Luận tạng Tây Tạng (Tengyur) — Tập 66

གྱིས་ཟླ་བའི་སྟེང་། །དགའ་བའི་ཕ་རོལ་ཕྱིན་པའི་སྟོབས། །ཁྲོས་
པའི་ལྷ་མོ་ལྕགས་སྒྲོག་མ། །དམར་མོ་ཕྱག་ན་ལྕགས་སྒྲོག་བསྣམས། །ཁྲོས་པའི་ཚུལ་གྱིས་ཟླ་བའི་སྟེང་། །ཡེ་ཤེས་ཟད་མེད་བཏང་སྙོམས་བདག །ཁྲོས་པའི་ལྷ་མོ་དྲིལ་བུ་མ། །ལྗང་གུའི་མདོག་ཅན་དྲིལ་བུ་མ། །ཁྲོས་པའི་ཚུལ་གྱིས་ཟླ་བའི་སྟེང་། །དང་པོའི་

དབྱངས་ཡིག་རང་བཞིན་ལས། །ལྷ་རྣམས་དེ་ལྟར་བསྐྱེད་པར་བྱའོ། །ཨོཾ་པྲ་ཀྲྀ་ཏ་པ་རི་ཤུདྡྷ་སརྦ་དྷརྨཱ་ཡ་དུ་ཏ། སརྦ་ཏ་ཐཱ་ག་ཏཱ་ཛྙཱ་ན་ཀཱ་ཡ་མཉྫུ་ཤྲཱི་པ་རི་ཤུདྡྷི་ཏཱ། མུ་པཱ་ད་ཡེ་ཏ་ཨ། ཞེས་སྤྱན་དྲང་བར་བྱའོ། །ཨ་ཨཱ་ཨི་ཨཱི་ཨུ་ཨཱུ་ཨེ་ཨཻ་ཨོ་ཨཽ་ཨཾ་
ཨ། སྠི་ཏོ་ཧྲྀ་དི་ཛྙཱ་ན་མཱུརྟི། ར་ཧཾ་བུདྡྷོ་བུདྡྷཱ་ནཱཾ། ཏྲྱ་དྷྭ་ཝཪྟི་ནི། ཨོཾ་བཛྲ་ཏཱིཀྵྞ། དུཿཁཙྪེ་ད། པྲཛྙཱ་ཛྙཱ་ན་མཱུརྟ་ཡེ། ཛྙཱ་ན་ཀཱ་ཡ། ཝཱ་གཱི་ཤྭ་ར། ཨ་ར་པ་ཙ་ནཱ་ཡ་ཏེ་ན་མཿ། ཞེས་ཕྱག་བཙལ་བར་བྱའོ། །ཛཿཧཱུཾ་བཾ་ཧོཿ། ཞེས་བྱ་བས་གཉིས་སུ་མེད་པར་བསྟིམ་པར་བྱའོ། །
ཨོཾ་སརྦ་ཏ་ཐཱ་ག་ཏཱ་ཧྲྀ་ད་ཡ་ཧ་ར་ཧ་ར། ཨོཾ་ཧཱུཾ་ཧྲཱིཿ བྷ་ག་བཱན་ཛྙཱ་ན་མཱུརྟི་ཨ། ཞེས་བྱ་བས་ཟླ་བའི་སྟེང་དུ་ས་བོན་གསུམ་གྱིས་བྱིན་གྱིས་བརླབ་པར་བྱའོ། །ཨོཾ་སརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་ཧ་ར། སརྦ་དྷརྨ་ག་ག་ན། ཨ་མ་ལ་སུ་པ་རི་ཤུདྡྷ་དྷརྨ་དྷཱ་ཏུ་ཛྙཱ་ན་གརྦྷ་ཨཱཿ། ཞེས་བྱ་བས་དབང་བསྐུར་
ཏེ། རིགས་རྣམས་ཀྱིས་མཚོན་པའོ། །དེ་ནས་བསྒོམ་པ་རབ་ཏུ་བརྩམས། །མ་ཡེངས་གསལ་བར་བྱས་ཏེ་བསྒོམ། །ཨ་ར་པ་ཙ་ན་ཨ་ཞེས་བཟླས་པར་བྱའོ། །དེ་ནས་མཚན་གྱི་སྔགས་བརྗོད་པར་བྱའོ། །མཚན་རྣམས་བསྡུས་ནས་གཙོ་བོ་ལ་ཞུ་སྟེ་ཀུན་དུ་ཞལ་རྣམ་པར་སྣང་
མཛད་དུའོ། །གཞན་དུ་ནི་གཙོ་བོ་ཞུ་བ་དང་རྗེས་ཀྱི་གཙོ་བོ་ཞུ་བའོ། །གཏི་མུག་ཅན་སྦྱངས་ནས། པྲཛྙཱ་ཛྙཱ་ན་མཱུརྟི་ཨ་ཞེས་བྱ་བས་ཆོས་ཀྱི་དབྱིངས་ཀྱི་ཡེ་ཤེས་སེམས་དཔའ་ལས་བྱུང་བའི་སྐུར་གསལ་བར་བྱས་ཏེ་མཚན་བརྗོད་པར་བྱའོ། །ཞེ་སྡང་ཅན་སྦྱངས་ནས་དུཿཁཙྪེ་ད་ཞེས་བྱ་
བས་མེ་ལོང་ལྟ་བུའི་ཡེ་ཤེས་སེམས་དཔའ་ལས་བྱུང་བའི་སྐུར་གསལ་ཏེ་མཚན་བརྗོད་པར་བྱའོ། །འདོད་ཆགས་ཅན་སྦྱངས་ནས་ཨོཾ་བཛྲ་ཏཱིཀྵྞ་ཞེས་བྱ་བས་སོ་སོར་ཀུན་དུ་རྟོག་པའི་ཡེ་ཤེས་སེམས་དཔའ་ལས་བྱུང་བའི་སྐུར་གསལ་ཏེ་མཚན་བརྗོད་པར་བྱའོ། །ང་རྒྱལ་ཅན་སྦྱངས་
ནས་ཨོཾ་ཝཱ་གཱི་ཤྭ་ར་ཞེས་བྱ་བས་མཉམ་པ་ཉིད་ཀྱི་ཡེ་ཤེས་སེམས་དཔའ་ལས་བྱུང་བའི་སྐུར་གསལ་ཏེ་མཚན་བརྗོད་པར་བྱའོ། །ཕྲག་དོག་ཅན་སྦྱངས་ནས་ཛྙཱ་ན་ཀཱ་ཡ་ཞེས་བྱ་བས་བྱ་བ་གྲུབ་པའི་ཡེ་ཤེས་སེམས་དཔའ་ལས་བྱུང་བའི་སྐུར་གསལ་ཏེ་མཚན་བརྗོད་པར་བྱའོ། །དེ་ལྟར་

ལོངས་སྐུ་དང་སྤྲུལ་སྐུའི་སྔགས་བརྗོད་ནས་བསྟོད་པ་ནི། །མཆོག་སྦྱིན་རྡོ་རྗེ་མཆོག་ཁྱོད་འདུད། །ཡང་དག་མཐར་གྱུར་ཁྱོད་ལ་འདུད། །སྟོང་ཉིད་ལས་བྱུང་ཁྱོད་ལ་འདུད། །སངས་རྒྱས་བྱང་ཆུབ་ཁྱོད་ལ་འདུད། །ཅེས་བྱ་བས་སྟོང་པ་ཉིད་དེ་དང་མཚན་མ་མེད་པ་དང་སྨོན་
པ་མེད་པ་དང་། རང་བཞིན་གྱིས་རྣམ་པར་དག་པའོ། །ཡུམ་བཞིས་ཆོས་སྐུ་ལ་བསྟོད་པའོ། །སངས་རྒྱས་ཆགས་པ་ཁྱོད་ལ་འདུད། །སངས་རྒྱས་འདོད་ལ་ཕྱག་འཚལ་འདུད། །སངས་རྒྱས་དགྱེས་པ་ཁྱོད་ལ་འདུད། །སངས་རྒྱས་རོལ་ལ་ཕྱག་འཚལ་འདུད། །
ཅེས་བྱ་བས་ནང་སྟོང་པ་ཉིད་དང་ཕྱི་སྟོང་པ་ཉིད་དང་ཕྱི་ནང་སྟོང་པ་ཉིད་དང་སྟོང་པ་ཉིད་སྟོང་པ་ཉིད་ཀྱི་སྒོ་ནས་ཤར་ཕྱོགས་ཀྱི་སེམས་དཔའ་བཞིས་ཆོས་སྐུ་ལ་བསྟོད་པའོ། །སངས་རྒྱས་འཛུམ་པ་ཁྱོད་ལ་འདུད། །སངས་རྒྱས་བཞད་ལ་ཕྱག་འཚལ་འདུད། །སངས་རྒྱས་གསུང་
ཉིད་ཁྱོད་ལ་འདུད། །སངས་རྒྱས་ཐུགས་ལ་ཕྱག་འཚལ་འདུད། །ཅེས་བྱ་བས་ཆེན་པོ་སྟོང་པ་ཉིད་དང་དོན་དམ་པ་སྟོང་པ་ཉིད་དང་འདུས་བྱས་སྟོང་པ་ཉིད་དང་འདུས་མ་བྱས་སྟོང་པ་ཉིད་དེ་ལྷོའི་ཕྱོགས་ཀྱི་སེམས་དཔས་ཆོས་སྐུ་ལ་བསྟོད་པའོ། །མེད་པ་ལས་བྱུང་ཁྱོད་ལ་
འདུད། །སངས་རྒྱས་འབྱུང་བ་ཁྱོད་ལ་འདུད། །ནམ་མཁའ་ལས་བྱུང་ཁྱོད་ལ་འདུད། །ཡེ་ཤེས་ལས་བྱུང་ཁྱོད་ལ་འདུད། །ཅེས་བྱ་བས་མཐའ་ལས་འདས་པ་སྟོང་པ་ཉིད་དང་ཐོག་མ་དང་ཐ་མ་མེད་པ་སྟོང་པ་ཉིད་དང་དོར་བ་མེད་པ་སྟོང་པ་ཉིད་དང་རང་བཞིན་སྟོང་པ་ཉིད་དེ་
ནུབ་ཕྱོགས་ཀྱི་སེམས་དཔས་ཆོས་སྐུ་ལ་བསྟོད་པའོ། །སྒྱུ་འཕྲུལ་དྲ་བ་ཁྱོད་ལ་འདུད། །སངས་རྒྱས་རོལ་སྟོན་ཁྱོད་ལ་འདུད། །ཐམས་ཅད་ཐམས་ཅད་ཁྱོད་ལ་འདུད། །ཡེ་ཤེས་སྐུ་ཉིད་ཁྱོད་ལ་འདུད། །ཅེས་བྱ་བས་ཆོས་ཐམས་ཅད་སྟོང་པ་ཉིད་དང་རང་གི་མཚན་
ཉིད་སྟོང་པ་ཉིད་དང་མི་དམིགས་པ་སྟོང་པ་ཉིད་དང་དངོས་པོ་མེད་པའི་ངོ་བོ་ཉིད་སྟོང་པ་ཉིད་དེ་བྱང་ཕྱོགས་ཀྱི་སེམས་དཔས་ཆོས་སྐུ་ལ་བསྟོད་པའོ། །ཨ་བྷཱ་བ་སྭ་བྷཱ་བ་བི་ཤུདྡྷ་བཛྲ་ཙཀྵུ་ཨཾ་ཨ། ཞེས་བྱ་བས་བཟླས་པ་བསྟན་ནས་གཏོར་མ་གཏང་བར་བྱའོ། །དེ་ནས་སྤྱོད་

ལམ་གྱིས་གནས་པར་བྱའོ། །བདག་གིས་བླ་མའི་གདམས་པ་ལ་བརྟེན་ནས། རྒྱུད་དོན་དབང་པོ་རྡོ་རྗེའི་ཚིག་དོན་སྦྱར། །མཁའ་འགྲོའི་རྗེས་སུ་འབྲངས་ནས་དེ་བརྩམས་པས། །འགྲོ་ཀུན་ཡེ་ཤེས་སེམས་དཔའ་རྟོགས་པར་ཤོག །འཕགས་པ་
འཇམ་དཔལ་གྱི་མཚན་ཡང་དག་པར་བརྗོད་པའི་དཀྱིལ་འཁོར་གྱི་སྒྲུབ་ཐབས་ཨུ་རྒྱན་གྱི་སློབ་དཔོན་ཤྲཱི་ཨ་ཝ་དྷཱུ་ཏཱི་པ་ཆེན་པོས་མཛད་པ་རྫོགས་སོ།། །།རྒྱ་གར་གྱི་མཁན་པོ་དྷརྨཱ་ཤྲཱི་མི་ཏྲ་དང་། བོད་ཀྱི་ལོ་ཙཱ་བ་དགེ་སློང་ཆོས་ཀྱི་བཟང་པོས་བསྒྱུར་བའོ།། །།
༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་ནཱ་མ་སཾ་གཱི་ཏི་ནོ་པི་ཀ །བོད་སྐད་དུ། འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་སྒྲུབ་ཐབས། འཇིག་རྟེན་དབང་ཕྱུག་ལ་ཕྱག་འཚལ་ལོ། །ཤེས་རབ་རལ་གྲི་མདའ་གཞུ་ཐོགས། །དང་པོའི་སངས་རྒྱས་རྒྱུ་མེད་
པ། །གདོང་ལྔ་གཙུག་ཕུད་ལྔ་དང་ལྡན། །གསང་སྔགས་རྒྱལ་པོ་དྲུག་ལྡན་འདུད། །དང་པོར་སྔགས་པས་དབང་ཐོབ་ཅིང་དམ་ཚིག་དང་ལྡན་པར་བྱས་ཏེ། ཡིད་དགའ་བའི་གནས་སུ་འདུག་ལ། ཐོ་རངས་ཀར་ཁའི་སྒོ་དག་པར་བྱས་ལ། སྙིང་གར་ཟླ་བའི་སྟེང་དུ། ཡི་གེ་
མུཾ་རྣམ་པར་བསམས་ལ། འོད་ཟེར་གྱིས་བླ་མ་དང་ཡང་དག་པར་རྫོགས་པའི་སངས་རྒྱས་སྤྱན་དྲངས་ལ། ཕྱག་བཙལ་བ་དང་། མཆོད་པ་དང་། རྗེས་སུ་ཡི་རང་བ་དང་། ཆོས་ཀྱི་འཁོར་ལོ་བསྐོར་བར་བསྐུལ་ཞིང་། མྱ་ངན་ལས་མི་འདའ་བར་གསོལ་ཏེ། དགེ་བའི་རྩ་བ་
བསྔོ་བར་བྱའོ། །དེ་ནས་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་བསྒོམ་པར་བྱའོ། །དེའི་རྗེས་ལ་སྟོང་པ་ཉིད་བསྒོམས་ཏེ། ཨོཾ་ཤཱུནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། སྔགས་འདིའི་དོན་ལ་དམིགས་པས། ཆོས་ཐམས་ཅད་སྒྱུ་མ་ལྟ་བུར་བསྒོམ་མོ། །
དེ་ནས་ཡི་གེ་ཧྲཱིཿལས་པདྨའི་གདན་དམར་པོ་བསམ་ཞིང་། དེའི་སྟེང་དུ་ཨ་ལས་ཟླ་བའི་གདན་རྣམ་པར་བསམས་ཏེ། དབུས་སུ་ཡི་གེ་མུཾ་དམར་སྐྱ་འོད་ཟེར་གྱི་ཚོགས་འཕྲོ་ཞིང་འདུ་བ་བསམ་པར་བྱའོ། །དེ་ཉིད་ཐིག་ལེར་གྱུར་པ་ལས། །ཡེ་ཤེས་སེམས་དཔའ་སྐུ་མདོག་

དཀར་པོ་སྤྲིན་དཀར་དག་པ་ལྟ་བུ་རྡོ་རྗེ་སྐྱིལ་ཀྲུང་ཅན། ཕྱག་བཞི་དང་ལྡན་པ་གཡས་གཡོན་གཉིས་ན་མཛེས་པའི་རལ་གྲིས་འདེབས་ཤིང་ཤེས་རབ་ཀྱི་པུ་སྟི་འཛིན་པའོ། །དེའི་འོག་མ་གཉིས་ན་མདའ་དང་གཞུ་བསྣམས་པའོ། །གཞོན་ནུའི་རྒྱན་ཅན་ནོ། །དེ་ལྟར་རྣམ་པར་བསྒོམས་
ཏེ། ཨཱཏྨ་ཀོ྅ཧཾ། ཞེས་བརྗོད་ལ། ང་རྒྱལ་བསྐྱེད་པར་བྱའོ། །དེའི་རྗེས་ལ་སྙིང་གའི་འོད་ཟེར་གྱིས་ཡེ་ཤེས་སེམས་དཔའ་སྤྱན་དྲངས་ཏེ། ཡི་གེ་ལས་བྱུང་བའི་པདྨ་དང་ཟླ་བའི་སྟེང་དུ་བཞུགས་ཏེ། མཆོད་པའི་ཚོགས་ཀྱིས་རྣམ་པར་མཆོད་ལ། རང་དང་གཉིས་སུ་མེད་པར་
བསྲེ་བར་བྱའོ། །སྙིང་ག་དང་མགྲིན་པ་དང་དཔྲལ་བ་དང་སྤྱི་བོ་རྣམས་སུ། རྡོ་རྗེ་དང་པདྨ་དང་རིན་པོ་ཆེ་དང་སྣ་ཚོགས་རྡོ་རྗེས་རྒྱས་བཏབ་སྟེ། ཐུགས་ཀའི་འོད་ཟེར་གྱིས་ནམ་མཁའ་ཁྱབ་པས། དེ་བཞིན་གཤེགས་པ་བསྐུལ་བས་ལྷ་མོའི་ཚོགས་ཀྱིས་བདུད་རྩིའི་རྒྱུན་གྱིས་དབང་བསྐུར་
ཏེ། སངས་རྒྱས་ལྔའི་ཅོད་པན་དང་དར་དཔྱངས་དང་བཅས་པས་དབང་བསྐུར་རོ། །དེའི་ཐུགས་ཀར་ཟླ་བའི་དཀྱིལ་འཁོར་དུ། ཧྲཱིཿ ཡོངས་སུ་གྱུར་པ་ལས་དང་པོའི་སངས་རྒྱས་སྐུ་མདོག་དཀར་པོ་ཞལ་ལྔ་ཕྱག་བརྒྱད་པ། ཞབས་གཉིས་སྐྱིལ་མོ་ཀྲུང་དུ་བཞུགས་པ། བྱིས་པའི་རྒྱན་
ཐམས་ཅད་ཀྱིས་བརྒྱན་པ། རིན་པོ་ཆེ་སྣ་ཚོགས་པའི་ན་བཟའ་ཅན། གཡས་བཞི་ན་མཛེས་པའི་རལ་གྲི། གཡོན་བཞི་ན་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་དེའི་ཐུགས་ཀར་ཤེས་རབ་ཀྱི་འཁོར་ལོ་རྣམ་པར་བསྣམས་ཏེ། ལྕེ་དྲུག་པ་ཁ་དོག་དྲུག་དང་ལྡན་པ། མུ་ཁྱུད་
བཞི་ཡིས་བསྐོར་བ། ལྟེ་བར་ཡི་གེ་ཨ་དཀར་པོ་བསམས་ཏེ། དེ་ལས་འོད་འཕྲོས་པས། ཕྱོགས་བཅུའི་སེམས་ཅན་གྱི་ཁམས་ཐམས་ཅད་ཁྱབ་པར་བྱས་ཏེ། སླར་འདུས་ཏེ་དེ་ཉིད་ལ་ཐིམ་པས། རྩ་བའི་སྔགས་དགོད་པར་བྱའོ། །ཨོཾ་སརྦ་དྷརྨཱ་ཨ་བྷཱ་བ་སྭ་བྷཱ་བ་བི་ཤུདྡྷ་
བཛྲ་ཨ་ཨཱ་ཨཾ་ཨཿ། དེའི་ཕྱི་རོལ་མུ་ཁྱུད་ལ་དབྱངས་ཀྱི་ཡི་གེ་བཅུ་གཉིས་དགོད་དོ། །དེའི་ཕྱི་རོལ་འཁོར་ལོ་རྩིབས་དྲུག་པ་སྟེ། དང་པོའི་རྩིབས་ལ་ཨོཾ་བཛྲ་ཏཱིཀྵྞ་ཡ་ཏེ་ནཱ་མ། གཉིས་པ་ལ་ཨོཾ་དུཿཁ་ཙྪེ་ད་ཡ་ཏེ་ནཱ་མ། གསུམ་པ་ལ་ཨོཾ་པྲཛྙཱ་ཛྙཱ་ན་མཱུརྟ་ཡེ་ཡ་ཏེ་ནཱ་མ། བཞི་པ་

ལ་ཨོཾ་ཛྙཱ་ན་ཀཱ་ཡ་ཡ་ཏེ་ནཱ་མ། ལྔ་པ་ལ་ཨོཾ་ཝཱ་གཱི་ཤྭ་ར་ཡ་ཏེ་ནཱ་མ། དྲུག་པ་ལ་ཨོཾ་ཨ་ར་པ་ཙ་ནཱ་ཡ་ཏེ་ནཱ་མ། ཕྱིའི་མུ་ཁྱུད་དང་པོ་ལ་ཡེ་ཤེས་སེམས་དཔའི་ཕྲེང་སྔགས། སརྦ་ཏ་ཐཱ་ག་ཏ་ཧྲྀ་ད་ཡ་ཞེས་བྱ་བ་ནས། ཛྙཱ་ན་གརྦྷ་ཨཱཿཞེས་བྱ་བའི་བར་དུ་དགོད་དོ། །
ཕྱིའི་མུ་ཁྱུད་ཐ་མ་ལ་ཡི་གེ་ཀ་ནས་ཧའི་མཐར་གསལ་བྱེད་ཀྱི་ཡི་གེ་དགོད་དོ། །དེ་ལྟར་སྙིང་གར་བསམ་ཞིང་། དེ་ལས་འཁོར་ལོ་དེའི་དབུས་སུ་ཨ་ལས་བསྐྱེད་པ། བཅོམ་ལྡན་འདས་འཇམ་དཔལ་ཡེ་ཤེས་སེམས་དཔའ་ཞལ་དྲུག་པ་སྟོན་ཀའི་ཟླ་བ་ལྟར་དཀར་ཞིང་། ཨིནྡྲ་ནཱི་ལའི་
གཙུག་ཕུད་ཅན། ཉི་མ་འཆར་ཀའི་འོད་འདྲ་བས་བསྐོར་ཞིང་། ཞི་བའི་ངང་ཚུལ་དང་ལྡན་པ། ཕྱག་གཉིས་ཀྱིས་ཨུཏྤལ་དམར་པོ་དང་སྔོན་པོ། ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་གྱིས་མཛེས་པ་གཡས་དང་གཡོན་ན་རིམ་པ་བཞིན་བསྣམས་པ་རྒྱན་ཐམས་ཅད་ཀྱིས་
བརྒྱན་ཅིང་སྐྱིལ་མོ་ཀྲུང་གིས་བཞུགས་པར་བསམ་མོ། །དེའི་ཐུགས་ཀར་ཟླ་བའི་དཀྱིལ་འཁོར། དེའི་དབུས་སུ་ཡི་གེ་ཨ་བཀོད་དེ། དེ་ལས་འོད་ཟེར་འཕྲོས་ཤིང་། འཁོར་ལོའི་སྔགས་ཀྱི་ཁ་དོག་ཇི་ལྟ་བ་བཞིན་འོད་ཟེར་འཕྲོས་ཏེ། རང་དང་འཇིག་རྟེན་གྱི་ཁམས་ཀུན་ཁྱབ་པར་
བྱས་ནས། སངས་རྒྱས་ཀྱི་ཞིང་ཐམས་ཅད་གསལ་བར་འགྱུར་ཞིང་། སེམས་ཅན་གྱི་ཁམས་ཐམས་ཅད་སྣང་བར་བྱས་ཏེ། འོད་ཀྱིས་དེ་བཞིན་གཤེགས་པ་ཐམས་ཅད་སླར་བསྡུས་ནས། བདག་ཉིད་ལ་ལན་གསུམ་བསྐོར་ཏེ། སྙིང་གའི་སྔགས་དང་ཟླ་བ་དང་བཅས་པ་གཅིག་ཏུ་
འདྲེས་པར་གྱུར་ནས། ཤེས་རབ་དང་ཡེ་ཤེས་ཀྱི་མེ་འབར་བའི་ཚུལ་གྱིས། བདག་མེད་པ་བརྟན་པོར་བསྒོམ་མོ། །དེ་ལྟ་བུའི་ཚུལ་གྱིས་སྔགས་ཀྱི་བཟླས་པ་རྫོགས་པར་འགྱུར་རོ། །གཞན་ཡང་སྔགས་བཟླས་པ་དང་། མཚན་ཡང་དག་པར་བརྗོད་པ་བཀླག་པ་ཡང་རིམ་པ་དེས་ཡང་དང་
ཡང་དུ་བྱའོ། །ཐུན་མཚམས་སུ་ནི་ཡེ་ཤེས་སེམས་དཔའ་གཤེགས་སུ་གསོལ་ཞིང་ཇི་ལྟར་བསྐྱེད་པའི་རིམ་པ་བདག་ཉིད་ལ་བསྡུ་བར་བྱའོ། །བདག་ཉིད་ཀྱང་མི་དམིགས་པ་ལ་ལྷའི་རྣལ་འབྱོར་དུ་ལངས་ཏེ། སྤྱོད་ལམ་ཐམས་ཅད་ཀྱང་བདེན་པ་གཉིས་ཀྱི་ཚུལ་གྱིས་དཀྱིལ་འཁོར་དང་

གཏོར་མ་དང་། སྦྱིན་སྲེག་དང་། མཆོད་པ་དང་། མདོ་གདོན་པ་ལ་སོགས་པ་མཆོད་རྟེན་གྱི་ལས་དང་། སྦྱིན་པ་ལ་སོགས་པ་ཕ་རོལ་ཏུ་ཕྱིན་པ་དྲུག་དང་། ལུས་ངག་གི་སྤྱོད་པ་ཐམས་ཅད་ལྷའི་རྣལ་འབྱོར་དང་ལྡན་པས་སྒྱུ་མའི་ཚུལ་གྱིས་སྦྱར་བར་བྱའོ། །ཟས་ལ་སོགས་པ་ནི་
རང་བཞིན་གྱིས་རྣམ་པར་དག་པའི་བདུད་རྩི་ཆེན་པོར་སྔགས་ཀྱིས་བཏབ་ལ་ཚིམ་པར་བྱའོ། །ཕྱིའི་ཁྲུས་དོན་དུ་གཉེར་བའི་ཚེ་ཡང་དབང་བསྐུར་བའི་ཆོ་ག་རང་བཞིན་རྣམ་པར་དག་པས་བཀྲུའོ། །ཉལ་བའི་ཚེ་ཆོས་ཀྱི་དབྱིངས་ལ་སྙོམས་པར་ཞུགས་པས་ཉལ་ལོ། །ལྡང་ན་གཟུགས་
ཀྱི་སྐུའི་རིམ་པས་སོ། །ཚུལ་འདི་ལྟ་བུར་གང་ཞིག་སྒོམ་པར་བྱེད་པ་དེ་ནི་འདུལ་བའི་དབང་གིས་དེ་ཉིད་རིང་པོར་མི་ཐོགས་པར་ནམ་མཁའི་དཀྱིལ་ན་བཞུགས་པ་མཐོང་ངོ་། །ཡེ་ཤེས་སེམས་དཔའ་སྤྲུལ་པའི་སྐུ་ཡི་སྒྲུབ་ཐབས་འདི། །རྒྱུད་དང་སྒེག་པའི་རྡོ་རྗེ་བྱང་ཆུབ་མཆོག་
ལྡན་དང་། །འཇམ་དཔལ་གྲགས་པ་བླ་མའི་མན་ངག་རིམ་པ་འདི། །གསང་བའི་མཚན་ལྡན་རྡོ་རྗེ་ལས་གྲུབ་ཀྱིས། །དམ་པ་ཉེར་བསྟེན་དན་ཧྲི་བཛྲ་ལས། །བྱང་ཆུབ་སྒྱུ་འཕྲུལ་སྦྱོར་བའི་མན་ངག་འདི། །རྙེད་ནས་འདི་ལ་གུས་ཕྱིར་བདག་གིས་བྲིས། །འདི་ཡིས་འགྲོ་ཀུན་
ཡེ་ཤེས་སེམས་དཔར་ཤོག །འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པའི་སྒྲུབ་ཐབས་རྫོགས་སོ།། ༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་མཎྜལ་བི་དྷི་ཀྲི་ཏ། བོད་སྐད་དུ། འཕགས་པ་འཇམ་དཔལ་གྱི་དཀྱིལ་འཁོར་གྱི་ཆོ་ག །
འཇམ་པའི་རྡོ་རྗེ་ལ་ཕྱག་འཚལ་ལོ། །ཁྱབ་པའི་བདག་པོ་ཡེ་ཤེས་སྐུ། །དེ་བཞིན་ཉིད་དག་དྲི་མེད་པའི། །ཚིག་ལ་སྨྲ་མཁས་བརྗོད་པའི་གསུང་། །ཁྱབ་བདག་སྐུ་ལྔ་ལ་བསྟོད་དེ། །རྫོགས་པའི་སངས་རྒྱས་ཀུན་གྱི་ལམ། །སྒྱུ་འཕྲུལ་དྲ་བའི་དཀྱིལ་འཁོར་བཤད། །ཐབས་
དང་ཤེས་རབ་དོན་ལྡན་པའི། །དད་ལྡན་ཐོས་པ་ལ་བརྩོན་དང་། །དབང་ཐོབ་གནང་བ་སྦྱིན་པའི་ཕྱིར། །དབེན་པའི་གནས་ཀྱི་བར་ཆད་བསལ། །བྱམས་སེམས་ལྡན་པས་བསྙེན་པ་བརྩམ། །སློབ་མས་ཐལ་མོ་སྦྱར་བྱས་ནས། །མཎྜལ་མེ་ཏོག་བཅས་ཕུལ་ནས། །བདག་ནི་

མི་ཤེས་རང་བཞིན་གྱི། །ལམ་གྱི་དམ་པ་བསྟན་དུ་གསོལ། །གསོལ་བཏབ་གནང་སྦྱིན་ཆེད་དུ་ནི། །རྫས་རྣམས་ལ་སོགས་གནང་བ་སྦྱིན། །བྱམས་ལྡན་བསྙེན་པ་ལ་འཇུག་བྱ། །གཙོ་བོ་ལ་འབུམ་གཞན་ལ་ཁྲི། །ཨོཾ་བཛྲ་ཏཱིཀྵྞ་དུཿཁ་ཙྪེ་ད།
པྲཛྙཱ་ཛྙཱ་ན་མཱུརྟྟ་ཡེ། ཛྙཱ་ན་ཀཱ་ཡ་བཱ་གཱི་ཤྭ་ར་ཨ་ར་པ་ཙ་ན་ཧཱུཾ་དྷཱིཿ། ཕྱོགས་སྐྱོང་རྣམས་ལ་གཏོར་མ་བཏང་། །བསོད་ནམས་བསགས་པས་སྦྱིན་སྲེག་བྱའོ། །སྔོན་དུ་བསྙེན་པའི་མཚན་བྱུང་ནས། །དཀྱིལ་འཁོར་བྲི་བའི་ལས་བརྩམ་བྱ། །དང་པོ་སངས་རྒྱས་སྐུར་གསལ་
ལ། །ལྷ་མཉེས་ས་བསླང་ས་བརྟག་དང་། །ནགས་ཚལ་སྤང་ལྗོངས་ཉམས་དགའི་གནས། །སྔར་བྱས་རང་ཡིད་དགའ་བར་བརྩོམ། །དྲི་ཞིམ་ཆུས་གཏོར་མེ་ཏོག་དགྲམ། །དེ་ལྟར་ས་བརྟག་དེ་རུ་ནི། །མཆོད་པ་ལྔ་ཡིས་ལྷ་མོ་མཆོད། །སྐྱོབ་པ་སངས་རྒྱས་ཐམས་ཅད་
ཀྱི། །སྤྱོད་པའི་ཚུལ་དང་ཁྱད་པར་གྱིས། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །སྐྱོབ་པ་ཤཱཀྱ་སེང་གེ་ཡིས། །བདུད་ཀྱི་སྡེ་རྣམས་བཅོམ་པ་ལྟར། །དེ་ལྟར་བདག་གིས་བདུད་ཀྱི་སྡེ། །ཕམ་པར་བྱ་ཕྱིར་དཀྱིལ་འཁོར་བྲི། །ལན་གསུམ་བརྗོད་པས་
ས་ལ་ཐིམ། །དེ་ཡི་རྟགས་ནི་ཤར་ལ་སོགས། །མཐོན་དམན་རྟགས་ཀྱིས་བརྟག་པར་བྱ། །རྐོ་བ་ལྟོ་འཕྱེའི་ལྟེ་བར་བརྐོ། །དྲི་ཡི་ཆུ་ཡིས་སྤངས་ལ་བཞག །དེ་ནས་ལག་མཐིལ་ལྟར་མཉམ་བྱ། །ལྷ་ཡི་རྣལ་འབྱོར་དང་ལྡན་པས། །ས་གཞི་རྡོ་རྗེའི་རང་བཞིན་བསམ། །
ལོགས་དང་སྟེང་ཡང་དེ་བཞིན་ནོ། །བདག་ནི་དཀྱིལ་འཁོར་ལྷ་མཆོད་པས། །ལྷ་རྣམས་ཁྱེད་ནི་དཔང་དུ་གྱུར། །བདག་གཞན་སྒྲིབ་པ་སྦྱང་བའི་ཕྱིར། །རིན་ཆེན་སྣ་ཚོགས་དཀྱིལ་འཁོར་བྲི། །དེ་ནས་དབུ་རྒྱན་སྟོད་གཡོགས་དང་། །རྒྱན་བགོས་རྡོ་རྗེ་དྲིལ་ཐོགས་ནས། །ཨོཾ་
བཛྲ་དྷཱུ་པེ་ཨཱཿཧཱུཾ། ཨོཾ་བཛྲ་པུཥྤེ་ཨཱཿཧཱུཾ། ཨོཾ་བཛྲ་ཨཱ་ལོ་ཀེ་ཨཱཿཧཱུཾ། ཨོཾ་བཛྲ་གནྡྷེ་ཨཱཿཧཱུཾ། ཨོཾ་བཛྲ་ནཻ་བི་ཏྱ་ཨཱཿཧཱུཾ། ཞེས་མཆོད་པ་ལྔས་མཆོད། །སྤྲུལ་པའི་དཀྱིལ་འཁོར་ལ་བསྟོད་པ། །སྒྱུ་མ་སྤྲུལ་པ་བདག་ཉིད་ཀྱི། །འཇའ་ཚོན་ལྟ་བུར་སོ་སོར་གསལ། །ཐབས་

དང་ཤེས་རབ་སྐུ་མངའ་བའི། །དཀྱིལ་འཁོར་ལྡན་ལ་ཕྱག་འཚལ་བསྟོད། །ཁོང་ནས་འབྱུང་བ་ཤེས་རབ་ཐབས། །ཤེས་རབ་དཀྱིལ་འཁོར་བཤད་དུ་གསོལ། །ཉོན་མོངས་དུག་རྣམས་སེལ་མཛད་པའི། །ཐབས་ཀྱི་དཀྱིལ་འཁོར་བཤད་དུ་གསོལ། །ཨོཾ་པྲཛྙཱ་མཎྜ་ལ་པྲ་བེེ་
ཤ །ཨོཾ་ཨུ་པ་མཎྜ་ལ་པྲ་བེེ་ཤ །དེ་ནས་ཕྱོགས་བཅུ་ཁྲོ་བོས་བསྲུང་། །བཀའ་བསྒོ་སྟང་སྟབས་བྱ་བར་བཤད། །གུར་དང་བླ་རེ་ལ་སོགས་པ། །རཀྵའི་སྔགས་ཀྱིས་བསྲུང་བར་བྱའོ། །བ་ཡི་རྣམ་ལྔས་ལེགས་བྱུགས་ཏེ། །དེ་སྟེང་དྲི་ཡི་ཐིག་ལེ་དང་། །མེ་ཏོག་ཚོམ་བུ་དགྲམ་
པར་བྱ། །ཚོགས་བསགས་སྟོང་ཉིད་བསྒོམས་ནས་ནི། །བྷྲཱུཾ་ལས་གཞལ་ཡས་ཨས་ལྷ་བསྐྱེད། །ཛཿཧཱུཾ་བཾ་ཧོཿས་དགུག་གཞུག་བྱ། །འདི་ལྟར་སངས་རྒྱས་སྐྱེད་བྱེད་ཡུམ། །ཁོང་ནས་འབྱུང་བ་སྐྱེ་མེད་བདག །སྨྲ་བསམ་བརྗོད་མེད་སྤྲོས་བྲལ་ཡུམ། །གསང་བའི་ཡུམ་ལ་
ཕྱག་འཚལ་བསྟོད། །མཆོད་པ་ཆེན་པོ་གཏི་མུག་ཆེ། །གཏི་མུག་མ་ལུས་འཇོམས་མཛད་པ། །མ་རིག་མུན་སེལ་འཁོར་ལོ་འཛིན། །རྣམ་པར་སྣང་མཛད་ཕྱག་འཚལ་བསྟོད། །མཆོད་པ་ཆེན་པོ་ཞེ་སྡང་ཆེ། །ཞེ་སྡང་མ་ལུས་འཇོམས་མཛད་ཅིང་། །མཁྲེགས་
ཤིང་རྡོ་རྗེ་ཆེན་པོ་འཆང་། །རྡོ་རྗེ་སེམས་དཔའ་ཕྱག་འཚལ་བསྟོད། །མཆོད་པ་ཆེན་པོ་ང་རྒྱལ་ཆེ། །ང་རྒྱལ་མ་ལུས་འདུལ་མཛད་པ། །ཡིད་བཞིན་ནོར་བུ་ཆེན་པོ་འཛིན། །རིན་ཆེན་འབྱུང་ལྡན་ཕྱག་འཚལ་བསྟོད། །མཆོད་པ་ཆེན་པོ་འདོད་ཆགས་ཆེ། །འདོད་ཆགས་
མ་ལུས་འཇོམས་མཛད་པ། །སྤྲིན་དཀར་དག་བཞིན་པདྨ་བསྣམས། །སྣང་བ་མཐའ་ཡས་ཕྱག་འཚལ་བསྟོད། །མཆོད་པ་ཆེན་པོ་ཕྲག་དོག་ཆེ། །ཕྲག་དོག་མ་ལུས་འཇོམས་མཛད་པ། །སྲིད་པའི་རི་བོ་ཆེན་པོ་འཇོམས། །ཕྱག་འཚལ་དོན་ཡོད་གྲུབ་ལ་བསྟོད། །དང་
པོ་སངས་རྒྱས་རྒྱུ་མེད་ཅིང་། །གདོང་ལྔ་གཙུག་ཕུད་ལྔ་དང་ལྡན། །གླེགས་བམ་རལ་གྲི་ཕྱག་ན་བསྣམས། །དང་པོའི་སངས་རྒྱས་ཕྱག་འཚལ་བསྟོད། །ཤེས་རབ་རལ་གྲི་མདའ་གཞུ་ཐོགས། །ཉོན་མོངས་མི་ཤེས་གཡུལ་ངོ་སེལ། །དཔའ་བོ་བདུད་དགྲ་བདུད་འདུལ་བ། །

ཤེས་རབ་འཁོར་ལོ་ཕྱག་འཚལ་བསྟོད། །ཡེ་ཤེས་སེམས་དཔའ་སེམས་དཔའ་ཆེ། །ཡེ་ཤེས་གཉིས་མེད་གཟུགས་འཆང་བ། །ཡེ་ཤེས་དབང་བསྐུར་ཅོད་པན་ཅན། །ཡེ་ཤེས་སེམས་དཔའ་ཕྱག་འཚལ་བསྟོད། །འདོད་པ་ཆེན་པོ་བདེ་ཆེན་ལྡན། །
དགའ་བ་དོན་ལྡན་མགུ་བར་བྱེད། །ཤེས་རབ་ཕ་རོལ་ཕྱིན་པའི་མཐའ། །ཤེས་རབ་སེམས་དཔའ་བཅུ་དྲུག་བསྟོད། །སྦྱིན་པའི་བདག་ཉིད་སྒེག་མོ་ལ། །ཚུལ་ཁྲིམས་བདག་ཉིད་ཕྲེང་བ་མ། །བཟོད་པའི་བདག་ཉིད་པི་ཝང་མ། །བརྩོན་འགྲུས་བདག་ཉིད་གར་མཁན་
མ། །ལྷ་མོ་བཞི་ལ་ཕྱག་འཚལ་བསྟོད། །ཤེས་རབ་མར་མེ་བསམ་གཏན་བྲི། །ཐབས་ལྡན་མེ་ཏོག་སྨོན་ལམ་རོ། །ཕྱག་འཚལ་ལྷ་མོ་བཞི་ལ་བསྟོད། །སེམས་ཅན་དོན་ལ་རབ་བརྩོན་པའི། །སྙིང་རྗེ་ཆེན་པོ་བློ་མཆོག་ལྡན། །བྱམས་པ་ལ་སོགས་ཐབས་ཀྱི་
བདག །ཐབས་ཀྱི་སེམས་དཔའ་བཅུ་དྲུག་བསྟོད། །སྟོབས་ལྡན་ལྕགས་ཀྱུ་ཞགས་པ་མ། །ཡེ་ཤེས་ལྕགས་སྒྲོག་དྲིལ་བུ་མ། །ཐབས་དང་ཤེས་རབ་བདག་ཉིད་ཀྱི། །སྒོ་མ་བཞི་ལ་ཕྱག་འཚལ་བསྟོད། །དེ་ནས་གྲུབ་པའི་ལས་བརྩམས་ནས། །གསང་བའི་དཀྱིལ་འཁོར་ལྷ་
རྣམས་ཀུན། །མ་ལུས་བདག་ལ་དགོངས་སུ་གསོལ། །སེམས་ཅན་ཀུན་གྱི་དོན་སྒྲུབ་ཕྱིར། །སང་ནི་དཀྱིལ་འཁོར་བྲི་བར་འཚལ། །ཐལ་སྦྱར་པུས་བཙུགས་དྲིལ་བུ་གསིལ། །སྤོས་ཐོགས་དེ་ལྟར་གསོལ་བ་གདབ། །དེ་ནས་བསྒྲུབ་པ་བྱས་ནས་ནི། །གསོལ་བ་བཏབ་པ་སྔོན་སོང་
ནས། །གསང་བའི་དཀྱིལ་འཁོར་མཁའ་ལ་གདེག །ཉི་ཟླའི་བར་དུ་མཁའ་ལ་གདེག །དེ་ནས་སློབ་མ་གཟུང་བར་བྱ། །དགའ་ཆེན་ཁྱོད་བདག་སྟོན་པ་བས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་སེམས་དཔའི་ཚུལ་བསྟན་པའི། །མགོན་པོ་ཆེན་པོ་བདག་འཚལ་
ལོ། །དམ་ཚིག་དེ་ནི་སྩལ་དུ་གསོལ། །བྱང་ཆུབ་སེམས་ནི་བསྐྱེད་པ་དང་། །དཀོན་མཆོག་གཙོ་འཁོར་བཅས་པ་དང་། །སྐྱབས་དང་གྲོང་མཆོག་འཇུག་པར་འཚལ། །བུ་ཚུར་ལམ་ཆེན་འདིར་ཞུགས་པའི། །བུ་ཚུར་ཐེག་ཆེན་རྟེན་ཡིན་ཏེ། །སྒྱུ་འཕྲུལ་དྲ་བའི་དཀྱིལ་འཁོར་འདི། །

ཁྱོད་ལ་ཡང་དག་བཤད་པར་བྱ། །ལམ་འདི་ལ་ནི་བརྟེན་ནས་ནི། །འདས་དང་མ་བྱོན་ད་ལྟར་རྣམས། །བྱང་ཆུབ་ཤིང་གི་གདན་དྲུང་དུ། །ཐམས་ཅད་མཁྱེན་པའི་འབྲས་བུ་ཐོབ། །བདུད་སྡེ་དག་ཀྱང་འདི་ཡིས་བཅོམ། །དེ་བས་འབྲས་བུ་ཐོབ་བྱའི་ཕྱིར། །བུ་ཡིས་ལམ་འདི་བསྒྲུབ་
པར་གྱིས། །དཀྱིལ་འཁོར་ལྔ་དང་དཀོན་མཆོག་གསུམ། །དུས་འདི་རྟག་ཏུ་སྐྱབས་སུ་མཆི། །དཔའ་བོ་དཔའ་མོ་སློབ་དཔོན་ལ། །དུས་འདི་རྟག་ཏུ་སྐྱབས་སུ་མཆི། །བླ་མེད་དཀོན་མཆོག་དཀྱིལ་འཁོར་ལྷ། །ཐམས་ཅད་བདག་ལ་དགོངས་སུ་གསོལ། །བདག་དུས་
འདི་ནས་གཟུང་བྱས་ཏེ། །ཚངས་སྤྱོད་དམ་ཚིག་སྡོམ་པ་གཟུང་། །ཕྱོགས་བཅུའི་ནམ་མཁའི་ཁམས་བཞུགས་པའི། །བླ་མ་སློབ་དཔོན་ཡི་དམ་ལྷ། །སངས་རྒྱས་བྱང་ཆུབ་སེམས་དཔའ་དང་། །དམ་ཆོས་རྣམས་ལ་བདག་སྡིག་བཤགས། །བླ་མ་ཡི་དམ་སངས་རྒྱས་
དང་། །དཀྱིལ་འཁོར་ཆོས་དང་དགེ་འདུན་གྱི། །ཡོན་ཏན་ཡོངས་སུ་སྒྲོགས་རྣམས་ལ། །དེ་ལ་བདག་ནི་ཡི་རང་ངོ་། །ཆོས་ཀྱི་འཁོར་ལོ་བསྐོར་བ་དང་། །བདེ་གཤེགས་མྱ་ངན་མི་འདའ་བཞུགས། །ཕྱོགས་བཅུའི་བླ་མ་ཡི་དམ་ལྷ། །དཀྱིལ་འཁོར་གཙོ་འཁོར་བཅས་པ་
དང་། །སངས་རྒྱས་ཆོས་དང་དགེ་འདུན་ལ། །སྙིང་པོ་བྱང་ཆུབ་མཆིས་བར་དུ། །དི་རིང་ཉིད་དུ་སྐྱབས་སུ་མཆི། །བདག་ནི་དེང་དུ་གཟུང་དུ་གསོལ། །སངས་རྒྱས་བྱང་ཆུབ་སེམས་དཔའ་ཡིས། །བྱང་ཆུབ་ཏུ་ནི་སེམས་བསྐྱེད་ལྟར། །དེ་བཞིན་སེམས་ཅན་ཕན་དོན་དུ། །བདག་
གིས་བྱང་ཆུབ་སེམས་བསྐྱེད་དོ། །སངས་རྒྱས་བདག་ལ་དགོངས་སུ་གསོལ། །སངས་རྒྱས་ཆོས་དང་དགེ་འདུན་དང་། །བླ་ན་མེད་པའི་དཀོན་མཆོག་གསུམ། །རྣལ་འབྱོར་སངས་རྒྱས་སྡོམ་པ་གཟུང་། །རྡོ་རྗེ་རིན་ཆེན་ཁྱད་པར་གྱི། །རྡོ་རྗེ་དྲིལ་བུའི་སྡོམ་པ་གཟུང་། །ཐབས་དང་ཤེས་
རབ་བསམ་པས་ནི། །སློབ་དཔོན་ཉིད་དུ་སྡོམ་པ་གཟུང་། །རིན་ཆེན་འཛིན་པ་ཆེན་པོ་ཡི། །ཡིད་དུ་འོང་བའི་དམ་ཚིག་ལ། །ཉིན་རེ་བཞིན་ནི་དུས་དྲུག་ཏུ། །སྦྱིན་པ་རྣམ་བཞི་སྦྱིན་པར་བྱ། །པདྨ་འཛིན་པ་ཆེན་པོ་ཡི། །ཐབས་དང་ཤེས་རབ་ལས་བྱུང་བའི། །ཕྱི་ནང་གསང་བའི་ཐེག་པ་ཡི། །

དམ་པའི་ཆོས་ཀྱི་སྡོམ་པ་གཟུང་། །ཕྲིན་ལས་འཛིན་པ་ཆེན་པོ་ཡི། །ཚུལ་ཁྲིམས་གསུམ་ལྡན་བྱ་བ་དང་། །རྒྱ་ཆེ་གཞན་གྱི་དོན་གྱི་ཕྱིར། །བདག་གིས་སྡོམ་པ་གཟུང་བར་བྱ། །དེ་ལྟར་སྡོམ་པ་རབ་བཟུང་ནས། །སློབ་མ་བསྲུང་བར་རབ་ཏུ་བྱ། །འབྲུ་
གསུམ་སྔགས་ཀྱིས་རབ་བསྲུངས་ནས། །གནས་གསུམ་བྱིན་བརླབས་རབ་བརྟན་ནས། །མཆོད་པས་སློབ་མ་བརྟན་ཕྱིར་མཆོད། །དེ་ནས་མཎྜལ་བ་ཀོ་ཙམ། །བཤམས་ནས་སོ་ཤིང་དོར་བྱ་ནི། །ཨུཏྤལ་པདྨ་དྲི་ཞིམ་ནི། །སོར་ནི་བཅུ་གཉིས་འབུས་མ་ཟོས། །དྲི་དང་
མེ་ཏོག་ཤིན་ཏུ་བཅིངས། །ཤར་བལྟས་མི་གཡོ་སྟེང་དུ་དོར། །བཟའ་ཟིན་ནས་ནི་མི་གཡོ་དོར། །སྟེང་བལྟས་མཆོག་ཐོབ་ཕྱོགས་སུ་ནི། །སོ་སོའི་ཕྲིན་ལས་མཚམས་སུ་ནི། །དངོས་གྲུབ་ཐ་མ་འོག་གིས་འོག །དེ་ནས་དྲི་མ་དག་པའི་ཕྱིར། །ཨོཾ་སརྦ་ཏ་ཐཱ་ག་ཏ་ཛྙཱ་ན་ཀཱ་ཡ་བཱ་གཱི་ཤྭ་
ར། མ་ཧཱ་པ་ཙ་བི་ཤོ་དྷ་སརྦ་པཱ་པཾ་རཱུ་པ་ཙིཏྟ་བཱཀ་ཨ་པ་ཡ་ན་ཧཱུཾ། བཟླས་པའི་ཆུ་ཡིས་ལུས་ངག་ཡིད། །སོ་སོར་དག་ཕྱིར་ཧུབ་གསུམ་བཏུང་། །དེ་ནས་རྒྱུད་ནི་སྦྱོང་བའི་ཕྱིར། །དད་དང་མི་ལུས་ཐོབ་པ་དང་། །སངས་རྒྱས་འབྱུང་བ་ཤིན་ཏུ་དཀོན། །མེ་ཏོག་ཨུ་དུམྺཱ་ར་བཞིན། །ལམ་
བཟང་རྙེད་པ་དེ་བས་ཀྱང་། །ཤིན་ཏུ་སྡིག་པ་ཟད་བྱེད་པ། །དཀྱིལ་འཁོར་དབང་ནི་ཐོབ་པར་དཀའོ། །དབང་ལྡན་ནུས་པ་ཐོབ་དཀའོ། །དེ་ནས་ཨོཾ་ཨཱཿཧཱུཾ་མ་ནི་བི་ཤུངྡྷ་ཧཱུཾ། སརྦ་པཱ་པཾ་བི་ཤུདྡྷ་ཧཱུཾ། ཀུ་ཤ་བྱིན་བརླབས་སྔས་སུ་གཞུག །ལྡང་བའི་སྟོབས་ཀྱིས་སྨོན་ལམ་གདབ། །ཨོཾ་ཡ་མཱནྟ་ཀ་ཧཱུཾ། ཨོཾ་ཀཱ་
ལ་རཱུ་པ་ཧཱུཾ་ཕཊ། གཉིས་ཀྱིས་བསྲུང་བའི་སྐུད་པ་བྱ། །བྱིན་བརླབས་སྲོག་གནས་ཉིད་དུ་གདགས། །དེ་ནས་གཏོར་མ་གཏང་བྱས་ནས། །སློབ་མ་སེང་གེའི་ཉལ་ཐབས་ཉལ། །རྨི་ལམ་རྟགས་ནི་སོ་སོར་བརྟག །རྟགས་བཟང་སྤྲོ་བ་ངན་ན་ནི། །སྦྱིན་སྲེག་གཞན་གྱིས་སྡིག་པ་སྦྱོང་། །
སློབ་དཔོན་དཀྱིལ་འཁོར་ནང་ཞུགས་ཏེ། །སློབ་མ་སྟ་གོན་ལ་གནས་པའོ། །དེ་ནས་རིན་ཆེན་ལྔ་ལས་བྱས། །བུམ་པ་ཁ་དོག་དཀར་པོ་སྟེ། །པད་སྟེང་སོ་སོའི་མཚན་མ་དགོད། །མགུལ་ཆིངས་ཁ་དོག་སོ་སོར་བཅིངས། །འབྲུ་དང་རིན་ཆེན་ལྔ་དང་ནི། །སྙིང་པོ་ལྔ་དང་སྤོས་ལྔ་

བླུགས། །འབྲས་བུ་ཅན་གྱི་ཁ་རྒྱན་ཤིང་། །སྦྱངས་ནས་དེ་ནས་དགྲམ་པར་བྱ། །ལྷ་གྲངས་མཐུན་པའི་བུམ་པ་དགྲམ། །བི་ཤུདྡྷ་ཡི་སྔགས་ཀྱིས་སྦྱངས། །བྲུཾ་ལས་རིན་ཆེན་བུམ་པ་བསྐྱེད། །ནང་དུ་སོ་སོའི་ལྷ་རྣམས་བསམ། །དགུག་གཞུག་ལ་སོགས་རྫོགས་པ་དང་། །
མཆོད་ནས་བསྟོད་ཅིང་འདུད་ཀྱིས་བསྟོད། །ཨོཾ་ཨཱཿཧཱུཾ། སརྦ་ཏ་ཐཱ་ག་ཏཱ་ཧྲྀ་ད་ཡ། ཧ་ར་ཧ་ར། ཨོཾ་ཧཱུཾ་ཧྲཱིཿ། བྷ་ག་བཱན་ཛྙཱ་ན་མཱུརྟྟི་ར་ཧཾ་བུདྡྷོ་བུདྡྷཱ་ནཱཾ། བཱ་གཱི་ཤྭ་ར། མ་ཧཱ་ཝ་ཙ། སརྦ་དྷརྨཱ་ག་ག་ན་ཨ་མ་ལ་སུ་པ་རི་ཤུདྡྷ། དྷརྨ་དྷཱ་ཏུ་ཛྙཱ་ན་གརྦྷ་ཨཱཿ། ཨོཾ་བཛྲ་ཏྲིཀྵྞ་ཨཱཿཧཱུཾ། ཨོཾ་
དུཿཁ་ཙྪེ་ད་ཨཱཿ་ཧཱུཾ། ཨོཾ་པྲཛྙཱ་ཛྙཱ་ན་མཱུརྟ་ཡ་ཨཱཿཧཱུཾ། ཨོཾ་བཱ་གཱི་ཤྭ་ར་ཨཱཿཧཱུཾ། ཨོཾ་ཛྙཱ་ན་ཀཱ་ཡ་ཨཱཿཧཱུཾ། ཨོཾ་ཨ་ར་པ་ཙ་ན་ཨཱཿཧཱུཾཿ། ཞེས་པས་ནི་རིགས་སོ་སོ་དང་ཐ་མས་ནི་ལས་ཐམས་ཅད་པའི་བུམ་པ་བྱིན་གྱིས་བརླབ་པོ། །དེ་ལྟར་བསྒྲུབ་པའི་དུས་སུ་མཎྜལ་བྱས་ལ། མེ་ཏོག་གོ་
རིམས་སོ་སོར་དགྲམ། །མར་མེ་མཆོད་པ་སོ་སོའི་གྲངས། །ཟིན་ནས་རས་ཀྱི་སྟེང་དུ་གཞག །དེ་ནས་དཀྱིལ་འཁོར་ལས་བྱས་ཏེ། །དང་པོར་ཐིག་གི་ལས་བྱའོ། །སར་པ་ཚད་དང་མཚན་ཉིད་ལྡན། །དྲི་ཞིམ་ཆུ་དང་སྣོད་དུ་གཞག །བདག་ཉིད་ཤར་དུ་འདུག་ནས་ནི། །ཐིག་ནི་
ཡེ་ཤེས་ལྔ་རུ་བསྐྱེད། །ཕྱོགས་བཅུའི་ཡེ་ཤེས་བཀུག་ནས་བསྟིམ། །ཨོཾ་ཨ་ར་པ་ཙ་ན་མ་ཏི་ཀྲ་མ་ཧཱུཾ། ཞེས་བརྒྱ་རྩ་བརྒྱད་བཟླས་སོ། །དེ་ནས་ཨོཾ་ཨཱཿཧཱུཾ་ཞེས་པས་སུམ་སྒྲིལ་དུ་བྱའོ། །དེ་ནས་སློབ་མས་བླངས་ལ་དང་པོ་མཁའ་ཐིག་གདབ་བོ། །ས་ཡི་ཐིག་གདབ་སློབ་དཔོན་ནུབ། །
སློབ་མ་ཤར་འདུག་ཚངས་ཐིག་གདབ། །སློབ་མ་ལྷོར་འདུག་སློབ་དཔོན་བྱང་། །སློབ་དཔོན་ཤར་ལྷོ་ལྷོ་ནུབ་སྟེ། །དེ་བཞིན་ལོགས་ཐིག་གདབ་པར་བྱ། །ཟུར་ཐིག་དེ་ནས་ཆ་ཆེན་གདབ། །དེ་ནས་ཆ་ཆུང་བཅུ་དྲུག་གདབ། །དེ་ནས་ཕྱི་དང་ནང་དུ་དབྱེ། །ནང་དུ་བཅུ་དྲུག་དེ་བཞིན་དབྱེ། །
ཕྱི་དང་དེ་བཞིན་ཆ་ཡིས་དབྱེ། །ཆ་རྣམས་དབྱེ་བ་སྒོ་རྒྱན་ཏེ། །ནང་གི་ཕྱེད་ཆ་ཕོ་བྲང་སྟེ། །ཚོམ་བུ་ལྔ་ལྡན་པད་འདབ་བཞི། །དེ་ལྟར་ཐིག་ནི་སོ་སོར་གདབ། །ཡེ་ཤེས་སྐུད་པ་མཆོད་པ་ནི། །ཡེ་ཤེས་གཤེགས་ལ་དམ་ཚིག་བསྡུ། །དེ་ནས་རྡུལ་ཚོན་དགྱེ་བ་ནི། །རིན་ཆེན་

ལྔ་ཡི་ཕྱེ་མའམ། །ཡང་ན་འབྲས་ཀྱི་ཕྱེ་མས་བྲི། །ཁ་དོག་སོ་སོར་དགྲམ་ནས་ནི། །ཨོཾ་ཧཱུཾ་སྭཱ་ཨཾ་ཧཱ་གོ་རིམས་སུ། །མ་དག་བཤིག་ནས་དག་པ་བསྐྱེད། །ཡེ་ཤེས་ལྔ་ནི་སྤྱན་དྲངས་བསྟིམས། །ཨོཾ་ཨ་ར་པ་ཙ་ན་ས་མ་ཡ་སྟྭཾ། ཞེས་ལན་བདུན་བཟླས་ནས་
ནི། དེ་ནས་ཚོན་རྩི་རིམ་བཞིན་དུ། །དབུས་ནས་བརྩམས་ཏེ་བྲི་བར་བྱ། །སྒོ་ནི་ཤར་ནས་དབྱེ་བར་བྱའོ། །དང་པོའི་ཚོན་ལ་མཆོད་པ་ནི། །ཡིད་ཀྱིས་མཆོད་ནས་ཚིག་འདི་བརྗོད། །ཆོས་རྣམས་རང་བཞིན་རྣམ་དག་ལ། །སེམས་ཅན་ཡོངས་དག་ཞིང་འདིར་བྲི། །ཉེས་པའི་དྲི་
མ་ཀུན་བྲལ་ཕྱིར། །རྡུལ་ཚོན་ཡེ་ཤེས་ལྔ་ཡིས་བྲི། །དང་པོ་དབུས་སུ་པདྨ་ནི། །སྣ་ཚོགས་ཤིན་ཏུ་ཟེ་འབྲུ་དཀར། །ཤར་གྱི་སྣ་ཚོགས་ཟེ་འབྲུ་མཐིང་། །ལྷོ་ཡི་སྣ་ཚོགས་ཟེ་འབྲུ་སེར། །ནུབ་ཏུ་སྣ་ཚོགས་ཟེ་འབྲུ་དམར། །བྱང་དུ་སྣ་ཚོགས་ཟེ་འབྲུ་ལྗང་། །རྡོ་རྗེའི་གདུང་དང་
འདྲ་བ་བསྐོར། །པདྨ་ཉི་མས་རབ་ཏུ་བསྐོར། །དེ་ནི་ནང་གི་ཕོ་བྲང་ངོ་། །གྲུ་ཆད་ལྗང་ལ་སྒོ་བཞི་དང་། །རྟ་བབས་ལ་སོགས་བཅས་པའོ། །དེ་ཡི་ཕྱི་རོལ་ཆ་ཆེན་གཅིག །རྩིབས་བཅུ་དྲུག་པའི་འཁོར་ལོའོ། །ཤར་མཐིང་ལྷོ་སེར་ནུབ་དམར་པོ། །བྱང་ལྗང་གྲུ་ཆད་ལྗང་གུ་སྟེ། །
སྒོ་བཞི་རྟ་བབས་བཞི་ལྡན་པའི། །དཀྱིལ་འཁོར་ལེགས་པར་རབ་ཏུ་བྲི། །ནམ་མཁའ་དང་བསྲེ་ཐུགས་མཚན་དགོད། །དབུས་སུ་ས་བོན་ཨ་བྲིས་ནས། །ཕྱོགས་བཞི་གཞན་གྱི་དོན་བཞིན་ནོ། །དབུས་ཀྱི་པདྨ་འདབ་བཞི་ལ། །རྡོ་རྗེ་རིན་ཆེན་པདྨ་རྒྱ་གྲམ་དང་། །གཙོ་བོས་ཕྱེད་ནས་
མཚན་མ་སོ་སོར་སྦས། །ཤར་གྱི་པདྨ་འདབ་མ་བཞི་པོ་ལ། །རྡོ་རྗེ་ལྕགས་ཀྱུ་མདའ་གཞུ་སེ་གོལ་དགོད། །ལྷོ་ཡི་པདྨ་འདབ་མ་བཞི་པོ་ལ། །རིན་ཆེན་ཉི་མ་ཏོག་དང་སོ་ཕྲེང་དགོད། །ནུབ་ཀྱི་པདྨ་འདབ་མ་བཞི་པོ་ལ། །པདྨ་འཁོར་ལོ་རལ་གྲི་ལྕེ་དགོད་དོ། །བྱང་གི་པདྨ་འདབ་མ་
བཞི་པོ་ལ། །རྒྱ་གྲམ་མཆེ་བ་གོ་ཆ་ཁུ་ཚུར་དགོད། །གྲུ་ཆད་བཞི་ལ་ནང་གི་ལྷ་མོ་ནི། །མེ་ལོང་ཕྲེང་བ་པི་ཝང་ཆགས་ཤིང་དགོད། །དེ་ནི་ནང་གི་མཚན་མ་དགོད་པའོ། །དེ་ནས་ཕྱི་ཡི་མཚན་མ་དགོད་པ་ནི། །ཤར་དུ་གུནྡྷེ་ཨུཏྤལ་སྤོས་ཕོར་རྒྱལ་མཚན་ནོ། །ལྷོ་ནི་རིན་ཆེན་འབར་བ་སྤོས་

ཕོར་པུསྟིའོ། །ནུབ་ཏུ་པདྨ་ལྕགས་ཀྱུ་རལ་གྲི་བྲི་བའོ། །བྱང་དུ་ཟླ་བ་ལྕགས་ཀྱུ་རལ་གྲི་རིན་ཆེན་སྒྲོམ། །ཕྱི་ཡི་ལྷ་མོ་དགོད་པ་ནི། །མེ་ཏོག་མར་མེ་དྲི་དང་བཤོས། །དེ་དག་གོ་རིམས་སོམོ་སོར་ནི། །ལྕགས་ཀྱུ་ཞགས་པ་ལྕགས་སྒྲོག་དྲིལ་བུའོ། །ལྷ་རྣམས་ཕྱོགས་སྐྱོང་
རྣམས་ཀྱང་དགོད། །ཡེ་ཤེས་གཉིས་མེད་བསྲེས་ལ་དགོད། །དེ་ནས་བླ་རེ་བ་དན་སོགས། །བུམ་པ་མཆོད་རྫས་ལ་སོགས་དགྲམ། །དེ་ནས་རོལ་མོས་བུམ་པ་ནི། །སྤྱན་དྲང་བསྐོར་བྱས་དགྲམ་པར་བྱ། །དེ་ནས་བདག་ཉིད་ཤར་བལྟས་ཏེ། །བདེ་བའི་སྟན་ལ་ཉེར་འདུག་
ནས། །བགེགས་རྣམས་ཡོངས་སུ་བསྐྲད་ནས་ནི། །རྟེན་ལ་མཆོད་དང་སྡིག་བཤགས་དང་། །བྱང་ཆུབ་ཏུ་བདག་སེམས་བསྐྱེད་བྱ། །སྟོང་ཉིད་སྔགས་ཀྱིས་སྟོང་ཉིད་བསྒོམ། །དེ་ནས་ཧཱུཾ་ལས་རྡོ་རྗེ་བསྒོམ། །ཁྲོ་ཞལ་དྲུག་ལྡན་བུམ་པར་ནི། །བྲུཾ་ལས་ཆོས་སྐུ་ནམ་མཁར་ལྡན། །
གྲུ་གསུམ་ནམ་མཁར་བྲུཾ་བསམས་ནས། །གྲུ་བཞི་སྒོ་བཞི་ཚོམ་བུ་བཞི། །ཐབས་དང་ཤེས་རབ་དཀྱིལ་འཁོར་བསྐྱེད། །དེ་ནས་ཚོམ་བུ་ལྔ་ལ་ནི། །སེང་གེ་གླང་ཆེན་རྟ་དང་ནི། །རྨ་བྱ་ཤང་ཤང་ཨ་ལས་བསྐྱེད། །པདྨའི་སྟེང་དུ་རང་སེམས་ཨ། །དེ་ལས་རྣམ་པར་སྣང་མཛད་
ནི། །ཞི་བ་མདོག་དཀར་ཞལ་བཞི་པ། །ཕྱག་རྒྱ་བྱང་ཆུབ་མཆོག་གི་སྐུའོ། །ཐུགས་ཀར་དང་པོའི་སངས་རྒྱས་སོ། །ཤེས་རབ་འཁོར་ལོ་རྩིབས་བཞི་སྟེ། །དེ་སྟེང་ཡེ་ཤེས་སེམས་དཔའོ། །ཕྱག་རྒྱས་རལ་གྲི་པུསྟི་སྟེ། །གཞན་ནི་སོ་སོའི་ཕྱག་མཚན་ནོ། །མཐིང་ཀ་སེར་
པོ་དམར་དང་ལྗང་། །རྡོ་རྗེ་རིན་ཆེན་པདྨ་ལས། །ས་གནོན་མཆོག་སྦྱིན་ཏིང་འཛིན་སྐྱབས་སྦྱིན་ཏེ། །དེ་བཞིན་ཡུམ་གྱི་མདོག་དང་ཕྱག་མཚན་སོ་སོའོ། །མཐིང་ག་སེར་པོ་མརྒད་ལྗང་གུ་སྟེ། །རྡོ་རྗེ་ལྕགས་ཀྱུ་མདའ་གཞུ་སེ་གོལ་ནི། །སོ་སོའི་ཕྱག་མཚན་ལེགས་པར་བསྣམས་
པའོ། །སེམས་དཔའ་རྒྱལ་པོ་ཆགས་པ་ལེགས་པའོ། །གསེར་མདོག་དམར་དང་ལྗང་གུ་མཐོན་ཀའི་མདོག །རིན་ཆེན་ཉི་མ་ཏོག་དང་སོར་ཕྲེང་བསྣམས། །རིན་ཆེན་ཉི་མ་ཏོག་དང་བཞད་པའི་དཔལ། །སོ་སོའི་རྒྱན་ལྡན་སྐུ་ནི་མཛེས་པའོ། །དམར་དང་ལྗང་གུ་མཐིང་ག་གསེར་

བསྲེགས་མདོག །མ་ཆགས་སེམས་གཅོད་སེམས་རྒྱུད་གསལ་བར་སྨྲ། །ཁ་དོག་སོ་སོར་གསལ་ཞིང་མ་འདྲེས་འཛིན། །པདྨ་རལ་གྲི་འཁོར་ལོ་ལྕེ་རྣམས་སོ། །ལྗང་གུ་མཐིང་ག་གསེར་བསྲེགས་མརྒད་མདོག །ལས་དང་གནོད་སྦྱིན་གོ་ཆ་ཁུ་ཚུར་དང་། །རྒྱ་གྲམ་
མཆེ་བ་གོ་ཆ་ཁུ་ཚུར་ཏེ། །བཞུགས་ཚུལ་ཟླ་བའི་གདན་ལ་ལེགས་པར་བཞུགས། །སྒེག་དང་རིན་ཆེན་ཕྲེང་དང་གླུ་མ་གར། །དཀར་དང་སེར་དང་དམར་དང་ལྗང་གུ་དང་། །མེ་ལོང་ཕྲེང་དང་པི་ཝང་ཆགས་ཤིང་བསྣམས། །པད་སྟེང་རྒྱན་ལྡན་སྒེག་པས་བཞུགས་པའོ། །བྱམས་
པ་འཇམ་དཔལ་སྤོས་ཀྱི་གླང་པོ་ཏོག །དམར་པོ་ལྗང་སེར་མཐིང་ག་དཀར་བ་སྟེ། །གུནྡྷེ་ཨུཏྤལ་སྤོས་ཕོར་རིན་ཆེན་ཏོག །སོ་སོའི་ཕྱག་མཚན་མ་འདྲེས་བསྣམས་པའོ། །བློ་གྲོས་རྒྱ་མཚོ་བློ་གྲོས་མི་ཟད་བཟང་སྐྱོང་སྤོབས་པ་བརྩེགས། །གསེར་དང་གསེར་བསྲེགས་ཨིནྡྲ་ནཱི་ལ་
མཐོན་ཀ་ཆེན་པོའི་མདོག །རིན་ཆེན་རིན་ཆེན་འབར་བ་སྤོས་ཕོར་པུསྟི་བསྣམས། །སེམས་དཔའི་སྐྱིལ་ཀྲུང་ཟླ་བའི་སྟེང་ན་བཞུགས་ཤིང་མཛེས། །མཐུ་ཆེན་ཐོབ་དང་ངན་སོང་འདྲེན་དང་མྱ་ངན་དྲ་བ་ཅན་གྱི་འོད། །དམར་དང་པདྨ་རཱ་ག་དུང་མདོག་ཤིན་ཏུ་དཀར་དང་ཨུཏྤལ་མདོག །པདྨ་
ལྕགས་ཀྱུ་རལ་གྲི་དྲ་བ་བསྣམས། །ཤིན་ཏུ་མཛེས་པའི་རྒྱན་འཛིན་སྐུ་དང་ལྡན། །ཟླ་འོད་གཞོན་ནུ་ཐུགས་རྗེའི་སྟོབས་དང་ནམ་མཁའི་སྙིང་པོ་ནམ་མཁའི་མཛོད། །ཟླ་བ་ལྕགས་ཀྱུ་དང་ནི་རལ་གྲི་འབར་བ་རིན་ཆེན་སྒྲོམ་ནི་གཡས་གཡོན་འཛིན། །དཀར་སེར་དཀར་དང་ལྗང་གུ་མཐིང་
ཀའི་མདོག །སྐུ་མདོག་ཤིན་ཏུ་གསལ་བས་མ་འདྲེས་གསལ། །བདུག་པ་མེ་ཏོག་དྲི་དང་རོ། །མཐིང་ཀ་དཀར་དང་དམར་པོ་ལྗང་། །ལྕགས་ཀྱུ་ཞགས་པ་ལྕགས་སྒྲོག་དྲིལ། །མཐིང་ཀ་སེར་དམར་ལྗང་གུའོ། །དེ་ལྟར་དམ་ཚིག་ལྷ་བསྐྱེད་ནས། །ཐུགས་ཀར་མཚན་མ་རབ་ཏུ་
གསལ། །པྲ་ཀྲྀ་ཏི་པ་རི་ཤུདྡྷ་སརྦ་དྷརྨཱ་ཡ་དུ་ཏ་སརྦ་ཏ་ཐཱ་ག་ཏཱ་ཛྙཱ་ན་ཀཱ་ཡ། མཉྫུ་ཤྲཱི་པ་རི་ཤུདྡྷི་ཏཱ་མུ་པཱ་དཱ་ཡེ་ཏ་ཨ། ཡོངས་སུ་དག་པའི་ཡེ་ཤེས་སོ། །ཞིང་ནས་མ་ལུས་སྤྱན་དྲང་ངོ་། །དཀྱིལ་འཁོར་རིམ་བཞིན་ཡེ་ཤེས་རིམ་བཞིན་དུ་སྤྱན་དྲང་ངོ་། །སྠི་ཏོ་ཧྲྀ་དི་ཛྙཱ་ན་མཱུརྟྟི་ར་ཧཾ་བུདྡྷོ་བུདྡྷཱ་ནཱཾ།

ཏྲྱ་དྷྭ་ཝརྟྟི་མཱཾ་ཞེས་པས་སྐུ་བཞི་ལ་ཕྱག་བྱའོ། །དེ་ནས་ཛཿཧཱུཾ་བཾ་ཧོཿས་བསྟིམ་ཞིང་བྱིན་གྱིས་བརླབ་པ་ནི། ཨོཾ་ཧཱུཾ་ཧྲཱིཿཞེས་པས་སོ། །ད་ནི་དབང་བསྐུར་ཏེ་གསོལ་བ་གདབ་པ་ནི། ཨོཾ་སརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་ཧ་ར། སརྦ་དྷརྨཱ། ག་ག་ན་ཨ་མཱ་ལ་སུ་པ་རི་ཤུདྡྷ་དྷརྨཱ་དྷཱ་ཏུ་ཛྙཱ་ན་གརྦྷ་ཨཱཿ།
དེ་ནི་སློབ་དཔོན་འཇུག་པའོ། །དེ་ནས་སློབ་མ་འཇུག་པ་ནི། །རས་ཀྱིས་གདོང་ནི་བཀབ་ནས་སུ། །ལས་ཀྱི་རྡོ་རྗེ་ལམ་བསྟན་ནས། །ཤར་སྒོར་སློབ་མ་འདུག་སྟངས་ནི། །ཐལ་སྦྱོར་གུས་པའི་ཚུལ་གྱིས་འདུག །དེ་ནས་གསོལ་བ་གདབ་བྱ་སྟེ། །སངས་རྒྱས་ཀུན་གྱི་ཡེ་ཤེས་སྐུ། །
སློབ་དཔོན་ལ་ནི་སྐྱབས་སུ་མཆི། །དཀྱིལ་འཁོར་གཙོ་འཁོར་བཅས་ལ་ཡང་། །བདག་ནི་རྟག་ཏུ་སྐྱབས་སུ་མཆི། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་འཇུག་པར་འཚལ། །ཞེས་བརྗོད་ལ་མཎྜལ་དབུལ། དེ་ནས་སློབ་དཔོན་གྱིས་གསོལ་བ་ནི། དེ་བཞིན་
གཤེགས་པ་ཀུན་གྱི་གནས། །སྒྱུ་འཕྲུལ་དྲ་བའི་གྲོང་མཆོག་ཏུ། །བདག་གིས་ཁྱོད་ནི་གཞུག་པར་བྱ། །སྙིང་པོའི་དཀྱིལ་འཁོར་བསྟན་པར་བྱ། །གོང་གི་སྔགས་ཀྱིས་དཀྱིལ་འཁོར་གྱི་ལྷ་ལ་ཕྱག་བྱེད་དུ་གཞུག །དེ་ནས་སྡོམ་པའི་ཆོ་ག་སྦྱིན་པ་ནི། །སངས་རྒྱས་ཆོས་དང་དགེ་
འདུན་གསུམ། །གསུམ་ལ་སྐྱབས་སུ་མཆི་བར་བགྱི། །འདི་ནི་སངས་རྒྱས་རིགས་ཡིད་འོང་། །སྡོམ་པ་རྟག་ཏུ་གཟུང་བར་བྱ། །ཐབས་ནི་རྡོ་རྗེ་ཤེས་རབ་དྲིལ། །ཐབས་དང་ཤེས་རབ་སྡོམ་པ་གཟུང་། །དེ་ནི་རྡོ་རྗེ་རིགས་ཀྱི་མཆོག །སྡོམ་པ་དེ་ནི་གཟུང་བར་བྱ། །ཉིན་རེ་བཞིན་
ནམ་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །རིན་ཆེན་རིགས་མཆོག་ཆེན་པོ་ཡི། །སྡོམ་པ་རྟག་ཏུ་གཟུང་བའོ། །ཕྱི་ནང་གསང་བ་ཐེག་པ་གསུམ། །དམ་པའི་ཆོས་ཀྱང་མ་ལུས་གཟུང་། །པདྨའི་རིགས་མཆོག་ཆེན་པོ་སྟེ། །དམ་ཚིག་ཡིད་དུ་འོང་བ་གཟུང་། །སྡོམ་པ་
ཐམས་ཅད་ལྡན་པ་དང་། །མཆོད་སྦྱིན་ལས་ཀྱང་ཅི་ནུས་བྱ། །ལས་ཀྱི་རིགས་མཆོག་ཆེན་པོ་ཡི། །སྡོམ་པ་དག་ཀྱང་གཟུང་བར་བྱ། །ད་ནི་ཁྱོད་ཀྱིས་འདི་གྱིས་ཤིག །ལས་རྣམས་སུ་ལ་སྨྲ་མི་བྱ། །འདི་ནི་སེམས་ཅན་དམྱལ་བའི་ཆུ། །འདི་ལས་འདས་ན་བརླག་པར་འགྱུར། །

ཨོཾ་ཨ་མྲྀ་ཏ་ཧཱུཾ་ཧཱུཾ་ཧཱུཾ་པཉྩ་ཧྲི། ཞེས་པས་ལན་གསུམ་སྦྱིན་ནོ། །ད་ནི་དཀྱིལ་འཁོར་གྱི་འཁོར་ལོ་སློབ་དཔོན་ནུས་པ་དང་ལྡན་པས་སློབ་མ་ཉིད་ལ་བསྟིམས་ནས་བསྲུང་། ཕྲིན་ལས་རྣམ་བཞིའི་ཁ་དོག་བརྟག །སྠི་ཏོ་ཧྲྀ་དི་ཛྙཱ་ན་མཱུརྟྟི་ཨ། ཞེས་པས་བྱིན་གྱིས་བརླབས་
དེ་ནས་མེ་ཏོག་དོར་བྱས་ནས། །སྤྱན་ནི་ལེགས་པར་དབྱེ་བར་བྱ། །ཇི་ལྟར་མིག་མཁན་རྒྱལ་པོ་ལྟར། །དེ་བཞིན་དུ་ནི་སྤྱན་དབྱེའོ། །ཨོཾ་ཨ་བྷཱ་བ་སྭ་བྷཱ་བ་བི་ཤུདྡྷ་བཛྲ་ཙཀྵུ་ཨ་ཨཱ་ཨཾ་ཨཿབསྟོད་པ་བཞིན་སྤྱན་དབྱེའོ། །གདོང་གཡོགས་ཕུད་ལ་འདི་སྐད་དོ། །དཀྱིལ་འཁོར་དམ་
པ་འདི་ལ་ལྟོས། །ད་ནི་དང་བ་རབ་ཏུ་བསྐྱེད། །སྡིག་པ་ཐམས་ཅད་ཞི་བ་དང་། །དངོས་གྲུབ་རྣམ་གཉིས་འདི་ལས་འབྱུང་། །དེ་ཕྱིར་འདི་ལ་ནན་ཏན་གྱིས། །དཀྱིལ་འཁོར་ལྷ་དང་སྔགས་བསྒྲུབ་བྱོས། །ཞེས་བྱས་ནས། རང་གི་གུ་ཧྱ་ན་མ་དང་། །ཡི་དམ་ལྷ་རྣམས་གསལ་བར་
བསྟན། །ལྷ་རྣམས་ཕུང་པོ་ཁམས་སུ་བཤད། །དེ་ནས་དཀྱིལ་འཁོར་རབ་ཏུ་བཤད། །གྲུ་བཞི་ཚད་མེད་བཞི་དང་ནི། །སྒོ་བཞི་དྲན་པ་ཉེར་གཞག་བཞི། །རྟ་བབས་ཡང་དག་སྤོང་བ་བཞི། །དྲ་བ་དྲ་བ་ཕྱེད་པ་ཡང་། །ཡང་དག་སྤོང་བ་བཞི་པའོ། །ཀ་བ་བརྒྱད་ནི་འཕགས་
ལམ་བརྒྱད། །ཚོམ་བུ་ལྔ་ལྡན་ཕ་རོལ་ཕྱིན། །རྡོ་རྗེའི་གདུང་ནི་ཤེས་རབ་བོ། །འཁོར་ལོ་ཆོས་ཀྱི་འཁོར་ལོ་སྟེ། །སྟོང་པ་བཅུ་དྲུག་ཕྱི་ཡང་ངོ་། །དེ་ནས་མཎྜལ་བྱས་ནས་ནི། །ཡོ་བྱད་རྫས་ཀྱིས་བླ་མ་མཆོད། །དེ་རྗེས་དབང་ནི་རབ་བསྐུར་ཕྱིར། །སྒོ་ལྷོར་སྣ་ཚོགས་པདྨའི་སྟེང་། །
སློབ་མ་བློ་ལྡན་དེ་སྟེང་གཞག །བདག་ཉིད་དཀྱིལ་འཁོར་རབ་གསལ་བས། །ལས་ཀྱི་ཁྲོ་བོའི་སྤྲུལ་པ་སྤྲོ། །བདུད་རྩི་ཆུ་ཡིས་བསྲུང་བར་གཏོར། །ཨོཾ་ཡ་མཱནྟ་ཀ་ཧཱུཾ་ཁཾ། ཨོཾ་ཀཱ་ལ་རཱུ་པ་ཧཱུཾ་ཧྲཱིཿ། བར་ཆོད་བགེགས་རྣམས་བསལ་ནས་ནི། །དྲ་བ་གུར་གྱིས་བསྲུང་བ་དང་། །ཁྲོ་བོ་
དྲུག་གིས་བསྲུང་བ་ལ། །རིམ་པ་བཞིན་དུ་དབང་བསྐུར་རོ། །བུམ་པའི་ཆུ་རྣམས་ཐམས་ཅད་ཀུན། །གཙོ་བོའི་བུམ་པར་ཀུན་བསྡུས་ནས། །བདག་ཉིད་ལྷ་ཡི་སྐུར་གསལ་བས། །སློབ་མ་བྱིན་བརླབ་བྱ་བའི་ཕྱིར། །དེ་ནས་བུམ་པ་བླང་ནས་ནི། །སློབ་མའི་མགོ་ལ་རབ་

གཏུགས་ཏེ། །ཨོཾ་ཨ་བྷི་ཥིཉྩ་མཾ་ཧཱུཾ། ཇི་ལྟར་སངས་རྒྱས་བཅོམ་ལྡན་འདས། །དགའ་ལྡན་གནས་ན་བཞུགས་པ་ལ། །ལྷ་རྣམས་ཀྱིས་ནི་ཁྲུས་གསོལ་ལྟར། །དེ་བཞིན་བདག་གིས་ཁྲུས་གསོལ་ལོ། །ཨོཾ་དུཿཁ་ཙྪེ་ད་ཧཱུཾ། དེ་ནས་དབུ་རྒྱན་ནི། ཡེ་ཤེས་ལྔ་ཡི་རང་བཞིན་
གྱིས། །སོ་སོ་ཡང་དག་རབ་གསལ་ཕྱིར། །བསྟིམས་ནས་མཆོད་ཅིང་བསྟོད་ནས་ནི། །མཉམ་ཉིད་གཟུང་འཛིན་སྤང་བས་བསྐུར། །ཨོཾ་བཱ་གཱི་ཤྭ་ར་ཏྲཱཾ། ཐབས་དང་ཤེས་རབ་གཉིས་མེད་པའི། །ཡེ་ཤེས་ལྔ་ལྡན་ལོག་ལྟ་འཇོམས། །སྟོང་ཉིད་དོན་སྟོན་རྡོ་རྗེ་ཆེ། །བུ་
ཁྱོད་ཐུགས་ལ་གནས་པར་གྱིས། །ཨོཾ་བཛྲ་ཏཱིཀྵྞ་ཧྲཱིཿ། ཐབས་དང་ཤེས་རབ་གཉིས་མེད་དོན། །རྒྱུན་མི་འཆད་པར་འགྲོ་དོན་ཕྱིར། །མཆོད་ཅིང་བསྟིམས་ནས་དབང་བསྐུར་ཕྱིར། །དི་རིང་ཁྱོད་ལ་དབང་བསྐུར་རོ། །ཨོཾ་ཛྙཱ་ན་ཀཱ་ཡ་ཧ། མཚན་རྣམས་ཐམས་ཅད་ཡོངས་རྫོགས་
པའི། །ཤེས་རབ་ཡེ་ཤེས་གཉིས་མེད་མཚན། །པུསྟི་གླེགས་བམ་མཆོད་ནས་བསྟིམ། །དི་རིང་བུ་ཁྱོད་མིང་དབང་བསྐུར། །ཨོཾ་པྲཛྙཱ་ཛྙཱ་ན་མཱུརྟྟ་ཡེ་ཨོཾ། ཡེ་ཤེས་ལྔ་ལྡན་དྲུག་རྫོགས་པ། །སངས་རྒྱས་སྲས་པོ་དམ་པའི་མཆོག །སྤྱོད་ལམ་རྒྱུན་དུ་ཕྲེང་བའི་དབང་། །དི་རིང་ཁྱོད་
ལ་བསྐུར་བར་བྱ། །ཨོཾ་ཨ་ར་པ་ཙ་ན་ཧཱུཾ། །ཉོན་མོངས་སྡུག་བསྔལ་གཅོད་པ་དང་། །ཤེས་བྱ་མ་རིག་བསལ་བའི་ཕྱིར། །ཤེས་རབ་མཚོན་ཆེན་རལ་གྲི་འདི། །བུ་ཡིས་རྟག་ཏུ་གཟུང་བར་གྱིས། །ཨོཾ་པྲཛྙཱ་ཛྙཱ་ན་མཱུརྟྟ་ཡེ། བཛྲ་ཏཱིཀྵྞ། དུཿཁ་ཙྪེ་ད་དྷ་ར་ཧཱུཾ། ལྷ་རྣམས་མཆོད་
དང་སེམས་ཅན་མཉེས། །ཞི་དང་རྒྱས་ལ་སོགས་པ་རྣམས། །ལས་རྣམས་ཐམས་ཅད་ཁྱོད་ཀྱིས་གྱིས། །བསམ་པ་བཟང་པོས་དེ་གྱིས་ཤིག །དེ་ནས་ད་ནི་བདག་གིས་ནི། །རི་དྭགས་རྣ་བ་བཞིན་དུ་གོས། །གྱོན་ནས་ཁྱོད་ལ་ལུང་བསྟན་གྱིས། །དེ་བཞིན་གཤེགས་པ་
འདུས་པ་ཡི། །དངོས་གྲུབ་རྣམ་གཉིས་ཐོབ་བྱའི་ཕྱིར། །འགྲོ་དྲུག་དུག་རྣམས་གཞོམ་པའི་ཕྱིར། །འགྲོ་དྲུག་ཐར་པའི་ལམ་འདི་ཐོབ། །སརྦ་ཏ་ཐཱ་ག་ཏ་ཛྙཱ་ན་ཀཱ་ཡ་བྷུར་བྷུ་བ་སྭཿ་ཧཱཾ། ཆོས་ཀྱི་དུང་དེ་སྒྲ་ཆེན་ལྡན། །ཆོས་ཀྱི་གཎྜི་སྒྲ་བོ་ཆེ། །ཕྱོགས་བཅུར་ཆོས་ཀྱི་རྔ་སྒྲ་སྒྲོགས། །ཆོས་

ཀྱིས་བསྐྱབ་ཕྱིར་གདུགས་ཕུབ་བོ། །ཨོཾ་པྲཛྙཱ་ཛྙཱ་ན་མཱུརྟྟ་ཡེ། སཾ་གཱི་ཏི་ཨོཾ། ཨོཾ་བཛྲ་ཏཱིཀྵྞ་གཎྜི་ཧྲཱིཿ། ཨོཾ་ཛྙཱ་ན་ཀཱ་ཡ་དུནྡུ་ཧ། ཨོཾ་དུཿཁ་ཙྪེ་ད་ཚ་ཏྲཾ་ཧཱུཾ། ཨོཾ་བཱ་གཱི་ཤྭ་ར་རཏྣེ་ཏྲཱཾ། ཨོཾ་ཨ་ར་པ་ཙ་ན་ཛྙཱ་ནཻ་ཀ་ཙཀྵུ་བི་མཱ་ལ་ཧཱུཾ། དེ་ལྟར་དབང་རྣམས་རྫོགས་པ་དང་། །
མཆོད་ཅིང་བསྟོད་ལ་སྦྱིན་སྲེག་བྱ། །དེ་ལྟར་རྫོགས་ནས་གཏོར་མ་གཏང་། །ཡེ་ཤེས་གཤེགས་སུ་གསོལ་བ་ནི། །སྭ་ཨརྠཉྩེ་ཝཱ་པ་ར་ཨརྠཉྩེ་ཝ། སཱ་དྷི་ཏཾ་གཙྪ་མུ་པ་ད་ཡེ་ཏི་ཨ། །དེ་ལྟར་གཤེགས་ནས་མུཿཞེས་བརྗོད། །དམ་ཚིག་བདག་ལ་བསྡུ་བར་བྱ། །དཀྱིལ་འཁོར་
རྡུལ་ཚོན་མཐའ་ནས་བསྡུ། །རབ་ཏུ་གནས་པར་བྱ་བ་ནི། །དང་པོར་བསྙེན་པ་རྫོགས་པར་བྱ། །དེ་ནས་ས་ཡི་ཆོ་ག་ནི། །བླང་དང་བརྟག་དང་བསྲུང་བ་དང་། །སྦྱིན་ཞིང་བྱིན་བརླབ་བསྲུང་བར་བྱ། །དེ་ནས་བུམ་པ་སྟ་གོན་བྱ། །གསེར་དངུལ་ཟངས་ལ་སོགས་པ་ཡི། །ས་བོན་མཚན་
མ་སོ་སོར་བྲི། །སྨན་ལྔ་འབྲུ་ལྔ་རིན་ཆེན་བླུགས། །འབྲས་བུ་དྲི་དང་ཁ་རྒྱན་གདགས། །ཨོཾ་སརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་ཧ་ར། ཨོཾ་ཧཱུཾ་ཧྲཱིཿ། བྷ་ག་ཝཱན་ཛྙཱ་ན་མཱུརྟྟི། བཱ་གཱི་ཤྭ་ར། མ་ཧཱ་ཝ་ཙ། སརྦ་དྷརྨཱ་ག་ག་ན། ཨ་མ་ལ་སུ་པ་རི་ཤུདྡྷ་དྷརྨཱ་དྷཱ་ཏུ་ཛྙཱ་ན་གརྦྷ་ཨཱཿ། ལྷ་རྣམས་བུམ་
པར་གསལ་བར་བསྐྱེད། །ས་བོན་མཚན་མ་སོ་སོར་བྲི། །མཎྜལ་དུ་ནི་གོ་རིམས་དགོད། །རྣམ་རྒྱལ་བུམ་པ་རྫོགས་པར་རོ། །དེ་ནས་གོ་རིམས་བཞིན་དུ་གཞག །མཎྜལ་དྲི་ཡི་ཐིག་ལེ་བྱ། །མཆོད་པ་ལ་སོགས་གཞུང་བཞིན་དབུལ། །དཀྱིལ་འཁོར་འཁོར་ལོ་བསྐྱེད་
ནས་ནི། །ཡེ་ཤེས་སྤྱན་དྲང་བསྟིམས་ནས་ནི། །མཆོད་དང་རྩ་བའི་བཟླས་པ་བྱ། །ཨོཾ་ཨ་ར་པ་ཙ་ན་ཧཱུཾ། དེ་ནས་མཁའ་ལ་གདེག་པར་བྱ། །སྟན་ནི་སྦྱང་བ་ལེགས་བྱས་ནས། །ཁྲུས་ནི་ཡོངས་དག་རྫོགས་བྱས་ནས། །ཡར་གྱི་ངོ་ཡི་ཟླ་བ་དང་། །སྔ་དྲོ་དྲི་མེད་གཙང་མའི་གོས། །གྱོན་པའི་སློབ་དཔོན་
ཐིག་ལས་བྱ། །ཚོན་གྱི་ལས་ཀྱང་རྫོགས་བྱས་ནས། །བསྐྱེད་དང་མཆོད་དང་བསྟོད་སོགས་བྱས། །དེ་ནས་རབ་ཏུ་གནས་པ་བྱ། །ཐམས་ཅད་སྐུ་གསུམ་དག་ཏུ་བསྐྱེད། །དེ་ནས་སྤྱན་ནི་དྲང་བྱ་སྟེ། །ཇི་ལྟར་སངས་རྒྱས་བཅོམ་ལྡན་འདས། །རང་བཞིན་གནས་ན་བཞུགས་པ་ལ། །

ཆོས་དབྱིངས་གནས་སུ་གཤེགས་པ་ལྟར། །འདི་ཉིད་དུ་ནི་གཤེགས་སུ་གསོལ། །ཇི་ལྟར་སངས་རྒྱས་བཅོམ་ལྡན་འདས། །འོག་མིན་གནས་ན་བཞུགས་པ་ལས། །བདེ་བ་ཅན་དུ་གཤེགས་པ་ལྟར། །འདི་ཉིད་དུ་ནི་བཞུགས་སུ་གསོལ། །ཇི་ལྟར་སངས་རྒྱས་བཅོམ་
ལྡན་འདས། །དགའ་ལྡན་གནས་ན་བཞུགས་པ་ལ། །སྤྲུལ་པའི་སྐུ་རུ་གཤེགས་པ་ལྟར། །འདི་ཉིད་དུ་ནི་བཞུགས་སུ་གསོལ། །ཨོཾ་པྲ་ཀྲྀ་ཏི་པ་རི་ཤུདྡྷཿ། སརྦ་དྷརྨཱ། ཡ་དུ་ཏ། ཨོཾ་པྲ་ཀྲྀ་ཏ་པ་རི་ཤུདྡྷ་སཾ་བོ་ཏ་ཛ་ཏུ་ཏ། ཨོཾ་པྲ་ཀྲྀ་ཏ་པ་རི་ཤུདྡྷ་ནི་མཱ་ན་ཛ་ཏུ་ཏ། ཨོཾ་སྠི་ཏོ་
ཧྲྀ་དི་ཛྙཱ་ན་མཱུརྟི། ར་ཧཾ་བུདྡྷི་བུདྡྷ་ནཱཾ། ཏྲྱཻ་དྷྭ་ཝརྟཱི་ནཱཾ། ཨོཾ་སརྦ་ཏ་ཐཱ་ག་ཏ་དྷཱུ་པ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཨཱཿཧཱུཾ། ཞེས་བྱ་བས་མཆོད་ནས་དེ་ནས་ཛཿཧཱུཾ་བཾཾ་ཧོཿཞེས་པས་བསྟིམ་པར་བྱའོ། །ཨོཾ་ཨ་བྷཱ་བ་སྭ་བྷཱ་བ་བི་ཤུདྡྷོ། །བཛྲ་ཙཀྵུ་བཛྲ་ཙཀྵུ་བཛྲ་ཙཀྵུ་ཨ་ཨཱ་ཨཾ་ཨཿ།
དེ་ནས་ཨ་སརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་ཧ་ར། ག་ག་ན་ཨ་མ་ལ་སུ་པ་རི་ཤུདྡྷོ། །བཛྲ་དྷཱ་ཏུ། དུཿཁ་ཙྪེ་ད། ཛྙཱ་ན་གརྦྷ་ཨཱཿ། ཨ་སརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་ཧ་ར། ག་ག་ན། ཨ་མ་ལ་སུ་པ་རི་ཤུདྡྷ། རཏྣ་དྷཱ་ཏུ་བཱ་གཱི་ཤྭ་ར། ཛྙཱ་ན་གརྦྷ་ཨཱཿ། ཨ་སརྦ་ཏ་ཐཱ་ག་ཏ་ཧྲྀ་ད་ཡ།
ཧ་ར་ཧ་ར། ག་ག་ན། ཨ་མཱ་ལ་སུ་པ་རི་ཤུདྡྷ། པདྨ་དྷ་ཏུ། བཛྲ་ཏཱིཀྵྞ། ཛྙཱ་ན་གརྦྷ་ཨཱཿ། ཨ་སརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་ཧ་ར། ག་ག་ན། ཨ་མ་ལ་སུ་པ་རི་ཤུདྡྷ། ཀརྨ་དྷཱ་ཏུ། ཛྙཱ་ན་ཀཱ་ཡ་ཛྙཱ་ན་གརྦྷ་ཨཱཿ། ཨ་སརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་ཧ་ར། ག་ག་ན། ཨ་མ་ལ་
སུ་པ་རི་ཤུདྡྷོ། དྷརྨ་དྷཱ་ཏུ། པྲཛྙཱ་ཛྙཱ་ན་མཱུརྟྟ་ཡེ། ཛྙཱ་ན་གརྦྷ་ཨ། བུམ་པ་ལྔས་དབང་བསྐུར་ཏེ། ཨོཾ་ཧྲཱིཿཀཱ་ལ་རཱུ་པ་ཧཱུཾ། ཞེས་བྱ་བས་བགེགས་བསྐྲད་ལ་ཕྱག་རྒྱ་ནི་ལག་པ་མཉམ་པར་སྦྱར་ཞིང་བཅིངས་པ་ལ་མཐེ་བོ་གཉིས་དང་མཐེ་ཆུང་གཉིས་ནང་དུ་གཞག་རྩེ་མོ་ལྟར་བྱས་
པ་ནི་རྡོ་རྗེ་སྟེ་སྡུག་བསྔལ་གཅད་པའི་ཕྱག་རྒྱའོ། །ལག་པ་མཉམ་པར་ཐལ་མོ་སྦྱར་ནས་མཛུབ་མོ་དང་མཐེ་བོ་དང་གུང་མོ་གཉིས་རྩེ་མོ་སོ་སོར་བྱས་པ་ནི་རིན་པོ་ཆེ་སྟེ་ངག་གི་དབང་ཕྱུག་གི་ཕྱག་རྒྱའོ། །ལག་པ་ཐལ་མོ་སྦྱར་ནས་ཕན་ཚུན་དུ་བསྣོལ་བ་ལ་གུང་མོ་བསྒྲེངས་ཏེ་ཚིགས་

བཅག་ནས་རྩེ་སྤྲད་པ་ནི་པདྨ་སྟེ་རྡོ་རྗེ་རྣོན་པོའིའོ། །ལག་པ་ཐལ་མོ་མཉམ་པར་སྦྱར་ཏེ་གུང་མོ་གཉིས་ནང་དུ་མཉམ་པར་སྦྱར་ཏེ་སྲིན་ལག་གཉིས་བསྣོལ་ལ་མཛུབ་མོ་དང་མཐེའུ་ཆུང་གཉིས་ཕྱིར་བསྐྱེད་དེ། མཐེ་བོང་གཉིས་དང་སྦྱར་བ་ནི་རྡོ་རྗེ་རྒྱ་གྲམ་སྟེ་ཛྙཱ་ན་ཀཱ་
ཡའིའོ། །ལག་པ་རྒྱབ་སྦྱར་ནས་སོར་མོ་བསྣོལ་ཏེ་མཐེ་བོང་མཐིལ་དུ་སྦྱར་བ་ནི་འཁོར་ལོ་སྟེ་པྲཛྙཱ་ཛྙཱ་ནའི་ཕྱག་རྒྱས་བུམ་པ་བླངས་ལ་དབང་བསྐུར་རོ། །དེ་ནས་འཁོར་ལོས་དབང་བསྐུར་བ་ནི། ཨོཾ་བཛྲ་སཏྭ་ཛྙཱ་ན་ཙཀྲ་ཧཱུཾ། དེ་ནས་དུང་གིས་དབང་བསྐུར་བ་ནི། ཨོཾ་བཛྲ་ཤཾ་ཀ་ཛྙཱ་ན་སཏྭ་
ཧཱུཾ། དེ་ནས་གདུགས་ཀྱིས་དབང་བསྐུར་བ་ནི། །ཨོཾ་བཛྲ་དྷྭ་ཛ་ཚ་ཏྲཾ་ཞེས་པས་སོ། །དེ་ནས་སྦྱིན་སྲེག་མཆོད་སྦྱིན་བྱ། །གཏོར་མ་བཏང་ནས་དཀྱིལ་འཁོར་བསྡུའོ། །བདག་གིས་འདི་བྱས་དགེ་བས་ནི། །ཐམས་ཅད་འབྲས་བུ་ཐོབ་པར་ཤོག །ཤར་ནས་ལྷོ་རུ་ཟ་ཧོར་ཡུལ་དུ་ནི། །
ཟླ་དང་འོད་ཀྱིས་གང་བའི་སྐལ་ལྡན་ལ། །གཉིས་སུ་མེད་ཅིང་སྦས་པའི་དོན་ལ་མཁས། །ཆོས་ཀྱི་དམ་པ་དེ་ཉིད་དཔལ་དུ་བྱུང་། །ཆོས་ཀྱི་དམ་པ་བཟང་པོའི་གདམས་ངག་འདི། །རིན་ཆེན་ལྟ་བུར་འགྲེལ་པ་རྣམ་གཉིས་ཐོས། །དེ་བསྒྲུབས་དངོས་གྲུབ་འབྲས་བུ་ཐོབ་གྱུར་ནས། །ཐམས་
ཅད་བླ་མེད་གནས་སུ་འདྲེན་གྱུར་ཅིག །འཕགས་པ་འཇམ་དཔལ་གྱི་དཀྱིལ་འཁོར་གྱི་ཆོ་ག་ཡེ་ཤེས་གསལ་བ་ཞེས་བྱ་བ་སློབ་དཔོན་གཉིས་སུ་མེད་པ་སྦས་པས་མཛད་པ་རྫོགས་སོ།། །།རྒྱ་གར་གྱི་མཁན་པོ་དྷརྨ་ཤྲཱི་མི་ཏྲ་དང་། ལོ་ཙཱ་བ་དགེ་སློང་ཆོས་ཀྱི་བཟང་
པོས་བསྒྱུར་བའོ།། ༄༅༅། །རྒྱ་གར་སྐད་དུ། ཨཱརྱ་ཛྙཱ་ན་སཏྭ་མཉྫུ་ཤྲཱི་ཏཏྟྭ་སཱ་དྷ་ན་ནཱ་མ། བོད་སྐད་དུ། འཕགས་པ་འཇམ་དཔལ་ཡེ་ཤེས་སེམས་དཔའ་དེ་ཁོ་ན་ཉིད་ཅེས་བྱ་བའི་སྒྲུབ་ཐབས། འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །ཉོན་མོངས་
རྒྱ་མཚོའི་འཆིང་གཅོད་པའི། །སྡུག་བསྔལ་གཅོད་ལ་ཕྱག་འཚལ་ནས། །ལམ་གྱི་རིམ་པ་ཡང་དག་དོན། །དྲན་ནས་བདག་གིས་རབ་ཏུ་བཤད། །རེ་ཞིག་ཡིད་འོང་གནས་དག་ཏུ། །བདེ་བའི་སྟན་ལ་ཉེར་འདུག་སྟེ། །མཆོད་ཅིང་བསྟོད་ནས་སྡིག་བཤགས་བྱ། །ཚད་མེད་བཞི་

ནི་རབ་ཏུ་བསྒོམ། །ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་བསྒོམ་མོ། །དང་པོར་བདག་ཉིད་ཨ་བསྒོམ་སྟེ། །པཾ་ལས་པདྨ་འདབ་བཞི་ནི། །ཆོས་འབྱུང་རྡོ་རྗེའི་ནང་དུ་བསྒོམ། །བདག་ཉིད་ཟླ་བའི་སྟེང་བསམ་མོ། །དེ་ལས་སྡུག་བསྔལ་གཅོད་པ་ནི། །སྐུ་མདོག་མཐིང་ག་འགྱིང་བག་
ཅན། །རྡོ་རྗེ་ཨུཏྤལ་བརྟན་པའི་སྐུ། །ཟླ་བའི་སྟེང་དུ་ཨ་བསམ་མོ། །འདབ་བཞི་ཟླ་བའི་སྟེང་དུ་ནི། །ཨ་ཨཱ་ཨཾ་ཨཿ། ཚད་མེད་བཞི་ལྡན་ཡུམ་བཞི་ནི། །འགྱིང་བག་ཨུཏྤལ་བཅས་པའི་སྐུ། །རྡོ་རྗེ་སྐྱིལ་ཀྲུང་མདུན་བདར་ནས། །གོ་རིམས་བཞིན་དུ་རབ་ཏུ་བསམ། །
ཡེ་ཤེས་སེམས་དཔའ་སྤྱན་དྲངས་ནས། །སྐུ་གསུམ་བྱིན་བརླབ་དབང་བསྐུར་རོ། །དེ་ནས་དོན་དང་རབ་ལྡན་པས། །མཚན་རྣམས་རབ་ཏུ་བརྗོད་པར་བྱ། །ཨོཾ་དུཿཁ་ཙྪེ་ད། ན་མ་སྟེ་བ་ར་ད་བཛྲཱ་གྲ། བྷཱུ་ཏ་ཀོ་ཊི་ན་མ་སྟུ་ཏེ། ན་མ་སྟེ་ཤཱུ་ནྱ་ཏཱ་གརྦྷ། བུདྡྷ་བོ་དྷི་ན་མ་སྟུ་ཏེ་ཧོཿ། དེ་ནས་
ལྡང་བར་འདོད་ན་མུཿདང་བཅས་པས་གཤེགས་སུ་གསོལ་ལ། དམ་ཚིག་གིས་ལྡང་བར་བྱའོ། །བཅོམ་ལྡན་ངག་གི་དབང་ཕྱུག་ནི། །རིན་ཆེན་ཨུཏྤལ་གསེར་གྱི་མདོག །པདྨ་འདབ་བཞི་ཟླ་བའི་སྟེང་། །རྡོ་རྗེ་སྐྱིལ་མོ་ཀྲུང་གིས་བཞུགས། །འདབ་བཞི་ཟླ་བའི་སྟེང་
དུ་ནི། །ཨ་ཨཱ་ཨཾ་ཨཿཡུམ་བཞིའོ། །སྤྱན་དྲངས་མཆོད་དང་བསྟིམ་བྱས་ནས། །བྱིན་བརླབ་དབང་བསྐུར་མཚན་གདོན་ནོ། །ཨོཾ་བཱ་གཱི་ཤྭ་ར་བུདྡྷ་རཱ་ག་ན་མ་སྟེ་སྟུ། བུདྡྷ་ཀཱ་མ་ན་མོ་ན་མཿ། བུདྡྷ་པྲཱི་ཏི་ན་མ་སྟུ་བྷྱཾ། བུདྡྷ་ཏུ་བྷྱཱཾ་པུ་ཏ་ན་མཿ། ཞེས་བརྗོད་ནས། མུཿཞེས་
གཤེགས་སུ་གསོལ་ནས་སྤྱོད་ལམ་གྱིས་གནས་པར་བྱའོ། །རྡོ་རྗེ་རབ་ཏུ་འབར་བའི་ནང་། །འདབ་བཞི་དམར་བའི་ཟླ་བའི་སྟེང་། །ཨ་ལས་བྱུང་བ་རྣོན་པོ་ནི། །མདོག་དམར་པདྨ་ཨུཏྤལ་བསྣམས། །རྡོ་རྗེ་སྐྱིལ་ཀྲུང་ཟླ་བའི་སྟེང་། །འདབ་བཞི་ཟླ་བའི་སྟེང་དུ་ནི། །ཨ་ཨཱ་ཨཾ་
ཨཿཡུམ་བཞི་ནི། །འགྱིང་བག་གཙོ་ལ་ཕྱོགས་པའོ། །སྤྱན་དྲངས་མཆོད་དང་བསྟིམ་བྱས་ནས། །བྱིན་བརླབ་དབང་བསྐུར་མཚན་གདོན་ནོ། །ཨོཾ་བཛྲ་ཏཱིཀྵྞ། བུདྡྷ་མོ་ད་ན་མོ་ན་མཿ། བུདྡྷཱ་སྨི་ཏ་ན་མ་སྟུ་བྷྱཾ། བུདྡྷ་ཧཱ་ས་ན་མོ་ན་མཿ། བུདྡྷ་བཱ་ཙ་ནཱ་མ་སྟེ་སྟུ། བུདྡྷོ་བྷཱ་བ་ན་མོ་ན་མཿ།

ཞེས་བརྗོད་ནས་མུཿཞེས་གཤེགས་སུ་གསོལ་ནས་སྤྱོད་ལམ་གྱིས་གནས་པར་བྱའོ། །ཤེས་རབ་རང་བཞིན་སྟོང་པའི་ནང་། །སྙིང་རྗེས་མཚོན་པའི་གདན་བསམས་ཏེ། །བྱང་ཆུབ་སེམས་ཀྱི་ས་བོན་ཏེ། །ཤེས་རབ་ཡེ་ཤེས་ཨ་ལས་བསྐྱེད། །སྐུ་མདོག་
དཀར་པོ་རབ་ཏུ་མཛེས། །འཁོར་ལོ་ཨུཏྤལ་ཡང་དག་ལྡན། །ཟླ་བའི་དཀྱིལ་འཁོར་སྟེང་དུ་ནི། །རྡོ་རྗེ་སྐྱིལ་ཀྲུང་བཅས་པར་བསམ། །འདབ་བཞི་ཟླ་བའི་སྟེང་དུ་ནི། །ཨ་ཨཱ་ཨཾ་ཨཿཡུམ་བཞི་བསྒོམ། །པྲ་ཀྲྀ་ཏི་པ་རི་ཤུདྡྷཿ། སརྦ་དྷརྨཱ་ཡ་དུ་ཏ། སརྦ་ཏ་ཐཱ་ག་ཏ་དྷཱུ་བ་པཱུ་ཛ་མེ་
གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། སརྦ་ཏ་ཐཱ་ག་ཏ་པུཥྤ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། སརྦ་ཏ་ཐཱ་ག་ཏ་ཨཱ་ལོ་ཀེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། སརྦ་ཏ་ཐཱ་ག་ཏ་གནྡྷ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། སརྦ་ཏ་ཐཱ་ག་ཏ་ནི་བི་ཏྱེ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། སརྦ་
ཏ་ཐཱ་ག་ཏ་ཤཔྟ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུཾ། ཞེས་མཆོད་ནས་ཛཿཧཱུཾ་བཾཾ་ཧོཿཞེས་བསྟིམ་མོ། །ཨོཾ་ཧཱུཾ་ཧྲཱིཿབྷ་ག་བཱན། ཛྙཱ་ན་མཱུརྟི། བཱ་གཱི་ཤྭ་ར། མ་ཧཱ་ཝ་ཙ། སརྦ་ཏ་ཐཱ་ག་ཏ་ཧྲྀ་ད་ཡ། སརྦ་དྷརྨཱ་ག་ག་ན། ཨ་མ་ལ་སུ་པ་རི་ཤུདྡྷ། དྷརྨ་དྷཱ་ཏུ་ཛྙཱ་ན་གརྦྷ་ཨཱཿ། ཞེས་བརྗོད་
ནས་མཚན་ཡང་དག་པར་བརྗོད་པ་གདོན་པར་བྱའོ། །ཨོཾ་པྲཛྙཱ་ཛྙཱ་ན་མཱུརྟ་ཡེ། ཨ་བྷ་བོདྦྷ་བ་ན་མ་སྟུ་སྟེ། ན་མ་སྟེ་བུདྡྷ་སཾ་བྷ་བ། ག་ག་ནོདྡྷ་བ་ན་མ་སྟུ་བྷྱཾ། ན་མ་སྟེ་ཛྙཱ་ན་སཾ་བྷ་བ། ཞེས་བསྟོད་ནས་མུཿཞེས་བརྗོད་ནས་སྤྱོད་ལམ་གྱིས་གནས་པར་བྱའོ། །ཤེས་རབ་ཀྱིས་ནི་ཧཱུཾ་ལས་
བསྐྱེད། །སྙིང་རྗེ་མ་ཆགས་པདྨའི་གདན། །བྱང་ཆུབ་སེམས་ལས་བྱུང་བའི་སྟེང་། །ཨ་ནི་རབ་ཏུ་གསལ་བར་བྱ། །ཡེ་ཤེས་སྐུ་ནི་ལྗང་གུ་སྟེ། །རྒྱ་གྲམ་ཨུཏྤལ་བསྣམས་པ་ཡིས། །སེམས་བསྐྱེད་པ་ཡི་ས་བོན་ཏེ། །རྡོ་རྗེ་སྐྱིལ་མོ་ཀྲུང་དུ་བཞུགས། །འདབ་བཞི་ཟླ་
བའི་སྟེང་ན་ནི། །ཨ་ཨཱ་ཨཾ་ཨཿཡུམ་བཞི་བསྐྱེད། །ཡེ་ཤེས་གཉིས་མེད་བསྟིམ་བྱས་ནས། །བྱིན་བརླབ་དབང་བསྐུར་རྫོགས་པ་དང་། །མཚན་ནི་ཡང་དག་བརྗོད་པར་བྱ། །དེ་ནས་བསྟོད་པ་འདིས་བསྟོད་དོ། །ཨོཾ་ཛྙཱ་ན་ཀཱ་ཡ། མཱ་ཡ་ཛཱ་ལ་ན་མ་སྟུ་བྷྱཾ། ནཱ་མ་སྟེ་བུདྡྷ་ནཱ་ཊ་ཀ །

ན་མ་སྟེ་སརྦ་སརྦེ་བྷྱཾ། ཛྙཱ་ན་ཀཱ་ཡ་ན་མ་སྟུ་ཏེ། ཨོཾ་ཨཱཿཧཱུཾ་མུཿ། ཞེས་སྤྱོད་ལམ་གྱིས་གནས་པར་བྱའོ། །དྲི་མེད་ཡེ་ཤེས་ལས་བྱུང་བ། །དགེ་བ་དྲི་མེད་གང་ཐོབ་དེས། །འགྲོ་རྣམས་སྲིད་པ་ལས་གྲོལ་ནས། །བླ་མེད་བྱང་ཆུབ་ཐོབ་པར་ཤོག །དེ་ཁོ་ན་ཉིད་ཀྱི་སྒྲུབ་ཐབས་སློབ་
དཔོན་གཉིས་སུ་མེད་པ་སྦས་པས་མཛད་པ་རྫོགས་སོ།། །།པཎྜི་ཏ་དྷརྨྨ་ཤྲཱི་མི་ཏྲ་དང་། ལོ་ཙཱ་བ་དགེ་སློང་ཆོས་ཀྱི་བཟང་པོས་བསྒྱུར་བའོ།། ༄༅༅། །རྒྱ་གར་སྐད་དུ། ཧོ་མ་བི་དྷི་པིཎྜི་ཏ། བོད་སྐད་དུ། སྦྱིན་སྲེག་གི་ཆོ་ག་མདོར་བྱས་པ། འཇམ་
དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །དེ་ལ་དང་པོ་སྔགས་པ་ནི། །རང་ལུས་འཇིག་ཀྱང་གཞན་ཕན་བརྩོན། །རྙེད་དང་བཀུར་སྟི་མ་ཆགས་སེམས། །སེམས་ཅན་དོན་ཕྱིར་སྦྱིན་སྲེག་བྱ། །དང་པོར་སའི་ཆོ་ག་དང་སྟ་གོན་ཆོ་ག་བྱ་སྟེ། རང་ཡིད་དུ་འོང་བའི་སར་ཐིག་
གདབ་སྟེ། དཀྱིལ་འཁོར་གྱི་དབུས་སུ་ཐབ་ཁུང་རྒྱར་ཁྲུ་གང་ཟབས་སུ་དེའི་ཁྲུ་ཕྱེད་པ་ཁ་ཁྱེར་སོར་བཞི་བྱི་དོར་བྱ། ནང་དུ་པདྨ་རྡོ་རྗེས་མཚན་པ། བྱུག་པ་དང་དྲི་དང་མེ་ཏོག་དཀར་པོས་བརྒྱན་པ། མཚམས་སུ་རྡོ་རྗེ་རྩེ་གསུམ་པ་དང་། ཁ་ཁྱེར་ལ་ཀུ་ཤ་དགྲམ་པར་བྱའོ། །ཤིན་
ཏུ་སར་པའི་རས་ཀྱིས་གཡོགས་པར་བྱ། དེ་ནས་མཆོད་རྫས་དང་སྲེག་རྫས་དང་། ཡམ་ཤིང་བུད་ཤིང་དང་དགང་གཟར་ལ་སོགས་པ་བཤམས་ཏེ། མཆོད་རྫས་གཡོན་དུ་གཞག་སྲེག་རྫས་གཡས་སུ་གཞག །དགང་གཟར་དང་བླུགས་གཟར་མར་ནི་མདུན། དེ་ནས་བསོད་ནམས་
ཚོགས་བསགས་ལ། །ཚད་མེད་བཞི་ལྡན་སེམས་བསྐྱེད་བྱའོ། །དེ་ནས་སྟོང་པའི་ཏིང་འཛིན་བསྒོམ། །ཨོཾ་ཨ་བྷཱ་བ་སྭ་བྷཱ་བ་བཛྲ་ཙཀྵུ་ཨ་ཨཱ་ཨཾ་ཨཿ། དེ་ནས་བདག་ཉིད་ལྷ་རུ་བསྐྱེད། །སྤྱན་དྲང་བྱིན་བརླབ་དབང་བསྐུར་བྱ། །ཡེ་ཤེས་མེ་ལྕེ་འོད་འབར་གསལ། །དེ་ནས་རཾ་ལས་མེའི་དཀྱིལ་
འཁོར་གྲུ་གསུམ་འབར་བ་བསྐྱེད་པར་བྱའོ། །གཟི་བརྗིད་ཆེན་པོ་འོད་གསལ་བ། །ཞེས་པས་དེ་ནས་ཨ་ལས་མེ་ལྷ་ནི། །སྐུ་མདོག་དཀར་པོ་ཚངས་པའི་གཟུགས། །དབྱུག་པ་བགྲང་ཕྲེང་འཛིན་པར་བསྐྱེད། །སྤྱན་དྲང་མཆོད་བསྟོད་བྱས་ནས་བསྟིམ། །བུམ་པའི་ཆུ་ཡིས་

བགེགས་བསྐྲད་བྱ། །དེ་ནས་མར་ནི་དགང་བླུགས་གསུམ། །མེ་ལྷ་ཉིད་ལ་དབུལ་བར་བྱའོ། །མེ་མཚན་ངན་ན་སྤོགས་པ་བྱ། །དེ་ནས་མཆོད་རྫས་དབུལ་བྱ་ཞིང་། །སྲེག་རྫས་ཕུལ་ནས་བསྟོད་པ་བྱ། །ནོར་བུ་ཆེན་པོ་འོད་ཆགས་དཔལ། །ཞེས་
པ་ནི། དེ་ནས་ཐུགས་ཀར་ཕོ་བྲང་བཅའ། །བགེགས་བསལ་ལ་སོགས་གོང་བཞིན་བྱ། །སྲེག་རྫས་མཆོད་རྫས་ཐམས་ཅད་དབུལ། །གདགས་པ་ཞི་བ་ཤཱནྟིཾ་ངོ་། །སྤྲིན་དཀར་དག་པ་བཞིན་དུ་དཀར། །ཉི་མ་འཆར་ཀའི་དཀྱིལ་ལྟར་མཛེས། །དེ་ནས་བུམ་པའི་ཆུས་
བསངས་ལ། །སྲེག་རྫས་མཆོད་རྫས་ཐམས་ཅད་དབུལ། །དགང་བླུགས་གཉིས་ཀྱང་དབུལ་བར་བྱ། །དེ་ནས་ཕྲིན་ལས་བཅོལ་བྱ་ཞིང་། །བསྟོད་པའི་རིམ་པས་གཞུང་བཞིན་བསྟོད། །རྩ་སྔགས་མུཿདང་བཅས་པས་གཤེགས། །བདག་གིས་དགེ་བ་འདི་བརྩམས་པས། །དགེ་བ་
དྲི་མེད་གང་ཐོབ་དེས། །བདག་དང་མཐའ་ཡས་སེམས་ཅན་རྣམས། །རྗེ་བཙུན་འཇམ་དབྱངས་ཐོབ་པར་ཤོག །འཕགས་པ་འཇམ་དཔལ་གྱི་སྦྱིན་སྲེག་གི་ཆོ་ག་སློབ་དཔོན་མྱ་ངན་མེད་པའི་དཔལ་བས་མཛད་པ་རྫོགས་སོ།། ༄༅༅། །རྒྱ་གར་སྐད་དུ། ཛྙཱ་ན་སཏྭ་མཉྫུ་ཤྲྱཱ་
དི་བུདྡྷ་ནཱ་མ་སཱ་དྷ་ནཱཾ། བོད་སྐད་དུ། འཇམ་དཔལ་ཡེ་ཤེས་སེམས་དཔའ་དང་པོའི་སངས་རྒྱས་ཞེས་བྱ་བའི་སྒྲུབ་ཐབས། འཕགས་པ་འཇམ་དཔལ་ཡེ་ཤེས་སེམས་དཔའ་ལ་ཕྱག་འཚལ་ལོ། །ཐོག་མ་བར་དང་མཐར་སངས་རྒྱས། །སྲིད་པའི་དྲི་མ་དང་བྲལ་བའི། །རང་བཞིན་གྱིས་ནི་དག་
པའི་སྐུ། །དང་པོའི་སངས་རྒྱས་ལ་བཏུད་ནས། །སྙིང་པོ་བསྡུས་པའི་མཚན་རྒྱུད་ལས། །ཡེ་ཤེས་ལྔ་ཡི་སྒྲུབ་ཐབས་འདི། །མ་རིག་འཁྲུལ་པ་སྤང་བའི་ཕྱིར། །གསུང་གི་སྒྲུབ་ཐབས་གསལ་ཕྱིར་བྲི། །གནས་ཁང་ཡིད་དུ་འོང་བར་ནི། །བདེ་བའི་སྟན་ལ་ཉེར་འདུག་སྟེ། །ཚད་མེད་
བཞི་པོ་བསྒོམ་བྱས་ནས། །བྱང་ཆུབ་མཆོག་ཏུ་སེམས་བསྐྱེད་དེ། །ཨ་བྷཱ་བ་སྭ་བྷཱ་བ་བི་ཤུདྡྷ་བཛྲ་ཙཀྲ་ཨ་ཨཱ་ཨཾ་ཨཿ། དེ་ནས་སྟོང་པའི་ཏིང་འཛིན་ལས། །ཨ་ཧཱུཾ་ལས་བྱུང་རྡོ་རྗེ་ནི། །རྡོ་རྗེ་འཇིགས་བྱེད་འཇིགས་པར་བྱེད། །ཁྲོ་བོའི་རྒྱལ་པོ་ཞལ་དྲུག་ལྡན། །མེ་དཔུང་འབར་བ་དང་

བཅས་པ། །འཇིགས་པའི་རྡོ་རྗེ་བསྐྱེད་པར་བྱ། །དང་པོ་ཡི་ནི་དབྱངས་ཡིག་ལས། །ཐབས་དང་ཤེས་རབ་རང་བཞིན་གྱི། །ཡེ་ཤེས་མིག་གཅིག་ཨེ་ཡི་ནང་། །ཉོན་མོངས་དྲི་མེད་པདྨའོ། །དང་པོའི་དབྱངས་ཡིག་ལས་བྱུང་བའི། །པཾ་ལས་བྱུང་བའི་པདྨའི་སྟེང་། །རྡོ་རྗེ་སྐྱིལ་ཀྲུང་
རྫོགས་སངས་རྒྱས། །སངས་རྒྱས་འགྲོ་བའི་ཆོས་འཛིན་པ། །དཔལ་ལྡན་སངས་རྒྱས་པདྨ་སྐྱེས། །ཀུན་མཁྱེན་ཡེ་ཤེས་མཛོད་འཛིན་པ། །རྡོ་རྗེ་རྣོན་པོ་རང་བཞིན་ཞལ། །ཚིག་གི་དབང་ཕྱུག་སྨྲ་བ་ཆེ། །རྣམ་དག་ཤེས་རབ་ཡེ་ཤེས་ཞལ། །སྨྲ་བའི་སྐྱེས་མཆོག་དམ་པ་ཡི། །
བཅོམ་ལྡན་སྡུག་བསྔལ་གཅོད་པའི་ཞལ། །སྟོབས་དང་ལྡན་པ་སྨྲ་བའི་རྒྱལ། །གསུང་དབྱངས་རྡོ་རྗེ་ཆོས་ཀྱི་ཞལ། །སྨྲ་བའི་དམ་པ་མཆོག་གི་གནས། །རྡོ་རྗེ་ཟབ་མོ་སྐུ་ཡི་ཞལ། །སྨྲ་བའི་སེང་གེ་ཉོན་མོངས་སེལ། །ཁ་དོག་སོ་སོར་མཚུངས་མེད་ཞལ། །ཀུན་དུ་ལྟ་བ་མཆོག་ཏུ་
དགའ། །སྐུ་ནི་གཟི་བརྗིད་ཕུང་པོ་ཡི། །མཚན་དང་དཔེ་བྱད་བལྟ་ན་སྡུག །འོད་བཟང་རིན་ཆེན་འབར་བ་ཡི། །གཡོན་པའི་ཕྱག་བཞི་པུསྟི་འཛིན། །གཡས་པ་ཡི་ནི་ཕྱག་བཞི་ཡིས། །འདོད་དང་བཅས་པའི་རལ་གྲི་འཕྱར། །སྨན་པ་ཆེ་མཆོག་གཞོན་ནུའི་སྐུ། །ལྗོན་པའི་ཤིང་
དང་བཅས་པའོ། །སངས་རྒྱས་ཀུན་གྱི་སྐུ་ཆེ་བ། །སངས་རྒྱས་སྐུ་ལྔའི་བདག་ཉིད་ཅན། །སངས་རྒྱས་ཀུན་གྱི་གསུང་ཆེ་བ། །རྩིབས་བཞི་མུ་ཁྱུད་གསུང་ཡང་ཡིན། །ཨོཾ་བཛྲ་ཏཱིཀྵྞ་ནུབ་ཏུའོ། །དུཿཁ་ཙྪེ་ད་ཤར་དུའོ། །པྲཛྙཱ་ཛྙཱ་ན་མཱུརྟ་ཡེ་དབུས་སུའོ། །བཱ་གཱི་ཤྭ་ར་ལྷོ་རུའོ། །
ཛྙཱ་ན་ཀཱ་ཡ་བྱང་དུ་སྟེ། །ཨ་ནི་དབུས་སུ་དཀར་པོའོ། །པ་ནི་ཤར་དུ་མཐིང་གའོ། །ཙ་ནི་ལྷོ་རུ་སེར་པོའོ། །ར་ནི་ནུབ་ཏུ་དམར་པོའོ། །ན་ནི་བྱང་དུ་ལྗང་གུའོ། །གསལ་བྱེད་དང་ནི་དབྱངས་ཡིག་ནི། །མུ་ཁྱུད་བཞི་ལ་བསམ་པ་སྟེ། །དེ་ལྟར་ཤེས་རབ་འཁོར་ལོའོ། །སངས་རྒྱས་
ཀུན་གྱི་ཐུགས་ཆེ་བ། །སངས་རྒྱས་ཀུན་གྱི་ཐུགས་ལ་གནས། །རྡོ་རྗེ་ཉི་མ་ཤེས་རབ་ཆེ། །རྡོ་རྗེ་ཟླ་བ་ཐབས་ཀྱི་བདག །ཆགས་དང་ཆགས་བྲལ་ཡིག་འབྲུ་མཆོག །ཁ་དོག་སྣ་ཚོགས་འབར་བའི་འོད། །ཨོཾ་པྲ་ཀྲྀ་ཏི་པ་རི་ཤུདྡྷཿ། སརྦ་དྷརྨཱ་ཡ་དུ་ཏ། སརྦ་ཏ་ཐཱ་ག་ཏ་ཛྙཱ་ན་ཀཱ་ཡ།

མཉྫུ་ཤྲཱི་མུ་པ་ད་ཡེ་ཏི་ཨ། ཨ་ཨཱ་ཨི་ཨཱི་ཨུ་ཨཱུ་ཨེ་ཨཻ་ཨོ་ཨཽ་ཨཾ་ཨཿ། སྠི་ཏོ་ཧྲྀ་དི་ཛྙཱ་ན་མཱུརྟི་ར་ཧཾ་བུདྡྷོ་ནཾ། ཏྲྱ་དྷྭ་བརྟི་ནཾ། ཨོཾ་བཛྲ་དྷཱུ་པེ་སྭཱ་ཧཱ། ཨོཾ་བཛྲ་པུཥྤེ་སྭཱ་ཧཱ། ཨོཾ་བཛྲ་ཨཱ་ལོ་ཀེ་སྭཱ་ཧཱ། ཨོཾ་བཛྲ་གནྡྷེ་སྭཱ་ཧཱ། ཨོཾ་བཛྲ་ནཻ་བི་ཏྱེ་སྭཱ་ཧཱ། ཨོཾ་བཛྲ་ཤཔྟ་སྭཱ་ཧཱ།
ཨོཾ་སརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་ཧ་ར། ཨོཾ་ཧཱུཾ་ཧྲཱིཿ། བྷ་ག་བཱན་ཛྙཱ་ན་མཱུརྟི་བཱ་གཱི་ཤྭ་ར། མ་ཧཱ་ཝ་ཙ། ཨ་སརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་ཧ་ར། ག་ག་ན། ཨ་མ་ལ་སུ་པ་རི་ཤུདྡྷ་དྷརྨ་དྷཱ་ཏུ་ཛྙཱ་ན་གརྦྷ་ཨཱཿ། དེ་ལྟར་བསྐྱེད་ནས་བསྒོམ་པར་བྱའོ། །དེ་ནས་གསང་སྔགས་བཟླས་པར་
བྱ། །ཨོཾ་བཛྲ་ཏཱིཀྵྞ་དུཿཁ་ཙྪེ་ད། པྲཛྙཱ་ཛྙཱ་ན་མཱུརྟ་ཡེ། ཛྙཱ་ན་ཀཱ་ཡ། བཱ་གཱི་ཤྭ་ར། ཨ་ར་པ་ཙ་ན་ཡ་ཏེ་ན་མཿ། ད་ནི་མཚན་ནས་བརྗོད་པ་ནི། སྡུ་གུ་འཇིག་རྟེན་གསུམ་གྱི་མཆོག །དཔལ་ལྡན་རྒྱུ་སྐར་དཀྱིལ་འཁོར་ཅན། །ཕྱོགས་བཅུ་ནམ་མཁའི་མཐས་གཏུགས་པར། །ཆོས་
ཀྱི་འཁོར་ལོ་ལེགས་པར་བསྐོར། །འགྲོ་དང་འདུག་པ་སྤངས་པ་སྟེ། །བྱམས་དང་སྙིང་རྗེའི་དཀྱིལ་འཁོར་ཅན། །དེ་ལྟར་བསྒོམས་ནས་མཚན་བརྗོད་དོ། །གཏོར་མ་ཕུལ་ནས་གཤེགས་སུ་གསོལ། །བདག་ཉིད་སྤྱོད་ལམ་གནས་པར་བྱའོ། །མདོ་རྒྱུད་སྙིང་པོའི་དོན་ལས་ནི། །
མན་ངག་ལ་བརྟེན་གཞུང་འདི་བརྩམས། །དེ་ཡིས་བསོད་ནམས་གང་བསགས་པ། །འགྲོ་རྣམས་འཇམ་དབྱངས་ཐོབ་པར་ཤོག །སློབ་དཔོན་ཆེན་པོ་ཨ་ཝ་དྷཱུ་ཏཱིས་མཛད་པའི་དང་པོའི་སངས་རྒྱས་ཀྱི་སྒྲུབ་ཐབས་རྫོགས་སོ།། །།དྷརྨ་ཤྲཱི་མི་ཏྲ་དང་། ལོ་ཙཱ་བ་ཆོས་ཀྱི་
བཟང་པོས་བསྒྱུར་བའོ།། ༄༅༅། །རྒྱ་གར་སྐད་དུ། ཙཻ་ཏྱོ་སཱ་དྷ་ན་བི་དྷི་པཎྜི་ཏ། བོད་སྐད་དུ། མཆོད་རྟེན་གྱི་སྒྲུབ་པའི་ཆོ་ག་མདོར་བསྡུས་པ། འཕགས་པ་འཇམ་དཔལ་ལ་ཕྱག་འཚལ་ལོ། །ཆོས་ཉིད་དང་བསྡུས་རྟོག་པའི་དྲི་མ་བྲལ། །རང་བཞིན་ཡོངས་དག་ཡོན་
ཏན་ལྡན་པའི་སྐུ། །ཐུགས་རྗེས་སྤྲུལ་སྐུ་འགྲོ་བའི་དོན་མཛད་པ། །སྐུ་གསུམ་ཡེ་ཤེས་མཆོད་པའི་རྟེན་ལ་འདུད། །དེ་དོན་འགྲོ་ལ་ཕན་པའི་ཕྱིར། །རྒྱུད་དོན་ལ་བརྟེན་བདག་གིས་བརྩམ། །མཆོད་ཅིང་བརྗོད་པ་དྲང་སྲོང་ཆེ། །ས་རྣམས་ཀུན་གྱི་རྒྱན་ལྡན་བསྐྱེད། །ཅེས་བྱ་བ་ནི།

ས་བསླང་ཞིང་བྱིན་གྱིས་བརླབ་པ་བསྟན་ནས། ཀོང་བུ་བྱིན་གྱིས་བརླབ་ཅིང་གདབ་པ་ནི། །ཤེས་རབ་ཆེན་པོའི་སྐད་ཅིག་ལ། །ཆོས་ཀུན་ཁོང་དུ་ཆུད་པ་འཆང་། །ཞེས་བྱ་བས་ཐབས་ཤེས་རབ་གཉིས་སུ་བྱིན་གྱིས་བརླབ་པའོ། །ཨོཾ་བཛྲ་ཏཱིཀྵྞ་དུཿཁ་ཙྪེ་ད་པྲ་ཛྙཱ་ཛྙཱ་ན་མཱུརྟི་ཡེ་ཛྙཱ་ན་ཀཱ་ཡ་
བཱ་གཱི་ཤྭ་ར། ཨ་ར་པ་ཙ་ན་ཨ། ཞེས་བྱ་བས་གདབ་བོ། །བཏབ་པ་དེ་ཇི་ལྟར་བསམ་ཞེ་ན། ཕ་རོལ་ཕྱིན་པ་ཀུན་རྫོགས་པ། །རྣམ་པར་དག་པ་བདག་མེད་ཆོས། །ཡང་དག་ཡེ་ཤེས་ཟླ་འོད་བཟང་། །བརྩོན་ཆེན་སྒྱུ་འཕྲུལ་དྲ་བ་ལས། །རྒྱུད་ཀུན་གྱི་ནི་བདག་པོ་མཆོག །རྡོ་རྗེ་རིན་
ཆེན་དབང་བསྐུར་གནས། །མཆོད་འོས་བསྟོད་འོས་ཕྱག་གི་གནས། །རྟག་ཏུ་རིམ་གྲོ་སྨོན་ལམ་གདབ། །རྒྱུ་ཕ་རོལ་ཏུ་ཕྱིན་པ། འབྲས་བུ་ཆོས་ཀྱི་སྐུའི་བདག་ཉིད། ཡེ་ཤེས་ལྔའི་བདག་ཉིད་ཀྱི་སྐུ་བུམ་པ་ན་འོད་དང་བཅས་པ་སེམས་ཅན་རྒྱུད་སྨིན་པ་འོད་འཕྲོ་བ་བསམ་མོ། །དགེ་བ་དྲི་
མེད་གང་ཐོབ་དེས། །འགྲོ་ཀུན་སྐུ་གསུམ་ཐོབ་པར་ཤོག །ཨ་ཝ་དྷཱུ་ཏཱིས་མཛད་པ་རྫོགས་སོ།། ༄༅༅། །རྒྱ་གར་སྐད་དུ། ཨཱརྱ་མཉྫུ་ཤྲཱི་སཱ་དྷ་ན་ནཱ་མ། བོད་སྐད་དུ། འཕགས་པ་འཇམ་དཔལ་གྱི་སྒྲུབ་ཐབས་ཞེས་བྱ་བ། འཇམ་དཔལ་ཡེ་ཤེས་སེམས་
དཔའ་ལ་ཕྱག་འཚལ་ལོ། །དཔལ་ལྡན་སངས་རྒྱས་ཀུན་གྱི་བདག །རིགས་གསུམ་བདག་པོ་ཡེ་ཤེས་སྐུ། །རྗེ་བཙུན་འཇམ་དཔལ་ཕྱག་འཚལ་ཏེ། །དེ་ཉིད་རྗེས་དྲན་ཆོ་ག་བཤད། །སྒྱུ་འཕྲུལ་དྲ་བའི་ལུགས་ཉིད་ཀྱིས། །གང་ཞིག་ཡང་དག་མངོན་དབང་བསྐུར། །རྗེས་
གནང་ཐོབ་པའི་སྒྲུབ་པ་པོ། །དང་འདིར་ཡིད་ལ་གནས་དག་ཏུ། །བདེ་བའི་སྟན་ལ་ཉེར་འདུག་སྟེ། །གཤིན་རྗེའི་དགྲའམ་ཞལ་དྲུག་ལ། །ཁྲོ་བོའི་རྒྱལ་པོས་བསྲུང་བར་བྱ། ཨོཾ་ཧྲཱི་ཀཱ་ལ་རཱུ་པ་ཧཱུཾ་ཁ་ཧཱུཾ་སྭཱ་ཧཱ། ཨཱཿཡ་མཱནྟ་ཀ་ཧཱུཾ། དེ་ནས་གཤིན་རྗེ་གཤེད་པོའི་སྔགས། །ཨོཾ་
ཨཱཿཧཱུཾ་ཞེས་བྱ་བ་འདིས། མཆོད་པ་རྣམས་ཀྱིས་ཡང་དག་མཆོད། །ཚངས་པའི་གནས་པ་བཞི་ཡང་བསྒོམ། །དེ་ནས་ཆོས་ཀུན་དངོས་མེད་པར། །རང་གི་བློ་ཡི་རྣམ་པར་བསྒོམ། །ཨོཾ་པྲ་ཀྲྀ་ཏ་པ་རི་ཤུདྡྷཿ། སརྦ་དྷརྨཱ་ཡ་དུ་ཏ། སརྦ་ཏ་ཐཱ་ག་ཏ་ཛྙཱ་ན་ཀཱ་ཡ། མཉྫུ་ཤྲཱི་པ་རི་ཤུདྡྷི་ཏ་མུ་

པ་རཱ་ཡ་ཏི། དེ་ནས་ཐམས་ཅད་སྟོང་པ་ལས། །པཾ་ལས་བྱུང་བ་པདྨ་ལས། །ཟླ་བའི་དཀྱིལ་འཁོར་ཨ་ལས་བྱུང་། །དེ་དབུས་ཡི་གེ་ཨ་དཀར་ལས་བསྐྱེད་པ། །རྣམ་སྣང་ཆེ་མཆོག་ཞི་བ་སྐུ་མདོག་དཀར། །བྱང་ཆུབ་མཆོག་གི་ཕྱག་རྒྱ་མཉམ་པར་འཛིན། །
སངས་རྒྱས་སེང་གེའི་གདན་བཞུགས་བདག་ཉིད་བསྒོམ། །དེ་ཡི་ཐུགས་ཀར་དྷཱིཿལས་བྱུང་བ་ཡི། །པདྨའི་སངས་རྒྱས་རྣམ་པར་བསམ་པར་བྱ། །གདོང་ལྔ་གཙུག་ཕུད་ལྔ་དང་ལྡན། །ཟུར་ཕུད་ལྔ་པ་མེ་ཏོག་ཐོད། །དང་པོའི་སངས་རྒྱས་དེ་ཡི་ཐུགས་ཀར་ཡང་། །ཤེས་རབ་འཁོར་ལོ་
ཉེས་ཀུན་སེལ་བ་བསྒོམ། །པདྨར་གྱུར་པ་འཁོར་ལོ་དེ་དབུས་སུ། །ཡེ་ཤེས་སེམས་དཔའ་རྣམ་པར་བསྒོམ་པར་བྱ། །སྠི་ཏོ་ཧྲྀ་དི་ཛྙཱ་ན་མཱུརྟི་ར་ཧཾ། བུདྡྷོ་བུདྡྷཱ་ནཱཾ། ཏྲྱ་དྷྭ་བརྟི་ནཱཾ། ཞེས་བྱ་བ་དང་། ལྟེ་བ་དང་བཅས་མུ་ཁྱུད་ནང་མ་གཉིས། །དེ་ནས་རྩིབས་རྣམས་རིམ་པར་ལྡན་པ་
ལ། དེ་ནས་ཡང་ནི་ཕྱི་ཡི་མུ་ཁྱུད་གཉིས། །དེ་ལ་རྩ་བའི་སྔགས་སོགས་རིམ་བཞིན་དགོད། །ཡེ་ཤེས་སེམས་དཔའ་པདྨ་ཟླ་བར་གནས། །དེ་སྟེང་རྡོ་རྗེ་སྐྱིལ་ཀྲུང་ལེགས་བཞུགས་པ། །ཕྱག་གཉིས་ཏིང་འཛིན་ཕྱག་རྒྱ་ཨུཏྤལ་མཚན། །དེ་སྟེང་ཤེས་རབ་པུ་སྟིས་གཉིས་ཀ་བརྒྱན། །
ཉི་མ་འཆར་ཀའི་དཀྱིལ་ལྟར་མཛེས། །སེན་མོའི་འོད་ནི་ཤས་ཆེར་དམར། །ཅོད་པན་བཟང་པོ་མཐོན་ཀའི་རྩེ། །སྐྲ་མཆོག་མཐོན་ཀ་ཆེན་པོ་ཅན། །ནོར་བུ་ཆེན་པོ་འོད་ཆགས་དཔལ། །སངས་རྒྱས་སྤྲུལ་པའི་རྒྱན་དང་ལྡན། །ཞེས་བྱའོ། །ཨོཾ་སརྦ་དྷརྨཱཿཨ་བྷཱ་བ། སྭ་བྷཱ་བ།
བི་ཤུདྡྷ་བཛྲ་ཨ་ཨཱ་ཨཾ་ཨཿ། ནང་གི་མུ་ཁྱུད་མཆོག་ལའོ། །ཨ་ཨཱ་ཨི་ཨཱི་ཨུ་ཨཱུ་ཨེ་ཨཻ་ཨོ་ཨཽ་ཨཾ་ཨཿ། ཕྱི་རོལ་མ་ལའོ། །དེ་ནས་འཁོར་ལོ་རྩིབས་དྲུག་ལ་ཤར་ནས་བརྩམས་ཏེ་སྔགས་ཀྱི་རྒྱལ་པོ་དྲུག་དྲུག་གོ། །ཨ་ཨཱ་སརྦ་ཏ་ཐཱ་ག་ཏ་ཧྲྀ་ད་ཡ། ཧ་ར་ཧ་ར། ཨོཾ་ཧཱུཾ་ཧྲཱིཿ། བྷ་ག་བཱན།
ཛྙཱ་ན་མཱུརྟི་ཝཱ་གཱི་ཤྭ་ར། མ་ཧཱ་ཝ་ཙ་སརྦ་དྷརྨཱ་ག་ག་ན། ཨ་མ་ལ་སུ་པ་རི་ཤུདྡྷ། དྷརྨ་དྷཱ་ཏུ་ཛྙཱ་ན་གརྦྷ་ཨཱཿ། མུ་ཁྱུད་ཕྱི་རོལ་མ་ལའོ། །དེའི་ཕྱི་རོལ་ཀ་ལ་སོགས་པའོ། །ཛཿཧཱུཾ་བཾཾ་ཧོཿས་དགུག་པ་ལ་སོགས་པའོ། །ཨོཾ་ཨཱཿཧཱུཾ། དེ་ནས་མངོན་པར་དབང་བསྐུར་ཏེ་མི་བསྐྱོད་པས་ནི་དབུ་བརྒྱན་

པའོ། །ཡེ་ཤེས་སེམས་དཔའི་ཐུགས་ཀའི་ས་བོན་ལས་འོད་ཟེར་འཕྲོས་ཏེ་སླར་བསྡུ་བར་བྱའོ། །དངོས་པོ་ཐམས་ཅད་ཀྱི་དེ་ཁོ་ན་ལྷག་པར་རྟོགས་པས་ཆོས་ཐམས་ཅད་ལ་ཡང་འཇམ་པའི་དཔལ་དུ་བྱེད་ཅིང་། འདི་ལྟར་སངས་རྒྱས་བཅོམ་ལྡན་འདས། །ཞེས་བྱ་བ་ལ་སོགས་
པས་སྙིང་གའི་ཡེ་ཤེས་སེམས་དཔའ་དང་། མཉམ་པར་སྦྱོར་ཞིང་སྔགས་ཀྱི་ཚིག་གི་མིང་དག་གདོན་ནོ། །ཨོཾ་ཨཱཿཧཱུཾ་མུཿ། སླར་ཡང་ཁྲོ་བོ་གཉིས་གང་ཡང་རུང་བས་བསྲུང་ལ་ལངས་ཏེ། ཕྱི་རོལ་ཏུ་ཨ་ཀཱ་རོ་ལ་སོགས་པས་གཏོར་མ་སྦྱིན་ནོ། །འདི་ལྟར་དུས་གསུམ་དུ་སྟེ། རྣལ་
འབྱོར་གྱི་དུས་མ་ཡིན་པར་ནི་འཇམ་པའི་དཔལ་གྱི་སྔགས་གང་འདོད་པ་བཟླས་པའམ། མཆོད་རྟེན་བྱ་ཞིང་བསྐོར་བ་ལ་སོགས་པ་བྱའོ། །འཕགས་པ་འཇམ་དཔལ་གྱི་སྒྲུབ་ཐབས་མྱ་ངན་མེད་པའི་དཔལ་གྱིས་བྱས་པ་རྫོགས་སོ།། །།རྒྱ་གར་གྱི་མཁན་པོ་ཨ་ཤྭོ་
ཀ་ཤྲཱི་དང་། ལོ་ཙཱ་བ་འ་ཞ་རྒྱ་གར་བརྩེགས་ཀྱིས་བསྒྱུར་བའོ།། །།བཛྲ་ཏཱིཀྵྞ་དམར། དུཿཁ་ཙྪེ་ད་སྔོ། པྲཛྙཱ་ཛྙཱ་ན་མཱུརྟ་ཡེ་དཀར། ཛྙཱ་ན་ཀཱ་ཡ་ལྗང་། ཝཱ་གཱི་ཤྭ་ར་སེར། ཨ་ར་པ་ཙ་ན་དཀར། ཨི་ཏི།། ༄༅༅། །རྒྱ་གར་སྐད་དུ། བཛྲ་བྷཻ་ར་བ་སཱ་དྷ་
ན་ནཱ་མ། བོད་སྐད་དུ། རྡོ་རྗེ་འཇིགས་བྱེད་ཀྱི་སྒྲུབ་ཐབས་ཞེས་བྱ་བ། འཇམ་དཔའི་རྡོ་རྗེ་ལ་ཕྱག་འཚལ་ལོ། །རབ་ཏུ་ཁྲོས་ཤིང་གདུག་པ་འདུལ། །མ་ལུས་ལོག་པའི་བདུད་འདུལ་བ། །ཞལ་དང་ཕྱག་དྲུག་མཚོན་ཆ་འཛིན། །མ་ཧེའི་ཞལ་ལ་ཕྱག་འཚལ་ཏེ། །དེ་ཡི་སྒྲུབ་
པའི་རིམ་པ་ཞིག །བདག་གིས་དྲན་ནས་བརྩམ་པར་བྱ། །དང་པོར་ཡིད་དང་མཐུན་པའི་གནས་སུ་བདག་ཉིད་ཁྲུས་བྱས་ཏེ་སྟན་བདེ་བ་ལ་འདུག་ནས། ཨོཾ་བཛྲ་བྷཻ་ར་ཝ་ཛྭ་ལ་ཛྭ་ལ་ཧཱུཾ། ཞེས་པས་ལུས་བསྲུངས་ནས། བླ་མ་དཀོན་མཆོག་ལ་མཆོད་པ་རྣམས་ཀྱིས་ཡང་དག་
པར་མཆོད་ནས་སྡིག་པ་བཤགས་པ་ལ་སོགས་པ་བྱའོ། །ཨོཾ་ཨ་བྷཱ་བ་སྭ་བྷཱ་བ་བི་ཤུདྡྷ་བཛྲ་ཙཀྵུ་ཨ་ཨཱ་ཨཾ་ཨཿ། ཞེས་བྱ་བས་སྟོང་པ་ཉིད་བསྒོམ་མོ། །དེ་ནས་བདག་ཉིད་ཡི་གེ་ཨར་གནས་པ་ལས་དེའི་འོད་ཟེར་གྱིས་ཚངས་པ་དང་བརྒྱ་བྱིན་དང་། ཉི་ཟླའི་སྟེང་དུ་ཨ་ཞུ་བ་

ཨུཏྤལ་འཁོར་ལོས་མཚན་པ་དེ་ཞུ་བ་ལས་བཅོམ་ལྡན་འདས་འཇམ་པའི་རྡོ་རྗེ་ཞེས་བྱ་བ་སྐུ་མདོག་མཐིང་ནག་གཡས་ན་རྡོ་རྗེ་གཡོན་ན་ཨུཏྤལ་འཛིན་པ། གཞོན་ནུའི་ཆ་ལུགས་ལ་རྒྱན་གྱིས་བརྒྱན་པར་བསམ་མོ། །དེའི་ཐུགས་ཀ་ན་ཉི་མ་ལ་ཧཱུཾ་གནས་པ་ཅན་དུ་
བསམས་ཏེ། ཧཱུཾ་ཞེས་བྱ་བའི་སྒྲ་རྒྱུན་མི་འཆད་པར་བྱུང་བས་ཕྱོགས་བཅུའི་སངས་རྒྱས་ཐམས་ཅད་མཆོད། །ཚུར་ཧཱུཾ་ལ་ཐིམ་པས། ཞེ་སྡང་གི་སྐུར་གྱུར་པ་ནི། །ཞལ་དྲུག་ཕྱག་རྣམ་པ་དྲུག་དང་ལྡན་པ། སྟོབས་ཆེ་བ། མ་ཧེའི་ཞལ་ཅན། སྐུ་མདོག་མཐིང་ནག །མི་མགོ་བརྒྱའི་དོ་
ཤལ་ཅན། ཞབས་བརྐྱང་བསྐུམ་དུ་བཞུགས་པ། ཕྱག་དྲུག་གཡས་གཡོན་གྱི་དང་པོ་ཀེང་རུས་ཀྱི་དབྱུག་པ་དང་རྡོ་རྗེ་བསྣམས་པ། གཡས་གཡོན་གྱི་བར་པ་ན་མདའ་གཞུ་དང་རལ་གྲི། ཐ་མ་ན་སྣ་ཚོགས་རྡོ་རྗེ་དང་མདུང་བསྣམས་པའོ། །དེ་ལས་ཚད་མེད་པ་བཞིའི་ཁྲོ་བོ་འཕྲོ་བ་ཅན་ནོ། །
ཞབས་བཞི་བརྐྱང་བསྐུམ་དུ་བཞུགས་པ་བསྒོམ། དེའི་ཐུགས་ཀར་ཉི་མའི་སྟེང་དུ་ཧཱུཾ་བསམས་ལ། སྤྱན་དྲངས་པ་ལ་སོགས་པ་རྫོགས་པ་དང་གསང་སྔགས་བཟླས་པ་ནི། ཨོཾ་ཧྲཱིཿཥྚྲཱྀཿཝི་ཀྲི་ཏཱ་ན་ན་ཧཱུཾ་ཧཱུཾ། ཞེས་པའམ། ཨོཾ་དུཿཁ་ཙྪེ་ད་ཧཱུཾ་ཧཱུཾ། ཞེས་པ་བཟླས་པར་བྱའོ། །དེ་ནས་མཚན་གྱི་
སྒོ་ནས་བསྟོད་དོ། །གཏོར་མ་བཏང་ནས་གཤེགས་སུ་གསོལ་ཏེ་ལྡང་བར་བྱའོ། །བདག་གིས་དགེ་བ་འདི་བྱས་པས། །བླ་མེད་བྱང་ཆུབ་ཐོབ་པར་ཤོག །རྡོ་རྗེ་འཇིགས་བྱེད་ཀྱི་སྒྲུབ་ཐབས་སློབ་དཔོན་ཨ་ཤྭ་ཀ་ཤྲཱིས་མཛད་པ་རྫོགས་སོ།། །།པཎྜི་ཏ་དྷརྨ་ཤྲཱི་མི་ཏྲ་དང་། ལོ་ཙཱ་བ་
ཆོས་ཀྱི་བཟང་པོས་བསྒྱུར་བའོ།། ༄༅༅། །རྒྱ་གར་སྐད་དུ། ཡ་མཱ་རི་ཀཱ་ལ་སཱ་དྷ་ན་ནཱ་མ། བོད་སྐད་དུ། གཤིན་རྗེ་དགྲ་ནག་པོའི་སྒྲུབ་ཐབས་ཞེས་བྱ་བ། བཅོམ་ལྡན་འདས་ཤེས་རབ་ཡེ་ཤེས་ལ་ཕྱག་འཚལ་ལོ། །ལོག་པའི་ལྟ་བ་གཅོད་མཛད་ཅིང་། །ཤེས་རབ་
སྙིང་རྗེས་རབ་ཏུ་ཁྲོས། །མཆེ་བ་གཙིགས་ཤིང་བཞད་མཛད་པ། །གཤིན་རྗེའི་དགྲ་ལ་ཕྱག་འཚལ་ནས། །རྒྱུད་ཆེན་སྒྱུ་འཕྲུལ་དྲ་བ་ལས། །བླ་མའི་མན་ངག་ལ་བརྟེན་ནས། །བདག་གིས་སྒྲུབ་པའི་རིམ་པ་བཞིན། །སྒྲུབ་ལ་ཕན་ཕྱིར་བརྩམ་པར་བྱ། །དབེན་ཞིང་མེ་ཏོག་གཅལ་

བཀྲམ་པའི། །བདེ་བའི་སྟན་ལ་ཉེར་འདུག་སྟེ། །ལྷ་དང་དཀོན་མཆོག་སྤྱན་དྲངས་ནས། །མཆོད་དང་སྡིག་བཤགས་ལ་སོགས་བྱ། །ཨ་བྷཱ་བ་སྭ་བྷཱ་བ་བི་ཤུདྡྷ་བཛྲ་ཙཀྵུ་ཨ་ཨཱ་ཨཾ་ཨཿ། དེ་ནས་སྟོང་པའི་ཏིང་འཛིན་ལས། །ནམ་མཁར་ཨ་ནི་བསམ་པར་བྱ། །རྡོ་རྗེ་མེ་དཔུང་རབ་
ཏུ་འཕྲོས། །རྡོ་རྗེའི་སྟེང་དུ་ཨ་བསམས་ཏེ། །གྱུར་པས་ཤེས་རབ་ཡེ་ཤེས་ནི། །མདོག་དཀར་འཁོར་ལོ་རལ་གྲི་འཛིན། །ཉི་སྟེང་ཧཱུཾ་གི་འཕྲོ་འདུ་ལས། །གྱུར་པས་གཤིན་རྗེ་གཤེད་པོ་ནི། །བགེགས་ཀྱི་རྒྱལ་པོ་ཆེན་པོ་སྟེ། །ལུས་ནི་རྡོ་རྗེས་རྣམ་པར་བརྒྱན། །ཕྱག་ན་རྡོ་རྗེ་
བེ་ཅོན་དང་། །ཤུགས་དང་བཅས་པའི་སྦྲུལ་ཞགས་བསྣམས། །ཚད་མེད་བཞི་ལྡན་ཁྲོ་བོ་ནི། །ཤིན་ཏུ་ཁྲོས་པ་རྣམ་པར་བསྒོམ། །ཛཿཧཱུཾ་བཾ་ཧོཿཞེས་བྱ་བས་དགུག་པ་དང་གཞུག་པ་དང་། བཅིང་བ་དང་། དགྱེས་པ་བསྐྱེད་ནས། ཨོཾ་སྭ་ཧཱུཾ། གསུམ་གྱིས་བྱིན་གྱིས་བརླབས་
ནས་དབང་བསྐུར་བྱའོ། །དེ་ནས་བསྒོམས་པས་སྐྱོ་ན་བཟླས་པ་བྱ་སྟེ། ཨོཾ་པྲཛྙཱ་ཛྙཱ་ན་མཱུརྟ་ཡེ་ཡ་མཱནྟ་ཀ་ཧཱུཾ། ཞེས་བརྗོད་ནས། མཚན་བརྗོད་དེ་གཏོར་མ་གཏང་བར་བྱའོ། །དེ་ལྟར་བསྟོད་ནས་གཤེགས་སུ་གསོལ་ལོ། །བདག་གིས་འགྲོ་ལ་ཕན་ཕྱིར་བརྩམས། །དགེ་བས་འབྲས་
བུ་ཚད་མེད་ཤོག །གཤིན་རྗེ་གཤེད་ཀྱི་སྒྲུབ་ཐབས་སློབ་དཔོན་ཨ་ཤྭ་ཀ་ཤྲཱིས་མཛད་པ་རྫོགས་སོ།། །།པཎྜི་ཏ་དྷརྨ་ཤྲཱི་མི་ཏྲ་དང་། ལོ་ཙཱ་བ་ཆོས་ཀྱི་བཟང་པོས་བསྒྱུར་བའོ།། ༄༅༅། །རྒྱ་གར་སྐད་དུ། ཨཱརྱཱ་ཙ་ལ་སཱ་དྷ་ནཾ། བོད་སྐད་དུ། འཕགས་པ་
མི་གཡོ་བའི་སྒྲུབ་ཐབས། རྡོ་རྗེ་རྣོན་པོ་ལ་ཕྱག་འཚལ་ལོ། །གསུང་སྒྲ་ཟབ་མོའི་སྒྲ་སྒྲོགས་ཤིང་། །འཇམ་པའི་མགོན་ལ་ཕྱག་འཚལ་ནས། །མཚན་གྱི་དོན་ལ་རབ་བརྟེན་ཏེ། །བདག་གིས་སྒྲུབ་ཐབས་རབ་ཏུ་བཤད