Luận tạng Tây Tạng (Tengyur) — Tập 73

་དུ། དཔལ་
ཕྱག་ན་རྡོ་རྗེ་གོས་སྔོན་པོ་ཅན་གྱི་གཟུངས་ཀྱི་གཏོར་མའི་ཆོ་ག་ཞེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །སློབ་དཔོན་དང་ནི་སྒྲུབ་པ་པོས། །བསྙེན་པ་དང་ནི་སྒྲུབ་པ་དང་། །དཀྱིལ་འཁོར་དང་ནི་སྦྱིན་སྲེག་དང་། །གཞན་ཡང་ལྷ་རྣམས་མཉེས་པ་དང་། །བགེགས་ཞི་བ་དང་
ཉམས་པ་བསྐང་། །འཁྲུལ་འཁོར་ཚོགས་ཀྱི་འཁོར་ལོ་དང་། །ཕན་གདགས་པ་དང་ཚར་བཅད་དང་། །དགར་དང་གསད་དང་དགུག་པ་དང་། །གཟིར་དང་བཅིངས་དང་མནན་པ་དང་། །རྒྱས་དང་བསྡུས་དང་ཤིན་ཏུ་བསྡུས། །ཞི་དང་ལོངས་སྤྱོད་འཕེལ་བ་དང་། །རྒྱས་དང་དབང་

དང་མངོན་སྤྱོད་ཀྱི། །ལས་རྣམས་ཉེ་བར་འགྲུབ་པ་དང་། །ཐུན་མོང་མཆོག་དང་དངོས་གྲུབ་དང་། །བསོད་ནམས་ཆེན་པོ་ཐོབ་བྱའི་ཕྱིར། །ཡར་ངོ་མར་ངོའི་ཚེས་བཅུ་དང་། །བརྒྱད་དང་བཅུ་བཞི་ཉ་སྟོང་ངམ། །ཡང་ན་རྒྱུན་ནམ་དུས་དྲུག་ཏུ། །རྟག་ཏུ་གཏོར་མའི་ལས་རྣམས་བྱ། །རྩ་
བ་ལྔ་དང་ཡན་ལག་ལྔ། །འབྲུ་དང་ཤིང་ཐོག་སྨན་རྣམས་དང་། །ཆན་ཐུག་ཁུར་བ་དཀར་གསུམ་མངར། །ཤ་ཁྲག་རུས་པ་སྙིང་སྣ་རྣམས། །དགྲའམ་འབྱུང་པོ་བགེགས་ཀྱི་གཟུགས། །སྦྲུལ་དང་སྦལ་ལྕོང་ཉ་ཤ་རྣམས། །དེ་སོགས་དྲག་པོའི་ཐུན་རྫས་སོ། །ཆོ་ག་གསུམ་མམ་སྐད་ཅིག་
མས། །འདོད་པའི་ལྷ་རྣམས་བསྐྱེད་བྱས་ལ། །ཚོགས་བསགས་སྔོན་འགྲོ་རྗེས་འཇུག་རྣམས། །བསྙེན་སྒྲུབ་དུས་དང་མཐུན་པར་བྱ། །བདག་མཆོད་ལྷ་རྣམས་མཉེས་བྱའི་ཕྱིར། །མཚན་ལྡན་རྡོ་རྗེ་ཀ་པཱ་ལར། །རྫས་རྣམས་ཀུན་གྱིས་བཀང་བྱས་ཏེ། །ཡཾ་ལས་རླུང་སྟེ་རཾ་མེ་སྦར། །དེ་སྟེང་
ཨ་ལས་ཀ་པཱ་ལར། །དེ་འོག་ཡེ་ཤེས་ལྔ་ལྡན་གསུམ། །གོ་ཀུ་ད་ཧ་ན་ལས་ནི། །ལྕགས་ཀྱུ་ལྔ་པོ་བསྐྱེད་པར་བྱ། །བི་མུ་མ་ར་ཤུ་ལས་ནི། །བདུད་རྩི་ལྔ་ཡི་རང་བཞིན་བསྐྱེད། །དཔའ་བོ་ལྔ་ཡིས་རབ་སྦྱངས་ཏེ། །ཟླ་སྟེངས་ཨོཾ་ལས་རྡོ་རྗེ་ཧཱུཾ། །དེ་གྱུར་རྩེ་ལྔ་དེ་ཉིད་ཅན། །སྔོ་བསྐྱོད་མེ་སྦར་རྫས་རྣམས་
བསྐོལ། །འོད་ཀྱིས་རི་བོང་རྩེ་ལྔ་ཞུ། །ཐིམ་པས་བདུད་རྩིའི་ངོ་བོར་གནས། །ཡེ་ཤེས་ལྔ་ཡི་ཡིག་འབྲུ་ལས། །འོད་ཀྱིས་གང་གཱའི་ཀླུང་སོགས་ཀྱི། །བདུད་རྩི་དྲངས་ཏེ་གཉིས་མེད་བསྟིམ། །འབྲུ་གསུམ་སྔགས་ཀྱི་བྱིན་གྱིས་བརླབ། །ལྷག་པའི་ལྷ་དང་བླ་མ་དང་། །དཀོན་མཆོག་གསུམ་དང་
ཆོས་སྐྱོང་རྣམས། །ལྕེ་ཡི་རྡོ་རྗེས་བདུད་རྩི་ལེན། །ཨོཾ་ནཱི་ལཱཾ་བ་ར་དྷ་ར་བཛྲ་པཱ་ཎི་བ་ལིཾ་ཨི་དཾ་གྲྀ་ཧྞ་གྲྀ་ཧྞ་ཁཱ་ཧི་ཁཱ་ཧི་བྷུཾ་ཛ་ཧོ་བ་ལིངྟ་ཁཱ་ཧི། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱ་དྱ་ནུཏྤ་ནྣ་ཏྭཱཏ་ཨོཾ་ཨཱཿཧཱུཾ་ཞེས་བསྙེན་པའི་དུས་སུ་དབུལ་ལོ། །དེ་རྗེས་སྒྲུབ་པའི་དུས་དག་ཏུ། །གཏོར་མ་བྱིན་གྱིས་བརླབ་པ་ནི། །
ཨ་ལས་བནྡྷའི་ནང་དག་ཏུ། །མཾ་ལས་ཤ་ཡི་ཕུང་པོ་བསྐྱེད། །ཀེཾ་ལས་རུས་པའི་ཕོ་བྲང་ལས། །ར་ལས་རཀྟའི་རྒྱ་མཚོ་བསྐྱིལ། །ཤ་ཁྲག་རུས་པར་བྱིན་བརླབས་ལ། །དུག་གསུམ་དམར་གྱི་མཆོད་པ་འདི། །དྲག་པོའི་སྔགས་ཀྱིས་དབུལ་བར་བྱ། །ཨོཾ་ནཱི་ལཱཾ་བ་ར་དྷ་ར་བཛྲ་པཱ་ཎི། མ་མ་སརྦ་ཤ་

ཏུཾ་ཨ་མུ་ཀའི་མཛྫ་མེ་དཱ་བཱ་ས་མཱཾ་ས་ཛཱི་བཾ་བུ་གཾ་རུ་<དྷེ་ར་‚དྷ་རེ་>པྲཱི་ཡ་ཀུ་རུ་བྷཀྵ་ནི་ཨི་དཾ་བ་ལིཾ་གྲི་ཧྞ་གྲྀ་ཧྞ་ཁཱ་ཧི་ཁཱ་ཧི་བྷུཉྫ་ཧོ། རཀྟ་པཱི་པ་ཏ་ཨ་ཏི་ཀྲ་མ་ས་མ་ཡེ་སྭཱ་ཧཱ། ཞེས་སྒྲུབ་པའི་དུས་སུའོ། །ལས་སྦྱོར་དྲག་པོའི་དུས་དག་ཏུ། །གཏའ་ཡི་གཏོར་མ་དབུལ་བ་ནི། །སྦལ་ལྕོང་ཉ་ཤའི་གཏོར་མ་བཤམ། །གཟས་
པ་པོ་ཡི་ལིང་ག་ལ། །སྔགས་དང་ཕྱག་རྒྱའི་ཏིང་འཛིན་གྱིས། །རྫུས་སྐྱེས་ཚུལ་དུ་བསྐྱེད་བྱ་སྟེ། །བཀུག་སྟེ་གྲུ་གསུམ་ཁ་བཅད་གཟིར། །འཇིག་རྟེན་འདས་དང་མ་འདས་པའི། །ལས་ཀྱི་གནོད་སྦྱིན་ཚོགས་ལ་དབུལ། །ཡཀྵ་ནཱི་ལཱཾ་པ་ར་དྷ་ར་བཛྲ་པཱ་ཎི་ཧཱུཾ། མ་ཧཱ་ཡཀྵ་སེ་ནཱ་པ་ཏ་ཡེ་ཆེ་གེ་མོའི་སྲོག་
ལ་ཤག་ཤག་མ་མ་སརྦ་ཤཏཱུཾ་ཨ་མུ་ཀ་ཞེས་དབུལ་ལོ། །དེ་ནས་བསྟོད་ཅིང་སྨོན་ལམ་བཏབ། །ཐོད་ཆེན་རྔ་བརྡུང་འཕྲིན་ལས་བཅོལ། །རྡོ་རྗེ་སེམས་དཔའི་སྙིང་པོ་ཡིས། །རང་རང་གནས་སུ་གཤེགས་སུ་གསོལ། །གོ་བགོ་ལུས་བསྲུང་བརྟན་པར་བྱ། །རང་ཉིད་ང་རྒྱལ་ཅི་བདེར་གནས། །ཕྱག་ན་
རྡོ་རྗེ་གོས་སྔོན་པོ་ཅན་གྱི་གཟུངས་ཀྱི་གཏོར་མའི་ཆོ་ག་ཞེས་བྱ་བ། སློབ་དཔོན་སུ་ཝཱ་གཱི་ཤྭ་ར་ཀཱིརྟིས་མཛད་པ་རྫོགས་སོ།། ༄༅༅། །རྒྱ་གར་སྐད་དུ། བཛྲ་པཱ་ཎི་ནོ་པི་ཀ་སཱ་དྷ་ནཾ་ནཱ་མ། བོད་སྐད་དུ། ཕྱག་ན་རྡོ་རྗེའི་སྒྲུབ་པའི་ཐབས་མདོར་བསྡུས་པ་ཞེས་བྱ་བ། ཁྲོ་བོ་གཏུམ་པོ་ལ་
ཕྱག་འཚལ་ལོ། །གདུག་པ་མ་ལུས་འཇོམས་མཛད་པ། །རྡོ་རྗེ་འཛིན་ལ་ཕྱག་འཚལ་ཏེ། །དེ་ཡི་གསང་སྔགས་དབྱེ་བ་བཤད། །ཨོཾ་ནས་སྭཱ་ཧཱ་བཅུ་བདུན་བར། །གཙོ་ལ་བསྙེན་པ་དབུལ་བའོ། །དེ་ནས་སྒྲུབ་པའི་ཐབས་དག་ལ། །འབུམ་དུ་བསྙེན་པ་རྫོགས་བྱས་ནས། །མྱུར་དུ་གསད་པའི་
ལས་ལ་འཇུག །ཀླུ་དང་གཉན་དང་ས་བདག་སོགས། །གཞན་ཡང་གནོད་སྦྱོར་མཐའ་དག་རྣམས། །བཟློག་ཅིང་མི་ཚུགས་བྱ་བའི་ཕྱིར། །ལས་ཀྱི་གནོད་སྦྱིན་སྒྲུབ་ཐབས་བརྩམ། །སྔགས་བདག་ནག་པོའི་སྒྲུབ་པ་ལ། །སྔགས་ཀྱང་དུ་མ་རྣམ་པ་བཞི། །བོད་པ་རྦད་པ་གསད་དང་
མཆོད། །གདམས་ངག་ཅན་གྱིས་ནན་ཏན་བྱ། །ཨོཾ་བཛྲ་པཱ་ཎི་ཡཀྵ་ཀྲོ་དྷ། བཛྲ་དྷ་ར་བཛྲ་ཁཌྒ་དྷ་ར། བཛྲ་ཁ་ལ་རུ་པཱ་ཤ་དྷ་ར། བཛྲ་ཙཀྲ་དྷ་ར། ནཱ་ག་མཱ་ར་ཡ་ཧཱུཾ་ཕཊ། ཨོཾ་བཛྲ་པཱ་ཎི་ཡཀྵ་ཀྲོ་དྷ། བཛྲ་དྷ་ར་ནཱ་ག་རུ་ཡ་ཧཱུཾ་ཕཊ། ཨོཾ་བཛྲ་པཱ་ཎི་ཡཀྵ་ཀྲོ་དྷ་ཁཌྒ་དྷ་ར་ནཱ་ག་མཱ་ར་ཡ་ཧཱུྃ་ཕཊ། ཨོཾ་

བཛྲ་པཱ་ཎི་ཡཀྵ་ཀྲོ་དྷ་ཁ་ལ་རུ་པཱ་ཤ་དྷ་ར་ནཱ་ག་མཱ་ར་ཡ་ཧཱུཾ་ཕཊ། ཨོ་བཛྲ་པཱ་ཎི་ཡཀྵ་ཀྲོ་དྷ་ཙཀྲ་དྷ་ར་ནཱ་ག་མཱ་ར་ཡ་ཧཱུཾ་ཕཊ། ཨོཾ་བཛྲ་པཱ་ཎི་ཡཀྵ་ཀྲོ་དྷ་ཧཱུཾ། ཧ་ར་ཧ་ར་ནཱ་ག་ནཾ། པྲ་ཧ་ར་པྲ་ཧ་ར་ནཱ་ག་ནཾ། ཆེ་གེ་མོ་མཱ་ར་ཡ་སོད་སོད། ནཱ་ག་མཱ་ར་ཡ་བྱིང་བྱིང་། ནཱ་ག་མཱ་ར་ཡ་མུགས་མུགས། ནཱ་ག་
མཱ་ར་ཡ་ཤིག་ཤིག །ནཱ་ག་མཱ་ར་ཡ་མྱོག་མྱོག །ནཱ་ག་མཱ་ར་ཡ་དུན་དུན། ནཱ་ག་མཱ་ར་ཡ་ཐུམ་རིལ་ཛཿཨོཾ་བཛྲ་པཱ་ཎི་ཡཀྵ་ཀྲོ་དྷ་བཛྲ་དྷ་ར་བཛྲ་ཁཌྒ་དྷ་ར་ཁ་ལ་རུ་པཱ་ཤ་དྷ་ར་ཙཀྲ་དྷ་ར། ཡཀྵ་ཀྲོ་དྷ་ཆེ་གེ་མོའི་སྲོག་ལ་ཤག་ཤག་མ་མ་སརྦ་ཤ་ཏྲཱུཾ་ཨ་མུ་ཀི་ཡི་མ་ཛྫ་མ་དྷ་བྷ་ས་མཱཾ་ས་ཛཱི་བཾ་བུ་ག་རུ་དྷི་ར་པྲཱི་ཡཾ་
བྷཀྵ་ནི་བ་ལིཾ་ཨི་དཾ་གྲིཧྞ་གྲི་ཧྞ་ཁཱ་ཧི་ཁཱ་ཧི་བྷུཉྫ་ཧོ། རཀྟ་པཱི་པ་ཧོ། མཱ་ཏི་ཀྲ་མ་ས་མ་ཡེ་སྭཱ་ཧཱ། གནོད་སྦྱིན་གྱི་སྡེ་དཔོན་བཞིའི་སྒྲུབ་ཐབས་ཐུན་མོང་མ་ཡིན་པའི་གུ་རུ་སུ་ཝཱ་གཱི་ཤྭ་ར་ཀཱིརྟིས་མཛད་པ། པཎྜི་ཏ་དཱི་པཾ་ཀ་ར་ཤྲཱི་ཛྙཱ་ན་དང་། ལོ་ཙཱ་བ་རྒྱ་བརྩོན་འགྲུས་སེང་གེས་བསྒྱུར་བའོ།། །།དཔལ་
ཕྱག་ན་རྡོ་རྗེ་ལ་ཕྱག་འཚལ་ལོ། །སངས་རྒྱས་བྱེ་བ་ཕྲག་འབུམ་ཇི་སྙེད་ཀྱིས། །རྗེས་གནང་ལས་ཀྱི་ཁྲོ་བོར་དབང་བསྐུར་བའི། །མཐུ་སྟོབས་བདག་པོ་གདུག་པའི་གཉེན་པོ་ལ། །དང་བས་ཕྱག་འཚལ་སྒྲུབ་པའི་གོ་རིམས་བྲི། །དང་པོར་གནས་དང་དཀྱིལ་འཁོར་བཤམས། །མཆོད་རྟེན་སྔོན་པོ་བུམ་
པ་བཅས། །གཏའ་བཅས་མཆོད་རྫས་ཁྲུས་བྱས་ལ། །མཆོད་རྟེན་སྔོན་པོ་བུམ་པ་དང་། །གཏའ་གཏོར་མཆོད་ཡོན་བྱིན་གྱིས་བརླབ། །སེམས་བསྐྱེད་སྣོད་བཅུད་སྔགས་ཀྱིས་སྦྱངས། །ཚོགས་བསགས་མགྲོན་གྱི་ལྷ་རྣམས་གཤེགས། །བགེགས་བསྐྲད་མཚམས་བཅད་ཚད་མེད་བསྒོམས། །
སྟོང་ཉིད་བསྒོམས་ལ་འབྱུང་རྣམས་བསྐྱེད། །རི་རབ་སྟེང་དུ་སྲུང་འཁོར་བསྒོམ། །དེ་དཀྱིལ་གཞལ་ཡས་ཁང་དང་གདན། །ཡིག་འབྲུ་རྣམས་ལས་ལྷ་རྣམས་བསྐྱེད། །ཐུགས་ཀར་ཡེ་ཤེས་འཁོར་ལོ་བསྒོམས། །བྱིན་རླབས་ལུས་བསྲུང་བརྟན་པར་བྱ། །ཡེ་ཤེས་འཁོར་ལོ་
དགུག་གདན་དབུལ། །ཕྱག་འཚལ་མཆོད་བསྟོད་སྡིག་བཤགས་བསྟིམ། །བྱིན་རླབས་འོད་ཟེར་གསུམ་འཕྲོ་འདུ། །དབང་བསྐུར་ལྷ་རྣམས་སྤྱན་དྲངས་མཆོད། །སྡིག་བཤགས་གཟུངས་ལྟར་རྗེས་གནང་བྱ། །དབང་བསྐུར་བྱིན་རླབས་དེ་ཉིད་བསྟིམ། །ལྕེ་ནི་བྱིན་

རླབས་སྐྱོན་སྤངས་འདས། །བསྙེན་དུས་ལྷར་གཏད་སྤྲོ་བསྡུ་བྱ། །ཐུན་མཚམས་ཕྱེ་ལ་མཆོད་གཏོར་གཏང་། །གཤེགས་གསོལ་བསྐྱེད་བསྡུ་མི་དམིགས་བསམ། །བསྙེན་པ་རྟགས་ལྡན་དངོས་གྲུབ་བླང་། །གཏའ་གཏོར་ནམ་གུང་ཐོ་རངས་དུས། །དབང་བསྐུར་རྒྱས་གདབ་བུམ་ལྷ་གཤེགས། །
ལུས་བསྲུང་སྤྱོད་ལམ་རྣལ་འབྱོར་བྱ། །རྟགས་རྣམས་སྒྱུ་མ་ལྟ་བུར་གཟུང་། །དེ་དོན་གཞན་ལ་སྨྲ་མི་བྱ། །སྒྲུབ་ཐབས་གསལ་བར་བྱེད་པའི་མན་ངག་འདི། །ཚིག་རྐང་སུམ་ཅུས་དེ་ཉིད་དོན་བསྡུས་ནས། །ཤེས་པར་བྱེད་པའི་དོན་འགྲེལ་སྒྲོན་མ་འདི། །བྱས་པའི་དགེ་བ་སེམས་ཅན་ཀུན་ལ་བསྔོ། །
ནོངས་པ་མཆིས་ན་འཕགས་པས་བཟོད་པར་གསོལ། །སློབ་དཔོན་གསུང་གི་དབང་ཕྱུག་གྲགས་པས་མཛད་པ་རྫོགས་སོ།། །།བཅོམ་ལྡན་འདས་དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །དུས་གསུམ་བདེ་གཤེགས་སྐུ་གསུང་སྲས་བཅས་ཀྱིས། །རྗེས་གནང་ལས་ཀྱི་ཁྲོ་བོར་
དབང་བསྐུར་བའི། །ཁྲོ་བོའི་རྒྱལ་པོ་དུག་དགྲ་དྲེགས་འཇོམས་ལ། །དང་བས་ཕྱག་འཚལ་སྒྲུབ་ཐབས་གོ་རིམས་བྲི། །གྲངས་དང་དུས་དང་མཚན་མ་ཡི། །བསྙེན་རྫོགས་དངོས་གྲུབ་བླང་བའི་ཕྱིར། །གནས་དང་ཕྱོགས་དང་སྔོན་འགྲོ་བྱ། །ཐིག་གདབ་ཚོན་དགྱེ་ཕྱག་མཚན་དགོད། །ཁྱད་
པར་རྫས་བསོག་བུམ་པ་བཅའ། །དངོས་གྲུབ་རྟེན་དང་མཆོད་རྫས་བཤམ། །སྡོམ་བསྲུང་སྨྱུང་གནས་ཆོས་གོས་བརྒྱན། །ཚོགས་བསགས་སྔོན་འགྲོ་རྗེས་འཇུག་དང་། །བསྐྱེད་རིམ་མཆོད་པ་བསྙེན་དུས་བཞིན། །བུམ་ནང་ལྷ་བསྐྱེད་སྤྱན་དྲངས་མཆོད། །དབང་བསྐུར་བྱིན་རླབས་བུམ་ནང་
ཐིམ། །གཟུངས་ཐག་བཏགས་ཏེ་རིག་སྔགས་བཟླས། །སྟེང་དང་འོག་གི་ལམ་གཉིས་ལས། །ཐུན་མོང་ཁྱད་པར་སྤྲོ་བསྡུ་བྱ། །ཁྲི་ཕྲག་བདུན་དུ་དངོས་གྲུབ་བླང་། །དབང་བསྐུར་མཆོད་བསྟོད་གཤེགས་སུ་གསོལ། །བསྐྱེད་བསྡུ་སྤྱོད་ལམ་རྣལ་འབྱོར་བྱ། །དེ་རྗེས་སྒྲུབ་པ་ཐོན་པ་དང་། །
ཞི་དང་བསྐྲད་དང་འཁྲུལ་འཁོར་དང་། །སྦྱོར་བ་བདུན་གསལ་ལས་ལ་སྦྱར། །སྒྲུབ་པའི་གོ་རིམས་སློབ་དཔོན་སུ་ཝཱ་གཱི་ཤྭ་ར་ཀཱིརྟིས་མཛད་པ་རྫོགས་སོ།། ༄༅༅། །རྒྱ་གར་སྐད་དུ། ཀ་ལ་ཤ་སཱ་དྷ་ནཾ་ནཱ་མ། བོད་སྐད་དུ། བུམ་པའི་སྒྲུབ་ཐབས་ཞེས་བྱ་བ། དཔལ་ཕྱག་

ན་རྡོ་རྗེ་ལ་ཕྱག་འཚལ་ལོ། །གདུག་པའི་དགྲར་གྱུར་མི་ཤིགས་འཛིན། །ཁྲོ་རྒྱལ་སྤྱི་བོས་རབ་བཏུད་ནས། །བདག་དང་གཞན་ལ་ཕན་བྱའི་ཕྱིར། །བུམ་པའི་སྒྲུབ་པ་བྲི་བར་བྱ། །མཎྜལ་སྔོན་པོའི་སྟེང་དག་ཏུ། །རྫས་རྣམས་མངོན་པར་འདུས་བྱས་ལ། །བདག་ཉིད་ཡི་དམ་ལྷར་བསྐྱེད་དེ། །བུམ་
པ་ཡེ་ཤེས་གཞལ་ཡས་སུ། །སྨན་ལྔ་འབྲུ་ལྔ་སྙིང་པོ་ལྔ། །རིན་ཆེན་ལྔ་དང་དྲི་ཆུ་ལྔ། །བདུད་རྩིའི་རྒྱ་མཚོར་བྱིན་བརླབས་ལ། །ཆོ་ག་བཞིན་དུ་ལྷར་བསྐྱེད་དེ། །དེ་ནས་སྒྲུབ་པོའི་གནས་མལ་བཅས། །གཞོན་ནུས་བཀལ་བའི་སྐུད་པ་ཡིས། །བདག་དང་ལྷ་རུ་འབྲེལ་བར་བྱ། །སྤྲོ་བ་གསུང་གི་
རང་བཞིན་ལ། །བསྡུ་བ་སྔགས་ཀྱི་ཡན་ལག་ཡིན། །སྐྱོ་བར་གྱུར་ན་གཟུངས་ཐག་གཟུང་། །སྟེང་དང་འོག་གི་ལམ་གཉིས་ལ། །བརྟེན་པས་མཚན་མ་འབྱུང་བར་འགྱུར། །མེད་ན་ལས་ཀྱི་སྦྱིན་སྲེག་བྱ། །དེ་ཡིས་འབྲས་བུ་འབྱིན་པར་བྱེད། །འདི་ནི་བུམ་པའི་སྒྲུབ་པ་སྟེ། །ལམ་བརྟེན་བཟླས་
པའི་སྒོར་འཇུག་ཡིན། །དབང་བསྐུར་བ་དང་ཁྲུས་ལ་སོགས། །གང་བྱས་དངོས་གྲུབ་འབྱུང་བར་བྱེད། །སྣོད་ལྡན་རྣམས་ཀྱིས་འདི་ཡི་དོན། །རྟོགས་ནས་ཐུན་མོང་མཆོག་ཐོབ་ཤོག །བུམ་པའི་སྒྲུབ་ཐབས་ཞེས་བྱ་བ། །སློབ་དཔོན་སུ་ཝཱ་གཱི་ཤྭ་ར་ཀཱིརྟིས་མཛད་པ་རྫོགས་སོ།། །།
༄༅༅། །རྒྱ་གར་སྐད་དུ། ཏཏ་ཏྭ་པྲ་དཱི་པ་ནཱ་མ། བོད་སྐད་དུ། དེ་ཁོ་ན་ཉིད་སྒྲོན་མ་ཞེས་བྱ་བ། དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །མཐུ་སྟོབས་ཀུན་གྱི་བདག་པོ་ནི། །རྡོ་རྗེ་འཛིན་ལ་ཕྱག་འཚལ་ནས། །བསྙེན་སྒྲུབ་ལས་སྦྱོར་ལ་སོགས་པའི། །རྟགས་ཀྱི་རིམ་པ་བྲི་བར་བྱ། །དེ་ལ་རྟགས་
ནི་བཞི་ཡིན་ཏེ། །ལྷ་གྲུབ་གདོན་རྣམས་ཐུབ་པ་དང་། །ནད་ཕྱིར་བྱུང་དང་མི་ལྡོག་པའོ། །ལྷ་ནི་ཉེ་བར་འགྲུབ་གྱུར་ན། །ཡང་དག་རྟགས་དང་བདུད་ཀྱི་རྟགས། །རྣམ་པ་གཉིས་སུ་ཤེས་པར་བྱ། །དང་པོ་རྣམ་པ་གསུམ་ཡིན་ཏེ། །མངོན་སུམ་རྨི་ལམ་ཉམས་མྱོང་ངོ་། །དབང་པོའི་
མངོན་སུམ་དག་ཏུ་ཡང་། །ལྷ་ཡི་སྐུ་མདོག་ཕྱག་མཚན་གཟུགས། །རྟེན་དང་ལུས་ལས་འོད་བྱུང་བ། །མིག་གིས་མཐོང་ངམ་ཉམས་སུ་འབྱུང་། །རྣ་བས་དག་པའི་གསང་སྔགས་ཐོས། །དེས་ནི་དངོས་གྲུབ་གཉིས་ཀ་འབྱུང་། །འབྲིང་ནི་རྨི་ལམ་གསལ་པོ་ལ། །དངོས་དང་ཕྱག་མཚན་

མཆོད་རྟེན་དང་། །མེ་ཏོག་སྔོ་དང་ཁྱེ་ཆུང་སྔོ། །བླ་མ་སངས་རྒྱས་མཐོང་བ་དང་། །རི་བོར་འཛེག་དང་ལྷ་ཡུལ་མཐོང་། །དངོས་གྲུབ་འགྲུབ་ཏུ་ཉེ་བ་སྟེ། །བསྙེན་པའི་རྟགས་སུ་ཤེས་པར་བྱ། །རང་གི་ཉམས་སུ་འབྱུང་བ་ནི། །ལུས་ལ་སྲོག་ཆགས་སྡར་པས་ནི། །ཕྱི་དང་ནང་དུ་ཉུང་བ་དང་། །རིག་པ་
ཤིན་ཏུ་བདེ་བ་དང་། །ཉོན་མོངས་རྣམ་རྟོག་ཤས་ཆུང་བའོ། །གོང་དུ་བསྟན་པ་དེ་རྣམས་ཀྱང་། །ཡ་ང་འཇིགས་དང་བཅས་པ་དང་། །ཁ་དོག་སྐྱ་ལ་མདངས་མེད་དང་། །འོད་ཀྱང་སྔོ་ཞིང་མི་རྟག་དང་། །ནམ་གུང་མན་ཆད་རྨི་ལམ་ན། །སད་ནས་འཇིགས་ཤིང་སྐྱི་གཡའ་བ། །བདུད་ཀྱི་རྟགས་
སུ་ཤེས་པར་བྱ། །འབྱུང་པོ་བསད་དང་ཡན་ལག་བཅད། །བརྡུང་བཏགས་སྐད་ངན་འདོན་པ་དང་། །ཕྱུགས་རྫི་བྱས་དང་མེར་བསྲེག་སོགས། །གདོན་རྣམས་ཐུབ་པའི་རྟགས་ཡིན་ནོ། །བཤང་གཅི་དོར་དང་བཤལ་བཏང་དང་། །སྲོག་ཆགས་ལུས་ལ་ཕྱིར་འཐོན་དང་། །སྔར་གྱི་
རྟོག་པ་སྤངས་པ་ནི། །ནད་རྣམས་ཕྱིར་ལ་ཐོན་པའི་རྟགས། །གཟུགས་བརྙན་བསྲེགས་པར་ཐལ་བར་འགྱུར། །དགྲ་བོ་ཡུལ་ནས་ཐོན་གྱི་རྨི། །འོག་ཏུ་བཅུག་པས་དངོས་པོ་བརླག །ཕྱིར་མི་ལྡོག་པའི་རྟགས་ཡིན་ཏེ། །དེ་རྣམས་ལས་བཟློག་ངན་པ་ཡི། །རྟགས་སུ་ངེས་པར་ཤེས་
པར་བྱ། །འདི་ལ་བརྟེན་ནས་འདིར་ཞུགས་རྣམས། །འདི་ཡི་དངོས་གྲུབ་ཐོབ་པར་ཤོག།། །།དེ་ཁོ་ན་ཉིད་སྒྲོན་མ་ཞེས་བྱ་བ། སློབ་དཔོན་སུ་བཱ་གཱི་ཤྭ་ར་ཀཱིརྟིས་མཛད་པ་རྫོགས་སོ།། ༄། །ཕྱག་ན་རྡོ་རྗེའི་སྤུར་བསད་ལས་ཚོགས་བསྡུས་པ་བཞུགས། བཅོམ་ལྡན་འདས་དཔལ་
ཕྱག་ན་རྡོ་རྗེ་ལ་ཕྱག་འཚལ་ལོ། །བསྙེན་སྒྲུབ་རྟགས་དང་ལྡན་གྱུར་ནས། །སྤུར་ཞིང་བསད་པའི་ལས་དག་བརྩམ། །དེ་ཡང་ལས་ཚོགས་བསྡུས་པ་ལས། །ཞི་བར་མ་གྱུར་གདོན་བགེགས་ལ། །སྨྱག་ཤད་བལ་པོ་སེའུ་ཡི། །སྔགས་བཟླས་ལྕུག་མས་བྱབས་སམ་བྲབས། །འཇིགས་
པ་བརྒྱད་ཀྱི་རྫས་ཀྱིས་གཟིར། །ཞེས་པ་ནི་སྤུར་བསད་ཀྱི་སྦྱོར་བའོ། །དེའང་སྤུར་པ་ནི་བསྐྲད་པའི་ལས་ཏེ། ཐོག་མར་རིག་པ་འཛིན་པ་ཉིད་ཀྱིས་ཞུགས་པ་བཞིའི་མཚན་ཉིད་བརྟགས་ལ། ནད་རྣམས་དབྱུང་ཞིང་གནོད་པ་གདོན་པར་བྱ་བའི་ཐབས་ནི། རྒྱལ་པོ་བྲམ་ཟེ་རྗེ་རིགས་ཀྱི། །

གཞོན་ནུ་གཙང་མ་ཤར་བལྟས་ཏེ། །དཀོན་མཆོག་གསུམ་དང་གོས་སྔོན་ལ། །ཕྱག་འཚལ་སེམས་བསྐྱེད་སྨྱག་ཤད་བླང་། །དག་བྱེད་སྔགས་བཟླས་ཆུས་བསངས་ལ། །ཡུངས་ཀར་རྨ་བྱ་ཚོན་སྐུད་བཅིངས། །བྱབ་པའི་རྫས་དེ་རྟག་ཏུ་བཅང་། །དེ་ནས་རིན་ཆེན་སྣོད་དག་
ཏུ། །གཙོ་བོ་ཀླུ་ཆེན་བརྒྱད་པོ་དང་། །རིགས་དྲུག་རིགས་བཞིའི་ས་བདག་གཉེན། །གཟུགས་བརྙན་བྱས་ཏེ་ཀླུ་སྨན་དང་། །དཀར་གསུམ་རིན་ཆེན་དར་ཟབ་བཅས། །ཤིང་སྣས་མཐའ་བསྐོར་ཚོན་ལྔས་བརྒྱན། །གཞན་ཡང་མཆོད་རྫས་ཐམས་ཅད་བསོགས། །རིག་པ་འཛིན་པས་སྒྲུབ་
ཐབས་ལྟར། །སྔོན་དུ་འགྲོ་བའི་ལས་རྫོགས་བྱ། །གཙོ་བོ་གདན་གྱི་ཀླུ་བརྒྱད་ལས། །པཾ་ལས་འདབ་བརྒྱད་ནཾ་གྱིས་མཚན། །དེ་གྱུར་སྦྲུལ་ལམ་ཀླུ་ཆེན་བརྒྱད། །བཙུན་མོ་སྲས་བཅས་བློན་པོ་དང་། །སྤྲུལ་པ་ཡང་སྤྲུལ་རྣམས་བསྐྱེད་ལ། །དེ་དང་འདྲ་བ་བཀུག་བསྟིམ་མཆོད། །དབང་བསྐུར་
གཏོར་མ་བྱིན་རླབས་སྦྱིན། །ཨོཾ་ནཱ་ག་རཱ་ཛ་བ་སུ་ཏ་ཀྵ་ཀ་ཀརྐོ་ཊ་པདྨ་མ་ཧཱ་པདྨ་ཤཾ་ཁ་པཱ་ལ་གྷེ་ལ་གྷེ་འུ་ཧུ་ལུ་ཧུ་ལུ་ཏ་གེ་ནི་བ་ལིཾ་ཨི་དཾ། གྲྀ་ཧྞ་གྲྀ་ཧྞ་ཁཱ་ཧི་ཁཱ་ཧི། གཏོར་མ་བྱིན་པས་གདུག་རྩུབ་ཞི། །དེ་ནས་བདག་ཉིད་ཁྲོ་བོར་བསྒོམ། །གཟུངས་སྔགས་བཟླས་ཤིང་ལྕུག་མས་བྱབ། །ནཱ་ག་རཱ་ཛ་བ་སུ་ཀི་
ཧྲྀ་ད་ཡ་དྷ་ར་ཡ་ཕུད་ཕུད། ཛ་ཡེ་ཕུཿབི་ཛ་ཡེ་ཕུཿ། ཛི་ཏི་ཛི་ཏི་ཕུཿ། ཛི་ཏི་ཨཾ་གེ་ཕུཿ། ས་མ་ཡ་ཕུཿ། ཤཾ་ཀཾ་རུ་ཏེ་ཕུཿ། ཨ་ལ་ཨུགྟེ་ཕུཿ། གྲ་ཧེ་ཀ་ར་ཕུཿ། ས་མ་ཡ་ཕུཿ། ནཱ་ག་སརྦ་ནི་ཕུཿ། ཧྲྀ་ད་ཡ་དྷ་ར་ཡ་ཕུད་ཕུད། ནད་པ་ལ་བྱབ་གཟུགས་ལ་དབབ། །དུག་ཕྱུང་ཁྲོ་བོའི་ཆེ་བརྗོད་ལ། །
ཟླ་དཀྱིལ་སྟེང་བཞག་ཡཾ་ལས་བསྐྱོད། །ནཱ་ག་སྥ་ར་ཎ་ཕཊ་ཅེས། །ཀླུ་བྲོ་བསྒགས་ཅིང་དམ་ཚིག་བསྒྲགས། །གཟུངས་བརྒྱ་བཟླས་ལ་ཕུར་ཞིང་བསྐྲད། །དེ་ལྟར་བརྒྱའམ་སྟོང་བྱས་ན། །ཀླུ་ཡི་ནད་ལས་གྲོལ་བར་འགྱུར། །གཟུགས་བརྙན་ས་འམ་ཆུ་བོར་དོར། །རྡོ་རྗེ་འཛིན་ལ་ཕྱག་འཚལ་ཏེ།
ཞི་དང་སྤུར་བས་མི་ཐུལ་ཞིང་། །རིག་སྔགས་འཆང་གི་བཀའ་འདས་ན། །དེ་ལ་འཇིགས་པའི་ལས་བརྒྱད་བརྩམ། །གྲོག་མཁར་བདུད་འཆང་ཚུབ་མ་ཡི། །ས་ལས་མཐིང་ནག་གྲུ་གསུམ་བརྩིག །ཟུར་གསུམ་ལྕགས་ཀྱུ་བརྩེགས་མས་མཚན། །དབུས་སུ་ལིང་ག་སྔོན་དམར་

གྱིས། །བཅིངས་ཏེ་བྱད་བཅུག་ཕུར་ལ་བཏོད། །མགྱོགས་ཕུར་རྩང་དང་ཕུར་པས་བསྐོར། །བྱེ་ཚན་གཟེ་མ་ཡུངས་ཀར་དང་། །ཚ་ལ་ཟངས་ལྕགས་དུར་བླུགས་བཅས། །དམར་གཏོར་དུག་གཏོར་དུག་ཐུན་བཤམ། །གྲུ་གསུམ་དུར་ཁྲོད་གཡམ་པས་བཅད། །དུར་ཁྲོད་རས་ལ་ནམ་མཁའ་ལྡིང་། །
གསེར་མདོག་ཞལ་གསུམ་ཕྱག་དྲུག་གིས། །བ་སུ་ཏ་ཡི་ཀླུ་རྣམས་འཛིན། །སྤྱན་མིག་ཉི་ཟེར་རྡོ་རྗེའི་མཆུ། །འཁོར་ལོའི་གཞུག་སྒྲོ་རལ་གྲིའི་གཤོག །ལུས་རྣམས་རྡོ་རྗེའི་སྤུ་ཡིས་གཏམས། །དེ་འདྲ་རྒྱལ་རིགས་ཁ་བསྟན་གཞག །ཁྲ་སྤྱང་ཉ་ཁྲ་གཅན་གཟན་གྱི། །མཆེ་སྡེར་ལ་
སོགས་ཁྱུ་རྣམས་བསོག །དྲག་པོའི་མཆོད་ཡོན་བཤམ་བྱས་ལ། །དེ་ནས་རིག་པ་འཛིན་པ་རྣམས། །ན་རའི་གོས་གྱོན་གོས་སྔོན་གྱི། །སོ་སོའི་བསམ་གཏན་ལ་ཞུགས་ནས། །བསྙེན་སྒྲུབ་སྤུར་དང་གསང་སྔགས་བཟླས། །ཞི་བས་དུག་ཕྱུང་གསད་པ་ཡི། །རྩེ་གཅིག་བསྒོམས་ཏེ་བརྩོན་
འགྲུས་ཀྱིས། །བར་ཆད་མེད་པར་ལས་ལ་སྦྱར། །ནག་པོའི་ཚེས་བརྒྱད་ནས་བརྩམས་ཏེ། །ཞི་བ་བྱམས་པ་སྙིང་རྗེ་བསྒོམ། །གཟུངས་ཀྱི་སྔགས་དང་ཤཱནྟིཾ་བཟླས། །ནད་དང་གདུག་རྩུབ་ཞི་བར་བསམ། །སྤུར་བ་གོང་དུ་བསྟན་པ་བཞིན། །གསང་བའི་སྦྱོར་བའི་དྲག་སྔགས་ནི། །རིག་
པ་འཛིན་པ་ཧཱུཾ་ཡིག་ལས། །གྱུར་ཏེ་ནག་པོ་ཆར་སྤྲིན་མདོག །སྨིན་མཚམས་དཔྲལ་བསྡུས་ཧ་ཧ་བཞད། །རྡོ་རྗེ་ཚར་གཅོད་སྡིགས་མཛུབ་བཅས། །དེ་འདྲར་བསྒོམས་ཏེ་ཡུངས་ཀར་ལ། །སྔགས་བཟླས་ཚངས་པའི་གནས་སུ་ཐབ། །ཤི་ས་དྲག་པོ་འདི་ཡིས་གདབ། །ཡཀྵ་ནཱི་ལཱམྦ་ར་དྷ་ར་བཛྲ་པཱ་ཎི་
ཧཱུཾ། མ་ཧཱ་ཡཀྵ་སེ་ནཱ་པ་ཏ་ཡེ་དེ་བ་ཀུ་རུ་ཤ་ན་དྷ་ར། །ཐོག་ཐོག་ཐོག་རིལ་ཐོག་ཐོག་དར་བྱམས་སད། །ཆེ་གེ་མོའི་ལུས་ལ་རུམ་རུམ། །སྙིང་ལ་ཤག་ཤག་མ་མ་ཤཱནྟི་རྦད་པུ་ནནྟིཏ་སྲི་རྦད་པུ་ནན། ནཱ་ག་ས་ཁྲག་པུ་མ་མཱ་ར་ཡ་ཕཊ། །ཡུངས་ཀར་ཡུངས་ནག་སྐེ་ཚེ་དང་། །ཚ་ལ་ཟངས་ལྕགས་
བྱེ་ཚན་ཆར། །གནམ་ལྕགས་དྲག་པོའི་སྔགས་དེས་བརྡེག །གཅན་གཟན་མཆེ་སྡེར་བྱ་ཁྲའི་མཆུ། །མཁའ་ལྡིང་རྒྱལ་པོའི་སྔགས་བཟླས་བྲབ། །ཀཱི་ལ་ཡ་དང་བཅས་པའི་སྔགས། །དུས་དྲུག་ཕུར་པས་གཟིར་བར་བྱ། །འོག་ནས་དྲག་པོའི་རྫས་ཀྱིས་བདུག །སྨྱག་ཤད་བལ་

པོ་སེའུ་ཡི། །ལྕུག་མས་བརྡེག་ཅིང་རིག་སྔགས་བཟླས། །གཡས་ནས་གསད་ཅིང་གཡོན་ནས་སྤུར། །མི་བཟད་རྫས་ཀྱིས་དེ་ལ་བྱུག །གག་པ་ལྷོག་པ་བྱུང་བ་བཞིན། །དྲག་པོའི་སྔགས་ཀྱིས་དེ་ལ་གདབ། །བདུན་ནམ་རྩ་གཅིག་བདུན་ཚོ་བདུན། །དེ་ལ་སོགས་ཏེ་བསྒྲུབས་གྱུར་
ན། །ནཱ་ག་རཱ་ཛ་ཀརྐོ་ཊ། །དེས་ཟིན་པ་ཡང་གྲོལ་འགྱུར་ངེས། །ཕྱག་ན་རྡོ་རྗེའི་ལས་བསྡུས་འདི། །པཎྜི་ཏ་རྣམས་ཀྱིས་མཛད་པས། །མི་མ་ཡིན་རྣམས་སྐྲག་ཅིང་བརྒྱལ། །དེས་ན་རྣམ་སྨིན་སྡིག་པའི་རྒྱུ། །དེ་ཕྱིར་ཤིན་ཏུ་གསང་བར་གསུངས། །དཔལ་ཕྱག་ན་རྡོ་རྗེའི་སྤུར་གསད་ལས་
ཚོགས་བསྡུས་པ་ཞེས་བྱ་བ། སློབ་དཔོན་སུ་པཱ་གཱི་ཤྭ་ར་ཀཱིརྟིས་མཛད་པ་རྫོགས་སོ།། །།ཨ་ཀྲ་མ། ཏདྱ་ཐཱ། ཨོཾ་བི་པུ་ལེ་པྲ་བ་ར་ནཱ་ག །མ་ཧཱ་ནཱ་ག་ཧྲྀ་ད་ཡ། ཨ་པ་ར་ཏེ། ཛྭ་ལ་ཛྭ་ལ། སརྦ་ནཱ་ཌཱི་ཏ་ཡ་ནི། ཀི་མཱི་ཀི་མཱི། ནཱ་ག་ཀུ་ལ་བིདྷྭཱཾ་ས་ནི། ཧ་ན་ཧ་ན། སརྦ་ནཱ་ག་དུཥྚ་ཌཱི་ཏ་ཡ་
ནི། ད་ཧ་ད་ཧ་སརྦ་དུཥྚཱཾ། ནཱ་ག་བྷ་བ་ན་ནི། པ་ཙ་པ་ཙ་ཡ་སརྦ་དུཥྚཱཾ། ནཱ་ག་ནཱཾ། ཨ་ཀྲ་མ་ས་མུ་དྲ་སཱ་ག་ར་ཙ་ལེ་མེ་ལེ། པཱི་ཀི་མཱ་མ་ཧཱ་ནཱ་ག་ཏེ་ཛ་པ་རེ་སྭཱ་ཧཱ། ཞེས་ནམ་མཁའ་ལྡིང་གི་རྒྱལ་པོའི་དྲག་སྔགས་ཀྱིས་གསད་པའོ། །ཨོཾ་ན་མོ་བུདྡྷཱ་ཡ། ནཱ་ག་དུ་ཙུནྡེ་མི་ལི་མི་ལི། བནྡྷ་བནྡྷ་ནཱ་ག་ནི་སྭཱ་ཧཱ་
ཞེས་ཕུར་པ་གདབ་པའི་སྔགས་སོ། །ཨོཾ་ཙ་ཏ་ཙ་ཏ། བི་ཙི་ཏི་བི་ཙི་ཏ། ཤ་ཏ་ཤ་ཏ། བི་ཤ་ད། ནཱ་ག་བི་ཤ་ད་སྭཱ་ཧཱ། ཀླུ་འབྲོས་པའི་སྔགས་ཨི་ཐི།། ༄། །ཕྱག་ན་རྡོ་རྗེ་མདོ་ལུགས་ཀྱི་མན་ངག་ལག་ཏུ་བླང་བའི་སྒྲུབ་ཐབས་བཞུགས། །བཅོམ་ལྡན་འདས་དཔལ་ཕྱག་ན་རྡོ་རྗེ་
ལ་ཕྱག་འཚལ་ལོ། །དེ་ཡོངས་སུ་བསྙེན་པར་འདོད་པའི་རིག་པ་འཛིན་པས་དབེན་ཞིང་ཉམས་དགའ་བའི་སར་ས་བསླང་བ་དང་། གནས་བརྩིག་པ་དང་། དགོས་པའི་ཡོ་བྱད་དང་། མཐུན་པའི་སྦྱོར་བ་དང་། མཆོད་པའི་རྫས་རྣམས་བསོགས་ལ་སྔོན་དུ་འགྲོ་བའི་ལས་བྱ་སྟེ། དང་
པོར་དཀོན་མཆོག་མཆོད། དེ་ནས་ཆོས་སྐྱོང་དང་རིགས་དྲུག་ལ་སྦྱིན། གཏོར་མ་རྒྱ་ཆེན་པོ་བཏང་། དེ་ནས་བསམ་གཏན་ཁང་པ་བྱི་དོར་བྱས་ཏེ། མེ་ཏོག་གཅལ་དུ་བཀྲམ་ལ་རྒྱན་རྣམས་ཀྱིས་བརྒྱན་ཏེ། དེའི་དབུས་སུ་མཎྜལ་སྔོན་པོ་གྲུ་བཞི་པ་ཅིག་གི་སྟེང་དུ། མཆོད་

རྟེན་སྔོན་པོ་སྐུ་གདུང་དང་ལྡན་པའི་དྲུང་དུ་མེ་ཏོག་སྔོན་པོ་ལ་སོགས་ཏེ། མཆོད་པ་རྣམ་པ་ལྔ་དང་། གཏའ་གཏོར་དང་། བུམ་པ་བཅའ་ཐབས་རྫོགས་པར་བྱས་ལ་དང་པོར་ཁྲུས་བྱ་སྟེ། དེ་ནས་རིག་པ་འཛིན་པ་ཉིད་སྟན་བདེ་བ་ལ་འདུག་སྟེ། དང་པོར་བྱང་ཆུབ་མཆོག་ཏུ་སེམས་བསྐྱེད་ལ།
དེ་ནས་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་སྔོན་པོ་བསམས་ཏེ་སྔགས་འདི་བརྗོད་པར་བྱའོ། །ཨོཾ་སརྦ་དྷརྨ་ཏཱ་བཛྲ་སིདྡྷི་ཧཱུཾ་ཞེས་པས་སྣོད་བཅུད་དང་རྫས་ཐམས་ཅད་དག་པ་ཆེན་པོར་བསམ་མོ། །ཧཱུཾ་དེ་ཉིད་ལས་སྐད་ཅིག་ཏུ་ལྷའི་ང་རྒྱལ་དུ་གནས་པའི་ཧཱུཾ་ལས་འོད་ཟེར་ཕྱོགས་བཅུར་
འཕྲོས་པས། བླ་མ་དང་། ལྷག་པའི་ལྷ་དང་། དཀོན་མཆོག་སྤྱན་དྲངས་ཏེ། ཨེ་ཧྱེ་ཧི་བྷ་ག་བཱན་སརྦ་ཏ་ཐཱ་ག་ཏ་བུདྡྷ་དྷརྨ་སཾ་གྷ་བཛྲ་པཱ་ཎི། མ་ཧཱ་གུ་རུ། བཛྲ་ས་མ་ཡ་ཧཱུཾ་ཧཱུཾ་ཛཿཞེས་བརྗོད་པས་ནམ་མཁའི་མཐའ་དང་མཉམ་པ་མདུན་དུ་བྱོན་པར་བསམ་མོ། །པདྨ་ཀཱ་མ་ལ་ཡ་སྟྭཾ་
ཞེས་གདན་དབུལ་ལོ། །ཕྱག་བཙལ་བ་དང་། མཆོད་པ་འབུལ་བ་དང་། སྡིག་པ་བཤགས་པ་དང་། རྗེས་སུ་ཡི་རང་བ་དང་། ཆོས་ཀྱི་འཁོར་ལོ་བསྐོར་བ་དང་། གསོལ་བ་གདབ་ཅིང་སྐྱབས་སུ་འགྲོ་བ་དང་། ལུས་དབུལ་ཞིང་དགེ་བའི་རྩ་བ་བསྔོ་བའོ། །དེ་ནས་ཡི་གེ་བརྒྱ་པས་
ཚོགས་སོགས་ལྷ་རྣམས་གཤེགས་སུ་གསོལ། ཨོཾ་ཨཱཿབིགྷྣཱནྟ་ཀྲྀཏ་ཧཱུཾ་ཞེས་པས་བདག་ཉིད་བགེགས་དགྲའི་ཏིང་ངེ་འཛིན་གྱིས་ཡུངས་ཀར་ལ་སྔགས་བཟླས་ཏེ། ཁྲོ་བོའི་སྤྲུལ་པར་སྤྲོ་སྟེ། ཨོཾ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ། སརྦ་བིགྷྣཱནྟ་ཀྲྀཏ་ཧཱུཾ་ཕཊ་ཅེས་ཕྱོགས་བཞི་མཚམས་
བརྒྱད་སྟེང་འོག་བཅུར་སྔགས་བདུན་བདུན་དང་བཅས་ཏེ་མཚམས་གཅད་པར་བྱའོ། །ན་མོ་རཏྣ་ཏྲ་ཡཱ་ཡ། ན་མཿཙཎྜ་བཛྲ་པཱ་ཎ་ཡེ། མ་ཧཱ་ཡཀྵ་སེ་ནཱ་པ་ཏ་ཡེ། ན་མོ་བཛྲ་ཀྲོ་དྷཱ་ཡ། མ་ཧཱ་དཾཥྚཱོཏྐ་ཊ་བྷཻ་ར་བཱ་ཡ། ཨ་སི་མུ་ས་ལ་དྷ་རཱ་ཡ། པ་ར་ཤུ་པཱ་ཤ་ཧསྟཱ་ཡ། ཏདྱ་ཐཱ། ཨོཾ་ཨ་མྲྀ་ཏ་
ཀུཎྜ་ལི་ཁ་ཁ། ཁཱ་ཧི་ཁཱ་ཧི། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། གྲྀ་ཧྞ་གྲྀ་ཧྞ། གརྫ་གརྫ། བི་སྥོ་ཊ་ཡ་བི་སྥོ་ཊ་ཡ། སརྦ་བིགྷྣཱཾ་བི་ནཱ་ཡ་ཀཱཾ། མ་ཧཱ་ག་ན་པ་ཏི། ཛཱི་བི་ཏཱནྟ་ཀ་རཱ་ཡེ་སྭཱ་ཧཱ་ཞེས་མཚོན་ཆའི་ཆར་ཕབ་ལ་བཏུལ་ཞིང་སྦྱང་བར་བྱའོ། །དེ་ནས་ཁམས་གསུམ་གྱི་

སེམས་ཅན་ཐམས་ཅད་སྡུག་བསྔལ་དང་དབྲལ་བར་བྱའོ་སྙམ་པ་ནི་སྙིང་རྗེ་ཚད་མེད་པའོ། །བདེ་བ་ལ་དགོད་པར་བྱའོ་སྙམ་པ་ནི་བྱམས་པ་ཚད་མེད་པའོ། །བདེ་བ་དང་ནམ་དུའང་མི་འབྲལ་བར་བྱའོ་སྙམ་པ་ནི་དགའ་བ་ཚད་མེད་པའོ། །དེའང་སེམས་ཅན་ཐམས་ཅད་དང་ཐུན་མོང་དུ་བྱེད་
པ་ནི་བཏང་སྙོམས་ཚད་མེད་པའོ། །ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་པ་སྟོང་པ་ཉིད་དུ་བསམས་ལ། དེའི་ངང་ལས་ཨེ་ལས་ཆོས་འབྱུང་གྲུ་གསུམ་པའི་དབུས་སུ་ཡཾ་ལས་རླུང་གི་དཀྱིལ་འཁོར། བཾ་ལས་ཆུའི་དཀྱིལ་འཁོར། ཁཾ་ལས་གསེར་གྱི་ས་གཞི། རཾ་ལས་མེ་རི་ལྔའི་
དབུས་སུ། ལཾ་ལས་རི་རབ་ཀྱི་སྟེང་དུ། སཾ་ཡོངས་སུ་གྱུར་པ་ལས་སྣ་ཚོགས་རྡོ་རྗེ། དེ་ཡོངས་སུ་གྱུར་པ་ལས་རྡོ་རྗེའི་གུར་དང་། ར་བ་དང་མཚོན་ཆའི་འཁོར་ལོ་རྫོགས་པར་བསྒོམས་པའི་དབུས་སུ། བྷྲཱུཾ་སྔོན་པོ་འཕྲོ་འདུས་པ་ལས་གཞལ་ཡས་ཁང་སྔོན་པོ་གྲུ་བཞི་སྒོ་བཞི། སྒོ་ཁྱུད་དང་ལྡན་
པར་བསྒོམ་པར་བྱའོ། །ཙ་སེར་པོ་ལས་འཁོར་ལོ་སྔོན་པོ་རྩིབས་བཞིའི་དབུས་སུ་པཾ་ལས་པདྨ། རཾ་ལས་ཉི་མ། ཨ་ལས་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་མཐིང་ནག་བསམས་ཏེ། འོད་འཕྲོས་པ་ལས་འཕགས་པ་མཆོད། སེམས་ཅན་གྱི་དོན་བྱས་ནས་སྣང་བ་ཐམས་ཅད་རང་གི་ལྷག་པའི་
ལྷར་གྱུར་ཏེ། དེ་དག་ཡོངས་སུ་གྱུར་པ་ལས་ཁྲོ་བོའི་རྡོ་རྗེ་རྩེ་ལྔ་པ་ཁ་དོག་སྔོན་པོ་འོད་ཟེར་གྱི་ཕྲེང་བ་རྣམ་པར་འཁྲུགས་པ་ལྟེ་བ་ཧཱུཾ་གིས་མཚན་པར་བསམ་མོ། །དེའི་འོད་ཟེར་གྱིས་ཁྲོ་བོའི་རིགས་རྣམས་བཀུག་ནས་དེ་དག་ཡོངས་སུ་གྱུར་པ་ལས། གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་གོས་སྔོན་པོ་
ཅན་སངས་རྒྱས་གང་གཱའི་ཀླུང་ཕྲག་འབུམ་བྱེ་མ་སྙེད་ཀྱིས་རྗེས་སུ་གནང་བ། མཆེ་བ་གཙིགས་པ་དང་འཚམ་པའམ། སྐུ་མདོག་སྔོན་པོ་གཡས་རྡོ་རྗེ། གཡོན་སྡིགས་མཛུབ་ཀླུ་ཆེན་པོ་བརྒྱད་ཀྱིས་གཟུངས་ནས་འབྱུང་བ་ལྟར་བརྒྱན་པ། སྟག་གི་ཤམ་ཐབས་དང་། ན་བཟའ་ཆོས་གོས་སྔོན་པོ་
དང་། སེང་གེའི་སྟོད་གཡོགས་དང་། གདན་དབང་པོ་དང་། ཉི་མ་དང་པདྨའི་སྟེང་ན་ཀླུ་ཆེན་པོ་བརྒྱད་ནམ་མཁའ་ལྡིང་གི་རྒྱལ་པོ་དང་བཅས་པར་ཡང་དག་པར་བསྐྱེད་དེ། དེ་ཉིད་ཀྱི་སྙིང་གར་ཡེ་ཤེས་སེམས་དཔའི་འཁོར་ལོ་གོས་སྔོན་པོ་ཅན་རྣམས་བསྒོམ་པར་བྱའོ། །དབང་པོ་དྲུག་ལའང་དེ་

དང་འདྲ་བའི་གོས་སྔོན་པོ་ཅན་རེ་བསམ་པར་བྱའོ། །དེ་ནས་ཡེ་ཤེས་ཀྱི་འཁོར་ལོའི་ཧཱུཾ་ལས་ཧཱུཾ་རེ་འཁོར་ལོའི་སྟེང་དུ་གནས་པ་ལས་ཕྱག་མཚན་ཏྲི་ཤཱུ་ལ་དང་། རལ་གྲི་དང་། དབྱུག་ཐོ་དང་། འཁོར་ལོ་ཧཱུཾ་གིས་མཚན་པར་གྱུར་ཏེ། དེ་དག་ཡོངས་སུ་གྱུར་པ་ལས་ཤར་གྱི་འཁོར་ལོའི་སྟེང་དུ་ལས་ཀྱི་གནོད་
སྦྱིན་ལག་ན་རྡོ་རྗེ་གཡས་རྡོ་རྗེ། གཡོན་ཏྲི་ཤཱུ་ལ་རྩེ་གསུམ་འཕན་ཅན་འཕྱར་བ། ན་བཟའ་མི་བཟད་སྔོ་བཀྲ་གསོལ་བ། གདན་ཀླུ་རྒྱལ་རིགས་མནན་པའོ། །ལྷོར་རྡོ་རྗེ་སྲིན་པོ་གཡས་རྡོ་རྗེ་གཡོན་རལ་གྲི། ན་བཟའ་པདྨ་རཱ་ག །གདན་བྲམ་ཟེའི་རིགས་ཅན་མནན་པའོ། །ནུབ་ཏུ་རྡོ་རྗེ་གདོན་
ཆེན་གཡས་རྡོ་རྗེ་གཡོན་དབྱུག་ཏོ། །གདན་རྗེ་རིགས་མནན་པ། ན་བཟའ་ཟ་ཧོར་བཙོ་དམར་གསོལ་བའོ། །བྱང་གི་འཁོར་ལོའི་སྟེང་དུ་རྡོ་རྗེ་རོ་ལངས་གཡས་རྡོ་རྗེ། གཡོན་འཁོར་ལོ། ན་བཟའ་བ་ཏི་ཁྲ་བོ་གདན་ཀླུ་དམངས་རིགས་མནན་པའོ། །སྡེ་དཔོན་དེ་དག་ཀྱང་སྐུ་མདོག་གཙོ་
བོ་དང་མཐུན་པ། ཀླུ་རྣམས་ཀྱིས་རྒྱན་མཛད་པ། བསྐལ་པའི་མེ་རབ་ཏུ་འབར་བའི་དབུས་ན་བསྒོམ་མོ། །ཛཿཧཱུཾ་བཾ་ཧོཿབཞི་ལས་སྒོ་བཞིར་ལྕགས་ཀྱུ་མ་དང་། ཞགས་པ་མ་དང་། ལྕགས་སྒྲོག་མ་དང་། དྲིལ་བུ་མ་དང་། ཁྲོ་མོ་དེ་དག་ཀྱང་སྟག་གི་ཤམ་ཐབས་དང་། སྦྲུལ་གྱི་
རྒྱན་ཆ་དང་། ཉི་ཟླའི་གདན་དང་བཅས་པའོ། །དེ་ནས་རྡོ་རྗེ་གོ་ཆའི་ཕྱག་རྒྱས་གནས་ལྔར་གཏུགས་ཏེ། ན་མཿས་མནྟ་བཛྲཱ་ཎཱཾ་ཀ་བ་ཙ་ཧཱུཾ་ཞེས་བརྗོད་པས་ལུས་ཐམས་ཅད་རྡོ་རྗེ་ར་བར་བསྒོམ་མོ། །དེ་ནས་རྡོ་རྗེ་རྩེ་ལྔའི་ཕྱག་རྒྱ་བཅས་ཏེ། ན་མཿས་མནྟ་བཛྲཱ་ཎཱཾ་བཛྲ་ཙཎྜ་མ་ཧཱ་རོ་ཥ་ཎ་ཧཱུཾ་ཞེས་བརྗོད་
ནས་གནས་ལྔར་རྒྱས་བཏབ་པས་ལུས་ཐམས་ཅད་རྡོ་རྗེའི་དྲ་མིག་རྣམས་ཁྲོ་ཆུང་ཚོན་གང་བས་གཏམས་པར་བསམས་ཏེ་བྱིན་གྱིས་བརླབ་པོ། །དེ་ནས་དེ་ལྟར་དམ་ཚིག་གི་དཀྱིལ་འཁོར་བསྐྱེད་ནས། རང་བཞིན་གྱི་དཀྱིལ་འཁོར་སྤྱན་དྲངས་པ་ནི། འོག་མིན་གནས་མཆོག་དམ་པ་ཡི། །
ལྕང་ལོ་ཅན་གྱི་ཕོ་བྲང་ནས། །སངས་རྒྱས་ཀུན་གྱིས་རྗེས་གནང་བའི། །གསང་བའི་བདག་པོ་གོས་སྔོན་ཅན། །མཎྜལ་སྔོན་པོའི་གཞལ་ཡས་འདིར། །འཁོར་བཅས་མ་ལུས་སྤྱན་འདྲེན་གྱིས། །པདྨའི་གདན་ལ་བཞུགས་སུ་གསོལ། །ཕྱག་ན་རྡོ་རྗེ་དབང་གི་མཐུ། །གནོད་སྦྱིན་རྒྱལ་པོ་

གོས་སྔོན་ཅན། །རི་རབ་ཆེན་པོའི་ལྕོག་བཞི་ཡི། །ལྕགས་རི་ནག་པོའི་གཞལ་ཡས་ནས། །སྤྱན་འདྲེན་མཆོད་ཀྱིས་གཤེགས་སུ་གསོལ། །ཡཀྵ་ནཱི་ལཱཾ་བ་ར་དྷ་ར་བཛྲ་པཱ་ཎི་ཧཱུཾ། མ་ཧཱ་ཡཀྵ་སེ་ན་པ་ཏ་ཡེ། བཛྲ་དྷ་ར། བཛྲ་ཁཌྒ་དྷ་ར། བཛྲ་ནཱི་ལ་དྷ་ར། བཛྲ་ཙཀྲ་དྷ་ར། ས་
མ་ཨ་མཎྜ་ལ་མ་དྷྱེ། ཨཱ་གཙྪ་ཡ་ཨཱ་གཙྪ་ཡ། པྲ་བེ་ཤ་ཡ་པྲ་ཝེ་ཤ་ཡ། ཏིཥྛ་ཡ་ཏིཥྛ་ཡ། ཨ་བ་ལོ་ཀཱ་ཡ། ཨ་བ་ལོ་ཀཱ་ཡ་ཧཱུཾ་ཕཊ་སྭཱ་ཧཱ། བཞུགས་སུ་གསོལ་བ་ནི། གདུག་པ་འདུལ་བའི་གཉེན་པོ་ནི། །ཕྱག་ན་རྡོ་རྗེ་གོས་སྔོན་ཅན། །མཆོད་རྟེན་སྔོན་པོའི་གཞལ་ཡས་འདིར། །
དགྱེས་ཤིང་བརྟན་པར་བཞུགས་སུ་གསོལ། །ཕྱག་ན་རྡོ་རྗེ་གོས་སྔོན་གྱིས། །ལས་ཀྱི་ཁྲོ་བོར་དབང་བསྐུར་བའི། །གནོད་སྦྱིན་སྡེ་དཔོན་འཁོར་དང་བཅས། །ཕྱག་དང་ཞབས་གཉིས་བསིལ་ནས་ཀྱང་། །འཚམ་པའི་གདན་ལ་གཞུགས་སུ་གསོལ། །ཡཀྵ་ནཱི་ལཱཾ་བ་ར་དྷ་ར་བཛྲ་པཱ་
ཎི་ཧཱུཾ་མ་ཧཱ་ཡཀྵ་སེ་ན་པ་ཏ་ཡེ། བཛྲ་ས་མ་ཡ་ཏིཥྛ་ལྷན། སངས་རྒྱས་མང་པོས་དབང་བསྐུར་བའི། །གནོད་སྦྱིན་ཀུན་པས་ཁྱད་པར་འཕགས། །མཐུ་སྟོབས་ཀུན་གྱི་བདག་པོ་སྟེ། །སྟོབས་ཆེན་ཁྱོད་ལ་ཕྱག་འཚལ་ལོ། །ལས་ཀྱི་གནོད་སྦྱིན་ཆེན་པོ་རྣམས། །འཇིགས་སུ་རུང་བའི་
ཆ་ལུགས་ཅན། །ཐམས་ཅད་མ་ལུས་འཇིགས་པར་བྱེད། །རིགས་བཞི་ཀླུ་ཡི་གཉེན་པོ་སྟེ། །འཇིགས་བྱེད་ཁྱོད་ལ་ཕྱག་འཚལ་ལོ། །དེ་ནས་མཆོད་པ་འབུལ་བ་ནི། །ཤེལ་ལྟར་དག་པའི་སྣོད་མཆོག་ཏུ། །བཀྲ་ཤིས་འོ་མའི་ཆབ་ཀྱིས་གཏམས། །བཅོམ་ལྡན་ཕྱག་ན་རྡོ་རྗེ་ཡི། །
དཀྱིལ་འཁོར་ལྷ་ཚོགས་རྣམས་ལ་འབུལ། །ཡཀྵ་ནཱི་ལཱཾ་བ་ར་དྷ་ར་བཛྲ་པཱ་ཎི་ཧཱུཾ། མ་ཧཱ་ཡཀྵ་སེ་ན་པ་ཏ་ཡེ། བཛྲ་པ་ཎི་ཙཎྜ་མ་ཧཱ་ཡཀྵ་ཀྲོ་དྷ། རོ་ཥ་ཎཱ་ཡ། བཛྲ་དྷ་ར། བཛྲ་ཁཌྒ་དྷ་ར། བཛྲ་ནཱི་ལ་དྷ་ར། བཛྲ་ཙཀྲ་དྷ་ར། བཛྲ་ཡཀྵ་རཀྵ་ཧེ། ཨཱ་ཧ་ར་པཱུ་ཛ་མེ་གྷ་ས་མུ་དྲ་སྥ་ར་ཎ་
ས་མ་ཡེ་སྭཱ་ཧཱ། མེ་ཏོག་དམ་པ་འདི་དག་དང་། །དེ་བཞིན་ལྷ་རྫས་མེ་ཏོག་རྣམས། །བཅོམ་ལྡན་ཕྱག་ན་རྡོ་རྗེ་ཡི། །དཀྱིལ་འཁོར་ལྷ་ཚོགས་རྣམས་ལ་འབུལ། །བཛྲ་པུཥྤེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་སྭཱ་ཧཱ། ཨ་ཀ་རུ་དང་ཏུ་རུཥྐ། །ལྷན་ཅིག་སྐྱེས་དང་སྦྱར་བའི་དྲི། །ལྷ་

རྫས་དམ་པའི་བདུག་སྤོས་འདི། །གསང་བདག་འཕགས་པ་གོས་སྔོན་གྱི། །དཀྱིལ་འཁོར་ལྷ་ཚོགས་རྣམས་ལ་འབུལ། །བཛྲ་དྷཱུ་པེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་སྭཱ་ཧཱ། ཙནྡན་ག་པུར་ཛཱ་ཏི་དང་། །གུར་གུམ་ཆུ་གཙང་སྨན་སྦྱར་འདི། །བཅོམ་ལྡན་ཕྱག་ན་རྡོ་རྗེ་ཡི། །དཀྱིལ་འཁོར་
ལྷ་ཚོགས་རྣམས་ལ་འབུལ། །བཛྲ་གནྡྷེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་སྭཱ་ཧཱ། མུན་པའི་ཚོགས་ནི་འཇོམས་བྱེད་ཅིང་། །ཕྱོགས་བཅུ་གསལ་བའི་མར་མེ་འདི། །བཅོམ་ལྡན་ཕྱག་ན་རྡོ་རྗེ་ཡི། །དཀྱིལ་འཁོར་ལྷ་ཚོགས་རྣམས་ལ་འབུལ། །བཛྲ་ཨཱ་ལོ་ཀེ་དཱི་བཾ་པཱུ་ཛ་མེ་གྷ་ས་མུ་དྲ་སྥ་ར་
ཎ་ས་མ་ཡེ་སྭཱ་ཧཱ། ཁ་དོག་དྲི་དང་རོ་ལྡན་པའི། །ལྷ་རྫས་དམ་པའི་ཞལ་ཟས་འདི། །བཅོམ་ལྡན་ཕྱག་ན་རྡོ་རྗེ་ཡི། །དཀྱིལ་འཁོར་ལྷ་ཚོགས་རྣམས་ལ་འབུལ། །བཛྲ་ནཻ་བི་དྱེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་སྭཱ་ཧཱ། བླ་མེད་རྡོ་རྗེ་ཐེག་པའི་དོན་སྟོན་པའི། །ཤེས་རབ་མཆོག་གི་རྗེས་
འགྲོ་རོལ་མོའི་སྒྲ། །བཅོམ་ལྡན་ཕྱག་ན་རྡོ་རྗེ་ཡི། །དཀྱིལ་འཁོར་ལྷ་ཚོགས་རྣམས་ལ་འབུལ། །བདུད་ཀྱི་འཁོར་ལོ་གཞོམ་ཕྱིར་བཞེས་སུ་གསོལ། །བཛྲ་གཱི་ཏི་ག་ཏ་ག་ཏ་ཧཱུཾ། སྥ་ར་ཎ་ས་མ་ཡེ་སྭཱ་ཧཱ། བླ་རེ་རྒྱལ་མཚན་བ་དན་གདུགས། །དཔུང་རྒྱན་དོ་ཤལ་སེ་མོ་དོ། །ན་བཟའ་ཆོས་གོས་
སྔོན་པོར་བཅས། །དཀྱིལ་འཁོར་ལྷ་ཚོགས་རྣམས་ལ་འབུལ། །ཨོཾ་ཝསྟྲ་ཨ་ལཾ་ཀ་ར་བི་བྷཱུ་ཥ་ཎ་པཱུ་ཛ་སྥ་ར་ཎ་ས་མ་ཡ་ཧཱུཾ་སྭཱ་ཧཱ། དེ་ནས་བཅོམ་ལྡན་འདས་ལ་ཁྲོ་བོའི་མཚན་བརྒྱ་རྩ་བརྒྱད་པས་བསྟོད་ལ། །བཅོམ་ལྡན་ཕྱག་ན་རྡོ་རྗེ་ཡིས། །ལས་ཀྱི་ཁྲོ་བོར་དབང་བསྐུར་བའི། །སྐུ་
གསུང་ཐུགས་དང་ཕྲིན་ལས་ལས། །གནོད་སྦྱིན་སྡེ་དཔོན་བཞི་སྤྲུལ་པ། །རི་རབ་ཆེན་པོའི་ལྕོག་ལ་གནས། །ཀུན་ཀྱང་སྐུ་མདོག་མཐིང་ནག་ལ། །གཡས་པ་རྡོ་རྗེ་རྩེ་ལྔ་བསྣམས། །གཡོན་པ་སོ་སོའི་ཕྱག་མཚན་འཛིན། །ན་བཟའ་ལ་བ་སྔོན་པོ་གསོལ། །མི་བཟང་སྔོ་བཀྲ་སྟག་ཤམ་
ཅན། །ཀླུ་ཆེན་བརྒྱད་ཀྱིས་སྐུ་ལ་བརྒྱན། །དུས་མཐའི་མེ་དཔུང་འབར་བ་ཡི། །དཀྱིལ་ནས་འོད་ཟེར་མཚོན་ཆ་འཕྱར། །ཀླུ་རིགས་བཞི་ལ་འབེབས་མཛད་པ། །སྡེ་དཔོན་རྣམས་ལ་ཕྱག་འཚལ་ལོ། །དེ་ནས་ཡན་ལག་བདུན་པས་སྡིག་པ་བཤགས་ལ། འདོད་པའི་དོན་ལ་གསོལ་བ་གདབ་

ཅིང་ཕྲིན་ལས་བཅོལ་ཏེ། ཛཿཧཱུཾ་བཾ་ཧོཿཞེས་ཡེ་ཤེས་ཀྱི་འཁོར་ལོའི་ལྷ་རྣམས་བསྟིམ་པར་བྱའོ། །ཨོཾ་ཨཱཿཧཱུཾ་ཞེས་སྤྱི་བོ་དང་། མགྲིན་པ་དང་སྙིང་གར་དཀར་པོ་དང་དམར་པོ་དང་། མཐིང་ག་དང་། སྐུ་གསུང་ཐུགས་ཀྱི་འཁོར་ལོ་ལ་ཡི་གེ་བཅུ་གསུམ་པ་བཀོད་དེ། རྒྱས་གདབ་
པར་བྱའོ། །དེ་ཉིད་ལས་སྤྲོ་བསྡུའི་རིམ་པ་ནི། ཨོཾ་སརྦ་ཏ་ཐཱ་ག་ཏ་ཀཱ་ཡ་བཱཀ་ཙིཏྟ་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་ཕྱོགས་བཅུའི་འཇིག་རྟེན་གྱི་ཁམས་ན་སངས་རྒྱས་ཀྱི་ཞིང་ཁམས་བྱེ་བ་ཕྲག་བརྗོད་ཀྱིས་མི་ལང་བར་འདོད་ཡོན་གྱི་ལྷ་མོ་རྣམས་ཀྱིས་འཕགས་པ་རྣམས་ལ་ཡང་དག་པར་མཆོད་
ཅིང་གཉིས་སུ་མེད་པར་ཐིམ་ནས་དེ་དག་གི་གསུང་རྣམ་པར་དག་པ་དང་། སངས་རྒྱས་ཀྱི་ཆེ་བའི་ཡོན་ཏན་རྣམས་ཀྱི་འོད་ཟེར་བདག་ཉིད་ལ་ཐིམ་པས་སྒྲིབ་པ་སྦྱངས་ཏེ། ཐུགས་ཀའི་འོད་ཟེར་འགྲོ་དྲུག་ལ་ཕོག་པས་རང་གི་ལྷག་པའི་ལྷར་གྱུར་ནས། སེམས་ཅན་གྱི་དོན་བྱས་ཏེ། སླར་བདག་ཉིད་
ལ་བསྟིམ་པ་དང་། སྤྲོ་བསྡུའི་རིམ་པ་ཡང་ནས་ཡང་དུ་བྱའོ། །དེ་ནས་དབང་བསྐུར་བར་བྱ་སྟེ། རིགས་ཀྱི་བདག་པོ་མི་བསྐྱོད་པ་དང་། སངས་རྒྱས་གང་གཱའི་ཀླུང་གི་བྱེ་མ་སྙེད་དང་། དེའི་སྲས་ཁྲོ་བོ་རྣམས་སྤྱན་དྲངས་པ་དང་། མཆོད་ཅིང་སྡིག་པ་བཤགས་པ། འདོད་པའི་དོན་ལ་
གསོལ་བ་གདབ་པ་ནི། བཅོམ་ལྡན་འདས་ཀྱིས་གསུངས་པའི་གཟུངས་ལས་ཇི་ལྟར་འབྱུང་བ་ལྟར་སངས་རྒྱས་ཐམས་ཅད་ཀྱི་ཐུགས་མི་བསྐྱོད་པ། རིགས་བཞིའི་འཁོར་དང་སངས་རྒྱས་གང་གཱའི་ཀླུང་གི་བྱེ་མ་སྙེད་དང་། རིགས་ཀྱི་ཡུམ་རྣམས་ཀྱིས་བུམ་པས་དབང་བསྐུར་ཞིང་། རྡོ་རྗེ་སེམས་
དཔའི་སྔགས་ཡི་གེ་བརྒྱ་པས་སྐུ་ཁྲུས་གསོལ་བ་ནི། ལྷའི་རྗེས་སུ་གནང་བ་སྟེ། སྐུ་རྡོ་རྗེར་བྱིན་གྱིས་བརླབ་པའོ། །མདོ་ནས་ཇི་ལྟར་འབྱུང་བ་ལྟར་སྔགས་ཀྱི་གནང་བ་ཐོབ་པ་ནི་གསུང་རྡོ་རྗེར་བྱིན་གྱིས་བརླབ་པའོ། །ཨོཾ་ཤྲཱི་བཛྲ་པཱ་ཎི་ཧཱུཾ། མ་ཧཱ་ཙཎྜ་སརྦ་དུཥྚཱན་སརྦ་བུདྡྷ་ས་པ་རི་ཝཱ་ར་བཛྲ་ས་མ་ཡ་ཛཿཧཱུཾ་བཾ་ཧོཿ
ཞེས་དགུག་པ་དང་གཞུག་པ་དང་། བཅིང་བ་དང་། དབང་དུ་བྱ་བ་དང་། ཐ་མི་དད་པར་བྱས་ཏེ། སྐུ་གསུང་ཐུགས་རྡོ་རྗེའི་བདག་ཉིད་ཁམས་གསུམ་ཆོས་ཀྱི་རྒྱལ་པོ་ཐུགས་གསང་བའི་བདག་པོ་རྡོ་རྗེ་འཛིན་པར་གྱུར་ཏེ། ཇི་ལྟར་སྐྱོ་བར་མ་གྱུར་གྱི་བར་དུ་བསྒོམ་པར་བྱའོ། །སྐྱོ་བར་གྱུར་ན་

བཅོམ་ལྡན་འདས་ཀྱིས་གསུངས་པའི་གཟུངས་ཀྱི་ཕྲེང་བ་ཁོ་ན་ལ་སྦྲུལ་འཁྲིལ་བ་ལྟར་བཟླས་ཤིང་རྡོ་རྗེ་གསུམ་གྱི་དགོངས་པས་བདག་ཉིད་ཀྱི་ལུས་ཀྱི་ནད་དང་། སྡིག་སྒྲིབ་དང་། ཀླུའི་དུག་དང་གདུག་རྩུབ་རྣམས་ཞི་བར་བསྒོམ་མོ། ཐུན་མཚམས་སུ་བཟླས་པ་གཏོང་བར་འདོད་པ་དང་། ཡེ་ཤེས་
སེམས་དཔའ་མཆོད་རྟེན་སྔོན་པོར་བཞུགས་སུ་གསོལ་ཏེ། མེ་ཏོག་ལ་སོགས་པས་ཀྱང་མཆོད་ཅིང་བསྟོད་ལ་གཏོར་མ་བཏང་བའི་ལས་བྱའོ། །ཐ་མའི་ཐུན་ལ། གང་ཡང་བདག་བློ་གཏི་མུག་པས། །ཞེས་བཟོད་པར་གསོལ་ལ། ཁྱེད་ཀྱིས་སེམས་ཅན་དོན་ཀུན་མཛད། །ཅེས་གཤེགས་སུ་གསོལ་ལོ། །
བསྐྱེད་པ་ཐུགས་ཀར་བསྡུ། མི་དམིགས་པར་བསམ། ཡི་གེ་བརྒྱ་པ་བརྗོད། སྤྱོད་ལམ་གྱི་དུས་སུ་སྐད་ཅིག་མས་ལྷར་བསྐྱེད། ལུས་བསྲུང་། གོ་བགོ །ནང་ཡེ་ཤེས་ཀྱི་འཁོར་ལོ་དང་། ཕྱི་དམ་ཚིག་གི་འཁོར་ལོ་གསལ་གདབ། འཁོར་ལོ་ཁ་སྦྱོར་བསྡམ། རྟག་ཏུ་ལྷའི་ང་རྒྱལ་གྱིས་སྤྱོད་ལམ་ལ་
གནས་པར་བྱའོ། །སྒྱུ་མ་ལྟ་བུའི་བློས་དགེ་བའི་ལས་འབའ་ཞིག་ལ་འབད་པར་བྱའོ། །བསྙེན་པའི་དུས་སུ་བཅོམ་ལྡན་འདས་ཀྱིས་གསུངས་པའི་རྩ་བའི་སྔགས་ཡི་གེ་འབྲུ་བཅུ་བདུན་པ་དང་། ལས་ཀྱི་ཕྱག་ན་རྡོ་རྗེའི་ཡི་གེ་བཅུ་པ་ལ་རྟག་ཏུ་བཟླས་ཤིང་ནང་ནུབ་བུམ་པ་ལ་གཟུངས་སྔགས་བརྒྱ་རྩ་
བརྒྱད་ཀྱི་བསྙེན་པ་དབུལ་ལོ། །གཏའ་གཏོར་ལའང་དེ་བཞིན་བྱའོ། །བསྙེན་པའི་གྲངས་ཀྱི་ཚད་ནི་བྱེ་བའམ་བདུན་འབུམ་མོ། །རྟགས་ཀྱི་མཚན་མ་ཐོབ་ནས་བསྙེན་པ་ཐོན་ནས། ནམ་གུང་ལ་གཏའ་གཏོར་བཏང་། ཐོ་རངས་བུམ་པས་རང་ངམ་སློབ་མ་ལ་དབང་བསྐུར། གཏའ་བདག་ལས་ཀྱི་
གནོད་སྦྱིན་རི་རབ་ཀྱི་ལྕོག་ལ་གཤེགས་སུ་གསོལ། བུམ་པའི་ལྷས་བདག་ལ་རྒྱས་གདབ། ཁྲུས་བྱས། དངོས་གྲུབ་ཀྱི་རྟེན་ཕུད་ལྷ་ལ་དབུལ། ལྷག་མ་དངོས་གྲུབ་ཏུ་དམིགས་ལ་རང་ཟ། བསྐྱེད་པ་བསྡུ། མི་དམིགས་པར་བསམ། ལྷ་རྒྱུན་དུ་འཁོར་བའི་མན་ངག་ལ་གནས་པར་བྱའོ། །
དཔལ་ཕྱག་ན་རྡོ་རྗེ་མདོ་ལུགས་ཀྱི་མན་ངག་ལག་ཏུ་བླང་བའི་སྒྲུབ་ཐབས་སློབ་དཔོན་ཆེན་པོ་བཱིརྱ་ཙནྡྲས་མཛད་པ་རྫོགས་སོ།། ༄། །གསང་སྔགས་ཀྱི་བཟླས་བརྗོད་བཞུགས། །འཕགས་པ་ལག་ན་རྡོ་རྗེ་གོས་སྔོན་པོ་ཅན་ལ་ཕྱག་འཚལ་ལོ། །དབེན་ཞིང་ཉམས་དགའི་གནས་

དག་ཏུ། །རྣལ་འབྱོར་སྔགས་ཀྱི་སྐྱོན་གྱུར་པ། །སྒྲ་ཆེས་སྐྱོན་གྱུར་འབྱུང་པོ་དག །སྣོད་མེད་གྱུར་པས་ཐོས་གྱུར་ན། །སྒྲ་ཆེས་བར་ཆད་མཐུ་མེད་གྱུར། །སྒྲ་ཆུང་གྱུར་ན་དངོས་གྲུབ་མེད། །སྐྱེན་གྱུར་ལུས་ཀྱི་ཕྲད་པ་ཉམས། །དེས་ན་སྔགས་ཀྱི་མཐུ་མེད་འགྱུར། །བུལ་ན་བཟླས་པའི་གྲངས་
མེད་པས། །དུས་འདས་བར་གཅོད་སྦྱོར་བ་འབྱུང་། །གློ་དང་གཡལ་དང་སྦྲིད་པ་དང་། །གཉིད་ལ་སོགས་པས་བར་ཆོད་ན། །དེས་ནི་ཡི་དགས་བདུད་ལ་སོགས། །སྤྲོ་ནས་མྱུར་དུ་བར་གཅོད་འབྱུང་། །སྔགས་ཀྱི་བསྙེན་པ་བྱེད་དུས་སུ། །མེ་དང་འདྲ་བའི་ཞེ་སྡང་གིས། །སྔགས་ཀྱི་འབྲས་བུ་སྲེག་པར་བྱེད། །
ཀུན་ནས་དཀྲིས་པའི་འདོད་ཆགས་ཀྱིས། །ཡོན་ཏན་རྒྱུ་རྣམས་འཆིང་བར་བྱེད། །མུན་པ་ལྟ་བུའི་གཏི་མུག་གིས། །དངོས་གྲུབ་སྟེར་བ་རྙེད་མི་འགྱུར། །སྒང་བུ་ལྟ་བུའི་ང་རྒྱལ་གྱིས། །དངོས་གྲུབ་ཆུ་འདྲ་རྩེ་ལ་མིན། །སྔགས་ཀྱི་ཡོན་ཏན་སྤྲིན་འདྲ་ལ། །ཕྲག་དོག་རླུང་གིས་འཐོར་བར་བྱེད། །དངོས་
གྲུབ་བྱེ་མའི་རྒྱུན་འདུས་པའང་། །བརྩོན་འགྲུས་རྡོ་རྗེའི་བྲག་མེད་ན། །ལེ་ལོའི་དབའ་རླབས་ཆེན་པོ་འཁྲུག །དངོས་གྲུབ་བར་དུ་གཅོད་པ་བཅུ། །ལྔ་ལས་འབྱུང་བས་ལྔ་བཅུ་སྟེ། །མི་དགེ་བཅུ་ཞེས་གསུངས་པ་ཡིན། །མ་བྱིན་ལེན་དང་སྲོག་གཅོད་གཡེམ། །ཚིག་འཁྱལ་ངག་རྩུབ་ཕྲ་མ་རྫུན། །བརྣབ་
སེམས་གནོད་སེམས་ལོག་པར་ལྟ། །དགེ་བཅུའི་བར་དུ་གཅོད་པ་སྟེ། །ཡང་དག་དོན་གྱི་སྒྲ་ཞེས་བཤད། །འདི་ལྟར་དངོས་གྲུབ་ཀུན་བྲལ་བས། །སྔགས་ཀྱི་འབྲས་བུ་འདོད་པས་སྤང་། །དེ་སྤངས་འབྲས་བུ་མྱུར་དུ་འཐོབ། །རྟག་ཏུ་བཟླས་བརྗོད་མེ་དཔུང་ལ། །བསམ་གཏན་རླུང་གིས་སྦར་
གྱུར་ན། །སྡིག་པ་སྟོབས་ཅན་མི་བཟད་པའི། །ལྗན་ལྗིན་ཐམས་ཅད་སྲེག་པར་བྱེད། །བཟླས་བརྗོད་མེ་ཡི་རྒྱུན་འདྲ་ཡང་། །བསམ་གཏན་བྲལ་བས་མི་འགྲུབ་སྟེ། །སྡིག་པ་ཆུ་དང་འདྲ་བས་གསོད། །དེ་བས་བསམ་གཏན་ལྡན་པར་བྱ། །རྡོ་རྗེའི་བཟླས་པ་ཞེས་གསུངས་པས། །རྡོ་རྗེ་གསུམ་གྱི་
སྐུར་བསྒོམས་ཏེ། །ཕྱི་དང་ཤིན་ཏུ་ནང་དག་དང་། །དགུག་དང་གདོན་དང་ཡང་དག་དང་། །ཨོཾ་གྱི་དོན་དང་ལ་སོགས་པ། །དེ་ལ་དམིགས་ནས་བཟླས་པར་བྱ། །གང་ཞིག་དོན་འདི་མེད་གྱུར་པས། །གསང་སྔགས་བཟླས་བརྗོད་བྱས་གྱུར་པ། །མུན་ལ་བྱེ་མའི་གསེར་ཕྱེ་ཚོལ། །མི་འདོད་འདུ་

ཡི་འདོད་པ་མིན། །སློབ་དཔོན་ཆེན་པོ་བཱིརྱ་ཙནྡྲས་མཛད་པ་གསང་སྔགས་ཀྱི་བཟླས་བརྗོད་རྫོགས་སོ།། ༄༅༅། །རྒྱ་གར་སྐད་དུ། བཛྲ་བ་ཏི་རཱ་ཛ་ཏུཎྜེ་སཱ་དྷ་ནཾ་ནཱ་མ། བོད་སྐད་དུ། ནམ་མཁའ་ལྡིང་གི་རྒྱལ་པོ་རྡོ་རྗེ་སྒྲུབ་པའི་ཐབས་ཞེས་བྱ་བ། གནོད་སྦྱིན་གྱི་སྡེ་དཔོན་ཆེན་པོ་ལག་
ན་རྡོ་རྗེ་དྲག་པོ་ལ་ཕྱག་འཚལ་ལོ། །རེ་ཞིག་དང་པོར་དབེན་པའི་གནས་སུ། རིག་པ་འཛིན་པ་དེས་ཁྲུས་བགྱིས་ཏེ་གཙང་མར་བགྱིས་ལ། གོས་གསར་པ་བགོས། དམ་ཚིག་དང་སྡོམ་པ་ལ་གནས་ཤིང་། གཙང་སྦྲའི་སྤྱོད་པ་དང་བཅས་པས་མཎྜལ་བའི་རྣམ་ལྔས་བྱུགས་ལ་སྤོས་ཀྱི་དཀྱིལ་
འཁོར་བགྱིས་ཏེ། བཅོམ་ལྡན་འདས་ཤཱཀྱ་ཐུབ་པའི་གཟུགས་སམ། མཆོད་རྟེན་སྐུ་གདུང་དང་བཅས་པ་དཀྱིལ་འཁོར་དེའི་དབུས་སུ་བཞག་སྟེ། སྤོས་ཆབ་ཀྱིས་བཀྲུ་བར་བྱའོ། །མེ་ཏོག་དང་བདུག་པ་ལ་སོགས་ཏེ། མཆོད་རྫས་རྣམས་བཤམས་ལ་སྟན་བདེ་བ་ལ་འདུག་སྟེ། དང་པོར་
བྱང་ཆུབ་མཆོག་ཏུ་སེམས་བསྐྱེད་ལ་དེའི་རང་བཞིན་ཨ་ལས་ཟླ་བའི་སྟེང་དུ་ཧཱུཾ་ཡོངས་སུ་བསམ་པར་བྱའོ། །དེའི་འོད་ཟེར་གྱིས་བླ་མ་དང་ལྷག་པའི་ལྷ་དང་སངས་རྒྱས་དང་བྱང་ཆུབ་སེམས་དཔའ་རྣམས་མདུན་དུ་བཀུག་སྟེ། ཕྱག་བཙལ་བ་དང་། མཆོད་ཅིང་བཤགས་པ་དང་། རྗེས་སུ་ཡི་རང་
ཞིང་ཆོས་ཀྱི་འཁོར་ལོ་བསྐོར་བ་དང་། མྱ་ངན་ལས་མི་འདའ་བར་གསོལ་བ་གདབ་པ་དང་། དེ་དག་དགེ་བའི་རྩ་བ་བསྔོས་ཏེ་གཤེགས་སུ་གསོལ། ཚངས་པའི་གནས་བཞི་བསྒོམ་པར་བྱའོ། །དེ་ནས་བཅོམ་ལྡན་འདས་ཀྱི་སྐུ་མཚན་དང་དཔེ་བྱད་ལྡན་པར་བསྐྱེད་ལ། སྙིང་རྗེ་དང་བྱམས་པ་
དང་། བཏང་སྙོམས་ཆེན་པོའི་ངང་གིས་སྔགས་འདི་བརྗོད་པར་བྱའོ། །ན་མོ་བྷ་ག་བ་ཏེ། ཤཱཀྱ་མུ་ན་ཡེ། ཏ་ཐཱ་ག་ཏཱ་ཡ། ཏདྱ་ཐཱ། བྷུ་ཛ་ས་མ་ཡེ། བྷུ་ཛེ་ཏ་ཐཱ་བྷུ་ཛེ། པྲ་བ་ར་བྷུ་ཛེ། ས་མནྟ་ཨ་ཀ་བྷུ་ཛ། ཏུ་རུ་ཏུ་རུ་སྭཱ་ཧཱ། ས་མ་ཡ་པཱ་ལཱ་ཡ་སྭཱ་ཧཱ། ཀླུ་མི་བགྲུངས་པ་དམ་ཚིག་མི་འཚལ་
བ་རྣམས་སླར་བཟློག་ཅིང་བསྐྲད་པའི་ཕྱིར་ལན་བདུན་བརྗོད་དོ། །སྭ་བྷཱ་བ་བི་ཤུདྡྷཱཿསརྦ་དྷརྨྨཿསྭ་བྷཱ་བ་བི་ཤུདྡྷོ྅ཧཾ་ཞེས་བརྗོད་པས་དེ་ཉིད་ཀྱི་ངང་ལས་བཛྲ་བ་ཏི་ག་རུ་ཌ་ཞེས་རྣམ་པ་དང་བཅས་ཏེ་ཧཱུཾ་ངོ་བོར་གནས་པ་ལས་དེ་ཉིད་ཡོངས་སུ་གྱུར་པ་ལས། རིན་པོ་ཆེ་འབར་བ་ཧཱུཾ་གིས་མཚན་པ།

འོད་ཟེར་གྱི་ཕྲེང་བ་རྣམ་པར་འཁྲུགས་པར་གྱུར། དེ་དག་ཡོངས་སུ་གྱུར་པ་ལས་ར་ཛི་སྲི་ཛ་ཧཱུཾ་ཞེས་པས་ནམ་མཁའ་ལྡིང་གི་རྒྱལ་པོ་གསེར་གྱི་འདབ་མ་ཅན། རྡོ་རྗེའི་མཆུ་ཅན་བདག་ཉིད་ཆེན་པོའི་ལུས་འབར་བ་རྡོ་རྗེའི་རང་བཞིན། ཁྲོ་བོ་འཇིགས་སུ་རུང་བ་རྩལ་ཅན།
རིན་པོ་ཆེ་ཐ་དད་པ་སྣ་ཚོགས་དང་། མུ་ཏིག་དང་། མན་ཤེལ་དང་། གསེར་གྱིས་སྤྲས་པའི་རྒྱན་མགོ་ལ་ཐོགས་པ། གསེར་གྱིས་བཀླུབས་པ། དྲེགས་པའི་གཟུགས་འགྱིང་བས་བལྟ་བ། ཀླུ་ཆེན་པོ་བརྒྱད་གདན་དུ་བཅས་པ། ཀླུ་མགོ་དགུ་པ་རྒྱན་དུ་བྱས་པ། ཀླུ་མགོ་གསུམ་
པ་གཡས་ན་ཐོགས་པ། ནོར་བུ་རིན་པོ་ཆེའི་དབྱིག་པ་གཡོན་ན་ཐོགས་པ། ལུས་ཐམས་ཅད་རྡོ་རྗེ་འབར་བ་གསེར་གྱི་རང་བཞིན་གཤོག་པའི་འདབ་མ་བརྐྱང་བས་ཀླུ་རིགས་དབང་དུ་སྡུད་པ། གཡོག་འཁོར་ནམ་མཁའ་ལྡིང་གི་ཚོགས་ཀྱིས་བསྐོར་བ་ཅིག་ཏུ་བསམ་པར་བྱའོ། །དེ་ནས་
ནམ་མཁའ་ལྡིང་གི་རྒྱལ་པོའི་ཕྱག་རྒྱ་བཅས་ཏེ། ཨོཾ་སུ་པྲ་ཏིཥྛ་བཛྲ་དུན་ཏི་མི་ལི་མི་ལི་སྭཱ་ཧཱ། དེ་ནས་བརྟན་པར་བྱས་ཏེ་ལུས་བསྲུང་བར་བྱའོ། །དེ་དང་འདྲ་བའི་ནམ་མཁའ་ལྡིང་གི་རྒྱལ་པོ་འཁོར་དང་བཅས་པ་སྤྱན་དྲངས་ལ། ཡང་དག་པར་མཆོད་ཅིང་བསྟོད་ལ་དེ་ཉིད་ཀྱི་རྟེན་ལ་
བསྟིམ་པར་བྱའོ། །དེ་ནས་ཇི་ལྟར་སྐྱོ་བར་མ་གྱུར་གྱི་བར་དུ་སྤྲོ་བ་དང་། བསྡུ་བའི་རིམ་པ་བྱའོ། །དེ་ཉིད་གསལ་བར་མ་གྱུར་ན་སྐྱོན་སྤངས་པའི་བཟླས་པ་བྱའོ། །ཨོཾ་བཛྲ་བ་ཏི་ག་རུ་ཌ་བེ་གེ་ཏ་ཧཱུཾ་ཧཱུཾ་ཛ་ཛ་རཱ་སྲི་ཛ་ཧཱུཾ་ཕཊ་ཅེས་ཉིན་གཅིག་བཞིན་སྔགས་སྟོང་ངམ་ཁྲི་བརྗོད་དོ། །ནམ་ལུས་
ཀྱིས་མི་ཐུབ་པར་སྐྱོ་བར་གྱུར་པའི་ཚེ་ཁ་ཟས་དཀར་པོ་བཟའ་བར་བྱ་སྟེ། ཡང་ཁྲུས་བྱས་ལ་བསྒྲུབ་པར་བྱའོ། །གུ་གུལ་གྱི་དུད་པས་བདུག་གོ། །མེ་ཏོག་དང་། བདུག་པ་དང་། ཡོན་ཆབ་དང་། མར་མེ་དང་། བཤོས་གཙང་ལ་སོགས་ཏེ། གཏོར་མའི་རྫས་ཅི་འབྱོར་པས་མཆོད་
ཅིང་། ཡང་དག་པར་བསྟོད་ནས་ཉན་ལ། དགེ་བ་དང་མི་དགེ་བ་སྟོན་པར་འགྱུར་ཞིང་ལས་ཐམས་ཅད་འགྲུབ་པར་འགྱུར་ལ། མཆོག་དང་ཐུན་མོང་ཐམས་ཅད་སྦྱིན་པར་འགྱུར་རོ། །ཅི་བསྒོ་བ་དེས་བྱེད་པར་འགྱུར་རོ། །གྲུབ་ནས་ཀྱང་རྟག་ཏུ་མཆོད་པར་བྱའོ། །ནམ་མཁའ་ལྡིང་གི་

རྒྱལ་པོ་སྔོན་དུ་བསྙེན་པའི་ཆོ་ག་སློབ་དཔོན་བཱིརྱ་ཙནྡྲ་ས་མཛད་པ་རྫོགས་སོ།། ༄༅༅། །རྒྱ་གར་སྐད་དུ། བཛྲ་པཱ་ཎི་སཱ་དྷ་ནཾ་ནཱ་མ། བོད་སྐད་དུ། ཕྱག་ན་རྡོ་རྗེའི་སྒྲུབ་པའི་ཐབས་ཞེས་བྱ་བ། ཕྱག་ན་རྡོ་རྗེ་ལ་ཕྱག་འཚལ་ལོ། །དྲག་པོའི་སྟོབས་ཀྱིས་འདུལ་དཀའ་འདུལ། །
བདེ་གཤེགས་ཀུན་གྱི་ཐུགས་ངོ་བོ། །རྡོ་རྗེ་འཆང་ལ་ཕྱག་འཚལ་ནས། །དེ་ཡི་སྒྲུབ་ཐབས་བྲི་བར་བྱ། །བསླབ་པ་གསུམ་ལྡན་དགེ་སློང་ངམ། །དགེ་ཚུལ་དགེ་བསྙེན་བསྙེན་གནས་པ། །བྱ་བའི་རྒྱུད་མོས་དེ་ཡིས་བསྒྲུབ། །གཞན་གྱིས་དེ་ལྟ་མ་ཡིན་ནོ། །དང་པོར་ས་ཕྱོགས་
གཙང་མར་རང་ཉམས་དགའ་བའི་ཕྱོགས་སུ། སྟན་བདེ་བ་ལ་སེམས་དཔའི་སྐྱིལ་མོ་ཀྲུང་གིས་གནས་ལ། དྲི་དང་མེ་ཏོག་ལ་སོགས་པས་དཀྱིལ་འཁོར་མཛེས་པར་བྱས་ལ། མདུན་དུ་རིག་སྔགས་ཀྱི་བདག་པོ་དང་། བླ་མ་བསམས་ལ། ཇི་སྐད་གསུངས་པའི་མཆོད་པས་
མཆོད། སྡིག་པ་བཤགས་པ་དང་། བྱེད་པ་བསྡམ་པ་དང་། གསུམ་ལ་སྐྱབས་སུ་འགྲོ་བ་དང་། བྱང་ཆུབ་ཏུ་སེམས་བསྐྱེད་པར་བྱ། དེ་ནས་སྭ་བྷཱ་བ་ཤུདྡྷཱཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ་ཞེས་ལན་གསུམ་བརྗོད་པས་ཐམས་ཅད་སྟོང་པར་བསམ་མོ། །རང་སེམས་དག་པས་པཾ་
པདྨ། །དཀར་པོ་འདབ་བརྒྱད་དབུས་ཟླ་བ། །དབུས་སུ་ཧཱུཾ་ལས་རྡོ་རྗེར་གྱུར། །ལྟེ་བའི་དབུས་སུ་ཧཱུཾ་མཐིང་ག །གྱུར་བ་བཞི་པ་རྡོ་རྗེ་འཆང་། །བརྐྱང་བསྐུམ་སེམས་དཔའ་ཁྲོས་པ་སྟེ། །མཐིང་ག་ན་རའི་རྒྱན་གྱིས་སྤུད། །འཇིགས་བྱེད་མགོ་སྐྱེས་གྱེན་དུ་བརྫེས། །རྡོ་རྗེ་དྲིལ་འཛིན་
མེ་དཔུང་བཞུགས། །རྩེ་གཅིག་པ་ཡི་སེམས་ཀྱིས་བསམ། །རང་སྙིང་ཟླ་བར་སྙིང་པོ་དགོད། །སྔོན་དུ་བསྙེན་པ་སུམ་འབུམ་བྱ། །གསང་སྔགས་རྒྱལ་པོ་འདི་ལན་ཅིག་བཟླས་པས་སྡིག་པ་ཐམས་ཅད་སྲེག་པ་དང་། ཐམས་ཅད་སྲུང་བར་བྱེད་དོ། །འབྱུང་པོའི་གདོན་གྱིས་ཟིན་པ་ལ་
སོགས་པ་ལ་བསྣུན་ན་འབྱེར་བར་བྱེད་དོ། །ཁ་ཏི་ཁས་ཁམ་ཕོར་ལ་བྲིས་ཏེ་སྒོ་ལ་དབྱངས་ན་སྲིའུ་སྲུང་བར་བྱེད་དོ། །སྤྲ་ཚིལ་ལ་གཟུགས་སོར་བཞི་པ་བྱས་ལ། དེའི་སྙིང་གར་དགྲའི་མིང་དང་སྔགས་སྦྲེལ་ནས་ཚེར་མས་ཁ་ལ་བཙུགས་ན་ཕྱིར་རྒོལ་བའི་ངག་རེངས་པར་བྱེད་དོ། །སྙིང་ལ་

བཙུགས་ན་ཁྲོས་པ་ཞི་བ་དང་། གསད་པའི་སེམས་ཀྱིས་གསད་པར་འགྱུར་བ་དང་། རྐང་ལག་གང་ལ་བཙུགས་ན་ཞ་བར་འགྱུར་བ་དང་། རྟགས་ལ་བཙུགས་ན་ནུས་པ་མེད་པར་འགྱུར་རོ། །མིའི་རྗེ་ངར་གྱི་ཕུར་བུའམ་ལྕགས་ཕུར་ལ་བསྔགས་ཏེ་གང་ལ་བསྣུན་པ་རེངས་
པར་འགྱུར་རོ། །མི་ཐོད་ལ་སྔགས་བྲིས་ལ། དེའི་ནང་དུ་མི་ཁྲག་གིས་བཀང་བ་དུར་དུ་སྦས་ན་རིགས་རྒྱུད་འཆད་དོ། །དུག་བླུགས་ཏེ་ཀླུ་ཡོད་པའི་གནས་སུ་སྦས་ན་མཛེ་ནད་ཀྱིས་འཛིན་ཏོ། །དགྲའི་སྒོར་སྦས་ན་འབྱེར་བར་བྱེད་པ་དང་། ཞིང་དཀྱིལ་དུ་སྦས་ན་ཞིང་ལ་མི་སྐྱེ་བ་དང་། ཕྱུགས་
ལྷས་སུ་སྦས་ན་མི་འཕེལ་བ་དང་། ཆུར་སྦས་ན་ཆུ་སྐེམས་སོ། །སྐྱེས་བུ་མཚོན་གྱིས་བསད་པའི་ཐོད་པ་ལ་སྔགས་དང་། ཡུལ་ལྷའི་མིང་སྤེལ་ལ་བྲིས་ནས་ཡུལ་ལྷའི་གནས་སུ་སྦས་ལ། དེའི་ཐོག་ཏུ་ཕུར་པ་ལ་སྔགས་མང་དུ་བཟླས་ལ་ཡུལ་ལྷའི་སྙིང་གར་དམ་དུ་གདབ། དེའི་སྟེང་དུ་ཚེར་
མ་ཅན་གྱི་ཤིང་ལ་གདུག་པའི་མེ་བཏང་ལ། རྟ་དང་། མི་དང་། བ་ལང་དང་། ཁྱི་དང་མ་ཧེ་ལ་སོགས་པའི་ཤ་ཁྲག་བསྲེགས་ལ། ལྷ་ཁྱོད་ཀྱི་ཡུལ་འདིར་ཐོག་སེར་ཕོབ་ཤིག །མ་ཕེབས་ན་བསྐལ་པར་མི་གཏོང་ངོ་ཞེས་བརྗོད་ལ། ཕེབས་ན་རྫས་རྣམས་འོ་མས་བཀྲུས་ལ་བཏང་། མ་
ཕེབས་ན་གཞག །ལས་དེ་དག་ཐམས་ཅད་ནི་སྔགས་དང་མིང་སྤེལ་བའི་དབྱེ་བས་ཤེས་པར་བྱའོ། །གསང་སྔགས་ནི་ཨོཾ་ཙཎྜ་མ་ཧཱ་རོ་ཥ་ཎ་ཆེ་གེ་མོ་ཧཱུཾ་ཕཊ། གཞན་ཡང་གོང་གི་གཟུགས་བརྙན་གྱི་སྙིང་གར་མིང་འབའ་ཞིག་བྲིས་ལ། མཆོད་རྟེན་ནག་པོ་མཐོ་གང་བའི་ནང་དུ་བཅུག་ལ།
ལྷུང་བཟེད་ཀྱི་འོག་ཏུ་མཎྜལ་བྱས་ལ་གཞག །དེ་ནས་དགེ་སློང་ངམ། དགེ་ཚུལ་ལམ། དགེ་བསྙེན་ཕྱག་ན་རྡོ་རྗེའི་རྣལ་འབྱོར་དང་ལྡན་པ་སྔགས་བཟླས་པ་པོ་བཞི་ཡན་ཆད་ཀྱིས་དབེན་པར་ནུབ་བཅོ་ལྔར་ནམ་གུང་ལ་སྔགས་བརྒྱ་རྩ་བརྒྱད་བཟླ་ཞིང་བསྐོར་བར་བྱ། བཅུ་དྲུག་པ་ལ་བསྐོར་བར་
བཟློག་ལ་གཟུགས་བསྲེགས་ན། ཇི་སྐད་སྔགས་དང་སྤེལ་བ་བཞིན་ལོ་ལས་མི་འདའོ། །སེར་བ་ལ་སོགས་པ་བཟློག་པ་ལ་འཁོར་ལོ་ལ་བྲི་བའམ་རྔ་ལའོ། །གཡུལ་དུ་འཇུག་ན་རལ་གྲི་ལ་སོགས་པའོ། །ནད་ཐམས་ཅད་ལ་ཆུ་དང་ཡུངས་ཀར་ལ་སོགས་པའོ། །གཞན་ཡང་འདིའི་

ཡོན་ཏན་ནི་བརྗོད་པར་མི་ནུས་སོ། །ཕྱག་ན་རྡོ་རྗེ་སྒྲུབ་པའི་ཐབས་སློབ་དཔོན་ཆེན་པོ་ཤྲདྡྷ་ཀ་ར་ཝརྨས་མཛད་པ་རྫོགས་སོ།། ༄། །རྟེན་འབྲེལ་གྱི་སྲུང་བ་བཞུགས། །དཔལ་ཕྱག་ན་རྡོ་རྗེ་ལ་ཕྱག་འཚལ་ལོ། །བཅོམ་ལྡན་འདས་ཀྱིས་བཀའ་སྩལ་པ། ཀླུ་རིགས་ལྔ་ལ་དུག་ལྔ་
སྟེ། །འགྲོ་བ་གཞན་ལ་གནོད་པ་བྱེད། །གནོད་པའི་མཚན་ཉིད་འདི་ལྟ་སྟེ། །བྲག་བར་གྲོག་པོ་གཏིང་རིངས་དང་། །རི་ཕུག་དོག་དང་སྒོ་དོག་མོར། །མི་ཤོང་བཞིན་དུ་འཚང་བ་དང་། །ལྷ་ཁང་ཁང་ཧྲུལ་ཉམས་མི་དགའ། །ཆུ་དང་འདམ་རྫབ་ཟག་པ་ངན། །གཡག་དང་བ་གླང་ར་ལུག་དང་། །རི་
དགས་གཅན་གཟན་ཁྱི་ཡིས་འཚེ། །གཟར་བའི་རི་ལ་འཛེག་འབབ་རྨི། །ལུས་དང་ཤེས་པ་ལྕི་བ་དང་། །གཉིད་ཆེ་སེམས་སྐྱོ་སྣང་གླུ་ལེན། །སྤྲོ་ཐུང་སྙིང་མི་དགའ་བ་འོང་། །བཅོམ་ལྡན་འདས་ཀྱིས་བཀའ་སྩལ་པ། །དེ་དག་བསྲུང་དང་གསོ་བྱའི་ཕྱིར། །རྫས་ཀྱི་སྦྱོར་བ་བསྟན་པར་བྱ། །ཐུན་མོང་
སྦྱོར་བ་བཤད་བྱ་བ། །རི་དགས་ལྟེ་དྲི་འདྲེ་གསོད་ཆུ། །ནགས་ཀྱི་རྩི་དང་རྩི་བོ་ཆེ། །དྲི་ཆེན་ཉ་ཡི་མཁྲིས་པ་དང་། །བྱི་སྐུ་བདུན་དུ་སྦྱར་བ་ཡིས། །ཀླུ་གཉན་ས་བདག་ནག་མོ་དཀོར། །འབྱུང་པོ་རྣམས་ཀྱིས་མི་ཚུགས་ཤིང་། །མཛེ་འབྲས་ཤུ་བ་ཟ་ཀོང་དང་། །བས་ལྡག་གཡན་པ་མེ་དབལ་
དང་། །གག་པ་ལྷོག་པ་རྨ་རིམས་དང་། །ཚད་རིམས་རྒྱུ་གཟེར་འབྱུང་པོའི་ནད། །བཟའ་དང་གདགས་དང་བྱུགས་དང་བདུགས། །ཐམས་ཅད་འཇོམས་པར་བྱེད་པའི་མཆོག །ཁྱད་པར་སྦྱོར་བ་རྣམ་པ་བཞི། །ལྟེ་དྲི་ཤིང་ཀུན་ཨ་རུ་ར། །དྲི་ཆུས་སྦྱངས་ཤིང་ཁོང་དུ་བཏུང་། །སྐད་
སྙན་ཚེ་རིང་ནད་སྐེམས་སྲུང་། །ལྟེ་དྲི་འདྲེ་གསོད་ཐང་ཆུ་དང་། །ནགས་ཀྱི་རྩི་དང་རྩི་བོ་ཆེ། །བྱི་སྐུ་ཧ་ལ་ཛཱ་ཏི་དང་། །ཨ་མྲྀ་ཏ་སྦྱར་བ་བཅང་བའོ། །ལྟེ་དྲི་འདྲེ་གསོད་རུ་རྟ་ནག །བདུད་རྩི་རྒྱ་ཚིལ་ས་ཚིལ་དང་། །བྱི་སྐུ་ཧ་ལ་མི་ཕག་བཅུད། །བྱུག་པའི་རྫས་སུ་བཤད་པ་ཡིན། །རུས་ཆེན་
མནན་ལ་བདུག་པ་བྱ། །ཉི་མའི་འོད་ལ་མུན་པ་བཞིན། །ཇོ་བོ་རྗེ་དང་། རྒྱ་བརྩོན་འགྲུས་སེང་གེའི་འགྱུར།། ༄༅༅། །རྒྱ་གར་སྐད་དུ། ནཱི་ལཱཾ་བ་ར་དྷ་ར་བཛྲ་པཱ་ཎི་སཱ་དྷ་ནཾ། བོད་སྐད་དུ། ཕྱག་ན་རྡོ་རྗེ་གོས་སྔོན་པོ་ཅན་གྱི་སྒྲུབ་པའི་ཐབས། བཅོམ་ལྡན་འདས་ཕྱག་ན་

རྡོ་རྗེ་ལ་ཕྱག་འཚལ་ལོ། །ལྷག་པའི་ཁྲོ་རྒྱལ་སྐྱོན་ཀུན་ལས་རྒྱལ་བ། །རྣམ་དག་བྱང་ཆུབ་སེམས་ཅན་དོན་མཛད་པ། །གོས་སྔོན་ཕྱག་ན་རྡོ་རྗེ་ལ་བཏུད་དེ། །དེ་ཡི་སྒྲུབ་ཐབས་སེམས་ཅན་ཕན་ཕྱིར་བཤད། །འདི་ལ་ལྷག་པར་དབང་བའི་སྔགས་པ་ནི། །སྙིང་རྗེ་ཡིས་ནི་ཡིད་ནི་གཅུགས་
གྱུར་ཅིང་། །ལྷག་པར་མོས་པ་བརྟན་པོའི་ཡིད་ཅན་ནི། །བྱང་ཆུབ་སེམས་ཀྱི་རྣམ་པས་རབ་ཏུ་བརྒྱན། །དཀོན་མཆོག་གསུམ་ལ་གཅིག་ཏུ་སྐྱབས་སུ་སོང་། །བླ་མའི་རྗེས་གནང་ཐོབ་ཅིང་ཡོན་ཏན་ལྡན། །རང་འདོད་ལྷ་དང་བླ་མ་དབྱེར་མེད་ལྷ། །ཤིན་ཏུ་བརྩོན་ལྡན་དབང་དུ་གྱུར་པ་ཡིས། །སྔ་བར་
ལངས་ཏེ་སྙིང་གར་ཉི་མ་ལ། །ཧཱུཾ་ཡིག་སྔོན་པོ་བུང་བ་ལྟ་བུའི་འོད། །འོད་གསལ་བ་ནི་བློ་ལྡན་གྱིས་བལྟས་ནས། །ཁ་ལ་སོགས་པ་རབ་ཏུ་དག་པར་བྱ། །ཙནྡན་ཨ་ཀར་ཛཱ་ཏི་ཨེ་ལ་དང་། །རམས་དང་སོ་བ་ཤིང་གི་ལོ་མ་ཡིས། །བསྲེས་པའི་དྲི་ཞིམ་ཆུ་ཡིས་བྱུགས་པ་ལ། །མེ་ཏོག་སྔོན་པོས་ཉེ་བར་
བརྒྱན་བྱས་ཏེ། །ཤ་ཁར་དྲི་སོགས་བདུག་པ་དག་གིས་ནི། །བདུག་ཅིང་ཡིད་དུ་འོང་བར་གྱུར་པ་ཡིས། །ཉེ་བར་འཚེ་བའི་འཇིགས་པ་རྣམ་སྤོངས་ཏེ། །ཡངས་ཤིང་འཇམ་པའི་སྟན་ལ་རབ་འདུག་ནས། །དེ་ནས་ཁམས་གསུམ་རྣམ་པར་རྒྱལ་བ་ཡི། །བདག་ཉིད་ཁྲོ་རྒྱལ་གཙོ་བོ་དག་ཏུ་ནི། །
རྣམ་པར་བསྒོམས་ནས་གཡས་ཀྱི་སྡིགས་མཛུབ་ལ། །རཾ་ཡིག་དམར་པོ་རྣམ་པར་བསྒོམ་པར་བྱ། །དེ་ནས་དེ་ལས་བྱུང་བའི་ཉི་མ་ལ། །ཧཱུཾ་ཡིག་སྔོན་པོ་ལས་ནི་བྱུང་བ་ཡི། །མི་བཟད་པ་ཡི་རྡོ་རྗེ་རྩེ་དགུ་པ། །འོད་ཟེར་རབ་ཏུ་འཕྲོས་པ་བསམ་པར་བྱ། །དེ་ནས་ཕྱོགས་བཅུ་དག་ཏུ་ནི། །ཁྲོས་
པས་སྔགས་ནི་བརྗོད་བྱ་ཞིང་། །གོ་རིམས་ཇི་བཞིན་སེ་གོལ་གྱིས། །གནས་བདག་རྣལ་འབྱོར་བསྲུང་བར་བྱ། །དེ་ལ་གནས་ལ་སོགས་པ་བསྲུང་བའི་སྔགས་ནི། ཨོཾ་བཛྲ་ཀྲོ་དྷ་སརྦ་བིགྷྣཱཾ་ཧ་ན་ཧ་ན་ཧཱུཾ་ཕཊ་རཀྵ་རཀྵ་སྭཱ་ཧཱ་ཞེས་བྱའོ། །དེ་ནས་སྔོན་གསུངས་ཉིད་ཀྱིས་ནི། །དྲི་ཞིམ་ཆུ་ཡིས་
དཀྱིལ་འཁོར་ཡང་། །བྱས་ནས་མེ་ཏོག་དགྲམ་པར་བྱ། །ཨརྒྷཾ་ལ་སོགས་ཧཱུཾ་བཟླས་བྱ། །དེ་ནས་རང་གི་སྙིང་གར་འོད་ཟེར་གྱི་ཕྲེང་བའི་ལྕགས་ཀྱུས་བཀུག་པའི་དེ་བཞིན་གཤེགས་པ་ཐམས་ཅད་དང་། བྱང་ཆུབ་སེམས་དཔའི་དགེ་འདུན་གྱིས་ནམ་མཁའི་ཕྱོགས་སུ་ཉེ་བར་གནས་པར་

ལྷག་པར་མོས་ཏེ། དེ་རྣམས་ལ་ཡང་དག་པའི་དད་པ་ཉེ་བར་བསྐྱེད་དེ། དེ་ཀུན་བླ་ན་མེད་པའི་མཆོད་པ་རྣམ་པ་བདུན་བྱའོ། །དུས་གསུམ་བཞུགས་པའི་སངས་རྒྱས་ལ། །ལུས་ངག་ཡིད་ཀྱིས་ཕྱག་འཚལ་ལོ། །རབ་གུས་རྒྱ་ཆེའི་མཆོད་པ་ཡིས། །བདེ་གཤེགས་རྣམས་ལ་ཉེ་བར་མཆོད། །
འཇིགས་པས་དེ་མདུན་མ་ལུས་པའི། །སྡིག་པ་བྱས་པ་བཤགས་པར་བགྱི། །སངས་རྒྱས་སོགས་བགྱིས་བསོད་ནམས་ལ། །དེང་འདིར་རྗེས་སུ་ཡི་རང་ངོ་། །ཆོས་ཀྱི་འཁོར་ལོ་བསྐོར་སླད་དུ། །བདེ་གཤེགས་རྣམས་ལ་བསྐུལ་བར་བགྱི། །བདེ་གཤེགས་མྱ་ངན་འདའ་བཞེད་ལ། །དེ་
རྣམས་ཡུན་རིང་གནས་གསོལ་འདེབས། །གསུང་མཆོག་རང་བཞིན་བསོད་ནམས་དང་། །དགེ་བ་གཞན་ཡང་བདག་གིས་ནི། །གང་དེ་ཐམས་ཅད་བྱང་ཆུབ་དག །གཅིག་ཏུ་བསྡུས་ནས་བསྔོ་བར་བགྱི། །དེ་ནས་སྐྱབས་སུ་འགྲོ་བྱ་སྟེ། དུས་གསུམ་འབྱུང་བའི་སངས་རྒྱས་དང་། །ཐེག་
ཆེན་དམ་ཆོས་འདི་དང་ནི། །དགེ་འདུན་སངས་རྒྱས་སྲས་ཚོགས་ལ། །བྱང་ཆུབ་བར་དུ་སྐྱབས་སུ་མཆི། །དེ་ནས་བདག་ཉིད་དབུལ་བྱ་སྟེ། །བདག་ཉིད་ཐལ་མོ་སྦྱར་ནས་ནི། །སངས་རྒྱས་རྣམས་ལ་འབུལ་བར་བགྱི། །བདག་ཀྱང་རབ་ཏུ་བཞེས་མཛོད་ལ། །ཇི་ལྟར་དགྱེས་པ་བཞིན་དུ་སྦྱོར། །དེ་
ནས་བྱང་ཆུབ་ཏུ་སེམས་བསྐྱེད་པར་བྱ་སྟེ། ངོ་མཚར་ཆེ་མཆོག་བྱང་ཆུབ་ནི། །བླ་མེད་དག་ནི་ཐོབ་ནས་སུ། །ཤིན་ཏུ་མཐར་ཐུག་མྱ་ངན་འདས། །འགྲོ་བ་མྱུར་དུ་དགོད་པར་བགྱི། །དེ་ནས་ལམ་ནི་བསྟན་བྱ་སྟེ། །གོང་འདིར་རྒྱལ་དང་རྒྱལ་བའི་སྲས། །སྙིང་རྗེ་མཆོག་གི་བསྟན་བྱ་བ། །རྡོ་རྗེ་
ཐེག་པ་བླ་ན་མེད། །མཆོག་གྱུར་སྙིང་པོ་བསྟེན་པར་བགྱི། །དེ་ནས་སྙིང་རྗེ་བསྒོམ་བྱས་ཏེ། །འཁོར་བའི་རྒྱ་མཚོ་མ་བརྒལ་བའི། །འགྲོ་བ་མ་ལུས་རྣམས་བལྟས་ནས། །སྡུག་བསྔལ་སེལ་བར་བྱེད་པ་ཡི། །སྙིང་རྗེ་མཐར་ཐུག་བསྒོམ་པར་བྱ། །དེ་ནས་སྟོང་ཉིད་བསྒོམ་བྱ་སྟེ། །གཟུང་དང་
འཛིན་པ་མི་ལྡན་པའི། །མ་དཔྱད་དངོས་པོ་ཡོད་མ་ཡིན། །དེ་ཕྱིར་འགྲོ་ཀུན་སྟོང་པ་ཉིད། །གཉིས་སུ་མེད་པ་བསྒོམ་པར་བྱ། །དེ་ནས་ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་བྱ་བ་འདིས་བྱིན་གྱིས་བརླབ་པར་བྱའོ། །དེ་ནས་རྒྱུ་མཐུན་པ་ལས་ཡོངས་སུ་རྫོགས་པའི་འབྱུང་བ་བཞི་སྟེ།

དཀྱིལ་འཁོར་བཞིའི་རྣམ་པའི་འབྱུང་བ་ཆེན་པོ་བཞི་བསྒོམ་པར་བྱའོ། །དེ་ལ་ལཾ་སྐྱེས་སེར་པོ་སྟེ། །མཐར་ནི་མ་ལུས་རྡོ་རྗེས་མཚན། །གྲུ་བཞི་པ་ལ་རབ་རྒྱས་པའི། །དབང་ཆེན་དཀྱིལ་འཁོར་བསྒོམ་པར་བྱ། །དེ་ནས་བྃ་སྐྱེས་དཀར་པོ་ནི། །ཟླུམ་པོ་བུམ་པས་མཚན་པ་སྟེ། །
ཆུ་ཡི་དཀྱིལ་འཁོར་ཟླུམ་པོ་དེ། །སྟེང་དུ་གནས་པ་ཡང་དག་བསམ། །དེ་ནས་རྃ་སྐྱེས་དམར་པོ་ནི། །གྲུ་གསུམ་རྃ་གྱིས་རྩེ་མཚན་པ། །འབར་ཞིང་འཕྲོ་བ་སྟེང་དུ་ནི། །མེ་ཡི་དཀྱིལ་འཁོར་བསམ་པར་བྱ། །དེ་ནས་ཡྃ་སྐྱེས་སྔོན་པོ་ནི། །སྦྱར་གཞུ་ལྟ་བུ་འོད་འབར་བ། །བ་དན་དང་བཅས་
མཉམ་གཞག་པས། །རླུང་གི་དཀྱིལ་འཁོར་བལྟ་བར་བྱ། །འབྱུང་བ་བཞི་ནི་ཡང་དག་གྱུར། །རྒྱས་འཕྲོ་གཞལ་ཡས་ཁང་པ་སྟེ། །རྣམ་སྣང་མཛད་ཀྱི་རང་བཞིན་ནི། །ཐར་པའི་གྲོང་མཆོག་བསྒོམ་པར་བྱ། །གྲུ་བཞི་པ་ལ་སྒོ་བཞི་པ། །རྟ་བབས་བཞི་དང་ཡང་དག་ལྡན། །མཆོད་སྣམ་བཞི་ཡིས་
ཡོངས་སུ་བསྐོར། །ཀ་བ་བརྒྱད་ཀྱིས་ཉེ་བར་མཛེས། །རྡོ་རྗེ་ཐིག་གིས་རབ་ཏུ་བསྐོར། །དྲ་བ་དྲ་བ་ཕྱེད་པས་བརྒྱན། །བླ་རེ་རྔ་ཡབ་མེ་ལོང་དང་། །གོས་དང་མེ་ཏོག་ཕྲེང་གིས་བརྒྱན། །མཆོད་པ་ལྔ་ཡིས་ཡང་དག་བརྒྱན། །འདོད་ཡོན་ལྔ་དང་ཡང་དག་ལྡན། །གླུ་དང་གར་སོགས་མཆོད་
པ་ནི། །ལྷ་རྫས་བསྣམས་པའི་ལྷ་མོའི་ཚོགས། །བ་དན་རྩེ་མོ་རླུང་བསྐྱོད་པའི། །དྲིལ་བུ་དག་ནི་ཕྱོགས་སྒོར་འཁྲོལ། །ཁ་དོག་ལྔ་ཡི་འོད་ཚོགས་ཀྱིས། །མ་ལུས་པ་ཡི་ཁམས་ནི་གསལ། །དེ་ཡི་ལྟེ་བར་པདྨ་ནི། །སྣ་ཚོགས་འདབ་མ་གེ་སར་བཅས། །དགའ་བོ་ལ་སོགས་ཀླུ་བརྒྱད་ནི། །
གདན་དུ་རྣམ་པར་བསམ་པར་བྱ། །ཤར་ལ་སོགས་པའི་ཕྱོགས་བཞི་རུ། །དེ་བཞིན་གདན་ནི་བསྒོམ་བྱ་སྟེ། །པདྨ་འཇིགས་བྱེད་སྟག་དང་ནི། །ཆུ་སྲིན་མ་ནི་རིམ་བཞིན་ནོ། །དེ་ནས་ཕྱི་འཕར་བཞི་པོ་ལ། །རོ་ལངས་སྔོན་པོ་བྲིས་པ་ཡིས། །དཀར་དང་ནག་དང་སྔོ་སྐྱ་དང་། །དེ་བཞིན་སེར་སྐྱ་བསྒོམ་པར་
བྱ། །དེ་ནས་དབུས་གདན་ཤེས་རབ་ནི། །དབྱངས་ཡིག་བཅུ་དྲུག་ངོ་བོ་ཉིད། །རབ་རྒྱས་ཟླ་བ་བསྒོམ་བྱ་བ། །མེ་ལོང་ཡེ་ཤེས་ངོ་བོ་ཉིད། །དེ་སྟེང་སུམ་ཅུ་རྩ་བཞི་ཡི། །གསལ་བྱེད་སྙིང་རྗེའི་བདག་ཉིད་ནི། །ཉི་མའི་འོད་གསལ་རྣམ་བསམས་པ། །མཉམ་ཉིད་ཡེ་ཤེས་ངོ་བོ་ཉིད། །དེ་སྟེང་བྃ་གྱིས་ཧཱུཾ་

བྱས་པ། །ཡང་དག་སྐྱེས་ལས་རྩེ་ལྔ་པའི། །རྡོ་རྗེ་ལྟེ་བར་ཧཱུཾ་གིས་མཚན། །སོ་སོར་ཀུན་རྟོག་ཡེ་ཤེས་བསྒོམ། །ཧཱུཾ་ལས་སངས་རྒྱས་སྤྲོ་བྱ་སྟེ། །བསྡུས་ཏེ་དེ་ལ་དེ་རྣམས་བཞུགས། །ཡང་དག་འདུས་ནས་དབྱེར་མེད་པ། །དེ་ནི་བྱ་བ་གྲུབ་པར་བསྒོམ། །ཟླ་བ་ཉིས་མཚན་ཧཱུཾ་ཡིག་ལས། །སྐྱེས་པའི་རང་
ཉིད་གོས་སྔོན་ཅན། །རྣམ་དག་ཡེ་ཤེས་ངོ་བོ་ཉིད། །ཡུན་རིང་ཕྱག་ན་རྡོ་རྗེ་བསམ། །དབུ་སྐྲ་ཁམ་སེར་གྱེན་དུ་འགྲེང་། །ཁྲོ་གཉེར་སྤྱན་ནི་དམར་བ་སྟེ། །མཆེ་བ་གཙིགས་པ་ཡི་ནི་ཞལ། །གློག་གི་ལྗགས་ཀྱིས་འཇིགས་བྱེད་པ། །འཇིག་དུས་རླུང་གི་དབུགས་དང་ནི། །ཧཱུཾ་ཡིག་འདོན་པ་ཡི་ནི་ཞལ། །
ཧ་ཧར་དགོད་པ་རྩུབ་ཅིང་དྲག །རྒྱ་མཚོ་ཆེན་པོ་ལྟོ་ཆེ་བ། །པདྨ་དབུ་ལ་རྒྱས་པར་རོ། །དགའ་བོ་ཉེར་དགའ་རྣ་ཆ་སྟེ། །པདྨ་ཆེན་པོ་ཚངས་སྐུད་དོ། །དུང་སྐྱོང་ཏཀྵ་ལག་གདུབ་བོ། །རིགས་ལྡན་ཀརྐོ་དབུ་རྒྱན་ཏེ། །ལྷག་ཅན་ནོར་རྒྱས་རྐང་གདུབ་བོ། །ཕྲག་པ་ཟླ་བ་ཉི་མས་བརྒྱན། །སེང་གེ་རྐང་བརྒྱད་
པགས་པའི་གོས། །རྡོ་རྗེ་ལྕགས་སྒྲོག་རྐེད་པར་དཀྲིས། །བྲང་འགྲོ་ཆེན་པོ་གསོལ་བས་སོ། །རང་མདོག་རྡོ་རྗེ་རྩེ་གསུམ་ནི། །གཡས་ཀྱི་ཕྱག་ན་བསྣམས་པ་སྟེ། །རྡོ་རྗེ་དབྱུག་ཆེན་མི་བཟད་པ། །གཡོན་གྱི་ཕྱག་ན་བསྣམས་པའོ། །ཉི་མའི་གདན་དང་རྒྱབ་རྟེན་བྲག །གཡོན་བརྐྱང་པ་ཡི་ཞབས་ཀྱིས་
གནས། །དེ་ནས་དབྱུག་པའི་སྟེང་བསམ་པ། །མཁའ་ལ་འགྲོ་བདག་བྱ་ཁྱུང་སྟེ། །ཁྲོས་ཞིང་ལུས་ནི་ཆེ་ལ་དཔའ། །ཁ་གདངས་སྣ་ཚོགས་མདོག་ཅན་ནོ། །རྐང་པ་གཉིས་ཀྱིས་སྦྲུལ་རྒྱལ་པོ། །ཟ་བཞིན་པ་ནི་ཉིད་དུ་བྱེད། །ཟླུམ་ཞིང་དམར་ལ་འབར་བའི་སྤྱན། །འཇིགས་ཤིང་ཀུན་ཏུ་སེང་
སེང་ལྟ། །དེ་ནས་སྙིང་གར་ཉིས་མཚན་ཧཱུཾ། །དེ་ཉིད་འོད་ཟེར་འཕྲོ་བའོ། །དེ་བཞིན་སྤྱི་བོ་མགྲིན་པ་སྙིང་། །ཨོཾ་ཨཱཿཧཱུཾ་ཡོངས་བསྒོམ་པར་བྱ། །ཞེས་བྱ་བ་ནི་སྦྱོར་བ་དང་པོ་ཞེས་བྱ་བའི་ཏིང་ངེ་འཛིན་ཏོ། །དེ་ནས་སྙིང་གར་ཉིས་གནས་པའི། །ས་བོན་ལས་བྱུང་ཟླ་བ་ནི། །འཇིགས་བྱེད་ལ་སོགས་
བརྒྱད་ལ་དགོད། །དེ་རྣམས་ཉི་གནས་དེ་བཞིན་ནོ། །དེ་ལ་ཟླ་ཉི་སྦྱོར་བ་ལས། །དེ་བཞིན་ས་བོན་བརྒྱད་དུ་གྱུར། །ཧཱུཾ་ཧཱུཾ་ཕུཾ་ཀུཉྫ་ཤཾ་རཾ་མཾ། །ཐིག་ལེ་ནཱ་ད་ལྡན་རིམ་བཞིན། །དེ་རྣམས་ཡོངས་སུ་གྱུར་པ་ལས། །མཚན་མ་བརྒྱད་ནི་གོ་རིམས་བཞིན། །འོག་ནས་འབྱུང་ཞིང་སྒྲུབ་པ་པོས། །རང་

རང་ས་བོན་ཡང་དག་ལྡན། །དེ་ནས་ཟླ་བ་ཉི་མ་དང་། །མཚན་མ་ས་བོན་ལས་བྱུང་བའི། །དཀྱིལ་འཁོར་བ་ནི་གོ་རིམས་བཞིན། །རང་རང་གདན་གནས་བསམ་པར་བྱ། །དེ་ལ་ཁམས་གསུམ་རྣམ་རྒྱལ་ནི། །ཀུན་དུ་སྔོ་བ་འབར་བའི་སྐུ། །རྩ་ཞལ་གནག་ཅིང་དཀར་བ་ནི། །གཡས་པའི་
ཞལ་ཏེ་སྤྱན་མིག་དམར། །གཡོན་ཞལ་དམར་ཞིང་ཤ་རྒྱས་ལ། །ཅུང་ཞིག་མཆེ་བ་གཙིགས་པའི་ཞལ། །སྟག་ལྤགས་གོས་གྱོན་ཁྲོས་པ་སྟེ། །ཉི་གནས་རྣམ་པར་འཕྲོ་བའི་འོད། །རྡོ་རྗེ་རལ་གྲི་ལྕགས་ཀྱུ་རྣོ། །གཡས་ཀྱི་ཕྱག་ན་བསྣམས་པའོ། །དྲིལ་བུ་ཞགས་པ་མི་མགོ་ནི། །གཡས་
ལས་ཅིག་ཤོས་ཕྱག་ན་བསྣམས། །གཡོན་བརྐྱང་བ་ཡི་ཞབས་གནས་པ། །ཤར་གྱི་གདན་ལ་བསམ་པར་བྱ། །སྒེག་ཅིང་ལང་ཚོ་དང་ལྡན་ཞིང་། །རྒྱན་རྣམས་ཀུན་གྱིས་རྣམ་པར་བསམ། །ལྷོ་ཕྱོགས་གདན་གྱི་ཉི་མ་ལ། །ནག་པོ་ཆེན་པོ་དེ་ནས་བལྟ། །སྤྱན་གསུམ་པོ་ནི་དམར་བ་སྟེ། །གནག་ཅིང་
ཁྲོས་པ་མཆེ་བ་གཙིགས། །སྐྲ་ནི་ཁམ་པ་གྱེན་དུ་འགྲེང་། །གང་ཡང་རུང་བའི་རྒྱན་གྱིས་མཛེས། །སྦྲུལ་མཆོག་མཆོད་ཕྱིར་ཐོགས་པ་སྟེ། །གཡོན་བརྐྱང་བ་ཡི་ཞབས་ཀྱིས་གནས། །རྩེ་མོ་རྣོ་ཞིང་འཇིགས་པ་ཡི། །ཙནྡན་ཕུར་ཤིང་གཡས་ན་བསྣམས། །གཡོན་པའི་ཕྱག་ན་ཞགས་པ་ནི། །
བསྣམས་ཤིང་མི་བཟད་པ་ཡི་གཟུགས། །ནུབ་ཀྱི་གདན་གྱི་ཟླ་བ་ལ། །ཀླུ་ཡི་རྒྱལ་པོ་བ་རུ་ཎ། །དཀར་པོ་གདེངས་ཀ་བདུན་གྱིས་སྒེག །མཉམ་པའི་ཞབས་ཀྱིས་ཡང་དག་གནས། །སྡོང་པོ་དང་བཅས་པདྨ་ཕྱེ། །གཡས་པའི་ཕྱག་ན་བསྣམས་པའོ། །དེ་ནས་གཡོན་པའི་ཕྱག་གིས་ནི། །ཕྱག་
བྱེད་ཚུལ་དུ་བསྒོམ་པར་བྱ། །བྱང་གི་གདན་གྱི་ཉི་མ་ལ། །གསང་བའི་དབང་ཕྱུག་རྣམ་ཐོས་སྲས། །སེར་ཞིང་བཟང་ལ་མཆོག་ཏུ་དགའ། །ལྷ་རྫས་རྒྱན་གྱིས་རྣམ་པར་བརྒྱན། །ཡིད་བཞིན་ནོར་བུ་འོད་འཕྲོ་བ། །གཡས་པ་ཡི་ནི་ཕྱག་ན་བསྣམས། །གསེར་གྱི་ནེའུ་ལེ་ཁ་འོག་བལྟས། །གཡོན་པ་
ཡི་ནི་ཕྱག་ན་བསྣམས། །རྟག་ཏུ་བསམ་པ་ཡོངས་རྫོགས་བྱེད། །གཡོན་བརྐྱང་བ་ཡི་ཞབས་ཀྱིས་གནས། །སྤྱན་ནི་ཀུན་དུ་དམར་ཞིང་ཆེ། །ལྟོ་བ་ཆེ་ཞིང་སྦོམ་པ་བསམ། །དེ་ནས་ཕྱི་འཕར་བསམ་བྱ་སྟེ། །ཤར་གྱི་གདན་གྱི་ཉི་མ་ལ། །སྲོག་ཟ་དག་ནི་ཆེ་ཞིང་གནག །གྲི་དང་སྡིགས་མཛུབ་ཀྱི་ནི་ཕྱག །ལྷོ་ཕྱོགས་

གདན་གྱི་ཉི་མ་ལ། །དེ་ནས་དབུགས་འཕྲོག་པ་ནི་བལྟ། །དཱུར་བ་ལྟ་བུ་ལྗང་ཞིང་རིང་། །པགས་པ་དང་ནི་སྡིགས་མཛུབ་ཕྱག །ནུབ་ཀྱི་གདན་གྱི་ཉི་མ་ལ། །དམར་པོ་ཁྲག་ཟ་བསྒོམ་པར་བྱ། །སྦལ་བའི་ཁྲག་གིས་གང་བ་ཡི། །ཐོད་པ་དག་ནི་ཕྱག་ན་བསྣམས། །བྱང་གི་གདན་གྱི་ཉི་མ་ལ། །ཤ་ཟ་བ་ནི་
རྣམ་པར་བསམ། །ཐལ་བའི་མདོག་ཅན་དྲི་དང་ཞག །ཕྱག་བསྣམས་འཇིགས་པར་བྱེད་པའོ། །བཞི་པོ་འདི་ནི་སྟོབས་དང་ལྡན། །བང་མཐོ་གྲིམས་པ་ཡི་ནི་ལུས། །མཆེ་བ་གཙིགས་ཤིང་མི་སྡུག་པ། །སྨ་ར་སྨིན་མ་མགོ་སྐྱེས་ལྡན། །ཧ་ཧར་བཞད་བཅས་ལྗགས་འདྲིལ་བ། །ཟླུམ་ཞིང་དམར་བ་ཡི་ནི་
སྤྱན། །སྨིན་མ་འཁྱོག་ཅིང་གསུས་པོ་ཆེ། །འཇིག་དུས་ཀྱི་ནི་མེ་ཡི་འོད། །དྲག་པོ་སྟག་ལྤགས་ཀྱི་ནི་གོས། །ཐོད་པའི་རུས་པས་རྣམ་པར་བརྒྱན། །ཞལ་གཅིག་ཕྱག་གཉིས་ཁྲོས་པ་སྟེ། །གཡོན་བརྐྱང་བ་ཡི་ཞབས་ཀྱིས་གནས། །ཁམས་གསུམ་རྣམ་རྒྱལ་ཞེས་སོགས་ནས། །མདངས་
འཕྲོག་མ་ཡི་མཐར་ཐུག་པར། །སྙིང་གར་ས་བོན་གདན་མཚན་མ། །དེ་ཉིད་གསུམ་དང་ལྡན་པ་བསམ། །གཞན་ཡང་ཡོངས་རྫོགས་དཀྱིལ་འཁོར་ནི། །སྔགས་རིག་པ་ཡིས་བལྟས་ནས་སུ། །རང་སྙིང་ས་བོན་འོད་ཟེར་གྱིས། །ཡེ་ཤེས་འཁོར་ལོ་ཡོངས་སུ་དགུག །དེ་ནས་མདུན་གྱི་ནམ་
མཁའ་ལ། །དེ་བཞིན་གཤེགས་པ་ཡང་དག་བཞུགས། །ཧཱུཾ་གིས་བགེགས་ནི་བསྐྲད་བྱ་སྟེ། །བསང་གཏོར་ལ་སོགས་སྦྱར་བར་བྱ། །ཛཿཧཱུཾ་བཾ་ཧོཿས་དགུག་པ་དང་། །གཞུག་དང་བཅིང་དང་དགྱེས་པར་ནི། །ཆོ་གས་དམ་ཚིག་ཡེ་ཤེས་ནི། །གཅིག་ཏུ་གྱུར་པར་རྣམ་པར་བསམ། །དེ་ནས་
སྙིང་སྔགས་འོད་ཟེར་གྱིས། །ནམ་མཁའི་རྒྱལ་བ་བཀུག་ནས་སུ། །བཞུགས་གསོལ་མེ་ཏོག་ལ་སོགས་མཆོད། །བརྟུལ་ཞུགས་དབང་བསྐུར་གསོལ་བ་གདབ། །དེ་ནས་ཡེ་ཤེས་ཆུས་གང་བའི། །རྒྱལ་བདག་རིན་ཆེན་བུམ་པ་ཡིས། །བདག་དང་དཀྱིལ་འཁོར་བཅས་པ་ལ། །
སངས་རྒྱས་རྣམས་ཀྱིས་དབང་བསྐུར་བསྒོམ། །དེ་ནས་དབང་བསྐུར་ཆུར་གྱུར་པས། །ཀུན་གྱི་དབུ་ལ་མི་བསྐྱོད་དེ། །རལ་པའི་དབུ་རྒྱན་གྱིས་བརྒྱན་པའི། །མིག་སྨན་ལྟ་བུར་བསྒོམ་པར་བྱ། །དེ་ནས་སྙིང་གའི་ས་བོན་འོད། །བྱུང་བའི་ལྷ་མོའི་ཚོགས་རྣམས་ཀྱིས། །ཡང་དག་མཆོད་

བཞིན་བདག་ཉིད་ཀྱིས། །དཀྱིལ་འཁོར་ཡང་དག་ལྡན་པར་བསམ། །དེའི་རྗེས་སུ་དཀྱིལ་འཁོར་པ་ཀུན་གྱི་གླུ་གསུམ་གྱིས་དཀྱིལ་འཁོར་གྱི་དབང་ཕྱུག་གི་བདག་ཉིད་ལ་བསྟོད་བཞིན་པར་བལྟའོ། །གསང་བའི་བདག་པོ་གཙོ་ཆེན་པོ། །སངས་རྒྱས་སྐུ་དང་འདྲ་བའི་འོད། །
གཏི་མུག་རྡོ་རྗེའི་རང་བཞིན་བདག །རྡོ་རྗེའི་སྐུ་ལ་ཕྱག་འཚལ་བསྟོད། །གསང་བའི་བདག་པོ་གཙོ་ཆེན་པོ། །སངས་རྒྱས་གཟུངས་དང་འདྲ་བའི་ངག །འདོད་ཆགས་རྡོ་རྗེའི་རང་བཞིན་བདག །རྡོ་རྗེའི་གསུང་ལ་ཕྱག་འཚལ་བསྟོད། །གསང་བའི་བདག་པོ་གཙོ་ཆེན་པོ། །སངས་རྒྱས་ཐུགས་དང་
མཚུངས་པའི་ཡིད། །ཞེ་སྡང་རྡོ་རྗེའི་རང་བཞིན་བདག །རྡོ་རྗེའི་ཐུགས་ལ་ཕྱག་འཚལ་བསྟོད། །ཅེས་པ་ནི་དཀྱིལ་འཁོར་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པའོ། །དེ་ནས་རྗེས་སུ་མཐུན་པའི་གཟུགས་ཀྱིས་འགྲོ་བའི་དོན་བྱེད་པ་ལ་རྗེས་སུ་གནས་པར་བྱ་སྟེ། སྙིང་གའི་འོད་ཀྱིས་བསྐུལ་ཏེ་དཀྱིལ་
འཁོར་པ་ཀུན་གྱིས་འོད་སྤྲོ་ཞིང་རང་གི་ལུས་ལ་སྡུད་པར་བསམ་པར་བྱའོ། །རང་ཉིད་དཀྱིལ་འཁོར་གྱི་གཙོ་བོ་ལས་རང་གི་འོད་ཡོངས་སུ་སྤྲོས་ཏེ། སེམས་ཅན་གྱི་དོན་བྱས་ཤིང་རང་ཉིད་ལ་རང་ཉིད་ཀྱི་འོད་མ་ལུས་པར་བསྡུ་བར་བྱའོ། །ཞེས་པ་ནི་ལས་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་
པའོ། །གཞན་ཡང་བསྒོམས་པས་སྐྱོ་ན་ངལ་བསོ་ཞིང་ཡོངས་སུ་བཟླས་པར་བྱ་སྟེ། སྔགས་ཀྱི་ཡི་གེ་ཕྲེང་བ་ཉིད་ཀའི་ཉི་མ་ལ་དཀྱིལ་འཁོར་གྱི་རྣམ་པར་གོ་རིམས་བཞིན་དུ་རྣམ་པར་བལྟས་ནས། སྒྲ་ཁྲོ་བོའི་ངག་གིས་རབ་ཏུ་བཟླས་སོ། །རྡོ་རྗེའི་བཟླས་པ་མགལ་མེའི་འཁོར་ལོའི་རིམ་པས་གཞན་
ཉིད་ཀྱང་ངོ་། །ཇི་སྲིད་མི་སྐྱོ་བའི་བར་དུ་བླ་མའི་མན་ངག་གིས་བཟླས་སོ། །སྔགས་ནི་ཏདྱ་ཐཱ། བྷོ་བྷོ་པན་ནཱ་ག་ཨ་དྷི་པ་ཏ་ཡེ། ཨི་དཾ་ནཱི་ལཱཾ་བ་ར་དྷ་ར་ཤ་རཱི་རཾ། བཛྲ་པཱ་ཎི་ཧྲྀ་ད་ཡཾ། ཡཿས་མ་ཏི་ཀྲ་མ་ཐ། ཨུཏྶཱ་ད་ནཱཾ། བྷ་བི་ཥྱ་ཏི། ཏདྱ་ཐཱ། བུདྡྷ་བུདྡྷ། བི་བུདྡྷ་བི་བུདྡྷ། མ་ཏི་ཀྲ་མ་ཐཱ། ཧ་ར་ཧ་ར་ནཱ་ག་ནཱཾ། པྲ་ཧ་ར་པྲ་ཧ་ར། ནཱ་ག་ནཱཾ།
ཙྪིནྡ་ཙྪིནྡ་ནཱ་ག་ཧྲྀ་ད་ཡཱ་ནི། བྷིནྡ་བྷིནྡ་ནཱ་ག་མརྨ་ཎི། བི་ས་མ་ད་ནཱ་ག་ཤ་རཱི་རཾ། བི་སྥོ་ཊ་ཡ་ནཱ་ག་ཡ་ནཱ་ག་ཡ་ཏདྱ་ཐཱ། ཧཱུཾ་ཕཊ། ནཱ་ག་བི་དཱ་ར་ཎ་ཡ་ཧཱུཾ་ཕཊ། ནཱ་གཱ་ཨུཏྶཱ་དཱ་ཡ་ཕཊ། ནཱི་ལཱཾ་བཱ་ས་ནཱ་ཡ་ཕཊ། ཨ་པྲ་ཏི་ཧ་ཏ་བ་ལ། པ་ར་ཀྲ་མཱ་ཡ་ཕཊ། ཀྲི་ཏཱནྟཱ་ཡ་ཕཊ། ཀྲཱི་ཏཱནྟཱ་རུ་པཱ་ཡ་ཕཊ། རོ་ཥ་ཎཱ་ཡ་

ཕཊ། ཏྲཱ་སཱ་ནཱ་ཡ་ཕཊ། ཀུཥྨཎྜོཏྶཱ་ཡ་ཕཊ། པྲེ་ཏ་བི་ཤཱ་ཙི་བི་ནཱ་ཤ་ཀ་རཱ་ཡ་ཕཊ། ཡཀྵ་ཨ་པསྨཱ་ར་བི་ནཱ་ཤ་ཀ་རཱ་ཡ་ཕཊ། ཧ་ས་ཧ་ས། དྷ་ར་དྷ་ར། མཱ་ར་ཡ་མཱ་ར་ཡ། ན་ཤ་ཡ་ན་ཤ་ཡ། སརྦ་བིགྷྣཱཾ། བི་ནཱ་ཤ་ཀ་རཱ་ཡ་ཕཊ། སརྦ་ཤ་ཏྲཱུཾ་སཾ་གྷ་བི་ནཱ་ཤ་ཀ་རཱ་ཡ་ཕཊ། ནཱི་ལཱཾ་བ་ར་དྷ་ར་བཛྲ་པཱ་ཎི་རཱ་
ཛྙཱ་པ་ཡ་ཏི་སྭཱ་ཧཱ་ཞེས་བྱའོ། །བཟླས་པ་དང་བསྒོམས་པས་སྐྱོ་ན་སྔགས་པས་སྐྱོ་བ་ཡོངས་སུ་སྤང་བའི་ཕྱིར་ལུས་གསོ་བའི་ཆོ་ག་བྱ་སྟེ། བདུད་རྩི་ལྔ་ཞུ་གང་བ་ཡི། །སྤྱི་བོའི་སྟེང་དུ་ཟླ་དཀྱིལ་འཁོར། །ཨོཾ་ཡིག་བྱིན་རླབས་བསྒོམ་པར་བྱ། །དེ་ཡི་འོད་ཟེར་དཀར་སྤྲོས་ཏེ། །ཡེ་ཤེས་བདུད་རྩི་སངས་
རྒྱས་ལ། །འབད་པས་ཡང་དག་དགུག་པར་བྱ། །དེ་དག་ཉིད་ལས་བསྒྲུབ་བྱ་སྟེ། །རོ་གཅིག་གཉིས་མེད་དག་ཏུ་བྱ། །སྲོག་དང་རྩོལ་བ་བསྡམས་པ་ལས། །དེ་ནས་ལེགས་རྒྱུན་ལ་བབས་པས། །བདག་ཉིད་ལུས་ལ་སོགས་པ་སྟེ། །གསོ་བཞིན་པར་ནི་བལྟ་བར་བྱ། །དེ་ནས་ལངས་
པར་འདོད་ན་ནི། །སྨོན་ལམ་དག་ཀྱང་གདབ་པར་བྱ། །ཕྱག་ན་རྡོ་རྗེ་གོས་སྔོན་ཅན། །གོ་འཕང་མྱུར་དུ་ཐོབ་པར་ཤོག །བསོད་ནམས་འདི་ཡིས་འགྲོ་བ་ནི། །མ་ལུས་པ་ཡིས་ཐོབ་པར་ཤོག །དེ་ནས་དེ་ཉིད་གསུམ་བརྗོད་པས། །རང་སྙིང་ས་བོན་རང་དཀྱིལ་འཁོར། །བསྡུས་ཏེ་ལྷ་ཡི་
རྣམ་པ་ཡི། །ང་རྒྱལ་དག་གིས་གནས་པར་བྱ། །ཉིན་མོ་ཐུན་གཉིས་རྣལ་འབྱོར་བས། །རང་ཉིད་ས་བོན་ལས་བྱུང་བའི། །ཡོངས་སུ་རྫོགས་པའི་དཀྱིལ་འཁོར་ཀུན། །སྔོན་བཞིན་དུ་ནི་རབ་ཏུ་བྱ། །དེ་ལྟར་ནུབ་ཀྱི་ཐུན་མཚམས་སུ། །འོན་ཀྱང་ཁྱད་པར་ཡོངས་གྱུར་ཏེ། །ཡེ་ཤེས་འཁོར་ལོ་
གཤེགས་སུ་གསོལ། །འཁོར་ལོ་རང་གི་གཉུག་མར་བསྡུ། །ཡེ་ཤེས་འཁོར་ལོ་གཤེགས་སུ་གསོལ་བའི་སྔགས་ནི། ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འདི་རུ་བྱོན་པར་མཛོད། །
མུཿཞེས་བྱའོ། །ཡེ་ཤེས་འཁོར་ལོ་གཤེགས་སུ་གསོལ། །གཉུག་མར་དཀྱིལ་འཁོར་བསྡུ་བྱ་སྟེ། །མལ་སྟན་ཀླུ་རུ་བསྒོམ་བྱ་ཞིང་། །བློ་ལྡན་སེང་གེ་བཞིན་དུ་ཉལ། །སྔོན་གསུངས་ཀླུ་ནི་གསུམ་པོ་ཡིས། །ཐོ་རངས་བདག་ལ་བསྐུལ་བཞིན་པར། །ཀླུ་དབང་རང་ཉིད་བསམ་པར་བྱ། །ལངས་ནས་

སྔོན་གྱི་ཞག་བཞིན་དུ། །བསྒོམ་པའི་རིམ་པ་རབ་ཏུ་བྱ། །དངོས་སུ་ཐུན་ནི་སོ་སོ་ལ། །ཇི་སྲིད་དངོས་གྲུབ་གྱུར་དེ་བཞིན། །བགེགས་རྣམས་ཉེ་བར་ཞི་དོན་དུ། །སྔགས་རིག་པ་ཡིས་ཐུན་ལ་ནི། །ཇི་ལྟའི་གདམས་ངག་གིས་སྦྱངས་ཏེ། །ཆོ་ག་བཞིན་དུ་གཏོར་མ་སྦྱིན། །རྒྱལ་
བས་དབང་བསྐུར་བར་བསམས་ནས། །རང་ཉིད་རྣམ་པར་དག་འདོད་བྱ། །རྩ་སྔགས་ལན་གསུམ་བརྗོད་ནས་སུ། །བློ་ལྡན་བྱམས་པས་གསོལ་བར་བསམ། །རྐང་འོག་སྣ་ཚོགས་རྡོ་རྗེ་ནི། །ཧཱུཾ་ཡིག་ལས་ནི་བྱུང་བར་བསམ། །དེ་ཡི་སྟེང་དུ་ཧཱུཾ་སྐྱེས་