Luận tạng Tây Tạng (Tengyur) — Tập 57

ལ་སྣ་ཚོགས་ཀྱིས་སེམས་ཅན་ཐམས་ཅད་རྣམ་པར་སྦྱོང་བ་ནི་སེམས་ཅན་གྱི་དོན་ནོ། །བཅོས་མའི་ཁྲོ་བོ་ཡང་དག་པར་སྟོན་པ་ནི་ཐབས་ཆེན་པོ་སྟེ། ཐབས་ཆེན་པོའི་ཡེ་ཤེས་ཀྱི་དམ་ཚིག་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་
ཞུགས་སོ་ཞེས་བསྟན་པའི་ཕྱིར་རོ། །དེ་ཉིད་གདུག་པ་ཐམས་ཅད་ཚར་གཅོད་པར་སྦྱོར་བས་སྟོབས་སོ། །རྟ་མཆོག་ལ་སོགས་པའི་གཟུགས་ཅན་དུ་གྱུར་པས་བརྩོན་འགྲུས་སོ། །ཚིག་རེ་རེར་ཐམས་ཅད་བདག་ཡིན་པར་བྱ་བའི་ཡེ་ཤེས་ཆེན་པོའོ། །དེ་ལྟར་ན་དེ་བཞིན་
གཤེགས་པ་ཐམས་ཅད་ཀྱི་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་པར་གྲོལ་བའི་ཡེ་ཤེས་མཐོང་བ་དང་། ཆོས་ཀྱི་འཁོར་ལོ་བསྐོར་བ་དང་། སེམས་ཅན་གྱི་དོན་བྱ་བ་དང་། ཐབས་ཆེན་པོ་དང་། སྟོབས་ཆེན་པོ་དང་།
བརྩོན་འགྲུས་དང་། ཡེ་ཤེས་ཆེན་པོ་སྟེ། དེ་རྣམས་བསྐྱེད་པའི་རྒྱུར་གྱུར་པས་ན། རྡོ་རྗེ་ནི་དམ་ཚིག་གོ། །དེ་ཅིའི་ཕྱིར་ཞེ་ན། སེམས་ཅན་གྱི་ཁམས་ཞེས་བྱ་བ་ལ་སོགས་པ་གསུངས་ཏེ། སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་རྣམས་ཡོངས་སུ་བསྐྱབ་
པ་དང་། ཐམས་ཅད་ཀྱི་དབང་པོར་བྱ་བ་ནི་འཇིག་རྟེན་དང་འཇིག་རྟེན་ལས་འདས་པའོ། །དེ་ཡང་བདེ་བ་ཐམས་ཅད་ནི་འཇིག་རྟེན་དང་འཇིག་རྟེན་ལས་འདས་པ་རྣམས་སོ། །ཡིད་བདེ་བ་ཐམས་ཅད་ནི་དགའ་བ་སྟེ་དེ་དག་ཀྱང་དེ་བཞིན་ནོ། །དེ་རྗེས་སུ་མྱོང་བར་བྱ་བ་ནི་མངོན་
སུམ་དུ་བྱ་བ་སྟེ། དེའི་དོན་དུ་རྗེས་སུ་སྦྱིན་ནོ། །ཇི་སྲིད་ཅེས་བྱ་བའི་སྒྲས་ནི་ས་དང་ཕ་རོལ་ཏུ་ཕྱིན་པ་ལ་སོགས་པ་གཞན་རྣམས་ཀྱང་བསྡུའོ། །དེ་བཞིན་གཤེགས་པ་ཐམས་ཅད་ཀྱི་མཉམ་པ་ཉིད་ནི་མི་བསྐྱོད་པ་ལ་སོགས་པའི་ཐུགས་ཏེ། དེའི་ཡེ་ཤེས་ནི་མངོན་པར་རྟོགས་
པའོ། །མངོན་པར་ཤེས་པ་ནི་ཇི་སྐད་དུ་བཤད་པའི་མངོན་པར་ཤེས་པ་དྲུག་ཉིད་དོ། །ཡེ་ཤེས་དང་མངོན་པར་ཤེས་པ་དྲུག་ཉིད་ནི་བླ་ན་མེད་པའི་ཐེག་པ་ཆེན་པོའོ། །དེ་མངོན་པར་རྟོགས་པ་ནི་ཐུགས་སུ་ཆུད་པའོ། །དེ་ཉིད་ནི་གྲུབ་པའི་མཆོག་སྟེ། དངོས་གྲུབ་ཀྱི་

མཆོག་གོ། །དེ་ཐོབ་པ་ནི་བརྙེས་པའོ། །དེ་ཉིད་ནི་འབྲས་བུ་སྟེ་དེ་དག་གི་རྒྱུའི་ཕྱིར་དེ་བཞིན་གཤེགས་པ་ཐམས་ཅད་ཀྱི་གྲུབ་པའི་རྡོ་རྗེ་བྱིན་པ་ནི་སྩལ་བའོ། །འདི་སྐད་སྟོན་ཏེ། ཇི་སྲིད་རྡོ་རྗེ་སེམས་དཔའི་ཡེ་ཤེས་དང་མངོན་པར་ཤེས་པ་ཐོབ་པར་བྱ་བའི་ཕྱིར་དེའི་ལག་
པར་བྱིན་ནོ། །བྱང་ཆུབ་སེམས་དཔའ་ཆེན་པོ་ཞེས་བྱ་བ་ལ་སོགས་པ་ལ། དེ་བཞིན་གཤེགས་པ་ཐམས་ཅད་ཀྱི་འཁོར་ལོ་ནི་རྡོ་རྗེ་དབྱིངས་ཀྱི་དུམ་བུར་གསུངས་པའི་དཀྱིལ་འཁོར་རྣམས་ཏེ། འཁོར་ལོ་ནི་དཀྱིལ་འཁོར་ཞེས་གསུངས་པའི་ཕྱིར་རོ། །དེ་སྒྱུར་བའི་
ངང་ཚུལ་འདི་ལ་མངའ་བ་སྟེ། སེམས་ཅན་ཐམས་ཅད་ཀྱི་རྒྱུད་ལ་སྤྲུལ་པ་དང་བྲི་བའི་ཆོ་གས་ཐུན་མོང་དུ་བྱ་བའི་ཕྱིར་དེའི་ངོ་བོ་ཉིད་ཡིན་པས་ན། དེ་བཞིན་གཤེགས་པ་ཐམས་ཅད་ཀྱི་འཁོར་ལོས་སྒྱུར་བ་ཉིད་དུའོ། །དེ་བཞིན་གཤེགས་པ་ཐམས་ཅད་ཀྱི་འཁོར་ལོས་
སྒྱུར་བ་ཉིད་དུ་བྱ་བ་དེས་ཀྱང་ཅི་ཞིག་མཛད་ཅེ་ན། སངས་རྒྱས་ཐམས་ཅད་ཀྱི་ཞེས་བྱ་བ་ལ་སོགས་པ་གསུངས་ཏེ། རྣམ་པར་སྣང་མཛད་དང་། མི་བསྐྱོད་པ་དང་། རིན་ཆེན་འབྱུང་ལྡན་དང་། འོད་དཔག་ཏུ་མེད་པ་དང་། དོན་ཡོད་གྲུབ་པའི་སྐུ་ནི་སངས་རྒྱས་
ཐམས་ཅད་ཀྱི་སྐུའོ། །དེ་ཉིད་ནི་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པའི་རྒྱུར་གྱུར་པས་ན་རིན་པོ་ཆེའོ། །དེ་དང་ལྡན་པའི་དབུ་རྒྱན་ནི་སངས་རྒྱས་ཐམས་ཅད་ཀྱི་སྐུ་རིན་པོ་ཆེའི་དབུ་རྒྱན་ནོ། །དེས་དབང་བསྐུར་བ་ནི་དེ་ལྟ་བུའི་དབུ་རྒྱན།
དེའི་དབུ་ལ་བཞག་ནས། དར་དཀར་པོ་ཞང་དུ་ཁྲུ་གང་ལ། དཀྱུས་ཁྲུ་ཉི་ཤུ་པ་བཅིངས་པའི་དབང་གིས་དབང་བསྐུར་ནས་རྡོ་རྗེ་དེ་དེའི་ལག་ཏུ་བྱིན་ནོ་ཞེས་བྱ་བ་ལ་གཡོན་པའི་རྡོ་རྗེ་ཁུ་ཚུར་དྲིལ་བུ་དང་བཅས་པ་ནི་གཡོན་པའི་རྡོ་རྗེ་སྟེ། དེ་ཁ་ནང་དུ་བསྟན་པར་
གཡོན་པའི་རྐེད་པའི་ཕྱོགས་སུ་བཀན་ཏེ་བཞག་པ་ནི་གཡོན་པའི་རྡོ་རྗེ་བསྒྱིངས་པའོ། །དེས་བཞུགས་ནས་ཕྱག་གཡས་པ་འདེགས་ཤིང་འཛིན་པར་མཛད་པས་ན་གསོར་བ་ཉིད་ཀྱིས་ཏེ་དེས་རྡོ་རྗེ་དེ་ཞེས་བྱ་བ་གང་བཅོམ་ལྡན་འདས་རྣམ་པར་སྣང་མཛད་ཀྱིས་སྩལ་

བ་གང་ཡིན་པ་དེ་ཐུགས་ཀར་བསྟོད་པའི་ཚུལ་གྱིས་ཞེས་བྱ་བ་རང་གི་ཐུགས་ཀའི་གནས་སུ་སོར་མོ་གསུམ་བསྒྲེང་བའི་གུང་མོ་ལ་རྡོ་རྗེ་དེ་ཁ་གྱེན་དུ་བལྟ་བར་འཇོག་པའི་ཚུལ་གྱིས་འཛིན་ཅིང་འཆང་ངོ་། །འདི་ཞེས་བྱ་བ་ཐུགས་ལ་གཞག་པར་མཛད་ནས་འདི་
སྐད་གསུངས་སོ། །སངས་རྒྱས་ཀུན་གྱི་ཞེས་བྱ་བ་ནི་རྣམ་པར་སྣང་མཛད་ལ་སོགས་པའོ། །གྲུབ་པའི་རྡོ་རྗེ་ཞེས་བྱ་བ་ནི་གྲུབ་པའི་ཕྱིར་དང་དངོས་གྲུབ་ཀྱི་རང་བཞིན་ཡིན་པས་སོ། །བླ་ན་མེད་པ་ཞེས་བྱ་བ་ནི། སྟོང་པ་ཉིད་ནི་རྡོ་རྗེར་བཤད། །ཅེས་གསུངས་པའི་ཕྱིར་རོ། །
རིགས་ལྔའི་སྟོང་པ་ཉིད་ཀྱི་ཡེ་ཤེས་ཀྱི་ངོ་བོ་ཉིད་ཀྱིས་ནི་ཕུལ་དུ་བྱུང་བ་ཡིན་པས་སོ། །འདི་ཞེས་བྱ་བ་ནི་རྣམ་པར་སྣང་མཛད་ཀྱིས་སྩལ་བ་གང་ཡིན་པའོ། །བདག་སྟེ་ཞེས་བྱ་བ་ནི་རྡོ་རྗེ་གང་ཡིན་པ་དེ་ནི་བདག་ཡིན་པའོ། །བདག་གི་ལག་ཏུ་བྱིན་ཞེས་བྱ་བ་ནི།
བདག་གི་རང་བཞིན་ཅན་གྱི་རྡོ་རྗེའི་གཟུགས་གང་ཡིན་པ་དེ་བདག་གི་ལག་ཏུ་བྱིན་པའོ། །དེ་ལྟ་ཡིན་པ་དེས་ན་བདག་རྡོ་རྗེ་ལ་ནི་རྡོ་རྗེ་གནས་ཞེས་བྱ་བའོ། །དེ་ལྟར་བཅོམ་ལྡན་འདས་ཀྱིས་དཔལ་རྡོ་རྗེ་སེམས་དཔའི་གདུལ་བྱ་རྣམས་བྱང་ཆུབ་ཀྱི་སེམས་ལ་རབ་ཏུ་གཞག་པའི་དོན་དུ།
རྡོ་རྗེ་སེམས་དཔའ་བསྐུལ་བའི་ཕྱིར་ཏིང་ངེ་འཛིན་མངོན་དུ་མཛད་པ་དང་། དེའི་ཆེད་དུ་བརྗོད་པའི་ཕྱིར་ཟླ་བའི་དཀྱིལ་འཁོར་དང་། ཡེ་ཤེས་ཀྱི་རྡོ་རྗེ་དང་། རྡོ་རྗེ་ཆེན་པོའི་འོད་ཟེར་གྱིས་དེ་བཞིན་གཤེགས་པ་རྣམས་དང་། སེམས་ཅན་གྱི་དོན་དང་། ཀུན་དུ་བཟང་པོ་དང་། དེའི་ཆེད་དུ་
བརྗོད་པ་དང་། བཀའ་ནོད་པ་དང་། དབང་བསྐུར་བ་དང་། རྫོགས་པའི་ཆེད་དུ་བརྗོད་པས་བསྐྱེད་པ་དང་། སྤྲོ་བ་དང་། བསྡུ་བ་དང་། གནས་པ་དང་། བརྟན་པར་བསྒོམ་པ་གསུངས་པ་ཡིན་ནོ། །དེ་ལྟར་ཚུལ་འདིས་དཔལ་རྡོ་རྗེ་སེམས་དཔས་འདུལ་བའི་རང་བཞིན་ལ་དེ་བཞིན་
གཤེགས་པ་ཐམས་ཅད་ཀྱི་བྱང་ཆུབ་ཀྱི་སེམས་སུ་གཞག་པ་ཡིན་ནོ། །རྡོ་རྗེ་རྒྱལ་པོས་འགུགས་པ་ཡིན་པས་ན། དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་ནས་བཅོམ་ལྡན་འདས་ཞེས་བྱ་བ་ནི་རྣམ་པར་སྣང་མཛད་དོ། །ཡང་ཞེས་བྱ་བའི་སྒྲ་ནི་གཞན་ཡང་ཞེས་བྱ་

བའི་དོན་ཏོ། །བྱང་ཆུབ་སེམས་དཔའ་ཆེན་པོ་གདོན་མི་ཟ་བའི་རྒྱལ་པོ་ཞེས་བྱ་བ་ལ། གདོན་མི་ཟ་བ་ཡང་ཡིན་ལ་རྒྱལ་པོ་ཡང་ཡིན་པས་ན་གདོན་མི་ཟ་བའི་རྒྱལ་པོའོ། །དེ་ཉིད་ནི་བྱང་ཆུབ་སེམས་དཔའ་ཆེན་པོ་སྟེ་བྱང་ཆུབ་ཆེན་པོའི་མཚན་ཉིད་ཅན་གྱི་ཟླ་བའི་དཀྱིལ་
འཁོར་གྱི་སྟེང་ན་རྡོ་རྗེ་རྩེ་ལྔ་པའི་གཟུགས་སུ་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ན་གནས་པར་གང་སྔར་བཤད་པའོ། །གདོན་མི་ཟ་བ་ནི་དོན་ཡོད་པའོ། །དེ་བཞིན་གཤེགས་པ་ཐམས་ཅད་སྤྱན་འདྲེན་པ་རྡོ་རྗེ་རྒྱལ་པོའི་གཟུགས་ཀྱིས་དེ་ཉིད་མཛེས་ཤིང་འབར་བའི་
གདོན་མི་ཟ་བའི་རྒྱལ་པོའོ། །དེའི་དམ་ཚིག་ནི་རྡོ་རྗེ་ལྕགས་ཀྱུ་ལ་སོགས་པའི་གཟུགས་ཐམས་ཅད་ཡང་དག་པར་སྟོན་པའོ། །གང་གི་ཕྱིར་དེ་ལས་བྱུང་བས་ན་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །འདི་སྐད་སྟོན་པ་ཡིན་ཏེ། རྡོ་རྗེ་ལྕགས་ཀྱུ་ལ་སོགས་པའི་གཟུགས་
ཀྱི་རྣམ་པར་སྤྲུལ་པ་བསྐྱེད་པའི་རྣམ་པར་ཐུགས་རྩེ་གཅིག་ཏུ་མཛད་པའོ། །དེ་བཞིན་གཤེགས་པ་ཐམས་ཅད་སྤྱན་དྲང་བའི་དམ་ཚིག་ཅེས་བྱ་བ་ལ། རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་ཐམས་ཅད་སྤྱན་དྲང་བ་ནི་སྤྱན་འདྲེན་པའོ། །དེ་
ཉིད་ནི་དམ་ཚིག་སྟེ་རྒྱུའོ། །མིང་དེ་སྐད་ཅེས་བྱ་བའི་དེ་བཞིན་གཤེགས་པ་ཐམས་ཅད་ཀྱི་སྙིང་པོར་གྱུར་པ་དེ་རང་གི་ཐུགས་ཀ་ནས་རང་ཉིད་ཀྱིས་ཕྱུང་བར་གྱུར་པ་ནི་བཛྲ་རཱ་ཛེ་ཞེས་བྱ་བའོ། །དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་ཞེས་བྱ་བ་ནི། དེ་བཞིན་གཤེགས་
པ་ལྔའི་ཐུགས་ཀ་ནས་སོ། །ཕྱུང་མ་ཐག་པ་ཞེས་བྱ་བ་ནི་སྒྲའི་གཟུགས་སོ། །བཅོམ་ལྡན་འདས་ཕྱག་ན་རྡོ་རྗེ་དེ་ཉིད་ཅེས་བྱ་བ་ནི། གང་སྔར་ཟླ་བའི་དཀྱིལ་འཁོར་ལ་སོགས་པའི་གཟུགས་ཀྱིས་བྱུང་བ་དེ་ཉིད། དེ་ནི་རྡོ་རྗེ་ལྕགས་ཀྱུ་ལྟ་བུར་བྱུང་བར་གྱུར་ནས་ཕྱག་གཉིས་སུ་
གནས་སོ་ཞེས་བྱ་བར་སྦྱོར་རོ། །དེ་བཞིན་གཤེགས་པ་ཐམས་ཅད་ཀྱི་ལྕགས་ཀྱུ་ཆེན་པོ་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་ལྕགས་ཀྱུ་ཆེན་པོ་སྟེ། ལྕགས་ཀྱུ་ཚད་མེད་པའི་གཟུགས་སུ་གྱུར་ཅིང་གྲུབ་པ་སྟེ། དེ་བཞིན་གཤེགས་པ་ལྔའི་ཐུགས་ཀ་ནས་བྱུང་ནས།

བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་སུ་བཞུགས་ཏེ་སྔར་བཤད་པའི་རྒྱུད་ཉིད་ཀྱིས་གཅིག་ཏུ་འདྲེས་ནས། རྡོ་རྗེའི་རང་བཞིན་ཅན་གྱི་རྡོ་རྗེ་ལྕགས་ཀྱུ་ཆེན་པོའི་དབྱིབས་སུ་གྱུར་ཅིང་བྱུང་ནས། བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་
ཀ་ནས་ཕྱུང་སྟེ། དེ་ཉིད་ཀྱི་ཕྱག་གཉིས་སུ་གནས་སོ། །དེ་ནས་ཞེས་བྱ་བ་ལ་སོགས་པ་ལ། དེ་བཞིན་གཤེགས་པ་ཐམས་ཅད་སྤྱན་དྲང་བ་ལ་སོགས་པ་བྱས་ནས་ཐུགས་ཀར་གནས་ཏེ། ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་ནས་ལྕགས་ཀྱུའི་
དབྱིབས་ཆེན་པོ་དེ་ལས་ཞེས་བྱ་བ་ནི་རྣམ་པར་སྣང་མཛད་ཀྱི་ཕྱག་ན་གནས་པ་ནས་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་མོ་དང་མཉམ་པའི་དེ་བཞིན་གཤེགས་པའི་སྐུ་རྣམས་ཞེས་བྱ་བ་ནི་རྣམ་པར་སྣང་མཛད་དང་། མི་བསྐྱོད་པ་དང་། རིན་ཆེན་འབྱུང་ལྡན་དང་།
འོད་དཔག་ཏུ་མེད་པ་དང་། དོན་ཡོད་གྲུབ་པའི་སྐུ་རྣམས་བྱུང་ཞིང་འཐོན་པར་གྱུར་པའོ། །དེས་ཅི་ཞིག་མཛད་ཅེ་ན། དེ་བཞིན་གཤེགས་པ་ཐམས་ཅད་སྤྱན་དྲང་བ་ལ་སོགས་པ་ཞེས་བྱ་བ་གསུངས་ཏེ། དེ་བཞིན་གཤེགས་པ་ཐམས་ཅད་སྤྱན་འདྲེན་པ་ནི་འདིའི་ལས་ཀྱི་
གཙོ་བོ་ཡིན་པར་སྟོན་ལ་དེ་ལ་སོགས་པའི་སངས་རྒྱས་ཐམས་ཅད་ཀྱི་རྫུ་འཕྲུལ་དང་ཆོ་འཕྲུལ་གང་ཡིན་པ་དེ་ནི་དེ་བཞིན་གཤེགས་པ་ཐམས་ཅད་སྤྱན་དྲང་བ་ལ་སོགས་པ་སངས་རྒྱས་ཐམས་ཅད་ཀྱི་རྫུ་འཕྲུལ་དང་ཆོ་འཕྲུལ་རྣམས་སོ། །སོགས་པའི་སྒྲས་ནི་བྱང་ཆུབ་ཏུ་སེམས་བསྐྱེད་
པ་ལ་སོགས་པ་བསྡུས་ཏེ། དེ་རྣམས་བྱས་ནས་སོ། །རྡོ་རྗེ་སེམས་དཔའི་ཏིང་ངེ་འཛིན་ནི་ཤིན་ཏུ་གདོན་མི་ཟ་བའི་རྒྱལ་པོ་ཞེས་བྱ་བ་ལ་ཤིན་ཏུ་གདོན་མི་ཟ་ཞིང་དོན་ཡོད་པའི་དེ་བཞིན་གཤེགས་པ་ཐམས་ཅད་སྤྱན་འདྲེན་པའི་རང་བཞིན། རྡོ་རྗེ་རྒྱལ་པོའི་གཟུགས་སུ་འདི་ལས་
འགྱུར་བས་ན་ཤིན་ཏུ་གདོན་མི་ཟ་བའོ། །དེ་ཉིད་ཀྱིས་ནི་རྒྱལ་པོ་སྟེ། དེའི་ངོ་བོ་ཉིད་ཡིན་པས་ན་རྒྱལ་པོ་དེ་ཉིད་དོ། །དེ་ལྟར་ཤིན་ཏུ་གདོན་མི་ཟ་བའི་རྒྱལ་པོ་ཉིད་དོ། །གང་གི་ཡིན་ཞེ་ན། རྡོ་རྗེ་སེམས་དཔའི་ཏིང་ངེ་འཛིན་ནི་ཞེས་བྱ་བ་སྟེ། སྔར་ནི་རྡོ་རྗེ་སེམས་དཔའི་ཏིང་ངེ་

འཛིན་ཏོ། །རྒྱུ་དེ་ལས་དེ་བཞིན་གཤེགས་པའི་སྐུ་དེ་དག་ཐམས་ཅད་གཅིག་ཏུ་གྱུར་པ་ལས་རྡོ་རྗེ་རྒྱལ་པོའི་ལུས་གཅིག་ཏུ་གྱུར་ཏོ། །ཤིན་ཏུ་བརྟན་པའི་ཕྱིར་ཡང་རྡོ་རྗེ་སེམས་དཔའི་ཏིང་ངེ་འཛིན་ཡིན་ཏེ། གང་གིས་རྡོ་རྗེའི་རང་བཞིན་ཁོང་སྟོང་མ་ཡིན་པའོ། །བྱང་ཆུབ་སེམས་
དཔའ་ཆེན་པོ་གདོན་མི་ཟ་བའི་ལུས་སུ་གྱུར་ནས། བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་སུ་ཞུགས་ནས་དེ་ཉིད་དུ་གནས་ཏེ། ཆེད་དུ་བརྗོད་པ་འདི་ཆེད་དུ་བརྗོད་པར་གྱུར་ཏོ། །ཨེ་མའོ་རྡོ་རྗེ་ལས་བྱུང་བ། །ཞེས་བྱ་བ་ལ། ཨེ་མའོ་ཞེས་བྱ་བའི་སྒྲ་ནི་སྔ་མ་བཞིན་ནོ། །
རྡོ་རྗེ་ལས་བྱུང་བའི་ལྕགས་ཀྱུ་ཞེས་བྱ་བ་ནི། དེ་བཞིན་གཤེགས་པ་ཐམས་ཅད་ཀྱི་སྐུ་ལས་བྱུང་བས་ན་དེའི་ཕྱིར་རྡོ་རྗེ་ལས་བྱུང་བའོ། །ཡན་ལག་གང་ལས་གཟུང་བ་སྟེ་འདྲེན་པའི་དོན་གྱིས་ནི་ལྕགས་ཀྱུ་སྟེ། འདི་ཡང་དེ་བཞིན་གཤེགས་པ་ཐམས་ཅད་སྤྱན་འདྲེན་པའི་ཚུལ་
གྱིས་ན་ལྕགས་ཀྱུ་དང་འདྲ་བས་ལྕགས་ཀྱུ་ཞེས་སྨོས་པ་ཡིན་ནོ། །ངེས་པའི་རྒྱལ་པོ་བདག་ཅེས་བྱ་བ་སྨོས་པ་ནི། གདོན་མི་ཟ་བའི་རྒྱལ་པོ་ནི་བདག་ཡིན་པའོ། །འདིར་ཅི་ཞིག་ངོ་མཚར་ཆེ་ཞེ་ན། གང་གི་ཕྱིར་ཀུན་དུ་སངས་རྒྱས་ཁྱབ་ཅེས་བྱ་བ་ལ་སོགས་པ་གསུངས་
ཏེ། གང་གི་ཕྱིར་ཏེ་གཏན་ཚིགས་གང་གིས་ན་སྐུ་དང་གསུང་དང་ཐུགས་རྡོ་རྗེ་བདག་མེད་པའི་ཡེ་ཤེས་ཀྱི་མཐུས་ནམ་མཁའི་དབྱིངས་ཐམས་ཅད་དུ་རྟག་ཏུ་བཞུགས་པའི་སངས་རྒྱས་བཅོམ་ལྡན་འདས་གང་ཡིན་པ་དེ་དངོས་གྲུབ་གྲུབ་པའི་ཕྱིར། ཀུན་ནས་སྤྱན་འདྲེན་ཅིང་ཐམས་
ཅད་དུ་ཁྱབ་པ་ལས་འགུགས་པ་འདི་ནི་ངོ་མཚར་ཆེའོ། །འདི་སྐད་སྟོན་ཏེ། བདག་དང་དེ་རྣམས་ཐ་མི་དད་པས་ཐམས་ཅད་དུ་ཁྱབ་པ་ལྟ་བུ་ལས། དེ་བཞིན་གཤེགས་པ་ཐམས་ཅད་སྤྱན་འདྲེན་པ་ཡིན་ནོ་ཞེས་གདུལ་བྱ་རྣམས་ཀྱིས་དེ་ལྟར་མཐོང་གི །དེའི་རང་བཞིན་བདག་དང་ཐ་དད་པ་ནི་
མ་ཡིན་ནོ། །དེ་ནས་བྱང་ཆུབ་སེམས་དཔའ་ཆེན་པོ་ཤིན་ཏུ་གདོན་མི་ཟ་བའི་རྒྱལ་པོའི་སྐུ་ཞེས་བྱ་བ་ནི་གང་གིས་བཤད་མ་ཐག་པའི་ཆེད་དུ་བརྗོད་པ་གསུངས་སོ། །བཅོམ་ལྡན་འདས་ཀྱི་ཐུགས་ཀ་ནས་ཕྱུང་སྟེ་ཞེས་བྱ་བ་ནི་རྣམ་པར་སྣང་མཛད་ཀྱི་ཐུགས་ཀ་ནས་སོ། །དེ་བཞིན་གཤེགས་པ་

ཐམས་ཅད་ཀྱི་གཡས་ཕྱོགས་ཀྱི་ཟླ་བའི་དཀྱིལ་འཁོར་ལ་གནས་ནས་ཞེས་བྱ་བ་ནི། བཅོམ་ལྡན་འདས་མི་བསྐྱོད་པའི་གཡས་ལོགས་སུའོ། །ཡང་བཀའ་ནོད་ཅིང་བཞུགས་པར་གྱུར་ཏེ་ཞེས་བྱ་བ་ནི། ཀུན་དུ་བཟང་པོའི་ཚུལ་གྱིས་བཀའ་ནོད་པ་ནི་བྱང་ཆུབ་ཀྱི་
སེམས་ཡོངས་སུ་རྫོགས་པར་བྱ་བའི་ཕྱིར་ཡིན་ལ། དེ་ནས་དེ་བཞིན་གཤེགས་པ་ཐམས་ཅད་སྤྱན་འདྲེན་པའི་ཕྱིར་ཡིན་པས་ཞེས་བྱ་བའི་སྒྲས་སྟོན་ཏོ། །དེ་ནས་ཞེས་བྱ་བ་ལ་སོགས་པ་ལ་དེ་བཞིན་གཤེགས་པ་ཐམས་ཅད་ཅེས་བྱ་བ་རྣམ་པར་སྣང་མཛད་ལ་སོགས་པ་སྤྱན་འདྲེན་པའི་
ཕྱིར་དམ་ཚིག་སྟེ། རྡོ་རྗེ་ལྕགས་ཀྱུའི་སྐུ་ལ་དམིགས་པ་རྡོ་རྗེ་ལྟར་མི་ཕྱེད་པའི་ཏིང་ངེ་འཛིན་གང་ལ་མིང་དེ་སྐད་ཅེས་བྱ་བ་དེ་ལ་སྙོམས་པར་ཞུགས་ཏེ། རྡོ་རྗེ་ལྕགས་ཀྱུ་སྦྱིན་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་ཐ་ཚིག་གོ། །དེས་ཅི་ཞིག་མཛད་ཅེ་ན། དེ་བཞིན་
གཤེགས་པ་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་སྤྱན་འདྲེན་པའི་དམ་ཚིག་རྡོ་རྗེ་ལྕགས་ཀྱུ་དེ་དེའི་ལག་པར་དེ་བཞིན་དུ་བྱིན་ནོ་ཞེས་བྱ་བར་སྦྱར་ཏེ། དེ་བཞིན་གཤེགས་པ་ཐམས་ཅད་སྤྱན་འདྲེན་པའི་དམ་ཚིག་ནི་རྒྱུའོ། །དེ་
ཅིའི་ཕྱིར་ཞེ་ན། སེམས་ཅན་ཐམས་ཅད་ཀྱི་ཁམས་ཞེས་བྱ་བ་ལ་སོགས་པ་གསུངས་ཏེ། སེམས་ཅན་གྱི་ཁམས་མ་ལུས་ཤིང་ལུས་པ་མེད་པའི་སེམས་ཅན་གྱི་ཁམས་ཐམས་ཅད་དོ། །ཐམས་ཅད་འགུགས་པ་དང་ཞེས་བྱ་བ་ནི། དེ་བཞིན་གཤེགས་པ་ཐམས་ཅད་སྤྱན་
དྲངས་པས་བདེ་བ་དང་ཡིད་བདེ་བ་ཐམས་ཅད་མྱོང་བར་བྱ་བའི་ཕྱིར་རོ། །དེ་བཞིན་གཤེགས་པ་ཐམས་ཅད་འདུ་བའི་བྱིན་གྱི་རླབས་ནི་གཅིག་ཏུ་འདུས་པར་མཛད་པའོ། །དེ་ཉིད་ནི་དམ་པའི་དངོས་གྲུབ་སྟེ་དེའི་ཕྱིར་རོ། །བར་གྱི་ཞེས་བྱ་བའི་སྒྲས་ནི་ས་དང་ཕ་རོལ་ཏུ་ཕྱིན་པ་ལ་སོགས་
པ་བསྡུའོ། །རྡོ་རྗེ་ལྕགས་ཀྱུ་དེ་རྣམས་བྱང་ཆུབ་སེམས་དཔའ་ཆེན་པོ་གདོན་མི་ཟ་བའི་རྒྱལ་པོ་དེའི་ཞེས་བྱ་བ་ནི་སྔར་གྲུབ་པའོ། །ལག་པར་དེ་བཞིན་དུ་བྱིན་ནོ་ཞེས་བྱ་བ་ནི། དེ་བཞིན་གཤེགས་པ་ལྔའི་རིན་པོ་ཆེའི་ཅོད་པན་དང་། དར་དཔྱངས་ཀྱི་དབང་གིས་དབང་བསྐུར་

ནས། རྡོ་རྗེ་འགུགས་པ་ཞེས་བྱ་བ། རྡོ་རྗེ་ལྟར་མི་ཕྱེད་པའི་འགུགས་པས་སྤྱན་འདྲེན་པ་འདི་ལ་མངའ་བས་ན་རྡོ་རྗེ་འགུགས་པའོ། །སངས་རྒྱས་ཀུན་གྱི་ཞེས་བྱ་བ་ནི། དེ་བཞིན་གཤེགས་པ་ཐམས་ཅད་ཀྱིའོ། །རྡོ་རྗེའི་ཡེ་ཤེས་ཞེས་བྱ་བ་ནི་སྟོང་པ་ཉིད་ཀྱི་ཡེ་ཤེས་སོ། །
དེ་ཉིད་ཀྱིས་ན་བླ་ན་མེད་པ་སྟེ་མཆོག་ཏུ་གྱུར་པའོ། །འདི་ཞེས་བྱ་བ་ནི་བཅོམ་ལྡན་འདས་ལས་རྙེད་པ་གང་ཡིན་པའོ། །ཅིའི་ཕྱིར་བླ་ན་མེད་པ་ཡིན་ཞེ་ན། སངས་རྒྱས་ཀུན་གྱི་དོན་གྲུབ་ཕྱིར། །ཀུན་ནས་སྤྱན་དྲངས་དམ་པའོ། །ཞེས་བྱ་བ་གསུངས་ཏེ། གང་གི་ཕྱིར་སངས་
རྒྱས་ཐམས་ཅད་ཀྱི་དོན་ནི་དེ་བཞིན་གཤེགས་པ་ཐམས་ཅད་སྤྱན་འདྲེན་པས་སེམས་ཅན་གྱི་དོན་གང་ཡིན་པ་དེ་གྲུབ་ཅིང་རྫོགས་པར་གྱུར་ཏེ། དེའི་ཕྱིར་ཀུན་ནས་ཏེ། ཕྱོགས་བཅུ་ནས་སྤྱན་འདྲེན་པ་ཡིན་ལ། དེ་ལྟར་ཀུན་ནས་སྤྱན་དྲངས་པ་ཉིད་ཀྱིས་ན་དམ་པའོ། །
བསྐྱེད་པ་དང་། སྤྲོ་བ་དང་། བསྡུ་བ་དང་། གནས་པ་དང་། བརྟན་པར་བསྒོམས་པ་ལ་སོགས་པ་ནི་ཐམས་ཅད་སྔ་མ་བཞིན་དུ་ཤེས་པར་བྱའོ། །དེ་ལྟར་རྡོ་རྗེ་རྒྱལ་པོས་དེ་བཞིན་གཤེགས་པ་ཐམས་ཅད་སྤྱན་དྲངས་ནས། དེ་རྣམས་རྡོ་རྗེ་ཆགས་པས་ཇི་ལྟར་རྗེས་སུ་
མཉེས་པར་བྱ་བ་དེ་བསྟན་པ་ནི། དེ་ནས་ཞེས་བྱ་བ་ལ་སོགས་པ་ཡིན་ཏེ། དེ་ནས་ཞེས་བྱ་བ་ནི་དེ་མ་ཐག་པར་སྟོན་པའི་ཚིག་གོ། །ཡང་ཞེས་བྱ་བ་ནི་རྡོ་རྗེ་རྒྱལ་པོ་ལ་ལྟོས་ནས་ཡང་གི་སྒྲ་སྨོས་པ་ཡིན་ནོ། །བྱང་ཆུབ་སེམས་དཔའ་ཆེན་པོ་བདུད། །ཅེས་བྱ་བ་ནི། །བྱང་ཆུབ་སེམས་
དཔའ་ཆེན་པོ་ལ་རྒྱབ་ཀྱིས་ཕྱོགས་པའི་སེམས་ནི་ཆོས་བདག་མེད་པའི་ཆགས་པས་གསོད་པས་ན་བདུད་དོ། །བྱང་ཆུབ་སེམས་དཔའ་ཆེན་པོ་ཡང་ཡིན་ལ། བདུད་ཀྱང་ཡིན་པས་ན་བྱང་ཆུབ་སེམས་དཔའ་ཆེན་པོ་བདུད་དོ། །དེ་ཉིད་ནི་རྡོ་རྗེ་སེམས་དཔའ་ལྟ་བུའོ། །དེའི་
དམ་ཚིག་ནི་མེ་ཏོག་གི་མཚོན་ཆ་ལ་སོགས་པའི་གཟུགས་སོ། །དེ་གང་ལས་བྱུང་བ་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །དེ་ལ་སྙོམས་པར་ཞུགས་པ་ནི་མེ་ཏོག་གི་མཚོན་ཆ་ལ་སོགས་པའི་གཟུགས་ཀྱི་རྣམ་པར་འཕྲུལ་པ་བསྐྱེད་པའི་རྣམ་པར་ཐུགས་རྩེ་གཅིག་ཏུ་

མཛད་དོ་ཞེས་བྱ་བའི་ཐ་ཚིག་གོ། །ཅི་ཞིག་མཛད་ཅེ་ན། དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། སྙིང་པོ་འདི་ཕྱུང་ངོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་མཉེས་པར་བྱེད་པ་ཞེས་པ་ནི་ཡང་དང་
ཡང་དུ་མངོན་དུ་བྱེད་པའོ། །དེའི་དོན་གྱི་དམ་ཚིག་ནི་དེ་བཞིན་གཤེགས་པ་ཐམས་ཅད་མཉེས་པར་བྱེད་པའི་དམ་ཚིག་སྟེ་རྒྱུའོ། །གང་ལ་མིང་དེ་སྐད་ཅེས་བྱ་བའི་དེ་བཞིན་གཤེགས་པ་ཐམས་ཅད་ཀྱི་སྙིང་པོ་གང་ཡིན་པ་དེ་ལ་དེ་སྐད་ཅེས་བྱ་སྟེ། དེ་བཞིན་གཤེགས་པ་
ཐམས་ཅད་ཀྱི་སྙིང་པོ་དེ་རང་གི་ཐུགས་ཀའི་ངེས་པའི་ཡེ་ཤེས་ལས་བྱུང་ངོ་ཞེས་པ། ཕྱུང་བར་གྱུར་པ་ནི་བཛྲ་རཱ་ག་ཞེས་བྱ་བ་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ་ཕྱག་གཉིས་སུ་གནས་སོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་ཐུགས་ལས་ཞེས་
བྱ་བ་ནི། དེ་བཞིན་གཤེགས་པ་ལྔའི་ཐུགས་ལས་སོ། །བཅོམ་ལྡན་འདས་རྡོ་རྗེ་འཛིན་པ་ཉིད་དེ་ཞེས་བྱ་བ་ནི་སེམས་དཔའི་རྡོ་རྗེ་གཟུགས་གང་ཡིན་པ་སྔར་བཤད་པའི་རྡོ་རྗེ་ལྕགས་ཀྱུ་ལ་སོགས་པའི་གཟུགས་སུ་བྱུང་བ་གང་ཡིན་པ་དེ་ཉིད་དོ། །དེ་བཞིན་གཤེགས་པ་ཐམས་
ཅད་ཀྱི་མེ་ཏོག་གི་མངར་གྱུར་ནས་ཞེས་བྱ་བ་ནི་མེ་ཏོག་གི་མདའ་དང་བཅས་པའི་གཞུའི་གཟུགས་སུ་གྱུར་ནས། ཕྱག་གཉིས་སུ་གནས་སོ་ཞེས་བྱ་བའི་བར་དུ་སྔ་མ་བཞིན་ནོ། །དེ་ནས་ཞེས་བྱ་བ་ལ་སོགས་པ་ལ་བཅོམ་ལྡན་འདས་ཀྱི་ཐུགས་ལ་གནས་ནས་ཆེད་དུ་བརྗོད་
པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་རྗེས་སུ་མཉེས་པར་བྱ་བ་ལ་སོགས་པ་དང་། སངས་རྒྱས་ཐམས་ཅད་ཀྱི་རྫུ་འཕྲུལ་དང་ཆོ་འཕྲུལ་རྣམས་བྱས་ནས་ཞེས་བྱ་བ་ནི། དེ་བཞིན་གཤེགས་པ་ཐམས་ཅད་རྗེས་སུ་མཉེས་པ་ནི་སྒོམ་པ་སྟེ།
འདོད་ཆགས་དམ་ཚིག་ཅེས་བཤད་པ། །ཆོས་ཀྱི་འདོད་པ་ཡིད་དུ་འོང་། །དེ་ཡི་ལམ་གྲུབ་རྣལ་འབྱོར་ནི། །རྗེས་སུ་ཆགས་པ་ཞེས་བཤད་དོ། །ཞེས་གསུངས་པ་ཡིན་ནོ། །དེ་ལ་སོགས་པ་གང་ཡིན་པ་དེ་ནི་དེ་བཞིན་གཤེགས་པ་ཐམས་ཅད་རྗེས་སུ་མཉེས་པར་བྱ་བ་ལ་སོགས་

པ་སྟེ། སོགས་པའི་སྒྲས་ནི་རྡོ་རྗེ་སེམས་དཔའ་ལ་སོགས་པ་བསྡུའོ། །རྡོ་རྗེ་སེམས་དཔའི་ཏིང་ངེ་འཛིན་ནི་ཤིན་ཏུ་བདུད་བྱེད་པ་ཉིད་དང་ཞེས་བྱ་བ་ནི། རབ་ཏུ་བདུད་བྱེད་པས་ན་ཤིན་ཏུ་བདུད་བྱེད་པ་སྟེ། དེའི་ངོ་བོ་ཉིད་ནི་ཤིན་ཏུ་བདུད་བྱེད་པ་ཉིད་དོ། །དེའི་ཕྱིར་ཤིན་ཏུ་བདུད་
བྱེད་པ་ཉིད་ཀྱིས་ནི། འདི་ནི་རྡོ་རྗེ་སེམས་དཔའི་ཏིང་ངེ་འཛིན་ཡིན་ཏེ། རྡོ་རྗེ་ཆགས་པ་ནི་བྱང་ཆུབ་སེམས་དཔའ་རྣམས་ཀྱི་ཉན་ཐོས་དང་རང་སངས་རྒྱས་ཀྱི་བློ་ཅན་སངས་རྒྱས་ཀྱི་བྱང་ཆུབ་སེམས་ཀྱི་ངོ་བོ་ཆོས་བདག་མེད་པའི་འདོད་ཆགས་ཀྱིས་ཤིན་ཏུ་གསོད་ཅིང་བར་དུ་གཅོད་པར་
བྱེད་པས་ཤིན་ཏུ་བདུད་བྱེད་པ་ཉིད་དེ་དེ་རྫོགས་པར་བྱེད་པའི་སེམས་རྩེ་གཅིག་པ་ནི་ཤིན་ཏུ་བདུད་བྱེད་པའི་རྡོ་རྗེའི་ཏིང་ངེ་འཛིན་ཏོ། །དེ་བས་ན་རྡོ་རྗེ་སེམས་དཔའི་ཏིང་ངེ་འཛིན་གྱིས་ཤིན་ཏུ་བདུད་བྱེད་པ་ལས་ནི་དེ་དེ་བཞིན་གཤེགས་པའི་སྐུ་གཅིག་ཏུ་གྱུར་ནས། ཤེས་པ་བྱང་ཆུབ་
སེམས་དཔའ་ཆེན་པོ་བདུད་ཀྱི་སྐུར་གྱུར་ནས་སོ། །ཤིན་ཏུ་བརྟན་པའི་ཕྱིར་ཞེས་བྱ་བ་ནི་སྔ་མ་བཞིན་ནོ། །གཅིག་ཏུ་འདྲེས་པར་གྱུར་པ་ནི་རྡོ་རྗེའི་རང་བཞིན་ཁོང་སྟོང་མ་ཡིན་པའོ། །བདུད་ཅེས་བྱ་བ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བསྒོམ་པའི་ལམ་གྱི་ཚུལ་
གྱིས་གཟུང་བ་དང་འཛིན་པ་པོའི་རྣམ་པར་རྟོག་པ་གསོད་པས་ན་བདུད་ཅེས་བྱ་སྟེ། སངས་རྒྱས་ཐམས་ཅད་མཉེས་བྱེད་པ། །རྗེས་སུ་ཆགས་པ་ཞེས་བཤད་དོ། །རྡོ་རྗེ་འདོད་པ་འདོད་ཆགས་ཆེ། །རྡོ་རྗེ་ཆགས་པ་ཞེས་བཤད་དོ། །ཞེས་གསུངས་པའི་ཕྱིར་རོ། །ཨེ་མའོ་ཞེས་བྱ་བ་ལ་སོགས་
པ་ལ། ཨེ་མའོ་ཞེས་བྱ་བ་ནི་ངོ་མཚར་ཏོ། །བདག་གི་རང་བཞིན་དག་ཅེས་བྱ་བ་ནི། རང་བཞིན་གྱིས་ཡང་དག་པའི་ལམ་བསྒོམ་པའི་ཚུལ་གྱིས་ཉོན་མོངས་པའི་དྲི་མ་ཐམས་ཅད་དང་བྲལ་བའི་ཕྱིར་དག་པ་སྟེ་རྗེས་སུ་ཆགས་པའི་སྒོམ་པའོ། །གང་གིས་སྒོམ་པ་ཡིན་ཞེ་ན། རང་བྱུང་
བདག་ཅེས་བྱ་བ་གསུངས་ཏེ། སངས་རྒྱས་བཅོམ་ལྡན་འདས་ཀྱི་སྐུ་བསྒོམས་པས་ཞེས་བྱ་བའི་དོན་ཏོ། །འདིར་ཅི་ཞིག་ངོ་མཚར་ཆེ་ཞེ་ན། གང་གི་ཕྱིར། འདོད་ཆགས་བྲལ་རྣམས་དག་བྱའི་ཕྱིར། །ཞེས་གསུངས་ཏེ། འདོད་ཆགས་དང་བྲལ་བ་ནི་ཉོན་མོངས་པ་བག་ཆགས་

དང་བཅས་པ་སྤངས་པས་ཁམས་གསུམ་ལ་རྒྱབ་ཀྱིས་ཕྱོགས་ཤིང་དེར་འདོད་ཆགས་དང་བྲལ་བའོ། །སངས་རྒྱས་བཅོམ་ལྡན་འདས་ནི་རྣམ་པར་རྟོག་པ་མི་མངའ་བས་དེ་རྣམས་ལ་འདོད་ཆགས་ཀྱིས་ཞེས་བྱ་བ། ཆོས་ལ་བདག་མེད་པའི་འདོད་
ཆགས་རྒྱུར་གྱུར་པས་སོ། །འདུལ་བར་བྱེད་ཅེས་བྱ་བ་སེམས་ཅན་གྱི་ཁམས་རྣམས་སངས་རྒྱས་ཀྱི་བྱང་ཆུབ་ལ་རབ་ཏུ་འཇོག་པར་བྱེད་པ་འདི་ནི་ངོ་མཚར་ཆེའོ། །གང་འདོད་ཆགས་དང་བྲལ་བ་ཇི་ལྟར་འདོད་ཆགས་ཅན་ཡིན། ཇི་ལྟར་འདོད་ཆགས་ཅན་འདོད་ཆགས་དང་
བྲལ་བར་འགྱུར་ཞེས་བྱ་བ་ནི་མི་མཐུན་པའི་རྒྱན་ནོ། །བཅོམ་ལྡན་འདས་ཀྱི་ཐུགས་ཀ་ནས་ཕྱུང་སྟེ་ཞེས་བྱ་བ་ནི་རྣམ་པར་སྣང་མཛད་ཀྱིའོ། །དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ནི། མི་བསྐྱོད་པའི་གཡོན་ཕྱོགས་སུའོ། །ཡང་བཀའ་ནོད་ཅིང་བཞུགས་
སོ་ཞེས་བྱ་བ་ནི། གདོན་མི་ཟ་བའི་རྒྱལ་པོའི་གཟུགས་ཀྱིས་ནི། དེ་བཞིན་གཤེགས་པ་རྣམས་སྤྱན་འདྲེན་པའི་ཕྱིར་བཀའ་ནོད་པ་ཡིན་ལ། དེ་ལྟ་ནི་དེའི་རྗེས་སུ་མཉེས་པར་བྱ་བའི་ཕྱིར་རོ་ཞེས་བྱ་བ་ནི། ཡང་གི་སྒྲའི་དོན་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ་
བཅོམ་ལྡན་འདས་ཀྱིས་རྡོ་རྗེའི་མདའ་དེ་དེའི་ལག་ཏུ་བྱིན་ནོ་ཞེས་བྱ་བར་སྦྱར་རོ། །དེ་དེ་བཞིན་གཤེགས་པ་ཐམས་ཅད་མཉེས་པར་བྱ་བ་ནི་སྔ་མ་བཞིན་ནོ། །དེའི་དོན་དུ་བྱིན་གྱིས་བརླབས་པ་ནི། དེའི་རྒྱུ་མདའི་གཟུགས་སུ་དེ་ལ་དམིགས་པ་རྡོ་རྗེ་ལྟར་མི་ཕྱེད་པའི་ཏིང་ངེ་
འཛིན་གང་ལ་མིང་དེ་སྐད་ཅེས་བྱ་བ་དེ་ལ་སྙོམས་པར་ཞུགས་པ་ནི་མངོན་སུམ་དུ་མཛད་པ་སྟེ། རྡོ་རྗེ་མདའི་སྦྱིན་པའི་རྣམ་པར་ཐུགས་རྩེ་གཅིག་ཏུ་མཛད་དོ་ཞེས་བྱ་བའི་ཐ་ཚིག་གོ། །དེ་བཞིན་གཤེགས་པ་ཐམས་ཅད་ཀྱི་བདུད་རྡོ་རྗེའི་དམ་ཚིག་ཅེས་བྱ་བ་ནི། དེ་བཞིན་
གཤེགས་པ་ཐམས་ཅད་ཀྱི་གདུལ་བྱ་དམིགས་པ་ལ་སྤྱོད་པ་དེ་རྣམས་ཀྱི་ཉེ་བར་དམིགས་པ་ལས་ངེས་པར་ཟློག་པར་བྱེད་པ་ནི་གསོད་པ་ཡིན་ལ། དེའི་དོན་ནི་མི་ཕྱེད་པའི་དམ་ཚིག་གི་རྒྱུ་མདའི་གཟུགས་ནི་དེ་བཞིན་གཤེགས་པ་ཐམས་ཅད་ཀྱི་བདུད་ཀྱི་རྡོ་རྗེའི་དམ་ཚིག་གོ། །དེ་

ཅིའི་ཕྱིར་བརྩལ་ཞེ་ན། སེམས་ཅན་གྱི་ཁམས་ཞེས་བྱ་བ་ལ་སོགས་པ་གསུངས་ཏེ། སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་རྣམས་སངས་རྒྱས་ཀྱི་བྱང་ཆུབ་བསྒོམ་པ་ནི་མགུ་བར་བྱ་བའོ། །དེས་བདེ་བ་དང་ཡིད་བདེ་བ་མྱོང་བར་བྱ་བའི་དོན་དུའོ། །དེ་བཞིན་གཤེགས་
པ་ཐམས་ཅད་ཀྱི་བདུད་ཀྱི་ལས་ཡིན་པས་ན་བདུད་ཀྱི་ལས་ཏེ། སངས་རྒྱས་ཀྱི་བྱང་ཆུབ་ལ་རྗེས་སུ་ཆགས་པའོ། །དེ་ཉིད་ནི་དངོས་གྲུབ་ཀྱི་མཆོག་སྟེ། དེ་ཐོབ་ཅིང་རེག་པར་བྱ་བ་དེ་དག་གི་རྒྱུའི་ཕྱིར་ཏེ། སེམས་ཅན་གྱི་ཁམས་རྣམས་ཀྱི་རྡོ་རྗེ་ཆགས་པའི་ཏིང་ངེ་འཛིན་ཐོབ་པའི་
དོན་དུ་ཞེས་བྱ་བའི་ཐ་ཚིག་གོ། །བར་དུ་ཞེས་བྱ་བའི་སྒྲས་ནི་རྡོ་རྗེ་སེམས་དཔའ་ལ་སོགས་པའི་ཡང་ཞེས་སྟོན་ཏོ། །རྡོ་རྗེའི་མདའ་དེས་དེ་བཞིན་གཤེགས་པ་ཐམས་ཅད་ལ་བདུད་བྱེད་ཅིང་ཞེས་བྱ་བ་ནི་བདག་ཉིད་དང་མཉམ་པར་བྱེད་ཅེས་བྱ་བའི་དོན་ཏོ། །འདི་ཞེས་བྱ་བ་ནི་
གང་བཅོམ་ལྡན་འདས་ཀྱིས་སྩལ་པ་གང་ཡིན་པའོ། །འདི་ཅི་ཞིག་ཡིན་ཞེ་ན། སངས་རྒྱས་ཀུན་གྱི་འདོད་ཆགས་ཀྱི་ཡེ་ཤེས་ཞེས་བྱ་བ་སྟེ། བྱང་ཆུབ་ཀྱི་སེམས་སུ་ངེས་པ་ནི་འདོད་ཆགས་ཀྱི་ཡེ་ཤེས་སོ། །དྲི་མ་མེད་ཅེས་བྱ་བ་ནི་ངེས་པའི་ཚུལ་ཡིན་པ་ཉིད་ཀྱིས་ན་འདོད་
ཆགས་ལ་སོགས་པའི་དྲི་མ་དང་བྲལ་བས་དྲི་མ་མེད་པའོ། །འདིས་ཅི་ཞིག་བྱེད་ཅེ་ན། འདོད་ཆགས་ཀྱིས་ནི་ཆགས་བྲལ་བཅོམ། །ཞེས་བྱ་བ་གསུངས་ཏེ། འདོད་ཆགས་འདིས་སངས་རྒྱས་ཀྱི་བྱང་ཆུབ་ལ་རྒྱབ་ཀྱིས་ཕྱོགས་པའི་སེམས་ཅན་བཅོམ་ནས། བདེ་
བ་ཐམས་ཅད་སྦྱིན་པར་བྱེད། །ཅེས་བྱ་བ། སེམས་ཅན་རྣམས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རང་བཞིན་ཅན་གྱིས་བདེ་བ་ཐམས་ཅད་ངེས་པར་སྦྱིན་པར་བྱེད་ཅིང་སྩོལ་བར་མཛད་པའོ། །དེ་ལྟར་རྡོ་རྗེ་ཆགས་པས་དེ་བཞིན་གཤེགས་པ་ཐམས་ཅད་
རྗེས་སུ་མཉེས་པར་བྱ་བ་གསུངས་ནས། དེ་ནས་ཞེས་བྱ་བ་ལ་སོགས་པས་རྡོ་རྗེ་ལེགས་པས་དེ་བཞིན་གཤེགས་པ་ཐམས་ཅད་དགྱེས་པར་བྱ་བར་གསུངས་པ་ཡིན་ཏེ། བཅོམ་ལྡན་འདས་ཀྱི་སྙིང་པོ་འདི་རང་གི་ཐུགས་ཀ་ནས་ཕྱུང་ངོ་ཞེས་བྱ་བར་སྦྱར་རོ། །ཡང་ཞེས་བྱ་བ་ནི་

རྡོ་རྗེ་ཆགས་པ་ལ་ལྟོས་པའོ། །རབ་ཏུ་དགའ་ཞེས་བྱ་བ་ནི་ཡིད་བདེ་བ་སྟེ། ཟག་པ་མེད་པའི་དགའ་བའོ། །དེས་ནི་མཛེས་ཤིང་འབར་བས་ན་རྒྱལ་པོའོ། །བྱང་ཆུབ་སེམས་དཔའ་ཆེན་པོ་རབ་ཏུ་དགའ་བའི་རྒྱལ་པོ་དེ་ཉིད་ནི་རྡོ་རྗེ་སེམས་དཔའི་ཚུལ་
ལོ། །དེའི་དམ་ཚིག་ནི་ལེགས་སོ་ཞེས་བྱ་བ་ལ་སོགས་པའི་ཚུལ་ལོ། །དེ་བྱུང་བ་ནི་སེམས་དཔའ་སྟེ་རྣམ་པར་སྣང་མཛད་ལ་སོགས་པའི་ཐུགས་ཀར་གནས་པའི་སེམས་དཔའ་གང་ལས་སེམས་དཔའི་རྡོ་རྗེར་གྱུར་པ་དེ་བྱིན་གྱིས་བརླབས་པའི་ཕྱིར། རྡོ་རྗེ་ལྟར་མི་ཕྱེད་
པའི་ཏིང་ངེ་འཛིན་གང་ཡིན་པ་དེ་ལ་མིང་དེ་སྐད་ཅེས་བྱ་བ་དེ་ལ་སྙོམས་པར་ཞུགས་ཏེ། དགའ་བའི་ཕྱག་རྒྱ་ལ་སོགས་པའི་རྣམ་པར་འཕྲུལ་པ་རྫོགས་པར་མཛད་པར་ཐུགས་རྩེ་གཅིག་ཏུ་མཛད་དོ་ཞེས་བྱ་བའི་དོན་ཏོ། །དེ་བཞིན་གཤེགས་པ་ཐམས་ཅད་ཀྱི་རབ་ཏུ་
དགའ་བའི་དམ་ཚིག་ཅེས་བྱ་བ་ནི། དེ་བཞིན་གཤེགས་པ་ཐམས་ཅད་ཀྱི་རབ་ཏུ་དགའ་བ་ནི་མགུ་བའོ། །དེའི་དམ་ཚིག་ནི་རྒྱུའོ། །གང་ལ་མིང་དེ་སྐད་ཅེས་བྱ་བའི་དེ་བཞིན་གཤེགས་པའི་སྙིང་པོ་དེ་རང་གི་ཐུགས་ཀ་ནས་ཕྱུང་བར་གྱུར་པ་ནི་བཛྲ་སཱ་དྷུ་ཞེས་བྱ་བ་སྟེ། ལེགས་
སོ་ཞེས་བྱ་བ་ལ་སོགས་པའི་ཚུལ་གང་བཤད་མ་ཐག་པ་དང་ཕྱིས་སྟོན་པ་སྟེ། བཛྲ་སཱ་དྷུ་ཞེས་བྱ་བའི་སྒྲའི་ཚུལ་དུ་ཕྱུང་བར་གྱུར་ཏོ་ཞེས་བྱ་བའི་ཐ་ཚིག་གོ། །དེ་ནས་ཞེས་བྱ་བ་ལ་སོགས་པ་ལ། བཅོམ་ལྡན་འདས་དེ་ཉིད་རྡོ་རྗེ་དགྱེས་པའི་དབྱིབས་སུ་གྱུར་ཏེ། ཕྱག་གཉིས་
སུ་གནས་སོ་ཞེས་བྱ་བར་སྦྱོར་རོ། །བཛྲ་སཱ་དྷུ་ཞེས་བྱ་བའི་སྒྲ་ནི་དེ་བཞིན་གཤེགས་པ་ཐམས་ཅད་ཀྱི་ཐུགས་ལས་ཕྱུང་མ་ཐག་པ་ཞེས་བྱ་བ་ནི། དེ་བཞིན་གཤེགས་པ་ལྔའི་ཐུགས་ལས་སོ། །བཅོམ་ལྡན་འདས་རྡོ་རྗེ་འཛིན་པ་ནི་ཟླ་བ་དང་རྡོ་རྗེའི་རྣམ་པའོ། །ལེགས་སོ་ཞེས་བྱ་བར་
གྱུར་ནས་ཞེས་བྱ་བ་ནི་མགུ་བའི་ཕྱག་རྒྱའི་གཟུགས་སུ་གྱུར་ནས། བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་གཉིས་སུ་གནས་སོ། །དེ་ནས་རྣམ་པར་སྣང་མཛད་ཀྱི་ཕྱག་གཉིས་ན་གནས་པའི་རྡོ་རྗེ་དགྱེས་པའི་དབྱིབས་ཕྱག་རྒྱའི་གཟུགས་ལས་དེ་བཞིན་གཤེགས་པའི་སྐུ་རྣམས་

བྱུང་ནས་ལེགས་སོ་ཞེས་བྱ་བ་ལ་སོགས་པ་བྱས་ནས། དེ་བཞིན་གཤེགས་པའི་ཐུགས་ལ་གནས་ནས་ཆེད་དུ་བརྗོད་པ་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱིས་ལེགས་སོ་ཞེས་བྱ་བ་ནི་རྡོ་རྗེ་ལེགས་པའོ། །སོགས་པ་ཞེས་བྱ་བའི་སྒྲས་ནི་
རྡོ་རྗེ་སེམས་དཔའ་ལ་སོགས་པ་གཞན་རྣམས་ཀྱི་ཡང་བསྡུས་ཏེ། དེ་ལ་སོགས་པ་བྱས་ནས་སངས་རྒྱས་ཀྱི་སྐུ་དེ་རྣམས་ལས་རྡོ་རྗེ་ལེགས་པའི་སྐུ་གཅིག་པུར་གྱུར་ཏོ། །ཅིའི་ཕྱིར་ཞེ་ན། རྡོ་རྗེ་སེམས་དཔའི་ཏིང་ངེ་འཛིན་ནི་ཤིན་ཏུ་དགའ་བར་བྱེད་པ་ཉིད་དང་ཞེས་བྱ་བ་གསུངས་
ཏེ། ཤིན་ཏུ་རབ་ཏུ་དགའ་ཞིང་ཡིད་བདེ་བ་གང་ཡིན་པ་དེ་ནི་ཤིན་ཏུ་དགའ་བར་བྱ་སྟེ། བྱང་ཆུབ་སེམས་དཔའ་ཆེན་པོ་རབ་ཏུ་དགའ་བའི་རྒྱལ་པོ་སྐྱེད་པར་བྱེད་པའི་རྣམ་པར་མི་རྟོག་པའི་ཡིད་བདེ་བའི་རང་བཞིན་ཉིད་ནི་ཤིན་ཏུ་དགའ་བར་བྱེད་པའོ། །དེའི་ངོ་བོ་ཉིད་ནི་ཤིན་ཏུ་
དགའ་བར་བྱེད་པ་ཉིད་དེ་གང་གི་ངོ་བོ་ཡིན་ཞེ་ན། རྡོ་རྗེ་སེམས་དཔའི་ཏིང་ངེ་འཛིན་ཏེ། རྡོ་རྗེ་སེམས་དཔའ་ནི་འདིར་སྔ་མ་བཞིན་དུ་སེམས་དཔའི་རྡོ་རྗེའོ། །དེ་ཉིད་ནི་ཐམས་ཅད་འབྱིན་པ་ཡིན་པར་ཤེས་པར་བྱའོ། །རབ་ཏུ་དགའ་བའི་རྒྱལ་པོའི་སྐུར་གྱུར་པ་གཅིག་པུ་
ནི་སྟོང་པ་ཉིད་ཀྱིས་ན་རབ་ཏུ་བརྟན་པའི་ཕྱིར་རོ། །དེ་བས་ན་འདྲེས་ཤིང་སྲ་བར་གྱུར་པ་སྟེ། རབ་ཏུ་དགའ་བའི་རྒྱལ་པོ་ནི་རྡོ་རྗེའི་རང་བཞིན་ནོ། །ཨེ་མའོ་ཐམས་ཅད་མཁྱེན་ཀུན་གྱི། །ཞེས་བྱ་བ་ནི་ཐམས་ཅད་མཁྱེན་པ་སྟེ་སངས་རྒྱས་རྣམས་ཀྱིའོ། །ལེགས་སྦྱིན་ནང་
ན་བདག་མཆོག་པས། །ཞེས་བྱ་བ་ནི་མ་ཚང་བ་མེད་པ་ཀུན་གྱིས་ལེགས་པར་སྦྱིན་པ་ཉིད་ནི་བདག་ཉིད་ཡིན་ཏེ། རྣམ་པར་རྟོག་པ་མེད་དུ་ཟིན་ཀྱང་སྔོན་གྱི་འཕེན་པའི་ཤུགས་ཀྱིས་ཕྱོགས་བཅུའི་སེམས་ཅན་ཐམས་ཅད་མགུ་བར་བྱེད་པ་ཡིན་པའི་ཕྱིར་རོ། །ཅི་ཞིག་ངོ་མཚར་ཆེ་ཞེ་ན།
རྣམ་རྟོག་བྲལ་བ་དེ་དག་གིས། །ངེས་པར་དགྱེས་པ་བསྐྱེད་པ་ཡིན། །ཞེས་གསུངས་ཏེ། གང་གི་ཕྱིར་རྣམ་རྟོག་དང་བྲལ་ཞིང་རྣམ་པར་མི་རྟོག་པའི་ཡེ་ཤེས་ཀྱི་རང་བཞིན་གྱི་སངས་རྒྱས་རྣམས་ཀྱང་ངེས་པར་དགྱེས་པ་སྟེ། དགའ་བ་བསྐྱེད་པར་ནུས་པ་འདི་ནི་ངོ་མཚར་ཏོ། །

འདི་སྐད་སྟོན་ཏེ། སངས་རྒྱས་རྣམས་ཀྱི་སྔོན་གྱི་འཕེན་པའི་ཤུགས་ཀྱིས་ཟད་པ་མེད་པའི་མགུ་བའི་ངོ་བོ་ནི་བདག་ཡིན་ཏེ། བདག་གིས་དེ་རྣམས་རྣམ་པར་མི་རྟོག་པའི་རང་བཞིན་གྱིས་དགྱེས་པ་བསྐྱེད་དོ་ཞེས་བྱ་བ་འདི་གདུལ་བྱ་རྣམས་ཀྱིས་དེ་ལྟར་མཐོང་
བ་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ་བཀའ་ནོད་ཅིང་བཞུགས་པར་གྱུར་ཏོ་ཞེས་བྱ་བར་སྦྱར་རོ། །དེ་ནས་བྱང་ཆུབ་སེམས་དཔའ་ཆེན་པོ་རབ་ཏུ་དགའ་བའི་རྒྱལ་པོའི་སྐུ་དེ་ཞེས་བྱ་བ་ནི་གང་གིས་འདས་མ་ཐག་པའི་ཆེད་དུ་བརྗོད་པ་གསུངས་སོ། །དེ་བཞིན་གཤེགས་པ་
ཐམས་ཅད་ཀྱི་རྒྱབ་ན་ཟླ་བའི་དཀྱིལ་འཁོར་ལ་གནས་པར་གྱུར་ནས་ཞེས་བྱ་བ་ནི་བཅོམ་ལྡན་འདས་མི་བསྐྱོད་པའི་རྒྱབ་ནའོ། །ཡང་བཀའ་ནོད་ཅིང་བཞུགས་པར་གྱུར་ཏོ་ཞེས་བྱ་བ་ནི་སྔར་ནི་རྡོ་རྗེ་ཆགས་པའི་གཟུགས་ཀྱིས་རྗེས་སུ་མཉེས་པར་བྱ་བའི་ཕྱིར་བཀའ་ནོད་པ་ཡིན་ལ་ད་ལྟར་
ནི་དེ་བཞིན་གཤེགས་པ་ཐམས་ཅད་ཀྱི་དགྱེས་པ་བསྐྱེད་པར་བྱ་བའི་ཕྱིར་ཡིན་ནོ་ཞེས་བྱ་བ་ནི་ཡང་གི་སྒྲའི་དོན་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ་རྡོ་རྗེ་དགྱེས་པ་དེའི་ལག་པ་གཉིས་སུ་དེ་བཞིན་དུ་སྦྱིན་ནོ་ཞེས་བྱ་བར་སྦྱོར་རོ། །དེ་བཞིན་གཤེགས་པ་ཐམས་ཅད་མཉེས་
པར་བྱེད་པའི་ཞེས་བྱ་བ་ལ་སོགས་པ་ལ། དེ་བཞིན་གཤེགས་པ་ཐམས་ཅད་ཀྱི་མཉེས་པར་བྱེད་པ་ནི་དགྱེས་པ་བསྐྱེད་པ་སྟེ་དོན་དེས་ནི་རྡོ་རྗེ་དགྱེས་པའི་ཕྱག་རྒྱ་ལ་དེ་སྐད་ཅེས་བྱའོ། །དེ་ལ་དམིགས་པའི་ཏིང་ངེ་འཛིན་ནི་རྡོ་རྗེ་ལྟར་མི་ཕྱེད་པས་མིང་དེ་སྐད་ཅེས་བྱ་སྟེ། དེ་ལ་
སྙོམས་པར་འཇུག་པ་ནི་རྡོ་རྗེ་མགུ་བ་སྦྱིན་པའི་རྣམ་པར་ཐུགས་གཅིག་ཏུ་མཛད་ཅེས་བྱ་བའི་དོན་ཏོ། །དེ་བཞིན་གཤེགས་པ་ཐམས་ཅད་ཀྱི་རབ་ཏུ་དགྱེས་པ་བླ་ན་མེད་པ་ནི་ཟག་པ་མེད་པའི་དགའ་བའོ། །དེའི་ཡེ་ཤེས་ནི་མངོན་སུམ་དུ་བྱས་པ་ཡིན་པས་དེ་བཞིན་གཤེགས་པ་
ཐམས་ཅད་ཀྱི་རབ་ཏུ་དགྱེས་པ་བླ་ན་མེད་པའི་ཡེ་ཤེས་སོ། །དེའི་དམ་ཚིག་ནི་བསྐྱེད་པའི་རྒྱུ་དགྱེས་པའི་རྡོ་རྗེའི་ཕྱག་རྒྱའོ། །སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་ཐམས་ཅད་མགུ་བར་བྱས་པས་བདེ་བ་དང་ཡིད་བདེ་བ་ཐམས་ཅད་མྱོང་བར་བྱ་བ་ནི་མངོན་སུམ་དུ་བྱ་

བ་སྟེ་དེའི་དོན་དུ་དགྱེས་པའི་ཕྱག་རྒྱ་བྱིན་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་དགྱེས་པའི་རོ་བླ་ན་མེད་པ་ཞེས་བྱ་བ་ལ་སོགས་པ་ལ། དེ་བཞིན་གཤེགས་པ་ཐམས་ཅད་ཀྱི་ཟག་པ་མེད་པའི་ཡེ་ཤེས་དགྱེས་པ་ནི། དེ་བཞིན་གཤེགས་པ་ཐམས་ཅད་ཀྱི་དགྱེས་པ་བླ་ན་
མེད་པ་སྟེ་ཡིད་བདེ་བ་ཡིན་ལ། དེའི་རོ་ནི་དགྱེས་པའི་ཉམས་སོ། །དེ་ཉིད་ནི་དངོས་གྲུབ་ཀྱི་དམ་པ་སྟེ་ཐོབ་པ་ཉིད་འབྲས་བུ་ཡིན་ཏེ་དེའི་ཕྱིར། རྡོ་རྗེ་ལེགས་པ་ཉིད་ཐོབ་པའི་ཕྱིར་རོ། །བར་དུ་ཞེས་བྱ་བའི་སྒྲས་ནི་ས་དང་ཕ་རོལ་ཏུ་ཕྱིན་པ་ལ་སོགས་པ་མ་གསུངས་པ་རྣམས་ཀྱང་བསྡུའོ། །
རབ་ཏུ་དགའ་བའི་རྒྱལ་པོ་དེའི་ཞེས་བྱ་བ་ནི་རབ་ཏུ་དགའ་བས་འབར་བར་བྱ་བའི་ཕྱིར་རོ། །དེ་བཞིན་དུ་སངས་རྒྱས་ལྔའི་དབུ་རྒྱན་དང་དར་དཔྱངས་ཀྱི་དབང་གིས་དབང་བསྐུར་ནས་རྡོ་རྗེ་དགྱེས་པ་ཞེས་བྱ་བ་མི་ཕྱེད་པའི་དགའ་བ་མངའ་བས་ན་རྡོ་རྗེ་དགྱེས་པའོ། །དེ་བཞིན་གཤེགས་པ་
ཐམས་ཅད་རབ་ཏུ་དགྱེས་པར་བྱེད་པའི་རང་བཞིན་དུ་བྱེད་ཅིང་ཆེད་དུ་བརྗོད་པ་འདི་གསུངས་པ་ཡིན་ཏེ། སངས་རྒྱས་ཀུན་གྱི་ཞེས་བྱ་བ་ནི། བཅོམ་ལྡན་འདས་ཀྱི་ཐད་ནས་བདག་གིས་རྙེད་པ་གང་ཡིན་པ་འདིའོ། །ཅི་ཞིག་ལས་ཅན་ཞེ་ན། ལེགས་པ་སྦྱིན་པ་རབ་ཏུ་འཇུག་བྱེད་པས། །
ཞེས་བྱ་བ་སྨོས་ཏེ། དགའ་བ་བསྐྱེད་པའོ། །དེ་བས་ན་རྡོ་རྗེ་ཐམས་ཅད་དགྱེས་པར་བྱེད་ཅེས་བྱ་བ་སྟེ་མི་ཕྱེད་པའོ། །ལྷ་རྫས་ཞེས་བྱ་བ་ནི་ལྷ་རྣམས་ཀྱི་ཡིན་པས་ན་ལྷ་རྫས་ཏེ། དེ་བཞིན་གཤེགས་པ་ཐམས་ཅད་ཀྱི་རང་བཞིན་ཅན་གྱི་ལྷ་རྣམས་ཀྱི་ཡིན་གྱི་གཞན་གྱིས་ནི་མ་ཡིན་ནོ། །
དགྱེས་པ་སྤེལ་བའོ་ཞེས་བྱ་བ་ནི་ཟག་པ་མེད་པའི་ཡིད་བདེ་བའི་རྒྱུ་མངོན་པར་འཕེལ་བར་བྱེད་པའོ། །དེ་ལྟར་ན་རྡོ་རྗེ་ལེགས་པས་དེ་བཞིན་གཤེགས་པ་ཐམས་ཅད་ལེགས་སོ་ཞེས་བྱ་བས་མཉེས་པར་བྱེད་པ་ཡིན་ནོ། །བྱང་ཆུབ་ཀྱི་སེམས་ཆེན་པོ་དང་ཞེས་བྱ་བ་ནི་མི་བསྐྱོད་པའི་ཐུགས་
ཏེ། དེ་ལས་བྱུང་བའི་རྡོ་རྗེ་སེམས་དཔའ་ཡང་དབྱེར་མེད་པའི་ཉེ་བར་གདགས་པས་བྱང་ཆུབ་ཀྱི་སེམས་ཆེན་པོ་ཞེས་བཤད་དོ། །དེ་བཞིན་གཤེགས་པ་ཐམས་ཅད་སྤྱན་འདྲེན་པའི་དམ་ཚིག་དང་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་སྤྱན་འདྲེན་པ་ནི་སྤྱན་དྲངས་པའོ། །དེའི་དམ་ཚིག་

ནི་རྒྱུ་སྟེ་བཅོམ་ལྡན་འདས་རྡོ་རྗེ་རྒྱལ་པོའོ། །དེ་བཞིན་གཤེགས་པ་ཐམས་ཅད་མཉེས་པར་བྱེད་པའི་ཡེ་ཤེས་ནི་དེ་བཞིན་གཤེགས་པ་ཐམས་ཅད་མཉེས་པར་བྱེད་པའི་དོན་གྱི་ཡེ་ཤེས་ཏེ་རྡོ་རྗེ་ཆགས་པའོ། །དགྱེས་པ་ཆེན་པོ་ནི་དགྱེས་པ་ཆེ་བ་སྟེ། རྡོ་རྗེ་
ལེགས་པའོ། །འདི་ནི་སྡོམ་པ་གསུངས་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་དམ་ཚིག་ཆེན་པོའི་སེམས་དཔའོ་ཞེས་བྱ་བ་ནི་མི་བསྐྱོད་པ་ལ་སོགས་པའི་ཚུལ་ཅན་གྱི་དེ་བཞིན་གཤེགས་པ་ཐམས་ཅད་ཀྱི་དམ་ཚིག་ཆེན་པོའི་སེམས་དཔའ་ཡིན་པས་ན་དམ་ཚིག་
ཆེན་པོའི་སེམས་དཔའ་སྟེ། དེ་རྣམས་ལས་སྐྱེས་པ་ཡིན་པའི་ཕྱིར་རོ། །དེ་ཡང་ཐོག་མ་དང་ཐ་མ་མེད་པའི་དམ་ཚིག་ཆེན་པོའི་ཆོས་ཀྱི་དབྱིངས་ཀྱི་རང་བཞིན་གྱི་སེམས་དཔའ་ནི་དམ་ཚིག་ཆེན་པོའི་སེམས་དཔའ་སྟེ། གཟུགས་སྟོང་པའོ། །སྟོང་པ་ཉིད་གཟུགས་སོ་ཞེས་
གསུངས་པའི་ཕྱིར་རོ། །གཞན་དུ་ཡང་བཤད་པར་བྱ་སྟེ། བྱང་ཆུབ་ཀྱི་མཚན་ཉིད་ཅན་གྱི་སེམས་བསྐྱེད་པ་ནི། མི་བསྐྱོད་པའི་རང་བཞིན་ཡིན་ནོ། །དེ་ཡང་བརྟགས་པ་ལས་ལྡོག་པའི་དབྱེ་བས་རྣམ་པ་བཞིའོ། །དེ་ལ་དབྱེ་བ་ནི་འདི་ཡིན་ཏེ། རྣམ་པར་རྟོག་པ་ཐམས་ཅད་
ཀྱིས་མི་གཡོ་བའི་མི་བསྐྱོད་པའི་ཐུགས་ཏེ་དེ་ཉིད་རྣམ་པར་རྟོག་པའི་ཆུ་བོ་ལས་གྲོལ་བར་བྱེད་པས་གྲོལ་བའི་སེམས་སོ། །གྲོལ་བར་བྱེད་པ་ཉིད་ཀྱིས་གྲོལ་བར་བྱེད་པས་ན་དེའི་ཕྱིར་གྲོལ་བའི་སེམས་སོ། །རྣམ་པར་རྟོག་པ་མེད་པས་ནི་དབུགས་འབྱིན་པའི་ངོ་བོ་སྟེ། དབུགས་
འབྱིན་པའི་ཚུལ་དེ་ཉིད་ཀྱིས་མཆོག་ཏུ་ཡིད་བདེ་བ་ཐོབ་པ་མྱ་ངན་ལས་འདས་པའི་ཚུལ་ཐམས་ཅད་ནི་རྡོ་རྗེ་སེམས་དཔའ་དང་། རྡོ་རྗེ་རྒྱལ་པོ་དང་། རྡོ་རྗེ་ཆགས་པ་དང་། རྡོ་རྗེ་ལེགས་པའི་ཚུལ་ཡིན་པར་བཤད་དོ། །དེ་བས་ན་འདི་དག་ཉིད་ལ་དམ་ཚིག་ཆེན་པོའི་སེམས་དཔའ་
ཞེས་བཤད་དེ། བྱང་ཆུབ་ཆེན་པོར་སེམས་བསྐྱེད་པ་ལས་བྱུང་བའི་ཕྱིར་རོ། །དེ་ཡང་དམ་ཚིག་ཀྱང་ཡིན་ལ་ཆེན་པོ་ཡང་ཡིན་པས་ན་དམ་ཚིག་ཆེན་པོ་ཞེས་བཤད་དོ། །དམ་ཚིག་ཆེན་པོ་ཞེས་སུ་ཞིག་ལ་བཤད་ཅེ་ན། ཐོག་མཐའ་མེད་པའི་སེམས་དཔའ་ནི་རྡོ་རྗེ་སེམས་དཔའ་

ཞེས་གསུངས་པས་ཆོས་བདག་མེད་པའི་ཚུལ་གྱིས་ཐམས་ཅད་དུ་ཁྱབ་པས། དེའི་ཕྱིར་དམ་ཚིག་ཆེན་པོའོ། །གཞན་ཡང་། བྱང་ཆུབ་སེམས་བཟང་གང་ཡིན་ཏེ། །རྡོ་རྗེ་སེམས་དཔའ་ཡང་དག་འབྱུང་། །བསྡུ་བའི་དངོས་པོ་བཞི་རྣམས་ན། །རྡོ་རྗེ་རྒྱལ་པོར་དེ་བྱུང་ངོ་། །སེམས་
ཅན་སྨིན་བྱེད་འདི་ཆགས་པ། །ཡང་དག་བྱང་ཆུབ་སྤྱོད་ལེགས་པ། །དམ་ཚིག་ཆེ་སེམས་ཞེས་བྱ་བ། །བྱང་ཆུབ་སེམས་ལས་ཡང་དག་བྱུང་། །ཞེས་བཤད་པ་ཡིན་ནོ། །དེ་ལྟར་རྡོ་རྗེ་ལེགས་པའི་ཚུལ་གྱིས་སེམས་ཅན་ཡང་དག་པའི་བྱང་ཆུབ་ཀྱི་སྤྱོད་པས་དྲི་མ་ཐམས་ཅད་དང་
བྲལ་བར་གྱུར་ནས། དབང་བསྐུར་བར་བྱའོ་ཞེས་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ཏེ། ཡང་བཅོམ་ལྡན་འདས་ཀྱིས་དེ་བཞིན་གཤེགས་པ་ཐམས་ཅད་ཀྱི་སྙིང་པོ་རང་གི་ཐུགས་ཀ་ནས་བྱུང་ངོ་ཞེས་བྱ་བར་སྦྱར་རོ། །ལེགས་སོ་ཞེས་བྱ་
བའི་ཚུལ་ལ་ལྟོས་ན་ཡང་ཞེས་བྱ་བའི་སྒྲ་སྨོས་སོ། །ནམ་མཁའ་ནི་མཉམ་པ་ཉིད་ཀྱི་ཡེ་ཤེས་སོ། །སྙིང་པོ་ནི་བསྐྱེད་པའི་གནས་ཏེ་དེ་ལྟ་བུའི་སེམས་དཔའི་རྡོ་རྗེ་གང་ལ་མངའ་བ་དེ་ནི་ནམ་མཁའི་སྙིང་པོའོ། །དེའི་དམ་ཚིག་ནི་ནམ་མཁའ་ཐམས་ཅད་ཀྱི་ཟེར་ལ་སོགས་པའི་
ཚུལ་ལོ། །དེ་བྱུང་བ་ནི་སེམས་དཔའི་རྡོ་རྗེ་གང་ལས་རིན་པོ་ཆེ་ལྟ་བུར་གྱུར་པའོ། །དེ་བྱིན་གྱིས་བརླབས་པ་ནི་བརྟན་པར་བྱ་བའི་ཕྱིར་སྤྲུལ་པའི་དོན་རྡོ་རྗེ་ལྟར་མི་ཕྱེད་པའི་ཏིང་ངེ་འཛིན་ལ་མིང་དེ་སྐད་ཅེས་བྱ་བའི་ཚུལ་ཉིད་ཀྱི་ཏིང་ངེ་འཛིན་ལ་སྙོམས་པར་ཞུགས་པ་སྟེ། བྱང་ཆུབ་
སེམས་དཔའ་ཆེན་པོ་ནམ་མཁའི་སྙིང་པོའི་འོད་ཟེར་ལ་སོགས་པས་སྤྲུལ་པ་རྣམས་བསྐྱེད་པའི་རྣམ་པར་ཐུགས་རྩེ་གཅིག་པར་མཛད་ཅེས་བྱ་བའི་ཐ་ཚིག་གོ། །དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བའི་དམ་ཚིག་ཅེས་བྱ་བ་ལ། དེ་བཞིན་གཤེགས་པ་ཐམས་ཅད་
ཀྱི་དབང་བསྐུར་བ་ནི་ནམ་མཁའི་སྙིང་པོའོ། །དེ་ཉིད་ནི་འདའ་བར་མི་བྱ་བ་ཡིན་པས་ན་དམ་ཚིག་སྟེ། དེ་ལས་བྱུང་བ་ཉིད་ཀྱིས་ན་མིང་དེ་སྐད་ཅེས་བྱ་བའི་ཐ་ཚིག་གོ། །དེ་བཞིན་གཤེགས་པ་ཐམས་ཅད་ཀྱི་ཐུགས་ལས་ཞེས་བྱ་བ་ན་དེའི་རང་གི་ཐུགས་ཀ་ནས་བྱུང་བར་གྱུར་པ་ན།

བཛྲ་རཏྣ་ཞེས་བྱ་བ་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ། དེ་ཉིད་བཅོམ་ལྡན་འདས་ནམ་མཁའ་ཐམས་ཅད་ཀྱི་འོད་ཟེར་དུ་གྱུར་ནས་བྱུང་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་ཐུགས་ལས་ཞེས་བྱ་བ་ནི་རྣམ་པར་སྣང་མཛད་ལ་
སོགས་པ་དེ་བཞིན་གཤེགས་པ་ལྔའི་ཐུགས་ལས་སོ། །བྱུང་མ་ཐག་པ་ཞེས་བྱ་བ་ནི། བཛྲ་རཏྣ་ཞེས་བྱ་བའི་སྒྲའི་ཚུལ་བྱུང་མ་ཐག་ཏུའོ། །ཐམས་ཅད་ནམ་མཁའ་དང་མཉམ་པ་ཞེས་བྱ་བ་ནི་ཐམས་ཅད་ཀྱང་ཡིན་ལ་ནམ་མཁའ་ཡང་ཡིན་པས་ན་ཐམས་ཅད་ནམ་མཁའོ། །དེའི་
མཉམ་པ་ཉིད་ནི་ཕྱོགས་བཅུ་ཐམས་ཅད་མེད་པར་བསྒོམ་པ་དང་། དོན་དམ་པར་ནི་རིན་པོ་ཆེའི་རིགས་སྒོམ་པའོ། །དེའི་ཡེ་ཤེས་ནི་ནམ་མཁའ་ཐམས་ཅད་དང་མཉམ་པ་ཉིད་ཀྱི་ཡེ་ཤེས་སོ། །དེ་གང་གིས་ཤིན་ཏུ་རྟོགས་པ་དེ་ལ་དེ་སྐད་ཅེས་བྱ་སྟེ། དེའི་ངོ་བོ་ཉིད་ཡིན་པའི་ཕྱིར་
ཤིན་ཏུ་རྟོགས་པ་ཡིན་པའི་ཕྱིར་ཞེས་བྱའོ། །དེ་སུ་ཞིག་ཡིན་ཞེ་ན། རྡོ་རྗེ་སེམས་དཔའི་ཏིང་ངེ་འཛིན་ཞེས་གང་གསུངས་པ་ཡིན་ཏེ། ནམ་མཁའི་འོད་ཟེར་སྐྱེད་པར་བྱེད་པར་སེམས་རྩེ་གཅིག་པ་ཉིད་ནི་རྡོ་རྗེ་སེམས་དཔའི་ཏིང་ངེ་འཛིན་ཏོ། །བཅོམ་ལྡན་འདས་རྡོ་རྗེ་འཛིན་པ་
དེ་ཉིད་དེ་ཞེས་བྱ་བ་ནི་སེམས་དཔའི་རྡོ་རྗེའི་རང་བཞིན་ནོ། །ནམ་མཁའ་ཐམས་ཅད་ཀྱི་འོད་ཟེར་དུ་གྱུར་ནས་བྱུང་ངོ་ཞེས་བྱ་བ་ལ། ནམ་མཁའ་ཐམས་ཅད་ཀྱི་འོད་ཟེར་ནི། སྔོན་པོ་དང་། དམར་པོ་དང་། སེར་པོ་དང་། ཤེལ་གྱི་མདོག་ཅན་ནི་ནམ་མཁའ་ཐམས་ཅད་ཀྱི་འོད་ཟེར་ཏེ།
རིའི་རྒྱལ་པོ་རི་རབ་ཀྱི་གྲགས་པ་ཉིད་བཤད་པ་ཡིན་ནོ། །རིན་པོ་ཆེ་སྣ་བཞིའི་རང་བཞིན་དེའི་འོད་ཟེར་གྱིས་ཁྱབ་པ་ཡིན་ཏེ། འདི་ལྟ་སྟེ། འཛམ་བུའི་གླིང་འདི་ནི་ནམ་མཁའ་གཅིག་ཏུ་སྔོ་བར་སྣང་ངོ་། །དེ་བཞིན་དུ་ཤར་གྱི་ལུས་འཕགས་པོ་ནི་ཤེལ་གྱི་མདོག་ཅན་ནོ་ཞེས་བྱ་བའི་
བར་དུའོ། །ནམ་མཁའ་ཐམས་ཅད་ཀྱི་འོད་ཟེར་དེ་དག་གིས་འཇིག་རྟེན་གྱི་ཁམས་ཐམས་ཅད་སྣང་བར་བྱས་པ་ནི་གསལ་བར་བྱས་པའོ། །ཐམས་ཅད་ནམ་མཁའི་དབྱིངས་ལྟ་བུ་ནི་ནམ་མཁའི་འོད་ཟེར་གྱི་རང་བཞིན་ནོ། །གྱུར་པ་ནི་གྲུབ་པའོ། །དེ་ནས་ཞེས་བྱ་བ་ལ་སོགས་པ་

ལ། ནམ་མཁའི་ཁམས་ཐམས་ཅད་ཀྱི་འོད་ཟེར་གྱི་ཚོགས་བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་སུ་ཞུགས་ནས་རྡོ་རྗེ་རིན་པོ་ཆེའི་དབྱིབས་སུ་གྱུར་ནས་བཅོམ་ལྡན་འདས་ཀྱི་ཕྱག་གཉིས་སུ་གནས་སོ་ཞེས་བྱ་བར་སྦྱར་རོ། །རྒྱུ་གང་གིས་ཤེ་ན། རྡོ་རྗེ་སེམས་དཔའི་
ཏིང་ངེ་འཛིན་ཤིན་ཏུ་བསྒོམས་པའི་ཕྱིར་ཞེས་བྱ་བ་གསུངས་ཏེ། ཤིན་ཏུ་ཡོངས་སུ་བསྒོམས་པས་ན་ཤིན་ཏུ་བསྒོམས་པ་སྟེ། དེ་བས་ན་ཤིན་ཏུ་བསྒོམས་པར་གྱུར་པ་ཉིད་ཀྱི་ཕྱིར་རོ། །སུ་ཞིག་གི་ཞེ་ན། རྡོ་རྗེ་སེམས་དཔའི་ཏིང་ངེ་འཛིན་ཞེས་བྱ་བ་སྟེ་ནམ་མཁའི་ཁམས་ཐམས་
ཅད་ཀྱི་འོད་ཟེར་བསྡུས་པའི་ཚུལ་གྱིས་རྡོ་རྗེ་རིན་པོ་ཆེ་གཅིག་ཏུ་གྲུབ་པར་བྱེད་པས་སེམས་རྩེ་གཅིག་པ་ནི། འདིར་རྡོ་རྗེ་སེམས་དཔའི་ཏིང་ངེ་འཛིན་ཏེ། དེ་ཤིན་ཏུ་བསྒོམས་པར་གྱུར་པའི་ཕྱིར་རོ། །ནམ་མཁའི་ཁམས་ཐམས་ཅད་ཀྱི་སྙིང་པོའི་རང་བཞིན་ཞེས་བྱ་བ་ལ་ནམ་མཁའི་
ཁམས་ཀྱང་ཡིན་ལ་ཐམས་ཅད་ཀྱང་ཡིན་པས་ན། ནམ་མཁའི་ཁམས་ཐམས་ཅད་དེ། རྡོ་རྗེ་རིན་པོ་ཆེ་བསྐྱེད་པའི་རྒྱུའི་འོད་ཟེར་བསྡུས་པའི་ཚུལ་གྱིས་རྡོ་རྗེ་རིན་པོ་ཆེ་བསྐྱེད་པའི་རྒྱུའི་འོད་ཟེར་སྤྲོས་པ་ཐམས་ཅད་དོ། །དེ་ཉིད་ནི་སྙིང་པོ་སྟེ་བསྐྱེད་པའི་གནས་གང་ལ་ཡོད་པའི་རྡོ་རྗེ་རིན་
པོ་ཆེའི་དབྱིབས་དེ་ནི། ནམ་མཁའི་ཁམས་ཐམས་ཅད་ཀྱི་སྙིང་པོའི་རང་བཞིན་ཏེ། དེའི་ངོ་བོ་ཉིད་ཅེས་བྱ་བའི་ཐ་ཚིག་གོ། །ཚད་ཇི་ཙམ་ཞེ་ན། འཇིག་རྟེན་གྱི་ཁམས་ཐམས་ཅད་ཀུན་དུ་ཁྱབ་པར་སོང་བ་ནི་འཇིག་རྟེན་གྱི་ཁམས་ཐམས་ཅད་དུ་མཉམ་པར་འཇུག་པའོ། །དེ་ཉིད་ཀྱི་
ཚད་གང་ལ་ཡོད་པ་དེ་ནི་འཇིག་རྟེན་གྱི་ཁམས་ཐམས་ཅད་དུ་མཉམ་པར་འཇུག་པའི་ཚད་ཙམ་མོ། །དེ་གང་ཞིག་ཡིན་ཞེ་ན། རྡོ་རྗེ་རིན་པོ་ཆེའི་དབྱིབས་ཞེས་བྱ་བ་གསུངས་ཏེ། རྡོ་རྗེ་རིན་པོ་ཆེའི་དབྱིབས་ཀྱང་ཡིན་ལ་རིན་པོ་ཆེ་ཡང་ཡིན་པས་རྡོ་རྗེ་རིན་པོ་ཆེ་ཆེན་པོའི་དབྱིབས་ཏེ་རྡོ་རྗེ་རྩེ་ལྔ་
པའི་རྩེ་མོ་ཅན་གྱི་ཡིད་བཞིན་གྱི་ནོར་བུ་རིན་པོ་ཆེ་འདི་ནི། རྡོ་རྗེས་ཉེ་བར་མཚན་པས་ན་རྡོ་རྗེ་རིན་པོ་ཆེའི་དབྱིབས་ཞེས་བྱ་བ་ལ། ནམ་མཁའ་ཐམས་ཅད་ཁྱབ་པས་ན་ཆེན་པོའོ། །བཅོམ་ལྡན་འདས་ཀྱི་ཕྱག་གཉིས་སུ་གནས་སོ་ཞེས་བྱ་བ་ནི་བསྡུ་བ་མཛད་ནས་བཅོམ་ལྡན་འདས་རྣམ་

པར་སྣང་མཛད་ཀྱི་ཐུགས་ཀ་ནས་བྱུང་སྟེ་དེ་ཉིད་ཀྱི་ཕྱག་གཉིས་སུ་གནས་པའོ། །དེ་ནས་རྡོ་རྗེ་རིན་པོ་ཆེ་ཞེས་བྱ་བ་ལ་སོགས་པ་ལ། རྡོ་རྗེ་རིན་པོ་ཆེའི་དབྱིབས་དེ་ལས་དེ་བཞིན་གཤེགས་པ་རྣམས་ཀྱི་སྐུ་དང་། བྱང་ཆུབ་སེམས་དཔའི་སྐུར་གྱུར་
ནས་ཐུགས་ལ་གནས་ནས་ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་ནས་རིན་པོ་ཆེའི་དབྱིབས་དེ་ལས་ཞེས་བྱ་བ་ནི། རྣམ་པར་སྣང་མཛད་ཀྱི་ཕྱག་ན་གནས་པ་ལས་སོ། །དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བ་ལ་སོགས་པ་ཞེས་བྱ་བ་ནི་
རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་རྣམས་དང་། གདུལ་བྱ་རྣམས་ལ་ནམ་མཁའི་སྙིང་པོའི་གཟུགས་སུ་གྱུར་པ་ནི་དབང་བསྐུར་བའོ། །དེ་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་རྫུ་འཕྲུལ་དང་ཆོ་འཕྲུལ་རྣམས་གང་ཡིན་པ་དེ་ལ་དེ་སྐད་ཅེས་བྱ་སྟེ་
དེ་དག་འཇིག་རྟེན་གྱི་ཁམས་ཐམས་ཅད་དུ་བྱས་ནས་སོ། །སོགས་པའི་སྒྲས་ནི་བྱང་ཆུབ་ཏུ་སེམས་བསྐྱེད་པ་ལ་སོགས་པ་བསྡུའོ། །དེ་བཞིན་གཤེགས་པ་དེ་རྣམས་ཀྱིས་ཀྱང་འཇིག་རྟེན་གྱི་ཁམས་ཐམས་ཅད་དུ་ཆོ་འཕྲུལ་རྣམས་མཛད་ནས་གཅིག་ཏུ་གྱུར་ཏེ། བྱང་ཆུབ་
སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོའི་སྐུར་གྱུར་ཏོ། །རྒྱུ་ཅི་ཞིག་གི་ཕྱིར་ཞེ་ན། རྡོ་རྗེ་སེམས་དཔའི་ཏིང་ངེ་འཛིན་ནི་ནམ་མཁའི་ཁམས་ཐམས་ཅད་ཀྱི་སྙིང་པོ་ལས་ཤིན་ཏུ་བྱུང་བ་དང་ཞེས་བྱ་བ་གསུངས་ཏེ། ནམ་མཁའི་ཁམས་ཀྱང་ཡིན་ལ་ཐམས་ཅད་
ཀྱང་ཡིན་པས་ན་ནམ་མཁའི་ཁམས་ཐམས་ཅད་དོ། །འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་ཇི་སྐད་དུ་བཤད་པའི་དེ་བཞིན་གཤེགས་པ་རྣམས་སོ། །དེ་ཉིད་ནི་གང་གིས་བསྐྱེད་པའི་རྒྱུ་ཡིན་པ་དེ་ལ་ནམ་མཁའ་ཐམས་ཅད་ཀྱི་སྙིང་པོ་ཞེས་བྱ་སྟེ།
འཕགས་པ་ནམ་མཁའི་སྙིང་པོའོ། །དེ་ཏིང་ངེ་འཛིན་གང་ལས་ཤིན་ཏུ་བྱུང་བར་གྱུར་པ་དེ་ནི་ཤིན་ཏུ་བྱུང་བའོ། །དེའི་ངོ་བོ་ཉིད་ཡིན་པས་ན་བྱུང་བ་ཉིད་དོ། །དེ་ལྟར་ནམ་མཁའི་ཁམས་ཐམས་ཅད་ཀྱི་སྙིང་པོ་ལས་ཤིན་ཏུ་བྱུང་བ་ཡིན་པའི་ཕྱིར་སེམས་དཔའི་ཏིང་ངེ་འཛིན་ཏེ། དེ་བཞིན་

གཤེགས་པ་ཐམས་ཅད་གཅིག་ཏུ་མཛད་པའི་ཚུལ་གྱིས་འཕགས་པ་ནམ་མཁའི་སྙིང་པོ་སྐྱེད་པར་བྱེད་པར་ཐུགས་རྩེ་གཅིག་ཏུ་མཛད་པའི་ཐ་ཚིག་གོ། །གཅིག་པའི་རྒྱུད་བཤད་ནས་ཅིའི་ཕྱིར་འདྲེས་པར་གྱུར་ཞེ་ན་ཤིན་ཏུ་བརྟན་པའི་ཕྱིར་ཞེས་བྱ་བ་གསུངས་ཏེ། རྣམ་པར་
རྟོག་པ་ཐམས་ཅད་དང་བྲལ་བའི་ཕྱིར་ཞེས་བྱ་བའི་དོན་ཏོ། །ཨེ་མའོ་དབང་བསྐུར་མཆོག་ནི་བདག་ཡིན་ནོ། །ཞེས་བྱ་བ་ནམ་མཁའ་དང་མཉམ་པའི་ཡེ་ཤེས་ཀྱི་བདུད་རྩི་ལ་ལོངས་སྤྱོད་པས་དེ་བཞིན་གཤེགས་པ་ཐམས་ཅད་ཀྱི་བག་ཆགས་དང་བཅས་པའི་ཉོན་མོངས་
པའི་དྲི་མ་འཁྲུད་པས་ན་དབང་བསྐུར་མཆོག་སྟེ། དབང་བསྐུར་བཟང་པོ་ནི་དབང་བསྐུར་བའི་མཆོག་གོ། །བདག་ཉིད་ཡིན་ནོ་ཞེས་བྱ་བ་ནི་བདག་ཉིད་ཡིན་པར་སྟོན་ཏོ། །ཁྱེད་ཇི་ལྟ་བུ་ཡིན་ཞེ་ན། རྡོ་རྗེ་རིན་ཆེན་བླ་ན་མེད་པའི་ཞེས་བྱ་བ་གསུངས་ཏེ་རྡོ་རྗེ་ནི་སྟོང་པ་ཉིད་ཀྱི་ཡེ་ཤེས་སོ། །དེ་
ཉིད་ནི་སེམས་ཅན་ཐམས་ཅད་ཀྱི་བསམ་པ་ཐམས་ཅད་ཡོངས་སུ་རྫོགས་པའི་རྒྱུར་གྱུར་པས་ན་རིན་པོ་ཆེ་དང་འདྲ་བའི་ཕྱིར་ན་རིན་ཆེན་ནོ། །དེ་ཉིད་བླ་ན་མེད་པ་སྟེ། འདིའི་གོང་ན་དམ་པ་གཞན་མེད་པའི་ཕྱིར་རོ། །ཅི་ཞིག་ངོ་མཚར་ཆེ་ཞེ་ན། ཆགས་མེད་རྒྱལ་བ་ཡང་། ཁམས་གསུམ་
དབང་པོར་དགོངས་པས་ན་ཞེས་བྱ་བ་གསུངས་ཏེ། འདི་ནི་ངོ་མཚར་ཆེའོ། །ཇི་སྐད་དུ་བཤད་པའི་ཉོན་མོངས་པ་བག་ཆགས་དང་བཅས་པ་སྤངས་པ་གང་ཁམས་གསུམ་པར་ཞེན་པ་མི་མངའ་ཞིང་ཆགས་པ་མེད་པའི་རྒྱལ་བ་སྟེ། དེ་བཞིན་གཤེགས་པ་སེམས་ཅན་ཐམས་ཅད་
ཀྱི་བསམ་པ་ཐམས་ཅད་ཡོངས་སུ་རྫོགས་པའི་རྒྱུ་རིན་པོ་ཆེའི་རིགས་སུ་བསྐྱེད་པ་འདི་ནི་ཁམས་གསུམ་གྱི་དབང་པོའོ། །འདི་སྐད་སྟོན་ཏེ་དེ་བཞིན་གཤེགས་པ་ཐམས་ཅད་གང་ཡིན་པ་དེ་ནི་བདག་ཡིན་ལ། བདག་གང་ཡིན་པ་དེ་ནི་དེ་བཞིན་གཤེགས་པ་ཐམས་ཅད་དོ། །དེས་ན་
དེ་རྣམས་དང་བདག་ཐ་མི་དད་པའི་ཚུལ་གྱིས་དབང་བསྐུར་བར་གྱུར་པས་ན་ཁམས་གསུམ་གྱི་བདག་པོར་གྱུར་པ་ཡིན་མོད་ཀྱི། ཀུན་རྫོབ་ཏུ་དེ་རྣམས་ལས་ཐ་དད་པར་གདུལ་བྱ་རྣམས་ཀྱིས་མཐོང་བ་འདི་ནི་ངོ་མཚར་ཆེའོ། །དེ་རྣམས་ཀྱང་སྔོན་གྱི་འཕེན་པའི་ཤུགས་ཀྱིས་རྣམ་པར་མི་རྟོག་

པའི་སྦྱོར་བས་བདག་པོ་མཛད་པས་གདུལ་བྱ་རྣམ་པར་རྟོག་པ་དང་བཅས་པས་དེ་ལྟར་མཐོང་བ་འདི་ཡང་ངོ་མཚར་ཆེའོ། །དེ་བཞིན་གཤེགས་པ་ཐམས་ཅད་ཀྱི་སྤྱན་སྔ་ན་ཞེས་བྱ་བ་ནི། བཅོམ་ལྡན་འདས་རིན་ཆེན་འབྱུང་ལྡན་གྱི་མདུན་ནའོ། །ཡང་བཀའ་ནོད་ཅིང་
བཞུགས་པར་གྱུར་ཏོ་ཞེས་བྱ་བ་ནི་རྡོ་རྗེ་ལེགས་པའི་གཟུགས་ཀྱིས་ནི་དགྱེས་པ་བསྐྱེད་པའི་ཕྱིར་བཀའ་ནོད་པ་ཡིན་ལ། ད་ལྟར་ནི་རིན་པོ་ཆེའི་རིགས་ཀྱི་འཁོར་ལོས་སྒྱུར་བ་ཉིད་དུ་ཡིན་པས་ན་ཡང་གི་སྒྲས་སྨོས་སོ། །དེ་ནས་ཞེས་བྱ་བ་ལ་སོགས་པ་ལ། བཅོམ་ལྡན་འདས་ཀྱིས་ལག་ཏུ་
རྡོ་རྗེ་ནོར་བུ་བྱིན་ནོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་ནོར་བུ་རིན་པོ་ཆེ་རྡོ་རྗེ་ཞེས་བྱ་བ་ནི། བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་ན་གནས་པའི་རྡོ་རྗེ་རིན་པོ་ཆེ་ཆེན་པོ་སྟེ། དེ་ལ་དམིགས་པའི་ཏིང་ངེ་འཛིན་དེ་ལ་དེ་སྐད་ཅེས་བྱའོ། །དེ་ལ་སྙོམས་པར་
ཞུགས་པ་ནི་རྡོ་རྗེ་རིན་པོ་ཆེ་སྦྱིན་པའི་རྣམ་པར་ཐུགས་རྩེ་གཅིག་ཏུ་མཛད་པ་ཡིན་ནོ་ཞེས་སྟོན་ཏོ། །དེ་ཇི་ལྟ་བུ་ཡིན་ཞེ་ན། དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་དགོངས་པ་ནི་རིན་པོ་ཆེའི་རིགས་ཀྱི་ཚུལ་གྱིས་སེམས་
ཅན་གྱི་དོན་མཛད་པར་བཞེད་པའོ། །དེ་ཡོངས་སུ་རྫོགས་པར་བྱ་བ་ནི་སེམས་ཅན་གྱི་དོན་མངོན་པར་འདོད་པའི་དོན་རྫོགས་པར་བྱ་བའོ། །དེའི་དམ་ཚིག་ནི་རྒྱུ་སྟེ། དེ་ནི་དེ་བཞིན་གཤེགས་པ་ཐམས་ཅད་ཀྱི་དགོངས་པ་ཡོངས་སུ་རྫོགས་པའི་དམ་ཚིག་ཅེས་བྱའོ། །ཅིའི་
ཕྱིར་རྗེས་སུ་བརྩལ་ཞེ་ན། སེམས་ཅན་གྱི་ཁམས་ཞེས་བྱ་བ་ལ་སོགས་པ་གསུངས་ཏེ། སེམས་ཅན་གྱི་ཁམས་མ་ལུས་ཤིང་ལུས་པ་མེད་པའི་དོན་ཐམས་ཅད་ཡོངས་སུ་གྲུབ་པར་བྱ་བ་ནི། འཇིག་རྟེན་དང་འཇིག་རྟེན་ལས་འདས་པའི་དོན་རྣམས་ཐོབ་པའོ། །དེས་ན་འདིའི་བདེ་བ་
ཐམས་ཅད་མྱོང་བར་བྱ་བའི་དོན་དུ་བྱིན་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་དོན་ཕུན་སུམ་ཚོགས་པ་ནི་འཕགས་པ་ནམ་མཁའི་སྙིང་པོའོ། །དོན་ཕུན་སུམ་ཚོགས་པ་ཉིད་ནི་དངོས་གྲུབ་དམ་པའོ། །དེའི་མངོན་དུ་བྱས་པ་ནི་ཐོབ་པའོ། །ཐོབ་པར་བྱ་བའི་ཕྱིར་དེ་ཐོབ་པར་བྱ་

བའི་དོན་དུའོ། །རྡོ་རྗེ་རིན་པོ་ཆེའི་འཁོར་ལོས་སྒྱུར་བ་ཉིད་དུ་ཞེས་བྱ་བ་ལ། རྡོ་རྗེ་རིན་པོ་ཆེ་ནི་རིན་པོ་ཆེའི་རིགས་སོ། །དེ་རྣམས་ཀྱི་འཁོར་ལོ་ནི་དཀྱིལ་འཁོར་སྤྲུལ་པ་དང་བྲི་བ་དག་གོ། །དེ་བསྐོར་བའི་ངང་ཚུལ་གང་ལ་ཡོད་པ་དེ་ནི་འཁོར་ལོ་བསྐོར་བའོ། །དེའི་ངོ་བོ་ཉིད་ཡིན་པས་ན་རིན་པོ་
ཆེའི་འཁོར་ལོ་བསྐོར་བ་ཉིད་དོ། །དེ་ལ་རྡོ་རྗེ་རིན་པོ་ཆེའི་འཁོར་ལོ་བསྐོར་བ་ཉིད་དུ་ཅི་ཞིག་གིས་བྱ་ཞེ་ན། རྡོ་རྗེ་རིན་པོ་ཆེའི་མྱུ་གུའི་དབང་གིས་དབང་བསྐུར་ནས་ཞེས་བྱ་བ་ཡིན་ཏེ། རྡོ་རྗེ་རིན་པོ་ཆེའི་མྱུ་གུ་ནི་དུམ་བུ་བཞི་ལས་འོག་ནས་བཤད་པའི་ཨོཾ་བཛྲ་རཏྣ་ཀུ་རུ་ཧཱུཾ་ཞེས་བྱ་བ། རྡོ་རྗེ་
རིན་པོ་ཆེའི་མྱུ་གུས་དབང་བསྐུར་བ་ནི་རྡོ་རྗེ་རིན་པོ་ཆེའི་མྱུ་གུའི་དབང་བསྐུར་ཏེ། དེས་དབང་བསྐུར་བའོ། །འདིས་ནི་འདི་སྐད་སྟོན་ཏེ། དུམ་བུ་བཞི་པ་ལས་འཁོར་ལོས་སྒྱུར་བར་སྤྲུལ་པ་ཡང་། འོག་མིན་དུ་མངོན་པར་བྱང་ཆུབ་ནས་མི་བསྐྱོད་པ་ལ་སོགས་པའི་དེ་བཞིན་གཤེགས་
པ་བཞིས་ཡོངས་སུ་བསྐོར་ཏེ་བབས་ནས། དེ་བཞིན་གཤེགས་པའི་རིགས་སུ་ནམ་མཁའི་སྙིང་པོ་ལ་ཡང་དེ་ཉིད་ཀྱིས་མི་བྱའོ། །ཁྱད་པར་ནི་འདི་ཡོད་དེ། འདི་ལྟར་འདིར་ནི་སངས་རྒྱས་ལྔའི་རིན་པོ་ཆེའི་དབུ་རྒྱན་དང་། དར་དཔྱངས་ཀྱིས་དབང་བསྐུར་ལ། ནོར་བུའི་རིགས་ཀྱི་
འཁོར་ལོས་སྒྱུར་བར་ནི་རྡོ་རྗེ་རིན་པོ་ཆེའི་མྱུ་གུས་རིན་པོ་ཆེའི་དབུ་རྒྱན་དང་དར་དཔྱངས་ཀྱིས་དབང་བསྐུར་བའོ། །གང་གི་ཕྱིར་འདིའི་རྒྱུད་ཕྱི་མ་ལས། དེ་བཞིན་གཤེགས་པ་ཐམས་ཅད་ཀྱི་རིགས་ཀྱི་དབང་བསྐུར་བ་ལ། རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པ་དེ་བཞིན་གཤེགས་པ་
ལྔའི་ཕྱག་རྒྱས་དེ་བཞིན་གཤེགས་པ་ལྔའི་དབུ་རྒྱན་གྱི་ཚུལ་གྱིས་བྱ་བར་བསྟན་ལ། ནོར་བུའི་རིགས་ཀྱི་དབང་བསྐུར་བར་ནི་རྡོ་རྗེ་རིན་པོ་ཆེའི་མྱུ་གུས་སོ། །གང་རྡོ་རྗེ་དབྱིངས་ཀྱི་དུམ་བུར་མི་བསྐྱོད་པའི་རིགས་གང་ཡིན་པ་དེ་ནི། དེ་བཞིན་གཤེགས་པའི་རིགས་ཡིན་ལ། རིན་ཆེན་འབྱུང་
ལྡན་གྱི་རིགས་གང་ཡིན་པ་དེ་ནི་རིན་པོ་ཆེའི་རིགས་སོ། །དེ་བཞིན་དུ་དོན་ཡོད་པར་གྲུབ་པའི་རིགས་གང་ཡིན་པ་དེ་ནི་ལས་ཀྱི་རིགས་ཡིན་ནོ་ཞེས་བྱ་བའི་བར་དུ་དེ་ལྟར་ནི་སྨྲ་བར་ནུས་པ་ཡང་མ་ཡིན་ཏེ་ཅིའི་ཕྱིར་ཞེ་ན། རྡོ་རྗེ་དབྱིངས་ཀྱི་དུམ་བུ་ཐམས་ཅད་ནི་དེ་བཞིན་གཤེགས་པའི་རིགས་

སོ་ཞེས་བྱ་བ་ནས། དོན་ཐམས་ཅད་གྲུབ་པའི་དུམ་བུ་ཐམས་ཅད་ནི་ནོར་བུའི་རིགས་སོ་ཞེས་རྒྱུད་ཕྱི་མ་ལས་བཤད་པ་དང་། བཤད་པའི་རྒྱུད་ལས་ཀྱང་དེ་བཞིན་གཤེགས་པའི་རིགས་དབང་དུ་མཛད་ནས། རྡོ་རྗེ་སེམས་དཔའ་དང་། རྡོ་རྗེ་རིན་ཆེན་དང་། རྡོ་རྗེ་ཆོས་
དང་། རྡོ་རྗེ་ལས་རྣམས་སངས་རྒྱས་ལྔའི་དབུ་རྒྱན་དང་དར་དཔྱངས་ཀྱིས་དབང་བསྐུར་བར་བྱའོ། །ཞེས་གསུངས་པ་ཡིན་ནོ། །རྡོ་རྗེ་ནོར་བུ་དེ་ཞེས་བྱ་བ་ནི་བཅོམ་ལྡན་འདས་ཀྱི་ཕྱག་ན་གནས་པའོ། །ལག་པ་གཉིས་སུ་བྱིན་ནོ་ཞེས་བྱ་བ་ནི་ལག་པ་གཉིས་ཀར་ཡང་ངོ་། །འདིས་ནི་རིན་
པོ་ཆེའི་རིགས་ཀྱི་དཀྱིལ་འཁོར་སྤྲུལ་པའི་དང་པོ་སྦྱོར་བའི་ཏིང་ངེ་འཛིན་བསྟན་པ་ཡིན་ནོ། །གཞུང་བསྡུས་པས་གཞུང་རྒྱས་པ་ཁོང་དུ་ཆུད་པར་བྱ་བའི་ཕྱིར་ཏེ། གཞན་དུ་ནི་གླེང་གཞི་དང་བཅས་པར་བརྗོད་དགོས་པར་འགྱུར་རོ། །རྡོ་རྗེ་དབྱིངས་ཀྱི་དཀྱིལ་འཁོར་གྱི་རྒྱལ་པོ་
མཆོག་སྒོམ་པ་པོས་ནི་སངས་རྒྱས་ལྔའི་དབུ་རྒྱན་དང་དར་དཔྱངས་ཀྱི་དབང་གིས་དབང་བསྐུར་བར་བྱའོ། །རྡོ་རྗེ་རིན་པོ་ཆེའི་མྱུ་གུས་ནི་མ་ཡིན་ཏེ། དེ་ནི་དོན་གཞན་ཡིན་པའི་ཕྱིར་རོ། །དེ་ནས་ཞེས་བྱ་བ་ལ་སོགས་པ་ལ། གཡོན་པ་བསྙེམས་པས་བཞུགས་ནས་གཡས་པའི་ཁུ་ཚུར་
གྱིས་རྡོ་རྗེ་ནོར་བུ་འཛིན་པ་དང་། དཔྲལ་བའི་གནས་སུ་འཇོག་ཅིང་ཆེད་དུ་བརྗོད་པ་འདི་ཆེད་དུ་བརྗོད་པ་ཡིན་ཏེ། རྡོ་རྗེ་སེམས་དཔའ་དང་། རིན་པོ་ཆེ་དང་། ཆོས་དང་། ལས་ནི་བསྙེམས་པའི་ཚུལ་གྱིས་བཞུགས་པ་ཡིན་ནོ་ཞེས་བཤད་པ་ཡིན་ནོ། །སངས་རྒྱས་ཀུན་གྱི་འདི་ཞེས་བྱ་བ་ནི་
བཅོམ་ལྡན་འདས་རྣམ་པར་སྣང་མཛད་ལས་ཐོབ་པ་གང་ཡིན་པ་དེའོ། །འདི་ཅི་ཞིག་ཡིན་ཞེ་ན། སེམས་ཅན་ཁམས་ལ་དབང་བསྐུར་བ། །ཞེས་བྱ་བ་གསུངས་ཏེ། དེ་བཞིན་གཤེགས་པ་ལ་སོགས་པའི་རིན་པོ་ཆེས་སེམས་ཅན་གྱི་ཁམས་རྣམས་ནམ་མཁའི་སྙིང་པོར་བྱེད་པ་
ནི་དབང་བསྐུར་བའོ། །བདག་ཡིན་ཏེ་བདག་གི་ལག་ཏུ་བྱིན་པས་ན་ཞེས་བྱ་བ་ནི་རིན་པོ་ཆེའི་ཕྱག་རྒྱ་གང་ཡིན་པ་ནི་བདག་ཡིན་ལ། བདག་དེ་རིན་པོ་ཆེའི་ཕྱག་རྒྱ་ཡིན་ནོ། །དེ་ལྟར་ཡིན་པ་དེའི་ཕྱིར། རིན་ཆེན་ལ་ནི་རིན་ཆེན་བཞག །ཅེས་བྱའོ། །དེ་ལྟར་རྡོ་རྗེ་རིན་ཆེན་གྱིས་དེ་

བཞིན་གཤེགས་པ་ཐམས་ཅད་དབང་བསྐུར་ལ་དབང་བསྐུར་བར་གྱུར་པས་ནི་ཉོན་མོངས་པའི་མུན་པའི་གནས་མེད་པས་ཉི་མར་གྱུར་པའི་ཡེ་ཤེས་སུ་འགྱུར་བ་ཡིན་པས། དེ་ནས་ཞེས་བྱ་བ་ལ་སོགས་པས་རྡོ་རྗེ་ཉི་མའི་འོད་ཀྱིས་སྣང་བར་བྱས་སོ་ཞེས་སྟོན་པ་ཡིན་ནོ། །དེ་ནས་བཅོམ་
ལྡན་འདས་ཀྱིས་དེ་བཞིན་གཤེགས་པ་ཐམས་ཅད་ཀྱི་སྙིང་པོ་འདི་རང་གི་ཐུགས་ཀ་ནས་བྱུང་ངོ་ཞེས་བྱ་བར་སྦྱར་རོ། །དེ་ནས་ཞེས་བྱ་བའི་སྒྲས་ནི་འདས་མ་ཐག་པའོ། །ཡང་ཞེས་བྱ་བའི་སྒྲས་ནི་འཕགས་པ་ནམ་མཁའི་སྙིང་པོ་ལ་ལྟོས་པས་སོ། །བྱང་ཆུབ་སེམས་དཔའ་
ཆེན་པོ་ཡང་ཡིན་ལ། གཟི་བརྗིད་ཆེན་པོ་ཡང་ཡིན་པས་བྱང་ཆུབ་སེམས་དཔའ་ཆེན་པོ་གཟི་བརྗིད་ཆེན་པོའོ། །དེ་ཉིད་ནི་སེམས་དཔའི་སྟེ། རྡོ་རྗེ་ལྟ་བུའི་རྡོ་རྗེ་འཛིན་པ་ཆེན་པོའོ། །དེའི་དམ་ཚིག་ནི་ཉི་མའི་དཀྱིལ་འཁོར་ལ་སོགས་པའི་གཟུགས་སོ། །དེ་འབྱུང་བ་ནི་
རིན་པོ་ཆེ་ལྟ་བུའི་སེམས་དཔའི་རྡོ་རྗེ་གང་ལས་དེ་འབྱུང་བའོ། །དེ་བྱིན་གྱིས་བརླབས་པ་ནི་བརྟན་པར་བྱ་བའི་ཕྱིར། ཏིང་ངེ་འཛིན་གང་ཡིན་པ་དེ་ལ་སྙོམས་པར་ཞུགས་ནས་ཉི་མའི་དཀྱིལ་འཁོར་ལ་སོགས་པ་སྤྲུལ་ཅིང་བསྐྱེད་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་དོན་ཏོ། །
དེ་བཞིན་གཤེགས་པ་ཐམས་ཅད་ཀྱི་འོད་ཟེར་རྣམས་ནི་དེ་བཞིན་གཤེགས་པ་ཐམས་ཅད་ཀྱི་འོད་ཟེར་ཏེ། ཉི་མའི་དཀྱིལ་འཁོར་ལ་སོགས་པའི་རང་བཞིན་ནོ། །དེའི་དམ་ཚིག་ནི་རྒྱུའོ། །གང་ལ་མིང་དེ་སྐད་ཅེས་བྱ་བའི་དེ་བཞིན་གཤེགས་པ་ཐམས་ཅད་ཀྱི་སྙིང་པོ་གང་ཡིན་པ་དེ་
རང་གི་ཐུགས་ཀ་ནས་བྱུང་བ་ནི་རང་ཉིད་ཀྱིས་སྟོན་པར་གྱུར་པ་སྟེ། བཛྲ་ཏེ་ཛ་ཞེས་བྱ་བའོ། །དེ་ནས་ཕྱག་གཉིས་སུ་གནས་སོ་ཞེས་བྱ་བར་སྦྱར་རོ། །བཅོམ་ལྡན་འདས་ཕྱག་ན་རྡོ་རྗེ་ཞེས་བྱ་བ་ནི་སེམས་དཔའི་རྡོ་རྗེའི་གཟུགས་སོ། །ཉི་མའི་དཀྱིལ་འཁོར་ཆེན་པོ་ཞེས་བྱ་བ་ནི་
ནམ་མཁའ་ཐམས་ཅད་ཀྱི་ཚད་དང་མཉམ་པ་ཡིན་པས་དེའི་ཕྱིར་ཉི་མའི་དཀྱིལ་འཁོར་ཆེན་པོ་ཞེས་བྱའོ། །དེ་ནས་བསྡུ་བ་བྱས་ནས་དེ་བཞིན་དུ་དེ་བཞིན་གཤེགས་པ་ཐམས་ཅད་ཀྱི་བྱིན་གྱི་རླབས་ཀྱིས་བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་སུ་ཞུགས་ཏེ།

ནམ་མཁའ་ཐམས་ཅད་ཁྱབ་པ་རྣམས་རྡོ་རྗེ་ཉི་མའི་དབྱིབས་གཅིག་ཏུ་གྱུར་ལ། དེ་ལྟར་གྱུར་ནས་བྱུང་སྟེ། དེ་ཉིད་ཀྱི་ཕྱག་གཉིས་སུ་གནས་སོ། །དེ་ནས་ཞེས་བྱ་བ་ལ་སོགས་པ་ལ་ཐུགས་ལ་གནས་ཏེ་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་བཞིན་
གཤེགས་པ་ཐམས་ཅད་ཀྱི་འོད་ཟེར་འགྱེད་པ་ལ་སོགས་པ་ཞེས་བྱ་བ་ནི་སེམས་ཅན་གྱི་ཁམས་མ་ལུས་པར་རྡོ་རྗེ་ཉི་མའི་ཏིང་ངེ་འཛིན་བསྐྱེད་པ་ནི། དེ་བཞིན་གཤེགས་པ་ཐམས་ཅད་ཀྱི་འོད་ཟེར་འགྱེད་པའོ། །དེ་ལྟར་དེ་ལ་སོགས་པའི་དེ་བཞིན་གཤེགས་པ་ཐམས་ཅད་ཀྱི་རྫུ་
འཕྲུལ་དང་ཆོ་འཕྲུལ་གང་ཡིན་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་འོད་ཟེར་འགྱེད་པ་ལ་སོགས་པ་དང་། དེ་བཞིན་གཤེགས་པ་ཐམས་ཅད་ཀྱི་རྫུ་འཕྲུལ་དང་ཆོ་འཕྲུལ་རྣམས་ཏེ། དེ་རྣམས་བྱས་ནས་སོ། །སོགས་པའི་སྒྲས་ནི་རྡོ་རྗེ་སེམས་དཔའ་ལ་སོགས་པའི་རྣམ་པར་
འཕྲུལ་པ་རྣམས་གཟུང་ངོ་། །རྡོ་རྗེ་སེམས་དཔའི་ཏིང་ངེ་འཛིན་ནི་ཤིན་ཏུ་གཟི་བརྗིད་ཆེ་བ་ཉིད་དང་ཞེས་བྱ་བ་འདི་ལ་རབ་ཏུ་ཆེ་བའི་གཟི་བརྗིད་མངའ་བས་ན་ཤིན་ཏུ་གཟི་བརྗིད་ཆེ་བ་སྟེ། དེའི་ངོ་བོ་ཉིད་ཤིན་ཏུ་གཟི་བརྗིད་ཆེ་བ་ཉིད་དོ། །ཤིན་ཏུ་གཟི་བརྗིད་ཆེ་བ་ཉིད་གང་ཡིན་ཞེ་ན།
སེམས་དཔའི་ཏིང་ངེ་འཛིན་ནི་ཞེས་བྱ་བ་སྨོས་ཏེ། དེ་བཞིན་གཤེགས་པ་ཐམས་ཅད་གཅིག་ཏུ་མཛད་ནས་བྱང་ཆུབ་སེམས་དཔའ་རྡོ་རྗེ་ཉི་མའི་གཟུགས་ཀྱི་རང་བཞིན་དུ་གྱུར་ཏོ་ཞེས་བྱ་བའི་དོན་ཏོ། །རབ་ཏུ་བརྟན་པའི་ཕྱིར་ཞེས་བྱ་བ་ནི་རྣམ་པར་རྟོག་པ་ཐམས་ཅད་ཀྱིས་གཡོ་བར་
མི་ནུས་པའི་ཕྱིར་རོ་གཅིག་ཏུ་འདྲེས་པ་ནི་འདུས་པར་གྱུར་པ་སྟེ་རྡོ་རྗེའི་རང་བཞིན་ནོ། །ཨེ་མའོ་དཔེ་མེད་གཟི་བརྗིད་ནི། །ཞེས་བྱ་བ་ནི་འདི་ལ་མཚུངས་པ་ཡོད་པ་ཡིན་པས་ན་དཔེ་མེད་གཟི་བརྗིད་དོ། །སེམས་ཅན་ཁམས་ཀུན་སྣང་བྱེད་བདག །ཅེས་བྱ་བ་ནི། ཉོན་མོངས་པའི་མུན་ནག་
ཐམས་ཅད་སེལ་བར་བྱེད་པའི་ཡེ་ཤེས་ཀྱི་ཉི་མ་སེམས་དང་སེམས་ལས་བྱུང་བའི་མཚན་ཉིད་ཅན་གྱི་སེམས་ཅན་གྱི་ཁམས་རྣམས་ཀྱི་སྣང་བ་མཛད་པས་ན་ཀུན་དུ་སྣང་བྱེད་དོ། །འདིའི་ཕྲིན་ལས་བསྟན་པ་ཡིན་ནོ། །འདིར་ཅི་ཞིག་ངོ་མཚར་ཆེ་ཞེ་ན། གང་གི་ཕྱིར་ཞེས་བྱ་བ་ལ་སོགས་པ་གསུངས་ཏེ།

གང་གི་ཕྱིར་སྦྱོང་བར་བྱེད་པའི་གཟི་བརྗིད་ཡིན་ཞེས་བྱ་བར་སྦྱར་རོ། །གང་གི་ཞེ་ན། སངས་རྒྱས་དག་པའི་ཞེས་བྱ་བ་ལ་སོགས་པ་གསུངས་ཏེ། བག་ཆགས་དང་བཅས་པའི་ཉོན་མོངས་པ་སྤངས་པས་དག་པར་གྱུར་པའི་སངས་རྒྱས་བཅོམ་ལྡན་འདས་དེ་རྣམས་ཀྱི་གཟི་བརྗིད་ཀྱང་སྤྱོད་
པར་བྱེད་པའི་ཡེ་ཤེས་ཀྱི་ཉི་མ་འབར་བ་ཡིན་པ་འདི་ནི་ངོ་མཚར་ཆེའོ། །འདི་སྐད་སྟོན་པ་ཡིན་ཏེ། མ་དག་པ་དང་ཐ་དད་པའི་ཚུལ་གྱིས་དེ་བཞིན་གཤེགས་པ་སྦྱོང་བ་ཡིན་ནོ། །དེ་རྣམས་ཤིན་ཏུ་དག་པ་ཡིན་པའི་ཕྱིར་བདག་དང་རང་བཞིན་ཐ་མི་དད་པ་ཡིན་པས་བདག་ཉིད་ལ་བྱེད་པ་པོར་
འགྱུར་བ་ནི་འགལ་བ་ཡིན་པའི་ཕྱིར། བདག་དེ་རྣམས་སྦྱོང་བར་བྱེད་པ་མ་ཡིན་མོད་ཀྱི་འོན་ཀྱང་གདུལ་བྱ་རྣམས་ཀྱིས་དེ་ལྟར་མཐོང་བ་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ། བྱང་ཆུབ་སེམས་དཔའ་ཆེན་པོ་དྲི་མ་མེད་པའི་གཟི་བརྗིད་དེ། བཀའ་ནོད་ཅིང་བཞུགས་པར་གྱུར་ཏོ་
ཞེས་པར་སྦྱར་རོ། །བྱང་ཆུབ་སེམས་དཔའ་ཆེན་པོ་ཡང་ཡིན་ལ་དྲི་མ་མེད་པའི་གཟི་བརྗིད་ཀྱང་ཡིན་པས། བྱང་ཆུབ་སེམས་དཔའ་ཆེན་པོ་དྲི་མ་མེད་པའི་གཟི་བརྗིད་དོ། །དེ་བཞིན་གཤེགས་པ་ཐམས་ཅད་ཀྱི་གཡས་ཕྱོགས་སུ་གནས་སོ་ཞེས་བྱ་བ་ནི་བཅོམ་ལྡན་འདས་རིན་
ཆེན་འབྱུང་ལྡན་གྱི་གཡས་ཕྱོགས་སུའོ། །ཡང་ཞེས་བྱ་བ་ནི་ནམ་མཁའི་སྙིང་པོ་ལ་ལྟོས་ནས་ཡང་གི་སྒྲས་གསུངས་པ་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ། བཅོམ་ལྡན་འདས་ཀྱིས་རྡོ་རྗེ་ཉི་མའི་ལག་ཏུ་བྱིན་ནོ་ཞེས་བྱ་བར་སྦྱར་རོ། །དེ་ནས་དེ་བཞིན་གཤེགས་པ་
ཐམས་ཅད་ཀྱི་འོད་ཀྱི་དཀྱིལ་འཁོར་ནི་རྡོ་རྗེ་ཉི་མའི་ཕྱག་རྒྱའོ། །དེ་ལ་དམིགས་པའི་ཏིང་ངེ་འཛིན་གང་ཡིན་པ་དེ་བཞིན་གཤེགས་པ་ཐམས་ཅད་ཀྱི་འོད་ཀྱི་དཀྱིལ་འཁོར་བྱིན་གྱིས་བརླབ་པ་རྡོ་རྗེ་ཞེས་བྱ་བ་སྟེ། དེ་ལ་སྙོམས་པར་ཞུགས་པ་ནི་རྡོ་རྗེ་ཉི་མ་སྦྱིན་པའི་རྣམ་པར་ཏིང་ངེ་
འཛིན་ལ་སྙོམས་པར་ཞུགས་སོ་ཞེས་བྱ་བའི་ཐ་ཚིག་གོ། །དེ་ཇི་ལྟ་བུ་ཡིན་ཞེ་ན། དེ་བཞིན་གཤེགས་པ་ཐམས་ཅད་ཀྱི་འོད་ཀྱི་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་འོད་ཟེར་རྣམས་ནི་དེ་བཞིན་གཤེགས་པ་ཐམས་ཅད་ཀྱི་འོད་ཟེར་ཏེ། ཉི་མའི་

འོད་ཟེར་རྣམས་སོ། །དེ་རྣམས་ཀྱི་དམ་ཚིག་ནི་རྒྱུ་སྟེ། རྡོ་རྗེ་ཉི་མའི་དཀྱིལ་འཁོར་རོ། །ཅིའི་ཕྱིར་ཞེ་ན། སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་རྣམས་ཀྱི་གཟི་བརྗིད་མཚུངས་པ་མེད་པ་སྟེ། ཉི་མའི་དཀྱིལ་འཁོར་གྱི་ཕྱག་རྒྱའི་
གཟུགས་ཀྱིས་བདེ་བ་དང་ཡིད་བདེ་བ་ཐམས་ཅད་མྱོང་བར་བྱ་བའི་ཕྱིར། འདི་ལ་དཔེ་ཡོད་པ་མ་ཡིན་པས་ན་མཚུངས་པ་མེད་པ་སྟེ། རྒྱུར་གྱུར་པ་དེ་ཞེས་བྱ་བའི་ཐ་ཚིག་གོ། །དེ་བཞིན་གཤེགས་པ་ཐམས་ཅད་ཀྱི་རང་གི་འོད་འབར་བའོ། །དེ་ཐོབ་པ་ནི་ཐོབ་པར་གྱུར་པའོ། །
དེ་ཉིད་ནི་དངོས་གྲུབ་དམ་པ་སྟེ། དེའི་ཕྱིར་ནི་དེའི་དོན་དུ་སྟེ་བྱང་ཆུབ་སེམས་དཔའ་ཆེན་པོ་རྡོ་རྗེ་ཉི་མ་གྲུབ་པའི་ཕྱིར་ཞེས་བྱ་བའི་ཐ་ཚིག་གོ། །བར་གྱི་ཞེས་བྱ་བའི་སྒྲས་ནི་བྱང་ཆུབ་ཏུ་སེམས་བསྐྱེད་པ་ལ་སོགས་པ་བསྡུའོ། །དེ་བཞིན་དུ་ཞེས་བྱ་བ་ནི་སངས་རྒྱས་ལྔའི་དབུ་རྒྱན་
དང་དར་དཔྱངས་ཀྱི་དབང་གིས་དབང་བསྐུར་ནས་སོ། །རྡོ་རྗེའི་འོད་ཅེས་བྱ་བ་ནི་འདི་ལ་མི་ཕྱེད་པའི་འོད་མངའ་བས་ན་རྡོ་རྗེའི་འོད་དེ། གང་གི་ཕྱིར་ཉི་མའི་ཕྱག་རྒྱ་དེ་ནི་རི་བོ་ཡང་བརྟོལ་ཏེ་སྣང་བར་བྱེད་པ་ཡིན་པས་དེས་འབད་པར་བྱེད་པའི་ཕྱིར་རྡོ་རྗེའི་འོད་དོ། །རྡོ་རྗེ་ཉི་མ་དེས་ཞེས་
བྱ་བ་ནི་དེ་བཞིན་གཤེགས་པ་ཐམས་ཅད་སྣང་བར་བྱེད་ཅིང་སེམས་ཅན་རྣམས། དེ་བཞིན་གཤེགས་པ་ལ་སོགས་པའི་རང་བཞིན་དུ་བྱེད་པའོ། །སངས་རྒྱས་ཀུན་གྱི་སྣང་བ་འདི། །ཞེས་བྱ་བ་ནི། བཅོམ་ལྡན་འདས་ཀྱི་གསལ་བ་གང་ཡིན་པ་དེའོ། །འདི་ཇི་ལྟ་བུ་
ཡིན་ཞེ་ན། མི་ཤེས་མུན་ནག་འཇོམས་བྱེད་པ། །ཞེས་བྱ་བ་གསུངས་ཏེ། མི་ཤེས་པ་ནི་མ་རིག་པའོ། །མི་ཤེས་པ་དེ་ཉིད་ནི་མུན་པ་མུན་ནག་གོ། །དེ་འཇོམས་པར་བྱེད་པ་ནི་འཇིག་པར་བྱེད་པའོ། །ཤིན་ཏུ་རྡུལ་ཕྲན་ཇི་སྙེད་པ། །ཞེས་བྱ་བ་ནི་འཇིག་རྟེན་གྱི་ཁམས་ཐམས་
ཅད་ཀྱི་རྡུལ་ཕྲ་རབ་ཀྱི་གྲངས་དང་མཉམ་པའོ། །ཉི་མའི་འོད་པས་ཤིན་ཏུ་ལྷག །ཅེས་བྱ་བ་ནི་འཇིག་རྟེན་གྱི་ཁམས་ཀྱི་རྡུལ་ཕྲ་རབ་ཀྱི་གྲངས་སྙེད་ཀྱི་ཉི་མ་བས་ལྷག་པ་ཡོད་པའི་རྡོ་རྗེ་ཉི་མའོ། །འདི་སྐད་སྟོན་པ་ཡིན་ཏེ། རྡོ་རྗེ་ཆོས་ཀྱི་དབྱིངས་སྟོང་པ་ཉིད་ཀྱི་རང་བཞིན་གྱི་

དེ་བཞིན་གཤེགས་པ་ཐམས་ཅད་ཀྱི་སྐུ་དེ་ལས་བྱུང་བའི་རྡོ་རྗེ་ཉི་མ་མཐའ་ཡས་པ་ཡིན་པས་ན། ཤིན་ཏུ་རྡུལ་ཕྲན་ཇི་སྙེད་པའི། །ཉི་མའི་འོད་བས་ཤིན་ཏུ་ལྷག །ཅེས་བྱའོ། །དེ་ལྟར་རྡོ་རྗེ་ཉི་མའི་འོད་ཀྱིས་དེ་བཞིན་གཤེགས་པ་ཐམས་ཅད་སྣང་བར་བྱས་ནས། སྒྲིབ་པ་
ཐམས་ཅད་དང་བྲལ་བའི་བྱམས་པའི་བདག་ཉིད་ཅན་དུ་གྱུར་པ་ཡིན་པས། དེ་ནས་ཞེས་བྱ་བ་ལ་སོགས་པས་བྱམས་པའི་སྦྱིན་པའི་ཚུལ་གསུངས་པ་ཡིན་ནོ། །བཅོམ་ལྡན་འདས་ཀྱིས་དེ་བཞིན་གཤེགས་པ་ཐམས་ཅད་ཀྱི་སྙིང་པོ་འདི་རང་གི་ཐུགས་ཀ་ནས་ཕྱུང་ངོ་ཞེས་བྱ་བར་
སྦྱར་རོ། །ཡང་ཞེས་བྱ་བ་ནི་རྡོ་རྗེ་ཉི་མ་ལ་ལྟོས་པའོ། །བྱང་ཆུབ་སེམས་དཔའ་ཆེན་པོ་རིན་པོ་ཆེའི་དཔལ་ཞེས་བྱ་བ་ནི་རིན་པོ་ཆེའི་ཏོག་ཅན་གྱི་རིན་པོ་ཆེ་ཡང་དག་པར་བསྒྲེང་ཞིང་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱེད་པ་ཉིད་ཀྱིས་ན་ཐམས་ཅད་ལས་མཆོག་ཏུ་གྱུར་
པའི་རིན་པོ་ཆེ་བསྒྲེང་བའི་བཅོམ་ལྡན་འདས་ནི། བྱང་ཆུབ་སེམས་དཔའ་རིན་ཆེན་དཔལ་ཏེ་དེ་ཉིད་ནི་སེམས་དཔའི་རྡོ་རྗེའོ། །དེའི་དམ་ཚིག་ནི་རྒྱལ་མཚན་ལ་སོགས་པའི་གཟུགས་སོ། །དེ་འབྱུང་བ་ནི་སེམས་དཔའི་རྡོ་རྗེའི་གཟུགས་ཀྱི་རིན་པོ་ཆེ་གང་ལས་སོ། །དེ་བྱིན་གྱིས་
བརླབ་པའི་ཕྱིར་རྡོ་རྗེ་ལྟར་མི་ཕྱེད་པའི་ཏིང་ངེ་འཛིན་གང་ལ་མིང་དེ་སྐད་ཅེས་བྱ་བ་དེ་ལ་སྙོམས་པར་ཞུགས་པ་ནི་རྒྱལ་མཚན་ལ་སོགས་པ་སྤྲུལ་ཅིང་བསྐྱེད་པའི་རྣམ་པར་ཐུགས་རྩེ་གཅིག་ཏུ་མཛད་དོ་ཞེས་བྱ་བའི་དོན་ཏོ། །དེ་བཞིན་གཤེགས་པ་ཐམས་ཅད་ཀྱི་དགོངས་པ་ནི་
བྱམས་པའི་སྦྱིན་པས་སེམས་ཅན་གྱི་ཁམས་མགུ་བར་བྱ་བར་མངོན་པར་བཞེད་པའོ། །དེ་ཡོངས་སུ་རྫོགས་པར་བྱེད་པ་ནི་ཕྱོགས་བཅུར་མི་དམིགས་པའི་བྱམས་པའི་མཐུས་སེམས་ཅན་རྣམས་ཀྱི་ཕན་པ་དང་བདེ་བས་བསྡུས་པ་གྲུབ་པར་ཡོངས་སུ་དགའ་བའི་བྱང་ཆུབ་སེམས་
དཔའི་རྡོ་རྗེ་དབལ་གྱི་རང་བཞིན་ནོ། །དེའི་དམ་ཚིག་ནི་རྒྱུ་སྟེ་མིང་དེ་སྐད་ཅེས་བྱ་བའི་དེ་བཞིན་གཤེགས་པ་ཐམས་ཅད་ཀྱི་སྙིང་པོ་གང་ཡིན་པའི་སྙིང་པོ་འདི་རང་གི་ཐུགས་ཀ་ནས་ཕྱུང་བར་གྱུར་པ་ནི། བཛྲ་ཀེ་ཏུ་ཞེས་བྱ་བའོ། །བཅོམ་ལྡན་འདས་ཞེས་བྱ་བ་ལ་སོགས་པ་ལ་བཅོམ་

ལྡན་འདས་རྡོ་རྗེ་འཛིན་པ་སེམས་དཔའི་རྡོ་རྗེའི་གཟུགས་ཀྱིས་ཕྱག་གཉིས་སུ་གནས་སོ་ཞེས་བྱ་བར་སྦྱར་རོ། །རྒྱལ་མཚན་ཞེས་བྱ་བ་ལ་སོགས་པ་ལ་ཁ་དོག་སྣ་ཚོགས་པ་ནི་དཀར་པོ་ལ་སོགས་པའོ། །དེ་ཉིད་ནི་གཟུགས་ཏེ་རང་བཞིན་ནོ། །རྒྱན་ནི་དར་དང་མུ་ཏིག་
ཆུན་འཕྱང་ལ་སོགས་པའི་རྒྱན་ནོ། །དབྱིབས་སྣ་ཚོགས་པ་ནི་རིང་པོ་ལ་སོགས་པ་རྣམ་པ་བརྒྱད་དོ། །དེ་ཐམས་ཅད་གང་ལ་ཡོད་པ་དེ་ནི་ཁ་དོག་གཟུགས་དང་རྒྱན་དང་དབྱིབས་སྣ་ཚོགས་པ་སྟེ། དེ་ལྟ་བུ་རྒྱལ་མཚན་དུ་གྱུར་ཏེ་བྱུང་ཞིང་འཐོན་ནས་རྣམ་པར་སྣང་མཛད་ཀྱི་ཐུགས་
སུ་ཞུགས་ཏེ་གཅིག་ཏུ་འདྲེས་པར་གྱུར་ནས་རྡོ་རྗེ་རྒྱལ་མཚན་གྱི་དབྱིབས་སུ་གྱུར་ཏེ། བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་གཉིས་སུ་གནས་སོ། །དེ་ནས་ཞེས་བྱ་བ་ལ་སོགས་པ་ལ་བྱང་ཆུབ་སེམས་དཔའ་ཆེན་པོ་རིན་པོ་ཆེ་དཔལ་གྱི་སྐུར་གྱུར་ནས། ཐུགས་ལ་གནས་ནས་
ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་རིན་པོ་ཆེའི་རྒྱལ་མཚན་ཞེས་བྱ་བ་ལ་སོགས་པ་ལ། དེ་བཞིན་གཤེགས་པ་ཐམས་ཅད་ཀྱི་རིན་པོ་ཆེའི་རྒྱལ་མཚན་མངོན་པར་བསྒྲེང་བ་ན་བྱང་ཆུབ་སེམས་དཔའ་ཆེན་པོ་རྡོ་རྗེ་དཔལ་གྱི་
རང་བཞིན་རྫོགས་པར་བྱེད་པ་ལ་དེ་བཞིན་གཤེགས་པ་ཐམས་ཅད་ཀྱི་རིན་པོ་ཆེའི་དབལ་བསྒྲེང་བ་ཞེས་བྱའོ། །དེ་ལ་སོགས་པ་སངས་རྒྱས་ཐམས་ཅད་ཀྱི་རྫུ་འཕྲུལ་དང་ཆོ་འཕྲུལ་གང་དག་ཡིན་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་རིན་པོ་ཆེའི་རྒྱལ་མཚན་བསྒྲེང་བ་ལ་
སོགས་པ་སངས་རྒྱས་ཐམས་ཅད་ཀྱི་རྫུ་འཕྲུལ་དང་ཆོ་འཕྲུལ་རྣམས་ཏེ་དེ་བྱས་ནས་སོ། །སོགས་པའི་སྒྲས་ནི་ས་དང་ཕ་རོལ་ཏུ་ཕྱིན་པ་ལ་སོགས་པ་གཞན་རྣམས་ཀྱང་བསྡུ་སྟེ། དེ་བཞིན་དུ་ཐམས་ཅད་ལ་ཡང་ཤེས་པར་བྱའོ། །རྡོ་རྗེ་སེམས་དཔའི་ཏིང་ངེ་འཛིན་རིན་པོ་ཆེའི་
དབལ་ཉིད་དང་ཞེས་བྱ་བ་ནི་བྱང་ཆུབ་སེམས་དཔའ་རིན་པོ་ཆེའི་དབལ་གྱི་ཏིང་ངེ་འཛིན་དེ་ལ་དམིགས་པ་ཉིད་ཀྱིས་ན་རིན་པོ་ཆེ་ཆེན་པོའི་དབལ་གྱི་ཏིང་ངེ་འཛིན་ཏོ། །དེའི་ངོ་བོ་ཉིད་ཡིན་པས་ན་རིན་པོ་ཆེ་ཆེན་པོའི་དབལ་ཉིད་དོ། །དེ་ཉིད་ཀྱིས་ན་རྡོ་རྗེ་སེམས་དཔའི་ཏིང་ངེ་འཛིན་ནི་

ཞེས་བྱ་བ་སྟེ། འཇིག་རྟེན་གྱི་ཁམས་ཀྱི་རྡུལ་ཕྲ་རབ་དང་མཉམ་པའི་དེ་བཞིན་གཤེགས་པ་རྣམས་གཅིག་ཏུ་མཛད་ནས། བྱང་ཆུབ་སེམས་དཔའ་ཆེན་པོ་རྡོ་རྗེ་དབལ་གྱི་སྐུར་བསྐྱེད་པ་གང་ཡིན་པ་འདི་ནི། འདིར་རྡོ་རྗེ་སེམས་དཔའི་ཏིང་ངེ་འཛིན་ནི་རིན་པོ་ཆེ་ཆེན་པོའི་
དབལ་ཏེ། འདིས་ནི་མང་པོ་གཅིག་ཏུ་བྱས་པ་གསུངས་པ་ཡིན་ནོ། །ཤིན་ཏུ་བརྟན་པའི་ཕྱིར་ཞེས་བྱ་བ་འདིས་ཀྱང་རྣམ་པར་རྟོག་པ་མེད་པས་མི་ཕྱེད་པ་ཉིད་དང་། འདྲེས་ཤིང་གཅིག་ཏུ་གྱུར་པའི་རྒྱུད་གསུངས་པ་ཡིན་ནོ། །ཨེ་མའོ་འདྲ་མེད་དཔལ་གྱི་བདག་ཡིན་ནོ། །
ཞེས་བྱ་བ་ལ། འདྲ་བ་མེད་པ་ནི་གཉིས་པ་མེད་པའོ། །སངས་རྒྱས་ཐམས་ཅད་ཀྱི་ངོ་བོར་གྱུར་པའི་ཡིད་བཞིན་གྱི་ནོར་བུའི་རྒྱལ་མཚན་གྱིས་ཉེ་བར་མཚོན་པའི་ཕྱིར་དཔལ་ལོ། །བདག་ཡིན་ནོ་ཞེས་བྱ་བ་ནི་བདག་ཉིད་ཡིན་པར་སྟོན་ཏོ། །ཁྱོད་སུ་ཞིག་གི་ཡིན་ཞེ་ན། དོན་
ཀུན་གྲུབ་པ་སྟེ་ཞེས་བྱ་བ་གསུངས་ཏེ། དོན་ཐམས་ཅད་གྲུབ་པ་གང་ཡིན་པ་དེ་ནི་དོན་ཀུན་གྲུབ་པ་སྟེ། དེ་རྣམས་ཀྱི་འདྲ་བ་མེད་པའི་དཔལ་བདག་ཡིན་ནོ། །འདི་ལ་ངོ་མཚར་ཅི་ཞིག་ཡོད་ཅེ་ན། གང་གི་ཕྱིར་དགོངས་པ་ཐམས་ཅད་ཡོངས་སུ་རྫོགས་ཤིང་། དོན་རྣམས་ཐམས་
ཅད་རྫོགས་པར་བྱེད་པ་ཞེས་བྱ་བ་སྨོས་ཏེ། འདི་ནི་ངོ་མཚར་ཆེའོ། །འདི་སྐད་སྟོན་པ་ཡིན་ཏེ། བདག་གི་རང་བཞིན་དུ་གྲུབ་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་དགོངས་པ་ཐམས་ཅད་ཡོངས་སུ་རྫོགས་པར་བྱེད་པ་ཡིན་ཏེ། དེ་རྣམས་བདག་དང་ཐ་མི་དད་ཀྱང་བྱང་
ཆུབ་སེམས་དཔའ་ཆེན་པོ་རིན་ཆེན་དབལ་གྱི་ཏིང་ངེ་འཛིན་གྲུབ་པའི་རང་བཞིན་ནི་དོན་ཐམས་ཅད་ཡོངས་སུ་རྫོགས་པར་བྱེད་པ་ཡིན་ནོ་ཞེས་གདུལ་བྱ་རྣམས་ཀྱིས་མཐོང་བ་འདི་ནི་ངོ་མཚར་ཆ