Luận tạng Tây Tạng (Tengyur) — Tập 57

ོ། །དེའི་དཔུང་རྒྱན་གྱིས་ཉེ་བར་མཚོན་པ་གང་ཡིན་པ་དེ་ནི་རྒྱལ་མཚན་གྱི་རྩེ་མོའི་དཔུང་རྒྱན་མའོ། །
དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྦྱིན་པ་སྟོན་པར་བྱེད་པའི་ཅུང་ཟད་འཛུམ་པ་ནི་བཞད་པ་སྟེ། དེ་འདི་ལ་མངའ་བས་ན་བཞད་པ་དང་ལྡན་མའོ། །ནོར་དང་། མི་འཇིགས་པ་དང་། བྱམས་པ་དང་། ཆོས་ཀྱི་སྦྱིན་པའི་རིན་པོ་ཆེ་ནི་རིན་པོ་ཆེའོ། །དེ་སྟོན་པར་བྱེད་པ་
དག་ལ་ཡང་རིན་པོ་ཆེའི་གཟུངས་ཞེས་བྱའོ། །རྡོ་རྗེ་པདྨོ་ནི་ཆུ་སྐྱེས་ཀྱི་མཚན་མ་གང་ལ་མངའ་བ་དེ་ནི་རྡོ་རྗེ་པདྨའོ། །ཀུན་ནས་འཛིན་ཅིང་དེ་བཞིན་དུ་ཉོན་མོངས་པ་དང་། ཤེས་བྱའི་སྒྲིབ་པ་འཇོམས་པར་བྱེད་པའི་གཟུངས་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ཀུན་དུ་འཛིན་
པས་ན་ཀུན་འཛིན་མའོ། །འཁོར་ལོ་ཐམས་ཅད་ནི་དཀྱིལ་འཁོར་ཐམས་ཅད་དེ། དེ་གང་ལ་མངའ་བ་དེ་ནི་འཁོར་ལོ་ཐམས་ཅད་མའོ། །ཆོས་ཐམས་ཅད་ནི་ངག་གི་སྤྲོས་པ་དང་བྲལ་བ་སྟེ། བྲག་ཅ་དང་འདྲའོ་ཞེས་བྱ་བའི་སྒྲ་རྣམས་སྟོང་དུ་ཟློས་ཤིང་མངོན་དུ་བྱེད་པ་གང་ཡིན་པ་

དེ་ནི་སྟོང་དུ་ཟློས་མའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་ཆོས་ཀྱི་རང་བཞིན་དེ་ལས་བྱུང་བའི་གཟུངས་ནི་ཆོས་ཀྱི་གཟུངས་རྣམས་སོ། །སངས་རྒྱས་ཀྱི་སྤྲུལ་པ་དང་སེམས་ཅན་གྱི་བྱ་བ་རྣམས་འགྲུབ་པའི་མཆོག་ཡིན་པས་ན། དངོས་གྲུབ་ཀྱི་གཙོ་མོའོ། །སངས་རྒྱས་ཉིད་འདོད་
པ་ཐམས་ཅད་ལ་ཕྱིར་མི་ལྡོག་པའི་བརྩོན་འགྲུས་ཀྱིས་བསྲུང་བའམ། དེའི་གཟུགས་ཀྱིས་བསྲུང་བས་ན་ཐམས་ཅད་སྲུང་བ་མའོ། །བགེགས་དང་ལོག་འདྲེན་ཐམས་ཅད་ལ་རེ་རེ་ཞིང་དྲག་པོའི་གཟུགས་བསྟན་ནས་མདངས་དང་གཟི་བརྗིད་འཕྲོག་པར་མཛད་པས་ན་མདངས་སླར་
འཕྲོག་མའོ། །དེ་བཞིན་ཉིད་ཀྱི་ཁུ་ཚུར་གྱིས་གཟུངས་ཐམས་ཅད་རྒྱས་འདེབས་པས་ན་གཟུངས་ཀྱི་ཕྱག་རྒྱའོ། །བརྩོན་འགྲུས་ཀྱི་ཕ་རོལ་ཏུ་ཕྱིན་པས་བྱང་ཆུབ་ཀྱི་སེམས་ལ་སོགས་པ་རྫོགས་པར་བྱེད་པ་ཉིད་ཀྱིས་སེམས་ཅན་ཐམས་ཅད་དུ་ཁྱབ་པ་ཉིད་ཀྱིས་ནི་ཐམས་ཅད་ཅེས་
བྱ་བ་ལ། དེའི་ངོ་བོ་ཉིད་མ་ཡིན་པའམ། དེ་ལས་བྱུང་བ་ཡིན་པས་ཐམས་ཅད་ཀྱི་གཟུངས་རྣམས་སོ། །རྡོ་རྗེ་གསང་བ་ནི་གཟུངས་ཀྱི་དཀྱིལ་འཁོར་ཏེ། དེའི་དམ་ཚིག་གི་ཕྱག་རྒྱ་བཞི་པོ་བཤད་དོ། །ཕྱག་རྒྱ་འདི་དག་ནི་རྡོ་རྗེ་སེམས་མ་ལ་སོགས་པ་ཡིན་ཏེ། གང་
གི་ཕྱིར་རྗེས་ཐོགས་ཉིད་ལ་ཕ་རོལ་ཏུ་ཕྱིན་པ་དེ་དག་ཉིད་ལས་ཞེས་གསུངས་ལ། དེ་དག་ཉིད་ལས་ཞེས་བྱ་བ་ནི་དཀྱིལ་འཁོར་ཆེན་པོ་ལས་གསུངས་པའི་རྡོ་རྗེ་སེམས་མ་ལ་སོགས་པ་ཡིན་ལ། རྡོ་རྗེའི་ཕ་རོལ་ཏུ་ཕྱིན་པ་ལ་སོགས་པ་ཞེས་བྱ་བའི་སྒྲས་ནི། རིན་པོ་ཆེ་དང་། ཆོས་
དང་། ལས་ཀྱི་ཕ་རོལ་ཏུ་ཕྱིན་པ་བསྡུའོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་གསང་བ་ནི་གཟུངས་ཀྱི་དཀྱིལ་འཁོར་རོ། །དེ་ཉིད་ནི་དམ་ཚིག་ཡིན་ལ། དེ་དག་ཏུ་གཟུངས་སྡུད་པའི་དམ་ཚིག་གི་ཕྱག་རྒྱ་རྣམས་ཏེ། གང་གི་ཕྱིར་དེ་རྣམས་རེ་རེའི་ཕྱག་རྒྱས་གཟུངས་
ཐམས་ཅད་ཡང་དག་པར་བསྡུས་པའོ། །དེ་རྣམས་གང་དུ་གཞག་པར་བྱ་ཞེ་ན། རྡོ་རྗེ་དབྱིངས་ཀྱི་དབང་ཕྱུག་མའི་དཀྱིལ་འཁོར་ཆེན་པོ་ཞེས་བྱ་བ་གསུངས་སོ། །རྡོ་རྗེ་གསང་བའི་མཆོད་པ་ནི་སྒེག་མོ་ལ་སོགས་པ་སྟེ། དེ་རྣམས་ཀྱི་དམ་ཚིག་གི་ཕྱག་རྒྱ་བཞི་པོ་བཤད་དོ། །དེ་

དག་ཉིད་དེ་ཞེས་བྱ་བ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་གསུངས་པའི་སྒེག་མོ་ལ་སོགས་པའི་མཚན་མའི་ཕྱག་རྒྱ་རྣམས་དགོད་དོ། །བདུག་པ་མ་ལ་སོགས་པ་དང་། རྡོ་རྗེ་འབེབས་པའི་བར་གྱི་སྙིང་པོ་རྣམས་ནི་འདིར་རྡོ་རྗེ་དབྱིངས་ཀྱི་དཀྱིལ་འཁོར་ཆེན་
པོར་གསུངས་པ་ཉིད་ཡིན་པར་ཤེས་པར་བྱའོ། །དེ་ནས་འདིར་རྡོ་རྗེ་འབེབས་པའི་བར་གྱི་མཚན་མའི་ཕྱག་རྒྱ་ཡང་དེ་རྣམས་ཉིད་དགོད་པར་བྱའོ། །འདིས་ནི་དེ་ནས་ཞེས་བྱ་བ་ནས་དགོད་དོ་ཞེས་བྱ་བའི་བར་གྱི་གཞུང་གིས་ནི་གཟུངས་ཀྱི་དཀྱིལ་འཁོར་གྱི་དཀྱིལ་འཁོར་རྒྱལ་པོ་མཆོག་
ཅེས་བྱ་བའི་ཏིང་ངེ་འཛིན་གཉིས་པ་བསྟན་པ་ཡིན་ནོ། །དེ་ནས་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པ་ནི་སྔ་མ་ཁོ་ན་བཞིན་དུ་ཤེས་པར་བྱའོ། །གཟུངས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་རྣམས་ནི། གཟུངས་ཀྱི་དཀྱིལ་འཁོར་དུ་དམ་
ཚིག་དང་དབང་བསྐུར་བ་ཐོབ་པ་རྣམས་ཀྱིས་བསྒྲུབ་པར་བྱ་བ་ཡིན་པས། དེ་རྣམས་ཀྱིས་ཕྱག་རྒྱ་ཆེན་པོ་ལ་སོགས་པ་བསྒྲུབ་པར་བྱ་བའི་ཕྱིར་དང་། སློབ་དཔོན་གྱི་ལས་ཀྱི་ཆོ་ག་དང་། སློབ་མ་གཞུག་པ་ལ་སོགས་པའི་ཆོ་ག་རྒྱས་པ་ནི། དེ་ནས་ཞེས་བྱ་བ་ལ་སོགས་པ་གསུངས་པ་
ཡིན་ནོ། །དེ་ནས་ཞེས་བྱ་བའི་སྒྲ་ནི་རྗེས་ཐོགས་ཉིད་ལ་སྟེ། གང་གི་ཞེ་ན། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པའི་རྣལ་འབྱོར་ཆེན་པོ་བྱས་ལ། གཟུངས་ཀྱི་རིག་པ་ཐམས་ཅད་རེ་རེ་ཞིང་བཟླས་བརྗོད་ཁྲི་བྱས་ལ། ཞག་བདུན་གྱི་བར་དུ་གཟུངས་ཀྱི་དཀྱིལ་
འཁོར་ལས་གསུངས་པའི་ཏིང་ངེ་འཛིན་གསུམ་བསྒོམས་པས་སོ། །རྡོ་རྗེ་གསང་བ་ཞེས་བྱ་བ་ལ་རྡོ་རྗེ་ནི་གཉིས་སུ་མེད་པའི་ཡེ་ཤེས་སེམས་དང་སེམས་ལས་བྱུང་བའོ། །གཟུངས་ཀྱི་རང་བཞིན་ཅན་གྱི་གསང་བ་ནི་རྡོ་རྗེ་གསང་བ་སྟེ། མིང་དེ་སྐད་ཅེས་བྱ་བའི་དཀྱིལ་འཁོར་
ཆེན་པོ་གང་ཡིན་པ་དེ་བཤད་པ་ནི་གསུངས་པའོ། །དེ་ལ་རྡོ་རྗེ་ཡང་ཡིན་ལ་ཆེན་པོ་ཡང་ཡིན་པས་ན་རྡོ་རྗེ་ཆེན་པོ་སྟེ། རྣམ་པར་སྣང་མཛད་ལ་སོགས་པ་ནས་རྡོ་རྗེ་འབེབས་པའི་བར་གྱི་གཟུངས་ཀྱི་ཚུལ་གྱིས་སེམས་དང་སེམས་ལས་བྱུང་བའི་མཆོད་རྟེན་ལ་སོགས་པ་ནས། རྡོ་རྗེ་

དྲིལ་བུའི་ཕྱག་རྒྱ་ནི་རྡོ་རྗེ་ཆེན་པོ་སྟེ། རྡོ་རྗེ་ཆེན་པོ་དེ་རྣམས་ཀྱི་དཀྱིལ་འཁོར་འདི་བཤད་པའོ། །འདིས་ནི་འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པའི་ལྷ་མོའི་གཟུགས་སྦ་བར་བྱ་བའི་ཕྱིར། མཆོད་རྟེན་ལ་སོགས་པ་ནས་རྡོ་རྗེ་དྲིལ་བུའི་བར་གྱི་ཕྱག་རྒྱ་
སྤྲུལ་པ་གང་ཡིན་པ་དེ་ནི་རྡོ་རྗེ་གསང་བའོ། །དེ་ཉིད་ནི་རྡོ་རྗེ་ཆེན་པོའོ། །དེ་རྣམས་ཀྱི་དཀྱིལ་འཁོར་གང་ཡིན་པ་དེ་ནི་རྡོ་རྗེ་གསང་བ་ཞེས་བྱ་བའི་རྡོ་རྗེ་ཆེན་པོའི་དཀྱིལ་འཁོར་རོ། །རྡོ་རྗེའི་དཀྱིལ་འཁོར་ཞེས་བྱ་བ་ལ་རྡོ་རྗེ་ནི་མཚན་མའི་ཕྱག་རྒྱ་རྣམས་སོ། །དཀྱིལ་འཁོར་དམ་པ་ནི་
མཆོག་སྟེ། དེ་རབ་ཏུ་བཤད་པར་བྱའོ། །ཇི་ལྟ་བུ་ཞེ་ན། རྡོ་རྗེ་དབྱིངས་དང་འདྲ་བས་ན། །ཞེས་བྱ་བ་གསུངས་ཏེ། སྤྲུལ་པའི་གཟུངས་ཀྱི་དཀྱིལ་འཁོར་ནི་འདིར་རྡོ་རྗེ་དབྱིངས་ཏེ་དེ་དང་འདྲའོ། །མིང་ཇི་སྐད་བྱ་ཞེ་ན། རྡོ་རྗེ་གསང་བ་ཞེས་བཤད་དོ་ཞེས་བྱ་བའོ། །དཀྱིལ་འཁོར་
ཆེན་པོའི་ཚུལ་དུ་ནི། །ཞེས་བྱ་བ་ནི། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་དབྱིབས་དང་འདྲ་བའོ། །དཀྱིལ་འཁོར་ཐམས་ཅད་བྲི་བར་བྱ། །ཞེས་བྱ་བ་ནི་ཕྱི་དང་ནང་དུ་བཅས་པ་བྲི་བར་བྱའོ། །དཀྱིལ་འཁོར་ཀུན་གྱི་དབུས་སུ་ནི། །ཞེས་བྱ་བ་ནི་རྡོ་རྗེ་དབྱིངས་ཀྱི་དབང་ཕྱུག་
མ་རྡོ་རྗེ་ཐུགས་ཀྱི་རང་གི་དབང་བསྐུར་བའི་མིང་བྲི་བ་ནི། དཀྱིལ་འཁོར་ཀུན་གྱི་དབུས་སུ་ནི། །ཞེས་བྱ་བའི་དོན་ཏོ། །སངས་རྒྱས་ཕྱག་རྒྱ་ཞེས་བྱ་བ་ནི། རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པ་སྟེ། དེ་རྣམས་ཀྱི་མཚན་མ་བྲི་བར་བྱའོ། །ཇི་ལྟར་བྲི་བར་བྱ་ཞེ་ན། མཆོད་
རྟེན་ཁྲི་ལ་ལེགས་འདུག་པ། །རྡོ་རྗེ་དབྱིངས་ཀྱི་དབང་མོར་བཤད། །ཅེས་བྱ་བ་གསུངས་ཏེ། དེ་ལ་ཁྲི་ནི་རིག་པའི་རྟེན་ཏེ། དེའི་སྟེང་དུ་ཇི་ལྟར་གྲགས་པའི་མཆོད་རྟེན་བྲི་བ་འདི་ནི་རྡོ་རྗེ་དབྱིངས་ཀྱི་དབང་མོ་ཞེས་བྱ་བ་བཅོམ་ལྡན་འདས་རྣམ་པར་སྣང་མཛད་ཀྱི་མཆོད་རྟེན་གྱི་
ཕྱག་རྒྱའོ། །འདི་སྐད་སྟོན་ཏེ། ཁ་ཁྱེར་གསུམ་པའི་རིག་པའི་གནས་ཀྱི་ཁྲི་བྲིས་ལ། དེའི་སྟེང་དུ་པདྨ་དང་། དེའི་ཡང་སྟེང་དུ་ཟླ་བའི་དཀྱིལ་འཁོར། དེའི་སྟེང་དུ་མཆོད་རྟེན་དབུ་ནུབ་ཏུ་བལྟས་པ་བྲི་བར་བྱའོ། །རྡོ་རྗེ་སེམས་མ་ནས་བརྩམས་ཏེ། རྡོ་རྗེ་འབེབས་པའི་བར་གྱི་

མཚན་མ་ཡང་རེ་རེ་ཞིང་རིག་པའི་ཁྲིའི་སྟེང་དུ་བྲི་བར་བྱའོ། །རྡོ་རྗེ་བརྩེགས་ཞེས་བྱ་བ་ནི་རྡོ་རྗེ་རྩེ་ལྔ་པ་ཆུར་གནས་པ་བྲིས་ལ། དེའི་སྟེང་དུ་རྡོ་རྗེ་རྩེ་ལྔ་པ་གཉིས་པ་མགོ་ཤར་དུ་བལྟས་པར་རྡོ་རྗེ་ལ་རྡོ་རྗེ་བྲི་བ་ནི་རྡོ་རྗེ་བརྩེགས་ཞེས་བྱའོ། །རྡོ་རྗེ་ཐུགས་ཞེས་
བཤད་པའོ། །ཞེས་བྱ་བ་ནི་བྱང་ཆུབ་ཀྱི་མཚན་ཉིད་ཅན་མི་བསྐྱོད་པའི་ཐུགས་ནི་རྡོ་རྗེའི་ཐུགས་སོ། །དེ་སྟོན་པར་བྱེད་པའི་ཕྱག་རྒྱ་ལ་རྡོ་རྗེ་ཐུགས་ཞེས་བརྟགས་པ་ཡིན་ཏེ། འདི་ནི་མི་བསྐྱོད་པའི་གནས་སུ་བྱའོ། །རྡོ་རྗེ་རིན་ཆེན་ཁྲི་ཡི་སྟེང་། །ཞེས་བྱ་བ་ནི། རྡོ་རྗེ་རྩེ་ལྔ་པས་
རྩེ་མོ་མཚན་པའི་ཡིད་བཞིན་གྱི་ནོར་བུ་རིན་པོ་ཆེ་མགོ་ལྷོ་ཕྱོགས་སུ་བལྟས་པ། རིན་ཆེན་འབྱུང་ལྡན་གྱི་གནས་སུ་རང་གི་དབང་བསྐུར་བའི་མིང་གི་ཕྱག་རྒྱ་བྲི་བར་བྱའོ། །རྡོ་རྗེ་པདྨ་ཞེས་བྱ་བ་ལ་སོགས་པ་ལ། པདྨ་དམར་སྐྱ་འདབ་མ་བཅུ་དྲུག་པ་ལ། འདིའི་དབུས་ན་པདྨ་
འདབ་མ་བརྒྱད་པ་ཁ་ལེགས་པར་བྱེ་བ། སྟེང་གི་བརྒྱད་ཁ་མ་བྱེ་བ། དེའི་ལྟེ་བ་ན་རྡོ་རྗེ་རྩེ་ལྔ་པ་གནས་པ་འདི་ནི་རྡོ་རྗེ་པདྨོ་ཞེས་བྱ་བ་སྟེ། འོད་དཔག་ཏུ་མེད་པའི་གནས་སུ་མགོ་ནུབ་ཏུ་བལྟས་པར་བྲི་བ་འདི་ནི་མཚོན་ཆ་ཞེས་བྱ་བའི་ཕྱག་རྒྱ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པའི་
རལ་གྲིའི་གཟུགས་ཀྱི་མཚོན་ཆས་གཟུང་བ་དང་འཛིན་པའི་རྣམ་པར་རྟོག་པ་འཇོམས་པས་ན་མཚོན་ཆ་ཞེས་བྱ་བར་བཤད་ཅེས་བྱ་བ་ཡིན་ནོ། །ལས་ཀྱི་རྡོ་རྗེ་ནི་རྩེ་མོ་བཅུ་གཉིས་པའི་ཇི་སྐད་བཤད་པའི་རྡོ་རྗེ་ལས་མའི་གཟུགས་མགོ་བྱང་དུ་བལྟས་པའི་སྣ་ཚོགས་རྡོ་རྗེ་འདི་ནི་དོན་ཡོད་
པར་གྲུབ་པའི་གནས་སུ་བྱ་བས་ན་རྡོ་རྗེ་ཀུན་ཞེས་བྱ་བར་བཤད་ཅེས་བྱའོ། །རྡོ་རྗེ་བྲི་བར་བྱ་ཞེས་བྱ་བ་ནི་རྡོ་རྗེ་སེམས་དཔའི་གནས་སུ་རྡོ་རྗེ་རྩེ་ལྔ་པ་འགྲེང་བ་བྲིའོ། །རྡོ་རྗེ་རྒྱལ་པོའི་གནས་སུ་ལྕགས་ཀྱུ་གཉིས་སོ། །རྡོ་རྗེ་ཆགས་པའི་གནས་སུ་རྡོ་རྗེ་གཉིས་འཁྱུད་པ་ཆུང་ངུ་བྲིའོ། །
རྡོ་རྗེ་ལེགས་པའི་གནས་སུ་མཁྲིག་མའི་བར་དུ་ཡོད་པ་རྡོ་རྗེ་དང་བཅས་པའི་ལག་པ་གཉིས་ཀྱིས་ལེགས་སོ་ཞེས་སྦྱིན་པའི་ཚུལ་དུ་བྱའོ། །རྡོ་རྗེ་རིན་ཆེན་གྱི་གནས་སུ་ཡིད་བཞིན་གྱི་ནོར་བུ་རིན་པོ་ཆེ་ཇི་སྐད་དུ་བཤད་པའི་མཚན་ཉིད་ཅན་ནོ། །རྡོ་རྗེ་ཉི་མའི་གནས་སུ་ནི་ཉི་མའི་དཀྱིལ་

འཁོར་ལྟེ་བ་ན་རྡོ་རྗེ་རྩེ་ལྔ་པ་ཡོད་པ་འདི་ནི་རྡོ་རྗེ་ཉི་མའི་ཕྱག་རྒྱའོ། །དཔལ་གྱི་གནས་སུ་ནི་ཡིད་བཞིན་གྱི་ནོར་བུའི་རྒྱལ་མཚན་གྱི་ཕྱག་རྒྱའོ། །བཞད་པའི་གནས་སུ་ནི་རྡོ་རྗེ་གཉིས་ཀྱི་བར་དུ་སོའི་ཕྲེང་བ་གཉིས་བྲིས་པ་ནི་བཞད་པའི་ཕྱག་རྒྱའོ། །རྡོ་རྗེ་ཆོས་ཀྱི་གནས་སུ་ནི་སྔར་
བཤད་པའི་མཚན་ཉིད་ཅན་གྱི་རྡོ་རྗེ་པདྨའི་དབུས་སུ་རྡོ་རྗེ་རྩེ་ལྔ་པ་ཡོད་པ་བྲིའོ། །རྡོ་རྗེ་རྣོན་པོའི་གནས་སུ་ནི་རྡོ་རྗེ་རལ་གྲིའོ། །རྡོ་རྗེ་རྒྱུའི་གནས་སུ་ནི་འཁོར་ལོ་རྩིབས་བརྒྱད་པ་རྩིབས་རྣམས་རྡོ་རྗེ་རྩེ་གཅིག་པ་ལྟ་བུར་བྱའོ། །རྡོ་རྗེ་སྨྲ་བའི་གནས་སུ་ནི་རྡོ་རྗེ་རྩེ་ལྔ་པས་མཚན་པའི་
ལྕེའོ། །རྡོ་རྗེ་ལས་ཀྱི་གནས་སུ་ནི་ཇི་སྐད་དུ་བཤད་པའི་མཚན་ཉིད་ཅན་གྱི་སྣ་ཚོགས་རྡོ་རྗེ་ཀུན་དུ་རྩེ་མོ་ཞེས་བྱ་བའོ། །རྡོ་རྗེ་སྲུང་བའི་གནས་སུ་ནི་གོ་ཆའི་ཕྱག་རྒྱ་མཐའ་གཉིས་སུ་རྡོ་རྗེ་རྩེ་ལྔ་པ་གཉིས་དང་ལྡན་པའོ། །རྡོ་རྗེ་གནོད་སྦྱིན་གྱི་གནས་སུ་ནི་མཆེ་བ་གཉིས་རྩ་བའི་ཆ་ན་
རྡོ་རྗེ་རྩེ་ལྔ་ཡོད་པའོ། །རྡོ་རྗེ་ཁུ་ཚུར་གྱི་གནས་སུ་ནི་དམ་ཚིག་གི་ཁུ་ཚུར་གྱིས་ཡོངས་སུ་བཟུང་བའི་རྡོ་རྗེ་རྩེ་ལྔ་པ་བྲི་བར་བྱའོ། །རྡོ་རྗེ་སེམས་མ་ལ་སོགས་པ་ནི་རྡོ་རྗེ་དབྱིངས་སུ་གསུངས་པ་ཉིད་བྲི་བའི་ཆོ་ག་ཡིན་ནོ། །སྒེག་མོའི་གནས་སུ་ནི་རྡོ་རྗེ་རྩེ་ལྔ་པ་གཉིས་སོ། །ཕྲེང་བ་མའི་
གནས་སུ་ནི་རྡོ་རྗེ་རིན་པོ་ཆེའི་ཕྲེང་བའོ། །གླུ་མའི་གནས་སུ་ནི་རྡོ་རྗེ་པི་ཝང་ངོ་། །གར་མའི་གནས་སུ་ནི་མཁྲིག་མའི་བར་དང་བཅས་པའི་ལག་པ་གཉིས། རྡོ་རྗེ་རྩེ་གསུམ་པ་དང་བཅས་པས་གར་བྱེད་པའོ། །བདུག་པ་མའི་གནས་སུ་ནི་སྤོས་སྣོད་དོ། །མེ་ཏོག་མའི་གནས་
སུ་ནི་མེ་ཏོག་གི་སྣོད་རྡོ་རྗེ་མེ་ཏོག་གིས་གང་བའོ། །མར་མེའི་གནས་སུ་ནི་རྡོ་རྗེ་མར་མེའི་སྡོང་བུའོ། །བྱུག་པའི་གནས་སུ་ནི་རྡོ་རྗེ་དྲིའི་དུང་ཆོས་སོ། །རྡོ་རྗེ་ལྕགས་ཀྱུའི་གནས་སུ་ནི་རྡོ་རྗེ་ལྕགས་ཀྱུའི་ཕྱག་རྒྱའོ། །ཞགས་པའི་གནས་སུ་ནི་རྡོ་རྗེ་ཞགས་པའོ། །ལྕགས་སྒྲོག་གི་
གནས་སུ་ནི་རྡོ་རྗེ་ལྕགས་སྒྲོག་གོ། །རྡོ་རྗེ་འབེབས་པའི་གནས་སུ་ནི་རྡོ་རྗེ་དྲིལ་བུ་བྲི་བར་བྱའོ། །ཕྱག་རྒྱ་ཐམས་ཅད་ཀྱང་རྡོ་རྗེ་འབར་བས་བསྐོར་བའོ། །མི་བསྐྱོད་པའི་རིགས་ལས་བྱུང་བ་རྣམས་ནི་མགོ་ཤར་དུ་བལྟས་པའོ། །གཞན་དག་ནི་མགོ་ལྷོ་དང་། ནུབ་དང་། བྱང་

དུ་བལྟས་པའོ། །མཚམས་སུ་གནས་པ་རྣམས་ནི་མགོ་མཚམས་སུ་བལྟས་པ་བྱའོ། །ཕྱི་རོལ་དུ་ཡང་ཞེས་བྱ་བ་ནི་ཕྱིའི་དཀྱིལ་འཁོར་གྱི་ཁྱམས་ལ་ཇི་ལྟར་རིགས་པའི་ཚུལ་དང་མི་འགལ་བར་བྱམས་པ་ལ་སོགས་པ་རང་གི་མཚན་མ་ཡང་དག་པར་བྲི་བར་བྱ་སྟེ།
དེ་ཉིད་བཤད་པ་ནི་བྱམས་པ་ལ་སོགས་པ་རང་གི་མཚན། ཇི་ལྟར་དགའ་བ་བཞིན་དུ་བྲི། །ཞེས་བྱ་བ་གསུངས་པ་ཡིན་ནོ། །ཇི་ལྟར་དགའ་བ་ཞེས་བྱ་བ་ནི་འདི་ཡིན་ཏེ། ཤར་ཕྱོགས་ཀྱི་ཁམས་ཀྱི་ནང་དུ་རྡོ་རྗེ་རྩེ་ལྔ་པ་ཉིས་བརྒྱ་ལྔ་བཅུར་གཅིག་གིས་མ་ཚང་བ་བྲིའོ། །དེ་
བཞིན་དུ་ལྷོ་ཕྱོགས་སུ་ནི་རྡོ་རྗེ་རིན་པོ་ཆེའོ། །ནུབ་ཏུ་ནི་རྡོ་རྗེ་པདྨའོ། །བྱང་དུ་ནི་སྣ་ཚོགས་རྡོ་རྗེའོ། །ཡང་ན་བྱམས་པ་དང་། མཐོང་བ་དོན་ཡོད་དང་། ངན་སོང་ཀུན་འདྲེན་དང་། མྱ་ངན་དང་མུན་པ་ཐམས་ཅད་ངེས་པར་འཇོམས་པའི་བློ་གྲོས་ཀྱི་མཚན་མ་ཤར་ཕྱོགས་ཀྱི་ཁྱམས་ཀྱི་
ནང་དུ་སྔ་མ་བཞིན་དུ་རྡོ་རྗེ་བཞི་བྲིའོ། །སྤོས་ཀྱི་གླང་པོ་དང་། དཔའ་བར་འགྲོ་བ་དང་། ནམ་མཁའི་མཛོད་དང་། ཡེ་ཤེས་ཏོག་ནི་ལྷོ་ཕྱོགས་སུ་རིན་པོ་ཆེ་བཞིའོ། །འོད་དཔག་ཏུ་མེད་པ་དང་། ཟླ་འོད་དང་། བཟང་སྐྱོང་དང་། དྲ་བ་ཅན་གྱི་འོད་ནི་ནུབ་ཏུ་རྡོ་རྗེ་པདྨ་བཞིའོ། །རྡོ་རྗེ་
སྙིང་པོ་དང་། བློ་གྲོས་མི་ཟད་པ་དང་། སྤོབ་པ་བརྩེགས་པ་དང་། ཀུན་དུ་བཟང་པོ་ནི་བྱང་ཕྱོགས་སུ་སྣ་ཚོགས་རྡོ་རྗེ་བཞི་བྲི་བར་བྱའོ། །ཨོཾ་སརྦྦ་སཾ་སྐཱ་ར་པ་རི་ཤུདྡྷ་དྷརྨ་ཏེ་མ་ཧཱ་ནཱ་ཡ་པ་རི་ཝཱ་རེ་སྭཱ་ཧཱ་ཞེས་བྱ་བ་ནི་བྱང་ཆུབ་སེམས་དཔའ་འདི་དག་ཐམས་ཅད་ཀྱི་སྒྲུབ་པར་བྱེད་པའི་
རིག་པ་སྟེ། འདི་དག་གིས་ནི་བྱམས་པ་ལ་སོགས་པའི་ཕྱག་རྒྱ་བྲི་བར་བྱའོ། །གནས་དེ་ཉིད་དུ་འཇུག་པ་ལ་སོགས་པའི་ཆོ་ག་རྒྱས་པ་ཡིན་ཏེ་ཞེས་བྱ་བ་ནི་འཇུག་པ་ལ་སོགས་པའི་ཆོ་ག་རྒྱས་པ་གང་ཡིན་པ་དེ་ནི་འཇུག་པ་ལ་སོགས་པའི་ཆོ་ག་རྒྱས་པ་སྟེ། སོགས་པའི་སྒྲས་ནི་རྡོ་རྗེ་
ཆུ་བཏུང་བ་དང་། དབབ་པ་དང་། མེ་ཏོག་དོར་བ་དང་། ཕྲེང་བའི་དབང་དང་། གདོང་གཡོགས་དགྲོལ་བ་དང་། དཀྱིལ་འཁོར་བལྟ་བ་དང་། དབབ་པ་ཉེ་བར་བསྡུ་བ་དང་། དབང་བསྐུར་བ་དང་། སྔགས་བཟླས་པ་དང་། བདག་ལ་བྱིན་གྱིས་བརླབ་པ་ལ་སོགས་པའི་ཆོ་ག་དང་། རང་

གི་མིང་ནས་བརྗོད་པ་དང་། རྡོ་རྗེས་དཀྱིལ་འཁོར་བསྒྲུབ་པ་དང་། བསྡུ་བ་བྱ་བ་དང་། མཚན་བརྒྱ་རྩ་བརྒྱད་པས་བསྟོད་པ་ལ་སོགས་པ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་གསུངས་པའི་ཆོ་ག་ཐམས་ཅད་བྱ་བར་སྟོན་ཏོ། །དེ་ཉིད་ནི་དེ་ལ་ཐོག་མ་ཞེས་བྱ་བ་ལ་སོགས་པས་འགྲེལ་ཏེ།
དེ་ལ་རེ་ཞིག་ཐོག་མ་རྡོ་རྗེ་སློབ་དཔོན་གྱིས་འོག་ནས་བཤད་པའི་སེམས་དཔའ་རྡོ་རྗེ་མའི་དམ་ཚིག་གི་ཕྱག་རྒྱས་ས་མ་ཡ་སྟྭཾ་ཧཱུཾ་བཛྲ་བནྡྷ་ཞེས་བྱ་བས་རང་གིས་བཅིང་བར་བྱའོ། །དེ་ནས་ས་མ་ཡ་ཧཱུཾ་ཞེས་ཟློས་ཤིང་འཇུག་པར་བྱའོ། །ཞུགས་ནས་ལན་ཅིག་བསྐོར་ཏེ་ཞེས་བྱ་བ་ནི་ནང་གི་དཀྱིལ་
འཁོར་དུའོ། །ཕྱག་རྒྱ་དེ་བཅོམ་ལྡན་འདས་ཕྱག་ན་རྡོ་རྗེ་ལ་ཕུལ་ནས་ཞེས་བྱ་བ་ནི། སེམས་མ་རྡོ་རྗེ་མའི་ཕྱག་རྒྱ་རྡོ་རྗེ་སྙེམས་པའི་གཟུགས་འཛིན་པར་བསམས་ལ། བཅོམ་ལྡན་འདས་ལ་ཕྱག་བྱས་ནས། བཅོམ་ལྡན་འདས་རྡོ་རྗེ་སེམས་དཔའ་དང་ལྷན་ཅིག་ཏུ་གྱུར་པར་བསམ་པར་བྱ་
སྟེ། དེ་ལྟ་བུས་ནི་དེ་ཕུལ་བ་ཡིན་ནོ། །རང་གི་སྙིང་གར་ཚུལ་བཞིན་དུ་བཀྲོལ་ཏེ་ཞེས་བྱ་བ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་གསུངས་པའི་ཆོ་གས་བདག་ཉིད་ལ་དབབ་པ་ལ་སོགས་བྱས་ལ། ཏིཥྛ་བཛྲ་ཞེས་བྱ་བ་ལ་སོགས་པས་དབབ་པ་ཉེ་བར་བསྡུ་བར་བྱའོ་ཞེས་བྱ་བའི་
ཐ་ཚིག་གོ། །དེ་ནས་མེ་ཏོག་དོར་བ་ལ་སོགས་པའི་ཆོ་ག་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་ཇི་སྐད་གསུངས་པའི་ཚུལ་དུ་སྤྱད་པར་བྱའོ། །འཇུག་པ་ལ་སོགས་པའི་ཆོ་ག་འདི་དག་ཐམས་ཅད་ནི་བཅོམ་ལྡན་འདས་རྡོ་རྗེ་སེམས་དཔའ་སློབ་དཔོན་དུ་གྱུར་པས་མཛད་པར་བསམ་ཞིང་
རང་ཉིད་ཀྱི་རྗེས་སུ་སྤྱད་པར་བྱའོ། །འདིར་གསང་བའི་རྡོ་རྗེ་ནི་དང་པོའི་རྡོ་རྗེ་སོར་བཞི་པའི་ཚད་ཀྱིས་རྡོ་རྗེ་དང་བདག་པོའི་དབང་བསྐུར་བ་བྱ་བར་འདོད་དོ། །དེ་ནས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པའི་ཆོ་ག་སྔ་མ་བཞིན་དུ་བྱས་ལ། བདག་ཉིད་དཔལ་རྡོ་རྗེ་སེམས་
དཔའི་སྦྱོར་བ་དང་ལྡན་པས་རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པ་ནས་རྡོ་རྗེ་འབེབས་པའི་བར་གྱི་ཚུལ་འཛིན་པའི་གཟུངས་ཀྱི་ལྷ་མོ་ཐམས་ཅད་བསྡུ་བར་བྱའོ། །དེ་ནས་མཚན་བརྒྱ་རྩ་བརྒྱད་པས་བསྟོད་པར་བྱའོ། །སྒོ་བཞིར་རྡོ་རྗེ་ལྕགས་ཀྱུ་ལ་སོགས་པས་ཞེས་བྱ་བ་ལ་གཟུངས་

ཀྱི་དཀྱིལ་འཁོར་ལས་གསུངས་པའི་རྡོ་རྗེ་ལྕགས་ཀྱུའི་ལས་ཀྱི་ཕྱག་རྒྱ་དང་། བཛྲ་ཨཾ་ཀུ་ཤ་ཛཿཞེས་ཟློས་ཤིང་མི་བསྐྱོད་པ་དང་། དེའི་རིགས་ཀྱི་ཚུལ་རྡོ་རྗེ་ཐུགས་ལ་སོགས་པ་དང་། རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པའི་གཟུགས་རྣམས་བཀུག་ལ། ཤར་
ཕྱོགས་ཀྱི་སྒོ་དང་ཉེ་བར་རིག་པའི་ལྷ་མོའི་གཟུགས་སུ་གཞག་པར་བྱའོ། །དེ་བཞིན་དུ་རིན་ཆེན་འབྱུང་ལྡན་དང་། འོད་དཔག་ཏུ་མེད་པ་དང་། དོན་ཡོད་པར་གྲུབ་པ་དང་། དེའི་རིགས་ཀྱི་ཚུལ་གྱིས་གཟུགས་རྣམས་རང་རང་གི་སྒོ་དང་། ཉེ་བར་གཞག་པར་བྱའོ། །དེ་ནས་བཛྲ་པཱ་ཤ་
ཧཱུཾ་ཞེས་ཟློས་ཤིང་། གཟུངས་ཀྱི་དཀྱིལ་འཁོར་ལས་གསུངས་པའི་ལས་ཀྱི་ཕྱག་རྒྱས་རང་རང་གི་སྒོ་ནས་མཆོད་རྟེན་ལ་སོགས་པར་བཅུག་ནས། བཛྲ་སྥོ་ཊ་བཾ་ཞེས་བྱ་བ་དང་། རྡོ་རྗེ་ལྕགས་སྒྲོག་གི་ལས་ཀྱི་ཕྱག་རྒྱས་དེ་དག་ཐམས་ཅད་བཅིངས་ལ། བཛྲ་ཨཱ་བེ་ཤ་ཨཿཞེས་བྱ་བ་དང་།
གཟུངས་ཀྱི་དཀྱིལ་འཁོར་ལས་གསུངས་པའི་ལས་ཀྱི་ཕྱག་རྒྱས་ཐམས་ཅད་དབང་དུ་བྱའོ། །དེ་ནས་རང་གི་དམ་ཚིག་གི་ཕྱག་རྒྱ་རྣམས་ཀྱིས་སྔ་མ་བཞིན་དུ་ཐམས་ཅད་བསྒྲུབས་ལ། ཆོས་དང་། ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་ནས། དབང་བསྐུར་ལ་
མཆོད་ཡོན་ཕུལ་ཏེ། མཆོད་པ་ཐམས་ཅད་ཀྱིས་ཡང་དག་པར་མཆོད་པ་ལ་སོགས་པ་བྱས་ནས། ཕྱིར་ཕྱུང་ལ་རྡོ་རྗེ་སློབ་མ་སྔར་བཤད་པའི་ཆོ་ག་ཉིད་ཀྱིས་གཞུག་པར་བྱའོ། །དེ་ཡང་གང་གི་ཕྱིར། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་གཟུང་བའི་ཚུལ་དུ་གཟུང་ངོ་ཞེས་བྱ་
བ་གསུངས་པ་ཡིན་ནོ། །དངོས་གྲུབ་ཀྱི་གསང་བའི་རྡོ་རྗེའི་མཚན་མ་ཆད་པས་གཡོགས་ལ་བྱིན་ཏེ་ཞེས་བྱ་བ་ནི་གཟུངས་ཀྱི་དཀྱིལ་འཁོར་ལ་སོགས་པ་རྣམས་འགྲུབ་པའི་ཕྱིར་དང་། གསང་བའི་རྡོ་རྗེ་སོར་བཞི་པ་ཇི་ནས་ཀྱང་སུས་ཀྱང་མི་མཐོང་བར་བྱོས་ཤིག་ཅེས་བསྒོ་ལ།
སློབ་དཔོན་གྱིས་སློབ་མ་ལ་སྦྱིན་པར་བྱ་བ་ཡིན་པས་ན་དེའི་ཕྱིར། ཆད་པས་གཡོགས་ལ་ཞེས་བྱ་བ་སྨོས་པ་ཡིན་ནོ། །དེ་ལྟར་སློབ་དཔོན་གྱི་ལས་ཀྱི་ཆོ་ག་དང་། སློབ་མ་གཞུག་པའི་ཆོ་ག་རྒྱས་པ་བསྟན་ནས། ད་ནི་དམ་ཚིག་དང་། དབང་བསྐུར་བ་ཐོབ་པ་རྣམས་ལ། མངོན་པར་

འདོད་པའི་དོན་གྱི་དངོས་གྲུབ་ཀྱི་མན་ངག་བསྟན་པར་བྱ་བ་ཡིན་པས། རྡོ་རྗེ་གསང་བའི་ཞེས་བྱ་བ་ལ་སོགས་པ་གསུངས་སོ། །རྡོ་རྗེ་གསང་བ་ནི་གཟུངས་ཀྱི་དཀྱིལ་འཁོར་རོ། །དེའི་ཕྱག་རྒྱ་ནི་དེར་འདོད་པའི་དོན་སྒྲུབ་པར་བྱེད་པ་གང་ཡིན་པའོ། །དེའི་ཡེ་ཤེས་ནི་ངེས་པ་སྟེ་དེ་
བསླབ་བོ་ཞེས་བྱ་བ་ནི་དེ་བསྟན་པར་བྱའོ། །ཕྱག་རྒྱ་དེ་རྣམས་ཀྱང་རྣམ་པ་མང་པོ་ཡོད་པས་དེའི་ཕྱིར། དང་པོར་རེ་ཞིག་ཅེས་བྱ་བ་གསུངས་པའོ། །རྡོ་རྗེ་གསང་བ་ནི་གཟུངས་ཀྱི་དཀྱིལ་འཁོར་རོ། །དེའི་ལུས་ཀྱི་ཕྱག་རྒྱའི་ཡེ་ཤེས་བསླབ་བོ་ཞེས་བྱའོ། །ཇི་ལྟ་བུ་ཞེ་ན། ཟླ་བའི་
དཀྱིལ་འཁོར་དབུས་སུ་ནི། །ཞེས་བྱ་བ་ལ་སོགས་པ་གསུངས་ཏེ། རྐང་པ་དང་ལག་པས་ཐལ་མོ་སྦྱར་བ་གང་ཡིན་པ་དེ་ནི། རྐང་ལག་ཐལ་མོ་སྦྱར་ཞིང་ཞེས་བྱ་བ་སྟེ་རྣལ་འབྱོར་པའོ། །དེ་ལ་ལག་པའི་ཐལ་མོ་རྡོ་རྗེ་ཐལ་མོ་སྟེ་ཁོང་སྟོང་ངོ་། །རྐང་པའི་ཐལ་མོ་ནི་སེམས་དཔའི་
སྐྱིལ་ཀྲུང་ངོ་། །དེ་སྐད་དུ་ཡང་། སེམས་དཔའི་སྐྱིལ་ཀྲུང་གིས་གནས་ལ། །སྟེང་དུ་ཐལ་མོ་སྦྱིན་བྱེད་པ། །ཞེས་གསུངས་པ་ཡིན་ནོ། །འདིས་ནི་ལུས་ཀྱི་ཕྱག་རྒྱས་བདག་ཉིད་ཡང་དག་པར་གནས་པ་ཡིན་ནོ། །འདི་དེ་ལྟར་གྱུར་པ་དང་། ཁ་གླལ་བར་བྱེད་པ་དང་ལྡན་ཞིང་རྡོ་རྗེ་བསྒོམ་
པར་བྱས་ནས་ཞེས་པའོ། །རྡོ་རྗེ་སེམས་དཔར་བདག་ཉིད་བསྒོམས་ནས་བསྒོམ་པ་འདིས་རྡོ་རྗེ་མ་ཡང་ཞེས་པ་རྡོ་རྗེ་སེམས་དཔའི་བཙུན་མོ་ཡང་ཆགས་པར་བྱེད་ཅིང་དབང་དུ་བྱེད་དོ་ཞེས་བྱ་བའི་བར་དུའོ། །འདི་སྐད་དུ་སྟོན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་
པའི་རྡོ་རྗེ་སེམས་དཔའི་རྣལ་འབྱོར་བྱས་ལ། དེའི་འོག་ཏུ་གཟུངས་ཀྱི་དཀྱིལ་འཁོར་ལས་གསུངས་པའི་བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཅིངས་ནས། ཨོཾ་བཛྲ་སཏྭ་གུ་ཧྱ་ས་མ་ཡེ་ཧཱུཾ་ཞེས་བརྗོད་པར་བྱའོ། །དེ་ནས་བཛྲ་རཱ་ག་ཡ་ཧོ་ཞེས་ཟློས་ཤིང་། སྟོང་གསུམ་
གྱི་སྟོང་ཆེན་པོའི་སངས་རྒྱས་ཀྱི་ཞིང་འདི་ཐམས་ཅད་ནམ་མཁའ་དང་འདྲ་བར་བསྒོམས་ལ་དེའི་ཚད་ཙམ་གྱིས་ཟླ་བའི་དཀྱིལ་འཁོར་དེའི་སྟེང་དུ་བདག་ཉིད་དཔལ་རྡོ་རྗེ་སེམས་དཔའ་སྐུ་མདོག་དམར་བ། འོད་ཟེར་དམར་པོ་ཤིན་ཏུ་འཁྲུག་པ། རྡོ་རྗེ་དང་དྲིལ་བུ་བསྣམས་པ་

བསྒོམས་ལ། མདུན་དུ་ཡང་བཛྲ་སཏྭ་གུ་ཧྱ་ས་མ་ཡེ་ཧཱུཾ་ཞེས་བྱ་བས་ཟླ་བའི་དཀྱིལ་འཁོར་དེ་ཉིད་ལ་ཀུན་དུ་བཟང་མོ་སྤྲུལ་ལ། བསྡུ་བས་སྤྱན་དྲངས་ནས་མཚན་བརྒྱ་རྩ་བརྒྱད་པས་བསྟོད་ནས། རྡོ་རྗེ་ལྕགས་ཀྱུ་ལ་སོགས་པ་ལས་ཀྱི་ཕྱག་རྒྱ་རྣམས་ཀྱིས་དགུག་
པ་དང་གཞུག་པ་དང་། བཅིང་བ་དང་། དབང་དུ་བྱས་ནས། རང་གི་དམ་ཚིག་གི་ཕྱག་རྒྱ་རབ་ཏུ་བསྒྲུབས་ལ། ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་ལ་དབང་བསྐུར་བའི་ཕྱག་རྒྱ་རྣམས་ཀྱིས་དབང་བསྐུར་ནས། སྒེག་མོ་ལ་སོགས་པ་མཆོད་པ་བརྒྱད་
ཀྱིས་ཡང་དག་པར་མཆོད་ནས་ཕྱག་བྱས་ལ། བཛྲ་རཱ་ག་ཡ་ཧོ་ཞེས་ཡང་ཟློས་ཤིང་བདག་ནི་རྡོ་རྗེ་ཅན་གྱི་ལྷ་མོ་ཀུན་དུ་བཟང་མོའོ་ཞེས་ང་རྒྱལ་བསྐྱེད་དེ། འདི་དག་དང་འོག་ནས་བཤད་པའི་སྦྱོར་བ་ལ་ཡང་ཕྱག་རྒྱ་བཞིས་རྒྱས་གདབ་པར་བྱའོ། །དེ་བས་ན་དེར་མདུན་དུ་བརྟན་པར་
བྱས་ལ། དེའི་རྗེས་ལ་ཡང་བཛྲ་རཱ་ག་ཡ་ཧོ་ཞེས་བྱ་བས་བདག་ཉིད་རྡོ་རྗེ་སེམས་དཔར་བསམས་ལ། སེམས་དཔའི་སྐྱིལ་མོ་ཀྲུང་བཅས་ཏེ། རྡོ་རྗེ་ཐལ་མོ་བཅིངས་ནས། བཛྲ་རཱ་ག་ཡ་ཧོ་ཨ་དྷི་ཏིཥྛ་སྭ་མཾ་ཞེས་བྱ་བས་བྱིན་གྱིས་བརླབས་ལ། བཛྲ་རཱ་ག་ཡ་ཧོ་ཞེས་བྱ་བ་རྡོ་རྗེའི་
ཚིག་གིས་ཟློས་ཤིང་བཅོམ་ལྡན་འདས་ཡུམ་མདུན་དུ་བསྒོམ་པ་ནི། ཐུན་བཞིའི་སྦྱོར་བས་ཟླ་བ་གཅིག་གམ། ཟླ་བ་དྲུག་གམ། ལོ་གཅིག་གམ། ཇི་སྲིད་དེ་མངོན་སུམ་དུ་མཐོང་བའི་བར་དུ་བསྒོམ་པར་བྱའོ། །དེ་ནས་ཟླ་བ་ཉ་ལ་ཆོ་ག་ཐམས་ཅད་རྗེས་སུ་སྤྱད་དེ་ཉི་མ་ནུབ་པའི་
དུས་སུ་དེ་བཞིན་དུ་རྡོ་རྗེ་ཐལ་མོས་བདག་ཉིད་བྱིན་གྱིས་བརླབས་ལ་དལ་གྱིས་འགྲོ་བས་དེ་ཆགས་པར་བྱས་ལ། ཁ་གླལ་བ་དང་བཅས་པས་ཆགས་ཤིང་ཆགས་པས་འཛུམ་པས་འཁྱུད་ཅིང་བཟླས་ནས། དེ་འདིའི་དབང་དུ་འགྱུར་ཞིང་འཁྱུད་པར་འགྱུར་བ་དང་། དེའི་ལུས་མི་སྣང་བར་འགྱུར་རོ། །དེ་ནས་
རྡོ་རྗེ་འཛིན་ཆེན་པོར་འགྱུར་རོ། །དཔུང་པ་བསྐུམ་པའི་ལྕགས་ཀྱུ་དང་། །མགོ་ལ་རྡོ་རྗེ་བསྒོམ་པར་བྱ། །ཞེས་བྱ་བ་ནི། དཔུང་པ་གཡོན་པ་བསྐུམ་པའི་ལག་པས་ལྕགས་ཀྱུ་དང་མགོ་ལ་རྡོ་རྗེ་རྩེ་ལྔ་པ་བསྒོམ་པར་བྱའོ། །ལག་པ་ཡིས་ནི་འབོད་བྱེད་ཅིང་། །ཞེས་བྱ་བ་ནི་

ལག་པ་གཡས་པས་སེ་གོལ་གྱི་སྒྲ་བྱེད་ཅིང་ངོ་། །ལྕགས་ཀྱུ་མ་ཡང་འགུགས་པར་བྱེད། །ཅེས་བྱ་བ་ནི་རྡོ་རྗེ་རྒྱལ་པོའི་བཙུན་མོ་འང་བསྒོམས་པ་འདིས་འགུགས་པར་བྱེད་དོ། །འདིའི་ཆོ་ག་ནི་འདི་ཡིན་པར་ཤེས་པར་བྱ་སྟེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་
པའི་ཆོ་གས་རྡོ་རྗེ་རྒྱལ་པོའི་སྦྱོར་བ་ཇི་ལྟ་བ་བཞིན་དུ་བྱས་ལ། དེའི་འོག་ཏུ་གཟུངས་ཀྱི་དཀྱིལ་འཁོར་ལས་གསུངས་པའི་རྡོ་རྗེ་རྒྱལ་པོའི་ཕྱག་རྒྱ་ཆེན་པོ་ཇི་ལྟ་བ་བཞིན་དུ་བཅིངས་ལ། བཛྲ་ཨཾ་གུ་ཤ་ཛཿཞེས་བྱ་བ་ཟློས་ཤིང་སྔ་མ་བཞིན་དུ་སངས་རྒྱས་ཀྱི་ཞིང་ཐམས་ཅད་ནམ་མཁའ་
དང་མཉམ་པར་བསམ་པར་བྱའོ། །དེ་ནས་དེའི་ཚད་ཙམ་གྱི་ཟླ་བའི་དཀྱིལ་འཁོར་དེའི་སྟེང་དུ་བདག་ཉིད་རྡོ་རྗེ་རྒྱལ་པོར་བསམས་ལ་ཟླ་བའི་དཀྱིལ་འཁོར་དེ་ཉིད་ཀྱི་མདུན་དུ། ཨོཾ་བཛྲ་གུ་ཧྱ་བཛྲ་ཨཾ་གུ་ཤ་ཧཱུཾ་ཞེས་བྱ་བས་རྡོ་རྗེ་རྒྱལ་པོ་བཙུན་མོ་རྡོ་རྗེ་ལྕགས་ཀྱུ་མ་སྤྲུལ་ལ། དེ་བཞིན་
དུ་བསྡུ་བ་ལ་སོགས་པའི་ཆོ་ག་རྗེས་སུ་སྤྱད་ནས། བཛྲ་ཨཾ་གུ་ཤ་ཛཿཞེས་བྱ་བ་ཇི་ལྟ་བ་བཞིན་དུ་ཟློས་ཤིང་དེས་སྔ་མ་བཞིན་དུ་བསྒོམ་པར་བྱའོ། །དེ་ནས་ཟླ་བ་གཅིག་གམ། ཟླ་བ་དྲུག་གི་མཐར་མངོན་དུ་བྱས་ནས་དེ་བཞིན་དུ་མཚན་ཐོག་ཐག་དཔུང་པ་བསྐུམ་པའི་ལྕགས་ཀྱུ་དང་།
མགོ་ལ་རྡོ་རྗེ་བསྒོམ་པར་བྱ། །ལག་པ་ཡིས་ནི་འབོད་བྱེད་ཅིང་། །ལྕགས་ཀྱུ་མ་ཡང་འགུགས་བྱེད་པར། །ཞེས་བྱ་བ་བདག་ཉིད་དམར་བ། དེ་ཡང་དམར་བ། དཔུང་པ་བསྐུམ་པའི་ལྕགས་ཀྱུ་འོད་དམར་པོ་འབར་བ། ཀུན་དུ་འཁྲུག་པས་སྙིང་གའི་པདྨ་ནས་བཟུང་ལ་དགུག་པར་
བྱའོ། །མདའ་འཕེན་པ་ཡི་ཚུལ་གྱིས་ནི། །གླལ་ཞིང་སྙིང་གར་འཕངས་ནས་ནི། །ཉིད་ཀྱི་རྡོ་རྗེ་དགའ་མ་ཡང་། །བདུད་ཀྱི་ཚུལ་གྱིས་མཉེས་པར་བྱེད། །ཅེས་བྱ་བ་ནི་མདའ་འཕེན་པའི་ཚུལ་ནི་རྡོ་རྗེ་ཆགས་པའི་ལས་ཀྱི་ཕྱག་རྒྱ་སྟེ། དེས་མདའ་འཕེན་པའི་ཚུལ་གྱིས་ཁ་གླལ་བ་དང་
ལྡན་པར་བྱེད་ཅིང་བསྒྲུབ་པར་བྱ་བའི་ལྷ་མོའི་སྙིང་གར་ཏེ། སྙིང་ལ་མདའ་བསྣུན་པར་བྱའོ། །དེ་བཞིན་དུ་དེའི་རྒྱབ་ཀྱིས་ཕྱོགས་པར་སེམས་དཔའ་བསད་པས་བདུད་ཀྱི་ཚུལ་གྱིས་མཉེས་པར་བྱེད་ཅིང་མངོན་དུ་ཕྱོགས་པར་དབང་དུ་བྱའོ། །ཇི་སྲིད་གང་དང་གང་རྡོ་རྗེ་ཆགས་པའི་སྦྱོར་

བས། རྡོ་རྗེ་དགའ་མ་རང་ཉིད་ཀྱང་། །ཞེས་བྱ་བ་རྡོ་རྗེ་ཆགས་པའི་བཙུན་མོ་རང་ཉིད་ཀྱང་རྣལ་འབྱོར་པའི་དབང་དུ་འགྱུར་བའོ། །འདིའི་དོན་ནི་འདི་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པའི་ཆོ་གས་རྡོ་རྗེ་ཆགས་པའི་རྣལ་འབྱོར་བྱས་ལ།
དེའི་འོག་ཏུ་གཟུངས་ཀྱི་དཀྱིལ་འཁོར་ལས་གསུངས་པའི་རྡོ་རྗེ་ཆགས་པའི་ལས་ཀྱི་ཕྱག་རྒྱ་བཅིངས་ཏེ། ཨོཾ་བཛྲ་གུ་ཧྱ་རཱ་གེ་རཱ་ག་ཡ་ཧཱུཾ་ཞེས་བྱས་ལ། མཱ་ར་ཡ་མཱ་ར་ཡ་ཕཊ་ཅེས་ཟློས་ཤིང་། སྔ་མ་བཞིན་དུ་སངས་རྒྱས་ཀྱི་ཞིང་ཐམས་ཅད་ནམ་མཁའ་དང་མཉམ་པར་བསམ་
མོ། །དེ་ནས་དེའི་ཚེ་ནམ་མཁའི་ཚད་ཙམ་གྱི་ཟླ་བའི་དཀྱིལ་འཁོར་ལ་དེའི་སྟེང་དུ་རྡོ་རྗེ་ཆགས་པ་སྐུ་མདོག་དམར་པོ་རྒྱན་ཐམས་ཅད་ཀྱིས་བརྒྱན་པར་བདག་ཉིད་བསམས་ནས། ཨོཾ་བཛྲ་གུ་ཧྱ་རཱ་ག་ཡ་ཧཱུཾ་ཞེས་བྱ་བས་རྡོ་རྗེ་ཆགས་པའི་བཙུན་མོ་རྡོ་རྗེ་དགའ་མ་ཟླ་བའི་དཀྱིལ་
འཁོར་གཅིག་ཉིད་ཀྱི་མདུན་དུ་སྤྲུལ་ལ། བསྡུ་བ་ལ་སོགས་པའི་ཆོ་ག་རྗེས་སུ་སྤྱད་ནས། མཱ་ར་ཡ་མཱ་ར་ཡ་ཕཊ་ཅེས་ཟློས་ཤིང་སྔ་མ་བཞིན་དུ་དེ་དང་དེ་བསྒོམ་པར་བྱའོ། །དེ་ནས་ཟླ་བ་གཅིག་གམ་ཟླ་བ་དྲུག་གམ་ལོ་གཅིག་གིས་དེ་མངོན་དུ་བྱས་ནས་རྡོ་རྗེ་ཆགས་པའི་ལས་
ཀྱི་ཕྱག་རྒྱ་བཅིངས་ལ། མཚན་ཐོག་ཐག་དེའི་ལས་ཀྱི་ཕྱག་རྒྱའི་སྦྱོར་བས་མདའ་དམར་པོ་སྙིང་གར་འཕེན་ཞིང་ཁ་གླལ་བ་དང་ལྡན་པར་བྱས་ལ་མདའ་དེས་བསྣུན་ནས་ཕུག་ལ་བསྒྲུབ་པར་བྱ་བ་དམར་ཞིང་སྒྲུབ་པ་པོ་ལ་གཅིག་ཏུ་ཆགས་པར་བསམ་པར་བྱའོ། །བདག་གི་ལུས་ཀྱི་
སྙིང་ག་རུ། །རྡོ་རྗེ་གོ་ཆའི་ཚུལ་གྱིས་ནི། །དཔུང་པ་བསྣོལ་བ་བཅིངས་ནས་ནི། །སངས་རྒྱས་ཉིད་ཀྱང་སྲུང་བར་བྱེད། །ཅེས་བྱ་བ་ནི་རྡོ་རྗེ་ཁུ་ཚུར་གཉིས་བཅིངས་ཏེ། དེ་དཔུང་པ་བསྣོལ་བའི་ཚུལ་གྱིས་རང་གི་སྙིང་གར་བདག་ཉིད་འཁྱུད་ལ། རྡོ་རྗེ་གོ་ཆས་ཡན་ལག་ཐམས་ཅད་
གོ་བསྐོན་པར་བསམ་པར་བྱའོ། །རྡོ་རྗེ་གོ་ཆའི་སྦྱོར་བ་འདིས་དེ་བཞིན་གཤེགས་པ་ཐམས་ཅད་ཀྱང་མི་ཕྱེད་པར་གལ་ཏེ་གནོད་པར་བྱེད་པ་རྩོམ་པ་ན་དེ་ཡང་བསྲུང་བར་འགྱུར་ན་གཞན་དག་ལྟ་སྨོས་ཀྱང་ཅི་དགོས། འདིར་ཡང་སངས་རྒྱས་ཉིད་ཀྱང་ཞེས་བྱ་བའི་ཚིག་འདིས། རྣལ་འབྱོར་

པ་གནོད་པའི་ཁྱད་པར་ཆེན་པོ་ལས་སྲུང་ནུས་པར་སྟོན་ཏོ། །འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པའི་རྡོ་རྗེ་ལེགས་པའི་སྦྱོར་བ་བྱས་ནས། ཕྱིས་གཟུངས་ཀྱི་དཀྱིལ་འཁོར་ལས་གསུངས་པའི་རྡོ་རྗེ་ལེགས་པའི་ལས་ཀྱི་ཕྱག་རྒྱ་བཅིངས་ལ།
ཨོཾ་བཛྲ་གུ་ཧྱ་སཱ་ཧཱུཾ་ཤྭ་རི་ཧཱུཾ་ཞེས་བརྗོད་ལ་བཛྲ་བནྡྷ་རཀྵ་ཧཾ་ཞེས་ཟློས་ཤིང་སྔ་མ་བཞིན་དུ་སངས་རྒྱས་ཀྱི་ཞིང་ཐམས་ཅད་ནམ་མཁར་གྱུར་པར་བསམ་པར་བྱའོ། །དེ་ནས་ནམ་མཁའི་ཕྱོགས་དེར་སྟོང་གསུམ་གྱི་སངས་རྒྱས་ཀྱི་ཞིང་གི་ཚད་ཙམ་གྱི་ཟླ་བའི་དཀྱིལ་འཁོར་དེའི་སྟེང་དུ་བདག་
ཉིད་རྡོ་རྗེ་ལེགས་པར་རྣམ་པར་བསམས་ལ་སྟན་དེ་ཉིད་ལ་མདུན་དུ། ཨོཾ་བཛྲ་གུ་ཧྱ་སནྡྷི་ཤ་རི་ཧཱུཾ་ཞེས་བྱ་བས་རྡོ་རྗེ་ལེགས་པའི་གཟུགས་འཛིན་པའི་ལེགས་ལྡན་མ་སྤྲུལ་ལ། བསྡུ་བ་ལ་སོགས་པའི་ཆོ་ག་རྗེས་སུ་སྤྱད་ནས། བནྡྷ་རཀྵ་ཧཾ་ཞེས་ཟློས་ཤིང་སྔ་མ་བཞིན་དུ་བསྒོམ་པར་
བྱའོ། །དེ་ནས་ཟླ་བ་གཅིག་གམ་ཟླ་བ་དྲུག་གམ་ལོ་གཅིག་གི་མཐར་ཉི་མ་ནུབ་པའི་དུས་སུ་རང་གི་ལུས་ཀྱི་དཔུང་པ་བསྣོལ་བས་བཟུང་ལ་ཞུགས་ཏེ་གཅིག་ཏུ་གྱུར་པར་བསྒོམས་ཏེ། ཇི་སྲིད་སྒྲུབ་པ་པོའི་ལུས་སུ་ཞུགས་ཏེ་གཅིག་ཏུ་གྱུར་པ་དེ་སྲིད་ཀྱི་བར་དུ་བཟླས་པར་བྱའོ། །དེ་
ནས་རྡོ་རྗེ་ལེགས་པ་ཉིད་དུ་འགྱུར་ཞིང་ལེགས་པ་མ་ཡིན་པའི་ཚུལ་གྱིས་རྣམ་པར་རྟོག་པ་རྣམས་ལས་བདག་ཉིད་བསྲུང་བ་བྱས་པར་འགྱུར་རོ། །གཞན་སྲུང་བར་བྱེད་པར་འདོད་ན་ཟླ་བ་གཅིག་ཙམ་བསྙེན་པ་བྱས་ལ་མཐར་མཚན་ཐོག་ཐག་བཟླས་པ་བྱའོ། །དེ་ནས་གང་གི་ཚེ་
མི་ལ་སོགས་པའི་འཇིགས་སྐྲག་ཅུང་ཟད་འབྱུང་བར་མཐོང་ན། དེའི་ཚེ་རྡོ་རྗེ་ལེགས་པའི་རྣལ་འབྱོར་པས་དེ་བཞིན་དུ་ཟླ་བའི་དཀྱིལ་འཁོར་གྱི་སྟེང་དུ་གནས་ལ་སེམས་ཅན་དེ་ལྕགས་ཀྱུ་ལ་སོགས་པས་བཀུག་ཅིང་བཅུག་ལ་བཅིངས་ཏེ། ཟླ་བའི་དཀྱིལ་འཁོར་དེ་ཉིད་ཀྱི་སྟེང་དུ་
འདུག་པར་བསམས་ལ་སྔ་མ་བཞིན་དུ་བདག་ཉིད་ཀྱི་སྙིང་གར་དཔུང་པ་བསྣོལ་བ་བཅིངས་ནས། རྡོ་རྗེ་གོ་ཆའི་སྦྱོར་བས་བསྲུང་བར་གྱུར་ན་སངས་རྒྱས་ཉིད་ཀྱང་བསྲུང་བར་འགྱུར་རོ། །དེ་ལྟར་ལུས་ཀྱི་ཕྱག་རྒྱ་བསྟན་ནས། ལྟ་བའི་ཕྱག་རྒྱ་བསྟན་པའི་ཕྱིར། དེ་ནས་ཞེས་

བྱ་བ་ལ་སོགས་པ་གསུངས་ཏེ། ལྟ་བ་ཉིད་ཕྱག་རྒྱ་ཡིན་པས་ན་ལྟ་བའི་ཕྱག་རྒྱའོ། །དེའི་ཡེ་ཤེས་ནི་ངེས་པ་སྟེ་དེ་བསླབ་པའོ། །རྡོ་རྗེ་ལྟ་བ་ཆགས་པས་ནི། །དགའ་བས་མིག་ནི་རབ་ཏུ་བགྲད། །ཅེས་བྱ་བ་ལ། ཆགས་པ་ནི་མངོན་པར་འདོད་པ་སྟེ། དེ་ལས་
བྱུང་བའི་རབ་ཏུ་དགའ་བ་ནི་ཀུན་དུ་ཆགས་པས་རབ་ཏུ་དགའ་བའི་ཡིད་དོ། །དེས་མིག་རབ་ཏུ་བགྲད་ཅིང་གདངས་པའི་ལྟ་བའི་ཕྱག་རྒྱ་གང་ཡིན་པ་དེ་ནི་ཆགས་པས་ཏེ། དགའ་བས་མིག་ནི་རབ་ཏུ་བགྲད། །ཅེས་བྱ་བ་ལྟ་བའི་ཕྱག་རྒྱ་ནི་རྡོ་རྗེའི་ལྟ་བའོ། །འདི་དང་བཛྲ་དྲྀཥྚི་མ་
ཊ་ཞེས་བྱ་བ་མིག་གཉིས་སུ་བཀོད་ལ། རྡོ་རྗེའི་ལྟ་བ་བསྐྱེད་དེ། དེས་བལྟས་ན་བུད་མེད་རྣམས་ངེས་པར་དབང་དུ་འགྱུར་རོ། །ལྟ་བ་འདི་ལ་སྒེག་པའི་ཉམས་ཐམས་ཅད་སྦྱར་བར་བྱའོ་ཞེས་བཅོམ་ལྡན་འདས་ཀྱིས་གསུངས་སོ། །རབ་ཏུ་མྱུར་བར་ཞེས་བྱ་བ་ལ་སོགས་པ་
ལ་རབ་ཏུ་དགའ་བས་མྱུར་བ་ནི་རབ་ཏུ་མྱུར་བ་སྟེ། རིངས་པར་ཞེས་བྱ་བའི་ཐ་ཚིག་གོ། །རབ་ཏུ་བསྐུལ་བས་ན་རབ་ཏུ་བསྐུལ་ཏེ། དེ་གང་ཞེ་ན་མིག་གཉིས་ཏེ། འདིས་མིག་གི་རྫི་མ་དགུག་ཅིང་འདྲེན་པར་བྱེད་པ་ཡིན་པས་ན། རབ་ཏུ་མྱུར་བར་མིག་རབ་བསྐུལ། །མིག་གི་རྫི་མ་
འགུགས་བྱེད་པའི། །ཞེས་བྱ་སྟེ་དེ་ལྟ་བུའི་ལྟ་བ་གང་ཡོད་པ་དེ་ལ་དེ་སྐད་ཅེས་བྱའོ། །ལྟ་བ་ཡང་ཡིན་ལ་གཟི་ཅན་ཡང་ཡིན་པས་ན་ལྟ་བ་གཟི་ཅན་ཏེ་གཟི་བརྗིད་ཅན་ནོ། །ཡིན་པར་བཤད་ཅེས་བྱ་བ་ནི་བསྟན་པའོ། །དཱི་པྟ་དྲྀཥྚ་ཨཾ་གུ་ཤ་ཛཿཞེས་བྱ་བ་མིག་གཉིས་སུ་བཀོད་ལ་
བསྐྱེད་དེ་འགུགས་པའི་ལས་རྣམས་ལ་འབར་བའི་ལྟ་བས་སྦྱར་བར་བྱའོ། །ཁྲོ་གཉེར་ཞེས་བྱ་བ་ལ་སོགས་པ་ལ། གང་གིས་ཁྲོ་གཉེར་གྱི་གཉེར་མ་བསྡུས་ཤིང་། གསལ་བ་གང་ཡིན་པ་དེ་ནི་གཉེར་མ་རབ་ཏུ་བསྡུས་པའོ། །དེ་ནས་ཁྲོ་བའི་མིག་བཙུམས་པས་ལྟ་བ་གང་ཡིན་
པ་དེ་ནི་ཁྲོ་བོའི་ལྟ་བ་ཡིན་པས་དེ་ལ། །ཁྲོ་གཉེར་གཉེར་མ་རབ་བསྡུས་པ། །ཁྲོ་བའི་མིག་ནི་བཙུམས་པ་སྟེ། །ཞེས་བྱའོ། །དེ་ལྟ་བུའི་ཁྲོ་བོའི་ལྟ་བ་བྱས་ཤིང་མཉམ་པར་བཞག་ན་ནི། ཁམས་གསུམ་ཡང་ནི་འཇིགས་པར་བྱེད། །ཅེས་བྱ་བ་སྟེ། ཀྲོ་དྷ་དྲིཥྚི་ཧྲི་ཞེས་བྱ་བ་

མིག་གཉིས་སུ་བཀོད་ལ། ཁྲོ་བོའི་ཉམས་ཐམས་ཅད་ཀྱིས་ཁྲོ་བོའི་ལྟ་བ་བསྐྱེད་པར་བྱའོ། །རི་རབ་ཅེས་བྱ་བ་ལ་སོགས་པ་ལ་རི་རབ་ནི་རིའི་རྒྱལ་པོའོ། །རི་ཡང་དེ་དག་གོ། །བྲག་ནི་རྡོ་རྗེའོ། །དེ་དང་འདྲ་བར་བརྟན་པ་ནི་མི་ཕྱེད་པའོ། །འཛུམ་པ་མེད་པ་ནི་མི་གཡོ་བ་
སྟེ། རྫི་མ་དང་མིག་མི་འགྱུར་བའི་ལྟ་བའི་ཕྱག་རྒྱ་གང་ཡིན་པ་དེ་ནི། རི་རབ་རིའི་བྲག་ཅ་འདྲ་བར་བརྟན་པས་འཛུམ་པ་མེད་པའི་མིག་བྱམས་པའི་ལྟ་བ་ཡིན་པར་བཤད་ཅེས་བྱ་སྟེ། དྲྀ་ཌྷ་ཏྲྀ་ཏཥྚ་ཏ་ཞེས་བྱ་བས་མིག་གཉིས་སུ་བཀོད་ལ། བརྟན་པའི་ལྟ་བ་བསྐྱེད་ནས། དེའི་
འོག་ཏུ་བསྲུང་བ་ལ་སོགས་པའི་ལས་འཇུག་པར་བྱའོ། །དེ་ལ་གང་གི་ཚེ་ལྟ་བའི་ཕྱག་རྒྱ་རྣམས་ཀྱིས་ལས་བྱེད་པ་དེའི་ཚེ། རང་གི་ལྷའི་སྦྱོར་བས་ལྟ་བའི་ཕྱག་རྒྱ་འདི་དག་ཟླ་བ་གཅིག་ཙམ་གྱི་བར་དུ་གོམས་པར་བྱའོ། །དེ་ལ་རེ་ཞིག་ཡི་གེ་མ་ལས་ཉི་མའི་དཀྱིལ་འཁོར་ཊ་ཨ་
མེད་པ་ལས་མིག་གཡོན་པ་ཟླ་བའི་དཀྱིལ་འཁོར། ཡི་གེ་ཧཱུཾ་ལས་རྡོ་རྗེ་རྩེ་ལྔ་པ་དཀར་པོ་མིག་གཉིས་ཀྱི་མིག་གི་འབྲས་བུར་བསམས་ལ་བཛྲ་དྲྀཥྚི་མ་ཊ་ཞེས་བྱ་བས་བྱིན་གྱིས་བརླབས་ལ། ཇི་སྐད་དུ་གསུངས་པའི་མཚན་ཉིད་ཅན་གྱི་རྡོ་རྗེ་ལྟ་བ། བཛྲ་དྲྀཥྚི་མ་ཊ་ཞེས་
ཟློས་ཤིང་བསྒོམས་ལ། ཟླ་བ་ཚང་བའི་མཐར་ནི་མཚན་ཐོག་ཐག་བྱའོ། །དེ་ནས་དབང་དུ་བྱས་ལ་རྡོ་རྗེ་ལྟ་བ་དང་བཅས་པའི་འོད་ཟེར་རྣམས་སྤྲོ་བར་བྱའོ། །དེ་བཞིན་དུ་རང་གི་ལྷའི་རྣལ་འབྱོར་བྱས་ལ་ཡི་གེ་ཛཿལས་མིག་གཡས་དང་གཡོན་དུ་ཉི་མ་དང་ཟླ་བ་བསྐྱེད་ལ། དཱིཔྟ་དྲྀཥྚི་
ཨཾ་གུ་ཤ་ཛཿཞེས་བྱ་བས་བྱིན་གྱིས་བརླབས་ཏེ། རྡོ་རྗེ་ལྕགས་ཀྱུ་ལྟ་བུའི་འོད་ཟེར་རྣམས་སྤྲོ་བ་དང་། དཱི་པྟ་དྲྀཥྚི་ཨ་གུ་ཤ་ཛཿཞེས་ཟློས་ཤིང་བསྒོམ་པར་བྱའོ། །དེ་ནས་ཟླ་བའི་མཐར་དེ་བཞིན་དུ་བསྒྲུབས་པས་ཇི་སྐད་དུ་བཤད་པའི་མཚན་ཉིད་ཅན་གྱི་འབར་བའི་ལྟ་
བའི་ལྕགས་ཀྱུ་ལྟ་བུའི་འོད་ཟེར་རྣམས་ཀྱིས་བསྒྲུབ་པར་བྱ་བ་དགུག་པར་བྱའོ། །དེ་བཞིན་དུ་རང་གི་ལྷའི་རྣལ་འབྱོར་བྱས་ལ། ཡི་གེ་ཧི་ཞེས་བྱ་བས་མིག་གཉིས་སུ་རྡོ་རྗེ་ཉི་མ་བསམ། ཡི་གེ་ཧཱུཾ་ཐུང་ངུ་ལས་མིག་འབྲས་ཁྲོ་བོའི་རྡོ་རྗེར་བསམས་ལ་ཀྲོ་དྷ་དྲྀཥྚི་ཧྲི་ཞེས་བྱ་བས་བྱིན་

གྱིས་བརླབས་ནས། ཇི་སྐད་བཤད་པའི་མཚན་ཉིད་ཅན་གྱི་ཁྲོ་བོའི་ལྟ་བ་དང་། ཀྲོ་དྷ་དྲྀཥྚི་ཧྲི་ཞེས་ཟློས་ཤིང་བསྒོམ་པར་བྱའོ། །དེ་ནས་དེ་བཞིན་དུ་རབ་ཏུ་བསྒྲུབས་ལ། རང་གི་མིག་ལས་བྱུང་བའི་ཁྲོ་བོའི་རྡོ་རྗེ་རྣམས་ཀྱིས་བསྒྲུབ་པར་བྱ་བ་ཐལ་བར་བྱའོ། །
དེ་བཞིན་དུ་རང་གི་ལྷའི་རྣལ་འབྱོར་བྱས་ལ། སེམས་ཅན་གྱི་ཁམས་རྣམས་སུ་བྱམས་པ་སྤྲོས་ཏེ། ཡི་གེ་མ་ལས་མིག་གཡས་པར་ཉི་མའི་དཀྱིལ་འཁོར་ཞི་བ། ཊ་ཨ་མེད་པ་ལས་མིག་གཡོན་པར་ཟླ་བའི་དཀྱིལ་འཁོར་བསམས་ལ་དྲྀ་ཌྷ་དྲྀཥྚི་ཏྲ་ཊ་ཞེས་བྱ་བས་བྱིན་གྱིས་
བརླབས་ནས། དྲྀ་ཌྷ་དྲྀཥྚི་ཏྲ་ཊ་ཞེས་ཟློས་ཤིང་ཇི་སྐད་དུ་བཤད་པའི་ལྟ་བ་བསྒོམ་པར་བྱའོ། །དེ་ནས་དེ་བཞིན་དུ་ཟླ་བ་གཅིག་གི་མཐར་བསྒྲུབ་པར་བྱའོ། །དེ་ནས་ཚ་བའི་རིམས་ལ་ཟླ་བ་རྡོ་རྗེ་ལྟ་བུའི་འོད་ཟེར་རྣམས་ཀྱིས་བསྒྲུབ་པར་བྱ་བ་ལ་བལྟས་ལ་བྱབ་ཅིང་ཚ་བ་བསལ་བར་
བྱའོ། །གྲང་བའི་རིམས་ལ་ནི་ཉི་མའི་འོད་ཟེར་རྣམས་ཀྱིས་གྲང་བ་བསལ་བར་བྱའོ། །གདོན་གྱིས་ཟིན་པ་ལ་ནི་འབར་བའི་ལྟ་བའི་འོད་ཟེར་རྣམས་ཀྱིས་གཞོམ་པར་བྱའོ། །ཚིག་གི་ཕྱག་རྒྱའི་ཡེ་ཤེས་བསླབ་བོ་ཞེས་བྱ་བ་ནི་རྡོ་རྗེ་དབྱིངས་ཀྱི་དཀྱིལ་འཁོར་ལས་ཇི་སྐད་གསུངས་
བའི་སྦྱོར་བས་ལྷའི་རྣལ་འབྱོར་ནི་ཐམས་ཅད་དུ་བྱ་བར་ཤེས་པར་བྱའོ། །དེ་ནས་རང་གི་ལྷའི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་གསུངས་པའི་རང་གི་ལས་ཀྱི་ཕྱག་རྒྱ་བཅིངས་ཏེ། ཧོ་ཧོ་ཧོ་ཧོ་ཞེས་བདག་ཉིད་ཟློས་ཤིང་ཁ་དོག་དམར་པོར་བསམས་ལ། བཛྲ་
ཧོ་ཞེས་ཟློས་ཤིང་ཟླ་བ་གཅིག་གི་བར་དུ་ཐུན་བཞིར་བསྒོམ་པར་བྱའོ། །དེ་ནས་ཟླ་བའི་མཐར་མཚན་ཐོག་ཐག་བསྒོམ་མོ། །དེ་ནས་དེ་བཞིན་དུ་ལས་ཀྱི་དུས་སུ་ཡང་ལྷའི་རྣལ་འབྱོར་བྱས་ལ་བསྒྲུབ་པར་བྱ་བ་དང་ལྷན་ཅིག་ཟླ་བའི་དཀྱིལ་འཁོར་གཅིག་ཉིད་ལ་གནས་པར་བློས་བསམས་
ལ། ཧོ་ཧོ་ཧོ་ཧོ་ཞེས་ཟློས་ཤིང་བསྒྲུབ་པའི་ལུས་ལ་ཡི་གེ་ཧོ་བཞི་བཅུག་ལ་དེས་དེའི་ལུས་ཐམས་ཅད་དམར་པོར་བྱས་ནས་བཛྲ་ཧོ་ཞེས་ཟློས་ཤིང་རང་གི་ལུས་ལས་བྱུང་བའི་འོད་ཟེར་དམར་པོ་འབར་བས་འཁྱུད་བཞིན་པར་བསམས་ན་ངེས་པར་དབང་དུ་འགྱུར་རོ། །གང་གི་ཕྱིར་སྒྲ་

དང་བྲལ་བས་ཞེས་གསུངས་པས་ལྐོག་མའི་ཕྱོགས་སུ་ཅུང་ཟད་ཙམ་གདོན་པས་འདིར་བཟླས་པར་བྱའོ། །ཛྫཿཞེས་བྱ་བ་ལ་སོགས་པ་ལ་དེ་བཞིན་དུ་རང་གི་ལྷའི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་གསུངས་པའི་ལས་ཀྱི་ཕྱག་རྒྱ་བཅིངས་ཏེ། ཡི་གེ་ཛྫཿབཞི་
ལན་གསུམ་བཟླས་ལ། ཛྫཿཛྫཿཞེས་བྱ་བ་སྔ་མ་བཞིན་དུ་ཟླ་བ་གཅིག་ཙམ་བསྒོམས་ནས་མཐར་མཚན་ཐོག་ཐག་བྱའོ། །དེ་ནས་དེ་བཞིན་དུ་རང་གི་ལྷའི་རྣལ་འབྱོར་བྱས་ལ། རང་གི་གདན་གྱི་ཟླ་བའི་དཀྱིལ་འཁོར་ལ་བསྒྲུབ་པར་བྱ་བ་ལྕགས་ཀྱུ་ལ་སོགས་པས་དགུག་པ་དང་། གཞུག་
པ་དང་། བཅིང་བ་དང་། དབང་དུ་བྱས་ལ་ཡི་གེ་ཛྫཿབཞིས་ཁྲོ་བོའི་ཚིག་གིས་ཟློས་ཤིང་བསྒྲུབ་པར་བྱ་བའི་ལུས་ལ་ཞུགས་ལ། རྡོ་རྗེ་ལྕགས་ཀྱུའི་གཟུགས་གཡས་སུ་བསྐྱེད་པར་བྱའོ། །དེ་ནས་ཛྫཿཛྫཿཞེས་བྱ་བས་རང་གི་ལག་པར་ལྕགས་ཀྱུ་བསྐྱེད་ལ། དེས་བསྒྲུབ་པར་བྱ་བའི་སྙིང་
ཕུག་ནས་བཛྲ་ཛྫཿཞེས་ཟློས་ཤིང་བཀུག་ན་ངེས་པར་འགུགས་པར་བྱེད་དོ། །སྔ་མ་བཞིན་དུ་རང་གི་ལྷའི་རྣལ་འབྱོར་བྱས་ལ། དེའི་འོག་ཏུ་གཟུངས་ཀྱི་དཀྱིལ་འཁོར་ལས་གསུངས་པའི་ལས་ཀྱི་ཕྱག་རྒྱ་བཅིངས་ནས་ཡི་གེ་ཧཱུཾ་བཞི་ཟློས་ཤིང་ཁྲོ་བོའི་གཟུགས་སུ་བདག་ཉིད་བསྒོམ་
པར་བྱའོ། །དེ་ནས་བཛྲ་ཧཱུཾ་ཞེས་ཟློས་ཤིང་ཐུན་བཞིའི་སྦྱོར་བས་བསྒོམ་པར་བྱའོ། །དེ་ནས་ཟླ་བའི་མཐར་མཚན་ཐོག་ཐག་བྱའོ། །ཡང་ལས་ཀྱི་དུས་སུ་དེ་བཞིན་དུ་ཡང་རང་གི་ལྷའི་རྣལ་འབྱོར་བྱས་ལ། ཡི་གེ་ཧཱུཾ་བཞི་རང་དང་གཞན་གྱི་རྣ་བའི་རྣམ་པར་ཤེས་པས་གཟུང་དུ་རུང་བའི་
སྒྲའི་ཚིག་ཏུ་བརྗོད་པ་གསལ་བར་བརྗོད་ཅིང་བསྒྲུབ་པར་བྱ་བའི་ལུས་འཇིག་པའི་དུས་ཀྱི་རླུང་དང་འདྲ་བ་དེས། རྣམ་པར་གཏོར་བར་འགྱུར་བར་བསམ་ཞིང་། བཛྲ་ཧཱུཾ་ཞེས་བཟླས་ན་རི་རབ་ཀྱང་ལྟུང་བར་བྱེད་དོ། །སྔ་མ་བཞིན་དུ་རང་གི་ལྷའི་རྣལ་འབྱོར་བྱས་ལ་གཟུངས་ཀྱི་དཀྱིལ་
འཁོར་ལས་གསུངས་པའི་ལས་ཀྱི་ཕྱག་རྒྱ་བཅིངས་ཏེ། ཡི་གེ་ཧཱུཾ་བཞིའི་རྡོ་རྗེའི་གོ་ཆས་བདག་ཉིད་གོ་བགོས་པར་བསམ་པར་བྱའོ། །དེ་ནས་བཛྲ་ཧཾ་ཞེས་བྱ་བའི་ཕྲ་བའི་ཚིག་ཡོངས་སུ་ཟློས་ཤིང་སྔ་མ་བཞིན་དུ་བསྒོམ་པར་བྱའོ། །དེ་ནས་ཟླ་བ་གཅིག་གི་མཐར་མཚན་ཐོག་ཐག་བསྒོམ་

པར་བྱའོ། །ཡང་ལས་ཀྱི་དུས་སུ་དེ་བཞིན་དུ་རང་གི་ལྷའི་རྣལ་འབྱོར་བྱས་ལ། བསྒྲུབ་པར་བྱ་བ་ལྕགས་ཀྱུ་ལ་སོགས་པས་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་ནས་རང་གི་སྟན་ཟླ་བའི་དཀྱིལ་འཁོར་ལ་བཞག་སྟེ། ཧཾ་ཧཾ་ཧཾ་ཧཾ་ཞེས་
ཡོངས་སུ་ཟློས་ཤིང་ལྷ་མོར་གྱུར་པར་བསམས་ལ་བཛྲ་ཧཾ་ཞེས་བཟླས་ན་འཇིག་རྟེན་གསུམ་ཡང་སྲུང་བར་བྱེད་དོ། །དེ་ནས། རྡོ་རྗེ་གསང་བའི་ཡེ་ཤེས་ཀྱི། །ཞེས་བྱ་བ་ལ་སོགས་པ་ལ་རྣམ་པ་ཡང་ཡིན་ལ་ཐམས་ཅད་ཀྱང་ཡིན་པས་ན་རྣམ་པ་ཐམས་ཅད་དོ། །དེ་ཉིད་མཆོག་སྟེ་དམ་
པའོ། །དེ་དང་ལྡན་པ་ནི་བཅས་པ་སྟེ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུ་དང་ལྡན་པ་ཞེས་བྱ་བའི་ཐ་ཚིག་གོ། །རྣམ་པ་ཐམས་ཅད་ཀྱི་མཆོག་དེ་དང་ལྡན་པ་ནི་ཕྱག་ན་རྡོ་རྗེ་སྟེ། རྡོ་རྗེ་སེམས་དཔར་བདག་ཉིད་དེ་རང་ཉིད་བསྒོམ་པར་བྱས་ན་དེ་
ཡང་། སངས་རྒྱས་ཐམས་ཅད་དབང་དུ་བྱེད། །ཅེས་པ་རང་དབང་དུ་བྱེད་པའོ། །འདི་སྐད་སྟོན་པ་ཡིན་ཏེ། དཀྱིལ་འཁོར་ཆེན་པོ་ལས་གསུངས་པའི་ཚུལ་གྱིས་རྡོ་རྗེ་སེམས་དཔའི་རྣལ་འབྱོར་བྱས་ལ། དེའི་འོག་ཏུ་གཟུངས་ཀྱི་དཀྱིལ་འཁོར་ཆེན་པོ་ལས་གསུངས་པའི་རྡོ་རྗེ་
སེམས་དཔའི་ཕྱག་རྒྱ་ཆེན་པོ་བཅིངས་ཏེ། སརྦ་ཏ་ཐཱ་ག་ཏ་ས་མཱ་ཛཿམ་དྷསྠ་བཛྲ་པཱ་ཎི་པ་ཤ་མཱ་ན་ཡ། སརྦྦ་བདྡྷ་ན་ཧོ། །ཞེས་ཟློས་ཤིང་ཇི་སྐད་སངས་རྒྱས་ཐམས་ཅད་འདུས་པའི་དབུས་ན་གནས་པའི་རྡོ་རྗེ་སེམས་དཔར་བདག་ཉིད་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་རྡོ་རྗེ་སེམས་
དཔའ་བདག་ཉིད་བསྒོམ་པར་བྱའོ། །དེ་ནས་མཚན་ཐོག་ཐག་བཟླས་པས་སངས་རྒྱས་ཐམས་ཅད་དབང་དུ་འགྱུར་ཞིང་རྡོ་རྗེ་འཛིན་པ་ཆེན་པོ་ཉིད་སྩོལ་བར་འགྱུར་རོ། །སྔ་མ་བཞིན་དུ་རྡོ་རྗེ་རིན་ཆེན་གྱི་རྣལ་འབྱོར་བྱས་ལ། དེའི་འོག་ཏུ་གཟུངས་ཀྱི་དཀྱིལ་འཁོར་ལས་གསུངས་པའི་འཕགས་
པ་ནམ་མཁའི་སྙིང་པོའི་ཕྱག་རྒྱ་ཆེན་པོ་བཅིངས་ཏེ། བཛྲ་གརྦྷ་བཛྲ་པཱ་ཎི་ཤཱི་གྷྲཾ་ཨཱ་ཀཱཪྵ་ཡ་ཧཱུཾ་ཛཿཞེས་ཟློས་ཤིང་ཟླ་བ་གཅིག་གམ། ཟླ་བ་དྲུག་གམ། ལོ་གཅིག་གི་བར་དུ་བསྒོམ་པར་བྱའོ། །དེ་ནས་སྟན་གཅིག་པོ་ཉིད་ལ་བཅོམ་ལྡན་འདས་རྡོ་རྗེ་སེམས་དཔའ་རྡོ་རྗེ་ལྕགས་ཀྱུ་ལ་

སོགས་པས་དགུག་པ་དང་། གཞུག་པ་དང་བཅིང་བ་དང་། དབང་དུ་བྱས་ལ། ཕྱག་རྒྱ་བཞིས་རྒྱས་གདབ་པ་བྱས་ནས་དབང་བསྐུར་ལ་ཡང་དག་པར་མཆོད་དེ། མཚན་ཐོག་ཐག་བཟླས་ཤིང་འབར་བའི་ལྟ་བའི་ལྕགས་ཀྱུས་ཐུགས་ཀ་ཕུལ་ཏེ་བཀུག་ན་དབང་དུ་འགྱུར་རོ། །རྡོ་རྗེ་སྤྱན་ཞེས་
བྱ་བ་ནི། རྡོ་རྗེ་ཆོས་ནི་སྔར་བཤད་པའི་ཚུལ་ཉིད་ཀྱིས་རྡོ་རྗེ་ཆོས་ཀྱི་རྣལ་འབྱོར་བྱས་ལ། དེའི་འོག་ཏུ་གཟུངས་ཀྱི་དཀྱིལ་འཁོར་ལས་གསུངས་པའི་རྡོ་རྗེ་ཆོས་ཀྱི་ཕྱག་རྒྱ་ཆེན་པོ་བཅིངས་ཏེ། བཛྲ་ནཻ་ཏྲ་སརྦྦ་དྷརྨ་མཱ་ར་ཡ་ཕཊ་ཅེས་སངས་རྒྱས་ཐམས་
ཅད་འདུས་པའི་དབུས་ན་གནས་ཏེ་ཟློས་པའི་རྡོ་རྗེ་སྤྱན་དུ་བདག་ཉིད་སྔ་མ་བཞིན་དུ་བསྒོམ་པར་བྱའོ། །དེ་ནས་མཚན་ཐོག་ཐག་རང་བཞིན་གྱིས་རྣམ་པར་དག་པར་མོས་པར་བྱེད་ཅིང་བསྒོམས་ན་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་པ་ཐོབ་པས། ཉེ་བར་དམིགས་པའི་རང་བཞིན་ཅན་
གྱིས་ཆོས་ཐམས་ཅད་བདུད་བྱེད་ཅིང་གསོད་པར་འགྱུར་ཏེ། རྒྱུད་ཕྱི་མ་ལས། བསད་ན་དངོས་གྲུབ་ཐོབ་པར་འགྱུར། །ཞེས་ཇི་སྐད་གསུངས་པ་ལྟ་བུའོ། །ཏིང་ངེ་འཛིན་འདི་ཉིད་ཀྱིས་དེ་བཞིན་གཤེགས་པ་རྣམས་དེར་ཡང་གཞོམ་མོ་ཞེས་བྱ་བ་ཡིན་ནོ། །རྡོ་རྗེ་ཐམས་ཅད་ཅེས་བྱ་བ་ལ་རྡོ་རྗེ་
དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པའི་རྡོ་རྗེ་ལས་ཀྱི་རྣལ་འབྱོར་བྱས་ལ། ཡང་གཟུངས་ཀྱི་དཀྱིལ་འཁོར་ལས་གསུངས་པའི་རྡོ་རྗེ་ལས་ཀྱི་ཕྱག་རྒྱ་ཆེན་པོ་བཅིངས་ཏེ། བཛྲ་བི་ཤྭ་རཀྵ་སརྦྦ་བཛྲ་ཧཾ་ཞེས་ཟློས་ཤིང་སྔ་མ་བཞིན་དུ་ཐུན་བཞིའི་སྦྱོར་བས་ཟླ་བ་གཅིག་གི་བར་དུ་
བསྒོམ་པར་བྱའོ། །དེ་ནས་མཚན་ཐོག་ཐག་བསྒོམ་མོ། །དེ་ནས་ནི་བསྒྲུབ་པར་བྱ་བའི་སེམས་ཅན་ནམ་ལྷ་གང་ཡིན་པ་བསྲུང་བར་འགྱུར་རོ། །རྡོ་རྗེ་སྣ་ཚོགས་ཀྱི་སྦྱོར་བ་དེ་དང་དེས་བཛྲ་བི་ཤྭ་རཀྵ་སརྦ་བཛྲ་ཎ་ཧཾ་ཞེས་བྱ་བས་སྤྱི་བོར་སྣ་ཚོགས་རྡོ་རྗེ་བསམས་ལ། དེའི་འོད་ཟེར་གྱི་ནང་དུ་
བསྒྲུབ་པར་བྱ་བ་ཆུད་པར་བསམ་མོ། །དཀྱིལ་འཁོར་འདྲི་བའི་དུས་སུ་ཡང་དེ་ལྟར་གནས་སྲུང་བ་བྱས་ན་རླུང་དང་ཆར་ལ་སོགས་པའི་འཇིགས་པ་མི་འབྱུང་ངོ་། །དེ་ནས་ཞེས་བྱ་བ་ལ་སོགས་པ་ལ་རྡོ་རྗེ་གསང་བ་ནི་གཟུངས་ཀྱི་དཀྱིལ་འཁོར་རོ། །དེའི་ཕྱག་རྒྱ་ནི་སེམས་མ་རྡོ་རྗེ་མ་ལ་

སོགས་པའོ། །དེའི་ཡེ་ཤེས་ནི་ངེས་པ་སྟེ། དེ་བསླབ་པོ་ཞེས་པ་ནི་ཉེ་བར་བསྟན་པའོ། །སེམས་དཔའི་རྡོ་རྗེ་མཉམ་གཞག་ལ། །ཞེས་བྱ་བ་ནི་རང་གི་སྙིང་གའི་ཟླ་བའི་དཀྱིལ་འཁོར་དུ་རྡོ་རྗེ་རྩེ་ལྔ་པ་བསྒོམས་པའི་སྟོབས་ཀྱིས་བརྟན་པར་བྱ་བ་སྟེ། གང་གི་ཕྱིར།
བདག་གིས་བདག་གི་སྙིང་གར་ནི། །ཞེས་གསུངས་པའི་ཕྱིར་རོ། །འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པའི་རྡོ་རྗེ་སེམས་དཔའི་རྣལ་འབྱོར་བྱས་ལ། དེའི་འོག་ཏུ་གཟུངས་ཀྱི་དཀྱིལ་འཁོར་ལས་གསུངས་པའི་སེམས་དཔའ་རྡོ་རྗེ་མ་
བཅིངས་ཏེ། བཛྲ་གུ་ཧྱ་ས་མ་ཡ་ཨཿཞེས་ཟློས་ཤིང་རང་གི་སྙིང་གར་ཟླ་བའི་དཀྱིལ་འཁོར་གྱི་སྟེང་དུ་རྡོ་རྗེ་རྩེ་ལྔ་པ་ཁ་དོག་དམར་པོ་འོད་ཟེར་དམར་པོ་འབར་བ་ཀུན་དུ་འཁྲུག་པ་བསྐྱེད་ལ་ཟླ་བ་གཉིས་ཀྱི་བར་དུ་བསྒོམ་པར་བྱའོ། །དེ་ནས་ཡང་ཟླ་བ་གཅིག་གི་བར་དུ་སྤྲོ་བ་དང་བསྡུ་བའི་
སྦྱོར་བས་བསྒོམས་ལ་མཐར་མཚན་གཅིག་ཐོག་ཐག་བསྒོམ་པར་བྱའོ། །དེ་ལྟར་སེམས་དཔའི་རྡོ་རྗེ་མཉམ་པར་བཞག་ལ། བདག་གིས་བདག་ཉིད་ཀྱི་སྙིང་གར་རྡོ་རྗེའི་ལྟ་བས་ཇི་སྐད་དུ་བཤད་པ་བཞིན་དུ་ངེས་པར་ལྟ་ཞིང་རང་གི་སྙིང་ག་ནས་ཇི་སྐད་གསུངས་པའི་སེམས་
དཔའི་རྡོ་རྗེ་ལྟ་བུའི་འོད་ཟེར་གྱི་ཚོགས་སྤྲུལ་ལ་དེས་དབབ་པར་བྱ་བའི་ལུས་ཀུན་དུ་བཀང་ན། ངེས་པར་འབབ་པར་འགྱུར་རོ། །དེ་བཞིན་དུ་རྡོ་རྗེ་རིན་ཆེན་གྱི་རྣལ་འབྱོར་གྱིས་གཟུངས་ཀྱི་དཀྱིལ་འཁོར་ལས་གསུངས་པའི་རྡོ་རྗེ་རིན་ཆེན་མ་བཅིངས་ལ་རིན་ཆེན་རྡོ་རྗེ་བསྒྲུབ་པར་བྱའོ། །རྡོ་རྗེ་
ཆོས་ཀྱི་རྣལ་འབྱོར་གྱིས་གཟུངས་ཀྱི་དཀྱིལ་འཁོར་ལས་གསུངས་པའི་རྡོ་རྗེ་ཆོས་མ་བཅིངས་ལ། ཆོས་ཀྱི་རྡོ་རྗེ་བསྒྲུབ་པར་བྱའོ། །ལས་ཀྱི་རྡོ་རྗེའི་རྣལ་འབྱོར་གྱིས་གཟུངས་ཀྱི་དཀྱིལ་འཁོར་ལས་གསུངས་པའི་རྡོ་རྗེ་ལས་མ་བཅིངས་ལ། ལས་ཀྱི་རྡོ་རྗེ་བསྒྲུབ་པར་བྱའོ། །དེ་
ལྟར་རིན་ཆེན་རྡོ་རྗེ་ལ་སོགས་པའི་སྒྲུབ་པ་བྱས་ནས། ཕྱིས་ལས་ཀྱི་དུས་སུ་ཡང་དེ་བཞིན་དུ་རྡོ་རྗེ་རིན་ཆེན་གྱི་རྣལ་འབྱོར་བྱས་ལ་རྡོ་རྗེ་རིན་ཆེན་མ་བཅིངས་ཏེ་བསྒྲུབ་པར་བྱ་བ་ལ་འབར་བའི་ལྟ་བས་ལྟ་ཞིང་རང་གི་སྙིང་ག་ནས་ནོར་བུ་པདྨ་རཱ་གའི་འོད་ལྟ་བུ་སྤྲུལ་ལ། དེས་དེའི་ལུས་ཉི་མ་

ནུབ་པ་ལྟ་བུར་བྱ་བས་དགུག་པར་བྱའོ། །རྡོ་རྗེ་ཆོས་ཀྱི་སྦྱོར་བས་རྡོ་རྗེ་ཆོས་མ་བཅིངས་ལ། སྙིང་ག་ནས་པདྨའི་འོད་ཟེར་གྱི་ཚོགས་གདུག་པ་སྤྲུལ་ལ། ཁྲོ་བོའི་ལྟ་བས་ལྟ་ཞིང་དེས་སེམས་ཅན་གདུག་པ་རྣམས་གཞོམ་པར་བྱའོ། །རྡོ་རྗེ་ལས་ཀྱི་སྦྱོར་བས་རྡོ་རྗེ་ལས་མ་བཅིངས་
ལ། རང་གི་སྙིང་ག་ན་སྣ་ཚོགས་རྡོ་རྗེ་ལྟ་བུ་འོད་ཟེར་གྱི་ཚོགས་སྤྲུལ་ལ། བྱམས་པའི་ལྟ་བས་ལྟ་ཞིང་བསྒྲུབ་པར་བྱ་བ་དེའི་ནང་དུ་ཆུད་པར་བསམས་ན། ཡང་དག་པར་བསྲུང་བར་འགྱུར་རོ། །དེ་ནས་ཞེས་བྱ་བ་ལ་སོགས་པས་ནི་གཟུངས་ཀྱི་དཀྱིལ་འཁོར་ལས་གསུངས་པའི་
དངོས་གྲུབ་རྣམས་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པའི་རང་གི་ལྷའི་རྣལ་འབྱོར་བྱས་ལ། རྡོ་རྗེ་སེམས་དཔའ་སྦྱོར་བས་ཀྱང་རྣལ་འབྱོར་ཆེན་པོ་བསྒྲུབས་ལ། གཟུངས་ཀྱི་དཀྱིལ་འཁོར་དང་གཞན་དག་ཏུ་ཡང་ལྷ་རྣམས་གཟུངས་ཀྱི་དཀྱིལ་འཁོར་དུ་གསུངས་
པའི་ཕྱག་རྒྱ་བཞིས་རྒྱས་བཏབ་ལ་ཇི་ལྟ་བ་བཞིན་དུ་བསྒྲུབ་པར་བྱའོ་ཞེས་སྟོན་ཏོ། །གཟུངས་ཀྱི་དཀྱིལ་འཁོར་གྱི་ཕྱག་རྒྱ་ཆེན་པོ་ནི་རྡོ་རྗེ་གསང་བའི་ཕྱག་རྒྱ་ཆེན་པོ་སྟེ་འདིར་ལག་པའི་ཕྱག་རྒྱ་ཉིད་ཀྱི་ཁྱད་པར་ནི་ཕྱག་རྒྱ་ཆེན་པོ་ཡིན་ཏེ་གང་གི་ཕྱིར་བྲིས་པའི་རྗེས་སུ་མཐུན་པར་བཅིངས་པ་
ཡིན་ལ། དེ་རྣམས་ཀྱི་མཚན་མའི་ཕྱག་རྒྱའི་ཚུལ་གྱིས་ལྷ་ཐམས་ཅད་བྲི་བའི་ཆོ་གར་གནས་ཀྱི་སྐུའི་ཚུལ་གྱིས་ནི་མ་ཡིན་ནོ། །འོན་ཀྱང་སྐུ་སྟོན་པར་བྱེད་པས་ཕྱག་རྒྱ་ཆེན་པོ་ཞེས་བཤད་དོ། །བཅིང་བ་བསླབ་བོ་ཞེས་བྱ་བ་ནི་དེ་རྣམས་ཀྱི་བཅིང་བའི་མཚན་ཉིད་ཅེས་བྱ་བའི་དོན་
ཏོ། །རྡོ་རྗེ་ཐལ་མོ་ལས་བྱུང་བ། །གསང་བ་ཆེན་པོ་རབ་ཏུ་བཤད། །ཅེས་བྱ་བ་ནི་ཤིན་ཏུ་སྦ་བར་བྱ་བ་ཉིད་ཡིན་པའི་ཕྱིར་གསང་བ་ཆེན་པོའོ། །འདིས་ནི་གང་དུ་ཁྱད་པར་གྱི་དགག་པ་མེད་པ་དེར་རྡོ་རྗེ་ཐལ་མོ་ནི་ཕྱག་རྒྱ་ཆེན་པོ་ཐམས་ཅད་བསྐྱེད་པའི་རྒྱུ་ཡིན་པར་སྟོན་ཏོ། །
མཐེ་བོང་གཉིས་ནི་བསྣོལ་བྱས་ལ། །ཞེས་བྱ་བ་ནི་མཐེ་བོང་གཉིས་སྐྱིལ་ཀྲུང་གི་ཚུལ་དུ་བྱས་པ་གང་ཡིན་པ་དེ་ནི་མཐེ་བོང་གཉིས་བསྣོལ་བ་ཞེས་བྱའོ། །མཛུབ་མོའི་རྩེ་མོ་བཀུག་པས་ནི། །ཞེས་བྱ་བ་ནི་མཛུབ་མོ་ཡང་ཡིན་ལ་རྩེ་མོ་བཀུག་པ་ཡང་ཡིན་པས་ན་དེ་སྐད་ཅེས་བྱའོ། །

མཛུབ་མོ་བཀུག་པ་དེ་ཡང་གུང་མོ་གཉིས་བསྙམས་པའི་ཚིགས་བར་མར་སྦྱར་བར་བྱ་བ་ཡིན་པས་ན། གུང་མོ་བསྙམས་པའི་ཚིགས་སུ་སྦྱར། །ཞེས་བྱའོ། །འདིའི་མིང་ཇི་སྐད་ཅེས་བྱ་ཞེ་ན། རྡོ་རྗེ་དབྱིངས་ཀྱི་དབང་མོར་བཤད། །ཅེས་བྱ་བ་གསུངས་ཏེ།
རྡོ་རྗེ་དབྱིངས་རྣམས་ཀྱི་དབང་མོ་སྟེ། གཙོ་བོ་ནི་རྡོ་རྗེ་དབྱིངས་ཀྱི་དབང་པོ་རྣམ་པར་སྣང་མཛད་ཡིན་ལ་དེའི་ཕྱག་རྒྱ་གང་ཡིན་པ་དེ་ནི་རྡོ་རྗེ་དབྱིངས་ཀྱི་དབང་མོ་ཞེས་བྱའོ། །འདིའི་དོན་ནི་འདི་ཡིན་ཏེ། རྡོ་རྗེ་ཐལ་མོའི་མཐེ་བོ་གཡོན་པས་གཡས་པ་མནན་ལ། མཛུབ་མོ་གཡས་
པའི་རྩ་བ་གཡོན་པས་མནན་ཏེ། མཛུབ་མོ་གཉིས་ལྕགས་ཀྱུ་ལྟ་བུར་བྱས་ལ་གུང་མོའི་ཚིགས་བར་མའི་སྟེང་དུ་གཞག་གོ། །གུང་མོ་རལ་གྲི་ལྟ་བུར་ཚིགས་གསུམ་པར་དགུག་པར་བྱའོ། །དབྱིངས་རྣམས་ཀྱི་དབང་ཕྱུག་ནི་གཙོ་བོ་ཡིན་པས་ན་རྡོ་རྗེ་དབྱིངས་ཀྱི་དབང་ཕྱུག་མ་
ནི་རྣམ་པར་སྣང་མཛད་ཡིན་ལ། འདི་དེའི་ཕྱག་རྒྱ་ཡིན་པས་ན། རྡོ་རྗེ་དབྱིངས་ཀྱི་དབང་ཕྱུག་མའོ། །དེ་ཉིད་གུང་མོ་རྡོ་རྗེར་བྱ། །ཞེས་བྱ་བ་ནི་རྡོ་རྗེ་དབྱིངས་ཀྱི་དབང་ཕྱུག་མ་ཉིད་ཀྱི་གུང་མོ་གཉིས་སྦྱར་ལ་རྩེ་མོར་བྱས་པ་ཡིན་གྱི། རྡོ་རྗེ་ཐལ་མོ་ནི་མ་ཡིན་ནོ། །རྡོ་རྗེ་ཐལ་མོར་ཁས་
བླངས་པར་གྱུར་ན་དེ་ཉིད་ཅེས་བརྗོད་པར་མི་བྱ་སྟེ། དེའི་དབང་དུ་བྱས་པ་དང་འབྲེལ་པ་མ་ཡིན་པའི་ཕྱིར་རོ། །འདིས་ནི་མི་བསྐྱོད་པའི་གནས་སུ་རྡོ་རྗེ་ཐུགས་རྡོ་རྗེ་མ་དང་། སེམས་དཔའ་རྡོ་རྗེ་མའི་ཕྱག་རྒྱའོ། །གུང་མོ་གཉིས་ནི་ནོར་བུར་བྱ། །ཞེས་བྱ་བ་ནི་ཞེས་བྱ་བའི་སྒྲ་ནི་
ཁྱད་པར་དུ་བྱ་བའི་དོན་ཏེ། རྡོ་རྗེ་དབྱིངས་ཀྱི་དབང་མོ་དེ་ཉིད་ལས་གུང་མོ་གཉིས་རྒྱབ་ཏུ་བསྐུམ་ལ། རིན་པོ་ཆེ་དང་འདྲ་བར་བྱས་པ་ནི། རིན་ཆེན་འབྱུང་ལྡན་གྱི་གནས་སུ་རང་གི་དབང་བསྐུར་བ་དང་རྡོ་རྗེ་རིན་ཆེན་མའིའོ། །པདྨོ་སྲིན་ལག་མཐེའུ་ཆུང་གུང་། །ཞེས་བྱ་བ་ནི་
རྡོ་རྗེ་དབྱིངས་ཀྱི་དབང་ཕྱུག་མ་དེ་ཉིད་ལས་གུང་མོ་དང་སྲིན་ལག་དང་། མཐེའུ་ཆུང་པདྨའི་འདབ་མ་འདྲ་བར་བྱས་པ་ནི། མཚོན་ཆ་ཞེས་བྱ་བ་དང་། རྡོ་རྗེ་ཆོས་མའིའོ། །ལག་པའི་སོར་མོ་རབ་ཏུ་བརྐྱང་། །ཞེས་བྱ་བ་ནི་རྡོ་རྗེ་དབྱིངས་ཀྱི་དབང་ཕྱུག་མ་དེ་ཉིད་ཀྱི་ལག་མཐིལ་ཕན་

ཚུན་སྤྲད་ལ་སོར་མོ་ཐམས་ཅད་བརྐྱང་བ་ནི། རྡོ་རྗེ་ཀུན་ཞེས་བྱ་བ་དང་། རྡོ་རྗེ་ལས་མའིའོ། །དེ་ལྟར་རྡོ་རྗེ་དབྱིངས་ཀྱི་དབང་ཕྱུག་མ་ལས་བྱུང་བའི་ཕྱག་རྒྱ་རྣམས་བསྟན་ནས། ད་ནི་མཛུབ་མོ་རྡོ་རྗེ་ཞེས་བྱ་བ་ལ་སོགས་པས་རྡོ་རྗེ་ཐལ་མོ་ལས་བྱུང་བའི་ཕྱག་རྒྱ་རྣམས་སྟོན་ཏེ། རྡོ་རྗེ་
ཐལ་མོའི་མཛུབ་མོ་གཉིས་ཕན་ཚུན་སྦྱར་ཏེ་རྩེ་མོར་བྱས་པ་འདི་ནི་མཛུབ་མོ་རྡོ་རྗེ་སྟེ་ཀུན་དུ་བཟང་མོའི་ཕྱག་རྒྱའོ། །མཛུབ་མོ་གཉིས་ཞེས་བྱ་བ་རྡོ་རྗེ་ཐལ་མོའི་མཛུབ་མོ་གཉིས་ལྕགས་ཀྱུ་གཉིས་སུ་བྱས་པ་འདི་ནི་དེ་བཞིན་གཤེགས་པ་ལྕགས་ཀྱུ་མའིའོ། །དེ་ཉིད་མཐེ་བོ་གཉིས་
ཀྱིས་སྦས། །ཞེས་བྱ་བ་ནི་བཤད་མ་ཐག་པའི་དེ་བཞིན་གཤེགས་པའི་ལྕགས་ཀྱུའི་མཐེ་བོང་གཉིས་བསྒྲེང་བས་མཛུབ་མོ་གཉིས་ཀྱི་ལྕགས་ཀྱུའི་ཚིགས་གསུམ་པའི་སོར་མོ་ལ་བཀབ་བ་ནི་དགའ་བ་ལ་ཆགས་མའིའོ། །ལེགས་པ་སྦྱིན་དང་ཞེས་བྱ་བ་ནི་རྡོ་རྗེ་ཐལ་མོའི་མཛུབ་མོ་
དང་མཐེ་བོས་སེ་གོལ་བརྡབས་པ་ནི་ལེགས་ལྡན་མའིའོ། །མཛུབ་མོ་རིན་ཆེན་ཞེས་བྱ་བ་ནི། རྡོ་རྗེ་ཐལ་མོའི་མཛུབ་མོ་གཉིས་རྒྱབ་བཀུག་ནས་རིན་པོ་ཆེ་འདྲ་བར་བྱས་པ་ནི་རིན་པོ་ཆེའི་གཙོ་མོའིའོ། །མཛུབ་མོ་རིན་ཆེན་ཅན་འོད་འབར། །ཞེས་བྱ་བ་ནི་
ཕྱག་རྒྱ་དེ་ཉིད་ལས་མཛུབ་མོ་རིན་ཆེན་ཅན་ཞེས་བྱ་བ་ནི་རྡོ་རྗེ་ཐལ་མོའི་མཛུབ་མོ་རིན་པོ་ཆེ་ལྟ་བུར་བྱས་ལ་སོར་མོ་གཞན་ཐམས་ཅད་བརྐྱང་སྟེ། འོད་ཟེར་འབར་བ་ལྟ་བུར་བྱ་བ་འདི་ནི་རིན་པོ་ཆེའི་སྒྲོན་མའིའོ། །སྲིན་ལག་གཤིབས་ལ་མཐེའུ་རིན་ཆེན། །ཞེས་བྱ་བ་ནི་རྡོ་རྗེ་
ཐལ་མོ་ལས་སྲིན་ལག་གཉིས་གཤིབས་ཤིང་སྦྱར་ལ། མཐེའུ་ཆུང་གཉིས་རྒྱབ་བསྐུམ་སྟེ་རིན་པོ་ཆེ་ལྟར་བྱས་པ་འདི་ནི་རྒྱལ་མཚན་གྱི་རྩེ་མོའི་དཔུང་རྒྱན་མའིའོ། །དེ་ཉིད་ཡོངས་སུ་བསྐོར་བའོ། །ཞེས་བྱ་བ་ནི་རྒྱལ་མཚན་རྩེ་མོའི་དཔུང་རྒྱན་མའི་ཕྱག་རྒྱ་དེ་ཉིད་བཞད་པའི་
ཚུལ་གྱིས་ཡོངས་སུ་བསྐོར་བ་ནི་བཞད་མ་དང་ལྡན་མའིའོ། །ཀུན་གྱི་རྩེ་མོ་རབ་ཏུ་འགྱེད། །ཅེས་བྱ་བ་ནི་རྡོ་རྗེ་ཐལ་མོ་ལས་སོར་མོ་ཐམས་ཅད་བརྐྱང་སྟེ་པདྨ་ཅུང་ཟད་ཁ་འབྱེད་པ་ལྟ་བུར་གཞག་པ་འདི་ནི་རྡོ་རྗེ་པདྨའིའོ། །མཐེ་བོང་མཐེའུ་ཆུང་བར་དུ་གཞུག །ཅེས་

བྱ་བ་ནི་མཐེ་བོང་མཉམ་པ་ནང་དུ་གནས་པ་གང་ཡིན་པ་དེ་ལ་དེ་སྐད་ཅེས་བྱའོ། །དེའི་དོན་ནི་འདི་ཡིན་ཏེ། རྡོ་རྗེ་ཐལ་མོ་ལས་མཐེ་བོང་གཉིས་བསྙམས་ལ་ནང་དུ་བཅུག་ནས་གཞག་པ་འདི་ནི་ཀུན་དུ་འཛིན་མའིའོ། །སོར་མོ་རབ་ཏུ་འཁོར་ལོ་བརྐྱང་། །ཞེས་
བྱ་བ་འདི་ནི་རྡོ་རྗེ་ཐལ་མོའི་དབྱིབས་ལས་དེ་དག་ཅུང་ཟད་ཁ་ཕྱེ་བ་ནི་འཁོར་ལོ་ཐམས་ཅད་མའིའོ། །དེ་ཉིད་ཀྱང་ནི་ཁ་ནས་དབྱུང་། །ཞེས་བྱ་བ་ནི་འཁོར་ལོ་ཐམས་ཅད་མའིའོ། །ཕྱག་རྒྱ་ཉིད་ཁ་ནས་སྟེང་དུ་ཚིག་འབྱིན་པའི་ཚུལ་གྱིས་ཁ་ནས་དབྱུང་བ་ནི་སྟོང་དུ་ཟློས་མའི་ཕྱག་རྒྱའོ། །
མཐེ་བོ་བརྐྱང་སྟེ་རྡོ་རྗེ་དགབ། །ཅེས་བྱ་བ་ནི་རྡོ་རྗེ་ཐལ་མོ་ལས་མཛུབ་མོ་གཉིས་ཀྱི་རྩ་བ་མཐེ་བོ་གཉིས་གཤིབས་པས་ཡང་དགབ་པ་འདི་ནི་དངོས་གྲུབ་ཀྱི་གཙོ་མོའིའོ། །མཛུབ་མོ་བསྙམས་ནས་ནང་དུ་གཞུག །ཅེས་བྱ་བ་ནི་རྡོ་རྗེ་ཐལ་མོ་ལས་མཛུབ་མོ་གཉིས་བསྙམས་ལ་ནང་
དུ་སྟེ་མཐེ་བོ་གཉིས་ཀྱི་རྩ་བར་བཅུག་ལ་རྡོ་རྗེ་ཐལ་མོ་བྱས་པའི་མཐེ་བོང་གཉིས་ཀྱིས་བཀབ་པ་འདི་ནི་ཐམས་ཅད་སྲུང་མའིའོ། །མཐེབ་གཉིས་དབྱེ་བ་དེ་ཉིད་ལས། །ཞེས་བྱ་བ་ནི་ཐམས་ཅད་སྲུང་མའི་ཕྱག་རྒྱ་དེ་ཉིད་ལས་མཐེ་བོང་གཉིས་ཕྱེ་ལ་ཁར་གཞག་པ་ནི་མདངས་སླར་
འཕྲོག་མའིའོ། །དེ་ནས་ནང་དུ་རྡོ་རྗེར་བྱ། །ཞེས་བྱ་བ་ནི་མདངས་སླར་འཕྲོག་མའི་ཕྱག་རྒྱ་ཉིད་ལས་མཐེ་བོ་གཉིས་ནང་དུ་བཅུག་ལ། རང་རང་གི་མཐེའུ་ཆུང་དང་སྲིན་ལག་གཉིས་ཀྱི་བར་དུ་གཏད། མཛུབ་མོ་སྦྱར་ཏེ་རྒྱབ་ཏུ་གཞག་པ་འདི་ནི་གཟུངས་ཀྱི་ཕྱག་རྒྱ་ཆེན་པོ་ཡིན་ནོ། །
རྡོ་རྗེ་སྒེག་མོ་ལ་སོགས་པ་ནས་རྡོ་རྗེ་འབེབས་པའི་བར་གྱི་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པའི་དམ་ཚིག་གི་ཕྱག་རྒྱ་ཉིད་གཟུངས་ཀྱི་དཀྱིལ་འཁོར་དུ་ཕྱག་རྒྱ་ཆེན་པོ་ཉིད་ཡིན་པར་འདོད་དོ། །རྡོ་རྗེ་གསང་བ་དེ་རྣམས་ནི། །རྡོ་རྗེ་བཅིངས་ལས་བྱུང་བ་ཡིན། །
ཞེས་བྱ་བ་ལ། རྡོ་རྗེ་ནི་འདིར་མི་བསྐྱོད་པའི་རིགས་རྣམས་སོ། །དེའི་གསང་བ་ནི་གསང་བའི་དམ་ཚིག་གི་ཕྱག་རྒྱ་རྣམས་ཞེས་བྱ་བའི་ཐ་ཚིག་གོ། །ཕྱག་རྒྱ་ཆེན་པོ་རྣམས་ནི་རྡོ་རྗེ་ཐལ་མོ་ལས་བྱུང་བ་འདི་རྣམས་ནི་རྡོ་རྗེ་བསྡམས་པ་ལས་བྱུང་བས་དེ་རྣམས་ཀྱི་གསང་བའི་དམ་ཚིག་

གི་ཕྱག་རྒྱར་འགྱུར་བ་ཡིན་ནོ། །འདི་རྣམས་ཀྱི་མཚན་ཉིད་ནི་འདི་ལྟར་ཤེས་པར་བྱ་སྟེ། རྡོ་རྗེ་བཅིང་བ་བཅིངས་པའི་མཛུབ་མོ་རྡོ་རྗེ་ནི་ཀུན་དུ་བཟང་མོའིའོ། །མཛུབ་གཉིས་རྩེ་ནི་དེ་བཞིན་གཤེགས་པ་ལྕགས་ཀྱུ་མའིའོ། །མཐེ་བོ་གཉིས་ཀྱིས་སྦས་པ་ནི་དགའ་བ་ལ་ཆགས་
མའིའོ། །ལེགས་པ་སྦྱིན་པ་ནི་ལེགས་ལྡན་མའི་དམ་ཚིག་གི་ཕྱག་རྒྱའོ། །ཆོས་ཀྱི་གསང་བའི་མཚན་རྣམས་ནི། །ཐལ་མོ་ནང་དུ་བཀུག་པས་སོ། །ཞེས་བྱ་བ་ལ། ཆོས་ནི་འོད་དཔག་ཏུ་མེད་པའི་རིགས་ཏེ་དེ་གསང་བ་ནི་གསང་བ་རྣམས་ཀྱི་དམ་ཚིག་གི་ཕྱག་རྒྱའོ། །ཐལ་
མོ་ནི་ཐལ་མོ་ཁོང་སྟོང་ངོ་། །དེའི་ནང་ནི་ནང་ཉིད་དུ་སྟེ། ནང་དེར་ཚུལ་འདྲ་བར་བྱས་ཤིང་བསྒོམས་པས་བསྒྲུབ་པར་གྱུར་པ་གང་ཡིན་པ་དེ་ལ་དེ་སྐད་ཅེས་བྱ་སྟེ། ཐལ་མོ་ནང་དུ་བཀུག་པའི་མཚན་མ་རྣམས་ཀྱིས་ཆོས་ཀྱི་གསང་བ་དེ་ཉིད་རྡོ་རྗེ་ཐལ་མོ་ལས་བྱུང་བའི་གསང་བ་རྣམས་
ཀྱི་ཕྱག་རྒྱར་གྱུར་པ་ཡིན་ནོ། །འདི་སྐད་སྟོན་ཏེ་ཐལ་མོ་སྦྱར་བའི་ནང་དུ་སོར་མོ་ཐམས་ཅད་བརྐྱང་ལ་ཅུང་ཟད་ཁ་བྱེ་བའི་པདྨ་ལྟ་བུར་གཞག་པ་ནི་རྡོ་རྗེ་པདྨོའི་འོ། །ཐལ་མོ་སྦྱར་ལ་མཐེ་བོང་གཉིས་བར་དུ་བཅུག་ནས་གཞག་པ་ནི་ཀུན་འཛིན་མའིའོ། །ཐལ་མོ་སྦྱར་བ་བཅིངས་ལ་
ནང་དུ་རྡོ་རྗེ་ཐལ་མོར་བྱས་ཏེ། སོར་མོའི་རྩེ་མོ་ཕན་ཚུན་མ་འབྱར་བར་གཞག་པ་ནི་འཁོར་ལོ་ཐམས་ཅད་མའིའོ། །འདི་ཉིད་ཁ་ནས་དབྱུང་བ་ནི་སྟོང་དུ་ཟློས་པའི་གསང་བའི་དམ་ཚིག་གི་ཕྱག་རྒྱའོ། །ལས་ཀྱི་གསང་བ་ནང་གནས་པའི། །མཚན་མས་ལས་སུ་བསྟན་པའོ། །
ཞེས་བྱ་བ་ནི་འདིར་དོན་ཡོད་པར་གྲུབ་པའི་རིགས་ནི་ལས་སོ། །དེའི་གསང་བ་ནི་གསང་བའི་དམ་ཚིག་གི་ཕྱག་རྒྱའི་གསང་བ་རྣམས་ཏེ། རྡོ་རྗེ་ཐལ་མོ་ནང་དུ་བཅིངས་བའི་ནང་དུ་མཛུབ་མོ་གཉིས་ཀྱི་རྩ་བའི་ཚིགས་སུ་མཐེ་བོ་གཉིས་སྦྱར་བས་དགག་པ་འདི་ནི་དངོས་གྲུབ་ཀྱི་གཙོ་
མོའི་འོ། །རྡོ་རྗེ་ཐལ་མོ་ནང་དུ་བཅིངས་པའི་ནང་དུ་མཛུབ་མོ་བསྙམས་ལ་མཐེ་བོའི་རྩ་བར་བཞག་ནས་མཐེ་བོ་གཉིས་ཀྱིས་བཀབ་པ་འདི་ནི་ཐམས་ཅད་སྲུང་མའིའོ། །ཐམས་ཅད་སྲུང་མའི་ཕྱག་རྒྱ་ཉིད་ལས་གང་གི་མཐེ་བོ་གཉིས་ཕྱེ་ལ་ཁར་གཞག་པ་ནི་མདངས་སླར་

འཕྲོག་མའིའོ། །མདངས་སླར་འཕྲོག་མའི་ཕྱག་རྒྱ་ཉིད་དེ་ལྟར་བཞག་ལ་མཛུབ་མོ་གཉིས་ཀྱི་རྩེ་མོ་རྒྱབ་སྤྲད་ལ་མཐེ་བོ་གཉིས་སྦྱར་ནས་རང་རང་གི་མཐེའུ་ཆུང་དང་སྲིན་ལག་གི་བར་དུ་གཞག་པ་འདི་ནི་གཟུངས་ཀྱི་ཕྱག་རྒྱའི་གསང་བའི་དམ་ཚིག་གི་ཕྱག་རྒྱ་
གསང་བའོ། །དེ་ལྟར་ན་ནང་ན་གནས་པའི་མཚན་མ་རྣམས་ཀྱིས་ལས་ལ་རབ་ཏུ་བསྟན་པས། ལས་ཀྱི་གསང་བར་འགྱུར་བ་ཡིན་ནོ། །རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པའི་ནི་ཕྱག་རྒྱ་ཆེན་པོ་ཉིད་དམ་ཚིག་གི་ཕྱག་རྒྱ་བསྒྲུབ་པའི་སྦྱོར་བས་གསང་བའི་དམ་ཚིག་གི་ཕྱག་
རྒྱ་གསང་བར་འགྱུར་བར་ཤེས་པར་བྱ་སྟེ། གཞན་དུ་ན་དམ་ཚིག་གི་ཕྱག་རྒྱ་ལས་གྱུར་པའི་རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པའི་སྒྲུབ་པ་མེད་པར་འགྱུར་རོ། །ཡི་གེ་ཨ་ལ་སོགས་པའི་ཆོས་ཀྱི་ཡི་གེ་རྣམས་ནི་ཀུན་དུ་བཟང་མོ་ནས་བརྩམས་ཏེ། གཟུངས་ཀྱི་ཕྱག་རྒྱའི་
བར་གྱི་ཆོས་ཀྱི་ཕྱག་རྒྱ་ཡིན་ནོ། །ལྷག་མ་རྣམས་ཀྱི་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་གསུངས་པ་ཡིན་པར་ཤེས་པར་བྱའོ། །གསང་བའི་ཕྱག་རྒྱ་གཉིས་བྱས་ནས། །ལས་ཀྱི་ཕྱག་རྒྱ་རྣམས་སུ་བྱ། །ཞེས་བྱ་བ་ནི་རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པ་ནས་
རྡོ་རྗེ་འབེབས་པའི་བར་གྱི་སྐུའི་གསང་བ་སྟོན་པར་བྱེད་པའི་ཕྱག་རྒྱ་ཆེན་པོ་ནི་གསང་བའི་ཕྱག་རྒྱ་སྟེ། དེ་གཉིས་སུ་བྱས་ནས་རྡོ་རྗེ་དབྱིངས་ལས་གསུངས་པའི་ཚུལ་དུ་ལས་ཀྱི་ཕྱག་རྒྱ་བཅིང་བར་བྱའོ། །དེ་ལ་ཚུལ་ནི་འདི་ཡིན་ཏེ། གཡོན་པའི་རྡོ་རྗེ་སོར་མོ་ནི། །གཡས་པའི་
ནང་དུ་བསྒྲེང་བར་བྱའོ། །བྱང་ཆུབ་མཆོག་གི་ཕྱག་རྒྱ་སྟེ། །སངས་རྒྱས་བྱང་ཆུབ་སྦྱིན་བྱེད་པའོ། །མི་གཡོ་བ་ཡི་རེག་པ་སྟེ། །དེ་བཞིན་རིན་ཆེན་མཆོག་སྦྱིན་པའོ། །ཚེ་དཔག་མེད་པའི་ཏིང་འཛིན་མཆོག །གདོན་མི་ཟ་བའི་མི་འཇིགས་སྦྱིན། །དེ་ནས་ལས་ཀྱི་
ཕྱག་རྒྱ་རྣམས། །མདོར་བསྡུས་པ་ནི་བཤད་པར་བྱ། །རྡོ་རྗེ་སེམས་སོགས་སེམས་དཔའ་རྣམས། །རྡོ་རྗེ་ལས་རྣམས་བྱེད་པ་སྟེ། །བསྒྱིངས་བཅས་གསོར་བ་གཉི་ག་ཡིས། །ལྕགས་ཀྱུ་འཛིན་ལྟར་གནས་པ་དང་། །མདའ་འཕངས་པ་ཡི་ཚུལ་དང་ནི། །ལེགས་སོ་

ཞེས་པས་སྙིང་གར་གཞག །དབང་བསྐུར་བ་ནི་རྡོ་རྗེ་ཡིས། །སྙིང་གར་ཉི་མ་བསྟན་པར་བྱ། །གཡོན་པ་ལ་ནི་གྲུ་མོ་གཟུགས། །དེ་བཞིན་ཁ་ཕྱོགས་བསྐོར་བར་བྱ། །གཡས་པ་ཡིས་ནི་གཡོན་པར་དབྱེ། །སྙིང་གར་གཡོན་པ་རལ་གྲི་འདུད། །མགལ་མེའི་འཁོར་ལོ་
བསྐོར་བ་དང་། །རྡོ་རྗེ་གཉིས་ཀ་ཁ་ནས་དབྱུང་། །རྡོ་རྗེ་གར་བསྐོར་བཀྲོལ་བ་ཡི། །ཐལ་མོ་འགྲམ་པ་སྤྱི་བོར་གཞག །གོ་ཆ་མཐེའུ་ཆུང་མཆེ་བ་མཆོག །ཁུ་ཚུར་གཉིས་ནི་མནན་པའོ། །རྡོ་རྗེ་འགྱིང་བའི་ཚུལ་གྱིས་སོ། །བསམ་པ་གཡོས་པས་འདུད་པར་བྱ། །
ཕྲེང་བ་བཅིང་དང་ཁ་ནས་དབྱུང་། །རྡོ་རྗེ་གར་ནི་བསྐོར་བ་ཡིན། །རྡོ་རྗེ་ཁུ་ཚུར་ཚུལ་གྱིས་ནི། །བདུག་པ་ལ་སོགས་དེ་བཞིན་སྦྱིན། །སངས་རྒྱས་ཀུན་ལ་མཆོད་པ་ཡི། །ཕྱག་རྒྱའི་མཆོད་པ་བྱེད་པའོ། །མཛུབ་མོ་ལྕགས་ཀྱུ་བཅིང་བ་ནི། །མཐེ་ཆུང་ལས་ཏེ་ལྕགས་ཀྱུ་
ཆེ། །མཁྲིག་མ་མདུད་པ་མཛུབ་གཉིས་གདུབ། །རྒྱབ་གཉིས་ཀྱང་ནི་བསྙམས་ཏེ་མནན། །ཞེས་བྱའོ། །དམ་ཚིག་མཆོག་ནི་ཇི་སྙེད་པ། །གཉིས་སུ་ཕྲལ་ནས་དེ་བཞིན་ནོ། །ཞེས་བྱ་བ་ནི་ཇི་ལྟར་ཕྱག་རྒྱ་ཆེན་པོ་གཉིས་སུ་བྱས་ནས་བྱང་ཆུབ་མཆོག་ལ་སོགས་པ་ལས་
ཀྱི་ཕྱག་རྒྱ་བཅིང་བ་དེ་བཞིན་དུ། དམ་ཚིག་གི་ཕྱག་རྒྱ་གཉིས་སུ་བྱས་ནས་སྔར་བཤད་པའི་ཚུལ་གྱིས་བཅིངས་པ་ནི་ལས་ཀྱི་ཕྱག་རྒྱར་འགྱུར་རོ་ཞེས་པའོ། །དམ་ཚིག་གི་ཕྱག་རྒྱ་ལས་བྱུང་བའི་ལས་ཀྱི་ཕྱག་རྒྱ་འདི་རྣམས་ཀྱི་སྒྲུབ་པ་ནི་གྲུབ་པའི་རྒྱུའོ། །ས་མ་ཡ་སྟྭཾ་ཞེས་བྱ་
བ་འདི་ནི་སྔགས་ཏེ། འདི་བརྗོད་ཅིང་བཅིང་བར་བྱའོ། །དེའི་འོག་ཏུ་རང་རང་གི་གཟུངས་ཀྱི་རིག་པས་ལས་རྣམས་ལ་སྦྱར་བར་བགྱིའོ། །དེ་ལྟར་བྱས་པས་ཅིར་འགྱུར་ཞེ་ན། བདག་གི་བཅིངས་པས་གྲུབ་པ་ནི། །ཞེས་བྱ་བ་གསུངས་ཏེ། བདག་ཉིད་ཀྱིས་བདག་ཉིད་
བཅིངས་པས་སྒྲུབ་པ་པོའི་འདོད་པའི་དོན་སྩོལ་བར་འགྱུར་རོ། །ཇི་ལྟ་བུ་ཞེ་ན། འདོད་ལ་ཆགས་པའི་བདེ་བའི་བདག །ཅེས་བྱ་བ་གསུངས་ཏེ། འདོད་པར་བྱ་བ་ཡིན་པས་ན་འདོད་པ་སྟེ། བྱང་ཆུབ་ཀྱི་མཚན་ཉིད་ཅན་རྡོ་རྗེ་སེམས་དཔའ་ནི་མངོན་པར་འདོད་པར་བྱ་བ་ཉིད་

ཡིན་ནོ་ཞེས་བྱ་བའི་ཐ་ཚིག་གོ། །དེར་ཆགས་པ་ནི་འདོད་པའི་འདོད་ཆགས་ཏེ། དེས་བདེ་བའི་བདག་ཉིད་ཅན་གྱི་རང་གི་རྒྱུད་འདི་ལ་ཡོད་པ་ཉིད་དུ་འགྱུར་རོ་ཞེས་སྟོན་ཏོ། །གང་གི་ཕྱིར་དེ་ལྟར་མཚན་མ་ཐོབ་པའི་སེམས་ཀྱིས་ལས་ཀྱི་ཕྱག་རྒྱ་རྣམས་འགྲུབ་
པར་འགྱུར་གྱི་གཞན་དག་ལ་ནི་མ་ཡིན་ནོ། །དེ་བས་ན་དམ་ཚིག་གི་ཕྱག་རྒྱ་ལས་བྱུང་བའི་ལས་ཀྱི་ཕྱག་རྒྱ་འདི་རྣམས་ལྷག་པར་གཅིག་ཀྱང་ནི་འདི་ལྟ་སྟེ། དུས་ཀུན་དུ་ནི་བཅིང་མི་བྱ། །ཞེས་གསུངས་པ་ཡིན་ནོ། །འོ་ན་འདི་དག་དུས་གང་གི་ཚེ་བཅིང་ཞེ་ན། གསང་བའམ་
ནི་དོན་ཆེ་ལ། །མཁས་པ་ཡིས་ནི་སྦྱར་བར་བྱ། །ཞེས་བྱ་བ་གསུངས་ཏེ། དེ་ལ་གསང་བའི་བྱ་བ་ནི་ཇི་ལྟར་རྒྱུད་ཕྱི་མ་ལས་བསྒྲུབ་པའི་དཀྱིལ་འཁོར་ཇི་ལྟ་བ་བཞིན་དུ་བྲིས་ལ། གཟུངས་ཀྱི་ལྷ་མོ་རྣམས་མཆོད་པ་ཐམས་ཅད་ཀྱིས་ཡང་དག་པར་མཆོད་ལ་ལས་ཀྱི་ཕྱག་རྒྱ་
བཅིངས་ཏེ། རྡོ་རྗེ་སེམས་དཔའི་ཏིང་ངེ་འཛིན་གྱིས། སངས་རྒྱས་རྗེས་སུ་དྲན་པ་བསྒོམས་ལ། བུད་མེད་ལུས་ཀྱི་བུ་གར་ཞུགས། །བུད་མེད་རྣམས་ནི་དབང་དུ་འགྱུར། །ཞེས་བྱ་བ་ལ་སོགས་པ་དོན་ཆེན་པོ་དང་། དམ་ཚིག་དང་དབང་བསྐུར་བའི་ཕྱིར། གཟུངས་ཀྱི་
དཀྱིལ་འཁོར་བྲི་བ་གང་ཡིན་པ་སྟེ། དེར་ཡང་དམ་ཚིག་གི་ཕྱག་རྒྱ་ལས་བྱུང་བའི་ལས་ཀྱི་ཕྱག་རྒྱ་འདི་དག་སྦྱོར་བ་ལ་མཁས་པས་སྦྱར་བར་བྱ་བ་ཡིན་པས་དེ་བས་ན། མཁས་པ་ཡིས་ནི་སྦྱར་བར་བྱ། །ཞེས་བྱ་བ་གསུངས་པ་ཡིན་ཏེ། མཁས་པ་ནི་དམ་ཚིག་གི་ཕྱག་རྒྱ་རྒྱུ་
ལས་བྱུང་བའི་ལས་ཀྱི་ཕྱག་རྒྱའི་དེ་ཁོ་ན་ཉིད་ཤེས་པའོ་ཞེས་བྱ་བའི་དོན་ཏོ། །སྔོན་དུ་བསྙེན་པ་ལ་སོགས་པའི་དུས་སུ་ཡང་སྒྲུབ་པ་པོས་འདི་རྣམས་ཅིའི་ཕྱིར་སྦྱར་བར་མི་བྱ་ཞེ་ན། དེའི་ཕྱིར་འདི་དག་ཀུན་ལ་བདག་ཉིད་གནས། །ཞེས་བྱ་བ་གསུངས་ཏེ། གང་གི་ཕྱིར་ཀུན་གྱི་
བདག་ཉིད་བྱང་ཆུབ་ཀྱི་མཚན་ཉིད་ཅན་གྱི་དེ་བཞིན་གཤེགས་པ་རྣམས་ཀྱི་དྲན་པ་དང་། ཤེས་རབ་དང་ཡང་དག་པར་ལྡན་པའི་ཐུགས་ལ་གནས་ཤིང་དེའི་བདག་ཉིད་དུ་རྗེས་སུ་ཞུགས་པས་འདི་རྣམས་དེ་ལས་བྱུང་བའི་ཡིན་ལ། དེ་བས་ན་ལས་ཀྱི་ཕྱག་རྒྱ་འདི་དག་ནི། །རང་

འབྱུང་སངས་རྒྱས་བཅོམ་ལྡན་འདས་རྣམས་ཀྱི་གསང་བའི་བཙུན་མོ་ལྷ་མོ་བརྟན་པ་ཡིན་པས་སྐྱེ་བོ་དེ་ཐམས་ཅད་ཀྱི་མངོན་སུམ་དུ་གྱུར་པར་མི་བྱའོ། །དེ་ལྟར་ཡིན་མོད་ཀྱི་འོན་ཀྱང་ཅིའི་ཕྱིར་སྒྲུབ་པ་པོས་དུས་ཐམས་ཅད་དུ་སྦྱར་བར་མི་བྱ་ཞེ་ན། སྒྲུབ་པ་རྣམས་ལ་རབ་ཆགས་ན། །
ཞེས་བྱ་བ་གསུངས་ཏེ། ཉིན་རེ་ཞིང་ལས་ཀྱི་ཕྱག་རྒྱ་བསྒོམ་པ་དང་རབ་ཏུ་ལྡན་པའི་རྣལ་འབྱོར་པ་རྣམས་ལ་རབ་ཏུ་ཆགས་ཤིང་ཞེན་པས་ན། རང་གི་བདག་པོ་གཏང་ང་རེ། །ཞེས་བྱ་བ་བདག་པོ་དེ་བཞིན་གཤེགས་པའོ། །ཇི་ལྟ་བུ་ཞེ་ན། རང་གི་སྟེ་ཕྱི་མའི་མཐར་ཐུག་པར་བརྟན་པར་
གནས་པའོ། །འདི་སྐད་སྟོན་པ་ཡིན་ཏེ། རང་གི་བདག་པོ་དེ་བཞིན་གཤེགས་པ་རྣམས་ཐམས་ཅད་ནས་ཐམས་ཅད་དུ་ཡོངས་སུ་སྤངས་ནས་སྒྲུབ་པ་པོ་ཉིད་ལ་དགའ་བར་འདོད་པ་ཡིན་ལ། དེ་བས་ན་སྒྲུབ་པ་པོས་དེ་བཞིན་གཤེགས་པ་རྣམས་ལ་མཆོག་ཏུ་གུས་པ་བསྐྱེད་ལ།
བླ་མའི་བཙུན་མོ་རྟག་ཏུ་རང་གི་ལས་ལ་སྦྱར་བར་མི་བྱའོ་ཞེས་བྱ་བ་དེ་ལྟ་བུའི་འཇིག་རྟེན་གྱི་ཐ་སྙད་ཁས་བླངས་ལ་སོ་སོར་ངེས་པའི་དུས་སུ་སྦྱར་བར་བྱའོ། །དེ་ལྟར་ན་ངེས་པའི་དུས་སུ་མཚན་མ་ཐོབ་ནས་སྦྱར་བར་གྱུར་ན། དེ་རྣམས་ངེས་པར་དགྱེས་པར་མངོན་པར་འདོད་
པའི་དངོས་གྲུབ་སྒྲུབ་པར་བྱེད་དོ། །དེ་བས་ན་དུས་གཞན་དུ་སྦྱར་ན་འདི་དག་ལོག་པར་སྦྱར་བས་བཀའ་ལས་འདས་པའི་ཕྱིར་དངོས་གྲུབ་ཉམས་པར་འགྱུར་རོ། །དེ་ལྟར་དམ་ཚིག་གི་ཕྱག་རྒྱ་ལས་བྱུང་བའི་ལས་ཀྱི་ཕྱག་རྒྱ་བསྒྲུབ་པའི་ཁྱད་པར་གསུངས་ནས། དེ་ནས་ཕྱག་རྒྱ་
འདི་རྣམས་ཞེས་བྱ་བ་ལ་སོགས་པས་ཕྱག་རྒྱ་ཆེན་པོ་ལ་སོགས་པ་སྤྱིའི་བཅིང་བ་ལ་སོགས་པའི་ལས་རྣམས་སྟོན་ཏོ། །སོགས་པའི་སྒྲས་ནི་དགྲོལ་བ་དང་། བརྟན་པར་བྱ་བ་དང་གོ་ཆ་དང་མཉེས་པར་བྱ་བ་རྣམས་བསྡུའོ། །དེ་ལ་བཛྲ་ཨཱ་བེ་ཤ་ཞེས་བྱ་བས་རྡོ་རྗེ་དབབ་པའི་
ཕྱག་རྒྱ་བཅིངས་ལ། ཨཿཞེས་བྱ་བས་དབབ་པ་བསྐྱེད་ལ་ཇི་སྐད་དུ་གསུངས་པའི་ཚུལ་གྱིས་ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་ཐམས་ཅད་བཅིངས་པ་ནི་བདག་འཆིང་བའོ། །གཞན་ནི་བཛྲ་ཧཱུཾ་བནྡྷ་ཞེས་ཟློས་ཤིང་ངོ་། །དེ་ནི་འདི་སྐད་སྟོན་པ་ཡིན་ཏེ། རྡོ་རྗེ་དབྱིངས་ཀྱི་དཀྱིལ་

འཁོར་ཆེན་པོ་ལས་གསུངས་པའི་ཚུལ་གྱིས། རང་གི་ལྷའི་རྣལ་འབྱོར་བྱས་ལ། ཕྱིས་གཟུངས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོ་དང་། དམ་ཚིག་དང་ཆོས་དང་ལས་ཀྱི་ཕྱག་རྒྱ་བཅིངས་ལ་བཛྲ་ཧཱུཾ་བནྡྷ་ཞེས་ཟློས་ཤིང་བཅིང་བར་བྱ་
བའམ། མདུན་དུ་རང་གི་གཟུངས་ཀྱི་ལྷ་མོ་རང་གི་ཕྱག་རྒྱ་བཞིས་རྒྱས་གདབ་པར་བྱའོ། །དེ་ལྟར་ཕྱག་རྒྱ་བཅིང་བའི་ཆོ་ག་ཐམས་ཅད་བསྟན་ནས། ད་ནི་དེ་དགྲོལ་བ་ཡིན་ནོ་ཞེས་བྱ་བ་ལ་སོགས་པ་དགྲོལ་བའི་ཆོ་ག་གསུངས་པ་ཡིན་ཏེ། རྡོ་རྗེ་དབྱིངས་ཀྱི་དབང་ཕྱུག་མའི་དམ་
ཚིག་གི་ཕྱག་རྒྱ་བཅིངས་ལ། ཨོཾ་བཛྲ་དྷ་ཏྭཱི་ཤྭ་རཱི་ཧཱུཾ་བཛྲ་ཎི་ཞེས་ལན་གསུམ་བརྗོད་ལ། ཨོཾ་བཛྲ་མུཿཞེས་བྱ་བས་དམ་ཚིག་གི་ཕྱག་རྒྱ་དེ་སྤྱི་གཙུག་ཏུ་བཀྲོལ་ལ། རྡོ་རྗེ་དབྱིངས་ཀྱི་དབང་ཕྱུག་མའི་ཕྱག་རྒྱ་ཐམས་ཅད་དེར་གྲོལ་བར་བསམ་པར་བྱའོ། །དེ་བཞིན་དུ་བཛྲ་ཨཱ་བེ་ཤ་
ཞེས་བྱ་བའི་བར་གྱིས་རྡོ་རྗེ་འབེབས་པའི་དམ་ཚིག་གི་ཕྱག་རྒྱ་བཅིངས་ལ། ཨོཾ་བཛྲ་མུཿཞེས་བྱ་བ་ལན་གསུམ་བརྗོད་དེ་རང་གི་བྱིན་པ་གཡོན་པའི་གནས་ནས་བཀྲོལ་ལ། རྡོ་རྗེ་འབེབས་པའི་རང་གི་ཕྱག་རྒྱ་ཐམས་ཅད་དེ་ནས་གྲོལ་བར་བསམ་པར་བྱའོ། །དེ་ལྟར་ན་ཕྱག་རྒྱ་
ཐམས་ཅད་གང་དང་གང་ནས་བྱུང་བ་དེ་དང་དེ་ནས་གྲོལ་བར་འགྱུར་རོ། །རིན་ཆེན་རྡོ་རྗེ་ཞེས་བྱ་བ་ལ་སོགས་པ་ལ་སྔར་བཤད་པའི་འཕགས་པ་ནམ་མཁའི་སྙིང་པོའི་དམ་ཚིག་གི་ཕྱག་རྒྱ་བརྟན་པར་བྱས་ཏེ། བཅིངས་ལ་རང་གི་སྙིང་གའི་ཕྱོགས་ནས་བཏེག་ལ། བཅིང་བར་ཇི་
སྐད་བཤད་པའི་ཕྱག་རྒྱ་ཐམས་ཅད་དབང་བསྐུར་བའི་བསམ་པས་རང་གི་དབང་བསྐུར་བའི་གནས་སུ་དེ་བཞག་ལ་འདི་སྐད་བརྗོད་དོ། །ཨོཾ་བཛྲ་རཏྣ་ཨ་བྷི་ཥིཉྩ། དེ་ནས་ཕྱག་རྒྱ་དེ་གཉིས་སུ་བྱས་ལ། ཨོཾ་ཏྲི་དྷ་བཛྲ་ཀརྨྨཱ་ཙ་ཏྲི་དྷ་ཞེས་ཟློས་ཤིང་མཛུབ་མོ་གཉིས་ཀྱིས་གོ་ཆ་བཅིང་
བར་བྱའོ། །དེ་ནས་གོ་ཆའི་མཐར་སྔ་མ་བཞིན་དུ་དར་དཔྱངས་འཕྱང་བ་བྱས་ལ། མཉམ་པའི་ཐལ་མོས་མཉེས་པར་བྱའོ་ཞེས་བསྟན་པར་བྱ་བའི་ཕྱིར་འདི་ཉིད་དོ་ཞེས་གསུངས་པ་ཡིན་ནོ། །བཅིང་བའི་དམ་ཚིག་ནི་འདའ་བར་མི་བྱ་བའི་བཅིང་བའོ། །མཉམ་པའི་ཐལ་མོས་

མཉེས་པར་བྱ་བ་ཉིད་གསུངས་པ་ནི་ཐལ་མོ་བརྡབས་པས་ཞེས་བྱ་བ་ཡིན་ནོ། །སྔགས་གང་གིས་བྱ་ཞེ་ན། ཨོཾ་གུ་ཧྱ་ས་མཱ་ཏ་ལས་ཞེས་གསུངས་པ་ཡིན་ཏེ་ལན་གསུམ་བྱའོ། །གང་གིས་དེ་ལྟར་ཆོ་ག་རྒྱ་ཆེར་བྱེད་མི་ནུས་པ་དེས་བཅིངས་པ་ལ་སོགས་པའི་ལས་རྣམས་བཛྲ་སཏྭ་
བཛྲ་སཏྭ་ཞེས་ཟློས་ཤིང་བརྟན་པར་བྱ་བའི་ཕྱིར། དེ་ནས་རྡོ་རྗེ་སེམས་དཔའ་ཅི་དགར་བཟླས། །ཞེས་གསུངས་པ་ཡིན་ཏེ། དགྲོལ་བ་ལ་སོགས་པའི་དཀྱིལ་འཁོར་ལས་གསུངས་པའི་ལས་ཐམས་ཅད་ལ་རྡོ་རྗེ་སེམས་དཔའ་ཅི་དགར་བཟླས་ལ་སྦྱར་བར་བྱའོ་ཞེས་བྱ་བའི་ཐ་ཚིག་གོ། །ཆོ་ག་ལྷག་མ་རྣམས་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པ་གཟུང་བར་བྱ་སྟེ། རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པའི་རྣལ་འབྱོར་ཆེན་པོ་བྱས་ལ། རྡོ་རྗེ་སེམས་དཔའི་སྦྱོར་བས་དེ་བཞིན་གཤེགས་པའི་རིགས་ཀྱི་གཟུངས་ལ་སོགས་
པའི་དཀྱིལ་འཁོར་བྲི་བར་བྱའོ། །འདི་ནི་གཟུངས་ཀྱིས་འདུལ་བའི་སེམས་ཅན་གྱི་ཕྱིར་གསུངས་པ་ཡིན་པས་གཟུངས་ཀྱི་དཀྱིལ་འཁོར་རོ། །གཟུངས་ཀྱི་དཀྱིལ་འཁོར་གྱི་འགྲེལ་པའོ། །དེ་ལྟར་གཟུངས་ཀྱི་དཀྱིལ་འཁོར་བསྟན་ནས། ད་ནི་དེ་ནས་ཞེས་བྱ་བ་ལ་སོགས་
པས་དེ་འདུལ་བའི་འགྲོ་བ་ལས་བརྩམས་ཏེ། ཆོས་ཀྱི་ཕྱག་རྒྱ་གཙོ་བོར་གྱུར་པའི་ཆོས་ཀྱི་དཀྱིལ་འཁོར་ལས་གསུངས་པ་ཡིན་ནོ། །དེ་ནས་ཞེས