Luận tạng Tây Tạng (Tengyur) — Tập 74

སྒྲུབ་པ་པོ་ལ་སྐྱབས་གསོལ་བསམ། །དེ་སྐྱེ་ཐུན་མཚམས་འདི་ལྟ་སྟེ། །གཏོར་དབུལ་ཡེ་ཤེས་ནམ་མཁར་དབྱུང་། །ཡིད་ཀྱིས་ཕར་མཆོད་བྱིན་གྱིས་ཚུར་བརླབས་བསམ། །སེ་གོལ་སྒྲ་དང་བཅས་པ་ཡིས། །ཡེ་ཤེས་མཆོག་

འབྱུང་མགོན་པོ་ཁྱོད་ཀྱིས་ནི། །དངོས་གྲུབ་ཆེན་པོ་སྩལ་དུ་གསོལ། །སླར་གཤེགས་སླར་ཡང་འབྱོན་དུ་གསོལ། །བསྟན་བཅོས་བརྩམ་པ་རྣམ་གཉིས་ཏེ། །སྒྲ་ཚད་དག་ལས་ཕུལ་བྱུང་བས། །ལུང་དང་མི་འགལ་དོན་དེ་གཏན་ལ་འབེབས། །མདོ་རྒྱུད་ལུང་དང་བསྟན་
བཅོས་ནས་དྲངས་ཏེ། །དེ་ནས་རྟེན་དང་དེ་དང་མི་འགལ་བ། །དེས་ཀྱང་འགའ་ཞིག་བརྩམ་པར་རིགས་པ་ཡིན། །སྒོ་དྲུག་གིས་ནི་བསྟན་བཅོས་བརྩམ་པ་ནི། །ཡི་དམ་ལྷ་ཡི་ཞལ་མཐོང་དང་། །དེ་ཡིས་གནང་བ་བྱིན་པ་དང་། །དངོས་གྲུབ་ཀུན་ལ་དབང་ཐོབ་
པས། །མདོ་རྒྱུད་ལུང་དང་བསྟན་བཅོས་ལས་དྲངས་ནས། །དེ་ལ་རྟེན་དང་དེ་དང་མི་འགལ་བས། །དེས་ནི་བརྩམ་པར་རིགས་པ་ཡིན། །བདེ་གཤེགས་རྣམས་ཀྱི་བཀའ་ལས་ཀྱང་། །བསྐྱེད་རིམ་གསལ་བར་མ་བསྟན་ཏེ། །བསྐྱེད་རིམ་གསལ་བར་མ་གྱུར་
ན། །དོན་རྣམས་འགྲུབ་པར་མི་འགྱུར་ཏེ། །དེ་བསྐྱེད་གསལ་བར་བསྟན་གྱུར་ནས། །ཤེས་རབ་འཆལ་བའི་གང་ཟག་གིས། །སློབ་དཔོན་མེད་པར་ཞུགས་གྱུར་ནས། །བདག་ཉིད་ཕུང་བ་ཁོ་ནར་ཟད། །ཡང་ན་དེ་དུས་འཁོར་རྣམས་ཀྱིས། །བདེ་གཤེགས་
ཀྱི་ནི་བྱིན་རླབས་ཀྱིས། །དེ་ནི་གསོལ་བ་ཁོ་ན་ཡིན། །བདེ་གཤེགས་མྱ་ངན་འདས་འོག་ཏུ། །བློ་ཆུང་སེམས་ཅན་མང་གྱུར་ཏེ། །མདོ་སྡེ་རྣམས་ལས་ལུང་བསྟན་ཏེ། །ད་ནི་མྱ་ངན་འདས་འོག་ཏུ། །བློ་ཆུང་སེམས་ཅན་མང་གྱུར་ཏེ། །དེ་ལ་དགོངས་ཏེ་བདེ་
གཤེགས་ཀྱིས། །ང་དང་འདྲ་བའི་གང་ཟག་གིས། །ང་ཡི་ལུང་རྣམས་འགྲོལ་བར་བྱ། །དེ་སྐད་ལུང་ནས་འབྱུང་བ་སྟེ། །མཚན་ཉིད་ལྡན་གྱིས་བསྟན་བཅོས་བརྩམ། །མཚན་ཉིད་མི་ལྡན་བརྩམས་གྱུར་ནས། །ཀུན་ཀྱང་དགོངས་པར་མ་གྱུར་པས། །
དེ་དོན་གཞན་དུ་བསྟན་བྱས་ནས། །སྡུག་བསྔལ་ཆེན་པོ་མྱོང་བར་འགྱུར། །སློབ་དཔོན་ཆེན་པོ་རཏྣ་ཀཱིརྟིས་མཛད་པ་སྒྲུབ་ཐབས་ཐམས་ཅད་ཀྱི་ལས་ཀ་གསལ་བྱེད་ཅེས་བྱ་བ་རྫོགས་སོ།། ༄༅༅། །རྒྱ་གར་སྐད་དུ། པྲ་ཏཱི་ཏྱ་ས་མུཏྤཱ་ད་ཧྲྀ་ད་ཡ་

ཀལྤཾ། བོད་སྐད་དུ། རྟེན་ཅིང་འབྲེལ་པར་འབྱུང་བའི་སྙིང་པོའི་ཆོ་ག་ཞིབ་མོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཆོས་གང་རྒྱུས་འབྱུང་དེ་དག་གི །རྒྱུ་དང་དེ་འགོག་གང་ཡིན་པ། །དེ་བཞིན་གཤེགས་པས་བཀའ་
སྩལ་ཏེ། །དེ་སྐད་གསུངས་པ་དགེ་སྦྱོང་ཆེ། །ཚིགས་བཅད་འདི་ཡི་ཆོ་ག་ནི། །སེམས་ཅན་རྣམས་ལ་ཕན་བྱེད་པ། །ལས་ཀུན་འགྲུབ་པར་བྱ་བའི་ཕྱིར། །ཆོ་ག་བཞིན་དུ་བཤད་པར་བྱ། །དེ་ལ་རེ་ཞིག་སྒྲུབ་པ་པོའི་སྐྱེས་བུས་དང་པོར་སངས་རྒྱས་བཅོམ་ལྡན་འདས་ལ་སེམས་རབ་ཏུ་
དང་བ་ཆེན་པོས་བསྐྱེད་པར་བྱའོ། །འདི་སྙམ་དུ་ཡང་སེམས་བསྐྱེད་པར་བྱ་སྟེ། བཅོམ་ལྡན་འདས་ཀྱིས་ཚིགས་སུ་བཅད་པ་འདིས་སེམས་ཅན་རྣམས་ཀྱི་རྟེན་ཅིང་འབྲེལ་བར་འབྱུང་བ་ལུགས་དང་མཐུན་པ་དང་། ལུགས་དང་མི་མཐུན་པའི་སྒོ་ནས་འཇུག་པ་དང་། ལྡོག་པ་གསུངས་ཏེ་འདི་
ལྟར་ལས་དང་ཉོན་མོངས་པ་ཡོད་ན་ནི་སེམས་ཅན་རྣམས་འཁོར་བར་འཇུག་པར་འགྱུར་ལ། ལས་དང་ཉོན་མོངས་པ་མེད་ན་ནི་སེམས་ཅན་རྣམས་འཁོར་བ་ལས་ལྡོག་གོ་ཞེས་བྱ་བའི་བདེན་པའི་ཚིག་འདིས་བདག་གི་ཆོ་ག་ཞིབ་མོ་ཞིག་གྲུབ་པར་གྱུར་ཅིག་ཅེས་སེམས་བསྐྱེད་པར་བྱའོ། །དེའི་
འོག་ཏུ་འདི་སྐད་ཅེས་ཚིག་བརྗོད་པར་བྱའོ། །སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ། །ཡང་དག་པར་རྫོགས་པའི་སངས་རྒྱས་གངྒཱའི་ཀླུང་གི་བྱེ་མ་སྙེད་ཉན་ཐོས་ཀྱི་དགེ་འདུན་དང་བཅས་པ་ལ་ཕྱག་འཚལ་ལོ། །རང་སངས་
རྒྱས་རྣམས་ལ་ཕྱག་འཚལ་ལོ། །དགྲ་བཅོམ་པ་རྣམས་ལ་ཕྱག་འཚལ་ལོ། །ཕྱིར་མི་འོང་བ་རྣམས་ལ་ཕྱག་འཚལ་ལོ། །ལན་ཅིག་ཕྱིར་འོང་བ་རྣམས་ལ་ཕྱག་འཚལ་ལོ། །ནོར་བུ་གྲུབ་པ་རྣམས་ལ་ཕྱག་འཚལ་ལོ་ཞེས་བརྗོད་པར་བྱའོ། །རིམ་པ་འདིས་དེ་དག་གི་ལས་ཐམས་
ཅད་ཚིགས་སུ་བཅད་པ་འདིའི་ཆོ་ག་བཞིན་དུ་སྦྱར་བར་བྱ་སྟེ། དེ་ལྟ་བུ་ནི་ཆོ་ག་ཞིབ་མོ་དང་པོ་ཡིན་ནོ། །དེ་ནས་རང་གི་ལག་མཐིལ་ལམ་ལུས་ལ་སངས་རྒྱས་བཅོམ་ལྡན་འདས་ཀྱི་སྐུ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་བརྒྱན་པ། དཔེ་བྱད་བཟང་པོ་བརྒྱད་ཅུས་སྤྲས་པ་

མེའི་ཁམས་ལ་སྙོམས་པར་བཞུགས་པར་བསམ་པར་བྱ་སྟེ། དེ་ལྟ་བུ་ནི་ལྷ་རྗེས་སུ་དྲན་པའི་ཆོ་ག་ཡིན་ནོ། །ད་ནི་སྦྱོར་བ་བྲི་བར་བྱ་སྟེ། རིམས་ཀྱིས་བཏབ་པ་དང་། ཀླད་པ་ན་བ་དང་མིག་ན་བ་ལ་སོགས་པ་ཇི་ལྟར་འདོད་པ་ཚིགས་སུ་བཅད་པ་འདིས་ལག་པ་གཡས་པའི་ཁུ་ཚུར་གྱིས་དབྱུང་
བའི་ཚུལ་དུ་བྱབ་པར་བྱའོ། །རིམས་ཉིན་གསུམ་པ་དང་། ཉིན་བཞི་པ་དང་། རྟག་པ་དང་། རིམས་མི་བཟད་པས་ཐེབས་པ་རྣམས་ལ་བུ་མོ་གཞོན་ནུས་བཀལ་བའི་སྐུད་པ་ལ་བཟླས་བརྗོད་བརྒྱ་བྱས་པ་གདགས་པར་བྱའོ། །དེ་བཞིན་དུ་རིམས་སེལ་བའི་བདུག་པའི་རི་ལུ་དག་ཇི་
ལྟར་འདོད་པར་བཟླས་བརྗོད་བྱས་ནས་བདུག་པར་བྱའོ། །སྙིང་ནད་དང་རྩིབ་ལོགས་ན་བས་ཐེབས་པ་རྣམས་ལ་ཆུ་ལ་བཟླས་བརྗོད་བཅུའམ་བཅུ་གཉིས་བཟླས་ནས་བླུད་པར་བྱའོ། །ཡང་ན་ནད་དེ་ལ་ཕན་པའི་སྨན་དང་བཅས་ལ་བཟླས་བརྗོད་བྱས་ལ་བླུད་དོ། །གཡེན་པ་དང་།
རྡོ་དང་། འབྲུམ་བུ་དང་། ཕོལ་མིག་ལ་སོགས་པ་དང་། རྨ་རེད་པ་ལ་གྲོག་ཚང་གི་ས་ལ་སྔ་མ་བཞིན་དུ་བཟླས་བརྗོད་བྱས་ནས་བསྐུ་བར་བྱའོ། །གཞང་འབྲུམ་མམ་ཕོ་མཚན་འབྲུམ་བུས་ཐེབས་པ་རྣམས་ལ་སྐྱེར་ཁཎྜའི་རི་ལུའམ་བྱང་ཆུབ་སེམས་དཔའི་རི་ལུ་ལ་བཟླས་བརྗོད་
བྱས་ནས་བསྐུ་བར་བྱའོ། །མདོར་ན་ནད་ཀྱི་རྣམ་པ་གང་གིས་ཐེབས་པ་དེ་ལ་བདག་ཉིད་ཀྱིས་ཚབ་ཆེ་ཆུང་ཤེས་པར་བྱས་ལ་ཚིགས་སུ་བཅད་པ་འདིས་བཟླས་བརྗོད་མང་བའམ་ཉུང་ངུ་ཉི་ཤུ་སུམ་ཅུ་བཟླས་པས་བྱུག་པའམ་བསྐུ་བར་བྱའོ། །འཁྲུ་བས་ཐེབས་པ་རྣམས་ལ་སྨན་ཁུའམ་
རི་ལུའི་རྫས་ཀྱི་རིགས་གཞན་ལ་བཟླས་བརྗོད་ལྔའམ་དྲུག་བཟླས་ནས་ཟར་གཞུག་སྟེ། དེ་ལྟ་བུའི་ནད་གསོ་བའི་ཆོ་ག་ཡིན་ནོ། །དེ་ནས་ལོ་ཏོག་ནས་དང་། གྲོ་དང་། འབྲས་དང་། སྲན་མུངྒ་དང་། མོན་སྲན་དྲེའུ་དང་། རས་བལ་གྱི་ཤིང་དང་། རྒུན་འབྲུམ་དང་། ཨ་རུ་ར་ལ་
སོགས་པ་ལ་ཟ་པའི་སྲིན་བུ་དང་སྦྱར་བ་དང་། ཕྱེ་མ་ལེབ་དང་། བྱི་བ་དང་། ནེ་ཙོ་དང་། རི་སྐེགས་ལ་སོགས་པ་ཁ་བཅིང་བའི་ཕྱིར་ཞིང་གི་ཁྱོན་ཤེས་པར་བྱས་ནས་བྱེ་མའམ་ཐལ་བ་བྲེ་གང་ངམ། དེ་ལས་ལྷག་ཙམ་ལ་བཟླས་བརྗོད་བརྒྱ་རྩ་བརྒྱད་བྱས་ནས་ཞིང་ལ་གཏོར་བར་

བྱའོ། །དེ་ལྟ་བུ་ནི་ལོ་ཐོག་ལ་ཕན་པའི་ཆོ་ག་ཡིན་ནོ། །དེ་བཞིན་དུ་ཧ་ཅང་ཆར་ཆེས་ན་བཅོམ་ལྡན་འདས་ལ་ཕུལ་བའི་མེ་ཏོག་དམན་མ་རེ་རེ་ལ་བཟླས་བརྗོད་ཉི་ཤུ་རྩ་གཅིག་བྱས་ནས། བླ་གབ་མེད་པའི་ཕྱོགས་སུ་བ་ལང་གི་ལྕི་བས་དཀྱིལ་འཁོར་གྲུ་བཞི་པ་ཞིག་
བྱས་ལ། དབུས་སུ་བུམ་པ་བཞག་ནས་སྟེང་དུ་ཁམ་ཕོར་གཞག་པར་བྱའོ། །ཁམ་ཕོར་གྱི་ནང་དུ་མེ་ཏོག་དམན་པ་བཟླས་བརྗོད་བྱས་པ་བསྲེགས་པས་འཆད་པར་འགྱུར་ཏེ། འདི་ནི་ཆར་བཅད་པའི་ཆོ་གའོ། །དེ་བཞིན་དུ་སེར་བ་བཟློག་པ་ལ་སེའུའི་ལྕུག་མའམ་ཉ་ཕྱིས་ལྕུག་མ་ལ་
བཟླས་བརྗོད་བརྒྱ་རྩ་བརྒྱད་བྱས་ནས་སྤྲིན་བཟློག་པར་བྱའོ། །ཡང་ན་ཡུངས་ཀར་ལ་བཟླས་བརྗོད་བརྒྱ་རྩ་བརྒྱད་བྱས་ནས་ཐུམ་པོར་བྱས་ཏེ། སེའུའི་ལྕུག་མའི་ཐོར་ཐོ་ལ་བཅིངས་ནས་བླ་གབ་མེད་པར་གཟུགས་ཏེ། དེ་ལྟ་བུ་ནི་སྤྲིན་བཟློག་པའི་ཆོ་ག་ཡིན་ནོ། །དེ་བཞིན་དུ་འབྱུང་
པོ་དང་། ཤ་ཟ་དང་། བརྗེད་བྱེད་ཀྱི་གདོན་གྱིས་ཟིན་པ་རྣམས་བུམ་པའམ་ཟངས་ཀྱི་རིལ་བར་ཡུངས་ཀར་ཡང་བླུགས། དྲིའི་རྫས་ག་པུར་དང་། ཙནྡན་དང་། གླ་རྩི་ལ་སོགས་པ་ཡང་བཅུག་ནས་བཟླས་བརྗོད་བརྒྱ་རྩ་བརྒྱད་བྱས་ཏེ། སྐུ་གདུང་དང་བཅས་པའི་མཆོད་
རྟེན་ནམ། དྲི་གཙང་ཁང་ངམ། ས་ཕྱོགས་བདེ་བ་ཞིག་ཏུ་བཞག་ལ། ཕྱིས་ས་ཕྱོགས་གཞན་པར་བ་ལང་གི་ལྕི་བས་དཀྱིལ་འཁོར་གྲུ་བཞི་པ་བྱས་ཏེ། མེ་ཏོག་གིས་གཏོར་ལ་ཕྱོགས་བཞིར་བུམ་པ་གང་བ་བཞག་སྟེ། གུ་གུལ་གྱི་བདུགས་པས་བདུག་པར་བྱའོ། །དེ་ནས་
བཀྲུ་བར་བྱ་བ་དེ་གོས་དཀར་པོ་བསྐོན་ནས་དཀྱིལ་འཁོར་གྱི་ནང་དུ་བཞག་ལ། བུམ་པར་ས་བོན་ཐམས་ཅད་དང་རིན་པོ་ཆེ་ཐམས་ཅད་བཅུག་ལ། རྗེ་བཙུན་སངས་རྒྱས་ལ་རེག་པར་བྱས་པའི་ཆུའི་རྒྱུན་གྱིས་བཀྲུས་ན། ནད་ཐམས་ཅད་ལས་ཐར་བར་འགྱུར་རོ། །ནད་འགོ་བ་
ཐམས་ཅད་དང་འཚེ་བ་ཐམས་ཅད་ཐག་རིང་པོར་འགྱུར་རོ། །རིམ་པ་དེ་ལྟར་བྱས་ན་འབྱུང་པོའི་གདོན་དང་། བརྗེད་བྱེད་དང་། ཤ་ཟ་ལ་སོགས་པས་ཀྱང་གླགས་རྙེད་པར་མི་འགྱུར་ཏེ། དེ་ལྟ་བུ་ནི་བུམ་པའི་ཆོ་ག་ཡིན་ནོ། །དེ་བཞིན་དུ་སྦྱོར་བ་གཞན་ཡང་བྱིས་པས་

འཇིགས་པ་རྣམས་ལ་གི་ཝང་ལ་བཟླས་བརྗོད་ལན་ཉི་ཤུ་རྩ་གཅིག་བྱས་པས། འཕགས་པ་སྟོབས་པོ་ཆེ་བྲིས་ལ་གཙང་སྦྲ་བྱས་ལ་མགུལ་བར་གདགས་སོ། །དེ་བཞིན་དུ་ཡུངས་ཀར་ལ་བཟླས་བརྗོད་བྱས་ནས་མགུལ་དུ་གདགས་སོ། །གུ་གུལ་གྱི་བདུག་པ་ལ་ཡང་
དག་པར་བཟླས་བརྗོད་གཉིས་སམ་གསུམ་བྱས་ནས་བདུག་གོ། །མཁའ་འགྲོ་མས་ཟིན་པ་ལ་ཡུངས་ཀར་དང་གུ་གུལ་གྱི་བདུག་པ་ལ་དེ་བཞིན་དུ་བཟླས་བརྗོད་བྱས་པས་བདུག་པར་བྱའོ། །ཡང་ན་སྐུད་པ་ལ་སྔ་མ་དེ་བཞིན་དུ་བཟླས་བརྗོད་བྱས་ནས་མགུལ་དུ་གདགས་
ཏེ། དེ་ལྟ་བུ་ནི་བྱིས་པ་གསོ་བའི་ཆོ་ག་ཡིན་ནོ། །དེ་བཞིན་དུ་བུད་མེད་བུ་ཐོགས་པ་ལ་ཆུ་ལ་བཟླས་བརྗོད་ལྔའམ་དྲུག་བྱས་ནས་བླུད་ན་ལེགས་པར་བཙའ་བར་འགྱུར་རོ། །དེ་བཞིན་དུ་བུད་མེད་མོ་གཤམ་ལ་རྗེ་བཙུན་སངས་རྒྱས་ཀྱི་སྐུ་བསིལ་བའི་ཆུ་ལ་བཟླས་བརྗོད་
ཉི་ཤུ་རྩ་གཅིག་བྱས་ཏེ། ཁྲུས་བྱས་པས་ལུས་གཙང་མར་གྱུར་པ་ལ་བླུད་ན་བུ་ཚ་བྱུང་ཞིང་ཕན་པར་འགྱུར་ཏེ། དེ་ལྟ་བུ་ནི་རིགས་རྒྱུད་སྤེལ་བའི་ཆོ་ག་ཡིན་ནོ། །ལམ་དུ་ཞུགས་པ་རྣམས་ཀྱིས་སྐུད་པ་ལ་བཟླས་བརྗོད་ལན་བདུན་བྱས་ནས་རེ་རེ་བཞིན་མདུད་པ་དོར་བར་བྱའོ། །
ཡང་ན་གོས་ཀྱི་མཐའ་ལ་ལན་གཉིས་སམ་གསུམ་བཟླས་བརྗོད་བྱས་ཏེ། མདུད་པ་བོར་ན་བདེ་བར་འགྲོ་བར་འགྱུར་ཏེ། དེ་ལྟ་བུ་ནི་ལམ་དུ་ཉེས་པ་མི་འབྱུང་བའི་ཆོ་ག་ཡིན་ནོ། །ཤུ་དག་ཚོན་གང་ཙམ་ལོ་གཅིག་གི་ཉི་མའི་གྲངས་དང་མཉམ་པ་བླངས་ནས་གྲངས་དེ་ཙམ་དུ་
བཟླས་བརྗོད་བྱས་ལ། མར་ཡང་སྲང་དེ་ཙམ་ཞིག་ལ་བཟླས་བརྗོད་བྱས་ནས་བུམ་པ་གཅིག་ཏུ་བླུགས་ཏེ། བཀྲུས་ནས་ཉི་མ་རེ་རེ་ཞིང་ཤུ་དག་གི་དུམ་བུ་དང་། མར་སྲང་གཅིག་ལ་བཟླས་བརྗོད་བྱས་ནས་ཟོས་ན་ཡིད་གཞུངས་པའི་མཆོག་ཏུ་འགྱུར་རོ། །དེ་བཞིན་དུ་བ་
སེར་སྐྱའི་འོ་མ་དང་མར་དང་བཟླས་བརྗོད་བརྒྱ་རྩ་བརྒྱད་བྱས་པའི་འོ་ཐུག་སྣ་མའི་མགོ་ལྕོགས་ཀྱིས་དཀྲུགས་ཏེ་ཟོས་ན་ཡིད་གཞུངས་པའི་མཆོག་ཏུ་འགྱུར་ཏེ། དེ་ལྟ་བུ་ནི་ཡིད་གཞུངས་པའི་ཆོ་ག་ཡིན་ནོ། །དེ་བཞིན་དུ་མེ་ཏོག་དང་། འབྲས་བུའམ། རྩྭའམ། ཤིང་ངམ་

འཇིམ་པ་ལག་པ་གཡས་པའི་ཆང་པར་བཅུག་ལ་ལན་ཉི་ཤུ་རྩ་གཅིག་ཆང་པར་བཅུག་པ་བྱིན་པ་དེ་དང་མཛའ་བར་འགྱུར་རོ། །དེ་ནི་མཛའ་བར་འགྱུར་བའི་ཆོ་ག་ཡིན་ནོ། །དེ་བཞིན་དུ་བ་ལང་དང་རྟ་ལ་སོགས་པ་ཕྱུགས་འཆི་བར་ཉེ་བར་གནས་པའི་ཚེ་ཆུ་ཡུངས་ཀར་
དང་བཅས་པ་ལ་བརྒྱ་རྩ་བརྒྱད་བཟླས་བརྗོད་བྱས་པའི་ཐུམ་པོ་གདགས་སོ། །དེ་བཞིན་དུ་མི་རྣམས་འཆི་བའི་གནོད་པ་འབྱུང་བ་ལ། ཡུངས་ཀར་ལ་དེ་བཞིན་དུ་བཟླས་བརྗོད་བྱས་པའི་ཐུམ་པོ་མགོ་སྐྱོབ་ཀྱི་ཐོག་ཏུ་གདགས་པར་བྱ་སྟེ། འདི་ལྟ་བུ་ནི་རེ་ཞིག་མི་ངས་དང་
ཕྱུགས་ངས་གསོ་བའི་ཆོ་ག་ཡིན་ནོ། །རེ་ཞིག་ནེ་རྦན་རཀྵི་ཏ། བདག་གིས་རང་གི་བླ་མ་ལས་ཚིགས་སུ་བཅད་པ་མཐུ་བསམ་གྱིས་མི་ཁྱབ་པའི་སྦྱོར་བ་བརྒྱ་ཐོས་སོ། །དེ་ཡང་ཡུན་རིངས་པས་ཁ་ཅིག་ནི་བརྗད་དེ། ཆེ་ལོང་ཀུན་བསྡུས་པ་ཡིན་ནོ། །འདི་ཐམས་ཅད་
འགྲུབ་པ་ལ་ཐེ་ཚོམ་མི་བྱའོ། །ནངས་ན་ཡང་གང་ལ་ཡིད་ཆེས་པས་དད་པ་ཡོད་པ་དེ་ལ་ལྷག་པར་འགྲུབ་པར་འགྱུར་རོ་ཞེས་བྱ་བར་ངེས་སོ། །བཟླས་བརྗོད་འབུམ་བྱས་ནས་དགོས་པ་ཅི་ཡང་མི་འགྲུབ་པ་མེད་དོ། །ཐོ་གར་ཡུལ་ནས་སྐྱེས་གྱུར་པ། །དགེ་སློང་ནེ་རྦན་རཀྵི་
ཏས། །ཆོ་ག་བཟང་པོ་ཚུལ་བཞིན་དུ། །རབ་ཏུ་འབད་ནས་བཤད་པ་ཡིན། །རྟེན་ཅིང་འབྲེལ་པར་འབྱུང་བའི་སྙིང་པོའི་ཆོ་ག་ཞིབ་མོ། །མཁན་པོ་ནེརྦན་རཀྵི་ཏས་མཛད་པ་རྫོགས་སོ།། ༄༅༅། །རྒྱ་གར་སྐད་དུ། པྲ་ཏིཥྛ་བི་དྷིཿ། བོད་སྐད་དུ།
རབ་ཏུ་གནས་པའི་ཆོ་ག །ཐམས་ཅད་མཁྱེན་པ་ལ་ཕྱག་འཚལ་ལོ། །དེ་ལ་རེ་ཞིག་ཕ་རོལ་ཏུ་ཕྱིན་པའི་ཐེག་པའི་སྒོར་བྱང་ཆུབ་མཆོག་ཏུ་སེམས་བསྐྱེད་ཐོབ་པའི་དགེ་བསྙེན་ནམ། དགེ་ཚུལ་ལམ། དགེ་སློང་གི་དགེ་འདུན་ནམ། གང་ཟག་གི་མཆོད་རྟེན་ནམ། བྲིས་
སྐུ་ལ་སོགས་པ་རབ་ཏུ་གནས་པ་བྱེད་པས་གང་རབ་ཏུ་གནས་པར་བྱ་བ་མཚན་ཉིད་དང་ལྡན་པ་དེའི་ཉེ་འཁོར་ཅིག་སྐྱང་ནུལ་བྱས་ཏེ། མཐར་ཙནྡན་ལ་སོགས་པའི་དྲི་ཞིམ་པོའི་ཆུས་བྱུགས་ནས། མདུན་དུ་མཎྜལ་གྲུ་བཞི་པ་ཁྲུ་གང་ཡན་ཆོད་ནས་ཇི་ཙམ་ནུས་པར་བྱུགས་ནས།

དེར་པདྨ་བདབ་མ་བརྒྱད་པ་ཚོན་གྱིས་བྲི་བར་བྱའོ། །དེའི་སྟེང་དུ་མཚན་ཉིད་དང་ལྡན་པའི་བུམ་པ་གསེར་ལ་སོགས་པའི་རྒྱུ་ལས་བྱས་པ་ཁ་རྒྱན་དང་། མགུལ་དཀྲིས་དང་བཅས་པར་རིན་པོ་ཆེ་དང་། སྨན་དང་། འབྲུ་རྣམས་གཞུག་ཅིང་ཙནྡན་དང་། ག་བུར་ལ་སོགས་པ་
དྲི་ཞིམ་པོ་དང་སྦྱོར་བའི་ཆུ་ཀླུང་གི་ཆུ་གཙང་མས་དགང་ཞིང་། གྲངས་ཀྱང་གཅིག་ནས་བརྩམས་ཏེ་ཇི་སྙེད་འབྱོར་པ་གཞག་པར་བྱའོ། །མེ་ཏོག་ལ་སོགས་པའི་ཡོ་བྱད་ཅི་འབྱོར་པ་རྣམས་ཀྱང་མདུན་དུ་སྟ་གོན་དུ་བྱས་ལ། ནང་པར་སྔ་དྲོའི་དུས་སུ་ཡིད་དུ་འོང་བའི་བླ་རེ་བྲེས་
པས་མཛེས་པའི་གནས་སུ་སྒྲུབ་པ་པོས་སྟན་བདེ་བ་ལ་སྐྱིལ་མོ་ཀྲུང་ལ་སོགས་པ་མཉམ་པར་གཞག་པའི་སྤྱོད་ལམ་གྱིས་གནས་ཏེ། འཇིག་རྟེན་སྐྱོང་བ་རྣམས་ལ་གཏོར་མ་བྱིན་ལ། གསེར་རམ་དངུལ་གྱི་གཞིའམ་གྲོ་ག་ལའང་རུང་། ཙནྡན་དཀར་པོས། ཡེ་དྷརྨཱ་ཧེ་ཏུ་
པྲ་བྷ་བཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་བ་དཏ། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་བཱ་དཱི་མ་ཧཱ་ཤྲ་མ་ཎཿ ཞེས་པ་ཚར་བདུན་དུ་བྲིས་ལ། ཚར་རེ་རེ་ཞིང་ལན་བདུན་བདུན་བཀླགས་ཏེ། བུམ་པའི་ཆུས་བཀྲུས་ལ་བུམ་པ་དེ་ཉིད་དུ་བཞུགས་པར་བྱའོ། །དེ་ནས་བུམ་པའི་སྟེང་དུ་ཟླ་བ་ལ་སྔགས་
ཀྱི་ཕྲེང་བ་དཀར་པོ་འོད་དང་བཅས་པ་སྐད་ཅིག་གིས་བསམས་ཏེ། དེའི་འོད་ཟེར་གྱིས་འཇིག་རྟེན་གྱི་ཁམས་ཐམས་ཅད་ནས་ལྷའི་བདུད་རྩིའི་རྒྱུན་རྣམས་བཀུག་ལ་བུམ་པའི་ཆུ་དེ་སྔགས་ཀྱི་ཕྲེང་བ་ཞུ་བ་དང་ལྷན་ཅིག་རོ་གཅིག་ཏུ་གྱུར་པས་བུམ་པ་གང་བར་དམིགས་ནས། དེ་ལག་པས་
རེག་ནས་བརྒྱ་རྩ་བརྒྱད་བཟླས་པར་བྱའོ། །དེའི་རྗེས་ལ་མཆོད་རྟེན་ལ་སོགས་པའི་ནང་ངམ་སྙིང་གར་ཟླ་བ་ལ་སྔ་མ་ལྟར་སྔགས་ཀྱི་ཕྲེང་བ་དམིགས་ལ། དེའི་འོད་ཀྱིས་འཇིག་རྟེན་ཁྱབ་པར་བལྟས་ཏེ། དེས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བསྐུལ་ནས། གང་ཞིག་
རབ་ཏུ་གནས་པར་བྱ་བ་མཆོད་རྟེན་ལ་སོགས་པ་དེའི་གཟུགས་ཀྱིས་བྱོན་ནས་དེ་དང་དེ་ལ་ཐིམ་པ་དང་། སྔགས་ལ་སོགས་པ་ཐམས་ཅད་རོ་གཅིག་ཏུ་གྱུར་པར་བསམས་ནས། ལུགས་སུ་བླུགས་པ་རྣམས་ལ་ནི་དངོས་སུ་ཁྲུས་བྱའོ། །གླེགས་བམ་ལ་སོགས་པ་རྣམས་ལ་ནི་མེ་

ལོང་ལ་བཀྲ་ཤིས་ཀྱི་ཚིགས་སུ་བཅད་པ་དང་། གླུ་དང་། སྒྲ་དང་བཅས་པས་སྔགས་བཟླས་བཞིན་དུ་སྔར་གྱི་བུམ་པའི་ཆུས་ཁྲུས་གསོལ་བར་བྱའོ། །དེ་ནས་དྲི་ཞིམ་པོས་བསྒོས་པའི་གོས་ཀྱིས་སྐུ་ཕྱི་བ་བྱས་པའི་རྗེས་ལ་ཅི་འབྱོར་པའི་ན་བཟའ་དང་
རྒྱན་རྣམས་དབུལ་བར་བྱའོ། །དེ་ནས་མེ་ཏོག་ལ་སོགས་པའི་མཆོད་པ་ཅི་འབྱོར་པ་རྣམས་དབུལ་ལོ། །དེའི་རྗེས་ལ་ལག་པས་རེག་ནས་སྙིང་པོ་བརྒྱ་རྩ་བརྒྱད་བཟླས་པར་བྱའོ། །དེ་ནས་མཆོད་རྟེན་ནམ་ལུགས་སྐུའི་ནང་དུ་གྲོ་ག་ལ་སྙིང་པོ་བྲིས་ཏེ་གཞུག་གོ། །གླེགས་
བམ་བྲིས་སྐུའི་ནི་མཐའ་མར་བྲིའོ། །དེ་ལྟར་བྱས་ནས་སླར་ཡང་མེ་ཏོག་ལ་སོགས་པའི་མཆོད་པ་རྣམས་ཀྱིས་མཆོད་ཅིང་རོལ་མོའི་སྒྲ་ཡང་བསྒྲགས་ཏེ། འབྱུང་པོ་གང་དག་འདིར་ནི་ལྷགས་གྱུར་ཅིང་། །སའམ་འོན་ཏེ་བར་སྣང་འཁོད་པ་དག །སྐྱེ་དགུ་ཀུན་ལ་རྟག་ཏུ་
བྱམས་བྱེད་ཅིང་། །ཉིན་དང་མཚན་དུ་ཆོས་ཀྱང་སྤྱོད་གྱུར་ཅིག །རྒྱལ་བ་དགྲ་རྒྱལ་བདེན་པའི་བྱིན་གང་གིས། །བདེན་འདི་གསུངས་པ་འདི་ལ་སྡིག་མེད་ཅིང་། །ལྷར་བཅས་ལྷ་མིན་གྱིས་རྟག་མཆོད་འོས་པའི། །བདེན་པ་དེས་ནི་དེང་འདིར་བདེ་ལེགས་ཤོག །དམ་ཆོས་བདུད་རྩི་
ཐམས་ཅད་མཁྱེན་པ་ཡིས། །ཞལ་ནས་གསུངས་པ་བསིལ་བའི་རོ་འདི་ཡི། །ཉོན་མོངས་འབར་བའི་མེ་ཡིས་གདུངས་པ་ཡི། །འགྲོ་ཀུན་སྡུག་བསྔལ་རྟག་ཏུ་ཞི་བྱེད་ཤོག །ཅེས་བརྗོད་ཅིང་སྔར་གྱི་བུམ་པའི་ཆུའི་ལྷག་མས་རབ་ཏུ་གནས་པའི་ས་གཞི་དང་། གནས་ཁང་དག་ཏུ་ཉུང་
ཟད་གཏོར་བར་བྱའོ། །བྱ་བ་རྣམས་རྫོགས་པ་ན་རྡུལ་ཚོན་ལ་སོགས་པ་རྣམས་ཆུ་བོ་ཆེན་པོའམ། ཁྲོན་པ་རྙིང་པར་དོར་ནས་ས་གཞི་ལྕི་བ་སར་པས་བྱུགས་ཏེ། རབ་གནས་བྱེད་པའི་སློབ་དཔོན་དང་། དགེ་སློང་ལ་མཆོད་སྟོན་དང་། ཡོན་དབུལ་བ་ལ་སོགས་པ་བྱའོ། །དེ་ནས་རྟེན་དེ་ལ་མཆོད་
པ་ཕུལ་ཏེ། ཡོན་བདག་འདིའི་ཆེད་དུ་བཞུགས་ལ་སེམས་ཅན་གྱི་དོན་མཛད་པར་གསོལ་བ་གདབ་པོ། །རབ་ཏུ་གནས་པའི་ཆོ་ག་ཐུན་མོང་པ་པཎྜི་ཏ་དཔལ་སུ་མ་ཏི་ཀཱིརྟིས་མཛད་པ་རྫོགས་སོ།། །།མཁས་པ་དེ་ཉིད་དང་ལོ་ཙཱ་བ་པྲཛྙཱ་ཀཱིརྟིས་བསྒྱུར་བའོ།། །།