Luận tạng Tây Tạng (Tengyur) — Tập 48

ེལ་པ་ནི་གང་ཞེ་ན། བརྗོད་པར་བྱ་བ་ནི་འཇམ་དཔལ་ཡེ་ཤེས་སེམས་དཔའ་ཁོ་ན་ཡིན་ལ། དགོས་པ་ནི་ཐེག་པ་སྣ་ཚོགས་ཀྱི་དོན་རྟོགས་པའོ། །དགོས་པའི་དགོས་པ་ནི་སྐུ་གསུམ་དང་ཡེ་ཤེས་ལྔ་ཐོབ་པར་བྱེད་པའོ། །འབྲེལ་པ་ནི་
ཐབས་དང་ཐབས་ལས་བྱུང་བའི་མཚན་ཉིད་ཀྱིས་འབྲེལ་པར་གནས་སོ། །དེ་ལ་རྒྱུད་འདི་ནི་ནམ་མཁའ་དང་མཉམ་པའི་རྒྱུད་ཡིན་ཏེ། བྱ་བ་དང་། སྤྱོད་པ་དང་། གཉི་ག་དང་། རྣལ་འབྱོར་དང་། རྣལ་འབྱོར་བླ་ན་མེད་པའི་རྒྱུད་དང་། རྒྱུད་ཐམས་ཅད་
ཀྱི་བཤད་རྒྱུད་ཡིན་ཏེ། རྒྱུད་ཀུན་གྱི་ནི་བདག་པོ་མཆོག །ཅེས་པས་གསལ་ལོ། །ཐེག་པ་ཐམས་ཅད་ཀྱི་གལ་འགེགས་ཡིན་ཏེ། ཐེག་པ་སྣ་ཚོགས་ཐབས་ཚུལ་གྱིས། །ཞེས་པས་གསལ་ལོ། །གཞུང་མི་མཐུན་པ་མང་པོ་དག་རང་གི་འདོད་པའི་ངོས་ནས་
སྨྲ་སྟེ་དེ་དག་གིས་ནི་རྒྱུད་འདིའི་ཆ་ཤས་ཙམ་ལས་མ་རྟོགས་ཏེ། རང་རང་གི་རྟོག་པ་ལ་བདེན་པར་འཛིན་པའི་ཕྱིར་རོ། །དེ་ལ་རེ་ཞིག་བསྡུས་པའི་དོན་བཤད་པར་བྱ་སྟེ། གླེང་གཞི་ཕུན་སུམ་ཚོགས་པ་དང་། རྒྱུད་དངོས་དང་། རྗེས་སུ་ཡི་རང་བའོ། །གླེང་གཞི་ལ་གསུམ་སྟེ། འཁོར་དང་སྟོན་

པ་དང་བསྟན་པ་ལན་སུམ་ཚོགས་པའོ། །རྒྱུད་དངོས་ནི། ཡི་གེ་གཅིག་པའི་རྒྱུད་དེ་ཨ་ཡིག་གཙོ་བོར་གྱུར་པའི་ཕྱིར་རོ། །མུ་སྟེགས་རི་དགས་ཞེས་པ་དང་། །ཀུན་དོན་ཡོན་ཏན་གསུམ་གྱི་བདག །ཅེས་པས་མུ་སྟེགས་ཀྱི་ལྟ་བ་བསྟན་ཏེ། བདེན་པ་གཉིས་ནི་རྟོགས་པ་
པོ། །ཕྱིར་མི་ལྡོག་པ་ཕྱིར་མི་འོང་། །ཞེས་པས་ཉན་ཐོས་ཀྱི་ལྟ་བ་བསྟན་ཏོ། །འདྲེན་པ་རང་རྒྱལ་བསེ་རུའི་ཚུལ། །ངེས་འབྱུང་སྣ་ཚོགས་ལས་བྱུང་བ། །ཞེས་པས་རང་རྒྱལ་བའི་ལམ་འབྲས་བུ་དང་བཅས་པ་བསྟན་ཏོ། །རྣམ་རིག་སྣ་ཚོགས་གཟུགས་དོན་ཅན། །རྣམ་ཤེས་
སྣ་ཚོགས་རྒྱུད་དང་ལྡན། །སྣ་ཚོགས་གཟུགས་ཅན་ཡིད་ལས་སྐྱེས། །ཞེས་པས་རྣལ་འབྱོར་སྤྱོད་པའི་ལྟ་བ་བསྟན་ཏོ། །གཉིས་མེད་གཉིས་སུ་མེད་པར་སྟོན། །ཞེས་པས་ཟུང་འཇུག་གི་ངོ་བོ་སྟེ་སྒྱུ་མ་ལྟ་བུ་བསྟན་ཏོ། །བདེན་པ་གཉིས་ཀྱི་ཚུལ་ལ་གནས། །ཡང་དག་མཐའ་ལ་རྣམ་
པར་གནས། །ཞེས་པས་རབ་ཏུ་གནས་པའི་དོན་བསྟན་ཏོ། །ཡང་དག་མཐའ་སྟེ་ཡི་གེ་མེད། །ཅེས་པས་གསང་སྔགས་བླ་ན་མེད་པའི་མཐར་ཐུག་པའི་དོན་བསྟན་ཏོ། །ཚོགས་གཉིས་ཚོགས་ནི་བསགས་པ་པོ། །ཞེས་པས་བསོད་ནམས་དང་ཡེ་ཤེས་ཀྱི་ཚོགས་བསགས་པ་བསྟན་ཏོ། །
སྐད་ཅིག་གཅིག་གིས་རྫོགས་སངས་རྒྱས། །ཞེས་པས་ལྷ་སྐད་ཅིག་དྲན་རྫོགས་ཀྱིས་བསྐྱེད་པར་བསྟན་ཏོ། །རྡོ་རྗེ་ཧཱུཾ་སྟེ་ཧཱུཾ་ཞེས་སྒྲོགས། །མཚོན་དུ་རྡོ་རྗེའི་མདའ་ཐོགས་པ། །རྡོ་རྗེ་རལ་གྲིས་མ་ལུས་གཅོད། །རྡོ་རྗེ་སྐུ་འཆང་རྡོ་རྗེ་ཅན། །ཞེས་པས་ཆོ་ག་གསུམ་གྱིས་བསྐྱེད་པ་བསྟན་ཏེ། རྡོ་རྗེ་
གདན་ནི་མ་ལུས་ལྡན། །ཞེས་པས་གདན་སྐྱེད་པ་བསྟན་ཏོ། །ཡེ་ཤེས་དབང་བསྐུར་ཅོད་པན་ཅན། །ཞེས་པས་དབང་བསྐུར་བའི་ཆོ་ག་ཡན་ལག་དང་བཅས་པ་བསྟན་ཏོ། །ངན་སོང་ཐམས་ཅད་རྣམ་སྦྱོང་བ། །ཞེས་པས་རོ་སྲེག་པའི་ཆོ་ག་བསྟན་ཏོ། །ཡེ་ཤེས་མེ་ལྕེ་འོད་འབར་གསལ། །
ཞེས་པས་སྦྱིན་སྲེག་གི་ཆོ་ག་བསྟན་ཏོ། །བསམ་གཏན་ཡན་ལག་ཀུན་ཤེས་ཤིང་། །ཞེས་པས་གྲུབ་མཐའ་དེ་དག་སོ་སོའི་སྒོམ་པ་བསྟན་ཏོ། །ཡན་ལག་མེད་པའི་རྩིས་ལས་འདས། །ཞེས་པ་དང་། བསམ་གཏན་བཞི་པོའི་རྩེ་མོ་ཅན། །ཞེས་པས་མཚན་མ་མེད་པའི་རྫོགས་པའི་རིམ་པ་

བསྟན་ཏོ། །བཅུ་དྲུག་ཕྱེད་ཕྱེད་ཐིག་ལེ་ཅན། །རྣམ་པ་ཀུན་ལྡན་རྣམ་པ་མེད། །ཅེས་པས་མཚན་བཅས་ཀྱི་རྫོགས་རིམ་བསྟན་ཏོ། །ད་ནི་དཀྱིལ་འཁོར་བསྟན་པར་བྱ་སྟེ། དེ་ལ། དཀྱིལ་འཁོར་ཆེན་པོ་ཡངས་པ་ཡིན། །ཞེས་པས་དཀྱིལ་འཁོར་ཐམས་ཅད་ཀྱི་དོན་འདིར་
རྟོགས་པར་བྱའོ། །ཁྱད་པར་གྱི་དཀྱིལ་འཁོར་བསྟན་པ་ནི། སངས་རྒྱས་རྣམ་པར་སྣང་མཛད་ཆེ། །ཞེས་པས་རིགས་ཀྱི་གཙོ་བོ་ཡིན་པས་རིགས་ལྔའི་དཀྱིལ་འཁོར་བསྟན་ཏོ། །གཙང་གནས་དམ་པ་གཽ་ཏ་མ། །ཞེས་པས་ཤཱཀྱ་ཐུབ་པའི་དཀྱིལ་འཁོར་བསྟན་ཏོ། །རྡོ་རྗེ་འཇིགས་
བྱེད་འཇིགས་པར་བྱེད། །ཅེས་པས་རྡོ་རྗེ་འཇིགས་བྱེད་ཀྱི་དཀྱིལ་འཁོར་བསྟན་ཏོ། །ཁྲོ་བོའི་རྒྱལ་པོ་གདོང་དྲུག་འཇིགས། །ཞེས་པས་གཞོན་ནུ་གདོང་དྲུག་གི་དཀྱིལ་འཁོར་བསྟན་ཏོ། །ཧ་ལ་ཧ་ལ་གདོང་བརྒྱ་པ། །ཞེས་པས་འཇམ་དཔལ་གདོང་བརྒྱ་པའི་དཀྱིལ་འཁོར་བསྟན་ཏོ། །
གཤིན་རྗེ་གཤེད་པོ་བགེགས་ཀྱི་རྒྱལ། །ཞེས་པས་གཤིན་རྗེ་གཤེད་ཀྱི་དཀྱིལ་འཁོར་བསྟན་ཏོ། །གདོང་ལྔ་གཙུག་ཕུད་ལྔ་དང་ལྡན། །ཞེས་པས་འཇམ་དཔལ་ཀུན་དུ་ཞལ་གྱི་དཀྱིལ་འཁོར་བསྟན་ཏོ། །དཔལ་ལྡན་རྒྱུ་སྐར་དཀྱིལ་འཁོར་ཅན། །ཞེས་པས་དཔལ་ལྡན་རྒྱུ་སྐར་གྱི་
དཀྱིལ་འཁོར་བསྟན་ཏོ། །ལྷའི་དབང་པོ་ཞེས་པས་ཁྱབ་འཇུག་གི་དཀྱིལ་འཁོར་བསྟན་ཏོ། །ལྷ་ཡི་བླ་ཞེས་པས་ཚངས་པའི་དཀྱིལ་འཁོར་བསྟན་ཏོ། །ལྷ་ཡི་བདག་པོ་ཞེས་པས་བརྒྱ་བྱིན་གྱི་དཀྱིལ་འཁོར་བསྟན་ཏོ། །ལྷ་མིན་བདག་ཅེས་པས་རཱ་ཧུ་ལའི་དཀྱིལ་འཁོར་བསྟན་ཏོ། །ལྷ་ཡི་
བླ་ཞེས་པས་གཟའ་ཕུར་བུའི་དཀྱིལ་འཁོར་བསྟན་ཏོ། །འཇོམས་བྱེད་ཅེས་པས་གཟའ་ཐགས་ཟངས་རིས་ཀྱི་དཀྱིལ་འཁོར་བསྟན་ཏོ། །འཇོམས་བྱེད་ཕྱི་མས་ནི་སྲིན་པོའི་རྒྱལ་པོ་ལང་ཀ་མགྲིན་བཅུའི་དཀྱིལ་འཁོར་བསྟན་ཏོ། །དབང་ཕྱུག་པོ་ཞེས་པས་མ་ཧཱ་དེ་བའི་དཀྱིལ་འཁོར་བསྟན་ཏོ། །
ཤེས་རབ་རལ་གྲི་མདའ་གཞུ་ཐོགས། །ཞེས་པས་འཇམ་དཔལ་ཡེ་ཤེས་སེམས་དཔའ་ཉིད་ཀྱི་དཀྱིལ་འཁོར་བསྟན་ཏོ། །དེ་ལས་ཚོགས་བསགས་པ་དག་གིས་ནི་ས་དང་། ལམ་དང་། རྣམ་པར་ཐར་པའི་སྒོ་ནས་འཇམ་དཔལ་ཡེ་ཤེས་སེམས་དཔའ་ལ་བསྟོད་པ་བསྟན་ཏོ། །

ཏིང་འཛིན་ལུས་ཅན་ལུས་ཀྱི་མཆོག །ལོངས་སྤྱོད་རྫོགས་སྐུ་ཀུན་གྱི་རྒྱལ། །སྤྲུལ་པའི་སྐུ་སྟེ་སྐུ་ཡི་མཆོག །ཅེས་པས་འབྲས་བུ་བསྟན་ཏོ། །དེ་དག་དང་ཡེ་ཤེས་རྣམ་པ་ལྔ་དང་། འདིས་བསྡུས་རྒྱས་ཀྱི་བསྟོད་པ་ཤེས་པར་བྱའོ། །དེ་ལྟར་བསྡུས་པའི་དོན་རབ་ཏུ་རྟོགས་ནས། ཚིག་གི་
དོན་བདེ་བླག་ཏུ་རྟོགས་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་ལ། དེ་ནས་ཞེས་བྱ་བ་ནི་སྒྱུ་འཕྲུལ་དྲ་བའི་ལེའུ་ཁྲི་དྲུག་སྟོང་ཡོད་པ་ལས། ལེའུ་ཁྲི་ལྔ་སྟོང་དགུ་བརྒྱ་དགུ་བཅུ་གོ་དགུ་བཤད་པ་དེ་ནས་སོ། །དཔལ་ལྡན་རྡོ་རྗེ་འཆང་ཞེས་པ་ལ། འཁོར་ཕུན་སུམ་ཚོགས་པ་
ཕྱག་ན་རྡོ་རྗེའི་བཤད་པ་སྟེ། དཔལ་ལྡན་ནི་གཟུགས་སྐུ་གཉིས་སོ། །རྡོ་རྗེ་ནི་སྟོང་པ་ཉིད་དེ་ཆོས་སྐུའོ། །འཆང་ཞེས་པ་ནི་སྐུ་གསུམ་དབྱེར་མི་ཕྱེད་པ་སྟེ་ངོ་བོ་ཉིད་ཀྱི་སྐུའོ། །གདུལ་དཀའ་ཞེས་པ་ནི་གདུལ་བྱ་སྟེ་དུག་གསུམ་མོ། །འདུལ་བ་རྣམས་ཞེས་པ་འདུལ་བྱེད་དེ་སྐུ་
རྣམ་པ་གསུམ་མོ། །མཆོག་ཅེས་པ་ནི་ཕྱག་ན་རྡོ་རྗེའོ། །དཔའ་བོ་འཇིག་རྟེན་གསུམ་ལས་རྒྱལ། །ཞེས་པ་ནི་གདུག་པ་ཅན་ཐམས་ཅད་ཚར་གཅོད་པ་ལ་ནི་དཔའ་བོ་ཞེས་བྱའོ། །འཇིག་རྟེན་གསུམ་ལས་རྒྱལ་ནི་ས་འོག་ས་སྟེང་ས་བླ་གསུམ་ལས་རྒྱལ་བའོ། །རྡོ་རྗེ་དབང་
ཕྱུག་གསང་བའི་རྒྱལ། །ཞེས་པ་ནི་རྡོ་རྗེ་ནི་སྟོང་པ་ཉིད་དོ། །སྟོང་པ་ཉིད་དེའི་དོན་ཐུགས་སུ་ཆུད་པ་ལ་ནི་དབང་ཕྱུག་ཅེས་བྱའོ། །དོན་དེ་ཉན་ཐོས་དང་རང་སངས་རྒྱས་དང་ཐུན་མོང་མ་ཡིན་པས་ན་གསང་བའི་རྒྱལ་ལོ། །ཡང་ན་གསང་བ་ནི་གསང་སྔགས་ཀྱི་ཐེག་པའོ། །དེའི་
རྒྱལ་པོ་ནི་ཕྱག་ན་རྡོ་རྗེའོ། །འོ་ན་ཕྱག་ན་རྡོ་རྗེ་དེའི་ཆ་ལུགས་ཅི་འདྲ་ཞེ་ན། པདྨ་དཀར་པོའི་རྒྱས་འདྲའི་སྤྱན། །ཞེས་བྱ་བ་སྨོས་ཏེ། པདྨ་དཀར་པོ་ནི་མདོག་དཀར་བ། རྩ་བ་བཟང་བ། དྲི་ཞིམ་པ། རྩི་ཡོད་པ། འདབ་མ་ལྔ་དང་ལྡན་པའོ། །དེ་བཞིན་དུ་ཕྱག་ན་རྡོ་རྗེ་དེ་ཡང་ཉོན་མོངས་
པས་མ་གོས་པ་དང་། ཚོགས་གཉིས་ལས་གྲུབ་པ་དང་། གཞན་འདུལ་བ་དང་། སྙིང་རྗེ་དང་ལྡན་པ་དང་། རིགས་ལྔས་འགྲོ་བའི་དོན་བྱེད་པའོ། །ཡང་ན། པདྨ་དཀར་པོའི་རྒྱས་འདྲའི་སྤྱན། །ཞེས་བྱ་བ་ནི་པདྨ་ལ་འདམ་གྱི་སྐྱོན་གྱིས་མ་གོས་པ་བཞིན་སྐྱོན་མེད་པའི་སྤྱན་ལྔ་དང་ལྡན་ཞེས་

བྱ་བའི་ཚིག་གོ། །པདྨ་རྒྱས་པའི་གདན་ལ་བཞུགས། །ཞེས་པ་ནི། པདྨ་རྒྱས་པའི་གདན་ལ་བཞུགས་པ་ཡིན་ལ་འཁོར་བ་ལ་གནས་ཀྱང་ཉེས་པས་མ་གོས་ཞེས་པའི་དོན་ཏོ། །རང་གི་ལག་གིས་རྡོ་རྗེ་མཆོག །ཅེས་པ་ནི་གཉིས་སུ་མེད་པའི་ཡེ་ཤེས་ཐུགས་སུ་ཆུད་
པའི་རྟགས་སུ་རྡོ་རྗེ་ཐུགས་ཀར་འཛིན་པའོ། །གཞན་དོན་མཛད་པའི་རྟགས་སུ་ཡང་དང་ཡང་དུ་གསོར་བར་བྱེད་པའོ། །དེས་ནི་ཐུན་མོང་མ་ཡིན་པའི་འཁོར་བསྟན་ཏོ། །ད་ནི་ཐུན་མོང་གི་འཁོར་ཁྲོ་བོ་སྟོང་ལྔ་བརྒྱ་བཤད་པར་བྱ་སྟེ། ཁྲོ་བོ་དེ་དག་གི་ཆ་ལུགས་བསྟན་པ་ནི། ཁྲོ་གཉེར་
རིམ་པར་ལྡན་ལ་སོགས། །ཞེས་བྱ་བ་སྨོས་ཏེ། ཁྲོ་གཉེར་ནི་ཁྲོ་གཉེར་རོ། །རིམ་པར་ལྡན་ལ་སོགས་ཞེས་པ་ནི་སྐྲ་དང་ཨག་ཚོམ་སེར་ལ་བརྫེས་པ་དང་། མིག་དམར་བ་དང་། ལྕེ་འདྲིལ་ཞིང་ཡ་སོས་མ་མཆུ་མནན་པ་དང་། ཐུང་ཞིང་གེལ་བ་དང་། གསུས་པ་ཆེ་བ་དང་། ཡན་ལག་རབ་
ཏུ་བགྲད་པ་དང་། ཉིང་ལག་རྡོ་རྗེའི་རྩེ་མོ་ལྟ་བུ་དང་། དུར་ཁྲོད་དང་གདུག་པའི་རྒྱན་གྱིས་བརྒྱན་པ་དང་། མཚོན་ཆ་འབར་ཞིང་འཕྲོ་བ་དང་། མགོའི་དོ་ཤལ་དང་། མེ་འབར་བའི་གནས་ནི་རིམ་པར་ལྡན་པ་སྟེ་སོགས་ཞེས་བྱའོ། །དེ་ལྟ་བུ་སུ་ལ་ལྡན་ཞེ་ན། ལག་ན་རྡོ་རྗེ་མཐའ་ཡས་པ་
ལའོ། །གདུལ་དཀའ་འདུལ་བས་ན་དཔའ་བོའོ། །ཁྲོ་བོའི་ཆ་ལུགས་དང་ལྡན་པས་ན་འཇིགས་སུ་རུང་བའོ། །སྟག་གི་ཤམ་བུ་དང་ལྡན་པས་ན་དཔའ་བྱད་ཅན་ནོ། །བ་སྤུའི་བུ་ག་ནས་རྡོ་རྗེའི་རྩེ་མོ་རབ་ཏུ་འཕྲོ་བ་ནི་གཞན་དོན་ནོ། །རང་གི་ལག་གིས་གསོར་བར་བྱེད་པས་ན་རང་དོན་
ནོ། །སྙིང་རྗེ་ཆེན་པོའི་སྒོ་ནས་གཞན་དོན་བྱེད་པ་དང་། ཤེས་རབ་ཆེན་པོའི་སྒོ་ནས་རང་གི་དོན་ཐུགས་སུ་ཆུད་པས་ན། ཐབས་ཀྱིས་འགྲོ་དོན་བྱེད་པའི་མཆོག །འཁོར་དེ་དག་ཐམས་ཅད་ཀྱང་འཇམ་དཔལ་ཡེ་ཤེས་སེམས་དཔའི་དོན་ལ་དགའ་བ་དང་། མགུ་བ་དང་། རངས་པའི་བསམ་
པ་ཅན་ནོ། །ཁྲོ་བོའི་ལུས་ཀྱི་གཟུགས་ལྡན་པ་ནི་བཤད་ཟིན་ཏོ། །སངས་བ་ནི་སྤངས་པ་ཕུན་སུམ་ཚོགས་པ། རྒྱས་པ་ནི་ཡེ་ཤེས་ཕུན་སུམ་ཚོགས་པའོ། །ཕྲིན་ལས་ནི་ཞི་བ་དང་རྒྱས་པ་དང་དབང་དང་དྲག་པོའོ། །བྱེད་པའི་མགོན་ཞེས་པ་ནི་ཕྲིན་ལས་བཞིས་འགྲོ་བའི་མགོན་བྱེད་པའི་ཐ་

ཚིག་གོ། །ལུས་བཏུད་རྣམས་དང་ལྷན་ཅིག་ཅེས་བྱ་བ་ནི་ཕྱག་ན་རྡོ་རྗེ་དང་ལྷན་ཅིག་ཏུ་གནས་པའོ། །གནས་ནས་ཀྱང་། དེ་བཞིན་གཤེགས་པ་བཅོམ་ལྡན་འདས། །རྫོགས་སངས་རྒྱས་ལ་ཞེས་བྱ་བ་ནི་སྟོན་པ་ཕུན་སུམ་ཚོགས་པ་སྟེ་ཤཱཀྱ་ཐུབ་པའོ། །གཉིས་སུ་མེད་པའི་དེ་བཞིན་ཉིད་
ཐུགས་སུ་ཆུད་ནས་འགྲོ་བའི་དོན་ལ་གཤེགས་པས་ན་དེ་བཞིན་གཤེགས་པའོ། །བཅོམ་པ་ནི་བདུད་བཞིའོ། །ལྡན་པ་ནི་ཡེ་ཤེས་ལྔ་དང་ལྡན་པའོ། །འདས་པ་ནི་རྟག་ཆད་གཉིས་ལས་འདས་པའོ། །རྫོགས་པ་ནི་སྟོབས་དང་མི་འཇིགས་པ་ལ་སོགས་པའི་ཆེ་བའི་ཡོན་ཏན་བསམ་གྱིས་
མི་ཁྱབ་པའོ། །སངས་རྒྱས་ནི་སྐུ་གསུམ་མོ། །ཕྱག་འཚལ་ནས་ཞེས་བྱ་བ་ལ་སོགས་པ་ལུས་གུས་པ་དང་། ངག་དང་བ་དང་། ཡིད་མོས་པ་དང་བཅས་ནས་སོ། །ཐལ་མོ་སྦྱར་བ་ནི་ལུས་ཀྱི་བྱ་བའོ། །སྤྱན་སྔར་འདུག་སྟེ་ཞེས་བྱ་བ་ནི་སྟོན་པ་ཕུན་སུམ་ཚོགས་པ་སྟེ་ཤཱཀྱ་ཐུབ་
པའི་སྤྱན་སྔར་འདུག་པའོ། །འདི་སྐད་གསོལ་ཞེས་པ་ནི་མཚམས་སྦྱོར་གྱི་ཚིག་སྟེ་ངག་ཏུའོ། །ཁྱབ་བདག་ཅེས་བྱ་བ་ནི་ཐུགས་རྗེ་ཆེན་པོས་འགྲོ་བ་ལ་ཁྱབ་པས་ན་ཁྱབ་བདག་གོ། །བདག་ལ་སྨན་པ་དང་ཞེས་པ་ནི་ཕྱག་ན་རྡོ་རྗེ་ལའོ། །བདག་དོན་བདག་ལ་ཐུགས་བརྩེའི་
ཕྱིར། །ཞེས་པ་ནི་གཉིས་སུ་མེད་པའི་ཡེ་ཤེས་ཐོབ་པའི་ཕྱིར་རོ། །ཐབས་ཁྱད་པར་ཅན་སྒྱུ་འཕྲུལ་དྲ་བའི་སྒོ་ནས་མངོན་པར་རྫོགས་པའི་བྱང་ཆུབ་ཅི་ནས་བདག་གིས་ཐོབ་པར་བྱ་བའི་ཕྱིར་རྒྱུད་འདི་བཤད་དུ་གསོལ་ཞེས་པའོ། །རང་གི་དོན་དུ་ཞུས་པ་བསྟན་པའོ། །
ད་ནི་གཞན་གྱི་དོན་དུ་ཞུས་པ་བསྟན་པ་ནི། ཉོན་མོངས་པ་ནི་དུག་ལྔའམ་གསུམ་མོ། །སེམས་དཀྲུགས་ཞེས་པ་ནི། ཉོན་མོངས་པ་དེ་དག་གིས་རབ་ཏུ་སྡུག་བསྔལ་བར་བྱས་པའོ། །མ་རིག་པ་ནི་མ་རིག་པའོ། །འདམ་དུ་བྱིང་བ་ནི་འཁོར་བའི་འདམ་དུ་བྱིང་བའོ། །
སེམས་ཅན་ཀུན་ཞེས་པ་འགྲོ་བ་རིགས་དྲུག་གོ། །སྨན་པ་དང་ཞེས་པ་ནི་མྱ་ངན་ལས་འདས་པའི་བདེ་བ་ཐོབ་པའི་ཕྱིར་རོ། །བླ་མེད་འབྲས་བུ་ཐོབ་བྱའི་ཕྱིར། །ཞེས་པ་ནི་ཆོས་ཀྱི་སྐུ་སྟེ་དེ་ཐོབ་པའི་ཕྱིར་བཤད་དུ་གསོལ་བའོ། །ཡུལ་གང་ལ་གསོལ་བ་གདབ་སྙམ་པ་ལ། རྫོགས་

པའི་སངས་རྒྱས་བཅོམ་ལྡན་འདས་ལའོ། །འགྲོ་བ་ནི་རིགས་དྲུག་གོ། །བླ་ནི་སངས་རྒྱས་ཀྱི་དགོངས་པའོ། །མ་ནི་དེ་སྟོན་པའམ་འབྱིན་པའམ་སྐྱེད་པར་བྱེད་པའོ། །སྟོན་པ་པོ་ཞེས་པ་ནི་མ་རྟོགས་པ་དང་། ལོག་པར་རྟོགས་པ་དང་། ཐེ་ཚོམ་ཟ་བ་ལས་བཟློག་པའོ། །
དམ་ཚིག་ཆེན་པོ་ནི་དེ་ལས་མི་འདའ་བའོ། །དེ་ཉིད་མཁྱེན་ཞེས་བྱ་བ་ནི། ཇི་ལྟ་བ་མཁྱེན་པའི་ཡེ་ཤེས་ཏེ། དེ་ཁོ་ན་ཉིད་ཐུགས་སུ་ཆུད་པའོ། །དབང་པོ་བསམ་པ་མཁྱེན་མཆོག་གིས། །ཞེས་པ་ནི་ཇི་སྙེད་པ་མཁྱེན་པའི་ཡེ་ཤེས་ཏེ། གདུལ་བྱའི་དབང་པོ་དང་བསམ་པ་
ཐམས་ཅད་མཁྱེན་པའི་ཡེ་ཤེས་ཞེས་བྱ་བའི་ཐ་ཚིག་གོ། །དེ་ལྟ་བུའི་སྟོན་པ་ཁྱེད་ནི་གསོལ་བ་གདབ་པའི་གནས་སོ། །བཅོམ་ལྡན་འདས་ཀྱི་ཡེ་ཤེས་སྐུ། །ཞེས་པ་ནི་འཇམ་དཔལ་ཡེ་ཤེས་སེམས་དཔའ་སྟེ་ཆོས་སྐུ་སྟེ་ཐུགས་སོ། །གཙུག་ཏོར་ཆེན་པོ་ཚིག་གི་བདག །ཅེས་
པ་ནི་སྐུའི་རང་བཞིན་ཏེ། བྱང་ཆུབ་སེམས་དཔའ་མན་ཆད་གྱིས་བལྟར་མི་མངོན་པ་སྟེ་འདྲ་བ་མེད་ཅིང་ཟིལ་གྱིས་མི་ནོན་པའི་རྟགས་སོ། །ཚིག་གི་བདག་ཅེས་པ་ནི་གསུང་ཕུན་སུམ་ཚོགས་པ་སྟེ། མི་ཟད་པའི་གསུང་དེ་ལྟ་བུ་སུ་ལ་མངའ་བ་ལ་བདག་ཅེས་བྱའོ། །དེ་ལྟ་བུ་དེ་ཡང་རྒྱུ་
རྐྱེན་གྱིས་མ་བསྐྱེད་པས་ན། ཡེ་ཤེས་སྐུ་སྟེ་རང་འབྱུང་བ། །ཞེས་བྱའོ། །སྐུ་དེ་ལྟ་བུ་དང་ལྡན་པའི་འཇམ་དཔལ་ཡེ་ཤེས་སེམས་དཔའི་མིང་ནི་ཡང་དག་བརྗོད་པའི་མཆོག །དེའི་དོན་བཤད་དུ་གསོལ་ཞེས་པའི་ཚིག་གོ། །འཇམ་པ་ནི་ཐ་དད་ཀྱི་རྟོག་པའི་ཟུག་རྔུས་མ་གོས་པ་སྟེ་ཆོས་
སྐུའོ། །དཔལ་ནི་འགྲོ་བའི་དཔལ་དུ་གྱུར་པ་སྟེ་གཟུགས་སྐུའོ། །ཡེ་ཤེས་ཡེ་གནས་པའི་དོན་ཤེས་པས་ན་ཡེ་ཤེས་སོ། །སེམས་དཔའ་ནི་འགྲོ་བའི་དོན་ལ་སེམས་དཔའ་བའོ། །མིང་ནི་ཞེས་པས་ནི་མཚན་ནོ། །ཡང་དག་པར་བརྗོད་པ་ནི་མ་ནོར་བའོ། །མཆོག་ཅེས་པ་ནི་འགྲན་
ཟླ་མེད་པའོ། །དོན་ཟབ་ཅེས་པ་ནི། བློའི་ཡུལ་མ་ཡིན་པ་སྟེ་ལྟ་བའོ། །དེ་ལྟ་བུའི་དོན་དེས་མ་ཁྱབ་པ་མེད་པས་ན་དོན་རྒྱ་ཆེ་བ་ཞེས་བྱའོ། །དོན་ཆེན་མཚུངས་མེད་ཅེས་བྱ་བ་ནི་དེ་ལྟ་བུའི་དོན་དེ་གོམས་པ་ལས། རང་གི་དོན་དང་གཞན་གྱི་དོན་ཕུན་སུམ་ཚོགས་པ་འབྱུང་བས་ན་དོན་ཆེན་པོ་

ཞེས་བྱའོ། །མཚུངས་མེད་ཅེས་བྱ་བ་ནི། ཉན་ཐོས་དང་རང་རྒྱལ་བའི་འབྲས་བུ་དང་འདྲ་བ་མ་ཡིན་པའོ། །རབ་ཞི་བ་ཞེས་བྱ་བ་ནི། སྒྲིབ་པ་གཉིས་དང་བྲལ་བའི་སྐུའོ། །ཐོག་མ་བར་དང་མཐར་དགེ་བ། །ཞེས་བྱ་བ་ནི་རྒྱུད་ཀྱི་རྒྱལ་པོ་འདི་འདས་པའི་སངས་རྒྱས་རྣམས་ཀྱིས་གསུངས་པས་ཐོག་མར་
དགེ་བ་ཞེས་བྱའོ། །ད་ལྟར་གྱི་སངས་རྒྱས་རྣམས་ཀྱིས་གསུངས་པས་བར་དུ་དགེ་བ་ཞེས་བྱའོ། །མ་འོངས་པའི་སངས་རྒྱས་རྣམས་ཀྱང་གསུང་བར་འགྱུར་བས་ན་ཐ་མར་དགེ་བ་ཞེས་བྱའོ། །ཡང་ན་ཐོག་མར་དགེ་བ་ནི་ལྟ་བའོ། །བར་དུ་དགེ་བ་ནི་སྒོམ་པའོ། །ཐ་མར་དགེ་བ་ནི་འབྲས་བུའོ། །ཡང་
དང་ཡང་དུ་གསུངས་པ་གང་། །ཞེས་པ་ནི་ནན་ཏན་དུ་གསུངས་པའོ། །རྒྱུད་ཆེན་ཞེས་པ་ནི་རྒྱུད་སྡེ་བཞི་ལས་ཁྱད་པར་འཕགས་པའོ། །སྒྱུ་འཕྲུལ་དྲ་བ་ནི་རྒྱུད་ཀྱི་མིང་ངོ་། །ལས་ཞེས་པ་ནི་ལེའུ་ཁྲི་དྲུག་སྟོང་ཡོད་པ་ལས། ད་རེས་ཀླུའི་ལེའུ་བཤད་དུ་གསོལ་ཞེས་པའོ། །རྡོ་རྗེ་ནི་
སྟོང་པ་ཉིད་དོ། །འཆང་བ་ནི་དེའི་དོན་ཐུགས་སུ་ཆུད་པའོ། །ཆེན་པོ་ནི་འགྲན་ཟླ་མེད་པ་སྟེ་ལོངས་སྐུའོ། །གསང་སྔགས་འཆང་ཞེས་པ་ནི་ཟུང་འཇུག་གི་ངོ་བོ་ཐུགས་སུ་ཆུད་པ་སྟེ་ཆོས་སྐུའོ། །དཔག་མེད་རྣམས་ཞེས་པ་ནི་སྤྲུལ་པའི་སྐུ་གྲངས་མེད་པའོ། །དགའ་བཞིན་དུ་ཞེས་
པ་ནི་སངས་རྒྱས་དེ་དག་དགྱེས་བཞིན་དུ་འཇམ་དཔལ་ཡེ་ཤེས་སེམས་དཔའི་དོན་གླུར་བླངས་པ་གང་ལགས་པ་བཤད་དུ་གསོལ་ཞེས་པའོ། །འགྲོ་བའི་མགོན་བྱེད་པས་ན། མགོན་པོ་རྫོགས་སངས་རྒྱས་ཀུན་གྱིས། །ཞེས་པ་ནི་སྐུ་གསུམ་མོ། །གསང་འཛིན་ནི་སྐུ་གསུམ་
དབྱེར་མི་ཕྱེད་པའོ། །ཅི་ནས་བདག་འགྱུར་ཕྱིར་ཞེས་པ་ནི་དབྱེར་མི་ཕྱེད་པའི་དོན་ཏེ། བདག་གིས་ཐོབ་པར་མཛད་དུ་གསོལ་ཞེས་པའི་དོན་ཏོ། །ངེས་པར་འབྱུང་གི་བར་དུ་འདི། །ཞེས་པ་མི་གནས་པའི་མྱ་ངན་ལས་འདས་པ་མ་ཐོབ་ཀྱི་བར་དུ། བདག་གི་བསམ་པ་བརྟན་པོས་
བཟུང་། །ཞེས་པའི་དོན་ཏོ། །གཞན་དོན་དུ་ཞུས་པ་བསྟན་པ་ནི། ཉོན་མོངས་མ་ལུས་བསལ་བ་དང་། །ཞེས་པ་ནི་ཉོན་མོངས་པའི་སྒྲིབ་པའོ། །བསལ་བ་དང་ཞེས་པ་ནི། ཉོན་མོངས་པ་དེ་དག་པར་བྱེད་པའི་ཕྱིར་ཞེས་བྱ་བའི་དོན་ཏོ། །མི་ཤེས་པ་ནི་ཤེས་བྱའི་སྒྲིབ་པའོ། །

མ་ལུས་སྤང་བའི་ཕྱིར་ཞེས་པ་ནི་ཉོན་མོངས་པ་དང་། ཤེས་བྱའི་སྒྲིབ་པ་མཐའ་དག་དག་པའི་ཕྱིར། བསམ་པའི་ཁྱད་པར་ཇི་བཞིན་དུ། །ཞེས་པ་དབང་པོའི་བྱེ་བྲག་ཇི་ལྟར་འཚལ་བ་བཞིན་དུ་བཤད་དུ་གསོལ་ཞེས་པའི་དོན་ཏོ། །སེམས་ཅན་རྣམས་ལ་ཞེས་པ་ནི་
ཉོན་མོངས་པའི་གང་ཟག་གོ། །བཤད་པར་འཚལ་ཞེས་བྱ་བ་ནི་ཀླུའི་ལེའུ་ཐེག་པ་སྣ་ཚོགས་ཀྱི་དོན་བཤད་དུ་གསོལ་ཞེས་པའི་དོན་ཏོ། །གསང་དབང་ནི་གསང་སྔགས་ལ་དབང་བའོ། །དེ་ནི་ཕྱག་ན་རྡོ་རྗེའོ། །དེ་བཞིན་གཤེགས་ལ་དེ་སྐད་དུ། །ཞེས་པ་ནི་དོན་ཕྱིན་ཅི་མ་ལོག་པ་ལ་
གཤེགས་པ་ནི་དེ་བཞིན་གཤེགས་པའོ། །དེ་སྐད་དུ་གསོལ་ནས་ཞེས་བྱ་བ་ནི་ཐེག་པ་སྣ་ཚོགས་ཀྱི་དོན་བཤད་དུ་གསོལ་ཞེས་པའོ། །ཐལ་མོ་སྦྱར་བྱས་ཏེ། ལུས་བཏུད་ནས་ནི་སྤྱན་སྔར་འདུག །ཅེས་པ་ནི་གུས་པའི་ཚུལ་གྱིས་ཤཱཀྱ་ཐུབ་པའི་སྤྱན་སྔར་འདུག་པའོ། །ད་ནི་རྒྱུད་
བཤད་པའི་སྦྱོར་བ་བསྟན་ཏོ། །དེ་ནས་ཞེས་པ་ནི་འདས་མ་ཐག་པ་སྟེ། སྤྱན་སྔར་འདུག་པའི་དེ་མ་ཐག་པའོ། །བཅོམ་པ་ནི་བདུད་བཞི་སྟེ་ལྷའི་བུའི་བདུད་དང་། འཆི་བདག་གི་བདུད་དང་། ཉོན་མོངས་པའི་བདུད་དང་། ཕུང་པོའི་བདུད་དོ། །ལྡན་པ་ནི་ཡེ་ཤེས་ལྔ་སྟེ་མེ་ལོང་ལྟ་བུ་དང་།
མཉམ་པ་ཉིད་དང་། སོ་སོར་རྟོག་པ་དང་། བྱ་བ་གྲུབ་པ་དང་། ཆོས་ཀྱི་དབྱིངས་ཀྱི་ཡེ་ཤེས་སོ། །ཤཱཀྱ་ནི་རྒྱལ་པོ་ཤཱཀྱའི་རིགས་སོ། །ཐུབ་པ་ནི་ཤཱཀྱ་རྣམས་ཀྱི་ངག་ཐུབ་པའོ། །ཡང་ན་སྟོབས་བཅུས་བདུད་བཞི་ཐུབ་པས་ན་ཐུབ་པའོ། །རྫོགས་པའི་སངས་རྒྱས་རྐང་གཉིས་མཆོག །
ཅེས་པ་ནི་རྐང་གཉིས་ནི་ལྷ་དང་མིའོ། །དེའི་མཆོག་ཏུ་གྱུར་པ་ནི་ཤཱཀྱ་ཐུབ་པའོ། །ཉིད་ཀྱི་ཞེས་པ་ནི་ཤཱཀྱ་ཐུབ་པའོ། །ཞལ་ནས་ལྗགས་བཟང་བ་ཞེས་པ་ནི་ཁ་དོག་དང་དབྱིབས་ཕུན་སུམ་ཚོགས་པའོ། །རིང་ཞིང་ཞེས་པ་ནི་ཆུའོ། །ཡངས་པ་ནི་ཞེང་ངོ་། །བརྐྱང་བར་མཛད་དེ་ཞེས་པ་ནི་
ལྗགས་ལས་འོད་བྱུང་བས་འདོད་ཁམས་ལ་སོགས་པ་འཇིག་རྟེན་གསུམ་པོ་སྣང་བར་བྱས་ནས་བདུད་བཞིའི་དགྲ་རྣམས་འདུལ་བར་བྱེད་པའོ། །དེའི་རྗེས་ཐོགས་ལ་འཛུམ་པ་བསྟན་ནས། སེམས་ཅན་གྱི་ངན་སོང་གསུམ་སྦྱོང་བར་བྱེད་པ་ཞེས་བྱ་སྟེ་དག་པར་བྱེད་པའི་ཐ་ཚིག་གོ། །ཚངས་པའི་

གསུང་ནི་ཡན་ལག་དྲུག་ཅུའོ། །སྙན་པ་ཡི་ཞེས་པ་ནི་ཡིད་དུ་འོང་བའི་གསུང་ངོ་། །དེས་འདོད་ཁམས་ལ་སོགས་པ། འཇིག་རྟེན་གསུམ་པོ་ཀུན་བཀང་ནས། །ལག་ན་རྡོ་རྗེ་སྟོབས་པོ་ཆེ། །གསང་དབང་ལ་ནི་སླར་གསུངས་པ་ནི་ཞུས་པའི་ལན་གསུངས་པའོ། །ཇི་སྐད་གསུངས་ཤེ་ན།
ཕྱག་ན་རྡོ་རྗེ་ལ་སྙིང་རྗེ་ཆེན་པོ་དང་ལྡན་པ་ཞེས་བོས་ནས། འགྲོ་བ་རྣམས་ལ་ཕན་པའི་དོན་དུ་ཕྱག་ན་རྡོ་རྗེ་ཁྱོད་ཀྱིས་སྣང་ལ་རང་བཞིན་མེད་པའི་སྐུ་འཇམ་དཔལ་གྱི་མཚན་བརྗོད་པ་ཙམ་གྱིས་དོན་ཆེན་པོ་འབྱུང་བ་སྒྲིབ་པ་དག་པར་བྱེད་ཅིང་སྡིག་སེལ་ཞེས་པ་དྲི་མ་ཐམས་ཅད་དང་བྲལ་བར་བྱེད་པའོ། །
ང་ལ་ཉན་པར་བརྩོན་པ་ནི། །ཞེས་པ་ཤཱཀྱ་ཐུབ་ལའོ། །བརྩོན་པ་ནི་ཞེས་པ་བར་ཆད་མེད་པའོ། །ལེགས་སོ་དཔལ་ལྡན་རྡོ་རྗེ་འཆང་། །ཞེས་པ་རང་དོན་དུ་ཞུས་པ་ལེགས་སོ། །ལག་ན་རྡོ་རྗེ་ཁྱོད་ལེགས་སོ། །ཞེས་པ་གཞན་དོན་དུ་ཞུས་པ་ལེགས་སོ། །དེའི་ཕྱིར་ངས་བཤད་ཅེས་རང་བཞིན་
གྱི་དོན་དུ་ཞུས་པ་དེའི་ཕྱིར། ཤཱཀྱ་ཐུབ་པ་ངས་ཕྱག་ན་རྡོ་རྗེ་ལ་ལམ་འབྲས་བུ་དང་བཅས་པར་བསྟན་ཏོ་ཞེས་བྱ་བའི་དོན་ཏོ། །ཁྱོད་ནི་རྩེ་གཅིག་ཡིད་ཀྱིས་ཉོན། །ཞེས་པ་ནི་མ་ཡེངས་པར་རོ། །བཅོམ་ལྡན་དེ་ནི་ལེགས་ཞེས་གསོལ། །ཞེས་པ་ནི་མཚམས་སྦྱོར་གྱི་ཚིག་གོ། །བཅོམ་ལྡན་
ཤཱཀྱ་ཐུབ་པས་འཁོར་དེ་དག་ཐམས་ཅད་རིགས་ཐ་དད་དུ་གཟིགས་ཏེ། ལ་ལ་ནི་གསང་སྔགས་ཞེས་པ་ལྷ་ཁ་སྦྱོར་གྱི་རིགས་སུ་གཟིགས། ལ་ལ་ནི་རིགས་ཆེན་ཞེས་པ་རྫོགས་པའི་རིམ་པའི་སྐལ་ལྡན་དུ་གཟིགས། ལ་ལ་ནི་ཐམས་ཅད་དང་ཞེས་པ་བསྐྱེད་རྫོགས་ཐུན་མོང་
བའི་གང་ཟག་ཏུ་གཟིགས་སོ། །ལ་ལ་ནི། གསང་སྔགས་རིག་སྔགས་འཆང་བའི་རིགས། །ཞེས་པ་ལྷ་རྐྱང་པ་ལ་དགའ་བའི་གང་ཟག་ཏུ་གཟིགས་སོ། །ཡང་ན། རིགས་གསུམ་ལ་ནི་རྣམ་པར་གཟིགས། །ཞེས་པ་སྐུ་དང་གསུང་དང་ཐུགས་ཀྱི་རིགས་སུ་གཟིགས་སོ། །འཇིག་
རྟེན་ཞེས་པ་ནི་ལོག་པའི་ཤེས་པས་བརྟགས་པའོ། །འཇིག་རྟེན་འདས་པའི་རིགས་ཞེས་པ་ནི་མྱ་ངན་ལས་འདས་པ་སྟེ་འཁྲུལ་པ་ཟད་པའོ། །འཇིག་རྟེན་སྣང་བྱེད་ཅེས་པ་ནི་འཇིག་རྟེན་སྣང་བར་བྱེད་པ་ནི་རིགས་པ་རྒྱུན་གྱི་བརྟག་པ་སྟེ་མུ་སྟེགས་ཀྱི་རིགས་སོ། །རིགས་ཆེན་དང་ཞེས་པ་ནི་མུ་

སྟེགས་ལས་བཟློག་པ་སྟེ་ཕ་རོལ་ཏུ་ཕྱིན་པའི་ཐེག་པའི་གང་ཟག་དུ་གཟིགས་སོ། །ཕྱག་རྒྱ་ཆེན་པོའི་རིགས་མཆོག་དང་། །ཞེས་པ་ནི་ཕྱག་ནི་བློ་ལས་འདས་པ་སྟེ་སྟོང་པ་ཉིད་དོ། །རྒྱ་ནི་སྟོང་པ་ཉིད་དེས་མ་ཁྱབ་པ་མེད་པའོ། །ཆེན་པོ་ནི་དེ་ལྟ་བུ་རྟོགས་པའི་
གང་ཟག་དེ་འགྲན་ཟླ་མེད་པས་ན་རིགས་མཆོག་ཅེས་བྱའོ། །རིགས་ཆེན་གཙུག་ཏོར་ཆེར་གཟིགས་ནས། །ཞེས་པ་ནི་ཟིལ་གྱིས་མི་ནོན་པའི་གང་ཟག་སྟེ་ཁྱད་པར་བླ་ན་མེད་པའི་གང་ཟག་ཏུ་གཟིགས་ནས། ཚིག་གི་བདག་པོ་ཞེས་པ་ནི་ཤཱཀྱ་ཐུབ་པ་ལའོ། །ཚིགས་སུ་བཅད་
ཅེས་པ་བརྐྱང་པ་བསྡུས་པ་སྟེ་སྒྱུ་འཕྲུལ་དྲ་བ་ཀླུའི་ལེའུ་བསྡུས་ཞེས་པའི་དོན་ཏོ། །གང་གསུང་ཞེ་ན། གསང་སྔགས་རྒྱལ་པོ་དྲུག་ལྡན་ཞིང་། །ཞེས་པ་འོག་ནས་འབྱུང་བའི་ཚིག་གོ། །གསང་སྔགས་ཞེས་པ་ནི་ཟུང་འཇུག་གོ། །རྒྱལ་པོ་ཞེས་པ་ནི་ལམ་ཐུན་མོང་མ་ཡིན་པའོ། །
དྲུག་ཅེས་པ་ནི་ཨའི་སྡེ་ཚན་ནོ། །ལྡན་ཞེས་པ་ནི་ཐབས་ཀྱི་ཡི་གེ་ཨ་དང་བཅས་པའོ། །གཉིས་སུ་མེད་པར་འབྱུང་བ་དང་། །ཞེས་པ་ནི་ཀུན་རྫོབ་ཏུ་གསལ་བྱེད་དང་དབྱངས་ཡིག་དང་གཉིས་སུ་མེད་པའོ། །དོན་དམ་རིག་པ་དང་སྟོང་པ་གཉིས་སུ་མེད་པའོ། །མི་སྐྱེ་ཞེས་པ་ནི་དོན་དམ་
པའི་བདེན་པའོ། །ཆོས་ཅན་ཞེས་པ་ནི་ཀུན་རྫོབ་ཀྱི་བདེན་པའོ། །འདི་གསུངས་པ་ཞེས་པ་ནི་དབྱེར་མེད་ཀྱི་ཚུལ་དུ་འཁོར་རྣམས་ལ་བཀའ་སྩལ་པའོ། །དེ་དག་གིས་ནི་གླེང་གཞི་ཕུན་སུམ་ཚོགས་པ་རྒྱུད་བཤད་པའི་སྦྱོར་བ་དང་བཅས་པ་བསྟན་ཏོ།། །།ད་ནི་རྒྱུད་དངོས་བསྟན་པར་བྱ་
སྟེ། ཐེག་པ་སྣ་ཚོགས་ཐབས་ཚུལ་གྱིས། །ཞེས་པ་ནི་ཐེག་པ་སྣ་ཚོགས་ཀྱི་ཚུལ་དུ་བཤད་པར་བྱ་སྟེ། སྤྱིར་ཐེག་པའི་སྒོ་སྣ་ཚོགས་ཤིང་བསམ་གྱིས་མི་ཁྱབ་ཀྱང་བསྡུ་ན་གཉིས་ཏེ། ཕ་རོལ་ཏུ་ཕྱིན་པའི་ཐེག་པ་དང་། གསང་སྔགས་ཀྱི་ཐེག་པའོ། །རེ་ཞིག་ཕ་རོལ་ཏུ་ཕྱིན་པའི་ཐེག་
པའི་སྒོ་ནས་བཤད་པར་བྱ་སྟེ། ཨ་ཨཱ་ཞེས་པ་ནི་སྦྱིན་པའི་ཕ་རོལ་ཏུ་ཕྱིན་པའོ། །ཨི་ཨཱི་ཞེས་པ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའོ། །ཨུ་ཨཱུ་ཞེས་པ་ནི་བཟོད་པའི་ཕ་རོལ་ཏུ་ཕྱིན་པའོ། །ཨེ་ཨཻ་ཞེས་པ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པའོ། །ཨོ་ཨཽ་ཞེས་པ་ནི་བསམ་གཏན་གྱི་ཕ་རོལ་ཏུ་

ཕྱིན་པའོ། །ཨཾ་ཨཿཞེས་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའོ། །དེ་དག་ཀྱང་རིང་ཐུང་གི་བྱེ་བྲག་གིས་འཇིག་རྟེན་དང་འཇིག་རྟེན་ལས་འདས་པར་ཤེས་པར་བྱའོ། །དེ་ལ་འཇིག་རྟེན་པའི་སྦྱིན་པ་ནི་སྦྱིན་པ་པོ་དང་སྦྱིན་པ་པོའི་ཡུལ་དང་། སྦྱིན་པར་བྱ་བའི་རྫས་དང་གསུམ་དུ་དམིགས་ཏེ་
གཏོང་ངོ་། །འཇིག་རྟེན་ལས་འདས་པའི་སྦྱིན་པ་ནི་འཁོར་གསུམ་ཡོངས་སུ་དག་པའོ། །དེ་བཞིན་དུ་ཚུལ་ཁྲིམས་ལ་སོགས་པ་ཤེས་པར་བྱའོ། །གསང་སྔགས་ཀྱི་དབང་དུ་བྱས་ནས་བཤད་ན། ཨ་ཨཱ་ནི་གསལ་ལ་རྟོག་པ་མེད་པ་སྟེ་མེ་ལོང་ལྟ་བུའི་ཡེ་ཤེས་སོ། །ཨི་ཨཱི་ཞེས་པ་
ནི་ཕྱོགས་རིས་ཐམས་ཅད་དང་བྲལ་བ་སྟེ་མཉམ་པ་ཉིད་ཀྱི་ཡེ་ཤེས་སོ། །ཨུ་ཨཱུ་ཞེས་པ་ནི་འཁོར་འདས་གཉིས་གཉིས་མེད་དུ་ཤེས་པའི་ཡེ་ཤེས་ཏེ་སོ་སོར་རྟོག་པའི་ཡེ་ཤེས་སོ། །ཨེ་ཨཻ་ཞེས་པ་ནི་བྱ་བ་གྲུབ་པའི་ཡེ་ཤེས་ཏེ་འགྲོ་བའི་དོན་འབད་པ་མེད་པར་འབྱུང་བའོ། །ཨོ་ཨཽ་
ཞེས་པ་ནི་ཡེ་ཤེས་དེ་དག་དབྱེར་མི་ཕྱེད་པ་སྟེ་ཆོས་ཀྱི་དབྱིངས་ཀྱི་ཡེ་ཤེས་སོ། །ཨཾ་ཞེས་པ་ནི་ཡེ་ཤེས་དེ་དག་སྟོང་པ་ཉིད་དང་ལྡན་ཞེས་བྱ་བའི་དོན་ཏོ། །ཨཿཞེས་པ་ནི་ཡེ་ཤེས་དང་སྟོང་པ་དབྱེར་མི་ཕྱེད་པའི་དོན་དེ་བདག་གིས་བསྒོམ་ཞེས་པའི་དོན་ཏོ། །ཤེས་རབ་དང་ཡེ་ཤེས་
གཉིས་སུ་མེད་པའི་དོན་དེ་གང་དུ་བསྒོམ་ཞེ་ན། སྠི་ཏོ་ཞེས་པ་ནི་བསྟན་པ་སྟེ། གནས་ཕུན་སུམ་ཚོགས་པ་སྟེ་བཀྲ་ཤིས་ཤིང་ཉམས་དགའ་བའོ། །ཧྲྀ་དི་ཞེས་པ་ནི་སྙིང་པོའོ། །སྙིང་པོ་ནི་གང་ཞེ་ན་ཛྙཱ་ན་ཞེས་པ་སྟེ་ཡེ་ཤེས་ལྔའོ། །མཱུརྟི་ནི་རྒྱུན་ཏེ་ཡེ་ཤེས་དེ་དག་རྒྱུན་དུ་བསྒོམ་
ཞེས་པའི་ཐ་ཚིག་གོ། །ཨ་ཧཾ་ཞེས་པ་བདག་སྟེ་རྣལ་འབྱོར་པ་བསྒོམ་ཞེས་པའི་ཐ་ཚིག་གོ། །བུདྡྷོ་ཞེས་པ་སངས་རྒྱས་ཏེ་འབྲས་བུའོ། །བུདྡྷ་ནཱཾ་ཞེས་པ་ནི་སྐུ་རྣམ་པ་གཉིས་སོ། །ཏྲྱ་དྷྭ་བརྟཱི་ནཱཾ་ཞེས་པ་ནི་སྐུ་གསུམ་དབྱེར་མི་ཕྱེད་པའོ། །དབྱེར་མི་ཕྱེད་པའི་དོན་དེ་ཡེ་ཤེས་ལྔ་དང་
ལྡན་པས་ཨོཾ་ཞེས་བྱའོ། །ཡེ་ཤེས་དེས་ཐ་དད་ཀྱི་རྟོག་པ་ཐམས་ཅད་གཅོད་པས་བཛྲ་ཏཱིཀྵྞ་ཞེས་བྱ་སྟེ་རྡོ་རྗེ་རྣོན་པོའོ། །དུཿཁཙྪེ་ད་ནི་ཉོན་མོངས་པ་གཅོད་པའོ། །པྲཛྙཱ་ཛྙཱ་ན་ཤེས་རབ་ཡེ་ཤེས་ཏེ་ཐུགས་སོ། །དེ་ལྟ་བུའི་ཡེ་ཤེས་དེ་རྒྱུན་མི་འཆད་པས་མཱུརྟ་ཡེ་ཞེས་བྱ་སྟེ་རྒྱུན་ནོ། །ཛྙཱ་ན་ཀཱ་

ཡ་ཞེས་པ་ནི་ཡེ་ཤེས་ཀྱི་སྐུ་སྟེ་སྐུའོ། །ཝཱ་གཱི་ཤྭ་ར་ཞེས་བྱ་བ་ནི་ངག་གི་དབང་ཕྱུག་སྟེ་གསུང་ངོ་། །དེ་ལྟ་བུའི་སྐུ་གསུང་ཐུགས་ཏེ་སྐྱེ་བ་མེད་པའི་ལྟ་བ་རྟོགས་པ་ལས་འབྱུང་སྟེ་ཨའོ། །བདེ་བ་ཆེན་པོ་གོམས་པས་ཉམས་སུ་བླངས་པས་ན་རའོ། །དེ་ལྟ་བ་དང་སྒོམ་པ་ལ་སྐྱོན་
གང་གིས་ཀྱང་མ་གོས་པ་པདྨ་སྟེ་པའོ། །དེ་ལྟ་བུ་དེ་བསྐྱེད་རྫོགས་ཐུན་མོང་གི་སྤྱོད་པས་གྲོལ་བས་ན་ཙའོ། །ནཱ་ཡ་ཞེས་པ་ནི་རིག་པས་ཀྱང་ཆོས་ཐམས་ཅད་སྐྱེ་བ་མེད་པར་ཤེས་པར་བྱའོ། །ཏེ་ཞེས་བྱ་བ་ནི་འབྲས་བུ་སྟེར་བ་དང་བྲལ་བའོ། །ན་མཿཞེས་བྱ་བ་ནི་དོན་མ་ནོར་བའོ། །དེ་དག་གིས་
ནི་རྒྱུད་ཀྱི་དོན་སྔགས་སུ་བསྡུས་པ་བསྟན་ཏོ། །འདི་ལྟར་སངས་རྒྱས་བཅོམ་ལྡན་འདས། །ཞེས་པ་ནི་གོང་དུ་བསྟན་པའི་སྐུ་གསུམ་མོ། །རྫོགས་པའི་སངས་རྒྱས་ཨ་ལས་བྱུང་། །ཞེས་པ་ནི་ཨ་ནི་སྐྱེ་བ་མེད་པར་རྟོགས་པ་ལས་འབྱུང་ཞེས་བྱ་བའི་ཐ་ཚིག་གོ། །ཨ་ནི་སྐྱེ་བ་མེད་པ་སྟེ་དོན་
དམ་པའོ། །ཡིག་འབྲུ་ཀུན་ཞེས་པ་ནི་ཀུན་རྫོབ་ཀྱི་ཆོས་ཐམས་ཅད་དོ། །མཆོག་ཅེས་པ་ནི་དབྱེར་མི་ཕྱེད་པའོ། །དེ་ལྟ་བུ་ཉམས་སུ་བླངས་པ་ལས། དོན་ཆེན་ཞེས་པ་ནི་རང་དོན་དང་གཞན་དོན་འབྱུང་བའོ། །ཡི་གེ་དམ་པ་ཡིན་ཞེས་པ་ནི་ལམ་མ་ནོར་བའོ། །ཁོང་ནས་འབྱུང་བ་
སྐྱེ་བ་མེད། །ཅེས་པ་ནི་ཆོས་ཐམས་ཅད་ལ་ཆོས་ཉིད་སྐྱེ་བ་མེད་པས་ཁྱབ་པའོ། །སྐྱེ་མེད་དེའི་རང་བཞིན་བསྟན་པ་ནི། ཚིག་ཏུ་བརྗོད་པ་སྤངས་པ་སྟེ། །བློའི་ཡུལ་མ་ཡིན་པའོ། །བརྗོད་པ་ཀུན་གྱི་རྒྱུ་ཡི་མཆོག །ཅེས་པ་ནི་སྐྱེ་བ་མེད་ལས་ཐམས་ཅད་སྐྱེ་བའི་ཚུལ་དུ་ཤར་བའོ། །ཚིག་
ཀུན་རབ་ཏུ་གསལ་བར་བྱེད་པ་སྣ་ཚོགས་སུ་ཤར་བའོ། །དེ་ལྟ་བུ་དེ་ཡང་འཇམ་དཔལ་ཡེ་ཤེས་སེམས་དཔའི་རང་བཞིན་ཡིན་ཞེས་པའི་སྒོ་ནས་བསྟོད་པའོ། །མཆོད་པ་ཆེན་པོ་ཞེས་བྱ་བ་ནི་ཡེ་ཤེས་སེམས་དཔའ་དེ་མཆོད་པའི་གནས་ཡིན་པས་ན་མཆོད་པ་ཆེན་པོའོ། །འདོད་ཆགས་
ཆེ་ཞེས་བྱ་བ་ནི་འགྲོ་བའི་དོན་ལ་ཆགས་པའོ། །སེམས་ཅན་ཐམས་ཅད་དགའ་བར་བྱེད། །ཅེས་བྱ་བ་ནི་གདུལ་བྱ་ཐམས་ཅད་རྒྱུད་ཚིམ་པར་བྱེད་པའོ། །མཆོད་པ་ཆེན་པོ་ཞེ་སྡང་ཆེ། །ཞེས་པ་ནི་ཆོས་ཐམས་ཅད་སྟོང་ཞིང་བདག་མེད་པའོ། །སྟོང་ཞིང་བདག་མེད་པ་དེས། ཉོན་མོངས་

ཀུན་གྱི་དགྲ་ཆེ་བ། །ཞེས་བྱ་སྟེ་ཉོན་མོངས་པ་ཐམས་ཅད་རླག་པར་བྱེད་པའོ། །མཆོད་པ་ཆེན་པོ་ནི་བཤད་ཟིན་ཏོ། །གཏི་མུག་ཆེ་ཞེས་པ་ནི་ཤེས་རབ་བོ། །གཏི་མུག་བློ་སྟེ་ཞེས་པ་ནི་ཤེས་རབ་ཆེན་པོ་དེས་མ་རིག་པ་སེལ་བས་ན་གཏི་མུག་སེལ་ཞེས་བྱའོ། །ཁྲོ་བ་ཆེ་ཞེས་པ་ནི་འཇམ་
དཔལ་ཡེ་ཤེས་སེམས་དཔའོ། །ཁྲོ་བ་ཆེན་པོ་ཞེས་བྱ་བ་ནི་ཐ་དད་ཀྱི་རྟོག་པ་ཐམས་ཅད་དང་བྲལ་བའོ། །དགྲ་ཆེ་བ་ཞེས་པ་ནི་ཐ་དད་ཀྱི་རྟོག་པ་ཐམས་ཅད་སེལ་བར་བྱེད་དོ་ཞེས་བྱ་བའི་ཐ་ཚིག་གོ། །ཁྲོ་བ་ཆེན་པོ་དགྲ་ཆེ་བ། །ཞེས་བྱ་བ་ནི་ཁྲོ་བ་ཆེན་པོ་ནི་འཇམ་དཔལ་ཡེ་ཤེས་
སེམས་དཔའོ། །དགྲ་ཆེ་བ་ནི་འཇམ་དཔལ་གྱིས་འཇོམས་པའོ། །ཆགས་པ་ཆེ་ཞེས་པ་ནི་ཡེ་ཤེས་སེམས་དཔའོ། །ཆགས་པ་ཐམས་ཅད་སེལ་བར་བྱེད། །ཅེས་པ་ནི་མངོན་ཞེན་ཐམས་ཅད་གཅོད་པར་བྱེད་པའོ། །འདོད་པ་ཆེན་པོ་ནི་དང་བ་སྐྱེ་བའི་གནས་ཡིན་པའོ། །བདེ་བ་
ཆེ་ཞེས་པ་ནི་ཆོས་ཀྱི་སྐུའོ། །དགའ་བ་ཆེན་པོ་མགུ་བ་ཆེ། །ཞེས་པ་ནི་སེམས་ཅན་ཐམས་ཅད་མགུ་བར་བྱེད་པ་སྟེ་གཟུགས་སྐུ་གཉིས་སོ། །གཟུགས་ཆེ་ལུས་ཀྱང་ཆེ་བ་སྟེ། །ཞེས་པ་ནི་གཟུགས་ཆེན་པོ་དང་ལུས་ཆེན་པོའི་སྒོ་ནས་འགྲོ་བའི་དོན་བྱེད་པའོ། །ཁ་དོག་ཆེ་ཞེས་
པ་ནི་དཀར་པོ་ལ་སོགས་པ་སྣ་ཚོགས་པའི་སྒོ་ནས་འགྲོ་བའི་དོན་བྱེད་པའོ། །ལུས་ཆེ་ཞེས་པ་ནི་ཞེང་ངོ་། །བོང་ཆེ་ཞེས་པ་ནི་ཆུ་རིང་པའོ། །ཐམས་ཅད་དུ་གྲགས་པས་ནི་ཆེ་ཞེས་བྱའོ། །འགྲོ་བ་ཐམས་ཅད་ལ་ཁྱབ་པས་ན་རྒྱ་ཆེ་བ་ཞེས་བྱའོ། །དཀྱིལ་འཁོར་ཆེན་པོ་
ཡངས་པ་ཡིན། །ཞེས་པ་ནི་དཀྱིལ་འཁོར་མཐའ་དག་གི་སྒོ་ནས་འགྲོ་བའི་དོན་བྱེད་པའོ། །ཤེས་རབ་ཅེས་པ་ནི་སྟོང་པ་ཉིད་དོ། །དེས་ཐ་དད་ཀྱི་རྟོག་པ་གཅོད་པས་ན་མཚོན་ནོ། །འཆང་ཞེས་པ་ནི་འཇམ་དཔལ་ལ་ལྡན་ཞེས་བྱ་བའི་དོན་ཏོ། །ཉོན་མོངས་པའི་འདམ་ལས་
འདྲེན་པར་བྱེད་པས་ན་ལྕགས་ཀྱུ་ཆེ་ཞེས་བྱའོ། །གདུལ་བྱ་ཐམས་ཅད་ལ་གྲགས་པས་ན་གྲགས་ཆེན་ཞེས་བྱའོ། །ཡོན་ཏན་མ་ལུས་པར་རྫོགས་པས་ན་སྙན་གྲགས་ཆེན་པོ་ཞེས་བྱའོ། །སྣང་བ་ཆེན་པོ་ནི་ལོངས་སྐུའོ། །གསལ་བ་ཆེན་པོ་ནི་ཆོས་སྐུའོ། །མཁས་པ་སྒྱུ་འཕྲུལ་

ཆེན་པོ་འཆང་། །ཞེས་པ་ནི་མཁས་པ་ནི་འགྲོ་བའི་དོན་ལ་མཁས་པ་སྟེ་སྤྲུལ་སྐུའོ། །སྒྱུ་འཕྲུལ་ཆེན་པོ་ཞེས་པ་ནི་ཐབས་སྣ་ཚོགས་པའོ། །འཆང་ཞེས་བྱ་བ་ནི་ལྔ་པའོ། །སྒྱུ་འཕྲུལ་ཆེན་པོའི་དོན་གྲུབ་པ་ནི་བསྐྱེད་པའི་རིམ་པའི་ལྷའི་སྒོ་ནས་དོན་གྲུབ་པའོ། །
སྒྱུ་འཕྲུལ་ཆེན་པོ་དགའ་བས་དགའ། །ཞེས་པ་ནི་རྫོགས་པའི་སྒོ་ནས་སོ། །སྒྱུ་འཕྲུལ་ཆེན་པོ་མིག་འཕྲུལ་ཅན། །ཞེས་པ་ནི་བསྐྱེད་རྫོགས་ཐུན་མོང་གི་སྒོ་ནས་འགྲོ་བའི་དོན་བྱེད་པའོ། །ད་ནི་ཕ་རོལ་ཏུ་ཕྱིན་པ་བཅུའི་སྒོ་ནས་བསྟོད་པ་བསྟན་ཏེ། སྦྱིན་པ་ལ་བཞི་སྟེ། ཟང་ཟིང་མི་
འཇིགས་ཆོས་དང་བྱམས། །དེ་དག་འཁོར་གསུམ་མི་དམིགས་པ། །འཇིག་རྟེན་འདས་པའི་སྦྱིན་པའོ། །དེའི་བདག་པོ་ནི་འཇམ་དཔལ་ཡེ་ཤེས་སེམས་དཔའ་སྟེ་གཙོ་བོ་ཞེས་བྱའོ། །ཚུལ་ཁྲིམས་ནི་གསུམ་སྟེ་སྡོམ་པའི་ཚུལ་ཁྲིམས་དང་། སེམས་ཅན་གྱི་དོན་བྱེད་པའི་ཚུལ་ཁྲིམས་
དང་། དགེ་བ་ཆོས་སྡུད་པའི་ཚུལ་ཁྲིམས་དང་གསུམ་མོ། །ཆེན་པོ་ཞེས་བྱ་བ་ནི་འཁོར་གསུམ་མི་དམིགས་ཏེ་འཇིག་རྟེན་ལས་འདས་པའོ། །འཆང་བའི་མཆོག་ནི་ཡེ་ཤེས་སེམས་དཔའོ། །བཟོད་པ་ནི་གསུམ་སྟེ་གནོད་པ་བྱེད་པ་ལ་ཇི་མི་སྙམ་པའི་བཟོད་པ་དང་། སྡུག་བསྔལ་དང་དུ་
ལེན་པའི་བཟོད་པ་དང་། ཆོས་ལ་ངེས་པར་སེམས་དཔའི་བཟོད་པའོ། །ཆེན་ཞེས་པ་ནི་འཁོར་གསུམ་མི་དམིགས་པ་སྟེ་འཇིག་རྟེན་ལས་འདས་པའོ། །འཆང་བ་ནི་ཡེ་ཤེས་སེམས་དཔའོ། །བརྟན་པ་པོ་ཞེས་བྱ་བ་ནི་མི་འགྱུར་བའོ། །བརྩོན་འགྲུས་ལ་གསུམ་སྟེ། གོ་ཆའི་བརྩོན་
འགྲུས་དང་། སྦྱོར་བའི་བརྩོན་འགྲུས་དང་། ཆོག་པར་མི་འཛིན་པའི་བརྩོན་འགྲུས་སོ། །བརྟུལ་བ་ཡིན་ཞེས་པ་ནི་བརྩོན་འགྲུས་ཀྱི་སྟོབས་ཀྱིས་འཁོར་བ་ལས་བརྟུལ་བའོ། །བསམ་གཏན་ལ་གཉིས་ཏེ་ཞི་གནས་དང་ལྷག་མཐོང་ངོ་། །ཞི་གནས་ནི་དམིགས་པ་རྩེ་གཅིག་
པའོ། །ལྷག་མཐོང་ནི་གང་ཟག་དང་ཆོས་ཀྱི་བདག་གིས་སྟོང་པའོ། །ཆེན་པོ་ཞེས་པ་ནི་འཁོར་གསུམ་མི་དམིགས་པ་སྟེ་འཇིག་རྟེན་ལས་འདས་པའོ། །ཏིང་ངེ་འཛིན་གནས་ཞེས་པ་ནི་ཡེ་ཤེས་སེམས་དཔའ་ལྡན་པའོ། །ཤེས་རབ་ལ་གཉིས་ཏེ་རྒྱུའི་ཤེས་རབ་དང་འབྲས་བུའི་

ཤེས་རབ་བོ། །རྒྱུའི་ཤེས་རབ་ནི་ཐོས་བསམ་སྒོམ་གསུམ་མོ། །འབྲས་བུའི་ཤེས་རབ་ནི་དོན་ཕྱིན་ཅི་མ་ལོག་པའོ། །ཆེན་པོ་ནི་འཁོར་གསུམ་མི་དམིགས་པ་སྟེ་འཇིག་རྟེན་ལས་འདས་པའོ། །ལུས་འཆང་བ་ཞེས་པ་ནི་ཡེ་ཤེས་སེམས་དཔའ་ལའོ། །སྟོབས་ཞེས་པ་ནི་
གཞན་གྱིས་མི་ཐུབ་པའི་སྟོབས་ཏེ་བཅུའོ། །ཆེ་ཞེས་པ་ནི་འཁོར་གསུམ་མི་དམིགས་པ་སྟེ་འཇིག་རྟེན་ལས་འདས་པའོ། །ཐབས་ཤེས་རབ་ནི་ཐེག་པའི་སྒོ་བསམ་གྱིས་མི་ཁྱབ་པ་དང་ལྡན་པའོ། །ཆེ་ཞེས་པ་ནི་འཁོར་གསུམ་མི་དམིགས་པའོ། །སྨོན་ལམ་ཞེས་པ་ནི་
འགྲོ་བའི་དོན་འབྱུང་བའོ། །ཡེ་ཤེས་ཞེས་པ་ནི་ཇི་ལྟ་བ་མཁྱེན་པ་དང་ཇི་སྙེད་པ་མཁྱེན་པའི་ཡེ་ཤེས་མངའ་བ་སྟེ། རྒྱ་མཚོ་ཞེས་པ་མི་ཟད་པའི་ཡེ་ཤེས་དང་ལྡན་པའོ། ད་ནི་བྱམས་པ་དང་སྙིང་རྗེ་དང་ཕྲིན་ལས་དང་རྫུ་འཕྲུལ་གྱི་སྒོ་ནས་བསྟོད་པའོ། །བྱམས་ཆེན་ཞེས་པ་ནི་ཕྱོགས་རིས་མེད་
པ་སྟེ་དཔག་ཏུ་མེད་པའི་བྱམས་པའོ། །སྙིང་རྗེ་ཆེན་པོ་བློའི་མཆོག་དང་ལྡན་པ་ནི་ཡེ་ཤེས་སེམས་དཔའོ། །ཤེས་རབ་ཆེན་པོ་བློ་ཆེན་ལྡན་པ་ཡང་དེ་ཉིད་དོ། །མཁས་པ་ཆེན་པོ་ཞེས་བྱ་བ་ནི་འགྲོ་བའི་དོན་ལ་མཁས་པའོ། །ཐབས་ཆེ་བ་ཞེས་བྱ་བ་ནི་ཐེག་པ་སྣ་ཚོགས་ཀྱི་སྒོ་ནས་
སོ། །རྫུ་འཕྲུལ་ཆེན་པོའི་སྟོབས་དང་ལྡན། །ཞེས་བྱ་བ་ནི་རྫུ་འཕྲུལ་བསམ་གྱིས་མི་ཁྱབ་པ་དང་ལྡན་པ་སྟེ་རྩིག་པ་དང་ར་བ་ལས་ཐལ་བ་དང་། ཐོགས་པ་མེད་པའི་ལུས་ཀྱིས་ཀུན་དུ་འགྲོ་བ་དང་། དུ་བ་འཐུལ་ཞིང་མེ་འབར་བ་ལ་སོགས་པ་དང་ལྡན་པའོ། །ཤུགས་ཆེན་ནི་གཞན་གྱི་
སྟོབས་འཇོམས་པའོ། །མགྱོགས་པ་ཆེན་པོ་ནི་འགྲོ་བའི་དོན་ལ་མྱུར་བའོ། །རྫུ་འཕྲུལ་ཆེན་པོ་ནི་ཡེ་ཤེས་སེམས་དཔའོ། །ཆེར་གྲགས་པ་ནི་འགྲན་ཟླ་མེད་པའོ། །སྟོབས་ཆེན་ཕ་རོལ་གནོན་པ་ནི་གདུལ་བྱ་གདུལ་བའོ། །སྲིད་པའི་རི་བོ་ནི་སྲིད་པ་གསུམ་མོ། །ཆེན་པོ་འཇོམས་
ཞེས་པ་ནི་མ་རིག་པའོ། །མཁྲེགས་པ་ནི་རིག་པ་དང་སྟོང་པ་དབྱེར་མི་ཕྱེད་པའོ། །རྡོ་རྗེ་ཆེན་པོ་འཆང་བ་ནི་དབྱེར་མི་ཕྱེད་པའི་དོན་ཐུགས་སུ་ཆུད་པའོ། །དྲག་པོ་ཆེན་པོ་ནི་ཡེ་ཤེས་སེམས་དཔའོ། །དྲག་ཤུལ་ཆེ་ཞེས་པ་ནི་དྲག་པོའི་ལས་ཀྱིས་འདུལ་བའོ། །འཇིགས་ཆེན་ཞེས་པ་ནི་

བདག་ཏུ་འཛིན་པའོ། །འཇིགས་པར་བྱེད་ཅེས་བྱ་བ་ནི་མཐའ་དང་བྲལ་བའི་ཡེ་ཤེས་སྟོན་པའོ། །མགོན་པོ་ནི་མགོན་བྱེད་པའོ། །རིགས་ཞེས་པ་ནི་ལྔའོ། །མཆོག་ཅེས་པ་ནི་ཡེ་ཤེས་སེམས་དཔའོ། །བླ་ནི་སངས་རྒྱས་ཀྱི་དགོངས་པའོ། །མ་ནི་དེ་འབྱིན་པའོ། །སངས་
རྒྱས་ཀྱི་དགོངས་པ་གང་ཞེ་ན། གསང་སྔགས་ཆེན་པོའི་མཆོག་སྟེ་མཐའ་དང་བྲལ་བའོ། །ཐེག་པ་ཆེན་པོའི་ཚུལ་ལ་གནས། །ཞེས་པ་ནི་བྱང་ཆུབ་སེམས་དཔའི་ལམ་འབྲས་བུ་དང་བཅས་པའོ། །དེ་ལྟ་བུའི་ལམ་འགྲོ་བ་ལ་སྟོན་པས་ན་ཐེག་པ་ཆེན་པོའི་ཚུལ་གྱི་མཆོག་གོ། །སངས་རྒྱས་རྣམ་པར་སྣང་
མཛད་ཆེ། །ཞེས་པ་ནི་རིགས་ལྔའི་དཀྱིལ་འཁོར་མཚོན་པའོ། །སངས་རྒྱས་ནི་སྤང་བ་ཕུན་སུམ་ཚོགས་པ་དང་། ཡེ་ཤེས་ཕུན་སུམ་ཚོགས་པ་སྟེ་ཆོས་སྐུའོ། །རྣམ་པར་སྣང་མཛད་ཅེས་པ་ནི་མཚན་དང་དཔེ་བྱད་ཀྱིས་བརྒྱན་པ་སྟེ་ལོངས་སྐུའོ། །མཛད་ཆེ་ཞེས་པ་ནི་མཛད་པ་བཅུ་གཉིས་ཀྱིས་
འགྲོ་བའི་དོན་བྱེད་པ་སྟེ་སྤྲུལ་སྐུའོ། །ཐུབ་པ་ཆེན་ཕོ་ཞེས་བྱ་བ་ནི་ཤཱཀྱ་ཐུབ་པའོ། །ཐུབ་ཆེན་ལྡན་ཞེས་པ་ནི་ཤཱཀྱ་ཐུབ་པའི་ཡོན་ཏན་དང་ཡང་ཡེ་ཤེས་སེམས་དཔའ་ལ་ལྡན་ཞེས་པའི་དོན་ཏོ། །གསང་སྔགས་ཚུལ་ཆེན་ཞེས་པ་ནི་བསྐྱེད་པའི་རིམ་པ་དང་རྫོགས་པའི་རིམ་པའོ། །དེ་ལ་བསྐྱེད་
པའི་རིམ་པ་ནི་ཕྱི་བསྐྱེད་པའི་རིམ་པ་དང་། ནང་བསྐྱེད་པའི་རིམ་པ་དང་། ཟབ་མོ་བསྐྱེད་པའི་རིམ་པའོ། །ཕྱི་བསྐྱེད་པའི་རིམ་པ་ནི་ལྷ་མང་ངམ་ཉུང་ཡང་རུང་སྟེ་ལྷ་རྐྱང་པ་བསྒོམ་པའོ། །ནང་བསྐྱེད་པའི་རིམ་པ་ནི་ལྷ་ཁ་སྦྱོར་བསྒོམ་པའོ། །ཟབ་མོ་བསྐྱེད་པའི་རིམ་པ་ནི་རྩ་རླུང་
བསྒོམ་པའོ། །དེ་དག་ཐམས་ཅད་ལ་རང་བཞིན་མེད་པར་ཤེས་པ་ནི་རྫོགས་པའི་རིམ་པའོ། །ལས་བྱུང་ཞེས་པ་སྐུ་གསུམ་མོ། །གསང་སྔགས་ཚུལ་ཆེན་བདག་ཉིད་ཅན། །ཞེས་པ་ནི་བསྐྱེད་རྫོགས་ཐུན་མོང་གི་བདག་ཉིད་ཡེ་ཤེས་སེམས་དཔའ་ཁྱོད་ལ་ལྡན་ནོ་ཞེས་བྱ་བའི་
ཐ་ཚིག་གོ། །ད་ནི་ཕ་རོལ་ཏུ་ཕྱིན་པ་དང་། ས་བཅུ་དང་། ཡོན་ཏན་བསམ་གྱིས་མི་ཁྱབ་པའི་སྒོ་ནས་བསྟོད་པ་བསྟན་ཏེ་ཕ་རོལ་ཕྱིན་བཅུ་ནི་བཤད་ཟིན་ཏོ། །ཐོབ་པ་ཡེ་ཤེས་སེམས་དཔའ་ཁྱོད་ཀྱིས་ཐོབ་ཅེས་པའི་དོན་ཏོ། །ཕ་རོལ་ཕྱིན་པ་བཅུ་ལ་གནས། །ཞེས་པ་ནི་གནས་

ནས་འགྲོ་བའི་དོན་བྱེད་དོ་ཞེས་བྱ་བའི་ཐ་ཚིག་གོ། །དག་པ་སྟེ་ཞེས་བྱ་བ་ནི་ཕ་རོལ་ཕྱིན་པ་ཐམས་ཅད་དབྱེར་མེད་དུ་རྟོགས་པའོ་ཞེས་བྱའོ། །ཚུལ་ཞེས་པ་ནི་ཕ་རོལ་ཏུ་ཕྱིན་པ་བཅུ་འགྲོ་བ་ལ་སྟོན་པའོ། །མགོན་པོ་ནི་ཡེ་ཤེས་སེམས་དཔའོ། །ས་བཅུའི་དབང་ཕྱུག་ཅེས་པ་ནི་ས་
བཅུ་ལ་དབང་ཐོབ་པ་ཞེས་བྱའོ། །གནས་པ་པོ་ཞེས་བྱ་བ་ནི་ས་བཅུ་པ་ལ་གནས་ནས་འགྲོ་བའི་དོན་བྱེད་པའོ། །ཤེས་བཅུ་ཞེས་པ་ནི་ཆོས་ཤེས་པ་དང་། རྗེས་སུ་རྟོགས་པ་ཤེས་པ་དང་། ཕ་རོལ་གྱི་སེམས་ཤེས་པ་དང་། ཀུན་རྫོབ་ཤེས་པ་དང་། སྡུག་བསྔལ་ཤེས་པ་
དང་། ཀུན་འབྱུང་ཤེས་པ་དང་། འགོག་པ་ཤེས་པ་དང་། ལམ་ཤེས་པ་དང་། ཟད་པ་ཤེས་པ་དང་། མི་སྐྱེ་བ་ཤེས་པའོ། །རྣམ་དག་ཅེས་པ་ནི། ཉན་ཐོས་ཀྱི་ཤེས་པ་བཅུ་རང་བཞིན་མེད་པར་ཤེས་པའོ། །བདག་ཉིད་ཅན་ཞེས་པ་ནི་ཡེ་ཤེས་སེམས་དཔའོ། །རྣམ་པ་བཅུ་པོ་
ཞེས་པ་ནི་གཅིག་པུར་འཛིན་པ་དང་། རྒྱུར་འཛིན་པ་དང་། ཟ་བར་འཛིན་པ་དང་། བྱེད་པ་པོར་འཛིན་པ་དང་། རང་དབང་ཅན་དུ་འཛིན་པ་དང་། རྟག་པར་འཛིན་པ་དང་། ཀུན་ནས་ཉོན་མོངས་པར་འཛིན་པ་དང་། རྣམ་པར་བྱང་བར་འཛིན་པ་དང་། རྣལ་འབྱོར་ཅན་དུ་འཛིན་པ་དང་།
མ་གྲོལ་བ་གྲོལ་བར་འཛིན་པའོ། །དོན་བཅུའི་དོན་ནི་མུ་སྟེགས་ཀྱི་དོན་བཅུ་པོ་དེ་ཡང་ཡེ་ཤེས་སེམས་དཔས་ཁོང་དུ་ཆུད་ཅེས་བྱ་བའི་དོན་ཏོ། །ཐུབ་དབང་ནི་ཐུབ་པའི་དབང་པོ་སྟེ་བདུད་བཞི་ཐུབ་པའོ། །སྟོབས་བཅུ་ནི་གནས་དང་གནས་མ་ཡིན་པ་མཁྱེན་པའི་སྟོབས་དང་། མོས་
པ་སྣ་ཚོགས་པ་མཁྱེན་པའི་སྟོབས་དང་། བསམ་གཏན་དང་ཏིང་ངེ་འཛིན་མཁྱེན་པའི་སྟོབས་དང་། རྣམ་པར་ཐར་པ་དང་སྙོམས་པར་འཇུག་པ་མཁྱེན་པའི་སྟོབས་དང་། ཀུན་ནས་ཉོན་མོངས་པ་དང་རྣམ་པར་བྱང་བ་མཁྱེན་པའི་སྟོབས་དང་། ལས་དང་ལས་ཀྱི་རྣམ་པར་སྨིན་པ་མཁྱེན་
པའི་སྟོབས་དང་། ཐམས་ཅད་དུ་འགྲོ་བའི་ལམ་མཁྱེན་པའི་སྟོབས་དང་། སྔོན་གྱི་གནས་དྲན་པའི་སྟོབས་དང་། འཆི་འཕོ་དང་སྐྱེ་བ་ཤེས་པའི་སྟོབས་དང་། ཟག་པ་ཟད་པ་མཁྱེན་པའི་སྟོབས་སོ། །དེ་ལྟར་སྟོབས་བཅུས་འགྲོ་བའི་དོན་བྱེད་པས་ན་ཁྱབ་པའི་བདག །ཀུན་གྱི་དོན་ནི་

མ་ལུས་བྱེད། །ཅེས་བྱའོ། །འོ་ན་འགྲོ་བའི་དོན་བྱེད་པ་ལ་སྐྱོན་གྱིས་མ་གོས་སམ་ཞེ་ན། རྣམ་བཅུ་དབང་ལྡན་ཆེ་བ་པོ། །ཞེས་སྨོས་ཏེ་དབང་བཅུ་ནི་ཚེ་ལ་དབང་བ་དང་། ལས་ལ་དབང་བ་དང་། ཡོ་བྱད་ལ་དབང་བ་དང་། མོས་པ་ལ་དབང་བ་དང་། སྨོན་ལམ་ལ་དབང་
བ་དང་། རྫུ་འཕྲུལ་ལ་དབང་བ་དང་། སྐྱེ་བ་ལ་དབང་བ་དང་། ཆོས་ལ་དབང་བ་དང་། སེམས་ལ་དབང་བ་དང་། ཡེ་ཤེས་ལ་དབང་བ་དང་། དབང་བཅུ་དང་ལྡན་པས་སྐྱོན་གྱིས་མ་གོས་པའོ། །ད་ནི་སྐུ་གསུམ་གྱི་སྒོ་ནས་བསྟོད་པར་བྱ་སྟེ། དང་པོ་ཆོས་ཀྱི་སྐུའི་སྒོ་ནས་བསྟོད་པར་བྱ་སྟེ།
ཐོག་མ་མེད་ཅེས་པ་ནི་རྒྱུས་སྟོང་པའོ། །སྤྲོས་མེད་བདག་ཅེས་པ་ནི་སྐྱོན་དང་བྲལ་བའོ། །དེ་བཞིན་ཉིད་བདག་དག་པའི་བདག །ཅེས་པ་ནི་རང་གི་ངོ་བོས་སྟོང་པའོ། །བདེན་པར་སྨྲ་ཞིང་ཞེས་པ་ནི་ལོངས་སྐུ་སྟེ་བདེན་པར་སྨྲས་པ་ནི་ཐེག་པ་ཆེན་པོའོ། །ཚིག་མི་འགྱུར་ཞེས་པ་ནི་བདེན་
པ་ཡང་དག་པ་ཞེས་བྱ་བའི་དོན་ཏོ། །ཇི་སྐད་སྨྲས་པ་དེ་བཞིན་བྱེད། །ཅེས་པ་ནི་འཁོར་ཕུན་སུམ་ཚོགས་པ་སྟེ་ས་བཅུའི་བྱང་ཆུབ་སེམས་དཔའ་དག་གོ། །གཉིས་མེད་ཅེས་པ་ནི་དོན་དམ་པའི་བདེན་པ་དང་ཀུན་རྫོབ་ཀྱི་བདེན་པ་དབྱེར་མི་ཕྱེད་པའོ། །དེ་ཐུགས་སུ་ཆུད་ནས་འགྲོ་བ་ལ་ཡང་
གཉིས་སུ་མེད་པར་སྟོན་པའོ། །ཡང་དག་མཐའ་ལ་རྣམ་པར་གནས། །ཞེས་པ་ནི་རྒྱུད་འདིའི་ལྟ་བ་སྟོན་པའི་ཚིག་ཡིན་ཏེ། ཡང་དག་པའི་མཐའ་ནི་དོན་ཕྱིན་ཅི་མ་ལོག་པའོ། །དེའི་རིག་པ་ཡུལ་ན་མི་གནས་པ་དང་། རྒྱུད་དང་བསྟན་བཅོས་ཀུན་གྱི་ཡུལ་དུ་མི་གནས་པ་དང་བློ་ལས་འདས་
པའོ། །བདག་མེད་སེང་གེའི་སྒྲ་དང་ལྡན། །ཞེས་པ་ནི་སྤྲུལ་པའི་སྐུ་སྟེ། གང་ཟག་གི་བདག་དང་ཆོས་ཀྱི་བདག་མེད་པའི་སྒྲ་སྟེ་སེང་གེ་དང་འདྲ་སྟེ། དཔེར་ན་གཅན་ཟན་གྱི་རྒྱལ་པོ་སེང་གེ་དེས་སྒྲ་བསྒྲགས་པ་ཙམ་གྱིས་རི་དགས་མ་ལུས་པ་ཐམས་ཅད་ཟིལ་གྱིས་གནོན་ཅིང་འཇིགས་
པར་བྱེད་དོ། །དེ་བཞིན་དུ་ཡེ་ཤེས་སེམས་དཔའི་བདག་མེད་པའི་སྒྲ་དེས་རི་དགས་ངན་པ་དང་འདྲ་བའི་མུ་སྟེགས་འཇིགས་པར་བྱེད་དོ། །ཀུན་དུ་འགྲོ་ཞེས་པ་ནི་ཕྱོགས་དང་དུས་ཐམས་ཅད་དུ་གཤེགས་པའོ། །དོན་ཡོད་ཅེས་པ་ནི་འགྲོ་བའི་དོན་ལ་གཤེགས་པའོ། །སྟོབས་ཞེས་པ་ནི་སྟོབས་

བཅུས་དོན་བྱེད་པའོ། །དེ་བཞིན་གཤེགས་པའི་ཡིད་ལྟར་མགྱོགས། །ཞེས་པ་ནི་འགྲོ་བའི་དོན་ལ་མྱུར་བའོ། །རྒྱལ་བ་ཞེས་པ་ནི་ཉན་ཐོས་སོ། །རྣམ་རྒྱལ་ཞེས་པ་ནི་བྱང་ཆུབ་སེམས་དཔའོ། །དགྲ་ལས་རྒྱལ་ཞེས་པ་ནི་སྒྲིབ་པ་མཐའ་དག་ཟད་པ་སྟེ་སངས་རྒྱས་སོ། །དེ་ལྟར་སྤྲུལ་པའི་སྐུ་
དེས་འགྲོ་བའི་དོན་བྱེད་པའི་ཚུལ་ནི་འཁོར་ལོས་སྒྱུར་བའི་རྒྱལ་པོ་ལྟ་བུའི་སྒོ་ནས་ཀྱང་དོན་བྱེད་ལ། སྟོབས་ཆེ་ཞེས་བྱ་བ་ནི་ཚུལ་སྣ་ཚོགས་ཀྱི་སྒོ་ནས་འགྲོ་བའི་དོན་བྱེད་པའི་ཐ་ཚིག་གོ། །ཚོགས་ཞེས་པ་ནི་ཉན་ཐོས་སོ། །སློབ་དཔོན་ཞེས་པ་ནི་སྤྲུལ་པའི་སྐུ་སྟེ་ཤཱཀྱ་ཐུབ་པའོ། །ཚོགས་ཞེས་
པ་ནི་རང་རྒྱལ་བའོ། །མཆོག་ཅེས་པ་ནི་རང་རྒྱལ་བའི་སློབ་དཔོན་རིགས་གསུམ་མགོན་པོ་ལྟ་བུའོ། །ཚོགས་ཞེས་པ་ནི་བྱང་ཆུབ་སེམས་དཔའི་དགེ་འདུན་ནོ། །རྗེ་ཞེས་པ་ནི་ལོངས་སྐུ་སྟེ་རྣམ་པར་སྣང་མཛད་ལྟ་བུའོ། །ཚོགས་ཞེས་པ་དང་། །བདག་ཅེས་པ་ནི་མཐའ་དང་བྲལ་བའི་
ཡེ་ཤེས་ཏེ་ཆོས་ཀྱི་སྐུའོ། །དབང་དང་ལྡན་ཞེས་པ་ནི་དེ་དག་ཐམས་ཅད་ཡེ་ཤེས་སེམས་དཔའ་ལ་ལྡན་ནོ་ཞེས་པའི་དོན་ནོ། །མཐུ་ཆེན་ཞེས་པ་ནི་ཡེ་ཤེས་སེམས་དཔའོ། །གཅེས་པར་ཞེས་པ་ནི་གདུལ་བྱའོ། །འཛིན་པ་ཞེས་པ་ནི་ཐུགས་རྗེས་མི་གཏོང་བའོ། །ཚུལ་ཆེན་
ཞེས་པ་ནི་ཐེག་པ་ཆེན་པོའོ། །གཞན་གྱི་དྲིང་མི་འཇོག་ཅེས་པ་ནི་འདུ་བྱེད་གཞན་ལ་རེ་ལྟོས་མི་བྱེད་པའོ། །ཚིག་ཅེས་པ་ནི་དྲང་བའི་དོན་གྱི་ཚིག་གོ། །རྗེ་ཞེས་པ་ནི་སྤྲུལ་པའི་སྐུའོ། །ཚིག་ཅེས་པ་ནི་ཐེག་པ་ཆེན་པོའི་ཚིག་གོ། །བདག་ཅེས་པ་ནི་ལོངས་སྤྱོད་རྫོགས་པའི་སྐུའོ། །
སྨྲ་མཁས་པ་ཞེས་པ་ཚིག་ལ་མངའ་བརྙེས་པ་ཞེས་བྱ་བའི་དོན་ཏོ། །ཚིག་ལ་དབང་བ་ཚིག་མཐའ་ཡས། །ཞེས་པ་ནི་རང་གི་དོན་ཁོང་དུ་ཆུད་ནས་གཞན་ལ་ཚིག་བདེན་པར་སྨྲ་བའོ། །བདེན་པ་བཞི་ནི་ཞེས་པ་ནི་ཉན་ཐོས་ཀྱི་ལམ་བཤད་པར་བྱ་སྟེ། བདེན་པ་བཞི་ནི་སྡུག་བསྔལ་གྱི་
བདེན་པ་དང་། ཀུན་འབྱུང་གི་བདེན་པ་དང་། འགོག་པའི་བདེན་པ་དང་། ལམ་གྱི་བདེན་པའོ། །སྟོན་པ་པོ་ཞེས་པ་ནི་ཡེ་ཤེས་སེམས་དཔའོ། །ཕྱིར་མི་ལྡོག་པ་ཕྱིར་མི་འོང་། །ཞེས་པ་ནི་སྐྱེས་བུ་ཟུང་བཞི་དང་། གང་ཟག་ཡ་བརྒྱད་དེ་ཉན་ཐོས་ཀྱི་འབྲས་བུའོ། །འདྲེན་པ་ཞེས་པ་ནི་

འགྲོ་བ་ཐམས་ཅད་འདྲེན་པ་སྟེ་ཡེ་ཤེས་སེམས་དཔའོ། །རང་རྒྱལ་ཞེས་པ་ནི་རྟེན་འབྲེལ་བཅུ་གཉིས་ལུགས་ལས་བཟློག་པའི་ཚུལ་གྱིས་བསྒོམ་པའི་གང་ཟག་སྟེ་ཤེས་རབ་ཆེ་བ་དང་། སློབ་དཔོན་འདི་བདག་འཆད་པ་དང་འགྲོ་བའི་དོན་ལ་མི་དགའ་བའི་གང་ཟག་གོ། །
ལྷག་པར་ཡང་ང་རྒྱལ་དང་ལྡན་པའི་རིགས་ཏེ་རང་གི་ཤེས་རབ་ཀྱིས་དཔྱད་ནས་ཞི་གནས་དང་ལྷག་མཐོང་བསྒོམ་པའོ། །བསེ་རུའི་ཚུལ་ཞེས་པ་ནི་འབྲས་བུ་སྟེ་བསེ་རུ་ལྟར་རྭ་གཅིག་པའོ། །ངེས་འབྱུང་སྣ་ཚོགས་ནི་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ནོ། །ལས་འབྱུང་བ་ནི་བྱིའུ་ལྟར་
ཁྱུར་ལྡིང་བའོ། །འབྱུང་བ་ཆེན་པོ་ཞེས་བྱ་བ་ནི་འགྲོ་བའི་དོན་ལ་ནམ་ཡང་མ་བྱུང་མ་མོས་པས་ན་འབྱུང་བ་ཆེན་པོའོ། །རྒྱུ་གཅིག་པོ་ཞེས་བྱ་བ་ནི་སྙིང་པོ་བྱང་ཆུབ་ཀྱི་སེམས་སོ། །དགེ་སློང་དགྲ་བཅོམ་ཟག་པ་ཟད། །ཅེས་པ་ནི་འོད་སྲུངས་ལ་སོགས་པ་དགྲ་བཅོམ་པ་བསམ་གྱིས་མི་ཁྱབ་པར་
སྤྲུལ་ནས་འགྲོ་བའི་དོན་བྱེད་པ་ཞེས་བྱའོ། །འདོད་ཆགས་བྲལ་བ་ནི་ནང་འཛིན་པ་ཞི་བའོ། །དབང་པོ་ཐུལ་བ་ནི་ཕྱི་རོལ་དུལ་བའོ། །བདེ་བ་རྙེད་པ་ནི་མྱ་ངན་ལས་འདས་པའོ། །འཇིགས་མེད་ཐོབ་པ་ནི་བདུད་བཞི་གཞོམ་པའོ། །བསིལ་བར་གྱུར་པ་ནི་མངོན་ཞེན་གྱི་གདུང་བ་དང་བྲལ་བའོ། །
རྙོག་པ་མེད་པ་ནི་སྒྲིབ་པ་དང་བྲལ་བའོ། །རིག་པ་དང་ནི་ཞེས་པ་ནི་ལྷག་པའི་ཏིང་ངེ་འཛིན་གྱི་བསླབ་པའོ། །རྐང་པ་ཞེས་པ་ནི་གཉིས་མཚོན་པའི་ཚིག་སྟེ། ཚུལ་ཁྲིམས་དང་ཤེས་རབ་ཀྱི་བསླབ་པའོ། །བདེ་གཤེགས་ནི་ཡེ་ཤེས་སེམས་དཔའོ། །འཇིག་རྟེན་རིག་པའི་མཆོག་ནི་གདུལ་བྱའི་
རྒྱུད་མཁྱེན་པའོ། །བདག་གིར་མི་འཛིན་ངར་མི་འཛིན། །ཞེས་པ་ནི་རང་རྒྱུད་དུ་འཛིན་པ་དང་རྟོག་པ་དང་བྲལ་བའོ། །བདེན་པ་གཉིས་ནི་དོན་དམ་དང་ཀུན་རྫོབ་བོ། །ཚུལ་ལ་གནས་པ་ནི་དབྱེར་མེད་དུ་རྟོགས་པའོ། །འཁོར་བའི་ཕ་རོལ་ནི་མཐོང་བའི་ལམ་མོ། །མཐར་སོན་པ་ནི་ས་
བཅུ་གཅིག་པའོ། །བྱ་བ་བྱས་པ་ནི་ཚོགས་གཉིས་རྫོགས་པའོ། །སྐམ་སར་གནས་པ་ནི་མྱ་ངན་ལས་འདས་པ་ཐོབ་པའོ། །ཡེ་ཤེས་འབའ་ཞིག་ལས་བྱུང་བ། །ཞེས་པ་ནི་ཇི་ལྟ་བ་མཁྱེན་པ་དང་ཇི་སྙེད་པ་མཁྱེན་པའི་སྒོ་ནས་འགྲོ་དོན་བྱེད་པའོ། །ཤེས་རབ་མཚོན་ཆེན་ནི་སྟོང་པ་ཉིད་དོ། །རྣམ་

འཇོམས་པ་ནི་དངོས་པོའི་ཆོས་ཐམས་ཅད་དོ། །དམ་ཆོས་ཆོས་རྒྱལ་ནི་མ་ནོར་བ་སྟེ་ལྟ་བའོ། །གསལ་བར་ལྡན་པ་ནི་འཛིན་པ་མེད་པའི་ཤེས་པ་བསྒོམ་པའོ། །འཇིག་རྟེན་སྣང་བར་བྱེད་པའི་མཆོག་ནི་སྣ་ཚོགས་སུ་སྣང་ཡང་ཞེན་པ་མེད་པ་སྟེ་སྤྱོད་པའོ། །ཆོས་ནི་འཁོར་འདས་སོ། །དབང་
ཕྱུག་ནི་དེ་ལ་མངའ་བརྙེས་པའོ། །ཆོས་ཀྱི་རྒྱལ་ཞེས་པ་ནི་ཡེ་ཤེས་སེམས་དཔའོ། །ངེས་པའི་ལམ་ནི་བདེན་པ་གཉིས་མེད་དོ། །སྟོན་པ་ནི་འགྲོ་བ་ལའོ། །པོ་ཞེས་པ་ནི་ཁྱོད་ཉིད་དོ། །དོན་གྲུབ་ཅེས་པ་ནི་རང་དོན་ནོ། །བསམ་པ་གྲུབ་ཅེས་པ་གཞན་དོན་ནོ། །ཀུན་དུ་རྟོག་པ་ཐམས་
ཅད་སྤངས། །ཞེས་པ་ནི་གཟུང་འཛིན་དང་བྲལ་བའོ། །རྣམ་པར་མི་རྟོག་དབྱིངས་མི་ཟད། །ཅེས་པ་ནི་འཕེལ་འགྲིབ་མེད་པའི་དོན་ནོ། །ཆོས་དབྱིངས་དམ་པ་ཟད་མི་ཤེས་པ་ནི་ཡོན་ཏན་ཟད་མི་ཤེས་པ་དང་ལྡན་པའོ། །ཀུན་གྱི་གཏི་མུག་གནས་སུ་གྱུར་པའོ། །བསོད་ནམས་ཀྱི་
ཚོགས་བསགས་པ་ལས་བྱུང་བའོ། །ཡེ་ཤེས་ཞེས་པ་ནི་ཡེ་ཤེས་ཀྱི་ཚོགས་སོ། །ཡེ་ཤེས་ཁྱད་པར་ཆེ་ཞེས་པ་ནི་གོང་ན་མེད་པའོ། །ཡེ་ཤེས་ལྡན་པ་ཞེས་པ་ནི་ཇི་ལྟ་བ་མཁྱེན་པ་དང་ཇི་སྙེད་པ་མཁྱེན་པའོ། །ཡོད་མེད་ཅེས་པ་ནི་མཐའ་ཐམས་ཅད་ལས་གྲོལ་བའོ། །
ཚོགས་གཉིས་ནི་བསོད་ནམས་དང་ཡེ་ཤེས་སོ། །བསགས་པ་པོ་ནི་ཡེ་ཤེས་སེམས་དཔའོ། །རྟག་པ་ནི་ཆོས་སྐུའོ། །ཀུན་རྒྱལ་ནི་འཁོར་བ་ལས་རྒྱལ་བའོ། །རྣལ་ཞེས་པ་ནི་ཆོས་ཉིད་དོ། །འབྱོར་ཞེས་པ་ནི་བློ་དང་འབྱོར་པའོ། །ཅན་ནི་ལྡན་པའི་ཚིག་གོ། །བསམ་གཏན་
ཞེས་པ་ནི་ཞི་གནས་དང་ལྷག་མཐོང་ངོ་། །དེ་ལྟ་བུ་བསམ་པར་བྱ་བས་ན་བསམ་བྱའོ། །བློ་ཞེས་པ་ནི་ཤེས་རབ་བོ། །ལྡན་ཞེས་པ་ནི་ཡེ་ཤེས་སེམས་དཔའོ། །མཆོག་ཅེས་པ་ནི་ས་དགུ་པ་མན་ཆད་ལ་འཕགས་པའོ། །སོ་སོ་ཞེས་པ་ནི་འཁོར་འདས་སོ། །རང་རིག་ཅེས་པ་ནི་སེམས་
ལའོ། །མི་གཡོ་བ་ཞེས་པ་ནི་འཁོར་འདས་ཐམས་ཅད་སེམས་ལས་མི་བསྐྱོད་པ་ཞེས་པའི་དོན་ཏོ། །མཆོག་གི་དང་པོ་ནི་རང་རིག་གོ། །སྐུ་གསུམ་འཆང་ནི་ཆོས་སྐུ་དང་ལོངས་སྐུ་དང་སྤྲུལ་སྐུའོ། །འཆང་བ་ནི་ཡེ་ཤེས་པ་ལ་མངའ་བའོ། །སངས་རྒྱས་སྐུ་ལྔའི་བདག་ཉིད་ཅན་ནི་

ཆོས་དང་། ལོངས་སྤྱོད་དང་། སྤྲུལ་སྐུ་དང་། ངོ་བོ་ཉིད་ཀྱི་སྐུ་དང་། བདེ་བ་ཆེན་པོའི་སྐུའོ། །འགྲོ་བའི་དོན་ལ་ཁྱབ་པས་ན་ཁྱབ་བདག་གོ། །ཡེ་ཤེས་ལྔ་ཡི་བདག་ནི་མེ་ལོང་ལྟ་བུ་ལ་སོགས་པའོ། །སངས་རྒྱས་ལྔ་བདག་ཅེས་པ་ནི་རྣམ་པར་སྣང་མཛད་དོ། །ཅོད་
པན་ཅན་ཞེས་པ་ནི་ཡེ་ཤེས་སེམས་དཔའི་དབུ་ལ་རྒྱན་དུ་བྱས་པའོ། །སྤྱན་ལྔ་ཞེས་པ་ནི་ཤའི་སྤྱན་དང་། ལྷའི་སྤྱན་དང་། ཆོས་ཀྱི་སྤྱན་དང་། སངས་རྒྱས་ཀྱི་སྤྱན་དང་། ཤེས་རབ་ཀྱི་སྤྱན་དང་ལྔའོ། །ཆགས་པ་མེད་པ་འཆང་ཞེས་པ་ནི་ཞེན་པ་མེད་པའོ། །སངས་རྒྱས་ཐམས་
ཅད་སྐྱེད་པ་པོ། །ཞེས་པ་ནི་དུས་གསུམ་གྱི་སངས་རྒྱས་ཐམས་ཅད་ཀྱི་ཡབ་དང་ཡུམ་དུ་གྱུར་པ་ཡང་ཡེ་ཤེས་སེམས་དཔའ་ཁྱོད་ཡིན་ཞེས་པའི་སྒོ་ནས་བསྟོད་པའོ། །སངས་རྒྱས་སྲས་པོ་དམ་པའི་མཆོག །ཅེས་པ་ནི་བདེ་གཤེགས་ཐམས་ཅད་ཀྱི་སྲས་ཀྱང་ཁྱོད་ཡིན་ཞེས་པའི་སྒོ་
ནས་བསྟོད་པའོ། །འདིར་རྒལ་བ་འོ་ན་ཡེ་ཤེས་སེམས་དཔའི་རང་བཞིན་ནི་རྒྱུ་རྐྱེན་ཐམས་ཅད་དང་བྲལ་བ་ཡིན་ལ། འདིར་ནི་སྲས་པོ་ཞེས་པས་སྐྱེ་གནས་ཀྱི་རྙོག་པ་ཡོད་དོ་ཞེ་ན། དེ་ནི་མ་ཡིན་ཏེ་ཡེ་ཤེས་སེམས་དཔའ་ཉིད་སྲིད་པ་གསུམ་གྱི་རང་བཞིན་དུ་བྱུང་བ་ལས་མ་གཏོགས་པ་སྐྱེ་
གནས་མེད་ཅེས་པ་སྟེ་སྐྱེ་གནས་ཀྱི་རྙོག་པ་མེད་དོ། །འོ་ན་སྲིད་གསུམ་སྐྱེ་བ་མེད་པ་ཡེ་ཤེས་སེམས་དཔའི་རང་བཞིན་ཡིན་ན་བློའི་ཡུལ་དུ་སོང་བ་སྟེ། དངོས་པོའི་རྙོག་པ་ཡོད་དོ་ཞེ་ན་དེ་ནི་མ་ཡིན་ཏེ། ཆོས་ནི་འཁོར་འདས་ཐམས་ཅད་དོ། །ལས་བྱུང་བ་ཞེས་པ་ནི་ཐམས་ཅད་རྟེན་
འབྲེལ་ལས་བྱུང་བའི་ཕྱིར་ངོ་བོ་སྐྱེ་བ་མེད་པས་ན། སྲིད་པ་སེལ་ཞེས་པ་ནི་དངོས་པོའི་རྙོག་པ་མེད་དོ། །ཡང་རྒལ་བ་དང་། འོ་ན་ཆོས་ཐམས་ཅད་སྐྱེ་མེད་ཡིན་ན། ཆོས་ཅན་རེ་རེ་ལ་སྐྱེ་མེད་རེ་ཡོད་པས་དུ་མའི་རྙོག་པ་ཡོད་དོ་ཞེ་ན་མ་ཡིན་ཏེ། ཆོས་ཅན་དུ་མ་ཐ་དད་ཀྱང་ངོ་བོ་སྐྱེ་མེད་དུ་
གཅིག་པས་ན། གཅིག་པུ་སྲ་མཁྲེགས་རྡོ་རྗེའི་བདག །ཅེས་པ་སྟེ་དུ་མའི་རྙོག་པ་མེད་དོ། །སྲ་མཁྲེགས་ཞེས་པ་ནི་དབྱེར་མི་ཕྱེད་པའོ། །རྡོ་རྗེ་ནི་སྟོང་པ་ཉིད་དོ། །བདག་ཅེས་པ་ནི། སྟོང་པ་ཉིད་ཀྱིས་ཀུན་ལ་ཁྱབ། །ཅེས་པའི་དོན་ཏོ། །འོ་ན་དུ་མ་དང་བྲལ་བའི་ལམ་དུ་བྱེད་པས་

ལམ་མམ་ཡིད་ལ་བྱེད་པའི་རྙོག་པ་ཡོད་དོ་ཞེ་ན་མ་ཡིན་ཏེ། སྐྱེས་མ་ཐག་པ་འགྲོ་བའི་བདག །ཅེས་པ་རྟོག་པའི་དུས་ཉན་རང་ནས་སངས་རྒྱས་ཀྱི་དགོངས་པ་སླེབ་པ་ཡིན་པས་ལམ་གྱི་རྙོག་པ་མེད་དོ། །འོ་ན་སྐྱེས་མ་ཐག་ཟེར་བས་ན་ཡེ་ཤེས་སེམས་དཔའ་དེ་རྒྱུ་རྐྱེན་ལས་གྲུབ་པས་འདུས་
བྱས་སམ་བཅོས་མར་སོང་ངོ་ཞེ་ན་མ་ཡིན་ཏེ། ནམ་མཁའ་ལས་བྱུང་རང་བྱུང་བ། །ཞེས་པ་སྟེ་རྒྱུ་རྐྱེན་ལས་མ་བསྐྱེད་པ་ཡིན་པས་ན་ནམ་མཁའ་དང་འདྲ་སྟེ། རང་བྱུང་བས་ན་བཅོས་མའི་རྙོག་པ་མེད་དོ། །འོ་ན་ནམ་མཁའ་དང་འདྲ་ན་ནམ་མཁའ་ལ་སེམས་མེད་པ་སྟེ། དྲན་མེད་ཀྱི་ཆ་ན་
འདུག་པས་ཆད་ལྟའི་རྙོག་པ་ཡོད་དོ་ཞེ་ན་མ་ཡིན་ཏེ། ཤེས་རབ་ཅེས་པ་སྟོང་པ་ཉིད་དོ། །ཡེ་ཤེས་ནི་རིག་པའོ། །རིག་པ་དང་སྟོང་པ་དབྱེར་མི་ཕྱེད་པས་ཆད་ལྟའི་རྙོག་པ་མེད་དོ། །མེ་བོ་ཆེ་ཞེས་པ་ནི་དབྱེར་མེད་དེས་ཐ་དད་ཀྱི་རྟོག་པ་བསྲེག་པས་སོ། །འོ་ན་མེ་བོ་ཆེ་ཞེས་པ་ནི་
མེས་བསྲེགས་ནས་དངོས་པོ་མེད་པར་བྱས་པས་ན། དངོས་མེད་ཀྱི་རྙོག་པ་ཡོད་དོ་ཞེ་ན་མ་ཡིན་ཏེ། འོད་ཆེན་རྣམ་པར་སྣང་བར་བྱེད། །ཅེས་པས་ན་དབྱེར་མེད་དེ་ཇི་ལྟར་ཡང་སྣང་བས་ན་དངོས་མེད་ཀྱི་རྙོག་པ་མེད་དོ། །འོ་ན་ཇི་ལྟར་ཡང་སྣང་བ་ན་སྣང་བྱ་སྣང་བྱེད་གཉིས་བྱུང་བས་
མ་རིག་པའི་རྙོག་པ་ཡོད་དོ་ཞེ་ན་མ་ཡིན་ཏེ། ཡེ་ཤེས་སྐར་མ་ལམ་མེ་བ། །ཞེས་པ་ནི་དཔེར་ན་སྐར་མ་སྤྲིན་གྱིས་མ་གཡོགས་པ་ནི་ལྷམ་མེ་ལྷན་ནེ་ལྷང་ངེར་གར་ཡང་གསལ་བ་བཞིན་ཡེ་ཤེས་དེས་ཀྱང་མི་མཁྱེན་པ་གང་ཡང་མེད་པས་ན་མ་རིག་པའི་རྙོག་པ་མེད་དོ། །འོ་ན་ལམ་
མེ་ཞེས་པས་ན་ཕྱོགས་ཀྱི་རྙོག་པ་ཡོད་དོ་ཞེ་ན་མ་ཡིན་ཏེ། འགྲོ་བ་རྣམས་ཀྱི་མར་མེ་དང་འདྲ་བའི་ཡེ་ཤེས་ཀྱི་སྒྲོན་མེ་དེ་ལ་ཕྱོགས་དང་རིས་མེད་པས་ན་ཕྱོགས་ཀྱི་རྙོག་པ་མེད་དོ། །དེ་ལྟ་བུའི་ཡེ་ཤེས་སེམས་དཔའ་དེ་ཁོ་ན། གཟི་བརྗིད་ཆེན་པོ་འོད་གསལ་བ། །ཞེས་བྱའོ། །སྔགས་
མཆོག་ཅེས་པ་ནི་ཨ་སྟེ་སྐྱེ་བ་མེད་པའོ། །མངའ་བདག་ཅེས་པ་ནི་སྐྱེ་བ་མེད་པ་ཁོང་དུ་ཆུད་པའོ། །རིག་སྔགས་རྒྱལ་ཞེས་པ་ནི་སྔགས་ཐམས་ཅད་ལ་དབང་ཐོབ་པའོ། །གསང་སྔགས་རྒྱལ་པོ་དོན་ཆེན་བྱེད། །ཅེས་པ་ནི་ལྷ་ཁ་སྦྱོར་གྱི་དོན་བྱེད་པའོ། །གཙུག་ཏོར་ཆེན་པོ་རྨད་

བྱུང་གཙུག །ཅེས་པ་ནི་ཟིལ་གྱིས་མི་ནོན་པའི་སྐུའོ། །ནམ་མཁའ་ནི་སྟོང་པ་ཉིད་དོ། །བདག་པོ་ནི་ཡེ་ཤེས་སེམས་དཔའོ། །སྣ་ཚོགས་དོན་ཞེས་པ་ནི་འགྲོ་བ་ལ། །སངས་རྒྱས་ཀུན་ནི་དུས་གསུམ་གྱི་བདེ་བར་གཤེགས་པ་ལའོ། །སྐུ་ཡི་མཆོག་ནི་ཡེ་ཤེས་
སེམས་དཔའ་ལའོ། །འགྲོ་བ་ཀུན་དགའ་བའི་ཡེ་ཤེས་ཀྱི་མིག་དང་ལྡན་ན་སྣ་ཚོགས་པའི་གཟུགས་ཀྱིས་འགྲོ་བའི་དོན་བྱེད་པའོ། །དྲང་སྲོང་ཞེས་པ་ནི་སྐྱོན་མེད་པ་སྟེ་སངས་རྒྱས་སོ། །ཆེ་དགུ་ཞེས་པ་ནི་ཡོན་ཏན་དང་ལྡན་པའོ། །དེ་དག་གིས་ཀྱང་ཁྱོད་ལ་མཆོད་ཅིང་ངག་གིས་
བསྟོད་པ་བརྗོད་པའོ། །རིགས་གསུམ་ནི་སྐུ་གསུང་ཐུགས་སོ། །གསང་སྔགས་ལྡན་ནི་ཐབས་དང་ཤེས་རབ་དང་ལྡན་པའོ། །གསང་སྔགས་འཛིན་ནི་གཞན་འཛིན་དུ་འཇུག་པའོ། །གཙོ་བོ་ནི་འགྲན་ཟླ་མེད་པའོ། །དཀོན་མཆོག་གསུམ་ནི་སྤྱི་བོར་ཁུར་བའི་དོན་ཏོ། །
ཐེག་པ་གསུམ་ནི་ཉན་ཐོས་དང་། རང་རྒྱལ་བ་དང་། བྱང་ཆུབ་སེམས་དཔའི་ཐེག་པའི་སྒོ་ནས་འགྲོ་བའི་དོན་བྱེད་པའོ། །དོན་ཡོད་ཅེས་པ་ནི་འགྲོ་བའི་དོན་བྱེད་པའོ། །ཞགས་པ་ཞེས་པ་ནི་ཐུགས་རྗེའི་ཞགས་པའོ། །རྣམ་པར་རྒྱལ་ཞེས་པ་ནི་འཁོར་བ་ལས་སོ། །འཛིན་
པ་ཆེན་པོ་ནི་འགྲོ་བ་འཛིན་པའོ། །རྡོ་རྗེ་ནི་སྟོང་པ་ཉིད་དོ། །ཞགས་པ་ནི་སྙིང་རྗེའོ། །རྡོ་རྗེ་ལྕགས་ཀྱུ་ཞགས་པ་ནི་སྒོ་བ་དེ་ཉིད་མཚོན་པའོ། །ཆེ་ཞེས་པ་ནི་ལྕགས་སྒྲོག་དང་དྲིལ་བུ་མཚོན་པའོ། །རྡོ་རྗེ་འཇིགས་བྱེད་ཅེས་པ་ནི། འཇིགས་བྱེད་ཀྱི་དཀྱིལ་འཁོར་ལྷ་བཅུ་གསུམ་པའི་སྒོ་
ནས་འགྲོ་བའི་དོན་བྱེད་པའོ། །འཇིགས་པར་བྱེད་ཅེས་པ་ནི་དུག་ལྔ་ཡེ་ཤེས་ལྔར་སྒྱུར་བའོ། །ཁྲོ་བོའི་རྒྱལ་པོ་གདོང་དྲུག་འཇིགས། །མིག་དྲུག་ལག་དྲུག་སྟོབས་དང་ལྡན། །ཀེང་རུས་མཆེ་བ་གཙིགས་པ་པོ། །ཞེས་པ་ནི་གཞོན་ནུ་གདོང་དྲུག་གི་དཀྱིལ་འཁོར་ལྷ་བཅུ་གསུམ་པས་འགྲོ་
བའི་དོན་བྱེད་པའོ། །ཧ་ལ་ཧ་ལ་ཞེས་པ་ནི་ཕུག་ཅིག་ཕུག་ཅིག་པའོ། །གདོང་བརྒྱ་པ་ནི་གདོང་བརྒྱ་པའི་དཀྱིལ་འཁོར་གྱི་སྒོ་ནས་འགྲོ་བའི་དོན་བྱེད་པའོ། །གཤིན་ཞེས་པ་ནི་ཤི་བའི་རོའོ། །རྗེ་ཞེས་པ་ནི་སྲོག་བདག་གོ། །གཤེད་ཅེས་པ་ནི་དེའི་གཉེན་པོ་ཁྲོ་བོའོ། །ཡང་ན་

གཤིན་ཞེས་པ་ནི་ཁམས་གསུམ་གྱི་སེམས་ཅན་ནོ། །རྗེ་ཞེས་པ་ནི་ང་བདག་གོ། །གཤེད་ཅེས་པ་ནི་བསྐྱེད་རྫོགས་གཉིས་སོ། །བགེགས་ཀྱི་རྒྱལ་ཞེས་པ་ནི་བདུད་བཞི་སེལ་བའོ། །སྤྱིར་གཤིན་རྗེ་གཤེད་ཀྱི་དཀྱིལ་འཁོར་གྱི་སྒོ་ནས་འགྲོ་བའི་དོན་བྱེད་པའོ། །དཀྱིལ་འཁོར་དེ་དག་
ཐམས་ཅད་ལ་རང་བཞིན་མེད་པར་ཤེས་པ་ནི་ཤུགས་ཆེན་ནོ། །འཇིགས་བྱེད་ཅེས་པ་ནི་འཁོར་བའོ། །རྡོ་རྗེ་གྲགས་པ་ནི་སྟོང་ཉིད་ལས་སྣ་ཚོགས་ཤར་བའོ། །རྡོ་རྗེ་སྙིང་ཞེས་པ་ནི་སྣ་ཚོགས་དང་སྟོང་པ་དབྱེར་མི་ཕྱེད་པའོ། །སྒྱུ་འཕྲུལ་རྡོ་རྗེ་ཞེས་པ་ནི་སྒྱུ་ནི་སྒྱུ་མ་སྟེ་སྟོང་པ་ཉིད་དོ། །
འཕྲུལ་ནི་སྣ་ཚོགས་སུ་ཤར་བའོ། །རྡོ་རྗེ་ནི་དབྱེར་མི་ཕྱེད་པའོ། །གསུས་པོ་ཆེ་ནི་ཁྲོ་བོའི་སྐུའོ། །རྡོ་རྗེ་ལས་སྐྱེས་རྡོ་རྗེའི་བདག་ནི་སྟོང་པ་ལ་སྟོང་པ་རོལ་པའོ། །རྡོ་རྗེ་སྙིང་པོ་མཁའ་འདྲ་བ་ནི་དཔེ་དང་དོན་ནོ། །མི་གཡོ་བ་ནི་བརྟན་པའོ། །རལ་པ་གཅིག་གིས་བསྒྱིངས་པ་ནི་སྐྲའོ། །གླང་
ཆེན་ཀོ་རློན་གོས་སུ་གྱོན་པ་ནི་སྟོད་གཡོགས་སོ། །གྲགས་ཆེན་ཧ་ཧ་ཞེས་སྒྲོགས་པ་ནི། ཐབས་དང་ཤེས་རབ་གཞན་ལ་སྟོན་པའོ། །ཧི་ཧི་ཞེས་སྒྲོགས་འཇིགས་པར་བྱེད་པ་ནི། རང་གི་རྒྱུད་ལ་གོམས་པར་བྱེད་པའོ། །གད་མོ་ཆེན་པོ་ནི་དགྱེས་པའོ། །གད་རྒྱངས་ཅན་ནི་རབ་ཏུ་
དགྱེས་པའོ། །རྡོ་རྗེ་གད་མོ་ཆེར་སྒྲོགས་པ། །ཞེས་པ་ནི་སྟོང་པ་ཉིད་སྟོན་པའོ། །རྡོ་རྗེ་ཞེས་པ་ནི་སྟོང་པ་ཉིད་དོ། །སེམས་ཞེས་པ་ནི་རིག་པའོ། །དཔའ་ཞེས་པ་ནི་དབྱེར་མེད་དོ། །སེམས་དཔའ་ཆེ་ཞེས་པ་ནི་གཞན་དོན་ནོ། །རྡོ་རྗེ་རྒྱལ་པོ་བདེ་བ་ཆེ། །ཞེས་པ་ནི་ལོངས་སྐུའོ། །རྡོ་
རྗེ་དྲག་པོ་དགའ་བ་ཆེ། །ཞེས་པ་ནི་ཁྲོ་བོའི་སྐུའོ། །རྡོ་རྗེ་ཧཱུཾ་སྟེ་ཧཱུཾ་ཞེས་སྒྲོགས། །ཞེས་པ་ནི་གསུང་ཡིག་འབྲུའི་སྒོའོ། །མཚོན་དུ་རྡོ་རྗེའི་མདའ་ཐོགས་པ། །རྡོ་རྗེ་རལ་གྲིས་མ་ལུས་གཅོད། །ཅེས་པ་ནི་ཐུགས་ཕྱག་མཚན་གྱི་སྒོའོ། །རྡོ་རྗེ་སྐུ་འཆང་རྡོ་རྗེ་ཅན། །ཞེས་པ་ནི་སྐུའི་སྒོའོ། །
རྡོ་རྗེ་གཅིག་པུ་གཡུལ་སེལ་བ། །ཞེས་པ་ནི་སྟོང་པ་ཉིད་ཀྱིས་འཁོར་བ་བཟློག་པའོ། །རྡོ་རྗེ་འབར་བ་མིག་མི་བཟད། །ཅེས་པ་ནི་ཡེ་ཤེས་ཀྱི་སྤྱན་དང་ལྡན་པའོ། །སྐྲ་ཡང་རྡོ་རྗེ་འབར་བ་སྟེ། །ཞེས་པ་ནི་དབུ་སྐྲའོ། །རྡོ་རྗེ་འབེབས་པ་འབེབས་པ་ཆེ། །ཞེས་པ་ནི་རབ་ཏུ་གནས་པའོ། །

མིག་བརྒྱ་པ་སྟེ་རྡོ་རྗེའི་མིག །ཅེས་པ་ནི་བསམ་གྱིས་མི་ཁྱབ་པའི་སྤྱན་དང་ལྡན་པའོ། །ལུས་ནི་རྡོ་རྗེའི་བ་སྤུ་ཅན། །ཞེས་པ་ནི་བ་སྤུ་ཐམས་ཅད་རྡོ་རྗེ་ཕྲ་མོར་གནས་པའོ། །རྡོ་རྗེ་སྤུ་ནི་གཅིག་པུའི་ལུས། །ཞེས་པ་ནི་ལུས་ཐམས་ཅད་རྡོ་རྗེས་ཁྱབ་པའོ། །སེན་མོ་
སྐྱེས་པ་རྡོ་རྗེའི་རྩེ། །ཞེས་པ་ནི་ཡན་ལག་དང་ཉིང་ལག་ཐམས་ཅད་རྡོ་རྗེའི་རྩེ་མོ་ལྟ་བུའོ། །རྡོ་རྗེའི་སྙིང་པོ་པགས་པ་མཁྲེགས། །ཞེས་པ་ནི་རྡོ་རྗེའི་པགས་པ་དང་ལྡན་ནོ། །རྡོ་རྗེ་ཕྲེང་ཐོགས་དཔལ་དང་ལྡན། །རྡོ་རྗེའི་རྒྱན་གྱིས་བརྒྱན་པ་སྟེ། །ཞེས་པ་ནི་རྡོ་རྗེའི་རྒྱན་དང་ལྡན་པའོ། །གད་
རྒྱངས་ཧ་ཧ་ངེས་པར་སྒྲོགས། །ཞེས་པ་ནི་ཟིལ་གྱིས་མི་ནོན་པའི་གསུང་ངོ་། །ཡི་གེ་དྲུག་པ་རྡོ་རྗེའི་སྒྲ། །ཞེས་པ་ནི་ཨ་ར་པ་ཙ་ན་ཡའོ། །འཇམ་དབྱངས་ཆེན་པོ་སྒྲ་ཆེ་བ། །ཞེས་པ་ནི་ཡེ་ཤེས་སེམས་དཔའོ། །འཇིག་རྟེན་གསུམ་ན་སྒྲ་གཅིག་པ། །ཞེས་པ་ནི་སྲིད་པ་གསུམ་ན་མ་ཐོས་པ་མེད་པའོ། །
ནམ་མཁའི་ཁམས་ན་སྒྲ་སྒྲོགས་པ། །ཞེས་པ་ནི་ནམ་མཁས་གར་ཁྱབ་པར་འགྲོ་བ་ལ་ཟབ་པ་དང་རྒྱ་ཆེ་བའི་སྒྲ་སྒྲོགས་པའོ། །སྒྲ་དང་ལྡན་པ་རྣམས་ཀྱི་མཆོག །ཅེས་པ་ནི་འདུ་བྱེད་རྣམས་ཀྱི་མཆོག་ཏུ་གྱུར་པའོ། །ཡང་དག་བདག་མེད་དེ་བཞིན་ཉིད། །ཅེས་པ་ནི་གང་ཟག་གི་བདག་
དང་ཆོས་ཀྱི་བདག་གིས་སྟོང་པའོ། །ཡང་དག་མཐའ་སྟེ་ཡི་གེ་མེད། །ཅེས་པ་ནི་ཚིག་དང་ཐ་སྙད་ལས་འདས་པ་སྟེ་ལྟ་བ་སྟོར། ཐ་སྙད་ནུབ། གྲུབ་མཐའ་ཐམས་ཅད་བག་ལ་ཞ་བའོ། །སྟོང་ཉིད་སྨྲ་བའི་ཁྱུ་མཆོག་སྟེ། །ཞེས་པ་ནི་སྟོན་པ་ཐམས་ཅད་ཀྱི་ནང་ན་མཆོག་ཏུ་གྱུར་པ་ཡེ་ཤེས་
སེམས་དཔའོ། །ཟབ་ཅིང་ཞེས་པ་ནི་གསང་སྔགས་ཀྱི་ཐེག་པའོ། །རྒྱ་ཆེ་བ་ནི་ཕ་རོལ་ཏུ་ཕྱིན་པའི་ཐེག་པའོ། །སྒྲ་སྒྲོགས་པ་ནི་གདུལ་བྱ་ལའོ། །ཆོས་ཀྱི་དུང་སྟེ་སྒྲ་ཆེན་ལྡན། །ཞེས་པ་ནི་ཟབ་མོ་སྟོན་པའོ། །ཆོས་ཀྱི་གཎྜཱི་སྒྲ་བོ་ཆེ། །ཞེས་པ་ནི་རྒྱ་ཆེ་བ་སྟོན་པའོ། །དེ་ལྟར་སྟོན་པའི་ཡེ་ཤེས་སེམས་
དཔའ་དེའི་ངོ་བོ་ཅི་འདྲ་ཞེ་ན། མི་གནས་མྱ་ངན་འདས་པའོ། །ཞེས་བྱ་སྟེ་མཐའ་དང་བྲལ་བ་ཞེས་བྱ་བའི་ཐ་ཚིག་གོ། །ཕྱོགས་བཅུའི་ཆོས་ཀྱི་རྔ་བོ་ཆེ། །ཞེས་པ་ནི་ཐམས་ཅད་ལ་ཁྱབ་པར་སྟོན་པའོ། །གཟུགས་མེད་ཅེས་པ་ནི་ཆོས་སྐུའོ། །གཟུགས་བཟང་དམ་པ་ནི་ལོངས་སྐུའོ། །སྣ་ཚོགས་

གཟུགས་ཅན་ཡིད་ལས་སྐྱེས། །གཟུགས་རྣམས་ཐམས་ཅད་སྣང་བའི་དཔལ། །གཟུགས་བརྙན་མ་ལུས་འཆང་བ་པོ། །ཞེས་པ་ནི་སྤྲུལ་པའི་སྐུའོ། །ཡང་ན་ཡིད་ལས་སྐྱེས་ཞེས་པ་ནི་རྣལ་འབྱོར་སྤྱོད་པའི་ལྟ་བའོ། །མཚུངས་པ་མེད་ཅིང་ཆེ་བར་གྲགས། །ཞེས་པ་ནི་འདྲ་བ་མེད་ཅིང་ཀུན་
ལ་ཁྱབ་པའི་དོན་ནོ། །ཁམས་གསུམ་ནི་འདོད་ཁམས་ལ་སོགས་པའོ། །དབང་ཕྱུག་ནི་དེ་ལ་མངའ་བརྙེས་པའོ། །འཕགས་ལམ་ནི་ཡན་ལག་བརྒྱད་དོ། །མཐོ་ལ་གནས་ཞེས་པ་ནི་ས་བཅུ་གཅིག་པའོ། །དར་བ་ཆེན་པོ་ཞེས་བྱ་བ་ནི་རྒྱས་པ་སྟེ་ཡོན་ཏན་ཐམས་ཅད་དང་ལྡན་པའོ། །ཆོས་
ཞེས་བྱ་བ་ནི་འཁོར་འདས་ཐམས་ཅད་དོ། །ཏོག་ཅེས་པ་ནི་དེ་དག་གི་རྩེ་མོར་གྱུར་པའོ། །འཇིག་རྟེན་གསུམ་ཞེས་པ་ནི་འདོད་ཁམས་ལ་སོགས་པའོ། །གཞོན་ལུས་གཅིག་ཅེས་པ་ནི་འཇམ་དཔལ་གཞོན་ནུར་གྱུར་པའོ། །གནས་བརྟན་རྒན་པོ་སྐྱེ་དགུའི་བདག །ཅེས་པ་ནི་འཕགས་
པ་དགྲ་བཅོམ་པའི་སྒོ་ནས་འགྲོ་བའི་དོན་བྱེད་པའོ། །སུམ་ཅུ་རྩ་གཉིས་ཞེས་པ་ནི་བདུན་ཤིན་ཏུ་མཐོ་བ་དང་། སོར་མོ་རིང་བ་དང་། རྟིང་པ་ཡངས་པ་དང་། སྐུ་ཆེ་ཞིང་དྲང་བ་དང་། ཡན་ལག་གི་སྤུ་གཡས་ཕྱོགས་སུ་འཁྱིལ་པ་དང་། ཞལ་མཛོད་སྤུས་བརྒྱན་པ་ལ་སོགས་པ་
སུམ་ཅུ་རྩ་གཉིས་ཀྱིས་བརྒྱན་པའོ། །སྡུག་གུ་འཇིག་རྟེན་གསུམ་ན་མཛེས། །ཞེས་པ་ནི་སེན་མོ་ཟངས་ཀྱི་མདོག་ལྟར་དམར་བ་ལ་སོགས་པ་དཔེ་བྱད་བཟང་པོ་བརྒྱད་ཅུ་དང་ལྡན་པའོ། །འཇིག་རྟེན་ཞེས་པ་ནི་འཁོར་བ་རང་བཞིན་མེད་པར་ཤེས་པའོ། །ལེགས་ཞེས་པ་ནི་མྱ་ངན་ལས་
འདས་པ་རང་བཞིན་མེད་པར་ཤེས་པའོ། །སློབ་དཔོན་ཞེས་པ་ནི་ཡེ་ཤེས་སེམས་དཔའོ། །འཇིག་རྟེན་སློབ་དཔོན་འཇིགས་པ་མེད། །ཅེས་པ་ནི་འགྲོ་བ་རྣམས་ཀྱི་གཙོ་བོར་གྱུར་པའོ། །མགོན་དང་སྐྱོབ་པ་ནི་མྱ་ངན་ལས་འདས་པའོ། །འཇིག་རྟེན་ནི་འཁོར་བའོ། །ཡིད་གཅུགས་
པ་ཞེས་བྱ་བ་ནི་འགྲོ་བ་ལ་མཛེས་པའོ། །སྐྱབས་དང་ཞེས་བྱ་བ་ནི་གདུལ་བྱ་མ་ལུས་པའོ། །སྐྱོབ་པ་ཞེས་བྱ་བ་ནི་འདུལ་བྱེད་དོ། །བླ་ན་མེད་ཅེས་བྱ་བ་ནི་དོ་ཟླ་དང་བྲལ་བ་སྟེ་ཡེ་ཤེས་སེམས་དཔའོ། །འོ་ན་གདུལ་བྱ་ཇི་ཙམ་གྱི་དོན་བྱེད་ཅེ་ན། ནམ་མཁའི་མཐའ་ལ་ལོངས་སྤྱོད་པ། །ཞེས་

བྱ་སྟེ་ནམ་མཁས་གར་ཁྱབ་པའི་གདུལ་བྱ་ལ་དོན་བྱ་བའི་ཐ་ཚིག་གོ། །ཐམས་ཅད་མཁྱེན་པའི་ཡེ་ཤེས་མཚོ་ནི་ཇི་སྙེད་པ་མཁྱེན་པའི་ཡེ་ཤེས་སོ། །དེས་འགྲོ་བའི་དོན་བྱེད་པ་ནི། མ་རིག་སྒོ་ངའི་སྦུབས་འབྱེད་པ། །ཞེས་བྱ་སྟེ་མ་རིག་པ་ནི་ལས་རྒྱུ་འབྲས་དང་།
དཀོན་མཆོག་དང་བདེན་པ་དག་ཡོད་པར་མི་ཤེས་ཏེ། ཐར་པ་དང་མྱ་ངན་ལས་འདས་པ་ལ་སྒྲིབ་པས་སྒོ་ངའི་སྦུབས་དང་འདྲའོ། །འབྱེད་པ་ཞེས་པ་ནི་མ་རིག་པའི་ལིང་ཏོག་སེལ་བར་བྱེད་ཅེས་བྱ་བའི་ཐ་ཚིག་གོ། །སྲིད་པ་ནི་གསུམ་མོ། །དྲ་བ་ནི་མ་རིག་པའོ། །འཇོམས་པ་ནི་རླག་
པར་བྱེད་པའོ། །མ་རིག་པ་འབའ་ཞིག་བརླག་པར་མ་ཟད་ཀྱི། ཉོན་མོངས་པ་མ་ལུས་པ་ཞི་བར་བྱེད་དོ། །འཁོར་བ་ནི་སྐྱེ་རྒ་ན་འཆི་བཞིའོ། །རྒྱ་མཚོ་ནི་རྒལ་བར་དཀའ་བའོ། །ཕ་རོལ་ཕྱིན་པ་ནི་མྱ་ངན་ལས་འདས་པའོ། །ཡེ་ཤེས་ནི་ཡེ་ནས་གནས་པའི་དོན་ཤེས་པའོ། །དབང་བསྐུར་
ནི་དེ་ལ་དབང་ཐོབ་པའོ། །ཅོད་པན་ནི་ཡང་དག་པར་རྫོགས་པའི་སངས་རྒྱས་རྒྱན་དུ་ཐོགས་པ་སྟེ། རྣམ་པར་སྣང་མཛད་མགོ་ལ་ཁུར་བའོ། །སྡུག་བསྔལ་གསུམ་ཞེས་པ་ནི། འདུ་བྱེད་ཀྱི་སྡུག་བསྔལ་དང་། འགྱུར་བའི་སྡུག་བསྔལ་དང་། སྡུག་བསྔལ་གྱི་སྡུག་བསྔལ་ལོ། །
སྡུག་བསྔལ་ཞེས་པ་ནི་བརྒྱད་དོ། །ཞི་ཞེས་པ་ནི་དེ་ལས་གྲོལ་བའོ། །གསུམ་སེལ་ཞེས་པ་ནི་ལུས་ངག་ཡིད་གསུམ་གྱི་དག་པའོ། །མཐའ་ཡས་ཞེས་པ་ནི་མ་ལུས་པའོ། །གྲོལ་གསུམ་ཐོབ་ཅེས་པ་ནི་སྐུ་གསུམ་མོ། །སྒྲིབ་པ་ཀུན་ཞེས་པ་ནི་ཉོན་མོངས་པའི་སྒྲིབ་པ་དང་ཤེས་བྱའི་
སྒྲིབ་པའོ། །ངེས་པར་གྲོལ་ཞེས་པ་ནི་དག་པའོ། །མཁའ་ལྟར་མཉམ་པ་ཉིད་ལ་གནས། །ཉོན་མོངས་དྲི་མ་ཀུན་ལས་འདས། །ཞེས་པ་ནི་མཉམ་གཞག་གོ། །དུས་གསུམ་དུས་མེད་རྟོགས་པ་པོ། །ཞེས་པ་ནི་རྗེས་ཐོབ་བོ། །སེམས་ཅན་ཀུན་ཞེས་པ་ནི་འགྲོ་བ་རིས་དྲུག་གོ། །གཙོ་
བོ་ཞེས་པ་ནི་སངས་རྒྱས་སོ། །ཡོན་ཏན་ཐོད་ཅན་རྣམས་ཀྱི་ཐོད། །ཅེས་པ་ནི་ས་བཅུའི་བྱང་ཆུབ་སེམས་དཔའོ། །ཐོད་ཅེས་པ་དེ་རྣམས་ཀྱི་ཐོད་དུ་གྱུར་པ་ཡེ་ཤེས་སེམས་དཔའོ། །ལུས་ཞེས་པ་ནི་གཟུགས་སོ། །ཀུན་ཞེས་པ་ནི་སྒྲ་དང་དྲི་ལ་སོགས་པའོ། །ལས་ནི་རྣམ་གྲོལ་བ་ཞེས་པ་

དེ་དག་ཐམས་ཅད་ལས་འདས་པ་སྟེ། གང་གིས་ང་ལ་གཟུགས་སུ་མཐོང་། །གང་གིས་ང་ལ་སྒྲར་ཤེས་པ། །ལོག་པར་རྟོག་པ་ཞུགས་པ་སྟེ། །སྐྱེ་བོ་དེ་ཡིས་ང་མི་མཐོང་། །ཞེས་པ་ལྟ་བུའོ། །ནམ་མཁའི་ལམ་ལ་རབ་གནས་པ་ནི་སྟོང་པ་ཉིད་ཀྱི་དོན་ལ་མ་ཡེངས་པའོ། །དེ་ལྟར་ཡེ་ཤེས་སེམས་
དཔའ་དེ་གཞན་དོན་མཛད་པའི་དཔེ་ནི། ཡིད་བཞིན་གྱི་ནོར་བུ་རིན་པོ་ཆེ་དང་དཔག་བསམ་གྱི་ཤིང་དང་བུམ་པ་བཟང་པོ་དང་འདྲ་བའི་སྒོ་ནས་འགྲོ་བའི་དོན་བྱེད་པས་ནི་ཆེ་བའི་མཆོག་ཅེས་བྱའོ། །གཞན་དོན་འབའ་ཞིག་གཙོ་བོར་བྱེད་པས་ན། བྱེད་པ་སེམས་ཅན་ཀུན་དོན་བྱེད། །
ཅེས་བྱའོ། །ཕན་འདོགས་པ་ནི་སེམས་ཅན་ལའོ། །མཉེས་གཤིན་པ་ནི་ཐུགས་བརྩེ་བའོ། །བཟང་ངན་ཤེས་པ་ནི་སློབ་མའི་སྣོད་ཀྱི་བྱེ་བྲག་མཁྱེན་པའོ། །དུས་མཁྱེན་པ་ནི་བསྟན་པའི་གོ་རིམས་མཁྱེན་པའོ། །ཐུགས་རྗེས་མ་ཁྱབ་པ་མེད་པས་ན་ཁྱབ་བདག་གོ། །དམ་ཤེས་
དམ་ཚིག་ལྡན་པ་ནི་འགྲོ་བའི་དོན་བྱེད་པ་ལས་མི་འདའ་བའོ། །དུས་ཤེས་ཞེས་པ་ནི་འདུལ་བ་དང་མི་འདུལ་བའི་དུས་མཁྱེན་པའོ། །སེམས་ཅན་དབང་པོ་ཤེས་ཞེས་པ་ནི་གདུལ་བྱའི་དབང་པོ་རྣོ་རྟུལ་གྱི་བྱེ་བྲག་མཁྱེན་པའོ། །རྣམ་གྲོལ་གསུམ་བྱ་བ་ནི་ཉན་ཐོས་ཀྱི་ཐེག་པ་དང་། རང་རྒྱལ་
བའི་ཐེག་པ་དང་། བྱང་ཆུབ་སེམས་དཔའི་ཐེག་པའོ། །མཁས་པ་པོ་ནི་ཡེ་ཤེས་སེམས་དཔའོ། །ཡོན་ཏན་ལྡན་ཞིང་ཞེས་པ་ནི་རང་གི་དོན་ཕུན་སུམ་ཚོགས་པའོ། །ཡོན་ཏན་ཞེས་པ་ནི་གཞན་དོན་ཕུན་སུམ་ཚོགས་པའོ། །ཆོས་ཞེས་པ་ནི་འཁོར་འདས་སོ། །ཤེས་ཞེས་པ་ནི་རང་བཞིན་
མེད་པར་ཤེས་པའོ། །བཀྲ་ཤིས་ཞེས་པ་ནི་བར་ཆོད་མེད་པ་སྟེ་ལྟ་བའོ། །བཀྲ་ཤིས་འབྱུང་ཞེས་པ་ནི་འབྲས་བུའོ། །བཀྲ་ཤིས་ཀུན་གྱི་ཞེས་པ་ནི་བསྒོམ་པའོ། །བཀྲ་ཤིས་པ་ཞེས་པ་ནི་སྤྱོད་པའོ། །གྲགས་པ་ནི་འགྲོ་བ་ལ་གྲགས་པ་སྟེ་ཡེ་ཤེས་སེམས་དཔའོ། །ཇི་ལྟར་ཞེ་ན་
སྙན་པར་གྲགས་པ་དེ་དགེ་བའོ། །ཐ་དད་ཀྱི་རྟོག་པ་ལས་དབུགས་འབྱིན་པས་དབུགས་འབྱིན་ཆེན་པོའོ། །གདུལ་བྱ་ཐམས་ཅད་ལ་དགའ་བ་དང་བདེ་བ་སྐྱེ་བས་ན་དགའ་སྟོན་ཆེ་ཞེས་བྱའོ། །དགའ་ཆེན་རོལ་མོ་ཆེན་པོ་སྟེ། །ཞེས་བྱ་བ་ནི་ཐབས་སྣ་ཚོགས་ཀྱིས་འབྲིད་པའོ། །

བཀུར་སྟི་རིམ་གྲོ་ཕུན་སུམ་ཚོགས། །ཞེས་བྱ་བ་ནི་འགྲོ་བ་རྣམས་ཀྱི་མཆོད་པའི་གནས་སུ་གྱུར་པའོ། །མཆོག་ཏུ་དགའ་ཞེས་པ་ནི་རྡོ་རྗེ་ལྟ་བུའི་ཏིང་ངེ་འཛིན་ཏེ་ས་བཅུ་གཅིག་པའོ། །གྲགས་ཞེས་པ་ནི་བཀའ་རྒྱུད་ཐམས་ཅད་ལས་སོ། །བདག་ཅེས་པ་ནི་ཡེ་ཤེས་སེམས་
དཔའོ། །དཔལ་ཞེས་པ་ནི་རང་དོན་ཐུགས་སུ་ཆུད་པས་རྟོག་པ་དག་གི་དཔལ་ལོ། །འགྲོ་བའི་དོན་བྱེད་པས་ན་ཐུགས་རྗེ་གཞན་གྱི་དཔལ་ལོ། །མཆོག་ལྡན་ཞེས་པ་ནི་མཆོག་ལྡན་ནི་མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུ་དང་ལྡན་པའོ། །མཆོག་ཅེས་པ་ནི་
ཐེག་པ་ཆེན་པོའོ། །སྦྱིན་ཞེས་པ་ནི་ས་བཅུའི་བྱང་ཆུབ་སེམས་དཔའ་ལ་སྟོན་པའོ། །གཙོ་བོ་ཞེས་བྱ་བ་ནི་ས་བཅུའི་བྱང་ཆུབ་སེམས་དཔའི་དཔོན་དུ་གྱུར་པའོ། །སྐྱབས་ཀྱི་དམ་པ་སྐྱབས་སུ་འོས། །ཞེས་པ་ནི་ཡེ་ཤེས་སེམས་དཔའ་དེས། འཇིག་རྟེན་དགྲ་སྟེ་ཞེས་པ་འཁོར་བ་ལས་
སྐྱོབ་པས་ན་སྐྱབས་ཀྱི་དམ་པ་ཡང་ཡིན་ལ་རབ་ཀྱི་མཆོག་ཅེས་བྱའོ། །འཇིགས་པ་མ་ལུས་སེལ་བ་ནི་འཁོར་བའི་ཆོས་སོ། །གཙུག་ཕུད་ཅེས་པ་ནི་རལ་པ་སྤྱི་བོར་བཅིངས་པའོ། །ཕུད་བུ་ཞེས་པ་ནི་རིན་པོ་ཆེའི་ཐུར་མས་གཟེར་དུ་བཏབ་པའོ། །ལྕང་ལོ་ཅན་ཞེས་པ་ནི་སྐྲ་ལྷག་པ་ཐུར་དུ་
འཕྱང་བའོ། །རལ་པ་མུཉྫ་ཞེས་པ་ནི་རལ་པ་བཅིངས་པའི་རྩེ་མོར་བཤིག་པའོ། །ཅོད་པན་ཐོགས་པ་ནི་རིགས་ཀྱི་བདག་པོ་སྤྱི་བོར་ཁུར་བའོ། །གདོང་ལྔ་གཙུག་ཕུད་ལྔ་དང་ལྡན། །ཞེས་པ་ནི་འཇམ་དཔལ་ཞལ་ལྔ་པའི་དཀྱིལ་འཁོར་གྱིས་འགྲོ་བའི་དོན་བྱེད་པའོ། །ཟུར་ཕུད་
ལྔ་པའི་ཞེས་པ་ནི་ཞལ་ལྔའི་སྐྲ་བྱེ་བྲག་ཟུར་ཕུད་ལྔའོ། །མེ་ཏོག་ཐོད་ནི་རྒྱན་དུ་བཅིངས་པའོ། །མགོ་ཟླུམ་ཞེས་པ་ནི་སྐྲ་དང་ཁ་སྤུ་བྲེགས་པ་དང་། དགེ་སློང་གི་ཆ་ལུགས་ཏེ་ཚངས་པར་སྤྱོད་པ་ཞེས་བྱ་བར་སྦྱར་རོ། །བརྟུལ་ཞུགས་ཞེས་པ་ནི་ཉན་ཐོས་དང་རང་རྒྱལ་བའི་དཀའ་ཐུབ་བོ། །
བརྟུལ་ཞུགས་མཆོག་ཅེས་པ་ནི་རིག་པ་འཛིན་པའི་སྤྱོད་པའོ། །དཀའ་ཐུབ་མཐར་ཕྱིན་དཀའ་ཐུབ་ཆེ། །ཞེས་པ་ནི་བཅུ་གཉིས་སོ། །དེ་ལྟར་སྤྱོད་པའི་གང་ཟག་གང་ཡིན་སྙམ་པ་ལ། གཽ་ཏ་མ་ཞེས་སྨོས་ཏེ་ཤཱཀྱ་ཐུབ་པའོ། །གནས་ཕུན་སུམ་ཚོགས་པ་ནི་གཙང་གནས་དམ་པ་ཞེས་བྱ་

སྟེ། རྒྱལ་པོའི་ཁབ་བྱ་རྒོད་ཀྱི་ཕུང་པོའི་རི་ལ་སོགས་པའོ། །བྲམ་ཟེ་ཞེས་པ་ནི་ལེགས་སྐྱེས་ཀྱི་གཟུགས་སོ། །ཚངས་པ་ཞེས་པ་ནི་བཙུན་མོའི་དབུ་མའོ། །ཚངས་པ་ཆེ་ཞེས་པ་ནི་བསམ་གཏན་དང་པོའི་ལྷ་སྟེ་སྡིག་པ་མི་དགེ་བའི་ཆོས་ལས་ཚངས་པའོ། །མྱ་ངན་འདས་པ་ཚངས་པ་ཐོབ། །ཅེས་པ་
ནི་རྡོ་རྗེ་ལྟ་བུའི་ཏིང་ངེ་འཛིན་གཉིས་པའོ། །གྲོལ་བ་ཞེས་པ་ནི་འཁོར་བ་ལས་སོ། །ཐར་པ་ནི་མྱ་ངན་ལས་འདས་པའོ། །རྣམ་གྲོལ་ལུས་ནི་བདེ་བར་གཤེགས་པའི་སྐུའོ། །རྣམ་ཞེས་པ་ནི་ཐ་དད་ཀྱི་རྟོག་པ་ལས་གྲོལ་བའོ། །ཞི་ཞེས་པ་ནི་ཉོན་མོངས་པའི་སྒྲིབ་པའོ། །ཞི་བ་ཉིད་ཅེས་པ་ནི་
ཤེས་བྱའི་སྒྲིབ་པའོ། །མྱ་ངན་འདས་ཞི་ཞེས་པ་ནི་བྱང་ཆུབ་སེམས་དཔའོ། །མྱ་ངན་འདས་ཞེས་པ་ནི་སངས་རྒྱས་སོ། །ལེགས་པར་མྱ་ངན་འདས་དང་ཉེ། །ཞེས་པ་ནི་ཉན་ཐོས་དང་རང་རྒྱལ་བའོ། །བདེ་སྡུག་སེལ་ཞེས་པ་ནི་འཁོར་འདས་ཀྱི་མཐའ་ལས་འདས་པའོ། །མཐར་གྱུར་པ་ཞེས་བྱ་
བ་ནི་བློའི་ཡུལ་མ་ཡིན་པའོ། །ཆགས་བྲལ་ཞེས་པ་ནི་འདོད་པ་དང་བྲལ་བའོ། །ལུས་ལས་འདས་པ་པོ་ཞེས་པ་ནི་ཟག་བཅས་ཀྱི་ཕུང་པོ་མི་མངའ་བའོ། །ཐུབ་པ་མེད་པ་ཞེས་བྱ་བ་ནི་མི་འཇིགས་པ་བཞི་དང་ལྡན་པའོ། །དཔེ་མེད་པ་ཞེས་བྱ་བ་ནི་ཆོས་ཀྱི་སྐུ་སྟེ་མཐའ་དང་བྲལ་བའོ། །དེ་ལྟ་བུའི་
དོན་དེ་རིག་པའི་ཤེས་པའི་ཡུལ་དུ་མི་མངོན་བློའི་ཡུལ་དུ་མི་སྣང་ལུང་གིས་ཀྱང་གསལ་བར་མི་ནུས་པའོ། །མི་འགྱུར་ཞེས་པ་ནི་རྒྱུན་གྱིས་རྟག་པའོ། །ཀུན་དུ་འགྲོ་ཞེས་པ་ནི་སྣ་ཚོགས་སུ་ཤར་བའོ། །ཁྱབ་པ་པོ་ནི་ཡེ་ཤེས་སེམས་དཔའོ། །ཕྲ་ཞིང་ཞེས་པ་ནི་རྟོགས་པར་དཀའོ། །ཟག་མེད་
ཅེས་པ་ནི་ཉོན་མོངས་པ་དང་བྲལ་བའོ། །ས་བོན་བྲལ་ཞེས་པ་ནི་མ་རིག་པ་དང་བྲལ་བའོ