་པོ་ཆེན་པོའི་སྤོས་ཕུལ་ནས་སྲན་མ་ཤ་དང་འཛམ་བུ་ཏི་ཀ་དང་ཆང་དང་མེ་ཏོག་དང་བྱུག་པ་ལྔའི་ལྕགས་ཀྱུའི་བདུད་རྩིས་ནག་པོ་ཆེན་པོ་མཆོད་པ་བྱ་སྟེ། གཏོར་མའི་སྔགས་འདིས་སོ། །ཨོཾ་མ་ཧཱ་ཀཱ་ལཱ་ཡ་ཤཱ་ས་ནོ་པ་
ཀཱ་རི་ཎཾ་ཨེ་ཥཱ་པཤྩི་མ་ཀ་ལོ་ཨ་ཡཾ་ཨིདཾ་རཏྣ་ཏྲ་ཡཱ་པ་ཀཱ་རི་ཎཾ་ཡ་དི་པྲ་ཏིཛྙཱཾ་སྨ་ར་སི་ཏ་དཱ་ཨི་དཾ་དུཥྚ་ཁ་ཁ་ཁཱ་ཧི་ཁཱ་ཧི་མ་ར་མ་ར་གྲྀཧྞ་གྲྀཧྞ་བནྡྷ་བནྡྷ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། དཱི་ན་མེ་ཀེ་ན་མཱ་ར་ཡ་ཧཱུཾ་ཧཱུཾ་ཕཊ་ཕཊ་ཚ་བ་གསུམ་གྱིས་བསྒྲུབ་བྱའི་གཟུགས་བྱས་ཏེ་ལུས་ལ་ཚེར་མས་དགང་ཞིང་དུག་དང་
སྐེ་ཚེ་རྣམས་ཀྱིས་ཆོ་ག་བཞིན་དུ་བྱུགས་ནས་མེ་ལ་བསྲོ་བར་བྱའོ། །གང་གི་མིང་དང་བཅས་པ་དེ། །དེ་བཞིན་སྐད་ཅིག་མཐོང་བར་འགྱུར། །སློབ་དཔོན་ཞེ་སྡང་རྟག་ཁྲོ་གང་། །གང་ཞིག་དཀོན་མཆོག་གསུམ་པོ་དང་། །དཔག་མེད་སེམས་ཅན་རྣམས་འཚེ་རྣམས། །ནག་པོ་
ཆེན་པོས་ཟ་བར་བྱེད། །དེ་ཡི་ལུས་ལ་ཤ་གཅོད་ཅིང་། །དེ་བཞིན་ཁྲག་ནི་འཐུང་བར་བྱེད། །སྤྱི་བོར་ཐིག་ལེ་བྱས་ནས་གུས་པ་རྒྱ་ཆེན་པོ་བྱས་ནས་བཟླས་པར་བྱའོ། །དཔལ་ལྡན་ནག་པོ་ཆེན་པོའི་སྒྲུབ་ཐབས་རྫོགས་སོ།། །།

༄༅༅། །རྒྱ་གར་སྐད་དུ། ཤུ་ཀླཱ་པྲཛྙཱ་པཱ་ར་མི་ཏཱ་སཱ་དྷ་ནཾ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་མ་དཀར་མོའི་སྒྲུབ་ཐབས། འཕགས་མ་ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །གང་ཞིག་བསྒོམས་པ་ཙམ་གྱིས་ནི། །ཤེས་རབ་ཕ་རོལ་ཕྱིན་འབྱུང་ཞིང་། །ཀུན་
གྱི་བྱང་ཆུབ་རྣམ་འཛིན་པ། །དེ་ནས་ཡང་དག་བཤད་པར་བྱ། །ཞལ་གཅིག་ཕྱག་ནི་གཉིས་པ་སྟེ། །སྐུ་མདོག་དཀར་མོ་ཡིད་འོང་མ། །དབུ་སྐྲ་ཕྱེད་ཕྱེད་འཁྱིལ་པ་ཅན། །ཆུ་སྐྱེས་དཀར་ལ་ཡང་དག་གནས། །ཕྱག་གཡས་ན་ནི་པདྨ་དང་། །གཡོན་ན་ཤེས་རབ་ཕ་རོལ་ཕྱིན། །མདོག་
དཀར་རྣམ་པར་བསྒོམ་པར་བྱ། །རྡོ་རྗེ་སྐྱིལ་ཀྲུང་གིས་བཞུགས་པའི། །རྒྱན་རྣམས་ཐམས་ཅད་ཡོངས་སུ་རྫོགས། །ལྟེ་བའི་དཀྱིལ་འཁོར་ལ་བསྒོམ་བྱ། །ཨོཾ་ཡིག་ཡེ་ཤེས་ལས་བྱུང་བ། །མཆོག་ཏུ་དགའ་བར་བྱེད་པ་མོ། །དམ་ཚིག་སེམས་དཔའ་རྫོགས་བྱས་ལ། །ཡེ་ཤེས་
སེམས་དཔའ་བསྒོམ་པར་བྱ། །རྣལ་འབྱོར་ཟླ་དྲུག་གོམས་པ་ཡིས། །ཤེས་རབ་ཕ་རོལ་ཕྱིན་མར་འགྱུར། །མཚན་མོ་བདུན་གྱི་རྣལ་འབྱོར་གྱིས། །བསྟན་བཅོས་ཀུན་ལ་འཇིགས་པ་མེད། །བཟླས་པ་འབུམ་དུ་སྦྱོར་བ་ཡིས། །ཉིན་རེ་ཉིན་རེ་ཚིགས་བཅད་བརྒྱ། །འབད་པ་མེད་པར་
རབ་ཏུ་རྩོམ། །གཞུང་ཡང་བརྒྱ་ནི་འཛིན་པར་བྱེད། །འདི་རྣམས་སྔགས་ཀྱི་ཚིག་ཏུ་འགྱུར། །ཨོཾ་པི་ཙུ་པི་ཙུ་པྲཛྙཱ་ཝརྡྷ་ནི་ཛྭ་ལ་ཛྭ་ལ་མེ་དྷ་ཝརྡྷ་ནི་དྷི་རི་དྷི་རི་བུ་དྷི་ཝརྡྷ་ནི་སྭཱ་ཧཱ། བྱ་རོག་གི་སྒྲ་མི་གྲག་པར་སྔགས་འདིས་ལན་བདུན་རང་སྐྱུར་ལ་མངོན་པར་བསྔགས་ནས་ཇི་སྲིད་ཟླ་བ་དྲུག་གི་བར་དུ་
འཐུངས་ན་ཤེས་རབ་ཆེན་པོར་འགྱུར་རོ། །ཨོཾ་པྲཾ་སྭཱ་ཧཱ། སྔགས་འདིས་ཀྱང་ངོ་། །འདི་ལ་མི་བསྐྱོད་པའི་རྒྱས་གདབ་པོ་ཞེས་སོ། །ཤེས་རབ་ཀྱི་ཕ་རོལ་ཏུ་ཕྱིན་མ་དཀར་མོའི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། པཱི་ཏ་བརྞ་པྲཛྙཱ་པཱ་ར་མི་ཏཱ་སཱ་དྷ་ནཾ། བོད་སྐད་དུ།
ཤེས་རབ་ཀྱི་ཕ་རོལ་ཏུ་ཕྱིན་མ་སྐུ་མདོག་སེར་མོའི་སྒྲུབ་ཐབས། འཕགས་མ་ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་ཨ་ཡིག་ལས་སྐྱེས་པའི་ཟླ་བ་ལ་དྷཱིཿཡིག་སེར་པོ་ལས་སྐྱེས་པའི་སྣ་ཚོགས་པདྨ་ལ་ཧཾ་ཡིག་སེར་པོ་ལ་ཨ་ཡིག་ལ་སོགས་པའི་

དབྱངས་བཅུ་དྲུག་གིས་ཡོངས་སུ་བསྐོར་ཞིང་གནས་པའི་ཕྱི་རོལ་དུ་ཀ་ཡིག་ལ་སོགས་པའི་ཡི་གེ་སུམ་ཅུ་རྩ་གཉིས་ཀྱིས་ཡོངས་སུ་བསྐོར་བ་བསྒོམ་པར་བྱའོ། །དེ་ནས་སྒེག་མོ་དང་། ཕྲེང་བ་མ་དང་། གར་མ་དང་། གླུ་མ་དང་། མེ་ཏོག་མ་དང་། བདུག་སྤོས་མ་དང་། མར་མེ་མ་དང་། དྲི་མ་ཞེས་པའི་
རྣལ་འབྱོར་མ་བརྒྱད་དོ། །དེ་ཐམས་ཅད་ཡོངས་སུ་གྱུར་པ་ལས་ཡེ་ཤེས་ཀྱི་ཟླ་བ་ཤར་བ་འོད་རབ་ཏུ་གསལ་བའོ། །དེའི་སྟེང་དུ་པདྨ། དེའི་སྟེང་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟི། དེའི་སྟེང་དུ་ཟླ་བའི་དཀྱིལ་འཁོར་གཉིས་པ་ལ་དེའི་སྟེང་དུ་པུསྟི་གཉིས་པའོ། །དེ་ཐམས་ཅད་
ཡོངས་སུ་གྱུར་པ་ལས་བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་སྐུ་མདོག་སེར་མོ་ཞལ་གཅིག་ཕྱག་གཉིས་མ་དེ་བཞིན་གཤེགས་པ་ལྔའི་དབུ་རྒྱན་ཅན། ཆོས་འཆད་པའི་ཕྱག་རྒྱ་དང་ལྡན་པ། སྣ་ཚོགས་པདྨ་དང་ཟླ་བ་ལ་བཞུགས་པ་ན་བཟའ་དང་རྒྱན་ཐམས་ཅད་ཀྱིས་བརྒྱན་པ།
གཡས་གཡོན་གྱི་ལོགས་དག་ན་ཨུཏྤལ་ལ་གནས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟི་བསྣམས་པའོ། །སྔགས་ནི། ཨོཾ་ཨཱཿདྷཱིཿཧཱུཾ་སྭཱ་ཧཱ། དཔྲལ་བར་ཨོཾ་ཡིག་སེར་པོ། མགྲིན་པར་ཨཱཿཡིག་དཀར་པོ། སྙིང་གར་དྷཱིཿཡིག་སེར་པོ། ལྟེ་བར་ཧཱུཾ་ཡིག་ནག་པོ་ཞེས་བཟླས་པའི་དུས་སུ་
ཡི་གེ་བཞི་པོ་རྣམས་ཀྱི་རྗེས་སུ་བསམ་པར་བྱའོ་ཞེས་སོ། །ཤེས་རབ་ཀྱི་ཕ་རོལ་ཏུ་ཕྱིན་མ་སྐུ་མདོག་སེར་མོའི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། པཱི་ཏ་བརྞ་སཾ་ཀྵིཔྟ་པྲཛྙཱ་པཱ་ར་མི་ཏཱ་སཱ་དྷ་ནཾ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་མ་སྐུ་མདོག་སེར་མོའི་སྒྲུབ་
ཐབས་མདོར་བསྡུས་པ། བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་སྟོང་པ་ཉིད་བསྒོམས་པའི་རྗེས་ལ་པདྨ་དམར་པོ་དང་ཟླ་བ་ལ་གནས་པའི་དྷཱིཿསེར་པོ་ཡོངས་སུ་གྱུར་པ་ལས་ཤེས་རབ་ཀྱི་ཕ་རོལ་ཏུ་ཕྱིན་མ་སྐུ་མདོག་སེར་མོ་མི་བསྐྱོད་པ་བཞུགས་
པའི་རལ་པའི་ཅོད་པན་ཅན། ཆོས་འཆད་ཀྱི་ཕྱག་རྒྱ་མཛད་ནས། གཡོན་ལོགས་སུ་པུསྟི་དང་བཅས་པའི་ཨུཏྤ་ལ་སྔོན་པོ་བསྣམས་པ། ན་བཟའ་དཀར་པོའི་སྟོད་གཡོགས་ཅན། མཛེས་ཤིང་གོས་དང་རྒྱན་ཐམས་ཅད་ཀྱིས་བརྒྱན་པའོ། །ཞེས་དེ་བཞིན་དུ་བསམས་ནས། ཨོཾ་དྷཱིཿཤྲུ་ཏ་སྨྲྀ་ཏི་

བི་ཛཱ་ཡ་སྭཱ་ཧཱ། ཞེས་པའི་སྔགས་བཟླས་པར་བྱའོ། །ཤེས་རབ་ཀྱི་ཕ་རོལ་ཏུ་ཕྱིན་མ་སྐུ་མདོག་སེར་མོའི་སྒྲུབ་ཐབས་མདོར་བསྡུས་པ་རྫོགས་སོ།། ༄༅༅། །རྒྱ་གར་སྐད་དུ། ཤུཀླཱ་པྲཛྙཱ་པཱ་ར་མི་ཏཱ་སཱ་དྷ་ནཾ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་མ་དཀར་
མོའི་སྒྲུབ་ཐབས། འཕགས་མ་ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་རང་གི་སྙིང་གར་ཆུ་སྐྱེས་དཀར་པོ་དང་ཟླ་བའི་དཀྱིལ་འཁོར་ལ་པྲི་ཡིག་དཀར་པོ་རྣམ་པར་བཀོད་ལ་དེ་བཞིན་དུ་སྔོན་མ་བཞིན་དུ་ཐམས་ཅད་བྱའོ། །པྲཾ་ཡིག་དང་པདྨ་ཡོངས་
སུ་གྱུར་པ་ལས་བཅོམ་ལྡན་འདས་མ་སྐུ་མདོག་དཀར་མོ་ཞལ་གཅིག་ཕྱག་གཉིས་པ་ལུང་དང་རྟོགས་པའི་གཟུགས་ཅན་མ། རིན་པོ་ཆེའི་ཅོད་པན་བསྣམས་པ། ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟིས་མཚན་པའི་ཆུ་སྐྱེས་གཉིས་གཡོན་དང་གཡས་ཀྱི་ལོགས་དག་གི་ནང་དུ་ལངས་པ་བསྣམས་
པའི་ཕྱག་དག་གིས་ཆོས་འཆད་པའི་ཕྱག་རྒྱ་མཛད་པ། པདྨ་དཀར་པོ་དང་ཟླ་བ་ལ་རྡོ་རྗེ་སྐྱིལ་ཀྲུང་གིས་བཞུགས་པ། ལང་ཚོ་གཞོན་ཞིང་དར་ལ་བབ་པ། ན་བཟའ་དང་རྒྱན་རྣམ་པ་སྣ་ཚོགས་པས་བརྒྱན་པ། སོ་སོར་སྣང་བ་ཙམ་རབ་ཏུ་འཕྲོ་བའི་སྣ་ཚོགས་པའི་འོད་ཟེར་གྱི་ཚོགས་ཀྱིས་ནམ་མཁའ་
གང་བ། མར་མེའི་ཕྲེང་བ་ལྟ་བུ་ཐོགས་པ་མེད་པའི་ཤེས་རབ་ཀྱི་ཕ་རོལ་ཏུ་ཕྱིན་པ་དཔག་ཏུ་མེད་པ་སྤྲོ་ཞིང་བསྡུ་བའི་སྦྱོར་བས་ཐམས་ཅད་རང་བཞིན་གཅིག་ཏུ་ལྷག་པར་མོས་པས་ཇི་སྲིད་ཤེས་རབ་ཀྱི་ཕ་རོལ་ཏུ་ཕྱིན་མ་མངོན་དུ་མ་གྱུར་པ་དེ་སྲིད་དུ་བསྒོམ་པར་བྱའོ། །དེ་ནས་གང་གི་ཚེ་དགོད་པར་
གྱུར་ན་པདྨ་དཀར་པོ་སྣའི་རྩེ་མོར་ཙ་ན་ཀའི་ཚད་ཙམ་ཀུན་ནས་བྲིས་པ་བཞིན་དུ་རྣམ་པར་བསྒོམས་ལ། དེ་ལ་བཞུགས་པའི་ཤེས་རབ་ཀྱི་ཕ་རོལ་ཏུ་ཕྱིན་མ་ཤིན་ཏུ་ཕྲ་བར་གསུངས་པའི་གཟུངས་ལ་རྩེ་གཅིག་པའི་ཡིད་ཀྱིས་ཡང་དང་ཡང་དུ་མངོན་དུ་བྱ་ཞིང་བསྒོམ་པར་བྱའོ། །དེ་ནས་བསྐྱེད་པའི་
རིམ་པའི་ཕྱོགས་ཀྱི་སྔགས་ནི་ཨོཾ་པྲཾ་སྭཱ་ཧཱ། རྫོགས་པའི་རིམ་པའི་ཕྱོགས་ལ་ནི། །སྔགས་མེད་དོན་དམ་རིམ་པའོ། །ཤེས་རབ་ཕ་རོལ་ཕྱིན་མ་ཡི། །མན་ངག་ཐོབ་པའི་རྣལ་འབྱོར་པ། །དགེ་འདུན་བྱིན་གྱི་བུ་ཡིས་ནི། །རིགས་ཀྱི་མིང་གིས་ཀྱང་འབད་ནས། །སེམས་ཅན་ཀུན་གྱི་དོན་

ཕྱིར་དུ། །སྒྲུབ་ཐབས་གསལ་པོ་འདི་བྲིས་སོ། །ཤེས་རབ་ཀྱི་ཕ་རོལ་ཏུ་ཕྱིན་མ་དཀར་མོའི་སྒྲུབ་ཐབས་སློབ་དཔོན་དགེ་འདུན་བྱིན་གྱི་བུས་མཛད་པ་རྫོགས་སོ།། ༄༅༅། །རྒྱ་གར་སྐད་དུ། ཤུཀླཱ་པྲཛྙཱ་པཱ་ར་མི་ཏཱ་སཱ་དྷ་ནཾ། བོད་སྐད་དུ། ཤེས་རབ་ཀྱི་ཕ་རོལ་ཏུ་ཕྱིན་མ་དཀར་
མོའི་སྒྲུབ་ཐབས། འཕགས་མ་ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །ཤེས་རབ་ཕ་རོལ་ཕྱིན་མ་ཡི། །ལྷ་མོ་སྒྲོལ་མའི་གཟི་བརྗིད་ཅན། །ཟླ་བ་གང་ཞིག་ཤར་བ་ཡིས། །རྒོལ་བའི་ཞལ་པད་གཉིད་ལོག་གོ། །བརྩེ་བ་དང་ལྡན་པའི་རྣལ་འབྱོར་པས་སྟན་བདེ་བ་ལ་འདུག་
ནས་རང་གི་སྙིང་གར་པཾ་ཡིག་དཀར་པོ་ཡོངས་སུ་གྱུར་པ་ལས་པདྨ། དེ་ལ་ཡང་ཨཾ་ལས་བྱུང་བའི་ཟླ་བའི་དཀྱིལ་འཁོར་དེ་ལ་ཨོཾ་དཀར་པོའོ། །དེ་ལས་བྱུང་བའི་འོད་ཟེར་གྱིས་ནམ་མཁའ་ལ་བླ་མ་དང་། ཤེས་རབ་ཀྱི་ཕ་རོལ་ཏུ་ཕྱིན་མ་དང་། སངས་རྒྱས་དང་བྱང་ཆུབ་སེམས་དཔའ་རྣམས་བལྟས་
ནས། ས་བོན་དེ་ལས་གྱུར་པའི་མཆོད་པའི་ཉེར་སྤྱོད་རྣམས་ཀྱིས་མཆོད་པས་མཆོད་ནས། དེ་བཞིན་དུ་ཕྱག་འཚལ་བ་དང་། གསུམ་ལ་སྐྱབས་སུ་འགྲོ་བ་དང་། སྡིག་པ་བཤགས་པ་དང་མི་བྱེད་པའི་སྡོམ་པ་དང་། བསོད་ནམས་ལ་རྗེས་སུ་ཡི་རང་བ་དང་། བདག་ཉིད་དབུལ་བ་དང་། བསོད་
ནམས་ཡོངས་སུ་བསྔོ་བ་དང་། བྱང་ཆུབ་ཏུ་སེམས་བསྐྱེད་པ་དང་། རྒྱལ་བའི་ལམ་ལ་བརྟེན་པ་དང་། གཞན་ལ་བདེ་བ་ཕུན་སུམ་ཚོགས་པར་འདོད་པའི་བྱམས་པ་དང་། གཞན་སྡུག་བསྔལ་དང་བྲལ་བར་འདོད་པའི་སྙིང་རྗེའི་བདག་ཉིད་དང་། སེམས་ཅན་རྣམས་ལ་དགའ་བའི་རྣམ་པ་སྦྱིན་
པར་འདོད་པ་དང་། བཤེས་དང་བྲན་མོ་དང་དགྲ་རྣམས་ལ་མཐུན་པ་དང་། ཁྲོ་བ་རྣམ་པར་སྤང་ཞིང་མཚུངས་པར་བྱེད་པ་ནི་བཏང་སྙོམས་ཞེས་པ་རྣམས་བསམ་པར་བྱའོ། །དེ