Luận tạng Tây Tạng (Tengyur) — Tập 75

ྒྱ་འཛིན་པའོ། །ནུབ་ཏུ་རྡོ་རྗེ་སྨྲ་བ་དམར་པོ་གཡོན་པ་ཆོས་ཀྱི་དུང་དང་གཡས་པས་རྡོ་རྗེ་རྩེ་གཅིག་པའི་ལྕེ་འཛིན་པའོ། །བྱང་དུ་ཁྱུང་གི་སྟེང་དུ་སྣ་ཚོགས་པདྨའི་ལྟེ་བར་དོན་ཡོད་གྲུབ་པ་ལྗང་གུ་རྡོ་རྗེ་སྐྱིལ་ཀྲུང་གིས་བཞུགས་པ། ཕྱག་གཡས་པའི་གུང་མོས་སྣ་ཚོགས་
རྡོ་རྗེ་འཛིན་པས་མི་འཇིགས་པ་སྦྱིན་པའི་ཚུལ་བྱེད་ཅིང་གཡོན་པ་གན་རྐྱལ་དུ་པང་བར་བཞག་པའོ། །ཤར་གྱི་འདབ་མར་རྡོ་རྗེ་ལས་ལྗང་གུ་གཡས་པས་སྙིང་གར་བསླང་བའི་སྦྱོར་བས་སྣ་ཚོགས་རྡོ་རྗེ་རྩེ་མོ་བཅུ་གཉིས་པ་འཛིན་པ། གཡོན་པ་སྣ་ཚོགས་རྡོ་རྗེས་མཚན་པའི་དྲིལ་བུ་དཀུར་
བརྟེན་པ། ཡང་ན་ལག་པ་གཉིས་ཀྱིས་ཐལ་མོ་སྤྱི་བོར་སྦྱར་ནས་སྣ་ཚོགས་རྡོ་རྗེ་སྤྱི་བོར་འཛིན་པའོ། །ལྷོར་རྡོ་རྗེ་བསྲུང་བ་སེར་པོ་ཕྱག་གཉིས་ཀྱི་རྡོ་རྗེའི་གོ་ཆ་འཛིན་པའོ། །བྱང་དུ་རྡོ་རྗེ་གནོད་སྦྱིན་ནག་པོ་ཕྱག་གཉིས་ཀྱིས་མཐེ་ཆུང་གཉིས་ཀྱི་རྡོ་རྗེ་མཆེ་བའི་མཚོན་གྱི་རྩེ་མོ་གཉིས་རང་གི་ཁར་
བཅུག་པས་གདུག་པ་རྣམས་སྡིགས་པར་བྱེད་པའོ། །ནུབ་ཏུ་རྡོ་རྗེ་ཁུ་ཚུར་སེར་པོ་ཁུ་ཚུར་གྱི་མཚམས་སུ་རྡོ་རྗེ་སྟེ། རྡོ་རྗེ་ཁུ་ཚུར་དག་གིས་བཟུང་བའི་རྡོ་རྗེ་རྩེ་ལྔ་པ་བསྡམས་པའོ། །དབུས་ཀྱི་གཞལ་ཡས་ཁང་གི་མེའི་པདྨ་ལ་རྡོ་རྗེ་སྒེག་མོ་དཀར་མོ་རྡོ་རྗེ་དཀུར་བརྟེན་པའི་ཕྱག་རྒྱའི་
ཕྱག་གཉིས་ཀྱིས་རྡོ་རྗེ་གཉིས་འཛིན་པའོ། །བདེན་བྲལ་དུ་པདྨ་ལ་ཕྲེང་བ་མ་སེར་མོ་ཕྱག་གཉིས་ཀྱིས་རཏྣའི་ཕྲེང་བ་འཛིན་པའོ། །རླུང་དུ་པདྨ་ལ་གླུ་མ་དམར་མོ་ཕྱག་གཉིས་ཀྱིས་པི་ཝང་གི་རྒྱུད་སྦྲེང་བའོ། །དབང་ལྡན་དུ་པདྨ་ལ་གར་མ་ལྗང་གུ་རྡོ་རྗེ་རྩེ་གསུམ་པ་གཉིས་བཟུང་

ནས་ཕྱག་གཉིས་ཀྱིས་གར་བྱེད་པའོ། །དབུས་ཀྱི་གཞལ་ཡས་ཁང་གི་ཕྱི་རུ་སྣམ་བུ་ལ་ཤར་དུ་པདྨ་རྣམས་ལ་བྱམས་པ་དང་མཐོང་བ་དོན་ཡོད་དང་ངན་སོང་ཀུན་འདྲེན་དང་། མྱ་ངན་དང་མུན་པ་ཐམས་ཅད་འཇོམས་པའི་བློ་གྲོས་རྣམས་ནི་མི་བསྐྱོད་པ་ལྟ་བུའོ། །ལྷོར་པདྨ་རྣམས་ལ་སྤོས་ཀྱི་
གླང་པོ་དང་། དཔའ་བར་འགྲོ་བ་དང་། ནམ་མཁའ་མཛོད་དང་། ཡེ་ཤེས་ཏོག་རྣམས་ནི་རིན་ཆེན་འབྱུང་ལྡན་ལྟ་བུའོ། །ནུབ་ཏུ་པདྨ་རྣམས་ལ་འོད་དཔག་མེད་དང་། ཟླ་བའི་འོད་དང་བཟང་སྐྱོང་དང་དྲ་བ་ཅན་གྱི་འོད་རྣམས་ནི་འོད་དཔག་མེད་ལྟ་བུའོ། །བྱང་དུ་པདྨ་རྣམས་ལ་རྡོ་རྗེ་སྙིང་པོ་དང་། བློ་
གྲོས་མི་བཟད་པ་དང་། སྤོབས་པ་བརྩེགས་པ་དང་། ཀུན་དུ་བཟང་པོ་རྣམས་ནི་དོན་ཡོད་གྲུབ་པ་ལྟ་བུའོ། །ཡང་ན་ཤར་ལ་སོགས་པའི་སྣམ་བུ་རྣམས་ལ་བསྐལ་པ་བཟང་པོའི་བྱང་ཆུབ་སེམས་དཔའ་བྱམས་པ་ལ་སོགས་པ་སྟོང་དུ་བཞིས་མ་ཚང་བ་བསྒོམ་པར་བྱའོ། །དེའི་མཚན་རྣམས་
མངས་པས་འཇིགས་པས་མ་བཤད་དོ། །མེའི་མཚམས་སུ་པདྨ་ལ་རྡོ་རྗེ་བདུག་སྤོས་མ་དཀར་མོ་དང་བདེན་བྲལ་གྱི་པདྨ་ལ་རྡོ་རྗེ་མེ་ཏོག་མ་སེར་པོ་དང་། རླུང་གི་པདྨ་ལ་རྡོ་རྗེ་མར་མེ་མ་དཀར་དམར་དང་། དབང་ལྡན་གྱི་པདྨ་ལ་རྡོ་རྗེ་དྲི་ཆབ་མ་ལྗང་གུ། བདུག་སྤོས་མ་ལ་སོགས་པ་འདི་
རྣམས་གོང་བཞིན་དུ་ཕྱག་མཚན་འཛིན་པའོ། །ཤར་ལ་སོགས་པའི་སྒོའི་པདྨ་རྣམས་ལ་རྡོ་རྗེ་ལྕགས་ཀྱུ་དང་རྡོ་རྗེ་ཞགས་པ་དང་། རྡོ་རྗེ་ལྕགས་སྒྲོག་དང་། རྡོ་རྗེ་འབེབས་པ་རྣམས་རིམ་པ་བཞིན་དུ་དཀར་པོ་དང་སེར་པོ་དང་དམར་པོ་དང་ལྗང་གུ་རྣམས་ནི་གོང་བཞིན་དུ་ཕྱག་མཚན་འཛིན་པའོ། །
འདིར་བཅོམ་ལྡན་འདས་རྡོ་རྗེ་དབྱིངས་ལས་གཞན་པའི་ལྷ་རྣམས་ནི་ཞལ་གཅིག་ཕྱག་གཉིས་པ་གོས་དང་རཏྣ་སྣ་ཚོགས་ཀྱིས་བརྒྱན་པ་རཏྣའི་ཅོད་པན་ཅན་རྡོ་རྗེ་སེམས་དཔའ་ལ་སོགས་པ་མ་གཏོགས་པ་དཀྱིལ་འཁོར་གྱི་དབང་ཕྱུག་ལ་མངོན་དུ་ཕྱོགས་པའོ། །རྡོ་རྗེ་སེམས་དཔའ་ལ་སོགས་པའི་བྱང་ཆུབ་
སེམས་དཔའ་བཅུ་དྲུག་ནི་རང་གི་རིགས་ཀྱི་བདག་པོ་དེ་བཞིན་གཤེགས་པ་ལ་མངོན་དུ་ཕྱོགས་པའོ། །རྣམ་པར་སྣང་མཛད་ལ་སོགས་པ་ནས་རྡོ་རྗེ་འབེབས་པའི་བར་གྱི་ལྷ་རྣམས་ནི་ཇི་ལྟར་གསུངས་པའི་ལྟེ་བ་དང་འདབ་མ་རྣམས་ལ་གནས་ཤིང་ཉི་མའི་འོད་ཟེར་ཅན་ནོ། །དེ་བཞིན་གཤེགས་

པ་ལྔ་ལས་གཞན་པའི་ལྷ་བཞི་བཅུ་ཞེ་བརྒྱད་ནི་སེམས་དཔའི་སྐྱིལ་ཀྲུང་གིས་བཞུགས་པའོ། །འདིར་བཅོམ་ལྡན་འདས་རྡོ་རྗེ་དབྱིངས་རྣམ་པར་སྣང་མཛད་ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ཀྱི་ཡེ་ཤེས་ཀྱི་བདག་ཉིད་ལ་རང་འདྲ་བའི་རྡོ་རྗེ་སེམས་དཔས་རྒྱས་བཏབ་པའོ། །
མེ་ལོང་ལྟ་བུའི་ཡེ་ཤེས་ལ་སོགས་པའི་བདག་ཉིད་ཀྱིས་མི་བསྐྱོད་པ་ལ་སོགས་པ་དེ་བཞིན་གཤེགས་པ་བཞིའི་རིགས་ཀྱི་བདག་པོ་ནི་རྣམ་པར་སྣང་མཛད་དོ། །སེམས་མ་རྡོ་རྗེ་མ་དང་རྡོ་རྗེ་སེམས་དཔའ་ལ་སོགས་པ་བཞི་དང་སྒེག་མོ་དང་བདུག་སྤོས་མ་དང་བྱམས་པ་ལ་སོགས་པ་བཞི་དང་། རྡོ་རྗེ་
ལྕགས་ཀྱུ་རྣམས་ཀྱི་མི་བསྐྱོད་པའོ། །རིན་ཆེན་རྡོ་རྗེ་མ་དང་རྡོ་རྗེ་རིན་ཆེན་ལ་སོགས་པ་བཞི་དང་། ཕྲེང་བ་མ་དང་མེ་ཏོག་མ་དང་སྤོས་ཀྱི་གླང་པོ་ལ་སོགས་པ་བཞི་དང་རྡོ་རྗེ་ཞགས་པ་རྣམས་ཀྱི་རིན་ཆེན་འབྱུང་ལྡན་ནོ། །ཆོས་ཀྱི་རྡོ་རྗེ་མ་དང་རྡོ་རྗེ་ཆོས་ལ་སོགས་པ་བཞི་དང་གླུ་མ་དང་། མར་མེ་མ་
དང་། འོད་དཔག་མེད་ལ་སོགས་པ་བཞི་དང་། རྡོ་རྗེ་ལྕགས་སྒྲོག་རྣམས་ཀྱི་སྣང་བ་མཐའ་ཡས་སོ། །ལས་ཀྱི་རྡོ་རྗེ་མ་དང་། རྡོ་རྗེ་ལས་ལ་སོགས་པ་བཞི་དང་། གར་མ་དང་དྲི་ཆབ་མ་དང་། རྡོ་རྗེ་སྙིང་པོ་ལ་སོགས་པ་བཞི་དང་རྡོ་རྗེ་འབེབས་པ་རྣམས་ཀྱི་དོན་ཡོད་གྲུབ་པའོ། །འདིར་ནང་
གི་གཞལ་ཡས་ཁང་གི་སྒོ་རྣམས་སུའང་། རྡོ་རྗེ་ལྕགས་ཀྱུ་ལ་སོགས་པ་སྒོ་སྐྱོང་བཞི་བསྒོམ་པར་བྱའོ་ཞེས་པ་ཕྱོགས་གཞན་ནོ། །རྣམ་པར་སྣང་མཛད་ཀྱི་སྙིང་གའི་ས་བོན་ཨཱཿཨོཾ་སརྦ་ཏ་ཐཱ་ག་ཏཱ་མ་ཧཱ་ཡོ་གཱི་ཤྭ་ར་ཧཱུཾ་ཞེས་པ་ནི་སྙིང་པོའོ། །ཨོཾ་བཛྲ་ཡཀྵ་ཧཱུཾ་ཞེས་པ་ནི་རྡོ་རྗེ་གནོད་སྦྱིན་གྱི་ལས་
ཐམས་ཅད་པའི་སྔགས་སོ། །གང་ཡང་རྡོ་རྗེ་རྩེ་མོ་ལ་སོགས་པའི་རྒྱུད་གཞན་གྱིས་ཀྱང་ལྷའི་རྣམ་པའི་ཁྱད་པར་གསུངས་པ་དེ་ནི་འདིར་མངས་ཀྱིས་དོགས་པས་མ་བཤད་དོ།། །།བཞི་བཅུ་རྩ་གསུམ་གྱི་བདག་ཉིད་ཅན། འཇམ་པའི་རྡོ་རྗེའི་དཀྱིལ་འཁོར་ལ་རྡོ་རྗེ་གུར་གྱི་ནང་ལ་སོགས་
པ་གཞལ་ཡས་ཁང་བར་དུ་དང་པོར་བཤད་པའི་འཇམ་པའི་རྡོ་རྗེའི་དཀྱིལ་འཁོར་བཞིན་ནོ། །འོན་ཀྱང་འདིར་ཁྲོ་བོ་རྣམས་ནི་འོག་ནས་འཆད་པའི་གཟུགས་ཅན་ནོ་ཞེས་པ་ནི་ཕྱོགས་གཅིག་གོ། །རྡོ་རྗེ་གུར་གྱི་ནང་ན་རི་རབ་ཀྱི་སྟེང་ན་སྣ་ཚོགས་པདྨའི་ལྟེ་བར་གནས་པའི་སྣ་ཚོགས་རྡོ་རྗེའི་ལྟེ་བར་གཞལ་

ཡས་ཁང་ཞེས་པ་ནི་ཕྱོགས་གཉིས་པའོ། །ཕྱོགས་གཉིས་ཀ་ལ་ཡང་མཆོད་རྟེན་དཀར་པོའི་ནང་དུ་གཞལ་ཡས་ཁང་ངོ་། །དེའི་ལྟེ་བ་ལ་སེང་གེའི་སྟེང་དུ་སྣ་ཚོགས་པདྨ་དང་ཟླ་བ་ལ་སེམས་དཔའི་སྐྱིལ་ཀྲུང་གིས་བཞུགས་པའི་བཅོམ་ལྡན་འདས་རྣམ་པར་སྣང་མཛད་ཀྱི་རང་བཞིན་འཇམ་པའི་རྡོ་རྗེ་
སྐུ་མདོག་གསེར་བཙོ་མ་ལྟ་བུ་སྡུག་ཅིང་ཡིད་དུ་འོང་བ་མེ་ཏོག་སྣ་ཚོགས་ཀྱིས་མཛེས་པའི་གཙུག་ཕུད་ཅན་གསུམ་གྱིས་རྣམ་པར་བརྒྱན་པ་རྩ་བ་དང་གཡས་དང་གཡོན་གྱི་ཞལ་སེར་པོ་དང་སྔོན་པོ་དང་དཀར་པོ་ཕྱག་དྲུག་པ་གཡས་པ་རྣམས་ཀྱི་རལ་གྲི་དང་། མཆོག་སྦྱིན་དང་མདའ་དང་། གཡོན་པ་
རྣམས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟི་དང་ཆུ་སྐྱེས་སྔོན་པོ་དང་གཞུ་འཛིན་པའོ། །བདག་ལྟ་བུའི་རྡོ་རྗེ་དབྱིངས་ཀྱི་དབང་ཕྱུག་མ་ལ་སྙོམས་པར་ཞུགས་པའོ། །དེའི་ཤར་ཕྱོགས་ཀྱི་ལེ་ཚེ་ལ་གླང་པོ་ཆེའི་སྟེང་དུ་སྣ་ཚོགས་པདྨ་དང་ཉི་མ་ལ་མི་བསྐྱོད་པ་སྔོན་པོ་འགྱིང་བའི་ཚུལ་གྱིས་གནས་པ་
རྩ་བ་དང་གཡས་གཡོན་གྱི་ཞལ་སྔོན་པོ་དང་དཀར་པོ་དང་དམར་པོ་ཕྱག་བརྒྱད་པ་གཡས་པའི་གུང་མོས་སྙིང་གར་རྡོ་རྗེ་གྱེན་དུ་བསྒྲེང་བ། གཡོན་པའི་རྡོ་རྗེ་ཁུ་ཚུར་གྱིས་རྡོ་རྗེ་དྲིལ་བུ་དཀུ་ལ་བརྟེན་པ། གཡས་གཞན་རྣམས་ཀྱིས་རལ་གྲི་དང་ལྕགས་ཀྱུ་དང་མདའ་རྣམས་སོ། །གཡོན་པ་རྣམས་
ཀྱིས་ནུ་མ་དང་ཞགས་པ་དང་གཞུ་འཛིན་པའོ། །ལྷོ་རུ་རྟའི་སྟེང་དུ་སྣ་ཚོགས་ཆུ་སྐྱེས་དང་ཉི་མ་ལ་རིན་ཆེན་འབྱུང་ལྡན་སེར་པོ་སེམས་དཔའི་སྐྱིལ་ཀྲུང་གིས་བཞུགས་པ། སེར་པོ་དང་སྔོན་པོ་དང་དཀར་པོ་རྩ་བ་དང་གཡས་གཡོན་གྱི་ཞལ་ལོ། །ཕྱག་དྲུག་པ་རྩ་བའི་ཕྱག་དག་གིས་མཉམ་གཞག་གི་
ཕྱག་རྒྱ་བྱས་ལ། གཡས་པའི་ཕྱག་གཉིས་ཀྱིས་རིན་པོ་ཆེ་དང་རལ་གྲི་འཛིན་པའོ། །གཡོན་པ་གཉིས་ཀྱིས་ནུ་མ་དང་རྡོ་རྗེ་འཛིན་པའོ། །ནུབ་ཏུ་རྨ་བྱའི་སྟེང་དུ་སྣ་ཚོགས་ཆུ་སྐྱེས་དང་ཉི་མ་ལ་སེམས་དཔའི་སྐྱིལ་མོ་ཀྲུང་གིས་གནས་པའི་སྣང་བ་མཐའ་ཡས་དཀར་པོ་དཀར་པོ་དང་སྔོན་པོ་དང་དམར་
པོ་རྩ་བ་དང་གཡས་གཡོན་གྱི་ཞལ་ལོ། །ཕྱག་དྲུག་པ་གཡོན་པ་སྒེག་པ་དང་བཅས་པའི་པདྨའི་ཡུ་བ་སྙིང་གར་བཟུང་སྟེ། གཡས་པས་ཁ་འབྱེད་པའོ། །གཡས་པ་གཉིས་ཀྱིས་བགྲང་ཕྲེང་དང་རྡོ་རྗེ་འཛིན་པའོ། །གཡོན་པ་གཉིས་ཀྱིས་ནུ་མ་དང་སྤྱི་བླུགས་འཛིན་པའོ། །བྱང་དུ་ཁྱུང་

གི་སྟེང་དུ་སྣ་ཚོགས་ཆུ་སྐྱེས་དང་ཉི་མ་ལ་དོན་ཡོད་གྲུབ་པ་སེམས་དཔའི་སྐྱིལ་ཀྲུང་གིས་བཞུགས་པ་ཁ་དོག་དམར་པོ་དམར་པོ་དང་སྔོན་པོ་དང་དཀར་པོ་རྩ་བ་དང་གཡས་གཡོན་གྱི་ཞལ་ལོ། །ཕྱག་དྲུག་པ་དང་པོ་གཉིས་ཀྱིས་བསམ་གཏན་གྱི་ཕྱག་རྒྱ་བཅིང་བའོ། །གཡས་པ་གཉིས་
ཀྱིས་རལ་གྲི་དང་རྡོ་རྗེ་འཛིན་པའོ། །གཡོན་པ་གཉིས་ཀྱིས་ནུ་མ་དང་ལྕགས་ཀྱུ་འཛིན་པའོ། །དབང་ལྡན་དུ་སྤྱན་མ་སེར་མོ་ནི་སེམས་དཔའི་སྐྱིལ་ཀྲུང་ཅན། ཕྱག་བརྒྱད་མ་གཡས་པ་རྣམས་ཀྱིས་མཆོག་སྦྱིན་དང་མི་འཇིགས་པ་དང་རྡོ་རྗེ་དང་མདའ་འཛིན་པའོ། །གཡོན་པ་རྣམས་ཀྱིས་སྡིགས་
མཛུབ་དང་བཅས་པའི་ཞགས་པ་དང་། རིན་པོ་ཆེའི་སྙེ་མ་དང་བགྲང་ཕྲེང་དང་གཞུ་འཛིན་པའོ། །མེར་མཱ་མ་ཀཱི་སེམས་དཔའི་སྐྱིལ་ཀྲུང་ཅན་མ་སྔོན་མོ་ནི་ཁྲོ་བ་དང་བཅས་པས་དགོད་པ་ཕྱག་དྲུག་པ་གཡས་པ་རྣམས་ཀྱིས་མི་འཇིགས་པ་དང་རྡོ་རྗེ་དང་མདའ་དང་། གཡོན་པ་རྣམས་ཀྱིས་སྡིགས་
མཛུབ་དང་ཞགས་པ་དང་གཞུ་འཛིན་པའོ། །བདེན་བྲལ་དུ་གོས་དཀར་མོ་དམར་མོ་ནི་ཕྱག་དྲུག་པ་གཡས་པ་རྣམས་ཀྱིས་མི་འཇིགས་པ་དང་རྡོ་རྗེ་དང་མདའོ། །གཡོན་པ་རྣམས་ཀྱིས་པདྨ་དང་བགྲང་ཕྲེང་དང་གཞུ་འཛིན་ཅིང་འགྱིང་བའི་ཚུལ་གྱིས་གནས་པའོ། །རླུང་དུ་སྒྲོལ་མ་མརྒད་ལྟ་བུའི་མདོག་
ཅན་མ་སེམས་དཔའི་སྐྱིལ་ཀྲུང་གིས་གནས་པ། ཕྱག་དྲུག་པ་གཡས་པ་རྣམས་ཀྱིས་མི་འཇིགས་པ་དང་རྡོ་རྗེ་དང་མདའ་འཛིན་པའོ། །གཡོན་པ་རྣམས་ཀྱིས་སྡིགས་མཛུབ་དང་ཨུཏྤ་ལ་དང་གཞུ་འཛིན་པའོ། །རིམ་པ་གཉིས་པ་ལ་ཤར་ལ་སོགས་པའི་ཕྱོགས་རྣམས་སུ་སེམས་མ་རྡོ་རྗེ་མ་
དང་རིན་ཆེན་རྡོ་རྗེ་མ་དང་ཆོས་ཀྱི་རྡོ་རྗེ་མ་དང་། ལས་ཀྱི་རྡོ་རྗེ་མ་རྣམས་རིམ་པ་བཞིན་དུ་སྐུ་མདོག་དང་། ཕྱག་མཚན་ནི་མི་བསྐྱོད་པ་ལ་སོགས་པ་བཞིན་ནོ། །འོན་ཀྱང་ནུ་མ་འཛིན་པ་མེད་པས་སེམས་མ་རྡོ་རྗེ་མ་རིན་ཆེན་རྡོ་རྗེ་མ་ལས་ཀྱི་རྡོ་རྗེ་མ་རྣམས་སྡིགས་མཛུབ་འཛིན་པའོ། །ཆོས་ཀྱི་རྡོ་རྗེ་
མ་ནི་ཞགས་པ་འཛིན་པའོ། །དབང་ལྡན་དུ་ཙུནྡ་དཀར་མོ་ཟླ་བའི་མདོག་ཅན་ཕྱག་ཉི་ཤུ་རྩ་དྲུག་མ་རྩ་བའི་ཕྱག་གཉིས་ཀྱིས་སྙིང་གར་རྩ་བའི་ཕྱག་རྒྱ་དང་། གཡས་པ་རྣམས་ཀྱིས་མི་འཇིགས་པ་དང་རལ་གྲི་དང་རཏྣའི་ཕྲེང་བ་དང་བི་ཛ་པཱུ་ར་དང་མདའ་དང་དགྲ་སྟ་དང་མདུང་ཐུང་དང་ཐོ་བ་དང་

ལྕགས་ཀྱུ་དང་རྡོ་རྗེ་དང་བ་དན་གསུམ་གྱི་ཚུལ་དང་བགྲང་ཕྲེང་ངོ་། །གཡོན་པ་རྣམས་ཀྱིས་ཡིད་བཞིན་གྱི་ནོར་བུའི་རྒྱལ་མཚན་དང་། པདྨ་དང་སྤྱི་བླུགས་དང་ཞགས་པ་དང་གཞུ་དང་ཤག་ཏི་དང་འཁོར་ལོ་དང་རལ་གྲི་དང་སྡིགས་མཛུབ་དང་བུམ་པ་བཟང་པོ་དང་བི་དི་བ་ལ་དང་། ཤེས་རབ་ཀྱི་ཕ་
རོལ་ཏུ་ཕྱིན་པའི་པོ་ཏིའོ། །ཀན་ཛཱི་ཀའི་སྟོད་གཡོགས་བཅིངས་པ་བླ་གོས་ཕྲག་པ་ལ་གཟར་བ་གར་གྱི་ཉམས་དགུའི་རང་བཞིན་རྩ་བའི་ཞལ་དཀར་པོ་གཡས་པའི་སྔོན་པོ་ལྗགས་འགུལ་ཞིང་མཆེ་བ་བག་ཙམ་གཙིགས་པ། གཡོན་པ་སེར་པོ་མ་མཆུ་མནན་པ། ཐལ་མོ་སྦྱར་ཏེ་མཛུབ་
མོ་གཉིས་གུང་མོའི་ཚིགས་པར་ཟླུམ་པོའི་རྣམ་པར་བཞག་སྟེ་མཐེ་བོང་གཉིས་མཛུབ་མོའི་རྩ་བའི་ལོགས་ལ་གཞག་པར་བྱ་སྟེ། སྙིང་གར་བཞག་པ་འདི་ནི་རྩ་བའི་ཕྱག་རྒྱའོ། །མེར་ནི་རིན་ཆེན་སྐར་མདའ་སེར་མོ་ཕྱག་དྲུག་པ་གཉིས་ཀྱིས་སྙིང་གར་རིན་པོ་ཆེ་ཁ་སྦྱོར་འཛིན་པའོ། །
གཡས་པ་གཉིས་མི་འཇིགས་པ་དང་མདའ་འཛིན་པ་གཡོན་པ་གཉིས་ཀྱིས་སྡིགས་མཛུབ་དང་གཞུ་འཛིན་པའོ། །བདེན་བྲལ་དུ་ཁྲོ་གཉེར་ཅན་དཀར་མོ་ཕྱག་དྲུག་མ་གཡས་པ་རྣམས་ཀྱིས་རྡོ་རྗེ་དང་དབྱུག་པ་དང་མདའ་འཛིན་པའོ། །གཡོན་པ་རྣམས་ཀྱིས་སྡིགས་མཛུབ་དང་སྤྱི་བླུགས་
དང་གཞུ་འཛིན་པའོ། །རླུང་དུ་རྡོ་རྗེ་ལྕགས་སྒྲོག་མ་ལྗང་གུ་ཕྱག་དྲུག་མ་གཡས་པ་རྣམས་ཀྱིས་རྡོ་རྗེ་དང་རྡོ་རྗེ་ལུ་གུ་རྒྱུད་དང་མདའ་འཛིན་པ་གཡོན་པ་རྣམས་ཀྱིས་སྡིགས་མཛུབ་དང་ཞགས་པ་དང་གཞུ་འཛིན་པའོ། །སྤྱན་མ་ལ་སོགས་པའི་ལྷ་མོ་བཅུ་གཉིས་པོ་འདི་རྣམས་ནི་རོལ་པའི་ཀུན་
དུ་བསྐྱོད་པ་དང་ལྡན་པ་ཟླ་བའི་གདན་ལ་བཞུགས་ཤིང་འོད་དམར་པོའི་དཀྱིལ་འཁོར་ཅན། རང་རང་གི་རིགས་ཀྱི་བདག་པོ་བཞིན་དུ་ཞལ་གསུམ་པའོ། །རིམ་པ་གསུམ་པའི་དཀྱིལ་འཁོར་དུ་ཤར་གྱི་སྣམ་བུ་ལ་བྱམས་པ་གསེར་གྱི་མདོག་ལྟ་བུ་ཕྱག་དང་པོ་གཉིས་ཆོས་འཆད་ཀྱི་ཕྱག་
རྒྱ་དང་། གཡས་པ་མཆོག་སྦྱིན་གྱི་ཕྱག་རྒྱ་དང་གཡོན་པ་མེ་ཏོག་དང་བཅས་པའི་ཀླུ་ཤིང་གི་ཡལ་ག་འཛིན་པའོ། །འཇམ་དཔལ་ནི་བརྗོད་ཟིན་པའི་གཟུགས་ཅན་ཏེ། ཁྱད་པར་དུ་ཤེས་རབ་མ་དང་བྲལ་བའོ། །སྤོས་ཀྱི་གླང་པོ་ལྗང་གུ་གཡོན་པས་བུམ་པར་གནས་པའི་གླང་པོ་ཆེའི་

སྣ་འཛིན་པའོ། །གཡས་ཀྱི་མཆོག་སྦྱིན་ནོ། །ཡེ་ཤེས་ཏོག་སེར་པོ་གཡོན་པས་ཡིད་བཞིན་གྱི་ནོར་བུའི་རྒྱལ་མཚན་འཛིན་པའོ། །གཡས་མཆོག་སྦྱིན་ནོ། །ལྷོ་རུ་བཟང་སྐྱོང་སྐུ་མདོག་དམར་པོ། །གཡོན་པ་རཏྣ་འཛིན་པ་གཡས་པས་མཆོག་སྦྱིན་ནོ། །བློ་གྲོས་
རྒྱ་མཚོ་དཀར་པོ་ཕྱག་གཉིས་ཀྱི་སོར་མོ་ཐམས་ཅད་བརྐྱང་བས་ཆུ་རླབས་ཀྱི་ཚུལ་བྱེད་པའོ། །བློ་གྲོས་མི་ཟད་པ་གསེར་གྱི་མདོག་ལྟ་བུ་གཡོན་པའི་ཁུ་ཚུར་སྙིང་གར་བཞག་སྟེ། གཡས་པས་མཆོག་སྦྱིན་ནོ། །སྤོབས་པ་བརྩེགས་པ་ལྗང་གུ་གཡོན་པས་ཁུ་ཚུར་མཁལ་ཁུང་དུ་
བཞག་པའོ། །གཡས་པས་སེ་གོལ་གཏོགས་པའོ། །ནུབ་ཏུ་མཐུ་ཆེན་ཐོབ་དཀར་པོ་གཡོན་པས་བག་ཙམ་ཁ་ཕྱེ་བའི་པདྨ་དཀར་པོའོ། །གཡས་པས་མཆོག་སྦྱིན་ནོ། །ངན་སོང་ཀུན་འདྲེན་དཀར་པོ་ཕྱག་གཉིས་ཀྱིས་སྡིག་པ་སྤྲུག་པའི་ཚུལ་ལོ། །མྱ་ངན་དང་མུན་པ་ཐམས་ཅད་ངེས་
པར་འཇོམས་པའི་བློ་གྲོས་གསེར་གྱི་མདོག་ལྟ་བུ་ཕྱག་གཉིས་ཁ་སྦྱར་བརྡབས་པའི་ཚུལ་ལོ། །དྲ་བ་ཅན་གྱི་འོད་དམར་པོ་གཡོན་པས་ཨུཏྤ་ལ་ལ་གནས་པའི་ཉི་མའི་དཀྱིལ་འཁོར་འཛིན་པའོ། །གཡས་པས་མཆོག་སྦྱིན་ནོ། །བྱང་དུ་ཟླ་འོད་སྐུ་མདོག་ཟླ་བའི་འོད་ལྟ་བུ་གཡོན་པས་ཨུཏྤ་
ལར་གནས་པའི་ཟླ་བའི་དཀྱིལ་འཁོར་འཛིན་པ་གཡས་པས་མཆོག་སྦྱིན་ནོ། །འོད་དཔག་མེད་དམར་པོ་ཕྱག་གཉིས་ཀྱིས་དབང་བསྐུར་བའི་བུམ་པ་འཛིན་པའོ། །ནམ་མཁའ་མཛོད་སྐུ་མདོག་གསེར་ལྟ་བུས་གཡོན་པས་རྡོ་རྗེ་ཁུ་ཚུར་འགྱིང་བས་དཀུར་བརྟེན་པ། གཡས་པས་ནམ་མཁའ་
ལ་བསྐོར་བའོ། །སྒྲིབ་པ་ཐམས་ཅད་རྣམ་པར་སེལ་བ་སྔོན་པོའམ་དཀར་པོ་གཡོན་པས་ས་ལ་རེག་པ། གཡས་པའི་ཁུ་ཚུར་གྱིས་མཐེ་བོང་དང་སྡིགས་མཛུབ་སྦྱར་ཏེ། དྲི་བའི་ཚུལ་གྱིས་གནས་པའོ། །བྱམས་པ་ལ་སོགས་པའི་བྱང་ཆུབ་སེམས་དཔའ་འདི་རྣམས་ནི་ཟླ་བའི་གདན་
དང་ཟླ་བའི་འོད་ཅན་ནོ། །སེམས་དཔའི་སྐྱིལ་ཀྲུང་གིས་བཞུགས་པ་སྤྱན་གསུམ་པ་རང་ཕྱོགས་ཀྱི་བདག་པོ་བཞིན་དུ་ཞལ་གསུམ་པ་ཕྱག་དྲུག་པ་ཕྱག་གཉིས་ཀྱིས་མཉམ་གཞག་གི་ཕྱག་རྒྱ་བྱས་པ། གཉིས་ཀྱིས་གཞུ་དང་མདའ་འཛིན་པའོ། །བྱམས་པ་དང་འཇམ་དབྱངས་གཉིས་

ལ་ནི་མཉམ་གཞག་གི་ཕྱག་རྒྱ་མེད་དོ། །འཇམ་པའི་རྡོ་རྗེ་ལ་སོགས་པའི་ལྷ་ཐམས་ཅད་གོས་སྣ་ཚོགས་པ་དང་རིན་པོ་ཆེའི་རྒྱན་དང་རལ་པའི་ཐོར་ཚུགས་དང་འཛུམ་པ་དང་བཅས་པའི་ཞལ་དང་སྒེག་པའི་ཉམས་དང་ལྡན་པའོ། །ཤར་གྱི་སྒོར་མ་ཧེའི་སྟེང་དུ་གཤིན་རྗེ་མཐར་བྱེད་ནག་པོ་ཕྱག་
དྲུག་པ་གཡས་པ་རྣམས་ཀྱིས་རལ་གྲི་དང་རྡོ་རྗེ་དང་མདའ་འཛིན་པའོ། །གཡོན་པས་ཞགས་པ་དང་བཅས་པའི་སྡིགས་མཛུབ་གྱེན་དུ་བསྒྲེངས་པས་སྡིགས་པར་བྱེད་པ། གཡོན་པའི་གཉིས་པས་འཁྱུད་པའི་ལྷ་མོའི་ནུ་མ་འཛིན་པའོ། །དེ་ཡང་ཞལ་གཅིག་པ་ཕྱག་གཉིས་པ་སྐུ་
མདོག་དཀར་པོ་གཡོན་པས་པདྨ་དཀར་པོ་འཛིན་པ་ཕྱག་གཡས་པས་ཡབ་ལ་འཁྱུད་པར་བརྩོན་པའོ། །གཡོན་པའི་གསུམ་པས་དངུལ་གྱི་གཞུ་འཛིན་པའོ། །མརྒད་ལྟ་བུའི་ལྷ་མོ་ལྗང་གུ་ཕྱག་གཉིས་མ་གཡས་ཨུཏྤ་ལ་སྔོན་པོ་འཛིན་པ་ཕྱག་གཡོན་པ་ཡབ་ཀྱི་སྐེ་ལ་འཁྱུད་པས་
གཡས་ཕྱོགས་སུ་བརྒྱན་པ། ཞལ་དྲུག་པ་གསུས་པ་འཕྱང་བ། ཞལ་དྲུག་ནི་སྔོན་པོ་རྩ་བའི་ཞལ་དགྱེས་པའི་གད་མོས་བཞད་པ། གཉིས་པས་འཇིགས་པར་བྱེད་པ། གསུམ་པའི་ཞལ་གདངས་པ། བཞི་པ་འཇིགས་སུ་རུང་བ། ལྔ་པ་རྡོ་རྗེ་མཆེ་བ་ཅན། དྲུག་པ་མགོའི་སྟེང་དུ་
གནས་པ་ལྗགས་འགུལ་བའོ། །ཡང་ན་སྟེང་གི་སྔོན་པོ་རྩ་བ་ལ་སོགས་པའི་ཞལ་རྣམས་ནི་གཡས་སྐོར་གྱིས་སྔོན་པོ་དང་དཀར་པོ་དང་སེར་པོ་དང་དམར་པོ་དང་ལྗང་གུ་རྣམས་སོ། །ལྷོ་སྒོར་གཞན་གྱིས་མི་ཐུབ་པ་སེར་པོ་སེར་པོ་དང་ནག་པོ་དང་དཀར་པོ་རྩ་བ་དང་གཡས་གཡོན་གྱི་ཞལ་ལོ། །
ཕྱག་དྲུག་པ་གཡས་པ་རྣམས་ཀྱིས་རྡོ་རྗེ་དང་དབྱུག་ཐོ་དང་མདའ་འཛིན་པའོ། །གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་ནུ་མ་དང་གཞུ་འཛིན་པའོ། །ནུབ་ཏུ་རྟ་མགྲིན་དམར་པོ་དམར་པོ་དང་སྔོན་པོ་དང་དཀར་པོ་རྩ་བ་དང་གཡས་གཡོན་གྱི་ཞལ་ལོ། །ཕྱག་དྲུག་པ་
གཡས་པ་རྣམས་ཀྱིས་རྡོ་རྗེ་དང་དབྱུག་པ་དང་ཀ་ན་ཡ་དང་མདའ་རྣམས་འཛིན་པའོ། །གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་ནུ་མ་དང་གཞུ་འཛིན་པའོ། །བྱང་དུ་བདུད་རྩི་འཁྱིལ་བ་སྔོན་པོ་རྐང་པས་བགེགས་མནན་པ། ཕྱག་དྲུག་པ་གཡས་པ་རྣམས་ཀྱིས་

རལ་གྲི་དང་དགྲ་སྟེ་དང་མདའ་འཛིན་པའོ། །གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་ནུ་མ་དང་གཞུ་འཛིན་པའོ། །དབང་ལྡན་གྱི་མཚམས་སུ་རཏྣའི་རི་བོའི་སྟེང་དུ་མི་གཡོ་བ་སྔོན་པོ་ཕྱག་དྲུག་པ་གཡས་པ་རྣམས་ཀྱིས་རལ་གྲི་དང་ཞགས་
པ་དང་མདའ་འཛིན་པའོ། །གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་ནུ་མ་དང་གཞུ་འཛིན་པའོ། །གཡོན་ངོས་སུ་འཕྱང་བའི་གོས་སྔོན་པོ་འཛིན་པའོ། །ཁྲག་གིས་བརླན་པའི་ལྗགས་འགུལ་བའི་ཞལ་གདངས་པའོ། །མེར་འདོད་པའི་རྒྱལ་པོ་སྔོན་པོ་ཕྱག་
དྲུག་པ་དང་པོ་གཉིས་ཀྱིས་རང་གི་ཕྱག་རྒྱ་བྱས་པ་གཡས་པ་གཉིས་ཀྱིས་རྡོ་རྗེ་དང་མདའ་དང་གཡོན་པ་གཉིས་ནུ་མ་དང་གཞུ་འཛིན་པའོ། །རྡོ་རྗེ་ཁུ་ཚུར་གཉིས་ཕན་ཚུན་རྒྱབ་སྦྱར་ཏེ་མཐེའུ་ཆུང་གཉིས་བསྣོལ་ཏེ་སྡིགས་མཛུབ་གཉིས་ཕྱིར་བརྐྱང་ནས་ཞགས་པའི་ཚུལ་བྱས་པ་ནི་འདོད་པའི་
རྒྱལ་པོའི་ཕྱག་རྒྱའོ། །བདེན་བྲལ་དུ་དབྱུག་པ་སྔོན་པོ་སྐུ་མདོག་སྔོན་པོ་ཕྱག་དྲུག་པ་གཡས་པ་རྣམས་ཀྱིས་རྡོ་རྗེ་དང་དབྱུག་པ་དང་མདའ། གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་ནུ་མ་དང་གཞུ་འཛིན་པའོ། །རླུང་དུ་སྟོབས་པོ་ཆེ་སྔོན་པོ་ཕྱག་བརྒྱད་པ་
གཡས་པ་རྣམས་ཀྱིས་རྡོ་རྗེ་དང་དབྱུག་པ་དང་རལ་གྲི་དང་མདའོ། །གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་ནུ་མ་དང་ཐོ་བ་དང་གཞུ་འཛིན་པའོ། །དཀྱིལ་འཁོར་གྱི་དབང་ཕྱུག་གི་སྟེང་དུ་གནོད་མཛེས་རྒྱལ་པོ་སྔོན་པོ་ཕྱག་དྲུག་པ་ཕྱག་གཉིས་ཀྱིས་རྡོ་རྗེ་ཧཱུཾ་མཛད་ཀྱི་
ཕྱག་རྒྱ་བཅིངས་པ་གཡས་པ་གཉིས་ཀྱིས་རལ་གྲི་དང་མདའ་འཛིན་པའོ། །གཡོན་པ་གཉིས་ཀྱིས་ནུ་མ་དང་གཞུ་འཛིན་པའོ། །འདིར་འདོད་པའི་རྒྱལ་པོའི་ཕྱག་རྒྱ་དེ་ཉིད་ཀྱི་མཛུབ་མོ་གཉིས་གྱེན་དུ་བསྒྲེང་བ་ནི་གནོད་མཛེས་ཀྱི་ཕྱག་རྒྱའོ། །འོག་ཏུ་རྡོ་རྗེ་ས་འོག་སྔོན་པོ་ཕྱག་དྲུག་པ་
གཡས་པ་རྣམས་ཀྱིས་རྡོ་རྗེ་དང་ལྕགས་ཀྱུ་དང་མདའ་འཛིན་པའོ། །གཡོན་པ་རྣམས་ཀྱིས་ནུ་མ་དང་ཞགས་པ་དང་བཅས་པའི་རྩེ་གཅིག་པ་དང་གཞུ་འཛིན་པའོ། །བགེགས་མཐར་བྱེད་ལ་སོགས་པ་བདུན་པོ་ནི་སྔོན་པོ་དང་སེར་པོ་དང་དམར་པོ་རྩ་བ་དང་གཡས་གཡོན་གྱི་ཞལ་གསུམ་

མོ། །ཁྲོ་བོ་བཅུ་ཡང་ཁྲོས་པའི་ལྟ་སྟངས་ཅན་སྤྱན་དམར་པོ་སྨིན་མ་གཡོ་བ་བག་ཙམ་རྩ་བའི་ཞལ་ཁ་ཕྱེ་བ། གཡས་པའི་ཞལ་གདངས་པ། གཡོན་པའི་ཞལ་མ་མཆུ་མནན་པ་མཆེ་བ་གཙིགས་པ་སྟག་གི་པགས་པས་སྨད་དང་སྟོད་ལ་གོན་པ་ཐོད་པའི་ཕྲེང་བས་དབུ་ལ་བརྒྱན་
པ། དབུ་སྐྲ་འབར་བ་གྱེན་ལ་བཅིངས་ཤིང་འཁྱིལ་བ་སྨ་ར་དམར་སེར་རོལ་པའི་ཀུན་ཏུ་བསྐྱོད་པ་ཅན། ཀླུའི་རྒྱལ་པོ་བརྒྱད་ཀྱིས་བརྒྱན་པ། ཕུད་ཀྱི་སྒྲ་སྒྲོགས་པ་དང་བཅས་པའི་གདེངས་ཀ་ཅན་རྣམས་ཀྱིས་འཇིགས་པ་སྣ་ཚོགས་པདྨ་དང་། ཉི་མའི་གདན་ལ་གཡོན་བརྐྱང་
བས་གནས་པའོ། །གཤིན་རྗེ་མཐར་བྱེད་ནི་གཡས་བརྐྱང་བའམ་རྡོ་རྗེ་སྐྱིལ་ཀྲུང་གིས་ཀྱང་བཞུགས་པའོ། །དཀྱིལ་འཁོར་འདི་ལ་གནོད་མཛེས་རྒྱལ་པོའི་གཟུགས་ཁོ་ནས་རྣམ་པར་གནས་པའི་ཕྱིར་གཙུག་ཏོར་འཁོར་ལོས་སྒྱུར་བ་ནི་དཀྱིལ་འཁོར་ཉིད་དུ་ཐ་དད་དུ་མ་
བཤད་དེ། དཔལ་སྒྱུ་འཕྲུལ་དྲ་བའི་རྒྱུད་ལས་རྣལ་འབྱོར་རྒྱས་པར་བསྟན་པ་ལའོ། །འབྲིང་པོར་བསྟན་པ་ལ་ནི་འཇམ་པའི་རྡོ་རྗེའི་སྤྱི་བོའི་སྟེང་ན་རཏྣའི་རི་ལ་གནས་པའི་པདྨ་དང་ཉི་མ་ལ་རྡོ་རྗེ་སྐྱིལ་ཀྲུང་གིས་གནས་པའི་གཙུག་ཏོར་འཁོར་ལོས་སྒྱུར་བ་སེར་པོ་སེར་པོ་དང་སྔོན་པོ་
དང་དཀར་པོ་རྩ་བ་དང་གཡས་དང་གཡོན་གྱི་ཞལ་ལོ། །ཕྱག་བརྒྱད་པའི་ཕྱག་གཉིས་ཀྱིས་མཉམ་གཞག་གི་ཕྱག་རྒྱ་བྱས་པ། གཡས་པ་རྣམས་ཀྱིས་འཁོར་ལོ་དང་བགྲང་ཕྲེང་དང་མདའ་འཛིན་པའོ། །གཡོན་པ་རྣམས་ཀྱིས་འཁོར་ལོ་དང་ནུ་མ་དང་གཞུ་འཛིན་པའོ། །
སྣ་ཚོགས་པའི་གོས་དང་རིན་པོ་ཆེའི་རྒྱན་ཅན། རལ་པའི་ཐོར་ཅོག་གི་ཅོད་པན་ཅན་གཞོགས་གཉིས་སུ་སྤྱན་མ་ལ་སོགས་པའི་ལྷ་མོ་བཞི་པོ་རྣམས་ཀྱིས་བརྒྱན་པའོ་ཞེས་གསུངས་སོ། །དེའི་རྗེས་སུ་འབྲངས་ནས་རྣལ་འབྱོར་རྒྱས་པ་ལ། ཡང་གཙུག་ཏོར་འཁོར་ལོས་སྒྱུར་
བ་ནི་དཀྱིལ་འཁོར་བ་ཐ་དད་དུ་དང་དེའི་སྟེང་དུ་གནོད་མཛེས་རྒྱལ་པོ་ཤེས་པར་བྱའོ་ཞེས་པ་ནི་ཁ་ཅིག་གོ། །ལྷ་གཞན་བཞི་བཅུ་ཞེ་གསུམ་པོ་རྣམས་ཀྱང་ཞལ་རེ་རེ་ལ་སྤྱན་གསུམ་གསུམ་པའོ། །འདིར་ནུ་མ་འཛིན་པར་བསྟན་པ་དེ་ཡང་མི་བསྐྱོད་པ་ལ་སོགས་པ་བཞི་བདག་ལྟ་

བུའི་ཤེས་རབ་མ་ལ་སྙོམས་པར་ཞུགས་པ་རྣམས་ཀྱིའོ། །ཁྲོ་བོ་རྣམས་ཀྱིས་ནི་བདག་ལྟ་བུའི་ཤེས་རབ་མ་གཡོན་ངོས་སུ་གནས་པའི་ནུ་མ་འཛིན་པའོ་ཞེས་ཤེས་པར་བྱའོ། །གཤིན་རྗེ་མཐར་བྱེད་ལས་གཞན་རྣམས་ལ་ཤེས་རབ་མ་མེད་ཀྱང་དེའི་ནུ་མར་འཛིན་
པའི་ཚུལ་གྱིས་བདག་གི་ནུ་མར་འཛིན་པའོ་ཞེས་པ་ནི་གཞན་ནོ། །འདིར་རྣམ་པར་སྣང་མཛད་ཀྱི་རང་བཞིན་འཇམ་པའི་རྡོ་རྗེ་ཆོས་ཀྱི་དབྱིངས་རྣམ་པར་དག་པའི་ཡེ་ཤེས་ཀྱི་བདག་ཉིད་ལྟ་བུའི་རྡོ་རྗེ་སེམས་དཔས་རྒྱས་བཏབ་པ། མེ་ལོང་ལྟ་བུའི་ཡེ་ཤེས་ལ་སོགས་པའི་རང་བཞིན་མི་
བསྐྱོད་པ་ལ་སོགས་པའི་དེ་བཞིན་གཤེགས་པ་བཞི་དང་། སྤྱན་མ་དང་ཙུནྡ་རྣམས་ལ་འཇམ་པའི་རྡོ་རྗེས་རྒྱས་བཏབ་པ། མཱ་མ་ཀཱི་དང་སེམས་མ་རྡོ་རྗེ་མ་དང་བྱམས་པ་ལ་སོགས་པ་བཞི་དང་། ཁྲོ་བོ་བཅུ་ལ་མི་བསྐྱོད་པས་རྒྱས་བཏབ་པ། རིན་ཆེན་རྡོ་རྗེ་མ་དང་རིན་ཆེན་སྐར་མདའ་
མ་དང་། བཟང་སྐྱོང་མ་ལ་སོགས་པ་བཞི་ལ་རིན་འབྱུང་གིས་རྒྱས་བཏབ་པ། གོས་དཀར་མོ་དང་ཆོས་ཀྱི་རྡོ་རྗེ་མ་དང་ཁྲོ་གཉེར་མ་དང་མཐུ་ཆེན་ཐོབ་ལ་སོགས་པ་བཞི་ལ་སྣང་བ་མཐའ་ཡས་ཀྱིས་རྒྱས་བཏབ་པ། སྒྲོལ་མ་དང་ལས་ཀྱི་རྡོ་རྗེ་མ་དང་རྡོ་རྗེ་ལྕགས་སྒྲོག་མ་དང་། ཟླ་འོད་
ལ་སོགས་པ་བཞི་ལ་དོན་ཡོད་གྲུབ་པས་རྒྱས་བཏབ་པའོ། །འཇམ་པའི་རྡོ་རྗེའི་ཐུགས་ཀར་ས་བོན་ནི་མུཿའོ། །ཨོཾ་ཨཱཿཞེས་པ་སྙིང་པོའི་སྔགས་སོ། །ཨོཾ་ཨ་མྲྀ་ཏ་ཀུཎྜ་ལི་བིགྷྣཱནྟ་ཀ་ཧཱུཾ་ཞེས་པ་ལས་ཐམས་ཅད་པའི་སྔགས་སོ།། །།ཆོས་ཀྱི་དབྱིངས་གསུང་གི་དབང་ཕྱུག་གི་
དཀྱིལ་འཁོར་ལ། རྡོ་རྗེ་གུར་ལ་སོགས་པ་བསྒོམ་པར་རྣམ་པར་བཞག་པ་ནི་བཤད་མ་ཐག་པའི་དཀྱིལ་འཁོར་བཞིན་ནོ། །ཁྱད་པར་དུ་གཤིན་རྗེ་གཤེད་ལ་སོགས་པའི་ཁྲོ་བོ་རྣམས་ནི་འཆད་པར་འགྱུར་བའི་གཟུགས་ཅན་ནོ། །མཆོད་རྟེན་ནི་འདིར་མེད་དོ། །གཞལ་ཡས་ཁང་གི་ལྟེ་བ་
ལ་སྣ་ཚོགས་པདྨའི་ཟེ་འབྲུ་ལ་གནས་པའི་སེང་གེའི་སྟེང་དུ་སྣ་ཚོགས་པདྨ་དང་ཟླ་བ་ལ་འཇམ་པའི་དབྱངས་རྡོ་རྗེ་སྐྱིལ་ཀྲུང་དུ་བཞུགས་པ་ཉི་མ་འཆར་བའི་དཀྱིལ་འཁོར་གྱི་འོད་དང་ལྡན་པ་སྐུ་མདོག་གསེར་ལྟ་བུ། ཨིནྡྲ་ནཱི་ལ་ལྟ་བུའི་གཙུག་ཕུད་དང་ལྡན་པ། རྡོ་རྗེ་དང་རིན་པོ་ཆེ་དང་པདྨ་

དང་སྣ་ཚོགས་རྡོ་རྗེའི་ཕྲེང་བའི་ཅོད་པན་གྱི་སྟེང་དུ་སངས་རྒྱས་ལྔ་དང་རིན་པོ་ཆེའི་ཅོད་པན་ཅན། རཏྣ་སྣ་ཚོགས་ཀྱིས་བརྒྱན་པ་དང་ན་བཟའ་སྣ་ཚོགས་བསྣམས་པ། སྒེག་པའི་ཉམས་ཀྱི་ཚོགས་དང་ལྡན་པ། སེར་པོ་དང་སྔོན་པོ་དང་དམར་པོ་དང་དཀར་པོ་ནི་རྩ་བ་དང་གཡས་
དང་ནུབ་དང་གཡོན་གྱི་ཞལ་ལོ། །ཕྱག་བརྒྱད་པའི་ཕྱག་གཉིས་ཀྱི་ཆོས་ཀྱི་འཁོར་ལོའི་ཕྱག་རྒྱ་མཛད་པའོ། །གཡས་པ་རྣམས་ཀྱིས་རལ་གྲི་དང་མདའ་དང་རྡོ་རྗེ་བསྣམས་པའོ། །གཡོན་པ་རྣམས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟི་དང་གཞུ་དང་རྡོ་རྗེ་དྲིལ་བུ་བསྣམས་པའོ། །འདབ་
མ་བརྒྱད་པ་ལ་སེང་གེའི་སྟེང་དུ་གནས་པའི་པདྨ་དང་ཟླ་བའི་དཀྱིལ་འཁོར་རྣམས་ལ་ཤར་ལ་སོགས་པའི་ཕྱོགས་རྣམས་སུ་གཙུག་ཏོར་ཆེན་པོ་དང་གདུགས་དཀར་པོ་དང་གཟི་བརྗིད་ཕུང་པོ་དང་། རྣམ་པར་རྒྱལ་བའི་གཙུག་ཏོར་རྣམས་དང་། དབང་ལྡན་ལ་སོགས་པའི་མཚམས་སུ་འོད་ཟེར་རྣམ་
པར་འཕྲོ་བ་དང་འཕགས་པ་དང་ཆེར་འཕགས་པ་དང་རྒྱལ་བ་རྣམས་སོ། །གཙུག་ཏོར་བརྒྱད་པོ་འདི་རྣམས་ནི་རྡོ་རྗེ་སྐྱིལ་ཀྲུང་དང་རིན་པོ་ཆེའི་ཅོད་པན་ཅན་སྐུ་མདོག་སེར་པོ་ཕྱག་གཉིས་པའོ། །ཕྱག་གཡས་པས་འཁོར་ལོ་གྱེན་དུ་བཟུང་བ། གཡོན་པས་རང་གི་གདན་ལ་མནན་པ་རྣམས་སོ། །
དེ་ནས་ཤར་གྱི་རེ་མིག་གི་དབུས་སུ་གླང་པོ་ཆེའི་རྒྱལ་པོ་ལ་མི་བསྐྱོད་པ་སྔོན་པོ། ཞལ་བཞི་པ་རྩ་བའི་ཞལ་སྔོན་པོ་བག་ཙམ་ཁྲོ་བ་དང་བཅས་པའི་རོལ་པ་དང་ལྡན་པ་གཡས་པ་དཀར་པོ་ཁ་གདངས་པ་དྲག་པོའོ། །ནུབ་ཀྱི་སེར་པོ་དཔའ་བོ་གཡོན་པ་དམར་པོ་མཆེ་བས་མ་མཆུ་མནན་པ་ཕྱག་
བརྒྱད་པ་གཡས་པ་རྣམས་ཀྱིས་རལ་གྲི་དང་རྡོ་རྗེ་དང་མདའ་དང་ལྕགས་ཀྱུ་འཛིན་པ། གཡོན་པ་རྣམས་ཀྱིས་སྡིགས་མཛུབ་དང་དྲིལ་བུ་དང་གཞུ་དང་ཞགས་པ་འཛིན་པའོ། །རྡོ་རྗེ་སེམས་དཔའ་དང་། རྡོ་རྗེ་རྒྱལ་པོ་དང་རྡོ་རྗེ་ཆགས་པ་དང་རྡོ་རྗེ་ལེགས་པ་རྣམས་ཀྱིས་ཡོངས་སུ་བསྐོར་བའོ། །
ལྷོའི་རེ་མིག་གི་དབུས་སུ་རྟ་མཆོག་གི་སྟེང་དུ་རིན་ཆེན་འབྱུང་ལྡན་སེར་པོ་སེར་པོ་དང་། ནག་པོ་དང་དཀར་པོ་དང་དམར་པོའི་ཞལ་བཞི་པ་ཕྱག་བརྒྱད་པ་གཡས་པ་རྣམས་ཀྱིས་རྡོ་རྗེ་དང་རལ་གྲི་དང་མདའ་དང་ལྕགས་ཀྱུའོ། གཡོན་པ་རྣམས་ཀྱིས་ཡིད་བཞིན་གྱི་ནོར་བུའི་རྒྱལ་མཚན་དང་རྡོ་རྗེ་

དྲིལ་བུ་དང་ཞགས་པ་དང་གཞུ་འཛིན་པའོ། །རྡོ་རྗེ་རིན་ཆེན་དང་རྡོ་རྗེ་ཉི་མ་དང་རྡོ་རྗེ་ཏོག་དང་རྡོ་རྗེ་བཞད་པ་རྣམས་ཀྱིས་ཡོངས་སུ་བསྐོར་བའོ། །ནུབ་ཀྱི་རེ་མིག་གི་དབུས་སུ་རྨ་བྱའི་སྟེང་དུ་སྣང་བ་མཐའ་ཡས་དམར་པོ་དམར་པོ་དང་ནག་པོ་དང་དཀར་པོ་དང་སེར་པོའི་ཞལ་
བཞིའོ། །ཕྱག་བརྒྱད་ཀྱི་གཡས་པ་རྣམས་ཀྱིས་རྡོ་རྗེ་དང་མདའ་དང་རལ་གྲི་དང་ལྕགས་ཀྱུ་འཛིན་པའོ། །གཡོན་པ་རྣམས་ཀྱིས་པདྨ་དང་གཞུ་དང་ཞགས་པ་དང་། དྲིལ་བུ་འཛིན་པའོ། །རྡོ་རྗེ་ཆོས་དང་རྡོ་རྗེ་རྣོན་པོ་དང་། རྡོ་རྗེ་རྒྱུ་དང་རྡོ་རྗེ་གསུང་བ་རྣམས་ཀྱིས་ཡོངས་སུ་བསྐོར་བའོ། །བྱང་གི་
རེ་མིག་གི་དབུས་སུ་ཁྱུང་གི་སྟེང་དུ་དོན་ཡོད་གྲུབ་པ་ལྗང་གུ་ཞལ་བཞི་པ་རྩ་བའི་ཞལ་ལྗང་གུ་མཆེ་བ་གཙིགས་པ་གཡས་སེར་པོ་ཞི་བ་ནུབ་དམར་པོ་སྒེག་པ་དང་བཅས་པ། གཡོན་དཀར་པོ་ཞི་བ་ཕྱག་བརྒྱད་པ། གཡས་པ་རྣམས་ཀྱིས་རལ་གྲི་དང་རྡོ་རྗེ་དང་མདའ་དང་ལྕགས་ཀྱུ་འཛིན་པ། གཡོན་པ་
རྣམས་ཀྱིས་སྡིགས་མཛུབ་དང་དྲིལ་བུ་དང་གཞུ་དང་ཞགས་པ་འཛིན་པའོ། །རྡོ་རྗེ་ལས་དང་རྡོ་རྗེ་བསྲུང་བ་དང་རྡོ་རྗེ་གནོད་སྦྱིན་དང་རྡོ་རྗེ་ཁུ་ཚུར་རྣམས་ཀྱིས་ཡོངས་སུ་བསྐོར་བའོ། །མི་བསྐྱོད་པ་ལ་སོགས་པ་དེ་བཞིན་གཤེགས་པ་རྣམས་རང་རང་གི་ཆིབས་ཀྱི་སྟེང་དུ་སྣ་ཚོགས་པདྨ་དང་ཉི་མའི་
གདན་ལ་རྡོ་རྗེ་སྐྱིལ་ཀྲུང་གིས་བཞུགས་པ། རཏྣ་སྣ་ཚོགས་དང་གོས་ཀྱིས་བརྒྱན་པ། རིན་པོ་ཆེའི་ཅོད་པན་ནོ། །རྡོ་རྗེ་སེམས་དཔའ་ལ་སོགས་པ་བཅུ་དྲུག་པོ་འདི་རྣམས་ནི་དབང་ལྡན་ལ་སོགས་པའི་མཚམས་སུ་གནས་པའི་སྣ་ཚོགས་པདྨ་དང་ཟླ་བའི་གདན་ལ་གནས་པ་རྡོ་རྗེ་དབྱིངས་ཀྱི་
དཀྱིལ་འཁོར་ལས་བཤད་པའི་རང་བཞིན་ཅན་རྣམས་སོ། །འདི་དག་ཀྱང་ཕྱོགས་སུ་གནས་པའོ་ཞེས་པའི་ཕྱོགས་ཀྱང་ཡོད་དོ། །དབང་ལྡན་ལ་སོགས་པའི་མཚམས་ལ་གནས་པའི་སྣ་ཚོགས་པདྨ་དང་ཟླ་བ་རྣམས་ལ་སེམས་དཔའི་སྐྱིལ་ཀྲུང་ཅན། སངས་རྒྱས་སྤྱན་མ་དང་མ་མ་ཀཱི་དང་གོས་
དཀར་མོ་དང་སྒྲོལ་མ་རྣམས་རིམ་པ་ཇི་ལྟ་བ་བཞིན་དུ་འཇམ་པའི་དབྱངས་དང་མི་བསྐྱོད་པ་དང་སྣང་བ་མཐའ་ཡས་དང་དོན་ཡོད་གྲུབ་པ་ལྟ་བུའོ། །ཤར་གྱི་སྒོ་རུ་རྡོ་རྗེ་ལྕགས་ཀྱུ་དམར་སེར་རྡོ་རྗེ་ལྕགས་ཀྱུ་འཛིན་པ། གཡས་བརྐྱང་གིས་བཞུགས་པའོ། །ལྷོ་རུ་རྡོ་རྗེ་ཞགས་པ་སེར་པོ་

རྡོ་རྗེ་ཞགས་པ་འཛིན་པ་གཡོན་བརྐྱང་གིས་གནས་པའོ། །ནུབ་ཏུ་རྡོ་རྗེ་ལྕགས་སྒྲོག་དམར་པོ་རྡོ་རྗེ་ལྕགས་སྒྲོག་ཕྱག་གཉིས་ཀྱིས་འཛིན་པ་ས་གའི་སྟང་སྟབས་ཀྱིས་གནས་པའོ། །བྱང་དུ་རྡོ་རྗེ་འབེབས་པ་ལྗང་གུ་ཕྱག་གཉིས་རྡོ་རྗེ་བསྡམས་པས་རྡོ་རྗེ་དྲིལ་བུ་འཛིན་པ། ཟླུམ་པའི་སྟང་སྟབས་
ཀྱིས་གནས་པའོ། །བཞི་པོ་འདི་དག་སྣ་ཚོགས་པདྨ་དང་ཉི་མ་ལ་གནས་པ་ཞལ་གཅིག་པ་ཕྱག་གཉིས་པ་སྤྱན་གསུམ་པ་དབུ་སྐྲ་དམར་སེར་གྱེན་དུ་བརྫེས་པ། སྨ་ར་དམར་སེར་དང་ལྡན་པ་ཀླུ་ཆེན་པོ་བརྒྱད་ཀྱིས་བརྒྱན་པའོ། །ནང་གི་དཀྱིལ་འཁོར་འདི་ལས་དཀྱིལ་འཁོར་གཉིས་པ་ལ།
ཤར་གྱི་ཕྱོགས་ཀྱི་དབང་ལྡན་ནས་བརྩམས་ནས་གཡས་སྐོར་དུ་རིམ་པ་བཞིན་དུ་ས་བཅུ་གཉིས་ཀྱི་ལྷ་མོ་རྣམས་ཞལ་གཅིག་ཕྱག་གཉིས་མ། གཡས་པ་ཐམས་ཅད་ཀྱིས་རྡོ་རྗེ་འཛིན་པ། གཡོན་པས་རང་རང་གི་ཕྱག་མཚན་འཛིན་པའོ། །དེ་ལ་མོས་པ་སྤྱོད་པའི་ས་མ་ནི་པདྨ་བཞིན་དུ་
དམར་བ་པདྨ་དམར་པོ་འཛིན་པའོ། །རབ་ཏུ་དགའ་བ་དམར་མོ་ཡིད་བཞིན་གྱི་ནོར་བུ་འཛིན་པའོ། །དྲི་མ་མེད་མ་དཀར་མོ་ཆུ་སྐྱེས་དཀར་པོ་འཛིན་པའོ། །འོད་བྱེད་མ་དམར་མོ་སྣ་ཚོགས་པདྨ་ལ་གནས་པའི་ཉི་མའི་དཀྱིལ་འཁོར་འཛིན་པའོ། །འོད་འཕྲོ་མ་མརྒད་ལྟ་བུའི་མདོག་ཨུཏྤ་
ལ་སྔོན་པོ་འཛིན་པའོ། །སྤྱང་ཁ་མ་སེར་མོ་པང་པར་གནས་པའི་ཕྱག་གན་རྐྱལ་གྱིས་མ་ར་ག་ཏའི་ནོར་བུ་བསྣམས་པའོ། །མངོན་དུ་གྱུར་པའི་ས་མ་གསེར་གྱི་མདོག་ཅན་པདྨའི་སྟེང་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་འཛིན་པའོ། །རིང་དུ་སོང་བ་མ་ནམ་མཁའ་ལྟར་
སྔོ་བསངས་སྣ་ཚོགས་པདྨ་ལ་གནས་པའི་སྣ་ཚོགས་རྡོ་རྗེ་འཛིན་པའོ། །མི་གཡོ་བ་མ་སྟོན་ཀའི་ཟླ་བའི་མདོག་ལྟ་བུ་ཟླ་བ་ལ་གནས་པའི་རྡོ་རྗེ་རྩེ་ལྔ་པ་དམར་པོས་མཚན་པའི་པདྨའི་ཡུ་བ་འགྱིང་བ་དང་བཅས་པ་འཛིན་པའོ། །ལགས་པའི་བློ་གྲོས་མ་དཀར་མོ་རལ་གྲིས་མཚན་པའི་ཨུཏྤ་
ལ་འཛིན་པའོ། །ཆོས་ཀྱི་སྤྲིན་མ་སེར་མོ་ཆོས་ཀྱི་སྤྲིན་གྱིས་ཡོངས་སུ་བསྐོར་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་པུ་སྟི་འཛིན་པའོ། །ཀུན་ཏུ་འོད་མ་ཉི་མ་ཕྱེད་ཀྱི་ཉི་མའི་མདོག་ཅན་པདྨའི་སྟེང་དུ་ཡང་དག་པར་རྫོགས་པའི་བྱང་ཆུབ་མཚོན་པར་བྱེད་པའི་བདེ་བར་གཤེགས་པའི་སྐུ་

གཟུགས་འཛིན་པའོ། །ལྷོ་རུ་ཕ་རོལ་ཏུ་ཕྱིན་མ་བཅུ་གཉིས་ནི་ཕྱག་གཉིས་པ་གཡས་པ་ཐམས་ཅད་ཀྱིས་ཡིད་བཞིན་གྱི་ནོར་བུ་འཛིན་པའོ། །གཡོན་པས་རང་རང་གི་ཕྱག་མཚན་འཛིན་པའོ། །ཤེས་རབ་ཀྱི་ཕ་རོལ་ཏུ་ཕྱིན་མ་ནི་ཕྱག་གཉིས་ཀྱིས་ལྷག་པའོ། །དེ་ལ་རིན་
པོ་ཆེའི་པདྨའི་ཕ་རོལ་ཏུ་ཕྱིན་མ་དམར་མོ་པདྨ་ལ་གནས་པའི་ཟླ་བའི་དཀྱིལ་འཁོར་འཛིན་པའོ། །སྦྱིན་པའི་ཕ་རོལ་ཏུ་ཕྱིན་མ་དཀར་དམར་གྱི་མདོག་ཅན་འབྲས་སོ་བའི་སྙེ་མ་སྣ་ཚོགས་འཛིན་པའོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་མ་དཀར་མོ་མྱ་ངན་མེད་པའི་ཡལ་ག་དང་བཅས་པའི་མེ་
ཏོག་གི་ཆུན་པོ་འཛིན་པའོ། །བཟོད་པའི་ཕ་རོལ་ཏུ་ཕྱིན་མ་སེར་མོ་ཆུ་སྐྱེས་དཀར་པོ་འཛིན་པའོ། །བརྩོན་འགྲུས་ཀྱི་ཕ་རོལ་ཏུ་ཕྱིན་མ་མ་ར་ག་ཏ་ལྟ་བུའི་མདོག་ཅན་ཨུཏྤ་ལ་སྔོན་པོ་འཛིན་པའོ། །བསམ་གཏན་གྱི་ཕ་རོལ་ཏུ་ཕྱིན་མ་ནམ་མཁའ་ལྟར་སྔོ་བསངས་པདྨ་དཀར་པོ་འཛིན་པའོ། །
ཤེས་རབ་ཀྱི་ཕ་རོལ་ཏུ་ཕྱིན་མ་གསེར་མདོག་ལྟ་བུ་ཡིད་དུ་འོང་མ་པདྨ་ལ་གནས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་པུ་སྟི་འཛིན་མ། ཕྱག་གཉིས་ཀྱིས་ཆོས་ཀྱི་འཁོར་ལོ་བསྐོར་བའི་ཕྱག་རྒྱ་མཛད་པའོ། །ཐབས་ཀྱི་ཕ་རོལ་ཏུ་ཕྱིན་མ་མེ་ཏོག་པྲི་ཡང་ཀུ་ལྟ་བུ་ལྗང་གུ་པདྨ་སེར་པོ་ལ་གནས་
པའི་རལ་གྲི་དང་རྡོ་རྗེ་འཛིན་པའོ། །སྨོན་ལམ་གྱི་ཕ་རོལ་ཏུ་ཕྱིན་མ་ཨུཏྤ་ལ་སྔོན་པོའི་མདོག་ཅན་ཨུཏྤ་ལ་སྔོན་པོ་ལ་གནས་པའི་རལ་གྲི་འཛིན་པའོ། །སྟོབས་ཀྱི་ཕ་རོལ་ཏུ་ཕྱིན་མ་དམར་མོ་ཤེས་རབ་ཀྱི་ཕ་རོལ་ཏུ་ཕྱིན་པའི་པུ་སྟི་འཛིན་པའོ། །ཡེ་ཤེས་ཀྱི་ཕ་རོལ་ཏུ་ཕྱིན་མ་དཀར་མོ་རཏྣ་སྣ་ཚོགས་
པའི་འབྲས་བུས་བརྒྱན་པའི་བྱང་ཆུབ་ཀྱི་ཤིང་གི་ཡལ་ག་འཛིན་པའོ། །རྡོ་རྗེ་ལས་ཀྱི་ཕ་རོལ་ཏུ་ཕྱིན་མ་ནི་སྐུ་མདོག་སྣ་ཚོགས་པ་ཨུཏྤ་ལ་སྔོན་པོ་ལ་གནས་པའི་སྣ་ཚོགས་རྡོ་རྗེ་འཛིན་པའོ། །ནུབ་ཏུ་དབང་བཅུ་མ་ནི་ཕྱག་གཉིས་གཡས་པ་རྣམས་ཀྱིས་པདྨ་འཛིན་པའོ། །གཡོན་པ་རྣམས་ཀྱིས་
སྙེམས་པས་རང་རང་གི་ཕྱག་རྒྱ་འཛིན་པའོ། །དེ་ལ་ཚེ་ལ་དབང་བ་མ་ནི་དཀར་དམར་གྱི་མདོག་ཅན་ནོར་བུ་པདྨ་རཱ་ག་ལ་གནས་པའི་ཏིང་ངེ་འཛིན་གྱི་ཕྱག་རྒྱ་ཅན་གྱིས་སངས་རྒྱས་ཚེ་དཔག་མེད་ཀྱི་སྐུ་འཛིན་པའོ། །སེམས་ལ་དབང་བ་མ་ནི་དཀར་མོ་རྡོ་རྗེ་རྩེ་ལྔ་པ་དམར་པོ་འཛིན་པའོ། །ཡོ་བྱད་

ལ་དབང་བ་མ་ནི་སེར་མོ་ཡིད་བཞིན་གྱི་ནོར་བུའི་རྒྱལ་མཚན་འཛིན་པའོ། །ལས་ལ་དབང་བ་མ་ནི་ལྗང་གུ་སྣ་ཚོགས་རྡོ་རྗེ་འཛིན་པའོ། །སྐྱེ་བ་ལ་དབང་བ་མ་ནི་སྐུ་མདོག་སྣ་ཚོགས་མ་མེ་ཏོག་ཛཱ་ཏི་ཁ་དོག་སྣ་ཚོགས་པའི་ཡལ་འདབ་འཛིན་པའོ། །རྫུ་འཕྲུལ་ལ་དབང་བ་མ་ནི་ནམ་མཁའ་
ལྟར་སྔོ་བསངས་པདྨ་ལ་གནས་པའི་ཉི་མ་དང་ཟླ་བའི་དཀྱིལ་འཁོར་འཛིན་པའོ། །མོས་པ་ལ་དབང་བ་མ་ནི་པདྨའི་རྩ་བ་ལྟར་དཀར་བའི་པྲི་ཡང་ཀུའི་མ་ཏོག་གི་སྙེམ་འཛིན་པའོ། །སྨོན་ལམ་ལ་དབང་བ་མ་ནི་སེར་མོ་ཨུཏྤ་ལ་སྔོན་པོ་འཛིན་པའོ། །ཡེ་ཤེས་ལ་དབང་བ་མ་སྔོན་མོ་ཨུཏྤ་
ལ་སྔོན་པོ་ལ་གནས་པའི་རལ་གྲི་འཛིན་པའོ། །ཆོས་ལ་དབང་བ་མ་སྐུ་མདོག་དཀར་མོ་པདྨ་ལ་གནས་པའི་བུམ་པ་བཟང་པོ་འཛིན་པའོ། །དེ་བཞིན་ཉིད་མ་དཀར་མོ་ཕྱག་གཡས་པས་པདྨ་དཀར་པོ་འཛིན་པ། གཡོན་པས་རྡོ་རྗེ་རིན་པོ་ཆེའི་སྙེ་མ་འཛིན་པའོ། །སངས་རྒྱས་ཀྱི་བྱང་
ཆུབ་མ་གསེར་གཞུ་ལྟ་བུའི་མདོག་ཅན་ཕྱག་གཡས་ཀྱིས་པདྨ་སེར་པོ་ལ་གནས་པའི་རྡོ་རྗེ་རྩེ་ལྔ་པ་འཛིན་པའོ། །གཡོན་པ་ཡིད་བཞིན་གྱི་ནོར་བུའི་རྒྱལ་མཚན་གྱི་སྟེང་དུ་འཁོར་ལོ་འཛིན་པའོ། །བྱང་དུ་གཟུགས་མ་བཅུ་གཉིས་ནི་ཕྱག་གཉིས་མ་གཡས་པ་རྣམས་ཀྱིས་སྣ་
ཚོགས་རྡོ་རྗེ་དང་གཡོན་པ་རྣམས་སྙེམས་པ་དང་བཅས་པས་རང་རང་གི་མཚན་མ་འཛིན་པ་སྟེ། དེ་ལ་དབྱིག་གི་བློ་གྲོས་མ་སེར་མོ་འབྲས་ཀྱི་སྙེ་མ་འཛིན་པའོ། །རིན་ཆེན་སྐར་མདའ་མ་དམར་མོ་ཡིད་བཞིན་གྱི་ནོར་བུའི་རྒྱལ་མཚན་འཛིན་པའོ། །གཙུག་ཏོར་རྣམ་པར་རྒྱལ་མ་
དཀར་མོ་ནོར་བུ་ཟླ་བ་ཆུ་ཤེལ་གྱི་བུམ་པ་འཛིན་པའོ། །འོད་ཟེར་ཅན་དཀར་དམར་སྐུད་པ་དང་བཅས་པའི་ཁབ་འཛིན་པའོ། །རི་ཁྲོད་ལོ་མ་ཅན་ལྗང་གུ་རྨ་བྱའི་མཇུག་སྒྲོ་འཛིན་པའོ། །དུག་སེལ་མ་དཀར་མོ་དུག་གི་མེ་ཏོག་གི་ཆུན་པོ་འཛིན་པའོ། །སྒོ་མཐའ་ཡས་མ་མེ་ཏོག་
པྲི་ཡང་ཀུ་ལྟར་ལྗང་བུ་ཆུ་སྐྱེས་དམར་པོ་ལ་གནས་པའི་མི་ཟད་པའི་གཏེར་ཆེན་པོའི་བུམ་པ་འཛིན་པའོ། །ཙུནྡ་མ་དཀར་མོ་བགྲང་ཕྲེང་འཕྱང་བའི་རིལ་བ་སྤྱི་བླུགས་འཛིན་པའོ། །ཤེས་རབ་འཕེལ་མ་དཀར་མོ་ཨུཏྤ་ལ་སྔོན་པོ་ལ་གནས་པའི་རལ་གྲི་འཛིན་པའོ། །ལས་

དང་སྒྲིབ་པ་ཐམས་ཅད་རྣམ་པར་སེལ་བ་ལྗང་གུ་སྟེ་རྡོ་རྗེ་རྩེ་གསུམ་པས་མཚན་པའི་པདྨ་དཀར་དམར་འཛིན་པའོ། །ཡེ་ཤེས་མི་ཟད་པའི་ཟ་མ་ཏོག་དམར་མོ་རཏྣའི་ཟ་མ་ཏོག་འཛིན་པའོ། །སངས་རྒྱས་ཐམས་ཅད་ཀྱི་ཆོས་ཀྱི་མཛོད་མོ་སེར་མོ་པདྨ་ལ་གནས་
པའི་རཏྣ་སྣ་ཚོགས་ཀྱི་དཔེ་སྒྲོམ་འཛིན་པའོ། །ཤར་ཕྱོགས་ཀྱི་སྒོར་ཆོས་སོ་སོ་ཡང་དག་པར་རིག་པ་མ་སྐུ་མདོག་དཀར་དམར་ཕྱག་གཉིས་ཀྱིས་རྡོ་རྗེ་ལྕགས་ཀྱུ་དང་ཞགས་པ་འཛིན་པའོ། །ལྷོ་ཕྱོགས་ཀྱི་སྒོར་དོན་སོ་སོ་ཡང་དག་པར་རིག་མ་མ་ར་ཀ་ཏའི་མདོག་ཅན་ཕྱག་གཡོན་གྱི་
རིན་པོ་ཆེའི་ཞགས་པ་འཛིན་པའོ། །ནུབ་ཀྱི་སྒོར་ངེས་པའི་ཚིག་སོ་སོ་ཡང་དག་པར་རིག་པ་མ་དམར་པོའི་ཕྱག་གཉིས་ཀྱིས་མཐའ་གཉིས་སུ་པདྨས་མཚན་པའི་ལྕགས་སྒྲོག་འཛིན་པའོ། །བྱང་གི་སྒོར་སྤོབས་པ་སོ་སོ་ཡང་དག་པར་རིག་པ་མ་མ་ར་ཀ་ཏ་ལྟ་བུ་ལྗང་གུ་ཕྱག་གཉིས་ཀྱིས་རྡོ་རྗེ་
རྩེ་གསུམ་པས་མཚན་པའི་དྲིལ་བུ་འཛིན་པའོ། །མེའི་མཚམས་སུ་སྒེག་མོ་སེར་མོ་སྒེག་པ་དང་བཅས་པའི་ཕྱག་གཉིས་ཀྱིས་རྡོ་རྗེ་གཉིས་འཛིན་པའོ། །བདེན་བྲལ་དུ་ཕྲེང་བ་མ་དམར་སེར་ཕྱག་གཉིས་རཏྣའི་ཕྲེང་བ་འཛིན་པའོ། །རླུང་དུ་གླུ་མ་དམར་མོ་ཕྱག་གཉིས་ཀྱིས་པི་ཝང་བསྒེང་
བའོ། །དབང་ལྡན་དུ་གར་མ་ལྗང་གུ་ཕྱག་གཉིས་ཀྱིས་གར་བྱེད་པའི་ཚུལ་གྱིས་རྡོ་རྗེ་རྩེ་གསུམ་པ་དང་རྡོ་རྗེ་དྲིལ་བུ་འཛིན་པའོ། །མོས་པས་སྤྱོད་པའི་ས་ལ་སོགས་པའི་ལྷ་མོ་འདི་རྣམས་ཐམས་ཅད་ནི་རཏྣའི་རྒྱན་སྣ་ཚོགས་དང་གོས་དང་རཏྣའི་ཅོད་པན་དང་ལྡན་པ་དང་ཅུང་ཟད་འཛུམ་
པ་དང་སྒེག་པའི་ཉམས་དང་ལྡན་པ་སྣ་ཚོགས་པདྨ་དང་ཟླ་བའི་དཀྱིལ་འཁོར་ལ་སེམས་དཔའི་སྐྱིལ་ཀྲུང་གིས་བཞུགས་པའོ། །ཁྱད་པར་དུ་སྒོ་སྐྱོང་མ་རྣམས་ནི་ཉི་མའི་དཀྱིལ་འཁོར་ལ་བཞུགས་པའོ། །གཞན་ནི་དེ་རྣམས་ཀྱང་ཟླ་བ་ལ་གནས་པའོ་ཞེས་སོ། །དཀྱིལ་འཁོར་གསུམ་པ་
དབང་ལྡན་ནས་བརྩམས་ནས་བྱང་ཆུབ་སེམས་དཔའ་རྣམས་ཏེ། དེ་ལ་ཤར་ཕྱོགས་ཀྱི་སྣམ་བུ་ལ་ཀུན་ཏུ་བཟང་པོ་སེར་པོ་ཕྱག་གཡས་པས་མཆོག་སྦྱིན་གཡོན་པས་ཨུཏྤ་ལ་ལ་གནས་པའི་རལ་གྲི་འཛིན་པའོ། །བློ་གྲོས་མི་ཟད་པ་སེར་པོ་གཡས་པས་རལ་གྲི་དང་གཡོན་པས་མི་

འཇིགས་པས་པདྨ་འཛིན་པའོ། །སའི་སྙིང་པོ་སེར་པོ་གཡས་པས་ས་གནོན་མཛད་པ། གཡོན་པས་པདྨ་ལ་གནས་པའི་དཔག་བསམ་གྱི་ཤིང་འཛིན་པའོ། །ནམ་མཁའི་སྙིང་པོ་ལྗང་གུ་གཡས་པས་རཏྣ་སྣ་ཚོགས་ཀྱི་ཆར་འབེབས་པ། གཡོན་པས་ཡིད་བཞིན་གྱི་ནོར་བུ་འཛིན་
པའོ། །ལྷོ་ཕྱོགས་ཀྱི་སྣམ་བུ་ལ་ནམ་མཁའ་མཛོད་སེར་པོ་གཡས་པས་ཡིད་བཞིན་གྱི་ནོར་བུ་འཛིན་པ། གཡོན་པས་བུམ་པ་བཟང་པོ་ལ་འཕྱང་བའི་དཔག་བསམ་གྱི་ཤིང་འཛིན་པའོ། །ཕྱག་ན་རིན་ཆེན་ལྗང་གུ་ཕྱག་གཡས་པས་རིན་པོ་ཆེ་དང་གཡོན་པས་པདྨ་ལ་གནས་པའི་ཟླ་བའི་དཀྱིལ་
འཁོར་འཛིན་པའོ། །བློ་གྲོས་རྒྱ་མཚོ་དཀར་པོ་གཡས་དུང་དང་གཡོན་པས་རྡོ་རྗེ་རལ་གྲི་འཛིན་པའོ། །རྡོ་རྗེ་སྙིང་པོ་ཨུཏྤ་ལ་སྔོན་པོའི་ལོ་མ་ལྟ་བུའི་མདོག་ཅན་གཡས་པས་རྡོ་རྗེ་དང་གཡོན་པས་མདོ་སྡེ་ས་བཅུ་པའི་པུ་སྟི་འཛིན་པའོ། །ནུབ་ཏུ་སྤྱན་རས་གཟིགས་དབང་ཕྱུག་གཡས་པས་
མཆོག་སྦྱིན་གྱི་ཕྱག་རྒྱ་གཡོན་པས་ཆུ་སྐྱེས་དཀར་པོ་འཛིན་པའོ། །མཐུ་ཆེན་ཐོབ་སེར་པོ་གཡས་པས་རལ་གྲི་གཡོན་པས་པདྨ་འཛིན་པའོ། །ཟླ་འོད་དཀར་པོ་གཡས་པས་རྡོ་རྗེ་འཁོར་ལོ་དང་གཡོན་པས་པདྨ་ལ་གནས་པའི་ཟླ་བའི་དཀྱིལ་འཁོར་འཛིན་པའོ། །དྲ་བ་ཅན་གྱི་འོད་
དཀར་དམར་གཡས་པས་རལ་གྲི་དང་གཡོན་པས་པདྨ་ལ་གནས་པའི་ཉི་མའི་དཀྱིལ་འཁོར་འཛིན་པའོ། །བྱང་དུ་འོད་དཔག་མེད་དཀར་པོ་གཡས་ན་སྣ་ཚོགས་པདྨ་དང་གཡོན་པས་པདྨ་ལ་གནས་པའི་བུམ་པ་འཛིན་པའོ། །སྤོབས་པ་བརྩེགས་པ་སེར་པོ་གཡས་པས་སེ་གོལ་གཡོན་པས་
པདྨ་ལ་གནས་པའི་རལ་གྲི་འཛིན་པའོ། །མྱ་ངན་དང་མུན་པ་ཐམས་ཅད་འཇོམས་པའི་བློ་གྲོས་གུར་གུམ་ལྟ་བུ་གཡས་པ་རྡོ་རྗེ་རྩེ་ལྔ་པ་དང་གཡོན་པ་ཤཀ་ཏི་འཛིན་པའོ། །སྒྲིབ་པ་ཐམས་ཅད་རྣམ་པར་སེལ་བ་སྔོན་པོ་གཡས་པས་རལ་གྲི་གཡོན་པས་སྣ་ཚོགས་རྡོ་རྗེས་མཚན་པའི་བ་དན་
འཛིན་པའོ། །བཅུ་དྲུག་པོ་འདི་དག་ནི་སྣ་ཚོགས་པདྨ་དང་ཟླ་བའི་དཀྱིལ་འཁོར་ལ་སེམས་དཔའི་སྐྱིལ་ཀྲུང་གིས་བཞུགས་པ་རིན་པོ་ཆེའི་ཅོད་པན་ཅན་རིན་པོ་ཆེ་དང་ན་བཟའ་སྣ་ཚོགས་པས་བརྒྱན་པ་ཞལ་གཅིག་པ་ཕྱག་གཉིས་པ་རྣམས་སོ། །ཤར་སྒོར་མ་ཧེ་ལ་གཤིན་རྗེ་མཐར་

བྱེད་ནག་པོ་ཞལ་དྲུག་པ་གསུས་པ་འཕྱང་བ་ཞབས་དྲུག་པ་ཕྱག་དྲུག་གི་གཡས་པ་རྣམས་ཀྱིས་ལྕགས་ཀྱུ་དང་རལ་གྲི་དང་མདའ་འཛིན་པ། གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་དྲིལ་བུ་དང་གཞུ་འཛིན་པའོ། །ཞལ་དང་ཞབས་རྣམས་ཀྱི་བྱེ་
བྲག་གོང་བཞིན་ནོ། །ལྷོ་སྒོར་ཤེས་རབ་མཐར་བྱེད་སེར་པོ་ཞལ་བཞི་པ་རྩ་བའི་ཞལ་སྒེག་པ་དང་བཅས་པའི་གཡས་གདངས་པ། ནུབ་ཏུ་དྲག་པོ་ཆེན་པོ་གཡོན་ཞི་བ་ཡང་ན་འདི་རྣམས་ནི་གོ་རིམས་ཇི་ལྟ་བས་སེར་པོ་དང་སྔོན་པོ་དང་དམར་པོ་དང་ལྗང་གུ་རྣམས་སོ། །འདི་ནི་ཕྱག་བརྒྱད་པ་
གཡས་པ་རྣམས་ཀྱིས་ཞགས་པ་དང་རྡོ་རྗེ་དང་རལ་གྲི་དང་མདའ་རྣམས་འཛིན་པའོ། །གཡོན་པ་རྣམས་ཀྱིས་སྙིང་གར་ལྕགས་ཀྱུ་དང་རྡོ་རྗེ་དྲིལ་བུ་དང་མདུང་དང་གཞུ་འཛིན་པའོ། །ནུབ་ཏུ་པདྨ་མཐར་བྱེད་དམར་པོ་ཞལ་བཞི་དམར་བ་སྒེག་པ་དང་དྲག་པོ་དང་བཞད་པ་དང་ཞི་བའི་ཉམས་དང་
ལྡན་པ་ནི། རྩ་བ་དང་གཡས་དང་རྒྱབ་དང་གཡོན་པའི་ཞལ་རྣམས་སོ། །ཡང་ན་འདི་རྣམས་ནི་དམར་པོ་དང་ནག་པོ་དང་སེར་པོ་དང་དཀར་པོ་རྣམས་སོ། །ཕྱག་བརྒྱད་པ་ཕྱག་གཉིས་ཀྱིས་རྡོ་རྗེ་ལྕགས་སྒྲོག་འཛིན་པ་ཕྱག་གཡས་པ་རྣམས་ཀྱིས་རྡོ་རྗེ་དང་རལ་གྲི་དང་མདའ་འཛིན་པའོ། །
གཡོན་པ་རྣམས་ཀྱིས་དྲིལ་བུ་དང་སྡིགས་མཛུབ་དང་བཅས་པའི་ཞགས་པ་དང་གཞུ་འཛིན་པའོ། །གསུམ་པོ་འདི་དག་ནི་རོལ་པའི་ཀུན་དུ་བསྐྱོད་པས་གནས་པའོ། །བྱང་དུ་བགེགས་མཐར་བྱེད་སྔོན་པོ་ཞལ་བཞི་སྔོན་པོའམ་ཡང་ན་སྔོན་པོ་དང་སེར་པོ་དང་དམར་པོ་དང་ལྗང་གུ་
རྣམས་སོ། །ཕྱག་བརྒྱད་པ་གཉིས་ཀྱིས་རྡོ་རྗེ་བསྡམས་པའི་ཚུལ་གྱིས་རྡོ་རྗེ་དྲིལ་བུ་དང་གཡས་པ་རྣམས་ན་རལ་གྲི་དང་མདའ་དང་ལྕགས་ཀྱུ་འཛིན་པའོ། །གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་གཞུ་དང་དྲིལ་བུ་འཛིན་པའོ། །ཚོགས་ཀྱི་བདག་
པོ་གཡོན་བརྐྱང་བས་ཀུན་ནས་མནན་ནས་བཞུགས་པའོ། །དབང་ལྡན་གྱི་མཚམས་སུ་འཇིག་རྟེན་གསུམ་ལས་རྣམ་པར་རྒྱལ་བ་སྔོན་པོ་ཞལ་བཞི་སྔོན་པོ་རྩ་བའི་ཞལ་ཁྲོ་བ་དང་བཅས་པའི་སྒེག་པ་དང་གཡས་དྲག་པོ་རྒྱབ་དཔའ་བ་གཡོན་མི་སྡུག་པའོ། །ཡང་ན་འདི་དག་སྔོན་པོ་དང་

སེར་པོ་དང་དམར་པོ་དང་དཀར་པོ་རྣམས་སོ། །འདི་ནི་ཕྱག་བརྒྱད་པ་ཕྱག་གཉིས་ཀྱིས་རྡོ་རྗེ་དང་དྲིལ་བུ་དང་ལྡན་པ་ཐུགས་ཀར་བཟུང་ནས་རྡོ་རྗེ་ཧཱུཾ་མཛད་ཀྱི་ཕྱག་རྒྱ་མཛད་པ་གཡས་པ་རྣམས་ཀྱིས་རལ་གྲི་དང་ལྕགས་ཀྱུ་དང་མདའ་དང་། གཡོན་པ་རྣམས་ཀྱིས་རྡོ་རྗེ་དང་ཞགས་པ་དང་། གཞུ་
འཛིན་པའོ། །གཡོན་བརྐྱང་བའི་སྟང་སྟབས་ཀྱིས་ཞབས་གཡོན་པས་དབང་ཕྱུག་ཆེན་པོའི་མགོ་མནན་པ་གཡས་པས་ཨུ་མའི་ནུ་མར་མནན་པའོ། །མེར་རྡོ་རྗེ་ཉི་མ་མེ་ལྟར་འབར་བ་ནག་པོ་སྒེག་པ་དང་དཔའ་བ་དང་འཇིགས་སུ་རུང་བ་དང་། སྙིང་རྗེའི་རོ་དང་ལྡན་པའི་ཞལ་བཞི་ནག་པོ་
འམ་ཡང་ན་འདི་དག་ནི་སྔོན་པོ་དཀར་པོ་སེར་པོ་དམར་པོ་རྣམས་སོ། །འདི་ནི་ཕྱག་བརྒྱད་པ་གཡས་པ་རྣམས་ཀྱིས་རྡོ་རྗེ་དང་རལ་གྲི་དང་མདའ་དང་འཁོར་ལོ་འཛིན་པའོ། །གཡོན་པ་རྣམས་ཀྱིས་དྲིལ་བུ་དང་ཞགས་པ་དང་གཞུ་དང་ཁ་ཊྭཱཾ་ག་ལ་འབྲེལ་པའི་བ་དན་འཛིན་པའོ། །ཆུང་མ་དང་
བཅས་པའི་ཁྱབ་འཇུག་གཡས་བརྐྱང་གིས་མནན་པའོ། །བདེན་བྲལ་དུ་ཧེ་རུ་ཀ་རྡོ་རྗེ་སྔོན་པོ་སྔོན་པོའི་ཞལ་བཞི་པ་རྩ་བའི་ཞལ་དྲག་པོ་གཡས་པ་རབ་ཏུ་དགའ་བས་བཞད་པ་རྒྱབ་ནི་ཟ་བར་རྔམས་པ་གཡོན་པ་སྒེག་པའོ། །ཡང་ན་འདི་དག་ནི་སྔོན་པོ་དང་དམར་པོ་དང་ལྗང་གུ་དང་དཀར་
པོའོ། །འདི་ནི་ཕྱག་བརྒྱད་པ་གཡས་པ་རྣམས་ཀྱིས་རྡོ་རྗེ་རྩེ་ལྔ་པ་དང་མདའ་དང་ཁྲག་གིས་བཀང་བའི་ཐོད་པ་དང་། གཡོན་པ་རྣམས་ཀྱིས་སྙིང་གར་པདྨ་ཁ་བྱེ་བ་དང་། གཞུ་དང་དྲིལ་བུ་དང་བ་དན་དང་བཅས་པའི་ཁ་ཊྭཱཾ་ག་འཛིན་པའོ། །ཕྱག་གཉིས་ཀྱིས་འཇིགས་བྱེད་ཀྱི་པགས་པ་
རླུང་གི་གོས་འདྲ་བ་འཛིན་པའོ། །ཆུང་མ་དང་བཅས་པའི་ཚངས་པ་གཡོན་བརྐྱང་བས་མནན་ནས་གནས་པའོ། །རླུང་དུ་རྟ་མཆོག་ལྗང་གུ་ལྗང་གུའི་ཞལ་བཞི་པ་རྩ་བ་ཁྲོ་བ་དང་བཅས་པའི་སྒེག་པ་གཡས་པ་དྲག་པོ་གཡོན་པའི་ཞལ་ཚངས་པ་ལྟ་བུ་སྟེ། ཡང་ན་ནི་འདི་ནི་ལྗང་གུ་དང་
སྔོན་པོ་དང་དཀར་པོ་རྣམས་ཏེ། སྤྱི་བོར་རྟ་མགོ་ལྗང་གུའོ། །འདི་ནི་ཕྱག་བརྒྱད་པ་གཡས་དང་པོ་སྣ་ཚོགས་རྡོ་རྗེ་དང་བ་དན་གསུམ་པ་དང་ལྡན་པས་ཕྱག་བསྒྲེང་བའི་ཚུལ་བྱས་པ་གཉིས་པས་བ་དན་གསུམ་པའི་ཚུལ་བྱས་པ། ཕྱག་གཉིས་ཀྱིས་རལ་གྲི་དང་མདའ་འཛིན་པའོ། །

གཡོན་པས་ཕུབ་དང་བཅས་པའི་ཕྱག་གི་སྣ་ཚོགས་ཆུ་སྐྱེས་འཛིན་པ། ལྷག་མ་གསུམ་གྱིས་ཤཀ་ཏི་དང་དབྱུག་པ་དང་གཞུ་རྣམས་འཛིན་པའོ། །ཞབས་གཡོན་བསྐུམ་པ་གཡས་བརྐྱང་བ་དང་གཡས་བསྐུམ་ཞིང་གཡོན་བརྐྱང་བའི་ཞབས་བཞིའོ། །གཡས་དང་
པོ་གཅིག་གིས་དབང་མོ་དང་དཔལ་མོ། གཉིས་པས་དགའ་མོ་དང་ཚིམ་མོ། གཡོན་པ་གཅིག་གིས་དབང་པོ་དང་སྦྲང་རྩིར་བྱེད་པ་དང་། གཉིས་པས་རྒྱལ་བར་བྱེད་པ་དང་། དཔྱིད་ཀྱི་ལྷ་མནན་ནས་གནས་པའོ། །དཀྱིལ་འཁོར་གྱི་བདག་པོའི་སྟེང་དུ་ནམ་མཁའ་ལ་གཙུག་ཏོར་
འཁོར་ལོས་སྒྱུར་བ་སེར་པོ་ཞལ་བཞི་སེར་བའམ་ཡང་ན་སེར་པོ་དང་སྔོན་པོ་དང་དམར་པོ་དང་དཀར་པོའོ། །ཕྱག་བརྒྱད་པའི་གཡས་པ་རྣམས་ཀྱིས་འཁོར་ལོ་དང་ལྕགས་ཀྱུ་དང་རལ་གྲི་དང་མདའོ། །གཡོན་པ་རྣམས་ཀྱིས་དྲིལ་བུ་དང་ཞགས་པ་དང་བགྲང་ཕྲེང་དང་གཞུ་བསྣམས་
པ། རོལ་པའི་ཀུན་དུ་བསྐྱོད་པས་གནས་པའོ། །འོག་ཏུ་གནོད་མཛེས་རྒྱལ་པོ་ནག་པོ་ཞལ་བཞི་པ་དྲག་པོ་དང་ཞི་བ་དང་། བཞད་པ་དང་སྒེག་པའི་ཉམས་དང་ལྡན་པའི་ནག་པོའོ། །ཡང་ན་ཞལ་བཞི་ནི་ནག་པོ་དང་དཀར་པོ་དང་དམར་པོ་དང་སེར་པོའོ། །ཕྱག་བརྒྱད་པའི་གཡས་
པ་རྣམས་ནི་རྡོ་རྗེ་དང་ལྕགས་ཀྱུ་དང་རལ་གྲི་དང་མདའོ། །གཡོན་པ་རྣམས་ཀྱིས་དྲིལ་བུ་དང་ཞགས་པ་གསལ་ཤིང་རྩེ་གཅིག་པ་དང་གཞུ་རྣམས་འཛིན་པ་གཡོན་བརྐྱང་གིས་གནས་པའོ། །ཁྲོ་བོ་བཅུ་པོ་འདི་དག་ནི་སྣ་ཚོགས་ཆུ་སྐྱེས་དང་ཉི་མ་ལ་གནས་པ་ཞལ་རེ་རེ་ཞིང་སྤྱན་གསུམ་
གསུམ་དམར་བ་སྨིན་མ་འཁྱོག་པ་སྟག་གི་པགས་པས་སྐུའི་སྟོད་སྨད་ལ་དཀྲིས་པ་ཐོད་པའི་ཕྲེང་བས་གཙུག་ཏོར་བྱས་པ་དབུ་སྐྲ་འབར་བ་དམར་སེར་གྱེན་དུ་བཅིངས་པ་སྨ་ར་དམར་སེར་དང་ལྡན་པ་ཀླུའི་རྒྱལ་པོ་བརྒྱད་ཀྱིས་འཇིགས་སུ་རུང་བའོ། །དཀྱིལ་འཁོར་གསུམ་པ་ཁོ་
ནའི་གྲྭ་བཞིའི་ནང་ན་འཇིག་རྟེན་གསུམ་ལས་རྣམ་པར་རྒྱལ་བ་ལ་སོགས་པ་ཁྲོ་བོ་བཞིའི་ཕྱིའི་རེ་ཁཱའི་ཕྱི་རོལ་གྱི་གནས་སུ་མེ་ལ་སོགས་པའི་ཟུར་ཐིག་བཞི་པོ་རྣམས་ཀྱི་གཡས་ལོགས་སུ་མེ་ཏོག་མ་ལ་སོགས་པ་བཞིའོ། །གཡོན་ལོགས་སུ་གཟུགས་རྡོ་རྗེ་མ་ལ་སོགས་པ་བཞིའོ། །

དེ་ལ་མེ་ཏོག་མ་སེར་མོ་ཕྱག་ན་མེ་ཏོག་གི་སྣོད་འཛིན་པའོ། །བདུག་སྤོས་མ་ནག་མོ་ཕྱག་ན་བདུག་སྤོས་ཀྱི་ཕོར་པ་འཛིན་པའོ། །མར་མེ་མ་དམར་མོ་ཕྱག་ན་རཏྣའི་སྒྲོན་མེའི་མཆོད་སྡོང་འཛིན་པའོ། །དྲི་ཆབ་མ་ལྗང་གུ་ཕྱག་ན་དྲིའི་དུང་ཆོས་འཛིན་པའོ། །རྡོ་རྗེ་གཟུགས་མ་སེར་
མོ་ཕྱག་ན་མེ་ལོང་འཛིན་པའོ། །རྡོ་རྗེ་སྒྲ་མ་ལྗང་གུ་ཕྱག་ན་པི་ཝང་འཛིན་པའོ། །རྡོ་རྗེ་རོ་མ་དམར་མོ་ཕྱག་ན་རོའི་སྣོད་འཛིན་པའོ། །རྡོ་རྗེ་རེག་བྱ་མ་སྣ་ཚོགས་པའི་ཁ་དོག་ཅན་ཕྱག་ན་གོས་སྣ་ཚོགས་འཛིན་པའོ། །བརྒྱད་པོ་འདི་དག་ནི་ཞལ་གཅིག་ཕྱག་གཉིས་མ་རཏྣའི་ཅོད་པན་
དང་ལྡན་པ་གོས་སྣ་ཚོགས་དང་རིན་པོ་ཆེས་བརྒྱན་པ་པདྨ་དང་ཟླ་བའི་དཀྱིལ་འཁོར་ལ་སེམས་དཔའི་སྐྱིལ་ཀྲུང་གིས་བཞུགས་པའོ། །བཞི་པ་རྡོ་རྗེ་རིགས་ཀྱི་དཀྱིལ་འཁོར་ལ་དབང་པོའི་ཕྱོགས་སུ་དབང་པོ་སེར་པོ་གླང་པོ་ཆེ་ས་སྲུང་དཀར་པོའི་སྟེང་ན་གནས་པ་ཕྱག་གཡས་ན་རྡོ་རྗེ་
གཡོན་པ་ནུ་མ་འཛིན་པའོ། །གཤིན་རྗེར་མ་ཧེ་ལ་གཤིན་རྗེ་ནག་པོ་ཕྱག་གཉིས་ཀྱིས་དབྱུག་པ་དང་རྩེ་གཅིག་པ་འཛིན་པའོ། །ཆུར་ཆུ་སྲིན་ལ་ཆུ་བདག་དཀར་པོ་སྦྲུལ་མགོའི་གདེངས་ཀ་བདུན་པ་ཀླུའི་ཞགས་པ་དང་དུང་དཀར་འཛིན་པའོ། །ལུས་ངན་དུ་མི་ལ་ལུས་ངན་སེར་པོ་
ལྕགས་ཀྱུ་དང་དབྱུག་ཏོ་འཛིན་པའོ། །དབང་ལྡན་དུ་དབང་ལྡན་དཀར་པོ་གླང་གི་སྟེང་ན་གནས་པ་རྩེ་གསུམ་དང་ཐོད་པ་འཛིན་པ་ཐོད་པ་དང་རལ་པའི་ཐོར་ཅོག་དང་ཟླ་བ་ཕྱེད་པས་དབུ་བརྒྱན་པ། སྦྲུལ་གྱི་མཆོད་ཕྱིར་ཐོགས་དང་ལྡན་པ་མགྲིན་པ་སྔོན་པོའོ། །མེར་ར་ལ་མེ་ལྷ་
དམར་པོ་བླུགས་གཟར་དང་སྤྱི་བླུགས་འཛིན་པའོ། །བདེན་བྲལ་དུ་སྲིན་པོའི་བདག་པོ་སྔོན་པོ་རོ་ལ་གནས་པ་རལ་གྲི་དང་ཕུབ་འཛིན་པའོ། །རླུང་དུ་རླུང་ལྷ་སྔོན་པོ་རི་དགས་ལ་གནས་པ་རླུང་རས་འཛིན་པའོ། །བརྒྱད་པོ་འདི་དག་ནི་ཕྱག་བཞི་པ་ཕྱག་གཡས་པས་ཕྱག་
མཚན་དང་པོ་འཛིན་པ། གཡོན་པས་ཕྱག་མཚན་གཉིས་འཛིན་ཅིང་རང་རང་གི་བཙུན་མོ་ལ་འཁྱུད་པ་ཕྱག་འོག་མ་གཉིས་གཙོ་བོ་ལ་འདུད་པའི་ཚུལ་གྱིས་སྤྱི་བོར་ཐལ་མོ་སྦྱོར་བའོ། །དབང་ལྡན་དང་ཉེ་བའི་ཕྱི་རོལ་དུ་དབང་ལྡན་གྱི་མཚམས་ནས་བརྩམས་ནས་རིམ་པས་

ཚངས་པ་ལ་སོགས་པ་སྟེ་དེ་ལ་ཚངས་པ་ནི་ངང་པ་ལ་ཞོན་པ་སེར་པོ་ཞལ་བཞི་ནི་སེར་པོའོ། །ཕྱག་བཞི་པ་དང་པོ་གཉིས་ཀྱིས་བགྲང་ཕྲེང་དང་པདྨ་འཛིན་པའོ། །འོག་མ་གཉིས་ཀྱིས་དབྱུག་པ་དང་སྤྱི་བླུགས་བཟུང་ནས་ཐལ་མོ་སྦྱར་བའོ། །ཁྱབ་འཇུག་ནག་
པོ་ཁྱུང་ལ་ཞོན་པ་ཕྱག་བཞི་པ་དང་པོ་གཉིས་ཀྱིས་འཁོར་ལོ་དང་དུང་འཛིན་པ། གཡས་གཡོན་གཉིས་ཀྱིས་མདུང་ཐུང་དང་ས་རཾ་ཁའི་གཞུ་འཛིན་པ་སྤྱི་བོར་ཐལ་མོ་སྦྱར་བའོ། །དབང་ཕྱུག་ཆེན་པོ་དཀར་པོ་གླང་ལ་ཞོན་པ་རལ་པའི་ཐོར་ཅོག་ཅན་ཟླ་བ་ཕྱེད་པས་མཚན་པ། ཕྱག་བཞི་པ་
སྤྱི་བོར་ཐལ་མོ་སྦྱར་བ་དང་རྩེ་གསུམ་པ་དང་ཐོད་པ་འཛིན་པའོ། །གདོང་དྲུག་དམར་པོ་རྨ་བྱ་ལ་ཞོན་པ་གདོང་དྲུག་པ་ཕྱག་དྲུག་པ་གཡས་པ་གཉིས་ཤ་ཀ་ཏི་དང་རྡོ་རྗེ་འཛིན་པ་གཡོན་པ་གཉིས་ཀྱིས་ཁྱིམ་བྱ་དང་དྲིལ་བུ་འཛིན་པའོ། །ལྷག་མ་གཉིས་ཀྱིས་སྤྱི་བོར་ཐལ་མོ་སྦྱར་བའོ། །འདི་
རྣམས་ཀྱང་གོང་བཞིན་དུ་རང་གི་བཙུན་མོ་ལ་འཁྱུད་པའོ། །ཚངས་མ་ནི་ཚངས་པ་དང་མཚུངས་པའོ། །དྲག་མོ་ནི་དྲག་པོ་དང་མཚུངས་པའོ། །ཁྱབ་འཇུག་མ་ནི་ཁྱབ་འཇུག་དང་མཚུངས་པའོ། །གཞོན་དུ་མ་ནི་གདོང་དྲུག་དང་མཚུངས་པའོ། །དབང་མོ་ནི་དབང་པོ་དང་མཚུངས་པའོ། །
ཕག་མོ་ནག་མོ་ནི་འུག་པ་ལ་ཞོན་པ་ཕྱག་བཞི་པ་ཕྱག་གཡས་གཡོན་གཉིས་ཀྱིས་རོ་ཧི་ཏའི་ཉ་དང་ཐོད་པ་འཛིན་པའོ། །གཞན་གཉིས་ཀྱིས་ཐལ་མོ་སྦྱར་བའོ། །ཙ་མུཎྜཱི་དམར་མོ་རི་དགས་ལ་ཞོན་པ་ཕྱག་བཞི་མ་གཡས་གཡོན་གྱིས་གྲི་གུག་དང་ཐོད་པ་འཛིན་པ་གཉིས་ཀྱིས་ཐལ་མོ་སྦྱར་བའོ། །
བྷྲྀངྒི་རི་ཏི་ནག་མོ་ཤིན་ཏུ་སྐེམ་པ་ཕྱག་བཞི་པ་གཉིས་ཀྱིས་ཕྲེང་བ་དང་སྤྱི་བླུགས་འཛིན་པ་གཉིས་ཀྱིས་ཐལ་མོ་སྦྱར་བའོ། །ཚོགས་བདག་དཀར་པོ་བྱི་བ་ལ་ཞོན་པ་གླང་པོ་ཆེའི་གདོང་ཅན་སྦྲུལ་གྱི་མཆོད་ཕྱིར་ཐོགས་པ་ཅན་ཕྱག་བཞིའི་གཡས་གཉིས་ཀྱིས་རྩེ་གསུམ་པ་དང་ལ་དུ་གཡོན་
གཉིས་ཀྱིས་དགྲ་སྟ་དང་ལ་ཕུག་འཛིན་པའོ། །ནག་པོ་ཆེན་པོ་ནག་པོ་རྩེ་གསུམ་པ་དང་ཐོད་པ་འཛིན་པའོ། །དགའ་བྱེད་དབང་ཕྱུག་ནག་པོ་རྫ་རྔ་ལ་ཞོན་པ་རྫ་རྔ་བརྡུང་བ་ལ་བརྩོན་པའོ། །ཉི་མ་དམར་པོ་རྟ་བདུན་གྱིས་འདྲེན་པའི་ཤིང་རྟ་ལ་ཞོན་པ་གཡས་པ་དང་གཡོན་པའི་ཕྱག་གཉིས་

པདྨ་ལ་གནས་པའི་ཉི་མའི་དཀྱིལ་འཁོར་འཛིན་པའོ། །ཟླ་བ་དཀར་པོ་ངང་པ་ལ་ཞོན་པ་ཕྱག་གཡས་པ་དང་གཡོན་པས་ཀུ་མུ་ད་ལ་གནས་པའི་ཟླ་བའི་དཀྱིལ་འཁོར་འཛིན་པའོ། །མིག་དམར་དམར་པོ་ར་ལ་ཞོན་པ་གཡས་ན་གྲི་གུག་གཡོན་པས་མི་མགོ་ཟ་བའི་ཚུལ་གྱིས་འཛིན་
པའོ། །ལྷག་པ་སེར་པོ་པདྨའི་སྟེང་དུ་མདའ་དང་གཞུ་འཛིན་པའོ། །ཕུར་བུ་དཀར་པོ་ཐོད་པའམ་སྦལ་པ་ལ་ཞོན་པ་ཕྲེང་བ་དང་སྤྱི་བླུགས་འཛིན་པའོ། །པ་བ་སངས་དཀར་པོ་པདྨ་ལ་གནས་པ་ཕྲེང་བ་དང་སྤྱི་བླུགས་འཛིན་པའོ། །སྤེན་པ་ནག་པོ་རུས་སྦལ་ལ་གནས་པ་དབྱུག་པ་འཛིན་
པའོ། །སྒྲ་གཅན་དམར་ནག་ཕྱག་གཉིས་ཀྱིས་ཉི་མ་དང་ཟླ་བ་འཛིན་པའོ། །མཇུག་རིངས་ནག་པོ་རལ་གྲི་དང་ཀླུའི་ཞགས་པ་འཛིན་པའོ། །སྟོབས་བཟངས་དཀར་པོ་གླང་པོ་ལ་གནས་པ་རལ་གྲི་དང་གཤོལ་འཛིན་པའོ། །རྒྱལ་བར་བྱེད་པ་ལྗང་གུ་བྱ་ཀོ་ཀི་ལའི་ཤིང་རྟ་ལ་ཞོན་པ་ལྗང་
གུ་ཕྱག་བཞི་པ་གཡས་པ་གཉིས་ན་མེ་ཏོག་གི་ཕྲེང་བ་དང་མདའ་གཡོན་གཉིས་ཀྱིས་བཏུང་བའི་སྣོད་དང་གཞུ་འཛིན་པའོ། །སྦྲང་རྩིར་བྱེད་པ་དཀར་པོ་ནེ་ཙོའི་ཤིང་རྟ་ལ་གནས་པ་ཕྱག་བཞི་པ་གཡས་ཆུ་སྲིན་གྱི་རྒྱལ་མཚན་དང་མདའ་གཡོན་པ་གཉིས་ན་བཏུང་བའི་སྣོད་འཛིན་པའོ། །
དཔྱིད་ཀྱི་ལྷ་དཀར་པོ་སྤྲེའུ་ལ་གནས་པ་ཕྱག་བཞི་པ་གཡས་པ་གཉིས་ཀྱིས་མདའ་དང་རལ་གྲི་གཡོན་པ་གཉིས་བཏུང་བའི་སྣོད་དང་གཞུ་འཛིན་པའོ། །ཀླུ་མཐའ་ཡས་དང་ནོར་རྒྱས་དང་འཇོག་པོ་དང་སྟོབས་ཀྱི་རྒྱུ་དང་པདྨ་དང་པདྨ་ཆེན་པོ་དང་དུང་སྐྱོང་དང་རིགས་ལྡན་རྣམས་
སྦྲུལ་མགོ་བདུན་དང་ལྡན་པ་ཐལ་མོ་སྦྱར་བའོ། །ཡང་ན་རང་རང་གི་ཡབ་ཀྱི་གཡས་པའི་ཕྱག་མཚན་གྱི་གཙོ་བོ་དང་ལྡན་པས་ཐལ་མོ་སྦྱར་བའོ། །ཐགས་བཟངས་རིས་དང་སྟོབས་ལྡན་དང་ཚིམ་བྱེད་དང་། རྣམ་པར་སྣང་བྱེད་ལ་སོགས་པ་ལྷ་མ་ཡིན་གྱི་དབང་པོ་ཆེན་པོ་
རྣམས་མདོག་ནག་པོ་གཡུལ་འགྱེད་པའི་གོ་ཆ་སྣ་ཚོགས་བགོས་པ་རལ་གྲི་དང་ཕེ་ཏ་ཀ་ལ་སོགས་པའི་མཚོན་ཆ་སྣ་ཚོགས་ཕྱག་གིས་འཛིན་པའོ། །ནམ་མཁའ་ལྡིང་གི་དབང་པོ་གཤོག་པ་བརྐྱང་བ་པུས་མོའི་བར་དུ་དཀར་པོ་དེའི་སྟེང་དུ་ལྟེ་བའི་བར་དུ་སེར་པོ་དེའི་སྟེང་དུ་

མགྲིན་པའི་བར་དུ་དམར་པོ། །དེའི་སྟེང་དུ་མགོའི་བར་དུ་ནག་པོ་ཕྱག་གཉིས་ཐལ་མོ་སྦྱར་བའོ། །མིའམ་ཅིའི་རྒྱལ་པོ་ལྗོན་པ་དམར་སེར་ཕྱག་གཉིས་ཀྱིས་པི་ཝང་གི་སྒྲ་སྒྲོགས་པའོ། །དྲི་ཟའི་རྒྱལ་པོ་ཟུར་ཕུད་ལྔ་པ་སེར་པོ་ཕྱག་གཉིས་ཀྱིས་པི་ཝང་གི་སྒྲ་སྒྲོགས་
པའོ། །རིག་པ་འཛིན་པའི་རྒྱལ་པོ་དོན་ཀུན་གྲུབ་པ་དཀར་པོ་མེ་ཏོག་གི་ཕྲེང་བ་འཛིན་པའོ། །གང་བ་བཟང་པོ་སྔོན་པོ། ནོར་བུ་བཟང་པོ་སེར་པོ། ནོར་སྦྱིན་དམར་པོ། རྣམ་ཐོས་ཀྱི་བུ་སེར་པོ། པི་ཙི་ཀུཎྜ་ལི་དམར་པོ། ཀི་ལི་མ་ལཱི་ལྗང་གུ། སྒོའི་དབང་པོ་སེར་པོ། སྤྱོད་
པའི་དབང་པོ་སེར་པོ་སྟེ། གང་བ་བཟང་པོ་ལ་སོགས་པའི་གནོད་སྦྱིན་གྱི་བདག་པོ་འདི་དག་ནི་ཕྱག་གཉིས་ཀྱི་གཡས་ཀྱིས་ཤིང་ཐོག་པི་ཛ་པཱུ་ར་དང་གཡོན་ནེའུ་ལེ་འཛིན་པའོ། །འཕྲོག་མ་སེར་མོ་ཕྱག་གཉིས་ཀྱིས་ཟན་གྱི་ཆང་བུ་གཉིས་འཛིན་པ་བུ་དང་བཅས་པའོ། །ཐ་སྐར་དཀར་པོ་དང་།
བྲ་ཉེ་ལྗང་གུ་དང་། སྨིན་དྲུག་སྔོ་བསངས་དང་། སྣར་མ་དམར་སྐྱ་དང་། མགོ་ནག་པོ་དང་། ལག་སེར་པོ་དང་། ནབ་སོ་སེར་པོ་དང་། རྒྱལ་སྔོ་བསངས་དང་། སྐག་དཀར་པོ་དང་། མཆུ་སེར་པོ་དང་། གྲེ་མེ་ཏོག་པྲི་ཡང་ཀུ་ལྟ་བུ་ལྗང་སེར་དང་། སྤོ་ལྗང་གུ་དང་། མེ་བཞི་དཀར་
པོ་དང་། ནག་པ་ལྗང་གུ་དང་། ས་རི་སེར་པོ་དང་། ས་ག་ནག་པོ་དང་། ལྷ་མཚམས་ལྗང་གུ་དང་། སྣོན་སེར་པོ་དང་། སྣྲུབས་སེར་པོ་དང་། ཆུ་སྟོད་ནག་པོ་དང་། ཆུ་སྨད་དཀར་པོ་དང་། གྲོ་བཞིན་དཀར་སེར་དང་། མོན་གྲེ་ནག་པོ་དང་། མོན་གྲུ་སེར་པོ་དང་། ཁྲུམས་སྟོད་ལྗང་གུ་དང་།
ཁྲུམས་སྨད་སེར་པོ་དང་། ནམ་གྲུ་དཀར་སེར་དང་། བྱི་བཞིན་སྔོ་བསངས་སོ། །ཐ་སྐར་ལ་སོགས་པའི་ལྷ་མོ་འདི་རྣམས་ནི་སྟོད་གཡོགས་གཡོ་བ་དང་བཅས་པ་རྣམས་ཐལ་མོ་སྦྱར་བའོ། །གཞན་ཡང་ལྷ་རྣམས་ནི་ཤིང་རྟ་ལ་གནས་པར་ཤེས་པར་བྱའོ། །དབང་པོ་ལ་སོགས་པའི་ལྷ་
རྣམས་པདྨ་ལ་གནས་པ་རེ་རེ་ལའང་འཁོར་དཔག་ཏུ་མེད་པས་བསྐོར་པའོ། །སྦྱོར་བ་ཇི་ལྟ་བ་བཞིན་དུ་རིན་པོ་ཆེ་དང་གོས་སྣ་ཚོགས་པས་བརྒྱན་པ། དཀྱིལ་འཁོར་གྱི་བདག་པོ་བཅོམ་ལྡན་འདས་ལ་ཕྱག་འཚལ་ཞིང་བཀྲ་ཤིས་ཀྱི་ཚིགས་སུ་བཅད་པའི་སྒྲ་ཕྱོགས་ཐམས་ཅད་དུ་སྒྲོགས་

པའོ། །ཤར་ལ་སོགས་པའི་སྒོ་རྣམས་སུ་རྡོ་རྗེ་ལྕགས་ཀྱུ་མ་ལ་སོགས་པའི་སྒོ་སྐྱོང་རྣམས་ནི་ནང་གི་དཀྱིལ་འཁོར་བཞིན་ནོ། །འདིར་བཅོམ་ལྡན་འདས་རྣམ་པར་སྣང་མཛད་ཆེན་པོའི་བདག་ཉིད་འཇམ་པའི་དབྱངས་ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ཀྱི་ཡེ་ཤེས་ཀྱི་རང་
བཞིན་ལ་བདག་ཉིད་ལྟ་བུའི་རྡོ་རྗེ་སེམས་དཔས་རྒྱས་བཏབ་པའོ། །མེ་ལོང་ལྟ་བུ་ལ་སོགས་པའི་ཡེ་ཤེས་ཀྱི་ངོ་བོ་མི་བསྐྱོད་པ་ལ་སོགས་པ་དེ་བཞིན་གཤེགས་པ་བཞི་དང་གཙུག་ཏོར་བརྒྱད་དང་། སྤྱན་མ་ལ་འཇམ་པའི་དབྱངས་ཀྱིས་རྒྱས་བཏབ་པའོ། །རྡོ་རྗེ་སེམས་དཔའ་ལ་སོགས་
པ་བཞི་དང་མཱ་མ་ཀཱི་དང་། རྡོ་རྗེ་ལྕགས་ཀྱུ་དང་ས་བཅུ་གཉིས་དང་ཆོས་སོ་སོ་ཡང་དག་པར་རིག་པ་མ་དང་། སྒེག་མོ་དང་ཀུན་དུ་བཟང་པོ་ལ་སོགས་པ་བཞི་དང་། ཁྲོ་བོ་བཅུ་དང་མེ་ཏོག་མ་དང་། རྡོ་རྗེ་གཟུགས་མ་དང་ཤར་ཕྱོགས་ན་གནས་པའི་ལྷ་རྣམས་ལ་མི་བསྐྱོད་པས་སོ། །རྡོ་རྗེ་
རིན་ཆེན་ལ་སོགས་པ་བཞི་དང་རྡོ་རྗེ་ཞགས་པ་དང་། ཕ་རོལ་ཏུ་ཕྱིན་མ་བཅུ་གཉིས་དང་དོན་སོ་སོ་ཡང་དག་པར་རིག་པ་མ་དང་ཕྲེང་བ་མ་དང་ནམ་མཁའ་མཛོད་ལ་སོགས་པ་བཞི་དང་། བདུག་སྤོས་མ་དང་རྡོ་རྗེ་སྒྲ་མ་དང་ལྷོའི་ཕྱོགས་ན་གནས་པའི་ལྷ་རྣམས་ལ་རིན་ཆེན་འབྱུང་ལྡན་
གྱིས་སོ། །རྡོ་རྗེ་ཆོས་ལ་སོགས་པ་བཞི་དང་གོས་དཀར་མོ་དང་། རྡོ་རྗེ་ལྕགས་སྒྲོག་དང་ཚེ་ལ་དབང་བ་མ་ལ་སོགས་པ་བཅུ་གཉིས་དང་། ངེས་པའི་ཚིག་སོ་སོ་ཡང་དག་པར་རིག་པ་མ་དང་གླུ་མ་དང་སྤྱན་རས་གཟིགས་ལ་སོགས་པ་བཞི་དང་། མར་མེ་མ་དང་རྡོ་རྗེ་རོ་མ་དང་།
ནུབ་ཕྱོགས་ན་གནས་པའི་ལྷ་རྣམས་ལ་འོད་དཔག་མེད་ཀྱིས་སོ། །རྡོ་རྗེ་ལས་ལ་སོགས་པ་བཞི་དང་། རྡོ་རྗེ་འབེབས་པ་དང་། གཟུངས་བཅུ་གཉིས་དང་སྤོབས་པ་སོ་སོ་ཡང་དག་པར་རིག་པ་མ་དང་། གར་མ་དང་འོད་དཔག་མེད་ལ་སོགས་པ་བཞི་དང་དྲི་ཆབ་མ་དང་རྡོ་རྗེ་རེག་བྱ་མ་
དང་། བྱང་ཕྱོགས་ན་གནས་པའི་ལྷ་རྣམས་ལ་དོན་ཡོད་གྲུབ་པས་རྒྱས་བཏབ་པའོ། །འཇམ་པའི་དབྱངས་ཀྱི་ཐུགས་ཀའི་ས་བོན་ནི་མུཿའོ། །ཨ་ཨཱ་སརྦ་ཏ་ཐཱ་ག་ཏ་ཧྲྀ་ད་ཡ་ཧ་ར་ཧ་ར་ཨོཾ་ཧཱུཾ་ཧྲཱིཿབྷ་ག་ཝཱན་ཛྙཱ་ན་མཱུརྟི་ཝཱ་གཱི་ཤྭ་ར་མ་ཧཱ་ཝཱ་ཙ་སརྦ་དྷརྨཱ་ག་ག་ན་ཨ་མ་ལ་སུ་པ་རི་ཤུདྡྷ་དྷརྨ་

དྷཱ་ཏུ་ཛྙཱ་ན་གརྦྷ་ཨཱཿཞེས་བྱ་བ་ནི་སྙིང་པོའི་སྔགས་སོ། །ཨོཾ་ཨ་མྲི་ཏ་ཀུཎྜ་ལི་བགྷྣཱ་ནྟ་ཀ་ཧཱུཾ་ཞེས་བྱ་བ་ནི་བདུད་རྩི་འཁྱིལ་པ་སྟེ་ལས་ཐམས་ཅད་པའི་སྔགས་སོ།། །།ངན་སོང་ཡོངས་སུ་སྦྱོང་བའི་དཀྱིལ་འཁོར་ལ་རྡོ་རྗེ་གུར་གྱི་ནང་དུ་རླུང་དང་མེ་དང་ཆུ་དང་ས་དང་རི་རབ་ཀྱི་
སྟེང་དུ་གཞལ་ཡས་ཁང་གི་དབུས་སུ་ནང་གི་དཀྱིལ་འཁོར་ལ་འཁོར་ལོ་རྩིབས་བརྒྱད་པ་སེར་པོ། རྡོ་རྗེ་ཕྲེང་བ་སྔོན་པོས་བསྐོར་བ་སྟེ། འགའ་ཞིག་ཏུ་འཁོར་ལོ་རྩིབས་བརྒྱད་པ་སྔོན་པོར་གསུངས་སོ། །གཞན་ནི་འདིའི་འཁོར་ལོའི་ལྟེ་བ་སྔོན་པོ་ཤར་གྱི་རྩིབས་དཀར་པོ་ལྷོ་ནག་པོ་
ནུབ་དམར་པོ་བྱང་ལྗང་གུའོ་ཞེས་གསུངས་སོ། །འཁོར་ལོའི་ལྟེ་བ་ལ་སྣ་ཚོགས་པདྨ་ལ་གནས་པའི་སེང་གེའི་སྟེང་དུ་བཅོམ་ལྡན་འདས་ཤཱཀྱ་སེང་གེ་རྣམ་པར་སྣང་མཛད་ཆེན་པོ་ཤིན་ཏུ་གསེར་གྱི་མདོག་ཅན་ཆོས་ཀྱི་འཁོར་ལོའི་ཕྱག་རྒྱ་མཛད་པའོ། །ཤར་གྱི་རྩིབས་ལ་རྡོ་རྗེ་གཙུག་
ཏོར་དཀར་པོ་ས་གནོན་གྱི་ཕྱག་རྒྱ་ཅན་ནོ། །ལྷོའི་རྩིབས་ལ་རིན་ཆེན་གཙུག་ཏོར་སྔོན་པོ་མཆོག་སྦྱིན་གྱི་ཕྱག་རྒྱ་མཛད་པའོ། །ནུབ་ཀྱི་རྩིབས་ལ་པདྨ་གཙུག་ཏོར་དམར་པོ་བསམ་གཏན་གྱི་ཕྱག་རྒྱ་ཅན་ནོ། །བྱང་གི་རྩིབས་ལ་སྣ་ཚོགས་གཙུག་ཏོར་ལྗང་གུ་མི་འཇིགས་པ་རབ་ཏུ་སྦྱིན་པའི་
ཕྱག་རྒྱའོ། །མེའི་རྩིབས་ལ་གཙུག་ཏོར་གཟི་བརྗིད་སྐུ་མདོག་དཀར་དམར་ཕྱག་གཉིས་ཀྱིས་ཉི་མ་འཛིན་པ་ཕྱག་གཡོན་པ་དཀུར་བརྟེན་པའོ། །བདེན་བྲལ་གྱི་རྩིབས་ལ་གཙུག་ཏོར་རྒྱལ་མཚན་སྐུ་མདོག་དམར་ནག་འདྲེས་པས་ཕྱག་གཉིས་ཀྱིས་ཡིད་བཞིན་གྱི་ནོར་བུའི་རྒྱལ་མཚན་
འཛིན་པའོ། །རླུང་གི་རྩིབས་ལ་གཙུག་ཏོར་རྣོན་པོ་ནམ་མཁའ་ལྟར་སྔོ་བསངས་ཕྱག་གཡས་པས་རལ་གྲི་འཛིན་པ་གཡོན་པས་པོ་ཏི་འཛིན་པའོ། །དབང་ལྡན་གྱི་རྩིབས་ལ་གཙུག་ཏོར་གདུགས་དཀར་སྐུ་མདོག་དཀར་པོ་ཕྱག་གཉིས་ཀྱིས་གདུགས་འཛིན་པའོ། །རྡོ་རྗེ་ཕྲེང་བའི་ཕྱི་རོལ་
མེ་ལ་སོགས་པའི་མཚམས་སུ་སྒེག་མོ་དང་ཕྲེང་བ་མ་དང་གླུ་མ་དང་གར་མ་རྣམས་སྐུ་མདོག་དཀར་མོ་དང་སེར་མོ་དང་དམར་མོ་དང་སྣ་ཚོགས་ཅན་མ་ཕྱག་གཉིས་པའོ། །སྣམ་བུ་ལ་སྒོའི་གཡོན་ལོགས་སུ་བྱང་ཆུབ་སེམས་དཔའ་གཉིས་དང་གཡས་ལོགས་སུ་གཉིས་སོ། །དེ་ལ་ཤར་

གྱི་སྣམ་བུ་ལ་བྱམས་པ་སེར་པོ། གཡས་པའི་ཕྱག་གིས་ཀླུ་ཤིང་གི་མེ་ཏོག་དང་། གཡོན་པས་སྤྱི་བླུགས་འཛིན་པའོ། །མཐོང་བ་དོན་ཡོད་སེར་པོ་ཕྱག་གཡས་པས་སྤྱན་དང་བཅས་པའི་པདྨ་འཛིན་པ། གཡོན་པས་ཁུ་ཚུར་དཀུར་བརྟེན་པའོ། །ངན་སོང་ཀུན་འདྲེན་དཀར་པོ་
ཕྱག་གཉིས་ཀྱིས་ལྕགས་ཀྱུ་འཛིན་པའོ། །མྱ་ངན་དང་མུན་པ་ཐམས་ཅད་འཇོམས་པའི་བློ་གྲོས་དཀར་སེར་འདྲེས་པའི་མདོག་ཅན་ཕྱག་གཡས་དབྱུག་པ་འཛིན་པ་གཡོན་པས་ཁུ་ཚུར་དཀུར་བརྟེན་པའོ། །ལྷོ་ཕྱོགས་ཀྱི་སྣམ་བུ་ལ་སྤོས་ཀྱི་གླང་པོ་དཀར་ལྗང་གཡས་ཀྱིས་དྲིའི་དུང་
ཕོར་འཛིན་པ། གཡོན་པ་ཁུ་ཚུར་དཀུར་བརྟེན་པའོ། །དཔའ་བར་འགྲོ་བ་དཀར་པོ་གཡས་པས་རལ་གྲི་གཡོན་པས་ཁུ་ཚུར་དཀུར་བརྟེན་པའོ། །ནམ་མཁའ་མཛོད་དཀར་སེར་གཡས་པས་པདྨ་ལ་གནས་པའི་ཆོས་ཀྱི་མཛོད་འཛིན་པ་གཡོན་པས་ཁུ་ཚུར་དཀུར་བརྟེན་པའོ། །ཡེ་ཤེས་
ཏོག་སྔོན་པོ་ཕྱག་གཡས་ཀྱིས་ཡིད་བཞིན་གྱི་ནོར་བུའི་རྒྱལ་མཚན་འཛིན་པ་གཡོན་པས་ཁུ་ཚུར་དཀུར་བརྟེན་པའོ། །ནུབ་ཀྱི་སྣམ་བུ་ལ་བདུད་རྩིའི་འོད་དཀར་པོ་གཡས་པས་ཅོད་པན་གྱི་སྟེང་དུ་བདུད་རྩིས་གང་བའི་བུམ་པ་འཛིན་པ་གཡོན་པས་ཁུ་ཚུར་དཀུར་བརྟེན་པའོ། །ཟླ་བའི་འོད་
དཀར་པོ་གཡས་པས་པདྨ་ལ་གནས་པའི་ཟླ་བ་འཛིན་པ་གཡོན་པས་ཁུ་ཚུར་དཀུར་བརྟེན་པའོ། །བཟང་སྐྱོང་དཀར་པོ་གཡས་པས་རིན་པོ་ཆེ་འབར་བ་དང་བཅས་པ་འཛིན་པ་གཡོན་པས་ཁུ་ཚུར་དཀུར་བརྟེན་པའོ། །དྲ་བ་ཅན་གྱི་འོད་དམར་པོ་གཡས་པས་རྡོ་རྗེའི་གུར་འཛིན་པ། གཡོན་
པས་ཁུ་ཚུར་དཀུར་བརྟེན་པའོ། །བྱང་གི་སྣམ་བུ་ལ་རྡོ་རྗེ་སྙིང་པོ་སྔོ་སྐྱ་གཡས་རྡོ་རྗེ་དང་བཅས་པའི་ཨུཏྤ་ལ་སྔོན་པོ་འཛིན་པ་གཡོན་པས་ཁུ་ཚུར་དཀུར་བརྟེན་པའོ། །བློ་གྲོས་མི་ཟད་པ་དཀར་པོ་ཕྱག་གཉིས་ཀྱིས་བདུད་རྩིས་གང་བའི་བུམ་པ་འཛིན་པའོ། །སྤོབས་པ་བརྩེགས་
པ་དམར་པོ་གཡས་པས་ཆུ་སྐྱེས་ལ་གནས་པའི་རཏྣ་བརྩེགས་པ་བསྣམས་པ་གཡོན་པས་ཁུ་ཚུར་དཀུར་བརྟེན་པའོ། །ཀུན་ཏུ་བཟང་པོ་གསེར་གྱི་མདོག་ཅན་ཕྱག་གཡས་པས་རིན་པོ་ཆེའི་སྙེ་མ་འཛིན་པ་གཡོན་པས་ཁུ་ཚུར་དཀུར་བརྟེན་པའོ། །དཀྱིལ་འཁོར་གྱི་མེ་ལ་སོགས་

པ་རྣམས་ལ་མེ་ཏོག་མ་དང་བདུག་སྤོས་མ་དང་མར་མེ་མ་དང་། དྲི་ཆབ་མ་རྣམས་ནི་དཀར་མོ་དང་ནག་མོ་དང་དམར་མོ་དང་། ལྗང་གུ་ཕྱག་གཉིས་ཀྱིས་མེ་ཏོག་ལ་སོགས་པ་འཛིན་པའོ། །ཤར་སྒོར་རྡོ་རྗེ་ལྕགས་ཀྱུ་དཀར་པོ་ཕྱག་གཉིས་ཀྱིས་ལྕགས་ཀྱུ་འཛིན་
པའོ། །ལྷོ་རུ་རྡོ་རྗེ་ཞགས་པ་སྔོན་པོ་ཕྱག་གཉིས་ཀྱིས་ཞགས་པ་འཛིན་པའོ། །ནུབ་ཏུ་རྡོ་རྗེ་ལྕགས་སྒྲོག་དམར་མོ་ཕྱག་གཉིས་ཀྱིས་རྡོ་རྗེ་ལྕགས་སྒྲོག་འཛིན་པའོ། །བྱང་དུ་རྡོ་རྗེ་འབེབས་པ་ལྗང་གུ་ཕྱག་གཉིས་ཀྱིས་རྡོ་རྗེ་དྲིལ་བུ་འཛིན་པའོ། །ལྷ་སུམ་ཅུ་སོ་བདུན་པོ་འདི་དག་
ཀྱང་གོས་སྣ་ཚོགས་དང་རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ་རཏྣའི་ཅོད་པན་ཅན་ཞལ་གཅིག་སྤྱན་གཉིས་པ་ཕྱག་གཉིས་པ་སྣ་ཚོགས་པདྨ་དང་ཟླ་བ་རྣམས་ལ་སེམས་དཔའི་སྐྱིལ་མོ་ཀྲུང་གིས་བཞུགས་པའོ། །འདིར་རྣམ་པར་སྣང་མཛད་ཆེན་པོ་ནི་རང་ཉིད་དང་མཚུངས་པའི་རྣམ་སྣང་
གིས་རྒྱས་བཏབ་པོ། །རྡོ་རྗེ་གཙུག་ཏོར་ལ་སོགས་པ་བཞི་ལ་རྣམ་པར་སྣང་མཛད་ཆེན་པོས་སོ། །ཤར་གྱི་ཕྱོགས་དང་མེའི་མཚམས་ན་གནས་པའི་ལྷ་རྣམས་ལ་རྡོ་རྗེ་གཙུག་ཏོར་གྱིས་སོ། །ལྷོ་ཕྱོགས་དང་བདེན་བྲལ་གྱི་མཚམས་ན་གནས་པ་རྣམས་ལ་རིན་ཆེན་གཙུག་ཏོར་
གྱིས་སོ། །ནུབ་ཕྱོགས་དང་རླུང་གི་མཚམས་ན་གནས་པ་རྣམས་ལ་པདྨ་གཙུག་ཏོར་གྱིས་སོ། །བྱང་ཕྱོགས་དང་དབང་ལྡན་གྱི་མཚམས་ན་གནས་པ་རྣམས་ལ་སྣ་ཚོགས་གཙུག་ཏོར་གྱིས་སོ། །འདིར་ཕྱི་རོལ་གྱི་དཀྱིལ་འཁོར་གྱི་ལྷའི་གནས་ཀྱི་སྣམ་བུ་ལ་ཟླ་བའི་དཀྱིལ་འཁོར་ཉི་
ཤུ་རྩ་བརྒྱད་པོ་ལྟའོ་ཞེས་རྒྱུད་ལས་གསུངས་པའི་ཕྱིར་འདོད་ཡོན་གྱི་སྣམ་བུ་རྣམས་ལ་བྱང་ཆུབ་སེམས་དཔའ་བཅུ་དྲུག་དགོད་པར་མི་རིགས་སོ། །འགའ་ཞིག་ནི་ནང་གི་དཀྱིལ་འཁོར་ཞེས་རྒྱུད་དུ་གསུངས་པས་ཕྱི་རོལ་གྱི་གཞལ་ཡས་ཁང་གི་ནང་དུ་གཞལ་ཡས་ཁང་གཉིས་པའོ་ཞེས་
སྨྲའོ། །འགའ་ཞིག་ཏུ་ནི་རྣམ་པར་སྣང་མཛད་ཆེན་པོ་ལ་སོགས་པ་དེ་བཞིན་གཤེགས་པ་དགུ་གཙུག་ཏོར་དང་བཅས་པ་དགེ་སློང་གི་ཆ་ལུགས་འཛིན་པར་གསུངས་སོ། །པདྨའི་ཕྲེང་བས་ཡོངས་སུ་བསྐོར་བ་དང་། ཁོར་ཡུག་གི་ནང་དུ་དབང་ལྡན་གྱི་མཚམས་ནས་བརྩམས་ནས་

གཡས་སྐོར་གྱིས་མགྲིན་པ་སྔོན་པོ་ལ་སོགས་པ་བསྐྱེད་པར་བྱ་སྟེ། །དེ་ལ་དབང་ལྡན་དུ་གླང་ལ་མགྲིན་པ་སྔོན་པོ་དཀར་པོ་མཆོད་ཕྱིར་ཐོགས་པ་ཅན་ཕྱག་གཡས་གཉིས་ན་རྡོ་རྗེ་དང་མཆོད་སྦྱིན་གྱི་ཕྱག་རྒྱ་གཡོན་གཉིས་ན་རྩེ་གསུམ་དང་རལ་གྲི་འཛིན་པའོ། །མགྲིན་སྔོན་མ་མགྲིན་
པ་སྔོན་པོ་ལྟ་བུའོ། །ནམ་མཁའ་ལྡིང་ལ་ཁྱབ་འཇུག་ནག་པོ་གཡས་གཉིས་ན་དབྱུག་ཐོ་དང་རྡོ་རྗེ་གཡོན་གཉིས་ན་དུང་དང་འཁོར་ལོའོ། །གསེར་གྱི་རྡོ་རྗེ་མ་ཁྱབ་འཇུག་ལྟ་བུ་ཁྱད་པར་གསེར་གྱི་མདོག་ཅན་ནོ། །རྨ་བྱ་ལ་རྡོ་རྗེ་དྲིལ་བུ་ཞལ་དྲུག་པ་དམར་བ་གཡས་པ་གཉིས་ན་
ཤཀ་ཏི་དང་རྡོ་རྗེ་གཡོན་པ་གཉིས་ན་ཁྱིམ་བྱ་དང་རྡོ་རྗེ་དྲིལ་བུའོ། །རྡོ་རྗེ་གཞོན་ནུ་མ་རྡོ་རྗེ་དྲིལ་བུ་ལྟ་བུའོ། །ངང་པ་ལ་མི་སྨྲ་རྡོ་རྗེ་སེར་པོ་ཞལ་བཞི་པ་གཡས་པ་གཉིས་ན་རྡོ་རྗེ་དང་སྔགས་བཟླ་བའི་ཕྲེང་བ་གཡོན་པ་གཉིས་ན་དབྱུག་པ་དང་སྤྱི་བླུགས་སོ། །རྡོ་རྗེ་ཞི་བ་མ་ཚངས་པ་ལྟ་བུའོ། །
གླང་པོ་ཆེ་མཆེ་བ་དྲུག་པའི་དབང་པོ་དཀར་པོ་དང་ཟླ་བ་ལ་རྡོ་རྗེ་མཚོན་ཆ་དཀར་པོ་རོལ་པའི་ཀུན་དུ་བསྐྱོད་པས་གནས་པ་ཕྱག་གཡས་ན་རྡོ་རྗེ་རྩེ་ལྔ་པ་གཡོན་པས་རྡོ་རྗེ་རྩེ་གསུམ་དཀུར་བརྟེན་པའོ། །ལྷ་མོ་རྡོ་རྗེ་ཁུ་ཚུར་མ་ནི་རྡོ་རྗེ་མཚོན་ཆ་ཇི་ལྟ་བུའོ། །རྟ་བདུན་གྱི་ཤིང་རྟ་ལ་རྡོ་རྗེ་འཁྱིལ་
པ་དམར་པོ་ཁྲོས་པ་གཡས་པ་ན་པདྨ་གཡོན་པདྨ་ལ་གནས་པའི་ཉི་མའི་དཀྱིལ་འཁོར་འཛིན་པའོ། །རྡོ་རྗེ་བདུད་རྩི་མ་རྡོ་རྗེ་འཁྱིལ་པ་བཞིན་ནོ། །ངང་པ་ལ་རྡོ་རྗེ་འོད་དཀར་པོ་ཁྲོ་བོ་ཕྱག་གཡས་པ་རྡོ་རྗེ་གཡོན་པ་པདྨ་ལ་གནས་པའི་ཟླ་བ་འཛིན་པའོ། །རྡོ་རྗེ་མདོག་མ་རྡོ་རྗེ་འོད་ལྟ་བུའོ། །ར་ལ་རྡོ་རྗེ་
དམར་སེར་ཁྲོ་བོ་གཡས་ཀྱིས་རྡོ་རྗེ་དམར་པོ་འཛིན་ཅིང་གཡོན་པས་མི་བཟུང་ནས་ཟ་བའི་ཚུལ་ལོ། །རྡོ་རྗེ་སྐེ་རགས་མ་རྡོ་རྗེ་དམར་སེར་བཞིན་ནོ། །པདྨ་ལ་རྡོ་རྗེ་ཞི་བ་ཁྲོ་བོ་སེར་པོ་མདའ་དང་གཞུ་འཛིན་པའོ། །རྡོ་རྗེ་ཞི་བ་མ་རྡོ་རྗེ་ཞི་བ་བཞིན་ནོ། །སྦལ་པ་ལ་རྡོ་རྗེ་བླ་མ་ཁྲོ་བོ་སེར་པོ་གཡས་
བགྲང་ཕྲེང་དང་གཡོན་སྤྱི་བླུགས་འཛིན་པའོ། །རྡོ་རྗེ་བླ་མ་མ་རྡོ་རྗེ་བླ་མ་བཞིན་ནོ། །པདྨ་ལ་རྡོ་རྗེ་པ་ཝ་སངས་ཁྲོ་བོ་དཀར་པོ་གཡས་ན་བགྲང་ཕྲེང་དང་གཡོན་ན་སྤྱི་བླུགས་འཛིན་པའོ། །རྡོ་རྗེ་པ་ཝ་སངས་མ་རྡོ་རྗེ་པ་ཝ་སངས་བཞིན་ནོ། །རུས་སྦལ་ལ་རྡོ་རྗེ་དབྱུག་པ་ཁྲོ་བོ་ནག་པོ་གཡས་པ་

ན་རྡོ་རྗེ་གཡོན་པ་ན་དབྱུག་པའོ། །རྡོ་རྗེ་དབྱུག་པ་མ་ནི་རྡོ་རྗེ་དབྱུག་པ་དང་འདྲ་བའོ། །རྡོ་རྗེ་སྒྲ་གཅན་ཁྲོ་བོ་མ་དམར་ནག་གཡས་པས་ཟླ་བའི་དཀྱིལ་འཁོར་དང་གཡོན་པ་ཉི་མ་འཛིན་པའོ། །རྡོ་རྗེ་ལྷ་མིན་མ་ནི་རྡོ་རྗེ་སྒྲ་གཅན་དང་འདྲ་བའོ། །རྡོ་རྗེ་མཇུག་རིངས་ཁྲོ་བོ་མདོག་
ནག་པོ་གཡས་པས་རལ་གྲི་གཡོན་པས་སྦྲུལ་ཞགས་འཛིན་པའོ། །རྡོ་རྗེ་གླུ་མ་རྡོ་རྗེ་མཇུག་རིངས་བཞིན་ནོ། །བཞི་པོ་འདི་དག་དང་རྡོ་རྗེ་ཞི་བ་ལ་སོགས་པ་རྒྱུད་གཞན་ལས་གསུངས་པ་ལྟར་བདག་གིས་བྲིས་སོ། །གླང་པོ་ཆེ་ལ་རྡོ་རྗེ་གླང་སྣ་དཀར་པོ་གཡས་རྡོ་རྗེ་གཡོན་པས་གཤོལ་
འཛིན་པའོ། །རྡོ་རྗེ་འདུལ་བ་མ་རྡོ་རྗེ་གླང་སྣ་བཞིན་ནོ། །དེའི་ཁྱད་པར་ནི་གཡོན་པས་ཁ་ཊྭཱཾ་ག་འཛིན་པའོ། །བྱ་ཀོ་ཀི་ལའི་ཤིང་རྟ་ལ་རྡོ་རྗེ་ཕྲེང་བ་ཅན་ལྗང་གུ་གཡས་པ་ན་རྡོ་རྗེ་གཡོན་པ་ན་མེ་ཏོག་གི་ཕྲེང་བ་འཛིན་པའོ། །རྡོ་རྗེ་བརྟན་མ་རྡོ་རྗེ་ཕྲེང་བ་ཇི་ལྟ་བ་ལས་ཁྱད་པར་ནི་ཕྱག་གཡོན་པ་ན་
མདུང་ངོ་། །ནེ་ཙོའི་ཤིང་རྟ་ལ་རྡོ་རྗེ་དབང་ཅན་སེར་པོ་གཡས་ན་རྡོ་རྗེ་གཡོན་པ་ན་ཆུ་སྲིན་གྱི་རྒྱལ་མཚན་འཛིན་པའོ། །རྡོ་རྗེ་དབང་ཅན་མ་རྡོ་རྗེ་དབང་ཅན་དང་འདྲ་བའོ། །ཁྱད་པར་ནི་སྐུ་མདོག་དམར་བའོ། །སྦལ་པ་ལ་རྡོ་རྗེ་རྣམ་པར་རྒྱལ་བ་དཀར་པོ་རྡོ་རྗེ་དང་རལ་གྲི་འཛིན་པའོ། །རྡོ་རྗེ་
གདན་མ་རྡོ་རྗེ་རྣམ་པར་རྒྱལ་བ་དང་འདྲ་བའོ། །མེ་ཏོག་ལ་རྡོ་རྗེ་གཏུན་ཤིང་སེར་པོ་གཡས་གཡོན་གྱིས་རྡོ་རྗེ་གཏུན་ཤིང་འཛིན་པའོ། །རྡོ་རྗེ་ཕོ་ཉ་མོ་རྡོ་རྗེ་གཏུན་ཤིང་ལྟ་བུའོ། །ཁྱད་པར་ནི་གཡོན་པས་ཁ་ཊྭཱཾ་ག་འཛིན་པའོ། །ར་ལ་རྡོ་རྗེ་མེ་དམར་པོ་གཡས་གཉིས་ཀྱིས་རྡོ་རྗེ་དང་
གོ་ཆ་གཡོན་གཉིས་དབྱུག་ཏོ་དང་། སྤྱི་བླུགས་འཛིན་པའོ། །རྡོ་རྗེ་འབར་མ་རྡོ་རྗེ་མེ་ལྟ་བུའོ། །མ་ཧེ་ལ་རྡོ་རྗེ་ནག་པོ་སྐུ་མདོག་ནག་པོ་རྡོ་རྗེ་དང་ལྕགས་ཀྱུ་འཛིན་པའོ། །རོ་ལངས་ལ་རྡོ་རྗེ་ནག་མོ་སྐུ་མདོག་ནག་མོ་རྡོ་རྗེ་དང་ཁ་ཊྭཱཾ་ག་འཛིན་པའོ། །ལྷག་པར་ཀླུ་ལ་རྡོ་རྗེ་ལྕགས་ཀྱུ་སྔོན་པོ་ཕག་
པའི་ཞལ་རྡོ་རྗེ་དང་ལྕགས་ཀྱུ་འཛིན་པའོ། །མི་ལ་རྡོ་རྗེ་གདོང་མ་སྔོན་མོ་ཕག་གདོང་རྡོ་རྗེ་དང་རལ་གྲི་འཛིན་པའོ། །ཆུ་སྲིན་ལ་རྡོ་རྗེ་ཀླུ་དཀར་པོ་སྦྲུལ་མགོ་བརྒྱད་དང་ལྡན་པ་གཡས་པས་རྡོ་རྗེ་གཡོན་པས་ཀླུའི་ཞགས་པའོ། །ཆུ་སྲིན་ལ་ཆུ་སྲིན་མ་དཀར་མོ་སྦྲུལ་མགོ་བརྒྱད་དང་ལྡན་

པ་གཡས་པས་རྡོ་རྗེ་དང་གཡོན་པས་རྡོ་རྗེས་མཚན་པའི་ཆུ་སྲིན་འཛིན་པའོ། །རི་དགས་ལ་རྡོ་རྗེ་རླུང་སྔོན་པོ་གཡས་པས་རྡོ་རྗེ་གཡོན་པས་རླུང་སྒྲིབ་པའི་གོས་འཛིན་པའོ། །རྡོ་རྗེ་ཤུགས་ཅན་མ་རྡོ་རྗེ་རླུང་ལྟ་བུའོ། །རོ་ལངས་ལ་རྡོ་རྗེ་འཇིགས་བྱེད་སྔོན་པོ་རྡོ་རྗེ་དང་དབྱུག་ཏོ་འཛིན་པའོ། །
རྡོ་རྗེ་རྣམ་པར་གཙིགས་མ་རྡོ་རྗེ་འཇིགས་བྱེད་ལྟ་བུའོ། །ཁྱད་པར་ནི་གཡོན་པས་ཞགས་པ་འཛིན་པའོ། །བྱི་བ་ལ་རྡོ་རྗེ་ལོག་འདྲེན་དཀར་པོ་གླང་པོ་ཆེའི་ཞལ་ཕྱག་གཡས་པ་གཉིས་ཀྱིས་རྡོ་རྗེ་དང་དགྲ་སྟ་གཡོན་པ་གཉིས་ཀྱིས་རྩེ་གསུམ་པ་དང་། དབྱུག་ཏོ་འཛིན་པ་སྦྲུལ་གྱི་མཆོད་ཕྱིར་
ཐོགས་པའོ། །བྲ་བ་བྱི་བ་ལ་སྦྲུལ་མོ་སྔོན་མོ་གཡས་པས་རྡོ་རྗེ་གཡོན་པས་ཕྱགས་ཤིང་འཛིན་པའོ། །བསྡིགས་མ་ལྗང་གུ་གཡས་པས་རྡོ་རྗེ་གཡོན་པ