Luận tạng Tây Tạng (Tengyur) — Tập 77

་ལ་དབང་བསྐུར་ཞིང་དོན་ཡོད་གྲུབ་པས་དབུ་བརྒྱན་པར་བསམ་པར་
བྱའོ། །ཡང་ན་སྙིང་པོ་ལ་གནས་པའི་ཟླ་བ་ལ་རྡོ་རྗེ་སྒྲོལ་མ་ལ་སོགས་པའི་ལྷ་མོ་རྣམས་སྐད་ཅིག་གིས་བལྟས་ཏེ། ཕྱི་ནས་བསྒོམ་པར་བྱ་སྟེ། ཤར་དུ་རྡོ་རྗེ་སྒྲོལ་མ་སྟེ། །ནག་མོ་ཕྱག་ན་རྡོ་རྗེ་བསྣམས། །ལྷོ་རུ་རིན་ཆེན་སྒྲོལ་མ་སྟེ། །སེར་མོ་ཕྱག་ན་རིན་ཆེན་བསྣམས། །ནུབ་ཏུ་པདྨའི་སྒྲོལ་མ་
སྟེ། །དམར་མོ་ཕྱག་ན་ཆུ་སྐྱེས་བསྣམས། །བྱང་དུ་སངས་རྒྱས་སྒྲོལ་མ་སྟེ། །དཀར་མོ་ཕྱག་ན་འཁོར་ལོ་བསྣམས། །མེ་མཚམས་མེ་ཏོག་སྒྲོལ་མ་སྟེ། །དཀར་མོ་མེ་ཏོག་ཕྲེང་བ་བསྣམས། །བདུག་སྤོས་སྒྲོལ་མ་བདེན་བྲལ་དུ། །ནག་མོ་སྤོས་ཕོར་ཕྱག་ན་བསྣམས། །རླུང་མཚམས་མར་
མེའི་སྒྲོལ་མ་སྟེ། །སེར་མོ་མར་མེའི་སྡོང་བུ་བསྣམས། །དྲི་ཡི་སྒྲོལ་མ་དབང་ལྡན་མཚམས། །དམར་མོ་དྲི་ཡི་དུང་ཆོས་བསྣམས། །འདི་རྣམས་སྣ་ཚོགས་པད་འདབ་ལ། །ཟླ་བརྒྱད་ལ་གནས་ཟླ་བའི་འོད། །སེམས་དཔའི་སྐྱིལ་ཀྲུང་གིས་བཞུགས་ཤིང་། །ཕྱག་གཡོན་ན་ནི་ཨུཏྤལ་
བསྣམས། །ཞལ་ནི་འཛུམ་ཞིང་སྣ་ཚོགས་པའི། །རྒྱན་དང་གོས་རྣམས་འཆང་བ་པོ། །ཤར་སྒོར་རྡོ་རྗེ་ལྕགས་ཀྱུ་མ། །ནག་མོ་རྡོ་རྗེ་ལྕགས་ཀྱུའི་ཕྱག །ལྷོ་རུ་རྡོ་རྗེ་ཞགས་པ་མ། །སེར་མོ་རྡོ་རྗེ་ཞགས་པའི་ཕྱག །ནུབ་ཏུ་རྡོ་རྗེ་ལྕགས་སྒྲོག་མ། །དམར་མོ་རྡོ་རྗེ་ལྕགས་སྒྲོག་བསྣམས། །བྱང་
དུ་རྡོ་རྗེ་དྲིལ་བུ་མ། །དཀར་མོ་རྡོ་རྗེ་དྲིལ་བུའི་ཕྱག །འདི་རྣམས་སྒོ་བཞི་ལ་ཉི་མ་ལ་བལྟ་ཞིང་ཉི་མའི་འོད་དང་ལྡན་པ་རལ་པ་དམར་སེར་གྱེན་དུ་བརྫེས་པ། ཞབས་གཡས་བརྐྱང་གིས་བཞུགས་པ། སྦྲུལ་གྱི་རྒྱན་གྱིས་བརྒྱན་པ། ཞལ་འཇིགས་པ་སྟག་གི་པགས་པའི་ན་བཟའ་བསྣམས་

པ། ཕྱག་གཡོན་པས་ཨུཏྤ་ལ་བསྣམས་པའོ། །དེ་ནས་ཡེ་ཤེས་སེམས་དཔའ་དང་ལྷན་ཅིག་ཏུ་བྱས་ཏེ་ཡིད་མི་གཡོ་བའི་རང་གི་ས་བོན་ཤིན་ཏུ་ཕྲ་མོ་བསྒོམ་པར་བྱའོ། །དེ་ནས་སྔགས་བཟླས་པར་བྱ་སྟེ། ཨོཾ་ཏཱ་རེ་ཏུཏྟཱ་རེ་ཏུ་རེ་དྷཱ་ནཾ་མེ་ད་ད་སྭཱ་ཧཱ། དེ་ནས་ལངས་ཏེ་དམ་ཚིག་ལ་ཨོཾ་
ཨ་ཀཱ་རོ་མུ་ཁཾ་ཞེས་པ་ལ་སོགས་པའི་སྔགས་ཀྱིས་ཨུཏྤ་ལའི་ཕྱག་རྒྱས་གཏོར་མ་ཕུལ་ནས་སྨོན་ལམ་གདབ་པར་བྱའོ། །ལྷ་རྣམས་ཀྱི་འཁོར་ལོ་རང་གི་ས་བོན་གྱི་ནང་དུ་བསྒོམས་ནས་རང་ལྷའི་ང་རྒྱལ་བྱས་ནས་ཅི་བདེར་གནས་པར་བྱའོ། །ཉི་མའི་གུང་དང་ཕྱི་དྲོའི་ཐུན་མཚམས་དག་ལ་རང་
གི་སྙིང་གའི་ས་བོན་ལས་སྐད་ཅིག་གིས་ལྷ་རྣམས་ཀྱི་འཁོར་ལོ་སྔོན་མ་བཞིན་དུ་སྤྲོས་ཏེ་བསྒོམས་ནས་བཟླས་པ་ལ་སོགས་པ་བྱའོ། །ཕྱི་དྲོ་དང་ཉི་མ་གུང་ཐུན་ལ་ཡང་ཁྱད་པར་འདིའོ། །མེ་ཏོག་ལ་སོགས་པས་ཡེ་ཤེས་པའི་དཀྱིལ་འཁོར་ཡང་དག་པར་མཆོད་ནས་ཨོཾ་ཏཱ་རེ་ཏུཏྟཱ་རེ་ཏུ་རེ་མུཿ
ཞེས་པ་འདིས་གཤེགས་སུ་གསོལ་ལོ། །སྒྲོལ་མ་ནོར་སྦྱིན་མའི་སྒྲུབ་ཐབས་རྫོགས་སོ།། །།ན་མོ་རཏྣ་ཏྲ་ཡཱ་ཡ། ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ན་མཿཏཱ་ར་ཡཻ། ཏདྱ་ཐཱ། ཨོཾ་ཏཱ་རེ་ཏཱ་རཱ་ཡ་ཧཱུཾ་ཧཱུཾ་ཧཱུཾ་ས་མ་ཡ་སྠི་ཏེ་བྷ་ར་བྷ་ར། སརྦ་
བྷ་ར་ཎ་བྷུ་ཥི་ཏེ་པདྨེ་པདྨེ་པདྨ་བྷུ་ཛེ་པ་དམཱ་ས་ན་སྠེ་ཧ་ས་ཧ་ས། ཏྲཻ་ལོ་ཀྱ་བ་རི་དེ་སརྦ་དེ་བ་དཱ་ན་བ་སཱུ་ཛི་ཏེ་སྨཱ་རཱ་ཧི་བྷ་ག་བ་ཏ་སུ་ར་ཏཿས་མ་ཡཿདྷ་ན་དྷ་ན་མ་ཧཱ་སཏྭཱ་བ་ལོ་ཀི་ཏེ་མ་ཎི་ཀ་ན་ཀ་བི་ཙི་ཏྲཱ་བྷ་ར་ཎེ། ཨོཾ་བི་ལོ་ཀི་ཡ་བྷ་ག་བ་ཏི་ཏཱ་རེ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། རྩ་བའི་སྔགས་སོ། །སྐུ་གདུང་དང་བཅས་པའི་
མཆོད་རྟེན་གྱི་དྲུང་དུ་བརྒྱད་ལྷག་པའི་སྟོང་བཟླས་པར་བྱའོ། །དེ་ནས་རྫོགས་པར་གྱུར་ནས་བཅོམ་ལྡན་འདས་འཕགས་མ་སྒྲོལ་མ་ལ་བལྟས་པས་གང་འདོད་པ་དེའི་མཆོག་ཐོབ་པར་འགྱུར་རོ། །ཨོཾ་མ་ཎི་ཏཱ་རེ་ཧཱུཾ་འབུམ་བཟླས་ནས་འཕགས་མའི་དྲུང་དུ་ཉེ་བར་གནས་ན་གང་འདོད་པ་དེ་
ཐམས་ཅད་སྟེར་བར་བྱེད་དོ། །དཀྱིལ་འཁོར་མེད་ཀྱང་ཁྲུས་བྱས་ཏེ་ཉེ་བར་གནས་ནས་བཟླས་པ་འབའ་ཞིག་ཙམ་གྱིས་འགྲུབ་སྟེ། བྱ་བ་ཐམས་ཅད་འགྲུབ་པར་བྱེད་དོ། །འོད་དཔག་མེད་ཀྱི་སྙིང་པོའི་རྒྱུད་ལས་བཅོམ་ལྡན་འདས་མ་འཕགས་མ་སྒྲོལ་མའི་རྟོག་པ་གསུངས་པ་རྫོགས་སོ།། །།

༄༅༅། །རྒྱ་གར་སྐད་དུ། དུརྒ་ཏི་ཨུཏྟཱ་རི་ཎཱི་སཱ་དྷ་ནཾ། བོད་སྐད་དུ། ངན་སོང་ལས་སྒྲོལ་མའི་སྒྲུབ་ཐབས། །འཕགས་མ་སྒྲོལ་མ་ལ་ཕྱག་འཚལ་ལོ། །ན་མ་ཨཱརྱཱ་བ་ལོ་ཀི་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་སཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ན་མོ་བྷ་ག་བ་ཏཻ་ཨཱརྱ་ཏཱ་ར་ཡཻ། ཨོཾ་ཏཱ་རེ་
ཏུཏྟཱ་རེ་ཏུ་རེ་བཱི་རེ་དུརྒ་ཏི་ཨུཏྟཱ་ར་ཡ། ཧྲཱིཾ་ཧྲཱིཾ་ཧྲཱིཾ་སརྦ་དུཿཁཱཏ་མོ་ཙ་ནི་བྷ་ག་བ་ཏི་དུརྒཱ་ཏྭཱ་ར་ཎོ་མ་ཧཱ་ཡོ་གེཤྩ་རི་ཧྲཱིཾ་ན་མོ་ཏུ་རེ་སྭཱ་ཧཱ། འདིར་བཅོམ་ལྡན་འདས་མ་ངན་སོང་ལས་སྒྲོལ་བའི་སྒྲོལ་མ་ལྗང་སྔོན་ཕྱག་བཞི་པ། གཡོན་པས་ཞགས་པ་བསྣམས་པ། གཡས་པས་ལྕགས་ཀྱུ་བསྣམས་ཤིང་
གུས་པས་དབུགས་འབྱིན་པ། གཡས་པས་མཆོག་སྦྱིན་པ། མཛེས་པའི་ཕྲེང་བ་དང་ན་བཟའ་མནབས་པ། ཕྱག་གཡོན་པས་ཨུཏྤ་ལ་སྔོན་པོ་བསྣམས་ཤིང་ན་བཟའ་དཀར་པོ་སྐུ་ལ་མནབས་པ་པདྨའི་གདན་ལ་བཞུགས་པ་དུས་གསུམ་དུ་བསྒོམ་པར་བྱའོ། །སྡུག་བསྔལ་ཐམས་
ཅད་ལས་སྒྲོལ་ཞིང་བཅིངས་པ་རྣམས་གྲོལ་བར་བྱེད་དེ། ལྕགས་སྒྲོག་གིས་བསྡམས་པ་དང་། ཞགས་པས་བཅིངས་པ་དང་། གདོན་གྱིས་རེངས་པ་ལས་སྒྲོལ་བར་བྱེད་དོ། །བཅིངས་པའི་གནས་སུ་བཟླས་པར་བྱའོ། །སྟོང་ངམ་བརྒྱད་བརྒྱ་ཉི་མ་རེ་རེ་ལ་བཟླས་པས་གྲོལ་བར་
འགྱུར་རོ། །གལ་ཏེ་མི་གྲོལ་ན་དེའི་ཚེ་མགོ་འགས་ཤིང་བཅད་པར་འགྱུར་བས་བདེ་བར་འགྱུར་རོ། །ཆེ་གེ་མོ་གྲོལ་བར་གྱིས་ཤིག །གལ་ཏེ་མ་གྲོལ་ན་དེའི་ཚེ་མགོ་འགས་པར་འགྱུར་རོ། །རིམས་ཆེན་པོར་འགྱུར་རོ། །མི་བཟད་པའི་ཟུག་རྔུ་ཆེན་པོར་འགྱུར་རོ། །སྒྲུབ་པ་པོ་
མཐོང་བས་སྟེར་བར་འགྱུར་རོ། །ཉི་མ་བདུན་གྱིས་ངེས་པར་གྲོལ་བར་འགྱུར་རོ། །འདི་ནི་བཅོམ་ལྡན་འདས་ངན་སོང་ལས་སྒྲོལ་བའི་སྒྲོལ་མས་གསུངས་སོ། །ཧཱུཾ་ཧྲཱིཾ་ཛཿལན་བདུན་དུ་མེ་ཏོག་ལ་མངོན་པར་བསྔགས་ནས་སྦྱིན་པར་བྱའོ། །མཆོད་པའི་དབུས་སུ་ཁཾ་ཏཱཾ། གཡོན་སྐོར་
གྱིས་བྷྲཱུཾ་ཨཱཾ་ཛྲཱིཾ་ཧཱུཾ། གཡས་སྐོར་གྱིས་ལཱཾ་མཱཾ་བཱཾ་ཏཱཾ་ཞེས་སོ། །ངན་སོང་ལས་སྒྲོལ་མའི་སྒྲུབ་ཐབས་རྫོགས་སོ།། །།༄༅༅། །རྒྱ་གར་སྐད་དུ། ཨཱརྱ་ཏཱ་རེ་དེ་བཱི་སཱ་དྷ་ནཾ། བོད་སྐད་དུ། ལྷ་མོ་སྒྲོལ་མའི་སྒྲུབ་ཐབས། ལྷ་མོ་སྒྲོལ་མ་ལ་ཕྱག་འཚལ་ལོ། །སྔར་བཤད་པའི་ཆོ་

གས་བདུད་རྩིའི་དཀྱིལ་འཁོར་དེའི་དབུས་སུ་ཡི་གེ་སྡེ་ཚན་ལྔ་པའི་དང་པོའི་ས་བོན་ལ་གཉིས་པས་རྫོགས་པར་བྱས་ལ་ཟླ་བ་ཕྱེད་པ་དང་ཐིག་ལེས་བརྒྱན་པ་དེ་ཉིད་ལས་བྱུང་བའི་ལྷ་མོ་སྒྲོལ་མ་བསྒོམ་པར་བྱའོ། །སྐུ་མདོག་ལྗང་གུ་ཕྱག་གཉིས་པ། གཡས་ཀྱིས་མཆོག་
སྦྱིན་པ། གཡོན་པས་ཨུཏྤ་ལ་བསྣམས་པ། པདྨ་དང་ཟླ་བ་ལ་བཞུགས་པ། རྒྱན་ཐམས་ཅད་ཀྱིས་བརྒྱན་པ་བསམ་པར་བྱའོ། །དེ་ནས་ཕྱག་རྒྱ་བཅིང་བར་བྱ་སྟེ། ལག་པ་གཉིས་ཐལ་མོ་སྦྱར་ལ་མཛུབ་མོ་གཉིས་ཀྱིས་གུང་མོ་བཅིངས་ལ། བཅང་བ་ནི་ལྷ་མོ་སྒྲོལ་མའི་ཨུཏྤ་ལ་ཁ་
བྱེ་བའི་ཕྱག་རྒྱའོ། །དེའི་འོག་ཏུ་སྔགས་བཟླས་པར་བྱ་སྟེ། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱཧཱ། ལྷ་མོ་སྒྲོལ་མའི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། མྲྀ་ཏྱུ་བཉྩ་ནོ་པ་དེ་ཤ་ཏཱ་རཱ་སཱ་དྷ་ནཾ། བོད་སྐད་དུ། འཆི་བ་སླུ་བའི་མན་ངག་གི་སྒྲོལ་མའི་སྒྲུབ་ཐབས། །
འཕགས་མ་སྒྲོལ་མ་ལ་ཕྱག་འཚལ་ལོ། །ཡིད་དུ་འོང་བའི་ས་ཕྱོགས་སུ། །ལངས་ནས་སྔ་དྲོའི་ཐུན་ལའོ། །བདེ་བའི་སྟན་ལ་རབ་འདུག་སྟེ། །རང་གི་སྙིང་གར་ཟླ་བ་ལ། །ལྔ་པ་ཡི་ནི་དང་པོ་ལ། །དབྱངས་ཡིག་གཉིས་པ་རབ་ཏུ་སྦྱར། །ཟླ་ཕྱེད་ཐིག་ལེ་ཡང་དག་ལྡན། །འོད་ཟེར་
དཀར་པོས་རྣམ་པར་བརྒྱན། །དེ་ཡི་འོད་ཟེར་དཀར་པོ་ཡིས། །མཁའ་ལ་སྒྲོལ་མ་གདན་དྲངས་ཏེ། །ཕྱག་གཉིས་སྐུ་མདོག་དཀར་མོ་ལ། །མཆོག་སྦྱིན་དང་ནི་ཨུཏྤལ་བསྣམས། །ཉེར་སྤྱོད་ལྔ་ཡི་མཆོད་པ་ཡི། །གུས་པ་ཡིས་ནི་མཆོད་བྱས་ནས། །སྡིག་པ་བཤགས་ཤིང་
ཕྱི་ནས་ནི། །དེ་ནས་བསོད་ནམས་རྗེས་ཡི་རང་། །དེ་ནི་ཡོངས་སུ་བསྔོ་བ་དང་། །དེ་བཞིན་གསུམ་ལ་སྐྱབས་སུ་འགྲོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་པའི་སྔགས་ཀྱིས་སྟོང་པར་བསྒོམ། །རྣལ་འབྱོར་པ་ཡི་ཆོ་ག་ཡིས། །ཆུ་སྐྱེས་དཀར་
པོའི་དབུས་གནས་པའི། །ཟླ་བའི་དཀྱིལ་འཁོར་སྟེང་དུ་ནི། །སྔོན་གསུངས་ས་བོན་ལས་སྐྱེས་པའི། །ལྷ་མོ་སྒྲོལ་མ་ཡིད་འོང་མ། །རྡོ་རྗེ་སྐྱིལ་མོ་ཀྲུང་བཅས་ནས། །མཆོག་སྦྱིན་མ་ནི་ཨུཏྤལ་བསྣམས། །སྟོན་ཀའི་ཟླ་བ་ལྟ་བུ་ནི། །ཟླ་བའི་སྟེང་དུ་ཡང་དག་བཞུགས། །རྒྱན་རྣམས་ཐམས་

ཅད་ཡོངས་སུ་རྫོགས། །བཅུ་དྲུག་ལོ་ཡི་གཟུགས་ཅན་མ། །སངས་རྒྱས་ཐམས་ཅད་དེ་ཡི་སྲས། །ཡུམ་གྱུར་འདོད་པའི་གཟུགས་འཛིན་མ། །འཕགས་མ་སྒྲོལ་མ་སྙིང་གར་བསྒོམ། །དེ་ཡི་འཁོར་ལོ་འོད་དཀར་ལྡན། །རེའུ་མིག་བརྒྱད་པོ་རྣམས་ལ་ནི། །ཡི་གེ་བརྒྱད་ཀྱིས་
ཡོངས་སུ་བསྐོར། །ཨོཾ་ཧཱ་གསལ་བྱེད་དབུས་གནས་པ། །བསྒྲུབ་བྱའི་མིང་སོགས་ལྟེ་བ་ལ། །མཁས་པས་རྩེ་གཅིག་ཡིད་ཀྱིས་ནི། །ངེས་པ་བརྟན་པོས་ཟླ་དྲུག་བསྒོམ། །ཡི་གེ་བཅུ་ཡི་གསང་སྔགས་འདི། །མཁས་པས་མི་སྐྱོའི་ཡིད་ཀྱིས་བཟླས། །ཨོཾ་ཡིག་དང་པོ་སྦྱིན་པར་བྱ། །
ཕྱི་ནས་ཏཱ་རེ་རབ་ཏུ་སྦྱར། །ཏུཏྟཱ་རེ་ཡི་ཏུ་རེ་ཕྱིས། །སྭཱ་ཧཱའི་མཐའ་ཅན་ལས་ཀུན་བྱེད། །ཚངས་དབང་ཁྱབ་འཇུག་ཉི་ཟླ་དང་། །དྲག་པོ་ཕྱོགས་སྐྱོང་འདོད་ལྷས་ཀྱང་། །བ་སྤུའི་རྩེ་མོའང་གཅོད་མི་ནུས། །འཆི་བདག་ལས་རྒྱལ་གྲོལ་བ་བཞིན། །སྐྲ་དཀར་གཉེར་མ་སྐལ་ངན་དང་། །ནད་
དང་དབུལ་སོགས་མདོར་བསྡུས་ན། །སེང་གེ་ལ་སོགས་འཇིགས་ཆེན་བརྒྱད། །སྡུག་བསྔལ་ཚོགས་རྣམས་རབ་ཏུ་འཇོམས། །བསྐུལ་པ་མེད་པར་ཟས་ལ་སོགས། །ཁང་བཟངས་གོས་ལ་སོགས་པ་ཐོབ། །རལ་གྲི་མིག་སྨན་རྐང་མགྱོགས་དང་། །བུམ་པ་བཟང་པོ་ལ་སོགས་
འགྲུབ། །སྙན་ངག་དང་ནི་སྨྲ་བ་མཁས། །བློ་རྣོ་ཤེས་རབ་དྲི་མ་མེད། །གཞན་ཡང་འདོད་པའི་དངོས་གྲུབ་རྣམས། །འཁོར་ལོ་འདི་ལས་རབ་ཏུ་འབྱུང་། །ཞེས་པ་ནི། འཆི་བ་སླུ་བའི་མན་ངག་གི་སྒྲོལ་མའི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། བི་ཤྭ་མཱ་ཏཱ་
སཱ་དྷ་ནཾ། བོད་སྐད་དུ། སྣ་ཚོགས་ཡུམ་གྱི་སྒྲུབ་ཐབས། སྣ་ཚོགས་ཡུམ་ལ་ཕྱག་འཚལ་ལོ། །ཉི་མ་ཟླ་བའི་དབུས་སུ་ཨཱ་ལི་ཀཱ་ལི་དང་བཅས་ཆུ་ཡི་ས་བོན་ཉིད་ལས་ཆུ་སྐྱེས་བསྒོམ། །དེ་ཡིས་བསྐྱེད་པའི་ལྷ་མོ་ཞལ་གཅིག་ཕྱག་གི་ཆུ་སྐྱེས་གཉིས་པ་སྐུ་མདོག་ཟླ་བ་ལྟ་བུ་སྟེ། །
གདེངས་ཀ་དཀར་པོ་ལ་གནས་ཆུ་སྐྱེས་དཀར་པོའི་ཕྱག་དང་མི་འཇིགས་པ་དང་ན་བཟའ་དཀར་པོ་མནབས། །རྒྱན་རྣམས་དཀར་པོ་དང་ལྡན་ཞལ་ནི་ཤིན་ཏུ་འཛུམ་ཞིང་བསྒྲུབ་བྱའི་ཁྱིམ་དུ་རབ་ཏུ་བསྲིངས་ནས་ནི། །དེ་ནས་བསྒྲུབ་བྱ་བླངས་ནས་སླར་ཡང་གཙོ་བོའི་དཀྱིལ་

འཁོར་ལ་ནི་ཡང་དག་རབ་ཏུ་ཞུགས་གྱུར་ནས། །གཙོ་བོའི་བཀའ་ཡིས་རབ་ཏུ་ཐོབ་པའི་སླར་ཡང་བདུད་རྩི་བུམ་པས་སྤྱན་མ་ལ་སོགས་རབ་དགྱེས་པས། །བསྒྲུབ་བྱ་དེ་ལ་ཁྲུས་མཛད་རབ་མཆོག་ནུས་མ་རྣམ་པ་བཅུ་པོ་རྣམས་ཀྱིས་ཡང་དག་མཆོད་པར་བྱེད། གཟུགས་
ལ་སོགས་པའི་ལྷ་མོ་རྣམས་ཀྱིས་རྒྱས་བྱེད་རབ་མཆོག་སྟོབས་བཅུ་ལ་སོགས་རྣམས་ཀྱིས་མཉེས་པར་བྱེད། །འབྱུང་པོར་བཤད་པས་མི་འཇིགས་བྱེད་ཅིང་རབ་མཆོག་རྣམ་པ་བཅུ་ཡི་ཁྲོ་བོ་ལས་སྐྱེས་རྣམས་ཀྱིས་སྐྱོང་། །ཀླུ་མོ་རྣམས་ཀྱིས་འོ་ནི་ཡང་དག་བྱེད་ཅིང་མི་ཡི་བུ་མོ་ལོ་ནི་བཅུ་གཉིས་
མ་པང་འཁྱུད། །གཏུམ་པོ་རྣམས་ཀྱིས་སྲུང་བར་བྱེད་ཅིང་ས་སྟེང་མཐའ་དག་རྣམས་སུ་རྒྱས་པར་བྱ་བའི་དོན་གྱི་ཕྱིར། །དེ་བཞིན་བསྒྲུབ་བྱའི་མ་ལུས་མཆོག་གི་བདེ་བ་བྱ་ཕྱིར་འདི་ནི་རྣལ་འབྱོར་པ་ཡིས་བསྒོམ་པར་བྱ། །སྣ་ཚོགས་ཡུམ་གྱི་སྒྲུབ་ཐབས་རྫོགས་སོ།། །།
༄༅༅། །རྒྱ་གར་སྐད་དུ། སརྦ་ཨཪྠ་སཱ་ངྷཱ་ནྱ་ཨཱརྱ་པྲ་སནྣ་ཏཱ་རཱ་སཱ་དྷ་ནཾ། བོད་སྐད་དུ། དོན་ཐམས་ཅད་གྲུབ་པ་རབ་ཏུ་སྦྱིན་པའི་འཕགས་མ་སྒྲོལ་མའི་སྒྲུབ་ཐབས། འཕགས་མ་སྒྲོལ་མ་ལ་ཕྱག་འཚལ་ལོ། །སྔོན་མའི་རིམ་པ་རབ་ཏུ་སྦྱོར་བས་བྷ་གའི་དབུས་སུ་ཟླ་བའི་དཀྱིལ་འཁོར་
ལ་ལྷ་མོ་སྒྲོལ་མ་ཆེན་མོ་གསེར་གྱི་མདོག་ལྟ་བུ་འཇིགས་པ་ཆེན་མོ་ཞལ་བརྒྱད་པ། སྤྱན་གསུམ་པ། ཕྱག་བཅུ་དྲུག་གིས་རྣམ་པར་བརྒྱན་པ། དབུ་སྐྲ་ཁམ་པ་གྱེན་དུ་བརྫེས་པ། མགོ་བོ་རློན་པའི་ཕྲེང་བ་བརྒྱ་ཕྱེད་ཀྱིས་དོ་ཤལ་བྱས་པ། འགྲོ་བ་རྣམས་སྐྱོབ་པའི་སྟོབས་ཆེན་མོ་ཞབས་གཡས་
བརྐྱང་བ་དང་ལྡན་པ། བཞད་ཅིང་ལང་ཚོ་གཞོན་ནུ་ལ་སྣ་ཚོགས་པའི་གོས་ཀྱིས་བརྒྱན་པ། རྩ་བའི་ཞལ་སེར་པོ། གཡས་ཀྱི་གཉིས་པ་ནི་ནག་པོ། གསུམ་པ་ནི་ལྗང་གུ། བཞི་པ་ནི་ནམ་མཁའ་ལྟ་བུ་སྔོན་པོའོ། །གཡོན་པ་ནི་ཀུནྡ་ལྟ་བུ། གཉིས་པ་ནི་དམར་པོ། གསུམ་པ་ནི་ནམ་མཁའ་
ལྟ་བུ་སྔོན་པོ། སྟེང་ནི་དུ་བའི་མདོག་ལྟ་བུ་འཇིགས་པ་ཆེན་མོའོ། །ཞལ་དབུས་མ་རྣམ་པར་གཙིགས་པའོ། །ཕྱག་གཡས་པ་རྣམས་ན་རལ་གྲི་དང་། ཨུཏྤ་ལ་དང་མདའ་དང་། རྡོ་རྗེ་དང་ལྕགས་ཀྱུ་དང་། དབྱུག་པ་དང་། གྲི་གུག་བསྣམས་པ་དང་། མི་འཇིགས་པ་རྣམས་སོ། །གཡོན་གྱི་

ཕྱག་རྣམས་ན་ཞགས་པ་དང་བཅས་པའི་སྡིགས་མཛུབ་དང་། ཐོད་པ་དང་། གཞུ་དང་། ཁ་ཊྭཱཾ་ག་དང་། རྡོ་རྗེ་དང་བཅས་པའི་ཞགས་པ་དང་། ཚངས་པའི་མགོ་བོ་དང་། རིན་པོ་ཆེ་དང་། བུམ་པ་རྣམས་བསྣམས་པའོ། །སྣ་ཚོགས་པདྨ་དང་ཟླ་བ་ལ་བཞུགས་པ། ཉི་མའི་འོད་ཀྱིས་རྣམ་པར་
བརྒྱན་པ། ཞབས་གཡོན་པས་དབང་པོ་དང་། ཞབས་གཉིས་ཀྱི་དབུས་སུ་དྲག་པོ་དང་། ཚངས་པ་དང་། འཁོར་ལོ་ཅན་ལ་གནས་པའོ། །སྒྲིབ་པ་ཐམས་ཅད་རྣམ་པར་འཇོམས་པ། རྣལ་འབྱོར་པས་བསྒོམས་པས་མྱུར་དུ་དངོས་གྲུབ་རྣམས་ཐོབ་པར་འགྱུར་རོ། །བཟླས་པའི་སྔགས་ནི་ཨོཾ་པྲ་
སནྣ་ཏཱ་རཻ་ཨ་མྲྀ་ཏེ། ཨ་མྲྀ་ཏ་མུ་ཁེ་ཨ་མྲྀ་ཏ་ལོ་ཙ་ནེ་སརྦཱཪྠ་སཱ་དྷ་ནི་སརྦ་སཏྭ་བ་ཤཾ་ཀ་རི་ཧཱུཾ་ཧཱུཾ་ཕཊ་སྭཱ་ཧཱ། ཞེས་པ་ནི་དོན་ཐམས་ཅད་རབ་ཏུ་གྲུབ་པ་སྦྱིན་པའི་འཕགས་མ་སྒྲོལ་མའི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། ཨཱརྱ་ཏཱ་རཱ་བྷཊྚཱ་རི་ཀཱ་ཡཱ་ཀལྤཿ། བོད་སྐད་དུ། རྗེ་བཙུན་
མ་འཕགས་མ་སྒྲོལ་མའི་ཆོ་ག །འཕགས་མ་སྒྲོལ་མ་ལ་ཕྱག་འཚལ་ལོ། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཨོཾ་ཀུ་རུ་ཀུལླེ་སྭཱ་ཧཱ། རྩ་བའི་སྔགས་སོ། །ལུས་ལ་དགོད་པར་བྱའོ། །སྙིང་པོའི་སྔགས་ཀྱི་བཟླས་པར་བྱའོ། །ཨོཾ་ཡིག་ནི་སྤྱི་བོར་དགོད་པར་བྱའོ། །ཀུ་ཡིག་ནི་དཔྲལ་བར་དགོད་པར་
བྱའོ། །རུ་ཡིག་ནི་མིག་ལ་དགོད་པར་བྱའོ། །ཀུ་ཡིག་ནི་གོ་ཆ་རུ་བྱའོ། །ལ་ཡིག་ནི་མགོ་བོར་བལྟ་བར་བྱའོ། །ལེ་ཡིག་ནི་སྙིང་གར་དགོད་པར་བྱའོ། །སྭཱ་ཡིག་ནི་ལྟེ་བའི་ཕྱོགས་སུའོ། །ཧཱ་ཡིག་ནི་རྐང་པ་དག་ལ་དགོད་པར་བྱའོ། །ཡི་གེ་འདི་རྣམས་སྒྲུབ་པ་པོས་བདག་ཉིད་ཀྱི་ལུས་ལ་དགོད་
པར་བྱའོ། །ཨོཾ་ཡིག་ཁ་དོག་དཀར་པོ་སྟེ། །ཀུ་ཡིག་སྔོན་པོ་དེ་བཞིན་དུ། །རུ་ཡིག་ཁ་དོག་དམར་པོར་གསུངས། །ཀུ་ཡིག་དཀར་པོ་དེ་བཞིན་དུ། །ལ་ཡིག་སེར་པོར་བལྟ་བར་བྱ། །དེ་བཞིན་ལེ་ཡིག་སྔོན་པོ་སྟེ། །སྭཱ་ཡིག་དམར་པོ་ཉིད་དུ་གསུངས། །ཧཱ་ཡིག་ནག་པོར་དེ་བཞིན་བཤད། །དེ་
བཞིན་དུ་ཡི་གེ་འདི་རྣམས་ཀྱི་ཁ་དོག་གསུངས་སོ། །སྒྲོལ་མའི་སྔགས་ཀྱང་འདི་ཉིད་དོ། །འདིར་བཅོམ་ལྡན་འདས་མ་མཆོད་པ་འདི་ཉེ་བར་བཞེས་ལ་བདག་ལ་མཆོག་སྩལ་དུ་གསོལ། །ཀུན་ནས་འབབ་པའི་སྔགས་སོ། །ཨོཾ་ཏཱ་རེ་ཏུཏྟཱ་རེ་ཏུ་རེ་ཧཱུཾ་ཕཊ་སྭཱ་ཧཱ། མཆོད་ཡོན་གྱི་སྔགས་ཀྱིས་པདྨའི་

ཕྱག་རྒྱ་བཅིངས་ནས་མེ་ཏོག་དྲི་ཞིམ་པོས་མཆོད་ཡོན་དབུལ་བར་བྱའོ། །ཨོཾ་ཏཱ་རེ་ཏུཏྟཱ་རེ་ཏུ་རེ་ལས་ཐམས་ཅད་ལ་ལེགས་པར་སྦྱར་བར་བྱའོ། །ཏཱཾ་ཡིག་གི་རྣམ་པ་དེ་བཞིན་དུ་ཨོཾ་ཏཱཾ་ཏཱཾ་ཏཱཾ་ཏཱཾ་ཏཱཾ་ཞེས་པ་འདིས་དགྲ་ཐམས་ཅད་རེངས་པར་འགྱུར་རོ། །སོར་མོ་རྣམས་ལ་བཀོད་ནས་
སྔགས་ཐམས་ཅད་ཀྱི་ལག་པ་བསྟན་པས་དེ་རེངས་པར་འགྱུར་རོ། །ཨོཾ་ཏྲཱཾ་ཏྲཱཾ་ཏྲཱཾ་ཏྲཱཾ་ཏྲཱཾ། ཡང་གང་གི་ཡང་དག་པའི་རྐྱེན་དུ་འགྱུར་རོ། །ཏཱཾ་གི་ཡི་གེ་འབུམ་བཟླས་པས་གྲོང་བརྒྱ་ཐོབ་པར་འགྱུར་རོ། །ཨོཾ་ཏྲུཾ་ཏྲུཾ་ཏྲུཾ་ཏྲུཾ་ཏྲུཾ། འདིས་ལས་ཐམས་ཅད་སྲུང་བར་བྱེད་པར་འགྱུར་རོ། །རྒྱལ་རིགས་ཀྱི་ནང་དུ་
ཞུགས་ནས་སྤྱོད་ཡུལ་དུ་བརྒྱད་བརྒྱ་མངོན་པར་བསྔགས་ཏེ་ཐིག་ལེ་བྱས་ནས་གནས་བདུན་དུ་སྦྱར་བར་བྱ་སྟེ། སྤྱི་བོ་དང་། དཔྲལ་བ་དང་། མགྲིན་པ་དང་། སྙིང་ག་དང་། ལྟེ་བ་དང་། པུས་མོ་དང་། རྐང་པ་དག་ལ་དེ་བཞིན་དུ་དགོད་པར་བྱའོ། །དེ་བཞིན་དུ་འདིས་གི་ཝང་གི་མིག་སྨན་བྱའོ། །
དེ་ནས་རྒྱལ་རིགས་ཀྱི་ནང་དུ་ཞུགས་ནས་རྒྱལ་པོ་དང་བཅས་པ་མངོན་དུ་ཕྱོགས་ནས་བལྟ་བར་འགྱུར་རོ། །སྟོང་ཕྲག་བརྒྱད་བཟླས་ན་སེམས་ཅན་ཐམས་ཅད་དབང་དུ་བྱེད་པར་འགྱུར་རོ། །ཏྲཱུཾ་ཏྲཱུཾ་ཏྲཱུཾ་ཏྲཱུཾ་ཏྲཱུཾ་ཨོཾ་འདི་སྔགས་འབུམ་བཟླས་ན། གྲོང་སྟོང་ཕྲག་གཅིག་ཐོབ་པར་འགྱུར་རོ། །བཅོམ་
ལྡན་འདས་སྒྲོལ་མ་ཡང་མཐོང་བར་འགྱུར་རོ། །མར་མེའི་སྔགས་ནི་ཨོཾ་རུཾ་རུཾ་རུཾ་ཧཿཧཿཧཱུཾ་ཕཊ་སྭཱ་ཧཱ། གཙུག་ཕུད་འཆིང་བའི་སྔགས་ནི་ཨོཾ་ཏཱཾ་ཏཱཾ་ཏཱཾ་ཏཱཾ་ཏཱཾ་བནྡྷ་ཏཱ་ཧོ་ཧཱཿསྭཱ་ཧཱ། སྟེང་འོག་གི་སྔགས་ནི་འདིར་སྒྲོལ་མའི་བཟླས་པའི་ཆོ་གའི་རིམ་པ། ཨོཾ་ཏྲུཾ་ཏྲུཾ་ཏྲུཾ་ཏྲུཾ་ཏྲུཾ། སྙིང་པོའི་སྔགས་སོ། །ཉེ་བའི་སྙིང་
པོ་ནི་ཏཱཾ་ཏཱཾ་ཏི་ཏེ། འདིས་དབང་དུ་བྱ་བའི་ལས་ལ་རབ་ཏུ་སྦྱར་བར་བྱའོ། །དབང་དུ་བྱ་བ་ལ་དཀྱིལ་འཁོར་ཀུན་ནས་བྲིས་ཏེ་དུར་ཁྲོད་ཀྱི་སོལ་བ་ལ་གཟུགས་བརྙན་བྱས་ཏེ་མགོ་བོ་ལ་ཏཱཾ་ཏཱཾའོ། །གསང་བ་ལ་ཏིའོ། །རྐང་པ་དག་ལ་ཏེ་བཀོད་ནས་ཀ་ར་བཱི་རའི་མེ་ཏོག་གིས་བྷ་ག་ལ་བསྣུན་པར་བྱའོ། །
སྔགས་འདིས་དབང་དུ་འགྱུར་རོ། །དགུག་པ་ལ་གི་ཝང་གིས་གྲོ་ག་ལ་བུད་མེད་དམ་སྐྱེས་པའི་གཟུགས་བརྙན་བྱས་ཏེ། ཏཱི་ནི་སྤྱི་བོ་རུའོ། །ཏི་ནི་སྙིང་གར་རོ། །ཏེ་ནི་རྐང་པ་དག་ལའོ། །ཏཱཾ་ནི་དཔྲལ་བ་ལའོ། །ཡི་གེ་འདི་རྣམས་དགོད་པར་བྱའོ། །དེ་ནས་བྲིས་སྐུའི་ཆོ་གས་བཅོམ་ལྡན་འདས་སྒྲོལ་མའི་

སྐུ་བྲི་བར་བྱ་སྟེ། ཕྱག་བཞི་པ། དམར་པོ་དང་། ལྗང་གུ་དང་། ནག་པོ་དང་། དཀར་པོ་དང་། ཁ་དོག་སྣ་ཚོགས་པའི་གཟུགས་ཅན་མའོ། །ཕྱག་དང་པོ་ན་ཞགས་པ། གཉིས་པ་ན་དུང་། དེ་བཞིན་དུ་ཨུཏྤ་ལ་དང་ལྕགས་ཀྱུ་ཕྱག་ན་བསྣམས་པའོ། །ལྕགས་ཀྱུས་དགུག་པར་བསམ་པར་བྱའོ། །
དཔག་ཚད་སྟོང་ལས་ཀྱང་དགུག་པར་འགྱུར་རོ། །འབུམ་བཟླས་པས་གང་འདོད་པ་དེ་སྟེར་ཞིང་དབང་དང་ལྡན་པར་འགྱུར་རོ། །ཡང་ན་ལྕགས་ཀྱུ་དགོད་པར་བྱའོ། །དགྲའི་མིང་བྲིས་ཏེ་ལག་པས་མནན་ནས་ཇི་སྲིད་དྲུང་དུ་མ་བཟུང་བར་དུ་དེ་སྲིད་བཟླས་པར་བྱའོ། །ཁ་དོག་ནག་པོར་བསམ་པར་བྱའོ། །
ཨོཾ་ཏྲུཾ་ཏྲུཾ་ཏྲུཾ་ཏྲུཾ་ཏྲུཾ་ཨོཾ། འདི་འབུམ་བཟླས་པས་ན་དབང་བསྐུར་བ་བརྟན་པར་འགྱུར་རོ། །དེ་ནས་ཨུཏྤ་ལ་སྔོན་པོའི་མེ་ཏོག་གིས་བཅོམ་ལྡན་འདས་སྒྲོལ་མ་ལ་སྟོང་ཕྲག་བཅུར་མཆོད་ནས་འདི་བཟླས་པས་སྟེར་རོ། །རེ་རེ་མཆོད་ནས་བཟླས་པ་བྱའོ། །སྐྱེ་བོ་ཐམས་ཅད་དེའི་རྗེས་སུ་འབྲང་ཞིང་དགའ་
བར་འགྱུར་རོ། །དུས་གསུམ་དུ་བརྒྱད་བརྒྱ་བཟླས་པར་བྱའོ། །དེ་བཞིན་དུ་རྒྱལ་རིགས་ལ་བརྟེན་པ་དང་། བྱ་བ་བྱེད་པ་དང་། ལྷ་ཁང་དང་། འབྲོག་དགོན་པ་ཐམས་ཅད་དུ་བཅོམ་ལྡན་འདས་སྒྲོལ་མས་བསྲུང་བར་འགྱུར་རོ། །རྗེ་བཙུན་མ་འཕགས་མ་སྒྲོལ་མའི་ཆོ་ག་རྫོགས་སོ།། །།
༄༅༅། །རྒྱ་གར་སྐད་དུ། ཨཱརྱ་ཛཱཾ་གུ་ལཱི་སཱ་དྷ་ནཾ། བོད་སྐད་དུ། འཕགས་མ་དུག་སེལ་མའི་སྒྲུབ་ཐབས། འཕགས་མ་ཛཱཾ་གུ་ལཱི་ལ་ཕྱག་འཚལ་ལོ། །སྔོན་གསུངས་ཆོ་གས་རང་ཉིད་ཀྱི། །སྙིང་གར་དཀྱིལ་འཁོར་དམར་པོ་ལ། །ཛཱཾ་ཡིག་ལས་ནི་ཡེ་ཤེས་རྫོགས། །རིག་མ་དུག་སེལ་མ་
ཞེས་བྱ། །སེར་མོ་སྦྲུལ་གྱི་གདེངས་ཀ་བདུན། །འབར་ཞིང་གཡོ་བའི་ནོར་བུས་བརྒྱན། །ཞལ་གསུམ་དང་ནི་སྤྱན་གསུམ་མ། །གཞོན་ནུ་མ་ཡི་མཚན་ཉིད་འབར། །ཁྲོ་བ་དང་བཅས་དེ་བཞིན་དུ། །སྦྲུལ་གྱི་སྐེ་རགས་ཀྱིས་བརྒྱན་མ། །ཕྱག་དྲུག་རོལ་པའི་སྟབས་ཀྱིས་བཞུགས། །མི་
བསྐྱོད་པ་ནི་དབུ་ལ་བཞུགས། །ཕྱག་གཡས་ན་ནི་རྡོ་རྗེ་སྟེ། །གཉིས་པ་དག་ན་རལ་གྲི་འཕྱར། །གསུམ་པ་གར་གྱི་ཚུལ་དང་ནི། །བདུད་རྣམས་སྐྲག་མཛད་མདའ་བསྣམས་སོ། །གཡོན་ན་སྡིགས་མཛུབ་ཞགས་པ་དང་། །གཉིས་པ་དུག་གི་མེ་ཏོག་བསྣམས། །གསུམ་པའི་ཕྱག་ན་གཞུ་

བསྣམས་ཤིང་། །མེ་ཏོག་གིས་བརྒྱན་སྐེ་རགས་ཏེ། །པདྨའི་གདན་གནས་གསེར་གྱི་མདོག །འོད་ཟེར་དམར་པོའི་དཀྱིལ་འཁོར་ལ། །དབང་པོའི་མཚོན་ཆ་སྤྲོ་ཞིང་སྦྲུལ། །འབར་བས་ཡོངས་བསྐོར་འོད་ཀྱིས་གཡོགས། །སངས་རྒྱས་སྐུ་ཚོགས་འཕྲོ་བ་ཡི། །ཟླ་བུམ་ཉིད་
ཀྱི་ཕྱག་རྒྱ་བསྣམས། །དུག་གི་རྒྱལ་ལ་དབང་བསྐུར་ཞིང་། །ཛཱཾ་ཡིག་གིས་ནི་ཁ་བརྒྱན་པ། །དུག་གིས་འགྱེལ་ལ་སྐུ་གསུམ་གྱི། །དུག་སེལ་མ་ནི་རྟག་ཏུ་བསྒོམ། །དེ་བཞིན་འདི་ནི་སྒོམ་བྱེད་ན། །རིང་པོར་མི་ཐོགས་བྱང་ཆུབ་འཐོབ། །ལག་པ་གཉིས་སྦྲུལ་གྱི་གདེངས་ཀའི་རྣམ་པ་ལྟར་བྱས་
ནས། སྤྱི་བོར་གདེངས་ཀ་གདུགས་ལྟ་བུ་རབ་ཏུ་སྦྱིན་པ་ནི་དུག་སེལ་མའི་ཕྱག་རྒྱའོ། །སྔགས་བཟླས་པར་བྱའོ། །ཨོཾ་ན་མཿཤ་བ་ར་ཀུ་མཱ་རི་ཡེ་ཙུཙྪཱཾ་ཙོ་ཌ་ཙཱི་ལ་ཙུཙྪ་ལ་ཡ་སཾ་གྷ་ཌྷ་ནི་མིཏྟ་མཱ་ཏཱཾ་གི་ཨ་ཌ་བིད་དྷེ་ཨ་ཧེ་ཨོཾ་ཛཱཿསྭཱ་ཧཱ། འཕགས་མ་དུག་སེལ་མའི་སྒྲུབ་ཐབས་རྫོགས་སོ།། །།
༄༅༅། །རྒྱ་གར་སྐད་དུ། ཨཱརྱ་ཛཱཾ་གུ་ལཱི་དྷཱ་ར་ཎི། བོད་སྐད་དུ། འཕགས་མ་དུག་སེལ་མའི་གཟུངས། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཨོཾ་ཨི་ལི་མིཏྟེ་ཏི་ལི་མིཏྟེ་ཨི་ལི་ཏི་ལི་མིཏྟེ་དུམྦེ་དུམྦཱ་ལ་ཡེ་དུ་སེ་དུ་སཱ་ལཱི་ཡེ་ཏརྐ་ར་ཎེ་མརྨྨེ་མརྨཱ་རོ་ཎ་ཀསྨཱི་
རེ་ཀསྨཱི་ར་མུགྟེ་ཨགྷེ་ཨ་གྷ་ཎེ་ཨ་གྷ་ཎེ་ཨཱི་ལི་ཨཱི་ལི་ཨེ་མི་ལཱི་ཨེ་མི་ལཱི་མི་ལེ་ཨེ་ཨཀྵཱ་ཨེ་ཨཀྵཱ་ཨི་ཨེ་ཤྭེ་ཏེ་ཤྭེ་ཏ་ཏུཎྜེ་ཨ་ནུཏྟ་རཀྵེ་སྭཱ་ཧཱ། འདིར་བདག་གིས་རིག་སྔགས་ཀུན་ཏུ་དཀར་བ་དགེ་སློང་རྣམས་ལ་ལེགས་པར་ཕུལ་བའི་རིག་པ་འདི་ལན་ཅིག་མཉན་པས་དེ་ལ་ལོ་བདུན་དུ་སྦྲུལ་
གྱིས་འཛིན་པར་མི་འགྱུར་རོ། །དེའི་ལུས་ལ་དུག་གིས་གོས་པར་མི་འགྱུར་རོ། །དགེ་སློང་རྣམས་ཀྱིས་རིག་པ་འདི་བཟུང་བར་གྱུར་ན། དེ་ཇི་སྲིད་འཚོའི་བར་དུ་སྦྲུལ་གྱིས་འཛིན་པར་མི་འགྱུར་རོ། །དེའི་ལུས་ལ་ཡང་དུག་གིས་གོས་པར་མི་འགྱུར་རོ། །གལ་ཏེ་སྦྲུལ་གྱིས་བཟུང་ན་དེའི་མགོ་ཨ་
རྫ་ཀའི་དོག་པ་བཞིན་དུ་ཚལ་པ་བདུན་དུ་འགས་པར་འགྱུར་རོ། །འཕགས་མ་དུག་སེལ་མའི་གཟུངས་རྫོགས་སོ།། ༄༅༅། །རྒྱ་གར་སྐད་དུ། ཨཱརྱ་ཛཱཾ་གུ་ལཱི་སཱ་དྷ་ནཾ། བོད་སྐད་དུ། འཕགས་མ་དུག་སེལ་མའི་སྒྲུབ་ཐབས། འཕགས་མ་དུག་སེལ་མ་ལ་ཕྱག་འཚལ་ལོ། །

སྔོན་དུ་གསུངས་པའི་ཆོ་གས་སྟོང་པ་ཉིད་དུ་བསྒོམས་པའི་རྗེས་ལ་ཆུ་སྐྱེས་དམར་པོ་དང་། ཟླ་བ་ལ་ཛཱཾ་ཡིག་སེར་པོ་ཡོངས་སུ་གྱུར་པ་ལས་འཕགས་མ་དུག་སེལ་མའི་བདག་ཉིད་དུ་སྐད་ཅིག་གིས་བསྐྱེད་པར་བྱ་སྟེ། སྐུ་མདོག་སེར་མོ་ཞལ་གསུམ་མ། ཕྱག་དྲུག་པ། སྔོན་པོ་དང་།
དཀར་པོ་ནི་གཡས་པ་དང་ཅིག་ཤོས་ཀྱི་ཞལ་ལོ། །རལ་གྲི་དང་། རྡོ་རྗེ་དང་། མདའ་རྣམས་ནི་གཡས་ཀྱི་ཕྱག་གསུམ་ནའོ། །སྡིགས་མཛུབ་དང་བཅས་པའི་ཞགས་པ་དང་། དུག་གི་མེ་ཏོག་དང་། གཞུ་བཀང་བ་ཕྱག་གཡོན་པ་གསུམ་ནའོ། །གདེངས་ཀ་རྒྱས་པའི་དཀྱིལ་འཁོར་
གྱི་དབུས་ལ་གནས་པ། སྦྲུལ་དང་མཛེས་པའི་གོས་དང་། རྒྱན་གྱིས་བརྒྱན་པ། གཞོན་ནུ་མའི་མཚན་ཉིད་འབར་བ། མི་བསྐྱོད་པས་དབུ་བརྒྱན་པར་བསྒོམས་ནས་སྔགས་བཟླས་པར་བྱའོ། ཨོཾ་ཛཱཾ་གུ་ལཱི་སརྦ་བི་ཥ་པྲ་ཤ་མ་ནི་ཕུཿསྭཱ་ཧཱ། འཕགས་མ་དུག་སེལ་མའི་སྒྲུབ་ཐབས་རྫོགས་སོ། །
༄༅༅། །རྒྱ་གར་སྐད་དུ། ཨཱརྱ་ཛཱཾ་གུ་ལཱི་མ་ཧཱ་བིདྱཱ། བོད་སྐད་དུ། འཕགས་མ་དུག་སེལ་མའི་རིག་སྔགས་ཆེན་མོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་དུ་ཡོད་པ་
ན་བཞུགས་ཏེ། རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་དགེ་སློང་གི་དགེ་འདུན་ཆེན་པོ་བརྒྱ་ཕྲག་ཕྱེད་དང་བཅུ་གསུམ་དང་ཐབས་ཅིག་ཏུ་བཞུགས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་མང་པོ་དང་། ཡང་དཔག་ཏུ་མེད་པའི་ལྷ་དང་། ཀླུ་དང་།
གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་རྣམས་དང་ཐབས་ཅིག་གོ། །དེ་ཉིད་དུ་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། དགེ་སློང་དག་སྔོན་བྱུང་པ་ན་ང་བྱང་ཆུབ་སེམས་
དཔར་གྱུར་ཏེ་སྤྱད་པ་སྤྱོད་པ་ན། རི་བོ་གངས་ལྡན་བྱང་ཕྱོགས་ལོགས། །སྤོས་ངད་ལྡང་བའི་རི་བོ་སྟེ། །རི་རྒྱལ་དེ་ཡི་ཤར་ཕྱོགས་ན། །གཞོན་ནུ་བསོད་ནམས་བརྒྱ་ཡིས་མཚན། །ཨེ་ན་ཡ་ཡི་པགས་པའི་གོས། །སྦྲུལ་གྱིས་བརྒྱན་ཅིང་སྐེ་རགས་བྱས། །སྦྲུལ་དུག་རེག་པའི་དུག་ཅན་

དང་། །མཐོང་དུག་ཅན་གྱིས་རྣ་རྒྱན་བྱས། །དུག་གི་མེ་ཏོག་ཟས་སུ་ཟ། །དུག་གི་ཁྲག་ནི་འཐུང་བར་བྱེད། །དེ་ཡི་བདག་ལ་བོས་བྱས་ཏེ། །བུ་ཁྱོད་ཚུར་ཤོག་བདག་ལ་ཉོན། །དུག་སེལ་མ་ཞེས་བྱ་བ་ཡི། །རིག་སྔགས་མཆོག་གིས་དུག་འཇོམས་མ། །གང་ཞིག་བདག་
མིང་ཙམ་གྱིས་ཀྱང་། །དེ་ཡི་དུག་རྣམས་ཐམས་ཅད་འཇོམས། །ཏདྱ་ཐཱ། ཨོཾ་ཨི་ལི་མིཏྟེ་ཏི་ལི་མིཏྟེ་ཨི་ལི་ཏི་ལི་མིཏྟེ་དུམྦེ་དུམྦཱ་ལི་ཨ་གྲ་དུསྶེ་དུསྶ་ལཱི་ཨི་ཏརྐེ་ཏརྐ་ར་ཎེ་མརྨེ་མརྨྨ་ར་ཎེ་ཀཤྨཱི་རེ་ཀཤྨཱི་ར་མུཀྟེ་ཨགྷེ་ཨགྷ་ནེ་ཨགྷ་ན་གྷ་ནེ་ཨ་གྷ་ན་གྷ་ནེ་ཨི་ལཱི་ཨི་ལཱི། ཨེ་མ་ལི་ཨེ་ཨི་ལི་མི་ལཱི་ཨེ་ཨཀྵཱ་
ཨེ་ཨཀྵ། ཨི་ཨེ་ཤྭེ་ཏེ་ཤྭེ་ཏེ་ཏུཎྜེ་ཨ་ནུ་རཀྵེ་སྭཱ་ཧཱ། འདིར་བདག་གིས་རིག་སྔགས་ཐམས་ཅད་དུ་དཀར་བ་དགེ་སློང་རྣམས་ལ་ལེགས་པར་ཕུལ་བའི་རིག་པ་འདི་ལན་ཅིག་ཐོས་པས་དེ་ལ་ལོ་བདུན་དུ་སྦྲུལ་གྱིས་འཛིན་པར་མི་འགྱུར་རོ། །དེའི་ལུས་ལ་དུག་གིས་གོས་པར་མི་འགྱུར་རོ། །དགེ་
སློང་གང་ཞིག་རྣམས་ཀྱིས་རིག་སྔགས་འདི་བཟུང་བར་གྱུར་ན་ཇི་སྲིད་འཚོའི་བར་དུ་སྦྲུལ་གྱིས་འཛིན་པར་མི་འགྱུར་རོ། །གལ་ཏེ་ཡང་སྦྲུལ་གྱིས་བཟུང་ན་དེའི་མགོ་ཨརྫ་ཀའི་དོག་པ་བཞིན་དུ་ཚལ་པ་བདུན་དུ་འགས་པར་འགྱུར་རོ། །ཡང་སྔགས་ཀྱི་ཚིག་འདི་སྦྲུལ་གྱི་མདུན་དུ་བཟླས་པར་མི་བྱའོ། །
གང་ཞིག་གིས་བཟླས་ན་སྦྲུལ་འཆི་བར་འགྱུར་རོ། །འདི་ལྟ་སྟེ། ཨི་ལ་ལཱ་ཙི་ལ་ལཱ་ཙཀྐོ་བཀྐོ་ཀོ་ཌ་ཏི་མོ་ཧོ་མོ་ཧི་ཏི་ཀུ་རུ་ཌཱ་ཀུ་རུ་ཌེ་ཏི་ནི་ཀུ་རུ་ཌེ་ཏི། པུ་རུ་ཌཱ་པུ་རུ་ཌེ་ཏི་ནི་པུ་རུ་ཌཱ་ནི་པུ་རུ་ཌེ་ཏི། ཕུཊྚེ་ཕུཊྚ་ར་ཧེ་ཕུཊྚེ་ཕུཊྚ། ཊྚེཎྚ་ར་ཧེ། ནཱ་གེ་ནཱ་གཾ་ར་ཧེ། ནཱ་གཎྚཎྚཎྚ་ར་ཧེ། སར་པེ་སར་པ་ར་ཧེ་སར་པཎྚཎྚཎྚ་ར་ཧེ།
ཨཙྪེ་ཨཙྪ་ལེ་ཨི་ཨི་ལ་བི་ཥེ། ཤཱི་ཏེ་ཤཱི་ཏཱ་བན་ཏ་ལེ། ཕ་ལེ་ཕ་ལ་ལེ། ཏུཎྜེ་ཏུ་ཏུཎྜེ། ཏཎྜི་ཏཎྜི་ཏེ་ཌ་ཏ་སྥུ་ཊ་སྥུ་ཊ་སྥུ་ཊ་ཏུ་བི་ཥཾ་སྭཱ་ཧཱ། དགེ་སློང་རྣམས་ཀྱིས་དུག་སེལ་མ་ཞེས་བྱ་བའི་རིག་སྔགས་ཆེན་པོ་ལྷ་དང་། ལྷ་མ་ཡིན་དང་། ཀླུ་དང་གནོད་སྦྱིན་དང་། འབྱུང་པོ་འདུས་པ་ཐམས་ཅད་ལ་
གསུངས་པ་དང་། གཏམ་བྱས་པ་དང་། ཉེ་བར་བསྟན་པ་དང་། རབ་ཏུ་ལུང་བསྟན་པ་དེ་ཐམས་ཅད་དེ་བཞིན་དུ་མི་བདེན་པ་མ་ལགས་ཏེ་གཞན་དུ་མ་ཡིན་ནོ། །དེ་བདེན་པར་འགྱུར་ཏེ་ཇི་ལྟ་བ་དེ་བཞིན་དུ་ཕྱིན་ཅི་མ་ལོག་པའོ། །ཕྱིན་ཅི་མ་ལོག་པས་སངས་རྒྱས་ཀྱི་བདེན་པ་རྗེས་སུ་དྲན་པ་

དང་། ཆོས་ཀྱི་བདེན་པ་རྗེས་སུ་དྲན་པ་དང་དགེ་འདུན་གྱི་བདེན་པ་རྗེས་སུ་དྲན་པ་དང་། བདེན་པའི་ཚིག་གི་བདེན་པ་རྗེས་སུ་དྲན་པ་དང་། བདེན་པ་འདི་དང་བདེན་པའི་ཚིག་འདིས་དུག་རྣམས་དུག་མེད་པར་གྱུར་ཅིག །དཱ་ཏཱ་རཾ་གཙྪ་ཏུ། ད་ཥ་ཌཱ་རཾ་གཙྪ་ཏུ། ཨགྣི་གཙྪ་ཏུ། ཀུ་ཊྱཾ་གཙྪ་ཏུ། ཛ་ལ་གཙྪ་ཏུ།
སྟཾ་བྷ་གཙྪ་ཏུ། ཤཱནྟཾ་གཙྪ་ཏུ། སྭསྟྱ་ཡ་ནཾ་གཙྪ་ཏུ། བྷཱུ་མྱཾ་ནི་པ་ཏ་ཏུ་བི་ཥཾ་སྭཱ་ཧཱ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། ཀུན་དགའ་བོ་དང་། དགེ་སློང་དང་བཅས་པའི་འཁོར་རྣམས་དང་། ལྷ་དང་མི་དང་། ལྷ་མ་ཡིན་དང་། ནམ་མཁའ་ལྡིང་དང་། དྲི་ཟ་དང་། མིའམ་
ཅི་དང་། ལྟོ་འཕྱེ་ཆེན་པོ་དང་། གནོད་སྦྱིན་དང་། ཀླུ་དང་བཅས་པའི་འཁོར་དེ་དག་ཐམས་ཅད་ཡི་རངས་ཏེ་མངོན་པར་དགའོ། །འཕགས་མ་དུག་སེལ་མའི་རིག་སྔགས་ཆེན་མོ་རྫོགས་སོ།། ༄༅༅། །རྒྱ་གར་སྐད་དུ། ཨཱརྱ་ཛཱཾ་གུ་ལྱཱ་བྷ་ག་བ་ཏྱཱཿཀལྤ། བོད་སྐད་དུ། བཅོམ་
ལྡན་འདས་འཕགས་མ་དུག་སེལ་བའི་རྟོག་པ། འཕགས་མ་དུག་སེལ་མ་ལ་ཕྱག་འཚལ་ལོ། །དེ་ནས་བཅོམ་ལྡན་འདས་མའི་ཐུགས་ཀྱི་རྟོག་པ་བདག་གིས་བཤད་པར་བགྱིའོ། །ཨོཾ་ཨ་སི་ཤུ་ལ་ཛི་ཧྭེ་ཛི་ཧྭེ་བཛྲ་ཀཱ་ཡཻ་གྲ་ས་གྲ་ས་ཛྭ་ལ་ཛྭ་ལ་མ་ཧཱ་ཛྭ་ལེ་མ་ཧཱ་ཡོ་གེ་ཤྭ་རི་ཧཱུཾ་ཧཱུཾ་ཕཊ་ཕཊ་
སྭཱ་ཧཱ། སྟོང་ཕྲག་བཅུ་བཟླས་པས་དུག་གི་ལས་ཐམས་ཅད་ཞི་བར་ནུས་པར་འགྱུར་རོ། །བཟླས་པ་ཡང་ཆོ་ག་འདིས་བྱའོ། །དུས་གསུམ་དུ་ཁྲུས་བྱས་ནས་ཆང་དང་། ཉ་དང་། སྒོག་པ་དང་། བཙོང་དང་། མར་ནག་དང་། ཚྭ་རྣམས་རྣམ་པར་སྤངས་ཏེ་དུས་གསུམ་དུ་བཟླས་པར་བྱའོ། །
ཇི་སྲིད་སྟོང་ཕྲག་བཅུའི་བར་དུའོ། །དེ་ནས་དངོས་གྲུབ་ཏུ་འགྱུར་རོ། །ཕྱི་ནས་འདི་རྣམ་པར་བཀོད་ནས་ལས་རྣམས་བྱའོ། །དང་པོ་རེ་ཞིག་སྔགས་པས་བདག་ཉིད་འདི་ལྟར་བསམ་པར་བྱ་སྟེ། གཞོན་ནུ་མའི་རྣམ་པ་སྐུ་མདོག་ལྗང་གུ། གདེངས་ཀ་བདུན་གྱིས་དབུ་ལ་རྣམ་པར་བརྒྱན་
པ། ཕྱག་བཞི་པ། ཞལ་གཅིག་པ། ཕྱག་དང་པོ་ན་རྩེ་གསུམ། གཉིས་པ་ན་རྨ་བྱའི་མཇུག་སྒྲོ། གསུམ་པ་ན་སྦྲུལ། བཞི་པ་ན་མི་འཇིགས་པ་རབ་ཏུ་བརྐྱང་པ། ཡན་ལག་ཐམས་ཅད་ལ་ཞབས་གདུབ་དང་། སྐ་རགས་དང་། དོ་ཤལ་དང་། རྣ་རྒྱན་ལ་སོགས་པ་སྦྲུལ་གྱི་རྣམ་

པར་བསམ་པར་བྱའོ། །བ་སྤུའི་ཁུང་བུ་རེ་རེ་ནས་མེ་འབར་ཞིང་ཀུན་ནས་འབྱུང་བ་དང་ལྡན་པ་རྣམ་པར་བསམ་པར་བྱའོ། །དེ་བཞིན་དུ་བདག་ཉིད་བརྟག་པར་བྱའོ། །བདག་གིས་རེ་ཞིག་ལྷ་རྣམས་ལ་དེ་ནས་སྦྲུལ་གྱིས་བཟུང་བ་དེའི་མདུན་དུ་བཀོད་ནས་ཟངས་མ་ལ་སོགས་
པའི་སྣོད་དུ་ཆུ་ལ་བཞག་ན་རིག་སྔགས་ལན་བདུན་དུ་མངོན་པར་བསྔགས་ནས་དེ་ལ་ལན་བདུན་དུ་མགོ་བོ་ལ་སོགས་པ་ལ་དུག་རྣམས་བྱབས་ནས་ཆུ་དེ་ལ་དེ་བཞིན་དུ་ཡང་ནས་ཡང་དུ་འཕང་བར་བྱའོ། །འདིས་དུག་མེད་པར་འགྱུར་རོ། །གཡོ་བའི་དུག་ལ་གང་དང་གང་ལ་དེ་བཞིན་དུ་གཏོང་བ་དེ་
དང་དེའི་གནས་ལ་ལན་བདུན་བཟླས་ཏེ། གང་ལ་གཟུངས་ཀྱིས་བཅིངས་ཤིང་། སྦྲུལ་གྱི་རྣམ་པར་འཁྱིལ་བར་སྦྱོར་བར་བྱའོ། །འདིའི་ཕྱག་རྒྱ་ནི་སྦྲུལ་གྱི་རྣམ་པའོ། །ཕུཿཞེས་པས་གཏོང་ཞིང་མཆེ་བའི་རྨའི་ཡན་ལག་ལས་དུག་འཐུངས་པ་བཞིན་དུ་བསམ་པར་བྱའོ། །དེ་ལྟ་བུས་ལས་གྲུབ་
པར་འགྱུར་ཞིང་གཞན་དུ་ནི་མ་ཡིན་ནོ། །བཅོམ་ལྡན་འདས་འཕགས་མ་དུག་སེལ་མའི་རྟོག་པ་རྫོགས་སོ།། ༄༅༅། །རྒྱ་གར་སྐད་དུ། ཨཱརྱ་ཛཱཾ་གུ་ལཱི་སཱ་དྷ་ནཾ། བོད་སྐད་དུ། འཕགས་མ་ཛཱཾ་གུ་ལཱིའི་སྒྲུབ་ཐབས། འཕགས་མ་དུག་སེལ་མ་ལ་ཕྱག་འཚལ་ལོ། །
སེམས་ཅན་རྣམས་ལ་བརྩེ་བ་ཅན། །འཕགས་མ་དུག་སེལ་གཟུགས་ཅན་མ། །བཅོམ་ལྡན་སྒྲོལ་མ་ལ་བཏུད་ནས། །དེ་ཡི་སྒྲུབ་ཐབས་བྲི་བར་བྱ། །དང་པོ་རེ་ཞིག་སྔགས་པས་གཙང་ཞིང་ཁྲུས་བྱས་ནས། ཕྲེང་བ་དང་གོས་དཀར་པོ་བཟུང་སྟེ། སྐྱེ་བོས་དབེན་པའི་ས་ཕྱོགས་
ལེགས་པར་བྱུགས་ཤིང་དྲི་བཟངས་དཀར་པོའི་ཆུས་ཆག་ཆག་བཏབ་ནས་མེ་ཏོག་དཀར་པོ་གཅལ་དུ་བཀྲམ་སྟེ། སྟན་བདེ་བ་ལ་ཉེ་བར་འདུག་ནས་འགྲོ་བ་རྣམས་ལ་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་རྣམས་རྣམ་པར་བསྒོམ་པར་བྱའོ། །ཨོཾ་སྭ་བྷཱ་བ་ཤུདྡྷཿསརྦ་
དྷརྨཱཿསྭ་བྷཱ་ཝ་ཤུདྡྷོ྅ཧཾ་ཞེས་བརྗོད་པར་བྱའོ། །དེ་ནས་གཟུང་བ་དང་འཛིན་པ་དང་བྲལ་བར་བལྟའོ། །དེ་ནས་པཾ་ཡིག་ཡོངས་སུ་གྱུར་པ་ལས་པདྨ་དཀར་པོ་འདབ་མ་བརྒྱད་པ་རྣམ་པར་བསམ་པར་བྱའོ། །དེའི་ཟེའུ་འབྲུ་ལ་ཨ་ཡིག་དཀར་པོ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་

བལྟས་ནས། དེའི་སྟེང་དུ་ཧྲཱིཿཡིག་ཁ་དོག་དཀར་པོ་ལས་སྐྱེས་པའི་བདག་ཉིད་འཕགས་མ་དུག་སེལ་མ་སྐུ་མདོག་ཐམས་ཅད་དཀར་མོ་ཕྱག་བཞི་པ། ཞལ་གཅིག་པ། རལ་པའི་ཅོད་པན་ཅན། དཀར་མོ་གོས་དཀར་པོས་སྟོད་གཡོགས་བྱས་པ། རིན་པོ་ཆེའི་རྒྱན་དཀར་པོས་བརྒྱན་པ།
སྦྲུལ་དཀར་པོས་བརྒྱན་པ། སེམས་དཔའི་སྐྱིལ་ཀྲུང་གིས་བཞུགས་པ། རྩ་བའི་ཕྱག་དག་གིས་པི་ཝང་བསྒྲེང་བར་མཛད་པ། གཡོན་གྱི་གཉིས་པས་སྦྲུལ་དཀར་པོ་བསྣམས་པ། གཡས་ཀྱི་གཉིས་པས་མི་འཇིགས་པ་རབ་ཏུ་སྦྱིན་པ། ཟླ་བའི་འོད་ཀྱི་ཕྲེང་བ་བསྣམས་པ་བསམ་པར་
བྱའོ། །མགོ་བོ་དང་མགྲིན་པ་དང་ནུ་མའི་བར་དུ་ཟླ་བའི་དཀྱིལ་འཁོར་ལ་ཨཱཿཧྲཱིཿཧཱུཾ་གི་ཡི་གེ་རྣམ་པར་བསྒོམ་པར་བྱའོ། །དེའི་རྗེས་སུ་ཧྲཱིཿཡིག་གི་འོད་ཟེར་གྱིས་ནམ་མཁའ་ལ་གནས་པའི་ཡེ་ཤེས་སེམས་དཔའ་གདན་དྲངས་ཏེ་དམ་ཚིག་སེམས་དཔའ་དང་གཅིག་ཏུ་བྱས་ཏེ་རྣམ་པར་བསྒོམ་
པར་བྱའོ། །ཛཿཧཱུཾ་བཾ་ཧོཿརབ་ཏུ་སྦྱོར་བས་སོ། །སླར་ཡང་ཧྲཱིཿཡིག་གི་འོད་ཟེར་གྱིས་ནམ་མཁའ་ལ་བཞུགས་པའི་དེ་བཞིན་གཤེགས་པ་ཐམས་ཅད་གདན་དྲངས་ཏེ་སེམས་ཅན་གྱི་དོན་ལ་བརྩོན་པས་ཀུན་ནས་དབང་བསྐུར་ཞིང་ལུས་ཀྱི་ནང་དུ་ཞུགས་པར་བསམ་པར་བྱའོ། །དེ་བཞིན་དུ་
བསམས་ནས་སྔགས་བཟླས་པར་བྱའོ། །ཧྲཱིཿཞེས་པའི་སྔགས་འབུམ་ཕྲག་བདུན་བཟླས་ནས་མེ་ཏོག་དཀར་པོའི་སྦྱིན་སྲེག་ཁྲི་ཕྲག་བདུན་བྱའོ། །རྒྱན་དཀར་པོས་རྣམ་པར་བརྒྱན་པར་བྱའོ། །འདིའི་རིམ་པས་ནམ་མཁའ་ལྡིང་གི་དབང་ཕྱུག་ཉིད་ཀྱི་མཁས་པར་གྱུར་ནས་བསྟན་བཅོས་
ཐམས་ཅད་ལ་འཇིགས་པ་མེད་ཅིང་དུག་ཐམས་ཅད་འཇོམས་པ་ཉིད་དུ་འགྱུར་ཏེ་ཐེ་ཚོམ་མེད་དོ། །འཕགས་མ་ཛཱཾ་གུ་ལཱིའི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། ཨེ་ཀ་ཛཱ་ཊཱི་སཱ་དྷ་ནཾ། བོད་སྐད་དུ། རལ་པ་གཅིག་མའི་སྒྲུབ་ཐབས། རལ་པ་གཅིག་མ་ལ་
ཕྱག་འཚལ་ལོ། །དེ་ནས་གཞན་ཡང་རབ་བཤད་བྱ། །རྟོག་པའི་མན་ངག་ཇི་བཞིན་དུ། །སྒྲོལ་མ་རལ་གཅིག་ལ་བཏུད་ནས། །དེ་ཡི་སྒྲུབ་ཐབས་བཤད་པར་བྱ། །ཨོཾ་ཧཱུཾ་བཛྲཱཾ་གི་མ་མ་མ་རཀྵ་རཀྵ་ཕཊ་ཕཊ་སྭཱ་ཧཱ། ཞེས་པ་འདིས་བདག་ཉིད་བྱིན་གྱིས་བརླབ་པར་བྱས་ནས་དང་པོར་རེ་

ཞིག་རྣལ་འབྱོར་པས་ཁ་བསང་བ་ལ་སོགས་པ་བྱས་ནས་སྐྱེ་བོས་དབེན་པའི་དུར་ཁྲོད་སྟུག་པོ་དང་བཞི་མདོ་ལ་སོགས་པ་འགྲོ་བ་ཐམས་ཅད་མངོན་པར་སྤྲོ་ཞིང་མཉེས་གཤིན་པས་མཆོག་ཏུ་བདེ་བའི་སྟན་ལ་འདུག་ནས། རང་གི་སྙིང་གར་པདྨ་དམར་པོའི་སྟེང་དུ་ཟླ་བའི་དཀྱིལ་འཁོར་
ལ་ཧཱུཾ་ཡིག་ནག་པོ་འོད་ཟེར་དང་བཅས་པ་བསམ་པར་བྱའོ། །དེའི་འོད་ཟེར་གྱིས་ནམ་མཁར་བླ་མ་དང་སངས་རྒྱས་དང་། བྱང་ཆུབ་སེམས་དཔའ་རྣམས་བལྟས་ནས་མཆོད་པར་བྱའོ། །སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། གསུམ་ལ་སྐྱབས་སུ་འགྲོ་བ་དང་། བྱང་
ཆུབ་ཏུ་སེམས་བསྐྱེད་པ་ལ་སོགས་པ་བྱས་ནས་བདག་ཉིད་ངེས་པར་དབུལ་བ་དང་། ལམ་ལ་བརྟེན་པ་དང་། ལྷག་པའི་བསམ་པ་རྣམ་པར་དག་པས་ང་རྒྱལ་དང་བདག་གིར་བྱེད་པ་ཡོངས་སུ་སྤངས་ཏེ་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་རྣམ་པར་བསྒོམ་པར་བྱའོ། །དེ་ནས་
སེམས་ཙམ་ལ་གནས་པར་བྱའོ། །བྱང་ཆུབ་ཀྱི་ཚོགས་བསྒོམས་པས་སོ་སོར་སྣང་བ་ཙམ་གྱི་ཡེ་ཤེས་ཏེ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། རང་དང་གཞན་སྟོང་པ་རྣམ་པར་བསྒོམས་ནས་སྔོན་གྱི་སྨོན་ལམ་རྗེས་སུ་དྲན་པར་བྱའོ། །རཾ་ཡིག་ལས་མདུན་དུ་ཉི་མ་རྣམ་པར་བསྒོམས་ནས། ཉི་མ་
དེ་ལས་ཧཱུཾ་ཡིག་ལས་བྱུང་བའི་སྣ་ཚོགས་རྡོ་རྗེའོ། །སྣ་ཚོགས་རྡོ་རྗེའི་ནང་དུ་ཉི་མའི་དཀྱིལ་འཁོར་རོ། །ཉི་མའི་དཀྱིལ་འཁོར་གྱི་སྟེང་དུ་ཟླ་བའི་དཀྱིལ་འཁོར་ལ་རིན་པོ་ཆེ་སྒྲོན་མ་འཕྲོ་བ་ལྟ་བུའི་ཧཱུཾ་ཡིག་མི་གཡོ་བར་བསམ་པར་བྱའོ། །དེ་ནས་དེ་ལས་བྱུང་བའི་འོད་ཟེར་ཁ་དོག་སྣ་ཚོགས་པ་སྔོན་པོ་དང་།
སེར་པོ་དང་། དམར་པོ་དང་ལྗང་གུའི་ཚོགས་བ་སྤུའི་ཁུང་ནས་རྣམ་པར་འཐོན་ནས་པཾ་ཡིག་དམར་པོ་ལས་སྐྱེས་པའི་པདྨ་དམར་པོ་ལ་སྐུ་མདོག་དམར་པོའི་རྣམ་པར་སྣང་མཛད་ལ་སོགས་པའི་རྡུལ་ཕྲ་རབ་ཀྱི་རང་བཞིན་གྱིས་ཤར་ལ་སོགས་པའི་ཕྱོགས་རྣམས་སུ་རིམ་པས་གཤིན་རྗེ་མཐར་བྱེད་ལ་སོགས་
པ་རྣམས་དེ་ལ་བཀུག་ནས་དེ་ཉིད་ཀྱི་མཆོད་པ་ལ་སོགས་པས་ཡང་དག་པར་མཆོད་ནས་ཡང་གསུམ་ལ་སྐྱབས་སུ་འགྲོ་བ་ལ་སོགས་པ་བསམ་པར་བྱའོ། །དེ་རྣམས་དེ་བཞིན་དུ་རབ་ཏུ་གཞུག་པར་བྱའོ་ཞེས་པ་ནི་སངས་རྒྱས་ཉེ་བར་སྡུད་པ་ཞེས་བྱ་བའི་ཏིང་ངེ་འཛིན་ཏོ། །དེ་ནས་སྙིང་རྗེའི་རླན་གྱིས་སྙིང་

གར་རིམ་པ་ཇི་ལྟ་བ་བཞིན་དུ་དམྱལ་བ་དང་དུད་འགྲོ་དང་ཡི་དགས་དང་མི་དང་ལྷ་མ་ཡིན་དང་། ལྷ་རྣམས་བལྟས་ནས་དེ་ནས་དེ་ལས་བྱུང་བའི་འོད་ཟེར་སྣ་ཚོགས་པས་ཡང་དག་པར་རེག་ནས་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་སྐུར་བསྐྱེད་ཅིང་དེ་ལ་དེ་བཞིན་དུ་རབ་ཏུ་གཞུག་
པར་བྱའོ་ཞེས་པའི་དོན་ནི་དམ་ཚིག་སེམས་དཔའ་ཉེ་བར་སྒྲུབ་པ་ཞེས་པའི་ཏིང་ངེ་འཛིན་ཏོ། །དེ་ནས་ནམ་མཁའི་ཕྱོགས་སུ་པཾ་ཡིག་དམར་པོ་ལས་སྐྱེས་པའི་ཆུ་སྐྱེས་དམར་པོ་སྣ་ཚོགས་པའི་འདབ་མ་དང་གེ་སར་གྱིས་བརྒྱན་པ་ལ་དེའི་དབུས་སུ་རཾ་ཡིག་དམར་པོ་ཡོངས་སུ་གྱུར་པ་ལས་ཉི་མའི་དཀྱིལ་འཁོར།
དེའི་སྟེང་དུ་ཧཱུཾ་ཡིག་ནག་པོ་ཧཱུཾ་ཡིག་ལས་སྐྱེས་པའི་ཉི་མ་ལ་གནས་པའི་ཧཱུཾ་ཡིག་ལས་བྱུང་བའི་སྣ་ཚོགས་རྡོ་རྗེ་རྒྱས་པ་ནས་ཀྱི་ཚད་ཙམ་རྡོ་རྗེའི་རང་བཞིན་འོད་ཟེར་རྣམས་བརྐྱང་བས་བདུད་ཀྱི་དཔུང་ཐམས་ཅད་འཇོམས་པ་དང་ལྡན་པར་རྣམ་པར་བསམ་པར་བྱའོ། །དེ་ནས་དེའི་སྟེང་དུ་སོང་སྟེ་དེས་རྡོ་རྗེའི་
གུར་དང་། ལོགས་སུ་སོང་སྟེ་དེས་རྡོ་རྗེའི་ར་བ་དང་། རྡོ་རྗེའི་བླ་བྲེའོ། །འོག་ཏུ་སོང་སྟེ་དེས་རྡོ་རྗེའི་རང་བཞིན་གྱིས་གཞི་རུ་བྱའོ། །དེ་ནས་དེའི་དབུས་སུ་སྟོན་ཀའི་ཟླ་བ་དཀར་པོའི་བུ་གའི་ནང་དུ་སྤྱི་བོར་གནས་པ་ཟུར་གསུམ་པ་ཨེ་ཡིག་ལས་སྐྱེས་པའི་ཆོས་འབྱུང་བསྒོམ་པར་བྱའོ། །དེ་ལ་ནམ་མཁའི་
མཐིལ་དུ་སོན་པའི་ཡཾ་ཡིག་ཡོངས་སུ་གྱུར་པ་ལས་རླུང་གི་དཀྱིལ་འཁོར་ནག་པོ་གཞུའི་རྣམ་པ་ལྟ་བུ་བ་དན་གྱིས་མཚན་པའོ། །དེའི་སྟེང་དུ་ར་ཡིག་ལས་སྐྱེས་པའི་ཟུར་གསུམ་སེར་པོ་ར་ཡིག་གིས་མཚན་པའི་མེའི་དཀྱིལ་འཁོར་རོ། །དེའི་སྟེང་དུ་བཾ་ཡིག་ཡོངས་སུ་གྱུར་པ་ལས་ཆུའི་དཀྱིལ་འཁོར་ཁ་དོག་
དཀར་པོ་འཁོར་ལོའི་རྣམ་པ་བུམ་པས་མཚན་པའོ། །དེའི་སྟེང་དུ་ལཾ་ཡིག་ལས་སྐྱེས་པའི་སའི་དཀྱིལ་འཁོར་ཁ་དོག་ལྗང་གུ་གྲུ་བཞི་སྣ་ཚོགས་རྡོ་རྗེས་མཚན་པའོ། །དེའི་སྟེང་དུ་སུཾ་ཡིག་ཡོངས་སུ་གྱུར་པ་ལས་རིའི་རྒྱལ་པོ་རི་རབ་ཆེན་པོ་རིན་པོ་ཆེ་བཞིའི་རང་བཞིན་རྩེ་མོ་བརྒྱད་ཀྱིས་ཉེ་བར་མཛེས་
པའོ། །དེའི་སྟེང་དུ་སྐད་ཅིག་གིས་ཆུ་སྐྱེས་དམར་པོ་འདབ་མ་སྣ་ཚོགས་པ་ཇི་སྲིད་འདོད་པའི་རྒྱ་ལ། དེའི་ཟེའུ་འབྲུ་ལ་ཉི་མ་དང་ཟླ་བ་ཡང་དག་པར་སྦྱོར་བའི་དབུས་སུ་ཧཱུཾ་ཡིག་གོ། །ཧཱུཾ་ལས་བདག་ཉིད་བསྒོམ་པར་བྱའོ། །སྐུ་གསུང་ཐུགས་ཀྱི་བདག་ཉིད་ཧཱུཾ་ཡིག་ནག་པོའོ། །ཡང་ཧཱུཾ་ཡིག་ནག་པོ་

ལས་སྣ་ཚོགས་རྡོ་རྗེ་ཡོངས་སུ་གྱུར་པ་ལས་སྐྱེས་པའི་གཞལ་ཡས་ཁང་གྲུ་བཞི་སྒོ་བཞི་པ་ཀ་བ་བརྒྱད་ཀྱིས་ཉེ་བར་མཛེས་པའོ། །དེའི་དཀྱིལ་འཁོར་གྱི་འཁོར་ལོའི་ནང་དུ་ཉི་མ་དང་ཟླ་བ་ཡང་དག་པར་སྦྱོར་བའི་དབུས་སུ་ཆོས་འབྱུང་ནམ་མཁའི་ནང་དུ་སོང་བའི་ཧཱུཾ་ཡིག་ནག་
པོ་བསམ་པར་བྱའོ། །དེ་ལ་ཨཱཿཡིག་ལས་ཉི་མའི་དཀྱིལ་འཁོར་བསྒོམ་པར་བྱའོ། །དེའི་སྟེང་དུ་ཧཱུཾ་ཡིག་ནག་པོ་ཡོངས་སུ་གྱུར་པ་ལས་རྡོ་རྗེ་འཛིན་པ་ཆེན་པོ་སྐུ་མདོག་དཀར་པོ་བསམ་པར་བྱ་སྟེ། ཞལ་གཅིག་པ། ཕྱག་གཉིས་པ། སྤྱན་གསུམ་པ། རྡོ་རྗེ་དང་དྲིལ་བུ་བསྣམས་པ། བསམ་
གཏན་ལ་གནས་པའི་བདག་ཉིད་དོ། །དེའི་ཐུགས་ཀར་ཧཱུཾ་ཡིག་ནག་པོ་འོད་ཟེར་སྣ་ཚོགས་འཕྲོ་བས་ཕྱོགས་བཅུའི་མཐར་ཐུག་པ་ན་བཞུགས་པའི་དེ་བཞིན་གཤེགས་པ་དང་། སངས་རྒྱས་དང་བྱང་ཆུབ་སེམས་དཔའ་དང་། རིག་པའི་ལྷ་མོ་རྣམས་དང་། ཁྲོ་བོ་ལ་སོགས་པ་རྣམས་ཡང་དག་པར་
བསྐུལ་ནས་སླར་འོང་སྟེ། དེ་ལ་དེ་བཞིན་དུ་ཉི་མ་ལ་རབ་ཏུ་ཞུགས་པར་བསམ་པར་བྱའོ། །དེ་ལ་དེ་བཞིན་དུ་རྡོ་རྗེ་འཛིན་པ་ཆེན་པོ་གང་ལ་དཔག་ཏུ་མེད་པའི་དེ་བཞིན་གཤེགས་པ་ལ་སོགས་པ་དང་རོ་གཅིག་ཏུ་གྱུར་ནས་ཉི་མ་ལ་རབ་ཏུ་ཞུགས་པར་བལྟ་བར་བྱའོ། །འོད་ཟེར་འབར་བས་དཔག་
ཚད་སྟོང་དུ་ཁྱབ་པའོ། །དེའི་སྟེང་དུ་ཧཱུཾ་ཡིག་ནག་པོ་འོད་ཟེར་སྣ་ཚོགས་དང་ཡང་དག་པར་ལྡན་པའོ། །དེ་ནས་ཧཱུཾ་ཡིག་ལས་འོད་ཟེར་འཕྲོ་བར་བལྟ་ཞིང་སླར་ཡང་དེ་ལ་དེ་བཞིན་དུ་ཞུགས་ཏེ། དེ་བཞིན་དུ་ཡི་གེའི་རྣམ་པར་གྱུར་པ་ལས་རྡོ་རྗེ་ནག་པོ་ཆེན་པོ་ཐོད་པ་དཀར་པོ་ལ་གནས་པ་འོད་ཟེར་སྣ་
ཚོགས་འཕྲོ་བར་བསམས་ནས་སངས་རྒྱས་དང་བྱང་ཆུབ་སེམས་དཔའ་དང་ཁྲོ་བོ་དང་། རིག་པའི་ལྷ་མོ་རྣམས་ཀྱིས་ནམ་མཁའི་མཐིལ་ཏིལ་གྱི་གང་བུ་བཞིན་དུ་ཉི་མ་ལ་བཞུགས་པར་བལྟ་བར་བྱའོ། །སངས་རྒྱས་ལ་སོགས་པ་དེ་རྣམས་ཀྱིས་སེམས་ཅན་རྣམས་ཡོངས་སུ་སྨིན་པར་མཛད་ནས་སླར་
འོངས་ཏེ་རྡོ་རྗེའི་གཟུགས་ལ་རབ་ཏུ་ཞུགས་པར་བལྟ་བར་བྱའོ། །རྡོ་རྗེའི་གཟུགས་དེ་ལ་དེ་བཞིན་དུ་ཞལ་བཅུ་གཉིས་པ། སྐུ་མདོག་ནག་མོ་ཕྱག་ཉི་ཤུ་རྩ་བཞི་པ། བདུད་བཞི་མནན་པ། ཐོད་པ་དཀར་པོའི་སྟེང་ན་ཞབས་གཡོན་བརྐྱང་གིས་བཞུགས་པ། བསྐལ་པ་ཆེན་པོའི་མེ་དང་མཚུངས་པ། བཞིན་

འཇིགས་སུ་རུང་བ་ཞལ་གདངས་ཤིང་ལྗགས་བརྐྱང་བ། ཁྲོ་ཞིང་མི་སྡུག་པ་ཤིན་ཏུ་འཇིགས་པ། ཁྲོ་གཉེར་བསྡུས་པ། མིག་ཟླུམ་ཞིང་གཡོ་བ། འཇིགས་ཤིང་འཇིགས་པར་བྱེད་པ། ཐོད་པའི་ཕྲེང་བས་དབུ་བརྒྱན་པ་སྦྲུལ་གྱིས་བརྒྱན་པ། ཕྱག་རྒྱ་དྲུག་དང་ལྡན་པ། ཞལ་དང་པོ་ནི་ནག་པོ་ཆེན་
པོའོ། །དེ་བཞིན་དུ་གཡས་ཀྱི་ལྔ་ནི་དཀར་པོ་དང་། སེར་པོ་དང་། ལྗང་གུ་དང་། དམར་པོ་དང་། དུ་བའི་མདོག་ལྟ་བུའོ། །གཡོན་གྱི་ཞལ་ནི་དམར་པོ་དང་། དཀར་པོ་དང་། སེར་པོ་དང་། ལྗང་གུ་དང་། དཀར་དམར་རྣམས་སོ། །སྟེང་གི་ཞལ་ནི་དུ་བ་ཆེན་པོའི་མདོག་ལྟ་བུ་མི་སྡུག་པ། ཞལ་ཐམས་ཅད་
ཁྲོ་ཞིང་མཆེ་བ་གཙིགས་པ། ཞལ་རྣམས་ནི་སྤྱན་གསུམ་པའོ། །སྐྲ་དམར་སེར་གྱེན་དུ་བརྫེས་པ། ཁྲོ་བ་དང་བཅས་ཤིང་ཐུང་ལ་ལྟོ་བ་འཕྱང་བ། ནུ་མ་རྒྱས་ཤིང་སྟེང་དུ་མཐོ་བ། སྟག་གི་པགས་པའི་ཤམ་ཐབས་ཅན། གཡས་ཀྱི་ཕྱག་བཅུ་གཉིས་རྣམས་ན་རལ་གྲི་དང་། རྡོ་རྗེ་དང་། འཁོར་ལོ་དང་།
རིན་པོ་ཆེའི་འཁྲི་ཤིང་དང་། ལྕགས་ཀྱུ་དང་། མདའ་དང་། མདུང་དང་། ཐོ་བ་དང་། གཏུན་ཤིང་དང་། གྲི་གུག་དང་། ཌ་མ་རུ་དང་། བགྲང་ཕྲེང་རྣམས་བསྣམས་པའོ། །གཡོན་གྱི་ཕྱག་བཅུ་གཉིས་རྣམས་ན། གཞུ་དང་ཞགས་པ་དང་། སྡིགས་མཛུབ་དང་། བ་དན་དང་དབྱུག་པ་དང་། རྩེ་གསུམ་
དང་། ཆང་སྣོད་དང་། ཨུཏྤ་ལ་དང་། དྲིལ་བུ་དང་། སྟ་གྲི་དང་། ཚངས་པའི་མགོ་བོ་དང་། ཐོད་པ་བསྣམས་པའོ། །ཤིན་ཏུ་དགྱེས་ཤིང་རོའི་གདན་ལ་བཞུགས་པ། ཀླུ་བརྒྱད་ཀྱིས་རྣམ་པར་བརྒྱན་པ། ལང་ཚོ་གཞོན་ཞིང་ཕུན་སུམ་ཚོགས་པ། ཧཱ་ཧཱ་ཊཱའི་གད་རྒྱངས་སྒྲོགས་པ། རལ་པ་གཅིག་མའི་
སྐྲ་ཁམ་པ་གྱེན་དུ་བརྫེས་པ་བསམ་པར་བྱའོ། །སྤྱི་བོར་མི་བསྐྱོད་པས་དབུ་བརྒྱན་པའོ། །ཨོཾ་ཨཱཿཧཱུཾ་ཞེས་པས་སྐུ་གསུང་ཐུགས་བྱིན་གྱིས་བརླབ་པར་བྱའོ། །ཨོཾ་ཧྲཱིཿཏྲུཾ་ཧཱུཾ་རླུང་དང་ཆུ་དང་། དབང་ཆེན་དང་། མེའི་དཀྱིལ་འཁོར་རྣམས་ལ་ཇི་ལྟར་ཉེ་བར་བསྟན་པ་བཞིན་དུ་དེ་ལྟ་བུར་གྱུར་པ་ལ་སྔགས་པས་
སླར་ཡང་ནམ་མཁའི་མཐིལ་དུ་ཡེ་ཤེས་ཀྱི་འཁོར་ལོ་གདན་དྲངས་ཤིང་མདུན་དུ་སྤྲོས་ནས་ཕྲེང་བ་བཞིན་དུ་རང་གི་དམ་ཚིག་སེམས་དཔའི་འཁོར་ལོ་ལ་རབ་ཏུ་གཞུག་པར་བྱའོ། །བཅུག་ནས་གཅིག་ཏུ་བྱས་ཏེ་ལྷ་རྣམས་ཀྱི་ང་རྒྱལ་བསྐྱེད་ནས་རང་གི་ཡུལ་ལ་འོད་ཟེར་གྱི་ཚོགས་བྱུང་སྟེ། དེ་བཞིན་

གཤེགས་པ་དང་བྱང་ཆུབ་སེམས་དཔའ་དང་། རིག་པའི་ལྷ་མོ་རྣམས་དང་། ཁྲོ་བོ་ལ་སོགས་པ་རྣམས་ཀྱིས་བདུད་རྩི་ལྔས་ཡོངས་སུ་གང་བའི་བུམ་པ་རྣམས་ཀྱིས་དབང་བསྐུར་ཞིང་། སྣ་ཚོགས་པའི་མཆོད་པ་ཁྱད་པར་ཅན་རྣམས་ཀྱིས་ཡང་དག་པར་མཆོད་པ་བྱེད་པར་བདག་ཉིད་
བསྒོམ་པར་བྱའོ། །གཙུག་ཏོར་དུ་ཧཱུཾ། དཔྲལ་བར་ཨོཾ་མགྲིན་པར་ཨཱཿསྙིང་གར་ཧྲཱིཿལྟེ་བར་ཏྲཱཾ་ལྟེ་བའི་འོག་ཏུ་ཧཱུཾ། གསང་བར་ཏྲཱཾ། རྐང་པ་དག་ལ་ཨོཾ་ཨཱཿཕཊ་སྭཱཧཱ། ཞེས་པ་རྣམས་ཡན་ལག་རྣམས་ལ་དགོད་པར་བྱའོ། །དེ་ལྟ་བུར་གྱུར་པའི་དམ་ཚིག་གི་ཆོ་ག་འདིས་སྔགས་ཀྱི་ཡི་གེ་རྣམས་ཀྱང་ཉེ་
བར་བརྗོད་ཅིང་དེ་རྣམས་ལྷ་མོ་རྣམས་ཀྱི་ཞལ་ལས་བྱུང་བའི་འོད་ཟེར་རྣམས་རང་གི་སྙིང་གར་རབ་ཏུ་ཞུགས་ཏེ། རྡོ་རྗེའི་ལམ་ནས་འཐོན་ཏེ་ལྷ་མོའི་པདྨའི་ནང་དུ་རབ་ཏུ་ཞུགས་ནས། སླར་ཡང་ལྷ་མོའི་ཞལ་ནས་རང་གི་ཁར་ཞུགས་ཤིང་རིམ་པ་འདིས་རྒྱུན་མ་ཆད་པར་སྔགས་རྣམས་འཁོར་བར་བྱའོ། །དེ་
བཞིན་དུ་ཇི་སྲིད་མི་ངལ་གྱི་བར་དུ་བཟླས་པར་བྱའོ། །དེ་ནས་རང་གི་སྙིང་གའི་འོད་ཟེར་གྱི་ཚོགས་ཀྱི་རྣམ་པའི་རིམ་པས་ཇི་སྲིད་མར་མེའི་རྩེ་མོ་བཞིན་དུ་དམིགས་པ་མེད་པར་བྱའོ། །ཇི་ལྟར་གསུངས་པའི་ཨུཏྤ་ལའི་ཕྱག་རྒྱ་བཅིངས་ནས་སྤྱི་བོ་དང་། དཔྲལ་བ་དང་། མགྲིན་པ་དང་། སྙིང་ག་དང་། ལྟེ་བའི་འོག་
དང་། གསང་བ་དང་། རྐང་པ་གཉིས་རྣམས་ལ་རྣམ་པར་བཀོད་པའི་སྔགས་མཚན་མ་མེད་པའི་སྦྱོར་བས་བཟླས་པར་བྱའོ། །དེ་ལ་སྔགས་འདིའོ། །ཧྲཱིཾ་ཏྲཱིཾ་ཧཱུཾ་ཕཊ། རྩ་བའི་སྔགས་སོ། །ཨོཾ་ཧྲཱིཾ་ཏྲཱིཾ་ཧཱུཾ་ཧཱུཾ་ཕཊ་སྭཱཧཱ། ཧྲཱིཾ་ཏྲཱིཾ་ཧཱུཾ་སྙིང་པོ་དང་ཉེ་བའི་སྙིང་པོའི་སྔགས་སོ། །དེ་བཞིན་དུ་རྣམ་པར་བསམས་ནས་བརྟན་པར་
བྱས་ཏེ་བདག་ཉིད་བསྒོམ་པར་བྱའོ། །ཡང་ན་རི་མོ་བཀྲམ་ནས་བཅོམ་ལྡན་འདས་མ་བསྒོམ་པར་བྱའོ། །སྔོན་དུ་བསྙེན་པ་འབུམ་ཕྲག་གཅིག་བཟླས་ནས་བཅུ་ཆའི་སྦྱིན་སྲེག་བྱའོ། །དཔལ་གྱི་འབྲས་བུ་དང་། ལོ་མའམ། ཨརྐ་དཀར་པོའི་མེ་ཏོག་དང་ཀ་ར་བཱི་ར་དཀར་པོའི་མེ་ཏོག་ཀྱང་རུང་སྟེ་བའི་མར་
དང་སྦྱིན་སྲེག་བྱའོ། །ཇི་ལྟར་རས་རིས་ཀྱི་ཆོ་གས་རི་མོ་བྲིས་ནས་མཆོད་པ་དང་། བསམ་གཏན་དང་། བཟླས་པ་བྱའོ། །མཚམས་མེད་པ་ལྔ་བྱེད་པས་ཀྱང་བྱེ་བ་བཟླས་པས་འགྲུབ་པར་འགྱུར་རོ། །དངོས་པོ་ཐམས་ཅད་རང་བཞིན་མེད་པར་བྱས་ནས་སྐད་ཅིག་གིས་སྙིང་གར་ཆུ་སྐྱེས་ཀྱི་སྟེང་དུ་ཉི་མ་དང་ཟླ་བའི་

དབུས་སུ་ཧཱུཾ་ཡིག་དམར་པོ་ཤིན་ཏུ་ཕྲ་བའི་གཟུགས་ཅན་སྐྲའི་རྩེ་མོ་བརྒྱར་གཤགས་པའི་ཆ་ཙམ་ཐིག་ལེའི་གཟུགས་ཅན་ཧཱུཾ་ཡིག་གིས་བརྒྱན་པ། རྡོ་རྗེ་དང་མིའི་སྣ་ལ་བསམ་པར་བྱའོ། །ཧཱུཾ་ཡིག་ལས་བྱུང་བའི་རྡོ་རྗེ་རྣལ་འབྱོར་མ་སྐུ་མདོག་དམར་མོ་ཞལ་གཅིག་ཕྱག་གཉིས་མ། སྤྱན་གསུམ་པ། གཅེར་
བུ་སྐྲ་གྲོལ་བ་རོལ་ཞིང་ཁྲོ་བ། ཕྱག་རྒྱ་དྲུག་དང་ལྡན་པ་ཆོས་འབྱུང་གི་ནང་དུ་སོན་པ་དང་། རོ་ལ་གནས་པ། ཞབས་སྟེང་དང་འོག་ཏུ་གནས་པ། གྲི་གུག་དང་། ཐོད་པ་བསྣམས་པ། ཁྲོ་བ་དང་བཅས་པ་ཉིན་དང་མཚན་དུ་བསྒོམ་པར་བྱའོ། །འོད་ཟེར་འབར་ཞིང་མཆེ་བ་གཙིགས་པ་རལ་པ་གཅིག་མ་ཞེས་བྱ་
བའི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། ཨེ་ཀ་ཛཱ་ཊཱི་སཱ་དྷ་ནཾ། བོད་སྐད་དུ། རལ་པ་གཅིག་མའི་སྒྲུབ་ཐབས། རལ་པ་གཅིག་མ་ལ་ཕྱག་འཚལ་ལོ། །སྒྲོལ་མ་བདུད་རྣམས་སྐྲག་མཛད་ལྷ་མཆོག་རྣམས་ཀྱིས་ཀུན་ཏུ་ཡང་དག་མཆོད། །འཇིག་རྟེན་རྣམས་ཀྱི་ཕན་མཛད་
སྙིང་རྗེ་མཚུངས་ལྡན་རྣམ་པ་མང་པོ་ཡིས། །སྐྱེ་བོ་འཁོར་བའི་འཇིགས་ལས་སྐྱོབ་མཛད་གུས་བཏུད་འགྲོ་རྣམས་སྣང་མཛད་མ། །རྟག་ཏུ་འཇིགས་པ་སེལ་མཛད་གང་རྣམས་སྲུང་མཛད་ཡུམ་དེ་རྒྱལ་གྱུར་ཅིག །རལ་པ་གཅིག་མ་ལས་བྱུང་མ། །དེ་མ་ཐག་ཏུ་འགྲུབ་འགྱུར་ཏེ། །དེ་ཤེས་པས་ཀྱང་ད་ལྟར་དུ། །དེ་
ཡིས་ལས་ཀུན་རབ་སྒྲུབ་བྱེད། །ཨོཾ་ཞེས་ཡི་གེ་བརྗོད་པ་ཡིས། །རྟག་ཏུ་སྟོང་པ་ཉིད་དུ་བྱ། །དེ་བཞིན་ཡི་གེ་བརྗོད་པ་ཡིས། །སྣ་ཚོགས་པདྨ་བསྒོམ་པར་བྱ། །སྣ་ཚོགས་པདྨའི་དབུས་སུ་ནི། །ཏཱཾ་ཡིག་ཅེས་པ་བསྒོམ་པར་བྱ། །བསྒོམ་བྱ་ཐོད་པ་དཀར་པོ་ལ། །ཧཱུཾ་ཡིག་དེ་ཡི་དབུས་སུ་སྟེ། །དེ་ནི་གྲོལ་ཞིང་
སྔོན་པོ་ལ། །འོད་ཟེར་སྔོན་པོར་མཚུངས་པར་ལྡན། །དེ་ཡི་ཡོངས་གྱུར་སྦྱོར་བ་ཡིས། །བདག་གི་སེམས་ཀྱི་རང་བཞིན་ཏེ། །བསྒོམ་བྱ་དེ་ཡི་སྐད་ཅིག་ལས། །ལྷ་མོ་མིག་སྨན་འོད་མཚུངས་གནག །ཕྱག་བཞི་སྤྱན་ནི་གསུམ་པ་སྟེ། དམར་ཞིང་ཤིན་ཏུ་འཇིགས་པའི་སྤྱན། །སྟག་གི་པགས་པ་ཡོངས་སུ་
བགོས། །ཐོད་པའི་རྒྱན་ནི་ཤིན་ཏུ་འབར། །མུ་ཏིག་དོ་ཤལ་དེ་བཞིན་དུ། །མཛེས་པ་ཡིས་ནི་རྣམ་པར་བརྒྱན། །བརྒྱད་གཉིས་ལོ་ཡི་རྣམ་པ་ཅན། །དཀར་འཛིན་མཁྲེགས་ཤིང་མཐོ་བ་ཅན། །རལ་པ་གཅིག་ཏུ་ཁམ་བརྫེས་ཤང་། །ལྷ་མོ་ལྟོ་འཕྱང་ཤིན་ཏུ་མཛེས། །ཞལ་ནི་ཅུང་ཟད་མཆེ་བ་གཙིགས། །

ལྗགས་ནི་བསྐྱོད་ཅིང་འཇིགས་པར་བྱེད། །སྦྲུལ་ནག་རྣམས་ཀྱིས་རབ་ཏུ་བརྒྱན། །ཤིན་ཏུ་མི་བཟད་འོད་ཟེར་དྲག །དཔུང་རྒྱན་རྐང་གདུབ་ལ་སོགས་དང་། །གཡེར་ཀ་རྣམས་ཀྱིས་རབ་ཏུ་བརྒྱན། །གཡོན་གྱི་ཕྱག་ན་ཐོད་པ་དང་། །གཡས་པ་གྲི་གུག་གིས་མཛེས་མ། །ཨུཏྤ་ལ་སྡོང་བུ་དང་
བཅས་པ། །ཕྱག་གཡོན་ན་ནི་ཡང་དག་ལྡན། །སླར་ཡང་གཡས་པའི་ཕྱག་ན་ནི། །རལ་གྲི་འབར་བ་རྣམ་པར་བསྒོམ། །རལ་གྲི་ཡོངས་སུ་སྦྱོར་བ་ཡིས། །བགྲང་ཕྲེང་ཡང་ནི་བལྟ་བར་བྱ། །གཡས་བརྐྱང་གིས་གནས་ཁྲག་དང་ནི། །ཐོད་པའི་དབུས་སུ་བསྟན་པ་ལས། །བསྐལ་པའི་མེ་ཚོགས་ལྟ་བུ་ཡི། །
འོད་ཟེར་འབར་བ་དང་ལྡན་པའི། །ལྷ་མོ་ལ་ནི་གུས་ལྡན་པས། །གང་གིས་རྟག་ཏུ་སྒོམ་བྱེད་ཅིང་། །གང་གིས་བཟླས་པར་བྱ་བ་ནི། །ཐམས་ཅད་ཡི་གེ་བཞི་ཡིས་ནི། །འགྲོ་ཀུན་དེ་ཡི་དབང་བྱེད་པར། །ཇི་ལྟར་སངས་རྒྱས་ཉིད་ཀྱིས་གསུངས། །སླར་ཡང་ཐོད་པའི་དབུས་སུ་ནི། །བསྒྲུབ་བྱ་རབ་ཏུ་ལྟུང་བར་
འབད། །དེ་ཡི་མགོ་བོ་རྐང་པ་དག །ཞབས་ཀྱིས་མནན་ཅིང་ཡང་དག་འཚིར། །ངེས་པར་ཆད་པས་གཅོད་བྱེད་ཅིང་། །གལ་ཏེ་བསམ་གཏན་ཡིད་རང་བཞིན། །སྔགས་ཀྱི་བརྗོད་བྱ་ཡང་དག་པ། །ཇི་ལྟར་ལྷ་མོ་རབ་རྟོགས་བཞིན། །ས་མཐའ་བྱིན་ཟའི་གནས་ལ་ནི། །དབྱངས་ཡིག་བཞི་པ་དང་ལྡན་
པ། །དབུ་ལ་ཐིག་ལེས་ཡང་དག་བརྒྱན། །སླར་ཡང་ཟླ་ཕྱེད་དང་བཅས་པ། །འདི་ནི་ས་བོན་ཆེན་པོ་སྟེ། །ས་བོན་གཉིས་པ་ལེགས་པར་ཉོན། །ཎ་མཐའ་མེ་དང་ཡང་དག་ལྡན། །དེ་ཡིས་དེ་བཞིན་སླར་དབྱེ་བ། །སྒྲ་ཡི་ཐིག་ལེ་ཡང་དག་ལྡན། །གཉིས་པར་འགྱུར་བ་བསྟན་པ་སྟེ། །སླར་ཡང་ས་བོན་
གསུམ་པ་ནི། །འབད་པས་རབ་ཏུ་བཤད་པར་བྱ། །ས་མཐའ་དབྱངས་ཡིག་དྲུག་པས་མནན། །སྒྲ་ཡི་ཐིག་ལེ་ཡང་དག་ལྡན། །འདི་ནི་ས་བོན་རབ་མཆོག་སྟེ། །འཇིག་རྟེན་གསུམ་པོ་སྲེག་བྱེད་བདག །བཞི་པ་ཡང་ནི་བཤད་བྱ་བ། །ཇི་ལྟར་སངས་རྒྱས་ཀྱིས་གསུངས་པ། །ཉོན་ཅིག་ཕྱེད་བཅས་
ཡི་གེ་ཡི། །ཡང་དག་སྔགས་ཀྱིས་འགྲུབ་པར་བྱེད། །ཉ་ཡི་མཐའ་ཅན་ཅུང་ཟད་ཙམ། །རྫོགས་པ་ཡི་ནི་མཚན་ཉིད་ཅན། །ལྷ་མོ་རལ་པ་གཅིག་མ་ཡི། །སྔགས་ཀྱི་རྒྱལ་པོ་སྟོབས་དང་ལྡན། །འདི་ནི་ཐོས་པ་ཙམ་གྱིས་ནི། །མི་རྣམས་བགེགས་ལས་རྒྱལ་བར་འགྱུར། །སྐལ་བ་དང་ལྡན་རྒྱལ་བ་དང་། །

རྟག་ཏུ་དགྲ་རྣམས་ཉམས་པར་འགྱུར། །རྟག་ཏུ་ཆོས་ཀྱི་ཕུང་པོ་དང་། །སངས་རྒྱས་དང་མཚུངས་ཐེ་ཚོམ་མེད། །རལ་གཅིག་མའི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། ཨཱརྱ་ཨེ་ཀ་ཛཱ་ཊཱི་སཱ་དྷ་ནཾ། བོད་སྐད་དུ། འཕགས་མ་རལ་གཅིག་མའི་སྒྲུབ་ཐབས། འཕགས་མ་རལ་གཅིག་མ་
ལ་ཕྱག་འཚལ་ལོ། །དང་པོ་རེ་ཞིག་སྔགས་པས་ཡིད་དང་མཐུན་པའི་བསམ་གཏན་གྱི་ཁང་པར་སྟན་བདེ་བ་ལ་ཉེ་བར་འདུག་སྟེ། བླ་མ་དང་སངས་རྒྱས་དང་། བྱང་ཆུབ་སེམས་དཔའ་རྣམས་ལ་ཕྱི་དང་ནང་གི་མཆོད་པ་རྣམས་ཀྱིས་ཡང་དག་པར་མཆོད་ནས་གསུམ་ལ་སྐྱབས་སུ་འགྲོ་བ་དང་། སྡིག་པ་བཤགས་པ་
ལ་སོགས་པ་བྱས་ནས། ཤིན་ཏུ་བརྟན་པའི་བྱང་ཆུབ་ཀྱི་སེམས་བསྐྱེད་དེ། ཨོཾ་ཞེས་པའི་ཡི་གེ་བརྗོད་ནས། ཆོས་ཐམས་ཅད་སྟོང་པ་ཉིད་མངོན་དུ་བྱས་ཏེ། སླར་ཡང་ཨཾ་ཡིག་བརྗོད་པ་དེ་ཡོངས་སུ་གྱུར་པ་ལས་སྣ་ཚོགས་པདྨ་བསྒོམ་པར་བྱའོ། །དེའི་དབུས་སུ་ཊྭཱཾ་ཡིག་ལས་སྐྱེས་པའི་པདྨའི་སྣོད་དུ་ཆུ་ཤེལ་
གྱི་འོད་དང་མཚུངས་པ། དེའི་དབུས་སུ་འོད་ཟེར་འཕྲོ་བས་འཇིག་རྟེན་གྱི་ཁམས་མཐའ་ཡས་པ་སྣང་བར་མཛད་པ་ཨིནྡྲ་ནཱི་ལའི་འོད་དང་ལྡན་པའི་ཧཱུཾ་ཡིག་རྣམ་པར་བསམ་པར་བྱའོ། །དེ་ཡོངས་སུ་གྱུར་པ་ལས། རིན་ཆེན་ཨིནྡྲ་ནཱི་ལ་ཡི། །འོད་ལྡན་འགྲོ་བ་གསུམ་པོ་ཁྱབ། །ཕྱག་བཞི་འཇིགས་པ་ཆེན་མོ་
སྟེ། །དམར་ཞིང་འཇིགས་པའི་སྤྱན་གསུམ་མ། །སྟག་གི་པགས་པའི་ན་བཟའ་མནབས། །པདྨའི་སྣོད་ཀྱིས་རབ་བརྒྱན་མ། །རུས་པའི་དོ་ཤལ་གྱིས་བརྒྱན་ཅིང་། །གཏུམ་མོ་ཡི་ནི་གཟུགས་ཅན་མ། །ལོ་བརྒྱད་གཉིས་ཀྱི་རྣམ་པ་ཅན། །དཀར་འཛིན་མཐོ་ཞིང་མཁྲེགས་པ་སྟེ། །ཀུན་ནས་ཁམ་པའི་རལ་
པ་ཅན། །སྦྲུལ་ནག་རྒྱན་གྱིས་རྣམ་པར་བརྒྱན། །ཞལ་ནི་ཅུང་ཟད་མཆེ་བ་གཙིགས། །ལྗགས་བསྒྲིལ་འཇིགས་པར་བྱེད་པ་སྟེ། །ལྟོ་ནི་འཕྱང་ཞིང་བྱམས་ཆེན་མ། །སྙིང་རྗེས་ཀུན་ཏུ་ཡིད་ཁྱབ་མ། །དོ་ཤལ་རྐང་གདུབ་དཔུང་རྒྱན་དང་། །གཡེར་ཀ་སྐ་རགས་ལ་སོགས་པས། །བརྒྱན་ཅིང་གཏུམ་མོ་ཧཱུཾ་
མཛད་མ། །བདུད་ཀྱི་དཔུང་ཆེན་ལས་རྒྱལ་མ། །ཕྱག་གཡོན་ཆུ་སྐྱེས་སྣོད་བསྣམས་མ། །གཡས་ཀྱི་ཕྱག་ན་གསོར་བཞིན་པས། །བདུད་རྣམས་སྐྲག་པར་མཛད་པ་ཡི། །རྡོ་རྗེ་དང་བཅས་གྲི་གུག་བསྣམས། །སླར་ཡང་གཡོན་པའི་ཕྱག་ན་ནི། །སྡོང་བུ་དང་བཅས་ཨུཏྤལ་བསྣམས། །ཕྱག་གཡས་ན་ནི་

རལ་གྲི་བལྟ། །དེ་ནི་ཡོངས་སུ་གྱུར་པ་ལས། །སྐར་མའི་ཕྲེང་བའི་འོད་འཕྲོ་བའི། །བགྲང་ཕྲེང་རྣམ་པར་བསྒོམ་པར་བྱ། །ཐོད་པ་ཁྲག་གིས་གང་བའི་དབུས། །གཡས་བརྐྱང་གིས་ནི་ཡང་དག་གནས། །བསྐལ་པའི་མེ་དང་མཚུངས་པ་ཡི། །འོད་ཟེར་འབར་བས་འཁོར་བའི་སྐུ། །ལྷ་
མོ་རལ་པ་གཅིག་མ་བསམ། །འཕྲོ་བའི་སྔགས་བཟླས་དེ་ནས་ནི། །བསམ་མེད་སྔགས་ཀྱི་ནུས་པ་ནི། །ཕྱེད་བཅས་ཡི་གེ་བཞི་པ་ཡིས། །འགྲོ་བ་གཡོ་ཞིང་དབང་བྱེད་དང་། །འབེབས་ཤིང་སྐྲག་མཛད་སངས་རྒྱས་གསུང་། །བསྒྲུབ་བྱའི་སྤྱི་བོར་རྐང་པ་དག །གཡས་བརྐྱང་ཞབས་ཀྱིས་ཀུན་ནས་
མནན། །དེ་བཞིན་པདྨའི་སྣོད་ལ་བསྒོམ། །རྣལ་འབྱོར་སྔགས་ནི་སྤྲོ་ཞིང་བཟླ། །སྔགས་གསུངས་པ་ལས་དངོས་གྲུབ་ནི། །ཡང་དག་ལྷ་མོས་རབ་ཏུ་རྟོགས། །དང་པོ་མེ་ཡི་ཤིང་རྟ་ཞོན། །ས་མཐའ་ཨཱི་ཡི་དབྱངས་ཀྱིས་བརྒྱན། །ཕྱི་ནས་ཟླ་ཕྱེད་ཐིག་ལེ་ཡིས། །དབུ་ཡི་སྟེང་དུ་ཡང་དག་བརྒྱན། །
གཉིས་པ་ཡང་ནི་དེ་བཞིན་ཏེ། །འོན་ཀྱང་ཎ་མཐའི་གཟུགས་ཀྱིས་དབྱེ། །ས་མཐའ་དེ་བཞིན་གསུམ་པ་ཡང་། །དྲུག་པའི་དབྱངས་དང་ཡང་དག་ལྡན། །སྔོན་མ་བཞིན་དུ་དབུ་ལ་མཛེས། །བཞི་པ་ཕཊ་ཀྱི་མཐའ་ཅན་ཏེ། །སྔགས་པས་སྔགས་འདི་བཟླས་པར་བྱ། །ཧྲཱིཾ་ཏྲཱིཾ་ཧཱུཾ་ཕཊ་འདི་བཞིན་ཞེས། །འཕགས་
མ་རལ་གཅིག་མའི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། ཨེ་ཀ་ཛཱ་ཊཱི་སཱ་དྷ་ནཾ། བོད་སྐད་དུ། རལ་པ་གཅིག་མའི་སྒྲུབ་ཐབས། རལ་པ་གཅིག་མ་ལ་ཕྱག་འཚལ་ལོ། །སྔོན་དུ་གསུངས་པའི་ཆོ་གས་སྟོང་པ་ཉིད་དུ་བསྒོམས་པའི་རྗེས་ལ་སྣ་ཚོགས་པདྨའི་སྟེང་དུ་ཊཱཾ་ཡིག་
ཡོངས་སུ་གྱུར་པ་ལས་ཐོད་པའི་དབུས་སུ་ཧཱུཾ་ཡིག་ནག་པོ་ལས་སྤྲོ་ཞིང་བསྡུ་བ་སྔོན་དུ་འགྲོ་ཞིང་དེ་ཡོངས་སུ་གྱུར་པ་ལས་བཅོམ་ལྡན་འདས་རལ་པ་གཅིག་མ་ཡན་ལག་ཐམས་ཅད་གནག་པ། ཞལ་གཅིག་པ། ཕྱག་བཞི་པ། ཀུན་ནས་དམར་བའི་སྤྱན་གསུམ་པ། སྟག་གི་པགས་པའི་ན་བཟའ་
ཅན། དབུ་ལ་ཐོད་པའི་ཕྲེང་བ་ཅན། སྐྲ་ཁམ་པ་གྱེན་དུ་བརྫེས་ཤིང་མཆེ་བ་གཙིགས་པ། ལྗགས་བསྒྲིལ་བ། ལྟོ་བ་འཕྱང་ཞིང་ལག་འགྲོ་ནག་པོའི་རྒྱན་སྣ་ཚོགས་པ། ལོ་བརྒྱད་གཉིས་ལོན་པ་ལྟ་བུ། དཀར་འཛིན་མཐོ་ཞིང་མཁྲེགས་པ། དོ་ཤལ་དང་། དཔུང་རྒྱན་དང་། གཡེར་ཀ་དང་། མེ་ཏོག་གི་

ཕྲེང་བས་ཡན་ལག་མ་ལུས་པ་བརྒྱན་པ། ཕྱག་གཡས་པ་དག་གིས་རལ་གྲི་དང་གྲི་གུག་བསྣམས་པ། གཡོན་པ་དག་གིས་ཨུཏྤལ་དང་། ཐོད་པ་བསྣམས་པའི་བདག་ཉིད་དུ་སྐད་ཅིག་གིས་བསྐྱེད་ལ་སྔགས་བཟླས་པར་བྱའོ། །ཨོཾ་ཧྲཱིཾ་ཏྲཱིཾ་ཧཱུཾ་ཕཊ་ཅེས་སོ། །རལ་བ་གཅིག་མའི་སྒྲུབ་ཐབས་རྫོགས་སོ།། །།
༄༅༅། །རྒྱ་གར་སྐད་དུ། ཨེ་ཀ་ཛཱ་ཊཱི་སཱ་དྷ་ནཾ། བོད་སྐད་དུ། རལ་པ་གཅིག་མའི་སྒྲུབ་ཐབས། འཕགས་མ་ཨེ་ཀ་ཛཱ་ཊཱི་ལ་ཕྱག་འཚལ་ལོ། །ཨོཾ་ཨཱཿཧཱུཾ་ཨོཾ་བཛྲ་ཡོ་གི་ནཱི་པྲ་ཏཱིཙྪ་མཾ་བ་ལིཾ་ཧྲཱིཾ་ཧཱུཾ་ཧ་ཧ་ཧ་ཧ་ཧེ་ཧེ་ཧཾ་ཧཿཕཊ་མ་མ་ཤཱནྟིཾ་ཀུ་རུ་སྭཱཧཱ། ཨོཾ་ཨཱཿརལླི་ཧཾ་ཞེས་པ་ལ་སོགས་པ་བརྗོད་པར་བྱའོ། །དེ་ནས་རབ་
ཏུ་བཤད་བྱ་བ། །ཕྱག་གཉིས་རལ་གཅིག་སྒྲུབ་པའི་ཐབས། །རལ་གཅིག་ཁམ་པ་གྱེན་བརྫེས་པའི། །ལྷ་མོ་གྲི་གུག་ཐོད་པ་བསྣམས། །དེ་བཞིན་ལྷ་མོ་ཕྱག་བཞི་མ། །རྟོག་པར་ཡང་ནི་བདག་གིས་བཤད། །མདའ་དང་རལ་གྲི་གཡས་ན་བསྣམས། །གཡོན་ན་གཞུ་དང་ཐོད་པ་སྟེ། །དེ་བཞིན་དུ་ནི་
ཕྱག་བརྒྱད་ཀྱང་། །རིམ་གྱུར་བདག་གིས་བཤད་པར་བྱ། །གཡས་ན་རལ་གྲི་མདའ་དང་ནི། །རྡོ་རྗེ་གྲི་གུག་དེ་བཞིན་དུ། །གཡོན་ན་ཨུཏྤལ་གཞུ་དང་ནི། །སྟ་གྲི་དང་ནི་ཐོད་པ་བསྣམས། །སྐུ་མདོག་ནག་མོ་དང་ལྡན་མ། །སྟག་ལྤགས་ཤམ་ཐབས་ཀུན་ནས་མནབས། །ཞལ་གཅིག་སྤྱན་ནི་གསུམ་པ་
སྟེ། །རལ་པ་ཁམ་པ་གྱེན་དུ་བརྫེས། །དྲག་མོ་ཀུན་ནས་ལྟོ་བ་འཕྱང་། །གཡོན་བརྐྱང་ཞབས་ཀྱིས་ཡང་དག་གནས། །ཁྲོ་བ་དང་བཅས་ཞལ་གཙིགས་ཤིང་། །མགོ་བོའི་ཕྲེང་བ་འཕྱང་བ་ཅན། །རོ་ལ་གནས་ཤིང་འཇིགས་ཆེན་མོ། །མི་བསྐྱོད་པ་ཡིས་དབུ་ལ་བརྒྱན། །ལང་ཚོ་གཞོན་ཞིང་ཕུན་སུམ་ཚོགས། །
མི་བཟད་གད་རྒྱངས་འཕྲོ་བ་ཅན། །ཊཱཾ་ཡིག་ས་བོན་ལས་བྱུང་བ། །དེ་མ་ཐག་རྐྱེན་བྱེད་པ་ཅན། །སྣ་ཚོགས་པདྨའི་སྟེང་དུ་ནི། །རབ་ཏུ་འབད་པས་ཉི་མ་བསམ། །ཧྲཱིཾ་ཏྲཱིཾ་ཧཱུཾ་ཕཊ། མཁས་པས་རལ་གྲིའི་གནས་སུ་ནི། །རུས་པའི་ཕྲེང་བ་བསམ་པར་བྱ། །ཇི་ལྟར་སྔོན་གསུངས་རིམ་པ་ཡིས། །སྔགས་མཆོག་
ཡང་དག་བཟླས་པར་བྱ། །བསྒོམ་པའི་སྟོབས་ནི་རྫོགས་པ་ན། །རྣལ་འབྱོར་སྙན་ངག་ཆེན་པོར་འགྱུར། །འབུམ་ཕྲག་གཅིག་གི་བཟླས་པ་ཡིས། །འཇམ་དབྱངས་དང་མཚུངས་ཐོབ་པར་འགྱུར། །སྒྲོལ་མའི་སྒྲུབ་ཐབས་བརྩམས་པ་ཡིས། །བདག་གིས་བསོད་ནམས་གང་བསྒྲུབས་དེས། །སྲོག་ཆགས་སྐྱེ་

བོ་མ་ལུས་པ། །སྒྲོལ་མ་དང་ནི་མཚུངས་པར་ཤོག །རལ་པ་གཅིག་མའི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། ཙུནྡ་སཱ་དྷ་ནཾ། བོད་སྐད་དུ། ཙུནྡེའི་སྒྲུབ་ཐབས། འཕགས་མ་ཙུནྡེ་ལ་ཕྱག་འཚལ་ལོ། །ལྷ་མོ་ཙུནྡེ་ལྷག་པར་ཆེ། །ཡང་དག་རྒྱལ་བ་དེ་བཏུད་
ནས། །དངོས་གྲུབ་མྱུར་དུ་རབ་འགྲུབ་པ། །དེ་ཡི་སྒྲུབ་ཐབས་མདོར་བསྡུས་བརྗོད། །དང་པོར་རེ་ཞིག་སྔགས་པས་རང་གི་སྙིང་གར་ཟླ་བའི་དབུས་སུ་ས་བོན་སྡེ་ཚན་གསུམ་པའི་དང་པོ་ལ་དང་པོའི་ལྔ་པས་བརྒྱན་པ། ཟླ་ཕྱེད་དང་ཐིག་ལེས་སྤྲས་པ་སྟོན་ཀའི་ཟླ་བའི་འོད་ཟེར་གྱི་ཕྲེང་བ་ཅན། སངས་རྒྱས་དང་བྱང་
ཆུབ་སེམས་དཔའ་ཐམས་ཅད་ཀྱིས་བྱིན་གྱི་རླབས་ཀྱིས་མཛེས་པ། དེའི་འོད་ཟེར་ལས་སྐྱེས་པའི་བཅོམ་ལྡན་འདས་མ་དང་། བླ་མ་དང་སངས་རྒྱས་ལ་སོགས་པ་རྣམས་བལྟས་ནས། མངོན་པར་ཕྱག་བྱས་ཏེ་སྔགས་ཀྱིས་མཆོད་པར་བྱའོ། །ཨོཾ་བཛྲ་པུཥྤེ་ཧཱུཾ། ཨོཾ་བཛྲ་དྷཱུ་པེ་ཧཱུཾ། ཨོཾ་བཛྲ་དཱི་པེ་ཧཱུཾ། ཨོཾ་བཛྲ་
གནྡྷེ་ཧཱུཾ། ཨོཾ་བཛྲ་ནཻ་བི་དྱེ་ཧཱུཾ། དེ་ནས། དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། །ཞེས་བརྗོད་པར་བྱའོ། །དེ་ནས་སྨོན་ལམ་སྔོན་དུ་འགྲོ་བས། སྔགས་འདིས་ཆོས་ཐམས་ཅད་
སྟོང་པ་ཉིད་བདག་མེད་པར་བསྒོམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། དེ་ནས་ཁམས་གསུམ་པ་མ་ལུས་པ་ས་བོན་སྒྱུ་མའི་རྣམ་པར་བསམས་ཏེ། ཨོཾ་སྭ་བྷཱ་བ་ཤུདྡྷཿ སརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། དེ་ནས་སྔོན་དུ་གསུངས་པའི་ས་བོན་ལས་སྐྱེས་པའི་དཔལ་གྱི་ལྷ་མོ་ཙུནྡེའི་བདག་
ཉིད་དུ་བསྒོམ་པར་བྱ་སྟེ། སྟོན་ཀའི་ཟླ་བ་ལྟ་བུ་ཕྱག་བཞི་པ། གཡས་པས་མཆོག་སྦྱིན་པ། གཡོན་པ་པུསྟིས་མཚན་པའི་པདྨ་བསྣམས་པ། ཕྱག་གཉིས་ཀྱིས་ལྷུང་བཟེད་བསྣམས་ཤིང་། རྒྱན་ཐམས་ཅད་ཀྱིས་བརྒྱན་པ། པདྨ་དང་ཟླ་བ་ལ་གནས་པ་བསྒོམ་པར་བྱའོ། །ཕྱི་ནས་ཕྱག་རྒྱ་བཅིང་
པར་བྱ་སྟེ། སྙིང་ག་དང་། མཛོད་སྤུ་དང་། མགྲིན་པ་དང་། སྤྱི་བོ་རྣམས་སུ་སྲུང་བ་བྱས་ནས་བཟླས་པར་བྱའོ། །དེ་ལ་ཕྱག་རྒྱ་ནི་འདི་ཡིན་ཏེ། ལག་པ་གཉིས་ཐལ་མོ་སྦྱར་ནས་སྡིགས་མཛུབ་གཉིས་གུང་མོའི་དཀྱིལ་དུ་འཁྱིལ་པའི་རྣམ་པར་སྦྱར་ཞིང་མཐེབ་ཆེན་གཉིས་ལོགས་སུ་སྦྱར་བར་བྱ་སྟེ། འདི་ནི་ཙུན་

དེའི་ཕྱག་རྒྱའོ། །སྔགས་ནི་འདི་ཡིན་ཏེ། ཨོཾ་ཙ་ལེ་ཙུ་ལེ་ཙུནྡེ་སྭཱཧཱ། ཙུནྡེའི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། ཙུནྡ་སཱ་དྷ་ནཾ། བོད་སྐད་དུ། ཙུནྡེའི་སྒྲུབ་ཐབས། འཕགས་མ་ཙུནྡེ་ལ་ཕྱག་འཚལ་ལོ། །དང་པོ་སྙིང་གར་ཟླ་བ་ལ་ཙུཾ་ཡིག་དཀར་པོའི་ས་བོན་བལྟས་ལ། དེའི་
འོད་ཟེར་གྱིས་སངས་རྒྱས་ལ་སོགས་པ་རྣམས་ལ་མཆོད་པ་དང་། ཕྱག་འཚལ་བ་དང་། ཡང་དག་པར་བསྟོད་པ་དང་། སྡིག་པ་བཤགས་པ་ལ་སོགས་པ་བླ་ན་མེད་པའི་མཆོད་པ་རྣམ་པ་བདུན་གྱིས་མཆོད་པའི་རྗེས་ལ་གསུམ་ལ་སྐྱབས་སུ་འགྲོ་བའི་ཚིགས་སུ་བཅད་པ་བརྗོད་ནས་བཟོད་པར་གསོལ་ཏེ། ཚད་
མེད་པའི་གནས་བཞི་རྣམ་པར་བསྒོམ་ཞིང་སྟོང་པ་ཉིད་བསམ་པར་བྱའོ། །དེ་ནས་སྣ་ཚོགས་པདྨ་དང་ཟླ་བ་ལ་ཡང་རང་གི་ས་བོན་བསམ་ཞིང་དེ་ཡོངས་སུ་གྱུར་པ་ལས་འཕགས་མ་ཙུནྡེ་སྟོན་ཀའི་ཟླ་བ་ལྟ་བུ་ཞལ་གཅིག་ཕྱག་བཞི་པ། ཕྱག་གཡས་པ་མཆོག་སྦྱིན། ཕྱག་གཡོན་པ་པུ་སྟིས་མཚན་པའི་
པདྨ། ཕྱག་ལྷག་མ་དག་གིས་ལྷུང་བཟེད་བསྣམས་པ། རྒྱན་དང་ན་བཟའ་སྣ་ཚོགས་པས་རྣམ་པར་བརྒྱན་པ་རྡོ་རྗེ་སེམས་དཔའི་ཅོད་པན་ཅན། སེམས་ཅན་དཔག་ཏུ་མེད་པའི་དོན་མཛད་པའི་སྐུའི་བདག་ཉིད་སྤྲོ་ཞིང་སྐད་ཅིག་གིས་བསྐྱེད་ནས་རང་གི་ས་བོན་སྙིང་གར་བསམས་ཏེ་ཕྱག་རྒྱ་གནས་
གསུམ་དུ་དགོད་པར་བྱའོ། །ལག་པ་གཉིས་ཐལ་མོ་སྦྱར་ནས་མཛུབ་མོ་གཉིས་གུང་མོའི་དཀྱིལ་དུ་འཁྱིལ་པའི་རྣམ་པར་སྦྱར་ཏེ། མཐེབ་ཆེན་གཉིས་ལོགས་སུ་སྦྱར་བའོ། །སྔགས་ནི། ཨོཾ་ཙ་ལེ་ཙུ་ལེ་ཙུནྡེ་སྭཱ་ཧཱ། ཞེས་སོ། །ཙུནྡེའི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། ཙུནྡེ་
སཱ་དྷ་ནཾ། བོད་སྐད་དུ། ཙུནྡེའི་སྒྲུབ་ཐབས། ཙུནྡེ་ལ་ཕྱག་འཚལ་ལོ། །དང་པོར་སྙིང་གར་ཟླ་བའི་དཀྱིལ་དུ་གནས་པའི་ཙུཾ་ཡིག་གི་ས་བོན་ལས་བྱུང་བའི་འོད་ཟེར་སྣ་ཚོགས་པ། ཡོངས་སུ་རྫོགས་པ་ལས་མདུན་དུ་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་བལྟས་ལ་མཆོད་པ་ལ་
སོགས་པ་བྱའོ། །ཨོཾ་བཛྲ་པུཥྤེ་ཧཱུཾ་ཞེས་པ་ལ་སོགས་པའི་སྔགས་ཀྱིས་སོ། །དེ་ནས་གསུམ་ལ་སྐྱབས་སུ་འགྲོ་བ་ལ་སོགས་པའི་ཚིགས་བཅད་བརྗོད་པར་བྱའོ། །དེ་ནས་སྟོང་པ་ཉིད་བསྒོམས་ཏེ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་བརྗོད་པར་བྱའོ། །དེ་ནས་ཨོཾ་ཙུཾ་ལས་སྐྱེས་པའི་ཙུནྡེ་སྟོན་

ཀའི་ཟླ་བ་ལྟ་བུ་ཕྱག་བཞི་པ། རྒྱན་ཐམས་ཅད་ཀྱིས་བརྒྱན་པ། གཡས་པ་མཆོག་སྦྱིན། གཡོན་པ་པུསྟིས་མཚན་པའི་པདྨ་བསྣམས་པ། ཕྱག་ལྷག་མ་དག་གིས་ལྷུང་བཟེད་བསྣམས་པ། པདྨ་དང་ཟླ་བ་ལ་སེམས་དཔའི་སྐྱིལ་ཀྲུང་གིས་བཞུགས་པ་བསྒོམ་པར་བྱའོ། །ཕྱི་ནས་ཕྱག་
རྒྱས་སྙིང་ག་དང་། མཛོད་སྤུ་དང་། མགྲིན་པ་དང་། སྤྱི་བོ་རྣམས་སུ་ཡང་དག་པར་རེག་ཅིང་སྲུང་བ་བྱས་ནས་བཟླས་པར་བྱའོ། །ཨོཾ་ཙ་ལེ་ཙུ་ལེ་ཙུནྡེ་སྭཱ་ཧཱ། དེ་ལ་ཕྱག་རྒྱ་ནི་འདི་ཡིན་ཏེ། ལག་པ་གཉིས་ཐལ་མོ་སྦྱར་ཏེ། མཛུབ་མོ་དག་གུང་མོ་དག་གི་དཀྱིལ་དུ་བསྐྱིལ་བའི་རྣམ་པར་སྦྱར་ཏེ་མཐེ་བོང་
དག་ལོགས་སུ་གནས་པའོ་ཞེས་སོ། །ཙུནྡེའི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། ཀལ་པོཀྟ་ད་ཤ་བྷུ་ཛ་སཱི་ཏ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། རྟོག་པ་ལས་གསུངས་པའི་འོད་ཟེར་ཅན་དཀར་མོ་ཕྱག་བཅུ་པའི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །སྔོན་དུ་གསུངས་པའི་
ཆོ་གས་བཾ་ཡིག་ལས་སྐྱེས་པའི་སྣ་ཚོགས་པདྨའི་སྟེང་དུ་ཟླ་བ་ལ་མཾ་ཡིག་དཀར་པོ་ལས་སྐྱེས་པའི་འོད་ཟེར་ཅན་དཀར་མོ་ཞལ་ལྔ་པ། ཕྱག་བཅུ་པ། ཞབས་བཞི་པའི་བདག་ཉིད་དུ་སྐད་ཅིག་གིས་བསམ་པར་བྱའོ། །དེ་ལ་རྩ་བའི་ཞལ་དཀར་པོ། གཡས་ནག་པོ། གཡོན་ཕག་ཞལ་དམར་མོ། རྒྱབ་ཞལ་ལྗང་གུ།
དབུའི་སྟེང་དུ་ཞལ་སེར་མོ། རིན་པོ་ཆེ་སྣ་ཚོགས་པའི་ཟུར་ཕུད་གསུམ་གྱིས་བརྒྱན་ཅིང་རལ་པའི་ཅོད་པན་ཅན། ཕྱག་གཡས་པ་ལྔ་རྣམས་ན་ཉི་མའི་དཀྱིལ་འཁོར་དང་། རྡོ་རྗེ་སྔོན་པོ་དང་། མདའ་དང་། ལྕགས་ཀྱུ་དང་ཁབ་ཕྱག་ན་བསྣམས་པའོ། །གཡོན་པ་ལྔ་རྣམས་ན་ཟླ་བའི་དཀྱིལ་འཁོར་དང་།
གཞུ་དང་། མྱ་ངན་མེད་པའི་ལོ་མ་དང་། ཞགས་པ་དང་བཅས་པའི་སྡིགས་མཛུབ་དང་། སྐུད་པ་བསྣམས་པའོ། །ལང་ཚོ་གཞོན་ཞིང་ཕུ་དུང་སྟོད་གཡོགས་དཀར་པོ་ཅན། མཆོད་རྟེན་གྱི་ནང་ན་གནས་པ། ཕག་བདུན་གྱི་ཤིང་རྟ་ལ་ཞོན་པ། ཁྱབ་འཇུག་དང་། དབང་པོ་དང་། བདེ་བྱེད་དང་། ཚངས་པ་རྣམས་ཞབས་བཞིས་མནན་པ། དེའི་
ཤིང་རྟའི་དབུས་སུ་གནས་པའི་ཆུ་སྲིན་མནན་པའི་བཅོམ་ལྡན་འདས་མ་གཞན་ཏེ། སྐུ་མདོག་ནག་མོ་ཕག་གི་གདོང་པ་ཅན། རྡོ་རྗེ་དང་སྡིགས་མཛུབ་ནི་གཡས་དང་གཡོན་གྱི་ཕྱག་ནའོ། །གཡས་ཕྱོགས་སུ་གཞན་བཅོམ་ལྡན་འདས་མ་ནི་ཕག་ཞལ་དམར་མོ་ཕྱག་བཞི་པ་གཡས་པ་གཉིས་ཀྱིས་ལྕགས་ཀྱུ་དང་ཁབ་བསྣམས་པའོ། །ཕྱག་

གཡོན་པ་གཉིས་ཀྱིས་ཞགས་པ་དང་བཅས་པའི་སྡིགས་མཛུབ་དང་སྐུད་པ་བསྣམས་པའོ། །མཛེས་པའི་རྒྱན་གྱིས་བརྒྱན་པའོ། །གཡོན་གྱི་ཕྱོགས་སུ་རྗེ་བཙུན་མ་གཞན་རྣམས་ནི་ཕག་ཞལ་དམར་མོའོ། །རྣ་བའི་བར་དུ་བཀང་བའི་གཞུ་དང་མདའ་དང་། རྡོ་རྗེ་དང་། མྱ་ངན་མེད་པའི་ཤིང་གི་ཡལ་ག་ནི་གཡས་དང་གཡོན་གྱི་ཕྱག་ན་
བསྣམས་པའོ། །སྣ་ཚོགས་པའི་རྒྱན་གྱིས་བརྒྱན་པ་སྟེ། ཤིང་རྟ་འདྲེན་པའི་ཕག་གི་འོག་ནས་ཉི་མ་ལ་སོགས་པའི་གཟུགས་གཟའ་དགུ་སྟེ། ཉི་མས་ཉེ་བར་འཚེ་བའི་ནད་ཀྱི་ཚོགས་ཀྱང་མིའི་གཟུགས་ཀྱི་འོག་ཏུ་ལྟུང་བར་བསམ་པར་བྱའོ། །དེ་ནས་སྙིང་གའི་ཟླ་བ་ལ་གནས་པའི་མཾ་གི་ས་བོན་གྱི་འོད་ཟེར་གྱིས་དེ་བཞིན་
གཤེགས་པ་རྣམས་གདན་དྲངས་ཏེ། དབང་བསྐུར་བ་བླངས་ནས་དབུ་ལ་རྣམ་པར་སྣང་མཛད་ཀྱིས་རྒྱས་གདབ་པའོ། །དེ་ནས་སྙིང་གའི་ས་བོན་ལས་དེ་བཞིན་དུ་ཕྲེང་བའི་རྣམ་པ་ལྟ་བུའི་སྔགས་ཀྱི་ཡི་གེ་རྣམས་ཁ་ནས་འཐོན་ནས་ལྟེ་བ། ལྟེ་བ་ནས་ཁ་རུ། ཁ་ནས་སླར་ཡང་ལྟེ་བ་ལ་སོགས་པར་འཁོར་ལོ་འཁོར་བའི་
རིམ་པ་བཞིན་དུ་སྔགས་བཟླས་པར་བྱའོ། །དེ་ལ་སྔགས་ནི་འདི་ཡིན་ཏེ། ཨོཾ་མཱ་རཱི་ཙྱཻ་མཱཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། རང་གི་ས་བོན་གྱི་བྱིན་གྱིས་བརླབས་ལ་ཟས་ལ་སོགས་པ་ཐམས་ཅད་ལ་རྗེས་སུ་གནས་པར་བྱའོ། །ངལ་ན་ཡི་གེ་བརྒྱ་པའི་སྔགས་བརྗོད་ལ་ཅི་བདེར་གནས་པར་བྱའོ། །རྟོག་པ་ལས་གསུངས་པའི་འོད་ཟེར་
ཅན་དཀར་མོ་ཕྱག་བཅུ་པའི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། ཨ་ཤོ་ཀ་ཀཱནྟ་མཱ་རཱི་ཙྱཻ་སཱ་དྷ་ནཾ། བོད་སྐད་དུ། མྱ་ངན་མེད་པའི་ཤིང་གི་འོད་ཟེར་ཅན་གྱི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །དེ་ནས་སྟོང་པ་ཉིད་བསྒོམས་པའི་རྗེས་ལ་ཟླ་བ་ལ་མཾ་ཡིག་སེར་པོ་ལས་བྱུང་བའི་མྱ་
ངན་མེད་པའི་ཤིང་དེའི་སྟེང་དུ་མཾ། དེ་ཡོངས་སུ་གྱུར་པ་ལས་སྐུ་མདོག་སེར་མོ་ཞལ་གཅིག་ཕྱག་གཉིས་པ། མགོན་པོ་རྣམ་པར་སྣང་མཛད་ཀྱི་རིན་པོ་ཆེའི་དབུ་རྒྱན་ཅན། གསེར་ལྟ་བུའི་ཕག་པའི་རྒྱབ་ཏུ་སྣ་ཚོགས་པདྨ་དང་། ཟླ་བ་ལ་འགྱིང་བག་དང་བཅས་པའི་སྟེང་དུ་བཞུགས་པ། མྱ་ངན་མེད་པའི་ཤིང་གི་ཡལ་ག་
འཕྱར་བ་ཕྱག་གཡོན་ན་བསྣམས་པ། ཕྱག་གཡས་པས་མཆོག་སྦྱིན་པ། དོ་ཤལ་ལ་སོགས་པ་སྐུ་ལ་བརྒྱན་པ། ལང་ཚོ་གཞོན་ཞིང་མཛེས་པ་འདི་བཞིན་བསམ་པར་བྱའོ། །སྙིང་གའི་མཾ་ཡིག་གི་ས་བོན་ལས་འོད་ཟེར་འཕྲོས་པས་མགོ་དང་བཅས་པའི་ཕག་གི་ཚོགས་ཀྱིས་གདུག་པ་ཅན་བརླག་སྟེ།

སེམས་ཅན་དཔག་ཏུ་མེད་པའི་དོན་སྣ་ཚོགས་བྱེད་པའོ། །ཨོཾ་མཱ་རཱི་ཙྱཻ་མཱཾ་སྭཱ་ཧཱ། ཞེས་པ་ནི་བཟླས་པའི་སྔགས་སོ། །མྱ་ངན་མེད་པའི་ཤིང་གི་འོད་ཟེར་ཅན་གྱི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། ཀལྤོཀྟ་མཱ་རཱི་ཙྱཻ་སཱ་དྷ་ནཾ། བོད་སྐད་
དུ། རྟོག་པ་ལས་གསུངས་པའི་འོད་ཟེར་ཅན་གྱི་སྒྲུབ་ཐབས། འཕགས་མ་འོད་ཟེར་ཅན་ལ་ཕྱག་འཚལ་ལོ། །བླ་མེད་བདེ་ལ་མ་ཆགས་པ། །བླ་མ་ཤེས་རབ་ཕ་རོལ་ཕྱིན། །ཕྱག་འཚལ་རྟོག་པའི་འོད་ཟེར་ཅན། །སྒྲུབ་ཐབས་དེ་ལྟར་བྲི་བར་བྱ། །དེ་ལ་དང་པོར་རེ་ཞིག་རྣལ་འབྱོར་པས་འགྲོ་བ་མ་
ལུས་པ་འདོན་པའི་ལྷག་པའི་བསམ་པས་ཨོཾ་ཕཊ་ཅེས་པའི་སྔགས་ཀྱིས་སྙིང་ག་དང་། མགྲིན་པ་དང་། མཛོད་སྤུ་དང་། སྤྱི་བོ་རྣམས་སུ་ཁྲོ་བོའི་ཁུ་ཚུར་བྱིན་ནས། ཨོཾ་མཱ་རཱི་ཙྱཻ་བིགྷྣཱཾ་ནུཏྶཱ་ར་ཡ་ཧཱུཾ་ཕཊ་ཅེས་པས་བགེགས་བསྐྲད་ནས། རང་གི་སྙིང་གར་ཨོཾ་ཡིག་ཡོངས་སུ་གྱུར་པ་ལས་ཉི་མ་ལ་
མཾ་ཡིག་བསམས་ནས་དེ་ལས་བྱུང་བའི་འོད་ཟེར་གྱི་ཚོགས་ཀྱིས་བཅོམ་ལྡན་འདས་མ་གདན་དྲངས་ཏེ་མདུན་གྱི་ནམ་མཁའ་ལ་བཞུགས་སུ་གསོལ་ཏེ། གསེར་ལྟ་བུ་ཞལ་གསུམ་པ། སྤྱན་གསུམ་པ། ཕྱག་བརྒྱད་པ། དམར་པོ་ནི་གཡས་ཀྱི་ཞལ་ལོ། །སྔོན་པོ་མི་སྡུག་པ་ཕག་གི་ཞལ་ནི་
གཡོན་དུའོ། །རྡོ་རྗེ་དང་། ལྕགས་ཀྱུ་དང་། མདའ་དང་། ཁབ་རྣམས་ནི་གཡས་ཀྱི་ཕྱག་བཞི་ན་བསྣམས་པའོ། །མྱ་ངན་མེད་པའི་ཤིང་གི་ཡལ་ག་དང་། གཞུ་དང་། སྐུད་པ་དང་། སྡིགས་མཛུབ་ནི་གཡོན་གྱི་ཕྱག་བཞི་ན་བསྣམས་པའོ། །རྣམ་པར་སྣང་མཛད་ཀྱི་དབུ་རྒྱན་ཅན། རྒྱན་
སྣ་ཚོགས་པས་བརྒྱན་པ། མཆོད་རྟེན་གྱི་ནང་ན་གནས་པ། གོས་དམར་པོའི་ཕུ་དུང་གི་སྟོད་གཡོགས་ཅན་ཕག་བདུན་གྱི་ཤིང་རྟའི་སྟེང་ན་ཞབས་གཡོན་བརྐྱང་གིས་བཞུགས་པ། པཾ་ཡིག་ལས་སྐྱེས་པའི་རླུང་གི་དཀྱིལ་འཁོར་ལ་ཧཾ་ཡིག་ལས་སྐྱེས་པའི་ཟླ་བ་དང་ཉི་མ་འཛིན་པའི་གཟའ་ཆེན་པོ་སྒྲ་
གཅན་ཡང་དག་པར་གནས་པའི་ཤིང་རྟའི་དབུས་སུ་ལྷ་མོ་བཞིས་ཡོངས་སུ་བསྐོར་ཏེ། དེ་ལ་ཤར་ཕྱོགས་སུ་བཏྟཱ་ལི་དམར་མོ་ཕག་གི་གདོང་པ་ཅན་ཕྱག་བཞི་པ་ཁབ་དང་། ལྕགས་ཀྱུ་ཕྱག་གཡས་ན་བསྣམས་པ། ཞགས་པ་དང་། མྱ་ངན་མེད་པའི་ཤིང་ཕྱག་གཡོན་ན་བསྣམས་པ། ཤ་འགག་

དམར་པོ་ཅན་ནོ། །དེ་བཞིན་དུ་ལྷོ་ཕྱོགས་སུ་བ་དཱ་ལི་སེར་མོ་མྱ་ངན་མེད་པའི་ཤིང་དང་། ཁབ་ནི་གཡོན་དང་གཡས་ཀྱི་ཕྱག་དག་ནའོ། །རྡོ་རྗེ་དང་ཞགས་པ་ནི་གཡས་ཀྱི་དང་གཡོན་གྱི་ཕྱག་ནའོ། །གཞོན་ནུའི་གཟུགས་ཅན་ལང་ཚོ་དང་ལྡན་ཞིང་རྒྱན་གྱིས་བརྒྱན་པའོ། །དེ་བཞིན་དུ་ནུབ་ཏུ་བ་རཱ་ལི་
དཀར་མོ་རྡོ་རྗེ་དང་། ཁབ་ནི་ཕྱག་གཡས་པ་དག་ནའོ། །ཞགས་པ་དང་། མྱ་ངན་མེད་པའི་ཤིང་ནི་ཕྱག་གཡོན་པ་དག་ན་བསྣམས་པའོ། །ཞབས་གཡོན་བརྐྱང་གིས་བཞུགས་ཤིང་ལེགས་པའི་གཟུགས་ཅན་མའོ། །དེ་བཞིན་དུ་བྱང་ཕྱོགས་ཀྱི་ཆར་ཕག་ཞལ་མ་དམར་མོ་སྤྱན་གསུམ་པ། ཕྱག་
བཞི་པ། རྡོ་རྗེ་དང་། མདའ་ནི་ཕྱག་གཡས་ན་བསྣམས་ཤིང་། གཞུ་དང་། མྱ་ངན་མེད་པའི་ཤིང་ནི་ཕྱག་གཡོན་ན་བསྣམས་པ་སྟེ། གཟུགས་མཛེས་མ་བསམས་ནས་མཆོད་པ་དང་། ཕྱག་