Luận tạng Tây Tạng (Tengyur) — Tập 57

འཆིང་བ་དེའི་ཚེ། རྡོ་རྗེ་ལས་ཀྱི་ཕྱག་རྒྱའོ། །གང་གི་ཚེ་རྡོ་རྗེ་རིན་ཆེན་གྱི་ཕྱག་རྒྱ་འཆིང་བ་དེའི་ཚེ་རྡོ་རྗེ་སྨྲ་བའི་ཕྱག་རྒྱའོ། །གང་གི་ཚེ་རྡོ་རྗེ་ཉི་མའི་ཕྱག་རྒྱ་འཆིང་བ་དེའི་ཚེ། རྡོ་རྗེ་རྒྱུའི་ཕྱག་རྒྱའོ། །གང་
གི་ཚེ་རྡོ་རྗེ་རྒྱལ་མཚན་གྱི་ཕྱག་རྒྱ་འཆིང་བ་དེའི་ཚེ། རྡོ་རྗེ་རྣོན་པོའི་ཕྱག་རྒྱའོ། །གང་གི་ཚེ་རྡོ་རྗེ་བཞད་པའི་ཕྱག་རྒྱ་འཆིང་བ་དེའི་ཚེ། སློབ་དཔོན་གྱིས་རྡོ་རྗེ་ཆོས་ཀྱི་ཕྱག་རྒྱ་བཅིང་བར་བྱའོ། །དེ་ལྟ་བུས་ནི་རྡོ་རྗེ་སེམས་དཔའ་ལ་སོགས་པའི་སེམས་དཔའ་རྣམས་དགོངས་པར་མཛད་པར་འགྱུར་རོ། །
དེ་ནས་བབས་པ་དེའི་ལྕེ་ལ་ཧཱུཾ་ལས་རྡོ་རྗེ་རྩེ་ལྔ་པ་དཀར་པོ་བསམས་ལ། སྨྲོས་ཤིག་རྡོ་རྗེ་ཞེས་བརྗོད་པར་བྱའོ། །དེ་ནས་མངོན་པར་འདོད་པ་ཐམས་ཅད་སྨྲ་བར་འགྱུར་རོ། །དེ་ནས་ཕྲེང་བ་དོར་བ་དེ་བླངས་ནས་མགོ་བོ་ལ་བཅིང་ངོ་། །དེ་ནས་གདོང་གཡོགས་བཀྲོལ་ལ་དཀྱིལ་འཁོར་བསྟན་ནས།
སེམས་མ་རྡོ་རྗེ་མའི་ཕྱག་རྒྱ་བཅིང་དུ་བཅུག་ལ་ཏིཥྛ་བཛྲ་ཞེས་བྱ་བ་ལ་སོགས་པས་དེའི་སྙིང་གར་དགྲོལ་དུ་གཞུག་གོ། །རྡོ་རྗེའི་བྱིན་གྱིས་བརླབས་པའི་བུམ་པའི་ནང་གི་དྲི་ཆུ་དང་ཞེས་བྱ་བ་ལ་སོགས་པ་ལ། ཕྱིའི་དཀྱིལ་འཁོར་གྱི་ཕྱི་རོལ་དུ་ཟླ་བའི་དཀྱིལ་འཁོར་བྲིས་ལ། སློབ་མ་རྡོ་རྗེ་
སེམས་དཔར་བསྐྱེད་ནས་བྱིན་གྱིས་བརླབས་ལ། ཟླ་བའི་དཀྱིལ་འཁོར་དེའི་སྟེང་དུ་རྡོ་རྗེ་སེམས་དཔའི་ཕྱག་རྒྱ་ཆེན་པོའི་རྡོ་རྗེ་དང་དྲིལ་བུ་འཛིན་པ་དེ་བཞག་ལ། དྲིལ་བུ་དཀྲོལ་ཞིང་། དྲི་དང་། བདུག་པ་དང་། མེ་ཏོག་དང་། ལྷ་བཤོས་དང་། མར་མེས་ཡང་དག་པར་མཆོད་དེ། གཏོར་
མ་བྱིན་ནས་བཀྲ་ཤིས་ཀྱི་ཚིགས་སུ་བཅད་པ་འདོན་ཞིང་། རྣམ་པར་རྒྱལ་བའི་བུམ་པ་ལས་རྡོ་རྗེ་ཁུ་ཚུར་གྱིས་ཆུ་བླངས་ལ་དེ་དང་། ཨོཾ་བཛྲ་ཨ་བྷི་ཥིཉྩ་ཞེས་བྱ་བའི་སྔགས་འདིས་སྤྱི་བོ་ནས་དབང་བསྐུར་བར་བྱའོ། །དེ་ནས་ཕྱག་རྒྱ་དང་ཕྲེང་བ་གང་ཡང་རུང་བ་ཅིག་བཅིངས་ལ་ཞེས་བྱ་བ་ལ།
དབང་བསྐུར་བ་ཐམས་ཅད་ཀྱི་སྤྱིའི་ཆོ་ག་བརྗོད་པར་བྱ་སྟེ། དེ་བཞིན་གཤེགས་པ་ཐམས་ཅད་ཀྱི་ནི་རྡོ་རྗེ་རིན་ཆེན་གྱི་ཕྱག་རྒྱའི་ཕྲེང་བས་དབང་བསྐུར་བ་ཡིན་ནོ། །དཔལ་རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པའི་རིགས་རྣམས་ཀྱི་ནི་རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པ་

སངས་རྒྱས་ཀྱི་ཕྱག་རྒྱ་རྣམས་ཀྱི་ཕྲེང་བས་དབང་བསྐུར་བའོ། །རྡོ་རྗེའི་རིགས་ལ་ནི་སངས་རྒྱས་ཀྱི་ཕྲེང་བས་ཏེ་དེའི་ཕྲེང་བ་དང་། རྡོ་རྗེའི་ཕྲེང་བས་སོ། །དེ་ཡང་རྡོ་རྗེ་ཏི་རཱི་ནྟི་རིའི་ཕྱག་རྒྱ་དང་། དཔལ་ཧེ་རུ་ཀའི་དམ་ཚིག་གི་ཕྱག་རྒྱས་དབང་བསྐུར་རོ། །འགྲོ་བ་འདུལ་
བའི་དུམ་བུ་ལ་ནི། རྡོ་རྗེ་ཆོས་མའི་ཕྱག་རྒྱས་འོད་དཔག་ཏུ་མེད་པས་དབང་བསྐུར་རོ། །དོན་ཐམས་ཅད་གྲུབ་པའི་དུམ་བུ་ལ་ནི། རྡོ་རྗེ་རིན་པོ་ཆེའི་མྱུ་གུས་རྡོ་རྗེ་རིན་ཆེན་གྱིས་དབང་བསྐུར་རོ། །ལས་ཀྱི་རིགས་ལ་ནི་རྡོ་རྗེ་ལས་ཀྱི་དམ་ཚིག་གི་ཕྱག་རྒྱས་སྣ་ཚོགས་རྡོ་རྗེའི་ཕྲེང་བས་དབང་བསྐུར་
རོ། །ཨོཾ་གྱིས་རང་གི་མཚན་མ་ལག་པར་བཞག་ལ་ཞེས་བྱ་བ་ནི་ཕྲེང་བས་དབང་བསྐུར་པའི་རྗེས་ཐོགས་ལའོ། །དེ་བཞིན་གཤེགས་པའི་དབང་བསྐུར་བ་ལ་ནི། དེ་བཞིན་གཤེགས་པའི་རྡོ་རྗེ་དང་། རྡོ་རྗེ་དྲིལ་བུའོ། །དེ་བཞིན་གཤེགས་པའི་རིགས་ཀྱི་དབང་བསྐུར་བ་ལ་ནི། དང་
པོའི་རྡོ་རྗེ་དྲིལ་བུ་ལའོ། །རྡོ་རྗེ་ཧཱུཾ་མཛད་ཀྱི་རིགས་ལ་ནི། རྡོ་རྗེ་གནོད་སྦྱིན་གྱི་རྡོ་རྗེ་འབར་བ་དང་། རྡོ་རྗེ་དྲིལ་བུ་འབར་བའོ། །པདྨའི་རིགས་འགྲོ་བ་འདུལ་བའི་དུམ་བུ་ལ་ནི། རྡོ་རྗེ་པདྨ་དང་། རྡོ་རྗེ་པདྨའི་དྲིལ་བུའོ། །ནོར་བུའི་རིགས་དོན་ཐམས་ཅད་གྲུབ་པའི་དུམ་བུ་ལ་ནི། རྡོ་རྗེ་རིན་པོ་
ཆེ་དང་། དྲིལ་བུ་རྡོ་རྗེ་རིན་པོ་ཆེའོ། །ལས་ཀྱི་རིགས་ལ་ནི་རྩེ་མོ་བཅུ་གཉིས་པ་སྣ་ཚོགས་རྡོ་རྗེ་དང་། དེའི་དྲིལ་བུའོ། །ཕྱིའི་རྡོ་རྗེའི་རིགས་རྣམས་ཀྱི་ནི་རྡོ་རྗེ་རྩེ་གསུམ་པ་དང་། དེས་མཚན་པའི་རྡོ་རྗེ་དྲིལ་བུ་སྟེ། འདི་དག་ནི་རང་གི་མཚན་མ་སྟེ། དེ་དག་ནི། སངས་རྒྱས་རྣམས་ཀྱི་རྡོ་རྗེའི་དབང་། །
དི་རིང་ཁྱོད་ལ་བསྐུར་བར་འགྱུར། །སངས་རྒྱས་ཀུན་གྱིས་རབ་གྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོང་། །ཨོཾ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩཱ་མི་ཏིཥྛ་བཛྲ་ས་མ་ཡ་སྟྭཾ་ཞེས་བྱ་བ་འདིས་ལག་པར་སྦྱིན་པར་བྱའོ། །བྱང་ཆུབ་སེམས་གང་དེ་རྡོ་རྗེ། །ཤེས་རབ་དྲིལ་བུ་ཞེས་བཤད་དོ། །ཞེས་གསུངས་
པས་ན། རྡོ་རྗེའི་དབང་བསྐུར་བས་ནི་རྡོ་རྗེ་ཡེ་ཤེས་ཀྱི་དབང་བསྐུར་བ་གསུངས་པ་ཡིན་ནོ། །སངས་རྒྱས་ཀུན་དུ་ཞེས་བྱ་བ་ནི། རྡོ་རྗེའི་དབང་བསྐུར་བ་འདི་ནི་བྱང་ཆུབ་ཀྱི་སེམས་ཀྱི་རང་བཞིན་ཡིན་པས། རྡོ་རྗེ་འདི་ནི་སངས་རྒྱས་ཐམས་ཅད་ཉིད་ཡིན་ནོ། །རབ་གྲུབ་ཕྱིར། རྡོ་རྗེ་འདི་ནི་ཁྱོད་ཀྱིས་ལོང་། །

ཞེས་བྱ་བ་ནི་གང་གི་ཕྱིར་རྡོ་རྗེ་འདི་ནི་སངས་རྒྱས་ཐམས་ཅད་ཀྱི་ངོ་བོ་ཉིད་ཡིན་པ་དེའི་ཕྱིར་རབ་གྲུབ་ཕྱིར་ཏེ་སངས་རྒྱས་ཉིད་དང་རྡོ་རྗེ་སེམས་དཔའ་ཉིད་ལ་སོགས་པ་ཐོབ་ཅིང་བསྐྱེད་པར་བྱ་བའི་ཕྱིར། རྡོ་རྗེ་འདི་ནི་ཁྱོད་ཀྱིས་ལོང་ཤིག་ཅེས་པ་སྟེ་ཟུང་ཞེས་པའོ། །བཛྲ་ཨ་དྷི་པ་ཏི་ཞེས་བྱ་བ་ནི་བདག་
པོར་གྱུར་པ་སྟེ། བག་ཆགས་དང་བཅས་པའི་ཉོན་མོངས་པ་ཐམས་ཅད་སྤངས་པས་ཁམས་གསུམ་གྱི་ཆོས་ཀྱི་རྒྱལ་པོར་གྱུར་པ་ཐོབ་པའོ། །ཏིཥྛ་བཛྲ་ཞེས་བྱ་བ་ནི་སྒྲུབ་པ་པོའི་རྒྱུད་འདིར་དབང་བསྐུར་བའི་ཚུལ་གྱིས་བཞུགས་ཤིག་ཅེས་བྱ་བ་སྔོན་དུ་འགྲོ་བས་རྡོ་རྗེ་ལ་བོད་པའོ། །ས་མ་
ཡ་སྟྭཾ་ཞེས་བྱ་བ་ནི་ཁྱོད་དེ་བཞིན་གཤེགས་པ་ཐམས་ཅད་ཀྱིས་ཀྱང་འདའ་བར་མི་མཛད་པ་ཡིན་པས་དེའི་ཕྱིར་རྡོ་རྗེ་ལ་བཞུགས་ཤིག་ཅེས་པའོ། །རྡོ་རྗེ་མིང་གི་དབང་གིས་དབང་བསྐུར་བར་བྱའོ་ཞེས་བྱ་བ་ནི་མེ་ཏོག་གི་ཕྲེང་བའི་དབང་བསྐུར་བ་དང་། ཕྱག་རྒྱའི་ཕྲེང་བའི་དབང་བསྐུར་བ་དང་།
རྡོ་རྗེའི་དབང་བསྐུར་བ་དང་། བདག་པོའི་དབང་བསྐུར་བ་དང་། མིང་གི་དབང་བསྐུར་བ་ལ་སོགས་པ་འདི་དག་ཐམས་ཅད་ཀྱིས་ཀྱང་ཕྱིར་མི་ལྡོག་པའི་ས་བོན་བསྐྱེད་པའི་ཕྱིར་ཡིན་པས་སྡོམ་པ་བཟུང་བ་དང་། སྡོམ་པ་མ་བཟུང་བའི་སྤྱིའི་དབང་བསྐུར་བ་ཡིན་ནོ། །སློབ་དཔོན་དུ་དབང་
བསྐུར་བར་འོས་པ་རྣམས་ཀྱི་ནི་ཁྱད་པར་འདི་ཡོད་པར་བཤད་དེ། སློབ་དཔོན་དུ་དབང་བསྐུར་བར་འོས་པ་དཀྱིལ་འཁོར་ཆེན་པོར་བཅུག་ལ། དཀྱིལ་འཁོར་གྱི་དེ་ཁོ་ན་ཉིད་དང་། ལྷའི་དེ་ཁོ་ན་ཉིད་དང་། སློབ་དཔོན་གྱི་ལས་ཐམས་ཅད་བསླབ་པར་བྱ་སྟེ། འདི་ཙམ་གྱིས་ནི་གསང་བའི་དབང་
བསྐུར་བས་དབང་བསྐུར་བ་ཡིན་ནོ་ཞེས་བཅོམ་ལྡན་འདས་རྡོ་རྗེ་འཛིན་པས་གསུངས་སོ། །དེ་ལ་དཀྱིལ་འཁོར་གྱི་དེ་ཁོ་ན་ཉིད་ནི་འདི་ཡིན་ཏེ། མི་མཉམ་མེད་པས་ཟུར་བཞི་སྟེ། །དྲན་དང་དབང་པོའི་སྒོ་བཞི་ཡིན། །བསམ་གཏན་རྣམས་ཀྱིས་རྟ་བབས་བཞི། །ཏིང་འཛིན་ཁྱམས་སུ་
བཤད་པ་ཡིན། །ཁ་ཁྱེར་ལ་བརྟེན་རྡོ་རྗེའི་མཆོག །ལྷ་མོས་མཆོད་པ་གཟུགས་རྣམས་ཡིན། །སྣ་ཚོགས་པ་ཡི་རྒྱན་རྣམས་ཀུན། །བསམ་པ་ཐམས་ཅད་རྫོགས་བྱེད་པའོ། །གདུལ་བྱ་བསྐྱོད་པ་སྣ་ཚོགས་མཆོག །དམ་ཆོས་མཆོག་ནི་ཀུན་དུ་འགྲོ། །རླུང་གིས་བསྐྱོད་པ་སྣ་ཚོགས་

མཆོག །དར་འཕན་དྲིལ་བུ་སྒྲ་སྒྲོགས་ཡིན། །མེ་ལོང་ཡེ་ཤེས་རྟག་མེ་ཏོག །བྱང་ཆུབ་ཡན་ལག་མེ་ཏོག་ཕྲེང་། །དྲ་བ་དྲ་ཕྱེད་རིན་ཆེན་མཆོག །ཉི་མ་ཟླ་བར་ཡང་དག་ལྡན། །ཀུན་གྲུབ་མི་ཟད་བདེ་བ་སྟེ། །བདེ་བ་ཆེན་པོ་ཞེས་བཤད་པའོ། །ཕྱིའི་དཀྱིལ་
འཁོར་གྱི་དེ་ཁོ་ན་ཉིད་དོ། །དེ་ཡི་ནང་རིམ་དག་གི་ཐིག །དཀྱིལ་འཁོར་བརྒྱད་པ་འདྲ་བ་ནི། །འདི་ནི་རྣམ་པར་ཐར་པ་བརྒྱད། །དངོས་གྲུབ་ཀུན་གྱིས་བདེ་བ་སྟེར། །ཐེག་པ་ཆེན་པོ་བྱང་ཆུབ་སེམས། །མདོ་སྡེའི་འཁོར་ལོ་བསྐོར་བས་ན། །རྡོ་རྗེའི་ཐིག་གིས་ཡོངས་བསྐོར་བར། །
རྡོ་རྗེའི་འཁོར་ལོ་ཡང་དག་བྲི། །རྣམ་པར་སྣང་མཛད་དང་། མི་བསྐྱོད་པ་དང་། རིན་ཆེན་འབྱུང་ལྡན་དང་། འོད་དཔག་ཏུ་མེད་པ་དང་། དོན་ཡོད་པར་གྲུབ་པའི་དཀྱིལ་འཁོར་ནི། ཐབས་རྣམ་པ་ལྔ་བསྟན་པའི་ཕྱིར། ཤེལ་དང་། བཻཌཱུརྱ་དང་། གསེར་དང་། པདྨ་རཱ་ག་དང་། མརྒད་
ཀྱི་མདོག་ཅན་ལྟ་བུ་སྟེ་ཟླུམ་པོའོ། །དེ་ལ་དབུས་མ་ཤེལ་ལྟ་བུའི་མདོག་ཅན་ནི། བཅོམ་ལྡན་འདས་རྣམ་པར་སྣང་མཛད་ཀྱི་དཀྱིལ་འཁོར་ཏེ། བྱང་ཆུབ་ཀྱི་སེམས་རྣམ་པར་དག་པ་སྟོན་པ་ཡིན་ནོ། །གཉིས་པ་བཻཌཱུརྱའི་མདོག་ཅན་ནི་མི་བསྐྱོད་པའི་དཀྱིལ་འཁོར་ཏེ། བསྡུ་བའི་
དངོས་པོ་བཞི་སྟོན་པར་བྱེད་པ་ཡིན་ནོ། །གསུམ་པ་གསེར་གྱི་མདོག་ཅན་ནི་རིན་ཆེན་འབྱུང་ལྡན་གྱི་དཀྱིལ་འཁོར་ཏེ། བསོད་ནམས་དང་ཡེ་ཤེས་ཀྱི་ཚོགས་སྟོན་པར་བྱེད་པ་ཡིན་ནོ། །བཞི་པ་པདྨ་རཱ་གའི་མདོག་ཅན་ནི་འོད་དཔག་ཏུ་མེད་པའི་དཀྱིལ་འཁོར་ཏེ། མི་དམིགས་པའི་ཐུགས་རྗེ་
ཆེན་པོ་དང་། ཏིང་ངེ་འཛིན་དང་། གཟུངས་དང་། རྣམ་པར་ཐར་པ་ལ་སོགས་པ་སྟོན་པར་བྱེད་པ་ཡིན་ནོ། །ལྔ་པ་མརྒད་ཀྱི་མདོག་ཅན་ནི་དོན་ཡོད་པར་གྲུབ་པའི་དཀྱིལ་འཁོར་ཏེ། སེམས་ཅན་སྨིན་པ་དང་གྲོལ་བར་བྱེད་པའི་བྱང་ཆུབ་སེམས་དཔའི་ལམ་འབྲས་བུ་དང་བཅས་པ་ཐོབ་
པ་ལས་བྱུང་བའི་ཐེག་པ་གཞན་གྱི་ལྟ་བ་དང་བྲལ་བ་ཡིན་ནོ་ཞེས་བྱ་བ་ནི་དཀྱིལ་འཁོར་ཞེས་བྱ་བའི་མདོས་སྟོན་པ་ཡིན་ནོ། །ཁ་དོག་ལྔ་པོ་ནི་དེ་བཞིན་གཤེགས་པ་རྣམས་སེམས་ཅན་གྱི་ཁམས་ལ་ཕ་རོལ་ཏུ་ཕྱིན་པ་དྲུག་གིས་ཆགས་པར་མཛད་པ་ཡིན་ནོ་ཞེས་སྟོན་པར་བྱེད་པའོ། །བུམ་

པ་ནི་གང་གི་ཚེ་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ལས་གཉིས་སུ་མེད་པའི་ཡེ་ཤེས་ཀྱི་བདུད་རྩི་གསོལ་བ་དེ་སྟོན་པར་བྱེད་པ་ཡིན་ལ། བུམ་པ་གང་བ་ནི་འདི་ནི་བྱང་ཆུབ་ཐོབ་པར་བྱེད་པའི་བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པ་ཡིན་ནོ་ཞེས་སྟོན་པ་ཡིན་
ནོ། །གང་དུ་བཟླས་པར་ཡང་དག་བཤད། །དེ་ཉིད་བརྩོན་པར་ཡང་དག་བཤད། །གང་ཕྱིར་དྲི་ནི་ཡང་དག་བཤད། །གྲགས་པའི་དྲི་ནི་བླ་ན་མེད། །རྫུ་འཕྲུལ་བྱུག་པ་གང་ཡིན་པ། །ཚུལ་ཁྲིམས་དྲི་ནི་བླ་མེད་པའོ། །བཟའ་བ་རྣམ་པ་སྣ་ཚོགས་ནི། །ཆོས་ཀྱི་ཟས་ནི་བླ་མེད་ཡིན། །
ལྷ་ཡི་གར་བཤད་སྣ་ཚོགས་པ། །རྟོག་པ་ཐམས་ཅད་རྣམ་འཕེལ་བ། །གྲོང་ཁྱེར་དུ་ནི་གང་བཤད་པ། །དེ་ཉིད་ཐར་པའི་གྲོང་ཁྱེར་བཟང་། །དཀྱིལ་འཁོར་དུ་ནི་གང་བཤད་པ། །ཆོས་ཀྱི་རང་བཞིན་གྲོང་ཁྱེར་ཡིན། །ཞེས་བཅོམ་ལྡན་འདས་ཀྱིས་གསུངས་སོ། །ཡང་མིའུ་
ཐུང་ལྟ་བུ་ཞལ་བཞི་པ་གསུས་ཁྱིམ་ཆེ་བ། རལ་པ་ཅན་དཀྱིལ་འཁོར་གྱི་བདག་པོའི་ཡོན་ཏན་དང་ལྡན་པ། ཚོགས་ལྟ་བུ་ཞལ་བཞི་པ་དེ་དཀྱིལ་འཁོར་གྱི་སྒོར་ཡོངས་སུ་གྱུར་པས་གདུལ་བྱ་རྣམས་རང་གི་སྐུར་བཞུགས་པར་མཛད་པའི་ཕྱིར་དེ་རྣམས་ཀྱང་སྡིག་པ་སེལ་ཞིང་སངས་རྒྱས་
ཀྱི་ཡོན་ཏན་སྐྱེད་པར་མཛད་པས་བཞུགས་པར་གསང་བའི་དཀྱིལ་འཁོར་གྱི་གཟུགས་ཅན་བསྒོམ་པར་བྱའོ། །དེ་ལ་ལྷ་རྣམས་ཀྱི་དེ་ཁོ་ན་ཉིད་སུམ་ཅུ་རྩ་བདུན་ཏེ། དེ་བརྗོད་པར་བྱའོ། །དཀྱིལ་འཁོར་ཐམས་ཅད་ཀྱི་དབུས་སུ་བཞུགས་པ་ནི་བཅོམ་ལྡན་འདས་རྣམ་པར་སྣང་མཛད་དེ།
སངས་རྒྱས་ཐམས་ཅད་གཅིག་ཏུ་བསྡུས་པར་གྱུར་པ་མི་བསྐྱོད་པ་ལ་སོགས་པའི་ཚུལ་གྱིས་མཛེས་པར་སྣང་བ་ཡིན་ནོ། །བཅོམ་ལྡན་འདས་རྣམ་པར་སྣང་མཛད་ཀྱི་བྱང་ཆུབ་ཀྱི་མཚན་ཉིད་ཅན་གྱི་ཐུགས་གང་ཡིན་པ་དེ་ནི་དེ་བཞིན་གཤེགས་པ་མི་བསྐྱོད་པའོ། །བཅོམ་ལྡན་འདས་
མི་བསྐྱོད་པ་དེ་ཉིད་རྣམ་པ་བཞིར་འདོད་དེ། དེའི་རྒྱུའི་གནས་སྐབས་ཀྱི་བྱང་ཆུབ་ཀྱི་ཐུགས་དང་། འབྲས་བུར་གྱུར་པའི་ཐུགས་གང་ཡིན་པ་དེ་ནི་རྡོ་རྗེ་སེམས་དཔའོ། །དེ་ཉིད་ཀྱི་བསྡུ་བའི་དངོས་པོ་བཞིའི་སྤྱོད་པ་དང་། འབྲས་བུའི་ཐུགས་ནི་རྡོ་རྗེ་རྒྱལ་པོའོ། །དེ་ཉིད་ཀྱི་སེམས་ཅན་སྨིན་པ་

དང་གྲོལ་བར་མཛད་པའི་ཐུགས་གང་ཡིན་པ་དང་། དེ་བཞིན་དུ་ལམ་བསྒོམ་པ་དང་། འབྲས་བུའི་རང་བཞིན་གྱི་ཐུགས་གང་ཡིན་པ་དེ་ནི་རྡོ་རྗེ་ཆགས་པའོ། །དེ་ཉིད་ཀྱི་ཕ་རོལ་ཏུ་ཕྱིན་པ་དྲུག་གི་སྤྱོད་པ་དང་འབྲས་བུའི་ཐུགས་གང་ཡིན་པ་དེ་ནི་རྡོ་རྗེ་ལེགས་པའོ། །
བཅོམ་ལྡན་འདས་རྣམ་པར་སྣང་མཛད་ཀྱི་སྦྱིན་པའི་ཕ་རོལ་ཏུ་ཕྱིན་པ་གང་ཡིན་པ་དེ་ནི་དེ་བཞིན་གཤེགས་པ་རིན་ཆེན་འབྱུང་ལྡན་ནོ། །རིན་ཆེན་འབྱུང་ལྡན་དེ་ཡང་ནོར་དང་། མི་འཇིགས་པ་དང་། བྱམས་པ་དང་། ཆོས་ཀྱི་སྦྱིན་པའི་ཚུལ་གྱིས་རྣམ་པ་བཞིར་འགྱུར་རོ། །དེ་ལ་ནོར་སྦྱིན་
པའི་སྤྱོད་པ་དང་། ནོར་སྦྱིན་པའི་སྤྱོད་པའི་འབྲས་བུ་གང་ཡིན་པ་དེ་ནི་རྡོ་རྗེ་རིན་ཆེན་ནོ། །མི་འཇིགས་པ་སྦྱིན་པ་དང་། མི་འཇིགས་པ་སྦྱིན་པའི་འབྲས་བུ་གང་ཡིན་པ་དེ་ནི་རྡོ་རྗེ་ཉི་མའོ། །བྱམས་པའི་སྦྱིན་པའི་སྤྱོད་པ་དང་། བྱམས་པའི་སྦྱིན་པའི་འབྲས་བུ་གང་ཡིན་པ་དེ་ནི་རྡོ་རྗེ་
དཔལ་ལོ། །ཆོས་ཀྱི་སྦྱིན་པ་དང་། ཆོས་ཀྱི་སྦྱིན་པའི་འབྲས་བུ་གང་ཡིན་པ་དེ་ནི་རྡོ་རྗེ་བཞད་པའོ། །བཅོམ་ལྡན་འདས་རྣམ་པར་སྣང་མཛད་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་གང་ཡིན་པ་དེ་ནི། དེ་བཞིན་གཤེགས་པ་འོད་དཔག་ཏུ་མེད་པའོ། །བཅོམ་ལྡན་འདས་འོད་དཔག་ཏུ་མེད་
པའི་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་ཐུགས་རྩེ་གཅིག་པ་ཉིད་ཀྱི་རྣམ་པའི་ཤེས་རབ་ཀྱི་སྤྱོད་པ་དང་། དེའི་འབྲས་བུ་གང་ཡིན་པ་དེ་ནི་རྡོ་རྗེ་ཆོས་སོ། །ཉོན་མོངས་པ་དང་ཤེས་བྱའི་སྒྲིབ་པ་སྤོང་བར་བྱེད་པའི་ཕྱིར་ཤེས་རབ་བསྒོམ་པ་དང་དེའི་འབྲས་བུ་གང་ཡིན་པ་དེ་ནི་
རྡོ་རྗེ་རྣོན་པོའོ། །རྡོ་རྗེ་དབྱིངས་ལ་སོགས་པའི་དཀྱིལ་འཁོར་སྤྲུལ་པའི་རྣམ་པའི་ཤེས་རབ་དང་། དེའི་འབྲས་བུ་གང་ཡིན་པ་དེ་ནི་རྡོ་རྗེ་རྒྱུའོ། །འོད་དཔག་ཏུ་མེད་པ་དེ་ཉིད་ཀྱི་སོ་སོ་ཡང་དག་པར་རིག་པ་བཞིའི་རང་བཞིན་གྱིས་ཤེས་རབ་ཀྱི་སྤྱོད་པ་གང་ཡིན་པ་དང་། དེའི་འབྲས་
བུ་གང་ཡིན་པ་དེ་ནི་རྡོ་རྗེ་སྨྲ་བའོ། །བཅོམ་ལྡན་འདས་རྣམ་པར་སྣང་མཛད་ཀྱི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་གང་ཡིན་པ་དེ་ནི་དེ་བཞིན་གཤེགས་པ་དོན་ཡོད་གྲུབ་པའོ། །བཅོམ་ལྡན་འདས་དོན་ཡོད་པར་གྲུབ་པ་དེ་ཡང་རྣམ་པ་བཞི་སྟེ། དོན་ཡོད་པར་གྲུབ་པ་དེས་

སངས་རྒྱས་སྤྲུལ་པའི་ཕྱིར། བརྩོན་འགྲུས་གང་བསྒོམ་པའི་སྤྱོད་པའམ། སེམས་ཅན་ཡོངས་སུ་སྨིན་པར་བྱ་བའི་སྤྱོད་པ་དང་། དེ་དག་གི་འབྲས་བུ་གང་ཡིན་པ་དེ་ནི་རྡོ་རྗེ་ལས་སོ། །ཐེག་པ་གཞན་འདོད་པའི་སེམས་ཀྱི་འཇིགས་པ་ལས་སེམས་སྲུང་བའི་བརྩོན་
འགྲུས་གང་ཡིན་པ་དང་། དེའི་འབྲས་བུ་གང་ཡིན་པ་དེ་ནི་རྡོ་རྗེ་སྲུང་བའོ། །ཆོས་རྣམས་རང་བཞིན་གྱིས་འོད་གསལ་བ་གདོད་ནས་དག་པ། ནམ་མཁའ་དང་མཉམ་པ་ཞེས་བྱ་བར་སོ་སོར་རྟོག་པའི་བརྩོན་འགྲུས་བསྒོམ་པ་འདིས། འདོད་ཆགས་ལ་སོགས་པའི་ཉོན་མོངས་པ་
དང་། ཉེ་བའི་ཉོན་མོངས་པ་ཟ་བ་དང་། གདུག་པ་ཐམས་ཅད་ཟ་བ་དང་། དེའི་འབྲས་བུ་གང་ཡིན་པ་དེ་ནི་རྡོ་རྗེ་གནོད་སྦྱིན་ནོ། །དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་རྡོ་རྗེའི་རང་བཞིན་དུ་བསྒོམ་པའི་བརྩོན་འགྲུས་དང་། དེའི་འབྲས་བུ་གང་ཡིན་
པ་དེ་ནི་རྡོ་རྗེ་ཁུ་ཚུར་རོ། །བཅོམ་ལྡན་འདས་རྣམ་པར་སྣང་མཛད་ཀྱི་བྱང་ཆུབ་ཀྱི་ཐུགས་བསྡུས་པར་གྱུར་པ་གང་ཡིན་པ་དེ་ནི་རྡོ་རྗེ་སེམས་མའོ། །སྦྱིན་པའི་ཕ་རོལ་ཏུ་ཕྱིན་པ་བསྡུས་པར་གྱུར་པ་གང་ཡིན་པ་དེ་ནི་རྡོ་རྗེ་རིན་ཆེན་མའོ། །ཤེས་རབ་ཀྱི་ཕ་རོལ་ཏུ་ཕྱིན་པ་བསྡུས་པར་གྱུར་པ་
གང་ཡིན་པ་དེ་ནི་རྡོ་རྗེ་ཆོས་མའོ། །བརྩོན་འགྲུས་ཀྱི་ཕ་རོལ་ཏུ་ཕྱིན་པ་བསྡུས་པར་གྱུར་པ་གང་ཡིན་པ་དེ་ནི་རྡོ་རྗེ་ལས་མའོ། །དེ་ཉིད་ཀྱི་སྦྱིན་པ་དང་། ཚུལ་ཁྲིམས་དང་། བཟོད་པ་དང་། བརྩོན་འགྲུས་དང་། ཤེས་རབ་དང་། བསམ་གཏན་དང་། སྨོན་ལམ་དང་། ཐབས་ཀྱི་
ཕ་རོལ་ཏུ་ཕྱིན་པ་གང་ཡིན་པ་དེ་ནི་ལྷ་མོ་སྒེག་མོ་དང་། ཕྲེང་བ་མོ་དང་། གླུ་མ་དང་། གར་མ་དང་། བདུག་པ་མ་དང་། མེ་ཏོག་མ་དང་། མར་མེ་མ་དང་། བྱུག་པ་མ་ཡིན་ནོ། །བཅོམ་ལྡན་འདས་རྣམ་པར་སྣང་མཛད་ཀྱིས་བྱང་ཆུབ་ཀྱི་ཐུགས་བསྐྱེད་ནས་ཐར་པའི་གྲོང་ཁྱེར་ཆེན་པོར་
སེམས་ཅན་འདྲེན་པར་མཛད་པའི་ཕྲིན་ལས་གང་ཡིན་པ་དེ་ནི་རྡོ་རྗེ་ལྕགས་ཀྱུའོ། །བྱང་ཆུབ་ཀྱི་སྤྱོད་པའི་ཞགས་པས་སེམས་ཅན་གཞུག་པར་མཛད་པ་གང་ཡིན་པ་དེ་ནི་རྡོ་རྗེ་ཞགས་པའོ། །བྱང་ཆུབ་ཀྱི་བསམ་གཏན་གྱིས་ཐེག་པ་གཞན་འདོད་པ་ལས་སེམས་རབ་ཏུ་དྲལ་ཏེ་འཆིང་བར་

མཛད་པ་གང་ཡིན་པ་དེ་ནི་རྡོ་རྗེ་ལྕགས་སྒྲོག་གོ། །བཅིང་བ་འབེབས་པས་རྗེས་སུ་ཆགས་པར་མཛད་པ་གང་ཡིན་པ་དེ་ནི་རྡོ་རྗེ་འབེབས་པ་ཡིན་ནོ། །དེ་སྐད་དུ་ཡང་རྡོ་རྗེ་ལྕགས་ཀྱུ་ལ་སོགས་པ་དབང་དུ་མཛད་ནས། བྱང་ཆུབ་སེམས་དང་དེ་བཞིན་སྦྱིན། །བསམ་
གཏན་སངས་རྒྱས་རྗེས་མཉེས་བྱེད། །ཅེས་གསུངས་པ་ཡིན་ནོ། །བྱམས་པ་ལ་སོགས་པའི་བྱང་ཆུབ་སེམས་དཔའ་རྣམས་ནི། དམ་པའི་ཆོས་ཀྱི་གྲོང་ཁྱེར་ཡོངས་སུ་སྐྱོང་བའོ། །དེ་ལ་འདི་དག་ཐམས་ཅད་ནི་སློབ་དཔོན་གྱི་ལས་ཡིན་ཏེ། སེམས་དཔའ་ཆེ་ཡི་ཕྱག་རྒྱ་ཆེར། །
བསྒོམ་ཞིང་བྱིན་གྱིས་རློབ་བགྱིད་ཅིང་། །དཀྱིལ་འཁོར་གྱི་ནི་དབུས་ཉིད་དུ། །ཅི་རིགས་པར་ནི་མཆིས་ནས་ཀྱང་། །ཕྱག་རྒྱ་ལ་གནས་དེ་བཞིན་ལངས། །ཀུན་དུ་རྣམ་པར་བལྟས་ནས་ནི། །རྡོ་རྗེ་སེམས་དཔའ་ཞེས་བརྗོད་ནོས། །བསྒྱིངས་པའི་ཚུལ་གྱིས་ཡོངས་སུ་
བསྐོར། །ཞེས་བྱ་བ་ནས། བདག་མིང་འདི་ཞེས་བགྱི་བ་ཡི། །རྡོ་རྗེ་སློབ་དཔོན་དཀའ་ཐུབ་ཆེས། །སེམས་ཅན་ཀུན་ལ་སྨན་སླད་དུ། །སློབ་མ་རྣམས་ནི་གཞུག་པར་བགྱི། །ཞེས་གང་བཤད་པ་འདི་དག་ཐམས་ཅད་ནི་སློབ་དཔོན་གྱི་ལས་ཡིན་ནོ། །དབང་བསྐུར་
བའི་ཆོ་ག་རྒྱས་པར་བརྗོད་པར་བྱ་སྟེ། རྩ་བའི་དཀྱིལ་འཁོར་ལས་ཁྲུ་གཉིས་ཙམ་དོར་བར་ཤར་སྒོར་བལྟས་ལ། དཀྱིལ་འཁོར་དབུས་མའི་ཕྱེད་ཀྱི་ཚད་ཙམ་དུ་ཟུར་བཞི་པ་སྒོ་ནུབ་ཏུ་བཏོད་པའི་དཀྱིལ་འཁོར་ཚོན་སྣ་ལྔས་བྲིས་པ། དེའི་དབུས་སུ་པདྨ་འདབ་མ་བརྒྱད་པ། དེའི་
སྟེང་དུ་དཔལ་རྡོ་རྗེ་སེམས་དཔའི་རྡོ་རྗེ་རྩེ་ལྔ་པ། ཁ་དོག་དམར་པོ་འོད་ཟེར་གྱི་ཕྲེང་བ་དང་ལྡན་པ་བྲི་བར་བྱའོ། །དེ་བཞིན་དུ་ལྷོ་དང་། ནུབ་དང་། བྱང་གི་སྒོར་བལྟས་པ། ཀུན་ནས་ཟླུམ་པོར་དཀྱིལ་འཁོར་གཞན་དག་བྲིས་ལ། དེའི་དབུས་སུ་པདྨ་འདབ་མ་བརྒྱད་པའི་སྟེང་དུ་རྡོ་རྗེ་
རིན་པོ་ཆེ་དང་། རྡོ་རྗེ་པདྨ་དང་། སྣ་ཚོགས་རྡོ་རྗེ་གོ་རིམས་ཇི་ལྟ་བ་བཞིན་བྲིས་ལ། དཀྱིལ་འཁོར་དེ་རྣམས་རྩ་བའི་དཀྱིལ་འཁོར་བཞིན་ཡང་དག་པར་མཆོད་ནས། དེ་རྣམས་ལ་རྡོ་རྗེ་གནོད་སྦྱིན་ཡོངས་སུ་བཟླས་པའི་སེང་གེའི་གདན་ནམ་ཁྲི་ལ་ཟླ་བའི་དཀྱིལ་འཁོར་དར་གྱིས་གཡོགས་

པ་གཞག་པར་བྱའོ། །དེ་ནས་སློབ་མ་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པར་བྱིན་གྱིས་བརླབས་ལ། ཤར་ཕྱོགས་ཀྱི་སྒོའི་དབང་བསྐུར་བའི་དཀྱིལ་འཁོར་དུ་རྣམ་པར་སྣང་མཛད་ལ་སོགས་པའི་ཕྱག་རྒྱ་ཆེན་པོས་སེང་གེའི་གདན་ལ་བཞག་ལ། སེང་གེའི་གདན་
གྱི་སྟེང་དུ་བླ་རེ་བྲེ་བ་དང་། གཡས་ལོགས་སུ་དར་དང་མེ་ཏོག་གི་ཕྲེང་བས་བརྒྱན་པ་དང་། གདུགས་མདོག་དཀར་པོ་རིན་པོ་ཆེའི་ཏོག་ཅན་ལ། ཨོཾ་མངོན་པར་བཟླས་པ་གཞག་པ་དང་། གཡོན་ལོགས་སུ་དར་སྣ་ཚོགས་པའི་རྒྱལ་མཚན་དང་། བ་དན་སྣ་ཚོགས་ལ་ནམ་མཁའ་མཛོད་
ཀྱི་སྔགས་བཟླས་པ་གཞག་པར་བྱའོ། །དེ་ནས་སློབ་མ་ལ་མཆོད་ཡོན་བྱིན་ལ། མཆོད་པ་ལྔས་ཀྱང་མཆོད། དུང་དང་། རྔ་རིངས་དང་། རྔ་བོ་ཆེ་དང་། ཟངས་དུང་ལ་སོགས་པ་རོལ་མོའི་ཕྱག་རྒྱས་བྱིན་གྱིས་བརླབས་པ་དང་། གར་དང་། གླུ་དང་། རོལ་མོ་ལ་སོགས་པས་ཀྱང་དེ་ཡང་
དག་པར་མཆོད་ལ་བཀྲ་ཤིས་ཀྱི་ཚིགས་སུ་བཅད་པ་བརྗོད་པར་བྱའོ། །དེ་ནས་སྦྱོར་བ་འདིས་མི་བསྐྱོད་པ་ལ་སོགས་པའི་བུམ་པ་བཞིས་དབང་བསྐུར་བར་བྱའོ། །ཨོཾ་བཛྲ་སཏྭ་ཧཱུཾ། ཨོཾ་བཛྲ་ཨ་བྷི་ཥིཉྩ། ཨོཾ་བཛྲ་རཏྣ་ཧཱུཾ། ཨོཾ་བཛྲ་ཨ་བྷི་ཥིཉྩ། ཨོཾ་བཛྲ་དྷརྨྨ་ཧཱུཾ། ཨོཾ་བཛྲ་ཨ་བྷི་
ཥིཉྩ། ཨོཾ་བཛྲ་ཀརྨྨ་ཧཱུཾ། ཨོཾ་བཛྲ་ཨ་བྷི་ཥིཉྩ། དེ་ནས་བཛྲ་བིད་སྭཱ་ཧཱ། ཞེས་བྱ་བ་དམ་ཚིག་གི་ཕྱག་རྒྱས་ཡོངས་སུ་བཟུང་བའི་མེ་ཏོག་གི་ལྕུག་མ་ལ་སྟོང་རྩ་བརྒྱད་བཟླས་པའི་རྣམ་པར་སྣང་མཛད་ཀྱི་བུམ་པ་དེ་དང་། ཨོཾ་བཛྲ་བིཏ་སྭཱ་ཧཱ། ཨོཾ་བཛྲ་ཨ་བྷི་ཥིཉྩ། ཞེས་བྱ་བས་
དབང་བསྐུར་རོ། །དེ་ལ་དམ་ཚིག་གི་ཕྱག་རྒྱ་ནི་འདི་ཡིན་ཏེ། མཐེ་བོ་གཉིས་ནི་བསྣོལ་བྱས་ལ། །མཛུབ་མོ་རྩེ་མོ་བཀུག་ནས་ནི། །གུང་མོ་བསྙམས་པའི་ཚིགས་སུ་བཅད། །རྡོ་རྗེ་ཐལ་མོའི་འོད་ཀྱིས་བརྒྱན། །ཞེས་བྱ་བའོ། །དེ་ནས་བཛྲ་སཏྭ། བཛྲ་རཏྣ། བཛྲ་
དྷརྨྨ། བཛྲ་ཀརྨྨ་ཆེ་གེ་མོ་ཞེས་བྱ་བ་འདི། ཨ་དྷི་ཏིཥྛ་སརྦྦ་ཏ་ཐཱ་ག་ཏ་ཨཱ་ཙརྱཾ་བཱ་སྭཱ་ཧཱ། ཞེས་བྱ་བ་ཕྱག་རྒྱ་དང་བཅས་པས་སློབ་མའི་སྙིང་ག་དང་། དཔྲལ་བ་དང་། ལྐོག་མ་དང་། སྤྱི་བོར་བྱིན་གྱིས་བརླབས་ལ། ཡང་ཕྱག་རྒྱ་སྤྱི་བོར་བཞག་སྟེ། ལན་བརྒྱ་བཟླ་བར་བྱའོ། །

དེ་ནས་འདི་ནི་ཕྱག་རྒྱ་བཤད་དེ། རྡོ་རྗེ་བསྡམས་པས་ལེགས་བཟུང་ལ། །སྙིང་ག་དབུས་ཀྱི་བར་ན་གནས། །མཐེབ་མཉམ་ཐ་མ་རྡོ་རྗེར་བྱ། །རྡོ་རྗེ་ཆེན་པོས་ཡོངས་སུ་འཕང་། །དེ་ནས་རྡོ་རྗེ་ཁུ་ཚུར་གྱིས་རྣམ་པར་རྒྱལ་བའི་བུམ་པ་ལས་ཆུ་བླངས་ལ། དབང་
བསྐུར་བར་བྱ་ཞིང་བཏུང་བའི་ཕྱིར་ཡང་སྦྱིན་པར་བྱའོ། །ཨོཾ་སརྦྦ་ཏ་ཐཱ་ག་ཏ་མ་ཧཱ་ཡོ་གཱི་ཤྭ་ར་ཧཱུཾ། ཨོཾ་བཛྲ་ཨ་བྷི་ཥིཉྩ། དེའི་རྗེས་ལ་རྡོ་རྗེ་རིན་ཆེན་ཡོངས་སུ་བཟླས་པའི་ཆོས་གོས་དང་། གོས་དང་རྒྱན་ཐམས་ཅད་སློབ་མ་ལ་བྱིན་ལ། དྲི་ལ་སོགས་པས་ཀྱང་མཆོད་དེ།
བཛྲ་རཏྣ་ཨ་བྷི་ཥིཉྩ་ཞེས་བྱ་བ་དང་། རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱས་དབང་བསྐུར་ལ་རིན་པོ་ཆེ་ལས་བྱས་པའི་རྡོ་རྗེ་རིན་ཆེན་གྱི་ཅོད་པན་དང་དར་དཔྱངས་དང་། རྡོ་རྗེ་རིན་ཆེན་གྱི་སྔགས་མངོན་པར་བཟླས་པས་དབང་བསྐུར་ལ། དེ་བཞིན་གཤེགས་པའི་རྡོ་རྗེ་དང་།
བདག་པོ་དང་མིང་གི་དབང་བསྐུར་བར་བྱའོ། །ལྷག་མ་ནི་རྡོ་རྗེ་སེམས་དཔའི་དབང་བསྐུར་བའི་ཆོ་གས་རྗེས་སུ་སྤྱད་པར་བྱའོ། །ཡང་དེ་ཉིད་དུ་རྡོ་རྗེ་སེམས་དཔར་བྱིན་གྱིས་བརླབས་ལ་རྣལ་འབྱོར་ཆེན་པོར་བཤད་པའི་ཚུལ་གྱིས་རྣམ་པར་སྣང་མཛད་ལ་སོགས་པའི་དམ་ཚིག་གི་ཕྱག་
རྒྱས་རྣམ་པར་སྣང་མཛད་ལ་སོགས་པ་དེའི་ལུས་ལ་བཀོད་དེ། རྡོ་རྗེ་སེམས་དཔའི་ཕྱག་རྒྱ་ཆེན་པོས་སེང་གེའི་ཁྲིའི་སྟེང་དུ་དེ་བཞིན་དུ་བཞག་ལ། སེང་གེའི་ཁྲིའི་སྟེང་དུ་བླ་རེ་བྲེ་བ་དང་། གཡས་ལོགས་སུ་དར་དང་། མེ་ཏོག་གི་ཕྲེང་བས་བརྒྱན་པ་དང་། གདུགས་དཀར་
པོ་རིན་པོ་ཆེའི་ཏོག་ཅན་ལ་ཡི་གེ་ཧཱུཾ་བཟླས་པ་དང་། གཡོན་ལོགས་སུ་དར་སྣ་ཚོགས་པའི་རྒྱལ་མཚན་དང་། བ་དན་སྣ་ཚོགས་ལ་ནམ་མཁའ་མཛོད་ཡོངས་སུ་བཟླས་པ་གཞག་པར་བྱའོ། །དེ་ནས་སློབ་མ་ལ་མཆོད་ཡོན་བྱིན་ནས་མཆོད་པ་རྣམ་པ་ལྔས་ཀྱང་མཆོད་དེ། དུང་
དང་། རྔ་རིངས་དང་། རྔ་བོ་ཆེ་དང་། ཟངས་དུང་ལ་སོགས་པའི་རོལ་མོ་རྣམས་རོལ་མོའི་ཕྱག་རྒྱས་བྱིན་གྱིས་བརླབས་པ་དང་། གར་དང་། གླུ་དང་། རྩེད་མོ་ལ་སོགས་པས་ཀྱང་དེ་ལ་མཆོད་ནས་སློབ་མ་ལས་ཡོན་གྱི་མཆོག་བླངས་ནས་རྡོ་རྗེ་སེམས་དཔའི་སྐུ་གཟུགས་སྤྱི་བོར་

བཞག་སྟེ་བཀྲ་ཤིས་ཀྱི་ཚིགས་སུ་བཅད་པ་གདོན་པར་བྱའོ། །དེ་ནས་ཤར་སྒོའི་བུམ་པ་དང་། བུམ་པ་གང་བས་ཀྱང་དབང་བསྐུར་བར་བྱའོ། །དེའི་རྗེས་ལ་སྦྱོར་བ་འདིས་རྡོ་རྗེ་ཁུ་ཚུར་གྱིས་རྣམ་པར་རྒྱལ་བའི་བུམ་པ་ལས་ཆུ་བླངས་ལ། དབང་བསྐུར་ཞིང་བཏུང་བའི་ཕྱིར་ཡང་
བླུད་པར་བྱའོ། །ཨོཾ་བཛྲ་ཨཾ་ཀུ་ཤ ཨོཾ་བཛྲ་ཨ་བྷི་ཥིཉྩ། ཞེས་བྱ་བ་ནས། བཛྲ་སཏྭ། ཨོཾ་བཛྲ་ཨ་བྷི་ཥིཉྩ་ཞེས་བྱ་བའི་བར་དང་། ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བཾ་ཧོཿསུ་ར་ཏ་སྟྭཾ་ཞེས་བརྒྱ་རྩ་བརྒྱད་བཟླས་ལ། དང་པོའི་རྡོ་རྗེ་བཅིངས་ནས་དེའི་སྤྱི་བོར་གཞག་གོ། །དེ་ནས་
རྡོ་རྗེ་སེམས་དཔའི་སྐུ་གཟུགས་གསལ་ལ་དེར་དར་དམར་པོ་དང་རྒྱན་རྣམས་ལ་རྡོ་རྗེ་རིན་ཆེན་བཟླས་པ་བྱིན་ལ། རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པ་སངས་རྒྱས་རྣམས་ཀྱི་ཕྱག་རྒྱས་དབང་བསྐུར་ནས། སངས་རྒྱས་ལྔའི་རིན་པོ་ཆེའི་ཅོད་པན་ལུགས་མའམ་བརྐོས་པའམ།
བྲིས་པ་རིན་པོ་ཆེ་འམ། དེ་ལས་གཞན་པའི་རྒྱུ་ལས་བྱས་པ་དང་། དར་དཔྱངས་ལ་རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པ་བཟླས་པ་དང་། རྡོ་རྗེ་རིན་ཆེན་ཀྱང་བཟླས་པས་དབང་བསྐུར་རོ། །དེ་ནས་རྡོ་རྗེ་དང་། བདག་པོ་དང་། མིང་གི་དབང་བསྐུར་ལ། མེ་ཏོག་
ལ་སོགས་པ་དང་། སྒེག་མོ་ལ་སོགས་པས་སློབ་མ་མཆོད་ལ། རིན་པོ་ཆེའི་ཐུར་མའམ། གསེར་གྱི་ཐུར་མ་བྲིའི་སྒྲས་བྱིན་གྱིས་བརླབས་པ་ཐོགས་ལ། མདུན་དུ་འདུག་སྟེ་དེའི་མིག་གཡས་པ་འབྱེད་པ་ལྟར་བྱེད་ཅིང་འདི་སྐད་ཅེས་བརྗོད་པར་བྱའོ། །ཇི་ལྟར་མིག་
མཁན་རྒྱལ་པོ་ཡིས། །འཇིག་རྟེན་ལིང་ཏོག་བསལ་བ་ལྟར། །བུ་ཁྱོད་ཀྱིས་ནི་མི་ཤེས་པ། །རབ་རིབ་རྒྱལ་བ་རྣམས་ཀྱིས་བསལ། ཨོཾ་བཛྲ་ནེ་ཏྲ་ཨ་པ་ཧ་ར་པ་ཊ་ལཾ་ཧྲཱིཿ། དེ་ནས་མེ་ལོང་ལ། ཨཱཿབཛྲ་སཏྭ་ཞེས་བྱ་བའི་སྔགས་མངོན་པར་བཟླས་ལ་བསྟན་ཅིང་ཆོས་ཀྱི་མཚན་ཉིད་
བཤད་པར་བྱའོ། །ཆོས་རྣམས་གཟུགས་བརྙན་ལྟ་བུ་སྟེ། །དག་ཅང་གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་བྱུང་། །ངོ་བོ་ཉིད་མེད་གནས་མེད་པར། །དེ་ལྟར་ཆོས་ནི་ཤེས་ནས་སུ། །སེམས་ཅན་དོན་ལ་མཉམ་མེད་

བྱོས། །འོན་ཏེ་སངས་རྒྱས་སྲས་སུ་སྐྱེ། །ཡི་གེ་ཧོས་མདའ་དྲུག་དང་ལྡན་པའི་གཞུ་བྱིན་ལ། འདི་སྐད་ཅེས་བརྗོད་པར་བྱ་སྟེ། འདིས་དེ་བཞིན་གཤེགས་པ་ཐམས་ཅད་མཉེས་པར་གྱིས་ཤིག་ཅེས་བསྒོ་ལ། ཧོ་ཞེས་བྱ་བའི་སྙིང་པོ་འདིས་ཕྱོགས་བཞི་དང་།
སྟེང་དང་འོག་ཏུ་མདའ་འཕེན་པའི་ཚུལ་དུ་བྱེད་དུ་གཞུག་གོ། །དེ་ནས་ཨཱཿབཛྲ་སཏྭ་ཞེས་བྱ་བ་མེ་ལོང་ལ་བཟླས་པ་ཉེ་བར་བསྟན་ཅིང་འདི་སྐད་ཅེས་བརྗོད་པར་བྱའོ། །རྡོ་རྗེ་སེམས་དཔའ་མེ་ལོང་སྦྱིན། །དག་ཅིང་གསལ་ལ་རྙོག་པ་མེད། །སངས་རྒྱས་ཀུན་བདག་རང་ཉིད་ནི། །
བུ་ཁྱོད་ཀྱི་ནི་སྙིང་ལ་བཞུགས། །གང་འདི་དེ་བཞིན་གཤེགས་པ་ཐམས་ཅད་ཀྱི་བདག་པོ་བྱང་ཆུབ་ཀྱི་སེམས་ནི་འདི་ཡིན་པར་ཤེས་པར་བྱོས་ཤིག་ཅེས་ཀྱང་བརྗོད་པར་བྱའོ། །བཛྲ་ཧེ་ཏུ་མཾ་ཞེས་བྱ་བས་དེའི་རྐང་པ་གཉིས་ཀྱི་བར་དུ་འཁོར་ལོ་གཞག་པ་དང་། བཛྲ་བྷཱ་ཥ་རཾ་ཞེས་བྱ་བས་
དེའི་ལག་པ་གཡས་པར་དུང་བྱིན་ལ་འདི་སྐད་ཅེས་བརྗོད་པར་བྱའོ། །དེང་ནས་བརྩམས་ཏེ་སེམས་བསྐྱེད་པ་ཙམ་གྱིས་ཆོས་ཀྱི་འཁོར་ལོ་སྐོར་ཅིག །དེ་རིང་ཕན་ཆད་འཇིག་རྟེན་ལ། །སྐྱོབ་པ་རྣམས་ཀྱིས་འཁོར་ལོ་བསྐོར། །ཆོས་ཀྱི་དུང་ནི་བླ་མེད་པས། །ཀུན་དུ་མ་ལུས་
གང་བར་གྱིས། །སོམ་ཉི་ཡིད་གཉིས་མི་བྱ་ཞིང་། །དོགས་པ་མེད་པའི་སེམས་ཀྱིས་སུ། །གསང་སྔགས་སྤྱོད་པའི་ཚུལ་གྱི་མཆོག །འཇིག་རྟེན་འདི་ལ་རབ་ཏུ་སྒྲོགས། །དེ་ལྟར་བྱས་ནས་སངས་རྒྱས་ལ། །ཕན་འདོགས་དྲིན་དུ་གཟོ་ཞེས་བྱ། །རྡོ་རྗེ་འཛིན་པ་དེ་ཀུན་ཀྱང་། །
ཀུན་དུ་ཁྱོད་ལ་སྲུང་བར་བྱེད། །དེ་ནས། འཇིག་རྟེན་ཀུན་ལ་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བ། །ཆོས་ཀྱི་འཁོར་ལོ་རབ་ཏུ་བསྐོར། །འཇིག་རྟེན་ཀུན་ལ་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་
སྣ་ཚོགས་འདུལ་འགྱུར་བ། །རྡོ་རྗེའི་འཁོར་ལོ་རབ་ཏུ་བསྐོར། །ཡང་འཕགས་པ་ནམ་མཁའི་སྙིང་པོར་བྱིན་གྱིས་བརླབས་ལ། དེའི་ཕྱག་རྒྱ་ཆེན་པོས་ལྷོའི་ཕྱོགས་ཀྱི་དབང་བསྐུར་བའི་དཀྱིལ་འཁོར་དུ་བཞག་ལ། རིན་ཆེན་འབྱུང་ལྡན་གྱི་རིགས་ཀྱི་བུམ་པས་དེ་བཞིན་དུ་

དབང་བསྐུར་བར་བྱའོ། །བཛྲ་པཱ་ཤ ཨོཾ་བཛྲ་ཨ་བྷི་ཥིཉྩ་ཞེས་བྱ་བ་ནས། བཛྲ་རཏྣ། ཨོཾ་བཛྲ་ཨ་བྷི་ཥིཉྩ་ཞེས་བྱ་བའི་བར་གྱིས་སོ། །དེ་ནས་རྣམ་པར་རྒྱལ་བའི་བུམ་པའི་ཆུས་དེ་བཞིན་དུ་དབང་བསྐུར་རོ། །དེ་ནས་རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱ་བཅིངས་ལ། སློབ་
མ་དེ་དབང་བསྐུར་བའི་གནས་སུ་བཞག་ལ། སྙིང་པོ་འདི་ལན་སྟོང་རྩ་བརྒྱད་བཟླས་པར་བྱའོ། །ཨོཾ་བཛྲ་རཏྣ་ཨ་བྷི་ཥིཉྩ། རཏྣ་ཨ་བྷི་བ་ཏི་བྷ་བ་ཏཱ་ཌ། དེ་ནས་དེར་གོས་སེར་པོ་དང་རྒྱན་ཐམས་ཅད་ལ་བཛྲ་རཏྣ་ཞེས་བཟླས་པ་བྱིན་ལ། རྡོ་རྗེ་རིན་ཆེན་གྱི་མྱུ་གུའི་ཕྱག་རྒྱའི་དབང་བསྐུར་བ་བྱིན་
ནས། རིན་པོ་ཆེ་ལ་སོགས་པ་ལས་བྱས་པའི་རིན་པོ་ཆེའི་ཅོད་པན་ལ། རྡོ་རྗེ་རིན་ཆེན་མྱུ་གུ་བཟླས་པ་དེས་རིན་པོ་ཆེའི་ཅོད་པན་དང་། དར་དཔྱངས་ཀྱི་དབང་བསྐུར་ལ། རྡོ་རྗེ་ནོར་བུ་རིན་པོ་ཆེའི་བདག་པོ་དང་། མིང་གི་དབང་བསྐུར་བས་ཀྱང་དབང་བསྐུར་བར་བྱའོ། །ཡང་དེ་བཞིན་དུ་
མཆོད་པ་རྣམ་པ་ལྔ་དང་། སྒེག་མོ་ལ་སོགས་པས་ཡང་དག་པར་མཆོད་ལ། རྡོ་རྗེ་སེམས་དཔའི་དབང་བསྐུར་བའི་ཆོ་ག་ཐམས་ཅད་འདིར་རྗེས་སུ་སྤྱད་ནས། འཇིག་རྟེན་ཀུན་ལ་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བ། །ནོར་བུའི་
འཁོར་ལོ་རབ་ཏུ་བསྐོར། །ཞེས་དེ་ལ་རྗེས་སུ་གནང་བ་སྦྱིན་པར་བྱའོ། །དེ་ནས་རྡོ་རྗེ་ཆོས་སུ་བྱིན་གྱིས་བརླབས་ལ། ཕྱག་རྒྱ་ཆེན་པོས་དེ་ནུབ་ཕྱོགས་ཀྱི་དབང་བསྐུར་བའི་དཀྱིལ་འཁོར་དུ་ཇི་ལྟ་བ་བཞིན་དུ་བཞག་ལ། འོད་དཔག་ཏུ་མེད་པའི་རིགས་ཀྱི་བུམ་པས་དེ་བཞིན་དུ་དབང་བསྐུར་བར་
བྱ་སྟེ། བཛྲ་སྤོ་ཊ། ཨོཾ་བཛྲ་ཨ་བྷི་ཥིཉྩ་ཞེས་བྱ་བ་ནས། དེ་བཞིན་བཛྲ་དྷརྨྨ། ཨོཾ་བཛྲ་ཨ་བྷི་ཥིཉྩ་ཞེས་བྱ་བའི་བར་གྱིས་སོ། །དེ་ནས་རྣམ་པར་རྒྱལ་བའི་བུམ་པའི་ཆུས་དེ་བཞིན་དུ་དབང་བསྐུར་རོ། །དེ་ནས་རྡོ་རྗེ་རིན་ཆེན་ཡོངས་སུ་བཟླས་པའི་གོས་དཀར་མོ་དང་། རྒྱན་ཐམས་ཅད་དེ་
ལ་བྱིན་ལ། དྲི་ལ་སོགས་པས་མཆོད་དེ། རྡོ་རྗེ་ཆོས་ཀྱི་དམ་ཚིག་གི་ཕྱག་རྒྱ་བཅིངས་ལ་འོད་དཔག་ཏུ་མེད་པའི་དབང་བསྐུར་བས་དབང་བསྐུར་བར་བྱའོ། །དེ་ནས་ཡང་དེ་བཞིན་གཤེགས་པ་འོད་དཔག་ཏུ་མེད་པ་དང་ལྡན་ཞིང་པདྨའི་ཕྲེང་བ་དང་བཅས་པའི་ཅོད་པན་ཅན་དང་། དར་དཔྱངས་

ཀྱི་དབང་གིས་དབང་བསྐུར་ལ། རྡོ་རྗེ་ཆོས་མ་དང་། རྡོ་རྗེ་རིན་ཆེན་བཟླས་པའི་རྡོ་རྗེ་པདྨའི་ཕྱག་རྒྱས་དབང་བསྐུར་བ་དང་། བདག་པོའི་དབང་བསྐུར་བ་ཡང་བྱིན་ལ། ཨོཾ་པདྨ་མཱ་ལེ་ཨ་བྷི་ཥིཉྩ་ལོ་ཀེ་ཤྭ་རཾ་སཾ་བ་རཧྲཱིཿཞེས་བྱ་བ་ས་ལན་སྟོང་རྩ་བརྒྱད་བཟླས་པའི་པདྨའི་ཕྲེང་
བ་དེའི་མགོ་ལ་བཅིང་བར་བྱའོ། །དེ་ནས་མིང་གི་དབང་བསྐུར་བས་དེའི་དབང་བསྐུར་ལ། མཆོད་པ་རྣམ་པ་ལྔ་དང་། སྒེག་མོ་ལ་སོགས་པ་མཆོད་པ་རྣམ་པ་བརྒྱད་ཀྱིས་ཡང་དག་པར་མཆོད་ལ། རིན་པོ་ཆེའི་ཐུར་མ་ལ་སོགས་པའི་ཆོ་ག་ཐམས་ཅད་རྗེས་སུ་སྤྱད་པར་བྱའོ། །འཇིག་
རྟེན་ཀུན་ལ་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བ། །པདྨའི་འཁོར་ལོ་རབ་ཏུ་བསྐོར། །ཞེས་དེ་ལ་རྗེས་སུ་གནང་བ་སྦྱིན་པར་བྱའོ། །དེ་ནས་རྡོ་རྗེ་ལས་སུ་བྱིན་གྱིས་བརླབས་ནས། ཕྱག་རྒྱ་ཆེན་པོ་དེས་བྱང་ཕྱོགས་ཀྱི་དབང་
བསྐུར་བའི་དཀྱིལ་འཁོར་ཇི་ལྟ་བ་བཞིན་བཞག་ལ། དོན་ཡོད་པར་གྲུབ་པའི་རིགས་ཀྱི་བུམ་པས། བཛྲ་ཨཱ་བེ་ཤ ཨོཾ་བཛྲ་ཨ་བྷི་ཥིཉྩ་ཞེས་བྱ་བ་ནས། དེ་བཞིན་དུ་བཛྲ་ཀརྨྨ། ཨོཾ་བཛྲ་ཨ་བྷི་ཥིཉྩ་ཞེས་བྱ་བའི་བར་གྱིས་དབང་བསྐུར་རོ། །ཡང་རྣམ་པར་རྒྱལ་བའི་བུམ་པའི་
ཆུས་དེ་བཞིན་དུ་དབང་བསྐུར་ནས། རྡོ་རྗེ་ལས་ཀྱི་དམ་ཚིག་གི་ཕྱག་རྒྱས་སྣ་ཚོགས་རྡོ་རྗེའི་ཕྲེང་བའི་དབང་གིས་དབང་བསྐུར་ལ། རིན་པོ་ཆེ་ཐམས་ཅད་ལས་བྱས་པའི་སྣ་ཚོགས་རྡོ་རྗེའི་ཕྲེང་བའི་ཅོད་པན་དང་དར་དཔྱངས་ཀྱི་དབང་ཨོཾ་མཾ། རྡོ་རྗེ་རིན་ཆེན་མངོན་པར་བཟླས་ལ་དེའི་
མགོ་བོར་བཞག་སྟེ། སྣ་ཚོགས་རྡོ་རྗེའི་དབང་བསྐུར་བ་དང་། བདག་པོའི་དབང་བསྐུར་བ་དང་། མིང་གི་དབང་བསྐུར་བ་དེ་ལ་སྦྱིན་པར་བྱའོ། །དེ་ནས་མཆོད་པ་རྣམ་པ་ལྔ་དང་། སྒེག་མོ་ལ་སོགས་པས་ཡང་དག་པར་མཆོད་དེ། དཔལ་རྡོ་རྗེ་སེམས་དཔའི་ཆོ་ག་ཐམས་ཅད་རྗེས་སུ་
སྤྱད་པར་བྱའོ། །འཇིག་རྟེན་ཀུན་ལ་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་འགྱུར་བ། །སྣ་ཚོགས་འཁོར་ལོ་རབ་ཏུ་བསྐོར། །ཞེས་དེ་ལ་རྗེས་སུ་གནང་བ་སྦྱིན་པར་བྱའོ། །དེ་ནས། དེ་ཉིད་ཀྱིས་ནི་རྡོ་རྗེ་གཟུང་། །ཆོས་ཀྱི་དྲིལ་བུ་དཀྲོལ་བར་

བྱ། །དམ་ཚིག་གི་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླ། །ཞེས་བྱ་བས་བསླབ་པར་བྱའོ། །དེ་ལ་འདི་ནི་དེ་བཞིན་གཤེགས་པའི་རྡོ་རྗེ་གཟུང་བའི་དེ་ཁོ་ན་ཉིད་ཡིན་ཏེ། དེ་ཉིད་ཀྱིས་ནི་བཅོམ་ལྡན་འདས། །བྱང་ཆུབ་སེམས་དཔའ་དེ་བཞིན་གཤེགས། །ལྟ་ངན་
རྣམས་ལ་ཕན་པའི་ཕྱིར། །མྱ་ངན་འདས་ནི་སྟོན་པར་མཛད། །མ་ལུས་འདུལ་བ་ལ་བརྩོན་པ། །བརྟན་ཞིང་ངེས་པའི་གོ་ཆ་བགོས། །ཤིན་ཏུ་སྲིད་པ་གནས་ཀྱི་མཆོག །གོ་ཆ་ལ་སོགས་བགོས་པས་ན། །སངས་རྒྱས་ཆོས་དང་ཚོགས་ཞེས་པའི། །དཀོན་མཆོག་གསུམ་པོ་
ཉིད་དུ་འགྱུར། །སྲིད་པ་ཤིན་ཏུ་ཡང་དག་གྲུབ། །རྣམ་དག་དཔལ་ནི་བྱེད་པའི་མཆོག །ཅེས་བྱ་བ་དེ་ཁོ་ན་ཉིད་འདིས་དེ་བཞིན་གཤེགས་པའི་རྡོ་རྗེ་གཟུང་བར་བྱའོ། །ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ནམ་མཁའ་དང་མཉམ་སྦྱོར་
བ་ཡིས། །ཀུན་མཆོག་མཉམ་པ་ཉིད་དུ་གསལ། །ཞེས་བྱ་བ་འདིས་ཆོས་ཀྱི་དྲིལ་བུ་དཀྲོལ་བར་བྱའོ། །ལོངས་སྤྱོད་ཐམས་ཅད་ཉེར་སྤྱོད་པར། །བདག་ཉིད་ཁོ་ན་སྟོན་བྱེད་ཅིང་། །དཀོན་མཆོག་གསུམ་མཆོད་དམ་པ་ནི། །བགྱིའོ་ཞེས་ནི་བརྗོད་དེ་མཆོད། །ཅེས་བྱ་བ་འདིས་
དེ་བཞིན་གཤེགས་པའི་སྐུའི་གསང་བ་བྱིན་གྱིས་བརླབ་པར་བྱའོ། །དེ་ནས་དངོས་གྲུབ་ཀྱི་རྡོ་རྗེའི་བརྟུལ་ཞུགས་སྦྱིན་པར་བྱ་སྟེ། དེ་ལ་འདི་ནི་རྡོ་རྗེ་སེམས་དཔའ་ལ་སོགས་པ་དེ་བཞིན་གཤེགས་པའི་རིགས་ཀྱི་རྡོ་རྗེ་གཟུང་བའི་དེ་ཁོ་ན་ཉིད་ཡིན་ཏེ། ཐོག་མཐའ་མེད་པའི་སེམས་དཔའ་
ནི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་བསྙེམས་ཚུལ་བདག་པོའི་བདག །བཅོམ་ལྡན་འདས་དཔལ་མཆོག་དང་པོའི་སྐྱེས་བུའོ་ཞེས་བྱ་བ་དེ་ཁོ་ན་ཉིད་འདིས་རྡོ་རྗེ་གཟུང་ངོ་། །བཅོམ་ལྡན་འདས་དེ་བཞིན་གཤེགས་པ་སྲིད་པའི་བདག་
པོ། དམ་པ་ཀུན་གྱི་དབང་ཕྱུག་དམ་པ་དེ་ཉིད་ཆོས་ཀྱི་མཆོག་གི་བཀའ་ཡང་དག་པར་སྩོལ་བར་མཛད་པ་ནི། སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་པའི་སེམས་དཔའ་མཆོག །སྲིད་པའི་མཆོག་ནི་བྱེད་པ་ཡིན། །མཆོག་ཏུ་

གསང་བའི་ཆོས་ཉིད་འབེབས་པའི་དྲིལ་བུས་དེ་བཞིན་གཤེགས་པ་ཐམས་ཅད་མཆོད་པར་བྱས་ལ། ལྷ་རྣམས་ཡང་དག་པར་བསྒྲུབས་ཏེ་དྲིལ་བུ་དཀྲོལ་ལོ། །དེ་ནས་ཆོས་ཐམས་ཅད་ཀྱི་དེ་ཁོ་ན་ཉིད་རབ་ཏུ་རྟོགས་པ་འབེབས་པས་སྒྲིབ་པ་ཐམས་ཅད་རྣམ་པར་དག་
པར་བྱེད་དོ། །རྡོ་རྗེ་ཐམས་ཅད་འབེབས་པ་དང་རབ་ཏུ་བསྒྲུབ་པ་དང་། དབང་དུ་བྱ་བ་དང་ཡང་རབ་ཏུ་སྒྲུབ་པར་བྱེད་པ་འགྲུབ་སྟེ། ཆོས་འདིས་དྲིལ་བུ་དཀྲོལ་བར་བྱའོ། །སྲིད་པའི་བདེ་བ་ཤིན་ཏུ་ཆེ། །སྡུག་བསྔལ་ཆེན་པོ་དག་བྱའི་ཕྱིར། །ཤིན་ཏུ་བདེ་བ་དམ་པའི་ཐབས། །
དམ་ཚིག་འདི་ནི་རྟག་ཏུ་བསྐྱེད། །འདོད་པའི་ལོངས་སྤྱོད་ཐམས་ཅད་ནི། །ཅི་འདོད་པར་ནི་བརྟེན་བཞིན་དུ། །རང་གི་ལྷ་ཡི་སྦྱོར་བ་ཡིས། །བདག་དང་གཞན་ལ་མཆོད་པར་བྱ། །དེ་བཞིན་གཤེགས་པ་ཐམས་ཅད་ཀྱི་བླ་ན་མེད་པའི་མཆོག་ཏུ་གསང་བའི་ཐེག་པ་ཆེན་པོའི་དམ་
ཚིག་གི་སྦྱོར་བ་ནི་བཅོམ་ལྡན་འདས་ཀྱི་དམ་ཚིག་གོ། །དེ་ཅིའི་ཕྱིར་ཞེ་ན་འདི་ལྟར། དེ་བཞིན་གཤེགས་པ་ཐམས་ཅད་ཀྱིས། །འདའ་བ་རུ་ནི་མི་མཛད་པ། །ཕྱག་རྒྱའི་དམ་ཚིག་ཅེས་སུ་བསྒྲགས། །ཡིད་ཀྱིས་གཟུགས་ནི་བརྟན་ཕྱིར་རོ། །དེ་ལ་འདི་སྐད་ཅེས་ཀྱང་བརྗོད་
པར་བྱ་སྟེ། ཇི་སྲིད་འཁོར་བའི་གནས་སུ་ནི། །མཁས་མཆོག་འདུག་པར་གྱུར་པའི་ཚེ། །དེ་སྲིད་མཚུངས་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །ཤེས་རབ་ཕ་རོལ་ཕྱིན་ཐབས་དང་། །ཡེ་ཤེས་གནས་སུ་བསྒྲུབས་པས་ན། །ཆོས་ཀུན་རྣམ་པར་དག་
པའི་ཕྱིར། །འཁོར་བ་ཡོངས་སུ་དག་པར་འགྱུར། །ཞེས་བྱ་བ་འདིའི་དམ་ཚིག་གིས་དེ་བཞིན་གཤེགས་པའི་རིགས་ཀྱི་སྐུའི་གསང་བ་བྱིན་གྱིས་བརླབ་པར་བྱའོ། །དེ་ལ་འདི་ནི་རིན་པོ་ཆེའི་རིགས་ཀྱི་འཁོར་ལོས་སྒྱུར་བ་དང་། དེའི་རིགས་ཀྱི་རྡོ་རྗེ་རིན་ཆེན་གཟུང་བའི་དེ་ཁོ་ན་
ཉིད་དོ། །ཉི་མ་འདི་ནི་དམ་པ་སྟེ། །ཀུན་གཟིགས་དེ་བཞིན་གཤེགས་པ་ཡིན། །ནམ་མཁའི་སྙིང་པོ་བཅོམ་ལྡན་འདས། །བསམ་པ་ཐམས་ཅད་རྫོགས་མཛད་པ། །ཞེས་བྱ་བ་དེ་ཁོ་ན་ཉིད་འདིས་རྡོ་རྗེ་རིན་ཆེན་གཟུང་བར་བྱའོ། །བསམ་པ་ཐམས་ཅད་གྲུབ་རྣམས་ཀྱི། །

བསམ་པ་གྲུབ་པ་དམ་པ་ཡིན། །དེ་ཡང་འདོད་པ་རབ་གྲུབ་ཕྱིར། །འདོད་དང་ཐར་པ་བདེ་བ་ཆེ། །ཞེས་བྱ་བའི་ཆོས་ཀྱིས་རིན་པོ་ཆེའི་དྲིལ་བུ་དཀྲོལ་བར་བྱའོ། །མི་ཕན་པ་ཡང་སྦྱིན་བྱ་ཞིང་། །འདོད་དང་བདེ་བ་ཐམས་ཅད་ཀྱིས། །བདག་ཉིད་དང་ནི་གཞན་རྣམས་ཀྱི། །བསམ་
པ་ཐམས་ཅད་རྫོགས་པར་བྱ། །ཞེས་བྱ་བ་ནི་དམ་ཚིག་གི་མཆོག་སྟེ། འདིས་རིན་པོ་ཆེའི་རིགས་ཀྱི་སྐུའི་གསང་བ་བྱིན་གྱིས་བརླབ་པར་བྱའོ། །དེ་ནས་དངོས་གྲུབ་ཀྱི་རྡོ་རྗེའི་བརྟུལ་ཞུགས་སྦྱིན་པར་བྱའོ། །དེ་ལ་འདི་ནི་པདྨ་རིགས་ཀྱི་འཁོར་ལོས་སྒྱུར་བ་དང་། དེའི་རིགས་ཀྱི་
རྡོ་རྗེ་པདྨ་གཟུང་བའི་དེ་ཁོ་ན་ཉིད་དོ། །དེ་ཉིད་ཀྱིས་ནི་བཅོམ་ལྡན་འདས། །སངས་རྒྱས་སྤྱན་རས་གཟིགས་དབང་ཕྱུག །འདུལ་བ་ཡི་ནི་ཐབས་མཛད་པ། །དགའ་བའི་རོལ་མོས་གར་མཛད་དོ། །ཞེས་བྱ་བའི་དེ་ཁོ་ན་ཉིད་འདིས་རྡོ་རྗེ་པདྨ་གཟུང་བར་བྱའོ། །ཇི་ལྟར་པདྨ་
དམར་པོ་འདི། །ཚོན་གྱི་ཉེས་པས་མི་གོས་པ། །དེ་བཞིན་སྲིད་གསུམ་དག་པ་ནི། །གནས་ཀྱི་ཉེས་པས་མི་གོས་སོ། །ཞེས་བྱ་བའི་ཆོས་འདིས་པདྨའི་དྲིལ་བུ་དཀྲོལ་བར་བྱའོ། །བྱ་བ་གང་དང་གང་གིས་ནི། །འགྲོ་བ་རྣམས་ནི་འདུལ་འགྱུར་བ། །པདྨ་རིགས་མཆོག་སྦྱོར་
བའི་བདག །དེ་དང་དེས་ནི་སྦྱང་བར་བྱ། །ཞེས་བྱ་བ་ནི་དམ་ཚིག་སྟེ། འདིས་པདྨའི་རིགས་ཀྱི་སྐུའི་གསང་བ་བྱིན་གྱིས་བརླབ་པར་བྱའོ། །དེ་ནས་བརྟུལ་ཞུགས་སྦྱིན་པར་བྱ་སྟེ། ཨོཾ་པདྨ་ཧསྟ་བཛྲ་དྷརྨྨ་ཏམྦ་ལ་ཡ། དེས་ཀྱང་འདི་སྐད་དུ་ཡང་། རྡོ་རྗེའི་ཆོས་ཉིད་ཇི་ལྟ་བུ་ལགས་ཞེས་
དྲི་བར་བྱའོ། །དེ་ནས་འདི་ལ་འདི་སྐད་ཅེས་བརྗོད་པར་བྱ་སྟེ། ཇི་ལྟར་པདྨ་དམར་པོ་འདི། །རིགས་ཀྱི་ཉེས་པས་མི་གོས་བཞིན། །ཐམས་ཅད་དག་པར་བསྒོམས་ན་ནི། །དེ་བཞིན་སྡིག་པ་ཆགས་མི་འགྱུར། །དེ་ལ་འདིར་ཆོས་ཉིད་ནི་དེ་ཡིན་ནོ། །རྡོ་རྗེ་ལས་ཀྱི་དེ་ཁོ་ན་ཉིད་དང་།
ཆོས་དང་། དམ་ཚིག་དང་། དངོས་གྲུབ་ཀྱི་རྡོ་རྗེ་བརྟུལ་ཞུགས་ནི་དེ་བཞིན་གཤེགས་པའི་རིགས་སུ་བཤད་པ་ཡིན་ནོ། །དེ་ནས་སློབ་མ་ལ་མཚན་བརྒྱ་རྩ་བརྒྱད་པས་བསྟོད་ལ་མཆོད་པ་ཐམས་ཅད་ཀྱིས་ཡང་དག་པར་མཆོད་པར་བྱའོ། །དེ་ནས་རིན་ཆེན་འབྱུང་ལྡན་གྱི་ང་རྒྱལ་དང་། གཟེངས་

བསྟོད་པའི་ཕྱག་རྒྱས་སློབ་མ་ཐམས་ཅད་ལུང་བསྟན་པར་བྱའོ། །ཨོཾ་འདི་ནི་ངས་ཁྱོད་ལུང་བསྟན་ཡིན། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པ་ཀུན་དུ་གྲུབ་པའི་ཕྱིར། །སྲིད་པའི་ངན་འགྲོ་རྣམས་ལས་བཏོན། །ཀྱེ་རྡོ་རྗེ་དེ་བཞིན་གཤེགས་པ་ཆེ་གེ་མོ།
སིདྡྷ་ས་མ་ཡ་སྟྭཾ་བྷུར་བྷུ་བ་སྭཿ། དེ་བཞིན་གཤེགས་པའི་ཁུ་ཚུར་བཅིངས་ཏེ། གཡོན་པས་ཆོས་གོས་འཛིན་པའི་ཚུལ་དུ་བྱས་ལ། གཡས་པ་མཆོག་སྦྱིན་པའི་ཚུལ་དུ་བྱའོ། །འདི་ནི་གཟེངས་བསྟོད་པའི་ཕྱག་རྒྱའོ། །དབུགས་དབྱུང་བའི་ཆོ་ག་ནི་དཔལ་མཆོག་དང་པོ་ལ་སོགས་
པའི་ཆོ་ག་ལས་ཤེས་པར་བྱའོ། །དཀྱིལ་འཁོར་ཐམས་ཅད་དུ་འཇུག་པའི་ཆོ་ག་རྒྱས་པའོ་ཞེས་བྱ་བ་ནི་རིགས་ཐམས་ཅད་ཀྱི་དཀྱིལ་འཁོར་དུ་འཇུག་པས་ཉེ་བར་མཚོན་པའི་ཆོ་ག་རྒྱས་པ་ཡིན་པས་དཀྱིལ་འཁོར་ཐམས་ཅད་དུ་འཇུག་པའི་ཆོ་ག་རྒྱས་པ་ཞེས་བྱའོ། །རིམ་པ་འདི་ཉིད་
དཀྱིལ་འཁོར་ཐམས་ཅད་དུ་འཇུག་པ་ལ་སོགས་པའི་ཆོ་གས་སྦྱང་བ་བྱས་ནས། དོན་གྱི་དངོས་གྲུབ་ལ་སོགས་པ་བསྒྲུབ་པ་ལ་སྦྱར་བར་བྱའོ་ཞེས་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བ་ནི། སྦྱང་བ་བྱས་པའི་རྗེས་ཐོགས་ལ་དངོས་གྲུབ་
བསྒྲུབ་ཅིང་བསྐྱེད་པའི་ཕྱག་རྒྱའི་ཡེ་ཤེས་བསླབ་པར་བྱའོ། །དེ་ལ་དོན་ནི་གསེར་ལ་སོགས་པའོ། །དེ་བསྐྱེད་པའི་དངོས་གྲུབ་ནི་ཐོབ་པ་སྟེ་དེ་ཉིད་གྲུབ་པའོ། །དེའི་ཕྱག་རྒྱ་ནི་རྡོ་རྗེ་གཏེར་གྱི་ཚུལ་ལ་སོགས་པའོ། །དེའི་ཡེ་ཤེས་ནི་ངེས་པའོ། །དེ་བསླབ་པར་བྱ་སྟེ་ཞེས་བྱ་བ་ནི་
བསྟན་པར་བྱ་བའོ། །འདི་སྐད་སྟོན་ཏེ་མན་ངག་གིས་དེའི་ཕྱག་རྒྱ་ཤེས་པར་འགྱུར་བའི་ཕྱག་རྒྱ་བསྒོམ་པ་བསླབ་པ་དེ་དེ་ལ་བསྟན་པར་བྱ་སྟེ། དེ་ལྟ་བུ་ནི་ཐམས་ཅད་དུ་ཡང་ཕྱག་རྒྱའི་ཡེ་ཤེས་ཀྱི་སྒྲའི་དོན་ཡིན་ནོ། །རྡོ་རྗེའི་དབྱིབས་ནི་གཏེར་གནས་པ། །སྙིང་གར་ཡོངས་སུ་བསྒོམ་
པར་བྱ། །ཞེས་བྱ་བ་ནི་དང་པོར་རེ་ཞིག་རང་གི་ལྷའི་སྦྱོར་བ་བྱའོ། །དེ་ནས་རང་གི་སྙིང་གའི་ཟླ་བའི་སྟེང་དུ་ཡི་གེ་ཨོཾ་གསེར་གྱི་མདོག་ཅན་ལས་གསེར་གྱི་བུམ་པ་རིན་པོ་ཆེས་ཡོངས་སུ་གང་བ་དེའི་སྟེང་དུ་ཡི་གེ་ཧཱུཾ་ལས་རྡོ་རྗེ་གསེར་གྱི་མདོག་ཅན་བསམས་ལ་ཟླ་བ་གཅིག་གམ། ཟླ་བ་དྲུག་

གམ། ལོ་གཅིག་གི་བར་དུ་བསྒོམ་པར་བྱའོ། །དེ་ནས་གསལ་བ་ཉིད་དུ་གྱུར་པ་དང་། མཚན་ཐོག་ཐག་བསྒོམས་པའི་རྗེས་ལ་གང་དུ་གཏེར་ཡོད་པར་རེ་བའི་སྐས་ལ་སོགས་པ་མཐོང་བ་དང་། དེར་སོང་ལ་འབྱོར་པ་ཅི་ཡོད་པས་མཆོད་པ་ལ་སོགས་པ་བྱ་བ་དང་། ཕྱི་རོལ་དུ་གཏོར་མ་
བྱིན་ལ་རྡོ་རྗེ་ལྕགས་སྒྲོག་གིས་གཏེར་བཅིང་བ་དང་། གནས་དང་ཞིང་སྐྱོང་བཅིང་བ་དང་། བདེན་པའི་བྱིན་རླབས་ཀྱང་བྱས་ལ་བཟླས་པ་དང་བསྒོམ་པ་བྱས་ན། བསྒོམས་ས་ན་གནས་པའི་གཏེར་ནི་དེའི་ས་མཐོང་བར་འགྱུར་ཞེས་པའོ། །རྡོ་རྗེའི་དབྱིབས་ནི་བྲིས་ནས་ཀྱང་། །ནམ་
མཁའི་ངོས་ལ་བསྒོམ་པར་བྱ། །ཞེས་བྱ་བ་ལ་སོགས་པ་ལ། སྔ་མ་བཞིན་དུ་རང་གི་ལྷའི་རྣལ་འབྱོར་བྱས་ལ་དཔྲལ་བར་ཡི་གེ་ཁཾ་ལས་མེ་ཏོག་དམར་པོ་ལྟ་བུའི་གཏེར། དེའི་སྟེང་དུ་ཡི་གེ་ཏྲཾ་ལས་རྡོ་རྗེ་དང་འདྲ་བར་བསྐྱེད་ལ་སྔགས་ཟློས་ཤིང་ཡིད་ཀྱིས་འཕྲལ་བ་ལས་ཕྱུང་སྟེ། ནམ་
མཁར་ཡོངས་སུ་བསྒོམ་པར་བྱའོ། །དེ་ནས་སྔ་མ་བཞིན་དུ་ཆོ་ག་ཐམས་ཅད་བྱས་ལ་ཡོད་པར་རེ་བའི་གནས་སུ་དེ་བཞིན་དུ་རྡོ་རྗེའི་གཟུགས་བྲིས་ལ་ནམ་མཁར་ཡོངས་སུ་བསྒོམ་པར་བྱས་ནས། གང་དུ་ལྷུང་བར་མཐོང་བ་དེར། །གཏེར་ཡོད་པར་ནི་རྣམ་པར་བཤད། །བློ་ལྡན་མི་ཡི་
རྡོ་རྗེའི་དབྱིབས། །ཞེས་བྱ་བ་ལ་སོགས་པ་ལ། དེ་བཞིན་དུ་རང་གི་ལྷའི་རྣལ་འབྱོར་བྱས་ལ། རང་གི་ལྕེ་ལ་ཡི་གེ་པ་གུར་གུམ་གྱི་མདོག་ཅན་དེའི་སྟེང་དུ་ཧྲཱིཿམདོག་སེར་པོ་ལས་རྡོ་རྗེ་བསམ་པར་བྱའོ། །དེ་ནས་སྔ་མ་བཞིན་དུ་བསྒོམ་པ་དང་བསྒྲུབ་པ་བྱས་ལ་གང་དུ་ཡོད་པར་རེ་བ་
དེར་སོང་སྟེ། དེ་བཞིན་དུ་བདེན་པའི་ཚིག་བྱས་ནས། བློ་ལྡན་མི་ཡི་རྡོ་རྗེའི་དབྱིབས། །ལྕེ་ཡི་སྟེང་དུ་བསྒོམས་ན་ནི། །འདི་ན་ཡོད་ཅེས་བདག་ཉིད་ཀྱིས། །བདེན་པ་ཉིད་དུ་སྨྲ་བར་འགྱུར། །ཞེས་པས་བྱིན་གྱིས་བརླབས་པའི་ལྕེས་རྟོག་པ་མེད་པའི་ཚུལ་གྱིས་སྨྲ་བར་བྱེད་དོ། །བདག་
གི་ལུས་ནི་ཐམས་ཅད་ལ། །ཞེས་བྱ་བ་ལ་སོགས་པ་ལ་དེ་བཞིན་དུ་བདག་ལ་བྱིན་གྱིས་བརླབས་པ་ལ་སོགས་པ་བྱས་ནས། ཡི་གེ་ཨ་མདོག་སེར་པོ་ལས་སྣ་ཚོགས་རྡོ་རྗེར་བདག་ཉིད་བསམས་ལ་བསྒོམ་པ་དེ་བྱས་ནས་བསྒྲུབ་པར་བྱ་བའི་གཏེར་གྱི་གནས་སུ་བདེན་པའི་བྱིན་རླབས་བྱས་ཏེ།

དེ་ཡང་དེ་བཞིན་དུ་བསྒོམས་ལ་གང་གི་ཚེ། བབས་པར་གྱུར་ནས་གང་གནས་པ། །གཏེར་ནི་དེ་ན་ཡོད་པར་བཤད། །ཅེས་བྱའོ། །དེ་ནས་དང་པོར་བརྐོས་ལ་དེའི་རྗེས་ལ་བླངས་ན་སུ་ཡང་བགེགས་བྱེད་པར་མི་འགྱུར་རོ་ཞེས་བཅོམ་ལྡན་འདས་ཀྱིས་གསུངས་སོ། །དེ་ནས་
རྡོ་རྗེ་རྫུ་འཕྲུལ་ཏེ། སེམས་ཀྱི་འབྱོར་པ་ཉིད་གང་ཡིན་པའོ། །དེའི་དངོས་གྲུབ་སྟེ་དེ་ཉིད་གྲུབ་པའོ། །དེའི་ཕྱག་རྒྱ་ནི་འོག་ནས་བཤད་པའི་རྡོ་རྗེ་དབབ་པ་ཞེས་བྱ་བ་ལ་སོགས་པའོ། །དེའི་ཡེ་ཤེས་ནི་ངེས་པ་སྟེ། དེ་བསླབ་པར་བྱ་ཞེས་བྱ་བ་ནི་བསྟན་པར་བྱ་སྟེ། རང་གི་ལྷའི་རྣལ་
འབྱོར་བྱས་ནས་རྡོ་རྗེ་ཕྲ་མོ་བསྒོམ་པ་ཟླ་བ་གཉིས་ཀྱི་བར་དུ་བྱའོ། །དེ་ནས་སྤྲོ་བ་དང་བསྡུ་བའི་སྦྱོར་བ་ཟླ་བ་གཅིག་གི་བར་དུ་བསྒོམས་ནས་བརྟན་པར་གྱུར་པ་དང་། མཚན་ཐོག་ཐག་རྡོ་རྗེ་ཕྲ་མོ་སྤྲོ་བའི་སྦྱོར་བ་བསྒོམ་པར་བྱའོ། །དེ་ནས་རྡོ་རྗེ་ཕྲ་མོའི་སྤྲོ་བའི་སྦྱོར་བས། ཆུ་རྡོ་རྗེ་ཕྲ་མོའི་རང་
བཞིན་དུ་ཇི་སྲིད་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་རྡོ་རྗེའི་ཚིག་གིས་བཛྲ་ཛྭ་ལ་ཞེས་ཟློས་ཤིང་ཆུའི་སྟེང་དུ་བཅག་པར་བྱའོ། །དེ་ལྟར་དབབ་པར་བྱས་ནས་ཀྱང་། །ཞེས་བྱ་བ་ནི། དེ་བཞིན་དུ་རང་གི་ལྷའི་རྣལ་འབྱོར་སྔོན་དུ་འགྲོ་བས། རྡོ་རྗེ་ཕྲ་མོ་
བསྒོམ་པར་བྱས་ན་དེས་དེ་འགྲུབ་བོ། །གང་གི་གཟུགས་སུ་བདག་གི་ལུས། །ཞེས་བྱ་བ་ནི། འདུལ་བའི་དབང་གིས་ལྷ་གང་དང་གང་གི་གཟུགས་སུ་བདག་ཉིད་སྟོན་པར་འདོད་པ་དང་། དེ་དང་དེ་ཉིད་དུ་རང་གི་ལུས་སུ་བསྒོམ་ཞིང་བཛྲ་རཱུ་པ་ཞེས་བཟླས་ནས། སངས་རྒྱས་ཀྱི་སྐུར་ཡང་
བདག་ཉིད་ཀྱིས་རང་མཐོང་ཞིང་། གཞན་རྣམས་ལ་ཡང་སྟོན་ནུས་པར་འགྱུར་རོ། །དེ་ལྟར་བདག་ལ་ཕན་ནས་ཀྱང་། །ཞེས་བྱ་བ་ནི། རང་གི་ལྷའི་རྣལ་འབྱོར་བྱས་ནས་དེ་བཞིན་དུ་རྡོ་རྗེ་ཕྲ་མོ་བསྒོམ་པ་རྫོགས་པར་བྱས་ལ། བདག་ནི་ནམ་མཁའ་འོ་ཞེས་རང་གི་བདག་ཉིད་བསྒོམས་
ཏེ། བཛྲ་ཨཱ་ཀཱ་ཤ་ཞེས་ཟློས་ཤིང་བསྒོམས་ན་ཇི་སྲིད་འདོད་པ་དེ་སྲིད་ཀྱི་བར་དུ་མི་སྣང་བར་འགྱུར་རོ། །རྡོ་རྗེ་དབབ་པར་བདག་གྱུར་ནས། །ཞེས་བྱ་བ་ནི་སྔ་མ་བཞིན་རྡོ་རྗེ་ཕྲ་མོ་བསྒོམ་པ་བྱས་ལ་ཞེས་བྱ་བའི་ཐ་ཚིག་གོ། །རྡོ་རྗེ་ཡིན་པར་བདག་བསྒོམས་ན། །ཞེས་བྱ་བ་ནི་བདག་ཉིད་རྡོ་རྗེ་

རྩེ་ལྔ་པའི་གཟུགས་སུ་བསམ་པའོ། །གནས་ནས་ཇི་སྲིད་འཛེག་འདོད་པ། །དེ་སྲིད་མཁའ་ལ་འགྲོ་བར་འགྱུར། །ཞེས་བྱ་བ་ནི་རང་གི་གནས་ནས་བརྩམས་ཏེ་རི་རབ་ཀྱི་རྩེ་མོའི་བར་དུ་རྡོ་རྗེའི་སྐས་ཀྱི་ཕྲེང་བས་ཁྱབ་པར་བསམས་ལ། བཛྲ་མ་ཧཾ་ཞེས་ཟློས་ཤིང་ཆེད་དུ་བསམས་པའི་
སྐས་ཀྱི་ཕྲེང་བ་ནས་ཇི་ཙམ་མངོན་པར་འདོད་པའི་གནས་སུ་འགྲོ་བར་བྱའོ། །དེ་ཡང་། རྡོ་རྗེའི་སྐས་ནི་ནམ་མཁའ་ལ། །བསྒོམས་ཏེ་མངོན་པར་འཛེགས་ན་ནི། །ཇི་སྲིད་དུ་ཡང་འཛེག་པའི་གནས། །དེ་སྲིད་ནམ་མཁར་འགྱུར་བ་ཡིན། །ཞེས་གསུངས་པ་ཡིན་ནོ། །རྡོ་རྗེ་རིག་
འཛིན་གྱི་ཞེས་བྱ་བ་ལ་སོགས་པ་ལ། རྡོ་རྗེས་ཉེ་བར་མཚན་པའི་རིག་པ་འཛིན་པ་ནི་རྡོ་རྗེ་རིག་པ་འཛིན་པའོ། །དེའི་དངོས་གྲུབ་ནི་རྡོ་རྗེ་རིག་པ་འཛིན་པའི་དངོས་གྲུབ་སྟེ་དེ་ཉིད་གྲུབ་པའོ། །དེའི་ཕྱག་རྒྱ་ནི། ཟླ་བའི་དབྱིབས་ཅིག་བྲིས་ནས་ནི། །སྟེང་གི་མཁའ་ལ་འཕགས་བྱས་ཏེ། །
ཞེས་བྱ་བ་ལ་སོགས་པའོ། །དེའི་ཡེ་ཤེས་ནི་ངེས་པ་སྟེ་དེ་བསླབ་པར་བྱའོ། །ཟླ་བའི་དབྱིབས་ཅིག་བྲིས་ནས་ནི། །ཞེས་བྱ་བ་ལ་སོགས་པ་ལ། རང་གི་ལྷའི་རྣལ་འབྱོར་བྱས་ནས། བཛྲ་དྷ་ར་ཞེས་བརྗོད་དེ། བདག་ཉིད་རྡོ་རྗེ་སེམས་དཔའི་སྐུ་ཟླ་བའི་དཀྱིལ་འཁོར་ལ་གནས་པར་
བསམས་ལ། དེ་ཉིད་ཟློས་ཤིང་ཟླ་བ་གཅིག་གམ་ཟླ་བ་དྲུག་གམ། ལོ་གཅིག་གི་བར་དུ་བསྒོམ་པར་བྱའོ། །དེ་ནས་མཚན་མ་ཐོབ་པ་དང་། མཚན་ཐོག་ཐག་བསྒོམས་ན། རྡོ་རྗེའི་རིག་པ་འཛིན་པར་འགྱུར་རོ། །རྡོ་རྗེ་རིན་ཆེན་རབ་བསྒོམས་ན། །ཞེས་བྱ་བ་ནི་རང་གི་ལྷའི་
རྣལ་འབྱོར་བྱས་ནས། རཏྣ་དྷ་ར་ཞེས་ཟློས་ཤིང་། བདག་ཉིད་ནམ་མཁའི་སྙིང་པོ་ཟླ་བའི་དཀྱིལ་འཁོར་ལ་གནས་པ། རྡོ་རྗེ་རིན་ཆེན་འཛིན་པ་བསྒོམ་པར་བྱའོ། །བདག་ཉིད་དག་པ་ཇི་སྲིད་འདོད། །ཅེས་བྱ་བ་ནི་བསྒོམ་པ་འདིས་གང་གི་ཚེ་ནམ་མཁའི་སྙིང་པོའི་གཟུགས་སུ་
བདག་ཉིད་ཉིན་རེ་ཞིང་མཐོང་བར་གྱུར་པ་དེའི་ཚེ། དག་པའི་བདག་ཉིད་ཅན་དུ་འགྱུར་རོ། །དེ་ནམ་མཁའ་ལ་འགྲོ་བའི་བསམ་པས་མཚན་ཐོག་ཐག་བསྒོམ་པར་བྱའོ། །དེ་ནས་དེའི་མོད་ལ་ནམ་མཁའི་སྤྱོད་ཡུལ་ཇི་སྲིད་འགྲོ་བར་འདོད་པ་དེ་སྲིད་ཀྱི་བར་དུ་ནམ་མཁའ་ལ་འགྲོ་བའི་

རིན་པོ་ཆེའི་རིག་པ་འཛིན་པར་འགྱུར་རོ། །རྡོ་རྗེ་པདྨ་ལག་གནས་པར། །ཞེས་བྱ་བ་ནི་རང་གི་ལྷའི་སྦྱོར་བ་བྱས་ལ། དྷརྨྨ་དྷ་ར་ཞེས་བརྗོད་པ་དེ་བདག་ཉིད་རྡོ་རྗེ་ཆོས་ཀྱི་སྐུ་ཟླ་བའི་དཀྱིལ་འཁོར་ལ་གནས་པར་བསམ་པར་བྱའོ། །དེ་ནས་དེ་བཞིན་དུ་དེ་ཉིད་བསྒོམ་པར་
བྱའོ། །དེ་ནས་མཚན་མ་བྱུང་བ་དང་མཚན་ཐོག་ཐག་བསྒོམས་ན་ཆོས་ཀྱི་རིག་པ་འཛིན་པར་འགྱུར་རོ་ཞེས་བྱ་བ་ལྷག་མའོ། །བསྒོམས་ན་རྡོ་རྗེ་སྤྱན་གྱིས་ནི། །ཞེས་བྱ་བར་སྦྱར་ཏེ། གང་གི་ཕྱིར་བསྒོམས་ན་རྡོ་རྗེ་སྤྱེན་ཞེས་པ་རྡོ་རྗེ་ཆོས་ཀྱིས་སོ། །རིག་འཛིན་གོ་འཕང་སྦྱིན་པར་བྱེད། །
ཅེས་བྱ་བ་ནི་རིག་པ་འཛིན་པའི་གོ་འཕང་པདྨའི་རིག་པ་འཛིན་པའི་དངོས་གྲུབ་སྦྱིན་པར་བྱེད་ཅེས་བྱ་བའི་དོན་ཏེ། དེ་བསྒོམས་པས་གོ་འཕང་དེ་ཐོབ་པ་ལ་དེ་སྦྱིན་པར་བྱེད་དོ་ཞེས་བཤད་དོ། །ལས་ཀྱི་རྡོ་རྗེ་བསྒོམས་ནས་ནི། །ཞེས་བྱ་བ་ནི་དེ་བཞིན་དུ་རང་གི་ལྷའི་རྣལ་འབྱོར་བྱས་
ནས་ཀརྨྨ་དྷ་ར་ཞེས་བརྗོད་དེ་བདག་ཉིད་རྡོ་རྗེ་ལས་སྣ་ཚོགས་རྡོ་རྗེ་བསྒོམས་པའི་རྡོ་རྗེ་ལས་ཀྱི་སྐུར་བདག་ཉིད་བསམ་པར་བྱ་ཞིང་དེ་བཞིན་དུ་བདག་ཉིད་བསྒོམ་པར་བྱའོ། །དེ་ནས་མཚན་ཐོག་ཐག་བསྒོམ་པར་བྱའོ། །རྡོ་རྗེ་སྣ་ཚོགས་འཛིན་པ་ལས། །རིག་འཛིན་ཀུན་དུ་མྱུར་དུ་
འགྱུར། །ཞེས་བྱ་བ་ནི་དེ་ལྟར་བདག་ཉིད་སྔར་བཤད་པའི་ཚུལ་གྱིས་བསྒོམས་ན། སྣ་ཚོགས་རྡོ་རྗེ་འཛིན་པའི་རིག་པ་འཛིན་པར་དེའི་མོད་ཁོ་ན་ལ་འགྱུར་རོ་ཞེས་བྱ་བའི་ཐ་ཚིག་གོ། །དེ་བཞིན་གཤེགས་པ་ཐམས་ཅད་ཀྱི། །ཞེས་བྱ་བ་
ལ་སོགས་པ་ལ། དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་དམ་པ་དེ་བསྒྲུབ་པར་བྱ་བའི་ཕྱིར་རོ། །ཕྱག་རྒྱ་ནི་རྡོ་རྗེ་ཀུན་གྱི་ཏིང་ངེ་འཛིན་ལ་སོགས་པ་དེའི་ཡེ་ཤེས་བསླབ་པར་བྱའོ། །རྡོ་རྗེ་ཀུན་གྱི་ཏིང་ངེ་འཛིན། །ཞེས་བྱ་བ་ལ། རྡོ་རྗེ་ཀུན་ནི་
རྩེ་མོ་བཅུ་གཉིས་པའི་སྣ་ཚོགས་རྡོ་རྗེ་སྟེ། དེས་ཉེ་བར་མཚོན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལས་ནི་རྡོ་རྗེ་ཀུན་ཏེ། དེ་ལ་དམིགས་པའི་ཏིང་ངེ་འཛིན་ནི་རྡོ་རྗེ་ཀུན་གྱི་ཏིང་ངེ་འཛིན་ཏོ། །ནམ་མཁའི་དབྱིངས་སུ་བསམས་ནས་ནི། །ཞེས་བྱ་བ་ནི་འདོད་པའི་

ལྷའི་རྣལ་འབྱོར་བྱས་ནས་བཛྲ་བཛྲ་ཞེས་ཟློས་ཤིང་། བྱང་ཆུབ་སེམས་དཔའ་ཆེན་པོ་རྡོ་རྗེ་ལས་ཀྱི་སྐུ་ཟླ་བའི་དཀྱིལ་འཁོར་ལ་གནས་པར་བདག་ཉིད་བསམ་པར་བྱའོ། །དེ་ནས་ཇི་སྲིད་བརྟན་པར་མ་གྱུར་གྱི་བར་དུ་བསྒོམ་པར་བྱའོ། །དེ་ནས་ནི་སྤྲོ་བར་བྱ་སྟེ། བརྟན་པར་
གྱུར་ནས་སྤྲོ་བར་བྱ། །བརྟན་པར་མ་གྱུར་སྤྲོ་མི་བྱ། །ཞེས་གསུངས་པའི་ཕྱིར་རོ། །བསྒོམ་པ་ཉེ་བར་བསྡུ་བའི་དུས་སུ་ཡང་ཡིད་ཉིད་ཀྱིས་གཞུག་པར་བྱའོ། །དེ་ལྟར་ཇི་སྲིད་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་མཚན་ཐོག་ཐག་བསྒོམ་
པར་བྱ་སྟེ། བསྒོམས་ན་འགྲུབ་པར་འགྱུར་ཞེས་གསུངས་པ་ཡིན་ནོ། །རྡོ་རྗེའི་བདག་ཉིད་ཇི་སྲིད་འདོད། །དེ་སྲིད་བར་དུ་ལྡིང་བར་འགྱུར། །ཞེས་བྱ་བ་ནི་ཐམས་ཅད་དུ་འགྲོ་བའི་སྣ་ཚོགས་རྡོ་རྗེའི་ཏིང་ངེ་འཛིན་ཐོབ་པས། རྡོ་རྗེའི་བདག་ཉིད་ཅེས་བྱ་བ་བྱང་ཆུབ་སེམས་དཔའ་
རྡོ་རྗེ་ལས་ཀྱི་སྐུར་གྱུར་ནས་ནམ་མཁའི་སྤྱོད་ཡུལ་ཇི་སྲིད་འགྲོ་བར་འདོད་པ་དེ་སྲིད་ཀྱི་ནམ་མཁའི་ཁམས་ཐམས་ཅད་དུ་འགྲོ་བར་འགྱུར་རོ། །ཐམས་ཅད་དག་པ་ནི་རྡོ་རྗེ་ཆོས་སོ། །དེ་ལ་དམིགས་པའི་ཏིང་ངེ་འཛིན་ནི་ཐམས་ཅད་དག་པའི་ཏིང་ངེ་འཛིན་ཏེ། དེ་བསྒོམས་
ཤིང་བསླབས་ན་བླ་ན་མེད་ཅིང་མཆོག་ཏུ་གྱུར་པའི་མངོན་པར་ཤེས་པ་ལྔ་མྱུར་ཞིང་རིངས་པར་ཐོབ་པར་འགྱུར་རོ། །སུ་ཞིག་གིས་ཐོབ་ཅེ་ན། ཡེ་ཤེས་བསྒྲུབ་པ་སྟེ། རྡོ་རྗེ་ཆོས་སྒྲུབ་པ་པོས། འདི་སྐད་སྟོན་ཏེ། རང་གི་ལྷའི་རྣལ་འབྱོར་བྱས་ནས། ཤུདྡྷ་ཤུདྡྷ་ཞེས་རྡོ་རྗེའི་ཚིག་
གིས་ཟློས་ཤིང་། རྡོ་རྗེ་ཆོས་སུ་བདག་ཉིད་ཇི་སྲིད་མཚན་མ་ཐོབ་པ་དེ་སྲིད་ཀྱི་བར་དུ་བསྒོམ་མོ། །དེ་ནས་མཚན་ཐོག་ཐག་བསྒོམས་ན་འཇིག་རྟེན་དབང་ཕྱུག་ལྟར་མངོན་པར་ཤེས་པ་ལྔ་ཐོབ་པར་འགྱུར་རོ། །རྡོ་རྗེ་སེམས་དཔའ་འདྲ་བར་ནི། །ཞེས་བྱ་བ་ལ་སོགས་པ་ལ། རང་གི་ལྷའི་
རྣལ་འབྱོར་བྱས་ནས་སཏྭ་སཏྭ་ཞེས་ཟློས་ཤིང་། རྡོ་རྗེ་སེམས་དཔའི་སྐུར་བདག་ཉིད་བསམ་པར་བྱའོ། །དེ་ནས་ཇི་སྲིད་བདག་ཉིད་དེའི་སྐུར་མཐོང་བ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་རྡོ་རྗེ་སེམས་དཔའ་དང་འདྲ་བར་ནམ་མཁའ་ཐམས་ཅད་དྲན་པར་བྱའོ། །ཡང་དག་པར་

སྤྲོ་བ་བསྒོམས་པས་ཅིར་འགྱུར་ཞེ་ན། བདག་ཉིད་དྲན་པ་བརྟན་ལྡན་ཞིང་། །རྡོ་རྗེ་འཛིན་པར་མྱུར་དུ་འགྱུར། །ཞེས་གསུངས་སོ། །འདི་སྐད་སྟོན་ཏེ། གང་གི་ཚེ་བསྒོམ་པའི་སྟོབས་ཀྱིས་ཕྱོགས་བཅུའི་ནམ་མཁའ་རྡོ་རྗེ་སེམས་དཔས་མཚམས་མེད་པར་ཡོངས་སུ་
གང་བ་ཉིད་དུ་མཐོང་བ་དེའི་ཚེ་དྲན་པ་བརྟན་པ་དང་ལྡན་པར་འགྱུར་བ་ཡིན་ནོ། །དེ་ནས་མཚན་ཐོག་ཐག་བསྒོམས་པས་རྡོ་རྗེ་འཛིན་པར་མྱུར་བ་ཉིད་དུ་འགྱུར་རོ། །ནམ་མཁའི་དབྱིངས་ནི་ཞེས་བྱ་བ་ལ་སོགས་པ་ལ། སངས་རྒྱས་གཟུགས་སུ་བསམས་ནས་ནི། །ཞེས་བྱ་བ་ནི་རྣམ་པར་
སྣང་མཛད་ལ་སོགས་པ་དེ་བཞིན་གཤེགས་པ་བསྒྲུབ་པར་འདོད་པས། རང་གི་འདོད་པའི་ལྷའི་རྣལ་འབྱོར་བྱས་ནས། བུདྡྷ་བུདྡྷ་ཞེས་ཟློས་ཤིང་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པའི་སྐུར་བདག་ཉིད་བསམ་མོ། །དེ་ནས་ཇི་སྲིད་སྐུ་དེར་བདག་ཉིད་རྒྱུན་མི་འཆད་
པ་ཁོ་ན་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་སངས་རྒྱས་ཀྱི་གཟུགས་དེ་སངས་རྒྱས་ཀྱི་སྐུའི་རང་བཞིན་དུ་ཕྱོགས་བཅུའི་ནམ་མཁའི་ཁམས་རྣམས་སུ་ཁམས་གསུམ་ཐམས་ཅད་ལྷག་པར་མོས་པར་བསྒོམ་པར་བྱའོ། །དེ་ལྟར་རྣམ་པར་བསྒོམས་པས་སྒྲུབ་
པ་པོ་དེ་ཅིར་འགྱུར་ཞེ་ན། སངས་རྒྱས་ཀུན་གྱི་ཏིང་འཛིན་ལས། །སངས་རྒྱས་ཉིད་དུ་འགྲུབ་པར་འགྱུར། །ཞེས་བྱ་བ་གསུངས་སོ། །དེ་ལ་སངས་རྒྱས་ཐམས་ཅད་ཀྱི་རྣམ་པར་སེམས་རྩེ་གཅིག་པ་ནི་སངས་རྒྱས་ཀུན་གྱི་ཏིང་ངེ་འཛིན་ཏོ། །ནི་ཞེས་བྱ་བ་ནི་ངེས་པར་གཟུང་
བའམ། ཐ་མི་དད་པའི་རིམ་པ་སྟེ་སངས་རྒྱས་ཉིད་དུ་འགྲུབ་པར་འགྱུར་རོ། །དེ་ནས་གསང་བ་འཛིན་ནུས་པར་བཤད་དེ་ཞེས་བྱ་བ་ནི་རང་ཉིད་རྡོ་རྗེ་སེམས་དཔའ་ལ་སོགས་པའི་སྦྱོར་བས་རྡོ་རྗེ་སེམས་མ་ལ་སོགས་པ་རིགས་ཀྱི་དམ་ཚིག་གི་རྡོ་རྗེའི་ཕྱག་རྒྱ་བཞི་པོ་འམ། རང་གི་མཚན་
མའི་ཕྱག་རྒྱ་མདུན་དུ་བཞག་ལ། དེ་ཟླ་བའི་དཀྱིལ་འཁོར་གྱི་སྟེང་དུ་བསམས་ནས་བསྡུ་བའི་ཕྱག་རྒྱས་སྤྱན་དྲངས་ཏེ་མཚན་བརྒྱ་རྩ་བརྒྱད་པས་བསྟོད་ལ། ལྕགས་ཀྱུ་ལ་སོགས་པས་དགུག་པ་དང་། གཞུག་པ་དང་། བཅིང་བ་དང་། དབང་དུ་བྱས་ནས། དམ་ཚིག་གི་

ཕྱག་རྒྱས་རབ་ཏུ་བསྒྲུབས་ཏེ། ཆོས་དང་། ལས་དང་། ཕྱག་རྒྱ་ཆེན་པོས་རྒྱས་བཏབ་ནས། དབང་བསྐུར་བའི་ཕྱག་རྒྱ་རྣམས་ཀྱིས་དབང་བསྐུར་ལ་མཆོད་པ་བརྒྱད་ཀྱིས་ཡང་དག་པར་མཆོད་ལ། ཇི་སྲིད་མངོན་སུམ་བཞིན་དུ་རྒྱུན་མི་འཆད་པར་མཐོང་བར་གྱུར་པ་དེ་སྲིད་ཀྱི་བར་དུ་
བསྒོམ་པར་བྱའོ། །མཉམ་པར་གཞག་པའི་གནས་སྐབས་འདི་ནི་འདིར་གསང་བའི་སྒྲར་བཤད་དེ། རང་གི་ཕྱག་རྒྱ་ལྷ་མོར་གྱུར་པ་དེ་ལ་བལྟས་ལ་འོག་ནས་བཤད་པའི་ཚུལ་གྱིས། དེ་དང་ལྷན་ཅིག་ཏུ་གྱུར་པར་ལྷག་པར་མོས་པར་གྱུར་པ་ནི། གསང་བར་གྱུར་པ་ཡིན་པས་གསང་བའོ། །
དེ་ལྟ་བུའི་གསང་བར་གྱུར་པས་སངས་རྒྱས་ཀྱི་བྱང་ཆུབ་སྒྲུབ་པར་གྱུར་པ་དེ། གསང་ཐུབ་ཅིང་མི་སྨྲ་བའི་ཚུལ་དང་། བསྒོམ་པའི་སྦྱོར་བས་འཛིན་པར་བྱེད་ལ། གལ་ཏེ་སེམས་ཅན་དམ་པ་ཡང་དག་པའི་དོན་དུ་གཉེར་བར་གྱུར་ནས་དེའི་ཚེ་དེ་ལ་ཅི་ནས་ཀྱང་གསང་ཐུབ་པར་བྱ་བའི་
སྦྱོར་བས་སྦྱིན་པར་བྱའོ། །དེ་ཡང་ཇི་ལྟར་སྦྱིན་པར་བྱ་ཞེ་ན་མ་གུས་པ་ཡོངས་སུ་སྤང་བར་བྱ་བའི་ཕྱིར་དེ་རེ་ཞིག་མནའ་འདོར་བར་བྱེད་དུ་བཅུག་ལ་དེ་ནས་བཤད་པར་བྱ་སྟེ། གང་གི་ཕྱིར་སྦྱོར་བ་འདིས་ནི་འདོད་ཆགས་ཅན་རྣམས་ངེས་པ་ཉིད་དུ་སངས་རྒྱས་རྣམས་སྒྲུབ་པར་བྱེད་པ་ཡིན་
ནོ། །སྙིང་ག་ཀུན་དུ་གནས་པ་ནི། །ཞེས་བྱ་བ་ནི་སྔར་བཤད་པའི་ཚུལ་གྱིས་སོ། །དེ་ནས་གསང་བའི་ཕྱག་རྒྱའི་ཡེ་ཤེས་བསླབ་པར་བྱའོ་ཞེས་བྱ་བ་ལ་གསང་བ་ནི་བཤད་ཟིན་ཏོ། །དེ་ཉིད་རྣལ་འབྱོར་གྱི་རྒྱུད་ལས་རྒྱས་འདེབས་པས་ན་ཕྱག་རྒྱའོ། །དེའི་ཡེ་ཤེས་ནི་དེ་ལ་ངེས་པ་སྟེ། དེ་
བསླབ་པར་བྱ་ཞིང་བསྟེན་པར་བྱའོ། །རྡོ་རྗེ་དབབ་པ་བསྐྱེད་ནས་ནི། །ཞེས་བྱ་བ་ནི་ཇི་སྐད་དུ་བཤད་པའི་གསང་བའི་སྦྱོར་བ་བསྐྱེད་པ་ནི་འདིར་རྡོ་རྗེ་དབབ་པ་སྟེ། དེ་བསྐྱེད་ལ་མདུན་དུ་རང་གི་ཕྱག་རྒྱའི་ལྷ་མོ་འམ་སེམས་མ་རྡོ་རྗེ་མ་ལ་སོགས་པ་རིགས་ཀྱི་ལྷ་མོའི་ཕྱག་རྒྱ་དེ། རྣལ་འབྱོར་གྱི་སྟོབས་
ཀྱིས་རྒྱུན་མི་འཆད་པར་བསམ་མོ། །གང་གི་ཕྱིར། མཉམ་པར་གཞག་པས་རྡོ་རྗེ་ཐལ་མོའི་ངོས་ནི་དལ་བརྡབས་ན། ཞེས་བྱ་བ་གསུངས་ཏེ། མཉམ་པར་གཞག་པ་ཉིད་ཀྱིས་འདི་ལས་གཞན་དུ་མ་ཡིན་ཏེ་དེ་ཡང་འདི་ལྟར་ཡིན་པར་གྱུར་གྱི། སེམས་གཡེངས་ཤིང་མཉམ་པར་མ་བཞག་པས་ནི་མ་ཡིན་ནོ། །གང་

གི་ཐལ་མོ་བརྡབ་ཅེ་ན། རྡོ་རྗེ་ཐལ་མོ་ངོས་ཀྱིས་ཞེས་བྱ་བ་གསུངས་ཏེ། རྡོ་རྗེ་ཐལ་མོའི་མཚན་ཉིད་ནི་འོག་ནས་འཆད་དེ། དེ་བཅིངས་ལ་དེའི་ལག་མཐིལ་གྱི་ནང་གི་ངོས་ཀྱི་ཐལ་མོ་བརྡབ་བོ། །དལ་ཞེས་བྱ་བ་ནི་ངོས་དེ་ཉིད་ཀྱི་ཁྱད་པར་མི་འདྲ་བ་སྟོན་པ་ཡིན་
ནོ། །འདི་སྐད་སྟོན་ཏེ་རྡོ་རྗེ་ཐལ་མོ་བཅིངས་ལ་དེའི་ལག་པའི་ངོས་གཉིས་ནས་ཡང་དང་ཡང་དུ་དལ་གྱིས་བརྡབ་པར་བྱའོ། །རི་བོ་ཡང་ནི་དབང་དུ་འགྱུར། །ཞེས་བྱ་བ་ནི། ཐལ་མོའི་ངོས་ཀྱི་སྦྱོར་བ་འདིས་སེམས་མེད་པའི་རི་བོ་ཡང་ནི་དབང་དུ་འགྱུར་ཞིང་སྒྲུབ་པ་པོའི་དབང་དུ་བྱེད་ན། གཞན་
ལྟ་ཅི་ཞིག་སྨོས་པ་འམ། གལ་ཏེ་སྒྲུབ་པ་པོ་སེམས་དང་ལྡན་པས་རི་བོ་ཡང་སེམས་དང་བཅས་པ་ལྟར་འགྱུར་ཞིང་། དེ་ཡང་སྒྲུབ་པ་པོ་ཅི་དགར་དབང་དུ་བྱེད་པར་འགྱུར་ན་སེམས་དང་ལྡན་པ་ལྟ་སྨོས་ཀྱང་ཅི་དགོས་ཞེས་ཕུལ་དུ་བྱུང་བར་གསུངས་པ་ཡིན་ནོ། །རྡོ་རྗེ་དབབ་པའི་ཆོ་ག་ཡིས། །ཞེས་
བྱ་བ་ནི་སྔ་མ་བཞིན་ནོ། །རྡོ་རྗེ་བསྡམས་པའི་ངོས་ཀྱིས་ནི། །ཞེས་བྱ་བ་ནི་རྡོ་རྗེ་བསྡམས་པ་བཅིངས་ལ་དེ་བཞིན་དུ་ལག་མཐིལ་གྱི་ངོས་གཉིས་ཕན་ཚུན་དལ་གྱིས་དལ་གྱིས་ཡང་དང་ཡང་དུ་བརྡབ་པར་བྱའོ། །དེ་ཡང་གང་གི་ཕྱིར། དལ་གྱིས་བརྡབ་པའི་སྦྱོར་བ་ཡིས། །ཞེས་གསུངས་པ་ཡིན་
ནོ། །རི་བོ་ཡང་ནི་ཀུན་ནས་འབེབས། །ཞེས་བྱ་བ་ནི་སྒྲུབ་པ་པོས་འབེབས་པའི་སྦྱོར་བ་འདི་རབ་ཏུ་སྦྱོར་ན། བསྒྲུབ་པར་བྱ་བའི་ལུས་ལ་སེམས་མེད་པའི་རི་བོ་ཡང་ཀུན་ནས་འབེབས་ཤིང་རབ་ཏུ་འཇུག་པར་བྱེད་ན། སེམས་དང་ལྡན་པའི་དེ་བཞིན་གཤེགས་པ་ལ་སོགས་པ་ལྟ་སྨོས་
ཀྱང་ཅི་དགོས་ཞེས་བྱ་བའི་ཐ་ཚིག་གོ། །དེ་བཞིན་དབབ་པའི་ཆོ་ག་ཡིས། །ཞེས་བྱ་བ་ནི་སྔ་མ་བཞིན་དུ་མཚན་མ་ཐོབ་པར་གྱུར་པས་སོ། །རྡོ་རྗེ་བསྡམས་པ་བརྐྱང་ནས་ནི། །ཞེས་བྱ་བ་ནི། རྡོ་རྗེ་བསྡམས་པ་བཅིང་ལ་བརྐྱང་བའོ། །དེ་གང་ཞིག་ཅེ་ན། སོར་མོའི་རྩེ་མོ་སྟེ་
མཛུབ་མོ་གཉིས་སོ། །མཉམ་བརྡབས་ན་ཞེས་བྱ་བ་ནི། དེ་ཉིད་ཡང་དག་པར་བསྡམས་པ་ནི་མཉམ་པར་དྲལ་ཏེ་མཉམ་པར་བརྡབས་པ་དེས། རིགས་བརྒྱ་ཡུད་ཀྱིས་བརླག་པར་འགྱུར། །ཞེས་བྱ་བ་ནི། འདོད་ཆགས་དང་ཞེ་སྡང་དང་གཏི་མུག་དང་། ང་རྒྱལ་དང་། མ་རིག་པ་

དང་། ལྟ་བ་དང་། ཐེ་ཚོམ་ལ་སོགས་པ་ཉོན་མོངས་པ་དང་། ཉེ་བའི་ཉོན་མོངས་པ་སྐྱེས་པ་རྣམས་རང་བཞིན་གྱིས་རྣམ་པར་དག་པར་ལྷག་པར་མོས་པས་སོར་མོའི་རྩེ་མོ་གཉིས་བརྡབས་པས་གཞོམ་པར་བྱ་བའི་དོན་ཏོ། །ཕྲ་མོ་དབབ་པའི་ཆོ་ག་བྱས། །ཞེས་བྱ་བ་སྔ་མ་བཞིན་
ནོ། །སོར་མོ་ཐམས་ཅད་མཉམ་གཞག་ཅིང་། །ཞེས་བྱ་བ་ནི་རྡོ་རྗེ་བསྡམས་པ་བཅིངས་ལ་སོར་མོ་ཐམས་ཅད་བརྐྱང་ནས་ཐལ་མོ་སྦྱར་བའི་ཚུལ་གྱིས་མཉམ་པར་གཞག་པ་སྟེ། དེ་ལྟར་ན་སོར་མོ་ཐམས་ཅད་མཉམ་པར་གཞག་པར་འགྱུར་ཏེ། དེ་ཡང་ཆོས་ཐམས་ཅད་རང་
བཞིན་གྱིས་འོད་གསལ་བར་སྟོན་པར་བྱེད་པ་ཡིན་ནོ། །དེའི་ཕྱིར་རྡོ་རྗེ་བསྡམས་པ་ལས་བཀྲོལ་བ་ནི། སྡུག་བསྔལ་ཐམས་ཅད་སེལ་བའི་མཆོག །ཅེས་གསུངས་པ་ཡིན་ཏེ། གང་གི་ཚེ་ཆོས་ཐམས་ཅད་རང་བཞིན་གྱིས་འོད་གསལ་བར་བསྒོམས་པས་སོར་མོ་ཐམས་
ཅད་མཉམ་པར་འཇོག་པ་དེའི་ཚེ་སྒྲིབ་པ་མེད་པའི་ཡེ་ཤེས་སྐྱེ་ཞིང་བདེ་བ་དང་། ཡིད་བདེ་བ་ཐམས་ཅད་ཐོབ་པས་སྡུག་བསྔལ་ཐམས་ཅད་ཞི་བར་འགྱུར་བ་ཡིན་ནོ། །དེ་ནས་དེ་དག་གི་གསང་བའི་སྒྲུབ་པ་འདི་ཡིན་ཏེ་ཞེས་བྱ་བ་ནི་འདི་གསང་བའི་ཕྱག་རྒྱ་འདི་དག་བསྒྲུབས་
པས་ན་སྒྲུབ་པའོ། །གསང་བ་ཡང་ཡིན་ལ་སྒྲུབ་པ་ཡང་ཡིན་པས་ན་གསང་བའི་སྒྲུབ་པ་སྟེ། ལྷ་མོའི་ལུས་སུ་རྡོ་རྗེ་སེམས་དཔའ་ལ་སོགས་པའི་གཟུགས་ཀྱིས་ཡིད་ཀྱིས་ཞུགས་ལ། དེའི་ལུས་ཐམས་ཅད་ཁྱབ་པ་འདི་ནི་གསང་བའི་སྒྲུབ་པའོ། །འདི་ཡིན་ཏེ་ཞེས་བྱ་བ་ནི་དེ་
སྟོན་པར་རྩོམ་པའོ། །བུད་མེད་དམ་ཞེས་བྱ་བ་ལ་སོགས་པ་ལ། བུ་གའི་ནང་ནས་འཇུག་པར་བྱ། །ཞེས་བྱ་བ་ནི་ལུས་ཀྱི་བུ་ག་སྟེ། མཚན་མའི་བུ་གའི་ནང་ནས་འཇུག་པར་བྱའོ། །གང་གི་ལུས་ཀྱི་ཞེ་ན། བུད་མེད་དམ་ནི་སྐྱེས་པ་ཡི། །ཞེས་བྱ་བ་གསུངས་སོ། །ཡིད་
ཀྱིས་དེ་ལྟར་ཞུགས་ནས་ཀྱང་། །དེ་ཡི་ལུས་ཀུན་ཁྱབ་པར་སྤྲོ། །ཞེས་བྱ་བ་ནི་ཡིད་ཀྱིས་ཞེས་བྱ་བ་སེམས་ཀྱིས་བསྒོམས་པའི་སྟོབས་ཀྱིས་སྐྱེས་པའམ་བུད་མེད་དེའི་ལུས་སུ་ཞུགས་ནས་ཀུན་ཞེས་བྱ་བ་མ་ལུས་པར་ཁྱབ་པར་སྤྲོ་ཞིང་ཐམས་ཅད་དུ་ཁྱབ་པར་བྱའོ། །འདི་སྐད་སྟོན་ཏེ།

དཔལ་རྡོ་རྗེ་སེམས་དཔའ་ལ་སོགས་པའི་རྣལ་འབྱོར་བྱས་ནས། སེམས་མ་རྡོ་རྗེ་མ་ལ་སོགས་པའི་ཕྱག་རྒྱ་མདུན་དུ་ཟླ་བའི་དཀྱིལ་འཁོར་གྱི་སྟེང་དུ་ཡིད་ཀྱིས་བསམས་ལ། དེའི་རིག་པའི་ལྷ་མོའི་གཟུགས་སུ་བསམས་ནས། བསྡུ་བ་ལ་སོགས་པ་བྱས་
ལ། སཏྭ་བཛྲི་ཞེས་བྱ་བ་ལ་སོགས་པ་རྡོ་རྗེ་ཚིག་གིས་ཟློས་ཤིང་། ཇི་སྲིད་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་ཉིན་རེ་ཞིང་བསྒོམ་པར་བྱའོ། །དེ་ནས་ཟླ་བ་ཉ་ལ་རྡོ་རྗེ་སེམས་དཔའ་ལ་སོགས་པ་རང་གི་ལྷའི་རྣལ་འབྱོར་བྱས་ནས། དེ་བཞིན་དུ་དེ་མདུན་དུ་བཞག་
སྟེ་མཆོད་པ་ཐམས་ཅད་ཀྱིས་ཡང་དག་པར་མཆོད་ལ། བཛྲ་པཱ་ཤ་ཧོཿཞེས་ཟློས་ཤིང་ཡིད་ཀྱིས་དེའི་གསང་བའི་ཕྱོགས་ནས་ལུས་སུ་འཇུག་པར་བྱའོ། །དེ་ནས་དེའི་སྙིང་གར་གནས་ལ། ལུས་ལ་ཁྱབ་པར་བྱས་ནས་བཛྲ་པཱ་ཤ་ཧོཿཞེས་ཟློས་ཤིང་རྡོ་རྗེ་ཐལ་མོའི་ངོས་ཀྱིས་དལ་
བུས་བརྡབ་པར་བྱའོ། །དེ་ནས་དེའི་དབང་དུ་འགྱུར་རོ། །ཡང་རྡོ་རྗེ་སེམས་དཔའ་ལ་སོགས་པའི་རྣལ་འབྱོར་བྱས་ནས། དེའི་མདུན་དུ་འདུག་ལ། བཛྲ་ཨཱ་བེ་ཤ་ཨཿཞེས་ཟློས་ཤིང་། དེ་བཞིན་དུ་དེའི་ལུས་སུ་འཇུག་པར་བྱའོ། །དེ་ནས་དེའི་སྙིང་གར་གནས་ལ་ལུས་
ཐམས་ཅད་ཁྱབ་པར་བྱས་ནས། བཛྲ་ཨཱ་བེ་ཤ་ཨཿཞེས་ཟློས་ཤིང་དཀྱིལ་འཁོར་གྱིས་བརྡབ་པའི་སྦྱོར་བས་རྡོ་རྗེ་བསྡམས་པའི་ངོས་ཀྱིས་བརྡབ་པར་བྱ་སྟེ། འདིས་ནི་ལྷའི་ཤེས་པ་སྐྱེ་བར་འགྱུར་རོ། །དེ་ནས་སྒྲིབ་པ་རྣམས་ཟད་པར་བྱ་བའི་ཕྱིར་ཡང་དེའི་མདུན་དུ་དཔལ་རྡོ་རྗེ་
སེམས་དཔའ་ལ་སོགས་པའི་རྣལ་འབྱོར་གྱིས་འདུག་ལ། བཛྲ་ཧ་ན་ཧཱུཾ་ཞེས་ཟློས་ཤིང་ཡང་དེའི་ལུས་ལ་དེ་བཞིན་དུ་འཇུག་པར་བྱའོ། །དེ་ནས་དེའི་སྙིང་གར་གནས་ལ་ལུས་ཐམས་ཅད་ཁྱབ་པར་བྱས་ནས། བཛྲ་ཧ་ན་ཧཱུཾ་ཞེས་ཟློས་ཤིང་རྡོ་རྗེ་བསྡམས་པ་བརྐྱང་ནས་སོར་མོའི་རྩེ་
མོ་མཉམ་པར་བརྡབས་པས་རིགས་བརྒྱ་ཡུད་ཀྱིས་བརླག་པར་འགྱུར་རོ། །འདིར་ཆོས་ཐམས་ཅད་ནི་རང་བཞིན་གྱིས་རྣམ་པར་དག་པའོ་ཞེས་ལྷག་པར་མོས་པས། འདོད་ཆགས་ལ་སོགས་པའི་རིག་བརྒྱ་ཡིད་ཀྱིས་བརླག་ཅིང་བཅོམ་པར་འགྱུར་རོ། །ཡང་དེའི་མདུན་དུ་དཔལ་

རྡོ་རྗེ་སེམས་དཔའ་ལ་སོགས་པའི་རྣལ་འབྱོར་གྱིས་འདུག་ལ། རང་བཞིན་གྱིས་འོད་གསལ་བའི་ཡེ་ཤེས་དབབ་པས་སྡུག་བསྔལ་ཐམས་ཅད་བསལ་བར་བྱ་བའི་ཕྱིར། བཛྲ་ཧ་ར་ཧཱུཾ་ཞེས་ཟློས་ཤིང་དེ་བཞིན་དུ་ཞུགས་ལ། དེའི་སྙིང་གར་གནས་ནས་ལུས་ཐམས་ཅད་
ཁྱབ་པར་བྱས་ལ། བཛྲ་ཧ་ར་ཧཾ་ཞེས་བརྗོད་དེ། སོར་མོ་ཐམས་ཅད་མཉམ་པར་གཞག་པའི་རྡོ་རྗེ་བསྡམས་པས་དགྲོལ་བར་བྱའོ། །དེ་ནས་རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོ་བཅིངས་ལ་སེམས་མ་རྡོ་རྗེ་མ་ལ་སོགས་པ་དང་། བདག་ཉིད་གཅིག་ཏུ་གྱུར་པར་
བྱས་ནས། སཏྭ་བཛྲི་ཞེས་བྱ་བ་ལ་སོགས་པ་མཚན་ཐོག་ཐག་ཟློས་ཤིང་། ཇི་སྲིད་དེའི་གཟུགས་སུ་བདག་ཉིད་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་སྐད་ཅིག་མ་དེ་ཉིད་ལ་དཔལ་རྡོ་རྗེ་སེམས་དཔའ་ལ་སོགས་པའི་དངོས་གྲུབ་འགྲུབ་པར་
འགྱུར་རོ། །འདིས་ནི་གང་གི་ཚེ་གསང་བའི་ལྷ་མོ་རྟོགས་པར་གྱུར་པ་དེའི་རིགས་ཀྱི་ལྷ་མོ་ཡིན་ནོ་ཞེས་དོན་འདིས་སྟོན་ཏོ། །ཡང་གང་གི་ཚེ་བསྒྲུབ་པར་བྱ་བ་རྣམ་པར་སྣང་མཛད་ལ་སོགས་པ་ལྷ་མོ་ཡིན་པར་གྱུར་ན། སེམས་བརྟགས་པ་ནས་བརྩམས་ནས་ནི། །རྡོ་རྗེ་དབྱིངས་
ཞེས་རྗོད་བྱེད་ཅིང་། །ཞེས་བྱ་བ་ལ་སོགས་པས་རྣམ་པར་སྣང་མཛད་ལ་སོགས་པའི་རྣལ་འབྱོར་བྱས་ནས། ཇི་སྲིད་རྒྱུད་ཕྱི་མ་ལས་གསུངས་པའི་མཚན་མ་ཐོབ་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ཉིད་ཇི་ལྟ་བ་བཞིན་དུ་
མདུན་དུ་བཞག་ལ་མཆོད་པ་ཐམས་ཅད་ཀྱིས་ཡང་དག་པར་མཆོད་དེ། ཟླ་བ་ཉ་ལ་ཉི་མ་ནུབ་པའི་དུས་སུ་རྡོ་རྗེ་དབྱིངས་ཀྱི་དབང་ཕྱུག་མའི་ཕྱག་རྒྱ་ཆེན་པོ་བཅིངས་ལ། བཛྲ་པཱ་ཤ་ཧོཿཞེས་ཟློས་ཤིང་ཡིད་ཀྱིས་མི་བསྐྱོད་པའི་ཐུགས་ཀར་གནས་ལ། ལྷ་མོ་རྡོ་རྗེ་དབྱིངས་ཀྱི་དབང་
ཕྱུག་མའི་སྐུར་བདག་ཉིད་བསྒོམ་པར་བྱའོ། །དེ་ནས་ཚུལ་དེ་ཉིད་ཀྱིས་མི་བསྐྱོད་པའི་ཐུགས་ཀ་ནས་ཕྱུང་ལ། སྔར་བཤད་པའི་དབང་དུ་བྱ་བའི་ཕྱག་རྒྱ་བཅིངས་ཏེ། བཛྲ་པཱ་ཤ་ཧོཿཞེས་ཟློས་ཤིང་དེ་བཞིན་དུ་རྣམ་པར་སྣང་མཛད་ཀྱི་གསང་བའི་ཕྱོགས་ནས་རྣམ་པར་སྣང་མཛད་

ཀྱི་སྐུ་ལ་ཞུགས་ལ། རྣམ་པར་སྣང་མཛད་ཀྱི་ཐུགས་ཀར་གནས་ཏེ་ཚུལ་དེ་ཉིད་ཀྱིས་རྣམ་པར་སྣང་མཛད་ཀྱི་སྐུ་ཐམས་ཅད་ཁྱབ་པར་བྱས་ནས། ཆུ་དང་འོ་མ་ལྟར་གཅིག་ཏུ་གྱུར་པར་བསམ་པར་བྱའོ། །དེ་ནས་ཡིད་ཀྱིས་རིན་ཆེན་འབྱུང་ལྡན་གྱི་ཐུགས་ཀར་
རྡོ་རྗེ་དབྱིངས་ཀྱི་དབང་ཕྱུག་མའི་གཟུགས་ཀྱིས་གནས་ལ་དེ་བཞིན་དུ་དེའི་ཐུགས་ཀ་ནས་ཕྱུང་སྟེ་བཛྲ་ཨཱ་བེ་ཤ་ཨཿཞེས་ཟློས་ཤིང་དེ་བཞིན་དུ་རྣམ་པར་སྣང་མཛད་ཀྱི་སྐུ་ལ་འཇུག་པར་བྱའོ། །དེ་ནས་རྣམ་པར་སྣང་མཛད་ཀྱི་ཐུགས་ཀར་གནས་ལ། དེ་བཞིན་དུ་དེའི་སྐུ་ཐམས་ཅད་
ཁྱབ་པར་བྱས་ནས། སྔ་མ་བཞིན་དུ་དབབ་པའི་ཕྱག་རྒྱ་བཅིངས་ཏེ། བཛྲ་ཨཱ་བེ་ཤ་ཨཿཞེས་བཟླས་པར་བྱའོ། །ཡང་ཡིད་ཀྱིས་འོད་དཔག་ཏུ་མེད་པའི་ཐུགས་ཀར་རྡོ་རྗེ་དབྱིངས་ཀྱི་དབང་ཕྱུག་མའི་གཟུགས་ཀྱིས་གནས་ལ། དེ་བཞིན་དུ་དེའི་ཐུགས་ཀ་ནས་ཕྱུང་སྟེ། བཛྲ་
ཧ་ན་ཧཱུཾ་ཞེས་ཟློས་ཤིང་། དེ་བཞིན་དུ་རྣམ་པར་སྣང་མཛད་ཀྱི་སྐུ་ལ་ཞུགས་ཏེ། དེའི་ཐུགས་ཀར་གནས་ལ། དེའི་སྐུ་ཐམས་ཅད་ལ་ཁྱབ་པར་བྱས་ནས་སྔར་བཤད་པའི་རིགས་བརྒྱ་རླག་པར་བྱེད་པའི་ཕྱག་རྒྱ་བཅིངས་ལ། བཛྲ་ཧ་ན་ཧཱུཾ་ཞེས་བརྗོད་པར་བྱའོ། །ཡང་ཡིད་ཀྱིས་
དོན་ཡོད་པར་གྲུབ་པའི་ཐུགས་ཀར་རྡོ་རྗེ་དབྱིངས་ཀྱི་དབང་ཕྱུག་མའི་གཟུགས་ཀྱིས་གནས་ལ། དེ་བཞིན་དུ་དེའི་ཐུགས་ཀ་ནས་ཕྱུང་སྟེ། བཛྲ་ཧ་ར་ཧཾ་ཞེས་ཟློས་ཤིང་སྔ་མ་བཞིན་དུ་རྣམ་པར་སྣང་མཛད་ཀྱི་སྐུ་ལ་ཞུགས་ཏེ་དེའི་ཐུགས་ཀར་གནས་ལ། དེའི་སྐུ་ཐམས་ཅད་ལ་ཁྱབ་པར་
བྱས་ནས་སྔར་བཤད་པའི་སྡུག་བསྔལ་ཐམས་ཅད་སེལ་བའི་ཕྱག་རྒྱ་བཅིངས་ལ། བཛྲ་ཧ་ར་ཧཾ་ཞེས་བཟླས་བརྗོད་བྱའོ། །དེ་ལྟར་སྦྱོར་བ་འདི་དག་གིས་སངས་རྒྱས་ཀྱི་བྱང་ཆུབ་དབང་དུ་བྱས་ལ། བྱང་ཆུབ་མཆོག་གི་ཕྱག་རྒྱ་བཅིངས་ནས། བཛྲ་དྷཱ་ཏུ་ཞེས་ཟློས་ཤིང་མཚན་
ཐོག་ཐག་བདག་ཉིད་རྣམ་པར་སྣང་མཛད་དུ་བསྒོམས་ན་དེ་བཞིན་གཤེགས་པར་ངེས་པར་འགྱུར་རོ། །རྣམ་པར་སྣང་མཛད་ཆེན་པོ་བསྒྲུབ་པ་ལ་དབང་དུ་བྱ་བར་བཤད་པ་དེ་བཞིན་དུ་མི་བསྐྱོད་པ་ལ་སོགས་པ་ནས་རྡོ་རྗེ་འབེབས་པའི་བར་གྱི་ལྷ་ཕོ་སྒྲུབ་པ་ཐམས་ཅད་རང་གི་ཕྱག་

རྒྱའི་ལྷ་མོས་ཤེས་པར་བྱའོ། །གསང་བའི་ཕྱག་རྒྱ་བཞི་བསྒྲུབ་པའོ། །དེ་ནས་སྙིང་པོ་བྱིན་པ་ཞེས་བྱ་བ་ནི་དབང་བསྐུར་ནས་ཁྱོད་དོན་གྱི་དངོས་གྲུབ་ལ་སོགས་པའི་ནང་ནས་གང་འདོད་ཅེས་དྲིས་ལ་གང་ཞིག་གང་མངོན་པར་འདོད་པ་དེ་དེ་ལ་བསྟན་ནས། དོན་གྱི་དངོས་གྲུབ་ལ་
སོགས་པ་བསྒྲུབ་པའི་ཕྱིར། དེའི་སྙིང་པོ་དང་། སྒྲུབ་པ་པོའི་མེ་ཏོག་ལྷའི་སྐུ་གང་ལ་བབ་པ་དེའི་སྙིང་པོ་སྦྱིན་ནོ། །གང་ཡང་རྡོ་རྗེ་སེམས་དཔའ་ལ་སོགས་པ་ཉིད་འདོད་ཀྱི། དོན་གྱི་དངོས་གྲུབ་ལ་སོགས་པ་མ་ཡིན་པ་དེ་ལ་ནི་བཛྲ་སཏྭ་ཞེས་བྱ་བ་ལ་སོགས་པའི་སྙིང་པོ་སྦྱིན་པར་
བྱའོ། །འདིས་ནི་འདི་སྐད་སྟོན་པ་ཡིན་ཏེ། གང་དོན་གྱི་དངོས་གྲུབ་ལ་སོགས་པ་བསྒྲུབ་པར་འདོད་པས་དེ་ལ་སྙིང་པོ་གཉིས་སྦྱིན་པར་བྱའོ། །ཡང་གང་ཞིག་དཔལ་རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོའམ། དམ་ཚིག་དང་ལས་ཀྱི་ཕྱག་རྒྱ་བསྒྲུབ་པར་འདོད་པ་དེ་ལ་
བཛྲ་སཏྭ་ཞེས་བྱ་བ་ལ་སོགས་པ་རང་གི་ལྷའི་སྙིང་པོ་ཉིད་སྦྱིན་ནོ། །གང་ཞིག་ཆོས་ཀྱི་ཕྱག་རྒྱ་བསྒྲུབ་པར་འདོད་པ་དེ་ལ་ཆོས་ཀྱི་ཕྱག་རྒྱ་འབའ་ཞིག་སྦྱིན་པར་བྱའོ། །སྙིང་པོ་བྱིན་ལ་ཅི་ཞིག་བྱ་ཞེ་ན། རང་གི་རིགས་ཀྱི་ལྷའི་ཕྱག་རྒྱ་བཞིའི་ཡེ་ཤེས་བསླབ་པར་བྱའོ་ཞེས་བྱ་བ་
གསུངས་ཏེ། རང་གི་ཡང་ཡིན་ལ་རིགས་ཀྱི་ཡང་ཡིན་པས་ན་རང་གི་རིགས་ཏེ། གང་གི་མེ་ཏོག་རིགས་གང་དུ་བབ་པ་དེ། དེ་བཞིན་གཤེགས་པ་དང་། རྡོ་རྗེ་དང་། པདྨ་དང་། ནོར་བུའི་རིགས་ཀྱི་དབྱེ་བས་རྣམ་པ་བཞི་སྟེ། འདིས་ནི་རིགས་ཐམས་ཅད་ཀྱི་ཐུན་མོང་གི་ཆོ་ག་
སྟོན་ཏོ། །དེ་ལ་རང་གི་རིགས་ཀྱི་ལྷ་དེ་བཞིན་གཤེགས་པ་ལ་སོགས་པའི་ཕྱག་རྒྱ་བཞི་ནི། ཕྱག་རྒྱ་ཆེན་པོ་དང་། དམ་ཚིག་དང་། ཆོས་དང་། ལས་ཀྱི་ཕྱག་རྒྱ་སྟེ། རྣམ་པ་བཞིའོ། །དེ་རྣམས་ཀྱི་ཡེ་ཤེས་ནི་ཕྱག་རྒྱ་ཆེན་པོ་ལ་སོགས་པའི་ངེས་པ་སྟེ། དེ་བསླབ་པར་བྱ་
ཞིང་ཉེ་བར་བསྟན་པར་བྱའོ། །འདིས་ཀྱང་འདི་སྐད་སྟོན་པ་ཡིན་ཏེ། སྒྲུབ་པ་ཐམས་ཅད་ལ་རང་གི་ལྷའི་སྐུ་ལ་མདུན་དུ་ཕྱག་རྒྱ་བཞིས་རྒྱས་གདབ་པར་བྱའོ། །ཕྱག་རྒྱ་འདི་ལ་མི་མཁས་པ་ཞེས་བྱ་བ་ནི་ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་བཞི་པོ་འདི་དག་ལ་མི་མཁས་ཤིང་མི་ཤེས་པ་

དེ་ལའོ། །གཞན་སུ་ལ་ཡང་རུང་བ་ལ་ཞེས་བྱ་བ་ནི་གང་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་མ་ཞུགས་པ་དེ་ནི་གཞན་ཏེ། དེ་ལྟར་ན་གཞན་པ་ཉིད་དང་མི་མཁས་ཤིང་མི་ཤེས་པ་དེ་ལའོ། །ཕྱག་རྒྱ་གང་ཡང་རུང་བ་སྟོན་པར་མི་བྱེད་ཅེས་བྱ་བ་ནི་དམ་ཚིག་མི་ཤེས་
ཤིང་དཀྱིལ་འཁོར་དུ་མ་ཞུགས་པ་ལ་ཕྱག་རྒྱ་རྣམ་པ་བཞི་སྤྱིར་བསྡུས་པའི་ཕྱག་རྒྱ་བསྟན་པར་མི་བྱ་བར་མ་ཟད་ཀྱི། ཐ་ན་གཅིག་ཙམ་ཡང་བསྟན་པར་མི་བྱའོ་ཞེས་གང་ཡང་རུང་བའི་སྒྲས་སྟོན་ཏོ། །ཅིའི་ཕྱིར་ཕྱ