Luận tạng Tây Tạng (Tengyur) — Tập 62

ས་པའི་སྔགས་སོ། །གཟུགས་བརྙན་ནི་དབང་པོ་ལ་སོགས་པའིའོ། །སྦྱིན་སྲེག་མང་ཞིང་སྨོས་པ་ནི་དེའི་ཆོ་ག་སློབ་དཔོན་གྱི་ཞལ་སྔ་ནས་དང་གཞན་གྱིས་ཀྱང་གཞན་དུ་ཞིབ་ཏུ་དཔྱད་པས་ཆོག་གོ། །སྙིང་གར་བྱུག་པ་ནི་
བསྲུང་བའི་དོན་ཏོ། །གཞན་དག་ནི་སློབ་མ་དང་བཅུག་པར་བྱ་བའི་ཕྱིར་རོ་ཞེས་ཟེར་རོ། །དེ་ལྟར་དོན་མཐའ་དག་ཡོངས་སུ་རྫོགས་པར་བྱས་ནས། ད་ནི་རྡོ་རྗེ་སེམས་ཞེས་བྱ་བ་ལ་སོགས་པས་དགེ་བ་བསྔོ་བ་མཛད་པ་སྟེ། དངོས་གྲུབ་ཐམས་ཅད་ནི་འཇིག་རྟེན་དང་དེ་ལས་འདས་
པའོ། །རིགས་པའི་མཆོག་ནི་ཐམས་ཅད་མཁྱེན་པའི་ཡེ་ཤེས་ཏེ་དེ་ཉིད་ནི། སེམས་ཅན་ཀུན་གྱི་གཉེན་གཅིག་པོ། །ཅིའི་ཕྱིར་ཞེ་ན། གཞན་ལ་དེ་ཙམ་དུ་ཕན་པ་དང་བདེ་བ་བྱ་བར་སེམས་པ་མེད་པས་མ་དང་ཕ་ལས་ཀྱང་ལྷག་པའོ། །དེར་ཀུན་དགའ་སྙིང་པོ་བདག་གྱུར་ཅིག་
ཅེས་སྦྱར་རོ། །དེ་བཞིན་དུ་སེམས་ཅན་མ་ལུས་པ་ཡང་ཁྱབ་བདག་རྡོ་རྗེ་འཆང་ཆེན་དུ་གྱུར་ཅིག་ཅེས་བྱ་བའི་དོན་ཏོ། །དཀྱིལ་འཁོར་ཆོ་ག་རྒྱ་ཆེན་འདི། །གོ་རིམས་ལོག་པར་སྨྲ་བ་དག །བསལ་ཕྱིར་གོ་རིམས་ཇི་བཞིན་བརྗོད། །དེ་བཞིན་ཚིག་དོན་ཉུང་ཟད་བྲིས། །འདི་
ལས་སྐྱེས་པའི་དགེ་བ་ཡིས། །འགྲོ་བ་སངས་རྒྱས་གནས་འགྲོ་ཤོག །འཕགས་པ་དེ་ཁོ་ན་ཉིད་བསྡུས་པའི་དཀྱིལ་འཁོར་གྱི་ཆོ་ག་རྡོ་རྗེ་འབྱུང་བ་ཞེས་བྱ་བའི་བསྡུས་པའི་དོན་ཨཱ་ཙཱརྱ་མུ་ནཱི་ན་དྲ་བྷ་དྲས་མཛད་པ་རྫོགས་སོ།། །།ཨཱ་ཙཱརྱ་མུ་ནཱི་ན་དྲ་བྷ་དྲ་དང་། བོད་ཀྱི་

ལོ་ཙཱ་བ་དགེ་སློང་ཆོས་ཀྱི་ཤེས་རབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། ༄༅༅། །རྒྱ་གར་སྐད་དུ། བཛྲ་དྷཱ་ཏུ་མཎྜ་ལཱརྠ་བྷ་བ་ན་པཎྜཱིརྠཾ། བོད་སྐད་དུ། རྡོ་རྗེ་དབྱིངས་ཀྱི་དཀྱིལ་འཁོར་གྱི་དོན་བསྒོམ་པའི་དོན་བསྡུས་པ། འཇམ་དཔལ་རྡོ་རྗེ་སེམས་དཔའ་ལ་ཕྱག་
འཚལ་ལོ། །དང་པོར་བདག་མེད་པ་ལ་མོས་པ་དང་། ལྐོག་མ་སྦྱང་བ་དང་། ལག་པ་སྦྱང་བ་དང་། བགེགས་བསྐྲད་པ་དང་། གནས་བསྲུང་བ་དང་། དཀྱིལ་འཁོར་སྤྲུལ་པ་དང་། མེ་ཏོག་ལ་སོགས་པས་མཆོད་པ་དང་། ཕྱག་འཚལ་བ་དང་། སྡིག་པ་བཤགས་པ་དང་།
བསོད་ནམས་ལ་རྗེས་སུ་ཡི་རང་བ་དང་། གསོལ་བ་གདབ་པ་དང་། བསྐུལ་བ་དང་། མཆོད་པ་ཉི་ཤུ་དང་། བདག་ཉིད་དབུལ་བ་དང་། བསྔོ་བ་དང་། སྨོན་ལམ་གདབ་པ་དང་། བྱང་ཆུབ་ཏུ་སེམས་བསྐྱེད་པ་དང་། སྡོམ་པ་ཉི་ཤུ་བླང་བ་དང་། བྱང་ཆུབ་ཏུ་སེམས་
བསྐྱེད་པ་ཕུལ་དུ་བྱུང་བ་དང་། རང་བཞིན་གྱི་དཀྱིལ་འཁོར་དང་། སྤྲུལ་པའི་དཀྱིལ་འཁོར་དང་། བསྒོམ་པའི་དཀྱིལ་འཁོར་རྣམས་ཀྱིས་གཟུགས་བརྙན་བསྒོམ་པ་དང་། ཕྱག་རྒྱ་བཅིང་བ་སྔོན་དུ་འགྲོ་བའི་ཆོ་ག་བསྒྲུབ་པ་མདོར་བསྟན་པ་དང་། རྡོ་རྗེ་ཐལ་མོའི་མཚན་
ཉིད་དང་དེ་དག་བྱིན་གྱིས་བརླབ་པའི་སྔགས་དང་། རྡོ་རྗེ་དབབ་པ་བསྐྱེད་པ་དང་། རྡོ་རྗེ་བརྟན་པར་བྱ་བ་དང་། ངན་སོང་ཐམས་ཅད་དགུག་པ་དང་། སྡིག་པ་ཐམས་ཅད་དྲལ་བ་དང་། ཕྱག་རྒྱ་དགྲོལ་བ་དང་། དེ་ཉིད་ཕུལ་དུ་དབྱུང་བ་དང་། རང་གི་སྙིང་གའི་རྡོ་རྗེ་ལ་སྙིང་པོ་
དགོད་པ་དང་། ཟླ་བ་གཉིས་བསྒོམ་པ་དང་། རྡོ་རྗེ་བསྒོམ་པ་དང་། གཞན་བསྒྲུབ་པ་ལ་ཕྱག་རྒྱ་གཞན་བསྒོམ་པ་དང་། སྙིང་པོ་དགོད་པ་དང་། ཕྱག་རྒྱའི་ང་རྒྱལ་དང་སྔར་བཤད་པའི་དཀྱིལ་འཁོར་དུ་གཞུག་པ་དང་། རྡོ་རྗེ་སེམས་དཔའ་བསྐྱེད་པ་དང་། དམ་ཚིག་
སེམས་དཔའི་ང་རྒྱལ་དང་། དམ་ཚིག་གི་ཕྱག་རྒྱས་དེའི་ང་རྒྱལ་དང་། དེ་ཉིད་ཀྱིས་གཞན་བཞིར་བྱིན་གྱིས་བརླབ་པ་དང་། ཕྱག་རྒྱ་ཆེན་པོའི་སྙིང་པོ་དང་། སྔགས་བཟླས་པ་དང་། རང་གི་སྙིང་གར་དཀྱིལ་འཁོར་བསམས་པ་དང་། ཕྲེང་བ་བླངས་ཏེ་དོར་བ་དང་།

དཀྱིལ་འཁོར་དུ་འཇུག་པ་དང་། ཕྲེང་བ་བླང་སྟེ་སྤྱི་བོར་བཀྲོལ་ཅིང་བཅིང་བ་དང་། གདོང་གཡོགས་དགྲོལ་བ་དང་། དཀྱིལ་འཁོར་བསྟན་པ་དང་། མཐོང་བ་དེ་བརྟན་པར་བྱ་བ་དང་། དབང་བསྐུར་ལྔ་དང་། དཀྱིལ་འཁོར་རེ་རེ་ཞིང་དག་པ་
བྱིན་གྱིས་བརླབ་པ་དང་། དཀྱིལ་འཁོར་རེ་རེའི་བདག་ལ་བྱིན་གྱིས་བརླབ་པ་ལ་སོགས་པ་ལྔ་བརྒྱ་དགུ་བཅུ་རྩ་གཉིས་ཀྱི་རྣལ་འབྱོར་སྒྲུབ་པ་དང་། སྙིང་གའི་དཀྱིལ་འཁོར་གཅིག་ཏུ་གྱུར་པ་དང་། རང་གི་ལུས་ལ་ཟླ་བ་མང་པོ་དགོད་པ་དང་། དེ་ནས་ནམ་མཁའ་ལ་ཟླ་བའི་
དཀྱིལ་འཁོར་དགོད་པ་དང་། སྙིང་པོ་དགོད་པ་དང་། རྡོ་རྗེ་ལ་སོགས་པའི་ཕྱག་མཚན་དགོད་པ་དང་། དེའི་ང་རྒྱལ་དང་། དཀྱིལ་འཁོར་བསྐྱེད་པ་དང་། ཡེ་ཤེས་སེམས་དཔའ་དགུག་པ་དང་། བལྟ་བ་དང་། དགུག་པ་ལ་སོགས་པས་རང་གི་ལུས་ལ་གཞུག་པ་དང་།
ཁ་དོག་དང་དབྱིབས་ལ་སོགས་པའི་དབྱེ་བ་དང་། སྙིང་པོ་དང་སྔགས་དག་གིས་བརྟན་པར་བྱ་བ་དང་། དེ་བཞིན་གཤེགས་པ་ཐམས་ཅད་གཞུག་པ་དང་། རྡོ་རྗེ་དབྱིངས་སྔོན་དུ་འགྲོ་བའི་རིགས་ལྔའི་སྔགས་ཀྱིས་བྱིན་གྱིས་བརླབ་པ་དང་། གནས་བཞི་པོར་རྡོ་རྗེ་ལ་
སོགས་པ་དགོད་པ་དང་། ཕྱག་རྒྱ་བཞིས་རྒྱས་གདབ་པ་དང་། ཕྱག་རྒྱ་ཐམས་ཅད་སྤྱིའི་སྔགས་ཀྱིས་བཅིང་བ་དང་ཡི་གེ་བརྒྱ་པས་བརྟན་པར་བྱ་བ་དང་། ཡང་དབང་བསྐུར་བླང་བ་དང་། དགའ་བའི་གླུ་དང་གར་དང་ལཱ་སྱེ་ལ་སོགས་པའི་མཆོད་པ་དང་། རྡོ་རྗེ་དྲིལ་བུ་
བླང་བའི་དེ་ཁོ་ན་ཉིད་དང་སྔགས་བརྗོད་པས་དེ་དག་བརྟན་པར་བྱ་བ་དང་། ཚིག་གསུམ་གྱི་གླུ་བླང་བ་དང་། རང་བཞིན་མེད་པའི་སྔགས་ཀྱིས་བདག་མེད་པར་བསྒོམ་པ་དང་། སྣོད་ཀྱི་འཇིག་རྟེན་རྣམ་པར་དག་པ་དང་། སྤྱིའི་གདན་དང་། ཁྱད་པར་གྱི་གདན་དང་།
དོན་ཐམས་ཅད་གྲུབ་པས་བསམ་གཏན་དང་གཟུགས་མེད་པ་བསྒོམ་པ་དང་། མི་གཡོ་བ་ལ་འཇུག་པ་དང་། དེ་བཞིན་གཤེགས་པས་བཞེངས་པ་དང་། དེ་རྣམས་མཐོང་བ་དང་། དེ་ལ་ཕྱག་བྱ་བ་དང་། དེ་རྣམས་ཀྱི་གདམས་ངག་དང་མངོན་པར་བྱང་ཆུབ་པ་ལྔ་

ནི་སེམས་སོ་སོར་རྟོག་པ་མི་བསྐྱོད་པའི་ངོ་བོ་དང་བྱང་ཆུབ་ཏུ་སེམས་བསྐྱེད་པ་སྦྱིན་པའི་ཕ་རོལ་ཏུ་ཕྱིན་པ་རིན་ཆེན་འབྱུང་ལྡན་དང་། རྡོ་རྗེ་བསྐྱོད་པ་ནི་འོད་དཔག་ཏུ་མེད་པ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་དང་། དེ་བཞིན་གཤེགས་པ་ཐམས་ཅད་ཀྱི་སྐུ་ལ་སོགས་པའི་
རྡུལ་ཕྲ་རབ་ཞུགས་པ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་སྟེ་དོན་ཡོད་གྲུབ་པའོ། །གཟུགས་རྫོགས་པ་ནི་དེ་བཞིན་གཤེགས་པ་ཐམས་ཅད་ཀྱི་རང་བཞིན་ཏེ། རྣམ་པར་སྣང་མཛད་ཀྱི་རང་བཞིན་ནོ། །རྡོ་རྗེ་རིན་ཆེན་གྱི་དབང་བསྐུར་བ་དང་རྗེས་སུ་གནང་བ་སྦྱིན་པ་དང་།
རི་རབ་ཀྱི་རྩེ་མོར་གཞལ་ཡས་ཁང་བསྐྱེད་པ་དང་། དེ་བཞིན་གཤེགས་པ་བཞིས་ཡོངས་སུ་བསྐོར་བ་སྟེ་སྦྱོར་བ་དང་པོའི་ཏིང་ངེ་འཛིན་ཏོ། །ནང་གི་བདག་ཉིད་ཁྲུས་ནི་ལུས་དྲན་པ་ཉེ་བར་གཞག་པའོ། །ལྐོག་མ་དང་ལྕེ་བྱིན་གྱིས་བརླབ་པ་ནི་ཚོར་བ་དྲན་པ་ཉེ་བར་གཞག་པའོ། །ལག་
པ་བྱིན་གྱིས་བརླབ་པ་ནི་སེམས་དྲན་པ་ཉེ་བར་གཞག་པའོ། །བགེགས་བསྐྲད་པ་ནི་ཆོས་དྲན་པ་ཉེ་བར་གཞག་པའོ། །བགེགས་འཇོམས་པ་ནི་སེམས་ཀྱི་རྫུ་འཕྲུལ་གྱི་རྐང་པའོ། །བགེགས་བཅིངས་པ་ནི་དཔྱོད་པའི་རྫུ་འཕྲུལ་གྱི་རྐང་པའོ། །སྟེང་བཅིངས་པ་ནི་མི་དགེ་བའི་
ཆོས་སྐྱེས་པ་སྤང་བའོ། །ཡང་ཤར་ལ་སོགས་པ་བཅིངས་པ་ནི་མི་དགེ་བའི་ཆོས་མ་སྐྱེས་པ་མི་སྐྱེད་པའོ། །དཀྱིལ་འཁོར་སྤྲུལ་པ་དང་དཀྱིལ་འཁོར་ལྔས་ཕྱག་བཙལ་བ་ནི་དགེ་བའི་ཆོས་མ་སྐྱེས་པ་བསྐྱེད་པའོ། །སྡིག་པ་བཤགས་པ་ནས་བརྩམས་ཏེ། མཆོད་པ་ཉི་ཤུ་དང་
སྡོམ་པ་བླང་བ་ནི་དགེ་བའི་ཆོས་སྐྱེས་པ་བསྲུང་བ་ཚོགས་ཀྱི་ལམ་མོ། །དེ་ནས་གཟུགས་བརྙན་ལ་སོགས་པའི་སྦྱོར་བ་ནས་བརྩམས་ཏེ། རྣལ་འབྱོར་ཆེན་པོའི་བར་དུ་སྦྱོར་བའི་ལམ་ཡིན་ཏེ། རྡོ་རྗེ་ཐལ་མོ་དང་རྡོ་རྗེ་བསྡམས་པ་དང་། རྡོ་རྗེ་དབབ་པ་དང་། བརྟན་པར་
བྱ་བ་དང་། སྡིག་པ་དྲལ་བ་དང་། ངན་འགྲོ་སྦྱོང་བ་ནི་དད་པའི་དབང་པོའོ། །བདག་མེད་པ་བསྒོམ་པ་ནི་བརྩོན་འགྲུས་ཀྱི་དབང་པོའོ། །ཟླ་བ་གཉིས་བསྐྱེད་པ་ནི་དྲན་པའི་དབང་པོའོ། །ཡེ་ཤེས་སེམས་དཔའ་གཞུག་པ་ལ་སོགས་པ་ནི་ཤེས་རབ་ཀྱི་དབང་པོའོ། །སྙིང་

གར་དཀྱིལ་འཁོར་དགོད་པ་ནི་དད་པའི་སྟོབས་སོ། །དེ་ལ་འཇུག་པ་ནི་བརྩོན་འགྲུས་ཀྱི་སྟོབས་སོ། །ཕྲེང་བའི་དབང་ནི་དྲན་པའི་སྟོབས་སོ། །དམ་ཚིག་གསུམ་གྱི་གླུ་ནི་ཏིང་ངེ་འཛིན་གྱི་སྟོབས་སོ། །ཡང་སྟོང་པ་ཉིད་བསྒོམ་པ་ནི་ཤེས་རབ་ཀྱི་སྟོབས་ཏེ་སྦྱོར་
བའི་ལམ་མོ། །འོག་མིན་ལ་ཡིད་ཀྱི་རང་བཞིན་གྱི་ལུས་གནས་པ་ནི་ཏིང་ངེ་འཛིན་བྱང་ཆུབ་ཀྱི་ཡན་ལག་གོ། །རི་རབ་ལ་སོགས་པ་བསྒོམ་པ་ནི་བརྩོན་འགྲུས་ལ་སོགས་པ་བྱང་ཆུབ་ཀྱི་ཡན་ལག་གོ། །གདན་བསྒོམ་པ་ནི་དགའ་བ་བྱང་ཆུབ་ཀྱི་ཡན་ལག་གོ། །དེ་བཞིན་
གཤེགས་པ་ཐམས་ཅད་གཤེགས་པ་ནི་ཤིན་ཏུ་སྦྱངས་པ་བྱང་ཆུབ་ཀྱི་ཡན་ལག་གོ། །དེ་རྣམས་མཐོང་བ་ནི་ཆོས་རྣམ་པར་འབྱེད་པ་བྱང་ཆུབ་ཀྱི་ཡན་ལག་གོ། །དེ་རྣམས་ཀྱི་གདམས་ངག་ནི་དྲན་པ་ཡང་དག་བྱང་ཆུབ་ཀྱི་ཡན་ལག་གོ། །དེ་དག་བདག་ངག་གི་མི་གཡོ་བའི་
ཏིང་ངེ་འཛིན་སྤོང་བ་ནི། བཏང་སྙོམས་ཡང་དག་བྱང་ཆུབ་ཀྱི་ཡན་ལག་གོ། །དེ་ནི་མཐོང་བའི་ལམ་སྟེ་ས་དང་པོའོ། །སེམས་སོ་སོར་རྟོག་པ་ནི་ཡང་དག་པའི་ལྟ་བ་སྟེ་ས་གཉིས་པའོ། །སེམས་བསྐྱེད་པ་ནི་ཡང་དག་པའི་རྟོག་པ་སྟེ་ས་གསུམ་པའོ། །རྡོ་རྗེའི་
བདག་ཉིད་བསྒོམ་པ་ནི་ཡང་དག་པའི་ངག་སྟེ་ས་བཞི་པའོ། །དེ་བཞིན་གཤེགས་པ་ཐམས་ཅད་གཞུག་པ་ནི་ཡང་དག་པའི་འཚོ་བ་སྟེ་ས་ལྔ་པའོ། །གཟུགས་གྲུབ་པ་ནི་ཡང་དག་པའི་རྩོལ་བ་སྟེ་ས་དྲུག་པའོ། །བྱིན་གྱིས་བརླབ་པ་ནི་ཡང་དག་པའི་ལས་ཀྱི་མཐའ་སྟེ་
ས་བདུན་པའོ། །དབང་བསྐུར་བ་དང་དབྱངས་བཅིངས་པ་ནི་ཡང་དག་པའི་དྲན་པ་སྟེ་ས་བརྒྱད་པའོ། །ཡི་གེ་བརྒྱ་པས་བརྟན་པར་བྱ་བ་ནི་ཡང་དག་པའི་ཏིང་ངེ་འཛིན་ཏེ་ས་དགུ་པའོ། །རྗེས་སུ་གནང་བ་ལྔ་ཐོབ་པ་ནི་ས་བཅུ་པ་སྟེ་བསྒོམ་པའི་ལམ་མོ། །དེ་ནི་དང་པོའི་
སྦྱོར་བའི་ཏིང་ངེ་འཛིན་ནོ། །དཀྱིལ་འཁོར་རྒྱལ་པོ་མཆོག་ནི་རྡོ་རྗེ་ལྟ་བུའི་ཏིང་ངེ་འཛིན་སྔོན་དུ་འགྲོ་བས་རྒྱུ་དང་འབྲས་བུ་ཉེ་བར་བཏགས་པས་བཤད་དོ། །ལས་རྒྱལ་པོ་མཆོག་ནི་སེམས་ཅན་གྱི་ལས་གཙོ་བོ་ཡིན་པས། སངས་རྒྱས་ཀྱི་ས་བཅུ་གཅིག་པ་ཀུན་དུ་འོད་ཅེས་བྱའོ། །

ལམ་གྱི་རིམ་པའོ། །རྡོ་རྗེ་དབྱིངས་ཀྱི་དཀྱིལ་འཁོར་གྱི་དོན་བསྒོམ་པའི་དོན་བསྡུས་པ་རྫོགས་སོ།། །རྒྱ་གར་གྱི་མཁན་པོ་ཀུ་མཱ་ར་ཀ་ལ་ཤའི་ཞལ་སྔ་ནས་བསྒྱུར་ཅིང་ཞུས་པའོ།། ༄༅༅། །རྒྱ་གར་སྐད་དུ། ཀྲི་ཡ་སཾ་གྲ་ཧ་ནཱ་མ། བོད་སྐད་དུ། བྱ་བ་
བསྡུས་པ་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །འགྲོ་མགོན་རྡོ་རྗེ་སེམས་བཏུད་ནས། །སློབ་མ་དམ་པས་བསྐུལ་དབང་ལས། །གཞུང་ཆེན་དམ་པའི་མན་ངག་ལས། །འདི་ནི་བདག་གིས་བརྩམ་པར་བྱ། །བསྙེན་པ་ལ་སོགས་ས་སྦྱང་བ་ནི་ཡོངས་སུ་གཟུང་
བ་དང་། རྩིག་རྨང་ཡང་དག་གཞན་དང་ཤིང་གི་ལས་རྣམས་དང་། །ལྷ་ནི་རབ་ཏུ་གནས་དང་དེ་བཞིན་གཎྜཱི་དང་། །རྒྱལ་མཚན་གཟུགས་དང་དེ་བཞིན་བྱ་བའི་ལྷ་རྣམས་ལ། །བླ་མ་སློབ་མ་བརྟག་པ་དང་། །བླ་མ་གསོལ་བཏབ་དེ་ནས་ནི། །བླ་མས་སྔགས་དང་བསྙེན་པ་བྱ། །དེ་ནས་
ས་ནི་ཡོངས་སུ་བརྟག །དེ་ལ་གཙུག་ལག་ཁང་ལ་སོགས་པ་བཞེངས་པར་འདོད་པའི་སྦྱིན་བདག་གིས་དང་པོ་སློབ་དཔོན་ཡོངས་སུ་བརྟག་པར་བྱ་སྟེ། གང་ཞིག་སེམས་ཅན་རྣམས་ལ་སྙིང་རྗེ་བྲལ་བ་དང་། གཞན་གྱི་ཚུལ་འབྱེད་པ་དང་། སེམས་ཅན་རྣམས་ལ་ཞེ་སྡང་དང་། །
ངན་ཤེས་ཀྱི་ཁེངས་པ་དང་། ཤིན་ཏུ་ཆགས་པ་དང་། ཤིན་ཏུ་མྱོས་ཤིང་བག་མེད་པ་དང་། བདག་ལ་བསྟོད་པ་དང་། གཞན་གྱི་སྐྱོན་བརྗོད་པའི་སློབ་དཔོན་དེ་ཡོངས་སུ་སྤང་བར་བྱའོ། །བླ་མས་ཀྱང་རྣམ་པ་དེ་ལྟ་བུའི་སློབ་མ་ཡོངས་སུ་སྤང་བར་བྱའོ། །གང་ཡང་དད་དང་ཤེས་རབ་
སྙིང་རྗེ་ལྡན་པ་དང་། །ཁྲོ་མེད་བརྩོན་འགྲུས་ལྡན་ཞིང་སེམས་ཅན་སླུ་བ་ཡང་། །རྣམ་པ་དེ་བཞིན་རིགས་པར་བླ་མས་ཡོངས་སུ་བརྟག །དེ་ལའང་སློབ་མའི་རྗེས་སུ་མཐུན་པར་བླ་མས་བསྒྲུབ། །གང་ཡང་དད་པ་དང་ཤེས་རབ་དང་བརྩེ་བ་དང་ལྡན་པ་དང་། ལུང་དུ་སྟོན་པ་དང་། སྙན་
དངགས་དང་སྡེབ་སྦྱོར་གྱི་བཀོད་པ་དང་། རྩིས་ཀྱི་བསྟན་བཅོས་རབ་ཏུ་རིག་པ་གཏམ་བརྗོད་པ་ལ་རབ་ཏུ་མཁས་པ་སྣ་ཚོགས་པའི་རི་མོ་དང་། སྣ་ཚོགས་པའི་ཡུལ་སྐད་དང་། རིན་པོ་ཆེ་དང་གསེར་དང་སྐྱེས་པ་དང་བུད་མེད་དང་། གླང་པོ་ཆེ་དང་རྟ་རྣམས་ཀྱི་མཚན་ཉིད་ཡང་དག་པར་

རིག་པ་དང་། སྤོས་སྦྱོར་དང་གླུ་དང་རོལ་མོ་དང་སྣ་ཚོགས་པའི་མཚོན་ཆ་དང་། སྨན་དང་མིག་འཕྲུལ་དང་། ཁམས་སྨྲ་བ་དང་ཚད་ཀྱི་བསྟན་བཅོས་ཤེས་པ་དང་། གླུ་ལ་སོགས་པ་ལ་མཁས་པ་དང་། སེན་མོ་བྲེག་པ་ལ་སོགས་པའི་བཟོ་རིག་པ་དང་། འདོད་
པའི་བསྟན་བཅོས་དང་། ཤེས་རབ་དང་ནུས་པར་ལྡན་པ། མཁས་ཤིང་སྨྲ་བའི་སྤོབས་པ་ཅན་སྒྲུབ་པ་དང་ལྡན་པ་རྟག་ཏུ་སྤྲོ་ཞིང་ཉོན་མོངས་པ་བཟོད་པ། བླ་མ་དང་རྣལ་འབྱོར་མ་དང་དམ་ཚིག་དང་དཀོན་མཆོག་གསུམ་ལ་སོགས་པ་རྣམས་ལ་གུས་པ་དང་ལྡན་པ། ཕ་རོལ་ཏུ་ཕྱིན་
པ་བཅུ་ལ་ཆགས་ཤིང་འཇིགས་པ་དང་། སྐྱུག་བྲོ་བ་དང་། འཚེར་ངོ་དང་བྲལ་བའོ། །རབ་ཏུ་གནས་པའི་དཀྱིལ་འཁོར་འདྲི་བ་དང་། ལས་སྣ་ཚོགས་བསྐྱང་བ་ལ་མཁས་པ། བླ་མའི་བཀའ་མཆོག་ཏུ་ཡོངས་སུ་བསྐྱང་བ་དེ་བླ་མའི་བཀའ་དང་བདེ་གཤེགས་བཀའ་ལས་
འདས་པ་དང་། །སྤུན་ལ་ཁྲོ་དང་ཉེས་པ་སྒྲོགས་པ་དང་། །སེམས་ཅན་བྱམས་པ་སྤངས་དང་བྱང་ཆུབ་སེམས་སྤངས་དང་། །དམ་ཆོས་སྨོད་དང་གསང་སྒྲོགས་ཕུང་པོ་ཉོན་མོངས་དང་། །ཐེག་ཆེན་ཐེ་ཚོམ་ཟ་དང་སྡུག་ལ་བྱམས་པ་དང་། །བདེ་སྡུག་ཆོས་ལ་རྟོག་ཅིང་དད་ཅན་སེམས་
སུན་འབྱིན། དམ་ཆོས་རྙེད་པ་མི་རྟེན་བུད་མེད་ཀུན་སྨོད་པ། །རྩ་བའི་ལྟུང་བྲལ་དེ་ནི་སློབ་དཔོན་བཟང་པོ་ཡིན། །རྣམ་པ་དེ་ལྟ་བུའི་ཡོན་ཏན་ཀུན་གྱིས་བརྒྱན་ཅིང་སྐྱོན་ཐམས་ཅད་དང་བྲལ་བས་དཀྱིལ་འཁོར་འདྲི་བ་ན་དང་པོར་རྣལ་འབྱོར་པས་དགེ་བའི་ཉི་མ་དང་སྐར་མ་ལ་སོགས་
པ་ལ་ཁང་པར་ཞུགས་ཏེ་མདུན་དུ་མཎྜལ་བྱས་ལ། ཇི་ལྟར་ནུས་པའི་ཡོན་ཕུལ་ནས་སྙིམ་པ་ཐལ་མོ་སྦྱར་ཏེ་གསོལ་བ་གདབ་པར་བྱའོ། །སློབ་དཔོན་དགོངས་སུ་གསོལ། བདག་དགེ་བསྙེན་ཆེ་གེ་མོ་ཞེས་བགྱི་བ་གཙུག་ལག་ཁང་ལ་སོགས་པ་བཞེངས་པར་འདོད་པས་དེའི་ཕྱིར་བདེ་བར་
གཤེགས་པའི་གསུང་རབ་མཐའ་དག་རྟོགས་པ་ཁྱོད་ཀྱིས་བདག་ལ་གནང་བར་མཛོད་ཅིག་ཅེས་པ་འདིས་སློབ་དཔོན་ལ་སྦྱིན་བདག་གིས་ལན་གསུམ་དུ་གསོལ་བ་གདབ་པར་བྱའོ། །དེ་ནས་བརྩམས་ནས་སློབ་དཔོན་གྱིས་ཚོགས་བསགས་པའི་ཁྱེད་དུ་སྔོན་དུ་བསྙེན་པ་བྱའོ། །དེ་སྐད་

དུ་ཡང་། སྔོན་དུ་བསྙེན་པ་ཚོགས་བསགས་དང་། །བགེགས་རྣམས་རྣམ་པར་གཞོམ་པར་བྱ། །ཐམས་ཅད་མཁྱེན་པའི་ལམ་ཤེས་ནི། །བསྙེན་པ་མེད་པས་འགྲུབ་མི་འགྱུར། །ཞེས་སོ། །དེ་ནས་འཁོར་ལོའི་གཙོ་བོའི་སྔགས་འབུམ་བཟླས་པ་བྱའོ། །ཡང་ན་རང་གི་ཡི་དམ་
ལྷའི་སྔགས་ལན་འབུམ་བཟླས་སོ། །དཀྱིལ་འཁོར་པ་རྣམས་ཀྱི་སོ་སོའི་ཁྲི་བཟླས་པ་བྱའོ། །དེ་ལ་དགེ་བའི་ཉི་མ་དང་གཟའ་ལ་སོགས་པ་ལ་མཆོད་པ་སྔོན་དུ་འགྲོ་བས་ས་ཡོངས་སུ་བརྟག་པར་བྱའོ། །གལ་ཏེ་མི་འདོད་པའི་ཤིང་ལ་སོགས་པ་དང་ལྡན་པའི་ས་གཞི་ནི་དེ་འདིར་
ཡོངས་སུ་སྤང་བར་བྱའོ། །དེ་ནས་ཡང་ས་གཞི་གང་ཞིག་གི་ཤར་ལ་སོགས་པའི་ཕྱོགས་རྣམས་སུ་རིམ་པས་ཨ་ཤྭཏྠ་དང་ཨརྫུ་ན་དང་། པླཀྵ་དང་། པ་ལཱ་ཤ་དང་། ནྱ་གྲོ་དྷ་དང་། ཤ་མ་ལཱི་དང་། བ་ཀུ་ལ་དང་། ཨུ་དུམྦཱ་ར་དང་། ཚེར་མ་ཅན་གྱི་ཤིང་རྣམས་ནི་བུ་དང་བུད་མེད་
དང་། ནོར་རྣམས་རྣམ་པར་བྲལ་བ་དང་། དགྲའི་འཇིགས་པ་དང་། ཡོ་བྱད་ཉམས་པ་དང་། འཁོར་ཡོངས་སུ་ཉམས་པ་དང་། སོ་བ་ལ་སོགས་པའི་འབྲུ་རྣམ་པར་ཉམས་པ་སྟེར་བར་འགྱུར་བ་དེ་རྣམས་སྤང་ངོ་ཞེས་ཏེ། དེ་སྐད་དུ་ཡང་། དབང་པོར་ནྱ་གྲོ་དྷ་དགོད་ཨུ་
དུམྦཱ་ར་དེ་བཞིན་དུ། གཤིན་རྗེར་དགོད་ཅིང་ཨ་ཤྭཏྠ་ནི་ནུབ་ཏུ་དགོད། པླཀྵ་བྱང་ཕྱོགས་ཤིན་ཏུ་དགེ་མཐར་བྱ། འདི་ནི་ཟློས་པས་ལོག་པར་ཡང་ནི་གནས་པར་འགྱུར། །ཞེས་སོ། །ཡང་ས་གཞི་གང་ཞིག་དབྱུག་པ་དང་། ཤིང་རྟ་ཐཱ་ཀ་ཌ་དང་། འཁྲབ་བློ་དང་།
ལྟོ་འགྲོ་དང་། རུས་སྦལ་དང་། གཞུ་དང་མགོ་ཆེ་བ་དང་། རྔ་མུརྫ་དང་། ཟུར་གསུམ། རླུང་ཡབ་ཀྱི་རྣམ་པ་དང་། ཀྱོག་པོ་དང་། འོད་དང་མི་མཉམ་པར་འབབ་པ་དེ་རྣམས་ནི་ངེས་པར་ཕྱུགས་དང་། ནོར་དང་འབྲུ་ཟད་པ་དང་། མིག་ནད་དང་། བཅིང་བས་འཚིར་ང་
དང་། ཆོམ་རྐུན་དང་མེའི་འཇིགས་པའི་ཕྱིར་དང་། བུད་མེད་ཉམས་པ་དང་། མིའི་བདག་པོའི་འཇིགས་པ་དང་། ལོངས་སྤྱོད་ཉམས་པ་དང་དབུལ་པོ་དང་། མྱ་ངན་དང་། ཉེས་པ་སྟེར་བར་འགྱུར་བ་རྣམས་སོ། །གང་ཡང་མེ་དང་གཤིན་རྗེ་དང་། སྲིན་པོ་དང་། ཆུ་

དང་། རླུང་གི་ཕྱོགས་རྣམས་སུ་བོ་བའི་ཉེས་པས་ལྟུང་བ་དང་། ནད་དང་དབུལ་བ་དང་། དགྲ་ཡིས་འཇོམས་པར་འགྱུར་བའི་སའི་རང་བཞིན་རྣམས་སོ། །ཡང་ས་གང་ཁྱི་དང་ཅེ་སྤྱང་དང་རྔ་མོ་རྣམས་སྣོད་བཅོམ་པའི་དགྲ་དང་མི་དགེ་བ་སྟེར་བར་
འགྱུར་བ་རྣམས་དང་། ཞག་དང་མར་ཁུ་དང་། ཚྭ་སྣ་དང་། བྱའི་དྲི་མ་དང་། མི་འདོད་པའི་འབྲས་བུ་སྟེར་བའི་ས་གཞི་རྣམས་དང་། གནོད་སྦྱིན་གྱི་གནས་དང་། དུར་ཁྲོད་དང་། ལྟོས་འགྲོའི་ཚང་ནག་པོའི་ས་རྣམས་སྤང་བར་བྱའོ། །གང་དུ་ཀླུའི་མཚོ་དང་།
ལྷ་མ་ཡིན་ལ་སོགས་པའི་གནས་དང་། ལྷའི་གནས་རྣམས་ཡོད་པའི་ས་གཞི་དེ་ཡང་མི་དགེ་བའོ། །གང་ཡང་ཕྱོགས་དང་ཕྱོགས་མཚམས་གང་དང་གང་ལ་ཡང་ཚེར་མའི་ཤིང་དང་། འཁྲི་ཤིང་དང་། ཚང་ཚིང་དང་། ཤིང་ཀླུ་སྐམ་ཡོད་པའི་ས་གཞི་དེ་ཡང་མི་ཤིས་པའོ་
ཞེས་སོ། །དེ་ནས་དགེ་བའི་མཚན་ཉིད་རྣམས་ནི་ས་གཞི་གང་ཞིག་དགའ་བ་དང་། སྟན་བཟང་པོ་དང་། ཡངས་པ་དང་། ཟླུམ་པོ་དང་། གྲུ་བཞི་རྣམས་སོ། །དེ་རྣམས་ནི་བྱ་བའི་དོན་དང་། དངོས་གྲུབ་རབ་ཏུ་སྟེར་བ་དང་། བློ་གྲོས་འཕེལ་བ་དང་། ནོར་དང་འབྲུ་རྣམས་འཕེལ་
བར་འགྱུར་རོ། །ཡང་གང་ལ་ཤར་དང་། བྱང་དང་། དབང་ལྡན་གྱི་ཕྱོགས་རྣམས་གཞོལ་བར་གྱུར་པ་དེ་ནས་དཔལ་དང་བདེ་བར་བྱེད་པར་འགྱུར་རོ། །གང་ལ་ཡང་རོ་ལྡན་བྱང་ཕྱོགས་ཀྱི་ཆ་ལ་རྫིང་བུ་མཆོག་ལ་མེ་ཏོག་དཀར་པོ་དང་དམར་པོ་དང་། པདྨའི་ཚོགས་ཀྱིས་བརྒྱན་པ།
ཨུཏྤལ་སྔོན་པོ་ཤིན་ཏུ་མང་པོ་དང་ཀུ་མུ་ཏ་དང་། དྲི་བཟངས་ལ་སོགས་པའི་མེ་ཏོག་རྣམས་ཀྱིས་འཁྲིགས་པ། ཁྱད་པར་དུ་འཕགས་པ་སྣ་ཚོགས་པའི་བྱའི་ཚོགས་ཀྱིས་གང་བ། ཉ་དང་རུས་སྦལ་ལ་སོགས་པས་ཡོངས་སུ་གང་བ། རྟག་ཏུ་རྩྭ་སྔོན་པོ་ལྡན་པའོ་ཞེས་སོ། །ཤར་ཕྱོགས་
ཀྱི་ཆ་ལ་ཨ་མྲ་དང་། ཛམྦུ་དང་། ཀ་དམ་པའི་ལྗོན་ཤིང་ཡོད་པའོ། །དེ་ལ་དེ་བཞིན་དུ་བར་དུ་ཛཱ་བ་བནྡུ་ཀཱ་མ་ལ་སོགས་པའི་མེ་ཏོག་ཤིང་ཇི་སྙེད་པ་ཞེས་སོ། །དེ་བཞིན་དུ་ལྷོ་ཕྱོགས་སུ་སྐྱེས་བུ་ནཱ་ག་དང་། ནཱ་ག་གེ་སར་དང་། བི་ར་དཱ་ཏ་དང་། ཙམ་པ་ཀ་དང་། ཨ་ཤོ་ཀ་དང་།

ཁྱད་པར་དུ་བ་ཀུ་ལའི་ཤིང་ཡོད་པའོ། །དེའི་བར་དུ་ཛཱ་ཏི་དང་། ཀུ་མུ་ཏ་དང་། སྣ་མ་དང་། དྲི་བཟང་པོའི་ཤིང་རྣམས་སོ། །མེ་ཏོག་དཀར་པོའི་ཤིང་ཇི་སྙེད་པ་རྣམས་རབ་ཏུ་ཤིས་སོ། །དེ་བཞིན་དུ་ནུབ་ཕྱོགས་སུ་ཨ་ཤྭཏྠ་དང་། ཨུ་དུམྦཱ་ར་དང་། བ་ཀུ་ལ་དང་། པ་ན་སའི་ཤིང་
རྣམས་ཡོད་པ་འོ་མ་ཅན་གྱི་ཤིང་ཇི་སྙེད་པ་དེ་རྣམས་ཐམས་ཅད་ནུབ་ཀྱི་ཕྱོགས་སུ་རབ་ཏུ་ཤིས་སོ། །དེའི་བར་དུ་མེ་ཏོག་ནག་པོའི་ཤིང་རྣམས་ཤིས་སོ། །གཞན་ཡང་སྤྱིར་པི་ཝང་དང་། གླིང་བུ་དང་། ཁྱུ་མཆོག་དང་། རྔའི་སྒྲ་དང་ལྡན་པ་ནི་ཕུན་སུམ་ཚོགས་པར་བྱེད་པའི་ས་གཞིའོ། །
བྱེ་བྲག་ཏུ་རིགས་དང་མཐུན་པ་སྣ་ཚོགས་པས་གང་བ་གཟུང་ངོ་། །འདི་ལྟ་སྟེ། ཁ་དོག་དཀར་པོ་དང་ཞོ་དང་འོ་མ་དང་། མར་ལ་སོགས་པ་དྲི་ཞིམ་པོ་དང་། རོ་མངར་བ་རྣམས་ནི་བྲམ་ཟེ་རྣམས་ཀྱི་འོས་སོ། །ཁ་དོག་དམར་བ་དང་སྣ་མའི་མེ་ཏོག་དང་། པདྨ་དང་། ཨུཏྤལ་དང་།
ཙམ་པ་ཀ་དང་། ནཱ་ག་གེ་སར་ལ་སོགས་པའི་དྲི་རྣམས་དང་། རོ་བསྐ་བ་ནི་རྒྱལ་རིགས་རྣམས་ཀྱིའོ། །ཁ་དོག་སེར་པོ་དང་ཆང་དང་གླང་པོའི་ཆང་གི་དྲི་རྣམས་དང་རོ་སྐྱུར་བ་ནི་རྗེའུ་རིགས་རྣམས་ཀྱིའོ། །ཁ་དོག་ནག་པོ་དང་དྲི་མེད་པ་དང་རོ་ཚ་བ་དང་། ཁ་བ་ནི་དམངས་རིགས་རྣམས་
ཀྱིའོ། །ས་ཁྲུ་གང་ཚད་ཙམ་བརྐོས་ནས་དེ་ཡིས་དེ་བཞིན་དུ་དགང་བར་བྱ་སྟེ། དམའ་བ་དང་ལྷག་པ་དང་མཉམ་པ་གང་དུ་གནས་པ་དེའི་དམན་པ་དང་མཆོག་དང་བར་མ་རྣམས་སོ། །ཡང་ན་ཁྲུ་དོའི་ཚད་གྲུ་བཞིར་དོང་བརྐོས་ཏེ་དེའི་དབུས་སུ་མཎྜལ་བྱས་ནས་ཤར་གྱི་ཕྱོགས་སུ་མེ་ཏོག་
དཀར་པོ་གཞག་པར་བྱའོ། །དེ་བཞིན་དུ་ནུབ་དང་བྱང་དང་གཤིན་རྗེའི་ཕྱོགས་སུ་དམར་པོ་དང་སྔོན་པོ་དང་སེར་པོའི་མེ་ཏོག་རྣམས་གཞག་པར་བྱ་སྟེ། གང་མ་སྐམས་པ་དེ་ནི་དེའི་འོས་སུ་འགྱུར་རོ། །དེ་ལ་དེ་བཞིན་དུ་དོང་དེའི་ཤར་ལ་སོགས་པའི་ཕྱོགས་སུ་བུམ་པ་སོ་མ་བཏང་བའི་སྟེང་དུ་
སོ་བཏང་བའི་ཁམ་ཕོར་རྣམས་སུ་དཀར་པོ་ལ་སོགས་པའི་རིམ་པས་བའི་མར་གྱིས་མར་མེ་རབ་ཏུ་སྤར་ནས་ཡོངས་སུ་བརྟག་པར་བྱའོ། །དེ་ལ་དཀར་པོ་ལ་སོགས་པའི་རིམ་པས་གང་རབ་ཏུ་འབར་བ་དེའི་ས་དེ་བྲམ་ཟེ་ལ་སོགས་པ་རྣམས་ཀྱི་འོས་སོ། །དེ་བཞིན་དུ་དམར་པོ་དང་སེར་པོ་

དང་ནག་པོ་རྣམས་གོ་རིམས་ཇི་ལྟ་བ་བཞིན་དུ་རྒྱལ་རིགས་དང་རྗེའུ་རིགས་དང་དམངས་རིགས་ཀྱི་དེའི་ས་གཞིར་འགྱུར་རོ། །དེ་བཞིན་དུ་ཀུ་ཤ་དང་ཤ་ར་དང་ཨུ་ཤི་ར་དང་དཱུར་བ་རྣམས་གང་མང་བའི་ས་ནི་གོ་རིམས་བཞིན་དུ་བྲམ་ཟེ་ལ་སོགས་པ་རྣམས་ཀྱི་འོས་སོ། །ཁ་ཅིག་གི་འདོད་
པས་བྱང་ན་གཙང་པོ་ཆེན་པོ་འབབ་པའི་འགྲམ་དུའོ་ཞེས་སོ། །ཁ་ཅིག་གི་འདོད་པས་ལྷོ་ཕྱོགས་ན་འབབ་པའི་འགྲམ་དུ་གྲོང་ཁྱེར་ལ་སོགས་པའི་གཞིའོ་ཞེས་སོ་དེ་བཞིན་དུ་ཇི་སྐད་བཤད་པའི་མཚན་ཉིད་དང་ལྡན་པའི་ས་གཞིར་མ་གྱུར་ན་ཇི་ལྟར་རྙེད་པའི་ས་གཞི་རྣམ་པར་སྦྱངས་པས་རང་གི་
རིགས་བསྒྲུབ་པར་བྱས་ནས་ཡོངས་སུ་གཟུང་བར་བྱའོ། །གང་དུ་གཙུག་ལག་ཁང་ལ་སོགས་པ་བཞེངས་པར་འདོད་པའི་ས་ལ། དེ་བཞིན་དུ་ས་གཞི་བའི་ལྕི་བ་ལས་བ་ལང་གི་ཀོ་བའི་ཚད་ཙམ་དུ་གྲྭ་བཞི་པའི་མཎྜལ་བྱས་ཏེ་དང་པོའི་ཐུན་ལ་མཆོད་པ་སྔོན་དུ་འགྲོ་བས་ཏིང་ངེ་འཛིན་གྱི་
རྣལ་འབྱོར་དང་ལྡན་པས་སློབ་དཔོན་མཉམ་པར་གཞག་སྟེ། དེར་དཀོན་མཆོག་གསུམ་ལ་མཆོད་པ་བྱས་ནས། ཕྱོགས་བཅུ་ན་བཞུགས་པའི་འཇིག་རྟེན་སྐྱོང་བ་ལ་སོགས་པ་རྣམས་ལ་དཔུང་པ་བཟང་པོའི་ཚིགས་སུ་བཅད་པས་མཉེས་པར་བྱས་ཏེ། པུས་མོ་གཡས་པའི་ལྷ་ང་ས་
ལ་བཙུགས་ཏེ་ཐལ་མོ་སྦྱར་ནས་ལྷ་ལ་སོགས་པ་རྣམས་ལ་གཞི་ཇི་སྙེད་པ་འདི་སྩལ་དུ་གསོལ་ཞེས་ཚིགས་སུ་བཅད་པ་འདིས་ཞུ་བར་བྱའོ། །ཁམས་གསུམ་ས་གཞི་གང་རྣམས་ལ། །ཆེན་པོའི་ཆེན་པོ་གནས་གྱུར་པ། །ལྷ་དང་ཀླུ་དང་དྲི་ཟ་དང་། །གནོད་སྦྱིན་ལྷ་མ་ཡིན་ལ་
སོགས། །སེམས་ཅན་ཀུན་གྱི་དོན་བསྒྲུབ་ཕྱིར། །ཁྱེད་རྣམས་བདག་ལ་གནང་བར་མཛོད། །ས་གཞི་བཟང་པོའི་ཆ་འདི་རུ། །ཕུན་ཚོགས་གཙུག་ལག་ཁང་གྱུར་པ། །གྲགས་པའི་གཞི་རུ་གྱུར་པ་དང་། །ལུས་ཅན་ཀུན་གྱི་འཚོ་ཕྱིར་དང་། །ཐོས་བསམ་ལ་སོགས་
སྤེལ་བ་དང་། །དམ་པའི་ཆོས་ནི་རབ་བསྒྲུབ་ཕྱིར། །མཆོད་རྟེན་ལ་སོགས་བཤད་པ་རྣམས། །གང་དང་གང་གིས་ཡིད་འདོད་ལ། །འདི་ཡི་ཉེས་ལེགས་རྣམ་དག་ཕྱིར། །བདག་ནི་ཆེ་གེ་མོ་ཞེས་བགྱི། །སྙན་པའི་གྲགས་པ་བསྐྱེད་པར་བྱ། །ཁྱེད་རྣམས་ཀོ་ལོང་མི་འགྱུར་

ན། །བདག་ལ་རྨི་ལམ་ལ་སོགས་བརྟག །དགེ་བའི་ས་གཞི་བདག་ལ་སྩོལ། །ཞེས་པ་འདི་ལན་གསུམ་བརྗོད་པར་བྱའོ། །དེ་ནས་ལངས་ནས་བྱང་ཕྱོགས་སུ་ཕྱིན་ནས་སློབ་དཔོན་ལྷོར་ཞལ་མངོན་པར་ཕྱོགས་ཏེ། མདུན་དུ་སའི་རང་བཞིན་གྱི་སྣོད་དུ་ཟླ་བ་ཕྱེད་པའི་རྣམ་པའི་ཐབ་
ཁུང་ཡོངས་སུ་བརྟག་པར་བྱའོ། །ས་ནག་པོ་དང་། ཐལ་བ་ལ་སོགས་པ་ཇི་ལྟར་རྙེད་པའི་ཁུ་བས་ཉེ་བར་བྱུགས་ཏེ། དུར་ཁྲོད་ཀྱི་སོལ་བའི་ཕྱེ་མའི་རྡུལ་ཚོན་གདབ་སྟེ་མེ་ཏོག་སྔོན་པོ་གཅལ་དུ་དགྲམ་པར་བྱའོ། །འཇིག་རྟེན་གསུམ་ལས་རྣམ་པར་རྒྱལ་བའི་ང་རྒྱལ་བྱས་ནས་
མདུན་དུ་ལྷོ་ཕྱོགས་ཀྱི་ཆ་ལ་མེ་ཏོག་སྔོན་པོའི་ཚོགས་འཕངས་ཏེ་མཆོད་ཡོན་གྱི་དུང་གི་སྣོད་གཞག་པར་བྱའོ། །གཡོན་དུ་ཡུངས་ཀར་དང་། ཚ་བའི་མར་ཁུ་དང་། ཁྲག་དང་དུག་དང་། ཚྭ་དང་། སྐྱེ་ཚེ་དང་། རོ་བསྲེགས་པའི་ཐལ་བ་དང་། རས་བལ་གྱི་སྙིང་པོ་དང་། ཁར་བའི་
ཕྱེ་མ་དང་། རྒྱ་སྐྱེགས་དང་། མིའི་རུས་པའི་ཕྱེ་མ་དང་། ནིམ་པའི་ལོ་མ་ལ་སོགས་པ་རྣམས་དང་། ཞག་དང་སྨྱོ་བྱེད་ཀྱི་ལོ་མའི་ཁུ་བ་བསྲེས་ཏེ་ནིམ་པ་དང་། ཡོངས་འདུ་ས་བརྟོལ་དང་། བྷ་ལཱ་ཏ་ཀ་དང་། མྱོས་བྱེད་ཀྱི་ཤིང་དང་། ཚེར་མ་དང་། ཁ་བའི་ཤིང་གི་རྩ་བའི་ཆ་ལས་
སྐྱེས་པ་རྣམས་བཞག་སྟེ་དུག་དང་། ཁྲག་དང་། མར་ཁུ་བསྲེས་ལ་རྩེ་གཉིས་བཅུག་པའི་ཡམ་ཤིང་ངོ་། །མར་དང་ཏིལ་དང་། ནས་དང་ཀུ་ཤ་དང་མེ་ཏོག་དང་། སྤོས་རྣམས་ཀྱང་ངོ་། །དེ་ནས་མྱོས་བྱེད་དང་། ནིམ་པ་དང་། ཡོངས་འདུ་ས་བརྟོལ་དང་། བྷ་ལཱ་ཏ་ཀ་དང་།
ཁ་བ་དང་། ཚེར་མ་ཅན་གྱི་ཤིང་སྐམ་པོ་ལ་ལྕགས་དང་། འཁར་བ་དང་། རྡོ་དང་། དུར་ཁྲོད་དང་། གཏུམ་པོའི་ཁྱིམ་ནས་བྱུང་བའི་མེ་ལ་མེ་རབ་ཏུ་སྦར་བར་བྱའོ། །དེ་ལ་ཡང་མེ་འབར་བའི་དབུས་སུ་ཧཱུྃ་སྔོན་པོ་ལས་ཡང་དག་པར་བྱུང་བ་ཁ་དོག་སྔོན་པོ་གོས་སྔོན་པོ་ཅན་རྒྱན་
གྱིས་བརྒྱན་པ་ཁྲོ་ཞིང་འཇིགས་སུ་རུང་བའི་གཟུགས་ཅན་ཞལ་མཆེ་བ་གཙིགས་པ་སྐྲ་དམར་སེར་གྱེན་དུ་འཁྱིལ་བ་མིག་གཅིག་འཛུམ་ཞིང་ལྟ་བའི་སྤྱན་གསུམ་དང་བཞིན་ཁྲོ་གཉེར་དང་ལྡན་པའོ། །ཕྱག་གཡས་ན་རལ་གྲི་དང་དབྱུག་པ་འཛིན་པ། གཡོན་ན་ཞགས་པ་དང་

སྤྱི་བླུགས་འཛིན་པ། དེ་ལྟ་བུར་གྱུར་པའི་མེའི་ཁྲོ་བོ་བསྒོམ་པར་བྱའོ། །དེ་དང་མཚུངས་པའི་ཡེ་ཤེས་ཀྱི་མེ་ལྷ་སྤྱན་དྲངས་ལ་མཆོད་ཡོན་ཕུལ་ནས་མཆོད་པ་བྱས་ལ་དམ་ཚིག་གི་མེ་གཞུག་པར་བྱའོ། །དེའི་རྗེས་སུ་ཨོཾ་ཀཱི་ལི་ཀཱི་ལ་བཛྲ་སརྦ་བི་གྷྣཱཾ་ཀཱི་ལ་ཡ་ཧཱུྃ་
ཕཊ། འདིས་བགེགས་ཐམས་ཅད་ལ་ཕུར་བུས་གདབ་པར་བྱའོ། །ཨོཾ་ཨ་མྲྀ་ཏ་ཀུཎྜ་ལི། ཁ་ཁ། ཁཱ་ཧི་ཁཱ་ཧི། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ད་ཧ་ད་ཧ། གརྫྫ་གརྫྫ། བི་སྥོ་ཊ་ཡ་བི་སྥོ་ཊ་ཡ། སརྦ་བིགྷྣཱཾ་བི་ནཱ་ཡ་ཀཱ་ནཱཾ། མ་ཧཱ་ག་ཎ་པ་ཏི་ཛཱི་བི་ཏཱནྟ་ཀ་རཱ་ཡ་ཧཱུྃ་ཧཱུྃ་ཕཊ། འདིས་
བགེགས་ཐམས་ཅད་གསད་པར་བྱའོ། །ཨོཾ་བཛྲ་ཡཀྵ་སརྦ་པཱ་པཾ་ཁཱ་ད་ཡ་ཧཱུྃ་ཕཊ། འདིས་སྡིག་པ་ཐམས་ཅད་བཟའ་བར་བྱའོ། །དེ་ནས་མེ་ལ་མར་གྱི་དགང་བླུགས་གསུམ་དབུལ་ལོ། །ལག་པ་པུས་མོའི་ཕྱི་ངོས་སུ་བྱས་པས་སོ། །ཨོཾ་ཀྲོ་དྷ་ཨགྣ་ཡེ་ཛ་ཧི་ཀྲོ་དྷ་ཡ་ཧཱུྃ་ཕཊ། སྔགས་འདིས་
སྲེག་རྫས་ཐམས་ཅད་སྦྱིན་པར་བྱའོ། །དེ་ནས་མེ་ལ་ཞལ་བསིལ་ཕུལ་ནས་དེའི་སྙིང་གར་བགེགས་མཐར་བྱེད་བལྟས་ཏེ། ཡེ་ཤེས་སེམས་དཔའ་སྤྱན་དྲངས་ལ་མཆོད་ཡོན་ལ་སོགས་པ་ཕུལ་ལ། དམ་ཚིག་སེམས་དཔའ་ནང་དུ་བསྒོམ་པར་བྱའོ། །དེ་ནས་ཨོཾ་ཨཱཿབིགྷྣཱཾནྟ་ཀྲྀཏ་སརྦ་
པཱ་པཾ་ད་ཧ་ན་ཧཱུྃ། སྔགས་འདིས་སྔོན་བཞིན་དུ་སྲེག་རྫས་སྦྱིན་པར་བྱའོ། །དགང་བླུགས་གང་བར་ཕུལ་ནས་གཤེགས་སུ་གསོལ་ལོ། །ལྷག་མ་རྣམས་ནི་སྔོན་མ་བཞིན་དུ་སྦྱིན་པར་བྱའོ། །དེ་ནས་ཞལ་བསིལ་ལ་སོགས་པ་ཕུལ་ནས། བཟོད་པར་གསོལ་ཞིང་གཤེགས་སུ་གསོལ་ལོ། །
དེ་ནས་ལངས་ནས་ས་ཕྱོགས་གཙང་སར་མགོ་ལྷོར་ཕྱོགས་ཏེ་ཉལ་བར་བྱའོ། །དེ་ལ་རང་གི་ཁ་ལ་ལག་པ་གཡོན་པས་དགབ་པར་བྱ་སྟེ། སྔགས་འདི་ལན་གསུམ་མམ་བདུན་ནམ་ཉི་ཤུ་རྩ་གཅིག་བཟླས་སོ། །ཨོཾ་མུ་ཙི་ལི་སྭཱ་ཧཱ། ཨོཾ་མོ་ཧ་ནི་སྭཱ་ཧཱ། ཨོཾ་དཾ་ཏཱ་ལི་སྭཱ་ཧཱ། རྨི་ལམ་བཟང་
ངན་གྱི་མཚན་མ་བརྟག་པར་བྱའོ། །རྨི་ལམ་ན་མི་དགེ་བའི་མཚན་མ་བྱུང་བ་དེ་འདིར་འཆད་པར་འགྱུར་བའི་ཆོ་གས་སྟོང་ཕྲག་ཉི་ཤུའི་སྦྱིན་སྲེག་གིས་གྲོལ་བར་འགྱུར་རོ། །ཐམས་ཅད་ལ་འབུམ་ཕྲག་གཅིག་སྟེ་མདོར་བསྡུས་ནས་བཤད་དོ། །དེ་ནས་བགེགས་མེད་པའི་ས་གཞི་ལ་སྔ་

བར་ལངས་ཏེ་དམ་ཚིག་ལ་རང་གི་ཡི་དམ་ལྷའི་རྣལ་འབྱོར་དང་ལྡན་པའི་སློབ་དཔོན་གྱིས་ཉེ་བར་སྤྱད་པ་ལྔ་དང་གཏོར་མ་དང་མཆོད་པ་ལ་སོགས་པ་བྱས་ནས། དེ་ནས་གྲོ་གའམ་དར་བཟང་པོ་ལ་རྩིབས་བརྒྱད་པའི་འཁོར་ལོ་བྲི་བར་བྱའོ། །ལྟེ་བ་ལ་མཾ་གི་ཡི་གེ་བྲིའོ། །མཾ་ཡིག་གི་དབུས་
སུ་ཨོཾ་མཱ་རཱི་ཙྱཻ་ཨཱསྨིན་བྷཱུ་བྷཱ་གེ་སརྦ་དུཥྚ་བིགྷྣཱཾ་བི་ནཱ་ཡ་ཀཱ་ནཱ་མ་བ་ཀཱ་ཥ་མ་ཀུ་རུ་སྭཱ་ཧཱ། ནང་གི་མུ་ཁྱུད་ལ། ཨོཾ་མཱ་རཱི་ཙྱཻ་བཏྟཱ་ལི་བ་དཱ་ལི་བ་རཱ་ལི་བཱ་རཱ་ཧ་མུ་ཁི་སརྦ་དུཥྚ་པྲ་དུཥྚ་ནཱཾ་མུ་ཁཾ་བནྡྷ་བནྡྷ་ཙཀྵུར་སྱ་བྷཱུ་བྷཱ་གཱ་སྱ་ཤཱིནྟཾ་ཀུ་རུ་སྭཱ་ཧཱ། ཤར་གྱི་རྩིབས་ལ། ཨོཾ་ཨརྐྐ་མ་སི་ཨ་སྱ་བྷཱུ་ད་གཱ་
སྱ་རཀྵཾ་ཀུ་རུ་སྭཱ་ཧཱ། ལྷོའི་རྩིབས་ལ། ཨོཾ་མརྐྐ་མ་སི་ཨ་སྱ་བྷཱུ་བྷཱ་གཱ་སྱ་རཀྵཾ་ཀུ་རུ་སྭཱ་ཧཱ། ནུབ་ཀྱི་རྩིབས་ལ། ཨོཾ་ཏེ་ཛོ་མ་སི་ཨ་སྱ་བྷཱུ་བྷཱ་གཱ་སྱ་རཀྵཾ་ཀུ་རུ་སྭཱ་ཧཱ། བྱང་གི་རྩིབས་ལ། ཨོཾ་ནེ་ར་མ་སི་ཨ་སྱ་བྷཱུ་བྷཱ་གཱ་སྱ་རཀྵཾ་ཀུ་རུ་སྭཱ་ཧཱ། དབང་ལྡན་གྱི་རྩིབས་ལ། ཨོཾ་ཙི་བཱ་ར་མ་སི་ཨ་སྱ་བྷཱུ་བྷཱ་
གཱ་སྱ་རཀྵཾ་ཀུ་རུ་སྭཱ་ཧཱ། རླུང་གི་རྩིབས་ལ། ཨོཾ་བྷ་ན་མ་སི་ཨ་སྱ་བྷཱུ་བྷཱ་གཱ་སྱ་རཀྵཾ་ཀུ་རུ་སྭཱ་ཧཱ། བདེན་བྲལ་གྱི་རྩིབས་ལ། ཨོཾ་གུལྨ་མ་སི་ཨ་སྱ་བྷཱུ་བྷཱ་གཱ་སྱ་རཀྵཾ་ཀུ་རུ་སྭཱ་ཧཱ། མེའི་རྩིབས་ལ། ཨོཾ་ཨུ་ད་ཡ་མ་སི་ཨ་སྱ་བྷཱུ་བྷཱ་གཱ་སྱ་རཀྵཾ་ཀུ་རུ་ཤཱནྟིཾ་ཀུ་རུ་པུཥྚིཾ་ཀུ་རུ་བ་ཤཾ་ཀུ་རུ་སྭཱ་ཧཱ། ཕྱིའི་
མུ་ཁྱུད་ལ། ཨོཾ་མཱ་རཱི་ཙྱཻ་བཏྟཱ་ལེ། བ་དཱ་ལེ། བ་རཱ་ལེ། བ་རཱ་ཧཱ་མུ་ཁི་ཨསྨིན་བྷཱུ་བྷཱ་གཱ་སྱ་སརྦ་དུཥྚ་བིགྷྣཱཾ་མུ་ཁཉྩ་ཀྵུ་བནྡྷ་བནྡྷ། ཨ་སྱ་བྷཱུ་བྷཱ་གཱ་སྱ་ཤཱནྟིཾ་པུཥྚིཾ་རཀྵཾ་ཀུ་རུ་སྭཱ་ཧཱ། སྔགས་འདིས་ཡང་སྤྲ་ཚིལ་གྱི་རས་ཀྱིས་དྲིལ་ནས་སྨྱུག་མ་ཤིན་ཏུ་རིང་མོའི་རྩེ་མོའམ་རྒྱལ་མཚན་གྱི་རྩེ་མོར་
གཞག་པར་བྱ་སྟེ་གདན་དང་བཅས་པའོ། །དེ་ནས་ས་གཞི་ལས་བགེགས་དང་ལོག་འདྲེན་ཐམས་ཅད་ཤིན་ཏུ་རིང་དུ་འབྲོས་པར་འགྱུར་ཏེ་སླར་བཟློག་པར་ལྟ་ག་ལ་འགྱུར། ས་ཕྱོགས་འདི་ནི་ངེས་པར་གཙུག་ལག་ཁང་ལ་སོགས་པར་དངོས་གྲུབ་ཏུ་འགྱུར་རོ་ཞེས་སོ། །ས་
བསྲུང་བའི་ཕྱིར་མེ་འབར་བའི་དབུས་སུ་བཾ་ཡིག་ལས་ཆུའི་དཀྱིལ་འཁོར་རོ། །དེའི་སྟེང་དུ་རཾ་ཡིག་ལས་བྱུང་བའི་བདུད་རྩིའི་འོད་ཟེར་གྱི་ཕྲེང་བ་ལ་རལ་པ་དང་ཅོད་པན་བཅིངས་ཤིང་སྤྱན་གསུམ་པ་མཆོད་ཕྱིར་ཐོགས་དཀར་པོ་དང་གོས་ལ་སོགས་པས་རྣམ་པར་བརྒྱན་པ། ཕྱག་

གཡས་པས་མི་འཇིགས་པ་དང་བགྲང་ཕྲེང་བསྣམས་པ། གཡོན་པ་ན་དབྱུག་པ་དང་སྤྱི་བླུགས་འཛིན་པ། ཞི་བའི་མེ་ལྷ་དཀར་པོ་རྣམ་པར་བསྒོམས་ལ། ཡེ་ཤེས་ཀྱི་མེ་སྤྱན་དྲང་བར་བྱའོ། །ནྱ་གྲོ་དྷ་དང་། བྱང་ཆུབ་ཀྱི་ཤིང་དང་། ཤ་ལའི་
བཟའ་བ་དང་། འབྲས་ཡོས་དང་། ནས་དང་ཞོ་དང་། འོ་མ་དང་། ཙནྡན་དང་། མེ་ཏོག་དང་། ཀུ་ཤའི་རྩེ་མོ་དང་། དཱུར་བའི་རྩེ་མོས་སྔོན་བཞིན་དུ་ཉུག་པར་བྱའོ། །ཨོཾ་པཱ་ཀཱགྣ་ཡེ་སྭཱ་ཧཱ། སྔགས་འདིས་དམར་གསུམ་དང་བསྲེས་པའི་ཏིལ་གྱིས་སྦྱིན་སྲེག་སྟོང་ཕྲག་གཅིག་
བྱའོ། །པཎྜི་ཏ་ཆེན་པོ་རིགས་ཀྱི་སྦྱིན་པ་ཞེས་བྱ་བས་མཛད་པའི་བྱ་བ་བསྡུས་པ་ལས་རབ་ཏུ་བྱེད་པ་དང་པོའོ།། །།ལྷ་ཡི་རྣལ་འབྱོར་ལྡན་གྱུར་པས། །ས་ནི་མཆོད་པའི་ཆོ་ག་ཡིས། །ལྷ་ནི་སྟེང་དུ་བཏེག་བྱས་ནས། །དེ་ནས་ས་ནི་སྦྱང་བར་བྱ། །དེ་ལ་སློབ་དཔོན་
གྱིས་རང་གི་ཡི་དམ་ལྷའི་རྣལ་འབྱོར་དང་ལྡན་པས་ཉི་མ་ནུབ་པའི་དུས་སུ་གཞོན་ནུ་མ་ཅིག་ཁ་ཤར་དུ་ཕྱོགས་ཏེ་མཆོད་ཅིང་བསྟོད་ནས། ཀྱེ་བཅོམ་ལྡན་འདས་མ་དགེ་བ་དང་མི་དགེ་བ་གསུངས་ཤིག་ཅེས་བྱའོ། །ཨ་ཀ་པ་ཏ་ཙ་ས་ཧ་བ་ཛ་རྣམས་ལས་ཚིག་གི་དང་པོ་ལ་སྨྲ་བ་
དེ་བརྫུན་པར་སྨྲ་བར་མི་འགྱུར་བར་རྗེས་སུ་དཔག་པར་བྱའོ། །དེ་ལ་ས་གཞི་རེའུ་མིག་དགུར་བྱས་ལ་ཇི་ལྟར་དེའི་ལན་ཨ་ཡིག་དང་པོར་གྱུར་ན་དེའི་ངེས་པས་ཤར་ཕྱོགས་སུ་རྐང་པས་ལྷག་པའི་ཁྲུ་གང་གི་འོག་ན་བྲམ་ཟེ་རྣམས་ཀྱི་རུས་པའོ། །དེ་མ་བཏོན་པའི་ཉེས་པ་ནི་རིགས་
དང་ཆུང་མ་འཆི་བ་དང་མེའི་འཇིགས་པའོ། །ཚིག་གི་ལན་ལ་ཀ་དང་པོར་གྱུར་ན་མེར་རྒྱལ་རིགས་ཀྱི་རུས་པའི་སེལ་ཏེ། རྐང་པ་གཉིས་ཀྱི་ལྷག་པའི་ཁྲུ་གང་གི་འོག་ཏུའོ། །གལ་ཏེ་དེ་མ་བཏོན་ན་དེས་ནད་སྣ་ཚོགས་དང་། མེའི་འཇིགས་པ་དང་། ནོར་ཉམས་པ་དང་།
རྒྱལ་པོས་འཚིར་བ་སྟེར་བར་བྱེད་པར་འགྱུར་རོ། །ཚིག་གི་ལན་ལ་པ་དང་པོར་གྱུར་ན་ལྷོ་ཕྱོགས་ན་རྐང་པས་དམན་པའི་ཁྲུ་དོའི་འོག་ན་རྗེའུ་རིགས་ཀྱི་རུས་པའོ། །དེ་མ་བཏོན་ན་ཕྱི་དང་ནང་གི་ཚ་བ་དང་ནོར་ཉམས་པར་འགྱུར་རོ། །ཚིག་གི་ལན་ལ་ཏ་དང་པོར་གྱུར་ན་སྲིན་པོའི་

ཕྱོགས་ན་དམངས་རིགས་ཀྱི་རུས་པ་སྟེ་ཁྲུ་དོའི་འོག་ནའོ། །གལ་ཏེ་དེ་མ་བཏོན་ན་དེས་སྣ་ཚོགས་པའི་ནད་དང་། འཚིར་བ་དང་སྲེག་པའི་འཇིགས་པ་དང་། ཁྱིམ་བདག་འཆི་བར་འགྱུར་རོ། །ཚིག་གི་ལན་ལ་ཙ་དང་པོར་གྱུར་ན་ཆུ་བདག་གི་ཕྱོགས་ན་བྲམ་ཟེའི་རུས་པ་སྟེ་རྐང་པས་
ལྷག་པའི་ཁྲུ་དོའི་འོག་ནའོ། །གལ་ཏེ་དེ་མ་བཏོན་ན་ཁྱིམ་མེས་ཚིག་པར་འགྱུར་རོ། །ཚིག་གི་ལན་ལ་ས་དང་པོར་གྱུར་ན་རླུང་གི་ཕྱོགས་ན་ས་བདག་གི་རིགས་ཀྱི་རུས་པ་སྟེ་ཕྱེད་དང་བཅས་པའི་ཁྲུ་དོའི་འོག་ཏུའོ། །དེ་མ་བཏོན་ན་མྱ་ངན་དང་། བུད་མེད་ལོག་པར་སྤྱོད་པར་
འགྱུར་རོ། །ཚིག་གི་ལན་ལ་ཧ་དང་པོར་གྱུར་ན་བྱང་ཕྱོགས་ན་རྐང་པ་གསུམ་ལྷག་པའི་ཁྲུ་དོའི་འོག་ན་རྗེའུ་རིགས་ཀྱི་རུས་པའི་སེལ་ལོ། །དེ་མ་བཏོན་ན་མི་དང་མི་མོ་ཚེ་ཐུང་བར་འགྱུར་རོ། །ཚིག་གི་ལན་ལ་བ་དང་པོར་གྱུར་ན་ཁྲུ་གསུམ་གྱི་འོག་ན་དམངས་
རིགས་ཀྱི་རུས་པའོ། །ཡང་ན་ཞུམ་བུའི་རུས་པའམ་ལྕགས་སམ་སོལ་བའོ། །དེ་མ་བཏོན་པར་གྱུར་ན་རིགས་དང་ནོར་ཉམས་པར་འགྱུར་རོ། །ཚིག་གི་ལན་ལ་ཛ་དང་པོར་གྱུར་ན་དེའི་དབུས་ན་གཉིས་སྐྱེས་ཀྱི་རུས་པའོ། །དེ་མ་བཏོན་ན་རྒྱལ་པོས་འཚིར་བ་དང་དེའི་ཆད་པ་
དང་ནོར་ཟད་པའི་ཉེས་པ་རྣམས་སྐྱེ་བར་འགྱུར་རོ། །དེའི་ཕྱིར་ཐམས་ཅད་དུ་ཉེས་པ་དཔག་ཏུ་མེད་པ་བྱེད་པར་འགྱུར་བའི་ཕྱིར་རུས་པ་རྣམས་གདོན་པར་བྱའོ། །དེ་ནས་གཞོན་ནུ་མའི་མདུན་དུ་མཆོད་པ་བྱས་ནས་ཡུངས་ཀར་དང་ནིམ་པའི་ལོ་མ་ལ་སོགས་པ་ཆང་པ་གཡས་པས་
གཟུང་སྟེ་གཡས་ཕྱོགས་སུ་བསྐོར་ཞིང་ཆང་པ་གཡོན་པས་གཟུང་ཞིང་གཡོན་ཕྱོགས་སུ་བསྐོར་ནས་མེ་ལ་ལན་གསུམ་དུ་འཕང་བར་བྱའོ། །ཞལ་བསིལ་གྱི་ཆུ་ཡང་འཕང་བར་བྱ་སྟེ་སྔགས་འདི་དག་གིས་སོ། །ཨོཾ་སརྦ་པཱ་པཾ་ད་ཧ་ན་བཛྲ་སརྦ་པཱ་པཾ་ད་ཧ་སྭཱ་ཧཱ། དེའི་རྗེས་སུ་ཨརྐའི་
བལ་གྱི་སྟོང་བུ་སྦྱར་ཏེ། ཛྱོ་ཏི་ཤ་མ་ཏིའི་མར་ཁུའམ། ཏིལ་ནག་པོའི་མར་མེ་རབ་ཏུ་སྦྱར་ཏེ་རུས་པ་ཡོངས་སུ་བརྟག་པར་བྱའོ། །དེ་ལ་ཕྱོགས་གང་དུ་མར་མེའི་རྩེ་མོ་རྒྱུག་པ་དེ་ལ་ངེས་པར་རུས་པ་ཡོད་པར་རིག་པར་བྱའོ། །ཡང་གང་དུ་རུས་པ་ཡོད་པ་དེར་མར་མེ་རྡུལ་གྱིས་ཉེ་

བར་འཐིབས་པར་འགྱུར་རོ། །དེ་ནས་གཏོར་མ་དང་མཆོད་པ་ལ་སོགས་པ་བྱས་ནས་མེ་ཏོག་གིས་བརྒྱན་ཅིང་འབྲས་ཡོས་ཀྱིས་མཆོད་ནས་གདུག་པ་ཅན་གྱིས་ཉེ་བར་བསྒྱུར་བ་རབ་ཏུ་ཞི་བར་བྱ་བའི་ཕྱིར་ལངས་ནས་མེའི་ཕྱོགས་ནས་རླུང་གི་ཕྱོགས་སུ་སློབ་དཔོན་ཞལ་
མངོན་པར་ཕྱོགས་ཏེ་སེང་ལྡེང་གི་ཤིང་གིས་མེ་རབ་ཏུ་སྦར་ནས་མེ་རབ་ཏུ་འབར་བའི་དབུས་སུ་ཁྲག་དང་ཐལ་བས་བྱུགས་པའི་གོས་འཛིན་པ་ཚངས་སྐུད་དང་ལྡན་པ་རི་དྭགས་རླུང་ལ་ཞོན་པ་མགྲིན་པ་རིད་བ་མགོ་རལ་པའི་ཐོར་ཚུགས་བཅིངས་པ་མིག་གསུམ་པ་གཡོ་བའི་བདག་ཉིད་ཅན་
རཾ་ཡིག་ལས་སྐྱེས་པའི་དབྱུ་གུ་རྩེ་གསུམ་དང་། བགྲང་ཕྲེང་དང་། བ་དན་དང་། སྤྱི་བླུགས་ཀྱིས་མཚན་པའི་ལག་པ་བཞི་དང་ལྡན་པ་ནག་པོ་དང་། དམར་མོ་འདྲེས་མ་ཐལ་བའི་རྡུལ་གྱིས་ལུས་ལ་གོས་པ་དྲག་པོ་རླུང་གི་མེ་ལྷ་བསྒོམ་པར་བྱའོ། །ཡེ་ཤེས་ཀྱི་མེ་ལ་སོགས་
པའང་སྤྱན་དྲང་བར་བྱའོ། །ཡུངས་འབྲུ་ལྔ་དང་། གནྡྷ་མུ་ཏ་དང་། སྤང་སྤོས་དང་། རྨ་བྱའི་གཙུག་ཕུད་རྣམས་ཚ་བའི་མར་ཁུ་དང་བསྲེས་ཏེ་གཞན་ཏིལ་ལ་སོགས་པའི་སྲེས་རྫས་ཀྱིས་སྦྱིན་སྲེག་བྱའོ། །ཨོཾ་མ་རུ་ཏ་ཨགྣ་ཡེ་སྭཱ་ཧཱ། སྔགས་འདིས་གདུག་པ་ཅན་
སྐྲོད་པའི་སྦྱིན་སྲེག་བྱའོ། །དེའི་རྗེས་སུ་ལངས་ཏེ་ཉལ་བར་བྱའོ། །དེ་ནས་སློབ་དཔོན་དགེ་བའི་ཉི་མ་གཉིས་པ་ལ་རང་གི་ཡི་དམ་ལྷའི་རྣལ་འབྱོར་བྱས་ནས་གཙུག་ལག་ཁང་ལ་སོགས་པའི་ས་གཞི་ལ་ཞིང་སྐྱོང་ལ་སོགས་པ་རྣམས་ལ་གཏོར་མ་དང་ཉེར་སྤྱོད་ལ་སོགས་པ་ཕུལ་ནས་
ཞུ་བར་བྱའོ། །སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་གྱི། །ས་དང་ཕ་རོལ་ཕྱིན་རྣམས་ལ། །ལྷ་མོ་ཁྱོད་ནི་དཔང་དུ་འགྱུར། །སྐྱོབ་པ་ཤཱཀྱ་སེང་གེ་ཡིས། །ཇི་ལྟར་བདུད་ཀྱི་དཔུང་བཅོམ་པ། །དེ་ལྟར་བདག་གིས་བདུད་ཀྱི་དཔུང་། །བཅོམ་ནས་
གཙུག་ལག་ཁང་སོགས་བགྱི། །ཞེས་པ་ལན་གསུམ་བརྗོད་པར་བྱའོ། །སའི་ལྷ་མོ་ལ་གསོལ་བ་བཏབ་ནས་ས་སྦྱང་བའི་ཕྱིར་སེལ་ཡོངས་སུ་བརྟག་པར་བྱའོ། །དེ་ལ་ཇི་ལྟར་ལུས་ཀྱི་གནས་ལ་སེལ་ཡོད་ན་སྐྱེས་བུ་རྣམས་ཀྱི་ཟུག་རྔུར་བྱེད་པ་དེ་བཞིན་དུ་ཁང་ས་གང་ཞིག་ལ་

སེལ་ཡོད་ན། དེ་ལ་གནས་པའི་སྐྱེས་བུ་རྣམས་ལ་མི་འདོད་པའི་འབྲས་བུ་སྟེར་བར་འགྱུར་རོ། །ཁྱིམ་གང་ལ་སེལ་ཡོད་པ་དེར་ལྷ་དང་གཉིས་སྐྱེས་གནས་ཀྱང་མཆོད་པར་མི་འགྱུར་རོ། །བྲམ་ཟེ་དང་རྒྱལ་རིགས་དང་རྗེའུ་རིགས་དང་། དམངས་རིགས་རྣམས་ཀྱང་འདོད་པ་ཆེ་བ་
དང་། ཆོས་ལ་སྨོད་པ་དང་། སྡིག་པ་སྤྱོད་པ་དང་། བཀྲ་ཤིས་དང་། སྦྱིན་སྲེག་དང་། བཟླས་པའི་བྱ་བ་རྣམས་སྤང་བ་དང་། ཕ་དང་མ་དང་བླ་མ་ཡང་སུན་འབྱིན་པ་དང་། དབུལ་པོ་དང་། ནད་ཀྱིས་མནར་བ་དང་། སྡིག་པའི་གྲོགས་པོ་རྣམས་མང་པོར་འགྱུར་རོ། །
གཞན་ཡང་བ་ལང་གི་མགོའི་རུས་པས་ནི་ཕྱུགས་དང་ནོར་ཉམས་པར་འགྱུར་རོ། །རྟའི་མགོ་བོས་ནི་ཁྱིམ་བདག་ནོར་དང་ལྡན་ཞིང་མཚོན་ཆས་འཚོ་བར་འགྱུར་རོ། །བ་ལང་གི་རུས་པ་སྤྱི་རྣམས་ཀྱིས་སྡུག་བསྔལ་གྱི་རྣམ་པ་རྣམས་ཉེ་བར་སྐྱེད་པར་བྱེད་དོ། །མིའི་རྐེད་པའི་རུས་
པས་ནི་རིགས་ཉམས་པར་བྱེད་དོ། །མི་རུས་སྤྱི་རྣམས་ཀྱིས་ནི་བདག་པོ་ཉམས་པ་དང་། ནོར་ཉམས་པ་དང་། གསོད་པ་དང་། འཆིང་བ་དང་། བུད་མེད་འཕྱོ་བ་དང་། ཚངས་སྤྱོད་འཇོམས་པ་ལ་སོགས་པའི་ཉེས་པ་རྣམས་སུ་འགྱུར་རོ། །བུང་བུ་དང་བུང་བུའི་རུས་པ་རྣམས་
ཀྱིས་ནི་བདག་པོ་འཇིགས་པ་དང་། ཉེ་བར་སྐྲོད་པར་ཡང་འགྱུར་རོ། །ཁྱིམ་བྱའི་རུས་པས་ནི་སྡུག་བསྔལ་བར་བྱེད་དོ། །གླང་པོ་ཆེའི་རུས་པས་ནི་བུད་མེད་རྣམས་ངན་དུ་སྤྱོད་པར་འགྱུར་རོ། །ལུག་གི་རུས་པས་ནི་ནོར་མེད་པ་དང་བློ་གྲོས་དམན་པར་ཡང་འགྱུར་རོ། །མྱུར་
འགྲོའི་རུས་པས་ནི་བ་ལང་གི་རིགས་ཉམས་པར་འགྱུར་རོ། །རའི་རུས་པ་རྣམས་ཀྱིས་ཀྱང་ངོ་། །རི་དྭགས་དང་གཟིག་དང་། ཅེ་སྤྱང་གི་རུས་པ་རྣམས་ཀྱིས་ནི་ཁྱིམ་བདག་ཕ་རོལ་གྱིས་ཉེ་བར་འཚེ་བར་འགྱུར་རོ། །སྟག་གི་རུས་པས་ནི་འཚེ་བ་དང་དགྲའི་འཇིགས་པར་བཤད་
དོ། །ཕུབ་མས་ནི་འབྲུ་རྣམས་ཉམས་པར་བྱེད་དོ། །རྡུལ་གྱིས་ནི་གཞན་དུ་འཁྱམས་པར་བྱེད་དོ། །ཐལ་བ་དང་སོལ་བ་དག་གིས་ནི་སྲེག་པའི་ཉེས་པའོ། །ཕག་གི་རུས་པས་ནི་ནད་དུ་བྱེད་དོ། །ར་གན་གྱིས་ནོར་ཉམས་པར་བྱེད་དོ། །ཟངས་མས་ཀྱང་ངོ་། །རི་དྭགས་དང་བྱ་

དང་སྲིན་པོའི་རུས་པ་རྣམས་ཀྱིས་འཆིའོ། །བྱི་བའི་ཐོད་པས་ནོར་དང་འབྲུ་རྣམ་པར་ཉམས་པར་བྱེད་དོ། །སྦྲེ་མོ་དང་གཡི་དག་གི་རུས་པས་གཉེན་རྣམས་དང་འཁོན་པར་བྱེད་དོ། །སྦྲུལ་གྱི་རུས་པས་སྟོབས་དང་ཕུན་སུམ་ཚོགས་པ་ཉམས་པར་འགྱུར་རོ། །ལུག་
གི་རུས་པས་ཚེ་ཐུང་བའོ། །ལྕགས་ཀྱིས་མིག་ནད་དོ། །རྡོ་ཡིས་འཇིགས་པ་དང་སེམས་གཡེང་བར་བྱེད་དོ། །རྩྭ་སྐམ་པོས་ནད་དོ། །ལོ་མ་སྐམ་པོས་གཞན་གྱི་བྲན་དུ་འགྱུར་རོ། །སྐྲ་ཡིས་སྡུག་པའོ། །མིའི་ཐོད་པས་ནི་བུ་དང་གཉེན་རྣམས་དང་བྲལ་བར་བྱེད་དོ། །ཤིང་
སྐམ་པོས་དབུལ་པོར་འགྱུར་རོ། །སོའི་རུས་པས་བཞོན་པ་ཉམས་པར་བྱེད་དོ། །ཞུམ་བུའི་བྱང་ཁོག་གིས་བུ་དང་བུད་མེད་དང་འབྲལ་བར་བྱེད་དོ། །མགྲིན་པའི་རུས་པས་འཆི་བར་བྱེད་དོ། །ལྕགས་སྒྲོག་གིས་ཆུང་མ་དང་ལྷན་ཅིག་པ་དང་འབྲལ་བར་བྱེད་དོ། །མིའི་
ཐལ་གོང་གི་རུས་པས་ནད་མང་པོ་སྟེར་བར་བྱེད་དོ། །སོག་པས་ནོར་ཉམས་པར་བྱེད་དོ། །དཔུང་པས་ཕ་རོལ་གྱིས་བརྙས་པར་བྱེད་དོ། །རྫའི་སྣོད་ཆག་པོས་བུ་དང་བྲལ་བར་བྱེད་དོ། །ཁྲའི་རྐང་པས་ནོར་དང་བུད་མེད་ཉམས་པར་བྱེད་དོ། །གྱོ་དུམ་གྱིས་སྡུག་
བསྔལ་དང་མིག་ནད་དུ་ཡང་འགྱུར་རོ། །དུད་འགྲོའི་རུས་པས་མྱ་ངན་སྟེར་རོ། །ཕྱུགས་ཀྱི་རུས་པས་ལྟོགས་པ་དང་སྐོམ་པ་སྟེར་རོ། །ཀཱ་ཤེ་རུ་ཀའི་རུས་པས་ཕག་དང་མི་དག་ཞེ་སྡང་དང་ནད་དུ་ཡང་བྱེད་དོ། །ཞ་ཉེས་ནི་རྐེད་ནད་དོ། །ལྕགས་གསུམ་གྱི་སེལ་གྱིས་
དགའ་བ་ཉམས་པར་བྱེད་དོ། །བརླའི་རུས་པས་བུད་མེད་ངན་དུ་སྤྱོད་པར་འགྱུར་རོ། །བྱིན་པའི་རུས་པས་འཆི་བ་སྟེར་རོ། །རུས་པ་ཚིག་པོས་འཆིང་བར་བྱེད་དོ། །འདྲེག་མཁན་གྱི་སྣོད་ཀྱིས་ཕ་རོལ་གྱིས་འཚེ་ཞིང་སྡུག་བསྔལ་དང་དབུལ་པོར་འགྱུར་རོ། །རྟ་རྨིག་གིས་
རིང་དུ་འཁྱམས་པ་དང་། ཉམས་པ་དང་། ཉོན་མོངས་པས་འཚེ་བར་འགྱུར་རོ། །ཚེར་མས་རིང་དུ་འཁྱམས་པའོ། །ཤལ་མ་ལིས་འཆིང་བར་བྱེད་དོ། །སོར་གདུབ་དང་རྨ་བྱ་བྲིས་པས་མྱ་ངན་དང་འདོད་པ་ཉམས་པ་རབ་ཏུ་སྟེར་རོ། །འཁར་བས་ནི་ནོར་ཉམས་པར་བྱེད་དོ། །

ལྷང་ཚེར་དང་ལྷམ་གྱིས་ངན་པ་རབ་ཏུ་སྟེར་རོ། །རྩ་བའི་རུས་པས་ནོར་ཉམས་པར་བྱེད་དོ། །ཏ་ལུ་ཀའི་རུས་པས་སེམས་རྨོངས་པར་བྱེད་དོ། །ཕྲག་པ་དང་འགྲམ་པའི་རུས་པས་འཆི་བ་དང་ནོར་ཉམས་པའོ། །མ་ཧེའི་རུས་པས་བུ་མོ་སྐྱེ་བར་བྱེད་དོ། །སྤྲེའུའི་རུས་པས་དོན་ཉམས་
པའོ། །རྔ་མོའི་རུས་པ་རྣམས་ཀྱིས་སྦྱིན་བདག་འཆིའོ། །འཆད་པར་འགྱུར་བའི་དབང་ཕྱུག་དང་། གཙུག་ཏོར་འཁོར་ལོས་སྒྱུར་བ་དང་། བརྒྱ་བྱིན་དང་། རྡོ་རྗེ་འཇིགས་པ་དང་། ཕུར་བུ་དང་། རྣམ་ཐོས་སྲས་དང་། བདུད་རྩི་འོད་དང་། ཟླ་འོད་དང་། རྡོ་རྗེ་རྒྱས་པ་
དང་། བཟང་སྐྱོང་དང་། རྡོ་རྗེ་རྣོན་པོ་དང་། རྡོ་རྗེ་སྲུང་བ་དང་། རྡོ་རྗེ་རྒྱུ་རྣམས་ཀྱི་རེ་མིག་བཅུ་གསུམ་པོ་རྣམས་ལ་སེལ་གནས་ན་རིགས་མི་འཕེལ་བ་དང་བུ་མེད་པའི་ཉེས་པ་སྟེར་བར་འགྱུར་རོ། །ལྷ་མ་ཡིན་དང་རྡོ་རྗེ་ལས་དང་རྡོ་རྗེ་མེ་དང་། ཉི་འོད་འབར་བ་དང་། རྡོ་རྗེ་དྲི་དང་།
བྱམས་པ་དང་། སྤོས་ཀྱི་གླང་པོ་དང་། ཀུན་དུ་བཟང་པོ་དང་། རྡོ་རྗེ་རིན་ཆེན་དང་། རྡོ་རྗེ་སེམས་དཔའ་རྣམས་ཀྱི་རེ་མིག་དགུ་ལ་སེལ་ཡོད་ན་བུད་མེད་འཆི་བར་འགྱུར་རོ། །ད་ནི་དགེ་བའི་མཚན་རྣམས་བཤད་པར་བྱ་སྟེ། དེ་ལ་སྦལ་པའི་རུས་པས་ཆོས་དང་ནོར་སྟེར་བར་བྱེད་
དོ། །གསེར་གྱིས་ནོར་དང་བུ་སྟེར་བར་བྱེད་དོ། །འབྲུ་ཡིས་བདེ་བ་འབབ་པར་བྱེད་དོ། །ཉ་ཕྱིས་ཀྱིས་བདེ་བ་དང་ཞི་བ་སྟེར་བར་བྱེད་དོ། །རུས་སྦལ་གྱི་རུས་པས་ནི་རིག་པ་ཐོབ་པ་དང་རྒྱས་པར་བྱེད་དོ། །དུང་གིས་འདོད་པ་དང་ཡོ་བྱད་རབ་ཏུ་སྟེར་རོ། །བ་ལང་གི་རོས་ནོར་དང་འབྲུ་
སྟེར་རོ། །མུ་ཏིག་གི་འབྲས་བུས་དཔལ་སྟེར་རོ། །བྱི་རུས་ནད་མེད་པར་བྱེད་དོ། །དངུལ་གྱིས་ཞི་བར་བྱེད་དོ། །རུས་སྦལ་དང་སྦལ་པ་གསོན་མའམ་མི་གསོན་པ་ཡང་རུང་སྟེ། དགེ་བ་རབ་ཏུ་སྟེར་རོ། །དབང་པོ་དང་མེ་དང་། གཤིན་རྗེ་དང་། མཚན་མོ་སྤྱོད་པ་དང་། ཆུ་བདག་
དང་། རླུང་གི་ཕྱོགས་རྣམས་སུ་གནས་པའི་ཁྲོན་པས་ནི་གོ་རིམས་བཞིན་དུ་མེ་ཡིས་འཇིགས་པ་དང་། དགྲ་ཡིས་འཇིགས་པ་དང་། འཐབ་མོ་དང་། བུ་འཆི་བ་དང་། བུད་མེད་གཡེམ་པ་དང་། བུད་མེད་འཆི་བར་བྱེད་དོ། །བྱང་ཕྱོགས་ན་གནས་པའི་ཁྲོན་པས་ནི་རྒྱས་

པར་བྱེད་དོ། །དབང་ལྡན་ན་ཡོད་པོས་ཞི་བར་བྱེད་དོ། །གཙང་པོས་འཁོར་བའམ་ཕྱོགས་གཉིས་ན་གཙང་པོ་ཡོད་པའི་ས་དེ་དགེ་བར་བྱེད་དོ། །གཤིན་རྗེའི་ཕྱོགས་ན་གཙང་བ་ཡོད་ན་མི་དགེ་བར་བྱེད་དོ། །ལྷོ་དང་ནུབ་ན་ནགས་དང་རི་དྭགས་གནས་པས་དགེ་བར་
བྱེད་དོ། །ས་གཞི་གང་ཞིག་ཚ་བའི་དུས་ན་བསིལ་བ་གྲང་བའི་དུས་སུ་དྲོ་བ་དང་། དབྱར་གྱི་དུས་སུ་སྙོམས་པ་དེས་རིགས་བཞི་པོ་རྣམས་དགེ་བར་བྱེད་པར་འགྱུར་རོ། །དེ་བཞིན་དུ་ལེགས་པར་ཡོངས་སུ་བརྟགས་ནས་ཁང་པའི་དབུས་སུ་སའི་ལྷ་མོ་རྣམ་པར་བསྒོམས་ཏེ་མཆོད་པ་
ལ་སོགས་པ་བྱས་ནས་སླར་ཞུ་བར་བྱ་སྟེ། རྣམ་པ་ཀུན་དུ་ཁྱོད་ཕྱག་འཚལ། །ཀྱེ་ཧོ་ལྷ་མོས་རབ་ཏུ་སྩོལ། །དཀོན་མཆོག་གསུམ་གྱི་བཞུགས་གནས་ཕྱིར། །གཙུག་ལག་ཁང་ནི་བཞེངས་པར་བྱ། །ཨོཾ་ཧཱུྃ་ཛཾ་ཛཾ་སྭཱ་ཧཱ། ཞེས་པ་ནི་ས་བླང་བའི་སྔགས་སོ། །དེ་ནས་མཆོད་པ་
ལ་སོགས་པ་ཕུལ་ནས། ཡང་དག་པར་མཆོད་དེ་སའི་ལྷ་མོ་ཡིད་ཀྱིས་བཏེག་སྟེ་ནམ་མཁའ་ལ་དགོད་པར་བྱའོ། །དེ་ལ་རེ་མིག་བརྒྱད་ཅུ་རྩ་གཅིག་གི་ལྷ་རྣམས་མཆོད་པའི་ཕྱིར་ཕྱོགས་བཞིའི་ཕྱོགས་རྣམས་སུ་རྩ་བཞི་བཅུའི་རང་བཞིན་གྱི་ལྷ་མོ་བཞི་བཅུ་རྣམས་བསྒོམ་པར་བྱའོ། །
དེ་རྣམས་ལ་དང་པོར་མཆོད་པར་བྱའོ། །དེ་ལ་ཤར་ཕྱོགས་ཀྱི་ཕྱི་རོལ་ཏུ་དང་པོ་དབང་ལྡན་ནས་གོ་རིམས་ཇི་ལྟ་བ་བཞིན་དུ་རྩ་བཅུ་སྟེ། རབ་ཏུ་དགའ་བ་དང་། དྲི་མ་མེད་པ་དང་། འོད་བྱེད་པ་དང་། འོད་འཕྲོ་བ་དང་། སྤྱང་་དཀའ་བ་དང་། མངོན་དུ་གྱུར་པ་དང་། རིང་དུ་གྱུར་
པ་དང་། མི་གཡོ་བ་དང་། ལེགས་པའི་བློ་གྲོས་དང་། ཆོས་ཀྱི་སྤྲིན་ཞེས་པ་རྣམས་ནི་ཞལ་ནུབ་ཏུ་མངོན་པར་ཕྱོགས་པའོ། །དེ་བཞིན་དུ་ལྷོ་ཕྱོགས་ཀྱི་ཕྱི་རོལ་དུ་དང་པོ་མེ་ནས་གོ་རིམས་ཇི་ལྟ་བ་བཞིན་དུ་རྩ་བཅུ་སྟེ། སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་
འགྲུས་དང་། བསམ་གཏན་དང་། ཤེས་རབ་དང་། ཐབས་དང་། སྨོན་ལམ་དང་། སྟོབས་དང་། ཡེ་ཤེས་ཀྱི་ཕ་རོལ་ཏུ་ཕྱིན་པའི་རང་བཞིན་རྣམས་ཞལ་བྱང་དུ་མངོན་པར་ཕྱོགས་པའོ། །དེ་བཞིན་དུ་ཡང་ནུབ་ཕྱོགས་ཀྱི་ཕྱི་རོལ་དུ་དང་པོ་བདེན་བྲལ་ནས་གོ་རིམས་ཇི་ལྟ་བ་

བཞིན་དུ་རྩ་བཅུ་སྟེ། ཚེ་དང་། སེམས་དང་། ཡོ་བྱད་དང་། ལས་དང་། སྐྱེ་བ་དང་། རྫུ་འཕྲུལ་དང་། མོས་པ་དང་། སྨོན་ལམ་དང་། ཡེ་ཤེས་དང་། ཆོས་རྣམས་ལ་དབང་བའི་རང་བཞིན་ཏེ། དེ་བཞིན་དུ་ཤར་དུ་ཕྱོགས་ནས་བཞུགས་པའོ། །དེ་བཞིན་དུ་བྱང་ཕྱོགས་
ཀྱི་ཕྱི་རོལ་དུ་དང་པོ་རླུང་ནས་གོ་རིམས་ཇི་ལྟ་བ་བཞིན་དུ་རྩ་བཅུ་སྟེ། ནོར་རྒྱུན་མ་དང་། རིན་ཆེན་སྣང་མ་དང་། གཙུག་ཏོར་རྣམ་པར་རྒྱལ་མ་དང་། འོད་ཟེར་ཅན་དང་། རི་ཁྲོད་ལོ་མ་ཅན་དང་། སྒོ་མཐའ་ཡས་མ་དང་། ཛཱཾ་གུ་ལི་དང་། ཙུན་ད་དང་། ཤེས་རབ་སྤེལ་མ་
དང་། སངས་རྒྱས་ཀུན་གྱི་མཛོད་ལྡན་མ་རྣམས་ཏེ་གཟུངས་མ་བཅུའི་རང་བཞིན་རྣམས་ནི་ཞལ་ལྷོར་མངོན་པར་ཕྱོགས་པའོ། །དེ་ལ་རབ་ཏུ་དགའ་བ་ལ་ཕྱོགས་པ་བཅུ་ནི་དམར་པོ་དང་། དཀར་པོ་དང་། དམར་སྐྱ་དང་། ནག་པོ་དང་། སེར་པོ་དང་། གསེར་དང་།
ནམ་མཁའ་དང་། སྐྱ་བོ་དང་། དཀར་པོ་དང་། སེར་པོའི་ཁ་དོག་རྣམས་སོ། །ཕྱག་གཉིས་པ་སྟེ། ཕྱག་གཡས་པ་རྣམས་ན་རྡོ་རྗེ་འཛིན་པའོ། །གཡོན་པ་རྣམས་ན་ཡིད་བཞིན་གྱི་ནོར་བུ་དང་། པདྨ་དཀར་པོ་དང་། སྣ་ཚོགས་པདྨའི་སྟེང་ན་ཉི་མ་དང་། ཨུཏྤལ་སྔོན་པོ་
དང་། མརྒད་དང་། པདྨ་ལ་གནས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟི་དང་སྣ་ཚོགས་པདྨ་ལ་གནས་པའི་སྣ་ཚོགས་རྡོ་རྗེ་དང་། པདྨའི་སྟེང་དུ་ཟླ་བ་ལ་གནས་པའི་རྡོ་རྗེ་དམར་པོ་དང་། རལ་གྲིས་མཚན་པའི་ཨུཏྤ་ལ་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟི་
རྣམས་འཛིན་པའོ། །སྦྱིན་པ་ལ་སོགས་པ་རྣམས་ནི་དཀར་པོ་དང་། སེར་པོ་དང་། སྔོན་པོ་དང་། སེར་པོ་དང་། སྐྱ་བོ་དང་། ནག་པོ་དང་། དམར་པོ་དང་། དཀར་པོའི་ཁ་དོག་རྣམས་སོ། །ཕྱག་གཉིས་ཏེ་ཕྱག་གཡས་པ་རྣམས་ནི་ཡིད་བཞིན་གྱི་ནོར་བུ་འཛིན་པ་རྣམས་
སོ། །གཡོན་ན་འབྲས་ཀྱི་སྙེ་མ་འཛིན་པ་དང་། ཨ་ཤོ་ཀའི་ལོ་མ་དང་པདྨ་དཀར་པོ་དང་། ཨུཏྤལ་སྔོན་པོ་དང་། པདྨ་དཀར་པོ་དང་། པདྨ་ལ་གནས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟི་དང་ཆོས་ཀྱི་འཁོར་ལོའི་ཕྱག་རྒྱ་དང་། པདྨ་སེར་པོ་ལ་གནས་པའི་རྡོ་རྗེ་དང་།

ཨུཏྤ་ལ་སྔོན་པོ་ལ་གནས་པའི་རལ་གྲི་དང་། ཤེས་རབ་ཀྱི་ཕ་རོལ་ཏུ་ཕྱིན་པའི་པུསྟི་དང་། རིན་པོ་ཆེའི་རྒྱན་གྱིས་བརྒྱན་པའི་བྱང་ཆུབ་ཀྱི་ཤིང་རྣམས་འཛིན་པའོ། །ཚེ་ལ་དབང་བ་ལ་སོགས་པ་རྣམས་ནི་དམར་པོ་དང་། དཀར་པོ་དང་། སེར་པོ་དང་།
ལྗང་གུ་དང་། སྣ་ཚོགས་པའི་མདོག་དང་། ནག་པོ་དང་། སྐྱ་བོ་དང་། སེར་པོ་དང་། སྔོན་པོ་དང་། དཀར་པོའི་མདོག་རྣམས་སོ། །ཕྱག་གཉིས་ཏེ་གཡས་པ་རྣམས་ན་པདྨ་འཛིན་པའོ། །གཡོན་པ་ན་པདྨ་རཱ་ག་ལ་གནས་པའི་འོད་དཔག་མེད་ཀྱི་སྐུ་དང་། རྡོ་རྗེ་
དམར་པོ་དང་། ཡིད་བཞིན་གྱི་ནོར་བུའི་རྒྱལ་མཚན་དང་། སྣ་ཚོགས་རྡོ་རྗེ་དང་། ཁ་དོག་སྣ་ཚོགས་པའི་འཁྲི་ཤིང་དང་། པདྨ་ལ་གནས་པའི་ཟླ་བ་དང་ཉི་མ་དང་། པྲི་ཡང་ཀུའི་མེ་ཏོག་གི་སྙེ་མ་དང་། ཨུཏྤ་ལ་དང་། ཨུཏྤ་ལ་སྔོན་པོ་ལ་གནས་པའི་རལ་གྲི་དང་། པདྨ་ལ་
གནས་པའི་བུམ་པ་བཟང་པོ་ཕྱག་ན་བསྣམས་པའོ། །ནོར་རྒྱུན་མ་ལ་སོགས་པ་རྣམས་ནི་སེར་པོ་དང་། དམར་པོ་དང་། དཀར་པོ་དང་། སྐྱ་བོ་དང་། སྔོན་པོ་དང་། དཀར་པོ་དང་། ལྗང་གུ་དང་། དཀར་པོ་དང་། སྐྱ་བོ་དང་། སེར་པོའི་ཁ་དོག་རྣམས་སོ། །ཕྱག་གཉིས་པ་
སྟེ་ཕྱག་གཡས་པ་ན་སྣ་ཚོགས་རྡོ་རྗེ་བསྣམས་པའོ། །གཡོན་པ་རྣམས་ན་འབྲས་ཀྱི་སྙེ་མ་དང་། ཡིད་བཞིན་གྱི་ནོར་བུའི་རྒྱལ་མཚན་དང་། ནོར་བུ་ཆུ་ཤེལ་གྱི་བུམ་པ་དང་། ཁབ་དང་སྐུད་པ་དང་། རྨ་བྱའི་སྒྲོ་དང་། དུག་གི་མེ་ཏོག་གི་སྙེ་མ་དང་། གཏེར་གྱི་བུམ་པ་
ཆེན་པོ་དང་། ཕྲེང་བ་འཕྱང་བའི་སྤྱི་བླུགས་དང་། ཨུཏྤལ་སྔོན་པོ་ལ་གནས་པའི་རལ་གྲི་དང་། པདྨ་ལ་གནས་པའི་རིན་པོ་ཆེ་སྣ་ཚོགས་པའི་སྒྲོམ་འཛིན་པ་རྣམས་སོ། །ལྷ་མོ་བཞི་བཅུ་པོ་ནི་སྣ་ཚོགས་པདྨ་དང་ཟླ་བའི་དཀྱིལ་འཁོར་ལ་སེམས་དཔའི་སྐྱིལ་ཀྲུང་གིས་བཞུགས་
པའོ། །དེ་ནས་མཆོད་པའི་སྔགས་ནི། ཨོཾ་ཨཱཿཔྲ་མུ་དི་ཏཱ་ཡཻ་ན་མཿསྭཱ་ཧཱ། ཨོཾ་བི་མ་ལཱ་ཡཻ་ན་མཿསྭཱ་ཧཱ། ཨོཾ་པྲ་བྷཱ་ཀ་རཱ་ཡཻ་ན་མཿསྭཱ་ཧཱ། ཨོཾ་ཨརྩིཥྨ་ཏྱཻ་ན་མཿསྭཱ་ཧཱ། ཨོཾ་སུ་དུརྫ་ཡཱ་ཡཻ་ན་མཿསྭཱ་ཧཱ། ཨོཾ་ཨ་བྷི་མུ་ཁཱ་ཡཻ་ན་མཿསྭཱ་ཧཱ། ཨོཾ་དུ་རཾ་ག་མཱ་ཡཻ་ན་མཿསྭཱ་ཧཱ། ཨོཾ་ཨ་ཙ་ལཱ་ཡཻ་

ན་མཿསྭཱ་ཧཱ། ཨོཾ་སཱ་དྷུ་མ་ཏྱཻ་ན་མཿསྭཱ་ཧཱ། ཨོཾ་དྷརྨ་མེ་གྷཱ་ཡཻ་ན་མཿསྭཱ་ཧཱ། ཞེས་པས་མཆོད་པར་བྱའོ། །ཨོཾ་དཱ་ན་པཱ་ར་མི་ཏཱ་ཡཻ་ན་མཿསྭཱ་ཧཱ། ཨོཾ་ཤཱི་ལ་པཱ་ར་མི་ཏཱ་ཡཻ་ན་མཿསྭཱ་ཧཱ། ཨོཾ་ཀྵཱནྟི་པཱ་ར་མི་ཏཱ་ཡཻ་ན་མཿསྭཱ་ཧཱ། ཨོཾ་བཱིརྱ་པཱ་ར་མི་ཏཱ་ཡཻ་ན་མཿསྭཱ་ཧཱ། ཨོཾ་དྷྱཱ་ན་པཱ་ར་མི་ཏཱ་ཡཻ་ན་མཿསྭཱ་ཧཱ།
ཨོཾ་པྲཛྙཱ་པཱ་ར་མི་ཏཱ་ཡཻ་ན་མཿསྭཱ་ཧཱ། ཨོཾ་ཨུ་པ་ཡ་པཱ་ར་མི་ཏཱ་ཡཻ་ན་མཿསྭཱ་ཧཱ། ཨོཾ་བ་ལ་པཱ་ར་མི་ཏཱ་ཡཻ་ནཱ་མཿསྭཱ་ཧཱ། ཨོཾ་པྲ་ཎི་དྷཱ་པཱ་ར་མི་ཏཱ་ཡཻ་ན་མཿསྭཱ་ཧཱ། ཨོཾ་ཛྙཱ་ན་པཱ་ར་མི་ཏཱ་ཡཻ་ན་མཿསྭཱ་ཧཱ། ཨོཾ་ཨཱ་ཡུརྦ་ཤི་ཏཱ་ཡཻ་ན་མཿསྭཱ་ཧཱ། ཨོཾ་ཙིཏྟ་བ་ཤི་ཏཱ་ཡཻ་ན་མཿསྭཱ་ཧཱ། ཨོཾ་པ་རི་སྐཱ་ར་བ་ཤི་ཏ་ཡཻ་ན་མཿ
སྭཱ་ཧཱ། ཨོཾ་ཀརྨ་བ་ཤི་ཏཱ་ཡཻ་ན་མཿསྭཱ་ཧཱ། ཨོཾ་ཨུ་པ་པཏྟི་བ་ཤི་ཏཱ་ཡཻ་ན་མཿསྭཱ་ཧཱ། ཨོཾ་རྀ་དྷི་བ་ཤི་ཏཱ་ཡཻ་ན་མཿསྭཱ་ཧཱ། ཨོཾ་ཨ་དྷི་མུཀྟི་བ་ཤི་ཏཱ་ཡཻ་ན་མཿསྭཱ་ཧཱ། ཨོཾ་པྲ་ཎི་དྷ་ན་བ་ཤི་ཏཱ་ཡཻ་ན་མཿསྭཱ་ཧཱ། ཨོཾ་ཛྙཱ་ན་བ་ཤི་ཏཱ་ཡཻ་ན་མཿསྭཱ་ཧཱ། ཨོཾ་དྷརྨ་བ་ཤི་ཏཱ་ཡཻ་ན་མཿསྭཱ་ཧཱ། ཨོཾ་བ་སུ་མ་ཏྱཻ་ན་མཿསྭཱ་ཧཱ།
ཨོཾ་རཏྣོ་ལྐཱ་ཡཻ་ན་མཿསྭཱ་ཧཱ། ཨོཾ་ཨུཥྞཱི་ཥ་བི་ཛ་ཡཱ་ཡཻ་ན་མཿསྭཱ་ཧཱ། ཨོཾ་མཱ་རཱི་ཙྱཻ་ན་མཿསྭཱ་ཧཱ། ཨོཾ་པརྞ་ཤ་བ་རྱཻ་ན་མཿསྭཱ་ཧཱ། ཨོཾ་ཛཱཾ་གུ་ལྱཻ་ན་མཿསྭཱ་ཧཱ། ཨོཾ་ཨ་ནནྟ་མུ་ཁྱཻ་ན་མཿསྭཱ་ཧཱ། ཨོཾ་ཙུནྡཱ་ཡཻ་ན་མཿསྭཱ་ཧཱ། ཨོཾ་པྲཛྙཱ་བརྡྷ་ནྱཻ་ན་མཿསྭཱ་ཧཱ། ཨོཾ་སརྦ་བུདྡྷ་ཀོ་ཥ་བ་ཏྱཻ་ན་མཿསྭཱ་ཧཱ།
དེའི་རྗེས་སུ་རེ་མིག་བརྒྱད་ཅུ་རྩ་གཅིག་གི་གནས་སུ་རྣམ་པར་སྣང་མཛད་ཆེན་པོ་ལ་སོགས་པའི་ལྷ་རྣམས་བསྒོམ་པར་བྱའོ། །རང་རང་གི་སྔགས་ཀྱིས་དཱུར་བ་དང་། ཀུན་ད་དང་། འབྲས་མ་ཉམས་པ་དང་། འབྲས་ཡོས་དང་། ཀུ་སུམ་བྷ་དང་། འབྲས་བུ་ལ་སོགས་པ་
རྣམས་ཀྱི་མཆོད་པས་མཆོད་པར་བྱའོ། །དབུས་ཀྱི་རེ་མིག་ལ་རྣམ་པར་སྣང་མཛད་ཆེན་པོ་སྐུ་མདོག་དཀར་པོ་ཞལ་བཞི་པ་བྱང་ཆུབ་མཆོག་གི་ཕྱག་རྒྱས་བཞུགས་པའོ། །ཨོཾ་བཛྲ་དྷཱ་ཏ་བེ་ན་མཿསྭཱ་ཧཱ། དེ་ནས་གཉིས་པ་ལ་རེ་མིག་བརྒྱད་དེ། ཤར་ལ་སོགས་
པའི་ཕྱོགས་སུ་སེམས་མ་རྡོ་རྗེ་མ་དང་། རིན་ཆེན་རྡོ་རྗེ་མ་དང་། ཆོས་ཀྱི་རྡོ་རྗེ་མ་དང་། ལས་ཀྱི་རྡོ་རྗེ་མ་རྣམས་སོ། །མེ་ལ་སོགས་པའི་མཚམས་རྣམས་སུ་རྡོ་རྗེ་སྒེག་མོ་དང་། རྡོ་རྗེ་ཕྲེང་བ་མ་དང་། རྡོ་རྗེ་གླུ་མ་དང་། རྡོ་རྗེ་གར་མ་རྣམས་དཀར་པོ་དང་། སེར་པོ་དང་

དམར་པོ་དང་། ཁ་དོག་སྣ་ཚོགས་པ་རྣམས་སོ། །རྡོ་རྗེ་དང་། རིན་པོ་ཆེ་དང་། པདྨ་དང་། སྣ་ཚོགས་རྡོ་རྗེ་དང་། རིན་པོ་ཆེའི་རྡོ་རྗེ་དང་། རིན་པོ་ཆེའི་ཕྲེང་བ་དང་། པི་ཝང་དང་། གར་བྱེད་པའི་ཚུལ་ལོ། །ཨོཾ་བཛྲ་བཛྲི་ཎཱི་ན་མཿསྭཱ་ཧཱ། ཨོཾ་རཏྣ་བཛྲི་ཎཱི་ན་མཿསྭཱ་ཧཱ།
ཨོཾ་དྷརྨ་བཛྲི་ཎཱི་ན་མཿསྭཱ་ཧཱ། ཨོཾ་ཀརྨ་བཛྲི་ཎཱི་ན་མཿསྭཱ་ཧཱ། ཨོཾ་བཛྲི་ལཱ་སྱེ་ན་མཿསྭཱ་ཧཱ། ཨོཾ་བཛྲ་མཱ་ལེ་ན་མཿསྭཱ་ཧཱ། ཨོཾ་བཛྲ་གཱི་ཏྱཻ་ན་མཿསྭཱ་ཧཱ། ཨོཾ་བཛྲ་ནྲྀ་ཏྱཻ་ན་མཿསྭཱ་ཧཱ། གསུམ་པའི་རེ་མིག་བཅུ་དྲུག་པོ་རྣམས་ལ་དང་པོ་དབང་ལྡན་ནས་རེ་མིག་བཞི་ལ་རྡོ་རྗེ་སེམས་དཔའ་དང་། རྡོ་རྗེ་རྒྱལ་
པོ་དང་། རྡོ་རྗེ་ཆགས་པ་དང་། རྡོ་རྗེ་ལེགས་པ་རྣམས་སོ། །དང་པོ་མེ་ནས་རེ་མིག་བཞི་ལ་རྡོ་རྗེ་རིན་པོ་ཆེ་དང་། རྡོ་རྗེ་གཟི་བརྗིད་དང་། རྡོ་རྗེ་མེ་ཏོག་དང་། རྡོ་རྗེ་བཞད་པ་རྣམས་སོ། །དང་པོ་བདེན་བྲལ་ནས་རེ་མིག་བཞི་ལ་རྡོ་རྗེ་ཆོས་དང་། རྡོ་རྗེ་རྣོན་པོ་དང་། རྡོ་རྗེ་རྒྱུ་དང་། རྡོ་རྗེ་
གསུང་བ་རྣམས་སོ། །དང་པོ་རླུང་ནས་རེ་མིག་བཞི་ལ་རྡོ་རྗེ་ལས་དང་། རྡོ་རྗེ་སྲུང་བ་དང་། རྡོ་རྗེ་གནོད་སྦྱིན་དང་། རྡོ་རྗེ་མཚམས་རྣམས་སོ། །སེམས་དཔའི་སྐྱིལ་ཀྲུང་གིས་བཞུགས་པའོ། །ཞལ་གཅིག་པ་ཕྱག་གཉིས་པ་རྣམས་ཏེ། དཀར་པོ་དང་། སེར་པོ་དང་། དམར་པོ་
དང་། སྔོན་པོ་དང་། སེར་པོ་དང་། དམར་པོ་དང་། སྔོན་པོ་དང་། དཀར་པོ་དང་། ཅུང་ཟད་དམར་པོ་དང་། སྔོན་པོ་དང་། སེར་པོ་དང་། དམར་པོ་དང་། སྣ་ཚོགས་དང་། སེར་པོ་དང་། ནག་པོ་དང་། སེར་པོའི་ཁ་དོག་རྣམས་སོ། །རྡོ་རྗེ་དང་། ལྕགས་ཀྱུ་དང་། མདའ་
འགེངས་པ་དང་། མཛུབ་མོ་འཕེན་པའི་ཚུལ་དང་། རྡོ་རྗེ་སེར་པོ་དང་། ཉི་མ་དང་། རྒྱལ་མཚན་དང་། སོའི་ཕྲེང་བ་དང་། པདྨ་དང་། རལ་གྲི་དང་། འཁོར་ལོ་དང་། ཆོས་ཀྱི་དུང་དང་། སྣ་ཚོགས་རྡོ་རྗེ་དང་། གོ་ཆ་དང་། མཆེ་བ་དང་། རྡོ་རྗེའི་ཁུ་ཚུར་རྣམས་ཏེ་རང་རང་གི་མཚན་མ་
འཛིན་པའོ། །ཨོཾ་བཛྲ་སཏྭཱ་ཡ་ན་མཿསྭཱ་ཧཱ། ཨོཾ་བཛྲ་རཱ་ཛཱ་ཡ་ན་མཿསྭཱ་ཧཱ། ཨོཾ་བཛྲ་རཱ་གཱ་ཡ་ན་མཿསྭཱ་ཧཱ། ཨོཾ་བཛྲ་སཱ་དྷ་བེ་ན་མཿསྭཱ་ཧཱ། ཨོཾ་བཛྲ་རཏྣཱ་ཡ་ན་མཿསྭཱ་ཧཱ། ཨོཾ་བཛྲ་ཏེ་ཛཱ་ཡ་ན་མཿསྭཱ་ཧཱ། ཨོཾ་བཛྲ་ཀེ་ཏ་བེེ་ན་མཿསྭཱ་ཧཱ། ཨོཾ་བཛྲ་ཧ་སཱ་ཡ་ན་མཿསྭཱ་ཧཱ། ཨོཾ་བཛྲ་དྷརྨཱ་ཡ་ན་མཿསྭཱ་ཧཱ།

ཨོཾ་བཛྲ་ཏཱིཀྵྞཱ་ཡ་ན་མཿསྭཱ་ཧཱ། ཨོཾ་བཛྲ་ཧེ་ཏ་བེ་ན་མཿསྭཱ་ཧཱ། ཨོཾ་བཛྲ་བྷཱ་ཥཱ་ཡ་ན་མཿསྭཱ་ཧཱ། ཨོཾ་བཛྲ་ཀརྨ་ཎེ་ན་མཿསྭཱ་ཧཱ། ཨོཾ་བཛྲ་རཀྵཱ་ཡ་ན་མཿསྭཱ་ཧཱ། ཨོཾ་བཛྲ་ཡཀྵཱ་ཡ་ན་མཿསྭཱ་ཧཱ། ཨོཾ་བཛྲ་སནྡྷཱ་ཡ་ན་མཿསྭཱ་ཧཱ། དེ་བཞིན་དུ་བཞི་པ་ལ་རེ་མིག་ཉི་ཤུ་རྩ་བཞི་སྟེ། དང་པོ་དབང་ལྡན་ནས་རྡོ་རྗེ་
དྲི་མ་དང་། བྱམས་པ་དང་། དོན་ཡོད་མཐོང་དང་། རྡོ་རྗེ་ལྕགས་ཀྱུ་དང་། ངན་སོང་ཀུན་འཇོམས་དང་། མྱ་ངན་དང་མུན་པ་ཐམས་ཅད་འཇོམས་པའི་བློ་གྲོས་རྣམས་སོ། །དང་པོ་མེ་ནས་རྡོ་རྗེ་བདུག་སྤོས་མ་དང་། སྤོས་ཀྱི་གླང་པོ་དང་། དཔའ་བར་འགྲོ་བ་དང་། རྡོ་རྗེ་ཞགས་
པ་དང་། ནམ་མཁའ་མཛོད་དང་། ཡེ་ཤེས་ཏོག་རྣམས་སོ། །དང་པོ་བདེན་བྲལ་ནས་རྡོ་རྗེ་མེ་ཏོག་མ་དང་། བདུད་རྩི་འོད་དང་། ཟླ་འོད་དང་། རྡོ་རྗེ་རྒྱས་པ་དང་། བཟང་སྐྱོང་དང་། དྲ་བ་ཅན་གྱི་འོད་རྣམས་སོ། །དང་པོ་རླུང་ནས་རྡོ་རྗེ་མར་མེ་མ་དང་། རྡོ་རྗེ་སྙིང་པོ་དང་། མི་ཟད་པའི་
བློ་གྲོས་དང་། རྡོ་རྗེ་འབེབས་པ་དང་། སྤོབས་པ་བརྩེགས་པ་དང་། ཀུན་དུ་བཟང་པོ་རྣམས་ཏེ། སྣ་ཚོགས་དང་། སེར་པོ་དང་། གསེར་དང་། དཀར་པོ་དང་། སྐྱ་བོ་དང་། དཀར་སྐྱ་དང་། དཀར་པོ་དང་། སྔོན་པོ་དང་། དཀར་པོ་དང་། ནག་པོ་དང་། སྐྱ་བོ་དང་། སྔོན་
པོ་དང་། སེར་པོ་དང་། དཀར་པོ་དང་། སྐྱ་བོ་དང་། དམར་པོ་དང་། དམར་པོ་དང་། དམར་པོ་དང་། ནམ་མཁའ་དང་། ནམ་མཁའ་དང་། དཀར་པོ་དང་། སྣ་ཚོགས་དང་། དམར་པོ་དང་། སེར་པོའི་ཁ་དོག་རྣམས་སོ། །རྡོའི་དུང་དང་། ཀླུ་ཤིང་གི་མེ་ཏོག་དང་། ཆུ་སྐྱེས་ཀྱི་སྤྱན་དང་།
ལྕགས་ཀྱུ་དང་། ལྕགས་ཀྱུ་དང་། དབྱུག་པ་དང་། པོག་ཕོར་དང་། དྲིའི་དུང་དང་། རལ་གྲི་དང་། ཞགས་པ་དང་། དམ་པའི་ཆོས་དང་། གཏེར་གྱི་རྒྱལ་མཚན་དང་། མེ་ཏོག་གི་ཟ་མ་ཏོག་དང་། བུམ་པ་དང་། ཟླ་བ་དང་། རིན་པོ་ཆེའི་ལྕགས་སྒྲོག་དང་། རིན་པོ་ཆེ་དང་། དྲ་
བ་དང་། མར་མེའི་སྡོང་བུ་དང་། རྡོ་རྗེ་དང་། བུམ་པ་དང་། རྡོ་རྗེ་དང་། རྡོ་རྗེའི་དྲིལ་བུ་དང་། མཛུབ་མོ་འཕེན་པའི་ཚུལ་དང་། རིན་པོ་ཆེའི་སྙེ་མ་རྣམས་ཕྱག་རྣམས་ནའོ། །སེམས་དཔའི་སྐྱིལ་ཀྲུང་གིས་བཞུགས་པའོ། །དེ་ལ་འདིར་ཡང་མཆོད་པའི་སྔགས་ནི་གོ་རིམས་ཇི་ལྟ་བ་

བཞིན་དུ། ཨོཾ་བཛྲ་དྷཱུ་པཱ་ཡཻ་ན་མཿསྭཱ་ཧཱ། ཨོཾ་བཛྲ་པུཥྤཱ་ཡཻ་ན་མཿསྭཱ་ཧཱ། ཨོཾ་བཛྲ་དཱི་པཱ་ཡཻ་ན་མཿསྭཱ་ཧཱ། ཨོཾ་བཛྲ་གནྡྷཱ་ཡཻ་ན་མཿསྭཱ་ཧཱ། ཨོཾ་བཛྲ་མཻ་ཏྲེ་ཡ་སྥ་ར་ཎཱ་ཡ་ན་མཿསྭཱ་ཧཱ། ཨོཾ་ཨ་མོ་གྷ་དཪྴི་ནེ་ན་མཿསྭཱ་ཧཱ། ཨོཾ་སརྦ་པཱ་པཾ་ཛ་ཧཱ་ཡ་ན་མཿསྭཱ་ཧཱ། ཨོཾ་སརྦ་ཤོ་ཀ་ཏ་མོ་
ནིརྒྷ་ཏཱ་ཡ་ན་མཿསྭཱ་ཧཱ། ཨོཾ་གནྡྷ་ཧསྟི་ནེ་ན་མཿསྭཱ་ཧཱ། ཨོཾ་ཤཱུ་རཾ་ག་མཱ་ཡ་ན་མཿསྭཱ་ཧཱ། ཨོཾ་ག་ག་ན་གཉྫཱ་ཡ་ན་མཿསྭཱ་ཧཱ། ཨོཾ་ཛྙཱ་ན་ཀེ་ཏ་བེ་ན་མཿསྭཱ་ཧཱ། ཨོཾ་ཨ་མཱི་ཏ་པྲ་བྷཱ་ཡ་ན་མཿསྭཱ་ཧཱ། ཨོཾ་ཙནྡྲ་པྲ་བྷཱ་ཡ་ན་མཿསྭཱ་ཧཱ། ཨོཾ་བྷ་དྲ་པཱ་ལཱ་ཡ་ན་མཿསྭཱ་ཧཱ། ཨོཾ་ཛཱ་ལ་ནཱི་པྲ་བྷཱ་ཡ་ན་མཿསྭཱ་ཧཱ། ཨོཾ་བཛྲ་
གརྦྷཱ་ཡ་ན་མཿསྭཱ་ཧཱ། ཨོཾ་ཨཀྵ་ཡ་མ་ཏ་ཡེ་ན་མཿསྭཱ་ཧཱ། ཨོཾ་པྲ་ཏི་བྷ་ན་ཀུ་ཊཱ་ཡ་ན་མཿསྭཱ་ཧཱ། ཨོཾ་ས་མནྟ་བྷ་དྲཱ་ཡ་ན་མཿསྭཱ་ཧཱ། ཨོཾ་བཛྲ་ཨཾ་ཀུ་ཤཱ་ཡ་ན་མཿསྭཱ་ཧཱ། ཨོཾ་བཛྲ་པཱ་ཤཱ་ཡ་ན་མཿསྭཱ་ཧཱ། ཨོཾ་བཛྲ་སྥོ་ཊཱ་ཡ་ན་མཿསྭཱ་ཧཱ། ཨོཾ་བཛྲ་ཨཱ་བེ་ཤཱ་ཡ་ན་མཿསྭཱ་ཧཱ། དེ་ནས་ལྔ་པ་ལ་རེ་མིག་སུམ་ཅུ་
རྩ་གཉིས་སོ། །དང་པོ་དབང་ལྡན་ནས་བརྒྱད་ནི་གོ་རིམས་བཞིན་དུ་དབང་ཕྱུག་ཆེན་པོ་དང་གཙུག་ཏོར་འཁོར་ལོས་སྒྱུར་བ་དང་། ཚངས་པ་དང་། དབང་པོ་དང་། ཉི་མ་དང་། ལག་པ་དང་། རྡོ་རྗེ་དབྱུག་པ་དང་། རྡོ་རྗེ་འབར་བའི་ཉི་མ་རྣམས་སོ། །དེ་བཞིན་དུ་དང་པོ་མེ་ནས་རེ་མིག་
བརྒྱད་ལ་མེ་དང་། རྡོ་རྗེ་ས་འོག་དང་། སྒྲ་གཅན་དང་། མིག་དམར་དང་། གཤིན་རྗེ་དང་། གཞན་གྱིས་མི་ཐུབ་པ་དང་། རྡོ་རྗེ་དུས་དང་། ལྷ་མ་ཡིན་རྣམས་སོ། །དེ་བཞིན་དུ་དང་པོ་བདེན་བྲལ་ནས་རེ་མིག་བརྒྱད་ལ་མཚན་མོ་སྤྱོད་པ་དང་། འོག་གི་ཀླུ་དང་། ས་དང་། རྡོ་རྗེ་གཙུག་ཏོར་དང་།
ཆུ་བདག་དང་། པ་བ་སངས་དང་། ཏོག་དང་། སྤེན་པ་རྣམས་སོ། །དེ་བཞིན་དུ་དང་པོ་རླུང་ནས་རེ་མིག་བརྒྱད་ལ་རླུང་དང་། ནག་པོ་ཆེན་པོ་དང་། ཕུར་བུ་དང་། རྣམ་ཐོས་སྲས་དང་། ཟླ་བ་དང་། བདུད་རྩི་འཁྱིལ་པ་དང་། རྡོ་རྗེ་ཧཱུྃ་མཛད་དང་། རྡོ་རྗེ་འཇིགས་པ་རྣམས་ཏེ། དཀར་
པོ་དང་། སྐྱ་བོ་དང་། གསེར་དང་། སེར་པོ་དང་། དམར་པོ་དང་། གསེར་དང་། སྔོན་པོ་དང་། དུད་ཀ་དང་། དམར་པོ་དང་། ནག་པོ་དང་། སྔོན་པོ་དང་། དམར་པོ་དང་། ནག་པོ་དང་། སེར་པོ་དང་། དཀར་པོ་མ་ཡིན་པ་དང་། སེར་པོ་དང་། ནག་པོ་དང་། དཀར་པོ་

དང་། སེར་པོ་དང་། དམར་པོ་དང་། དཀར་པོ་དང་། སྐྱ་བོ་དང་། སྣ་ཚོགས་དང་། དུད་ཀ་དང་། ལྗང་གུ་དང་། ནག་པོ་དང་། སེར་པོ་དང་། གསེར་དང་། དཀར་པོ་དང་། སྔོ་བསངས་དང་། སྔོན་པོ་དང་། ནག་པོའི་ཁ་དོག་རྣམས་སོ། །དེ་ནས་རྡོ་རྗེ་ཧཱུྃ་མཛད་དང་། རྡོ་རྗེ་དབྱུག་པ་དང་།
གཞན་གྱིས་མི་ཐུབ་པ་དང་། རྡོ་རྗེ་གཙུག་ཏོར་དང་། བདུད་རྩི་འཁྱིལ་པ་དང་། མེའི་ཉི་མ་དང་། རྡོ་རྗེ་དུས་དང་། ནག་པོ་ཆེན་པོ་དང་། རྡོ་རྗེ་འཇིགས་པ་དང་། རྡོ་རྗེ་ས་འོག་དང་། གཙུག་ཏོར་འཁོར་ལོས་སྒྱུར་བ་ཇི་སྙེད་པ་མཆོད་པར་བྱའོ། །དེའི་རྗེས་སུ་ཉི་མ་ལ་སོགས་པ་རྣམས་སོ། །དེའི་
ཕྱི་ནས་བརྒྱ་བྱིན་ལ་སོགས་པ་རྣམས་སོ། །དེ་ལ་མྱུར་དུ་སྣ་ཚོགས་ཆུ་སྐྱེས་དང་ཉི་མ་ལ་འཇིགས་བྱེད་དང་། དུས་མཚན་མོ་གཡས་བརྐྱང་གི་ཞབས་ཀྱིས་མནན་པ་ཁྲོ་བོ་བསྐལ་པའི་མེ་འབར་བ་ལྟར་གསལ་བ་བཞིན་མི་སྡུག་པ་མཆེ་བ་གཙིགས་པ་འཇིགས་ཤིང་སྨིན་མ་འཁྱོག་པོ་
བསྡུས་པ་དམར་ཞིང་ཟླུམ་པའི་སྤྱན་གསུམ་མངའ་བ་ཐོད་པ་ལྔས་དབུ་ལ་བརྒྱན་པ་མགོ་བོ་རློན་པའི་ཕྲེང་བ་དང་ལྡན་པའོ། །ཕྱག་རྒྱ་དྲུག་དང་ལྡན་པ་ཀླུ་བརྒྱད་ཀྱི་རྒྱན་གྱིས་སྤྲས་པ། འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་དང་། རྡོ་རྗེ་དང་། རྡོ་རྗེ་དྲིལ་བུ་བསྣམས་པའི་
རྡོ་རྗེ་ཧཱུྃ་མཛད་རྣམ་པར་བསྒོམ་པར་བྱའོ། །ཨོཾ་བཛྲ་ཧཱུྃ་ཀ་རཱ་ཡ་ན་མཿསྭཱ་ཧཱ། རྡོ་རྗེ་དབྱུག་པ་ལ་སོགས་པ་རྣམས་ནི་ཉི་མའི་སྟེང་དུ་གཡས་བརྐྱང་གིས་བཞུགས་པ། ཕྱག་གཡོན་པར་སྙིང་གར་སྡིགས་མཛུབ་ཀྱིས་ཞགས་པ་འཛིན་པ། གཡས་པ་རྣམས་ན་རྡོ་རྗེ་ཐོ་བ་དང་།
རྡོ་རྗེས་མཚན་པའི་དབྱུག་པ་དང་། པདྨ་དང་། སྣ་ཚོགས་རྡོ་རྗེ་དང་། ལྕགས་ཀྱུ་དང་། གཏུན་ཤིང་དང་། རྩེ་གསུམ་དང་། རལ་གྲི་དང་། དགྲ་སྟ་དང་། འཁོར་ལོ་རྣམས་བསྣམས་པའོ། །ལྷག་མ་རྣམས་ནི་རྡོ་རྗེ་ཧཱུྃ་མཛད་ཀྱི་རང་བཞིན་ནོ། །ཨོཾ་བཛྲ་དཎྜཱ་ཡ་ན་མཿསྭཱ་ཧཱ།
ཨོཾ་བཛྲ་ཨ་པ་རཱ་ཛི་ཏཱ་ཡ་ན་མཿསྭཱ་ཧཱ། ཨོཾ་བཛྲོཥྞཱི་ཥཱ་ཡ་ན་མཿསྭཱ་ཧཱ། ཨོཾ་བཛྲ་ཨ་མྲྀ་ཏ་ཀུཎྜ་ལི་ནེ་ན་མཿསྭཱ་ཧཱ། ཨོཾ་ཨ་ན་ལཱརྐྐཱ་ཡ་ན་མཿསྭཱ་ཧཱ། ཨོཾ་བཛྲ་ཀཱ་ལཱ་ཡ་ན་མཿསྭཱ་ཧཱ། ཨོཾ་མ་ཧཱ་ཀཱ་ལཱ་ཡ་ན་མཿསྭཱ་ཧཱ། ཨོཾ་བཛྲ་གྷོ་ཥཱ་ཡ་ན་མཿསྭཱ་ཧཱ། ཨོཾ་པཱ་ཏཱ་ལཱ་ཡ་ན་མཿསྭཱ་ཧཱ། ཨོཾ་

ཨུཥྞཱི་ཥ་ཙཀྲ་བིརྟ་ནེ་ན་མཿསྭཱ་ཧཱ། རྟ་བདུན་གྱི་ཤིང་རྟི་ལ་ཉི་མའོ། །ཕྱག་གཡས་ན་པདྨ་དང་གཡོན་ན་པདྨ་ལ་ཉི་མའི་དཀྱིལ་འཁོར་རོ། །ངང་པའི་སྟེང་དུ་ཟླ་བའོ། །གཡས་ན་རྡོ་རྗེ་དང་གཡོན་ན་པདྨ་ལ་གནས་པའི་ཟླ་བའོ། །ར་ལ་མིག་དམར་རོ། །གཡས་
ན་རྡོ་རྗེ་གཡོན་ན་མི་བཟུང་ནས་ཟ་བའོ། །པདྨ་ལ་ལག་པའོ། །མདའ་དང་གཞུ་འཛིན་པའོ། །སྦལ་པ་ལ་ཕུར་བུའོ། །བགྲང་ཕྲེང་དང་། སྤྱི་བླུགས་འཛིན་པའོ། །པདྨ་ལ་པ་བ་སངས་སོ། །བགྲང་ཕྲེང་དང་སྤྱི་བླུགས་འཛིན་པའོ། །རུས་སྦལ་ལ་སྤེན་པའོ། །ལག་པ་
གཡས་ན་རྡོ་རྗེ་དང་། གཡོན་ན་དབྱུག་པའོ། །སྒྲ་གཅན་སྤྲིན་གྱི་སྟེང་ན་གནས་པ་ལུས་ཕྱེད་པ་ཟླ་བ་དང་ཉི་མའི་དཀྱིལ་འཁོར་འཛིན་པའོ། །མཇུག་རིངས་ནི་ཁྲོ་བོ་པདྨ་ལ་གནས་པ་རལ་གྲི་དང་ཞགས་པ་འཛིན་པའོ། །ཨོཾ་སཱུརྱཱ་ཡ་ན་མཿསྭཱ་ཧཱ། ཨོཾ་ཤི་ཏཾ་ཤ་བཻ་ན་མཿསྭཱ་ཧཱ། ཨོཾ་རཀྟཱཾ་
ག་ཀུ་མཱ་རཱ་ཡ་ན་མཿསྭཱ་ཧཱ། ཨོཾ་བུ་དྷཱ་ཡ་ན་མཿསྭཱ་ཧཱ། ཨོཾ་བྷོ་གཱ་སྱ་དཱ་ཡ་ན་མཿསྭཱ་ཧཱ། ཨོཾ་ཨ་སུ་ར་ཨུཏྟ་མཱ་ཡ་ན་མཿསྭཱ་ཧཱ། ཨོཾ་ཀྲྀཥྞ་བརྞཱ་ཡ་ན་མཿསྭཱ་ཧཱ། ཨོཾ་ཨ་མྲྀ་ཏ་པྲི་ཡཱ་ན་མཿསྭཱ་ཧཱ། ཨོཾ་ཛྱོ་ཏི་ཀེ་ཏ་བེ་ན་མཿསྭཱ་ཧཱ། དེ་ནས་དབང་པོ་ནི་ས་སྲུང་གྱི་བུ་ལ་ཞོན་པ་གཡས་ན་རྡོ་རྗེ་དང་
གཡོན་ན་གཤོལ་ལོ། །གཤིན་རྗེ་ནི་མ་ཧེ་ལ་གནས་པ་དབྱུག་པ་དང་མདུང་འཛིན་པའོ། །ཆུ་བདག་ནི་ཆུ་སྲིན་ལ་ཞོན་པ་གདེངས་ཀ་བདུན་དང་ལྡན་པ་སྤྲུལ་དང་དུང་འཛིན་པའོ། །ལུས་ངན་པོ་ནི་མི་ལ་ཞོན་པ་ལྕགས་ཀྱུ་དང་དབྱུག་པ་འཛིན་པའོ། །མེ་ནི་ར་ལ་ཞོན་པ་དགང་གཟར་དང་སྤྱི་
བླུགས་ཐོགས་པའོ། །སྲིན་པོའི་བདག་པོ་ནི་རོ་ལ་ཞོན་པ་རལ་གྲི་དང་ཕུབ་ཐོགས་པ། རླུང་ནི་རི་དྭགས་ལ་ཞོན་པ་རླུང་གི་བ་དན་ཐོགས་པའོ། །དབང་ལྡན་ནི་ཁྱུ་མཆོག་ལ་ཞོན་པ་རྩེ་གསུམ་དང་ཐོད་པ་ཐོགས་པའོ། །ལྷ་མ་ཡིན་ནི་འབོལ་སྟན་ལ་གནས་པ་རལ་གྲི་དང་ཕུབ་ཐོགས་པ།
ཀླུ་ནི་པདྨ་ལ་གནས་པ་ལ་ལག་པ་ཐལ་མོ་སྦྱར་བའོ། །ས་ནི་པདྨ་ལ་གནས་པ་བདུད་རྩིའི་བུམ་པ་འཛིན་པའོ། །ཚངས་པ་ནི་ངང་པ་ལ་གནས་པ་གདོང་བཞི་པ་བགྲང་ཕྲེང་དང་སྤྱི་བླུགས་འཛིན་པའོ། །ཨོཾ་ཨ་ཁཎྜ་ལཱ་ཡ་ན་མཿསྭཱ་ཧཱ། ཨོཾ་ཡ་མཱ་ཡ་ན་མཿསྭཱ་ཧཱ། ཨོཾ་བ་རུ་ཎཱ་ཡ་ན་མཿསྭཱ་ཧཱ།

ཨོཾ་ཀུ་བེ་རཱ་ཡ་ན་མཿསྭཱ་ཧཱ། ཨོཾ་ཨགྣ་ཡེ་ན་མཿསྭཱ་ཧཱ། ཨོཾ་རཱཀྵ་སཱ་དྷི་པ་ཏ་ཡེ་ན་མཿསྭཱ་ཧཱ། ཨོཾ་བཱ་ཡ་བེ་ན་མཿསྭཱ་ཧཱ། ཨོཾ་ཨཱི་ཤ་ནཱ་ཡ་ན་མཿསྭཱ་ཧཱ། ཨོཾ་ཨ་སུ་རཱ་ཡ་ན་མཿསྭཱ་ཧཱ། ཨོཾ་ནཱ་གཱ་ཡ་ན་མཿསྭཱ་ཧཱ། ཨོཾ་པྲྀ་ཐྭི་ནེ་ན་མཿསྭཱ་ཧཱ། ཨོཾ་བྲཧྨ་ཎེ་ན་མཿསྭཱ་ཧཱ། དེའི་རྗེས་སུ་ཐང་ཤིང་དང་། ལ་གུ་
ཙ་དང་། བ་ཀུ་ལ་དང་། ཙམ་པ་ཀ་ལ་སོགས་པ་དྲི་ཞིམ་པོ་རོ་བསྐ་བའི་ཤིང་ཡམ་ཤིང་ངོ་། །རྗེའུ་རིགས་ཀྱི་མེ་ལ་འདོད་པའི་མེ་རབ་ཏུ་སྦར་ཏེ་ཉི་མ་སར་པ་འདྲ་བ་ཞལ་གཅིག་སྤྱན་གསུམ་པ་ཞགས་པ་དང་ལྕགས་ཀྱུ་དང་དབྱུག་པ་དང་། སྤྱི་བླུགས་འཛིན་པ་རལ་པའི་ཚོགས་མང་པོས་སྤྱི་བོར་ཉེ་
བར་བརྒྱན་པ། སྐྱེ་བོ་དཔག་ཏུ་མེད་པའི་བདེ་བ་ཉེ་བར་འབེབས་པར་བྱེད་པ་ཧྲཱིཿཡིག་ལས་ཡང་དག་པར་རབ་ཏུ་བྱུང་བ་ནི་འདོད་པའི་ཞེས་སོ། །ཡེ་ཤེས་ཀྱི་མེ་སྤྱན་དྲངས་ནས་མཆོད་ཡོན་ཕུལ་ནས། དམ་ཚིག་གི་མེ་ལ་བཞུགས་པར་བྱའོ། །སེང་ལྡེང་དང་། ར་བ་ད་ར་དང་།
བེ་ཀངྐ་དང་། ཨ་ཤོ་ཀ་དང་། ཀཱསྨ་རི་དང་། པ་ལཱ་ཥ་ལ་སོགས་པའི་ཡམ་ཤིང་ངོ་། །པདྨ་དང་། ཨུཏྤ་ལ་དང་། དྲི་ཞིམ་པོའི་མེ་ཏོག་ལ་སོགས་པ་དང་། ཏིལ་ལ་སོགས་པའི་འབྲུ་རྣམས་ཀྱིས་སྦྱིན་སྲེག་བྱའོ། །སྔགས་ནི་ཨོཾ་ཀཱ་མཱ་གྣ་ཡེ་སྭཱ་ཧཱ། དེ་ནས་ཁང་པ་ཐམས་
ཅད་ཀྱི་ལྷ་རྣམས་ཡིད་ཀྱིས་ནམ་མཁའ་ལ་བཞུགས་སུ་གསོལ་ལོ། །དེ་ལ་ཡང་ལས་བྱེད་པ་ནི་རྡོ་རྗེ་གནོད་སྦྱིན་གྱི་རྣམ་པ་ལག་ན་རྡོ་རྗེས་མཚན་པའི་ཏོག་ཙེ་ཐོགས་པ་ཧཱུྃ་མཛད་རྫོགས་པའི་ཤིན་ཏུ་དཔའ་བ་བསྒོམ་པར་བྱའོ། །རྡོ་རྗེ་གནོད་སྦྱིན་གྱི་སྔགས་ཀྱིས་བྱིན་གྱིས་བརླབ་པར་
བྱའོ། །ཚིམ་པར་བྱས་ནས་ཡང་དབང་པོ་དང་ནོར་གྱི་དབང་ཕྱུག་གི་ཕྱོགས་སུ་གདོང་ཕྱོགས་ཏེ་ལག་པ་གཡོན་པས་ཕྱི་ནས་བཟུང་སྟེ་མྱ་ངན་དང་མུན་པ་ཐམས་ཅད་འཇོམས་པའི་བློ་གྲོས་ཀྱི་རེ་མིག་ཏུ་བརྐོ་སྟེ་ཁམ་བཞི་བརྐོ་བར་བྱའོ། །སྔགས་ནི་ཨོཾ་གྷཱ་ཏ་ཡ་སརྦ་པཱ་པཾ་ནཱ་ཤཱ་ཡ་ཧཱུྃ་ཧཱུྃ་
ཕཊ། དེའི་ས་གསེར་ལ་སོགས་པའི་སྣོད་དུ་བླངས་ཏེ་ཞི་བ་ལ་གཏོར་མ་དང་བཅས་ཏེ་མེའི་ཕྱོགས་ཀྱི་ཕྱི་རོལ་དུ་སྦྱིན་བདག་གིས་འཕང་བར་བྱའོ། །དེ་ནས་དེའི་དབུས་སུ་རྨ་ལྔ་གདོད་པར་བྱས་ཏེ་ས་དེ་ཁྱབ་པར་གཏོར་རོ། །དེ་ནས་རྨ་དྲུག་གདོད་པར་བྱའོ། །དེ་བཞིན་དུ་རྨ་བདུན་

བཏོད་པ་ལ་སོགས་པ་ནས་ཕྱོགས་དང་ཕྱོགས་མཚམས་ཐམས་ཅད་དུ་ལས་བྱེད་པས་བརྐོ་བར་བྱའོ། །པུས་ནུབ་ཙམ་སྦྱང་བར་བྱའོ། །པཎྜི་ཏ་ཆེན་པོ་རིགས་ཀྱི་སྦྱིན་པ་ཞེས་བྱ་བས་མཛད་པའི་བྱ་བ་བསྡུས་པ་ལས་རབ་ཏུ་བྱེད་པ་གཉིས་པའོ།། །།དེ་
ནས་བཏབ་ནས་ཛཱཾ་གུ་ལཱི་ལ་མཆོད་པར་བྱའོ། །ཁང་ས་ལ་ཐིག་ལེགས་པར་བཏབ་ནས་འབད་པས་ལྟོ་འཕྱེ་བརྟག་པར་བྱའོ། །པུས་ནུབ་ཙམ་དུ་སྦྱངས་པའི་ས་གཞིའི་ལྷོ་ཕྱོགས་ནས་བྱང་དུ་མངོན་པར་ཕྱོགས་ཏེ་གནས་ནས་རང་གི་ལྷག་པའི་ལྷའི་རྣལ་འབྱོར་བྱས་ཏེ། དེ་ནས་
བདག་ཉིད་དོན་ཡོད་གྲུབ་པའི་གཟུགས་སུ་རྣམ་པར་བསྒོམ་པར་བྱའོ། །གླང་རྨོ་བའི་སྐྱེས་བུ་ནི་རྡོ་རྗེ་ལས་ཀྱི་རང་བཞིན་ནོ། །ཨོཾ་བཛྲ་ཀརྨ་ཀཾ་ཞེས་པ་འདིས་བྱིན་གྱིས་བརླབ་པར་བྱའོ། །དེ་བཞིན་དུ་གླང་གཅིག་ནི་ཞང་པོ་སྟེ་རྡོ་རྗེ་གནོད་སྦྱིན་གྱི་རང་བཞིན་ནོ། །ཨོཾ་བཛྲ་ཡཀྵ་ཧཱུྃ་ཞེས་
པ་འདིས་བྱིན་གྱིས་བརླབ་པར་བྱའོ། །དེ་བཞིན་དུ་གླང་དེའི་སྲིང་མོའི་བུ་ནི་རྡོ་རྗེ་སྲུང་བའི་རང་བཞིན་ནོ། །ཨོཾ་བཛྲ་རཀྵ་ཧཱུྃ་ཞེས་པས་བྱིན་གྱིས་བརླབ་པར་བྱའོ། །དེ་བཞིན་དུ་གསེར་གྱི་གཤོལ་ནི་རྡོ་རྗེ་མཚམས་ཀྱི་རང་བཞིན་ནོ། །ཨོཾ་བཛྲ་སནྡྷི་བཾ་ཞེས་བྱ་བའི་སྔགས་
འདིས་བྱིན་གྱིས་བརླབ་པར་བྱའོ། །དེ་ནས་དབང་ལྡན་དུ་ཁ་ཕྱོགས་ཏེ་བཞུགས་ནས་མཆོད་པ་ལ་སོགས་པ་བྱས་ཏེ། ནས་བཏབ་ནས་ས་གཞི་ལ་གསེར་གྱི་གཤོལ་གྱིས་ཁྱུ་མཆོག་དེ་དག་གིས་རྨོ་བར་བྱའོ། །དེ་ནས་ནྱ་གྲོ་དྷ་དང་། ཨུ་དུམྦཱ་ར་དང་། ཙམ་པ་ཀ་ལ་སོགས་
པའི་ཤིང་སྐམ་པོས་དགེ་འདུན་གྱི་ཚང་བང་ནས་མེ་བླངས་ནས་མེ་རབ་ཏུ་སྦར་བར་བྱའོ། །སེམས་ཅན་ཐམས་ཅད་ལ་བྱམས་པ་དང་བདེ་བས་གང་བར་བྱ་བའི་སེམས་དང་ཕུན་སུམ་ཚོགས་པ་དང་། སྟོབས་དང་ནད་མེད་པ་དང་། རྒྱས་པར་བྱ་བའི་ཕྱིར་དབང་ཆེན་གྱི་
དཀྱིལ་འཁོར་གྲུ་བཞི་སེར་པོ་ལ་གནས་པའི་ན་བཟའ་སེར་པོས་བརྒྱན་ཅིང་དབྱུག་པ་དང་ཕྲེང་བ་དང་། སྤྱི་བླུགས་དང་། མཆོག་སྦྱིན་དང་ཕྱག་བཞིའོ། །སྤྱན་གསུམ་སྐུ་མདོག་སེར་པོ་ཞལ་གཅིག་པ་མཆོད་ཕྱིར་ཐོགས་དང་ལྡན་པ་རལ་པའི་ཐོར་ཚུགས་ཅན། ཧཱུྃ་ཡིག་

སེར་པོ་ལས་ཡང་དག་པར་བྱུང་བའི་དབང་ཆེན་ལ་མེ་འབར་བའི་མེ་ལ་དེའི་དབུས་སུ་ཡེ་ཤེས་ཀྱི་མེ་བསམ་ཞིང་བཞུགས་པར་བྱའོ། །ཞལ་བསིལ་བ་ལ་སོགས་པ་ཕུལ་ནས་ཡང་དག་པར་མཆོད་ཅིང་བསྟོད་པར་བྱའོ། །ས་མའི་ཡམ་ཤིང་དང་རག་ཆུང་དང་། ཨ་མྲ་དང་།
བིལ་བ་དང་། ཀནྠ་ཀ་ཕ་ལ་དང་། ཀརྞི་ཀ་ལ་སོགས་པའི་མེ་ཏོག་སེར་པོ་དང་། ཞོ་དང་བུ་རམ་གྱི་ཟན་དང་། ཏིལ་དང་འབྲས་ཡོས་དང་། ཀ་ར་དང་འབྲས་ལ་སོགས་པའི་རིམ་པས་སྦྱིན་སྲེག་བྱའོ། །ཨོཾ་མ་ཧེནྡྲ་ཨགྣ་ཡེ་སྭཱ་ཧཱ། ཞག་གསུམ་དང་ལྔ་དང་བདུན་
གྱིས་ནས་རྣམས་སྐྱེས་ན་མཆོག་དང་འབྲིང་དང་དམན་པའི་ས་གཞིར་ཤེས་པར་བྱའོ། །གང་སྐྱེས་པའི་ནས་སྔོན་པོའི་གནས་སྐབས་སུ་ལྷ་རྣམས་ཀྱི་ལོངས་སྤྱོད་དུ་བྱའོ། །དེའི་རྗེས་སུ་རང་གི་ལྷག་པའི་ལྷའི་རྣལ་འབྱོར་དང་ལྡན་པའི་སྔགས་པས་ཛཱཾ་གུ་ལཱིའི་མཆོད་པ་བྱས་
ནས་བརྩམ་མོ། །དེ་ནས་དབང་ལྡན་གྱི་ཕྱོགས་ཀྱི་ཆར་རྒྱར་ཁྲུ་དོ་གྲུ་བཞི་པ་དེའི་ཕྱེད་འོག་ཏུ་དོང་བརྐོ་བར་བྱའོ། །ཡང་དེའི་དབང་ལྡན་གྱི་ཕྱི་རོལ་དུ་དེའི་ཕྱེད་ཟླུམ་པོར་དོང་བྲུ་བར་བྱའོ། །དེ་གཉིས་ཀའི་ས་ལ་བ་ལང་གི་ལྕི་བས་བྱུག་པར་བྱའོ། །དེ་ལ་དོང་གྲུ་བཞི་པར་ལོ་མ་ཅན་གྱི་
ཤིང་ལ་བཅུག་ནས་བུམ་པའི་ཆུས་དགང་བར་བྱའོ། །ཛཱཾ་ལས་སྐྱེས་པའི་རྡོ་རྗེ་ཛཱཾ་གུ་ལཱི་སེར་མོ་སེར་པོ་དང་། ནག་པོ་དང་དཀར་པོའི་རྩ་བ་དང་། གཡས་དང་གཡོན་གྱི་ཞལ་གསུམ་མོ། །གདེངས་ཀ་རྒྱས་པ་བདུན་དང་ལྡན་པའི་རིན་པོ་ཆེའི་ཅོད་པན་ཅན་ཕྱག་དྲུག་གི་གཡས་
པ་དག་ན་རྡོ་རྗེ་དང་། པདྨ་འཛིན་པ་དང་། གཡོན་པ་དག་ན་གཞུ་དང་ཞགས་པ་དང་བཅས་པའི་སྡིགས་མཛུབ་དང་། རང་གི་ཐབས་ལ་འཁྱུད་པ། གོས་སྣ་ཚོགས་དང་ཀླུའི་རྒྱན་གྱིས་བརྒྱན་པ། སྣ་ཚོགས་ཆུ་སྐྱེས་དང་ཉི་མའི་སྟན་ལ་འོད་ཀྱིས་གནས་པའོ། །ཛཱཾ་གུ་ལཱི་
བསྒོམས་ཏེ་ཡེ་ཤེས་སེམས་དཔའ་སྤྱན་དྲངས་ཏེ་མཆོད་ཡོན་ལ་སོགས་པ་ཕུལ་ནས་དེ་བཞིན་དུ་ཞུ་བར་བསམ་མོ། །མེ་ཏོག་དང་། སྤོས་དང་། མར་མེ་དང་། དྲི་དང་། ཞལ་ཟས་དང་། ཞོ་དང་། བུ་རམ་གྱི་ཟས་དང་། བདུད་རྩི་ལྔ་དང་། རིན་པོ་ཆེ་ལྔ་དང་། འབྲུ་ལྔ་དང་། དྲི་ལྔ་

དང་། ནཱ་ག་གེ་སར་དང་། དངུལ་ཆུ་དང་། ནས་དང་། ཏི