Luận tạng Tây Tạng (Tengyur) — Tập 62

ལ་དཀར་པོ་དང་། རག་ཆུང་གི་འབྲས་བུ་དང་། ལེ་བརྒན་རྩི་དང་། པྲི་ཡང་ཀུ་དང་། གསེར་དང་། དངུལ་གྱི་པདྨ་དང་། མཆོད་ཡོན་ལ་སོགས་པ་དབུལ་ལོ། །དེ་ནས་དེའི་ཉེ་བ་རུ་འོ་མ་དང་ཆུས་ཡོངས་
སུ་གང་བའི་ཆུ་སྣོད་རྟགས་ཀྱིས་མཚན་པ་གཞག་པར་བྱའོ། །དེ་ལ་ཡང་བཅོམ་ལྡན་འདས་མ་རྣམ་པར་བསྒོམས་ཏེ་མཆོད་པ་བྱས་ནས་ཡི་གེ་གཅིག་པའི་སྔགས་ཀྱིས་བྱིན་གྱིས་བརླབ་པར་བྱའོ། །ཨོཾ་ཨཱཿཧྲཱིཿཧཱུྃ་སྭཱ་ཧཱ། མཆོད་པའི་སྔགས་སོ། །ཇི་ལྟར་དོང་གྲུ་བཞི་
ཁེངས་པ་དང་། ཡུར་བ་བྱས་ཏེ་དེས་དོང་ཟླུམ་པོ་དགང་བར་བྱའོ། །དེ་ལ་ཉ་ལྕིབས་དང་ཉ་གསོན་པོ་བཅུག་སྟེ་ཆུ་གཡས་ཕྱོགས་སུ་འཁོར་རམ་བལྟ་བར་བྱའོ། །དེ་ནས་ཡིད་ཀྱིས་དོང་གི་ལྷ་མོ་བཏེག་སྟེ་ཆུ་སྣོད་ལ་རབ་ཏུ་གཞུག་པར་བྱའོ། །ཆུ་སྣོད་ཀྱང་ཛཱཾ་གུ་ལིའི་གནས་
སུ་གཞག་པར་བྱའོ། །དེ་དང་ཉེ་བར་སྨྱུག་མ་ཤིན་ཏུ་རིང་པོའི་སྟེང་དུ་གདུགས་དཀར་པོ་བ་དན་འཕྱང་བའོ། །དཱུར་བ་དང་། ཀུན་ད་དང་། སྣ་མའི་མེ་ཏོག་དང་བཅས་པས་མཆོད་པར་བྱའོ། །དེ་ནས་མཚན་མོའི་ཐུན་དང་པོ་ལ་རང་གི་ལྷག་པའི་ལྷའི་རྣལ་འབྱོར་དང་ལྡན་པས་སློབ་དཔོན་
རྡོ་རྗེ་སེམས་དཔའི་རྣལ་འབྱོར་དང་ལྡན་པ་ལ་བྱང་ཕྱོགས་ཀྱི་སྒྲུབ་པ་པོས་རྡོ་རྗེ་དྲིལ་བུ་བཟུང་ནས་གསོལ་བ་གདབ་པར་བྱའོ། །དེ་བཞིན་གཤེགས་པ་ཀུན་ཞི་བ། །དེ་བཞིན་གཤེགས་པ་ཀུན་གྱི་གནས། །མཚན་ཉིད་ཐམས་ཅད་ཡོངས་རྫོགས་པ། །གཙོ་བོའི་གཙུག་ལག་
ཁང་དུ་བརྟག །དེ་ནས་ཧཱུྃ་ལས་སྐྱེས་པའི་རྡོ་རྗེའི་ལྗགས་བླ་མས་བསམས་ནས་ཕྱོགས་རྣམས་ཀུན་ན་བཞུགས་པ་ཡི། །སངས་རྒྱས་རྣམས་ནི་བདག་ལ་དགོངས། །འདིར་བདག་བསམ་པ་དགེ་བ་ཡིས། །ལྷ་ཁང་གཙུག་ལག་ཁང་གནས་བྱ། །སངས་རྒྱས་ལ་སོགས་ཀུན་བྱོན་
ནས། །དངོས་གྲུབ་རྣམས་ནི་བདག་ལ་སྩོལ། །ཞེས་པས་སངས་རྒྱས་ལ་སོགས་པ་རྣམས་ལ་བདག་གིས་ཞུ་བར་བྱའོ། །བགེགས་དང་བདུད་ཐམས་ཅད་ཉེ་བར་བསྐྲད་པར་བྱ་སྟེ། འཆད་པར་འགྱུར་བའི་གོ་རིམས་ཀྱི་རིམ་པས་སོ། །གོ་རིམས་ངེས་པའི་བར་དུ་ཆོ་ག་ཇི་ལྟ་

བས་མཎྜལ་ཟླུམ་པོ་བྱས་ཏེ་ཉེར་སྤྱོད་ལྔའི་མཆོད་པ་རྣམས་ཀྱིས་ཡོངས་སུ་མཆོད་དེ་བུམ་པ་ལྷག་པར་གནས་པར་བྱའོ། །དེ་ལྔ་བཅུ་རྩ་གསུམ་དང་། བཅུ་གཅིག་དང་། ཡང་ན་ལྔའོ། །ལྔ་བཅུ་རྩ་གསུམ་གྱི་ཕྱོགས་ལ་དཀྱིལ་འཁོར་པ་ཐམས་ཅད་ཀྱིས་སོ་སོའི་རེ་རེའོ། །ལས་ཐམས་
ཅད་པའི་བུམ་པ་གཅིག་སྟེ་ལྔ་བཅུ་རྩ་བཞིའོ། །བཅུ་གཅིག་གི་ཕྱོགས་ལ་རྣམ་པར་སྣང་མཛད་ཆེན་པོ་དང་སེམས་མ་རྡོ་རྗེ་ལ་སོགས་པ་ལྔ་རྣམས་ཀྱི་གཅིག་གོ། །མི་བསྐྱོད་པ་ལ་སོགས་པ་ལྔ་རྣམས་ཀྱི་གཅིག་གོ། །རིན་ཆེན་འབྱུང་ལྡན་ལ་སོགས་པ་ལྔ་རྣམས་ཀྱི་གཅིག་གོ། །འོད་དཔག་
མེད་ལ་སོགས་པ་ལྔ་རྣམས་ཀྱི་གཅིག་གོ། །དོན་ཡོད་གྲུབ་པ་ལ་སོགས་པ་ལྔ་རྣམས་ཀྱི་གཅིག་གོ། །སྒེག་མོ་ལ་སོགས་པ་བཞི་པོ་རྣམས་ཀྱི་གཅིག་གོ། །བདུག་སྤོས་མ་ལ་སོགས་པ་བཞི་པོ་རྣམས་ཀྱི་གཅིག་གོ། །རྡོ་རྗེ་ལྕགས་ཀྱུ་དང་བྱམས་པ་ལ་སོགས་པ་ལྔ་པོ་རྣམས་ཀྱི་གཅིག་
གོ། །རྡོ་རྗེ་ཞགས་པ་དང་། སྤོས་ཀྱི་གླང་པོ་ལ་སོགས་པ་ལྔ་རྣམས་ཀྱི་གཅིག་གོ། །རྡོ་རྗེ་རྒྱས་པ་དང་བདུད་རྩི་འོད་ལ་སོགས་པ་ལྔ་རྣམས་ཀྱི་གཅིག་གོ། །རྡོ་རྗེ་འབེབས་པ་དང་། རྡོ་རྗེ་སྙིང་པོ་ལ་སོགས་པ་ལྔ་རྣམས་ཀྱི་གཅིག་གོ། །ལས་ཐམས་ཅད་པའི་བུམ་པ་གཅིག་དང་བཅས་
པས་བཅུ་གཉིས་སོ། །ལྔའི་ཕྱོགས་ལ་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་ལྔ་དང་སེམས་མ་རྡོ་རྗེ་མ་ལ་སོགས་པའི་ལྷ་མོ་བཞི་དང་དགུ་ལ་གཅིག་གོ། །སྒེག་མོ་ལ་སོགས་པའི་ལྷ་མོ་བརྒྱད་ལ་གཅིག་གོ། །རྡོ་རྗེ་སེམས་དཔའ་ལ་སོགས་པ་བྱང་ཆུབ་
སེམས་དཔའ་བཅུ་དྲུག་ལ་གཅིག་གོ། །བྱམས་པ་ལ་སོགས་པའི་བྱང་ཆུབ་སེམས་དཔའ་བཅུ་དྲུག་ལ་གཅིག་གོ། །རྡོ་རྗེ་ལྕགས་ཀྱུ་ལ་སོགས་པ་ཁྲོ་བོ་བཞི་རྣམས་ལ་གཅིག་གོ། །ལས་ཐམས་ཅད་པའི་བུམ་པ་གཅིག་དང་བཅས་ཏེ་དྲུག་གོ། །དེ་ལ་ལས་ཐམས་ཅད་པའི་
མཚན་ཉིད་ནི་ལྟོ་བ་ཟླུམ་པོ་ལ་ཆ་ལྔ་བཅུར་ཆ་གཅིག་གིས་མཆོག་པའོ། །ཇི་སྲིད་མཆུའི་མཐར་ཐུག་པའི་དཔངས་སུ་ཆ་ཉི་ཤུ་རྩ་གཅིག་གོ། །དེའི་མཆུ་འོག་ཏུ་འཕྱང་བ་ལ་ཆ་གཉིས་སོ། །ཁའི་བུག་པ་ལ་ཆ་བཅུ་གསུམ་མོ། །མགྲིན་པའི་འོག་གི་བུག་པ་ལ་ཕྱེད་དང་

བཅས་པའི་ཆ་ལྔའོ། །མགྲིན་པའི་དཔངས་ལ་རྐང་པས་ལྷག་པའི་སོར་བརྒྱད་དོ། །མཆུའི་འོག་གི་ཆར་འཕྲེད་ལ་རྐང་པ་དང་བཅས་པའི་ཆ་བཅུ་དྲུག་གོ། །དེ་ནས་དཀར་པོས་ཁ་བསྒྱུར་ནས་དཀར་པོར་བྱས་ལ་སྣ་ཚོགས་ཆུ་སྐྱེས་དང་ཟླ་བ་ལ་མཚན་མ་
རྣམས་བྲི་བར་བྱའོ། །རྣམ་པར་སྣང་མཛད་ཆེན་པོའི་རྡོ་རྗེ་རྩེ་ལྔ་པ་དཀར་པོའོ། །སེམས་མ་རྡོ་རྗེ་མའི་རྡོ་རྗེ་སྔོན་པོའོ། །རིན་ཆེན་རྡོ་རྗེ་མའི་རྡོ་རྗེས་མཚན་པའི་རིན་པོ་ཆེའོ། །ཆོས་ཀྱི་རྡོ་རྗེ་མའི་རྡོ་རྗེས་མཚན་པའི་པདྨའོ། །ལས་ཀྱི་རྡོ་རྗེ་མའི་སྣ་ཚོགས་རྡོ་རྗེའོ། །མི་བསྐྱོད་པའི་རྡོ་རྗེ་རྩེ་
ལྔ་པ་སྔོན་པོའོ། །རྡོ་རྗེ་སེམས་དཔའི་རྡོ་རྗེ་དཀར་པོའོ། །རྡོ་རྗེ་རྒྱལ་པོའི་རྡོ་རྗེས་མཚན་པའི་ལྕགས་ཀྱུའོ། །རྡོ་རྗེ་ཆགས་པའི་མདའ་འགེངས་པའོ། །རྡོ་རྗེ་ཆགས་པའི་རྡོ་རྗེ་དང་བཅས་པའི་ཕྱག་གཉིས་ཀྱིས་ལེགས་པར་རབ་ཏུ་སྦྱིན་པར་བྱེད་པའོ། །རིན་ཆེན་འབྱུང་ལྡན་གྱི་རྡོ་རྗེས་
མཚན་པའི་རིན་པོ་ཆེའོ། །རྡོ་རྗེ་རིན་ཆེན་གྱི་རྡོ་རྗེས་མཚན་པའི་རིན་པོ་ཆེའི་ཕྲེང་བའོ། །རྡོ་རྗེ་གཟི་བརྗིད་ཀྱི་ཉི་མའོ། །རྡོ་རྗེ་ཏོག་གི་ཡིད་བཞིན་ནོར་བུའི་རྒྱལ་མཚན་ནོ། །རྡོ་རྗེ་བཞད་པའི་རྡོ་རྗེས་མཚན་པའི་སོའི་ཕྲེང་བའོ། །འོད་དཔག་མེད་ཀྱི་རྡོ་རྗེས་མཚན་པའི་པདྨའོ། །རྡོ་རྗེ་ཆོས་
ཀྱི་ངང་པ་དང་བཅས་པའི་པདྨའོ། །རྡོ་རྗེ་རྣོན་པོའི་རལ་གྲི་དང་པུསྟིའོ། །རྡོ་རྗེ་རྒྱུའི་འཁོར་ལོ་རྩིབས་བརྒྱད་པའོ། །རྡོ་རྗེ་གསུང་བའི་ཆོས་ཀྱི་དུང་ངོ་། །དོན་ཡོད་གྲུབ་པའི་སྣ་ཚོགས་རྡོ་རྗེའོ། །རྡོ་རྗེ་ལས་ཀྱི་དེ་བཞིན་ནོ། །རྡོ་རྗེ་སྲུང་བའི་རྡོ་རྗེ་ལས་བྱས་པའི་གོ་ཆའོ། །རྡོ་རྗེ་
གནོད་སྦྱིན་གྱི་རྡོ་རྗེས་མཚན་པའི་མཆེ་བ་གཟུང་ངོ་། །རྡོ་རྗེ་མཚམས་ཀྱི་རྡོ་རྗེ་ཁུ་ཚུར་དག་གིས་གཟུང་བའི་རྡོ་རྗེ་རྩེ་ལྔ་པའོ། །རྡོ་རྗེ་སྒེག་མོའི་རྡོ་རྗེ་གཉིས་སོ། །རྡོ་རྗེ་ཕྲེང་བ་མའི་རིན་པོ་ཆེའི་ཕྲེང་བའོ། །རྡོ་རྗེ་གླུ་མའི་པི་ཝང་ངོ་། །རྡོ་རྗེ་གར་མའི་རྡོ་རྗེ་རྩེ་གསུམ་གྱིས་མཚན་པའི་ལག་
པ་གཉིས་སོ། །རྡོ་རྗེ་བདུག་སྤོས་མའི་པོག་ཕོར་རོ། །རྡོ་རྗེ་མེ་ཏོག་མའི་མེ་ཏོག་གི་སྣོད་དོ། །མར་མེ་མའི་མར་མེའི་སྡོང་པོའོ། །དྲི་མའི་དྲིའི་དུང་སེར་པོའོ། །བྱམས་པའི་ཡལ་ག་དང་བཅས་པའི་ཀླུ་ཤིང་གི་མེ་ཏོག་གོ། །དོན་ཡོད་གཟིགས་ཀྱི་སྤྱན་དང་བཅས་པའི་

ཆུ་སྐྱེས་སོ། །ངན་སོང་ཀུན་འཇོམས་ཀྱི་ལྕགས་ཀྱུའོ། །མྱ་ངན་དང་མུན་པ་ཐམས་ཅད་འཇོམས་པའི་བློ་གྲོས་ཀྱི་དབྱུག་པའོ། །སྤོས་ཀྱི་གླང་པོའི་དུང་ངོ་། །དཔའ་བར་འགྲོ་བའི་རལ་གྲིའོ། །ནམ་མཁའ་མཛོད་ཀྱི་པདྨ་ལ་གནས་པའི་ཆོས་ཀྱི་མཛོད་དོ། །ཡེ་ཤེས་ཏོག་
གི་ཡིད་བཞིན་གྱི་ནོར་བུའི་རྒྱལ་མཚན་ནོ། །བདུད་རྩི་འོད་ཀྱི་བུམ་པའོ། །ཟླ་འོད་ཀྱི་ཟླ་བའོ། །བཟང་སྐྱོང་གི་འབར་བ་དང་བཅས་པའི་རིན་པོ་ཆེའོ། །དྲ་བ་ཅན་གྱི་འོད་ཀྱི་རྡོ་རྗེའི་གུར་རོ། །རྡོ་རྗེ་སྙིང་པོའི་རྡོ་རྗེ་དང་ཨུཏྤ་ལ་སྔོན་པོའོ། །བློ་གྲོས་མི་ཟད་པའི་བུམ་པའོ། །སྤོབས་
པ་བརྩེགས་པའི་པདྨ་ལ་གནས་པའི་རིན་པོ་ཆེ་བརྩེགས་པའོ། །ཀུན་དུ་བཟང་པོའི་རིན་པོ་ཆེའི་སྙེ་མའོ། །རྡོ་རྗེ་ལྕགས་ཀྱུའི་ལྕགས་ཀྱུའོ། །རྡོ་རྗེ་ཞགས་པའི་ཞགས་པའོ། །རྡོ་རྗེ་རྒྱས་པའི་ལྕགས་སྒྲོག་གོ། །རྡོ་རྗེ་འབེབས་པའི་རྡོ་རྗེས་མཚན་པའི་དྲིལ་བུའོ། །དེའི་རྗེས་སུ་ཆུ་
འགྲམ་དུ་རིན་པོ་ཆེ་ལྔ་དང་། སྨན་ལྔ་དང་། འབྲུ་ལྔ་དང་། དྲི་ལྔ་བུམ་པའི་ནང་དུ་བྱས་ཏེ་ཡལ་ག་རྒྱས་པའི་ལོ་མས་ཁ་བརྒྱན་ཏེ་མེ་ཏོག་གི་ཕྲེང་བ་དང་བཅས་ཤིང་གོས་ཟུང་གིས་མགུལ་པ་བརྒྱན་ནས་རྒྱལ་མཚན་དང་། དར་དང་གསེར་ལས་བྱས་པའི་ཐིག་ལེ་དང་། མིག་གཉིས་
དང་། ལེ་བརྒན་རྩི་དང་། མཆོད་ཕྱིར་ཐོགས་ཀྱིས་ཉེ་བར་བརྒྱན་པར་བྱས་ལ། འབྲས་ཡོས་དང་། འབྲུ་མ་ཉམས་པ་དང་། མེ་ཏོག་དང་། པྲི་ཡང་ཀུ་དང་། གོ་ཡུ་རྣམས་ཀྱིས་ནང་བཀང་སྟེ། ཀུ་ཤ་སར་པའི་སྟན་འཁྱིལ་པ་ལ་བཞག་ནས་ལས་ཐམས་ཅད་པའི་བུམ་པའི་
སྔགས་ཀྱིས་བྱིན་གྱིས་བརླབས་ནས་དཱུར་བ་དང་། ཀུན་ད་དང་། ས་ལ་མ་ལྷུང་བའི་བའི་ལྕི་བ་དང་། རས་དཀར་པོ་རྣམས་ཀྱིས་བསྲུང་བར་བྱའོ། །དེ་ནས་སློབ་དཔོན་ཁྲུས་བྱས་ནས་མཉམ་པར་འདུག་སྟེ། མྱུར་དུ་བཾ་ཡིག་ཡོངས་སུ་གྱུར་པ་ལས་རིན་པོ་ཆེ་སྣ་ཚོགས་ཀྱི་རང་བཞིན་
གྱི་བུམ་པ་ལ་ཨ་ཡིག་ལས་སྐྱེས་པའི་ཆོས་འབྱུང་དཀར་པོ་ནང་དུ་གནས་པ་བསྒོམ་པར་བྱའོ། །དེའི་རྗེས་སུ་རང་རང་གི་ས་བོན་གྱི་མཚན་མ་ཡོངས་སུ་གྱུར་པ་ལས་རང་རང་གི་ལྷ་རྣམས་རྣམ་པར་བསམ་པར་བྱའོ། །རང་གི་སྙིང་གའི་ས་བོན་གྱི་འོད་ཟེར་གྱི་ལྕགས་ཀྱུས་ཡེ་ཤེས་

སེམས་དཔའ་སྤྱན་དྲངས་ཏེ་མདུན་དུ་བལྟས་ནས་ཞབས་བསིལ་དང་ཞལ་བསིལ་ལ་སོགས་པ་དབུལ་བར་བྱའོ། །དེ་ནས་དམ་ཚིག་སེམས་དཔའ་ལ་བཅུག་སྟེ་ཆགས་པ་ཆེན་པོས་བཞུ་ནས་སླར་ཡང་བྱང་ཆུབ་སེམས་ཀྱི་གཟུགས་ཀྱིས་བདུད་རྩིར་གྱུར་པར་བསམ་པར་
བྱའོ། །མཚན་མ་ལ་དམ་ཚིག་གི་ལྷ་དང་ཡེ་ཤེས་ཀྱི་ལྷ་དག་གཅིག་ཏུ་གྱུར་པར་བསམ་མོ། །དེ་ནས་མེ་ཏོག་གི་ཕྲེང་བ་དང་བཅས་ཏེ་སྐུད་པ་ལྔ་རྡོ་རྗེ་ལ་བཅིངས་ཏེ་བུམ་པ་ས་ལ་བཞག་ནས་གཡོན་པ་དྲིལ་བུ་དང་བཅས་པའི་གཡོན་པའི་ཁུ་ཚུར་གྱིས་གཟུང་ངོ་། །ཨོཾ་སརྦ་ཏ་ཐཱ་ག་ཏ་མ་ཧཱ་ཡོ་གཱི་
ཤྭ་ར་ཧཱུཾ་ཞེས་པ་ནི་འཁོར་ལོའི་དབང་ཕྱུག་གི་སྙིང་པོའི་སྔགས་དེ་ལན་བདུན་དུ་མངོན་པར་བསྔགས་པར་བྱའོ། །ཨོཾ་བཛྲ་ཡཀྵ་ཧཱུཾ་ཞེས་པ་ནི་ལས་ཐམས་ཅད་པའི་སྔགས་ཏེ་གསུམ་དུ་མངོན་པར་བསྔགས་པར་བྱའོ། །ཡང་རྡོ་རྗེ་གནོད་སྦྱིན་གྱི་སྔགས་ཀྱིས་དེ་བཞིན་དུ་བསྔགས་ཏེ་མེ་ཏོག་
གསུམ་གཞུག་པར་བྱའོ། །སོ་སོའི་སྔགས་ནི་བརྒྱ་རྩ་བརྒྱད་བཟླས་པར་བྱའོ། །དེའི་རྗེས་སུ་རྣམ་པར་རྒྱལ་བ་ལ་སོགས་པའི་བུམ་པ་མེ་ཏོག་ལ་སོགས་པས་ཡང་དག་པར་མཆོད་ནས་ལས་ཐམས་ཅད་པའི་བུམ་པ་གཟུང་ནས་མངོན་པར་བྲན་ཏེ་གཏོར་མ་ཕུལ་ནས་ཀུན་ཁྱབ་ཅེས་
པ་ལ་སོགས་པའི་བསྟོད་པ་སྔོན་དུ་སོང་བས་དྲིལ་བུ་དཀྲོལ་བར་བྱའོ། །ཀུན་ཁྱབ་སྲིད་པའི་རྩེ་མོའི་རྩེ། །བདེ་གཤེགས་རྒྱལ་བའི་བདག་པོ་སྟེ། །ཁམས་གསུམ་པ་ཡི་རྒྱལ་པོ་ཆེ། །རྣམ་པར་སྣང་མཛད་ཕྱག་འཚལ་བསྟོད། །རྡོ་རྗེ་སེམས་དཔའ་ཁྱོད་ཕྱག་འཚལ། །རྡོ་རྗེ་རིན་ཆེན་
ཁྱོད་ཕྱག་འཚལ། །རྡོ་རྗེ་ཆོས་ཁྱོད་ཕྱག་འཚལ་བསྟོད། །རྡོ་རྗེ་ལས་ཁྱོད་ཕྱག་འཚལ་ལོ། །དེ་ནས་བུམ་པ་དེ་རྣམས་ནས་ཆུ་ཅུང་ཟད་བླངས་ཏེ་ལས་ཐམས་ཅད་པའི་བུམ་པར་བླུགས་སོ། །སློབ་དཔོན་གང་ཞིག་རྡོ་རྗེ་དབྱིངས་ལ་མི་སྤྲོ་ན་དེའི་རང་གི་ཡི་དམ་ལྷའི་སྤྲོ་བས་སྦྱང་བ་དང་
རབ་ཏུ་གནས་པའི་མཐར་ཐུག་པའི་བྱ་བ་ཐམས་ཅད་བྱེད་པ་ལ་འགལ་བ་མེད་དོ། །ད་ནི་བུམ་པ་གཞག་པའི་རིམ་པ་བརྗོད་པར་བྱ་སྟེ། དེ་ལ་དཀྱིལ་འཁོར་གྱི་ཤར་གྱི་སྒོ་ནས་བརྩམས་ནས་གཡས་སྐོར་གྱིས་རྣམ་པར་རྒྱལ་བའི་བུམ་པ་ལ་སོགས་པ་རྣམས་ནས་མི་བསྐྱོད་པའི་

བུམ་པའི་མཐར་ཐུག་པར་དགོད་པར་བྱའོ། །ཤར་གྱི་སྒོ་ལ་འཁོར་ལོའི་དབང་ཕྱུག་གི་རྣམ་པར་རྒྱལ་བའི་བུམ་པ་དང་། དེའི་རྗེས་སུ་རིམ་གྱིས་རྡོ་རྗེ་ལྕགས་ཀྱུ་དང་། རྡོ་རྗེ་ཆགས་པ་དང་། རྡོ་རྗེ་ལེགས་པ་དང་། ངན་སོང་ཀུན་འཇོམས་དང་། མྱ་ངན་དང་མུན་པ་ཐམས་ཅད་
འཇོམས་པའི་བློ་གྲོས་དང་། རྡོ་རྗེ་སྒེག་མོ་དང་། སེམས་མ་རྡོ་རྗེ་མ་དང་། རྡོ་རྗེ་བདུག་སྤོས་མ་དང་། སྤོས་ཀྱི་གླང་པོ་དང་། དཔའ་བར་འགྲོ་བ་དང་། རྡོ་རྗེ་གཟི་བརྗིད་དང་། རྡོ་རྗེ་རིན་ཆེན་རྣམས་ཀྱི་བུམ་པ་བཅུ་གསུམ་མོ། །དེ་བཞིན་དུ་ལྷོའི་སྒོ་ནས་བརྩམས་ནས་རིན་
ཆེན་འབྱུང་ལྡན་དང་། རྡོ་རྗེ་ཞགས་པ་དང་། རྡོ་རྗེ་ཏོག་དང་། རྡོ་རྗེ་བཞད་པ་དང་། ནམ་མཁའ་མཛོད་དང་། ཡེ་ཤེས་ཏོག་དང་། རྡོ་རྗེ་ཕྲེང་བ་མ་དང་། རིན་ཆེན་རྡོ་རྗེ་མ་དང་། རྡོ་རྗེ་མེ་ཏོག་མ་དང་། བདུད་རྩི་འོད་དང་། ཟླ་འོད་དང་། རྡོ་རྗེ་རྣོན་པོ་དང་། རྡོ་རྗེ་ཆོས་རྣམས་ཀྱི་བུམ་
པ་བཅུ་གསུམ་མོ། །དེ་བཞིན་དུ་ནུབ་སྒོ་ནས་བརྩམས་ནས་འོད་དཔག་མེད་དང་། རྡོ་རྗེ་རྒྱས་པ་དང་། རྡོ་རྗེ་རྒྱུ་དང་། རྡོ་རྗེ་གསུང་བ་དང་། བཟང་སྐྱོང་དང་། དྲ་བ་ཅན་གྱི་འོད་དང་། རྡོ་རྗེ་གླུ་མ་དང་། ཆོས་རྡོ་རྗེ་མ་དང་། རྡོ་རྗེ་མར་མེ་མ་དང་། རྡོ་རྗེ་དྲི་མ་དང་། བློ་གྲོས་མི་ཟད་པ་དང་།
རྡོ་རྗེ་སྲུང་བ་དང་། རྡོ་རྗེ་ལས་རྣམས་ཀྱི་བུམ་པ་བཅུ་གསུམ་མོ། །དེ་བཞིན་དུ་བྱང་སྒོ་ནས་བརྩམས་ནས་དོན་ཡོད་གྲུབ་པ་དང་། རྡོ་རྗེ་འབེབས་པ་དང་། རྡོ་རྗེ་གནོད་སྦྱིན་དང་། རྡོ་རྗེ་མཚམས་དང་། སྤོབས་པ་བརྩེགས་པ་དང་། ཀུན་དུ་བཟང་པོ་དང་། རྡོ་རྗེ་གར་མ་
དང་། ལས་ཀྱི་རྡོ་རྗེ་མ་དང་། དྲི་རྡོ་རྗེ་མ་དང་། བྱམས་པ་དང་། དོན་ཡོད་གཟིགས་དང་། རྡོ་རྗེ་རྒྱལ་པོ་དང་། རྡོ་རྗེ་སེམས་དཔའ་དང་། མི་བསྐྱོད་པ་རྣམས་ཀྱི་བུམ་པ་བཅུ་བཞི་རྣམས་སོ། །ལས་ཐམས་ཅད་པའི་བུམ་པ་ནི་དབང་ལྡན་གྱི་ཕྱི་རོལ་གྱི་ཕྱོགས་སུ་བལྟས་ནས་བུམ་པའི་
ཕྲེང་བ་རྣམས་ཀྱི་བར་དུ་གཞག་པར་བྱའོ། །དེའི་ཕྱིར་དང་པོ་ལྷག་པར་གནས་པར་བྱས་པའི་བུམ་པ་རྣམས་དཀྱིལ་འཁོར་གྱི་འཁོར་ལོ་ལ་གཡས་ཕྱོགས་སུ་བསྐོར་བ་ལན་རེ་བྱས་ནས་དཀྱིལ་འཁོར་གྱི་འཁོར་ལོའི་འཁོར་ལོ་དང་འོད་ཟེར་གྱི་ཕྲེང་བའི་སའི་ཕྱི་རོལ་དུ་བུམ་པ་རྣམས་གཞག་པར་བྱའོ། །བུམ་པ་

དགོད་པའི་དུས་སུ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པ་ཐེག་པ་ཆེན་པོའི་མདོ་རྣམས་བཀླག་པར་བྱའོ། །ག་པུར་དང་ཨ་ཀ་རུ་དང་སིཧླ་ལ་སོགས་པའི་བདུག་སྤོས་ཀྱི་སྣོད་དང་མར་མེ་ལ་སོགས་པ་རྣམས་ཀྱིས་ཀྱང་དཀྱིལ་འཁོར་ལ་མཆོད་པར་བྱའོ། །དེ་ནས་སྔ་དྲོའི་
ཐུན་ལ་སློབ་དཔོན་དྲི་བཟངས་ཀྱི་ཆུས་ཁྲུས་བྱས་ནས་ལས་ཐམས་ཅད་པའི་ཆུས་བདག་ཉིད་ལ་འཐོར་འཐུང་བྱས་ནས་སྲུང་བའི་འཁོར་ལོ་ལ་སོགས་པ་བསྒོམ་པ་དང་སྔགས་དང་ཕྱག་རྒྱ་རྣམས་ཀྱིས་ཡང་དག་པར་བསྲུང་བར་བྱའོ། །རྡོ་རྗེ་དང་དྲིལ་བུ་བཟུང་ནས་ཨོཾ་བཛྲ་ཨུདྒྷ་ཊ་ཡ་ས་མ་ཡ་པྲ་
བེ་ཤ་ཡ་ཧཱུཾ་ཞེས་པའི་སྔགས་འདི་བརྗོད་ནས་སྒོ་དབྱེ་བར་བྱའོ། །ཏིང་ངེ་འཛིན་གསུམ་བསྒོམ་པར་བྱས་ནས། ཡང་དཔུང་བཟངས་ཀྱི་ཚིགས་སུ་བཅད་པ་རབ་ཏུ་བྱེད་པ་དྲུག་པ་ནས་བཤད་པའི་ཆོ་གས་གཏོར་མ་ཆེན་པོ་ཕུལ་ཏེ། དེ་ལ་གནས་པའི་ལྷ་རྣམས་ཡིད་ཀྱིས་ནམ་མཁའ་ལ་བཞུགས་
སུ་གསོལ་ལོ། །འདིར་གཙུག་ལག་ཁང་ལ་སོགས་པའི་ས་གཞི་ལ་བགེགས་རྣམས་མེད་པར་བསམ་པར་བྱའོ། །དེའི་རྗེས་ལ། ཤར་དང་བྱང་དུ་རྒྱུག་པ་ཡི། །རི་མོ་བདུན་བདུན་རབ་ཏུ་སྦྱར། །རེ་མིག་སུམ་ཅུ་རྩ་དྲུག་སྟེ། །མཉམ་དུ་ཁང་པའི་ས་གཞི་ལ། །དབུས་ཀྱི་གནས་ནི་བཞི་
པོ་ལ། །དེ་ལ་སྔགས་པ་གནས་པར་བྱ། །དེ་ཕྱིར་མེ་མཚམས་རེ་མིག་སོགས། །རེ་མིག་བཅུ་གཉིས་གོ་རིམས་བཞིན། །སྤྲིན་གྱི་སྒྲ་དང་། ཁྲོ་བོ་གཟེགས་མ་དང་། ཤེས་རབ་མཐར་བྱེད་དང་། གསུས་པོ་ཆེ་དང་། འཇིག་རྟེན་གསུམ་རབ་ཏུ་སྒྲུབ་པ་དང་། པདྨ་མཐར་བྱེད་དང་།
རྒྱལ་བ་དང་། དཔའ་བོ་རྣམ་པར་གནོན་པ་དང་། བདུད་རྩི་འཁྱིལ་བ་དང་། རྣམ་པར་རྒྱལ་བ་དང་། རྣམ་པར་རྒྱལ་བ་ཆེན་པོ་དང་། གཤིན་རྗེ་མཐར་བྱེད་རྣམས་གཡས་སྐོར་གྱིས་བཀོད་ནས་མཆོད་པར་བྱའོ། །དེ་བཞིན་དུ་དེའི་ཕྱིར་མེ་ལ་སོགས་པའི་རེ་མིག་ཉི་ཤུ་པོ་རྣམས་ལ་ཊཀྐི་
དང་། མཐར་སྤྱོད་དང་། རྡོ་རྗེ་ཞགས་པ་དང་། ཡལ་ག་ཅན་དང་། རིན་ཆེན་གཙུག་ཏོར་དང་། དབྱུག་པ་སྔོན་པོ་དང་། སྦྱང་དཀའ་བ་དང་། རྡོ་རྗེ་རྒྱས་པ་དང་། འཇིགས་བྱེད་དང་། རབ་ཏུ་གཏུམ་པོ་དང་། སྟོབས་པོ་ཆེ་དང་། གོམ་བསྐྱོད་དང་། རྡོ་རྗེ་འབེབས་པ་དང་། རྡོ་རྗེ་གད་རྒྱངས་

དང་། རྡོ་རྗེ་རྣམ་འཇོམས་དང་། མི་གཡོ་བ་དང་། རྣམ་འཇོམས་དང་། རྡོ་རྗེ་ལྕགས་ཀྱུ་དང་། རྡོ་རྗེ་གནམ་ལྕགས་དང་། བལྟ་བར་མི་བཟོད་པ་རྣམས་དགོད་པར་བྱས་ནས་མཆོད་པར་བྱའོ། །དེ་ལ་སྤྲིན་གྱི་སྒྲ་དང་། གསུས་པོ་ཆེ་དང་། རྒྱལ་བ་དང་། རྣམ་པར་རྒྱལ་བ་རྣམས་དང་པོར་
མཆོད་པར་བྱའོ། །རང་རང་གི་རེ་མིག་ལ་རང་རང་གི་ཕུར་བུས་གདབ་པར་བྱའོ། །ཨོཾ་ཨཱཿམེ་གྷ་ནཱ་དཱ་ཡ་ཧཱུཾ་སྭཱ་ཧཱ། ཨོཾ་ཨཱཿམ་ཧོ་ད་རཱ་ཡ་ཧཱུཾ་སྭཱ་ཧཱ། ཨོཾ་ཨཱཿཛཱ་ཡཱ་ཡ་ཧཱུཾ་སྭཱ་ཧཱ། ཨོཾ་ཨཱཿབི་ཛ་ཡཱ་ཡ་ཧཱུཾ་སྭཱ་ཧཱ། དེ་ནས་དེ་བཞིན་དུ་མི་གཡོ་བ་ལ་སོགས་པ་ཁྲོ་བོ་ཉི་ཤུ་རྩ་བརྒྱད་པོ་རྣམས་ཀྱི་
རང་རང་གི་རེ་མིག་རྣམས་རང་རང་གི་ཕུར་བུས་གདབ་པར་བྱའོ། །ཨོཾ་ཨཱཿཨ་ཙ་ལཱ་ཡ་ཧཱུཾ་སྭཱ་ཧཱ། ཨོཾ་ཨཱཿབི་དྲཱ་བ་ཀཱ་ཡ་ཧཱུཾ་སྭཱ་ཧཱ། ཨོཾ་ཨཱཿབཛྲ་ཨཾ་ཀུ་ཤཱ་ཡ་ཧཱུཾ་སྭཱ་ཧཱ། ཨོཾ་ཨཱཿམ་ཧཱ་བི་ཛ་ཡཱ་ཡ་ཧཱུཾ་སྭཱ་ཧཱ། ཨོཾ་ཨཱཿཡ་མཱནྟ་ཀཱ་ཡ་ཧཱུཾ་སྭཱ་ཧཱ། ཨོཾ་ཨཱཿབཛྲ་ཨཱ་ཤ་ནི་མ་ཧཱ་ཀྲོ་དྷཱ་ཡ་ཧཱུཾ་སྭཱ་ཧཱ།
ཨོཾ་ཨཱཿདུརྣཱི་རཱི་ཀྵཱ་ཡ་ཧཱུཾ་སྭཱ་ཧཱ། ཨོཾ་ཨཱཿཊཀྐི་རཱ་ཛཱ་ཡ་ཧཱུཾ་སྭཱ་ཧཱ། ཨོཾ་ཨཱཿཨནྟ་ཙ་རཱ་ཡ་ཧཱུཾ་སྭཱ་ཧཱ། ཨོཾ་ཨཱཿབཛྲ་པཱ་ཤཱ་ཡ་ཧཱུཾ་སྭཱ་ཧཱ། ཨོཾ་ཨཱཿཀ་ནི་ཀྲོ་དྷཱ་ཡ་ཧཱུཾ་སྭཱ་ཧཱ། ཨོཾ་ཨཱཿཔྲཛྙཱནྟ་ཀཱ་ཡ་ཧཱུཾ་སྭཱ་ཧཱ། ཨོཾ་ཨཱཿབ་ལཱ་ལཱ་ཡ་ཧཱུཾ་སྭཱ་ཧཱ། ཨོཾ་ཨཱཿརཏྣ་ཤི་ཁ་རཱ་ཡ་ཧཱུཾ་སྭཱ་ཧཱ། ཨོཾ་ཨཱཿནཱི་ལ་དཎྜཱ་ཡ་ཧཱུཾ་སྭཱ་ཧཱ།
ཨོཾ་ཨཱཿདུརྫ་ཡཱ་ཡ་ཧཱུཾ་སྭཱ་ཧཱ། ཨོཾ་ཨཱཿབཛྲ་སྥོ་ཊཱ་ཡ་ཧཱུཾ་སྭཱ་ཧཱ། ཨོཾ་ཨཱཿཏྲཻ་ལོཀྱ་པྲ་སཱ་དྷ་ཀཱ་ཡ་ཧཱུཾ་སྭཱ་ཧཱ། ཨོཾ་ཨཱཿཔདྨཱནྟ་ཀཱ་ཡ་ཧཱུཾ་སྭཱ་ཧཱ། ཨོཾ་ཨཱཿབཛྲ་བྷཱི་མཱ་ཡ་ཧཱུཾ་སྭཱ་ཧཱ། ཨོཾ་ཨཱཿབཛྲ་པྲ་ཙཎྜཱ་ཡ་ཧཱུཾ་སྭཱ་ཧཱ། ཨོཾ་ཨཱཿམ་ཧཱ་བ་ལཱ་ཡ་ཧཱུཾ་སྭཱ་ཧཱ། ཨོཾ་ཨཱཿབ་ད་ནཱི་ཀྵེ་པཱ་ཡ་ཧཱུཾ་སྭཱ་ཧཱ། ཨོཾ་ཨཱཿབཛྲ་ཨཱ་བེ་ཤཱ་ཡ་
ཧཱུཾ་སྭཱ་ཧཱ། ཨོཾ་ཨཱཿབཱི་ར་བི་ཀྲཱནྟཱ་ཡ་ཧཱུཾ་སྭཱ་ཧཱ། ཨོཾ་ཨཱཿཨ་མྲྀ་ཏ་ཀུཎྜ་ལི་ནེ་ཧཱུཾ་སྭཱ་ཧཱ། ཨོཾ་ཨཱཿབཛྲ་ཨཊྚ་ཧཱ་སཱ་ཡ་ཧཱུཾ་སྭཱ་ཧཱ། ཨོཾ་ཨཱཿབཛྲ་བི་དཱ་ར་ཎཱ་ཡ་ཧཱུཾ་སྭཱ་ཧཱ། དེ་ནས་ཁང་པའི་དཀྱིལ་དུ་བསྡད་ནས་རཾ་ལས་སྐྱེས་པའི་ཉི་མའི་སྟེང་དུ་ཧཱུཾ་ལས་སྐྱེས་པའི་སྣ་ཚོགས་རྡོ་རྗེ་ལ་གནས་པའི་ཧཱུཾ་ཡིག་གི་འོད་ཟེར་
རབ་ཏུ་འབར་བ་རྡོ་རྗེ་རྣམ་པར་བརྐྱང་བ་མཚམས་མེད་ཅིང་དུམ་བུ་གཅིག་ཏུ་གྱུར་པ་རྡོ་རྗེའི་ར་བ་དང་། གུར་དང་མདའི་དྲ་བ་དང་། བ་དན་དང་། འོག་གི་གནས་ཀྱང་འབར་ཞིང་འབར་བ་བཟོད་པར་དཀའ་བའི་སྣ་ཚོགས་རྡོ་རྗེའི་ས་གཞིར་རྣམ་པར་བསྒོམ་མོ། །དེའི་དབུས་སུ་མྱུར་དུ་

བདག་ཉིད་རྡོ་རྗེ་སེམས་དཔའི་གཟུགས་སོ། །གཞན་དུ་ཡང་བསྒྱུར་ཏེ་འཇིག་རྟེན་གསུམ་ལས་རྣམ་པར་རྒྱལ་བ་དང་། མིང་གཞན་རྡོ་རྗེ་ཧཱུཾ་མཛད་ཅེས་པ་སྣ་ཚོགས་ཆུ་སྐྱེས་དང་ཉི་མ་ལ་གནས་པའི་འཇིགས་བྱེད་དང་དུས་མཚན་མ་ཞབས་གཉིས་ལས་གཡས་བརྐྱང་བས་
མནན་པ་ཁྲོ་བོ་བསྐལ་བའི་དུས་ཀྱི་མཐའི་མེའི་འོད་ཟེར་གྱི་ཚོགས་པ་འདྲ་བ། འགྲོ་བ་མ་ལུས་པའི་བགེགས་ཀྱི་ཚོགས་རྣམས་ཟ་བར་བྱེད་པ་ལྟ་བུ་སྔོན་པོ་དང་སེར་པོ་དང་ལྗང་གུའི་རྩ་བ་དང་། གཡས་དང་གཡོན་པའི་ཞལ་གསུམ་གསལ་བར་བྱས་པ། མཆེ་བ་གཙིགས་ཤིང་
ལྗགས་བསྐྱོད་པ་ཞལ་སོ་སོའི་སྨིན་མ་འཁྱོག་པོ་བསྡུས་པ། དམར་ཞིང་ཟླུམ་པའི་སྤྱན་གསུམ་པ། ཕྱག་རྒྱ་དྲུག་དང་ལྡན་པ་དཔྲལ་བའི་སྟེང་དུ་ཐོད་པ་ལྔ་དང་མི་མགོ་རློན་པ་ཁྲག་འཛག་པའི་ཕྲེང་བ་འཕྱང་བས་རྣམ་པར་བརྒྱན་པ་དེའི་མགོ་བོའི་སྐ་རགས་དང་། སྟག་གི་པགས་
པའི་ཤམ་ཐབས་འཛིན་པ་སྐྲ་དམར་སེར་གྱེན་དུ་འབར་ཞིང་དགའ་བོ་སྔོན་པོས་དཀྲིས་པའོ། །འཇོག་པོ་ལ་སོགས་པ་ཀླུའི་རྒྱལ་པོ་རྣམས་ཀྱིས་བརྒྱན་ཅིང་རྡོ་རྗེ་དྲིལ་བུའི་མཚན་པའི་ཕྱག་གཉིས་རྡོ་རྗེ་ཁུ་ཚུར་བཅངས་ཏེ་རྒྱབ་གཉིས་སྦྱར་ཏེ་མཐེའུ་ཆུང་གཉིས་ལྕགས་སྒྲོག་བཞིན་དུ་
འཁྱུད་དེ་མཛུབ་མོ་གཉིས་བརྐྱང་བ་ནི་འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་རང་འོད་ཀྱི་ཤེས་རབ་ལ་འཁྱུད་པའོ། །གཡས་པའི་ཕྱག་གཉིས་ལྕགས་ཀྱུ་དང་ཞགས་པའོ། །གཡོན་པ་དག་ན་ཐོད་པ་དང་ཁ་ཊྭཱཾ་ག་འཛིན་པའོ། །ཕྱོགས་ཀྱི་ཞལ་ནས་ཧཱུཾ་གི་སྒྲ་སྒྲོགས་པ་རང་
གི་སྙིང་གའི་ཧཱུཾ་གི་ཡི་གེའི་འོད་ཟེར་འཕྲོས་པས་ཕྱོགས་ཕྱོགས་ནས་བགེགས་རྣམས་དགུག་པར་བྱའོ། །དེ་ནས་བྱང་ཕྱོགས་ཀྱི་སྒྲུབ་པ་པོ་སྤྲིན་གྱི་སྒྲ་ལ་སོགས་པའི་རྣམས་སོ་སོར་བསྒྱུར་བར་བྱས་ལ་རང་རང་གི་ཕུར་བུ་གདབ་པར་བྱའོ། །དང་པོ་མེའི་མཚམས་ལ་སོགས་པའི་ཟུར་བཞི་
ལ་ཕྱི་རོལ་དུ་འཆད་པར་འགྱུར་བའི་རང་རང་གི་སྔགས་ཀྱིས་ཕུར་བུ་གདབ་པར་བྱའོ། །དེ་ཡང་ཕུར་བུ་རིང་བའི་ཚད་ནི་སོར་བཅོ་བརྒྱད་དང་བཅུ་གཉིས་དང་བརྒྱད་རྣམས་གོ་རིམས་ཇི་ལྟ་བ་བཞིན་དུ་སོར་དྲུག་དང་བཞི་དང་ཕྱེད་ཀྱིས་ལྷག་པའི་གཉིས་ཀྱི་ཚད་ཀྱི་བསྲིང་བར་བྱའོ། །གསེར་

ལས་སྐྱེས་པ་དང་སེང་ལྡེང་དག །ལས་ཐམས་ཅད་པའི་བུམ་པའི་ཆུས་བཀྲུས་པ། ལས་ཐམས་ཅད་པའི་སྔགས་ཀྱིས་བྱིན་གྱིས་བརླབ་པོ། །དེ་ནས་རི་མོ་ཉི་ཤུ་རྩ་བརྒྱད་ཀྱི་རྩེ་མོ་ལ་གོ་རིམས་བཞིན་དུ་དང་པོ་དབང་ལྡན་ནས་བརྩམས་ཏེ་མི་གཡོ་བ་དང་། རྣམ་འཇོམས་དང་། རྡོ་རྗེ་
ལྕགས་ཀྱུ་དང་། རྣམ་པར་རྒྱལ་བ་ཆེན་པོ་དང་། གཤིན་རྗེ་མཐར་བྱེད་དང་། རྡོ་རྗེ་གནམ་ལྕགས་དང་། བལྟ་བར་མི་བཟོད་པ་རྣམས་ཀྱི་སྔོན་པོ་དང་། སེར་པོ་དང་། དཀར་པོ་དང་། སྐྱ་བོ་དང་། སྔོན་པོ་དང་། སེར་པོ་དང་། དཀར་པོ་རྣམས་དོན་གྲུབ་དང་ཙནྡན་དམར་
པོས་རྣམ་པར་བྱུགས་ཏེ། མེ་ཏོག་དམར་པོ་དང་མཆོད་ཕྱིར་ཐོགས་ཀྱིས་ཉེ་བར་བརྒྱན་ཏེ། ལྟེ་འོག་མན་ཆད་རྩེ་མོ་གཅིག་པའི་རྣམ་པ་སྟེ་མི་གཡོ་བ་ལ་སོགས་པའི་ཁྲོ་བོའི་མིང་གི་རྣམ་པའོ། །དེ་བཞིན་དུ་མེའི་མཚམས་ནས་བརྩམས་ཏེ་ཊཀྐི་དང་། མཐར་སྤྱོད་པ་དང་།
རྡོ་རྗེ་ཞགས་པ་དང་། ཁྲོ་བོ་གཟེགས་མ་དང་། ཤེས་རབ་མཐར་བྱེད་དང་། འབྲོས་པ་དང་། རིན་ཆེན་གཙུག་ཏོར་རྣམས་ཀྱི་སྔོན་པོ་དང་། སྐྱ་བོ་དང་། ནག་པོ་དང་། སྔོན་པོ་དང་། དཀར་པོ་དང་། ལྗང་གུ་དང་། སེར་པོ་རྣམས་སོ། །ལྷག་མ་སྔོན་བཞིན་དུའོ། །དེ་བཞིན་
དུ་དང་པོ་བདེན་བྲལ་ནས་བརྩམས་ཏེ་དབྱུག་པ་སྔོན་པོ་དང་། སྦྱང་དཀའ་བ་དང་། རྡོ་རྗེ་རྒྱས་པ་དང་། འཇིག་རྟེན་གསུམ་རབ་ཏུ་སྒྲུབ་པར་བྱེད་པ་དང་། པདྨ་མཐར་བྱེད་དང་། འཇིགས་བྱེད་དང་། རབ་ཏུ་གཏུམ་པོ་རྣམས་སྔོན་པོ་དང་། སེར་པོ་དང་། དམར་པོ་དང་། སྔོན་པོ་དང་། དམར་པོ་དང་།
ལྗང་གུ་དང་། སེར་བ་རྣམས་ཀྱང་འདིར་སྔོན་བཞིན་དུའོ། །དེ་བཞིན་དུ་དང་པོ་རླུང་གི་མཚམས་ནས་བརྩམས་ཏེ། སྟོབས་པོ་ཆེ་དང་། གོམ་བསྐྱོད་དང་། རྡོ་རྗེ་འབེབས་པ་དང་། དཔའ་བོ་རྣམ་པར་གནོན་པ་དང་། བདུད་རྩི་འཁྱིལ་པ་དང་། རྡོ་རྗེ་གད་རྒྱངས་ཅན་དང་། རྡོ་རྗེ་རྣམ་འཇོམས་རྣམས་
སྔོན་པོ་དང་། སྔོ་བསངས་དང་། སྣ་ཚོགས་མདོག་དང་། དཀར་པོ་དང་། སྔོན་པོ་དང་། དཀར་པོ་དང་། ལྗང་གུ་རྣམས་སོ། །འདིར་ཡང་ལྷག་མ་རྣམས་སྔོན་བཞིན་དུའོ། །དེ་ནས་ཡང་མི་གཡོ་བ་ལ་སོགས་པ་ཁྲོ་བོ་ཉི་ཤུ་རྩ་བརྒྱད་ཧཱུཾ་ཡིག་ལས་བྱུང་བའི་རྡོ་རྗེ་ཐོ་བས་མཚན་པ་

ལག་པ་གཡས་ནའོ། །ལྟེ་བའི་སྟེང་དུ་རང་གཟུགས་སོ། །འོག་རྩེ་མོ་གཅིག་པའི་ལག་པ་གཡོན་དུ་བསྒོམ་པར་བྱའོ། །ཨོཾ་བཛྲ་ཨ་ཙ་ལ་མ་ཧཱ་ཀྲོ་དྷ་ཀཱི་ལ་ཡ་སརྦ་བིགྷྣཱན་ཨཱ་ཛྙ་པ་ཡ་ཏི་བཛྲ་དྷ་རཿསརྦ་ཨཱི་ཤ་ནཱ་ནཱཾ་ཀཱ་ཡ་བཱཀྩིཏྟ་ཀཱི་ལ་ཡ་ཧཱུཾ་ཧཱུཾ་ཕཊ། ཅེས་བརྗོད་
ནས་སྔོན་དུ་དབང་ལྡན་གྱི་མགོ་ལ་ཕུར་བུས་གདབ་པོ། །ཕུར་བུ་མི་གཡོ་བའི་རྣམ་པར་བསམ་པར་བྱའོ། །དེ་བཞིན་དུ་ཨོཾ་བཛྲ་མུདྒ་ར་བཛྲ་ཀཱི་ལ་ཡ་ཨ་ཀོ་ཊ་ཡ་ཧཱུཾ། ཞེས་བརྗོད་ནས་བརྡུང་བར་བྱའོ། །དེ་བཞིན་དུ་ཨོཾ་བཛྲ་བི་དྲཱ་བ་ཀ་མ་ཧཱ་ཀྲོ་དྷ་ཀཱི་ལ་ཡ་སརྦ་བིགྷྣཱཾ་ཀཱ་ཡ་བཱཀྩིཏྟཾ་ཀཱི་ལ་
ཡ་ཧཱུཾ་ཕཊ། ཨོཾ་བཛྲ་ཨཾ་ཀུ་ཤ་མ་ཧཱ་ཀྲོ་དྷ་ཀཱི་ལ་ཡ་སརྦ་བིགྷྣནཱ་ཛྙཱ་པ་ཡ་ཏི་བཛྲ་དྷ་རཿསརྦ་ཨ་མྲྀ་ཏཾ་ཀཱ་རཱ་ཎཱཾ་ཀཱ་ཡ་བཱ་ཀྩིཏྟཾ་ཀཱི་ལ་ཡ་ཧཱུཾ་ཕཊ། ཨོཾ་བཛྲ་བི་ཛ་ཡ་མ་ཧཱ་ཀྲོ་དྷ་ཀཱི་ལ་ཡ་སརྦ་བིགྷྣཱནཱ་ཛྙཱ་པ་ཡ་ཏི་བཛྲ་དྷ་རཿསརྦ་ཨིནྡྲ་ཎཱཾ་ཀཱ་ཡ་བཱཀ་ཙིཏྟཾ་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཡ་མཱནྟ་ཀྲྀཏ་མ་ཧཱ་
ཀྲོ་དྷ་ཀཱི་ལ་ཡ་ས་རྦ་བིགྷྣཱནཱ་ཛྙཱ་པ་ཡ་ཏི་བཛྲ་དྷ་རཿསཱུརྱཱ་ནཱཾ་ས་པ་རི་བཱ་རཱ་ཎཱཾ་ཀཱ་ཡ་བཱ་ཀ་ཙིཏྟཾ་ཀཱི་ལ་ཡ་ཧཱུཾ་ཕཊ། ཨོཾ་བཛྲ་ཨཱ་ས་ནི་མ་ཧཱ་ཀྲོ་དྷ་ཀཱི་ལ་ཡ་སརྦ་བི་གྷྣཱནཱ་ཛྙཱ་པ་ཡ་ཏི་བཛྲ་དྷ་རཿསརྦ་ཨུ་པེནྡྲཱ་ཎཱཾ་ཀཱ་ཡ་བཱཀ་ཙིཏྟཾ་ཀཱི་ལ་ཡ་ཧཱུཾ་ཕཊ། ཨོཾ་བཛྲ་དུརྣི་རཱི་ཀྵ་མ་ཧཱ་ཀྲོ་དྷ་ཀཱི་ལ་ཡ་སརྦ་
བིགྷྣཱ་ནཱ་ཛྙཱ་པ་ཡ་ཏི་བཛྲ་དྷ་རཿསརྦ་ཀཱརྟི་ཀཱ་ནཱཾ་ས་པ་རི་བཱ་རཱ་ཎཱཾ་ཀཱ་ཡ་བཱཀ་ཙིཏྟཾ་ཀཱི་ལ་ཡ་ཧཱུཾ་ཕཊ། ཨོཾ་བཛྲ་མུདྒ་ར་ཨཱ་ཀོ་ཊ་ཡ་བཛྲ་ཀཱི་ལ་ཡཱ་ཛྙཱ་པ་ཡ་ཏི་བཛྲ་དྷ་རོ་ཧཱུཾ་ཕཊ། ཅེས་པའི་སྔགས་འདི་ཕུར་བུ་སོ་སོ་ལ་བརྗོད་པར་བྱའོ། །ཤར་དུའོ། །ཨོཾ་བཛྲ་ཊཀྐི་རཱ་ཛཱ་ས་པ་རི་
བཱ་རཱ་ནཱཾ་ཀཱ་ཡ་བཱཀ་ཙིཏྟཾ་ཀཱི་ལ་ཡ་ཧཱུཾ་ཕཊ། ཨོཾ་བཛྲ་ཨནྟ་ཙ་ར་མ་ཧཱ་ཀྲོ་དྷ་ཀཱི་ལ་ཡ་སརྦ་བིགྷྣཱ་ནཱ་ཛྙཱ་པ་ཡ་ཏི་བཛྲ་དྷ་རཿསརྦ་དྷརྨ་ཀིནྣ་ར་རཱ་ཛ་ས་པ་རི་བཱ་རཱ་ཎཱཾ་ཀཱ་ཡ་བཱ་ཀ་ཙིཏྟཾ་ཀཱི་ལ་ཡ་ཧཱུཾ་ཕཊ། ཨོཾ་བཛྲ་པཱ་ཤ་མ་ཧཱ་ཀྲོ་དྷ་ཀཱི་ལ་ཡ་སརྦ་བིགྷྣཱནཱ་ཛྙཱ་པ་ཡ་ཏི་བཛྲ་དྷ་རཿསརྦ་ཨརྠ་སིདྡྷ་བིདྱཱ་དྷ་རཱཾ་
སརྦ་དུཥྚ་ས་པ་རི་པཱ་རཱ་ཎཱཾ་ཀཱ་ཡ་བཱཀ་ཙིཏྟཾ་ཀཱི་ལ་ཡ་ཧཱུཾ་ཕཊ། ཨོཾ་བཛྲ་ཀ་ཎི་མ་ཧཱ་ཀྲོ་དྷ་ཀཱི་ལ་ཡ་སརྦ་བིགྷྣཱནཱ་ཛྙཱ་པ་ཡ་ཏི་བཛྲ་དྷརཿསརྦ་དུཥྚ་ས་པ་རི་བཱ་རཱ་ཎཱཾ་ཀཱ་ཡ་བཱཀ་ཙིཏྟཾ་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཔྲཛྙཱནྟ་ཀྲྀ་ཏ་མ་ཧཱ་ཀྲོ་དྷ་ཀཱི་ལ་ཡ་སརྦ་བིགྷྣཱནཱ་ཛྙཱ་པ་ཡ་ཏི་བཛྲ་དྷ་རཿསརྦ་དུཥྚ་པཉྩ་ཤི་

ཁ་གནྡྷརྦ་རཱ་ཛ་ས་པ་རི་བཱ་རཱ་ཎཱཾ་ཀཱ་ཡ་བཱཀ་ཙིཏྟཾ་ཀཱི་ལ་ཡ་ཧཱུཾ་ཕཊ། ཨོཾ་བཛྲ་མ་ཧཱ་བ་ལ་ཀྲོ་དྷ་ཀཱི་ལ་ཡ་སརྦ་བིགྷྣཱནཱ་ཛྙཱ་པ་ཡ་ཏི་བཛྲ་དྷ་རཿསརྦ་དུཥྚ་བྷྲཾྀ་གི་རི་ཏི་ས་པ་རི་བཱ་རཱ་ཎཱཾ་ཀཱ་ཡ་བཱཀ་ཙིཏྟཾ་ཀཱི་ལ་ཡ་ཧཱུཾ་ཕཊ། ཨོཾ་བཛྲ་རཏྣ་ཤི་ཁ་ར་མ་ཧཱ་ཀྲོ་དྷ་ཀཱི་ལ་ཡ་སརྦ་བིགྷྣཱནཱ་ཛྙཱ་པ་ཡ་ཏི་བཛྲ་དྷ་རཿསརྦ་དུཥྚ་བ་ལ་བྷ་
དྲ་ས་པ་རི་བཱ་རཱ་ཎཱཾ་ཀཱ་ཡ་བཱཀ་ཙིཏྟཾ་ཀཱི་ལ་ཡ་ཧཱུཾ་ཕཊ། ལྷོ་རུའོ། །ཨོཾ་ཨཱཿནཱི་ལ་དཎྜ་མ་ཧཱ་ཀྲོ་དྷ་ཀཱི་ལ་ཡ་སརྦ་བིགྷྣཱནཱ་ཛྙཱ་པ་ཡ་ཏི་བཛྲ་དྷ་རཿསརྦ་དུཥྚ་ནི་རྲྀ་ཏྱ་ས་པ་རི་བཱ་རཱ་ཎཱཾ་ཀཱ་ཡ་བཱཀ་ཙིཏྟཾ་ཀཱི་ལ་ཡ་ཧཱུཾ་ཕཊ། ཨོཾ་ཨཱཿདུར་ཛྫ་ཡ་མ་ཧཱ་ཀྲོ་དྷ་ཀཱི་ལ་སརྦ་བིགྷྣཱནཱ་ཛྙཱ་པ་ཡ་ཏི་བཛྲ་དྷ་རཿསརྦ་དུཥྚ་པྲྀ་ཐྭཱི་དེ་
བཱི། ས་པ་རི་བཱ་རཱ་ཎཱཾ་ཀཱ་ཡ་བཱཀ་ཙིཏྟཾ་ཀཱི་ལ་ཡ་ཧཱུཾ་ཕཊ། ཨོཾ་བཛྲ་སྥོ་ཊ་མ་ཧཱ་ཀྲོ་དྷ་ཀཱི་ལ་ཡ་སརྦ་བིགྷྣཱནཱ་ཛྙཱ་པ་ཡ་ཏི་བཛྲ་དྷ་རཿསརྦ་དུཥྚ་བེ་མ་ཙི་ཏྲ་ས་པ་རི་བཱ་རཱ་ཎཱཾ་ཀཱ་ཡ་བཱཀ་ཙིཏྟཾ་ཀཱི་ལ་ཡ་ཧཱུཾ་ཕཊ། ཨོཾ་བཛྲ་ཏྲཻ་ལོ་ཀྱ་པྲ་སཱ་དྷ་ཀ་མ་ཧཱ་ཀྲོ་དྷ་ཀཱི་ལ་ཡ་སརྦ་བིགྷྣཱ་ནཱ་ཛྙཱ་པ་ཡ་ཏི་བཛྲ་དྷ་རཿསརྦ་དུཥྚ་ཝ་རུ་ཎ་ས་
པ་རི་བཱ་རཱ་ཎཱཾ་ཀཱ་ཡ་བཱཀ་ཙིཏྟཾ་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཔདྨཱནྟ་ཀྲྀཏ་མ་ཧཱ་ཀྲོ་དྷ་ཀཱི་ལ་ཡ་སརྦ་བིགྷྣཱནཱ་ཛྙཱ་པ་ཡ་ཏི་བཛྲ་དྷ་རཿསརྦ་དུཥྚ་ནནྡི་གེ་ཤྭར་ས་པ་རི་བཱ་རཱ་ཎཱཾ་ཀཱ་ཡ་བཱཀ་ཙིཏྟཾ་ཀཱི་ལ་ཡ་ཧཱུཾ་ཕཊ། ཨོཾ་བཛྲ་བྷཱི་མ་མ་ཧཱ་ཀྲོ་དྷ་ཀཱི་ལ་ཡ་སརྦ་བིགྷྣཱནཱ་ཛྙཱ་པ་ཡ་ཏི་བཛྲ་དྷ་རཿསརྦ་དུཥྚ་བ་ལི་ར་སུ་རེནྡྲ་ས་པ་རི་
བཱ་རཱ་ཎཱཾ་ཀཱ་ཡ་བཱཀ་ཙིཏྟཾ་ཀཱི་ལ་ཡ་ཧཱུཾ་ཕཊ། ཨོཾ་བཛྲ་པྲ་ཙ་ཎྜ་མ་ཧཱ་ཀྲོ་དྷ་ཀཱི་ལ་ཡ་སརྦ་བིགྷྣཱནཱ་ཛྙཱ་པ་ཡ་ཏི་བཛྲ་དྷ་རཿསརྦ་དུཥྚ་པྲ་ཧླཱ་ད་ས་པ་རི་བཱ་རཱ་ཎཱཾ་ཀཱ་ཡ་བཱཀ་ཙིཏྟཾ་ཀཱི་ལ་ཡ་ཧཱུཾ་ཕཊ། ནུབ་ཏུའོ། །ཨོཾ་ཨཱཿམ་ཧཱ་བ་ལ་མ་ཧཱ་ཀྲོ་དྷ་ཀཱི་ལ་ཡ་སརྦ་བིགྷྣཱནཱ་ཛྙཱ་པ་ཡ་ཏི་བཛྲ་དྷ་རཿསརྦ་དུཥྚ་བཱ་ཡུ་ས་
པ་རི་བཱ་རཱ་ཎཱཾ་ཀཱ་ཡ་བཱཀ་ཙིཏྟཾ་ཀཱི་ལ་ཡ་ཧཱུཾ་ཕཊ། ཨོཾ་བཛྲ་པཱ་ད་ནཱི་ཀྵེ་པ་མ་ཧཱ་ཀྲོ་དྷ་ཀཱི་ལ་ཡ་སརྦ་བིགྷྣཱནཱ་ཛྙཱ་པ་ཡ་ཏི་བཛྲ་དྷ་རཿསརྦ་དུཥྚ་མ་ཧཱ་ཀཱ་ལ་ས་པ་རི་བཱ་རཱ་ཎཱཾ་ཀཱ་ཡ་བཱཀ་ཙིཏྟཾ་ཀཱི་ལ་ཡ་ཧཱུཾ་ཕཊ། ཨོཾ་བཛྲ་ཨཱ་བེ་ཤ་མ་ཧཱ་ཀྲོ་དྷ་ཀཱི་ལ་ཡ་སརྦ་བིགྷྣཱ་ནཱ་ཛྙཱ་པ་ཡ་ཏི་བཛྲ་དྷ་རཿསརྦ་དུཥྚ་བི་ནཱ་ཡ་ཀ་ས་
པཱ་རི་བཱ་རཱ་ཎཱཾ་ཀཱ་ཡ་བཱཀ་ཙིཏྟཾ་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཔཱི་ར་བི་ཀྲཱནྟ་མ་ཧཱ་ཀྲོ་དྷ་ཀཱི་ལ་ཡ་སརྦ་བིགྷྣཱནཱ་ཛྙཱ་པ་ཡ་ཏི་བཛྲ་དྷ་རཿསརྦ་དུཥྚ་ཀུ་བེ་ར་ཡ་ས་པ་རི་བཱ་རཱ་ཎཱཾ་ཀཱ་ཡ་བཱཀ་ཙིཏྟཾ་ཀཱི་ལ་ཡ་ཧཱུཾ་ཕཊ། ཨོཾ་ཨཱཿབཛྲ་ཨ་མྲྀ་ཏ་ཀུཎྜ་ལི་མ་ཧཱ་ཀྲོ་དྷ་ཀཱི་ལ་ཡ་བིགྷྣཱནཱ་ཛྙཱ་པ་ཡ་ཏི་བཛྲ་དྷ་རཿསརྦ་དུཥྚ་ཛ་ཡ་ཀ་ར་

ས་པ་རི་བཱ་རཱ་ཎཱཾ་ཀཱ་ཡ་བཱཀ་ཙིཏྟཾ་ཀཱི་ལ་ཡ་ཧཱུཾ་ཕཊ། ཨོཾ་བཛྲ་ཨཊྚ་ཧ་ས་མ་ཧཱ་ཀྲོ་དྷ་ཀཱི་ལ་ཡ་སརྦ་བིགྷྣཱནཱ་ཛྙཱ་པ་ཡ་ཏི་བཛྲ་དྷ་རཿསརྦ་དུཥྚ་མ་དྷུ་ཀ་ར་ས་པ་རི་བཱ་རཱ་ཎཱཾ་ཀཱ་ཡ་བཱཀ་ཙིཏྟཾ་ཀཱི་ལ་ཡ་ཧཱུཾ་ཕཊ། ཨོཾ་བཛྲ་བི་དཱ་ར་ཎ་མ་ཧཱ་ཀྲོ་དྷ་ཀཱི་ལ་ཡ་སརྦ་བིགྷྣཱནཱ་ཛྙཱ་པ་ཡ་ཏི་བཛྲ་དྷ་རཿསརྦ་དུཥྚ་བ་སནྟ་ས་པ་རི་བཱ་རཱ་ཎཱཾ་
ཀཱ་ཡ་བཱཀ་ཙིཏྟཾ་ཀཱི་ལ་ཡ་ཧཱུཾ་ཕཊ། བྱང་དུའོ། །དེ་བཞིན་དུ་བགེགས་ཀྱི་ཚོགས་རྣམས་ལ་ཕུར་བུས་བཏབ་པས་ལུས་ཀྱི་ངན་དུ་སྤྱོད་པ་དང་། ངག་གི་ངན་དུ་སྤྱོད་པ་དང་། ཡིད་ཀྱི་ངན་དུ་སྤྱོད་པ་རྣམས་བཅོམ་ནས་བདེ་བ་ཆེན་པོ་དང་དེ་བཞིན་རོ་གཅིག་པར་ཡང་དག་པར་གནས་ཤིང་
བགེགས་ལྷག་མ་རྣམས་རིང་དུ་འབྲོས་པར་བསམ་ཞིང་རྣམ་པ་ཐམས་ཅད་དུ་བགེགས་མེད་པའི་སའི་ཆ་ལྷག་པར་གྲོལ་ལོ་ཞེས་པ་ནི་རིམ་པ་གཅིག་གོ། །ཡང་ན། ཨོཾ་ཨཱཿཡ་མཱནྟ་ཀྲྀཏ་སརྦ་དུཥྚ་ཨུ་པེནྡྲཱཾ་ས་པ་རི་བཱ་རཱན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཊཀྐི་རཱ་ཛཱ་སརྦ་དུཥྚ་བིགྷྣཱཾ་ས་པ་རི་བཱ་རཱན་ཀཱི་
ལ་ཡ་ཧཱུཾ་ཕཊ། ཨོཾ་ཨཱཿམེ་གྷ་ནཱ་དཱ་མ་ཧཱ་ཀྲོ་དྷ་སརྦ་དུཥྚ་བིགྷྣཱཾ་ས་པ་རི་རྦཱ་རཱན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཔྲཛྙཱནྟ་ཀྲྀཏ་སརྦ་དུཥྚ་ཡ་མ་ནཱ་ས་པ་རི་བཱ་རཱན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿནཱི་ལ་དཎྜ་སརྦ་དུཥྚ་ནཻ་རྲྀ་ཏྱ་ས་པ་རི་བཱ་རཱན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿམ་ཧོ་ད་རམ་ཧཱ་ཀྲོ་དྷ་སརྦ་དུ་ཥྚ་བིགྷྣཱཾ་ས་པ་རི་བཱ་
རཱན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཔདྨནྟ་ཀྲྀཏ་སརྦ་དུཥྚ་ནཱ་གྷཾ་ས་པ་རི་པཱ་རཱན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿམ་ཧཱ་བཱ་ལ་སརྦ་དུཥྚ་བཱ་ཡཱུན་ས་པ་རི་བཱ་རཱན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཛ་ཡ་མ་ཧཱ་ཀྲོ་དྷ་སརྦ་དུཥྚ་བིགྷྣཱཾ་ས་པ་རི་བཱ་རཱན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿབིགྷྣཱནྟ་ཀྲྀཏ་སརྦ་དུཥྚ་ཀུ་བེ་ར་ས་པ་རི་
བཱ་རཱན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཨ་ཙ་ལ་སརྦ་དུཥྚ་བི་ནཱ་ཡ་ཀཾ་ས་པ་རི་བཱ་རཱན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿབི་ཛཱ་ཡ་མ་ཧཱ་ཀྲོ་དྷ་སརྦ་དུཥྚ་ཨཱི་ནས་པ་རི་བཱ་རཱན་ཀཱི་ལ་ཡ་ཧཱུཾ་ཕཊ། ཅེས་པའི་སྔགས་ཀྱིས་བརྡུང་བར་བྱའོ། །རྣམ་པར་རྒྱལ་བ་ཆེན་པོ་དང་། ཁྲོ་བོ་གཟེགས་མ་དང་།
འཇིག་རྟེན་གསུམ་རབ་ཏུ་བསྒྲུབ་པ་དང་། །དཔའ་བོ་རྣམ་པར་གནོན་པ་རྣམས་ཀྱི་གནས་ལ་གོ་རིམས་ཇི་ལྟ་བ་བཞིན་དུ་གཤིན་རྗེ་དང་། ཤེས་རབ་དང་། པདྨ་དང་། བགེགས་མཐར་བྱེད་རྣམས་ཤེས་པར་བྱའོ། །དེ་བཞིན་དུ་བལྟ་བར་མི་བཟོད་པ་དང་། ཊཀྐི་དང་། རིན་

ཆེན་གཙུག་ཏོར་དང་། དབྱུག་སྔོན་དང་། སྟོབས་པོ་ཆེ་དང་། རྡོ་རྗེ་རྣམ་འཇོམས་དང་། མི་གཡོ་རྣམས་ཀྱི་གནས་རྣམས་ལ་ཊཀྐི་དང་། སྤྲིན་གྱི་སྒྲ་དང་། དབྱུག་པ་སྔོན་པོ་དང་། གསུས་པོ་ཆེ་དང་། སྟོབས་པོ་ཆེ་དང་། རྒྱལ་བ་དང་། མི་གཡོ་བ་དང་། རྣམ་པར་
རྒྱལ་བ་རྣམས་ཏེ། ཁྲོ་བོ་བརྒྱད་ཤེས་པར་བྱའོ་ཞེས་པ་ནི། ཕུར་བུ་བཅུ་གཉིས་གདབ་བོ་ཞེས་པ་ནི་རིམ་པ་གཉིས་པའོ། །ཡང་ན་གཤིན་རྗེ་མཐར་བྱེད་ལ་སོགས་པའི་གནས་གང་ལ་རྡོ་རྗེ་ལྕགས་ཀྱུ་དང་། རྡོ་རྗེ་ཞགས་པ་དང་། རྡོ་རྗེ་རྒྱས་པ་དང་། རྡོ་རྗེ་འབེབས་པ་དང་། ཁྲོ་
བོ་བཞིའི་རྣམ་པའི་ཕུར་བུས་དེ་བཞིན་དུ་གཞན་ལའོ་ཞེས་པ་ནི། རིམ་པ་གསུམ་པའོ་ཞེས་པ་ནི་ཕུར་བུའི་ཆོ་གའོ།། །།དེ་ནས་སློབ་དཔོན་དཀྱིལ་འཁོར་གྱི་དབང་ཕྱུག་གི་རྣལ་འབྱོར་དང་ལྡན་པས་ནམ་མཁའ་ལ་དེ་བཞིན་གཤེགས་པ་ཐམས་ཅད་དམིགས་ཏེ་ཡང་དག་
པར་མཆོད་པར་བྱའོ། །གཞོན་ནུ་མ་མཉམས་པས་བྱས་པའམ་དཔའ་བོའི་རིན་གྱིས་ཉོས་པའི་སྐུད་པ་ལྔ་ལྔ་དཀར་པོ་དང་། སེར་པོ་དང་། དམར་པོ་དང་། ལྗང་གུ་དང་། ནག་པོའི་ཁ་དོག་རྣམས་སོ་སོར་ཁ་བསྒྱུར་ནས་བྷྲཱུཾ་ཨཱཾ་ཛྲཱཾི་ཁཾ་ཧཱུཾ་ཞེས་པ་དེ་བཞིན་གཤེགས་པ་ལྔའི་ས་བོན་
རྫོགས་པས་དེ་བཞིན་དུ་བྱིན་གྱིས་བརླབ་པར་བྱའོ། །དེའི་རྗེས་སུ་ནམ་མཁའ་ལ་གནས་པའི་དེ་བཞིན་གཤེགས་པ་ལྔའི་ཐུགས་ཀ་རྣམས་ལ་བྷྲཱུཾ་ཡིག་ལ་སོགས་པའི་ས་བོན་རྫོགས་པ་ལས་ཡེ་ཤེས་ཀྱི་ཐིག་གི་འོད་ཟེར་གྱི་རང་བཞིན་རྣམས་བལྟའོ། །ཨོཾ་ཨཱཿཤ་ཤྭ་ཏཱ་བཛྲ་སཱུ་
ཏྲཾ་མེ་པྲ་ཡཙྪ་ཧཱུཾ་ཞེས་པ་འདིས་རྣམ་པར་སྣང་མཛད་ཆེན་པོ་ལ་ཞུ་བར་བྱའོ། །དེ་བཞིན་དུ་ཨོཾ་ཨཱཿརཏྣཻ་ཥ་བཛྲ་སཱུ་ཏྲཾ་མེ་པྲ་ཡཙྪ་ཧཱུཾ། ཨོཾ་ཨཱཿཨ་མྲྀ་ཏཻ་ཥ་སཱུ་ཏྲཾ་མེ་པྲ་ཡཙྪ་ཧཱུཾ། ཨོཾ་ཨཱཿཨ་མོ་གྷཻ་ཥ་བཛྲ་སཱུ་ཏྲཾ་མེ་པྲ་ཡ་ཙྪ་ཧཱུཾ། ཨོཾ་ཨཱཿཅིཏྟཻ་ཥ་བཛྲ་སཱུ་ཏྲཾ་མེ་པྲ་ཡཙྪ་ཧཱུཾ་ཞེས་པ་འདིས་ཞུ་བར་བྱའོ། །
དེ་ནས་ཛ་ཡིག་སེར་པོ་ལས་ཟླ་བ་དང་ཉི་མའི་རང་བཞིན་གྱི་མིག་གཉིས་སོ། །ཨོཾ་དཱིཔྟ་དྲྀཥྚི་ཨཾ་ཀུ་ཤ་ཛཿཞེས་བརྗོད་པས་མིག་གཉིས་རབ་ཏུ་བསྐྱོད་ནས་མིག་གི་རྫི་མ་འབར་ཞིང་ལྟ་བའི་ལྕགས་ཀྱུས་དེ་བཞིན་དུ་རྣམ་པར་སྣང་མཛད་ལ་སོགས་པ་རྣམས་བསྐུལ་ནས་གདན་དྲངས་ཏེ་སོ་སོའི་ཁ་དོག་

དེ་བཞིན་དུ་གཞུག་པར་བྱའོ། །དེའི་ཕྱིར་དེ་རྣམས་མེ་ལོང་ལྟ་བུ་ལ་སོགས་པའི་ཡེ་ཤེས་ལྔའི་རང་བཞིན་ནོ། །མེ་ལོང་ལྟ་བུའི་ཡེ་ཤེས་ལ་སོགས་པ་སོ་སོར་རེ་རེ་ལ་ཡེ་ཤེས་བཞིའི་རྗེས་སུ་འབྲང་ནས་ཉི་ཤུ་རྩ་ལྔའི་དབྱེ་བ་རྣམས་སུ་འགྱུར་རོ། །དེའི་རྗེས་སུ་ལས་ཐམས་ཅད་པའི་
གཟུགས་ཀྱིས་ལས་ཀྱི་སློབ་དཔོན་གྱིས་བཟུང་ནས་ལྷན་ཅིག་ཏུ་དང་པོ་རེ་རེ་ལ་སྐུད་པ་ལྔ་ལྔའི་ཐིག་སྐུད་བསྒྲིལ་བར་བྱའོ། །དེའི་རྗེས་སུ་དེ་བཞིན་དུ་བསྒྲིལ་བའི་ལྔ་པོ་ཐིག་སྐུད་གཅིག་ཏུ་བྱའོ། །ཨོཾ་ཨ་ནྱོ་ནྱོ་ནུ་ག་ཏཱཿསརྦ་དྷརྨཱཿསྤ་ར་སྥ་རཱ་ནུ་ཕྲ་བིཥྚ་སརྦ་དྷརྨཱཿཨ་ཏྱནྟཱ་ནུ་པྲ་བིཥྚཿསརྦ་དྷརྨཱཿཨོཾ་ཨཱཿཧཱུཾ།
ཞེས་བརྗོད་ནས་བསྒྲིལ་བར་བྱའོ། །བསྒྲིལ་བ་རབ་ཏུ་བཏབ་ནས་གསེར་ལ་སོགས་པའི་སྣོད་དུ་བཞག་ནས་དྲི་དང་མེ་ཏོག་དང་སྤོས་ལ་སོགས་པ་རྣམས་ཀྱིས་མཆོད་ནས་ལས་ཐམས་ཅད་པའི་སྔགས་ཀྱིས་བསྲུང་བར་བྱའོ། །ཨོཾ་བཛྲ་སཾ་མ་ཡ་སཱུ་ཏྲཾ་མཱ་ཏི་ཀྲ་མ་ཧཱུཾ། ཞེས་པ་འདིས་ལན་བརྒྱ་རྩ་
བརྒྱད་བཟླས་ནས་ལྷག་པར་གནས་པར་བྱའོ། །ཡང་ཨོཾ་སརྦ་སཾ་ཤོདྷ་ནི་ཧཱུཾ་ཕཊ། ཅེས་པའི་སྔགས་ཀྱི་བུམ་པ་ཐམས་ཅད་ཀྱི་ཆུས་ལེགས་པར་གཏོར་ཏེ་མེ་ཏོག་གཅལ་དུ་བཀྲམ་ནས་ནམ་མཁའི་མཐིལ་དུ་སོང་སྟེ་ཡི་དམ་ལྷའི་དཀྱིལ་འཁོར་ལ་དམིགས་ཏེ་མཆོད་ཡོན་སྔོན་དུ་ཕུལ་ནས་
ཡང་དག་པར་མཆོད་པར་བྱའོ། །དེ་ནས་ཕྱག་འཚལ་ཏེ། རང་དེའི་རྣལ་འབྱོར་དང་ལྡན་པས་བྱང་ཕྱོགས་ཀྱི་སྒྲུབ་པ་པོ་ལས་ཐམས་ཅད་པའི་གཟུགས་སུ་རྣམ་པར་བསམ་མོ། །རང་དང་དེའི་ཡང་གཡས་ཕྱོགས་དང་གཡོན་གྱི་མིག་དག་ལ་ཛྫ་ཡིག་ལས་སྐྱེས་པའི་འོད་ཟེར་སེར་
པོ་ལ་ཟླ་བ་དང་ཉི་མ་བསམས་ནས་ཐིག་སྐུད་གཡོན་པའི་རྡོ་རྗེ་ཁུ་ཚུར་གྱིས་བཟུང་སྟེ་ལྟེ་བར་གཟུང་བར་བྱའོ། །དེ་ལ་ཡང་བྱང་ཕྱོགས་ཀྱི་སྒྲུབ་པ་པོས་དེ་བཞིན་དུ་ཐིག་སྐུད་བཟུང་ནས། ཛྫཿཛྫཿཛྫཿཡི་གེ་གསུམ་གྱི་བྱང་ཕྱོགས་ཀྱི་སྒྲུབ་པ་པོ་ཡང་དག་པར་བསྐུལ་ནས། ཛྫཿཛྫཿཛྫཿཞེས་ཛྫཿཡིག་
གསུམ་གྱིས་བཀུག་ཅིང་དེ་བཞིན་དུ་གདོང་མངོན་པར་ཕྱོགས་ཏེ་གནས་པས་ནུབ་ཏུ་གནས་ཏེ་ཁ་ཤར་དུ་ཕྱོགས་པ་དང་། ལྷོ་ཕྱོགས་སུ་གནས་ཏེ་ཁ་བྱང་དུ་ཕྱོགས་པས་ཚངས་པའི་ཐིག་གཉིས་ལྟེ་བ་ནས་མཉམ་དུ་བར་སྣང་ལ་གདབ་པར་བྱའོ། །ལག་པ་གཡས་པ་རྡོ་རྗེ་དང་བཅས་པའི་

སོར་མོ་དག་གིས་ཐིག་སྐུད་བླངས་ཏེ་སེ་གོལ་གྱི་སྒྲ་དང་བཅས་པས་གདབ་བོ། །ཐིག་གདབ་པ་ཐམས་ཅད་དུ་ཡང་ངོ་། །ཨོཾ་བཛྲ་སཱུ་ཏྲ་མཱ་ཏི་ཀྲ་མ་ཧཱུཾ་ཧཱུཾ་ཨོཾ་ཏྲཱཾ་ཨཱ་ཧཱཿཞེས་བརྗོད་པར་བྱའོ། །དེའི་ཐིག་གི་སྒྲས་ནམ་མཁའི་ཁམས་ཐམས་ཅད་ཁྱབ་ཅིང་དེ་བཞིན་གཤེགས་པ་ཐམས་ཅད་ཡང་
དག་པར་བསྐུལ་བར་བྱའོ། །དེ་རྣམས་ཀྱང་བྱོན་ཏེ་ཐིག་སྐུད་ཀྱི་ནང་དུ་གཞུག་པར་བྱའོ། །འདིའི་སྒྲ་ནི་སེམས་ཅན་གྱི་དོན་དུ་འགྱུར་བའི་དུས་སོ། །དེ་འདིར་འོངས་སོ་ཞེས་པའི་བརྡའོ། །གང་གི་ཕྱིར་ཐམས་ཅད་དུ་ཡང་སློབ་དཔོན་དང་བྱང་ཕྱོགས་ཀྱི་སྒྲུབ་པ་པོ་གཡས་སྐོར་
གྱིས་འགྲོ་བར་བྱའོ། །ཕྱོགས་ཐམས་ཅད་ཀྱང་མཉམ་དུ་འགྲོ་བར་བྱའོ། །ནམ་མཁའི་ཐིག་གཉིས་བཞིན་དུ་ས་ལ་ཚངས་པའི་ཐིག་གཉིས་ཐིག་སྐུད་དང་བཅས་པའི་ལག་པ་དག་གིས་གདབ་པར་བྱའོ། །དེ་ནས་ཊཀྐིའི་ཕུར་བུའི་གནས་དང་རྡོ་རྗེ་རྣམ་འཇོམས་ཀྱི་ཕུར་བུ་དག་ལ་ཁ་
མངོན་པར་ཕྱོགས་ཏེ་ཤར་ཕྱོགས་ཀྱི་ཐིག་གདབ་པར་བྱའོ། །དེའི་རྗེས་སུ་རྡོ་རྗེ་མཐར་སྤྱོད་པའི་ཕུར་བུ་ལ་ཕྱིན་ཏེ། རྡོ་རྗེ་གད་རྒྱངས་ཀྱིས་ཕུར་བུ་དག་ལ་གདོང་མངོན་པར་ཕྱོགས་ཏེ་ཤར་གྱི་རྩ་བའི་ཐིག་གདབ་པར་བྱའོ། །དེ་ནས་ཁྲོ་བོ་སྟོབས་པོ་ཆེའི་ཕུར་བུ་ལ་ཕྱིན་ཏེ། རིན་ཆེན་
གཙུག་ཏོར་གྱི་ཕུར་བུ་དག་ལ་གདོང་མངོན་པར་ཕྱོགས་ཏེ་ནུབ་ཕྱོགས་ཀྱི་ཐིག་གདབ་པར་བྱའོ། །དེའི་རྗེས་སུ་རྐང་པ་བསྐྱོད་པའི་ཕུར་བུའི་གནས་དང་། རྡོ་རྗེ་ཡལ་གའི་ཕུར་བུ་དག་ལ་གདོང་མངོན་པར་ཕྱོགས་ཏེ་ནུབ་ཀྱི་རྩ་བའི་ཐིག་གདབ་པར་བྱའོ། །དེ་ནས་ཁྲོ་བོ་ཆེན་པོ་རྡོ་རྗེ་
རབ་ཏུ་གཏུམ་པོའི་ཕུར་བུའི་གནས་དང་། མི་གཡོ་བའི་ཕུར་བུ་དག་ལ་གདོང་མངོན་པར་ཕྱོགས་ཏེ་བྱང་ཕྱོགས་ཀྱི་ཐིག་གདབ་པར་བྱའོ། །དེའི་རྗེས་སུ་རྡོ་རྗེ་འཇིགས་བྱེད་ཀྱི་ཕུར་བུའི་གནས་དང་རྡོ་རྗེ་འཇོམས་པའི་ཕུར་བུ་དག་ལ་གདོང་མངོན་པར་ཕྱོགས་ཏེ་བྱང་གི་རྩ་བའི་ཐིག་གདབ་
པར་བྱའོ། །དེ་ནས་རྡོ་རྗེ་བལྟ་བར་མི་བཟོད་པའི་ཕུར་བུ་ལ་ཕྱིན་ཏེ་དབྱུག་པ་སྔོན་པོའི་ཕུར་བུ་དག་ལ་གདོང་ཕྱོགས་ཏེ་ལྷོ་ཕྱོགས་ཀྱི་ཐིག་གདབ་པར་བྱའོ། །དེ་ནས་རྡོ་རྗེ་གནམ་ལྕགས་ཀྱི་ཕུར་བུའི་གནས་དང་ཁྲོ་བོ་ཆེན་པོ་སྦྱང་དཀའ་བའི་ཕུར་བུ་དག་ལ་གདོང་མངོན་དུ་ཕྱོགས་ཏེ་ལྷོའི་རྩ་

བའི་ཐིག་གདབ་བོ། །དེ་ནས་ཁྲོ་བོ་ཆེན་པོ་རྡོ་རྗེ་ཞགས་པའི་ཕུར་བུ་ལ་ཕྱིན་ཏེ་ཁྲོ་བོ་ཆེན་པོ་བདུད་རྩི་འཁྱིལ་པའི་ཕུར་བུ་དག་ལ་གདོང་མངོན་པར་ཕྱོགས་ཏེ་གཞོགས་ཀྱི་ཐིག་གདབ་པར་བྱའོ། །དེ་ནས་རྡོ་རྗེ་འབེབས་པའི་ཕུར་བུ་ལ་ཕྱིན་ཏེ་ཤེས་རབ་མཐར་བྱེད་ཀྱི་ཕུར་བུ་
དག་ལ་གདོང་མངོན་པར་ཕྱོགས་ཏེ་གཞོགས་ཀྱི་ཐིག་གདབ་པར་བྱའོ། །དེའི་རྗེས་སུ་པདྨ་མཐར་བྱེད་ཀྱི་ཕུར་བུའི་གནས་དང་། རྡོ་རྗེ་ལྕགས་ཀྱུའི་ཕུར་བུ་དག་ལ་གདོང་མངོན་པར་ཕྱོགས་ཏེ་གཞོགས་ཀྱི་ཐིག་གདབ་པར་བྱའོ། །དེ་ནས་གཤིན་རྗེ་མཐར་བྱེད་ཀྱི་ཕུར་བུའི་གནས་དང་རྡོ་རྗེ་རྒྱས་
པའི་ཕུར་བུ་དག་ལ་གདོང་མངོན་པར་ཕྱོགས་ཏེ་གཞོགས་ཀྱི་ཐིག་གདབ་བོ། །ཐིག་གདབ་པ་ཐམས་ཅད་ལ་སོ་སོ་ལ་གཡས་ཕྱོགས་སུ་བསྐོར་བ་རེ་རེ་བྱས་ནས་གདབ་པོ། །དེ་ནས་ཐིག་གདབ་པའི་མཐར་བདེན་བྲལ་གྱི་མཚམས་སུ་ཕྱིན་ནས་དབང་ལྡན་དུ་ཁ་ཕྱོགས་ཏེ་གཏོར་མ་དང་མཆོད་པ་སྔོན་དུ་
འགྲོ་བས། ཨོཾ་ཨཱཿཧཱུཾ་བཛྲ་མུཿཞེས་པས་ཡེ་ཤེས་ཀྱི་ཐིག་གཤེགས་སུ་གསོལ་ཏེ། ནམ་མཁའ་ལ་གནས་པའི་དེ་བཞིན་གཤེགས་པ་རྣམས་ཀྱི་ཐུགས་ཀར་རབ་ཏུ་ཞུགས་ཏེ་ཁ་དོག་ལྔའི་ཐིག་སྐུད་ཇི་ལྟ་བར་གནས་པར་བྱའོ་ཞེས་པ་ནི་ཐིག་གདབ་པའི་རིམ་པའོ།། །།རྟགས་མེད་
དངོས་གྲུབ་མེད་དེ་ཐིག་སྐུད་ཆད་གྱུར་བླ་མ་འཆི། །ཞེས་པའི་གསུང་ལས་མཚན་མ་རྣམས་ནི་ཉེ་བར་མཚོན་པར་བྱ། །རྟགས་ནི་ཐིག་སྐུད་ཆད་དང་དུ་དང་ཐིག་སྐུད་འགོང་བ་དང་། །ལུས་ལ་རེག་དང་མིང་ནི་ཡོངས་སུ་གྲགས་ལ་སོགས་པ་རྣམས། །དེ་ལ་ཐིག་སྐུད་ཆད་ན་འདིས་སློབ་དཔོན་འཆིའོ། །
ཁྱི་དང་ཅེ་སྤྱང་དང་བྱ་རྒོད་དང་སྡིག་པའི་སྒྲ་བྱུང་ན་སྦྱིན་བདག་འཆི་བར་བཤད་དོ། །ཞུམ་བུས་ཐིད་སྐུད་འགོང་ན་དེའི་རུས་པ་ཡོད་དོ། །ཡང་ན་གླང་གིའོ། །བོང་བུས་འགོང་ན་དེའི་རུས་པའོ། །བྱི་ཡིས་འགོང་ན་དེའི་རུས་པའོ། །ར་དང་ལུག་གིས་འགོང་ན་དེ་དག་གི་རུས་པ་འམ་ཡང་ན་བ་ལང་
གི་རུས་པའོ། །རྟ་ཡིས་ནི་རྟའི་རུས་པའོ། །གླང་པོ་ཆ་ཡིས་ནི་གླང་པོ་ཆེའི་རུས་པའོ། །ཡང་ན་རྔ་མོའི་རུས་པའོ། །རྟ་མཆོག་གིས་ནི་དེའི་རུས་པའམ་མ་ཧེའམ་ཅེ་སྤྱང་གི་རུས་པའོ། །རི་དྭགས་ཀྱིས་ནི་རི་དྭགས་ཀྱི་རུས་པའོ། །གཟིག་གིས་ནི་གཟིག་གི་རུས་པའོ། །ཕག་པས་ནི་

ཕག་གི་རུས་པའོ། །སྟག་གིས་ནི་གླང་པོ་ཆེའི་རུས་པའོ། །བྱི་བས་ནི་བྱི་བའི་རུས་པའོ། །སྦྲུལ་གྱིས་ནི་སྦྲུལ་གྱི་རུས་པའོ། །རུས་སྦལ་གྱིས་ནི་རུས་སྦལ་གྱི་རུས་པའོ། །གལ་ཏེ་སློབ་དཔོན་ནམ། བཟོ་བོ་འམ། སྦྱིན་བདག་གམ། ངེས་པར་སྦྱོར་བའི་སྐྱེ་བོ་རྣམས་ཀྱི་ནང་ནས་གང་ལ་ལ་
མགོ་བོ་གཡའ་བར་འགྱུར་ན་དེ་ལ་མི་གང་གི་འོག་ན་རུས་པ་ཡོད་དོ། །སྨིན་མཚམས་ཀྱི་རེག་བྱས་ནི་ཁྲུ་གསུམ་ན་གསེར་ཡོད་དོ། །ཡང་ན་མཆིང་བུའོ། །མིག་གི་རེག་བྱས་ནི་མིག་གི་མཐར་ཐུག་པའི་འོག་ན་མུ་ཏིག་གོ། །ཁའི་རེག་བྱས་ནི་ཁྲུ་གསུམ་གྱི་འོག་ན་སྐྲའམ་ཤིང་ཡོད་དོ། །
སོའི་རེག་བྱས་ནི་ཁྲུ་གསུམ་ན་སོ་རྗེས་སུ་དཔག་པར་བྱའོ། །རྣ་བ་གཡའ་ན་རྣ་བ་མན་ཆད་ཀྱི་འོག་ཏུ་དངུལ་ལམ་གསེར་རམ་ཡང་ན་བྱི་རུར་འགྱུར་རོ། །མགྲིན་པའི་རེག་བྱས་ནི་དེའི་ཚད་ཀྱི་འོག་ན་དོ་ཤལ་ལོ། །ཡང་ན་ལྕགས་སྒྲོག་གམ། ཡང་ན་སོལ་བའམ་ལག་གདུབ་ཁྲུ་གསུམ་
གྱི་འོག་ནའོ། །འཕྲག་པའི་རེག་བྱས་དེའི་ཚད་ཀྱི་འོག་ན་དེའི་རྒྱན་ནོ། །མཆན་འོག་གི་རེག་བྱས་ནི་མཆན་འོག་གི་ཚད་མན་ཆད་ན་ལྕགས་ཀྱི་སེལ་ལོ། །དཔུང་པ་ལ་ཟུག་རྔུ་བྱུང་ན་མགྲིན་པའི་ཚད་ཀྱི་འོག་ན་དེའི་རྒྱན་ནོ། །རྣ་བ་གཡས་པའི་རེག་བྱས་ནི་རྐེད་པ་ཙམ་གྱི་འོག་ན་ཐོད་པའམ་
ཡང་ན་སའི་རང་བཞིན་གྱི་ཐོད་པའོ། །ལག་པ་གཡོན་པའི་རེག་བྱས་ནི་པུས་ནུབ་ཀྱི་འོག་ན་ཁྲིའི་རྐང་པའོ། །རྩེབ་ལོགས་གཡས་ན་མི་ཕྱེད་ཙམ་གྱི་འོག་ན་རྡུལ་ལོ། །བརླའི་རེག་བྱས་ནི་སྐེད་པ་ཙམ་གྱི་འོག་ན་ཕྱུགས་ཀྱི་རུས་པའོ། །རྒྱབ་ཀྱི་རུས་པས་ནི་རྒྱབ་ཀྱི་རུས་པ་སྟེ་དེའི་ཚད་ཀྱི་
འོག་ནའོ། །རྐེད་པའི་རེག་བྱས་ནི་ཁྲུ་དོའི་འོག་ན་ལྕགས་ཀྱི་ཐུར་མར་བཤད་དོ། །རྟགས་ཀྱི་རེག་བྱས་ནི་ཁྲུ་གང་གི་ཚད་ན་ལྕགས་གསུམ་གྱི་སེལ་ལོ། །པུས་མོའི་རེག་བྱས་ནི་དེའི་རུས་པའམ་སོར་བཅུ་གཅིག་གི་འོག་ན་རྟའི་རྨིག་པའོ། །རྐང་པའི་རེག་བྱས་ནི་སོར་བཅུ་གཉིས་
ཀྱི་འོག་ན་ཤཱལ་མའམ་ཡང་ན་ཚེར་མའོ། །རྐང་པའི་མཐེའུ་ཆུང་གི་རེག་བྱས་ནི་སོར་བརྒྱད་ཀྱི་འོག་ན་འཁར་བའོ། །རྟིང་པའི་རེག་བྱས་སོར་བཅུ་གཉིས་ཀྱི་འོག་ན་ལྷང་ཚེར་རོ། །ཐིག་འདེབས་པའི་དུས་སུ་སྦྱིན་བདག་གི་རེག་བྱས་ནི་རུས་པའོ། །སྐྱེས་བུ་གཞན་གང་ཞིག་གམ་སྲོག་

ཆགས་གང་ཞིག་གི་མིང་ཡོངས་སུ་གྲགས་པ་ན་དེའི་རུས་པ་སྟེ་དེ་ལ་ངེས་པར་ཡོད་དོ། །གང་ནས་བ་ལང་གློ་བུར་དུ་འོངས་ནས་གལ་ཏེ་ལྕི་བ་བཏང་ན་དེའི་འོག་ན་ངེས་པར་དེའི་ཚད་ཀྱི་གསེར་ཡོད་དོ་ཞེས་པ་ནི་ངེས་པའོ། །གལ་ཏེ་བྱིས་པ་དང་གཞོན་ནུ་མ་འགའ་ཞིག་གློ་
བུར་དུ་འོངས་ནས་དེར་ཕྱིས་བཅག་ན་དེའི་འོག་ན་ངེས་པར་དེའི་ཚད་ཀྱི་དངུལ་ལོ། །སྦལ་པའི་སྒྲ་གྲགས་ན་ཆུའི་འཇིགས་པའོ། །ནེ་ཙོ་དང་། བྱེའུ་ས་རི་ཀ་དང་། ངང་པ་དང་། ཁུ་བྱུག་དང་། རྨ་བྱ་དང་། ཤང་ཤང་ངུར་པ་དང་། ཁྱུ་མཆོག་རྣམས་ཀྱི་སྒྲ་ཡིད་དུ་འང་བས་ནི་སྐྱེ་བོ་རྣམས་
དགེ་བར་འགྱུར་རོ། །སེང་གེ་དང་གླང་པོ་ཆེ་དང་། སྤྲིན་གྱི་སྒྲ་ཡིད་དུ་འོང་བས་ནི་རིགས་དང་། ནོར་དང་འབྲུ་དང་། དོན་ཐོབ་པ་ལ་སོགས་པར་འགྱུར་རོ། །དུང་དང་བཀྲ་ཤིས་ཀྱི་གླུ་དང་། བྱིས་པ་རྣམས་རྩེ་བར་བྱེད་ན་དོན་གྲུབ་བོ། །ངུ་བ་མཐོང་ན་སེམས་སྡུག་བསྔལ་བའོ། །
ངན་པ་དང་དམན་པ་དང་། ནད་པ་དང་། ཡོངས་སུ་མནར་བའི་སྐྱེ་བོ་མཐོང་ན་ནད་ཡོད་དོ། །རྒྱལ་མཚན་དང་། གདུགས་དང་། བ་དན་དང་། དྲིལ་བུ་དང་། རྒྱན་དང་ཟས་དང་། ཞོའི་དབང་པོ་དང་། མེ་འབར་བ་དང་། འབྲས་བུ་དང་། ཉ་ཟུང་དང་། རྒྱལ་བའི་ཡན་ལག་
ལ་སོགས་པ་མཐོང་ན་དགེ་བར་འགྱུར་རོ། །མཁས་པ་དང་བྲམ་ཟེ་དང་། དགེ་སློང་དང་། ལེགས་པའི་སྐྱེ་བོ་མཐོང་ན་ཆོས་ཀྱིའོ། །ཞེས་པ་ནི་རྟགས་རྣམས་གསུངས་སོ། །དེའི་རྗེས་སུ་ཐིག་འདེབས་པ་ན་སློབ་དཔོན་གྱི་སྐྱེ་བོ་དང་ནོར་དང་། སྟོབས་འཕེལ་བར་བྱ་བའི་ཕྱིར་
ལག་པ་གཡས་པ་རྡོ་རྗེ་དང་འདོད་པ་སྦྱིན་པའི་གསེར་གྱི་ཐུར་མ་དང་བཅས་ཏེ་དབང་ལྡན་གྱི་ཕྱོགས་ནས་བརྩམས་སྟེ་གཡས་སྐོར་གྱི་ཕྱོགས་ཀྱི་ཐིག་རྣམས་བྲི་བར་བྱའོ། །དེ་བཞིན་དུ་ལག་པ་གཡོན་པ་དྲིལ་བུ་དང་བཅས་ཏེ་རྩ་བའི་ཐིག་རྣམས་བྲི་བར་བྱའོ།། །།དེ་ནས་ཁང་པ་ལ་ཀླུ་
ཡོངས་སུ་བརྟག་པར་བྱའོ། །དེ་ལ་གཞུའི་ཁྱིམ་དུ་ཞུགས་པ་ནས་བརྩམས་ཏེ་ཉི་མ་དགུ་བཅུ་ཐམ་པ་སྟེ། ཇི་སྲིད་ཉའི་ཁྱིམ་དུ་མ་ཞུགས་བར་དུ་དེ་ཡ་ལྷོ་ཕྱོགས་སུ་མགོ་བསྟན་ནུབ་ཏུ་ཁ་བསྟན་ནས་ཀླུ་ཉལ་ལོ། །དེ་ནས་ཉའི་ཁྱིམ་དུ་ཞུགས་པ་ནས་བརྩམས་ཏེ་ཇི་སྲིད་འཁྲིག་པའི་

ཁྱིམ་དུ་མ་ཞུགས་བར་དུ་དེ་ལ་ནུབ་ཕྱོགས་སུ་མགོ་དང་བྱང་ཕྱོགས་སུ་ཁ་མངོན་པར་ཕྱོགས་ཏེ་ཀླུ་ཉལ་ལོ། །དེ་བཞིན་དུ་འཁྲིག་པའི་ཁྱིམ་དུ་ཞུགས་པ་ནས་བརྩམས་ཏེ་ཇི་སྲིད་བུ་མོའི་ཁྱིམ་དུ་མ་ཞུགས་བར་དུ་དེ་ལ་བྱང་དུ་མགོ་དང་ཤར་དུ་ཁ་མངོན་པར་ཕྱོགས་ཏེ་ཀླུ་ཉལ་ལོ། །དེ་བཞིན་དུ་
བུ་མོའི་ཁྱིམ་དུ་ཞུགས་པ་ནས་བརྩམས་ཏེ་ཇི་སྲིད་གཞུའི་ཁྱིམ་དུ་མ་ཞུགས་བར་དུ་དེ་ལ་ཤར་དུ་མགོ་དང་ལྷོར་ཁ་མངོན་པར་ཕྱོགས་ཏེ་ཀླུ་ཉལ་ལོ། །འདིར་བཤད་པ་ནི་ཆོས་ཀྱི་རིམ་པས་རེ་མིག་རེ་རེ་ལ་འཕོས་ཏེ་ཀླུའི་འཕོ་བར་འགྱུར་རོ། །ད་ནི་ཁང་པའི་ཀླུའི་མཆན་འོག་གི་ཆ་ལ་
བརྐོས་སྟེ། དེ་ལ་མགོ་བོ་ནས་མིག་ཏུ་མིག་ཉི་ཤུ་རྩ་བདུན་ནོ། །རྒྱབ་ཀྱི་མཐར་ཕྱེད་དང་བཅས་པའི་རེ་མིག་བཅུ་གསུམ་ཡོངས་སུ་སྤང་བ་ནི་ས་བདག་ཀླུའི་མཆན་འོག་གི་ཕྱོགས་སོ། །དེ་ལ་རེ་མིག་དགུའི་སྲིད་དང་ཞེང་དུ་དེའི་ཕྱེད་དོ། །ཡང་ན་ཤར་གྱི་མཐའ་ལས་དང་ནུབ་ཀྱི་
མཐའ་ལས་བཅུ་ཆ་ནི་མཆན་འོག་གི་སྲིད་དོ། །དེའི་ཕྱེད་ནི་ཞེང་ངོ་། །མཆན་འོག་གི་སྟེང་དུ་མགོ་བོའི་མཐར་ཐུག་པ་ལ་མཆན་འོག་གི་སྲིད་ཀྱི་སུམ་འགྱུར་རོ། །མཆན་འོག་གི་སྲིད་དང་ཞེང་དག་དང་མཉམ་པ་ནི་རྒྱབ་ཀྱི་མཐར་རོ། །དེ་བཞིན་དུ་ལྷོ་དང་བྱང་དང་ནུབ་དང་ཤར་དང་བྱང་
དང་ལྷོ་ལའོ། །ས་བདག་ཀླུའི་མགོ་བོ་ལ་བརྐོས་ན་ཕ་དང་བུ་ལ་སོགས་པ་འཆིའོ། །རྒྱབ་ཀྱི་ཕྱོགས་ལ་བརྐོས་ན་སྦྱིན་བདག་འཆིའོ། །ཡང་ན་ཡུལ་ནས་འཐོན་པར་འགྱུར་རོ། །མཇུག་མ་ལ་ནི་བ་ལང་དང་མ་ཧེ་ལ་སོགས་པ་ཉམས་པར་འགྱུར་རོ་ཞེས་སོ། །གཙུག་ལག་ཁང་གི་སའི་
ཆ་ལ་ས་བདག་ཀླུའི་མཚན་ཉིད་ཀྱི་དོང་གང་བ་ས་བདག་ཀླུའི་མཆན་གྱི་ཆ་ལ་དང་པོ་བརྐོ་བར་བྱའོ། །ཁྲུ་བཅུ་དྲུག་གི་ཁང་མིག་ཉེ་བར་མཚོན་པར་གྱུར་པ་ལ་གཙུག་ལག་ཁང་གི་སའི་ཆ་ལ་ཉི་མ་སོ་སོ་ལ་ཅུང་ཟད་རྐང་པས་དམན་པའི་སོར་བཅུ་གསུམ་ས་བདག་ཀླུའི་འཕོ་བར་འགྱུར་རོ། །དེ་བཞིན་དུ་
ཁྲུ་བཅུ་བཞིའི་ཚད་དུ་ཁང་མིག་ཏུ་ཉེ་བར་མཚོན་པར་འགྱུར་བ་ལ། གཙུག་ལག་ཁང་གི་སའི་ཆ་ལ་ཉི་མ་སོ་སོ་ལ་ཅུང་ཟད་ལྷག་པའི་ཕྱེད་དང་བཅས་པའི་ནས་གཅིག་གིས་ལྷག་པའི་སོར་བཅུ་གཅིག་ས་བདག་ཀླུའི་འཕོ་བར་འགྱུར་རོ། །དེ་བཞིན་དུ་ཁྲུ་བཅུ་གཉིས་ཀྱི་ཚད་ཀྱི་ཁང་མིག་ཏུ་འགྱུར་བ་

ལ་གཙུག་ལག་ཁང་གི་སའི་ཆ་ལ་ཉི་མ་སོ་སོ་ལ་ཅུང་ཟད་བཞི་གསུམ་གྱི་དམན་པའི་ནས་ལྷག་པའི་སོར་དགུ་ས་བདག་ཀླུའི་འཕོ་བར་འགྱུར་རོ། །དེ་བཞིན་དུ་ཡང་ཁྲུ་བཅུའི་ཚད་ཀྱི་ཁང་མིག་ཏུ་འགྱུར་བ་ལ་གཙུག་ལག་ཁང་གི་སའི་ཆ་ལ་ཉི་མ་སོ་སོ་ལ་སོར་བརྒྱད་ས་བདག་ཀླུའི་འཕོ་
བར་འགྱུར་རོ། །གཞན་ཡང་ས་མཆན་འོག་གི་མཚན་ཉིད་གསུངས་པ། ཁྲུ་བཅུ་དྲུག་གི་ཚད་ཀྱི་ཁང་མིག་གི་སའི་ཆ་ལ་ས་བདག་ཀླུའི་མགོ་བོའི་འོག་ཏུ་དེ་ལས་སོར་བཅུ་གཅིག་དང་ཁྲུ་བཅུ་བཞིའོ། །རྒྱབ་ཀྱི་མཐར་ཕྱེད་དང་བཅས་པའི་སོར་བཞི་ལྷག་པའི་ཁྲུ་བདུན་ཡོངས་སུ་སྤངས་ནས་
སྲིད་དུ་ཅུང་ཟད་ལྷག་པའི་སོར་བཅུ་དགུ་ལྷག་པའི་ཁྲུ་བཞིའི་ཚད་དོ། །ཞེང་དུ་ཕྱེད་དང་བཅས་པའི་སོར་མོ་དགུ་ལྷག་པའི་ཁྲུ་དོའི་ཚད་ནི་ས་བདག་ཀླུའི་མཆན་འོག་གི་ཆའོ། །དེ་བཞིན་དུ་ཁྲུ་བཅུ་བཞིའི་ཚད་ཀྱི་ཁང་མིག་ལ་གཙུག་ལག་ཁང་གི་ས་གཞི་ལ་ས་བདག་ཀླུའི་སྤྱི་བོ་ནས་འོག་ཏུ་
སོར་ལྔ་ལྷག་པའི་ཁྲུ་བཅུ་གསུམ་མོ། །རྒྱབ་ཀྱི་མཐར་སོར་བཅུ་དྲུག་ལྷག་པའི་ཁྲུ་དྲུག་ཡོངས་སུ་སྤངས་ཏེ་སྲིད་དུ་སོར་མོ་བཅུ་ལྷག་པའི་ཁྲུ་བཞིའི་ཚད་དང་། ཞེང་དུ་སོར་མོ་ལྔ་ལྷག་པའི་ཁྲུ་དོའི་ཚད་ནི་ས་བདག་ཀླུའི་མཆན་འོག་གོ། །དེ་བཞིན་དུ་ཁྲུ་བཅུ་གཉིས་ཀྱི་ཚད་ཀྱི་ཁང་མིག་ཏུ་འགྱུར་
བའི་གཙུག་ལག་ཁང་གི་སའི་ཆ་ལ་ས་བདག་ཀླུའི་མགོ་བོ་ནས་འོག་ཏུ་སོར་མོ་ལྔ་ལྷག་པའི་ཁྲུ་བཅུའོ། །རྒྱབ་ཀྱི་མཐར་ཐུག་པ་ལ་སོར་ལྔ་ལྷག་པའི་ཁྲུ་ལྔ་ཡོངས་སུ་སྤངས་པའི་སྲིད་དུ་སོར་མོ་བཅུ་ལྷག་པའི་ཁྲུ་གསུམ་གྱི་ཚད་དང་། ཞེང་དུ་སོར་མོ་བཅུ་བདུན་ལྷག་པའི་ཁྲུའི་ཚད་ཀྱི་ཀླུའི་
མཆན་འོག་གི་ཆའོ། །དེ་བཞིན་དུ་ཁྲུ་བཅུའི་ཚད་ཀྱི་ཁང་མིག་གི་གཙུག་ལག་ཁང་གི་སའི་ཆ་ལ་ས་བདག་ཀླུའི་མགོ་བོ་ནས་འོག་ཏུ་ཁྲུ་དགུའོ། །རྒྱབ་ཀྱི་མཐར་སོར་མོ་བཅུ་གསུམ་ལྷག་པའི་ཁྲུ་བཞི་ཡོངས་སུ་སྤངས་ཏེ། སྲིད་དུ་ཁྲུ་གསུམ་གྱི་ཚད་དང་། ཞེང་དུ་སོར་བཅུ་གཉིས་ལྷག་
པའི་ཁྲུའི་ཚད་ནི་ས་བདག་ཀླུའི་མཆན་འོག་གི་ཆའོ། །ཀླུ་དེ་ཡང་དུང་དང་། ཀུན་ད་དང་། ཟླ་བའི་ཁ་དོག་ལྟ་བུ་ལག་པ་གཡོན་པས་རང་གི་མགོའི་འོག་ནས་བརྟེན་པ་ལག་པ་གཡས་པས་རིན་པོ་ཆེ་འཛིན་ཅིང་རང་གི་རྐེད་པར་གཞག་པ། ལྟེ་བ་མན་ཆད་ལག་འགྲོའི་རྣམ་པ་ཅན། དེའི་སྟེང་དུ་

མིའི་གཟུགས་ལ་གདེངས་ཀ་བདུན་དང་ལྡན་པ་སྟེ། གཙུག་ལག་ཁང་ལ་སོགས་པའི་ས་གཞི་ལ་མངོན་པར་ཁྱབ་ཅིང་ཉལ་ལོ། །ཀླུ་བརྒྱད་ཀྱི་ས་བདག་ཀླུའི་ལུས་ལ་གནས་པ་སྟེ་འོ་མའི་རོའི་ཉེ་བར་སྤྱད་པས་མཆོད་པར་བྱའོ། །དེ་ལ་མཇུག་མའི་རྩེ་མོ་ལ་རིགས་ལྡན་སྐུ་མདོག་སྔོན་པོའོ། །
གསང་གནས་ལ་སྟོབས་ཀྱི་རྒྱུ་སྔོ་བསངས་དཱུར་བའི་ཁ་དོག་གོ། །ལྟེ་བ་ལ་དུང་སྐྱོང་པདྨའི་སྡོང་པོའི་མདོག་གོ། །དཔུང་པའི་ཕྱོགས་ལ་པདྨ་ཆེན་པོ་མཆིང་བུའི་མདོག་གོ། །སྙིང་གར་ནོར་རྒྱས་སྔོ་བསངས་དཱུར་བའི་མདོག་གོ། །མགུལ་པ་ལ་འཇོག་པོ་དམར་པོའོ། །རྣ་བ་ལ་པདྨ་དཀར་
པོའོ། །སྤྱི་གཙུག་ན་ཀླུ་དགའ་བོ་སྔོན་པོའོ། །དེ་བཞིན་དུ་རྣམ་པར་སྣང་མཛད་ཀྱི་སྐུའི་ངོ་བོར་ས་བདག་བསྒོམ་པར་བྱའོ། །ཨོཾ་ཨཱཿབ་རུ་ཎཱ་ཡ་ཧཱུཾ་སྭཱ་ཧཱ། ཨོཾ་ཨཱཿཀུ་ལི་ཀཱ་ཡ་ཧཱུཾ་སྭཱ་ཧཱ། ཨོཾ་ཨཱཿཀརྐོ་ཊ་ཀཱ་ཡ་ཧཱུཾ་སྭཱ་ཧཱ། ཨོཾ་ཨཱཿཤཾ་ཁ་པཱ་ལཱ་ཡ་ཧཱུཾ་སྭཱ་ཧཱ། ཨོཾ་ཨཱཿམ་ཧཱ་པདྨཱ་ཡ་ཧཱུཾ་
སྭཱ་ཧཱ། ཨོཾ་ཨཱཿབཱ་སུ་ཀ་ཡ་ཧཱུཾ་སྭཱ་ཧཱ། ཨོཾ་ཨཱཿཏཀྵ་ཀཱ་ཡ་ཧཱུཾ་སྭཱ་ཧཱ། ཨོཾ་ཨཱཿཔདྨཱ་ཡ་ཧཱུཾ་སྭཱ་ཧཱ། ཨོཾ་ཨཱཿཨ་ནནྟཱ་ཡ་ཧཱུཾ་སྭཱ་ཧཱ། ཞེས་པ་ནི་མཆོད་པའི་སྔགས་སོ། །དེ་ནས་ཐམས་ཅད་དུ་ས་གཞིའི་འོག་གི་ལྷ་རྣམས་དང་། །སའི་ལྷ་རྣམས་སྔོན་དུ་འགྲོ་བས། ཡིད་ཀྱིས་བཏེག་ནས་ནམ་
མཁའ་ལ་དགོད་པར་བྱའོ། །དེ་ལ་ཟུག་རྔུ་དང་ཉེས་པ་ཡོངས་སུ་གཞོམ་པའི་ཕྱིར་སའི་ཆ་ལ་མཚམས་ཡང་ཡོངས་སུ་བརྟག་པར་བྱའོ། །དེ་ལ་མཚམས་ནི་རྣམ་པ་ལྔ་སྟེ། མཚམས་དང་། ཉེ་བའི་མཚམས་དང་། །ལས་ཀྱི་མཚམས་དང་། ཚུལ་ལུགས་ཀྱི་མཚམས་དང་།
ཕྱོགས་ཀྱི་མཚམས་ཞེས་སོ། །དེ་ལ་རེ་མིག་དྲུག་ཅུ་རྩ་བཞིར་བྱ་བ་དེ་བཞིན་དུ་མཚམས་ནི་བཅོ་བརྒྱད་དུ་རིག་པར་བྱ་སྟེ། དབུས་ཀྱི་མཚམས་གཉིས་དང་། དེ་དག་གི་གཞོགས་གཉིས་སུ་ཉེ་བའི་མཚམས་བཞི་དང་དེའི་ཕྱི་རོལ་དུ་ལས་ཀྱི་མཚམས་བཞི་དང་། དེའི་ཕྱི་རོལ་དུ་ལུགས་ཀྱི་
མཚམས་བཞི་དང་། དེ་བཞིན་དུ་ཐམས་ཅད་ཀྱི་ཕྱི་རོལ་དུ་ཕྱོགས་ཀྱི་མཚམས་བཞིའོ། །དབུས་ཀྱི་མཚམས་ལ་བརྐོས་ན་བུ་ལ་སོགས་པ་ཉམས་པར་འགྱུར་རོ། །ཉེ་བའི་མཚམས་ལ་ནི་ཡུལ་སྟོངས་པར་འགྱུར་རོ། །ལས་ཀྱི་མཚམས་ལ་ནི་ཕྲ་མོའི་ཉེས་པའོ། །ལུགས་

ཀྱི་མཚམས་ལ་ནི་སྦྱིན་བདག་འཆིའོ། །ཕྱོགས་ཀྱི་མཚམས་ལ་ནི་ཡོ་བྱད་ཉམས་པ་དང་དབུལ་པོར་འགྱུར་རོ། །དེའི་ཕྱིར་མཚམས་རྣམས་ལ་བརྐོ་བར་མི་བྱའོ། །དེ་ལ་ཤར་ཕྱོགས་སུ་གླང་གི་ཁྱིམ་གྱི་རང་བཞིན་ལ་ཕྱོགས་དང་ལུགས་དང་ལས་ཀྱི་
མཚམས་དང་། ལུགས་ཀྱི་མཚམས་ལ་གནས་པའི་རིག་མ་གཟུགས་ཅན་མ་ཁ་དོག་དཀར་མོ་ཆོས་ཀྱི་ཕྱག་རྒྱའི་ཚུལ་དུ་བྱས་པ་པདྨ་དང་། ཟླ་བའི་སྟེང་དུ་གནས་པ་མཆོད་པ་བྱའོ། །ཨོཾ་བཛྲ་རུ་པི་ནི་ཡེ་ཨ་སྭཱ་ཧཱ། དེ་ནས་འཁྲིག་པའི་ཁྱིམ་གྱི་རང་བཞིན་ལ་ཉེ་བའི་
མཚམས་དང་དབུས་ཀྱི་མཚམས་དང་ཉེ་བའི་མཚམས་རྣམས་ཀྱིས་དབུས་ཀྱི་མཚམས་ལ་གནས་པའི་རིག་མ་འོད་བྱེད་མ་སྐུ་མདོག་དཀར་མོ་མཆོད་པར་བྱའོ། །ཨོཾ་བཛྲ་བྷཱསྐཱ་རི་ཡཻ་ཨཱ་སྭཱ་ཧཱ། ལྷག་མ་ནི་སྔོན་མ་བཞིན་ནོ། །དེ་བཞིན་དུ་ཀརྐ་ཊའི་ཁྱིམ་གྱི་རང་བཞིན་ལ་ལས་དང་
ལུགས་དང་ཕྱོགས་ཀྱི་མཚམས་ལ་གནས་པའི་རིག་མ་རྡོ་རྗེ་ཧཱུཾ་མཛད་མ་སྐུ་མདོག་སྔོན་མོ་མཆོད་པར་བྱའོ། །ཨོཾ་བཛྲ་ཧཱུཾ་ཀཱ་རི་ཡཻ་ཨི་སྭཱ་ཧཱ། ལྷག་མ་ནི་སྔོན་མ་བཞིན་ནོ། །དེ་བཞིན་དུ་ལྷོ་ཕྱོགས་སུ་སེང་གེའི་ཁྱིམ་གྱི་རང་བཞིན་ལ་ཕྱོགས་དང་ལུགས་དང་ལས་ཀྱི་མཚམས་ཀྱི་ལུགས་
ཀྱི་མཚམས་ལ་གནས་པའི་རིག་མ་རྡོ་རྗེ་སྒེག་མོ་སྐུ་མདོག་སེར་མོ་མཆོད་པར་བྱའོ། །ཨོཾ་བཛྲ་བཱི་ལཱ་ས་ནི་ཡཻ་ཨི་སྭཱ་ཧཱ། ལྷག་མ་ནི་སྔོན་མ་བཞིན་ནོ། །དེ་ནས་བུ་མོའི་ཁྱིམ་གྱི་རང་བཞིན་ལ་ཉེ་བའི་མཚམས་དང་དབུས་ཀྱི་མཚམས་དང་ཉེ་བའི་མཚམས་རྣམས་ཀྱི་དབུས་ཀྱི་
མཚམས་ལ་གནས་པའི་རིག་མ་རྡོ་རྗེ་རྨོངས་བྱེད་མ་ཞེས་པ་ཅུང་ཟད་སྐུ་མདོག་སེར་མོ་མཆོད་པར་བྱའོ། །ཨོཾ་བཛྲ་མོ་ཧ་ནི་ཡཻ་ཨུ་སྭཱ་ཧཱ། ལྷག་མ་ནི་སྔོན་མ་བཞིན་ནོ། །དེའི་རྗེས་སུ་སྲང་གི་ཁྱིམ་གྱི་རང་བཞིན་ལ་ལས་དང་ལུགས་དང་ཕྱོགས་ཀྱི་མཚམས་རྣམས་ཀྱི་ལུགས་
ཀྱི་མཚམས་ལ་གནས་པའི་རིག་མ་རྡོ་རྗེ་མཁའ་སྤྱོད་མ་ཞེས་པ་ནམ་མཁའི་མདོག་ཅན་མཆོད་པར་བྱའོ། །ཨོཾ་བཛྲ་ཁེ་ཙ་རི་ཡཻ་ཨཱུ་སྭཱ་ཧཱ། ལྷག་མ་ནི་སྔོན་མ་བཞིན་ནོ། །དེ་བཞིན་དུ་ནུབ་ཕྱོགས་སུ་སྡིག་པའི་ཁྱིམ་གྱི་རང་བཞིན་ལ་ཕྱོགས་དང་ལུགས་དང་ལས་ཀྱི་མཚམས་

རྣམས་ཀྱི་ལུགས་ཀྱི་མཚམས་ལ་གནས་པའི་རིག་མ་རྡོ་རྗེ་གནམ་ལྕགས་མ་སྐུ་མདོག་དམར་མོ་མཆོད་པར་བྱའོ། །ཨོཾ་བཛྲ་ས་ནི་ཡཻ་ཨེ་སྭཱ་ཧཱ། ལྷག་མ་ནི་སྔོན་མ་བཞིན་ནོ། །དེ་ན་གཞུའི་ཁྱིམ་གྱི་རང་བཞིན་ལ་ཉེ་བའི་མཚམས་དང་དབུས་ཀྱི་མཚམས་དང་ཉེ་བའི་མཚམས་
རྣམས་ཀྱི་མཚམས་ལ་གནས་པའི་རིག་མ་རྡོ་རྗེ་རོ་མ་ཞེས་སྐུ་མདོག་དམར་མོ་མཆོད་པར་བྱའོ། །ཨོཾ་བཛྲ་ར་ས་ནཱ་ཡཻ་ཨཻ་སྭཱ་ཧཱ། ལྷག་མ་ནི་སྔོན་མ་བཞིན་དུའོ། །དེའི་རྗེས་སུ་ཆུ་སྲིན་གྱི་ཁྱིམ་གྱི་རང་བཞིན་ལ་ལས་དང་ལུགས་དང་ཕྱོགས་ཀྱི་མཚམས་རྣམས་ཀྱི་ལུགས་ཀྱི་མཚམས་
ལ་གནས་པའི་རིག་མ་རྡོ་རྗེ་སྐྲག་བྱེད་མ་ཞེས་པ་ཁ་དོག་སྔོན་མོ་མཆོད་པར་བྱའོ། །ཨོཾ་བཛྲ་ཏྲཱ་ས་ནི་ཡཻ་ཨོཾ་སྭཱ་ཧཱ། ལྷག་མ་ནི་སྔོན་མ་བཞིན་དུའོ། །དེ་བཞིན་དུ་བྱང་ཕྱོགས་སུ་བུམ་པའི་ཁྱིམ་གྱི་རང་བཞིན་ལ་ཕྱོགས་དང་ལུགས་དང་ལས་ཀྱི་མཚམས་རྣམས་ཀྱི་ལུགས་ཀྱི་མཚམས་
རྣམས་ལ་གནས་པའི་རིག་མ་རེག་བྱ་རྡོ་རྗེ་མ་ཞེས་པ་སྐུ་མདོག་ལྗང་གུ་མཆོད་པར་བྱའོ། །ཨོཾ་བཛྲ་སྤཪྵ་ནཱི་ཡཻ་ཨཽ་སྭཱ་ཧཱ། ལྷག་མ་ནི་སྔོན་མ་བཞིན་དུའོ། །དེ་ནས་ཉའི་ཁྱིམ་གྱི་རང་བཞིན་ལ་ཉེ་བའི་མཚམས་དང་དབུས་ཀྱི་མཚམས་དང་ཉེ་བའི་མཚམས་ཀྱི་དབུས་ཀྱི་མཚམས་
ལ་གནས་པའི་རིག་མ་སེམས་རྡོ་རྗེ་མ་ཞེས་པ་དཱུར་བའི་མདོག་ཅན་མཆོད་པར་བྱའོ། །ཨོཾ་བཛྲ་ཙིཏྟ་ནི་ཡཻ་ཨཾ་སྭཱ་ཧཱ། ལྷག་མ་སྔོན་མ་བཞིན་དུའོ། །དེའི་རྗེས་སུ་ལུག་གི་ཁྱིམ་གྱི་རང་བཞིན་ལ་ལས་དང་། ལུགས་དང་ཕྱོགས་ཀྱི་མཚམས་རྣམས་ཀྱི་ལུགས་ཀྱི་མཚམས་ལ་
གནས་པའི་རིག་མ་རྡོ་རྗེ་དགྱེས་མ་ཞེས་པ་དུ་བའི་མདོག་ཅན་མཆོད་པར་བྱའོ། །ཨོཾ་བཛྲ་བཱི་ཀཱི་ཤི་ནི་ཡེ་ཨཿསྭཱ་ཧཱ། ལྷག་མ་ནི་སྔོན་མ་བཞིན་དུའོ། །དེའི་རྗེས་ལ་ལས་བྱེད་པ་ཏོག་ཅེས་མཚན་པ་རྡོ་རྗེ་ལས་ཀྱི་རང་བཞིན་དུ་རྣམ་པར་བསྒོམས་ཏེ་སོ་རྩི་ལ་སོགས་པ་རྣམས་ཀྱིས་ཚིམ་
པར་བྱས་ཏེ་ལག་པ་གཡོན་པས་སྨད་ནས་བཟུང་སྟེ་ཤར་དང་བྱང་ཕྱོགས་སུ་གདོང་གཡོགས་ཏེ་དོང་གང་བ་བརྐོ་བར་བྱའོ། །དེ་ནས་ནོར་དང་སྐྱེ་བོ་དང་སྟོབས་དང་རིག་པ་རྣམས་འཕེལ་བའི་ཕྱིར་པདྨ་དང་ཉི་མའི་སྟེང་དུ་ཨེ་ཎེ་ཡ་ཤ་ར་ས་ལ་གནས་པ་ལག་པ་གཡས་པ་དག་ན་ལྕགས་

ཀྱུ་དང་བགྲང་ཕྲེང་ངོ་། །གཡོན་པ་དག་ན་སྙིང་ག་ན་ཞགས་པ་དང་སྤྱི་བླུགས་འཛིན་པའོ། །ཡན་ལག་མཆོག་ལ་རལ་པའི་ཅོད་པན་བཅིངས་པ་ཡངས་པའི་སྤྱན་གསུམ་གྱིས་གདོང་བརྒྱན་པ་མཆོད་ཕྱིར་ཐོགས་དང་གོས་དམར་པོའི་རྒྱན་གྱིས་བརྒྱན་པ་
སྒེག་པ་དང་བཅས་པའི་མེ་དམར་པོ་སྤྱན་དྲངས་ཏེ་མཆོད་ཡོན་ལ་སོགས་པའི་ཕྱིའི་མཆོད་པ་རྣམས་ཀྱིས་ཡང་དག་པར་མཆོད་པར་བྱའོ། །ཛ་བ་དང་མྱ་ངན་མེད་དང་། ཨརྐ་དང་ཀོ་ཀེ་ལིའི་ཡམ་ཤིང་རྣམས་སྔོན་དུ་འགྲོ་བས་སྦྱིན་སྲེག་བྱའོ། །ཨོཾ་ལོ་ཧི་ཏཱགྣཱ་ཡེ་སྭཱ་ཧཱ། ཏིལ་ལ་སོགས་
པ་རྣམས་ཀྱིས་སྦྱིན་སྲེག་བྱའོ། །པཎྜི་ཏ་ཆེན་པོ་རིགས་ཀྱི་སྦྱིན་པ་ཞེས་བྱ་བས་མཛད་པའི་བྱ་བ་བསྡུས་པ་ལས་རབ་ཏུ་བྱེད་པ་གསུམ་པའོ།། །།སོ་ཕག་མཚན་ཉིད་ཡང་དག་པར། །ཤེས་ནས་ཕྱོགས་བཟུང་དེ་ནས་ནི། །ཡང་དག་འཕེལ་དང་ཟད་པ་དང་། །ཁང་བཟངས་མཚན་ཉིད་ཤེས་པ་དང་། །
ལྷ་དང་ཕྱོགས་སྐྱོང་ས་ཡི་ལྷ། །ཆོ་ག་ཇི་བཞིན་ཡང་དག་མཆོད། །སོ་ཕག་བྱ་བའི་ཕྱིར་རབ་ཏུ་རྨོངས་བྱེད་ཀྱི་མེ་ལ་སྦྱིན་སྲེག་བྱའོ། །དེ་ལ་སོ་ཕག་གི་ཆ་ལྔ་ནི་སྲིད་དུའོ། །ཆ་གསུམ་ནི་ཞེང་དུའོ། །རྩིག་ཞེང་གི་ཕྱེད་ནི་སོ་ཕག་གི་སྲིད་དོ། །ཞེང་གི་སུམ་ཆ་ནི་དཔངས་སོ། །དེ་ལ་སློབ་
དཔོན་བདག་ཉིད་སྦྱིན་བདག་དང་ལྷན་ཅིག་ཏུ་སོ་ཕག་འཇོག་པའི་ས་ལ་གཏོར་མ་དང་མཆོད་པ་སྔོན་དུ་འགྲོ་བས་རང་གི་སྙིང་གར་ཟླ་བ་ལ་གནས་པའི་བྷྲཱུཾ་ཡིག་གི་འོད་ཟེར་གྱིས་རྡུལ་ཕྲ་རབ་ཚོགས་པའི་གཟུགས་སུ་སོ་ཕག་བྱ་བའི་ཕུང་པོ་རྣམ་པར་བསྒོམས་ལ་བུམ་པའི་ཆུས་གཏོར་ནས་ཉེར་སྤྱོད་ལྔས་མཆོད་དེ་
འདིས་རྣམ་པར་སྦྱང་བར་བྱའོ། །གང་གི་རང་བཞིན་དེ་བཞིན་གཤེགས། །འགྲོ་འདི་དེ་ཡི་རང་བཞིན་ཉིད། །དེ་བཞིན་གཤེགས་པའི་རང་བཞིན་ངེས། །འགྲོ་བ་འདི་ཡི་རང་བཞིན་ལ། །ལས་བྱེད་པ་ནི་རྡོ་རྗེ་བསྲུང་བའི་ངོ་བོ་ཉིད་ཀྱི་གཟུགས་སུ་བསྒོམས་ཏེ། དེའི་ལག་པའི་མཐིལ་གྱི་
ཆུ་སྐྱེས་གཡོན་དང་གཡས་སུ་ཟླ་བ་དང་ཉི་མ་བསྒོམ་སྟེ། དཀར་པོ་དང་དམར་པོའི་དྲི་དང་མེ་ཏོག་རྣམས་ཀྱིས་ཚིམ་པར་བྱས་ཏེ་ལས་བྱེད་པ་དེ་ལ་ཡོན་ཕུལ་ཏེ་དེ་ནས་སོ་ཕག་བྱའོ་ཞེས་སོ། །དེ་ནས་ཕྱོགས་བཟུང་བ་བསྲུངས་ཏེ། དེ་ནས་ལུག་ཏུ་འཕོ་བའི་ཉི་མ་རྣམ་པར་དག་པ་ལས་

བཞི་མཉམ་པོར་བྱས་ཏེ་དབུས་སུ་ཆུ་བླུགས་ནས་བརྟག་ཅིང་ཕྱོགས་མཉམ་པོར་བསྒྲུབ་པར་བྱའོ། །དེ་ལ་སྲིད་དུ་སོར་བཅུ་གཉིས་པའི་དབུས་སུ་སོར་གསུམ་གྱི་འཁོར་བ་རྩེ་མོ་ཁབ་ཀྱི་རྣམ་པ་རི་མོ་དྲག་པོ་བྲིས་པའི་སེང་ལྡེང་གི་ཐུར་ཤིང་སའི་དབུས་དཀྱིལ་འཁོར་གྱི་སྟེང་དུ་
གཟུགས་སོ། །དབུས་ནས་ཐ་མའི་མཐར་ཐུག་པ་ཐུར་ཤིང་གི་སྲིད་དང་མཉམ་པའི་དཀྱིལ་འཁོར་གྱི་དབུས་སུའོ། །དེ་ལ་དང་པོ་ཉི་མ་ཤར་བའི་དུས་སུ་ནུབ་ཕྱོགས་སུ་གྲིབ་མ་གབ་པའི་སར་མཚན་མ་བྱས་པས་ནུབ་ཕྱོགས་འགྲུབ་བོ། །དེ་བཞིན་དུ་ཉི་མ་གུང་གི་དུས་སུ་བྱང་ཕྱོགས་སུ་གྲིབ་
མ་བབས་པའི་སར་མཚན་མ་བྱས་པས་བྱང་ཕྱོགས་འགྲུབ་བོ། །དེ་བཞིན་དུ་ཉི་མ་ནུབ་ཀའི་དུས་སུ་ཤར་ཕྱོགས་ཀྱི་གྲིབ་མ་བབས་པའི་སར་མཚན་མ་བྱས་པས་ཤར་ཕྱོགས་འགྲུབ་བོ། །ཤར་ནས་ནུབ་ཀྱི་བར་ལ་སོར་དགུ་བཅུ་རྩ་དྲུག་གོ། །ད་ནི་འཕེལ་བ་དང་ཟད་པ་བརྗོད་པར་བྱ་སྟེ།
ཞེང་ནི་སྲིད་ལ་བསྒྱུར་བྱས་ཏེ། །དེ་ནས་ཉི་ཤུ་བཞི་ཡིས་བསྒྱུར། །ནོར་གྱིས་གང་ཐོབ་ལྷག་མ་ནི། །འདི་ནི་འཕེལ་བར་ངེས་པར་བསྟན། །ཚོགས་པ་ནོར་གྱིས་བསྒྱུར་བ་ལ། །རྒྱུ་སྐར་རྣམས་ཀྱིས་རབ་ཏུ་བགོ། །སྐར་མས་བགོས་པའི་ལྷག་མ་ནི། །འདི་ནི་སྐར་མར་ངེས་པར་
བསྟན། །སྐར་མ་ལ་ནི་ནོར་གྱིས་བགོ། །ལྷག་མ་གང་དེ་ཟད་པའོ། །རྣམ་པ་ཀུན་དུ་སྐར་མ་ལ། །བཞིས་བསྒྱུར་གཟའ་ཚོགས་གིས་བགོས་པའི། །ལྷག་མ་རྣམས་ནི་ཆ་ཤས་སོ། །ཚོགས་ལ་བཀྲ་ཤིས་ཀྱིས་སྤེལ་ལ། །མཁའ་རོས་ཐོབ་པའི་ལྷག་མ་ནི། །མཚོ་འགྱུར་དེ་ལ་
ཕུང་པོས་བགོ། །འཚོ་བའི་ལྷག་མར་གང་གྱུར་པ། །དེ་ནི་རྟག་ཏུ་འཆི་བའོ། །འདིའི་དོན་ནི་ཁང་མིག་གི་སྲིད་ཀྱི་ཁྲུའི་གྲངས་ལ་ཞེང་གི་ཁྲུའི་གྲངས་ཀྱིས་བསྒྱུར་པར་བྱའོ། །དེ་བཞིན་དུ་ཁྲུའི་གང་བའི་སྲིད་ཀྱི་སོར་ཀྱི་་གྲངས་ལ་ཁྲུ་གང་བའི་ཞེང་གི་སོར་གྱི་གྲངས་ཀྱིས་བསྒྱུར་བར་བྱའོ། །
བསྒྱུར་བའི་ཁྲུའི་གྲངས་ལ་ཡང་ཉི་ཤུ་རྩ་བཞིས་བསྒྱུར་བས་ཐམས་ཅད་སོར་དུ་འགྱུར་རོ། །ཁྲུ་གང་བའི་སོར་མོ་རྣམས་ཀྱིས་བསྣན་པར་གྱུར་པ་ལ་བརྒྱད་བརྒྱད་ཀྱིས་བགོའོ། །དེ་ནས་གང་ཐོབ་པའི་ལྷག་མ་ནི་རྒྱལ་མཚན་ལ་སོགས་པ་འཕེལ་བ་ཞེས་བརྗོད་དེ་འཕེལ་བའོ། །དེ་བཞིན་དུ་

ཚོགས་པ་བརྒྱད་ཀྱིས་བསྒྱུར་ལ་ཉི་ཤུ་རྩ་བདུན་གྱིས་བགོ་བར་བྱའོ། །དེའི་ལྷག་མ་རྣམས་ནི་སྨིན་དྲུག་ལ་སོགས་པའི་སྐར་མ་རྣམས་སུ་འགྱུར་རོ། །སྐར་མའོ། །སྨིན་དྲུག་ལ་སོགས་པའི་སྐར་མ་རྣམས་ལ་བརྒྱད་བརྒྱད་ཀྱིས་བགོས་པའི་ལྷག་མ་ནི་ཟད་པར་འགྱུར་ཏེ་ཟད་
པའོ། །སྨིན་དྲུག་ལ་སོགས་པའི་སྐར་མ་རྣམས་ལ་བཞིས་བསྒྱུར་ཏེ་དགུ་དགུས་བགོས་པའི་ལྷག་མ་རྣམས་ནི་ཉི་མ་ལ་སོགས་པའི་གཟར་འགྱུར་ཏེ་དེ་ནི་ཆ་ཤས་ཡིན་ཏེ་ཆ་ཤས་སོ། །དེ་བཞིན་དུ་བཅུ་གཉིས་ཀྱིས་བགོས་ལ་གང་ལྷག་མ་རྣམས་ལུག་ལ་སོགས་པར་འགྱུར་ཏེ་དུས་
སྦྱོར་རོ། །དེ་བཞིན་དུ་ཚོགས་ལ་བརྒྱད་ཀྱིས་བསྒྱུར་ལ་དེ་ལ་དྲུག་ཅུ་དྲུག་ཅུས་བགོས་པའི་ལྷག་མ་རྣམས་ནི་འཚོ་བར་འགྱུར་ཏེ་འཚོ་བའོ། །འཚོ་བ་ལ་ལྔ་ལྔས་བགོས་ལ་གང་ཐོབ་པའི་ལྷག་མ་ནི་ས་ལ་སོགས་པའི་བསྐལ་པར་འགྱུར་ཏེ་འཇིག་པའོ། །འདིར་ཤར་ཕྱོགས་སུ་རྒྱལ་མཚན་
ནི་འདབ་ཆགས་རྒྱལ་པོའོ། །མེར་དུ་བ་ནི་ཞུམ་བུའོ། །གཤིན་རྗེའི་ཕྱོགས་སུ་སེང་གེའོ། །བདེན་བྲལ་དུ་ཁྱིའོ། །ཆུ་བདག་ཏུ་ཁྱུ་མཆོག་ནི་ལྕེ་གཉིས་པའོ། །རླུང་དུ་བོང་བུ་ནི་བྱི་བའོ། །བྱང་དུ་གླང་པོ་ཆེའོ། །དབང་ལྡན་དུ་བྱ་རོག་ནི་ལུག་གོ། །འདི་རྣམས་ཀྱི་འདབ་ཆགས་
སྦྲུལ་དག་དང་། ཞུམ་བུ་དང་བྱི་བ་དག་དང་སེང་གེ་དང་གླང་པོ་ཆེ་དག་དང་། ལུག་དང་ཁྱི་དག་ནི་ཕན་ཚུན་དུ་མི་མཐུན་པའོ། །ཁང་མིག་གི་སྲིད་དང་ཞེང་གི་གནས་ལ་ཁྲུ་དང་སོར་གྱི་གྲངས་རྣམས་ལ་ཕན་ཚུན་མི་མཐུན་པ་མ་ཡིན་པ་དེ་བཞིན་དུ་བྱའོ།། །།ད་ནི་ཁང་བཟངས་ཀྱི་མཚན་
ཉིད་བརྗོད་པར་བྱ་སྟེ། སྲིད་ཀྱི་ཕྱེད་དུ་གྱུར་པ་ནི་ཞེང་ངོ་། །འོན་ཀྱང་ཚད་ཅུང་ཟད་ལྷག་པར་བྱའོ། །ཁང་མིག་གི་སྲིད་ཀྱི་སུམ་ཆ་གཅིག་ནི་མ་ཐེམ་དུ་བཤད་དོ། །གདུང་གི་མཐར་ཐུག་པ་ནི་འོག་གི་ཆའོ། །དེ་བཞིན་དུ་དེ་དང་མཉམ་པ་ནི་སྟེང་གི་ཆའོ། །དོང་དགང་བའི་ཁྱད་པར་ལ་ཁ་ཅིག་ཏུ་སྐ་
རགས་གསུམ་དང་ལྡན་པའོ། །ཁ་ཅིག་ཏུ་སྐ་རགས་ལྔ་དང་ལྡན་པའོ། །ཁ་ཅིག་ཏུ་སྐ་རགས་བདུན་དང་ལྡན་པའོ། །ཁ་ཅིག་ཏུ་ཆུའི་མཐར་ཐུག་པའོ། །ཁ་ཅིག་ཏུ་རྡོ་བའི་མཐར་ཐུག་པའོ་ཞེས་པ་ནི་གྲོས་སུ་བྱའོ། །ཆུ་འགྲོ་བའི་གནས་ཀྱི་ངེས་པ་བརྗོད་པ་ནི་དེ་ལ་གང་དུ་དགེ་བ་དང་སྐྱེ་བོ་དང་

ནོར་འཕེལ་བར་འདོད་པས་དེ་ལ་རླུང་གི་ཕྱོགས་སུ་རྡོ་རྗེ་འབར་བ་དང་ནག་པོ་ཆེན་པོའི་རེ་མིག་དག་ལ་བྱང་ཕྱོགས་སུ་ཆུ་འགྲོ་བར་བྱའོ། །གང་དུ་ཚེ་དང་ནད་མེད་པ་དང་བདེ་བ་འཕེལ་བར་འདོད་པས་དེ་ལ་དབང་ལྡན་གྱི་ཕྱོགས་སུ་དྲི་རྡོ་རྗེ་མ་དང་། གཙུག་ཏོར་ཅན་མའི་རེ་མིག་དག་ལ་ཆུ་འགྲོ་བར་བྱའོ། །ཉེས་
པ་མེད་པར་བྱ་བའི་ཕྱིར་རྩ་དང་སྒོ་འབུགས་པ་ཡོངས་སུ་སྤང་བར་བྱའོ། །དེ་ནས་ཁང་མིག་ཞེང་གི་ཆ་གསུམ་གྱི་ཆ་གཅིག་གམ་ཡང་ན་བཞི་ཆ་གཅིག་གི་སྟེགས་བུ་དང་། ཆུ་ལྷུང་བ་དང་། ལག་འགྲོ་དང་། མྱོས་པ་བསྲུང་བ་དང་རྩེ་མོའོ། །དེའི་ཕྱེད་ཀྱི་ཚད་ནི་རྩིག་པའོ།། །།ད་ནི་བྱེ་བྲག་གི་
མཚན་ཉིད་བརྗོད་པར་བྱ་སྟེ། ཁང་པ་གཅིག་པ་དང་། ཁང་པ་གཉིས་པ་དང་། ཁང་པ་གསུམ་པ་དང་། ཁང་པ་བཞི་པའི་ཁང་བཟངས་ལ་གལ་ཏེ་ནུབ་ཏུ་ཁང་པ་གཅིག་པའི་ཁང་བཟང་ནི་དེས་ནོར་ཉམས་པར་འགྱུར་རོ། །དེ་བཞིན་དུ་བྱང་གི་ཁང་པ་ཁང་གཅིག་ཏུ་གྱུར་ན་སྦྱིན་བདག་མི་འཚོའོ། །
དེ་བཞིན་དུ་ཤར་གྱི་ཁང་པ་ཁང་གཅིག་ཏུ་གྱུར་ན་རིགས་རྒྱུད་མི་འཕེལ་ལོ། །དེ་ནས་ཡང་ལྷོ་ཕྱོགས་སུ་གནས་པ་བྱང་དུ་སྒོ་མངོན་པར་ཕྱོགས་པའི་ཁང་བཟངས་ཀྱི་སྐྱེ་བོ་དད་ནོར་དང་ཆ་རབ་ཏུ་སྟེར་བར་འགྱུར་རོ། །ཁང་པ་གཉིས་པའི་ཁང་བཟངས་ནི་གཤིན་རྗེའི་སློབ་མ་དང་། ཁྱིམ་གྱི་ཐབ་དང་། མཆིང་
བུ་དང་དབྱུག་པའི་མིག་དང་རླུང་གི་མིག་དང་དོན་གྲུབ་པ་རྣམས་སོ། །འཆི་བ་དང་ནོར་ཟད་པ་དང་། གཉེན་དང་མི་མཐུན་པ་དང་རྒྱལ་པོའི་ཆད་པ་དང་འཐབ་མོ་དང་དོན་ཐོབ་པར་བྱེད་པ་རྣམས་སོ། །དེ་ལ་ནུབ་དང་བྱང་ནི་གཤིན་རྗེའི་སློབ་མའོ། །ཤར་དང་ནུབ་ནི་ཁྱིམ་གྱི་ཐབ་བོ། །ལྷོ་དང་བྱང་ནི་མཆིང་བུའོ། །
ཤར་དང་བྱང་ནི་དབྱུག་པའི་མིག་གོ། །ཤར་དང་ལྷོ་ནི་རླུང་གི་མིག་གོ། །ལྷོ་དང་ནུབ་ནི་དོན་གྲུབ་པའོ། །གཤིན་རྗེ་དང་། ཆུ་བདག་དང་། བྱང་དང་ཤར་དུ་ཁང་པ་དང་མི་ལྡན་པའི་ཁང་བཟངས་ནི་གོ་རིམས་བཞིན་དུ་ཐབ་དང་ཕྱོགས་འཇོམས་པ་དང་གསེར་གྱི་ནམ་མཁའ་དང་ཞིང་བཟང་པོ་ཞེས་
བརྗོད་དོ། །དེ་ལ་ཐབ་ནི་ཡོ་བྱད་མཉམ་པར་བྱེད་དོ། །ཕྱོགས་འཇོམས་པ་ནི་བུ་འཆི་བ་དང་དགྲར་བྱེད་དོ། །གསེར་གྱི་ནམ་མཁའ་ནི་དོན་ཐམས་ཅད་ཕུན་སུམ་ཚོགས་པ་དང་བདེ་བ་རབ་ཏུ་སྟེར་རོ། །ཞིང་བཟང་པ་ནི་ཆོས་དང་ནོར་དང་བ་ལང་དང་དུད་འགྲོ་རྣམས་འཕེལ་བར་བྱེད་དོ། །ཁང་པ་གསུམ་

པ་ཡིའོ། །ཁང་པ་བཞི་པའི་ཁང་བཟངས་ལ་འདོད་ལྡན་དང་། བཀྲ་ཤིས་དང་། འཕེལ་ལྡན་དང་། གཡུང་དྲུང་འཁྱིལ་བ་དང་། དོན་ཐམས་ཅད་གྲུབ་པ་ཞེས་སོ། །དེ་ལ་འདིར་འདོད་ལྡན་བརྗོད་པར་བྱའོ། །གང་ལ་ཤར་དང་བྱང་དང་ནུབ་ཀྱི་ཕྱོགས་རྣམས་སུ་ཕྱོགས་
གཅིག་ལ་རྩ་བའི་སྒོ་གཅིག་གིས་ཉེ་བར་བརྒྱན་པ། དོང་བཀང་བའི་ཕྱི་དང་ནང་དང་དབུས་ཀྱི་གནས་ལ་རྩིག་པ་གསུམ་གྱིས་ཉེ་བར་མཆན་པའོ། །སྟེང་གི་ཆ་ལ་རྩིག་པ་གཉིས་ཀྱིས་རྣམ་པར་བརྒྱན་པའམ། ཡང་ན་རྩིག་པ་གཅིག་གིས་རྣམ་པར་བརྒྱན་པའོ། །དེ་ལ་གང་རྩིག་པ་གཅིག་གིས་
རྣམ་པར་བརྒྱན་པ་དེའི་རྩིག་པའི་གནས་ལ་ཀ་བའི་ཕྲེང་བས་བརྒྱན་པའོ། །གཉིས་ཀའི་མཐར་ཐུག་པ་ནི་སྲིད་དོ། །དེ་ཡང་ཁྲུ་སུམ་ཅུ་ནས་བརྩམས་ཏེ་ཇི་སྲིད་ཁྲུ་སྟོང་གི་བར་དུའོ། །སྲིད་ཀྱི་ཆ་ལྔའི་ཆ་གཅིག་ནི་ཞེང་གི་ཚད་དོ། །ཞེང་གི་ཆ་ལྔ་ལ་གསུམ་ནི་ནང་གི་དབུས་ཀྱི་རྩིག་པ་དང་
ཀ་བ་ཡང་ངོ་། །ནང་ན་སྟེང་འོག་ཆ་གཉིས་ཀ་ལ་ཀ་བའི་ཕྲེང་བ་བྱའོ། །སྒོ་ཕྱི་མ་དང་ནང་མ་ལ་སྒོ་ཀྱོག་པོ་མི་བྱའོ། །དེ་ཡང་འདོད་ལྡན་ཐམས་ཅད་མཚུངས་པར་ལྡན་པ་ནི་ཚེ་དང་སྐྱེ་བོ་དང་ནོར་དང་བདེ་བ་དང་ཕུན་སུམ་ཚོགས་པ་རབ་ཏུ་སྟེར་བར་འགྱུར་རོ། །དེ་བཞིན་དུ་ཤར་ནུབ་གཉིས་དང་། ལྷོ་
བྱང་གཉིས་ཀྱི་མཐར་ཐུག་པའི་སྲིད་དུ་གྱུར་པ་གང་ཡིན་པ་དེ་ནི་བཀྲ་ཤིས་མ་ཞེས་པའི་ཁང་བཟངས་སོ། །སྲིད་ཀྱི་དྲུག་ཆའི་ཆ་གཅིག་གི་ཚད་ནི་ཞེང་ངོ་། །ཁང་པའི་གཞོགས་གཉིས་ནི་གནས་དེ་དག་མཉམ་པའི་ཞེང་ངོ་། །སྲིད་ནི་ཞེང་གི་ཉིས་འགྱུར་རོ། །དེ་ལ་རིང་པོ་དག་ལ་སྒོ་གཉིས་གཉིས་
སོ། །ཁང་པ་ཐུང་བ་དག་ལ་སྒོ་རེ་རེའོ། །དེ་ཡང་ཁང་བཟངས་བཀྲ་ཤིས་མ་སྟེ། དེ་ལ་གནས་པའི་སེམས་ཅན་རྣམས་ཀྱི་ནོར་དང་སྐྱེ་བོ་དང་གཉེན་དང་ཚེ་དང་དུད་འགྲོ་དང་གྲགས་པ་འཕེལ་བར་བྱེད་དོ། །གང་ལ་གཡས་གཡོན་གཞོགས་གང་ཁང་ཆུང་གཉིས་དང་ལྡན་ཞིང་སྒོ་བྱང་དུ་ལྟ་བ་ནི་ལྷོའི་
ཁང་པའོ། །ནུབ་དང་བྱང་དང་ཤར་གྱི་ཁང་པའི་གནས་ལ་ཁང་ཆུང་དང་མི་ལྡན་པར་གྱུར་པ་དེ་ནི་ནོར་དང་འབྲུ་འཕེལ་བ་སྟེ་འཕེལ་ལྡན་ཞེས་བཤད་དོ། །གང་ལ་གཞོགས་གཡོན་དུ་ཁང་ཆུང་དང་ལྡན་པའི་ཁང་པ་བཞིར་གྱུར་པ་དེ་ནི་ནོར་དང་སྐྱེ་བོ་དང་བདེ་བ་འབབ་པའི་སྟེ། གཡུང་དྲུང་འཁྱིལ་

བ་ཞེས་གསུངས་སོ། །གང་ཡང་ཁང་ཆུང་བཞི་དང་བཅས་པའི་ཁང་པ་བརྒྱད་དུ་གྱུར་པ་དེ་ནི་ནོར་དང་འབྲུ་འཕེལ་ཏེ། དོན་ཐམས་ཅད་གྲུབ་པ་ཞེས་གསུངས་སོ། །ལྷ་ཁང་གི་བྱེ་བྲག་ནི་གྲུ་བཞི་པར་རེ་མིག་བརྒྱད་ཅུ་རྩ་གཅིག་བྱ་སྟེ། ཕྱི་རོལ་དུ་རེ་མིག་སུམ་ཅུ་རྩ་གཉིས་ཀྱི་དང་པོ་དང་གཉིས་
པའི་གནས་དག་གི་རྩིག་པའི་ལུས་སོ། །གནས་དང་པོའི་ཞེང་དང་མཚུངས་པ་དཔངས་སུ་སྟེ་གཉིས་པའི་རེ་མིག་ཏུའོ། །དེའི་སྟེང་དུ་གསུམ་པ་དང་བཞི་པ་དག་རྩིག་པ་བྱ་སྟེ། འོག་གི་གནས་ཀྱི་སྲིད་ཀྱི་དགུའི་ཆ་རྣམས་ལ་དྲུག་གི་ཆས་སྟེང་གི་གནས་དག་གི་ཞེས་སོ། །དེ་ནས་རེ་མིག་དགུར་
བྱས་ལ་ཕྱིའི་རེ་མིག་ཏུ་རྩིག་པ་བྱའོ། །དཔངས་སུ་གསུམ་པའི་གནས་ལ་དང་པོའི་གནས་ཀྱི་སུམ་ཆའི་ཆ་གཅིག་གིས་སོ། །དེའི་ཉིས་འགྱུར་གྱི་གནས་བཞི་པའི་དཔངས་སོ། །སྟེགས་བུ་ནི་རྩིག་པ་གཉིས་སོ། །དེ་ལ་རྩིག་རྨང་གཞན་པར་གསུངས་སོ། །ཡང་དག་པར་སྦྱང་བ་རྣམས་ལས་བཟང་
པོས་ཡོངས་སུ་བཀང་བ་རྣམས་ཡང་དག་པར་བརྡུང་ཞིང་དོང་བཀང་ལ། གསེར་དང་དངུལ་གྱི་པདྨའི་སྟེང་དུ་གསེར་དང་དངུལ་གྱི་བུམ་པ་རུས་སྦལ་གྱི་སྟེང་དུ་དགོད་དོ། །དེའི་སྟེང་དུ་གཡས་སྐོར་དུ་མེ་ལོང་ལ་སོགས་པའི་མཚམས་རྣམས་སུ་ཨིནྡྲ་ནཱི་ལ་དང་། རྡོ་རྗེ་ཕ་ལམ་དང་། མ་ར་ག་ཏ་དང་།
པདྨ་རཱ་ག་དང་། པུཥྤ་རཱ་ག་རྣམས་དང་། བདུད་རྩི་ལྔ་དང་། དྲི་ལྔ་དང་། དངུལ་ཆུས་ནང་ཡོངས་སུ་དགང་བར་བྱའོ། །ཇི་ལྟར་འབྱོར་པས་གསེར་དང་དངུལ་དང་། ཟངས་མ་ལས་ཡོངས་སུ་བྱས་ཏེ་ཁ་དགབ་པར་བྱའོ། །ཨོཾ་བཛྲ་ཡཀྵ་ཧཱུཾ་ཞེས་པའི་སྔགས་བརྒྱ་རྩ་བརྒྱད་ཡོངས་སུ་བཟླས་པར་བྱའོ། །
སྦྲང་གི་བུམ་པ་བཞི་ཟུར་བཞིར་གཞག་པར་བྱའོ། །དེའི་སྟེང་དུ་ལེགས་པར་བྱས་པའི་སོ་ཕག་གཞག་པར་བྱའོ།། །།དེ་ནས་ཡོངས་སུ་སྦྱང་བའི་སའི་དབུས་སུ་སློབ་དཔོན་གྱིས་ཏིང་ངེ་འཛིན་གསུམ་བསྒོམས་ནས་སྔོན་དུ་ཡིད་ཀྱི་རང་བཞིན་གྱི་མཆོད་པ་རྣམས་ཀྱིས་དེ་ན་གནས་པའི་ལྷ་དང་། ཕྱོགས་སྐྱོང་
དང་། ཀླུ་དང་། སའི་ལྷ་དང་། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་མཆོད་ཡོན་དང་ཞབས་བསིལ་དང་ཞལ་བསིལ་གྱིས་ཡང་དག་པར་མཆོད་པར་བྱའོ། །ཕྱིའི་མེ་ཏོག་དང་སྤོས་ལ་སོགས་པ་རྣམས་ཀྱིས་ཀྱང་ཡང་དག་པར་མཆོད་ནས་ནམ་མཁའ་ལ་གཞག་པར་བྱའོ། །དེ་ནས་

ཨོཾ་བྷྲཱུ་ཁཾ་ཞེས་པའི་སྔགས་ཀྱིས་སྟོང་པར་བྱས་ཏེ་སའི་ཆ་ལ་ཧཱུཾ་ལཾ་ཧཱུཾ་ཞེས་པའི་སྔགས་ཀྱིས་རྡོ་རྗེའི་རྡུལ་ཕྲ་རབ་ཀྱི་རང་བཞིན་དུ་རྣམ་པར་བསྒོམ་པར་བྱའོ། །ཨོཾ་མེ་དི་ནཱི་བཛྲཱི་བྷ་བ་བཛྲ་བནྡྷ་ཧཱུཾ་ཞེས་པའི་སྔགས་ཀྱི་བྱིན་གྱིས་བརླབ་པར་བྱའོ། །དེ་ནས་ལག་པ་གཡས་པར་ཟླ་བ་ལ་ཧཱུཾ་གསུམ་དང་
ཏྲཾ་ཞེས་བརྗོད་པས་ཧཱུཾ་ཡིག་གི་འོད་ཟེར་གྱིས་སོར་མོའི་རྩེ་མོ་ལས་གདེངས་ཀའི་སྒྲས་ཡེ་ཤེས་ཀྱི་སའི་ལྷ་མོ་བསྐུལ་ནས་འཐོན་ཏེ། ལག་པ་གཉིས་ཀྱིས་གསེར་གྱི་བུམ་པ་འཛིན་ཞིང་རྒྱན་ཐམས་ཅད་ཀྱིས་བརྒྱན་པའི་ས