Luận tạng Tây Tạng (Tengyur) — Tập 76

ྣམ་རྒྱས་པའི། །རྩིག་པར་གསུངས་ཏེ་རྣམ་གཞན་མིན། །ཤིན་ཏུ་ཆུང་དང་རབ་ཆེས་པ། །དེ་དག་མཛེས་པར་འགྱུར་བ་མིན། །བཞི་པའི་
ཆ་ཤས་ཉིད་ཀྱིས་ཆ། །སྒོ་རྣམས་ཀུན་ཏུ་མི་འདོད་དེ། །གྲགས་པ་བཞིན་དུ་འདབ་བརྒྱད་དང་། །དེ་བཞིན་ཉིད་དུ་སྒོ་རྣམས་འདོད། །ཁྲུ་དོ་གསུངས་པའི་གཅིག་གི་ཆས། །མཉམ་པ་ཆ་གསུམ་གྲགས་པ་ལ། །བཅུ་ལ་སོགས་པའི་སྒོ་བྱ་འདིར། །ཅུང་ཟད་ལྷག་པ་ལྷག་
པའོ། །དྲུག་གི་ཆ་ཤས་ཉིད་ཀྱིས་ནི། །བར་མར་ལྡན་པའི་སྒོ་སོགས་ཀྱིས། །སྒོ་ནི་ཉི་ཤུ་རྩ་གཉིས་ལས། །ཉུང་མིན་ཇི་ལྟར་མཛེས་པར་བྱ། །སོ་སོར་དེ་རྣམས་ལ་ནི་སླར། །སྒོ་དང་འགྲམ་ལོགས་ལ་སོགས་བྱ། །ཀུན་དུ་མཆོག་ཏུ་གྲགས་པ་ནི། །བརྒྱད་ཀྱི་ཆ་ཤས་

རྣམས་ཀྱིས་འཇུག །རིམ་པར་སྒོ་ལ་སོགས་པ་རྣམས། །ཤེས་ལྡན་ཉིད་ལ་ངེས་པར་བསྟན། །འཕེལ་དང་ཉུང་བའང་མཛེས་བྱ་སྟེ། །ཉུང་པ་མ་ཡིན་ལྷག་པ་མིན། །འཁོར་ས་མེད་པའི་འདེགས་བྱེད་ནི། །ཁང་ཆུང་རྣམས་ལས་ཉིས་འགྱུར་འདོད། །ཉིས་འགྱུར་
སླར་ཡང་དེ་ཡི་ནི། །དྲུག་དང་བདུན་ལ་སོགས་པ་ཡང་། །གྲུ་བཞི་པ་ཡི་ཁང་ཆུང་བསྔགས། །ཀ་བ་མཉམ་པའི་ས་ལ་སྟེ། །མན་ངག་གིས་ནི་ཁང་ཆུང་ཡང་། །གང་ཞིག་གཅིག་པ་སླར་ཡང་འདོད། །འདེགས་པ་དེ་ཡི་སྙིང་པོ་ཉིད། །ཅུང་ཟད་སྟོང་པར་ལྷ་གནས་གཅིག །འཁོར་
སར་ཁང་ཆུང་གཅིག་པ་གང་། །དེ་ཡང་དེ་བཞིན་སླར་ཡང་ངོ་། །རྩིག་པར་བཅས་པའི་འཁོར་ས་འདིར། །ཁང་ཆུང་བགྲོད་པའི་སྐབས་དང་ལྡན། །ཁང་པའི་ངོས་གཉིས་དག་ཏུ་ཡང་། །ཁང་ཆུང་ནང་ནི་རྫོགས་པ་ཅན། །ཕྱོགས་བཞིར་ཁང་ཆུང་རྣམས་ཀྱིས་ཀྱང་། །དེ་ནི་རྣམ་པར་མཛེས་
པའོ། །གང་ཞིག་འདེགས་པ་གཅིག་བཅས་པའི། །སྙིང་པོ་དེར་ནི་ལྷ་གནས་བཞི། །ཤིན་ཏུ་ཆེན་པོར་གྲགས་པ་ནི། །ཁང་ཆུང་གཉིས་གཉིས་ལྡན་པར་བྱ། །ནང་གི་འཁོར་ས་དང་བཅས་པའི། །སོ་སོར་སྒོ་ནི་ཕྱོགས་ཕྱོགས་སུ། །དེ་བར་ཁང་ཆུང་དང་འདེགས་པས། །མཉམ་པར་འཁོར་བས་
ཤིན་ཏུ་མཛེས། །འཁོར་ས་ལམ་གྱི་རྩིག་པ་རྣམས། །ལྷན་ཅིག་བར་མ་དག་ཏུ་བྱ། །འདིར་ནི་དེ་ཉིད་སྙིང་པོའི་སྟེང་། །དྲི་ཡི་གཙང་ཁང་བརྟན་པ་ཆེ། །ཁང་པ་བརྩེགས་མའམ་དེ་ལས་གཞན། །ཐམས་ཅད་ཤིན་ཏུ་བརྟན་པར་བྱ། །འཁོར་ས་དང་བཅས་འདེགས་པ་དང་། །ཁང་
ཆུང་ངོས་སུ་རྩིག་པ་སྟེ། །འདེགས་པའི་རྩིག་པ་མཉམ་པར་བྱ། །ལས་དང་གནས་ལ་འཇུག་པས་སོ། །འཁོར་ས་རྣམས་དང་ཁང་ཆུང་རྣམས། །མཐོ་དམན་རྗེས་སུ་མཐུན་པ་དག །འདིར་ནི་ཇི་ལྟར་རིགས་པར་བྱ། །ལས་རྣམས་ཤེས་པའི་བཟོ་བོས་སོ། །བརྟན་པའི་དོན་དུ་
འདེགས་པ་དང་། །རྨང་ལ་སོགས་པའི་ལས་ལ་ཡང་། །རྩིག་པའི་ཆ་ཡི་རྐང་པ་ཡི། །ཕྱེད་ཀྱིས་ཀྱང་ནི་འཕེལ་བའང་འདོད། །འདེགས་པའི་དཔངས་ནི་རྣམ་གཟུང་བ། །འདེགས་པའི་རྒྱ་ཡི་ཚད་ཡིན་ཏེ། །ཆ་གཉིས་སླར་ཡང་སྟེང་དུ་ནི། །ཆུང་བར་བཟོ་བོ་ཡང་དག་

འདོད། །རྡོ་བའི་ལས་ནི་གནས་དོན་དུ། །གཉིས་ཀྱི་ཆ་ཡིས་གཞན་དག་སླར། །དེ་ནི་མཐོང་བར་འདོད་པ་སྟེ། །འགའ་ཞིག་དེ་ཡི་སྟེང་དུ་འང་འཆད། །དྲི་གཙང་ཁང་དེའི་སྟེང་དུ་ཡང་། །བརྒྱད་ཀྱི་ཆ་འམ་བདུན་དོན་འདོད། །ཇི་ལྟའི་ཆ་ཡི་ཁང་བརྩེགས་ནི། །སྔར་བཤད་པ་ཡང་བསྟན་
པའོ། །དེ་ལྟའི་རིམ་པ་བདག་གིས་བྱས། །མཛེས་པ་རྣམ་དཔྱོད་ཇི་ལྟའི་རིམ། །འདེགས་པའི་སྟེང་དུ་དྲི་གཙང་ཁང་། །ལྷ་ཡི་ཁྱད་པར་གྱིས་དེ་བརྗོད། །སྟེང་དུ་བདུན་གྱི་ཆ་ཤས་རྣམས། །རྣམ་བརྒྱད་ཆ་སྟེ་སླར་ཡང་གང་། །བཅོ་བརྒྱད་སྟེང་གི་རྒྱ་ཡིན་ཏེ། །དེ་ཡང་བཞི་བཞིའི་ཆ་ཤས་ཅན། །ཕྱི་རོལ་
རྣམས་སུ་ཆ་ཤས་བཞི། །རེ་རེའང་བདུན་པ་བརྒྱད་པ་སྟེ། །དེ་དག་ཆ་ཤས་རབ་བསྐོར་བ། །ངོས་གཉིས་རི་མོ་མཛེས་དོན་དུའོ། །བཞི་ཡི་ཆ་ཤས་ངོས་གཉིས་དང་། །རབ་མཐོ་གང་གི་དབུས་སུ་གནས། །དེ་རྣམས་ཆ་བཅུས་ཕུང་པོར་འདོད། །བཱ་རེནྡྲ་ཡི་བཟོ་བོའི་ལུགས། །དྲི་གཙང་ཁང་སོགས་སྤྲུལ་པ་ལ། །ངོས་གཉིས་དེར་
ཡང་བཟོ་བོ་ཡིས། །ཆ་ཤས་དགུ་པའི་རྒྱར་ལྡན་པའི། །དྲི་གཙང་ཁང་ཡང་ངེས་པར་འཇུག །སླར་གསུངས་རྗེས་སུ་རིམ་པ་ལའང་། །གཉིས་གཉིས་ཆ་ནི་རབ་འཇུག་སྟེ། །དབུས་སུ་གནས་པའི་ལྔ་ཡི་ཆ། །འདི་ནི་ཕུང་པོར་རབ་ཏུ་གྲགས། །གཞན་ཡང་ཆ་ལྔའི་ཆ་ཤས་རྣམས། །དེར་བྱ་དཔངས་སུ་
གཉིས་སླར་ཡང་། །གསུམ་གྱི་ཆ་འདིར་ཕུང་པོ་དང་། །དཔུང་པར་བཟོ་བོ་རྣམས་ཀྱིས་འདོད། །རབ་འཇུག་ལྔ་པར་ཐིག་ལ་ཐིག །བཟུང་ནས་གཞན་ཡང་གསུམ་པ་དང་། །གཉིས་པར་འོག་གི་ཟུར་དག་སྟེ། །དྲི་གཙང་མར་མེའི་རྩེ་མོ་མཚུངས། །གལ་ཏེ་རྣམ་གསུམ་ཞེས་བཤད་རྣམས། །དབྱེ་བ་མེད་
དེ་ལྟ་བ་ནའོ། །དབྱེ་བ་མེད་པ་གང་དུ་འབྱེད། །བློ་ལྡན་མི་འགྱུར་ཞེས་མཐོང་ངོ་། །དྲི་ཡི་གཙང་ཁང་གསུམ་གྱི་ཆ། །སྟེང་དུ་རབ་འཇུག་ཤེས་བྱ་སྟེ། །རྩ་བར་ཡང་ནི་རབ་འཇུག་དང་། །ནས་ཀྱི་སྙིང་པོའང་མི་འདོད་དོ། །ཟླུམ་པོའི་དྲི་གཙང་ཁང་གི་ལས། །ཡང་ན་གྲུ་བཞིའི་ལས་ཅན་ཏེ། །ཕུང་པོའི་རྗེས་མཐུན་དག་པ་ཉིད། །
གང་ཞིག་ད་ནི་ཆ་རྣམས་དབྱེ། །ཆ་ཤས་བརྒྱད་ཀྱིས་ཡན་ལག་བརྒྱད། །ཇི་ལྟར་མཐོང་བའི་ལས་རྣམས་ཀྱིས། །ཆ་ཤས་བཅུ་གཉིས་པར་ཡང་འགྱུར། །དྲི་ཡི་གཙང་ཁང་ལྷག་པར་ཡང་། །ཇི་སྙེད་སུམ་ཅུ་རྩ་དྲུག་པའི། །ཤིན་ཏུ་ཟླུམ་པོའི་གཟུགས་ཅན་བྱ། །གང་ཡང་དྲི་ཡི་གཙང་ཁང་འདི། །གྲུ་བཞི་པ་ཡང་

བལྟ་བར་བྱ། །དེ་ལྟའི་གཟུགས་རྣམས་མངོན་འདོད་པས། །དེ་སྙེད་ཆ་ཤས་རྣམས་ཀྱང་བྱ། །ལྷ་ཡི་རིགས་ལས་རྣམ་སྤྲུལ་པའི། །རིམ་པ་ཉིད་དེ་གཞན་དུ་མིན། །བར་བར་ལ་སོགས་སྣམ་བུ་རྣམས། །དྲི་གཙང་ཁང་སོགས་ལུས་ལ་ནི། །འཕེལ་བ་དང་ནི་ཐུང་བ་ཡང་། །རྐང་པ་ཇི་ལྟར་མཛེས་པའང་བྱ། །སྣམ་བུ་གཞུང་ཤིང་སོགས་པ་
རྣམས། །ཉེ་བར་བསྟན་པ་ཇི་བཞིན་བྱ། །གཞན་དང་གཞན་གྱི་ལས་རྣམས་ཀྱང་། །ཇི་ལྟ་ཇི་ལྟར་བཞིན་དུ་བྱ། །མགྲིན་པའི་དཔངས་ཆ་རྐང་པས་དམན། །གཞན་ཡང་ཆུང་སོགས་གྲགས་རྣམས་ལ། །ཡོངས་སུ་རྫོགས་པའི་ཆ་ཉིད་ཀྱིས། །སྤྱི་བོའི་དཔངས་སུ་འདོད་པའོ། །ཕུང་པོར་བྱས་པ་དེ་ནས་ལྔའི། །ཆ་འདི་རྣམས་ཀྱི་ནང་ལ་གསུམ། །
དེ་ནི་མགྲིན་པའི་ཟླུམ་ལ་བྱ། །མགྲིན་པ་ཉེ་བའི་མཐར་གནས་པའོ། །འདི་འམ་ཐམས་ཅད་ཀྱི་ནི་ཚད། །མགྲིན་པའི་རྒྱ་ལ་འདོད་པ་སྟེ། །ཕུང་པོའི་ཆ་ཡིས་ཕྱེད་ཀྱི་ཆ། །སྔོན་གྱི་བཟོ་བོ་རྣམས་ཀྱི་ལུགས། །ཆེན་པོ་ཡི་ནི་ཕྱེད་ཀྱི་ཆས། །མགྲིན་པའི་དཔངས་དག་ལྷག་པ་མིན། །རྐང་པས་དམན་པའམ་གཞན་ཡང་ཕྱེད། །སྤྱི་བོ་ཡི་ནི་
དཔངས་ལ་འདོད། །སྤྱི་བོར་གང་ཞིག་འཆི་མེད་གནས། །སྐྱུ་རུ་ར་གནས་ལྟ་བུར་འགྱུར། །རྒྱ་དང་ཕུང་པོའི་ཚད་ཀྱིས་ནི། །ཅུང་ཟད་དེ་ནི་ལྷག་པ་ཡང་། །སྤྱི་བོའི་གསུམ་གྱི་ཆ་ཡིས་ནི། །སྟེང་གི་སྤྱི་བོར་འདོད་པ་ཡིན། །དཔངས་འདིར་ཇི་ལྟར་མཛེས་པ་སྟེ། །མཐོ་དང་དམའ་བ་དེ་བཞིན་ནོ། །མཆོད་རྟེན་རྒྱ་ནི་གཅིག་གིས་དམན། །མཆོད་
རྟེན་དཔངས་ནི་གཉིས་ཀྱི་ཆ། །ཞེས་འདིར་དཔངས་དང་རྒྱ་ལ་འགྱུར། །མཆོད་རྟེན་སྤྱི་བོའི་སྟེང་དུའོ། །མགྲིན་མཐའ་ཇི་སྲིད་རེ་རེ་ཞིང་། །བྱ་སྟེ་དེ་ཡི་སྟེང་དུའོ། །བརྟན་པའི་གདུགས་དང་སྣམ་བུར་བཅས། །གདུགས་ལ་དྲིལ་བུ་མེ་ལོང་ངོ་། །ཞེས་པ་དྲིའི་གཙང་ཁང་ལ་སོགས་པའི་མཚན་ཉིད་ཀྱི་ཆོ་གའོ།། །།འདེགས་པ་ལྷན་ཅིག་འཕེལ་
བ་ཡིས། །དེར་ནི་ལྔ་ཡི་ཆ་ལྡན་བྱ། །འདིར་གང་གསུམ་གྱི་ཆ་ལྡན་པ། །དེ་ཡི་དཔངས་ཅན་ཁང་བརྩེགས་སོ། །སྟེང་དུ་འཕེལ་བཅས་འདེགས་པའི་དཔངས། །དེ་བཞིན་དུ་ཡང་ཁང་བརྩེགས་འགྱུར། །ལེགས་པར་དཔངས་སུ་གནས་པ་འདིར། །མཐོང་བའང་གཞན་དང་ལྡན་པར་འགྱུར། །སྔར་བཞིན་ཕུང་པོ་རྣམ་གནས་པས། །
འདིར་ཡང་བརྩེགས་མར་རྣམ་གནས་ཉིད། །གཞན་དང་གཞན་གྱི་ལས་རྣམས་ནི། །ཤེས་པ་རྣམས་ཀྱིས་མཛེས་པར་བྱ། །ཁང་བརྩེགས་ཉིད་ནི་རིང་བ་དང་། །ཕྱོགས་འདིར་ཐུང་བའང་འདོད་པ་སྟེ། །གང་དུ་མགྲིན་སོགས་རྣམ་དབྱེ་བ། །དེས་སླར་འདིར་ཡང་སྔ་མ་བཞིན། །ཞེས་པ་ཁང་པ་བརྩེགས་མའི་ཆོ་གའོ།། །།

གསུམ་གྱི་ལྷ་རྣམས་གནས་པའི་ཕྱིར། །རྒྱ་ཕུབས་འགའ་ཡང་བལྟ་བྱ་སྟེ། །བཱ་རེནྡྲའམ་ཌཱ་བི་ཌའི། །ཉེ་བར་བསྟན་པ་ཇི་བཞིན་བྱ། །ལྔ་ཡི་ཆ་འམ་དྲུག་གི་ཆ། །རྒྱ་ཕུབས་ཡང་དག་གནས་པར་འདོད། །འདེགས་པའི་ཆ་དང་མཉམ་པའི་དཔངས། །བཱ་རེནྡྲ་གནས་སྟེང་དུའོ། །རྒྱ་ཕུབས་དབུས་ཀྱི་ལུས་ལ་ནི། །ཌཱ་བི་ཌ་བ་
དུམ་བུ་གཉིས། །དུམ་བུ་གཅིག་པའི་རྒྱ་ཕུབས་ནི། །བཱ་རེནྡྲ་དང་གཽ་ཊའི་ལུགས། །རྒྱབ་ཀྱི་རྩེ་མོ་ཡང་དག་བསྡུས། །ངོས་རྣམས་རྣམ་རྒྱས་མཁས་པ་ཡིས། །དབུས་སུ་གཞུང་ཤིང་སྣམ་བུ་རྣམས། །མཐོང་ན་མཛེས་པར་འགྱུར་བ་བྱ། །རྔ་ཟླུམ་མཚུངས་པ་དབུས་ཀྱི་སྟེང་། །ངོས་གཉིས་གཞུང་ཤིང་མཐོ་བ་སྟེ། །ཌཱ་བི་ཌ་བ་
གཞུང་ཕྱེད་ཀྱིས། །བུམ་པ་སེང་གེ་རབ་མཛེས་འདོད། །བཱ་རེནྡྲ་བའི་རྒྱ་ཕུབས་ཀྱི། །ལས་ནི་ཡུལ་རྣམས་ཀུན་དུ་མཐོང་། །ཌཱ་བི་ཌ་བའི་རྒྱ་ཕུབས་ནི། །གང་དུ་ཆ་ཤས་སོགས་ལ་མཐོང་། །སླར་ཡང་ཁང་བཟངས་ཆེན་པོ་གཞན་ཡང་སྟེ། །རི་རབ་མནྡ་ར་དང་ཕུན་ཚོགས་མཐར། །གནས་ཁང་བགྲོད་པའི་ཁང་བརྩེགས་བཟང་པོ་དང་། །
གླང་པོ་སེང་གེ་ངང་པ་བུ་ལྡན་མཁའ་ལྡིང་རིག་བྱེད་གནས་རྣམས་ལ་ནི་རྒྱ་ཕུབས་བཤད། །རིག་བྱེད་ཞལ་གྱི་ཉིས་འགྱུར་ཞལ་རྣམས་དང་ནི་རྒྱལ་པོའི་ཁང་པ་རྣམས་ལའང་དེ་ཉིད་དེ། །ཟླུམ་པོ་ཉིད་དང་དྲུག་དང་བཞི་ཡིས་དབྱེ་བས་རྒྱན་ལའང་ཇི་བཞིན་འཇུག་པ་ཤེས་པར་བྱ། །ཤེས་ནས་བཟང་པོ་ཤིན་ཏུ་བཟང་པོ་དགའ་བ་པདྨ་
བཟང་པོ་གསུམ་དང་ལྔ་པ་དང་། །དཔལ་བེའུ་ཕྱེད་དང་དུམ་བུ་མེད་ཅིང་བྱ་བ་ལྡན་པ་དེ་ནི་འཕེལ་ལྡན་བདག་ཉིད་དེ། ཁྱིམ་གང་རྒྱལ་པོའི་བདེ་བ་ལྡན་པ་བཤད་ཅིང་གཞན་ཡང་ཁང་པ་བརྩེགས་མ་རྣམས་ལའང་དྲན། །བུམ་པའི་སྟེང་དུ་ཟླ་བ་དྲ་གོ་རྣམས་ཀྱི་གོ་ཡུའི་ཤིང་ལས་ཕུན་ཚོགས་འཇུག་པ་ཉིད། །འདི་དག་དབྱེ་
བཞིས་བརྒྱན་པ་རྣམས་དང་དེ་ལ་སོགས་པ་རྣམས་ནི་གྲོང་ཁྱེར་ཏེ། ལཱ་ཌཱ་ཀྵ་དང་དེ་ནས་པ་ར་ཌ་ཀ་རབ་གསལ་ཞེས་བྱ་དེ་བཞིན་ཌཱ་བི་ཌ། །བསམ་པའི་དབང་གིས་ཆུང་ངུའི་གནས་དང་ཆེན་པོའང་སེམས་ཅན་རྣམས་ལ་རྣམ་པར་བསྟན། །མ་བཤད་པ་རྣམས་ཐོས་ལས་རྣམ་པར་རྒྱས་པའང་ཆོ་ག་ཤེས་པ་རྣམས་ཀྱིས་དེ་བཞིན་
བྱ། །གཙུག་ལག་ཁང་རྣམས་དང་ནི་རྐང་པའི་དབྱེ་བས་མིང་རྣམས་ཤེས་པར་བྱ་བ་སྟེ། །རྒྱའི་གནས་ཀྱི་སྟེང་དུ་ནི་མི་བྱའོ་ཞེས་པ་རྒྱ་ཕུབས་ལ་སོགས་པའི་མཚན་ཉིད་ཀྱི་ཆོ་གའོ།། །།བསམ་གཏན་དོན་དམ་ལྷ་རྣམས་ཀྱི། །ཁང་པ་ལ་ནི་ཐོག་གཅིག་སྟེ། །སངས་རྒྱས་གནས་པའི་དོན་དུ་ཡང་། །སངས་རྒྱས་བཞི་ཡི་གདན་

རིམ་བཞིན། །གནས་པ་འམ་དགའ་བ་བསྟན་པ་ཡི། །རྟག་ཏུ་རྣལ་འབྱོར་རྒྱལ་པོ་ཡིས། །ཡིད་སོགས་དང་མཐུན་ཁང་པ་ཉིད། །བསམ་གཏན་ལ་སོགས་བསྒྲུབ་ཕྱིར་བྱ། །དཀྱིལ་འཁོར་ལྟ་བུ་ཆ་བཞི་པའི། །ཁང་པ་བརྩེགས་པ་ཡང་བྱ་སྟེ། །ཁང་བརྩེགས་ལ་ནི་ཁང་ཆུང་འགྱུར། །དེ་ནི་རྟ་བབས་དང་བཅས་བྱ། །ཇི་སྙེད་པ་ལ་ཀ་
བའི་ཆ། །སླར་ཡང་རྣམ་པར་གནས་གྱུར་པ། །དེ་སྙེད་འདུན་ཁང་སྟེང་གི་དཔངས། །ཉུང་བ་མིན་པ་གཞན་ཡང་འདོད། །ཁང་པ་བརྩེགས་མ་ལ་སོགས་ཆ། །དེ་རྣམས་སྔར་བཞིན་རབ་ཏུ་གྲགས། །སླར་ཡང་བརྗོད་པར་འགྱུར་བ་རྣམས། །འདིར་ནི་དེ་རྣམས་བྱ་བ་སྟེ། །དེ་དག་སྟེང་དུ་མགྲིན་པ་དང་། །དྲི་མེད་སྙིང་པོ་
མཛེས་པ་སྟེ། ཁང་བརྩེགས་ལ་འདོད་མཆོད་རྟེན་དང་། །འདུན་ཁང་ལ་ཡང་སླར་དེ་ཉིད། །གཙུག་ལག་ཁང་དང་ཚོགས་ཁང་ངམ། །དེ་བཞིན་ཁང་པ་གཞན་ལ་ཡང་། །དྲ་གོ་རྣམས་ནི་མི་འགལ་བར། །བྱ་སྟེ་དེ་ལས་གཞན་དུ་མིན། །གཟུགས་རྣམས་ཇི་ལྟ་བ་ཡི་གནས། །མཆོག་གི་ལས་ཀྱི་གྲོགས་པོ་ཡིས། །བྱ་སྟེ་སླར་
ཡང་ཁང་པ་ཉིད། །ཅེས་འདི་བྱ་བའི་རིམ་པའོ། །ཁང་པ་བཞི་དང་བསམ་གཏན་གྱི་ཁང་པ་ལ་སོགས་པའི་མཚན་ཉིད་ཀྱི་ཆོ་གའོ།། །།ད་ནི་རྡོ་རྗེ་སློབ་དཔོན་རྣམས་ཀྱིས་ཡོངས་སུ་འདས་པ་ཐ་མ་དགའ་བར་བྱེད་པའི་ཆོ་ག་བརྗོད་པར་བྱ་སྟེ། གཞན་དོན་ལ་དགྱེས་ཤི་བ་འཚོ་མཛད་མ། །སྤྱན་མར་གྲགས་པའི་ལྷ་མོ་ཕྱག་འཚལ་
ཏེ། །ཤི་བ་ཡང་དག་འཚོ་བྱེད་སྦྱོར་བ་ཡི། །ཤི་བ་བདེ་འགྲོར་ངེས་སྦྱོར་བཤད་པར་བྱ། །ཤི་བའི་ཁང་པ་ཤིན་ཏུ་དབེན་པར་ནི། །ཉེར་སྤྱོད་ཀུན་དང་ལྡན་པས་རྣལ་འབྱོར་པ། །མེ་ཏོག་དཀར་པོའི་ཕྲེང་བས་གཙུག་ཏོར་བཅིངས། །ཞི་ཞིང་དཀར་པོའི་དྲི་ཡིས་རྣམ་པར་བྱུགས། །དཀར་པོའི་གོས་དང་རྒྱན་ལྡན་ཤར་དུ་ཞལ། །
བལྟས་པའམ་ཡང་ན་དེ་རུ་མོས་པ་ཡིས། །རྡོ་རྗེ་དང་ནི་རྡོ་རྗེ་དྲིལ་བུ་གཟུང་། །འཇམ་ཞིང་ཡངས་པ་མཐོ་བའི་སྟན་ལ་འདུག །ཙནྡན་དཀར་པོ་ལ་སོགས་དྲི་རྣམས་དང་། །བདུད་རྩི་ལྔ་སྦྱར་ཆུ་ཡིས་མདུན་དུ་ནི། །མཎྜལ་ཉེ་བར་བྱུགས་ཏེ་དཀར་པོ་ཡི། །མེ་ཏོག་རྣམས་ཀྱིས་ཉེ་བར་མཛེས་པ་བྱ། །ཨརྒྷ་ལ་སོགས་རང་གི་སྔགས་
རྣམས་ན། །སྭཱ་ཧཱའི་མཐའ་ཅན་ལེགས་བཟླས་བསྐུལ་ཚིག་དང་། །སྙིང་གའི་ཟླ་བར་རང་གི་ས་བོན་རྣམས། །བལྟས་ནས་གནས་ལ་སོགས་པ་བསྲུང་བར་བྱ། །དེ་ལ་གནས་བདག་རྣལ་འབྱོར་བསྲུང་བའི་སྔགས། །ཨོཾ་ཨཱཿབིགྷྣཱཾ་ཏ་ཀྲྀཏ་ཧཱུཾ། ཞེས་པའོ། །ཡང་ན། ན་མཿས་མནྟ་སོགས་སོ། །ཆོ་ག་བཞིན་དུ་བསྒྲུབ་ཤེས་

རྣལ་འབྱོར་བས། །སྤྱན་མའི་རྣལ་འབྱོར་རབ་ཏུ་རྣམ་བསྒྲུབས་ནས། །སྙིང་གའི་ས་བོན་རྩེ་ལས་ལེགས་གྲུབ་འདོད། །འཁོར་ལོས་མཚན་པའི་ལྕགས་ཀྱུ་སྤྲོ་བར་བྱ། །དེ་ཡིས་འཇིག་རྟེན་ཕ་རོལ་སོང་བའི་སེམས། །ཤིན་ཏུ་དམར་ཞིང་གསལ་བ་དགུག་བྱ་སྟེ། །ཆོས་ཀྱི་སྒོ་ཡི་གཟུགས་སམ་ཡང་ན་ནི། །རླུང་མེད་
མི་གཡོའི་མར་མེ་ལྟ་བུ་ཡིས། །ཤི་བ་དེ་ཡི་ཤེས་པ་འོངས་ནས་ནི། །སྤྱི་བོ་ནས་ནི་སྙིང་གར་གཞུག་པར་བྱ། །དེ་རྗེས་དེ་ནི་ཤེས་པར་ལྡན་པ་ཡིས། །ཡང་དག་ལངས་ནས་འདུག་པར་བལྟ་བར་བྱ། །དེ་ཡི་སྙིང་གར་མོ་ཧ་ར་ཏི་ཞེས། །བཀོད་ནས་དེ་ཡི་འོད་ཟེར་ཕྲེང་འབར་བས། །དེ་ཡི་ལུས་ནི་སྟོང་པར་བྱས་ནས་སུ། །ལྷག་མ་རྣམ་པར་
རིག་བྱེད་ཙམ་དུ་བལྟ། །དེ་ཡི་རྗེས་སུ་མོ་ཧ་ར་ཏི་ཞེས། །རབ་བརྗོད་དེ་ནི་སྤྱན་མའི་གཟུགས་སུ་བསམ། །དེ་ཡི་མིག་དང་ལུས་ལ་སོགས་པ་རྣམས། །ཐམས་ཅད་དུ་ནི་བྱིན་གྱིས་བརླབ་པར་བྱ། །སྙིང་པོ་ཡེ་ཤེས་ལྷ་ཡི་ཐུགས་ཀ་ཡི། །ཟླ་བ་ལ་གནས་རྩ་སྔགས་འོད་ཟེར་དང་། །ལྷ་མོའི་སྤྲིན་གྱི་བདུད་རྩིའི་འོད་ཅན་
གྱི། །རོ་ལྡན་བུམ་པ་རྣམས་ཀྱིས་དབང་བསྐུར་བྱ། །རང་གི་ལུས་ལས་ངེས་པར་སྤྲོས་ནས་ནི། །ནམ་མཁའི་དཀྱིལ་འཁོར་ཁྱབ་པར་འཕྲོས་པ་ཡི། །འོད་ཟེར་གོང་བུར་གྱུར་པའི་ཚོགས་རྣམས་ཀྱིས། །དེ་རྗེས་སྤྱན་མའི་སྤྲིན་གྱིས་དབང་བསྐུར་བྱ། །དེ་ཡི་སྔགས་བཟླས་ཆུ་ཡིས་གང་བ་ཡི། །བུམ་པ་ཡིས་ཀྱང་དེ་བཞིན་དབང་
བསྐུར་བྱ། །མགོ་བོ་ལ་ནི་ཅོད་པན་སྦྱིན་བྱ་སྟེ། །ལག་པ་དག་ལ་རྡོ་རྗེ་དྲིལ་བུ་ཡང་། །རྡོ་རྗེའི་སྔགས་པས་ཀུ་ཤའི་རྩེ་མོ་ལ། །རྡོ་རྗེ་རྩེ་གཅིག་རྣོན་པོ་རྣམ་བསྒོམས་ནས། །དེ་ནི་མེ་དང་མཚུངས་པར་བསམ་པར་བྱ། །དེ་རྗེས་མཉམ་གཞག་སེམས་ཀྱིས་དེ་ཡི་ནི། །སྙིང་གར་བཀོད་པའི་ཤེས་པ་རྣམ་འཕྲོ་བ། །ཡང་དག་བསྐུལ་ནས་འབར་བར་
གྱུར་པ་རྣམས། །རྡོ་རྗེའི་རྩེ་ནས་རླུང་གིས་བསྐྱོད་པར་བྱ། །མེ་ཡི་འོད་ཟེར་རྣམས་ཀྱིས་རེག་པ་ཡིས། །དེ་ནི་དངུལ་ཆུ་བཞིན་དུ་འབར་བར་བསམ། །སྟེང་གི་ལམ་ནས་རྣམ་པར་དགྲོལ་བ་འམ། །ཡང་ན་རྣམ་དག་སངས་རྒྱས་ཞིང་དུའོ། །གལ་ཏེ་ཤེས་པ་ལམ་གཞན་ནས་ཐོན་ན། །འཁོར་བའི་རྒྱ་མཚོ་རུ་ནི་ལྟུང་བར་འགྱུར། །དེ་ཡི་ཕྱིར་
ན་སྟེང་གི་ལམ་ནས་སུ། །དེ་ནི་ངེས་པར་འཕོ་བ་བྱ་བ་ཡིན། །སྤྱི་བོ་ནས་ནི་གཟུགས་མེད་འགྲོ་བ་སྟེ། །མཛོད་སྤུ་ནས་ནི་གཟུགས་ཀྱི་ཁམས་སུ་གྲགས། །མིག་དག་ལས་ནི་མི་ཡི་འགྲོ་བ་ཉིད། །རྣ་བ་དག་ནས་གྲུབ་པའི་ལྷ་རུ་འགྲོ། །སྣ་བུག་དག་ནས་གནོད་སྦྱིན་ཉིད་དུ་སྟེ། །ཁ་ནས་དྲི་ཟ་ཉིད་དུ་ངེས་པར་འགྲོ། །ལྟེ་བ་ནས་ནི་འདོད་པའི་ལྷ་རུ་སྟེ། །

ཁུ་བའི་ལམ་ནས་ཡི་དགས་འགྲོ་བར་རོ། །ཆུ་ཡི་ལམ་ནས་དུད་འགྲོའི་སྐྱེ་གནས་ཏེ། །བཤང་བའི་ལམ་ནས་དམྱལ་བའི་འགྲོ་བ་རུ། །ངེས་པར་འགྲོ་བར་ཤེས་བྱ་དེ་ཡི་ཕྱིར། །ལམ་དེ་དག་ནི་རྣམ་པར་སྤང་བར་བྱ། །དེ་ནས་ཐར་པའི་གྲོང་ཁྱེར་དུ་གཞུག་པའི་ཕྱིར་མདུན་དུ་ཞི་བའི་སྦྱིན་སྲེག་གསུངས་པ་ལས་ཡོངས་སུ་རྫོགས་པའི་ཆོ་ག་འམ་
རྫས་གཅིག་པའི་སྦྱིན་སྲེག་གི་ཕྱོགས་གསུངས་པའི་ཕྱིར་སྦྱིན་སྲེག་བྱའོ། །དེ་ལ་ཇི་སྲིད་དེའི་རུས་པ་མ་འོངས་པ་དེ་སྲིད་དུ་དེའི་གོས་ལ་དེའི་མིང་སྨོས་པ་སྔོན་དུ་འགྲོ་བས་བྱ་ཞིང་། འོངས་ནས་ནི་དེའི་རུས་པ་དང་གོས་ལ་ཡང་བྱ་སྟེ་ཉིན་ཞག་བརྒྱད་ཇི་སྲིད་པར་རོ། །ཡང་ན་ལྷོ་ཡི་ཕྱོགས་ཀྱི་ཆ་ལ་ནི། །ཁྲུ་གང་ཙམ་གྱི་སྟེགས་བུ་གྲུ་
བཞི་བྱ། །བ་ཡི་ལྕི་བ་སར་མ་ལྷུང་བས་བྱུག །བ་ཡི་རྣམ་ལྔ་མཉམ་པས་མངོན་པར་གཏོར། །དེར་ཡང་དཀྱིལ་འཁོར་མ་ལ་ཡ་ཡི་ནི། །ཙནྡན་དཀར་པོས་བྱུགས་ཤིང་མེ་ཏོག་གིས། །མཛེས་བྱས་དེ་སྟེང་བུམ་པ་རྣམ་པར་དགོད། །མཚན་ཉིད་དང་ལྡན་སྨན་དང་ཡལ་ག་དང་། །ནོར་བུ་དྲི་བཟངས་འབྲུ་ལྔ་རྣམས་དང་ལྡན། །གདུགས་དང་
བ་དན་རྣམས་ཀྱིས་ཉེ་བར་མཛེས། །མགྲིན་པར་སྔོན་པོའི་གོས་ཀྱིས་རྣམ་པར་དཀྲིས། །ཉེ་བར་སྤྱོད་པ་ལྔ་དང་ཡང་དག་ལྡན། །ཀུ་ཤའི་གདན་ལ་ཡང་དག་གཞག་བྱ་སྟེ། །རྒྱ་ཆེན་རིགས་བདག་རང་གི་མཚན་མས་མཚན། །ཡི་གེ་གསུམ་ལྡན་རྩ་བའི་ས་བོན་གྱིས། །དེ་ནི་ལྷག་པར་གནས་པར་བྱ་བ་ཡིན། །སྔགས་པས་
ཡང་ན་ཁྲུས་ཀྱི་སྔགས་རྣམས་ནི། །ལན་གྲངས་བརྒྱ་དང་རྩ་བརྒྱད་བཟླས་པས་སོ། །དེ་ནས་མདུན་དུ་དཀར་པོའི་རྡུལ་ཚོན་གྱིས། །ལྟེ་བར་བཅས་ཤིང་མུ་ཁྱུད་འབར་བར་བཅས། །འཁོར་ལོ་རྩིབས་བརྒྱད་བྲིས་ནས་མེ་ཏོག་ནི། །དཀར་པོ་མཛེས་པས་རྣམ་པར་སྤྲས་བྱས་ནས། །དེ་ཡི་སྟེང་དུ་བུམ་པ་སྟོང་པ་ཡི། །སྟེང་དུ་བུག་པ་དང་
བཅས་ཁམ་སྐྱོགས་གཞག །དེ་རྗེས་དེ་ཡི་རུས་བུ་ཁམ་སྐྱོགས་དེར། །ལྷག་མ་མེད་པར་ཡང་དག་དགོད་བར་བྱ། །ཏིང་འཛིན་གསུམ་དང་རྣམ་པར་ལྡན་པ་ཡི། །དེ་ཡི་ཕྱིར་བཟློག་ཆོ་ག་ཡང་དག་བྱ། །ཡུངས་ཀར་མེ་ཏོག་སྙོམས་པར་ལྡན་པ་རྣམས། །རིམ་པ་བཞིན་དུ་གསང་སྔགས་རབ་བརྗོད་པས། །དེ་ཡི་རུས་པའམ་
ཡང་ན་གོས་དག་གམ། །དེ་ཡི་མིང་ལ་ཡང་དག་བསྣུན་པར་བྱ། །དེ་ནས་སྔགས་ཀྱི་ཚིག་ཏུ་འགྱུར་བ་ནི། །ཨོཾ་སརྦ་པཱ་པཾ་ད་ཧ་ན་བཛྲ་ཧཱུཾ་ཕཊ། ཨོཾ་སརྦ་པཱ་པཾ་བི་ཤོ་དྷ་ན་བཛྲ་ཧཱུཾ་ཕཊ། ཨོཾ་སརྦ་ཀརྨ་ཨཱ་བ་ར་ཎ་བྷསྨི་ཀུ་རུ་ཧཱུཾ་ཕཊ། ཨོཾ་བྷྲཱུཾ་བི་ནཱ་ཤ་ཡ་ཨཱ་བ་ར་ཎཱ་ནི་ཛུཾ་ཧཱུཾ་ཕཊ། ཨོཾ་བྷྲཱུཾ་བི་ཤོ་དྷ་ཡ་ཨཱ་བ་ར་ཎཱ་ནི་ཧཱུཾ་ཕཊ། ཨོཾ་སརྦ་ཀརྨ་

ཨཱ་བ་ར་ཎཱ་ནི་ཧཱུཾ་ཕཊ། ཨོཾ་ཛྭ་ལ་ཛྭ་ལ་དྷ་ཀ་དྷ་ཀ་ཧ་ན་ཧ་ན་ཨཱ་བ་ར་ཎཱ་ནི་ཧཱུཾ་ཕཊ། ཨོཾ་སྲུཾ་སར་ས་ར་པྲ་ས་ར་པྲ་ས་ར་ཨཱ་བ་ར་ཎཱ་ནི་ཧཱུཾ་ཕཊ། ཨོཾ་ཧཱུཾ་ཧ་ར་ཧ་ར་སརྦ་ཨཱ་བ་ར་ཎཱ་ནི་ཧཱུཾ་ཕཊ། ཨོཾ་ཧཱུཾ་སརྦ་ཨཱ་བ་ར་ཎཱ་ནི་ཧཱུཾ་ཕཊ། ཨོཾ་སརྦ་ཨཱ་བ་ར་ཎཱ་ནི་བི་སྥོ་ཊ་ཡ་ཧཱུཾ་ཕཊ། ཨོཾ་བྲྀ་ཏ་བྲྀ་ཏ་སརྦ་ཨཱ་བ་ར་ཎཱ་ནི་ཧཱུཾ་ཕཊ། ཨོཾ་ཏྲཱ་ཊ་ཏྲཱ་ཊ་སརྦ་ཨཱ་བ་
རཎཱ་ནི་ཧཱུཾ་ཕཊ། ཨོཾ་ཚིནྡྷ་ཚིནྡ་སརྦ་ཨཱ་བར་ཎཱ་ནི་ཧཱུཾ་ཕཊ། ཨོཾ་ད་ཧ་ད་ཧ་སརྦ་ན་ར་ཀ་ག་ཏེ་ཧེ་ཏུ་ན་ཧཱུཾ་ཕཊ། ཨོཾ་པ་ཙ་པ་ཙ་སརྦ་པྲེ་ཏ་ག་ཏེ་ཧེ་ཏུན་ཧཱུཾ་ཕཊ། ཨོཾ་མ་ཐ་མ་ཐ་སརྦ་ཏི་ཪྻ་ཀ་ག་ཏི་ཧེ་ཏུན་ཧཱུཾ་ཕཊ། ཅེས་པ་ནི་རུས་པ་ལ་སོགས་པ་ལ་བསྣུན་པའི་སྔགས་སོ། །དེ་ནས་ལྷག་པར་གནས་པ་བྱས་པའི་ཆུས་དེའི་རུས་པ་ལ་སོགས་བཀྲུ་བར་
བྱ་སྟེ་སྔགས་རྣམས་བརྗོད་བཞིན་པས་སོ། །སྔགས་ནི། ཨོཾ་ན་མོ་བྷ་ག་ཝ་ཏེ། སརྦ་དུརྒ་ཏི་པ་རི་ཤོ་དྷ་ནི་རཱ་ཛཱ་ཡ། ཏ་ཐཱ་ག་ཏཱ་ཡ་ཨརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་ཤོ་དྷ་ནེ་ཤོ་དྷ་ནེ། སརྦ་བཱ་པཾ་བི་ཤོ་དྷ་ནེ་ཤུདྡྷེ་བི་ཤུདྡྷེ་སརྦ་ཀརྨ་ཨཱ་བ་ར་ཎ་བི་ཤོ་དྷ་ནེ་སྭཱ་ཧཱ། ཞེས་པ་ནི་རུས་པ་ལ་སོགས་པ་བཀྲུ་བའི་སྔགས་སོ། །དེ་ནས་
མེ་ཏོག་གཏོར་ཞིང་སྔགས་བཟླས་པས་ལམ་ཡང་དག་པར་བསྟན་པར་བྱ་སྟེ། སྔགས་ནི། ཨོཾ་རཏྣེ་རཏྣེ་རཏྣ་སམྦྷ་ཝེ། རཏྣ་ཀི་ར་ཎེ་རཏྣ་མཱ་ལ་བི་ཤུདྡྷ། ཤོ་དྷ་ཡ་སརྦ་པཱ་པཾ་ཧཱུཾ་ཕཊ། འགྲོ་བ་བསྟན་པའི་སྔགས་སོ། །དེ་ནས་མེ་ཏོག་དེ་རྣམས་ཆུ་ལ་གཏོར་ཞིང་ལམ་རྣམ་པར་སྦྱང་བར་བྱ་སྟེ་སྔགས་ནི། ཨོཾ་པདྨེ་པདྨེ་པདྨ་
ཨུདྦྷ་ཝེ་སུ་ཁ་བ་ཏིཾ་གཙྪནྟུ་སྭཱ་ཧཱ། ཞེས་པ་ནི་ལམ་སྦྱང་བའི་སྔགས་སོ། །སྔགས་ཚིག་དེ་དང་དེ་རྣམས་ལ། །བསྐུལ་བའི་ཚིག་རྣམས་སྤེལ་བར་བྱ། །ལམ་སྦྱང་བ་ཡི་སྔགས་རྣམས་ཀྱིས། །མེ་ཏོག་ཆར་པ་རབ་ཏུ་དབབ། །བཀྲ་ཤིས་ཚིགས་བཅད་འདོན་པ་ལ། །མཉམ་གཞག་དོན་དུ་གཞུག་པར་བྱ། །ཐུན་གསུམ་ཡང་ན་ཐུན་གཅིག་
ལ། ཉི་མ་སོ་སོར་དེ་བཞིན་བྱ། །ཆོ་ག་ཇི་ལྟར་བཤད་དེ་ལྟར། །ཡང་དག་མཆོད་ཅིང་ཐམས་ཅད་བསྡུ། །དེ་ལ་བཀྲ་ཤིས་ཀྱི་ཚིགས་སུ་བཅད་པ་ནི། བཀྲ་ཤིས་གང་ཞིག་སེམས་ཅན་ཀུན་ལ་ཕན་པར་དགྱེས། །སངས་རྒྱས་སྐྱོན་བྲལ་རྣམ་པར་དག་པའི་བློ་ལྡན་པ། །ཤེས་རབ་ཡན་ལག་འདུས་པས་མཛེས་པ་བདེ་བའི་བདག །དེས་
ནི་ཁྱེད་རྣམས་དབང་བསྐུར་མཆོག་ལ་བཀྲ་ཤིས་ཤོག །བཀྲ་ཤིས་གང་ཞིག་ལྷ་དང་ལྷ་མིན་མིས་མཆོད་པ། །ཆོས་ནི་དེ་ཡི་བསྟན་པ་བླ་ན་མེད་པ་ཉིད། །འཇིག་རྟེན་གསུམ་དུ་རབ་ཏུ་གསལ་ཞིང་བདག་མེད་པ། །དེས་ནི་ཁྱེད་རྣམས་དབང་བསྐུར་མཆོག་ལ་བཀྲ་ཤིས་ཤོག །བཀྲ་ཤིས་གང་ཞིག་རབ་མཆོག་ཆོས་རྣམས་

རྟག་ཏུ་འཛིན། །དམ་པའི་སར་ཞུགས་རྒྱལ་བའི་སྲས་པོའི་ཚོགས་ཀྱི་མཆོག །སེམས་ཅན་རྣམས་ལ་ཕན་པར་མཁས་ཤིང་ཤིན་ཏུ་མཛེས། །དེས་ནི་ཁྱེད་རྣམས་དབང་བསྐུར་མཆོག་ལ་བཀྲ་ཤིས་ཤོག །ཅེས་པའི་བཀྲ་ཤིས་ཀྱི་ཚིགས་སུ་བཅད་པ་དེ་རྣམས་ཀྱང་རུས་པ་འཁྲུད་པའི་དུས་སུ་འདོན་ནམ་འདོན་དུ་གཞུག་པར་བྱའོ། །དེ་ནས་གཤེགས་
སུ་གསོལ་བའི་སྔགས་ནི། །ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །མུཿཞེས་པའོ། །དེ་ནས་མཚན་མོ་ཚོགས་ཀྱི་འཁོར་ལོ་བྱས་ཏེ་ཐམས་ཅད་ཡང་དག་པར་བསྡུ་བར་བྱའོ། །འབྱོར་པ་ཡོད་ན་ངན་
སོང་ཡོངས་སུ་སྦྱོང་བའི་ཆོ་ག་ཇི་ལྟ་བ་བཞིན་དུ་བཞེངས་ཏེ། ཇི་ལྟར་གསུངས་པའི་ཆོ་ག་རྣམས་བསྒྲུབ་པར་བྱའོ། །སླར་ཡང་རྡོ་རྗེ་སློབ་དཔོན་གྱིས་སྦྱིན་བདག་ལས་ཡོན་བླང་བར་བྱ་སྟེ། དེས་ཀྱང་འབྱོར་པ་དང་རྗེས་སུ་མཐུན་པར་རབ་ཏུ་དབུལ་བར་བྱ་ཞིང་། བཀྲུས་པའི་གོས་ཀྱང་སློབ་དཔོན་ཉིད་ལ་དབུལ་བར་བྱའོ། །ཡང་
གསུངས་པ། ཤི་བ་ལ་དམིགས་གང་ཡིན་རྣམས། །རང་གི་གཉེན་གྱིས་སློབ་དཔོན་དབུལ། །ད་ནི་མཐོ་རིས་ལམ་ཆས་སུ། །དེ་ལ་བྱིན་ཞེས་ཤེས་པར་བྱ། །གང་ཞིག་ཅུང་ཟད་ཞི་དོན་གྱིས། །སྦྱིན་པ་དེས་འདིར་ངེས་པར་ནི། །བདེ་བ་ཅན་གྱི་སར་འགྲོ་བ། །ཞག་བདུན་སྔ་བར་རབ་སྦྱིན་བྱེད། །དེ་ལྟར་གང་ཡིན་ཀུན་བྱས་ཏེ། །
ཆོ་གས་ལུས་ཅན་སྟེང་བྱས་ན། །སྡིག་པ་ཐམས་ཅད་སྤངས་ནས་ནི། །བདེ་བ་ཅན་དུ་ངེས་པར་འགྲོ། །དེ་རྗེས་དེ་རུས་རྣམ་སྦྱང་བྱ། །ཞིབ་མོར་རྡོ་བས་བཏགས་ནས་ནི། །ཆུ་ཀླུང་ཤིན་ཏུ་རྒྱ་ཆེན་ལ། །མཆོད་པ་བྱས་ཏེ་དོར་བར་བྱ། །ཡང་ན་ས་འཛིན་ཆེན་པོ་ནི། །མཐོན་པོའི་རྩེ་མོའི་མཐར་འཛེགས་ནས། །ཤིན་ཏུ་ཤུགས་དྲག་རྗེས་
མཐུན་པའི། །རླུང་ལ་དེ་ནི་བསྐུར་བར་བྱ། །ཤིན་ཏུ་དྲག་པོའི་ལས་ཀྱི་དབང་དུ་གྱུར་པ་ཡིས། །གལ་ཏེ་བདེ་སྟེར་བདེ་བ་ཅན་དུ་མ་སོང་ན། །འདི་ནི་ངེས་པར་དྲན་པའི་འགྲོ་བ་སྤངས་ནས་སུ། །སུམ་ཅུ་རྩ་གསུམ་པ་ཡི་གནས་སུ་འགྲོ་བར་འགྱུར། །ཞེས་པ་རྡོ་རྗེ་སློབ་དཔོན་རྣམས་ཀྱིས་འདས་པ་ཐ་མ་དགའ་བར་བྱེད་པའི་
མཚན་ཉིད་ཀྱི་ཆོ་གའོ།། །།དེ་ལྟར་སློབ་དཔོན་རྣམས་ཀྱི་བྱ་བ་བསྡུས་པ་དངོས་གྲུབ་ཆེན་པོའི་རྒྱུར་ནི་རབ་ཏུ་འབད་པ་ལས། །སྣ་ཚོགས་གཞུང་ལས་འོངས་པ་ལ་སོགས་མང་པོའི་མེ་ཏོག་ཚུལ་ནི་བདུད་རྩིའི་གཟུགས་ཅན་ཏེ། །གང་ཞིག་བྱས་ལས་སྐྱེས་པའི་བསོད་ནམས་རྒྱལ་སྲས་རྣམས་ཀྱི་ཆེན་པོའི་ས་ཡི་

ཚོགས་གྱུར་པ། །དེ་ཡིས་འཇིག་རྟེན་གསུམ་གྱི་འཇིག་རྟེན་རྒྱལ་མཆོག་ཀུན་དགའ་དང་ལྡན་ཁང་བཟངས་རབ་འཇུག་ཤོག །ཅེས་པ་སློབ་དཔོན་གྱི་བྱ་བ་ཀུན་ལས་བཏུས་པ་རྣམ་པར་གྲགས་པའི་དཀྱིལ་འཁོར་གྱི་སློབ་དཔོན་ཆེན་པོ་པཎྜི་ཏ་ཨ་བ་དྷཱུ་ཏཱི་པ་དཔལ་ལྡན་འགྲོ་བའི་མེ་ལོང་གིས་མཛད་པ་རྫོགས་
སོ།། །།རྡོ་རྗེ་སློབ་དཔོན་རྣམས་ལ་ཉེ་བར་མཁོ་བའི་ཆོ་ག་མཐའ་ཡས་པ་ཕྱོགས་གཅིག་ཏུ་བསྡུས་པའི་བསྟན་བཅོས་ཆེན་པོ་འདི་ཉིད་ནི། དཔལ་ལྡན་བླ་མ་དམ་པ་དྷརྨ་ཀཱིརྟི་ཤྲཱི་བྷ་དྲའི་ཐུགས་དགོངས་རྣམ་པར་དག་པའི་སྒོ་ནས། བཀའ་ལུང་སྙན་པས་བསྐུལ་ཞིང་མཐུན་རྐྱེན་ཕུན་སུམ་ཚོགས་པ་བསྒྲུབས་པ་
ལ་བརྟེན་ནས། བི་ཀྲ་མ་ཤཱི་ལའི་པཎྜི་ཏ་ཆེན་པོ་མཉྫུ་ཤྲཱི་དང་། བོད་ཀྱི་ལོ་ཙཱ་བ་བློ་གྲོས་རྒྱལ་མཚན་དཔལ་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།བསྟན་པ་རིན་པོ་ཆེ་དང་འགྲོ་བ་མང་པོ་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག །དཔལ་དྷརྨ་ཀཱིརྟིའི་གསུང་གི་བདུད་རྩིས་བསྐུལ་བར་
གྱུར་པ་ལས། འཇིག་རྟེན་ཕན་པར་ངེས་པར་དགའ་བའི་པཎྜི་ཏ་དང་མ་ཏི་ཡིས། །ཆོ་ག་ཀུན་ལས་བཏུས་པའི་རིན་ཆེན་ཕུང་པོ་རྣམ་པར་གསལ་བྱས་པའི། །དགེ་བས་འཇིག་རྟེན་རྣམས་ནི་བདེ་བ་ཆེན་པོ་ཉིད་དང་ལྡན་གྱུར་ཅིག །ཕུན་སུམ་ཚོགས་པ་ཀུན་ནས་འབར་ཞིང་གྲགས་པ་གསལ་བར་
ལྡན་པས་འདི་ནི་རྟག་ཏུ་གནས་གྱུར་ཅིག །ནད་དང་མུ་གེ་ལས་གྲོལ་དགྲ་མི་ལྷག་མ་མེད་པའི་ས་སྐྱོང་ཡུན་རིང་ཕྱོགས་རྣམས་སྲུང་གྱུར་ཅིག །ཚུལ་ཁྲིམས་སོགས་ལྡན་ཡོན་གནས་རྣམས་ནི་གསུང་རབ་མཛོད་རྣམས་ཀུན་ནས་འཕེལ་བ་ཉིད་གྱུར་ཅིག །ཉི་མ་ཟླ་བ་ཇི་བཞིན་ཉིད་དང་མཚན་དུ་དཔལ་ལྡན་
དྷརྨ་ཀཱིརྟི་དགེ་ཞིང་ཤིས་གྱུར་ཅིག །ཅེས་པ་དག་ཀྱང་པཎྜི་ཏས་མཛད་པའི་སྨོན་ལམ་བསྒྱུར་བ་སྟེ་ཇི་ལྟ་བ་བཞིན་དུ་འགྲུབ་པར་གྱུར་ཅིག །སླར་ཡང་དཔལ་ལྡན་བྱང་ཆུབ་རྩེ་མོའི་ཞབས་རྡུལ་སྤྱི་བོས་ལེན་ཞིང་གསུང་གི་བདུད་རྩི་འཐུངས་པ་དགེ་སློང་བཛྲ་ཤྲཱིས་ཀྱང་ཅུང་ཟད་བཅོས་ཤིང་དག་པར་བགྱིས་
སོ། །དེ་ཡིས་མཚོན་པ་དགེ་ཚོགས་བདུད་རྩིའི་འོད་ལྡན་པ། །དཔག་ཡས་ཕན་བདེའི་འོད་དཀར་བརྒྱད་ལྡན་པས། །ལུས་ཅན་སྙིང་ལ་གནས་པའི་མུན་བསལ་ཞིང་། །ཐུབ་བསྟན་ཀུ་མུད་བཞད་པའི་གཉེན་གྱུར་ཅིག། །།