Luận tạng Tây Tạng (Tengyur) — Tập 66

ྡོ་རྗེ་ཉི་མ་ཉིད་བཞིན་དུ། །རྗེས་སུ་བྱེད་པར་གནས་པ་ཡིན། །སྡུག་བསྔལ་དང་ནི་ཀུན་འབྱུང་དང་། །འགོག་
དང་ལམ་ཡང་དེ་བཞིན་དུ། །ཆོས་ཤེས་རྗེས་སུ་ཤེས་པ་དང་། །ཀུན་རྫོབ་ཤེས་དང་དེ་བཞིན་དུ། །དོན་དམ་དེ་བཞིན་མི་སྐྱེ་བ། །ཟད་པ་ཤེས་པའི་ཡེ་ཤེས་ནི། །རང་དོན་ཕུན་སུམ་ཚོགས་དགེ་བའི། །རིན་ཆེན་རྒྱལ་མཚན་བསྣམས་པ་དང་། །མདོག་ལྗང་རྡོ་རྗེ་རྒྱལ་
མཚན་གྱི། །ཕུན་སུམ་ཚོགས་པར་བསྒོམ་པར་བྱ། །གཞན་དོན་ཕུན་ཚོགས་བདག་ཉིད་ཀྱི། །དེ་བཞིན་ཟླ་བའི་འོད་ཟེར་མདོག །རྡོ་རྗེ་བཞད་པ་ལ་བརྟེན་པ། །སོ་ཡི་ཕྲེང་བས་རྣམ་པར་བརྒྱན། །ཕུང་པོ་ཁམས་དང་སྐྱེ་མཆེད་དང་། །བདེན་པ་རྟེན་འབྲེལ་ཐུབ་པ་ཡི། །
གནས་དང་གནས་མིན་བདག་པོ་དང་། །དུས་གསུམ་བདེན་པ་རྣམ་པ་བཞི། །འདུས་བྱས་འདུས་མ་བྱས་དགེ་བ། །རྡོ་རྗེ་ཆོས་ཀྱིས་བསྒོམ་པར་བྱ། །མདོག་དམར་ཕྱག་གཡོན་པདྨ་ནི། །བསྣམས་ནས་གཡས་པས་འབྱེད་པར་མཛད། །གཅིག་དང་རྒྱུ་དང་ཟ་བ་དང་། །
བྱེད་པ་དང་ནི་དབང་སྒྱུར་དང་། །བདག་པོའི་དོན་དང་རྟག་པ་དང་། །ཉོན་མོངས་པ་དང་དག་པའི་གནས། །རྣལ་འབྱོར་ཅན་དང་མ་གྲོལ་གྲོལ། །བདག་ཏུ་འཛིན་པ་སྐྱེ་བ་ཉིད། །དེ་དག་གཅོད་པ་སྐུ་མདོག་གནག །ཕྱག་ན་པུསྟི་བསྣམས་པ་དང་། །ཉོན་མོངས་གཅོད་པའི་

རལ་གྲི་བསྣམས། །རྡོ་རྗེ་རྣོན་པོ་ཞེས་བརྗོད་དོ། །དད་དང་བརྩོན་འགྲུས་དྲན་བསམ་གཏན། །ཤེས་རབ་དེ་བཞིན་ཤ་ཡི་སྤྱན། །ལྷ་དང་ཤེས་རབ་ཆོས་དང་ནི། །སངས་རྒྱས་སྤྱན་དང་དབང་པོ་ཡི། །རྡོ་རྗེ་འཁོར་ལོ་སྐུ་མདོག་སེར། །ལྷ་མོ་འཁོར་ལོ་བསྣམས་པས་
བསྐོར། །གནས་དང་གནས་མིན་རྣམ་སྨིན་དང་། །མོས་པ་དང་ནི་སྣ་ཚོགས་ཁམས། །དབང་པོ་ཀུན་འགྲོ་ལམ་དག་དང་། །ཉོན་མོངས་རྣམ་པར་བྱང་བ་དང་། །སྔོན་གནས་རྗེས་དྲན་སྐྱེ་འཆི་དང་། །ཟག་པ་ཟད་པ་ཉིད་ཀྱང་སྟེ། །རྡོ་རྗེ་སྨྲ་བ་ཟངས་ཀྱི་མདོག །ཕྱག་གིས་
ལྕེ་བསྣམས་འཁོར་གྱིས་བསྐོར། །ནམ་མཁའ་རྣམ་ཤེས་མཐའ་ཡས་དང་། །དེ་ལས་གཞན་པ་ཟིལ་གནོན་བརྒྱད། །རྡོ་རྗེ་ལས་ནི་སྐུ་མདོག་ལྗང་། །སྣ་ཚོགས་རྡོ་རྗེ་དྲིལ་བུ་བསྣམས། །འབྱུང་བ་རྣམ་པ་བཞི་དག་དང་། །སྔོན་པོ་སེར་པོ་དཀར་དམར་དང་། །ནམ་མཁའ་
དེ་བཞིན་སེམས་དང་ནི། །ཟད་པར་རྣམ་པར་དག་ལྡན་པའི། །བསྲུང་བ་སེར་པོ་གོ་ཆ་བསྣམས། །རྩ་བའི་མཚན་ཉིད་དེ་ཁོ་ན། །ཕྱིན་ཅི་མ་ལོག་མཚན་ཉིད་དང་། །འབྲས་བུ་རྒྱུ་ཡི་དེ་ཁོ་ན། །ཕྲ་བ་དང་ནི་རགས་པ་དང་། །གྲགས་པ་རྣམ་པར་དག་ཡུལ་དང་། །བསྡུ་
དང་དབྱེ་བའི་མཚན་ཉིད་དང་། །མཁས་དེ་ཁོ་ན་རྣམ་བཅུ་ནི། །རྡོ་རྗེ་གནོད་སྦྱིན་སྐུ་མདོག་གནག །ཕྱག་གཉིས་མཆེ་བ་བསྣམས་པའོ། །ཚེ་དང་སེམས་དང་ཡོ་བྱད་དང་། །ལས་དང་སྐྱེ་བ་མོས་པ་དང་། །སྨོན་ལམ་དང་ནི་རྫུ་འཕྲུལ་དང་། །ཡེ་ཤེས་ཆོས་ལ་དབང་
འདི་རྣམས། །རྡོ་རྗེ་ཁུ་ཚུར་སྐུ་མདོག་དཀར། །ཕྱག་གཉིས་ཁུ་ཚུར་བསྣམས་པའོ། །སོ་སོའི་གཙོ་བོའི་སྔགས་ཀྱིས་བསྐྱེད། །རང་རང་སྔགས་ཀྱི་མཆོད་པ་དང་། །རྡོ་རྗེ་སྐྱིལ་ཀྲུང་ཕྱེད་ཀྱིས་ནི། །འདི་དག་རིམ་བཞིན་གནས་པ་ཡིན། །འདི་ལྟར་བསྒོམ་པའི་རྣལ་
འབྱོར་པ། །ཡོན་ཏན་ཕུན་སུམ་ཚོགས་པ་ནི། །འདི་སྐད་གསུངས་པ་བཞིན་དུ་ཐོབ། །དངོས་གྲུབ་གཞན་ནི་སྨོས་ཅི་དགོས། །མེ་མཚམས་སྒེག་མོ་སྐུ་མདོག་དཀར། །ཕྱག་གཉིས་རྡོ་རྗེ་བསྣམས་ནས་ནི། །སྒེག་དང་བཅས་པས་དཀུར་བརྟེན་ནས། །བསྐལ་བཟང་

ཐམས་ཅད་འབྱུང་བའི་གནས། །བདེན་བྲལ་རྡོ་རྗེ་ཕྲེང་བ་མ། །མདོག་སེར་རིན་ཆེན་ཕྲེང་བ་བསྣམས། །རླུང་དུ་གླུ་མ་སྐུ་མདོག་དམར། །པི་ཝང་བརྡུང་བའི་མཆོག་ཡིན་ནོ། །དབང་ལྡན་གར་མ་རྡོ་རྗེ་ནི། །རྩེ་གཅིག་བསྣམས་ནས་གར་མཛད་དོ། །
བདུག་པ་མེ་ཏོག་མར་མེ་དྲི། །སྤོས་ཁང་མེ་ཏོག་ཕྲེང་བ་དང་། །མར་མེ་དྲི་ཡི་དུང་ཆོས་བསྣམས། །སྐུ་མདོག་སྒེག་མོ་ལ་སོགས་བཞིན། །དེ་ཡི་ཕྱི་རོལ་དཀྱིལ་འཁོར་དུ། །སེམས་ཅན་ཀུན་དོན་བྱེད་བདག་ཉིད། །དཔག་མེད་གཟི་བརྗིད་རྙེད་དཀའ་བའི། །གང་
འདི་བྱང་ཆུབ་སེམས་དཔའ་རྣམས། །སྐུ་ལུས་མཛེས་ཤིང་ཉེར་ཞི་བ། །ཕྱག་གཉིས་པ་ལ་ཞལ་གཅིག་པ། །པདྨ་ཟླ་བའི་དབུས་སུ་ནི། །སེམས་དཔའི་སྐྱིལ་ཀྲུང་གིས་ལེགས་བཞུགས། །མགོན་པོ་བྱམས་པ་ལ་སོགས་པ། །རིན་ཆེན་ཅོད་པན་སྣང་བར་བསྒོམ། །
དེ་ལ་བྱམས་པ་ཕྱག་གཡས་ཀྱིས། །མཆོད་སྦྱིན་དཔུང་རྒྱན་མཛེས་པ་དང་། །གཉིས་པ་ཕྱག་གཉིས་ཀླུ་ཤིང་ནི། །མཛེས་པ་ཡང་དག་བསྣམས་པ་ཡིན། །འཇམ་དབྱངས་ཕྱག་ན་རལ་གྲི་ནི། །རིན་པོ་ཆེ་ཡིས་མཛེས་པ་བསྣམས། །ཆོས་ཀྱི་སྦྱིན་པ་རྗེས་བྱེད་པའི། །
གཞན་གྱིས་ཤེས་རབ་པུསྟི་བསྣམས། །སྤོས་ཀྱི་གླང་པོ་གསལ་བྱེད་པ། །དྲི་ཡི་དུང་ཆོས་བསྣམས་པ་དང་། །གཡས་པའི་ཕྱག་གིས་མཆོག་སྦྱིན་དང་། །སྤྱི་བོར་འོད་དཔག་མེད་རོལ་ལྡན། །ཡེ་ཤེས་ཏོག་ཅེས་བྱ་བ་ནི། །ཐོད་ཀྱིས་མཚན་པའི་ཅོད་པན་བསྣམས། །
ཟླ་རྒྱས་རྣམ་པར་མཛེས་པ་ཡི། །བཞི་པོ་དྲི་མ་མེད་པ་འདི། །གཏི་མུག་མུན་པ་ལྟ་བུ་ནི། །འཇོམས་པར་བྱེད་པ་ཤར་གྱི་ཡིན། །དཔལ་ལྡན་བཟང་སྐྱོང་ཞེས་བྱ་བ། །སྐུ་མདོག་གསེར་གྱི་མདོག་འདྲའི་འོད། །རིན་ཆེན་འབར་བ་ལྷོ་ཕྱོགས་སུ། །ནོར་བུ་རྒྱལ་མཚན་
ཕྱག་ན་བསྣམས། །ཕྱག་གཡོན་དེ་བཞིན་ནམ་མཁའ་ཡི། །མཛོད་ནི་རྒྱ་ཆེར་སྣང་བའོ། །བློ་གྲོས་རྒྱ་མཚོ་གསེར་གྱི་མདོག །ཕྱག་གཉིས་བསྐལ་པ་བཟང་པོ་ཡི། །དཔག་བསམ་ཤིང་དང་བུམ་པ་བཟང་། །སེམས་ཅན་དོན་མཆོག་འཛིན་པ་ཡིན། །བློ་གྲོས་

མི་ཟད་ཕྱག་གཡོན་གྱིས། །པུ་སྟིས་མཚན་པའི་རལ་གྲི་བསྣམས། །སྤོབས་པ་བརྩེགས་པ་དེ་བཞིན་དུ། །ཕྱག་ན་རལ་གྲིས་མཚན་པ་ཡིན། །གཤིན་རྗེའི་ཕྱོགས་སུ་བཞུགས་པ་རྣམས། །སྐུ་མདོག་སེར་པོ་འོད་ཟེར་ལྡན། །བྱང་ཆུབ་ཕུན་ཚོགས་མི་ཟད་པའི། །
འདི་དག་སེམས་ཅན་རྣམས་ལ་བརྟེན། །མཐུ་ཆེན་ཐོབ་པ་རལ་གྲི་དང་། །རྒྱལ་མཚན་དག་གིས་ལེགས་པར་བརྒྱན། །ངན་སོང་ཀུན་འདྲེན་ཞེས་བྱ་བ། །དཔལ་བེའུ་འཛིན་ཅིང་བྱམས་པར་བྱེད། །མྱ་ངན་ཀུན་འཇོམས་བློ་གྲོས་ནི། །ཕྱག་ན་གཡུང་དྲུང་འཁྱིལ་
བ་བསྣམས། །ཟླ་བས་མཚན་པའི་དྲིལ་བུ་དང་། །དྲིལ་བུའི་སྒྲ་ཡི་རྣམ་པ་ཡིས། །མཚན་པའི་གདུགས་ནི་འཛིན་པ་དང་། །དམན་པ་དགའ་བ་ཕུན་ཚོགས་པའི། །སྐྱེད་པའི་ལུས་ཀྱི་དྲ་བ་ཅན། །པདྨ་གེ་སར་ལྟར་དམར་བ། །ནུབ་ཀྱི་ཕྱོགས་སུ་བཞུགས་པའོ། །
ཟླ་འོད་གཞོན་ནུ་གསལ་བ་ཡིན། །པུ་སྟིས་མཚན་པའི་རལ་གྲི་བསྣམས། །སྐལ་ལྡན་རིན་ཆེན་མཛོད་ཆེན་པོ། །འོད་དཔག་མེད་ནི་བསྣམས་པ་ཡིན། །ནམ་མཁའི་སྙིང་པོ་ཕྱག་གཡས་ཀྱིས། །རིན་པོ་ཆེ་ནི་བཏེག་ནས་བསྣམས། །སྒྲིབ་པ་ཐམས་ཅད་རྣམ་སེལ་
བ། །ཕྱག་གཡས་རལ་གྲི་བསྣམས་པ་དང་། །སྣ་ཚོགས་རྡོ་རྗེ་གཡོན་ན་བསྣམས། །མྱ་ངན་ཐམས་ཅད་སེལ་བ་ཡིན། །བྱང་གི་ཕྱོགས་སུ་བཞུགས་པ་རྣམས། །ཐམས་ཅད་སྐུ་མདོག་ལྗང་གུ་ཡིན། །ཡང་ན་ཐམས་ཅད་རིམ་བཞིན་དུ། །གཡས་པའི་ཕྱག་ན་རྡོ་རྗེ་
དང་། །རིན་པོ་ཆེ་དང་ཆུ་སྐྱེས་དང་། །སྣ་ཚོགས་རྡོ་རྗེ་བསྣམས་པ་དང་། །ཇི་ལྟར་རང་གི་ཕྱག་རྒྱས་མཚན། །ཕྱག་གཡོན་དྲིལ་བུ་བསྣམས་པ་ཡིན། །འདི་རྣམས་རིམ་བཞིན་སྔགས་ཀྱིས་ནི། །ཉོན་མོངས་མ་ལུས་སེལ་བ་ཡིན། །ཨོཾ་མེ་ཏྲཻ་ཡ་སཾ་ཧཱ་ར་ན་ཡ་སྭཱ་ཧཱ། ཨོཾ་
མཉྫུ་ཤྲཱི་ཡེ་སྭཱ་ཧཱ། ཨོཾ་ཧྲཱིཿགནྦྷ་ཧ་ཏི་ཡེ་སྭཱ་ཧཱ། ཨོཾ་ཛྙཱ་ན་ཀེ་དུ་ཡེ་སྭཱ་ཧཱ། ཨོཾ་པ་ཏྲ་ལ་ཡེ་སྭཱ་ཧཱ། ཨོཾ་ས་ཀ་ར་མ་ཏི་ཡེ་སྭཱ་ཧཱ། ཨོཾ་ཨཀྵ་ཡེ་ཧྲི་ཨཀྵ་ཡ་ཀརྨ་ཨཱ་བ་ར་ཎ་བི་ཤུདྡྷ་ནེ་སྭཱ་ཧཱ། ཨོཾ་པྲ་ཏི་བྷ་ན་ཀུ་ཊེ་ཧཱུཾ་སྭཱ་ཧཱ། ཨོཾ་སྠ་མི་མ་ཧཱ་སྠ་མ་བ་དྷ་སྭཱ་ཧཱ། ཨོཾ་ཨཱ་ཀ་ར་ཡ་སྭཱ་ཧཱ། ཨོཾ་སརྦ་

ཀུ་ཤ་ནེ་ནེར་གྷ་ཏ་ན་མ་དྷཱི་ཧཱུཾ་སྭཱ་ཧཱ། ཨོཾ་ཛྭ་ལེ་ན་མ་ཧཱ་ཛྭ་ལ་ནི་ཧཱུཾ་སྭཱ་ཧཱ། ཨོཾ་ཙནྡྲ་སུ་ཙནྡྲི་ཙནྡྲ་བྱཱ་བ་ལོ་ཀི་ནི་སྭཱ་ཧཱ། ཨོཾ་ཨ་མྲྀ་ཏཱ་བྷཱ་ཏོ་ཧཱུཾ་སྭཱ་ཧཱ། ཨོཾ་ཁ་ཨཱ་ཀ་ཤ་གརྦྷ་ཡ་སྭཱ་ཧཱ། ཨོཾ་སརྦ་ནི་ཝ་ར་ཎི་བི་ཤྐཾ་བི་ནི་སྭཱ་ཧཱ། རྡོ་རྗེ་ཧཱུཾ་མཛད་དབང་ལྡན་དུ། །སྐུ་མདོག་
ནག་པོ་ཞལ་བཞི་པ། །དང་པོ་ཁྲོ་ཞིང་སྒེག་པ་དང་། །གཡས་པ་དྲག་པོ་འཇིགས་རུང་དང་། །དེ་ལས་གཞན་པ་དཔའ་བོ་དང་། །སྟེང་གི་ཞལ་ནི་རྔམ་པ་ཡིན། །སྙིང་གར་ཁམས་གསུམ་རྣམ་རྒྱལ་གྱི། །ཕྱག་རྒྱ་བཅིངས་པའི་ཕྱག་གཉིས་ནི། །རྡོ་རྗེ་ཁུ་
ཚུར་གཉིས་བཅིངས་པ། །རྒྱབ་དུ་སྦྱར་ནས་མཐེའུ་ཆུང་གཉིས། །རྡོ་རྗེ་ལུ་གུ་རྒྱུད་བཅིངས་ནས། །མཛུབ་མོ་གཉིས་ནི་ལེགས་པར་སྦྱར། །གཡས་ན་རལ་གྲི་ལྕགས་ཀྱུ་མདའ། །གཞུ་དང་སྦྲུལ་ཞགས་རྡོ་རྗེ་གཡོན། །དེ་ཡི་ཞབས་ཀྱི་བཀོད་པ་ཡིས། །དྲེགས་པ་དབང་
ཕྱུག་ཆེན་པོ་དང་། །ཨུ་མའི་ནུ་མ་གཡས་པ་ཡི། །ཞབས་ཀྱིས་གནོན་པ་བཞུགས་པ་ཡིན། །རྡོ་རྗེ་མེ་ལྟར་འབར་བ་ནི། །མིའུ་ཐུང་དུད་པའི་མདོག་ཅན་ནོ། །གཡས་ན་རྡོ་རྗེ་རལ་གྲི་དང་། །དེ་བཞིན་དུ་ནི་འཁོར་ལོ་བསྣམས། །གཡོན་ན་དྲིལ་བུ་ཞགས་པ་གཞུ། །
བ་དན་སྣ་ཚོགས་གཡོན་པས་བརྒྱན། །ཁ་ཊྭཱཾ་ག་ཡི་གཡེར་ཁ་ཡི། །སྒྲ་ཡིས་ཕྱོགས་ཀུན་ཁྱབ་པ་དང་། །ཁྱབ་འཇུག་ཆུང་མར་བཅས་པ་ལ། །གཡས་བརྐྱང་བ་ཡི་དགའ་བས་བཞུགས། །འཁྲུལ་པ་རྣམ་པར་དག་ངོ་བོ། །དེ་ནི་སྤངས་པའི་མཆོག་ཡིན་ནོ། །དེ་བཞིན་
བདེན་བྲལ་མཚམས་སུ་ནི། །དཔལ་ལྡན་དཔའ་བོ་ཁྲག་འཐུང་རྒྱལ། །དང་པོའི་ཞལ་ནི་དྲག་པོ་དང་། །གཡས་ཞལ་དགའ་བའི་རྒྱལ་བ་དང་། །སྟེང་མ་ཟ་བར་བྱེད་པ་དང་། །གཡོན་པ་མཆོག་ཏུ་སྒེག་པར་གནས། །འབར་བའི་རྡོ་རྗེ་སྣ་ཚོགས་ཁ་ཊྭཱཾ་སྒེག་པ་དང་། །འཇིགས་
བྱེད་ལྤགས་དམར་རློན་པ་རིམ་པར་ནི། །གཡས་དང་གཡོན་གྱི་ཕྱག་གིས་མདའ་དང་གཞུ། །ཕྱག་གཉིས་ཀྱིས་ནི་ཁྲག་གིས་བཀང་བའི་ཐོད་པ་བསྣམས། །གཡས་བརྐྱང་ཞབས་ཀྱིས་འཇིགས་བྱེད་ཆུང་མར་བཅས་པ་མནན། །འགྲོ་བའི་བྱེད་པོ་ཀེང་རུས་རྒྱན་དང་སྐ་རགས་དང་། །

སངས་རྒྱས་མཚན་མ་ནང་གནས་པའི། །ཐོད་པ་ལྔ་ཡི་ཅོད་པན་གསལ། །བགེགས་ཚོགས་མ་ལུས་རེངས་བྱེད་པའི། །སྤྲིན་ནག་པོ་ཡི་སྐུ་འཆང་བ། །རྣམ་པར་དག་བྱེད་མགོ་བོ་ཡི། །ཕྲེང་བ་རུས་པའི་དུམ་བུ་ཡི། །སྦྲུལ་ནག་པོ་ཡི་ངོ་བོས་ནི། །འཇིགས་པ་མ་
ལུས་སེལ་བ་ཡིན། །འདོད་ཆགས་ཉེ་བར་ཞི་བའི་མི་བཟད་སྒེག་པའི་སྤྱོད་པ་དང་། །ཆགས་དང་བྲལ་བ་སྤངས་པས་སྒྱུ་མའི་ཕྲེང་བ་འཆང་བ་ཡིན། །མང་པོ་ཇི་ལྟར་གཅིག་ཡིན་གཅིག་ཏུ་རྟོགས་ནས་གཞན་པ་ཡིན། །དེ་ཡང་སྐྱེ་བ་དེ་ཉིད་དངོས་ཀུན་བདག་པོ་ཉིད་ཁོ་ན། །
རྣལ་འབྱོར་སྒོམ་པར་བྱེད་པ་མྱ་ངན་འདས་མཆོག་ཡིན། །འོད་ཟེར་འབར་བ་དཔལ་ལྡན་ཁྲག་འཐུང་ཡེ་ཤེས་ཕྱག་རྒྱ་ཡིན། །རླུང་གི་ཕྱོགས་ཀྱི་རྟ་མཆོག་ནི། །དེ་ནི་ཞབས་བཞིར་ཡང་དག་ལྡན། །སྤྱན་གསུམ་ཁྲོ་བོ་སྒེག་པ་ཡི། །གཙོ་བོའི་ཞལ་གསུམ་གཡས་པ་ནི། །
དྲག་པོ་གཡོན་པ་ཚངས་པ་དང་། །རྟ་གདོང་སྟེང་མ་ལྗང་གུའོ། །བ་དན་གསུམ་ལྡན་གཡས་པ་ནི། །སྟེང་དུ་སློང་བར་བྱེད་པའི་ཚུལ། །རལ་གྲི་མདའ་ནི་འཛིན་པ་གཞན། །ཐོད་པ་སྣ་ཚོགས་ཆུ་སྐྱེས་དང་། །མདུང་ཐུང་དང་ནི་དབྱུག་པ་དང་། །བཞི་ནི་གཡོན་པའི་ཕྱག་
བཞི་ལའོ། །གཡས་ཀྱི་གཙོ་བོའི་ཞབས་ཀྱིས་ནི། །དཔལ་མོ་དབང་མོ་གཞན་གྱིས་ནི། །ཆགས་མ་དགའ་མ་མནན་པ་ཡིན། །ཏིང་འཛིན་རེག་པ་ཐོབ་བྱེད་ཡིན། །གཡོན་གྱི་དབང་པོ་མྱོས་བྱེད་དང་། །མྱོས་དང་བརྒྱལ་བྱེད་དེ་བཞིན་དུ། །རྗེས་སུ་འཛིན་པར་བྱེད་པ་དང་། །
འདི་ཡི་རྟ་སྐད་འཚེར་བ་ཡིས། །བདུད་རྣམས་སྙིང་ནི་འགས་པ་དང་། །སྤྲོས་པས་བྱང་ཆུབ་འགྲོ་བར་བྱེད། །བཞི་པོ་འདི་དག་འབར་བ་ཡི། །དུས་མཐའི་མེ་ཡིས་ཀུན་ཁྱབ་དང་། །སྤྲོ་ཞིང་གྱེན་དུ་འབར་བའོ། །གཙུག་གིས་ནོར་བུས་གསལ་བའི་སྐུ། །ཨོཾ་སུཾ་བྷ་ནི་
སུཾ་བྷ་ཧཱུཾ། གྲྀཧྞ་གྲྀཧྞ་ཧཱུཾ། གྲྀཧྞཱ་པ་ཡ་གྲྀཧྞཱ་པ་ཡ་ཧཱུཾ། ཨཱ་ན་ཡ་ཧོ་བྷ་ག་བཱན་བིདྱཱ་རཱ་ཛ་ཧཱུཾ་ཕཊ། ཨོཾ་བཛྲ་ཛྭ་ལ་ཨ་ན་ལཱརྐ་ཧཱུཾ། ཨོཾ་ཧེ་རུ་ཀ་བཛྲ་ས་མ་ཡ་ཧི། སརྦ་དུཥྚ་ས་མ་ཡ་མུ་ཏ་པཉྫ་ཀ་ཧཱུཾ་ཕཊ། ཨོཾ་སུཾ་བྷ་ནི་སུཾ་བྷ་ཧཱུཾ་ཕཊ། ཅེས་བྱ་རྒྱལ་པོའི་སྲས་ཀྱི་དཀྱིལ་འཁོར་ནི། །

གང་གི་སེམས་ཀྱིས་སྤྲོ་བ་འཇུག་པ་ཡིན། །ལྷ་ཡི་དབང་པོ་མཆོད་པ་བྱེད་པ་འདི། །ཐོས་པའི་ལམ་དུ་སོང་བས་སྤོས་ཆུའི་ཆར་འབེབས་པས། །འཇིག་རྟེན་ཀུན་གྱི་སྡིག་པའི་མེ་དཔུང་ཞི་བར་བྱེད། །དེ་ནས་རྡོ་རྗེ་ཤུགས་ཀྱིས་ནི། །ཕྱི་རོལ་དབང་
ལྡན་ལ་སོགས་ནས། །བརྩམས་ནས་ཆོ་ག་བཞིན་བལྟས་ནས། །མཆོད་པ་ལ་སོགས་རྣལ་འབྱོར་རྒྱལ། །སྔགས་ནི་དང་པོར་ཕྱག་འཚལ་དང་། །སྭཱ་ཧཱའི་མཐའ་ཅན་གཟི་བརྗིད་ཆེ། །བཞི་པའི་མཐའ་ཅན་རང་རང་མིང་། །དབུས་སུ་དེ་ནི་སྦྱར་བར་བྱ། །ཕྱག་
འཚལ་ཐལ་མོ་སྦྱར་བྱས་ནས། །སྤྱི་བོར་ཐལ་མོ་འཇོག་པ་ཡིན། །མདོག་དང་ཕྱག་ལ་སོགས་པ་དག །ཆུང་མ་རང་རང་བདག་པོ་མཚུངས། །རྩེ་གསུམ་ཐོད་པ་འཛིན་པ་དང་། །ཕྱག་བཞི་པ་ལ་སྤྱན་གསུམ་པ། །ཅོད་པན་རལ་གྲི་ཁྱུ་མཆོག་གདན། །ལྷ་མོ་ཉེ་
བར་གནས་པའང་ཡིན། །ཕྱག་གཉིས་པདྨ་ཕྲེང་བ་དག །ཚངས་པའི་སྤྱི་བོར་ཐལ་མོ་སྦྱར། །མདོག་སེར་ཞལ་བཞི་ངང་པའི་གདན། །ཕྱག་གཉིས་དབྱུག་པ་སྤྱི་བླུགས་བསྣམས། །ཕྱག་གཉིས་འཁོར་ལོ་དང་བཅས་དུད། །མགོ་ལ་ལེགས་བཅིངས་ཐལ་མོ་
སྦྱར། །མདོག་ནག་མདའ་གཞུ་བེ་ཅོན་བསྣམས། །མཁའ་ལྡིང་གདན་ལ་དཔལ་བེའུས་མཚན། །འདི་དག་འཁོར་དང་བཅས་པ་ནི། །ཤ་རྩི་དཔའ་བོ་གསེར་གླང་པོ། །གཤིན་རྗེ་མ་ཧེའི་གདན་ལ་བཞུགས། །ནག་པོ་དབྱིག་པ་མདུང་ཐུང་བསྣམས། །ཆུ་ལྷ་ཆུ་
སྲིན་སྟེང་དུ་ནི། །དཀར་པོ་དུང་དང་སྦྲུལ་ཞགས་འཛིན། །གཡས་གཡོན་ལྕགས་ཀྱུ་དབྱུག་ཏོ་དང་། །ལུས་ངན་སེར་པོ་མི་ལ་བཞུགས། །ཕྱག་གཉིས་ཕྲེང་བ་བླུགས་གཟར་དང་། །སྤྱི་བོར་ཐལ་སྦྱར་མེ་ལྷ་ནི། །མདོག་སེར་ར་སྐྱེས་དག་ལ་བཞུགས། །དབྱུག་པ་
གུནྡྷེ་འཛིན་པའོ། །བདེན་བྲལ་མི་རོའི་གདན་ལ་བཞུགས། །རལ་གྲི་དང་ནི་ཕུབ་འཛིན་པའོ། །རླུང་ལྷ་བ་དན་བསྣམས་པ་དང་། །རི་དྭགས་གདན་ལ་སྔོ་བསངས་མདོག །ཁྱུ་མཆོག་ལ་གནས་དབང་ལྡན་ནི། །སྤྱི་བོར་ཐལ་མོ་སྦྱར་བ་འཆིང་། །རྩེ་གསུམ་ཐོད་

འཛིན་ཁ་དོག་དཀར། །འདི་ཀུན་འཁོར་ལ་ཕྱོགས་པའོ། །པདྨ་ཉི་མ་འཆང་བ་ནི། །ཉི་མ་རྟ་ཡི་གདན་ལ་བཞུགས། །ཟླ་བ་ངང་པ་ལ་གནས་པ། །དཀར་པོ་ཟླ་བ་ཆུ་སྐྱེས་བསྣམས། །མིག་དམར་མདོག་དམར་པདྨའི་གདན། །གཡས་པའི་ལག་གིས་ཆུ་གྲི་
དང་། །དེ་ལས་གཞན་པ་མི་མགོ་ཟ། །པདྨ་ལ་གནས་གཟའ་ལག་ནི། །མདོག་སེར་མདའ་གཞུ་བསྣམས་པའོ། །བླ་མ་དཀར་པོ་ཆུ་སྐྱེས་གདན། །ཕྲེང་བ་དང་ནི་སྤྱི་བླུགས་བསྣམས། །དེ་བཞིན་པ་ཝ་སངས་སྤེན་པ། །མདོག་ནག་རུས་སྦལ་ལ་གནས་པ། །
ལག་ན་དབྱུག་པ་ཐོགས་པའོ། །སྒྲ་གཅན་ཟླ་བ་ཉི་མ་ཐོགས། །མཇུག་རིངས་རལ་གྲི་ཞགས་པ་ཐོགས། །རྒྱུ་སྐར་དཀྱིལ་འཁོར་བུད་མེད་གཟུགས། །ལྷ་མོའི་རྣམ་པར་མཛེས་པ་ཡིན། །སྤྱི་བོར་ཐལ་མོ་སྦྱར་བ་རུ། །བསྒོམ་བྱ་སྣ་ཚོགས་རྒྱན་གྱིས་བརྒྱན། །
དཀར་པོ་དང་པོ་བཞི་པ་དང་། །དྲུག་པ་བདུན་པའང་དེ་བཞིན་ནོ། །དགུ་པ་དང་ནི་བཅུ་པ་དང་། །བཅུ་གསུམ་པའང་དེ་བཞིན་ནོ། །བཅོ་ལྔ་པ་དང་བཅོ་བརྒྱད་པ། །ཉི་ཤུ་གཉིས་པའང་དེ་བཞིན་ནོ། །ཉི་ཤུ་གཅིག་དང་ཉི་ཤུ་དགུ། །ཉི་ཤུ་བརྒྱད་པའང་དེ་བཞིན་ནོ། །
སྔོ་བསངས་དག་ནི་གསུམ་པ་དང་། །དེ་བཞིན་ལྔ་དང་བརྒྱད་པ་དང་། །བཅུ་གཅིག་པ་དང་བཅུ་དྲུག་པ། །དེ་ནས་ཡང་ནི་བཅུ་བདུན་པ། །ཉི་ཤུ་ཉི་ཤུ་གསུམ་པ་དང་། །ཉི་ཤུ་བཞི་པའང་དེ་བཞིན་ནོ། །ལྗང་གུ་དག་ནི་གཉིས་པ་དང་། །བཅུ་པ་དང་ནི་བཅུ་བཞི་
པ། །བཅུ་གཉིས་བཅུ་དགུ་ཉི་ཤུ་ལ། །ཉི་ཤུ་དྲུག་པའང་སེར་པོ་ནི། །གཞོན་ནུ་གསེར་གྱི་མདོག་ཅན་ལ། །གདོང་དྲུག་རྨ་བྱའི་གདན་ལ་བཞུགས། །མདུང་ཐུང་རྡོ་རྗེ་དྲིལ་བུ་དང་། །ཁྱིམ་བྱ་དག་ནི་ཕྱག་ན་བསྣམས། །གླང་སྣ་དཀར་པོ་ལག་བཞི་པ། །སྦྲུལ་གྱི་མཆོད་
ཕྱིར་ཐོགས་འཆང་ཞིང་། །ལ་ཏུ་ལ་ཕུག་ཏྲི་ཤཱུ་ལ། །དེ་བཞིན་དུ་ནི་གྲི་གུག་ཐོགས། །བྱི་བ་ལ་གནས་ནག་པོ་ནི། །དགའ་བྱེད་རྫ་རྔ་རྡུང་བར་བྱེད། །རྩེ་གསུམ་ཐོད་པ་འཛིན་པ་ནི། །ནག་པོ་མ་ཧཱ་ཀཱ་ལར་གྲགས། །མ་མོའི་དཀྱིལ་འཁོར་མཚུངས་པ་ཡི། །བྷྲིཾ་གི་རི་

ཏི་དེ་བཞིན་མཆོད། །ཚངས་མ་དང་ནི་གོ་ཆ་མ། །དྲག་པོ་དབང་མ་གཞོན་ནུ་མ། །རང་གི་བདག་པོ་ཇི་བཞིན་ནོ། །ཡི་དྭགས་ལ་གནས་ཕག་མོ་ནི། །མདོག་ནག་པོ་ལ་ཐོད་པ་འཆང་། །མདོག་དམར་མཆེ་བ་གཙིགས་པ་ཡི། །ཡི་དྭགས་གདན་ལ་
གནས་པ་ནི། །ཆུ་གྲི་དང་ནི་ཐོད་པ་དག །གཏུམ་མོ་ཡིས་ནི་འཛིན་པ་ཡིན། །མཁའ་ལྡིང་རྐང་པ་པུས་མོའི་བར། །དཀར་སེར་དེ་ནས་ལྟེ་བའི་བར། །དེ་ནས་མགྲིན་པ་ཉི་མའི་མདོག །ཁ་ནི་མིག་སྨིན་ནག་པོའི་མདོག །སྟོབས་བཟང་གླང་པོ་ལ་གནས་པ། །རལ་
གྲི་གཤོལ་འཛིན་དཀར་པོ་ཡིན། །རྒྱལ་བར་བྱེད་པ་ཁ་དོག་ལྗང་། །ཁུ་བྱུག་ཤིང་རྟ་ལ་གནས་པ། །མེ་ཏོག་ཕྲེང་དང་མདའ་གཞུ་དང་། །ཁམ་ཕོར་ལག་ན་ཐོགས་པ་ཡིན། །སྦྲང་རྩིར་བྱེད་པ་ཁ་དོག་དཀར། །ནེ་ཙོ་ལ་གནས་ཁམ་ཕོར་དང་། །མདའ་གཞུ་ཆུ་སྲིན་
རྒྱལ་མཚན་བསྣམས། །དཔྱིད་ལྷ་སྐལ་ལྡན་མཛེས་པ་ནི། །དྲེའུ་ལ་གནས་ཁ་དོག་དཀར། །མདའ་དང་གཞུ་དང་ཁམ་ཕོར་དང་། །རལ་གྲི་དེ་ནི་འཛིན་པ་ཡིན། །སྦྲུལ་ནི་བདུན་བདུན་ལྡན་པའི་ཀླུ། །ཐལ་མོ་སྦྱར་བ་བྱས་ནས་འདུག །མཐའ་ཡས་རིགས་ལྡན་
མདོག་དམར་པོ། །བྲམ་ཟེའི་རིགས་དེ་མེ་ལས་སྐྱེས། །རྒྱལ་རིགས་དབང་ཆེན་ལས་སྐྱེས་སེར། །དུང་སྐྱོང་དང་ནི་ནོར་རྒྱས་བུ། །འཇོག་པོ་དང་ནི་པདྨ་ཆེ། །ནག་པོ་རྗེའུ་རིགས་རླུང་ལས་སྐྱེས། །སྟོབས་ཀྱི་རྒྱུ་དང་པདྨ་ནི། །དམངས་རིགས་དཀར་པོ་ཆུ་ལས་སྐྱེས། །
སྟོབས་བཟངས་དང་ནི་ཐགས་བཟངས་རིས། །རབ་དགའ་དང་ནི་རྣམ་སྣང་མཛད། །ཁྲབ་དང་གོ་ཆ་རལ་གྲི་དང་། །ཕུབ་དང་གཡུལ་ལ་འཇུག་པ་ཡིན། །གསེར་གྱི་མདོག་ཅན་བུ་དང་བཅས། །གཏེར་ནི་སྤྲོ་བའི་ཕྱོགས་བྱེད་པའོ། །གནོད་སྦྱིན་བདག་པོ་ན་ཀུ་ལ། །གྲོང་
དང་གྲོང་ཁྱེར་འཛིན་པ་ཡིན། །ནོར་བུ་བཟང་པོ་གསེར་གྱི་མདོག །གང་བ་བཟང་པོ་སྔོན་པོ་ཡིན། །ནོར་སྦྱིན་ཁ་དོག་དམར་པོ་ཡིན། །དེ་བཞིན་རྣམ་ཐོས་སྲས་སེར་པོ། །རྩེ་གཅིག་ཐུན་དང་ཁ་དོག་དམར། །ཀི་ལི་མི་ལ་དེ་བཞིན་གནག །སྒོ་དབང་སྤྱོད་པའི་དབང་

པོ་ནི། །སེར་པོ་རྒྱུད་མངས་བརྡུང་ལྗོན་པ། །ཆུང་མ་དང་བཅས་དཀར་མོ་ནི། །གཙུག་ཕུད་ལྔ་པ་དེ་བཞིན་ནོ། །བདག་གི་དོན་ཀུན་གྲུབ་པ་དང་། །དོན་མེད་ཐམས་ཅད་སེལ་བའོ། །རྩྭ་བཞིན་རྙེད་བླའི་ཐར་པ་ནི། །ཐམས་ཅད་སངས་རྒྱས་བསྟན་ལས་ཡིན། །དཀྱིལ་འཁོར་
འདི་ཡི་འཁོར་ལོ་ཡི། །མིང་ཙམ་ཡང་ནི་རྙེད་པར་དཀའ། །ཆུ་བུར་སྙིང་པོ་མེད་པ་ཡི། །འཁོར་བ་ཆོས་ཀྱི་རིན་ཆེན་ལྡན། །སྐལ་ལྡན་འགའ་ཞིག་ཉིད་འདིར་ནི། །མཐོ་རིས་འདོད་པ་དེ་ལས་འཐོབ། །འགའ་ཞིག་ཚངས་པའི་འཇིག་རྟེན་དང་། །དེ་ལས་མྱ་ངན་
འདས་མཆོག་ཡིན། །དེ་ལས་སྙིང་པོ་སྙིང་པོ་མཆོག །བསྒྲུབ་པའི་བྱང་ཆུབ་སེམས་དཔའ་རྣམས། །བདེ་གཤེགས་ཀུན་གྱིས་གང་བསྲུངས་པའི། །ཟབ་ཅིང་རྒྱ་ཆེའི་ཆོས་རྣམས་འཐོབ། །ཡོན་ཏན་དེ་ལས་ཀྱང་འབྱུང་བ། །འདི་ལྟར་དེ་ལ་མཆོད་པ་རྣམས། །མཆོད་
དང་བཞུགས་གསོལ་དགའ་བ་དང་། །ཏིང་ངེ་འཛིན་ལ་མཉམ་གནས་གཞན། །མཚུངས་མེད་མཆོད་པ་བྱེད་པ་དག །དེས་ནི་ཏིང་འཛིན་ཐམས་ཅད་འགྲུབ། །འདིར་ནི་མཆོད་དང་མཆོད་བྱེད་པ། །ལྷ་མཆོག་རྣམས་ཀྱིས་དེ་མཆོད་ཡིན། །དགའ་ཆེན་རྒྱ་མཚོ་རླབས་
ཀྱིས་ནི། །འཇིག་རྟེན་བསིལ་བར་བྱེད་པ་ཡིན། །མཆོད་དང་བསྙེན་བཀུར་བཅས་པ་དང་། །སྣ་ཚོགས་བཀོད་པའི་ཁྱད་པར་ལྡན། །དེ་ནི་ནམ་མཁར་བྱེད་པ་འདི། །སྐད་ཅིག་གིས་ནི་ངོ་མཚར་རྟོགས། །གཞན་དང་གཞན་ནི་གྲངས་མེད་སྤྲོས། །ནམ་མཁའ་ཤིན་
ཏུ་རྒྱ་ཆེན་པོ། །མཆོད་པའི་སྤྲིན་ནི་ཁྱབ་པ་ཡི། །རིན་ཆེན་མེ་ཏོག་སོགས་ཆར་གྱིས། །དཔག་བསམ་ཤིང་རྒྱས་སྐྱེད་མོས་ཚལ། །གནས་ནི་འབྱོར་པའི་བདག་ཉིད་འདི། །འདི་ལྟར་སྔོན་མེད་སྣ་ཚོགས་གཟུགས། །ཡོངས་སུ་བཟུང་ནས་སྤྲོ་བར་བྱ། །དང་བས་སྙིང་
གའི་པད་རྒྱས་པའི། །བདེ་བའི་དཔལ་ནི་འབྱུང་བའི་གནས། །སྒེག་པའི་རོ་ཡིས་བཅུས་པ་ཡིས། །རབ་ཏུ་སྤྲོས་པ་རྒྱས་པ་ཡིན། །དེ་དུས་ཡུན་རིང་གནས་པ་ཡི། །དྲག་པོའི་བྱང་ཆུབ་སེམས་དེ་ནི། །ལུས་ལས་བ་སྤུ་ལྡང་བ་དང་། །རྡོ་རྗེ་མཆོག་ནི་སྐྱེ་བ་ཡིན། །སྤོས་

ལྷའི་མེ་ཏོག་རྒྱས་ཚོགས་ཀྱིས། །གནས་ཀུན་སྤྲིན་གྱི་དྲ་བས་ཁྱབ། །འཁོར་ལོའི་སེམས་ནི་སྣ་ཚོགས་རོ་མྱོང་བའི། །གཡོ་དང་མི་གཡོ་འཁོར་ལོའི་བདག་ཉིད་ནི། །རྣམ་པ་སྣ་ཚོགས་འབྱོར་པའི་གནས་འདི་ནི། །མཆོག་གི་མཐུ་ཡིས་རྒྱས་
པར་སྤྱོད་བཟང་པོ། །པི་ཝང་རྫ་རྔ་རྔ་རིངས་ལ་སོགས་མཉམ་འཇུག་པ། །གསང་བར་སྒྲོགས་པ་ཆོས་ཀྱི་དེ་ནི་མཆོག་ཡིན་ནོ། །ཉོན་མོངས་དྲི་ངན་རྣམ་པར་སྤོང་བྱེད་གར་འབྱུང་བའི། །ཕྱག་རྒྱ་རྒྱུན་གྱི་སྒེག་པས་ལྷན་སྐྱེས་རྗེས་སུ་བྱེད། །ལྷ་མོ་ཕྱག་གི་པདྨ་རྣམ་པར་འཇུག་པ་
ཡིས། །རྫིང་བུ་རླུང་གིས་བསྐྱོད་པའི་པདྨ་མཉམ་པར་བྱེད། །དགོད་དང་ལྟ་དང་ལག་བཅངས་དང་ནི་གཉིས་གཉིས་འཁྱུད། །མཐོང་བ་བདུད་རྩི་དམ་པ་བདེ་བ་གཙོ་བོ་ཡིན། །གང་ཞིག་འདིར་ནི་ཕྱག་རྒྱའི་ཐབས་ནི་ཆེན་པོ་ཡི། །འབྲས་བུ་ཐམས་ཅད་སྟོན་པ་ཡོངས་སུ་སྤྲོ་
བ་ཡིན། །འདི་ལྟར་ཆོ་ག་ངོ་མཚར་ཆེན་པོའི་གནས་སྣ་ཚོགས། །ཕུན་ཚོགས་སྒེག་པའི་རྒྱས་པ་ཉམས་མྱོང་འབྱུང་། །དཀྱིལ་འཁོར་བདག་པོ་ནས་བརྩམས་དཀྱིལ་འཁོར་ལྷ། །འཁོར་ལོ་གྲངས་མེད་རྣམ་པར་འབྱུང་བ་ཡིན། །འདི་ལྟར་སོ་སོར་བདུད་རྩི་དཔག་མེད་
དེ་འདི་རྒྱས་པ་ལས། །ལྷན་སྐྱེས་ཡོན་ཏན་བརྒྱ་འགྱུར་གནས་པ་ཡིན། །དེས་ན་འདི་ལྟར་ཕན་ཚུན་ལྷག་པར་སྤྲོས་པ་ཡིས། །ཁྱད་འཕགས་ཀུན་གྱིས་མ་བྱས་ཆོས་རོ་འབྱུང་བ་ཡིན། །འདི་ལྟར་སྒྲུབ་པ་དགེ་བ་རབ་འབྱམ་བདག་ཉིད་ནི། །གང་ཞིག་རང་བཞིན་རྟོགས་
པའི་རང་བཞིན་ནོ། །དེས་ན་དེ་ཉིད་བདུད་རྩི་རྒྱས་ཀུན་འཇུག་པ་ཡིན། །ལྷན་སྐྱེས་མི་གཡོའི་རྟོགས་པས་མྱ་ངན་འདས། །མཆོད་པའི་སོ་སོར་ཏིང་འཛིན་ཐབས་ཐོབ་པ། །ཐོག་མ་མེད་པའི་གཏེར་རྣམས་སངས་རྒྱས་ཀུན་གྱིས་བསྔགས། །རིགས་པ་དང་ནི་གཞན་དག་དེ་
བཞིན་ཉིད་སྟོང་པ། །ཤེས་རབ་བྱང་ཆུབ་ཆོས་དང་བདག་མེད་ཅེས། །འདི་འདྲའི་ཕྱི་རོལ་མཆོད་པ་ཆུང་གྱུར་ཀྱང་། །མཆོད་པའི་ཚོགས་ཀྱིས་མཆོག་འགྱུར་དེ་ཉིད་མཐོང་བ་ཉིད། །འདི་ཡི་བསྒྲུབ་པ་སེམས་ཅན་མཆོག་ནི་རྙེད་པར་དཀའ་བ་ཡིན། །འདི་ནི་བདུད་

རྩིའི་རང་བཞིན་ལས་གཞན་ཅིས་ན་འགྱུར། །གང་དག་ཐུབ་པའི་སྐུ་གཟུགས་རས་རིས་གླེགས་བམ་སོགས། །དེ་ཉིད་མངོན་པར་རློམ་ཞིང་ཞི་བར་འདོད་པ་ཉིད། །དེ་ཉིད་ཕན་དུ་གཉིས་ལས་ཡུན་རིང་ཉམས་པར་འགྱུར། །དགེ་བའི་ལས་བྲལ་སྟོང་པ་ཉིད་ལ་དགོས་པ་མེད། །
མུན་ནག་ཐིབས་པོ་ཟླ་བའི་འོད་དང་བྲལ་བ་ལ། །པདྨ་རྒྱས་བྲལ་ཁ་བས་གཡོགས་པའི་མཚོ་བཞིན་ནོ། །རིགས་དང་ནོར་དང་དཀའ་ཐུབ་སྲེད་པ་དང་། །ཐུབ་པ་མཆོད་བྲལ་དེ་ཉིད་ཤེས་པ་ཡིས། །དེ་ནི་ལྷ་རྣམས་དགའ་བར་བྱེད་མིན་དེ་སུ་ཞིག །དེས་ན་ཡོན་ཏན་ཉིད་ཐོབ་
མིན་པ་དེ་གང་ཞིག །གང་དུ་འདི་མ་གཏོགས་པར་འགྲོ་བར་གཙོ་བོ་གང་། །གང་ཞིག་མཆོད་པའང་དེ་བཞིན་མཐོང་བར་འགྱུར། །ཆུ་བོ་བབ་པ་རྒྱ་མཚོ་དང་བ་དང་། །ས་ལ་མེ་ཏོག་རྒྱས་པ་འབྱུང་བ་དང་། །ཉི་མ་ཤར་བས་དོན་དམ་བསྟན་པ་དང་། །མཆོད་པ་བྱེད་པ་མཆོག་
དེའི་སྟོབས་ཀྱིས་ནི། །ངན་པས་གཞན་ལ་གནོད་པ་བྱས་པ་ལས། །མི་གཙང་བ་ཉིད་ཅིས་ནི་འབྱུང་མི་འགྱུར། །དེ་ཡི་དག་པའི་བདག་ཉིད་ལག་པ་ལས། །ལྷ་རྣམས་མེ་ཏོག་དག་ནི་ལེན་པ་ཡིན། །གང་ཞིག་སྡིག་པ་སྤངས་པ་དང་། །ལམ་གསུམ་ལ་གནས་བསྟན་པ་
ནི། །འཇིག་རྟེན་གསུམ་དག་འདི་དག་གི། །བསོད་ནམས་ཆེན་པོ་འབྱུང་བར་འགྱུར། །འདི་ཡི་སྒྲ་ལས་དེ་ལས་གཞན། །ཕལ་པ་འདི་དག་འཇུག་པ་ཡིན། །འདི་གཙོ་ཉིད་དུ་མངོན་རློམ་པ། །ཆོས་ཀྱི་ལམ་ལས་ལྟུང་བ་ཡིན། །དམ་པའི་ཆོས་དང་གླེགས་བམ་
དག །མདུན་དུ་སོ་སོར་བྱས་ནས་ནི། །སྔར་བཤད་པ་ཡི་སྔགས་ཀྱིས་ནི། །ཕྱག་འཚལ་མཆོད་པ་ལ་སོགས་བྱ། །སངས་རྒྱས་རྣམས་ཀྱི་ཡེ་ཤེས་ཡུལ། །སྔགས་ཀྱི་བསོད་ནམས་ཕུང་པོ་འདི། །དཀོན་མཆོག་གསུམ་ལ་ཕྱག་འཚལ་བ། །སྔོན་དུ་འདོན་པའི་རིམ་
པ་ཡིས། །ལྕེ་ལ་ཧཱུཾ་ཡིག་ལས་བྱུང་བའི། །རྡོ་རྗེ་དབུས་སུ་ཧྲཱིཿཡིག་ལས། །བྱུང་བའི་ཆུ་སྐྱེས་དབུས་རཾ་ཛཾ། །དཀར་པོ་འོད་ཟེར་འཁྲུག་པ་ལས། །སྔགས་པས་སྣང་བ་མཐའ་ཡས་བསྒོམ། །སྔགས་བསྐུལ་ནས་ནི་བཟླས་པ་བྱས། །དེ་ལ་སྔགས་ནི་འདི་ཡིན་ཏེ། །

ཨོཾ་པདྨ་ས་ར་ས་ར་སཏྭ་སཏྭ་པྲ་བརྟ་ཡ་ཤུདྡྷ་ཡ། ཧཱུཾ་ཧྲཱིཿ་རཾ་ཛིཾ། ཆོས་རྣམས་ཀུན་ལ་ཕྱོགས་མེད་པར། །སེམས་ཅན་ཐམས་ཅད་གྱུར་ཅིག་ཅེས། །བསམས་ནས་དེ་ཡི་སྙིང་པོ་བསལ། །འདི་ཡི་སྔགས་དང་དད་ལྡན་པ། །ཨོཾ་བཛྲ་བ་གཧཱུཾ། སེམས་
ཅན་རྣམས་ཀྱི་དྲི་མ་རྣམས། །བསལ་ལོ་ཞེས་ནི་རྣམ་བསམས་ནས། །འདི་ཡིས་སྔགས་པ་ཡིད་གཞུངས་པས། །དྲི་མ་ཐམས་ཅད་བསལ་བར་བྱ། །ཨོཾ་ས་མནྟ་པ་རཱི་ཀྵ་གུ་ཧྱ་ཙ་རི་ཙ་ར་ཧཱུཾ། པདྨ་འདམ་གྱིས་མ་གོས་ལྟར། །འགྲོ་ལ་ཕན་ཚུན་འགྲོགས་པར་ཤོག །
ཆགས་པ་མེད་པར་བྱུང་བའི་ཕྱིར། །སྔགས་པས་དག་པ་རྣམ་བསམ་བྱ། །ཨོཾ་ནིརྨ་ནི་ཤུདྡྷ་ཧཱུཾ། རྣམ་པ་ཐམས་ཅད་ཡོངས་གཅོད་པ། །ཆོས་དབྱིངས་རང་བཞིན་འོད་གསལ་བ། །བསྒོམས་ནས་གང་འདི་དཀྱིལ་འཁོར་འདི། །བྱེད་པ་སྔགས་པ་མཁས་པ་
ཡིན། །ཨོཾ་མ་ཧཱ་མཎྜལ་ཧཱུཾ། རང་བཞིན་སྟོང་པར་བསྒོམ་པའི་བདག །ཀུན་ལ་ཆགས་པ་མེད་སེམས་ཀྱིས། །སྔགས་ཀྱི་ཆུ་ཡི་ཐིག་ལེ་ཡིས། །རང་གི་སྤྱི་བོར་དབང་བསྐུར་བྱ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥིཉྩ་ས་མ་ཡ་ཤྲི་ཡེ་ཧཱུཾ། ཆོས་རྣམས་ཐམས་ཅད་རང་བཞིན་
གྱིས། །གནས་པ་མེད་པར་བསྒོམ་པར་བྱ། །བདེ་བའི་སྟན་ལ་འདུག་ནས་ནི། །སྔགས་པས་མཆོད་པ་བརྩམ་པར་བྱ། །ཨོཾ་ཨ་མོ་གྷ་པདྨ་བ་སུ་དྷ་རི་དྷ་ར་ད་རེ་མཎྜལ་ཧཱུཾ། ལས་ཀྱི་དཀྱིལ་འཁོར་སྦྱོར་བདག་ཉིད། །དེ་ནས་དད་པའི་མཆོད་པ་བརྩམ། །བགེགས་མཐར་བྱེད་
པའམ་བགེགས་འཇོམས་པ། །བགེགས་རྣམས་ཞི་བར་བྱ་ཕྱིར་མཆོད། །མཆོད་པའི་ལྷ་མོ་རྣམ་པ་བརྒྱད། །ཇི་ལྟ་བཞིན་དུ་སྦྱོར་རིགས་པས། །གཡོན་པ་ལ་གནས་དྲི་གཟུགས་དང་། །གཡས་པ་ལ་གནས་གཞན་གཡོན་ནོ། །དང་པོར་དབུལ་བ་བྱ་བ་ནི། །ཨརྒྷའི་
སྣོད་ནི་དག་བྱེད་དང་། །པདྨའི་ཕྱག་རྒྱ་ལྡན་གཡོན་པས། །དེ་ལ་བ་དན་གསུམ་པ་དག །དེ་ཉིད་ཤེས་པས་ཡི་གེ་ནི། །གསུམ་གྱིས་བྱིན་གྱིས་བརླབ་པར་བྱ། །ཨརྒྷའི་སྣོད་ཆུ་ཐོགས་པ་ཡིས། །མེ་ཏོག་ལ་སོགས་བསངས་ནས་ནི། །མེ་ཏོག་ལ་སོགས་ལྷ་མོ་ཡི། །སྔགས་

ནི་ཇི་ལྟ་བཞིན་དུ་བརྗོད། །དེ་ཉིད་མངོན་སུམ་བྱས་བདག་ཉིད། །སྔགས་པ་བླ་མ་མཆོད་པར་བྱ། །བརྟུལ་ཞུགས་ཉམས་པ་ལ་གཞན་དུ། །འདིར་ནི་གང་དུ་འགྲོ་བར་འགྱུར། །དབང་པོ་ལ་སོགས་རྙེད་དཀའ་བ། །གང་ཞིག་བྱིན་གྱི་རླབས་ལས་ཐོབ། །འདིར་ནི་ཐལ་
མོ་སྦྱར་བྱས་ནས། །དེ་ཡི་སྔགས་ཀྱིས་སྤྱན་དྲང་ངོ་། །ཨོཾ་སརྦ་ཏ་ཐཱ་ག་ཏ་བཛྲ་ཨཉྫ་ལི་ས་མ་ཡེ་ཧཱུཾ། ཞེས་བྱ་བའི་ཐལ་མོའི་སྔགས་སོ། །ཕྱོགས་རྣམས་ཀུན་གྱི་སངས་རྒྱས་རྣམས། །སྲས་བཅས་འཇིག་རྟེན་རབ་གྲགས་པ། །རྡོ་རྗེ་རིན་ཆེན་རིགས་དང་ནི། །པདྨ་ལས་
ཀྱི་རིགས་དེ་བཞིན། །སྙིང་པོ་ཕྱག་རྒྱ་རིམ་པ་རྣམས། །ལྷ་ཡི་ཚོགས་ནི་ཐམས་ཅད་དག །དེ་དག་བདག་ལ་དགོངས་སུ་གསོལ། །ཆོས་ཀྱི་དབྱིངས་ལ་གནས་པ་རྣམས། །བདག་མིང་ཆེ་གེ་ཞེས་བྱ་བ། །ཆོས་དབྱིངས་བདག་ཉིད་གྲོང་ཁྱེར་ནི། །དི་རིང་དཀྱིལ་འཁོར་
མཆོད་པར་གྱིས། །ཡོ་བྱད་ཅི་འབྱོར་པ་ཡིས་མཆོད། །སེམས་ཅན་རྣམས་ལ་བརྩེ་བ་དང་། །ཁྱེད་རྣམས་ལ་ཡང་མཆོད་པའི་ཕྱིར། །རྗེས་སུ་བརྩེ་བས་ཉེར་དགོངས་ལ། །བྱིན་གྱིས་བརླབས་པ་མཛད་པར་རིགས། །ཨོཾ་སརྦ་ཏ་ཐཱ་ག་ཏ་བོ་དྷི་སཏྭ་པ་རི་ཤུདྡྷ་སྭ་བྷཱ་
བ་ཨཱཏྨན། ཤུདྡྷི་ཨཾ་ཤུ་པཱུ་ར་ཡ་ཧཱུཾ། ཞེས་བྱ་བ་འདི་ནི་སྤྱན་འདྲེན་པའི་སྔགས་སོ། །མཆོད་ཅིང་བསྙེན་བཀུར་བྱ་བའི་ཕྱིར། །དེ་ནས་བདག་ཉིད་དབུལ་བར་བྱ། །དེ་ལ་སྔགས་ནི། ཨོཾ་སརྦ་ཏ་ཐཱ་ག་ཏ་པཱུ་ཛ་པསྠ་ནཱ་ཡ་ཨཱཏྨ་ནཱཾ་ནིཪྛ་ཏ་ཡཱ་མི། ཨོཾ་སརྦ་ཏ་ཐཱ་ག་ཏ་པྲ་ཏི་གྲི་ཧྞཾ་ཏུ་མཱཾ།
ཨོཾ་སརྦ་ཏ་ཐཱ་ག་ཏ་ཨ་དྷི་ཏིཥྛཾ་ཏུ་མཾ། ཨོཾ་ཨ་མོ་གྷ་སན་ཏིཥྛཾ་ཏུ་ཧཱུཾ། ཞེས་བྱིན་གྱིས་བརླབ་པའི་སྔགས་སོ། །སྔགས་ཀྱི་དོན་ནི་འདི་ལྟ་བུ། །བསྒོམས་ལ་བདག་ཉིད་དེ་མཆོད་དོ། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་སོ། །སྡིག་པ་མཐུག་པོའི་བག་གི་ཚོགས། །
དྲིལ་བུའི་སྒྲ་ཡིས་བདུད་ཚོགས་འཇོམས། །སྔགས་ཀྱི་གྲུབ་པ་འཛིན་པ་ནི། །ཕྱག་རྒྱ་དང་པོར་ཆེན་པོའི་ཚིག །ཅེས་གྲུབ་པའི་དཔལ་རྡོ་རྗེ་དྲིལ་བུས་ཀྱང་ནི་མཆོད་པ་ཡིན། ཨོཾ་དཱི་བྱ་ཨ་མོ་གྷ་བི་བུ་ལ་སྠ་ར། མ་དྷུ་ར་ནིར་གྷུ་ཤ་རུ་དྷི་ར་ན་ར་ན་ཧཱུཾ། ཡེ་ཤེས་ལྔ་ཡི་བདག་ཉིད་

གཅིག །གཉིས་མེད་གཉིས་སུ་ཇི་ལྟར་འགྱུར། །འདི་ལྟར་རང་བཞིན་སྤྲོས་པ་ལས། །སྒྱུ་འཕྲུལ་རྡོ་རྗེ་རྟོགས་པ་ཡི། །དེ་ཉིད་བློ་ཡིས་མཆོད་པར་བྱ། །ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་ཨེ་ཥ་ཏྭཾ་དྷ་ར་ཡ་མི་ཧི་ཧི་ཧི་ཧི་ཧཱུཾ། དེ་ལ་གནས་པ་འགའ་ཞིག་ནི། །
མཆོད་པ་དེ་ཡང་ལྷག་པར་གུས། །སེམས་ཅན་དང་ནི་སངས་རྒྱས་རྣམས། །རང་བཞིན་དོན་དམ་ཡིན་པའི་ཕྱིར། །དེ་ཡང་དམན་དང་ལྷག་པ་ལ། །སྒྲ་ཡི་རྡོ་རྗེ་མཆོད་པར་བྱ། །དྲིལ་བུའི་སྒྲ་ནི་སྒྲོགས་པ་དང་། །སྔགས་དང་བདུག་པ་བསྟོད་པ་དག །འདོན་པ་རྗེས་སུ་
སྒྲོགས་པ་ཡིས། །དད་པའི་རྒྱ་མཚོ་སྣ་ཚོགས་པའི། །རླབས་ཀྱིས་མགོན་པོ་མངོན་དགོངས་མཛད། །འཁོར་ལོའི་རྩ་བའི་སྔགས་ཀྱིས་ནི། །ཡང་དག་བཟླས་ལ་སྤྱན་དྲང་ངོ་། །དཀྱིལ་འཁོར་པ་ཀུན་རང་སྔགས་ཀྱིས། །དེ་ནས་བུམ་པ་གང་བ་ནི། །མགུལ་ཆིངས་ཕྲེང་
བས་རྣམ་པར་བརྒྱན། །འདབ་མ་དང་བཅས་དཔལ་འབྲས་བུ། །གསང་སྔགས་ཀྱིས་ནི་དབུལ་བར་བྱ། །ཨོཾ་བཛྲོད་ད་ཀ་ཧཱུཾ། གང་བའི་སྣོད་ཀྱིས་དེ་བཞིན་མཆོད། །འགྲོ་བ་རྒྱས་པའི་ཡིད་དགའ་བ། །ཨོཾ་བ་ཏྲ་ཕུ་ར་ཡ་ཨ་མོ་གྷ་བ་ཏི་ས་མནྟ་པྲ་ཏི་སྭཱ་ཧཱ། དེ་ནས་མེ་
ཏོག་རྒྱ་བཅིངས་ལ། །མེ་ཏོག་ཆར་རྒྱུན་འཇུག་པ་ཡི། །སྤྱི་བོར་ཐལ་མོ་སྦྱར་བྱས་ལ། །བཛྲ་བནྡྷ་ཞེས་བརྗོད་ནས། །གང་འཇིག་རྟེན་གྱི་ཁམས་འདི་འམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན། ལྷ་དང་མི་རྣམས་ཀྱི་མེ་ཏོག་གི་བྱེ་བྲག་ཡིད་ལས་
བྱུང་བ་དང་། ཆུ་ལས་སྐྱེས་པའམ། ཐང་ལས་སྐྱེས་པ་གང་དག་ཡོད་པ་དེ་རྣམས་འདི་ལྟ་སྟེ། མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་ཐམས་ཅད་ལ་མཆོད་པའི་ལས་བྱ་བའི་ཕྱིར། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རིགས་ལྔ་དང་བཅས་
པར་བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷའི་ཁྱད་པར་ཐམས་ཅད་ལ་དབུལ་བར་བགྱིའོ། །ཨོཾ་སརྦ་ཏ་ཐཱ་ག་ཏ་པུཥྤ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དེ་ནས་བདུག་པའི་ཕྱག་རྒྱ་བཅིངས་ནས་ནི། །ཚུལ་

ཁྲིམས་ཀྱི་ནི་བདུག་པ་ཡིས། །འགྲོ་བ་བདུག་པར་གྱུར་ཅིག་ཅེས། །མཁས་པས་འདི་ལྟར་བརྗོད་པར་བྱ། །གང་ཡང་འཇིག་རྟེན་ཁམས་འདིའམ། །གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན། ལྷ་དང་མི་རྣམས་ཀྱི་བདུག་པའི་བྱེ་བྲག་ལྷན་ཅིག་སྐྱེས་
པའམ། ཡང་དག་པར་སྦྱར་བའམ། ཡོངས་སུ་གྱུར་པ་གང་དག་ཡོད་པ་དེ་རྣམས་འདི་ལྟ་སྟེ། མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་ཐམས་ཅད་ལ་མཆོད་པའི་ལས་བྱ་བའི་ཕྱིར། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རིགས་ལྔ་དང་བཅས་
པར་བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷའི་ཁྱད་པར་ཐམས་ཅད་ལ་དབུལ་བར་བགྱིའོ། །ཨོཾ་སརྦ་ཏ་ཐཱ་ག་ཏ་དྷཱུ་པེ་པཱུ་ཛ་མེ་གྷ་ས་མུ་དྲ་སྤ་ར་ཎ་ས་མ་ཡེ་ཧཱུཾ། མར་མེའི་ཕྱག་རྒྱ་སྙིང་ག་རུ། །ཐལ་མོ་སྦྱར་ལ་མཐེ་བོ་
གཉིས། །མཉམ་དུ་བསྒྲེང་བར་བྱས་ནས་ནི། །འདི་ལྟར་བཟླས་པ་ཡང་དག་པའི། །ཡེ་ཤེས་ཁྱད་པར་དང་ལྡན་པའོ། །གང་ཡང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན། ལྷ་དང་མི་རྣམས་ཀྱི་སྣང་བའི་བྱེ་བྲག་ཡིད་
ལས་བྱུང་བའམ། རིན་པོ་ཆེའི་འོད་དམ་མར་མེའི་སྣང་བ་ལ་སོགས་པ་གང་དག་ཡོད་པ་འདི་ལྟ་སྟེ། མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་ཐམས་ཅད་ལ་མཆོད་པའི་ལས་བྱ་བའི་ཕྱིར་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རིགས་ལྔ་དང་བཅས་པར་
བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷའི་ཁྱད་པར་ཐམས་ཅད་ལ་དབུལ་བར་བགྱིའོ། །ཨོཾ་སརྦ་ཏ་ཐཱ་ག་ཏ་ཨཱ་ལོ་ཀེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དྲི་རྣམས་བཀོད་ལ་གར་དང་ནི། །དྲི་ཡི་ཕྱག་རྒྱ་བཅིངས་
ནས་ནི། །དྲི་མ་མེད་པའི་བདག་ཉིད་ལ། །བལྟས་ནས་བརྗོད་པར་བྱ་བ་སྟེ། །གང་ཡང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན། ལྷ་དང་མི་རྣམས་ཀྱི་དྲིའི་བྱེ་བྲག་ལྷན་ཅིག་སྐྱེས་པའམ། ཡང་དག་པར་སྦྱར་བའམ།

ཡོངས་སུ་གྱུར་པ་ཅན་གང་དག་ཡོད་པ་དེ་རྣམས་འདི་ལྟ་སྟེ། མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་ཐམས་ཅད་ལ་མཆོད་པའི་ལས་བྱ་བའི་ཕྱིར། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རིགས་ལྔ་དང་བཅས་པར་བཞུགས་པ་
ཐམས་ཅད་དང་། སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷའི་ཁྱད་པར་ཐམས་ཅད་ལ་དབུལ་བར་བགྱིའོ། །ཨོཾ་སརྦ་ཏ་ཐཱ་ག་ཏ་གནྡྷ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཐལ་མོ་སྤྱི་བོར་བཞག་ནས་ནི། །འདི་སྐད་ཅེས་ནི་བརྗོད་པར་བྱ། །
གང་ཡང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན། ལྷ་དང་མི་རྣམས་ཀྱི་རིན་པོ་ཆེའི་རི་བོའམ། རྒྱ་མཚོའི་རིན་པོ་ཆེའི་ཚོགས་གང་དག་ཡོད་པ་དེ་དག་ཐམས་ཅད་འདི་ལྟ་སྟེ། མ་ལུས་ཤིང་ལུས་པ་མེད་པའི་དེ་བཞིན་
གཤེགས་པ་ཐམས་ཅད་ལ་མཆོད་པའི་ལས་བྱ་བའི་ཕྱིར། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རིགས་ལྔ་དང་བཅས་པར་བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷའི་ཁྱད་པར་ཐམས་ཅད་ལ་
དབུལ་བར་བགྱིའོ། །ཨོཾ་སརྦ་ཏ་ཐཱ་ག་ཏ་བོ་དྷྱཾ་ཀ་རཏྣ་ཨཱ་ལཾ་ཀ་ར་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། གར་སྐོར་ཐལ་སྦྱར་སྤྱིར་བཞག་ལ། །བཞད་པའི་ཕྱག་རྒྱ་བཅིངས་ནས་ནི། །འཁོར་བ་ནང་འཁོར་རྣམས་ཀྱང་ནི། །བཞད་པ་ཉིད་འགྱུར་ཅེས་བརྗོད་ལ། །གང་ཡང་འཇིག་
རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན། ལྷ་དང་མི་རྣམས་ཀྱི་དགོད་པ་དང་། སྒེག་པ་དང་། དགའ་བ་དང་། རྩེ་འཇོའི་བདེ་བའི་བྱེ་བྲག་གང་དག་ཡོད་པ་དེ་རྣམས་འདི་ལྟ་སྟེ། མ་ལུས་ཤིང་ལུས་པ་མེད་པའི་དེ་བཞིན་གཤེགས་
པ་ཐམས་ཅད་ལ་མཆོད་པའི་ལས་བྱ་བའི་ཕྱིར། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་རིགས་ལྔ་དང་བཅས་པར་བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷའི་ཁྱད་པར་ཐམས་ཅད་ལ་དབུལ་བར་

བགྱིའོ། །ཨོཾ་སརྦ་ཏ་ཐཱ་ག་ཏ་ཧཱ་སྱ་ར་ཏི་ཀྲི་ཏ་སྭ་ཁྱ་ཨ་ནུཏྟ་ར་པཱུ་ཛ་མེ་གྷ་ས་མུ་དྲ་སྥར་ཎ་ས་མ་ཡེ་ཧཱུཾ། ཐལ་མོ་སྤྱི་བོར་བཞག་ནས་ནི། །མཁས་པས་འདི་སྐད་བརྗོད་པར་བྱ། །གང་ཡང་འཇིག་རྟེན་གྱི་ཁམས་འདིའམ། གང་ཡང་ཕྱོགས་བཅུའི་འཇིག་རྟེན་གྱི་ཁམས་ཐམས་
ཅད་ན། ལྷ་དང་མི་རྣམས་ཀྱི་དཔག་བསམ་གྱི་ཤིང་ངམ། གོས་ཀྱི་ཤིང་གང་དག་ཡོད་པ་དེ་རྣམས་འདི་ལྟ་སྟེ། མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་ཐམས་ཅད་ལ་མཆོད་པའི་ལས་བྱ་བའི་ཕྱིར། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་
རིགས་ལྔ་དང་བཅས་པར་བཞུགས་པ་ཐམས་ཅད་དང་། སྙིང་པོ་དང་། ཕྱག་རྒྱ་དང་། གསང་སྔགས་དང་། རིག་སྔགས་ཀྱི་ལྷའི་ཁྱད་པར་ཐམས་ཅད་ལ་དབུལ་བར་བགྱིའོ། །ཨོཾ་སརྦ་ཏ་ཐཱ་ག་ཏ་ཨ་ནུཏྟ་ར། བོ་དྷི་ཨཱ་ལཾ་ཀ་ར་ཝསྟྲ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། སྙིང་གར་
རྡོ་རྗེ་ཐལ་སྦྱར་ལ། །སྒེག་མོའི་ཕྱག་རྒྱ་རྣམས་བཅིངས་ནས། །ཕྱག་རྒྱ་གར་དང་བཅས་པ་དང་། །ཇི་བཞིན་དོན་རིག་འདི་ལྟར་བརྗོད། །སེམས་ཅན་ཐམས་ཅད་ཡོ་བྱད་ཐམས་ཅད་ཀྱིས་ཡང་དག་པར་འབྱོར་ཅིང་ཕུན་སུམ་ཚོགས་པ་ཐམས་ཅད་འདོད་པ་ཙམ་ལ་རག་ལུས་
པར་གྱུར་ཅིག །ཨོཾ་སརྦ་ཏ་ཐཱ་ག་ཏ་ཨ་ནུཏྟ་ར་མ་ཧཱ་བཛྲོད་བྷ་བ་ད་ན་པཱ་ར་མི་ཏ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། སྤྱི་བོར་ཐལ་སྦྱར་ཕྲེང་བ་ཡི། །ཕྱག་རྒྱ་བཅིངས་ལ་འདི་སྐད་བརྗོད། །སེམས་ཅན་ཐམས་ཅད་མི་དགེ་བའི་ལུས་དང་ངག་དང་ཡིད་ཀྱི་ལས་ཐམས་ཅད་
དང་ཡང་དག་པར་བྲལ་བར་གྱུར་ཅིག །དགེ་བའི་ལུས་དང་ངག་དང་ཡིད་ཀྱི་ལས་ཐམས་ཅད་དང་ཡང་དག་པར་ལྡན་པར་གྱུར་ཅིག །ཨོཾ་སརྦ་ཏ་ཐཱ་ག་ཏ་ཨ་ནུཏྟ་ར་མ་ཧཱ་བོ་དྷི་ཧ་ར་ཤཱི་ལ་པཱ་ར་མི་ཏ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཐལ་མོ་སྦྱར་བ་ཉིད་དང་ནི། །གླུ་ཡི་
ཕྱག་རྒྱ་བཅིངས་ནས་ནི། །སེམས་ཅན་ཐམས་ཅད་མཚན་དང་དཔེ་བྱད་ཐམས་ཅད་ཀྱིས་ལུས་ཡང་དག་པར་བརྒྱན་པར་བྱས་པ་དང་། རྟག་ཏུ་ཕན་ཚུན་འཇིགས་པ་མེད་པ་དང་། ཞེ་འགྲས་པ་མེད་པར་ཞུགས་ཤིང་། མིག་དང་ཡིད་མངོན་པར་དགའ་བ་དང་། ཆོས་ཟབ་

མོ་ལ་བཟོད་པ་དང་ལྡན་པར་གྱུར་ཅིག །ཨོཾ་སརྦ་ཏ་ཐཱ་ག་ཏ་མ་ཧཱ་དྷརྨ་ཨ་བ་བོ་དྷི་ཀྵཱནྟི་པཱ་ར་མི་ཏ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དང་པོར་གར་བསྐོར་བྱས་ནས་ནི། །དེ་ནས་གར་གྱི་ཕྱག་རྒྱ་བཅིངས་ནས། སེམས་ཅན་ཐམས་ཅད་བྱང་ཆུབ་སེམས་
དཔའི་སྤྱོད་པ་ལ་མངོན་པར་བརྩོན་པ་དང་ལྡན་པ་དང་། སངས་རྒྱས་ཉིད་དུ་ཡོངས་སུ་གཞོལ་ཞིང་འཁོར་བ་ཡོངས་སུ་མི་སྤོང་བ་བརྩོན་འགྲུས་དང་ལྡན་པར་གྱུར་ཅིག །ཨོཾ་སརྦ་ཏ་ཐཱ་ག་ཏ་ས་ན་ས་པ་རི་ཏྱཾ་ག་ཨ་ནུཏྟ་ར་མ་ཧཱ་བཱིརྱ་པཱ་རི་མི་ཏ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ།
དང་པོར་གར་བསྐོར་བྱ་བ་དང་། །མེ་ཏོག་ཕྱག་རྒྱ་བཅིངས་ནས་ནི། །སེམས་ཅན་ཐམས་ཅད་ཉོན་མོངས་པ་དང་ཉེ་བའི་ཉོན་མོངས་པ་རྣམས་དང་བྲལ་བར་གྱུར་ཅིག །བསམ་གཏན་དང་རྣམ་པར་ཐར་པ་དང་ཏིང་ངེ་འཛིན་དང་སྙོམས་པར་འཇུག་པ་དང་། མངོན་པར་ཤེས་པ་རྣམས་
དང་། རིག་པ་ཐམས་ཅད་དབང་དུ་གྱུར་པ་ཕུན་སུམ་ཚོགས་པར་གྱུར་ཅིག །ཨོཾ་སརྦ་ཏ་ཐཱ་ག་ཏ་ཨ་ནུཏྟ་ར་མ་ཧཱ་སཽ་ཁྱ་བི་ཧ་ར་དྷ་ན་པཱ་ར་མི་ཏ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཤེས་རབ་ཕ་རོལ་ཕྱིན་འགྲོ་བའི། །བདུག་པའི་ཕྱག་རྒྱ་བཅིངས་ནས་ནི། །སེམས་ཅན་ཐམས་ཅད་
འཇིག་རྟེན་དང་འཇིག་རྟེན་ལས་འདས་པའི་ཤེས་རབ་དང་ཡེ་ཤེས་རྣམས་དང་ཡང་དག་པར་ལྡན་པར་གྱུར་ཅིག །སོ་སོ་ཡང་དག་པར་རིག་པ་བཞི་ཐོབ་སྟེ། བཟོ་དང་བསྟན་བཅོས་ཐམས་ཅད་ཤེས་ཤིང་སྒྱུ་རྩལ་དང་ལྡན་ལ་གསང་བའི་ཆོ་ག་ཤེས་པ་དང་། དེ་ཁོ་ན་ཉིད་མཐོང་
སྟེ། ཉོན་མོངས་པ་དང་ཤེས་བྱའི་སྒྲིབ་པ་ཐམས་ཅད་ཡང་དག་པར་གཅོད་པའི་ཡེ་ཤེས་ཐོབ་པར་གྱུར་ཅིག །ཨོཾ་སརྦ་ཏ་ཐཱ་ག་ཏ་ཨ་ནུཏྟ་ར་ཀླེ་ཤ་ཙྪེ་ད་སརྦ་དྷརྨཱ་ས་མནྟ་ཛྙཱ་ན་མ་ཧཱ་པྲ་ཛྙཱ་ན་པཱ་ར་མི་ཏཱ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། གདུགས་དང་རྒྱལ་མཚན་བ་དན་སོགས། །
བཟའ་དང་བཅའ་སོགས་དད་པ་ཡིས། །ཕྱི་རོལ་ཇི་ལྟ་བ་བཞིན་གཞག །དཔག་ཏུ་མེད་པར་དབུལ་བར་བྱ། །དཀྱིལ་འཁོར་དབང་ཕྱུག་གསང་སྔགས་ནི། །བཟླས་པ་དག་ཀྱང་ལེགས་པར་བྱ། །ཡི་གེ་བརྒྱ་པ་ལན་གསུམ་བཟླས། །མཚན་བརྗོད་པ་དང་དཀྱིལ་འཁོར་བསྟོད། །

འབད་པ་ཡིས་ནི་སྨོན་ལམ་དག །དེ་ཉིད་རིག་པས་འདོན་པར་བྱ། །ཡོ་བྱད་ཐམས་ཅད་འབྱོར་པ་ཡིས། །ཡོངས་སུ་གང་བའི་གཏོར་མ་སྦྱིན། །ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱ་དྱ་ནུཏྤ་ནྣ་ཏྭཱཏ་སྭཱ་ཧཱ། ཞེས་བྱ་བའི་སྔགས་འདིས་སོ། །གལ་ཏེ་གོ་སྐབས་ཡོད་གྱུར་ན། །
ཕྱོགས་བཅུར་སྣོད་རྣམས་བསམ་པ་ལ། །འཇིག་རྟེན་གསུམ་རྒྱལ་ཕྱག་རྒྱ་ནི། །བཅིང་བ་བླ་ན་མེད་པའོ། །ཁུར་བ་འབྲས་ཆན་འབྲས་ཡོས་དང་། །ཏིལ་རྣམས་ཀྱི་ནི་གཏོར་མ་སྦྱིན། །དེ་ལ་སྔགས་ནི་འདི་ཡིན་ཏེ། །ལྷ་དང་ལྷ་མིན་གནོད་སྦྱིན་ལྟོ་འཕྱེ་གྲུལ། །ནམ་མཁའ་
ལྡིང་དང་འདབ་བཟངས་ལུས་སྲུལ་པོ། །དྲི་ཟ་སྲིན་པོ་གདོན་གྱི་རིགས་རྣམས་དང་། །གང་དག་ས་ལ་གནས་པའི་རྫུ་འཕྲུལ་ཅན། །བདག་ཅག་པུས་མོ་ས་ལ་བཙུགས་ནས་ནི། །ཐལ་སྦྱར་ཁྱེད་རྣམས་ལ་ནི་གསོལ་འདེབས་ཀྱི། །བུ་སྨད་བཅས་ཤིང་གཡོག་འཁོར་
བཅས་པ་རྣམས། །གསན་ནས་ཕན་གདགས་སླད་དུ་འདིར་གཤེགས་ཤིག །འབྱུང་པོ་གང་དག་རི་རབ་སྟེང་གནས་དང་། །དགའ་བའི་ཚལ་དང་ལྷ་ཡི་གནས་རྣམས་དང་། །ཤར་ནུབ་རི་དང་ཉི་ཟླའི་ཁྱིམ་རྣམས་དང་། །རི་བོ་ཀུན་ལ་གང་དག་གནས་པ་དང་། །ཆུ་བོ་
ཀུན་དང་ཆུ་ཡི་མདོ་རྣམས་དང་། །རིན་ཆེན་གནས་ན་ལྷག་པར་གང་གནས་དང་། །མཚོ་དང་རྫིང་བུ་ལྟེང་ཀ་ཆུ་ངོགས་དང་། །གཡའ་ཆུ་སིལ་མ་ཅན་ན་གང་གནས་དང་། །གྲོང་དང་གྲོང་ཁྱེར་ཕྱུགས་ལྷས་སྟོང་པ་དང་། །ཁང་སྟོང་དང་ནི་ལྷ་ཡི་ཁང་པ་དང་། །གཙུག་ལག་
ཁང་དང་གྲོང་ཁྱེར་གནས་དག་གམ། །དཀའ་ཐུབ་གནས་དང་གླང་ཆེན་བྲེས་དང་ནི། །རྒྱལ་པོའི་དཀོར་ཁང་དག་ན་གང་གནས་དང་། །ལམ་སྲང་སུམ་མདོ་དང་ནི་བཞི་མདོ་དང་། །གང་དག་ལམ་པོ་ཆེ་དང་ཤིང་གཅིག་དྲུང་། །དུར་ཁྲོད་ཆེན་པོ་ནགས་ཚལ་ཆེན་པོ་དང་། །
སེང་གེ་དྲེད་དང་གཅན་གཟན་གནས་རྣམས་དང་། །འབྲོག་ཆེན་འཇིགས་སུ་རུང་བར་གང་གནས་དང་། །གང་དག་གླིང་མཆོག་དག་ན་གནས་པ་དང་། །ལྷུན་པོ་དུར་ཁྲོད་དག་ན་གནས་པ་རྣམས། །རབ་ཏུ་དགྱེས་ཤིང་གོ་བར་གྱུར་ནས་སུ། །ཕྲེང་བ་དྲི་དང་མེ་ཏོག་བདུག་པ་

དང་། །བསྟོད་དང་གཏོར་མ་མར་མེ་གུས་དབུལ་བ། །འདི་དག་བཞེས་ནས་བཏུང་ཞིང་བསྣམས་ནས་སུ། །ལས་འདི་རྣམས་ཀྱི་འབྲས་བུ་མཆིས་པར་མཛོད། །དེ་ལྟར་གདོན་ལ་མཆོད་པ་བྱས་ནས་ནི། །དེ་ནས་ཕྱོགས་སྐྱོང་རྣམས་ལ་གཏོར་མ་སྦྱིན། །
ཤར་ཕྱོགས་རྡོ་རྗེ་ཅན་དེ་ལྷ་ཚོགས་བཅས། །གཏོར་མ་ཕུལ་བ་འདི་དག་བཞེས་སུ་གསོལ། །མེ་དང་གཤིན་རྗེ་བདེན་བྲལ་སྲིན་པོའི་བདག །ཆུ་བདག་རླུང་བདག་ནོར་གྱི་བདག་པོ་དང་། །དབང་ལྡན་ལྷ་སྟེ་འབྱུང་པོའི་བདག་པོ་དང་། །སྟེང་གི་ཉི་ཟླ་ཚངས་པ་ཆེན་པོ་དང་། །
ལྷ་རྣམས་ཀུན་དང་གང་དག་ས་སྟེང་ཀླུ། །རི་ཡི་ལྷ་དང་གསང་བའི་ཚོགས་འདུས་པ། །སོ་སོ་སོ་སོར་གཏོར་མ་ཕུལ་བ་འདི། །རབ་ཏུ་དགྱེས་པ་ཡིས་ནི་བཞེས་ནས་ཀྱང་། །རང་རང་ཕྱོགས་སུ་ལེགས་པར་བཞུགས་ནས་སུ། །རང་གི་བུ་སྨད་མཛའ་བཤེས་གཉེན་འདུན་
དང་། །ནང་མི་དམག་དང་དཔུང་བཅས་ཐབས་ཅིག་ཏུ། །མེ་ཏོག་དྲི་དང་བྱུག་པ་གཏོར་མར་བཅས། །འདི་དག་བཏུང་ཞིང་ལེགས་པར་གསོལ་ནས་ཀྱང་། །བདག་གི་ལས་འདིའི་འབྲས་བུ་མཆིས་པར་མཛོད། །ཨོཾ་བཛྲ་ཤི་ཁ་རེ་རུ་ཊ་མ་ཊ། ཨོཾ་སུཾ་བྷ་ནི་སུཾ་བྷ་ཧཱུཾ། ཨོཾ་གྲྀ་ཧྞ་གྲྀ་
ཧྞ་ཧཱུཾ། ཨོཾ་གྲྀཧྞཱ་པ་ཡ་གྲྀཧྞཱ་པ་ཡ་ཧཱུཾ། ཨོཾ་ཨཱ་ན་ཡ་ཧོ་བྷ་ག་བཱན་བིདྱཱ་རཱ་ཛ་ཧཱུཾ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ། ཨཱཏྱཱ་ནུཏྤནྣ་ཏྲཱ་ཏ་སྭཱ་ཧཱ། ཕྱི་རོལ་ལྷ་ཡི་འཁོར་ལོ་དང་། །བྱང་ཆུབ་སེམས་དཔའི་དཀྱིལ་འཁོར་མཆོག །རིམ་གྱིས་དེ་རུ་གཞུག་པར་བྱ། །དེ་ནས་སྙིང་པོའི་འཁོར་ལོ་དང་། །དེ་ཡང་གཙུག་
ཏོར་དཀྱིལ་འཁོར་ལ། །དེ་ནི་འཁོར་ལོའི་དབང་ཕྱུག་ལ། །དེ་ཡང་ཕྱག་མཚན་དང་ཐིག་ལེར། །དེ་ལྟར་སྣང་བ་སོགས་རིམ་གྱིས། །སྤྲོས་པ་ཐམས་ཅད་ཞི་བ་དང་། །སྟོང་ཉིད་ལ་སོགས་རིམ་ཐོབ་པའི། །རྣལ་འབྱོར་ལྷན་སྐྱེས་མཛེས་པ་ཡིན། །དེ་ལྟར་
གོམས་པས་འཇུག་པ་རྣམས། །མི་ཤེས་ཆུ་བོ་མ་ལུས་པ། །བསྐམས་ཤིང་སེམས་ཀྱི་ཟླ་བ་ནི། །ཤར་པ་སྐལ་བ་བཟང་པོ་ཡིན། །རིམ་པ་འདི་ཡིས་འཁོར་ལོ་རྣམས། །ཐམས་ཅད་སྤྲོ་བའང་ཤེས་པར་བྱ། །ཐིག་ལེའི་སྦྱོར་བ་འདི་ཉིད་ཀྱིས། །ཡུན་མི་རིང་བར་གྲུབ་

པར་འགྱུར། །ཡང་ན་མདོར་བསྡུས་སྔགས་ཀྱིས་ནི། །ཇི་སྐད་བཤད་པའི་མེ་ཏོག་སོགས། །གང་ཞིག་ཅུང་ཟད་དབུལ་བ་ཡིས། །མེ་ཏོག་ཆུང་ནའང་འདིར་ཉོན་མོངས། །དུས་མཐའི་མེ་ནི་འཇོམས་པ་ཡིན། །དེ་ལ་མདོར་བསྡུས་པའི་སྔགས་ནི། ཨོཾ་སརྦ་ཏ་
ཐཱ་ག་ཏ་པུཥྤེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། དེ་བཞིན་དུ་བདུག་པ་ལ་སོགས་པ་ལ་ཡང་ངོ་། །འཁོར་ལོའི་དབང་ཕྱུག་འབའ་ཞིག་གམ། །ཡང་ན་འཁོར་ལོས་སྒྱུར་བ་ནི། །རྒྱུ་དང་བཅས་པའམ་སྙིང་པོའམ། །འཁོར་ལོའམ་ཕྱི་ནང་ཐམས་ཅད་ལ། །དད་པ་དག་
པར་ལྡན་རྣམས་དང་། །སེམས་དཔའ་ཆེན་པོས་མཆོད་པར་བྱ། །མཆོད་པ་བཤད་པར་བྱས་པ་ལས། །མཐོ་རིས་ཐར་པའི་སྙིང་པོ་ཐོབ། །དེ་དང་དེ་ལས་སྒྲོ་འདོགས་ཡོངས་འཁྲུལ་པ། །སྡུག་བསྔལ་འཇིགས་པའི་ངོ་བོ་ཡི། །ལྷ་ཡི་འཁོར་ལོ་ཆེན་པོ་དགའ་སྟེར་
བ། །ཐུགས་རྗེ་རྣམ་པ་སྣ་ཚོགས་སྤྲོས་པ་ཡིན། །དེ་ལྟར་གཅིག་མཆོད་འཁོར་ལོ་མ་ལུས་པ། །མཆོད་རྒྱས་འདི་ཉིད་རྟག་ཏུ་སྦྱོར་བ་ཡིན། །ཤི་བར་གྱུར་ཀྱང་བླ་ཡི་དད་མེད་པར། །མཆོད་བྲལ་སྐད་ཅིག་མ་ཡིན་སྡིག་ཐོབ་འགྱུར། །འཁོར་ལོ་འདི་དག་རྣམ་བསམས་
ནས། །མེ་ཏོག་ཐལ་མོས་གཏོར་བ་དང་། །གང་དེ་འཁོར་བའི་སྡུག་བསྔལ་རྣམས། །དེ་ནི་ཏིལ་གྱི་ཐལ་མོ་སྦྱིན། །སྐྱེ་བ་དང་ནི་འཇིག་པ་རྣམས། །སྣ་ཚོགས་ཤེས་རབ་ཀྱིས་ཉམས་པས། །སྡུག་བསྔལ་ཐ་མར་བྱེད་པར་འགྱུར། །ཡི་གེ་གསུམ་གྱིས་གཤེགས་སུ་
གསོལ། །འཇིག་རྟེན་གསུམ་གྱི་སྤྱི་བོ་ཡི། །མི་ཡི་ནོར་བུའི་ཚོགས་རྣམས་ནི། །མཚུངས་མེད་མི་ཡི་སེང་གེ་ཡིས། །བདུད་ཀྱི་གླང་པོ་འཇོམས་པར་བྱེད། །མ་རིག་སྡོང་པོ་གཅོད་པ་ཡི། །ཐུབ་པའི་ཡོན་ཏན་ཚོགས་འཁོར་ལོ། །ཕྱག་འཚལ་བསྟོད་དང་ཁ་ཟས་ཀྱིས། །དགེ་
འདུན་དག་ནི་མཆོད་པར་བྱའོ། །བདག་གི་བསོད་ནམས་འདི་ཡིས་ནི། །ཤེས་རབ་ཡེ་ཤེས་མི་བཟད་མེད། །རྟོག་པ་ཤིང་གི་རྩ་བ་དག །སྲེག་པའི་རྡོ་རྗེ་རྡུང་བར་ཤོག །རྡོ་རྗེའི་རིགས་ནི་རྟོགས་པ་དང་། །རིན་ཆེན་རིགས་ནི་ཐོབ་པ་དང་། །དོན་དམ་རྟོགས་པ་པདྨའི་

རིགས། །ལས་ཀྱི་རིགས་ཀྱི་དོན་ཆེན་བྱེད། །ཆོས་ཀྱི་དབྱིངས་ཀྱི་ཡེ་ཤེས་ཀྱི་དཀྱིལ་འཁོར་གྱི་རིམ་པ་ལས། བཅོམ་ལྡན་འདས་འཇམ་དཔལ་གྱི་སྒྲུབ་པའི་ཐབས་སློབ་དཔོན་སོ་མ་ཤྲཱིས་མཛད་པ་རྫོགས་སོ།། །།རྒྱ་གར་གྱི་མཁས་པ་ཆེན་པོ་པཎྜི་ཏ་
མ་ཧཱ་ཛྙཱ་ན་དང་། བོད་ཀྱི་ལོ་ཙཱ་བ་དགེ་སློང་གཞོན་ནུ་འོད་ཀྱིས་བསྒྱུར་བའོ།། ༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་ནཱ་མ་སཾ་གཱི་ཏི་མཎྜ་ལོ་པི་ཀ །བོད་སྐད་དུ། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་དཀྱིལ་འཁོར་གྱི་ཆོ་ག །བཅོམ་ལྡན་འདས་འཇམ་དཔལ་
ཡེ་ཤེས་སེམས་དཔའི་སྐུ་ལ་ཕྱག་འཚལ་ལོ། །རང་བྱུང་རྣམ་པར་དག་པ་དང་། །ཐམས་ཅད་མཁྱེན་དང་གསུང་དབང་ཕྱུག །རྨད་དུ་བྱུང་དང་བརྩོན་འགྲུས་འཛིན། །སྣ་ཚོགས་བདག་ཉིད་ཕྱག་འཚལ་ལོ། །སྤང་འབྱུང་རྣམ་པར་དག་པ་དང་། །དད་དང་ཡེ་ཤེས་ཕུན་ཚོགས་པའི། །
གང་གིས་དྲིན་གྱིས་རྙེད་སླ་བའི། །དབྱངས་ཀྱི་རྗེས་འཇུག་བདག་ཉིད་ཀྱི། །དེ་ཡི་རྒྱུ་ལ་ཕྱག་འཚལ་ལོ། །ཕྱག་བརྙན་བཞིན་དུ་དངོས་གྲུབ་ནི། །གང་གི་དྲིན་གྱིས་རྙེད་སླ་བའི། །ཐུགས་རྗེས་ཁྱབ་པའི་བདག་ཉིད་ཀྱིས། །བླ་མའི་ཞབས་དག་རྒྱལ་གྱུར་ཅིག །སྲིད་པའི་བཅིངས་
པས་ཁྱབ་པ་ཡི། །འཁོར་བའི་འཁོར་ལོ་རྣམ་འཇོམས་པའི། །གང་དེ་འཇམ་དཔལ་དཀྱིལ་འཁོར་ནི། །ཡང་དག་ལྟ་བས་འཇུག་པ་བཤད། །དེ་ལ་རྣལ་འབྱོར་ཚངས་གནས་ལ། །གནས་དང་གསུམ་ལ་སྐྱབས་གནས་དང་། །སེམས་བསྐྱེད་པ་ཡི་སྟོབས་ཀྱིས་ནི། །ངང་
གིས་སྡོམ་པ་ལ་གནས་དང་། །རྨི་ལམ་ལྟ་བུར་རྟོགས་པ་ལས། །སེམས་གཉིས་དགེ་བ་མི་རྟོག་ནོར། །ཤིན་ཏུ་བདེ་བའང་རྟོགས་པ་དང་། །ཐེ་ཚོམ་མེད་དང་ཆགས་མེད་དང་། །དངོས་པོ་ལྔ་ལ་མཁས་པ་དང་། །ཕ་རོལ་ཕྱིན་ཚོལ་མངོན་དགའ་བ། །དེ་ལས་གཞན་
པའི་ངོ་བོ་ནི། །ཡོན་ཏན་ལྡན་པ་མཁས་པ་ཡིན། །ཡིད་ཆེས་པ་ཡི་ཁྱད་པར་གྱིས། །བྱང་ཆུབ་སེམས་ནི་ཕུལ་བྱུང་དང་། །ཐབས་དང་ཤེས་རབ་གཉིས་མེད་དང་། །མོས་པ་ཡང་དག་ལྡན་པ་དང་། །ཇི་བཞིན་དབང་ནི་ཐོབ་པ་དང་། །བླ་མ་སེམས་ཅན་བསྙེན་པ་དང་། །

ལྟུང་བ་སྣ་ཚོགས་སྤང་བའི་ཕྱིར། །གུས་པའི་བློ་ཡིས་སྐལ་བར་ལྡན། །དེ་ཉིད་རྣམ་བཅུ་རྟག་ཏུ་ནི། །ཡིད་ལ་བྱེད་པ་མངོན་གཞོལ་པ། །སྔགས་དང་རྒྱུད་དང་དེ་ཉིད་ཤེས། །སྒྲུབ་བྱེད་ཐུབ་པའི་དབང་པོར་བརྗོད། །དཀྱིལ་འཁོར་ལས་ལ་འཇུག་འདོད་པས། །འབད་
པས་བསྙེན་པ་ལ་གནས་བྱ། །དང་པོར་བསྙེན་པ་མ་བྱས་པར། །ལྷ་རྣམས་བྱིན་གྱིས་རློབ་མི་འགྱུར། །ཡིད་དང་མཐུན་པའི་གནས་རྣམས་སུ། །སྙིང་གའི་པདྨའི་ཟླ་བ་ལ། །འོད་ཟེར་འབར་བའི་མཾ་ཡིག་དགོད། །རང་སེམས་དག་པའི་ནམ་མཁའ་ལ། །རྫོགས་
སངས་སྲས་དང་བླ་མར་བཅས། །ཡང་དག་བལྟས་ལ་ཕྱག་འཚལ་དང་། །དད་པ་རྒྱས་པའི་ཡིད་ཀྱིས་ཀྱང་། །འཁོར་ལོ་མཆོད་པས་དང་པོར་མཆོད། །དེ་ལ་སྔགས་བརྗོད་སྔོན་སོང་བའི། །དང་པོའི་མགོན་ལ་ཕྱག་བཞི་བྱ། །ཆུ་གཙང་བ་ཡི་རྣམ་པ་དང་། །སྣོད་རྒྱས་
པ་ཡང་དབུལ་བར་བྱ། །མེ་ཏོག་དང་ནི་བདུག་པ་དང་། །མར་མེ་དྲི་ཡིས་མཆོད་པར་བྱ། །དེ་ལས་གཞན་ཡང་མཆོད་པའི་ཚོགས། །མེ་ཏོག་སྤོས་དང་མར་མེ་དྲི། །རྒྱན་གྱི་རང་བཞིན་མཆོད་པ་ནི། །རིན་ཆེན་བཞི་ནི་དབུལ་བར་བྱ། །བཞད་དང་སྒེག་དང་དགའ་བ་དང་། །
རྩེ་འཇོའི་བྱེ་བྲག་བདེ་བ་དང་། །དཔག་བསམ་ཤིང་དང་གོས་ཀྱི་ཤིང་། །ཤིང་དང་བཅས་པ་དེ་རྣམས་དབུལ། །སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་དེ་བཞིན་དུ། །ཇི་ལྟར་རང་སྔགས་བཟླས་པ་དང་། །ཕྱག་རྒྱ་ཡིས་ནི་དབུལ་བར་བྱ། །
ངན་པར་བྱས་པ་སུན་ཕྱུང་ནས། །དེ་རྣམས་མདུན་དུ་བཤགས་པར་བྱ། །གཡོ་མེད་པ་ཡི་སེམས་ཀྱིས་ཀྱང་། །གཞན་གྱི་བསོད་ནམས་རྗེས་ཡི་རང་། །དཀོན་མཆོག་གསུམ་ལ་བརྟེན་སྟོབས་ཀྱིས། །གནས་པ་གང་ལས་འཇིག་པ་འབྱུང་། །དེ་ནས་རང་གཞན་དོན་
གྱི་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །སེམས་བསྐྱེད་པ་དང་མཐུན་པར་ནི། །བློ་ལྡན་ལམ་ལ་གནས་པར་བགྱི། །དགེ་བ་རྒྱུན་མི་འཆད་པའི་ཕྱིར། །སྨོན་ལམ་དག་ཀྱང་གདོན་པར་བྱ། །སེམས་ཅན་ཀུན་ལ་བརྟེན་ནས་ནི། །ཚངས་པའི་གནས་ནི་

ཡོངས་སུ་བསྒོམ། །རང་བཞིན་མེད་དང་དགེ་ལ་སོགས། །བྲལ་ཕྱིར་མཚན་མ་མེད་པ་དང་། །ཡིད་མི་འཇུག་ཅེས་བྱ་བ་ཡིས། །ཤེས་རབ་ཏིང་འཛིན་གསུམ་ལ་འཇུག །ཇི་ལྟར་རང་སྔགས་བཟླས་པ་ཡི། །བྱིན་གྱིས་བརླབ་པའི་བྱ་བར་ལྡན། །མཐོང་
བའི་ལམ་བྱིན་རྫོགས་སངས་ཀྱིས། །བུ་ལ་སོགས་པ་བསྟན་པ་ཡིན། །རྫོགས་སངས་རྒྱས་དག་གིས་བསྟན་པས། །ཕྱག་འཚལ་གསོལ་བ་འདེབས་པ་ནི། །སྐྱོབ་པ་ཇི་ལྟར་བདག་ལ་ནི། །བསྟན་པ་ཡང་དག་བཤད་དུ་གསོལ། །རང་བཞིན་སྒྲུབ་པ་བཟླས་པ་ཡི། །
རང་གི་སེམས་ནི་བསྒོམ་པར་གྱིས། །སླར་གསོལ་ཟླ་བའི་གཟུགས་ལྟ་བུ། །མཐོང་ངོ་ཞེས་ནི་གསོལ་བ་དང་། །སེམས་བསྐྱེད་ཅེས་ནི་བྱ་བ་ཡི། །དང་པོར་ཕྱག་འཚལ་ལྡན་པ་དང་། །དབུས་སུ་བྱང་ཆུབ་ཡང་དག་ལྡན། །སེམས་བསྐྱེད་པ་ནི་བརྟན་པ་ལས། །བདེ་བ་
བསྐྱེད་པའི་རྗེས་ལ་ནི། །ཟླ་བའི་གཟུགས་ནི་མཐོང་ངོ་ཞེས། །གསོལ་བས་བརྟན་པར་གྱིས་ཤིག་ཅེས། །གསུངས་པ་དེ་ནི་བརྟན་པ་ཡིན། །ཨོཾ་ཛྙཱ་ན་རཥྨི་པི་སྲི་ཛ་ཧཱུཾ། རྣམ་པ་སྣ་ཚོགས་འོད་ཟེར་གྱིས། །སེམས་ཅན་བྱང་ཆུབ་ལ་བཀོད་ནས། །དེ་དག་གཅིག་པུར་གྱུར་
པ་ལས། །རྡོ་རྗེ་རྟོགས་པར་མངོན་པར་འདོད། །ཨོཾ་ཏིཥྛ་བཛྲ། ཨོཾ་སྥ་ར་ཎ་བཛྲ། ཨོཾ་སཾ་ཧ་ར་ན་བཛྲ། ཨོཾ་ཛྙཱ་ན་བཛྲ། ཨོཾ་སརྦ་ཏ་ཐཱ་ག་ཏ་ཛྙཱ་ན་བཛྲ། རྡོ་རྗེ་དབྱིངས་ཞེས་ཡང་དང་ཡང་། །ཞེས་ནི་བདག་ཉིད་དབང་བསྐུར་རོ། །ཨོཾ་བཛྲ་ཨཱཏྨ་ཀོ྅ཧཾ། བརྩེར་ལྡན་
འགྲོ་ལ་ཕན་པ་དག །གྱུར་ཕྱིར་བྱིན་གྱིས་བརླབ་ཏུ་གསོལ། །ཞེས་ནི་གསོལ་བཏབ་སྐད་ཅིག་ལ། །དེ་དག་རབ་ཏུ་བཞུགས་ནས་ནི། །དེ་ཡི་བདག་ཉིད་རང་ཉིད་གྱུར། །ཨོཾ་སརྦ་ཏ་ཐཱ་ག་ཏཱ་ཏ་ཐ་ཨ་ཧཾ། རྡོ་རྗེ་རིན་ཆེན་སོགས་མཉམ་ཉིད། །རྣམ་པ་ཀུན་དུ་འོད་གསལ་བ། །
ཆོས་ཀྱི་རྒྱལ་པོ་དཔལ་འབྱུང་བའི། །དང་པོའི་སངས་རྒྱས་ཞེས་བསྟོད་དོ། །དེ་ནས་གཞན་དོན་བྱེད་པའི་ཕྱིར། །སླར་ཡང་འདི་ལྟར་བསྒོམ་པར་བྱ། །ཁྲོ་བོའི་གཟུགས་ནི་འཆང་བ་ཡིས། །སྙིང་གར་པདྨ་ཉི་ཧཱུཾ་ལས། །ཁྲོ་བོ་བཅུ་པོ་བགེགས་ཀྱི་གཙོ། །ལུས་ངག་

ཡིད་གསུམ་ཕུར་བུས་གདབ། །ཕྱི་རོལ་རྡོ་རྗེ་ར་བ་དང་། །དྲ་བ་ལ་སོགས་རྣམ་བསྒོམས་ནས། །ཡི་གེ་ཧཱུཾ་གཉིས་དབུས་གནས་པའི། །འོག་ཏུ་ཡཾ་བཾ་རཾ་དག་ལས། །རླུང་ཆུ་མེ་ཡི་དཀྱིལ་འཁོར་རྣམས། །དེ་ཉིད་རིག་པས་དེ་ལྟར་བྱ། །མཁའ་ལ་བྲུཾ་ཡིག་ལས་བྱུང་བ། །རྟག་
པའི་ཡན་ལག་ལས་བྱུང་བའི། །བདུད་རྩིའི་རྒྱུན་ནི་ཡོངས་གང་བས། །སྣོད་ནི་དེ་ཡི་བདག་ཉིད་འགྱུར། །ཧཱུཾ་ཡིག་གཉིས་སུ་པ་ལས་ནི། །སྐུ་ཡི་རྡོ་རྗེ་ཡང་དག་འབྱུང་། །གནས་པ་མཁྲང་བར་གྱུར་པ་ལས། །གསེར་གྱི་དཀྱིལ་འཁོར་ཉིད་དུ་འགྱུར། །ཧཱུཾ་ཡིག་ངོས་གཉིས་
ལྡན་པ་ཡི། །དབུས་སུ་སུཾ་ལས་ལྷུན་པོ་སྟེ། །དེ་རུ་བྲུཾ་ལས་བྱུང་བ་ཡི། །དཔལ་ལྡན་གཞལ་ཡས་ཁང་བརྩེགས་བསམ། །ཕྱི་དང་ནང་དུ་སྒོ་བཞི་དང་། །གྲུ་བཞི་སྟེགས་བུར་ཡང་དག་ལྡན། །དྲ་བ་དྲ་ཕྱེད་ཕྲེང་བ་དང་། །དྲིལ་བུ་མེ་ལོང་གིས་གསལ་བའོ། །ཀ་བ་
བརྒྱད་དང་ལྡན་པ་དང་། །ནམ་མཁའ་བླ་རེས་སྣང་བ་ཡིན། །འོག་གི་ས་གཞི་མཐོ་བ་དང་། །ཡངས་པ་རྣམ་པར་མཛེས་པ་ཡིན། །དེ་དབུས་ཧྲཱིཿལས་སྣ་ཚོགས་པའི། །ཆུ་སྐྱེས་ཉི་མར་སེང་གེའི་གདན། །དང་པོའི་དབྱངས་ལས་བྱུང་བ་ཡི། །རྒྱལ་བ་རྣམ་སྣང་སྐུ་
མདོག་དཀར། །འཁོར་ལོ་དྲིལ་བུ་ཕྱག་ན་བསྣམས། །ཉི་མ་ལ་བཞུགས་བསྒོམ་པར་བྱ། །དེ་ཡང་སྙིང་གར་སྣ་ཚོགས་པའི། །པདྨ་ཉི་མ་དྷཱིཿལས་བྱུང་། །དང་པོའི་སངས་རྒྱས་མིག་སྨན་མདོག །ཞལ་ལྔ་ཕྱག་ནི་བརྒྱད་དང་ལྡན། །གཡས་བརྩམས་སེར་པོ་དམར་
པོ་དང་། །ལྗང་གུ་དཀར་པོ་པདྨའི་ཞལ། །ནམ་མཁའ་འདྲ་བའི་རལ་གྲི་དང་། །ཤེས་རབ་པུསྟི་བཞི་བཞི་ནི། །གཡས་དང་གཡོན་གྱི་ཕྱག་རྣམས་ཀྱི། །སྒེག་དང་བཅས་པས་བསྣམས་པ་ཡིན། །ཨོཾ་སརྦ་དྷརྨཱ་ཨ་བྷཱ་བ། ནང་གི་མུ་ཁྱུད་དག་ལ་དགོད། །ཕྱི་རོལ་
ཀ་ལ་སོགས་བཀོད་པ། །སྒེག་དང་མཛེས་པར་སྣང་བ་ཡིན། །སྙིང་གར་སྲིད་པའི་འཁོར་ལོ་ནི། །རྟེན་འབྲེལ་བཅུ་གཉིས་སྟོན་པའོ། །དེ་ཡི་ལྟེ་བའི་འཁོར་ལོ་ནི། །རྩིབས་བཅུ་པ་ཡིས་བརྒྱན་པ་ཡིན། །ཨོཾ་པྲ་ཛྙཱ་ལ་སོགས་པ་ཡི། །གཏི་མུག་སེལ་བར་བྱེད་པ་

ཡིས། །ལྷག་མ་ཉེ་སྙིང་སྔགས་ཕྱེད་ཀྱིས། །ནང་གི་མུ་ཁྱུད་རྣམ་པར་བསྐོར། །མུ་ཁྱུད་ཨཱ་ལི་བཅུ་གཉིས་ཀྱིས། །འཁོར་ལོ་འདི་ཡང་རྣམ་པར་གསལ། །ཟླ་བ་གཞོན་ནུ་ལྟར་འཇམ་པ། །གཞོན་ནུ་སྒེག་པའི་ཆ་བྱད་ཅན། །སྣ་ཚོགས་ཀྱིས་ནི་རྩེ་
བྲན་དང་། །གདོང་ལྔ་ཟུར་ཕུད་ལྔ་དང་ལྡན། །དཔུང་རྒྱན་དོ་ཤལ་ཡན་ལག་མཛེས། །དཔལ་འཕྲོ་བ་ཡི་ཞབས་གདུབ་སྤྲས། །འཁོར་བའི་སྡུག་བསྔལ་གྱིས་གདུངས་པ། །ཤིན་ཏུ་དབུགས་འབྱིན་བྱེད་པ་ཡིན། །གང་ཞིག་ཤེས་རབ་ཡེ་ཤེས་སྐུ། །ཟླ་བའི་དཀྱིལ་འཁོར་
གདན་ལ་བཞུགས། །དང་པོའི་དབྱངས་ལས་བྱུང་བ་ཡི། །དཔལ་ལྡན་འཇམ་དབྱངས་ཞེས་དྲན་བྱ། །སེང་གེའི་གདན་ལ་གསེར་གྱི་མདོག །ཕྱི་རོལ་ཤར་སོགས་ཕྱོགས་དགོད་པ། །ཉི་མར་རྡོ་རྗེའི་སྐྱིལ་ཀྲུང་བཞུགས། །རིན་ཆེན་ཅོད་པན་གྱིས་མཛེས་པ། །གཡས་ཀྱི་
འོད་ཟེར་བཅས་འཁོར་ལོ། །གཡོན་པ་གདན་ལ་བརྟེན་པའོ། །རྡོ་རྗེ་སེམས་དཔའ་སོགས་མིང་ཅན། །འཁོར་ལོས་སྒྱུར་བ་བརྒྱད་ཤེས་བྱ། །དེ་ལ་རིག་པའི་ལྷ་མོ་བཞི། །དེ་ཡི་མཚམས་བཞིར་ཤེས་བྱ་སྟེ། །རྡོ་རྗེ་སེམས་མ་སྐུ་མདོག་སྔོ། །ཕྱག་གིས་པདྨ་རྡོར་དྲིལ་བསྣམས། །
རིན་ཆེན་སེམས་མ་གསེར་གྱི་མདོག །རིན་ཆེན་དྲིལ་བུ་ཉེ་བར་མཛེས། །ཆོས་ཀྱི་སེམས་མ་གུར་གུམ་མདོག །པདྨ་དྲིལ་བུས་མཚན་པ་ཡིན། །ལས་ཀྱི་སེམས་མ་ལྗང་གུ་སྟེ། །སྣ་ཚོགས་རྡོ་རྗེ་བསྣམས་མཛེས་དང་། །འགྲོ་བ་སྡུད་པར་བྱེད་པ་ཡི། །གཡོན་པ་སྣང་
བ་ཆེན་པོ་ཡིན། །ཤར་དུ་རྡོ་རྗེ་ཧཱུཾ་མཛད་ནི། །མདོག་ནག་རྣམ་རྒྱལ་ཕྱག་རྒྱ་དང་། །རྡོ་རྗེ་དྲིལ་བུ་ཕྱག་རྒྱར་ལྡན། །འཇིགས་རུང་ས་བོན་ཧཱུཾ་ལས་བྱུང་། །གླང་པོའི་གདན་ལ་གནས་པ་དང་། །ཁྲོ་དང་སྒེག་པའི་ཉམས་དང་ལྡན། །ལྷོ་རུ་རྡོ་རྗེ་ཉི་མ་ནི། །ཏྲཱཾ་བྱུང་རྨད་བྱུང་རྟ་ཡི་
གདན། །ཡིད་བཞིན་ནོར་བུས་མ་ལུས་པའི། །དབུལ་བ་སེལ་བར་བྱེད་པ་དང་། །དྲིལ་བུའི་སྒྲ་ཡིས་སེམས་ཅན་ལ། །དཔལ་རྣམས་འགུགས་པར་བྱེད་པ་ཡིན། །པདྨ་གར་དབང་སྐུ་མདོག་དམར། །ནུབ་ཏུ་རྨ་བྱའི་གདན་ལ་བཞུགས། །ཆུ་སྐྱེས་དྲིལ་བུ་བསྣམས་

པ་དང་། །ཏཾ་གྱིས་བཾ་ལ་མངོན་ཕྱོགས་བྱེད། །བྱང་དུ་རྟ་མཆོག་སྐུ་མདོག་ལྗང་། །ནམ་མཁའ་ལྡིང་གི་གདན་ལ་བཞུགས། །ཨ་བྱུང་སྣ་ཚོགས་རྡོ་རྗེ་དང་། །དྲིལ་བུའི་སྒྲ་ཡིས་ཕྱོགས་ཀུན་ཁྱབ། །སཾ་གཾ་བཾ་མཾ་གྷཾ་ས་བོན་རྣམས། །ཨོཾ་ཧཱུཾ་ཏྲཱཾ་ཧྲཱིཿལྡན་པ་ལས། །གདན་
འདི་དག་ནི་གོ་རིམས་བཞིན། །མཁས་པས་གྲངས་བཞིན་ཤེས་པར་བྱ། །ཟླ་བའི་གདན་གནས་འདི་རྣམས་ཀྱི། །དང་པོའི་སངས་རྒྱས་གོང་མ་བཞིན། །སྲིད་པའི་འཁོར་ལོ་ཚངས་པ་སྟེ། །སྔ་མ་ལས་ཁྱད་མེད་ཕྱིར་རོ། །ཞི་བའི་འཁོར་ལོ་རྩིབས་བརྒྱད་པ། །མི་བསྐྱོད་
སོགས་རིགས་རིམ་བཞིན་དུ། །ཨོཾ་དུཿཁ་ཙྪེ་ད་ལ་སོགས་དགོད། །རིགས་ནི་ཇི་ལྟར་དེ་ན་གནས། །ན་མ་ཞེས་བྱ་རྩིབས་གཅིག་ལ། །མཁས་པས་ཀུན་ལ་ཤེས་པར་བྱ། །སྡུག་བསྔལ་གཅོད་པ་རྡོ་རྗེ་དང་། །རིན་པོ་ཆེ་ནི་གསུང་དབང་ཕྱུག །རྡོ་རྗེ་རྣོན་པོ་པདྨ་དང་། །ཡེ་ཤེས་
སྐུ་ཅན་ཞེས་བྱ་བ། །སྣ་ཚོགས་རྡོ་རྗེ་གཡོན་པ་ལ། །གཡས་པ་རལ་གྲི་ཁྱད་པར་མེད། །ཀུན་ཀྱང་ཟླ་བའི་གདན་ལ་བཞུགས། །ཟླ་བ་ལྟར་འཇམ་ཆ་བྱད་ཅན། །དང་པོའི་དབྱངས་བྱུང་བཟླས་པ་ཡང་། །སྙིང་པོ་ཉེ་སྙིང་རིམ་པ་བཞིན། །དེ་ལ་ལྔ་པོ་རིམ་བཞིན་དུ། །སྙིང་
པོ་དང་ནི་ཉེ་སྙིང་པོ། །ཨོཾ་པྲཛྙཱ་ཛྙཱ་ན་མཱུརྟ་ཡེ་ནཱ་མ། ཨོཾ་དུཿཁ་ཙྪེ་ད་ཡ་ཏེ་ནཱ་མ། ཨོཾ་བཱ་གཱི་ཤྭ་ར་ཡ་ཏེ་ནཱ་མ། ཨོཾ་བཛྲ་ཏཱིཀྵ་ཡ་ཏེ་ནཱ་མ། ཨོཾ་ཛྙཱ་ན་ཀཱ་ཡ་ཡ་ཏེ་ནཱ་མ། ཉེ་བའི་སྙིང་པོ་ཐུན་མོང་སྟེ། །ཨོཾ་སརྦ་དྷརྨཱ་ཨ་བྷཱ་བ་སྭ་བྷཱ་བ་བི་ཤུདྡྷ་བཛྲ་ཨ་ཨཱ་ཨཾ་ཨཿ། པྲ་ཀྲྀ་ཏ་པ་རི་ཤུདྡྷ། སརྦ་
དྷརྨཱ་ཡ། དུ་ཏ་སརྦ་ཏ་ཐཱ་ག་ཏ་ཛྙཱ་ན་ཀཱ་ཡ་མཉྫུ་ཤྲཱི་པ་རི་ཤུདྡྷི་ཏ་མུ་པཱ་དཱ་ཡེ་ཏི་ཨ་ཨཱཿསརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་ཧ་ར། ཨོཾ་ཧཱུཾ་ཧྲཱིཿབྷ་ག་བཱན་ཛྙཱ་ན་མཱུརྟི་བཱ་གཱི་ཤྭ་ར་མ་ཧཱ་ཝ་ཙ་སརྦ་དྷརྨཱ་ག་ག་ན་ཨ་མ་ལ་སུ་པ་རི་ཤུདྡྷ་དྷརྨ་དྷཱ་ཏུ་ཛྙཱ་ན་གརྦྷ་ཨཱཿ། འདི་རྣམས་ཀྱང་ནི་རིམ་བཞིན་དུ། །ཤར་
ལ་སོགས་པར་བསྒོམ་པར་བྱ། །རྡོ་རྗེ་སེམས་དཔའ་སོགས་དབྱེ་བས། །བྱང་ཆུབ་སེམས་དཔའ་རྣམས་བཅུ་དྲུག །རྡོ་རྗེ་སེམས་དཔའ་སྐུ་མདོག་དཀར། །རྡོ་རྗེ་དྲིལ་བུ་བསྣམས་པར་འདོད། །རྡོ་རྗེ་རྒྱལ་པོ་གསེར་གྱི་མདོག །ཕྱག་གཉིས་རྡོ་རྗེ་ལྕགས་ཀྱུ་བསྣམས། །

ཆགས་པ་པདྨ་རཱ་གའི་མདོག །མདའ་དང་གཞུ་ནི་བསྣམས་པ་ཡིན། །རྡོ་རྗེ་ལེགས་པ་སྐུ་མདོག་ལྗང་། །ཕྱག་གཉིས་ལེགས་སོ་སྦྱིན་པའོ། །རིན་ཆེན་བཙོ་མ་གསེར་གྱི་མདོག །རིན་པོ་ཆེ་དང་དྲིལ་བུ་བསྣམས། །རྡོ་རྗེ་གཟི་བརྗིད་ཉི་མའི་མདོག །
གཡས་པ་ཉི་མའི་གཟུགས་འཛིན་པ། །རྡོ་རྗེ་དཔལ་ནི་མརྒད་མདོག །གཡས་ན་རྒྱལ་མཚན་བསྣམས་པ་ཡིན། །བཞད་པ་ཀུནྡ་ཟླ་བའི་མདོག །གཡས་པ་སོ་ཡི་ཕྲེང་བ་བསྣམས། །འདི་གསུམ་པ་ཡི་གཡོན་པ་ནི། །སྐྱིལ་ཀྲུང་གདན་ལ་བརྟེན་ནས་སོ། །ཆོས་
ནི་པདྨ་རཱ་གའི་མདོག །གཡོན་པ་པདྨ་དམར་པོ་བསྣམས། །གཡས་པས་རྣམ་པར་འབྱེད་པ་ཡིན། །དེ་ནི་རྒྱས་པར་བྱེད་པ་ཡིན། །རྣོན་པོ་བདུད་རྩི་འོད་ཟེར་མདོག །རལ་གྲི་དང་ནི་པུསྟི་བསྣམས། །རྒྱུ་དང་སྨྲ་བ་གཡས་པ་ན། །འཁོར་ལོ་དང་ནི་ལྕེ་བསྣམས་པ། །
བདག་ཉིད་མཛེས་པ་གཡོན་པ་ཡི། །ཕྱག་གི་པདྨ་གདན་ལ་བརྟེན། །ལས་ནི་སྔོ་ལྗང་སྣ་ཚོགས་པའི། །རྡོ་རྗེ་དང་ནི་དྲིལ་བུ་བསྣམས། །བསྲུང་བ་གསེར་གྱི་མདོག་འདྲ་བ། །ཕྱག་གཉིས་གོ་ཆ་འབར་བའོ། །གནོད་སྦྱིན་མིག་སྨན་ནག་པོའི་མདོག །ཕྱག་གཉིས་མཆེ་
བ་རྣམ་པར་མཛེས། །ཁུ་ཚུར་རྨད་བྱུང་མཛེས་པའི་མདོག །ཕན་ཚུན་ཁུ་ཚུར་རྡོ་རྗེ་འཛིན། །བདག་པོ་རྣམ་པ་བཞི་ཡི་ཕྱིར། །བཞི་བཞི་རུ་ནི་དྲན་པར་བྱ། །ལྷ་མོ་བཅུ་བཅུ་འདི་རྣམས་ཀྱི། །འཁོར་དུ་ཡང་དག་དྲན་པར་བྱ། །སྐྱིལ་ཀྲུང་ཕྱེད་མར་ལྡན་པ་ཡི། །རང་རང་
བདག་པོའི་མདོག་བཞིན་ནོ། །སྦྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་དེ་བཞིན་ཤེས་རབ་དང་། །སྨོན་ལམ་ཡེ་ཤེས་ཞེས་བྱ་བ། །འབྲས་བུའི་གནས་ཀྱི་ཕ་རོལ་ཕྱིན། །རྡོ་རྗེ་དྲིལ་བུ་ཡང་དག་ལྡན། །མདོག་དཀར་རྡོ་རྗེ་སེམས་དཔའ་ཡི། །འཁོར་
དུ་དེ་དག་གནས་པ་ཡིན། །དེ་ཉིད་ལམ་གྱི་ངོ་བོར་ནི། །བདུད་ལ་ལྕགས་ཀྱུ་འདེབས་པ་གཞན། །སེར་པོ་རྡོ་རྗེ་རྒྱལ་པོ་ཡི། །འཁོར་དུ་དེ་དག་གནས་པ་ཡིན། །དེ་ཉིད་རྣམ་པར་དག་ངོ་བོར། །མདའ་དང་གཞུ་ཡིས་རྣམ་བརྒྱན་པ། །མདོག་དམར་རྡོ་རྗེ་ཆགས་པ་ནི། །

ཐམས་ཅད་དཀྱིལ་འཁོར་ཡོངས་སུ་བསྐོར། །གཞན་དོན་ངོ་བོར་གནས་དེ་ཉིད། །ཕྱག་གཉིས་ལེགས་པ་སྦྱིན་པ་དང་། །སྐུ་མདོག་ལྗང་ཁུའི་འཁོར་རྣམས་ཀྱིས། །རྡོ་རྗེ་ལེགས་པ་བསྐོར་བའོ། །རབ་ཏུ་དགའ་དང་དྲི་མ་མེད། །གསུམ་པ་དེ་བཞིན་འོད་བྱེད་དང་། །
འོད་འཕྲོ་སྦྱང་དཀའ་དེ་བཞིན་དུ། །མངོན་གྱུར་རིང་སོང་མི་གཡོ་བ། །ལེགས་པའི་བློ་གྲོས་ཆོས་ཀྱི་སྤྲིན། །སྐུ་མདོག་སེར་པོ་འབྲས་བདག་ཉིད། །དར་དཔྱངས་བཅིང་བའི་ཚུལ་གནས་པ། །རྡོ་རྗེ་རིན་ཆེན་འཁོར་དུ་གནས། །དེ་ཉིད་ལམ་གྱི་གྲངས་ཀྱིས་
ནི། །ཉི་མའི་མདོག་ཅན་ཉི་མ་བསྣམས། །རྡོ་རྗེ་ཉི་མ་ཉིད་བཞིན་དུ། །རྗེས་སུ་བྱེད་པར་གནས་པ་ཡིན། །སྡུག་བསྔལ་དང་ནི་ཀུན་འབྱུང་དང་། །འགོག་དང་ལམ་དང་དེ་བཞིན་དུ། །ཆོས་ཤེས་རྗེས་སུ་ཤེས་པ་དང་། །ཀུན་རྫོབ་ཤེས་དང་དེ་བཞིན་དུ། །དོན་དམ་
དེ་བཞིན་མི་སྐྱེ་བ། །ཟད་པ་ཤེས་པའི་ཡེ་ཤེས་ནི། །རང་བཞིན་ཕུན་སུམ་ཚོགས་དགེ་བའི། །རིན་ཆེན་རྒྱལ་མཚན་བསྣམས་པ་དང་། །མདོག་ལྗང་རྡོ་རྗེ་རྒྱལ་མཚན་གྱི། །ཕུན་སུམ་ཚོགས་པ་བསྒོམ་པར་བྱ། །གཞན་དོན་ཕུན་སུམ་བདག་ཉིད་ཀྱི། །དེ་བཞིན་ཟླ་
བའི་འོད་ཟེར་མདོག །རྡོ་རྗེ་བཞད་པ་ལ་བརྟེན་པ། །སོ་ཡི་ཕྲེང་བས་རྣམ་པར་བརྒྱན། །ཕུང་པོ་ཁམས་དང་སྐྱེ་མཆེད་དང་། །བདེན་པ་རྟེན་འབྲེལ་ཐུབ་པ་ཡི། །གནས་དང་གནས་མིན་བདག་པོ་དང་། །དུས་གསུམ་བདེན་པ་རྣམ་པ་བཞི། །འདུས་བྱས་འདུས་མ་
བྱས་དགེ་བ། །རྡོ་རྗེ་ཆོས་ཀྱི་འཁོར་དུ་བསྒོམ། །དོན་དང་ཕྱག་གཡོན་པདྨ་ནི། །བསྣམས་ནས་གཡས་པས་འབྱེད་པར་མཛད། །གཅིག་དང་རྒྱུ་དང་ཟ་བ་དང་། །བྱེད་པ་དང་ནི་དབང་སྒྱུར་དང་། །བདག་པོའི་དོན་དང་བརྟག་པ་དང་། །ཉོན་མོངས་པ་དང་དག་པའི་
གནས། །རྣལ་འབྱོར་ཅན་དང་མ་གྲོལ་གྲོལ། །བདག་ཏུ་འཛིན་པ་སྐྱེ་བ་ཉིད། །དེ་དག་གཅོད་པའི་སྐུ་མདོག་གནག །ཕྱག་ན་པུསྟི་བསྣམས་པ་དང་། །ཉོན་མོངས་གཅོད་པའི་རལ་གྲི་བསྣམས། །རྡོ་རྗེ་རྣོན་པོའི་འཁོར་དུ་བརྗོད། །དད་དང་བརྩོན་འགྲུས་དྲན་

བསམ་གཏན། །ཤེས་རབ་དེ་བཞིན་ཤ་ཡི་སྤྱན། །ལྷ་དང་ཤེས་རབ་ཆོས་དང་ནི། །སངས་རྒྱས་སྤྱན་དང་དབང་པོ་ཡི། །རྡོ་རྗེ་འཁོར་ལོ་སྐུ་མདོག་སེར། །ལྷ་མོ་འཁོར་ལོ་བསྣམས་པས་བསྐོར། །གནས་དང་གནས་མིན་རྣམ་སྨིན་དང་། །མོས་
པ་དང་ནི་སྣ་ཚོགས་ཁམས། །དབང་པོ་ཀུན་འགྲོའི་ལམ་དག་དང་། །ཉོན་མོངས་རྣམ་པར་སྦྱང་བ་དང་། །སྔོན་གནས་རྗེས་དྲན་སྐྱེ་འཆི་དང་། །ཟག་པ་ཟད་པ་ཉིད་ཀྱང་དེ། །རྡོ་རྗེ་སྨྲ་བ་ཟངས་ཀྱི་མདོག །ཕྱག་གིས་ལྕེ་བསྣམས་འཁོར་གྱིས་བསྐོར། །ནམ་མཁའ་
རྣམ་ཤེས་མཐའ་ཡས་དང་། །དེ་ལས་གཞན་པའི་ཟིལ་གནོན་བརྒྱད། །རྡོ་རྗེ་ལས་ནི་སྐུ་མདོག་ལྗང་། །སྣ་ཚོགས་རྡོར་དྲིལ་ཐོགས་པས་བསྐོར། །འབྱུང་བ་རྣམ་པ་བཞི་པོ་དང་། །སྔོན་པོ་སེར་པོ་དཀར་དམར་དང་། །ནམ་མཁའ་དེ་བཞིན་སེམས་དང་ནི། །ཟད་པར་
རྣམ་དག་ལྡན་པ་ཡི། །བསྲུང་བ་སེར་པོ་གོ་ཆ་བསྣམས། །རྩ་བའི་མཚན་ཉིད་དེ་ཁོ་ན། །ཕྱིན་ཅི་མ་ལོག་མཚན་ཉིད་དང་། །འབྲས་བུ་རྒྱུ་ཡི་དེ་ཁོ་ན། །ཕྲ་བ་དང་ནི་རགས་པ་དང་། །གྲགས་དང་རྣམ་པར་དག་ཡུལ་དང་། །སྡུད་དང་དབྱེ་བའི་མཚན་ཉིད་དང་། །མཁས་
དེ་ཁོ་ན་རྣམ་བཅུ་ནི། །རྡོ་རྗེ་གནོད་སྦྱིན་སྐུ་མདོག་ནག །ཕྱག་གཉིས་མཆེ་བ་བསྣམས་པའོ། །ཚེ་དང་སེམས་དང་ཡོ་བྱད་དང་། །ལས་དང་སྐྱེ་བ་མོས་པ་དང་། །སྨོན་ལམ་དང་ནི་རྫུ་འཕྲུལ་དང་། །ཡེ་ཤེས་ལ་ནི་དབང་བ་དང་། །རྡོ་རྗེ་ཁུ་ཚུར་སྐུ་མདོག་དཀར། །ཕྱག་གཉིས་
ཁུ་ཚུར་བསྣམས་པའོ། །སོ་སོའི་གཙོ་བོའི་སྔགས་ཀྱིས་བསྐྱེད། །རང་རང་སྔགས་ཀྱིས་མཆོད་པ་དང་། །རྡོ་རྗེའི་སྐྱིལ་ཀྲུང་ཕྱེད་ཀྱིས་ནི། །འདི་དག་རིམ་བཞིན་གནས་པ་ཡིན། །འདི་ལྟར་བསྒོམས་པའི་རྣལ་འབྱོར་པ། །ཡོན་ཏན་ཕུན་སུམ་ཚོགས་པ་ནི། །ཇི་སྐད་
གསུངས་པ་བཞིན་དུ་ཐོབ། །དངོས་གྲུབ་གཞན་ནི་སྨོས་ཅི་དགོས། །འདི་རྣམས་ཀྱི་ནི་གྲྭ་བཞི་རུ། །མཁས་པས་སྒེག་མོ་ལ་སོགས་བསྒོམ། །སྒེག་མོ་མདོག་དཀར་རྡོ་རྗེ་བསྣམས། །ཕྲེང་བ་མ་ནི་གསེར་གྱི་མདོག །རིན་ཆེན་ཕྲེང་བ་བསྣམས་པ་ཡིན། །གླུ་མ་སྐུ་མདོག་

དམར་མོ་སྟེ། །པི་ཝང་རྡེབ་པའི་མཆོག་ཡིན་ནོ། །གར་མ་རྡོ་རྗེ་ལྗང་གུ་ནི། །རྩེ་གཅིག་བསྣམས་ནས་གར་མཛད་དོ། །སྤོས་དང་མེ་ཏོག་མར་མེ་དྲི། །དེ་རྣམས་རྗེས་ལ་དྲན་པར་བགྱི། །སྤོས་ཁང་མེ་ཏོག་སྣོད་དང་ནི། །མར་མེ་ཡི་ནི་མཆོད་སྡོང་དང་། །དྲི་ཡི་
དུང་ཆོས་རིམ་བཞིན་ནོ། །འདི་རྣམས་ཁ་དོག་སྒེག་སོགས་བཞིན། །ལྕགས་ཀྱུ་དང་ནི་ཞགས་པ་དང་། །ལྕགས་སྒྲོག་དྲིལ་བུ་ཞེས་གྲགས་པ། །དཀར་པོ་སེར་པོ་དམར་པོ་ལྗང་། །ཤར་ལ་སོགས་པའི་སྒོ་ལ་བསྟན། །མིང་དང་མཐུན་པར་ཕྱག་མཚན་གནས། །
ཕྱི་རོལ་བསྐལ་པ་བཟང་པོ་ནི། །ཤར་ལ་སོགས་པར་བསྒོམ་པར་བྱ། །རྣམ་པ་བཞི་ཡི་དབྱེ་བ་ཡི། །དེ་དག་བཅུ་དྲུག་ཡང་དག་དགོད། །རང་གི་བདག་པོའི་རྗེས་མཐུན་པར། །སྐུ་མདོག་ཕྱག་མཚན་མཛེས་པ་ཡིན། །ཡང་ན་གཞན་དུ་ཕྱག་མཚན་རྣམས། །རིམ་པ་
བཞིན་དུ་བསམ་པར་བྱ། །དེ་ལ་མགོན་པོ་བྱམས་པ་ནི། །ཕྱག་ན་ཀླུ་ཤིང་བསྣམས་པ་ཡིན། །འཇམ་དཔལ་རལ་གྲི་པུསྟི་དང་། །ཇི་ལྟར་རིམ་བཞིན་མཚན་པ་ཡིན། །སྤོས་ཀྱི་གླང་པོ་སྤོས་ཆུ་ཡི། །དྲི་ཡི་དུང་ཆོས་ཆར་འབེབས་པའི། །ཐོད་དང་བཅས་པའི་ཅོད་པན་
ནི། །ཡེ་ཤེས་ཏོག་ནི་བསྒྲིངས་ནས་བསྣམས། །བཟང་སྐྱོང་བ་ནི་ནམ་མཁའ་མཛོད། །བསླང་ནས་མཚན་པར་བྱེད་པའོ། །བློ་གྲོས་རྒྱ་མཚོ་ཡིད་བཞིན་ནོར། །ཕྱག་གི་པདྨ་མཛེས་པ་ཡིན། །དཔག་བསམ་ཤིང་དང་བུམ་པ་བཟང་། །བློ་གྲོས་མི་ཟད་ཕྱག་གཡོན་ན། །པུསྟི་
མཚན་པའི་པདྨ་ནི། །སྤོབས་པ་བརྩེགས་པ་དེ་བཞིན་དུ། །ཕྱག་ན་རལ་གྲི་བསྣམས་པ་ཡིན། །མཐུ་ཆེན་ཐོབ་པ་རལ་གྲི་བསྣམས། །ངན་སོང་ཀུན་འདྲེན་རྒྱལ་མཚན་ནོ། །མྱ་ངན་མུན་པ་ངེས་འཇོམས་ནི། །དཔལ་བེའུ་གཡུང་དྲུང་འཁྱིལ་པ་ནི། །དྲ་བ་ཅན་གྱི་འོད་
རྣམས་སོ། །ཟླ་འོད་གཞོན་ནུ་ཞེས་བྱ་བ། །ཟླ་ཚེས་གཡེར་ཀ་རྒྱལ་མཚན་མཛེས། །འོད་དཔག་མེད་པ་པུསྟི་དང་། །རལ་གྲི་རིན་ཆེན་མཛོད་འཛིན་པ། །ནམ་མཁའི་སྙིང་པོར་ཤེས་པར་བྱ། །སྣ་ཚོགས་རྡོ་རྗེ་རལ་གྲི་ནི། །བསྣམས་པ་སྒྲིབ་པ་རྣམ་པར་སེལ། །བྱང་

ཆུབ་སེམས་དཔའ་ཞེས་འདོད་དོ། །འདི་རྣམས་ཕྱི་ཡི་སྒོ་སྐྱོང་དག །སྔར་ནི་ཇི་སྐད་སྨོས་པ་བཞིན། །དེ་ལྟར་བསྒོམས་པའི་རྗེས་ལ་ནི། །ཡེ་ཤེས་སེམས་དཔའ་སྤྱན་དྲངས་ནས། །དེ་ཉིད་གསུམ་གྱི་ཡི་གེ་ཡི། །རྣལ་འབྱོར་རིག་པས་བྱིན་བརླབ་
བྱ། །དེ་ལ་རིམ་པ་འདི་ཡིན་ཏེ། །སྤྱན་དྲང་སྔོན་འགྲོ་ཕྱག་འཚལ་ཏེ། །ཨོཾ་སརྦ་ཏ་ཐཱ་ག་ཏ་པ་ད་བནྡ་ན་ཀ་རོ་མི། །ཨེ་མ་ཀུན་དུ་བཟང་པོ་ཡི། །བྱང་ཆུབ་སེམས་དཔའི་སྤྱོད་པ་མཆོག །དེ་བཞིན་གཤེགས་པའི་འཁོར་ལོ་ཡི། །དབུས་ན་དེ་བཞིན་གཤེགས་པ་
མཛེས། །དེ་ནས་འཁོར་ལོའི་དབང་ཕྱུག་ལ། །དེ་བཞིན་གཤེགས་པ་ཀུན་ཞུགས་ནས། །བྱུང་ནས་རང་རང་རིགས་པ་ནི། །བྱིན་གྱིས་བརླབ་པ་མཛད་པ་ཡིན། །ཨེ་མ་སངས་རྒྱས་ཐམས་ཅད་ཀྱི། །རྒྱ་ཆེན་གདོད་ནས་སྐྱེ་བ་མེད། །རྡུལ་ཕྲན་ཐམས་ཅད་ཇི་སྙེད་ཀྱི། །
སངས་རྒྱས་ཐམས་ཅད་གཅིག་ཏུ་གྱུར། །དེ་ཉིད་གསུམ་གྱི་བྱིན་རླབས་དང་། །འཁོར་ལོའི་བདག་ཉིད་དབང་བསྐུར་ནས། །རང་བཞིན་དག་པར་བསྒོམ་པར་བྱ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ས་མ་ཡ་ཤྲཱི་ཡེ་ཧཱུཾ། དེ་ལྟར་ཏིང་འཛིན་གསུམ་དང་ནི། །མཁས་པས་ཆོ་
ག་བྱས་ནས་ནི། །དེ་ནས་རང་ལྷའི་རྣལ་འབྱོར་གྱིས། །མཆོད་པ་ཡང་དག་བརྩམ་པར་བྱ། །པདྨའི་ཕྱག་རྒྱ་ལྡན་གཡོ་བས། །ཨརྒྷའི་སྣོད་ནི་བཟང་བ་དང་། །གཡས་པ་བ་དན་གསུམ་དང་ནི། །དེ་ཉིད་གསུམ་གྱིས་བསམ་པར་བྱ། །དེ་ནས་མཁས་པས་མེ་ཏོག་
གསོལ། །དེ་ཡི་ཆུ་ཡིས་བསང་བར་བྱ། །ཨོཾ་བཛྲ་པུཥྤེ་ཧཱུཾ། ཨོཾ་བཛྲ་དྷཱུ་པེ་ཧཱུཾ། ཨོཾ་བཛྲ་ཨཱ་ལོ་ཀེ་ཧཱུཾ། ཨོཾ་བཛྲ་གནྡྷེ་ཧཱུཾ། སོཾ་བཛྲ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ། ཨཱདྱ་ནུཏྤནྣ་ཏྭཱཏ་ཨོཾ་ཨཱཿཧཱུཾ། ཕྱག་འཚལ་རྡོ་རྗེ་ལྡན་པ་ཡི། །ཛཿཧཱུཾ་བཾ་ཧོཿཞེས་བྱ་བ་དང་། །སེ་གོལ་བརྡབས་ལ་
དགུག་པ་དང་། །ཕྱག་བྱས་ནས་ནི་ཨརྒྷ་དབུལ། །ཨོཾ་བཛྲ་ཨཾ་ཀུ་ཤ་ཛཿ། ཨོཾ་བཛྲ་པཱ་ཤ་ཧཱུཾ། ཨོཾ་བཛྲ་སྥོ་ཊ་བཾཾ། ཨོཾ་བཛྲ་ཨཱ་བེ་ཤ་ཨཱཿ། ཞུས་ནས་ཡི་གེ་གསུམ་གྱིས་ནི། །བྱིན་གྱིས་བརླབས་ལ་དབང་བསྐུར་རོ། །དེ་ནས་སྔར་བཤད་རིམ་པ་ཡིས། །མཆོད་པ་རྣམས་

ཀྱིས་མཆོད་པ་དང་། །དེ་ལས་གཞན་པའི་རིག་མ་ནི། །བཅུ་དྲུག་གིས་ནི་མཆོད་བསྟོད་བྱ། །དཀྱིལ་འཁོར་རྣམ་གསུམ་ཕྱག་མཚན་དང་། །ཇི་སྲིད་ཐིག་ལེའི་རིམ་པ་དང་། །སྣང་བ་ལ་སོགས་རིམ་པ་ཡིས། །སྤྲོས་པ་ཐམས་ཅད་ཞི་བ་དང་། །སྟོང་ཉིད་སོགས་
རིམ་ཐོབ་པ་ཡི། །རྣལ་འབྱོར་ལྷན་སྐྱེས་མཛེས་པ་ཡིན། །དེ་ལྟར་གོམས་པ་འཇུག་པ་རྣམས། །མི་ཤེས་ཆུ་བོ་མ་ལུས་པ། །བསྐམས་ཤིང་སེམས་ཀྱི་ཟླ་བ་ནི། །ཤར་བ་སྐལ་བ་བཟང་པོ་ཡིན། །སྤྲོ་དང་བསྡུ་བའི་རིམ་པ་ཡིས། །ཇི་སྲིད་སྒྲུབ་པ་མི་སྐྱོའི་བར། །
དེ་ལྟར་ཡང་དང་ཡང་དུ་བྱ། །ལངས་ནས་སངས་རྒྱས་སྤྱན་དྲངས་ནས། །དེ་ནས་གཏོར་མ་སྦྱིན་པར་བྱ། །དེ་ལ་རྡོ་རྗེ་སེམས་དཔའ་ནི། །འཁོར་ལོས་སྒྱུར་བར་འདོད་པ་ལས། །ཨ་ལས་བྱུང་ཞིང་སྐུ་མདོག་དཀར། །རྡོ་རྗེ་དང་ནི་དྲིལ་བུ་བསྣམས། །ཐུགས་ཀར་དང་པོ་
སངས་རྒྱས་ནི། །སྔར་ནི་ཇི་སྐད་བཤད་པ་བཞིན། །དེ་ལ་མྱ་ངན་འདས་འཁོར་ལོ། །ཨ་ར་ལ་སོགས་ཡི་གེར་ལྡན། །དེ་སྟེང་ཨ་ར་པ་ཙ་ན། །ཕྱག་གཉིས་རྡོ་རྗེ་དྲིལ་བུ་བསྣམས། །འདི་ཡི་ཉེ་བའི་སྙིང་པོ་ནི། །སྔར་ནི་བསྟན་ཟིན་གང་ཡིན་པའོ། །ཨོཾ་ཨ་ར་པ་ཙ་ན་
ཡ་ཏེ་ནཱ་མ། སྔགས་ཀུན་རིགས་ཀྱི་བདག་ཉིད་ཀྱི། །རྣམ་པར་སྣང་མཛད་ཆེན་པོ་ཡང་། །ཞལ་བཞི་སྐུ་མདོག་དུད་འདྲ་ཞིང་། །བསམ་གཏན་ཕྱག་རྒྱར་ལྡན་པའོ། །དང་པོའི་སངས་རྒྱས་ཐུགས་ཀ་རུ། །ཞི་བའི་འཁོར་ལོ་འདི་རྣམས་ཀྱང་། །རྩིབས་དྲུག་པ་ལ་
རིགས་དྲུག་གིས། །ཡོངས་སུ་བསྐོར་བར་ལྡན་པའོ། །དེ་ལ་གཉིས་མེད་འཇམ་པའི་དཔལ། །མདོག་དཀར་ཞལ་དྲུག་ཨ་ལས་བྱུང་། །ཕྱག་གཉིས་རལ་གྲི་པུསྟི་བསྣམས། །གཉིས་ཀྱིས་ཨུཏྤལ་བསྣམས་པ་དང་། །གཉིས་ནི་ཏིང་འཛིན་ཕྱག་རྒྱ་ནི། །ཡང་དག་སྣང་
བ་སྣང་བ་ཆེ། །འདི་དག་སོ་སོའི་སྙིང་པོ་ནི། །སྒྲུབ་པའི་ཐབས་ལས་གསལ་བར་བསྟན། །བཤད་པའི་འཁོར་ལོ་བདག་ཉིད་ནི། །ལྷ་རྣམས་ཉི་ཤུར་མཉམ་པ་ལ། །གཅིག་གི་བདག་ཉིད་ཆེན་པོ་ནི། །བློ་ཆེན་རྣམས་ཀྱིས་མཆོད་པར་བྱ། །རྡོ་རྗེ་ཧཱུཾ་མཛད་གཙོ་བོ་ཡིས། །

འཁོར་ལོས་སྒྱུར་བར་འདོད་པ