Luận tạng Tây Tạng (Tengyur) — Tập 75

མ་པོ་བྲི་བར་བྱ་སྟེ། དེ་རྣམས་ལ་ཡང་ཟླ་བའི་
དཀྱིལ་འཁོར་ལྔ་བྲིས་ཞེས་ཀུན་དགའ་སྙིང་པོས་བཤད་པ་འདི་ནི་མི་རིགས་ཏེ། རྡོ་རྗེའི་རི་མོ་ཟླུམ་པོའི་རྗོད་བྱེད་རྒྱུད་ཚིག་འདི་ལ་མེད་པའི་ཕྱིར་རོ། །བཞི་བཅུ་རྩ་གསུམ་གྱི་བདག་ཉིད་ཅན་འཇམ་པའི་རྡོ་རྗེའི་དཀྱིལ་འཁོར་ལ་རྩ་བའི་ཐིག་གི་ནང་དུ་སྒོ་གཉིས་སྤངས་པར་ཟུར་ཐིག་གཉིས་ལ་རེག་པའི་
ལོགས་ཐིག་གཅིག་གོ། །དེ་ཉིད་ནི་གཉིས་པ་ནང་གི་དཀྱིལ་འཁོར་གྱི་རྩ་བའི་ཐིག་ཡིན་ཏེ། སྒོ་དང་སྒོ་ཁྱུད་ལ་སོགས་པ་མདའ་ཡབ་ཀྱི་ཐིག་གི་བར་དུ་ལྡན་ཞིང་རྟ་བབས་ལ་སོགས་པ་མེད་པའོ། །འདིའི་ནང་དུ་རང་གི་སྒོ་གཉིས་སྤངས་པར་ཟུར་ཐིག་ལ་རེག་པའི་ལོགས་ཐིག་གཅིག་གོ། །དེ་ཉིད་གསུམ་པ་ནང་གི་
དཀྱིལ་འཁོར་གྱི་རྩ་བའི་ཐིག་ཡིན་ཏེ། སྒོ་དང་སྒོ་ཁྱུད་ལ་སོགས་པ་དང་ལྡན་ཞིང་རྟ་བབས་ལ་སོགས་པ་མེད་པའོ། །རྩ་བའི་ཐིག་འདིའི་ནང་དུ་བར་མེད་པ་ཉིད་དུ་ཟླུམ་པོའི་ཐིག་དང་པོའོ། །ཞེས་པ་ལ་སོགས་པ་བཤད་པའི་རྡོ་རྗེ་དབྱིངས་ཀྱི་ནང་གི་དཀྱིལ་འཁོར་ལྟ་བུའི་དཀྱིལ་འཁོར་གསུམ་པའོ། །ཁྱད་
པར་དུ་གདབ་པའོ། །བཅོམ་ལྡན་འདས་ཆོས་ཀྱི་དབྱིངས་ངག་གི་དབང་ཕྱུག་གི་དཀྱིལ་འཁོར་ལ་དཀྱིལ་འཁོར་ཐམས་ཅད་ཐུན་མོང་དུ་ཕྱིའི་དཀྱིལ་འཁོར་གྱི་ཐིག་གདབ་པའི་ཚུལ་སྔར་བརྗོད་པ་ཤེས་པར་བྱ་སྟེ། ཕྱིའི་རྩ་བའི་ཐིག་ལ་སོགས་པའི་ཐིག་བདུན་ནི་ཟླུམ་པོ་སྟེ་འདི་ནི་ཁྱད་པར་རོ། །གང་གསུངས་པ་
ཀུན་ནས་ཟླུམ་པོ་བཟང་པོ་སྟེ། ཞེས་པ་ལ་སོགས་པའོ། །སྒོ་ཁྱུད་དང་འགྲེལ་པའི་རྩ་བའི་ཐིག་འདིའི་ནང་དུ་སྒོ་གཉིས་ཀྱི་བར་སྤངས་ནས་ཟུར་ཐིག་གཉིས་པོ་ལ་རེག་པའི་ངོས་ཐིག་གཅིག་གོ། །དེ་ཉིད་ནི་གཉིས་པ་ནང་གི་དཀྱིལ་འཁོར་གྱི་རྩ་བའི་ཐིག་ཡིན་ཏེ། སྒོ་དང་སྒོ་ཁྱུད་ལ་སོགས་པ་ནས་མདའ་ཡབ་

གྱི་བར་དང་ལྡན་ཞིང་རྟ་བབས་མེད་པའོ། །རྩ་བའི་ཐིག་འདིའི་ནང་དུ་དེ་ལྟ་བུའི་དཀྱིལ་འཁོར་གསུམ་པའི་རྩ་བའི་ཐིག་ནི་དེ་བཞིན་ནོ། །རྩ་བའི་ཐིག་འདིའི་ནང་དུ་རང་གི་སྒོ་གཉིས་ཞེས་པ་ལ་སོགས་པ་བརྗོད་པའི་རྡོ་རྗེ་དབྱིངས་ཀྱི་ནང་གི་དཀྱིལ་འཁོར་བཞིན་དུ་དཀྱིལ་འཁོར་བཞི་པའོ། །ཁྱད་པར་དུ་གདབ་པའོ། །
ངན་སོང་ཡོངས་སུ་སྦྱོང་བའི་དཀྱིལ་འཁོར་ལ་བསྡུས་པའི་རིམ་པར་གསུངས་པའི་དཀྱིལ་འཁོར་བཞིན་དུ་གདབ་པ་སྟེ། འོན་ཀྱང་རྡོ་རྗེ་ཕྲེང་བའི་ནང་དུ་ཀ་བ་བརྒྱད་ལ་སོགས་པ་མེད་པར་འཁོར་ལོ་རྩིབས་བརྒྱད་སེར་པོ་ཉིད་ཀྱིས་བརྒྱན་པ་ནི་ཁྱད་པར་ཞེས་སོ། །བཅོམ་ལྡན་འདས་འབྱུང་པོ་འདུལ་བྱེད་ཀྱི་དཀྱིལ་
འཁོར་ལ་རྩ་བའི་ཐིག་གྲུ་བཞི་པའི་ནང་དུ་ཆ་ཆུང་བཞི་དོར་བར་ཟུར་ཐིག་གཉིས་ལ་རེག་པའི་ལོགས་ཐིག་གསུམ་མོ། །དེའི་ནང་དུ་ཆ་ཆུང་བཞིའི་བར་དུ་དེ་བཞིན་དུ་ལོགས་ཐིག་གཅིག་གོ། །དེའི་ནང་དུ་ཆ་ཆུང་བཞི་དོར་བར་འཇམ་པའི་རྡོ་རྗེའི་དཀྱིལ་འཁོར་དུ་བརྗོད་པའི་ནང་གི་ཕོ་བྲང་ལྟ་བུའི་ནང་གི་ཕོ་བྲང་ངོ་། །རིམ་
པ་བཞིན་གདབ་པའོ། །མཁའ་འགྲོ་ལྔའི་དཀྱིལ་འཁོར་ལ་རྩ་བའི་ཐིག་གི་ནང་དུ་དཀྱིལ་འཁོར་ཆེན་པོའི་སྒོ་བཞི་ཆའི་ཆ་ཕྱེད་དང་གཉིས་ཀྱི་བར་དོར་ནས། གཞན་ཆ་ཆུང་དགུའི་བར་ལ་ཆ་མཉམ་པ་བཅུ་གཉིས་བྱས་ནས་ལོགས་སོ་སོར་ཆ་གཉིས་དོར་ཏེ། དབུས་ཀྱི་ཆ་གཉིས་ཀྱི་ཚད་ཀྱི་རྩ་བའི་ཐིག་བཞིའོ། །
དེ་རེ་རེའི་བརྒྱད་ཆ་ནི་སྒོའོ། །རྩ་བའི་ཐིག་ལས་ཕྱི་ངོས་སུ་ཐིག་དྲུག་ཅེས་པ་ལ་སོགས་པ་སྔར་བཞིན་དུ་བྱའོ། །དེ་ལྟར་ཕྱོགས་རྣམས་སུ་རྟ་བབས་མེད་པའི་གཞལ་ཡས་ཁང་བཞི་པའོ། །དབུས་སུ་ཡང་དེ་བཞིན་དུ་གཞལ་ཡས་ཁང་ལྔ་པའོ། །ཆ་ཆུང་དགུ་ཞེས་པ་ལ་སོགས་པ་ནི་འདིར་ཡང་རིག་པར་བྱའི།
དེ་ལྟ་མོད་ཀྱི་གཞལ་ཡས་ཁང་འདི་དང་བཞི་པོ་རྣམས་ཀྱི་བར་ན་དཀྱིལ་འཁོར་ཆེན་པོའི་ཆ་ཆུང་གཅིག་གོ། །འདིར་ཀྱེའི་རྡོ་རྗེའི་གཞལ་ཡས་ཁང་ལ་རྩ་བའི་ཐིག་གི་ནང་དུ་ཆ་ཆུང་གཅིག་ལ་གནས་ཤིང་། ཐིག་གཉིས་ཀྱི་ནང་དུ་སོན་པའི་རྡོ་རྗེའི་ཕྲེང་བ་གྲུ་བཞིས་བསྐོར་བའི་ཟླ་བ་ཕྱེད་པའི་རྣམ་པའོ། །རྟག་པའི་
འཁོར་ལོའི་ཕྲེང་བས་བསྐོར་བའི་ཟླུམ་པོའོ། །རྡོ་རྗེ་ཉི་མའི་ཆ་དགུ་པའི་རིན་པོ་ཆེའི་ཕྲེང་བས་བསྐོར་བའི་རིན་པོ་ཆེ་ཆ་དགུ་པའམ་བརྒྱད་པ་ལྟ་བུའོ། །པདྨ་གར་གྱི་དབང་ཕྱུག་གི་པདྨའི་ཕྲེང་བས་བསྐོར་བའི་གྲུ་བཞི་པ་ཟུར་བཞི་སྒོ་ལ་ཕྱོགས་པའམ་པདྨའི་རྣམ་པའོ། །རྟ་མཆོག་གི་རལ་གྲིའི་ཕྲེང་བས་བསྐོར་

བའི་གྲྭ་གསུམ་པའོ། །ཁྱད་པར་དུ་གདབ་པའོ། །གཞལ་ཡས་ཁང་ཐམས་ཅད་དུ་ཡང་རང་རང་ལ་ལྟོས་ནས་རྩ་བའི་ཐིག་དང་སྒོ་དང་ཆ་ཆུང་གི་ཚད་རྣམས་རིག་པར་བྱའོ། །འཁོར་ལོས་སྒྱུར་བ་དྲུག་གི་དཀྱིལ་འཁོར་རོ། །གཞལ་ཡས་ཁང་ཆེན་པོའི་ཆ་ཆུང་གི་ཚད་ཀྱིས་ཚངས་
ཐིག་ནས་གང་ཆ་ཆུང་བཞི་པའི་བར་གཞན་ཆ་ཆུང་བཞི་པའི་བར་དང་བཅས་པ་དེ་ཆ་ཆུང་བཅུ་གཉིས་སུ་བྱས་ལ། མདུན་དང་རྒྱབ་དང་གཡས་དང་གཡོན་གྱི་མཐའ་རྣམས་སུ་སོ་སོར་ཆ་གཉིས་ཀྱི་ནང་དུ་རྩ་བའི་ཐིག་ཆ་བརྒྱད་ཀྱི་ཚད་དུ་གདབ་པོ། །དེ་དང་བསྟུན་པའི་སྒོའི་ཆ་ཆུང་གིས་སྒོ་ཁྱུད་ལ་སོགས་པའི་
ཐིག་དང་མདའ་ཡབ་ཀྱི་ཐིག་གི་བར་དུ་གདབ་པོ། །དེ་ནས་ཕྱི་རོལ་དུ་དཀྱིལ་འཁོར་ཆེན་པོའི་ཆ་ཆུང་གི་ཚད་ཀྱིས་ཆ་ཆུང་གཉིས་ཀྱི་བར་དོར་ནས་ཚངས་ཐིག་ལ་ཐིག་སྐུད་བཟུང་ནས་ཚད་ཀྱི་དོན་དུ་ཐིག་ཟླུམ་པོ་གཅིག་གོ། །འདིའི་ཆ་མཉམ་པ་ལྔ་བྱས་ནས་ཆ་རེ་རེའི་དབུས་ལས་བྱུང་བའི་ཚངས་ཐིག་
ནི་དཀྱིལ་འཁོར་ཆེན་པོའི་ཆ་ཆུང་གི་ཚད་ཀྱི་ཆ་ཆུང་བརྒྱད་པའོ། །དེའི་དབུས་སུ་དེ་བཞིན་དུ་ཚངས་ཐིག་གཞན་ནོ། །གཉིས་པ་འདི་རེ་རེ་ཞིང་ཆ་ཆུང་གཉིས་སུ་བྱས་ལ་ཞེས་པ་ལ་སོགས་པ་ནས་རབ་ཏུ་གདབ་པོ་ཞེས་པའི་མཐར་ཐུག་པ་དེ་མ་ཐག་པར་བརྗོད་པ་དག་བྱའོ། །དཀྱིལ་འཁོར་དྲུག་པོ་འདི་
རྣམས་ལ་ཟུར་ཐིག་རྣམས་ཀྱང་གདབ་པར་བྱའོ། །འདི་རྣམས་ཀྱི་ཚངས་ཐིག་ནས་ཕྱི་ངོས་སུ་ལྟ་བའི་ཆ་ཆུང་གསུམ་གྱི་བར་སྤངས་པར་ཐིག་ཟླུམ་པོ་གཅིག་གོ། །དེའི་ཕྱི་ངོས་སུ་འདབ་མའི་ཆ་ཆུང་དྲུག་སྤངས་པར་ཐིག་ཟླུམ་པོ་གཅིག་གོ། །དེའི་ཕྱི་ངོས་སུ་ཕྱོགས་དང་མཚམས་རྣམས་སུ་ཆ་ཆུང་དྲུག་
པའི་པདྨ་བརྒྱད་དོ། །དེ་ནས་ཐིག་ཟླུམ་པོ་གཅིག་གོ། །དེའི་ཕྱི་ངོས་སུ་ཆ་ཆུང་གཅིག་དོར་བར་ཐིག་ཟླུམ་པོའོ། །དེ་ནས་ཐམས་ཅད་དུ་ཚང་བ་དང་ཟུར་ཐིག་དབྱི་བར་བྱའོ། །དེ་ལྟ་བུ་ནི་འདིར་གདབ་པའི་ཁྱད་པར་རོ། །གཞན་ཕོ་བྲང་བདུན་པ་ལ་སོགས་པའི་གཞལ་ཡས་ཁང་གི་ཁྱད་པར་རྣམས་ཀྱང་
བཤད་པའི་རྗེས་སུ་འབྲངས་ཏེ་དཔག་ལ་མཁས་པ་རྣམས་ཀྱིས་ཐིག་གདབ་པའོ། །དུས་ཀྱི་འཁོར་ལོའི་དཀྱིལ་འཁོར་ལ་ནི་འདིར་བརྗོད་པའི་རྒྱུད་གཞན་མ་ལུས་པར་གསུངས་པའི་ཆོ་ག་རྣམས་ལས་ཉི་མའི་ཤིང་རྟ་ལ་སོགས་པ་འདུལ་བའི་དོན་དུ་བྱ་བ་མི་མཐུན་པར་གསུངས་སོ། །དེའི་ཕྱིར་

རྫོགས་པའི་རིམ་པའི་རྣལ་འབྱོར་པས་བཅོམ་ལྡན་འདས་རྡོ་རྗེ་འཆང་ཆེན་པོ་ཉིད་མངོན་པར་འདོད་པ་ཐམས་ཅད་གྲུབ་པར་བྱ་བའི་ཕྱིར་སྐུ་སྣ་ཚོགས་པས་དཀྱིལ་འཁོར་མ་ལུས་པའི་དབང་ཕྱུག་ཉིད་དུ་འགྱུར་རོ་ཞེས་ལྷག་པའི་མོས་པ་བསྟན་པས། རྒྱུད་གཞན་གྱི་ཆོ་གས་ཀྱང་རབ་གནས་ལ་སོགས་པ་
བྱ་བ་མི་འགལ་ཏེ་མངོན་པར་འདོད་པ་སྒྲུབ་པར་བྱེད་དོ་ཞེས་པས། དུས་ཀྱི་འཁོར་ལོའི་བྱ་བ་སྤྲོས་པ་དོར་ནས་དཀྱིལ་འཁོར་གྱི་ཐིག་གདབ་པ་ཙམ་བརྗོད་པར་བྱའོ། །རྡུལ་ཚོན་བྲི་བ་ཙམ་ནི་འཆད་པར་འགྱུར་བའི་རྡུལ་ཚོན་བྲི་བའི་སྐབས་སུ་བརྗོད་པར་བྱའོ། །འདིར་སློབ་དཔོན་གྱི་མཐེ་བོ་ཉི་ཤུ་རྩ་བཞི་ཁྲུ་ཡིན་
ལ། ཁྲུ་བཞིས་དཀྱིལ་འཁོར་རོ། །དེ་ཉིས་འགྱུར་སྲིད་དུ་ཁྲུ་བརྒྱད་པའི་ཚངས་ཐིག་གཉིས་གདབ་པར་བྱའོ། །དེ་ནས་དེ་བཞིན་དུ་ཟུར་ཐིག་གཉིས་སོ། །ཐིག་སྐུད་ནི་སྦོམ་དུ་སློབ་དཔོན་གྱི་ནས་ཀྱི་ཚད་དོ། །དེ་ལ་ཐུགས་ཀྱི་དཀྱིལ་འཁོར་གྱི་སྒོའི་དྲུག་ཆ་ནི་མཐེ་བོང་ཕྱེད་ཀྱི་ཚད་དེ་ཆ་ཆུང་དུ་ཐ་སྙད་གདགས་
པར་བྱའོ། །དེ་ལ་ཚངས་ཐིག་གི་ལྟེ་བར་གཙོ་བོའི་པདྨའི་ལྟེ་བའི་དོན་དུ་ཚངས་ཐིག་ལས་ཕྱི་ངོས་སུ་ཆ་ཆུང་གཉིས་དོར་ནས་ཚངས་ཐིག་གཞན་གྱི་སྟེང་དུ་བཟུང་སྟེ་ཐིག་ཟླུམ་པོ་གཅིག་གདབ་པོ། །དེ་ནས་འདབ་མའི་ཆ་ཆུང་བཞི་དོར་ནས་ཐིག་གཅིག་གདབ་བོ། །དེ་ནས་རྡོ་རྗེའི་ཕྲེང་བའི་ཆ་ཆུང་སྤངས་པར་ཐིག་
གཅིག་གོ། །དེ་ནས་ལྷའི་པདྨའི་ཆ་ཆུང་བཞི་དོར་བར་ཐིག་གཅིག་གོ། །དེ་ནས་རྡོ་རྗེའི་ཕྲེང་བའི་ཆ་ཆུང་གཅིག་དོར་བར་ཐིག་གཅིག་གོ། །ཐིག་བཞི་པོ་འདི་རྣམས་ནི་ཟུར་ཐིག་གཉིས་ཀྱི་བར་དུའོ། །འདིར་ལྷའི་ཆ་ཆུང་བཞིའི་དབུས་སུ་ནི་པདྨའི་ཆ་ཆུང་བཞི་པའོ། །དེའི་འགྲམ་གཉིས་སུ་ཀ་བ་གཉིས་ཏེ་
རྒྱར་ཆ་ཆུང་རེ་རེ་སྲིད་དུ་ཆ་ཆུང་བཞིའོ། །དེ་གཉིས་ཀྱི་འགྲམ་དུ་རྒྱར་ཆ་ཆུང་གསུམ་པའི་བུམ་པ་གཉིས་ཏེ་དེ་ལྟར་རིང་བའོ། །དེ་དག་གི་འགྲམ་དུ་དེ་བཞིན་དུ་ཀ་བ་གཉིས་སོ། །དེ་ནས་ཟུར་ཐིག་གི་མཐར་ཐུག་པའི་ཐིག་མཐའ་མ་ལས་ཕྱི་ངོས་སུ་ཆ་ཆུང་བདུན་གྱི་བར་སྤངས་ནས་ཐིག་གཅིག་གོ། །དེ་ནས་ལྷ་
སྣམ་གྱི་ཆ་ཆུང་བཞི་པའི་བར་སྤངས་ནས་ཐིག་གཅིག་གོ། །དེ་ནས་ཆ་ཆུང་གཅིག་དོར་ནས་རྩ་བའི་ཐིག་སྟེ་ཟུར་ཐིག་གི་བར་དུའོ། །འདིར་ཐུགས་ཀྱི་དཀྱིལ་འཁོར་ནི་རྩ་བའི་ཐིག་གི་མཐར་ཐུག་པ་ཁོ་ནའོ། །དེ་ལྟར་གསུང་གི་དཀྱིལ་འཁོར་དང་དེ་བཞིན་དུ་སྐུའི་དཀྱིལ་འཁོར་རོ། །ཚངས་ཐིག་གི་གཡས་

གཡོན་དུ་རྩ་བའི་ཐིག་ཆ་ཆུང་གསུམ་གསུམ་སྔོན་བཞིན་ཕྱི་བས་སྒོ་ནི་ཆ་ཆུང་དྲུག་པ་སྟེ་འཁོར་ལོའི་བརྒྱད་ཆར་འགྱུར་རོ། །སྒོ་ཁྱུད་དང་འགྲམ་དང་ལོགས་གསུམ་གྱི་ཚད་ནི་སྒོ་དང་མཉམ་མོ། །རྩ་བའི་ཐིག་ལས་ཕྱི་རོལ་དུ་ཆ་ཆུང་ཕྱེད་དང་གཉིས་དོར་བར་རྩིག་པའི་ཐིག་སྟེ། །ཟུར་ཐིག་
ལས་འཐོན་ནས་སྒོ་ཁྱུད་དང་འགྲམ་དང་ལོགས་ཀྱི་རྗེས་སུ་འགྲོ་བས་གསུམ་ཀྱོག་པོ་མདའ་ཡབ་ཀྱི་ཐིག་གི་མཐར་ཐུག་པའོ། །དེའི་གློར་རྟ་བབས་ཀྱི་ཀ་བའི་ཆ་ཆུང་ཕྱེད་དང་གཉིས་དོར་བར་མདའ་ཡབ་ཀྱི་ཐིག་ལ་རྩེ་མོ་རེག་པའི་ཐིག་སྟེ། ནང་གི་དཔངས་སུ་ཆ་ཆུང་ཕྱེད་དང་བརྒྱད་པའོ། །རྩ་བའི་ཐིག་གི་ཕྱིའི་
ཐིག་ལས་ཕྱི་ངོས་སུ་སྟེགས་བུའི་ཆ་ཆུང་གསུམ་གྱི་བར་དོར་ནས་ཐིག་གོ། །དེ་ནས་རིན་པོ་ཆེའི་ཕ་གུའི་ཆ་ཆུང་ཕྱེད་དང་གཉིས་དོར་བར་ཐིག་གོ། །དེ་ནས་དྲ་བ་དང་དྲ་བ་ཕྱེད་པའི་སྣམ་བུའི་ཆ་ཆུང་གསུམ་དོར་བར་ཐིག་གོ། །དེ་ནས་རིན་ཆེན་ཤར་བུའི་ཆ་ཆུང་ཕྱེད་དང་གཉིས་དོར་བར་ཐིག་གོ། །དེ་ནས་མདའ་
ཡབ་ཀྱི་སྣམ་བུའི་ཆ་ཆུང་ཕྱེད་དང་གཉིས་དོར་བར་མདའ་ཡབ་ཀྱི་ཐིག་སྟེ་ཟུར་ཐིག་ནས་ཟུར་ཐིག་གཞན་གྱི་བར་དུ་རིང་བའོ། །སྟེགས་བུའི་ཐིག་ལ་སོགས་པ་བཞི་ནི་ཐིག་གཞན་གྱི་བར་དུའོ། །འདིར་ནི་ཀ་བ་གཅིག་གི་སྟེང་ནས་ཀ་བ་གཉིས་པའི་སྟེང་དུ་སོན་པའི་ཐིག་ནི་གདུང་མཚོན་པར་བྱེད་པ་སྟེ། འདིའི་ནང་
དུ་མདའ་ཡབ་རྣམས་བྲི་བར་མི་བྱའོ། །ཀ་བའི་སྟེང་དུ་རྟ་བབས་ནི་སྒོའི་ཚད་ལས་སྟེང་དུ་སུམ་འགྱུར་རོ། །དེ་ཡང་རིམ་པ་གསུམ་པ་སྟེ། དང་པོ་ནི་ཆ་ཆུང་དྲུག་གོ། །གཉིས་པ་ནི་ཆ་ཆུང་ཕྱེད་དང་ལྔའོ། །གསུམ་པ་ནི་ཆ་ཆུང་ཕྱེད་དང་བཞིའོ། །ཧར་མི་ནི་ཆ་ཆུང་གཉིས་སོ། །དེའི་སྟེང་དུ་བུམ་པ་ཆ་ཆུང་གཉིས་
པའོ། །དེ་ལ་རིམ་པ་དང་པོ་ལ་ཀ་བའི་སྟེང་དུ་ཆ་ཆུང་གཅིག་པའི་སྣམ་བུ་ཆ་ཆུང་ཉི་ཤུ་རྩ་བཞིར་རིང་བའོ། །དེའི་སྟེང་དུ་ཆ་ཆུང་གཅིག་པའི་མྱོས་པས་བསྲུང་བའི་སྣམ་བུ་ཆ་ཆུང་བཅུ་དྲུག་ཏུ་རིང་བའོ། །དེའི་སྟེང་དུ་དབུས་སུ་ཆ་ཆུང་བཞི་པ་གྲུ་བཞི་པ་སྟེ་མཆོད་པའི་ལྷ་མོའི་གནས་སོ། །དེའི་གཡས་དང་
གཡོན་དུ་ཆ་ཆུང་གཅིག་པའི་ཀ་བའོ། །དེ་དག་གི་གློར་དེ་བཞིན་དུ་མཆོད་པའི་ལྷ་མོའི་གནས་སོ། །དེའི་གློར་སླར་ཡང་ཀ་བ་ཆ་ཆུང་གཅིག་པའོ། །དེ་དག་གི་གཞོགས་སུ་རྟ་བབས་ཀྱི་ཀ་བའི་སྟེང་དུ་མཆེ་བ་ཅན་གྱི་དབང་པོ་དག་མནན་པའི་མགོ་བོའི་སྟེང་དུ་བཏེག་པའི་སེང་གེ་དག་གོ། །དེ་དག་གི་མགོ་དང་

ཀ་བ་བཞིའི་སྟེང་དུ་ཆ་ཆུང་ཕྱེད་པའི་སྣམ་བུ་ཆ་ཆུང་བཅོ་བརྒྱད་དུ་རིང་བའོ། །དེའི་སྟེང་དུ་ཆ་ཆུང་གཅིག་པའི་མྱོས་པས་བསྲུང་བའི་ཆ་ཆུང་བཅུ་གཉིས་སུ་རིང་བའོ། །དེའི་སྟེང་དུ་ཆ་ཆུང་གསུམ་པའི་སྣམ་བུ་ཆ་ཆུང་བཅུ་གཉིས་སུ་རིང་བའོ། །དེ་ལ་སོ་སོར་བཞི་ཆས་ཉུང་བའི་ཆ་ཆུང་གཅིག་པའི་ཀ་
བ་བཞིའོ། །ཀ་བའི་བར་རྣམས་སུ་སོ་སོར་ཆ་ཆུང་གསུམ་པའི་ལྷའི་གནས་གསུམ་མོ། །ཕྱིའི་ཀ་བའི་གློ་དག་ཏུ་གདུང་འདེགས་པའི་ལྷ་མོ་གཉིས་སོ། །དེ་དག་གི་མགོ་གཉིས་དང་ཀ་བ་རྣམས་ཀྱི་སྟེང་དུ་ཆ་ཆུང་ཕྱེད་པའི་སྣམ་བུ་ཆ་ཆུང་བཅོ་ལྔར་རིང་བའོ། །དེའི་སྟེང་དུ་ཆ་ཆུང་གཅིག་པའི་མྱོས་པས་
བསྲུང་བའི་སྣམ་བུ་ཆ་ཆུང་བརྒྱད་དུ་རིང་བའོ། །དེའི་སྟེང་དུ་ཆ་ཆུང་གཉིས་པའི་སྣམ་བུ་ཆ་ཆུང་བརྒྱད་དུ་རིང་བའོ། །དེ་ནས་སོ་སོར་ཆ་ཆུང་ཕྱེད་པའི་ཀ་བ་བཞིའོ། །ཀ་བའི་བར་རྣམས་སུ་ལྷའི་གནས་གསུམ་སྟེ་རེ་རེ་ཞིང་ཆ་ཆུང་གཉིས་གཉིས་པའོ། །ཕྱིའི་ཀ་བའི་གློ་དག་ཏུ་གདུང་འདེགས་པའི་ལྷ་མོ་
གཉིས་སོ། །དེའི་སྟེང་དུ་ཆ་ཆུང་ཕྱེད་པའི་སྣམ་བུ་ཆ་ཆུང་བཅུ་གཉིས་སུ་རིང་བའོ། །དེའི་སྟེང་དུ་ཧར་མི་སྟེ་སྲིད་དུ་ཆ་ཆུང་བརྒྱད་པོའོ། །དེའི་སྟེང་དུ་བུམ་པའོ། །དེའི་གཡས་དང་གཡོན་དུ་རྒྱལ་མཚན་གྱི་ཡུ་བའི་གནས་སོ། །དེ་ལྟར་སྣམ་བུ་ཐམས་ཅད་ཀྱི་རྩེ་མོ་ལ་དྲིལ་བུ་དང་མདའ་ཡབ་དང་མེ་ལོང་དང་
རྒྱལ་མཚན་དང་བ་དན་རྣམས་སོ། །འདིར་ཐུགས་ཀྱི་དཀྱིལ་འཁོར་རྩ་བའི་ཐིག་ནས་ཕྱི་ངོས་སུ་གསུང་གི་དཀྱིལ་འཁོར་རོ། །དེའི་ཕྱོགས་རེ་རེར་ཆ་ཆུང་བཅུ་གཉིས་པའི་གནས་ནི་ཐུགས་ཀྱི་དཀྱིལ་འཁོར་གྱི་རྩིག་པ་ལ་སོགས་པ་ནས་མདའ་ཡབ་ཀྱི་མཐར་ཐུག་པའི་སྣམ་བུ་རྣམས་ཀྱིས་ཁྱབ་པའོ། །དེའི་ཕྱི་
ངོས་སུ་ཆ་ཆུང་བདུན་པའི་བར་སྤངས་ནས་ཐིག་གཅིག་གོ། །དེ་ནས་ཆ་ཆུང་བཞི་པའི་ལྷ་སྣམ་དོར་ནས་ཐིག་གཅིག་གོ། །སྣམ་བུ་འདི་ལ་ཆ་ཆུང་བཞི་པའི་པདྨ་རྣམས་ཏེ། འོན་ཀྱང་ཕྱོགས་སུ་སོན་པ་ཐུགས་ཀྱི་དཀྱིལ་འཁོར་གྱི་རྟ་བབས་ཀྱི་འོག་ཏུ་གནས་པ་ནི་རིམ་པ་གཉིས་པའི་མྱོས་པས་བསྲུང་བ་ལ་
སོགས་པའི་ཆ་ཆུང་བཞི་པའི་གནས་སུ་ཀ་བ་གཉིས་ཀྱི་ཆ་ཆུང་ཕྱེད་པ་བསྣུར་ནས་བྲི་བར་བྱའོ། །དེ་ནས་ལྷ་སྣམ་གྱི་ཐིག་ལས་ཕྱི་ངོས་སུ་ཆ་ཆུང་གཅིག་དོར་བར་རྩ་བའི་ཐིག་གོ། །ཐིག་གསུམ་པོ་འདི་ཟུར་ཐིག་གི་མཐར་ཐུག་པར་རིང་བའོ། །རྩ་བའི་ཐིག་ལ་ཚངས་ཐིག་གི་གཡས་དང་གཡོན་དུ་ཆ་ཆུང་དྲུག་

དྲུག་སྔོན་བཞིན་ཕྱི་བས་སྒོ་ཆ་ཆུང་བཅུ་གཉིས་སུ་འགྱུར་རོ། །དེ་ནས་སྒོ་ཁྱུད་ལ་སོགས་པ་ནས་རྟ་བབས་ཀྱི་མཐར་ཐུག་པ་རྣམས་ཐུགས་ཀྱི་དཀྱིལ་འཁོར་གྱི་སྒོ་ཁྱུད་ལ་སོགས་པ་ལས་ཉིས་འགྱུར་དུ་འགྱུར་རོ། །གསུང་གི་དཀྱིལ་འཁོར་འདིའི་རྩ་བའི་ཐིག་ལས་ཕྱི་ངོས་སུ་སྐུའི་དཀྱིལ་
འཁོར་རོ། །དེའི་ཕྱོགས་རེ་རེ་ཆ་ཆུང་ཉི་ཤུ་རྩ་བཞིའི་གནས་ནི་གསུང་གི་དཀྱིལ་འཁོར་གྱི་རྩིག་པ་ལ་སོགས་པ་མདའ་ཡབ་ཀྱི་མཐར་ཐུག་པའི་སྣམ་བུ་རྣམས་ཀྱིས་ཁྱབ་པའོ། །དེའི་ཕྱི་ངོས་སུ་ཆ་ཆུང་བཅུ་གཅིག་དོར་ནས་ཐིག་གོ། །དེའི་ཕྱི་ངོས་སུ་ཆ་ཆུང་བཅུ་གཉིས་ཀྱི་ལྷ་སྣམ་དོར་ནས་ཐིག་གོ། །
ལྷ་སྣམ་འདི་ལ་པདྨ་བཅུ་གཉིས་ཏེ་རེ་རེ་ཞིང་ཆ་ཆུང་བཅུ་གཉིས་པའོ། །དེ་ལ་ཆ་ཆུང་བཅུ་གཉིས་པའི་པདྨ་ཆ་བདུན་བྱས་ནས་དབུས་ཀྱི་ཆ་ནི་ལྟེ་བའོ། །གཡས་དང་གཡོན་གྱི་ཆ་དག་ནི་འདབ་མ་བཞིའོ། །དེའི་གཡས་དང་གཡོན་དུ་བརྒྱད་དོ། །དེའི་གཡས་དང་གཡོན་དག་བཅུ་དྲུག་གོ། །དེ་ལྟར་དཀྱིལ་
འཁོར་གསུམ་རྣམས་ཀྱི་འདབ་མ་ཉི་ཤུ་རྩ་བརྒྱད་དོ། །ལྷ་སྣམ་གྱི་ཐིག་ལས་ཕྱི་ངོས་སུ་ཆ་ཆུང་གཅིག་དོར་བར་རྩ་བའི་ཐིག་གོ། །ཐིག་གསུམ་པོ་འདི་སྲིད་དུ་ཟུར་ཐིག་གི་བར་དུའོ། །རྩ་བའི་ཐིག་གི་ཚངས་ཐིག་གི་གཡས་དང་གཡོན་དག་ཏུ་ཆ་ཆུང་བཅུ་གཉིས་སྔོན་བཞིན་ཕྱི་བ་ལས་སྒོ་ཆ་ཆུང་ཉི་ཤུ་རྩ་
བཞི་ཡིན་ནོ། །དེ་ནས་དེའི་སྒོ་ཁྱུད་ལ་སོགས་པ་ནས་རྟ་བབས་ཀྱི་མཐར་ཐུག་པ་རྣམས་གསུང་གི་དཀྱིལ་འཁོར་གྱི་སྒོ་ཁྱུད་ལ་སོགས་པ་ཉིས་འགྱུར་ཏེ་ཆུའི་ཁོར་ཡུག་གི་ཕྱེད་ཚུན་ཆད་དོ། །གསུང་གི་དཀྱིལ་འཁོར་གྱི་རྟ་བབས་རྣམས་ཀྱི་ཕྱི་རོལ་དུ་སྐུའི་དཀྱིལ་འཁོར་གྱི་སྒོའི་དབུས་རྣམས་སུ་ཆ་ཆུང་བཅུ་
གཉིས་པའི་ཤིང་རྟ་རྣམས་སོ། །དེ་ནས་སའི་ཁོར་ཡུག་ཆ་ཆུང་བཅུ་གཉིས་པའོ། །དེའི་ཕྱི་ངོས་སུ་ཆུའི་ཁོར་ཡུག་ཆ་ཆུང་ཉི་ཤུ་རྩ་བཞིའོ། །དེ་ནས་མེའི་ཁོར་ཡུག་ཆ་ཆུང་ཉི་ཤུ་རྩ་བཞིའོ། །དེ་ནས་རླུང་གི་ཁོར་ཡུག་ཆ་ཆུང་ཉི་ཤུ་རྩ་བཞིའོ། །རླུང་གི་ཁོར་ཡུག་ལས་ཕྱི་ངོས་སུ་ནམ་མཁའི་ཁོར་ཡུག་ཆ་
ཆུང་བཅུ་གཉིས་སོ། །ཁོར་ཡུག་དེའི་ཕྱི་ངོས་སུ་འོད་ཟེར་གྱི་ཕྲེང་བ་ཆ་ཆུང་ཉི་ཤུ་རྩ་བཞིའོ། །སའི་ཁོར་ཡུག་ལ་སོགས་པ་དྲུག་པོ་འདི་རྣམས་རང་རང་གི་དང་པོར་ཐིག་ཟླུམ་པོའོ། །འོད་ཀྱི་ཁོར་ཡུག་གི་མཐར་ཡང་སྟེ་ཐིག་ཟླུམ་པོ་བདུན་ནོ། །དེ་ལྟ་བུ་འདི་ནི་གཙོ་བོ་ཐུགས་རྡོ་རྗེའི་དཀྱིལ་འཁོར་གསུམ་

གྱི་བདག་ཉིད་ཀྱི་དཀྱིལ་འཁོར་རོ། །འདིའི་ཐིག་སྐུད་ལ་ནི་ཁྲུ་བརྒྱད་དེ་སའི་ཁོར་ཡུག་གི་ཐོག་མའི་བར་དུའོ་ཞེས་པ་ནི། ཕྱོགས་དང་པོའོ། །གང་གི་ཚེ་ཐུགས་ཀྱི་དཀྱིལ་འཁོར་གྱི་སྒོའི་ཚད་དང་། གསུང་གི་དཀྱིལ་འཁོར་གྱི་སྒོའི་ཚད་བསྡོམས་ནས་སྒོ་ཆ་ཆུང་བཅོ་བརྒྱད་ཡོངས་སུ་བརྟགས་ཏེ།
དེའི་དྲུག་ཆ་ལ་ཆ་ཆུང་གི་ཐ་སྙད་བྱེད་པ་དེའི་ཚེ། ཆ་ཆུང་དེས་གཙོ་བོའི་པདྨའི་ལྟེ་བ་ལ་སོགས་པ་ནས་འོད་ཀྱི་ཕྲེང་བའི་མཐར་ཐུག་པར་ཆ་ཆུང་གི་གྲངས་བྱའོ། །དེའི་ཚེ་གཙོ་བོ་ཐུགས་རྡོ་རྗེ་དཀྱིལ་འཁོར་གསུམ་གྱི་བདག་ཉིད་ཀྱི་དཀྱིལ་འཁོར་ཁྲུ་བཅུ་གཉིས་དང་། དེའི་ཉིས་འགྱུར་གྱི་ཐིག་སྐུད་ནི་སའི་
ཁོར་ཡུག་གི་ཐོག་མའི་བར་དུ་ཁྲུ་ཉི་ཤུ་རྩ་བཞིའོ། །ཕྱོགས་གཉིས་པའོ། །གང་གི་ཚེ་བཅོམ་ལྡན་འདས་ཐུགས་རྡོ་རྗེ་གསུང་རྡོ་རྗེའི་གནས་སུ་གྱུར་ནས་གསུང་རྡོ་རྗེ་ནི་གཙོ་བོ་སྟེ། དེ་ལས་གཞན་པའི་ལྷ་ལ་སོགས་པའི་བཀོད་པ་ནི་ཕྱོགས་དང་པོ་བཞིན་དུ་སྟེ། གང་གི་ཚེ་ཡང་། དབུས་ཀྱི་དཀྱིལ་འཁོར་
གྲུ་བཞི་པ་དང་། དེའི་ཉིས་འགྱུར་གཉིས་པ་དང་། དེ་ཉིས་འགྱུར་གསུམ་པ་ཡིན་པ་དེའི་ཚེ་ཁྲུ་བཅུ་དྲུག་གི་དཀྱིལ་འཁོར་གསུམ་གྱི་བདག་ཉིད་གསུང་གི་དཀྱིལ་འཁོར་དང་། དེ་ཉིས་འགྱུར་གྱི་ཐིག་སྐུད་ནི་ཁྲུ་སུམ་ཅུ་སོ་གཉིས་པ་སྟེ། སའི་ཁོར་ཡུག་གི་དང་པོའི་བར་དུའོ་ཞེས་པ་ཕྱོགས་གསུམ་པའོ། །
གང་གི་ཚེ་དང་པོར་བརྗོད་པའི་ཐུགས་ཀྱི་དཀྱིལ་འཁོར་གྱི་སྒོའི་ཚད་དང་། དང་པོར་བརྗོད་པའི་སྐུའི་དཀྱིལ་འཁོར་གྱི་སྒོའི་ཚད་བསྡོམས་ནས་སྒོ་ཆ་ཆུང་སུམ་ཅུར་ཡོངས་སུ་བརྟགས་ཏེ། དེའི་དྲུག་ཆ་ལ་ཆ་ཆུང་དུ་འདོགས་པ་དེའི་ཚེ། ཆ་ཆུང་དེས་གཙོ་བོའི་ལྟེ་བ་ལ་སོགས་པ་ནས་འོད་ཀྱི་ཁོར་ཡུག་གི་མཐར་
ཐུག་པར་ཆ་ཆུང་གི་གྲངས་བྱ་ཞིང་། བཅོམ་ལྡན་འདས་ཐུགས་རྡོ་རྗེ་ཡང་སྐུ་རྡོ་རྗེའི་གནས་སུ་བྱའོ། །སྐུ་རྡོ་རྗེ་ནི་གཙོ་བོ་སྟེ། དེ་ལས་གཞན་པའི་ལྷ་ལ་སོགས་པ་དགོད་པ་ནི་ཕྱོགས་དང་པོ་བཞིན་ཏེ། དེའི་ཚེ་གཙོ་བོ་སྐུ་རྡོ་རྗེའི་དཀྱིལ་འཁོར་གསུམ་གྱི་བདག་ཉིད་ཁྲུ་ཉི་ཤུ་དང་། དེ་ཉིས་འགྱུར་གྱི་ཐིག་སྐུད་
ཀྱང་སའི་ཁོར་ཡུག་གི་ཐོག་མའི་བར་དུ་ཁྲུ་བཞི་བཅུ་པའོ་ཞེས་པ་ནི་ཕྱོགས་བཞི་པའོ། །དེ་ལྟར་ཡང་དྲི་མ་མེད་པའི་འོད་ལས་ཐིག་སྐུད་ཁྲུ་བརྒྱད་པ་ཞེས་པའི་རྩ་བ་ལ་ཁྲུ་བརྒྱད་པ་ཞེས་པ་ནི་དཀྱིལ་འཁོར་ཉིས་འགྱུར་རོ་ཞེས་བཀྲལ་ནས། དེ་ལ་དང་པོའི་སངས་རྒྱས་ལས། ཐུགས་ཀྱི་དཀྱིལ་འཁོར་ཁྲུ་བཅུ་

གཉིས་སུ་བྱ་ཞིང་ཐིག་སྐུད་ནི་ཁྲུ་ཉི་ཤུ་རྩ་བཞིའོ། །དེ་བཞིན་དུ་གསུང་གི་དཀྱིལ་འཁོར་ནི་ཁྲུ་བཅུ་དྲུག་པའོ། །སྐུའི་དཀྱིལ་འཁོར་ནི་ཁྲུ་ཉི་ཤུའོ་ཞེས་པ་ནི་ཐིག་སྐུད་ཉིས་འགྱུར་གྱི་ངེས་པ་ཡིན་ནོ་ཞེས་གསུངས་སོ། །ཡང་དབང་གི་དོན་དུ་དབུས་ཀྱི་དཀྱིལ་འཁོར་ཙམ་བྲི་བར་རྗེས་སུ་
གནང་སྟེ། ཇི་སྐད་དུ། དབང་གི་དོན་དུ་དཀྱིལ་འཁོར་རམ་ནི་རིགས་ཀྱི་དབང་ལས་ཕྱི་ཡི་འཁོར་ལོས་རབ་ཏུ་དམན་པར་འགྱུར། ཞེས་གསུངས་སོ། །གང་ཡང་ཁམས་གསུམ་རྣམ་པར་རྒྱལ་བའི་རྒྱུད་ལས་སྒོ་འཁོར་ལོའི་དགུ་ཆ་དང་། དཀྱིལ་འཁོར་ཆེན་པོ་བཀོད་པའི་རྒྱུད་ལས་འཁོར་ལོའི་བཅུ་ཆར་
གསུངས་པ་དེ་ལྟར་ནི་སློབ་དཔོན་རྣམས་ཀྱིས་ཐ་སྙད་མི་བྱེད་པས་ན་ཁོ་བོས་སྤངས་སོ། །དཀྱིལ་འཁོར་གྱི་ཚད་ཀྱང་རབ་ཏུ་གྲགས་པ་བརྗོད་ཀྱི་འདི་ཙམ་འབའ་ཞིག་ནི་མ་ཡིན་ཏེ། དེ་ལྟར་ཡང་བཅོམ་ལྡན་འདས་ཀྱིས། །འཛམ་བུ་གླིང་གི་དབང་ཕྱུག་གམ། །འཁོར་ལོས་སྒྱུར་བའི་རྒྱལ་པོ་ཡིས། །
ཀུན་ནས་དཔག་ཚད་མཐའ་རུ་ནི། །ཕྱི་རོལ་དཀྱིལ་འཁོར་བྲི་བར་བྱ། །མཁས་པས་གདུལ་བྱའི་སྐྱེ་བོ་ཡི། །སེམས་རྣམས་ཡང་དག་བལྟས་ནས་ནི། །འདོད་པས་ཚད་ནི་བྱས་ན་ཡང་། །ཉེས་པ་ཅུང་ཟད་ཡོད་མ་ཡིན། །རང་གི་འདོད་པས་དཀྱིལ་འཁོར་ཀུན། །ལག་པའི་མཐིལ་དུ་བྲི་བྱས་ན། །བསྟན་
བཅོས་ལས་གསུངས་དོན་བྱེད་དེ། །ས་སྟེང་སོགས་སུ་སྨོས་ཅི་དགོས། །ཞེས་གསུངས་སོ། །དཀྱིལ་འཁོར་དཔག་ཏུ་མེད་པའི་དབྱེ་བ་ཐ་དད་པ་རྣམས་ཇི་ཙམ་ཞིག་བརྗོད་ཅིང་བྱ་བར་ནུས། །གང་གི་ཕྱིར་ན་བཅོམ་ལྡན་འདས་ཀྱིས། །དཀྱིལ་འཁོར་ཇི་ལྟ་བ་དེ་བཞིན། །རབ་ཏུ་བསྟན་པར་སུ་ཡིས་
ནུས། །རང་གི་ལྷ་ཡི་སྦྱོར་བ་ཡིས། །དཀྱིལ་འཁོར་བརྟག་པར་གྲུབ་པ་ཡིན། །ཞེས་གསུངས་སོ། །འདིར་ཐིག་གདབ་པའི་བསྡུ་བའི་ཚིགས་སུ་བཅད་པ་ནི། ཤར་སོགས་ཕྱོགས་ཀྱི་ཐིག་ལེའི་སྟེང་། །སྲད་བུ་བཟུང་ནས་མཎྜལ་བཞིའི། །ཉ་ཡི་མགོ་དང་མཇུག་མའི་མཐར། །ཚངས་ཐིག་དང་ནི་
ཟུར་ཐིག་གདབ། །ཟུར་དེ་སྒོ་ཚད་བདུན་དང་ཕྱོགས། །ཁྲུ་ལ་སོགས་པའི་རྩ་བའི་ཐིག །དབུས་སུ་བརྒྱད་ཆ་ཕྱི་བ་སྟེ། །སྒོ་དེའི་བཞི་ཆ་ཆ་ཆུང་སྟེ། །རྩ་བའི་ཕྱི་རོལ་གཅིག་དང་གཉིས། །གཅིག་གཉིས་གཅིག་དང་གཅིག་གི་མཐར། །ཐིག་དྲུག་ཟུར་ནས་ངོས་སུ་སྟེ། །ཚངས་ལས་རིམ་གྱིས་རིང་

བར་ནི། །ཆ་ཆུང་གསུམ་དུ་དང་པོའི་ཐིག །གཉིས་ཐིག་ཆ་ཆུང་གཉིས་རྩེར་རེག །ཆ་ཆུང་བརྒྱད་དུ་གསུམ་སྟེགས་བུའི། །ཐིག་ལས་དྲང་པོའི་ཐིག་བཞི་སྟེ། །གསུམ་ནི་ཆ་ཆུང་ལྔ་བཞི་པ། །ཆ་ཆུང་བཞི་དེའི་དང་པོ་ནི། །ངོས་ཐིག་རྩེ་མོར་ཡང་དག་རེག །གསུམ་ནི་ཆ་ཆུང་རེ་རེའི་བར། །
བཞི་པའི་རྩེ་ནས་ངོས་སུ་ཐིག །ཆ་ཆུང་བཅུ་དང་ལྡན་པའོ། །རྩ་བའི་རྩེ་ནས་བྱུང་བའི་ཐིག །ཆ་ཆུང་བཞི་པ་ངོས་སྟེང་དུ། །ཆ་ཆུང་གཉིས་གཉིས་ཐད་ཀར་ནི། །ཆ་ཆུང་བརྒྱད་དེ་གསུམ་འཁྱོག་པ། །ཀ་བའི་རྩེ་ནས་ཕྱི་ངོས་སུ། །ཆ་ཆུང་རེ་རེ་དོར་བར་ཐིག །བཅུ་གཅིག་འདི་ལ་ལྔ་པ་དག །
བདུན་པ་ཆ་ཆུང་ཕྱེད་དང་གཉིས། །ཡང་ན་གསུམ་པ་བདུན་པ་དང་། །དགུ་པ་ཆ་ཆུང་རེ་རེའོ། །བཞི་པ་དྲུག་པ་བཅུ་པ་རྣམས། །སོ་སོར་ཆ་ཆུང་ཕྱེད་ཕྱེད་དོ། །ལྔ་ནི་ཆ་ཆུང་ཕྱེད་དང་གཉིས། །དེ་ལ་ཕྱོགས་གཉིས་སུ་ནི་རྒྱར། །ཚངས་པའི་གཡས་དང་གཡོན་དུ་ནི། །ཆ་ཆུང་ཕྱེད་བཅས་མངའ་ཡི་
མཐར། །སྣམ་བུ་ཆ་ཆུང་ཕྱེད་དང་གསུམ། །ཐིག་ནི་ཆ་ཆུང་ཕྱེད་དང་བཞི། །ཆ་ཆུང་དྲུག་མཐར་གཉིས་པ་དང་། །གསུམ་པ་ཆ་ཆུང་གསུམ་པའོ། །ཆ་ཆུང་བཞི་མཐར་བཞི་པ་ནི། །ཆ་ཆུང་ལྔ་སྟེ་མདའ་ཕྱེད་བཅས། །གསུམ་དོར་ནས་ནི་ཕྱེད་དང་ལྔ། །གསུམ་ནས་དྲུག་པ་ཆ་ཆུང་ལྔ། །བཞི་
ནི་ཆ་ཆུང་བདུན་རྣམས་ཏེ། །ཐིག་བཅུ་གཅིག་པ་ཆ་ཆུང་ལྔ། །སྣམ་བུ་ལྔ་པའི་སྟེང་དུ་ནི། །ངོས་སུ་ཆ་ཆུང་ཕྱེད་དང་བཞི། །བདུན་པའི་འོག་ལ་ཆ་ཆུང་གསུམ། །སྟེང་གི་ཆ་ཆུང་དྲུག་སྟེང་དུ། །སྣམ་བུ་རྣམས་མཐར་སོན་པའི་ཐིག །གཞན་གྱི་མཐའ་དང་ལྷན་ཅིག་ཏུ། །ཀྱོག་པོ་གཅིག་གོ་འདི་ནང་
དུའང་། །ཆ་ཆུང་ཕྱེད་ནས་དེ་བཞིན་གཞན། །དེ་ཕྱིར་ཆ་ཆུང་རིག་བྱེད་མཐར། །ཐིག་ཟླུམ་དེ་ནས་གཉིས་ཡིན་ཏེ། །ཆ་ཆུང་གཉིས་གཉིས་དོར་བར་རོ། །བཞི་དོར་བར་ནི་ཟླུམ་པོ་གཞན། །འགྲམ་ལོགས་སྒོ་དང་མཉམ་པ་ན། །མུན་པའི་སྣམ་བུ་མེད་པའོ། །རྟ་བབས་སྒོ་ལས་སུམ་འགྱུར་ནི། །ངོས་ཉིད་
དུ་སྟེ་སྟེང་མིན་པ། །དེ་ཚེ་ཐིག་ནི་དྲང་པོ་གསུམ། །སྟེགས་བུའི་ཐིག་ལས་དེ་ལྟར་གཞལ། །ཕྱོགས་ནི་དེ་མ་ཐག་པ་ཡི། །རྟ་བབས་སྣམ་བུ་དྲག་པོའི་ལས། །དཔངས་སུ་ཚད་ནི་སྒོ་ཡི་ཆ། །ནོར་ལྷ་ནོར་ལྷ་ཉི་མ་དང་། །རྒྱལ་བ་ནོར་ལྷ་རྒྱལ་བ་དང་། །ཉི་མ་ནོར་ལྷ་ཉི་མ་དང་། །རྒྱལ་བ་ནོར་ལྷ་གོ་རིམས་བཞིན། །

འདི་རྣམས་ངོས་ཀྱིས་བརྗོད་པར་བྱ། །ཚངས་པའི་གཡས་དང་གཡོན་དུ་ནི། །ཆ་ཆུང་ཕྱེད་དང་ལྔ་དོར་ནས། །སྣམ་བུ་ཆ་ཆུང་ཕྱེད་དང་གསུམ། །ཐིག་ནི་ཆ་ཆུང་ཕྱེད་དང་བཞི། །གཉིས་པ་དང་ནི་གསུམ་པ་ནི། །ཆ་ཆུང་ལྔ་ནས་ཆ་ཆུང་གསུམ། །བཞི་པ་ཆ་ཆུང་བཞི་དོར་ནས། །ཆ་ཆུང་གསུམ་
མདའ་ཆ་ཆུང་ནི། །ཕྱེད་དང་བཞི་ནས་ཕྱེད་དང་བཞི། །གསུམ་ནས་དྲུག་པ་ཆ་ཆུང་ལྔ། །དེ་ནས་གསུམ་ནས་བརྒྱད་གཅིག་ནི། །ཆ་ཆུང་བདུན་དེ་ཐ་མ་དྲུག །དེ་ཕྱིར་ཆ་ཆུང་རིག་བྱེད་མཐར། །ཟླུམ་པོ་གཉིས་ནས་དེ་བཞིན་ཐིག །ཆ་ཆུང་གཉིས་མཐར་ཟླུམ་པོ་སྟེ། །ཐ་མ་ཆ་ཆུང་བཞི་པའི་མཐར། །ཚངས་
ལས་ཆ་ཆུང་བརྒྱད་མཐར་དང་། །བདུན་པའི་མཐའ་རུ་ཟླུམ་པོའི་ཐིག །དེ་ནས་ཡང་དག་དྲངས་ནས་ནི། །ཕྱོགས་གཞན་ཐིག་གི་མཚམས་སོང་བའི། །ཐིག་གཉིས་རིམ་བཞིན་ཚངས་པའི་ཕྱིར། །ཆ་ཆུང་གཉིས་གསུམ་དོར་བར་རོ། །ཕྱི་ཟླུམ་ཐིག་ལས་ཕྱི་ངོས་སུ། །ཆ་ཆུང་དོར་བར་ཟླུམ་པོའི་ཐིག །
དེ་ནས་ཆ་ཆུང་གསུམ་དོར་ནས། །ཟུར་ཐིག་བར་དུ་གནས་པའི་ཐིག །ཀུན་དུ་སོན་པའི་ཚངས་ཐིག་དང་། །རེའུ་མིག་སྣམ་བུའི་རེ་ཁཱ་དབྱི། །རྩ་བའི་ནང་གི་དཀྱིལ་འཁོར་དུ། །ལྷ་ཡི་དབྱེ་བས་ཐིག་གདབ་པ། །ཅུང་ཟད་ཐ་དད་བདེ་མཆོག་གི། །གཞན་དེ་དེ་ཡིས་བརྗོད་པར་བྱ། །ཚངས་དང་ཟུར་ཐིག་
གནས་པ་ལས། །གཞན་མིན་དེ་ཡི་ཚངས་ལས་ཕྱིར། །ཆ་ཆུང་གཉིས་དོར་རྩ་བའི་བར། །ཐིག་གདབ་ཟུར་གྱི་འགྲམ་དག་ཏུ། །དེ་བཞིན་ལྟེ་བའི་ལོགས་དག་ལས། །སྒོ་ནི་བཞི་བཞིར་དེ་ཡི་སྲིད། །ལྟེ་བའི་ཕྱི་རུ་ཆ་ཆུང་བཞི། །དོར་བར་ཆ་ཆུང་བཞི་པའི་ཐིག །ཐད་ཀར་ཚངས་དང་ཟུར་ལ་གནས། །
འདིར་ནི་ཡང་ནི་ཐིག་ལྔ་ཡང་། །ཆ་ཆུང་གཉིས་གཉིས་དོར་བར་རོ། །དེ་བཞིན་དེ་རྣམས་དང་དྲུག་པ། །མཚམས་སུ་ཡང་དག་སོན་པའོ། །ཚངས་པ་དང་ནི་ཟུར་ཐིག་གི། །གཡས་དང་གཡོན་པའི་བདུན་རྣམས་ལས། །ལྔ་པ་གསུམ་པ་དང་པོ་ཡི། །ཆ་ཆུང་གཅིག་གི་མཐའ་ལས་འཐོན། །རང་གི་གཉིས་
པའི་རྩེར་སོང་ནས། །བདུན་པ་ཡིས་ནི་དབུས་སུ་སོང་། །ཐིག་གཅིག་ཀྱོག་པོ་ལྔ་རུ་འགྱུར། །དེ་ནང་དུ་ཡང་ཆ་ཆུང་ཕྱེད། །དོར་ནས་དེ་བཞིན་གཞན་ཡིན་ནོ། །ཚངས་ལས་རིམ་བཞིན་རྒྱལ་པོ་དང་། །ཉི་ཀླུ་ཆུ་མིག་ཆ་ཆུང་ནི། །དོར་བར་ཟླུམ་པོའི་ཐིག་ལྔའོ། །དང་པོ་གསུམ་གྱི་ནང་དུ་ཡང་། །ཆ་ཆུང་ཕྱེད་

ཕྱེད་དོར་ནས་ཐིག །ཟླུམ་པོ་གསུམ་མོ་རྩིབས་ཟླུམ་གྱི། །ཐིག་ལས་གཞན་ནི་དབྱི་བར་བྱ། །མངས་པས་འཇིགས་པས་གཞན་གྱི་ནི། །ཁྱད་པར་བསྡུ་བ་མ་བྱས་སོ། །ཞེས་པའོ། །དེ་ནས་ཐིག་གདབ་པའི་མཐའ་མཆོད་པ་དང་གཏོར་མ་སྔོན་དུ་འགྲོ་བས། །ཨོཾ་ཨཱཿཧཱུཾ་བཛྲ་མུཿཞེས་པས་ཡེ་ཤེས་ཀྱི་ཐིག་
གཤེགས་ཏེ། ནམ་མཁའ་ལ་གནས་པའི་དེ་བཞིན་གཤེགས་པ་རྣམས་ཀྱི་ཐུགས་ཀར་བཅུག་ནས་ཚོན་སྣ་ལྔའི་ཐིག་སྐུད་གནས་ཇི་ལྟ་བ་བཞིན་གཞག་པར་བྱའོ། །ཐིག་གདབ་པའི་ཆོ་གའོ།། །།དེ་ནས་གཏོར་མ་བྱིན་ལ། བཾ་ལཾ་རཾ་ཧཾ་ཡཾ་རྣམས་ཀྱི་ས་བོན་ལས་བྱུང་བའི་དཀར་པོ་དང་སེར་པོ་དང་། དམར་
པོ་དང་ལྗང་གུ་དང་ནག་པོའི་ཚོན་རྣམས་གོ་རིམས་བཞིན་དུ་ཟླ་ཤེལ་དང་། སྤུག་དང་། པདྨ་རཱ་ག་དང་། མརྒཏ་དང་། ཨིནྡྲ་ནཱི་ལ་ལས་བྱུང་བ་རྣམས་སམ། ཡང་ན་མུ་ཏིག་དང་། གསེར་དང་། བྱི་རུ་རྣམས་དང་བསྲེས་པ་དང་། མུ་མེན་ལས་སྐྱེས་པ་རྣམས་ཏེ། བསྲེས་པ་ནི་འདིར་མུ་ཏིག་ལ་སོགས་པ་བཞིའོ། །
ཡང་ན་ཁམ་པ་ལས་བྱས་པའམ། འབྲས་ལས་བྱས་པའམ། མེ་ཏོག་ལས་བྱས་པའམ། ཇི་ལྟར་རིགས་པར་སོ་ཕག་གི་ཕྱེ་མའམ། སོལ་བ་དང་རུས་པའི་ཕྱེ་མ་ལ་སོགས་པས་ཀྱང་རུང་སྟེ། ལེགས་པར་འདུ་བྱས་པ་བཟང་པོ་རྣམས། བྷྲཱུཾ་ཨཾ་ཧྲཱིཿཁཾ་ཧཱུཾ་རྣམས་ལས་སྐྱེས་པའི་རྣམ་པར་སྣང་མཛད་ལ་སོགས་
པའི་ངོ་བོར་བསྒོམས་ནས། ནམ་མཁའ་ལ་བཀོད་པའི་དེ་བཞིན་གཤེགས་པ་རྣམས་ཀྱི་ཐུགས་ཀར། བྷྲཱུཾ་ལ་སོགས་པ་ལས་གྲུབ་པའི་ཡེ་ཤེས་ཀྱི་ཚོན་རྣམས་ཐིག་སྐུད་འདུ་བྱ་བར་བརྗོད་པའི་འབར་བའི་ལྟ་སྟངས་ཀྱིས་བཀུག་སྟེ་བཅུག་པ་རྣམས་དང་རོ་གཅིག་ཏུ་གྱུར་པས། ཡེ་ཤེས་ཀྱི་ཚོན་དུ་གྲུབ་པ་
རྣམས་ལ་བྷྲཱུཾ་ལ་སོགས་པ་མངོན་པར་བསྔགས་ནས། ཨོཾ་བཛྲ་ཙི་ཏྲ་ས་མ་ཡ་ཧཱུཾ། ཞེས་པའི་སྔགས་ཀྱིས་བརྒྱ་རྩ་བརྒྱད་དུ་བསྔགས་སོ། །དེ་བཞིན་དུ་འབར་བའི་བལྟ་བས་ཡང་དག་པར་གཟི་བྱིན་བསྐྱེད་ཅིང་རེ་རེ་ལ་ཧཱི་ཡིག་བཀོད་ནས་བདེན་པ་གང་གིས་སེམས་ཅན་རྣམས་རྡུལ་ཚོན་མང་ཞིང་། སངས་
རྒྱས་བཅོམ་ལྡན་འདས་རྣམས་ནི་སེམས་ཅན་རྣམས་ལ་ཆགས་པས་རྗེས་སུ་ཆགས་པར་འགྱུར་བའི་བདེན་པ་དེས་རྡུལ་ཚོན་རྣམས་འབར་བར་གྱུར་ཅིག་ཅེས་བདེན་པའི་བྱིན་གྱི་རླབས་ཀྱིས་སྦར་བར་བྱའོ། །ལྷ་བསྒོམ་པ་ཕུལ་དུ་བྱུང་བ་ལས་ནི་འབར་རོ། །དྲི་དང་མེ་ཏོག་ལ་སོགས་པས་མཆོད་ནས་

སྣོད་གསར་པར་གཞག་པར་བྱའོ། །དེ་ནས་དཀྱིལ་འཁོར་གྱི་ལྟེ་བ་ན་གནས་པའི་ཕུར་པ་འཆད་པར་འགྱུར་བའི་ཧཱུཾ་བཞི་པའི་སྔགས་ཀྱིས་བཏོན་ནས། བློས་རང་གི་ལག་པའི་རྡོ་རྗེ་ལ་བསྟིམས་ཏེ། ཕུར་བུའི་ཁུང་བུ་ཚོན་ལྔས་བཀང་ལ་མཉམ་པར་བྱས་ཏེ། དྲིལ་བུའི་སྒྲ་དང་རྡོ་རྗེའི་གླུས་
མཚན་མ་ངན་པ་བསལ་བར་བྱའོ། །ཆོས་དབྱིངས་འདི་ནི་དག་པ་སྟེ། །སེམས་ཅན་རྣམས་ནི་རབ་གྲོལ་མཛད། །རང་ཉིད་རྒྱལ་པོ་རྡོ་རྗེ་འཆང་། །དེ་བཞིན་གཤེགས་པ་ཀུན་གྱི་གནས། །ཉེས་པ་ཀུན་ལས་རྣམ་པར་གྲོལ། །འཁོར་ལོའི་ནང་དུ་ཡང་དག་གནས། །ཞེས་པས་ཆོས་དབྱིངས་
རྣམ་པར་དག་པར་མོས་ནས། དང་པོར་ནང་གི་དཀྱིལ་འཁོར་དུ་འདུག་སྟེ། ལག་པ་གཡས་པ་རྡོ་རྗེས་མཚན་ཞིང་གཡོན་པ་རྡོ་རྗེ་ཁུ་ཚུར་གྱིས། ཨོཾ་བཛྲ་ར་ག་ས་མ་ཡ། ཨོཾ་ཨཱཿཧཱུཾ་ཞེས་པའམ། ཨོཾ་བཛྲ་ཙི་ཏྲ་ས་མ་ཡ་ཧཱུཾ། ཞེས་པ་བརྗོད་ཅིང་དཀྱིལ་འཁོར་གྱི་ནང་དུ་ཤར་དུ་ཕྱོགས་པར་འདུག་པས་དབང་ལྡན་
གྱི་མཚམས་ནས་བརྩམས་ཏེ་གཡས་སྐོར་དུ་ཚོན་དགྱེ་བར་བྱའོ། །ཕྱི་ནས་སློབ་དཔོན་ནམ་རི་མོ་མཁན་ལ་སོགས་པས་ཇི་ལྟར་བདེ་བར་དགྱེ་བར་བྱའོ། །སྦོམ་དུ་སྒོ་ཡི་ཉི་ཤུ་ཆར། །རེ་ཁཱ་ཡང་དག་དྲང་བར་བྱ། །མཉམ་ཉིད་དྲང་ལ་མ་ཆད་པ། །ཇི་ལྟར་རིགས་པར་ཕན་ཚུན་གྱི། །བར་གྱི་ཚད་ནི་ནས་ཙམ་
སྟེ། །འོག་དང་སྟེང་ནི་ཅི་མཛེས་བྱ། །སྦོམ་པོར་བཀྱེ་ན་ནད་འབྱུང་ངོ་། །ཕྲ་མོ་ཡིས་ནི་ནོར་རྣམས་ཉམས། །ཡོན་པ་ཡིས་ནི་རྣམ་པར་སྡང་། །ཆད་ན་བླ་མ་སློབ་མ་འཆི། །གཡས་སྐོར་མིན་པར་བཀྱེ་ན་ནི། །ཚོན་རྣམས་ཕུར་པས་བཏབ་པར་འགྱུར། །ཕུར་པས་བཏབ་པ་ནི་དངོས་གྲུབ་ཀྱི་རྒྱུ་ཡང་མ་
ཡིན་པའོ། །ཕན་ཚུན་འདྲེས་ན་རིགས་ཆད་པར་འགྱུར་རོ། །བཅོམ་ལྡན་འདས་ཀྱིས་ཉེས་པ་ཞི་བར་བྱ་བའི་ཕྱིར་གསུངས་པ། ཚོན་བཀྱེ་བ་ལ་ཉེས་པ་གང་། །དེ་ཉིད་བསམ་སྦྱོར་མེད་ལའོ། །དེ་ཉིད་བསམ་བཟང་སྦྱོར་རྣམས་ལ། །སུས་ཀྱང་བར་ཆད་བྱ་མི་ནུས། །དཀྱིལ་འཁོར་ཇི་ལྟ་བ་དེ་བཞིན། །ཇི་
སྲིད་དུ་ནི་བརྟགས་པ་ཡིན། །ཞེས་པའི་བར་དུའོ། །ཚོན་གྱི་རེ་ཁཱ་རྣམས་ལ་ཡང་རིན་ཆེན་དཀར་པོ་ལ་སོགས་པ་ལས་བྱས་པའི་ཐུར་མ་ལ་སོགས་པའི་ངོ་བོར་མོས་པར་བྱའོ། །འཇུག་དང་འབྱུང་ལས་ཐིག་ལས་ཚོན། །འགོམས་པའི་སྡིག་པས་འཇིགས་པ་ཡིས། །རྡོ་རྗེ་ཤུགས་ཀྱི་ཡེ་ཤེས་ཀྱིས་

ཚོན་གྱི་རེ་ཁཱ་ཡིད་ཀྱིས་ནམ་མཁའ་ལ་བཏེག་ལ། ཨོཾ་བཛྲ་བེ་གཱ་ཀྲ་མ་ཧཱུཾ་ཞེས་བརྗོད་ཅིང་རྩ་བའི་ཐིག་གི་ནང་གི་དཀྱིལ་འཁོར་དུ་བྲི་བའི་ཕྱིར་འཇུག་པ་འབྱུང་བར་འགྱུར་རོ། །དེ་ལ་དང་པོར་ལྷ་ཐམས་ཅད་ཀྱི་དཀྱིལ་འཁོར་ལ་ཕྱི་དང་ནང་གི་དཀྱིལ་འཁོར་གྱི་སྤྱིའི་ཚོན་གྱི་ཁ་དོག་གི་རིམ་པ་བརྗོད་པར་བྱའོ། །
ཤར་དང་ལྷོ་དང་ནུབ་དང་བྱང་གི་ཕྱོགས་ཀྱི་དེ་བཞིན་གཤེགས་པ་དང་། དབུས་ཀྱི་གཙོ་བོའི་ཁ་དོག་གི་གོ་རིམས་བཞིན་དུ་ཕྱིའི་རེ་ཁཱ་ནས་བརྩམས་ཏེ། ནང་གི་རེ་ཁཱའི་བར་དུ་ཚོན་ལྔའི་རྩིག་པའི་རེ་ཁཱའི་ཁ་དོག་གོ། །ཕྱོགས་དང་དབུས་སུ་ལྷ་གཞན་དགོད་པ་ནི་རྒྱས་འདེབས་ཀྱི་དེ་བཞིན་གཤེགས་པའི་
མདོག་གི་རིམ་པས་སོ། །བསྒོམ་བྱའི་དཀྱིལ་འཁོར་ལ་རྩིག་པ་ལྔ་པོ་འདི་དག་རིན་པོ་ཆེ་ཁ་དོག་ལྔ་ལས་གྲུབ་ཅིང་ནས་ཀྱི་བར་ཙམ་པའོ་ཞེས་པ་ནི་ཁ་ཅིག་གོ། །རྩིག་པ་འདི་ནི་གཅིག་པ་ཉིད་ཀྱིས་རིམ་གྱིས་སྟེང་ནས་སྟེང་དུ་ཁ་དོག་ལྔའི་རིན་པོ་ཆེ་ལས་བྱས་པའོ་ཞེས་པ་ནི་གཞན་དག་གོ། །དེ་ལ་
འདོད་པ་དང་པོ་ལ་ནི་རིན་པོ་ཆེའི་སྣམ་བུའི་ས་དམར་པོ་དང་། དོ་ཤལ་དང་དོ་ཤལ་ཕྱེད་པའི་ས་ནག་པོའོ། །འདོད་པ་གཉིས་པ་ལ་ནི་དང་པོའི་ཁ་དོག་གི་རིན་པོ་ཆེའི་རང་བཞིན་གྱི་ཆ་ཉིད་རྣམ་པར་བཀྲ་བའི་རིན་པོ་ཆེའི་སྣམ་བུའོ། །ཡང་ན་དེ་ལ་ཁ་དོག་གཞན་གྱི་རིན་པོ་ཆེ་ལས་བྱས་པ་བཀོད་པའི་
རིན་པོ་ཆེའི་སྣམ་བུའོ། །ལྔ་པའི་ཁ་དོག་གི་རིན་པོ་ཆེའི་རང་བཞིན་གྱི་ཆ་ཉིད་དྲ་བ་དང་དྲ་བ་ཕྱེད་པ་སྣ་ཚོགས་པའི་སྣམ་བུའམ། ཡང་ན་དེ་ལ་མདོག་གཞན་གྱི་རིན་པོ་ཆེ་ལས་བྱས་པ་བཀོད་པའི་དྲ་བ་དང་དྲ་བ་ཕྱེད་པ་སྣམ་བུའོ། །ཕྱོགས་གཞན་བརྗོད་པ་ནི་དེའི་སྟེང་དུ་རིན་པོ་ཆེའི་སྣམ་བུ་དྲ་བའི་
སྣམ་བུ་ལྟ་བུའོ། །འདོད་པ་གཉིས་ཀ་ལ་ཡང་སྟེགས་བུ་ནི་ཤེལ་ལམ་གསེར་གྱི་རང་བཞིན་ནམ་པདྨ་རཱ་གའི་རང་བཞིན་ནམ། །རིན་པོ་ཆེ་གཞན་ཡང་རུང་སྟེ་ཇི་ལྟར་མཛེས་པའོ། །རིན་པོ་ཆེའི་ཤར་བུ་དང་མདའ་ཡབ་རྣམས་ནི་དཀར་པོའོ། །རིན་པོ་ཆེའི་ཤར་བུ་དང་མདའ་ཡབ་དང་། དར་དཔྱངས་ཀྱི་བར་
གྱི་ས་གཞི་ནི་སྔོན་པོ་སྟེ། ནམ་མཁའི་ངོ་བོ་ཡིན་པའི་ཕྱིར་རོ། །དེ་ཉིད་ཀྱི་ཕྱིར་བར་གྱི་སྣམ་བུ་ལ་མུན་པའི་སྣམ་བུ་ཞེས་བརྗོད་དོ། །གདུང་ནི་ཇི་ལྟར་མཛེས་པར་རིན་པོ་ཆེ་ལས་བྱས་པ་སྟེ། རིན་པོ་ཆེ་སྣ་ཚོགས་པའི་པ་ཏྲ་འཕྲོ་བ་ལ་སོགས་པས་བརྒྱན་པའོ། །རྟ་བབས་ཀྱི་ཀ་བ་རྣམས་ནི་རང་

རང་གི་ཕྱོགས་ཀྱི་དེ་བཞིན་གཤེགས་པའི་ཁ་དོག་གོ། །ཀྱོག་པོའི་ནང་གི་བླ་རེས་ཀྱི་འོག་གི་ས་ཡང་སྟེ། དེ་ནི་རང་གི་དེ་བཞིན་གཤེགས་པའི་ཁ་དོག་གི་འོད་ཀྱིས་སྤྲས་པའི་ནམ་མཁའི་རང་བཞིན་ནོ། །རྟ་རྨིག་དང་། བ་རན་དང་། ཆུ་སྲིན་གྱི་སྣམ་བུ་ནི་ཁ་དོག་ཇི་ལྟར་མཛེས་པར་
རོ། །འཁོར་ལོ་རྣམས་ནི་གསེར་གྱི་ཁ་དོག་གོ། །ཁ་ཅིག་རིན་པོ་ཆེ་གཞན་ལས་ཀྱང་བྱས་པའོ་ཞེས་སོ། །རི་དགས་དང་རི་དགས་མོ་ནི་གསེར་གྱི་རང་བཞིན་ཏེ། རིན་པོ་ཆེ་གཞན་གྱིས་སྤྲས་པའོ། །སྣ་ཚོགས་རྡོ་རྗེའི་ལྟེ་བ་ནི་ནག་པོའོ། །ཁ་ཅིག་ཏུ་གཙོ་བོའི་དེ་བཞིན་གཤེགས་པའི་མདོག་གོ། །དབུས་ཀྱི་
ར་རྣམས་ནི་རང་རང་གི་ཕྱོགས་རྣམས་ཀྱི་དེ་བཞིན་གཤེགས་པའི་མདོག་གོ། །དེ་ལས་གཞན་པ་རྣམས་ནི་དེའི་གློ་དག་གི་དེ་བཞིན་གཤེགས་པའི་མདོག་གོ། །ར་ལྔ་བ་ལ་ནི་དེ་ལས་གཞན་པའི་ཕྱོགས་དང་དབུས་ཀྱི་དེ་བཞིན་གཤེགས་པའི་མདོག་སྟེ་ཇི་ལྟར་རིགས་པར་རོ། །ཕྱོགས་གཅིག་གི་ར་ཐམས་ཅད་
ཀྱང་རང་རང་གི་ཕྱོགས་ཀྱི་དེ་བཞིན་གཤེགས་པའི་ཁ་དོག་ཀྱང་ཁ་ཅིག་ཏུའོ། །འཁོར་ལོའི་དབང་པོའི་ཞལ་བཞི་པ་ཉིད་ལ་རང་རང་གི་ཕྱོགས་ཀྱི་ཞལ་གྱི་མདོག་གོ་ཞེས་པ་ནི་ཕྱོགས་གཞན་ནོ། །བུམ་པ་བཟང་པོ་རྣམས་ནི་གསེར་ལས་བྱས་པའོ། །དཔག་བསམ་གྱི་ཤིང་རྣམས་ནི་དེ་ལས་གཞན་པའི་
ཤིང་བཟང་པོ་ལྟ་བུའོ། །པདྨའི་ལྟེ་བ་ནི་ལྗང་གུའོ། །གེ་སར་ནི་སེར་པོའོ། །འདབ་མ་རྣམས་ནི་ཁ་དོག་སྣ་ཚོགས་པའོ། །དེའི་ས་གཞི་ནི་དམར་པོས་ཤས་ཆེ་བའི་དཀར་པོའོ། །ཆོས་འབྱུང་གི་ཆའི་རེ་ཁཱ་ནི་དཀར་པོའོ། །ཁོར་ཡུག་གི་ཕྱོགས་ལ་ཡང་ཤེལ་ཉིད་ཡིན་ན་རེ་ཁཱ་དཀར་པོའམ་གསེར་ཉིད་
ཡིན་ན་ནི་སེར་པོའོ། །རྡོ་རྗེ་རྣམས་དང་དེའི་རེ་ཁཱ་ནག་པོའོ། །གཞན་རྣམས་ནི་དཀར་པོའམ་སེར་པོའོ་ཞེས་གསུངས་སོ། །རྡོ་རྗེའི་ས་གཞིའི་མདོག་ནི་ཇི་ལྟར་མཛེས་པ་སྟེ། བསྒོམ་བྱའི་དཀྱིལ་འཁོར་ལ་འོག་ཏུ་རླུང་གི་དཀྱིལ་འཁོར་གྱི་མཐའ་ནས་སྟེང་དུ་འོག་མིན་གྱི་མཐའི་བར་དུ་རྡོ་རྗེའི་ར་བ་
གནས་པའི་ཕྱིར་དང་། རླུང་ལ་སོགས་པ་རྣམས་ནི་ཇི་ལྟར་རིགས་པར་ཁ་དོག་སྣ་ཚོགས་པའི་ཕྱིར་རོ། །འོད་ཟེར་རྣམས་ནི་དེ་བཞིན་གཤེགས་པ་ལྔའི་ཁ་དོག་སྟེ་འཕྲོ་བའི་ཚུལ་ལོ། །འཇམ་པའི་རྡོ་རྗེ་ནི། རྫོགས་སངས་ཡེ་ཤེས་སྐུ་ཡིན་ཕྱིར། །ངག་དབང་རྡོ་རྗེའི་རིགས་སུ་བརྗོད། ཆོས་སྐུའི་

རང་བཞིན་དག་པ་ལ། །འདི་ཡི་ཐུགས་ཀྱི་དཀྱིལ་འཁོར་རོ། །ཞེས་པའི་རིགས་པས། །དཀར་པོ་སེར་པོ་དེ་བཞིན་དམར། །ལྗང་གུ་དང་ནི་ནག་པོ་ཉིད། །རྩིག་པའི་ཚོན་ཞེས་གསུངས་སོ། །གང་གི་ཚེ། ཆོས་རྣམས་རང་བཞིན་གྱིས་ནི་དཀར། །དེས་ན་ངག་དབང་འདིར་དཀར་ཉིད། །ཅེས་
གསུངས་པས། །གསུང་རྡོ་རྗེ་དཀར་པོ་གཙོ་བོར་གྱུར་པ་དེའི་ཚེ་ནི་ཚོན་གྱི་རེ་ཁཱ་དཀར་པོ་དང་སེར་པོ་དང་ལྗང་གུ་དང་དཀར་པོའོ། །ཁ་སྦྱོར་དུ་གསུངས་པའི་རྡོ་རྗེ་སེམས་དཔའ་དཀར་པོ་ཉིད་ཡིན་ཡང་མི་བསྐྱོད་པ་དང་། ལྷན་ཅིག་རོ་གཅིག་པ་ཉིད་དུ་བསྟན་པའི་ཕྱིར། ནང་གི་རྩིག་པ་ནག་པོ་ཉིད་དོ། །གཞན་
དུ་ནི་དཀར་པོ་ཁོ་ན་ཡིན་ཏེ། ཇི་སྐད་དུ། གསུང་རྡོ་རྗེ་གཙོ་བོར་གྱུར་པ་ཁ་ཅིག་ཏུ་དཀར་པོ་ཉིད་དུ་འགྱུར་བའོ་ཞེས་གསུངས་སོ། །རྩ་བའི་ཐིག་གི་ནང་གི་དཀྱིལ་འཁོར་དུ་ཡང་ཟུར་ཐིག་གཉིས་གཉིས་ཀྱིས་བཅད་པའི་ཕྱོགས་བཞིའི་ས་གཞི་རྣམས་རང་རང་གི་དེ་བཞིན་གཤེགས་པའི་མདོག་གོ། །བསྒོམ་
བྱའི་དཀྱིལ་འཁོར་གྱི་ཕྱོགས་བཞིའི་ཐིག་རྣམས་དེ་བཞིན་ནོ། །ཀ་བ་རྣམས་ཀྱང་དེ་བཞིན་ཏེ། རང་རང་གི་རེའུ་མིག་གི་དེ་བཞིན་གཤེགས་པའི་མཚན་མའི་ཕྲེང་བས་མཚན་པའོ། །གཙོ་བོའི་ས་ནི་གཙོ་བོའི་མདོག་གོ། །སྣ་ཚོགས་པདྨའི་འདབ་མ་ནི། །བདེན་བྲལ་ལྗང་ལ་དབང་ལྡན་ནག །མེ་
དང་རླུང་གི་མཚམས་ནི་སེར། །ཕྱོགས་རྣམས་ཀྱི་ནི་དམར་པོའོ། །གཙོ་བོའི་སྣམ་བུ་ལ་ནི་གཙོ་བོའི་མཚན་མའི་ཕྲེང་བའོ། །རེ་ཁཱ་གཞན་ནི་མདོག་དང་སྦོམ་ཕྲ་ཇི་ལྟར་མཛེས་པའོ། །བདེ་མཆོག་གི་དཀྱིལ་འཁོར་ལ་ནི་ཐུགས་ཀྱི་འཁོར་ལོ་ནག་པོ། དེའི་རྩིབས་ཀྱི་བར་རྣམས་ནི་དམར་པོ་སྟེ། གསུང་
གི་འཁོར་ལོའི་ལྟེ་བ་ཡིན་པའི་ཕྱིར་རོ། །གསུང་གི་འཁོར་ལོ་དམར་པོའོ། །དེའི་རྩིབས་བར་རྣམས་ནི་དཀར་པོ་སྟེ། སྐུའི་འཁོར་ལོའི་ལྟེ་བ་ཡིན་པའི་ཕྱིར་རོ། །སྐུའི་འཁོར་ལོ་ནི་དཀར་པོའོ། །དེའི་རྩིབས་རྣམས་ཀྱི་བར་ནི་ཤར་ལ་སོགས་པའི་ཕྱོགས་རྣམས་སུ་རྣམ་པར་སྣང་མཛད་ལ་སོགས་པའི་
དེ་བཞིན་གཤེགས་པའི་ཁ་དོག་གོ། །མུ་ཁྱུད་གསུམ་ནི་གོ་རིམས་བཞིན་དུ་རྡོ་རྗེ་ནག་པོ་དང་། པདྨ་དམར་པོ་དང་། འཁོར་ལོ་དཀར་པོའི་ཕྲེང་བས་བསྐོར་བའོ། །ཕྱི་ངོས་ནས་བརྩམས་ཏེ་ནང་གི་བར་དུ་ལྗང་གུ་དང་། དཀར་པོ་དང་། དམར་པོ་དང་། སེར་པོ་དང་། ནག་པོའི་ཁ་དོག་གི་རེ་ཁཱ་ལྔའོ། །

ཤར་དང་། བྱང་དང་། ནུབ་དང་། ལྷོ་དང་། དབུས་ཀྱི་ས་རྣམས་དང་། ཐོག་རྣམས་ཀྱི་ཁ་དོག་དཀར་པོ་དང་། ལྗང་གུ་དང་། དམར་པོ་དང་། སེར་པོ་དང་། ནག་པོའོ། །གཞན་ནི་རེ་ཁཱ་ལྔ་དང་། ས་གཞི་དང་། ཐོག་རྣམས་ནག་པོ་དང་། ལྗང་གུ་དང་། དམར་པོ་དང་། སེར་པོ་དང་།
དཀར་པོ་དང་བསྲེས་པའི་སྔོན་པོའི་མདོག་གོ་ཞེས་ཟེར་རོ། །དེ་བཞིན་དུ་སྔ་མ་དང་། ཕྱི་མར་ཁ་དོག་གི་རིམ་པ་ཡོངས་སུ་བསམས་ནས་རྡུལ་ཚོན་དགྱེ་བར་བྱའོ། །དེ་ཡང་སྐལ་བ་དང་མི་ལྡན་པ་འདུས་ན་མཚན་མ་དང་ཕྱག་རྒྱ་ཇི་ལྟར་རིགས་པར་བྲིའོ། །སྐལ་བ་དང་མི་ལྡན་པ་མེད་ན་ནི་ལྷའི་སྐུ་བྲི་བར་
བྱ་ཞིང་། བྲིས་སྐུའམ། ལུགས་མའམ། འབུར་དུ་བཏོད་པའམ། ལེགས་པར་འདུས་བྱས་པ་གཞག་པར་བྱའོ། །དེ་ལྟར་ཀླུའི་བློའི་ཞབས་ཀྱིས། ཇི་ལྟར་ནུས་པས་དཀྱིལ་འཁོར་དུ། །ས་བོན་དགོད་བྱ་ཡང་ན་ནི། །མཚན་མའམ་ལྷ་ཡི་གཟུགས་ཉིད་དེ། །ལུགས་མའམ་བཟོ་བྱས་དགོད་པར་
བྱ། །ཞེས་གསུངས་སོ། །ཕྱག་རྒྱ་བྲི་བ་ནི་མངོན་པར་བརྗོད་པའི་རྒྱུད་བླ་མ་ལས་གསུངས་ཏེ། མི་ནུས་ན་ནི་བྲིས་པ་ཡི། །ཕྱག་རྒྱའམ་མཚན་མ་དགོད་པར་བྱའོ། །གང་ཡང་གསུངས་པ། ཚོན་ནམ་ཡང་ན་པིར་རྣམས་ཀྱིས། །བྲིས་པ་རྣམས་ཀྱིས་རྣམ་པར་སྤྲས། །ཞེས་སོ། །དཔལ་ཁ་སྦྱོར་གྱི་
རྒྱུད་དུ་ཡང་། དེ་ལྟར་ལུགས་མ་དང་། འདུས་བྱས་པ་ལ་སོགས་པའི་གཟུགས་དང་། མཚན་མའི་ཕྱག་རྒྱ་དང་ལྡན་པའོ་ཞེས་གསུངས་སོ། །དེའི་ཕྱིར་འཇམ་པའི་རྡོ་རྗེའི་དཀྱིལ་འཁོར་ལ། ལྟེ་བར་བཅོམ་ལྡན་འདས་འཇམ་པའི་རྡོ་རྗེའི་ཟླ་བ་རལ་གྲི་སྔོ་བསངས་སོ། །ཤར་དུ་ཟླ་བ་ལ་རྣམ་པར་
སྣང་མཛད་ཀྱི་འཁོར་ལོ་དཀར་པོ་རྩིབས་བརྒྱད་པའོ། །ལྷོར་ཉི་མ་ལ་རིན་ཆེན་འབྱུང་ལྡན་གྱི་རིན་པོ་ཆེ་ལྗང་གུ་ཆ་དགུ་པའོ། །ནུབ་ཏུ་ཉི་མ་ལ་མགོན་པོ་འོད་དཔག་མེད་ཀྱི་པདྨ་དམར་པོ་འདབ་མ་བརྒྱད་པའོ། །བྱང་དུ་ཉི་མ་ལ་དོན་ཡོད་གྲུབ་པའི་རལ་གྱི་ལྗང་གུའོ། །མེར་ཟླ་བ་ལ་སྤྱན་མའི་མིག་འབྲས་
ནག་པོ་ཅན་གྱི་མིག་དཀར་པོ་གཉིས་སྤྲིན་ལ་གནས་པའོ། །བདེན་བྲལ་དུ་ཟླ་བ་ལ་མཱ་མ་ཀཱིའི་རྡོ་རྗེ་ནག་པོ་རྩེ་ལྔ་པ་སྟེ་རྒྱུད་དུ་དེ་ལྟར་བཤད་པའི་ཕྱིར་རོ། །རླུང་དུ་ཟླ་བ་ལ་གོས་དཀར་མོའི་པདྨ་དམར་པོ་ཁ་བྱེ་བ་ཡུ་བ་དང་རྩ་བ་དང་བཅས་པའོ། །དབང་ལྡན་དུ་ཟླ་བ་ལ་སྒྲོལ་མའི་ཨུཏྤལ་མདོག་སྔོ་སེར་རོ། །

མེ་ལ་སོགས་པའི་མཚམས་བཞི་དང་། ཤར་སྒོའི་གཡོན་དང་གཡས་སུ་ཆ་ཆུང་གཉིས་གཉིས་སྤངས་པའི་འགྲམ་དག་ཏུ་ཟླ་བ་རྣམས་ལ་གོ་རིམས་བཞིན་དུ་གཟུགས་དང་སྒྲ་དང་། དྲི་དང་། རོ་དང་། རེག་བྱ་དང་། ཆོས་ཀྱི་དབྱིངས་ཀྱི་རྡོ་རྗེ་མ་རྣམས་ཀྱི་མེ་ལོང་དཀར་པོ་དང་། དྲི་ཟའི་པི་ཝང་སྔོན་པོ་དང་
དྲི་སེར་པོའི་དུང་དང་། རོའི་སྣོད་དམར་པོ་དང་། རས་སྣ་ཚོགས་དང་། ཆོས་འབྱུང་དཀར་པོའོ། །ཤར་ལ་སོགས་པའི་སྒོར་ཉི་མ་རྣམས་ལ་གཤིན་རྗེ་མཐར་བྱེད་དང་། ཤེས་རབ་མཐར་བྱེད་དང་། པདྨ་མཐར་བྱེད་དང་བགེགས་མཐར་བྱེད་ཀྱི་གོ་རིམས་བཞིན་དུ་རྡོ་རྗེ་ཐོ་བ་ནག་པོ་དང་། རྡོ་རྗེས་མཚན་
པའི་དབྱུག་པ་དཀར་པོ་དང་། པདྨ་དམར་པོ་དང་། རྡོ་རྗེ་ཁ་གྱེས་པ་སྔོན་པོའོ། །འདིར་ཟླ་བ་དང་ཉི་མ་བཅུ་དགུ་ནི་སྣ་ཚོགས་པདྨ་ལ་གནས་པའོ། །མཚན་མ་ཐམས་ཅད་ནི་འོད་ཟེར་དང་བཅས་པ་རང་རང་གི་ཕྱོགས་སུ་མགོ་བསྟན་པའོ། །འཁོར་ལོའི་དབང་ཕྱུག་ནི་མགོ་ནུབ་ཏུ་བསྟན་པའོ། །དེ་ལྟར་
ཕྱི་མ་རྣམས་སུ་ཡང་ངོ་། །རྡོ་རྗེ་སེམས་དཔའ་འཁོར་ལོའི་དབང་ཕྱུག་ཉིད་ལ་ནི་དབུས་སུ་ཆུ་སྐྱེས་དང་ཟླ་བ་ལ་ནི་ཞི་བའི་རྡོ་རྗེ་སྔོན་པོའོ། །ཁ་ཅིག་ནི་སྣ་ཚོགས་རྡོ་རྗེའོ་ཞེས་སོ། །མཁས་པ་རྣམས་ནི་དབུས་ཀྱི་འོད་ཟེར་གྱི་ཐིག་ཟླུམ་པོ་ལ་ཚོན་གྱིས་རེ་ཁཱ་མི་བྱའོ་ཞེས་སོ། །ཟླུམ་པོའི་ཐིག་གི་ཕྱི་ངོས་སུ་
ཚངས་པའི་ཐིག་གི་གློ་སོ་སོར་ཆ་ཆུང་བཞི་དོར་ནས་བུམ་པ་ཆ་ཆུང་བཞི་པ་སྟེ། བདུད་རྩིས་བཀང་པའི་གསེར་གྱི་བུམ་པ་ཆ་བརྒྱད་དོ་ཞེས་ཕྱོགས་གཅིག་གོ། །གཞན་ནི་རིན་པོ་ཆེའི་རང་བཞིན་རང་གི་ཕྱོགས་ཀྱི་དེ་བཞིན་གཤེགས་པའི་མདོག་གོ་ཞེས་སོ། །འདི་དང་ཕྱི་མ་རྣམས་ལ་དབུས་སུ་དེ་བཞིན་
གཤེགས་པ་གཞན་པའི་མཚན་མ་དགོད་པ་ནི། དེའི་དབུས་སུ་དབུས་ཀྱི་མཚན་མ་བྲི་བར་བྱའོ། །བསྡུས་པའི་རིམ་པར་གསུངས་པའི་དཀྱིལ་འཁོར་ལ། དབུས་སུ་ཉི་མ་ལ་མི་བསྐྱོད་པའི་རྡོ་རྗེ་ཁ་གྱེས་པ་རྩེ་ལྔ་པ་ཨིནྡྲ་ནཱི་ལ་ལྟ་བུ་དང་། རེག་བྱ་རྡོ་རྗེ་མའི་སྣ་ཚོགས་པའི་གོས་སོ། །རྣམ་པར་
སྣང་མཛད་ལ་སོགས་པའི་རིམ་པ་དང་པོ་དང་གཉིས་པར་གནས་པ་བཅུ་གཉིས་པོ་རྣམས་ཀྱི་མཚན་མ་རྣམས་ནི་སྔ་མ་བཞིན་ནོ། །རིམ་པ་གསུམ་པའི་སྒོའི་འགྲམ་གྱི་སྣམ་བུ་ལ་ཚངས་པའི་ཐིག་ནས་ཆ་ཆུང་བཞི་དོར་བར་གཡོན་དུ་བྱམས་པའི་ཀླུ་ཤིང་གི་མེ་ཏོག་གི་འཁོར་ལོ་དང་བཅས་པའོ། །

གཡས་སུ་སའི་སྙིང་པོའི་འཁོར་ལོ་རྩིབས་བརྒྱད་པ་དཀར་པོའོ། །ལྷོར་དེ་བཞིན་དུ་ཕྱག་ན་རྡོ་རྗེའི་དང་། ནམ་མཁའི་སྙིང་པོའི་རྡོ་རྗེ་དང་། རིན་པོ་ཆེ་མརྒཏ་ཆ་དགུ་པའོ། །ནུབ་ཏུ་དེ་བཞིན་དུ་འཇིག་རྟེན་དབང་ཕྱུག་དང་། འཇམ་པའི་དབྱངས་ཀྱི་པདྨ་དམར་པོ་དང་རྡོ་རྗེའོ། །བྱང་དུ་
དེ་བཞིན་དུ་སྒྲིབ་པ་ཐམས་ཅད་རྣམ་པར་སེལ་བ་དང་། ཀུན་དུ་བཟང་པོའི་རལ་གྲི་དང་རྡོ་རྗེའོ། །ཤར་ལ་སོགས་པའི་སྒོ་རྣམས་སུ་རིམ་པ་བཞིན་དུ་གཤིན་རྗེ་གཤེད་ལ་སོགས་པ་རྣམས་ཀྱི་རྡོ་རྗེ་ཐོ་བ་དང་། རྡོ་རྗེས་མཚན་པའི་དབྱུག་པ་དཀར་པོ་དང་། པདྨ་དམར་པོ་དང་། སྣ་ཚོགས་རྡོ་རྗེའོ། །མེ་ལ་སོགས་
པའི་མཚམས་སུ་གོ་རིམས་བཞིན་དུ་མི་གཡོ་བ་དང་། འདོད་པའི་རྒྱལ་པོ་དང་། དབྱུག་པ་སྔོན་པོ་དང་། སྟོབས་པོ་ཆེ་རྣམས་ཀྱི་རལ་གྲི་དང་། རྡོ་རྗེ་དང་རྡོ་རྗེས་མཚན་པའི་དབྱུག་པ་སྔོན་པོ་དང་། རྡོ་རྗེས་མཚན་པའི་དབྱུག་པ་ནག་པོའོ། །གཙུག་ཏོར་འཁོར་ལོས་སྒྱུར་བའི་རྡོ་རྗེ་སྔོན་པོ་དང་། གཤིན་རྗེ་
གཤེད་ཀྱི་མཚན་མ་ལ་སོགས་ཕྱི་ངོས་སུའོ། །ཁ་ཅིག་ནི་འཁོར་ལོ་སེར་པོ་ཞེས་བྱའོ། །གནོད་མཛེས་རྒྱལ་པོའི་རྡོ་རྗེ་ནི་པདྨ་མཐར་བྱེད་ཀྱི་མཚན་མ་ལས་ཕྱི་ངོས་སུའོ། །བྱམས་པ་ལ་སོགས་པ་བརྒྱད་རྣམས་ཀྱི་མཚན་མ་ནི་ཟླ་བ་ལ་གནས་པའོ། །གཤིན་རྗེ་གཤེད་ལ་སོགས་པའི་མཚན་མ་བཅུ་
ནི་ཉི་མ་ལ་གནས་པའོ། །འདིར་ཉི་མ་དང་ཟླ་བ་སུམ་ཅུ་རྩ་གཅིག་ནི་སྣ་ཚོགས་པདྨ་ལ་གནས་པའོ། །བུམ་པ་བྲི་བ་ནི་སྔར་བཞིན་ནོ། །ཁ་སྦྱོར་དུ་གསུངས་པའི་རྡོ་རྗེ་སེམས་དཔའི་དཀྱིལ་འཁོར་ལ་དབུས་སུ་ཟླ་བ་ལ་རྡོ་རྗེ་སེམས་དཔའི་རྡོ་རྗེ་རྩེ་ལྔ་པ་སྔོན་པོའོ། །ཤར་དུ་ཟླ་བ་ལ་རྣམ་པར་སྣང་མཛད་ཀྱི་
འཁོར་ལོའོ། །ལྷོར་ཉི་མ་ལ་རིན་ཆེན་དབང་པོའི་རིན་ཆེན་ནོ། །ནུབ་ཏུ་ཉི་མ་ལ་སྣང་བ་མཐའ་ཡས་ཀྱི་མདའོ། །བྱང་དུ་ཉི་མ་ལ་དོན་ཡོད་གྲུབ་པའི་སྣ་ཚོགས་རྡོ་རྗེའོ། །སྤྱན་མའི་སྤྲིན་ལ་གནས་པའི་མིག་ཉིད་དོ། །མཱ་མ་ཀཱིའི་མདའོ། །གོས་དཀར་མོའི་མདའོ། །སྒྲོལ་མའི་ཨུཏྤ་ལ་དམར་པོའོ། །
རིམ་པ་གཉིས་པར་ཤར་དུ་དྲག་མོའི་མདའོ། །ལྷོར་རྡོ་རྗེ་གཟུགས་མའི་རྡོ་རྗེའོ། །ནུབ་ཏུ་འདོད་ཆགས་རྡོ་རྗེ་མའི་རལ་གྲིའོ། །བྱང་དུ་རྡོ་རྗེ་ཞིབ་མོའི་ཏིལ་པ་ཐུང་ངུའོ། །དཔལ་ལྡན་དུ་རྡོ་རྗེ་གནོད་སྦྱིན་མའི་དབྱུག་པ་དཀར་སེར་རོ། །མེར་མཁའ་འགྲོ་མའི་པདྨ་དམར་སེར་རོ། །བདེན་བྲལ་དུ་སྒྲ་རྡོ་རྗེ་མའི་

ཤཀྟིའོ། །རླུང་དུ་ས་རྡོ་རྗེ་མའི་བུམ་པ་དཀར་ལྗང་ངོ་། །རིམ་པ་གསུམ་པར་ཤར་གྱི་ཕྱོགས་སུ་བཞད་མའི་རྡོ་རྗེ་ཁ་དོག་དམར་པོའོ། །ལྷོར་སྒེག་མའི་འཁར་རྔའོ། །ནུབ་ཏུ་གླུ་མའི་འཁར་རྔའོ། །བྱང་དུ་གར་མའི་རྡོ་རྗེ་རྩེ་གསུམ་པ་ལྗང་གུའོ། །དབང་ལྡན་དུ་གླིང་བུ་མའི་གླིང་བུའོ། །མེར་པི་ཝང་
མའི་པི་ཝང་ངོ་། །བདེན་བྲལ་དུ་མུ་ཀུནྡ་མའི་མུ་ཀུནྡའོ། །རླུང་དུ་རྫ་རྔ་མའི་རྫ་རྔའོ། །ཕྱིའི་སྣམ་བུའི་མེར་མེ་ཏོག་མའི་མེ་ཏོག་གི་ཕྲེང་བའོ། །བདེན་བྲལ་དུ་བདུག་སྤོས་མའི་སྤོས་ཕོར་རོ། །རླུང་དུ་མར་མེ་མའི་མར་མེའི་མཆོད་སྡོང་ངོ་། །དབང་ལྡན་དུ་དྲི་མའི་དྲིའི་དུང་ཆོས་སོ། །ཤར་དུ་མེ་ལོང་མའི་མེ་ལོང་
ངོ་། །ལྷོར་རོ་མའི་རོའི་སྣོད་དོ། །ནུབ་དུ་རེག་བྱ་མའི་གོས་སྣ་ཚོགས་སོ། །བྱང་དུ་ཆོས་མའི་ཆོས་འབྱུང་དཀར་པོའོ། །ཤར་ལ་སོགས་པའི་སྒོར་ནི་གོ་རིམས་བཞིན་དུ་རྡོ་རྗེ་ལྕགས་ཀྱུ་མ་དང་། རྡོ་རྗེ་ཞགས་པ་མ་དང་། རྡོ་རྗེ་ལྕགས་སྒྲོག་མ་དང་། རྡོ་རྗེ་དྲིལ་བུ་མ་རྣམས་ནི་རྡོ་རྗེ་ལྕགས་ཀྱུ་དང་། རྡོ་རྗེ་ཞགས་
པ་དང་། རྡོ་རྗེ་ཕྲེང་བའི་བདག་ཉིད་ཀྱི་རྡོ་རྗེ་ལྕགས་སྒྲོག་དང་། རྡོ་རྗེ་དྲིལ་བུ་མ་རྣམས་ཏེ་ཉི་མ་ལ་གནས་པའོ། །འདིར་བརྗོད་པའི་ཉི་མའི་གདན་ལ་གནས་པའི་མཚན་མ་བདུན་ལས་མཚན་མ་གཞན་ནི་ཟླ་བ་ལ་གནས་པའོ། །ཉི་མ་དང་ཟླ་བ་སུམ་ཅུ་རྩ་བདུན་པོ་འདི་རྣམས་ནི་སྣ་ཚོགས་པདྨའི་སྟེང་དུ་ཐོད་
པ་རྣམས་ལ་གནས་པའོ། །བུམ་པ་བྲི་བ་ནི་སྔ་མ་བཞིན་ཏེ། ཐིག་ཟླུམ་པོ་དྲུག་པ་ལས་ཕྱི་རོལ་ཞེས་པ་ནི་ཁྱད་པར་རོ། །ཡེ་ཤེས་ཀྱི་མཁའ་འགྲོ་མའི་དཀྱིལ་འཁོར་ལ་དབུས་དང་། ཤར་དང་བྱང་དང་། ནུབ་དང་། ལྷོ་རྣམས་སུ་གོ་རིམས་བཞིན་དུ་ཡེ་ཤེས་མཁའ་འགྲོ་མ་དང་། རྡོ་རྗེ་མཁའ་འགྲོ་
མ་དང་། མཁའ་འགྲོ་མ་མི་ཟད་མ་དང་། རོ་ལངས་མ་དང་། གཏུམ་མོ་རྣམས་ཀྱི་རྡོ་རྗེས་མཚན་པའི་ཁ་ཊྭཱཾ་ག་རྣམས་སོ། །དབང་ལྡན་དང་། མེ་དང་བདེན་བྲལ་དང་རླུང་རྣམས་སུ་སེང་གེ་མོ་དང་སྟག་མོ་དང་། ཅེ་སྤྱང་མོ་དང་འུག་པ་མོ་རྣམས་ཀྱི་རྡོ་རྗེ་ལྕགས་ཀྱུ་རྣམས་སོ། །ཤར་དང་བྱང་དང་ནུབ་དང་།
ལྷོའི་སྒོ་རྣམས་སུ་རྒྱལ་པོའི་དབང་མོ་དང་། གསལ་བྱེད་མ་དང་། འཇིགས་བྱེད་མ་དང་། ཀཾ་པོ་ཛཱི་རྣམས་ཀྱི་གོ་རིམས་བཞིན་དུ་ལག་པ་གཉིས་སྙིམ་པ་ཁ་བྱེ་བ་དང་། ཐལ་མོ་ཁ་སྦྱར་བ་དང་། སྙིམ་པ་ཁྲག་གིས་བཀང་བ་དང་། རྡོ་རྗེ་ཐལ་མོ་ཁ་སྦྱར་བའི་མཐེ་བོའི་རྩེ་མོ་གཉིས་སྦྱར་བའི་མཛུབ་མོ་

གཉིས་སྦྱར་བའོ། །འདིར་མཚན་མ་དང་ཕྱག་རྒྱ་རྣམས་ནི་སྣ་ཚོགས་པདྨ་དང་ཉི་མ་ལ་གནས་པའོ། །བསྒོམ་པར་བྱ་བའི་དཀྱིལ་འཁོར་ལ་ཡེ་ཤེས་མཁའ་འགྲོ་མ་ལ་སོགས་པའི་སྣ་ཚོགས་པདྨ་ནི་རིམ་པ་བཞིན་དུ། སེང་གེ་དང་མཆེ་བ་ཅན་དཀར་པོ་དང་། རིན་པོ་ཆེ་སྣ་བདུན་གྱི་
ཕུང་པོ་དང་། མ་ཧེ་དང་། སྦྲུལ་གྱི་དབང་པོ་བརྒྱད་ཀྱི་མཇུག་མ་དང་། རོ་བཞི་ལ་གནས་པ་སྟེ། དེ་ལྟར་རྡུལ་ཚོན་གྱི་དཀྱིལ་འཁོར་ལ་ནི་སྐལ་བ་དང་མི་ལྡན་པ་འདུས་པ་ན་བྲི་བར་མི་བྱའོ། །གཞན་དུ་ནི་ངལ་བས་འཇིགས་པ་དང་། ཡོན་བདག་བསྡུས་པ་ལ་དགའ་བས་སོ། །སྐལ་བ་དང་ལྡན་པ་
རབ་ཏུ་དང་བར་བྱ་བའི་དོན་དུ་ནི་ཡོན་བདག་གི་དབང་ལས་བྲི་བར་བྱའོ། །དེ་ལྟར་ཕྱི་མ་རྣམས་ལ་ཡང་ཇི་ལྟར་འབྱུང་བ་བྲི་བ་དང་མི་བྲི་བར་རིག་པར་བྱའོ། །ཕྱི་ངོས་ཀྱི་ཐིག་ཟླུམ་པོའི་ཕྱི་ངོས་སུ་བུམ་པ་བྲིའོ། །བཅུ་བདུན་གྱི་བདག་ཉིད་ཀྱི་ཀྱེའི་རྡོ་རྗེ་གསུམ་གྱི་དཀྱིལ་འཁོར་ལ་སྣ་ཚོགས་པདྨའི་ལྟེ་བ་
ལ་ཁྲོ་བོའི་རྡོ་རྗེ་སྔོན་པོའོ། །ཤར་དང་ལྷོ་ལ་སོགས་པ་དང་། དབང་ལྡན་དང་མེ་ལ་སོགས་པའི་འདབ་མ་རྣམས་ལ་ནི་རིམ་པ་བཞིན་དུ་རྡོ་རྗེ་དྲག་མོ་དང་། རྡོ་རྗེ་གཟུགས་མ་དང་། འདོད་ཆགས་རྡོ་རྗེ་མ་དང་། རྡོ་རྗེ་ཞི་བ་མོ་དང་། རྡོ་རྗེ་གནོད་སྦྱིན་མ་དང་། རྡོ་རྗེ་མཁའ་འགྲོ་མ་དང་། སྒྲ་རྡོ་རྗེ་མ་དང་། ས་རྡོ་རྗེ་མ་
རྣམས་ཀྱི་མདའ་དང་། རྡོ་རྗེ་དང་རལ་གྲི་དང་། ཏལ་པ་ཐུང་ངུ་དང་། དབྱུག་པ་སེར་པོ་དང་། པདྨ་དམར་སེར་དང་། ཤཀྟི་དང་། བུམ་པ་དཀར་ལྗང་ངོ་། །རིམ་པ་གཉིས་པར་དབང་ལྡན་དང་མེ་ལ་སོགས་པ་རྣམས་སུ་གླིང་བུ་མ་དང་། པི་ཝང་མ་དང་། མུ་ཀུནྡ་མ་དང་། རྫ་རྔ་མ་རྣམས་ཀྱི་གླིང་བུ་
དང་། པི་ཝང་དང་། རྔ་མུ་ཀུནྡ་དང་རྫ་རྔ་རྣམས་སོ། །ཤར་ལ་སོགས་པའི་སྒོ་རྣམས་སུ་རྡོ་རྗེ་ལྕགས་ཀྱུ་མ་དང་། རྡོ་རྗེ་ཞགས་པ་མ་དང་། རྡོ་རྗེ་ལྕགས་སྒྲོག་མ་དང་། རྡོ་རྗེ་དྲིལ་བུ་མ་རྣམས་ཀྱི་རྡོ་རྗེ་ལྕགས་ཀྱུ་དང་། རྡོ་རྗེ་ཞགས་པ་དང་། རྡོ་རྗེ་ལྕགས་སྒྲོག་དང་། རྡོ་རྗེ་དྲིལ་བུ་རྣམས་སོ། །མཚན་མ་
བཅུ་བདུན་པོ་འདི་རྣམས་ནི་ཐོད་པ་དང་ཉི་མ་ལ་གནས་པའོ། །གླིང་བུ་མ་ལ་སོགས་པ་བརྒྱད་ཀྱི་ནི་ཐོད་པའི་འོག་ཏུ་སྣ་ཚོགས་པདྨའོ། །ཕྱག་གཉིས་པ་དང་བཞི་པ་ལ་ནི་ཐོད་པ་མེད་དོ། །ཕྱག་བཅུ་དྲུག་པའི་དཀྱིལ་འཁོར་ལ་སྣ་ཚོགས་པདྨའི་ལྟེ་བ་ལ་ཁྲོ་བོའི་རྡོ་རྗེ་སྔོན་པོའོ། །ཤར་ལ་སོགས་པ་དང་།

དབང་ལྡན་ལ་སོགས་པའི་འདབ་མ་རྣམས་ལ་གཽ་རཱི་དང་། ཙཽ་རཱི་དང་། རོ་ལངས་མ་དང་། ཟ་ཕོད་མ་དང་། སྦོས་མ་དང་། རི་ཁྲོད་མ་དང་། གཏུམ་མོ་དང་། རབ་ཏུ་རྨོངས་བྱེད་མ་རྣམས་ཀྱི་རིམ་པ་བཞིན་དུ་མདའ་དང་། རྡོ་རྗེ་དང་། ཐོད་པ་ཁྲག་དང་བཅས་པ་ལ་གནས་པའི་རུས་སྦལ་དང་། ཚིལ་
གྱིས་བཀང་བ་ལ་གནས་པའི་སྦྲུལ་དང་། ཤས་བཀང་བ་ལ་གནས་པའི་སེང་གེ་དང་། ཁུ་བ་དང་བཅས་པའི་ཐོད་པ་ལ་གནས་པའི་དགེ་སློང་དང་། ཁྲག་དང་བཅས་པའི་ཐོད་པ་ལ་གནས་པའི་སྟག་དང་ཆང་གི་སྣོད་རྣམས་སོ། །རིམ་པ་གཉིས་པའི་མཚམས་རྣམས་སུ་གླིང་བུ་མ་ལ་སོགས་པའི་མཚན་མ་ནི་སྔ་
མ་བཞིན་ནོ། །ཤར་ལ་སོགས་པའི་སྒོར་སྟག་གདོང་མ་དང་། ཕག་གདོང་མ་དང་། ཁྱི་གདོང་མ་དང་། སེང་གེའི་གདོང་མ་རྣམས་ཀྱི་རྡོ་རྗེ་ལྕགས་ཀྱུ་དང་། རྡོ་རྗེ་ཞགས་པ་དང་། རྡོ་རྗེ་ལྕགས་སྒྲོག་དང་། རྡོ་རྗེ་དྲིལ་བུའོ། །མཚན་མ་བཅུ་བདུན་པོ་འདི་རྣམས་ཉི་མ་ལ་གནས་པའོ། །གླིང་བུ་མ་ལ་སོགས་
པ་བརྒྱད་ཀྱི་ཉི་མའི་འོག་ཏུ་སྣ་ཚོགས་པདྨ་རྣམས་སོ། །དབུས་ཀྱི་འོད་ཟེར་གྱི་ཕྱི་ངོས་སུ་སྔར་བཞིན་དུ་བུམ་པ་རྣམས་སོ། །བདག་མེད་མའི་དཀྱིལ་འཁོར་ལ་སྣ་ཚོགས་པདྨའི་ལྟེ་བ་དང་། ཤར་ལ་སོགས་པའི་འདབ་མ་རྣམས་ལ་གོ་རིམས་བཞིན་དུ་བདག་མེད་མ་དང་། རྡོ་རྗེ་མ་དང་། དཀར་མོ་དང་།
ཆུ་མ་དང་། རྡོ་རྗེ་མཁའ་འགྲོ་མ་རྣམས་དང་། རིམ་པ་གཉིས་པར་ཕྱག་བཅུ་དྲུག་པའི་དཀྱིལ་འཁོར་དུ་བརྗོད་པའི་དཀར་མོ་ལ་སོགས་པ་རྣམས་ཀྱི་རྡོ་རྗེའོ། །གླིང་བུ་མ་ལ་སོགས་པའི་མཚན་མ་ནི་སྔ་མ་བཞིན་དུའོ། །རྟ་གདོང་མ་ལ་སོགས་པའི་གྲི་གུག་རྣམས་སོ། །མཁའ་སྤྱོད་མའི་རྡོ་རྗེ་ནི་རྟ་གདོང་
མའི་ཕྱི་ངོས་སུའོ། །ས་སྤྱོད་མའི་རྡོ་རྗེ་ནི་ཁྱི་གདོང་མའི་ཕྱི་ངོས་སུའོ། །འདིར་གྲི་གུག་བཞི་ནི་ཉི་མ་ལ་གནས་པའོ། །མཚན་མ་གཞན་ནི་ཟླ་བའི་དཀྱིལ་འཁོར་ལ་གནས་པའོ། །ཕྱིའི་དཀར་མོ་ལ་སོགས་པ་བཅོ་བརྒྱད་པོ་རྣམས་ཀྱི་ཟླ་བ་དང་། ཉི་མ་ནི་སྣ་ཚོགས་པདྨ་ལ་གནས་པའོ། །གླིང་བུ་མ་
ལ་སོགས་པ་བརྒྱད་མེད་པ་ནི་ལྷག་མ་ལྷ་མོ་བཅོ་ལྔ་པོ་རྣམས་ཀྱི་ཟླ་བ་ལ་གྲི་གུག་རྣམས་སོ། །མཁའ་སྤྱོད་མའི་མཚན་མ་ནི་དཀར་མོའི་ཕྱི་ངོས་སོ། །རོ་ལངས་མའི་ཕྱི་ངོས་སུ་ས་སྤྱོད་མའོ། །དེ་བཞིན་དུ་ཀུ་རུ་ཀུལླེའི་དཀྱིལ་འཁོར་ལ་ཡང་ཡིན་ཏེ། ཁྱད་པར་ནི་ཟླ་བ་ལ་ཡུ་བ་དང་བཅས་པའི་ཨུཏྤ་

ལ་དམར་པོ་ཁ་འབུས་པའི་མདའ་ཡོད་པའོ། །འདིར་ལྷ་མོ་བཅོ་ལྔ་པོ་རྣམས་ཀྱང་ཀུ་རུ་ཀུལླེའི་བཞིན་དུ་མདོག་དམར་པོའོ། །རྡོ་རྗེ་བདུད་རྩིའི་དཀྱིལ་འཁོར་དང་པོ་ལ་སྣ་ཚོགས་པདྨའི་ལྟེ་བ་དང་། ཤར་ལ་སོགས་པ་དང་དབང་ལྡན་ལ་སོགས་པའི་འདབ་མ་རྣམས་ལ་གོ་རིམས་བཞིན་དུ་
རྡོ་རྗེ་བདུད་རྩི་དང་། ཞི་བ་མོ་དང་། ཟླ་ལྡན་མ་དང་། རི་བོང་ཅན་མ་དང་། ཟླ་དཀྱིལ་མ་དང་། ཟླ་ཚེས་མ་དང་། ཡིད་འོང་མ་དང་། ཡིད་ཚིམ་བྱེད་པ་རྣམས་ཀྱི་རྡོ་རྗེའོ། །ཁྱད་པར་ནི་ཟླ་ཚེས་མའི་ཟླ་བ་ཆ་གཅིག་པའོ། །རིམ་པ་གཉིས་པར་དབང་ལྡན་ལ་སོགས་པ་རྣམས་སུ་མེ་ཏོག་མ་དང་། བདུག་སྤོས་མ་དང་། མར་
མེ་མ་དང་། དྲི་ཆབ་མ་རྣམས་ཀྱི་མེ་ཏོག་གི་ཟ་མ་ཏོག་དང་། སྤོས་ཕོར་དང་། མར་མེའི་མཆོད་སྡོང་དང་། དྲིའི་དུང་ཆོས་རྣམས་སོ། །ཤར་ལ་སོགས་པའི་སྣམ་བུ་རྣམས་སུ་གླིང་བུ་མ་ལ་སོགས་པ་བཞིའི་གླིང་བུ་ལ་སོགས་པ་བཞིའོ། །ཤར་ལ་སོགས་པའི་སྒོ་རྣམས་སུ་ཁྲོ་གཉེར་རིམ་པར་ལྡན་དང་།
འཇིགས་སྡིགས་དང་། རྟ་གཟུགས་དང་། ཚོགས་ཀྱི་གཙོ་བོ་རྣམས་ཀྱི་རྡོ་རྗེ་ལྕགས་ཀྱུ་དང་། ཞགས་པ་དང་། ལྕགས་སྒྲོག་དང་། དྲིལ་བུ་རྣམས་སོ། །མཚན་མ་ཉི་ཤུ་རྩ་གཅིག་པོ་འདི་རྣམས་ནི་ཟླ་བ་ལ་གནས་པའོ། །མེ་ཏོག་མ་ལ་སོགས་པ་བཅུ་གཉིས་ཀྱི་ཟླ་བའི་འོག་ཏུ་སྣ་ཚོགས་པདྨའོ། །ཡང་ན་དཀྱིལ་
འཁོར་པ་ཐམས་ཅད་ལ་ཆོས་འབྱུང་བྲི་བར་བྱའོ། །འདི་ཉིད་ཁོ་ན་བྲི་བར་བྱའོ་ཞེས་པ་ནི་གཞན་དག་གོ། །གཞན་རྡོ་རྗེ་བདུད་རྩི་གསུམ་གྱི་དཀྱིལ་འཁོར་གྱི་མཚན་མ་རྣམས་ནི་རྡོ་རྗེ་བདུད་རྩིའི་རྒྱུད་དུ་རིག་པར་བྱའོ། །དགུའི་བདག་ཉིད་ཅན་ཀྱེའི་རྡོ་རྗེ་གསུམ་གྱི་དཀྱིལ་འཁོར་ལ་སྣ་ཚོགས་པདྨའི་ལྟེ་
བར་ཉི་མ་ལ་རྡོ་རྗེ་སྔོན་པོ་ཁ་གྱེས་པའོ། །ཤར་ལ་སོགས་པ་དང་དབང་ལྡན་ལ་སོགས་པའི་འདབ་མར་ཟླ་བ་རྣམས་ལ་གོ་རིམས་བཞིན་དུ་དཀར་མོ་དང་། ཆོམ་རྐུན་མ་དང་། རོ་ལངས་མ་དང་། ཟ་ཕོད་མ་དང་། སྤོས་མ་དང་། རི་ཁྲོད་མ་དང་། གཏུམ་མོ་དང་། གཡུང་མོ་རྣམས་ཀྱི་གྲི་གུག་དང་། ཅང་ཏེའུ་
དང་། རུས་སྦལ་དང་། སྦྲུལ་དང་། སེང་གེ་དང་། དགེ་སློང་དང་། འཁོར་ལོ་དང་། རྡོ་རྗེ་རྣམས་སོ། །ཕྱག་བཅུ་དྲུག་པའི་ཉི་མ་ལ་སྣ་ཚོགས་རྡོ་རྗེས་མཚན་པའོ། །ཐོད་པ་དཀར་པོ་ཞེས་པ་ནི་ཁྱད་པར་རོ། །ཕྱི་ངོས་ཀྱི་ཟླུམ་པོ་ལས་ཕྱི་ངོས་སུ་བུམ་པ་རྣམས་སོ། །སྒྱུ་མ་ཆེན་མོའི་དཀྱིལ་འཁོར་ལ་པདྨ་

དམར་པོའི་ལྟེ་བར་ཉི་མ་ལ་བཅོམ་ལྡན་འདས་མ་སྒྱུ་མ་ཆེན་པོའི་པདྨའི་སྣོད་དོ། །ཤར་ལ་སོགས་པའི་འདབ་མའི་ཟླ་བ་རྣམས་ལ་གཡས་སྐོར་དུ་རྡོ་རྗེ་མཁའ་འགྲོ་མ་དང་། རིན་ཆེན་མཁའ་འགྲོ་མ་དང་། པདྨ་མཁའ་འགྲོ་མ་དང་། སྣ་ཚོགས་མཁའ་འགྲོ་མ་རྣམས་ཀྱི་རྡོ་རྗེ་དང་། རིན་པོ་ཆེའི་སྙེ་མ་དང་། སྣ་
ཚོགས་ཆུ་སྐྱེས་དང་། རལ་གྲིའོ། །སངས་རྒྱས་མཁའ་འགྲོ་མ་ནི་རྡོ་རྗེ་སེམས་དཔའ་ལ་འཁྱུད་ནས་གནས་པས་དེའི་མཚན་མ་ཐ་དད་དུ་མི་དགོད་དོ། །དགུའི་བདག་ཉིད་སངས་རྒྱས་ཐོད་པའི་དཀྱིལ་འཁོར་ལ་སྣ་ཚོགས་ཆུ་སྐྱེས་ཀྱི་ལྟེ་བར་ཉི་མ་ལ་ཅང་ཏེའུའོ། །ཤར་དང་བྱང་དང་ནུབ་དང་ལྷོ་དང་དབང་
ལྡན་དང་མེ་དང་བདེན་བྲལ་དང་། རླུང་གི་འདབ་མར་ཉི་མ་རྣམས་ལ་སྣ་ཚོགས་སྡེ་མ་དང་། འདོད་མ་དང་། ས་འོག་ན་གནས་མ་དང་། ལེགས་བཟངས་མ་དང་། ཆང་འཚོང་མ་དང་། འབྱུང་མོ་དང་། ཕྱག་བཞི་མ་དང་། ནམ་མཁའ་ལ་གནས་མ་རྣམས་ཀྱི་གྲི་གུག་རྣམས་སོ། །རྡོ་རྗེ་ཧཱུཾ་མཛད་ཀྱི་དཀྱིལ་
འཁོར་ལ་དབུས་སུ་རྡོ་རྗེ་ཧཱུཾ་མཛད་ཀྱི་རྡོ་རྗེའོ། །ཤར་ལ་སོགས་པར་གཡོན་སྐོར་དུ་རྡོ་རྗེ་དབྱུག་པ་དང་། ཉི་མ་མེ་དང་། རྡོ་རྗེ་གཙུག་ཏོར་དང་། རྡོ་རྗེ་འཁྱིལ་པ་རྣམས་དང་། མེ་ལ་སོགས་པར་གཡས་སྐོར་དུ་རྡོ་རྗེ་གནོད་སྦྱིན་དང་། རྡོ་རྗེ་དུས་དང་། ནག་པོ་ཆེན་པོ་དང་། རྡོ་རྗེ་བསྡིགས་པ་དང་། གཙུག་
ཏོར་དང་། རྡོ་རྗེ་ས་འོག་རྣམས་ཀྱི་རྡོ་རྗེ་ཐོ་བ་དང་། རྡོ་རྗེ་དབྱུག་པ་དང་། ཆུ་སྐྱེས་དམར་པོ་དང་། སྣ་ཚོགས་རྡོ་རྗེ་དང་། ལྕགས་ཀྱུ་དང་། དགྲ་སྟ་དང་། རྩེ་གསུམ་དང་། རལ་གྲི་དང་། འཁོར་ལོ་དང་། རྡོ་རྗེའི་གཏུན་ཤིང་རྣམས་ཏེ། མཚན་མ་ཐམས་ཅད་ནི་སྣ་ཚོགས་ཆུ་སྐྱེས་དང་ཉི་མ་ལ་གནས་པའོ། །
ཡང་ན་ཤར་ལ་སོགས་པའི་ཕྱོགས་སུ་གཡས་སྐོར་དུ་གཤིན་རྗེ་མཐར་བྱེད་དང་། ཤེས་རབ་མཐར་བྱེད་དང་། པདྨ་མཐར་བྱེད་དང་། བགེགས་མཐར་བྱེད་རྣམས་ཀྱི་རྡོ་རྗེའི་ཐོ་བ་དང་། རྡོ་རྗེས་མཚན་པའི་དབྱུག་པ་དཀར་པོ་དང་། པདྨ་དམར་པོ་དང་། སྣ་ཚོགས་རྡོ་རྗེའོ། །མེ་ལ་སོགས་པའི་མཚམས་
རྣམས་སུ་མི་གཡོ་བ་དང་། འདོད་པའི་རྒྱལ་པོ་དང་། དབྱུག་པ་སྔོན་པོ་དང་། སྟོབས་པོ་ཆེ་རྣམས་ཀྱི་རལ་གྲི་དང་། རྡོ་རྗེ་དང་། རྡོ་རྗེས་མཚན་པའི་དབྱུག་པ་སྔོན་པོ་དང་། རྡོ་རྗེས་མཚན་པའི་དབྱུག་པ་ནག་པོའོ། །གཤིན་རྗེ་གཤེད་ཀྱི་མཚན་མ་ལས་ཕྱི་ངོས་སུ་གཙུག་ཏོར་འཁོར་ལོ་ཙན་གྱི་རྡོ་རྗེའོ། །

པདྨ་མཐར་བྱེད་ཀྱི་མཚན་མ་ལས་ཕྱི་ངོས་སུ་གནོད་མཛེས་ཀྱི་རྡོ་རྗེའོ། །མཚན་མ་བཅུ་གཅིག་པོ་འདི་རྣམས་ནི་སྣ་ཚོགས་པདྨ་དང་ཉི་མ་ལ་གནས་པའོ། །ཡང་ན་བགེགས་དགྲའི་རྡོ་རྗེ་ཁ་གྱེས་པའོ། །མེ་ལ་སོགས་པ་རྣམས་སུ་འདོད་པའི་རྒྱལ་པོ་དང་། དབྱུག་པ་སྔོན་པོ་དང་། སྟོབས་
པོ་ཆེ་དང་། མི་གཡོ་བ་རྣམས་ཀྱི་ལྕགས་ཀྱུ་དང་། རྡོ་རྗེས་མཚན་པའི་དབྱུག་པ་སྔོན་པོ་དང་། རྩེ་གསུམ་པ་དང་། རལ་གྲིའོ། །གཙུག་ཏོར་འཁོར་ལོ་ཅན་གྱི་འཁོར་ལོ་སེར་པོ་ཆེན་པོའོ། །གཞན་རྣམས་ཀྱི་བཤད་མ་ཐག་པ་སྔ་མ་བཞིན་ནོ། །ཡང་ན་གཤིན་རྗེ་གཤེད་ལ་སོགས་པ་བཞི་པོ་རྣམས་ཀྱི་
རྡོ་རྗེ་ལྕགས་ཀྱུ་དང་། རྡོ་རྗེ་ཞགས་པ་དང་། རྡོ་རྗེ་ལྕགས་སྒྲོག་དང་། རྡོ་རྗེ་དྲིལ་བུ་རྣམས་ཏེ། གཞན་རྣམས་ཀྱི་བཤད་མ་ཐག་པ་སྔ་མ་བཞིན་ནོ། །བདེ་མཆོག་གི་དཀྱིལ་འཁོར་ལ་སྣ་ཚོགས་ཆུ་སྐྱེས་ཀྱི་ལྟེ་བར་གནས་པའི་ཉི་མ་ལ་དཔལ་བདེ་མཆོག་གི་རྡོ་རྗེ་རྩེ་ལྔ་པ་སྔོན་པོ་ཁ་གྱེས་པའོ། །ཕྱོགས་
བཞིའི་འདབ་མ་ལ་མཁའ་འགྲོ་མ་དང་། ལཱ་མ་དང་། དུམ་སྐྱེས་མ་དང་། གཟུགས་ཅན་མ་རྣམས་ཀྱི་གྲི་གུག་རྣམས་སོ། །མཚམས་ཀྱི་འདབ་མ་རྣམས་ལ་པདྨའི་སྣོད་རྣམས་སོ། །ཐུགས་ཀྱི་འཁོར་ལོ་ལ་སོགས་པའི་རྩིབས་ཉི་ཤུ་རྩ་བཞི་ལ་རབ་ཏུ་གཏུམ་མོ་དང་། གཏུམ་མིག་མ་དང་། འོད་ལྡན་མ་
དང་། སྣ་ཆེན་མ་དང་། དཔའ་བོའི་བློ་ཅན་མ་དང་། མིའུ་ཐུང་མ་དང་། ལང་ཀའི་དབང་ཕྱུག་མ་དང་། ཤིང་གྲིབ་མ་དང་། ས་སྲུང་མ་དང་། འཇིགས་བྱེད་ཆེན་མོ་དང་། རླུང་གི་ཤུགས་ཅན་མ་དང་། ཆང་འཐུང་མ་དང་། ལྷ་མོ་སྔོ་བསངས་མ་དང་། རབ་ཏུ་བཟང་མོ་དང་། རྟ་རྣ་མོ་དང་། བྱ་གདོང་མ་དང་། འཁོར་
ལོའི་ཤུགས་ཅན་མ་དང་། དུམ་སྐྱེས་མ་དང་། ཆང་འཚོང་མ་དང་། འཁོར་ལོའི་གོ་ཆ་མ་དང་། རབ་ཏུ་དཔའ་མོ་དང་། སྟོབས་ཅན་མོ་དང་། འཁོར་ལོས་སྒྱུར་མ་དང་། བརྩོན་འགྲུས་ཆེན་མོ་རྣམས་ཀྱི་གྲི་གུག་གོ། །གཙོ་བོ་མ་ཡིན་པའི་ཕྱིར་དཔའ་བོ་རྣམས་ཀྱི་མཚན་མ་ནི་མི་བྲིའོ། །སྒོ་རྣམས་སུ་ཁྭ་
གདོང་མ་དང་། འུག་གདོང་མ་དང་། ཁྱི་གདོང་མ་དང་། ཕག་གདོང་མ་རྣམས་དང་། མཚམས་སུ་གཤིན་རྗེ་བརྟན་མ་དང་། གཤིན་རྗེ་ཕོ་ཉ་མོ་དང་། གཤིན་རྗེ་མཆེ་བ་མོ་དང་། གཤིན་རྗེ་འཇོམས་མ་རྣམས་ཀྱི་སྣ་ཚོགས་ཆུ་སྐྱེས་དང་། ཉི་མ་རྣམས་ལ་གྲི་གུག་གོ། །འདིར་ཤར་ལ་སོགས་པའི་

ཕྱོགས་སུ་གཡོན་སྐོར་དུ་དང་། མེ་ལ་སོགས་པའི་མཚམས་སུ་གཡས་སྐོར་དུ་མཚན་མ་དགོད་དོ། །ཕྱི་ངོས་སུ་ཟླུམ་པོའི་ཐིག་ལས་ཕྱི་རོལ་གྱི་མཚམས་ཀྱི་ཆར་བུམ་པ་རྣམས་བྲིའོ། །དེ་ལས་གཞན་པའི་འཁོར་ལོ་སྡོམ་པ་དང་། རྡོ་རྗེ་ཕག་མོའི་དཀྱིལ་འཁོར་རྣམས་ཀྱི་མཚན་མ་རྣམས་ནི་རྫོགས་
པའི་རྣལ་འབྱོར་གྱི་ཕྲེང་བར་བརྗོད་དོ། །ཉི་ཤུ་རྩ་ལྔའི་བདག་ཉིད་སངས་རྒྱས་ཐོད་པའི་དཀྱིལ་འཁོར་ལ་དབུས་སུ་སྣ་ཚོགས་ཆུ་སྐྱེས་ལ་ཉི་མར་ཅང་ཏེའུའོ། །ལྷ་མོ་ཉི་ཤུ་རྩ་བཞི་རྣམས་ཀྱི་གྲི་གུག་རྣམས་ཏེ་ཤར་ལ་སོགས་པའི་ཕྱོགས་སུ་གཡོན་སྐོར་དང་། མེ་ལ་སོགས་པའི་མཚམས་སུ་གཡས་སྐོར་
རོ། །དེ་ལ་འཁོར་ལོ་ནག་པོའི་རྩིབས་ཀྱི་སྟེང་དུ་ཕྱོགས་ཀྱི་འདབ་མ་ལ་ལེགས་ཕྲེང་ཅན་མ་དང་། ཐོད་པ་ཅན་མ་དང་། འཇིགས་མ་དང་། མི་ཐུབ་མ་རྣམས་ཀྱིའོ། །མཚམས་ཀྱི་འདབ་མ་རྣམས་ལ་ཐོད་པ་རྣམས་སོ། །དེ་ནས་རྡོ་རྗེ་སྔོན་པོའི་ཕྲེང་བའོ། །རིམ་པ་གཉིས་པ་ལ་རྩིབས་བརྒྱད་དམར་པོ་
ལ་གནས་པའི་ཆུ་སྐྱེས་བརྒྱད་རྣམས་ལ་ཕྱོགས་རྣམས་སུ་དགེ་བའི་སྐེ་རགས་མ་དང་། གཟུགས་ཅན་མ་དང་། རྣམ་རྒྱལ་མ་དང་། འོད་ཅན་མ་རྣམས་ཀྱིའོ། །མཚམས་རྣམས་སུ་དུས་ཅན་མ་དང་། མཚོ་ཆེན་མ་དང་། བྱེད་མ་དང་། གསོད་མ་རྣམས་ཀྱིའོ། །དེ་ནས་རྡོ་རྗེ་ཕྲེང་བ་དམར་པོའོ། །རིམ་
པ་གསུམ་པར་རྩིབས་བརྒྱད་དཀར་པོ་ལ་གནས་པའི་པདྨ་འདབ་བརྒྱད་ལ་ཕྱོགས་སུ་སྒྲོལ་མ་དང་། འཇིགས་མཐོང་མ་དང་། ལེགས་མཐོང་མ་དང་། ཐུབ་དཀའ་མ་རྣམས་ཀྱིའོ། །མཚམས་རྣམས་སུ་དགེ་མ་དང་། གྲིབ་གནོན་མ་དང་། དུས་མཚན་མ་དང་། གྲགས་ཆེན་མ་རྣམས་ཀྱིའོ། །
དེ་ནས་རྡོ་རྗེ་ཕྲེང་བ་དཀར་པོའོ། །སྒོའི་པདྨ་རྣམས་ལ་མཛེས་མ་དང་། ནོར་འཛིན་མ་དང་། སྐལ་བཟང་མོ་དང་། མཐོང་བ་ཡིད་འོང་མ་རྣམས་ཀྱིའོ། །པདྨ་ཉི་ཤུའི་སྟེང་དུ་ཉི་མ་རྣམས་ལ་གྲི་གུག་རྣམས་སོ་ཞེས་གདམས་སོ། །རྣལ་འབྱོར་ནམ་མཁའི་དཀྱིལ་འཁོར་གྱི་དབང་ཕྱུག་གི་སྣ་ཚོགས་
པདྨ་དང་། རྡོ་རྗེ་སྔོན་པོ་རྩེ་ལྔ་པའོ། །ཤར་དང་བྱང་དང་ནུབ་དང་ལྷོའི་རེའུ་མིག་རྣམས་ལ་པདྨ་དང་ཉི་མ་ལ་གནས་པའི་ཁ་ཊྭཱཾ་ག་རྣམས་སོ། །དབང་ལྡན་དང་མེ་ལ་སོགས་པའི་རེའུ་མིག་རྣམས་ལ་ཁ་ཊྭཱཾ་ག་དང་། ལྕགས་ཀྱུ་དང་། དགྲ་སྟ་དང་། དབྱུག་པའོ། །ཤར་ལ་སོགས་པའི་རེའུ་མིག་

རྣམས་ལ་ཁ་ཊྭཱཾ་ག་རྣམས་ཀྱི་ཕྱི་ངོས་སུ་རིམ་པ་བཞིན་དུ་ཁར་བསྡུས་པའི་ལག་པ་གཉིས་དང་། སྙིམ་པ་སྦྱར་བ་དང་ཁྲག་གི་སྙིམ་པ་དང་། གཏུན་ཤིང་ངོ་། །ཁ་ཊྭཱཾ་ག་ལ་སོགས་པའི་མཚན་མ་རྣམས་པདྨ་དང་ཉི་མར་གནས་པའོ། །འོད་ཟེར་གྱི་ཁོར་ཡུག་གི་ཕྱི་རོལ་གྱི་ཤར་ཕྱོགས་སུ་
བདུད་རྩིའི་ཐོད་པ་གསུམ་མོ། །བྱང་དུ་སྒྲོན་མའི་ཐོད་པ་གསུམ་དང་། ནུབ་དུ་གཏོར་མའི་ཐོད་པ་གསུམ་དང་། ལྷོར་བཏུང་བའི་ཐོད་པ་གསུམ་དང་། དབང་ལྡན་དུ་སྙེམས་པའི་ལག་པ་དང་། དྲིའི་སྣོད་དོ། །མེར་ནི་པི་ཝང་དང་། མེ་ཏོག་གི་ཟ་མ་ཏོག་གོ། །བདེན་བྲལ་དུ་སྡིགས་མཛུབ་ཀྱི་ལག་པ་དང་སྤོས་
སྣོད་དོ། །རླུང་དུ་ཐལ་མོ་དང་མར་མེའོ། །དེ་ནས་རྡོ་རྗེ་ཕྲེང་བའི་ཁོར་ཡུག་གི་ཕྱིའི་ཤར་ལ་སོགས་པའི་སྣམ་བུ་རྣམས་ལ་སོ་སོར་བཞི་བཞི་དང་སྒོ་དང་མཚམས་སུ་བརྒྱད་དེ་ཁ་ཊྭཱཾ་ག་ཉེར་བཞིའོ། །བདུད་རྩིའི་ཐོད་པ་ལ་སོགས་པ་ནི་མཚོ་སྐྱེས་མ་ཉི་མ་ལ་གནས་པའོ། །གཤིན་རྗེ་གཤེད་ཀྱི་དཀྱིལ་འཁོར་ལ་སྣ་
ཚོགས་རྡོ་རྗེའི་ལྟེ་བའི་དབུས་སུ་བཅོམ་ལྡན་འདས་གཤིན་རྗེ་གཤེད་ཀྱི་རྡོ་རྗེ་སྔོན་པོ་རྩེ་ལྔ་པ་ཁ་གྱེས་པའོ། །ཤར་དང་ལྷོ་ལ་སོགས་པའི་རའི་རྩ་བ་རྣམས་སུ་རྟག་པ་དང་། རིན་ཆེན་དབང་པོ་དང་། སྣང་བ་མཐའ་ཡས་དང་། དོན་ཡོད་གྲུབ་པ་རྣམས་ཀྱི་འཁོར་ལོ་དཀར་པོ་རྩིབས་བརྒྱད་པ་དང་། རིན་པོ་ཆེ་
ལྗང་གུ་ཆ་དགུ་པ་དང་། པདྨ་དམར་པོ་འདབ་མ་བརྒྱད་པ་དང་། རལ་གྲི་ལྗང་གུ་རྣམས་སོ། །སྣ་ཚོགས་རྡོ་རྗེའི་མེ་དང་། བདེན་བྲལ་ལ་སོགས་པའི་གྲྭར་རྡོ་རྗེ་ཙརྩི་ཀ་དང་། རྡོ་རྗེ་ཕག་མོ་དང་། རྡོ་རྗེ་དབྱངས་ཅན་མ་དང་། དཀར་མོ་རྣམས་ཀྱི་འཁོར་ལོ་དང་རྡོ་རྗེ་དང་པདྨ་དང་རལ་གྲིའོ། །དེ་ནས་རྡོ་རྗེ་ཕྲེང་
བའོ། །དེ་ནས་སྣ་ཚོགས་རྡོ་རྗེའི་ཕྱོགས་སོ་སོར་ར་ལྔའོ། །ཤར་དང་ལྷོ་ལ་སོགས་པའི་སྒོ་རྣམས་སུ་ཐོ་བ་གཤིན་རྗེ་གཤེད་དང་། དབྱུག་པ་གཤིན་རྗེ་གཤེད་དང་། པདྨ་གཤིན་རྗེ་གཤེད་དང་། རལ་གྲི་གཤིན་རྗེ་གཤེད་རྣམས་ཀྱི་རྡོ་རྗེ་རྩེ་མོ་ཉི་ཤུ་པས་མཚན་པའི་ཐོ་བ་དང་། དབྱུག་པ་དཀར་པོ་དང་།
པདྨ་དམར་པོ་དང་། རལ་གྲིའོ། །འདིར་རྟག་པ་དང་། ལྷ་མོ་རྣམས་ཀྱི་མཚན་མ་ནི་ཟླ་བ་ལ་གནས་པའོ། །གཞན་གྱི་ནི་ཉི་མ་ལ་གནས་པའོ། །ཉི་མ་དང་ཟླ་བའི་འོག་ཏུ་ནི་སྣ་ཚོགས་པདྨའོ། །དཀྱིལ་འཁོར་གྱི་མཚམས་རྣམས་སུ་པདྨ་ལ་གནས་པའི་ཐོད་པ་བཞིའོ། །རའི་གློ་རྣམས་སུ་བུམ་པ་

རྣམས་སོ། །རྡོ་རྗེ་སྒྲོལ་མའི་དཀྱིལ་འཁོར་ལ་སྣ་ཚོགས་པདྨའི་ལྟེ་བར་ཟླ་བ་ལ་རྡོ་རྗེ་རྩེ་དགུ་པ་གསེར་གྱི་མདོག་ཅན་ནོ། །ཤར་དང་ལྷོ་ལ་སོགས་པའི་འདབ་མར་ཟླ་བ་རྣམས་ལ་མེ་ཏོག་སྒྲོལ་མ་དང་། བདུག་སྤོས་སྒྲོལ་མ་དང་། མར་མེ་སྒྲོལ་མ་དང་། དྲིའི་སྒྲོལ་མ་རྣམས་ཀྱི་མེ་ཏོག་གི་ཕྲེང་བ་དང་།
སྤོས་ཕོར་དང་། མར་མེའི་ཀོང་བུ་དང་། དྲིའི་དུང་ཆོས་རྣམས་སོ། །མེ་ལ་སོགས་པའི་འདབ་མར་རྟག་པ་དང་། མི་བསྐྱོད་པ་དང་། སྣང་བ་མཐའ་ཡས་དང་། དོན་ཡོད་གྲུབ་པའི་རྣམ་པར་དག་པའི་འཁོར་ལོ་དང་། རྡོ་རྗེ་དང་། པདྨ་དང་། རལ་གྲི་རྣམས་སོ། །ཤར་དང་ལྷོ་ལ་སོགས་པའི་སྒོ་རྣམས་
སུ་རྡོ་རྗེ་ལྕགས་ཀྱུ་མ་དང་། རྡོ་རྗེ་ཞགས་པ་མ་དང་། རྡོ་རྗེ་ལྕགས་སྒྲོག་མ་དང་། རྡོ་རྗེ་དྲིལ་བུ་མ་རྣམས་ཀྱི་ལྕགས་ཀྱུ་ལ་སོགས་པ་སྔ་མ་བཞིན་ཏེ། སྣ་ཚོགས་པདྨ་དང་ཉི་མ་ལའོ། །རྡོ་རྗེ་ལྕགས་ཀྱུ་མའི་ཕྱི་ངོས་སུ་གཙུག་ཏོར་རྣམ་པར་རྒྱལ་བའི་འཁོར་ལོ་སྣ་ཚོགས་པདྨ་དང་ཉི་མ་ལའོ། །རྡོ་རྗེ་ལྕགས་སྒྲོག་མའི་
ཕྱི་ངོས་སུ་རྡོ་རྗེ་གནོད་མཛེས་མའི་སྦྲུལ་གྱི་ཞགས་པ་སྟེ། སྣ་ཚོགས་ཆུ་སྐྱེས་དང་ཉི་མ་ལའོ། །མེ་ལ་སོགས་པའི་མཚམས་སུ་པདྨ་ལ་སྤྱན་མ་དང་། མཱ་མ་ཀཱི་དང་། གོས་དཀར་མོ་དང་སྒྲོལ་མ་རྣམས་ཀྱི་རྣམ་པར་དག་པའི་བྱང་ཆུབ་ཀྱི་སེམས་ཀྱི་བུམ་པ་དང་། རི་རབ་དང་མེ་ཐབ་དང་རྒྱལ་མཚན་ཆེན་པོའོ། །པདྨའི་
ཕྱི་ངོས་སུ་བུམ་པ་རྣམས་སོ། །འོད་ཟེར་ཅན་གྱི་དཀྱིལ་འཁོར་གྱི་དབུས་ཀྱི་སྣ་ཚོགས་པདྨར་ཉི་མའམ། ཟླ་བ་ལ་མདའ་སྟེ་མཚན་མོ་ཟླ་བ་ལ་གནས་ཤིང་ཉིན་མོ་ཉི་མ་ལ་གནས་ཏེ་ལྷ་མོ་རྣམ་པར་རྒྱུའོ། །ཤར་དང་ལྷོ་ལ་སོགས་པའི་ཕྱོགས་སུ་ཨརྐ་མ་སཱི་དང་། མརྐ་མ་སཱི་དང་། ཨནྡ་ར་དྷ་ན་མ་སཱི་དང་།
ཏེ་ཛོ་མ་སཱིའི་ལྷ་མོ་རྣམས་ཀྱི་གོ་རིམས་བཞིན་དུ་ཁབ་དང་སྐུད་པ་དང་བཅས་པའི་ཁབ་དང་། ཨ་ཤྭ་ཀའི་ཡལ་ག་དང་མདའ་རྣམས་སོ། །མེ་དང་སྲིན་པོ་ལ་སོགས་པའི་མཚམས་རྣམས་སུ་ཨུ་ད་ཡ་མ་སཱི་དང་། གུལྨ་མ་སཱི་དང་། མ་ན་མ་སཱི་དང་། ཙཱི་བ་ར་མ་སཱི་རྣམས་ཀྱི་མཚན་མ་ནི་གོ་རིམས་བཞིན་དུ་ཨརྐ་
མ་སཱི་ལ་སོགས་པའི་མཚན་མ་བཞིན་ནོ། །ཕྱིའི་ཕོ་བྲང་གི་སྣམ་བུའི་ཤར་དུ་མ་ཧཱ་ཙི་བ་ར་མ་སཱི་དང་། བ་ར་ཧ་མུ་ཁའི་ལྷ་མོ་དག་གི་རྡོ་རྗེ་དང་ལྕགས་ཀྱུ་གཉིས་སོ། །ལྷོ་ཕྱོགས་སུ་ལྷ་མོ་པ་དཱ་ཀྲ་མ་སཱི་དང་། བ་ར་ལཱི་དག་གི་ཨ་ཤོ་ཀའི་འདབ་མ་གཉིས་སོ། །ནུབ་ཏུ་ལྷ་མོ་པ་ར་ཀྲ་མ་སཱི་དང་། བ་ད་ལཱི་དག་གི་མདའ་

གཉིས་སོ། །བྱང་དུ་ལྷ་མོ་ཨུརྨ་མ་སཱི་དང་། བ་རཱ་ལཱི་དག་གི་ཁབ་གཉིས་སོ། །མེ་ལ་སོགས་པའི་མཚམས་སུ་བཏྟཱ་ལཱི་དང་། བཏྟ་ལཱི་དང་། བ་རཱ་ལཱ་དང་། བ་རཱ་ཧ་མུ་ཁི་རྣམས་ཀྱི་ཁབ་དང་སྐུད་པ་དང་བཅས་པའི་ཁབ་དང་ཨ་ཤོ་ཀའི་ལོ་མ་དང་མདའ་རྣམས་སོ། །ཤར་སྒོར་ལྷ་མོ་ཨ་ལོའི་
རྡོ་རྗེ་ལྕགས་ཀྱུའོ། །ལྷོར་ལྷ་མོ་ཏ་ལོའི་རྡོ་རྗེ་ཞགས་པའོ། །ནུབ་དུ་ལྷ་མོ་ཀ་ལོའི་རྡོ་རྗེ་ལྕགས་སྒྲོག་གོ། །བྱང་དུ་ལྷ་མོ་སཙྪ་ལོ་སཾ་བ་མཱུརྡྷི་ཊིའི་རྡོ་རྗེ་དྲིལ་བུའོ། །འདིར་སྒོ་སྐྱོང་མའི་མཚན་མ་རྣམས་ནི་པདྨ་དང་ཉི་མ་ལ་གནས་པའོ། །གཞན་དག་གི་ནི་པདྨ་དང་ཟླ་བ་ལའོ། །སྲུང་བ་ལྔའི་དཀྱིལ་འཁོར་ལ་དབུས་
སུ་སྣ་ཚོགས་ཆུ་སྐྱེས་ཀྱི་ལྟེ་བར་ཟླ་བ་ལ་སོ་སོར་འབྲང་མ་ཆེན་མོའི་རིན་པོ་ཆེའི་ཆུན་པོའོ། །ཤར་དུ་སྣ་ཚོགས་པདྨ་དང་ཟླ་བ་ལ་སྟོང་ཆེན་མོ་རབ་ཏུ་འཇོམས་པའི་འཁོར་ལོའོ། །ལྷོར་སྣ་ཚོགས་པདྨ་དང་ཉི་མ་ལ་གསང་སྔགས་ཆེན་མོ་རྗེས་སུ་འཛིན་པའི་རྡོ་རྗེའོ། །ནུབ་ཏུ་སྣ་ཚོགས་པདྨ་དང་ཉི་མ་ལ་བསིལ་
བའི་ཚལ་ཆེན་མོའི་པདྨའོ། །བྱང་དུ་སྣ་ཚོགས་པདྨ་དང་ཟླ་བ་ལ་རྨ་བྱ་ཆེན་མོའི་རྨ་བྱའི་མཇུག་སྒྲོའོ། །རིམ་པ་གཉིས་པར་མེ་ལ་སོགས་པའི་མཚམས་སུ་ནག་མོ་དང་། དུས་མཚན་མོ་དང་། རྣ་བ་ནག་མོ་དང་། དཀར་མོ་རྣམས་ཀྱི་དུང་དང་། རྡོ་རྗེས་མཚན་པའི་རྒྱལ་མཚན་དང་། དགྲ་སྟྭ་དང་། རྩེ་གསུམ་
རྣམས་སོ། །སྣམ་བུ་རྣམས་ལ་བུམ་པ་རྣམས་སོ། །ཤར་ལ་སོགས་པའི་སྒོར་སྣ་ཚོགས་པདྨ་དང་ཉི་མ་རྣམས་ལ་རྡོ་རྗེ་ལྕགས་ཀྱུ་མ་ལ་སོགས་པའི་རྡོ་རྗེ་ལྕགས་ཀྱུ་ལ་སོགས་པ་བཞིའོ། །རྡོ་རྗེ་དབྱིངས་ཀྱི་དཀྱིལ་འཁོར་ལ་སྣ་ཚོགས་པདྨའི་ལྟེ་བར་ཟླ་བ་ལ་བཅོམ་ལྡན་འདས་རྡོ་རྗེ་དབྱིངས་ཀྱི་རྡོ་རྗེ་རྩེ་ལྔ་པ་
དཀར་པོའོ། །ལྟེ་བའི་ཤར་ལ་སོགས་པའི་ཕྱོགས་ཀྱི་འདབ་མར་ཟླ་བ་རྣམས་ལ་གོ་རིམས་བཞིན་དུ་གཡས་སྐོར་དུ་སེམས་མ་རྡོ་རྗེ་མ་དང་། རིན་ཆེན་རྡོ་རྗེ་མ་དང་། ཆོས་ཀྱི་རྡོ་རྗེ་མ་དང་། ལས་ཀྱི་རྡོ་རྗེ་མ་རྣམས་ཀྱི་རྡོ་རྗེ་དམར་པོ་རྩེ་ལྔ་པ་དང་། རྡོ་རྗེ་རྩེ་ལྔ་པའི་རྩེ་མོ་ཅན་གྱི་རིན་པོ་ཆེ་དང་། རྡོ་རྗེ་རྩེ་ལྔ་པས་མཚན་
པའི་པདྨ་འདབ་བརྒྱད་དཀར་དམར་དང་། དེ་བཞིན་གཤེགས་པ་ལྔའི་ཁ་དོག་གི་སྣ་ཚོགས་རྡོ་རྗེའོ། །ཤར་ལ་སོགས་པའི་པདྨའི་ལྟེ་བར་ཟླ་བའི་དཀྱིལ་འཁོར་རྣམས་ལ་གོ་རིམས་བཞིན་དུ་མི་བསྐྱོད་པ་དང་། རིན་ཆེན་འབྱུང་ལྡན་དང་། འོད་དཔག་མེད་དང་། དོན་ཡོད་གྲུབ་པ་རྣམས་ཀྱི་རྡོ་རྗེ་རྩེ་ལྔ་པ་སྔོན་

པོ་དང་། རྡོ་རྗེ་རིན་པོ་ཆེ་དང་། རྡོ་རྗེ་པདྨ་དང་། སྣ་ཚོགས་རྡོ་རྗེ་དང་། མི་བསྐྱོད་པའི་པདྨའི་ཤར་ལ་སོགས་པའི་ཕྱོགས་ཀྱི་འདབ་མར་ཟླ་བ་རྣམས་ལ་རྡོ་རྗེ་སེམས་དཔའ་དང་། རྡོ་རྗེ་རྒྱལ་པོ་དང་། རྡོ་རྗེ་ཆགས་པ་དང་། རྡོ་རྗེ་ལེགས་པ་རྣམས་ཀྱི་རིམ་པ་བཞིན་དུ་རྡོ་རྗེ་རྩེ་ལྔ་པ་དང་། རྡོ་རྗེ་ལྕགས་ཀྱུ་དང་། མདའ་
དང