Luận tạng Tây Tạng (Tengyur) — Tập 74

ས་བོན་གྱི་ཡི་གེ་ལ་གཏད་ལ་སྔགས་འདི་བཟླས་སོ། །ཨོཾ་བཛྲ་ཀྲོ་དྷ་ཧ་ཡ་

གྲཱི་བ་ཧུ་ལུ་ཧུ་ལུ་ཧཱུྃ་ཕཊ་ཅེས་ཅི་མང་དུ་བཟླས་སོ། །ས་བོན་གྱི་ཡི་གེ་ལས་འོད་འཕྲོས་པས་ནམ་མཁའི་མཐས་གཏུགས་པ་ཐམས་ཅད་འཕགས་པ་རྟ་མགྲིན་དུ་གྱུར་པར་བསམ། བཟླས་པས་དུབ་ན་ཡེ་ཤེས་པ་མདུན་དུ་བཏོན་ལ་ལྷ་མོ་ལྔས་སྔ་མ་བཞིན་དུ་མཆོད་དོ། །ཚེ་འདི་ཉིད་ལ་དངོས་གྲུབ་ཐོབ་པར་བྱ་བའི་ཕྱིར་
ཡི་གེ་བརྒྱ་པ་བཟླས། འཕགས་པ་རྟ་མགྲིན་ལ་བསྟོད་པ། ཧཱུྃ་སྐུ་མདོག་ཆགས་མེད་ནུབ་ཁའི་དམར་ཐག་འདྲ། །འབར་བའི་དབུ་ལ་རལ་པ་གྱེན་དུ་བརྫེས། །མ་རིག་ཚངས་པ་ཁ་སྦུབ་གནོན་པའི་ལྷ། །པདྨ་རིག་སྔགས་རྒྱལ་ལ་ཕྱག་འཚལ་ལོ། །ཡེ་ཤེས་ཧ་ཡ་གྲཱི་བ་རྟ་མཆོག་དཔལ། །
ཞལ་ནས་འབྲུག་སྟོང་དི་རི་རི། །ཚེམས་གཙིགས་ཙམ་ན་ཚེམས་ནང་ནས། །གདུག་པའི་མེ་སྟག་ཁམ་ཁམ་འབར། །ཁྲོ་རྒྱལ་དབང་གི་རྟ་སྐད་ཙེར་ཙེར་མཚེར། །ཞེས་བསྟོད། མཁྱེན་པར་གཤེགས་པར་བྱ་བའི་ཕྱིར་ཛཿཛཿཞེས་ལན་གསུམ་བརྗོད་དོ། །རྫོགས་པའི་རིམ་པ་འདི་ལྟར་བསྒོམ་པར་
བྱ་སྟེ། བདག་ཉིད་རྟ་མགྲིན་དུ་བསྒོམས་པའི་སྙིང་གར་ཉི་མའི་དཀྱིལ་འཁོར། དེའི་སྟེང་དུ་ཡི་གེ་ཧྲཱིཿདམར་པོ་ལས་ཕྱོགས་བཅུར་འོད་འཕྲོས་ཏེ། ཕྱི་སྣོད་ཀྱི་འཇིག་རྟེན་དང་ནང་བཅུད་ཀྱི་འཇིག་རྟེན་ལ་ཕོག་པས་འོད་དུ་ཞུ་ནས་ཀུན་རྟ་མགྲིན་གྱི་ངོ་བོར་བསམ། འོད་དེ་དག་ཐམས་ཅད་རང་གི་ལུས་ལ་བསྡུ།
དམ་ཚིག་སེམས་དཔའ་ཡེ་ཤེས་སེམས་དཔའི་རྟ་མགྲིན་དམར་པོ་ལ་བསྡུ། ཧྲཱིཿདམར་པོ་ཐིག་ལེ་དཀར་ཞིང་འཚེར་བ་ཡུངས་ཀར་ཙམ་ཅིག་ལ་བསྡུ། ཡུངས་ཀར་ཙམ་པོ་དེ་ཡང་མི་དམིགས་པར་བསྒོམ་སྟེ་གསལ་ལ་མི་རྟོག་པ་ཅིག་ཏུ་བསྒོམ་མོ། །ལྷའི་བུའི་བདུད་འདུལ་བར་འདོད་ན། རྡོ་རྗེ་རྩེ་ལྔ་པ་
ཐོགས་པའི་ཕྱག་ལ་མཆོད་པ་བྱ། ལྷ་ཀླུ་མཐུ་བོ་ཆེ་ཐམས་ཅད་དབང་དུ་སྡུད་པར་འདོད་ན་དུང་ཆེན་ཐོགས་པའི་ཕྱག་ལ་མཆོད་པ་བྱ། བདག་དང་གཞན་གྱི་སྡུག་བསྔལ་ཞི་བར་འདོད་ན་ཞགས་པ་ཐོགས་པའི་ཕྱག་ལ་མཆོད་པ་བྱ། བྱིས་པའི་གདོན་བཅོ་བརྒྱད་དང་། བགེགས་རིགས་སྟོང་ཕྲག་བརྒྱད་
ཅུ་དང་། ལྷ་འདྲེ་མ་རུངས་པ་ཐམས་ཅད་འདུལ་བར་འདོད་ན་རལ་གྲི་ཐོགས་པའི་ཕྱག་ལ་མཆོད་པ་བྱ། ལྷ་འདྲེ་མཐུ་བོ་ཆེ་ཐམས་ཅད་བྲན་བཞིན་དུ་འཁོལ་བར་འདོད་ན། སེང་ལྡེང་གི་རྟ་ཐོགས་པའི་ཕྱག་ལ་མཆོད་པ་བྱ། ཀླུ་མ་རུངས་པ་ཐམས་ཅད་གདུལ་བར་འདོད་ན། བྱ་ཁྱུང་ཐོགས་པའི་ཕྱག་

ལ་མཆོད་པ་བྱ། ཆུ་གྲོང་ཁྱེར་རམ་ཡུལ་དུ་བྱུང་བ་བཟློག་པར་འདོད་ན། སེང་ལྡེང་གི་ཕུར་བུ་སོར་བརྒྱད་པ་ལ་རྟ་མགྲིན་གྱི་སྔགས་སྔོན་དུ་འབུམ་བསྙེན་པ་བྱས་ལ་ལས་ཀྱི་དུས་སུ་ཡང་འབུམ་བྱས་ཏེ་བཏབ་ན་ཆུའི་རྒྱུན་བཟློག་པར་འགྱུར་རོ། །ཤྭ་བཟློག་པར་འདོད་ན་ཟངས་དང་
ལྕགས་ལ་འབྲུག་གི་གཟུགས་བྲིས་ལ་སེང་ལྡེང་གི་ཕུར་བུ་སོར་བརྒྱད་པ་ཅིག་ལ་སྔགས་བརྒྱ་རྩ་བརྒྱད་བཏབ་ལ་ཤྭ་སར་བཏབ་ན་བཟློག་པར་འགྱུར་རོ། །སེར་བ་བསྲུང་བར་འདོད་ན་ཡུངས་ཀར་ལ་སྔགས་བརྒྱ་རྩ་བརྒྱད་བཏབ་ལ་ཡུངས་ཀར་ལ་ཆའི་ནང་དུ་དྲིལ་ལ་ཕྱོགས་བཞི་མཚམས་བརྒྱད་དཀྱིལ་དང་དགུ་
རུ་སྦ། གདོང་ཟློག་ལ་བྱེ་མ་ལ་སྔགས་ལན་བརྒྱ་རྩ་བརྒྱད་བཟླས་ལ་འབྲུག་དང་། སྤྲིན་དང་། གློག་རྒོད་པའི་སར་བཏབ་ན་སེར་བ་བཟློག་པར་འགྱུར་རོ། །འབྲས་དང་གག་པ་དང་། ལྷོག་པ་ཀུན་ལ་འཇིམ་པ་ལ་སྔགས་བཏབ་སྟེ་བྱུགས་ན་ཞི་བར་འགྱུར་རོ། །མི་ནད་དང་། ཕྱུགས་ནད་དང་།
ཡམས་ཀྱི་ནད་ལ་སེང་ལྡེང་གི་ཕུར་བུ་སོར་བཞི་པ་ལ་སྔགས་སྟོང་ཕྲག་བདུན་བཟླས་ལ་ཕྱོགས་བཞིར་བཅུགས་ལ་སྔ་དྲོའི་དུས་སུ་ཆུ་གཙང་མ་ལ་སྔགས་བརྒྱ་རྩ་བརྒྱད་བཟླས་ཏེ། ཁང་ཐོག་ནས་གཏོར་ན་ཡམས་ནད་ཐམས་ཅད་ཞི་བར་འགྱུར་རོ། །གཏོར་མ་གཏོང་བར་འདོད་པས་བདག་ཉིད་དཔལ་རྟ་མགྲིན་དུ་
བསྒོམས་ལ་སྙིང་གར་ཧྲཱིཿདམར་པོ་ལས་འོད་ཕྱོགས་བཅུར་འཕྲོས་པས་སེམས་ཅན་ཐམས་ཅད་རྟ་མགྲིན་དུ་བསྒོམས་ལ། ཡང་རྟ་མགྲིན་གྱི་ཐུགས་ཀ་ནས་འོད་ཟེར་ཕྱོགས་བཅུར་འཕྲོས་པས་རྟ་མགྲིན་དུ་གྱུར་པ་དེ་གཏོར་མའི་སྟེང་དུ་སྤྱན་དྲངས་ཏེ། གཏོར་མའི་སྟེང་དུ་བཾ་དམར་པོ་ཅིག་བསམ། བཾ་དེ་ལས་
འོད་འཕྲོས་ཏེ། སླར་བཾ་ལ་ཐིམ་པས་ཤེལ་དམར་པོ་ལས་གྲུབ་པའི་རིན་པོ་ཆེའི་སྣོད་ཡངས་ཤིང་རྒྱ་ཆེ་བ་ཅིག་བསམ། རང་རྟ་མགྲིན་དུ་བསྒོམས་པའི་སྙིང་གའི་ཧྲཱིཿདམར་པོ་དེའི་འོད་ནམ་མཁའ་ལ་འཕྲོས་པས། ཧྲཱིཿདཀར་དམར་སེར་སྔོ། གནག་འོད་བྱུང་བས་བདུད་རྩིའི་ཆུ་རྒྱུན་བབས་པས་གང་
བར་བསམ། དེ་ནས་གཏོར་མ་རྣམ་པར་དག་པར་བྱ་བའི་ཕྱིར་སརྦ་ཀ་རི་ཞེས་ལན་བདུན་བརྗོད་པར་བྱའོ། །གཏོར་མ་ཉིད་བདུད་རྩིར་བྱིན་གྱིས་བརླབ་པའི་ཕྱིར། ན་མཿསརྦ་ཏ་ཐཱ་ག་ཏ་ཨ་བ་ལོ་ཀི་ཏེ། ཨོཾ་སཾ་བྷ་ར་སཾ་བྷ་ར་ཧཱུྃ་ཞེས་ཉི་ཤུ་རྩ་གཅིག་བརྗོད་པར་བྱ་སྟེ། ཡང་ན་སྔགས་བདུན་ཚན་བཞི་

བརྗོད་ལ་ཆུ་ལ་གདབ་པོ། །ཡེ་ཤེས་ཀྱི་ཆོས་སྐྱོང་ལ་ཉི་ཤུ་རྩ་གཅིག་བརྗོད་པར་བྱའོ། །ཕྱོགས་སྐྱོང་འཇིག་རྟེན་པ་ལ་ཡང་སྔགས་བདུན་ཚན་བཞི་བརྗོད་དོ། །ཡང་ན་ཨོཾ་ཨཱཿཧཱུྃ་ཧྲཱིཿཞེས་ཉི་ཤུ་རྩ་གཅིག་བརྗོད་པར་བྱའོ། །འཕགས་པ་རྟ་མགྲིན་གྱི་སྒྲུབ་ཐབས་ཞེས་བྱ་བ། སློབ་དཔོན་དཔལ་མར་
མེ་མཛད་ཡེ་ཤེས་ཀྱིས་མཛད་པ་རྫོགས་སོ།། ༄༅། །དཔལ་རྟ་མགྲིན་གྱི་སྒྲུབ་ཐབས། འཇིག་རྟེན་དབང་ཕྱུག་ལ་ཕྱག་འཚལ་ལོ། །དོན་མེད་དག་ལ་གནོད་པའི་བྱ་བ་རྣམས་སྤངས་ཏེ། །རི་བཞིན་བརྟན་པས་རྣམ་དབེན་ས་ཕྱོགས་སོང་ནས་ནི། །གནས་དེར་བསམ་གཏན་
ཁང་པ་ཤིན་ཏུ་ཡིད་འཐད་པར། །འོག་གི་ས་གཞི་ཤིན་ཏུ་འཐས་པ་ཁོ་ན་ལ། །ས་ལ་མ་ལྷུང་ལྕི་བ་དྲི་བཟང་རྣམས་དང་ནི། །བསྲེས་པས་ལེགས་བྱུགས་གཟུགས་བརྙན་འཆར་བ་ལྟ་བུར་བྱ། །དྲི་ཞིམ་མེ་ཏོག་དག་གིས་གཏོར་ལ་རྒྱན་རྣམས་བྲེ། །དཀྱིལ་འཁོར་དག་ཏུ་ཞུགས་ཤིང་དམ་ཚིག་
ལ་གནས་པའམ། །སོ་སོར་ཐར་ལ་གནས་པའམ་བྱང་ཆུབ་སེམས་བསྐྱེད་པས། །བདེ་བའི་སྟན་ལ་གནས་ནས་བདུན་པོ་རྣམ་པར་དག་པར་བྱས། །དེ་རྗེས་ཚད་མེད་བཞི་ཡིས་བདག་བློ་ལེགས་པར་སྦྱང་། །ཤཱུ་ནྱ་ཏཱའི་སྔགས་ཀྱིས་སྟོང་པ་ཉིད་དུ་བསྒོམ། །བདག་ཉིད་རྣམ་ཤེས་ངོ་བོ་ཡི་གེ་པཾ་དུ་ལྟ། །
པཾ་དེ་ཡོངས་སུ་གྱུར་པས་པདྨ་འདབ་མ་བརྒྱད། །པདྨའི་ལྟེ་བར་ཨ་ལས་ཟླ་བའི་དཀྱིལ་འཁོར་རོ། །དེ་སྟེང་པཾ་ལས་ཉི་མ་དེ་སྟེང་ཧཱུྃ་བསམ་བྱ། །དེ་ལས་རྡོ་རྗེའི་ལྟེ་བར་ཧཱུྃ་གིས་མཚན་པ་བསམ། །དེ་ལས་འོད་འཕྲོས་ས་གཞི་ར་བ་གུར་དུ་གྱུར། །རྡོ་རྗེ་ཧཱུྃ་བཅས་དེ་ལས་གཞལ་ཡས་ཁང་པ་བསྐྱེད། །
དེ་ནས་རྡོ་རྗེ་ཧཱུྃ་བཅས་ལས། །བདག་ཉིད་རྟ་མགྲིན་སྐུར་གྱུར་ཏེ། །དམར་པོ་ཞལ་གསུམ་ཕྱག་ཞབས་བཞི། །དབུས་དམར་གཡས་སྔོ་གཡོན་དཀར་བ། །དབུས་མའི་གཙུག་ནས་རྟ་མགོ་ལྗང་། །གྱེན་དུ་ཁ་བལྟས་རྟ་སྐད་འབྱིན། །དང་པོ་རྡོ་རྗེ་པདྨ་བསྣམས། །ཐ་མ་གཉིས་ཀྱིས་མདའ་
གཞུ་འགེངས། །རིགས་ལྔའི་བདག་ཉིད་དབུ་ལའོ། །དབུ་སྐྲ་ཁམ་ནག་གྱེན་དུ་བརྫེས། །ཐོད་པའི་ཕྲེང་བས་རབ་ཏུ་བརྒྱན། །ཡན་ལག་དྲུག་ལ་སྦྲུལ་གྱིས་བརྒྱན། །སྐུ་སྨད་སྟག་གི་པགས་པས་གཡོགས། །ཞབས་བཞི་ཡིས་ནི་འཇིག་རྟེན་གྱི། །ལྷ་ཆེན་བཞི་ནི་རབ་ཏུ་མནན། །

མེ་དཔུང་འབར་བའི་དཀྱིལ་ན་བཞུགས། །དཀྱིལ་འཁོར་གྱི་ནི་ཕྱོགས་བཞིར་ནི། །ཤར་དུ་རྡོ་རྗེ་ལས་བྱེད་མ། །ཞལ་གཅིག་ཕྱག་གཉིས་སྔོན་པོར་བསྒོམ། །ལྷོ་རུ་གཤིན་རྗེ་ལས་བྱེད་མ། །ཞལ་གཅིག་ཕྱག་གཉིས་ནག་མོར་བསྒོམ། །ནུབ་ཏུ་ཀླུ་ཡི་ལས་བྱེད་
མ། །ཞལ་གཅིག་ཕྱག་གཉིས་དཀར་མོར་བསྒོམ། །བྱང་དུ་གནོད་སྦྱིན་ལས་བྱེད་མ། །ཞལ་གཅིག་ཕྱག་གཉིས་སེར་མོར་བསྒོམ། །གཡས་པ་ཀུན་ལ་གྲི་གུག་སྟེ། །གཡོན་པ་ཀུན་ལ་ཐོད་ཁྲག་བསྣམས། །དཀྱིལ་འཁོར་འཁོར་ལོ་རྫོགས་ནས་ནི། །ཡེ་ཤེས་སེམས་དཔའ་
བཀུག་ལ་གཞུག །ལྷ་ཡི་འཁོར་ལོ་བསྒོམ་བྱས་ལ། །ལས་རྣམས་འདོད་ན་བཟླས་པ་བྱ། །ཨོཾ་ཧ་ཧ་ཧི་ཧི་ཧྲིཾ་ཧྲིཾ་ཧྲི་ཧྲི་ཧཱུྃ་ཧཱུྃ་ཕཊ་ཕཊ། །བསྙེན་པ་གྲངས་བཞིན་བཟླས་ནས་ནི། །ལས་བྱེད་རྣམས་ཀྱི་མཚན་སྔགས་བཟླས།།བཛྲ་ཤོ་ན་ས་མ་ཡ། ཡ་མ་ཤོ་ན་ས་མ་ཡ། ནཱ་ག་ཤོ་ན་ས་མ་ཡ།
ཁ་རག་ཤོ་ན་ས་མ་ཡ། །རྒྱལ་འགོང་རྒྱལ་ཚེ་ལ་མ་ཤ་དོམ། རོ་ལ་ཁྲག་འཐུང་ལ་སྙིང་ཁྲག་བཛྲ་ས་དུ་ས་མ་ཡ་ཛཿབཛྲ་ཛཿཏྲིག་རོག་ཏ་འབྱུང་པོ་མཱ་ར་ཡ་སྙིང་ཁྲག་ཛཿཧཱུྃ་བཾ་ཧོཿབཛྲ་ཨ་གུ་ཤ་ཛཿའབྱུང་པོའི་ཚེ་ལ་མ་ཤ་དོམ། རོ་ལ་ཁྲག་འཐུང་། སྙིང་ཁྲག་འཐུང་། སྙིང་ཁྲག་འབྱུང་པོ་འབྱུང་མོ་པྲ་
ཏི་པྲེ་མོའི་ཚེ་ལ་མ་ཤ་དོམ། རོ་ལ་ཁྲག་འཐུང་སྙིང་ཁྲག་མ་ལཱ་མ་ལཱ་ཡེས་ཡེས་བྷྱོ་བྷྱོ་ཀྲོཾ་ཀྲོཾ་སྭཱ་ཧཱ། ཨོཾ་བཛྲ་ཀྲོ་དྷ་ཧ་ཡ་གྲཱི་བ་ཧུ་ལུ་ཧུ་ལུ་ཧཱུྃ་ཕཊ། ཨོཾ་ཌ་ཀི་ཙ་ཏི་བི་ཙ་ཏི། ཧུ་ཡ་ཧུ་ཡ། ཧུ་ལུ་ཧུ་ལུ། པུ་རུ་ཏེ་པུ་རུ་ཏེ་ཧཱུྃ་ཕཊ་སྭཱ་ཧཱ། ཉ་ཤ་སྒོག་བཙོང་སྤངས་པ་ཡི། །གཏོར་མ་ལྔའམ་བཟང་པོ་
དབུལ། །ཇི་ལྟར་འདོད་དོན་གསོལ་བ་གདབ། །དཔལ་རྟ་མགྲིན་གྱི་སྒྲུབ་ཐབས་སློབ་དཔོན་ཆེན་པོ་དཔལ་མར་མེ་མཛད་ཡེ་ཤེས་ཀྱིས་མཛད་པ་རྫོགས་སོ།། ༄༅། །རྒྱ་གར་སྐད་དུ། ཨཱརྱ་ཨ་ཙ་ལ་སཱ་དྷ་ནཾ་ནཱ་མ། བོད་སྐད་དུ། འཕགས་པ་མི་གཡོ་བའི་སྒྲུབ་ཐབས་ཞེས་བྱ་བ།
འཕགས་པ་མི་གཡོ་བ་ལ་ཕྱག་འཚལ་ལོ། །དུས་གསུམ་སངས་རྒྱས་ཀུན་གྱི་བདག །ཐུགས་སྤྲུལ་ཁྲོ་རྒྱལ་མི་གཡོ་མགོན། །ཕྱི་ནང་བར་ཆད་སེལ་མཛད་ལྷ། །སྐུ་གསུང་ཐུགས་ལ་ཕྱག་འཚལ་ནས། །བརྩེ་ལྡན་ཉིད་ཀྱིས་འགྲོ་དོན་དུ། །རྒྱུད་དང་བླ་མའི་མན་ངག་ལ། །བརྟེན་ནས་ཡང་

དག་གཟུང་བའི་རིམ། །ཁྲོ་རྒྱལ་མི་གཡོའི་སྒྲུབ་ཐབས་བྲི། །དང་པོ་སྐྱབས་འགྲོ་སོ་སོར་ཐར། །བྱང་སེམས་རིག་འཛིན་སྡོམ་པ་རྣམས། །ལེགས་པར་ཐོབ་བསྲུངས་སྔགས་པ་ཡིས། །དབེན་པའི་གནས་སོགས་ཉམས་དགའ་འམ། །ཁང་བཟངས་གཙང་སྦྲར་བྱས་པའི་ནང་། །མཎྜལ་ལ་སོགས་
མཆོད་པ་དགྲམ། །སྐུ་གཟུགས་ལ་སོགས་དེ་བཞིན་དུ། །གཙང་ལྡན་ཡོ་བྱད་གང་འབྱོར་བ། །ཐོ་རངས་ཁྲུས་སོགས་ཆུ་སྦྱིན་བྱ། །ཀུ་ཤ་ལ་སོགས་སྟན་ལ་བསྡད། །ཧ་ཧཱུྃ་ཧྲི་དང་ཧཾ་མཾ་སོགས། །སྔགས་བརྗོད་ཁྲོ་བོས་བར་ཆད་བསལ། །བླ་མ་ཡི་དམ་དཀོན་མཆོག་རྣམས། །དག་པའི་གནས་སུ་
གདན་བཞུགས་ལ། །ཕྱག་དང་མཆོད་པ་སྡིག་བཤགས་དང་། །རྗེས་སུ་ཡི་རང་བསྐུལ་གསོལ་དང་། །བྱང་ཆུབ་བསྔོས་ལ་སྐྱབས་སུ་འགྲོ། །བསམ་གཏན་ཏིང་འཛིན་མོས་པ་བྱ། །བྱང་ཆུབ་སེམས་ཀྱི་རྒྱུན་སྤེལ་ཕྱིར། །བྱམས་དང་སྙིང་རྗེ་དགའ་བ་དང་། །བཏང་སྙོམས་ཚད་མེད་རྣམ་པས་ནི།
ཚངས་པའི་གནས་བཞི་བསྒོམ་པར་བྱ། །འགྲོ་རྣམས་བདེ་ལ་དགོད་པའི་ཕྱིར། །བྱང་ཆུབ་ཆེན་པོའི་སེམས་རྒྱུན་བསྒོམ། །སྔགས་དང་ཕྱག་རྒྱ་ལ་སོགས་དང་། །མི་འབྲལ་དད་པས་བསྒྲུབ་པར་བྱ། །ཕྱག་རྒྱ་དང་བཅས་སྔགས་འདི་བརྗོད། །ན་མཿས་མནྟ་བཛྲཱ་ཎཱཾ་དྷརྨ་དྷཱ་ཏུ་ཡ་སྭ་བྷཱ་ཝ་ཨཱཏྨ་ཀོ྅ཧཾ།
རྡོ་རྗེ་སྐྱིལ་ཀྲུང་རབ་བཅས་ཏེ། །སྙིང་གར་ཉི་མ་ལ་གནས་པའི། །ས་བོན་འོད་སྒྲའི་སྤྲོ་བསྡུ་ལས། །ཆོས་ཀུན་ནམ་མཁའ་ལྟ་བུ་ལ། །མཐའ་བཞི་ལས་གྲོལ་རྣམ་པར་བསྒོམ། །དེ་ནས་སྟོང་ཉིད་ངང་ལས་ནི། །སྐད་ཅིག་སྒྱུ་མའི་ལུས་སུ་བལྟ། །འོད་ཀྱིས་ཐམས་ཅད་ཧཱུཾ་ལ་བསྡུ། །དེ་ཉིད་སྟོང་པར་
བརྟན་པར་བསྒོམ། །དེ་ཡི་ངང་ལས་ནམ་མཁའི་འོད། །འདྲ་བའི་ཐུགས་ཀྱི་ས་བོན་ནི། །སེམས་ཀྱི་བདག་ཉིད་གསལ་བར་བལྟ། །དེ་འོག་གཾ་སྤྲོས་ཚོགས་བདག་སྟེ། །པཾ་སྤྲོས་སྣ་ཚོགས་པདྨར་བལྟ། །དེ་སྟེང་རཾ་ལས་རྟ་བདུན་པ། །དེར་ནི་ཧཱུྃ་ཉིད་བལྟ་བར་བྱ། །དེ་ལས་བྱུང་བ་ཤེས་རབ་ཀྱི། །
རལ་གྲི་སྔོན་པོའི་འོད་ཟེར་གྱིས། །ནམ་མཁའ་མ་ལུས་འགེངས་པར་བལྟ། །དེ་ལས་ཁྲོ་བོ་ཆེན་པོ་སྟེ། །དྲི་མ་མེད་པ་གཞོན་ནུའི་སྐུ། །བདུད་ལ་སོགས་པ་རབ་འཇོམས་པས། །རྣམ་རྟོག་ཐམས་ཅད་འཇོམས་པར་བསྒོམ། །གཞོན་ཞིང་སྐུ་རྒྱས་སྐུ་མདོག་གནག །འོད་ཀྱིས་ནམ་མཁའ་

མ་ལུས་འགེངས། །དབུ་སྐྲ་དམར་སེར་བཅིངས་ཤིང་འཕྱང་། །སྐུ་ནི་འགྱིང་བག་རབ་ཏུ་གཡོ། །གཡོན་བརྐྱང་གཡས་ནི་ཅུང་ཟད་བསྐུམ། །སྤྱན་གསུམ་ཉི་ཟླ་བཞིན་དུ་དམར། །སྟེང་འོག་ཕྱོགས་བཅུར་བལྟ་བར་མཛད། །མཆེ་བ་རྣོ་དཀར་རབ་ཏུ་གཙུགས། །ལྗགས་ནི་
ཀློག་ལྟར་རབ་ཏུ་འགྱུ། །སྨིན་མ་ཁྲོ་གཉེར་རབ་ཏུ་བསྡུ། །ཕྱག་གཉིས་རལ་གྲི་སྦྲུལ་ཞགས་བསྣམས། །སྟག་དང་སྦྲུལ་གྱི་རྒྱན་གྱིས་བརྒྱན། །མི་བསྐྱོད་ལ་སོགས་དབུ་རྒྱན་ཅན། །མ་རུངས་འདུལ་ཞིང་འགྲོ་དོན་མཛད། །ཁྲོ་རྒྱལ་སྣ་ཚོགས་སྐུ་ལས་སྤྲོ། །ཇི་ལྟར་འདོད་པས་ཡོངས་སུ་བསྐོར། །
ཐུགས་ཀར་པད་ཉིའི་སྟེང་དུ་ནི། །ཡེ་ཤེས་སེམས་དཔའ་རང་འདྲ་བསྒོམ། །ཡང་དེའི་ཐུགས་ཀར་ཉི་མ་ལས། །ཧཱུྃ་ནི་འོད་དང་བཅས་པར་བལྟ། །ཁྲོ་བོ་རྡོ་རྗེ་ཤུགས་ཅན་ནི། །སྐུ་མདོག་ནག་པོ་འཁོར་ལོ་འཛིན། །རྡོ་རྗེ་ཆགས་ཆེན་སྐུ་མདོག་དམར། །ཆགས་པར་བྱེད་པའི་མདའ་གཞུ་འཛིན། །
རྡོ་རྗེ་རྣོན་པོ་ལྗང་གུ་སྟེ། །འཛིན་པའི་བདག་ཉིད་ལྕགས་ཀྱུ་འཛིན། །རྡོ་རྗེ་འབར་བ་དཀར་པོ་སྟེ། །འཇོམས་བྱེད་རྡོ་རྗེའི་བྲག་འཛིན་པའོ། །རྡོ་རྗེ་ཁྲོ་བོ་སེར་པོ་སྟེ། །ཕྱག་ན་རལ་གྲི་འབར་བ་བསྣམས། །རྡོ་རྗེ་གཏུམ་པོ་ལྗང་ནག་སྟེ། །སྤྲིན་གྱི་ཞགས་པ་ཕྱག་ན་བསྣམས། །རྡོ་རྗེ་ཐབས་བདག་
དུད་པའི་མདོག །བྱ་བ་བྱེད་པའི་རྫ་རྔ་བསྣམས། །རྡོ་རྗེ་སྟོབས་ཆེན་མཐིང་ག་སྟེ། །གནམ་ལྕགས་འཁོར་ལོ་རབ་ཏུ་འཛིན། །རྡོ་རྗེ་སྒྱུ་སྟོབས་དམར་ནག་སྟེ། །རྡོ་རྗེ་བེ་ཅོན་ཕྱག་ན་འཛིན། །རྡོ་རྗེ་རབ་འབྱེད་སྣ་ཚོགས་མདོག །འཇོམས་བྱེད་རྡོ་རྗེ་རྩེ་གཅིག་བསྣམས། །ས་བཅུའི་ཡོན་ཏན་བདག་
ཉིད་ཅན། །སྐུ་འོད་མེ་ལས་འཕྲོས་པར་བསམ། །ཧཱུྃ་ལས་ཡེ་ཤེས་སེམས་དཔའ་ནི། །རང་དང་འདྲ་བ་སྤྱན་དྲངས་ལ། །ཛཿཧཱུྃ་བཾ་ཧོཿཡི་གེ་བཞིས། །དགུག་གཞུག་བཅིང་དང་དགེས་པ་བསྐྱེད། །ཨོཾ་དང་ཨཱཿདང་ཧཱུྃ་དང་གསུམ། །དཀར་དང་དམར་དང་ནག་པོ་ཡི། །སྤྱི་བོ་མགྲིན་པ་སྙིང་ག་ནི། །
སྐུ་གསུང་ཐུགས་སུ་བྱིན་གྱིས་བརླབ། །ས་བོན་ལས་འཕྲོས་འོད་ཟེར་གྱིས། །ཕྱོགས་བཅུའི་བདེ་བར་གཤེགས་པ་ལ། །དབང་བསྐུར་ཡིད་ཀྱིས་གསོལ་བ་གདབ། །ཐུགས་ལས་སྤྲུལ་པ་ལྷག་པའི་ལྷས། །རིན་ཆེན་བུམ་པ་བདུད་རྩིས་བཀང་། །སྤྱི་གཙུག་དབང་བསྐུར་རིགས་བདག་

མཚན། །འགྲོ་དྲུག་སེམས་ཅན་ཐམས་ཅད་ལ། །བྱམས་པས་བལྟ་བས་བལྟ་བའི་ཕྱིར། །མིག་ཏུ་ཧཱུྃ་ནི་སེར་པོ་དགོད། །སྲོག་གི་ནང་དུ་མཾ་ནག་པོ། །སྤྱི་བོར་ཧཾ་ནི་རབ་ཏུ་དགོད། །ལུས་ཀྱིས་རྡོ་རྗེའི་ཕྱག་རྒྱ་བཅའ། །ངག་ཏུ་སྔགས་འདི་བརྗོད་པར་བྱ། །ན་མཿས་མནྟ་བཛྲཱ་ཎཱཾ། ཙཎྜ་མ་ཧཱ་
རོ་ཥ་ཎ་ཧཱུྃ་ཕཊ། འདི་ཡི་རྐྱེན་གྱིས་མ་རིག་པ། །འཇིག་ཅིང་ཡེ་ཤེས་སྐུར་བྱིན་བརླབ། །དེ་ལྟར་རབ་རྫོགས་གསལ་བར་བསྐྱེད། །དེ་ནས་སྒྱུ་མ་ལྟ་བུའི་སྐུར། །ཇི་སྲིད་འདོད་ཀྱི་བར་དུ་བསྒོམ། །དེ་ནས་ཉི་མ་ལ་གནས་པའི། །ཧཱུྃ་ལས་བྱུང་བའི་སྔགས་ཕྲེང་གིས། །དེ་ཉིད་ལ་ནི་གཡས་
སྐོར་ལ། །དམིགས་པའི་ཚུལ་གྱིས་སྔགས་འདི་བཟླས། །ན་མཿས་མནྟ་བཛྲཱ་ཎཱཾ། ཏྲ་ཐཱ་ཨ་མོ་ཀ་ཙཎྜ་མ་ཧཱ་རོ་ཥ་ཎ། སྤོ་ཊ་ཡ་ཧཱུྃ། ཏྲཱ་ས་ཡ་ཏྲཱ་ས་ཡ། ཨ་ཀྲཱ་མ་ཡེ་ཨ་ཀྲཱ་མ་ཡེ་ཧཱུྃ། ཏྲ་ཏ་ཧཾ་མཾ་ཞེས་པའམ། ཡང་ན་ཨོཾ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། ཨ་ཙ་ལ་ཀ་ན་ཙཎྜ་ཙཎྜ། ན་ཏ་ན་ཏ། མ་ཏྲ་
ཏ་མ་ཏྲ་ཏ། མོ་ཏྲ་ཏ་མོ་ཏྲ་ཏ། ཤ་ཏ་ཤ་ཏ། ཊ་ཏ་ཊ་ཏ། ཧ་ན་ཧ་ན། ད་ཧ་ད་ཧ། མོ་ཧ་མོ་ཧ། མོ་ཧ་སརྦ་པཱ་པཾ་ཀ་ར། ཧ་ས་ཧ་ས། བཛྲ་ཧ་ས་ཨ་མོ་ཀ་ཀ་རུ། ཧ་ས་ཧ་ས། མརྟ་མརྟ། གརྫ་གརྫ། བནྡྷ་བནྡྷ། ཧ་ན་ཧ་ན། ཏིཥྛ་ཏིཥྛ། ཨཱ་བེ་ཤ་ཡ། ཨཱ་བེ་ཤ་ཡ། མ་ཧཱ་མནྟྲ་ས་ཀ་ལ། དྷུ་ན་དྷུ་ན།
ཏི་ནི་ཏི་ནི། ཁ་ན་ཁ་ན། སརྦ་བིགྷྣཱན། མཱ་ར་ཡ་མཱ་ར་ཡ། སརྦ་དུཥྚན། བྷཀྵ་བྷཀྵ། སརྦ་བིགྷྣཱན། ཀུ་རུ་ཀུ་རུ། མ་ཧཱ་བི་ཥ། སརྦ་པཱ་པཾ། མ་ཧཱ་བཛྲ། སྥོ་ཊ་ཡ་སྥོ་ཊ་ཡ། ཏྲི་བ་ལི་ཏ་རཱ་གནྟ་ཀ །ཧཱུྃ་ཧཱུྃ་མཾ་མཾ་ཧཾ་ཧཾ། ན་མཿས་མནྟ་བུདྡྷཱ་ནཱན། ཙཎྜ་མ་ཧཱ་རོ་ཥ་ཎཱ་ཡ། ཨ་མོ་ཀེ་ཧེ་ཧི། ཨ་མོ་ཀ་
ཧེ་ཧི། ཨ་ཕྲ་ཏི་ཧ་ཏ་ཨ་ཙ་ལ་ཙེ་དྷ། ཨ་ནནྟ་ཀ་ནཾ། ཏིཥྛ་ཏིཥྛ། ཙ་རུ་ཙ་རུ། ཏ་ཌི་ཏ་ཌི། ཌ་ཏ་ཌ་ཏ། བིགྷྣཱན་གྷ་ཏ་ཡ། མཱ་ར་ཡ། ཁ་ཏ་ཡ། སྥོ་ཊ་ཡ། ཤ་ཏྲཱུཾ་ཙ་ལེ། ཨ་ནུ་བནྡྷ། ཨ་ཙ་ཀུ་རུ། ཨ་ཧ་ས། ཨ་དྷ་ན་གྲ། ཀ་ཏྲ་ཊ་ཀ་ཏྲ་ཊ། མ་ཊ་མ་ཊ། ཧཾ་ཧཾ། ཨ་ཏི་བ་ལ་ཨེ་ཧི། མ་ཧཱ་
གུ་ཎ་བྷི་ཥ་ན། ནཱ་ཊ་ཏ་ནཱ་ཊ་ཏ། ཨ་བེ་ཤ་ཡ། ཨ་ཙ་ལ་ཙེ་དྷ། སརྦ་ཏ་ཊ། ཨ་ནུ་ད་རེ། ཨ་ཙེ་ཊ་ཏ་ཊ་ཏ། ཌ་མ་ཌ་མ། ཧཾ་ཧཾ། མཾ་མཾ། ཕཊ་ཕཊ། ཧཱུྃ་ཧཱུྃ། ན་མཿས་མནྟ་བཛྲཱ་ཎཱཾ། ཏྲ་ཐཱ་ཨ་མོ་ཀ །ཙཎྜ་མ་ཧཱ་རོ་ཥ་ཎཱ། སྥོ་ཊ་ཡ་སྥོ་ཊ་ཡ། ཧཱུྃ་ཧཱུྃ། ཏྲཱ་ས་ཡ་ཏྲཱ་ས་ཡ། ཀྲ་མ་ཡ་ཀྲ་མ་ཡ་ཧཱུྃ།

ཏྲ་ཏ་ཧཾ་མཾ། ཨོཾ་བ་ལི་ཏ། ཏི་ཛ་མ་ལི་ནི་སྭཱ་ཧཱ། ན་མཿས་མནྟ་བུདྡྷཱ་ནཱཾ། ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། ཨ་ཙ་ལ་ཙེ་དྷ་སྥོ་ཊ་ཡ་སྥོ་ཊ་ཡ་ཧཱུྃ། ཨ་ས་ལན་ཏྲི་ཀ་ཏྲཱ་ཧཱ། མ་ཧཱ་བ་ལ་ཤ་ཏ། བ་ར་མནྟྲ་ཨཾ་ཨཾ་ཧཱཾ་ཧཱཾ། ཤུདྡྷ་ཏྲཻ་ལོ་ཀྱ་ཏུ་ཥྱེ་ཏུ་བཛྲ། ཨ་པྲ་ཏི་ཧ་ཏ། བ་ལི་བྷྱཿ། ན་མཿཛྭ་ལ་ཡ་ཏྲ་
ཏ། ཨ་ཏ་ས་ན། མཾ་ཧཱཾ་སྭཱ་ཧཱ། ཞེས་པ་འབུམ་ལ་སོགས་པར་ནི། །མན་ངག་ཅན་གྱིས་བཟླས་པ་བྱ། །དེས་ནི་འཚེ་བ་ལ་སོགས་པའི། །མི་མཐུན་ཕྱོགས་རྣམས་ཞི་བར་འགྱུར། །མཆོག་དང་ཐུན་མོང་དངོས་གྲུབ་རྣམས། །ཇི་སྐད་བཤད་པ་འགྲུབ་པར་འགྱུར། །དེ་ནས་ཆོས་དབྱིངས་རང་
བཞིན་ལས། །ཡོངས་སུ་གནས་པ་བསྒོམ་པར་བྱ། །དེ་ལས་སྐད་ཅིག་ལྷར་དམིགས་ལ། །རིན་ཆེན་སྣོད་དུ་གཙང་མའི་རྫས། །དཀར་གསུམ་ལ་སོགས་རྩི་སྨན་བཅས། །ཆ་ལྔའམ་བདུན་ནི་བཤམ་པར་བྱ། །དེ་ནས་བྱིན་གྱིས་བརླབ་པ་ནི། །ཨོཾ་སརྦ་དྷརྨ་ཏ་བཛྲ་ས་ཏི་ཧཱུྃ། ལན་གསུམ་
བརྗོད་པས་དག་པར་བྱ། །ལུས་ཀྱི་མཆོད་སྦྱིན་ཕྱག་རྒྱ་བཅས། །འབྲུ་གསུམ་སྔགས་ཀྱིས་བྱིན་གྱིས་བརླབ། །ཨོཾ་ཨ་མྲྀ་ཏེ་ཨོཾ་ཧཱུཾ་ཧྲཱིཿཞེས་བརྗོད་འདོད་པའི་དོན་དུ་བརླབ། །ཡང་ནི་མཆོད་སྦྱིན་ཕྱག་རྒྱ་བཅའ། །ངག་ནས་སྔགས་འདི་བརྗོད་པར་བྱ། །ཨོཾ་ན་མཿསརྦ་ཏ་ཐཱ་ག་ཏེ་བྷྱོ། །བི་ཤྭ་མུ་ཁེ་
བྷྱཿ། སརྦ་ཏཏྑཾ་ཨུངྒ་ཏེ། སྥ་ར་ཎ་ཨི་མཾ་ག་ག་ན་ཁཾ། ལན་གསུམ་བརྗོད་པས་སྤེལ་བར་བྱ། །ཡང་ན་རབ་གནས་དབུལ་བའམ། །རྗེ་བཙུན་ཕྱོགས་སྐྱོང་འགྲོ་དྲུག་བཅས། །མདུན་གྱི་མཁའ་ལ་སྤྱན་དྲངས་ལ། །བྱིན་གྱིས་བརླབས་ལ་མཆོད་པ་ནི། །ན་མཿསརྦ་ཏ་ཐཱ་ག་ཏ་ཨ་བ་ལོ་ཀི་ཏེ།
ཨོཾ་སཾ་བྷ་ར་སཾ་བྷ་ར་ཧཱུྃ། ཞེས་པ་ལན་བདུན་སྔགས་ཀྱིས་ནི། །བཅོམ་ལྡན་འབྱུང་པོ་འཁོར་བཅས་མཆོད། །ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ། ཨཱ་དྱ་ནུཏྤནྣ་ཏྭཱཏ། ཨོཾ་ཨཱཿཧཱུྃ་ཕཊ་སྭཱ་ཧཱ། ཆོས་བཤད་བསྟོད་ལ་བདེན་སྟོབས་བརྗོད། །བདག་གི་བསམ་པའི་སྟོབས་དང་ནི། །དེ་བཞིན་
གཤེགས་པའི་སྦྱིན་སྟོབས་དང་། །ཆོས་ཀྱི་དབྱིངས་ཀྱི་སྟོབས་རྣམས་ཀྱིས། །སེམས་ཅན་ཀུན་ལ་ཕན་གདགས་ཕྱིར། །དོན་རྣམས་བསམ་པ་གང་དག་ཀུན། །འཇིག་རྟེན་ཁམས་ནི་མ་ལུས་པར། །དེ་དག་ཐམས་ཅད་ཅི་རིགས་སུ། །ཐོགས་པ་མེད་པར་འབྱུང་འགྱུར་ཤོག །གང་འདོད་ཕྲིན་

ལས་གཞོལ་བར་བྱ། །ལུས་ཀྱིས་ཐལ་མོ་སྦྱར་བྱས་ཏེ། །སྔགས་འདི་བརྗོད་པས་དམ་ཚིག་གསོ། །ཨོཾ་ན་མཿས་མནྟ་བུདྡྷཱ་ནཱཾ། ཙཎྜ་མ་ཧཱ་རོ་ཥ་ཎ། ཨ་ས་མེ་ཏྲི་ས་མ་ཡ། མ་ཧཱ་ས་མ་ཡ། སརྦ་པཱ་པཾ་ཤུདྡྷ་སྭཱ་ཧཱ། བཛྲ་མུཿཡིས་ཡེ་ཤེས་གཤེགས། །དགེ་རྩ་བསྔོས་ལ་སྨོན་ལམ་གདབ། །
སྤྱོད་ལམ་དག་ནི་ཐམས་ཅད་དུ། །ལྷ་ཡི་ང་རྒྱལ་གསལ་བས་བྱ། །ཐུན་བཞི་རུ་ནི་བརྩོན་པས་བསྒྲུབ། །སྔགས་དང་ཕྱག་རྒྱ་ལ་སོགས་པ། །ཇི་སྐད་བཤད་པའི་དམ་ཚིག་རྣམས། །ལུས་དང་སྲོག་ལ་མི་ལྟ་བར། །ཡང་དག་པར་ནི་བསྲུང་བར་བྱ། །བསྙེན་པ་ཚད་དང་ལྡན་པ་ཡིས། །བསྲུང་བ་
བདུན་སོགས་ལས་རྣམས་འགྲུབ། །རཀྵ་རཀྵ་ཧཱུྃ་ཕཊ་སྭཱ་ཧཱ། ཨོཾ་སྥུ་ཊ་སྥུ་ཊ་མ་ཧཱ་ཀྲོ་དྷ་ཧཱུྃ་ཕཊ། ཛྷ་ཏི་ཛྷ་ཏི་སྥོ་ཊ་ཡ་ཧཱུྃ་ཕཊ། ཅེས་པས་ཀླུ་ལ་མངག་པར་བྱའོ། །མཱ་ར་ཡ་ཛ་ཛཱ། ཨ་ཏི་ཐུམ་ཐུམ། རྦད་རྦད། ཤག་ཤག །ཚལ་ཚལ། ཙི་ཏྲ་ཏ་ར། ཙི་ཏ་གྲི་ཧ་ན། ཙིཏྟ་ཕྱུང་། དྷ་པོ་དམ་ཙག་ས་མ་ཡ་
ཕྱེ། སྙིང་ས་མ་ཡ་ཕྱེ། རྦད་རྦད་ཕྱེ། སྙིང་ལ་ཡཾ། ས་མ་ཡ་ཏྲེ་ཧེ། སྙིང་ལ་བཟེར། དུ་ཁ་ཕྱེ། བ་ཕྱེ། ཨོཾ་སྥུ་ཊ་སྥུ་ཊ། མ་ཧཱ་ཀྲོ་དྷ་ཧཱུཾ། དྷ་ཏི་ཛྷ་ཏི། སྥོ་ཊ་ཡ་སྥོ་ཊ་ཡ། ཏཱུྃ་ཕཊ་སྭཱ་ཧཱ་ཧཱུྃ་ཕཊ། ཅེས་པ་སྲོག་སྔགས་སོ། །མིང་འཇུག་གསུམ་བཞི་དྲུག་དང་དགུ། །གཉིས་པོ་དག་ལ་ཡང་དག་སྦྱར། །
མ་ར་ན་སོད་སོད། མ་ར་ན་བྱིང་བྱིང་། མ་ར་ན་རྨུགས་རྨུགས། མ་ར་ན་ཧ་ལ་ཧ་ལ། མ་ར་ན་དུན་དུན། མ་ར་ན་མྱོགས་མྱོགས། མཱ་ར་ཡ་ཐུམ་རིལ་རིལ། མཱ་ར་ཡ་ཛ། མན་ངག་ཇི་བཞིན་བཟླས་པ་བྱ། །དྲག་སྔགས་འབྲུ་བཏུས་བསྡེབས་པ་ནི། །འབྲུ་བསྡེབས་གསུམ་དང་དེ་བཞིན་དྲུག །
དུ་དང་ཀུན་ཐུབ་གཟུགས་བརྙན་ཅན། །བན་དྷེ་ཤ་ཡཱ་བན་དྷེ་ཤ་ཡཱ། ཧ་ཧ། སྟཾ་བྷ་ཡཱ་སྟཾ་བྷ་ཡཱ། མ་ར་ཡཱ་ཛ་ཛཱ། ཐུམ་རིལ་རིལ། མན་ངག་བཞིན་དུ་ལས་ལ་སྦྱར། །ཏིང་འཛིན་བསྲུང་བ་ཟབ་མོ་ནི། །ལུས་ཀྱི་གནད་ཆེན་བཅུ་གསུམ་དུ། །པད་ཟླའི་གདན་ལ་ཧཱུྃ་ལས་ནི། །རྡོ་རྗེ་རྒྱ་གྲམ་རེ་རེ་བསྒོམ། །
སྤྱི་བོ་དཔྲལ་བ་མིག་གཉིས་དང་། །རྣ་བ་གཉིས་དང་སྣ་གཉིས་དང་། །ཁ་དང་དཔུང་པ་གཉིས་དང་ནི། །སྙིང་ག་གསང་བ་ལྟེ་བ་དང་། །བཤང་སྒོ་པུས་མོ་གཉིས་པོ་དང་། །རྐང་མཐིལ་རྣམས་སུ་གནས་པའོ། །དེ་ནས་གསང་སྔགས་གང་རུང་བཟླས། །མི་ཡིས་ཕྱི་ནང་བར་ཆད་བསལ། །

བཟའ་བཏུང་སྔགས་ཀྱིས་བྱིན་བརླབས་སྤྱད། །ངག་ནས་རྡོ་རྗེ་རྒྱ་གྲམ་ནི། །གསེར་ལས་གྲུབ་པའི་བྱིན་གྱིས་བརླབས། །ངག་དང་ཡིད་ཀྱིས་བཟླས་པ་ཡང་། །ཇི་ལྟར་འདོད་བཞིན་བཟླས་པ་བྱ། །ནང་གི་སྦྱིན་སྲེག་ཀླུ་ལ་བྱ། །མི་ལྡོག་རྟགས་ཀྱིས་ཀླུ་རྣམས་མནན། མ་ཧཱ་ཀཱ་ལས་
བསྟན་པ་བསྲུང་། །འཁོར་ལོ་སྦས་པས་ཀླུ་ལ་སྦྱར། །རྣལ་འབྱོར་བསྲུང་ཕྱིར་རལ་གྲིས་བཟློག །ཡུལ་ཁམས་བསྲུང་དང་སྲིའུ་གསོ། །ནད་ཆེན་གསོ་དང་འབྱུང་པོ་བསྐྲད། །རྩ་ར་ཤིང་ལྟར་བྱ་བ་དང་། །དབང་དུ་བྱ་དང་རྨོངས་པ་དང་། །རལ་གྲི་བུམ་པ་ས་སྤྱོད་དང་། །རྐང་མགྱོགས་
མཁའ་སྤྱོད་མིག་སྨན་སོགས། །ལས་རྣམས་ཐེ་ཚོམ་ཡོད་མ་ཡིན། །འདི་བཀོད་དགེ་བ་གང་ཡིན་དེས། །བར་ཆད་སེལ་ཞིང་ཚོགས་རྫོགས་ནས། །འགྲོ་རྣམས་འབད་པ་ཆུང་ངུ་ཡིས། །བླ་མེད་བྱང་ཆུབ་མྱུར་ཐོབ་ཤོག །འཕགས་པ་མི་གཡོ་བའི་སྒྲུབ་ཐབས་ཞེས་བྱ་བ། བླ་མ་གསེར་
གླིང་པས་མཛད་པ་རྫོགས་སོ།། །།སློབ་དཔོན་དཱི་པཾ་ཀ་ར་ཤྲཱི་ཛྙཱ་ནས་རང་འགྱུར་དུ་མཛད་ནས། དགེ་སློང་དབང་ཕྱུག་རྒྱལ་མཚན་ལ་གནང་བའོ།། ༄༅༅། །རྒྱ་གར་སྐད་དུ། ཨཱརྱ་ཨ་ཙ་ལ་ཀྲོ་དྷ་རཱ་ཛ་སྟོ་ཏྲ། བོད་སྐད་དུ། ཁྲོ་བོའི་རྒྱལ་པོ་འཕགས་པ་མི་གཡོ་བ་ལ་བསྟོད་པ།
ཁྲོ་བོའི་རྒྱལ་པོ་མི་གཡོ་བ་ལ་ཕྱག་འཚལ་ལོ། །མི་གཡོ་ཞེས་བྱའི་ཁྲོ་བོ་ནི། །རལ་གྲི་ཞགས་པ་ལེགས་པར་ཐོགས། །སྤྱི་བོའི་ཟུར་ཕུད་གཡོན་དུ་འཁྱིལ། །རང་གི་དཀྱིལ་འཁོར་འོད་ལ་བཞུགས། །ཀླུ་ཆེན་ལ་སོགས་ཐམས་ཅད་ཀྱི། །རྒྱན་རྣམས་ཀུན་གྱིས་རབ་ཏུ་བརྒྱན། །བྱིས་པའི་
གཟུགས་ཅན་འགྱིང་བག་ཅན། །རྡོ་རྗེའི་སྐུ་ལ་ཕྱག་འཚལ་ལོ། །དཔལ་ལྡན་ནང་ན་ཐུགས་རྗེའི་རང་བཞིན་ཅན། །གདུག་པ་འདུལ་ཕྱིར་ཕྱི་རོལ་ཁྲོ་ཚུལ་སྟོན། །ཆོས་ཉིད་མི་འགྱུར་སྐུ་མདོག་མཐིང་ནག་ཞལ། །བཅོམ་ལྡན་མི་གཡོ་མགོན་ལ་ཕྱག་འཚལ་ལོ། །ཐུགས་རྗེའི་དབྱིངས་ནས་
བཞེངས་པའི་སྐུ་མཆོག་ནི། །ཡེ་ཤེས་མེ་དཔུང་འབར་བའི་ཀློང་དཀྱིལ་ན། །སྣ་ཚོགས་པདྨ་ཉི་མའི་གདན་ལ་བཞུགས། །ཞལ་གཅིག་ཕྱག་གཉིས་མཐིང་ནག་རྔམ་པའི་སྐུ། །ཞབས་གཉིས་བརྐྱང་བསྐུམ་བགེགས་ཆེན་དུ་མ་གཟིར། །སྟག་དང་སྦྲུལ་གྱི་རྒྱན་གྱིས་རྣམ་པར་བརྒྱན། །ལྷ་དང་

ལྷ་མིན་སྐྲག་མཛད་ཕྱག་གཡས་ན། །ཤེས་རབ་རལ་གྲི་འབར་བ་འདེབས་པའི་ཚུལ། །འབྱུང་པོ་སྐྲག་མཛད་ཕྱག་གཡོན་སྡིགས་མཛུབ་སྟེ། །ཐུགས་རྗེས་ལུས་ཅན་མི་གཏོང་རྡོ་རྗེ་ཞགས། །སྐྱེ་ཤི་རྩད་གཅོད་རྣོ་དཀར་མཆེ་བ་གཙིགས། །སྤྱན་གཉིས་དམར་ཟླུམ་ཐུགས་རྗེས་ཕྱོགས་བཅུར་
གཟིགས། །ཐུགས་རྗེས་ཁྲོས་པས་དབུ་སྐྲ་གྱེན་དུ་འཁྱིལ། །མི་བསྐྱོད་ལ་སོགས་རིགས་ལྔས་དབུ་ལ་བརྒྱན། །མ་རུངས་འདུལ་ཞིང་འགྲོ་དོན་རྫོགས་མཛད་པའི། །སྤྲུལ་པའི་ཁྲོ་རྒྱལ་སྣ་ཚོགས་སྐུ་ལས་འཕྲོ། །འགྲོ་བ་ཀུན་གྱི་སྡུག་བསྔལ་ཞི་མཛད་ཅིང་། །བདེ་བ་དག་ལ་རིམ་གྱིས་མགོན་
མཛད་པ། །འགྲོ་བའི་མགོན་པོ་ཤིན་ཏུ་ཐུགས་རྗེ་ཅན། །ཁྱོད་ཉིད་དུས་གསུམ་སངས་རྒྱས་ཐམས་ཅད་ལགས། །དུས་གསུམ་སངས་རྒྱས་ཐམས་ཅད་ཁྱོད་ལགས་པས། །ཁྲོ་རྒྱལ་ཡེ་ཤེས་སྐུ་ལ་ཕྱག་འཚལ་བསྟོད། །འཇིགས་བྱེད་དྲག་པོའི་གསུང་ལ་ཕྱག་འཚལ་བསྟོད། །གཉིས་མེད་
རྩེ་གཅིག་ཐུགས་ལ་ཕྱག་འཚལ་བསྟོད། །བདག་ཀྱང་ཁྱོད་ལྟར་འགྲོ་དོན་བགྱི་སླད་དུ། །རྩེ་གཅིག་སེམས་ཀྱིས་ཁྱོད་བསྒོམ་གསང་སྔགས་བཟླས། །དུས་རྣམས་རྟག་ཏུ་ཁྲོ་རྒྱལ་ཁྱོད་བསྟེན་ན། །ཐུགས་རྗེ་ཆེན་པོས་བྱིན་གྱིས་བརླབས་མཛད་དེ། །ཡེ་ཤེས་སྐུ་མཆོག་མངོན་སུམ་སྩལ་ནས་
ཀྱང་། །སྐུ་གསུང་ཐུགས་ཀྱི་དངོས་གྲུབ་བདག་ལ་སྩོལ། །སྒྲུབ་ལ་བར་ཆད་བྱེད་པའི་བདུད་དགྲ་རྣམས། །ཕ་རོལ་འཇོམས་པའི་སྟོབས་ཀྱིས་མེད་པར་མཛོད། །དུས་འདི་ནས་བཟུང་བྱང་ཆུབ་སྙིང་པོའི་བར། །ལྷ་མཆོག་ཁྱོད་ལ་བདག་ནི་སྐྱབས་སུ་མཆི། །དུས་རྣམས་རྟག་ཏུ་ཁྱོད་ཀྱིས་བསྲུང་དུ་
གསོལ། །ཁྲོ་བོའི་རྒྱལ་པོ་མི་གཡོ་བ་ལ་བསྟོད་པ། པཎྜི་ཏ་དཱི་པཾ་ཀ་ར་ཤྲཱི་ཛྙཱ་ནས་མཛད་པ་རྫོགས་སོ།། །།པཎྜི་དེ་ཉིད་དང་། ལོ་ཙཱ་བ་དགེ་སློང་ཚུལ་ཁྲིམས་རྒྱལ་བས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། ༄༅༅། །རྒྱ་གར་སྐད་དུ། ཨཱརྱ་ཨ་ཙ་ལ་ཀྲོ་དྷ་རཱ་ཛ་སྟོ་ཏྲ།
བོད་སྐད་དུ། ཁྲོ་བོའི་རྒྱལ་པོ་འཕགས་པ་མི་གཡོ་བ་ལ་བསྟོད་པ། བཅོམ་ལྡན་འདས་མི་བསྐྱོད་པ་ལ་ཕྱག་འཚལ་ལོ། །ཐུགས་རྗེའི་བདག་ཉིད་ཁྲོ་རྒྱལ་བརྟན་པའི་སྐུ། །བརྐྱང་བསྐུམ་ཐབས་ལས་བྱུང་བའི་ཁྲོ་རྒྱལ་དང་། །བཅས་ཏེ་ནམ་མཁའི་འོད་ཀྱི་དཀྱིལ་ན་བཞུགས། །ཚངས་པ་

ལ་སོགས་འབུམ་ནི་སྐྲག་བྱེད་པ། །ཉོན་མོངས་ཉེ་བའི་ཉོན་མོངས་རྣམས་དང་ནི། །ཀླུ་དང་གནོད་སྦྱིན་ཤ་ཟ་ཡི་དགས་སོགས། །འབྱུང་པོའི་ཚོགས་རྣམས་མ་ལུས་སྐྲག་མཛད་པ། །ཁྲོ་རྒྱལ་ཁྱོད་ལ་བདག་ནི་སྐྱབས་སུ་མཆི། །སྣ་ཚོགས་པདྨ་ཉི་ཟླའི་གདན་ལ་བཞུགས། །
ཕྱག་གཡས་རལ་གྲི་འཕྱར་བས་མ་རུངས་འདུལ། །རྣམ་རྟོག་འཇོམས་ཤིང་རབ་ཏུ་གྲིམས་པའི་སྐུ། །སྐུ་མདོག་མཐིང་ནག་ཆར་སྤྲིན་ནག་པོ་འདྲ། །དབུ་སྐྲ་ཨརྫ་ཀ་ཡི་འབྲས་བུ་འདྲ། །སྐུ་ནི་ཤིང་མཆོག་ཡོངས་འདུ་ས་བརྟོལ་འདྲ། །ཞབས་གཉིས་བརྐྱང་བསྐུམ་གྱད་ཀྱིས་ཁྲོས་ཁྲོས་འདྲ། །ལྷ་
མཆོག་ཁྱོད་ལ་བདག་ནི་སྐྱབས་སུ་མཆི། །སྤྱན་མིག་པ་ལ་ཤ་ཡི་མེ་ཏོག་འདྲ། །མཆེ་བ་གཙིགས་པ་ཟླ་བ་ཚེས་པ་འདྲ། །ལྗགས་འགྱུར་བ་ནི་ནམ་མཁའི་གློག་དང་འདྲ། །སྨིན་མའི་ཁྲོ་གཉེར་བྲིག་ཤའི་ལོ་མ་འདྲ། །རལ་གྲི་ཟླ་ཚེས་མཚོར་ལྷུང་འོད་དང་འདྲ། །སྦྲུལ་གྱི་ཞགས་པ་རྒྱ་མཚོའི་
དབའ་རླབས་འདྲ། །སྐུ་ཡིས་ཕྱོགས་སྐྱོང་དབང་སྡུད་མ་རུངས་འདུལ། །ཁྲོ་རྒྱལ་མི་གཡོ་མགོན་ལ་ཕྱག་འཚལ་ལོ། །བགེགས་དང་ལོག་འདྲེན་མ་ལུས་ཞི་མཛད་ཅིང་། །འབྱུང་པོའི་འཁྲུགས་སོགས་ནད་རྣམས་ཞི་མཛད་པ། །མི་དང་མི་མིན་མཚོན་ཆས་འཇོམས་མཛད་པ། །དུས་མིན་འཆི་
དང་སྡིག་པ་རྣམས་ལས་གྲོལ། །དབུས་དང་ཕྱོགས་བཞིའི་རིགས་ལྔའི་མི་གཡོ་སྟེ། །མཚམས་བཞི་ནས་ནི་ཁྲོ་བོ་བཞི་པོ་དང་། །གྲུ་ཆད་ཕྱོགས་མཚམས་ལྷ་མོ་བརྒྱད་ལྡན་པའི། །བཅོམ་ལྡན་མི་གཡོ་མགོན་ལ་ཕྱག་འཚལ་ལོ། །སྐུ་ལས་སྤྲུལ་པའི་ཁྲོ་བོ་བཅུ་པོ་ནི། །རྡོ་རྗེ་ཤུགས་ཅན་
སྐུ་མདོག་མཐིང་ནག་སྟེ། །ང་དང་ངར་འཛིན་གནམ་ལྕགས་འཁོར་ལོ་བསྣམས། །བགེགས་ཚོགས་སྐྲག་པར་མཛད་ལ་ཕྱག་འཚལ་ལོ། །སྤྲུལ་པའི་ཁྲོ་རྒྱལ་རྡོ་རྗེ་ཆགས་ཆེན་ནི། །གདུལ་བྱའི་དོན་དུ་སྐུ་མདོག་དམར་པོ་སྟེ། །ཆགས་དང་ཆགས་པའི་དོན་དུ་མདའ་གཞུ་བསྣམས། །མ་རུངས་
འདུལ་བར་མཛད་ལ་ཕྱག་འཚལ་ལོ། །སྤྲུལ་པའི་ཁྲོ་བོ་རྡོ་རྗེ་རྣོན་པོ་ནི། །གདུལ་བྱའི་དོན་དུ་སྐུ་མདོག་ལྗང་གུ་སྟེ། །འཛིན་ཅིང་འཛིན་པའི་བདག་ཉིད་ལྕགས་ཀྱུ་བསྣམས། །འགྲོ་བ་འདྲེན་པ་ཁྱོད་ལ་ཕྱག་འཚལ་ལོ། །སྤྲུལ་པའི་ཁྲོ་བོ་རྡོ་རྗེ་འབར་བ་ནི། །སྐུ་མདོག་གངས་རིའི་རྩེ་ལ་ཉི་ཤར་

འདྲ། །མི་ཤེས་མི་ཤེས་འཇོམས་པའི་བྲག་འཛིན་པ། །མ་རུངས་འདུལ་བར་མཛད་ལ་ཕྱག་འཚལ་ལོ། །རྡོ་རྗེ་ཁྲོ་བོ་སྐུ་མདོག་སེར་པོ་སྟེ། །ཁྲོ་དང་ཁྲོ་བའི་བདག་ཉིད་རལ་གྲི་བསྣམས། །རྣལ་འབྱོར་བར་ཆད་རབ་ཏུ་ཞི་མཛད་པ། །ཁྲོ་རྒྱལ་སྟོབས་ལྡན་ཁྱོད་ལ་ཕྱག་འཚལ་ལོ། །རྡོ་རྗེ་གཏུམ་
ཆེན་སྐུ་མདོག་ལྗང་ནག་སྟེ། །བཏང་སྙོམས་བཏང་སྙོམས་འགྱུར་བའི་བདག་ཉིད་ཀྱི། །ཕྱག་མཚན་ཕྱག་ན་སྤྲིན་གྱི་ཞགས་པ་བསྣམས། །འགྲོ་བ་འདྲེན་པ་ཁྱོད་ལ་ཕྱག་འཚལ་ལོ། །སྤྲུལ་པའི་ཁྲོ་བོ་རྡོ་རྗེ་ཐབས་བདག་ནི། །སྐུ་མདོག་སེར་ནག་དུ་བའི་མདོག་འདྲ་བ། །བྱ་དང་བྱེད་པའི་
བདག་ཉིད་རྫ་རྔ་བསྣམས། །སྒྲ་ཆེན་སྒྲོགས་པ་ཁྱོད་ལ་ཕྱག་འཚལ་ལོ། །སྤྲུལ་པའི་ཁྲོ་བོ་རྡོ་རྗེ་གཏུམ་ཆེན་ནི། །སྐུ་མདོག་མཐིང་ག་སྐུ་གསུམ་རང་བཞིན་ཅན། །སྨན་པའི་རང་བཞིན་གནམ་ལྕགས་འཁོར་ལོ་བསྣམས། །ཉོན་མོངས་སེལ་བ་ཁྱོད་ལ་ཕྱག་འཚལ་ལོ། །རྡོ་རྗེ་རྒྱུ་ཡི་སྟོབས་
ནི་དམར་ནག་སྟེ། །རྟེན་འབྲེལ་རྟེན་ཅིང་འབྲེལ་པའི་བདག་ཉིད་ནི། །མ་རུངས་གདུལ་ཕྱིར་ཕྱག་ན་བེ་ཅོན་བསྣམས། །བདུད་རྣམས་སྐྲག་པར་མཛད་ལ་ཕྱག་འཚལ་ལོ། །རྡོ་རྗེ་རབ་བྱེད་སྣ་ཚོགས་ཕྲིན་ལས་ཀྱིས། །འདོད་ཆགས་ཐམས་ཅད་ཐབས་ལས་གྲོལ་བ་ཡི། །བདག་ཉིད་ཅན་གྱི་རྡོ་
རྗེ་རྩེ་གཅིག་བསྣམས། །རྡོ་རྗེ་རབ་བྱེད་ཁྱོད་ལ་ཕྱག་འཚལ་ལོ། །གང་ཞིག་བསྟོད་པ་འདི་ཡིས་སྟོད་བྱེད་ན། །བཅོམ་ལྡན་མི་གཡོ་མགོན་པོ་འཁོར་བཅས་ཀྱིས། །འཇིག་རྟེན་འཇིག་རྟེན་འདས་པའི་དངོས་གྲུབ་ཀུན། །བསྟོད་དང་བསྒྲུབ་པ་རྣམས་ལ་སྩོལ་བར་འགྱུར། །འདི་བསྟོད་
འདི་ནི་མཆོད་བྱེད་ན། །དངོས་གྲུབ་མྱུར་དུ་ཐོབ་པར་འགྱུར། །འཕགས་པ་ཁྲོ་བོའི་རྒྱལ་པོ་མི་གཡོ་བ་ལ་བསྟོད་པ། སློབ་དཔོན་ཆེན་པོ་དཔལ་མར་མེ་མཛད་ཡེ་ཤེས་ཀྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་དེ་ཉིད་དང་། ལོ་ཙཱ་བ་དགེ་སློང་ཚུལ་ཁྲིམས་རྒྱལ་བས་བསྒྱུར་ཅིང་
ཞུས་ཏེ་གཏན་ལ་ཕབ་པའོ།། ༄༅༅། །རྒྱ་གར་སྐད་དུ། ཙཎྜ་མ་ཧཱ་རོ་ཥ་ཎ་སཱ་དྷ་ནཾ། བོད་སྐད་དུ། ཁྲོ་ཆེན་གཏུམ་པོའི་སྒྲུབ་ཐབས། ཁྲོ་ཆེན་གཏུམ་པོ་ལ་ཕྱག་འཚལ་ལོ། །ཡིད་དང་རྗེས་སུ་མཐུན་པའི་གནས་གང་ཡང་རུང་བར་བདེ་བའི་སྟན་ལ་འདུག་ཅིང་། རང་གི་སྙིང་

གར་པདྨ་འདབ་མ་བརྒྱད་ཀྱི་སྟེང་དུ་ཉི་མའི་དཀྱིལ་འཁོར་ལ་ཧཱུྃ་ནག་པོ་རྣམ་པར་བསམས་ཏེ། དེའི་འོད་ཟེར་གྱིས་ནམ་མཁའི་ཕྱོགས་སུ་བླ་མ་དང་སངས་རྒྱས་དང་། བྱང་ཆུབ་སེམས་དཔའ་རྣམས་དང་འཆད་པར་འགྱུར་བའི་ཁྲོ་ཆེན་གཏུམ་པོ་འགུགས་ཤིང་ཡང་དག་པར་མཆོད་
ཅིང་། སྡིག་པ་བཤགས་པ་དང་། ཕྱིས་མི་བྱེད་པར་སྡོམ་པ་དང་། གསུམ་ལ་སྐྱབས་སུ་འགྲོ་བ་དང་། བསོད་ནམས་ལ་རྗེས་སུ་ཡི་རང་བ་དང་། བདག་དབུལ་བ་དང་། བྱང་ཆུབ་ཏུ་སེམས་བསྐྱེད་པ་ལ་སོགས་པ་དང་། བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་དང་།
ཚངས་པའི་གནས་བཞི་བསྒོམས་ལ། འགྲོ་བ་དངོས་མེད་ཀྱི་རང་བཞིན་གཟུང་བ་དང་། འཛིན་པ་རྣམ་པར་གྲོལ་བ། སྒྱུ་མ་དང་། རྨི་ལམ་ལྟ་བུར་རྟོགས་ཤིང་སྟོང་པ་ཉིད་བསྒོམ་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་སོ། །དེའི་རྗེས་ལ་ནམ་མཁའ་དྲི་མ་མེད་པའི་
ཕྱོགས་སུ་པདྨ་འདབ་མ་བརྒྱད་ཀྱི་སྟེང་དུ་ཉི་མའི་དཀྱིལ་འཁོར་ལ་ཧཱུྃ་ནག་པོ་ལས་སྐྱེས་ཤིང་། །ཡུ་བ་ལ་ཧཱུྃ་གིས་མཚན་པའི་རལ་གྲི་དེའི་འོད་ཟེར་རྣམས་ཀྱིས་དེ་བཞིན་གཤེགས་པའི་ཚོགས་མ་ལུས་པ་བཀུག་ཅིང་རབ་ཏུ་ཞུགས་སོ། །དེ་ནས་ཧཱུྃ་ལས་བྱུང་བ་བསྐལ་པ་དཔག་ཏུ་མེད་པའི་མེ་འབར་
བའི་ཕྲེང་བ་ཅན། །བདུད་གདུལ་བར་དཀའ་བ་རྣམ་པར་འདུལ་བར་བྱེད་པ་སྤྲིན་སྔོན་པོ་ཆེན་པོ་ལྟ་བུའི་ལུས་ཅན་རིན་པོ་ཆེ་སྣ་ཚོགས་ཀྱི་རྒྱན་གྱིས་བརྒྱན་པ། རིན་པོ་ཆེས་སྤྲས་པའི་ཅོད་པན་གྱི་གཙུག་ཕུད་ལྔས་གསལ་བར་བྱས་ལ། གཞོན་ནུ་མ་བསྡིགས་པ་རོལ་པར་གྱུར་པའི་མེ་ཏོག་ཀུན་ད་
ལྟ་བུའི་ཡ་སོས་མ་མཆུ་མནན་པས་གདུག་པ་ལ་བསྡིགས་པ་དང་། འཇིགས་སུ་རུང་བའི་གཟུགས་ཀྱི་དཔལ་དང་ལྡན་པ། ཁྲོ་གཉེར་དང་སོ་ཆེ་བར་མཐོང་བ་ལྟ་བུ། སྤྱན་གཉིས་ཀྱིས་ཅིག་ཅར་ས་བླ་དང་། ས་འོག་འཇིགས་པར་བྱེད་པའི་སའི་དཀྱིལ་འཁོར་ལ་གཡས་པའི་པུས་མོས་མནན་པ།
སྣ་ཚོགས་པདྨ་ལ་གནས་པའི་ཉི་མའི་གདན་ལ་འདུག་པའི་ཞབས་གཡོན་པས་བཞེངས་པར་འདོད་པ། ཕྱག་གཡས་པའི་དཀྱིལ་དུ་ཧཱུྃ་གིས་མཚན་པའི་རལ་གྲི་སྔོན་པོ་འབར་བ་བསྣམས་པ། གཡོན་པས་སྡིགས་མཛུབ་ཀྱིས་བསྡིགས་པར་བྱས་པའི་ཁྱབ་འཇུག་དང་། འཕྲོག་བྱེད་དང་།

གསེར་གྱི་སྙིང་པོ་ལ་སོགས་པ་དང་། ཉོན་མོངས་ཀྱི་ཚོགས་ཀྱི་དགྲ་དཔག་ཏུ་མེད་པ་འཁྲུགས་པ་བཅིངས་པ་ལ་རྡོ་རྗེས་མཚན་པའི་གསེར་གྱི་ཞགས་པ་བསྣམས་པ། འགྲོ་བའི་འདོད་པ་མཐའ་ཡས་པ་ཕུན་སུམ་ཚོགས་པ་སྦྱིན་པ་ལ་རོ་གཅིག་པ་དཔལ་ལྡན་ཁྲོ་ཆེན་གཏུམ་པོ་བསྒོམ་པར་བྱའོ། །
བཅོམ་ལྡན་འདས་ཁྲོ་ཆེན་རྒྱལ་པོ་མི་གཡོ་བའི་སྙིང་གར་པདྨ་དང་ཉི་མ་ལ་གནས་པའི་ཧཱུྃ་ལས་བྱུང་ཞིང་དཀྱིལ་དུ་ཧཱུྃ་གིས་མཚན་པའི་རལ་གྲི་ཡོངས་སུ་གྱུར་པས་ཁྲོ་ཆེན་གཏུམ་པོ་གཉིས་པ་སྙིང་གི་ནང་ན་གནས་པ་བསམ་པར་བྱའོ། །ཡང་དེའི་སྙིང་གར་པདྨ་དང་ཉི་མ་ལ་གནས་ཤིང་ཧཱུྃ་ལས་
སྐྱེས་པའི་རལ་གྲི་ནག་པོ་དཀྲོངས་པ་དཀྱིལ་དུ་ཧཱུྃ་གིས་མཚན་པ་བསྒོམ་མོ། །དེའི་འོད་ཀྱིས་ཡེ་ཤེས་སེམས་དཔའ་བཀུག་ཅིང་དམ་ཚིག་སེམས་དཔའ་བཞིན་དུ་བལྟས་ལ། ཛཿཡིག་གིས་དགུག་ཅིང་། ཞལ་བསིལ་བ་དང་། བསང་གཏོར་ལ་སོགས་པ་ཕུལ་ནས། ཧཱུྃ་ཡིག་གིས་དེ་ཁོ་
ནར་རབ་ཏུ་བཞུགས་ཏེ། བཾ་ཡིག་གིས་བཅིངས་ལ། ཧོཿཡིག་གིས་དགྱེས་པར་བྱའོ། །ཆུ་ལ་ཆུ་བཞིན་དུ་གཅིག་ཏུ་གྱུར་པའི་འདྲེན་པ་པོ་བསྒོམ་པར་བྱའོ། །བཅོམ་ལྡན་འདས་ཀྱི་སྤྱན་གཉིས་དང་། སྙན་གཉིས་དང་། ཤངས་གཉིས་དང་། ཞལ་དང་། དབུ་དང་། ཐུགས་རྣམས་
ལ་གོ་རིམས་ཇི་ལྟ་བར་རྣམ་པར་སྣང་མཛད་དང་། མི་བསྐྱོད་པ་དང་། རིན་ཆེན་འབྱུང་ལྡན་དང་། སྣང་བ་མཐའ་ཡས་དང་། དོན་ཡོད་གྲུབ་པ་དང་། བདག་མེད་མ་རྣམས་ཡན་ལག་དྲུག་ལ་བསྐྱེད་པར་བྱའོ། །སྙིང་ལ་གནས་པའི་ཧཱུྃ་ལས་སྤྲོས་པའི་འོད་ཟེར་གྱིས་དེ་བཞིན་གཤེགས་པ་
དང་ལྷ་མོའི་ཚོགས་བཀུག་ཅིང་། བདུད་རྩི་ལྔས་གང་བའི་བུམ་པ་རྣམས་ཀྱིས་ཁྲུས་བྱ་སྟེ། སྤྱི་བོར་མི་བསྐྱོད་པ་བསྒོམས་ལ། ལྷ་མོ་རྣམས་ཀྱིས་གར་དང་རོལ་མོ་ལ་སོགས་པ་རྣམ་པ་སྣ་ཚོགས་དང་། མཆོད་པ་ལ་སོགས་པ་སྣ་ཚོགས་ཀྱིས་དགྱེས་པར་བྱའོ། །དེ་ནས་བཅོམ་ལྡན་འདས་
གཞན་དོན་ལ་བརྩོན་པ་པོ་སེམས་ཅན་ཐམས་ཅད་ཆགས་སྡང་དང་། གཏི་མུག་ལ་སོགས་པ་དང་། ཁྱབ་འཇུག་དང་། འཕྲོག་བྱེད་དང་། གསེར་གྱི་སྙིང་པོ་དང་། འདོད་ལྷ་ལ་སོགས་པ་དང་། གཏི་མུག་ཆེན་པོ་དང་། ཆགས་པའི་དྲ་བས་ཀྱང་མ་རིག་པའི་མུན་པས་སྲིད་པའི་འཁོར་

ལོ་ལ་འཁོར་དུ་འཇུག་པ་དེ་དག་བལྟ་བར་བྱའོ། །དེ་ནས་སྙིང་ལ་གནས་པའི་སྔགས་ལས་སྤྲོས་པའི་ཁྲོ་ཆེན་རྒྱལ་པོ་རྣམས་ཀྱིས་བདུད་ཀྱི་ཚོགས་དཔག་ཏུ་མེད་པ་འཁོར་དང་བཅས་པ། གཅེར་བུ་སྐྲ་གྲོལ་བ། ངུ་བར་གྱུར་པ། སྐྱབས་མེད་པ། རྡོ་རྗེའི་ཞགས་པས་
བཅིངས་ཤིང་བཀུག་སྟེ་བསྡུས་ནས་ཕྱེ་མར་བྱས་ལ། རལ་གྲི་རྣོན་པོས་དུམ་བུར་བཅད་ལ། བྱམས་པའི་སེམས་ཀྱིས་ཡང་སྤྲུལ་ནས་ཆོས་ལ་དགོད་པའི་ཆེད་དུ་རང་གི་རྐང་པའི་ཕྱོགས་སུ་བཞག་ལ། བསྒོ་བ་ལས་ངལ་བར་གྱུར་ན་སྨིན་མཚམས་ཀྱི་བར་དུ་སེམས་བཞག་ལ་སྔགས་བཟླས་པར་
བྱའོ། །སྣ་ཚོགས་གཅིག་ཏུ་གྱུར་པའི་སྐུ་ཅན་ཁྲོ་ཆེན་གཏུམ་པོ་སྔོན་པོའི་སྔགས་བཟླས་པ་ཙམ་གྱིས། གདུལ་དཀའ་འདུལ་བ་དང་། འགྲོ་བ་དབང་དུ་འགྱུར་བ་དང་། ཞི་བ་དང་། བསྲུང་བ་དང་། འཕེལ་བ་དང་། དགྱེས་པ་དང་། རྒྱས་པ་དང་། དེ་བཞིན་དུ་བསྐྲད་པ་དང་། འགུགས་པ་
དང་། གསོད་པ་དང་། བསྡིགས་པའི་ལས་ཐམས་ཅད་བྱེད་པར་འགྱུར་རོ། །ཁྲོ་ཆེན་གཏུམ་པོའི་སྒྲུབ་ཐབས། སློབ་དཔོན་པྲ་བྷཱ་ཀ་ར་ཀཱི་རྟིས་མཛད་པ་རྫོགས་སོ།། །།ཐུགས་རྗེ་ཆེན་པོའི་རྒྱུད་གསུམ་པ། །མཁས་རྟོགས་འཛོམ་ཞིང་ཡི་དམ་མཐོང་། །སྤོབས་པ་རྩོད་པ་སྙན་དངགས་
མཁས། །སྦྱིན་པ་ཚུལ་ཁྲིམས་ཀྱི་རང་འགྱུར།། ༄༅༅། །རྒྱ་གར་སྐད་དུ། ཙཎྜ་མ་ཧཱ་རོ་ཥ་ཎ་སཱ་དྷ་ནཾ་ནཱ་མ། བོད་སྐད་དུ། ཁྲོ་བོ་གཏུམ་པོ་ཆེན་པོའི་སྒྲུབ་ཐབས་ཞེས་བྱ་བ། བཅོམ་ལྡན་འདས་འཇམ་པའི་རྡོ་རྗེ་ལ་ཕྱག་འཚལ་ལོ། །པུས་མོ་ས་ལ་བཙུགས་ཤིང་གཡས་
པའི་ཕྱག་ན་རལ་གྲི་བསྣམས། །དེ་ལས་གཞན་པའི་ཕྱག་ནི་སྡིགས་མཛུབ་ཞགས་པ་དང་འབྲེལ་ཞིང་། །སྲ་ཞིང་མཁྲེགས་པའི་སྐུ་མངའ་ཉི་མ་ལྟ་བུར་གཏུམ་པའི་སྤྱན། །བགེགས་རྣམས་འཇོམས་པའི་མི་གཡོ་སྲིད་བགེགས་ཞི་བྱེད་ཤོག །ཕྱོགས་བཅུར་བཞུགས་པའི་སངས་རྒྱས་
དང་། །བྱང་ཆུབ་སེམས་དཔའ་ཚོགས་བཅས་པ། །དེ་ལ་མེ་ཏོག་ལ་སོགས་པའི། །མཆོད་པ་ལ་སོགས་བློས་བྱས་ནས། །སེམས་ཅན་སྡུག་བསྔལ་ལས་བསྐྱབ་ཕྱིར། །བདག་གི་ལུས་འདི་དབུལ་བར་བྱ། །དགེ་བ་འཕེལ་ཕྱིར་བསྔགས་པ་ཡིས། །སྡིག་པ་དག་ནི་བཤགས་པར་བྱའོ། །

དེ་ནས་རྫོགས་པའི་སངས་རྒྱས་དང་། །བྱང་ཆུབ་སེམས་དཔའི་ཚོགས་དང་ནི། །སློབ་མ་སློབ་སོགས་སེམས་ཅན་གྱི། །བསོད་ནམས་ཀུན་ལ་རྗེས་ཡི་རང་། །དཀོན་མཆོག་གསུམ་ལ་སྐྱབས་སོང་ཞིང་། །བྱང་ཆུབ་ཏུ་ནི་སེམས་བརྟན་ནས། །རིམ་པ་བཞིན་དུ་ཚངས་པའི་གནས། །བཞི་པོ་
ཡང་ནི་བསྒོམ་པར་བྱ། །དེའི་མཚན་བྲལ་བས་སྟོང་པ་སྟེ། །རྒྱུ་མེད་པས་ན་མཚན་མ་མེད། །རང་བཞིན་གྱིས་ནི་དངོས་པོ་རྣམས། །སྨན་པ་དང་ནི་བསྒོམ་པར་བྱ། །དེ་ནས་པདྨ་ཉི་དབུས་སུ། །ཧཱུྃ་ལས་བྱུང་བ་བསྒོམ་བྱ་སྟེ། །དཔའ་བོ་སྤྱན་གཉིས་རབ་དམར་ཞིང་། །ཕྱག་གཉིས་རིན་ཆེན་ཅོད་པན་
ཅན། །དེ་མ་ཐག་ཏུ་སྡིག་འཇོམས་མགོན། །ཇི་ལྟར་འདོད་པ་རྫོགས་བྱེད་ཅིང་། །ཨ་ཏྲ་སི་ཡི་མེ་ཏོག་མཚུངས། །དྲི་མེད་སངས་རྒྱས་འོད་འཕྲོ་ཞིང་། །ཚེམས་ཀྱི་མཆེ་བས་མ་མཆུ་མནན། །རྒྱན་ཀུན་གྱིས་ནི་རྣམ་བརྒྱན་ཅིང་། །གཡོན་པ་སྡིགས་མཛུབ་ཞགས་པར་ལྡན། །ཕྱག་གཡས་འབར་
བའི་རལ་གྲིས་བྲེལ། །པུས་མོ་ས་ལ་བཙུགས་པ་ནི། །འཇིགས་པའི་སྤྱན་རྩ་བཟློག་པ་ཡིས། །འཇིགས་པ་ཡང་ནི་མཛད་པའོ། །དམ་ཚིག་སེམས་དཔའ་ལྟ་བུ་ཡིས། །ཡེ་ཤེས་སེམས་དཔའ་ཆེར་འབར་བསྒོམ། །དེ་ཡི་ཐུགས་ཀར་སྔགས་པ་ཡིས། །མཚན་མ་ས་བོན་བཅས་པ་བསྒོམ། །
སྐྱོ་ན་གསང་སྔགས་བཟླས་བྱ་སྟེ། །ལྷ་ཡི་རྣམ་པར་སྦྱོར་བས་སོ། །དེ་ནས་འདོད་པའི་དངོས་གྲུབ་ནི། །འཐོབ་པ་ཉིད་དུ་ཐེ་ཚོམ་མེད། །དེ་ལ་འདི་ནི་གསང་སྔགས་རྒྱལ། །ཨོཾ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། བདག་གིས་བྲིས་པས་གང་ཐོབ་པ། །དགེ་བ་བྱང་ཆུབ་སྒྲུབ་བྱེད་པ། །དེ་ཡིས་འཇིག་རྟེན་མ་
ལུས་འདི། །རྫོགས་པའི་བྱང་ཆུབ་སྒྲུབ་བྱེད་ཤོག །ཁྲོ་བོ་གཏུམ་པོའི་སྒྲུབ་ཐབས་སློབ་དཔོན་ཛེ་ཏཱ་རི་དགྲ་ལས་རྣམ་པར་རྒྱལ་བས་མཛད་པ་རྫོགས་སོ།། །།པཎྜི་ཏ་སུ་ན་ཡ་ཤྲཱི་དང་། ལོ་ཙཱ་བ་གློག་སྐྱ་གཞོན་ནུ་འབར་གྱིས་བསྒྱུར་བའོ།། ༄༅༅། །རྒྱ་གར་སྐད་དུ། ཤུཀླ་
ཙཎྜ་མ་ཧཱ་རོ་ཥ་ཎ་སཱ་དྷ་ནཾ། བོད་སྐད་དུ། གཏུམ་པོ་དཀར་པོ་ཆེན་པོའི་སྒྲུབ་ཐབས། གཏུམ་པོ་ཁྲོ་བོ་ཆེན་པོ་ལ་ཕྱག་འཚལ་ལོ། །སྔགས་པས་རེ་ཞིག་ཐོག་མར་སྟོང་པ་ཉིད་བསྒོམས་ཏེ། དེའི་ངང་ལས་སྣ་ཚོགས་པདྨ་དང་ཉི་མའི་སྟེང་དུ་ཞལ་གཅིག་ཕྱག་གཉིས་པ་སྐུ་མདོག་དཀར་པོ་རིན་པོ་ཆེའི་

རྒྱན་སྣ་ཚོགས་ཀྱིས་བརྒྱན་པ། རིན་པོ་ཆེའི་ཅོད་པན་ཅན། ཕྱག་གཡས་པ་རལ་གྲི་སྤྱི་བོར་འཕྱར་བ། གཡོན་པ་སྡིགས་མཛུབ་དང་བཅས་པའི་ཞགས་པ་སྙིང་གར་འཛིན་པ། ཞབས་གཡས་པ་ཙོག་པུར་བཞུགས་ཤིང་། གཡོན་པའི་པུས་མོ་ཉི་མའི་དཀྱིལ་འཁོར་ལ་རབ་ཏུ་
བཙུགས་པ། ལྷའི་ན་བཟའ་གོས་སུ་གྱོན་པ། སྙིང་གར་སྣ་ཚོགས་པདྨ་དང་ཉི་མའི་དབུས་སུ་ཡི་གེ་ཧཱུྃ་ལ་ཡི་གེ་དགུས་བསྐོར་བ་དང་བཅས་པའི་བཅོམ་ལྡན་འདས་བསྒོམ་པར་བྱའོ། །དེའི་མདུན་དུ་དེ་དང་ཁ་སྦྱོར་ཞིང་ཡང་དེ་ཁོ་ན་དང་འདྲ་བའི་བཅོམ་ལྡན་འདས་གཉིས་པ་བསྒོམ་པར་བྱའོ། །དེའི་རྗེས་
སུ་རང་གི་སྙིང་གའི་སྔགས་ལས་འཕྲོས་པའི་སྔགས་ཀྱི་ཕྲེང་བ་རང་གི་ཁ་ནས་མདུན་གྱི་བཅོམ་ལྡན་འདས་ཀྱི་ཞལ་དུ་ཞུགས་ཤིང་དེའི་ལྟེ་བ་ནས་རང་གི་ལྟེ་བར་ཞུགས་ཤིང་ཡང་རང་གི་སྙིང་གར་འཐོན་ནས་དེ་ཁོ་ན་བཞིན་འཁོར་བར་བསྒོམ་པར་བྱའོ། །བཟླས་པའི་ཚེ་རང་གི་སྙིང་གའི་ཧཱུྃ་གི་འོད་ཟེར་གྱིས་
སངས་རྒྱས་དང་བྱང་ཆུབ་སེམས་དཔའི་ཡེ་ཤེས་ཀྱི་བདུད་རྩི་དང་། ཟླ་བ་དང་། སྐར་མ་དང་། སྨན་དང་། སྒྱུ་རྩལ་དྲུག་ཅུ་རྩ་བཞིའི་ནུས་པ་དང་། རིག་པ་ལ་སོགས་པ་ལ་མཁས་པའི་ཡོན་ཏན་དང་། གཞན་ཟིལ་གྱིས་གནོན་པའི་རྩོད་པ་དང་། སྙན་ངག་ལ་སོགས་པའི་ཡོན་ཏན་མ་ལུས་པ་
བཀུག་ནས་རང་གི་སྙིང་གའི་ཧཱུྃ་ལ་རབ་ཏུ་ཐིམ་ཞིང་། བདག་ཉིད་རིག་པ་ལྔ་ལ་མཁས་པའི་པཎྜི་ཏ་ཡིན་ནོ་སྙམ་པའི་ང་རྒྱལ་དང་ལྡན་པའི་སྤོབས་པས་སྔགས་བཟླས་པར་བྱའོ། །ཞག་ཉི་ཤུ་རྩ་གཅིག་བཟླས་པས་སྙན་ངག་མཁན་ཆེན་པོར་འགྱུར་རོ། །གཏུམ་པོ་ཁྲོ་བོ་ཆེན་པོའི་ཤེས་རབ་
བློ་འཕེལ་གྱི་སྒྲུབ་ཐབས་རྫོགས་སོ།། །།རྒྱ་གར་ཤར་ཕྱོགས་ཀྱི་པཎྜི་ཏ་དཱ་ན་ཤཱི་ལས་རང་འགྱུར་དུ་མཛད་པའོ།། ༄༅༅། །རྒྱ་གར་སྐད་དུ། ཨཱརྱ་ཨ་ཙ་ལ་སཱ་དྷ་ནཾ། བོད་སྐད་དུ། འཕགས་པ་མི་གཡོ་བའི་སྒྲུབ་ཐབས། འཕགས་པ་མི་གཡོ་བ་ལ་ཕྱག་འཚལ་ལོ། །ཐོག་མར་
སྔགས་པས་གསུམ་ལ་སྐྱབས་སོང་ཞིང་། །བྱང་ཆུབ་མཆོག་ཏུ་སེམས་བསྐྱེད་བྱས་རྗེས་སུ། །སྐད་ཅིག་ཙམ་གྱིས་སྟོང་པར་རབ་དམིགས་ནས། །རབ་དཀར་པདྨ་ཉི་མའི་དཀྱིལ་འཁོར་བལྟ། །དེ་སྟེང་མགོན་པོ་མི་གཡོ་སྐུ་མདོག་དཀར། །གཡས་གཡོན་ཕྱག་གིས་རལ་གྲི་སྡིགས་མཛུབ་

མཛད། །ཞབས་གཉིས་པུས་མོ་མཐིལ་གྱིས་རབ་བཞུགས་པ། །རིན་ཆེན་དར་གྱིས་བརྒྱན་པ་བསྒོམ་པར་བྱ། །ལྷག་པའི་ཁྲོ་རྒྱལ་དེ་ཡི་མདུན་དུ་ཡང་། །དེ་ཉིད་ཇི་ལྟའི་བཅོམ་ལྡན་འདས་བསམ་བྱ། །དེ་དག་ཐུགས་ཀར་པདྨ་ཉི་མ་ལ། །ཧཱུྃ་ལ་གཞན་གྱིས་བསྐོར་བ་དམར་བར་བལྟ། །དེ་ནས་ཡི་
གེ་འབྲུ་བཅུ་བཟླས་བྱ་སྟེ། །སྔགས་ཕྲེང་ཁ་ནས་ཁར་ཞུགས་ཡེ་ཤེས་དགུག །ལྟེ་བ་ནས་འཐོན་དེར་ཞུགས་བདག་ཉིད་ཀྱི། །སྙིང་གར་བསླན་པ་འཁོར་ལོ་བཞིན་དུ་བསམ། །དེ་ལྟར་ཞག་གྲངས་ཉི་ཤུ་རྩ་གཅིག་ཏུ། །ཐུན་གསུམ་ཉིད་དུ་བསྒོམ་པ་གང་ཡིན་དེས། །བཀའ་དང་བསྟན་བཅོས་
ཀུན་གྱི་ཚིག་དང་དོན། །བལྟས་པ་ཙམ་གྱིས་ཁོང་དུ་ཆུད་པར་འགྱུར། །གཞན་ཡང་ཀུན་ལ་མི་འཇིགས་སྤོབས་པ་འཐོབ། །སྙན་དངགས་བསྟན་བཅོས་ཐོགས་མེད་རྩོམ་ནུས་ཤིང་། །དེ་ཡི་སྨྲ་བ་སུས་ཀྱང་བཟློག་མི་ནུས། །དེ་ཕྱིར་འདི་འདྲ་གར་ཡང་རྙེད་པར་དཀའ། །འཕགས་པ་མི་གཡོ་
བའི་སྒྲུབ་ཐབས་རྫོགས་སོ།། །།རྒྱ་གར་ཤར་ཕྱོགས་ཀྱི་པཎྜི་ཏ་ཆེན་པོ་དཱ་ན་ཤཱི་ལས་རང་འགྱུར་དུ་མཛད་པའོ།། ༄༅༅། །རྒྱ་གར་སྐད་དུ། སུ་སིདྡྷི་ཀ་ར་སཾ་གྲ་ཧ་སཱ་དྷ་ནཾ། བོད་སྐད་དུ། ལེགས་པར་གྲུབ་པར་བྱེད་པའི་སྒྲུབ་པའི་ཐབས་བསྡུས་པ། སངས་རྒྱས་
དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དེ་ནས་སྒྲུབ་པ་པོས་འགྲོ་བ་མཐའ་དག་ལ་ཕན་པ་བསྒྲུབ་པ་དང་། དངོས་གྲུབ་བླ་ན་མེད་པ་འདོད་པ་རྣམས་ལ་ལེགས་པར་གྲུབ་པར་བྱེད་པ་ཞེས་བྱ་བ། རིགས་གསུམ་སྤྱིའི་སྒྲུབ་པའི་ཆོ་ག་རབ་ཏུ་གསལ་བར་བརྗོད་པར་བྱའོ། །དེ་ལ་རེ་ཞིག་
དང་པོ་སློབ་དཔོན་གྱི་ཡོན་ཏན་དང་རྗེས་སུ་མཐུན་པའི་སློབ་དཔོན་གྱིས་སྒྲུབ་པ་པོ་བདག་ཉིད་མངོན་པར་དབང་བསྐུར་ཞིང་རྗེས་སུ་གནང་བ། རྒྱུད་ལས་གསུངས་པའི་སྒྲུབ་པ་པོའི་མཚན་ཉིད་དང་ལྡན་པའི་གསང་སྔགས་ཀྱི་མཚན་ཉིད་ལེགས་པར་ཚོགས་པ། དངོས་གྲུབ་ལས་ཀྱི་བྱེ་བྲག་ལ་མཁས་
པ་མཐུན་པའི་དུས་ཀྱི་དབྱེ་བ་ཤེས་པ། མཆོད་པ་རྣམ་པ་ལྔའི་ཆོ་ག་རིག་པ། རང་གི་མཚན་ཉིད་དང་མཐུན་པའི་སྔགས་གཡོག་དང་ལྡན་པས་སྒྲུབ་པའི་ཡན་ལག་གིས་ཡོ་བྱད་ཐམས་ཅད་བསྡུ་བར་བྱའོ། །དེ་ནས་གསང་སྔགས་ཡོངས་སུ་བཟུང་བའི་ཆོ་གས་གང་ལ་མངོན་པར་དད་པའི་གསང་

སྔགས་མནོས་ཏེ། གསང་སྔགས་དང་རྗེས་སུ་མཐུན་པའི་ཡུལ་ཇི་སྐད་བསྟན་པ་དངོས་གྲུབ་དང་འཚམ་པའི་གནས་ཇི་སྐད་གསུངས་པ་དག་ཏུ་ཇི་སྐད་བཤད་པའི་མཚན་ཉིད་དང་ལྡན་པའི་གནས་བྱ་སྟེ། སྔོན་དུ་བསྙེན་པ་བརྩམ་པར་བྱའོ། །དེ་ལ་ཉིན་གཅིག་བཞིན་དུ་དུས་
གསུམ་དུ་འདི་ལྟར་བྱ་སྟེ། །ནང་པར་མལ་ནས་ལངས་ཏེ་རིགས་གསུམ་གྱི་དམ་ཚིག་གི་ཕྱག་རྒྱ་བཅིང་བར་བྱའོ། །དེ་ལ་དམ་ཚིག་གསུམ་གྱི་ཕྱག་རྒྱ་ནི་ཐལ་མོ་བཀན་པ་ལས་མཛུབ་མོ་གཉིས་ཅུང་ཟད་ཙམ་བཀུག་སྟེ་མགོ་ལ་བཞག་པ་འདི་ནི་དེ་བཞིན་གཤེགས་པའི་རིགས་ཀྱི་དམ་ཚིག་གི་ཕྱག་རྒྱ་སྟེ།
གསང་སྔགས་ལ། ཨོཾ་ཏ་ཐཱ་ག་ཏོཏྦྷ་བཱ་ཡ་སྭཱ་ཧཱ། ཐལ་མོ་སྦྱར་བ་པདྨ་ཁ་ཕྱེ་བའི་ཚུལ་དུ་བྱ་སྟེ། སྙིང་གར་བཞག་པ་འདི་ནི་པདྨའི་རིགས་ཀྱི་དམ་ཚིག་གི་ཕྱག་རྒྱ་སྟེ། གསང་སྔགས་ལ། ཨོཾ་པདྨོ་ཏྦྷ་བཱ་ཡ་སྭཱ་ཧཱ། ལག་པ་ཐལ་མོ་བཟློག་སྟེ་སྦྱར་ལ་མཐེ་བོང་གཉིས་དང་མཐེའུ་ཆུང་གཉིས་སྦྱར་
ནས་ལྟེ་བའི་ཐད་ཀར་བཞག་སྟེ་འདི་ནི་རྡོ་རྗེ་རིགས་ཀྱི་དམ་ཚིག་གི་ཕྱག་རྒྱའོ། །གསང་སྔགས་ལ། ཨོཾ་བཛྲོ་ཏྦྷ་བཱ་ཡ་སྭཱ་ཧཱ། དེ་ནས་ཕྱོགས་བཅུ་མཐའ་ཡས་མུ་མེད་པ་ན་བཞུགས་པའི་དེ་བཞིན་གཤེགས་པ་ཐམས་ཅད་མངོན་སུམ་དུ་དམིགས་ལ་གསང་སྔགས་འདིས་ཕྱག་བྱའོ། །ཨོཾ་སརྦ་ཏ་ཐཱ་ག་ཏ་
ཀཱ་ཡ་བཱཀ་ཙིཏྟ་བཛྲ་པྲ་ཎ་མྱ་ན་སརྦ་ཏ་ཐཱ་ག་ཏ་བཛྲ་པཱ་ད་བནྡ་ནཱཾ་ཀ་རོ་མི། དེ་ནས་དེ་དག་ལ་བདག་ལ་དབུལ་བར་བྱ་སྟེ། ཕྱོགས་བཅུ་མཐའ་ཡས་མུ་མེད་པ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་བདག་ཉིད་བྱང་ཆུབ་སྙིང་པོ་ལ་མཆིས་ཀྱི་བར་དུ་དུས་ཐམས་ཅད་དུ་ཡོང་
ཡེ་འབུལ་ན། སངས་རྒྱས་དང་བྱང་ཆུབ་སེམས་དཔའ་ཆེན་པོ་རྣམས་ཀྱིས་བདག་བཞེས་སུ་གསོལ། བདག་ལ་དངོས་གྲུབ་བླ་ན་མེད་པ་སྩལ་དུ་གསོལ་ཞེས་བྱའོ། །དེ་ནས་བྱང་ཆུབ་ཏུ་སེམས་བསྐྱེད་པར་བྱ་སྟེ། སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་བདག་སྐྱབས་མཆི། །
བདག་དང་གཞན་དོན་སྒྲུབ་སླད་དུ། །བདག་གིས་བྱང་ཆུབ་སེམས་བསྐྱེད་དོ། །ཕྱོགས་བཅུ་དག་ན་བཞུགས་པ་ཡི། །སངས་རྒྱས་བྱང་ཆུབ་སེམས་དཔའ་གསོན། །བདག་གིས་རྫོགས་པའི་བྱང་ཆུབ་ཕྱིར། །དེ་ནས་བྱང་ཆུབ་སེམས་བསྐྱེད་དོ། །དེ་ནས་ཁྲོ་བོ་མནོལ་བ་མེད་པའམ། བདུད་རྩི་ཐབ་

སྦྱོར་རམ། ཡང་ན་རྒྱུད་གཞན་ལས་གསུངས་པའི་ཆོ་གས་བདག་ཉིད་བསྲུང་བར་བྱའོ། །དེ་ལ་མནོལ་བ་མེད་པའི་སྔགས་ནི། ཨོཾ་བཛྲ་ཀྲོ་དྷ་མ་ཧཱ་བ་ལ་ཧ་ན་ད་ཧ་པ་ཙ། བི་དྷྭ་ནྶ་ཡ་ཨུ་ཙུཥྨ་ཀྲོ་དྷ་ཧཱུྃ་ཕཊ། ལག་པ་གཉིས་སོར་མོ་ཕན་ཚུན་བསྣོལ་ཏེ། ཁུ་ཚུར་བཅངས་ལ་མཐེའུ་ཆུང་གཉིས་
གཤིབས་ཏེ་བསྒྲེང་མཛུབ་མོ་རྩེ་མོ་སྦྱར་བའི་གློར་མཐེ་བོང་གཉིས་བཙུགས་པ་ནི་ཁྲོ་བོ་མནོལ་བ་མེད་པའི་ཕྱག་རྒྱའོ། །བདུད་རྩི་ཐབ་སྦྱོར་གྱི་སྔགས་དང་ཕྱག་རྒྱ་ནི་འོག་ནས་བཤད་པར་བྱ་སྟེ། །རྒྱུད་གཞན་ལས་གསུངས་པ་ཉིད་ལས་ཁོང་དུ་ཆུད་པར་བྱའོ། །དེ་ནས་སྙིང་གའི་ཟླ་བའི་དཀྱིལ་འཁོར་ལ་
རྣམ་པར་སྣང་མཛད་ཀྱི་སྙིང་པོའི་ངོ་བོ་ཨ་ཞེས་བྱ་བ་དང་། མགོ་བོ་ལ་མི་གཡོ་བའི་ངོ་བོ་ཧ་ཞེས་བྱ་བ་འབར་བའི་ཕྲེང་བ་འཁྲུགས་པར་བསམ་པར་བྱའོ། །དེ་ནས་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ་ཞེས་བྱ་བས་རང་བཞིན་གྱིས་དག་པར་མོས་པར་བྱས་ལ། དེ་ནས་ཕྱིར་བྱུང་སྟེ་སོ་ཤིང་བཅའ་བ་ལ་སོགས་
པ་བྱ་སྟེ། ལྷའི་ཁང་པ་ལ་སོགས་པ་བསྟར་བར་བྱས་ནས་ཁྲུས་བྱེད་དུ་སོང་ཤིག །གཞན་ཡང་ཕྱི་རོལ་གྱི་སར་བཤང་གཅི་བྱེད་པའི་དུས་དང་། ཟན་ཟ་བའི་ཚེའང་ཁྲོ་བོ་མནོལ་བ་མེད་པས་བསྲུང་བར་བྱ་སྟེ། དེ་ནས་སྐྱེ་བོ་འདུ་བ་དང་འཇིགས་པ་ལ་སོགས་པ་སྤངས་པའི་འཇུག་ངོགས་སུ་སོང་སྟེ།
གནས་གཙང་མ་ནས་ས་བླངས་ལ་ཆ་གསུམ་དུ་བགོས་ཏེ། གནས་གཙང་མར་གཞག་པར་བྱའོ། །ས་བླང་བའི་སྔགས་ནི། ཨོཾ་ནི་ཁ་ན་ཝ་སུ་དྷེ་སྭཱ་ཧཱ། ལག་པ་གཉིས་ཀྱི་སོར་མོ་ཕྱི་རོལ་དུ་བསྣོལ་ཏེ་བཀུག་ནས་མཛུབ་མོ་གཉིས་གཤིབས་ཏེ་བསྒྲེང་། མཐེ་བོང་གཉིས་དེའི་དྲུང་དུ་གཞག་གོ། །འདིའི་
གསང་སྔགས་དང་བཅས་པས་ས་ལ་གཏུག་ཅིང་བླང་བར་བྱའོ། །དང་པོར་དམ་ཚིག་གི་ཕྱག་རྒྱ་བཅིངས་ལ་དེ་ནས་བླང་བར་བྱའོ། །རིགས་གསུམ་གྱི་དམ་ཚིག་གི་ཕྱག་རྒྱ་ནི་བསྟན་ཟིན་ཏོ། །དེ་ནས་བདུད་རྩི་ཐབ་སྦྱོར་གྱིས་བདག་ཉིད་བསྲུང་བར་བྱའོ། །དེའི་ཕྱག་རྒྱ་ནི་མཐེ་བོའི་ངོས་ཀྱིས་མཐེ་ཆུང་གི་སེན་
མོ་མནན་ལ་སོར་མོ་ལྷག་མ་རྣམས་རྡོ་རྗེའི་མཚན་ཉིད་དུ་བྱ་སྟེ། བསྣོལ་ནས་དཔུང་པར་བཞག་སྟེ། ཡ་སོས་མ་མཆུ་མནན་པ་ཁྲོ་བོའི་ལྟ་བས་བལྟ་ཞིང་གསང་སྔགས་བརྗོད་པར་བྱའོ། །ན་མོ་རཏྣ་ཏྲ་ཡཱ་ཡ། ན་མཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མོ་བཛྲ་ཀྲོ་དྷཱ་ཡ། ཏདྱ་ཐཱ།

ཨོཾ་ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཨ་མྲྀ་ཏེ་ཧཱུྃ་ཕཊ། དེ་ནས་ལུས་ལ་བགེགས་བསལ་བའི་ཕྱིར་ཁུ་ཚུར་གཉིས་ནང་དུ་བཅིངས་ཏེ། མཛུབ་མོ་གཉིས་ཕྱུང་ནས་བསྒྲེངས་ནས་མགོ་ནས་རྐང་པ་ལ་ཐུག་གི་བར་དུ་བྲབ་པར་བྱའོ། །གསང་སྔགས་ལ། ཨོཾ་
ཧ་ན་ཧ་ན་ཨ་མྲྀ་ཏེ་ཧཱུྃ་ཕཊ། དེ་ནས་རྡོ་རྗེའི་གོ་ཆ་བྱ་སྟེ། ཐལ་མོ་བཀན་པ་ལས་མཐེའུ་ཆུང་གཉིས་བསྣོལ་བའི་བར་དུ་སྲིན་ལག་གཉིས་བཀུག་སྟེ་བཞག །གུང་མོ་གཉིས་གཤིབས་ཏེ་བསྒྲེངས་ལ་དེའི་ཚིགས་གསུམ་པར་མཛུབ་མོ་བཀུག་སྟེ། མཐེ་བོང་སྦྱར་ནས་མཐེ་བོང་གཉིས་དབུས་སུ་གཞག་
གོ། །གསང་སྔགས་ལ། ཨོཾ་བཛྲ་ཨགྣི་པྲ་དཱི་པ་ཏཱ་ཡེ་སྭཱ་ཧཱ། དེ་ཉིད་ལས་མཛུབ་མོ་གཉིས་བསྐྱེད་ནས་རྡོ་རྗེའི་ཚུལ་དུ་བྱས་པ་ནི་རྡོ་རྗེ་གོ་ཆའི་ཕྱག་རྒྱའོ། །ན་མོ་རཏྣ་ཏྲ་ཡཱ་ཡ། ཨོཾ་ཧཱུྃ་ཁ་ཀཱི་ལི་ཧཱུྃ་ཕཊ། དེ་དག་ལ་སོགས་པའམ་ཡང་ན་སྔགས་དང་ཕྱག་རྒྱ་གཞན་གྱིས་ཀྱང་བདག་ཉིད་ཀྱི་མགོ་བོ་
དང་། དཔུང་མགོ་གཉིས་དང་། སྙིང་ག་དང་། མགྲིན་པ་རྣམས་སུ་གོ་ཆ་བྱའོ། །དེ་ནས་སྔགས་དང་ཕྱག་རྒྱས་སའམ་ཆུ་ལ་གཏུགས་ཏེ་ཐམས་ཅད་དུ་བསལ་བར་བྱའོ། །ལག་པ་གཡོན་པའི་སོར་མོ་དབུས་མ་གཉིས་མཐེ་བོས་མནན་ལ། མཛུབ་མོ་དང་མཐེའུ་ཆུང་གདུ་བུའི་ཚུལ་དུ་བྱ་སྟེ། སོར་
མོ་དབུས་མའི་ཚིགས་དབུས་མར་གཟུགས་སོ། །ལག་པ་གཡོན་པའི་སོར་མོ་དབུས་མ་གསུམ་རྡོ་རྗེའི་ཚུལ་དུ་བྱ་སྟེ། སྐེད་པའི་ཕྱོགས་སུ་བཞག་པ་ནི་བསལ་བའི་ཕྱག་རྒྱའོ། །གསང་སྔགས་ལ། ཨོཾ་ཧ་ན་དྷུ་ན་མ་ཐ་བི་དྷྭ་ནྶ་ཡ་ཨུད་ས་ར་ཡ་ཕཊ། དེ་ནས་ཆུ་ལ་གསང་སྔགས་གདབ་བོ། །དཀོན་
མཆོག་གསུམ་དང་ཕྱག་ན་རྡོ་རྗེ་ལ་ཕྱག་འཚལ་ལོ། །ཨོཾ་ཧཱུྃ་ཧ་ན་ཧ་ན་བཛྲ་བཛྲེ་ཎ་ཧ། དེ་ནས་ཆུ་ལ་ཀཱི་ལི་ཀཱི་ལའི་སྔགས་དང་ཕྱག་རྒྱས་གཏུགས་ཏེ་ས་ལ་བསང་གཏོར་གཏོར་བར་བྱའོ། །ལག་པ་གཡོན་པའི་མཐེ་བོའི་ངོས་ཀྱིས་མཐེའུ་ཆུང་གི་སོར་མོ་མནན་ལ་སོར་མོ་ལྷག་མ་རྡོ་རྗེའི་མཚན་ཉིད་དུ་
བྱས་པ་ནི་ཀཱི་ལི་ཀཱི་ལའི་ཕྱག་རྒྱའོ། །སྔགས་ལ་ཨོཾ་ཀཱི་ལི་ཀཱི་ལ་བཛྲ་ཧཱུྃ་ཕཊ། དེ་ནས་སྔགས་འདིས་ལན་བདུན་བསྔགས་སོ། །ཨོཾ་བཛྲ་ཧ་ར་ཧཱུྃ། དེ་ནས་སའི་ཆ་གཅིག་བླངས་ཏེ་ཆུའི་ནང་དུ་ལྟེ་བ་ནུབ་ཙམ་དུ་བཞུགས་ཏེ། ཁྲུས་རས་དང་བཅས་པར་ཁྲུས་བྱའོ། །དེ་ནས་སའི་ཆ་ལྷག་མས་ལག་པ་

བཀྲུས་ཏེ། དབྱངས་ཅན་གྱི་ཕྱག་རྒྱས་ཉེ་རེག་བྱའོ། །ལག་པ་གཡས་པའི་ཐལ་མོ་བཀན་པ་ལས་མཛུབ་མོ་མཐེ་བོའི་དྲུང་དུ་བཞག་སྟེ། མཐེ་བོང་ཡང་མཛུབ་མོའི་ཚིགས་དབུས་མར་བྱས་པ་ནི་དབྱངས་ཅན་མའི་ཕྱག་རྒྱའོ། །གསང་སྔགས་ལ། ཨོཾ་ཤྲུ་ཏི་སྨྲྀ་ཏི་དྷཱ་རི་ཎི་ཧཱུྃ་ཧ། དེ་ནས་སྔགས་
འདིས་བསྲུང་བ་བྱ་སྟེ། གཙུག་ཕུད་བཅིང་བར་བྱའོ། །ཨོཾ་སུ་སིདྡྷི་ཀ་རི་སྭཱ་ཧཱ། དེ་ནས་ས་བླངས་ཏེ་གསང་སྔགས་འདིས་བསྔགས་ཤིང་གཡས་ནས་བསྐོར་ཏེ། ཉི་མ་ལ་བསྟན་ནས་ལུས་ལ་བསྐུ་བར་བྱའོ། །ཨོཾ་བྷུ་ཛ་ཧཱུྃ་ཕཊ། དེ་ནས་གསང་སྔགས་འདིས་ཆུ་ལ་དཀྲུག་པར་བྱའོ། །ན་མོ་རཏྣ་ཏྲ་ཡཱ་ཡ།
ན་མཿཙཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མོ་བཛྲ་ཀྲོ་དྷཱ་ཡ། དཾ་ཥྚྲོཏྐ་ཊ་བྷཻ་ར་བཱ་ཡ། ཏདྱ་ཐཱ། ཨོཾ་ཨ་མྲྀ་ཏ་ཀུཎྜ་ལི་ཁ་ཁ་ཁཱ་ཧི་ཁཱ་ཧི། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། གརྫ་གརྫ། བི་སྥོ་ཊ་ཡ་བི་སྥོ་ཊ་ཡ། སརྦ་བིགྷྣཱཾ་མ་ཧཱ་ག་ཎ་པ་ཏི། ཛཱི་བི་ཨནྟ་ཀ་རཱ་ཡ་སྭཱ་ཧཱ། ཕྱག་རྒྱ་ནི་ལག་པ་
གཡས་པའི་ཐལ་མོ་བཀན་པ་ལས་གུང་མོ་དང་སྲིན་ལག་བཀུག་སྟེ། མཐེ་བོའི་རྩེ་མོས་མནན་ལ་མཛུབ་མོ་དང་། མཐེའུ་ཆུང་ཅུང་ཟད་བཀུག་པ་ནི་ཆུ་དཀྲུག་པའི་ཕྱག་རྒྱའོ། །དེ་ནས་སྔགས་འདིས་ཆུ་ཁྱོར་བ་གསུམ་དཀོན་མཆོག་གསུམ་ལ་དབུལ་ལོ། །ཨོཾ་ར་ཏེ་ར་ཏེ་བུདྡྷཱ་ཡ་སྭཱ་ཧཱ། དེ་ནས་གསང་
སྔགས་འདིས་རང་གི་མགོ་བོར་སྙིམ་པ་གསུམ་བླུགས་སོ། །ཨོཾ་ཨ་མྲྀ་ཏེ་ཧཱུྃ་ཕཊ། དེ་ནས་བདུད་རྩི་ཐབ་སྦྱོར་གྱི་སྔགས་དྲན་བཞིན་དུ་ལྕི་བས་ཁྲུས་བྱའོ། །དེ་ནས་ཁྲུས་ཟིན་ནས་ལག་པ་བཀྲུས་ཏེ། གསང་སྔགས་དེ་ཉིད་ཀྱིས་ཆུ་སྙིམ་པ་གསུམ་གྱིས་བདག་ཉིད་དབང་བསྐུར་བར་བྱའོ། །དེ་ནས་རང་
གི་ལྷ་ཉིད་ཡིད་ཀྱིས་སྤྱན་དྲངས་ཏེ་པདྨའི་གདན་ལ་བཞུགས་སུ་གསོལ་ནས་གསང་སྔགས་འདིས་སྐུ་བསིལ་ལོ། །ཨོཾ་སརྦ་ཏ་ཐཱ་ག་ཏ་ཨ་མྲྀ་ཏ་སྭཱ་ཧཱ། དེ་ནས་གལ་ཏེ་ལྷ་ཁང་དུ་བཟླས་བརྗོད་བྱེད་ན་ནི། དེའི་ཚེ་ཆུའི་ནང་དུ་བདུན་གསུམ་ཉི་ཤུ་རྩ་གཅིག་ཏུ་གསང་སྔགས་བཟླ་བར་བྱའོ། །ཅི་སྟེ་ཆུའི་
ནང་དུ་ཟློས་ན་ནི་དེའི་ཚེ་སྐེ་ནུབ་ཙམ་མམ། བརླ་འམ། བྱིན་པ་ནུབ་ཙམ་དུ་ཆུའི་ནང་དུ་ཞུགས་ལ། མགོ་ནས་བཟླས་བརྗོད་ཀྱི་ཆོ་ག་ཇི་ལྟར་བྱུང་བ་བཞིན་དུ་བསྒྲུབ་པར་བྱའོ། །དངོས་གྲུབ་རབ་དང་འབྲིང་དང་། ཐ་མ་རྣམས་ཀྱི་ཕྱིར་ལྷའི་གནས་སུ་འགྲོ་བའི་ཚེ་ཆུའི་ནང་ནས་འབྱུང་སྟེ། ཀཱི་ལི་ཀཱི་ལའི་

གསང་སྔགས་སམ། འོག་ནས་འབྱུང་བའི་གསང་སྔགས་ཀྱིས་གོས་ལ་མངོན་པར་བསྔགས་ཏེ་བགོས་ནས། དེ་དག་ཉིད་ཀྱིས་བསྲུང་བ་བྱ་སྟེ། ཡིད་ལྷ་ལ་གཞོལ་བ་དང་། མི་སྨྲ་བ་དང་། འདོད་ཆགས་ལ་སོགས་པ་ཉོན་མོངས་པ་ཐམས་ཅད་ཡོངས་སུ་སྤངས་ནས་ལྷའི་གནས་
ཀྱི་དྲུང་དུ་ཕྱིན་པ་དང་རྐང་པ་བཀྲུས་ཏེ་ཉེ་རེག་བྱས་ནས་ལྷའི་གནས་སུ་ཞུགས་ཏེ། ལྷ་རྣམས་མངོན་སུམ་དུ་དམིགས་ལ་ཕྱག་བྱས་ནས་དམ་ཚིག་ལ་འཇུག་པ་འདི་བཟླས་པར་བྱའོ། །ཨོཾ་བི་ར་ཛ་བི་ར་ཛ་མ་ཧཱ་བཛྲི། ས་ཏ་ས་ཏ། སཱ་ར་ཏེ་སཱ་ར་ཏེ། ཏྲ་ཡི་ཏྲ་ཡི་བི་དྷ་མ་ནི་སཾ་བྷཉྫ་ནི། ཏ་ར་མ་ཏི་སིདྡྷ་ཨ་
གྲེ་ཏཾ་སྭཱ་ཧཱ། དེ་ནས་ལུས་ལ་བགེགས་བསལ་བའི་གསང་སྔགས་དང་ཕྱག་རྒྱ་བསྟན་པ་བཞིན་དུ་བྱ་བའམ། ཡང་ན་ཅི་ཤེས་པས་བདག་ཉིད་བསྲུང་བར་བྱ་སྟེ། དེ་ནས་བསལ་བར་བྱའོ། །སྔར་བསྟན་པའི་སྔགས་དང་ཕྱག་རྒྱའམ་ཡང་ན་རིགས་གསུམ་གྱི་ལས་ཐམས་ཅད་ཀྱི་ཕྱག་རྒྱའམ། བདུད་
རྩི་ཐབ་སྦྱོར་གྱིས་སྤོས་ཆུ་ལ་ཡོངས་སུ་བཟླས་ནས་ཐམས་ཅད་དུ་བསང་གཏོར་བྱས་ནས་བསལ་བར་བྱའོ། །དེ་ལ་གསང་སྔགས་ནི་འདི་དག་ཡིན་ཏེ། ཨོཾ་ཥྚོཾ་བནྡྷ་སྭཱ་ཧཱ། དེ་བཞིན་གཤེགས་པའི་རིགས་ཀྱི་ལས་ཐམས་ཅད་པའོ། །ན་མོ་མ་ཧཱ་ཤྲཱི་ཡཱ་ཡཻ། ཨོཾ་ཤམ་མེ་ས་མ་ཡེ། སཽ་མེ་སིདྡྷི།
སིདྡྷེ་སཱ་དྷ་ཡ། ཤི་བེ་ཤ་བཾ་ཀཱ་རི་ཤཱཾ་ཀཱ་རི། བྷོ་ཧ། སརྦ་ཨརྠ་སཱ་དྷ་ནི་སྭཱ་ཧཱ། པདྨ་རིགས་ཀྱིའོ། །ཨོཾ་ཀཱི་ལི་ཀཱི་ལ་བཛྲ་ཧཱུྃ་ཕཊ། རྡོ་རྗེ་རིགས་ཀྱི་ལས་ཐམས་ཅད་པའོ། །ན་མོ་རཏྣ་ཏྲ་ཡཱ་ཡ། ན་མཤྩཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མོ་བཛྲ་ཀྲོ་དྷཱ་ཡ། ཏདྱ་ཐཱ། ཨོཾ་ཧུ་ལུ་ཧུ་ལུ།
ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཨོཾ་ཨ་མྲྀ་ཏེ་ཧཱུྃ་ཕཊ། བདུད་རྩི་ཐབ་སྦྱོར་རོ། །དེ་དག་ཉིད་ཀྱིས་མེ་ཏོག་ལ་སོགས་པས་ཡང་བགེགས་བསལ་བར་བྱའོ། །དེ་ནས་དེ་དག་རིགས་ཀྱི་བདག་པོའི་གསང་སྔགས་སམ། རིགས་ཀྱི་སྙིང་པོས་བསང་བར་བྱའོ། །ཡང་ན་ལག་པ་གཡོན་པའི་ཕྱག་
རྒྱ་དང་བཅས་པས་ཐམས་ཅད་བསང་བར་བྱའོ། །དེ་ནས་མེ་ཏོག་ལ་སོགས་པ་བྱིན་བསྐྱེད་པར་བྱ་སྟེ། བསལ་བའི་ཕྱག་རྒྱ་ཉིད་ལས་གཡོན་པའི་གུང་མོ་ཉིད་ལག་པའི་རྡོ་རྗེས་གཟུང་བར་བྱ་བ་ནི་བྱིན་བསྐྱེད་པའི་ཕྱག་རྒྱ་སྟེ། དྲི་དང་མེ་ཏོག་ལ་སོགས་པའི་སྟེང་དུ་བྲིམས་ན་བྱིན་བསྐྱེད་པར་འགྱུར་རོ། །

དེ་ལ་འདི་ནི་བྱིན་བསྐྱེད་པའི་གསང་སྔགས་ཏེ། ཨོཾ་ཏེ་ཛཱ། ཏེ་ཛཱཿས་ནི་སིདྡྷི་སཱ་དྷ་ཡ་ཧཱུྃ་ཕཊ། དེ་བཞིན་གཤེགས་པའི་རིགས་ལའོ། །ཨོཾ་དི་པྱ་དི་པྱ་དི་པྱ་ཡ། ཨཱ་བེ་ཤ་མ་ཧཱ་ཤྲི་ཡཱ་ཡ་སྭཱ་ཧཱ། པདྨའི་རིགས་ལའོ། །ཨོཾ་ཛྭ་ལ་ཛྭ་ལ་ཛྭ་ལཱ་ཡ་བནྡྷ་རི་ཧཱུྃ་ཕཊ། རྡོ་རྗེའི་རིགས་ལའོ། །དེ་ལ་བདུད་རྩི་ཐབ་སྦྱོར་
གྱིས་བྱིན་གྱིས་བརླབ་པར་བྱའོ། །དེ་ནས་རིགས་ཀྱི་སྙིང་པོ་བཟླས་སོ། །དེ་ནས་ཕུར་བུ་དང་། ར་བ་དང་། དྲ་བ་དང་། བདུད་རྩི་ཐབ་སྦྱོར་དང་། ཀཱི་ལི་ཀཱི་ལས་མཚམས་བཅད་པ་ལ་སོགས་པས་གནས་བསྲུང་བར་བྱའོ། །དེ་ལ་སྔགས་དང་ཕྱག་རྒྱ་ནི་འདིའོ། །ཨོཾ་ཀཱི་ལི་ཀཱི་ལི་བཛྲི་བཛྲི་བྷུར་བནྡྷ་
བནྡྷ་ཧཱུྃ་ཕཊ། གསང་སྔགས་འདི་ཡིས་སྤོས་ཀྱི་ཆུ་ལ་ལན་བདུན་བཟླས་ཏེ་ཀུན་དུ་བསང་གཏོར་བྱས་ན་སྦྱང་བ་བྱས་པར་འགྱུར་རོ། །དེ་ནས་གསང་སྔགས་འདི་ཕྱག་རྒྱ་དང་བཅས་པས་ཕུར་བུར་བྱའོ། །དེ་ལ་འདི་ནི་ཕྱག་རྒྱ་སྟེ། ལག་པ་གཉིས་ཀྱི་གུང་མོ་དང་སྲིན་ལག་གཉིས་ཕན་ཚུན་གདུ་བུ་ལྟར་
བྱས་ཏེ། སོ་སོའི་དྲུང་དུ་རྩེ་མོ་སྦྱར་ཏེ་མཐེའུ་ཆུང་དང་མཛུབ་མོ་གཉིས་གཤིབས་ཏེ་བསྒྲེང་མཐེ་བོ་ཕུར་བུའི་ཚུལ་དུ་བྱ་སྟེ། ས་ལ་བཙུགས་པ་ནི་ཕུར་བུའི་ཕྱག་རྒྱའོ། །དེ་ནས་གསང་སྔགས་བཟླས་པའི་བདུག་པས་བདུགས་ཏེ་བཅིང་བར་བྱའོ། །གསང་སྔགས་འདི་ཡིན་ཏེ། ཨོཾ་སུ་སིདྡྷི་ཀ་ར་ཛྭ་ལི་ཏ།
ཨ་མ་ནནྟ་རྨུ་རྟ་ཡེ་ཛྭ་ལ་ཛྭ་ལ་བནྡྷ་བནྡྷ་ཧ་ན་ཧ་ན་ཧཱུྃ་ཕཊ། ཐམས་ཅད་ཀྱི་སྤྱིའིའོ། །ཨོཾ་ཛྭ་ལ་ཧཱུྃ། དེ་བཞིན་གཤེགས་པའི་རིགས་ལའོ། །ཨོཾ་པདྨི་ནི་པདྨི་ནི། བྷ་ག་བ་ཏི། མོ་ཧ་ཡ་མོ་ཧ་ཡ། ཛ་གད་མོ་ཧ་ནི་སྭཱ་ཧཱ། པདྨའི་རིགས་ལའོ། །དེ་ནས་མཁས་པས་ཐམས་ཅད་ལ་ཡང་རིགས་
ཀྱི་སྙིང་པོ་ཡོངས་སུ་བཟླས་པའི་སྤོས་ཆུས་ཕྱོགས་བཅིང་བར་བྱའོ། །དེ་ནས་ར་བ་བྱ་སྟེ་ཕུར་བུའི་ཕྱག་རྒྱ་ཉིད་ལས་མཐེ་བོང་གཉིས་གྱེན་དུ་བསྒྲེང་བ་ནི་ར་བའི་ཕྱག་རྒྱའོ། །གསང་སྔགས་དང་དཀོན་མཆོག་གསུམ་དང་ཕྱག་ན་རྡོ་རྗེ་ལ་ཕྱག་འཚལ་ལོ། །ཨོཾ་ས་ར་ས་ར། བཛྲ་པྲཱ་ཀ་ར་ཧཱུྃ་ཕཊ།
དེ་ནས་དྲ་བ་བྱ་སྟེ་ར་བའི་ཕྱག་རྒྱ་ཉིད་ཁ་ཐུར་དུ་བསྟན་པ་བསྐོར་བ་ནི་དྲ་བའི་ཕྱག་རྒྱའོ། །གསང་སྔགས་དང་དཀོན་མཆོག་གསུམ་དང་ཕྱག་ན་རྡོ་རྗེ་ལ་ཕྱག་འཚལ་ལོ། །ཨོཾ་བི་སྥུ་ར་རཀྵ་བཛྲ་པཱ་ཎི་ཧཱུྃ་ཕཊ། བདུད་རྩི་ཐབ་སྦྱོར་དང་ཀཱི་ལི་ཀཱི་ལ་ཞེས་བྱ་བ་སྔར་བསྟན་པ་ཉིད་ཀྱིས་སྦྱར་བར་བྱའོ། །དེ་ནས་

མཚམས་གཅད་པར་བྱ་སྟེ། ཁུ་ཚུར་བཅིངས་ཏེ་མཐེ་བོས་སེན་མོ་རྣམས་མནན་ཏེ་མཛུབ་མོ་ཕྱུང་ནས། གསང་སྔགས་ལན་གསུམ་བརྗོད་ཅིང་དབུས་ནས་བསྐོར་བར་བྱའོ། །མཚམས་བཅད་པ་སྟེ། གསང་སྔགས་ལ། ན་མཿས་མནྟ་བཛྲཱ་ཎཱཾ། ཨོཾ་ཏ་ར་ཏ་ར། ཏུ་རུ་ཏུ་རུ།
མ་ཊ་མ་ཊ། བནྡྷ་བནྡྷ། སརྦ་ཏྲ་ཨ་པྲ་ཏི་ཧ་ཏེ། ས་སི་མེ་ས་མ་བནྡྷ། ཀུ་རུ་ཀུ་རུ། ཏ་ར་ཏ་ར། ས་མནྟ་བཛྲེ། ཀུ་རུ་ཨ་མ་ལེ། ཀཱ་རུ་ཎ། མ་ཡེ་ཏུ་ཏ་ཡེ། ཏུ་ཏ་ཡེ། བ་ར་བ་ར། ཀ་ར་ཀ་ར། སུ་མི་མ་ས་མནྟ་བི་དྷྭ་ནྶ་ཡེ་ཛྭ་ལཱ་ཡ་སྭཱ་ཧཱ། དེ་ནས་བགེགས་བསལ་བ་དང་།
འབགས་པའི་སྐྱོན་ཡོངས་སུ་སྤང་བའི་ཕྱིར། སྤོས་ཆུ་ལག་མཐིལ་དུ་བླུགས་ལ་རིགས་ཀྱི་སྙིང་པོ་ཡོངས་སུ་བཟླས་པས་རང་གི་སྤྱི་བོར་བསང་གཏོར་བྱའོ། །དེ་ནས་རྩ་བའི་རྒྱུད་ལས་སྟན་གང་ཡང་རུང་བ་ཅིག་བདུད་རྩི་ཐབ་སྦྱོར་གྱིས་བསང་གཏོར་བྱས་ལ་བཀྲ་ཤིས་དང་པདྨ་དང་། རྡོ་རྗེ་
སྐྱིལ་མོ་ཀྲུང་གང་ཡང་རུང་བའི་ཚུལ་དུ་འདུག་གོ། །དེ་ནས་མཁས་པས་གསང་སྔགས་འདི་བརྒྱའམ་སྟོང་དུ་མངོན་པར་བསྔགས་པའི་ལས་ཀྱི་རྡོ་རྗེ་རྟག་ཏུ་བཅང་བར་བྱའོ། །ཨོཾ་དྷུ་ན་བཛྲ་ཧཱ། དེ་ལ་རྡོ་རྗེའི་ལས་ནི་རྡོ་རྗེ་བཀྲུས་ཏེ། ཙནྡན་དམར་པོས་བསྐུས་ལ་ལྷ་རྣམས་ལ་མཆོད་པ་བྱ་སྟེ། ལེགས་
པར་གྲུབ་པར་བྱེད་པ་སྤྱན་དྲང་ཞིང་། བདེ་བར་གཤེགས་སོ་ཞེས་བྱ་བ་དང་། མཆོད་པ་རྣམ་པ་ལྔ་ལ་སོགས་པ་ཕུལ་ཏེ་སྔར་བསྟན་པའི་སྔགས་ཀྱིས་ལན་སྟོང་མངོན་པར་བསྔགས་ལ་འདི་སྐད་ཅེས། བཅོམ་ལྡན་འདས་བདག་ལ་ཐུགས་བརྩེ་བའི་སླད་དུ་བཞུགས་ཏེ། བདག་གི་ལས་ཐམས་
ཅད་མཛད་དུ་གསོལ་ཞེས་བརྗོད་ནས། དེ་མཆོད་པ་ལ་སོགས་པ་བྱེད་པ་ན་ལག་པ་གཡོན་པས་གཟུང་བར་བྱའོ། །ཉིན་གཅིག་བཞིན་དུ་མཆོད་ཅིང་རང་གི་སྔགས་ཀྱིས་ལན་བདུན་བསྔགས་པར་བྱའོ། །གདུ་བུའི་ཆོ་ག་འདི་ཡིན་ཏེ། བུ་མོས་བཀལ་བའི་སྐུད་པའི་གྲངས་མི་མཉམ་པར་བསྒྲིལ་
ནས་མདུད་པ་ཡང་གྲངས་མི་མཉམ་པར་བོར་ཏེ་དབུས་སུ་བགྲང་ཕྲེང་གི་བྱེ་བྲག་ལས་ནོར་བུ་ཅིག་བཏགས་ཏེ། དེ་ལ་ནི་ལྷ་སྤྱན་མི་དྲང་བར་རིགས་གསུམ་ཆར་ལ་མཱ་མ་ཀཱིའམ་རྒྱལ་བ་དང་། པདྨའི་རིགས་ལ་སྤྱན་ནམ། གོས་དཀར་ཅན་གྱིས་ཡོངས་སུ་བཟླས་ལ་གདུ་བུ་དེ་ལག་པ་གཡས་པའི་

མཁྲིག་མ་ལ་གདགས་པར་བྱའོ། །ཨོཾ་རུ་རུ་སྥུ་རུ་ཛྭ་ལ་ཏིཥྛ་སིདྡྷ་ལོ་ཙ་ནེ་སརྦ་ཨརྠ་སཱ་དྷ་ནི་སྭཱ་ཧཱ། དེ་བཞིན་གཤེགས་པའི་རིགས་ཀྱི་གདུ་བུའི་རིག་སྔགས་ཏེ། རིགས་ཀྱི་ཡུམ་ཡིན་ནོ། །དཀོན་མཆོག་གསུམ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་
འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །མཐོང་བ་དང་ནི་ཐོས་པ་དང་། །རེག་པ་དང་ནི་དྲན་པའང་རུང་། །བདག་ནི་སེམས་ཅན་ཐམས་ཅད་ཀྱི། །ནད་རྣམས་ཀུན་གྱི་གསོས་གྱུར་ཅིག །ཏདྱ་ཐཱ། ཀ་ཊེ་བི་ཀ་ཊེ། ཀཾ་ཀ་ཊེ། ཀ་ཊ་བི་ཀ་ཊ། ཀཾ་ཀ་ཊེ། བྷ་ག་བ་ཏི་བི་ཛ་ཡ་
སྭཱ་ཧཱ། པདྨའི་རིགས་ཀྱི་གདུ་བུའི་རིག་སྔགས་ཏེ་ཡུམ་ཡིན་ནོ། །ཨོཾ་ཀུ་ལནྡྷ་རི། བནྡྷ་བནྡྷ་ཧཱུྃ་ཕཊ། རྡོ་རྗེ་རིགས་ཀྱི་གདུ་བུའི་རིག་སྔགས་ཏེ་ཡུམ་ཡིན་ནོ། །འདི་དག་གིས་ནི་དེ་ལ་ནི། །བགེགས་ཀྱིས་ཟིལ་གྱིས་གནོན་མི་འགྱུར། །དེ་དག་བརྗོད་པས་མྱུར་དུ་ནི། །དངོས་གྲུབ་མཐོང་ཞིང་
གཙང་མར་འགྱུར། །རིགས་ཀྱི་སྙིང་པོ་འབྲུ་གསུམ་པས། །སོ་སོར་བཟླས་བརྗོད་བྱས་པ་ཡིས། །ཀུ་ཤ་ཡི་ནི་བསང་བྱེད་ཀྱང་། །སྲིན་ལག་ལ་ནི་གདགས་པར་བྱ། །ཛི་ན་ཛིཀ་ཨཱ་རོ་ལྀ་ཀ་བཛྲ་དྷྲྀ་ཀ །ཟེའུ་ཀ་རས་ལ་ནི་འོག་ནས་བཤད་པའི་གསང་སྔགས་ཀྱིས་ཡོངས་སུ་བཟླས་པར་བྱའོ། །
དེ་ལྟར་གདུ་བུ་དང་། བསང་བྱེད་དང་། ཟེའུ་ཀ་དག་བྱས་ནས་ལུས་དྲང་པོར་བསྲང་སྟེ་བཞག་ལ་དབང་པོ་ལྔའི་ཡུམ་གྱི་ཁྱད་པར་དག་ལས་བཟློག་སྟེ། མགྲིན་པ་རྨ་བྱ་ལྟར་བྱས་ནས་དབུགས་ཕྱི་ནང་དུ་རྒྱུ་བ་དལ་བུས་དབྱུང་ཞིང་མིག་ཅུང་ཟད་ཙམ་ཕྱེ་སྟེ། སྣའི་རྩེ་མོར་བལྟ་བ། དེ་གཏད་ཅིང་
སོས་སོ་མནན་ནས་ལྕེ་རྐན་ལ་སྦྱར་ཏེ། སེམས་ཅན་གྱི་ཚོགས་མ་ལུས་པ་ལ་སྙིང་རྗེ་ཆེན་པོ་བསྐྱེད་ནས་བྱང་ཆུབ་ཀྱི་སེམས་བསྒོམ་པར་བྱའོ། །བྱང་ཆུབ་ཀྱི་སེམས་ལ་གནས་ཤིང་དགེ་བའི་རྩ་བ་གང་དག་སྒྲུབ་པ་དེ་དག་ནི་ཐམས་ཅད་མཁྱེན་པའི་ཡེ་ཤེས་འདྲེན་པར་བྱེད་པས་རྒྱུ་ཡིན་ནོ། །བྱང་ཆུབ་
ཀྱི་སེམས་ལ་གནས་པ་ལ་ནི་བསྒྲིམ་མི་དགོས་པ་ཁོ་ནར་འཁོར་བ་ན་ཡང་བདེ་བ་སྐྱེ་བར་བྱེད་དོ། །བྱང་ཆུབ་ཀྱི་སེམས་ཀྱིས་བྱིན་གྱིས་བརླབས་པའི་དགེ་བའི་རྩ་བ་དག་ནི་འཁོར་བ་དག་ན་ཡང་བདེ་བ་རྣམས་འདྲེན་པར་བྱེད་དེ། དེ་བས་ན་བྱང་ཆུབ་ཀྱི་སེམས་བསྐྱེད་དེ་བསོད་ནམས་ཀྱི་ཚོགས་

བསག་པར་བྱའོ། །དེ་ལ་བྱང་ཆུབ་ཀྱི་སེམས་བསྒོམ་པ་ནི་འདི་ཡིན་ཏེ། ཕུང་པོ་ལ་སོགས་པ་མཐའ་དག་རྡུལ་ཕྲ་རབ་ཏུ་བཤིག་ལ། རྡུལ་ཕྲ་རབ་རྣམས་ཕྱོགས་ཆའི་དབྱེ་བ་ལ་སོགས་པའི་རིམ་གྱིས་དཔྱད་ན་རང་བཞིན་མེད་པ་ལས་མི་འདའ་བ་ཡིན་ན། འདི་ལྟར་དེ་དག་
ལ་སོགས་པ་གཟུགས་རགས་པ་ལྟ་སྨོས་ཀྱང་ཅི་དགོས། དེ་བཞིན་དུ་འདི་ལྟར་བདག་གི་ངོ་བོ་ཡང་ཇི་ལྟ་ཇི་ལྟར་དཔྱད་པ་དེ་ལྟར་གཅིག་དང་དུ་མའི་རང་བཞིན་དང་བྲལ་བའི་ཕྱིར་དཔྱད་པའི་ལམ་དུ་འཇུག་མི་བཟོད་པ་ཡིན་ནོ། །དེ་བས་ན་ཐོག་མ་མེད་པའི་དུས་ནས་བསྒྲུབས་པའི་མ་རིག་པས་བསྐྱེད་
པ་ཕྱིན་ཅི་ལོག་ཏུ་སྣང་བ་དང་ལྡན་པའི་བག་ཆགས་ཤིན་ཏུ་བརྟན་པའི་སྟོབས་ཀྱིས་ནང་གི་ཤེས་པ་ཉིད། ཕྱིའི་གཟུགས་ཁོ་ན་ལྟར་སྣང་བར་ཟད་ཀྱི་དངོས་པོའི་གཟུགས་ནི་སྐྲའི་རྩེ་མོ་སྟོང་གི་ཆ་ཙམ་ཡང་མེད་དོ། །དེ་བས་ན་འདི་ལྟར་ཁམས་གསུམ་པ་འདི་དག་ནི་རྣམ་པར་ཤེས་པ་ཙམ་མོ་
ཞེས་རྣམ་པར་དཔྱད་དེ། མཐའ་དག་ནམ་མཁའ་ལྟ་བུར་བསམས་ནས་རང་གི་སེམས་ཀྱི་རྣམ་པ་ཟླ་བའི་དཀྱིལ་འཁོར་ལྟ་བུར་བལྟ་བ་འདི་ནི་བྱང་ཆུབ་ཀྱི་སེམས་བསྒོམ་པ་ཡིན་ནོ། །བྱང་ཆུབ་ཀྱི་སེམས་འདི་ནི་ཐམས་ཅད་མཁྱེན་པའི་ཡེ་ཤེས་ཀྱི་རྒྱུ་མཚན་འཇིག་རྟེན་དང་འཇིག་རྟེན་ལས་
འདས་པའི་དགེ་བའི་རྩ་བ་རྣམས་འདྲེན་པ་བདེ་བ་ཐམས་ཅད་འགྲུབ་པར་འགྱུར་བ་ཡིན་ནོ། །དེ་ལ་བཟླས་པར་བྱ་བའི་སྔགས་རྣམས་གོ་རིམས་བཞིན་དུ་དགོད་པས་དེ་ལས་འོད་ཟེར་སྣ་ཚོགས་རྣམ་པར་འབྱུང་ཞིང་རང་གི་ལྷ་ཉིད་ཀྱི་གཟུགས་ཀྱིས་ནམ་མཁའི་དབྱིངས་མཐའ་དག་ཁྱབ་པར་
བྱས་ཏེ། དེ་བཞིན་གཤེགས་པ་ཐམས་ཅད་ལ་མཆོད་པའི་སྤྲིན་ཆེན་པོ་སྤྲུལ་པས་ལེགས་པར་མཆོད་པ་དང་། སྤྲིན་ཆེན་པོ་སྤྲུལ་པ་ལ་བདུད་རྩིའི་ཆར་གྱི་རྒྱུན་འབབ་པས་དམྱལ་བའི་མེ་རྣམས་ཞི་བ་དང་། སེམས་ཅན་དམྱལ་བའི་སེམས་ཅན་རྣམས་ཚིམ་པར་བྱས་ནས་ཡང་དེ་བཞིན་
གཤེགས་པ་ཐམས་ཅད་ཀྱི་གཟུགས་དང་བཅས་པའི་འོད་ཟེར་སླར་ལོག་ནས། རང་གི་སེམས་ཟླ་བའི་དཀྱིལ་འཁོར་ལ་ཞུགས་པར་བསམ་མོ། །བྱ་བའི་རྒྱུད་ལས་ལྷ་སྒྲུབ་པའི་རྣལ་འབྱོར་གྱི་རིམ་པ་མ་བསྟན་ཏོ་སྙམ་དུ་བསམ་པར་མི་བྱ་སྟེ། བཅོམ་ལྡན་འདས་ཀྱིས་ཕལ་ཆེར་

མ་བསྟན་ཀྱང་ཕྱག་ན་རྡོ་རྗེར་དབང་བསྐུར་བ་དང་། དེ་ཁོ་ན་ཉིད་བཅུ་ལ་འཇུག་པ་དག་ལས་གཙོ་བོར་བསྟན་ཏོ། །གཅིག་ཏུ་དངོས་གྲུབ་ཐམས་ཅད་ནི་གསང་སྔགས་ཀྱི་ལྷ་དང་དེ་ཁོ་ན་ཉིད་ལ་རག་ལུས་པ་ཡིན་ལ། དེ་དག་རྣམ་པར་ཉམས་ན་ཞི་བ་ལ་སོགས་པའི་ལས་རྣམས་འགྲུབ་པར་མི་
འགྱུར་བས། བླ་མས་བཤད་པ་དང་རྒྱུད་ཀྱི་ཁྱད་པར་ཅུང་ཟད་དཔྱད་པ་ལས་ཁོང་དུ་ཆུད་པར་བྱའོ། །དེ་ལྟར་རིམ་པ་འདིས་ལྷ་ཉིད་ཀྱི་སྐུ་བསྐྱེད་པར་བྱའོ། །དེ་ནས་རང་གི་ལྷ་ཉིད་ཀྱི་དམ་ཚིག་གི་ཕྱག་རྒྱ་བཅིངས་ནས་སྙིང་ག་དང་། སྨིན་མཚམས་དང་། མགྲིན་པ་དང་། དཔུང་མགོ་རྣམས་
སུ་བྱིན་གྱིས་བརླབ་བོ། །དེ་ནས་རིན་པོ་ཆེ་དུ་མ་ལས་བྱས་པའི་ས་གཞི་གསེར་གྱི་བྱེ་མ་གདལ་བ་བསམས་ནས་གསང་སྔགས་འདིས་བྱིན་གྱིས་བརླབ་པར་བྱའོ། །ཨོཾ་ཙ་ལ་བཱི་ར་ཧཱུྃ་སྭཱ་ཧཱ། དེའི་སྟེང་དུ་འོ་མའི་ཆུས་ཡོངས་སུ་གང་བའི་རྒྱ་མཚོ་ཆེན་པོ་ཉ་ལྕིབས་ལ་སོགས་པའི་སྐྱོན་དང་བྲལ་བ་པདྨ་
དང་། ཨུཏྤལ་ལ་སོགས་པའི་མེ་ཏོག་གིས་རབ་ཏུ་བརྒྱན་པ་རིན་པོ་ཆེའི་བྱའི་ཚོགས་མང་པོ་ལྡིང་བ་བསམ་པར་བྱའོ། །བྱིན་གྱིས་བརླབས་པའི་གསང་སྔགས་ནི་བི་མ་ལ་དྷ་ཧཱ་ཧཱུྃ། དེའི་དབུས་སུ་དེར་རི་རབ་རིའི་རྒྱལ་པོ་བསམ་པར་བྱ་སྟེ། གྲུ་བཞི་པ་ངོས་བཞི་རིན་པོ་ཆེའི་ཐེམ་སྐས་ཀྱི་ཕྲེང་
བས་བརྒྱན་པ། ཐེམ་སྐས་ལ་ལ་ནི་གསེར་ལས་བྱས་པ། ལ་ལ་ནི་དངུལ་ལས་བྱས་པ། ལ་ལ་ནི་ཨིནྡྲ་ནཱི་ལ་ལས་བྱས་པ། ལ་ལ་ནི་སྦུར་ལོང་ལས་བྱས་པ། མཐའ་མ་ཐོག་ཐག་དཔག་བསམ་གྱི་ཤིང་ལེགས་པར་བསྐྲུན་པ་རྣམ་པར་རྒྱལ་བའི་བ་དན་སྟོང་འཕུར་བ་རང་གི་བློ་ཡི་ཁྱད་
པར་གྱིས་བརྒྱན་པ་བསམ་པར་བྱའོ། །དེ་ནས་དེའི་སྟེང་དུ་པདྨའི་སྡོང་བུ་རིན་པོ་ཆེ་དུ་མས་བརྒྱན་པའི་རིན་པོ་ཆེ་སྣ་ཚོགས་ཀྱི་འདབ་མ་ཅན། གསེར་གྱི་ཟེ་བ་དང་ལྡན་པ་སྤུར་ལོང་གི་ཟེ་འབྲུ་ཅན་སྙིང་པོའི་ཐོག་ལ་དངུལ་གྱི་རི་མོས་བསྐོར་བ། དཔག་ཚད་དུ་མའི་ཁྱོན་ཙམ་རི་རབ་ཀྱི་དབུས་བརྟོལ་
ནས་བྱུང་བར་བསམ་མོ། །དེ་ལས་ཀྱང་པདྨའི་དྲ་བ་གཞན་བརྒྱ་སྟོང་ཁྲི་བྱེ་བ་རྙེད་འབྱུང་བར་བསམ་མོ། །དེ་དག་བྱིན་གྱིས་བརླབས་པའི་གསང་སྔགས་འདི་ཡིན་ཏེ། ན་མཿསརྦ་ཏ་ཐཱ་ག་ཏཱ་ནཱཾ། སརྦ་ཐཱ་ཨུཏྒ་ཏེ་སྥ་ར་ཎ་ཧི་མཾ་ག་ག་ན་ཁཾ་སྭཱ་ཧཱ། དེ་ལ་ཕྱག་རྒྱ་ནི་ཕྱག་འཚལ་བའི་ཐལ་མོ་

ལས་ཕན་ཚུན་བསྣོལ་ཏེ་གཡས་པའི་མཐེ་བོས་གཡོན་པའི་མཐེ་བོ་མནན་ནོ། །ཕྱག་རྒྱ་འདི་བཅིངས་ནས་གསང་སྔགས་ལན་བརྒྱ་བརྗོད་པར་བྱའོ། །དེས་ཐམས་ཅད་ཡང་དག་པར་གནས་པར་འགྱུར་རོ། །དེར་གཞུང་ལས་བྱུང་བའི་རིམ་པས་བླ་རེ་དག་ཀྱང་ཡིད་ཀྱིས་སྐད་
ཅིག་ལ་བསམ་པར་བྱའོ། །དེའི་ཕྱིར་དེ་ལ་སྤྲོས་པ་དང་ལྡན་པའི་གཞུང་རྒྱས་པས་འཇིགས་པར་མི་བྱའོ། །དེ་ནས་ལྷ་སྤྱན་དྲང་སྟེ། འདི་ནི་སྤྱན་དྲང་བའི་ཆོ་གའོ། །གསེར་དང་དངུལ་དང་ཟངས་མ་དང་རྡོ་བ་དག་དང་ཤིང་གི་འམ་ཞེས་བྱ་བའམ། ཞི་དང་རྒྱས་དང་དྲག་སྤྱོད་དང་། །རབ་དང་
འབྲིང་དང་ཐ་མ་ཡི། །ལས་དང་དངོས་གྲུབ་རྣམས་ལ་ནི། །རིམ་པའི་སྣོད་རྣམས་སྦྱར་བར་བྱ། །ཁ་དོག་ཡོན་ཏན་བཤད་པ་ལས། །གཞན་དང་གཞན་ཡང་ཅི་རིགས་པའི། །སྣོད་རྣམས་ཇི་ལྟར་འདོད་པར་ནི། །མཆོད་ཡོན་ཕྱིར་ཡང་སྦྱར་བར་བྱ། །མཆོད་ཡོན་ཕྱིར་ནི་ཟངས་ཀྱི་སྣོད། །
ལས་རྣམས་ཀུན་ལ་རབ་ཏུ་ཤིས། །དེ་དག་ལས་རིགས་དང་ལས་དང་དངོས་གྲུབ་དག་ལ་གང་འདོད་པའི་སྣོད་བླངས་ཏེ། དེ་ནས་རྗེས་སུ་མེ་ཏོག་དང་། །སྤོས་ཀྱི་ཆུ་ནི་གཙང་བ་ཡིས། །མཆོད་ཡོན་ཆོ་ག་བཞིན་བཤམས་ལ། །བདུག་སྤོས་ཀྱིས་ནི་རབ་ཏུ་བདུག །དེ་ལ་ཞི་བ་དང་དངོས་གྲུབ་
རབ་གཉིས་ལ་ནི་ནས་དང་འོ་མའི་མཆོད་ཡོན་དབུལ་བར་བྱའོ། །རྒྱས་པ་དང་དངོས་གྲུབ་འབྲིང་ལ་ནི་ཏིལ་དང་ཞོ་དབུལ་བར་བྱའོ། །དྲག་ཤུལ་སྤྱོད་པ་དང་དངོས་གྲུབ་ཐ་མ་ལ་ནི་བའི་གཅིན་འབྲས་ཀོ་ཏྲ་བ་དང་བཅས་པའམ། ཡང་ན་ཁྲག་དབུལ་བར་བྱའོ། །རབ་དང་འབྲིང་དང་ཐ་མ་ཡི། །ལས་
རྣམས་ཀུན་ལ་འབྲས་ཡོས་ཤིས། །སྤོས་དང་མེ་ཏོག་ཀུ་ཤ་ཏིལ། །ཆུ་རྣམས་བྱེ་བྲག་མེད་པར་བཟང་། །འདི་མ་འབྱོར་གྱིས་བདག་ལ་ནི། །བཟོད་པ་ཅི་འབྱོར་བས་ཀྱང་བྱ། །དེ་ནས་གསང་སྔགས་ཀྱི་ལྷ་སྤྱན་དྲངས་པའི་ཕྱིར་མཆོད་ཡོན་བཤམས་ནས་རང་གི་རིགས་ཀྱི་རིག་པའི་རྒྱལ་པོའམ།
ཡང་ན་སྤྱི་ཡི་རིགས་ཀྱི་སྙིང་པོའམ། །དེ་སྤྱན་དྲང་བའི་གསང་སྔགས་སམ། །སོ་སོའི་ལས་ཐམས་ཅད་པས་ཡོངས་སུ་བཟླས་སོ། །རིག་སྔགས་ཀྱི་རྒྱལ་པོ་དང་། རིག་སྔགས་རང་བཟླས་སོ། །དེ་ལྟར་ཡོངས་སུ་བཟླས་ནས་གསང་སྔགས་ཀྱི་གནས་ཀྱི་ཕྱོགས་གང་ཡིན་པའམ། རི་མོ་ལ་

སོགས་པ་ལ་ལྷའི་གཟུགས་བཞག་པ་དེར་བལྟས་ཏེ། འདི་སྐད་ཅེས། དད་པ་དང་ནི་དམ་ཚིག་གིས། །ཚུར་གཤེགས་ཚུར་གཤེགས་བཅོམ་ལྡན་འདིར། །བདག་གི་མཆོད་ཡོན་འདི་བཞེས་ནས། །མཆོད་པས་བདག་ལ་དགྱེས་པར་མཛོད། །ཅེས་བྱ་སྟེ། དེ་ནས་པུས་མོ་གཉིས་
ས་ལ་བཙུགས་ཏེ། གསང་སྔགས་མཆོག་རྣམས་མགོ་བོའི་ཐད་ཀ་ནས་མཆོད་ཡོན་དབུལ་ལོ། །འབྲིང་རྣམས་ལ་བྲང་ནས་སོ། །ཕལ་པ་རྣམས་ལ་ནི་ལྟེ་བའི་ཐད་ཀ་ནས་མཆོད་ཡོན་དབུལ་བར་བྱའོ། །ཡང་ན་ཡིད་གཙོ་བོར་གྱུར་པ་ཡིན་པས་བཞི་པོ་གང་ཡང་རུང་བས་སྤྱན་དྲང་བར་བྱའོ། །
ཐལ་མོ་སྦྱར་བའམ། མཆོད་ཡོན་ནམ། མེ་ཏོག་བླང་བའམ། ཡང་ན་ཐལ་མོ་སྦྱར་བ་བྱ་སྟེ། ཚུར་གཤེགས་ཞེས་བྱ་བ་ལ་སོགས་པས་ཡིད་ཀྱིས་སྤྱན་དྲངས་ནས་ལས་ཀྱི་བྱེ་བྲག་ལས་ཤར་རམ། བྱང་ངམ། ལྷོའམ། ནུབ་ཏུ་ཁ་བལྟས་ཏེ་ལྷ་མདུན་དུ་བཞུགས་སུ་གསོལ། རྒྱས་
པར་ནི་རྒྱུད་ལས་ཤེས་པར་བྱའོ། །སླར་གཤེགས་སུ་གསོལ་བ་ནི་སྤྱན་དྲངས་པའི་ཆོ་ག་བཞིན་དུ་བྱ་བ་ལས་གསང་སྔགས་དང་ཕྱག་རྒྱར་ལྡན་པས་བྱེ་བྲག་ཏུ་བཞུད་ཅིག་ཅེས་བྱའོ། །དེ་ལ་འདི་ནི་ཕྱག་རྒྱ་ཡིན་ཏེ། སོར་མོ་ཕན་ཚུན་གྱི་བར་དུ་བསྣོལ་ནས་ཐལ་མོ་བཀན་ལ་མཛུབ་མོ་གཉིས་
གཤིབས་ཏེ་བསྒྲེང་ངོ་། །མཐེ་བོང་གཉིས་གཡབ་པ་ནི་སྤྱན་དྲངས་པའོ། །ཕྱིར་བསྒྱེལ་བ་ནི་སླར་གཤེག