Luận tạng Tây Tạng (Tengyur) — Tập 66

་སེམས་སོ། །
ཡོངས་སུ་སྨིན་པར་བྱ་བ་ནི་འབྲས་བུ་ཐོབ་པར་བྱ་བའི་ཕྱིར། སེམས་མ་གྲོལ་བ་གྲོལ་བར་བྱ་བའི་ཕྱིར། སློབ་མ་སེམས་བསྐྱེད། རྡོ་རྗེ་འཛིན་མའི་ཕྱག་རྒྱ་བཅིངས་ལ། མནྜལ་སློབ་དཔོན་ལ་ཡོན་འབུལ་ལོ། །རིག་པའི་མེ་ཏོག་ལྷ་ལ་འཕངས་པའོ། །གང་ལ་བབ་པའི་
ལྷ་དེ་ལ་བསྟན་པ་དང་། ཡི་དམ་དུ་འཆར་གཞུག་པའོ། །ད་ནི་སློབ་མ་ལ་དམ་ཚིག་དབོག་པ་སྟོན་ཏེ། ཅིའི་ཕྱིར་ཞེ་ན། དེ་ནས་སྔགས་པ་མཁས་པ་ཡིས། །ཞེས་པ་ནི། དེ་ནས་སྐབས་ཀྱི་རྟིང་ཐོགས་སོ། །སྔགས་པ་ནི་སློབ་དཔོན་ནོ། །མཁས་པ་ནི་དམ་ཚིག་སྒྲོགས་
པ་ལ་མཁས་པའོ། །སློབ་དཔོན་གྱིས་ཨརྒྷ་བྱིན་གྱིས་བརླབས་ནས། སློབ་མ་ལ་དམ་ཚིག་བསྒྲགས་པའི་ཚིགས་བཅད་དང་། སྔགས་དང་སྐྱོན་ཡོན་ནི་བདེ་སྟེ་མ་བྲིས་སོ། །ད་ནི་དམ་ཚིག་དབོག་སྟེ། ཅིའི་ཕྱིར་ཞེ་ན། ཁྱོད་ཀྱིས་སྲོག་ཆགས་གསད་མི་བྱ། །ཞེས་པ་ནས།
མདོར་ན་ཡིད་གཉིས་སོམ་ཉི་མི་བྱ་སྟེ། །ཞེས་པའི་བར་ནི་སྙིང་རྗེ་རྒྱུན་མི་འཆད་པའི་ཕྱིར་རོ། །སྲོག་མི་གཅོད་པ་དང་། ཆགས་པས་ཁམས་གསུམ་དུ་འཁོར་བར་མ་བྱིན་པར་མི་བླང་བ་དང་། དམ་པའི་ཆོས་དང་མི་མཐུན་པའི་བརྫུན་མི་སྨྲ་བ་དང་། ཆགས་པས་ཏིང་ངེ་འཛིན་

ཉམས་པའི་གཞི་ཡིན་པས་བུད་མེད་ལ་ཆགས་པ་མི་སྐྱེད་པ་དང་། ཉེས་པའི་གཞི་ཡིན་པས་ཆང་མི་འཐུང་བ་དང་། འབྱུང་པོའི་ཁ་ཟས་ཤ་མི་ཟ་བ་དང་། བསམ་པ་ངན་པའི་སྦྱོར་བ་སེམས་ལ་མི་བྱ་བ་དང་། དམིགས་པའི་རྟེན་དཀོན་མཆོག་གསུམ་མི་སྤང་བ་དང་། བྱང་ཆུབ་ཀྱི་
སེམས་རྗེས་སུ་གཟུང་བ་དང་། ལྷའི་སྙིང་པོ་རྫོགས་པ་དང་། ཕྱག་རྒྱ་རྣམས་རྟག་ཏུ་བྱ་བ་དང་། ལྷ་དང་སློབ་དཔོན་དབྱེར་མེད་པར་བལྟ་བ་དང་། སློབ་དཔོན་གྱི་བཀའ་ལས་མི་འདའ་ཞིང་། ལྷ་ལ་ཕུལ་བ་ལ་མི་འགོང་བ་དང་། སྔགས་དང་ཕྱག་རྒྱ་ལ་མི་སྨད་ཅིང་དང་དུ་བླང་བ་
དང་། གྲོང་སྔགས་ཀྱི་ལས་མི་བྱ་བ་དང་། ཡིད་གཉིས་དང་སོམ་ཉི་མི་བྱའོ། །ད་ནི་མི་འདའ་བའི་ཐབས་བསྟན་ཅིང་དབང་བསྐུར་བ་སྟོན་ཏེ། དེ་ཅིའི་ཕྱིར་ཞེ་ན། བདག་གི་དེ་བཞིན་དང་ནི་སྔགས་སོགས་དེ་བཞིན་པ་ནི། བདག་སྒྲུབ་པ་པོ་སློབ་དཔོན་ནོ། །དེ་ཉིད་ནི་སློབ་མ་ཉིད་ལ་བྱ་ལ།
སྔགས་རིག་པ་ལ་སོགས་པ་ནི་མངོན་པར་བྱང་ཆུབ་པ་ལྔ་དང་། ཆོ་འཕྲུལ་རྣམ་པ་བཞི་ལ་སོགས་པ་ལ། དེ་བཞིན་བདག་ཉིད་ཇི་ལྟར་བསྒོམས་པས་དེ་བཞིན་དུ་སློབ་མ་ཡང་སྒོམ་དུ་གཞུག་པའོ། །རྣམ་གཅིག་ཏུ་ནི་བདག་ནི་སློབ་མ་ཉིད། ལྷ་སྔགས་ནི་ལྷའི་སྙིང་པོའོ། །སོགས་
ནི་ཕྱག་རྒྱ་ལ་སོགས་པ། དེ་བཞིན་སློབ་མ་དེ་སྒོམ་དུ་གཞུག་པའི་ཐ་ཚིག་གོ། །དེ་ཡང་ཅིའི་ཕྱིར་ཞེ་ན། མོས་པ་བརྟན་དང་ལྡན་པ་དམ་བཅས་ནས། །ཞེས་པ་ནི། མོས་པ་ནི་སློབ་མ་ཡིད་ཆེས་པའི་སྒོ་ནས་སོ། །བརྟན་པ་ནི་སེམས་མི་འགྱུར་ཞིང་འཁུ་ལྡོག་མེད་པའོ། །ལྡན་པ་ནི་
ཡོན་ཏན་ཚང་བའི་ཕྱིར་སྨོས་ལ། དམ་བཅའ་བ་ནི་མི་འདའ་ཞིང་། མི་འགྱུར་བར་དམ་བསྒྲགས་ནས་དབང་བསྐུར་བའི་དོན་ཏོ། །ཅིའི་ཕྱིར་ཞེ་ན། བདག་གི་དེ་བཞིན་དང་ནི་སྔགས་སོགས་དེ་བཞིན་ཉིད། །ཅེས་པ་ནི། སརྦ་ནི་ཐམས་ཅད་དཀྱིལ་འཁོར་གྱི་ལྷ་རྣམས་སོ། །བིད་
ནི་རིག་པ་སྟེ་ཐུགས་སོ། །ཇི་བཞིན་ནི་སློབ་མ་སྟེ། ལྷ་ཇི་བཞིན་དུ་དམ་བཅའ་བའོ། །དབང་ནི་ཐུགས་ཏེ་ཡོ་གའི་དབང་བཅུ་དང་། ཐབས་དང་ཤེས་རབ་ཀྱི་དབང་དང་། རིན་པོ་ཆེ་སྣ་བདུན་གྱི་དབང་དང་གསུམ་མོ། །བསྐུར་ནི་སློབ་མ་ལ་སྦྱིན་པའི་ཐ་ཚིག་གོ། །ཅིའི་ཕྱིར་ཞེ་ན། བུམ་པ་ལ་

སོགས་ཇི་སྙེད་མང་ཐོགས་ལ། །བཅུ་པོ་རྣམས་ཀྱིས་དབང་བཅུ་ཅི་དགར་བསྐུར། །ཞེས་པ་ནི། སློབ་དཔོན་གྱིས་བུམ་པ་ཐུགས་ཀྱི་ངོ་བོ་སརྦ་བིད་ཀྱི་བྱིན་གྱིས་བརླབས་ནས། བདུད་རྩི་བུམ་པ་ཡུམ་ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོའོ། །བྱང་ཆུབ་ཀྱི་སེམས་ཡེ་ཤེས་ཀྱི་
སྤྲུལ་པ་འབྱུང་བས་སློབ་མ་ལ་དབང་བསྐུར་བས། ཉོན་མོངས་པ་ལྔ་འཇོམས་པས་རིགས་རྣམ་པ་ལྔའི་དབང་དང་། ཐབས་མཁས་པ་ཐུགས་རྗེའི་ཕྲེང་བའི་དབང་དང་། བྱང་ཆུབ་སེམས་དཔའ་ཅོད་པན་གྱི་དབང་དང་། མི་འདའ་བ་ཕྱག་རྒྱའི་དབང་དང་། རྒྱལ་བའི་སྲས་ཡིན་
པས་མིང་གི་དབང་དང་། དེ་བཞིན་གཤེགས་པའི་ཕྲིན་ལས་མཛད་པས་ལས་ཀྱི་དབང་དང་། འཁོར་བ་གཏིང་ནས་འཇོམས་པས་འཁོར་ལོའི་དབང་དང་། གཉིས་སུ་མེད་པ་གཟུངས་ཀྱི་དབང་དང་། ཆོས་ཉིད་ཀྱི་དོན་མཐོང་བས་གསང་བའི་དབང་དང་། རྒྱལ་བའི་སྲས་ཡིན་པས་མིང་
གི་དབང་དང་། དེ་བཞིན་གཤེགས་པའི་དེ་བཅུ་ནི་སློབ་མ་ཇི་ལྟར་དགའ་བར་དབང་རིམ་པས་བསྐུར་རོ། །ད་ནི་ཐབས་ཤེས་རབ་ཀྱི་དབང་བསྐུར་ཏེ། དེ་ནས་ལག་ཏུ་རྡོ་རྗེ་དང་དྲིལ་བུ་སྦྱིན། ཐུགས་ཡང་དག་པའི་ཡེ་ཤེས་ཀྱི་རྡོ་རྗེ་ཐབས་ཀྱི་དབང་དང་། ཆོས་ཀྱི་དབྱིངས་སྐྱེ་བ་མེད་པའི་
དྲིལ་བུ་ཤེས་རབ་ཀྱི་དབང་དང་། གཉིས་ནི་མཐའ་གཉིས་དབང་བསྐུར་བས་ཐབས་དང་ཤེས་རབ་བོ། །ད་ནི་ས་དང་པོ་ཐོབ་པའི་ལས་རིན་པོ་ཆེ་སྣ་བདུན་གྱི་དབང་བསྐུར་ཏེ། ཅིའི་ཕྱིར་ཞེ་ན། འཁོར་ལོ་ལ་སོགས་རིན་ཆེན་བདུན་ཐོགས་ལ། མི་དབང་དབང་ཕྱུག་འཁོར་ལོ་ཐོབ་པ་
དང་། སྡིག་པ་གཞོམ་ཕྱིར་དབང་ནི་བསྐུར་བར་བྱ། །ཞེས་པ་ནི། འཁོར་ལོ་ནི་གཙོ་བོ་ཡིན་པས་སྣ་ལ་སྨོས་སོ། །སོགས་ཀྱི་ཁུངས་སུ་རིན་པོ་ཆེ་སྣ་བདུན་འབྱུང་སྟེ། བྱང་ཆུབ་ཀྱི་ཡན་ལག་བདུན་དང་སྦྱར་ཏེ། ཆོས་རྣམ་པར་འབྱེད་པ་ནི་ཤེས་རབ་ཀྱི་རང་བཞིན་ཏེ། རང་བཞིན་
ནི་ཡན་ལག་གོ། །དེའི་རྟགས་ནི་ཡང་དག་པའི་ཤེས་རབ་ཀྱིས་འཁོར་བ་འཇོམས་པས་ན་འཁོར་ལོའོ། །རིན་པོ་ཆེ་ནི། བཏང་སྙོམས་ནི་མཐོང་བས་ན་སྤང་བར་བྱ་བའི་ཏིང་ངེ་འཛིན་སྤངས་ནས་ཉོན་མོངས་པ་རྒྱུན་དུ་མི་འབྱུང་བས། ཉོན་མོངས་པ་མེད་པའི་ཡན་ལག་སྟེ། དེའི་རྟགས་ནི་

ཐབས་ཐུགས་རྗེས་ནོར་བུ་རིན་པོ་ཆེའོ། །ཤིན་ཏུ་སྦྱངས་པ་ནི་ལུས་སེམས་ལས་སུ་རུང་བ་སྟེ། འདོད་ཆགས་ལ་སོགས་པ་མི་འབྱུང་བས་དེའི་རྟགས་ནི་ཡང་དག་པའི་ཤེས་རབ་ཀྱི་བཙུན་མོའོ། །བརྩོན་འགྲུས་ནི་ངེས་པར་འབྱུང་བའི་ཡན་ལག་སྟེ། སོ་སོའི་གནས་ལས་ངེས་པར་
འབྱུང་བའི་ཡན་ལག་སྟེ། དེའི་རྟགས་ནི་རྫུ་འཕྲུལ་གྱི་རྟ་རིན་པོ་ཆེའོ། །ཏིང་ངེ་འཛིན་ནི་མཐོང་བས་སྤང་བར་བྱ་བའི་ཉོན་མོངས་པ་སྤོང་བས་གནས་ཀྱི་ཡན་ལག་གོ། །དེའི་རྟགས་ནི་ཐབས་མཁས་པའི་གླང་པོ་རིན་པོ་ཆེའོ། །དགའ་བའི་ཕན་ཡོན་གྱི་ཡན་ལག་སྟེ། ས་དང་
པོར་བདེན་པ་མཐོང་བས་དེས་ལུས་སེམས་ལས་སུ་རུང་བས་ཕན་འདོགས་པས་ན་དེའི་རྟགས་ནི་འཁོར་བའི་དགྲ་འཇོམས་པ་དམག་མི་རིན་པོ་ཆེའོ། །དྲན་པ་ནི་ཤེས་རབ་ཀྱི་རྒྱུ་སྟེ། གནས་ཀྱི་ཡན་ལག་ཡིན་པས་དེའི་རྟགས་ནི་དྲན་པ་དང་ལྡན་པའི་ཁྱིམ་བདག་རིན་པོ་ཆེའོ། །མི་དབང་
ནི་འཇིགས་པས་མཐོང་བའི་ཕྱིར་རོ། །དབང་ནི་ས་དང་པོ་ཐོབ་ཅིང་དེ་ལ་ལོངས་སྤྱོད་པས་ཕྱུག་གོ། །སྡིག་པ་ནི་བག་ཆགས་ལ། གཞོམ་པ་ནི་སྤྲུལ་པའི་སྐུ་འཕྲོ་འདུ་བསྟིམས་ལ། དབང་ནི་བྱིན་གྱིས་བརླབས་ལ་བྱིན་པའོ། །ད་ནི་སློབ་མ་དགའ་བའི་གཏང་རག་ཡོན་འབུལ་བ་
བསྟན་ཏེ། ཅིའི་ཕྱིར་ཞེ་ན། སྔགས་འགྲུབ་ཕྱིར་ནི་མོས་ལྡན་སློབ་མ་ལ། །ཞེས་གསུངས་ཏེ། སྔགས་ནི་ཉོན་མོངས་པ་བཅོམ་ནས་དབང་ཐོབ་པའོ། །གྲུབ་པ་ནི་ཆུད་མ་ཟོས་པར་རོ། །ཕྱིར་ནི་ཡོན་འབུལ་བའི་ཕྱིར་ན། མོས་པ་ནི་སེམས་ལ། ལྡན་པ་ནི་དད་པའོ། །སློབ་མ་ནི་དབང་
བསྐུར་བ་སྟེ། དེས་སློབ་དཔོན་གྱི་ངག་མཉན་ནས་གཞུང་ལས་བྱུང་བ་བཞིན་ཡོན་འབུལ་བའོ། །དབང་བསྐུར་བའི་ཡོན་ཏན་ཡང་བདེ་སྟེ་མ་སྨོས་སོ། །ད་ནི་སློབ་དཔོན་གྱི་བལྟ་ཐབས་སྟོན་ཏེ། ཅིའི་ཕྱིར་ཞེ་ན། སངས་རྒྱས་ཀུན་དང་བླ་མར་མཉམ། །ཞེས་པ་ནི། སངས་རྒྱས་ཀུན་ནི་
དཀྱིལ་འཁོར་གྱི་ལྷ་ལ་བྱ་ལ། བླ་མ་ནི་སློབ་དཔོན་ཏེ། མཉམ་པ་ནི་ལྷ་དང་འདྲ་བར་བལྟ་བའི་ཕྱིར། ལྷ་ངོ་ཤེས་སུ་འཇུག་ཅིང་དམ་མི་འདའ་བར་སྟོན་པས་མཉམ། སློབ་དཔོན་ལ་ནི་བརྙས་མི་བྱ། །ཞེས་པ་ནི། བདག་འཁོར་བ་ལས་འདྲེན་ཅིང་ཡང་དག་པའི་དོན་སྟོན་པས་ན།

སློབ་དཔོན་ལ་བརྙས་ན་འཕགས་པ་ཐམས་ཅད་ལ་བརྙས་པའི་ཐ་ཚིག་གོ། །དེའི་འོག་ཏུ་གྲོགས་མཆེད་ལ་བརྙས་པ་སྟོན་ཏེ། ཅིའི་ཕྱིར་ཞེ་ན། རྡོ་རྗེ་སྤུན་དང་སྲིང་མོ་དང་། །ཞེས་གསུངས་ཏེ། རྡོ་རྗེ་ནི་དམ་ཚིག་རྡོ་རྗེ་ལྟར་བསྲུང་བ་དང་། དངོས་གྲུབ་རྡོ་རྗེ་བསྟན་པའི་
སྒོ་ནས་བསྒྲུབ་པའོ། །སྤུན་ནི་ཕ་མ་གཅིག་པའི་དོན་ཏོ། །ལྷ་དང་སློབ་དཔོན་ཕ་དང་འདྲ་བ་དང་། དམ་པའི་ཆོས་མ་དང་འདྲ་བ་དང་། གཉིས་པ་རྟེན་ཅིང་གནས་པ་དང་། མི་འབྲལ་ཞིང་འགྲོགས་པའི་ཕྱིར་ན་སྤུན་ནོ། །སྲིང་མོ་ནི་མིང་སྲིང་ལྟར་ཚུལ་བསྲུང་བ་དང་། ཕ་མའི་
རྒྱུ་རྐྱེན་གཅིག་ལས་བྱུང་བ་འདྲ་བས། རྒྱུ་རང་གི་སེམས་ལ། རྐྱེན་རང་སློབ་དཔོན་གྱི་བཀའ་དྲིན་གྱིས་འབྲས་བུ་བླ་ན་མེད་པ་འབྱུང་བའི་ཕྱིར་ན། སྒྲུབ་པའི་གྲོགས་ནི་མི་བརྙས་པར་བརྩེ་གདུང་བྱ་བའི་ཐ་ཚིག་སྟེ། ཞིབ་ཏུ་གཞུང་ལས་སྨོས་སོ། །ད་ནི་དཀོན་མཆོག་གསུམ་པོ་ལ་
གནོད་པ་བྱེད་པ་ལ། བཟོད་པ་མི་བསྒོམ་པ་སྟོན་ཏེ། ཅིའི་ཕྱིར་ཞེ་ན། དཀོན་མཆོག་གསུམ་ལ་གནོད་བྱེད་ལ། །ཞེས་གསུངས་ཏེ། དཀོན་པ་ནི་རྒྱུ་བསྒྲུབ་པར་དཀའ་བ་དང་། འབྲས་བུ་ཐོབ་པར་དཀའ་བའི་ཕྱིར་དཀོན་ནོ། །མཆོག་ནི་རྐང་གཉིས་མཆོག་སངས་རྒྱས། འདོད་
ཆགས་དང་བྲལ་བའི་མཆོག་དམ་པའི་ཆོས། མང་པོ་འདུས་པའི་མཆོག་དགེ་འདུན་ཏེ། དེ་གསུམ་ལ་གནོད་པ་བྱེད་པ་ལ་བཟོད་པ་མི་སྐྱེད་དེ། ཅིའི་ཕྱིར་ཞེ་ན། ཉེས་པ་བྱེད་པ་ལ་ཆད་པས་མ་ཆོད་ན། གླང་པོ་ཆེ་རྫིང་རྙོག་པ་ལྟར། ཡུལ་ལ་ཉེས་པ་འཕེལ་བའི་གཞིའོ། །བསྒྲུབས་
ན་མྱུར་དུ་འགྲུབ་པར་འགྱུར། །ཞེས་པ་ནི། བསྒྲུབས་པ་ནི་གོང་མའི་དོན་ལ་བྱ། མྱུར་བ་ནི་གུས་པར་གྲུབ་པས་མི་ཐོགས་པའི་ཕྱིར་རོ། །འགྱུར་ནི་རས་དཀར་པོ་དམར་པོར་བྱ་བའི་མཐུ་བཙོད་ལ་ཡོད་པ་དང་འདྲ་བར། འབྲས་བུ་བླ་ན་མེད་པའི་རྒྱུ་ནི་རང་གི་སེམས་ལ་ཡོད་པའི་ཐ་
ཚིག་གོ། །ཀུན་རིག་རྩ་བའི་དཀྱིལ་འཁོར་ཡན་ལག་དང་བཅས་པ་བཤད་ཟིན་ཏོ།། །།ད་ནི་བསྒྲུབ་པར་བྱ་བའི་ཐབས་སྐུ་གཟུགས་ཀྱི་དོན་ཏེ། ཅིའི་ཕྱིར་ཞེ་ན། དེ་ནས་བཅོམ་ལྡན་འདས་ཀྱིས་ལྷའི་དབང་པོ་བརྒྱ་བྱིན་དང་ཞེས་པ་ནི། དེ་ནས་ནི་སྐབས་ཀྱི་རྟིང་ཐོགས་སོ། །བཅོམ་

ནི་སྒྲིབ་པ་རྣམ་པ་གཉིས་བཅོམ་ལ། ལྡན་ནི་ཐུན་མོང་དང་ཐུན་མོང་མ་ཡིན་པའི་ཡོན་ཏན་དང་ལྡན་པས་ཏེ། ལྷའི་དབང་པོ་བརྒྱ་བྱིན་དང་། གསོལ་པ་འཇིག་རྟེན་ལ་ཕན་པའི་ཐ་ཚིག་ཏུ་གསུངས་པའི་ཚིག་ཏུ་སྨོས་སོ། །སྒྲུབ་པའི་ཆོ་ག་འདི་གསུངས་སོ། །ཞེས་པ་ནི། སྒྲུབ་པ་
རྣམས་ནི་གསུམ་སྟེ། སྐུ་གཟུགས་གཟུགས་བརྙན་སྒྲུབ་པ་དང་། དངོས་གྲུབ་གྱི་རྫས་སྒྲུབ་པ་དང་། འབྲས་བུ་བླ་ན་མེད་པ་སྒྲུབ་པའི་ཕྱིར་ན་སྒྲུབ་པའོ། །ཆོ་ག་ནི་ཞིབ་མོའི་སྒོ་ནས་བྱ་བའི་ཐ་ཚིག་ལ། འདི་ནི་འོག་གི་དོན་ལ་གསུངས་པ་ནི་དེ་བཞིན་གཤེགས་པས་གསུངས་པའི་ཐ་
ཚིག་གོ། །བཅོམ་ལྡན་འདས་ཐམས་ཅད་རིག་པ་ཞེས་པ་ནས། སྒྲོལ་མ་ཞེས་བྱ་བའི་བར་དུ་ནི་སྐུ་གཟུགས་བྲི་བའི་ལྷའི་ཁྱད་པར་སྟོན་ཏེ། ཅིའི་ཁྱད་པར་ཞེ་ན། དེ་བཞིན་གཤེགས་པ་ཡང་དག་པ། །ཞེས་པ་ནི། དབུས་སུ་རྣམ་པར་སྣང་མཛད་བྲིའོ། །ཡང་དག་པའི་ཡེ་ཤེས་
ཀྱིས་འཁོར་བའི་ངན་སོང་འཇོམས་པས་ངན་སོང་འཇོམས་པ་གཡས་སུ་བྲིའོ། །འཁོར་བ་གཡོན་ཕྱོགས་དང་འདྲ་བ་ལ། ཐུགས་རྗེ་དང་ལས་བསྐྱེད་པའི་ཕྱིར། ཤཱཀྱ་ཐུབ་པ་གཡོན་དུ་བྲིའོ། །ཐབས་ཐུགས་རྗེ་དང་ལྡན་པའི་རྟགས་སུ། ངན་སོང་སྦྱོང་བའི་འོག་ཏུ་སྤྱན་རས་
གཟིགས་བྲིའོ། །སྐུ་གསུང་ཐུགས་གསང་བའི་མཛོད་འཛིན་པས། ཤཱཀྱ་ཐུབ་པའི་འོག་ཏུ་ཕྱག་ན་རྡོ་རྗེ་བྲིའོ། །ཉོན་མོངས་པའི་ནད་བཞི་བརྒྱ་རྩ་བཞི་གསོ་བའི་རྟགས་སུ་སྨན་གྱི་བླ་བྲིའོ། །དུག་གསུམ་བདུད་རྩིར་བསྒྲུབ་པའི་ཕྱིར། ཀུན་རིག་གི་འོག་ཏུ་རྟ་མགྲིན་བྲིའོ། །བདུད་དང་
དྲེགས་བྱེད་གདུལ་བའི་ཕྱིར། འཇིག་རྟེན་གསུམ་ལས་རྣམ་པར་རྒྱལ་བ་རྟ་མགྲིན་གྱི་གཡོན་དུ་བྲིའོ། །ཡང་དག་པའི་ཤེས་རབ་ཀྱིས་རྟོགས་པའི་ཡུལ་ཡིན་པས། ཀུན་རིག་གི་མདུན་དུ་སངས་རྒྱས་སྤྱན་གྱི་ཟླ་བ་ཚེས་པ་ལ་སྤྱན་ཡོད་པ་བྲིའོ། །གཡས་སུ་མཱ་མ་ཀཱི་བྲིའོ། །གཡོན་
དུ་སྒྲོལ་མ་བྲི། རྒྱབ་ཏུ་གོས་དཀར་མོ་བྲི། འོག་ཏུ་མ་ཆག་པ་པདྨོའི་རྫིང་བུ་བྲིས་ལ། དེའི་ནང་དུ་ནི། ཉོན་མོངས་པ་འཁོར་བར་མི་གཏོང་བའི་ཆུ་སྲིན་གྱི་གཟུགས་དང་། གཟུང་འཛིན་རྣམ་པ་གཉིས་དང་བྲལ་བའི་རྟགས་སུ་སྦལ་པ་བྲིའོ། །ཐུགས་རྗེའི་རྫུ་འཕྲུལ་གྱིས་འཁོར་བའི་ཉེ་

གནས་ལ་འཛིན་ཅིང་འབྲེལ་པའི་རྟགས་སུ་སྦལ་པ་དཀར་པོའང་ཕྱིར་བྲིའོ། །སྐྱོན་གྱི་བག་ཆགས་དང་བྲལ་ཞིང་། ཐུགས་རྗེའི་ཐུགས་མངའ་བའི་རྟགས་སུ་རུས་སྦལ་དཀར་པོ་བྲི། ཉོན་མོངས་པ་ཟད་པར་མཛད་པའི་རྟགས་སུ་ཉ་དཀར་པོ་བྲིའོ། །དེ་རྣམས་ནི་ཡེ་
ཤེས་ཀྱི་རྟགས་དང་། མཛེས་པའི་རྒྱན་དང་ཐུགས་རྗེའི་ཡུལ་གསུམ་ཀ་སྦྱར་ཞིང་ཤེས་པར་བྱ། རྒྱན་ཆས་ཕྱི་མ་ནི་གཞུང་ལས་བྱུང་བར་བས། ལྷ་མི་བརྗེད་ཅིང་དྲན་པར་བྱ་བའི་ཕྱིར། བདག་ཉིད་ཀྱང་ཐལ་མོ་སྦྱར་ཞིང་མཆོད་པ་བྱེད་པའི་ཚུལ་དུ་བྲིའོ། །ད་ནི་མཆོད་པའི་ཐབས་སྟོན་ཏེ། དེ་
ནས་རི་མོའི་གཟུགས་དེ་མངོན་པར་མཆོད་དེ་ཞེས་པ་ནི། རི་མོའི་གཟུགས་བརྙན་རི་མོར་བྲིའོ། །མངོན་པར་ནི་དབང་པོའི་མངོན་སུམ་དུ་རི་མོ་གཞག་ལ་ཡིད་ཀྱི་མངོན་སུམ་ནི་ཏིང་ངེ་འཛིན་གྱི་མཎྜལ་དུ་བསྒོམ་པའི་དོན་ཏོ། །མཆོད་པའི་རྒྱུ་དང་རྐྱེན་དང་ཐབས་སོ། །རྒྱུ་ནི་ལུས་ངག་ཡིད་གསུམ་
གྱི་སྡིག་པ་བཤགས་པའོ། །རྐྱེན་ནི་དངོས་གྲུབ་ཀྱི་རྫས་ཀྱི་མར་དང་། བུ་རམ་དང་། ཛཱ་ཏི་ཕ་ལ་ལ་སོགས་ཏེ། དངོས་གྲུབ་ཀྱི་སྣོད་དུ་བླུགས་ནས་མཆོད་པར་བགྱི་བ་ནི་རྣམ་པ་གཉིས་ཏེ། གཟུགས་བརྙན་མཆོད་པའི་འབྲས་བུ་ནི། སྐུ་བཞད་པ་ལ་སོགས་པའི་རྟགས་འབྱུང་བའོ། །བདག་
ཉིད་ཀྱིས་སྤྱན་དབྱེ་ཞེས་པ་ནི། བདག་ཉིད་ནི་སྒྲུབ་པའོ། །སྤྱན་ནི་སྐུ་གཟུགས་ཀྱི་སྤྱན་ནོ། །དབྱེ་བ་ནི་རྣམ་པ་གཉིས་ཏེ། གཟུགས་བརྙན་དང་། མཚན་མའི་སྤྱན་དབྱེ་བའི་ཐབས་དང་གཉིས་སོ། །དེ་ལ་གཟུགས་བརྙན་གྱི་སྤྱན་ལ་ཡང་ཉི་ཟླའི་མཎྜལ་བསྒོམས་ནས། བདག་གི་མིག་
ལས་ཡེ་ཤེས་ཀྱི་ཛཿསྤྲོས་ཏེ། རང་གི་མཎྜལ་ནས་ཐུགས་དམ་གྱི་རྒྱུད་བསྐུལ་ནས། བདག་ཏིང་ངེ་འཛིན་དང་། ཆུ་དང་འོ་མ་འདྲེས་པར་གྱུར་ཏེ། གྲངས་ཀྱི་བསྙེན་པ་དང་། མཚན་མའི་བསྙེན་པ་ཚུལ་བཞིན་དུ་བྱས་ནས་གཟུགས་བརྙན་གྱི་སྐུ་གཟུགས་ལ་ཕབ་སྟེ། གཉིས་སུ་མེད་
པར་བྱིན་གྱིས་བརླབ་ཅིང་བརྟན་པར་བྱས་ནས། ཡེ་ཤེས་ཀྱི་སྤྱན་གྱིས་འགྲོ་བ་ལ་གཟིགས་པ་དང་། བྱིན་གྱིས་རླབས་པར་བྱེད་པ་ནི་ཏིང་ངེ་འཛིན་གྱིས་སྤྱན་དབྱེ་བའོ། །དངོས་གྲུབ་སྒྲུབ་པའི་རྟགས་བདེ་སྟེ་མ་བྲིས་སོ། །ད་ནི་བྱིན་གྱིས་བརླབ་པ་སྟོན་ཏེ། ཅིའི་ཕྱིར་ཞེ་ན། དེ་ནས་གཟུགས་བརྙན་

དེ་བྱིན་གྱིས་བརླབས་ཏེ་ཞེས་པ་ནི། དེ་ནས་ནི་སྐབས་ཀྱི་རྟིང་ཐོགས་སོ། །གཟུགས་ནི་བརྟན་ཏེ་བྱུང་བ་དང་། མཚོན་པར་བྱེད་པའི་ཕྱིར་ན་གཟུགས་ཏེ། དེ་ནི་གོང་དུ་སྨོས་པ་ཡིན་ལ། བྱིན་གྱིས་བརླབས་ཏེ་ཞེས་པ་ནི། ཡེ་ཤེས་ཀྱི་སྐུའི་སྤྲུལ་པ་སྤྲོས་པ་སྐུ་ལ་ཕོག་སྟེ་སྐུ་སྟོང་པ་
ཉིད་དུ་བྱིན་གྱིས་བརླབས། གསུང་ཡིག་འབྲུའི་འཕྲོ་འདུ་སྤྲོས་ཏེ། གསུང་ལ་ཐིམ་པས་ན་གསུང་སྨོན་པ་མེད་པར་བྱིན་གྱིས་བརླབས་པའི་སྐུ་གཟུགས་དེ་ལ་དངོས་གྲུབ་གསོལ་བའི་ཕྱིར། སྤྱན་སྔར་མཆོད་པ་དབུལ་ཞིང་བསྙེན་པར་བྱ་བའི་དོན་ཏོ། །དེ་ཅིའི་ཕྱིར་ཞེ་ན།
རྟག་ཏུ་མངོན་སུམ་འདུག་ཀྱང་ཞེས་གསུངས་ཏེ། རྟག་ཏུ་ཞེས་བྱ་བ་ནི། མི་འབྲལ་བར་བྱ་བའི་དོན་ཏོ། །མངོན་སུམ་དུ་ནི་དབང་པོས་མཐོང་བས་ལྟ། ཡིད་ཀྱིས་ནི་དམིགས་པའི་ཏིང་ངེ་འཛིན་གྱིས་ནི་བསྒོམ་པའི་དོན་ཏོ། །ད་ནི་བསྒྲུབ་པའི་གནས་བསྟན་ཏེ། དེ་ནས་
དབེན་པའི་གནས་སུ་ཞེས་པ་ནི། སེམས་དབེན་པ་ནི་ཕྱི་ཡུལ་ལ་མི་སྤྲོ་བ་དང་། ཡུལ་དབེན་པ་ནི་མིའི་སྐད་མི་ཐོས་པ་དང་། ཏིང་ངེ་འཛིན་དབེན་པ་ནི། སེམས་རྩེ་གཅིག་ཏུ་མི་འགྱུར་བའི་ཀློང་དུ་གྱུར་པ། གནས་ནི་ལུས་ཀྱི་གནས་ནི་དབེན་པ་ཡིན་ལ། དབང་པོ་དབེན་པའི་
གནས་ནི། གཟུགས་བརྙན་གྱི་སྐུ་ཡིན་ལ། ཏིང་ངེ་འཛིན་དབེན་པའི་གནས་ནི་ཆོས་ཉིད་ཡིན་ཏེ། བསྙེན་པའི་དོན་གྱི་དཀྱུས་ལས་འབྱུང་བས་མ་སྨོས་སོ། །ད་ནི་དངོས་གྲུབ་ཀྱི་རྫས་སྟོན་ཏེ། བསོད་ནམས་སྣོད་ལས་ཅི་དགའ་བར། །དངོས་གྲུབ་མཆོག་ནི་སྩོལ་བར་བྱ། །ཞེས་
གསུངས་ཏེ། སྒྲུབ་པ་པོས་དངུལ་གྱི་ཕོར་པའམ། རིན་པོ་ཆེའི་སྣོད་གཙང་མའི་ནང་དུ། དངོས་གྲུབ་ཀྱི་བུ་རམ་དང་ཙནྡན་ལ་སོགས་ཏེ་མཆོད་པའི་ཆ་རྐྱེན་ལ་བསྙེན་པ་ཚུལ་བཞིན་དུ་བྱས་ནས། ལྷའི་དབང་པོར་བྱིན་གྱིས་བརླབས་པ་སྟེ། འཕགས་པ་ལ་ཡང་དངོས་གྲུབ་
ཐོབ་ཙ་ན། མཆོད་རྫས་ཀྱི་སྐལ་བ་དབུལ། སེམས་ཅན་ལ་ཡང་སྙིང་རྗེའི་མགྲོན་དུ་སྦྱིན། བདག་གིས་ཀྱང་དངོས་གྲུབ་ཀྱི་རྫས་ལ་ལོངས་སྤྱོད་པའི་ཕྱིར་གཟུང་། ཕྱི་མ་ནི་བདེ་སྟེ་མ་སྨོས་སོ། །སྐུ་གཟུགས་ཀྱི་ཆོ་ག་བསྡུས་པ་བཤད་ཟིན་ཏོ།། །།ད་ནི་མ་གྲུབ་ན་སྤོགས་པའི་དོན་

ཏེ། ངན་སོང་ལས་ཐར་པར་སྟོན་ཏེ། ཅིའི་ཕྱིར་ཞེ་ན། དེ་ནས་ལྷ་རྣམས་ཀྱི་དབང་པོ་བརྒྱ་བྱིན་གྱིས་ཞེས་པ་ནི། ཕྱི་རབས་ཀྱི་སེམས་ཅན་རྣམས་ལ་ཕན་འདོགས་པའི་དོན་དུ་མ་གྲུབ་ན་སྤོགས་པའི་ཆོ་ག་སྟོན་ཏེ། ཞུ་བའི་ཡོན་བདག་ཡིན་པས་མ་སྨོས་སོ། །དེ་ལྟར་
ཞུ་བ་གསོལ་ནས། སྟོན་པས་གནང་ནས་བཀའ་སྩལ་པའི་དོན་ཏོ། །ཅིའི་ཕྱིར་ཞེ་ན། དེ་བཞིན་དཀྱིལ་འཁོར་བྲིས་ནས་ནི། །ཞེས་གསུངས་ཏེ། དེ་བཞིན་ཞེས་བྱ་བ་ནི་གོང་མའི་རྩ་བའི་དཀྱིལ་འཁོར་ཆེན་པོ་ནས་བྱུང་བ་དེ་ལྟར་བྱ་བའི་ཐ་ཚིག་གོ། །དེ་ཡང་འཇིག་རྟེན་ལས་
འདས་པའི་མཎྜལ་སྒོ་གཉིས་པ་ཡན་ཆད་བྲི་བར་འབྱུང་སྟེ། དེ་ལྟར་གཉིས་སུ་སྨོས་པ་ཡང་། གོང་གི་སྒྲུབ་ཐབས་ཡིན་པས་འོག་མ་མ་གྲུབ་ན་སྤོགས་པའི་ཆོ་ག་ཡིན་ཏེ། གོང་མ་ནི་ནོར་བུ་དྲི་མ་མེད་པའི་དོན་དུ་གསུངས་ལ། འདི་ནི་ཕྱི་རབས་ཀྱི་སེམས་ཅན་ལ་མ་གྲུབ་ན་སྤོགས་
པའི་ཐབས་སུ་ཤེས་པར་བྱ། དེ་ལྟར་ཡང་ནི་བུམ་པ་ཞེས་པ་ནི། ལྷའི་གྲངས་སོ་སོའི་བསྙེན་པ་དབུལ་བ་རྟགས་མ་བྱུང་གི་བར་དུ་བསྙེན་པ་བྱས་ནས། བུམ་པ་ལ་བྲུཾ་ལས་རིན་པོ་ཆེའི་གཞལ་ཡས་ཁང་དུ་ཆོས་ཀྱི་རང་བཞིན་དུ་བསྒོམ། ནང་གི་བཅུད་ཡེ་ཤེས་ཀྱི་ཕྲིན་ལས་ཐབས་
ཐུགས་རྗེ་འོད་ཟེར་སྣ་ཚོགས་པ་འབྱུང་བར་བསམས་ལ། ལྷ་སོ་སོའི་རྩ་བའི་སྔགས་དང་། ཤི་བའི་མིང་སྤེལ་མར་བཟླ་ཞིང་། ཡང་དང་ཡང་དུ་ཏིང་ངེ་འཛིན་གྱིས་དར་བསྐྱེད་ལ་གཞུང་ལས་བྱུང་བའི་ཡོན་ཏན་ཐོབ་པར་འགྱུར་རོ། །ད་ནི་དེའི་ཡན་ལག་མཚན་མ་ལ་དམིགས་
ནས། ངན་འགྲོ་ལས་ཐར་པའི་ཐབས་སྟོན་ཏེ། ཅིའི་ཕྱིར་ཞེ་ན། དེ་ཡི་གཟུགས་བརྙན་བྲི་བའམ། གུར་གུམ་གྱིས་ནི་མིང་ཡང་རུང་། །ཞེས་གསུངས་ཏེ། དེ་ནི་དམིགས་པའི་རྟེན་གང་ལ་བྱ་བའོ། །གཟུགས་ནི་རྟེན་པར་བྱེད་པའི་གཞི་རྣམ་པར་བམ་པའི་རོའི་གཟུགས་བརྙན་
རས་སམ་ཤོག་ཤོག་ལ་བྲིས་པའོ། །མིང་ནི་གདགས་པའི་གཞི། བོད་པའི་བརྡ། གུར་གུམ་གྱིས་ཤིང་བུ་ལ་བྲི་བའི་ཐ་ཚིག་གོ། །དེ་ལ་སྔགས་དང་ཕྱག་རྒྱས་རྟགས་མ་བྱུང་གི་བར་དུ་དབང་བསྐུར་ཞིང་བྱིན་གྱིས་བརླབས་ན་འགྲུབ་ཅེས་སོ། །དེ་ནི་ཇི་ལྟར་བྱ་བའི་ཐབས་སྟོན་ཏེ།

ཅིའི་ཕྱིར་ཞེ་ན། ལྷ་ཡི་གཟུགས་སུ་བརྟགས་ནས་ཀྱང་། །མཆོད་རྟེན་དབུས་སུ་གཞག་པར་བྱ། །ཞེས་པ་ནི། ལྷ་སོ་སོའི་སྐུའི་ཕྱག་རྒྱར་གཟུགས་ཀྱི་ངོ་བོ་བསྒོམས་ཏེ། དེ་ཡང་སྤྱི་བོར་ཀུན་རིག་གི་ཡིག་འབྲུས་བྱིན་གྱིས་བརླབ། སྙིང་གར་ངན་སོང་ཀུན་འདྲེན་གྱི་ཡིག་འབྲུས་
བྱིན་གྱིས་བརླབ། ལྷག་པར་རྒྱལ་བ་ཡེ་ཤེས་ཏོག །རྐང་མཐིལ་དུ་མེ་ཏོག་ཆེར་རྒྱས། ཁར་ཤཱཀྱ་ཐུབ་པ། ཆོ་འཕྲུལ་རྣམ་པ་བཞིའི་རང་བཞིན་དུ་བྱིན་གྱིས་བརླབ་ཅིང་། གསུང་ཡིག་འབྲུས་ཉོན་མོངས་པ་སྐྱེ་བའི་ཡུལ་གཞོམ་པའི་ཕྱིར་བརྟགས་ནས་སྤྲོ། སྐུ་ཙ་ཀ་ལིས་ཉོན་མོངས་
པའི་རྟེན་གཞོམ་པའི་ཕྱིར་བརྟགས་ནས་སྤྲོ། ཐུགས་ཕྱག་མཚན་ཉོན་མོངས་པའི་རྒྱུ་སེམས་སྦྱང་བའི་ཕྱིར་བརྟགས་ནས་སྤྲོ། དེ་བས་ན་མཆོད་རྟེན་ནི་མཎྜལ་བྱས་པའི་ཐ་ཚིག་ལ། དབུས་ནི་མཎྜལ་གྱི་ཕོ་བྲང་གི་དབུས་ལ་གཞག་པ་ནི་བྱིན་གྱིས་བརླབ་པ་དང་། དབང་བསྐུར་བའི་
ཕྱིར་གཞག་ཞེས་བྱ་བའི་ཐ་ཚིག་གོ། །འདི་ནི་མ་གྲུབ་ན་སྤོགས་པའི་ཆོ་ག་སྟོན་ཏེ། ཅིའི་ཕྱིར་ཞེ་ན། ཇི་སྲིད་མཚན་མ་ཤིན་ཏུ་ནི། །སྐྱེ་འགྱུར་འབར་བའི་གནས་ཀྱང་རུང་། ཞེས་པ་གསུངས་ཏེ། ཇི་སྲིད་ནི་མཚན་མ་སྤངས་པ་དང་། མ་གྲོལ་བ་དེ་སྲིད་ཀྱི་ཐ་ཚིག་གོ། །མཚན་མ་
ནི་དངོས་པོ་སྟེ་བག་ཆགས་ལ། ཤིན་ཏུ་ནི་མང་པོའི་ཐ་ཚིག་སྟེ། སྐྱེ་འགྱུར་ནི། འཁོར་བར་སྐྱེ་བར་འགྱུར་བ་དང་། ཉོན་མོངས་པ་སྐྱེ་བར་འགྱུར་བའི་ཐ་ཚིག་གོ། །འབར་བ་སྟེ་ཡེ་ཤེས་དེ་མ་གྲུབ་ན་གཉེན་པོ་བསྒོམ་པའི་དོན་ཏོ། །གནས་ནི་ཐུགས་རྗེའི་གནས། སྙིང་
རྗེའི་ཡུལ་ཡིན་པས་དེ་ལ་དམིགས་པའི་ཡུལ། གནས་ཞེས་སྨོས་སོ། །དེ་ཡང་ཅིའི་ཕྱིར་ཞེ་ན། ཏིལ་དང་ཡུངས་ཀར་འབྲས་རྣམས་དང་། །ཞེས་གསུངས་ཏེ། ཉོན་མོངས་པའི་མཚན་མ་བསྲེག་པའི་ཕྱིར་དང་། ཐམས་ཅད་ཞིར་གཞུག་པའི་ཕྱིར་དང་། བདག་
ཉིད་ཀྱི་ཁམས་གསུམ་རྣམ་པར་རྒྱལ་བའི་ཏིང་ངེ་འཛིན་ལ་བཞུགས་ནས། ཏིལ་དང་ཡུངས་ཀར་དང་། འབྲས་དང་། བུ་རམ་སྦྲང་རྩི་ལ་སོགས་པ་དང་། ར་རྒྱ་མོའི་འོ་མ་དང་། གུར་གུམ་གཉིས་བསྲེས་ཏེ། ཡམ་ཤིང་སོར་བཅུ་གཉིས་པ་ལ་བྱུགས་ནས། ཡ་ཐོག་མ་ཐོག་གཉིས་

སྦྲང་རྩིར་བྱུག་སྟེ། ཤི་བའི་མིང་དང་བསྲེས་ཏེ་སྦྱིན་སྲེག་བྱས་ན། ཤི་བ་དེ་ངན་སོང་ལས་ཐར་པའི་རྟགས་ནི་མེ་ལ་བལྟ་སྟེ། མེ་ལྕེ་མདོག་དཀར་བ་དང་། གཡས་སུ་འབར་བ་དང་། གྱེན་དུ་འབར་བ་དང་། དྲི་མ་མེད་པ་དང་། ཟླུམ་ལ་མི་འཕྲོ་བ་ནི་ངན་སོང་
ལས་ཐར་པའི་རྟགས་སུ་སྟོན་པས་གསུངས་སོ། །ཡོན་ཏན་དང་སྐྱོན་རྣམས་ཀྱི་ནི་བདེ་སྟེ་བརྡ་སྤྲད་པར་སླའོ། །མ་གྲུབ་ན་སྤོགས་པའི་ཐབས་ཀྱི་ཆོ་ག་ངན་སོང་ལས་ཐར་པའི་དོན་བསྡུས་པ་བསྟན་ཟིན་ཏོ། །ད་ནི་རོ་བསྲེག་ལ་ཧོམ་སྨོས་ཏེ། རོ་ནི་རྒྱུ་དང་འབྲས་བུའི་ཚུལ་ཏེ། རྒྱུ་
མ་རིག་པ་སྟེ། ཡང་དག་པའི་དོན་ལ་མགོ་རྨོངས་པའི་རྟོག་པ་གློ་བུར་བས། ཀུན་གཞིའི་སྒྲིབ་པ་ནི་རྒྱུའོ། །དེ་ཅིའི་ཕྱིར་ཞེ་ན། ནང་གི་ཉེ་བར་ལེན་པའི་ཕུང་པོ་འདི་ལེན་པའི་ཕྱིར་ན། ལེན་པའི་རྣམ་པར་ཤེས་པ་ཟབ་ཅིང་ཕྲ། །ཞེས་པ་སྨོས་སོ། །ཅིའི་ཕྱིར་ཞེ་ན། རོ་ནི་ཤེས་པ་དང་
བྲལ་བ་ལྟར་རྒྱུ་དང་འབྲས་བུ་ལ་མགོ་རྨོངས་པའི་ཕྱིར་རོ། །ཕྱིའི་རོ་ནི་འབྲས་བུའི་ངོ་བོ་སྟེ། དབང་པོའི་ལྔའི་སྤྱོད་ཡུལ་དུ་ལས་དང་ཉོན་མོངས་པས་བསྐྱེད་པས་ཕུང་པོ་གདོས་པ་ཅན་དུ་སྣང་བའི་ཕྱིར་རོ། །ཧོམ་ནི་རྒྱ་གར་གྱི་སྒྲ་སྟེ་དེ་ལས་དྲངས་ནས་སྦྱིན་སྲེག་ཅེས་སྨོས་ཏེ། སྦྱིན་པ་ནི་
ཐུགས་རྗེས་ཏེ་བདེ་བ་སྦྱིན་ལ། སྲེག་པ་ནི་ཕྲིན་ལས་རྣམ་པ་བཞིས་སྲེག་པའི་ཕྱིར་རོ། །དེ་ལ་རོའི་རྒྱུ་ནི་ནང་གི་སེམས་ཏེ། གཉེན་པོ་འཕགས་པའི་ཡེ་ཤེས་རྡོ་རྗེ་ལྟ་བུའི་ཏིང་ངེ་འཛིན་གྱིས་སྲེག་ལ། འབྲས་བུའི་རོ་ནི་འཇིག་རྟེན་གྱི་མེས་སྲེག་པའི་ཐ་ཚིག་གོ། །དེ་བས་ན་ཁམས་
གསུམ་གྱི་མཚན་མའི་རང་བཞིན་ཏེ། དངོས་པོ་གཞོམ་པའི་ཕྱིར་ནི། ཡང་དག་པའི་ཡེ་ཤེས་མཚོན་པར་བྱེད་པའི་འཇིག་རྟེན་གྱི་མེ་དང་། ཆོས་ཀྱི་དབྱིངས་མཚོན་པར་བྱེད་པས་ཧོམ་ཁུང་དང་། ཐབས་ཐུགས་རྗེ་མཚོན་པའི་ཤིང་། ཏིང་ངེ་འཛིན་ལས་སྤྲུལ་པ་གཞན་ལ་འབྱུང་
བ་མཚོན་པའི་ཐབས་མཆོད་པའི་རྫས་དང་། བསྲེག་རྫས་དང་། མི་ཤིས་པ་དད་པ་བསྐྱེད་པའི་ཕྱིར་ན། ཚོན་རྩི་རྣམ་པ་ལྔ་དང་། དེ་མེད་ནའང་ལྕགས་རྣམ་པ་ལྔའམ། ཐ་མ་ནི་འབྲས་བུ་ཚོན་གྱིས་ཁ་དོག་བསྒྱུར་རོ། །ཉོན་མོངས་པ་རྣམ་པ་ལྔ་གཞོམ་པའི་ཐུགས་སརྦ་བིད་

ཀྱིས་བྱིན་གྱིས་བརླབ་པ་སྟོན་ཏོ། །དེ་ཅིའི་ཕྱིར་ཞེ་ན། ཁྲུ་བཞི་པ་ཡི་ཚད་དུ་ནི། །ཞེས་སྨོས་ཏེ། ཁྲུ་བཞི་པ་ནི། ཡེ་ཤེས་རྣམ་པ་བཞིས་སྐྱེ་རྒས་ན་འཆིའི་སྡུག་བསྔལ་སྦྱངས་པའི་ཕྱིར་ན་གྲུ་བཞི་པའོ་ཚད་དུ་ནི་ཞེས་པ་ནི། ཐབ་ཁུང་སོགས་གཅིག་གི་ཚད་ནི་ཁྲུ་བཞི་སྟེ། ཕྱིའི་ཚད་
ནི་ཁྲུ་བཅུ་གཉིས་ཏེ། རྟེན་འབྲེལ་བཅུ་གཉིས་འཁོར་བ་ལུགས་ལས་བཟློག་པའི་དོན་ཏེ། ཁྲུ་བཅུ་གཉིས་པ། ཁ་གསུམ་བཅད་པའི་དབུས་མ་ཐབ་ཁུང་སྟེ། གྲུ་བཞི་ཞེས་སྨོས་པའི་དོན་ཏོ། །དེའི་ཚད་ཕྱི་མའི་འོག་མས་སྟོན་ཏེ། ཅིའི་ཕྱིར་ཞེ་ན། ཆོ་ག་བཞིན་དུ་ཁུང་བརྐོས་
ལ། །ཞེས་གསུངས་ཏེ། ཆོ་ག་ནི་རྣམ་པ་གཉིས་ཏེ། ནང་གི་ཟབས་དང་། ཕྱི་རོལ་གྱི་རྣམ་པ་གཉིས་སོ། །དེ་ལ་ནང་གི་ཟབས་ནི། ཁུང་བརྐོ་བ་སྟེ། ཅིའི་ཕྱིར་ཞེ་ན། ཁྲུ་གང་གི་ཡར་གྱེད་དེའི་ཕྱི་རོལ་སྨོས་སོ། །ཐབ་ཁུང་ལ་སོར་བརྒྱད་ནི་འཆད་པ་ལ་མུ་རན་དུ་བྱ། མེ་རི་ནི་དམར་པོར་
བཏང་སྟེ། རྣམ་པར་ཐར་པ་བརྒྱད་ཀྱི་ཡེ་ཤེས་ཞལ་གདངས་པའི་ཐ་ཚིག་གོ། །ཕྱི་རོལ་གྱི་སྣམ་བུའི་ནང་དུ་ཡང་ཁ་བཞིར་བཅད་དེ། ཕྲིན་ལས་རྣམ་བཞིའི་སྒོ་ནས་འགྲོ་བའི་དོན་མཛད་པའི་རྟགས་ཏེ། བཞིའི་ནང་མ་གསུམ་དུ་ཁ་བཅད་དེ། གཅིག་ལ་རྡོ་རྗེ་ར་བ་བཏང་སྟེ། ཁ་ཁྱེར་
གཅིག་ལ་སེམས་དཔའ་བཅུ་དྲུག །གཅིག་ལ་བསྐལ་བཟང་རྒྱལ་སྲས་བཅུ་དྲུག །གྲུ་ཆད་ཀྱི་ནང་གཉིས་ལ་མཆོད་པའི་ལྷ་མོ་བརྒྱད། བཞི་ཆ་གཅིག་ལ་མཆོད་པ་རྣམས་དང་། དྲི་རེག་དང་། པཱཉྩ་རེ་ག་དང་། སྒོ་བཞི་མུ་ཁྱུད་དང་བཅས་པའི་ས་བཅད་དོ། །དེའི་སུམ་ཆ་
གཅིག་ཕྱིར་བཅད་དོ། །ཤིང་རྣམས་གཞག །བཞིའི་ཆ་ཐབ་ལྷག་ཁ་གཉིས་སུ་འཆད་དེ། གོང་མའི་སུམ་ཆ་ལ་ཕྱེད་པོ་དེ་ཡར་བསྣན་ལ། ཤིང་གི་སྣམ་བུ་ལ་གཞག །ཕྱེད་པོ་དེ་སུམ་ཆ་སུམ་གཉིས་སུ་བཏང་ལ། ཤིང་སྣམ་དང་། ཉེ་བའི་སུམ་ཆ་གཅིག །མཆོད་སྣམ་
སུམ་གཉིས། འཇིག་རྟེན་པའི་སྣམ་བུ་བཞི་ཆ་ཕྱེད་ནི་ཁ་གཉིས་སུ་བཏང་སྟེ། གཟའ་དང་རྒྱུ་སྐར་གྱི་སྣམ་བུའོ། །ཕྱི་མ་སྒོ་སྣམ་མོ། །དབུས་ཀྱི་ཐབ་ཁུང་ཐིག་བཞི་བཏབ་པའི་རེའུ་མིག་དགུར་བྱས་ལ། དབུས་སུ་རྣམ་པར་སྣང་མཛད་ཀྱི་ཕྱག་རྒྱ་འཁོར་ལོ་འཇོམས་པ་ལ་འབུར་དུ་

བཏོད་ནས་བྲི། འཇིག་རྟེན་ལས་འདས་པའི་སྣམ་བུ་གཉིས་ནི་སེམས་དཔའ་བསྐལ་བཟང་ཤིང་སྣམ་བར་དུ་བཅུག་པ་ནི། འཇིག་རྟེན་པ་ཕྲག་དོག་ཆེ་བའི་ཕྱིར་རམ། འཇིག་རྟེན་དང་འཇིག་རྟེན་ལས་འདས་པ་ངོ་ཤེས་པའི་ཕྱིར་གཞག །འཇིག་རྟེན་པའི་སྣམ་བུ་གཉིས་
ནི། བར་མ་ཕྱོགས་སྐྱོང་བཅུ་དང་བཀྲ་ཤིས་བརྒྱད། ཐ་མ་གཙུག་ལག་ཁང་གི་སྲུང་མ་དང་། གཟའ་དང་རྒྱུ་སྐར་དང་། རྒྱལ་པོ་བཞི། དེ་རྣམས་བྲི་བའི་དགོས་ཆེད་ནི། བཅོམ་ལྡན་འདས་ཀྱི་བཀའ་སྲུང་དང་། རང་གི་འཁོར་གྱི་གདུག་པ་ཞི་བར་བྱ་བའི་ཕྱིར་དང་། འཇིག་རྟེན་
པའི་མངོན་རྟོགས་སྟོན་པའི་ཕྱིར་བྲི། ད་ནི་མཆོད་པའི་རྒྱན་ཆས་སྟོན་ཏེ། ཅིའི་ཕྱིར་ཞེ་ན། བྱ་དང་བུམ་པ་གང་བ་གཞག །ཅེས་པ་དང་། ཁུང་བུའི་དབུས་སུ་གཞག་པར་བྱ། །ཞེས་པའི་བར་ནི། འཁོར་བའི་ཉེ་གནས་ལ་ཕན་འདོགས་པའི་རྟགས་དངུལ་གྱི་བྱ་ཕོ་བཅུ་དྲུག་
དང་། ཆོས་ཀྱི་དབྱིངས་ཀྱི་ཡེ་ཤེས་ཀྱི་རྟགས་གསེར་གྱི་བུམ་པ་ལྔ་དང་། ཐབས་དང་ཤེས་རབ་ཟུང་དུ་འབྲེལ་པའི་རྟགས་གཏོར་མ་དང་། ཁམས་གསུམ་ཚིམ་པར་བྱ་བའི་ཕྱིར། བཟའ་བ་དང་བཅའ་བ་སྣ་ཚོགས་པ་དང་། བྱང་ཆུབ་ཀྱི་ཡན་ལག་ལ་མེ་ཏོག་སྣ་ཚོགས་པ་དང་། ཐུགས་
རྗེ་རྒྱུན་མི་འཆད་པའི་ཕྲེང་བ་དང་། ཁམས་གསུམ་གྱི་བླ་མར་གྱུར་པས་བླ་རེ་དང་། ཉོན་མོངས་པའི་བདུད་ལས་རྒྱལ་བའི་རྟགས་རྒྱལ་མཚན་དང་། ཏིང་ངེ་འཛིན་སྣ་ཚོགས་དང་ལྡན་པའི་རྟགས་དར་སྣ་ཚོགས་པ་དང་། ཉོན་མོངས་པའི་ཚ་བས་གདུང་བ་ལས་བསིལ་བའི་གདུགས་དང་།
ཏིང་ངེ་འཛིན་ལ་ཤེས་པ་རྩལ་སྦྱོང་བ་དང་། དམ་རྫས་དང་ལྡན་པར་བྱ་བ་སྟེ། སྔགས་དང་ཕྱག་རྒྱས་བྱིན་གྱིས་བརླབ་ཅིང་། ཡེ་ཤེས་ཀྱི་འོད་ཟེར་དམིགས་ནས་བསྲེག་རྫས་དང་། མཆོད་རྫས་ལ་སོགས་པ་ཀུན་ནི། འཕགས་པ་མཉེས་པར་བྱ་བ་དང་། དངོས་གྲུབ་ཐོབ་པའི་རྟགས་སུ་ཁུང་
བུའི་དབུས་སུ་གཞག །ད་ནི་རོ་བྱིན་གྱིས་བརླབ་ཅིང་རྒྱས་གདབ་པ་སྟོན་ཏེ། ཅིའི་ཕྱིར་ཞེ་ན། རོ་ལ་སྔགས་ཀྱིས་བཏབ་ནས་ཀྱང་། །ཆུ་མཆོག་གིས་ནི་བཀྲུ་བར་བྱ། །ཞེས་པ་ནི། རོ་ནི་རྒྱུ་འབྲས་ཀྱི་ཚུལ་གོང་དུ་སྨོས་པའོ། །སྔགས་ནི་རིགས་རྣམ་པ་ལྔའི་སྐུ་བསྐྱེད་པ་དང་།

སྙིང་པོ་དང་། ཉེ་བའི་སྙིང་པོ་དང་ལྔ་སྟེ་བཅོ་ལྔའོ། །སྟོང་པར་བསྒོམ་པ་དང་། རྡོ་རྗེ་བསྒོམ་པ་གཉིས་ཏེ་བཅུ་བདུན་ནོ། །བཏབ་ནས་ཀྱང་ནི། ཕྱིའི་བཏབ་པ་ནི་ལུས་ལ་བཏབ་པ་དང་། ནང་གི་བཏབ་པ་ནི་ཡིག་འབྲུ་སྟེ། དེ་རྣམས་སྤྲུལ་པ་རོ་ལ་བསྟིམས་ནས་དངོས་པོ་མེད་
པར་བསྒོམ་པའོ། །ཆུ་ནི་བུམ་པའི་ནང་གི་ཆུ་སྟེ། དྲི་ཞིམ་པོ་ལ་སོགས་པ་གཞུང་ནས་འབྱུང་བ་རྣམས་སྦྱར་རོ། །མཆོག་ནི་སྙིང་པོ་བཅུ་བདུན་གྱིས་བྱང་ཆུབ་སེམས་ཟླ་བའི་མཎྜལ་དུ་གྱུར་པར་བསྒོམ་པའོ། །བཀྲུ་བར་བྱ་བ་ནི་རྣམ་པ་གཉིས་ཏེ། ཕྱིའི་བཀྲུ་བ་བུམ་པའི་ཆུས་
འཁྲུ་བ་དང་། ནང་གི་བཀྲུ་བ་ཏིང་ངེ་འཛིན་གྱི་འཕྲོ་འདུས་དག་པར་བྱེད་པའི་ཐ་ཚིག་གོ། །བཟླས་པ་དྲི་ཡིས་བྱུག་པར་བྱ། །ཞེས་པ་ནི། ཏིང་ངེ་འཛིན་གྱི་བཟླས་པ་དང་། ཡིག་འབྲུ་དང་འཕྲོ་འདུའི་བཟླས་པའོ། །དྲི་གུར་གུམ་ལ་སོགས་པས་ལུས་ལ་བྱུག་པ་དང་། ཚུལ་ཁྲིམས་
ཀྱི་དྲིས་བྱིན་གྱིས་བརླབས་པའི་ཐ་ཚིག་གོ། །གོས་དང་རྒྱན་གྱིས་ཀླུབས་ནས་ཀྱང་། །ཞེས་པ་ནི། གོས་ནི་སྔགས་མཁན་གྱི་ཆས་གོས་དང་། རོའི་གོས་ནི་ཕྲིན་ལས་རྣམ་པ་བཞིའི་ལས་གང་བྱེད་པའི་ཚུལ་དུ་བྱས་ལ། རྒྱན་ནི་སྐུ་བྲེའུ་ལྡིར་གྱི་ཅོད་པན་གྱི་རྒྱན་ལ་སོགས་པ་བཏགས་པ་
དང་། ཀླུབས་ནི་མང་བ་དང་མཛེས་པའི་ཐ་ཚིག་གོ། །ད་ནི་རོ་ལ་སྔགས་ཀྱིས་བྱིན་གྱིས་བརླབ་ཅིང་གདགས་པའི་དོན་ཏེ། ཅིའི་ཕྱིར་ཞེ་ན། སྔགས་བྲིས་པ་ནི་གདགས་པར་བྱ། །ཞེས་འབྱུང་སྟེ། སྔགས་ནི་ལྷ་སོ་སོའི་ཡིག་འབྲུའོ། །བྲིས་པ་ནི་གྲོ་གའམ་ཤོག་ཤོག་ལ་བྲིའོ། །
གདགས་པ་ནི་ལུས་ལ་གདགས་པའོ། །དེའི་གནས་གང་ཡིན་ཞེ་ན། སྙིང་ག་ལྐོག་མ་ཁ་ཕྱོགས་དང་། །དཔྲལ་བ་མཛོད་སྤུ་རྣ་བ་གཉིས། །མགོ་བོ་གཙུག་ཕུད་དཔུང་པ་གཉིས། །སྣ་དང་རྐེད་པ་པུས་མོ་བོལ། །ལོང་བུ་སྣ་ཡི་རྩེ་མོ་དང་། །མིག་གཉིས་དང་ནི་གསང་བའི་གནས། །
དབང་པོ་རྣམས་ཀྱི་གནས་དག་ཏུ། །ཞེས་གསུངས་ཏེ། དེ་བཞིན་གཤེགས་པའི་ཡང་དག་པའི་ཡེ་ཤེས་ཀྱིས། མཚན་མ་རྣམས་གཞོམ་པར་བྱ་བའི་ཕྱིར། དེའི་གནས་ནི་བཅུ་བདུན་ཡོད་དེ། རྟེན་འབྲེལ་བཅུ་གཉིས་དང་། དེ་ལས་བྱུང་བ་ལྔ་སྟེ། དེ་རྣམས་ནི་ཐུགས་ཀྱི་ངོ་བོར་སྦྱར་

བའི་ཕྱིར་རོ། །དེ་མཚོན་པའི་གནས་ནི་ལུས་ཏེ། ཅིའི་ཕྱིར་ཞེ་ན། སྔོན་གྱི་བག་ཆགས་ཀྱིས་བསྐྱེད་པའི་རང་བཞིན་ཡིན་པས་སེམས་རྟེན་པའི་གཞི་བྱེད་པས། ལུས་ཐམས་ཅད་ཀྱི་རང་བཞིན་ནི་མགོ་བོ་སྟེ། དེ་བཞིན་དུ་མ་རིག་པ་ནི་ཉོན་མོངས་པ་ཐམས་ཅད་ཀྱི་
རང་བཞིན་ཏེ། ཅིའི་ཕྱིར་ཞེ་ན། མ་རིག་པ་མི་ཤེས་པའི་དབང་གིས་དེ་བཞིན་ཉིད་དང་། ཡང་དག་པའི་མཐའ་དང་། རྒྱུ་དང་འབྲས་བུ་ལ་མགོ་རྨོངས་པའི་ཕྱིར་རོ། །དེ་འཇོམས་པའི་སྔགས་ནི། རིན་ཆེན་མེ་ཏོག་གི་ཉེ་བའི་སྙིང་པོ་སྟེ། ཨོཾ་སརྦ་བིད་ཧཱུཾ་ཕཊ། དེ་མགོ་ལ་གདགས་
ཤིང་བྱིན་གྱིས་བརླབས་པ་ཚུལ་བཞིན་བྱའོ། །དཔུང་པ་ནི་ལས་ཀྱི་འདུ་བྱེད་ལ་རྩོལ་བར་བྱེད་པའི་རྒྱུ་ཡིན་པས་ན། དཔེ་དེ་དང་འདྲ་བར་མ་རིག་པ་མགོ་རྨོངས་པས་ན། ཕྱིའི་ཡུལ་རྣམས་ལ་འདོད་ཆགས་ལ་སོགས་པའི་ཉོན་མོངས་པ་སྐྱེ་བ་ནི་མངོན་པར་འདུ་བྱེད་པའི་ཕྱིར་ན་འདུ་བྱེད་
པའོ། །དེ་སྦྱོང་བའི་ཕྱིར་ཤཱཀྱ་ཐུབ་པའི་ཉེ་བའི་སྙིང་པོ་སྟེ། ཨོཾ་སརྦ་བིད་ཨཿ། དཔུང་པ་ལ་གདགས་ཏེ་གཉིས་སུ་མེད་པར་བྱིན་གྱིས་བརླབ་པའི་དོན་ཏོ། །སྙིང་ནི་ཁྱད་པར་དུ་ཡང་ཤེས་པའི་རང་བཞིན་གནས་པའི་ཡིན་ཏེ། དེ་བཞིན་དུ་རྣམ་པར་ཤེས་པ་ནི། འདུ་བྱེད་ཀྱི་རྐྱེན་གྱིས་
སོ་སོའི་སྤྲུལ་པ་རྣམ་པར་རིག་ཅིང་མ་འདྲེས་པར་མཆོད་པ་དང་། བདག་གིར་འཛིན་པའི་ཕྱིར་ཏེ། དེ་འཇོམས་པའི་ཕྱག་རྒྱ་ནི་རྣམ་པར་སྣང་མཛད་ཀྱི་སྙིང་པོ་སྟེ། ཨོཾ་ཤོ་དྷ་ནི་ཤོ་དྷ་ནི་སརྦ་པཱ་པཾ་བི་ཤོ་དྷ་ནི། ཤུདྡྷེ་བི་ཤུདྡྷེ་སརྦ་ཀརྨ་ཨཱ་བ་ར་ཎ་བི་ཤུདྡྷེ་སྭཱ་ཧཱ། སྙིང་གར་བཏགས་ནས་
བྱིན་གྱིས་བརླབ་པའི་དོན་ཏོ། །རྐེད་པ་ནི་དང་པོ་ཕུང་པོ་སྐྱེ་བའི་རྒྱུ་བྱེད་པའི་རྟེན་ལྟེ་བའི་ཐད་ཀ་ནས་མ་ཟོས་པའི་དྲོད་ཀྱིས་རེག་པས་འཚོ་བར་བྱེད་པས་ན་ལུས་བྱིན་གྱིས་བརླབ་བོ། །དེ་བཞིན་དུ་རྣམ་པར་ཤེས་པའི་རང་བཞིན་ལ་ལས་ཀྱི་བག་ཆགས་བསྒོས་ཤིང་སྨོན་པས་ལྷན་ཅིག་
སྐྱེས་པའི་ཉེ་བར་ལེན་པའི་ཕུང་པོ་ནི་མིང་དང་གཟུགས་འདི་འགྲུབ་སྟེ། དེ་འཇོམས་པའི་ཕྱག་རྒྱ་ནི་རྣམ་པར་སྣང་མཛད་ཀྱི་སྐུ་བསྐྱེད་པའི་ས་བོན་ཏེ། ཨོཾ་སརྦ་བིད་ཨོཾ། རྐེད་པར་བྱིན་གྱིས་བརླབ་ཅིང་གདགས་པའི་དོན་ཏོ། །རྣ་བའི་དབང་པོ་གྲོ་ག་གཅུས་ཏེ་བཅད་པ་འདྲ་བ་ནི་རྣམ་

པར་ཤེས་པ་སྐྱེ་ཞིང་འབྱུང་བའི་གཞི་བྱེད་ལ། དཔེར་ན་རྒྱུ་མིང་དང་གཟུགས་ལ་བརྟེན་པའི་དབང་པོ་རྣམས་ནི་སྐྱེ་མཆེད་དྲུག་སྟེ། དེ་འཇོམས་པ་ནི། ཀུན་རིག་གི་ཉེ་བའི་སྙིང་པོ་སྟེ། ཨོཾ་སརྦ་བིད་སརྦ་ཨཱ་བ་ར་ཎ་བི་ཤོ་དྷ་ཡ་ཧ་ན་ཧཱུཾ་ཕཊ། རྣ་བ་གཉིས་ལ་གདགས་ཤིང་གཉིས་སུ་མེད་
པར་བྱིན་གྱིས་བརླབ་པའི་དོན་ཏོ། །སྣའི་དབང་པོ་ཟངས་མའི་མོ་ཁབ་གཤིབས་པ་དང་འདྲ་བ་སྟེ། ཡུལ་ལ་བརྟེན་ནས་རྣམ་པར་ཤེས་པ་བྱུང་ནས་ཡུལ་ཉམས་སུ་མྱོང་བའི་དོན་ཏེ། དེ་བཞིན་དུ་ཡུལ་དང་དབང་པོ་དང་། རྣམ་པར་ཤེས་པ་གསུམ་འདུས་ནས། ཉམས་སུ་མྱངས་ནས་
ཕྲད་པ་ནི་རེག་པའོ། །དེ་འཇོམས་པ་ནི་མེ་ཏོག་ཆེར་རྒྱས་ཀྱི་ཉེ་བའི་སྙིང་པོ་སྟེ། ཨོཾ་སརྦ་བིད་ཏྲ་ཐ། སྣ་ལ་བཏགས་ལ་བྱིན་གྱིས་བརླབས་ནས་གཉིས་སུ་མེད་པར་བྱ་བའི་དོན་ཏོ། །དཔྲལ་བའི་ངོ་བོ་ནི་བཀྲག་མདངས་འབྱུང་བའི་རང་བཞིན་གྱི་གཞི་སྟེ། དེ་བཞིན་དུ་རེག་པས་ཡུལ་
དང་ཕྲད་པར་གྱུར་པའི་ཚེ། ཚེ་རབས་ཡུལ་གྱི་བདེ་སྡུག་ཉམས་སུ་མྱོང་བ་ནི་ཚོར་བ་སྟེ། དེ་འཇོམས་པའི་ཕྱག་རྒྱ་ནི། མེ་ཏོག་ཆེར་རྒྱས་ཀྱི་སྙིང་པོ་སྟེ། ཨོཾ་སརྦ་བིད་ཏྲ་ཐ། དཔྲལ་བར་བཏགས་ནས་བྱིན་གྱིས་བརླབ་པའི་དོན་ཏོ། །ཁ་ནི་ཟས་ལ་སོགས་པ་ལ་སྲེད་པའི་རང་བཞིན་
གྱི་རྒྱུ་བྱེད་པས་ན། དེ་བཞིན་དུ་ཚོར་བས་ཡུལ་གྱི་བདེ་སྡུག་ཉམས་སུ་མྱོང་ནས་ཕུང་པོ་ལྔ་ལ་མངོན་པར་ཞེན་པས་ནི་སྲེག་པའོ། །དེ་འཇོམས་པའི་ཕྱག་རྒྱ་ནི་ཤཱཀྱ་ཐུབ་པའི་སྙིང་པོ་སྟེ། ཨོཾ་སརྦ་ཨ་པ་ཡ་བི་ཤོ་དྷ་ཡ་ཧཱུཾ་ཕཊ། ཤཱཀྱ་ཐུབ་པའི་སྙིང་པོ་སྙིང་གར་བཏགས་ལ་བྱིན་གྱིས་བརླབ་
པའི་དོན་ཏོ། །པུས་མོ་ནི་བརྐྱང་བ་དང་། བསྐུམ་པའི་རྒྱུ་བྱེད་དེ། པུས་ཚིགས་ཏེ། དེ་བཞིན་དུ་སྲེད་པས་ཡུམ་གྱི་རྣམ་པར་ཤེས་པ་ལ་འཕེལ་ཞིང་འབྱུང་བའི་རྐྱེན་གྱིས་ལེན་པ་སྟེ། མེ་ཏོག་ཐུ་བ་ལྟ་བུ་སྟེ། ཡུལ་ལ་བདག་ཏུ་ཞེན་པའི་དོན་ཏོ། །དེ་འཇོམས་པ་ནི་ངན་སོང་སྦྱོང་བའི་
སྐུ་བསྐྱེད་པའི་སྙིང་པོ་སྟེ། ཨོཾ་སརྦ་བིད་སྭ། པུས་མོ་གཉིས་ལ་གཏགས་ལ་གཉིས་སུ་མེད་པར་བྱིན་གྱིས་བརླབ་པའི་དོན་ཏོ། །རྐང་པའི་བོལ་ནི་ཕུང་པོ་འདྲེན་ཅིང་མགྱོགས་པར་བྱེད་པའི་གཞི་བྱེད་པ་སྟེ། དེ་བཞིན་དུ་ཡུལ་ལ་ལེན་པས་བདག་ཏུ་གཟུང་བས་ལས་ཀྱིས་མའི་

མངལ་དུ་འཕངས་ནས། སྲིད་པའི་གཞི་བསྒྲུབ་པའི་ས་བོན་འབྱིན་པས་སྲིད་པའོ། །དེ་འཇོམས་པ་ནི་རིན་ཆེན་མེ་ཏོག་གི་སྐུ་བསྐྱེད་པའི་སྙིང་པོ་སྟེ། ཨོཾ་སརྦ་བིད་ཨ། རྐང་པའི་བོལ་གཉིས་ལ་བཏགས་ནས་གཉིས་སུ་མེད་པར་བྱིན་གྱིས་བརླབ་པའི་དོན་ཏོ། །
གསང་བའི་གནས་ནི་སེམས་ཅན་སྐྱེ་བའི་རྒྱུ་ས་བོན་འབྱུང་བའི་གནས་ཏེ། དེ་བཞིན་དུ་སྲིད་པས་སྲིད་ཅིང་རྟས་པར་བྱེད་པས་ཕུང་པོ་སྨིན་ཅིང་མའི་མངལ་ནས་བྱུང་ནས་ཕྱིར་འབྱུང་བ་ནི་སྐྱེ་བའོ། །དེ་འཇོམས་པ་ནི་རྡོ་རྗེའི་བསྒོམ་པ་སྟེ། ཨོཾ་བྷ་གསང་བའི་གནས་སུ་གདགས་ཏེ། གཉིས་
སུ་མེད་པར་བྱིན་གྱིས་བརླབ་པའི་དོན་ཏོ། །གཙུག་ཕུད་ནི་རྒས་པའི་རྟགས་ཏེ། ཅིའི་ཕྱིར་ཞེ་ན། སྐྲ་དཀར་པོར་གྱུར་པའི་རྟགས་སོ། །དེ་བཞིན་དུ་སེམས་ཅན་རྣམས་ལས་ཀྱིས་རབ་ཏུ་བསྐྱེད་ནས། ཕུང་པོ་སྨིན་ཅིང་མཐར་ཐུག་པའི་རྒས་པ་སྟེ་དེ་བདག་པོའོ། །དེ་འཇོམས་
པ་ནི་མེ་ཏོག་ཆེར་རྒྱས་ཀྱི་སྐུ་བསྐྱེད་པའི་སྙིང་པོ་སྟེ། ཨོཾ་སརྦ་བིད་ཏྲ་ཐ། གཙུག་ཕུད་དུ་བཏགས་ཏེ་གཉིས་སུ་མེད་པར་བྱིན་གྱིས་བརླབ་བོ། །ལྐོག་མ་ནི་དབུགས་ཕྱི་ནང་གཉིས་སུ་རྒྱུ་བའི་རྟེན་སྲོག་གི་གཟུངས་ཡིན་པས་དེ་བཞིན་དུ་དང་པོ་སྐྱེ་བའི་རྐྱེན་གྱིས་རྒས་ནས་ཁམས་
རབ་ཏུ་འགྱུར་ནས། ནད་ཀྱི་རྣམ་པ་སྣ་ཚོགས་ཕུང་པོ་རྣམ་པར་མི་བཟོད་པའི་སྡུག་བསྔལ་སྣ་ཚོགས་པས་གཟིར་ཏེ། འཇིག་པ་ནི་འཆི་བའོ། །དེ་འཇོམས་པའི་ཕྱག་རྒྱ་ནི། རིན་ཆེན་མེ་ཏོག་གི་སྙིང་པོ་སྟེ། ཨོཾ་ཤོ་དྷ་ནི་ཤོ་དྷ་ནི་སརྦ་ཨ་པ་ཡ་ན་སརྦ་སྭ་རྒྱེ་བྷྱ་ཧཱུཾ། རིན་ཆེན་མེ་
ཏོག་གི་སྙིང་པོ་སྟེ། ལྐོག་མར་བཏགས་ལ་བྱིན་གྱིས་བརླབ་བོ། །ལོང་བུ་ནི། རྐང་པའི་ཚིགས་གནས་པའི་གཞི་སྟེ། དེ་བཞིན་དུ་རབ་ཏུ་འཆིང་བར་མྱོས་ཏེ། སེམས་ཅན་མངོན་པར་ཆགས་པ་དང་བཅས་ཏེ། གང་གིས་སེམས་རབ་ཏུ་གདུང་བའི་མྱ་ངན་ནོ། །དེ་འཇོམས་
པའི་ཕྱག་རྒྱ་ནི་ཤཱཀྱ་ཐུབ་པའི་སྐུ་བསྐྱེད་པ་སྟེ། ཨོཾ་སརྦ་བིད་ཧཱུཾ། ལོང་བུ་ལ་བཏགས་ལ་གཉིས་སུ་མེད་པར་བྱིན་གྱིས་བརླབ། མིག་ནི་ཡུལ་སྣ་ཚོགས་པ་མཐོང་བའི་རྒྱུ་མིག་གི་དབང་པོ་ཆུ་དང་བ་ལྟ་བུ་སྟེ། དེ་བཞིན་དུ་མྱ་ངན་གྱི་སེམས་རབ་ཏུ་གདུངས་ཏེ་ཤིན་ཏུ་མྱོས་ཏེ། ཚིག་

རྣམ་པ་སྣ་ཚོགས་སུ་སྨྲེ་སྔགས་འདོན་པ་ནི་སྨྲེ་སྔགས་འཇོམས་པའི་ཕྱག་རྒྱ་ནི་སྟོང་པར་བྱིན་གྱིས་བརླབ་པའི་སྔགས་ཏེ། ཨོཾ་ཤ་མིག་ལ་བཏགས་ལ་བྱིན་གྱིས་བརླབ་བོ། །མཛོད་སྤུ་ནི་ངོའི་བཀྲག་སྐྱེ་བའི་གནས་ཏེ། དཔེ་དེ་དང་འདྲ་བར་ནི། ནང་གི་རྣམ་པར་ཤེས་པའི་ཚོགས་
ལྔ་དང་། ལྷན་ཅིག་ཏུ་སྡུག་བསྔལ་སྣ་ཚོགས་མྱོང་སྟེ་རབ་ཏུ་ཉོན་མོངས་པས་གཟིར་བ་ནི། སྡུག་བསྔལ་གསུམ་དང་རྒྱུད་ཀྱི་རྒྱུ་སྟེ། དེ་འཇོམས་པའི་ཐབས་ཀྱི་ཕྱག་རྒྱ་ནི། ངན་སོང་སྦྱོང་བའི་ཉེ་བའི་སྙིང་པོ་སྟེ། ཨོཾ་སརྦ་བིད་ཧཱུཾ། མཛོད་སྤུ་ལ་བཏགས་ལ་གཉིས་སུ་མེད་པར་བྱིན་
གྱིས་བརླབ་བོ། །སྣའི་རྩེ་མོ་ནི། སྣ་ནི་རྣམ་པར་ཤེས་པ་སྐྱེ་བའི་རྒྱུ་བྱེད་དེ། དཔེ་དེ་དང་འདྲ་བར་སྡུག་བསྔལ་གྱིས་སེམས་གཟིར་ཅིང་ཉོན་མོངས་པའི་ཚེ། ཡིད་མི་བདེ་བའི་འཁྲུལ་པ་སྣ་ཚོགས་ཉམས་སུ་མྱོང་བར་གྱུར་ནས། ཉོན་མོངས་པའི་སྡུག་བསྔལ་སྣ་ཚོགས་པས།
རང་གི་སེམས་གཟིར་ཅིང་ཡིད་འཁྲུལ་པ་ནི་ཡིད་མི་བདེ་བའོ། །དེ་འཇོམས་པའི་ཕྱག་རྒྱ་ནི་ངན་སོང་སྦྱོང་བའི་སྙིང་པོ་སྟེ། སྣའི་རྩེ་མོ་ལ་བཏགས་ལ་གཉིས་སུ་མེད་པར་བྱིན་གྱིས་བརླབ་བོ། །སྙིང་པོ་བཅུ་བདུན་དུ་སྨོས་པ་ནི། སྟོང་པར་བསྒོམ་པ་རིག་པའི་ཡེ་ཤེས་སོ། །དབྱིངས་
དང་ཡེ་ཤེས་ཀྱི་ཁྱད་པར་ལས། རིགས་ལྔའི་སངས་རྒྱས་འབྱུང་བའི་རྒྱུ་ཡིན་པའི་ཕྱིར་ཡང་སྨོས་སོ། །སེམས་ཅན་ཕྱི་གཟུང་བའི་ཡུལ་མེད་པ་ལ། ཡུལ་དུ་ལྟ་བའི་གཉེན་པོ་ནི། སྟོང་པར་བསྒོམ་པ་སྨོས་ལ། ནང་འཛིན་པའི་སེམས་མེད་པ་ལ་བདག་ཏུ་ལྟ་བའི་གཉེན་པོར་ནི་རྡོ་རྗེ་
བསྒོམ་པ་སྨོས་སོ། །ཕྱི་ལ་བཅོ་ལྔ་ཡོད་པ་ནི་རྣམ་པ་གསུམ་དུ་བསྡུས་ཏེ། ཅིའི་ཕྱིར་ཞེ་ན། དེ་ལྟར་གཞན་དུ་ཡི་གེ་སྔགས། །ཞེས་གསུངས་ཏེ། དེ་ལྟར་གོང་གི་ཡིག་འབྲུ་དགོད་པའི་བྱེ་བྲག་ལ་བྱ་བ་ཡིན་ལ། གཞན་དུ་ནི་འགྲོ་བ་གཞན་གྱི་དོན་ཆེད་དུ་འདི་ལྟར་དུ་ཡང་སྦྱར་བ་ཞེས་
པའི་ཐ་ཚིག་སྟེ། ཅིའི་ཕྱིར་ཞེ་ན། ཡི་གེ་ནི་མཚོན་པར་བྱེད་པའི་རྒྱུ་བྱང་ཆུབ་ལ་བྲི་བར་བྱེད་པ་ཡིན་ལ། སྔགས་ནི་རིག་པའི་ཁྱད་པར་དུ་བསྟན་པ་ཡིན་ཏེ། དེ་ཡང་རྣམ་པ་གསུམ་སྟེ། བྱང་ཆུབ་ཀྱི་སེམས་རྟོགས་པའི་ཁྱད་པར་ལས་ནི་སྙིང་པོ་རྣམ་པ་ལྔར་བསྟན་ལ། བྱང་ཆུབ་

སེམས་ཀྱི་འབྲས་བུ་བླ་ན་མེད་པ་ཐོབ་ཅིང་། སྦྱིན་པའི་རྒྱུ་བྱེད་པས་ཉེ་བའི་སྙིང་པོ་སྔར་བསྟན་ལ། འབྲས་བུ་ངོ་བོར་གཞག་པའི་ཕྱིར་ནི། སྐུ་བསྐྱེད་པ་ལྔ་བསྟན་ལ། དེ་ལ་སྙིང་པོ་ནི། རྒྱུའི་དོན་ཏོ། །ཉེ་བའི་སྙིང་པོ་ནི་རྐྱེན་སྙིང་པོ་འཕགས་པའི་ཡེ་ཤེས་ཀྱི་དོན་ཏོ། །
སྐུ་བསྐྱེད་པའི་འབྲས་བུ་བླ་ན་མེད་པ་འགྲོ་བ་ལ་བསྟན་པའི་ཐ་ཚིག་གོ། །དེ་ལ་སྙིང་པོ་བྱང་ཆུབ་ཀྱི་སེམས་རྒྱུ་རྣམ་པ་ལྔས་ནི་ངན་སོང་རྒྱུས་ཉོན་མོངས་པ་རྣམ་པ་ལྔ་ནི་ངན་སོང་གི་ཉོན་མོངས་པ་རྣམ་པ་ལྔ་འཇོམས་པའི་ཕྱག་རྒྱའོ། །རྐྱེན་གཉེན་པོ་ཡེ་ཤེས་ཀྱི་བརྩོན་འགྲུས་ཉེ་བའི་སྙིང་པོ་རྣམ་
པ་ལྔ་ནི། ངན་སོང་དུ་སྐྱེ་བའི་ལམ་རྒྱུད་ལྔ་འཇོམས་པའི་དོན་ཏོ། །སྐུ་བསྐྱེད་པ་རྣམ་པ་ལྔས་ནི། ངན་སོང་གི་རྟེན་ཕུང་པོ་རྣམ་པ་ལྔ་བཤིག་ཅིང་འཇོམས་པའི་ཐ་ཚིག་གོ། །དེ་ཡང་ཅིའི་ཕྱིར་ཞེ་ན། མཆོག་ཏུ་དགེ་བ་རྣམ་གཞག་གོ། །ཞེས་གསུངས་ཏེ། མཆོག་ནི་ཐུགས་ཀྱི་ཡིག་
འབྲུ་རྣམས་ལ་བྱ་སྟེ། ཅིའི་ཕྱིར་ཞེ་ན། ཡོན་ཏན་གྱི་མཆོག་ཏུ་གྱུར་པའི་ཕྱིར་རོ། །དགེ་བའི་ཐབས་ཏེ་གོང་དུ་གསུངས་པ་ལྟར། ངན་སོང་གི་རྒྱུ་ལམ་དང་རྟོག་པ་བཅོམ་ནས་དེ་དགེ་བ་ལ་དགོད་པའི་ཐ་ཚིག་གོ། །དེ་བས་ན་གཞག་ཅེས་སྨོས་པའི་ཕྱིར་རོ། །སྔགས་ཀྱི་ཡིག་འབྲུ་
བཏགས་པའི་དོན་བསྟན་ཟིན་ཏོ། །ད་ནི་རོ་ཤིང་སྟེང་དུ་གཞག་པའི་དོན་ཏེ། ཅིའི་ཕྱིར་ཞེ་ན། དེ་ནས་ངན་སོང་སྦྱོང་བའི་ཕྱིར་ཞེས་སྨོས་སོ། །དེ་ནས་ནི་སྐབས་ཀྱི་རྟིང་ཐོགས་སོ། །ངན་པ་ནི་ཉོན་མོངས་པ་སྟེ་རྒྱུའོ། །སོང་བ་ནི་འབྲས་བུ་སྟེ་ཁམས་གསུམ་དུ་འཁོར་བའོ། །སྦྱོང་བ་ནི་རྒྱུ་རྡོ་རྗེ་ལྟ་བུའི་ཏིང་ངེ་འཛིན་གྱིས་
སྦྱང་བ་དང་། རྐྱེན་གཉེན་པོས་འཕགས་པའི་ཡེ་ཤེས་ཀྱི་འཕྲོ་འདུས་སྦྱང་བ་དང་། ངན་སོང་གི་འབྲས་བུ་འོད་ཟེར་གྱི་ཕྲེང་བས། སྐུའི་ས་བོན་གྱིས་སྦྱང་བ་དང་གསུམ་མོ། །ཅིའི་ཕྱིར་ཞེ་ན། སྟན་དང་བཅས་པས་དེ་དབུས་སུ། །གཞག་པ་ཉིད་དུ་བྱ་བ་ཡིན། །ཞེས་གསུངས་ཏེ། སྟན་ནི་རྣམ་པ་གཉིས་ཏེ། ཕྱི་རོལ་
དང་ཆོས་མཐུན་པར་བྱ་བའི་ཕྱིར་ན། ཤིང་གི་སྟེང་དུ་པདྨ་འདབ་མ་བརྒྱད་པ་བྱ་བ་དང་། ཏིང་ངེ་འཛིན་དང་འབྲེལ་པའི་ཕྱིར་ནི། པཾ་ལས་པདྨ་འདབ་མ་བརྒྱད་པ་མཾ་ལས་ཉི་མའི་དཀྱིལ་འཁོར་ལ་སོགས་པའི་ཏིང་ངེ་འཛིན་གྱིས་བསྒོམ་པའི་ཐ་ཚིག་གོ། །བཅས་ཞེས་བྱ་བ་ནི། སྟན་སྟེང་དུ་གཞག་པའི་ཐ་

ཚིག་གོ། །དབུས་ནི་ཕོ་བྲང་དཀྱིལ་འཁོར་དུ་ཁྱེར་བའི་དོན་ཏོ། །གཞག་པ་ནི་དེ་ཉིད་དུ་སྟན་ལ་གཞག་པར་བྱ་བའི་དོན་ཏོ། །རོ་ཉིད་ཀྱང་སྙིང་པོ་ལྔ་བཀོད་པས་ནི་ཉོན་མོངས་པ་རྣམ་པ་ལྔ་དང་བྲལ་ཏེ། ཡེ་ཤེས་རྣམ་པ་ལྔར་བསྒོམས་ལ། ཉེ་བའི་སྙིང་པོ་རྣམ་པ་ལྔར་བཀོད་པས་ནི། ལམ་རྣམ་པ་ལྔ་
སྦྱངས་ཏེ། རིགས་རྣམ་པ་ལྔར་བསྐྱེད་པ་དང་། སྐུ་བསྐྱེད་པ་རྣམ་པ་ལྔ་བསྐྱེད་པས་ནི་ངན་སོང་གི་རྟེན་ཕུང་པོ་ལྔ་བཅོམ་ནས། རིན་པོ་ཆེ་ལྔའི་མཆོད་རྫས་སུ་གྱུར་བ་འམ། རྣམ་པར་གྲོལ་བའི་ཕུང་པོ་ལྔར་གྱུར་པར་བསྒོམས་ནས་བྱ་བ་ཡིན་ཞེས་སྨོས་སོ། །ད་ནི་གོས་ལ་སྔགས་ཀྱིས་གདབ་
ཅིང་མེ་སྦར་བ་སྟོན་ཏེ། དེ་ནས་སྔགས་འཆང་སྔགས་ཀྱིས་ནི། །བཏབ་པའི་གོས་ཀྱིས་གཡོགས་པར་བྱ། །ཞེས་གསུངས་ཏེ། དེ་ནས་ནི་སྐབས་ཀྱི་རྟིང་ཐོགས་སོ། །སྔགས་འཆང་ནི་སྒྲུབ་པ་པོ་ལས་རྡོ་རྗེའོ། །སྔགས་ནི་གཉེན་པོ་ཡེ་ཤེས་ཀྱི་འོད་ཟེར་གོས་ལ་འཕྲོ་བའོ། །བཏབ་པ་ནི་གོས་
ལ་བཏབ་པའོ། །རིགས་ལྔའི་ཡིག་འབྲུས་རིགས་དྲུག་ཁ་དོག་རྣམ་པ་ལྔར་བྱིན་གྱིས་བརླབས་པའི་ཐ་ཚིག་གོ། །གཡོགས་པ་ནི་རོ་ལ་གཡོགས་པའོ། །ད་ནི་མེ་སྦར་བ་སྟོན་ཏེ། དེ་ཅིའི་ཕྱིར་ཞེ་ན། དེ་ནས་བྱིན་ཟ་དགེ་བ་རབ་སྦར་ལ། །ཞེས་གསུངས་ཏེ། དེ་ནས་ནི་སྐབས་ཀྱི་རྟིང་ཐོགས་སོ། །
བྱིན་ཟ་ནི་ཡེ་ཤེས་ཀྱི་ཞལ་ཏེ། སྲེག་ཁང་གཞལ་ཡས་ཁང་ངོ་། །ཅིའི་ཕྱིར་ཞེ་ན། ཡེ་ཤེས་ཀྱིས་ཉོན་མོངས་པ་ཟད་ཅིང་སྟོངས་པར་བྱེད་པའི་ཐ་ཚིག་གོ། །དགེ་བ་ནི་མི་དགེ་བ་འཇོམས་པར་བྱེད་པའི་གཞི་ཡིན་ལ། སྦར་བ་ནི་ཤིང་ལ་མེ་སྦར་བའི་ཕྱིར་ཏེ། ཅིའི་ཕྱིར་ཞེ་ན། མེ་ལྕེ་སྟོང་གིས་དཀྲིས་ཤིང་
འབར་བའི་ལུས། །ཞེས་གསུངས་ཏེ། དེ་ལ་མེ་ནི་ཡེ་ཤེས། ལྕེ་ནི་ཕྲིན་ལས། སྟོང་པ་ནི་སྤྲུལ་པ། དཀྲིས་པ་ནི་ཐུགས་རྗེས་འགྲོ་བའི་དོན་ལ་དཀྲིས་ཤིང་འབྲེལ། འབར་བ་ནི་རང་བཞིན། ལུས་ནི་ལྷ་ཡེ་ཤེས་སེམས་དཔའི་ལུས་སུ། བདག་དམ་ཚིག་སེམས་དཔའ་བསྒོམ་ཞིང་། གཉིས་
སུ་མེད་པར་བྱིན་གྱིས་བརླབ་པའི་ལུས་སོ། །དེ་ནས་སྔགས་པས་མཆོད་རྫས་ནི་གཡོན་དུ་གཞག བསྲེག་རྫས་ནི་གཡས་སུ་གཞག་སྟེ། མེ་ལྷ་ཡེ་ཤེས་སེམས་དཔའ་སྤྱན་དྲངས་ཏེ། མཆོད་པ་སྦྱིན་སྲེག་ནས་འབྱུང་བ་བཞིན་བྱའོ། །ད་ནི་མཎྜལ་གྱི་ལྷ་སྤྱན་དྲངས་པ་སྟོན་ཏེ། ཅིའི་ཕྱིར་ཞེ་ན། དེ་བཞིན་

གཤེགས་སོགས་དེ་ལྟར་སྤྱན་དྲངས་ལ། །ཞེས་གསུངས་ཏེ། དེ་ནི་མ་ནོར་བའི་ཆོས་ཉིད་དོ། །བཞིན་ནི་ཡེ་ཤེས་ཀྱིས་ཕྱིན་ཅི་མ་ལོག་པར་རྟོགས་པའོ། །གཤེགས་པ་ནི་དབྱིངས་ཏེ། ཡེ་ཤེས་ཀྱི་ཁྱད་པར་ལས་རིགས་ལྔའི་སངས་རྒྱས་སུ་འགྲོ་བའི་དོན་ལ་གཤེགས་པའོ། །སོགས་ནི་
འཁོར་དང་བཅས་པའོ། །དེ་ལྟར་མེ་ལ་བྱ་བའི་ཐ་ཚིག་གོ། །སྤྱན་དྲང་བ་ནི། རང་བཞིན་གྱི་མཎྜལ་གྱི་འཕགས་པ་རྣམས་སྤྱན་དྲངས་ལ་བདག་གི་ཏིང་ངེ་འཛིན་བསྐྱེད་པ་ནི། ཆུ་དང་འོ་མ་འདྲེས་པ་ལྟར་གྱུར་ནས། ཡེ་ཤེས་ཀྱི་ཐབ་ཁུང་དུ་རིམ་པར་མཆོད་པ་གོང་ནས་བསྟན་པ་བཞིན་དུ་བྱ་བའི་ཐ་ཚིག་གོ། །
ད་ནི་མེ་བརྟག་པ་སྟོན་ཏེ། དེ་ཅིའི་ཕྱིར་ཞེ་ན། དེ་ནས་བྱིན་ཟ་ལ་ནི་བརྟག་བྱ་བ། །ཞེས་གསུངས་ཏེ། མེ་ལྕེ་ཟླུམ་ལ་འཁྱིལ་པ་ནི། ཆོས་ཀྱི་དབྱིངས་ཀྱི་ཡེ་ཤེས་ཀྱི་རྟགས་སོ། །དཀར་ལ་འཚེར་བ་ནི་མེ་ལོང་ལྟ་བུའི་ཡེ་ཤེས་ཀྱི་རྟགས་སོ། །མེ་ལྕེ་དྲང་པོར་འབར་བ་ནི་སོ་སོར་རྟོག་པའི་ཡེ་ཤེས་ཀྱི་
རྟགས་སོ། །མེ་སྟག་མི་འཕྲོ་བ་ནི་མཉམ་པ་ཉིད་ཀྱི་ཡེ་ཤེས་ཀྱི་རྟགས་སོ། །མེ་ལྕེ་གྱེན་དུ་མི་འཐོར་བར་འབར་བ་ནི་བྱ་བ་ནན་ཏན་གྱི་ཡེ་ཤེས་ཀྱི་རྟགས་སོ། །དེ་འཕགས་པའི་གནས་སྐབས་སོ། །སེམས་ཅན་གྱི་གནས་སྐབས་སུ་སྐྱོན་ཡོན་གཉིས་སུ་བསྟན་ཏེ། ཡོན་ཏན་ལ་ཁ་དོག་དཀར་བར་འབར་བ་
ནི་བག་ཆགས་ཟད་པའི་རྟགས་སོ། །གཡས་སུ་འཁྱིལ་ཞིང་འབར་བ་ནི་འཁོར་བ་ལས་ལྡོག་པའི་རྟགས་སོ། །གྱེན་དུ་འབར་བ་ནི་མཐོ་རིས་སུ་ཕྱིན་པའི་རྟགས་སོ། །དྲི་མ་མེད་པར་འབར་བ་ནི་ཉེ་བཞི་ལ་ཁ་ན་མ་ཐོ་བའི་སྐྱོན་གྱིས་མི་གོས་པའི་རྟགས་སོ། །མེ་ལྕེ་ཟླུམ་ལ་མེ་སྟག་མི་འཕྲོ་བར་འབར་བ་ནི།
ཉེ་བཞི་བཀྲ་ཤིས་པའོ། །མེ་ལྕེ་བརྟེན་ལ་གློག་བཞིན་དུ་དྲི་མ་མེད་པ་ལ་གསལ་བར་འབར་བ་ནི་ནོར་ཕྱུགས་འཕེལ་བའི་རྟགས་སོ། །དེ་ནི་མེའི་ཡོན་ཏན་བརྟག་ཐབས་དྲུག་གོ། །མེའི་སྐྱོན་རྣམ་པ་ལྔ་སྟེ། ཁ་དོག་ཁམ་ལ་མི་གསལ་བར་འབར་བ་ནི། བག་ཆགས་ཀྱི་སྒྲིབ་པ་མ་འབྱོངས་པའི་རྟགས་སོ། །
སྔོ་ལ་སྔོན་ལ་མེ་ལྕེ་གཡོན་དུ་འཁྱིལ་བ་ནི། མཐོ་རིས་སུ་མི་ཐར་བའི་རྟགས་སོ། །མེ་ལྕེ་ཐུར་དུ་འཚུབ་ཅིང་དུ་བ་དང་འདེས་ནས་འབར་བ་ནི། ཉེ་བཞི་ལ་མི་ཁས་བཙོགས་པའི་རྟགས་སོ། །མེ་ལྕེ་འཕྲོ་ཞིང་སྔོ་ནག་ཏུ་འབར་བ་ནི། ནོར་ཕྱུགས་མི་ཆགས་པའི་རྟགས་སོ། །མེ་འཚུབ་ཅིང་རླུང་གིས་

ལྷོ་ཕྱོགས་སུ་བསད་ན་རིམས་ནད་དང་ཡམས་འོང་བའི་རྟགས་སོ། །མེའི་རྟགས་སྐྱོན་རྣམ་པ་ལྔའོ། །ད་ནི་ལས་ཀྱི་ལྷག་ཆད་ཀྱི་ཁ་བསྐང་བ་སྟོན་ཏེ། ཅིའི་ཕྱིར་ཞེ་ན། དེ་ནས་སྤྱན་དྲང་ཡོ་བྱད་གསུམ་མཆོད་ཅེས་གསུངས་ཏེ། དེ་ནས་ནི། གོང་དུ་མཆོད་པ་ཕུལ་བའི་ཕྱི་ནས་བྱ་བར་སྨོས་ལ། སྤྱན་
དྲང་བ་ནི། ལས་ཀྱི་ལྷག་ཆད་ཁ་བསྐང་བའི་ཕྱིར། ཐབ་ཁུང་དུ་རིམ་པར་ལྷ་སྤྱན་དྲང་བའོ། །ཡོ་བྱད་ནི་མཆོད་རྫས་དང་བསྲེག་རྫས་ཐམས་ཅད་དོ། །ལན་གསུམ་ནི། སྐུ་གསུང་ཐུགས་ལ་མཉེས་པར་བྱ་བའི་ཕྱིར། ལྷ་རེ་རེ་ལ་ལན་གསུམ་གསུམ་དབུལ་ལོ། །ད་ནི་མ་གྲུབ་ན་སྤོགས་པའི་ཆོ་
ག་སྟོན་ཏེ། ཅིའི་ཕྱིར་ཞེ་ན། ཕྱག་ན་རྡོ་རྗེ་པདྨའི་ཞགས་པ་བསྣམས། འཇིག་རྟེན་གསུམ་ལས་རྣམ་རྒྱལ་གཟུགས། །ཞེས་གསུངས་ཏེ། ཕྱག་ན་རྡོ་རྗེ་ནི་ཐུགས་ཡང་དག་པའི་ཡེ་ཤེས་ཏེ། ཉོན་མོངས་པའི་སྐྱོན་གྱིས་མ་གོས་པ་ནི། ཕྱག་གཡས་པ་ན་པདྨ་བསྣམས། ཐབས་ཐུགས་རྗེ་
ཆེན་པོས་འཁོར་བ་མི་གཏོང་བའི་ཕྱིར་ནི་ཞགས་པ་བསྣམས། སྦྱིན་སྲེག་གི་གནས་སྐབས་སུ་བསྒོམས་པ་ལ། ད་ནི་རུས་པ་རྡོ་རྗེ་བསྡུ་བ་དང་། མ་གྲུབ་ན་སྤོགས་པའི་ཆོ་ག་བྱ་བའི་ཕྱིར། བདག་ཉིད་དེ་ལས་ལས་ཀྱི་ཁྲོ་བོ་འཇིག་རྟེན་གསུམ་ལས་རྣམ་པར་རྒྱལ་བ། སྐུ་མདོག་སྔོན་པོར་
འདུག་པ། དབུ་རྒྱན་རིགས་ལྔའི་སངས་རྒྱས་ཀྱིས་བརྒྱན་པ་དབུ་གསུམ་ཕྱག་དྲུག །དབུ་གཡས་དཀར་གཡོན་དམར། ཕྱག་གཡོན་དང་པོ་གཉིས་ཧཱུཾ་གིས་མཛུབ་མོ་གཉིས་བསྒྲེང་བ། གཡས་བར་མ་ནི་རྡོ་རྗེ་རྩེ་ལྔ་པ་བསྣམས་པ། གཡས་ཐ་མ་ན་པདྨ་འདབ་བརྒྱད་བསྣམས་པ།
གཡོན་ཐ་མ་ན་ཞགས་པ་བསྣམས་པ། ན་བཟའ་སྟོད་གཡོགས་དང་། སྨད་གཡོགས་ཀྱིས་བརྒྱན་པ། ཐུགས་ཆོས་ཉིད་ལས་མ་གཡོས་པའི་རྟགས་སུ་ནི་ཞབས་གཡས་བསྐུམ་པ། ཕྲིན་ལས་སྣ་ཚོགས་མཛད་པའི་རྟགས་སུ་ནི། གཡོན་བརྐྱང་བ་ལས་པདྨ་འདབ་མ་བརྒྱད་པ་
དཀར་པོའི་གདན་ལ་བཞུགས་པར་བསྒོམ། སྡིག་ཅན་གྱི་རོའམ་བསྲེགས་པའི་ཐལ་བའི་སྟེང་ན་གནོན་ཅིང་བཞུགས་པར་ཏིང་ངེ་འཛིན་གྱིས་བསྒོམ་མོ། །དེ་ནས་ཁམས་གསུམ་རྣམ་པར་རྒྱལ་བའི་སྙིང་པོ་སྟོང་ངམ་བྱེ་བ་ཙམ་བྱ་ཞིང་། སྡིག་ཅན་གྱི་མིང་ངམ་རུས་པ་དང་བསྲེས་ནས་སྦྱིན་སྲེག་བྱས་ན་

འགྲུབ་པར་གསུངས་སོ། །དེ་ནས་རུས་པ་རྡོ་རྗེ་བསྡུ་བའི་སྔགས་ཀྱིས་བསྡུ་བ་སྟོན་ཏེ། ཅིའི་ཕྱིར་ཞེ་ན། དེ་ནས་ཐར་པར་གྱུར་པ་དང་། རྡོ་རྗེ་བསྡུ་བའི་སྔགས་ཀྱིས་ནི། །ཞེས་པ་ནི། དེ་ནས་བདག་ཉིད་ཁམས་གསུམ་རྣམ་པར་རྒྱལ་བའི་ཏིང་ངེ་འཛིན་བསྒོམས་པ་དེས། རུས་
པ་ཉིད་རྡོ་རྗེ་བསྡུ་བའི་སྔགས་ཨོཾ་བཛྲ་ཏི་རིནྟི་ཞེས་བཟླས་ཤིང་རུས་པ་བསྡུ་སྟེ། ཅིའི་ཕྱིར་ཞེ་ན། དེ་ལྟར་མཚན་མ་སྲེག་པ་དེ་ཉིད་ལྷར་དབང་བསྐུར་བའི་ཕྱིར་རོ། །ཆོ་ག་བཞིན་དུ་བསྡུ་བར་བྱ། །ཞེས་གསུངས་ཏེ། ཆོ་ག་ནི་ཐབས་ཞིབ་མོ་སྟེ། བདག་ལྷར་བསྒོམས་པའི་ཆོ་གའོ། །བསྡུ་བ་ནི་རུས་
པ་རིན་པོ་ཆེའི་འབར་བར་བྱས། །རུས་པ་ཉིད་ནོར་བུ་རིན་པོ་ཆེར་བསྒོམ་པའི་ཆོ་ག་དང་སྔགས་ཡིག་འབྲུ་བྱང་ཆུབ་སེམས་ཟླ་བའི་མཎྜལ་དུ་བསྒོམ་པའི་ཆོ་ག་དང་། སྣོད་བྲུཾ་ལས་རིན་པོ་ཆེའི་གཞལ་ཡས་ཁང་དུ་བསྒོམ་པའི་ཆོ་གའོ། །བསྡུ་བ་ནི་རུས་པ་རིན་པོ་ཆེའི་འབར་བར་བྱས་ནས་སྣོད་
དུ་བསྡུ་བ་དང་། རྒྱུ་ཉོན་མོངས་པ་གཉེན་པོ་ཡེ་ཤེས་ཀྱི་སྟོབས་སུ་བསྡུ་བ་དང་། འབྲས་བུ་རིགས་ལྔའི་ངོ་བོར་བསྡུ་བའོ། །དེ་ལྟར་བསྡུས་ནས་སྔགས་མཁན་གྱིས། རྣམ་པར་རྒྱལ་བའི་བུམ་པ་དྲི་ཆུ་དང་། བའི་འོ་མ་དང་ཞོ་དང་མར་དང་། བའི་ལྕི་བ་དང་། གཅིན་དང་ལྔ། དྲི་སྣ་ཚོགས་
དང་བསྲེས་ལ་བཏགས་ཏེ། མཆོད་རྟེན་དུ་བྱས་ནས་སྔགས་དང་ཕྱག་རྒྱ་བརྒྱ་རྩ་བརྒྱད་དང་འབུམ་ཕྲག་གི་བར་དུ་ཏིང་ངེ་འཛིན་དང་བཟླས་པ་བྱ་ཞིང་། དངོས་གྲུབ་ཀྱི་རྟགས་མཆོད་རྟེན་འབར་བ་དང་། ཞལ་འཛུམ་པ་དང་། དྲི་དང་འོད་དང་། རྣམ་པ་སྣ་ཚོགས་ཀྱི་གཟུགས་སྟོན་པ་ནི་བཟང་པོའི་
རྟགས་སོ། །ཅི་སྲིད་མེ་ཏོག་ལ་སོགས་པ་འདོར་བ་དང་། དྲི་མི་ཞིམ་པ་ལ་སོགས་པ་བྱུང་ན་ནི་སྡིག་པའི་མཚན་མ་སྟེ། བདག་ཉིད་མི་ཉལ་བར་ཏིང་ངེ་འཛིན་རྩེ་གཅིག་པར་སྔགས་ཀྱི་ཡིག་འབྲུ་བཟླས་ནས། ལྷའི་གཟུགས་སུ་འགྱུར་ཞིང་བྱང་ཆུབ་ཀྱི་རྒྱུར་ངེས་པ་ཐེ་ཚོམ་མེད་པར་ཀུན་རིག་
གིས་གསུངས་སོ། །རུས་པ་རྡོ་རྗེ་བསྡུ་བའི་སྔགས་ཀྱིས་བསྡུ་བའི་ཆོ་ག་བྱེ་བྲག་དང་བཅས་པ་བཤད་ཟིན་ཏོ།། །།ད་ནི་ལས་ཀྱི་མཚན་ཉིད་བྱེ་བྲག་གཏན་ལ་དབབ་པ་སྟོན་ཏེ། མཚན་མ་འདི་དག་ཤེས་ནས་ནི། །ཞེས་པ་ནི། མཚན་མ་ནི་དངོས་གྲུབ་བཟང་ངན་གྱི་མཚན་མ་ལ། འདི་དག་ནི་གོང་དུ་གསུངས་

པ་ལ། ཤེས་ནས་ནི་ལས་ཀྱི་མཚན་ཉིད་གཏན་ལ་དབབ་པའི་དོན་སྟོན་ཏོ། །ཅིའི་ཕྱིར་ཞེ་ན། རྣམ་པར་མི་རྟོག་སེམས་ཀྱིས་ཀྱང་། །ཞེས་གསུངས་ཏེ། རྣམ་པ་ནི་མཚན་མའི་བྱེ་བྲག་ལ། མི་རྟོག་པའི་ཡེ་ཤེས་ཀྱི་མཚན་མ་རྣམས་མ་བྱུང་མ་སྐྱེས་པར་བསྒོམ་པའོ། །སེམས་ནི་དེའི་དོན་བསྒྲུབ་
པའི་སེམས་ཀྱི་ཏིང་ངེ་འཛིན་གྱིས་བསྒོམ་ཞེས་པའི་ཐ་ཚིག་གོ། །དང་པོར་རྣམ་པར་མི་རྟོག་པའི་ཏིང་ངེ་འཛིན་བསྒོམས་པ་ལས། དག་པ་འཇིག་རྟེན་པའི་ཡེ་ཤེས་ཀྱིས་འགྲོ་བའི་དོན་བྱ་དགོས་པས་ན། བྱམས་དང་སྙིང་རྗེར་ལྡན་པ་ཡི། །ཞེས་གསུངས་ཏེ། བྱམས་པ་ནི་ཕྱོགས་མེད་པ་སྟེ།
ཀུན་ལ་ཁྱབ་པར་བསྒོམ་པ་ཡིན་པས། སྙིང་རྗེས་ཕན་འདོགས་པ་སྟེ། ཁྱད་པར་དུ་ཡང་ངན་སོང་གསུམ་ལ་སོགས་པའི་སྡུག་བསྔལ་ཅན་རྣམས་སོ། །ལྡན་པ་ནི་ཕྲིན་ལས་དང་ལྡན་པ་སྟེ། འགྲོ་བའི་དོན་བྱེད་པའི་ཐ་ཚིག་པས། ལས་དང་ཐམས་ཅད་གཏན་ལ་འབེབས་པར་མཛད་
པས་ན་ལས་གྲུབ་པའི་ཐ་ཚིག་གོ། །ད་ནི་ལྟོས་པའི་རོ་མེད་ན་ཡང་ཆོ་ག་བྱེད་པའི་ཁྱད་པར་སྟོན་ཏེ། ཅིའི་ཕྱིར་ཞེ་ན། ཡང་ན་མེད་པར་གྱུར་ན་ཡང་། །ཞེས་གསུངས་ཏེ། ཡང་ན་ནི་རོ་མེད་ན་ཡང་བྱ་བའི་ཐ་ཚིག་གོ། །འགྱུར་ན་ནི་འགྲོན་ལ་ཐ་ཚིག་ཏུ་སོང་བའམ་ཤི་བའམ། ཆུས་ཁྱེར་བའམ།
དངོས་པོ་མེད་པའོ། །ཅིའི་ཕྱིར་ཞེ་ན། བཟླས་ཤིང་བསྒོམས་པའི་ཚུལ་གྱིས་ནི། །མིང་རུས་ལེགས་པར་བྲི་བར་བྱ། །ཞེས་གསུངས་ཏེ། བཟླས་པ་ནི་སྔགས་ཀྱི་ཡིག་འབྲུ་བཟླས་པ་དང་། མཚོན་པའི་སྒོ་ནས་མིང་རུས་བཟླས་པ་དང་། བཏགས་པའི་སྒོ་ནས་མིང་ཟློས་ཤིང་། མིང་
རུས་སྔགས་ཀྱི་ཡིག་འབྲུ་དང་བསྲེས་ཤིང་། མ་ནོར་བར་བསྒོམ་པའི་ཚུལ་ཡིན་ཏེ། གྲོ་གའམ་ཤོག་ཤོག་ལ་མིང་རུས་གུར་གུམ་གྱིས་བྲིས་ཏེ། དེ་ལ་དམིགས་པའི་རྟེན་བྱས་ནས། གཉེན་པོ་ཡེ་ཤེས་ཀྱི་སྤྲུལ་པ་བསྟིམས་ནས། དེ་ཉིད་འཇིམ་པ་དང་བསྲེས་ལ་བཏགས་ཏེ་མཆོད་རྟེན་
གྱི་ཕྲེང་བའམ། ལྷའི་གཟུགས་སུ་བྱས་ནའང་རུང་། སྦྱིན་སྲེག་བྱས་ནས་དབང་བསྐུར་ན་ཡང་རུང་སྟེ། གདོན་མི་ཟ་བར་མཐོ་རིས་སུ་སྐྱེ་བར་འགྱུར་རོ། །ཡང་ན་ཐལ་བ་ཉིད་ཡུངས་ཀར་དང་བསྲེས་ལ་ཤི་བའི་མིང་རུས་སྨོས་ལ་སརྦ་བིཏ་ཀྱི་སྔགས་ཀྱིས་བཏབ་ནས། རྒྱ་མཚོའམ་ཆུ་ཀླུང་དུ་

བླུགས་ནའང་ངན་འགྲོ་ལས་ཐར་བར་འགྱུར་རོ། །ད་ནི་དགེ་བའི་ཚོགས་ཆེ་བ་རྣམས་ངན་འགྲོ་ལས་ཐར་བར་ཐབས་སླ་བ་སྟོན་ཏེ། ཅིའི་ཕྱིར་ཞེ་ན། དགེ་བའི་མཆོག་ནི་བསྐྱེད་པ་དང་། །བྱང་ཆུབ་ས་བོན་ཐོབ་པའི་ཐབས། །ཞེས་གསུངས་ཏེ། དགེ་བ་ནི་སྔོན་གོམས་པའི་
མཐུས་དེ་ལྟར་མི་དགེ་བ་བཅུའི་དངོས་པོ་མེད་པའོ། །མཆོག་ནི་ཡིད་འཕགས་པའི་ལམ་ལ་འདུན་ཅིང་། བྱང་ཆུབ་ཏུ་སེམས་བསྐྱེད་པའོ། །ཤེས་བྱ་ལ་ཡེ་ཤེས་ཆུབ་པའོ། །ས་བོན་ནི་དཔེར་ན་ས་བོན་སྐྱེ་བའི་འབྲས་བུ་འབྱིན་པ་དང་འདྲ་བར་རྒྱུ་རང་གི་བྱང་ཆུབ་ཀྱི་སེམས་འབྲས་བུ་བྱང་
ཆུབ་ཏུ་སེམས་པ་སྐྱེད་པ་སྨོས་སོ། །སངས་རྒྱས་འབྲས་བུ་རྒྱུར་ལྡན་པ། །ཞེས་གསུངས་ཏེ། སངས་རྒྱས་ནི་རིགས་ལྔ་ལ་བྱ། འབྲས་བུ་ནི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་སྟེ། རྒྱུ་ནི་རང་གིས་རྟོགས་པའི་ཁྱད་པར་རོ། །ཅིའི་ཕྱིར་ཞེ་ན། སྦྱིན་པའི་ཕ་རོལ་ཕྱིན་པར་ལྡན། །
ཞེས་གསུངས་པ་དང་། ཤེས་རབ་རྣམས་ཀྱི་རྒྱུ་བསྒོམས་པ། །ཞེས་པའི་བར་གྱིས་སྟོན་ཏེ། དེ་ལ་སྦྱིན་པ་ནི་ཡོངས་སུ་གཏོང་བའི་མཚན་ཉིད་དེ། དེ་ལ་རྣམ་པ་གཉིས་ཏེ། ཆོས་དང་ཟང་ཟིང་གཉིས་སོ། །ཚུལ་ཁྲིམས་ནི་ཚུལ་ཡང་ཡང་དག་པའི་དོན་ལ། ཁྲིམས་ནི་དེ་ལས་མི་འདའ་བའི་
མཚན་ཉིད་དོ། །དེ་ལ་ཡང་གཉིས་ཏེ། དགེ་བའི་ཆོས་སྡུད་པ་དང་། སེམས་ཅན་གྱི་དོན་བྱེད་པའི་ཚུལ་ཁྲིམས་སོ། །བཟོད་པ་ནི་མི་འཁྲུགས་པའི་མཚན་ཉིད་དོ། །དེ་ཡང་གཉིས་ཏེ། ཆོས་ཟབ་མོ་ལ་ཡིད་ཆེས་པའི་བཟོད་པ་དང་། གནོད་པར་བྱེད་པ་ལ་ཇི་མི་སྙམ་པའི་བཟོད་པའོ། །བརྩོན་
འགྲུས་ནི། སྐྱོ་དུབ་མེད་པའི་མཚན་ཉིད་དེ། དེ་ལ་ཡང་གཉིས་ཏེ། གོ་ཆའི་བརྩོན་འགྲུས་དང་། སྦྱོར་བའི་བརྩོན་འགྲུས་སོ། །བསམ་གཏན་ནི། ཆོས་ཉིད་ཀྱི་དོན་ལ་མཉམ་པར་འཇོག་པའི་མཚན་ཉིད་དེ། དེ་ལ་ཡང་གཉིས་ཏེ། ཆོས་ཉིད་ཀྱི་བསམ་གཏན་དང་། ཏིང་ངེ་འཛིན་གྱི་བསམ་
གཏན་ནོ། །ཤེས་རབ་ནི། སྤྱི་དང་རང་གི་མཚན་ཉིད་དོ། །དེ་ལ་ཡང་གཉིས་ཏེ། ཟག་པ་དང་བཅས་པའི་ཤེས་རབ་དང་། ཟག་པ་མེད་པའི་ཤེས་རབ་བོ། །དེ་ནི་རྒྱུད་དེ་ཕ་རོལ་ཏུ་ཕྱིན་པ་དྲུག་གིས་འབྲས་བུ་བསོད་ནམས་དང་ཡེ་ཤེས་ཀྱི་ཚོགས་སྐྱེ་བའི་ཕྱིར་རོ། །དེ་ལྟ་བུའི་སེམས་ཅན་ནི་ཐེ་

ཚོམ་མེད་པར་འགྲུབ་པའི་དོན་ཏོ། །ད་ནི་དགེ་བའི་རྩ་བ་མ་བསྐྱེད་པས་མི་འགྲུབ་པའི་དོན་ཏེ། དེ་ཅིའི་ཕྱིར་ཞེ་ན། དགེ་བའི་རྩ་བ་མ་བསྐྱེད་ལ། །མེད་པར་ལྟ་བ་གང་ཡིན་དང་། །ཞེས་གསུངས་ཏེ། དགེ་བ་ནི་རྣམ་པར་དཀར་བ་ལ་བྱ། རྩ་བ་ནི་བྱང་ཆུབ་ཀྱི་སེམས་སོ། །མ་བསྐྱེད་པ་ནི་དེ་ལ་མི་
གནས་ཤིང་མ་མོས་པའོ། །མེད་པར་ལྟ་བ་ནི་རྒྱུ་དགེ་སྡིག་གཉིས་མི་དགེ་བར་ལྡན་པ་དང་། འབྲས་བུ་དགེ་སྡིག་གཉིས་མེད་པར་ལྟ་བའོ། །དེ་ནི་རྒྱུ་འབྲས་ལ་སྐུར་པ་འདེབས་པ་སྟེ། ཡང་དག་པའི་བྱང་ཆུབ་ཀྱི་སེམས་མ་རྟོགས་ནས། ལོག་པ་དང་། སངས་རྒྱས་ཀྱི་བསྟན་པ་ལ་ཞེ་སྡང་བྱེད་
ཅིང་། སྡིག་པའི་རང་བཞིན་དུ་མཐོང་བ་དང་། ཕ་མ་ལ་སྙིང་རིང་ཞིང་བྱང་ཆུབ་ཀྱི་སེམས་དང་མ་བྲལ་བ་རྣམས་འགྲུབ་པར་མི་འགྱུར་ཞེས་རྣམ་པར་སྣང་མཛད་ཀྱིས་གསུངས་སོ། །དེ་ཡན་ཆད་དུ་སྦྱིན་སྲེག་གི་དོན་བསྟན་ཟིན་ཏོ། །ད་ནི་ཆོ་གའི་ཕན་ཡོན་བསྟན་ཏེ། དེ་ནས་བརྒྱ་བྱིན་ལ་སོགས་ལྷ། །
ཞེས་གསུངས་ཏེ། དེ་ནི་གོང་གི་སྦྱིན་སྲེག་གི་མཇུག་སྡུད་ལ། ནས་ནི་འོག་གི་ཕན་ཡོན་གྱི་མགོ་འདྲེན་ནོ། །བརྒྱ་བྱིན་ནི་ཡོན་བདག་ཡིན་པས་ན་སྣ་ལ་སྨོས་ལ། ལྷ་ཐམས་ཅད་ནོར་བུ་དྲི་མ་མེད་པའི་འོད་ཐར་པ་ལས་ཕལ་དམ་པའི་ཕྱིར་སྨོས་སོ། །དེ་ནས་དབང་པོར་བཅས་པ་ཡི། །ཞེས་པ་
ནས། སྣ་ཚོགས་འབྱུང་བ་འདི་ཅི་ལགས། །ཞེས་པ་འབྱུང་བའི་བར་གྱིས་ནི། །ཡོན་ཏན་ལ་མང་སྟེ། མཆོད་པ་དུ་མས་མཆོད་པ་སྟོན་ཏེ། བཅོམ་ལྡན་འདས་ཀྱི་བཀའ་ཞེས་པ་ནས། བདེ་བར་གཤེགས་པ་ངོ་མཚར་ལགས་སོ་ཞེས་པའི་བར་གྱིས་ནི། ནོར་བུ་དྲི་མ་མེད་པའི་འོད་རྣམ་
པར་ཐར་པ་བསྟན་ལ། འཁོར་ངོ་མཚར་ཆེ་བར་བསྟན་ཏོ། །དེ་ནས་བརྒྱ་བྱིན་ལ་སོགས་པ། །ཞེས་པ་ནས། སྔགས་དང་འདྲ་བའི་འདྲེན་པ་མེད། །ཅེས་པའི་བར་གྱིས་ནི། དཀོན་མཆོག་གསུམ་ལ་ཡོན་ཏན་གྱི་སྒོ་ནས་བསྟོད་པ་བསྟན་ཏོ། །དེ་ནས་ལྷའི་བུ་དེ་དག་གིས་ཞེས་པ་དང་། བལྟ་
བར་འཚལ་ལོ་ཞེས་པའི་བར་གྱིས་ནི། ནོར་བུ་དྲི་མ་མེད་པའི་རྫུ་འཕྲུལ་དང་། རྣམ་པར་འཕྲུལ་པ་བལྟ་བར་ཞུ་བ་གསོལ་བ་སྟོན་ཏོ། །དེ་ནས་བཅོམ་ལྡན་འདས་ཞེས་པ་ནས་དེ་ཉིད་དུ་མི་སྣང་བར་གྱུར་ཏོ་ཞེས་པའི་བར་གྱིས་ནི། དེ་བཞིན་གཤེགས་པའི་ནོར་བུ་དྲི་མ་མེད་པའི་འོད་ཟེར་གྱི་ཕྲེང་བས་

བསྐུལ་ནས་རང་གི་གནས་ནས་འོང་བ་སྟོན་ཏོ། །དེ་ནས་ལྷའི་བུ་དེ་ཉིད་ཅེས་པ་ནས། ཟིལ་གྱིས་མནན་ཏོ་ཞེས་པའི་བར་གྱིས་ནི། ནོར་བུ་དྲི་མ་མེད་པའི་འོད་ཀྱི་རྣམ་པར་འཕྲུལ་པས་ཐམས་ཅད་ཟིལ་གྱིས་མནན་པ་སྟོན་ཏོ། །དེ་ནས་ལྷའི་བུ་དེ་ཞེས་པ་ནས། མྱུར་དུ་དགྲོལ་
ཞེས་པའི་བར་གྱིས་ནི། ཡ་མཚན་ཆེ་ནས་ཐུགས་རྗེ་ལ་ངམ་ནས་བསྟོད་པ་སྟོན་ཏོ། །དེ་ནས་སྐད་ཅིག་མ་ཉིད་ཀྱི་ཚེ་ཞེས་པ་ནས། ཡ་མཚན་སྐྱེས་ཏེ་ཞེས་པའི་བར་གྱིས་ནི། རྣམ་པར་འཕྲུལ་པ་སྣ་ཚོགས་འཐོན་པ་སྟོན་ཏོ། །དེ་སྐད་ཅེས་སྨྲས་སོ་ཞེས་པ་ནས། ཚངས་སྤྱོད་ཚུལ་
ཁྲིམས་དྲི་མེད་སྐྱེ་བསམ་ཡས། །ཞེས་པའི་བར་གྱིས་ནི་དེ་བཞིན་གཤེགས་པའི་ཡོན་ཏན་གྱི་ཁྱད་པར་བསམ་གྱིས་མི་ཁྱབ་པ་ལ་དམ་པ་སྟོན་ཏོ། །དེ་ནས་ལྷའི་བུ་དེ་དག་གིས་ཞེས་པ་ནས། བལྟ་བར་འཚལ་ལོ་ཞེས་པའི་བར་གྱིས་ནི་བལྟ་བར་ཞུ་བ་གསོལ་བ་སྟོན་ཏོ། །དེ་ནས་བཅོམ་
ལྡན་འདས་ཞེས་པ་ནས་མི་སྣང་བར་གྱུར་ཏོ་ཞེས་པའི་བར་གྱིས་ནི་སྣང་བར་བྱ་བའི་ཏིང་ངེ་འཛིན་ཏོ། །དེ་ནས་ནོར་བུ་དྲི་མ་མེད་པའི་ཞེས་པ་ནས། འདི་སྐད་གསོལ་ཏོ་ཞེས་པའི་བར་གྱིས་ནི་དེ་བཞིན་གཤེགས་པའི་སྤྱན་སྔར་འོངས་ནས་ཐམས་ཅད་ཟིལ་གྱིས་གནོན་པ་སྟོན་ཏོ། །ཀྱེ་མ་སངས་རྒྱས་
ཀྱི་སངས་རྒྱས། །ཞེས་པ་ནས། བདག་མྱུར་སྐྱེས་ཞེས་པའི་བར་གྱིས་སྔགས་ཀྱི་ཡོན་ཏན་ཀུན་ལ་བསྟོད་པ་བསྟན་ཏོ། །དེ་ནས་ནོར་བུ་དྲི་མ་མེད་པའི་འོད་དང་ཞེས་པ་ནས་དེ་བཞིན་དུ་སོང་བ་ཞེས་བྱ་བའི་བར་གྱིས་ནི། དྲིན་ལ་ལན་གྱིས་གླན་པའི་ཕྱིར་མཆོད་པའི་ཁྱད་པར་གྱིས་མཆོད་ནས་རང་གི་གནས་སུ་འགྲོ་བ་སྟོན་ཏོ། །
དེ་ནས་བརྒྱ་བྱིན་དང་ཞེས་པ་ནས། བཤད་དུ་གསོལ་ཞེས་པའི་བར་གྱིས་ནི། ཕྱི་རབས་ཀྱི་སེམས་ཅན་རྣམས་ལ་ཕན་པའི་ཕྱིར་ཞུ་བ་གསོལ་བ་སྟོན་ཏོ། །བརྒྱ་བྱིན་དང་ཞེས་པ་ནས་འགྲོ་བར་འགྱུར་ཞེས་པའི་བར་གྱིས་ནི། སྔགས་ཀྱི་དོན་ཐོས་པར་དཀའ་བའི་ཆེ་བའི་ཡོན་ཏན་འདི་བསྟན་ཏོ། །དེ་ནས་བརྒྱ་བྱིན་
དང་ཞེས་པ་ནས། རྣམ་པར་སྨིན་པ་ཇི་ལྟར་འགྱུར། །ཞེས་པའི་བར་གྱིས་ནི། རང་སྣོད་དུ་རུང་བས་ན་ཐེག་པ་ཆེན་པོ་ལ་དད་པའི་རྣམ་པར་སྨིན་པ་ཅིར་འགྱུར་ཞུ་བ་གསོལ་བ་བསྟན་ཏོ། །བཅོམ་ལྡན་འདས་ཀྱི་ཞེས་པ་ནས་སྨོས་ཅི་དགོས་ཞེས་པའི་བར་གྱིས་ནི། ཐེག་པ་ཆེན་པོའི་རིགས་ཅན་གྱི་ཡོན་

ཏན་གྱི་ཁྱད་པར་ཆེན་པོ་སྟོན་ཏོ། །དེ་ནས་བརྒྱ་བྱིན་དང་ཞེས་པ་ནས། བསྐྱབ་པར་བགྱི་ཞེས་པའི་བར་གྱིས་ནི། འཇིག་རྟེན་པའི་འཁོར་རྣམས་ཀྱིས་ཐེག་པ་ཆེན་པོའི་ཆོས་ཉིད་གང་ན་སྤྱོད་པ་དེ་བསྲུང་ཞིང་བསྐྱབ་པའི་ཐབས་སྟོན་ཏོ། །ལྷའི་དབང་པོ་ཞེས་པ་ནས། བསྒྲུབས་ཞེས་པའི་བར་
གྱིས་ནི། ཕྱི་རབས་ཀྱི་སེམས་ཅན་ལ་ཕན་པའི་ཕྱིར་གདམས་ངག་སྦྱིན་པ་སྟོན་ཏོ། །རོ་སྲེག་གི་ཧོམ་ཆོ་གའི་ཡན་ལག་ཕན་ཡོན་དང་བཅས་པའི་དོན་དཀའ་དཀའ་བསྡུས་པ་བཤད་ཟིན་ཏོ།། །།ད་ནི་གཙུག་ཏོར་ཆེན་པོ་བརྒྱད་ཀྱི་དཀྱིལ་འཁོར་སྟོན་ཏེ། གཙུག་ཏོར་ཞེས་བྱ་བ་ནི་དཔེར་ན། ལུས་ཀྱི་རང་
བཞིན་མགོའི་གཙུག་ཡིན་ལ་དེ་བཞིན་དུ་ཆོས་རྣམས་ཀྱི་རང་བཞིན་རྣམ་པར་དག་པ་ནི། ཆོས་ཀྱི་དབྱིངས་ཏེ་དབུས་ཀྱི་ཕོ་བྲང་ཟླུམ་པོར་སྟོན་ཏེ། ཤཱཀྱ་ཐུབ་པ་དཀྱིལ་འཁོར་ན་བཞུགས་པའི་དོན་ཏོ། །འཐོར་ནི་འཁོར་ཏེ་ཤཱཀྱ་ཐུབ་པ་ཆོས་ཀྱི་སྐུ་ལས། ཡེ་ཤེས་རྣམ་པ་བཞི་དང་ཕྲིན་ལས་རྣམ་པ་
བཞིའི་རྟགས། གཙུག་ཏོར་བརྒྱད་འཁོར་དུ་ཕྱུང་བ་ནི་འཐོར་བའི་ཐ་ཚིག་སྟེ། ཐུགས་རྗེས་འགྲོ་བའི་ལས་འབྱུང་བའི་ཕྱིར་རོ། །དེའི་དོན་བསྟན་པའི་ཕྱིར། དེ་ནས་བཅོམ་ལྡན་འདས་ཞེས་སྨོས་ཏེ། དེ་ནི་གོང་གི་ཆོ་གའི་དོན་བསྡུས་ལ། ནས་ནི་འོག་མའི་དཀྱིལ་འཁོར་མགོ་འདྲེན་པའི་
ཕྱིར་རོ། །བཅོམ་པ་ནི་ཡང་དག་པའི་ཤེས་རབ་ཀྱིས་ཉོན་མོངས་པ་ཕྱིན་ཅི་ལོག་པའི་སྐྱོན་བཅོམ་པ་ཡིན་ལ། ལྡན་པ་ནི་ཕ་རོལ་ཏུ་ཕྱིན་པའི་སྟོབས་དང་ལྡན་པ་ལ། འདས་ནི་མཐའ་གཉིས་དང་བྲལ་བའི་ཐ་ཚིག་སྟེ། ཅིའི་ཕྱིར་ཞེ་ན། བྱང་ཆུབ་སེམས་དཔའ་སེམས་དཔའ་ཆེན་པོ་
ཕྱག་ན་རྡོ་རྗེ་ཞེས་གསུངས་ཏེ། བྱང་བ་ནི་གཟུང་འཛིན་རྣམ་པ་གཉིས་སྤངས་པ་ཡིན་ལ། ཆུབ་པ་ནི་ཤེས་བྱ་ལ་ཡེ་ཤེས་ཀྱིས་ཆུབ་ཅིང་གནས་ལ། སེམས་ནི་གཉིས་སུ་མེད་པའི་དོན་ལ་སེམས་ལ། དཔའ་ནི་དེའི་དོན་ལ་སྲན་འཛུགས་ཏེ། སེམས་ནི་ཐུགས་རྗེས་འགྲོ་བའི་སེམས་ལ།
དཔའ་ནི་འགྲོ་བའི་དོན་ལ་མི་ལྡོག་པ་སྟེ། དེ་ནི་གཞན་དཔའ་བའི་ཕྱིར་ན་ཆེན་པོའོ། །ཕྱག་ན་རྡོ་རྗེ་ནི་དུས་གསུམ་གྱི་རྒྱལ་བ་ཐམས་ཅད་ཀྱི་ཐུགས་ལས་སྐྱེས་པའི་ཕྱིར་ན་ཕྱག་ན་རྡོ་རྗེ་སྐུ་གསུང་ཐུགས་ཀྱི་གསང་བའི་མཛོད་འཛིན་པའི་བདུད་དང་དྲེགས་བྱེད་འདུལ་བའི་རྟགས་སུ་རྡོ་རྗེ་བསྣམས་

པས་ཀྱང་རྡོ་རྗེ། དེ་བཞིན་གཤེགས་པ་རྣམས་ཀྱིས་མིང་གི་དབང་བསྐུར་ཞིང་། རྡོ་རྗེ་ལག་ཏུ་བྱིན་པས་ཀྱང་རྡོ་རྗེའོ། །བཅོམ་ལྡན་འདས་ཀྱི་མཐུས་ཆོ་ག་ཞིབ་མོ་ཞེས་པ་ནི། དཔེར་ན་བོན་པོ་ལྷ་བཀའ་འབེབས་པ་ནི། ལྷའི་བཀའ་ཟེར་བ་དང་འདྲ་བར། ཕྱག་ན་རྡོ་རྗེ་བཤད་
པ་འདི་ཡང་བཅོམ་ལྡན་འདས་ཀྱི་མཐུས་ཞེས་སྨོས་པའི་ཕྱིར་རོ། །ཆོ་ག་སྒྲུབ་པར་བྱེད་པའི་ཐབས་ལ་བྱ་སྟེ། ཞིབ་མོ་ནི་མ་གྲུབ་ན་སྤོགས་པའི་ཆོ་ག་བྱེད་པའོ། །ཅིའི་ཕྱིར་ཞེ་ན། ཕྱི་མ་འདི་བཤད་དོ་ཞེས་གསུངས་སོ། །གོང་གི་རྩ་བའི་མཎྜལ་གྱི་དོན་འདིར་འདུས་པའི་ཕྱིར་རམ། འདི་བསྡུ་བའི་
ཕྱིར་རམ། འདི་དང་འབྲེལ་བའི་ཕྱིར་ནི་སྨོས་སོ། །དཔའ་བོ་གདན་ལ་བཞེངས་ནས་ནི། །ཞེས་པ་ནི། ལྟ་བས་མཚན་མ་འཇོམས་པ་དང་། ཐུགས་རྗེས་འཁོར་བ་འཇོམས་པས་དཔའ་བའོ། །གདན་ནི་ཡེ་ཤེས་ཏེ་ཆོས་ཉིད་དང་འབྲེལ་བའི་ཕྱིར་ན་གདན། ཐུགས་རྗེས་འཁོར་བ་ལས་འབྲེལ་བའི་
རྟགས་སུ་པདྨར་བསྟན་པས་ན་གདན། བཞེངས་པ་ནི་དེ་བཞིན་གཤེགས་པའི་ཐུགས་ཀ་ནས། ཕྱག་ན་རྡོ་རྗེའི་སྐུ་ཕྱུང་བ་བཞེངས་ནས། ཕྱག་ན་རྡོ་རྗེའི་ཐུགས་ཀ་ནས་ནི། གཙུག་ཏོར་བརྒྱད་འབྱིན་པའི་ཕྱིར་ནི་བཞེངས་པའོ། །དགྱེས་ཤིང་རྡོ་རྗེ་གསོར་ནས་ནི། །ཞེས་པ་ནི། དགྱེས་པ་ནི་དེ་བཞིན་
གཤེགས་པས་བྱིན་གྱིས་བརླབས་པ་སྟེ། རྒྱུད་ཀྱི་དོན་སྟོན་པར་དགྱེས་པའོ། །རྡོ་རྗེ་ནི་རིགས་པས་ཏེ། མི་འགྱུར་བའི་དོན་ལའོ། །གསོར་བ་ནི་ཕྲིན་ལས་ཏེ་རྒྱུད་ཀྱི་དོན་སྟོན་པར་བྱེད་པའི་ཐ་ཚིག་གོ། །ཤཱཀྱ་ནི་རྒྱལ་པོ་ཤཱཀྱ་ཉི་མ་དམར་པོའི་རིགས་ཡིན་ལ། གཙོ་བོ་ནི་ཁམས་གསུམ་གྱི་གཙོ་བོའི་
ཐ་ཚིག་གོ། །དགྱེས་མཛད་ནི་རྒྱུད་ཀྱི་དོན་སྟོན་པའི་ཕྱིར་ན་དགྱེས་མཛད་དོ། །ཐུབ་པའི་གཙོ་ལ་ཕྱག་འཚལ་ནས། །ཞེས་གསུངས་ཏེ། ཐུབ་པ་ནི་སྐུ་གསུང་ཐུགས་ཐུབ་པའི་ཕྱིར་རོ། །གཙོ་བོ་ནི་རྐང་གཉིས་ཀྱི་གཙོ་བོ་ཡིན་ལ། ཕྱག་འཚལ་ནི་ཡ་རབས་བླ་མའི་ཚུལ་གཟུང་བའི་ཕྱིར་དང་། སྐུ་
གསུང་ཐུགས་ནན་ཏན་བསྐྱེད་པའི་ཕྱིར་སྨོས་སོ། །དེ་ཡན་ཆད་དུ་དེ་བཞིན་གཤེགས་པའི་བྱིན་གྱི་རླབས་ཀྱིས། ཕྱག་ན་རྡོ་རྗེས་བཤད་པ་བསྟན་ཟིན་ཏོ། །ད་ནི་རྩ་བའི་སྙིང་པོ་འབྱུང་བའི་ཕྱེད་དུ་བཤད་པའི་དོན་སྟོན་ཏེ། ཅིའི་ཕྱིར་ཞེ་ན། སྒྲིབ་པ་ཐམས་ཅད་རྣམ་པར་དག་པའི་རྡོ་རྗེ་ཞེས་བྱ་བའི་ཏིང་

ངེ་འཛིན་ལ་ཞེས་པ་ནི། སྒྲིབ་པ་ནི་ཉོན་མོངས་པ་རྣམ་པར་བྱང་བའི་བག་ཆགས་རྣམ་པར་རྟོག་པ་སྟེ། རྣམ་པ་ལྔར་བསྟན་ཏེ། ལས་ཀྱི་སྒྲིབ་པ་དང་། ཆོས་ཀྱི་སྒྲིབ་པ་དང་། རྣམ་པར་སྨིན་པའི་སྒྲིབ་པ་དང་། སྐྱེ་བའི་སྒྲིབ་པ་དང་། ཤེས་བྱའི་སྒྲིབ་པ་ལྔ་ནི་ཐམས་ཅད་དོ། །རྣམ་པར་དག་པ་ནི།
གཉེན་པོའི་ཡེ་ཤེས་ཀྱིས་མི་མཐུན་པ་དག་ཟིལ་གྱིས་གནོན་པ་སྟེ། ཅིའི་ཕྱིར་རྡོ་རྗེ་ཞེས་སྨོས་ཏེ། རྡོ་རྗེས་ཐམས་ཅད་འཇོམས་པ་དང་འདྲ་སྟེ། ཉོན་མོངས་པའི་མཚན་མ་འཇོམས་པའི་ཕྱིར་རོ། །ཏིང་ངེ་འཛིན་ནི་དེའི་ངང་ལས་མི་འདའ་ཞིང་འཛིན་པའི་ཕྱིར་རོ། །སྙོམས་པར་ཞུགས་པ་
ནི་གཉིས་སུ་མེད་པར་སྙོམས་པར་ཞུགས་པ་དང་། མི་འདའ་བར་སྙོམས་པར་ཞུགས་པའོ། །ངན་འགྲོ་ཐམས་ཅད་ནི། ངན་ནི་ངན་སོང་གསུམ་མོ། །འགྲོ་བ་ནི་ལས་ཀྱི་བག་ཆགས་ཀྱིས་དེར་འགྲོ་བའོ། །ཐམས་ཅད་ནི་དེ་རྣམས་ལ་བྱའོ། །རྣམ་པར་སྦྱོང་བ་ནི། ཐུགས་རྗེས་རྡོ་རྗེ་ལྟ་བུས་རྒྱུ་
སྦྱོང་བ་དང་། གཙུག་ཏོར་བརྒྱད་ཀྱི་སྙིང་པོ་ཕྱུང་བས་འབྲས་བུ་སྦྱོང་བའོ། །རང་གི་སྙིང་པོ་ནི། རང་ནི་ཕྱག་ན་རྡོ་རྗེའི་སྙིང་པོ་ནི་རིག་པའི་ཡེ་ཤེས་སོ། །འདི་ཉིད་ཐུགས་ཀ་ནས་ནི། འདི་ཉིད་ནི་སྙིང་པོ་འོག་ནས་འབྱུང་བ་ཉིད་དོ། །ཐུགས་ཀ་ནས་ནི་ཡེ་ཤེས་པའི་རྒྱུད་ལ་གནས་པ་ཞལ་དུ་
འབྱིན་པའི་དོན་ཏོ། །དེ་ཅིའི་ཕྱིར་ཞེ་ན། ཕྱུང་ཞེས་སྨོས་པའི་ཐ་ཚིག་གོ། །སྔགས་ནི་སྙིང་པོ་ཡིན་པའི་ཕྱིར་ན་མ་བཤད་དོ། །དེ་ཡན་ཆད་དུ་སྔགས་ཀྱི་དོན་འབྱུང་བའི་དགོས་ཆེད་དང་བཅས་པའི་དོན་བསྡུས་པ་བཤད་ཟིན་ཏོ།། །།ད་ནི་དཀྱིལ་འཁོར་གྱི་ལྷ་དགོད་པའི་ཐབས་སྟོན་ཏེ། ཅིའི་ཕྱིར་ཞེ་ན།
འཁོར་ལོ་འདྲ་བའི་དཀྱིལ་འཁོར་ལ། །ཞེས་བྱ་བ་ནི། དཔེར་ན་འཁོར་ལོས་སྒྱུར་བའི་གསེར་གྱི་འཁོར་ལོ་ནི་ལྟེ་བ་དང་མུ་ཁྱུད་དང་རྩིབས་དང་ལྡན་པ་ནི། དེ་དང་འདྲ་བའི་ཕྱིར་ན། དཀྱིལ་འཁོར་ལ་ཞེས་སྨོས་སོ། །ཅིའི་ཕྱིར་ཞེ་ན། ཤིན་ཏུ་མཛེས་པའི་རྩིབས་བརྒྱད་ཅན། །ཞེས་གསུངས་
ཏེ་ཤིན་ཏུ་མཛེས་པ་ནི། ཚོན་སྣ་ལྔ་སྟེ། དཀར་དང་དམར་དང་སེར་དང་ལྗང་། །ཀུན་གྱི་མཐའ་མ་ལྕགས་ཀ་བ། །ཞེས་གསུངས་ཏེ། དབུས་ཀྱི་ཕོ་བྲང་ནི་གཟུང་འཛིན་དང་བྲལ་བས་དཀར་པོར་བྱ་བ་ཡིན་ལ། རིན་པོ་ཆེའི་ཕྲེང་བའི་གཞི་མ་ནི་མ་ཆགས་པས་དམར་བར་བྱ་བ་ཡིན་ལ། རྩིབས་ནི་

རྒྱལ་པོའི་གསེར་གྱི་འཁོར་ལོ་དང་མཐུན་པར་སེར་པོ་བྱ་བ་ཡིན་ནོ། །གྲུ་ཆད་བཞི་ནི་ཕྲིན་ལས་ཀྱི་རང་བཞིན་ཡིན་པས། ལྗང་གུར་བྱ་བ་ཡིན་ལ། མཐའ་མ་ནི་ལྕགས་ཀ་བཏང་སྟེ། པཉྩ་རེ་ག་ཡང་དེ་བཞིན་དུ་བྱས་པས་མཛེས་ཞེའོ། །རྩིབས་བརྒྱད་ནི་འཁོར་ལོའི་རྩིབས་བརྒྱད་དོ། །
ཅིའི་ཕྱིར་ཞེ་ན། ལྟེ་བར་བཅས་ཤིང་མུ་ཁྱུད་བཅས། །ཞེས་འབྱུང་སྟེ། དེ་ལ་དབུས་ཀྱི་ལྟེ་བ་ཟླུམ་པོ་ནི་ཆོས་ཀྱི་སྐུའོ། །རིན་པོ་ཆེའི་ཕྲེང་བ་ནི་ལོངས་སྤྱོད་རྫོགས་པའི་རྟགས་སོ། །འཁོར་ལོའི་རྩིབས་ནི་སྤྲུལ་པའི་སྐུའོ། །ཡང་དག་པའི་ཤེས་རབ་ཀྱིས་འཁོར་བ་འཇོམས་པས་འཁོར་
ལོའོ། །ཆེ་བའི་ཡོན་ཏན་སྣ་ཚོགས་ལ་མངའ་བརྙེས་པས་ན་རིན་པོ་ཆེའི་ཕྲེང་བའོ། །ཐུགས་རྗེའི་ཕྲིན་ལས་ཀྱིས་སྐྱེ་ཤི་རྩད་ནས་བཅད་པས་ན་རྩིབས་སོ། །ཏིང་ངེ་འཛིན་མི་འགྱུར་བའི་རྟགས་སུ་ནི་རྡོ་རྗེ་ར་བར་བསྟན་ཏོ། །དུས་རྣམ་པ་བཞིའི་སྒོ་ནས་འགྲོ་བའི་དོན་མཛད་པའི་རྟགས་སུ་ནི་གྲུ་
ཆད་བཞིར་བསྟན་ཏོ། །སྐུ་གསུང་ཐུགས་མི་འགྱུར་བའི་རྟགས་སུ་ནི་ཏྲི་རཱ་ག་དང་ཡེ་ཤེས་རྣམ་པ་ལྔ་དང་ལྡན་པའི་རྟགས་སུ་ནི་པཉྩ་རེ་གར་བསྟན། ཏིང་ངེ་འཛིན་རྟོགས་པའི་རྟགས་སུ་སྒོ་ཁྱུད་ལྡན་པས་ཐབས་ཐུགས་རྗེ། འཁོར་བ་ལས་མི་ཉམས་པའི་རྟགས་སེང་གེ་མགོ་གཡས་སུ་བསྟན་ལ།
སྐུ་ཡང་དག་པའི་སྟོབས་དང་ལྡན་པའི་རྟགས་སུ་ནི་གླང་པོ་ཆེ་གཡོན་དུ་བསྟན་ལ། སྒོ་སྟེང་ཐུགས་རྗེ་ཐབས་ཀྱི་རྟ་བབས་དང་ལྡན་པ་ལ་བྱང་ཆུབ་སེམས་ཀྱི་མུ་ཏིག་ཧ་ར་ལ་གསུང་རྣམ་པར་དག་པ་དྲིལ་བུ་དང་། ཕྲིན་ལས་སྣ་ཚོགས་སུ་འབྱུང་བའི་རིན་པོ་ཆེའི་དོ་ཤལ་དང་། ཐབས་ཐུགས་
རྗེའི་རྡོ་རྗེ་དང་། ཤེས་རབ་མ་སྐྱེས་པའི་ཟླ་བར་འབྲེལ་པ་ལྟ་བུ་ནི་དཀྱིལ་འཁོར་གྱི་རྒྱན་ཏེ་ཡེ་ཤེས་ཀྱི་རྟགས་སུ་བསྟན་ཏོ། །ད་ནི་ནང་དུ་ལྷ་བྲི་བའི་ཁྱད་པར་སྟོན་ཏེ། ཅིའི་ཕྱིར་ཞེ་ན། ལྟེ་བའི་ནང་དུ་ཤཱཀྱ་ཐུབ། །ཅེས་གསུངས་ཏེ། ལྟེ་བ་ནི་དབུས་ཀྱི་ཕོ་བྲང་ངོ་། །ཤཱཀྱ་ནི་རྒྱལ་པོ་
ཤཱཀྱའི་རིགས་ཀྱི་སྲས་ཡིན་པའི་ཕྱིར་ན་ཤཱཀྱའོ། །ཐུབ་ནི་སྐུ་གསུང་ཐུགས་ཐུབ་ལ། སྐུ་མདོག་སེར་པོ་ཐུགས་རྗེ་ཐབས་ཀྱི་དྲང་སྲོང་དང་། ཆོས་ཀྱི་དབྱིངས་རྣམ་པར་དག་པའི་བར་དུ་བསྣམས་པར་བྲིའོ། །ད་ནི་མཎྜལ་གྱི་དོན་སྟོན་ཏེ། ཅིའི་ཕྱིར་ཞེ་ན། ཕྱག་རྒྱ་རྡོ་རྗེ་སྟོབས་པོ་ཆེ། །

དཔའ་བོ་དེ་ཡི་སྤྱན་སྔར་བྲི། །ཞེས་གསུངས་ཏེ། བཅོམ་ལྡན་འདས་ཀྱིས་མེ་ལོང་ལྟ་བུའི་ཡེ་ཤེས་ལས་སྤྲུལ་ཏེ་རྡོ་རྗེ་ལྟ་བུའི་ཏིང་ངེ་འཛིན་གྱིས་སྟོབས་དང་ལྡན་ལ། ཡེ་ཤེས་ཀྱིས་ཆོས་ཉིད་སེམས་ཤིང་ཐུགས་རྗེས་འགྲོ་བའི་དོན་ལ་སེམས་པའི་ཕྱིར་ན་སྟོབས་ཆེན་ནོ། །དཔའ་བོ་ནི་ཤཱཀྱ་
ཐུབ་པ་སྟེ་ཏིང་ངེ་འཛིན་མི་འགྱུར་བའི་ངོ་བོར་གྲུབ་པའོ། །དེའི་སྤྱན་སྔར་བྲི་བ་ནི་མདུན་ཏེ་ཤར་ཕྱོགས་ཀྱི་རྩིབས་ལ་ཐུགས་ཀྱི་རྡོ་རྗེ་དང་། ཤེས་རབ་ཀྱི་དྲིལ་བུ་དང་ལྡན་པར་བྲི་བའི་ཐ་ཚིག་གོ། །རྒྱབ་ཏུ་འཁོ