Luận tạng Tây Tạng (Tengyur) — Tập 57

ག་རྒྱ་གང་ཡང་རུང་བ་ཅིག་ཀྱང་བསྟན་པར་མི་བྱ་ཞེ་ན་དེ་ནི་འདི་ལྟར་
ཞེས་བྱ་བ་ལ་སོགས་པ་གསུངས་ཏེ། འདི་ནི་རྒྱུ་གསུངས་པ་ཡིན་ནོ། །དཀྱིལ་འཁོར་ཆེན་པོ་མ་མཐོང་བ། །ཞེས་བྱ་བ་ནི་དམ་ཚིག་མི་ཤེས་པའོ། །ཕྱག་རྒྱ་བཅིང་བ་བྱས་ན་ཞེས་བྱ་བ་ནི་ཕྱག་རྒྱ་ཆེན་པོ་ལ་སོགས་པའི་ལས་གྲུབ་པར་བྱ་བའི་ཕྱིར། ཕྱག་རྒྱ་ཆེན་པོ་ལ་
སོགས་པ་འཆིང་བ་ལ་རབ་ཏུ་སྦྱོར་བར་བྱེད་པའོ། །དེའི་ཚེ་དེ་དག་དེ་ལྟར་གྲུབ་པར་མི་འགྱུར་རོ་ཞེས་བྱ་བ་ནི་ཕྱག་རྒྱ་ཆེན་པོ་ལ་སོགས་པ་ལ་ལས་ཀྱི་དངོས་གྲུབ་གསུངས་པ་གང་ཡིན་པ་དེ་ལ་རབ་ཏུ་སྦྱར་དུ་ཟིན་ཀྱང་དེ་རྣམས་ཀྱི་དཀྱིལ་འཁོར་ཆེན་པོ་མ་མཐོང་བའི་ཕྱིར་དེ་དེ་ལ་འགྲུབ་
པར་མི་འགྱུར་རོ། །དེ་ནས་དེ་དག་ཐེ་ཚོམ་དུ་འགྱུར་རོ་ཞེས་བྱ་བ་ནི་དེ་ནས་ཕྱག་རྒྱ་བཅིང་བ་ལ་སྦྱོར་བ་དེ་རྣམས་འབྲས་བུ་ཐོབ་པར་མ་གྱུར་པས་ཐེ་ཚོམ་དུ་གྱུར་ཏེ། ཇི་འདི་དེ་བཞིན་གཤེགས་པས་གསུངས་པ་མ་ཡིན་ནམ་སྙམ་དུ་ཡིད་གཉིས་ཀྱིས་སེམས་སུ་འགྱུར་རོ། །གནོད་པ་མ་
སྤངས་པ་ཞེས་བྱ་བ་ལ་གནོད་པ་ནི་བཅོམ་ལྡན་འདས་ཀྱི་བཀའ་ལས་འདས་པའོ། །བཀའ་དེ་ཡང་འདི་ཡིན་ཏེ། དཀྱིལ་འཁོར་ཆེན་པོ་མ་མཐོང་བས་ཕྱག་རྒྱ་གང་ཡང་རུང་བ་ཅིག་ཙམ་ཡང་བཅིང་བར་མི་བྱ་ཞིང་རབ་ཏུ་སྦྱར་བར་མི་བྱའོ་ཞེས་བྱ་བ་འདི་མ་སྤངས་པ་ནི་གནོད་པ་
མ་སྤངས་པའོ། །ཡང་ན་དེ་བཞིན་གཤེགས་པའི་གསུང་ལ་སོམ་ཉིར་གྱུར་པ་ནི་གནོད་པ་སྟེ། དེ་མ་སྤངས་པ་ནི་གནོད་པ་མ་སྤངས་པའོ། །གནོད་པ་མ་སྤངས་པ་དེས་ན་མྱུར་བ་ཉིད་དུ་དུས་བྱས་ནས་ཞེས་བྱ་བ་གང་ཚེ་ལོ་བརྒྱ་ཐུབ་པར་གནས་པའི་ལས་ཡོད་པ་དེ་ཡང་ཕྱག་

རྒྱས་བཅིང་བའི་དུས་སུ་དེ་ཉིད་དུ་འམ། ཚེ་ཡོངས་སུ་མ་རྫོགས་པར་གྱུར་པ་ཉིད་དུ་དུས་བྱེད་པར་འགྱུར་རོ། །དུས་བྱེད་པའི་བྱ་བ་བྱས་ནས་ཀྱང་དམྱལ་བ་ཆེན་པོ་མནར་མེད་པར་ལྟུང་བར་འགྱུར་ཏེ། དམ་པའི་ཆོས་སྤོང་བའི་ལས་བྱས་པའི་ཕྱིར་རོ་ཞེས་བྱ་བར་དགོངས་སོ། །ཁྱོད་
ཉིད་ཀྱང་ངན་སོང་དུ་འགྲོ་བར་འགྱུར་རོ་ཞེས་བྱ་བ་ནི། ངའི་བཀའ་ལས་འདས་པ་དང་། སེམས་ཅན་བསླུས་པའི་ཕྱིར་རོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ལ་སོགས་པ་ལ་དེ་ནས་ཞེས་བྱ་བའི་སྒྲ་ནི་དེ་མ་ཐག་པའོ། །དེ་བཞིན་གཤེགས་པ་ཐམས་ཅད་ཀྱང་
ཡིན་ལ་སེམས་དཔའ་ཡང་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་སེམས་དཔའ་སྟེ། དེ་བཞིན་གཤེགས་པ་རྣམས་དང་། རྡོ་རྗེ་སེམས་དཔའ་ལ་སོགས་པ་ནས། རྡོ་རྗེ་འབེབས་པའི་བར་གྱི་སེམས་དཔའ་རྣམས་སོ། །དེ་རྣམས་ཀྱི་བསྒྲུབ་པ་ནི་ཕྱག་རྒྱ་ཆེན་པོ་ཡིན་ཏེ།
དེ་རྣམས་ཀྱི་སྐུའི་ཕྱག་རྒྱ་ལ་དེ་བཞིན་གཤེགས་པ་ཐམས་ཅད་ཀྱི་སེམས་དཔའ་བསྒྲུབ་པའི་ཕྱག་རྒྱ་ཆེན་པོའོ་ཞེས་བྱའོ། །དེའི་ཡེ་ཤེས་ནི་ངེས་པ་སྟེ་བཤད་པར་བྱའོ། །སེམས་རྟོགས་པ་ནས་བརྩམས་ནས་ནི། །ཞེས་བྱ་བ་ནི་རྡོ་རྗེ་ཐལ་མོ་དང་རྡོ་རྗེ་བསྡམས་པ་བཅིངས་
ལ་རྡོ་རྗེ་བསྡམས་པ་སྙིང་གར་དྲལ་བར་བྱའོ། །དེ་ནས་རྡོ་རྗེ་དབབ་པ་བསྐྱེད་ལ་བརྟན་པར་བྱས་ནས་རྡོ་རྗེ་སྐྱིལ་མོ་ཀྲུང་བཅས་པར་རྡོ་རྗེ་བསྡམས་པ་བཀན་ཏེ་སྐྱིལ་མོ་ཀྲུང་ལ་བཞག་ལ། རང་གི་སྙིང་གར་རྡོ་རྗེ་རྩེ་ལྔ་པ་བསམས་ལ། བསམ་གཏན་དང་གཟུགས་མེད་པའི་སྙོམས་
པར་འཇུག་པར་མངོན་དུ་བྱས་ནས། ཡིད་ཀྱི་རང་བཞིན་གྱི་ལུས་ཀྱི་སྲིད་པ་ཐ་མ་པའི་བྱང་ཆུབ་སེམས་དཔའ་ཆེན་པོ་དོན་ཐམས་ཅད་འགྲུབ་པའི་སྐུ་དར་དཔྱངས་དང་ཅོད་པན་གྱིས་དབང་བསྐུར་བ་ཐོབ་པ་འོག་མིན་གྱི་གནས་བྱང་ཆུབ་ཀྱི་སྙིང་པོ་སེང་གེའི་གདན་ལ་བདག་ཉིད་བཞུགས་
པར་བསམ་པར་བྱའོ། །དེ་ནས་རྣམ་པར་སྣང་མཛད་དང་། མི་བསྐྱོད་པ་ལ་སོགས་པའི་ཕྱག་རྒྱ་ཇི་ལྟ་བ་བཞིན་དུ་བཅིང་བའི་སྦྱོར་བས། ཨོཾ་ཙིཏྟ་པྲ་ཏི་བེ་དྷཾ་ཀ་རོ་མི་ཞེས་བྱ་བ་ནས་བརྩམས་ཏེ། ཡ་ཐཱ་སརྦ་ཏ་ཐཱ་ག་ཏ་ཏ་ཐཱ་ཨ་ཧཾ་ཞེས་བྱ་བའི་བར་གྱིས་མངོན་པར་རྫོགས་པར་སངས་

རྒྱས་ལ། དེ་ལྟར་མངོན་པར་རྫོགས་པར་སངས་རྒྱས་ནས། ཛཿཧཱུཾ་བཾ་ཧོཿཞེས་བརྗོད་ལ་ཡིད་ཀྱིས་ལེགས་པའི་སྦྱོར་བས་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་ལྔ་པོ་མཐའ་ཡས་པ་ལུས་ལ་བཅུག་སྟེ། བདག་ལ་བྱིན་གྱིས་བརླབ་པ་
ལ་སོགས་པ་བྱས་ནས། རྡོ་རྗེ་ཉི་མ་བསྒོམ་པར་བྱ། །ཞེས་བྱ་བ་ནི་རྡོ་རྗེ་ཉི་མའི་འོད་ཀྱིས་ཉེ་བར་མཚོན་པ་ནི་བཅོམ་ལྡན་འདས་དེ་བཞིན་གཤེགས་པ་རྡོ་རྗེ་ཉི་མ་སྟེ། རྡོ་རྗེ་ཉི་མ་བསྒོམ་པར་བྱའོ། །དེ་ཉིད་བསྟན་པ་ནི། སངས་རྒྱས་གཟུགས་སུ་བདག་བསྒྱུར་ལ། །ཞེས་
བྱ་བ་ཡིན་ནོ། །དེའི་དོན་འདི་སྟོན་ཏེ། རྡོ་རྗེ་ཉི་མའི་འོད་ཀྱི་དཀྱིལ་འཁོར་གྱིས་ཉེ་བར་མཚན་པའི་སངས་རྒྱས་ཀྱི་གཟུགས་སུ་ཞེས་བྱ་བ་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་སྐུར་བསྒོམ་པར་བྱའོ། །དེ་ལྟར་བསྒོམ་པ་ནི་རང་ཉིད་དམ་མདུན་དུ་བྱ་བ་
ཡང་སྲིད་པས། དེ་ལས་དགའ་བར་བྱ་བའི་ཕྱིར་བདག་བསྒྱུར་ལ་ཞེས་བྱ་བ་གསུངས་སོ། །ཅི་ཞིག་ཟློས་ཤིང་བསྒོམ་པར་བྱ་ཞེ་ན། རྡོ་རྗེ་དབྱིངས་ཞེས་རྗོད་བྱེད་ཅིང་། །ཞེས་བྱ་བ་གསུངས་ཏེ། དེ་བཞིན་གཤེགས་པ་ལྔའི་སྤྱིའི་སྙིང་པོ་བཛྲ་དྷཱ་ཏུ་ཞེས་བྱ་བ་རྗོད་པར་བྱེད་
ཅིང་ཡོངས་སུ་ཟློས་བཞིན་དུའོ། །འདི་སྐད་སྟོན་ཏེ། བདག་ལ་བྱིན་གྱིས་བརླབ་པ་ལ་སོགས་པ་ཐམས་ཅད་བྱས་ནས། བྱང་ཆུབ་མཆོག་དང་། ས་གནོན་གྱི་ཕྱག་རྒྱ་དང་། མཆོག་སྦྱིན་དང་ཏིང་ངེ་འཛིན་མཆོག་དང་། མི་འཇིགས་པ་ལ་སོགས་པའི་ཕྱག་རྒྱ་བཅིངས་
ལ། རྣམ་པར་སྣང་མཛད་ལ་སོགས་པའི་སྐུར་བདག་ཉིད་བསྒོམ་པར་བྱའོ། །འདི་ཡིས་ཞེས་བྱ་བ་ནི་རྣམ་པར་སྣང་མཛད་ལ་སོགས་པའི་ཕྱག་རྒྱ་ཆེན་པོས་སོ། །གྲུབ་མ་ཐག་ཏུ་ནི་ཞེས་བྱ་བ་ནི་དེའི་སྐུར་བསྐྱེད་ཅིང་གྲུབ་པ་ཙམ་གྱིས་སོ། །ཡེ་ཤེས་ནི་དུས་གསུམ་ལ་
སྒྲིབ་པ་མེད་ཅིང་ཐོགས་པ་མེད་པའོ། །ཚེ་ནི་དེ་བཞིན་གཤེགས་པ་ལྟར་ཕྱི་མའི་མཐར་ཐུག་པ་མེད་པར་འཚོ་བའོ། །སྟོབས་ནི་ལུས་སྟོབས་དང་། གནས་དང་གནས་མ་ཡིན་པ་མཁྱེན་པའི་སྟོབས་བཅུ་ལ་སོགས་པའོ། །ན་ཚོད་ནི་བཅུ་དྲུག་པའི་ཆ་ལུགས་ཅན་གྱི་

གཟུགས་ཏེ། དེ་དག་ཐམས་ཅད་ཐོབ་པར་འགྱུར་རོ། །ཀུན་དུ་བཟང་པོ་ཉིད་ནི་ཕྱོགས་བཅུར་འགྲོ་བ་དང་སངས་རྒྱས་པ་ཉིད་དེ་འདི་དག་ལུས་དེ་ཉིད་ཀྱིས་འཐོབ་པར་འགྱུར་རོ། །དེ་ནས་རྡོ་རྗེ་སེམས་དཔའ་བསྒྲུབ་པའི་ཕྱག་རྒྱ་ཆེན་པོ་བཅིང་བ་ཡིན་ཏེ་ཞེས་བྱ་བ་ལ། དེ་
ནས་ཞེས་བྱ་བའི་སྒྲ་ནི་བཤད་ཟིན་ཏོ། །མི་ཕྱེད་པའི་སེམས་དཔའ་ནི་རྡོ་རྗེ་སེམས་དཔའོ། །དེའི་བསྒྲུབ་པ་ནི་མངོན་སུམ་དུ་བྱའོ། །དེའི་དོན་གྱི་ཕྱག་རྒྱ་ཆེན་པོ་ནི་རྡོ་རྗེ་སེམས་དཔའི་སྐུའི་ཕྱག་རྒྱ་ཆེན་པོ་སྟེ་དེ་བཅིང་བ་ཡིན་ཏེ་ཞེས་བྱ་བ་ནི་དེ་བཅིང་བའི་མཚན་ཉིད་བཤད་
དོ་ཞེས་པའོ། །བསྒྱིངས་བཅས་རྡོ་རྗེ་གསོར་བྱེད་ནི། །ཞེས་བྱ་བ་ནི་བསྙེམས་པས་བསྟོད་པའི་གཡོན་པའི་རྡོ་རྗེ་ཁུ་ཚུར་དྲིལ་བུ་དང་བཅས་པ། ཁ་ནང་དུ་བལྟས་པ་གཡོན་གྱི་དཀུའི་ཆར་གཞག་པ་དེས་བསྙེམས་པ་དང་བཅས་པས་ན་བསྒྱིངས་བཅས་སོ། །ཕྱག་
གཡས་པས་རྡོ་རྗེ་གསོར་ཞིང་འདེབས་པས་ཡང་དག་པར་འཛིན་པར་མཛད་པས་ན། བསྒྱིངས་བཅས་རྡོ་རྗེ་གསོར་བྱེད་ནི། །ཞེས་བྱའོ། །དེ་ལྟར་བསྒྱིངས་པ་དང་བཅས་པས་རྡོ་རྗེ་གསོར་བར་མཛད་ཅིང་རྡོ་རྗེ་དེ་རང་གི་ཐུགས་ཀར་བསྟོད་པའི་ཚུལ་གྱིས་འཇོག་པར་མཛད་པ་ནི།
རྡོ་རྗེ་སེམས་དཔའི་སྐུའི་ཕྱག་རྒྱའི་ཚུལ་ཏེ། བདག་ཉིད་དེའི་ང་རྒྱལ་གྱི་སྦྱོར་བས་གནས་ཤིང་བསྒོམ་པར་བྱའོ། །ཅི་འདི་སྐུའི་ཕྱག་རྒྱ་འབའ་ཞིག་གིས་བཅོམ་ལྡན་འདས་རྡོ་རྗེ་བསྙེམས་པའི་ཕྱག་རྒྱ་ཆེན་པོ་བསྐྱེད་པར་བྱ་འམ་ཞེ་ན། སྐུ་གསུང་ཐུགས་ཀྱི་རྡོ་རྗེ་ཡིས། །
རྡོ་རྗེ་སེམས་དཔར་བདག་ཉིད་འགྱུར། །ཞེས་བྱ་བ་གསུངས་ཏེ། སེམས་དཔའི་སྐྱིལ་མོ་ཀྲུང་གིས་དཔལ་རྡོ་རྗེ་སེམས་དཔའི་དབྱིབས་ཀྱིས་གནས་པ་འདི་ནི་སྐུའི་རྡོ་རྗེའོ། །ཡི་གེ་ཧཱུཾ་ལས་ལྕེ་རྡོ་རྗེ་རྩེ་ལྔ་པ་དཀར་པོ་བསམ་ཏེ། བཛྲ་སཏྭ་ཞེས་ཟློས་པ་འདི་ནི་གསུང་གི་རྡོ་རྗེའོ། །
དེ་ལྟར་བསྒོམས་པ་འདི་ནི་ཐུགས་ཀྱི་རྡོ་རྗེའོ། །སྐུ་གསུང་ཐུགས་ཀྱི་རྡོ་རྗེ་འདི་དག་གིས་དཔལ་རྡོ་རྗེ་སེམས་དཔའ་རང་ཉིད་འགྱུར་རོ། །ནི་ཞེས་བྱ་བ་ནི་ངེས་པར་གཟུང་བ་སྟེ། དེ་དག་ཉིད་ཀྱིས་བསྐྱེད་ལ་དེ་ཉིད་ཀྱི་བདག་ཉིད་དེའི་ཚུལ་དུ་བསྒོམ་མོ་ཞེས་བྱ་བའི་ཐ་ཚིག་གོ། །དེ་སྐད་དུ་ཡང་།

ཁ་དོག་དབྱིབས་དང་གདན་དང་ནི། །མཚན་མ་ཕྱག་མཚན་ཚོགས་དབྱེ་བས། །རྣམ་པ་དུ་མ་རྒྱ་ཆེ་གང་། །སྐུ་ཡི་གསང་བ་འདི་ཤེས་བྱ། །རྡོ་རྗེའི་ཚིག་གི་སྦྱོར་བ་ཡིས། །ཆོས་ཀྱི་ཕྱག་རྒྱའི་རང་བཞིན་སྨྲ། །རྡོ་རྗེའི་ཚིག་ནི་སྒྲ་སྤངས་པ། །འདི་ནི་གསལ་
བར་གསུང་གསང་བ། །རང་སེམས་སོ་སོར་རྟོགས་པ་ཡིས། །ཟླ་བ་རྡོ་རྗེར་རྣམ་བསྒོམ་པ། །སྒོམ་ཞིང་གསུམ་པོ་ཚུལ་གཅིག་པ། །ཐུགས་ཀྱི་གསང་བ་འདི་ཤེས་བྱ། །ཞེས་གསུངས་པ་ཡིན་ནོ། །འདི་སྐད་སྟོན་པ་ཡིན་ཏེ། རྡོ་རྗེ་དབབ་པ་ཇི་ལྟ་བ་བཞིན་དུ་བསྐྱེད་
ནས། བཛྲ་སཏྭ་ཞེས་ཡིད་ལ་ཟློས་ཤིང་ཆོས་ཐམས་ཅད་བདག་མེད་པར་བསྒོམ་པར་བྱའོ། །དེ་ནས་ཟླ་བའི་དཀྱིལ་འཁོར་གྱི་རྣམ་པ་དེའི་སྟེང་དུ་ཟླ་བའི་དཀྱིལ་འཁོར་གཉིས་པ་སྟེ། ཟླ་བའི་དཀྱིལ་འཁོར་གཉིས་པོ་དེ་བཛྲ་སཏྭ་ཞེས་བྱ་བའི་སྙིང་པོ་དང་བཅས་པ་ལས། རྡོ་རྗེ་
རྩེ་ལྔ་པའོ། །རྡོ་རྗེའི་དབུས་སུ་བཛྲ་སཏྭ་ཞེས་བྱ་བ་བཀོད་ལ། བཛྲོ྅ཧཾ་ཞེས་བྱ་བའི་རྡོ་རྗེའི་ང་རྒྱལ་བསྐྱེད་ནས་རྡོ་རྗེ་དེ་ཉིད་སེམས་དཔར་བྱིན་གྱིས་བརླབས་པའི་སྦྱོར་བས་རྡོ་རྗེ་སེམས་དཔར་བདག་ཉིད་ངེས་པར་བསམས་ལ། མ་ཧཱ་ས་མ་ཡ་སཏྭ་ཧཾ་ཞེས་བྱ་བས་ང་རྒྱལ་བསྐྱེད་ལ།
རྡོ་རྗེ་སེམས་དཔའི་དམ་ཚིག་གི་ཕྱག་རྒྱ་བཅིངས་ཏེ། ས་མ་ཡོ྅ཧཾ་ཞེས་བྱ་བས་དམ་ཚིག་གི་སེམས་དཔར་བསྒོམས་ལ། དམ་ཚིག་གི་ཕྱག་རྒྱ་དེ་ཉིད་དང་། ས་མ་ཡ་སཏྭ་ཨ་དྷི་ཏིཥྛ་སྭ་མཾ་ཞེས་བྱ་བས་བདག་ཉིད་བྱིན་གྱིས་བརླབས་ལ་ཕྱག་རྒྱ་ཆེན་པོར་བསམ་པར་བྱའོ། །དེ་
ནས་ཡེ་ཤེས་སེམས་དཔའ་ཇི་ལྟ་བ་བཞིན་དུ་བཅུག་ལ། བདག་ལ་བྱིན་གྱིས་བརླབས་པ་ལ་སོགས་པ་བྱས་ནས་ཡང་དག་པར་མཆོད་ལ་ཕྱག་བྱས་ནས་ཕྱག་རྒྱ་ཆེན་པོ་བཅིངས་ལ། བཛྲ་སཏྭ་ཞེས་ཟློས་ཤིང་རྡོ་རྗེ་སེམས་དཔར་བདག་ཉིད་བསྒོམ་པར་བྱའོ། །འདིས་ནི་ཞེས་བྱ་བ་
ལ་སོགས་པ་ལ། དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་གྲུབ་པ་འདིས་ཀུན་དུ་འགྲོ་བ་དང་ཞེས་བྱ་བ་འཇིག་རྟེན་གྱི་ཁམས་ཐམས་ཅད་དུ་སྐད་ཅིག་མ་གཅིག་གིས་འགྲོ་ཞིང་ཕྱིན་པར་གྱུར་པ་དང་། འདོད་པ་ཀུན་བདག་ཅེས་བྱ་བ་ནི་འཇིག་རྟེན་གྱི་ཁམས་ཐམས་ཅད་ན་གནས་པའི་

འདོད་པའི་གཟུགས་དང་། སྒྲ་དང་། དྲི་དང་། རོ་དང་། རེག་བྱ་རྣམས་ཀྱི་བདག་པོ་སྟེ། ཉེ་བར་སྤྱོད་པར་བྱེད་པ་དེ་རྣམས་ཀྱི་གཙོ་བོར་གྱུར་པ་དང་། བདེ་བ་ཅན་དང་ཞེས་བྱ་བ་འདི་ལ་སྡུག་བསྔལ་ཐམས་ཅད་མི་འབྱུང་ཞིང་བདེ་བ་ཐམས་ཅད་སྐྱེ་བར་འགྱུར་ཏེ། གང་གི་ཕྱིར་
བདེ་བ་དང་ལྡན་པར་འགྱུར་རོ་ཞེས་བཤད་པ་ཡིན་ནོ། །རྫུ་འཕྲུལ་ཚེ་སྟོབས་གཟུགས་མཆོག་རྣམས། །རྡོ་རྗེ་སེམས་དཔའ་འདྲ་བར་འགྱུར། །ཞེས་བྱ་བ་ནི་གང་གི་ཕྱིར་རྫུ་འཕྲུལ་དང་། ཚེ་དང་། སྟོབས་དང་། གཟུགས་ཀྱི་མཆོག་རྣམས་རྡོ་རྗེ་སེམས་དཔའ་དང་
མཉམ་པར་འགྱུར་ལ། ཕྱིས་ནི་རྡོ་རྗེ་སེམས་དཔའ་ཉིད་དུ་འགྱུར་རོ། །ད་ནི། སྐུ་གསུང་ཐུགས་ནི་རྡོ་རྗེ་ཡིས། །ཞེས་བྱ་བ་ལ་སོགས་པས་རྡོ་རྗེ་རྒྱལ་པོ་ལ་སོགས་པའི་ཕྱག་རྒྱ་བཅིང་བའི་མཚན་ཉིད་བསྒྲེ་བ་སྟོན་ཏེ། དེས་ན། སྐུ་གསུང་ཐུགས་ནི་རྡོ་རྗེ་ཡིས། །ཞེས་བྱ་བ་ནི་སྔ་མ་
བཞིན་ནོ། །ཇི་ལྟར་རི་མོའི་རྗེས་མཐུན་ཞིང་། །ཞེས་བྱ་བ་ནི་བྲི་བར་བྱ་བ་ཡིན་པས་ན་རི་མོ་སྟེ་རྡོ་རྗེ་རྒྱལ་པོ་ལ་སོགས་པ་ནས་རྡོ་རྗེ་འབེབས་པའི་བར་རོ། །དེ་རྣམས་ཀྱི་རྗེས་སུ་འབྲངས་པ་ནི་རྗེས་སུ་མཐུན་པ་སྟེ། རྡོ་རྗེ་ལྕགས་ཀྱུས་དེ་བཞིན་གཤེགས་པ་ཐམས་ཅད་བསྡུ་
བར་མཛད་ཅིང་བཞུགས་སོ་ཞེས་བྱ་བ་ནས། རྡོ་རྗེ་དྲིལ་བུས་དེ་བཞིན་གཤེགས་པ་ཐམས་ཅད་འབེབས་པར་མཛད་ཅིང་བཞུགས་སོ་ཞེས་བྱ་བའི་བར་ལས་ཤེས་པར་བྱ་བ་ནི་ཇི་ལྟར་བྲིས་པ་དེའི་རྗེས་སུ་མཐུན་པ་སྟེ། ཇི་ལྟར་རི་མོ་བྲིས་པ་བཞིན་དུ་ཤེས་པར་བྱ། དེས་ན། ཇི་ལྟར་
བྲིས་པའི་རྗེས་སུ་འབྲངས་ནས། ཇི་ལྟར་རི་མོའི་རྗེས་མཐུན་ཞིང་། །ཞེས་བྱའོ། །མཚན་མའི་ཕྱག་རྒྱ་རྣམས་ལྡན་པར། །ཞེས་བྱ་བ་ནི་ལྕགས་ཀྱུ་ལ་སོགས་པ་ནི་དེ་རྣམས་ཀྱི་མཚན་མའི་ཕྱག་རྒྱ་སྟེ། དེ་རྣམས་དང་ཡང་དག་པར་ལྡན་ཞིང་དེ་དང་བཅས་པར་རྡོ་རྗེ་རྒྱལ་པོ་
ལ་སོགས་པའི་སེམས་དཔའ་ཆེན་པོ་རྣམས་བསྒོམ་པར་བྱའོ། །འདི་སྐད་སྟོན་ཏེ་དཔལ་རྡོ་རྗེ་སེམས་དཔའ་བསྒྲུབ་པ་དང་འདྲ་བར་ཆོ་ག་ཐམས་ཅད་རྗེས་སུ་སྤྱད་ལ། ཇི་ལྟར་རི་མོ་བྲིས་པའི་ཆོ་གར་འདི་རྣམས་ཀྱི་ཕྱག་རྒྱ་ཆེན་པོ་བྲི་བར་གསུངས་པ་དེ་དང་རྗེས་སུ་མཐུན་པར་རྡོ་རྗེ་རྒྱལ་

པོ་ལ་སོགས་པ་འདི་རྣམས་ཀྱི་མཚན་མ། རྡོ་རྗེ་ལྕགས་ཀྱུ་ལ་སོགས་པ་ལག་པས་བཟུང་ལ། རྡོ་རྗེ་རྒྱལ་པོ་ལ་སོགས་པ་བསྒོམ་པར་བྱའོ། །གཞུང་འདི་ཙམ་གྱིས་ནི་རྣལ་འབྱོར་ཙམ་གསུངས་པ་ཡིན་ཏེ། སེམས་ཙམ་དུ་ནི་སྙོམས་འཇུག་པ། །རྣལ་
འབྱོར་ཞེས་ནི་བྱ་བ་ཡིན། །ཞེས་གསུངས་པའི་ཕྱིར་རོ། །རྣམ་པར་སྣང་མཛད་ལ་སོགས་པ་འདི་དག་བདག་ལ་བྱིན་གྱིས་བརླབ་པ་ལ་སོགས་པ་བྱས་ནས་བསྒྲུབ་པར་བྱའོ་ཞེས་བསྟན་པའི་ཕྱིར་རོ། །དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ཏེ། འདིར་ནི་ཞེས་བྱ་བ་ནི་
རྣལ་འབྱོར་གྱི་རྒྱུད་དུའོ། །རྟོག་ཀུན་གྱི་ཞེས་བྱ་བ་ནི་ཇི་སྐད་དུ་བཤད་པའི་ཕྱག་རྒྱ་ཆེན་པོའོ། །བསྒྲུབ་པ་དང་ཞེས་བྱ་བ་ནི་རང་གི་ལུས་ལ་ཡེ་ཤེས་སེམས་དཔའ་ཇི་ལྟ་བ་བཞིན་དུ་བཅུག་སྟེ། གཅིག་ཏུ་གྱུར་པ་ལྷག་པར་མོས་པ་སྟེ་སྒྲུབ་པ་དེས་ཕྱག་རྒྱ་ཆེན་པོ་ལ་སོགས་པ་
འགྲུབ་པ་ཡིན་ནོ། །དངོས་གྲུབ་དང་། གྲུབ་པ་རྣམས་ཀྱི་ལས་ཆེན་རྣམས། །ཞེས་བྱ་བ་ནི་དངོས་གྲུབ་རྣམས་གྲུབ་ཅིང་རྫོགས་པ་རྣམས་ཀྱི་ཕྱག་རྒྱ་ཆེན་པོའི་ལས་ཆེན་པོ་སྟེ། ལས་དམ་པ་ནི། སངས་རྒྱས་རྗེས་སུ་དྲན་གྲུབ་ན། །སངས་རྒྱས་ཉིད་དུ་མྱུར་དུ་འགྱུར། །ཞེས་
བྱ་བ་ལ་སོགས་པའོ། །གོ་རིམས་བཞིན་དུ་བཤད་པར་བྱ། །ཞེས་བྱ་བ་ནི་རྟོག་པ་ཐམས་ཅད་ཀྱི་བསྒྲུབ་པ་དང་། དངོས་གྲུབ་དང་། གྲུབ་པ་རྣམས་ཀྱི་ལས་ཆེན་པོ་འདི་དག་ཐམས་ཅད་གོ་རིམས་ཇི་ལྟ་བ་བཞིན་དུ་བཤད་པར་བྱའི་ཕན་ཚུན་འཆོལ་བར་ནི་མ་ཡིན་ནོ། །
དང་པོར་ཞེས་བྱ་བ་ནི་བཟླས་པ་དང་། བསྒོམ་པའི་ཐོག་མར་རོ། །ཉིན་རེ་ཞིང་ཞེས་བྱ་བ་ནི་ཉི་མ་རེ་རེ་ཞིང་ངོ་། །དུས་བཞིན་དུ་ཞེས་བྱ་བ་ནི་སྔ་དྲོ་དང་ཉི་མ་ཕྱེད་དང་། ཕྱི་དྲོ་དང་། མཚན་ཕྱེད་ནའོ། །རང་ལ་བྱིན་རླབས་སོགས་དེ་བཞིན། །ཞེས་བྱ་བ་ནི། འདིའི་འོག་
དང་རྒྱུད་གཞན་ལས་ཇི་སྐད་བཤད་པ་ལྟ་བུས་རང་ལ་བྱིན་གྱིས་བརླབ་པ་ལ་སོགས་པ་བྱས་ནས་བྱ་བ་ཉིད་ཡིན་གྱི། མ་བྱས་པ་ནི་མ་ཡིན་ནོ། །ཐམས་ཅད་བསྒྲུབ་པར་བྱ་སྟེ་ཞེས་བྱ་བ་ནི་བཟླས་པ་དང་བསྒོམས་པས་ཕྱག་རྒྱ་ཆེན་པོ་ལ་སོགས་པ་བསྐྱེད་པར་བྱའོ། །དེའི་འོག་ཏུ་

ཅི་དགར་བྱ། །ཞེས་བྱ་བ་ནི་ཕྱག་རྒྱ་ཆེན་པོ་ལ་སོགས་པ་བསྒོམ་པ་དང་། བཟླས་པས་དུབ་ན་ངལ་བསོ་ཞིང་ཕྱག་རྒྱ་མ་བཅིངས་པར་ཡང་བཟླས་པ་དང་བསྒོམ་པ་བྱ་བའོ། །དེ་ནས་སྐྱོ་ཞིང་དུབ་པ་དང་བྲལ་བ་ན་སླར་ཡང་ཕྱག་རྒྱ་བཅིངས་ལ་བཟླས་པ་དང་བསྒོམ་པ་བྱ་བའོ། །
འདིས་ནི་འདི་སྐད་སྟོན་པ་ཡིན་ཏེ། གལ་ཏེ་དཀྱིལ་འཁོར་གྱི་བརྟུལ་ཞུགས་རྫོགས་པར་བྱེད་པར་འདོད་ན་དེའི་ཚེ་བདག་ཉིད་བསྲུང་བ་བྱས་ལ། ཁྲུས་ལ་སོགས་པའི་ཆོ་ག་ཐམས་ཅད་རྗེས་སུ་སྤྱད་ནས། སྡིག་པ་དྲལ་བའི་ཕྱག་རྒྱས་སྡིག་པ་དྲལ་བར་བྱའོ། །དེ་ནས་དེ་
བཞིན་གཤེགས་པའི་རྣལ་འབྱོར་པས་རྣམ་པར་སྣང་མཛད་ལ་སོགས་པའི་སྐུར་བསྐྱེད་དེ། དེའི་རིགས་ཀྱི་རྣལ་འབྱོར་པས་ནི་རྡོ་རྗེ་སེམས་དཔའ་ལ་སོགས་པའི་སྐུར་བསམས་ཏེ། སེམས་སོ་སོར་རྟོགས་པ་ལ་སོགས་པའི་རིམ་གྱིས་རང་གི་རྣལ་འབྱོར་བསྒོམས་ཏེ་བདག་ཉིད་
རྫོགས་པར་བྱས་ལ་དེ་རྣམས་ཀྱི་ཕྱག་རྒྱ་ཆེན་པོ་ཇི་ལྟ་བ་བཞིན་དུ་བཅིངས་ནས་ནམ་མཁའ་དང་མཉམ་པའི་སྦྱོར་བས་རང་གི་སྙིང་གར་སྟོང་གསུམ་པའི་སངས་རྒྱས་ཀྱི་ཞིང་དང་མཉམ་པའི་ཟླ་བའི་དཀྱིལ་འཁོར་བསམས་ལ། རྡོ་རྗེ་རྒྱུའི་ཕྱག་རྒྱས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་
པོ་སྤྲུལ་ནས། བདག་ཉིད་རྡོ་རྗེ་སེམས་དཔར་བསམས་ཏེ། འཇུག་པའི་ཆོ་གས་ཞུགས་ལ་དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་བར་གྱི་ཆོ་ག་བྱའོ། །འདི་ནི་འདིར་བདག་ལ་བྱིན་གྱིས་བརླབ་པ་ལ་སོགས་པ་བྱས་ལ་དེ་ནས་དེའི་རྗེས་ལ་རང་གི་ལུས་ལ་ལྷ་ཐམས་ཅད་བཅུག་སྟེ།
རང་གི་གནས་སུ་བཀོད་ལ། ཕྱག་རྒྱ་བཞིས་རྒྱས་གདབ་པ་བྱས་ནས་བྱིན་གྱིས་བརླབས་ལ་དབང་བསྐུར་ནས། མཆོད་པ་ཐམས་ཅད་ཀྱིས་ཡང་དག་པར་མཆོད་དེ་ཐམས་ཅད་ཀྱི་སྔགས་རེ་རེ་ཞིང་ཡང་བཟླས་བརྗོད་འབུམ་བྱའོ། །གལ་ཏེ་བསྒོམ་པར་འདོད་ན་དེ་བཞིན་དུ་ལྷ་ཐམས་
ཅད་རང་གི་ལུས་ལ་བཅུག་སྟེ། ཆོ་ག་ཐམས་ཅད་རྗེས་སུ་སྤྱད་ལ། ཡང་ནམ་མཁའ་དང་མཉམ་པའི་སྦྱོར་བས་རང་གི་སྙིང་གར་ཞུགས་ཏེ། དེ་བཞིན་དུ་རྡོ་རྗེ་རྒྱུའི་ལས་ཀྱི་ཕྱག་རྒྱས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་སྤྲུལ་ནས། ཕྱག་རྒྱ་བཞིའི་དཀྱིལ་འཁོར་ལས་གསུངས་

པའི་སྙིང་པོ་ལྔས་ལྷ་ཐམས་ཅད་ཀྱི་གཟུགས་སུ་སྤྲུལ་ལ། རང་རང་གི་གནས་སུ་གཞག་པར་བྱའོ། །ཨོཾ་བཛྲ་དྷཱ་ཏུ་སཏྭ་བཛྲི། རཏྣ་བཛྲི། དྷརྨྨ་བཛྲི། ཀརྨ་བཛྲི། ཨོཾ་བཛྲ་སཏྭ་ཧཱུཾ། བཛྲ་སཏྭ། བཛྲ་རཱ་ཛ། བཛྲ་རཱ་ག །བཛྲ་སཱ་དྷུ། ཨོཾ་བཛྲ་རཏྣ་
ཧཱུཾ། བཛྲ་རཏྣ། བཛྲ་ཏེ་ཛ། བཛྲ་ཀེ་ཏུ། བཛྲ་ཧ་ས། ཨོཾ་བཛྲ་དྷརྨྨ་ཧཱུཾ། བཛྲ་དྷརྨ། བཛྲ་ཏཱིཀྵྞ། བཛྲ་ཧེ་ཏུ། བཛྲ་བྷ་ཥ། ཨོཾ་བཛྲ་ཀརྨྨ་ཧཱུཾ། བཛྲ་ཀརྨྨ། བཛྲ་རཀྵ། བཛྲ་ཡཀྵ། བཛྲ་སནྡྷི། བཛྲ་ལཱ་སྱེ། བཛྲ་མཱ་ལེ། བཛྲ་གཱི་ཏི། བཛྲ་ནིརྟི། བཛྲ་དྷཱུ་པེ། བཛྲ་པུཥྤེ། བཛྲ་
ཨཱ་ལོ་ཀེ། བཛྲ་གནྡྷེ། བཛྲ་ཨཾ་ཀུ་ཤ བཛྲ་པཱ་ཤ །བཛྲ་སྥོ་ཊ། བཛྲ་ཨཱ་བེ་ཤ་ཞེས་བྱ་བའི་ཚིག་ཙམ་ཉིད་ཀྱིས་ཐམས་ཅད་རང་རང་གི་གནས་སུ་བཀོད་ལ། ཨོཾ་བཛྲ་ཨཱཏྨ་ཀོ྅ཧཾ་ཞེས་བརྗོད་ཅིང་བདག་ཉིད་མི་ཕྱེད་པར་བསྒོམ་མོ། །ཨོཾ་སྭ་བྷཱ་ཝ་བི་ཤུདྡྷོ྅ཧཾ་ཞེས་བྱ་བས་ནི་ཆོས་
ཐམས་ཅད་བདག་མེད་པར་རོ། །ཨོཾ་སརྦ་ས་མོ྅ཧཾ་ཞེས་ཟློས་ཤིང་བདག་མེད་པའི་མཉམ་པ་ཉིད་ཀྱིས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་ལྷ་ཐམས་ཅད་དང་བདག་ཉིད་མཉམ་པར་བསམ་པར་བྱའོ། །དེ་ནས་བདག་ནི་རང་ཉིད་རྡོ་རྗེ་དབྱིངས་ཡིན་ནོ་ཞེས། རྡོ་རྗེ་དབྱིངས་
ཀྱི་དཀྱིལ་འཁོར་ཆེན་པོའི་ང་རྒྱལ་བསྐྱེད་པར་བྱའོ། །དེ་ནས་བཛྲ་སཏྭ་ཞེས་ཟློས་ཤིང་རྣམ་པར་སྣང་མཛད་ལ་སོགས་པའི་རང་བཞིན་དུ་བདག་ཉིད་བསྒོམས་ལ། ལྷ་ཐམས་ཅད་ཀྱི་ཞལ་ནས་བཛྲ་སཏྭ་ཞེས་བྱ་བའི་སྒྲ་འབྱུང་བར་ལྷག་པར་མོས་པར་བྱ་སྟེ། དེ་ལྟ་བུས་ནི་
ཐམས་ཅད་བཟླས་པར་འགྱུར་རོ། །དེ་ལྟར་ཇི་སྲིད་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་ཉིན་རེ་ཞིང་བསྒོམ་པར་བྱའོ། །ཡང་ན་ཏིང་ངེ་འཛིན་གསུམ་སྔོན་དུ་འགྲོ་བས་ཟླ་བ་དྲུག་གམ། ལོ་གཅིག་གི་བར་དུ་བསྒོམ་པར་
བྱའོ། །སློབ་དཔོན་གྱི་དབང་དུ་བྱས་པའོ། །སློབ་མའི་དབང་དུ་བྱས་པ་ལ་ནི། བདག་ལ་བྱིན་གྱིས་བརླབ་པ་ལ་སོགས་པ་འདི་ལྟར་ཤེས་པར་བྱ་སྟེ། བདག་བསྲུང་བ་དང་། ཆུའི་ཁྲུས་དང་། ཡང་བདག་བསྲུང་བ་དང་། གནས་བསྲུང་བ་ཡང་བྱས་ལ། རང་གི་ལྷ་མདུན་

དུ་བཞུགས་སུ་གསོལ་ཏེ། ཕྱག་བྱ་བ་དང་། སྡིག་པ་བཤགས་པ་དང་། བསོད་ནམས་ལ་རྗེས་སུ་ཡི་རང་བ་དང་། བསྐུལ་བ་དང་། གསོལ་བ་དང་། ཡོངས་སུ་བསྔོ་བ་དང་། བྱང་ཆུབ་ཏུ་སེམས་བསྐྱེད་པ་དང་། གསུམ་ལ་སྐྱབས་སུ་འགྲོ་བ་ལ་སོགས་པ་རྗེས་སུ་སྤྱད་ལ།
རྡོ་རྗེ་ཐལ་མོ་དང་རྡོ་རྗེ་བསྡམས་པ་བཅིངས་ཏེ། རྡོ་རྗེ་ཐལ་མོ་སྙིང་གར་དྲལ་ལ། རྡོ་རྗེ་དབབ་པ་བསྐྱེད་དེ། བརྟན་པར་བྱས་ནས་བདག་མེད་པར་བསྒོམ་པ་དང་། ཟླ་བའི་དཀྱིལ་འཁོར་ལ་སོགས་པ་སྔ་མ་བཞིན་དུ་བསྒོམས་ཏེ། རང་གི་ལྷའི་ཕྱག་རྒྱ་ཆེན་པོ་ཇི་ལྟ་བ་བཞིན་དུ་བཅིང་
བར་བྱའོ། །དེ་ནས་ཡེ་ཤེས་སེམས་དཔའ་ཇི་ལྟ་བ་བཞིན་དུ་བཅུག་སྟེ། ཕྱག་རྒྱ་ཆེན་པོ་བསྒྲུབ་པར་བྱས་ནས། ཛཿཧཱུཾ་བཾ་ཧོཿཞེས་བརྗོད་དེ་ཡིད་ཀྱིས་ལེགས་པའི་སྦྱོར་བས་དེ་བཞིན་གཤེགས་པ་ཐམས་ཅད་རང་གི་ལུས་ལ་བཅུག་སྟེ། རང་གི་དམ་ཚིག་གི་ཕྱག་རྒྱ་རྣམས་
ཀྱིས་རབ་ཏུ་བསྒྲུབས་ནས། རང་གི་ལྷ་དང་དེ་བཞིན་གཤེགས་པ་ཐམས་ཅད་ཆོས་དང་ལས་དང་ཕྱག་རྒྱ་ཆེན་པོས་རྒྱས་བཏབ་ལ། རིགས་ཀྱི་དམ་ཚིག་གིས་བདག་ཉིད་བྱིན་གྱིས་བརླབས་ཏེ། རང་གི་རིགས་ཀྱི་དབང་བསྐུར་བས་དབང་བསྐུར་ནས་སྒེག་མོ་ལ་སོགས་པ། གསང་
བའི་མཆོད་པ་བཞིས་ཡང་དག་པར་མཆོད་ལ་དེ་བཞིན་གཤེགས་པ་ཐམས་ཅད་ལ་ཕྱག་བྱས་ཏེ། རང་གི་ཕྱག་རྒྱ་ཆེན་པོ་ལེགས་པར་བསྒོམས་ལ། བཛྲ་སཏྭ་ཞེས་བྱ་བ་ལ་སོགས་པས་རང་གི་ལྷའི་སྔགས་ཟློས་ཤིང་ལོ་གཅིག་གི་བར་དུ་ཉིན་རེ་ཞིང་ཐུན་བཞིར་བསྒོམ་པར་བྱའོ། །
སློབ་མའི་དབང་དུ་བྱས་པའོ། །ད་ནི་དེ་ལ་ཞེས་བྱ་བ་ལ་སོགས་པས་རྟོག་པ་ཐམས་ཅད་ཀྱི་སྒྲུབ་པ་དང་གྲུབ་པའི་ལས་རྣམ་པར་འགྲེལ་ཏེ། ཕྱག་རྒྱ་ཆེན་པོ་བསྒྲུབ་པའི་ཆོ་ག་རྒྱས་པ་ཞེས་བྱ་བ་ནི། ཕྱག་རྒྱ་ཆེན་པོ་རྣམས་ཀྱི་བསྒྲུབ་པ་ནི་ཡེ་ཤེས་སེམས་དཔའ་དང་ལྷན་ཅིག་ཏུ་
གྱུར་པར་ལྷག་པར་མོས་པའོ། །དེའི་དོན་གྱི་ཆོ་ག་རྒྱས་པ་ནི། རྡོ་རྗེ་ཐལ་མོ་ནས་བརྩམས་ཏེ། ས་མ་ཡ་སྟྭཾ་ས་མ་ཡ་ཨ་ཧཾ་ཞེས་བརྗོད་ཅེས་བྱ་བའི་བར་དུའོ། །རྡོ་རྗེ་དབབ་པ་བྱས་ནས་ནི། །ཞེས་བྱ་བ་ནི་བཛྲ་ཨཱ་བེ་ཤ་ཞེས་བྱ་བས་རྡོ་རྗེ་འབེབས་པའི་དམ་ཚིག་གི་ཕྱག་རྒྱ་

བཅིངས་ལ། ཨཿཞེས་བྱ་བས་རྡོ་རྗེ་རང་གི་སྙིང་གར་གཞུག་གོ། །ཕྱག་རྒྱ་ཆེན་པོའི་ཆོ་ག་བཞིན། །ཞེས་བྱ་བ་ནི་ཆོ་ག་བཞིན་ཞེས་བྱ་བའི་སྒྲས་གནས་གསུམ་དུ་བལྟ་བར་བྱ་སྟེ། ཆོ་ག་བཞིན་དུ་རྡོ་རྗེ་དབབ་པ་བྱས་ནས། ཆོ་ག་བཞིན་དུ་ཕྱག་རྒྱ་ཆེན་པོ་བཅིངས་
ཏེ། ཆོ་ག་བཞིན་དུ་མདུན་དུ་སེམས་དཔའ་ཆེན་པོ་དེ་བསྒོམ་མོ། །དེ་ཡང་གང་གི་ཕྱིར་དང་པོ་ཁོ་ནར་རྡོ་རྗེ་དབབ་པ་བསྐྱེད་པར་འདོད་པས། རྡོ་རྗེ་ཐལ་མོ་དང་། རྡོ་རྗེ་བསྡམས་པ་བཅིངས་ལ། རང་གི་སྙིང་གར་རྡོ་རྗེ་བསྡམས་པ་ལས་སོར་མོ་དྲལ་བར་བྱས་ནས། རྡོ་རྗེ་འབེབས་
པའི་དམ་ཚིག་གི་ཕྱག་རྒྱ་བཅིངས་ལ་བདག་ཉིད་ལ་དབབ་པར་བྱའོ་ཞེས་བཤད་དོ། །དེ་བས་ན་རིམ་པ་འདིས་རྡོ་རྗེ་དབབ་པ་ཆོ་ག་བཞིན་དུ་བསྐྱེད་པ་ཡིན་ནོ། །དེ་ནས་ཆོས་བདག་མེད་པའི་སྦྱོར་བ་ནས་བརྩམས་ཏེ། སེམས་དཔར་བྱིན་གྱིས་བརླབ་པའི་སྦྱོར་བའི་མཐར་ཐུག་
པའི་ཆོ་ག་རྗེས་སུ་སྤྱད་པར་བྱའོ། །དེ་ནས་དམ་ཚིག་གི་ཕྱག་རྒྱ་དང་། སེམས་དཔའ་ཆེན་པོ་རྗེས་སུ་དྲན་པའི་སྙིང་པོ་འདི་བརྗོད་པར་བྱ་སྟེ། མ་ཧཱ་ས་མ་ཡ་སཏྭ་ཧཾ། ས་མ་ཡོ྅ཧཾ། ས་མ་ཡ་སཏྭ་ཨ་དྷི་ཏིཥྛ་སྭ་མཾ་ཞེས་བྱ་བས་བྱིན་གྱིས་བརླབས་ལ་ཕྱག་རྒྱ་ཆེན་པོ་བཅིང་བར་
བྱ་སྟེ། དེ་ལྟར་ན་འདི་ནི་ཆོ་ག་བཞིན་ཕྱག་རྒྱ་ཆེན་པོ་བཅིངས་པ་ཡིན་ནོ། །དེ་ནས་ཕྱག་རྒྱ་ཆེན་པོ་བཅིངས་ལ། བཛྲ་སཏྭ་ཨཿཞེས་བྱ་བས་མདུན་དུ་ཟླ་བ་ལ་རྡོ་རྗེ་རྩེ་ལྔ་པ་དབབ་པར་བྱའོ། །བཛྲ་ཧཾ་ཞེས་བྱ་བས་ང་རྒྱལ་བསྐྱེད་ལ་རྡོ་རྗེ་ཉིད་བཛྲ་སཏྭ་ཧཾ་ཞེས་བྱ་བས་རྡོ་རྗེ་སེམས་
དཔར་བདག་ཉིད་བསྒོམ་པར་བྱ་བ་སྟེ། འདི་ནི་ཆོ་ག་བཞིན་ཞེས་བྱ་བའི་སྒྲ་གསུམ་པའི་དོན་ཡིན་ནོ། །ཆོ་ག་འདི་ཡང་ཇི་ལྟར་གནས་པ་དེ་བཞིན་དུ་འདིའི་འོག་ནས་བཤད་པར་བྱའོ། །དེ་ལྟར་ཇི་སྐད་དུ་བཤད་པའི་ཚུལ་གྱིས་རྡོ་རྗེ་ལས་བྱུང་བའི་རྡོ་རྗེ་སེམས་དཔའ་བདག་ཉིད་ཀྱི་མདུན་
དུ་བསྒོམས་ལ་དེ་ཉིད་དུ་ཡེ་ཤེས་སེམས་དཔའ་རྡོ་རྗེ་ལྕགས་ཀྱུ་ལ་སོགས་པས་དགུག་པ་དང་། གཞུག་པ་དང་། བཅིང་བ་དང་དབང་དུ་བྱས་ཏེ། རྡོ་རྗེ་སེམས་དཔའི་དམ་ཚིག་གི་ཕྱག་རྒྱ་བཅིངས་ཏེ། བཛྲ་སཏྭ་དྲྀ་ཤྱ་ཞེས་པས་བསྐུལ་བར་བྱའོ། །དེ་ནས་བསྐུལ་བའི་རྗེས་ཐོགས་

ཉིད་ལ་སྒྲུབ་པ་པོ་འདི་ལ་མཐོང་བ་སྩལ་བར་འགྱུར་ཏེ། གང་གི་ཕྱིར་ཡེ་ཤེས་སེམས་དཔའ་དེ་མཐོང་ནས་ཞེས་གསུངས་པ་ཡིན་ནོ། །ཡེ་ཤེས་ཀྱི་རང་བཞིན་གྱི་སེམས་དཔའ་ནི་ཡེ་ཤེས་སེམས་དཔའ་ཡིན་པའམ། ཡེ་ཤེས་དང་ལྡན་པའི་སེམས་དཔའ་ནི་ཡེ་ཤེས་སེམས་
དཔའ་ཡིན་གྱི་ཡེ་ཤེས་ཀྱིས་གཞག་པའི་སེམས་དཔའ་ནི་ཤིན་ཏུ་ཐལ་ཆེས་པས་ཡེ་ཤེས་སེམས་དཔའ་མ་ཡིན་ཏེ། བདག་ཉིད་ཀྱི་རྒྱུད་ལས་ཀྱང་བསྒོམས་པའི་ཡེ་ཤེས་ཀྱིས་གཞག་ཏུ་རུང་བའི་ཕྱིར། ཡེ་ཤེས་སེམས་དཔའ་མ་ཡིན་པར་འགའ་ཡང་མི་འགྱུར་རོ། །རང་
གི་ལུས་སུ་བསྒོམ་པར་བྱ། །ཞེས་བྱ་བ་ནི་རང་གི་ལུས་སུ་རབ་ཏུ་བསྒོམ་པར་བྱའོ། །འདི་སྐད་སྟོན་ཏེ། བལྟས་པས་མདུན་ན་བཞུགས་པའི་རྡོ་རྗེ་སེམས་དཔའ་བདག་ཉིད་གཟུགས་བརྙན་གྱི་བདག་ཉིད་ཀྱིས་རྡོ་རྗེ་སེམས་དཔར་འགྱུར་བར་བསམས་ལ། གཞུག་པ་དང་། བཅིང་བ་དང་། དབང་དུ་
བྱས་ནས་བསྒྲུབ་པར་བྱའོ། །དགུག་པ་ལ་སོགས་པ་འདི་དག་མདུན་གྱི་ལྷ་ཡང་རྡོ་རྗེ་ལྕགས་ཀྱུ་ལ་སོགས་པས་སྦྱར་བར་བྱའོ། །དེ་ཡང་རང་གི་ལུས་ལ་ཡང་རྡོ་རྗེ་སེམས་དཔའ་ལ་སོགས་པའི་དམ་ཚིག་གི་ཕྱག་རྒྱས། ཛཿཧཱུཾ་བཾ་ཧོཿཞེས་བརྗོད་པར་བྱས་ལ་བསྒྲུབ་པར་བྱའོ་ཞེས་གསུངས་
པ་ཡིན་ནོ། །ས་མ་ཡ་སྟྭཾ་ཞེས་བྱ་བ་དང་། དམ་ཚིག་གི་ཕྱག་རྒྱ་དེ་ཉིད་ཀྱིས་འོད་ཀྱི་དཀྱིལ་འཁོར་བསྐྱེད་ལ། ཡང་ས་མ་ཡ་སྟྭཾ་ཨ་ཧཾ་བཛྲ་སཏྭ་ཞེས་ཀྱང་ཟློས་ཤིང་། དམ་ཚིག་གི་ཕྱག་རྒྱ་དེ་ཉིད་ཀྱིས་གནས་ལ་འོག་ནས་བཤད་པའི་ཚུལ་གྱིས་གཅིག་ཏུ་གྱུར་པར་ལྷག་པར་མོས་པར་
བྱའོ། །དེ་དག་གི་སྙིང་པོ་ནི་འདི་དག་ཡིན་ནོ་ཞེས་བྱ་བ་ནི་རྡོ་རྗེ་དབབ་པ་ལ་སོགས་པའིའོ། །བཛྲ་སཏྭ་ཨཿཞེས་བྱ་བ་ནི་རྡོ་རྗེ་དབབ་པའི་སྙིང་པོའོ། །བཛྲ་སཏྭ་དྲྀ་ཤྱ་ཞེས་བྱ་བ་ནི་སེམས་དཔའ་ཆེན་པོ་རྗེས་སུ་དྲན་པའི་སྙིང་པོའོ། །ཛཿཧཱུཾ་བཾ་ཧོཿནི་སེམས་དཔའ་ཆེན་པོ་སྤྱན་དྲང་བ་དང་།
གཞུག་པ་དང་། བཅིང་བ་དང་དབང་དུ་བྱ་བ་རྣམས་ཀྱི་སྙིང་པོའོ་ཞེས་བྱ་བ་དང་ས་མ་ཡ་སྟྭཾ་ཞེས་བརྗོད་པས། རྒྱབ་ཏུ་ཟླ་བ་གྲུབ་ནས་ནི། །ཞེས་བྱ་བ་ནི། རྡོ་རྗེ་སེམས་དཔའི་དམ་ཚིག་གི་ཕྱག་རྒྱ་བཅིངས་ལ། ཛཿཧཱུཾ་བཾ་ཧོཿཞེས་བརྗོད་དེ། ཡེ་ཤེས་སེམས་དཔའ་རང་གི་ལུས་ལ་བཅུག་

ལ། ས་མ་ཡ་སྟྭཾ་ཞེས་བྱ་བས་བསྐུལ་བར་བྱ་སྟེ། འདས་པར་མི་བྱ་བའི་དོན་ནི་ས་མ་ཡ་ཞེས་བྱ་བའི་སྒྲས་བཤད་ཀྱི། འདིར་བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོའི་ཚུལ་ལ་བྱ་བར་མི་འདོད་དོ། །དེ་ཡང་བཅོམ་ལྡན་འདས་ཀྱིས་ཕྱག་རྒྱ་ཆེན་
པོའི་དབང་དུ་མཛད་ནས། དེ་བཞིན་གཤེགས་པ་ཀུན་གྱིས་ཀྱང་། །འདའ་བ་རུ་ནི་མི་མཛད་པས། །ཕྱག་རྒྱ་དམ་ཚིག་ཡིན་པར་བཤད། །ཡིད་ཀྱིས་གཟུགས་ནི་བརྟན་ཕྱིར་རོ། །ཞེས་གསུངས་པ་ཡིན་ནོ། །དེས་ན་འདི་སྐད་སྟོན་པ་ཡིན་ཏེ། བཅོམ་ལྡན་འདས་རྡོ་རྗེ་
སེམས་དཔའ་བྱང་ཆུབ་ཀྱི་མཚན་ཉིད་ཅན་གྱི་སྐུའི་རང་བཞིན་ཁྱེད་ནི་དམ་ཚིག་ཡིན་གྱི་འཁོར་བ་ལ་གནས་པ་གཞན་དག་ནི་མ་ཡིན་ནོ། །དེ་སྐད་དུ་ཡང་བཅོམ་ལྡན་འདས་སེམས་ནི་འདོད་ཆགས་ཆེན་པོ་སྟེ། འདི་ནི་ལྷ་ཡིན་ནོ་ཞེས་གསུངས་པས་སོ། །རྒྱབ་ཏུ་ཟླ་བ་བསྒྲུབས་ནས་
ནི། །ཞེས་བྱ་བ་ནི་འོད་ཀྱི་དཀྱིལ་འཁོར་དུ་གྱུར་པའི་ཟླ་བའི་དཀྱིལ་འཁོར་བསྐྱེད་པའམ་དགོད་པར་བྱའོ་ཞེས་བྱ་བའི་དོན་ཏོ། །སྐད་ཀྱི་དབྱིངས་ནི་དོན་དུ་མ་དང་ལྡན་པ་ཡིན་ནོ་ཞེས་བཤད་པའི་ཕྱིར་རོ། །དེར་བདག་སེམས་དཔའི་ལུས་སུ་བསྒོམ། །ཞེས་བྱ་བ་ནི་རང་གི་ལུས་ཀྱི་ནང་
དུ་ཆུད་པའི་སེམས་དཔའ་དེར་བདག་ཉིད་བསྒོམ་པ་ནི། དེ་དང་ལྷན་ཅིག་ཏུ་ཆུ་དང་འོ་མ་ལྟར་གཅིག་ཏུ་གྱུར་པར་བསྒོམ་པར་བྱ་སྟེ། སེམས་དཔའ་ནི་རྡོ་རྗེ་སེམས་དཔའོ། །ཇི་སྐད་བརྗོད་ཅིང་ཞེ་ན། ས་མ་ཡ་སྟྭཾ་ཨ་ཧཾ་བརྗོད་ཅེས་བྱ་བ་སྟེ། ས་མ་ཡ་སྟྭཾ་ནི་བཤད་ཟིན་ཏོ། །
དེས་ན་འདི་སྐད་སྟོན་པ་ཡིན་ཏེ། ཇི་སྐད་དུ་བཤད་པའི་དམ་ཚིག་གི་ཚུལ་ཁྱེད་གང་ཡིན་པ་དེ་ནི་བདག་ཡིན་ལ་བདག་གང་ཡིན་པ་དེ་ནི་སེམས་དཔའ་ཡིན་ནོ་ཞེས་བྱ་བ་སྟེ། འདིས་ནི་བཅོམ་ལྡན་འདས་དང་ལྷན་ཅིག་གཅིག་ཏུ་གྱུར་པར་ལྷག་པར་མོས་པར་བསྒྲུབས་པས་བསྒོམ་པའི་རབ་ཀྱི་
མཐར་ཐུག་པ་ལས་བྱུང་བ་ཕྱག་རྒྱ་ཆེན་པོ་གྲུབ་པ་ཡིན་ཞེས་བྱ་བ་འདི་ཡང་སྟོན་པ་ཡིན་ནོ། །ད་ནི་རྡོ་རྗེ་རྒྱལ་པོ་ལ་སོགས་པའི་སྒྲུབ་པ་བསྟན་པར་བྱ་བའི་ཕྱིར་སེམས་དཔའ་གང་གི་ཞེས་བྱ་བ་ལ་སོགས་པ་གསུངས་པ་ཡིན་ཏེ། སེམས་དཔའ་གང་གི་ཞེས་བྱ་བ་ནི་རྡོ་རྗེ་རྒྱལ་པོ་ལ་

སོགས་པ་ནས་རྡོ་རྗེ་འབེབས་པའི་བར་གྱིའོ། །ཕྱག་རྒྱ་གང་ཞེས་བྱ་བ་ནི་རྡོ་རྗེ་ལྕགས་ཀྱུའི་མཚན་མའི་ཕྱག་རྒྱ་ནི་རྡོ་རྗེ་རྒྱལ་པོའིའོ་ཞེས་བྱ་བ་ནས་རྡོ་རྗེ་དྲིལ་བུ་ནི་རྡོ་རྗེ་འབེབས་པའིའོ་ཞེས་བྱ་བའི་བར་དུའོ། །དེ་ནི་བདག་ཏུ་བསྒོམས་ནས་ཀྱང་། །ཞེས་བྱ་བ་ནི་བཛྲ་ཨཾ་ཀུ་ཤོ྅ཧཾ་ཞེས་
བྱ་བ་ནས། བཛྲ་གྷཎྚོ྅ཧཾ་ཞེས་བྱ་བའི་བར་དུའོ། །ཡང་མཚན་མའི་ཕྱག་རྒྱ་དེ་དག་ཀྱང་བཛྲ་ར་ཛོ྅ཧཾ་ཞེས་བྱ་བ་ནས། བཛྲ་ཨཱ་བེ་ཤོ྅ཧཾ་ཞེས་བྱ་བའི་བར་དུ་བསྒོམ་པར་བྱ་སྟེ། འདི་དག་གི་བསྒྲུབ་པར་བྱ་བ་དང་། དངོས་གྲུབ་ནི་སྔ་མ་བཞིན་ནོ། །འདིར་ཕྱག་རྒྱ་ཆེན་པོ་
བསྒོམ་པ་ནི་སྔགས་བཟླས་པ་དང་བཅས་པས་བྱའོ་ཞེས་བསྟན་པའི་ཕྱིར། རྡོ་རྗེའི་བཟླས་པས་བསྒྲུབ་པར་བྱ། །ཞེས་བྱ་བ་གསུངས་པ་ཡིན་ཏེ། འདིར་འོག་ནས་བཤད་པའི་མཚན་ཉིད་ཅན་གྱི་རྡོ་རྗེའི་བཟླས་པས་སྔགས་ཐམས་ཅད་བཟླས་པར་བྱ་ཞིང་གཞན་དུ་མ་གྱུར་པས་
བསྒོམ་པར་བྱའོ་ཞེས་སྟོན་ཏོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། བཛྲ་རཱ་ཛ་ཞེས་ཟློས་ཤིད་ཆོས་ཐམས་ཅད་བདག་མེད་པར་བསྒོམ་པར་བྱའོ། །དེ་ནས་ཟླ་བའི་དཀྱིལ་འཁོར་གྱི་རྣམ་པར་རོ། །དེའི་སྟེང་དུ་ཟླ་བའི་དཀྱིལ་འཁོར་
གཉིས་པ་སྟེ། དེ་དག་ཀྱང་རྡོ་རྗེ་རྒྱལ་པོའི་སྙིང་པོ་དང་བཅས་པ་ལས་རྡོ་རྗེ་རྩེ་ལྔ་པ་དེ་ཉིད། བཛྲ་རཱ་ཛ་ཞེས་བརྗོད་དེ། རྡོ་རྗེ་ལྕགས་ཀྱུ་དེའི་དབུས་སུ་བཛྲ་རཱ་ཛ་ཞེས་བྱ་བ་བཀོད་ལ་བཛྲ་ཨཾ་ཀུ་ཤོ྅ཧཾ་ཞེས་ང་རྒྱལ་བསྐྱེད་དེ། རྡོ་རྗེ་ལྕགས་ཀྱུ་དེ་སེམས་དཔར་བྱིན་གྱིས་བརླབ་པའི་སྦྱོར་
བས་རྡོ་རྗེ་སེམས་དཔར་བདག་ཉིད་བསྒོམས་ནས། རྡོ་རྗེ་སེམས་དཔའ་དེ་ཉིད་བཛྲ་རཱ་ཛ་ཞེས་བྱ་བས་རྡོ་རྗེ་རྒྱལ་པོར་བདག་ཉིད་བསྒོམས་ནས། མ་ཧཱ་ས་མ་ཡ་སཏྭ་ཧཾ་ཞེས་བརྗོད་ལ། ས་མ་ཡོ྅ཧཾ་ཞེས་བྱ་བས་རྡོ་རྗེ་རྒྱལ་པོའི་དམ་ཚིག་གི་ཕྱག་རྒྱ་བཅིང་བར་བྱའོ། །དེ་ནས་དམ་
ཚིག་གི་ཕྱག་རྒྱ་དེ་ཉིད་དང་ས་མ་ཡ་སཏྭ་ཨ་དྷི་ཏིཥྛ་སྭ་མཱཾ་ཞེས་བྱ་བས། བདག་ཉིད་བྱིན་གྱིས་བརླབས་ནས་རྡོ་རྗེ་ལྕགས་ཀྱུ་ཐོགས་ལ་དེ་བཞིན་གཤེགས་པ་ཐམས་ཅད་འགུགས་ཤིང་སྐུ་གསུང་ཐུགས་རྡོ་རྗེ་རྒྱལ་པོར་བདག་ཉིད་བསྐྱེད་ནས། བཛྲ་རཱ་ཛ་ཨཿཞེས་བྱ་བས་མདུན་དུ་

ཟླ་བའི་དཀྱིལ་འཁོར་དེའི་སྟེང་དུ་རྡོ་རྗེ་ལྕགས་ཀྱུ་སྤྲུལ་ལ། བཛྲ་ཨཾ་ཀུ་ཤོ྅ཧཾ་ཞེས་བྱ་བས་ང་རྒྱལ་བསྐྱེད་དེ། དེ་ཉིད་བཛྲ་རཱ་ཛོ྅ཧཾ་ཞེས་བྱ་བས་རྡོ་རྗེ་རྒྱལ་པོར་རྣམ་པར་བསམས་ཏེ། དེ་ཉིད་དུ་རྡོ་རྗེ་ལྕགས་ཀྱུ་ལ་སོགས་པས་དེ་དགུག་པ་དང་། གཞུག་པ་དང་།
བཅིང་བ་དང་། དབང་དུ་བྱས་ལ་དེའི་དམ་ཚིག་གི་ཕྱག་རྒྱ་དང་། བཛྲ་རཱ་ཛ་དྲྀ་ཤྱ་ཞེས་བྱ་བས་བལྟ་བར་བྱས་ལ། ཕྱག་རྒྱ་དེ་ཉིད་དང་ཛཿཧཱུཾ་བཾ་ཧོཿཞེས་ཟློས་ཤིང་རང་གི་ལུས་ལ་གཞུག་པར་བྱའོ། །ཡང་དེ་ཉིད་དང་ས་མ་ཡ་སྟྭཾ་ཞེས་ཟློས་ཤིང་རྒྱབ་ཏུ་ཟླ་བ་བསམ་པར་བྱ་སྟེ། ས་མ་
ཡ་སྟྭ་ཞེས་བརྗོད་པས། །རྒྱབ་ཏུ་ཟླ་བ་གྲུབ་ནས་ནི། །དེར་བདག་སེམས་དཔའི་ལུས་སུ་བསྒོམ། །ས་མ་ཡ་སྟྭཾ་ཨ་ཧཾ་བརྗོད། །བཛྲ་རཱ་ཛ་ཞེས་ཀྱང་བརྗོད་དོ། །དེ་བཞིན་དུ་རྡོ་རྗེ་འབེབས་པའི་བར་དུ་བསྒྲུབ་པར་བྱའོ། །ཛཿཧཱུཾ་བཾ་ཧོཿཞེས་བརྗོད་པས། ལུས་ལ་སངས་རྒྱས་ཀུན་
གཞུག་གོ། །ཞེས་བྱ་བ་ནི་དེ་ལྟར་བཤད་མ་ཐག་པའི་ཚུལ་གྱིས་རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོ་རབ་ཏུ་བསྒྲུབས་ལ་རྡོ་རྗེ་བསྡུ་བའི་ཕྱག་རྒྱ་བཅིངས་ལ་ཛཿཧཱུཾ་བཾ་ཧོཿཞེས་བརྗོད་དེ་རང་གི་ལུས་ལ་བྱེ་མ་ལ་བུམ་པའི་ཆུ་རྒྱུན་བླུགས་པ་ལྟར་སངས་རྒྱས་ཐམས་ཅད་གཞུག་པར་
བྱའོ། །ཇི་ལྟར་གཞུག་པར་བྱ་ཞེ་ན། ལེགས་པའི་ཆོ་ག་ཡིད་ཀྱིས་ནི། །ཞེས་བྱ་བ་གསུངས་པ་ཡིན་ཏེ། དེ་བཞིན་གཤེགས་པ་ཐམས་ཅད་རང་གི་ལུས་ལ་གཞུག་པའི་རྣམ་པར་ལེགས་པར་མཉམ་པར་གཞག་པའི་སྦྱོར་བས་ཡིད་ཀྱིས་ཛཿཧཱུཾ་བཾ་ཧོཿཞེས་བརྗོད་པར་བྱའོ་
ཞེས་བྱ་བའི་ཐ་ཚིག་གོ། །གཞན་ཡང་སྒྲུབ་པ་ཆེན་པོ་ནི། །ཞེས་བྱ་བ་ནི་སྔར་གྱི་ཕྱག་རྒྱ་ཆེན་པོ་སྒྲུབ་པ་ལ་ལྟོས་ནས། འདི་ནི་དེ་བཞིན་གཤེགས་པ་ཚད་མེད་པ་བཅུག་པའི་སྦྱོར་བས། ཚད་མེད་པས་ཆེ་བའི་སྒྲུབ་པ་གཉིས་པ་ཡིན་ནོ། །དེ་བཞིན་གཤེགས་པའི་
ཟློས་པ་པོས་ནི་མངོན་པར་བྱང་ཆུབ་པ་ལྔའི་རིམ་པས་དེ་བཞིན་གཤེགས་པའི་ཕྱག་རྒྱ་ཆེན་པོ་བཅིངས་ལ་སྒྲུབ་པ་ཆེན་པོ་ཁོ་ན་བྱའི་ཅིག་ཤོས་ནི་མ་ཡིན་ནོ། །དེ་ནས་དེ་བཞིན་གཤེགས་པ་ཐམས་ཅད་བཅུག་ལ་རྡོ་རྗེ་དབྱིངས་ལ་སོགས་པའི་དམ་ཚིག་གི་ཕྱག་རྒྱ་ཡང་བཅིངས་ཏེ། རེ་

རེ་ཞིང་འདི་སྐད་ཅེས་བརྗོད་དོ། །བཛྲ་དྷཱ་ཏུ་དྲྀ་ཤྱ་ཛཿཧཱུཾ་བཾ་ཧོཿས་མ་ཡ་སྟྭཾ། ས་མ་ཡ་སྟྭཾ་ཨ་ཧཾ། བཛྲ་དྷཱ་ཏུ། དེ་ནས་ལྕེ་ལ་ཡི་གེ་ཧཱུཾ་ལས་རྡོ་རྗེ་རྩེ་ལྔ་པ་དཀར་པོ་བསམས་ཏེ། བཛྲ་ཛི་ཧྭ་ཞེས་བྱ་བས་བྱིན་གྱིས་བརླབས་ལ། རྣམ་པར་སྣང་མཛད་ལ་སོགས་པ་ནས་རྡོ་རྗེ་འབེེབས་
པའི་བར་གྱིས་ལྗགས་ལ་རང་རང་གི་ཆོས་ཀྱི་ཕྱག་རྒྱ་བསམ་པར་བྱའོ། །དེ་ནས་གོ་རིམས་ཇི་ལྟ་བ་བཞིན་དུ་ལས་ཀྱི་ཕྱག་རྒྱ་དང་། ཕྱག་རྒྱ་ཆེན་པོ་བཅིངས་ལ་ཡང་དེ་རྣམས་ལ་དེ་བཞིན་གཤེགས་པ་རྣམས་དང་། རྡོ་རྗེ་སེམས་དཔའ་ལ་སོགས་པ་རྣམས་ལ། རང་རང་གི་བྱིན་གྱིས་
བརླབ་པའི་ཕྱག་རྒྱ་རྣམས་ཀྱིས་བྱིན་གྱིས་བརླབས་ལ། རང་རང་གི་དབང་བསྐུར་བས་དབང་བསྐུར་ཏེ། རང་གི་མཆོད་པ་རྣམས་ཀྱིས་ཡང་དག་པར་མཆོད་ལ། བཟླས་པའི་དོན་གྱིས་བསྒོམ་པ་བྱས་ཏེ། འདི་ནི་རྗེས་སུ་རྣལ་འབྱོར་རོ། །དེ་ལྟར་རང་གི་སློབ་མ་རྣམས་
ཀྱིས་རྣལ་འབྱོར་དང་། རྗེས་སུ་རྣལ་འབྱོར་བཤད་ནས་སློབ་དཔོན་རྣམས་ཀྱིས་དཀྱིལ་འཁོར་བསྒྲུབ་པ་དང་། རང་གི་ལྷ་བསྒྲུབ་པའི་རྣལ་འབྱོར་ཆེན་པོའི་ཆོ་ག་བརྗོད་པར་བྱ་སྟེ། དཔལ་རྡོ་རྗེ་སེམས་དཔའི་སྦྱོར་བ་ཇི་ལྟ་བ་བཞིན་དུ་བྱས་ལ། དེའི་ཕྱག་རྒྱ་ཆེན་པོ་བཅིངས་
ཏེ། དེ་ཉིད་ཀྱི་ཐུགས་ཀར་དཀྱིལ་འཁོར་ཆེན་པོ་སྤྲུལ་ལ་དངོས་གྲུབ་ཀྱི་རྡོ་རྗེའི་བརྟུལ་ཞུགས་ཀྱི་བར་དུ་རྗེས་སུ་སྤྱད་ནས། ཡང་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ཏེ། རང་གི་ལུས་ལ་ལྷ་ཐམས་ཅད་ཀྱི་གནས་སུ། ས་མ་ཡ་ཨཿཞེས་བརྗོད་ཅིང་ཟླ་བའི་དཀྱིལ་འཁོར་
བསྐྱེད་ནས་རང་གི་གནས་ན་གནས་པའི་ཟླ་བའི་དཀྱིལ་འཁོར་གྱི་སྟེང་དུ་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་བསམས་ལ། ཡིད་ཀྱིས་འདུག་སྟེ། རང་གི་ལུས་ལས་ཕྱི་རོལ་དུ་བཛྲ་སཏྭ་ཨཿཞེས་བྱ་བས་མདུན་དུ་ཟླ་བའི་དཀྱིལ་འཁོར་གྱི་སྟེང་དུ་རྡོ་རྗེ་སྤྲུལ་ལ། བཛྲོ྅ཧཾ་ཞེས་
བྱ་བས་རྡོ་རྗེའི་ང་རྒྱལ་བསྒོམས་ཏེ། རྡོ་རྗེ་དེ་ཉིད་བཛྲ་སཏྭ་ཧཾ་ཞེས་བྱ་བས་རྡོ་རྗེ་སེམས་དཔར་བདག་ཉིད་བསྒོམ་པར་བྱའོ། །དེ་བཞིན་དུ་རང་གི་གནས་ན་གནས་པའི་ཟླ་བའི་དཀྱིལ་འཁོར་གྱི་སྟེང་དུ། རྡོ་རྗེ་འབེབས་པའི་ཕྱག་རྒྱ་ཆེན་པོ་བསམས་ལ། ཡིད་ཀྱིས་འདུག་སྟེ། རང་

གི་ལུས་ལས་ཕྱི་རོལ་དུ་བཛྲ་ཨཱ་བེ་ཤ་ཨཿཞེས་བྱ་བས་མདུན་དུ་ཟླ་བའི་དཀྱིལ་འཁོར་གྱི་སྟེང་དུ་རྡོ་རྗེ་དྲིལ་བུ་སྤྲུལ་ལ་བཛྲ་གྷཎྚོ྅ཧཾ་ཞེས་བྱ་བས་རྡོ་རྗེ་དྲིལ་བུའི་ང་རྒྱལ་བསྒོམ་སྟེ་བཛྲ་ཨཱ་བེ་ཤོ྅ཧཾ་ཞེས་བྱ་བས་རྡོ་རྗེ་འབེབས་པར་བདག་ཉིད་བསྐྱེད་པའོ། །དེ་ནས་
དཔལ་རྡོ་རྗེ་སེམས་དཔའ་ལ་སོགས་པའི་ཡེ་ཤེས་སེམས་དཔའ་ཇི་ལྟ་བ་བཞིན་དུ་མདུན་དུ་བསམས་ལ། རྡོ་རྗེ་སེམས་དཔའ་ལ་སོགས་པའི་སྐུ་ལ་རྡོ་རྗེ་ལྕགས་ཀྱུ་ལ་སོགས་པས་དགུག་པ་དང་གཞུག་པ་དང་། བཅིང་བ་དང་། དབང་དུ་བྱས་ལ། དེ་རྣམས་ཀྱི་དམ་ཚིག་གི་
ཕྱག་རྒྱ་རྣམས་ཀྱིས་དང་པོར་བལྟ་བ་བྱས་ནས། ཛཿཧཱུཾ་བཾ་ཧོཿཞེས་བརྗོད་དེ་རང་གི་གནས་ན་གནས་པའི་ཟླ་བའི་དཀྱིལ་འཁོར་གྱི་སྟེང་ན་བཞུགས་པའི་སྐུ་ལ་བཅུག་ལ། ས་མ་ཡ་སྟྭཾ་ཞེས་བྱ་བས་འོད་ཀྱི་དཀྱིལ་འཁོར་བསྐྱེད་དེ། ས་མ་ཡ་སྟྭཾ་ཨ་ཧཾ་བཛྲ་སཏྭ་ཞེས་བརྗོད་པ་
ནས། ཇི་སྲིད་ས་མ་ཡ་སྟྭཾ་ཨ་ཧཾ་བཛྲ་ཨ་བེ་ཤ་ཞེས་བྱ་བའི་བར་དུ་བརྗོད་ལ། དེ་རྣམས་དང་ལྷན་ཅིག་ཏུ་ཆུ་དང་འོ་མ་ལྟར་ཐ་མི་དད་པར་བདག་ཉིད་བསྒོམ་པར་བྱའོ། །དེ་ནས་དེ་རྣམས་ལ་ཆོས་དང་ལས་དང་། ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་ལ། ཡིད་ཀྱིས་ལེགས་པའི་
སྦྱོར་བས་རྟེན་དང་བརྟེན་པའི་ལྷ་ཐམས་ཅད་ཀྱི་སྐུ་ལ་དེ་བཞིན་གཤེགས་པ་རྣམས་བཅུག་སྟེ། སྔ་མ་བཞིན་དུ་རབ་ཏུ་བསྒྲུབས་ལ། ཆོས་དང་། ལས་དང་། ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་སྟེ། ཡང་རྡོ་རྗེ་སེམས་དཔའ་ལ་སོགས་པ་ལ་རིགས་ཀྱི་ཕྱག་རྒྱ་བཞིས་བྱིན་གྱིས་
བརླབས་ལ། དེ་བཞིན་གཤེགས་པ་རྣམས་རང་གི་བྱིན་གྱི་རླབས་པས་བྱིན་གྱིས་བརླབས་ཏེ་སྔ་མ་བཞིན་དུ་དབང་བསྐུར་ལ། མཆོད་པ་ཐམས་ཅད་ཀྱིས་ཡང་དག་པར་མཆོད་ནས། ཕྱག་རྒྱ་བཞི་བྱས་ལ་དེ་བཞིན་དུ་བཟླས་བརྗོད་དང་བསྒོམ་པར་བྱ་བའོ། །དེ་བཞིན་དུ་རྣམ་པར་སྣང་
མཛད་ཀྱི་རྣལ་འབྱོར་པས་ཀྱང་རྣལ་འབྱོར་ཆེན་པོ་བྱས་ལ་ཆོ་ག་ཐམས་ཅད་རྗེས་སུ་སྤྱད་པར་བྱའོ། །དེ་ལ་གནས་ཀྱི་ངེས་པ་ནི་འདི་ཡིན་ཏེ། རྣལ་འབྱོར་པའི་སྙིང་གའི་ཟླ་བར་མདུན་དུ་རྡོ་རྗེ་སེམས་དཔའ། གཡས་ལོགས་སུ་རྡོ་རྗེ་རྒྱལ་པོ། གཡོན་ལོགས་སུ་རྡོ་རྗེ་ཆགས་པ། རྒྱབ་

ཏུ་རྡོ་རྗེ་ལེགས་པ། དཔྲལ་བར་རྡོ་རྗེ་རིན་ཆེན། མགོ་བོའི་རྒྱབ་ཏུ་ཉི་མ། ཕྲག་པ་གཉིས་སུ་དབལ། སོའི་ཕྲེང་བ་གཉིས་སུ་བཞད་པ། ལྐོག་མར་ཆོས། ནུ་མ་གཉིས་ཀྱི་བར་དུ་རྣོན་པོ། ལྟེ་བར་རྒྱུ། ལྕེ་ལ་སྨྲ་བ། སྤྱི་བོར་ལས། ནམ་ཚོང་གཉིས་སུ་རྡོ་རྗེ་སྲུང་བ། ཁར་
གནོད་སྦྱིན། དཀུར་ཁུ་ཚུར་རོ། །སྙིང་ག་དང་། སྨིན་མཚམས་དང་། ལྐོག་མ་དང་། སྤྱི་བོར་སེམས་མ་རྡོ་རྗེ་མ་ལ་སོགས་པའོ། །རྡོ་རྗེ་སེམས་དཔའ་ལ་སོགས་པའི་གཡོན་ལོགས་སུ་སྒེག་མོ་ལ་སོགས་པའོ། །ཡང་རྣལ་འབྱོར་པའི་མདོམས་ཀྱི་གསང་བར་བདུག་པ་
མ། མགོར་མེ་ཏོག་མ། མིག་གཉིས་སུ་མར་མེ་མ། ནུ་མ་དང་བྲང་དང་སྙིང་གར་བྱུག་པ་མ། བརླ་གཡས་པར་རྡོ་རྗེ་ལྕགས་ཀྱུ། བརླ་གཡོན་པར་རྡོ་རྗེ་ཞགས་པ། བྱིན་པ་གཡས་པར་ལྕགས་སྒྲོག །བྱིན་པ་གཡོན་པར་འབེབས་པའོ། །དེ་བཞིན་གཤེགས་པ་རྣམས་ནི་ལུས་
ཐམས་ཅད་ལ་ཁྱབ་པར་བཞུགས་པ་ཡིན་ནོ། །རིགས་རིགས་སུ་ངེས་པ་ཁོ་ནར་དཀྱིལ་འཁོར་བྲི་བ་ན། རང་གི་འཁོར་ལོས་སྒྱུར་བའི་སྦྱོར་བ་བྱས་ལ། རྣལ་འབྱོར་ཆེན་པོ་དང་ལྡན་པས་བྱའི། གཞན་དུ་ན་དཀྱིལ་འཁོར་འགྲུབ་པར་མི་འགྱུར་ཏེ། བཅོམ་ལྡན་འདས་
ཀྱིས་དེ་བས་འབད་པ་ཐམས་ཅད་ཀྱིས། །རྣལ་འབྱོར་ཆེན་པོ་བརྩམ་པར་བྱ། །ཞེས་གསུངས་པ་ཡིན་ནོ། །དེ་ནས་འདི་དག་གི་ལས་བཤད་དེ་ཞེས་བྱ་བ་ནི་རྣམ་པར་སྣང་མཛད་ལ་སོགས་པ་ཕྱག་རྒྱ་ཆེན་པོ་ཇི་སྐད་དུ་བཤད་པའི་བསྒྲུབས་པས་གྲུབ་པ་རྣམས་ཀྱི་གང་གིས་
གང་འགྲུབ་པ་སྟེ། སངས་རྒྱས་ཉིད་ལ་སོགས་པའི་ཚུལ་འབྲས་བུ་ཡིན་ལ། དེའི་ཕྱག་རྒྱའི་ལས་དེ་བཤད་པའོ། །དེ་ཇི་ལྟ་བུ་ཞེ་ན། རྡོ་རྗེའི་ལས་ཞེས་བྱ་བ་གསུངས་ཏེ། མི་ཕྱེད་པའི་ལས་ནི་རྡོ་རྗེའི་ལས་སོ། །དེ་ཉིད་ཀྱིས་ན་གོང་ན་གཞན་མེད་ཅིང་མཆོག་ཏུ་གྱུར་
པས་ན་བླ་ན་མེད་པའོ། །སངས་རྒྱས་རྗེས་སུ་དྲན་གྲུབ་ན། །སངས་རྒྱས་ཉིད་དུ་མྱུར་དུ་འགྱུར། །ཞེས་བྱ་བ་ནི་དེ་བཞིན་གཤེགས་པ་ལྔའི་ཕྱག་རྒྱ་ཆེན་པོ་བསྒོམ་པ་ནི། སངས་རྒྱས་རྗེས་སུ་དྲན་པ་སྟེ། དེས་ན་གང་གི་ཚེ་དེ་བཞིན་གཤེགས་པ་དང་འདྲ་བར་འགྲུབ་པར་

གྱུར་པ་དེའི་ཚེ། སངས་རྒྱས་རྗེས་སུ་དྲན་པ་གྲུབ་པ་ཞེས་བྱའོ། །དེས་དེ་ཡང་དག་པར་གྲུབ་ན་སངས་རྒྱས་ཉིད་དུ་འགྱུར་བ་སྟེ། ཚེ་དེ་ཉིད་ལ་སངས་རྒྱས་ཉིད་ཐོབ་པར་འགྱུར་རོ། །སེམས་དཔའི་རྡོ་རྗེ་མ་གྲུབ་ན། །ཕྱག་རྒྱ་ཀུན་གྱི་བདག་པོར་འགྱུར། །ཞེས་
བྱ་བ་ནི་རྡོ་རྗེ་སེམས་དཔའི་གཟུགས་སུ་སེམས་དཔའ་རྡོ་རྗེ་མའི་ཕྱག་རྒྱ་ཆེན་པོ་དེ་རྡོ་རྗེ་བསྙེམས་པ་དང་འདྲ་བར་བསྒོམས་པ་དེས་དེ་དང་འདྲ་ཞིང་གང་གི་ཚེ་འགྲུབ་པར་གྱུར་པ་དེའི་ཚེ། ལུས་དེ་ཉིད་ཀྱིས་ཕྱག་རྒྱ་ཀུན་གྱི་བདག་པོ་རྡོ་རྗེ་སེམས་དཔར་འགྱུར་རོ། །རིན་ཆེན་རྡོ་རྗེ་མའི་ཕྱག་རྒྱ་
རྒྱས། །དེ་ནི་རྡོ་རྗེ་ཀུན་དབང་འགྱུར། །ཞེས་བྱ་བ་ནི་རིན་ཆེན་རྡོ་རྗེ་མ་ནི་འཕགས་པ་ནམ་མཁའི་སྙིང་པོའི་གཟུགས་ཅན་མ་སྟེ། དེ་བཅིངས་ལ་དེ་བསྒོམས་པས་དེ་དང་འདྲ་བར་གྲུབ་ཅིང་རྡོ་རྗེ་རིན་ཆེན་མའི་ཕྱག་རྒྱ་དེ་གྲུབ་བས། དེ་བདེན་པར་རིན་པོ་ཆེ་ཀུན་ལ་དབང་བ་སྟེ། རིན་པོ་
ཆེའི་རིགས་ཐམས་ཅད་ཀྱི་བདག་པོ་ནམ་མཁའི་སྙིང་པོར་རྣལ་འབྱོར་པ་དེ་འགྱུར་རོ། །ཆོས་ཀྱི་རྡོ་རྗེ་མ་གྲུབ་ན། །སངས་རྒྱས་ཆོས་ནི་འཛིན་པར་འགྱུར། །ཞེས་བྱ་བ་ནི་རྡོ་རྗེ་ཆོས་ཀྱི་ཕྱག་རྒྱ་ཆེན་པོ་ཉིད་ལས་དང་ལྡན་པ་ནི་ཆོས་ཀྱི་རྡོ་རྗེ་མའི་ཕྱག་རྒྱ་ཆེན་པོ་སྟེ། དེ་བཅིངས་ལ་
རྡོ་རྗེ་ཆོས་མའི་གཟུགས་ཅན་བསྒོམས་ནས། གང་གི་ཚེ་དེའི་གཟུགས་སུ་གྲུབ་པ་འགྲུབ་པར་འགྱུར་བ་དེའི་ཚེ། འདི་ཆོས་ཀྱི་རྡོ་རྗེ་མ་གྲུབ་པས་སངས་རྒྱས་ཀྱི་ཆོས་འཛིན་པའི་འཇིག་རྟེན་དབང་ཕྱུག་ཏུ་འགྱུར་རོ། །ལས་ཀྱི་རྡོ་རྗེ་མའི་ཕྱག་རྒྱས། རྡོ་རྗེ་ལས་ནི་བྱེད་པར་འགྱུར། །
ཞེས་བྱ་བ་ནི་བཅོམ་ལྡན་འདས་རྡོ་རྗེ་ལས་ཀྱི་ཕྱག་རྒྱ་ཆེན་པོ་ནི་རྡོ་རྗེ་ལས་མའི་གཟུགས་ཅན་དེ་བཅིངས་ལ་ལས་ཀྱི་རྡོ་རྗེ་མ་བསྒོམས་པས་དེ་དང་འདྲ་བའི་དངོས་གྲུབ་གྲུབ་པས་ཕྱག་རྒྱ་དེས་ངེས་པར་རྡོ་རྗེ་ལས་བྱེད་པར་འགྱུར་ཏེ། སངས་རྒྱས་རྣམས་ཀྱི་ལས། སངས་རྒྱས་མཆོད་པ་དང་།
སེམས་ཅན་གྱི་དོན་གྱི་ཚུལ་དེ་བྱེད་པས་ན། རྡོ་རྗེའི་ལས་ནི་བྱེད་པར་འགྱུར། །ཞེས་བྱའོ། །སེམས་དཔའི་ཕྱག་རྒྱ་བཅིངས་པ་ཡིས། །རྡོ་རྗེ་སེམས་དཔའ་འགྲུབ་པར་འགྱུར། །ཞེས་བྱ་བ་ནི་བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་ནི་སེམས་དཔའི་ཕྱག་རྒྱ་སྟེ།

དེ་རྣམ་པར་བསྒོམས་ནས་གང་གི་ཚེ་འགྲུབ་པར་གྱུར་ན་ཡང་དེ་བཅིངས་ནས་བསྒོམས་པ་དེའི་ཚེ། རྡོ་རྗེ་སེམས་དཔའ་དེ་འགྲུབ་པར་འགྱུར་རོ། །འདིའི་འོག་ནས་བཤད་པའི་སྤྱན་འདྲེན་པ་ལ་སོགས་པའི་མཚན་ཉིད་ཐམས་ཅད་ལ་ཡང་དེ་དང་འདྲ་བའི་དངོས་གྲུབ་གྲུབ་པ་ཉིད་ཡིན་པར་ཕྱིས་
བཤད་པའི་ལས་ཐམས་ཅད་ལ་སྦྱར་བར་བྱའོ། །རྡོ་རྗེ་འདྲེན་པའི་ཆོ་ག་ཡིས། །ཞེས་བྱ་བ་ནི་རྡོ་རྗེ་རྒྱལ་པོའི་ཕྱག་རྒྱ་ཆེན་པོའི་སྦྱོར་བ་སྟེ། དེས་རྡོ་རྗེ་འཛིན་པའི་ལས་ཞེས་བྱ་བ་སངས་རྒྱས་འདྲེན་ཞིང་འགུགས་པར་འགྱུར་རོ། །རྡོ་རྗེ་ཆགས་པའི་ཕྱག་རྒྱ་ཆེན་པོ་གྲུབ་པས་ནི་སངས་
རྒྱས་ཐམས་ཅད་དེ། དེ་བཞིན་གཤེགས་པ་ཐམས་ཅད་ཆོས་བདག་མེད་པའི་ཆགས་པས་མཉེས་ཤིང་དབང་དུ་བྱེད་དོ། །རྡོ་རྗེ་ལེགས་པའི་ཆོ་ག་ཡིས། །ཞེས་བྱ་བ་རྡོ་རྗེ་ལེགས་པའི་ཕྱག་རྒྱ་ཆེན་པོ་གྲུབ་པས་ནི། སངས་རྒྱས་ཐམས་ཅད་དགྱེས་པར་བྱེད་དོ། །རིན་ཆེན་
ཕྱག་རྒྱ་ནི་འཕགས་པ་ནམ་མཁའི་སྙིང་པོའི་ཕྱག་རྒྱ་ཆེན་པོའོ། །དེའི་ཆོ་ག་ནི་བྱ་བ་རྣམས་རྫོགས་པར་བྱེད་པའོ། །རིན་པོ་ཆེའི་ཕྱག་རྒྱའི་ཆོ་ག་འཕགས་པ་ནམ་མཁའི་སྙིང་པོའི་ཕྱག་རྒྱ་ཆེན་པོ་དེ་གྲུབ་ན། སངས་རྒྱས་རྣམས་དབང་བསྐུར་བ་སྦྱིན་པར་བྱེད་དོ། །དེའི་རང་བཞིན་
ཅན་གཟི་བརྗིད་འདི་ལ་མངའ་བས་ན། རྡོ་རྗེ་གཟི་བརྗིད་དེ། དེ་མྱུར་དུ་འགྱུར་བའོ། །ཇི་ལྟར་འགྱུར་ཞེ་ན། རྡོ་རྗེ་གཟི་བརྗིད་ཆོ་ག་ཡིས། །ཞེས་བྱ་བ་གསུངས་ཏེ། རྡོ་རྗེ་ཉི་མའི་ཕྱག་རྒྱ་ཆེན་པོ་བསྒོམས་པས་ཞེས་བྱ་བའི་ཐ་ཚིག་གོ། །རྡོ་རྗེས་ཉེ་བར་མཚོན་པའི་ཏོག་ནི་རྡོ་རྗེ་
དབལ་ཏེ། དེ་འཛིན་པར་མཛད་པས་ན་རྡོ་རྗེ་དབལ་འཛིན་ཏེ། དེ་བརྟན་ཞིང་གོམས་པར་གྱུར་ན། རེ་བ་རྣམས་ནི་ཡོངས་སུ་སྐོང་། །ཞེས་བྱ་བ་ནི་རྡོ་རྗེ་དབལ་གྱི་ཕྱག་རྒྱ་ཆེན་པོ་བཅིངས་ལ་བསྒོམས་ཏེ་གྲུབ་པར་གྱུར་ནས། ཡང་དེ་ཉིད་བསྟེན་ན་རེ་བ་ཐམས་ཅད་ཡོངས་སུ་རྫོགས་
པར་འགྱུར་རོ་ཞེས་བྱ་བའི་ཐ་ཚིག་གོ། །རྡོ་རྗེ་བཞད་པས་ཞེས་བྱ་བ་ལ་སོགས་པ་ལ། རྡོ་རྗེ་བཞད་པའི་ཆོ་ག་དེ་བསྒོམས་པ་བྱས་པས། རྡོ་རྗེ་བཞད་པའི་ཕྱག་རྒྱ་ཆེན་པོ་གྲུབ་ནས་དེའི་རྗེས་ལ་དེ་བཅིངས་ནས། དེ་བཞིན་གཤེགས་པ་ཐམས་ཅད་ཀྱི་འཛུམ་པ་ཐོབ་པར་འགྱུར་ལ།

འཛུམ་པ་དེས་སངས་རྒྱས་ཀུན་དང་མཉམ་ཞིང་མཚུངས་པར་བཞེད་དེ། སངས་རྒྱས་ཐམས་ཅད་ཀྱི་བཞད་པས་སེམས་ཅན་གྱི་དོན་བྱེད་པར་འགྱུར་རོ། །རྡོ་རྗེ་ཆོས་ནི་གཉིས་སུ་མེད་པའི་ཏིང་ངེ་འཛིན་ཏེ་དེ་འཛིན་པར་མཛད་པས་ན། རྡོ་རྗེ་ཆོས་ནི་འཛིན་པར་འགྱུར། །ཞེས་བྱ་བའོ། །
དེ་ག་ལས་འགྱུར་ཞེ་ན། རྡོ་རྗེ་ཆོས་ཀྱི་ཆོ་ག་ཡིས། །ཞེས་གསུངས་ཏེ། རྡོ་རྗེ་ཆོས་ཀྱི་ཕྱག་རྒྱ་ཆེན་པོ་བསྒོམས་པས་སོ། །རྡོ་རྗེ་རྣོན་པོ་བསྒོམས་པ་ཡིས། །ཞེས་བྱ་བ་ནི་བཅོམ་ལྡན་འདས་རྡོ་རྗེ་རྣོན་པོའི་ཕྱག་རྒྱ་ཆེན་པོ་བཅིངས་ལ། དེ་བསྒོམས་པས་སངས་རྒྱས་ཀུན་གྱི་ཤེས་རབ་ཀྱི་
མཆོག་ཏུ་འགྱུར་ཏེ། ཤེས་རབ་ཀྱིས་ཉོན་མོངས་པ་དང་། ཤེས་བྱའི་སྒྲིབ་པ་ཐམས་ཅད་འཇོམས་པའི་མཆོག་ཡིན་པས་ན། ཤེས་རབ་མཆོག་གོ། །རྡོ་རྗེ་འཁོར་ལོ་བསྟེན་པས་ཞེས་བྱ་བ་ནི་རྣམ་པར་བསྒོམས་པས་སོ། །ཆོས་ཀྱི་འཁོར་ལོ་བསྐོར་བར་འགྱུར། །ཞེས་བྱ་བ་ནི་
དཀྱིལ་འཁོར་སྤྲུལ་པར་བྱེད་པའོ། །རྡོ་རྗེ་གསུང་གི་ཆོ་ག་ཡིས། །ཞེས་བྱ་བ་ནི་རྡོ་རྗེ་སྨྲ་བའི་ཕྱག་རྒྱ་ཆེན་པོའི་སྦྱོར་བས་སོ། །སངས་རྒྱས་གསུང་གི་གྲུབ་པ་ཐོབ། །ཅེས་བྱ་བ་ནི་རྡོ་རྗེ་སྨྲ་བ་ཉིད་དུ་གྲུབ་པའོ། །རྡོ་རྗེ་ལས་མཆོག་བསྒྲུབས་པས་ན། །ཞེས་བྱ་བ་ནི་རྡོ་རྗེ་ལས་མཆོག་གི་
ཕྱག་རྒྱ་ཆེན་པོ་ཡང་དག་པར་བསྒྲུབས་པས་སོ། །རྡོ་རྗེ་ལས་སུ་མྱུར་དུ་འགྱུར། །ཞེས་བྱ་བ་ནི་རྡོ་རྗེ་ལས་ཀྱི་དངོས་གྲུབ་མྱུར་བ་ཉིད་དུ་ཐོབ་པས་སོ། །རྡོ་རྗེ་གོ་ཆ་བསྐོན་པས་ནི། །ཞེས་བྱ་བ་ནི་རྡོ་རྗེ་གོ་ཆའི་ཕྱག་རྒྱ་ཆེན་པོ་བསྒོམས་པའོ། །རྡོ་རྗེའི་སྐུ་ཉིད་ཐོབ་པར་འགྱུར། །ཞེས་
བྱ་བ་ནི་རྡོ་རྗེ་སྐུའི་རང་བཞིན་ཉིད་ཐོབ་པ་སྟེ། རྡོ་རྗེ་བསྲུང་བ་ཐོབ་པར་འགྱུར་རོ་ཞེས་བྱ་བའི་ཐ་ཚིག་གོ། །རྡོ་རྗེ་གནོད་སྦྱིན་ཞེས་བྱ་བ་ལ་སོགས་པ་ལ་རྡོ་རྗེ་གནོད་སྦྱིན་གྱི་ཕྱག་རྒྱ་ཆེན་པོ་བསྒྲུབས་པས་རྡོ་རྗེ་གནོད་སྦྱིན་དང་མཉམ་ཞིང་མཚུངས་པར་འགྱུར་རོ། །ཕྱག་རྒྱ་ཡང་ཡིན་ལ་
ཐམས་ཅད་ཀྱང་ཡིན་པས་ན་སངས་རྒྱས་ཐམས་ཅད་དེ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཕྱག་རྒྱ་ཐམས་ཅད་དོ། །དེ་ཤིན་ཏུ་གྲུབ་པ་འདི་ལ་ཡོད་པས་ན་ཕྱག་རྒྱ་ཐམས་ཅད་འགྲུབ་པ་སྟེ། དེ་ལྟ་བུར་འགྱུར་རོ་ཞེས་བྱ་བར་སྦྱར་རོ། །གང་གིས་ཤེ་ན། རྡོ་རྗེ་ཁུ་ཚུར་

བཅིངས་པས་ནི། །ཞེས་བྱ་བ་གསུངས་ཏེ། རྡོ་རྗེ་ཁུ་ཚུར་གྱི་ཕྱག་རྒྱ་ཆེན་པོ་བཅིངས་སོ། །རྡོ་རྗེ་འཛིན་མ་བསྒྲུབས་པས་ན། །ཞེས་བྱ་བ་ནི་རྡོ་རྗེ་སྒེག་མོའི་ཕྱག་རྒྱ་ཆེན་པོ་གང་ཡིན་པ་དེ་བསྒྲུབས་སོ། །རྡོ་རྗེ་ཆེན་པོ་འདིའི་དགའ་བ་ཐོབ་ཅེས་བྱ་བ་ནི་བྱང་ཆུབ་ཆེན་པོའི་མཚན་ཉིད་ཅན་གྱི་སེམས་ནི་
རྡོ་རྗེ་ཆེན་པོ་སྟེ། དེ་ལ་དགའ་ཞིང་མགུ་བ་གང་ཡིན་པ་དེས་ཐོབ་པར་འགྱུར་བའོ། །རྡོ་རྗེ་ཕྲེང་བ་ནི་རྡོ་རྗེ་ཕྲེང་བ་མའི་ཕྱག་རྒྱ་ཆེན་པོ་གང་ཡིན་པའོ། །དེ་བཅིངས་པ་ནི་གང་གིས་བཅིངས་ཤིང་བསྡམས་པ་ཞེས་བྱ་བའི་དོན་ཏོ། །དེས་ཅིར་འགྱུར་ཞེ་ན། སངས་རྒྱས་ཀུན་གྱིས་དབང་
བསྐུར་འགྱུར། །ཞེས་བྱ་བ་གསུངས་ཏེ། དེ་བཞིན་གཤེགས་པ་ཐམས་ཅད་རྡོ་རྗེ་ཕྲེང་བས་དབང་བསྐུར་བ་སྩོལ་བར་འགྱུར་རོ། །རྡོ་རྗེ་གླུ་མའི་ཆོ་ག་ཡིས། །ཞེས་བྱ་བ་ནི། རྡོ་རྗེ་གླུ་མའི་ཕྱག་རྒྱ་ཆེན་པོའི་སྦྱོར་བས་སོ། །རྡོ་རྗེའི་གླུ་ནི་ལེན་པར་འགྱུར། །ཞེས་བྱ་བ་ནི་བཟོད་
པའི་ཕ་རོལ་ཏུ་ཕྱིན་པའི་བདག་ཉིད་ཅན་རྡོ་རྗེ་གླུ་ལེན་ཅིང་སྐྱེད་པར་བྱེད་དོ། །རྡོ་རྗེ་གར་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །དེ་སྦྱོར་བ་ཡིས་ཞེས་བྱ་བ་ཡང་དག་པར་བསྒོམས་ཤིང་བསྐྱེད་པས་སོ། །སངས་རྒྱས་ཀུན་གྱི་དེ་མཆོད་དོ། །ཞེས་བྱ་བ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་
པའི་མཚན་ཉིད་ཅན་གྱི་བསྒྲུབ་པའི་མཆོད་པ་དེ་ཉིད་ཀྱིས་སོ། །རྡོ་རྗེ་བདུག་པའི་ཆོ་ག་ཡིས། །འགྲོ་བ་ཐམས་ཅད་ཚིམ་པར་བྱེད། །ཅེས་བྱ་བ་ནི་རྡོ་རྗེ་བདུག་པ་མར་རབ་ཏུ་སྦྱོར་བ་ནི་རྡོ་རྗེ་བདུག་པ་མའི་ཆོ་ག་སྟེ། དེའི་ཕྱག་རྒྱ་ཆེན་པོ་བསྒོམས་པའོ། །རྡོ་རྗེ་མེ་ཏོག་སྦྱོར་བྱེད་པ། །ཞེས་བྱ་བ་
ནི། རྡོ་རྗེ་མེ་ཏོག་མའི་ཕྱག་རྒྱ་ཆེན་པོ་བསྒོམས་པའོ། །རྡོ་རྗེ་སྣང་བའི་ཕྱག་རྒྱ་ཆེ། །ཞེས་བྱ་བ་ནི་མར་མེའི་ཕྱག་རྒྱ་ཆེན་པོ་གང་ཡིན་པ་དེས་ན། རབ་མཆོག་མིག་ནི་སྦྱིན་པར་བྱེད། །ཅེས་པ་དེས་མཆོད་པར་འོས་པའི་མིག་ཐོབ་པར་འགྱུར་རོ། །རྡོ་རྗེ་དྲི་ཡི་ཆོ་ག་ཡིས། །ཞེས་བྱ་བ་ནི་
རྡོ་རྗེ་དྲིའི་ཕྱག་རྒྱ་ཆེན་པོ་བསྒོམས་པ་སྟེ། སྦྱོར་བ་དེས་མཆོད་པ་བྱེད་ན་བདག་དང་གཞན་གྱི་སྡུག་བསྔལ་ཐམས་ཅད་སེལ་བར་བྱེད་དོ། །རྡོ་རྗེ་ལྕགས་ཀྱུས་དྲངས་པས་ན། །ཞེས་བྱ་བ་ནི་རྡོ་རྗེ་ལྕགས་ཀྱུས་ཡང་དག་པར་འདྲེན་པ་སྟེ། རྡོ་རྗེ་ལྕགས་ཀྱུའི་ཕྱག་རྒྱ་ཆེན་པོ་བསྒོམས་པ་ཡང་དང་

ཡང་དུ་མངོན་དུ་བྱེད་པའོ། །འདྲེན་པ་ཀུན་གྱི་མཆོག་ཏུ་འགྱུར། །ཞེས་བྱ་བ་ནི། སྤྱན་འདྲེན་པ་ཀུན་གྱི་དམ་པར་འགྱུར་བའོ། །རྡོ་རྗེ་ཞགས་པའི་ཆོ་ག་ཡིས། །ཞེས་བྱ་བ་ནི་རྡོ་རྗེ་ཞགས་པའི་ཕྱག་རྒྱ་ཆེན་པོ་བསྒོམས་པའོ། །རྡོ་རྗེ་ལྕགས་སྒྲོག་སྦྱོར་བ་ཡིས། །ཞེས་
བྱ་བ་ནི་རྡོ་རྗེ་ལྕགས་སྒྲོག་གི་ཕྱག་རྒྱ་ཆེན་པོ་ཡང་དག་པར་བསྒོམས་པས་སོ། །རྡོ་རྗེ་དབབ་པའི་ཆོ་ག་ཡིས། །ཞེས་བྱ་བ་ནི་རྡོ་རྗེ་འབེབས་པའི་ཕྱག་རྒྱ་ཆེན་པོ་བསྒོམས་པ་དེ་ལ་ཡང་དག་པར་སྦྱོར་བས་སོ། །ཐམས་ཅད་དབབ་པ་རབ་ཏུ་གྲུབ། །ཅེས་བྱ་བ་ནི་དབབ་པ་ཕུལ་དུ་བྱུང་བ་རྫོགས་
པར་བྱེད་པའོ། །ཕྱག་རྒྱ་ཆེན་པོ་འདི་དག་གི་རང་གི་ངོ་བོ་ནི་དཀྱིལ་འཁོར་ཆེན་པོ་བྲི་བའི་ཆོ་ག་བསྟན་པ་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ་དེ་ནས་ཞེས་བྱ་བའི་སྒྲ་ནི་དེ་མ་ཐག་པའོ། །དེ་བཞིན་གཤེགས་པ་ཐམས་ཅད་ནི། །ཞེས་བྱ་བ་ནི་རྣམ་པར་སྣང་མཛད་ལ་སོགས་པ་
ནས་རྡོ་རྗེ་འབེབས་པའི་བར་གྱིའོ། །རྡོ་རྗེ་ནི་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའོ། །དེའི་དམ་ཚིག་ནི་ཀུན་རྫོབ་སྟེ། དེ་སྟོན་པར་བྱེད་པའི་ཚུལ་ཏེ་དེ་ཉིད་ཕྱག་རྒྱའོ། །དེའི་ཡེ་ཤེས་བཤད་དོ་ཞེས་བྱ་བ་ནི་རྩོམ་པའོ། །ཐལ་མོ་དམ་དུ་སྦྱར་བ་ལས། །ཞེས་བྱ་བ་ནི་ཐལ་མོ་
ཁོང་སྟོང་དུ་དམ་དུ་བྱས་པའོ། །སོར་མོ་ཐམས་ཅད་བསྣོལ་བ་ནི། །ཞེས་བྱ་བ་ནི་སོར་མོ་ཐམས་ཅད་ཚིགས་གསུམ་པ་ཕན་ཚུན་བསྣོལ་བ་ནི་རྡོ་རྗེ་ཐལ་མོའིའོ། །རབ་ཏུ་བསྡམས་ཕྱིར་རྡོ་རྗེ་བསྡམས། །ཞེས་བྱ་བ་ནི་མི་ལྷོད་པར་བསྡམས་པ་ནི་རྡོ་རྗེ་བསྡམས་པའོ། །ཇི་ལྟར་ཞེ་ན།
རབ་ཏུ་བསྡམས་ཕྱིར་ཞེས་བྱ་བ་གསུངས་ཏེ། ཤིན་ཏུ་བསྡམས་པས་ན་རབ་ཏུ་བསྡམས་པའོ། །དེ་བས་ན་འདི་སྐད་སྟོན་ཏེ། རྡོ་རྗེ་ཐལ་མོ་དེ་ཉིད་ཀྱི་སོར་མོ་ཐམས་ཅད་གཅིག་ལ་གཅིག་གི་ལག་པའི་རྒྱབ་ཏུ་བཅར་བར་རོ། །ཨ་ནྱོ་ནྱཱ་ནུ་ག་ཏ་སརྦྦ་དྷརྨྨ་ཞེས་བྱ་བ་ནི་རྡོ་རྗེ་ཐལ་མོ་
སྦྱར་བའི་སྔགས་སོ། །པ་ར་སྤ་ར་ཨ་ནུ་པྲ་བིཥྚཿསརྦ་དྷརྨྨ་བཛྲ་ཨཉྫ་ལི་ཞེས་བྱ་བ་ནི་རྡོ་རྗེ་ཐལ་མོའོ། །ཨཏྱནྟ་ཨ་ནུ་པྲ་བིཥྚཿསརྦྦ་དྷརྨྨ་བཛྲ་བནྡྷ་ཞེས་བྱ་བ་ནི་རྡོ་རྗེ་བསྡམས་པའིའོ། །དམ་ཚིག་གི་ཕྱག་རྒྱ་ཐམས་ཅད་ཅེས་བྱ་བ་ནི། སེམས་མ་རྡོ་རྗེ་མ་ལ་སོགས་པའི་འོ། །རྡོ་རྗེ་བསྡམས་

པ་ལས་བྱུང་ན། །ཞེས་བྱ་བ་ནི། གང་དུ་ཁྱད་པར་དུ་དགག་པ་མེད་པའོ། །དེ་དག་ཅེས་བྱ་བ་ནི་སེམས་མ་རྡོ་རྗེ་མ་ལ་སོགས་པའིའོ། །བསྡམས་པ་ཞེས་བྱ་བ་ནི་བསྡམས་པའི་མཚན་ཉིད་དོ། །ཇི་ལྟ་བུ་ཞེ་ན། རྡོ་རྗེ་བསྡམས་པ་ཞེས་བྱ་བ་གསུངས་ཏེ། མི་ཕྱེད་པའི་བསྡམས་པར་
བཤད་པའི་ཕྱག་རྒྱ་དེ་ལ་དེ་སྐད་ཅེས་བྱའོ། །དེ་ཉིད་ཀྱི་ཕྱིར་བླ་ན་མེད་པ་སྟེ་དེ་བཤད་པར་བྱའོ། །སེམས་མའི་རྡོ་རྗེ་ཞེས་བྱ་བ་ནི་མཚན་གཞི་སྟོན་ཏོ། །གུང་མོ་མྱུ་གུ་ལྟར་མཉམ་བསྒྲེང་། །ཞེས་བྱ་བས་ནི་མཚན་ཉིད་སྟོན་ཏོ། །འདི་སྐད་སྟོན་ཏེ་རྡོ་རྗེ་བསྡམས་པ་ལས་གུང་མོ་གཉིས་
བརྐྱང་སྟེ་སྦྱར་ལ་རྩེ་མོར་བྱས་པ་ནི་སེམས་མ་རྡོ་རྗེ་མའི་རིགས་ཀྱི་དམ་ཚིག་གི་ཕྱག་རྒྱ་སྟེ། དེ་བརྟན་པར་བྱས་ནས་བཅིང་བའོ། །ཅིར་འགྱུར་ཞེ་ན། སངས་རྒྱས་དང་པོ་ཡིན་པར་བཤད་དོ་ཞེས་བཤད་པར་བྱ་སྟེ། སངས་རྒྱས་གཉིས་པའི་ཡིན་པར་བཤད། །ཅེས་བསྟན་པ་ལས་ན་འདི་ནི་
བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་རྒྱ་ཡིན་ནོ། །གུང་མོ་ཞེས་བྱ་བ་ལ་སོགས་པ་ལ་སེམས་མ་རྡོ་རྗེ་མའི་སོར་མོ་གུང་མོ་གཉིས་རྡོ་རྗེ་བསྡམས་པ་ནང་དུ་བཀུག་པ་གང་ཡིན་པ་དེ་ནི། གུང་མོ་ནང་དུ་གཤིབས་པ་ནི། །སངས་རྒྱས་གཉིས་པ་ཡིན་པར་བཤད། །ཅེས་བྱ་སྟེ། སངས་
རྒྱས་གཉིས་པ་མི་བསྐྱོད་པ་ཡིན་ནོ། །གུང་མོ་རིན་ཆེན་འདྲ་བ་དང་། །ཞེས་བྱ་བ་ནི་སེམས་མ་རྡོ་རྗེ་མ་དེ་ཉིད་ཀྱི་གུང་མོ་རིན་པོ་ཆེ་ལྟ་བུར་རྒྱབ་ཏུ་བཀུག་པའི་མཚན་ཉིད་ཀྱིས་གནས་པ་གང་ཡིན་པ་དེ་ནི་རིན་ཆེན་འདྲ་བ་སྟེ། སངས་རྒྱས་གསུམ་པ་རིན་ཆེན་འབྱུང་ལྡན་དང་། རྡོ་རྗེ་རིན་
ཆེན་མ་ཡིན་པར་བཤད་དོ། །གུང་མོ་པདྨ་འདྲ་བར་དགུག །ཅེས་བྱ་བ་ནི་སེམས་མ་རྡོ་རྗེ་མ་དེ་ཉིད་ཀྱི་གུང་མོ་ལྟོ་བ་ཕན་ཚུན་པདྨ་ལྟ་བུར་བཀུག་པ་གང་ཡིན་པ་དེ་ལ་དེ་སྐད་ཅེས་བྱ་སྟེ། འོད་དཔག་ཏུ་མེད་པ་དང་རྡོ་རྗེ་ཆོས་མ་ཡིན་ནོ། །སངས་རྒྱས་ལྔ་པའི་ཕྱག་རྒྱ་ནི། །ཞེས་བྱ་བ་ནི་
དོན་ཡོད་པར་གྲུབ་པ་དང་རྡོ་རྗེ་ལས་མའོ། །དེ་བཞིན་ཞེས་བྱ་བ་ལ་སོགས་པ་ལ་སེམས་མ་རྡོ་རྗེ་མ་དེ་ཉིད་དེ་བཞིན་དུ་གནས་པ་ལ་མཛུབ་མོ་གཉིས་བཀུག་སྟེ། རྡོ་རྗེ་ལྟ་བུར་བྱ་བ་གང་ཡིན་པ་དེ་ལ་དེ་སྐད་ཅེས་བྱ་སྟེ། དེ་བཞིན་ཞེས་བྱ་བ་ནི་སྔ་མ་དང་སྦྱར་བ་ཡིན་ནོ། །དེ་ནས་ཞེས་བྱ་བ་

ནི་སྤྱིར་ཚིག་གི་ཕྲད་ཡིན་པ་ལས་དེ་མ་ཐག་པ་ལ་འཇུག་སྟེ། དེ་ནས་འདི་བཤད་དོ་ཞེས་པའོ། །དེ་ནི་དེ་བཞིན་གཤེགས་པའི་རིགས་ཀྱི་དམ་ཚིག་འཛིན་པའི་ཕྱག་རྒྱ་བཤད་པར་བྱའོ་ཞེས་བྱ་བ་ལ། དེ་བཞིན་གཤེགས་པའི་རིགས་ཀྱི་ཞེས་བྱ་བ་ནི། ལྷ་མོ་སེམས་
མ་རྡོ་རྗེ་མ་ནས་རྡོ་རྗེ་འབེབས་པའི་བར་གྱིའོ། །དམ་ཚིག་འཛིན་པའི་ཕྱག་རྒྱ་ཞེས་བྱ་བ་ནི། དམ་ཚིག་འཛིན་པར་བྱེད་པས་ན་དམ་ཚིག་འཛིན་པ་སྟེ། སེམས་མ་རྡོ་རྗེ་མ་ལ་སོགས་པའི་ཕྱག་རྒྱ་རྣམས་སོ། །གང་གི་ཕྱིར་དེ་རྣམས་ཀྱི་དཔལ་རྡོ་རྗེ་སེམས་དཔའ་ལ་སོགས་པའི་ཡེ་ཤེས་
སེམས་དཔའ་རྣམས་དཀྱིལ་འཁོར་དང་སྔོན་དུ་བསྙེན་པ་ལ་སོགས་པའི་དུས་སུ་སྒྲུབ་པ་པོས་སྤྱན་དྲངས་ནས། དམ་ཚིག་འཛིན་དུ་བཅུག་ཅིང་ཐུགས་སུ་ཆུད་པར་བྱས་ཏེ། འཛིན་པ་ནི་ཁོང་དུ་ཆུད་པའི་དོན་ཡིན་པའི་ཕྱིར་རོ། །ཛཿཧཱུཾ་བཾ་ཧོཿཞེས་བརྗོད་པས། བྱང་ཆུབ་ཀྱི་སེམས་
ལས་དགུག་པ་དང་། སྦྱིན་པའི་ཕ་རོལ་ཏུ་ཕྱིན་པ་ལ་གཞུག་པ་དང་། ཤེས་རབ་ཀྱི་ཕ་རོལ་ཏུ་ཕྱིན་པར་བཅིངས་པ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པར་དབང་དུ་བྱས་ལ་འདའ་བར་མི་བྱ་བའི་མཚན་ཉིད་ས་མ་ཡ་སྟྭཾ། ས་མ་ཡ་སྟྭཾ་ཨ་ཧཾ་ཞེས་ཀྱང་བརྗོད་ལ། ཕྱག་རྒྱ་དེ་དག་
ཉིད་ཀྱིས་བཅིངས་པའི་མཚན་ཉིད་དང་། དངོས་གྲུབ་འགྲུབ་ཅིང་རྫོགས་པར་བྱེད་པ་དང་། དེ་རྣམས་ཀྱི་འབྲས་བུ་གང་ཞིག་སྒྲུབ་པ་དེའི་ལས་རྣམས་ཡང་དག་པར་བཤད་པར་བྱའོ། །ཟླ་བ་ལྟ་བུའི་ལག་གཉིས་ཀྱིས། །ཞེས་བྱ་བ་ནི་ལག་པ་གཉིས་གཅིག་ཏུ་གྱུར་པའི་རང་
བཞིན་ཅན་གྱི་ཟླ་བའོ། །ཇི་ལྟ་བུ་ཞེ་ན། གུང་མོའི་སོར་མོ་བཏང་གྱུར་པའི། །ཞེས་བྱ་བ་སྟེ། དབུ་མར་གྱུར་པས་ན་གུང་མོའོ། །གུང་མོ་ཡང་ཡིན་ལ་སོར་མོ་ཡང་ཡིན་པས་གུང་མོའི་སོར་མོ་སྟེ། དེ་བཏང་བར་གྱུར་པ་ནི་རྡོ་རྗེ་བསྡམས་པ་བྱས་པའི་ལག་པ་གཉིས་ཀྱིས་ཟླ་བའི་
གུང་མོ་གཉིས་བཏང་བར་གྱུར་པའོ། །ཇི་ལྟར་བཏང་ཞེ་ན། མཐེ་བོང་མཐེའུ་ཆུང་སོ་སོར་བསྒྲེང་། །ཞེས་བྱ་བ་སྨོས་སོ། །འདི་སྐད་སྟོན་ཏེ། གང་གི་ཕྱིར་མཐེ་བོ་དང་མཐེའུ་ཆུང་སོ་སོར་བསྒྲེང་སྟེ་གཞུག་པ་སྟེ་མ་འབྱར་པའོ། །དེ་ཉིད་ཀྱིས་ན་བསྒྲེང་བའི་སྦྱོར་བ་བཏང་བས་ན་

བཏང་བ་ཞེས་བཤད་དོ། །དེ་དག་ནི་སོར་མོ་ཡང་ཡིན་ལ་ཐ་མ་ཡང་ཡིན་པས་ན་སོར་མོ་ཐ་མ་སྟེ། མཐེ་བོང་གཉིས་དང་མཐེའུ་ཆུང་གཉིས་སོ། །དེ་རྣམས་ཀྱི་ལྟོ་བ་མ་འབྱར་བར་བཞག་པས་ན་སོ་སོར་བསྒྲེང་བ་སྟེ། སོ་སོར་གྱུར་པ་དེ་ལས་གྱུར་པ་དེའོ། །ཅི་དེ་དག་ཙམ་ཉི་
ཚེར་འགྱུར་ཞེ་ན། སེམས་དཔའི་རྡོ་རྗེ་ཞེས་བྱ་བ་གསུངས་ཏེ། རྡོ་རྗེ་བསྡམས་པ་ལས་གུང་མོ་གཉིས་རྩེ་མོར་བྱས་པའི་མཚན་ཉིད་ཀྱིས་སོ། །འདི་སྐད་སྟོན་ཏེ། གུང་མོ་གཉིས་གཤིབས་ལ་བསྒྲེང་སྟེ། མཛུབ་མོ་གཉིས་དང་སྲིན་ལག་གཉིས་རྡོ་རྗེ་བསྡམས་པར་གཞག་པ་
དང་བཅས་པ་ཉིད་དུ་བྱ་བ་ཡིན་པས་ན། སེམས་དཔའི་རྡོ་རྗེ་ཉིད་དང་བཅས་པ་སྟེ། འདི་ནི་རྡོ་རྗེ་སེམས་དཔའོ། །མཛུབ་མོ་ལྕགས་ཀྱུ་ཞེས་བྱ་བ་ནི་རྡོ་རྗེ་བསྡམས་པ་ལས་མཛུབ་མོ་གཉིས་ལྕགས་ཀྱུ་ལྟ་བུར་བྱས་པ་གང་ཡིན་པ་དེ་ནི་མཛུབ་མོ་ལྕགས་ཀྱུ་སྟེ། རྡོ་རྗེ་རྒྱལ་པོའོ། །
མཛུབ་མོ་སྦྱར་བ་ནི་རྡོ་རྗེ་བསྡམས་པ་ལས་མཛུབ་མོ་གཤིབས་ཏེ། ཕན་ཚུན་ལྟོ་སྦྱར་བ་ནི་རྡོ་རྗེ་ཆགས་པའིའོ། །རྡོ་རྗེ་བསྡམས་པ་ལས་མཛུབ་མོ་གཉིས་བསྒྲེང་ཞིང་མཐེ་བོ་གཉིས་ཀྱང་བསྒྲེང་བ་བྱས་ནས། དེས་སེ་གོལ་གཏོགས་པ་གང་ཡིན་པ་དེ་ནི་ལེགས་སོ་ཞེས་བྱ་བ་སྦྱིན་
པ་འདྲ་བ་སྟེ་རྡོ་རྗེ་ལེགས་པའིའོ། །རྡོ་རྗེ་སེམས་དཔའི་བཞི་པ་ཡི། །ཕྱག་རྒྱ་མང་པོའི་དངོས་གྲུབ་འདིའོ། །ཞེས་བྱ་བ་ནི་རྡོ་རྗེ་སེམས་དཔའ་ལས་ཉེ་བར་མཚོན་པའི་སེམས་དཔའ་བཞིའི་དངོས་གྲུབ་འགྲུབ་པའི་དོན་གྱི་ཕྱག་རྒྱའི་ཚོགས་ནི་འདི་དག་ཡིན་ནོ། །འདིས་ནི་འདི་སྐད་
སྟོན་ཏེ། དཀྱིལ་འཁོར་དང་ཕྱག་རྒྱ་ཆེན་པོ་བསྒྲུབ་པའམ། གཞན་དག་ཏུ་དམ་ཚིག་གི་ཕྱག་རྒྱས་རང་གི་ལྷ་བསྒྲུབ་པར་བྱའོ། །འཕགས་པ་ནམ་མཁའི་སྙིང་པོའི་རིན་ཆེན་རྡོ་རྗེར་ཇི་ལྟར་འགྱུར་ཞེ་ན། མཐེ་བོ་གཤིབས་ལ་མཛུབ་མོ་གཉིས་བཅག་ལ་རྩེ་སྤྲད་ཅེས་བྱ་བ་གསུངས་
ཏེ། རྡོ་རྗེ་བསྡམས་པ་ལས་མཐེ་བོ་གཉིས་གཤིབས་ཏེ་བསྒྲེང་ལ་མཛུབ་མོ་གཉིས་བཀུག་སྟེ། མཐེ་བོ་གཉིས་ཀྱི་རྩེ་མོར་སྦྱར་ལ་མཛུབ་མོ་གཉིས་རིན་པོ་ཆེ་འདྲ་བར་བྱས་པ་ནི་རྡོ་རྗེ་རིན་ཆེན་གྱི་ཕྱག་རྒྱའོ། །འདི་ཉིད་ཅེས་བྱ་བ་ནི་ནམ་མཁའི་སྙིང་པོའི་ཕྱག་རྒྱ་སྟེ། དེ་ལས་གུང་མོ་

དང་སྲིན་ལག་དང་མཐེ་འུ་ཆུང་ཤིན་ཏུ་སྟེ། མཆོག་ཏུ་བསྣོལ་ལ་བརྐྱང་སྟེ་ཉི་མའི་འོད་ཟེར་གཏོང་བའི་ཚུལ་དུ་བྱ་བ་གང་ཡིན་པ་དེ་ལ་དེ་སྐད་ཅེས་བྱ་སྟེ། རྡོ་རྗེ་གཟི་བརྗིད་ཀྱིའོ། །ནམ་མཁའི་སྙིང་པོའི་ཕྱག་རྒྱ་དེ་ཉིད་ལས་རྡོ་རྗེ་རྒྱལ་མཚན་གྱི་ཕྱག་རྒྱ་ཇི་ལྟར་
འགྱུར་ཞེ་ན། སྲིན་ལག་ཅེས་བྱ་བ་ལ་སོགས་པ་གསུངས་ཏེ། སྲིན་ལག་དང་མཐེའུ་ཆུང་གཉིས་མཉམ་པར་གཤིབས་པ་དང་ལྡན་པ་དེ་ནི་རྡོ་རྗེ་དབལ་གྱིའོ། །ཁ་ཡི་ཕྱོགས་སུ་གཞག་པའོ། །ཞེས་བྱ་བ་ནི་བཞད་པའི་གནས་ཁ་དང་ཉེ་བར་བཞག་པས་ན་དེ་སྐད་ཅེས་བྱའོ། །
ཁའི་གནས་སུ་གང་ཞིག་གཞག་ཅེ་ན། དེ་ཉིད་ཅེས་བྱ་བ་གསུངས་ཏེ། རྡོ་རྗེ་དབལ་གྱི་ཕྱག་རྒྱ་དེ་ཉིད་དོ། །ཇི་ལྟར་གཞག་ཅེ་ན། བསྐོར་ནས་ཀྱང་ཞེས་བྱ་བ་གསུངས་ཏེ། བཞད་པའི་ཚུལ་གྱིས་ཡོངས་སུ་བསྐོར་ནས་གཞག་གོ་ཞེས་བྱ་བའི་ཐ་ཚིག་གོ། །འདི་ནི་རྡོ་རྗེ་བཞད་
པའིའོ། །མཐེ་བོ་གཉིས་ཞེས་བྱ་བ་ལ་སོགས་པ་ལ། རྡོ་རྗེ་བསྡམས་པ་ལས་མཐེ་བོ་གཉིས་མཉམ་པར་བརྐྱང་སྟེ་གཤིབས་ལ། མཛུབ་མོ་གཉིས་ཕན་ཚུན་རྩེ་སྤྲད་དེ་པདྨའི་འདབ་མ་འདྲ་བར་བཀུག་སྟེ་གཞག་པ་གང་ཡིན་པ་དེ་ལ་དེ་སྐད་ཅེས་བྱ་སྟེ་རྡོ་རྗེ་ཆོས་ཀྱིའོ། །དེ་
ཉིད་ཅེས་བྱ་བ་ནི་རྡོ་རྗེ་ཆོས་ཀྱི་དམ་ཚིག་གི་ཕྱག་རྒྱ་སྟེ་དེ་ལས་རལ་གྲིར་འགྱུར་རོ། །ཇི་ལྟར་འགྱུར་ཞེ་ན། གུང་མོ་བསྒྲེང་བའི་རྩེ་མོ་བཀུག །ཅེས་བྱ་བ་གསུངས་ཏེ། གུང་མོ་གཉིས་གཤིབས་ཏེ་བསྒྲེང་ལ་ཚིགས་གསུམ་པར་བཅག་ནས་རྩེ་མོ་ཕན་ཚུན་བཀུག་ལ་ཕན་ཚུན་
ལྟོ་སྦྱར་ཏེ། རལ་གྲི་འདྲ་བར་བྱས་པ་འདི་ནི་རྡོ་རྗེ་རྣོན་པོའི་འོ། །དེ་ལས་ཞེས་བྱ་བ་ནི་རྡོ་རྗེ་རྣོན་པོའི་ཕྱག་རྒྱ་ལས་སྲིན་ལག་དང་མཐེ་འུ་ཆུང་གཤིབས་ལ་རྡོ་རྗེ་ཐལ་མོ་ལྟ་བུར་བྱས་པ་གང་ཡིན་པ་དེ་ནི་འཁོར་ལོ་ཞེས་བྱ་བ་ཡིན་པར་བཤད་དེ། རྡོ་རྗེ་རྒྱུའིའོ། །རྡོ་རྗེ་བསྡམས་པ་
ལས་མཐེ་བོ་གཉིས་བརྐྱང་བ་གང་ཡིན་པ་དེ་ནི་བསྡམས་པ་མཐེ་བོང་གཉིས་བཀྲོལ་བ་ཞེས་བྱའོ། །བཀན་ཏ་ཁའི་ཕྱོགས་སུ་གཞག་པའོ་ཞེས་བྱ་བ་ནི་བརྐྱང་བ་དེ་ཉིད་སོ་སོར་བྱས་ལ་ཁ་ནས་ཚིག་འབྱིན་པའི་ཚུལ་དུ་བཏེག་པ་གང་ཡིན་པ་དེ་ལ་དེ་སྐད་ཅེས་བྱ་སྟེ། རྡོ་རྗེ་སྨྲ་བའིའོ། །

རྡོ་རྗེ་བསྡམས་པ་ལས་མཐེ་བོང་དང་མཐེའུ་ཆུང་གཉིས་ཀ་ཕན་ཚུན་རྩེ་སྤྲད་དེ་བསྐྱེད་པ་གང་ཡིན་པ་དེ་ནི་ལས་ཀྱི་ཡིན་པར་བཤད་དེ། རྡོ་རྗེ་ལས་ཀྱི་ཕྱག་རྒྱ་དེ་ཉིད་ལས་མཛུབ་མོ་གཉིས་ཕན་ཚུན་སྦྱར་ཏེ་གཤིབས་ལ་སྙིང་གར་གཞག་གོ། །ཇི་ལྟར་གཞག་ཅེ་ན་བརྐྱང་སྟེ་གཞག་ཅེས་པ་
སྟེ། ལག་མཐིལ་གཉིས་ལེགས་པར་བརྐྱང་བ་ནི་རྡོ་རྗེ་བསྲུང་བའིའོ། །རྡོ་རྗེ་བསྡམས་པའི་མཛུབ་མོ་གཉིས་ལེགས་པར་བརྐྱང་བ་ལས། ལྕགས་ཀྱུ་ལྟ་བུར་བཀུག་ལ་མཆེ་བ་འདྲ་བར་བྱས་པ་གང་ཡིན་པ་དེ་ལ་དེ་སྐད་ཅེས་བྱ་བ་སྟེ། ཅི་དེ་ཙམ་འབའ་ཞིག་ལ་བྱའམ་ཞེ་ན།
མཐེའུ་ཆུང་ཞེས་བྱ་བ་ལ་སོགས་པ་གསུངས་ཏེ། མཐེའུ་ཆུང་གཉིས་གཤིབས་ཏེ་བརྐྱང་ལ་རྩེ་མོར་བྱས་པ་གང་ཡིན་པ་འདི་ནི་རྡོ་རྗེ་གནོད་སྦྱིན་གྱིའོ། །རྡོ་རྗེ་བསྡམས་པ་ལས་ལག་པ་གཉིས་ཀའི་སྲིན་ལག་མཐེའུ་ཆུང་གི་ཚིགས་ཀྱི་རྩ་གཤིབས་པའི་ནང་དུ་མཐེ་བོའི་རྩེ་མོ་གཉིས་བཞག་ལ།
མཛུབ་མོ་གཉིས་བཀུག་སྟེ་རང་རང་གི་མཐེ་བོའི་རྒྱབ་རང་རང་གི་མཛུབ་མོའི་ལྟོ་བཙིར་བ་འདི་ནི་རྡོ་རྗེ་ཁུ་ཚུར་གྱིའོ། །སྙིང་གའི་ཕྱོགས་སུ་རྡོ་རྗེ་བསྡམས་པ་ལས་མཐེ་བོང་གཉིས་བསྡམས་ཏེ་གཤིབས་ལ་གཞག་པ་གང་ཡིན་པ་དེ་ནི་དེ་བཞིན་དུ་རྡོ་རྗེ་སྒེག་མོའིའོ། །རྡོ་རྗེ་བསྡམས་པ་རབ་ཏུ་བརྐྱང་བ་ཕྲེང་བ་
འཆིང་བའི་ཚུལ་དུ་བྱ་བ་ཕྲེང་བ་ཅན་ཞེས་བྱ་བ་ནི་རྡོ་རྗེ་ཕྲེང་བ་མའིའོ། །རྡོ་རྗེ་བསྡམས་པ་ལས་བྱུང་བའི་རྡོ་རྗེ་ཐལ་མོ་ནི་རྡོ་རྗེ་ཐལ་མོའི་མཆོག་སྟེ་དམ་པའོ། །དེའི་ཚིག་འབྱིན་པའི་ཚུལ་དུ་ཁ་ནས་གྱེན་དུ་འབྱུང་བ་ལྟར་བྱ་བ་གང་ཡིན་པ་དེ་ནི། ཐལ་མོའི་མཆོག་ནི་ཁ་ནས་འབྱུང་། །ཞེས་
བྱ་སྟེ། གླུ་མའིའོ། །རྡོ་རྗེ་བསྡམས་པ་ལས་བྱུང་བའི་གར་བྱས་ལ་ཐལ་མོ་སྦྱར་བ་སྤྱི་བོར་གཞག་པ་ནི་གར་མའིའོ། །རྡོ་རྗེ་བཅིངས་པ་ཐུར་དུ་བླུགས། །ཞེས་བྱ་བ་ནི་རྡོ་རྗེ་བསྡམས་པ་བདུག་སྤོས་འབུལ་བའི་ཚུལ་དུ་ཐུར་དུ་བླུགས་པ་ནི་བདུག་པ་མའིའོ། །རང་གི་ཐལ་མོ་སྦྱར་ཏེ་གྱེན་
དུ་གཏོར། །ཞེས་བྱ་བ་ནི་རྡོ་རྗེ་བསྡམས་པ་ལས་བྱུང་བའི་མེ་ཏོག་གི་ཐལ་མོ་བྱས་པའི་ཐལ་མོ་དེ་མེ་ཏོག་འབུལ་བའི་ཚུལ་དུ་གྱེན་དུ་འཐོར་བ་ནི་མེ་ཏོག་མའིའོ། །མཐེ་བོ་བསྙམས་ཏེ་རབ་ཏུ་བསྡམས། །ཞེས་བྱ་བ་ནི་རྡོ་རྗེ་བསྡམས་པ་ལ་མཐེ་བོ་གཉིས་གཤིབས་ལ་ལེགས་པར་

བསྡམས་ཏེ་མར་མེའི་ཚུལ་དུ་གཞག་པ་འདི་ནི་མར་མེའིའོ། །རབ་ཏུ་བརྐྱང་ནས་བྱུག་པའོ། །ཞེས་བྱ་བ་ནི་རྡོ་རྗེ་བསྡམས་པ་ཤིན་ཏུ་བརྐྱང་ལ་རང་གི་སྙིང་གར་དྲིས་བྱུགས་པའི་ཚུལ་དུ་བྱེད་པ་ནི་བྱུག་པ་མའིའོ། །མཛུབ་མོ་གཅིག་ཏུ་བཀུག་པ་དང་། །ཞེས་བྱ་བ་
ནི་རྡོ་རྗེ་བསྡམས་པ་ལས་གཡས་པའི་མཛུབ་མོ་བསྒྲེང་ལ་ལྕགས་ཀྱུ་ལྟ་བུར་བཀུག་པ་འདི་ནི་རྡོ་རྗེ་ལྕགས་ཀྱུའིའོ། །མཐེ་བོ་གཉིས་ནི་མདུད་པར་བོར། །ཞེས་བྱ་བ་ནི་རྡོ་རྗེ་བསྡམས་པ་ལས་མཐེ་བོང་གཉིས་ཕན་ཚུན་མདུད་པར་བྱ་བ་ནི་རྡོ་རྗེ་ཞགས་པའིའོ། །མཐེ་བོང་མཛུབ་མོ་གདུ་བུར་
བཅིངས། །ཞེས་བྱ་བ་ནི་རྡོ་རྗེ་བསྡམས་པའི་མཐེ་བོང་དང་མཛུབ་མོ་གཉིས་ལྕགས་སྒྲོག་བཅིངས་པ་ལྟར་བྱ་བ་ནི་རྡོ་རྗེ་ལྕགས་སྒྲོག་གིའོ། །རྡོ་རྗེ་བཅིང་བ་མཛུབ་མོ་བསྡམས། །ཞེས་བྱ་བ་ནི་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་ལས་མཛུབ་མོ་གཉིས་རྡོ་རྗེ་མཚམས་སྦྱོར་དུ་བྱས་པ་ནི་
རྡོ་རྗེ་འབེབས་པའི་དམ་ཚིག་གི་ཕྱག་རྒྱའོ། །དེ་ནས་འདི་རྣམས་ཞེས་བྱ་བ་ནི་རྡོ་རྗེ་དབྱིངས་ལ་སོགས་པའི་དམ་ཚིག་གི་ཕྱག་རྒྱ་རྣམས་འདིས་བསྒྲུབ་པར་བྱ་བ་ཡིན་པས་ན་བསྒྲུབ་པ་སྟེ། ཐུགས་ཀའི་ཟླ་བར་རྡོ་རྗེ་རྩེ་ལྔ་པར་ལྷག་པར་མོས་པས་ཕྱག་རྒྱ་རྣམས་སྙིང་གར་གཞག་པས་
བསྒྲུབ་པར་འགྱུར་རོ། །དེ་ཉིད་ནི་དངོས་གྲུབ་སྩོལ་བ་ལ་མི་ཕྱེད་པས་ན་རྡོ་རྗེ་བསྒྲུབ་པ་སྟེ། དེ་ཉིད་ཀྱིས་ན་དམ་པའོ། །དེ་ཉིད་བསྟན་པ་ནི་རང་གི་ཕྱག་རྒྱ་ཞེས་བྱ་བ་སྟེ། རྡོ་རྗེ་དབྱིངས་ལ་སོགས་པའི་དམ་ཚིག་གི་ཕྱག་རྒྱ་སྙིང་གར་གནས་པ་ནི་སྙིང་གར་གཞག་པའོ། །ཡང་
ཇི་ལྟར་བསྒྲུབ་པར་འགྱུར་ཞེ་ན། སེམས་དཔའི་རྡོ་རྗེ་ཏིང་ངེ་འཛིན་གྱིས་ཞེས་བྱ་བ་གསུངས་ཏེ། སེམས་དཔའི་རྡོ་རྗེ་ནི་བཤད་ཟིན་ཏོ། །དེ་ལ་དམིགས་པའི་ཏིང་ངེ་འཛིན་ནི། སེམས་དཔའི་རྡོ་རྗེ་ཏིང་ངེ་འཛིན་ཏེ། སེམས་དཔའི་ཏིང་ངེ་འཛིན་རྒྱུར་གྱུར་པ་དེས་ཞེས་བྱ་བའི་ཐ་
ཚིག་གོ། །དེ་ཡང་རང་གི་སྙིང་གའི་ཟླ་བ་ལ་རྡོ་རྗེ་རྩེ་ལྔ་པ་རྣམ་པར་བསམས་ལ། དེ་ཉིད་སྒོམ་ཞིང་སྙིང་གར་གཞག་པའི་སྦྱོར་བས་རང་གི་ལྷའི་དམ་ཚིག་གི་ཕྱག་རྒྱ་བཅིངས་ལ་བསྒོམ་པར་བྱའོ་ཞེས་བྱ་བའི་དོན་ཏོ། །རྡོ་རྗེ་དབྱིངས་སོགས་ཕྱག་རྒྱ་ནི། །ཞེས་བྱ་བ་ནི་རྡོ་རྗེ་དབྱིངས་ནི་རྣམ་

པར་སྣང་མཛད་དོ། །དེ་ལ་སོགས་པ་གང་ཡིན་པ་དེ་ནི་རྡོ་རྗེ་དབྱིངས་ལ་སོགས་ཏེ། དོན་ཡོད་པར་གྲུབ་པའི་མཐར་ཐུག་པའོ། །དེ་རྣམས་ཀྱི་ཕྱག་རྒྱ་གང་ཡིན་པ་དེ་ནི། རྡོ་རྗེ་དབྱིངས་སོགས་ཀྱི་ཕྱག་རྒྱ་སྟེ། རྣམ་པར་སྣང་མཛད་དང་། རྡོ་རྗེ་དང་། རིན་ཆེན་དང་། ཆོས་དང་།
ལས་ཀྱི་རྡོ་རྗེ་མའི་ཕྱག་རྒྱ་རྣམས་དང་། དེ་བཞིན་དུ་མི་བསྐྱོད་པ་དང་། རིན་ཆེན་འབྱུང་ལྡན་དང་། འོད་དཔག་ཏུ་མེད་པ་དང་། དོན་ཡོད་པར་གྲུབ་པའི་ཕྱག་རྒྱ་རྣམས་སོ། །དེ་རྣམས་བཅིངས་པས་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་རྣམས་འདུས་པས་ཞེས་བྱ་བ་
ནི་གཅིག་ཏུ་ཚོགས་པར་མཛད་པས་དཀྱིལ་འཁོར་དུ་བྱིན་གྱིས་རློབ་པར་འགྱུར་རོ། །སུ་ཞིག་བྱིན་གྱིས་རློབ་པར་མཛད་ཅེ་ན། དཀྱིལ་འཁོར་སློབ་དཔོན་སློབ་མར་བཅས། །ཞེས་བྱ་བ་སྟེ། སློབ་དཔོན་གྱི་དོན་དང་སློབ་མའི་དོན་དུ་དཀྱིལ་འཁོར་གང་ཞིག་འདྲི་བའི་དཀྱིལ་འཁོར་ཏེ།
དེ་མ་ཐག་ཏུ་བྱིན་གྱིས་རློབ་པར་མཛད་པའམ། དཀྱིལ་འཁོར་སློབ་དཔོན་སློབ་མ་རྣམས། །ཞེས་བྱ་བ་དཀྱིལ་འཁོར་དང་སློབ་དཔོན་དང་སློབ་མར་བཅས་པ་བྱིན་གྱིས་རློབ་པར་འགྱུར་རོ། །སེམས་དཔའི་རྡོ་རྗེ་ཞེས་བྱ་བ་ལ་རྡོ་རྗེ་སེམས་དཔའི་ཕྱག་རྒྱ་གང་ཡིན་པ་དེ་ནི་སེམས་མ་རྡོ་རྗེ་མའི་
ཕྱག་རྒྱ་སྟེ་དེ་བཅིངས་པས་ནི། རྡོ་རྗེ་འཛིན་པ་འདྲ་བར་འགྱུར། །ཞེས་བྱ་བ་རྡོ་རྗེ་སེམས་དཔའ་དང་འདྲ་བར་འགྱུར་རོ། །རྡོ་རྗེ་ལྕགས་ཀྱུ་ནི་རྡོ་རྗེ་རྒྱལ་པོ་སྟེ། དེའི་ཕྱག་རྒྱ་གང་ཡིན་པ་དེ་ནི་རྡོ་རྗེ་ལྕགས་ཀྱུའོ། །རྡོ་རྗེ་ལྕགས་ཀྱུ་དེ་བཅིངས་པས། །སངས་རྒྱས་ཐམས་ཅད་ཀུན་ནས་
འགུགས། །ཞེས་བྱ་བ་ཐམས་ཅད་སྤྱན་འདྲེན་ཏོ། །འདོད་པའི་རྡོ་རྗེ་ནི། རྡོ་རྗེ་ཆགས་པའི་ཕྱག་རྒྱའི་འདོད་པའི་རྡོ་རྗེའིའོ། །དེའི་སྦྱོར་བ་ནི་ཕྱག་རྒྱ་བཅིངས་པ་སྟེ། དེས་ན། རྫོགས་སངས་རྒྱས་ཀྱང་མཉེས་པར་བྱེད། །ཅེས་བྱ་བ་དབང་དུ་བྱེད་དོ། །ཀྱང་ཞེས་བྱ་བའི་སྒྲས་ནི་
སེམས་དཔའ་གཞན་དག་ཀྱང་ཞེས་བྱ་བ་སྟོན་ཏོ། །ལེགས་སོ་བས་ནི་སྟོད་པར་བྱེད། །ཅེས་བྱ་བ་ནི། སྔགས་པ་དེས་ལག་པ་གཉིས་ཀྱིས་ལེགས་སོ་ཞེས་བྱ་བའི་ཕྱག་རྒྱ་བཅིངས་ན། དེ་བཞིན་གཤེགས་པ་རྣམས་ཀྱིས་སྟོད་པར་བྱེད་ཅིང་བསྔགས་པ་གསུངས་པར་འགྱུར་རོ། །རྡོ་རྗེ་

རིན་ཆེན་ནི་རྡོ་རྗེ་རིན་ཆེན་ནོ། །དེའི་ཕྱག་རྒྱ་ནི་རིན་ཆེན་དང་། རྡོ་རྗེ་དང་ལྡན་པ་གང་ཡིན་པ་སྟེ། དེ་བཅིངས་པར་གྱུར་པ་ནི། སངས་རྒྱས་ཀུན་གྱིས་དེ་དབང་བསྐུར། །ཞེས་བྱ་བ། དེ་བཞིན་གཤེགས་པ་རྣམས་ཀྱིས་ཀུན་ནས་དབང་བསྐུར་བར་འགྱུར་རོ། །རྡོ་རྗེ་
ཉི་མའི་ཕྱག་རྒྱ་གང་ཡིན་པ་དེ་ནི་རྡོ་རྗེ་ཉི་མ་སྟེ། དེ་བཅིངས་པས་ཅིར་འགྱུར་ཞེ་ན། སངས་རྒྱས་ཀུན་གྱི་འོད་འདྲར་འགྱུར། །ཞེས་བྱ་བ་སྟེ། སངས་རྒྱས་ཀྱི་འོད་ཀྱི་གཟི་བརྗིད་འདི་ལ་ཡོད་པས་ན་སངས་རྒྱས་ཀྱི་འོད་དེ་རྡོ་རྗེ་ཉི་མའོ། །དེ་དང་འདྲ་བར་འགྱུར་བ་ནི་སྔགས་པ་དེ་
དང་མཚུངས་པར་འགྱུར་རོ། །རྡོ་རྗེ་རྒྱལ་མཚན་འཆང་འགྱུར་བ། །ཞེས་བྱ་བ་ལ་རྡོ་རྗེ་རྒྱལ་མཚན་འཆང་བ་ནི་རིན་ཆེན་དབལ་ཏེ། དེའི་ཕྱག་རྒྱ་ལ་དེ་སྐད་ཅེས་བཤད་དོ། །རྡོ་རྗེ་འཆང་བར་གྱུར་པ་ནི་རིན་ཆེན་དབལ་གྱི་དམ་ཚིག་གི་ཕྱག་རྒྱ་བཅིངས་ལ། རྡོ་རྗེ་དབལ་ནི་
བདག་གོ་ཞེས་བསྒོམས་ན་སྔགས་པ་དེ་ཉིད་ཀྱིས། རེ་བ་ཀུན་ཡང་རྫོགས་པར་བྱེད། །ཅེས་བྱ་བ་སེམས་ཅན་ཐམས་ཅད་ཀྱི་སྲེད་པ་ཐམས་ཅད་ཡོངས་སུ་རྫོགས་པར་བྱེད་པར་འགྱུར་རོ། །རྡོ་རྗེ་བཞད་པའི་ཚུལ་གྱིས་ནི། །ཞེས་བྱ་བ་ནི་རྡོ་རྗེ་བཞད་པའི་སྦྱོར་བ་སྟེ། དེའི་དམ་ཚིག་
གི་ཕྱག་རྒྱ་བཅིངས་པས་སོ། །དེས་ཅིར་འགྱུར་ཞེ་ན། སངས་རྒྱས་ཀུན་དང་ལྷན་ཅིག་བཞད། །ཅེས་བྱ་བ་གསུངས་ཏེ། རྡོ་རྗེ་བཞད་པ་དང་འདྲ་བར་འགྱུར་ཞེས་བྱ་བའི་དོན་ཏོ། །ཆོས་ཀྱི་རྡོ་རྗེ་ནི་རྡོ་རྗེ་ཆོས་སོ། །དེའི་ཕྱག་རྒྱ་གང་ཡིན་པ་དེ་ཡང་ཆོས་ཀྱི་རྡོ་རྗེ་སྟེ། ཆོས་ཀྱི་རྡོ་རྗེ་དེ་བཅིང་
པས་རྡོ་རྗེ་ཆོས་དང་འདྲ་བར་འགྱུར་རོ། །རྡོ་རྗེ་རལ་གྲི་ནི་རྡོ་རྗེ་རྣོན་པོ་སྟེ། དེའི་དམ་ཚིག་གི་ཕྱག་རྒྱ་ཡང་རྡོ་རྗེ་རལ་གྲིའོ། །དེ་ཐོགས་པ་ནི་ཡང་དག་པར་བཅིངས་པས་ཉོན་མོངས་པ་ཐམས་ཅད་དེས་གཅོད་དོ་ཞེས་པའོ། །རྡོ་རྗེ་འཁོར་ལོ་ནི་རྡོ་རྗེ་རྒྱུའོ། །དེ་བསྟན་པར་བྱས་པ་ནི། དེའི་དམ་ཚིག་
གི་ཕྱག་རྒྱ་དམ་པོར་བཅིངས་ནས་བསྒོམས་པས་བརྟན་པོར་བསྐྱེད་པའོ། །དེས་ནི། དཀྱིལ་འཁོར་གྱི་ནི་བདག་པོར་འགྱུར། །ཞེས་བྱ་བ་དཀྱིལ་འཁོར་གྱི་བདག་པོ་རྡོ་རྗེ་འཁོར་ལོར་འགྱུར་རོ། །རྡོ་རྗེ་སྨྲ་བའི་དམ་ཚིག་གི་ཕྱག་རྒྱ་བཅིངས་ལ་དེའི་ངོ་བོར་བསྒོམས་པ་ནི་རྡོ་རྗེ་སྨྲ་བའི་སྦྱོར་བའོ། །

དེས་ནི། རྡོ་རྗེའི་ངག་མཆོག་འགྲུབ་པར་འགྱུར། །ཞེས་བྱ་བ་རྡོ་རྗེ་སྨྲ་བའི་དངོས་གྲུབ་དམ་པ་ཐོབ་པར་འགྱུར་རོ། །རྡོ་རྗེ་ལས་ཀྱི་དམ་ཚིག་གི་ཕྱག་རྒྱ་ནི་རྡོ་རྗེ་ལས་སོ། །དེ་བཅིངས་པ་ནི། རྡོ་རྗེ་ལས་དང་འདྲ་བར་འགྱུར། །ཞེས་བྱ་བ་ལས་ཀྱི་རྡོ་རྗེ་དང་འདྲ་བར་འགྱུར་བའོ། །རྡོ་རྗེ་གོ་
ཆའི་དམ་ཚིག་གི་ཕྱག་རྒྱ་ནི་རྡོ་རྗེ་གོ་ཆ་སྟེ། དེ་བརྟན་པར་བྱས་པས་བཅིངས་ན་ལུས་རྡོ་རྗེ་དང་འདྲ་བར་འགྱུར་རོ། །རྡོ་རྗེ་གནོད་སྦྱིན་དང་། དམ་ཚིག་གི་ཕྱག་རྒྱ་ནི་རྡོ་རྗེ་མཆེ་བ་མཆོག་གི་ཕྱག་རྒྱ་སྟེ། དེ་བཅིངས་པས་མ་རུངས་པའི་བདུད་དེས་འཇོམས་པར་འགྱུར་རོ། །བཅོམ་ལྡན་
འདས་རྡོ་རྗེ་ཁུ་ཚ