Luận tạng Tây Tạng (Tengyur) — Tập 76

་གྲིའོ། །འདིའི་ཤར་ཕྱོགས་སུ་རྡོ་རྗེ་མཁའ་འགྲོ་མ་དཀར་མོ་སྒེག་པའི་ཉམས་ཅན་དང་། བྱང་དུ་མི་བཟད་མཁའ་འགྲོ་མ་གསེར་གྱི་མདོག་ཅན་དང་། ནུབ་ཏུ་རོ་ལངས་མ་སྔོན་མོ་དང་། ལྷོར་གཏུམ་མོ་དམར་མོ་སྟེ་བཞི་པོ་འདི་རྣམས་ཀྱང་སེང་གེ་

ལ་གནས་པའི་སྣ་ཚོགས་པདྨ་དང་ཉི་མ་ལ་བཞུགས་པ། གཡས་པ་དང་ཅིག་ཤོས་ཀྱི་ཕྱག་གཉིས་ཀྱིས་སྟེང་དུ་བསྒྲེང་བའི་ཁ་ཊྭཱཾ་ག་དང་ཁྲག་གིས་གང་བའི་ཐོད་པ་འཛིན་པའོ། །དབང་ལྡན་དུ་སེང་གེ་མོ་སེང་གེའི་གདོང་པ་ཅན་གཡོན་པ་དང་གཡས་པའི་ལུས་ཕྱེད་ཕྱེད་དཀར་པོ་དང་
སེར་པོ་གླང་པོ་ཆེ་དཀར་པོ་ལ་གནས་པའོ། །མེར་སྟག་མོ་སྟག་གི་གདོང་པ་ཅན་གཡོན་པ་དང་གཡས་པའི་ལུས་ཕྱེད་ཕྱེད་སྔོན་པོ་དང་དཀར་པོ་རིན་པོ་ཆེ་སྣ་བདུན་གྱི་ཕུང་པོ་ལའོ། །བདེན་བྲལ་དུ་ཅེ་སྤྱང་མོ་ཅེ་སྤྱང་གི་གདོང་པ་ཅན་གཡོན་པ་དང་གཡས་པའི་ལུས་ཕྱེད་ནག་པོ་དང་དམར་
པོ་མ་ཧེ་ལའོ། །ནུབ་ཏུ་འུག་པ་མོ་འུག་པའི་གདོང་པ་ཅན་གཡོན་པ་དང་གཡས་པའི་ལུས་ཕྱེད་ཕྱེད་སེར་པོ་དང་དམར་པོ་ཀླུ་བརྒྱད་ཀྱི་མཇུག་མ་ལའོ། །བཞི་པོ་འདི་རྣམས་ནི་གཡས་པ་དང་གཡོན་པའི་ཕྱག་གཉིས་རྡོ་རྗེ་ལྕགས་ཀྱུ་དང་སྡིགས་མཛུབ་དང་བཅས་པའི་ཞགས་པས་བརྒྱན་ཅིང་
སྣ་ཚོགས་ཆུ་སྐྱེས་དང་ཉི་མ་ལ་གནས་པའོ། །དེ་ནས་སྒོ་རྣམས་ལ་ཤར་དུ་རྒྱལ་བའི་དབང་ཕྱུག་མ་དཀར་མོ་ཕྱག་གཉིས་ཀྱིས་ཐལ་མོ་ཁར་བཅུག་པའོ། །བྱང་དུ་གསལ་བྱེད་མ་སེར་མོ་མར་མེ་ལྟ་བུའི་ཐལ་མོ་སྦྱར་བ་སྤྱི་བོར་འཛིན་པའོ། །ནུབ་ཏུ་འཇིགས་བྱེད་མ་དམར་མོ་ཁྲག་གིས་གང་བའི་
སྙིམ་པ་སྟེང་དུ་བཀན་པ་ཁའི་ཐད་ཀར་བཟུང་ནས་ཁྲག་གི་རྒྱུན་འཐུང་བར་བྱེད་པའོ། །ལྷོར་ཀཾ་པོ་ཛཱི་ནག་མོ་རྡོ་རྗེའི་སྙིམ་པ་ལ་མཐེ་བོང་གི་རྩེ་མོ་གཉིས་ཕན་ཚུན་སྦྱར་ཏེ་སྡིགས་མཛུབ་གཉིས་ཀྱི་མཛུབ་མོ་བརྐྱང་བ་སྦྱར་ནས་གསང་བའི་གནས་སུ་བཞག་པས་རང་གི་བྷ་ག་སྟོན་པར་བྱེད་པའོ། །
བཞི་པོ་འདི་རྣམས་ནི་སྣ་ཚོགས་ཆུ་སྐྱེས་ལ་གནས་པའི་ཡི་དགས་ཀྱི་སྙིང་གར་ཉི་མ་ལ་བཞུགས་པའོ། །རྡོ་རྗེ་མཁའ་འགྲོ་མ་ལ་སོགས་པ་བཅུ་གཉིས་ནི་ཞལ་གཅིག་པ་སྤྱན་གསུམ་པའོ། །ལྷ་མོ་བཅུ་གསུམ་པོ་ཐམས་ཅད་ཀྱང་ལྷའི་རིན་པོ་ཆེ་དང་ལྷའི་གོས་དང་དབུ་ལ་ཐོད་པ་ལྔའི་ཕྲེང་བ་
ཅན་ཕྱག་རྒྱ་ལྔ་དང་ལྡན་པ་སེམས་དཔའི་སྐྱིལ་ཀྲུང་ཅན་ཀླུའི་རྒྱལ་པོ་བརྒྱད་ཀྱིས་རྣམ་པར་མཛེས་པ། བསྐལ་པའི་མཐའི་མེ་འབར་བའི་འོད་ལྟ་བུའི་འོད་ཟེར་གྱི་ཚོགས་ཀྱིས་འབར་ཞིང་འཇིགས་སུ་རུང་བ་སྟེ་གོ་རིམས་ཇི་ལྟ་བ་བཞིན་དུ་མི་བསྐྱོད་པ་དང་རྟག་པ་དང་རིན་ཆེན་དབང་པོ་དང་སྣང་བ་

མཐའ་ཡས་དང་དོན་ཡོད་གྲུབ་པ་དང་མི་བསྐྱོད་པ་དང་རྣམ་པར་སྣང་མཛད་དང་རིན་ཆེན་འབྱུང་ལྡན་དང་འོད་དཔག་མེད་དང་རྟག་པ་དང་རིན་ཆེན་དབང་པོ་དང་སྣང་བ་མཐའ་ཡས་དང་དོན་ཡོད་གྲུབ་པ་རྣམས་ཀྱིས་རྒྱས་བཏབ་པའོ། །ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཨཱཾ་ཨཱྀཾ་རཱྀཾ་ལཱྀཾ་ཨཻཾ་ཨཽཾ་ཨཿཞེས་པ་འདི་རྣམས་ནི་
ཐུགས་ཀའི་ས་བོན་ནོ། །ཨོཾ་ཧྲཱིཿསྭཱ་ཧཱ། ཞེས་པ་ནི་ཡེ་ཤེས་མཁའ་འགྲོ་མའི་སྙིང་པོའོ། །ཨོཾ་བེ་ཏ་ལཱི་ཧཱུཾ་སྭཱ་ཧཱ། ཞེས་པ་ནི་རོ་ལངས་མའི་སྟེ་ལས་ཐམས་ཅད་པའི་སྔགས་སོ། །བཅུ་བདུན་གྱི་བདག་ཉིད་ཀྱེའི་རྡོ་རྗེའི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་ཆོས་ཀྱི་འབྱུང་གནས་ཀྱི་སྙིང་པོར་
གནས་པའི་གཞལ་ཡས་ཁང་གི་དབུས་སུ་སྣ་ཚོགས་ཆུ་སྐྱེས་ཀྱི་ལྟེ་བ་ལ་གནས་པའི་རོའི་སྙིང་གར་ཁྲག་གིས་གང་བའི་ཐོད་པའི་སྟེང་དུ་ཉི་མ་ལ་གནས་པའི་ཀྱེའི་རྡོ་རྗེ་རྣམ་པ་གསུམ་སྟེ་བཞི་པ་ནི་རོ་དང་བྲལ་བའོ། །དེ་ལ་འཇིག་རྟེན་གསུམ་ཀུན་དུ་བསྐྱོད་པ་ནག་པོ་སྣ་ཚོགས་རྡོ་རྗེས་མཚན་
པའི་དབུ་སྐྲ་དམར་སེར་གྱེན་དུ་བརྫེས་པ། ཐོད་པ་ལྔ་དང་ཕྱག་རྒྱ་དྲུག་དང་མི་མགོ་རློན་པའི་ཕྲེང་བས་བརྒྱན་པ་རྒྱབ་ཀྱི་ཆར་སྟག་གི་པགས་པའི་སྨད་གཡོགས་ཅན་ཞབས་གཡོན་པའི་བརླ་ལ་ཞབས་གཡས་པའི་སེན་མོ་ཡང་དག་པར་བཞག་པའི་སྐྱིལ་ཀྲུང་ཕྱེད་པས་གནས་པ། དམར་ལ་
ཟླུམ་པའི་སྤྱན་གསུམ་དང་ལྡན་པའི་ཞལ་གཅིག་པ་ཕྱག་གཉིས་པ་ཕྱག་གཡོན་གྱིས་རྡོ་རྗེས་མཚན་པའི་ཐོད་པ་ཁྲག་གིས་གང་བ་འཛིན་པས་འཆད་པར་འགྱུར་བའི་གཟུགས་ཅན་གྱི་བདག་མེད་མ་ལ་འཁྱུད་པ། ཕྱག་གཡས་ཀྱིས་རྡོ་རྗེ་རྩེ་ལྔ་པ་དབྱུག་པ་བརྡེག་པའི་ཚུལ་དུ་འཛིན་པའོ། །ཡང་
ཕྱག་བཞི་པ་ནི་ཕྱག་གཉིས་པ་ལྟ་བུ་སྟེ་ཕྱག་གཞན་པ་གཉིས་ཀྱིས་རང་དང་འདྲ་བའི་རྡོ་རྗེ་ཕག་མོ་ལ་ཡང་དག་པར་འཁྱུད་པའོ་ཞེས་པ་ནི་ཁྱད་པར་རོ། །ཡང་ཕྱག་དྲུག་པ་ནི་ནག་པོ་དང་དཀར་པོ་དང་དམར་པོའི་ཞལ་གསུམ་པ་ཞལ་རེ་རེ་ཞིང་སྤྱན་གསུམ་གསུམ་དང་ལྡན་པ་རལ་པའི་ཅོད་པན་
གྱིས་བརྒྱན་པ། ཕྱག་གཡོན་པ་རྣམས་ཀྱིས་རྡོ་རྗེ་དྲིལ་བུ་དང་གཞུ་དང་ཐོད་པ། གཡས་པ་རྣམས་ཀྱིས་རྡོ་རྗེ་དང་མདའ་དང་རྩེ་གསུམ་འཛིན་པ་རྡོ་རྗེ་དྲིལ་བུ་དང་ལྡན་པའི་ཕྱག་གཉིས་ཀྱིས་རང་དང་འདྲ་བའི་རྡོ་རྗེ་ལུ་གུ་རྒྱུད་མ་ལ་ཡང་དག་པར་འཁྱུད་པ་སྟེ་གཞན་ནི་ཇི་ལྟར་རིགས་པར་སྔ་མ་བཞིན་

ནོ། །དེ་ལྟར་ཧེ་རུ་ཀ་གསུམ་གྱི་ཤར་ལ་སོགས་པའི་འདབ་མ་བརྒྱད་ལ་རྡོ་རྗེ་དྲག་མོ་ལ་སོགས་པ་བརྒྱད་དོ། །འདི་དག་གི་ཕྱི་རོལ་དུ་དབང་ལྡན་ལ་སོགས་པའི་མཚམས་རྣམས་སུ་གླིང་བུ་མ་དང་པི་ཝང་མ་དང་མུ་ཀུན་ད་མ་དང་རྫ་རྔ་མའོ། །ཤར་ལ་སོགས་པའི་སྒོ་རྣམས་སུ་རྡོ་རྗེ་
ལྕགས་ཀྱུ་མ་དང་རྡོ་རྗེ་ཞགས་པ་མ་དང་རྡོ་རྗེ་ལྕགས་སྒྲོག་མ་དང་རྡོ་རྗེ་དྲིལ་བུ་མའོ། །ལྷ་མོ་བཅུ་དྲུག་པོ་འདི་དག་ནི་གོང་གི་དང་འདྲ་བ་ལ་ཡབ་དང་བྲལ་བའོ། །ཧེ་རུ་ཀ་གསུམ་གྱི་རིགས་ཀྱི་བདག་པོ་ནི་མི་བསྐྱོད་པ་སྟེ་ཐུགས་ཀའི་ས་བོན་ནི་ཧཱུཾ་ངོ་། །སྙིང་པོའི་སྔགས་ནི་ཨོཾ་ཨཱཿཧཱུཾ་ཧྲཱིཿསྭཱ་ཧཱ་ཞེས་པའོ། །
སོ་སོའི་སྔགས་ནི་རིམ་པ་ཇི་ལྟ་བ་བཞིན་དུ་ཨོཾ་ཏྲཻ་ལོཀྱ་ཨཱཀྵེ་པ་ཧུཾ་ཧུཾ་ཧཱུཾ་ཕཊ་སྭཱ་ཧཱ། ཨོཾ་ཛྭ་ལ་ཛྭ་ལ་བྷྱོ་ཧུཾ་ཧུཾ་ཧཱུཾ་ཕཊ་སྭཱ་ཧཱ། ཨོཾ་ཀི་ཊི་ཀི་ཊི་བཛྲ་ཧུཾ་ཧུཾ་ཧཱུཾ་ཕཊ་ཅེས་པའོ།། །།ཀྱེའི་རྡོ་རྗེ་བཞི་པ་ནི་ཕྱག་བཅུ་དྲུག་པ་སྟེ་མི་བསྐྱོད་པས་རྒྱས་བཏབ་པ་བདག་མེད་མ་དང་སྙོམས་པར་འཇུག་པའོ། །འོན་ཀྱང་འདི་
ལ་གོང་དུ་བཤད་པའི་རོའི་གནས་སུ་བདུད་བཞི་སྟེ། དེའང་ཕུང་པོའི་བདུད་ཀྱི་ངོ་བོ་ཚངས་པ་སེར་པོ་དང་། ཉོན་མོངས་པའི་བདུད་ཁྱབ་འཇུག་ནག་པོ་དང་། འཆི་བདག་གི་བདུད་དབང་ཕྱུག་དཀར་པོ་དང་། ལྷའི་བུའི་བདུད་དབང་པོ་དམར་སེར་རོ། །དེ་རྣམས་ལ་བཅོམ་ལྡན་འདས་ཀྱི་
ཞབས་བཞིའི་གཉིས་ཀྱིས་སྐྱིལ་ཀྲུང་ཕྱེད་པ་དང་གཞན་པ་དག་གིས་གཡོན་བསྐུམ་ཞིང་གཡས་བརྐྱང་བས་བཞུགས་པ། སྐུ་མདོག་ནག་པོ་ནས་སྣ་ཚོགས་རྡོ་རྗེ་ལ་སོགས་པ་དང་སྨད་གཡོགས་ཀྱི་བར་སྔར་བཤད་པའི་ཁྱད་པར་དང་ལྡན་པ། ཞལ་བརྒྱད་པ་སྤྱན་ཉི་ཤུ་རྩ་བཞི་པ། རྩ་
ཞལ་ནག་པོ་གད་མོ་ཅན་གཡས་དཀར་པོ་གཡོན་དམར་པོ་སྟེང་མ་མཆེ་བ་གཙིགས་པ་ལྷག་མ་རྣམས་ནག་པོའོ། །ཕྱག་གཡས་པ་རྣམས་ན་རྡོ་རྗེ་དང་རལ་གྲི་དང་མདའ་དང་འཁོར་ལོ་དང་ཐོད་པ་དང་དབྱུག་པ་དང་རྩེ་གསུམ་དང་ལྕགས་ཀྱུ་དང་། གཡོན་པ་རྣམས་ན་དྲིལ་བུ་དང་པདྨ་
དང་གཞུ་དང་ཁ་ཊྭཱཾ་ག་བསྒྲེང་བ་དང་ཐོད་པ་དང་རིན་པོ་ཆེ་དང་སྡིགས་མཛུབ་དང་ཞགས་པའོ། །ཤར་གྱི་འདབ་མ་ལ་གཽ་རཱི་དམར་སེར་ཕྱག་གཡས་པ་གཉིས་ན་མདའ་ཕྱུང་བ་དང་རྡོ་རྗེ་གྲི་གུག །གཡོན་གཉིས་ན་གཞུ་དང་ཉ་རོ་ཧི་ཏ་དང་བཅས་པའི་ཐོད་པ་ཁྲག་གིས་གང་བའོ། །

ལྷོར་ཆོམ་རྐུན་མ་དམར་མོ་རྡོ་རྗེ་དང་ཌ་མ་རུ་དང་ལྕགས་ཀྱུ་དང་ཕག་པ་དང་བཅས་པའི་ཐོད་པ་ཁྲག་གིས་གང་བ་ཅན་ནོ། །ནུབ་ཏུ་རོ་ལངས་མ་དཀར་སེར་རལ་གྲི་དང་རུས་སྦལ་དང་བཅས་པའི་ཐོད་པ་ཁྲག་གིས་གང་བ་དང་། ཆང་གིས་གང་བའི་ཐོད་པ་དང་དྲི་ཆུས་གང་བའི་ཐོད་པ་ཅན་ནོ། །
བྱང་དུ་གྷསྨ་རཱི་ལྗང་གུ་ཅུང་ཟད་སེར་བ་རྐང་མར་གྱིས་གང་བའི་ཐོད་པ་ལ་གནས་པའི་སྦྲུལ་དང་མི་འཇིགས་པའི་ཕྱག་རྒྱ་དང་རྡོ་རྗེས་མཚན་པའི་མེ་ཐབ་དང་རྡོ་རྗེས་མཚན་པའི་དགྲ་སྟ་ཅན་ནོ། །དབང་ལྡན་དུ་པུཀྐ་སཱི་སེར་མོ་ཤ་ཆེན་གྱིས་གང་བའི་ཐོད་པ་ལ་གནས་པའི་སེང་གེ་དང་མཆོག་སྦྱིན་
གྱི་ཕྱག་རྒྱ་དང་དཔག་བསམ་གྱི་ཤིང་གི་ཡལ་ག་དང་རིན་པོ་ཆེ་ཅན་ནོ། །མེར་རི་ཁྲོད་མ་དཀར་མོ་ཁུ་བས་གང་བའི་ཐོད་པ་ལ་གནས་པའི་དགེ་སློང་དང་རྡོ་རྗེ་དང་ཁ་ཊྭཱཾ་ག་དང་ཞགས་པའོ། །བདེན་བྲལ་དུ་གཏུམ་མོ་སྔོན་མོ་གཡས་པ་ན་ཁྲག་གིས་གང་བའི་ཐོད་པ་ལ་སྟག་དང་། གཡོན་ན་པདྨ་དཀར་
པོ་དང་ཕྱག་གཉིས་ན་རླུང་རས་ཅན་ནོ། །རླུང་དུ་གཡུང་མོ་ནག་མོ་ཆང་གི་ཐོད་པ་དང་རྩེ་གསུམ་དང་བདུད་རྩི་ལྔའི་ཐོད་པ་ལ་གནས་པའི་ཅེ་སྤྱང་དང་ཐོང་གཤོལ་ཅན་ནོ། །འདི་དག་གི་ཕྱི་རོལ་གྱི་མཚམས་རྣམས་སུ་གླིང་བུ་མ་ལ་སོགས་པ་བཞི་སྔ་མ་བཞིན་ནོ། །སྒོ་རྣམས་ལ་ཤར་དུ་རྟ་གདོང་
མ་ནག་མོ་སྟེ་ཞལ་རྣམས་ནི་ནག་པོ་དང་དཀར་པོ་དང་སེར་པོ་དང་སྟེང་དུ་རྟའི་གདོང་པ་ལྗང་གུའོ། །ལྷོར་ཕག་གདོང་མ་སེར་མོ་སྟེ་ཞལ་རྣམས་ནི་སེར་པོ་དང་ནག་པོ་དང་དཀར་པོ་དང་སྟེང་དུ་ཕག་གི་གདོང་པ་དམར་པོའོ། །ནུབ་ཏུ་ཁྱི་གདོང་མ་དམར་མོ་སྟེ་ཞལ་རྣམས་ནི་དམར་པོ་དང་ནག་པོ་དང་དཀར་
པོ་དང་སྟེང་དུ་ཁྱིའི་གདོང་པ་སེར་པོའོ། །བྱང་དུ་སེང་གདོང་མ་ལྗང་གུ་སྟེ་ཞལ་རྣམས་ནི་ལྗང་གུ་དང་ནག་པོ་དང་དཀར་པོ་སྟེང་དུ་སེང་གེའི་གདོང་པ་དམར་པོའོ། །འདིར་རྩ་བ་དང་གཡས་པ་དང་ཅིག་ཤོས་དང་སྟེང་གི་རིམ་པས་ཞལ་བཞི་པའོ། །སྒོ་སྐྱོང་མ་རྣམས་ཕྱག་བཞི་མ་རྡོ་རྗེ་
ལྕགས་ཀྱུ་མ་ལ་སོགས་པ་བཞིན་དུ་ཕྱག་མཚན་འཛིན་པ་སྣ་ཚོགས་ཆུ་སྐྱེས་དང་ཁྲག་གིས་གང་བའི་ཐོད་པ་དང་རོའི་སྟེང་དུ་གཡས་བསྐུམ་ཞིང་གཡོན་བརྐྱང་བས་གནས་པ་དབུ་སྐྲ་དམར་སེར་གྱེན་དུ་འབར་ཞིང་བརྫེས་པའོ། །ལྷ་གཞན་རྣམས་ནི་སྐྱིལ་ཀྲུང་ཕྱེད་པ་ཅན་ཐམས་

ཅད་ཀྱང་ཞལ་རེ་རེ་ཞིང་སྤྱན་གསུམ་གསུམ་པ་ཕྱག་རྒྱ་ལྔ་ལ་སོགས་པས་བརྒྱན་པ་ཡབ་མེད་པའོ། །བཅོམ་ལྡན་འདས་ཀྱི་ཐུགས་ཀའི་ས་བོན་ནི་ཧཱུཾ་ངོ་། །སྙིང་པོའི་སྔགས་ནི་ཨོཾ་དེ་བ་པི་ཙུ་བཛྲ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པའོ། །གྷསྨ་རཱིའི་ཨོཾ་ཨོཾ་སྭཱ་ཧཱ། ཞེས་པ་སྟེ་
ལས་ཐམས་ཅད་པའི་སྔགས་སོ།། །།བདག་མེད་མའི་དཀྱིལ་འཁོར་ནི་རྡོ་རྗེའི་གུར་གྱི་ནང་དུ་ཆོས་འབྱུང་གི་སྙིང་པོར་གནས་པའི་གཞལ་ཡས་ཁང་གི་དབུས་སུ་སྣ་ཚོགས་པདྨའི་ལྟེ་བར་བདག་མེད་མ་སྟེ། ཤར་ལ་སོགས་པའི་ཕྱོགས་ཀྱི་འདབ་མར་རྡོ་རྗེ་མ་དང་། དཀར་མོ་དང་།
ཆུང་མ་དང་། རྡོ་རྗེ་མཁའ་འགྲོ་མ་རྣམས་སོ། །རིམ་པ་གཉིས་པར་སྣ་ཚོགས་པདྨ་རྣམས་ཀྱི་ཤར་ལ་སོགས་པར་གཽ་རཱི་དང་ཆོམ་རྐུན་མ་དང་རོ་ལངས་མ་དང་གྷསྨ་རཱི་རྣམས་ཏེ། དབང་ལྡན་ལ་སོགས་པར་པུཀྐ་སཱི་དང་རི་ཁྲོད་མ་དང་གཏུམ་མོ་དང་གཡུང་མོ་རྣམས་སོ།
བདག་མེད་མའི་སྟེང་དུ་ཤར་གྱི་ངོས་ཀྱི་ཆུ་སྐྱེས་ལ་གནས་པའི་མཁའ་སྤྱོད་མ་སྟེ་སྟེང་ཞལ་ཅན་ནོ། །འོག་ཏུ་ནུབ་ཀྱི་ངོས་ཀྱིས་པདྨ་ལ་གནས་པའི་ས་སྤྱོད་མ་སྟེ་འོག་ཞལ་ཅན་ནོ། །འདིའི་ཕྱི་རིམ་ལ་གནས་པའི་གཽ་རཱི་ལ་སོགས་པ་བརྒྱད་ནི་ཕྱག་བཅུ་དྲུག་པའི་དཀྱིལ་འཁོར་བཞིན་དུ་སེར་པོ་ལ་
སོགས་པའི་མདོག་ཅན་ཏེ་གཞན་བདུན་ནི་སྔོན་མོའོ། །བཅོ་ལྔ་པོ་ཡང་སྐྱིལ་ཀྲུང་ཕྱེད་པས་རོ་དང་ཟླ་བ་ལ་གནས་པ་ཞལ་གཅིག་པ་སྤྱན་གསུམ་དམར་བ་དབུ་སྐྲ་དམར་སེར་གྱེན་དུ་བརྫེས་པ་སྟག་གི་པགས་པའི་ཤམ་ཐབས་ཅན། ཕྱག་བཞི་མ་གཡས་པ་དག་གིས་རྡོ་རྗེ་དང་གྲི་གུག །
གཡོན་པ་དག་གིས་ཐོད་པ་དང་སྟེང་དུ་སྒྲེང་བའི་ཁ་ཊྭཱཾ་ག་འཛིན་པ། དབུ་ལ་ཐོད་པ་ལྔའི་ཕྲེང་བ་ཅན་ཕྱག་རྒྱ་ལྔ་དང་ལྡན་པའོ། །མཚམས་རྣམས་སུ་གླིང་བུ་མ་ལ་སོགས་པ་བཞི་ནི་སྔ་མ་བཞིན་དུའོ། །སྒོ་རྣམས་ལ་ཤར་དུ་རྟ་གདོང་མ་དཀར་སྔོ་དང་ལྷོར་ཕག་གདོང་མ་སེར་སྔོ་དང་ནུབ་ཏུ་
ཁྱི་གདོང་མ་དམར་སྔོ་དང་། བྱང་དུ་སེང་གདོང་མ་ལྗང་སྔོ་སྟེ་བཞི་པོ་འདི་རྣམས་ཀྱང་གཡས་བརྐྱང་ཞིང་གཡོན་བསྐུམ་པས་ཉི་མ་ལ་གནས་པ་གཡས་པ་དང་གཡོན་པའི་ཕྱག་གཉིས་ཀྱིས་གྲི་གུག་དང་ཐོད་པ་འཛིན་པ་མིང་དང་རྗེས་སུ་མཐུན་པའི་ཞལ་གཅིག་མ་ཁ་དོག་གཉིས་གཉིས་

དང་ལྡན་པ། ཁྱད་པར་གཞན་རྣམས་ནི་བདག་མེད་མ་དང་མཚུངས་པ། བདག་མེད་མ་ལ་སོགས་པ་རྣམས་ནི་གོ་རིམས་ཇི་ལྟ་བ་བཞིན་དུ་མི་བསྐྱོད་པ་དང་རྟག་པ་དང་རིན་ཆེན་དབང་པོ་དང་སྣང་བ་མཐའ་ཡས་དང་དོན་ཡོད་གྲུབ་པ་དང་མི་བསྐྱོད་པ་དང་རྟག་པ་དང་རིན་ཆེན་དབང་པོ་དང་སྣང་བ་
མཐའ་ཡས་དང་མི་བསྐྱོད་པ་དང་རྟག་པ་དང་རིན་ཆེན་དབང་པོ་དང་སྣང་བ་མཐའ་ཡས་དང་རྣམ་པར་སྣང་མཛད་ཀྱིས་རྒྱས་བཏབ་པ་སྟེ། གླིང་བུ་མ་ལ་སོགས་པ་དང་རྟ་གདོང་མ་ལ་སོགས་པ་རྣམས་ལ་རྣམ་པར་སྣང་མཛད་དང་རིན་ཆེན་འབྱུང་ལྡན་དང་སྣང་བ་མཐའ་ཡས་དང་དོན་ཡོད་གྲུབ་པ་རྣམས་
ཀྱིས་སོ། །བདག་མེད་མའི་ཐུགས་ཀའི་ས་བོན་ནི་ཨོཾ་སྟེ་ཨོཾ་ཨཾ་སྭཱ་ཧཱ་ཞེས་པ་ནི་སྙིང་པོའོ། །ཨོཾ་ཨཾ་སྭཱ་ཧཱ། ཞེས་པ་ནི་གྷསྨ་རཱིའི་སྟེ་ལས་ཐམས་ཅད་པའི་སྔགས་སོ། །ཡང་བདག་མེད་མ་ལ་སོགས་པ་ལྷ་མོ་བཅོ་ལྔའི་དཀྱིལ་འཁོར་ཏེ། དེ་ཡང་ལྷ་མོ་ཐམས་ཅད་སྐུ་མདོག་ནག་མོ་
གཡས་པ་དང་གཡོན་པའི་ཕྱག་གཉིས་ཀྱིས་གྲི་གུག་དང་ཐོད་པ་འཛིན་པ་མཆོད་ཕྱིར་ཐོགས་པ་ཅན་ཁ་ཊྭཱཾ་ག་དང་བཅས་པ་སྟེ་གཞན་རྣམས་ནི་སྔ་མ་བཞིན་ནོ། །ཨོཾ་ཨཱཿབཛྲ་གྷསྨ་རཱི་ཨོཾ་ཧཱུཾ་སྭཱ་ཧཱ་ཞེས་པ་གྷསྨ་རཱིའི་སྔགས་ཏེ་ལས་ཐམས་ཅད་པའོ། །གང་གི་ཚེ་དཀྱིལ་འཁོར་གྱི་དབང་མོ་
ཀུ་རུ་ཀུ་ལླེར་གྱུར་པ་ན་སྐུ་མདོག་དམར་མོ་ཕྱག་བཞི་མ་གཡས་པ་དག་གིས་མདའ་དང་ལྕགས་ཀྱུ་གཡོན་པ་དག་གིས་ཨུཏྤལ་དམར་པོ་དང་གཞུ་འཛིན་པ། ཞལ་གཅིག་པ་སྤྱན་གསུམ་པ་སྣང་བ་མཐའ་ཡས་ཀྱིས་རིགས་ཀྱི་བདག་པོ་བྱས་པའོ། །རྡོ་རྗེ་མ་ལ་སོགས་པ་བཅུ་བཞིའང་
སྐུ་མདོག་དམར་མོ་ཕྱག་གཉིས་ཀྱིས་མདའ་དང་གཞུ་འཛིན་པ་སྟེ་བཅོ་ལྔ་པོ་ཐམས་ཅད་ཀྱང་པདྨ་དམར་པོ་དང་རོའི་སྙིང་གར་ཟླ་བ་ལ་སྐྱིལ་ཀྲུང་ཕྱེད་པས་གནས་པའོ། །ཀུ་རུ་ཀུལླེའི་ཐུགས་ཀའི་ས་བོན་ནི་ཧྲཱིཿའོ། །ཨོཾ་ཀུ་རུ་ཀུལླེ་ཧྲཱིཿསྭཱ་ཧཱ། སྙིང་པོའོ། །གཞན་ནི་སྔ་མ་བཞིན་དུ་
གྱུར་པ་དེའི་ཚེ་ཀུ་རུ་ཀུལླེའི་དཀྱིལ་འཁོར་དུ་འགྱུར་རོ། །རྡོ་རྗེ་བདུད་རྩིའི་དཀྱིལ་འཁོར་ནི་རྡོ་རྗེའི་གུར་གྱི་ནང་དུ་ཆོས་འབྱུང་གི་སྙིང་པོར་གནས་པའི་གཞལ་ཡང་ཁང་གི་དབུས་སུ་སྣ་ཚོགས་ཆུ་སྐྱེས་ཀྱི་ལྟེ་བར་ཟླ་བ་ལ་དཔལ་རྡོ་རྗེ་བདུད་རྩི་སེམས་དཔའི་སྐྱིལ་ཀྲུང་ཅན་མེ་ཏོག་པྲི་ཡང་ཀུ་ལྟ་

བུར་སྔོ་བསངས་རྩ་བ་དང་གཡས་པ་དང་ཅིག་ཤོས་ཀྱི་ཞལ་གསུམ་མེ་ཏོག་པྲི་ཡང་ཀུ་ལྟ་བུ་སྔོ་བསངས་དང་དཀར་པོ་དང་དམར་པོའོ། །སྣ་ཚོགས་པའི་ལག་གདུབ་དང་རྐང་གདུབ་ལ་སོགས་པ་དང་གོས་རྣམས་ཀྱིས་བརྒྱན་པ། ཕྱག་དྲུག་པ་རྡོ་རྗེ་དྲིལ་བུ་དང་བཅས་པའི་ཕྱག་
གཉིས་ཀྱིས་རང་འོད་ཀྱི་ཤེས་རབ་ལ་འཁྱུད་པ་གཡས་པ་དག་གིས་འཁོར་ལོ་དང་རལ་གྲི་དང་གཡོན་པ་དག་གིས་ཞགས་པ་དང་ལྕགས་ཀྱུ་འཛིན་པ་འོད་དམར་པོའི་དཀྱིལ་འཁོར་ཅན། ཞི་བ་དང་སྒེག་པའི་ཉམས་ཀྱི་ཕུང་པོ་ཅན་ནོ། །འདབ་མ་རྣམས་ལ་ཤར་དུ་ཞིབ་མོ་དཀར་མོ་དཀར་བ་དང་ནག་པ་
དང་དམར་བའི་ཞལ་གསུམ་མོ། །ལྷོར་ཞི་གདོང་མ་སེར་མོ་སེར་བ་དང་དཀར་བ་དང་དམར་བའི་ཞལ་གསུམ་མོ། །ནུབ་ཏུ་ཟླ་ལྡན་མ་དམར་མོ་དམར་བ་དང་གནག་པ་དང་དཀར་བའི་ཞལ་གསུམ་མོ། །བྱང་དུ་རི་བོང་ཅན་མ་ལྗང་གུ་ལྗང་བ་དང་དཀར་བ་དང་དམར་བའི་ཞལ་གསུམ་མོ། །མེར་ཟླ་
དཀྱིལ་མ་སྔོན་མོ་སྔོ་བ་དང་དཀར་བ་དང་དམར་བའི་ཞལ་གསུམ་མོ། །བདེན་བྲལ་དུ་ཟླ་ཚེས་མ་མེ་ཏོག་པྲི་ཡང་ཀུ་ལྟར་སྔོ་བསངས་སྔོ་བསངས་དང་དཀར་བ་དང་དམར་བའི་ཞལ་གསུམ་མོ། །རླུང་དུ་ཡིད་འོང་མ་ཨུཏྤ་ལ་སྔོན་པོའི་མདོག་ཅན་སྔོ་བ་དང་དཀར་བ་དང་དམར་བའི་ཞལ་གསུམ་མོ། །
དབང་ལྡན་དུ་ཡིད་ཚིམ་པར་བྱེད་མ་གསེར་གྱི་མདོག་ཅན་སེར་བ་དང་དཀར་བ་དང་དམར་བའི་ཞལ་གསུམ་མོ། །ལྷ་མོ་འདི་རྣམས་འཁོར་ལོའི་དབང་ཕྱུག་ལྟ་བུའི་ཕྱག་མཚན་འཛིན་པ་སྟེ། འོན་ཀྱང་འཁོར་ལོའི་གནས་སུ་ཟླ་བའི་དཀྱིལ་འཁོར་རོ། །ཟླ་ཚེས་མ་ནི་ཟླ་བའི་ཆ་གཅིག་
འཛིན་པའོ། །རིམ་པ་གཉིས་པར་དབང་ལྡན་གྱི་མཚམས་སུ་མེ་ཏོག་མ་དཀར་མོ་དཀར་པ་དང་གནག་པ་དང་དམར་བའི་ཞལ་གསུམ་མོ། །མེར་བདུག་སྤོས་མ་དུ་བའི་མདོག་ཅན་དུ་བའི་མདོག་དང་དཀར་བ་དང་དམར་བའི་ཞལ་གསུམ་མོ། །བདེན་བྲལ་དུ་མར་མེ་མ་གསེར་གྱི་
མདོག་ཅན་སེར་བ་དང་དཀར་བ་དང་གནག་པའི་ཞལ་གསུམ་མོ། །རླུང་དུ་དྲི་ཆབ་མ་དམར་མོ་དམར་བ་དང་དཀར་བ་དང་གནག་པའི་ཞལ་གསུམ་མོ། །འདི་རྣམས་ནི་རིམ་པ་ཇི་ལྟ་བ་བཞིན་དུ་གཡས་ཀྱི་ཕྱག་དང་པོས་མེ་ཏོག་གི་ཟ་མ་ཏོག་དང་སྤོས་ཕོར་དང་མར་མེའི་མཆོད་སྡོང་དང་དྲིའི་དུང་ཆོས་

འཛིན་པ་སྟེ་ཕྱག་ལྷག་མ་རྣམས་ཀྱིས་ནི་གཙོ་བོའི་ཕྱག་མཚན་ནོ། །དེ་ནས་ཤར་ལ་སོགས་པའི་སྣམ་བུ་ལ་གླིང་བུ་མ་དང་པི་ཝང་མ་དང་མུ་ཀུན་ད་མ་དང་རྫ་རྔ་མ་རྣམས་ནི་དམར་མོ་དང་སེར་མོ་དང་དཀར་མོ་དང་དུ་བའི་མདོག་ཅན་ཞལ་གཅིག་མ་ཕྱག་གཉིས་པ་གླིང་བུ་ལ་སོགས་པའི་སྒྲ་སྒྲོགས་པར་
བརྩོན་པའོ། །སྒོ་རྣམས་ལ་ཤར་དུ་ཁྲོ་གཉེར་རིམ་པར་ལྡན་ནམ་མཁའ་ལྟར་སྔོ་བསངས་དང་དཀར་པོ་དང་དམར་པོའི་ཞལ་གསུམ་པའོ། །ལྷོར་འཇིགས་སྡིགས་དཀར་བ་དཀར་པོ་དང་ནག་པོ་དང་དམར་པོའི་ཞལ་གསུམ་པའོ། །ནུབ་ཏུ་རྟའི་གཟུགས་དམར་པོ་དམར་པོ་དང་དཀར་པོ་དང་
ནག་པོའི་ཞལ་གསུམ་པའོ། །བྱང་དུ་ཚོགས་ཀྱི་གཙོ་བོ་ལྗང་གུ་ལྗང་གུ་དང་དཀར་པོ་དང་དམར་པོའི་ཞལ་གསུམ་པའོ། །འདི་རྣམས་ནི་འགྱིང་བའི་ཁྲོ་བོ་འགྱིང་བའི་རྐང་སྟབས་ཀྱིས་བཞུགས་པ་འཁོར་ལོའི་དབང་ཕྱུག་གི་ཕྱག་མཚན་འཛིན་པ་སྟེ། ཁྱད་པར་ནི་ཕྱག་གཡས་ཀྱི་དང་པོས་རིམ་པ་ཇི་ལྟ་
བར་ལྕགས་ཀྱུ་དང་ཞགས་པ་དང་ལྕགས་སྒྲོག་དང་དྲིལ་བུ་འཛིན་པ་མཆེ་བ་ཅུང་ཟད་གཙིགས་པའོ། །འདིར་ནི་འཁོར་ལོའི་དབང་པོའི་གཟུགས་བརྙན་དེ་བཞིན་གཤེགས་པ་ལྔ་དང་རྡོ་རྗེས་མཚན་པའི་རིན་པོ་ཆེ་སྣ་ཚོགས་པའི་ཅོད་པན་ནོ། །དེ་ལས་གཞན་པའི་ལྷ་ཉི་ཤུ་པོ་རྣམས་ནི་རྡོ་རྗེ་བདུད་
རྩི་དང་པོ་ཏིས་མཚན་པའི་རིན་པོ་ཆེའི་ཅོད་པན་ཟླ་བ་ལ་གནས་པ། གཙོ་བོ་ལྟ་བུར་རྣམ་པ་སྣ་ཚོགས་པའི་གོས་དང་རིན་པོ་ཆེ་ལ་སོགས་པས་བརྒྱན་པའོ། །མེ་ཏོག་ལ་སོགས་པ་བཅུ་གཉིས་པོ་རྣམས་ཀྱི་ཟླ་བའི་འོག་ཏུ་སྣ་ཚོགས་པདྨའོ། །རྡོ་རྗེ་བདུད་རྩིའི་ཐུགས་ཀའི་ས་བོན་ནི་ཧཿའོ། །
ཨོཾ་ཧཿབཛྲ་ཨ་མྲྀ་ཏ་སྭཱ་ཧཱ་ཞེས་པ་ནི་སྙིང་པོ་སྟེ་ལས་ཐམས་ཅད་པ་ཡང་འདི་ཉིད་དོ། །རྡོ་རྗེ་བདུད་རྩི་གཞན་གསུམ་འདི་ལྟར་རྣམ་པར་བསྒོམ་པའི་རིམ་པ་ནི་རྡོ་རྗེ་བདུད་རྩིའི་རྒྱུད་ལས་རིག་པར་བྱ་སྟེ་མངས་པས་འཇིགས་ནས་འདིར་མ་བཤད་དོ། །དགུའི་བདག་ཉིད་ཧེ་རུ་ཀ་བཞིའི་དཀྱིལ་
འཁོར་ནི་རྡོ་རྗེ་གུར་གྱི་ནང་དུ་ཆོས་ཀྱི་འབྱུང་གནས་ལ་གཞལ་ཡས་ཁང་ངོ་། །ཕྱག་བཅུ་དྲུག་པ་ལ་སླར་ཡང་འཇམ་པའི་རྡོ་རྗེའི་དཀྱིལ་འཁོར་ལྟ་བུའི་སྲུང་བའི་འཁོར་ལོ་རྩིབས་བཅུ་པ་ཡང་ཡོད་དོ་ཞེས་པ་ནི་ཕྱོགས་གཉིས་པའོ། །གཞལ་ཡས་ཁང་གི་དབུས་སུ་སྣ་ཚོགས་ཆུ་

སྐྱེས་ཀྱི་ལྟེ་བའི་སྟེང་དུ་གན་རྐྱལ་དུ་གནས་པའི་ཚངས་པ་དང་ཁྱབ་འཇུག་དང་དབང་ཕྱུག་དང་དབང་པོ་སྟེ། བདུད་བཞིའི་རང་བཞིན་ཅན་གྱི་སྙིང་གར་ཉི་མ་ལ་གནས་པའི་ཞབས་བཞི་པ་གཅེར་བུ་གར་གྱི་ཉམས་དགུ་དང་ལྡན་པ་ཞབས་གཉིས་སྐྱིལ་ཀྲུང་ཕྱེད་པ་དང་གཞན་གཉིས་གཡོན་
བསྐུམ་ཞིང་གཡས་བརྐྱང་བའི་གར་སྟབས་ཅན་སྣ་ཚོགས་རྡོ་རྗེས་མཚན་པའི་དབུ་སྐྲ་དམར་སེར་གྱེན་དུ་བརྫེས་པ། དཔྲལ་བའི་སྟེང་དུ་མི་མགོ་སྐམ་པོ་ལྔས་བརྒྱན་པ། སངས་རྒྱས་ལྔའི་ཅོད་པན་ཅན་སྐུ་མདོག་ནག་པོ་ཕྱག་བཅུ་དྲུག་པ་གད་རྒྱངས་དང་བཅས་པའི་ཞལ་བརྒྱད་པ་ཞལ་རེ་རེ་ལ་དམར་
ཞིང་ཟླུམ་པའི་སྤྱན་གསུམ་གསུམ་ཡོད་པ་རྩ་བའི་ཞལ་ནག་པོ་གཡས་པ་རྣམས་དཀར་པོ་དང་ནག་པོ་དང་ནག་པོ། གཡོན་པ་རྣམས་དམར་པོ་དང་ནག་པོ་དང་ནག་པོ་སྟེང་མ་དུ་བའི་མདོག་ཅན་རྣམ་པར་འགྱུར་བ། ཞལ་ཐམས་ཅད་སྨིན་མ་འཁྱོག་པོ་དང་བཅས་པ་ཁྲོ་གཉེར་ཅན་མཆེ་བའི་
མྱུ་གུ་གཙིགས་པ་ཕྱག་གཡས་པ་བརྒྱད་ཀྱིས་ཐོད་པ་རྣམས་ན་གླང་པོ་ཆེ་དང་རྟ་དང་བོང་བུ་དང་གླང་དང་རྔ་མོ་དང་མི་དང་ཤ་ར་བྷ་དང་བྱི་ལ་རྣམས་དང་། གཡོན་པ་བརྒྱད་ཀྱིས་ཐོད་པ་རྣམས་ན་ས་དང་ཆུ་དང་རླུང་དང་མེ་དང་ཟླ་བ་དང་ཉི་མ་དང་གཤིན་རྗེ་དང་ནོར་སྦྱིན་རྣམས་འཛིན་པ། འཁོར་ལོ་དང་རྣ་ཆ་དང་
མགུལ་རྒྱན་དང་ལག་གདུབ་དང་སྐ་རགས་དང་ཐལ་ཆེན་རྣམས་དང་མི་མགོ་རློན་པ་ཁྲག་འཛག་པ་ལྔ་བཅུའི་དོ་ཤལ་ཅན་དཔུང་རྒྱན་དང་རྐང་གདུབ་རྣམས་ཀྱིས་བརྒྱན་པའོ། །འདིའི་ཡུམ་ནི་བདག་མེད་མ་ནག་མོ་གཅེར་བུ་གྲི་གུག་དང་ཐོད་པར་ལྡན་པའི་ཕྱག་གཡས་པ་དང་གཡོན་པ་དག་གིས་
བཅོམ་ལྡན་འདས་ལ་ཡང་དག་པར་འཁྱུད་པ། གཡས་བསྐུམ་ཞིང་གཡོན་བརྐྱང་བའི་གར་སྟབས་ཅན་ཕྱག་རྒྱ་ལྔ་དང་ལྡན་པ། ཞལ་གཅིག་མ་མཆེ་བ་གཙིགས་མ་དམར་ལ་ཟླུམ་པའི་སྤྱན་གསུམ་དང་ལྡན་པ། དབུ་སྐྲ་དམར་སེར་འབར་ཞིང་གྱེན་དུ་བརྫེས་པ། དཔྲལ་བའི་མཚམས་
སུ་ཐོད་པ་ལྔས་བརྒྱན་པ། མགྲིན་པར་མི་མགོ་སྐམ་པོའི་ཕྲེང་བ་འཕྱང་བ་རྐང་གདུབ་ལ་སོགས་པས་བརྒྱན་པའོ། །ཤར་ལ་སོགས་པའི་ཕྱོགས་ཀྱི་འདབ་མར་གནས་པའི་ཚངས་བ་དང་དབང་པོ་དང་ཉེ་དབང་དང་དྲག་བོ་རྣམས་ཀྱི་སྙིང་གའི་སྟེང་དུ་ཟླ་བ་ལ་གཽ་རཱི་ལ་སོགས་པ་སྟེ་དབང་ལྡན་ལ་

སོགས་པའི་འདབ་མར་གནས་པའི་གཤིན་རྗེ་དང་ལུས་ངན་དང་སྲིན་པོ་དང་ཐགས་བཟངས་རིས་རྣམས་ཀྱི་སྙིང་གའི་སྟེང་དུ་ཟླ་བ་ལ་པུཀྐ་སཱི་ལ་སོགས་པའོ། །དེ་ལ་གཽ་རཱི་ནག་མོ་གཡས་པ་ན་གྲི་གུག་དང་གཡོན་པ་ན་ཉ་རོ་ཧི་ཏ་འཛིན་པའོ། །ཆོམ་རྐུན་མ་དམར་མོ་ཕྱག་གཡས་པ་དང་གཡོན་པ་དག་གིས་ཊ་
མ་རུ་དང་ཕག་པ་འཛིན་པའོ། །རོ་ལངས་མ་གསེར་གྱི་མདོག་ཅན་ཕྱག་གཡས་པ་དང་གཡོན་པ་དག་གིས་རུས་སྦལ་དང་པདྨའི་སྣོད་འཛིན་པའོ། །གྷསྨ་རཱི་ལྗང་གུ་ཕྱག་གཡས་པ་དང་གཡོན་པ་དག་གིས་སྦྲུལ་དང་རྣལ་འབྱོར་གྱི་སྣོད་འཛིན་པའོ། །པུཀྐ་སཱི་སྔོན་མོ་ཕྱག་གཡས་པ་དང་
གཡོན་པ་དག་གིས་སེང་གེ་དང་དགྲ་སྟ་འཛིན་པའོ། །རི་ཁྲོད་མ་དཀར་མོ་ཕྱག་གཡས་པ་དང་གཡོན་པ་དག་གིས་དགེ་སློང་དང་གསིལ་བྱེད་འཛིན་པའོ། །གཏུམ་མོ་ནམ་མཁའ་ལྟར་སྔོ་བསངས་ཕྱག་གཡས་པ་དང་གཡོན་པ་དག་གིས་འཁོར་ལོ་དང་ཐོང་གཤོལ་འཛིན་པའོ། །གཡུང་
མོ་སྣ་ཚོགས་པའི་མདོག་ཅན་ཕྱག་གཡས་པ་དང་གཡོན་པ་དག་གིས་རྡོ་རྗེ་དང་སྡིགས་མཛུབ་འཛིན་པའོ། །བརྒྱད་པོ་འདི་རྣམས་ནི་སྐྱིལ་ཀྲུང་ཕྱེད་པའི་གར་གྱིས་བཞུགས་པ་སྟེ། ཁྱད་པར་གཞན་རྣམས་ནི་སྔར་བརྗོད་པའི་བདག་མེད་མ་བཞིན་ནོ། །རིགས་ཀྱི་བདག་པོ་ནི་ཧེ་རུ་ཀ་དང་བདག་མེད་མ་
དག་གི་མི་བསྐྱོད་པའོ། །གཽ་རཱི་ལ་སོགས་པ་རྣམས་ཀྱི་མི་བསྐྱོད་པ་དང་རྣམ་པར་སྣང་མཛད་དང་རིན་ཆེན་འབྱུང་ལྡན་དང་སྣང་བ་མཐའ་ཡས་ཏེ་པུཀྐ་སཱི་ལ་སོགས་པ་རྣམས་ཀྱི་ཡང་ངོ་། །ཡང་ཕྱག་གཉིས་པ་དཀྱིལ་འཁོར་གྱི་གཙོ་བོར་གྱུར་པ་ན་གཡས་པས་རྡོ་རྗེ་གྱེན་དུ་འཕྱར་ཞིང་
གཡོན་པས་རྡོ་རྗེ་ཐོད་པ་འཛིན་པས་བདག་མེད་མ་ལ་འཁྱུད་པ། ཁ་ཊྭཱཾ་ག་ཡང་དཔུང་པ་གཡོན་པ་ལ་བརྟེན་པའོ། །ཡང་ཕྱག་བཞི་པ་འཁོར་ལོའི་དབང་ཕྱུག་ཏུ་གྱུར་པ་ན། ཕྱག་གཡས་པས་རྡོ་རྗེ་སྔོན་པོ་དང་གཡོན་པས་ཁྲག་གིས་གང་བའི་ཐོད་པ་འཛིན་པ། ཕྱག་ལྷག་མ་དག་གིས་
རྡོ་རྗེ་ཕག་མོ་ལ་འཁྱུད་པའོ། །ཡང་ཕྱག་དྲུག་པ་འཁོར་ལོའི་དབང་པོར་གྱུར་པ་ན་རྩ་བ་དང་གཡས་པ་དང་གཡོན་པའི་ཞལ་གསུམ་སྔོན་པོ་དང་དཀར་པོ་དང་དམར་པོ་ཕྱག་གཡས་པ་དག་གིས་རྡོ་རྗེ་དང་གྲི་གུག་དང་གཡོན་པ་དག་གིས་རྩེ་གསུམ་དང་དྲིལ་བུ་འཛིན་པ། ལྷག་མ་དག་གིས་རྡོ་རྗེ་

ལུ་གུ་རྒྱུད་མ་ལ་འཁྱུད་པ་སྟེ། རྡོ་རྗེ་ལུ་གུ་རྒྱུད་མ་ནི་སྐུ་མདོག་དང་ཞལ་དང་ཕྱག་ལ་སོགས་པ་བདག་མེད་མ་དང་མཚུངས་པར་ཡན་ལག་མེད་པའི་རྡོ་རྗེའི་ཞབས་ཀྱིས་གསུངས་པའོ། །ཕྱག་གཉིས་པ་ལ་སོགས་པ་འདི་རྣམས་སྣ་ཚོགས་ཆུ་སྐྱེས་ཀྱི་ཟེའུ་འབྲུ་ལ་རོའི་སྙིང་གར་ཉི་མ་ལ་
སྐྱིལ་ཀྲུང་ཕྱེད་པའི་གར་སྟབས་མཛད་པ། མི་བསྐྱོད་པས་རྒྱས་བཏབ་པ་སྣ་ཚོགས་རྡོ་རྗེས་མཚན་པའི་དབུ་སྐྲ་དམར་སེར་གྱེན་དུ་བརྫེས་པ། མི་མགོ་ལྔས་བརྒྱན་པ། སྨིན་མ་འཁྱོག་པ་དང་བཅས་པའི་ཁྲོ་གཉེར་ཅན། མཆེ་བ་གཙིགས་པ། ཕྱག་བཅུ་དྲུག་པ་རིམ་པ་བཞིན་དུ་འཁོར་ལོ་ལ་
སོགས་པས་བརྒྱན་པའོ། །གཽ་རཱི་ལ་སོགས་པའི་ལྷ་མོ་རྣམས་ཀྱིས་བསྐོར་བའོ། །ལྷ་མོ་ཐམས་ཅད་ནི་ཐབས་དང་བྲལ་བ་སྟེ་རྡོ་རྗེ་ཕག་མོ་དང་རྡོ་རྗེ་ལུ་གུ་རྒྱུད་ལ་ནི་མི་བསྐྱོད་པས་རྒྱས་བཏབ་པའོ། །ཀྱེའི་རྡོ་རྗེ་རྣམ་པ་བཞིའི་ཐུགས་ཀའི་ས་བོན་ནི་ཧཱུཾ་ངོ་། །ཨོཾ་དེ་བ་པི་ཙུ་བཛྲ་ཧཱུཾ་ཧཱུཾ་ཧཱུཾ་ཕཊ་
སྭཱ་ཧཱ། ཞེས་པ་ནི་ཕྱག་བཅུ་དྲུག་པའི་སྙིང་པོའོ། །ཨོཾ་ཏྲཻ་ལོཀྱ་ཨཱཀྵེ་པ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པ་ནི་ཕྱག་གཉིས་པའོ། །ཨོཾ་ཛྭ་ལ་ཛྭ་ལ་བྷྱོ་ཧཱུཾ་ཧཱུཾ་ཧཱུཾ་ཕཊ་ཅེས་པ་ཕྱག་བཞི་པའི་འོ། །ཨོཾ་ཀི་ཊི་ཀི་ཊི་བཛྲ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པ་ཕྱག་དྲུག་པའི་འོ། །ཨོཾ་ཨཱཿབཛྲ་གྷསྨ་རཱི་ཨོཾ་ཧཱུཾ་
སྭཱ་ཧཱ། ཞེས་པ་ནི་གྷསྨ་རཱིའི་སྟེ་ལས་ཐམས་ཅད་པའོ། །སྒྱུ་འཕྲུལ་ཆེན་མོའི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་གནས་པ་ནི་ཆོས་འབྱུང་གི་དབུས་སུ་གཞལ་ཡས་ཁང་སྟེ། ཁ་ཅིག་ནི་རྡོ་རྗེ་གུར་གྱི་ནང་དུ་ཆོས་འབྱུང་མེད་པར་གཞལ་ཡས་ཁང་ངོ་ཞེས་སོ། །གཞལ་ཡས་ཁང་གི་དབུས་
སུ་པདྨ་དམར་པོ་འདབ་མ་བརྒྱད་པའི་ལྟེ་བར་ཉི་མ་ལ་སྒྱུ་མ་ཆེན་པོ་ལས་བྱུང་བའི་ཧེ་རུ་ཀ་ནག་པོ་ཉི་མའི་འོད་ཟེར་ཅན་འབར་བའི་ཕྲེང་བ་འཁྲིགས་པ་འགྱིང་བའི་ཁྲོ་བོ་དབུ་སྐྲ་དམར་སེར་འབར་ཞིང་གྱེན་དུ་བརྫེས་པ། ཐོད་པའི་ཅོད་པན་ཅན་རྩ་བ་དང་གཡས་པ་དང་རྒྱབ་དང་གཡོན་པའི་ཞལ་བཞི་
སྔོན་པོ་དང་སེར་པོ་དང་དཀར་པོ་དང་ལྗང་གུ་ཞལ་རེ་རེ་ལ་དམར་ལ་ཟླུམ་པའི་སྤྱན་གསུམ་གསུམ་པ་ཕྱག་བཞི་པ་གཡས་པ་དག་གིས་ཐོད་པ་དང་མདའ། གཡོན་པ་དག་གིས་ཁ་ཊྭཱཾ་ག་དང་གཞུ་འཛིན་པ། ཕྱག་བཞི་དང་ལྡན་པ། མིའི་པགས་པའི་ན་བཟའ་འཛིན་པ། སྐྱིལ་ཀྲུང་ཕྱེད་པའི་

གར་གྱིས་བཞུགས་པའོ། །དཔལ་ལྡན་སངས་རྒྱས་མཁའ་འགྲོ་མ་ནི་སྐུ་མདོག་དམར་མོ་དམར་པོ་དང་སེར་པོ་དང་དཀར་པོ་དང་ལྗང་གུའི་ཞལ་ཅན་གཙོ་བོ་ལྟ་བུའི་མཚོན་ཆ་འཛིན་པ། ཕྱག་གཉིས་ཀྱིས་དེའི་མགུལ་ནས་འཁྱུད་པའོ། །འདབ་མ་རྣམས་ལ་ཤར་དུ་རྡོ་རྗེ་མཁའ་འགྲོ་མ་སྔོན་
མོ་སྔོན་པོ་དང་སེར་པོ་དང་དཀར་པོ་དང་ལྗང་གུའི་ཞལ་ཅན་རྡོ་རྗེ་དང་ཐོད་པ་དང་དྲིལ་བུ་དང་ཁ་ཊྭཱཾ་ག་འཛིན་པའོ། །ལྷོར་རིན་ཆེན་མཁའ་འགྲོ་མ་སེར་མོ་སེར་པོ་དང་སྔོན་པོ་དང་དཀར་པོ་དང་ལྗང་གུའི་ཞལ་ཅན། རིན་པོ་ཆེའི་པ་ཏྲ་དང་རྩེ་གསུམ་དང་མགྲིན་པ་བཙིར་བའི་ཅེ་སྤྱང་དང་བ་དན་འཛིན་པའོ། །ནུབ་ཏུ་
པདྨ་མཁའ་འགྲོ་མ་དཀར་མོ་དཀར་པོ་དང་སེར་པོ་དང་སྔོན་པོ་དང་ལྗང་གུའི་ཞལ་ཅན་སྣ་ཚོགས་པདྨ་དང་མདའ་དང་ཐོད་པ་དང་གཞུ་འཛིན་པའོ། །བྱང་དུ་སྣ་ཚོགས་མཁའ་འགྲོ་མ་ལྗང་གུ་ལྗང་གུ་དང་སེར་པོ་དང་དཀར་པོ་དང་སྔོན་པོའི་ཞལ་ཅན་རལ་གྲི་དང་ཌ་མ་རུ་དང་ཞགས་པ་དང་ཐོད་པ་འཛིན་པའོ། །
ཐམས་ཅད་ཕྱག་རྒྱ་ལྔ་དང་ལྡན་པ་ཟླ་བའི་གདན་དང་འོད་ཅན་ཏེ། འདི་རྣམས་ཀྱི་ཁྱད་པར་རྣམས་ནི་གཙོ་མོ་ལྟ་བུའོ། །རིགས་ཀྱི་བདག་པོ་ནི་བཅོམ་ལྡན་འདས་ཀྱི་མི་བསྐྱོད་པ་སྟེ། སངས་རྒྱས་མཁའ་འགྲོ་མ་ལ་སོགས་པ་རྣམས་ཀྱི་རིམ་པ་ཇི་ལྟ་བ་བཞིན་དུ་རྟག་པ་དང་མི་བསྐྱོད་པ་དང་རིན་ཆེན་
དབང་པོ་དང་གསུང་གི་དབང་ཕྱུག་དང་དོན་ཡོད་གྲུབ་པ་རྣམས་སོ། །བཅོམ་ལྡན་འདས་ཀྱི་ཐུགས་ཀའི་ས་བོན་ནི་ཧཱུཾ་ངོ་། །ཨོཾ་ཧཱུཾ་ཧཱུཾ་སྙིང་པོའོ། །རྡོ་རྗེ་མཁའ་འགྲོ་མ་ལ་སོགས་པ་རྣམས་ཀྱི་ཡང་ཨོཾ་ཨོཾ་ཧཱུཾ། ཨོཾ་ཧཱུཾ་ཧཱུཾ། ཨོཾ་སྭཱ་ཧཱུཾ། ཨོཾ་ཨཱཿཧཱུཾ། ཨོཾ་ཧཱ་ཧཱུཾ་ཞེས་པ་སྟེ་སྣ་ཚོགས་མཁའ་འགྲོ་མའི་
སྔགས་ནི་ལས་ཐམས་ཅད་པའི་འོ། །བཅོམ་ལྡན་འདས་སངས་རྒྱས་ཐོད་པའི་ལྷ་དགུའི་བདག་ཉིད་ཀྱི་དཀྱིལ་འཁོར་ནི། རྡོ་རྗེ་གུར་གྱི་ནང་དུ་ཆོས་འབྱུང་ལ་གནས་པའི་གཞལ་ཡས་ཁང་གི་དབུས་སུ་སྣ་ཚོགས་ཆུ་སྐྱེས་ཀྱི་ལྟེ་བ་ལ་རོའི་སྙིང་གར་ཉི་མ་ལ་ཤེས་རབ་མ་དང་བྲལ་བའི་བཅོམ་
ལྡན་འདས་ཏེ་སྐུ་མདོག་ལ་སོགས་པ་ནི་འཆད་པར་འགྱུར་བའི་འཁོར་ལོ་གསུམ་ལ་གནས་པའི་དཔལ་སངས་རྒྱས་ཐོད་པ་བཞིན་ནོ། །ཤར་དང་བྱང་དང་ནུབ་དང་ལྷོའི་འདབ་མ་རྣམས་ལ་རིམ་པ་ཇི་ལྟ་བ་བཞིན་དུ་སྣ་ཚོགས་སྡེ་མ་དང་འདོད་མ་དང་ས་འོག་ན་གནས་པ་མ་དང་ལེགས་བཟངས་མ་

རྣམས་ནི་སྐུ་མདོག་སྔོན་མོ་གཡས་བསྐུམ་ཞིང་གཡོན་བརྐྱང་བ། སྟག་གི་པགས་པའི་ཤམ་ཐབས་ཅན། ཕྱག་གཡས་པ་དག་གིས་གྲི་གུག་དང་ཐོད་པ། གཡོན་པ་དག་གིས་ཁ་ཊྭཱཾ་ག་དང་ཊ་མ་རུ་འཛིན་པའོ། །དབང་ལྡན་དང་མེ་ལྷ་དང་བདེན་བྲལ་དང་རླུང་གི་འདབ་མ་རྣམས་ལ་ཆང་འཚོང་
མ་དང་འབྱུང་མོ་དང་ཕྱག་བཞི་མ་དང་ནམ་མཁའ་ལ་གནས་མ་རྣམས་ནི་སེར་མོ་ན་བཟའ་སེར་པོ་གྱོན་པ་འོད་ཟེར་སེར་པོ་འཕྲོ་བ། ཞབས་གཉིས་གཡས་བརྐྱང་ཞིང་གཡོན་བསྐུམ་པ་ཀླུ་བརྒྱད་ཀྱིས་བརྒྱན་པ། ཕྱག་གཡས་པ་དག་གིས་གྲི་གུག་དང་ཌ་མ་རུ། གཡོན་པ་དག་གིས་ཁ་ཊྭཱཾ་ག་དང་པདྨའི་
སྣོད་འཛིན་པའོ། །བརྒྱད་པོ་འདི་རྣམས་ཀྱང་ཉི་མའི་དཀྱིལ་འཁོར་ལ་གར་གྱི་ཚུལ་གྱིས་གནས་པ། དབུ་སྐྲ་དམར་སེར་འབར་ཞིང་གྱེན་དུ་བརྫེས་པ། དབུ་ལ་ཐོད་པ་ལྔའི་ཕྲེང་བ་དང་ལྡན་པ། ཕྱག་རྒྱ་ལྔ་ལ་སོགས་པས་བརྒྱན་པ། མི་མགོ་རློན་པ་ལྔ་བཅུ་མགུལ་དུ་འཆང་བ། མཆེ་བ་ཅུང་ཟད་
གཙིགས་པའི་ཞལ་གཅིག་པ་སྤྱན་གསུམ་པ་ཕྱག་བཞི་པའོ། །བཅོམ་ལྡན་འདས་ལ་མི་བསྐྱོད་པ་ལ་སོགས་པའི་སངས་རྒྱས་ལྔས་རྒྱས་བཏབ་པ་སྟེ། སྣ་ཚོགས་སྡེ་མ་ལ་སོགས་པ་རྣམས་ལ་མི་བསྐྱོད་པ་དང་རྣམ་པར་སྣང་མཛད་དང་རིན་ཆེན་འབྱུང་ལྡན་དང་སྣང་བ་མཐའ་ཡས་རྣམས་ཀྱིས་སོ། །ཆང་
འཚོང་མ་ལ་སོགས་པ་རྣམས་ཀྱི་ཡང་དེ་རྣམས་ཉིད་དོ། །ཡང་ན་བཅོམ་ལྡན་འདས་འདི་དང་ཕྱོགས་ཀྱི་ལྷ་མོ་རྣམས་ཀྱང་དཀར་པོ་སྟེ་མཚམས་ཀྱི་ལྷ་མོ་རྣམས་དམར་མོའོ། །འདི་ནི་ཡུམ་དང་བྲལ་བ་འམ་ཡུམ་དང་བཅས་པའོ། །རྡོ་རྗེ་ཧཱུཾ་མཛད་ཀྱི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་ཆོས་
འབྱུང་ལ་གཞལ་ཡས་ཁང་གི་དབུས་སུ་སྣ་ཚོགས་ཆུ་སྐྱེས་དང་ཉི་མའི་སྟེང་དུ་གཡོན་བསྐུམ་ཞིང་གཡས་བརྐྱང་བའི་ཞབས་དག་གིས་འཇིགས་བྱེད་དང་དུས་མཚན་མནན་པའི་བཅོམ་ལྡན་འདས་འཇིག་རྟེན་གསུམ་ལས་རྣམ་པར་རྒྱལ་བ་ཁྲོ་བོ་བསྐལ་པའི་དུས་ཀྱི་མེ་ལྟར་འོད་ཟེར་འབར་ཞིང་འགྲོ་
བ་མ་ལུས་པའི་བགེགས་ཀྱི་ཚོགས་ཐམས་ཅད་རབ་ཏུ་གསོལ་བར་མཛད་པ། སྐུ་མདོག་སྔོན་པོ་རྣམ་པར་འགྱུར་ཞིང་གདངས་པའི་ཞལ་གསུམ་པ། རྩ་བ་དང་གཡས་པ་དང་གཡོན་པའི་ཞལ་རྣམས་སྔོན་པོ་དང་སེར་པོ་དང་ལྗང་གུ་མཆེ་བ་གཙིགས་ཤིང་རབ་ཏུ་གཏུམ་པ། ལྗགས་འདྲིལ་

ཞིང་ཤིན་ཏུ་འཇིགས་སུ་རུང་བ་ཞལ་རེ་རེ་ཞིང་དམར་ལ་ཟླུམ་པའི་སྤྱན་གསུམ་གསུམ་པ་སྨིན་མ་གཡོ་བ་དང་བཅས་པའི་ཁྲོ་གཉེར་ཅན་དཔྲལ་བའི་སྟེང་ན་ཐོད་པ་ལྔའི་ཕྲེང་བ་དང་ལྡན་པ། ཁྲག་འཛག་པའི་མི་མགོ་ལྔ་བཅུའི་ཕྲེང་བ་མགུལ་བར་འཕྱང་བ། ཕྱག་རྒྱ་དྲུག་དང་ལྡན་པ། ཀླུ་མཐའ་ཡས་སྔོན་པོས་
དབུ་སྐྲ་དམར་སེར་གྱེན་དུ་འབར་བ་བཅིངས་པ། འཇོག་པོ་དམར་པོས་རྣ་རྒྱན་བྱས་པ། པདྨ་ཆེན་པོ་པདྨའི་རྩ་བ་ལྟ་བུ་དཀར་པོས་མགུལ་རྒྱན་བྱས་པ། སྟོབས་ཀྱི་རྒྱུ་དཱུར་བ་ལྟ་བུ་ལྗང་གུས་མཆོད་ཕྱིར་ཐོགས་བྱས་པ། ནོར་རྒྱས་དཀར་པོས་སྐ་རགས་བྱས་པ། པདྨ་དཀར་པོ་ཀུནྡའི་མེ་
ཏོག་ལྟར་མཛེས་པས་རྐང་གདུབ་བྱས་པ། དུང་སྐྱོང་སེར་པོས་ལག་གདུབ་བྱས་པ། རིགས་ལྡན་དུ་བ་ལྟ་བུ་ཁྲ་བོས་དཔུང་རྒྱན་བྱས་པ། རྡོ་རྗེ་སེམས་དཔས་རྒྱས་བཏབ་པ། རྡོ་རྗེ་དང་དྲིལ་བུ་འཛིན་པའི་ཕྱག་དག་གིས་འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་མཛད་པས་རང་དང་
འདྲ་བའི་ཤེས་རབ་མ་ལ་སྙོམས་པར་འཇུག་པ། ཕྱག་གཡས་པ་དག་གིས་ལྕགས་ཀྱུ་དང་ཞགས་པ། གཡོན་པ་དག་གིས་ཐོད་པ་དང་ཁ་ཊྭཱཾ་ག་འཛིན་པའོ། །འདིའི་ཤར་ཕྱོགས་སུ་རྡོ་རྗེ་དབྱུག་པ་སྔོན་པོ་རྩ་བ་དང་གཡས་པ་དང་གཡོན་པའི་ཞལ་རྣམས་སྔོན་པོ་དང་སེར་པོ་དང་ལྗང་གུ། ཕྱག་
གཡས་པ་དག་གི་རྡོ་རྗེ་ཐོ་བ་དང་སྡིགས་མཛུབ་དང་བཅས་པའི་རྡོ་རྗེ་གྱེན་དུ་འཕྱར་བ། གཡོན་པ་དག་གིས་ཐོད་པ་དང་ཁ་ཊྭཱཾ་ག་འཛིན་པའོ། །བྱང་དུ་རྡོ་རྗེ་ཉི་མ་སེར་པོ་དང་སྔོན་པོ་དང་ལྗང་གུའི་ཞལ་ཅན། ཕྱག་དང་པོས་རྡོ་རྗེ་དབྱུག་པ་འཛིན་པའོ། །རྡོ་རྗེ་ལ་སོགས་པའི་ཕྱག་མཚན་རྣམས་
ནི་རྡོ་རྗེ་དབྱུག་པའི་ལྟ་བུ་སྟེ་འཆད་པར་འགྱུར་བ་གཞན་རྣམས་ཀྱང་ངོ་། །ནུབ་ཏུ་རྡོ་རྗེ་གཙུག་ཏོར་དམར་པོ་དམར་པོ་དང་དཀར་པོ་དང་ལྗང་གུའི་ཞལ་ཅན་ཕྱག་ན་པདྨ་དམར་པོའོ། །ལྷོར་རྡོ་རྗེ་འཁྱིལ་པ་ལྗང་གུ་ལྗང་གུ་དང་དཀར་པོ་དང་སེར་པོའི་ཞལ་ཅན་ཕྱག་ན་སྣ་ཚོགས་རྡོ་རྗེས་མཚན་
པའོ། །མེར་རྡོ་རྗེ་གནོད་སྦྱིན་དུ་བའི་མདོག་ཅན་དུ་བའི་མདོག་དང་སེར་པོ་དང་ལྗང་གུའི་ཞལ་ཅན་ལྕགས་ཀྱུ་འཛིན་པའོ། །བདེན་བྲལ་དུ་རྡོ་རྗེ་དུས་དམར་པོ་དམར་པོ་དང་སེར་པོ་དང་ལྗང་གུའི་ཞལ་ཅན་ཕྱག་ན་དགྲ་སྟའོ། །རླུང་དུ་ནག་པོ་ཆེན་པོ་སྔོན་པོ་སྔོན་པོ་དང་སེར་པོ་དང་ལྗང་གུའི་ཞལ་ཅན་ཕྱག་

ན་རྩེ་གསུམ་མོ། །དབང་ལྡན་དུ་རྡོ་རྗེ་འཇིགས་རུང་ནག་པོ་མིག་ཡོན་ནག་པོ་དང་སེར་པོ་དང་ལྗང་གུའི་ཞལ་ཅན་ཕྱག་ན་རལ་གྲིའོ། །རྡོ་རྗེ་དབྱུག་པ་ལ་སོགས་པ་བརྒྱད་པོ་འདི་རྣམས་ནི་གོ་རིམས་ཇི་ལྟ་བ་བཞིན་གཤིན་རྗེ་མཐར་བྱེད་དང་ཤེས་རབ་མཐར་བྱེད་དང་པདྨ་མཐར་བྱེད་དང་བདུད་རྩི་འཁྱིལ་
པ་དང་འདོད་པའི་རྒྱལ་པོ་དང་དབྱུག་སྔོན་ཅན་དང་སྟོབས་པོ་ཆེ་དང་མི་གཡོ་བ་རྣམས་ཀྱི་མིང་གཞན་ནོ། །སྟེང་དུ་གཙུག་ཏོར་འཁོར་ལོས་སྒྱུར་བ་དཀར་པོ་དཀར་པོ་དང་སྔོན་པོ་དང་ལྗང་གུའི་ཞལ་ཅན་ཕྱག་ན་འཁོར་ལོའོ། །འོག་ཏུ་རྡོ་རྗེ་ས་འོག་མ་གནོད་མཛེས་ཀྱི་མིང་གི་རྣམ་གྲངས་ཅན་སྔོན་པོ་སྔོན་པོ་དང་སེར་པོ་དང་
ལྗང་གུའི་ཞལ་ཅན་ཕྱག་ན་རོལ་པ་དང་བཅས་པའི་རྡོ་རྗེའི་གཏུན་ཤིང་སྟེ། འདིའི་ཕྱག་གཡོན་པ་ན་ཀླུའི་ཞགས་པ་སྡིགས་མཛུབ་དང་བཅས་པ་དང་ཁ་ཊྭཱཾ་གའོ། །རྡོ་རྗེ་དབྱུག་པ་ལ་སོགས་པའི་ཁྲོ་བོ་འདི་རྣམས་ཕྱག་མཚན་གྱི་གཙོ་བོ་དང་ཐོད་པས་མཚན་པའི་ཕྱག་དག་གིས་རང་འོད་ཀྱི་ཤེས་རབ་མ་ལ་འཁྱུད་
པ། དབུ་སྐྲ་དམར་སེར་འབར་ཞིང་གྱེན་དུ་འཁྱིལ་པ་རང་རང་གི་རིགས་ཀྱི་བདག་པོའི་ཅོད་པན་མཛེས་པར་བརྒྱན་པ། སྨིན་མ་གཡོ་བ་དང་བཅས་པའི་ཁྲོ་གཉེར་ཅན། ཞལ་མཆེ་བ་གཙིགས་པ། ཞལ་རེ་རེ་ལ་དམར་ཞིང་ཟླུམ་པའི་སྤྱན་གསུམ་པ། མི་མགོའི་ཕྲེང་བ་དང་ཕྱག་རྒྱ་ལྔ་ལ་སོགས་པ་དང་
ཀླུའི་རྒྱལ་པོ་བརྒྱད་ཀྱིས་བརྒྱན་པ། སྣ་ཚོགས་ཆུ་སྐྱེས་དང་ཉི་མ་རྣམས་ལ་གནས་པའི་ཕྱོགས་སྐྱོང་བརྒྱད་དང་། སྟེང་དུ་ཚངས་པ་དང་འོག་ཏུ་ཐགས་བཟངས་རིས་རྣམས་མནན་པའི་གཡས་བརྐྱང་གིས་བཞུགས་པ་རང་གི་རིགས་ཀྱི་བདག་པོས་རྒྱས་བཏབ་པ་སྟེ། འཇམ་པའི་རྡོ་རྗེའི་དཀྱིལ་འཁོར་
གྱི་རྩིབས་བཅུ་པའི་འཁོར་ལོ་ཇི་ལྟ་བ་བཞིན་ནོ། །བཅོམ་ལྡན་འདས་རྡོ་རྗེ་ཧཱུཾ་མཛད་ཀྱི་ཐུགས་ཀའི་ས་བོན་ནི་ཧཱུཾ་ངོ་། །ཨོཾ་ཁ་བཛྲ་དྷྲྀཀ་བཛྲ་ཧཱུཾ་ཕཊ་ཅེས་པ་ནི་སྙིང་པོའོ། །ཨོཾ་བཛྲ་ཀུཎྜ་ལི་བཛྲ་ཧཱུཾ་ཕཊ་ཅེས་པ་ནི་རྡོ་རྗེ་འཁྱིལ་པའི་སྔགས་ཏེ་ལས་ཐམས་ཅད་པའོ། །ཡང་ན་ཤར་ལ་སོགས་པའི་
ཕྱོགས་དང་མཚམས་དང་སྟེང་དང་འོག་ཏུ་སྣ་ཚོགས་པདྨ་དང་ཉི་མ་རྣམས་ལ་གཡས་སྐོར་གྱིས་གཤིན་རྗེ་མཐར་བྱེད་ལ་སོགས་པའི་ཁྲོ་བོ་བཅུ་སྟེ་འདི་དག་ཐམས་ཅད་ཀྱི་གནས་དང་སྐུ་མདོག་ལ་སོགས་པ་ནི་བསྡུས་པའི་རིམ་པའི་དཀྱིལ་འཁོར་དུ་གསུངས་པ་ཇི་ལྟ་བ་བཞིན་ནོ། །ཡང་ན་

འཇམ་པའི་རྡོ་རྗེའི་དཀྱིལ་འཁོར་གྱི་རྩིབས་བཅུ་པའི་འཁོར་ལོ་ཇི་ལྟ་བ་བཞིན་ནོ། །ཡང་ན་དཔལ་ཀུན་དུ་ཁ་སྦྱོར་གྱི་རྡོ་རྗེ་སེམས་དཔའི་དཀྱིལ་འཁོར་ཇི་ལྟ་བ་བཞིན་ནོ། །ཕྱོགས་འདི་གསུམ་ཀ་ལ་ཡང་ཨོཾ་ཨཱཿབིགྷཱནྟ་ཀྲྀཏ་ཧཱུཾ་ཕཊ། ཅེས་པ་ནི་བགེགས་མཐར་བྱེད་ཀྱི་སྔགས་ཏེ་ལས་ཐམས་ཅད་པའོ།། །།
བདེ་མཆོག་གི་དཀྱིལ་འཁོར་ནི་རྡོ་རྗེ་གུར་གྱི་ནང་རི་རབ་ཀྱི་སྟེང་དུ་སྣ་ཚོགས་ཆུ་སྐྱེས་ཀྱི་ཟེའུ་འབྲུ་ལ་སྣ་ཚོགས་རྡོ་རྗེའི་ལྟེ་བར་གནས་པའི་གཞལ་ཡས་ཁང་གི་དབུས་སུ་བཅོམ་ལྡན་འདས་ཏེ་གཡས་བརྐྱང་གི་ཞབས་དག་གིས་སྣ་ཚོགས་པདྨའི་ལྟེ་བའི་སྟེང་དུ་ཉི་མ་ལ་གནས་པའི་འཇིགས་བྱེད་དང་དུས་
མཚན་མནན་པ། སྐུ་མདོག་ནག་པོ་ཤར་དང་བྱང་ལ་སོགས་པའི་ཞལ་ནི་ནག་པོ་དང་ལྗང་གུ་དང་དམར་པོ་དང་སེར་པོའོ། །ཞལ་རེ་རེ་ལ་སྤྱན་གསུམ་གསུམ་པ། སྟག་གི་པགས་པའི་ཤམ་ཐབས་ཅན་ཕྱག་བཅུ་གཉིས་པ་རྡོ་རྗེ་དང་དྲིལ་བུར་བཅས་པའི་ཕྱག་གིས་རྡོ་རྗེ་ཕག་མོ་ལ་འཁྱུད་པ།
ཕྱག་གཉིས་ཀྱིས་རྒྱབ་ཏུ་གླང་པོ་ཆེ་དཀར་པོའི་པགས་པ་ཁྲག་དང་བཅས་པ་བརྒྱངས་ནས་འཛིན་པ། དེ་དག་ལས་གཞན་པའི་ཕྱག་གཡས་པ་རྣམས་ཀྱིས་ཌ་མ་རུ་དང་དགྲ་སྟ་དང་གྲི་གུག་དང་རྩེ་གསུམ་པ་དང་། གཡོན་པ་རྣམས་ཀྱིས་རྡོ་རྗེས་མཚན་པའི་ཁ་ཊྭཱཾ་ག་དང་ཁྲག་གིས་གང་བའི་ཐོད་པ་
དང་རྡོ་རྗེ་ཞགས་པ་དང་ཚངས་པའི་མགོ་བོ་འཛིན་པ། འཛག་པའི་མི་མགོ་ལྔ་བཅུའི་ཕྲེང་བ་མགུལ་དུ་འཕྱང་བ། ཕྱག་རྒྱ་དྲུག་དང་ལྡན་པ་མིའི་རྒྱུས་པས་མཆོད་ཕྱིར་ཐོགས་བྱས་པ་དཔྲལ་བའི་སྟེང་དུ་ཐོད་པ་ལྔ་དང་ལྡན་པ། ནོར་བུ་དང་གཡོན་ངོས་སུ་གནས་པའི་ཟླ་བ་ཕྱེད་པ་དང་སྣ་ཚོགས་
རྡོ་རྗེ་རྣམས་ཀྱིས་མནན་པའི་རལ་པའི་ཐོར་ཅོག་ནག་པོ་ཅན། རྣམ་པར་འགྱུར་ཞིང་གདངས་པའི་ཞལ་མཆེ་བ་གཙིགས་པ། གར་གྱི་ཉམས་དགུའི་ཚོགས་དང་ལྡན་པའོ། །རྡོ་རྗེ་ཕག་མོ་ནི་དམར་མོ་ཞལ་གཅིག་མ་སྤྱན་གསུམ་པ་སྐྲའི་ཚོགས་གྲོལ་བ་གཅེར་བུ་ཐོད་པའི་དུམ་བུས་རྐེད་
པའི་རྒྱན་བྱས་པ། འཁྱུད་པའི་ཕྱག་གིས་གཟུང་བའི་ཐོད་པ་ཁྲག་གིས་གང་བ་འཛག་པའི་རྒྱུན་གཙོ་བོའི་ཞལ་དུ་སྟོབས་པ། སྡིགས་མཛུབ་དང་བཅས་པའི་རྡོ་རྗེ་སྟེང་དུ་འཕྱར་བས་གདུག་པ་ཅན་རྣམས་བསྡིགས་པ། ཁྲག་དང་བྲལ་བའི་མི་མགོ་སྐམ་པོའི་ཕྲེང་བ་ཅན། ཉི་མའི་

འོད་ཀྱི་དཀྱིལ་འཁོར་ཅན་ཕྱག་རྒྱ་ལྔ་དང་ལྡན་པ། ཅུང་ཟད་བཞད་པ་ཟླ་མཚན་འབབ་པ་དང་བཅས་ཤིང་བ་སྤུ་གྱེན་དུ་ལངས་པའོ། །དེ་ནས་ཤར་ལ་སོགས་པའི་ཕྱོགས་རྣམས་ལ་གཡོན་སྐོར་གྱིས་དང་། མེ་ལ་སོགས་པའི་མཚམས་རྣམས་ལ་གཡས་སྐོར་གྱིས་དགོད་པར་བྱའོ། །
དེ་ལ་ཕྱོགས་ཀྱི་འདབ་མ་རྣམས་སུ་མཁའ་འགྲོ་མ་དང་ལཱ་མ་དང་དུམ་སྐྱེས་མ་དང་གཟུགས་ཅན་མ་རྣམས་ནི་ནག་མོ་དང་ལྗང་གུ་དང་དམར་མོ་དང་སེར་མོའི་མདོག་ཅན་ཞལ་གཅིག་མ་སྤྱན་གསུམ་མ་སྐྲ་གྲོལ་བ། ཕྱག་བཞི་མ་གཡོན་པ་དག་གིས་ཁ་ཊྭཱཾ་ག་དང་ཐོད་པ་དང་། གཡས་པ་དག་གིས་
ཌ་མ་རུ་དང་གྲི་གུག་འཛིན་པ་གཡས་བརྐྱང་གིས་གནས་པའོ། །མཚམས་ཀྱི་འདབ་མ་རྣམས་ལ་བྱང་ཆུབ་ཀྱི་སེམས་དང་ཁྲག་དང་བདུད་རྩི་དང་སྒྲོན་མ་ལྔ་རྣམས་གྲུབ་པའི་དངུལ་ཆུ་ལྟ་བུའི་བདུད་རྩིར་གྱུར་པས་གང་བའི་པདྨའི་སྣོད་རྣམས་ཏེ། ཡང་ན་བཞི་ཆར་ཡང་བདུད་རྩི་ལྔས་གང་བའོ། །
དེ་ནས་ཐུགས་ཀྱི་འཁོར་ལོ་ལ་རྩིབས་རྣམས་སུ་ཤར་དུ་ཐོད་པའི་དུམ་བུ་དང་རབ་ཏུ་གཏུམ་མོ། བྱང་དུ་ཀེང་རུས་ཆེན་པོ་དང་གཏུམ་པའི་མིག་ཅན་མ། ནུབ་ཏུ་ཀེང་རུས་དང་འོད་ལྡན་མ། ལྷོར་མཆེ་བ་རྣམ་པར་གཙིགས་མ་དང་སྣ་ཆེན་མོ། མེར་ཆང་དགྲ་དང་བརྟན་པའི་བློ་ཅན་མ།
བདེན་བྲལ་དུ་འོད་དཔག་མེད་དང་མིའུ་ཐུང་མ། རླུང་དུ་རྡོ་རྗེའི་འོད་དང་ལངྐའི་དབང་ཕྱུག་མ། དབང་ལྡན་དུ་རྡོ་རྗེའི་སྐུ་དང་ཤིང་གྲིབ་མའོ། །རིམ་པ་དེ་བཞིན་དུ་གསུང་གི་འཁོར་ལོ་ལ་མྱུ་གུ་ཅན་དང་ས་སྲུང་མ་དང་། རྡོ་རྗེ་རལ་པ་ཅན་དང་འཇིགས་བྱེད་ཆེན་མོ་དང་དཔའ་བོ་ཆེན་མོ་དང་རླུང་གི་
ཤུགས་ཅན་མ་དང་རྡོ་རྗེ་ཧཱུཾ་མཛད་དང་ཆང་འཐུང་མ་དང་ཤིན་ཏུ་བཟང་མོ་དང་སྔོ་བསངས་ལྷ་མོ་དང་རྡོ་རྗེ་བཟང་པོ་དང་ཤིན་ཏུ་བཟང་མོ་དང་འཇིགས་བྱེད་ཆེན་པོ་དང་རྟ་རྣ་མ་དང་མིག་མི་བཟང་དང་བྱ་གདོང་མའོ། །དེ་བཞིན་དུ་སྐུའི་དཀྱིལ་འཁོར་ལ་སྟོབས་པོ་ཆེ་དང་འཁོར་ལོའི་ཤུགས་
ཅན་མ་དང་རིན་ཆེན་རྡོ་རྗེ་དང་དུམ་སྐྱེས་མ་དང་རྟ་མགྲིན་དང་ཆང་འཚོང་མ་དང་ནམ་མཁའི་སྙིང་པོ་དང་འཁོར་ལོའི་གོ་ཆ་མ་དང་དཔལ་ཧེ་རུ་ཀ་དང་ཤིན་ཏུ་དཔའ་མོ་དང་པདྨ་གར་གྱི་དབང་ཕྱུག་དང་སྟོབས་ཆེན་མ་དང་རྣམ་པར་སྣང་མཛད་དང་འཁོར་ལོས་སྒྱུར་མ་དང་རྡོ་རྗེ་སེམས་དཔའ་དང་བརྩོན་

འགྲུས་ཆེན་མོའོ། །དེ་ལ་ཐོད་པའི་དུམ་བུ་ལ་སོགས་པའི་དཔའ་བོ་རྣམས་ནི་ཞལ་གཅིག་པ་སྤྱན་གསུམ་པ་རལ་པའི་ཐོར་གཙུགས་ཅན་དཔྲལ་བར་གནས་ཤིང་། རྡོ་རྗེས་མཚན་པའི་དཔའ་བོའི་དར་དཔྱང་དང་ལྡན་པ་ཕྱག་བཞིས་འཁྱུད་པའི་ཕྱག་གཉིས་རྡོ་རྗེ་དང་དྲིལ་བུ་འཛིན་པ། གཡོན་
པས་ཁ་ཊྭཱཾ་ག་དང་གཡས་པས་ཌ་མ་རུ་འཛིན་པ། ཚངས་པའི་སྐུད་པ་ཅན་དཔུང་རྒྱན་དང་ལྡན་པ་མཆེ་བ་གཙིགས་པའི་ཞལ་ཅན་ཕྱག་རྒྱ་ལྔ་དང་ལྡན་པ་གཡས་བརྐྱང་གིས་གནས་པའོ། །རབ་ཏུ་གཏུམ་མོ་ལ་སོགས་པའི་ལྷ་མོ་རྣམས་ནི་ཞལ་གཅིག་པ་སྤྱན་གསུམ་པ་དྲག་པའི་གཟུགས་ཅན་མ། སྐྲ་
གྲོལ་བ་གཅེར་བུ་ཕྱག་གཉིས་མ་འཁྱུད་པའི་ཕྱག་གིས་ཐོད་པ་དང་གཡས་པས་གདུག་པ་ཅན་བསྡིགས་པར་བྱེད་པའི་གྲི་གུག་འཛིན་པའོ། །སྒོ་རྣམས་ལ་ཁྭ་གདོང་མ་དང་འུག་གདོང་མ་དང་ཁྱི་གདོང་མ་དང་ཕག་གདོང་མ་ལ་སོགས་པ་རྣམས་ནི་མཁའ་འགྲོ་མ་ལ་སོགས་པ་བཞིན་ཏེ་འདི་རྣམས་
ཀྱི་ཞལ་ནི་མིང་དང་རྗེས་སུ་མཐུན་པའོ། །མཚམས་རྣམས་སུ་གཤིན་རྗེ་བརྟན་མ་དང་གཤིན་རྗེ་ཕོ་ཉ་མོ་དང་གཤིན་རྗེ་མཆེ་བ་མོ་དང་གཤིན་རྗེ་འཇོམས་མ་རྣམས་ནི་མིའི་ཞལ་ཅན་ཏེ། གཡས་དང་གཡོན་གྱི་སྐུ་ཕྱེད་དེ་གཡས་དང་གཡོན་གྱི་ལྷ་མོ་རྣམས་ཀྱི་སྐུ་དང་འདྲ་བའོ། །བརྒྱད་པོ་
འདི་རྣམས་ནི་རོའི་གདན་ཅན་ཉིད་དོ། །མཁའ་འགྲོ་མ་ལ་སོགས་པའི་ལྷ་མོ་ཐམས་ཅད་ཀྱང་འཛག་པའི་མི་མགོའི་ཕྲེང་བ་མགུལ་དུ་འཆང་བ། རྡོ་རྗེའི་ཕྲེང་བས་དཔྲལ་བ་མཚན་པ། ཕྱག་རྒྱ་ལྔ་དང་ལྡན་པ་སྐ་རགས་ལ་སྒྲ་དང་བཅས་པའི་གཡེར་ཁ་ལ་སོགས་པས་བརྒྱན་པའོ། །རིགས་
ཀྱི་བདག་པོ་ནི་བཅོམ་ལྡན་འདས་ཀྱི་མི་བསྐྱོད་པ་སྟེ་རྡོ་རྗེ་ཕག་མོའི་རྣམ་པར་སྣང་མཛད་དང་མཁའ་འགྲོ་མ་ལ་སོགས་པའི་རིན་ཆེན་དབང་ཕྱུག་གོ། །ཐུགས་དང་གསུང་དང་སྐུའི་འཁོར་ལོ་རྣམས་ཀྱི་མི་བསྐྱོད་པ་དང་སྣང་བ་མཐའ་ཡས་དང་རྟག་པ་རྣམས་ཏེ་དམ་ཚིག་གི་འཁོར་ལོ་ལ་གནས་པ་
རྣམས་ཀྱི་ནི་དོན་ཡོད་གྲུབ་པའོ། །བཅོམ་ལྡན་འདས་ཀྱི་ཐུགས་ཀའི་ས་བོན་ནི་ཧཱུཾ་ངོ་། །ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུཾ་ཧཱུཾ་ཕཊ་ཌཱ་ཀི་ནཱི་ཛཱ་ལ་སམྦ་རཾ་སྭཱ་ཧཱ། ཞེས་པ་ནི་སྙིང་པོའོ། །ཨོཾ་ཁཎྜ་རོ་ཧེ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པ་ནི་དུམ་སྐྱེས་མའི་སྔགས་ཏེ་ལས་ཐམས་ཅད་པའོ། །ཡང་ན་འཁོར་

ལོའི་དབང་ཕྱུག་ལ་སོགས་པ་ནས་གཤིན་རྗེ་འཇོམས་མའི་མཐར་ཐུག་པ་ཐམས་ཅད་ཞལ་གཅིག་པ་ཕྱག་གཉིས་པའོ། །དེ་ལ་དཔའ་བོ་ཉི་ཤུ་རྩ་ལྔ་ཐམས་ཅད་ནི་འཁྱུད་པའི་གཡས་དང་གཡོན་གྱི་ཕྱག་གཉིས་ཀྱིས་རྡོ་རྗེ་དང་དྲིལ་བུ་བསྣམས་པའོ། །མཁའ་འགྲོ་
མ་ལ་སོགས་པ་བཞི་དང་ཁྭ་གདོང་མ་ལ་སོགས་པ་རྣམས་ནི་གཡོན་པས་ཐོད་པ་དང་དཔུང་པ་ལ་བརྟེན་པའི་ཁ་ཊྭཱཾ་ག་དང་། གཡས་པས་ཌ་མ་རུ་འཛིན་པ་སྟེ་གཞན་ཐམས་ཅད་ནི་སྔ་མ་བཞིན་ནོ། །ཡང་ན་འཁོར་ལོའི་དབང་ཕྱུག་ལ་སོགས་པ་ཕྱག་གཉིས་པ་ཉིད་ཀྱི་ཕྱོགས་ལ་ནི་དཔལ་བདེ་མཆོག་དང་རྡོ་རྗེ་ཕག་
མོ་གསེར་གྱི་མདོག་ཅན་ནམ་ཡང་ན་སྔོན་པོ་སྟེ། བཅོམ་ལྡན་འདས་ནི་ཕྱག་གཡས་པས་རྡོ་རྗེ་གསོར་བ་མཆོག་ཏུ་བརྩོན་པ། གཡོན་པས་ཐོད་པ་དང་ཁ་ཊྭཱཾ་ག་འཛིན་པའམ་ཡང་ན་རྡོ་རྗེ་དང་དྲིལ་བུའི་ཕྱག་གཉིས་ཀྱིས་འཁྱུད་པར་མཛད་པའོ། །མཁའ་འགྲོ་མ་ལ་སོགས་པ་བཞི་ནི་སེར་མོ་
གཡས་པས་ཌ་མ་རུ་འཛིན་པའོ། །ཐུགས་ཀྱི་འཁོར་ལོའི་དཔའ་བོ་རྣམས་ནི་ནག་པོ་རྡོ་རྗེ་དང་དྲིལ་བུ་འཛིན་པ་སྟེ། དཔའ་མོ་རྣམས་ནི་དཀར་མོ་ཕྱག་གཡས་པ་རྡོ་རྗེ་དང་བཅས་པའི་སྡིགས་མཛུབ་ཅན་ནོ། །གསུང་གི་འཁོར་ལོའི་དཔའ་བོ་རྣམས་ནི་དམར་པོ་པདྨ་དང་པདྨའི་དྲིལ་བུ་འཛིན་པ་སྟེ་མཁའ་
འགྲོ་མ་རྣམས་ནི་ནག་མོ་གཡས་པ་པདྨ་དང་བཅས་པའི་སྡིགས་མཛུབ་ཅན་ནོ། །སྐུའི་འཁོར་ལོའི་དཔའ་བོ་རྣམས་ནི་དཀར་པོ་འཁོར་ལོ་དང་འཁོར་ལོའི་དྲིལ་བུ་འཛིན་པ་སྟེ་ལྷ་མོ་རྣམས་ནི་དམར་མོ་གཡས་པ་སྡིགས་མཛུབ་དང་བཅས་པའི་འཁོར་ལོ་འཛིན་པའོ། །དཔའ་བོ་ཐམས་ཅད་ཡུམ་ལ་
འཁྱུད་པར་བརྩོན་ཞིང་གཡས་བརྐྱང་ཞིང་བཞུགས་པ་སྟེ་དཔའ་མོ་རྣམས་ནི་དེའི་བརླ་གཉིས་ལ་འཁྲིལ་བའི་ཚུལ་ལོ། །ཁྭ་གདོང་མ་ལ་སོགས་པ་ནི་གཡས་པ་སྡིགས་མཛུབ་དང་བཅས་པའི་གྲི་གུག་འཛིན་པ་སྟེ་ལྷ་མོ་ཐམས་ཅད་ཕྱག་གཡོན་པས་ཐོད་པ་འཛིན་པའོ། །གཤིན་རྗེ་བརྟན་མ་ལ་སོགས་
པ་ནི་གཡས་པས་ཌ་མ་རུ་དང་། གཡོན་པ་སྡིགས་མཛུབ་དང་བཅས་པས་མི་མགོ་འཛིན་པའོ། །མཁའ་འགྲོ་མ་ལ་སོགས་པ་རྣམས་དང་ཁྭ་གདོང་མ་ལ་སོགས་པ་རྣམས་ཀྱི་གཡོན་པ་ན་ཁ་ཊྭཱཾ་གའོ། །བཅུ་གཉིས་པོ་འདི་རྣམས་ནི་སྐྱིལ་ཀྲུང་ཕྱེད་པའི་གར་གྱིས་གནས་པ་སྟེ་གཞན་རྣམས་ནི་

སྔ་མ་བཞིན་ནོ་ཞེས་པ་བདེ་མཆོག་གི་དཀྱིལ་འཁོར་རྣམ་པ་གསུམ་མོ། །གང་གི་ཚེ་འདི་རྣམས་ལ་དཔའ་བོ་ཉི་ཤུ་རྩ་ལྔ་མི་བསྒོམ་པར་རྡོ་རྗེ་ཕག་མོ་དཀྱིལ་འཁོར་གྱི་གཙོ་མོར་གྱུར་པ་དེའི་ཚེ་རྡོ་རྗེ་ཕག་མོའི་དཀྱིལ་འཁོར་གསུམ་མོ། །རྡོ་རྗེ་ཕག་མོའི་ཐུགས་ཀའི་ས་བོན་ནི་བཾ་མོ། །ཨོཾ་བཛྲ་བཻ་རོ་ཙ་
ནཱི་ཡེ་ཧཱུཾ་ཧཱུཾ་ཕཊ་ཅེས་པ་ནི་སྙིང་པོའོ། །བདེ་མཆོག་ཕྱག་གཉིས་པ་ལ་སོགས་པའི་ལྷ་འདི་རྣམས་ཀྱི་ཕྱག་གཡས་སུ་གནས་པའི་ཕྱག་མཚན་ནི་བྲི་བྱའི་དཀྱིལ་འཁོར་ལ་ཡང་བྲི་བར་བྱའོ། །བཅོམ་ལྡན་འདས་སངས་རྒྱས་ཐོད་པ་ལྷ་ཉི་ཤུ་རྩ་ལྔའི་བདག་ཉིད་ཅན་གྱི་དཀྱིལ་འཁོར་ནི་རྡོ་རྗེ་གུར་
གྱི་ནང་དུ་ཆོས་འབྱུང་གི་སྙིང་པོར་གནས་པའི་གཞལ་ཡས་ཁང་གི་དབུས་སུ་འཁོར་ལོ་རྩིབས་བརྒྱད་པ་ལ་གནས་པའི་སྣ་ཚོགས་ཆུ་སྐྱེས་ཀྱི་ལྟེ་བར་རོ་གན་རྐྱལ་གྱི་སྙིང་གར་ཉི་མའི་དཀྱིལ་འཁོར་ལ་བཅོམ་ལྡན་འདས་དཔལ་ཧེ་རུ་ཀ་སྐུ་མདོག་ནག་པོ་སྐྱིལ་ཀྲུང་ཕྱེད་པ་ཅན་གར་གྱི་ཉམས་དགུ་དང་
ལྡན་པས་གར་མཛད་པ་ཞལ་གཅིག་པ་སྤྱན་གསུམ་པ་དམར་ལ་ཟླུམ་པ་ཕྱག་བཞི་པ་གཡས་པ་དག་གིས་ཌ་མ་རུ་དང་གྲི་གུག །གཡོན་པ་དག་གིས་ཐོད་པ་དང་ཁ་ཊྭཱཾ་ག་འཛིན་པ་ཕྱག་རྒྱ་དྲུག་དང་ལྡན་པ་མི་མགོ་རློན་པ་ལྔ་བཅུའི་དོ་ཤལ་མགྲིན་པ་ལ་འཕྱང་བ། གཉིས་འཐུང་གི་པགས་པའི་ཤམ་ཐབས་
རྒྱབ་ན་ཅུང་ཟད་དཔྱངས་པ། སྣ་ཚོགས་རྡོ་རྗེ་དང་ཟླ་བ་ཕྱེད་པས་མཚན་པའི་རལ་པ་ནག་པོའི་ཐོར་ཅོག་ཅན་དཔྲལ་བའི་མཐར་ཐོད་པ་ལྔས་བརྒྱན་པ། སངས་རྒྱས་ལྔའི་ཅོད་པན་ཅན་ནོ། །མངའ་བདག་འདིའི་དགའ་མ་ནི་སྣ་ཚོགས་སྡེ་མ། ན་བཟའ་མེད་པ་མི་མགོའི་ཕྲེང་བ་ཅན་དབུ་སྐྲ་སིལ་བུར་གྲོལ་
ཞིང་གྱེན་དུ་འབར་བ་ཐོད་པ་ལྔས་དབུ་ལ་མཚན་པ། མཆེ་བ་ཅུང་ཟད་གཙིགས་པ་སྐུ་མདོག་དམར་མོ་ཞལ་གཅིག་མ་སྤྱན་གསུམ་པ་ཕྱག་གཡོན་པ་བདག་པོའི་མགྲིན་པར་འཁྱུད་པས་ཁྲག་གི་རྒྱུན་འཛག་པའི་ཐོད་པ་ཡབ་ལ་སྟོབས་པ། ཕྱག་གཡས་པ་ན་གྲི་གུག་རྡེག་པའི་ཚུལ་ཅན་ནོ། །རྩིབས་
ནག་པོའི་སྟེང་གི་འདབ་མ་རྣམས་ལ་ཤར་དུ་ལེགས་ཕྲེང་ཅན་མ་དང་། བྱང་དུ་ཐོད་པ་ཅན་མ་དང་ནུབ་ཏུ་འཇིགས་མ་དང་ལྷོར་ཐུབ་དཀའ་མའོ། །དབང་ལྡན་ལ་སོགས་པའི་འདབ་མ་རྣམས་ལ་གཡས་སྐོར་གྱིས་ཁུ་བ་དང་རྡུལ་དང་བདུད་རྩི་དང་སྒྲོན་མ་ལྔས་གང་བའི་པདྨའི་སྣོད་དེ་རིམ་པ་དང་པོ་

འདི་ནི་རྡོ་རྗེ་སྔོན་པོའི་ཁོར་ཡུག་ཅན་ནོ། །དེ་ནས་རིམ་པ་གཉིས་པའི་རྩིབས་བརྒྱད་དམར་པོ་ལ་གནས་པའི་པདྨ་བརྒྱད་ནི་རྡོ་རྗེའི་ཕྲེང་བ་དམར་པོས་བསྐོར་བ་སྟེ། དེའི་རྩིབས་རྣམས་ལ་ཤར་དུ་དགེ་བའི་སྐ་རགས་ཅན་མ་དང་། བྱང་དུ་གཟུགས་ཅན་མ་དང་། ནུབ་ཏུ་རྣམ་པར་རྒྱལ་མ་དང་།
ལྷོར་འདོད་མ་དང་། དབང་ལྡན་དུ་དུས་ཅན་མ་དང་། མེར་མཚོན་ཆེན་མ་དང་། བདེན་བྲལ་དུ་ཕྱེད་མ་དང་། རླུང་དུ་གསོད་མའོ། །དེ་ནས་རིམ་པ་གསུམ་པའི་རྩིབས་བརྒྱད་དཀར་པོ་ལ་གནས་པའི་པདྨ་བརྒྱད་ནི་རྡོ་རྗེའི་ཕྲེང་བ་དཀར་པོའི་ཁོར་ཡུག་ཅན་ཏེ། དེའི་རྩིབས་རྣམས་ལ་ཤར་དུ་སྒྲོལ་མ་དང་
བྱང་དུ་འཇིགས་མཐོང་མ་དང་། ནུབ་ཏུ་ལེགས་མཐོང་མ་དང་། ལྷོར་མི་ཐུབ་མ་དང་། དབང་ལྡན་དུ་དགེ་མ་དང་། མེར་གྲིབ་གནོན་མ་དང་། བདེན་བྲལ་དུ་དུས་མཚན་མ་དང་། རླུང་དུ་གྲགས་ཆེན་མའོ། །སྒོ་རྣམས་སུ་ཤར་གྱི་པདྨ་ལ་མཛེས་མ་དང་། བྱང་གི་པདྨ་ལ་ནོར་འཛིན་མ་དང་། ནུབ་ཀྱི་པདྨ་
ལ་སྐལ་བཟང་མ་དང་། ལྷོའི་པདྨ་ལ་མཐོང་དགའ་མའོ། །འདི་རྣམས་ཐམས་ཅད་གཡས་པ་དང་གཡོན་པའི་ཕྱག་དག་གིས་གྲི་གུག་དང་ཐོད་པ་འཛིན་པའོ། །སོ་ཅུང་ཟད་སྟོ་བ་ཞལ་གཅིག་མ་སྤྱན་གསུམ་མ། རུས་པའི་རྒྱན་གྱིས་བརྒྱན་མ། མི་མགོའི་ཕྲེང་བ་དང་བྲལ་བ། དབུ་སྐྲ་སིལ་
བུ་དམར་སེར་གྱི་ཚོགས་གྱེན་དུ་འབར་བ་བྱང་སེམས་འཛག་པ། ཉི་མ་ལ་སྐྱིལ་ཀྲུང་ཕྱེད་པའི་གར་གྱིས་གནས་པའོ། །སྒོ་སྐྱོང་མ་རྣམས་ནི་གཡས་བསྐུམ་ཞིང་གཡོན་བརྐྱང་བ་སྟེ། ཐམས་ཅད་སྟག་གི་པགས་པའི་ན་བཟའ་སྐུ་མདོག་སྔོན་མོའོ། །ཡང་ན་ལེགས་མ་ལ་སོགས་པ་བཞི་ནག་མོ་དང་
རིམ་པ་གཉིས་པ་ལ་གནས་པ་རྣམས་དཀར་སེར་དང་རིམ་པ་གསུམ་པ་ལ་གནས་པ་རྣམས་ལྗང་གུ་དང་སྒོའི་ལྷ་མོ་རྣམས་ནག་མོའོ། །བཅོམ་ལྡན་འདས་ལ་མི་བསྐྱོད་པ་ལ་སོགས་པའི་དེ་བཞིན་གཤེགས་པ་ལྔས་རྒྱས་བཏབ་པ་སྟེ། སྣ་ཚོགས་སྡེ་མ་ལ་རྣམ་པར་སྣང་མཛད་དང་ལེགས་ཕྲེང་མ་ལ་སོགས་
པ་བཞི་ལ་རིན་ཆེན་དབང་པོ་དང་། རིམ་པ་གཉིས་པར་གནས་པ་རྣམས་ལ་སྣང་བ་མཐའ་ཡས་དང་། རིམ་པ་གསུམ་པ་ན་གནས་པ་རྣམས་ལ་རྣམ་པར་སྣང་མཛད་དང་། སྒོའི་ལྷ་མོ་རྣམས་ལ་དོན་ཡོད་གྲུབ་པའོ། །བཅོམ་ལྡན་འདས་ཀྱི་ཐུགས་ཀའི་ས་བོན་ནི་ཧཱུཾ་ངོ་། །ཨོཾ་བུདྡྷྱ་ཀ་པཱ་ལི་ནཱི་ཨཱཿཧི་ཧི་ཧཱུཾ་

ཕཊ། སྙིང་པོའོ། །ལས་ཐམས་ཅད་པའི་སྔགས་ཀྱང་འདི་ཉིད་ཀྱིས་བྱའོ། །རྣལ་འབྱོར་ནམ་མཁའི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་རླུང་དང་མེ་དང་ཆུ་དང་སའི་དཀྱིལ་འཁོར་གྱི་སྟེང་དུ་རྒྱ་མཚོ་ཆེན་པོ་ལ་སོགས་པས་ཡོངས་སུ་བསྐོར་བའི་རི་རབ་ཀྱི་སྤྱི་བོར་སྣ་ཚོགས་ཆུ་སྐྱེས་དང་སྣ་ཚོགས་རྡོ་རྗེའི་
ལྟེ་བ་ལ་གནས་པའི་གཞལ་ཡས་ཁང་གི་སྙིང་པོར་རིམ་པ་དབུས་མའི་ལྟེ་བར་སེང་གེའི་སྟེང་དུ་སྣ་ཚོགས་པདྨ་དང་ཟླ་བ་ལ་སེམས་དཔའི་སྐྱིལ་ཀྲུང་གིས་བཞུགས་པའི་བཅོམ་ལྡན་འདས་རྣལ་འབྱོར་ནམ་མཁའ་སྐུ་མདོག་ནག་པོ་རྩ་བ་དང་གཡས་པ་དང་གཡོན་པའི་ཞལ་གསུམ་ནག་པོ་དང་དཀར་པོ་
དང་དམར་པོ། ཞལ་རེ་རེ་ལ་སྤྱན་གསུམ་གསུམ་པ། ཕྱག་རྒྱ་དྲུག་དང་ལྡན་པ་ཐོད་པ་ལྔའི་ཕྲེང་བ་དཔྲལ་བར་གནས་པ་ནོར་བུ་དང་ཟླ་བ་ཕྱེད་པ་དང་སྣ་ཚོགས་རྡོ་རྗེས་མཚན་པའི་རལ་པ་ནག་པོའི་ཐོར་ཅོག་ཅན། དེ་བཞིན་གཤེགས་པ་ལྔ་འཕྲོ་བའི་དབུ་རྒྱན་དང་ལྡན་པ། སྟག་གི་པགས་པའི་ཤམ་ཐབས་རྒྱབ་ཏུ་
ཅུང་ཟད་འཕྱང་བ། ཕྱག་དྲུག་པ་རྡོ་རྗེ་དང་དྲིལ་བུ་བསྣམས་པའི་ཕྱག་དག་གིས་ཡེ་ཤེས་ཀྱི་མཁའ་འགྲོ་མ་དཀར་མོ་འམ་ནག་མོ་ལ་འཁྱུད་པ། གཡས་པ་དག་གིས་ནུ་མ་དང་མདའ། གཡོན་པ་དག་གིས་པདྨའི་སྣོད་དང་གཞུ་འཛིན་པའོ། །དེ་ནས་རེའུ་མིག་རྣམས་ལ་ཤར་དུ་གླང་པོ་ཆེའི་རྒྱལ་པོ་ལ་འགྱིང་
བའི་ཚུལ་གྱིས་གནས་པའི་རྡོ་རྗེ་མཁའ་འགྲོ་མ་དཀར་མོ། །བྱང་དུ་རྨ་བྱ་ལ་སྐྱིལ་ཀྲུང་ཕྱེད་པས་གནས་པའི་མི་བཟད་མཁའ་འགྲོ་མ་སེར་མོ་སྦྲུལ་གྱིས་བརྒྱན་པའོ། །ནུབ་ཏུ་མཁའ་ལྡིང་ལ་ཙོག་པུའི་འདུག་སྟངས་ཀྱིས་གནས་པའི་རོ་ལངས་མ་དམར་མོའོ། །ལྷོར་མིའམ་ཅིའི་གདན་ལ་སྐྱིལ་ཀྲུང་
ཕྱེད་པས་གནས་པའི་གཏུམ་མོ་སྔོན་མོ་དབུ་སྐྲ་དམར་པོ་གྲོལ་ཞིང་སྤྱི་བོར་ཐལ་མོ་སྦྱར་བའོ། །འདིར་ཡེ་ཤེས་མཁའ་འགྲོ་མ་ལ་སོགས་པ་ལྔ་ནི་གཡས་པ་དང་གཡོན་པའི་ཕྱག་གཉིས་ཀྱིས་ཁ་ཊྭཱཾ་ག་དང་ཐོད་པ་འཛིན་པའོ། །རྡོ་རྗེ་མཁའ་འགྲོ་མ་ལ་སོགས་པ་ནི་གླང་པོ་ཆེ་ལ་སོགས་པ་པདྨ་
དང་ཉི་མ་ལ་གནས་པ་གླང་པོ་ཆེའི་པགས་པའི་སྨད་གཡོགས་དང་མིའི་པགས་པའི་སྟོད་གཡོགས་ཅན་ནོ། །དབང་ལྡན་དུ་སེང་གེ་ལ་འགྱིང་བའི་ཚུལ་གྱིས་གནས་པའི་སེང་གེ་མ་དཀར་སེར་ཕྱག་གཉིས་མ་གཡས་པས་སྟེང་དུ་འཕྱར་བའི་ཁ་ཊྲཱཾ་ག་དང་། གཡོན་པས་སྡིགས་མཛུབ་དང་བཅས་

པའི་ཞགས་པ་འཛིན་པའོ། །མེར་རྡོ་རྗེ་ཕག་ལ་ཟླུམ་པོའི་ཚུལ་གྱིས་གནས་པའི་སྟག་མོ་དཀར་ནག་ཕྱག་གཉིས་མ་གཡས་པ་དང་གཡོན་པས་ལྕགས་ཀྱུ་དང་ཞགས་པ་འཛིན་པའོ། །བདེན་བྲལ་དུ་མ་ཧེ་ལ་སྐྱིལ་ཀྲུང་ཕྱེད་པས་གནས་པའི་ཅེ་སྤྱང་མོ་ཅེ་སྤྱང་གི་གདོང་པ་ཅན་དམར་ནག་ཕྱག་
གཉིས་ཀྱིས་དགྲ་སྟ་དང་ཞགས་པ་འཛིན་པའོ། །རླུང་དུ་ཅེ་སྤྱང་ལ་ཙོག་པུའི་འདུག་སྟངས་ཀྱིས་གནས་པའི་འུག་པ་མོ་འུག་པའི་གདོང་པ་ཅན་དམར་སེར་ཕྱག་གཉིས་ཀྱིས་དབྱུག་པ་དང་ཞགས་པ་འཛིན་པའོ། །འདི་རྣམས་ནི་རང་རང་གི་བཞོན་པ་རྣམས་ལ་པདྨ་དང་ཉི་མར་གནས་པའོ། །ཤར་དུ་
མཁའ་འགྲོ་མའི་རྒྱབ་ཏུ་མཁའ་འགྲོ་མ་དཀར་མོ་ཕྱག་གཉིས་ཀྱི་རྩེ་མོ་ཁར་བཅུག་པའོ། །བྱང་དུ་མི་བཟད་མཁའ་འགྲོ་མའི་རྒྱབ་ཏུ་མར་མེ་མ་སེར་མོ་སྤྱི་བོར་མར་མེ་ལྟ་བུའི་ཐལ་མོ་སྦྱར་བ་དང་། ནུབ་ཏུ་རོ་ལངས་མའི་རྒྱབ་ཏུ་འཇིགས་བྱེད་མ་དམར་མོ་སྙིམ་པ་ཁྲག་གིས་བཀང་ནས་
གསོལ་བ་དང་། ལྷོར་གཏུམ་མོའི་རྒྱབ་ཏུ་ཀམ་པོ་ཛཱི་ནག་མོ་ཕྱག་དག་གིས་ཐུགས་ཀར་གཏུན་ཤིང་འཕྱར་བ་སྟེ་འདི་རྣམས་ནི་པདྨ་དང་ཉི་མ་དང་རོ་ལ་གནས་པའོ། །དེ་ནས་རྡོ་རྗེ་ཕྲེང་བ་དང་འོད་ཟེར་གྱི་ཁོར་ཡུག་གི་ཕྱི་རོལ་དུ་ཟླུམ་པོའི་རིམ་པར་པདྨ་དང་ཟླ་བ་རྣམས་ལ་ཤར་ཕྱོགས་སུ་པུཀྐ་སཱི་དང་
དྲ་མི་ཌི་དང་གཏུམ་མོ་རྣམས་ཕྱག་གཉིས་ཀྱིས་བདུད་རྩིའི་སྣོད་འཛིན་པའོ། །བྱང་དུ་མི་བཟད་མ་ཁྲག་མ་དང་ཤ་མ་རྣམས་ནི་སྒྲོན་མ་ལྔས་གང་བའི་པདྨའི་སྣོད་འཛིན་པའོ། །ནུབ་ཏུ་དྲག་ཤུལ་མ་དང་འབར་མ་དང་མི་སྡུག་མ་རྣམས་གཏོར་མའི་སྣོད་འཛིན་པའོ། །ལྷོར་ཐོད་པ་མ་དང་རྡོ་རྗེ་མ་དང་བུམ་པ་
ཅན་མ་རྣམས་བཏུང་བའི་སྣོད་འཛིན་པའོ། །དབང་ལྡན་དུ་སྒེག་མོ་བསྙེམས་པའི་ཕྱག་རྒྱ་ཅན་དང་དྲི་ཆབ་མ་དྲིའི་སྣོད་འཛིན་པའོ། །མེར་པི་ཝང་མ་པི་ཝང་བསྒྲེང་བ་དང་མེ་ཏོག་མ་མེ་ཏོག་འཐོར་བའོ། །བདེན་བྲལ་དུ་གླུ་མ་ཁའི་ཐད་ཀར་མཛུབ་མོ་གཡོ་བ་དང་བདུག་སྤོས་མ་སྤོས་དང་བཅས་པའི་སྤོས་ཕོར་འཛིན་
པའོ། །རླུང་དུ་གར་མ་གར་གྱི་ཚུལ་གྱིས་སྟེང་དུ་ཐལ་མོ་སྦྱར་བ་དང་མར་མེ་མ་མར་མེ་དང་བཅས་པའི་མར་མེའི་སྣོད་འཛིན་པའོ། །ཡེ་ཤེས་མཁའ་འགྲོ་མ་ལ་སོགས་པའི་ལྷ་སུམ་ཅུ་རྩ་གསུམ་པོ་འདི་རྣམས་ནི་ཕྱག་གཉིས་མ་ཞལ་གཅིག་པ་སྤྱན་གསུམ་པ་སྐྲ་གྲོལ་བ་དབུ་ལ་ཐོད་པའི་ཕྲེང་བ་ཅན་ནོ། །

མི་བཟད་མཁའ་འགྲོ་མ་ནི་དབུ་སྐྲ་གྱེན་དུ་བརྫེས་པ་སྟེ་སེང་གེ་མོ་ལ་སོགས་པ་ནི་གོས་དམར་པོ་གྱོན་པའོ། །པུཀྐ་སཱི་ལ་སོགས་པ་མེའི་མཚམས་ཀྱི་ལྷ་མོ་དག་ནི་དཀར་མོའོ། །མི་བཟད་མ་ལ་སོགས་པ་དང་དབང་ལྡན་གྱི་ལྷ་མོ་དག་ནི་སེར་མོའོ། །དྲག་ཤུལ་མ་ལ་སོགས་པ་དང་རླུང་གི་མཚམས་
ཀྱི་ལྷ་མོ་དག་ནི་དམར་མོའོ། །ཐོད་པ་མ་ལ་སོགས་པ་དང་བདེན་བྲལ་གྱི་མཚམས་ཀྱི་ལྷ་མོ་དག་ནི་ནག་མོའོ། །དེ་ནས་རྡོ་རྗེ་ཕྲེང་བའི་ཁོར་ཡུག་གི་ཕྱི་རོལ་གྱི་རིམ་པར་སྒོ་རྣམས་དང་སྣམ་བུ་རྣམས་ལ་ཆུ་སྐྱེས་དང་ཟླ་བའི་གདན་རྣམས་ལ་ཤར་སྒོར་ཁྱབ་འཇུག་ནག་པོ་དང་། བྱང་དུ་ཚངས་པ་སེར་པོ་དང་། ནུབ་
ཏུ་དབང་ཕྱུག་དཀར་པོ་དང་། ལྷོར་གདོང་དྲུག་དམར་པོ་དང་། དབང་ལྡན་གྱི་མཚམས་སུ་དབང་པོ་སེར་པོ་དང་། མེར་ལུས་ངན་པོ་སེར་པོ་དང་། བདེན་བྲལ་དུ་གཤིན་རྗེ་ནག་པོ་དང་། རླུང་དུ་ཆུ་ལྷ་དཀར་པོའོ། །ལྷའི་སྣམ་བུ་ལ་ཤར་དུ་ཀེང་རུས་འཇིགས་དང་ཁ་ཊྭཱཾ་གའི་སྲིན་པོ་དང་ཚོགས་ཀྱི་དབང་
ཕྱུག་དང་དྲིལ་བུའི་རྣ་བ་ཅན་རྣམས་དཀར་པོའོ། །བྱང་དུ་གཏུམ་མོའི་དབང་ཕྱུག་དང་མདུན་དུ་སའི་ལྷ་དང་རིམ་གྱི་དབང་ཕྱུག་དང་ཛྷི་ཀ་ར་འཇིགས་སུ་རུང་བ་རྣམས་སེར་པོའོ། །ནུབ་ཏུ་དྲག་པོའི་འདོད་པ་དང་ཤཎྜི་ལིའི་དབང་ཕྱུག་དང་ཌ་མ་རུའི་འདུལ་བྱེད་དང་སྒྲས་འཇིགས་བྱེད་རྣམས་
དམར་པོའོ། །ལྷོར་ཏུམྦུ་རའི་དབང་ཕྱུག་དང་། སྠཱ་ར་ནཱ་དོ་དང་མཆེ་བ་གཙིགས་པ་དང་གཞུ་འཛིན་རྣམས་ནག་པོའོ། །ཁྱབ་འཇུག་ལ་སོགས་པ་ཉི་ཤུ་རྩ་བཞི་པོ་འདི་རྣམས་ནི་ཞལ་གཅིག་པ་སྤྱན་གསུམ་པ་ཕྱག་བཞི་པ་གཡས་པ་དག་གིས་ཁ་ཊྭཱཾ་ག་དང་རྩེ་གསུམ་འཛིན་པ་གཡོན་
པ་དག་གིས་ལྷ་མོ་ལ་འཁྱུད་པ་དང་ཐོད་པ་འཛིན་པ། རལ་པ་ནག་པོའི་ཐོར་ཅོག་ཅན་ཐོད་པ་ལྔའི་ཕྲེང་བ་དང་ཕྱག་རྒྱ་ལྔ་དང་ལྡན་པ། སྟག་གི་པགས་པའི་ཤམ་ཐབས་ཅན་ནོ། །འདི་རྣམས་ཀྱི་ལྷ་མོ་རྣམས་ཀྱང་ཕྱག་གཡས་པ་དང་གཡོན་པ་དག་གིས་ཐོད་པ་དང་ཁ་ཊྭཱཾ་ག་འཛིན་པའོ། །འདིར་དཔལ་ལྡན་
ནམ་མཁའི་རྣལ་འབྱོར་ལ་མི་བསྐྱོད་པ་ལ་སོགས་པའི་དེ་བཞིན་གཤེགས་པ་ལྔས་རྒྱས་བཏབ་པ་སྟེ། ཡེ་ཤེས་མཁའ་འགྲོ་མ་ལ་མི་བསྐྱོད་པ་འམ་རྣམ་པར་སྣང་མཛད་ཀྱིས་རྒྱས་བཏབ་པའོ། །རྡོ་རྗེ་མཁའ་འགྲོ་མ་ལ་སོགས་པ་བཞི་དང་མཁའ་འགྲོ་མ་ལ་སོགས་པ་བཞི་རྟག་པ་དང་རིན་

ཆེན་དབང་པོ་དང་སྣང་བ་མཐའ་ཡས་དང་། དོན་ཡོད་གྲུབ་པ་རྣམས་ཀྱི་སྟེ། སེང་གེ་མ་ལ་སོགས་པ་བཞི་ལ་མི་བསྐྱོད་པ་དང་རྣམ་པར་སྣང་མཛད་དང་རིན་ཆེན་འབྱུང་ལྡན་དང་སྣང་བ་མཐའ་ཡས་རྣམས་ཀྱིས་སོ། །ཚངས་པ་ལ་རྣམ་པར་སྣང་མཛད་ཀྱིས་ཏེ་དབང་ཕྱུག་ཆེན་པོ་ལ་སྣང་བ་
མཐའ་ཡས་ཀྱིས་སོ། །ལྷ་གཞན་དཀར་པོ་རྣམས་ལ་རྣམ་པར་སྣང་མཛད་དང་སེར་པོ་རྣམས་ལ་རིན་ཆེན་དབང་པོ་དང་། དམར་པོ་རྣམས་ལ་ཚེ་དཔག་མེད་དང་ནག་པོ་རྣམས་ལ་མི་བསྐྱོད་པ་ནག་པོའོ། །དཀྱིལ་འཁོར་གྱི་དབང་ཕྱུག་གི་ཐུགས་ཀའི་ས་བོན་ནི་ཧཱུཾ་ངོ་། །ཨོཾ་ཧུཾ་ཧཿསྭཱ་ཧཱ་ཞེས་པ་ནི་སྙིང་པོའོ། །ཨོཾ་ཡུཾ་
ཡཿསྭཱ་ཧཱ། ཞེས་པ་ནི་རོ་ལངས་མའི་སྟེ་ལས་ཐམས་ཅད་པའི་སྔགས་སོ་ཞེས་པ་རིམ་པ་གསུམ་གྱི་དཀྱིལ་འཁོར་རོ། །སྙིང་པོའི་དཀྱིལ་འཁོར་གཞལ་ཡས་ཁང་ལྟ་བུ་ལ་མཁའ་འགྲོ་མ་ལ་སོགས་པ་བཞི་པོ་རྣམས་ནི་སྒོ་རྣམས་སུའོ། །ཞེས་པ་གཞན་དག་གིའོ། །རིམ་པ་གཉིས་པ་ལ་ཡང་གཞལ་ཡས་
ཁང་གི་གཟུགས་སོ་ཞེས་པ་ནི་གཞན་དག་གི་སྟེ་དེ་ཡང་ཟླུམ་པོའི་བྱེད་པ་ཁ་ཅིག་གོ། །གཤིན་རྗེ་གཤེད་ཀྱི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་ཆོས་འབྱུང་གི་ལྟེ་བར་གནས་པའི་གཞལ་ཡས་ཁང་གི་དབུས་སུ་སྣ་ཚོགས་ཆུ་སྐྱེས་དང་ཉི་མའི་སྟེང་དུ་གནས་པའི་མ་ཧེ་ནག་པོ་ཁྲོས་པ་རུས་པའི་རྒྱན་གྱིས་བརྒྱན་པའི་
རྒྱབ་ཏུ་སྣ་ཚོགས་ཆུ་སྐྱེས་དང་ཉི་མ་ལ་གཡས་བསྐུམ་ཞིང་གཡོན་བརྐྱང་བའི་རྐང་སྟབས་ཀྱིས་གཤིན་རྗེ་མནན་ནས་བཞུགས་པའི་གཤིན་རྗེ་གཤེད་ནག་པོ་སྨིན་མ་དང་སྨ་ར་ལངས་ཤིང་དབུ་སྐྲ་གྱེན་དུ་བརྫེས་པ། རྡོ་རྗེའི་རྒྱན་གྱིས་བརྒྱན་པ་སྐུ་བོང་ཐུང་ཞིང་གསུས་པ་འཕྱང་བ། ཡན་ལག་རགས་པ་མི་
མགོའི་ཕྲེང་བ་མགུལ་པར་འཕྱང་བ་ལྗགས་འགྱུར་བ་མཆེ་བ་འབར་ཞིང་གཙིགས་པ་རྩ་བ་དང་གཡས་པ་དང་གཡོན་པའི་ཞལ་ནག་པོ་དང་དཀར་པོ་དང་དམར་པོ་ཕྱག་དྲུག་གི་གྲི་གུག་དང་ཐོད་པར་ལྡན་པའི་གཡས་པ་དང་གཡོན་པའི་ཕྱག་དག་གིས་རང་འོད་ཀྱི་ཤེས་རབ་མ་ལ་འཁྱུད་པ། གཡས་པ་དག་གིས་
རྡོ་རྗེ་དང་རལ་གྲི་གཡོན་པ་དག་གིས་འཁོར་ལོ་དང་པདྨ་འཛིན་པ། འཇིག་རྟེན་གསུམ་ལས་རྣམ་པར་རྒྱལ་བ་བཞིན་དུ་མཐའ་ཡས་ལ་སོགས་པའི་ཀླུ་རྣམས་ཀྱིས་བརྒྱན་པའོ། །འདིའི་ཤར་དུ་རྣམ་པར་སྣང་མཛད་དཀར་པོ་རྩ་བ་དང་གཡས་པ་དང་གཡོན་པའི་ཞལ་གསུམ་དཀར་པོ་དང་ནག་པོ་དང་

དམར་པོ། །ཕྱག་གཡས་པ་དག་གིས་འཁོར་ལོ་དང་རལ་གྲི་དང་། གཡོན་པ་དག་གིས་རིན་པོ་ཆེ་དང་ཆུ་སྐྱེས་འཛིན་པའོ། །ལྷོར་རིན་ཆེན་དབང་པོ་གསེར་བཙོ་མའི་མདོག་ལྟ་བུ་སེར་པོ་དང་སྔོན་པོ་དང་དཀར་པོའི་ཞལ་གསུམ་པ་ཕྱག་གཡས་པ་དག་གིས་རིན་པོ་ཆེ་དང་རལ་གྲི། གཡོན་པ་དག་གིས་
འཁོར་ལོ་དང་པདྨ་འཛིན་པའོ། །ནུབ་ཏུ་སྣང་བ་མཐའ་ཡས་དམར་པོ་དམར་པོ་དང་ནག་པོ་དང་དཀར་པོའི་ཞལ་གསུམ་པ། ཕྱག་གཡས་པ་དག་གིས་པདྨ་དང་རལ་གྲི་དང་། གཡོན་པ་དག་གིས་ནོར་བུ་དང་འཁོར་ལོ་འཛིན་པའོ། །བྱང་དུ་ཕྲག་དོག་གཤིན་རྗེ་གཤེད་ལྗང་གུ་ལྗང་གུ་དང་ནག་པོ་དང་དཀར་
པོའི་ཞལ་གསུམ་པ། ཕྱག་གཡས་པ་དག་གིས་རལ་གྲི་དང་འཁོར་ལོ། གཡོན་པ་དག་གིས་ནོར་བུ་དང་པདྨ་འཛིན་པའོ། །བཞི་ཆར་ཡང་འཁོར་ལོའི་དབང་ཕྱུག་གི་མཚན་ཉིད་ཅན་གྱི་ཁྲོ་བོ། གཡས་པ་དང་ཅིག་ཤོས་ཀྱི་རྩ་བའི་ཕྱག་དག་གིས་གྲི་གུག་དང་ཐོད་པ་འཛིན་པས་རང་དང་འདྲ་བའི་ཡུམ་ལ་
འཁྱུད་པའོ། །མེའི་མཚམས་སུ་རྡོ་རྗེ་ཙརྩི་ཀ་སྐུ་དང་ཕྱག་མཚན་རྣམས་གཏི་མུག་གཤིན་རྗེ་གཤེད་ལྟ་བུའོ། །བདེན་བྲལ་དུ་རྡོ་རྗེ་ཕག་མོ་ཕག་ཞལ་ཅན་མ་ཞེ་སྡང་གཤིན་རྗེ་གཤེད་ལྟ་བུའོ། །དབང་ལྡན་དུ་གཽ་རཱི་ཕྲག་དོག་གཤིན་རྗེ་གཤེད་ལྟ་བུའོ། །འདིར་རྣམ་པར་སྣང་མཛད་ལ་སོགས་པ་ནི་སྣ་ཚོགས་རྡོ་རྗེའི་
རྩ་བ་རྣམས་སུ་ཏེ། མཚམས་རྣམས་སུ་ནི་རྡོ་རྗེ་ཙརྩི་ཀ་ལ་སོགས་པ་རང་དང་འདྲ་བའི་ཐབས་དང་བཅས་པའོ། །སྒོ་རྣམས་ལ་ཤར་དུ་ཐོ་བ་གཤིན་རྗེ་གཤེད་ནག་པོའོ། །ནག་པོ་དང་དཀར་པོ་དང་དམར་པོའི་ཞལ་ཅན། ཕྱག་གཡས་པ་དག་གིས་ཐོ་བ་དང་རལ་གྲི་དང་། གཡོན་པ་དག་གིས་ནོར་བུ་དང་པདྨ་འཛིན་
པའོ། །ལྷོར་དབྱུག་པ་གཤིན་རྗེ་གཤེད་དཀར་པོ་དཀར་པོ་དང་སྔོན་པོ་དང་དམར་པོའི་ཞལ་ཅན་ཕྱག་གཡས་པ་དག་གིས་དབྱུག་པ་དང་རལ་གྲི། གཡོན་པ་དག་གིས་པདྨ་དང་འཁོར་ལོ་འཛིན་པའོ། །ནུབ་ཏུ་པདྨ་གཤིན་རྗེ་གཤེད་འདོད་ཆགས་གཤིན་རྗེ་གཤེད་ལྟ་བུའོ། །བྱང་དུ་རལ་གྲི་གཤིན་རྗེ་
གཤེད་ཕྲག་དོག་གཤིན་རྗེ་གཤེད་ལྟ་བུ་ལས་ཅུང་ཟད་སྔོ་བའོ། །ཐམས་ཅད་ཀྱང་ཁྲོ་བོ་ཀླུ་རྣམས་ཀྱིས་བརྒྱན་པ། འཇིགས་པའི་གད་རྒྱངས་ཅན། དབུ་སྐྲ་དམར་སེར་གྱེན་དུ་འབར་བ་མཆེ་བ་གཙིགས་པའི་ཞལ་ཅན། རྩ་བའི་ཕྱག་གཉིས་ཀྱིས་གྲི་གུག་དང་ཐོད་པ་འཛིན་པས་རང་འོད་ཀྱི་ཤེས་རབ་མ་ལ་

འཁྱུད་པའོ། །འདིར་རྣམ་པར་སྣང་མཛད་དང་ལྷ་མོ་རྣམས་ནི་སྣ་ཚོགས་པདྨ་དང་ཟླ་བའི་གདན་ལ་སྟེ། ལྷ་གཞན་རྣམས་ནི་སྣ་ཚོགས་པདྨ་དང་ཉི་མ་ལ་གནས་པའོ། །དཀྱིལ་འཁོར་གྱི་མེ་ལ་སོགས་པའི་མཚམས་བཞིར་སྣ་ཚོགས་པདྨ་ལ་གནས་པའི་ཐོད་པ་བཞི་ནི། ཁུ་བ་དང་རྡུལ་དང་
བདུད་རྩི་ལྔ་དང་སྒྲོན་མ་ལྔས་གང་བའོ། །རིགས་ཀྱི་བདག་པོ་ནི་གཤིན་རྗེ་གཤེད་ནག་པོའི་སྤྱི་བོར་རང་ཉིད་དེ། རྣམ་པར་སྣང་མཛད་ལ་སོགས་པ་བཞིའི་ཡང་དེ་བཞིན་ནོ། །དེ་རྣམས་ནི་གོ་རིམས་ཇི་ལྟ་བར་སྤྱན་མ་ལ་སོགས་པ་བཞི་དང་ཐོ་བ་གཤིན་རྗེ་གཤེད་ལ་སོགས་པ་རྣམས་ཀྱི་ཡང་ངོ་། །བཅོམ་ལྡན་
འདས་ཀྱི་ཐུགས་ཀའི་ས་བོན་ནི་ཡའོ། །ཨོཾ་ཧྲིཿཥྚྀཿབི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་སྭཱ་ཧཱ། ཞེས་པ་ནི་སྙིང་པོ་སྟེ་ལས་ཐམས་ཅད་པའི་སྔགས་ཀྱང་འདིའོ། །རྡོ་རྗེ་སྒྲོལ་མའི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་ཆོས་འབྱུང་གི་སྙིང་པོར་གཞལ་ཡས་ཁང་གི་དབུས་སུ་སྣ་ཚོགས་པདྨ་འདབ་མ་བརྒྱད་པའི་ལྟེ་
བར་ཟླ་བ་ལ་བཅོམ་ལྡན་འདས་རྡོ་རྗེ་སྒྲོལ་མ་གསེར་གྱི་མདོག་ལྟ་བུ་སངས་རྒྱས་ལྔའི་ཅོད་པན་ཅན། རྩ་བ་དང་གཡས་པ་དང་རྒྱབ་དང་གཡོན་པའི་ཞལ་བཞི་གསེར་གྱི་མདོག་དང་། དཀར་པོ་དང་སྔོན་པོ་དང་དམར་པོའོ། །ཕྱག་བརྒྱད་མ་གཡས་པ་རྣམས་ཀྱིས་རྡོ་རྗེ་དང་ཞགས་པ་དང་མདའ་དང་དུང་རྣམས་འཛིན་པ།
གཡོན་པ་རྣམས་ནི་ཨུཏྤ་ལ་སེར་པོ་དང་གཞུ་དང་ལྕགས་ཀྱུ་དང་སྡིགས་མཛུབ་ཅན་ནོ། །ཤར་གྱི་འདབ་མ་ལ་མེ་ཏོག་སྒྲོལ་མ་དཀར་མོ་ཕྱག་དག་གིས་མེ་ཏོག་གི་ཕྲེང་བ་འཛིན་པ་དང་། ལྷོར་བདུག་སྦོས་སྒྲོལ་མ་ནག་མོ་ཕྱག་དག་གིས་བདུག་སྤོས་ཀྱི་སྣོད་འཛིན་པ་དང་། ནུབ་ཏུ་མར་མེ་སྒྲོལ་མ་སེར་མོ་
ཕྱག་གཉིས་ཀྱིས་མར་མེའི་ཀོང་བུ་འཛིན་པ་དང་། བྱང་དུ་དྲི་ཆབ་སྒྲོལ་མ་དམར་མོ་ཕྱག་གཉིས་ཀྱིས་དྲི་ཆབ་ཀྱི་དུང་ཆོས་འཛིན་པ་སྟེ་ལྷ་མོ་བཞི་པོ་འདི་རྣམས་ཀྱང་ཟླ་བ་ལ་གནས་པའོ། །མེ་ལ་སོགས་པའི་འདབ་མ་རྣམས་ལ་རྣམ་པར་སྣང་མཛད་ལ་སོགས་པའི་ངོ་བོ་དེ་དག་ལྟ་བུའི་འཁོར་ལོ་དང་རྡོ་རྗེ་དང་
པདྨ་དང་རལ་གྲིའོ། །རིམ་པ་གཉིས་པ་ལ་སྒོ་རྣམས་སུ་ཤར་དུ་རྡོ་རྗེ་ལྕགས་ཀྱུ་མ་དཀར་མོ་ཕྱག་གཡས་པས་ལྕགས་ཀྱུ་འཛིན་པ་དང་། ལྷོར་རྡོ་རྗེ་ཞགས་པ་མ་སེར་མོ་ཕྱག་གཡས་པས་ཞགས་པ་འཛིན་པ་དང་། ནུབ་ཏུ་རྡོ་རྗེ་ལྕགས་སྒྲོག་མ་དམར་མོ་ཕྱག་གཡས་བས་རྡོ་རྗེས་མཚན་པའི་ལྕགས་སྒྲོག་

འཛིན་པ་དང་། བྱང་དུ་རྡོ་རྗེ་དྲིལ་བུ་མ་ལྗང་གུ་ཕྱག་གཡས་པས་རྡོ་རྗེ་དྲིལ་བུ་འཛིན་པའོ། །མེ་ལ་སོགས་པའི་མཚམས་རྣམས་སུ་གནས་པའི་སྣ་ཚོགས་པདྨ་རྣམས་ལ། སྤྱན་མ་ལ་སོགས་པ་རྣམ་པར་དག་པའི་བྱང་ཆུབ་ཀྱི་སེམས་ཀྱི་བུམ་པ་དང་། རི་རབ་དང་མེ་ཐབ་དང་རྒྱལ་མཚན་ཆེན་པོའོ། །སྟེང་
དུ་གཙུག་ཏོར་རྣམ་པར་རྒྱལ་མ་དཀར་མོ་ཕྱག་གཡས་པས་འཁོར་ལོ་འཛིན་པ་སྟེ། འོག་ཏུ་གནོད་མཛེས་མ་སྔོན་མོ་ཀླུའི་ཞགས་པ་འཛིན་པའོ། །ལྷ་མོ་བཅུ་དྲུག་པོ་འདི་རྣམས་ནི་ཕྱག་གཡོན་པ་སྡིགས་མཛུབ་དང་བཅས་པ་སྟེ་སྣ་ཚོགས་པདྨ་དང་ཉི་མ་ལ་གནས་པའོ། །བཅུ་པོ་འདི་རྣམས་ཀྱང་ཞལ་གཅིག་
པ་ཕྱག་གཉིས་མའོ། །བཅུ་གཅིག་པོ་རྣམས་ཀྱང་རྡོ་རྗེ་སྐྱིལ་ཀྲུང་ཅན་གསེར་གྱི་རྣ་ཆ་གཡོ་བ། རྣམ་པ་སྣ་ཚོགས་པའི་གོས་དང་རིན་པོ་ཆེས་བརྒྱན་པ། པདྨ་རཱ་གའི་འོད་ཟེར་འཕྲོ་བའོ། །རིགས་ཀྱི་བདག་པོ་ནི་རྡོ་རྗེ་སྒྲོལ་མའི་རིན་ཆེན་དབང་པོའོ། །མེ་ཏོག་སྒྲོལ་མ་ལ་སོགས་པ་ནི་རྣམ་པར་སྣང་མཛད་དང་མི་བསྐྱོད་
པ་དང་སྣང་བ་མཐའ་ཡས་དང་དོན་ཡོད་གྲུབ་པ་རྣམས་ཏེ་རྡོ་རྗེ་ལྕགས་ཀྱུ་མ་ལ་སོགས་པ་རྣམས་ཀྱི་ཡང་ངོ་། །གཙུག་ཏོར་རྣམ་པར་རྒྱལ་མའི་རིན་ཆེན་དབང་པོ་སྟེ། གནོད་མཛེས་མའི་མི་བསྐྱོད་པའོ། །བཅོམ་ལྡན་འདས་མའི་ཐུགས་ཀའི་ས་བོན་ནི་ཏཱཾ་ངོ་། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཞེས་པ་ནི་སྙིང་པོ་སྟེ་ལས་
ཐམས་ཅད་པའི་སྔགས་ཀྱང་འདིའོ། །འོད་ཟེར་ཅན་གྱི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་གནས་པའི་ཆོས་འབྱུང་གི་ནང་དུ་གཞལ་ཡས་ཁང་སྟེ། ཁ་ཅིག་ནི་ཆོས་འབྱུང་མེད་པར་རི་རབ་ཀྱི་སྟེང་དུ་གཞལ་ཡས་ཁང་ངོ་ཞེས་པའོ། །གཞལ་ཡས་ཁང་གི་ལྟེ་བར་མཆོད་རྟེན་གྱི་ཕུག་གི་སྙིང་པོར་སྣ་
ཚོགས་ཆུ་སྐྱེས་ལ་གནས་པའི་ཟླ་བའམ་ཉི་མ་ལ་གཡས་བསྐུམ་ཞིང་གཡོན་བརྐྱང་བས་གནས་པའི་བཅོམ་ལྡན་འདས་མ་འོད་ཟེར་ཅན་སེར་མོ་རིན་པོ་ཆེ་སྣ་ཚོགས་ཀྱི་ཅོད་པན་ཅན། དབུའི་རྩེར་མཆོད་རྟེན་གྱིས་བརྒྱན་པ་རྣམ་པ་སྣ་ཚོགས་པའི་རིན་པོ་ཆེའི་རྒྱན་དང་ལྡན་པ། ཞལ་གསུམ་མ་རྩ་བའི་ཞལ་
སེར་པོ་གཡས་ཞལ་དཀར་པོ། གཡོན་ཞལ་ནག་པོ་ཕག་པའི་གདོང་ཅན་ཁྲོས་པ་ཁྲོ་གཉེར་དང་ཟུར་མིག་ཏུ་ལྡན་པ། ལྗགས་འདྲིལ་བ་འཇིགས་སུ་རུང་བ་ཕྱག་དྲུག་མ་གཡས་པ་རྣམས་ཀྱིས་མདའ་དང་རྡོ་རྗེ་དང་ཁབ་འཛིན་པ། གཡོན་པ་རྣམས་ཀྱིས་གཞུ་དང་སྐུད་པ་དང་མྱ་ངན་མེད་པའི་ཤིང་གི་ཡལ་ག་མེ་

ཏོག་དང་བཅས་པ་འཛིན་པ། སྨད་གཡོགས་སྔོན་པོ་གྱོན་པ་རྣམ་པར་བཀྲ་བའི་སྟོད་གཡོགས་སྔོན་པོ་ཅན། སེར་པོའི་མདོག་ཅན་གྱི་ཕག་པ་ལ་གནས་ཤིང་དེའི་མདོག་ཅན་གྱི་ཕག་པས་ཡོངས་སུ་བསྐོར་བ། མྱ་ངན་མེད་པའི་མེ་ཏོག་གི་ཕྲེང་བས་དབུ་ལ་བརྒྱན་པའོ། །ཤར་ཕྱོགས་སུ་ཨརྐ་མ་སཱི་མེ་
ཏོག་བནྡུ་ཀའི་མདོག་ཅན་གཡས་པ་དང་གཡོན་པའི་ཕྱག་གིས་ཁབ་དང་སྐུད་པ་འཛིན་པའོ། །ལྷོར་མརྐ་མ་སཱི་སེར་མོ་གསེར་གྱི་མདོག་ཅན་གཡས་པས་སྐུད་པ་དང་བཅས་པའི་ཁབ་དང་གཡོན་པས་མྱ་ངན་མེད་པའི་ཡལ་ག་འཛིན་པའོ། །ནུབ་ཏུ་ཨནྡྷར་དྷ་མ་སཱི་སེར་མོ་གཡས་པས་མྱ་ངན་མེད་པའི་ཡལ་ག་དང་
གཡོན་པས་སྡིགས་མཛུབ་དང་བཅས་པའི་ཞགས་པ་འཛིན་པའོ། །བྱང་དུ་ཏེ་ཛོ་མ་སཱི་དམར་མོའི་མདོག་ཅན་གཡས་པ་དང་གཡོན་པའི་ཕྱག་གིས་མདའ་དང་གཞུ་འཛིན་པའོ། །མེ་ལ་སོགས་པའི་མཚམས་རྣམས་སུ་ཨུ་ད་ཡ་མ་སཱི་དང་གུལ་མ་མ་སཱི་དང་པ་ན་མ་སཱི་དང་ཙི་བ་ར་མ་སཱི་རྣམས་རིམ་པ་ཇི་ལྟ་བ་བཞིན་དུ་
ཨརྐ་མ་སཱི་ལ་སོགས་པའི་སྐུ་མདོག་དང་ཕྱག་མཚན་ནོ། །རིམ་པ་ཕྱི་མའི་སྣམ་བུ་རྣམས་ལ་ཤར་དུ་མ་ཧཱ་ཙི་བ་ར་མ་སི་དང་བ་རཱ་ཧཱ་མུ་ཁི་མཆེ་བ་གཙིགས་པ་འཇིགས་སུ་རུང་བ་གཡས་པས་རྡོ་རྗེ་ལྕགས་ཀྱུ་དང་གཡོན་པས་རྡོ་རྗེ་ཞགས་པ་འཛིན་པའོ། །ལྷོར་པ་ཏ་ཀྲ་མ་སཱི་དང་བ་ར་ལི་སེར་མོ་གཡས་པས་མྱ་ངན་མེད་
པའི་ཡལ་ག་དང་གཡོན་པས་རྡོ་རྗེ་འཛིན་པའོ། །ནུབ་ཏུ་པ་ར་ཀྲ་མ་སཱི་དང་བ་ད་ལེ་དམར་མོ་གཡས་པ་དང་གཡོན་པ་དག་གིས་མདའ་དང་གཞུ་འཛིན་པའོ། །བྱང་དུ་ཨཱུརྨ་མ་སཱི་དང་བ་ར་ལི་ལྗང་གུ་གཡས་པ་དང་གཡོན་པའི་ཕྱག་དག་གིས་ཁབ་དང་སྐུད་པ་འཛིན་པའོ། །མེའི་མཚམས་སུ་བཏྟཱ་ལི་དམར་པོའི་
མདོག་ཅན་གཡས་པ་དང་གཡོན་པའི་ཕྱག་དག་གིས་ཁབ་དང་སྐུད་པ་འཛིན་པའོ། །བདེན་བྲལ་དུ་བ་དཱ་ལི་སེར་མོ་གཡས་པས་སྐུད་པ་དང་བཅས་པའི་ཁབ་དང་གཡོན་པས་ཡལ་ག་དང་བཅས་པའི་མྱ་ངན་མེད་པའི་མེ་ཏོག་གི་ཆུན་པོ་འཛིན་པའོ། །རླུང་དུ་བ་རཱ་ལི་དཀར་མོ་གཡས་པ་དང་གཡོན་པ་དག་གིས་
མྱ་ངན་མེད་པའི་ཡལ་ག་དང་ཞགས་པ་འཛིན་པའོ། །དབང་ལྡན་དུ་བ་རཱ་ཧཱ་མུ་ཁི་དམར་མོ་ཕྱག་གཉིས་ཀྱིས་མདའ་དང་གཞུ་འཛིན་པའོ། །ཤར་ལ་སོགས་པའི་སྒོ་རྣམས་སུ་ཨཱ་ལོ་དང་། ཏཱ་ལོ་དང་། ཀཱ་ལོ་དང་། སད་པ་ལོ་སམྦ་མཱུརྡྷ་ཊི་རྣམས་ནི་རིམ་པ་ཇི་ལྟ་བ་བཞིན་དུ། དཀར་མོ་དང་། སེར་མོ་དང་། དམར་

མོ་དང་། ལྗང་གུ་སྟེ་ཕྱག་གཉིས་མ་རྡོ་རྗེ་ལྕགས་ཀྱུ་དང་། ཞགས་པ་དང་ལྕགས་སྒྲོག་དང་དྲིལ་བུ་འཛིན་པའོ། །ཨརྐ་མ་སཱི་ལ་སོགས་པའི་ལྷ་མོ་ཉི་ཤུ་རྩ་བཞི་པོ་འདི་རྣམས་མངོན་པར་གསར་དུ་བྱུང་བའི་ལང་ཚོ་ཅན་སྤྱི་བོར་མཆོད་རྟེན་གྱིས་བརྒྱན་པ། རྣམ་པ་སྣ་ཚོགས་པའི་རིན་པོ་ཆེའི་རྒྱན་དང་ལྡན་པ་རྣམ་པར་
བཀྲ་བའི་གོས་སྔོན་པོས་སྟོད་གཡོགས་བྱས་པ། ཕག་ཞལ་གཅིག་མ་སྤྱན་གསུམ་མ་ཕྱག་གཉིས་མ་གསེར་གྱི་མདོག་ཅན་གྱི་ཕག་པ་ལ་གནས་ཤིང་། གསེར་གྱི་མདོག་ཅན་གྱི་ཕག་པས་ཡོངས་སུ་བསྐོར་བའོ། །སྒོ་སྐྱོང་མ་རྣམས་ནི་སྣ་ཚོགས་ཆུ་སྐྱེས་དང་ཉི་མ་ལ་གཡས་བརྐྱང་གིས་གནས་པ་སྟེ་
གཞན་ཉི་ཤུ་རྩ་བཞི་པོ་སྣ་ཚོགས་ཆུ་སྐྱེས་དང་ཟླ་བ་ལ་གཡོན་བརྐྱང་གིས་གནས་པའོ། །རིགས་ཀྱི་བདག་པོ་ནི་འོད་ཟེར་ཅན་མའི་རྟག་པའོ། །ཤར་ལ་སོགས་པའི་ཕྱོགས་ལ་བསྐོར་བ་རྣམས་ཀྱི་མི་བསྐྱོད་པ་དང་རིན་ཆེན་དབང་པོ་དང་སྣང་བ་མཐའ་ཡས་དང་དོན་ཡོད་གྲུབ་པ་རྣམས་ཏེ་མེ་ལ་སོགས་པའི་མཚམས་
ལ་བསྐོར་བ་རྣམས་ཀྱིའང་དེ་བཞིན་ནོ་ཞེས་པ་ནི་ཁ་ཅིག་གོ། །ཡང་ན་དཀར་མོ་རྣམས་ཀྱི་རྣམ་པར་སྣང་མཛད་དང་ནག་མོ་རྣམས་ཀྱི་མི་བསྐྱོད་པ་དང་། སེར་མོ་རྣམས་ཀྱི་རིན་ཆེན་འབྱུང་ལྡན་དང་། ལྗང་གུ་རྣམས་ཀྱི་དོན་ཡོད་གྲུབ་པའོ་ཞེས་པ་ནི་གཞན་ནོ། །འོད་ཟེར་ཅན་གྱི་ཐུགས་ཀའི་ས་བོན་ནི་མཾ་མོ། །
ཨོཾ་མཱ་རཱི་ཙྱཻ་སྭཱ་ཧཱ། ཞེས་པ་ནི་སྙིང་པོའོ། །ཨོཾ་མཱ་རཱི་ཙྱཻ་ཧཱུཾ་སརྦྦ་བིགྷྣཱན་ཨུདྤཱ་ད་ཡ་ཧཱུཾ་ཕཊ། ཅེས་པ་ལས་ཐམས་ཅད་པའི་སྔགས་སོ།། །།བསྲུང་བ་ལྔའི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་རི་རབ་ཀྱི་སྟེང་གི་གཞལ་ཡས་ཁང་གི་དབུས་སུ་སྣ་ཚོགས་ཆུ་སྐྱེས་དང་ཟླ་བ་ལ་བཅོམ་ལྡན་འདས་མ་སོ་སོར་འབྲང་
མ་ཆེན་མོ་འོད་ཟེར་དམར་པོའི་དཀྱིལ་འཁོར་ཅན། ཞལ་བཞི་མ་རྩ་བའི་ཞལ་སེར་མོ་གཡས་དཀར་བ་རྒྱབ་སྔོ་བ། གཡོན་དམར་བ་ཕྱག་བཅུ་གཉིས་མ་གཡས་པ་རྣམས་ཀྱིས་རིན་པོ་ཆེའི་གདུགས་དང་འཁོར་ལོ་དང་རྡོ་རྗེ་དང་མདའ་དང་རལ་གྲི་དང་མཆོག་སྦྱིན་གྱི་ཕྱག་རྒྱའོ། །གཡོན་པ་རྣམས་ཀྱིས་རྡོ་རྗེ་
དང་ཞགས་པ་དང་རྩེ་གསུམ་དང་གཞུ་དང་དགྲ་སྟ་དང་དུང་རྣམས་འཛིན་པ། དབུ་ལ་མཆོད་རྟེན་གྱིས་བརྒྱན་པ་རྡོ་རྗེའི་སྐྱིལ་ཀྲུང་ཅན་མའོ། །དེའི་ཤར་ཕྱོགས་སུ་སྣ་ཚོགས་པདྨ་དང་ཟླ་བ་ལ་སྟོང་ཆེན་མོ་རབ་ཏུ་འཇོམས་མ་རོལ་པའི་ཀུན་དུ་བསྐྱོད་པས་བཞ