Luận tạng Tây Tạng (Tengyur) — Tập 48

ཙྪ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཨོཾ་པི་ཤུ་ནཱནྟ་ཀྲྀཏ་ཨཱ་གཙྪ་ཨཱ་གཙྪ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཨོཾ་རཱ་གཱནྟ་ཀྲྀཏ་ཨཱ་གཙྪ་ཨཱ་གཙྪ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཨོཾ་ཨིཪྵྱནྟ་ཀྲྀཏ་ཨཱ་གཙྪ་ཨཱ་གཙྪ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་པ་
བཟླས་སོ། །དེ་ནས་གཏི་མུག་དགའ་མ་འབའ་ཞིག་བསྒྲུབ་པར་འདོད་ན་གཏི་མུག་དགའ་མའི་སྐུ་གཟུགས་སྔར་བཤད་པའི་ལྷ་མོའི་གཟུགས་ཅན་མ་ཧེ་མེད་པ་བདག་ཉིད་ཀྱི་སྐུ་མདོག་དང་བཅས་པ་བྱེད་དུ་བཅུག་ལ་སྔར་བཞིན་མནན་ནས་བཟླས་པར་བྱ་སྟེ། ཇི་སྲིད་བྱོན་ནས་བཀའ་སྡོད་བྱེད་ཀྱི་བར་
དུའོ། །དེ་ནས་བརྩམས་ཏེ་སྒྲུབ་པ་པོའི་མངོན་པར་འདོད་པ་ཐམས་ཅད་སྒྲུབ་པར་བྱེད་དོ། །དེ་བཞིན་དུ་སེར་སྣ་དགའ་མ་དང་། འདོད་ཆགས་དགའ་མ་དང་། ཕྲག་དོག་དགའ་མ་རྣམས་བསྒྲུབ་པར་བྱའོ། །འདིའི་སྔགས་ནི། ཨོཾ་མོ་ཧ་ར་ཏི་ཨཱ་གཙྪ་ཨཱ་གཙྪ་ཧཱུཾ་ཧཱུཾ་ཛཿ། ཨོཾ་པི་ཤུ་ན་ར་ཏི་ཨཱ་གཙྪ་ཨཱ་
གཙྪ་ཧཱུཾ་ཛཿ། ཨོཾ་རཱ་ག་ར་ཏི་ཨཱ་གཙྪ་ཨཱ་གཙྪ་ཧཱུཾ་ཛཿ། ཨོཾ་ཨིཪྵྱ་ར་ཏི་ཨཱ་གཙྪ་ཨཱ་གཙྪ་ཧཱུཾ་ཛཿ། ཨོཾ་བཛྲ་ཙརྩི་ཀཱ་ཨཱ་གཙྪ་ཨཱ་གཙྪ་ཧཱུཾ་ཛཿ། ཨོཾ་བཛྲ་བཱ་རཱ་ཧཱི་ཨཱ་གཙྪ་ཨཱ་གཙྪ་ཧཱུཾ་ཛཿ། ཨོཾ་བཛྲ་ས་ར་སྭ་ཏཱི་ཨཱ་གཙྪ་ཨཱ་གཙྪ་ཧཱུཾ་ཛཿ། ཨོཾ་བཛྲ་གཽ་རཱི་ཨཱ་གཙྪ་ཨཱ་གཙྪ་ཧཱུཾ་ཛཿ། ཞེས་བཟླས་སོ། །དེ་ནས་གནོད་སྦྱིན་
བསྒྲུབ་པར་འདོད་ན་དེའི་ཚེ་འཇིག་རྟེན་པའི་ལུང་ལ་གྲགས་པའི་ཐ་སྙད་ཀྱིས་གནོད་སྦྱིན་གྱི་གཟུགས་བརྙན་བྱེད་དུ་བཅུག་ལ་དེ་ཁོ་ན་བཞིན་དུ་མནན་ནས་བསྒྲུབ་པར་བྱའོ། །བཀའ་ཐམས་ཅད་སྒྲུབ་པར་འགྱུར་རོ། །མི་དང་མི་མོ་ལ་སོགས་པ་གཞན་ཐམས་ཅད་ཀྱང་བསྒྲུབ་པར་བྱའོ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་
ཆེ་གེ་མོ་སཱ་དྷ་ཡ་སཱ་དྷ་ཡ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་བཟླས་སོ། །དེ་ནས་རྡོ་རྗེའི་དབྱུག་པ་བསྒྲུབ་པར་འདོད་ན། རྒྱལ་ལ་པ་ད་རའི་ཤིང་ལས་བྱས་པའི་དབྱུག་པ་སོར་སུམ་ཅུ་སོ་གཉིས་པ་བྱས་ལ་བའི་རྣམ་ལྔས་བཀྲུས་ལ་ཙནྡན་དང་མེ་ཏོག་གི་ཕྲེང་བ་ལ་སོགས་པས་མཛེས་པར་བྱས་ལ་ཤུབས་ནས་རལ་

གྲི་འདོན་པའི་སྟངས་ཀྱིས་ལག་པ་གཉིས་ཀྱིས་བཟུང་ལ་ཇི་སྲིད་འབར་བ་དེ་སྲིད་བཟླས་སོ། །དེ་ནས་དབྱུག་པའི་རིག་པ་འཛིན་པར་འགྱུར་རོ། །གཤིན་རྗེ་གཤེད་དང་མཚུངས་པར་ཕ་རོལ་གནོན་པར་འགྱུར་རོ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་བཛྲ་དཎྜ་ཛྭ་ལཱ་ཡ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་པ་བཟླས་སོ། །དེ་
ནས་ཐོད་པ་བསྒྲུབ་པར་འདོད་ན་ཤིང་སཱ་ལ་ལས་ཐོད་པ་སོར་སུམ་ཅུ་སོ་གཉིས་པ་བྱེད་དུ་བཅུག་ལ་སྔར་བཞིན་དུ་ལག་པ་གཡོན་དུ་བཞག་ལ་ལག་པ་གཡས་ཀྱིས་བཀབ་ལ་ཇི་སྲིད་འབར་བ་དེ་སྲིད་དུ་བཟླས་སོ། །འབྲས་བུ་དེ་ཁོ་ན་བཞིན་ནོ། །སྔགས་ལ་ཀ་པཱ་ལ་ཛྭ་ལཱ་ཡ་ཞེས་པ་ཁྱད་པར་རོ། །དེ་ནས་དབྱུག་
པའི་ཕྱག་རྒྱ་བསྒྲུབ་པར་འདོད་ན་དེའི་ཚེ་ལག་པ་གཡས་ཁུ་ཚུར་བསྡམས་ཏེ་སྡིགས་མཛུབ་བརྐྱང་བར་བྱ་བའི་ཕྱག་རྒྱ་འདི་བཅིངས་ལ་ཇི་སྲིད་འབར་བ་དེ་སྲིད་བཟླས་སོ། །དེ་ནས་གཤིན་རྗེ་གཤེད་ཀྱི་གཟུགས་སུ་གྲུབ་པར་འགྱུར་རོ། །སྔགས་ལ་དཎྜ་མུ་དྲཱི་ཛྭ་ལཱ་ཡ་ཞེས་པ་ཁྱད་པར་རོ། །འདི་དག་
ཐམས་ཅད་འདོད་ཡོན་ལྔ་ལ་ཉེ་བར་སྤྱོད་པ་ཁོ་ནས་བསྒྲུབ་པར་བྱའོ། །ཇི་ལྟར་རྙེད་པའི་དམ་ཚིག་གི་རྫས་སེམས་གསལ་བའི་དོན་དུ་བཟའ་བར་བྱའོ། །གང་ཅུང་ཟད་ཟ་བ་དང་འཐུང་བ་དེ་ཐམས་ཅད་གཤིན་རྗེ་གཤེད་ལ་དང་པོར་ཕུལ་ཏེ་བཟའ་བཏུང་བྱའོ། །འདི་ནི་གྲུབ་པ་ཆེན་མོའི་ཆོ་གའོ། །དེ་ནས་
དངོས་གྲུབ་ཕྲན་ཚེགས་བསྒྲུབ་པར་འདོད་ན་དེའི་ཚེ་ཞི་བ་ལ་སོགས་པ་བསྒྲུབ་པར་བྱའོ། །དེ་ལ་ཆོ་ག་ནི་འདི་ཡིན་ཏེ། གྲོ་ག་ལ་བརྒྱ་རྩ་བརྒྱད་བསྔགས་ཏེ་འོ་མས་རྩིབས་བཅུ་གཉིས་པའི་འཁོར་ལོ་གཉིས་ཐ་དད་དུ་བྲིས་ལ་དེའི་ཤར་གྱི་རྩིབས་ནས་བརྩམས་ཏེ་ཡི་གེ་ཧཱུཾ་གཉིས་དང་ཕཊ་གཉིས་གཅིག་པས་
བཅུ་གཉིས་གཡས་སྐོར་དུ་བྲིའོ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། དབུས་སུ་ཆུའི་ས་བོན་བཾ་ཡིག་བྲིས་ཏེ། བཾ་ཡིག་གཉིས་ཁ་སྦྱར་བའི་བསྒྲུབ་བྱའི་མིང་དེའི་ལྟེ་བའི་དབུས་སུ་བྲིའོ། །ཕྱི་རོལ་དུ་བའི་རྣམ་པ་གསུམ་གྱིས་བསྐོར་རོ། །དེ་ནས་ཁ་སྦྱར་ལ་སྐུད་པ་དཀར་པོས་བཅིངས་ལ་
མྱོས་བྱེད་དང་སྤྲ་ཚིལ་གྱིས་དཀྲིས་ཤིང་བརྒྱ་རྩ་བརྒྱད་དུ་བྱིན་གྱིས་བརླབས་ཤིང་འོ་མས་གང་བའི་བུམ་པར་བཅུག་ལ་སྔགས་བཟླས་སོ། །ཅི་འབྱོར་པའི་མཆོད་པ་བྱས་ལ། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་བཾ་ལྷ་སྦྱིན་གྱི་ཤཱནྟིཾ་ཀུ་རུ་བཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་པ་ཇི་སྲིད་ཞི་བར་མ་གྱུར་པ་དེ་སྲིད་བཟླས་སོ། །

འཇིག་རྟེན་ཐམས་ཅད་ལ་སྡིག་པའི་ནད་ལ་སོགས་པས་ཉེ་བར་འཚེ་བ་ལ་ནི་གྲོང་གི་ཕྱོགས་བཅུར། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་གྲོང་ཆེ་གེ་མོའི་ཉེ་བར་འཚེ་བ་ཐམས་ཅད་ཤཱནྟིཾ་ཀུ་རུ་ཧེ་ཧེ་བ་ལིཾ་གྲྀཧྞ་གྲྀཧྞ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་པ་འདིས་ལན་བདུན་གྱིས་བྱིན་གྱིས་བརླབས་པའི་གཏོར་མ་ཆོ་
ག་བཞིན་ཕུལ་ལ་རོལ་མོ་ལ་སོགས་པ་སྔོན་དུ་འགྲོ་བས་གྲོང་གི་དབུས་སུ་འོ་མ་ལ་བསྒྲེས་པའི་ཏིལ་གྱིས་སྦྱིན་སྲེག་བྱ་སྟེ་ཇི་སྲིད་དུ་ཉེ་བར་འཚེ་བ་ཐམས་ཅད་ཞི་བར་གྱུར་པའོ། །དེ་ནས་རྒྱས་པར་བྱེད་པར་འདོད་ན་གུར་གུམ་གྱིས་སྔར་ལྟ་བུའི་འཁོར་ལོ་གཉིས་ཀྱི་དབུས་སུ་ཡི་གེ་བཅུ་གཉིས་ཀྱང་བྲིས་
ལ་དབུས་སུ་ཡི་གེ་བྷཱུཾ་དཀྱིལ་འཁོར་གྱི་འཁོར་ལོའི་ས་བོན་བྲིའོ། །དེའི་དབུས་སུ་བསྒྲུབ་བྱའི་མིང་བཽ་ཥཊ་གཉིས་ཀྱིས་ཁ་སྦྱར་བ་བྲིའོ། །ཕྱི་རོལ་དུ་གྲུ་བཞི་པའི་རི་མོ་གསུམ་གྱིས་བསྐོར་རོ། །དེ་ནས་སྐུད་པ་སེར་པོས་དཀྲིས་ལ་ལན་བརྒྱ་རྩ་བརྒྱད་དུ་བྱིན་གྱིས་བརླབས་ཤིང་མར་དང་སྦྲང་རྩིས་གང་བའི་བུམ་པར་
བཅུག་ལ་སྔགས་བཟླས་ཏེ། འབྱོར་པ་ཇི་ལྟ་བས་མཆོད་པ་བྱས་ལ། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་བྷྲཱུཾ་བཽ་ཥཊ་ལྷ་སྦྱིན་གྱི་པུཥྚིཾ་ཀུ་རུ་བཽ་ཥཊ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་བཟླས་སོ། །རྒྱས་པ་འཕེལ་བའི་མཚན་ཉིད་དུ་གྱུར་པ་དེ་སྲིད་དུའོ། །སྔགས་བཟླས་པའི་མཇུག་ཐོགས་སུ་ཞོ་ཟན་གྱི་སྦྱིན་སྲེག་བྱའོ། །
དེ་ནས་དབང་དུ་བྱ་བར་འདོད་ན་སྔར་བཞིན་རྒྱ་སྐྱེགས་ཀྱི་ཁུ་བས་འཁོར་ལོ་གཉིས་དང་ཡི་གེ་བཅུ་གཉིས་བྲིས་ལ་དབུས་སུ་ཀུ་རུ་ཀུལླེའི་ས་བོན་ཡི་གེ་ཧྲཱིཿའོ། །དེའི་དབུས་སུ་ཡི་གེ་ཧོཿགཉིས་ཁ་སྦྱར་བའི་བསྒྲུབ་བྱའི་མིང་བྲིའོ། །ཕྱི་རོལ་ཏུ་གྲུ་གསུམ་གྱི་རི་མོ་གསུམ་གྱིས་བསྐོར་རོ། །དེ་ནས་སྐུད་པ་དམར་
པོས་དཀྲིས་ལ་བརྒྱ་རྩ་བརྒྱད་ཀྱིས་བྱིན་གྱིས་བརླབས་པའི་སྦྲང་རྩི་དང་རྒྱ་སྐྱེགས་དང་སྐེ་ཚེས་གང་བའི་ཐོད་པའམ་ཁམ་ཕོར་ཁ་སྦྱར་དུ་བཅུག་ལ་ཅི་འབྱོར་པའི་མཆོད་པ་བྱ་སྟེ་སྔགས་བཟླས་སོ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧྲཱིཿཧོཿལྷ་སྦྱིན་པ་ཤ་མ་ན་ཡ་ཧོ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་པ་དབང་དུ་གྱུར་པ་
ཇི་སྲིད་དུ་བཟླས་སོ། །སྔགས་བཟླས་པའི་མཐར་ནི་ལན་ཚྭ་དང་བཅས་པའི་མེ་ཏོག་དམར་པོས་སྦྱིན་སྲེག་བྱའོ། །དེ་ནས་གོང་བུས་དགུག་པར་འདོད་ན་དེའི་ཚེ་དུར་ཁྲོད་ཀྱི་སོལ་བ་དང་ས་ལས་བྱས་པའི་གཟུགས་བརྙན་གྱི་སྙིང་གའི་དབུས་སུ་བཅུག་ལ་དེར་རྐང་པ་གཡོན་པའི་མཐེ་བོང་བཞག་ལ་

བཟླས་ཏེ། དེ་ཉིད་བསྒྲུབ་བྱའི་གོང་བུར་བསྒོམས་ནས་ཇི་སྲིད་གོང་བུ་ཁུགས་པ་དེ་སྲིད་དུ་བཟླས་སོ། །སྔགས་ལ་བ་ཤ་མ་ནའི་ཤུལ་དུ་ཨཱ་ཀཪྵ་ཡ་དང་ཧོཿའི་ཤུལ་དུ་ཛཿ། ཞེས་པ་བྱེ་བྲག་གོ། །དེ་ནས་རྐང་པ་དགུག་པར་འདོད་ན་བསྒྲུབ་བྱའི་སྙིང་གར་ཡི་གེ་ཧྲཱིཿདམར་པོ་དང་། རྟགས་ཀྱི་ལྟེ་བའམ་
སྐྱེ་གནས་ཀྱི་ལྟེ་བར་བོའི་རྣམ་པ་དཀར་པོ་བསྒོམས་ལ་ཇི་སྲིད་རྐང་པ་ཁུགས་པ་དེ་སྲིད་བཟླས་སོ། །སྔགས་བཟླས་པའི་མཐར་སྐྱེ་ཚེའི་སྦྱིན་སྲེག་བྱའོ། །དེ་ནས་སྐྲོད་པར་འདོད་ན་སྔར་བཞིན་འཁོར་ལོ་གཉིས་དང་ཡི་གེ་བཅུ་གཉིས་བྲིས་ལ་དབུས་སུ་ཡི་གེ་ཡཾ་རླུང་གི་ས་བོན་ནོ། །དེའི་དབུས་སུ་
དགྲ་བོའི་མིང་ཡཿཡིག་གཉིས་ཁ་སྦྱར་བ་ཅན་ཏེ་ཕྱི་རོལ་དུ་ཟླ་བ་ཕྱེད་པའི་རྣམ་པའི་རི་མོ་གསུམ་གྱིས་བསྐོར་རོ། །སྲེག་པའམ་བྱ་རོག་གི་ཁྲག་གིས་སོ། །དེ་ནས་སྐུད་པ་ལྗང་གུས་དཀྲིས་ལ་བརྒྱ་རྩ་བརྒྱད་མངོན་པར་བསྔགས་པར་བྱས་ལ་ཆུ་བོའི་རྒྱུན་ལ་བསྐུར་རོ། །ཡང་ན་བྱ་རོག་གི་སྐེ་ལ་བཏགས་
ལ་ཡུལ་གཞན་དུ་ཁྲིད་ལ་དོར་ཏེ་དེ་ནས་ཇི་སྲིད་བསྐྲད་པར་གྱུར་པ་དེ་སྲིད་བཟླས་སོ། །ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཙ་ལ་ཡ་ཙ་ལ་ཡ་སཱ་དཱ་ཙ་ལ་ན་ཡ་ལྷ་སྦྱིན་ཨུཙྪ་ཊ་ཡ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། བཟླས་པའི་མཐར་བྱ་རོག་གི་ཁྲག་གིས་སྦྱིན་སྲེག་བྱའོ། །བརྒྱ་རྩ་བརྒྱད་ཀྱིས་བྱིན་གྱིས་བརླབས་པའི་ཁྭ་ཏའི་སྒྲོ་
དགྲའི་ཁྱིམ་དུ་སྦའོ། །དེ་ནས་དགྲའི་སྲོག་ཉམས་པར་འདོད་ན་སྔར་བཞིན་འཁོར་ལོ་གཉིས་དང་ཡི་གེ་བཅུ་གཉིས་བྲིས་ལ་དཀྱིལ་དུ་མེའི་ས་བོན་རཾ་བྲིའོ། །དེའི་དབུས་སུ་དགྲའི་མིང་གྷུ་ཡིག་དང་སྤེལ་བའོ། །དེའི་ཕྱི་རོལ་དུ་རི་མོ་གྲུ་གསུམ་པ་གསུམ་གྱིས་བསྐོར་རོ། །ཚ་བ་གསུམ་དང་དུག་དང་
སྐྱེ་ཚེ་ལ་སོགས་པས་སོ། །སྐུད་པ་ནག་པོས་དཀྲིས་ལ་དུར་ཁྲོད་ཀྱི་སོལ་བ་དང་ས་ལས་བྱས་པའི་གཟུགས་བརྙན་གྱི་སྙིང་གར་བཅུག་ལ་ལྕགས་ཀྱི་ཕུར་པས་སྒོ་བཅུ་དང་སྙིང་གར་བཏབ་ལ་སྐམ་པོར་བྱ་སྟེ་དུག་དང་སྐྱེ་ཚེ་ལ་སོགས་པས་བྱུགས་ལ་ཚ་བའི་ཤིང་གི་མེ་དུ་བ་ཅན་ལ་སྐམ་པས་བཟུང་
ལ་སྔགས་ཟློས་ཤིང་ཇི་སྲིད་སྲོག་དང་བྲལ་བ་དེ་སྲིད་བསྲོ་བར་བྱའོ། །བཟླས་པའི་མཐར་ནི་དགྲ་བོའི་སྐྲ་དང་། བཤང་བ་དང་། རྐང་པའི་རྡུལ་དང་། སེན་མོ་དོར་བ་དང་། ཟོས་པའི་ལྷག་མ་དང་། མེ་ཏོག་དང་། གོས་དང་། དྲིལ་ཕྱིས་ཀྱི་དྲི་མ་ལ་སོགས་པ་ཇི་ལྟར་རྙེད་པའི་སྦྱིན་སྲེག་

བྱའོ། །མེད་ན་ཕག་ཤ་དགྲ་བོའི་ཤ་བཞིན་དུ་བསྒོམས་ལ་བསྲེག་གོ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་རཾ་གྷུཿལྷ་སྦྱིན་མཱ་ར་ཡ་གྷུཿཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་བཟླས་སོ། །དེ་ནས་རེངས་པར་འདོད་ན་སྔར་བཞིན་འཁོར་ལོ་གཉིས་དང་ཡི་གེ་བཅུ་གཉིས་བྲིས་པའི་ས་བོན་ཡི་གེ་ལཾ་ཡིག་དང་བཾ་
གཉིས་ཀྱིས་སྤེལ་བའི་བསྒྲུབ་བྱའི་མིང་བྲི་བར་བྱའོ། །གྲུ་བཞི་པའི་རེ་ཁཱ་གསུམ་གྱིས་བསྐོར་རོ། །ཡུང་བའི་ཁུ་བས་སོ། །དེ་ནས་སྐུད་པ་སེར་པོས་དཀྲིས་ལ་མྱོས་བྱེད་ཀྱི་གཟུགས་བརྙན་གྱི་ནང་དུ་བྱས་ལ་ཇི་ལྟར་རྙེད་པའི་ཚེར་མས་ཡན་ལག་ཐམས་ཅད་ཕུག་ལ། བརྒྱ་རྩ་བརྒྱད་ཀྱིས་བྱིན་གྱིས་
བརླབས་པའི་ཡུང་བའི་ཆུས་གང་བའི་བུམ་པར་བཅུག་ལ་རྒྱས་བཏབ་སྟེ་སྔགས་བཟླས་སོ། །ཇི་སྲིད་རེངས་པར་གྱུར་པ་དེ་སྲིད་སྔགས་བཟླས་སོ། །བཟླས་པའི་མཐར་ནི་ཡུང་བའི་སྦྱིན་སྲེག་བྱའོ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ལཾ་བཾ་ལྷ་སྦྱིན་སྟྭཾ་བྷ་ཡ་ལཾ་བཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་བཟླས་སོ། །ངག་
རེངས་པར་བྱེད་ན་བཱ་ཙཾ་སྟཾ་བྷ་ཡ་ཞེས་པ་སྤེལ་ལོ། །དེ་ནས་མཁའ་འགྲོ་མ་དང་ཚངས་པ་སྲིན་པོ་ལ་སོགས་པ་ལས་གྲོལ་བར་འདོད་ན་དེའི་ཚེ་སྔར་བཤད་པའི་དབྱུག་པའི་ཕྱག་རྒྱས་ལུས་ངག་ཡིད་གསུམ་གྱི་གནས་སུ་བརྡེག་ཅིང་སྔགས་བཟླས་ན་མཁའ་འགྲོ་མ་ལ་སོགས་པ་ལས་གྲོལ་བར་འགྱུར་
རོ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཆེ་གེ་མོའི་ལུས་ཀྱི་ཌཱ་ཀི་ནི་ནཱཾ་བྲཧྨ་རཱཀྵ་སཾ་བཱ་ཨ་པ་སཱ་ར་ཡ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། བརྡེག་པའི་མཐའ་ནི་གཏོར་མ་སྦྱིན་ལ་ལུས་ལ་གཤིན་རྗེ་མཐར་བྱེད་ཡིད་ཀྱིས་སྦྱར་བར་བྱའོ། །དེ་ལྟར་རིམས་དང་སྡིག་པའི་ནད་དང་གདོན་དང་སྦྲུལ་དང་མཆེ་བ་དང་དུག་དང་གཟའ་དང་
འབྲས་ལ་སོགས་པ་ལས་གྲོལ་བར་བྱ་སྟེ། ཇི་ལྟར་རྗེས་སུ་མཐུན་པའི་སྔགས་ལ་སྤེལ་ཚིག་རེག་པར་བྱའོ། །ཐམས་ཅད་དུ་འཁྲུལ་འཁོར་བཤིག་ན་ཞི་བར་འགྱུར་རོ། །བདག་སྙན་ངག་མཁན་ནོ་ཞེས་ང་རྒྱལ་དུ་བསྒོམས་ནས་བཟླས་ན་སྙན་ངག་མཁན་དུ་འགྱུར་རོ། །དེ་ནས་ཆར་མ་འབབ་ན་
གཏོར་མ་ཆེན་པོ་བྱིན་པས་ཉེ་བར་འཚེ་བ་ཐམས་ཅད་ཞི་བར་འགྱུར་རོ། །བདུད་རྩི་མྱང་བའི་ཆོ་གས་གཏོར་མ་བསྒྲུབས་ལ་མདུན་དུ་གཤིན་རྗེ་གཤེད་དམར་པོའི་འཁོར་ལོ་སྐད་ཅིག་གིས་ཁམས་གསུམ་གྱི་སེམས་ཅན་ཡོངས་སུ་གྱུར་པར་བསམས་ལ་དྲིལ་བུ་དཀྲོལ་ཞིང་སྔགས་བརྗོད་དོ། །ཨོཾ་

རཀྟ་མུ་ཀུ་ཊཱ་ཡ། རཀྟ་ཛཱ་ཊཱ་ཡ། རཀྟ་མུ་ཁཱ་ཡ། རཀྟ་ཤཱ་རི་རཱ་ཡ། རཀྟ་བྷུ་ཛཱ་ཡ། ས་རཀྟ་མུཎྜ་མཱ་ལཱ་བྷ་ར་ཎཱ་ཡ། རཀྟ་ར་ཐ་ས་མཱ་རཱུ་དྷཱ་ཡ། རཀྟ་པདྨ་ཨཱ་ས་ནཱ་ཡ། རཀྟ་ཨཱ་བྷ་ར་ཎ་བྷཱུ་ཥ་ཎཱ་ཡ། ཨི་དཾ་བ་ལིཾ་གྲྀཧྞ་གྲྀཧྞ་མ་མ་བི་བྷྣི་ཧ་ར་ཧ་ར་ཙ་ཏུརྨཱ་རཱ་ན་ནི་བཱ་ར་ཡ་ནི་བཱ་ར་ཡ་བྷྲཱ་མ་ཡ་བྷྲཱ་མ་ཡ།
ཙྪིནྡ་ཙྪིནྡ། བྷིནྡ་བྷིནྡ། ནཱ་ཤ་ཡ་ནཱ་ཤ་ཡ། ཤོ་ཥ་ཡ་ཤོ་ཥ་ཡ། ཙྪེ་ད་ཙྪེ་ད། བྷེ་ད་བྷེ་ད། ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཨོཾ་མོ་ཧ་ཡ་མཱ་ར་ཡ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཨོཾ་པི་ཤུ་ནཱ་ཡ་མཱ་ར་ཡ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཨོཾ་རཱ་གཱ་ཡ་མཱ་ར་ཡ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཨོཾ་ཨིཪྵྱཱ་ཡ་མཱ་ར་ཡ་ཧཱུཾ་ཧཱུཾ་ཕཊ་ཕཊ་སྭཱ་ཧཱ།
ཨོཾ་མརྨྨཱ་མརྨྨཱ་བི་ག་ཏེ་ཧཱུཾ་བཛྲ་ཙརྩི་ཀེ་ཧ་ར་ཧ་ར་བུཀྐཾ་མཱ་ར་ཡ་མཱ་ར་ཡ་བིགྷྣཱཾ་ཛཿ། ཨོཾ་གྷོ་ཎེ་སུ་གྷོ་ཎེ་བཛྲ་མཱ་མ་ཀཱི་བྷཱ་ར་བྷཱ་ར་སམྦྷཱ་ར་སམྦྷཱ་ར་ཧ་ར་ཧ་ར་བིགྷྣཱཾ་ཛཿ། ཨོཾ་མརྨྨེ་མརྨྨ་ཀྵོ་བྷ་ནི་བཛྲ་ས་ར་སྭ་སྟི་ད་ར་ད་ར། ཐ་ར་ཐ་ར། ཛ་ར་ཀམྤ་ཐུ་ན་ཐུ་ན་ཧཱུཾ་བིགྷྣཱཾ་ཛཿ། ཨོཾ་གཾ་བྷཱི་རེ་བཛྲ་ཀཱརྟི་ཀེ་གྷཿགྷཿཧཱུཾ་རཀྟ་ཤྲོ་ཎི་ཏ་
པྲི་ཡེ་གཽ་རྱཻ་བིགྷྣཱཾ་ཛཿ། ཨོཾ་ཨིནྡྲཱ་ཡ་ཧྲཱིཿ། ཡ་མཱ་ཡ་ཥྚྲྀཿ། བ་རུ་ཎཱ་ཡ་བི། ཀུ་བེ་རཱ་ཡ་ཀྲྀ། ཨི་ཤ་ནཱ་ཡ་ཏ། ཨགྣེ་ཡེ་ཨཱ། ནཻ་རྀ་ཏ་ཡེ་ན། བཱ་ཡ་བེ་ན། ཙནྡྲཱ་ཡ་ཧཱུཾ། ཨརྐཱ་ཡ་ཧཱུཾ། བྲཧྨ་ཎེ་ཕཊ། བ་སུ་དྷཱ་ར་ཡེ་ཕཊ། བེ་མ་ཙི་ཏྲ་ཎེ་སྭཱ། སརྦ་བྷཱུ་ཏེ་བྷྱོ་ཧཱ། ཧཱ་ཧཱ་ཧཱ། ཧཱི་ཧཱི་ཧཱི། ཧཱུཾ་ཧཱུཾ་ཧཱུཾ།
ཕེཾ་ཕེཾ་ཕེཾ་སྭཱ་ཧཱ། ཞེས་སོ། །དེ་ནས་མེ་ཏོག་ལ་སོགས་པས་ཡང་དག་པར་མཆོད་ལ་སོ་རྩི་ལ་སོགས་པ་ཡང་དབུལ་ཏེ། བཟོད་པར་གསོལ་ཞིང་གཤེགས་སུ་གསོལ་ཏེ་ཨཿཡིག་གསུམ་དང་སེ་གོལ་གསུམ་གྱིས་གཤེགས་སུ་གསོལ་ནས་ཤར་ལ་སོགས་པའི་ཕྱོགས་ཐམས་ཅད་དུ་དོར་རོ། །
ཇི་སྲིད་འདོད་པའི་དོན་གྲུབ་པ་དེ་སྲིད་དུ་བྱའོ། །མེད་ན་ཆུ་དང་བསྲེས་པའི་བཟའ་བའི་སྣོད་ལ་མངོན་པར་བསྔགས་ལ་སྦྱིན་ནོ། །དེ་ལྟར་ལས་གཞན་སྟོང་ཕྲག་ལ་ཡང་བཅོམ་ལྡན་འདས་སྦྱར་བར་བྱའོ། །བསྒོམ་པའི་བདག་ཉིད་ཅན་གྱིས་ཐམས་ཅད་འགྲུབ་པར་ཐེ་ཚོམ་མེད་དོ། །འདི་ནི་
དངོས་གྲུབ་ཕྲན་ཚེགས་ཀྱི་ཆོ་གའོ། །དེ་ནས་བཅོམ་ལྡན་འདས་མཆོད་པར་འདོད་ན། དེའི་ཚེ་ཨོཾ་བཛྲ་སཏྭ་སརྦ་བིགྷྣཱཾ་ཨུ་ཙ་ཏ་ཡ་ཧཱུཾ་ཕཊ། ཅེས་པ་འདིས་ཙནྡན་དམར་པོའམ་སིནྡྷུ་ར་བདུད་རྩི་ལྔ་དང་བསྲེས་པའམ་འབའ་ཞིག་པས་དཀྱིལ་འཁོར་གྲུ་བཞི་པ་ཉེ་བར་བྱུགས་ལ། ཨོཾ་ཨཱཿ

བཛྲ་རེ་ཁེ་ཧཱུཾ་དཀྱིལ་དུ་ཟླུམ་པོ་བྱས་ཏེ་ཨོཾ་སུ་རེ་ཁེ་སརྦ་ཏ་ཐཱ་ག་ཏ་ཨ་དྷིཥྛིནྟུ་སྭཱ་ཧཱ། འདིས་མེ་ཏོག་བཞག་ནས་ལག་པ་བཀྲུས་ནས་སྐད་ཅིག་གིས་རང་གི་ལུས་ལས་འཐོན་པའི་དཀྱིལ་འཁོར་གྱི་འཁོར་ལོ་མཎྜལ་དུ་བཞུགས་པར་བསྒོམས་ལ་མཆོད་པར་བྱ་སྟེ། ཨོཾ་རཀྟ་ཡ་མཱ་ར་ཡེ་
བཛྲ་བེ་ཏཱ་ལ་མ་ཨཱ་ལིཾ་གི་ཏ་ཀནྡྷ་རཱ་ཡ་ཨཱཿཧཱུཾ་ཕཊ་སྭཱ་ཧཱ། དབུས་སུའོ། །ཨོཾ་མོ་ཧཱ་ཡ་མཱ་ར་ཡེ་བཛྲ་ཙརྩི་ཀ་ཨཱ་ལིཾ་གི་ཏ་ཀནྡྷ་རཱ་ཡ་ཨཱཿཧཱུཾ་ཕཊ་སྭཱ་ཧཱ། ཤར་དུའོ། །ཨོཾ་པི་ཤུ་ནཱ་ཡ་མཱ་ར་ཡེ་བཛྲ་བཱ་རཱ་ཧཱི་ཨ་ལིཾ་གི་ཏ་ཀནྡྷ་རཱ་ཡ་ཨཱཿཧཱུཾ་ཕཊ་སྭཱ་ཧཱ། ལྷོ་ཕྱོགས་སུའོ། །ཨོཾ་རཱ་ག་ཡ་མཱ་ར་ཡེ་བཛྲ་ས་ར་སྭ་སྟི་ཨ་ལིཾ་གི་
ཏ་ཀནྡྷ་རཱ་ཡ་ཨཱཿཧཱུཾ་ཕཊ་སྭཱ་ཧཱ། ནུབ་ཏུའོ། །ཨོཾ་ཨིཪྵྱཱ་ཡ་མཱ་ར་ཡེ་བཛྲ་གཽ་རཱི་ཨཱ་ལིཾ་གི་ཏ་ཀནྡྷ་རཱ་ཡ་ཨཱཿཧཱུཾ་ཕཊ་སྭཱ་ཧཱ། བྱང་དུའོ། །ཨོཾ་རཱ་ཛ་པཊྚ་གྷ་ཊཱ་ཡ་ཙ་ཏུཿས་མ་པཱུརྞཱ་ཡ་ཨཱཿཧཱུཾ་ཕཊ་སྭཱ་ཧཱ། མེ་མཚམས་སུའོ། །ཨོཾ་སཱུ་བརྞ་གྷ་ཊཱ་ཡ་ཀསྪུ་རི་ཀཱ་པཱུ་རྞཱ་ཡ་ཨཱཿཧཱུཾ་ཕཊ་སྭཱ་ཧཱ། བདེན་བྲལ་དུའོ། །ཨོཾ་
པྲ་བཱ་ལ་གྷ་ཊཱ་ཡ་སིཧླ་ཀ་པཱུ་རྞཱ་ཡ་ཨཱཿཧཱུཾ་ཕཊ་སྭཱ་ཧཱ། རླུང་དུའོ། །ཨོཾ་རཱ་ཛ་ཏ་གྷ་ཊཱ་ཡ་ཀརྦཱུ་ར་པཱུ་རྞཱ་ཡ་ཨཱཿཧཱུཾ་ཕཊ་སྭཱ་ཧཱ། དབང་ལྡན་དུའོ། །སྔགས་འདི་ཉིད་ཀྱིས་ཇི་ལྟ་བ་བཞིན་མངོན་པར་བསྔགས་པའི་མཆོད་རྫས་བཅོམ་ལྡན་འདས་ལ་དབུལ་ལོ། །བསྟོད་པ་བསྡུས་པ་ཡང་བྱ་སྟེ། ཕྱག་བཙལ་ནས་
བཟླས་པ་བྱས་ནས་གཤེགས་སོ། །ཨོཾ་མུཿསྭཱ་ཧཱ། ཞེས་པ་འདིས་རང་ཉིད་ཀྱི་ལུས་ཁོ་ན་ལ་གཞུག་གོ། །དེ་ལ་འདི་ནི་བསྟོད་པའོ། །མ་ཧེ་དབང་ཕྱུག་ཆེན་པོ་ལྷ་བདག་པོ། །གཉུག་མར་གསུངས་པའི་དངོས་གྲུབ་མངའ་བདག་པོ། །སྡིག་པ་འཇིགས་རུང་བགེགས་རྣམས་འཇོམས་བདག་པོ། །
གཤིན་རྗེའི་འཁྲུལ་འཁོར་གསང་སྔགས་མཆོག་བདག་པོ། །དབྱུག་པ་དཀར་བསྣམས་དབྱུག་དཀར་བསྣམས་པ་པོ། །མི་ཐོད་ཕྱག་ན་མི་ཐོད་འཛིན་པ་པོ། །ཟུང་འཇུག་བདེ་ལྡན་ཟུང་འཇུག་བདེ་བ་པོ། །གཤིན་རྗེ་གསོད་མཛད་གཤིན་རྗེ་གསོད་པ་པོ། །མི་ཐོད་ཀླུ་ཡིས་བརྒྱན་བྱས་
འཇིགས་པ་པོ། །བཅོས་མའི་སྐུ་ལུས་སྤྲུལ་གཞི་མཛད་པ་པོ། །མཐར་བདེའི་གོ་འཕང་གནས་གཟུགས་འགོད་པ་པོ། །བརྟན་སྟེར་བློ་སྟེ་ཚེ་རིང་སྟེར་པ་པོ། །དེ་བཞིན་ཡིད་མཛད་ཕ་རོལ་ཕྱིན་པ་པོ། །ལྷན་སྐྱེས་བདེ་ཆེན་གཅིག་ཐུགས་དགྱེས་པ་པོ། །ཐུགས་རྗེ་རོ་གཅིག་བསོད་ནམས་

མཛད་པ་པོ། །ཐུགས་གསུང་བསྟོད་དགེའི་ལས་ཀྱི་ལམ་པ་པོ། །ཞབས་ལ་ལྷ་མོ་ཅོད་ཅན་བཏུད་པ་པོ། །བགེགས་ཚོགས་མཐའ་དག་གོ་འཕང་བཅོམ་པ་པོ། །ནོར་སྟེར་སྐུ་མདོག་ཉི་ལྟར་དམར་བ་པོ། །བདེ་ཆེན་གཤིན་རྗེ་གཤེད་ལ་ཕྱག་འཚལ་ལོ། །དེ་ནས་རྣམ་པར་དག་པ་བསྒོམ་པར་འདོད་
ན། དེའི་ཚེ་བསམ་གཏན་དང་སྔགས་བཟླས་པས་སྐྱོན་རྣམ་པར་དག་པ་བསྒོམ་པར་བྱའོ། །བགེགས་རྣམས་ཞི་ཕྱིར་བསྲུང་བ་བྱས། །དེ་ཉིད་རྒྱུར་ནི་བྱམས་ལ་སོགས། །སྨོན་ལམ་འབྲས་བུ་རྙེད་པའི་ཕྱིར། །མཆོད་པ་བསོད་ནམས་འཕེལ་བྱའི་ཕྱིར། །ལྟ་བ་གཞོམ་ཕྱིར་སྟོང་པ་ཉིད། །རང་
ལུས་མཆོག་ཏུ་ལྟ་བ་ཡི། །སངས་རྒྱས་ཞིང་ནི་རྣམ་དག་ཕྱིར། །རྒྱལ་བ་རྣམས་ཀྱིས་དཀྱིལ་འཁོར་གསུངས། །གྲུ་བཞི་བདེན་བཞི་བསྒྲུབ་ཕྱིར་སྤྲུལ། །བདུད་བཞི་བཟློག་པའི་དོན་དུ་ན། །སྒོ་བཞི་པོ་ནི་ཀུན་ནས་གསུངས། །ཟུར་བཞི་དག་ནི་ཚངས་པ་ཡི། །གནས་བཞི་རྫོགས་པར་བྱ་
བའི་ཕྱིར། །སྒྱུ་འཕྲུལ་སྣ་ཚོགས་བསྒྲུབ་དོན་དུ། །ཀ་བ་བརྒྱད་ནི་གསལ་བར་བཤད། །ཀུན་རྟོག་ཐམས་ཅད་གཞོམ་པའི་ཕྱིར། །དྲ་བ་དྲ་ཕྱེད་རིན་པོ་ཆེ། །བསྡུ་བའི་དངོས་པོ་བཞི་བསྒྲུབ་ཕྱིར། །རྟ་བབས་བཞི་པོ་ཁོ་ན་སྟེ། །ཕུན་སུམ་ཚོགས་པའི་རྒྱུ་ཡི་ཕྱིར། །ས་བོན་ལ་སོགས་
ཞུ་བའི་ཚུལ། །བྱམས་སོགས་འབྲས་བུ་ལྟ་བའི་ཕྱིར། །ཙརྩི་ཀ་ལ་སོགས་པས་བསྐུལ། །གཤིན་རྗེའི་དགྲ་རུ་རབ་གྲགས་ཕྱིར། །གཤིན་རྗེ་གཤེད་གཟུགས་བསྒོམ་པའོ། །ཆགས་ཅན་སེམས་ཅན་གདུལ་བྱའི་ཕྱིར། །སྐུ་ཡི་ཁ་དོག་དམར་པོའོ། །དུས་གསུམ་ཡེ་ཤེས་གྲུབ་བྱའི་
ཕྱིར། །སྤྱད་གསུམ་པར་ནི་བརྟགས་པའོ། །ཕྱག་གཉིས་གཉུག་མའི་ངོ་བོའི་ཕྱིར། །ཤེས་རབ་དེ་ཉིད་རྒྱུ་ཡི་ཕྱིར། །དབྱུག་པས་གདུག་པ་གདུལ་བའི་ཕྱིར། །བསྲུང་བའི་དོན་དུ་ཐོད་པ་ཕྱག །གཡོན་བརྐྱང་ཤིན་ཏུ་ཆོམ་པའི་ཕྱིར། །ཀླུ་ནི་ཀླུ་རྣམས་འདུལ་བའི་ཕྱིར། །གདུག་པ་
བསྡིགས་ཕྱིར་མགོ་བོའི་ཕྲེང་། །མ་ཧེ་གདུལ་དཀའ་འདུལ་བྱེད་ཕྱིར། །ཁྲོ་བོ་ཤིན་ཏུ་ཆགས་སྦྱོར་ཕྱིར། །སྦོམ་པ་གང་བ་ཐོབ་པའི་ཕྱིར། །སྟག་ལྤགས་ལ་སོགས་ཁྲོ་བོའི་ཕྱིར། །སྐྲ་གྲོལ་བ་ནི་གྲོལ་བའི་ཕྱིར། །སྙིང་རྗེའི་ངོ་བོའི་རྟོགས་པའི་ཕྱིར། །སྐྱེས་པའི་གཟུགས་ནི་རྟག་

ཏུ་བཤད། །ཤེས་རབ་གྲི་གུག་དངོས་པོ་དང་། །དངོས་མེད་ལྟ་བ་བཟློག་པའི་ཕྱིར། །ལྷ་རྫས་བདུད་རྩི་མྱང་བའི་ཕྱིར། །རོ་དང་ལྡན་ཕྱིར་ཐོད་པའོ། །སྟོང་ཉིད་ངོ་བོ་རྟོགས་བྱའི་ཕྱིར། །བུད་མེད་གཟུགས་སུ་ཡང་དག་བསྟན། །སྟོང་ཉིད་སྙིང་རྗེའི་སྦྱོར་བ་ལ། །
གཉིས་ཀྱིས་སྦྱོར་བ་བཤད་པའོ། །དབང་ཕྱུག་བརྒྱད་ཀྱི་ཁྱབ་བདག་ཉིད། །ཕྱིར་ནི་དཀྱིལ་འཁོར་པ་རྣམས་བསྟན། །དེ་ཕྱིར་རྡོ་རྗེ་ཐུགས་བསྒྲུབ་ཕྱིར། །འདི་ལ་རྣལ་འབྱོར་གཞན་ཡོད་མིན། །ཞེས་པའི་རྣམ་པར་དག་པ་བསམ་པར་བྱའོ། །བཟང་པོའི་བློ་ཡིས་འདུད་ཀྱི་བརྩོན་པས་
སྤྲུལ་པའི་བརྗོད་པ་རྒྱ་ཆེན་ནུས་གྱུར་ཅིག །དེ་ཉིད་དེ་ཉིད་རིགས་པས་ངེས་བྱས་འདི་ནི་སེམས་ཅན་དོན་རྣམས་བསྒྲུབ་བྱའི་ཕྱིར། །དཔལ་ལྡན་གཤིན་རྗེའི་དགྲ་ཡིས་རབ་བསྒྲགས་རྒྱུད་ཆེན་སྣ་ཚོགས་བླ་མ་དམ་པ་ཡི། །ཞལ་ལས་རྟོགས་ནས་ཐེ་ཚོམ་མེད་པའི་ཡིད་ཀྱིས་བསམ་པ་རྣམ་པར་
དག་པས་བྱས། །དད་པ་མེད་པར་འབྲས་བུ་མི་འཐོབ་ཉིད། །དེས་ན་དད་པ་ཉམས་པ་ཉིད་མི་བྱ། །བློ་གྲོས་བཟང་པོ་མཁས་པས་སྒྲུབ་ཐབས་མཆོག །དག་བྱས་གཤིན་རྗེ་གཤེད་དམར་སྐུར་གྱུར་ཅིག །གཤིན་རྗེ་གཤེད་དམར་སྒྲུབ་པའི་ཐབས། །བྱས་ལ་བསོད་ནམས་གང་
བསགས་པ། །དེ་ཡིས་གཤིན་རྗེ་གཤེད་ཉིད་དེའི། །རྣལ་འབྱོར་མཆོག་ལ་བརྩོན་པར་ཤོག །རང་བྱིན་གྱིས་བརླབ་པའི་རིམ་པ་མན་ངག་དང་བཅས་པ་གཤིན་རྗེ་གཤེད་དམར་པོའི་མངོན་པར་རྟོགས་པ་རྫོགས་སོ།། །།སློབ་དཔོན་ཆེན་པོ་མཁས་ཤིང་དངོས་གྲུབ་བརྙེས་པ་བློ་གྲོས་
བཟང་པོས་མཛད་པ། །པཎྜི་ཏ་ཆེན་པོ་བླ་མ་རྗེ་བཙུན་ཉི་མའི་དབང་པོའི་འོད་ཟེར་གྱི་ཞལ་སྔ་ནས་གུས་པས་མཉན་ནས་ཆག་ལོ་ཙཱ་བ་དགེ་སློང་ཆོས་རྗེ་དཔལ་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། ༄༅༅། །རྒྱ་གར་སྐད་དུ། རཀྟ་ཡ་མཱནྟ་ཀ་ཡནྟྲ་ཨུཏྟ་ཀ །
བོད་སྐད་དུ། གཤིན་རྗེ་གཤེད་དམར་པོའི་འཁོར་ལོའི་གསལ་བྱེད། བཅོམ་ལྡན་འདས་གཤིན་རྗེ་གཤེད་ལ་ཕྱག་འཚལ་ལོ། །འདི་རྣམས་བྲི་གཞི་ནི། ནྱ་གྲོ་དྷའི་ལོ་མ་ལ་སོགས་པ་ལ། དང་པོ་འཁོར་ལོ་རྩིབས་བརྒྱད་པ་ཟླུམ་པོ། །གཉིས་པ་ལ་རྩིབས་བཅུ་གཉིས་པ། གསུམ་པ་

ལ་རྩིབས་བཅུ་དྲུག་པ། རྩིབས་བརྒྱད་པའི་ཕྱོགས་སུ་ཡ་མ་ལ་སོགས་པའི་ཡི་གེ་དགོད། མཚམས་ཀྱི་འདབ་མ་ལ་བསྒྲུབ་བྱའི་མིང་གི་ཡི་གེ་དགོད། རྩིབས་བཅུ་དྲུག་པའི་རྩིབས་ཀྱི་བར་གྱི་རྩིབས་བརྒྱད་ལ། དེ་ལྟར་བསྒྲུབ་བྱ་ཟུར་རྣམས་སུའོ། །འཁོར་ལོ་དང་པོའི་དབུས་ཀྱི་ལྟེ་བར།
ཡ་ནི་རབ་ཏུ་འབྱུང་བར་འགྱུར། ཤར་དུ་མ། རྩིབས་བཅུ་གཉིས་པའི་ཤར་དུ་རཱ། གཉིས་པར་ཛ། གསུམ་པར་ས། བཞི་པར་དོ། །རྩིབས་བརྒྱད་པའི་ལྷོའི་རྩིབས་ལ་མེ། སླར་ཡང་རྩིབས་བཅུ་གཉིས་པའི་འདབ་མ་ལྔ་པ་ལ་རུ། དྲུག་པ་ལ་ཎ། བདུན་པ་ལ་ཡོ། སླར་ཡང་
རྩིབས་བརྒྱད་ཀྱི་ནུབ་ཀྱི་འདབ་མ་ལ་ད། ཡང་རྩིབས་བཅུ་གཉིས་པའི་རྩིབས་བརྒྱད་པ་ལ་ནི། དགུ་པ་ལ་རཱ། བཅུ་པ་ལ་ཡ། སླར་ཡང་རྩིབས་བརྒྱད་པའི་བྱང་གི་རྩིབས་ལ་ཀྵེ། ཡང་རྩིབས་བཅུ་གཉིས་པའི་བཅུ་གཅིག་པ་ལ་ཙྪ། བཅུ་གཉིས་པ་ལ་ནི། དེ་བཞིན་དུ་གསུངས་པ། ཡ་མ་
རཱ་ཛ་ས་དོ་མེ་ཡ། ཡ་མེ་ད་རུ་ཎ་ཡོ་ད་ཡ། ཡ་ད་ཡོ་ནི་ར་ཡ་ཀྵེ་ཡ། ཡཀྵེ་ཡཙྪ་ནི་རཱ་མ་ཡ། ཞེས་པ་རྩ་བའི་སྔགས་སོ། །ཡི་གེ་བཅུ་དྲུག་ནི་རྩིབས་བཅུ་དྲུག་ལའོ། །གཅིག་ནི་གཙོ་བོའི་སྟེ་འདི་ལྟར་དབུས་སུ་རབ་ཏུ་འབྱུང་བར་འགྱུར་རོ། །ཡ་མ་རཱ་ཛ་ས་དོ་མེ་རུ་ཎ་ཡོ། དེ་ནས་དབུས་ཀྱི་སྙིང་པོའི་
རྩིབས་ནས་འབྱུང་བར་འགྱུར་རོ། །ད་ནི་རཀྵ་ཡཙྪ། དེ་ནས་ནའི་མཐའ་ཅན་ནོ། །འཁོར་ལོ་རྩིབས་བརྒྱད་པ་དང་། རྩིབས་བཅུ་གཉིས་པའི་ངེས་པའོ། །དེ་ནས་རྩིབས་བཅུ་དྲུག་པའི་ངོས་བསྒྲུབ་བྱའི་མིང་གི་བར་བར་གྱི་འདབ་མ་ལ་སྔགས་འདི་རྣམས་བྲི་བར་བྱ་སྟེ། ཨོཾ་ཧྲཱིཿཥྚྲྀཿཝི་ཀྲྀ་
ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། སྡང་བ་རྣམ་པར་དབྱེ་བ་ལ་དབུས་སུ་གཙོ་བོ་ཡའོ། །གསད་པ་ལམ་། དབང་དུ་སྡུད་པ་ལ་རཱ་འབྱུང་བར་འགྱུར་རོ། །རྒྱས་པ་ལ་རཱ། མནན་པ་ལ་ཀྵེ། དགུག་པ་ལ་ད། རྨོངས་པ་ལ་མེ། སྟོབས་དང་ལྡན་པར་བྱ་བ་ལ་དོ། །ཞི་བ་ལ་ས། བསྐྲད་པ་ལ་ཙྪ།
ཆད་པ་བཏབ་པ་ལ་ཎ། སེམས་མནན་པ་ལ་རུ། རྒྱལ་བ་ལ་ཛ། རབ་ཏུ་གདུང་བ་ལ་ཡོ། དགྲ་བརླག་པར་བྱ་བ་ལ་ནི། འདིར་ལས་ཀྱི་རང་བཞིན་གྱིས་ཡི་གེ་དབུས་སུ་གཙོ་བོར་གྱུར་པ་དེའི་གནས་སུ་ཡ་བྲི་བར་བྱ། གཤིན་རྗེ་གཤེད་ཀྱི་འཁོར་ལོ་ལ་ངེས་པ་འདི་དང་པོའི་སངས་རྒྱས་

ནས་བཏུས་པའོ།། །།འདི་རྣམས་ཀྱི་ཞི་བ་ལ་སོགས་པའི་ལས་འཆད་པར་འགྱུར་བའི་འཁོར་ལོ་བྲི་བའི་ཆོ་ག་བརྗོད་དེ། དེ་ལ་ཞི་བ་དང་རྒྱས་པའི་འཁོར་ལོ་ནི་ནྱ་གྲོ་དྷའི་ལོ་མ་རླན་དང་མ་བྲལ་བའི་བྲི་གཞི་ལ། འབྲས་སཱ་ལུ་བཏགས་པའི་ཆུ་ཡིས། དཱུར་བའི་སྨྱུ་གུས་སོ། །
རྒྱས་པ་ལ་འཇག་རྒོད་དཀར་པོ་ལ་སོགས་པས་བྲིའོ། །དེ་བཞིན་དུ་གསད་པ་དང་བསྐྲད་པ་ལ་དུར་ཁྲོད་ཀྱི་རས་ལ་དུག་དང་ཁྲག་དང་སོལ་བས་མི་རུས་ཀྱི་སྨྱུ་གུས་སོ། །སྐྲོད་པ་ལ་བྱ་རོག་གི་སྒྲོ་རྐང་གིས་བྲིའོ། །དབང་དུ་བྱ་བ་དང་དགུག་པ་ལ་གྲོ་ག་ལ་གུར་གུམ་དང་གི་ཝང་གསེར་གྱི་ཐུར་
མས་སོ། །དགུག་པ་ལ་ཙནྡན་དམར་པོ་སེང་ལྡེང་གི་སྨྱུ་གུས་སོ། །རེངས་པ་དང་རྨོངས་པ་ནི་མཆོད་སྦྱིན་གྱི་ལོ་མ་ཡོངས་སུ་སྨིན་པ་ཁ་དོག་སེར་པོ་ལ་འབྲས་བུ་གསུམ་གྱི་ཁུ་བ་དང་བསྲེས་པའི་བ་བླའམ་ཡུང་བས་སོ། །ཀ་པེད་ཀྱི་སྨྱུ་གུ་དང་མཆོད་སྦྱིན་གྱི་སྨྱུ་གུས་རྨོངས་པར་བྱེད་པ་ལའོ། །
འདི་ནི་ངེས་པའོ།། །།འཁོར་ལོ་དེ་རྣམས་ཀྱི་རབ་ཏུ་གནས་པའི་ཆོ་ག་བཤད་དེ། ཞི་བ་དང་རྒྱས་པའི་འཁོར་ལོ་བྲིས་ལ། འཁོར་ལོ་ལ་སོགས་པ་སྐུད་པ་དཀར་པོས་བཅིང་བར་བྱ། ཇི་ལྟར་འཁོར་ལོ་མི་མཐོང་བའི་ཚུལ་ལོ། །དེ་བཞིན་ལས་ཀྱི་བྱེ་བྲག་གིས་སྐུད་པ་དཀར་པོ་དང་།
སེར་པོས་བཅིང་བར་བྱའོ། །དེ་ནས་ཞི་དང་རྒྱས་པ་ནི་མར་དང་འོ་མ་དང་སྦྲང་གིས་བཀང་བའི་རྫ་ཕོར་ཁ་སྦྱར་དུ་གཞག་པའོ། །གསད་པ་དང་བསྐྲད་པ་ལ་ཐོད་པ་ཁྲག་གིས་བཀང་བར་གཞག་པར་བྱ། དབང་དང་དགུག་པ་ལ་སྤྲ་ཚིལ་གྱིས་གཡོགས་ལ་གྱོ་མོ་ཁ་སྦྱར་དུ་མེས་གདུང་བར་
བྱའོ། །མནན་པ་དང་རྨོངས་པ་ལ་བ་བླའི་ཆུས་བཀང་བའི་སོ་ཕག་དབུས་སུ་གཞག་པར་བྱའོ། །གནས་གཙང་ཞིང་རླན་དང་བཅས་པའི་མཎྜལ་གྱི་སྟེང་དུ་ཞི་བ་དང་རྒྱས་པ་ལ་གཞག་པར་བྱའོ། །གསད་པ་དང་བསྐྲད་པ་ལ་དོང་གི་ནང་དུ་ཞོ་དང་མར་བླུགས་ལ་སྦ་བར་བྱའོ། །དགུག་པ་དང་དབང་
ལ་ཐབ་ཀྱི་འོག་ཏུའོ། །མནན་པ་དང་རྨོངས་པ་ནི་ས་སྐམ་པོར་སྦ་བར་བྱའོ། །དགེ་བ་དང་མི་དགེ་བའི་ལས་ཀྱི་འབྲས་བུ་འདི་ནི་སྔགས་པས་ངེས་པར་རིག་པར་བྱའོ། །འཁོར་ལོ་བྲིས་བ་དེ་རྣམས་ཀྱི་ཕྱི་རོལ་གྱི་འཁོར་ལོའི་ངེས་པ་གསུངས་ཏེ། དེ་ལ་ཞི་བའི་འཁོར་ལོའི་ཕྱི་རོལ་ཏུ་ཟླ་བའི་

དཀྱིལ་འཁོར་གྱིས་བསྐོར་ཞིང་རེ་ཁཱས་བསྐོར་བར་བྱའོ། །རྒྱས་པ་ལ་གླང་པོ་ཆེས་བསྐོར་བར་བྱ་སྟེ། ཇི་ལྟར་གླང་པོ་ཆེའི་ལྟོ་བར་འཁོར་ལོ་ཆུད་པའོ། །གསད་པ་ལ་ཡི་དགས་ཀྱི་ལུས་སུའོ། །བསྐྲད་པ་ལ་རྔ་མོའི་ལྟོ་བར་རོ། །དབང་དུ་བསྡུ་བ་ལ་རི་དགས་ཀྱི་ལྟོ་བར་རོ། །དགུག་པ་ལ་རྟའི་
ལྟོ་བར་རོ། །རྨོངས་པ་ལ་རའི་ལྟོ་བའམ་ལུག་གི་ལྟོ་བར་རོ། །མནན་པ་རུས་སྦལ་གྱི་ལྟོ་བར་རོ། །ཇི་ལྟར་འཁོར་ལོ་ལྟོ་བར་འགྱུར། །ཕྱི་རོལ་གཟུགས་ཀྱང་དེ་བཞིན་ནོ། །དེ་ནས་གོང་དུ་གསུངས་པའི་སྐུད་པས་དཀྲི་བར་བྱའོ། །རིག་པ་དེ་རྣམས་ཀྱི་དུས་སུ་ཐུན་གྱི་ངེས་པས་གསུངས་ཏེ།
ཐུན་དང་པོ་ཕྱེད་གཡོན་པ་ཆུའི་དཀྱིལ་འཁོར་ལ་ཁ་བྱང་དུ་བལྟས་ཏེ་ཞི་བའི་ལས་སྒྲུབ། ཐུན་ཕྱེད་ཀྱི་གཉིས་པ་ལ་དེ་བཞིན་དུ་རྒྱས་པའི་ལས་ལ་དབང་ལྡན་དུ་ཁ་བལྟས་ལའོ། །ཐུན་ཚོད་གཉིས་པའི་ཐུན་ཕྱེད་ལ་གཡས་པ་རླུང་གི་དཀྱིལ་འཁོར་རྒྱུ་བའི་ཚེ་ཁ་ཤར་དུ་བལྟས་ལ་གསད་པའི་ལས་
སྒྲུབ། ཐུན་ཚོད་གཉིས་པའི་ཕྱེད་ཀྱི་ཕྱི་མ་ལ་མེ་རུ་བལྟས་ཏེ་བསྐྲད་པའི་ལས་སྒྲུབ། ཐུན་ཚོད་གསུམ་པའི་ཕྱེད་ལ་གཡས་པ་མེའི་དཀྱིལ་འཁོར་གྱི་དུས་སུ་ཁ་ལྷོ་རུ་བལྟས་ཏེ་དབང་གི་ལས་སྒྲུབ། ཐུན་ཚོད་གསུམ་པའི་ཕྱེད་ཀྱི་ཕྱི་མ་ལ་བདེན་བྲལ་དུ་བལྟས་ཏེ་དགུག་པའི་ལས་སྒྲུབ། ཐུན་ཚོད་བཞི་
པ་ལ་གཡས་པ་སའི་དཀྱིལ་འཁོར་འབྱུང་བའི་དུས་སུ་ཁ་ནུབ་ཏུ་བལྟས་ཏེ་མནན་པའི་ལས་སྒྲུབ། ཐུན་ཚོད་བཞི་པའི་ཕྱེད་ལ་རླུང་དུ་བལྟས་ཏེ་རྨོངས་པའི་ལས་སྒྲུབ། དབང་དུ་བྱ་བ་དང་དགུག་པ་ནི་གྲོ་ག་ལ་གུར་གུམ་དང་གི་ཝང་ལ་གསེར་གྱི་སྨྱུ་གུས་བྲི། ཞི་བ་དང་རྒྱས་པ་ལ་ནྱ་གྲོ་དྷའི་ལོ་མ་ལ་
དཱུར་བས་འབྲས་ཀྱི་ཁུ་བས་བྲི། གསད་པ་དང་བསྐྲད་པ་ནི་དུར་ཁྲོད་ཀྱི་རས་ལ་སོགས་པ་དག་ལ་མིའི་རུས་པས་སོ། །མནན་པ་དང་རྨོངས་པ་དག་ལ་སོ་ཕག་གི་ཕྱེ་མ འམ་ཡུང་བས་སོ། །འཁོར་ལོའི་ཆོ་ག་ཉེ་བར་བསྡུས་པ་རྫོགས་སོ།། །།པཎྜི་ཏ་རྡོ་རྗེ་གདན་པ་ནི་སྐ་ལཾ་ཀའི་ཞལ་སྔ་ནས།
དཔྱལ་ལོ་ཙཱ་བ་དཔལ་ཆོས་ཀྱི་བཟང་པོས་བསྒྱུར་བའོ།། ༄༅༅། །རྒྱ་གར་སྐད་དུ། རཀྟ་ཡ་མཱ་རི་ཡནྟྲ་ཏཏྟྭ་ནི་རྡེ་ཤ་ཀ །བོད་སྐད་དུ། གཤིན་རྗེ་གཤེད་དམར་པོའི་འཁོར་ལོའི་དེ་ཁོ་ན་ཉིད་ཀྱི་གསལ་བྱེད། བཅོམ་ལྡན་འདས་དཔལ་གཤིན་རྗེ་གཤེད་ལ་ཕྱག་འཚལ་ལོ། །བུད་

མེད་རྣམས་ལ་སྲུང་བའི་ཕྱིར། ཞི་བ་ལ་གི་ཝང་གིས། རས་དཀར་པོའམ་གྲོ་གའམ་སྨྱུག་མའི་སྐོགས་པའམ། རས་ལེགས་པར་བཀྲུས་པ་ལ་འཁོར་ལོ་གཉིས་ཡང་དག་པར་བྲིས་ཏེ། དེར་ན་མའི་ནང་དུ་བཅུག་པའི་མིང་གི་ཡི་གེ་བྲིས་ལ། ནག་ནོག་ལ་སོགས་
པ་སྤངས་ཤིང་རྫ་ཕོར་ཁ་དོག་གཅིག་པ་ཁ་སྦྱར་དུ་མར་དང་སྦྲང་གི་ནང་དུ་བཅུག་སྟེ་སྐུད་པ་དཀར་པོས་དཀྲིས་ནས་བཞག་སྟེ། ཁ་ཤར་དུ་བལྟས་ཏེ་ཐུན་གསུམ་དུ་གཤིན་རྗེ་གཤེད་སྐུ་མདོག་དཀར་པོ་བསྒོམས་ནས། མེ་ཏོག་དཀར་པོས་མཆོད་ཅིང་མདུན་དུ་ཟླ་བའི་དཀྱིལ་འཁོར་གྱི་ཐོག་
ན་བསྒྲུབ་བྱ་གནས་པར་བལྟས་ལ། བུམ་པ་དཀར་པོ་ཟླ་བའི་བདུད་རྩིའི་ཆུས་ཡོངས་སུ་གང་བས་དབང་བསྐུར་བར་བསམ་ཞིང་། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་ན་མཿཆེ་གེ་མོ་ལ་ཤཱནྟིཾ་ཀུ་རུ་ན་མཿ། ཞི་བའི་ཆོ་གའོ། །སྐྱེས་པ་རྣམས་ཀྱི་ཞི་བའི་ལས་ལ་གུར་གུམ་གྱིས་སོ། །རྒྱས་
པ་ལའང་འཁོར་ལོ་གཉིས་མངོན་པར་བྲིས་ཏེ། དེར་ཡི་གེ་སྭཱ་ཧཱའི་ནང་དུ་མིང་ཡིག་བཅུག་ལ་མར་དང་སྦྲང་གི་ནང་དུ་བཅུག་ལ། རྫ་ཕོར་ཁ་སྦྱར་དུ་སྐུད་པ་སེར་པོས་ལེགས་པར་དཀྲིས་ཏེ་གཞག །དེ་ནས་ཁ་བྱང་དུ་བལྟས་ལ་གཤིན་རྗེ་གཤེད་སྐུ་མདོག་སེར་པོའི་སྐུར་ཡང་དག་པར་
དམིགས་ཏེ་ཐུན་གསུམ་དུ་མེ་ཏོག་སེར་པོས་མཆོད་ཅིང་ཟླ་བ་སེར་པོ་ལ་གནས་པའི་བསྒྲུབ་བྱ་ཁ་དོག་སེར་པོ་བསམས་ལ། བུམ་པ་སེར་པོའི་བདུད་རྩིས་ཆུས་དབང་བསྐུར་ཞིང་བཟླས་པ་བྱ་སྟེ། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། འམ། ཡང་ན། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་
ཕཊ་སྭཱ་ཧཱ། བཽ་ཥཊ་ཆེ་གེ་མོ་པུཥྚིཾ་ཀུ་རུ་བཽ་ཥཊ། རྒྱས་པའི་ཆོ་གའོ། །གྲོ་གའམ་རས་ལ་རྒྱ་སྐྱེགས་ཀྱི་ཁུ་བའམ་ཙནྡན་དམར་པོའམ། མིང་མེད་ཀྱི་ཁྲག་དང་བསྲེས་པས་འཁོར་ལོ་གཉིས་བྲིས་ཏེ། ཧོཿའི་ཡི་གེའི་བར་དུ་མིང་བཅུག་ལ། ནག་ནོག་ལ་སོགས་པ་ཁ་དོག་ངན་པ་སྤངས་པའི་
རྫ་ཕོར་ཁ་སྦྱར་དུ་མར་དང་སྦྲང་རྩིས་ཡང་དག་པར་བཀང་སྟེ་སྐུད་པ་དམར་པོས་བཅིངས་ལ་གཞག་གོ། །དེ་ནས་ཁ་ནུབ་ཏུ་བལྟས་ལ་གཤིན་རྗེ་གཤེད་དམར་པོའི་ཏིང་ངེ་འཛིན་དང་ལྡན་པས། ཐུན་གསུམ་དུ་མེ་ཏོག་དམར་པོས་མཆོད་ཅིང་། ཟླ་བ་དམར་པོ་ལ་གནས་པའི་བསྒྲུབ་

བྱ་ཁ་དོག་དམར་པོ་བསམས་ཏེ། རང་གི་ལུས་ལས་འོད་འཕྲོས་པའི་འོད་ཟེར་གྱིས་རབ་ཏུ་བཀང་བས་ཤིན་ཏུ་མྱོས་པར་གྱུར་ཏེ། རྐང་པ་གཉིས་ཀྱི་མདུན་དུ་འགྱེལ་བར་བསམ་ཞིང་སྔགས་བཟླ་བར་བྱའོ། །གལ་ཏེ་དབང་དུ་མ་གྱུར་ན་མར་དང་སྦྲང་རྩི་སྤངས་པའི་འཁོར་ལོ་ཁོ་ན་སེང་
ལྡེང་གསོལ་བ་དུད་པ་མེད་པའི་མེ་ལ་གདུང་བར་བྱའོ། །དེ་དག་གི་སྔགས་ནི། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་ཧོཿཆེ་གེ་མོ་མ་མ་བ་ཤཾ་ཀུ་རུ་ཧོཿ ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་བཽ་ཥཊ་ཆེ་གེ་མོ་བ་ཤ་མཱ་ན་ཡ་བཽ་ཥཊ། དབང་གི་ཆོ་གའོ།། །།དུར་ཁྲོད་ཀྱི་རས་སམ་རཱ་ཛ་ས་ལས་བྱས་
པའི་རས་ལ་ཚོས་ཀྱི་ཁུ་བས་འཁོར་ལོ་གཉིས་མངོན་པར་བྲིས་ཏེ། ཡི་གེ་ཛའམ་ཧྲིཿའི་བར་དུ་བཅུག་པའི་མིང་གི་ཡི་གེ་བྲིས་ཏེ། རྫ་ཕོར་ཁ་སྦྱར་རམ་བུད་མེད་ཀྱི་ཐོད་པ་ཁ་སྦྱར་གྱི་བར་དུ་བཞག་ལ་གོས་དམར་པོས་གཏུམས་ཏེ་མེ་ཏོག་དམར་པོས་མཆོད་ཅིང་། དགོངས་ཐུན་ཉི་མ་ལྟ་བུའི་
གཤིན་རྗེ་གཤེད་དམར་པོའི་སྐུ་ཞགས་པ་དང་ལྕགས་ཀྱུ་འཛིན་པ་བསམས་ལ། བསྒྲུབ་བྱའི་སྙིང་གར་ལྕགས་ཀྱུས་ཕུག་ཅིང་སྐེ་ནས་ཞགས་པས་བཅིངས་ལ་དྲངས་པར་བསམ། གལ་ཏེ་འོང་བར་མ་གྱུར་ན་དེ་ནས་སེང་ལྡེང་གི་མེ་ལ་གདུང་བར་བྱའོ། །ཨོཾ་ཧྲཱིཿཥྚྲཱིཿཝི་ཀྲྀ་ཏཱ་ན་ན་ཧཱུཾ་ཧཱུཾ་
ཕཊ་ཕཊ་ཛཿདེ་བ་དཏྟཾ་ཨཱ་ཀཪྵ་ཡ་ཛཿ། རྐང་པ་དགུག་པའི་ཆོ་གའོ།། །།དུར་ཁྲོད་ཀྱི་རས་ལ་བ་བླའམ་ཡུང་བའི་ཁུ་བས་འཁོར་ལོ་གཉིས་མངོན་པར་བྲིས་ཏེ། ཡི་གེ་ལཾ་གྱི་ཁོངས་སུ་བཅུག་པའི་བསྒྲུབ་བྱའི་མིང་བྲིས་ཏེ། རྫ་ཕོར་སེར་པོ་ཁ་སྦྱར་དུ་བཞག་ནས། །རྫ་ཕོར་ལ་རེ་ཁཱ་གྲུ་བཞི་
བདུན་བྲིས་ཏེ། དེའི་སྟེང་དུ་རི་རབ་ལྕོག་ཆེན་པོ་བརྒྱད་དང་ལྡན་པ་ཡི་གེ་ཧཱུཾ་ནང་དུ་བཅུག་པ་ལྕོག་གི་སྟེང་དུ་སའི་དཀྱིལ་འཁོར་ལཾ་གྱིས་མཚན་པ། སྣ་ཚོགས་རྡོ་རྗེས་བསྐོར་བ་སྐུད་པ་སེར་པོས་བཅིངས་ཏེ། བདག་ཉིད་གཤིན་རྗེ་གཤེད་སེར་པོ་བསམས་ལ་བསྒྲུབ་བྱ་སེར་པོ་ཁ་ལྷོར་བལྟས་
ནས་སའི་དཀྱིལ་འཁོར་གྱི་སྟེང་ན་འདུག་པ་ལ། གསེར་གྱི་རི་བདུན་དང་རི་བོ་མཆོག་རབ་ཀྱིས་མནན་ཅིང་། སའི་དཀྱིལ་འཁོར་གྱི་སྟེང་ན་སྣ་ཚོགས་རྡོ་རྗེ་རྒྱ་གྲམ་གྱིས་མནན་པར་བསམས་ཏེ་བཟླས་པ་བྱའོ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་ལཾ་དེ་བ་དཏྟ་སྭ་སྠཱ་ན་སྟམྦྷ་ཡ་ལཾ།

མནན་པའི་ཆོ་གའོ།། །།ངག་མནན་པར་འདོད་པས། དེ་བཞིན་དུ་མིང་ནང་དུ་བཅུག་པའི་འཁོར་ལོ་གཉིས་མངོན་པར་བྲིས་ཏེ། ལཾ་དེ་བ་དཏྟ་སྱ་ཡ་ཐཱ་ཨཱ་རཾ་བྷ་ཀཱ་ར་ཡ་ཀྲྀ་ཏེ་ནི་ཝར་ཡ་ཏོ་བི་རཱུ་པ་ཀཾ་དེ་བ་དཏྟ་ཡཛྙ་དཏྟ་སྱ་ཝཱཀ་སྟཾ་བྷ་ནི་ཀུ་རུ་ལཾ། བཟླས་པ་བྱས་པས་མནན་
པར་བྱ་སྟེ། ངག་མནན་པའི་ཆོ་གའོ།། །།ལྐུགས་པར་འདོད་པས་དུར་ཁྲོད་ཀྱི་རས་ལ་འཁོར་ལོ་གཉིས་མངོན་པར་བྲིས་ཏེ། བཾ་དེ་བ་དཏྟ་སྱ་མུ་ཁཾ་བནྡྷ་ཡ་བཾ། ཞེས་པ་ནང་དུ་གཞུག །གཤིན་རྗེ་གཤེད་ཀྱི་སྦྱོར་བས་བསྒྲུབ་བྱ་ལུག་གི་སྙིང་དུ་རབ་ཏུ་གཞུག་ཅིང་། སའི་དཀྱིལ་
འཁོར་བཞིས་ཟ་མ་ཏོག་ལྟ་བུར་ཁ་སྦྱར་དུ་བྱས་ཏེ། རེངས་པའི་སྦྱོར་བའི་ཆོ་གས་འཁོར་ལོ་གཉིས་བྲི་བ་དང་། སྒོམ་པ་དང་མནན་པར་བྱས་ནས་བཟླས་པར་བྱའོ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་བཾ་དེ་བ་དཏྟ་སྱ་མུ་ཁཾ་བནྡྷ་ཨ་མུ་ཀཾ་ཀུ་རུ་བཾ། ཡུལ་ཆོས་ལ་སོགས་པ་རྨོངས་པར་
འགྱུར་རོ།། །།དུར་ཁྲོད་ཀྱི་རས་ལ་སྐེ་ཚེ་དང་ཚྭ་དང་དྲི་ཚ་བའི་མར་ཁུ་དང་། ནིམ་པའི་ལོ་མ་དང་། ད་དུ་རའི་ལོ་མའི་ཁུ་བ་དང་། རོ་བསྲེགས་པའི་སོལ་བ་དང་། རང་གི་སྡིགས་མཛུབ་ཀྱི་ཁྲག་གིས་སྣག་ཚ་བྱས་ལ་བྱ་རོག་གི་སྒྲོ་རྐང་གི་སྨྱུ་གུས་འཁོར་ལོ་གཉིས་མངོན་པར་བྲིས་ཏེ། ཡི་གེ་ཧཱུཾ་གི་
ནང་དུ་བསྒྲུབ་བྱའི་མིང་གཞུག །ཁ་ལྷོ་ཕྱོགས་སུ་བལྟས་པ་གཤིན་རྗེ་ཁྲོ་བོའི་གཟུགས་ཅན། ཞབས་གཡོན་བརྐྱང་བས་ཉི་མའི་དཀྱིལ་འཁོར་ལ་བཞུགས་པ། བཞིན་མི་སྡུག་ཅིང་མཆེ་བ་གཙིགས་པ། ཤིན་ཏུ་མི་བཟད་ཅིང་ཞལ་གྱི་ལྗགས་གློག་ལྟ་བུར་འགྱུ་བ། བསྐལ་པའི་མེ་ལྟ་
བུའི་འོད་ཟེར་ཅན་ཕྱག་མཚན་མཚོན་ཆ་སྣ་ཚོགས་འཕྱར་བ། ཆར་འབབ་པའི་སྤྲིན་ལྟ་བུ། ལྟོ་བ་ཆེ་ཞིང་དབུ་སྐྲ་དང་སྨ་ར་སེར་པོ་གྱེན་དུ་འབར་བ། མགྲིན་པའི་སྦུབས་ཆུ་འཛིན་གྱི་གློག་ལྟ་བུ་ཧཱུཾ་གིས་ཡོངས་སུ་གང་བར་བདག་ཉིད་རྣམ་པར་བསམས་ཏེ། མདུན་དུ་བསྒྲུབ་བྱ་གོས་དྲི་མ་ཅན་
ཧྲུལ་པོ་གྱོན་ཅིང་། ལུས་ཐམས་ཅད་ཐལ་བས་བྱུགས་ཤིང་མེའི་དཀྱིལ་འཁོར་ལ་གནས་པ། སྤྱི་བོ་དང་མཚོག་མ་དང་། སྙིང་ག་དང་ལག་པའི་རྩ་བ་དང་པུས་མོ་རྣམས་ཀྱི་སྔགས་ཀྱི་ཆོ་གས་བྱས་པའི་གོས་དང་། སྲུང་བ་རྣམས་དང་ཕྲལ་ནས་དེའི་ལུས་ལ་གནས་པའི་ལྷ་རྣམས་

དྲངས་ཤིང་བསྡུས་ཏེ། རང་གི་ལུས་ལ་རབ་ཏུ་བཅུག་པས། དེ་ནས་ཁང་པ་སྟོང་པ་ལྟ་བུར་བལྟས་ལ། ཁྲོ་བོའི་ཚུལ་རྣམ་པ་སྣ་ཚོགས། མཚོན་ཆ་རྣམ་པ་སྣ་ཚོགས་ཕྱག་ན་འཕྱར་བ་སྤྲུལ་ཏེ། བསྣུན་ཅིང་དུམ་བུ་བརྒྱ་སྟོང་དུ་བྱས་ནས། ཤ་དང་ཚིལ་བུ་དང་རུས་པ་རྣམས་ཟ་ཞིང་། ཁྲག་
ཀྱང་འཐུངས་ལ་བསྲེགས་ཤིང་ཐལ་བ་བྱས་ནས། མདུན་དུ་གཤིན་རྗེ་ཆར་འབེབས་པའི་སྤྲིན་གྱི་མདོག་ཅན་ལྟ་བུ་མ་ཧེ་ལ་གནས་པ། དབྱུག་ཏོ་དང་ཞགས་པ་འཛིན་ཅིང་ལྟོ་བ་ཆེ་བ། ཞལ་གདངས་ཤིང་མཆེ་བ་གཙིགས་པའི་གཟུགས་སུ་རྣམ་པར་བསམས་ཏེ། དེའི་སྙིང་གར་གནས་ཏེ་
དེས་ཟ་བར་བསམས་ལ། སྔགས་བགྲང་བར་བྱའོ། །དེ་ཉིད་ཁོ་ནའི་ཆོ་གས་འཁོར་ལོ་གཉིས་མངོན་པར་བྲིས་ཏེ། ཡི་གེ་ཧཱུཾ་དང་ཕཊ་ཀྱི་ནང་དུ་མིང་བཅུག་པས་དེ་བཞིན་ཁོ་ནའི་བསམ་གཏན་ལ་གནས་པས། བསྒྲུབ་བྱ་ལྷ་དང་བྲལ་ཞིང་ཁ་དྲེག་ཅན་མེའི་དཀྱིལ་འཁོར་ལ་གནས་ཤིང་། ཁྲོ་
བོའི་གཟུགས་མི་སྡུག་པ་རྣམ་པ་སྣ་ཚོགས་ཀྱིས་རལ་གྲི་དང་། མཚོན་ཤིང་དང་དགྲ་སྟ་དང་། མདུང་དང་། ཞགས་པ་དང་། འཁོར་ལོ་དང་། རྩེ་གསུམ་དང་། ལྕགས་ཐོ་ལ་སོགས་པའི་མཚོན་ཆ་རྡེག་པ་དང་། དུམ་བུ་བརྒྱ་རུ་བཅད་པར་བསམ་ཞིང་། བྱ་རོག་དང་འུག་པ་དང་།
བྱ་རྒོད་དང་། ཅེ་སྤྱང་དང་། སྲིན་པོ་དང་། མཁའ་འགྲོ་མ་ལ་སོགས་པ་སྣ་ཚོགས་ཀྱིས་ཟ་བར་བསམ་ཞིང་སྔགས་བཟླས་པར་བྱའོ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་དེ་བ་དཏྟཾ་མཱ་ར་ཡ་ཧཱུཾ་ཕཊ། གསད་པའི་ཆོ་གའོ།། །།དེ་བཞིན་དུ་འཁོར་ལོ་བསྒྲུབ་བྱའི་མིང་ཕཊ་ཀྱི་ནང་དུ་བཅུག་པ་བྲིས་
ཏེ། ཐོད་པ་ཁ་སྦྱར་དུ་བཞག་ལ་སྐུད་པ་སྔོན་པོས་དཀྲིས་ཏེ་ཉི་མ་ཕྱེད་ཀྱི་དུས་སུ་དུར་ཁྲོད་དུ་དོང་བྲུས་ལ་བཅུག་སྟེ། གཤིན་རྗེ་གཤེད་ཀྱི་སྦྱོར་བ་དང་ལྡན་པས་བསྒྲུབ་བྱ་གཉིས་རྟ་དང་མ་ཧེ་ལ་ཞོན་ཅིང་། ལག་ན་མཚོན་ཆ་འཕྱར་བ། རྡོ་རྗེ་ཁྲོ་བོའི་ཚོགས་དང་བཅས་པས་གཉིས་ཀ་གནས་
པར་སྤྲུལ་ཏེ་འཐབ་མོ་བྱེད་པར་བསམ་ཞིང་སྔགས་བཟླས་ཏེ། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་དེ་བ་དཏྟཾ་ཡ་ཛྙ་དཏྟ་བི་དེ་ཤ་ཡ་ཕཊ། སྡང་བ་རྣམ་པར་དབྱེ་བའི་ཆོ་གའོ།། །།འཁོར་ལོ་དེ་ཉིད་ཐོད་པ་གཉིས་སུ་ཡི་གེ་ཧཱུཾ་ཕཊ་ཕཊ་ཀྱི་ཁོངས་སུ་བཅུག་པ་བྲིས་ལ་ཐོད་པ་ཁ་སྦྱར་བྱས་ནས་

སྐུད་པ་ནག་པོས་དཀྲིས་ཏེ་དུར་ཁྲོད་དུ་སྦས་ལ་གཤིན་རྗེ་གཤེད་ཀྱི་སྦྱོར་བ་དང་ལྡན་པའི་མདུན་དུ་ཡཾ་ལས་རླུང་གི་དཀྱིལ་འཁོར་དེའི་ཐོག་ཏུ་རྔ་མོ། དེའི་ཐོག་ཏུ་བསྒྲུབ་བྱའི་རྣམ་པ་སྔོན་པོ་བསམས་ཏེ། རྡོ་རྗེ་ཁྲོ་བོའི་བྲབ་ཅིང་ལྷོ་ཕྱོགས་སུ་འགྲོ་བར་བསམས་ལ་སྐྲོད་
པར་འགྱུར་རོ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་དེ་བ་དཏྟ་ཨུཙྪ་ཊ་ཡ་ཕཊ་ཕཊ། བསྐྲད་པའི་ཆོ་གའོ།། །།ཁྲོ་བོ་གཤིན་རྗེ་གཤེད་མཐར་བྱེད་ནི་ཤིན་ཏུ་དམར་བ། སྦྱོར་བ་ནི་དུར་ཁྲོད་ཀྱི་ཐལ་བ་དང་། དུག་དང་། ཚྭ་དང་། སྐེ་ཚེ་དང་། ཆུ་ཚ་བས་དུར་ཁྲོད་ཀྱི་རས་ལ་འཁོར་ལོ་གཉིས་གཏོར་
མའི་ཆོ་ག་བསྟན་ཞིང་གསུངས་པ་དང་། ཟླ་བ་ཟླ་བའི་ཚེས་བཅུ་བཞི་ལ་ཤ་ལྔ་དང་། བདུད་རྩི་ལྔས་བཟླས་པའི་ཡུལ་ལ་བསྐུས་ཤིང་ལྡན་པར་བྱས་ན། ཤིན་ཏུ་གདུང་བར་བྱེད་པའི་མཆོག །ཁྲི་ཕྲག་གཅིག་གིས་འབྱུང་པོ་རྣམས། །སྟོང་ཕྲག་གཅིག་གིས་མཁའ་འགྲོ་དང་། །ཡི་
དགས་ཚོགས་རྣམས་གསོད་པར་བྱེད། །བཟླས་པ་འབུམ་གྱིས་རྣལ་འབྱོར་བདག །ལས་རྣམས་ཐམས་ཅད་འདི་ཡིས་བྱེད། །བཟླས་པ་བྱེ་བས་འགྲུབ་པར་འགྱུར། །བྱེ་བ་ལྔ་ཡིས་སྨོས་ཅི་དགོས། །སློང་མོ་ཟ་ཞིང་མི་བཟླས་ཏེ། །མ་བསླངས་པ་ཡང་ཆགས་མི་བྱ། །དམ་ཚིག་
རྟག་ཏུ་བརྟན་བྱ་ཞིང་། །རྣལ་འབྱོར་ཆེན་པོ་སྔགས་བཟླའོ། །རྣལ་འབྱོར་རིག་པའི་སེམས་ཅན་ཀུན། །བྱམས་པའི་སེམས་ནི་རྟག་ཏུ་བྱ། །ཉིན་རེ་ཞིང་ངམ་ཟླ་རེ་དང་། །ལོ་རེ་བཞིན་དུ་རྟག་པ་རུ། །དབྱུ་གུ་དྲུག་ཅུ་རྩ་བཞི་གཏོང་། །གཏོར་མ་དྲུག་ཅུ་རྩ་བཞི་འབུལ། །བགེགས་
རྣམས་ཐམས་ཅད་ཞི་བ་དང་། །བསོད་ནམས་ཡང་ནི་འཕེལ་བའི་ཕྱིར། །དེ་ལས་འདིར་ནི་འབྱུང་པོ་ཡི། །གཏོར་མའི་ཆོ་ག་བསྟན་པར་བྱ། །དྲི་ཆེན་དྲི་ཆུ་བསྲེས་པའི་ཆུས། །མཎྜལ་གྲུ་གསུམ་བྱས་ནས་ནི། །གཤིན་རྗེ་གཤེད་ཀྱི་རྣལ་འབྱོར་གནས། །ཕྱོགས་སྐྱོང་རྣམས་
ནི་ཡང་དག་དགུག །སྔགས་ནི་འདི་ཡིས་དགུག་པར་བྱ། །སྔགས་ནི། ཨོཾ་ཨིནྡྲཱ་ཡ་ཧྲཱིཿ ཡ་མཱ་ཡ་ཥྚྲྀཿབ་རུ་ཎཱ་ཡ་བི། ཀུ་བེ་རཱ་ཡ་ཀྲྀ། ཨཱི་ཤ་ནཱ་ཡ་ཏ། ཨགྣེ་ཡེ་ཨ། ནཻ་རྀ་ཏ་ཡེ་ན། བ་ཡ་བེ་ན། ཙཎྜ་ཡ་ཧཱུཾ། ཨཱརྐ་ཡ་ཧཱུཾ། བྲཧྨ་ཎེ་ཕཊ། བ་སུ་དྷ་ར་ཡེ་ཕཊ། བེ་མ་ཙི་ཏྲ་

ཎེ་སྭཱ། སརྦ་བྷཱུ་ཏེ་བྷྱོ་ཧཱ། ཧཱི་ཧཱི་ཧཱི། ཧཱུཾ་ཧཱུཾ་ཧཱུཾ། ཕེཾ་ཕེཾ་ཕེཾ། སྭཱ་ཧཱ། ཞེས་པ་འདིས་རྟག་ཏུ་བཟའ་བ་ཇི་སྙེད་པ་དང་བཏུང་བ་ཇི་སྙེད་པ་ཐམས་ཅད་ཀྱི་ཕུད་གཤིན་རྗེ་གཤེད་ལ་དབུལ་བར་བྱའོ། །དེ་རྣམས་འདིས་མཉེས་པར་བྱ་ཞིང་བཟོད་པར་གསོལ་ནས་ཇི་ལྟར་བདེ་བར་གཤེགས་སུ་
གསོལ། །བདག་གིས་བསོད་ནམས་ཇི་སྙེད་གང་བསགས་འདི་ཡིས་འཇིག་རྟེན་རྣམས། །མ་ལུས་མྱ་ངན་རྣམས་བཅོམ་དེ་ནི་བྱང་ཆུབ་སྣོད་གྱུར་ཏེ། །བདག་དང་འགྲོ་བ་རྣམས་ཀྱང་བྱང་ཆུབ་ལམ་ལ་ངེས་སྦྱར་ནས། །དོན་དམ་བདེ་བས་ལེགས་ལྡན་སངས་རྒྱས་སྐུ་ནི་ཐོབ་པར་ཤོག །
སྟོན་ཀའི་ཟླ་བ་ལྟ་བུ་ཡི། །གྲུབ་པའི་སྒྲུབ་ཐབས་ངེས་པ་ནི། །སེམས་ཅན་རྣམས་ལ་ཕན་ཕྱིར་དུ། །གནས་བརྟན་བྱང་ཆུབ་སྙིང་པོས་མཛད། །དཔལ་གཤིན་རྗེ་གཤེད་ཀྱི་ལས་ཚོགས་ཀྱི་འཁོར་ལོའི་དེ་ཁོ་ན་ཉིད་གསལ་བར་བྱེད་པ་ཞེས་བྱ་བ་སྒྲུབ་པའི་ཐབས་རྫོགས་སོ།། །།པཎྜི་
ཏ་རྡོ་རྗེ་གདན་པ་ནི་སྐ་ལཾ་ཀའི་ཞལ་སྔ་ནས། དཔྱལ་ལོ་ཙཱ་བ་དཔལ་ཆོས་ཀྱི་བཟང་པོས་བསྒྱུར་བའོ།། ༄༅༅། །རྒྱ་གར་སྐད་དུ། རཀྟ་ཡ་མཱ་རི་སཱ་དྷ་ནཾ་ནཱ་མ། བོད་སྐད་དུ། གཤིན་རྗེའི་དགྲ་དམར་པོའི་སྒྲུབ་ཐབས་ཞེས་བྱ་བ། གཤིན་རྗེའི་གཤེད་དམར་པོ་ལ་ཕྱག་འཚལ་ལོ། །
ཧཱུཾ་ཡིག་དམར་པོ་འབར་བ་ལས་མེ་འབར་བར་བལྟ་སྟེ། དེའི་སྟེང་དུ་ཨཿཡིག་གིས་གསེར་གྱི་བུམ་པའི་སྣོད་ཆེན་པོའོ། །དེའི་ནང་དུ་གོ་ཀུ་ད་ཧ་ན་བི་ར་ཤུ་མ་མུ། དེ་རྣམས་ཐམས་ཅད་འོ་མའི་རང་བཞིན་ལྟར་རྣམ་པར་བསམ་པར་བྱའོ། །དེའི་རྗེས་སུ་སྣོད་ཀྱི་ཤར་དུ་གླང་པོ་ཆེ་ལ་ཞོན་པའི་
དབང་པོ་རྡོ་རྗེ་འཆང་བའོ། །ལྷོར་མ་ཧེ་ལ་ཞོན་པའི་གཤིན་རྗེ་དབྱུག་པ་འཆང་བའོ། །ནུབ་ཏུ་ཆུ་སྲིན་ལ་ཞོན་པའི་ཆུ་ལྷ་ཞགས་པ་འཛིན་པའོ། །བྱང་དུ་གཏེར་ལ་ཞོན་པའི་ལུས་ངན་པོ་ཕྱག་ན་ན་ཀུ་ལི་དང་བི་ཛ་པཱུ་ར་ཅན་ནོ། །མེར་ར་ལ་ཞོན་པའི་མེ་ལྷ་ཕྱག་ན་ཕྲེང་བ་ཅན་ནོ། །བདེན་བྲལ་
དུ་སྲིན་པོ་རོ་ལ་ཞོན་པ་རལ་གྲི་འདེབས་པའི་ཕྱག་ཅན་ནོ། །རླུང་དུ་རི་དགས་ལ་ཞོན་པའི་རླུང་ལྷ་རླུང་དར་འཛིན་པའོ། །དབང་ལྡན་དུ་གླང་ལ་ཞོན་པའི་དབང་ཕྱུག་རྩེ་གསུམ་དང་ཐོད་པ་འཛིན་པ་ཅན་ནོ། །དབུས་སུ་ཚངས་པའོ། །དེའི་མདུན་དུ་ཟླ་བའི་ལྷ་ཕྱག་ན་ཀུ་མུ་ད་ཅན་ནོ། །རྒྱབ་ཏུ་ཉི་མ་

ཕྱག་ན་པདྨ་ཅན་ནོ། །གཡས་སུ་སའི་ལྷ་མོ་དམ་བཅའ་ལ་མངོན་པར་ཕྱོགས་པས་བཞུགས་པའོ། །གཡོན་དུ་ཐགས་བཟངས་རིས་གཞོན་ནུའོ། །དེ་ལྟར་ཡོངས་སུ་བསྐོར་ནས་བཞུགས་པའི་འབྱུང་པོའི་ཚོགས་མ་ལུས་པ་སྐད་ཅིག་གིས་སྟོང་པ་ཉིད་ལས་སེམས་ཅན་རྣམས་
ཡོངས་སུ་གྱུར་པ་ལས། གཤིན་རྗེའི་དགྲའི་སྐུར་དམིགས་ཏེ་དེ་རྣམས་ཀྱི་ལྗགས་ལ་རྡོ་རྗེ་ནས་འབྲུ་ཙམ་བསྒོམས་ཏེ་དེ་རྣམས་ལ་གཏོར་མ་ཉེ་བར་དབུལ་བར་བྱའོ། །དེ་ནས་བཅོམ་ལྡན་འདས་ཀྱི་ཐུགས་ཀར་སྔོན་གྱི་ས་བོན་ལས་བསྐྱེད་པའི་ཉི་མའི་སྟེང་དུ། ཧཱུཾ་ཡིག་དམར་པོ་ལས་སྐྱེས་
པའི་མི་མགོ་རློན་པས་མཚན་པའི་དབྱུག་ཐོ་ངེས་པར་བསྒོམ་པར་བྱའོ། །དེའི་དབུས་སུ་ཉི་མའི་དཀྱིལ་འཁོར་ལ་གནས་པའི་ཧཱུཾ་ཡིག་དམར་པོ་བསམ་པར་བྱའོ། །དེ་ནས་གསང་བའི་རྡོ་རྗེ་ཧཱུཾ་ཡིག་ཡོངས་སུ་གྱུར་པར་བསམ་པར་བྱའོ། །བཅོམ་ལྡན་འདས་མའི་གསང་བར་འདབ་མ་བརྒྱད་
པའི་པདྨ་ལ་ཨཾ་ཡིག་དམར་པོ་ཡོངས་སུ་གྱུར་པའོ། །དེའི་རྗེས་སུ་སྔགས་བརྗོད་པར་བྱ་སྟེ། ཨོཾ་སརྦྦ་ཏ་ཐཱ་ག་ཏ་རཱ་ག་ཎ་བཛྲ་སྭ་བྷཱ་བ་ཨཱཏྨ་ཀོ྅ཧཾ། དེའི་རྗེས་སུ་ལྟེ་བའི་འོག་དེར་པདྨ་དམར་པོ་འདབ་མ་བརྒྱད་པའི་སྟེང་དུ་ཧྲཱིཿཡིག་དམར་པོ་འབར་བ་བསམ་པར་བྱའོ། །བཅོམ་ལྡན་འདས་
ཞལ་གཅིག་ཕྱག་གཉིས། ཕྱག་གཡོན་གྱིས་ཐོད་པ་ཁྲག་གིས་གང་བ་དང་། གཡས་ཀྱིས་མི་མགོས་མཚན་པའི་དབྱུག་ཏོ་དཀར་པོ་འཆང་བ། མ་ཧིཪྵའི་སྟེང་དུ་སྣ་ཚོགས་པདྨ་ལ་བཞུགས་པ་བསྒོམ་པར་བྱའོ། །ཤེས་རབ་མ་དགའ་བས་མྱོས་པ་ཐོད་པ་སྐམ་པོས་མགུལ་པ་བརྒྱན་པ།
ཞལ་གཅིག་ཕྱག་གཉིས་མ། བཅོམ་ལྡན་འདས་དང་ལྷན་ཅིག་སྦྱོར་བས་བཞུགས་པ། དེ་ལྟ་བུར་གྱུར་པའི་གཤིན་རྗེའི་དགྲ་ཐུན་གསུམ་མམ་བཞིར་བསྒོམ། གཏོར་མ་སྦྱིན་ནོ། །བྲུཾ་མཱཾ་ཧྲཱཾ་ཁཾ་ཧཱུྃ་ཞེས་པས་དམ་ཚིག་བྱིན་གྱིས་བརླབ་པའི་སྔགས་སོ། །ཨོཾ་ཨིནྡྲཱ་ཡ་ཧྲཱིཿ ཡ་མ་ཡ་ཥྚྲྀཿ
བ་རུ་ཎཱ་ཡ་བི། ཀུ་བེ་རཱ་ཡ་ཀྲྀ། ཨཱི་ཤ་ནཱ་ཡ་ཏ། ཨཀྣ་ཡེ་ཨ། ནཻ་རྀ་ཏྱེ་ན། བཱ་ཡ་བེེ་ན། ཙནྡྲཱ་ཡ་ཧཱུཾ། ཨ་ཀཱ་ཡ་ཧཱུྃ། བྲཧྨ་ཎཱ་ཡ་ཕཊ། བ་སུ་དྷ་རཱ་ཡ་ཕཊ། བེ་མ་ཙི་ཏྲ་ཎེ་སྭཱ། སརྦ་བྷཱུ་ཏེ་བྷྱོ་ཧཱ། ཧྲཱཾ་ཧྲཱཾ་ཧྲཱིཿ། ཧཱུཾ་ཧཱུཾ་ཧཱུཾ། ཕེཾ་ཕེཾ་ཕེཾ། སྭཱ་ཧཱ། གཏོར་མའི་སྔགས་སོ། །གང་ཅུང་ཟད་ཟ་བ་དེ་ཐམས་ཅད་

གཤིན་རྗེའི་དགྲ་ལ་དབུལ་བར་བྱའོ། །སློབ་དཔོན་ཆེན་པོ་བློ་བཟང་སྙིང་པོ་ཞབས་ཀྱིས་མཛད་པའི་གཤིན་རྗེའི་དགྲ་དམར་པོའི་སྒྲུབ་ཐབས་རྫོགས་སོ།། །།ལྷའི་སྐད་ལ་ལེགས་པར་ཞུགས་པའི་ཤཱཀྱའི་དགེ་སློང་ཉི་མ་རྒྱལ་མཚན་དཔལ་བཟང་པོས་སྐད་གཉིས་སྨྲ་བ་རྣམས་ཀྱི་གདན་ས་
དཔལ་ཐར་པ་གླིང་གི་གཙུག་ལག་ཁང་དུ་བསྒྲུབས་པའོ། །གཤིན་རྗེ་གཤེད་དམར་པོ་ཡོན་ཏན་འབྱུང་གནས་སྒྲུབ་ཐབས་ཆོས། །རྒྱ་གར་དཔེ་འདི་བོད་ཀྱིས་མི་རྟོགས་པས། །དམ་པ་སེ་ཙའི་རིག་འཛིན་སྐད་གཉིས་པ། །ཆོས་ཀྱི་བཟང་པོའི་དཔེ་ལས་གུས་པར་བསྒྱུར། །སའི་སྟེང་
ན་ཉི་ཟླ་ལྟར་གྱུར་ཅིག།། ༄༅༅། །རྒྱ་གར་སྐད་དུ། རཀྟ་ཡ་མཱནྟ་ཀ་ནིཥྤན་ན་ཡོ་ནཱ་མ། བོད་སྐད་དུ། གཤིན་རྗེ་གཤེད་དམར་པོའི་རྫོགས་པའི་རྣལ་འབྱོར་ཞེས་བྱ་བ། བཅོམ་ལྡན་འདས་གཤིན་རྗེ་གཤེད་དམར་པོ་ལ་ཕྱག་འཚལ་ལོ། །དེ་ལ་རེ་ཞིག་དང་པོར་བདག་གིས་
སེམས་ཅན་ཐམས་ཅད་གཤིན་རྗེ་གཤེད་དམར་པོའི་གོ་འཕང་ལ་དགོད་པའི་ཕྱིར། བཅོམ་ལྡན་འདས་གཤིན་རྗེ་གཤེད་དམར་པོ་བསྒོམ་པར་བྱའོ་སྙམ་དུ་བསམས་ལ། ཕུང་པོ་དང་ཁམས་དང་སྐྱེ་མཆེད་ཀྱིས་བསྡུས་པའི་ཆོས་ཐམས་ཅད་སྒྱུ་མ་ལྟ་བུར་སྟོང་པ་ཉིད་རོ་གཅིག་པར་
བལྟས་ཏེ། སྟོང་པ་ཉིད་ལ་རབ་ཏུ་ཐིམ་པའི་སྒོ་ནས་ཆོས་ཐམས་ཅད་བདེན་བརྫུན་གྱི་མཚན་མའི་རྣམ་པ་ཐམས་ཅད་དང་བྲལ་ཞིང་ཅིར་ཡང་མ་གྲུབ་པའི་སྟོང་པ་ཉིད་དུ་བསྒོམ་པར་བྱའོ། །དེའི་ངང་ལས་སྐད་ཅིག་གིས་ཇི་ལྟར་བློས་ཕྱོགས་པའི་རྒྱ་ཆེན་པོར་བར་མཚམས་མེད་ཅིང་སྙིང་པོ་
གཅིག་ཏུ་གྱུར་པའི་རྡོ་རྗེའི་ས་གཞི་འབར་བ་དང་། དེའི་སྟེང་དུ་རབ་ཏུ་མཁྲེགས་པ་དུམ་བུ་གཅིག་ཏུ་གྱུར་པའི་སྲ་ཞིང་འབར་བའི་རྡོ་རྗེ་ར་བ་དང་། དེའི་སྟེང་དུ་བར་མཚམས་མེད་པར་གཅིག་ཏུ་གྱུར་པའི་རྡོ་རྗེའི་མདའི་དྲ་བ་དང་། དེའི་འོག་ཏུ་རྡོ་རྗེའི་བླ་རེ་དང་། དེའི་འོག་ཏུ་རྡོ་རྗེའི་གུར་འབར་བ་དང་།
དེའི་ནང་དུ་འཁོར་ལོ་རྩིབས་བཅུ་པ་སེར་པོ་གཡས་སུ་ཤིན་ཏུ་དྲག་པོར་འཁོར་བ་རྩིབས་ཀྱི་རྩེ་མོ་ལ་ཉེ་བར་གནས་པའི་ཤིན་ཏུ་འཇིགས་པའི་ཁྲོ་མོ་བཅུ་དང་བཅས་པའི་ལྟེ་བའི་ནང་དུ། རླུང་དང་མེ་དང་། ཆུ་དང་སའི་དཀྱིལ་འཁོར་དང་། རི་རབ་ཀྱི་སྟེང་དུ་གཞལ་ཡས་ཁང་གི་དབུས་

སུ་སྣ་ཚོགས་མཚོ་སྐྱེས་དང་ཉི་མ་ལ་གནས་པའི་མ་ཧེ་དམར་ནག་ཤིན་ཏུ་ཁྲོས་པ་རུས་རྒྱན་གྱིས་བརྒྱན་པའི་རྒྱབ་ཏུ། གཤིན་རྗེ་ཡབ་ཡུམ་ཞབས་གཡས་བསྐུམ་པ། གཡོན་བརྐྱང་བས་མནན་པའི་བཅོམ་ལྡན་འདས་གཤིན་རྗེ་གཤེད་དམར་པོ་ཉི་མ་བྱེ་བའི་འོད་ཅན།
ཞལ་གཅིག་ཕྱག་གཉིས་པ། ཕྱག་གཡས་ན་ཁམས་གསུམ་རྣམ་པར་འཇོམས་པའི་དབྱུག་ཏོ་དཀར་པོ་བསྣམས་པ། ཕྱག་གཡོན་ན་བདུད་མ་ལུས་པའི་ཁྲག་གིས་བཀང་བའི་ཐོད་པ་ཐུགས་ཀར་འཛིན་པ། བརྒྱད་གཉིས་ལོན་པའི་རྣམ་པ་ཅན། མི་མགོ་ལྔའི་ཕྲེང་བས་དཔྲལ་བར་
བརྒྱན་པ། ཕྱག་རྒྱ་ལྔ་དང་། ཀླུ་བརྒྱད་ཀྱིས་ཉེ་བར་བརྒྱན་པ། ཁྲག་འཛག་པའི་མི་མགོ་ལྔ་བཅུའི་ཕྲེང་བ་མགུལ་པར་འཕྱང་བ། སྟག་གི་པགས་པའི་ཤམ་ཐབས་བསྣམས་པ། སྨ་ར་དམར་སྐྱ་དབུ་སྐྲ་དམར་སེར་གྱེན་ལ་བརྫེས་པ། ཐུང་ཞིང་སྦོམ་པ། གསུས་པ་ཆེ་བ། ཉི་མ་ལྟ་བུའི་
སྤྱན་གསུམ་དམར་ལ་ཟླུམ་པ། ཞལ་ཁྲོ་གཉེར་ཅན་མཆེ་བ་གཙིགས་པ། ཞལ་ཅུང་ཟད་གདངས་པ། ཁྲོ་བོའི་ཚུལ་གྱིས་བཞད་པའི་ཞལ། ལྗགས་བསྒྱུར་བ། ཡུམ་རྡོ་རྗེ་རོ་ལངས་མས་འཁྱུད་པ། ལྷ་མོ་ཞལ་གཅིག་ཕྱག་གཉིས་པ། སྤྱན་གསུམ་པ། དབུ་སྐྲ་གྲོལ་བ། ཕྱག་
གཡོན་ན་གདུག་པ་བདུད་ཀྱི་ཁྲག་གིས་བཀང་བའི་ཐོད་པ་འཛིན་པ། གཡས་ན་རྡོ་རྗེ་གྲི་གུག་འཛིན་པ། མགོ་བོ་སྐམ་པོ་ལྔ་བཅུའི་ཕྲེང་བ་མགུལ་པར་འཕྱང་བ། དེ་ལས་གཞན་ཡབ་ཉིད་འདྲ་བ་ཅན་བསྒོམ་པར་བྱའོ། །དེ་ལ་སྣ་ཚོགས་པདྨ་འདབ་མ་བརྒྱད་པའི་ཤར་གྱི་འདབ་མ་ལ་ཉི་མ་
ལ་གནས་པའི་གཏི་མུག་གཤིན་རྗེ་གཤེད་སྐུ་མདོག་དཀར་པོ། རྡོ་རྗེ་ཙརྩི་ཀ་ནག་མོ་ལ་འཁྱུད་པ། ལྷོའི་པདྨའི་འདབ་མ་ལ་ཉི་མ་ལ་གནས་པའི་ཕྲ་མ་གཤིན་རྗེ་གཤེད་སྐུ་མདོག་སེར་པོ་རྡོ་རྗེ་ཕག་མོ་སེར་མོ་ལ་འཁྱུད་པ། ནུབ་ཀྱི་པདྨའི་འདབ་མ་ལ་ཉི་མ་ལ་གནས་པའི་འདོད་ཆགས་
གཤིན་རྗེ་གཤེད་སྐུ་མདོག་དམར་པོ་རྡོ་རྗེ་དབྱངས་ཅན་མ་དཀར་མོ་ལ་འཁྱུད་པ། བྱང་གི་པདྨའི་འདབ་མ་ལ་ཉི་མ་ལ་གནས་པའི་ཕྲག་དོག་གཤིན་རྗེ་གཤེད་སྐུ་མདོག་ལྗང་གུ་ལྷ་མོ་གཽ་རཱི་ལྗང་གུ་ལ་འཁྱུད་པའོ། །གཏི་མུག་གཤིན་རྗེ་གཤེད་ལ་སོགས་པའི་དཔའ་བོ་བཞི་ནི་ཞལ་གཅིག་

ཕྱག་གཉིས་པ། ཕྱག་གཡས་རྣམས་ན་རིམ་པ་བཞིན་འཁོར་ལོ་དང་། རིན་པོ་ཆེ་དང་། པདྨ་དང་། རལ་གྲི་འཛིན་པ། ཕྱག་གཡོན་ཐམས་ཅད་ཁྲག་གིས་བཀང་བའི་ཐོད་པ་ཐུགས་ཀར་འཛིན་པ། དེ་ལས་གཞན་ཐམས་ཅད་གཙོ་བོ་དང་མཚུངས་པའོ། །རྡོ་རྗེ་ཙརྩི་ཀ་ལ་སོགས་པའི་
དཔའ་མོ་བཞི་ནི་ཞལ་གཅིག་ཕྱག་གཉིས་པ། གཡས་རྡོ་རྗེ་གྲི་གུག །གཡོན་ཁྲག་གིས་བཀང་བའི་ཐོད་པ་འཛིན་པ། ཕྱག་རྒྱ་ལྔ་ཡིས་རྣམ་པར་བརྒྱན་པ། སྤྱན་གསུམ་པ། མཆེ་བ་གཙིགས་པ། དབུ་སྐྲ་གྲོལ་བ་བསྒོམ་པར་བྱའོ། །མེའི་མཚམས་ཀྱི་པདྨའི་འདབ་མ་ལ།
མུ་མེན་གསེར་ཆབ་ཀྱི་བུམ་པ། ཙ་ཏུ་ར་ས་མ་ཡས་གང་བ། བདེན་བྲལ་གྱི་མཚམས་ཀྱི་པདྨའི་འདབ་མ་ལ་གསེར་གྱི་བུམ་པ་ཀ་ཏོ་རིས་གང་བ། རླུང་གི་མཚམས་ཀྱི་པདྨའི་འདབ་མ་ལ་བྱི་རུའི་བུམ་པ་སིཧླས་གང་བ། དབང་ལྡན་གྱི་མཚམས་ཀྱི་པདྨའི་འདབ་མ་ལ་དངུལ་གྱི་བུམ་པ་
ག་བུར་གྱིས་གང་བ། བུམ་པ་བཞི་ཀའང་ཁ་ཐོད་པས་བཅད་པ་བསྒོམ་པར་བྱའོ། །བཅོམ་ལྡན་འདས་ཀྱི་ཐུགས་ཀར་སྣ་ཚོགས་པདྨ་དང་ཉི་མ་ལ་གནས་པའི་རང་ཉིད་ལྟ་བུའི་ཡེ་ཤེས་སེམས་དཔའི་ཐུགས་ཀར་སྣ་ཚོགས་པདྨ་དང་ཉི་མ་ལ་གནས་པའི་དབྱུག་ཏོ་དཀར་པོའི་དབུས་
སུ་ཉི་མའི་དཀྱིལ་འཁོར་ལ་ཡི་གེ་ཧཱུྃ་དམར་པོས་མཚན་པ་བསྒོམ་པར་བྱའོ། །དེ་ལ་བཅོམ་ལྡན་འདས་ཉིད་ལ་ནི་མི་བསྐྱོད་པས་རྒྱས་བཏབ་པའོ། །གཏི་མུག་གཤིན་རྗེ་གཤེད་ལ་སོགས་པ་བཞི་ལ་ནི་གོ་རིམས་བཞིན་དུ་རྣམ་པར་སྣང་མཛད་དང་། རིན་ཆེན་འབྱུང་ལྡན་དང་། སྣང་བ་
མཐའ་ཡས་དང་། དོན་ཡོད་གྲུབ་པས་རྒྱས་བཏབ་པའོ། །བཅོམ་ལྡན་འདས་ཀྱི་ཐུགས་ཀའི་སྙིང་པོ་ནི། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་པའོ། །དེ་ལྟར་བཤད་པར་གྱུར་མོད་ཀྱང་། །ཕུན་ཚོགས་སྐུ་ནི་དཔག་མེད་དེ། །ཆུ་ཡི་གཏེར་ལས་ཆུ་འཛིན་གྱིས། །ཆུ་བླངས་ཟད་
པར་མི་འགྱུར་བཞིན། །གཤིན་རྗེ་གཤེད་དམར་པོའི་རྫོགས་པའི་རྣལ་འབྱོར་ཞེས་བྱ་བ། མཁས་པ་ཆེན་པོ་འཇིགས་མེད་འབྱུང་གནས་སྦས་པས་མཛད་པ་རྫོགས་སོ།། ༄༅༅། །རྒྱ་གར་སྐད་དུ། ཤྲཱི་རཀྟ་ཡ་མཱ་རི་ཛཱི་བཾ་ཏཏྟྭ་ཨུ་པ་དེ་ཤ་ནཱ་མ། བོད་སྐད་དུ། དཔལ་

གཤིན་རྗེ་གཤེད་དམར་པོའི་འཚོ་བའི་དེ་ཁོ་ན་ཉིད་ཅེས་བྱ་བའི་མན་ངག །དཔལ་གཤིན་རྗེ་གཤེད་དམར་པོ་ལ་ཕྱག་འཚལ་ལོ། །དག་ཅིང་དྲི་མེད་བདུད་བཞི་འཇོམས། །དཔའ་བོ་གཤིན་རྗེ་གཤེད་བཏུད་དེ། །དཔལ་ལྡན་གཤིན་རྗེ་གཤེད་རྒྱུད་ལས། །སྦས་པ་
བླ་མའི་ལུང་གིས་བཤད། །ཕྱི་དང་ནང་དང་གཞན་རྣམས་ཀྱིས། །དུས་དགྲའི་ཚུལ་འདི་ཤེས་བྱ་སྟེ། །ལྷོ་ཕྱོགས་ས་འོག་རིམ་པ་བདུན། །སྒོ་མེད་མུན་ཁུང་བཅུ་དྲུག་གནས། །ཆོས་ཀྱི་རྒྱལ་པོའི་ལས་ཀྱི་འཁོར། །བྱེ་བ་འབུམ་བཅས་གཤིན་རྗེ་སྟེ། །གྲུབ་པའི་དངོས་གྲུབ་ཕུན་སུམ་
ཚོགས། །ཞལ་གཅིག་ཕྱག་གཉིས་ཉི་མའི་མདོག་ལྟར་གསལ། །མ་ཧེ་ལ་བཞུགས་དེ་ཡི་གཤེད་ཡིན་ཏེ། །ལྷར་བཅས་འཇིག་རྟེན་ཀུན་གྱི་གཙུག་གིས་མཆོད། །གདུག་ཅིང་གཏུམ་པའི་སྐྱེ་བོ་གང་། །ལོག་པར་ལྟུང་བ་གཤིན་རྗེ་ཡིན། །སྙིང་རྗེས་བསྟན་ལ་གཞུག་པའི་ཕྱིར། །ཚར་
གཅོད་པ་ནི་གཤེད་ཡིན་ནོ། །ཀཱ་ལི་ཡ་སྟེ་ཨཱ་ལི་མ། །གཡས་དང་གཡོན་པ་གཤིན་རྗེ་སྟེ། །ཀུན་འདར་མ་ནི་དབུས་གནས་སུ། །གང་ཞིག་གཉིས་སུ་མེད་དེ་གཤེད། །ཉི་མ་ཟླ་བའི་ལམ་གཉིས་པོར། །འགྲོ་བ་གང་ཡིན་གཤིན་རྗེ་སྟེ། །དེ་ཡང་དབུས་སུ་གང་གནས་པ། །ཡེ་
ཤེས་དེ་ནི་གཤེད་ཡིན་ནོ། །མནན་པའི་སྙིང་གི་དབུས་སོང་རྩ། །ཉོན་མོངས་ངོ་བོ་ཉིད་ཡིན་ནོ། །སྲིད་པའི་རྩ་བ་གཤིན་རྗེར་བཤད། །རྣལ་འབྱོར་པ་ལ་ཚུལ་དེ་ཉིད། །ཡང་དག་ཡེ་ཤེས་ཉིད་དུ་འགྱུར། །དེ་ནི་དེ་ཡི་གཤེད་ཡིན་ནོ། །གཟུང་བ་ཡ་སྟེ་འཛིན་རྟོག་མ། །གཟུང་དང་འཛིན་
པའི་ཀུན་རྟོག་ན། །འཁོར་བའི་རྩ་བ་གཤིན་རྗེ་སྟེ། །ཨ་ནི་རྣམ་པར་སྐྱེ་བ་མེད། །རི་ནི་གང་ཡིན་སྙིང་རྗེའོ། །སྟོང་ཉིད་སྙིང་རྗེ་རོ་གཅིག་པ། །མི་གནས་མྱ་ངན་འདས་ཏེ་གཤེད། །གང་ཞིག་ལུས་ངག་སེམས་ཀྱི་ནི། །སྙིགས་མ་གང་ཡིན་གཤིན་རྗེ་སྟེ། །སྐུ་གསུང་ཐུགས་ཀྱི་ཡེ་ཤེས་
ཀྱིས། །དངོས་པོར་གྱུར་པ་གཤེད་ཡིན་ནོ། །མདོར་ན་སྲིད་པའི་ཀུན་རྟོག་ཚོགས། །གང་ཡིན་གཤིན་རྗེ་གཤེད་པོ་སྟེ། །རྣམ་པར་དག་པའི་ཡེ་ཤེས་སྐུ། །ཀུན་མཁྱེན་པ་ནི་གཤེད་དུ་གསུངས། །ལྟེ་སྙིང་མགྲིན་པ་སྤྱི་བོར་ནི། །བདུད་བཞི་གནས་པ་གཤིན་རྗེ་སྟེ། །མཐར་བྱེད་

བཞི་ནི་གཤེད་ཡིན་ནོ། །ཡ་ལ་སོགས་པའི་ཡི་གེ་ནི། །མ་དག་ལས་ཀྱི་གཤིན་རྗེ་ནི། །མི་བཟད་སྲིད་པའི་ལས་ཀྱིས་བཟིར། །དག་པས་དཔལ་ལྡན་དུས་ཀྱི་དགྲ། །སྲིད་པའི་འཆིང་བ་ལས་གྲོལ་ཞིང་། །དངོས་གྲུབ་བདེ་ཆེན་མཆོག་སྟེར་ཡིན། ཡ་མ་གཉིས་སུ་འཛིན་པ་སྟེ། །སྤྲོས་མེད་འོད་
གསལ་ཨནྟར་བརྗོད། །ཀ་ཡིག་བླ་མས་བསྟན་པ་ཉིད། །གཤིན་རྗེ་མཐར་བྱེད་ཅེས་བྱར་གྲགས། །འཚོ་བ་ཞེས་བྱ་སྲོག་ཏུ་བརྗོད། །འཚོ་བའི་དབྱེ་བ་ཞེས་བྱ་བ། །འཇིག་རྟེན་འཇིག་རྟེན་འདས་པའི་སྲོག །འོད་གསལ་རྣམ་པར་མི་རྟོག་པ། །སྲོག་གི་གསང་འདི་གང་གིས་ཤེས། །
ཐམས་ཅད་གྲུབ་ཅིང་རང་དབང་འགྱུར། །གཞན་ཡང་སྲིད་དང་ཞི་བ་ལས། །སྲོག་ནི་དེ་བཞིན་གཉིས་སུ་བརྗོད། །དངས་མ་དང་ནི་སྙིགས་མ་གནས། །སངས་རྒྱས་ཐམས་ཅད་གཅིག་བསྡུས་པ། །བླ་མའི་ཐུགས་སུ་ཤེས་བྱ་སྟེ། །མི་ཕྱེད་བརྟན་པའི་གུས་པ་ཡིས། །ལྟོས་པ་མེད་པའི་
བསྙེན་བཀུར་བྱ། །སྟོང་ཉིད་སྙིང་རྗེ་དབྱེར་མེད་པས། །མི་འགྱུར་བ་ནི་སྲོག་གི་མཆོག །དེ་ལས་གཞན་པའི་བསྐྱོད་པ་ཡི། །ཡིག་འབྲུ་རྣམས་དང་ཕྱག་མཚན་དང་། །ཕྱག་རྒྱ་སྙིང་པོ་ལ་སོགས་པ། །རྒྱལ་བ་སྲས་བཅས་སྲོག་ཡིན་ཏེ། །དད་པས་ཐུགས་དམ་བསྐུལ་བར་བྱ། །སྟོང་
ཉིད་སྙིང་པོའི་སྙིང་རྗེ་ཅན། །རྣལ་འབྱོར་ལམ་པ་རྣམས་ཀྱི་སྲོག །དངོས་གྲུབ་ཆེན་པོ་འདོད་རྣམས་ཀྱི། །སྲོག་ནི་དམ་ཚིག་སྡོམ་པ་ཡིན། །རྣལ་འབྱོར་པ་རྣམས་བསྒྲུབ་བྱ་བ། །འཇིག་རྟེན་པ་དང་འཇིག་རྟེན་འདས། །ཡོན་ཏན་འབྱུང་གནས་སྲོག་གཅིག་ཏུ། །བྱང་ཆུབ་སེམས་ནི་
ཀུན་འདར་བརྗོད། །བླ་མ་ལྷག་པའི་ལྷ་རྣམས་ཀྱི། །བྱིན་བརླབས་སྲོག་ནི་མི་ཕྱེད་པའི། །གུས་པས་བརྟན་པ་མེད་ན་མིན། །དེ་ལས་གཞན་པ་འཇིག་རྟེན་པའི། །འབྱུང་པོ་ཕལ་ཆེའི་སྲོག་གི་གནས། །སྲོག་དང་འཚོ་བ་དང་ནི་ཚེ། །འདི་རྣམས་དབྱེ་བས་ཤེས་པར་བྱ། །རྩ་བའི་སྲོག་ནི་སྔོན་
བཞིན་ནོ། །ས་སྟེང་འབྱུང་པོ་ཁ་ཅིག་གི། །དབུགས་རླུང་སྲོག་ཏུ་ངེས་པ་ཡིན། །འབྱུང་པོ་རྣམས་ཀྱི་རང་རང་གི །བོད་པའི་སྔགས་དང་ས་བོན་དང་། །མ་ཎི་རྣམས་ནི་སྲོག་ཡིན་ནོ། །སྡེ་ཚན་བཞི་པའི་དང་པོ་ལ། །མེས་བརྒྱན་དབྱངས་ཀྱི་གསུམ་པས་བརྒྱན། །འབྱུང་པོ་རྣམས་ཀྱི་སྲོག་

ལ་གནས། །དེ་ལས་གཞན་པ་འབྱུང་པོའི་སྲོག །ཁ་ཅིག་གནས་ལ་གནས་པ་ཡོད། །ཞུག་ཤང་ལ་སོགས་གནས་པ་ནི། །ཁ་ཅིག་རྫས་ལ་བརྟེན་ཏེ་གནས། །ཁ་ཅིག་རང་གི་གྲིབ་མར་གནས། །ཁ་ཅིག་ཕྱི་ཡི་འབྱུང་བར་གནས། །ནོར་བུ་རི་རབ་གོས་ལ་སོགས། །ཁ་
ཅིག་སྨན་དང་ཁ་ཅིག་དུག །ཁ་ཅིག་འགྲོ་བ་གཞན་གྱི་གཟུགས། །ས་སྟེང་འབྱུང་པོ་རྣམས་ཀྱི་སྲོག །བདག་གི་རྩལ་གནས་པ་ཡིན། །དེ་ལ་སོགས་པ་དུ་མ་ཡིས། །སྲོག་གི་དབྱེ་བ་སྣ་ཚོགས་པ། །འདི་རུ་བརྗོད་པར་མི་ནུས་སོ། །མི་རྣམས་ཀྱི་ནི་སྲོག་གྱུར་པ། །མིང་དང་མིང་ཡིན་
དང་པོ་དང་། །རྣམ་པར་ཤེས་པ་ཚེ་གཟུགས་ཡིན། །གཟའ་དང་རྒྱུ་སྐར་ལ་སོགས་པ། །མདོར་ན་བརྟན་གཡོ་མ་ལུས་པའི། །སྲོག་ནི་ཕྱི་དང་ནང་དུ་གནས། །རྣམ་རྟོག་མ་རིག་ཆེན་པོ་སྟེ། །འཁོར་བར་གནས་པ་རྣམས་ཀྱི་སྲོག །སྟོང་ཉིད་སྙིང་རྗེ་མི་འགྱུར་བདེ། །མི་གནས་མྱ་ངན་འདས་
པའི་སྲོག །སྲིད་པ་དང་ནི་མྱ་ངན་འདས། །རྩ་ཡི་བདག་ཉིད་ལུས་ལ་གནས། །ལྟེ་བ་མགྲིན་སྙིང་སྤྱི་བོ་ལ། །རླུང་མེ་ཆུ་ས་ཞེས་བྱ་བ། །ཕྲག་དོག་ཞེ་སྡང་ཆགས་དང་རྨོངས། །ལུས་ངག་ཡིད་གསུམ་མི་ཕྱེད་གནས། །བདུད་བཞི་པོ་ནི་རྣམ་པར་གནས། །སྡུག་བསྔལ་ཀུན་འབྱུང་
ལམ་དང་འགོག །བདེན་པ་བཞི་ཡི་ངོ་བོ་ཉིད། །རྒྱུ་མཐུན་རྣམས་སྨིན་སྐྱེས་བུ་ཅན། །དྲི་མ་མེད་པའི་འབྲས་བུ་བཞི། །སྲིད་པའི་སྐྱེ་གནས་བཞི་པོ་དང་། །ཨེ་ཝཾ་མ་ཡ་ཡི་གེ་བཞི། །དེ་བཞིན་ཡ་མ་རཱ་ཛ་བཞི། །སྤྱན་དང་མཱ་མ་གོས་དཀར་སྒྲོལ། །ཡུམ་བཞི་ཕོ་ནི་རྣམ་པ་སྟེ། །གཤིན་རྗེ་
ཤེས་རབ་པདྨ་དང་། །བགེགས་ཞེས་བྱ་བ་མཐར་བྱེད་བཞི། །ཚད་མེད་བཞི་དང་མཐར་བྱེད་བཞི། །དགའ་བ་བཞི་དང་སྐད་ཅིག་བཞི། །དམ་ཚིག་ལས་ཆོས་ཕྱག་རྒྱ་ཆེ། །ཕྱག་རྒྱ་ཆེ་ཡི་རང་བཞིན་ནོ། །རིགས་བཞི་ཡེ་ཤེས་བཞི་ཡི་དངོས། །སྐུ་བཞི་ཡེ་ཤེས་བཞི་དང་ལྡན། །
ཁམས་གསུམ་ལ་སོགས་ཐམས་ཅད་ཀྱི། །བདག་ཉིད་ཆེན་པོ་རྡོ་རྗེ་འཛིན། །བདུད་ཀྱི་བར་ཆད་བསྲུང་བའི་ཕྱིར། །དེ་ཕྱིར་གསང་བ་བཤད་པར་བྱ། །ཨཱ་ལི་ཀཱ་ལིའི་སྦྱོར་བ་ཡིས། །ལུས་ངག་ཡིད་གསུམ་བསྲུང་བར་བྱའོ། །བདག་ཉིད་ལྷག་པའི་ལྷར་གསལ་བས། །ཨཱ་ལི་

ཀཱ་ལི་རབ་བརྗོད་པས། །སྤྱི་གཙུག་ནས་ནི་རྐང་མཐིལ་བར། །ཤེས་རབ་ཐབས་ཀྱིས་བསྐོར་ཕྱོགས་སུ། །མི་ཕྱེད་པར་ནི་བཅིང་བར་བྱ། །ཨཱ་ལི་ཀཱ་ལི་རྩ་གཉིས་པོ། །ཐབས་དང་ཤེས་རབ་ཡི་གེས་བསྲུང་། །གཉིས་མེད་རྩ་ནི་རྡོ་རྗེས་བསྲུང་། །ཕྱི་དང་ནང་གི་བདག་ཉིད་དོ། །རང་གི་
གསང་སྔགས་རྒྱལ་པོ་ལ། །ཤེས་རབ་ཐབས་ཀྱི་ཡེ་ཤེས་མཆོག །ཐོག་མ་ནས་ནི་མཐའ་རུ་སྦྱར། །ཨོཾ་ཨཱཿཧཱུྃ་ཕཊ་སྦྱོར་བ་ཡི། །ཧཱུྃ་ལས་བྱུང་བའི་རྡོ་རྗེ་ཡིས། །རང་གི་གསང་སྔགས་བརྟན་པར་འགྱུར། །རང་མིང་རིགས་ཀྱི་ཡི་གེ་དག །ཡ་དང་མ་ཡི་ནང་བཅུག་སྟེ། །ཨཱ་ལི་ཀཱ་ལི་
གཉིས་མེད་པའི། །ཟ་མ་ཏོག་གི་ནང་སོན་ལ། །ལྟོ་བའི་ཆུ་སྐྱེས་འོག་ཏུ་སྦ། །བརྒྱ་བྱིན་གྱིས་ཀྱང་མི་ཚུགས་ན། །ཤ་ཟ་ཕྲ་མོ་སྨོས་ཅི་དགོས། །ཐབས་དང་ཤེས་རབ་རོ་གཅིག་པ། །རྣམ་པར་མི་རྟོག་བདེ་བ་ཆེ། །འོད་གསལ་ཏིང་འཛིན་མཆོག་གི་ནི། །ལྷག་པའི་བསྲུང་བ་གཞན་མེད་དོ། །
ས་བཅུ་པས་ཀྱང་མི་ཕྱེད་དོ། །ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ། ཨོཾ་ཨ་ར་པ་ཙ་མུཾ་ཧཱུྃ་ཕཊ། ཀ་ཁ་ག་གྷ་ང་། ཙ་ཚ་ཛ་ཛྙ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵཿ། ཤེས་རབ་ཡི་གེས་འཇིག་རྟེན་དང་། །
འདས་པའི་བསྒྲུབ་བྱ་དབང་དུ་འགྱུར། །རྟག་ཏུ་སྒྲུབ་པ་པོ་རྣམས་ལ། །ཐབས་ཀྱི་ཡི་གེ་བརྟན་པར་འགྱུར། །ཡི་གེ་བརྒྱ་པའི་གསང་སྔགས་ཀྱིས། །ལྷག་པའི་ལྷ་ནི་མཉེས་པར་བྱ། །བླ་མའི་མན་ངག་རྗེས་འབྲང་འདི། །བློ་ལྡན་སློབ་མས་བསྐུལ་བའི་ཕྱིར། །མེ་ལོང་ལྟར་གསལ་
བྱས་པ་ལ། །བླ་མ་ལྷར་བཅས་བཟོད་མཛད་རིགས། །དགེ་བ་གང་དེས་འགྲོ་བ་ཀུན། །བདུད་བཞིའི་དགྲ་ལས་རྒྱལ་གྱུར་ཅིག །དཔལ་གཤིན་རྗེ་གཤེད་ཀྱི་འཚོ་བའི་དེ་ཁོ་ན་ཉིད་ཅེས་བྱ་བ། རྒྱ་གར་གྱི་པཎྜི་ཏ་དརྤཎ་ཨཱ་ཙཱརྱའི་ཞབས་ཀྱིས་མཛད་པ་རྫོགས་སོ།། །།
རྒྱ་གར་གྱིས་ཎྜི་ཏ་དངོས་གྲུབ་བརྙེས་པ་དརྤཎ་ཨཱ་ཙཱརྱ་དེ་ཉིད་དང་། གློ་བོ་ལོ་ཙཱ་བ་དགེ་སློང་ཤེས་རབ་རིན་ཆེན་གྱིས། ཆོས་ཀྱི་རྒྱལ་པོའི་སྐུ་མཁར་ཉི་ཟུངས་སུ་བསྒྱུར་ཅིང་ཞུས་ཏེ་གཏན་ལ་ཕབ་པའོ།། ༄༅༅། །རྒྱ་གར་སྐད་དུ། རཀྟ་ཡ་མ་ཨ་རི་དེ་ཤ་པ་ཨ་དྷིཥྛཱ་ན། བོད་སྐད་དུ།

གཤིན་རྗེ་མཐར་བྱེད་དམར་པོའི་བྱིན་གྱིས་བརླབ་པའི་རིམ་པ། ཁམས་གསུམ་པོ་ནི་མ་ལུས་པ། །སྙིང་རྗེས་ཆགས་པའི་ངོ་བོ་ཉིད། །བདེ་ཆེན་གཤིན་རྗེ་གཤེད་པོ་ལ། །བཏུད་དེ་འདིར་ནི་བྱིན་བརླབ་བཤད། །དེ་ལ་འདིར་ནི་རིམ་པ་འདིས། །རྣལ་འབྱོར་བྱང་ཆུབ་འདོད་
པ་ཡིས། །དད་པ་ཆེན་པོ་བརྟན་པར་བྱས། །བླ་མའི་ཁ་ལས་ཤེས་པར་བྱ། །རྡོ་རྗེ་འཛིན་རྒྱལ་གསང་སྔགས་དང་། །བླ་མ་བཀུར་དང་མཁའ་འགྲོ་བསྙེན། །ཇི་ལྟར་གསུངས་པའི་རྡོ་རྗེ་ལ། །མཆོད་སོགས་ལས་སུ་རུང་བར་བྱ། །མཎྜལ་ལ་སོགས་ཡོ་བྱད་དང་། །བུམ་པ་དཀྱིལ་
འཁོར་གསང་སྔགས་བྲི། །ལྷ་ཡི་གཟུགས་བརྙན་གསལ་བ་དང་། །བཟླས་དང་མཆོད་སོགས་སྔོན་འགྲོ་བས། །བགེགས་སྦྱང་གསོལ་བ་གདབ་པ་དང་། །དམ་ཚིག་གཟུང་དང་སེམས་བསྐྱེད་བྱ། །ཨོཾ་བཛྲ་ཡོ་ག་ཙིཏྟ་ཨུཏྤཱ་ད་ཡཱ་མི་སུ་ར་ཏ་ས་མ་ཡ་སྟྭཾ་ཧཾ། སིདྡྷི་བཛྲ་ཡ་ཐཱ་སུ་ཁཾ། དེ་ཉིད་
གསུམ་གྱི་སྐད་ཅིག་ལ། །ལུས་སོགས་ཡེ་ཤེས་གསུམ་དུ་བྱ། །ཇི་སྐད་གསུངས་པའི་མན་ངག་གིས། །རང་ཉིད་ཡེ་ཤེས་དྲན་པ་དང་། །རྡོ་རྗེ་སྒྲ་ནི་བརྗོད་པར་བྱ། །ཆོ་ག་ལས་བྱུང་ཆུ་སོགས་ལྔའི། །ཇི་བཞིན་དབང་ནི་སྦྱིན་བྱས་ལ། །འདོད་ན་རང་སྙིང་པད་འདབ་ལ། །ཡི་གེ་ལྔ་ནི་
དགོད་པར་བྱ། །ཧཱུྃ་བྷྲཱུཾ་ཨཱཾ་ཛྲཱིཾ་ཁཾ། ཁ་དོག་ལྔ་ཡི་འོད་ཟེར་གྱིས། །མ་ལུས་ལུས་པ་མེད་པ་ཡི། །སངས་རྒྱས་ལ་སོགས་ཡོན་ཏན་ཚོགས། །འོད་ནི་གསལ་བས་ཡང་དང་ཡང་། །བཀུག་ནས་སྤྲོ་དང་བརྟན་པར་བྱ། །རྡོ་རྗེ་རྣམས་དང་དབྱེར་མེད་པ། །སྐད་ཅིག་ཉིད་ལ་ཐོབ་པར་འགྱུར། །
ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། གསང་སྔགས་རྒྱལ་པོ་བྲིས་པ་ཡི། །མཎྜལ་བྱིན་ལ་འདི་སྐད་དོ། །གདོད་ནས་རང་བཞིན་རྣམ་དག་མཆོག །འོད་གསལ་སྲིད་གསུམ་ཀུན་གྱི་གཞི། །ཤིན་ཏུ་བདེ་བའི་བདེ་བ་སྟེ། །སེམས་ཀྱིས་ཡིད་ནི་དེ་ལྟར་བལྟ། །བསྡུས་ཏེ་དམར་པོས་
ཐིག་ལེ་བྱ། །བླ་མའི་མན་ངག་གི་རྗེས་འགྲོ། །རིག་པའི་རྒྱལ་པོའི་བཟླས་པའང་སྦྱིན། །བུ་གའི་སྦྱོར་བ་དམ་པ་ཡིས། །ཡིད་ནི་བདེ་བ་ཅན་དུ་འཕང་། །དེ་ལྟར་རྟེན་དང་བརྟེན་མེད་པར། །གང་ལ་གང་གིས་བདག་འཛིན་མེད། །གདོད་ནས་སྐྱེ་བ་མེད་པ་ཡི། །སྐྱེ་སོགས་སྤྲོས་

ལས་འདས་པས་ན། །སྤྲོས་པ་ཉིད་ནི་སྤྲོས་མེད་པས། །ཟུང་འཇུག་འོད་གསལ་བདེ་ཆེན་ཉིད། །བདེ་བས་བདེ་བ་རྟོགས་པའོ། །རྡོ་རྗེ་འཛིན་རྒྱལ་ཡེ་ཤེས་ཆེ། །གང་ན་བཙལ་ཡང་མི་རྙེད་དེ། །བླ་མ་མཉེས་ཐབས་ཁ་ལས་སོ། །དེ་ནི་རྟོགས་པ་ཙམ་གྱིས་ནི། །སྲིད་དང་མྱ་ངན་འདས་
པ་ཡི། །འཆིང་བ་ཀུན་སྤངས་རྣམ་གྲོལ་གྱི། །ཡེ་ཤེས་མཆོག་ནི་ཐོབ་པའོ། །འཇིག་རྟེན་གསུམ་ན་མཉམ་པ་སྤངས། །འདི་ནི་བླ་མ་གཤིན་རྗེའི་དགྲར་གྱུར་པས། །བདག་ལ་རྗེས་སུ་བཟུང་བས་དངོས་གྲུབ་ཐོབ། །དེ་དོན་གཞན་ལའང་སྦྱིན་ཕྱིར་ཡི་གེ་རུ། །བྲིས་ལ་བླ་མ་མཁའ་འགྲོ་
བཟོད་པར་མཛོད། །ཕོད་ལ་མ་ཡིན་མན་ངག་མེད་ལ་མིན། །ཤིན་ཏུ་གཅེས་པས་ཕངས་པས་ཕངས་པར་བྱ། །དེ་ལྟར་བླ་མའི་དྲིན་ལས་ཟབ་མོ་གསལ་ཕྱེ་བས། །འགྲོ་ཀུན་ལྷན་ཅིག་སྐྱེས་དགའ་བདེ་བའི་གཙོ། །ཀུན་ཁྱབ་བདེ་གསལ་མི་རྟོག་ཡེ་ཤེས་ཟུང་འཇུག་སྐུ། །ཐོབ་ནས་
བདེ་བས་བདེ་ལ་རྣམ་རོལ་དགྱེས་པར་ཤོག །གཤིན་རྗེ་མཐར་བྱེད་དམར་པོའི་བྱིན་གྱིས་བརླབ་པའི་རིམ་པ་གྲུབ་ཐོབ་ཀྱི་འཁོར་ལོས་སྒྱུར་བ་བྲམ་ཟེ་དཔལ་འཛིན་གྱི་ཞལ་སྔ་ནས་མཛད་པ་རྫོགས་སོ།། །།རྒྱ་གར་གྱི་མཁན་པོ་དརྤཎ་ཨཱ་ཙཱརྱ་དང་། གློ་བོ་ལོ་ཙཱ་བ་དགེ་སློང་ཤེས་རབ་རིན་ཆེན་གྱིས་
བསྒྱུར་བའོ།། ༄༅༅། །རྒྱ་གར་སྐད་དུ། དེ་ཝི་དྷ་ར་པྲ་བྷཱ་ཨ་དྷིཥྛཱ་ན། བོད་སྐད་དུ། ལྷ་མོ་འོད་འཛིན་མའི་བྱིན་གྱིས་བརླབ་པ་བཅོམ་ལྡན་འདས་གཏི་མུག་དགའ་མ་ལ་ཕྱག་འཚལ་ལོ། །མ་ལུས་སྲིད་པའི་གཏི་མུག་རྣམས། །མཐར་བྱེད་མ་ལ་རབ་བཏུད་ནས། །སྤྲོས་མེད་
བདུད་རྩི་ཟ་བ་ཡི། །ཏིང་ངེ་འཛིན་གྱིས་བྱིན་བརླབ་བཤད། །མཎྜལ་ལ་སོགས་སྟ་གོན་ཏེ། །བདག་བསྐྱེད་བཟླས་པ་མཆོད་གཏོར་དང་། །འཁོར་ལོ་ཚོགས་ཀྱིས་མཉེས་བྱས་ལ། །ཡོན་བཅས་དད་པའི་སློབ་མ་ལ། །སྡོམ་པ་བྱིན་ལ་དམ་ལ་གཞག །དེ་ནས་འདུན་པ་དྲག་པོ་ཡིས། །
བླ་མ་ལ་ནི་གསོལ་བ་གདབ། །པདྨའི་དབུས་གནས་ཟླ་བ་ལ། །ཨོཾ་སྐྱེས་ལྷ་མོ་མཉམ་བཞེངས་དཀར། །ཆུ་ཤེལ་གྲི་གུག་པདྨའི་སྣོད། །ཐུགས་ཀར་འཛིན་པ་རྒྱན་གྱིས་བརྒྱན། །འོད་དཀར་འཕྲོ་འདུ་ཤེལ་ལྟ་བུ། །དེ་ལྟའི་གཉིས་ཀ་གསལ་བྱས་ནས། །བླ་མའི་སྙིང་གར་

ཇི་བཞིན་གྱི། །ལྷ་མོ་འཐོན་ཏེ་སྙིང་གར་གཞུག །དེ་ཡི་བྲང་དཀྱིལ་ཨོཾ་སྐྱེས་པ། །གྲི་གུག་ཨས་མཚན་ཐོད་ནང་དུ། །ཕྱེད་ནུབ་ཙམ་དུ་བསམ་པར་བྱ། །དེ་ཡི་འོད་ཀྱིས་ཁམས་གསུམ་གྱི། །གཉིས་འཛིན་འཁྲི་བ་ཀུན་བཅད་དོ། །བདག་མེད་ཤེས་རབ་དམ་པ་ཡིས། །
སངས་རྒྱས་མཆོད་དེ་དེ་རྣམས་ཀྱིས། །སྟོང་ཉིད་ཡེ་ཤེས་བཀུག་ལ་བསྟིམ། །ཐོད་པའི་འོད་ཀྱིས་སྲིད་གསུམ་གྱི། །འཛིན་པའི་དུཿཁ་ཀུན་བསལ་ཏེ། །ཟག་མེད་བདེ་བར་གཤེགས་པ་མཆོད། །མི་རྟོག་བདེ་ཆེན་ཡེ་ཤེས་མཆོག །བཀུག་ལ་གཉིས་སུ་མེད་པར་བྱ། །སངས་རྒྱས་
རྣམས་ཀྱི་བདེ་སྟོང་གི །ཡེ་ཤེས་ཟུང་འཇུག་རྨད་བྱུང་གིས། །བདུད་རྩིས་ལུས་གང་བརྟན་གཡོ་ཡི། །བཅུད་བསྡུས་ངོ་བོར་བསམ་བྱས་ལ། །བླ་མའི་ཏིང་འཛིན་ནུས་པས་དབབ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཨ་མོ་ཧ་ར་ཏི་ཨཱ་གཙྪ་ཡ་ཨཱ་གཙྪ་ཡ་ཧཱུཾ་ཧཱུཾ་ཛ་ཛ་ཛ་ཡ། ཨ་ཨཱ།
ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ། འཕར་དང་གཡའ་དང་དགོད་པ་དང་། །བདེ་སྟོང་ཉམས་ནི་སྐྱེ་བར་འགྱུར། །ཇི་སྲིད་བྲན་དུ་ཁས་བླངས་ནས། །ཡོན་ཕུལ་མཉེས་པས་དམ་ཚིག་བཞིན། །བླ་མ་བསྟེན་ལ་བརྩོན་པར་བྱ། །བླ་མ་བློ་མི་བདེ་བ་ཡི། །སློབ་མའི་
དངོས་གྲུབ་འདོད་པ་ནི། །ཆུར་ཤེས་སྨིག་རྒྱུ་ཇི་བཞིན་ནོ། །ཏིང་ངེ་འཛིན་གྱི་བཅུད་ལེན་གྱི་བྱིན་རླབས་གྲུབ་ཐོབ་ཀྱི་བདག་པོ་མཁས་པ་ཆེན་པོ་དཔལ་འཛིན་གྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་དེ་བ་ཨཱ་ཀ་ར་དང་། ལོ་ཙཱ་བ་རིན་ཆེན་བཟང་པོས་བསྒྱུར་བ་ལས། དུས་ཕྱིས་རྒྱ་གར་
ཤར་ཕྱོགས་ཀྱི་པཎྜི་ཏ་དརྤཎ་ཨཱ་ཙཱརྱ་དང་ལོ་ཙཱ་བ་དགེ་སློང་རྡོ་རྗེ་འཛིན་པ་ཞེ་སྡང་རྡོ་རྗེས་བསྒྱུར་ཅིང་ཞུས་ཏེ་སླར་དག་པར་བྱས་སོ། །སྔ་འགྱུར་ལ་འདི་བས་ཚན་ཆེ་ཙམ་གདའོ་གསུང་ངོ་།། ༄༅༅། །རྒྱ་གར་སྐད་དུ། པྲ་བྷ་ཝ་དྷ་རིསཱ་དྷ་ནཾ། བོད་སྐད་དུ། འོད་འཛིན་མ་སྒྲུབ་པའི་ཐབས། བདུད་
རྩིའི་མངའ་བདག་བཅོམ་ལྡན་འདས་གཤིན་རྗེ་གཤེད་ལ་ཕྱག་འཚལ་ལོ། །གང་ཞིག་ཁ་ཟས་ཉུང་བ་ཡིས། །འཚོ་བའི་ཡོ་བྱད་ཀྱིས་ངོས་ན། །སོམ་ཉི་བཟའ་བར་བྱ་བའི་ཕྱིར། །ཏིང་ངེ་འཛིན་གྱི་བཅུད་ལེན་བཤད། །གསུམ་ལ་སྐྱབས་སོང་བྱང་ཆུབ་སེམས། །གནས་བཞི་ལ་སོགས་

སྔོན་སོང་བས། །སྐད་ཅིག་ཉིད་ལས་ཡུལ་རྣམས་དང་། །ཡུལ་ཅན་སྟོང་པའི་ངང་ཉིད་ལས། །པཾ་ལས་མཚོ་སྐྱེས་དབུས་སོན་པའི། །ཉི་མའི་དབུས་སུ་ལྷ་མོ་ནི། །ཆུ་ཤེལ་ལྟ་བུ་གྲི་གུག་དང་། །བདུད་རྩིའི་བུམ་པ་གཡས་དང་གཡོན། །དར་དཀར་གོས་དང་རིན་ཆེན་རྒྱན། །ལང་ཚོ་རྒྱས་
ཤིང་ཤ་རྒྱས་མ། །ལི་བའི་སྐྲ་དང་བུང་བའི་དྲི། །མཛེས་ལྡན་མ་ཡི་བྲང་དབུས་སུ། །རང་དང་འདྲ་བའི་ལྷ་མོ་ནི། །དངས་པའི་ཤེལ་དྲུང་མུ་ཏིག་ལྟར། །དཀར་ཞིང་འཚེར་བའི་འོད་ཅན་བལྟ། །དེ་ནས་རང་སྙིང་ཤིང་འབྲས་ལྟར། །རྩེ་མོ་གྱེན་ལྟར་རྩ་ལྟ་དང་། །བཅས་པ་ཕྱེད་ནས་
མཚོན་གྱིས་གཅད། །སྟེང་གི་ཕྱོགས་ནི་སངས་རྒྱས་ལྷའི། །རྩ་དང་བཅས་ཏེ་ལྟོས་མེད་དབུལ། །ཉོན་མོངས་ལྷ་ཡི་རྩ་སྦུབས་ནས། །དྲི་མ་མ་ལུས་བཤང་ལམ་ནས། །འཐོན་ཏེ་རྒྱ་མཚོའི་ངོགས་སུ་བསྐུར། །རྩ་སྟོང་བུམ་པའི་བདུད་རྩིས་བཀང་། །ལུས་དང་རྩ་དང་ཁམས་
བདུད་རྩི། །ཡེ་ཤེས་རྒྱལ་པོའི་རླུང་རྒྱས་ཏེ། །ཕྲུ་མ་མར་གྱིས་གང་བ་ལྟར། །རང་གི་ལུས་དང་དེ་བཞིན་སེམས། །ཟག་མེད་བདེ་བས་རབ་རྒྱས་ཏེ། །དམིགས་ཤིང་སྤྲོས་པ་བཅད་པ་ཡིས། །ཏིང་ངེ་འཛིན་ལ་གཏད་དེ་གཞག །དེ་ལྟར་ཡང་ཡང་གོམས་པ་ཡིས། །ཏིང་འཛིན་ཟས་སུ་
མི་འགྱུར་བའི། །སྲིན་བུ་ཀུན་ཡང་འཛག་འགྱུར་བས། །དེ་དོན་བྱ་ཕྱིར་གསང་སྔགས་དང་། །སྨོན་ལམ་ཆེ་ལ་འབད་པར་བྱ། །དེ་ལྟར་བརྟེན་ན་ཟག་མེད་ཀྱི། །ཏིང་འཛིན་མཆོག་ནི་སྐྱེ་བ་དང་། །གཉིད་རྨུགས་ལ་སོགས་བྱེད་པའི་ཟས། །ཏིལ་ཙམ་དགོས་པར་མི་འགྱུར་བའི། །སྐྲ་དཀར་
གཉེར་མ་སྤོང་བ་དང་། །ལུས་རྒྱས་དངས་ཤིང་ཤ་སྟོབས་རྒྱས། །ཐིག་ལེ་རྒྱས་ཤིང་འཛག་མི་འགྱུར། །དུས་མིན་འཆི་བས་མི་གོས་ཏེ། །ཕྱི་ནང་མཁའ་འགྲོ་བྲན་དུ་འགྱུར། །འདྲེ་སོགས་གནོད་པར་མི་འགྱུར་ཞིང་། །འགྲོ་ཀུན་དགའ་ཞིང་དབང་དུ་འགྱུར། །ཅི་འདོད་དམ་པའི་མཆོག་
སྟེར་ཏེ། །འདོད་སྲེད་མ་ལུས་རབ་བཅད་ནས། །དུས་ཀྱི་དགྲར་ནི་མྱུར་འགྲོའོ། །དེ་ལྟར་བླ་མས་གནང་བ་ཡི། །མན་ངག་གསལ་ལ་ནོངས་མཆིས་རྣམས། །བཟོད་པར་གནང་ཞིང་དེ་ཡི་ནི། །དགེ་བས་གཤིན་རྗེ་གཤེད་གྱུར་ཅིག །འོད་འཆང་མའི་སྒྲུབ་ཐབས་ཏིང་ངེ་འཛིན་གྱི་བཅུད་ལེན་

གྱི་མན་ངག་ཏིང་ངེ་འཛིན་ལ་མངའ་བརྙེས་པ་དཔལ་འཛིན་གྱིས་མཛད་པ་རྫོགས་སོ།། །།ལོ་པཎ་སྔ་མ་དང་འདྲ། འདིའི་མན་ངག་གཅིག་སྔར་ཡང་སྙན་བརྒྱུད་དུ་བྱུང་འདུག་སྟེ། གཞུང་སྔར་མ་འགྱུར་གསུང་།། ༄༅༅། །རང་གི་སེམས་གོང་དུ་འཕོ་བའི་མན་ངག་
བྱིན་བརླབ་དང་བཅས་པ། དཔལ་རྡོ་རྗེ་འཛིན་རྒྱལ་ཁྲོས་པ་ཆེན་པོ་ཞེ་སྡང་གཤིན་རྗེ་གཤེད་ལ་ཕྱག་འཚལ་ལོ། །རྣལ་འབྱོར་གང་ལ་ཕྱི་དང་ནི། །ནང་གི་འཆི་ལྟས་བརྟག་བྱ་སྟེ། །ངེས་པར་འཆི་འགྱུར་རླུང་ལས་ཏེ། །གསུམ་མམ་ལྔ་འམ་བདུན་ལ་སོགས། །གཡས་གཡོན་
རླུང་ནི་མ་འགྱུར་ན། །ནང་གི་རྩ་དང་རླུང་ཐིག་ལེ། །ལས་མི་རུང་བས་འཆི་ལྟས་སུ། །རྟོགས་ནས་སླུ་བའི་རྣལ་འབྱོར་བྱ། །གཡས་ནས་ལྔ་དང་གཡོན་ནས་གཅིག །སྐྱོང་དང་སྡུད་པའི་ཁྱད་པར་རོ། །གློ་གཡས་ས་ལ་ཕབ་བྱས་ནས། །བརླ་གཡོན་སྟེང་དུ་རྐང་གཡས་གཞག །
གཡོན་གྱི་རྐང་མགོ་སྒྱིད་པར་སྦྲེལ། །ལག་གཡོན་ནུ་མཉེས་མཆན་ཁུང་གཞུག །ལུས་ལྗིད་དཔུང་པ་གཡས་ལ་བསྐུར། །དཔུང་པ་གཡས་པས་ཁ་གཅུས་ལ། །རྡོ་རྗེའི་བཟླས་པས་བསླུ་བར་བྱ། །དེས་ཀྱང་འཕོ་བར་མ་གྱུར་ཚེ། །རྡུབས་ལ་མཐེ་ཆུང་གཡས་ཀྱིས་བཀག །
གཡོན་ནས་འགྲོ་འོང་བྱ་བ་དེད། །རླུང་བཅིང་མན་ངག་དམ་པའོ། །འཁྲུལ་འཁོར་བཟློག་སྟེ་བྱ་བ་ནི། །གཡོན་ནས་འཕོ་བར་མ་འདོད་ནའོ། །དེ་ལྟར་ཕྱི་དུས་ཚེས་གྲངས་ལ། །བརྟགས་ནས་གལ་ཏེ་མི་འཕོ་ན། །དུས་ལ་བབ་པས་རྣམ