Luận tạng Tây Tạng (Tengyur) — Tập 48

པའི་གཏོར་མ་དབུལ་བར་བྱའོ།། །།ཨོཾ་རཀྟ་མུ་ཀུ་ཊཱ་ཡ། རཀྟ་ཛཱ་ཊཱ་ཡ། རཀྟ་མུ་ཁཱ་ཡ། རཀྟ་ཤ་རཱི་རཱ་ཡ། རཀྟ་བྷུ་ཛཱ་ཡ། རཀྟ་ཀ་མུཎྜ་མཱ་ལཱ་བྷ་ར་ཎཱ་ཡ། རཀྟ་ར་ཐ་ས་མ་རུ་ཌྷཱ་ཡ། རཀྟ་པདྨཱ་ས་ནཱ། རཀྟ་བྷ་ར་ཎ། བྷཱུ་ཥ་ཎཱ་ཡ། ཨི་དཾ་བ་ལིཾ། གྲྀཧྞ་གྲྀཧྞ། མ་མ་བིགྷྣཱན། ཧ་ར་ཧ་ར།
ཙ་ཏུརྨྨཱ་ར་ཎ། བི་བཱ་ར་ཡ། བྷྲ་མ་ཡ་བྷྲ་མ་ཡ། ཙྪིནྡ་ཙྪིནྡ། བྷིནྡ་བྷིནྡ། ནཱ་ཤ་ཡ་ནཱ་ཤ་ཡ། ཤོ་ཥ་ཡ་ཤོ་ཥ་ཡ། ཙྪེ་ད་ཙྪེ་ད། བྷེ་ད་བྷེ་ད་ཧཱུཾ་ཧཱུཾ་ཕཊ་ཕཊ་སྭཱ་ཧཱ། དེ་ནས་སོ་སོ་ལ་དབུལ་བར་བྱ་སྟེ། ཨོཾ་ཨིནྡྲཱ་ཡ་ན་མོ་ཧྲཱིཿ ཡ་མཱ་ཡ་ན་མཿཥྚྲྀཿ། བ་རུ་ཎཱ་ཡ་ན་མོ་ཝི། ཀུ་བེ་རཱ་ཡ་ན་མཿཀྲྀ། ཨཱི་ཤཱ་ནཱ་ཡ་ན་མཿ
ཏ། ཨགྣ་ཡེ་ན་མ་ཨ། ནཻཪྼྀ་ཏ་ཡེ་ན་མོ་ན། བ་ཡ་བེ་ན་མོ་ན། ཙནྡྲཱ་ཡ་ན་མོ་ཧཱུཾ། ཨཱརྐཱ་ཡ་ན་མོ་ཧཱུཾ། བྲཧྨ་ཎ་ཡེ་ན་མ་ཕཊ། བ་སུཾ་དྷཱ་ར་ཡཻ་ན་མ་ཕཊ། བེེ་མ་ཙི་ཏྲ་ཎི་ན་མཿསྭཱ། སརྦྦ་བྷུ་ཏེ་བྷྱོ་ན་མོ་ཧཱ། ཧ་ཧ་ཧཱི་ཧཱི། ཧཱུཾ་ཧཱུཾ་ཕེཾ་ཕེཾ་སྭཱ་ཧཱ། ཨོཾ་མརྨྨེ་མརྨྨེ་བི་ག་ཏེ་ཧཱུཾ། བཛྲ་ཙརྩི་ཀ །ཧ་ར་ཧ་ར། བྷུཀྐེཾ་
མཱ་ར་ཡ་མཱ་ར་ཡ། ཨ་མུ་ཀཾ་ཛཿཛཿ། ཨོཾ་གྷོ་ཎེ་སུ་གྷོ་ཎེ། བཛྲ་མཱ་མ་ཀཱི། བྷ་ར་བྷ་ར། སམྦྷ་ར་སམྦྷ་ར། བི་གྷ་ན་ཛཿཛཿ། ཨོཾ་མརྨེ་མརྨེ། ཀྵོ་བྷ་ཎི་བཛྲ་ས་ར་སྭ་ཏྱཻ། ཧ་ར་ཧ་ར། ཐ་ར་ཐ་ར། པ་ར་པ་ར། ཀ་ནྱ་ཀ་ནྱ། དྷུ་ན་དྷུ་ན་ཧཱུཾ་ཧཱུཾ་ཨ་མུ་ཀཾ་ཛཿཛཿ། ཨོཾ་གཾ་བྷི་ར། བཛྲ་ཀཱ་ར་ཏི་ཀེ། གྷཿགྷཿ
ཧཱུཾ་རཀྟ་ཤོ་ཎ། ཏ་པྲ་ཡེ་གཽ་རཱི་ཡེ། ཨ་མུ་ཀཾ་ཛཿཛཿཤིང་གཅིག་དང་དུར་ཁྲོད་དམ་རིའི་རྩེ་མོར་བྱུང་སྟེ། ཁ་ལྷོ་ཕྱོགས་སུ་བལྟས་གཅེར་བུར་བྱས་ནས། ཧྲཱིཿཥྚྲྀཿབརྒྱ་རྩ་བརྒྱད་བཟླས་པ་བྱས་ན། དེ་ནས་འདི་འགྲུབ་པར་འགྱུར་ལ་ཐེ་ཚོམ་མེད་དོ། །སྔགས་ཀྱི་ཆོ་ག་གསུངས་ཏེ། དབེན་པ་

གཅིག་ཏུ་འདུག་སྟེ། རྗེ་བཙུན་གྱི་ཐང་ཀ་བཀྲམ་ལ། ཕྱོགས་བཅུ་ན་བཞུགས་པའི་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་མངོན་སུམ་དུ་དམིགས་ནས། མི་རུས་ཀྱི་སྨྱུ་གུས་ཁྲག་ཆེན་དང་། བྱ་རོག་གི་ཁྲག་བསྲེས་པ་བྲི་གཞི་སོར་བཅུ་གཉིས་ཀྱི་ཚད་ལ་འཁོར་ལོ་རྩིབས་བཅུ་
གཉིས་ཀྱི་དབུས་སུ་རླུང་གི་ས་བོན་དེའི་ལྟེ་བར་དགྲའི་མིང་ཚེག་དྲག་དང་བཅས་པ་ཁ་སྦྱར་དུ་བྱས་ཏེ་བྱ་རོག་གི་སྐེ་ལ་བཏགས་ནས། གལ་ཏེ་མ་བཀྲོལ་ན་དེ་རུ་ཆགས་པར་མི་འགྱུར་རོ། །དེ་ཉིད་དུ་བྲི་བར་བྱ་བའི་ས་བོན་བཅུ་གཉིས་ནི་ཕཊ་ཕཊ་ཧཱུཾ་ཧཱུཾ་ན་ན་ཏཱ་ཀྲྀ་བིཥྚྲྀཿཧྲཱིཿཨོཾ། ཇི་ལྟར་འབྱོར་པའི་པཱུ་ཛ་
བྱས་ནས། སྤོས་ཆེན་པོས་བདུགས་ཏེ། གལ་ཏེ་འབབ་ཆུ་ལ་རབ་ཏུ་བསྒྱུར་ན། དེ་ནས་མི་གནས་པར་འགྱུར་རོ། །དེ་མ་ཡིན་པ་བྱ་རོག་གི་སྒྲོ་ལ་ལན་གསུམ་བསྔགས་ཏེ་དགྲའི་སྒོ་གོང་དུ་སྦས་ན་འཁོར་དང་བཅས་པ་དེ་མ་ཐག་ཏུ་བརླག་པར་འགྱུར་རོ། །དེ་བཞིན་དུ་འཁོར་ལོ་རྩིབས་བཅུ་གཉིས་
པ་དེ་ཉིད་ཀྱི་དབུས་སུ་ཚ་སྣ་གསུམ་དང་། དུག་དང་སྐེ་ཚེ་རྣམས་ཀྱིས་རུས་ཆེན་གྱི་སྨྱུ་གུས་མེའི་ས་བོན་དབུས་སུ་ཚེག་དྲག་དང་བཅས་པའི་གྷཿགཉིས་ཁ་སྦྱར་ལ། ཐ་གཉིས་ཀྱིས་ཕྱི་ནས་བསྐོར་ཏེ། བུད་ཤིང་གི་མེ་ལ་བསྲོས་ན། བུ་དང་བུ་མོ་འཁོར་དང་བཅས་པ་དེ་མ་ཐག་ཏུ་འཆི་བར་འགྱུར་
རོ། །འདི་མན་ངག་ལ་འཁོར་ལོ་གཉིས་ཁ་སྦྱར་བར་བྱའོ། །ཡང་ན་མིའི་རུས་པ་སོར་བཞིའི་ཚད་ལ་ལན་བདུན་སྔགས་བཟླས་ནས་དགྲ་བོའི་སྒོ་རུ་སྦས་ན། དེའི་རིགས་སྟོང་པར་འགྱུར་རོ། །དེ་བཞིན་དུ་ས་བོན་བཅུ་གཉིས་པས་དེ་ཁོ་ན་ཡོངས་སུ་བསྐོར་བའི་འཁོར་ལོ་རྩིབས་བཅུ་གཉིས་པའི་
དབུས་སུ་ཙནྡན་ནམ་བོ་དེ་ཙེའི་ཤིང་ངམ། གཞན་གྱིས་མི་ཐུབ་པའི་སྔོ་རིགས་ཀྱི་ཤིང་གི་སྨྱུ་གུས་ཆུའི་ས་བོན་གྱི་དབུས་སུ་བཾ་དེ་གཉིས་ཁོ་ན་ཁ་སྦྱར་ལ། ཐ་གསུམ་གྱིས་ཕྱི་ནས་བསྐོར་ཏེ། འོ་མས་བཀང་སྟེ་བརྒྱ་རྩ་བརྒྱད་མངོན་པར་བཟླས་ན། ཟླ་བ་གང་བ་ལྟ་བུར་རྒྱས་པར་འགྱུར་རོ། །དེ་
བཞིན་དུ་ས་བོན་བཅུ་གཉིས་པ་དེ་ཉིད་ཀྱིས་ཡོངས་སུ་བསྐོར་བར་འཁོར་ལོ་རྩིབས་བཅུ་གཉིས་ཀྱི་དབུས་སུ་རྒྱ་སྐྱེགས་ཀྱི་ཡི་གེ་ཧཱུཾ་གིས་བསྐོར་བའི་ཧོཿགཉིས་ཁ་སྦྱོར་ནང་དུ་མིང་བཅུག་སྟེ། ཡུངས་ཀར་དང་མར་དང་སྦྲང་རྩིས་བཀང་བར་གྱུར་ན། ལྷ་དང་ལྷ་མ་ཡིན་དང་། མིའམ་ཅི་དང་།

ལྟོ་འཕྱེ་ཆེན་པོ་དང་མཁའ་འགྲོ་མ་དང་། གནོད་སྦྱིན་དང་སྲིན་པོ་དང་རྒྱལ་པོ་གདུག་པ་ཅན་ལ་སོགས་པ་ཁོལ་པོ་དང་ཁོལ་མོ་ལྟ་བུར་ཉེ་བར་དབྱུང་བར་འགྱུར་རོ། །འཁོར་ལོ་བྲིས་ནས་རོ་བསྲེགས་པའི་སོལ་བས་ལིངྒ་བྲིས་ལ་རྐང་པ་གཡོན་པའི་མཐེ་བོ་ཆེས་
མནན་ཏེ། སྔགས་བཟླས་པས་གོང་བུ་དགུག་པའོ། །དེ་བཞིན་དུ་སྙིང་གར་ཧྲཱིཿདམར་པོས་མཚན་པར་བསྒོམས་ནས་བཟླས་ན། རྐང་པ་འགུགས་པར་འགྱུར་རོ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཙཱ་ལ་ཡ་པཱ་ད་ཙཱ་ལ་ནེ་ཧཱུཾ་ཧཱུཾ་ཕཊ་ཕཊ། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་པ་ཏྱ་དེ་བ་དཏ་ཏཾ། མཱ་ར་ཡ་མཱ་ར་ཡ།
ར་རཾ་ར་རཾ་ཧཾ་ཧཱུཾ་ཧཱུཾ་ཕཊ་ཕཊ། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཛི་བཾ་བ་ར་ཏ་ཧཱུཾ་ཧཱུཾ་ཕཊ་ཕཊ། ཨོཾ་རཀྟ་རཱུ་པ་སརྦྦ་སཏྭ། ད་མ་ཀ །སྟྭཾ་བྷ་ཡ། མོ་ཧ་ཡ་བནྡྷ་ཡ། ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ། ཧྲཱིཿཆེ་གེ་མོ་བདག་གི་དབང་དུ་གྱིས་ཤིག །ཧྲཱིཿཚེག་དྲག་དང་བཅས་པ་ཛཿགཉིས་ཀྱི་བར་དུ་བཅུག་པ་
ནི་རྐང་པ་དགུག་པའོ། །རིམ་པ་ཇི་ལྟ་བར་སྔགས་ཀྱི་ཚིག་རྣམས་གོ་བར་བྱའོ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་བྷྲུཾ། ཨ་མུ་ཀཾ། གྷཿགྷཿཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞོ་དང་འོ་མ་འདྲེས་པའི་ཟན་ལ་སོགས་པའི་སྦྱིན་སྲེག་གིས་རྒྱས་པར་འགྱུར་རོ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧེ་ཧེ་ཧཱུཾ་ཧཱུཾ་ཕཊ་ཕཊ།
གྲོང་གི་ཕྱོགས་སུ་གཏོར་མ་བཏང་སྟེ། དབུས་སུ་ཏིལ་གྱི་སྦྱིན་སྲེག་བྱས་ན། བདུད་ཀྱི་གནོད་པ་ཐམས་ཅད་ཞི་བར་འགྱུར་རོ། །རྣམ་དག་གསུང་སྟེ། དམར་བ་ནི་འདོད་ཆགས་ལ་སོགས་པ་ཉོན་མོངས་པ་ཐམས་ཅད་བརླག་པར་མཛད་པའི་དོན་ཏོ། །འདས་དང་མ་འོངས་པ་དང་ད་
ལྟར་བྱུང་བའི་དུས་གསུམ་ནི་སྤྱན་གསུམ་མོ། །ཕྱག་གཉིས་ནི་དངོས་པོ་དང་དངོས་པོ་མེད་པའི་རྟོག་པ་འཇོམས་པའོ། །སྟོང་པ་དང་སྙིང་རྗེ་དབྱེར་མེད་པར་ལྡན་པས་ན་ཤེས་རབ་མ་ལ་འཁྱུད་པའོ། །ཀླུ་བརྒྱད་ནི་རྣམ་པར་ཤེས་པ་བརྒྱད་རབ་ཏུ་སྟོན་པའོ། །མི་མགོ་བརྒྱ་ཕྱེད་ཀྱི་ཕྲེང་བ་ནི་
ཡི་གེ་ལྔ་བཅུ་དང་ལྡན་པའོ། །གཡོན་པའི་ཐོད་པ་ཡེ་ཤེས་ཀྱི་བདུད་རྩིས་བཀང་བ་ནི་སྟོང་པ་ཉིད་ཀྱི་རང་བཞིན་ནོ། །གཡས་པའི་དབྱུག་ཏོ་ནི་ཕུང་པོ་དང་ཉོན་མོངས་པ་དང་། ལྷའི་བུ་དང་འཆི་བདག་གི་བདུད་བཞི་བཅོམ་ཞིང་སྙིང་རྗེའི་རང་བཞིན་ནོ། །ཞབས་གཡོན་བརྐྱང་བས་ནི་ཁམས་

གསུམ་རབ་ཏུ་སྟོན་པའོ། །བདུད་བཞི་ཁྲག་གི་རོ་དང་བཅུད་ལེན་དཔག་ཏུ་མེད་པ་མྱོང་བས་ན་ལྷ་མོའི་གཡོན་གྱི་ཕྱག་ན་ཐོད་པའོ། །གཡས་ཀྱི་གྲི་གུག་གི་དངོས་པོ་དང་། དངོས་པོ་མེད་པའི་རྣམ་པར་རྟོག་པ་རབ་ཏུ་གཅོད་པའི་ཕྱིར་རོ། །གདུག་པ་ཅན་འདུལ་བ་ནི་ཁྲོ་བོའི་གཟུགས་ཅན་ནོ། །གསུས་
པ་འཕྱང་བ་ནི་མྱ་ངན་ལས་མི་འདའ་བའོ། །དབུ་སྐྲ་སེར་པོ་གྱེན་དུ་བརྫེས་པ་ནི། སྡུག་བསྔལ་བ་དང་ཀུན་འབྱུང་བ་དང་། འགོག་པ་དང་། ལམ་གྱི་བདེན་པ་རབ་ཏུ་སྟོན་པའོ། །སྒོ་བཞི་ནི་བདུད་བཞི་སྐྲག་པར་མཛད་པའོ། །ཟུར་བཞི་ནི་ཚངས་པའི་གནས་བཞི་རབ་ཏུ་གང་བའོ། །ཀ་བ་བརྒྱད་
ནི་རྨི་ལམ་ལྟ་བུ་དང་དྲི་ཟའི་གྲོང་ཁྱེར་ལྟ་བུ་དང་། བྲག་ཅ་དང་སྒྱུ་མའི་བདག་ཉིད་དང་། སྨིག་རྒྱུ་དང་མེ་ལོང་གི་གཟུགས་བརྙན་དང་། ཆུའི་ཟླ་བ་ལྟ་བུ་དང་། ནམ་མཁའི་འཇའ་ཚོན་ཏེ་དངོས་པོ་དང་དངོས་པོ་མེད་པའི་ཉོན་མོངས་པ་འཇོམས་པའི་ཕྱིར་རོ། །ནང་གི་རྟོག་པ་འཇོམས་པ་ནི་དྲ་བ་ཕྱེད་
པའོ། །རྟ་བབས་བཞི་ནི་སྦྱིན་པ་དང་སྙན་པར་སྨྲ་བ་དང་། དོན་མཐུན་པ་དང་དོན་དཔྱོད་པ་དང་ལྡན་ཞིང་བབ་ཏུ་སྤང་བ་བཞི་དང་ལྡན་པའོ། །གཤིན་རྗེ་གཤེད་དམར་སྒྲུབ་པའི་ཐབས། །བྱས་པའི་བསོད་ནམས་གང་བསགས་པ། །དེ་ཡིས་འགྲོ་བ་མ་ལུས་ཀུན། །བདུད་བཞི་ལས་ནི་ཐར་བར་
ཤོག །གཤིན་རྗེ་གཤེད་དམར་པོའི་སྒྲུབ་པའི་ཐབས་སློབ་དཔོན་ཤྲཱི་བི་རཱུ་པས་མཛད་པ་རྫོགས་སོ།། །།རྒྱ་གར་ཤར་ཕྱོགས་ཀྱི་པཎྜི་ཏ་དཱ་ན་ཤཱི་ལས་རང་འགྱུར་དུ་མཛད་པའོ།། ༄༅༅། །འོད་གསལ་འཆར་བའི་རིམ་པ། དཔལ་གཤིན་རྗེ་གཤེད་དམར་པོ་
ལ་ཕྱག་འཚལ་ལོ། །གང་ཞིག་ཤིན་ཏུ་གོམས་པ་ཡིས། །སྤྲོས་པ་ཡིད་ཀྱིས་ཡིད་གཡེངས་ན། །བླ་མའི་མན་ངག་ལ་བརྟེན་ནས། །སྤྲོས་པ་དེ་ཉིད་སྤྲོས་མེད་བྱ། །རི་བོའི་རྩེ་སོགས་རབ་དབེན་པར། །མཎྜལ་ལ་སོགས་ཚོགས་བྱས་ལ། །བདག་བསྐྱེད་མཆོད་དང་བུམ་པ་བཟླས། །ཇི་སྐད་
བཤད་བཞིན་འགྲུབ་པ་ན། །ཤིན་ཏུ་དད་དང་ལྡན་པ་ཡི། །སློབ་མ་རྗེས་སུ་གཟུང་བར་བྱ། །ཁྲུས་སོགས་སྔོན་འགྲོ་བགེགས་བསྐྲད་ལ། །ཐུན་མོང་པ་དང་ཁྱད་པར་གྱི། །ཡོངས་སུ་རྫོགས་པའི་སྡོམ་པ་སྦྱིན། །རང་སྙིང་ལ་གནས་དབྱུག་པ་དཀར། །རྡོ་རྗེས་མཚན་པ་བསྒོམ་པར་

བྱ། །སྣ་ཚོགས་སྤྲོས་པའི་ཡིད་འདི་ཉིད། །སྤྲོས་དང་བྲལ་བར་གདོད་ནས་གྲུབ། །སྤྲོས་དང་སྤྲོས་མེད་གཞན་མིན་ཕྱིར། །ཟུང་དུ་འཇུག་པའི་སེམས་བསྐྱེད་བྱ། །ཨོཾ་བཛྲ་ཡོ་ག་ཙིཏྟ་ཨུཏྤཱ་ད་ཡཱ་མི་སུ་ར་ཏ་ས་མ་ཡ་སྟྭཾ་ཧོ། །དེ་ནས་འཇོམ་དཔལ་འདུས་པ་ཡི། །དཀྱིལ་
འཁོར་ཆོ་ག་ལ་གསུངས་ལྟར། །འབྱུང་བ་ལྔ་དང་ཕུང་ལྔ་ལ། །གནས་པའི་ཉོན་མོངས་ལྔ་སྦྱངས་ནས། །བདེ་གཤེགས་ལྔ་དང་ཡེ་ཤེས་ལྔ། །དབང་བར་བྱེད་པ་དབང་ལྔ་སྦྱིན། །དེ་ནས་བསྲུབ་དང་བསྲུབས་པ་ཡི། །བདེ་བ་ཐིག་ལེའི་མན་ངག་བྱ། །རྡོ་རྗེས་རྣམ་རྟོག་གཞོམ་པ་
ཡི། །གཡོ་འཛིན་རླུང་གི་མན་ངག་དབབ། །དེ་ཡི་འོག་ཏུ་ཟབ་མོ་ནི། །སངས་རྒྱས་ཀུན་གྱི་ཐུགས་ཀྱི་གསང་། །མཁའ་འགྲོའི་བཀའ་ཡིས་གདམས་གྱུར་པ། །རྣམ་རྟོག་འོད་གསལ་ཞལ་ལས་གཟུང་། །དེ་ནི་ནམ་ཞིག་རྟོགས་གྱུར་པས། །སྐད་ཅིག་ཉིད་ལ་ཡེ་ཤེས་འཆར། །གྲོལ་
དང་གྲོལ་བ་མ་ཡིན་པའི། །འཆིང་བ་ཀུན་ནི་སྤངས་པར་འགྱུར། །ནོར་དང་གོ་འཕང་མཉམ་པ་དང་། །མཁའ་ལ་འགྲོ་དང་ཀུན་མཐོང་དང་། །མཁའ་འགྲོ་བྲན་དུ་བྱ་ལ་སོགས། །ཅི་འདོད་པ་ཡི་བསམ་པ་འགྲུབ། །དེ་ལྟར་ཤིན་ཏུ་གསང་བ་བླ་མ་དམ་པའི་དྲིན་ལས་བྱུང་གྱུར་པ། །
གསལ་བར་བྱས་པ་གང་ཡིན་དེས་ནི་སྲིད་པ་གསུམ་བོའི་འཆིང་བ་ཀུན། །སྤངས་ནས་སྲིད་གསུམ་བདེ་ཆེན་རོ་གཅིག་དཔལ་ལྡན་ལས་འབྲས་ཀུན་གཟིགས་པ། །ཞི་ལས་འཇམ་དབྱངས་ཤིན་ཏུ་ཁྲོས་པ་གཤིན་རྗེ་གཤེད་དཔལ་ཐོབ་གྱུར་ཅིག །དཔལ་གཤིན་རྗེ་གཤེད་དམར་པོའི་
བྱིན་གྱིས་བརླབ་པའི་མན་ངག་འོད་གསལ་འཆར་བའི་རིམ་པ་སློབ་དཔོན་མཐུ་སྟོབས་ཀྱི་མགོན་པོ་དཔལ་བི་རཱུ་པས་མཛད་པ་རྫོགས་སོ།། །།རྒྱ་གར་གྱི་པཎྜི་ཏ་བ་རེནྡྲ་བའི་ཞལ་སྔ་ནས་དང་། ཆག་ལོ་ཙཱ་དགེ་སློང་ཆོས་རྗེ་དཔལ་བཟང་པོས་བསྒྱུར་བའོ།། །།
༄༅༅། །རྒྱ་གར་སྐད་དུ། སུ་ནི་པྲ་པཉྩ་ཏཏྟྭ་ཨུ་པ་དེ་ཤ་ནཱ་མ། བོད་སྐད་དུ། ཤིན་ཏུ་སྤྲོས་པ་མེད་པ་དེ་ཁོ་ན་ཉིད་ཀྱི་མན་ངག་ཅེས་བྱ་བ། བཅོམ་ལྡན་འདས་འཇམ་པའི་དབྱངས་ལ་ཕྱག་འཚལ་ལོ། །སྟོང་ཉིད་སྙིང་རྗེ་གཅིག་པའི་སྐུ། །སྲིད་གསུམ་བདེ་ཆེན་

ངོ་བོ་ཉིད། །སྤྲོས་པའི་དྲི་མས་མ་གོས་པའི། །བླ་མ་རྡོ་རྗེ་ཅན་ཞབས་འདུད། །འཇིག་རྟེན་གསུམ་ན་རྙེད་དཀའ་བ། །བླ་མ་མཆོག་གི་བཀའ་དྲིན་གྱིས། །སྐད་ཅིག་ཉིད་ལ་འཆར་བ་ནི། །བླ་མ་ཉེ་བར་བསྟེན་པར་བཤད། །ཤིན་ཏུ་འཇིགས་པའི་དུར་ཁྲོད་
དུ། །འཇིག་རྟེན་ཆོས་ལ་ལྟོས་མེད་པའི། །རྣམ་རྟོག་ཀུན་སྤངས་དཔའ་བོས་ནི། །དོགས་པ་མེད་པར་བསྒྲུབ་པར་བྱ། །བློ་གྲོས་མཆོག་ལྡན་སྒྲུབ་པ་པོས། །གཟའ་སྐར་ཚེས་གྲངས་འདིར་མེད་དེ། །དཀྱིལ་འཁོར་ལ་སོགས་ལྷ་རྣམས་དང་། །ཕྱི་རོལ་བཀོད་པ་འདིར་མི་དགོས། །
བསམ་གཏན་བཟླས་པ་ཡོད་མ་ཡིན། །སྲེག་བླུགས་དང་ནི་གཏོར་མ་མེད། །ཕྱག་རྒྱ་བཅིངས་དང་འཁྲུལ་འཁོར་སོགས། །ཕྱི་རོལ་གཡེང་བ་ཀུན་སྤངས་ཏེ། །བརྩེ་ལྡན་གཞན་གྱི་དོན་སེམས་པ། །བླ་མའི་བྱིན་རླབས་ལ་བརྟེན་ནས། །སྐད་ཅིག་ཉིད་ལ་དངོས་གྲུབ་འགྱུར། །ཐོག་
མར་བླ་མ་ལྷར་བཅས་ལ། །མཎྜལ་དབུལ་ཞིང་མཆོད་གསོལ་གདབ། །གསང་སྔགས་རྒྱལ་པོ་རྗེས་དྲན་ནས། །སེམས་ནི་དག་ཅིང་ལས་རུང་འགྱུར། །བླ་མ་དང་ནི་རྡོ་རྗེ་སེམས། །ཐ་དད་པར་ནི་མི་བྱ་སྟེ། །བླ་མ་སངས་རྒྱས་ཆོས་དང་ནི། །དེ་བཞིན་དགེ་འདུན་བླ་མ་སྟེ། །དངོས་གྲུབ་གོ་
འཕང་མཆོག་འདོད་པས། །ཀུན་ནས་བླ་མ་མཉེས་པར་བྱ། །སངས་རྒྱས་ཀུན་དངོས་རྡོ་རྗེ་འཆང་། །རྩོད་པའི་དུས་འདིར་བདག་དོན་དུ། །ཀུན་དང་མཐུན་པར་སྟོན་མཛད་པ། །དེ་ལྟར་ཤེས་ནས་དངོས་ཀུན་གྱིས། །བསྟེན་བྱ་དུས་གསུམ་སངས་རྒྱས་ཀྱི། །དངོས་གྲུབ་རྒྱ་ཆེན་སྣོད་དུ་འགྱུར། །
སྲིད་པའི་རྩ་བ་ཉོན་མོངས་དང་། །བདག་འཛིན་ལ་སོགས་མ་ལུས་པ། །ཞེན་པ་མེད་པའི་སེམས་ཀྱིས་ནི། །ལྟོས་པ་མེད་པར་གཏང་བར་བྱ། །དཀོན་མཆོག་གསུམ་དང་བླ་མ་ལ། །བསམ་པ་ཐག་པས་སྐྱབས་སོང་བས། །ལུས་ངག་ཡིད་གསུམ་སྒྲིབ་པ་གང་། །བག་ལ་ཉལ་དང་བཅས་
པས་གྲོལ། །སྐུ་གསུང་ཐུགས་ཀྱི་ཡེ་ཤེས་ནི། །རྡོ་རྗེ་རྣམས་དང་དབྱེར་མེད་འགྱུར། །འདི་ཉིད་གསལ་ཞིང་སྟོང་པ་དང་། །རིག་པ་དེ་ཉིད་མ་འགགས་ལ། །རང་རིག་ཡེ་ཤེས་སྐད་ཅིག་ལ། །འདིར་ནི་ཐོག་མ་དབུས་མཐའ་མེད། །སྲིད་མེད་མྱ་ངན་འདས་པ་མེད། །བདག་མེད་གཞན་

ཡང་མེད་པ་སྟེ། །འདི་ནི་མཆོག་ཏུ་བདེ་ཆེན་ཉིད། །འདི་ཉིད་གསལ་ཞིང་སྟོང་པ་ཉིད། །འདི་ལས་མཚོན་ཏེ་ཤེས་པར་བྱ། །འདི་ནི་རང་བཞིན་སྐུ་གསུམ་དང་། །ཡེ་ཤེས་ལྔ་ཡི་བདག་ཉིད་ཅན། །སེམས་ཅན་རྣམས་ནི་སངས་རྒྱས་ཉིད། །སངས་རྒྱས་གཞན་དུ་བསྟན་
པ་མེད། །སངས་རྒྱས་རྣམས་ཀྱི་ཡེ་ཤེས་སྐུ། །གཞན་དུ་བཙལ་བས་རྙེད་མ་ཡིན། །ཆོས་ཀུན་སྟོང་པ་ཉིད་རྟོགས་པས། །འགྲོ་ལ་སྙིང་རྗེ་རྒྱུན་མི་འཆད། །ཐབས་མཁས་སྤྱོད་པས་མཐའ་ཡས་པ། །ཡུལ་དང་དངོས་པོ་མེད་པའོ། །སྒྱུ་མ་ལྟ་བུར་འཛིན་མེད་པ། །རྒྱ་ཆེན་བསོད་ནམས་
ཚོགས་ལ་འབད། །རྣམ་རྟོག་མ་རིག་ཆེན་པོ་སྟེ། །སྲིད་པའི་རྒྱ་མཚོར་ནུབ་བྱེད་ཡིན། །རྟོག་པའི་འཆིང་བ་ལས་གྲོལ་བ། །དེ་ཚེ་མཆོག་གི་ལམ་རྙེད་དོ། །ཕྱི་རོལ་ཡུལ་གྱི་འཆིང་བྱེད་རྣམས། །བུ་ག་དགུ་ནས་སྙིང་གར་བསྡུ། །ནང་གི་རྣམ་རྟོག་ཟུག་རྔུ་ཡང་། །སྤྱི་གཙུག་ནས་ནི་རྐང་མཐིལ་
བར། །མེ་ཤེལ་ཙམ་དུ་སྙིང་གར་དགུག །སྙིང་གི་བུ་ག་གསལ་པོར་ཕྱེ། །སྐར་མདའ་འཕོ་བ་ཇི་ལྟ་བར། །རྒྱ་མཚོའི་མཐར་ཐུག་སྤྲོ་བར་བྱ། །རྟོག་པ་དང་ནི་བྲལ་བ་ནི། །ལུས་ཀྱི་བདེ་བ་ཅན་དེར་སོན། །ཡི་གེ་གསུམ་གྱི་གསང་སྔགས་བརྗོད། །མཁའ་དང་རང་རིག་སྟོང་པ་ཉིད། །
རོ་གཅིག་ནམ་མཁའ་ཡེ་ཤེས་བསྒོམ། །འདི་ནི་སངས་རྒྱས་ཐམས་ཅད་ཀྱི། །ཐུགས་ཀྱི་གསང་ཆེན་བླ་ན་མེད། །འདི་ནི་སྲིད་དང་ཞི་ལས་གྲོལ། །བླང་དང་དོར་བ་ཅི་ཡང་མེད། །བདེ་བ་དང་ནི་སྡུག་བསྔལ་དང་། །བདུད་དང་ཉོན་མོངས་ཡོད་མ་ཡིན། །ལྷ་དང་སྲིན་པོ་འདིར་མེད་དེ། །
ནད་དང་སྡུག་བསྔལ་གྱིས་མི་གོས། །འདིས་ནི་བདུད་དང་ཉོན་མོངས་འཇོམས། །འཇོམས་བྱེད་བཅོམ་ལྡན་འདས་ཞས་བྱ། །དེ་ལས་གཞན་པ་གང་ཡིན་པ། །ཆོས་ཀུན་གཉེན་པོར་མི་འགྱུར་ཏེ། །ཐམས་ཅད་རྟོག་པ་ཡིན་ཕྱིར་རོ། །རྟོག་པའི་འཆིང་བས་འཆིང་བར་འགྱུར། །དེ་ཉིད་
རྣལ་འབྱོར་པས་ཤེས་ནས། །ཕྱི་དང་ནང་དང་གཞན་རྣམས་ཀྱི། །སྤྲོས་པའི་དྲ་བ་རྣམ་པར་བཅད། །ཡུལ་གྱི་འཛིན་པ་རྣམ་པར་བཤིག །སྟོང་པ་ཉིད་ལ་གཏད་ལེགས་ན། །རྟོག་པའི་དྲ་བ་སྤོང་བར་འགྱུར། །རྟེན་དང་བརྟན་པ་རྣམ་པར་དབྱེ། །མཉམ་པར་གཞག་པ་གོམས་པར་བྱ། །

དེ་ནས་བྱང་ཆུབ་སེམས་བསྐྱེད་པའི། །བླ་མའི་མན་ངག་བཤད་པར་བྱ། །བླ་མ་རྡོ་རྗེ་འཆང་གི་སྐུ། །འོག་མིན་བདེ་ཆེན་དེར་བསྒོམས་ཏེ། །མི་ཕྱེད་བསམས་པས་གསོལ་བ་གདབ། །མཐར་ཕྱིན་ཚེ་ན་རང་ལ་བསྟིམ། །ཐོག་མེད་བརྩེ་བས་བསྐྱངས་པ་ཡི། །དྲིན་ཅན་རྣམས་ལ་སྙིང་རྗེ་
བསམ། །གནོད་བྱེད་འདི་རྣམས་བདག་གི་མ། །སྔོན་ཚེ་ཡང་ཡང་ཕན་བཏགས་ཀྱང་། །སྨྱོན་པ་བཞིན་དུ་རང་དབང་མེད། །མི་དགེའི་ལས་ཀྱིས་མནར་མེད་འགྱུར། །དེ་ལྟར་དྲན་པས་སྲིད་གསུམ་ལ། །སྙིང་རྗེ་མཐར་ཕྱིན་འགྱུར་བ་ཡིན། །ཕྱི་ནང་སྤྱོད་པ་མི་སྲུན་པས། །བློ་གྲོས་ཤིན་
ཏུ་འཁྲུགས་པའི་ཚེ། །བདག་དང་གཞན་དུ་བརྗེ་བ་ཡི། །བྱང་ཆུབ་སེམས་ནི་དྲན་པར་བྱ། །དེས་ནི་བདུད་དང་ཉོན་མོངས་ཚོགས། །འཇོམས་ཤིང་སྤྲོས་མེད་ཉིད་དུ་འགྱུར། །སྲོག་འགག་པ་ཡི་སྦྱོར་བ་ཡིས། །གོམས་པར་བྱེད་པའི་རྣལ་འབྱོར་བས། །ཇི་ལྟར་རྡོ་རྗེའི་རྣལ་འབྱོར་གྱིས། །
ལུས་འདི་རྣམ་དག་སྦྱང་བར་བྱ། །དགང་བའི་སྦྱོར་བས་སྤྱི་གཙུག་ནས། །རྐང་མཐིལ་བར་དུ་དགང་བྱས་ལ། །རྔུབ་པའི་སྦྱོར་བས་ཞི་བར་བྱ། །དང་པོར་སྲུབ་ཅིང་བསྲུབ་པར་བྱ། །གཉིས་པ་རྒྱ་མཚོ་བསྐྱོད་པ་སྟེ། །གསུམ་པ་བསད་པ་ནོར་ལྷ་གཉིས། །བཞི་པ་ཡན་ལག་བརྐྱང་བསྐུམ་
འདི། །ཕྱོགས་བཞི་གཡོ་ཞིང་སྲིད་གསུམ་བསྒྲགས། །འདི་ཡི་སྦྱོར་བས་གོམས་བྱས་ན། །ནད་ཀུན་ལས་ནི་གྲོལ་འགྱུར་ཞིང་། །འདི་ལྟར་རྒུད་དང་རྒས་པ་དང་། །འཆི་བདག་ཐག་རིང་ཀུན་རྟོག་འཇོམས། །སྲིད་པའི་འཆིང་བ་ལས་གྲོལ་ཞིང་། །སྤྲོས་མེད་ཡེ་ཤེས་གོ་འཕང་
འཐོབ། །དག་པའི་བཞི་མཉམ་བླང་བྱས་ཏེ། །གླ་རྩི་ཡིས་ནི་དུག་མེད་འགྱུར། །གཉྫི་དང་ནི་བ་རུ་ར། །སྒ་སྐྱ་དང་ནི་ལྷན་ཅིག་བྱས། །བུ་རམ་མར་དང་སྦྲང་རྩིར་བཅས། །གསང་སྔགས་བཟླས་ཤིང་ཞག་བདུན་བསྒྲུབ། །དམ་ཚིག་བརྟན་ལྡན་རྣལ་འབྱོར་པས། །ནང་པར་དུས་
སུ་བསྙེན་པ་བྱ། །སྐྲ་དཀར་གཉེར་མ་ལ་སོགས་སྤང་། །དབང་པོ་རྣམས་ནི་མཆོག་ཏུ་གསལ། །ལུས་ཀྱི་མདོག་རྒྱས་ཟོ་མདོག་བདེ། །མཁའ་འགྲོ་རྣམས་ཀྱིས་བྱིན་གྱིས་རློབས། །བདེ་བ་ཆེན་པོའི་ཏིང་འཛིན་དང་། །སྤྲོས་མེད་ཡེ་ཤེས་གོ་འཕང་འཐོབ། །རྡོ་རྗེ་འཇིགས་བྱེད་

སྦྱོར་བ་ཡིས། །རྒྱལ་བའི་ཚོགས་སུ་མཉེས་བྱས་ཏེ། །སྙིང་གི་ཀུན་རྫོབ་སྣ་རྩེ་ནས། །སོར་བཞི་བཅལ་ནས་དབུ་མར་གཞུག །ནོར་བུའི་བར་དུ་སྲོག་འཛིན་པ། །སྟེང་གི་དག་པས་ཟིན་པ་ཡིན། །ཕྱག་ན་རྡོ་རྗེ་གཟུང་བྱ་སྟེ། །གཡས་པའི་མཐིལ་གྱིས་བུམ་པ་སྦྱོར། །
ཙཀྵུ་གྱེན་དུ་བལྟ་བར་བྱ། །ཅིག་ཤོས་གཡོ་བར་མི་བྱེད་དེ། །བ་ཐག་ཙམ་ཡང་མི་འབྱུང་ངོ་། །གལ་ཏེ་ཕྱི་རོལ་བྱུང་བ་ན། །མཁའ་འགྲོ་རྣམས་ཀྱིས་ཚར་གཅོད་དོ། །འོག་རླུང་བསྡམས་པས་དགྲ་ཚོགས་ཞི། །སྟེང་རླུང་མནན་པས་བདུད་རྣམས་འཇོམས། །དབུས་རླུང་དཀྲུགས་
པས་བར་ཆོད་སེལ། །རྣལ་འབྱོར་འདི་ལ་སྒྲུབ་པ་པོས། །དུ་བ་ལ་སོགས་མངོན་ཤེས་སོ། །རྣམ་རྟོག་དྲ་བ་མ་ལུས་གཅོད། །ཤིན་ཏུ་སྤྲོས་མེད་གོ་འཕང་ཐོབ། །སྒྲུབ་པོའི་ལམ་གྱི་གེགས་བྱེད་པ། །བར་དུ་གཅོད་པ་དེ་སེལ་བ། །ཕྱི་རོལ་བདུད་ཀྱིས་དཀྲུགས་པ་དང་། །ལུས་ལ་
སེམས་དང་རང་རིག་དང་། །ནད་དང་སྡུག་བསྔལ་རེངས་པ་ཡིས། །བར་དུ་གཅོད་པ་ཕལ་ཆེར་ལ། །སྔར་གྱི་མན་ངག་བསྒོམས་པ་ཡིས། །མཁའ་ལ་སྤྲིན་ཚོགས་འཁྲིགས་པ་ལ། །མི་བཟད་རླུང་གིས་བསྐྱོད་པ་བཞིན། །གཞན་ཡང་བདུད་ཀྱི་བར་ཆད་གང་། །སྤྲོས་མེད་དེ་ཉིད་དབྱིངས་
སུ་བསྟིམ། །རྟེན་དང་བརྟེན་པ་སོ་སོར་བྱ། །འཛིན་པ་ཉིད་ལ་གཏད་པར་བྱ། །དེ་ལྟར་གོམས་པས་སྤྲོས་མེད་འགྱུར། །དགའ་དང་བདེ་བ་དང་བ་ཡིས། །ཕྱི་དང་གསང་བ་མཚོན་པར་བྱ། །བློ་ཡི་རྟོག་པ་མ་ཞི་ན། །སེམས་ཅན་ལམ་གྱི་དཔའ་བསྐྱེད་ལ། །ཏིལ་མར་ངར་བཏགས་རལ་གྲི་
བཞིན། །ཐོགས་པ་མེད་པར་གཞོམ་པར་བྱ། །ཤིན་ཏུ་སྤྲོས་མེད་བླ་མའི་གསུང་། །བློ་ཡི་ཡུལ་དུ་གམས་ན་ཡང་། །སྤྲོས་པ་རྩུབ་མོས་བསྐྱོད་པའི་ཚེ། །བློ་ལ་སྤྲོས་མེད་ཀྱིས་ལ་རེག །བློ་ནི་ཕལ་པར་བརྟན་པར་གནས། །དེ་ཚེ་སྤྲོས་པ་སྤྲོས་མེད་དུ། །རོ་གཅིག་མཉམ་པ་ཉིད་དུ་ཐིམ། །
འདྲེ་དང་སྲིན་པོ་འཇིགས་པའི་ཚོགས། །དུར་ཁྲོད་རོ་ལངས་ལ་སོགས་པ། །འཁུན་དུང་རང་བ་བཤུགས་པ་འབོད། །འཇིགས་པ་རྣམ་པ་སྣ་ཚོགས་པ། །སེམས་ལས་མ་གཏོགས་གཞན་མེད་པས། །རང་སེམས་སྐར་མདའ་འཕོ་བ་ལྟར། །དེ་ཡི་སྙིང་ལ་ཐིམ་པ་ཡིས། །བློ་དང་གཞན་

དང་སྤྲོས་མེད་རྣམས། །སྤྲོས་མེད་ཡེ་ཤེས་ཉིད་དུ་འགྱུར། །ཡང་ན་བློ་དེ་ཉིད་ལ་གཏད། །བདག་གི་གཅེས་དེ་མཆོད་སྦྱིན་བྱ། །མི་བཟད་གདོན་དང་འགོ་བའི་ནད། །སྡིག་པའི་རྨི་ལམ་འཕོ་བ་སོགས། །གཟའ་དང་རྒྱུ་སྐར་གདོན་ལ་སོགས། །ནད་དང་མྱ་ངན་སྡུག་བསྔལ་དང་། །དགྲ་དང་
འབྱུང་བའི་གནོད་པ་དང་། །མི་དང་མི་མ་ཡིན་པ་ཡིས། །ཉེ་བར་འཚེ་བ་སྣ་ཚོགས་པ། །ཐག་པའི་སྦྲུལ་ནི་སངས་པ་བཞིན། །སྐྱུག་བྲོ་བ་དང་གཙང་སྦྲ་དང་། །འཛེམ་བག་དང་ནི་ངོ་ཚ་དང་། །སྤྲོས་མེད་ཡེ་ཤེས་ཀྱིས་གཞོམ་བྱ། །བླ་མ་འདོད་ལྟར་བསྒྲུབ་བྱ་སྟེ། །དགའ་དང་བདེ་དང་རངས་པ་
དང་། །ཚིམ་དང་ང་རྒྱལ་དྲེགས་པ་དང་། །སྒེག་དང་ཚུལ་འཆོས་རྒྱན་ལ་སོགས། །སྤྲོས་མེད་ཡེ་ཤེས་ངོ་བོ་ཉིད། །ཞུམ་དང་སྒྱིད་ལུག་མི་མཐུན་ཕྱོགས། །ཐམས་ཅད་སྤྲོས་མེད་ཉིད་དུ་འགྱུར། །མི་བཟད་ཉོན་མོངས་གང་ཡིན་པ། །སྤྲོས་མེད་དེ་ཉིད་ལས་གཞན་མིན། །དེ་ལྟར་བགྲོད་དང་
བགྲོད་མིན་པ། །ཡིད་དུ་འོང་དང་མི་འོང་བ། །ཤིན་ཏུ་སྤྲོས་མེད་སེམས་ཀྱིས་ནི། །ཞེན་པ་ཉིད་དུ་མི་བྱའོ། །འཇིག་རྟེན་རྣམས་དང་མཐུན་པ་ཡི། །རྣམ་གཞག་ཧྲུལ་པོ་བཤིགས་ནས་ཀྱང་། །དོགས་པ་མེད་པའི་སེམས་ཀྱིས་ནི། །དཔའ་བོ་སེང་གེ་བཞིན་དུ་སྤྱོད། །དེ་ལས་ཡོན་ཏན་
ཕུན་སུམ་ཚོགས། །དཔལ་ལྡན་རྡོ་རྗེ་འཛིན་པར་འགྱུར། །ཨེ་མ་ཞི་བ་ཆེན་པོའི་ཆོས། །ཨེ་མ་ཁྲོ་བོ་འཇིགས་མཛད་པ། །ཨེ་མ་མྱ་ངན་འདས་པ་མཆོག །ཨེ་མ་འཁོར་བ་ཞི་བ་ཉིད། །ཨེ་མ་འདི་ནི་རབ་ཏུ་མཚར། །སྐྱོན་ནི་གང་ཡིན་ཡོན་ཏན་འགྱུར། །བྱང་ཆུབ་སེམས་ནི་མངོན་
རྟོགས་བྱེད། །དངོས་པོ་མིན་ཞིང་སྒོམ་པ་མིན། །ཁམས་ཀྱང་མིན་ཞིང་རྣམ་ཤེས་མིན། །ནམ་མཁའི་དཀྱིལ་དང་མཚུངས་པ་ཉིད། །ནམ་མཁའ་ལྟ་བུར་བདག་མེད་པ། །ཆོས་འདི་བདེ་བ་ཆེན་པོའོ། །ས་ཡང་མ་ཡིན་ཆུ་ཡང་མིན། །མེ་མིན་རླུང་མིན་ནམ་མཁའ་མིན། །རྡོ་རྗེ་
སེམས་དཔའི་སྦྱོར་བ་ཡིས། །སྐྱེ་བ་འདི་ལ་རབ་ཏུ་གནས། །དངོས་པོ་ཐམས་ཅད་དངོས་མེད་བཤད། །དངོས་པོ་མེད་ཅེས་མ་བསྒྲགས་པ། །རྣལ་འབྱོར་སྦྱོར་བ་དང་བྲལ་ཞིང་། །ཆད་པ་མ་ཡིན་རྟག་པ་མིན། །ཡན་ལག་མེད་ཅིང་ཁ་དོག་མེད། །ཐོག་མ་དབུས་དང་མཐའ་ཡང་སྤངས། །

དངོས་པོ་ཐམས་ཅད་མེད་པར་འགྱུར། །མཆོག་ཏུ་དགའ་བའི་མཚན་ཉིད་དོ། །བསོད་ནམས་སྡིག་པ་དག་དང་མ་འབྲེལ་བ། །མཆོག་ཏུ་དགའ་བ་དྲི་མེད་དག་པ་ཡི། །མགོན་པོ་དེ་ཉིད་གཏེར་ཆེན་གཅིག་པུ་སྟེ། །ཀུན་ཀྱང་སྙིང་རྗེའི་སེམས་ཉིད་མགོན་འདི་ཡོད། །ཆོས་
རྣམས་ངོ་བོ་བདེ་བ་ཆེན་པོའི་མཆོག །མཆོག་ཏུ་ལྷན་ཅིག་སྐྱེས་དགའི་ངོ་བོ་ནི། །གཟུགས་མེད་བསོད་ནམས་མེད་ཅིང་སྡིག་པ་མེད། །སྐྱེ་དང་འགག་པ་ཡོད་པ་མ་ཡིན་ནོ། །དེ་ལྟར་བླ་མའི་དྲིན་གྱིས་རང་ཉིད་ཡིད་ཆེས་དྲན་ཕྱིར་གསལ་བྱས་ལ། །དེ་ལ་ནོངས་གྱུར་དཔལ་ལྡན་བླ་མ་ལྷ་མོ་
རྣམས་ལ་བཟོད་པར་གསོལ། །རྒྱལ་བ་སྲས་བཅས་ཐུགས་ཀྱི་གསང་འདི་ལེགས་པར་བཀོད་པ་ཡིས། །བསོད་ནམས་གང་སྐྱེས་དེ་ཡིས་འགྲོ་ཀུན་རྡོ་རྗེ་འཛིན་གྱུར་ཅིག །ཤིན་ཏུ་སྤྲོས་པ་མེད་པའི་དེ་ཁོ་ན་ཉིད་གྱི་མན་ངག་ཅེས་བྱ་བ། སློབ་དཔོན་དཔལ་ལྡན་མཐུ་སྟོབས་ཀྱི་མགོན་པོ་ཐུགས་
སྤྲོས་པ་མེད་པའི་དབྱིངས་ལས་མ་གཡོས་བཞིན་དུ། སྐུའི་སྤྲོས་པ་དཔག་ཏུ་མེད་པས་གདུག་པ་ཅན་ཚར་གཅོད་ཅིང་། བཅོམ་ལྡན་འདས་ཀྱིས་དངོས་སུ་བྱིན་གྱིས་བརླབས་པའི་རྣལ་འབྱོར་གྱི་དབང་ཕྱུག་ཆེན་པོ་བི་རཱུ་པས་མཛད་པ་རྫོགས་སོ། །བསྟན་པ་སྲུང་བའི་ལྷ་རྣམས་
ཀྱིས་བུ་གཅིག་པ་ལྟར་བསྐྱངས་པས་རྒྱལ་པོ་གཞན་གྱི་རྒོལ་བས་གླགས་ལྟ་བར་མི་ནུས་པའི་ལྗོངས་ཆོས་ཀྱི་རྒྱལ་པོའི་སྐུ་མཁར་ཉི་མ་གཟུགས་སུ་རྒྱ་གར་གྱི་མཁན་པོ་པཎྜི་ཏ་དངོས་གྲུབ་བརྙེས་པ་དཔལ་དརྤན་ཨཱ་ཙཱརྱ་དང་། གློ་བོ་ལོ་ཙཱ་བ་དགེ་སློང་ཤེས་རབ་རིན་ཆེན་གྱིས་བསྒྱུར་ཅིང་
ཞུས་ཏེ་གཏན་ལ་ཕབ་པའོ།། ༄༅༅། །རྒྱ་གར་སྐད་དུ། རཀྟ་ཡ་མཱ་རི་སཱ་དྷ་ན་བི་དྷི། བོད་སྐད་དུ། གཤིན་རྗེ་གཤེད་དམར་པོའི་སྒྲུབ་ཐབས་ཀྱི་ཆོ་ག །དཔལ་གཤིན་རྗེ་གཤེད་དམར་པོ་ལ་ཕྱག་འཚལ་ལོ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ།
ན་མཿ ལྷ་སྦྱིན་བདག་གི་ཤཱནྟིཾ་ཀུ་རུ་ན་མཿསྭཱ་ཧཱ། འདི་ནི་ཞི་བའོ། །རྒྱ་སྐགས་སམ། ཙནྡན་དམར་པོ་ལ་མིང་མེད་ཀྱི་ཁྲག་དང་བསྲེས་པས་བྲི་བར་བྱའོ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་ཧོཿ། ལྷ་སྦྱིན་བདག་གི་བ་ཤྱཾ་ཀུ་རུ་ཧོ། །བ་ཤྱཾ་ཀུ་རུ་བཽ་ཥཊ། དབང་དུ་བྱ་བའི་ཆོ་གའོ། །རས་ལ་

རྒྱ་སྐགས་ཀྱི་ཁུ་བས། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་ཛ་ཧྲཱིཿཆེ་གེ་མོ་བདག་ལ་ཨཱ་ཀཪྵ་ཡ་ཧྲཱིཿཛཿ རྐང་པ་དགུག་པའོ། །རས་ལ་བ་བླ་འམ། ཡུང་བའི་ཁུ་བས། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ། ལཾ་ཨ་དེ་བ་ལྷ་སྦྱིན་སྭསྠནཱ་ཏ་སྟམྦྷ་ཡ་སྟམྦྷ་ཡ་ལཾ། རེངས་པའི་ཆོ་གའོ། །
ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་བཾ། ལྷ་སྦྱིན་གྱི་མུ་ཁཾ་བནྡྷ་མ་ནོ་བནྡྷ་མུ་ཁཾ། ཀུ་རུ་བཾ་མོ་ཧཱ་ཡ་བྱ་བ་ཧ་ར་བི་ཥྱ་བཾ། རས་ལ་དུག་དང་སྐེ་ཚེ་དང་ཚ་བའི་མར་ནག་དང་། ནགས་ཀྱི་ནིམ་པའི་འདབ་མ་དང་། ད་དུ་རའི་འདབ་མའི་ཁུ་བ་དང་། རོ་བསྲེགས་པའི་སོལ་བ་དང་ཐལ་བ་དང་ཁྲག་གིས་
བྱ་རོག་གི་སྒྲོའི་སྨྱུ་གུས། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ། ལྷ་སྦྱིན་མཱ་ར་ཡ་ཧཱུཾ། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་ཧ་ར་ཆེ་གེ་མོ་མཱ་ར་ཡ་ཧཱུཾ་ཕཊ། གསད་པའི་ཆོ་གའོ། །དེ་ཁོ་ན་བཞིན་དུ། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ། ལྷ་སྦྱིན་དང་མཆོད་སྦྱིན་དག །བི་དེ་ཥ་ཡ་ཧཱུཾ་
ཕཊ་ཆེ་གེ་མོ་ཉིད་ཀྱི། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཆེ་གེ་མོའི་ཡེ་ན་ཀེ་ན་ཙི་ཛ་གྲི་ན་ཡནྟྲ་མནྟྲ་བི་ཥ་ཙཱུརྞ་པྲ་ཡོ་ག་ཏི་ཏ་ཏ་སརྦྦ་ཨུཏ་གྷཱ་ཊ་ཡ་སྭཱ་ཧཱ། དང་པོར་འཁོར་ལོ་བཏུ་བར་བྱ་སྟེ། རྩིབས་བརྒྱད་པ་འམ། རྩིབས་བཅུ་གཉིས་པའི་དབུས་སུ་ཡ། ཤར་དུ་ཀྵེ། ལྷོར་མ།
ནུབ་ཏུ་མེ། བྱང་དུ་ཡི་གེ་ད། ཡི་གེ་ཡ་དང་པོར་བྱས་པའི། རཱ་ཛ་ཡ་ས་དོ་རུ་ཎ་ཡོ་ནི་ར་ཡཙྪ་ནི་འདབ་མ་བཅུ་གཉིས་སུ་བྲིའོ། །རྩིབས་བཅུ་དྲུག་ཏུ་རེ་རེའི་བར་དུ་བཅུག་པའི་རེའུ་མིག་ལ། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་པ་ལ་སོགས་པ་བྲི་བར་བྱའོ། །རེའུ་མིག་གཞན་
བརྒྱད་དུ། ཨོཾ་ཧྲཱིཿཥྚྲྀཿལ་སོགས་པ་རྫོགས་པ་དང་། སྭཱ་ཧཱ་མཐར་བྲི་སྟེ་ལྷ་སྦྱིན་གྱི་ཤཱནྟིཾ་ཀུ་རུ་པུཥྟིཾ་ཀུ་རུ་བ་ཤྱཾ་ཀུ་རུ། སྟམྦྷ་ཡ་མོ་ཧ་ཡ། ཥ་ཡ། ཨུཙྪ་ཊ་ཡ། མཱ་ར་ཡཱ་མུ་ཀཾ་ཀུ་རུ་སྭཱ་ཧཱ། ཞེས་བྱ་བ་བྲི་བར་བྱའོ། །ཕྱོགས་བྲལ་དུ་ལྷ་སྦྱིན་གྱི་མིང་ངོ་། །གཤིན་རྗེ་གཤེད་དམར་
སྒྲུབ་པའི་ཐབས། །བྲིས་ལ་དགེ་བ་གང་བསགས་པ། །དེ་ཡིས་མྱུར་དུ་སེམས་ཅན་རྣམས། །བདེ་བ་མྱུར་དུ་མཆོག་ཐོབ་ཤོག །དཔལ་དཔའ་བོའི་རྒྱལ་པོས་མཛད་པ་རྫོགས་སོ།། །།རྒྱ་གར་གྱི་མཁན་པོ་བླ་མ་རྗེ་བཙུན་ཉི་མའི་དབང་པོའི་འོད་ཟེར་གྱི་ཞལ་སྔ་ནས་དང་། ཆག་ལོ་ཙཱ་

བ་དགེ་སློང་ཆོས་རྗེ་དཔལ་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།༄༅༅། །རྒྱ་གར་སྐད་དུ། ཡ་མཱ་རི་ཡནྟྲ་ཨ་བ་ལི། བོད་སྐད་དུ། གཤིན་རྗེ་གཤེད་ཀྱི་འཁྲུལ་འཁོར་གྱི་ཕྲེང་བ། བཅོམ་ལྡན་འདས་གཤིན་རྗེ་གཤེད་ལ་ཕྱག་འཚལ་ལོ། །
དམར་པོ་དང་སེར་པོ་དང་། ནག་པོ་དང་ལྗང་གུ་དང་དཀར་པོའི་མདོག་གི་དབྱེ་བས་ཕྲིན་ལས་ཀྱི་རྗེས་སུ་འབྲངས་ནས་བསྒོམ་པར་བྱའོ། །དེ་ནས་བཟླས་པ་རྗེས་སུ་དྲན་པ་ནི། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་ན་མཿཆེ་གེ་མོ་ཤཱནྟིཾ་ཀུ་རུ་ན་མཿསྭཱ་ཧཱ། རྒྱས་པ་ལ་བོ་ཥཊ་དགུག་པ་ལ་ཛཿབསྐྲད་
པ་ལ་བཾ། དབང་དུ་བསྡུ་བ་ལ་ཧོཿ རེངས་པ་ལ་ལཾ། བསྐུལ་པ་ལ་ཧཱུཾ། གསད་པ་ལ་ཧཱུཾ་ཕཊ། དེ་ལྟར་ངེས་པ་ལ་སོགས་པའི་ཕྲིན་ལས་རྣམས་ལ་གདགས་པར་བྱའོ། །ཨོཾ་ཡ་མ་རཱ་ཛ། ས་དོ་མེ་ཡ། ཡ་མེ་དོ་རུ། ཎ་ཡོ་ད་ཡ། ཡ་ད་ཡོ་ནི། ར་ཡ་ཀྵེ་ཡ། ཡ་ཀྵེ་ཡཙྪ། ནི་རཱ་མ་ཡ་ཧཱུཾ་ཕཊ་
སྭཱ་ཧཱ། འདི་ནི་སྔགས་ཀྱི་རྒྱལ་པོའི་ཕྲིན་ལས་ཐམས་ཅད་བྱེད་པར་འགྱུར་རོ། །བུད་མེད་རྣམས་ཀྱི་སྲུང་བ་དང་ཞི་བ་ལ་གི་ཝང་གིས་དར་དཀར་པོའམ། གྲོ་གའམ་སྨྱུག་མའི་ཤུན་པའམ། རས་དཀར་པོ་ལ་འཁོར་ལོ་གཉིས་མངོན་པར་བྲིས་ཏེ། ན་མཱཿ ཡི་གེ་མིང་ལ་བཏགས་ལ་ནག་
ནོག་ལ་སོགས་པ་མེད་པའི་རྫ་ཕོར་ཁ་སྦྱོར་གྱི་ནང་དུ་བཅུག་སྟེ། མར་དང་སྦྲང་རྩིའི་ནང་དུ་བཅུག་ནས་སྐུད་པ་དཀར་པོས་དྲིལ་ཏེ་ཐུན་གསུམ་དུ་མེ་ཏོག་དཀར་པོས་མཆོད། ཤར་ཕྱོགས་སུ་བལྟས་ལ་གཤིན་རྗེ་གཤེད་དཀར་པོ་བསྒོམ་ཞིང་མདུན་དུ་ཟླ་བའི་དཀྱིལ་འཁོར་གྱི་སྟེང་དུ་བསྒྲུབ་བྱ་
དམིགས་ནས་རང་གི་སྙིང་ག་ནས་ཁུག་པ་ལྟ་བུའི་འོད་ཟེར་ལས་བྱུང་བའི་གཤིན་རྗེ་གཤེད་དཀར་པོ་རྣམས་ཀྱིས་བུམ་པ་དཀར་པོ་ཟླ་བའི་བདུད་རྩིའི་ཆུས་ཡོངས་སུ་གང་བས་དབང་བསྐུར་བར་བསམས་ལ་སྔགས་བཟླས་པ་ནི། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་ན་མཿཆེ་གེ་མོ་ཤཱནྟིཾ་ཀུ་རུ་ན་
མཿསྭཱ་ཧཱ། ཞི་བའི་ཆོ་གའོ། །སྐྱེས་པ་རྣམས་ཀྱིས་ཞི་བ་དང་། རྒྱས་པ་ལ་གུར་གུམ་གྱི་འཁོར་ལོ་གཉིས་བཽ་ཥཊ་དང་བཅས་པ་མངོན་པར་བྲིས་ཏེ། སྭཱ་ཧཱ་ཡི་གེ་མིང་ལ་བཏགས་ལ་མར་དང་སྦྲང་རྩིའི་ནང་དུ་བཅུག་ནས། སྐུད་པ་སེར་པོས་དྲིལ་ཏེ། ཐུན་གསུམ་དུ་མེ་ཏོག་སེར་པོས་མཆོད།

བྱང་དུ་ཁ་བལྟས་པས་གཤིན་རྗེ་གཤེད་སེར་པོ་བསྒོམས་ཏེ། ཟླ་བའི་དཀྱིལ་འཁོར་སེར་པོ་ལ་གནས་པའི་བསྒྲུབ་བྱ་བསམ་ཞིང་དམིགས་ནས་རང་གི་སྙིང་ག་ནས་འོད་ཟེར་སེར་པོ་ལས་བྱུང་བའི་གཤིན་རྗེ་གཤེད་སེར་པོ་དཔག་ཏུ་མེད་པ་རྣམས་ཀྱིས་གསེར་གྱི་བུམ་པ་སེར་པོ། བདུད་རྩི་
སེར་པོས་གང་བས་དབང་བསྐུར་བར་བསམ་ཞིང་སྔགས་བཟླས་པ་ནི། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ། བཽ་ཥཊ་ཆེ་གེ་མོ་པུཥྚིཾ་ཀུ་རུ་བཽ་ཥཊ་སྭཱ་ཧཱ། རྒྱས་པའི་ཆོ་གའོ། །གྲོ་གའམ་རས་དཀར་པོ་ལ་རྒྱ་སྐྱེགས་ཀྱི་ཁུ་བའམ་ཙནྡན་དམར་པོས་མིང་མེད་ཀྱི་ཁྲག་དང་བསྲེས་པས་འཁོར་ལོ་
གཉིས་མངོན་པར་བྲིས་ཏེ་ཧོཿའི་ཡི་གེ་མིང་ལ་བཏགས་ལ་ནག་ནོག་ལ་སོགས་པ་མེད་པའི། སོ་ལེགས་པར་བཏང་བའི་རྫ་ཕོར་དམར་པོ་ཁ་སྦྱོར་དུ་བཅུག་ལ། མར་དང་སྦྲང་རྩིའི་ནང་དུ་བཅུག་ནས་སྐུད་པ་དམར་པོས་དྲིལ་ཏེ་མེ་ཏོག་དམར་པོས་མཆོད། ནུབ་ཏུ་བལྟས་ལ་བདག་ཉིད་གཤིན་
རྗེ་གཤེད་དམར་པོ་བསྒོམས་ཏེ། མདུན་དུ་ཟླ་བ་དམར་པོའི་དཀྱིལ་འཁོར་ལ་གནས་པའི་བསྒྲུབ་བྱ་བསམས་ཏེ། རང་གི་སྙིང་ག་ནས་སྤྲོས་པའི་འོད་ཟེར་དམར་པོས་ལུས་ཀུན་ཏུ་གང་བས་མྱོས་པར་གྱུར་ཏེ། རྐང་པ་གཉིས་ལ་མདུད་པར་བསམ་ཞིང་། སྤོབས་པས་སྔགས་བཟླས་པ་ནི།
ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་ཧོཿཆེ་གེ་མོ་ལྷ་སྦྱིན་གྱི་ཆེད་དུ་བ་ཤྱཾ་ཀུ་རུ་ཧོཿསྭཱ་ཧཱ། གལ་ཏེ་དབང་དུ་མ་གྱུར་ན་མར་དང་སྦྲང་རྩི་མེད་པའི་འཁོར་ལོ་ཉིད་དུ་བ་མེད་པའི་སེང་ལྡེང་གི་མེ་ལ་བདུག་ཅིང་། རང་གི་རྣལ་འབྱོར་གྱིས་ཇི་སྐད་བཤད་པའི་སྔགས་བཟླ་བར་བྱའོ། །ཡང་ན། ཨོཾ་ཧྲཱིཿཥྚྲྀཿ
ཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་བཽ་ཥཊ་ཆེ་གེ་མོ་བདག་གི་དབང་དུ་གྱིས་ཤིག །བཽ་ཥཊ་སྭཱ་ཧཱ། དབང་དུ་བསྡུ་བའི་ཆོ་གའོ། །དུར་ཁྲོད་ཀྱི་རས་སམ་ཟླ་མཚན་གྱི་རས་ལ་ཚོས་ཀྱི་ཁུ་བས་འཁོར་ལོ་གཉིས་མངོན་པར་བྲིས་ལ་ཡི་གེ་ཛཿའམ་ཧྲཱིཿའམ་ཡང་ན་གཉིས་ཀ་མིང་ལ་བཏགས་ལ་རྫ་ཕོར་ཁ་སྦྱར་
རམ་བུད་མེད་ཀྱི་ཐོད་པ་ཁ་སྦྱོར་དུ་བཅུག་ལ། མེ་ཏོག་དམར་པོས་མཆོད། སྐུད་པ་དམར་པོས་དྲིལ་ཏེ་དགོངས་ཐུན་ཉི་མ་ལྟ་བུར་གཤིན་རྗེ་གཤེད་དུ་བདག་ཉིད་བསྒོམས་ཏེ། རང་གི་སྙིང་གའི་འོད་ཟེར་ལས་བྱུང་བའི་གཤིན་རྗེ་གཤེད་དམར་པོ་ཞགས་པ་དང་ལྕགས་ཀྱུ་འཛིན་པ་

བསྒོམས་ཏེ། བསྒྲུབ་བྱའི་སྙིང་ལ་ལྕགས་ཀྱུས་བཀུག །ཞགས་པས་རྐེ་ལ་བཏགས་ནས་འགུགས་པར་བསམས་ནས། སྔགས་བཟླས་པ་ནི། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་ཛཿཆེ་གེ་མོའི་ཆེད་དུ་མཆོད་སྦྱིན་ཨཱ་ཀཪྵ་ཡ་ཛཿསྭཱ་ཧཱ། ཡང་ན་ཧྲཱིཿཡང་ན་གཉིས་
ཀའོ། །གལ་ཏེ་འོང་བར་མ་གྱུར་ན་འཁོར་ལོ་དེ་ཉིད་དུ་བ་མེད་པའི་སེང་ལྡེང་གི་མེ་ལ་བདུག་ཅིང་སྔགས་བཟླ་བར་བྱའོ། །དགུག་པའི་ཆོ་གའོ། །དུར་ཁྲོད་ཀྱི་རས་ལ་ཟླ་བའམ། ཡུང་བས་འཁོར་ལོ་གཉིས་མངོན་པར་བྲིས་ཏེ། བསྒྲུབ་བྱའི་མིང་ལ་ཡི་གེ་ལཾ་བཏགས་ཏེ། ནག་ནོག་ལ་སོགས་
མེད་པའི་རྫ་ཕོར་ཁ་སྦྱོར་དུ་གཞུག །རྫ་ཕོར་དེའི་སྟེང་དུ་རེ་ཁཱ་སེར་པོ་གྲུ་བཞི་པ་བདུན་བྲིས་ཏེ། དེའི་སྟེང་དུ་ཧཱུཾ་བཾ་ཧཱུཾ་གི་ཡི་གེ་གསུམ་གྱིས་མཚན་པའི་ལྕོག་བརྒྱད་དང་ལྡན་པའི་རི་རབ། དེའི་སྟེང་དུ་དབང་ཆེན་གྱི་དཀྱིལ་འཁོར་ལཾ་གྱིས་མཚན་པ་སྣ་ཚོགས་རྡོ་རྗེས་མནན་པར་བྲིས་ཏེ། མེ་ཏོག་སེར་
པོས་མཆོད། སྐུད་པ་སེར་པོས་དྲིལ་ཏེ། བདག་ཉིད་ཁ་ལྷོར་བལྟས་ལ་གཤིན་རྗེ་གཤེད་སེར་པོ་བསྒོམས་ཏེ། མདུན་དུ་དབང་ཆེན་གྱི་དཀྱིལ་འཁོར་གྱི་སྟེང་དུ་བསྒྲུབ་བྱ་སེར་པོ་བསམས་ལ། བསྒྲུབ་བྱའི་མགོའི་སྟེང་དུ་སའི་དཀྱིལ་འཁོར། དེའི་སྟེང་དུ་རི་རབ་སྣ་ཚོགས་རྡོ་རྗེ་རྒྱ་གྲམ་གྱིས་མནན་
པར་བསམས་ལ་སྔགས་བཟླས་པ་ནི། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ། ལཾ་ཆེ་གེ་མོ་སྟམྦྷུ་ཡ་ལཾ་མནན་པའི་ཆོ་གའོ། །ངག་མནན་པར་འདོད་པས་དེ་བཞིན་དུ་འཁོར་ལོ་གཉིས་མངོན་པར་བྲིས་ཏེ། བསྒྲུབ་བྱའི་མིང་ལ་ཡི་གེ་ལཾ་བཏགས་ནས་བཟླས་པ་ནི། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་
ཕཊ་ལཾ་ལྷ་སྦྱིན་གྱི་ཇི་ལྟར་སེམས་པའི་དོན་ལ་འགག་པ་བྱེད་པའམ། མི་སྙན་པར་སྨྲ་བའི་མཆོད་སྦྱིན་ངག་མནན་པར་གྱིས་ཤིག །ལཾ་ཞེས་སྔགས་བཟླས་པར་བྱའོ། །ངག་མནན་པའི་ཆོ་གའོ། །ལྐུགས་པར་འདོད་པར་དུར་ཁྲོད་ཀྱི་རས་ལ་འཁོར་ལོ་གཉིས་མངོན་པར་བྲིས་ཏེ།
ཡི་གེ་བཾ་བསྒྲུབ་བྱའི་མིང་ལ་བཏགས་ནས་གཤིན་རྗེ་གཤེད་སེར་པོའི་རྣལ་འབྱོར་གྱི་ཆོ་གས་བསྒྲུབ་བྱ་དེ་ལུག་གི་སྙིང་གར་རབ་ཏུ་བཀུག་ནས། དབང་ཆེན་གྱི་འཁོར་ལོ་བཞིས་ཟ་མ་ཏོག་བཞིན་དུ་ཁ་སྦྱོར་བྱས་ཏེ་རེངས་པའི་ཁ་སྦྱོར་གྱི་ཆོ་ག་བཟླས་པར་བྱ་བ་ནི། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་

ཕཊ་ཕཊ་བཾ། ལྷ་སྦྱིན་གྱི་ཁ་ཆིངས་ཤིག །ཡིད་ཆིངས་ཤིག །ལྐུགས་པར་གྱིས་ཤིག་བཾ། ཡུལ་ཆོས་ལ་སོགས་པ་ལ་རྨོངས་པར་འགྱུར་རོ། །དུར་ཁྲོད་ཀྱི་རས་ལ་དུག་དང་སྐེ་ཚེ་དང་ཚ་དང་མར་ནག་དང་། ནིམ་པའི་ལོ་མ་དང་། ད་དུ་རའི་ལོ་མའི་ཁུ་བ་དང་། རོ་བསྲེགས་པའི་སོལ་བ་དང་
རང་གི་སྡིགས་མཛུབ་གྱི་ཁྲག་གིས་སྣག་ཚ་བྱས་ཏེ། བྱ་རོག་གི་སྒྲོ་རྐང་གིས་སྨྱུ་གུ་བྱས་ལ་འཁོར་ལོ་གཉིས་མངོན་པར་བྲིས་ཏེ། ཡི་གེ་ཧཱུཾ་བསྒྲུབ་བྱའི་མིང་ལ་བཏགས་ལ་ཐོད་པ་ཁ་སྦྱོར་གྱི་ནང་དུ་བཅུག་ནས་སྐུད་པ་སྔོན་པོས་དྲིལ་ཏེ། ཉི་མ་གུང་ལ་དུར་ཁྲོད་དུ་སྦས་ནས་ཁ་ལྷོར་བལྟས་ཏེ།
གཤིན་རྗེ་གཤེད་ནག་པོ་གཡས་བསྐུམ་གཡོན་བརྐྱང་གིས་ཉི་མའི་གདན་ལ་བཞུགས་པ། བཞིན་མི་སྡུག་ཅིང་མཆེ་བ་གཙིགས་པ། གློག་ལྟར་ལྗགས་འགྱུ་བ་ཤིན་ཏུ་མི་བཟད་པ། བསྐལ་པའི་མེ་ལྟར་ཤིན་ཏུ་འབར་བ། ཕྱག་ན་མཚོན་ཆ་སྣ་ཚོགས་འཕྱར་བ། དབྱར་གྱི་ཆར་སྤྲིན་
ལྟ་བུར་གསུས་པ་འཕྱང་བ། མེ་འབར་བ་ལྟར་སྐྲ་དང་སྨ་ར་གྱེན་དུ་འབར་བ། འབྲུག་གི་སྒྲ་ལྟ་བུའི་ཧཱུཾ་གིས་མགྲིན་པའི་སྦུབས་གང་བར་བདག་ཉིད་བསམས་ཏེ། མདུན་དུ་བསྒྲུབ་བྱ་གོས་ཧྲུལ་པོ་དྲི་མ་ཅན་གྱོན་པ་ལུས་ལ་དྲི་མ་ཆགས་པ། དེའི་སྤྱི་བོ་དང་། མཚོག་མ་དང་། སྙིང་ག་དང་།
དཔུང་པ་དང་པུས་མོ་རྣམས་ལ་སྔགས་ཀྱི་ཆོ་གས་བྱས་པའི་ཆོ་ག་དང་སྲུང་བ་རྣམས་བཤིགས་ནས་དེའི་ལུས་ལ་གནས་པའི་ལྷ་རྣམས་ཉེ་བར་བསྡུས་ཏེ། རང་གི་ལུས་ལ་རབ་ཏུ་བཅུག་ནས་བསྒྲུབ་བྱའི་ལུས་ཁང་སྟོང་ལྟ་བུར་བསམས་ལ། ཁྲོ་བོ་མཚོན་ཆ་སྣ་ཚོགས་ཕྱག་ན་བསྣམས་པ་
སྤྲུལ་ནས་ང་རྒྱལ་དང་བཅས་པས་བསྒྲུབ་བྱ་དུམ་བུ་དུམ་བུར་བྱས་ལ་ཁྲག་དང་ཞུན་མར་དང་། ཚིལ་དང་རྐང་མར་དང་། ཤ་རྣམས་འཐུང་ཞིང་ཟོས་ལ། རུས་པ་ཡང་བསྲེགས་པས་ཐལ་བར་བྱེད་ཅིང་མདུན་དུ་ཆར་སྤྲིན་གྱི་མདོག་ལྟ་བུ་མ་ཧེ་ལ་གནས་པ། ཐོད་དབྱུག་དང་ཞགས་པ་འཛིན་
པ་གསུས་པ་འཕྱང་བ་མཆེ་བ་གཙིགས་པ་དེས་ཟ་བར་གྱུར་པ་དེའི་སྙིང་ལ་གནས་པར་བསམས་ཏེ་སྔགས་བཟླས་པ་ནི། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ། ཧཱུཾ་ལྷ་སྦྱིན་མཱ་ར་ཡ་ཧཱུཾ། ཡང་ན་ཆོ་ག་འདིས་འཁོར་ལོ་གཉིས་མངོན་པར་བྲིས་ཏེ། ཧཱུཾ་ཕཊ་ཡི་གེ་བསྒྲུབ་བྱའི་མིང་ལ་

བཏགས་ལ། དེ་བཞིན་དུ་བསམ་གཏན་ལ་གནས་པའི་ཆོ་གས་བསྒྲུབ་བྱ་ལྷ་དང་བྲལ་ཞིང་ལུས་ལ་དྲི་མ་ཆགས་པ་མེའི་དཀྱིལ་འཁོར་ལ་གནས་པའི་བསྒྲུབ་བྱ་བཞིན་མི་སྡུག་པ། ཁྲོ་བོ་སྣ་ཚོགས་ཀྱིས་རལ་གྲི་དང་། དབྱུག་པ་དང་གཏུན་ཤིང་དང་སྟ་རེ་དང་མཚོན་ཀ་ཎ་
པ་དང་། གཞུ་དང་མདའ་དང་། འཁོར་ལོ་དང་ཏྲི་ཤཱུ་ལ་དང་རྩེ་གསུམ་པ་དང་མདུང་དང་། རལ་གྲི་དང་། མཚོན་པ་ཎི་ཌི་པ་ལ་དང་ལྡན་པའི་ཕྱག་མཚན་རྣམས་ཀྱིས་བརྒྱབ་པས་དུམ་བུ་བརྒྱར་བཅད་ཅིང་། བྱ་རོག་དང་འུག་པ་དང་བྱ་རྒོད་དང་སྤྱང་ཀི་དང་སྲིན་པོ་དང་མཁའ་འགྲོ་མ་ལ་སོགས་པ་
རྣམས་ཀྱིས་ཟ་བར་བསམ་ཞིང་། སྤོབས་པས་སྔགས་བཟླས་པ་ནི། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ། ཧཱུཾ་ཕཊ་ལྷ་སྦྱིན་མཱ་ར་ཡ་ཧཱུཾ་ཕཊ། གསད་པའི་ཆོ་གའོ། །གལ་ཏེ་གྲུབ་པར་མ་གྱུར་ན་སྔར་བཤད་པའི་སྔགས་བཟློག་ནས་བཟླས་ན་འགྲུབ་པར་འགྱུར་རོ་ཞེས་སོ། །སྡང་བ་ལ་
དེ་བཞིན་དུ་འཁོར་ལོ་གཉིས་མངོན་པར་བྲིས་ཏེ་བསྒྲུབ་བྱའི་མིང་ལ་ཕཊ་ཡིག་བཏགས་ལ་ཐོད་པ་ཁ་སྦྱོར་གྱི་ནང་དུ་བཅུག་ནས་སྐུད་པ་ནག་པོས་དཀྲིས་ཏེ་ཉི་མ་གུང་ལ་དུར་ཁྲོད་དུ་སྦས་ཏེ། གཤིན་རྗེ་གཤེད་ཀྱི་རྣལ་འབྱོར་དང་ལྡན་པས་གནས་པའི་མདུན་དུ་རྟ་དང་། མ་ཧེ་ལ་ཞོན་པའི་བསྒྲུབ་
བྱ་གཉིས་མཚོན་སྟོན་པ་རྡོ་རྗེ་ཁྲོ་བོའི་ཚོགས་སྤྲུལ་པ་ཕྱོགས་གཉིས་ལ་གནས་པས། ཕན་ཚུན་ཟ་ཞིང་འཁྲུག་པར་བྱེད་པར་བསམ་ཞིང་བཟླས་པ་བྱ་བ་ནི། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ། ཕཊ། ལྷ་སྦྱིན་མཆོད་སྦྱིན་དང་རྣམ་པར་དབྱེ་བར་གྱིས་ཤིག་ཕཊ། རྣམ་པར་ལྡང་བའི་
ཆོ་གའོ། །ཆོ་ག་འདི་ཉིད་ཀྱི་འཁོར་ལོ་གཉིས་མངོན་པར་བྲིས་ཏེ་བསྒྲུབ་བྱའི་མིང་ལ་ཧཱུཾ་ཕཊ་ཡི་གེ་བཏགས་ལ་ཐོད་པ་ཁ་སྦྱོར་དུ་བཅུག་ནས་སྐུད་པ་ནག་པོས་དྲིལ་ཏེ་དུར་ཁྲོད་དུ་སྦས་ལ། གཤིན་རྗེ་གཤེད་ཀྱི་རྣལ་འབྱོར་གྱི་མདུན་དུ་ཡཾ་ལས་བྱུང་བའི་རླུང་གི་དཀྱིལ་འཁོར་ལ་གནས་པའི་
བསྒྲུབ་བྱ་རྔ་མོང་ལ་ཞོན་པ། ལྷོ་ཕྱོགས་སུ་རྡོ་རྗེ་ཁྲོ་བོའི་ཚོགས་མཚོན་ཆ་སྣ་ཚོགས་འཛིན་པ་རྣམས་ཀྱིས་རྡེག་ཅིང་འགྲོ་བར་བསམས་ནས་བཟླས་པ་ནི། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ། ཧཱུཾ་ཕཊ་ལྷ་སྦྱིན་སྐྲོད་པར་གྱིས་ཤིག །ཧཱུཾ་ཕཊ་སྐྲོད་པའི་ཆོ་གའོ། །གཤིན་རྗེའི་གཤེད་ཀྱི་

བདག་སྲུང་བའི་ཆོ་ག་ནི། ཨོཾ་ཡ་མཱ་རཱ་ཛ་ས་དོ་མེ་ཡ་ན་མཿ། སྙིང་ལའོ། །ཨོཾ་ཡ་མེ་དོ་རུ་སྭཱ་ཧཱ། མཚོག་མ་ལའོ། །ཨོཾ་ཎ་ཡོ་ད་ཡ་ཧཱུཾ། སྤྱི་བོར་རོ། །ཨོཾ་ཡོ་ནི་རཱ་བ་ཁ་ཊ་ཡཀྵེ་ཡ། མིག་གཡས་པ་ལའོ། །ཨོཾ་ཡཀྵེ་ཡཙྪ་ནི་རཱ་མ་ཡ། མིག་གཡོན་པའོ། །ཨོཾ་ད་ཡ་ཕཊ། རྒྱུ་མ་
ལའོ། །དེ་ལྟར་བསྐྱེད་ཚུལ་དྲུག་བྱས་ནས། སྙིང་གར་ཉི་མའི་དཀྱིལ་འཁོར་ལ་ཧཱུཾ་བསམ་མོ། །རྣལ་འབྱོར་པ་ཁྲོས་པས་རང་གི་ཁྲག་དང་། རོ་བསྲེགས་པའི་ཐལ་བ་དང་དུག་དང་ཚྭ་དང་། སྐེ་ཚེ་དང་མར་ནག་དང་ད་དུ་རའི་ལོ་མའི་ཁུ་བས་དུར་ཁྲོད་ཀྱི་རས་ལ་འཁོར་ལོ་གཉིས་རིམ་པས་བྲི་
བར་བྱའོ། །གསོད་པ་གཤིན་རྗེའི་སྐུ་ལ་གནས། །སྡང་བ་རྟ་དང་མ་ཧེ་ལ། །བསྐྲད་པ་རྔ་མོ་རྒྱབ་ན་གནས། །ཞི་བ་ཟླ་བའི་དཀྱིལ་འཁོར་ལ། །དབང་སྡུད་བུད་མེད་སྙིང་ལའོ། །རྒྱས་པ་རྟ་ཡི་རྒྱབ་ཏུ་སྟེ། །ལྐུགས་པ་ལུག་གི་སྙིང་ལ་གནས། །རེངས་པ་རི་རབ་དབུས་སུ་སྟེ། །
འགུགས་པ་སེང་གེ་ཤ་ར་བྷ། །གི་ཝཾ་གུར་གུམ་དག་གིས་ཀྱང་། །གྲོ་ག་ལ་སོགས་དག་ལ་བྲི། །རྫ་ཕོར་ཁ་སྦྱོར་ནང་དུ་གཞུག །ཡོངས་སུ་འདུད་དེ་དག་སེམས་ཀྱིས། །བྱ་རོག་ཆེན་པོའི་སྨྱུ་གུ་སྟེ། །ཉིན་གུང་རོ་བསྲེགས་ཐབ་ཏུ་སྦ། །ཐོད་པ་ཁ་སྦྱོར་ནང་བཅུག་ནས། །བཞིན་མི་
སྡུག་གི་འདུ་ཤེས་ཅན། །གཤིན་རྗེ་གཤེད་ཀྱི་རྣལ་འབྱོར་ལྡན། །ལྷོ་ཕྱོགས་བལྟས་པས་ཆད་པས་བཅད། །ཞི་བར་མཐའ་ཡི་གཡས་བསུབ་བྱ། །ནི་ཡིག་གཉིས་ཀྱང་དེ་བཞིན་དུ། །རྗེས་ལ་དབུས་ཀྱི་ཡ་ཡིག་བསུབ། །ལྷག་མ་འབྲུ་རྣམས་ཅི་བདེར་གནས། །འདི་ཡི་བསྙེན་པ་
ཁྲི་ཕྲག་གཅིག །ཡང་དག་དངོས་གྲུབ་འདོད་པས་བཟླས། །གང་ལ་བྲིས་ནས་གཞག་པ་ཡི། །ཁྱིམ་དེར་རྟག་ཏུ་འཐབ་མོ་འབྱུང་། །ཟླུམ་པོ་གསུམ་ནི་བྱས་ནས་སུ། །བརྒྱད་དང་བཅུ་གཉིས་བཅུ་དྲུག་པ། །རེའུ་མིག་དེ་ལ་འདི་ལྟར་དགོད། །བཏགས་པའི་སྔགས་ནི་བྲི་བར་བྱ། །ཡ་
མ་རཱ་ཛ། ས་དོ་མེ་ཡ། ཡ་མེ་དོ་རུ། ཎ་ཡོ་ད་ཡ། ཡ་ད་ཡོ་ནི། ར་ཡ་ཀྵེ་ཡ། ཡ་ཀྵེ་ཡཙྪ་ནི་རཱ་མ་ཡ། དབུས་སུ་ཡང་འབྱུང་ངོ་། །ནང་གི་འཁོར་ལོའི་ཕྱོགས་ཀྱི་རེའུ་མིག་ལ། ཀྵེ་མ་མེ་ད་འབྱུང་ངོ་། །ཕྱོགས་བྲལ་སྟོང་པ་ལ་བསྒྲུབ་བྱ་ཧཱུཾ་གཉིས་ཀྱི་བར་དུ་གཞུག་གོ། །ཡ་ཀྵེ་མ་

མེ་ད་ཡཙྪ་ནི་རཱ་ཛ་ས་དོ་རུ་ཎ་ཡོ་ནི་རཱ། འཁོར་ལོ་གཉིས་པ་ལ་གཡོན་ནས་བརྩམས་ནས་གཡས་སྐོར་གྱིས་བྲིའོ། །འཁོར་ལོ་གསུམ་པ་ལ་ཤར་ཕྱོགས་ནས་བརྩམས་ནས་བར་བར་གྱི་རེའུ་མིག་ལ། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་བྲི་
བར་བྱའོ། །དེའི་བར་བར་གྱི་རེའུ་མིག་རྣམས་ལ་ཆེ་གེ་མོ་བསྐྲད་པར་གྱིས་ཤིག སོད་ཅིག །དབང་དུ་གྱིས་ཤིག །སྡང་བར་གྱིས་ཤིག །རྒྱས་པར་གྱིས་ཤིག །ཞི་བར་གྱིས་ཤིག་སྭཱ་ཧཱ། ཞེས་དེ་ལ་སོགས་པ་ལས་ཀྱི་རྗེས་སུ་འབྲང་བ་བྲི་བར་བྱའོ། །དང་པོར་ཨོཾ། ཐ་མ་ལ་
ན་མཿདང་བ་ཥཊ་དང་བཽ་ཥཊ་དང་། ཧཱུཾ་ཕཊ་ཡི་གེ་དང་ལྡན་པའི་ས་བོན་རྣམས་ཞི་བ་དང་། རྒྱས་པ་དང་། དབང་དུ་བསྡུ་བ་དང་། གསོད་པར་བྱེད་པར་འགྱུར་རོ། །འདི་དག་ཐམས་ཅད་བདག་ཉིད་བསྒོམས་པས་འགྲུབ་པར་འགྱུར་རོ། །དཔལ་ཨུ་རྒྱན་ནས་འབྱུང་བ་གཤིན་རྗེ་
གཤེད་དམར་པོའི་རྒྱུད་ཆེན་འབུམ་ཕྲག་གསུམ་པ་ལས་བྱུང་བ་སློབ་དཔོན་བི་རཱུ་པས་མཛད་པ་རྫོགས་སོ། །རྒྱ་གར་ཤར་ཕྱོགས་ཀྱི་པཎྜི་ཏ་དཔལ་མཁས་པ་ཆེན་པོ་དཱ་ན་ཤཱི་ལ། ཡུལ་དབུས་ཀྱི་གྲུབ་པ་ཐོབ་པའི་གནས་དྲང་སྲོང་སྲིན་པོ་རིར་བསྒྱུར་བའོ།། །།
༄༅༅། །རྒྱ་གར་སྐད་དུ། ཤྲཱི་རཀྟ་ཡ་མཱ་སཱ་དྷ་ནཾ། བོད་སྐད་དུ། དཔལ་གཤིན་རྗེ་གཤེད་དམར་པོའི་སྒྲུབ་ཐབས། དཔལ་གཤིན་རྗེ་གཤེད་དམར་པོ་ལ་ཕྱག་འཚལ་ལོ། །བླ་མ་དེ་རྗེས་རྡོ་རྗེ་གཤིན་རྗེ་གཤེད་དམར་པོ། །རང་སྣང་ལུས་འཁྱུད་བདེ་བས་གང་ཞིག་
གཞན་དོན་འཇུག །རྡོ་རྗེས་མཚན་པའི་དབྱུག་པ་མི་མགོར་ལྡན་པའི་ཕྱག །ཞལ་གཅིག་འཇིགས་པ་སེལ་ལ་གུས་པས་མགོས་ཕྱག་འཚལ། །སྦྱིན་པ་ཚུལ་ཁྲིམས་ལ་སོགས་ལྡན། །བློ་བཟངས་སེམས་ཅན་དོན་རྩེ་གཅིག །བྱམས་སོགས་ཡོན་ཏན་ཡོངས་སུ་རྫོགས། །
དད་དང་ཐོས་པས་རྣམ་པར་བརྒྱན། །སྔ་བར་བརྩེ་བའི་བདག་ཉིད་ཀྱིས། །དང་པོར་ཁ་སོགས་དག་བྱས་ནས། །སྐྱེ་བོས་དབེན་སོགས་དུར་ཁྲོད་སོགས། །བདེ་བའི་སྟན་ལ་བརྩམ་པར་བྱ། །རང་གི་སྙིང་གར་པདྨ་བཀོད། །ཤིན་ཏུ་གསལ་བའི་ཉི་མ་བལྟ། །ཡཾ་ཡིག་དབུས་སུ་ཧཱུཾ་

ཡིག་ནི། །དམར་པོ་འོད་ཟེར་འཕྲོ་བའོ། །དེ་ཡི་འོད་ཀྱིས་སྤྱན་དྲངས་པའི། །རང་ལྷག་ལྷ་ཡི་དཀྱིལ་འཁོར་དང་། །རྡོ་རྗེ་འཆང་བདག་རྣམ་པ་ཅན། །བླ་མ་སངས་རྒྱས་དེ་ཡི་སྲས། །ཁམས་གསུམ་གནས་པའི་སེམས་ཅན་ཡང་། །དཀྱིལ་འཁོར་པ་ཡི་རང་བཞིན་ཅན། །དམིགས་ནས་
དེ་དག་རྣམས་ལ་ཕྱག །ལུས་ཀྱི་ཚོགས་ཀྱིས་རྣམ་པར་བརྩོན། །ཙརྩི་ཀཱ་ལ་སོགས་པ་ཡིས། །མཆོད་པ་བྱས་ལ་སྡིག་པ་བཤགས། །ལུས་དང་ངག་དང་ཡིད་ཀྱིས་སྡིག །བགྱིད་དང་དེ་བཞིན་བགྱིད་སྩལ་གང་། །གང་ཡང་རྗེས་སུ་ཡི་རང་བ། །དེ་དག་དུས་གསུམ་མགོན་ལ་
བཤགས། །རྫོགས་སངས་རྒྱས་དང་དེ་ཡི་སྲས། །འཕགས་རྣམས་དགེ་ཚོགས་རྗེས་ཡི་རང་། །རྫོགས་པའི་སངས་རྒྱས་དམ་པའི་ཆོས། །ཚོགས་ཀྱི་མཆོག་བཅས་སྐྱབས་སུ་མཆི། །ཡོན་ཏན་རྒྱ་མཚོ་ཁྱེད་རྣམས་ལ། །རང་གི་ལུས་ནི་དབུལ་བར་བགྱི། །དམ་པའི་ཆོས་ཀུན་
སྟོན་པ་ཡི། །སྒྲ་དབྱངས་མཛེས་པས་བཞུགས་སུ་གསོལ། །ཡང་དག་རྫོགས་པའི་སངས་རྒྱས་དང་། །དེ་སྲས་ལམ་གྱུར་སྦྱིན་སོགས་ཚུལ། །སྐུ་གསུམ་ཡེ་ཤེས་ཐོབ་བྱའི་ཕྱིར། །རབ་ཏུ་དང་བས་བསྟེན་པར་བགྱི། །སེམས་ཅན་རྣམས་ཀྱི་དོན་བསྒྲུབ་ཕྱིར། །རྫོགས་པའི་
བྱང་ཆུབ་སེམས་བསྐྱེད་བགྱི། །བསོད་ནམས་ཀུན་ནས་གང་བསགས་པ། །རྫོགས་པའི་བྱང་ཆུབ་ཕྱིར་བསྔོའོ། །དཔལ་ལྡན་གཤིན་རྗེ་མཐར་བྱེད་དུ། །གྱུར་ནས་བདག་གིས་འགྲོ་ཕན་བགྱི། །སྨོན་ལམ་འདི་ནི་བྱས་ནས་སུ། །བློ་ཡིས་དེ་རྣམས་གཤེགས་དེ་ནས། །བརྩེ་
བས་ཆོ་ག་བཞིན་བལྟས་ཏེ། །སྣ་ཚོགས་སྟོང་པར་རྣམ་པར་བསམ། །རང་བཞིན་དང་བྲལ་སྟོང་པ་སྟེ། །རྒྱུ་ཡིས་ཀྱང་ནི་མཚན་མ་མེད། །རྣམ་པར་རྟོག་དང་བྲལ་ཉིད་ཀྱིས། །སྨོན་པ་རྣམ་པར་སྤངས་པའོ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། བརྟན་པར་བྱས་ནས་
སེམས་དེ་ནི། །ཨཾ་ཡིག་ལས་བྱུང་ཉི་མ་དེར། །ཧཱུཾ་ལས་བྱུང་བའི་རྡོ་རྗེ་སྟེ། །ཀུན་ནས་སྔོན་པོ་རྩེ་ལྔ་པ། །འོད་ཟེར་འཕྲོ་བས་ཀུན་ནས་འཁྲིགས། །བསྲུང་བའི་དོན་དུ་བསྒོམ་པར་བྱ། །རྡོ་རྗེས་ས་གཞི་ཁོར་ཡུག་དང་། །ར་བ་གུར་ནི་དེ་བཞིན་དུ། །སངས་རྒྱས་ཞིང་ནི་རྣམ་དག་ཕྱིར། །

སླར་ཡང་བསམ་གཏན་བརྩམ་པར་བྱ། །དེར་ནི་སྣ་ཚོགས་པད་ཟླ་ལ། །སཾ་བྱུང་རྡོ་རྗེ་བཟང་པོ་ཡི། །ཡན་ལག་ཆོས་འབྱུང་ཟུར་གསུམ་དཀར། །སྣ་ཚོགས་པདྨ་རྡོ་རྗེ་དང་། །སོན་ཅིང་གྱེན་དུ་གནས་བསྒོམ་དེའི། །དབུས་སུ་སླར་ཡང་དཀྱིལ་འཁོར་ནི། །བྷྲུཾ་ཡིག་
འཁོར་ལོ་ལས་སྐྱེས་པ། །རྟག་པའི་ཡན་ལག་ཡང་དག་བྱུང་། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་རྣམ་པར་བརྒྱན། །དྲ་བ་དྲ་ཕྱེད་ཀྱིས་སྤྲས་ཤིང་། །སྟེགས་བུ་ལྷ་མོས་མཛེས་བྱས་པ། །སྣ་ཚོགས་རྩེ་མོ་རླུང་གིས་བསྐྱོད། །བ་དན་དྲིལ་བུ་དང་ལྡན་པ། །སྣ་ཚོགས་
རྡོ་རྗེ་མཉམ་པར་མནན། །ཟླ་བ་ཉི་མ་རྒྱལ་བའི་གདན། །ཤར་ཕྱོགས་སུ་ནི་དཀར་པོ་ཆེ། །ལྷོར་ནི་སེར་པོ་ཡང་དག་ལྡན། །ནུབ་ཀྱི་ཆ་ནི་དམར་པོ་སྟེ། །བྱང་ནི་ལྗང་གུ་ཡང་དག་མཚུངས། །དབང་སྔོན་འོད་འབར་རྣམ་པར་ནི། །དབུས་ཀྱི་ས་གཞི་རྣམ་བསྒོམ་བྱ། །ཕྱོགས་ཀྱི་ཁ་དོག་
དབྱེ་བ་འདིས། །སྣ་ཚོགས་རྡོ་རྗེའང་བསྒོམ་པར་བྱ། །ཐོག་ཀྱང་དེ་བཞིན་བསམ་བྱ་ཞིང་། །རྩིག་པ་སོ་སོ་གོ་རིམས་བཞིན། །རྣམ་པ་ལྔ་ནི་རྣམ་བསྒོམས་ནས། །སངས་རྒྱས་སྐུ་ནི་རྣམ་པར་བསྒོམ། །རྣམ་པ་ལྔ་དེས་དཔལ་ལྡན་ནི། །རྡོ་རྗེ་གཤིན་རྗེ་འཇོམས་མཛད་པ། །སངས་
རྒྱས་སྐུ་ཞེས་བྱ་བར་གྲགས། །དེ་ཡང་དབྱེ་བས་བརྗོད་པར་བྱ། །སྣ་ཚོགས་རྡོ་རྗེའི་ལྟེ་བ་ལ། །པདྨ་ཉི་མ་དབྱངས་ཟུང་དགོད། །དེ་ཡིས་ཟླ་བ་ཀ་ཡིག་སོགས། །ཌ་ཌྷ་ད་དྷ་ཡ་ལ་ཡང་། །སྤེལ་ཏེ་ཟུང་དེས་རྫོགས་པ་ཡི། །ཟླ་བ་དམར་པོ་བསྒོམ་པར་བྱ། །འདི་དག་ཁོ་ན་རྫོགས་པ་ནི། །
མེ་ལོང་ལྟ་བུའི་ཡེ་ཤེས་བརྗོད། །མཉམ་པ་ཉིད་ནི་དེ་གཅིག་ཉིད། །སོ་སོར་ཀུན་རྟོག་དེ་བྱུང་ཧཱུཾ། །བྱ་བ་གྲུབ་པའི་ཡེ་ཤེས་ནི། །དེ་ལས་བྱུང་བའི་རྣམ་པར་བསམ། །རྡོ་རྗེ་དབྱུག་པ་དབྱུག་པ་ཆེ། །མི་མགོ་སེར་པོས་རྣམ་པར་བརྒྱན། །ནོར་བུ་མེ་ཤེལ་ལྟ་བུ་ཡི། །འོད་ཟེར་འཁྲུག་
པའི་ས་བོན་བཅས། །ཨོཾ་བཛྲ་དཎྜ་ཨཱཏྨ་ཀོ྅ཧཾ། ཞེས་པས་ང་རྒྱལ་བྱའོ། །དེ་ལས་བྱུང་བ་དཀར་པོའི་ཉི་འོད་སྣང་བ་ཐུབ་མཆོག་འོད་འཕྲོ་རང་སྣང་གིས་སྐུ་འཁྱུད། །སྒེག་པའི་ཁྲོ་བོའི་ཚུལ་ཅན་མཆོག་ཏུ་བདེ་བའི་རང་བཞིན་རྡོ་རྗེ་འཆང་གི་མཚན་འཆང་བ། །གཡོན་བརྐྱང་གདན་

བཞུགས་འབར་བའི་རྡོ་རྗེ་དང་ལྡན་མི་མགོ་སོ་སོར་མཚན་པའི་དབྱུག་པ་ཐོགས། །གཏུམ་པོ་བདུད་རྩིའི་ཚོགས་ཀྱི་ཁུ་བས་ཡོངས་སུ་གང་བའི་པདྨའི་སྣོད་ནི་བསྣམས་པའོ། །ཆོས་ཀྱི་དབྱིངས་ཀྱི་རང་བཞིན་གྱི། །ཡེ་ཤེས་རྡོ་རྗེ་འཛིན་བདག་ཉིད། །རྣམ་པ་ལྔ་ཡི་རང་བཞིན་གང་། །
རྣལ་འབྱོར་ཞེས་ནི་མངོན་པར་བརྗོད། །འདི་ནི་རྣལ་འབྱོར་རོ། །འདོད་ཆགས་ཆེན་པོའི་གདུལ་བྱ་ནི། །འགྲོ་བ་གསུམ་པོ་མཉམ་བལྟས་ནས། །རང་སྙིང་ཡེ་ཤེས་འོད་ཟེར་གྱིས། །འགྲོ་བ་སངས་རྒྱས་གཟུགས་ཅན་བྱས། །རང་གི་ལུས་ལ་མཉམ་པར་གཞུག །བདེ་བ་དམ་པའི་རང་
བཞིན་དུ། །བདག་ཉིད་ལོངས་སྤྱོད་རྫོགས་པ་བསྒོམ། །ཀུན་དུ་རྟོག་པ་ཐམས་ཅད་སྤོངས། །འདི་ནི་དེ་ཉིད་གསུམ་སྔགས་མཆོག །ཧོ་དམར་གཉིས་ཀྱི་དབུས་གནས་པ། །ཇི་ལྟར་སྐར་མདའ་འཕོ་བ་ལྟར། །དེ་ནས་བྱང་ཆུབ་སེམས་ལ་གཞུག །སྙིང་རྗེ་ཆགས་པའི་སེམས་
ཀྱིས་ནི། །རྡོ་རྗེ་འཛིན་པ་རང་ཉིད་ཞུ། །བྱམས་སོགས་ཙརྩི་ཀ་སོགས་ཀྱིས། །འཁོར་ལོའི་འདྲེན་པས་བསྐུལ་བར་བྱ། །ཐུགས་རྗེའི་ཁྲོ་བོ་རྗེ་བཙུན་ཉིད་བཞེངས་ཤིག །ས་གསུམ་མཐའ་དག་རྨོངས་པ་སོལ་མཛོད་ཅིག །ཇོ་བོ་བདུད་བཞི་པོ་འདི་ལས་རྒྱལ་བ། །སེམས་ནི་གཡེངས་
སོ་རྗེ་བཙུན་ཉིད་བཞེངས་ཤིག །འཇིག་རྟེན་མགྲོན་གཉེར་སྟོང་ཉིད་བཞུགས་སམ་ཅི། །རྗེ་བཙུན་འཇིག་རྟེན་བསོད་ནམས་ཉིད་ཀྱིས་བཞེངས། །བྱང་ཆུབ་རང་བཞིན་འཇིག་རྟེན་མགྲོན་གཉེར་ནས། །ཁྱོད་ནི་སྟོང་ཉིད་སེམས་ཤིང་ཅི་ལ་བཞུགས། །ཁུ་བ་དེ་བསྐུལ་ཞུ་བར་ནི། །
གྱུར་ཅིང་བཅུད་དེའི་རྗེས་སུ་ཞུགས། །གླུ་འདི་དག་གི་རྗེས་མཐུན་ངོར། །དེ་རྣམས་རྒུད་བཞིན་འབོད་པའི་ཕྱིར། །ཁུ་བ་ཡོངས་གྱུར་པཾ་ལས་སྐྱེས། །སྣ་ཚོགས་པདྨ་ཉི་དཀྱིལ་དུ། །ཁྲོས་ཤིང་དྲེགས་བཅས་དམར་པོ་ནི། །རུས་པའི་རྒྱན་གྱིས་རྣམ་པར་བརྒྱན། །སྨིན་མ་རྣོ་ཞིང་རབ་
འབར་བ། །རྨིག་པ་བརྡབས་པས་འཇིགས་པར་བྱེད། །མཾ་ཡིག་ས་བོན་ལས་བྱུང་བ། །འཇིགས་པ་ཡང་ནི་འཇིགས་པར་བྱེད། །མ་ཧེ་དེ་ཡི་རྒྱབ་གནས་པ། །མི་མགོ་སེར་པོས་མཚན་པ་ཡི། །རྡོ་རྗེའི་དབྱུག་པ་འོད་ཟེར་ཅན། །དཀར་པོ་གདུལ་དཀའ་འདུལ་བྱེད་བསྒོམ། །སླར་

ཡང་ས་བོན་དེ་དབུས་སོན། །ཉི་མ་དང་བཅས་མེ་ལོང་གི །གཟུགས་བརྙན་ལྟར་བསམས་དེ་འོད་ཀྱིས། །སྣ་ཚོགས་དུས་དགྲའི་གཟུགས་ཅན་བྱས། །དེ་ལ་ཡང་དག་བཅུག་ནས་ནི། །རྡོ་རྗེའི་དབྱུག་པ་ལས་བྱུང་བའི། །འཁོར་ལོའི་དབང་ཕྱུག་འོད་གསལ་
འབར། །བདག་ཉིད་འདི་ལྟར་བསྒོམ་པར་བྱ། །ཁམས་གསུམ་བདུད་ཀྱི་དཀྱིལ་འཁོར་ལ། །འོད་ཟེར་འབར་བ་དྲག་ཏུ་འཕྲོ། །དྲག་ཤུལ་བསྐལ་པའི་མེ་འབར་སྐུ། །ཁྲོ་གཉེར་འཁྱོག་པོ་འཇིགས་སུ་རུང་། །མགྲིན་པར་ཧཱུཾ་གི་རྣམ་པ་གང་། །ལྗགས་ནི་འགྱུར་ཞིང་འོད་ཟེར་
འཕྲོ། །ཉི་མའི་གཟུགས་ལ་འགྲན་པ་ཡི། །སྤྱན་གསུམ་འཕྲོ་བ་དང་ལྡན་པ། །མཆེ་བ་འབར་ཞིང་གཙིགས་པའི་ཞལ། །སྨིན་མ་སྨ་ར་མགོ་སྐྱེས་གྱེན། །ཉ་ཕྱིས་ལྟ་བུའི་མགོ་བོ་ལྔས། །དབུ་ལ་རྣམ་པར་བརྒྱན་པ་སྟེ། །ཞབས་གཡོན་བརྐྱང་བས་མནན་པ་ཡི། །དུས་ནི་
རྒྱལ་བར་བྱེད་པ་པོ། །འབར་བའི་ཕྲེང་བ་དམར་པོ་ཡིས། །ས་ཡི་དཀྱིལ་འཁོར་མཐའ་དག་ཁྱབ། །དཔའ་བོ་ཞལ་གཅིག་ཕྱག་གཉིས་པ། །དཔལ་ལྡན་གཤིན་རྗེ་མཐར་བྱེད་དམར། །ཕྱག་གཡས་རྡོ་རྗེའི་དབྱུག་པ་ནི། །དཀར་པོ་མི་མགོ་སེར་པོས་མཚན། །གཡོན་ན་པདྨའི་སྣོད་
མཆོག་ནི། །དཀར་པོ་བདུད་རྩི་ལྔ་ཡིས་གང་། །སྦོམ་ཞིང་ཐུང་ལ་གསུས་པ་འཕྱང་། །མགོ་བོའི་དོ་ཤལ་རྣམ་འཕྱང་བ། །ཞལ་ནས་ཁྲག་འཛག་མགུལ་པར་ནི། །རང་སྣང་ཤེས་རབ་མ་ཡིས་འཁྱུད། །སྟག་གི་པགས་པའི་ན་བཟའ་ཅན། །གདེངས་ཅན་དབང་པོ་ཁྲོས་པས་
བརྒྱན། །མཐའ་ཡས་སྔོན་པོ་ཀླུ་དབང་གིས། །དབུ་སྐྲ་བཅིངས་མཛེས་འཇིགས་པར་བྱེད། །ཀླུ་རྒྱལ་འཇོག་པོ་དམར་པོ་ཡི། །རྣམ་པར་དྲག་པོའི་རྣ་རྒྱན་བྱས། །སྣ་ཚོགས་རིགས་ལྡན་དཔུང་པའི་རྒྱན། །ཀླུ་རྒྱལ་དུང་སྐྱོང་སེར་པོ་ནི། །ལག་གདུབ་དག་ཏུ་འཛིན་པའོ། །པདྨ་
དཀར་པོ་མགུལ་པའི་རྒྱན། །ལྗང་གུ་སྟོབས་ཀྱི་རྒྱུ་ཡིས་ཀྱང་། །མཆོད་ཕྱིར་ཐོགས་པ་ཤིན་ཏུ་མཛེས། །གདེངས་ཅན་ནོར་རྒྱས་བདུད་རྩི་ཡི། །ཁ་དོག་ལྟ་བུས་སྐ་རགས་བྱས། །པད་རྩ་ལྟ་བུར་དཀར་བའི་མདོག །པདྨ་ཆེན་པོས་རྐང་གདུབ་བྱས། །ཐམས་ཅད་ཕཊ་ཀྱི་སྒྲ་དྲག་

པོས། །ལྕེ་གཉིས་མཆེ་བའི་ཕྲེང་བ་ཅན། །དེ་ནས་རང་ཉིད་པད་ཉི་ལ། །ས་བོན་ཧཱུཾ་ལས་བྱུང་བ་ཡི། །རྡོ་རྗེས་མཚན་པའི་དབྱུག་པ་དཀར། །མགོ་བོ་སེར་པོས་རྣམ་པར་བརྒྱན། །ཇི་ལྟར་དངས་པའི་ཤེལ་དག་ལ། །ཛ་བའི་མེ་ཏོག་དྲུག་ཏུ་གཞག །ཛ་བའི་མེ་ཏོག་དེས་མཚུངས་པ། །
རབ་ཏུ་གསལ་བར་སྣང་བར་འགྱུར། །དེ་བཞིན་དེ་དབུས་ཉི་མར་གནས། །གསལ་བར་དེར་སོན་གདན་དག་ལ། །མར་མེ་འབར་བའི་རྩེ་མོ་ལྟའི། །ཧཱུཾ་གི་རྣམ་པ་རབ་ཏུ་བསམ། །བཅོམ་ལྡན་འདས་འདི་ཅི་འདྲ་བ། །སྐུ་མདོག་ཕྱག་མཚན་ལ་སོགས་པ། །བཅོམ་ལྡན་འདས་མའང་དེ་དང་
འདྲ། །འོན་ཀྱང་མགོ་ཕྲེང་སྐམ་པོ་ཅན། །དེ་མཚན་རྡོ་རྗེ་རོ་ལངས་མ། །ཁ་ཅིག་རྡོ་རྗེ་གཤིན་རྗེ་ཡི། །གཤེད་མ་ཞེས་གྲགས་རིག་པ་ཡི། །དགའ་བའི་ཚོགས་རྒྱུན་འབབ་པ་མོ། །ཕྱི་ནས་བཅོམ་ལྡན་འདས་གསང་བ། །ཧཱུཾ་ཡིག་ལས་བྱུང་རྡོ་རྗེ་དང་། །བཅོམ་ལྡན་འདས་མའི་
གསང་བ་ཡང་། །ཨཱཿཡིག་ལས་བྱུང་པདྨ་རུ། །བལྟས་ནས་གསང་སྔགས་ཨོཾ་སརྦྦ། །ལ་སོགས་བརྗོད་ཅིང་མདུན་གནས་མ། །བདེ་ཆགས་ཐུགས་མ་རང་སྣང་གི །ཤེས་རབ་མ་ཡིས་གཙོ་བོ་འཁྱུད། །རྡོ་རྗེ་པདྨ་སྙོམས་འཇུག་པས། །བདེ་བ་འབེབས་པའི་དོན་དུ་གཉེར། །
ལྷན་ཅིག་སྐྱེས་དགའི་རང་བཞིན་དུ། །དེ་ཡི་མཇུག་ཐོགས་བསྒོམ་པར་བྱ། །ཤེས་རབ་ལྟེ་འོག་མཚོ་སྐྱེས་ནི། །འདབ་མ་བརྒྱད་པ་དམར་པོ་དེའི། །ལྟེ་བར་གནས་པའི་ཧཱུཾ་ཡིག་དམར། །དེ་ཡི་སྟེང་དུ་གནས་པ་ཡི། །པདྨའི་སྣལ་མའི་གཟུགས་ཅན་ནི། །སྤྱི་བོའི་བདུད་རྩི་ལས་
འཐོན་པ། །རི་མོ་དཀར་པོ་གསལ་བར་བྱ། །ཤེས་རབ་འཕེལ་བ་ཉེར་གནས་གང་། །འདི་ནི་འཁོར་བ་མྱང་འདས་ཀྱི། །གཟུགས་ཅན་གཤིན་རྗེ་འཇོམས་བྱེད་དུ། །རྟོགས་ནས་རྣམ་རྟོག་ཞི་བྱའི་ཕྱིར། །སྔགས་ཀྱིས་ཀུན་ནས་བྱིན་གྱིས་བརླབ། །ཨོཾ་དྷརྨྨ་དྷཱ་ཏུ་སྭ་བྷཱ་བ་ཨཱཏྨ་
ཀོ྅ཧཾ། འདི་ནི་རྗེས་སུ་རྣལ་འབྱོར་རོ། །རང་སྙིང་འོད་ཟེར་ལྕགས་ཀྱུ་ཡིས། །མཁའ་ཁྱབ་རྫོགས་པའི་སངས་རྒྱས་ཀུན། །སྤྱན་དྲངས་ཞལ་ནས་རྣམ་ཀུན་གཞུག །བདེ་བ་ཞུགས་པ་སྙིང་ག་རུ། །ཞུ་བྱས་བློ་ལྡན་དེ་དབྱུང་བྱ། །རྡོ་རྗེའི་ལམ་ནས་ཞུ་བ་དེ། །རང་སྣང་པདྨའི་དཀྱིལ་

གནས་པའི། །ས་བོན་རང་བཞིན་ཅན་དུ་བལྟ། །འོད་ཟེར་འཕྲོ་བའི་ཚོགས་འབར་བ། །ཆོ་ག་བཞིན་དུ་མཁས་པས་བསྒོམ། །དབུས་སུ་ཡ་ཡིག་ལས་བྱུང་བའི། །གཙོ་བོ་བཤད་པའི་མཚན་ཉིད་ཅན། །ཤར་དུ་ཀྵེ་དང་འཁོར་ལོ་ལས། །བྱུང་བའི་རྟག་པ་ཕྱག་གཉིས་
པ། །དཀར་པོ་གཡས་ན་འཁོར་ལོ་གཡོན། །དེ་བཞིན་ཐོད་པ་བསྣམས་པར་བསྒོམ། །ལྷོར་ནི་མ་ཡིག་རིན་ཆེན་ལས། །སྐྱེས་པའི་རིན་ཆེན་འབྱུང་ལྡན་ནི། །བཙོ་མ་གསེར་གྱི་མདོག་ལྟ་བུས། །གཡས་ན་རིན་ཆེན་ཆེ་མཆོག་བསྣམས། །གཡས་པ་མིན་ན་ཐོད་པའོ། །ནུབ་ཏུ་ཆགས་
པ་རྡོ་རྗེ་ཅན། །མེ་ཡི་ས་བོན་པདྨས་སྐྱེས། །པདྨ་རཱ་གའི་འོད་མཚུངས་པ། །པདྨ་དམར་དང་ཐོད་པ་ནི། །ཕྱག་གཡས་ཅིག་ཤོས་དག་ཏུ་དགོད། །བྱང་དུ་ད་ཡིག་རལ་གྲིས་བསྐྱེད། །ཕྲག་དོག་གཤིན་རྗེ་གཤེད་ལྗང་གུ། །གཡས་ན་རལ་གྲི་མཆོག་བསྣམས་ཤིང་། །གཡོན་ན་མི་ཡི་
ཐོད་པའོ། །འདི་རྣམས་ཞལ་གཅིག་ཕྱག་གཉིས་པ། །ཞབས་ནི་གཡོན་བརྐྱང་སྟབས་ཀྱིས་བཞུགས། །ཐམས་ཅད་ཞེ་སྡང་གཤིན་རྗེ་གཤེད། །མཚན་ཉིད་དག་གི་ཁྲོ་བོའི་གཟུགས། །འོན་ཀྱང་དེ་རྣམས་ཕྱག་གཡས་ན། །རང་རང་སྐུ་མདོག་རང་ཕྱག་མཚན། །གཉུག་མའི་ཤེས་རབ་
གཉིས་མེད་གྱུར། །སྐུ་ནི་བདེ་བའི་རང་བཞིན་ཅན། །ཉི་མའི་དཀྱིལ་འཁོར་དག་ལ་གནས། །རྟག་པ་ཟླ་བའི་དཀྱིལ་འཁོར་ལ། །སྣ་ཚོགས་རྡོ་རྗེའི་ར་རྩར་གནས། །སེམས་ཅན་དོན་མཛད་བསྒོམ་པར་བྱ། །ཤར་དུ་ཡ་ཡིག་ཐོ་བ་ལས། །བྱུང་བའི་ཐོ་བ་གཤིན་རྗེ་གཤེད། །ཅེས་
གྲགས་སྐུ་མདོག་སྔོན་པོའི་ཚུལ། །ཕྱག་གཡས་ན་ནི་ཐོ་བ་སྟེ། །གཡོན་ན་པདྨའི་སྣོད་བསྣམས་པ། །ལྷོར་ནི་ཙ་ཡིག་དབྱུག་པ་ལས། །བྱུང་བའི་དབྱུག་པ་གཤིན་རྗེ་གཤེད། །དཀར་པོ་དབྱུག་མཆོག་མི་ཐོད་ཅན། །ནུབ་ཏུ་པདྨ་གཤིན་རྗེ་གཤེད། །ནི་སྐྱེས་ཆགས་པ་མཐར་བྱེད་
ཚུལ། །བྱང་དུ་རལ་གྲི་གཤིན་རྗེ་གཤེད། །ར་ལས་ཕྲག་དོག་མཐར་བྱེད་འདྲ། །ཅུང་ཟད་སྔོ་བ་བྱེ་བྲག་ཏུ། །མཛེས་ཤིང་རབ་ཏུ་འཇིགས་པར་བྱེད། །ཐམས་ཅད་གདུག་པ་སྦྲུལ་གྱིས་བརྒྱན། །མཆེ་བ་གཙིགས་ཤིང་གད་རྒྱངས་ཅན། །དབུ་སྐྲ་དམར་སེར་གྱེན་དུ་འབར། །ཉི་མའི་

དཀྱིལ་འཁོར་ཡང་དག་བཞུགས། །རང་སྣང་ཤེས་རབ་ཡན་ལག་སྦྱོར། །གཉིས་མེད་ཡེ་ཤེས་རང་བཞིན་ཅན། །མཆེ་བ་རྣམ་གཙིགས་འཇིགས་པའི་ཞལ། །རང་རང་ཕྱག་མཚན་ཐོད་པ་ཅན། །སྣ་ཚོགས་རྡོ་རྗེའི་གྲྭ་བཞི་རུ། །དེ་བཞིན་ལྷ་མོ་ཟླ་བར་བཞུགས། །ཤར་ལྷོར་ཛ་དང་
འཁོར་ལོ་ལས། །ལྷ་མོ་རྡོ་རྗེ་ཙརྩི་ཀ །དཀར་མོ་སྐེམ་ཞིང་དྲག་མོ་ཆེ། །གཏི་མུག་གཤིན་རྗེ་གཤེད་གཟུགས་མ། །ལྷོ་ནུབ་དག་ཏུ་རྡོ་རྗེ་ས། །ལས་སྐྱེས་རྡོ་རྗེ་ཕག་མོ་སྟེ། །དྲག་མོ་ཕག་གི་གདོང་ཅན་ཉིད། །ཟར་མའི་མེ་ཏོག་དང་མཚུངས་མ། །ནུབ་བྱང་ཟུར་དུ་དབྱངས་ཅན་མ། །
དམར་མོ་དེ་དང་པདྨས་བསྐྱེད། །རབ་ཏུ་ཞི་མ་ཕུན་སུམ་ཚོགས། །འདོད་ཆགས་གཤིན་རྗེ་མཐར་བྱེད་གཟུགས། །བྱང་ཤར་མཚམས་སུ་དཀར་མོ་སྟེ། །ལྗང་གུ་འཇིགས་བྱེད་ར་ལས་སྐྱེས། །ཕྲག་དོག་གཤིན་རྗེ་གཤེད་བྱེད་ཀྱི། །ཚུལ་དང་ཕྱག་མཚན་འཛིན་པར་བརྩོན། །ཐམས་ཅད་
གཡོན་བརྐྱང་བ་ཡི་ཞབས། །རང་རང་མཚན་མ་ཐོད་པ་ཅན། །འོན་ཀྱང་རྡོ་རྗེ་ཕག་མོ་དང་། །དཀར་མོ་བོང་ཐུང་སྟོ་བ་འཕྱང་། །ཎ་ཡོ་ནི་རཱ་ལས་བྱུང་བའི། །ཐོད་པ་བཞི་ནི་ཟུར་བཞི་རུ། །བསྐྱེད་དེ་ཇི་ལྟར་རང་རང་སྔགས། །གསུངས་པས་བློ་དང་ལྡན་པས་དབྱུང་། །ཧྲཱིཿཥྚྲྀཿལ་སོགས་གསང་སྔགས་
སྒྲས། །དཀྱིལ་འཁོར་བདག་པོ་ལ་བསྐུལ་ནས། །སྤྲུལ་པ་དཔག་མེད་སྤྲོ་བར་བྱ། །བླ་མེད་སེམས་ཅན་དོན་བྱས་ནས། །དངོས་པོ་ཀུན་གྱི་རང་ལུས་ལ། །ཁྲོ་བོ་དཔའ་བོ་དགོད་པར་བྱ། །ཛི་ན་ཛིཀ་ཅེས་བྱ་བ་འདིས། །ཤར་གྱི་རྨོངས་པ་མཐར་བྱེད་ནི། །ར་ཡི་རྩ་བར་གནས་སྣ་ཚོགས། །པདྨ་
ཟླ་བ་དག་ལ་དགོད། །རཏྣ་དྷྲྀཀ་ཅེས་བྱ་བ་འདིས། །ལྷོ་ར་ཆུ་སྐྱེས་ཉི་མ་ལ། །ཕྲ་མ་ཞེས་གྲགས་སྤྱན་དྲངས་ནས། །ཆོ་ག་ཡིས་ནི་དགོད་པར་བྱ། །ཨཱ་རོ་ལྀཀ་ཅེས་གསང་སྔགས་ཀྱིས། །འདོད་ཆགས་གཤིན་རྗེ་འཇོམས་པ་པོ། །ནུབ་ར་ཆུ་སྐྱེས་ཉི་མ་ལ། །ཆོ་ག་ཇི་བཞིན་དགོད་པར་བྱ། །
པྲཛྙཱ་དྷྲྀཀ་གི་དེ་ཉིད་ཀྱིས། །ཕྲག་དོག་གཤིན་རྗེ་རྣམ་འཇིག་པ། །བྱང་གི་ཆུ་སྐྱེས་འོད་རྣོ་བར། །ཆོ་ག་བཞིན་དུ་དགོད་པར་བྱ། །མུངྒ་དྷྲྀཀ་གི་དེ་ཉིད་ཀྱིས། །ཤར་སྒོར་ཆུ་སྐྱེས་ཉི་མ་ལ། །ཐོ་བ་གཤིན་རྗེ་མཐར་བྱེད་དག །མཁས་པས་ཆོ་ག་བཞིན་དུ་བསམ། །དཎྜ་དྷྲྀཀ་གི་གསང་སྔགས་

ཀྱིས། །ལྷོ་སྒོར་ཡང་དག་བཞུགས་པ་ཡི། །དབྱུག་པ་དུས་དགྲ་གདུལ་དཀའ་འདུལ། །སྣ་ཚོགས་པདྨ་ཉི་མར་དགོད། །པདྨ་དྷྲྀཀ་ཉིད་འདི་ཡིས་ནི། །པདྨ་གཤིན་རྗེ་འཇོམས་མཛད་པ། །ནུབ་སྒོར་པདྨ་ཉི་མ་ལ། །སྟོབས་པོ་ཆེ་ནི་བསམ་པར་བྱ། །ཁཌྒ་དྷྲྀ་ཀ་གི་དེ་ཉིད་
ཀྱིས། །རལ་གྲི་གཤིན་རྗེ་ཟད་མཛད་མ། །བྱང་དུ་བདུད་རྣམས་སེལ་བ་པོ། །སྣ་ཚོགས་པདྨ་ཉི་མར་དགོད། །སྣ་ཚོགས་རྡོ་རྗེའི་གྲྭ་བཞི་རུ། །དེ་བཞིན་གཞན་ཡང་ལྷ་མོ་བསྒོམ། །ཤར་ལྷོར་ལྷ་མོ་ཙརྩི་ཀ །དྲག་མོ་རབ་ཏུ་འོད་འཕྲོ་མ། །མོ་ཧ་ར་ཏིའི་གསང་སྔགས་ཀྱིས། །སྣ་ཚོགས་
ཆུ་སྐྱེས་ཟླ་བར་བཞུགས། །དེ་ནས་ལྷོ་ནུབ་རིགས་ཀྱི་ཡུམ། །རྡོ་རྗེ་ཕག་མོ་མཁས་པ་ཡིས། །དྭེ་ཥ་ར་ཏི་དེ་ཉིད་ཀྱིས། །པདྨ་ཟླ་བར་དགོད་པར་བྱ། །དེ་ནས་ནུབ་བྱང་མཚམས་སུ་ནི། །པདྨ་ཟླ་བར་དབྱངས་ཅན་མ། །རཱ་ག་ར་ཏིའི་སྔགས་ཀྱིས་དགོད། །དེ་ནས་བྱང་ཤར་དཀར་མོ་སྟེ། །བཛྲ་
ར་ཏིའི་གསང་སྔགས་ཀྱིས། །ཟླ་བར་འདི་རྣམས་ཤིས་པ་མཚན། །དཀྱིལ་འཁོར་གྱི་ནི་གྲྭ་བཞི་རུ། །དེ་ཉིད་གསུམ་གྱི་ཐོད་པའོ། །འདི་ལྟར་འཁོར་ལོ་དམ་པ་སྤྲོས། །བདེ་བ་ལྡན་པ་བརྟེན་བྱས་ནས། །སྔར་གྱི་འཁོར་ལོ་དེ་ཉིད་དུ། །ཐིམ་པར་མཉམ་པར་གཞག་པར་བལྟ། །འདི་ནི་ཤིན་
ཏུ་རྣལ་འབྱོར་རོ། །གཤིན་རྗེ་གཤེད་པོ་དམར་པོ་ཡི། །དཀྱིལ་འཁོར་པ་ཡི་རང་བཞིན་ཅན། །མིག་དང་སྐུ་སོགས་ངོ་བོ་ནི། །ལྷ་ཡི་མངོན་པར་བྱིན་གྱིས་བརླབ། །ཀྵིཾ་དང་འཁོར་ལོས་གཏི་མུག་བཞིན། །ཅུང་ཟད་ཁྲོ་བོའི་མིག་དག་ལ། །བློ་ལྡན་རྡོ་རྗེའི་མིག་དགོད་བྱ། །རྣ་བར་ཛྲཱིཾ་དང་
རྡོ་རྗེ་བསྐྱེད། །རྡོ་རྗེའི་སྣང་བ་ནག་པོར་སྣང་། །སྣར་ཁཾ་རིན་ཆེན་ལས་བྱུང་བའི། །སེར་སྣ་ཞེས་བྱ་ཟླ་བ་ལ། །རྡོ་རྗེ་སྣ་ཡང་དེ་བཞིན་གཞན། །ལྕེ་ལ་རཾ་ལས་པདྨ་བསྐྱེད། །རྡོ་རྗེ་ལྕེ་ནི་ཟླ་བར་གནས། །འདོད་ཆགས་དང་མཚུངས་རྡོ་རྗེ་ལུས། །སྐཾ་སྐྱེས་རལ་གྲི་ལས་བྱུང་བ། །ཕྲག་དོག་
གཤིན་རྗེ་གཤེད་ངོ་བོ། །ལུས་མིང་བྲལ་བའི་ཟླ་བར་གནས། །ལྟེ་བའི་སྟེང་དུ་སཾ་རྡོ་རྗེས། །སེམས་ཀྱི་རྡོ་རྗེ་དེ་བཞིན་གཤེགས། །སྒེག་པའི་ཁྲོ་བོའི་གཟུགས་ཅན་དེ། །རྡོ་རྗེ་འཛིན་པའི་རྣམ་པར་དགོད། །འདི་ནི་ཡན་ལག་དྲུག་དགོད་པ། །མངོན་ཤེས་དོན་བསྒྲུབ་ཆེད་དུ་བཤད། །སྙིང་

གར་རྡོ་རྗེའི་དཀྱིལ་གནས་ཧཱུཾ། །རྡོ་རྗེ་ཧཱུཾ་ལས་ཐུགས་རྡོ་རྗེ། །དུས་དགྲའི་སྐུ་མདོག་ཕྱག་མཚན་ལྡན། །སྔོན་པོ་འོད་ཟེར་གསལ་བའོ། །མགྲིན་པར་ཨཱཿཡིག་པདྨའི་དབུས། །སླར་ཡང་ཨཱཿཡིག་པདྨ་ལས། །འདོད་ཆགས་དུས་དགྲ་ལྟ་བུའི་སྐུ། །དཔལ་གསུམ་རྡོ་རྗེ་རྣམ་པར་བསམ། །སྤྱི་
བོར་ཨོཾ་ཡིག་འཁོར་ལོའི་དབུས། །ཨོཾ་ཡིག་འཁོར་ལོས་འོད་བཟང་དཀར། །སྐུ་ཡི་རྡོ་རྗེ་སྐུ་དབང་ཕྱུག །སྐུ་མདོག་དག་དང་ཕྱག་མཚན་མཆོག །འདི་ནི་དེ་ཉིད་གསུང་རྡོ་རྗེ། །མཆོག་བསྐྱེད་ནམ་མཁར་གནས་པ་ཡི། །སངས་རྒྱས་མཆོད་ལ་གསང་སྔགས་ཀྱིས། །དེ་དག་བྱིན་གྱིས་
བརླབ་པར་བྱ། །ཨོཾ་སརྦྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཨོཾ་སརྦྦ་ཏ་ཐཱ་ག་ཏ་ཝཱཀ་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཨོཾ་སརྦྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་བ་ཨཱཏྨ་ཀོ྅ཧཾ། རང་སྙིང་ས་བོན་འོད་ཟེར་གྱིས། །འཇིག་རྟེན་བཞུགས་པའི་སངས་རྒྱས་རྣམས། །སྲས་བཅས་སྤྱན་དྲངས་
མདུན་བལྟས་ནས། །གང་ཞིག་དེ་རྣམས་ཀྱིས་སྤྲོས་པའི། །ཙརྩི་ཀ་སོགས་ཀྱིས་གཟུང་བའི། །ཟླ་བ་ལྟ་བུའི་བུམ་པས་ནི། །དེ་རྣམས་བཀྲ་ཤིས་གླུ་ལ་སོགས། །སླར་ཡང་ཅ་ཅོའི་སྒྲ་རྣམས་ཀྱིས། །ཐམས་ཅད་དང་ནི་བདག་ཉིད་ལ། །དབང་བསྐུར་བར་ནི་བསམ་པར་བྱ། །སྤྱི་བོར་
གཤིན་རྗེ་གཤེད་དམར་པོ། །བདག་ཉིད་སྤྱི་བོར་རྡོ་རྗེ་ཅན། །རང་སྙིང་ས་བོན་འོད་ཟེར་གྱིས། །ཡེ་ཤེས་འཁོར་ལོ་སྤྱན་དྲངས་ལ། །བདག་ཉིད་མདུན་བལྟས་ཁྲོ་བོ་ཡིས། །བགེགས་ཚར་བཅད་ཅིང་བསྲུངས་ནས་ནི། །མཆོད་ཡོན་ཞབས་བསིལ་སོགས་ཕུལ་ནས། །ཨོཾ་མུངྒ་ར་ཛཿཞེས་
པའི་སྔགས་ཀྱིས་བཀུག་ནས། ཨོཾ་དཎྜ་ཧཱུཾ་ཞེས་པ་འདིས་བཅུག་ལ། ཨོཾ་པདྨ་བཾ་ཞེས་པ་འདིས་བཅིངས་ཏེ། ཨོཾ་ཁཌྒ་ཧོཿ ཞེས་པ་འདིས་དབང་དུ་བྱའོ། །སྙིང་གའི་ས་བོན་འོད་ཟེར་གྱིས། །སངས་རྒྱས་སྤྱན་དྲངས་འདིར་བཞུགས་པར། །བལྟས་ཏེ་ཐུགས་ཀར་ཞུ་བྱས་པར། །རྡོ་རྗེའི་
ལམ་ནས་འཐོན་གྱུར་པ། །རང་གི་རིག་མའི་པདྨ་ཡི། །ཟེ་འབྲུར་ཟླ་བས་བསྐྱེད་ལྷ་མོའི། །འཁོར་ལོ་ཕྱག་ན་སྣ་ཚོགས་པའི། །མེ་ཏོག་ཉེར་སྤྱོད་སོགས་བཟུང་བས། །བལྟས་ཏེ་ཐུགས་ཀར་ཞུ་བྱས་པ། །རྡོ་རྗེའི་ལམ་ནས་འཐོན་གྱུར་པ། །སྒེག་བཅས་མཆོད་བྱེད་དེ་རྣམས་ཀྱིས། །

མཆོད་པ་གླུ་དབྱངས་ཡིད་འོང་དང་། །སྣ་ཚོགས་གར་གྱི་རང་བཞིན་དག །བདེ་བ་ཆེན་པོ་སྟེར་བས་མཆོད། །ཨ་ཡེ་ཀྱེ་ཀྱེ་གཤིན་རྗེ་གཤེད་དམར་པོ། །བླ་མ་སྲིན་པོའི་གཟུགས་རང་བཞིན། །ཁོ་བོ་ཁྱོད་མཐོང་རྣམ་པར་འཇིགས། །བླ་མ་ཁྲོ་བོའི་རང་བཞིན་སྤངས། །ཁྱོད་ཀྱིས་
གར་མཛད་ས་སྟེངས་དང་། །ས་བླ་དང་ནི་ས་འོག་གཡོ། །ཆགས་པས་བརྒྱན་པའི་ཁྲོ་བོའི་འོད། །གར་མཛད་ཁྱོད་ཉིད་རོ་ལངས་ལགས། །སྐུ་ལུས་སྦོམ་ཐུང་དམར་པོ་སྟེ། །རྣམ་པ་སྣ་ཚོགས་སྐུ་སྤྲུལ་པ། །རྡོ་རྗེ་དབྱངས་ཅན་མ་ཡིས་བཏུད། །གར་མཛད་ཁྱོད་ནི་བདེ་བ་ཆེ། །ཧྲཱིཿཥྚྲྀཿགསང་
སྔགས་དག་གིས་ནི། །ཁྱོད་ནི་ས་གསུམ་འཁྲུལ་པ་སེལ། །རྗེ་བཙུན་སྙིང་རྗེའི་ཁྲོ་བོ་ལགས། །གར་མཛད་ཁྱོད་ནི་འཇིག་རྟེན་གཟིགས། །ཨོཾ་སརྦྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་བ་ཨཱཏྨ་ཀོ྅ཧཾ། སྒྲ་ཡི་ཚོགས་རྣམས་ཐམས་ཅད་ནི། །བྲག་ཅ་ལྟ་བུར་རྣམ་བལྟ་ཞིང་། །འཁོར་ལོ་ཅན་གྱི་འཁོར་ལོའི་
གཙོ། །བསྟོད་བྱ་དེ་རྣམས་དེ་བཞིན་དེས། །གཏི་མུག་རྡོ་རྗེའི་རང་བཞིན་ཁྱོད། །གཤིན་རྗེ་གཤེད་པོ་ཤིན་ཏུ་འཇིགས། །སྟོན་པ་སངས་རྒྱས་ཀུན་རང་བཞིན། །སྐུ་ཡི་རྡོ་རྗེ་ཁྱོད་ཕྱག་འཚལ། །སེར་སྣ་རྡོ་རྗེའི་རང་བཞིན་ཁྱོད། །གཤིན་རྗེ་གཤེད་པོ་ཤིན་ཏུ་འཇིགས། །སེམས་ཀྱི་རྡོ་རྗེ་རབ་ཏུ་
གསལ། །རིན་ཆེན་རྡོ་རྗེ་ཁྱོད་ཕྱག་འཚལ། །འདོད་ཆགས་རྡོ་རྗེའི་རང་བཞིན་ཁྱོད། །ཁྱབ་བདག་ཆགས་པའི་ཆོས་འབྱུང་གནས། །དབྱངས་མཆོག་ཀུན་གྱི་མཆོག་གི་མཆོག །གསུང་གི་རྡོ་རྗེ་ཁྱོད་ཕྱག་འཚལ། །ཕྲག་དོག་རྡོ་རྗེའི་རང་བཞིན་ཁྱོད། །གཤིན་རྗེ་གཤེད་པོ་ལས་ཀུན་བྱེད། །སྐུ་ཡི་
རྡོ་རྗེ་རབ་གསལ་བ། །ཕྱག་ན་རལ་གྲི་ཁྱོད་ཕྱག་འཚལ། །སངས་རྒྱས་ཀུན་གྱི་རང་བཞིན་ཁྱོད། །སངས་རྒྱས་ཐམས་ཅད་གཅིག་བསྡུས་པ། །སངས་རྒྱས་ཀུན་རབ་མཆོག་གི་མཆོག །དཀྱིལ་འཁོར་དབང་ཕྱུག་ཁྱོད་ཕྱག་འཚལ། །མགོ་བོ་གསུམ་གྱི་སྟེང་གནས་པ། །ཨཱཿཡི་ཡི་གེ་ལས་
བྱུང་དག །པདྨའི་སྣོད་ནི་བསྐྱེད་ནས་སུ། །དེ་འོག་མེ་ཡི་དཀྱིལ་འཁོར་ཏེ། །གྲུ་གསུམ་རཾ་ཡིག་ལས་བྱུང་བ། །དེ་འོག་རླུང་གི་དཀྱིལ་འཁོར་ཏེ། །གཡོ་ཞིང་སྔོ་བ་གཞུ་ལྟ་བུ། །བ་དན་གྱིས་མཚན་ཡཾ་ལས་བྱུང་། །དེར་ནི་རྣམ་སྣང་ལ་སོགས་ཏེ། །མིང་ཡིག་དང་པོ་ལས་སྐྱེས་པ། །བྷྲཱུཾ་ཡིག་

ལ་སོགས་བྱུང་བ་ཡི། །གླང་ཆེན་ཤ་ལ་སོགས་པ་ལྔ། །ཧཱུཾ་སྐྱེས་རྡོ་རྗེའི་ཁ་ཆོད་ཀྱིས། །བཀབ་ལ་དེ་ནས་བསྒོམ་པར་བྱ། །ཧཱུཾ་སྐྱེས་རྡོ་རྗེའི་དབྱུག་པ་ཡིས། །ཡང་དང་ཡང་དུ་དཀྲུགས་བྱ་ཞིང་། །རླུང་གིས་བསྐྱོད་པར་འགྱུར་བའི་མེ། །འཇིག་དུས་བསྐལ་པའི་མེ་ལྟ་བུས། །བི་ར་མ་སོགས་གོ་
ཀུ་སོགས། །དེ་དག་ཞུ་བར་གྱུར་པར་བསམ། །དེ་དང་རེག་པའི་ཁོལ་བ་ཡི། །ཁུ་བར་འདི་ཉིད་ཡོངས་སུ་ཞུ། །རྡོ་རྗེ་རྡོ་རྗེའི་དབྱུག་པ་ཡང་། །རང་ཉིད་ཞུན་མར་ལྟ་བུ་སྟེ། །ཐམས་ཅད་དག་ཅིང་རོ་གཅིག་འགྱུར། །ཤིན་ཏུ་དྲི་མ་མེད་པར་བལྟ། །དེར་ནི་ཨོཾ་ཡིག་འོད་ཟེར་གྱིས། །སངས་རྒྱས་
ཡེ་ཤེས་ཚུལ་ཅན་བཀུག །གསང་སྔགས་གཟུགས་ཀྱིས་བཅུག་ནས་སུ། །བདུད་རྩི་ལྔ་པོ་མཆོག་བལྟས་ལ། །དེ་ཉིད་གསུམ་གྱིས་བྱིན་བརླབས་ཏེ། །དཀྱིལ་འཁོར་བདག་པོ་ཚིམ་པར་བྱ། །ལྗགས་ཀྱི་ཧཱུཾ་ལས་བྱུང་བ་ཡི། །རྡོ་རྗེ་དཀར་པོ་བལྟས་ནས་སུ། །དེ་འོད་སྦུ་གུའི་རྣམ་པ་
ཡིས། །མཉམ་པར་དྲངས་ནས་དེ་ཡིས་ཀྱང་། །སྣ་ཚོགས་གནས་དང་སངས་རྒྱས་ཀུན། །དཀྱིལ་འཁོར་པ་དང་དེ་བཞིན་གཞན། །སྙིང་གར་ཡེ་ཤེས་འོད་ཟེར་དགོད། །ཀུན་དུ་རྟོག་པ་ཐམས་ཅད་སྤངས། །ཐོག་མཐའ་དབུས་ཀྱི་དབྱེ་བ་ཡིས། །འདིར་ཡང་གཅིག་ཏུ་ཡོད་མིན་ཏེ། །རྡུལ་ཕྲན་
ལ་ནི་ཆ་མེད་ཕྱིར། །དུ་མར་ཡང་ནི་གྲུབ་པ་མིན། །གཅིག་དང་དུ་མའི་རང་བཞིན་དུ། །གང་ཞིག་བྲལ་ཏེ་དེ་བཞིན་ནོ། །འཁྲུལ་པའི་ངོ་བོ་དེ་ཉིད་ཡིན། །གང་ཕྱིར་འཁྲུལ་པ་གཉིས་ལ་གནས། །སེམས་ནི་རྟག་ཏུ་འཁྲུལ་པ་མེད། །སྤྲོ་བ་དག་ནི་སྡུད་པའི་ལུས། །སེམས་ཅན་དོན་དུ་རོ་གཅིག་
བྱུང་། །འདི་ལས་གཞན་དུ་དེ་ཉིད་མིན། །ཡེ་ཤེས་ཞབས་སོགས་དཔའ་བོ་ཡིས། །འདི་ཉིད་ཁོ་ན་གསལ་བར་གསུངས། །དཔལ་ལྡན་གསང་འདུས་ལས་གསུངས་པ། །འདིར་ནི་ཅུང་ཟད་རབ་ཏུ་བསྟན། །བྱང་ཆུབ་མེད་ཅིང་མངོན་རྟོགས་མེད། །དངོས་པོ་མེད་ཅིང་བསྒོམ་པ་མེད། །ཁམས་
མེད་རྣམ་པར་ཤེས་པའང་མེད། །ནམ་མཁའ་མཉམ་པ་ཉིད་ཀྱི་གཞི། །ནམ་མཁའ་ལྟ་བུར་བདག་མེད་པ། །ཆོས་འདི་བདེ་བ་ཆེན་པོ་སྟེ། །ས་མེད་ཆུ་དང་མེ་མེད་ལ། །རླུང་མེད་ནམ་མཁའ་ཡོད་མ་ཡིན། །རྡོ་རྗེ་སེམས་དཔའི་སྦྱོར་བ་ཡིས། །འདི་དག་སྐྱེ་ཞིང་རབ་ཏུ་གནས། །དངོས་

པོ་ཐམས་ཅད་དངོས་མིན་ཞེས། །དེས་ན་དངོས་པོ་མེད་པར་གྲགས། །རྣལ་འབྱོར་རྣལ་འབྱོར་པ་ཉིད་འབྲེལ། །རྟག་པ་མ་ཡིན་ཆད་པའང་མིན། །ཕྱག་མིན་ཞལ་དང་སྐུ་མདོག་མིན། །མཆོག་ཏུ་དགའ་བའི་མཚན་ཉིད་དོ། །དངོས་ཀུན་ངེས་པར་བདེན་པ་མིན། །ཐོག་མ་
དབུས་མཐའ་སྤངས་པ་ཉིད། །འདི་ལྟར་རིག་བཅས་འཁོར་ལོ་མཆོག །ཀུན་དུ་རྟོག་པ་ཐམས་ཅད་སྤངས། །ཕུང་པོ་ཁམས་སུ་བདག་མེད་མ། །བདེ་བ་དམ་པའི་གཟུགས་ཅན་བསྒོམ། །རང་སྙིང་ས་བོན་འོད་ཟེར་གྱིས། །འགྲོ་རྣམས་གཤིན་རྗེ་མཐར་བྱེད་བྱས། །བཀུག་ནས་དེ་རུ་
གནས་བལྟས་ཏེ། །སྐུ་གསུང་ཐུགས་ཀྱི་རྡོ་རྗེ་ཅན། །རྡོ་རྗེ་དང་བ་དང་ནི་ཆོས། །ཡེ་ཤེས་པ་ནི་ཡ་སྐྱེས་དགོད། །དེ་ལ་དེ་རྣམས་རང་ས་བོན། །ཡེ་ཤེས་ཧྲཱིཿཥྚྲྀཿསོགས་འོད་གསལ། །ལྟ་ཞིང་ཀུན་རྟོག་མ་ལུས་སྤངས། །བདེ་བ་དམ་པའི་རྣམ་པ་ནི། །འཕྲོ་ཞིང་སྡུད་པ་ཡོངས་སུ་རྫོགས། །
བདག་ཉིད་མཁས་པས་བཟླས་པར་བྱ། །སྐུ་སོགས་སྤྲོ་ཞིང་གཞུག་པ་ནི། །རིམ་པ་བཞིན་ནམ་ཅིག་ཅར་བྱ། །ཁྲོ་བོའི་ཚོགས་རྣམས་སྤྲུལ་པ་ནི། །ནམ་མཁའི་དཀྱིལ་རྣམས་མ་ལུས་ཁྱབ། །སེམས་ཅན་དོན་ནི་ཕུན་སུམ་བྱས། །ཧྲཱིཿཥྚྲྀཿལ་སོགས་འགྲོ་ལ་སྒྲོགས། །ཧྲཱིཿལ་སོགས་
པའི་སྔགས་ཟློས་ཏེ། །ཨོཾ་དང་སྭཱ་ཧཱས་དང་མཐར་བརྒྱན། །ཆོ་ག་འདི་དག་ཁོ་ན་ཡིས། །རྣམ་པ་ཀུན་དུ་བསྒོམ་ཞིང་བཟླས། །གཞན་ཡང་ཟས་ཀྱི་བྱ་བ་ལ། །སོགས་པ་བྱ་ཕྱིར་ལྡང་འདོད་ན། །མཆོད་བསྟོད་བདུད་རྩི་མྱང་བྱས་ནས། །སེམས་ཅན་དོན་ལ་སེམས་པ་ཡིས། །དེ་ཉིད་གསུམ་
གྱི་ཆོ་ག་བཞིན། །ཡེ་ཤེས་འཁོར་ལོ་གཤེགས་གསོལ་ཏེ། །ཆོ་ག་ཇི་བཞིན་བདག་ཉིད་ལ། །བདག་ཉིད་འཁོར་ལོ་བསྟིམས་ནས་ནི། །རང་གིས་བསགས་པའི་བསོད་ནམས་དག །བྱང་ཆུབ་ཏུ་ནི་ཡོངས་བསྔོ་ཞིང་། །དེ་ནས་སྨོན་ལམ་གདབ་བྱ་སྟེ། །ཨོཾ་ཨཱཿཧཱུཾ་མུཿ ཞེས་པས་གཤེགས་
སུ་གསོལ་ལོ། །འདི་ནི་རྣལ་འབྱོར་ཆེན་པོའོ། །ལངས་ནས་རང་གི་ལྷག་པའི་ལྷའི། །རྣམ་པ་ང་རྒྱལ་ཡང་དག་ལྡན། །རྣམ་པ་ཀུན་དུ་དངོས་པོ་ཀུན། །གསང་སྔགས་ངོ་བོ་དེ་བཞིན་ཏེ། །གཏི་མུག་དུས་དགྲའི་ངོ་བོར་ཡང་། །བསྒོམ་པར་བྱ་ཞིང་གནས་པར་བྱ། །ཐུན་གཞན་དུ་ནི་རྣལ་

འབྱོར་བཞིན། །དང་པོའི་རྣལ་འབྱོར་པ་ཡིས་བསྒོམ། །ཤིན་ཏུ་རྣལ་འབྱོར་རྣལ་འབྱོར་ཆེ། །ཡེ་ཤེས་ཅུང་ཟད་རྗེས་སྦྱོར་བས། །ཤིན་ཏུ་རྣལ་འབྱོར་ལས་རྣལ་འབྱོར། །ཆེན་པོ་ཡང་དག་ཡེ་ཤེས་དབང་། །གནས་པས་བཤད་བཞིན་ཆོ་ག་ཡིས། །ཐུན་གཅིག་ལ་ཡང་བསམ་གཏན་
འདི། །རྣལ་འབྱོར་ཆེན་པོའི་རང་བཞིན་གྱི། །རྣལ་འབྱོར་པ་ཡི་སྤྲོ་བསྡུའི་སྐུ། །ཡེ་ཤེས་དེ་ཉིད་གསུམ་བདག་ཚུལ། །རང་ཉིད་གཤིན་རྗེ་མཐར་བྱེད་དོ། །དབང་བསྐུར་ཆོ་ག་བསྒོམ་བྱ་ཞིང་། །ཁྲུས་བྱ་བཟའ་བའི་དུས་སུ་ནི། །བདུད་རྩི་ལྔ་ཡི་ཆོ་ག་ཡིས། །མཆོད་པ་གཞན་ནི་རྣམ་བརྟགས་པ། །
བདག་ཉིད་དང་ནི་གཞན་ཉིད་ཀྱང་། །ཆོ་ག་བཞིན་དུ་རྟག་ཏུ་མཆོད། །དཔལ་ལྡན་གཤིན་རྗེ་མཐར་བྱེད་ཀྱི། །རྣམ་པར་བལྟ་བྱ་བྱང་ཆུབ་བརྟེན། །བདག་གཞན་མཉམ་པ་བྱང་ཆུབ་སྟེ། །དཀྱིལ་འཁོར་བདག་པོའི་རྣལ་འབྱོར་ལས། །མིན་ན་ཇི་ལྟར་རྣལ