Luận tạng Tây Tạng (Tengyur) — Tập 57

ུར་གྱི་དམ་ཚིག་གི་ཕྱག་རྒྱ་ནི་རྡོ་རྗེ་ཁུ་ཚུར་རོ། །རྡོ་རྗེ་ཁུ་ཚུར་དེ་དམ་ཞིང་མི་ཕྱེད་པས་བཅིངས་པས་ཕྱག་རྒྱ་ཀུན་ཞེས་བྱ་བ་རྣམ་པར་སྣང་མཛད་ལ་སོགས་པའི་ཕྱག་རྒྱ་རྣམས་དབང་དུ་འགྱུར་ཞེས་བྱ་བ་རང་དབང་དུ་བྱེད་པའོ། །འདི་སྐད་སྟོན་ཏེ་རྡོ་རྗེ་འབེབས་པའི་དམ་ཚིག་
གི་ཕྱག་རྒྱས་བདག་ཉིད་ལ་དབབ་པ་བྱས་ལ། རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་བཅིངས་ཏེ། སེམས་སོ་སོར་རྟོགས་པ་ལ་སོགས་པ་བྱས་ནས། དམ་ཚིག་གི་ཕྱག་རྒྱ་ལ་སོགས་པའི་ཕྱག་རྒྱ་ཐམས་ཅད་བཅིང་བར་བྱའོ། །དེ་ཡང་བཛྲ་ཨཱ་བེ་ཤ་ཞེས་བྱ་བས་རྡོ་རྗེ་འབེབས་པའི་
དམ་ཚིག་གི་ཕྱག་རྒྱ་བཅིངས་ལ་ཨཿཞེས་བྱ་བས་བདག་ཉིད་ལ་དབབ་པར་བྱའོ། །དེ་ནས་བཛྲ་མུཥྚི་ཞེས་བྱ་བས་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་བཅིང་བར་བྱ་སྟེ། དེ་ལྟར་ན་ཕྱག་རྒྱ་ཐམས་ཅད་འགྲུབ་པར་འགྱུར་རོ། །གལ་ཏེ་དེ་ལྟར་མི་ཕྱེད་ན་ས་མ་ཡ་སྟྭཾ་ཞེས་ཟློས་
ཤིང་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་བཅིང་བར་བྱའོ་ཞེས་གསུངས་པ་ཡིན་ནོ། །འཛུམ་པས་ཞེས་བྱ་བ་ནི་སྒེག་མོའི་དམ་ཚིག་གི་ཕྱག་རྒྱའི་རང་བཞིན་གང་ཡིན་པ་དེས་ནི་ལྷའི་དགའ་བ་རྣམས་ཏེ། བྱང་ཆུབ་ཀྱི་སེམས་ཀྱི་དགའ་བ་ཐོབ་པར་འགྱུར་རོ་ཞེས་བྱ་བའི་དོན་
ཏོ། །ཕྲེང་བ་ཡིས་ནི་ཞེས་བྱ་བ་ཕྲེང་བ་མའི་དམ་ཚིག་གི་ཕྱག་རྒྱས་ནི་རྒྱན་རྣམས་ཐོབ་པར་འགྱུར་རོ། །གླུ་མས་ཞེས་བྱ་བ་གླུ་མའི་དམ་ཚིག་གི་ཕྱག་རྒྱས་ནི་རྟག་ཏུ་སྐད་གསལ་བར་འགྱུར་རོ། །གར་གྱིས་ཞེས་བྱ་བ་གར་མའི་དམ་ཚིག་གི་ཕྱག་རྒྱས་ནི་མཆོད་པ་རྣམས་རྙེད་པར་འགྱུར་རོ། །བདུག་

པས་ཞེས་བྱ་བ་ནི་བདུག་པ་མའི་དམ་ཚིག་གི་ཕྱག་རྒྱས་ནི་འཇིག་རྟེན་ཚིམ་པར་བྱེད་པར་འགྱུར་རོ། །མེ་ཏོག་གིས་ནི་ཞེས་བྱ་བ་མེ་ཏོག་མའི་དམ་ཚིག་གི་ཕྱག་རྒྱས་ནི་མཛེས་པའི་གཟུགས་ཐོབ་པར་འགྱུར་རོ། །མར་མེའི་ཞེས་བྱ་བ་ནི་མར་མེ་མའི་
དམ་ཚིག་གི་ཕྱག་རྒྱས་ནི་མིག་ལྔ་ཐོབ་པའི་ཕྱིར་སྣང་བ་དག་པ་ཉིད་དུ་འགྱུར་རོ། །དྲི་ཡིས་ཞེས་བྱ་བ་ནི་བྱུག་པ་མའི་དམ་ཚིག་གི་ཕྱག་རྒྱས་ནི་ལྷ་རྫས་ཀྱི་དྲི་རྙེད་པར་འགྱུར་རོ། །རྡོ་རྗེ་ལྕགས་ཀྱུ་ནི་རྡོ་རྗེ་ལྕགས་ཀྱུའི་དམ་ཚིག་གི་ཕྱག་རྒྱ་སྟེ། དེས་ནི་ཡང་དག་པར་འགུགས་པར་འགྱུར་
རོ། །རྡོ་རྗེ་ཞགས་པས་ནི་རྡོ་རྗེ་ཞགས་པའི་དམ་ཚིག་གི་ཕྱག་རྒྱ་སྟེ། དེས་ནི་འཇུག་པར་བྱེད་དོ། །རྡོ་རྗེ་ལྕགས་སྒྲོག་ནི་རྡོ་རྗེ་ལྕགས་སྒྲོག་གི་དམ་ཚིག་གི་ཕྱག་རྒྱ་སྟེ་དེས་ནི་འཆིང་བར་བྱེད་དོ། །རྡོ་རྗེ་དྲིལ་བུ་ནི་རྡོ་རྗེ་འབེབས་པའི་དམ་ཚིག་གི་ཕྱག་རྒྱ་སྟེ། དེས་ནི་ཡང་དག་པར་འབེབས་
ཤིང་མཉེས་པར་བྱེད་དོ། །དེ་ནས་ཆོས་ཀྱི་ཕྱག་རྒྱ་རྣམས་བཤད་དོ་ཞེས་བྱ་བ་ནི་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་རྟོགས་པ་ནི་ཆོས་སོ། །དེ་ཉིད་ནི་སེམས་ཅན་ཐམས་ཅད་ཀྱི་རྒྱུད་ལ་རྒྱས་འདེབས་པས་ན་ཕྱག་རྒྱའོ། །དེ་སྟོན་པར་བྱེད་པའི་སྒྲ་ལ་ཡང་ཉེ་
བར་གདགས་པས་དེ་སྐད་ཅེས་བྱའོ། །བཛྲ་ཛྙཱ་ན་སངས་རྒྱས་རྣམས། །ཞེས་བྱ་བ་ནི། དེ་བཞིན་ཉིད་ནི་རྡོ་རྗེ་སྟེ། དེའི་ཡེ་ཤེས་ནི་རྡོ་རྗེའི་ཡེ་ཤེས་སོ། །དེ་སྟོན་པར་བྱེད་པ་བཛྲ་ཛྙཱ་ན་ཞེས་བྱ་བའི་སྒྲའི་ཚུལ་འདི་ནི་དེ་བཞིན་གཤེགས་པ་ལྔ་པོའི་ཆོས་ཀྱི་ཕྱག་རྒྱ་ཡིན་ནོ། །རྡོ་རྗེ་དབྱིངས་
ནི་བརྟན་པར་བྱེད། །ཅེས་བྱ་བ་ནི་དེའི་ལས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ནི་རྡོ་རྗེ་དབྱིངས་ཏེ། དེ་བརྟན་པར་བྱེད་པས་ན། རྡོ་རྗེ་དབྱིངས་ནི་བརྟན་པར་བྱེད། །ཅེས་བྱའོ། །འདི་སྐད་སྟོན་ཏེ། དེ་བཞིན་གཤེགས་པའི་ཟློས་པ་པོས་རང་བཞིན་
གྱིས་དག་པར་མོས་པས་ལྕེ་ལ་རྡོ་རྗེ་དཀར་པོར་བསམ་པར་གང་གི་ཚེ་བཛྲ་ཛྙཱ་ན་ཞེས་བྱ་བ་དགོད་བར་བྱས་པ་དེའི་ཚེ། དེའི་སྐུ་དང་གསུང་དང་ཐུགས་རྡོ་རྗེར་འགྱུར་རོ། །རྡོ་རྗེ་སེམས་དཔའ་ལ་སོགས་པའི་ཆོས་ཀྱི་ཕྱག་རྒྱའི་དབང་དུ་བྱས་ནས། དེ་ནས་ཞེས་བྱ་བ་ལ་སོགས་པ་གསུངས་

ཏེ། ཆོ་ག་བཞིན་དུ་ཞེས་བྱ་བ་ནི་ལྷ་རྣམས་དམ་ཚིག་གི་ཕྱག་རྒྱས་བསྒྲུབས་ནས། ལྗགས་ལ་ཆོས་ཀྱི་ཡི་གེ་ཇི་ལྟ་བ་བཞིན་དུ་བཀོད་པ་འདི་ནི་ཆོ་ག་བཞིན་ཞེས་བྱའོ། །ས་མ་ཡ་སྟྭཾ་ཞེས་བྱ་བ་ནི་རང་བཞིན་གྱིས་དག་པའི་ཚུལ་ཉིད་ཀྱིས་ན་འདའ་བར་མི་བྱ་བ་ནི་ཁྱེད་ཡིན་ནོ་ཞེས་བྱ་བའི་
ཐ་ཚིག་གོ། །ཕྱག་རྒྱ་ཀུན་གྱི་དབང་པོར་འགྱུར། །ཞེས་བྱ་བ་ནི་ཕྱག་རྒྱ་ཡང་ཡིན་ལ་ཀུན་ཀྱང་ཡིན་པས་ན་ཕྱག་རྒྱ་ཀུན་ཏེ། རྣམ་པར་སྣང་མཛད་ལ་སོགས་པའི་དམ་ཚིག་དང་ཆོས་དང་ལས་དང་ཕྱག་རྒྱ་ཆེན་པོའོ། །ཕྱག་རྒྱ་དེ་ཐམས་ཅད་ཀྱི་བདག་པོ་ཡིན་པས་ན། ཕྱག་
རྒྱ་ཀུན་གྱི་དབང་པོ་སྟེ། ཆོས་ཀྱི་དབྱིངས་ཀྱི་རང་བཞིན་རྣམ་པར་སྣང་མཛད་ཆེན་པོ་ནི་རྡོ་རྗེ་སེམས་དཔའ་སྟེ། དེ་འགྱུར་རོ། །འདི་ནི་རྡོ་རྗེ་སེམས་དཔའི་ཆོས་ཀྱི་ཕྱག་རྒྱའོ། །ཨ་ན་ཡ་སོ་ཞེས་བྱ་བ་ནི་ཁུག་ཅིག་ཅེས་བྱ་བ་སྟེ་རྡོ་རྗེ་རྒྱལ་པོའིའོ། །ཨ་ཧོ་སུ་ཁ་ཞེས་བྱ་བ་ནི་ཐོག་མ་
དང་ཐ་མ་མེད་པའི་ཆོས་བདག་མེད་པའི་ཆགས་པ་ཞེས་བྱ་བའི་ཐ་ཚིག་སྟེ། རྡོ་རྗེ་ཆགས་པའིའོ། །སཱ་དྷུ་སྭཱ་ཧཱ་ཞེས་བྱ་བ་ནི་ལེགས་པ་ནི་རྫོགས་པའི་བྱང་ཆུབ་ཀྱི་སྤྱོད་པ་ཞེས་གསུངས་པས། ཕ་རོལ་ཏུ་ཕྱིན་པ་དྲུག་གི་སྤྱོད་པའི་ངོ་བོ་སྟེ་རྡོ་རྗེ་ལེགས་པའིའོ། །སུ་མ་ཧཱ་
སྟྭཾ་ཞེས་བྱ་བ་ནི་མཛེས་པའི་མཆོད་པ་ནི་མཆོད་པ་བཟང་པོ་སྟེ་བསྒྲུབ་པའི་མཆོད་པའི་ངོ་བོར་སྦྱིན་པ་ནི་ཁྱོད་ཡིན་ནོ་ཞེས་བོད་པ་སྟེ་རྡོ་རྗེ་རིན་ཆེན་གྱིའོ། །རཱུ་པོ་དྱོ་ཞེས་པ་ནི་གཟུགས་ཉེ་བར་གསལ་བར་བྱེད་པས་ན་གཟུགས་སྣང་བ་སྟེ། ནམ་མཁའ་དང་མཉམ་པ་ཉིད་ཀྱི་ཡེ་ཤེས་ཀྱི་
ཆོས་ཐམས་ཅད་རང་བཞིན་རབ་ཏུ་གསལ་བར་མཛད་པ་ཞེས་བྱ་བའི་ཐ་ཚིག་གོ། །ཆོས་ཀྱི་གཟི་བརྗིད་ཉིད་དུ་འགྱུར། །ཞེས་བྱ་བ་ནི་རང་བཞིན་གྱིས་དག་པ་རྟོགས་པའི་ཆོས་ཀྱི་རང་བཞིན་ཅན་གྱི་བཟི་བརྗིད་འདི་ལ་མངའ་བས་ན་ཆོས་ཀྱི་གཟི་བརྗིད་དེ། རྡོ་རྗེ་ཉི་མ་ཉིད་དུ་དེ་འགྱུར་
རོ་ཞེས་བྱ་བའི་དོན་ཏོ། །རྡོ་རྗེ་གཟི་བརྗིད་ཀྱིའོ། །ཨརྠ་པྲ་བ་ཏི་ཞེས་བྱ་བ་ནི་དོན་དུ་གཉེར་བར་བྱ་བ་ཡིན་པས་ན་དོན་ཏེ། དེ་བཞིན་གཤེགས་པའི་སྟོབས་དང་མི་འཇིགས་པ་ལ་སོགས་པའོ། །དེ་རྣམས་རྟོགས་པ་ནི་ནོར་ཐོབ་པ་སྟེ་རྡོ་རྗེ་དབལ་གྱིའོ། །ཧ་ཧ་ཧཱུཾ་ཞེས་བྱ་བ་ནི་རྒྱུ་དང་འབྲས་

བུ་ལ་དམིགས་པའི་ཆོས་ཀྱི་སྦྱིན་པ་ཆེན་པོ་རྟོགས་པའི་ཚུལ་གྱིས་ནི། སངས་རྒྱས་འཛུམ་པ་ཅུང་ཟད་བཞད་པ་ཐོབ་ཅིང་རྙེད་པར་འགྱུར་ཏེ་རྡོ་རྗེ་བཞད་པ་ཉིད་ཐོབ་པར་འགྱུར་རོ་ཞེས་བྱ་བའི་ཐ་ཚིག་གོ། །རྡོ་རྗེ་བཞད་པའིའོ། །སརྦྦ་ཀ་རི་ཞེས་བྱ་བ་ནི་ཆོས་རྣམས་
རང་བཞིན་གྱིས་རྣམ་པར་དག་པར་ཐུགས་སུ་ཆུད་ནས་སྔོན་གྱི་འཕེན་པའི་སྟོབས་ཀྱི་ཤུགས་ཀྱིས་གཟུགས་ཐམས་ཅད་ཡང་དག་པར་སྟོན་པའི་ཏིང་ངེ་འཛིན་གྱིས་སེམས་ཅན་ཐམས་ཅད་ཀྱི་དོན་རྫོགས་པར་མཛད་པས་ན་ཐམས་ཅད་མཛད་པ་སྟེ། རྡོ་རྗེ་ཆོས་ཀྱིའོ། །དུཿཁཙྪེ་ད་
ཞེས་བྱ་བ་ནི་ཤེས་རབ་དང་ཡེ་ཤེས་ཀྱི་ངོ་བོ་ཉིད་ཀྱིས་སྡུག་བསྔལ་ཐམས་ཅད་དུ་རྣམ་པར་རྟོག་པར་མི་དམིགས་པས་ན་སྡུག་བསྔལ་གཅོད་པ་སྟེ། རྡོ་རྗེ་རྣོན་པོའིའོ། །བུདྡྷ་བོ་དྷི་ཞེས་བྱ་བ་ནི་རྫུ་འཕྲུལ་གྱི་རྐང་པ་ཐུགས་སུ་ཆུད་པས་རྡོ་རྗེ་དབྱིངས་ལ་སོགས་པའི་དཀྱིལ་འཁོར་ཆེན་པོ་
རྫོགས་པར་མཛད་དེ། སངས་རྒྱས་དང་བྱང་ཆུབ་སེམས་དཔའི་དཀྱིལ་འཁོར་ཀུན་གྱི་བདག་པོར་འགྱུར་བ་སྟེ། སེམས་བསྐྱེད་པ་ཙམ་གྱིས་ཆོས་ཀྱི་འཁོར་ལོ་བསྐོར་བར་འགྱུར་རོ་ཞེས་བྱ་བའི་ཐ་ཚིག་གོ། །རྡོ་རྗེ་རྒྱུའིའོ། །པྲ་ཏི་ཤབྡ་ཞེས་བྱ་བ་ནི་བྲག་ཅ་སྟེ། སོ་སོ་ཡང་
དག་པར་རིག་པ་བཞིའི་རང་བཞིན་གྱི་ཤེས་རབ་སྤྲོས་པ་མེད་པའི་སྒྲ་ནི་མ་སྐྱེས་པ་ཡིན་པའི་ཕྱིར་སྒྲ་བརྙན་ལྟ་བུ་སྟེ། དེ་ལྟ་བུ་གང་ཡིན་པ་དེ་ནི་ཁྱོད་ཡིན་ནོ་ཞེས་བྱ་བའི་ཐ་ཚིག་གོ། །སངས་རྒྱས་རྣམས་དང་ལྷན་ཅིག་སྨྲ། །ཞེས་བྱ་བ་ནི། རྣམ་པར་སྣང་མཛད་ལ་སོགས་པའི་སངས་
རྒྱས་རྣམས་དང་ལྷན་ཅིག་ཏུ་སྨྲ་བ་སྟེ། རྡོ་རྗེ་སྨྲ་བར་འགྱུར་རོ་ཞེས་བྱ་བའི་ཐ་ཚིག་གོ། །རྡོ་རྗེ་སྨྲ་བའིའོ། །སུ་བ་ཤི་ཏྭཾ་ཞེས་བྱ་བ་ནི་རབ་ཏུ་དབང་དུ་བྱེད་པ་ཉིད་ཡིན་པས་ན་ཤིན་ཏུ་དབང་བ་ཉིད་དེ། མ་ལུས་ཤིང་ལུས་པ་མེད་པའི་མཆོད་པ་རྣམས་ཀྱིས་དེ་བཞིན་གཤེགས་པ་ཐམས་
ཅད་མཆོད་པ་ལ་དབང་བའོ། །ཀུན་གྱི་དབང་དང་ལྡན་པར་འགྱུར། །ཞེས་བྱ་བ་ནི། རིགས་ཀུན་ནས་ཀུན་དུ་སངས་རྒྱས་ཀྱི་སྤྲུལ་པའི་ཕྲིན་ལས་རྣམས་དང་། སེམས་ཅན་གྱི་དོན་བྱ་བ་རྣམས་ལ་དབང་བ་ཉིད་དང་། གཙོ་བོ་ཉིད་དུ་དེ་འགྱུར་རོ། །ཞེས་བྱ་བའི་ཐ་ཚིག་སྟེ། རྡོ་རྗེ་

ལས་ཀྱིའོ། །ནིར་པ་ཡ་སྟྭཾ་ཞེས་བྱ་བ་ནི་ཕྱིར་མི་ལྡོག་པའི་བརྩོན་འགྲུས་ཀྱིས་ཉན་ཐོས་དང་རང་སངས་རྒྱས་ཀྱི་སར་ལྟུང་བའི་འཇིགས་པ་མེད་པས་ན་འཇིགས་མེད་ཉིད་དོ། །འཇིགས་མེད་འགྱུར་ཞེས་བྱ་བ་ནི་རྡོ་རྗེ་བསྲུང་བར་འགྱུར་རོ། །རྡོ་རྗེ་བསྲུངས་པའིའོ། །ཤ་ཏྲུཾ་བྷཀྵ་ཞེས་
བྱ་བ་ནི་འདོད་ཆགས་པའི་ཉོན་མོངས་པ་དང་ཉེ་བའི་ཉོན་མོངས་པ་རྣམས་དང་། ལྷའི་བུའི་བདུད་ལ་སོགས་པ་ནི་དགྲ་རྣམས་སོ། །དེ་སོ་སོར་རྟོགས་པའི་བརྩོན་འགྲུས་དང་། རྣམ་པར་ཐར་པའི་སྒོ་རང་བཞིན་གྱིས་འོད་གསལ་བས་ཟ་ཞིང་མི་སྣང་བར་མཛད་པས་ན་དགྲ་རྣམས་
ཟ་བའོ། །རྡོ་རྗེ་གནོད་སྦྱིན་གྱིའོ། །སརྦྦ་སིདྡྷི་ཞེས་བྱ་བ་ནི་དམ་ཚིག་དང་། ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱི་དངོས་གྲུབ་རྣམས་གྲུབ་པ་སྟེ། དེ་སྟོན་པར་བྱེད་པའི་སྒྲ་ལ་ཡང་དེ་སྐད་ཅེས་བྱའོ། །དེ་སྨྲས་ན་ཐམས་ཅད་འགྲུབ་པར་འགྱུར་ཞེས་བྱ་བ་ཕྱག་རྒྱ་ཐམས་ཅད་
འགྲུབ་པར་འགྱུར་རོ། །རྡོ་རྗེ་ཁུ་ཚུར་གྱིའོ། །མ་ཧཱ་རཱ་ཏི་ཞེས་བྱ་བ་ནི་དགའ་བ་ཡང་ཡིན་ལ་ཆེན་པོ་ཡང་ཡིན་པས་ན་དགའ་བ་ཆེན་པོ་སྟེ་མགུ་བའོ། །སྒེག་མོའི་ཆོས་ཀྱི་ཕྱག་རྒྱ་དེས་ནི་ལྷའི་མགུ་བ་ཐོབ་པར་འགྱུར་རོ། །རཱུ་པ་ཤོ་བེ་ཞེས་བྱ་བས་ཕྲེང་བ་མའི་ཆོས་ཀྱི་ཕྱག་རྒྱ་
གང་ཡིན་པ་དེས་གཟུགས་བཟང་ཉིད་ཅེས་བྱ་བ། གཟུགས་བཟང་བ་ཉིད་དུ་གྱུར་པའི་གཟུགས་བཟང་བ་ཉིད་ཐོབ་བོ། །ཤྲོ་ཏྲ་སཽ་ཁྱ་ཞེས་བྱ་བ་ལྷ་མོ་གླུ་མའི་ཆོས་ཀྱི་ཕྱག་རྒྱ་གང་ཡིན་པ་དེས་ནི་བདེ་བ་སྦྱིན་པར་བྱེད་དོ། །སརྦྦ་པཱུ་ཛ་ཞེས་བྱ་བས་གར་མའི་ཆོས་ཀྱི་ཕྱག་རྒྱ་གང་
ཡིན་པ་དེས་ནི་ལེགས་པར་མཆོད་པ་ཉིད་སྦྱིན་པར་བྱེད་པའོ། །པྲ་ཧླ་ད་ནི་ཞེས་བྱ་བ་བདུག་པ་མའི་ཆོས་ཀྱི་ཕྱག་རྒྱ་གང་ཡིན་པ་དེས་ནི་ཡིད་བདེ་བའི་བདེ་བ་སྦྱིན་པར་འགྱུར་རོ། །ཕ་ལ་ག་ནི་ཞེས་བྱ་བ་ནི་མེ་ཏོག་མའི་ཆོས་ཀྱི་ཕྱག་རྒྱ་གང་ཡིན་པ་དེས་འབྲས་བུ་རྣམས་ཏེ་བསམ་གཏན་གྱི་
འབྲས་བུ་དང་། འཇིག་རྟེན་པའི་དོན་གྱི་དངོས་གྲུབ་ལ་སོགས་པའི་འབྲས་བུ་ཐོབ་པར་འགྱུར་རོ། །སུ་ཏེ་ཛ་གྲི་ཞེས་བྱ་བ་མར་མེ་མའི་གང་ཡིན་པ་དེས་ནི་གཟི་བརྗིད་ཆེན་པོ་སྦྱིན་པར་བྱེད་དོ། །སུ་གནྡྷ་གི་ཞེས་བྱ་བ་བྱུག་པ་མའི་གང་ཡིན་པ་དེས་ནི་དྲིའི་མཆོག་ཉིད་སྦྱིན་པར་བྱེད་དོ། །སྡེག་

མོ་ལ་སོགས་པའི་ཆོས་ཀྱི་ཕྱག་རྒྱ་བརྒྱད་པོ་འདི་དག་ནི་བོད་པའི་ཚིག་གིས་བརྗོད་པ་ཡིན་ནོ། །ཨ་ཡ་ཧི་ཛཿརྡོ་རྗེ་ལྕགས་ཀྱུའིའོ། །ཨ་ཡ་ཧི་ཧཱུཾ་ཧཱུཾ་ཞགས་པའིའོ། །ཧེ་སྥོ་ཊ་བཾ་ལྕགས་སྒྲོག་གིའོ། །གྷཎྚ་ཨ་ཨ་ཞེས་བྱ་བ་ནི་རྡོ་རྗེ་འབེབས་པའི་ཆོས་ཀྱི་
ཕྱག་རྒྱའོ། །སེམས་མ་རྡོ་རྗེ་མ་ལ་སོགས་པའི་ཆོས་ཀྱི་ཕྱག་རྒྱ་ནི་རང་གི་སྙིང་པོ་ཉིད་ཡིན་ནོ། །དགེ་བ་ཞེས་བྱ་བ་ནི་དཀར་པོའོ། །ལྕེ་ལ་ཞེས་བྱ་བ་ནི་གཟུགས་བརྙན་གྱི་སྦྱོར་བས་ལྕེ་ཀུན་དུ་གང་བར་གནས་པར་བསམ་བར་བྱའོ། །རྡོ་རྗེ་ཞེས་བྱ་བ་ནི་རྡོ་རྗེ་རྩེ་ལྔ་པའོ། །དེ་
ནས། ལས་ཀྱི་ཕྱག་རྒྱ་བཅིང་བ་བཤད། །ཅེས་བྱ་བ་ནི་བརྩོན་འགྲུས་ཀྱི་རང་བཞིན་གྱི་བྱ་བ་ནི་ལས་སོ། །དེ་སྟོན་པར་བྱེད་པ་ལག་པའི་ཚུལ་འདྲ་བ་ནི་ཕྱག་རྒྱའོ། །དེ་བཅིང་བ་བཤད་དེ་ཞེས་བྱ་བ་ནི་བཅིང་བའི་མཚན་ཉིད་བརྩམ་པར་བྱའོ། །རྡོ་རྗེ་ཁུ་ཚུར་ཞེས་བྱ་བ་ནི་དམ་ཚིག་གི་
རྡོ་རྗེ་ཁུ་ཚུར་རོ། །དམ་བཅིངས་ཏེ་ཞེས་བྱ་བ་ནི་དམ་དུ་བཙིར་བའོ། །མཉམ་པར་གཞག་པས་ཞེས་བྱ་བ་ནི་རང་གི་ལྷ་ལ་དམིགས་པའི་སེམས་ཀྱིས་སོ། །གཉིས་སུ་བྱའོ་ཞེས་བྱ་བ་ནི་སོ་སོར་བྱ་བའོ། །རྡོ་རྗེའི་ཕྱག་རྒྱ་གཉིས་བཅིངས་ཏེ། །ཞེས་བྱ་བ་ནི་རྡོ་རྗེ་ཁུ་ཚུར་གྱི་ཕྱག་རྒྱ་
གཉིས་སུ་བྱས་པ་ནི། རྡོ་རྗེའི་ཕྱག་རྒྱ་གཉིས་ཏེ་རྡོ་རྗེ་ཁུ་ཚུར་གྱི་ཕྱག་རྒྱ་གཉིས་སུ་འགྱུར་རོ། །དེ་ནས་བཅིངས་པ་རབ་ཏུ་བཤད། །ཅེས་བྱ་བ་ནི་ལས་ཀྱི་ཕྱག་རྒྱ་རྣམས་ཀྱི་བཅིངས་པའི་མཚན་ཉིད་སོ་སོར་ཕྱེ་སྟེ་རབ་ཏུ་བཤད་པར་བྱའོ། །གཡོན་པའི་རྡོ་རྗེ་ཞེས་བྱ་བ་ལ་སོགས་པ་
ལ། སྙིང་ག་ན་གནས་པའི་གཡོན་པའི་རྡོ་རྗེ་ཁུ་ཚུར་གྱི་སོར་མོ་ནི་གཡོན་པའི་རྡོ་རྗེ་མཛུབ་མོ་སྟེ། དེ་གཟུང་བར་བྱའོ། །གང་གིས་གཟུང་ཞེ་ན། གཡས་པས་ཞེས་བྱ་བ་གསུངས་ཏེ། གཡས་པའི་རྡོ་རྗེ་ཁུ་ཚུར་གྱིས་སོ། །དེ་ཇི་ལྟ་བུར་གྱུར་པ་གཟུང་ཞེ་ན། བསྒྲེང་བ་སྟེ་ཁ་གྱེན་དུ་
བལྟས་ཏེ་གནས་པ་ཞེས་བྱ་བའི་ཐ་ཚིག་གོ། །བྱང་ཆུབ་མཆོག་གི་ཕྱག་རྒྱ་འདི། །ཞེས་བྱ་བ་ལ། བྱང་ཆུབ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་པའོ། །དེ་ཉིད་ནི་མཆོག་སྟེ་དམ་པ་གང་ཡིན་པ་དེས་གསལ་བར་བྱེད་པས་ན། ཕྱག་རྒྱ་དེ་ནི་བྱང་ཆུབ་མཆོག་སྟེ། དེ་

སྟོན་པར་བྱེད་པ་བཅོམ་ལྡན་འདས་རྣམ་པར་སྣང་མཛད་ཀྱི་ལས་ཀྱི་ཕྱག་རྒྱའོ། །མི་གཡོ་བ་ཡི་ས་རེག་པ། །ཞེས་བྱ་བ་ནི་གཡོན་པའི་རྡོ་རྗེ་ཁུ་ཚུར་གྱིས་ཆོས་གོས་ཀྱི་ཐ་མ་འཛིན་པའི་ཚུལ་དུ་བཞག་ལ། གཡས་པའི་རྡོ་རྗེ་ཁུ་ཚུར་གྱི་སོར་མོ་ཐམས་ཅད་བརྐྱངས་པས་ས་ལ་རེག་པའི་
ཚུལ་དུ་བྱ་བ་ནི་ས་ལ་རེག་པའོ། །དེ་བཞིན་རིན་ཆེན་མཆོག་སྦྱིན་པའོ། །ཞེས་བྱ་བ་ལ་དེ་བཞིན་ཞེས་བྱ་བ་ནི་རྣམ་པ་དེ་ཉིད་ཀྱིས་ཏེ། ཇི་ལྟར་མི་བསྐྱོད་པའི་ཁུ་ཚུར་གཡོན་པས་ཆོས་གོས་འཛིན་པར་མཛད་པའི་ཚུལ་དེ་བཞིན་དུ། རིན་ཆེན་འབྱུང་ལྡན་གྱི་ཡང་བྱའོ། །རིན་ཆེན་
འབྱུང་ལྡན་གྱི་དེ་ཡང་མཆོག་སྦྱིན་པ་ནི་གཡས་པའི་རྡོ་རྗེ་ཁུ་ཚུར་བཀན་ཏེ། སོར་མོ་ཐམས་ཅད་བརྐྱང་ལ་མཆོག་སྦྱིན་པའི་ཚུལ་དུ་བྱའོ། །དཔག་མེད་པ་ཞེས་བྱ་བ་ནི་ཚེ་དཔག་ཏུ་མེད་པའོ། །ཏིང་ངེ་འཛིན་མཆོག་ཅེས་བྱ་བ་ནི་ཏིང་ངེ་འཛིན་གྱི་དམ་པའོ། །དེ་སྟོན་པར་བྱེད་
པའི་ཕྱག་རྒྱ་ནི་ཏིང་ངེ་འཛིན་མཆོག་སྟེ། རྡོ་རྗེ་ཁུ་ཚུར་གཉིས་ཀྱི་སོར་མོ་ཐམས་ཅད་བརྐྱང་ལ་ལྷུང་བཟེད་འཛིན་པའི་ཚུལ་དུ་ཕན་ཚུན་མཐེ་བོའི་རྩེ་ལ་ཕྲད་པར་གཞག་པའོ། །གདོན་མི་ཟ་བ་ཞེས་བྱ་བ་ནི་དོན་ཡོད་པར་གྲུབ་པ་སྟེ་དེའི་ལས་ཀྱི་ཕྱག་རྒྱ་ནི་མི་འཇིགས་པ་སྦྱིན་པའོ། །
འདི་སྐད་སྟོན་ཏེ། གཡོན་པའི་རྡོ་རྗེ་ཁུ་ཚུར་གྱིས་ཆོས་གོས་འཛིན་པའི་ཚུལ་དུ་བྱས་ལ། གཡས་པའི་སོར་མོ་ཐམས་ཅད་བརྐྱང་ལ་མི་འཇིགས་པ་སྦྱིན་པའི་ཚུལ་དུ་བྱའོ། །རྡོ་རྗེའི་ལས་རྣམས་ནི་དམ་ཚིག་མི་ཕྱེད་པའི་ལས་ཏེ། དེ་བྱེད་པ་ནི་རྫོགས་པར་བྱེད་པའོ། །བསྒྱིངས་
བཅས་གསོར་བ་ཞེས་བྱ་བ་ནི་སྔར་བཤད་པའོ། །གཉིས་ཀ་ཡིས་ཞེས་བྱ་བ་ནི་གཡོན་དང་གཡས་ཀྱི་རྡོ་རྗེ་ཁུ་ཚུར་གཉིས་ཀྱིས་ཏེ། གཡོན་པའི་རྡོ་རྗེ་ཁུ་ཚུར་ཁ་ནང་དུ་བལྟས་པ་དཀུར་བཞག་ལ། གཡས་པ་བཀན་ཏེ། སྙིང་གར་གྱེན་དུ་བསྟོད་པའི་ཚུལ་གྱིས་གཞག་པ་འདི་ནི་
རྡོ་རྗེ་སེམས་དཔའི་ལས་ཀྱི་ཕྱག་རྒྱའོ། །ལྕགས་ཀྱུ་འཛིན་ལྟར་གནས་པ་དང་། །ཞེས་བྱ་བ་ནི་གཡས་པའི་རྡོ་རྗེ་ཁུ་ཚུར་མདུན་དུ་བཞག་ལ་དེའི་ཡང་མདུན་དུ་གཡོན་པའི་རྡོ་རྗེ་ཁུ་ཚུར་ལྕགས་ཀྱུ་འཛིན་པ་ལྟར་བྱ་བ་ནི་རྡོ་རྗེ་རྒྱལ་པོའིའོ། །མདའ་འཕང་པ་ཡི་ཚུལ་དང་ནི། །ཞེས་

བྱ་བ་ནི་གཡོན་པའི་རྡོ་རྗེ་ཁུ་ཚུར་སྙིང་གར་བཀན་ཏེ་བཞག་ལ། དེའི་སྟེང་དུ་གཡས་པ་ཁ་སྦུབ་སྟེ་བཞག་ནས་ཡང་གཡས་པའི་རྡོ་རྗེ་ཁུ་ཚུར་གྱིས་མདའ་འདྲེན་པའི་ཚུལ་དུ་བྱས་ལ། རྣ་བ་ལ་ཐུག་གི་བར་དུ་གཞུ་འདྲེན་པའི་ཚུལ་དུ་བྱས་ནས། མདའ་བཀང་
ནས་འཕེན་པ་ལྟར་བྱེད་པ་འདི་ནི་རྡོ་རྗེ་ཆགས་པའིའོ། །ལེགས་སོ་ཞེས་པ་སྙིང་གར་གཞག །ཅེས་བྱ་བ་ནི་རྡོ་རྗེ་ཁུ་ཚུར་གཉིས་སྙིང་གར་བཞག་ལ་མཛུབ་མོ་དང་མཐེ་བོས་སེ་གོལ་བརྡེབས་པ་འདི་ནི་ལེགས་པའོ། །དབང་བསྐུར་བ་ནི་རྡོ་རྗེ་གཉིས། །ཞེས་བྱ་བ་ནི་རྡོ་རྗེ་ཁུ་ཚུར་
གཉིས་མཛོད་སྤུའི་གནས་སུ་གཞག་པ་འདི་ནི། དབང་བསྐུར་བ་ནི་རྡོ་རྗེ་གཉིས། །ཞེས་བྱ་བར་འགྱུར་རོ། །འདི་ནི་རིན་ཆེན་གྱིའོ། །སྙིང་གར་ཉི་མ་བརྟན་པར་བྱ། །ཞེས་བྱ་བ་ནི་རྡོ་རྗེ་ཁུ་ཚུར་གཉིས་སྙིང་གར་གཡས་ནས་བསྐོར་ཏེ་བསྐོར་བར་བྱ་བ་ནི་རྡོ་རྗེ་གཟི་བརྗིད་ཀྱིའོ། །
གཡོན་པ་ལ་ནི་གྲུ་མོ་གཟུགས། །ཞེས་བྱ་བ་ནི་གཡོན་པའི་རྡོ་རྗེ་ཁུ་ཚུར་ལ་གཡས་པའི་རྡོ་རྗེ་ཁུ་ཚུར་གྱིས་གྲུ་མོ་གཟུགས་པ་ནི་རྡོ་རྗེ་དཔལ་གྱིའོ། །དེ་བཞིན་ཁ་ཕྱོགས་བསྐོར་བར་བྱ། །ཞེས་བྱ་བ་ནི་རྡོ་རྗེ་ཁུ་ཚུར་གཉིས་དགོད་པའི་ཚུལ་དུ་སྒེག་པ་དང་བཅས་པས་ཡོངས་སུ་བསྐོར་
ལ་ཁའི་གྲ་གཉིས་སུ་གཞག་པ་ནི་རྡོ་རྗེ་བཞད་པའིའོ། །གཡས་པ་ཡིས་ནི་གཡོན་པ་དབྱེ། །ཞེས་བྱ་བ་ནི་གཡས་པའི་རྡོ་རྗེ་ཁུ་ཚུར་གྱིས་གཡོན་པའི་རྡོ་རྗེ་ཁུ་ཚུར་སྙིང་གར་འབྱེད་པའི་ཚུལ་དུ་འབྱེད་པ་འདི་ནི་རྡོ་རྗེ་ཆོས་ཀྱིའོ། །སྙིང་གར་གཡོན་པ་རལ་གྲི་མདུད། །ཅེས་
བྱ་བ་ནི་གཡོན་པའི་རྡོ་རྗེ་ཁུ་ཚུར་སྙིང་གར་བཞག་ལ། གཡས་པའི་རྡོ་རྗེ་ཁུ་ཚུར་གྱིས་རལ་གྲི་འདེབས་པའི་ཚུལ་དུ་བྱ་བ་འདི་ནི། སྙིང་གར་གཡོན་པས་རལ་གྲི་གསོད། །ཅེས་བྱ་བ་སྟེ་རྡོ་རྗེ་རྣོན་པོའིའོ། །མགལ་མེའི་འཁོར་ལོ་བསྐོར་བ་དང་། །ཞེས་བྱ་བ་ནི་རྡོ་རྗེ་ཁུ་
ཚུར་གཉིས་མགལ་མེའི་འཁོར་ལོ་ལྟ་བུར་གཡས་ཕྱོགས་ནས་ལུས་ཀྱི་ཕྱི་རོལ་དུ་བསྐོར་བ་ནི་རྡོ་རྗེ་རྒྱུའིའོ། །རྡོ་རྗེ་གཉིས་ཀ་ཁ་ནས་དབྱུང་། །ཞེས་བྱ་བ་ནི་རྡོ་རྗེ་ཁུ་ཚུར་གཉིས་ཁ་ནས་གྱེན་དུ་བཏེག་པ་འདི་ནི་རྡོ་རྗེ་སྨྲ་བའིའོ། །རྡོ་རྗེ་གར་བསྐོར་ཞེས་བྱ་བ་ལ་སོགས་པ་ལ། རྡོ་རྗེ་

ཁུ་ཚུར་གཉིས་བཅིངས་ཏེ། །སྒེག་བཅས་མཐའ་ནས་དགྲོལ་བ་ཡིས། །གློག་འགྱུ་ལྟར་འདེབས་བསྐོར་བ་ནི། །རྡོ་རྗེའི་གར་ཞེས་དེ་བཤད་དོ། །དེ་ཉིད་ནི་གར་བསྐོར་བ་སྟེ། དེས་རྡོ་རྗེ་ཁུ་ཚུར་གཉིས་བསྐོར་བ་དེ་ལས་བྱུང་བའི་ཐལ་མོ་སྦྱར་བ་སྤྱི་བོར་ཡང་དག་པར་བཞག་
ན། རྡོ་རྗེ་ལས་ཀྱི་ཕྱག་རྒྱར་འགྱུར་རོ། །གོ་ཆ་ཞེས་བྱ་བ་ནི་རྡོ་རྗེ་ཁུ་ཚུར་གཉིས་སྙིང་གར་མདུད་པའི་ཚུལ་གྱིས་ཡོངས་སུ་བསྐོར་ལ། ཡང་མགྲིན་པ་དང་ལྟག་པར། ཡང་སྙིང་གར། དེ་ནས་ནུ་མའི་བར་དུ་སླར་ཡང་སྙིང་གར། དེ་ནས་མགྲིན་པ་དང་། རྒྱབ་དང་དབང་
བསྐུར་བའི་གནས་སུ་མདུད་པ་བྱ་བའི་ཚུལ་གྱིས་ཡོངས་སུ་བསྐོར་ལ། ཕྲེང་བ་བཅིང་བ་ཇི་ལྟ་བ་བཞིན་བྱས་ལ། མཐར་ཐལ་མོའི་རྟིང་པ་བརྡབས་པས་མཉེས་པར་བྱས་ལ། ཡང་རྡོ་རྗེ་ཁུ་ཚུར་གཉིས་བཅིངས་ཏེ། གོ་བགོ་བའི་ཚུལ་གཉིས་རབ་ཏུ་སྦྱར་བ་ནི་རྡོ་རྗེ་སྲུང་
བའིའོ། །མཐེའུ་ཆུང་མཆེ་བའི་མཆོག་ཅེས་བྱ་བ་ནི་རྡོ་རྗེ་ཁུ་ཚུར་གཉིས་ཀྱི་མཐེའུ་ཆུང་བརྐྱང་ལ་བཀུག་པའི་མཐེ་བོའི་མཆོག་གང་ཡིན་པ་དེ་ནི་མཆེ་བའི་མཆོག་ཅེས་བྱ་བ་སྟེ་དེ་ཁའི་གྲྭ་གཉིས་སུ་གཞག་པ་ནི་རྡོ་རྗེ་གནོད་སྦྱིན་གྱི་ཕྱག་རྒྱའོ། །ཁུ་ཚུར་གཉིས་ནི་མནན་
པའོ་ཞེས་བྱ་བ་ནི་རྡོ་རྗེ་ཁུ་ཚུར་གཉིས་ཕན་ཚུན་བཙིར་བ་འདི་ནི་རྡོ་རྗེ་ཁུ་ཚུར་གྱིའོ། །རྡོ་རྗེ་འགྱིང་བ་ཞེས་བྱ་བ་ལ་སོགས་པ་ལ། རྡོ་རྗེ་ཁུ་ཚུར་གཉིས་དཀུ་གཉིས་སུ་བཞག་ལ། བསམ་པ་གཡོས་པས་ཞེས་བྱ་བ་སྨོས་པའི་ཁྱད་པར་གྱིས་མདུད་པར་བྱ་བ་ནི་སྒེག་མོའི་ཕྱག་རྒྱའོ། །
ཕྲེང་བ་བཅིང་དང་ཞེས་བྱ་བ་ནི་རྡོ་རྗེ་ཁུ་ཚུར་གཉིས་ཀྱིས་ཕྲེང་བ་བཅིང་བའི་ཚུལ་དུ་བྱེད་པ་ནི་ཕྲེང་བ་མའིའོ། །ཁ་ནས་དབྱུང་ཞེས་བྱ་བ་ནི། །རྡོ་རྗེ་ཁུ་ཚུར་གཉིས་ཀྱིས་ཚིག་འབྱིན་པའི་ཚུལ་དུ་བྱེད་པ་འདི་ནི་གླུ་མའིའོ། །རྡོ་རྗེ་གར་ནི་བསྐོར་བ་ཡིས། །ཞེས་བྱ་བ་ནི་རྡོ་རྗེ་ལས་ཀྱི་ཕྱག་རྒྱ་
ལྟར་གར་བྱ་བ་ཉིད་ཅེས་བྱ་བའི་ཐ་ཚིག་སྟེ། རྡོ་རྗེ་གར་མའིའོ། །རྡོ་རྗེ་ཁུ་ཚུར་གྱིས་ནི་ཞེས་བྱ་བ་ནི་རྡོ་རྗེ་ཁུ་ཚུར་གཉིས་ཀྱིས་སོ། །བདུག་པ་ལ་སོགས་དེ་བཞིན་སྦྱིན། །ཞེས་བྱ་བ་ནི་དེ་བཞིན་ཏེ་སྔར་བཤད་པའི་བདུག་པ་མ་ལ་སོགས་པའི་ཕྱག་རྒྱའི་ཚུལ་དེ་ལས་རྡོ་རྗེ་ཁུ་ཚུར་གཉིས་

བདུག་པ་འབུལ་བའི་ཚུལ་དུ་ཐུར་དུ་བླུགས་པ་ནི་བདུག་པ་མའིའོ། །རྡོ་རྗེ་ཁུ་ཚུར་གཉིས་མེ་ཏོག་འབུལ་བའི་ཚུལ་དུ་གྱེན་དུ་འཐོར་བ་ནི་མེ་ཏོག་མའིའོ། །རྡོ་རྗེ་ཁུ་ཚུར་གཉིས་ཀྱི་མཐེ་བོང་གཉིས་གཤིབས་ཏེ་བསྒྲེང་ལ་མར་མེ་འབུལ་བའི་ཚུལ་དུ་གཞག་པ་ནི་མར་མེ་མའིའོ། །
རྡོ་རྗེ་ཁུ་ཚུར་གཉིས་བརྐྱང་ལ་རང་གི་སྙིང་གར་དྲིས་བྱུག་པའི་ཚུལ་དུ་བྱེད་པ་ནི་བྱུག་པ་མའིའོ། །སངས་རྒྱས་ཀུན་ལ་མཆོད་པ་ཡི། །ཕྱག་རྒྱའི་མཆོད་པ་བྱེད་པའོ། །ཞེས་བྱ་བ་ནི་མཆོད་པའི་རྒྱུར་བདུག་པ་མ་ལ་སོགས་པའི་མཆོད་པ་ཕྱག་རྒྱ་འདི་དག་བརྟག་པ་འདི་ཡིན་ནོ། །མཛུབ་མོ་ལྕགས་
ཀྱུ་བཅིང་བ་ནི། །ཞེས་བྱ་བ་ནི་རྡོ་རྗེ་ཁུ་ཚུར་གཉིས་བཅིངས་ལ། གཡས་པའི་རྡོ་རྗེ་ཁུ་ཚུར་གྱི་མཛུབ་མོ་ལྕགས་ཀྱུར་བྱའོ། །དེ་བཅིང་བ་ནི་མཐེའུ་ཆུང་ལས། །ཞེས་བྱ་བ་ནི། གཡོན་པའི་རྡོ་རྗེ་ཁུ་ཚུར་གྱིས་མཐེའུ་ཆུང་ལྕགས་ཀྱུར་བྱས་པའི་ལྕགས་ཀྱུ་གཡས་པའི་མཛུབ་མོའི་ལྕགས་ཀྱུའི་རྩ་བ་
དགུག་པར་བཅིང་སྟེ། བཅིངས་པ་དེས། མཐེའུ་ཆུང་སྟེ་ལྕགས་ཀྱུ་ཆེ། །ཞེས་བྱ་བ་ནི་རྡོ་རྗེ་ལྕགས་ཀྱུའི་ལས་ཀྱི་ཕྱག་རྒྱའོ། །མཁྲིག་མ་མདུད་པ་ཞེས་བྱ་བ་ནི་རྡོ་རྗེ་ཁུ་ཚུར་གཉིས་བཅིངས་ལ་གཅིག་ལ་གཅིག་གི་མཁྲིག་མའི་གནས་ཀྱི་རྒྱབ་ཀྱི་ཆ་སྦྱར་བ་དེ་ལྟ་བུ་ནི་མཁྲིག་མ་མདུད་
པར་གྱུར་ཏེ། རྡོ་རྗེ་ཞགས་པའིའོ། །མཛུབ་མོ་གཉིས་གདུབ་ཅེས་བྱ་བ་ནི་རྡོ་རྗེ་ཁུ་ཚུར་གཉིས་བཅིངས་ལ་དེ་ཉིད་ཀྱི་མཛུབ་མོ་གཉིས་ལྕགས་ཀྱུ་འདྲ་བར་བྱས་པ་ནང་དུ་ཐད་ཀར་བཞག་སྟེ། ཕན་ཚུན་ལྕགས་སྒྲོག་བཅིང་བའི་ཚུལ་དུ་བྱ་བ་འདི་ནི་མཛུབ་མོ་གཉིས་གདུ་བུར་འགྱུར་ཏེ།
རྡོ་རྗེ་ལྕགས་སྒྲོག་གིའོ། །རྒྱབ་གཉིས་ཀྱང་ནི་བསྙམས་ཏེ་གཞག །ཅེས་བྱ་བ་ནི་རྡོ་རྗེ་ཁུ་ཚུར་གཉིས་བཅིངས་ལ་ཕན་ཚུན་རྒྱབ་སྦྱར་ནས་བཙིར་བ་འདི་ནི་རྡོ་རྗེ་འབེབས་པའི་ལས་ཀྱི་ཕྱག་རྒྱའོ། །སེམས་མ་རྡོ་རྗེ་མ་ལ་སོགས་པའི་ཕྱག་རྒྱ་ནི་རྡོ་རྗེ་སེམས་མ་དང་། རིན་ཆེན་དང་།
ཆོས་དང་། ལས་ཀྱི་ཕྱག་རྒྱ་དེ་ཉིད་དེ་དག་གི་ཕྱག་རྒྱ་ཡིན་པར་བལྟ་བར་བྱའོ། །དེ་ནས་འདི་རྣམས་ཞེས་བྱ་བ་ནི་ལས་ཀྱི་ཕྱག་རྒྱ་རྣམས་ཀྱིའོ། །སྒྲུབ་པ་ཞེས་བྱ་བ་ནི་འདིས་སྒྲུབ་པས་ན་སྒྲུབ་པ་སྟེ། རང་གི་སྙིང་གར་སྣ་ཚོགས་རྡོ་རྗེ་བསམ་པའོ། །རྡོ་རྗེ་ལས་ནི་བྱེད་དང་མཉམ། །

ཞེས་བྱ་བ་ནི། རྡོ་རྗེ་ཞེས་བྱ་བ་དེ་བཞིན་གཤེགས་པ་རྣམས་ཀྱི་ཕྲིན་ལས་ནི། སངས་རྒྱས་རྣམས་ཀྱི་སྤྲུལ་པ་དང་། སེམས་ཅན་གྱི་དོན་བྱ་བ་རྣམས་སོ། །དེ་བྱེད་པས་ན། རྡོ་རྗེ་ལས་ནི་བྱེད་པ་སྟེ་རྡོ་རྗེ་ལས་སོ། །དེ་དང་མཉམ་པ་ནི་མཚུངས་པའོ། །དེ་བསྟན་པའི་ཕྱིར། རྡོ་རྗེ་ཀུན་
དངོས་རྡོ་རྗེ་ནི། །སྙིང་གར་ཡོངས་སུ་བསྒོམ་པར་བྱ། །ཞེས་བྱ་བ་གསུངས་ཏེ། རྡོ་རྗེ་ཐམས་ཅད་རང་བཞིན་ནོ། །རྡོ་རྗེ་ཀུན་དངོས་རྡོ་རྗེ་སྟེ་སྣ་ཚོགས་རྡོ་རྗེ་ཞེས་བྱ་བའི་ཐ་ཚིག་གོ། །དེ་སྙིང་གར་བསྒོམ་ཞིང་བསམ་པ་འདི་ནི་དེ་བསྒྲུབ་པ་ཡིན་ནོ། །ཡེ་ཤེས་ཕྱག་རྒྱ་བཅིངས་པས་ནི། །
སངས་རྒྱས་ཡེ་ཤེས་འཇུག་པར་འགྱུར། །ཞེས་བྱ་བ་ལ། བྱང་ཆུབ་མཆོག་ནི་ཡེ་ཤེས་ཀྱི་ཕྱག་རྒྱ་སྟེ། བྱང་ཆུབ་ཀྱི་སེམས་དང་། སྦྱིན་པ་དང་། ཤེས་རབ་དང་། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ཤེས་རབ་ཡེ་ཤེས་བསྡུས་པའི་ཁུ་ཚུར་དེ་བཅིངས་པར་གྱུར་ན། སངས་
རྒྱས་ཀྱི་ཡེ་ཤེས་བཞི་པོ་ཡང་དག་པར་འཇུག་པར་འགྱུར་ཞིང་རབ་ཏུ་ཞུགས་ལ་རྣལ་འབྱོར་པ་ལ་སྐྱེ་བར་འགྱུར་རོ་ཞེས་བྱ་བའི་ཐ་ཚིག་གོ། །མི་གཡོ་བའི་ཞེས་བྱ་བ་ནི། བཅོམ་ལྡན་འདས་མི་བསྐྱོད་པའི་ལས་ཀྱི་ཕྱག་རྒྱ་སྟེ། དེ་བཅིངས་པས་ནི་གཡོ་བ་མེད་ཅིང་འཁྲུག་པ་མེད་
པར་འགྱུར་ཏེ། བཅོམ་ལྡན་འདས་རིན་ཆེན་འབྱུང་ལྡན་གྱི་ཕྱག་རྒྱ་བཅིངས་པས་ནི་གཞན་ལ་ཕན་པར་བྱེད་དེ། ཕ་རོལ་གཞན་རྣམས་ལ་རྗེས་སུ་གཟུང་བའི་ཕན་འདོགས་པ་འདི་ལ་ཡོད་པས་ན་གཞན་ལ་ཕན་བྱེད་ལྡན་པ་སྟེ་དེ་ལྟ་བུར་འགྱུར་རོ། །དམ་ཆོས་འཁོར་ལོའི་
ཕྱག་རྒྱ་ནི། །ཆོས་ཀྱི་འཁོར་ལོ་བསྐོར་བར་འགྱུར། །ཞེས་བྱ་བ་ནི། བཅོམ་ལྡན་འདས་འོད་དཔག་ཏུ་མེད་པའི་ཕྱག་རྒྱ་བཅིངས་ན། ཆོས་སྟོན་པས་སེམས་ཅན་གྱི་དོན་བྱེད་པར་འགྱུར་རོ། །མི་འཇིགས་ཞེས་བྱ་བ་ལ་སོགས་པ་ལ། མི་འཇིགས་པ་རབ་ཏུ་སྩོལ་བའི་
མཆོག་ཡིན་པས་ན། མི་འཇིགས་མཆོག་སྟེ་བཅོམ་ལྡན་འདས་དོན་ཡོད་པར་གྲུབ་པའོ། །དེའི་ཕྱག་རྒྱས་ནི་མི་འཇིགས་པ་སྦྱིན་པར་འགྱུར་རོ། །རྡོ་རྗེ་སེམས་དཔའ་ལ་སོགས་པ་ནི་གོ་སླའོ། །གདུལ་བྱའི་སྐྱེ་བོ་སྤྲོ་བ་བསྐྱེད་པའི་ཕན་ཡོན་གསུངས་པ་ཡིན་ནོ། །དེ་ནས་

ཕྱག་རྒྱ་ཐམས་ཅད་ཀྱི། །ཞེས་བྱ་བ་རྡོ་རྗེ་འབེབས་པའི་དམ་ཚིག་གི་ཁུ་ཚུར་ནི། དམ་ཚིག་དང་། ཆོས་དང་། ལས་དང་། ཕྱག་རྒྱ་ཆེན་པོ་རྣམས་ཀྱིའོ། །སྤྱིའི་ཕྱག་རྒྱ་བཅིངས་པའི་ཆོ་ག་རྒྱས་པ་བཤད་དེ་ཞེས་བྱ་བ་ནི། སྤྱི་ཞེས་བྱ་བ་ཐུན་མོང་དུ་གྱུར་པའི་
བཅིང་བའི་ཆོ་ག་རྒྱས་པ་ཡིན་པས་ཕྱག་རྒྱ་བཅིང་བའི་ཆོ་ག་རྒྱས་པ་ཞེས་བྱ་སྟེ། སྙིང་གར་རྡོ་རྗེ་བསྡམས་པ་དྲལ་བའི་མཚན་ཉིད་དོ། །དེ་བཤད་པར་བྱའོ། །དེ་ཉིད་གསུངས་པ་ནི། དེ་ལ་ཐོག་མ་ཉིད་དུ་ཞེས་བྱ་བ་སྟེ། རྡོ་རྗེ་དབབ་པའི་དམ་ཚིག་གི་ཁུ་ཚུར་གྱི་ཕྱག་རྒྱ་བཅིངས་པ་
ཉིད་ཀྱིས། དངོས་གྲུབ་ཀྱི་ཆོ་ག་རྒྱས་པའི་དམ་ཚིག་དང་། ཆོས་དང་། ལས་དང་། ཕྱག་རྒྱ་ཆེན་པོ་རྣམས་ལས། ཐོག་མ་ཉིད་དུ་རྡོ་རྗེ་བཅིངས་པའི་སོར་མོ་སྙིང་གར་གདབ་པར་བྱ་སྟེ་ཞེས་བྱ་བ་ནི། ཐལ་མོ་སྦྱར་བ་དང་། རྡོ་རྗེ་ཐལ་མོ་དང་། རྡོ་རྗེ་བསྡམས་པ་བཅིངས་ལ།
རང་གི་སྙིང་གར་བཛྲ་བནྡྷ་ཏྲཊ། ཅེས་བྱ་བ་འདིས་ལན་གསུམ་དྲལ་བ་ནི། ཁམས་གསུམ་པའི་འདོད་ཆགས་ལ་སོགས་པ་བག་ཆགས་ཀྱིས་འཆིང་བ་གཞིག་པར་དཀའ་བ་སྟེ། རང་བཞིན་གྱིས་འོད་གསལ་བར་བསྒོམས་པས་གཅོད་པར་སྟོན་པ་ཡིན་ནོ། །དེ་ནས་
ཕྱག་རྒྱ་བཅིང་བ་ཀུན་ནི། རྡོ་རྗེ་འབེབས་པ་ལ་སོགས་པའོ། །རང་རང་གི་ལུས་དང་ངག་དང་སེམས་རྡོ་རྗེ་ནི་རྣལ་འབྱོར་པའིའོ། །དབང་དུ་འགྱུར་རོ་ཞེས་བྱ་བ་ནི་སྒྲུབ་པ་པོས་ཕྱག་རྒྱ་གང་དང་གང་བཅིངས་པ་དེ་དང་དེ་རང་གི་ལས་བྱེད་དོ་ཞེས་བྱ་བའི་ཐ་ཚིག་གོ། །དེ་ལྟར་
ཕྱག་རྒྱ་ཐམས་ཅད་བཅིང་བའི་དོན་གྱི་སྔོན་དུ་བྱ་བའི་ཆོ་ག་བསྟན་ནས་ད་ནི་དེ་རྣམས་ཉིད་གྲུབ་པའི་དོན་གྱི་ཆོ་ག་གསུངས་པ་ནི། དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ཏེ། རྡོ་རྗེ་དབབ་པའི་དམ་ཚིག་གི་ཕྱག་རྒྱར་བཤད་པ། བཛྲ་ཨཱ་བེ་ཤ་ཞེས་ཟློས་ཤིང་བཅིངས་
ལ། ཨཿཞེས་བྱ་བས་བདག་ཉིད་ལ་དབབ་པར་བྱ་ཞིང་། རང་གི་སྙིང་གའི་ཟླ་བ་ལ་རྡོ་རྗེ་ཡང་ཞུགས་པར་བསམ་པར་བྱའོ། །རྡོ་རྗེ་ཞེས་བྱ་བ་ནི་རང་གི་རིགས་ཀྱི་མཚན་མའི་ཉེ་བར་མཚོན་པ་ཙམ་ཡིན་པར་ཤེས་པར་བྱའོ། །དེ་ནས་བབས་ནས་གྲོགས་པོ་ཉིད་དུ་ཉེ་བར་

གནས་པར་འགྱུར་རོ་ཞེས་བྱ་བ་ནི་རང་གི་རིགས་ཀྱི་མཚན་མའི་ཁྱད་པར་གྱི་གཟུགས་ཀྱིས་བབས་ཤིང་ཡང་དག་པར་ཀུན་དུ་ཞུགས་ནས་གྲོགས་པོ་ཉིད་དུ་ཉེ་བར་གནས་པར་འགྱུར་ཏེ། གྲོགས་པོ་དང་འདྲ་བར་དགོས་པ་ཐམས་ཅད་བྱེད་ཅིང་སྒྲུབ་པ་པོ་གང་འདོད་པ་དེ་རྫོགས་
པར་བྱེད་དོ་ཞེས་བྱ་བའི་ཐ་ཚིག་གོ། །དེ་ནས་ཏིཥྛ་བཛྲ་ཞེས་བྱ་བ་ལ་སོགས་པས་དབབ་པ་བརྟན་པར་བྱས་ནས། བཛྲ་མུཥྚི་ཞེས་བྱ་བས་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་བཅིངས་ནས། བཛྲ་སནྡྷི་ཞེས་བརྗོད་པར་བྱའོ། །དེ་ནས་ཕྱག་རྒྱ་བཅིངས་པ་ཐམས་ཅད་འགྲུབ་
པར་འགྱུར་ཏེ། གང་གི་ཕྱིར་རྒྱུད་འདི་ཉིད་ལས། །རྡོ་རྗེ་ཁུ་ཚུར་དམ་བཅིངས་པས། །ཕྱག་རྒྱ་ཐམས་ཅད་དབང་དུ་འགྱུར། །ཞེས་བསྟན་པ་ཡིན་ནོ། །དེ་ནས་སྡིག་པ་དྲལ་བའི་ཕྱག་རྒྱས་སྡིག་པ་ཟད་པར་བྱས་ནས། དེ་བཞིན་གཤེགས་པའི་ཟློས་པ་པོས་ནི་སེམས་སོ་སོར་
རྟོགས་པ་ལ་སོགས་པའི་ཚུལ་གྱིས་མངོན་པར་བྱང་ཆུབ་པ་ལྔའི་རིམ་པ་བསྒོམ་པར་བྱའོ། །རྡོ་རྗེ་སེམས་དཔའ་ལ་སོགས་པའི་ཟློས་པ་པོས་སྡིག་པ་ཟད་པའི་རྗེས་ཐོགས་ལ་ཕྱག་རྒྱའི་དམ་ཚིག་སེམས་དཔའ་ཆེན་པོ་བསྒོམ་པར་བྱའོ་ཞེས་བསྟན་པར་བྱ་བའི་ཕྱིར། དེ་ནས་
ཕྱག་རྒྱའི་དམ་ཚིག་གི་སེམས་དཔའ་ཆེན་པོ་རྗེས་སུ་དྲན་པར་བྱ་སྟེ་ཞེས་བྱ་བ་གསུངས་ཏེ། ཕྱག་རྒྱ་རྣམས་ཀྱི་དམ་ཚིག་ཡིན་པས་ན་ཕྱག་རྒྱའི་དམ་ཚིག་སྟེ། དམ་ཚིག་གི་ཕྱག་རྒྱ་དང་ལས་ཀྱི་ཕྱག་རྒྱ་རྣམས་བསྐྱེད་པའི་རྒྱུ་ཞེས་བྱ་བའི་ཐ་ཚིག་གོ། །དམ་ཚིག་ཀྱང་ཡིན་ལ་
སེམས་དཔའ་ཡང་ཡིན་པས་ན། ཕྱག་རྒྱའི་དམ་ཚིག་གི་སེམས་དཔའ་ཆེན་པོ་སྟེ། ཆོས་ཀྱི་དབྱིངས་ཀྱི་མཚན་ཉིད་རྣམ་པར་སྣང་མཛད་ཆེན་པོའོ། །དེ་རྗེས་སུ་དྲན་པ་ནི་བསྒོམ་པའོ། །དེ་རྣམ་པར་བསྒོམ་པ་ནི་འདི་ཡིན་ཏེ། ཐོག་མཐའ་མེད་པའི་སེམས་དཔའ་ནི། །ནམ་
མཁའ་སྐྱེ་བའི་མཚན་ཉིད་ཡིན། །ཀུན་ཏུ་བཟང་པོ་ཀུན་བདག་ཉིད། །འདོད་པ་ཀུན་དང་འགྲོ་བའི་བདག །སེམས་ཅན་ཀུན་གྱི་སེམས་གང་ཡིན། །བསྟན་ཕྱིར་སེམས་དཔའ་ཞེས་བཤད་དོ། །མཉམ་པར་གཞག་པས་ཏིང་ངེ་འཛིན། །སེམས་དཔའ་ལས་ནི་རྡོ་རྗེར་

འགྱུར། །སེམས་དཔའ་བྱིན་རླབས་སྦྱོར་བ་ཡིས། །སེམས་དཔའ་ཉིད་དུ་འང་དེ་འགྱུར་རོ། །བཅོམ་ལྡན་སེམས་དཔའ་དེ་ཉིད་དེ། །རྡོ་རྗེ་འདོད་པའི་དེ་བཞིན་གཤེགས། །རང་སེམས་རབ་ཏུ་རྟོགས་ལ་སོགས། །སངས་རྒྱས་བྱང་ཆུབ་ཆོ་ག་བཞིན། །
དེ་ཉིད་དེ་བཞིན་གཤེགས་པའི་རིགས། །དེ་ཉིད་རྡོ་རྗེའི་རིགས་ཆེན་པོ། །དེ་ཉིད་པདྨའི་རིགས་དག་པ། །དེ་ཉིད་ནོར་བུའི་རིགས་མཆོག་གོ། །ཞེས་གསུངས་པ་ཡིན་ནོ། །དེ་ལྟར་རྡོ་རྗེ་སེམས་དཔའ་དང་། རྡོ་རྗེ་སེམས་དཔའ་ལས་བྱུང་བའི་རིགས་ཐམས་ཅད་རྣམ་པར་
བསྒོམས་ནས། མ་ཧཱ་ས་མ་ཡ་སཏྭ་ཧཾ་ཞེས་བརྗོད་པར་བྱའོ། །དེ་ལ་དམ་ཚིག་ཀྱང་ཡིན་ལ་ཆེན་པོ་ཡང་ཡིན་པས་ན། དམ་ཚིག་ཆེན་པོའི་སེམས་དཔའ་སྟེ། ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཀྱི་ངོ་བོ་རྣམ་པར་སྣང་མཛད་ཆེན་པོའོ། །དེ་ལས་བྱུང་བའམ་དེའི་
ངོ་བོའི་སེམས་དཔའ་ལ་སོགས་པའི་སྐུ་དང་གསུང་དང་ཐུགས་རྡོ་རྗེའི་མཚན་ཉིད་ཅན་ནི་དམ་ཚིག་ཆེན་པོའི་སེམས་དཔའ་ཆེན་པོ་སྟེ། དེའི་ངོ་བོ་ཉིད་ནི་བདག་ཡིན་ནོ་ཞེས་ང་རྒྱལ་བསྐྱེད་པར་བྱའོ། །འདིས་ནི་འདི་སྐད་སྟོན་ཏེ། བདག་ནི་སེམས་དཔའི་སྐུ་དང་གསུང་དང་
ཐུགས་རྡོ་རྗེའི་ངོ་བོ་མིག་ཡོར་ཙམ་ཡིན་གྱི། དོན་དམ་པར་ནི་ཐམས་ཅད་དུ་གཟུགས་ཅན་མ་ཡིན་ཏེ། དེ་བས་ན་ཐོག་མ་དང་ཐ་མ་མེད་པའི་དམ་ཚིག་ཆེན་པོའི་སེམས་དཔའ་ནི་བདག་ཡིན་ནོ་ཞེས་པའོ། །དེ་བཞིན་གཤེགས་པའི་རྣལ་འབྱོར་པས་ནི། ཨོཾ་ཙིཏྟ་པྲ་ཏི་བེ་དྷཾ་ཀ་རོ་
མི་ཞེས་བྱ་བ་ནས། ཡ་ཐཱ་སརྦྦ་ཏ་ཐཱ་ག་ཏསྟ་ཐ་ཨ་ཧཾ་ཞེས་བྱ་བའི་བར་འདི་ཙམ་ཞིག་བརྗོད་པར་བྱའི། མ་ཧཱ་ས་མ་ཡ་སཏྭ་ཧཾ་ཞེས་བྱ་བ་ནི་མ་ཡིན་ཏེ། དེ་བཞིན་གཤེགས་པ་དང་། རྡོ་རྗེ་དང་། པདྨ་དང་། རིན་པོ་ཆེ་དང་། ནོར་བུའི་རིགས་ཉིད་ནི། རྣམ་པར་སྣང་མཛད་ཆེན་
པོའི་ངོ་བོ་ཉིད་ཀྱིས་ན། དམ་ཚིག་ཆེན་པོའི་སེམས་དཔའི་རང་བཞིན་ཡིན་པའི་ཕྱིར་རོ། །བཛྲ་སཏྭ་ཞེས་བྱ་བ་ལ་སོགས་པ་ཟློས་པས་ཀྱང་རིགས་ཀྱི་སྒོམ་པ་པོས་རང་གི་ལྷའི་རྣལ་འབྱོར་བྱ་བ་ཡིན་ཏེ། བཟླས་པའི་དོན་དུ་བདག་ཉིད་ནི། །བསྒོམས་ན་འགྲུབ་པར་འགྱུར་

བ་ཡིན། །ཞེས་གསུངས་པའི་ཕྱིར་རོ། །དེ་ལྟར་ཕྱག་རྒྱ་ཐམས་ཅད་འགྲུབ་པར་བྱ་བའི་ཕྱིར། རང་གི་བསྒོམ་པའི་ཆོ་ག་རྒྱས་པར་བཤད་ནས་དེ་བཞིན་གཤེགས་པའི་རྣལ་འབྱོར་པ་དང་། དེའི་རིགས་ཀྱི་རྣལ་འབྱོར་པས་རྣམ་པར་སྣང་མཛད་ལ་སོགས་པའི་རང་གི་ཕྱག་རྒྱ་ཆེན་
པོ་བསྒོམ་པ་གསུངས་པ་ནི། དེ་ལ་ཞེས་བྱ་བ་ལ་སོགས་པ་གསུངས་པ་ཡིན་ཏེ། ཐོག་མ་ཁོ་ན་ཞེས་བྱ་བ་ནི། ཆོས་དང་། ལས་དང་། ཕྱག་རྒྱ་ཆེན་པོ་བཅིང་བའི་སྔོན་དུ་ཞེས་བྱ་བའི་ཐ་ཚིག་གོ། །རང་གི་ཕྱག་རྒྱ་བཅིངས་ནས་ཞེས་བྱ་བ་ནི་རང་གི་ལྷའི་དམ་ཚིག་གི་ཕྱག་རྒྱ་ནི་རང་གི་
ཕྱག་རྒྱ་སྟེ། དེ་བཅིང་བ་ནི་རང་གི་ཕྱག་རྒྱ་བཅིང་བའོ། །རང་གི་ཕྱག་རྒྱའི་སེམས་དཔའ་ནི་རྣམ་པར་སྣང་མཛད་ལ་སོགས་པའི་སྐུ་དང་གསུང་དང་ཐུགས་རྡོ་རྗེའི་ངོ་བོ་སྟེ། རང་གི་ཕྱག་རྒྱའི་སེམས་དཔའ་དེར་ས་མ་ཡ་ཧཾ་ཞེས་ཟློས་ཤིང་བསྒོམ་པར་བྱའོ། །དེ་ལ་ས་མ་ཡ་ཞེས་བྱ་
བ་ནི་ཀུན་རྫོབ་སྟེ། ཀུན་རྫོབ་ཀྱི་གཟུགས་ཅན་ནི་བདག་གོ་ཞེས་བྱ་བའི་ཐ་ཚིག་གོ། །འདི་དག་ཀྱང་བཤད་ཟིན་པས་མ་སྨྲས་སོ། །དེ་ལྟར་རང་གི་དམ་ཚིག་གི་ཕྱག་རྒྱ་བཅིངས་ལ་རང་གི་ལྷའི་ངོ་བོར་བདག་རྣམ་པར་བསྒོམས་ནས་རང་གི་ལྷའི་རྣལ་འབྱོར་བརྟན་པར་བྱ་བའི་
ཕྱིར། རང་གི་ལྷའི་དམ་ཚིག་གི་ཕྱག་རྒྱ་ཉིད་ཀྱིས། སྙིང་ག་དང་། དཔྲལ་བ་དང་། ལྐོག་མ་དང་། སྤྱི་བོར་རྡོ་རྗེ་དང་། རིན་པོ་ཆེ་དང་། པདྨ་དང་། སྣ་ཚོགས་རྡོ་རྗེ་བསྐྱེད་པར་བྱའོ། །དེ་བརྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་སོ། །བྱིན་གྱིས་
བརླབས་པའི་སྔགས་གསུངས་པ་ནི། ས་མ་ཡ་སཏྭ་ཨ་དྷི་ཏིཥྛ་སྭ་མཾ་ཞེས་བྱ་བ་ཡིན་ཏེ། ས་མ་ཡ་སཏྭ་ཞེས་བྱ་བ་ནི་དམ་ཚིག་གི་སེམས་དཔའ་ཞེས་བོད་པའོ། །ཨ་དྷི་ཏིཥྛ་སྭ་མཾ་ཞེས་བྱ་བ་ནི་བདག་ལ་བྱིན་གྱིས་རློབས་ཤིག་ཅེས་གསོལ་བ་འདེབས་པའོ། །དེ་ལྟར་བདག་
བྱིན་གྱིས་བརླབས་ནས་དེ་བཞིན་གཤེགས་པའི་ཟློས་པ་པོས་ནི། བཛྲ་དྷཱ་ཏུ་ཞེས་ཟློས་ཤིང་རང་གི་ཕྱག་རྒྱ་ཆེན་པོ་བཅིང་བར་བྱའོ། །རྡོ་རྗེ་སེམས་དཔའི་ཟློས་པ་པོས་ནི་བཛྲ་སཏྭ་ཞེས་བྱ་བ་རང་གི་སྙིང་པོ་ཟློས་ཤིང་། སྐུ་གསུང་ཐུགས་ཀྱི་རྡོ་རྗེས་ནི། །རྡོ་རྗེ་བསྒྱིངས་པར་

སེམས་བསྐྱེད་དེ། །བསྒྱིངས་བཅས་རྡོ་རྗེ་གསོར་བྱེད་ན། །རྡོ་རྗེ་སེམས་དཔར་བདག་ཉིད་འགྱུར། །ཞེས་བསམ་པར་བྱའོ། །དེ་བཞིན་དུ་རྡོ་རྗེ་རྒྱལ་པོ་ལ་སོགས་པའི་ཕྱག་རྒྱ་ཆེན་པོ་བཅིང་བ་ཡང་དེ་བཞིན་དུ་ཤེས་པར་བྱའོ། །དེ་བས་ན་འདིས་དམ་ཚིག་གི་
ཕྱག་རྒྱ་བཅིངས་ལ། ཕྱག་རྒྱ་ཆེན་པོ་སྦྱར་བར་བྱའོ་ཞེས་བཅོམ་ལྡན་འདས་ཀྱིས་གསུངས་པ་ཡིན་ནོ། །དེ་ནས་བསྒྲུབ་པར་བྱའོ་ཞེས་བྱ་བ་ནི་དེ་ལྟར་ཆོ་ག་འདིས་ཕྱག་རྒྱ་བཅིངས་ལ་དེ་བཞིན་གཤེགས་པའི་ཟློས་པ་པོས་ནི། ཛཿཧཱུཾ་བཾ་ཧོཿཞེས་བརྗོད་ལ། ལེགས་པའི་ཆོ་ག་ཡིད་
ཀྱིས་ནི། །ལུས་ལ་སངས་རྒྱས་ཀུན་གཞུག་གོ། །དམ་ཚིག་མཆོག་གི་ཕྱག་རྒྱ་ནི། །སེམས་དཔའི་རྡོ་རྗེ་ལ་སོགས་པས། །དེ་ལྟར་སེམས་དཔའ་ཆེན་པོ་བསྒྲུབ། །ཛཿཧཱུཾ་བཾ་ཧོཿཞེས་བརྗོད་ཅིང་། །ཞེས་བྱ་བའོ། །རྡོ་རྗེ་སེམས་དཔའ་ལ་སོགས་པའི་སྒྲུབ་པ་པོས་ནི། ཕྱག་རྒྱ་
ཆེན་པོ་བཅིངས་ལ། བཛྲ་སཏྭ་ཨཿཞེས་བྱ་བ་ལ་སོགས་པས་མདུན་དུ་རྡོ་རྗེ་དབབ་པ་ཇི་ལྟ་བ་བཞིན་དུ་བྱས་ལ། རང་གི་དམ་ཚིག་གི་ཕྱག་རྒྱ་དང་། བཛྲ་སཏྭ་དྲྀ་ཤྱ་ཞེས་བྱ་བ་ལ་སོགས་པས་བལྟ་བ་བྱས་ལ། དེ་ཉིད་རང་གི་ལུས་ལ་དགུག་པ་དང་། གཞུག་པ་དང་། བཅིང་
བ་དང་། དབང་དུ་བྱས་ལ་བསྒྲུབ་པར་བྱའོ། །འདིས་ནི། རྡོ་རྗེ་དབབ་པ་བྱས་ནས་ནི། །ཕྱག་རྒྱ་ཆེན་པོ་ཆོ་ག་བཞིན། །བཅིངས་ནས་དེ་ཡི་མདུན་ཕྱོགས་སུ། །སེམས་དཔའ་ཆེན་པོ་དེ་བསྒོམ་མོ། །ཡེ་ཤེས་སེམས་དཔའ་དེ་མཐོང་ནས། །རང་གི་ལུས་ལ་བསྒོམ་པར་བྱ། །
བཀུག་ཅིང་བཅུག་ལ་བཅིང་བ་དང་། །དབང་དུ་བྱས་ཏེ་སྒྲུབ་པའོ། །ཞེས་གང་གསུངས་པ་དེ་བཤད་པ་ཡིན་ནོ། །དེ་ནས་དངོས་གྲུབ་ཀྱི་ཆོ་ག་རྒྱས་པ་བཤད་དེ་ཞེས་བྱ་བ་ནི་དངོས་གྲུབ་ཀྱི་དོན་གྱི་ཆོ་ག་རྒྱས་པ་ཡིན་པས་ན། དངོས་གྲུབ་ཀྱི་ཆོ་ག་རྒྱས་པའོ། །ནོར་བསྒྲུབ་པར་
འདོད་པས་རང་གི་ལྷའི་སྦྱོར་བ་རྗེས་སུ་སྤྱད་ནས་ཇི་སྐད་གསུངས་པའི་ཚུལ་གྱིས་རྡོ་རྗེའི་དངོས་གྲུབ་ལ་སོགས་པ་བསམ་པ་ཉིད་དང་། ཤིས་པའི་སྒྲ་བརྗོད་པར་བྱ་བ་ནི། ཨརྠ་སིདྡྷི་ཞེས་བྱ་བ་སྟེ་གང་གི་ཕྱིར་སྙིང་པོ་འདིས་ནོར་གྱི་དངོས་གྲུབ་ཏུ་འགྱུར་བ་ཡིན་ནོ། །དེ་ནས་རྡོ་རྗེ་ཞེས་

བྱ་བ་ལ་སོགས་པ་ལ། བཛྲ་སིདྡྷི་ཞེས་ཟློས་པ་པོས་རྫུ་འཕྲུལ་གྱི་དངོས་གྲུབ་བསྒྲུབ་པར་འདོད་པས་ཀྱང་དེ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ་བཛྲ་སིདྡྷི་ཞེས་ལན་གསུམ་བརྗོད་པར་བྱའོ། །དེ་ནས་བཛྲ་ཛྭ་ལ་ཞེས་བྱ་བ་ལ་སོགས་པ་བརྗོད་པར་བྱའོ། །དེ་བཞིན་དུ་རང་གི་ལྷའི་
རྣལ་འབྱོར་སྔོན་དུ་འགྲོ་བ་དང་། ཆོ་ག་ཐམས་ཅད་རྗེས་སུ་སྤྱད་ལ། རིག་འཛིན་གྱི་དངོས་གྲུབ་བསྒྲུབ་པར་འདོད་པས། དང་པོ་ཁོ་ནར་འདི་ལྟར་བཛྲ་བི་དྷཱ་ར་ཞེས་ལན་གསུམ་བརྗོད་པར་བྱའོ། །དེ་ནས་ནི་བཛྲ་དྷཱ་ར་ཞེས་བྱ་བ་ལ་སོགས་པ་བཟླས་པ་བྱའོ། །དེ་ནས་དམ་པ་
བསྒྲུབ་པར་འདོད་ན་ཞེས་བྱ་བ་ནི་དེ་བཞིན་གཤེགས་པ་དང་། རྡོ་རྗེ་སེམས་དཔའ་དང་། འཇིག་རྟེན་དབང་ཕྱུག་དང་། རྡོ་རྗེ་ལས་ཀྱི་དངོས་གྲུབ་ཇི་སྐད་དུ་བཤད་པ་ནི་དམ་པ་སྟེ། དེ་གྲུབ་པར་འདོད་ཅིང་དོན་དུ་གཉེར་ནའོ། །རང་གི་ཕྱག་རྒྱའི་སྙིང་པོས་བསྒྲུབ་པོ་ཞེས་བྱ་བས་
ནི་རྣལ་འབྱོར་པ་གང་གི་ལྷའི་ཁྱད་པར་གང་ཡིན་པ་དེའི་སྙིང་པོ་བླངས་ལ་ལྷའི་ཁྱད་པར་བྱས་ནས། བཛྲ་སཏྭ་ཞེས་བྱ་བ་ལ་སོགས་པ་ལ་དེ་ཉིད་ཀྱི་སྙིང་པོ་ལན་གསུམ་བཟླས་པར་བྱའོ། །དེ་ནས་བཛྲ་བཛྲ་ཞེས་བྱ་བ་ལ་སོགས་པ་བཟླས་པར་བྱའོ། །རྣམ་པར་སྣང་མཛད་ལ་
སོགས་པའི་སྒྲུབ་པ་པོས་ཀྱང་བཛྲ་དྷཱ་ཏུ་ཞེས་བྱ་བ་ནས་བཛྲ་ཨཱ་བེ་ཤ་ཨཿཞེས་བྱ་བའི་བར་གྱིས་རང་གི་ཕྱག་རྒྱའི་སྙིང་པོ་ཟློས་པ་པོས་རྣམ་པར་སྣང་མཛད་ལ་སོགས་པ་བསྒྲུབ་པར་བྱ་སྟེ། རང་གི་ཕྱག་རྒྱ་གྲུབ་པར་བྱ་བའི་ཕྱིར་བཟླས་པ་བྱ་བའི་ངེས་པ་བཤད་པ་ཡིན་ནོ། །དེ་ནས་
ཕྱག་རྒྱ་ཐམས་ཅད་ཀྱི། །ཞེས་བྱ་བ་ནི་རྡོ་རྗེ་འབེབས་པའི་བར་གྱིས་དོན་གྱི་དངོས་གྲུབ་ལ་སོགས་པའི་ཕྱག་རྒྱའོ། །སྤྱིའི་ཞེས་བྱ་བ་ནི་དེ་བཞིན་གཤེགས་པ་དང་། རིགས་ཐམས་ཅད་ཀྱི་རྣལ་འབྱོར་པ་རྣམས་ཀྱི་ཐུན་མོང་དུ་གྱུར་པའོ། །རྡོ་རྗེ་ཞེས་བྱ་བ་ནི་བརྟན་པར་བྱ་བའི་ཆོ་གའོ། །གང་ཞིག་ལ་
བརྟན་པར་བྱ་ཞེ་ན། རང་གི་ལུས་དང་ངག་དང་། སེམས་རྡོ་རྗེ་ལའོ། །གང་གི་ཚེ་བརྟན་པར་བྱ་ཞེ་ན། ནམ་ཕྱག་རྒྱའི་བྱིན་གྱི་རླབས་ལྷོད་པར་གྱུར་ཏམ་ཞེས་བྱ་བ་ལ་སོགས་པ་གསུངས་ཏེ། ནམ་ཞེས་བྱ་བ་དུས་གང་གི་ཚེ་ཕྱག་རྒྱ་ཆེན་པོ་ལ་སོགས་པ་བསྒོམ་པ་ལ་འཇུག་པའི་སྒྲུབ་པ་པོ་རྣམས་

དེ་ལ་དམིགས་པའི་སེམས་གཞན་དུ་འཕྱོ་བ་དང་། ཡུལ་ཕྱོགས་གཞན་དུ་འགྲོ་བ་ལ་སོགས་པའི་རྣམ་པར་རྟོག་པའི་ཚུལ་གྱིས་བཅོམ་པར་གྱུར་པ་དེའི་ཚེ། ཕྱག་རྒྱའི་ཏིང་ངེ་འཛིན་གྱི་མཐུ་ཉམས་པར་གྱུར་པས་ན་འདི་ནི་ཕྱག་རྒྱའི་བྱིན་གྱི་རླབས་ལྷོད་པར་
གྱུར་པ་ཞེས་བྱ་བ་སྟེ། དེའི་ཚེ་འམ་བདག་གཏོང་བར་འདོད་ན་ཞེས་བྱ་བ་ནི་གང་གི་ཚེ་བསྒོམས་པས་ཡོངས་སུ་དུབ་པར་གྱུར་ན་ཕྱག་རྒྱ་འདི་དགྲོལ་བར་འདོད་པ་ཡིན་ཏེ། དེའི་ཚེ་ཡང་བརྟན་པར་བྱའོ་ཞེས་དུས་ཀྱི་ངེས་པ་གསུངས་པ་ཡིན་ནོ། །འདིས་ཞེས་བྱ་བ་ནི་ཨོཾ་བཛྲ་སཏྭ་
ཞེས་བྱ་བ་ལ་སོགས་པ་ཡི་གེ་བརྒྱ་པ་གསུངས་པས་སོ། །འདིས་ནི་མཚམས་མེད་པ་བྱས་པ་དང་ཞེས་བྱ་བ་ལ་སོགས་པ་ལ། དངོས་གྲུབ་ཐོབ་པར་འགྱུར་རོ་ཞེས་བྱ་བར་སྦྱར་ཏེ། མཚམས་མེད་པ་བྱས་པ་ཡང་ཞེས་བྱ་བ་ནི། ལ་བཟླ་བ་གསུངས་པ་ཡིན་ཏེ། ངེས་པར་མྱོང་བར་
འགྱུར་བའི་སྡིག་པ་ཆེན་པོ་བྱས་པས་ཀྱང་འགྲུབ་པར་འགྱུར་ན། སྡིག་པ་ཆུང་ངུ་བྱེད་པ་དང་རྒྱུད་ཡོངས་སུ་དག་པ་དེ་དག་ནི་ལྟ་སྨོས་ཀྱང་ཅི་དགོས་ཀྱི་ཤིན་ཏུ་འགྲུབ་པར་འགྱུར་རོ། །དེ་བཞིན་གཤེགས་པ་ཐམས་ཅད་བསླུས་པ་དང་ཞེས་བྱ་བ་ནི་དེ་བཞིན་གཤེགས་པས་གསུངས་པ་
གང་ཡིན་པ་འདི་ནི་ངས་བྱས་ཀྱི། བསྟན་བཅོས་འདི་ནི་སངས་རྒྱས་ཀྱིས་གསུངས་པ་མ་ཡིན་ནོ་ཞེས་སྨྲ་བ་ནི་དེ་བཞིན་གཤེགས་པ་ཐམས་ཅད་སླུ་བར་བྱེད་པ་དེ་དག་ཀྱང་ངོ་། །དམ་པའི་ཆོས་ལ་སྨོད་པ་ནི་དམ་པའི་ཆོས་རྐུ་བའི་སྡིག་པ་ཆེན་པོ་བྱེད་པ་སྟེ། འདི་དག་ནི་སངས་རྒྱས་
ཀྱིས་གསུངས་པ་མ་ཡིན་གྱི། འདི་ནི་སྙན་དངགས་མཁན་གྱིས་བྱས་པ་ཡིན་ནོ་ཞེས་དེ་བཞིན་གཤེགས་པས་གསུངས་པའི་ཚིག་གམ་དོན་སྤོང་བར་བྱེད་པ་དེ་ཡང་ངོ་། །ཉེས་པ་ཐམས་ཅད་བྱས་པ་དང་། །ཞེས་བྱ་བ་ནི་ཚུལ་ཁྲིམས་དང་། ཀུན་དུ་སྤྱོད་པ་དང་། འཚོ་བ་ལོག་པ་དང་།
ལྡན་པ་དེ་དག་ཀྱང་རྡོ་རྗེ་སེམས་དཔའ་བརྟན་པར་གྱུར་པས་འགྲུབ་པར་འགྱུར་ཞིང་། དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ནི། སྐུ་དང་གསུང་དང་། ཐུགས་རྡོ་རྗེ་ལྟ་བུའི་ཏིང་ངེ་འཛིན་ཐོབ་པ་ནི་རྡོ་རྗེ་སེམས་དཔའ་བརྟན་པར་གྱུར་པ་སྟེ། དེ་ལས་ཚེ་འདི་ཉིད་ཇི་ལྟར་འདོད་པ་

ཞེས་བྱ་བ་དངོས་གྲུབ་དམ་པ་ལ་སོགས་པའི་དངོས་གྲུབ་དང་། ནོར་ཆེན་པོ་འགྲུབ་པ་དང་། དབང་དུ་བྱ་བ་དང་། དབབ་པ་དང་། བསྐྲད་པ་དང་། དགུག་པ་དང་། བཅིང་བ་དང་། རྨོངས་པར་བྱ་བ་དང་། སྨྱོ་བར་བྱ་བ་ལ་སོགས་པ་ནི་དངོས་གྲུབ་ཐམས་ཅད་ཅེས་བྱ་བའི་སྒྲར་བཤད་
དོ། །དངོས་གྲུབ་དམ་པ་ཞེས་བྱ་བ་ནི་དེ་བཞིན་གཤེགས་པ་དང་། རྡོ་རྗེ་སེམས་དཔའ་དང་། རྡོ་རྗེ་རིན་ཆེན་དང་། རྡོ་རྗེ་ཆོས་དང་། རྡོ་རྗེ་ལས་དང་། རིག་འཛིན་གྱི་དངོས་གྲུབ་ནི་དངོས་གྲུབ་དམ་པའོ། །རྡོ་རྗེའི་དངོས་གྲུབ་ཅེས་བྱ་བ་ནི་རྫུ་འཕྲུལ་རྣམ་པ་བཞིའི་དངོས་གྲུབ་བོ། །རྡོ་རྗེ་
སེམས་དཔའི་དངོས་གྲུབ་ཅེས་བྱ་བ་ནི་སེམས་དཔའ་བཅུ་དྲུག་གི་དངོས་གྲུབ་ལ་རྡོ་རྗེ་སེམས་དཔའི་དངོས་གྲུབ་ཅེས་བྱའོ། །དེ་བཞིན་གཤེགས་པའི་དངོས་གྲུབ་ཅེས་བྱ་བ་ནི། དེ་བཞིན་གཤེགས་པ་ལྔའི་དངོས་གྲུབ་བོ། །བར་དུ་ཞེས་བྱ་བའི་སྒྲ་ནི་སྒེག་མོ་ལ་སོགས་པའི་དངོས་གྲུབ་
ནས། རྡོ་རྗེ་འབེབས་པའི་བར་གྱི་དངོས་གྲུབ་སྟོན་ཏེ། འདི་ལྟ་བུའི་དངོས་གྲུབ་རྣམས་དེས་ཐོབ་པར་འགྱུར་བའོ། །དེ་ནས་ཕྱག་རྒྱ་ཐམས་ཅད་ཅེས་བྱ་བ་ནི་དེ་བཞིན་གཤེགས་པ་དང་། རིགས་ཐམས་ཅད་ཀྱི་དམ་ཚིག་དང་། ཆོས་དང་། ལས་དང་། ཕྱག་རྒྱ་ཆེན་པོ་རྣམས་སོ། །དེ་
རྣམས་ཀྱི་དགྲོལ་བའི་དོན་གྱི་ཆོ་ག་རྒྱས་པ་ནི་ཕྱག་རྒྱ་དགྲོལ་བའི་སྤྱིའི་ཆོ་ག་རྒྱས་པ་སྟེ། དམ་ཚིག་བཅིང་བས་བཅིངས་པ་རྣམས་དམ་ཚིག་གི་འཆིང་བ་དང་བྲལ་བ་ནི་དགྲོལ་བའོ། །དེ་ལ་ཐོག་མ་ཉིད་དུ་ཞེས་བྱ་བ་ནི་གཤེགས་སུ་གསོལ་བའི་དུས་ཀྱི་སྔོན་དུ་སྟེ། ཕྱག་རྒྱ་དགྲོལ་
བར་བྱས་པའི་རྗེས་ལ། ལྷ་རྣམས་གཤེགས་སུ་གསོལ་ཞེས་བྱ་བའི་ཐ་ཚིག་གོ། །གང་དང་གང་ནས་ཞེས་བྱ་བ་ནི་བཟླས་ཏེ་གསུངས་པའོ། །འདི་སྐད་སྟོན་ཏེ་ཕྱག་རྒྱ་གང་སྙིང་གའི་ཕྱོགས་ནས་བྱུང་བ་དེ་དེ་ཉིད་དུ་དགྲོལ་བར་བྱའོ་ཞེས་བྱ་བ་ནས། གང་སྤྱི་གཙུག་ནས་བྱུང་བ་ནི་དེ་
ཉིད་ནས་སོ་ཞེས་བྱ་བའི་བར་དུའོ། །དེ་ལ་རྡོ་རྗེ་སེམས་དཔའ་ལ་སོགས་པའི་གནས་ཀྱི་ངེས་པ་ནི་སྨྲས་ཟིན་ཏོ། །དེ་བཞིན་གཤེགས་པ་རྣམས་ཀྱི་བརྗོད་པར་བྱ་སྟེ། རྡོ་རྗེ་སེམས་དཔའི་གནས་ནི་མི་བསྐྱོད་པའིའོ། །རྡོ་རྗེ་རིན་ཆེན་གྱི་གནས་ནི་རིན་ཆེན་འབྱུང་ལྡན་གྱིའོ། །རྡོ་རྗེ་ཆོས་

ཀྱི་གནས་ནི་འོད་དཔག་ཏུ་མེད་པའོ། །རྡོ་རྗེ་ལས་ཀྱི་གནས་ནི་དོན་ཡོད་པར་གྲུབ་པའིའོ། །སྤྱི་གཙུག་གི་གནས་ནི་རྣམ་པར་སྣང་མཛད་ཀྱིའོ། །འདིར་སྦྱར་བ་ནི་འདི་ལྟ་བུ་ཡིན་ཏེ། རྣམ་པར་སྣང་མཛད་ཀྱི་གནས་སུ་བཛྲ་དྷཱ་ཏུ་ཞེས་ཟློས་ཤིང་དམ་ཚིག་གི་ཕྱག་
རྒྱ་བཅིངས་ལ་བཛྲ་མུཿཞེས་བྱ་བས་རྣམ་པར་སྣང་མཛད་ཀྱི་གནས་སུ་དགྲོལ་ལ། དེའི་ཕྱག་རྒྱ་ཐམས་ཅད་དགྲོལ་བར་བསམ་པར་བྱ་བའོ། །དེ་བཞིན་དུ་རྡོ་རྗེ་འབེབས་པའི་བར་གྱིས་དམ་ཚིག་ཕྱག་རྒྱ་བཅིངས་ལ་བཛྲ་ཨཱ་བེ་ཤ་ཞེས་ཟློས་ཤིང་བཛྲ་མུཿཞེས་བྱ་བས་རྡོ་རྗེ་འབེབས་པའི་གནས་
སུ་དགྲོལ་ལ། དེའི་ཕྱག་རྒྱ་ཐམས་ཅད་དགྲོལ་བར་བསམ་པར་བྱའོ། །སྙིང་ག་ནས་བྱུང་བའི་རྡོ་རྗེ་རིན་ཆེན་གྱི་ཕྱག་རྒྱ་ཞེས་བྱ་བ་ལ་སོགས་པ་ལ། འཕགས་པ་ནམ་མཁའི་སྙིང་པོའི་དམ་ཚིག་གི་ཕྱག་རྒྱ་སྙིང་གར་བཅིངས་ལ། དེ་ནས་བཏེག་སྟེ་རང་གི་དབང་བསྐུར་བའི་གནས་
མཛོད་སྤུའི་ཕྱོགས་སུ་བཞག་ལ། བཛྲ་རཏྣ་ཨ་བྷི་ཥིཉྩ་ཞེས་བྱ་བས་ཕྱག་རྒྱ་ཐམས་ཅད་དབང་བསྐུར་བ་བྱས་ནས། ཕྱག་རྒྱ་ཐམས་ཅད་རྣམ་པར་སྣང་མཛད་ལ་སོགས་པའི་རང་བཞིན་ཅན་གྱི་རིན་པོ་ཆེའི་ཅོད་པན་གྱིས་དབང་བསྐུར་བར་འགྱུར་རོ། །མཛུབ་མོ་གཉིས་ཀྱིས་ཞེས་བྱ་བ་
ལ་སོགས་པ་ལ། ཡང་འཕགས་པ་ནམ་མཁའི་སྙིང་པོའི་དམ་ཚིག་གི་ཕྱག་རྒྱ་གཉིས་སུ་བྱས་ལ། སརྦྦ་མུ་དྲ་མེ་དྲྀཥྚི་ཀུ་རུ་བ་ར་ཀ་བ་བེ་ཙེ་ན་བཾ་ཞེས་བྱ་བ་འདི་དང་། དེ་བཞིན་དུ་མཛུབ་མོ་གཉིས་ཀྱིས་དེ་རྣམས་ལ་གོ་ཆ་བཅིང་བར་བྱ་ཞིང་། དེ་ཉིད་ཀྱི་དར་དཔྱངས་དང་ཕྲེང་བ་དཀྲི་
ཞིང་བཅིང་བར་བྱའོ། །དེ་ནས་དར་དཔྱངས་དཔྱང་བ་བྱས་ནས། བཛྲ་ཏུ་ཥྱ་ཧོ་ཞེས་བྱ་བ་དང་། མཉམ་པའི་ཐལ་མོས་མཐར་མཉེས་པར་བྱའོ། །རྡོ་རྗེ་ལྟ་བུར་འགྱུར་རོ་ཞེས་བྱ་བ་ནི། དེ་ལ་གོ་ཆ་བགོ་བ་དང་ཕྲེང་བ་བཅིང་བ་དག་གིས་སྔགས་པ་ལུས་དང་སེམས་རྡོ་རྗེ་ལྟར་མི་ཕྱེད་པ་
ཉིད་དུ་འགྱུར་རོ་ཞེས་བྱ་བའི་ཐ་ཚིག་གོ། །ཡང་ན་རྡོ་རྗེ་སེམས་དཔས་ཀྱང་བྱའོ་ཞེས་བྱ་བ་ནི་བཛྲ་སཏྭ་ཞེས་རྡོ་རྗེ་སེམས་དཔའ་བཟླས་པས་ཀྱང་བཤད་མ་ཐག་པ་དེ་ཐམས་ཅད་དུ་འགྱུར་རོ་ཞེས་བྱ་བའི་ཐ་ཚིག་གོ། །ཡང་ཇི་ལྟར་འགྱུར་ཞེ་ན། རྡོ་རྗེ་སེམས་དཔའ་ཞེས་བྱ་བ་ལ་སོགས་པ་

གསུངས་ཏེ། གང་གི་ཕྱིར་རྡོ་རྗེ་སེམས་དཔའ་ལྷན་ཅིག་ཅེས་བྱ་བ་གསུངས་ཏེ། ལྷན་ཅིག་བཟླས་ན་འགྲུབ་པར་འགྱུར། །ཇི་ལྟར་འདོད་པ་ཞེས་བྱ་བ་ནི། བསམ་པ་གང་ཁོ་ནས་བཟླས་པ་ཞེས་བྱ་བའི་ཐ་ཚིག་གོ། །གང་ཞིག་འགྲུབ་པར་འགྱུར་ཞེ་ན། བདག་བདེ་བར་ཞེས་བྱ་
བ་གསུངས་ཏེ། གང་ཞིག་སེམས་བདེ་བའི་བདག་ཉིད་ཅན་དེ་ནི་བདེ་བའི་བདག་སྟེ། དཔལ་རྡོ་རྗེ་སེམས་དཔའ་བསྒོམས་པས་སེམས་བདེ་བ་རྣམས་འགྲུབ་པར་འགྱུར་རོ། །ཇི་ལྟར་ཞེ་ན། བཟླས་པ་ཙམ་གྱིས་སོ། །ཕྱག་ན་རྡོ་རྗེས་གསུངས་པ་བཞིན། །ཞེས་བྱ་བ་ནི་
ཇི་ལྟར་བཅོམ་ལྡན་འདས་ཕྱག་ན་རྡོ་རྗེས་བདེ་བའི་བདག་ཉིད་ཅན་དག་འགྲུབ་པར་འགྱུར་གྱི། བདེ་བ་མ་ཡིན་པའི་བདག་ཉིད་ཅན་སེམས་རྣམ་པར་གཡེངས་པ་རྣམས་ནི་མ་ཡིན་ནོ་ཞེས་གསུངས་པ་བཞིན་དུའོ། །རྡོ་རྗེ་སེམས་དཔའ་ལ་སོགས་པ་ཡང་ཡིན་ལ་སེམས་དཔའ་
རྣམས་ཀྱང་ཡིན་པས་ན། རྡོ་རྗེ་སེམས་སོགས་སེམས་དཔའ་རྣམས་ཏེ། རྡོ་རྗེ་རྒྱལ་པོ་ལ་སོགས་པ་ནས་རྡོ་རྗེ་འབེབས་པའི་བར་རྣམས་སོ། །དེ་རྣམས་ཀྱི་བསྒྲུབ་པ་དང་ལས་ཀུན་ནི། ཕྱག་རྒྱ་ཆེན་པོ་ལ་སོགས་པ་དང་ལས་རྣམས་ཏེ། བསྒྲུབ་པ་དང་ལས་ད་དག་ཐམས་ཅད་
ལ། འདིར་ནི་ཅི་དགར་བཟླས་ནས་ནི། །ཞེས་བྱ་བ་ནི། འདིར་ཞེས་བྱ་བ་རྒྱུད་འདིར་ནི་བསྒོམ་པ་གཙོ་བོ་ཡིན་གྱི་གྲངས་ཀྱི་བཟླས་པ་གཙོ་བོར་མི་བྱའོ། །འདིས་ནི་འདི་སྐད་སྟོན་ཏེ། རྒྱུད་འདིར་ནི་བསྒོམ་པ་གཙོ་བོར་གྱུར་པ་ཡིན་གྱི་དེ་བས་ན་ཇི་ཙམ་འདོད་པ་ཙམ་གྱི་སྔགས་
བཟླས་པར་བྱའི་གྲངས་ཀྱི་བཟླས་པ་ནི་མི་བྱའོ། །དེ་ལྟར་རང་གི་རྒྱུད་ཀྱི་ཆོ་ག་གསུངས་ནས། སྙིང་པོ་ཕྱག་རྒྱ་སྔགས་རིག་རྣམས། །ཞེས་བྱ་བ་ལ་སོགས་པས་དེས་འདུལ་བའི་སྐྱེ་བོ་རྣམས་ཀྱི་ཕྱིར་རྒྱུད་གཞན་གྱི་ཆོ་ག་ཡང་གསུངས་པ་ཡིན་ཏེ། དེ་ལ་སྙིང་པོའི་སྒྲས་ནི་
རིགས་ཐམས་ཅད་ཀྱི་དཀྱིལ་འཁོར་ཆེན་པོ་ལས་གསུངས་པའི་སྙིང་པོ་རྣམས་ལ་བྱ་བར་བཤད་དོ། །ཕྱག་རྒྱ་ནི་གཟུགས་ཀྱི་དཀྱིལ་འཁོར་ལས་གསུངས་པའོ། །སྔགས་ནི་ཆོས་ཀྱི་དཀྱིལ་འཁོར་ལས་གསུངས་པ་རྣམས་སོ། །རིག་པ་རྣམས་ནི་རིགས་ཐམས་ཅད་ཀྱི་ལས་ཀྱི་

དཀྱིལ་འཁོར་ལས་གསུངས་པ་ལས་བྱ་བར་བཤད་དོ། །དེ་རྣམས་ཀྱང་། ཇི་ལྟར་འདོད་པའི་ཚུལ་གྱིས་ནི། །ཞེས་བྱ་བ་ནི་རྣལ་འབྱོར་དང་། བྱ་བ་དང་། སྤྱོད་པ་དང་། གཉི་གའི་རྒྱུད་ལ་སོགས་པའི་ཆོ་གའི་ཚུལ་གྱིས་སོ། །རྟོག་པ་ལས་བཤད་
པ་ནི་རང་གི་ལྷས་གསུངས་པའི་རྟོག་པ་ལ་སོགས་པ་དང་། རྟོག་པ་གཞན་གྱི་ཆོ་ག་དེ་ནི་རྟོག་པ་ལས་བཤད་པ་སྟེ། རྟོག་པ་ལས་བཤད་པ་དེས་སོ། །རང་བྱས་པའམ་ཞེས་བྱ་བ་ནི། རང་གི་ལྷས་རང་གི་བསྒྲུབ་པ་གསུངས་པ་གང་ཡིན་པ་དེ་ནི་རང་བྱས་པ་ཞེས་བྱ་སྟེ། རང་གིས་
བྱས་པ་དེས་ཀྱང་ངོ་། །བསྒྲུབ་པ་འདིར་ནི་ཐམས་ཅད་དོ། །ཞེས་བྱ་བ་ནི་སྔར་བཤད་པ་ཐམས་ཅད་ཀྱིས་ཞེས་བྱ་བའི་ཐ་ཚིག་གོ། །གསང་བའི་མཆོད་པ་ནི་མཆོད་པ་གསང་བ་སྟེ་རྡོ་རྗེ་སྒེག་མོ་ལ་སོགས་པའོ། །བརྗོད་པ་ནི་བཛྲ་ལཱ་སྱེ་ཞེས་བྱ་བ་ལ་སོགས་པ་ཟློས་ཤིང་སྒེག་མོ་ལ་
སོགས་པ་གསང་བའི་མཆོད་པ་བཞི་བྱའོ། །རྡོ་རྗེ་བསྟོད་པ་ནི་རྡོ་རྗེ་རྣམས་ཀྱི་བསྟོད་པ་ཡིན་པའམ། རྡོ་རྗེ་བསྟོད་པའི་གླུ་ཡིན་པས་ན་རྡོ་རྗེ་བསྟོད་པའི་གླུ་སྟེ། དེ་བླངས་པ་ནི་གླུར་ལེན་པའོ། །འདིས་ཞེས་བྱ་བ་ནི་འོག་ནས་བཤད་དོ། །ཨོཾ་རྡོ་རྗེ་སེམས་དཔའ་བསྡུས་པས་ནི། །ཞེས་བྱ་བ་ནི་
བྱང་ཆུབ་ཀྱི་མཚན་ཉིད་ཅན་གྱི་སེམས་དང་མི་བསྐྱོད་པའི་རིགས་ནི་རྡོ་རྗེ་སེམས་དཔའོ། །དེ་བསྡུས་པ་ནི་བསྒོམས་པའི་སྟོབས་ཀྱིས་ཉེ་བར་བླངས་པའོ། །རྡོ་རྗེ་རིན་ཆེན་བླ་ན་མེད། །ཅེས་བྱ་བ་ནི་སྦྱིན་པའི་ཕ་རོལ་ཏུ་ཕྱིན་པ་དང་། དེའི་འབྲས་བུ་རིན་པོ་ཆེའི་རིགས་ནི་རྡོ་རྗེ་རིན་ཆེན་
ནོ། །དེ་ཉིད་བླ་ན་མེད་པའོ། །དེ་བས་ན། རྡོ་རྗེ་སེམས་དཔའ་བསྡུས་པས་ནི། །ཞེས་བྱ་བ་མི་བསྐྱོད་པའི་རིགས་རྟོགས་པས་ན། རྡོ་རྗེ་རིན་ཆེན་བླ་ན་མེད། །ཅེས་བྱ་བ་ཉོན་མོངས་པ་བག་ཆགས་དང་བཅས་པ་དང་བྲལ་བའི་རིན་པོ་ཆེའི་རིགས་དང་མཉམ་པར་གྱུར་ཅིག་ཅེས་རྣལ་
འབྱོར་པ་ལ་གསོལ་བ་འདེབས་པའོ། །རྡོ་རྗེ་ཆོས་ནི་གླུར་བླངས་པས། །ཞེས་བྱ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོའི་སེམས་དང་སེམས་ལས་བྱུང་བ་དང་པདྨའི་རིགས་ནི་རྡོ་རྗེ་ཆོས་སོ། །དེ་གླུར་བླངས་པ་ནི་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་སོ་སོར་རྟོགས་པ་སྟེ།

དེ་ཡང་གསལ་བའི་དབྱེ་བས་རྣམ་པ་སྣ་ཚོགས་པར་སོ་སོར་རྟོགས་པ་ཡིན་ཏེ། དེ་བས་ན་གླུར་བླངས་པ་ཞེས་གསུངས་པ་ཡིན་ནོ། །དེ་ལྟར་གྱུར་པས། རྡོ་རྗེ་ལས་ནི་བྱེད་པར་འགྱུར། །ཞེས་བྱ་བ་སྟེ། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་། ལས་ཀྱི་རིགས་ནི་རྡོ་རྗེ་སྟེ། དེ་ལ་བོད་པའོ། །
སངས་རྒྱས་ཀྱི་སྤྲུལ་པ་དང་། འགྲོ་བའི་དོན་བྱེད་པ་ནི་འདི་ལས་ཡིན་ཏེ། རྫོགས་པར་བྱེད་པར་འགྱུར་བས་ན། རྡོ་རྗེའི་ལས་ནི་བྱེད་པར་འགྱུར། །ཞེས་གསོལ་བ་འདེབས་པའོ། །འདིས་ནི་འདི་སྐད་སྟོན་ཏེ། རྡོ་རྗེ་གླུ་ལེན་ཅིང་རེ་རེ་ཞིང་རྡོ་རྗེ་ཁུ་ཚུར་གཉིས་ལས་བྱུང་བའི་གར་བྱས་ལ། རྡོ་རྗེ་
སྒེག་མོ་ལ་སོགས་པའི་ལས་ཀྱི་ཕྱག་རྒྱ་བཅིངས་ལ་མཆོད་པ་བྱའོ། །དེ་ལྟར་གསང་བའི་མཆོད་པ་བཞེས་ཕྱི་དང་ནང་དུ་བཅས་པའི་དཀྱིལ་འཁོར་ཡང་དག་པར་མཆོད་ལ། དེ་བཞིན་དུ་གར་དང་གླུ་ལེན་ཅིང་གར་ལས་བྱུང་བའི་རྡོ་རྗེ་བདུག་པ་མ་ལ་སོགས་པའི་ལས་ཀྱི་ཕྱག་རྒྱ་བཞི་
དང་། ཕྱིའི་བདུག་པ་ལ་སོགས་པ་ལག་པ་གཤིབས་པས་བླངས་ལ། ནང་གི་དཀྱིལ་འཁོར་ཡང་དག་མཆོད་ནས་ཕྱིའི་དཀྱིལ་འཁོར་མཆོད་པར་བྱའོ་ཞེས་བསྟན་པའི་ཕྱིར། དེ་ནས་དབུས་ཀྱི་དཀྱིལ་འཁོར་དུ་རྡོ་རྗེ་བསྟོད་པའི་གླུ་འདི་ཉིད་ཀྱིས་ཞེས་བྱ་བ་ལ་སོགས་པ་གསུངས་
སོ། །མཆོད་པ་དེ་དག་རང་རང་གི་གནས་སུ་གཞག་གོ་ཞེས་བྱ་བ་ནི་སྒེག་མོ་ལ་སོགས་པའི་ཕྱག་རྒྱ་བཅིངས་ན། སྒེག་མོ་ལ་སོགས་པའི་ཚུལ་དུ་རྣལ་འབྱོར་པས་བསྒོམས་པ་གང་ཡིན་པ་དེ། སྒེག་མོ་ལ་སོགས་པའི་གནས་སུ་ཡིད་ཀྱིས་གཞག་པ་ལ་གཞན་གྱིས་ཕྱག་རྒྱ་བཅིང་
བར་བྱའོ། །དེ་ནས་ཞེས་བྱ་བ་ལ་སོགས་པ་ལ། དེ་ལྟར་སློབ་དཔོན་གྱིས་དཀྱིལ་འཁོར་གྱི་དེ་བཞིན་གཤེགས་པ་ཐམས་ཅད་ལ་མཆོད་པ་བྱས་ནས། དཀྱིལ་འཁོར་ཐམས་ཅད་ཅི་ནུས་པར་མཆོད་ཅིག་ཅེས་སློབ་མ་ལ་བསྒོ་སྟེ། དེ་བཞིན་གཤེགས་པའི་རིགས་ཐམས་ཅད་ལ་
གསོལ་ཞིང་ཞུ་བར་བྱའོ། །དེ་ནས་མཆོད་པ་བྱེད་དུ་བཅུག་ལ། ཇི་ལྟར་ཞུགས་པའི་རྣམ་པ་ཞེས་བྱ་བ་བསམ་པ་གང་ཞིག་གིས་ཞུགས་པ་སྟེ། དེ་རྣམས་ཅི་འབྱོར་བའི་ཞེས་བྱ་བ་ནི་རྫས་ཅི་ཡོད་པས་སོ། །དེ་ཉིད་བཤད་པ་ནི་རོ་དང་ཞེས་བྱ་བ་ལ་སོགས་པ་ཡིན་ཏེ། དེ་ལ་རོ་

ཐམས་ཅད་ནི། མངར་བ་དང་། སྐྱུར་བ་དང་། ལན་ཚྭ་བ་ལ་སོགས་པའི་དབྱེ་བས་ཕྱེ་བ་དང་ལྡན་པའི་ཁ་ཟས་ནི་རོ་དང་ཁ་ཟས་ཐམས་ཅད་དོ། །གནས་པས་ན་གནས་པ་སྟེ། སྤྱོད་ལམ་གར་ལ་སོགས་པའི་ཚུལ་དང་། གླུ་མ་ལ་སོགས་པ་ཡང་གཟུང་ངོ་། །རོ་དང་
ཁ་ཟས་དང་སྤྱོད་ལམ་ལ་སོགས་པའི་ཡོ་བྱད་ཐམས་ཅད་དཀྱིལ་འཁོར་ཆེན་པོར་དབུལ་བར་བྱ་སྟེ། དེ་ཐམས་ཅད་ཀྱིས་ཇི་ལྟར་ཞུགས་པ་རྣམས་མགུ་ཞིང་ཚིམ་པར་བྱའོ། །དེ་ལྟར་ཚིམ་པར་བྱས་ནས་ཅི་ཞིག་བྱ་ཞེ་ན། དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ལ་སོགས་
པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཡིན་པས། དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་སྟེ། རྣམ་པར་སྣང་མཛད་ལ་སོགས་པ་ནས་རྡོ་རྗེ་འབེབས་པའི་བར་གྱི་ཕྱག་རྒྱ་ཆེན་པོ་ལ་སོགས་པ་གྲུབ་པའོ། །དེའི་དོན་གྱི་རྡོ་རྗེ་བརྟུལ་ཞུགས་ནི་ངེས་
པར་བྱ་བ་སྟེ། རྡོ་རྗེ་ཡོངས་སུ་མི་འདོར་བ་དེ་སྦྱིན་པར་བྱའོ། །འདི་ཞེས་བྱ་བ་ནི་རང་གི་ལག་ན་གནས་པར་གསུངས་པའོ། །དེ་ཞེས་བྱ་བ་ནི། བྱང་ཆུབ་སེམས་གང་དེ་རྡོ་རྗེ། །ཞེས་བཅོམ་ལྡན་འདས་ཀྱིས་གང་གསུངས་པའོ། །འདི་ཅི་ཞིག་ཡིན་ཞེ་ན། སངས་རྒྱས་ཐམས་ཅད་
ཉིད་ཅེས་བྱ་བ་གསུངས་ཏེ། སངས་རྒྱས་ཐམས་ཅད་ཀྱི་ངོ་བོ་ཉིད་ཡིན་པས་ན་སངས་རྒྱས་ཉིད་དེ། རྡོ་རྗེ་འདི་ནི་སངས་རྒྱས་ལྔའི་རང་བཞིན་ཉིད་ཡིན་ནོ་ཞེས་བྱ་བའི་ཐ་ཚིག་གོ། །རྡོ་རྗེ་སེམས་དཔའི་ལག་ན་འདུག །ཁྱོད་ཀྱིས་ཀྱང་ནི་རྟག་ཏུ་བཅང་། །ཞེས་བྱ་བ་ནི་གང་གི་
ཕྱིར་སངས་རྒྱས་ཐམས་ཅད་ཀྱི་རྡོ་རྗེ་འདི་རྡོ་རྗེ་སེམས་དཔའི་ལག་ན་འདུག་པ་ཡིན་ལ། དེ་བས་ན་དེའི་གོ་འཕང་ཐོབ་པར་བྱ་བའི་ཕྱིར་ཁྱོད་ཀྱིས་ཀྱང་རྟག་ཏུ་བཅང་བར་བྱའོ། །འདི་གང་གི་བརྟུལ་ཞུགས་ཡིན་ཞེ་ན། ཕྱག་ན་རྡོ་རྗེའི་བརྟུལ་ཞུགས་བརྟན། །ཞེས་བྱ་བ་གསུངས་
ཏེ། འདི་ནི་ཕྱག་ན་རྡོ་རྗེའི་བརྟུལ་ཞུགས་མི་ཕྱེད་ཅིང་བརྟན་པ་ཡིན་ནོ། །དེ་ནས་སློབ་མས་རང་གི་མགོར་རྡོ་རྗེ་བཞག་ལ། ཨོཾ་སརྦྦ་ཏ་ཐཱ་ག་ཏ་ཞེས་བྱ་བ་ལ་སོགས་པའི་སྔགས་བཟླས་པར་བྱའོ། །དེ་བཞིན་གཤེགས་པ་ཐམས་ཅད་ལ་གསོལ་བ་བཏབ་ལ་ཞེས་བྱ་བ་ནི་བཅོམ་

ལྡན་འདས་དེ་བཞིན་གཤེགས་པ་ཐམས་ཅད་བདག་ནི་སོ་སོའི་སྐྱེ་བོར་གྱུར་པས། ཆོ་ག་ལྷག་པ་དང་མ་ཚང་བ་གང་ཅི་བགྱིས་པ་དེ་དག་ཐམས་ཅད་བདག་ལ་བཟོད་པར་མཛོད་ཅིག་ཅེས་བརྗོད་པར་བྱའོ། །དེ་ལྟར་གསོལ་བ་བཏབ་སྟེ། སེམས་མ་རྡོ་རྗེ་མའི་ཕྱག་རྒྱ་བཅིངས་ནས་
ཁ་གྱེན་དུ་བསྟན་ཏེ་བཀྲོལ་ལ། ཨོཾ་ཁྱེད་ཀྱིས་ཞེས་བྱ་བ་ལ་སོགས་པ་ཡང་བརྗོད་པར་བྱའོ། །ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །ཅེས་བྱ་བ་ནི་ཁྱེད་ཀྱིས་སེམས་ཅན་གྱི་དོན་སྐལ་བ་ཇི་ལྟ་བ་བཞིན་མཛད་པས་ན། སེམས་ཅན་དོན་ཀུན་མཛད་དེ། བག་ཆགས་བསྒོ་
བ་ལ་སོགས་པའི་མཚན་ཉིད་ཅན་ནོ། །རྗེས་སུ་མཐུན་པར་དངོས་གྲུབ་སྩོལ། །ཞེས་བྱ་བ་ནི་བག་ཆགས་ཇི་ལྟར་བསྒོ་བའི་ཚུལ་དང་མཐུན་པ་ནི་རྗེས་སུ་མཐུན་པ་སྟེ། གང་གི་ཕྱིར་སྐལ་བ་ཇི་ལྟ་བ་བཞིན་དུ་བག་ཆགས་བསྒོ་བ་ལ་སོགས་པ་དང་། རྗེས་སུ་མཐུན་པའི་དངོས་གྲུབ་
སྩལ་བ་འདིས། །ཁྱེད་ཀྱིས་སེམས་ཅན་གྱི་དོན་ཀུན་མཛད་པའོ། །སངས་རྒྱས་ཡུལ་དུ་བཞུད་པར་མཛོད། །ཅེས་བྱ་བ་ནི། སངས་རྒྱས་རྣམས་ཀྱི་ཡུལ་ནི་སངས་རྒྱས་ཀྱི་ཡུལ་ཏེ། སེམས་ཅན་གྱི་དོན་དང་ཆོས་ཀྱི་དབྱིངས་སོ། །དེ་ནས་སླར་ཡང་གཤེགས་པར་གསོལ། །
ཞེས་བྱ་བ་ནི་གང་གི་ཚེ་བདག་སྤྱན་འདྲེན་པར་བགྱིད་པ་དེའི་ཚེ། ཁྱེད་གཤེགས་པར་མཛད་དུ་གསོལ་ཞེས་པའོ། །དེ་ལྟར་དཀྱིལ་འཁོར་ཐམས་ཅད་ལ་བྱའོ་ཞེས་བྱ་བ་ནི་གཟུངས་ཀྱི་དཀྱིལ་འཁོར་ནས་བརྩམས་ཏེ། རིགས་ཐམས་ཅད་ཀྱི་དཀྱིལ་འཁོར་དུ་ཇི་སྐད་
གསུངས་པའི་ཆོ་ག་འདི་ཐམས་ཅད་བྱའོ། །དམ་ཚིག་མཆོག་གི་ཕྱག་རྒྱ་ནི་རྣམ་པར་སྣང་མཛད་ལ་སོགས་པའི་ཕྱག་རྒྱ་རྣམས་སོ། །དེ་རྣམས་བཅིངས་པར་གྱུར་པ་ལས་དགྲོལ་བར་བྱ་སྟེ། ཕྱག་རྒྱ་ཐམས་ཅད་གང་དང་གང་ནས་བྱུང་བ་དེ་དང་དེ་ནས་དགྲོལ་ལོ་ཞེས་སྔར་
བཤད་པའི་དམ་ཚིག་གི་ཕྱག་རྒྱ་རྣམས་ཀྱིས་དགྲོལ་བར་བྱའོ། །འདི་སྐད་སྟོན་ཏེ། དཀྱིལ་འཁོར་གྱི་ནི་དབུས་ཉིད་དུ། །ཅི་རིགས་པར་ནི་མཆིས་ནས་ཀྱང་། །ཞེས་བྱ་བ་ནས་བརྩམས་ཏེ། དཀྱིལ་འཁོར་ཕྱི་རིམ་ཕྱོགས་སུ་ནི། །སེམས་དཔའ་ཆེན་པོ་རྣམས་ཀྱང་གཞག །ཅེས་

བྱ་བའི་བར་འདིས་དཀྱིལ་འཁོར་དང་། སྔགས་དང་། ཕྱག་རྒྱ་དང་། བསྲུང་བ་དང་། དགུག་པ་དང་། བཟླས་པ་དང་། བསྒོམ་པ་དང་། སྦྱིན་སྲེག་གི་དེ་ཁོ་ན་ཉིད་བསྟན་པ་ལས། གང་གི་ཕྱིར་དཀྱིལ་འཁོར་གཟུགས་ཅན་དང་གཟུགས་ཅན་མ་ཡིན་པ་འདིར་བསྟན་
ལ། སྔགས་ཀྱི་དེ་ཁོ་ན་ཉིད་ནི་རྒྱུད་ཕྱི་མ་ལས་སྟོན་ཏོ། །དེ་མ་ཚིག་གསུམ་སྒོམ་པར་བྱེད་པ་ན་ལྷ་རྣམས་ཕྱག་རྒྱ་བཞིས་ངེས་པར་རྒྱས་གདབ་པར་བྱ་བ་ནི་ཕྱག་རྒྱའི་དེ་ཁོ་ན་ཉིད་དོ། །བདག་བསྲུང་བ་ལ་སོགས་པ་ནི། བསྲུང་བའི་དེ་ཁོ་ན་ཉིད་དོ། །བསྡུ་བ་ལ་སོགས་པ་ནི་སྔར་
སྤྱན་དྲངས་པའི་དེ་ཁོ་ན་ཉིད་དོ། །བཟླས་པ་དང་བསྒོམ་པ་ནི་སྔོན་དུ་བསྙེན་པ་ལ་སོགས་པ་ཐམས་ཅད་བྱ་བ་ཡིན་པས་ན། དེ་དག་གི་དེ་ཁོ་ན་ཉིད་དོ། །དཀྱིལ་འཁོར་ལ་སོགས་པར་སྦྱིན་སྲེག་བྱ་བ་ནི། སྦྱིན་སྲེག་གི་དེ་ཁོ་ན་ཉིད་ཡིན་པར་བསྟན་ཏོ། །དེ་ནས་ཕྱག་རྒྱ་ཐམས་ཅད་དགྲོལ་
བའི་སྤྱིའི་ཆོ་ག་རྒྱས་པར་བཤད་དོ་ཞེས་བྱ་བ་ནས། ཕྱག་ན་རྡོ་རྗེས་གསུངས་པ་བཞིན། །ཞེས་བྱ་བའི་གཞུང་གིས་ནི། ཕྱག་རྒྱ་ཐམས་ཅད་ཉེ་བར་བསྡུས་པའི་དེ་ཁོ་ན་ཉིད་སྟོན་ཏོ། །དེ་ནས་གསང་བའི་མཆོད་པ་བརྗོད་ཅིང་། རྡོ་རྗེ་བསྟོད་པའི་གླུ་བླངས་ཏེ། གསང་བའི་མཆོད་
པ་བཞི་བྱའོ། །ཞེས་བྱ་བ་ནས་བརྩམས་ཏེ། བདུག་པ་ལ་སོགས་པས་མཆོད་པ་བྱེད་དུ་བཅུག་ལ་ཞེས་བྱ་བའི་བར་གྱི་གཞུང་དང་། དེ་བཞིན་དུ་དེ་བཞིན་གཤེགས་པ་ཐམས་ཅད་ལ་གསོལ་བ་བཏབ་ལ་ཞེས་བྱ་བ་ནས་བརྩམས་ཏེ། བཛྲ་ས་ཏྭ་མུཿཞེས་བྱ་བའི་བར་གྱི་གཞུང་
གིས་ནི། མཆོད་ནས་གཤེགས་སུ་གསོལ་བའི་མཚན་ཉིད་ཅན་གྱི་དེ་ཁོ་ན་ཉིད་སྟོན་ཏོ། །གཞན་དག་ནི་དེ་ཁོ་ན་ཉིད་དགུ་པོ་འདི་དག་གི་ཡུལ་དང་བྲལ་བའི་གཞུང་གིས་ཆོ་གའི་དེ་ཁོ་ན་ཉིད་སྟོན་པ་ཡིན་ནོ། །ལ་ལ་ནི་རྣམ་པར་སྣང་མཛད་ལ་སོགས་པ་ནས་རྡོ་རྗེ་འབེབས་པའི་
བར་གྱི་ངོ་བོ་དེ་ཁོ་ན་ཉིད་སུམ་ཅུ་རྩ་བདུན་ནི་དེ་ཁོ་ན་ཉིད་བཅུ་དང་ཐ་དད་པར་འདོད་དོ། །ཁ་ཅིག་ནི་མི་རིགས་ཏེ། གང་གི་ཕྱིར་འདི་དག་ཀྱང་ཕྱག་རྒྱ་ཆེན་པོ་ལ་སོགས་པའི་ཚུལ་གྱིས་ན། ཕྱག་རྒྱ་ཆེན་པོའི་ཁོངས་སུ་གཏོགས་པ་ཡིན་པས་ལོགས་ཤིག་ཏུ་མ་བཞག་གོ་ཞེས་

ཟེར་རོ། །ཡང་དེ་ཁོ་ན་ཉིད་བཅུ་པོ་འདི་དག་འབྲས་བུ་དང་རྒྱུ་དང་། དོན་དམ་པའི་དེ་ཁོ་ན་ཉིད་ཀྱི་དབྱེ་བས་རྣམ་པ་གསུམ་དུ་འགྱུར་རོ། །དེ་ལ་དོན་གྱི་དངོས་གྲུབ་ལ་སོགས་པ་ནི་འབྲས་བུའི་དེ་ཁོ་ན་ཉིད་དོ། །དེ་ཐོབ་པའི་ཐབས་ནི་རྒྱུའི་དེ་ཁོ་ན་ཉིད་དོ། །དོན་དམ་པར་རྒྱུ་དང་
འབྲས་བུའི་དངོས་པོ་མེད་པའི་ངོ་བོ་ཉིད་ཡིན་པས་ན། དོན་དམ་པའི་དེ་ཁོ་ན་ཉིད་ཡིན་པར་བཤད་པ་ཡིན་ནོ། །ཡང་ན་ཤེས་རབ་དང་ཐབས་ཀྱི་དབྱེ་བས་དེ་ཁོ་ན་ཉིད་རྣམ་པ་གཉིས་སུ་འགྱུར་རོ། །དོན་དམ་པ་དང་ཀུན་རྫོབ་ཀྱི་དེ་ཁོ་ན་ཉིད་དོ། །དེ་ལ་དེ་ཁོ་ན་ཉིད་བཅུ་པོ་འདི་དག་དོན་
དམ་པར་བསྒོམ་པ་ཡིན་པས་ན་དོན་དམ་པའི་དེ་ཁོ་ན་ཉིད་དུ་གསུངས་པ་ཡིན་ལ། ཀུན་རྫོབ་ཏུ་ཡང་ཇི་སྐད་དུ་གསུངས་པའི་དབྱེ་བས་ཕྱེ་བ་འདི་དག་ཡོད་པ་ཉིད་དེ། དེ་བས་ན་ཀུན་རྫོབ་ཀྱི་དེ་ཁོ་ན་ཉིད་དུ་གསུངས་པ་ཡིན་ནོ། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་འདིར་དེ་ཁོ་ན་
ཉིད་ཇི་ལྟར་བསྟན་པར་བྱས་པ་དེ་བཞིན་དུ། གཟུངས་ཀྱི་དཀྱིལ་འཁོར་ནས་བརྩམས་ཏེ་རིགས་ཐམས་ཅད་ལ་ཡང་ཤེས་པར་བྱའོ་ཞེས་བྱ་བའི་ཐ་ཚིག་གོ། །དེ་བཞིན་གཤེགས་པ་ཐམས་ཅད་ཀྱི་ཐེག་པ་ཆེན་པོ་ནི་རྣམ་པར་སྣང་མཛད་དང་། རྣམ་པར་སྣང་མཛད་ཆེན་པོའི་
མཚན་ཉིད་དོ། །དེ་མངོན་པར་རྟོགས་པ་ནི་ཁོང་དུ་ཆུད་ཅིང་མངོན་སུམ་དུ་བྱས་པའི་དོན་ཏོ། །དེ་ལས་རྟོག་པ་གང་སྐྱེ་བ་དེ་ནི་རྟོག་པ་སྟེ། འདི་ནི་རྣམ་པར་སྣང་མཛད་ཀྱི་ཕྱག་རྒྱ་ཆེན་པོའི་ཞེས་བྱ་བ་ནས། འདི་ནི་རྡོ་རྗེ་འབེབས་པའི་ཕྱག་རྒྱ་ཆེན་པོ་ཞེས་བྱ་བ་ལ་སོགས་པའོ། །ཕྱག་
རྒྱ་ཆེན་པོ་ལ་སོགས་པ་བརྟག་པའི་ཚུལ་དེ་ཉིད་ཀྱིས་གཞན་དུ་རྟོག་པ་ཟིལ་གྱིས་མནན་ནས། མཛེས་ཤིང་འབར་བ་ནི་རྟོག་པའི་རྒྱལ་པོའོ། །རྟོག་པའི་རྒྱལ་པོ་དེ་ལས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་ཆོ་ག་རྒྱས་པ་རྫོགས་སོ་ཞེས་བྱ་བ་ནི་མཐར་ཐུག་པ་ཉིད་དོ་
ཞེས་བྱ་བའི་ཐ་ཚིག་གོ། །རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོའི་རྣམ་པར་འགྲེལ་པ་རྫོགས་སོ།། །།དེ་ལྟར་ཕྱག་རྒྱ་ཆེན་པོ་གཙོ་བོར་གྱུར་པ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་བསྟན་ནས། ད་ནི་དམ་ཚིག་གི་ཕྱག་རྒྱ་ཆེན་པོ་གཙོ་བོར་གྱུར་པ་གཟུགས་ཀྱི་དཀྱིལ་

འཁོར་སྟོན་པར་བཞེད་པས། དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་ནས་ཞེས་བྱ་བ་ནི་དེ་མ་ཐག་པའི་སྒྲ་སྟེ། དང་པོ་སྦྱོར་བའི་རྗེས་ཐོགས་ལའོ། །འདིར་དང་པོ་སྦྱོར་བའི་ཏིང་ངེ་འཛིན་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པའི་རྡོ་རྗེ་
སེམས་དཔའི་སྤྲུལ་པ་ལ་སོགས་པའོ། །དེ་བཞིན་གཤེགས་པ་ཐམས་ཅད་ནི་རྣམ་པར་སྣང་མཛད་ལ་སོགས་པ་ནས་རྡོ་རྗེ་འབེབས་པའི་བར་རོ། །དེ་རྣམས་ཀྱི་གཉིས་སུ་མེད་པའི་དྲན་པ་དང་ཤེས་རབ་དང་ཡང་དག་པར་ལྡན་པའི་ཐུགས་ནི་རྡོ་རྗེའི་གཟུགས་སོ། །དེའི་དམ་ཚིག་ནི་
རྡོ་རྗེའི་གཟུགས་ཀྱི་ལྷ་མོ་ལ་སོགས་པའི་སྐུའོ། །དེའི་འབྱུང་བ་ནི་དེ་བཞིན་གཤེགས་པ་ཐམས་ཅད་ཀྱི་ཐུགས་ཀར་གནས་པའི་སེམས་དཔའ་རྡོ་རྗེ་ལས་བྱུང་བ་གང་ཡིན་པ་འདི་ནི་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་གཟུགས་ཀྱི་དམ་ཚིག་འབྱུང་བ་རྡོ་རྗེའོ། །དེ་ལ་དམིགས་
པའི་ཏིང་ངེ་འཛིན་གང་ཡིན་པ་དེ་ལ་ཡང་མིང་དེ་སྐད་ཅེས་བྱ་སྟེ། ཏིང་ངེ་འཛིན་དེ་ལ་སྙོམས་པར་ཞུགས་པ་ནི། གཟུགས་ཀྱི་ལྷ་མོ་སྤྲུལ་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་ཐ་ཚིག་གོ། །བཅོམ་ལྡན་འདས་ཕྱག་ན་རྡོ་རྗེ་དེ་ཉིད་ཅེས་བྱ་བ་ནི། དེ་བཞིན་
གཤེགས་པ་ཐམས་ཅད་ཀྱི་ཐུགས་ལ་གནས་པའི་སེམས་དཔའ་རྡོ་རྗེའི་གཟུགས་ཀྱིས་ཆེད་དུ་བརྗོད་པ་འདི་ཆེད་དུ་བརྗོད་དོ་ཞེས་བྱ་བར་སྦྱར་རོ། །རྡོ་རྗེ་འཛིན་པ་ནི་འདིར་རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེབས་པའི་བར་ལ་བྱ་སྟེ། དེ་རྣམས་ཀྱི་གཟུགས་འཛིན་པའི་ངང་
ཚུལ་འདི་ལ་མངའ་བས་ན་རྡོ་རྗེ་འཛིན་པའོ། །རྡོ་རྗེ་འཛིན་པའི་གཟུགས་འཛིན་པ་འབའ་ཞིག་ཏུ་མ་ཟད་ཀྱི། ཀུན་དུ་འབར་བའི་སྙིང་པོ་ཡང་ཡིན་ཏེ། ཀུན་ནས་འབར་བའི་སྙིང་པོར་བྱས་པ་ནི་ཀུན་དུ་འབར་བའི་སྙིང་པོའོ། །དེ་ལྟ་བུ་དེ་སུ་ཞིག་ཡིན་ཞེ་ན། རྡོ་རྗེ་གཟུགས་ཀྱི་དམ་
ཚིག་གི་ཕྱག་རྒྱའི་ལྷ་མོ་རྣམས་ཞེས་བྱ་བ་གསུངས་ཏེ། རྡོ་རྗེའི་གཟུགས་ནི་བཤད་ཟིན་ཏོ། །དེ་རྣམས་ཀྱི་དམ་ཚིག་གི་ཕྱག་རྒྱ་རྡོ་རྗེ་རྩེ་ལྔ་པ་ལ་སོགས་པ་ནས་རྡོ་རྗེ་དྲིལ་བུའི་བར་གྱི་གཟུགས་ཏེ། དེས་ཉེ་བར་མཚོན་པའི་ལྷ་མོ་རྣམས་ནི། རྡོ་རྗེ་གཟུགས་ཀྱི་དམ་ཚིག་གི་ཕྱག་

རྒྱའི་ལྷ་མོ་རྣམས་སོ། །དེ་རྣམས་སུ་གྱུར་པ་ནི་ཀུན་དུ་བཟང་པོ་ལ་སོགས་པ་ནས་རྡོ་རྗེ་འབེབས་པའི་བར་གྱི་གཟུགས་རིག་པའི་ལྷ་མོ་རྣམས་སུ་གྱུར་ཏོ་ཞེས་བྱ་བའི་ཐ་ཚིག་གོ། །དེ་ལྟ་བུའི་རྡོ་རྗེའི་གཟུགས་ཀྱི་ལྷ་མོ་དམ་ཚིག་གི་ཕྱག་རྒྱའི་ལྷ་མོ་རྣམས་སུ་གྱུར་ནས་དེ་བཞིན་གཤེགས་
པ་ཐམས་ཅད་ཀྱི་ཐུགས་ལས་བྱུང་སྟེ། འཇིག་རྟེན་གྱི་ཁམས་ཐམས་ཅད་ཀྱི་ཞེས་བྱ་བ་ལ་སོགས་པས་ནི་སྤྲོས་པ་སྟོན་པའོ། །འཇིག་རྟེན་གྱི་ཁམས་ཐམས་ཅད་ན་སངས་རྒྱས་རྣམས་ཀྱི་གདུལ་བྱ་དེ་བཞིན་གཤེགས་པའི་སྙིང་པོ་ཅན་གྱི་སེམས་ཅན་གང་ཡིན་པ་དེ་རྣམས་ཀྱི་ཡེ་
ཤེས་བསྒྲུབས་ཏེ་ཞེས་བྱ་བར་སྦྱར་ཏེ། རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་གཟུགས་ནི། དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་གཟུགས་སོ། །དེ་ཉིད་ནི་ཡེ་ཤེས་ཏེ། ཇི་སྐད་དུ་བཤད་པའི་དྲན་པ་དང་། ཤེས་རབ་དང་། ཡང་
དག་པར་ལྡན་པའི་ཐུགས་སོ། །དེ་བསྒྲུབ་པ་ནི་གདུལ་བྱ་རྣམས་ཀྱི་རྒྱུད་ལ་རྡོ་རྗེ་གཟུངས་ཀྱི་ཡེ་ཤེས་བསྐྱེད་ཅེས་བྱ་བའི་དོན་ཏོ། །དེ་བཞིན་གཤེགས་པ་ཐམས་ཅད་ཀྱི་ཚིག་གི་ཕྱག་རྒྱའི་གཟུགས་སུ་གྱུར་ནས་ཞེས་བྱ་བ་ནི། ཀུན་དུ་བཟང་མོ་ལ་སོགས་པའི་ལྷ་མོའི་
གཟུགས་མི་སྣང་བར་བྱས་ནས་རྡོ་རྗེ་ལ་སོགས་པའི་གཟུགས་སུ་སྤྲུལ་ཏེ། དེ་བཞིན་གཤེགས་པ་ཐམས་ཅད་དང་འབྲེལ་བའི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ཇི་སྐད་བཤད་པའི་བཀོད་པའི་ཚུལ་གྱི་རིམ་པས་ཟླ་བའི་དཀྱིལ་འཁོར་རྣམས་ལ་བཀོད་དེ། ཆེད་དུ་བརྗོད་པ་
འདི་ཆེད་དུ་བརྗོད་དོ། །ཨེ་མའོ་ཞེས་བྱ་བ་ནི་ངོ་མཚར་དུ་གྱུར་པའོ། །བྱང་ཆུབ་སེམས་དཔའ། སེམས་ཅན་ཀུན་ལ་ཕན་བཞེད་པ། །ཞེས་བྱ་བ་ནི་ཕན་པར་བཞེད་པ་ཉིད་དོ། །ཅི་ཞིག་ངོ་མཚར་ཆེ་ཞེ་ན། འདུལ་བའི་དབང་གིས་ཞེས་བྱ་བ་ལ་སོགས་པ་གསུངས་ཏེ། གང་གི་
ཕྱིར་འདུལ་བའི་དབང་གིས་ཏེ། སེམས་ཅན་ཡོངས་སུ་སྨིན་པར་བྱ་བའི་དབང་གིས་དཔའ་བོ་ཞེས་བྱ་བ། ཉོན་མོངས་པ་བག་ཆགས་དང་བཅས་པ་སྤངས་པ་ཉིད་ཀྱི་རྣམ་པར་རྟོག་པ་ཐམས་ཅད་ཀྱིས་མི་བསྐྱོད་པ་ཡིན་ན། བུད་མེད་གཟུགས་སུ་མཛད་པར་འགྱུར། །ཞེས་བྱ་བ་དེ་

དོན་ཡོད་པ་མ་ཡིན་ཞིང་ཉོན་མོངས་པ་སྤངས་སུ་ཟིན་ཀྱང་། འདི་ལྟ་བུ་མཛད་པ་འདི་ནི་ངོ་མཚར་ཆེའོ། །དེ་ལྟར་གཟུངས་ཀྱི་དཀྱིལ་འཁོར་སྤྲུལ་ནས། དེ་ནས་ཞེས་བྱ་བ་ལ་སོགས་པས་གཟུངས་ཀྱི་རིག་པ་གསུངས་པར་སྟོན་ཏོ། །དེ་བཞིན་གཤེགས་པ་
ཐམས་ཅད་ཀྱི་ཡེ་ཤེས་ནི་རྣམ་པར་སྣང་མཛད་དང་། རྡོ་རྗེ་སེམས་མ་དང་། རིན་ཆེན་མ་དང་། ཆོས་མ་དང་། ལས་མ་རྣམས་ཀྱི་ཇི་སྐད་དུ་བཤད་པའི་གཟུངས་རྣམས་ནི་ཡེ་ཤེས་སོ། །དེ་རྣམས་ལས་བྱུང་ནས་ཀྱང་ཞེས་བྱ་བ་ལ་སོགས་པ་ནི་ཕྱག་རྒྱའོ། །དེའི་དམ་ཚིག་ནི་རྡོ་རྗེ་
དབྱིངས་ཀྱི་དབང་ཕྱུག་མའི་དཀྱིལ་འཁོར་རོ། །དེ་ཉིད་ནི་རྡོ་རྗེ་དབྱིངས་སོ། །དེའི་ཏིང་ངེ་འཛིན་གང་གིས་བྱིན་གྱིས་རློབ་ཅིང་བརྟན་པར་བྱེད་པ་དེ་ནི་བྱིན་གྱིས་བརླབ་པ་ཞེས་བྱ་བའི་ཏིང་ངེ་འཛིན་ཏེ་དེ་ལ་སྙོམས་པར་ཞུགས་པ་ནི། རྡོ་རྗེ་དབྱིངས་ཀྱི་དབང་ཕྱུག་མའི་དཀྱིལ་འཁོར་བརྟན་པའི་
རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་ཐ་ཚིག་གོ། །དེ་བཞིན་གཤེགས་པ་ཐམས་ཅད་ཀྱང་ཡིན་ལ། རྡོ་རྗེ་སེམས་དཔའ་ཡང་ཡིན་པས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་སེམས་དཔའ་སྟེ། མི་བསྐྱོད་པ་དང་དེའི་རིགས་རྣམས་སོ། །དེ་རྣམས་ཀྱི་དམ་ཚིག་གི་
ཡེ་ཤེས་ནི་མི་བསྐྱོད་པའི་རིགས་ཀྱི་ཕྱག་རྒྱ་བསྐྱེད་པའི་རང་བཞིན་ཏེ། ཇི་སྐད་དུ་བཤད་པའི་གཟུངས་ནི་ཡེ་ཤེས་སོ། །དེ་རྣམས་ལས་སྐྱེས་པའི་རྡོ་རྗེ་རྩེ་ལྔ་པ་ལ་སོགས་པའི་གཟུགས་ནི་ཕྱག་རྒྱ་ཡིན་པས་དེ་སྐད་ཅེས་བྱའོ། །དེའི་དཀྱིལ་འཁོར་ནི་རྡོ་རྗེ་ཐུགས་ཀྱི་དཀྱིལ་འཁོར་
རོ། །དེ་གང་བྱིན་གྱིས་རློབ་པ་དེ་ནི་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ཏོ། །དེ་ལ་སྙོམས་པར་ཞུགས་པ་ནི་རྡོ་རྗེ་ཐུགས་ཀྱི་དཀྱིལ་འཁོར་བརྟན་པར་བྱེད་པའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་བར་དུའོ། །དེ་བཞིན་གཤེགས་པ་ཐམས་ཅད་ཀྱང་ཡིན་ལ་རྡོ་རྗེ་
རིན་པོ་ཆེ་ཡང་ཡིན་པས། དེ་བཞིན་གཤེགས་པ་ཐམས་ཅད་ཀྱི་རིན་པོ་ཆེ་སྟེ། རིན་ཆེན་འབྱུང་ལྡན་ལ་སོགས་པའི་རིགས་རྣམས་སོ། །དེའི་དམ་ཚིག་ནི་ཡེ་ཤེས་ཏེ་རིན་ཆེན་འབྱུང་ལྡན་གྱི་རིགས་བསྐྱེད་པའི་རྒྱུའོ། །ཇི་སྐད་དུ་བཤད་པའི་གཟུངས་ནི་ཡེ་ཤེས་སོ། །དེ་ལས་

བྱུང་བའི་རྡོ་རྗེ་རིན་པོ་ཆེའི་ཕྱག་རྒྱ་ནི་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་རིན་པོ་ཆེའི་དམ་ཚིག་གི་ཡེ་ཤེས་ཀྱི་ཕྱག་རྒྱའོ། །དེ་རྣམས་ཀྱི་དཀྱིལ་འཁོར་ནི་རང་གི་དབང་བསྐུར་བའི་དཀྱིལ་འཁོར་རོ། །དེ་གང་གི་བྱིན་གྱིས་བརླབ་པ་ནི་དེ་བྱིན་གྱིས་བརླབ་པའི་ཏིང་ངེ་འཛིན་ཏོ། །དེ་ལ་
སྙོམས་པར་ཞུགས་པ་རང་གི་དབང་བསྐུར་བའི་དཀྱིལ་འཁོར་བརྟན་པར་བྱ་བའི་ཕྱིར་ཐུགས་རྩེ་གཅིག་ཏུ་མཛོད་ཅེས་བྱ་བའི་བར་དུའོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ཆོས་ནི་འོད་དཔག་ཏུ་མེད་པ་ལ་སོགས་པའི་རིགས་རྣམས་སོ། །དེ་རྣམས་ཀྱི་དམ་ཚིག་གི་ཡེ་ཤེས་
ནི་སྔ་མ་བཞིན་དུ་ཤེས་པར་བྱའོ། །དེ་རྣམས་ལས་བྱུང་བའི་རྡོ་རྗེ་པདྨ་ལ་སོགས་པའི་ཕྱག་རྒྱ་རྣམས་ནི་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ཆོས་ཀྱི་དམ་ཚིག་གི་ཡེ་ཤེས་ཀྱི་ཕྱག་རྒྱའོ། །དེའི་དཀྱིལ་འཁོར་ནི་ཚེ་ཚད་མེད་པའི་ཆོས་ཀྱི་དཀྱིལ་འཁོར་ཏེ། དེ་ཏིང་ངེ་
འཛིན་གང་གིས་བྱིན་གྱིས་རློབ་པ་དེ་ནི། དེ་བྱིན་གྱིས་བརླབ་པ་ཞེས་བྱ་བའི་ཏིང་ངེ་འཛིན་ཏེ། ཏིང་ངེ་འཛིན་དེ་ལ་སྙོམས་པར་ཞུགས་པའོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ལས་ནི་གདོན་མི་ཟ་བར་གྲུབ་པ་ལ་སོགས་པའི་སྣ་ཚོགས་རྡོ་རྗེ་བསྐྱེད་པའི་རྒྱུའི་ཡེ་ཤེས་
ནི། དེ་བཞིན་གཤེགས་པ་ཐམས་ཅད་ཀྱི་ལས་ཀྱི་དམ་ཚིག་གི་ཡེ་ཤེས་སོ། །དེ་རྣམས་ལས་བྱུང་བའི་སྣ་ཚོགས་རྡོ་རྗེ་ལ་སོགས་པའི་ཕྱག་རྒྱ་རྣམས་ནི་དེ་བཞིན་གཤེགས་པ་ཐམས་ཅད་ཀྱི་ལས་ཀྱི་དམ་ཚིག་གི་ཕྱག་རྒྱའོ། །དེའི་དཀྱིལ་འཁོར་ནི་རྡོ་རྗེ་ཐམས་ཅད་ཀྱི་དཀྱིལ་
འཁོར་རོ། །དེ་ཏིང་ངེ་འཛིན་གང་གིས་བྱིན་གྱིས་བརླབ་པ་དེ་ནི་དེ་བྱིན་གྱིས་བརླབ་པ་ཞེས་བྱ་སྟེ། ཏིང་ངེ་འཛིན་དེ་ལ་སྙོམས་པར་ཞུགས་ནས་རང་གི་རིག་པའི་མཆོག་འདི་སྨྲས་སོ་ཞེས་རེ་རེ་ཞིང་ཀུན་ལ་ཡང་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་གཟུངས་ཆེན་པོ་ནི་ཀུན་དུ་བཟང་
མོ་ལ་སོགས་པ་སྟེ། དེ་རྣམས་ཀྱི་དམ་ཚིག་གི་ཕྱག་རྒྱ་བཞི་པོ་བཤད་དོ། །ཀུན་དུ་བཟང་མོ་ཞེས་བྱ་བ་ནི་ཀུན་ནས་བཟང་བ་སྟེ། བྱང་ཆུབ་ཀྱི་མཚན་ཉིད་ཅན་གྱི་ཐུགས་ཀྱི་ཚུལ་གྱིས་སམ། དེའི་རྒྱུ་མཐུན་པ་ལས་བྱུང་བས་སོ། །དེ་བཞིན་གཤེགས་པ་ཐམས་ཅད་བསྡུས་པའི་རྒྱུ་ཉིད་

ཀྱིས་ན། དེ་བཞིན་གཤེགས་པའི་ལྕགས་ཀྱུ་མའོ། །དགའ་བ་ནི་མགུ་བ་སྟེ་བྱང་ཆུབ་ཀྱི་སེམས་བསྒོམས་པའི་སྟོབས་ཀྱིས་བྱང་ཆུབ་ཀྱི་སེམས་ཀྱི་དགའ་བ་གང་ཡིན་པའོ། །དེའི་ཆགས་པ་ནི་དགའ་བ་ལ་ཆགས་པ་སྟེ་ཤིན་ཏུ་ཞེན་པ་ཡིན་ལ། དེའི་ངོ་བོ་ཉིད་
ཡིན་པའམ། དེ་ལས་བྱུང་བ་ཉིད་ཀྱིས་ན། དེ་ལ་ཡང་དགའ་བ་ལ་ཆགས་པ་ཞེས་བྱའོ། །རྫོགས་པའི་བྱང་ཆུབ་ལ་སྤྱོད་པའི་མཚན་ཉིད་ཅན་གྱི་ལེགས་པ་ཉིད་ཡིན་པས་སམ། དེའི་རྒྱུ་མཐུན་པ་ལས་བྱུང་བས་ལེགས་ལྡན་མའོ། །བྱང་ཆུབ་ཀྱི་མཚན་ཉིད་ཅན་གྱི་སེམས་
ལས་བྱུང་བ་ཡིན་པས་ན་འདི་དག་ནི་གཟུངས་ཆེན་མོ་རྣམས་སོ། །ནོར་གྱི་སྦྱིན་པ་ནི་རིན་པོ་ཆེའོ། །དེས་མཆོག་ཏུ་གྱུར་པས་ན་རིན་པོ་ཆེའི་གཙོ་མོའོ། །དེ་བཞིན་དུ་མི་འཇིགས་པ་སྦྱིན་པའི་རིན་པོ་ཆེའོ། །དེ་ཉིད་ནི་འཇིགས་པའི་མུན་པ་སེལ་བ་ཉིད་ཀྱིས་སྒྲོན་མ་དང་ཆོས་
མཐུན་པའི་ཕྱིར་རོ། །དེ་ལས་བྱུང་ཞིང་དེའི་རྒྱུ་མཐུན་པ་ཡིན་པས་ན་རིན་པོ་ཆེའི་སྒྲོན་མའོ། །བྱམས་པའི་སྦྱིན་པ་སྟོན་པར་བྱེད་པའི་རྒྱལ་མཚན་གྱི་ཕྱག་རྒྱ་ནི་རྒྱལ་མཚན་གྱི་རྩེ་མོའ