Luận tạng Tây Tạng (Tengyur) — Tập 48

། །རྡུལ་མེད་ཅེས་པ་ནི་ཆོས་སྐུའོ། །རྡུལ་བྲལ་ཞེས་པ་ནི་ལོངས་སྐུའོ། །དྲི་མ་མེད་པ་ནི་སྤྲུལ་སྐུའོ། །ཉེས་པ་སྤངས་པ་སྐྱོན་མེད་པ། །ཞེས་པ་ནི་ཡེ་ཤེས་སེམས་དཔའོ། །ཤིན་ཏུ་སད་པ་
ཞེས་པ་ནི་སྨོན་ལམ་གྱི་མཐུ་སད་པའོ། །སད་པའི་བདག་ཅེས་པ་དེ་འགྲོ་བའི་དོན་ལ་སྦྱོར་བའོ། །ཇི་ལྟར་སྦྱོར་ཞེ་ན། ཀུན་ཤེས་པ་ནི་ཇི་སྙེད་པ་མཁྱེན་པའོ། །ཀུན་རིག་ཅེས་པ་ཇི་ལྟ་བ་མཁྱེན་པའོ། །དམ་པ་ཞེས་པ་དབྱེར་མི་ཕྱེད་པའོ། །རྣམ་པར་ཤེས་པ་ཆོས་ཉིད་འདས། །ཞེས་པ་

རྟོག་དཔྱོད་དང་བྲལ་བའོ། །ཡེ་ཤེས་གཉིས་མེད་ཚུལ་འཆང་བ། །ཞེས་པ་ནི་རིག་སྟོང་དབྱེར་མེད་དོ། །རྣམ་པར་རྟོག་མེད་ལྷུན་གྱིས་གྲུབ། །ཅེས་པ་ནི་དངོས་པོའི་འདུག་ཚུལ་ལོ། །དུས་གསུམ་སངས་རྒྱས་ཞེས་པ་ནི་འདས་པ་དང་། མ་འོངས་པ་དང་ད་ལྟར་རོ། །
ལས་བྱེད་པ་ཞེས་བྱ་བ་ནི་སངས་རྒྱས་ཀུན་གྱི་ཕྲིན་ལས་བྱེད་པའོ། །སངས་རྒྱས་ཐོག་མ་ཐ་མ་མེད། །ཅེས་པ་ནི་ཐོག་མ་སྐྱེ་བས་སྟོང་པ། ཐ་མ་འགགས་པས་སྟོང་པའོ། །དང་པོའི་སངས་རྒྱས་ཞེས་པ་ནི་ཆོས་ཀྱི་སྐུ་སྟེ། རྒྱུ་མེད་པ་ཞེས་བྱ་བ་རྒྱུ་རྐྱེན་མཐའ་དག་དང་བྲལ་བའོ། །
ཡེ་ཤེས་མིག་གཅིག་དྲི་མ་མེད། །ཅེས་པ་ནི་ཡེ་ཤེས་ཀྱི་སྤྱན་དང་ལྡན་པའི་ལོངས་སྐུ་སྟེ། དྲི་མ་མེད་ཅེས་པ་ཐེག་པ་ཆེན་པོ་སྟོན་པའོ། །ཡེ་ཤེས་ལུས་ཅན་དེ་བཞིན་གཤེགས་པ་སྤྲུལ་པའི་སྐུ་སྟེ། ཚིག་གི་དབང་ཕྱུག་སྨྲ་བ་ཆེ། །ཞེས་པ་ནི་དྲང་དོན་གྱི་ཚིག་ལ་མཁས་པའོ། །སྨྲ་བའི་
སྐྱེས་མཆོག་སྨྲ་བའི་རྒྱལ། །ཞེས་པ་ནི་ངེས་པའི་དོན་གྱི་ཚིག་ལ་མཁས་པའོ། །སྨྲ་བའི་དམ་པ་མཆོག་གི་གནས། །ཞེས་པ་ནི་དྲང་དོན་ངེས་དོན་གཉིས་ལ་མཁས་པའོ། །སྨྲ་བའི་སེང་གེ་ཞེས་པ་ནི་གང་ཟག་གིས་ཀྱང་ཟིལ་གྱིས་མི་ནོན་པའོ། །མཚུངས་པ་མེད་ཅེས་པ་ནི་འགྲན་ཟླ་མེད་
པའོ། །ཀུན་དུ་ཞེས་པ་ནི་འགྲོ་བ་ལའོ། །མཆོག་ཏུ་དགའ་ཞེས་པ་བདེ་བ་བསྐྱེད་པའོ། །གཟི་བརྗིད་ཕུང་པོ་བལྟ་ན་སྡུག །ཅེས་པ་ནི་ཡིད་དུ་འོང་བའོ། །འོད་བཟང་འབར་བ་དཔལ་གྱི་བེའུ། །ཞེས་པ་ནི་རྣམ་པར་མི་རྟོག་པའི་ཐུགས་སོ། །ལག་ན་འོད་འབར་སྣང་བ་པོ། །ཞེས་པ་ནི་
སྐུའི་ཆ་ལུགས་འགྲོ་བ་ལ་སྟོན་པའོ། །སྨན་པ་ཆེ་མཆོག་དང་འདྲ་བར་འགྲོ་བའི་ཟུག་རྔུ་འབྱིན་པས་བླ་ན་མེད་པའོ། །སྨན་རྣམས་མ་ལུས་ལྗོན་པའི་ཤིང་། །ཞེས་པ་ནི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་ངོ་། །ནད་དོ་ཅོག་ཅེས་པ་ནི་ཉོན་མོངས་པ་བརྒྱད་ཁྲི་བཞི་སྟོང་ངོ་། །དགྲ་ཆེ་བ་ནི་འཇོམས་
པར་བྱེད་པའོ། །སྡུག་གུ་འཇིག་རྟེན་གསུམ་གྱི་མཆོག །ཅེས་པ་ནི་འཇིག་རྟེན་གསུམ་གྱི་འདུལ་བྱེད་དུ་གྱུར་པའོ། །དཔལ་ལྡན་རྒྱུ་སྐར་དཀྱིལ་འཁོར་ཞེས་པ་ནི་དཔལ་ལྡན་རྒྱུ་སྐར་གྱི་དཀྱིལ་འཁོར་གྱི་སྒོ་ནས་འགྲོ་བའི་དོན་བྱེད་པའོ། །ཕྱོགས་བཅུའི་ཞེས་པ་ནི་གནས་སོ། །ནམ་མཁའི་

ཞེས་པ་ནི་རྒྱའོ། །མཐར་ཐུག་པ་ཞེས་པ་ནི་དུས་སོ། །རྒྱ་དེ་སྲིད་དུ། ཆོས་ཀྱི་རྒྱལ་མཚན་ལེགས་པར་འཛུགས། །ཞེས་པ་སྟེ་གདུལ་བྱ་རྣམས་དགེ་བ་ལ་དགོད་དོ་ཞེས་པའི་དོན་ཏོ། །འགྲོ་ན་ཞེས་པ་ནི་འགྲོ་བ་རྣམས་སོ། །གདུགས་གཅིག་ཅེས་པ་ནི་ཐ་དད་ཀྱིས་གདུང་བའི་ཚད་པ་ལས་སྐྱོབ་པའོ། །
གཅིག་ཅེས་པ་ནི་འགྲན་ཟླ་མེད་པའོ། །ཡངས་པ་ཞེས་པ་ནི་ཀུན་ལ་ཁྱབ་པའོ། །བྱམས་པ་ཞེས་པ་ནི་སེམས་ཅན་ཐམས་ཅད་བདེ་བ་དང་ལྡན་པར་འདོད་པའོ། །སྙིང་རྗེ་ཞེས་པ་ནི་འགྲོ་བ་ཐམས་ཅད་སྡུག་བསྔལ་དང་བྲལ་བར་འདོད་པའོ། །དཀྱིལ་འཁོར་ཅན་ཞེས་པ་དེ་གཉིས་དང་མི་
འབྲལ་བའོ། །དཔལ་ལྡན་ཞེས་པ་ནི་གཟུགས་སྐུ་གཉིས་སོ། །པདྨ་ཞེས་པ་སྐྱོན་གྱིས་མ་གོས་པའོ། །གར་གྱི་བདག་ཅེས་པ་དཔེར་ན་གར་ཇི་ལྟར་བྱས་ཀྱང་ལུས་ལས་མི་གཞན་པ་དེ་བཞིན་དུ་ཡེ་ཤེས་སེམས་དཔའ་དེ་ཡང་མཛད་སྤྱོད་ཅི་མཛད་ཀྱང་འགྲོ་བའི་དོན་ལས་མི་འདའ་བའོ། །
ཁྱབ་བདག་ཆེན་པོ་ནི་བཤད་ཟིན་ཏོ། །རིན་ཆེན་ནི་འདོད་དགུ་འབྱུང་བའོ། །གདུགས་ཞེས་པ་ནི་གདུང་བ་ལས་སྐྱོབ་པའོ། །སངས་རྒྱས་ཀུན་གྱི་གཟི་བརྗིད་ཆེ། །ཞེས་པ་ནི་ཀུན་ལ་སྣང་བའོ། །སངས་རྒྱས་ཀུན་གྱི་སྐུ་འཆང་བ། །ཞེས་པ་ནི་སྐུ་གསུམ་དང་ལྡན་པའོ། །སངས་རྒྱས་
ཀུན་གྱི་རྣལ་འབྱོར་ཆེ། །ཞེས་པ་ནི་བདེན་པ་ཡ་མ་བྲལ་བའོ། །སངས་རྒྱས་ཀུན་གྱི་བསྟན་པ་གཅིག །ཅེས་པ་ནི་སྐྱེ་བ་མེད་པའི་ངོ་བོར་གཅིག་པའོ། །རྡོ་རྗེ་རིན་ཆེན་ཞེས་པ་ནི་རིན་པོ་ཆེའི་དབུ་རྒྱན་དང་རྡོ་རྗེ་ཐོད་དང་ལྡན་པས་ན་དབང་བསྐུར་དཔལ་ཞེས་བྱའོ། །རིན་ཆེན་ཀུན་བདག་དབང་
ཕྱུག་ཅེས་པ་ནི་འདོད་དགུ་འབྱུང་བ་ལ་དབང་ཐོབ་པའོ། །འཇིག་རྟེན་དབང་ཕྱུག་ཅེས་པ་ནི་སྤྱན་རས་གཟིགས་ཀྱི་གཟུགས་ཀྱིས་སོ། །ཀུན་གྱི་བདག་ཅེས་པ་ནི་གདུལ་བྱའི་དོན་བྱེད་པའོ། །རྡོ་རྗེ་འཆང་བ་ཞེས་པ་ནི་ཕྱག་ན་རྡོ་རྗེའོ། །ཀུན་གྱི་རྗེ་ཞེས་པ་ནི་འཇམ་དཔལ་ལོ། །སངས་
རྒྱས་ཀུན་གྱི་ཐུགས་ཆེ་བ། །སངས་རྒྱས་ཀུན་གྱི་ཐུགས་ལ་གནས། །ཞེས་པ་ནི་ཕྱག་ན་རྡོ་རྗེའི་ངོ་བོ་བཤད་པའོ། །སངས་རྒྱས་ཀུན་གྱི་སྐུ་ཆེ་བ། །ཞེས་པ་ནི་འཇམ་དཔལ་གྱི་ངོ་བོ་བཤད་པའོ། །སངས་རྒྱས་ཀུན་གྱི་གསུང་ཡང་ཡིན། །ཞེས་པ་ནི་སྤྱན་རས་གཟིགས་ཀྱི་ངོ་བོ་བཤད་

པའོ། །རྡོ་རྗེ་ཉི་མ་སྣང་བ་ཆེ། །རྡོ་རྗེ་ཟླ་བ་དྲི་མེད་འོད། །ཅེས་པ་ནི་བཀླག་པའི་ཐབས་ཏེ་ཐབས་དང་ཤེས་རབ་ཀྱི་ངོ་བོ་བཤད་པའོ། །བཀླག་པའི་ཐབས་ནི་གཉིས་ཏེ་དཀྱིལ་འཁོར་འཁོར་ལོའི་ཚུལ་དུ་གདོན་པ་དང་། ལྷ་རྐྱང་བའི་ཚུལ་དུ་གདོན་པའོ། །དཀྱིལ་
འཁོར་གྱི་ཚུལ་གདོན་པ་ནི། ཡེ་ཤེས་སེམས་དཔའི་དཀྱིལ་འཁོར་ནས་ཇི་ལྟར་འབྱུང་བ་བཞིན་བསྐྱེད་ལ། ཡས་རྐན་ཐབས་ཀྱི་རང་བཞིན་ཟླ་བའི་དཀྱིལ་འཁོར་དུ་བསྐྱེད། མས་རྐན་ཤེས་རབ་ཀྱི་རང་བཞིན་ཉི་མའི་དཀྱིལ་འཁོར་དུ་བསྐྱེད་ལ། ལྕེ་ཟག་པ་མེད་པའི་རང་
བཞིན་རྡོ་རྗེར་བསྐྱེད་དེ་དབྱངས་ཡིག་དང་གསལ་བྱེད་ཀྱི་བར་ནས་གདོན་པར་བྱའོ། །ཅིག་ཤོས་ཀྱང་དེ་དང་འདྲའོ། །ཆགས་བྲལ་ཞེས་པ་ནི་མཚན་ཉིད་ཀྱི་ཐེག་པའོ། །ཆགས་པ་ཆེ་ཞེས་པ་ནི་སྔགས་ཀྱི་ཐེག་པའོ། །ལ་སོགས་པའི་དོན་ནི་གཉིས་ཀ་བསྡུས་པའི་དོན་ཏོ། །
ཁ་དོག་སྣ་ཚོགས་ཞེས་པ་ནི་ཐེག་པ་སྣ་ཚོགས་ཀྱིས་འགྲོ་བའི་དོན་བྱེད་པའོ། །རྡོ་རྗེ་ཞེས་པ་ནི་སྟོང་པ་ཉིད་ཀྱི་དོན་ཏོ། །སྐྱིལ་ཀྲུང་ཞེས་པ་ནི་སྟོང་པ་ཉིད་ལ་མཉམ་པར་གཞག་པའོ། །རྫོགས་སངས་རྒྱས་ཞེས་པ་ནི་དེའི་སྒོ་ནས་མྱ་ངན་ལས་འདས་པ་ཐོབ་པའོ། །སངས་རྒྱས་འགྲོ་བའི་
ཆོས་འཛིན་པ་ནི་འགྲོ་བའི་དོན་དུ་གཟུགས་སྐུ་གཉིས་ཤར་བའོ། །དཔལ་ལྡན་པདྨ་སངས་རྒྱས་སྐྱེས། །ཞེས་པ་ནི་འཁོར་བར་གནས་ཀྱང་སྐྱོན་གྱིས་མ་གོས་པའོ། །ཀུན་མཁྱེན་ཞེས་པ་ནི་ཇི་སྙེད་པ་མཁྱེན་པའི་ཡེ་ཤེས་སོ། །མཛོད་འཛིན་ཞེས་པ་ནི་ཇི་ལྟ་བ་མཁྱེན་པའི་ཡེ་ཤེས་
སོ། །རྒྱལ་པོ་ཞེས་པ་ནི་འཁོར་འདས་ཀྱི་གཙོ་བོར་གྱུར་པའོ། །སྒྱུ་འཕྲུལ་སྣ་ཚོགས་ཞེས་པ་ནི་ཐབས་དུ་མ་དང་ལྡན་པའོ། །ཆོས་ཞེས་པ་ནི་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང་། སྟོབས་དང་མི་འཇིགས་པ་ལ་སོགས་པ་དང་ལྡན་པའོ། །དེ་ལྟ་བུ་དེ་སུ་ལ་ལྡན་ཞེ་ན།
སངས་རྒྱས་རིག་སྔགས་འཆང་ཞེས་སྨོས་ཏེ། སྤོང་བ་ཕུན་སུམ་ཚོགས་པ་དང་། ཡེ་ཤེས་ཕུན་སུམ་ཚོགས་པ་དང་ལྡན་པའི་ཡེ་ཤེས་སེམས་དཔའ་ལ་ལྡན་ཞེས་པའི་དོན་ཏོ། །རྡོ་རྗེ་རྣོན་པོ་རལ་གྲི་ཆེ། །ཞེས་པ་ནི་རྟགས་དང་དོན་ཏོ། །རྟགས་ནི་གཡས་པའི་ཕྱག་མཚན་རལ་གྲིའོ། །

དོན་ནི་རྡོ་རྗེ་སྟེ་སྟོང་པ་ཉིད་དོ། །རྣོན་པོ་ནི་རྟོག་པ་མ་ལུས་པ་གཅོད་པའོ། །སྟོང་པ་ཉིད་ཀྱི་དོན་དེ་རལ་གྲི་དང་འདྲ་བས་ན་རལ་གྲིའོ། །ཐོགས་ཞེས་པ་ནི་འཆང་བའི་དོན་ཏོ། །ཡི་གེ་མཆོག་སྟེ་རྣམ་པར་དག །ཅེས་པ་ཡང་རྟགས་དང་དོན་ཏོ། །རྟགས་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་
པོ་ཏི་བསྣམས་པའོ། །དོན་ནི་ཡི་གེ་མཆོག་ཅེས་པ་སྟེ་ཨའོ། །རྣམ་པར་དག་ཅེས་པ་ནི་སྐྱེ་བ་མེད་པའོ། །ཐེག་པ་ཆེན་པོ་ཞེས་པ་ནི་བྱང་ཆུབ་སེམས་དཔའི་ལམ་འབྲས་བུ་དང་བཅས་པའོ། །སྡུག་བསྔལ་གཅོད་ཅེས་པ་ནི་འཁོར་བ་ལས་སྒྲོལ་བའོ། །མཚོན་ཆ་ཆེན་པོ་ཞེས་པ་ནི་རལ་
གྲིའོ། །རྡོ་རྗེ་ཆོས་ཞེས་པ་ནི་པོ་ཏིའོ། །རྡོ་རྗེ་ཟབ་མོ་ཞེས་པ་ནི་ཐུགས་སོ། །ཛི་ན་ཞེས་པ་ནི་གསུང་ངོ་། །ཛིཀ་ཅེས་པ་ནི་སྐུའོ། །རྡོ་རྗེ་བློ་གྲོས་ཞེས་པ་ནི་སྟོང་པ་ཉིད་ཤེས་པའི་ཤེས་རབ་པོ། །དོན་བཞིན་རིག་ཅེས་པ་ནི་མཐའ་དག་ཤེས་པའོ། །ཕ་རོལ་ཕྱིན་པ་ཀུན་ཞེས་པ་ནི་ས་བཅུའོ། །
རྫོགས་པ་ཞེས་པ་ནི་ཐུགས་སུ་ཆུད་པའི་དོན་ཏོ། །ས་རྣམས་ཞེས་པ་ནི་དང་པོ་ནས་ས་བཅུ་གཅིག་པའི་བར་རོ། །ཀུན་ཞེས་པ་ནི་ཉན་ཐོས་དང་རང་རྒྱལ་བའི་སའོ། །རྒྱན་དང་ལྡན་ཞེས་པ་ནི་དེ་དག་ཐམས་ཅད་ཡེ་ཤེས་སེམས་དཔའ་ལ་ལྡན་པའོ། །རྣམ་པར་དག་པ་ཞེས་པ་ནི་དོན་དམ་
པའི་བདེན་པའོ། །བདག་མེད་ཆོས་ཞེས་པ་ནི་གང་ཟག་གི་བདག་དང་ཆོས་ཀྱི་བདག་དང་བྲལ་བའོ། །ཡང་དག་ཡེ་ཤེས་ཞེས་བྱ་བ་ནི་ཆོས་ཀྱི་དབྱིངས་ཀྱི་ཡེ་ཤེས་སོ། །ཟླ་འོད་བཟང་ཞེས་པ་ནི་ལོངས་སྤྱོད་རྫོགས་པའི་སྐུའོ། །བརྩོན་ཆེན་ཞེས་པ་ནི་བརྩོན་འགྲུས་དང་ལྡན་པ་སྟེ་
སྤྲུལ་པའི་སྐུའོ། །སྒྱུ་ནི་སྟོང་པ་ཉིད་དོ། །འཕྲུལ་ནི་སྣ་ཚོགས་སུ་ཤར་བའོ། །དྲ་བ་ནི་གཉིས་སུ་མེད་པའི་དོན་ཏོ། །རྒྱུད་ཀུན་གྱི་ནི་ཞེས་པ་ནི་གཉིས་ཏེ། ཚིག་གི་རྒྱུད་དང་། དོན་གྱི་རྒྱུད་དང་། གཉི་གའི་རྒྱུད་དང་། རྣལ་འབྱོར་གྱི་རྒྱུད་དང་། རྣལ་འབྱོར་བླ་ན་མེད་པའི་རྒྱུད་དེ། དེ་དག་
ཐམས་ཅད་ཀྱི་རྩ་བ་རྒྱུད་ཡིན་པས་ན། རྒྱུད་ཀུན་གྱི་ནི་བདག་པོ་མཆོག །ཅེས་བྱའོ། །དོན་གྱི་རྒྱུད་ལ་དྲུག་སྟེ། རྒྱུད་ཀྱི་ངོ་བོ་དང་། ངེས་ཚིག་དང་། དབྱེ་བ་དང་། མཚན་ཉིད་དང་། རྣམ་གྲངས་དང་། ལས་སོ། །དེ་དག་ཐམས་ཅད་ལ་མངའ་བརྙེས་པ་དེ་ནི་ཡེ་ཤེས་སེམས་དཔའ་སྟེ། བདག་

པོ་མཆོག་ཅེས་བྱའོ། །རྡོ་རྗེའི་གདན་ཞེས་པ་ནི་ལྷའི་གདན་བསྐྱེད་པའི་ཆོ་ག་ཡན་ལག་དང་བཅས་པ་བསྟན་ཏེ། རྡོ་རྗེ་ནི་སྟོང་པ་ཉིད་དོ། །མ་ལུས་ལྡན་ཞེས་པ་ནི་པདྨ་དང་ཉི་མ་དང་ཟླ་བའི་གདན་དང་ལྡན་པའོ། །ཡེ་ཤེས་སྐུ་རྣམས་མ་ལུས་འཆང་། །ཞེས་པ་ནི་ཡེ་ཤེས་
རྣམ་པ་ལྔ། སྐུ་རྣམས་ཞེས་པ་ནི་རིགས་ལྔའོ། །མ་ལུས་མཆོག་ཅེས་པ་ནི་འཁོར་དང་བཅས་པའོ། །དེ་ལྟར་རིགས་ལྔ་འཁོར་དང་བཅས་པའི་སྒོ་ནས་ཡེ་ཤེས་སེམས་དཔའ་དེས་འགྲོ་བའི་དོན་བྱེད་དོ་ཞེས་བྱ་བའི་ཐ་ཚིག་གོ། །ད་ནི་ས་བཅུའི་བྱང་ཆུབ་སེམས་དཔའི་སྒོ་ནས་འགྲོ་བའི་དོན་བྱེད་
པ་བསྟན་པར་བྱ་སྟེ། ཀུན་དུ་བཟང་པོ་དང་། བློ་གྲོས་བཟང་པོ་ཞེས་པ། འཇམ་དཔལ་དང་། སའི་སྙིང་པོ་འགྲོ་བ་འཛིན་པ་སྤྱན་རས་གཟིགས་ཀྱི་ཚུལ་གྱིས་ཀྱང་འགྲོ་བའི་དོན་བྱེད་པའོ། །སངས་རྒྱས་ཀུན་གྱི་སྙིང་པོ་ནི་ཡེ་ཤེས་རྣམ་པ་ལྔ་དབྱེར་མི་ཕྱེད་པ་སྟེ་ཆོས་ཀྱི་
དབྱིངས་ཀྱི་ཡེ་ཤེས་སོ། །ཆེ་ཞེས་པ་ནི་འགྲན་ཟླ་མེད་པའོ། །དེ་ལྟ་བུའི་ཡེ་ཤེས་དེ་ལས་སྤྲུལ་པའི་འཁོར་ལོ་སྣ་ཚོགས་འཆང་ཞེས་ཏེ། ལྷ་བསྡུས་རྒྱས་ཀྱི་བྱེ་བྲག་སྣ་ཚོགས་སུ་སྣང་ནས་འགྲོ་བའི་དོན་བྱེད་ཅེས་བྱ་བའི་ཐ་ཚིག་གོ། །དངོས་པོ་ཀུན་ཞེས་པ་ནི་འཁོར་འདས་
ཐམས་ཅད་དོ། །རང་བཞིན་ཞེས་པ་ནི་སྟོང་པ་ཉིད་དོ། །མཆོག་ཅེས་པ་ནི་དབྱེར་མི་ཕྱེད་པའོ། །དངོས་པོ་ཀུན་གྱི་རང་བཞིན་འཛིན། །ཞེས་པ་ནི་སྟོང་པ་ཉིད་ཀྱི་དོན་ཏེ་མཉམ་གཞག་གིས་འཛིན་པའོ། །སྐྱེ་མེད་ཆོས་ཏེ་ཞེས་པ་ནི་དེ་ལྟར་མཉམ་གཞག་ལ་གང་དུ་ཡང་མ་གྲུབ་ཀྱང་
རྗེས་ཐོབ་ལ་སྣ་ཚོགས་སུ་ཤར་བས་སྣ་ཚོགས་དོན་བྱེད་ཅེས་བྱའོ། །ཆོས་ཀུན་ངོ་བོ་ཉིད་ཅེས་པ་ནི་ཟུང་འཇུག་གི་ངོ་བོ་སྟེ་སྒྱུ་མ་ལྟ་བུའོ། །འཆང་བ་ཞེས་བྱ་བ་ནི་ཐུགས་སུ་ཆུད་པའི་དོན་ཏོ། །ཤེས་རབ་ཆེན་པོ་ཞེས་པ་ནི་ཡེ་ཤེས་སེམས་དཔའོ། །སྐད་ཅིག་ལ་ཆོས་ཀུན་ཁོང་དུ་
ཆུད་པའོ་ཞེས་བྱ་བ་ནི། ཆོས་ཐམས་ཅད་རང་བཞིན་མེད་པར་སྐད་ཅིག་གིས་ཐུགས་སུ་ཆུད་པའོ། །ཆོས་ཀུན་ཞེས་པ་ནི་འཁོར་འདས་ཐམས་ཅད་དོ། །མངོན་པར་རྟོགས་ཞེས་པ་ནི་སྐྱེ་མེད་དུ་འཛིན་པ་ལས་ཀྱང་གྲོལ་བའོ། །ཐུབ་པ་མེད་པ་ནི་བདུད་བཞིའོ། །བློ་མཆོག་ཅེས་པ་ནི་དེ་

ཁོ་ན་ཉིད་མཁྱེན་པའི་ཡེ་ཤེས་སོ། །འབྱུང་བ་སེལ་ཞེས་པ་ནི་འཁོར་བ་ལས་སྒྲོལ་བའོ། །མི་གཡོ་ཞེས་པ་ནི་འགྲོ་བའི་དོན་ལས་མི་གཡོ་བའོ། །རབ་ཏུ་དང་བའི་བདག་ཅེས་པ་ནི་འགྲོ་བ་རྣམས་ཀྱི་ཡིད་དུ་འོང་བའོ། །རྫོགས་སངས་རྒྱས་པའི་བྱང་ཆུབ་འཆང་། །ཞེས་པ་ནི་གཞན་དོན་ཕུན་
སུམ་ཚོགས་པའོ། །སངས་རྒྱས་ཀུན་གྱི་མངོན་སུམ་པ། །ཞེས་པ་ནི་ཆོས་ཉིད་ཀྱི་དོན་མངོན་སུམ་དུ་ཐུགས་སུ་ཆུད་པ་སྟེ། དཔེར་ན་སྐྱུ་རུ་ར་རློན་པ་ལག་མཐིལ་དུ་བཞག་པ་ལྟ་བུའོ། །ཡེ་ཤེས་མེ་ལྕེ་འོད་རབ་གསལ། །ཞེས་པ་ནི་གཉེན་པོ་ཡེ་ཤེས་མེ་དང་འདྲ་བས་ཐ་དད་ཀྱི་རྟོག་པ་
ཐམས་ཅད་སྲེག་པར་བྱེད་པའོ། །འདོད་པའི་དོན་གྲུབ་ཅེས་པ་ནི་རང་གི་དོན་དང་གཞན་གྱི་དོན་གྲུབ་པའོ། །དམ་པ་སྟེ་ཞེས་པ་ནི་ས་བཅུ་གཅིག་པ་མཐར་ཕྱིན་པའོ། །ངན་སོང་ཐམས་ཅད་རྣམ་སྦྱོང་བ། །ཞེས་པ་ནི་འགྲོ་བ་ཐམས་ཅད་ཀྱི་རྒྱུད་དག་པར་བྱེད་པའོ། །འདིར་ཉམས་སུ་
བླང་བའི་རིམ་པར་ཡང་ཤེས་པར་བྱ་སྟེ། སྐུ་གདུང་གདབ་པ་དང་། རོ་བསྲེག་པ་དང་། རབ་ཏུ་གནས་པ་དང་། སྦྱིན་སྲེག་དག་ཀྱང་འདིར་ཤེས་པར་བྱ་བས་ན། ངན་སོང་ཐམས་ཅད་རྣམ་སྦྱོང་བ། །ཞེས་བྱའོ། །སེམས་ཅན་ཀུན་གྱི་མགོན་བྱེད་པས་ན་མཆོག་ཅེས་བྱའོ། །
སེམས་ཅན་ཐམས་ཅད་རབ་གྲོལ་བྱེད། །ཅེས་པ་ནི་གོ་སླའོ། །ཉོན་མོངས་ཞེས་པ་ནི་བརྒྱད་ཁྲི་བཞི་སྟོང་ངོ་། །གཡུལ་ཞེས་པ་ནི་འཐབ་པའི་སའོ། །གཅིག་དཔའ་བ་ཞེས་པ་ཡེ་ཤེས་སེམས་དཔའོ། །མི་ཤེས་པ་ནི་མ་རིག་པའོ། །དགྲ་ནི་འདོད་ཆགས་དང་ཞེ་སྡང་ངོ་། །དྲེགས་
པ་ནི་ང་རྒྱལ་ལོ། །འཇོམས་ཞེས་པ་ནི་སེལ་བར་བྱེད་པའོ། །དཔལ་ལྡན་ཞེས་པ་ནི་གཟུགས་སྐུ་གཉིས་སོ། །བློ་དང་ཞེས་པ་ནི་རིག་པ་སྟེ་ཆོས་སྐུའོ། །སྒེག་པར་ལྡན་ཞེས་པ་ནི་འཁོར་བ་ལས་འདས་པའོ། །བརྟན་པོ་མི་སྡུག་གཟུགས་འཆང་བ། །ཞེས་པ་ནི་ཁྲོ་བོའི་གཟུགས་འདི་
དག་གིས་ལག་པ་བརྒྱ་པོ་ཀུན་བསྐྱོད་ཅིང་། གོམ་པའི་སྟོབས་ཀྱིས་ཅི་རིགས་པའི་གར་བྱའོ། །དཔལ་ལྡན་ལག་པ་བརྒྱས་གང་ལ། །ཞེས་པ་ནི་ཡན་ལག་གི་ཁྱད་པར་རོ། །ནམ་མཁའ་ཁྱབ་པར་གར་བྱེད་པ། །ཞེས་པ་ནི་བྱེད་པའི་ཁྱད་པར་རོ། །ས་ཡི་དཀྱིལ་འཁོར་བཞི་ཡི་

ཁྱོན། །ཞེས་པ་ནི་གནས་ཀྱི་ཁྱད་པར་རོ། །རྐང་པ་ཡ་གཅིག་མཐིལ་གྱིས་གནོན། །ཞེས་པ་ནི་འདུག་སྟངས་ཀྱི་ཁྱད་པར་རོ། །རྐང་མཐེབ་སེན་མོའི་ཁྱོན་གྱིས་ཀྱང་། །ཚངས་པའི་ཡུལ་ས་རྩེ་ནས་གནོན། །ཞེས་པ་ནི་ཆེ་བའི་ཁྱད་པར་རོ། །དེ་ལྟར་ཡེ་ཤེས་
སེམས་དཔའ་དེ་ཁྲོ་བའི་གཟུགས་ཁྱད་པར་དེ་དག་དང་ལྡན་པས་འགྲོ་བའི་དོན་བྱེད་དོ་ཞེས་བྱ་བའི་ཐ་ཚིག་གོ། །འདི་ནི་སྒྲུབ་པ་པོ་དག་གིས་བགེགས་ཉེ་བར་ཞི་བར་བྱ་བའི་ཆོ་གར་ཤེས་པར་བྱ་སྟེ། ཁྲོ་བོ་གདོང་བརྒྱ་པའི་ང་རྒྱལ་དང་ལྡན་པར་བྱ་སྟེ། ཁྲོ་བོའི་བསྟོད་པ་དག་ཀྱང་བྱ་སྟེ།
གཡས་བརྐྱང་དང་། གཡོན་བརྐྱང་དང་། ཟླུམ་པོ་དང་། ས་ག་དག་ཀྱང་བྱ་སྟེ། ཕྱི་ནས་ནི་ཅི་བདེར་ཆོ་ག་ལ་འཇུག་པར་བྱའོ། །དོན་གཅིག་གཉིས་མེད་ཆོས་ཀྱི་དོན། །ཞེས་པ་ལ་མཐའ་བཞི་དང་བྲལ་བའི་དོན་ནི་ཆོས་ཀྱི་དོན་ནོ། །དམ་པའི་དོན་ཞེས་པ་ནི་རྣམ་གྲངས་དང་
བྲལ་བའི་དོན་དམ་པའོ། །འཇིགས་པ་མེད་ཅེས་པ་ནི་འཁོར་བའི་སྐྱོན་གྱིས་མ་གོས་པའོ། །རྣམ་རིག་སྣ་ཚོགས་ཞེས་པ་ནི་གདུལ་བྱ་ཐམས་ཅད་ཀྱི་རྒྱུད་མཁྱེན་པའོ། །གཟུགས་དོན་ཞེས་པ་ནི་གང་དང་གང་གིས་འདུལ་བ་ལ་དེ་དང་དེའི་གཟུགས་སུ་སྤྲུལ་ནས་འདུལ་བའོ། །
རྣམ་ཤེས་སྣ་ཚོགས་རྒྱུད་དང་ལྡན། །ཞེས་པ་ནི་སེམས་ཅན་ཐ་དད་ཀྱི་སེམས་ཀྱི་རྒྱུད་མཁྱེན་ཅིང་མཁྱེན་པ་ཙམ་དུ་ཡང་མ་ཟད་དེ། དངོས་དོན་མ་ལུས་རྣམས་ལ་དགའ། །ཞེས་པ་ནི་སྟོང་པ་ཉིད་ཀྱི་དོན་འབའ་ཞིག་སྟོན་ཏོ་ཞེས་བྱ་བའི་དོན་ཏོ། །སྟོང་པ་ཉིད་ལ་དགའ་ཞེས་པ་ནི།
སྟོང་པ་ཉིད་ལ་དགའ་བའི་གང་ཟག་ལ་འདོད་ཆགས་བློ་ཞེས་པ་སྟེ་སྙིང་རྗེ་ཆེན་པོ་དང་ལྡན་པ་ཞེས་བྱ་བའི་དོན་ཏོ། །འོ་ན་སྙིང་རྗེས་འདོད་ཆགས་དང་མ་བྲལ་བས་འཁོར་བར་འགྱུར་རོ་ཞེ་ན། སྲིད་པའི་འདོད་ཆགས་ལ་སོགས་འདས། །ཞེས་པ་སྟེ་འདོད་ཆགས་རང་རྒྱུད་པ་སྤངས་པའོ། །
སྲིད་གསུམ་ཞེས་པ་ནི་འདོད་པའི་ཁམས་དང་། གཟུགས་ཀྱི་ཁམས་དང་གཟུགས་མེད་པའི་ཁམས་ཀྱི་སྲིད་པའོ། །དགའ་བ་ཆེན་པོ་པ་ཞེས་བྱ་བ་ནི་དེ་དག་མགུ་བར་བྱེད་པའོ། །སྤྲིན་དཀར་དག་པ་བཞིན་དུ་དཀར། །འོད་བཟང་སྟོན་ཀའི་ཟླ་བའི་འོད། །ཉི་མ་འཆར་ཀའི་དཀྱིལ་ལྟར་མཛེས། །

ཞེས་པ་ནི། སྐྱོན་གྱིས་མ་གོས་པའི་དཔེ་བསྟན་པའོ། །སེན་མོའི་འོད་ནི་ཤས་ཆེར་དམར། །ཅོད་པན་བཟང་པོ་མཐོན་ཀའི་རྩེ། །སྐྲ་མཆོག་མཐོན་ཀ་ཆེན་པོ་ཅན། །ཞེས་པ་ནི་མཚན་དང་དཔེ་བྱད་ཀྱི་སྒོ་ནས་བསྟོད་པའོ། །ནོར་བུ་ཆེན་པོ་འོད་ཆགས་དཔལ། །ཞེས་པ་ནི་དཔེའི་སྒོ་ནས་བསྟོད་
པའོ། །སངས་རྒྱས་སྤྲུལ་པའི་རྒྱན་དང་ལྡན། །ཞེས་པ་ནི་གླིང་བཞི་བྱེ་བ་ཕྲག་བརྒྱར་སྤྲུལ་པའི་སྐུར་སྟོན་པའོ། །འཇིག་རྟེན་ཁམས་བརྒྱ་ཀུན་བསྐྱོད་པ། །ཞེས་པ་ནི་འཁོར་བ་ལས་སྐྱོད་པར་བྱེད་པའོ་ཞེས་བྱ་བའི་ཐ་ཚིག་གོ། །རྫུ་འཕྲུལ་རྐང་པའི་སྟོབས་ཆེན་ལྡན། །ཞེས་པ་ནི་
མོས་པའི་ཏིང་ངེ་འཛིན་ལ་སོགས་པ་རྫུ་འཕྲུལ་གྱི་རྐང་པ་བཞིས་འགྲོ་བའི་དོན་བྱེད་པའོ། །དེ་ཉིད་ཅེས་པ་ནི་ཡེ་ཤེས་སེམས་དཔའོ། །དྲན་པ་ཆེན་པོ་འཆང་ཞེས་པ་ནི་ཡེ་ཤེས་རྣམ་པ་ལྔ་དང་ལྡན་པའོ། །དྲན་པ་བཞི་པོ་ཞེས་པ་ནི་ལུས་དྲན་པ་ཉེ་བར་གཞག་པ་དང་། སེམས་དྲན་
པ་ཉེ་བར་གཞག་པ་དང་། ཚོར་བ་དྲན་པ་ཉེ་བར་གཞག་པ་དང་། ཆོས་དྲན་པ་ཉེ་བར་གཞག་པའོ། །ཏིང་འཛིན་རྒྱལ་ཞེས་པ་ནི་རྡོ་རྗེ་ལྟ་བུའི་ཏིང་ངེ་འཛིན་ཏོ། །བྱང་ཆུབ་ཡན་ལག་ཅེས་པ་ནི་བྱང་ཆུབ་ཀྱི་ཡན་ལག་བདུན་ཏེ་དྲན་པ་ཡང་དག་བྱང་ཆུབ་ཀྱི་ཡན་ལག་ལ་སོགས་པའོ། །མེ་
ཏོག་ཅེས་པ་ནི་མཛེས་པའི་དོན་གྱིས་སོ། །སྤོས་ཞེས་པ་ནི་ཡིད་ཚིམ་པར་བྱེད་པའོ། །དེ་བཞིན་གཤེགས་པའི་ཡོན་ཏན་མཚོ། །ཞེས་པ་ནི་སྟོབས་དང་མི་འཇིགས་པ་དང་། སངས་རྒྱས་ཀྱི་ཆོས་མ་འདྲེས་པ་དང་ལྡན་པའོ། །ལམ་གྱི་ཡན་ལག་བརྒྱད་ཚུལ་རིག །ཅེས་པ་ནི་
འཕགས་པའི་ལམ་ཡན་ལག་བརྒྱད་དེ་ཡང་དག་པའི་ལྟ་བ་དང་། ཡང་དག་པའི་རྟོག་པ་དང་། ངག་དང་། ལས་ཀྱི་མཐའ་དང་། འཚོ་བ་དང་། རྩོལ་བ་དང་། དྲན་པ་དང་། ཏིང་ངེ་འཛིན་དང་བརྒྱད་དོ། །རིག་ཅེས་པ་ནི་ཐུགས་སུ་ཆུད་པའི་དོན་ཏོ། །ཡང་དག་སངས་རྒྱས་
ལམ་རིག་པ། །ཞེས་པ་ནི་དོན་ཕྱིན་ཅི་མ་ལོག་པར་རང་གི་ཐུགས་སུ་ཆུད་ནས། སེམས་ཅན་ཀུན་ལ་ཤས་ཆེར་ཆགས། །ཞེས་པ་སྟེ་འགྲོ་བ་ལ་སྟོན་པའོ། །ནམ་མཁའ་ལྟ་བུར་ཆགས་པ་མེད། །ཅེས་པ་ནི་འགྲོ་བའི་དོན་བྱེད་ཀྱང་སྐྱོན་གྱིས་མ་གོས་པའོ། །སེམས་ཅན་ཀུན་གྱི་

ཡིད་ལ་འཇུག །ཅེས་པ་ནི་འགྲོ་བ་དང་མཐུན་པའི་སྐུ་སྟོན་པའོ། །སེམས་ཅན་ཀུན་གྱི་ཡིད་ལྟར་མགྱོགས། །ཞེས་པ་ནི་འགྲོ་བའི་དོན་ལ་མྱུར་བའོ། །སེམས་ཅན་ཀུན་གྱི་དབང་དོན་ཤེས། །ཞེས་པ་ནི་གདུལ་བྱའི་རྒྱུད་དང་དབང་པོའི་བྱེ་བྲག་མཁྱེན་པའོ། །
སེམས་ཅན་ཀུན་གྱི་ཡིད་འཕྲོག་པ། །ཞེས་པ་ནི་གདུལ་བྱའི་ཡིད་འབྲིད་པར་བྱེད་པའོ། །ཕུང་པོ་ལྔ་ཞེས་པ་ནི་གཟུགས་དང་། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པའི་ཕུང་པོ་དང་ལྔའོ། །དེ་ཉིད་ཤེས་ཞེས་པ་ནི་མི་རྟག་པ་དང་། སྡུག་བསྔལ་བ་དང་།
བདག་མེད་པར་མཁྱེན་པའོ། །རྣམ་དག་ཕུང་པོ་ལྔ་འཆང་བ། །ཞེས་པ་ནི་ཟག་པ་མེད་པའི་ཕུང་པོ་ལྔ་དང་ལྡན་པའོ། །ངེས་འབྱུང་ཀུན་གྱི་མཐའ་ལ་གནས། །ཞེས་པ་ནི་རྡོ་རྗེ་ལྟ་བུའི་ཏིང་ངེ་འཛིན་བརྙེས་པའོ། །ངེས་པར་འབྱུང་བ་ཀུན་ལ་མཁས། །ཞེས་པ་ནི་ལམ་མཐའ་དག་
མཁྱེན་པའོ། །ངེས་འབྱུང་ཀུན་གྱི་ལམ་ལ་གནས། །ཞེས་པ་ནི་རང་གིས་སྤྱད་པའོ། །ངེས་པར་འབྱུང་བ་ཀུན་སྟོན་པ། །ཞེས་པ་ནི་དེ་ལྟ་བུའི་ལམ་དེ་གཞན་ལ་སྟོན་པའོ། །ཡན་ལག་བཅུ་གཉིས་ཞེས་པ་ནི་རྟེན་འབྲེལ་བཅུ་གཉིས་སོ། །སྲིད་རྩ་བཏོན་ཞེས་པ་ནི་མ་རིག་པ་དག་པར་བྱེད་
པའོ། །དག་པ་རྣམ་པ་བཅུ་གཉིས་ལྡན། །ཞེས་པ་ནི་རྟེན་འབྲེལ་བཅུ་གཉིས་དག་པའོ། །བདེན་བཞིའི་ཚུལ་གྱི་རྣམ་པ་ཅན། །ཞེས་པ་ནི་སྡུག་བསྔལ་གྱི་བདེན་པ་དང་། ཀུན་འབྱུང་གི་བདེན་པ་དང་། འགོག་པའི་བདེན་པ་དང་། ལམ་གྱི་བདེན་པ་དག་ཐུགས་སུ་ཆུད་པའོ། །ཤེས་པ་
བརྒྱད་པོ་རྟོགས་པ་འཆང་། །ཞེས་པ་ནི་རྣམ་པར་ཤེས་པའི་ཚོགས་བརྒྱད་རྣམ་པར་དག་པའོ། །བདེན་དོན་རྣམ་པ་བཅུ་གཉིས་འཆང་། །ཞེས་པ་ནི་བདེན་པ་བཞི་རྣམ་པ་བཅུ་གཉིས་ཚུལ་དུ་མཁྱེན་པའོ། །དེ་ཉིད་རྣམ་པ་བཅུ་དྲུག་རིག །ཅེས་པ་ནི་སྟོང་པ་ཉིད་བཅུ་དྲུག་གི་དོན་ཐུགས་སུ་ཆུད་
པའོ། །རྣམ་པ་ཉི་ཤུས་བྱང་ཆུབ་པ། །ཞེས་པ་ནི་ཕུང་པོ་ལྔ་པོ་རེ་རེ་ལ་ཡང་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པ་བཞི་བཞི་སྟེ་ཉི་ཤུའོ། །རྣམ་པ་སངས་རྒྱས་ཀུན་རིག་མཆོག །ཅེས་པ་ནི་འཁོར་འདས་ཀྱི་ཆོས་ཐམས་ཅད་ཁོང་དུ་ཆུད་པའོ། །སངས་རྒྱས་

ཀུན་གྱི་སྤྲུལ་པའི་སྐུ། །བྱེ་བ་དཔག་མེད་འགྱེད་པ་པོ། །ཞེས་པ་ནི་ལྷ་རྐྱང་པ་དང་། དཀྱིལ་འཁོར་གྱི་འཁོར་ལོ་དང་། ཁྲོ་བོ་དང་ཞི་བའི་སྐུ་བསམ་གྱིས་མི་ཁྱབ་པ་དང་། གང་དང་གང་མོས་པ་ལ་དེ་དང་དེའི་སྐུ་སྟོན་པའོ། །སྐད་ཅིག་ཐམས་ཅད་མངོན་པར་རྟོགས། །ཞེས་པ་ནི་ཆོས་ཉིད་
ཀྱི་དོན་དུས་ཀྱི་མཐའ་སྐད་ཅིག་གིས་རྟོགས་པའོ། །སེམས་ཀྱི་སྐད་ཅིག་དོན་ཀུན་རིག །ཅེས་པ་ནི་སེམས་ཅན་ཐམས་ཅད་ཀྱི་རྒྱུད་ཐམས་ཅད་སྐད་ཅིག་གིས་ཁོང་དུ་ཆུད་པའོ། །ཐེག་པ་སྣ་ཚོགས་ཐབས་ཚུལ་གྱིས། །འགྲོ་བའི་དོན་ལ་རྟོགས་པ་པོ། །ཞེས་པ་ནི་ཐེག་པ་སྣ་ཚོགས་
ཞེས་པ་ནི་ཐེག་པའི་སྒོ་བསམ་གྱིས་མི་ཁྱབ་པ་ལ་བྱ་སྟེ། རྒྱས་པར་དབྱེ་ན་བརྒྱད་ཁྲི་བཞི་སྟོང་དང་། འབྲིང་དུ་དབྱེ་ན་གསུང་རབ་ཡན་ལག་བཅུ་གཉིས་དང་། བསྟུ་ན་སྡེ་སྣོད་གསུམ་དང་། ཐེག་པ་རྣམ་པ་གསུམ་དང་། ཁྱད་པར་བླ་ན་མེད་པའི་ཐེག་པ་དང་། མུ་སྟེགས་ཀྱི་ཐེག་པ་ཡན་
ཆད་འདིར་ཤེས་པར་བྱའོ། །དེ་ལ་མུ་སྟེགས་ཀྱི་ལྟ་བ་ལ་གཉིས་ཏེ། ཆད་པར་ལྟ་བ་དང་རྟག་པར་ལྟ་བའོ། །དེ་ལ་འདིར་སློབ་དཔོན་གྱི་མདོ་སྡེ་མྱ་ངན་ལས་འདས་པའི་རྗེས་སུ་འབྲངས་ཏེ། རང་བཞིན་གྱིས་བདག་དགག་པར་བྱ་སྟེ། སྟོན་པ་གཟེགས་ཟན་པ་དག་བདག་དངོས་པོ་དོན་
དམ་པར་འདོད་པ་སྟེ། འདུས་བྱས་སམ་འོན་ཏེ་འདུས་མ་བྱས་ཡིན་ཞེ་ན། འདུས་བྱས་ཡིན་ན་མི་རྟག་པར་འགྱུར་ལ་འདུས་མ་བྱས་ཡིན་ན་དངོས་པོ་ཉམས་པར་འགྱུར་རོ། །གཏན་ཚིགས་ལྷག་པ་གཞན་ཡང་སྟོན་པ་སེར་སྐྱའི་བདག་རྟག་པ་དེ་དངོས་པོ་ཞིག་གམ། འོན་ཏེ་དངོས་
མེད་ཞིག་ཁོ་བོས་དཔྱད་པར་བྱའོ། །གལ་ཏེ་དངོས་མེད་དོ་ཞེ་ན། འོ་ན་བདག་རྟག་པ་ཉམས་པར་འགྱུར་རོ། །གལ་ཏེ་ཡང་དངོས་པོའོ་ཞེ་ན། འོ་ན་བདག་རྟག་པ་དེས་དོན་བྱེད་པར་འགྱུར་རམ་མི་འགྱུར་ཞེ་ན། གལ་ཏེ་དོན་བྱེད་པར་མི་འགྱུར་ཞེ་ན། གང་དོན་བྱེད་པར་མི་ནུས་པ་དེ་
ནི་ནམ་མཁའི་མེ་ཏོག་དང་འདྲའོ། །གཞན་ཡང་དོན་བྱེད་པར་འགྱུར་རོ་ཞེ་ན། རིམ་གྱིས་བྱེད་དམ་ཅིག་ཅར་དོན་བྱེད། རིམ་གྱིས་དོན་བྱེད་ན་ནི་མི་རྟག་པར་འགྱུར་ལ། ཅིག་ཅར་དོན་བྱེད་ན་ནུས་པ་ཆུང་ངུ་དག་གིས་ཀྱང་དཔའ་བོའི་བྱ་བ་བྱེད་པར་འགྱུར་རོ། །ཆད་པར་ལྟ་

བ་དག་ཀྱང་རིགས་པར་མི་འགྱུར་ཏེ། ཆད་ནས་འབྱུང་བར་འགྱུར་ཕྱིར་དང་། །སྔ་ཕྱི་སླུ་བ་མེད་པའི་ཕྱིར། །ཆད་པའི་རང་བཞིན་དུ་མི་འགྱུར་ཏེ། དེ་བས་ན་ཕྱི་པ་དག་རིགས་པ་མ་ཡིན་ནོ། །ནང་པ་དག་ལ་རྣམ་པ་གསུམ་སྟེ། ཉན་ཐོས་ཀྱི་ཐེག་པ་དང་། རང་
སངས་རྒྱས་ཀྱི་ཐེག་པ་དང་། བྱང་ཆུབ་སེམས་དཔའི་ཐེག་པའོ། །ཉན་ཐོས་ཀྱི་ཐེག་པ་ནི་གང་ཟག་གི་བདག་དྲི་མ་སྤངས་ནས་ཆོས་ཀྱི་བདག་གཟུང་འཛིན་དོན་དམ་པར་འདོད་དེ། དེ་ལ་ཕྱི་རོལ་གྱི་ཡུལ་འདི་རྡུལ་ཕྲ་རབ་ཟླུམ་སྒོང་ཆ་མེད་པ་མང་པོ་འདུས་པ་ལས། གོང་བུ་རགས་པ་
གྲུབ་པར་འདོད་དེ། དེ་དག་ཀྱང་བྱིས་པའི་ངང་ཚུལ་ཅན་དུ་ཤེས་པར་བྱ་སྟེ། རྡུལ་ཕྲ་རབ་དེ་དག་འབྱར་བ་དང་བསྐོར་བའམ། བར་མེད་པར་གནས་ཀྱང་རུང་སྟེ། ཕྱོགས་ཆ་དྲུག་གིས་རྣམ་པར་ཕྱེ་ན། རྡུལ་ཕྲ་རབ་གཅིག་ཀྱང་མི་འགྲུབ་ལ། གང་གཅིག་མ་གྲུབ་པ་དེས་ནི་དུ་མ་
ཡང་འགྲུབ་པར་མི་འགྱུར་རོ། །དེ་ལྟར་གཅིག་དང་དུ་མ་མ་གྲུབ་ན་ཕྱི་རོལ་གྱི་དོན་ཡང་མེད་པར་འགྱུར་རོ། །རང་རྒྱལ་ནི། ཕྱི་རོལ་གྱི་དོན་ལ་གཅིག་དང་དུ་མས་གནོད་པས་གཏན་མེད་ལ། ནང་འཛིན་པ་རིག་པ་དོན་དམ་པར་འདོད་དོ། །དེ་དག་ཀྱང་བདེན་པར་མི་འགྱུར་ཏེ། ཡུལ་
མ་གྲུབ་པའི་ཡུལ་དུ་འཛིན་པའི་ཤེས་པ་ནི་ནམ་ཡང་རིགས་པ་མ་ཡིན་ནོ། །དཔེར་ན་དཀར་པོ་མ་གྲུབ་པར་དཀར་པོར་འཛིན་པའི་ཤེས་པ་ནི་སྐྱེ་མི་སྲིད་དེ། སྐྱེས་བུ་ལྷ་སྦྱིན་ལ་གང་དག་དབྱུག་པ་ཡོད་ན་དེས་ཁྱད་པར་དུ་བྱས་པའི་དབྱུག་པ་ཅན་ཞེས་འདོགས་པར་རིགས་ལ། གང་དག་དབྱུག་
པ་མེད་ན་ལྷ་སྦྱིན་དབྱུག་པ་ཅན་ཞེས་མི་རིགས་སོ། །བྱང་ཆུབ་སེམས་དཔའི་ཐེག་པ་ལ་གཉིས་ཏེ། རྣལ་འབྱོར་སྤྱོད་པ་དང་། དབུ་མ་པའོ། །རྣལ་འབྱོར་སྤྱོད་པ་ལ་གཉིས་ཏེ། རྣམ་བདེན་པ་དང་། རྣམ་བརྫུན་པའོ། །དེ་ལ་རྣམ་བདེན་པའི་ལུགས་ཀྱིས་དཀར་དམར་གྱི་རྣམ་པ་སྣ་
ཚོགས་འདི་ཤེས་པའི་རྣམ་པར་བདེན་པར་འདོད་དེ། གང་ཟག་དང་ཆོས་ཀྱི་བདག་དང་བྲལ་བའི་ཤེས་པ་དོན་དམ་པར་འདོད་དེ། དེ་ཉིད་ལ་ཡང་དབྱེ་ན་གཉིས་ཏེ། སྣ་ཚོགས་སུ་སྣང་ཡང་ཤེས་པ་གཅིག་གི་ངོ་བོར་བདེན་པར་འདོད་པ་དང་། སྣང་ཡང་དུ་མར་སྣང་ལ་བདེན་ཡང་དུ་མར་

བདེན་པར་འདོད་པ་དང་གཉིས་སོ། །དང་པོ་ཡང་རིགས་པ་མ་ཡིན་ཏེ། གལ་ཏེ་ཡུལ་དང་ཤེས་པ་གཉིས། །གཅིག་གམ་འོན་ཏེ་ཐ་དད་ཡིན། །གལ་ཏེ་གཅིག་པ་ཡིན་འགྱུར་ན། །རྣམ་པ་དུ་མར་ཡོད་པའི་ཕྱིར། །ཤེས་པའང་དུ་མར་ཐལ་བར་འགྱུར། །ཡུལ་དང་ཤེས་པ་ཐ་དད་ན། །ཉན་ཐོས་
དག་ཏུ་ཅིས་མི་འགྲོ། །གཉིས་པའང་རིགས་པ་མ་ཡིན་ཏེ། །ཡུལ་ལ་ཚད་མས་གནོད་པ་བཞིན། །རིག་པ་དག་ལ་ཅིས་མི་གནོད། །གཞན་ཡང་རྣམ་པའི་འཁོར་ལོ་འདི། །འཁྲུལ་པའི་ཤེས་པས་གཟུང་བའམ། །འོན་ཏེ་མ་འཁྲུལ་པ་ཡིས་གཟུང་། །གལ་ཏེ་འཁྲུལ་པས་གཟུང་
འགྱུར་ན། །རྣམ་བདེན་པ་ཡི་དམ་བཅའ་བུད། །མ་འཁྲུལ་པ་ཡིས་གཟུང་འགྱུར་ན། །ཀུན་གྱིས་བདེན་པ་མཐོང་བར་འགྱུར། །རྣམ་པར་བརྫུན་པའི་འདོད་པ་ཡང་། །རྣམ་པ་གཉིས་སུ་ཤེས་བྱ་སྟེ། །ཚུ་རོལ་མཐོང་བའི་རིག་པ་དང་། །མྱ་ངན་འདས་པའི་ཡེ་ཤེས་སོ། །མྱ་ངན་འདས་
པའི་ཡེ་ཤེས་ལ། །རྣམ་པ་གཉིས་སུ་ཤེས་བྱ་སྟེ། །དྲི་བྱས་རང་རིག་དག་པའོ། །དྲི་མ་དང་བཅས་ལུགས་ཀྱིས་ནི། །རྣམ་པའི་འཁོར་ལོ་སྣ་ཚོགས་འདི། །མཉམ་གཞག་ངོ་ལ་མི་སྣང་སྟེ། །རྗེས་ཐོབ་དག་ལ་སྣང་བར་འདོད། །རང་རིག་དག་པའི་ལུགས་ཀྱིས་ནི། །མཐོང་ལམ་སྐྱེས་
པའི་རྗེས་ཐོགས་ལ། །རྣམ་པའི་འཁོར་ལོ་མེད་པར་འདོད། །མྱོང་བ་ཙམ་གྱིས་རིག་པ་དེ། །གང་ཡང་འཐད་པ་མ་ཡིན་ཏེ། །གང་ཡང་རྣམ་པར་རིག་པ་པ། །ཁྱོད་ཀྱི་ཤེས་པ་དོན་དམ་དེ། །སྐྱེས་ནས་ཡོད་དམ་མ་སྐྱེས་པར། །གལ་ཏེ་སྐྱེས་ནས་ཡོད་པ་ན། །རང་ལས་སྐྱེའམ་གཞན་
ལས་སྐྱེ། །གལ་ཏེ་རང་ལས་སྐྱེ་ཞེ་ན། །རང་ཉིད་གྲུབ་བམ་མ་གྲུབ་ལས། །གྲུབ་པ་དག་ལས་སྐྱེ་མི་དགོས། །མ་གྲུབ་པ་ལ་སྐྱེ་མི་སྲིད། །གལ་ཏེ་གཞན་ལས་སྐྱེ་ཞེ་ན། །རྟག་པའམ་ནི་མི་རྟག་པ། །རྟག་པ་དག་ལས་སྐྱེ་ཞེ་ན། །འགྱུར་མེད་ཕྱིར་ན་རྒྱུར་མི་བཏུབ། །མི་རྟག་པ་
ལས་སྐྱེ་ཞེ་ན། །མི་རྟག་དུས་ཀྱིས་བསྡུས་པའི་ཕྱིར། །འདས་དང་མ་འོངས་ད་ལྟར་གསུམ། །གང་ལས་སྐྱེ་བ་དྲི་བར་བྱ། །འདས་དང་མ་འོངས་རྣམ་པ་གཉིས། །མེད་པའི་ཕྱིར་ན་རྒྱུར་མི་རུང་། །ད་ལྟར་དག་ལས་སྐྱེ་ཞེ་ན། །རྒྱུ་འབྲས་དུས་མཉམ་འགྱུར་བའི་ཕྱིར། །བསྐྱེད་བྱ་

སྐྱེད་བྱེད་མི་རིགས་ཏེ། །སྐྱེས་ནས་ཡོད་པའི་དམ་བཅའ་ཉམས། །གལ་ཏེ་མ་སྐྱེས་ཡོད་ཅེ་ན། །མ་སྐྱེས་ཡོད་པ་མི་སྲིད་དེ། །དཔེར་ན་ནམ་མཁའི་མེ་ཏོག་བཞིན། །དེས་ན་གདོན་གྱིས་ཟིན་པ་ཡི། །རིག་པ་དངོས་པོར་འདོད་པ་དག །ཐར་པའི་མིང་ཡང་མི་སྲིད་
དེ། །རང་ཉིད་ཕུང་བར་བྱེད་དུ་ཟད། །དབུ་མ་ལ་ཡང་གཉིས་ཡོད་དེ། །ཆོས་རྣམས་སྒྱུ་མར་སྨྲ་བ་དང་། །རབ་ཏུ་མི་གནས་སྨྲ་བའོ། །སྒྱུ་མའི་གྲུབ་མཐའ་རིགས་མིན་ཏེ། །སྒྱུ་མ་ཚད་མས་མ་གྲུབ་དང་། །སྒྱུ་མ་ཡིན་ཕྱིར་བདེན་པ་མིན། །དེས་ན་སྒྱུ་མ་ཉམས་པར་འགྱུར། །རབ་ཏུ་
མི་གནས་འདོད་གཞུང་ནི། །རྣམ་པ་གཉིས་སུ་ཤེས་བྱ་སྟེ། །དོན་དམ་གཤིས་ཀྱི་བདེན་པ་དང་། །ཀུན་རྫོབ་དག་གི་བདེན་པའོ། །དོན་དམ་བདེན་པ་རྣམ་པ་གཉིས། །རྣམ་གྲངས་དང་ནི་རྣམ་གྲངས་མིན། །ཀུན་རྫོབ་བདེན་པ་རྣམ་གཉིས་ཏེ། །ཡང་དག་པ་དང་ལོག་པའོ། །འདི་དག་གྲུབ་
མཐའ་མཆོག་ཡིན་ཏེ། །བླ་མེད་གསང་སྔགས་ཐེག་པ་ཡང་། །དེ་ལས་གུད་ན་མེད་ཕྱིར་རོ། །འོ་ན་ཕ་རོལ་ཕྱིན་པ་དང་། །གསང་སྔགས་ཐེག་པ་ཁྱད་མེད་དམ། །སྙམ་དུ་སེམས་དཔའི་གང་ཟག་ལ། །དོན་ལ་ཁྱད་པར་རྡུལ་ཙམ་མེད། །ཐབས་དང་ལམ་གྱི་བྱེ་བྲག་ལ། །ཁྱད་པར་བསམ་
གྱིས་མི་ཁྱབ་སྟེ། །དེ་སྐད་དུ་ཡང་། དོན་གཅིག་ན་ཡང་མ་རྨོངས་དང་། །ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་པས། །སྔགས་ཀྱི་ཐེག་པ་ཁྱད་པར་འཕགས། །ཞེས་པའོ། །དེ་ལྟ་བུའི་ཐེག་པ་སྣ་ཚོགས་ཀྱི་སྒོ་ནས་འགྲོ་བའི་དོན་བྱེད་པ་པོ་དེ་ཡང་ཡེ་ཤེས་
སེམས་དཔའ་ཁྱོད་ཉིད་ཡིན་ནོ། །ཐེག་པ་གསུམ་ནི་ཞེས་པ་ནི་ཉན་ཐོས་དང་། རང་རྒྱལ་བ་དང་། བྱང་ཆུབ་སེམས་དཔའི་ཐེག་པའོ། །ངེས་འབྱུང་ལ་ཞེས་པ་ནི། ས་དང་པོའི་བདེན་པ་ཙམ་ནི་ཐེག་པ་གསུམ་གྱིས་ཐོབ་པར་སྨྲ་ལ། མཐར་ཐུག་བཅུ་གཅིག་པའི་ཡེ་ཤེས་ནི་ཁྱད་པར་
བླ་ན་མེད་པའི་ཐེག་པ་ཁོ་ནས་ཐོབ་པའི་ཕྱིར། ཐེག་པ་གཅིག་གི་འབྲས་བུར་གནས། །ཞེས་པའོ། །ཉོན་མོངས་ཁམས་རྣམས་དག་པའི་བདག །ཅེས་པ་ནི་འཁོར་བའི་འབྲས་བུ་དག་པར་བྱེད་པའོ། །ལས་ཀྱི་ཁམས་ནི་ཟད་བྱེད་པ་ནི་འཁོར་བའི་རྒྱུ་དག་པར་བྱེད་པའོ། །ཆུ་བོ་རྒྱ་

མཚོ་ཀུན་ལས་བརྒལ། །ཞེས་པ་ནི་འདོད་པའི་ཆུ་བོ་དང་། སྲིད་པའི་ཆུ་བོ་དང་། མ་རིག་པའི་ཆུ་བོ་དང་། བདག་ཏུ་ལྟ་བའི་ཆུ་བོ་སྟེ། དེ་དག་རྒྱ་མཚོ་དང་འདྲ་ཞིང་རྒལ་དཀའ་བས་ན་རྒྱ་མཚོ་ཞེས་བྱའོ། །ཀུན་ལས་བརྒལ་ཞེས་པ་ནི་དེ་དག་ཀུན་ལས་ཐར་པའོ། །ཐབས་གང་གིས་རྒལ་ཞེ་ན།
སྦྱོར་བའི་དགོན་པ་ཞེས་བྱ་བ་སྟེ་སྦྱོར་བའི་བསོད་ནམས་དང་ཡེ་ཤེས་ཀྱི་ཚོགས་ཟུང་དུ་འཇུག་པའོ། །དགོན་པ་ནི་དགོན་པ་ཞེས་བྱ་དབེན་པ་ཞེས་བྱ་སྟོང་པ་ཞེས་བྱ་སྟེ། དེ་ལྟར་ཚོགས་གཉིས་དང་སྟོང་པ་ཉིད་བསྒོམས་པ་ལས་བྱུང་ཞེས་བྱའོ། །ཉོན་མོངས་ཞེས་པ་ནི་འདོད་ཆགས་དང་།
ཞེ་སྡང་དང་། གཏི་མུག་དང་། ང་རྒྱལ་དང་། ཕྲག་དོག་དང་། ལོག་པར་ལྟ་བའོ། །ཉེ་བ་ཞེས་པ་ནི་ཉེ་བའི་ཉོན་མོངས་པ་ཉི་ཤུ་སྟེ་འདི་ལྟར་ཁྲོ་བ་དང་། འཁོན་དུ་འཛིན་པ་དང་། འཆབ་པ་དང་། འཚིག་པ་དང་། སེར་སྣ་དང་། སྒྱུ་དང་། གཡོ་དང་། རྒྱགས་པ་དང་།
ངོ་ཚ་མེད་པ་དང་། ཁྲེལ་མེད་པ་ལ་སོགས་པའོ། །ཀུན་ཉོན་མོངས་ཞེས་པ་ནི་ཉོན་མོངས་པ་ཅན་གྱི་ཡིད་དོ། །བག་ཆགས་བཅས་པ་ཞེས་པ་ནི་ཀུན་གཞིའི་རྣམ་པར་ཤེས་པའོ། །གཏན་སྤངས་པ་ཞེས་པ་ནི་དེ་དག་ལས་གྲོལ་བའོ། །དེ་ལྟར་རང་གི་དོན་ཐུགས་སུ་ཆུད་ནས་འགྲོ་
བའི་དོན་དུ་སྙིང་རྗེ་ཆེན་པོ་ཤེས་རབ་ཅེས་སྨོས་ཏེ། སྙིང་རྗེ་དང་ཤེས་རབ་ཀྱི་སྒོ་ནས་དོན་ཡོད་པར་འགྲོ་བའི་དོན་བྱེད་པའོ། །འདུ་ཤེས་ཀུན་གྱི་དོན་སྤངས་ཤིང་། །ཞེས་པ་ནི་མཚན་མར་འཛིན་པ་ལས་གྲོལ་བའོ། །རྣམ་ཤེས་ཞེས་པ་ནི་འཛིན་པའི་ཤེས་པའོ། །དོན་ཞེས་པ་ནི་
ཕྱི་རོལ་གྱི་ཡུལ་ལོ། །དེ་ལྟར་ཡུལ་ཅན་གྱི་ཤེས་པ་ལས་གྲོལ་བས་ན་འགོག་ཅེས་བྱའོ། །སེམས་ཅན་ཀུན་ཡིད་ཡུལ་དང་ལྡན། །ཞེས་པ་ནི་གདུལ་བྱའི་ཤེས་པ་ལ་ལྷའི་སྐུར་སྣང་བའོ། །སངས་རྒྱས་ཀུན་གྱི་ཐུགས་རིགས་པ། །ཞེས་པ་ནི་རྣམ་པར་མི་རྟོག་པའི་ཡེ་ཤེས་ཀྱི་དོན་ཁོང་
དུ་ཆུད་པའོ། །སེམས་ཅན་ཀུན་གྱི་ཡིད་ལ་གནས། །ཞེས་པ་ནི་རྣམ་པར་མི་རྟོག་པའི་ཡེ་ཤེས་དེ་འགྲོ་བ་ཐམས་ཅད་ཀྱི་རྒྱུད་ལ་གནས་པའོ། །དེ་དག་སེམས་དང་མཐུན་པར་འཇུག །ཅེས་པ་ནི་འགྲོ་བ་དེ་དག་གི་བློའི་བྱེ་བྲག་གི་སྒོ་ནས་ཆོས་སྟོན་པའོ། །སེམས་ཅན་ཀུན་ཡིད་

ཚིམ་པར་བྱེད། །སེམས་ཅན་ཀུན་གྱི་ཡིད་དགའ་བ། །གྲུབ་པ་མཐར་ཕྱིན་འཁྲུལ་པ་མེད། །ཅེས་པ་ནི་འགྲོ་བའི་དོན་མཐར་བྱིན་པའོ། །ནོར་བ་ཐམས་ཅད་རྣམ་པར་སྤངས། །ཞེས་པ་ནི་ལོག་པར་རྟོག་པ་སྤངས་པའོ། །དོན་གསུམ་ཐེ་ཚོམ་མེད་པའི་བློ། །
ཞེས་པ་ནི་དུས་གསུམ་དུ་ཡིད་གཉིས་དང་བྲལ་བའི་བློ་དང་ལྡན་པའོ། །ཀུན་དོན་ཞེས་པ་ནི་འགྲོ་བ་ཐམས་ཅད་ཀྱི་དོན་བྱེད་པ་སྟེ། གྲུབ་མཐས་བློ་བསྒྱུར་བ་བྱང་ཆུབ་སེམས་དཔའ་མན་ཆད་ནས་མུ་སྟེགས་ཡན་ཆད་ཀྱི་དོན་བྱེད་དོ་ཞེས་བྱ་བའི་ཐ་ཚིག་གོ། །མུ་སྟེགས་ཀྱི་དོན་ཇི་ལྟར་བྱེད་
ཅེ་ན། ཡོན་ཏན་གསུམ་གྱི་བདག་ཅེས་སྨོས་ཏེ། སྙིང་སྟོབས་དང་རྡུལ་དང་མུན་པ་གསུམ་གྱིས་དོན་བྱེད་པའོ། །གཞན་ཡང་གྲུབ་མཐའ་བློ་འགྱུར་བ་དག་གིས་དོན་ཡང་བྱེད་པས་ན་ཀུན་དོན་ཞེས་བྱའོ། །ཕུང་པོ་ལྔ་ཞེས་པ་ནི་གཟུགས་དང་། ཚོར་བ་དང་། འདུ་ཤེས་དང་།
འདུ་བྱེད་དང་། རྣམ་པར་ཤེས་པའི་ཕུང་པོའོ། །ཕུང་པོ་དེ་དག་ཆོས་གཞན་དུ་བཞག་ནས། དེ་དག་དུས་གསུམ་གྱི་ཆས་གཞིག་ན་གང་ཡང་མི་དམིགས་ཏེ་རང་བཞིན་མེད་པར་འགྱུར་རོ། །འདིར་རྒལ་བ་འོན་ཏེ་དུས་གསུམ་གྱི་ཆས་གཞིག་ན་སྐད་ཅིག་མ་ཡོད་པར་འགྱུར་རོ་ཞེ་ན།
སྐད་ཅིག་ཐམས་ཅད་བྱེ་བྲག་ཕྱེད། །ཅེས་བྱ་བ་སྨོས་ཏེ་སྐད་ཅིག་མ་ཡང་དུས་གསུམ་གྱི་ཆས་གཞིག་ན་མེད་པར་འགྱུར་རོ། །དཔེར་ན་རྡུལ་ཕྲ་རབ་ལ་ཕྱོགས་ཀྱི་ཉེས་པ་ཡོད་པ་བཞིན་ནོ། །སྐད་ཅིག་གཅིག་གིས་རྫོགས་སངས་རྒྱས། །ཞེས་པ་ནི་ས་བཅུ་པ་ནས་ས་བཅུ་གཅིག་པའི་བར་
ལ་དུས་ཀྱི་མཐའི་སྐད་ཅིག་མས་རྟོགས་སོ་ཞེས་པའི་དོན་ཏོ། །ཡང་ན་ལྷ་སྐད་ཅིག་དྲན་རྫོགས་ཀྱིས་བསྐྱེད་པར་ཤེས་པར་བྱའོ། །སངས་རྒྱས་ཀུན་གྱི་རང་བཞིན་འཆང་། །ཞེས་པ་ནི་རྡོ་རྗེ་ལྟ་བུའི་ཏིང་ངེ་འཛིན་ཏོ། །ལུས་མེད་ཅེས་པ་ནི་རྣམ་རྟོག་གི་ལུས་དང་བྲལ་བ་སྟེ་ཆོས་ཀྱི་སྐུའོ། །ལུས་
ཏེ་ཞེས་པ་ལོངས་སྤྱོད་རྫོགས་པའི་སྐུའོ། །ལུས་ཀྱི་མཆོག་ཅེས་པ་སྤྲུལ་པའི་སྐུའོ། །མཐའ་ནི་རྟོགས་པ་པོ་ཞེས་བྱ་སྟེ་སྐུ་ཐམས་ཅད་ལ་མཁས་པའོ། །གཟུགས་རྣམས་སྣ་ཚོགས་ཀུན་དུ་སྟོན། །ཞེས་པ་ནི་གང་དང་གང་གིས་འདུལ་བ་ལ་དེ་དང་དེའི་གཟུགས་ཀྱིས་འདུལ་བའོ། །ནོར་བུ་

ཆན་པོ་རིན་ཆེན་ཏོག །ཅེས་པ་ནི་དགོས་འདོད་འབྱུང་བའི་དཔེ་བསྟན་པའོ། །སངས་རྒྱས་ཀུན་གྱིས་རྟོགས་བྱ་བ། །ཞེས་པས་ནི་མཁྱེན་པར་བྱ་བའམ་ཤིས་པར་བྱ་བ་སྟེ། སངས་རྒྱས་བྱང་ཆུབ་བླ་ན་མེད། །ཅེས་པ་ནི་མི་གནས་པའི་མྱ་ངན་ལས་འདས་པའོ། །དེའི་མཚན་ཉིད་
ཅི་འདྲ་ཞེ་ན། གསང་སྔགས་ལས་བྱུང་ཡི་གེ་མེད། །ཅེས་པ་སྟེ་བློའི་ཡུལ་ཐམས་ཅད་དང་བྲལ་བའོ། །དེ་ལྟ་བུའི་སྐྱེ་བ་མེད་པའི་དོན་དེ་ལས་སྐྱེ་བའི་ཆོ་འཕྲུལ་སྣ་ཚོགས་སུ་འཆར་བས། གསང་སྔགས་ཆེན་པོ་རིགས་གསུམ་པ། །ཞེས་སྨོས་ཏེ་སྐུ་གསུང་ཐུགས་སྣ་ཚོགས་
སུ་ཤར་བའི་དོན་ཏོ། །གསང་སྔགས་དོན་ཀུན་སྐྱེད་པ་པོ། །ཞེས་པ་ནི་དོན་ཀུན་ཞི་བ་དང་། རྒྱས་པ་དང་། དབང་དང་། དྲག་པོའོ། །དེ་ལ་ཞི་བའི་ལས་ནི་རྒྱུད་འདི་བྲིས་པ་འམ། བཟུང་བའམ། བཅངས་པའམ། བཀླགས་པ་ཙམ་གྱིས་མི་མཐུན་པའི་ཕྱོགས་ཐམས་ཅད་
ཞི་བར་འགྱུར་བ་དང་། རྒྱས་པའི་ལས་ནི་ལོངས་སྤྱོད་ལ་སོགས་པ་འཕེལ་བ་དང་བསོད་ནམས་ཀྱི་ཕུང་པོ་ཡོངས་སུ་རྒྱས་པར་འགྱུར་བའོ། །དབང་གི་ལས་ནི་གང་དང་གང་འདོད་པ་དེ་རེངས་པ་དང་འགུགས་པར་བྱེད་དོ། །དྲག་པོའི་ལས་ནི་གསད་པ་དང་། བཅད་པ་དང་།
མནན་པ་དང་། གཟིར་བའི་ལས་བྱེད་དེ། ལས་དེ་དག་ཀྱང་འཁྲུལ་འཁོར་གྱི་སྦྱོར་བས་ཀྱང་ཤེས་པར་བྱའོ། །འཁྲུལ་འཁོར་གྱི་རིམ་པ་ནི་འདི་ཡིན་ཏེ། རོའི་རས་སམ་ཞིང་གི་པགས་པ་ལ། ནག་པོའི་སྒྲོ་རྩས་སྨྱུ་གུ་བྱས་ཏེ་གྲིར་ཤི་བའི་ཁྲག་དང་དུག་དང་སྦགས་ཏེ། སྔགས་
པ་གཤིན་རྗེ་གཤེད་ཀྱི་ང་རྒྱལ་དང་ལྡན་པས་མཚན་ཕྱེད་ན་ཁ་ལྷོར་བལྟས་ཏེ་འཁོར་ལོ་དག་བྲི་བར་བྱའོ། །ཐིག་བཞིའི་ལེ་ཚེ་དགུ་པ་ལ། །ཕྱེད་ཕྱེད་བགོས་པའི་སུམ་ཅུ་གཉིས། །མ་ཧེའི་ལྟོ་བར་བྲི་བར་བྱ། །གཉིས་ཀྱི་བར་དུ་བསྒྲུབ་བྱ་གཞུག །མཱ་ར་ཡ་དང་བཅས་པ་བྲི། །བསྙེན་
པའི་འཁོར་ལོ་འདི་ལྟ་སྟེ། །འཁོར་ལོའི་རྩིབས་ནི་བཅུ་པ་ལ། །ཡི་གེ་བཅུ་པ་བྲི་བར་བྱ། །ལྟེ་བ་ལ་ནི་བསྒྲུབ་བྱ་དགོད། །དེ་དག་ལ་དགོད་པའི་སྔགས་ནི་འདི་ཡིན་ཏེ། ཡ་མ་རཱ་ཛ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་ར་ཡ་ཀྵེ་ཡ། ཡཀྵེ་ཡཙྪ་ནི་རཱ་མ་ཡ། ཆེ་གེ་

མོ་མཱ་ར་ཡ་ཕཊ། ཨོཾ་ཧྲཱིཿ་ཥྚྲྀཿཝི་ཀྲྀ་ཏཱ་ན་ན་ཧཱུཾ་ཕཊ་ཅེས་པས་བསྐོར་རོ། དེའི་རིམ་པ་ནི་འདི་ཡིན་ཏེ། རང་གི་ཉེས་པས་མ་གོས་པའི་འཁོར་ལོ་ཐོད་པ་ཁ་སྦྱོར་དུ་གསལ་ཏེ་དགུག་པའི་ལས་དེ་གོང་དུ་སོང་བ་དང་། གར་སྦྱིན་བཟང་པོས་ལེགས་པར་སྦྱར་ཏེ།
བསྙེན་པ་རྫོགས་པ་དང་། མནན་པ་དང་། གཏུབ་པ་དང་། སྦྱིན་སྲེག་ལ་སོགས་པ་ཅི་རིགས་པ་བརྩམ་པར་བྱའོ། །ཡང་ན་གསང་སྔགས་ཀྱི་དོན་དེ་དག་ཐམས་ཅད་བསྐྱེད་པ་ནི་ཡེ་ཤེས་སེམས་དཔའ་ཁྱོད་ཡིན་བྱ་བའི་དོན་ཏོ། །ཐིག་ནི་དྲང་པོ་སྟེ་དོན་མ་ནོར་བའོ། །ལེ་ནི་ཀུན་
ལ་ཁྱབ་པའོ། །སྟོང་པ་ནི་རང་བཞིན་མེད་པའོ། །ཡི་གེ་ནི་ཀུན་རྫོབ་མཚོན་པ་སྟེ་སེམས་ཅན་ཐམས་ཅད་དོ། །རྒྱ་ཞེས་པ་ནི་བྱེ་བྲག་གམ་དུ་མ་མཚོན་པའི་ཚིག་གོ། །རྣམ་པ་ཀུན་ལྡན་ཞེས་པ་ནི་རྣམ་པ་མི་འདྲ་བ་ལ་བྱ་སྟེ། ཀུན་རྫོབ་ལྷའི་འཁོར་ལོ་ཐམས་ཅད་དོ། །རྣམ་པ་མེད་ཅེས་པ་
ནི་རྫོགས་པའི་རིམ་པ་སྟེ་ལྷའི་འཁོར་ལོ་རང་བཞིན་མེད་པར་ཤེས་པའོ། །ཡང་ན་རྣམ་པ་ཀུན་ཞེས་པ་ནི་སེམས་ཙམ་རྣམ་པ་བདེན་པར་སྨྲ་བའོ། །རྣམ་པ་མེད་ཅེས་པ་ནི་རྣམ་པ་བརྫུན་པར་སྨྲ་བའོ། །བཅུ་དྲུག་ནི་རྩ་འདབ་མ་བཅུ་དྲུག་གོ། །ཕྱེད་ནི་རྩ་འདབ་མ་བརྒྱད་དེ་སྙིང་གའོ། །ཕྱེད་གཉིས་
པ་ནི་འཁོར་ལོ་བཞིའོ། །ཐིག་ལེ་ནི་ཁུ་བ་སྟེ་བྱང་ཆུབ་ཀྱི་སེམས་སོ། །རྩ་དེ་དག་ནི་ཡུར་བ་དང་འདྲ་སྟེ་ཁྲག་དང་ཞག་དང་ཐིག་ལེའི་རྟེན་བྱེད་པའོ། །ཐིག་ལེ་དེ་དག་གི་འོད་ནི་ཡི་གེའི་རྣམ་པར་གནས་པའོ། །དེ་ཡང་རེ་ཞིག་སྒྲུབ་པ་པོ་གཤིན་རྗེ་གཤེད་ཡབ་ཡུམ་དང་བཅས་པའི་ང་རྒྱལ་
དུ་ཞུགས་ཏེ། རྩའི་ཏིང་ངེ་འཛིན་བསྐྱེད་པ་ནི་ཕྱི་རོལ་གྱི་ལྷའི་རྣམ་པ། ནང་ནི་རྩའི་རྣམ་པ་སྟེ། གཡས་པ་ནི་ར་ས་ནཱའོ། །གཡོན་པ་ནི་ལ་ལ་ནཱའོ། །དབུས་མ་ནི་ཨ་ཝ་དྷཱུ་ཏཱི་ཞེས་བྱ་སྟེ། དེ་ཡང་མཚན་ཉིད་རྣམ་བཞི་དང་ལྡན་པ། དཀར་བ། སེར་བ། དམར་བ། སྣུམ་པ། གནས་
ནི་སྒལ་ཚིགས་ལ་བརྟེན་སྲོག་རྩ་ཞེས་གྲགས་སོ། །སྦོམ་ཕྲ་ནི་འབྲས་ཀྱི་སོག་མའི་ཚད་དོ། །རིང་ཐུང་སྤྱི་བོ་བདེ་བ་ཆེན་པོ་ནས་གསང་བའི་གནས་སུ་སླེབ་པའོ། །རྩ་ཆེན་པོ་འདི་ནི་དཔེར་ན་ཆུ་བོ་ཆེན་པོ་དང་འདྲ་སྟེ། ཆུ་བྲན་ཐམས་ཅད་དེའི་ནང་དུ་འདུ་ཞིང་དེར་ཁ་བལྟས་པའོ། །དེ་བཞིན་དུ་

རྩ་ཐམས་ཅད་ཀྱང་འདིའི་ནང་དུ་འདུ་ཞིང་འདི་ལ་ཁ་བལྟས་པའོ། །འཁོར་ལོ་བཞིའི་ཡང་སྲོག་ཤིང་གི་ཚུལ་དུ་གནས་པའོ། །དེ་ལ་འོག་རླུང་བསྡམས་ཏེ་ཙཎྜ་ལཱི་རབ་ཏུ་སྦར་བས་ཨ་ཝ་དྷཱུ་ཏཱིའི་ནང་དུ་ཞུགས་ཏེ། སྤྲུལ་པའི་འཁོར་ལོའི་རྩའི་ནང་ཐམས་ཅད་བསྲོས་པས། ཐིག་ལེ་ཞུན་མར་གྱི་
ཚུལ་དུ་གནས་པ་དེ་ཞུ་ནས། གསང་བའི་གནས་སུ་བདེ་བ་འབར་བར་བསམ། དེ་ནས་ཡང་ཙཎྜ་ལཱིའི་མེ་ཆེན་པོ་རབ་ཏུ་འབར་བས། སྙིང་གའི་ཆོས་ཀྱི་འཁོར་ལོའི་རྩ་ཐམས་ཅད་རབ་ཏུ་བསྲོས་ཏེ་ཐིག་ལེ་ཐམས་ཅད་རབ་ཏུ་ཞུ་ནས་བདེ་བ་ཉམས་སུ་མྱོང་བར་བསམ་མོ། །དེ་ནས་ཡང་ཙཎྜ་ལཱི་
རབ་ཏུ་སྦར་བས་མགྲིན་པ་ལོངས་སྤྱོད་ཀྱི་རྩ་ཐམས་ཅད་རབ་ཏུ་བསྲོས་ཏེ། ཐིག་ལེ་ཐམས་ཅད་ཞུ་ནས་བདེ་བ་ཉམས་སུ་མྱོང་བར་བསམ། དེ་ནས་ཙཎྜ་ལཱི་རབ་ཏུ་སྦར་བས་སྤྱི་བོ་བདེ་བ་ཆེན་པོའི་རྩ་ཐམས་ཅད་རབ་ཏུ་བསྲོས་ཏེ། ཐིག་ལེ་ཐམས་ཅད་ཞུ་ནས་བདེ་བ་ཉམས་སུ་མྱོང་བར་བསམ་མོ། །
དེ་ལྟར་རྩ་རླུང་ཐིག་ལེ་རིམ་པ་བཞིན་དུ་ཉམས་སུ་བླངས་སོ། །ཅན་ཞེས་པ་ལྡན་པའི་ཚིག་སྟེ་མངོན་པར་ཤེས་པ་དྲུག་དང་རྫུ་འཕྲུལ་བསམ་གྱིས་མི་ཁྱབ་པ་དང་ལྡན་པར་འགྱུར་རོ། །མཚན་བཅས་ཀྱི་རྫོགས་པའི་རིམ་པ་བསྟན་པའོ། །ཡང་ན་བཅུ་དྲུག་ནི་སྟོང་པ་བཅུ་དྲུག་སྟེ་ཡུལ་ལོ། །བརྒྱད་ནི་
རྣམ་པར་ཤེས་པའི་ཚོགས་བརྒྱད་དེ་ཡུལ་ཅན་ནོ། །བཞི་ནི་ཨེ་ཝཾ་མ་ཡཱ་སྟེ་འཁོར་འདས་བསྟན་པའི་ཡི་གེའོ། །འདི་ལ་སློབ་དཔོན་ཁ་ཅིག་ནི་ཕྱིའི་དཀྱིལ་འཁོར་གྱི་ཐིག་གི་རིམ་པར་འདོད་པ་དག་ཀྱང་ཡོད་དོ། །ཡན་ལག་མེད་པའི་རྩིས་ལས་འདས། །ཞེས་པ་ནི་སྤྱིར་རྒྱུད་འདིའི་བསྒོམ་པ་
ཡིན་ཏེ། རྩིས་གདབ་ཐམས་ཅད་དང་བྲལ་བ་ངོ་བོ་གང་དུ་ཡང་མ་གྲུབ་པ་ཅི་ལ་ཡང་བསམ་དུ་མེད་པ། ཐ་སྙད་དང་བློའི་ཆོས་ཐམས་ཅད་ལས་འདས་པའོ། །དེ་བས་ན་ཡན་ལག་ནི་སྤྲོས་པ་མཚོན་པ་སྟེ་ཚིག་གི་ཚོགས་སོ། །རྩིས་ལས་འདས་ཞེས་པ་ནི་འཁྲུལ་པ་ཞེས་པ་སྟེ་བརྟགས་པའི་
དངོས་པོ་ནུབ་པའོ། །དེ་ལྟ་བུ་དེ་ལ་མཉམ་པར་གཞག་པ་ནི་མཉམ་གཞག་ཆེན་པོའོ། །བསམ་གཏན་བཞི་པ་ཞེས་པ་ནི་འཇིག་རྟེན་པའི་བསམ་གཏན་ཏེ་དང་པོ་དང་། གཉིས་པ་དང་། གསུམ་པ་དང་། བཞི་པའོ། །རྩེ་མོ་ཅན་ཞེས་པ་ནི་དེ་དག་ལས་ཁྱད་པར་དུ་གྱུར་པ་སྟེ། གོང་དུ་སྨོས་

པའི་སྟོང་པ་ཉིད་དོ། །བསམ་གཏན་ཡན་ལག་ཀུན་ཞེས་པ་ནི་དཔའ་བར་འགྲོ་བ་ལ་སོགས་པའི་ཏིང་ངེ་འཛིན་བསམ་གྱིས་མི་ཁྱབ་པ་དང་ལྡན་པའོ། །ཤེས་ཤིང་ཞེས་པ་ནི་རྩིས་གདབ་དང་བྲལ་བའི་དོན་རྟོགས་པ་ལས་འབྱུང་ཞེས་བྱ་བའི་ཐ་ཚིག་གོ། །ཏིང་འཛིན་རིག་
དང་ཞེས་པ་ནི་འཇིག་རྟེན་དང་འཇིག་རྟེན་ལས་འདས་པའི་ཏིང་ངེ་འཛིན་ཐམས་ཅད་ཁོང་དུ་ཆུད་པའོ། །རྒྱུད་རིག་པ་ཞེས་པ་ནི་ཏིང་ངེ་འཛིན་གོམས་པའི་འབྲས་བུ་སྟེ་འགྲོ་བ་ཐམས་ཅད་ཀྱི་སེམས་ཤེས་པའོ། །དེ་ལྟ་བུའི་ཏིང་ངེ་འཛིན་སུས་རྟོགས་པ་དེ་ལ་ཏིང་འཛིན་ལུས་ཅན་ཞེས་བྱ་སྟེ།
དངོས་སུ་ཡེ་ཤེས་སེམས་དཔའ་ལ་ལྡན་ཞེས་བྱ་བའི་དོན་ཏོ། །ལུས་ཀྱི་མཆོག་ཅེས་པ་དང་། ལོངས་སྤྱོད་རྫོགས་སྐུ་ཀུན་གྱི་རྒྱལ། །ཞེས་པ་དང་། སྤྲུལ་པའི་སྐུ་སྟེ་སྐུ་ཡི་མཆོག །ཅེས་པ་ནི་རྒྱུད་འདིའི་འབྲས་བུ་སྟོན་པའི་ཚིག་སྟེ། དེ་ཡང་སྐུ་རྣམ་པ་གསུམ་པོ་ནི་འབྲས་བུ་ཡིན་པས་ཀུན་
རྫོབ་ཀྱི་བདེན་པ་ཡིན་ལ། ངོ་བོ་ཉིད་ཀྱི་སྐུ་ནི་དབྱེར་མི་ཕྱེད་པ་སྟེ་དོན་དམ་པའི་བདེན་པའོ། །ཕྱོགས་བཅུར་སྤྲུལ་པ་སྣ་ཚོགས་འགྱེད། །ཅེས་པ་ནི་སྤྲུལ་པའི་སྐུའི་ཁྱད་པར་གྱི་ཡོན་ཏན་ནོ། །ཁྱད་པར་ཇི་ལྟ་བུ་དང་ལྡན་ཞེ་ན། ཇི་བཞིན་འགྲོ་བའི་དོན་བྱེད་པ། །ཞེས་བྱ་བ་སྨོས་ཏེ་
ཇི་ལྟར་འགྲོ་བ་དང་མཐུན་པའི་དོན་བྱེད་དོ་ཞེས་བྱ་བའི་ཐ་ཚིག་གོ། །ལྷ་ཡི་དབང་པོ་ཞེས་བྱ་བ་ཁྱབ་འཇུག་གོ། །ལྷའི་བདག་པོ་ཞེས་པ་ནི་བརྒྱ་བྱིན་ནོ། །ལྷ་མིན་བདག་ཅེས་པ་ནི་རཱ་ཧུ་ལའོ། །ལྷ་ཡི་བླ་ཞེས་པ་ནི་གཟའ་ཕུར་བུའོ། །འཇོམས་བྱེད་ཅེས་པ་ནི་ལྷ་མ་ཡིན་གྱི་བདག་པོ་ཐགས་
བཟངས་རིས་སོ། །འཇོམས་བྱེད་ཕྱི་མས་ནི་སྲིན་པོའི་རྒྱལ་པོ་ལང་ཀ་མགྲིན་བཅུ། དབང་ཕྱུག་ཅེས་པ་ནི་མ་ཧཱ་དེ་བའོ། །འདིར་རྒལ་བ། འོ་ན་འཇམ་དཔལ་ཡེ་ཤེས་སེམས་དཔའ་ཁྱོད་འཇིག་རྟེན་པ་སྣ་ཚོགས་ཀྱི་གཟུགས་སུ་སྣང་བས་ན་སྲིད་པའི་ཉེས་པས་གོས་པར་ཐལ་ལོ་ཞེ་ན་མ་ཡིན་
ཏེ། སྲིད་པའི་དགོན་པ་ལས་བརྒལ་བ། །ཞེས་སྨོས་ཏེ་སྲིད་པ་ནི་གསུམ་མོ། །དགོན་པ་ནི་སྲིད་པའི་ཆོས་ལ་དོན་མེད་པ་སྟེ་སྟོང་པའོ། །ལས་བརྒལ་བ་ཞེས་པ་ནི་སྲིད་པའི་སྐྱོན་གྱིས་མ་གོས་པའི་དོན་ཏོ། །སྟོན་པ་གཅིག་པུ་ཞེས་པ་ནི་འགྲན་ཟླ་མེད་པའོ། །འགྲོ་བའི་བླ་ཞེས་པ་ནི་གོང་ན་མེད་

པའོ། །འཇིག་རྟེན་ཕྱོགས་བཅུར་རབ་གྲགས་པ། །ཞེས་པ་ནི་ཡེ་ཤེས་སེམས་དཔའ་དེ་ལས་གོང་ན་མེད་པ་འགྲན་ཟླ་མེད་པ་ཞེས་གྲགས་སོ། །ཆོས་ཀྱི་སྦྱིན་བདག་ཆེན་པོ་ཞེས་པ་ནི་ཟག་པ་མེད་པའི་དོན་སྟོན་པའོ། །བྱམས་པའི་ཞེས་པ་ནི་ཐམས་ཅད་ལ་བུ་གཅིག་པའི་ཕ་ལྟར་དགོངས་པའོ། །
གོ་ཆ་ནི་བར་ཆོད་བསྲུང་བ་སྟེ་ཞེ་སྡང་གིས་མི་ཚུགས་ཞེས་བྱ་བའི་དོན་ཏོ། །སྙིང་རྗེའི་ཞེས་པ་ནི་སེམས་ཅན་ཐམས་ཅད་སྡུག་བསྔལ་དང་བྲལ་བར་འདོད་པའི་བསམ་པ་ཅན་ནོ། །ཡ་ལད་བགོས་ཞེས་པ་ནི་སྟོད་གཡོགས་སོ། །སྟོད་གཡོགས་ཀྱི་གོ་ཆ་དེ་ལྟ་བུས་འགྲོ་བའི་དོན་རྒྱུན་མི་འཆད་
དོ་ཞེས་བྱ་བའི་དོན་ཏོ། །ཤེས་རབ་རལ་གྲི་མདའ་གཞུ་ཐོགས། །ཞེས་པ་ནི་ཕྱག་མཚན་ཏེ་གོ་སླའོ། །ཉོན་མོངས་པ་ནི་བརྒྱད་ཁྲི་བཞི་སྟོང་ངོ་། །མི་ཤེས་ཞེས་པ་ནི་མ་རིག་པའོ། །གཡུལ་ངོ་སེལ་ཞེས་པ་ནི་དེ་དག་འཇོམས་པར་བྱེད་པའོ། །དཔའ་བོ་ཞེས་པ་ནི་གཞན་གྱིས་མི་ཐུབ་པའོ། །
བདུད་དགྲ་ཞེས་པ་ནི་ཡེ་ཤེས་སེམས་དཔའོ། །བདུད་བཏུལ་བ་ཞེས་པ་ནི་བར་དུ་གཅོད་པ་ཐམས་ཅད་སེལ་བའོ། །བདུད་བཞིའི་འཇིགས་པ་སེལ་བར་བྱེད། །ཅེས་པ་ནི་ལྷའི་བུ་དང་། འཆི་བདག་དང་། ཉོན་མོངས་པ་དང་། ཕུང་པོའི་བདུད་རབ་ཏུ་སེལ་བའོ། །བདུད་ཀྱི་དཔུང་རྣམས་
ཕམ་བྱེད་པ། །ཞེས་པ་ནི་བདུད་འཁོར་དང་བཅས་པ་རླག་པར་བྱེད་པའོ། །རྫོགས་པའི་སངས་རྒྱས་ནི་ཡེ་ཤེས་སེམས་དཔའོ། །འཇིག་རྟེན་འདྲེན་ནི་འགྲོ་བ་རྣམས་འདྲེན་པར་མཛད་པའོ། །དེ་ལྟ་བུའི་ཡེ་ཤེས་སེམས་དཔའ་དེ་ནི་མཆོད་པའི་འོས་སོ། །བསྟོད་པའི་འོས་སོ། །ཕྱག་གི་
གནས་སོ། །དུས་རྟག་ཏུ་རི་མོར་བྱ་བའི་འོས་སོ། །བཀུར་བར་འོས་སོ། །བརྗོད་པར་བྱ་བའི་མཆོག་གོ། །ཕྱག་བྱ་བའི་འོས་སོ། །བླ་མ་རྣམས་ཀྱི་རབ་པོ། །འཇིག་རྟེན་གསུམ་པོ་གོམ་གཅིག་བགྲོད། །ཅེས་པ་ནི་སྐད་ཅིག་གིས་འགྲོ་བའི་དོན་ལ་ཁྱབ་པའོ། །འཁོར་བའི་སྐྱོན་གྱིས་མ་གོས་པས།
མཁའ་ལྟར་མཐའ་མེད་རྣམ་པར་གནོན། །ཞེས་སོ། །གསུམ་རིག་ཅེས་པ་ནི་ཡོད་པ་དང་མེད་པ་དང་གཉིས་མེད་དོ། །གཙང་མ་དག་པ་སྟེ་ཞེས་པ་ནི་མཐའ་ཡིས་མ་གོས་པའོ། །མངོན་ཤེས་དྲུག་ཅེས་པ་ནི་ལྷའི་མིག་གི་མངོན་པར་ཤེས་པ་དང་། རྣ་བ་དང་། གཞན་གྱི་སེམས་ཤེས་པའི་མངོན་

པར་ཤེས་པ་དང་། འཆི་འཕོ་དང་སྐྱེ་བ་ཤེས་པའི་མངོན་པར་ཤེས་པ་དང་། རྫུ་འཕྲུལ་གྱི་མངོན་པར་ཤེས་པ་དང་། ཟག་པ་ཟད་པའི་མངོན་པར་ཤེས་པ་དང་དྲུག་གོ། །རྗེས་དྲན་དྲུག་ཅེས་པ་ནི་སངས་རྒྱས་རྗེས་སུ་དྲན་པ་དང་། ཆོས་དང་། དགེ་འདུན་དང་། གཏོང་
བ་དང་། ལྷ་རྗེས་སུ་དྲན་པ་དང་། བླ་མ་རྗེས་སུ་དྲན་པ་དང་དྲུག་གོ། །བྱང་ཆུབ་སེམས་དཔའ་ཞེས་པ་ནི་རང་དོན་ཕུན་སུམ་ཚོགས་པའོ། །སེམས་དཔའ་ཆེ་ཞེས་པ་ནི་གཞན་དོན་ཕུན་སུམ་ཚོགས་པའོ། །རྫུ་འཕྲུལ་ཆེན་པོ་ཞེས་པ་ནི་རྫུ་འཕྲུལ་གྱི་རྐང་པ་བཞི་དང་ལྡན་པའོ། །
འཇིག་རྟེན་འདས་ཞེས་པ་ནི་འཁོར་བ་ལས་བསྒྲལ་ཞེས་བྱ་བའི་དོན་ཏོ། །ཤེས་རབ་ཕ་རོལ་ཕྱིན་པའི་མཐའ། །ཞེས་པ་ནི་ཐོས་པའི་ཤེས་རབ་དང་། བསམ་པའི་ཤེས་རབ་བོ། །ཤེས་རབ་ཀྱིས་ནི་དེ་ཉིད་ཐོབ། །ཅེས་པ་ནི་བསྒོམ་པའི་ཤེས་རབ་པོ། །དེ་ཉིད་ཐོབ་ཅེས་པ་ནི་རྡོ་རྗེ་ལྟ་
བུའི་ཏིང་ངེ་འཛིན་བརྙེས་པའོ། །ཏིང་ངེ་འཛིན་དེའི་མཚན་ཉིད་ནི་བདག་རིག་ཅེས་པ་ཡུལ་ཅན་ནོ། །གཞན་རིག་ཅེས་པ་ནི་ཡུལ་ལོ། །ཐམས་ཅད་སྤངས་ཞེས་པ་ནི་ཡུལ་དང་ཡུལ་ཅན་གྱི་ཤེས་པ་ཐམས་ཅད་སྤངས་ཞེས་པའི་དོན་ཏོ། །ཀུན་ལ་ཕན་པའི་གང་ཟག་མཆོག །ཅེས་པ་
ནི་རྡོ་རྗེ་ལྟ་བུའི་ཏིང་འཛིན་ལས་གྲོལ་བའི་དོན་ཏེ་གཟུགས་སྐུ་འཆར་བའོ། །དཔེར་བྱ་ཀུན་ལས་འདས་པ་སྟེ། །ཞེས་པ་ནི་འགྲན་ཟླ་དང་བྲལ་བའོ། །ཤེས་དང་ཞེས་པ་ནི་འཇལ་བར་བྱེད་པའི་རིགས་པའོ། །ཤེས་བྱའི་ཞེས་པ་ནི་གཞལ་བའི་ཡུལ་ལོ། །བདག་པོ་མཆོག་ཅེས་
པ་ནི་ཤེས་བྱ་ལ་མངའ་བརྙེས་པའི་དོན་ཏོ། །གཙོ་བོ་ཆོས་ཀྱི་སྦྱིན་བདག་སྟེ། །ཞེས་པ་ནི་ཁྱད་པར་བླ་ན་མེད་པའི་ཕྱག་རྒྱ་བཞིའི་དོན་སྟོན་པའོ། །འགྲོ་བའི་བསྙེན་བཀུར་གནས་ཀྱི་མཆོག །ཅེས་པ་ནི་བཤད་ཟིན་ཏོ། །ངེས་འབྱུང་གསུམ་པོ་བགྲོད་རྣམས་ཀྱི། །ཞེས་པ་ནི་ཉན་ཐོས་དང་།
རང་རྒྱལ་བ་དང་། བྱང་ཆུབ་སེམས་དཔའི་ཐེག་པའོ། །དོན་གྱི་དམ་པ་རྣམ་དག་དཔལ། །ཞེས་པ་ནི་དེ་དག་ཐམས་ཅད་ཁོང་དུ་ཆུད་ཅེས་པའི་དོན་ཏོ། །འཇིག་རྟེན་གསུམ་ནི་འདོད་ཁམས་ལ་སོགས་པའོ། །སྐལ་བཟང་ཆེ་ཞེས་པ་ནི་ཕྱིན་ཅི་མ་ལོག་པ་དང་བློ་འབྱོར་པའོ། །དཔལ་ལྡན་

འབྱོར་པ་ཀུན་བྱེད་པ། །ཞེས་པ་ནི་འགྲོ་བ་ཐམས་ཅད་ལ་འདུལ་བྱེད་ཀྱི་སྐུ་སྟོན་པའོ། །དེ་སུ་ཡིན་སྙམ་པ་ལ། འཇམ་དཔལ་དཔལ་དང་ལྡན་པའི་མཆོག །ཅེས་བྱའོ། །ད་ནི་ཡེ་ཤེས་རྣམ་པ་ལྔའི་སྒོ་ནས་འདུད་ཉི་ཤུས་བསྟོད་དེ། ཚིག་བཞིའི་ཚིགས་སུ་བཅད་པ་རེ་རེ་ཞིང་ཡེ་ཤེས་རེ་རེ་ལ་
བསྟོད་པའོ། །མཆོག་སྦྱིན་ཞེས་པ་ཆོས་ཀྱི་དབྱིངས་ཀྱི་ཡེ་ཤེས་སོ། །རྡོ་རྗེ་ཞེས་པ་ཡེ་ཤེས་རྣམ་པ་ལྔ་དབྱེར་མི་ཕྱེད་པའོ། །མཆོག་ཁྱོད་འདུད་ཅེས་པ་ནི་ཡེ་ཤེས་སེམས་དཔའ་ལའོ། །ཡང་དག་མཐའ་ནི་བློའི་ཡུལ་མ་ཡིན་པའོ། །སྟོང་ཉིད་ལས་བྱུང་ནི་སྐྱེ་བ་མེད་པ་ལས་སྐྱེས་པའོ། །སངས་
རྒྱས་བྱང་ཆུབ་ནི་སྤོང་བ་ཕུན་སུམ་ཚོགས་པ་དང་། ཡེ་ཤེས་ཕུན་སུམ་ཚོགས་པའོ། །ཆགས་པ་ནི་འགྲོ་བའི་དོན་ལ་ཆགས་པའོ། །འདོད་པ་ནི་འགྲོ་བའི་དོན་ལ་འདོད་པའོ། །དགྱེས་པ་ནི་འགྲོ་བའི་དོན་ལ་དགྱེས་པའོ། །རོལ་པ་ནི་སྐུ་སྣ་ཚོགས་སྟོན་པའོ། །འཛུམ་པ་ནི་ཞི་བའི་སྐུའོ། །
བཞད་པ་ནི་རྒྱས་པའི་སྐུའོ། །གསུང་ནི་དབང་གི་སྐུའོ། །ཐུགས་ནི་དྲག་པོའི་སྐུའོ། །མེད་པ་ནི་སྟོང་པ་ཉིད་དོ། །སངས་རྒྱས་འབྱུང་བ་ནི་ཆོས་སྐུའོ། །ནམ་མཁའ་ལས་བྱུང་ནི་དཔེའོ། །སྒྱུ་འཕྲུལ་དྲ་བ་ནི་བདེ་སྟོང་དབྱེར་མེད་དོ། །རོལ་སྟོན་ནི་དྲག་པོའི་སྐུ་སྣ་ཚོགས་སོ། །ཐམས་ཅད་ཅེས་
པ་འཁོར་བ་ཐམས་ཅད་དོ། །ཡེ་ཤེས་སྐུ་ཉིད་ཅེས་པ་ནི་གསལ་ལ་མི་རྟོག་པའི་སྐུའོ། །ཁྱེད་ལ་འདུད་ཅེས་པ་ནི་ལུས་ངག་ཡིད་གསུམ་གྱིས་ཁྱོད་ལ་གུས་པའོ། །ད་ནི་སྔགས་ཀྱི་དོན་བཤད་པར་བྱ་སྟེ། ཨོཾ་ནི་ཡེ་ཤེས་ལྔའོ། །སརྦ་དྷརྨཱ་ནི་ཆོས་ཐམས་ཅད་དོ། །ཨ་བྷཱ་བ་ཞེས་པ་ནི་སྐྱེ་བ་མེད་པའོ། །
སྭ་བྷཱ་བ་ཞེས་པ་ནི་རང་བཞིན་གྱིས་དག་པའོ། །བི་ཤུདྡྷ་ཞེས་པ་ནི་རྣམ་པར་དག་པའོ། །ཨ་ཨཱ་ཞེས་པ་ནི་སྐྱེ་བ་མེད་པའོ། །ཨཾ་ཨཿཞེས་པ་ནི་རང་ལ་ཡོད་པའོ། །པྲ་ཀྲྀ་ཏི་པ་རི་ཤུདྡྷཿཞེས་པ་ནི་རང་བཞིན་ཡོངས་སུ་དག་པའོ། །སརྦ་དྷརྨཱ་ཡ་དུ་ཏ་ཞེས་པ་ནི་ཆོས་ཐམས་ཅད་མ་སྐྱེས་པའོ། །
སརྦ་ཏ་ཐཱ་ག་ཏ་དེ་བཞིན་གཤེགས་པ་ཐམས་ཅད་དོ། །ཛྙཱ་ན་ཀཱ་ཡ་ཞེས་པ་ནི་ཡེ་ཤེས་ཀྱི་སྐུའོ། །ཡེ་ཤེས་སྐུ་དེ་སུ་ལ་ལྡན་སྙམ་དུ་སེམས་པ་ལ། མཉྫུ་ཤྲཱི་ཞེས་བྱ་སྟེ་འཇམ་དཔལ་ལོ། །པ་རི་ཤུདྡྷི་ཏཱ་ཞེས་པ་ནི་ཡོངས་སུ་དག་པའོ། །མུ་པཱ་དཱ་ཡ་ཏི་ཨཱ་ཨ་ཞེས་པ་ནི་བདག་ལ་རྗེས་སུ་

ཞུགས་པའོ། །སརྦ་ཏ་ཐཱ་ག་ཏ་ནི་དེ་བཞིན་གཤེགས་པ་ཐམས་ཅད་དོ། །ཧ་ར་ཧ་ར་ཞེས་པ་ནི་གཏོར་ཅིག་པའོ། །ཨོཾ་ཧཱུྃ་ཧྲཱིཿཞེས་པ་ནི་སྐུ་གསུང་ཐུགས་སོ། །བྷ་ག་ཝཱན་ཞེས་པ་ནི་བཅོམ་ལྡན་འདས་སོ། །ཛྙཱ་ན་ཞེས་པ་ནི་ཡེ་ཤེས་སོ། །མཱུརྟི་ཞེས་པ་ནི་སྤྱི་གཙུག་གོ། །ཝཱ་གཱི་ཤྭ་
ར་ནི་ངག་གི་དབང་ཕྱུག་གོ། །མ་ཧཱ་པཱ་ཙ་ནི་ཆེན་པོས་ཆོས་ཞེས་པའོ། །སརྦ་དྷརྨ་ནི་ཆོས་ཐམས་ཅད་དོ། །ག་ག་ན་ནི་ནམ་མཁའ་ལྟ་བུའོ། །ཨ་མ་ལ་སུ་པ་རི་ཞེས་པ་ནི་དྲི་མ་མེད་ཅིང་དྲི་མ་དང་བྲལ་བའོ། །ཤུདྡྷ་དྷརྨ་དྷཱ་ཏུ་ཞེས་པ་ནི་ཆོས་ཀྱི་དབྱིངས་ཡོངས་སུ་དག་པའོ། །ཛྙཱ་ན་ནི་ཡེ་ཤེས་
སོ། །གརྦྷ་ནི་སྙིང་པོའོ། །ཨཱཿནི་སྐྱེ་བ་མེད་པའོ། །དེ་ལྟར་རྒྱུད་ཀྱི་དོན་ཡོངས་སུ་རྫོགས་པའོ། །རྗེས་སུ་ཡི་རང་བའི་སྒོ་ནས་བསྟོད་པ་ནི་གོ་སླ་བས་འདིར་མ་བྲིས་སོ། །རྒྱུད་ཀུན་གྱི་ནི་བདག་པོ་མཆོག །ཉི་མ་ཟླ་བ་ལྟར་གྲགས་པ། འདོད་དགུ་འབྱུང་བའི་རིན་པོ་ཆེ། ལེའུ་ཁྲི་ནི་དྲུག་སྟོང་
ལས། །ཟབ་མོ་ཀླུ་ཡི་ལེའུ་ཡི། །འགྲེལ་པ་སྣང་བ་འདི་བྱས་པས། །ཁམས་གསུམ་འཁོར་བའི་སེམས་ཅན་དག །ཡེ་ཤེས་སེམས་དཔའི་ཞལ་མཐོང་ནས། །ཐེག་པ་སྣ་ཚོགས་ཐབས་ཚུལ་གྱིས། །འགྲོ་དོན་མ་ལུས་སྤྱོད་པར་ཤོག །རྒྱུད་ནི་བྱིངས་ཆེ་གང་ཟག་རྟོག་པ་མང་། །སོ་སོའི་
འདོད་པ་སྣ་ཚོགས་འདི་ལ་སྨྲས། །རྒྱུད་འདིའི་དོན་ལ་ཚིག་གཅིག་ཕོག་པ་མེད། །གསལ་བའི་སྒྲོན་མ་འགྲེལ་པ་འདི་བརྩམས་པས། །ལོག་རྟོག་མ་ལུས་མྱུར་དུ་ཟད་པར་ཤོག །མཚན་ཡང་དག་པར་བརྗོད་པའི་འགྲེལ་པ་སློབ་དཔོན་ཆེན་པོ་ཙནྡྲ་གོ་མིས་མཛད་པ་རྫོགས་སོ།། །།
པཎྜི་ཏ་མངོན་ཤེས་ཅན་གྱི་ཕྱག་ནས་བྱུང་བའོ། །ཞུ་ཆེན་གྱི་ལོ་ཙཱ་བ་འགོས་ལྷས་བཙས་དང་ཤེས་རབ་བརྩོན་འགྲུས་ཀྱིས་བསྒྱུར་བའོ།། ༄། །མཚན་ཡང་དག་པར་བརྗོད་པའི་འགྲེལ་བ་ཚུལ་གསུམ་གསལ་བ་ཞེས་བྱ་བ་བཞུགས།། ༄༅། །འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པ་ཞེས་
བྱ་བ་ལ། འཕགས་པ་འཇམ་དཔལ་ཞེས་བྱ་བ་ནི་རང་གི་ངོ་བོ་ནི་ཇི་ལྟ་བུ་ཞིག །དེའི་མཚན་ནི་གང་དང་གང་རྣམས་ཡིན། དེ་ཡང་དག་པར་བརྗོད་པ་ནི་ཇི་ལྟར་བརྗོད་ཅེ་ན། དེ་ལ་འཕགས་པ་འཇམ་དཔལ་ནི་གཉིས་སུ་མེད་པའི་ཡེ་ཤེས་ཏེ། དེ་ནི་དུས་གསུམ་གྱི་སངས་རྒྱས་ཐམས་ཅད་ཀྱི་

ཡེ་ཤེས་ཀྱི་བདག་ཉིད། བྱང་ཆུབ་ཀྱི་སེམས་ཀྱི་ངོ་བོ་ཆོས་ཐམས་ཅད་ཀྱི་ཆོས་ཉིད་དང་ཐ་མི་དད་པ་ཡིན་ཏེ། དེའི་དབང་གིས་སྣང་བའི་གཟུགས་ཀྱི་སྐུ་ལོངས་སྤྱོད་རྫོགས་པ་དང་། སྤྲུལ་པའི་བདག་ཉིད་ཅན། ཡེ་ཤེས་ཀྱི་རྟེན་དུ་སྣང་བ། སངས་རྒྱས་དང་བྱང་ཆུབ་སེམས་དཔའི་གཟུགས་
རྣམས་སུ་ཐེག་པ་ཆེ་ཆུང་གི་ཚུལ་སྣ་ཚོགས་ལས་གྲགས་པར་སྣང་བའི་བདག་ཉིད་དེ་རྣམས་ཀྱང་འཕགས་པ་འཇམ་དཔལ་ཞེས་འདོད་དོ། །འདིར་དྲིས་པ། སངས་རྒྱས་ཐམས་ཅད་ཀྱི་གཉིས་སུ་མེད་པའི་ཡེ་ཤེས་ཀྱི་བདག་ཉིད་འཕགས་པ་འཇམ་དཔལ་ཡིན་ན་ཕྱོགས་བཅུ་དུས་གསུམ་གྱི་
སངས་རྒྱས་རྣམས་ཀྱི་སོ་སོ་རང་གིས་རིག་པའི་ཡེ་ཤེས་རྣམས་ཆོས་ཅན་གཅིག་གམ་ཐ་དད་པ་ཅིག་ཡིན། དེ་བཞིན་དུ་དེའི་ཆོས་ཉིད་དང་། དེའི་མཛད་པ་ཡང་གཅིག་གམ་ཐ་དད་པ་ཞིག་ཡིན་ཞེ་ན། སྨྲས་པ་དེ་ནི་འདི་ལྟར་རིག་པར་བྱ་སྟེ། ཁ་ཅིག་གི་ཚུལ་ལས་ནི། དེ་བཞིན་གཤེགས་
པ་རྣམས་ནི་ཡེ་ཤེས་ཀྱི་རྒྱུད་ཀྱང་ཐ་དད། དེའི་ཆོས་ཉིད་དང་དེའི་མཛད་པ་ཡང་ཐ་དད་དེ། འོན་ཀྱང་རྣམ་པ་བཞིའི་སྒོ་ནས་མཚུངས་པ་ཡིན་ནོ། །བཞི་གང་ཞེ་ན། ཆོས་མཚུངས་པ་དང་། སྐུ་མཚུངས་པ་དང་། གསུང་མཚུངས་པ་དང་། ཡི་གེ་མཚུངས་པའོ་ཞེས་འདོད་དོ། །ཁ་ཅིག་གི་
ཚུལ་ལས་ནི། ཡེ་ཤེས་ནི་གང་ཟག་གི་རྒྱུད་སོ་སོ་ལས་སྒྲུབ་པའི་ཕྱིར་ཐ་དད་དེ། དེའི་ཆོས་ཉིད་དང་མཛད་པ་དག་ནི་འདྲེས་པ་སྟེ། ཐ་དད་པ་མེད་དོ་ཞེས་འདོད། ཁ་ཅིག་གི་ཚུལ་ལས་ནི། བདག་དང་གཞན་གྱི་རྒྱུད་དུ་འབྱེད་པའི་བདག་ཏུ་ལྟ་བའི་བག་ཆགས་ཡིན་ལ། བདག་ཏུ་ལྟ་བ་ནི་
འཁྲུལ་པ་སྟེ། དེས་བསྐྱེད་ཅིང་དེའི་དབང་གིས་སྣང་བ་ནི། དེ་ལྟར་བདེན་པ་མ་ཡིན་ལ། སེམས་ཅན་གྱི་དུས་ན་ཡང་རྒྱུད་ཐ་དད་མི་འགྲུབ་ན། བདག་ཏུ་ལྟ་བའི་མདུད་པ་མི་མངའ་བའི་སངས་རྒྱས་རྣམས་ལ་ཡེ་ཤེས་ཐ་དད་ཀྱི་རྒྱུད་དུ་ག་ལ་འགྲུབ་སྟེ། དེ་བས་ན་སངས་རྒྱས་རྣམས་ལ་ནི་རྒྱུད་
ཐ་དད་པ་དང་། རྒྱུད་ཐ་དད་པས་དོན་མཛད་པ་དང་། དེ་བཞིན་དུ་ཚུལ་ཐ་དད་པས་དོན་མཛད་པ་དང་། ཞིང་ཐ་དད་དུ་དོན་མཛད་པ་དང་། དུས་ཐ་དད་དུ་དོན་མཛད་པ་མི་མངའ་སྟེ། ཇི་སྲིད་དུ་ཐེག་པ་ཆེ་ཆུང་གི་གསུང་རབ་རྣམས་ལས་འཕགས་པ་འཇམ་དཔལ་ཞེས་གྲགས་པ་དང་། སྤྱན་རས་

གཟིགས་དབང་ཕྱུག་དང་། ཕྱག་ན་རྡོ་རྗེ་ཞེའམ། སངས་རྒྱས་ཤཱཀྱ་ཐུབ་པ་དང་། མར་མེ་མཛད་དང་། བྱམས་པ་ཞེའམ། རྣམ་པར་སྣང་མཛད་དང་། མི་བསྐྱོད་པ་དང་། དཀོན་མཆོག་དཔལ་ཞེས་བྱ་བ་ལ་སོགས་པར་གྲགས་པ། ལོངས་སྤྱོད་རྫོགས་པ་དང་སྤྲུལ་པའི་
སྐུར་གྲགས་ཤིང་། སོ་སོའི་གདུལ་བྱ་དང་། ཞིང་ཁམས་དང་། ཚུལ་དང་། བསྟན་པ་དང་། དུས་ཐ་དད་དུ་ཡེ་ཤེས་ཆེན་པོའི་རྟེན་དུ་སྣང་བ་ཐམས་ཅད་ཀྱང་སངས་རྒྱས་ཀྱི་གཉིས་སུ་མེད་པའི་ཡེ་ཤེས་ཀྱི་ཆོས་ཉིད་རྟོགས་པ་དབང་དང་། སྔོན་གྱི་སྨོན་ལམ་དང་ཐུགས་རྗེའི་ཤུགས་ཀྱིས་
གདུལ་བྱ་དཀར་པོའི་བག་ཆགས་དང་ལྡན་པའི་བློ་ལ། སོ་སོར་སྣང་ཙམ་གྱིས་ཕྱེ་བ་ལས་མ་གཏོགས་པ། སངས་རྒྱས་རྣམས་ཀྱི་དབང་དུ་ནི་བྱེ་བྲག་ཕྲ་མོ་ཙམ་ཡང་རྙེད་པ་མ་ཡིན་ནོ། །དེ་བས་ན་འདིར་འཕགས་པ་འཇམ་དཔལ་གྱི་ཡོན་ཏན་བརྗོད་པ་འདི་ནི་ཕྱོགས་བཅུ་དུས་གསུམ་གྱི་སངས་རྒྱས་
ཐམས་ཅད་ཀྱི་ཡོན་ཏན་བརྗོད་པ་ཡིན་པར་ཤེས་པར་བྱའོ། །དེ་ལ་འཕགས་པ་འཇམ་དཔལ་གྱི་སྐུར་སྣང་བའི་ཚུལ་ལ་བརྟེན་ནས་ཚུལ་སོ་སོར་གྲགས་པ་ནི་འདི་ལྟ་སྟེ། ཉན་ཐོས་ཀྱི་ཚུལ་ལས་ནི་འཕགས་པ་འཇམ་དཔལ་ཞེས་བྱ་བ་བྱང་ཆུབ་སེམས་དཔའི་རྒྱུད་དུ་གཏོགས་པ། ད་དུང་འཕགས་
པའི་ལམ་མ་ཐོབ་པ་སོ་སོའི་སྐྱེ་བོར་འདོད་དོ། །ཕ་རོལ་ཏུ་ཕྱིན་པའི་ཚུལ་མཐུན་པ་འཛམ་བུའི་གླིང་ན་ཡང་བཅོམ་ལྡན་འདས་ཤཱཀྱ་ཐུབ་པའི་འཁོར་དུ་གྱུར་པ་ཡིན་ནོ། །འོག་མིན་ན་ཡང་བཅོམ་ལྡན་འདས་རྣམ་པར་སྣང་མཛད་ཀྱི་ཉེ་བའི་སྲས་སུ་གྱུར་པ་ཡིན་ཞེའོ། །མདོ་སྡེ་ཟབ་མོའི་ཚུལ་
ལས་ནི། སྔོན་གྱི་དུས་སུ་སངས་རྒྱས་པ་སྟེ། བྱང་ཆུབ་སེམས་དཔའི་ཚུལ་དུ་བཞུགས་པའོ་ཞེའོ། །གསང་སྔགས་ཀྱི་ཚུལ་ཁ་ཅིག་ལས་རིགས་ཀྱི་གཙོ་བོ་དེ་བཞིན་གཤེགས་པའི་གཙུག་ཏོར་ལས་སྤྲུལ་པའི་བདག་ཉིད་བྱང་ཆུབ་སེམས་དཔའི་ཚུལ་དུ་བཞུགས་པའོ་ཞེས་འདོད་དོ། །རྣལ་
འབྱོར་གྱི་ཚུལ་ཁ་ཅིག་ལས་ནི་བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་ལས་སྤྲུལ་པའི་ཡེ་ཤེས་ཀྱི་སེམས་དཔའ་ཆེན་པོ་བཅུ་དྲུག་ལས་རྡོ་རྗེ་རྣོན་པོ་སྟེ་འཇམ་དཔལ་རྡོ་རྗེ་ཞེས་འདོད་དོ། །རྣལ་འབྱོར་ཆེན་པོའི་ཚུལ་ཁ་ཅིག་ལས་ནི། འཇམ་དཔལ་ཡེ་ཤེས་སེམས་དཔའ་ཞེས་ཀྱང་

བྱ། བྱང་སེམས་རྡོ་རྗེ་ཞེས་ཀྱང་བྱ། དེ་བཞིན་དུ་རྡོ་རྗེ་སེམས་དཔའ་དང་། ཀུན་དུ་བཟང་པོ་དང་། བདེ་བ་ཆེན་པོ་ལ་སོགས་པ་སངས་རྒྱས་ཐམས་ཅད་ཀྱི་གཙོ་བོ་དཀྱིལ་འཁོར་ཐམས་ཅད་ཀྱི་མངའ་བདག་ཉིད་དུ་ཡང་བསྟན་ཏོ། །འཇམ་དཔལ་གྱི་སྒྱུ་འཕྲུལ་དྲ་བ་ལས་ནི་དེ་བཞིན་གཤེགས་པ་
ཐམས་ཅད་ཀྱི་ཐུགས་ཀ་ན་འཇམ་པའི་རྡོ་རྗེ་བཞུགས་ཏེ། དེ་ཡང་དང་པོའི་སངས་རྒྱས་གྱི་ཚུལ་དང་། ཡེ་ཤེས་སེམས་དཔའི་ཚུལ་གྱིས་བཞུགས་སོ་ཞེས་འདོད་དོ། །འདི་དག་ནི་འཕགས་པ་འཇམ་དཔལ་གྱི་བདག་ཉིད་བསྟན་པའོ། །འཕགས་པ་འཇམ་དཔལ་དེའི་མཚན་ནི་གང་དང་གང་
རྣམས་ཡིན་ཞེ་ན་ཇི་སྲིད་དུ་ཟག་པ་དང་བཅས་པའི་ཆོས་སམ། ཟག་པ་མེད་པའི་ཆོས་སམ། དེ་བཞིན་དུ་འཇིག་རྟེན་པའམ། འཇིག་རྟེན་ལས་འདས་པའམ། འདུས་བྱས་སམ། འདུས་མ་བྱས་སམ། དངོས་པོའམ། དངོས་པོ་མེད་པའམ། སེམས་སམ་སེམས་སྣང་པ་ལ་སོགས་
ཏེ། ཇི་སྲིད་དུ་ཆོས་རྣམས་ཀྱི་རབ་ཏུ་དབྱེ་བའི་མིང་དུ་གྲགས་པའམ། འཇིག་རྟེན་པའི་གཙུག་ལག་ལས་གྲགས་པའམ། ཐེག་པ་ཆུང་ངུ་ལས་གྲགས་པའམ། ཐེག་པ་ཆེན་པོ་ལས་གྲགས་པའམ། ཐེག་པ་ཆེན་པོའི་ཡང་ཆེན་པོ་གསང་སྔགས་ཀྱི་ཚུལ་ལས་གྲགས་པ་ཡང་
རུང་སྟེ། ཆོས་རྣམས་ཀྱི་མིང་ཇི་སྙེད་པ་དེ་དག་ཐམས་ཅད་ནི་འཕགས་པ་འཇམ་དཔལ་གྱི་མཚན་དུ་མ་གྱུར་པ་མེད་དེ། དེ་བས་ན་དེ་དག་ཐམས་ཅད་མཚན་དུ་ཤེས་པར་བྱའོ། །འདིར་དྲིས་པ་ཟག་པ་མེད་པའི་ཆོས་རྣམས་ཀྱི་མིང་རྣམས་ནི་འཕགས་པ་འཇམ་དཔལ་གྱི་མཚན་དུ་རུང་སྟེ།
འཕགས་པ་འཇམ་དཔལ་ཉིད་ཟག་པ་མེད་པ་ཐོབ་པའི་བདག་ཉིད་ཡིན་པའི་ཕྱིར་རུང་ན། ཟག་པ་དང་བཅས་པའི་ཆོས་རྣམས་དེའི་མཚན་དུ་ཇི་ལྟར་འགྱུར། འཕགས་པ་འཇམ་དཔལ་ནི་ཟག་པའི་ཆོས་ཐམས་ཅད་ཡོངས་སུ་ཟད་པའི་བདག་ཉིད་ཡིན་པའི་ཕྱིར་དེ་རྣམས་ཀྱི་མིང་དེའི་མཚན་དུ་
མི་རུང་ངོ་ཞེ་ན། འཕགས་པ་འཇམ་དཔལ་ནི་ཟག་པ་མེད་པའི་ཆོས་ཀྱི་བདག་ཉིད་ཅན་ཡིན་མོད་ཀྱི། ཚུལ་འདི་ལ་འགལ་བ་མེད་དེ། འདི་ལྟར་འཕགས་པ་འཇམ་དཔལ་ནི་ཟག་པ་དང་བཅས་པའི་ཆོས་རྣམས་ཀྱི་རང་བཞིན་ཡིན་པའི་ཕྱིར་དང་། དེ་ལ་ཁྱབ་པ་ཡིན་པའི་ཕྱིར་དང་། དེར་འཁྲུལ་

པ་ཡིན་པའི་ཕྱིར་དང་། དེ་ལ་དགའ་བ་ཡིན་པའི་ཕྱིར་དང་། དེ་མཁྱེན་པ་ཡིན་པའི་ཕྱིར་དང་། དེ་གསུང་བ་ཡིན་པའི་ཕྱིར་དང་། དེ་ཡོངས་སུ་དག་པ་ཡིན་པའི་ཕྱིར་དང་། དེ་ལ་མངའ་བརྙེས་པ་ཡིན་པའི་ཕྱིར་དང་། དེ་ལས་སྐྱེས་པ་ཡིན་པའི་ཕྱིར་དང་། ཚུལ་བཅུ་པོ་འདི་ནི་
འཁོར་བ་དང་མྱ་ངན་ལས་འདས་པའི་ཆོས་ཐམས་ཅད་ཡང་ཤེས་པར་བྱའོ། །དེ་ལ་ཇི་ལྟར་དེ་ཆོས་ཐམས་ཅད་རང་བཞིན་ནམ། བདག་ཉིད་ཡིན་ཞེ་ན། འདི་ཉིད་ལས་གསུངས་པ། དངོས་པོ་ཀུན་གྱི་རང་བཞིན་མཆོག །དངོས་པོ་ཀུན་གྱི་རང་བཞིན་འཛིན། །སྐྱེ་མེད་ཆོས་ཏེ་སྣ་ཚོགས་དོན། །ཆོས་
ཀུན་ངོ་བོ་ཉིད་འཆང་བ། །ཞེས་གསུངས་པ་ལྟ་བུ་དང་། རྣམ་རིག་སྣ་ཚོགས་གཟུགས་དོན་ཅན། །རྣམ་ཤེས་སྣ་ཚོགས་རྒྱུད་དང་ལྡན། །ཞེས་གསུངས་པ་དང་། སྡུག་བསྔལ་གསུམ་གྱི་སྡུག་བསྔལ་ཞི། །ཞེས་པ་དང་། རྣམ་པ་བཅུ་པོ་དོན་བཅུའི་དོན། །ཞེས་པ་དང་། དོན་གྲུབ་
བསམ་པ་འགྲུབ་པ་སྟེ། །ཀུན་དུ་རྟོག་པ་ཐམས་ཅད་སྤངས། །ཞེས་བྱ་བ་ལ་སོགས་པ་ལྟ་བུའི་སྐབས་སུ་བཤད་པ། དངོས་པོ་ཐམས་ཅད་ཀྱི་ངོ་བོ་ཉིད་དང་ལྡན་པའོ་ཞེས་བཤད་པ་དང་། གཞན་ཡང་རྣམ་རིག་སྣ་ཚོགས་གཟུགས་དོན་ཅན་གྱི་སྐབས་སུ། སེམས་དང་ཡིད་དང་རྣམ་པར་
རིག་པ་སྣང་བ་དང་བཅས་པའི་བདག་ཉིད་འཇམ་དཔལ་ལོ་ཞེས་བཤད་པ་དང་། དེ་བཞིན་དུ་སྡུག་བསྔལ་གསུམ་གྱི་སྡུག་བསྔལ་ཞིའི་སྐབས་སུ་སྡུག་བསྔལ་གསུམ་ནི་སྡུག་བསྔལ་ཉིད་དུ་བཤད་ལ། ཡང་སྡུག་བསྔལ་ནི་སྡུག་བསྔལ་སྒྲུབ་པར་བྱེད་པའི་ཀུན་འབྱུང་དུ་བཤད།
ཞི་བ་འགོག་པར་བཤད་དེ། དེ་དག་ཀྱང་འཕགས་པ་འཇམ་དཔལ་ཡིན་པར་བཤད་པ་དང་། རྣམ་པ་བཅུ་པོ་དོན་བཅུའི་སྐབས་སུ་བདག་ཏུ་ལྟ་བ་རྣམ་པ་བཅུ་བཤད་ལ། ཡང་དོན་ནི་གཉེན་པོ་རྣམ་པ་བཅུ་བཤད་དེ། དེ་ལྟར་ན་མི་མཐུན་པ་དང་གཉེན་པོ་དེ། འཕགས་པ་འཇམ་
དཔལ་ལོ་ཞེས་བཤད་པ་ལྟ་བུ་ལ་སོགས་པ། ཆོས་ཐམས་ཅད་ཀྱི་བདག་ཉིད་འཕགས་པ་འཇམ་དཔལ་ཡིན་པར་བཤད་པའི་ཕྱིར། དེ་ལྟ་བུ་ཡོན་ཏན་བརྗོད་པའི་མི་ཐམས་ཅད་ཀྱང་དེའི་མཚན་དུ་འགྱུར་རོ། །དེ་ལ་འཕགས་པ་འཇམ་དཔལ་ཇི་ལྟར་ན་ཆོས་ཐམས་ཅད་ལ་ཁྱབ་པ་ཡིན་ཞེ་ན།

འདིར་གསུངས་པ། མི་འགྱུར་ཀུན་འགྲོ་ཁྱབ་པ་པོ། །ཞེའམ། སངས་རྒྱས་ཀུན་གྱི་ཐུགས་ལ་གནས། །ཞེས་གསུངས། སེམས་ཅན་ཀུན་གྱི་ཡིད་ལ་གནས། །ཞེས་བྱ་བ་ལ་སོགས་པ་ལྟ་བུ་སྟེ། དེ་ལ་རྣམ་པ་བཞིའི་ཚུལ་གྱིས་ཁྱབ་པ་ནི་འདི་ལྟ་སྟེ། ཆོས་ཉིད་དང་། ཡེ་ཤེས་དང་།
ཐུགས་རྗེ་དང་། མཛད་པའོ། །དེ་ལ་ཆོས་ཉིད་ཀྱིས་ཁྱབ་པ་ནི་ཆོས་ཐམས་ཅད་ནི་རང་བཞིན་གྱིས་སྟོང་པ་བདག་མེད་པ་སྟེ། འདི་ལྟར་གཞན་ལས། ཆོས་ཀྱི་དབྱིངས་ནི་མ་གཏོགས་པ། །ཆོས་ནི་འགའ་ཡང་ཡོད་མ་ཡིན། །གསུངས་པ་ལྟ་བུའོ། །དེ་བས་ན་ཆོས་ཀྱི་དབྱིངས་ནི་འཕགས་པ་
འཇམ་དཔལ་ཏེ། དེའི་ཕྱིར་ཐམས་ཅད་ལ་ཁྱབ་པའོ། །ཡེ་ཤེས་ཀྱི་སྒོ་ནས་ཁྱབ་སྟེ། འདི་ལྟར་ཆོས་ཀྱི་དབྱིངས་ཀྱི་ཆོས་ཅན་ནི་རང་རིག་པ་ཙམ་སྟེ། ཆོས་ཐམས་ཅད་ཀྱང་རང་རིག་པ་ཙམ་དུ་འདུས་པ་དང་། ཡེ་ཤེས་ཀྱི་ཡུལ་དུ་མ་གྱུར་པའི་ཆོས་ཉིད་ཀྱང་མེད་དེ། དེའི་ཕྱིར་ཡེ་ཤེས་ཀྱི་
ཚུལ་གྱིས་ཀྱང་ཁྱབ་པའོ། །ཐུགས་རྗེས་ཀྱང་བྱ་བ་སྟེ། ཇི་ལྟར་དབྱིངས་དང་ཡེ་ཤེས་ཟུང་དུ་འབྲེལ་པ་གང་ན་བ་དེ་ན་ཐུགས་རྗེ་ཆེན་པོ་ཡང་རྒྱུན་མི་འཆད་པ་ཡིན་ནོ། །དེ་བཞིན་དུ་མཛད་པས་ཀྱང་ཁྱབ་སྟེ། ཆོས་དེ་གསུམ་གང་དུ་ཚོགས་པ་དེར་མཛད་པ་རྒྱུན་མི་འཆད་དོ། །དེའི་ཕྱིར་སངས་
རྒྱས་རྣམས་ཀྱི་ཐུགས་དང་སེམས་ཅན་རྣམས་ཀྱི་སེམས་ལ་འཕགས་པ་འཇམ་དཔལ་གྱིས་ཁྱབ་སྟེ། ཆོས་དེ་དག་གང་ནས་མ་འོངས། གང་དུ་ཡང་མི་འགྲོ། །གར་ཡང་གནས་པར་འགྱུར་བ་མེད་བཞིན་དུ་སྐལ་བ་དང་། མོས་པ་ཇི་ལྟ་བ་བཞིན་དུ་སེམས་ཅན་གྱི་དོན་མཛད་པར་ནུས་པ་
ཡིན་ནོ། །དེ་ལྟ་བུའི་ཡོན་ཏན་བརྗོད་པའི་མིང་ཐམས་ཅད་ཀྱང་དེའི་མཚན་དུ་འགྱུར་རོ། །དེ་ལ་འཕགས་པ་འཇམ་དཔལ་ཇི་ལྟར་ན་ཆོས་ཐམས་ཅད་དུ་སྤྲུལ་པ་ཡིན་ཞེ་ན་འདི་ཉིད་དུ་གསུངས་པ། གཟུགས་རྣམས་མ་ལུས་སྣང་བའི་དཔལ། །སྣ་ཚོགས་གཟུགས་ཅན་ཡིད་ལས་སྐྱེས། །ཞེས་
བྱ་བ་ལ་སོགས་པ་ཇི་ལྟར་འགྲོ་བ་འདུལ་བའི་དབང་གིས་སྣོད་དང་བཅུད་དུ་བཅས་པའི་གཟུགས་སྣ་ཚོགས་སུ་སྤྲུལ་པ་དང་། གཙུག་ཕུད་ཕུད་བུ་ལྕང་ལོ་ཅན། །རལ་པ་མུཉྫ་ཅོད་པན་ཐོགས། །ཞེས་བྱ་བ་ལ་སོགས་པའི་སྐབས་སུ་བརྟུལ་ཞུགས་ཐམས་ཅད་འཛིན་པར་སྤྲུལ་པ་དང་།

གཟུགས་ཀྱི་མཚན་ཉིད་ཀྱང་ལོངས་སྤྱོད་རྫོགས་པའམ། སྤྲུལ་པའམ། བྱང་ཆུབ་སེམས་དཔའ་འམ། རང་རྒྱལ་བའམ། ཉན་ཐོས་སམ། སྐྱེ་དགུའི་བདག་པོ་ལ་སོགས་པའམ། གཞན་ཡང་མཛེས་པའི་གཟུགས་སམ། མི་སྡུག་པའི་གཟུགས་སམ།
རྒན་པོའམ། གཞོན་པ་ལ་སོགས་པའི་གཟུགས་སམ། གཞན་ཡང་ཉོན་མོངས་པ་དང་བཅས་པའི་གཟུགས་སམ། ཟག་པ་ཟད་པ་ལ་སོགས་པའི་ཆོས་ཐམས་ཅད་ཀྱི་གཟུགས་བརྙན་དུ་འཕགས་པ་འཇམ་དཔལ་མི་འཕྲུལ་པ་མེད་དོ། །དེ་བས་ན་དེ་ལྟ་བུའི་ཡོན་ཏན་བརྗོད་པའི་
མིང་ཐམས་ཅད་ཀྱང་དེའི་མཚན་དུ་འགྱུར་རོ། །དེ་ལ་ཇི་ལྟར་ན་འཕགས་པ་འཇམ་དཔལ་དེ་ཆོས་ཐམས་ཅད་ལ་དགའ་བ་ཡིན་ཞེ་ན་འདི་ཉིད་དུ་གསུངས་པ། དངོས་དོན་མ་ལུས་རྣམས་ལ་དགའ། །སྟོང་པ་ཉིད་དགའ་འདོད་ཆགས་བློ། །སྲིད་གསུམ་དགའ་བ་ཆེན་པོ་པ། །ཞེས་བྱ་བ་
ལ་སོགས་པ་གསུངས་པ་ལྟ་བུ་སྟེ། འགྲོ་བ་འདུལ་བའི་དབང་གིས་ཆོས་ཐམས་ཅད་དགའ་བར་སྟོན་པ་དང་། སྙིང་རྗེའི་དབང་གིས་སྲིད་པ་ལ་ཆགས་པའི་ཡིད་དགའ་བ་དང་། ཤེས་རབ་ཀྱི་དབང་གིས་སྟོང་པ་ཉིད་ལ་ཆགས་ཤིང་དགའ་བ་སྟེ། དེ་བས་ན་དེ་ལྟ་བུའི་ཡོན་ཏན་གྱི་དབང་དུ་
གསུངས་པའི་མིང་ཐམས་ཅད་ཀྱང་དེའི་མཚན་དུ་འགྱུར་རོ། །དེ་ལ་ཇི་ལྟར་ན་ཆོས་ཐམས་ཅད་མཁྱེན་པ་ཡིན་ཞེ་ན། འདི་ཉིད་དུ་གསུངས་པ། ཤེས་རབ་ཆེན་པོས་སྐད་ཅིག་ལ། །ཆོས་ཀུན་ཁོང་དུ་ཆུད་པ་པོ། །ཆོས་ཀུན་མངོན་པར་རྟོགས་པ་པོ། །ཞེས་བྱ་བ་ལ་སོགས་པ་ཇི་སྐད་དུ་
ཆོས་ཐམས་ཅད་མཁྱེན་པའི་ཡོན་ཏན་བསྟན་པའི་དབང་དུ་གསུངས་པའི་མིང་ཐམས་ཅད་ཀྱང་དེའི་མཚན་དུ་འགྱུར་རོ། །དེ་ལ་ཇི་ལྟར་ན་ཆོས་ཐམས་ཅད་གསུངས་པ་ཡིན་ཞེ་ན། འདི་ཉིད་དུ་གསུངས་པ། སྨྲ་བའི་སྐྱེས་མཆོག་སྨྲ་བའི་རྒྱལ། །སྨྲ་བའི་དམ་པ་མཆོག་གི་གནས། །སྨྲ་
བའི་སེང་གེ་ཚུགས་པ་མེད། །ཅེས་བྱ་བ་ལ་སོགས་པ་སྟེ། ཇི་སྲིད་དུ་ཆོས་ཐམས་ཅད་ཕྱིན་ཅི་མ་ལོག་པར་སྟོན་པའི་མངའ་བདག་ཡིན་པས། དེའི་དབང་དུ་སྨོས་པའི་ཆོས་ཐམས་ཅད་ཀྱི་མིང་ཡང་དེའི་མཚན་དུ་འགྱུར་རོ། །དེ་ལ་ཇི་ལྟར་ན་དེ་ཆོས་ཐམས་ཅད་རྣམ་པར་དག་པའི་

བདག་ཉིད་ཅན་ཡིན་ཞེ་ན། འདི་ཉིད་དུ་གསུངས་པ། ཟག་པ་ཟད་པ་དང་། སྒྲིབ་པ་ལས་གྲོལ་བ་དང་། ཉོན་མོངས་པ་ཞི་བར་བྱེད་པ་དང་། སྲིད་པ་འཇོམས་པ་དང་། འཁོར་བའི་ཕ་རོལ་ཏུ་ཕྱིན་པ་དང་། ཆུ་བོ་ལས་རྒལ་བ་དང་། སྲིད་རྩ་བཏོན་པ་ལ་སོགས་པ་ཟག་པ་དང་
བཅས་པའི་ཆོས་ཀྱི་དྲི་མ་དག་པའི་སྒོ་ནས་བརྗོད་པ་དང་། གཞན་དག་པ་རྣམ་པ་བཅུ་གཉིས་འཆང་བ་དང་། རྣམ་དག་ཕུང་པོ་ལྔ་འཆང་བ། ཕ་རོལ་ཏུ་ཕྱིན་པ་བཅུ་དག་པ་དང་། ཤེས་པ་བཅུ་རྣམ་དག་འཆང་བ་ལ་སོགས་པ་སྟེ། ཟག་པ་མེད་པའི་ཆོས་རྣམས་ཀྱང་མཐར་ཕྱིན་པའི་
སྒོ་ནས་ཤིན་ཏུ་རྣམ་པར་དག་པའི་མཚན་ཉིད་དུ་སྟོན་ཏེ། དེ་ལྟར་ཆོས་ཐམས་ཅད་རྣམ་པར་དག་པའི་ཡོན་ཏན་སྟོན་པའི་མིང་གང་སྨོས་པ་ཐམས་ཅད་དེའི་མཚན་དུ་འགྱུར་རོ། །དེ་ལ་ཇི་ལྟར་ན་དེ་ཆོས་ཐམས་ཅད་ཀྱི་དབང་ཕྱུག་ཡིན་ཞེ་ན། འདི་ཉིད་དུ་གསུངས་པ། ཆོས་ཀྱི་དབང་
ཕྱུག་ཆོས་ཀྱི་རྒྱལ། །ཞེས་བྱ་བ་ལ་སོགས་པ་ལྟ་བུ་ཆོས་ཐམས་ཅད་ལ་མངའ་བརྙེས་ཤིང་། དེ་ལ་དབང་སྒྱུར་བ་ཆོས་ཀྱི་རྒྱལ་པོ་དང་། གཙོ་བོ་དང་། བདག་པོ་སྟོན་པའི་སྒོ་ནས་ཡོན་ཏན་བརྗོད་པའི་མིང་ཐམས་ཅད་ཀྱང་དེའི་མཚན་དུ་འགྱུར་རོ། །དེ་ལ་ཇི་ལྟར་ན་དེ་ཆོས་ཐམས་ཅད་
སྐྱེད་པ་ཡིན་ཞེ་ན། འདི་ཉིད་དུ་གསུངས་པ། སངས་རྒྱས་ཐམས་ཅད་སྐྱེད་པ་པོ། །འབྱུང་བ་ཆེན་པོ་རྒྱུ་གཅིག་པ། །སྣ་ཚོགས་དོན་ཀུན་སྐྱེད་པའོ། །གསང་སྔགས་དོན་ཀུན་སྐྱེད་པ་པོ། །ལ་སོགས་པའི་ཆོས་ཐམས་ཅད་འཕགས་པ་འཇམ་དཔལ་ལས་བྱུང་བར་སྟོན་པ་ལྟ་བུ་སྟེ།
འདི་ལྟར་དེ་བཞིན་ཉིད་ཀྱི་ཕྱིར་ཆོས་ཐམས་ཅད་སྐྱེད་པ་ཡིན་པ་དང་། ཐབས་དང་ཤེས་རབ་ཀྱི་ཕྱིར་སངས་རྒྱས་ཐམས་ཅད་སྐྱེད་པ་ཡིན་པ་དང་། འདུལ་བའི་དབང་གི་ཕྱིར་སྤྲུལ་པ་ཐམས་ཅད་སྐྱེད་པ་ཡིན་ཏེ། དེ་ལྟ་བུ་ལ་སོགས་པ་ཡོན་ཏན་བརྗོད་པའི་ཕྱིར་སྨོས་པའི་མིང་ཐམས་ཅད་དེའི་
མཚན་དུ་འགྱུར་རོ། །དེ་ལ་ཇི་ལྟར་དེ་ཆོས་ཐམས་ཅད་ལས་སྐྱེས་པ་ཡིན་ཞེ་ན། དེ་ཆོས་ཉིད་ལས་སྐྱེས་པ་ཡིན་ཞེས་ཏེ། ནམ་མཁའ་ལས་བྱུང་རང་བྱུང་བ། །ཞེས་གསུངས་པ་ལྟ་བུའོ། །དེ་ལ་ཡེ་ཤེས་འབའ་ཞིག་ལས་སྐྱེས་པ་ཞེས་གསུངས་པ་ལྟ་བུའོ། །དེ་སེམས་ལས་སྐྱེས་པ་

ཡིན་ཏེ། སྣ་ཚོགས་གཟུགས་ཅན་ཡིད་ལས་སྐྱེས། །ཞེས་གསུངས་པ་ལྟ་བུའོ། །དེ་ཉན་ཐོས་ཀྱི་ལམ་དང་། རང་སངས་རྒྱས་ཀྱི་ལམ་དང་ཡང་དག་པར་རྫོགས་པའི་སངས་རྒྱས་ཀྱི་ལམ་ཐམས་ཅད་ལས་སྐྱེས་པ་ཡིན་ཏེ། ངེས་འབྱུང་སྣ་ཚོགས་ལས་བྱུང་བ། །ཞེས་
གསུངས་པ་ལྟ་བུའོ། །དེ་ཐེག་པ་ཆེན་པོའི་ཡང་ཆེན་པོ། །གསང་སྔགས་ཀྱི་ཚུལ་ལས་ཀྱང་སྐྱེས་པ་ཡིན་ཏེ། གསང་སྔགས་ཚུལ་ཆེན་ལས་བྱུང་བ། །ཞེས་གསུངས་པ་ལྟ་བུའོ། །དེ་ལེགས་པར་སྤྱད་པའི་ཆོས་ལས་ཀྱིས་སྐྱེས་པ་ཡིན་ཏེ། ཆོས་ལས་བྱུང་བ་སྲིད་པ་སེལ། །ཞེས་
གསུངས་པ་ལྟ་བུའོ། །དེ་ཆོས་ཐམས་ཅད་དབྱེར་མེད་པའི་མཚན་ཉིད་ལས་སྐྱེས་པ་ཡིན་ཏེ། རྡོ་རྗེ་ལས་སྐྱེས་རྡོ་རྗེའི་བདག །ཅེས་པ་ལྟ་བུའོ། །དེ་ལྟར་ཆོས་ཐམས་ཅད་ལས་སྐྱེས་པ་བསྟན་པའི་ཕྱིར་དེའི་ཡོན་ཏན་བརྗོད་པའི་མིང་ཐམས་ཅད་ཀྱང་དེའི་མཚན་དུ་འགྱུར་རོ། །དེ་ལྟར་རྣམ་
པ་བཅུའི་སྒོ་ནས་ཟག་པ་དང་བཅས་པའི་ཆོས་དང་། ཟག་པ་མེད་པའི་ཆོས་ཐམས་ཅད་ཀྱི་མིང་ཐམས་ཅད་དེའི་མཚན་དུ་འགྱུར་བ་ཐུན་མོང་དུ་འགྱུར་བ་བསྟན་ནས། ད་ནི་ཁྱད་པར་བརྗོད་པར་བྱ་སྟེ། དེ་ལ་ཟག་པ་དང་བཅས་པའི་ཆོས་ལ་དེའི་བདག་ཉིད་དུ་སྟོན་པའི་ཚེ། འདི་ལྟར་ཟག་པ་དང་
བཅས་པའི་ཆོས་རྣམས་ཀྱི་མཚན་ཉིད་ནི། འཕགས་པ་འཇམ་དཔལ་ཡིན་ནོ་ཞེས་བརྗོད་པར་བྱའོ། །འཕགས་པ་འཇམ་དཔལ་གྱི་མཚན་ཉིད་ཟག་པ་དང་བཅས་པའོ་ཞེས་བརྗོད་པར་མི་བྱ་སྟེ། དཔེར་ན་བུམ་པའི་མཚན་ཉིད་དོ། །ཞེས་བརྗོད་པར་བྱའོ། །མི་རྟག་པ་ཉིད་ཀྱི་མཚན་ཉིད་ནི་བུམ་
པའོ་ཞེས་བརྗོད་པར་མི་བྱའོ། །འདི་ལྟར་མཚན་ཉིད་དང་མཚན་གཞི་རྣམ་པར་གཞག་པ་ནི་ཁྱབ་པ་ཆེ་ཆུང་དང་། ཕྲ་རགས་དང་དམ་པ་དང་དམ་པ་མ་ཡིན་པ་དང་། འཁྲུལ་པ་དང་བདེན་པ་ལྟ་བུའི་སྒོ་ནས་ཕན་ཚུན་བཞག་སྟེ། ཐམས་ཅད་དུ་ཕན་ཚུན་ནོར་དུ་རུང་བ་ནི་མ་ཡིན་ནོ། །དེ་བས་ན་
འཕགས་པ་འཇམ་དཔལ་གྱི་མཚན་ཉིད་ཟག་པ་དང་བཅས་པའི་ཆོས་ཡིན་པར་མི་བརྗོད་དོ། །ཆོས་ཐམས་ཅད་ཁྱབ་པར་སྟོན་པའི་སྐབས་སུ་རྟེན་དང་བརྟེན་པར་གཞག་པའི་ཚེ་འཕགས་པ་འཇམ་དཔལ་ནི་ཟག་བཅས་ཀྱི་ཆོས་ལ་ཁྱབ་པ་ཡིན་གྱི་བརྟེན་པ་མ་ཡིན་ནོ། །དཔེར་ན་ནམ་

མཁའ་ནི་གཟུགས་ལ་ཁྱབ་པ་ཡིན་གྱི་བརྟེན་པ་ནི་མ་ཡིན་ནོ། །དཔེར་ན་ནམ་མཁའ་ནི་གཟུགས་ལ་ཁྱབ་པ་ཡིན་ཀྱང་ནམ་མཁའི་མཚན་ཉིད་གཟུགས་ལ་བརྟེན་པ་ནི་མ་ཡིན་ཏེ། དེ་བས་ན་ཟག་པ་དང་བཅས་པའི་ཆོས་ལ་འཕགས་པ་འཇམ་དཔལ་བརྟེན་པའི་ཚུལ་ནས་མཚན་མི་བརྗོད་
དོ། །ཟག་པ་དང་བཅས་པའི་ཆོས་ལྟ་བུར་སྤྲུལ་ཞིང་འཇུག་པར་སྟོན་པའི་ཚེ། ཟག་པ་དང་བཅས་པའི་ཆོས་ལ་ཐུགས་རྗེ་དང་འཕྲུལ་པ་འཇུག་པར་སྟོན་ཀྱང་ཟག་པ་དང་བཅས་པའི་ཆོས་ལ་ནི་དེས་བསྒོས་ཤིང་བྱིན་གྱིས་རློབ་ཀྱི། དེ་ལ་ཟག་པ་དང་བཅས་པས་མི་འཛིན་ཅིང་མི་གོས་
ཏེ། དཔེར་ན་ཉི་མའི་འོད་ཟེར་གྱིས་མི་གཙང་བའི་ས་ཕྱོག