Luận tạng Tây Tạng (Tengyur) — Tập 47

ོད་ཡོན་གྱི་སྔགས་སོ། །ཨོཾ་ཧཱུཾ་ཧཱུཾ་ཕཊ་ཕཊ། ཞབས་བསིལ་བའི་སྔགས་སོ། །ཨོཾ་ཝི་ཀྲྀ་ཏཱ་ན་ན་དུཥྚཱཾ་སཏྭ་ད་མ་ཀ་གཿགཿདྲིའི་སྔགས་སོ། །ཨོཾ་ཀུ་མཱ་ར་རཱུ་པི་ཎི་ཛ་ཛ་ཧཱུཾ་ཧ། མེ་ཏོག་གི་སྔགས་སོ། །ཨོཾ་ཧྲཱིཿཧ་ཧོ་ཕཊ། བདུག་པའི་སྔགས་སོ། །ཨོཾ་དཱིཔྟ་ལོ་ཙ་ནེ་བི་ཀྲྀ་ཏཱ་ན་ན་མ་ཧཱ་ཨཊྚ་ཧ་ས་ན་དི་ནི་དཱིཔྟཱ་ཡ་སྭཱ་ཧཱ།
མར་མེའི་སྔགས་སོ། །ཨོཾ་བཛྲ་ནཻ་ཝི་དྱེ་ཨཱཿཧཱུཾ་སྭཱ་ཧཱ། ལྷ་བཤོས་ཀྱི་སྔགས་སོ། །ཨོཾ་ཀཱ་ལ་རཱུ་པ་སརྦ་སཏྭ་ད་མ་ཀ་མ་ཧཱ་བྷཱུ་ཏ་པ་ཏི་ཨི་དཾ་བ་ལིཾ་གྲྀཧྞ་གྲྀཧྣཱ་པ་ཡ་སྭཱ་ཧཱ། གཏོར་མའི་སྔགས་སོ། །དེ་ནས་ཡང་དག་སྔགས་བཟླས་བྱ། །བཟླས་དུས་རང་གི་སྙིང་གར་ནི། །ཉི་མའི་དཀྱིལ་འཁོར་རྣམ་བསམས་ཏེ། །
རང་གི་གསང་སྔགས་རྣམ་བཀོད་བྱ། །དེ་རྗེས་མ་ཡེངས་སེམས་ཀྱིས་ནི། །འབར་བའི་གསང་སྔགས་བཟླས་པར་བྱ། །ཨོཾ་ཡ་མ་རཱ་ཛ། ས་དོ་མེ་ཡ། ཡ་མེ་དོ་རུ། ཎ་ཡོ་ད་ཡ། ཡ་ད་ཡོ་ནི། ར་ཡཀྵེ་ཡ། ཡཀྵེ་ཡཙྪ། ནི་རཱ་མ་ཡ། ཧཱུཾ་ཧཱུཾ་ཕཊ་ཕཊ། འདི་ནི་འཇམ་དཔལ་ཞེས་བྱ་བའི། །རྡོ་རྗེ་འཇིགས་བྱེད་
ཆེན་པོའི་མཆོག །འཁོར་ལོ་མ་ཧེའི་ཞལ་ན་ནི། །རྩ་བའི་སྔགས་ཀྱིས་ལས་ཀུན་བྱེད། །གསང་སྔགས་འབུམ་དུ་བཟླས་པ་ཡིས། །ལས་རྣམས་ཐམས་ཅད་བྱེད་པར་འགྱུར། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཕཊ། འདི་ནི་གསང་སྔགས་རྒྱལ་པོ་སྟེ། །མ་ཧེའི་ཞལ་གྱི་སྦྱོར་བ་ཡིས། །ལས་རྣམས་ཀུན་
ནི་བྱེད་པའོ། །འབུམ་ཕྲག་གསུམ་ནི་བཟླས་ནས་སུ། །ལས་རྣམས་ཐམས་ཅད་རབ་ཏུ་བྱ། །ཨོཾ་ཡ་མཱནྟ་ཀ་ཧཱུཾ་ཕཊ། འདི་ནི་མ་ཧེའི་གདོང་ཅན་གྱི། །སྙིང་པོའི་སྔགས་སུ་རབ་ཏུ་གྲགས། །ཡི་གེ་རེ་ལ་འབུམ་བཟླས་ན། །ལས་རྣམས་ཐམས་ཅད་རབ་ཏུ་འགྲུབ། །ཁམས་གསུམ་ལ་ནི་གང་དང་
གང་། །ཤིན་ཏུ་མཉམ་གཞག་རབ་ཏུ་གྲུབ། །དེ་ནས་བཟླས་པ་བཏང་འདོད་ན། །སྤྱན་དྲངས་ཁྲོ་བོ་གཤེགས་སུ་གསོལ། །ཨོཾ་ཛ་ཡ་ཛ་ཡ་སུ་ཛ་ཡ་བི་ཤྭ་རཱུ་པ་དྷ་རི། གཙྪ་གཙྪ་སྭ་སྠཱ་ནཾ། ཀྲྀ་ཏྭཾ་ཏེ་ན་ཏ་ཐཱ་གཙྪ་སརྦ་བུདྡྷ་ཤྩ་བི་སརྫ་ཡ་མ་མ་ཀརྱཾ་ཀུ་རུ་སྭཱ་ཧཱ། གཤེགས་སུ་གསོལ་བའི་སྔགས་སོ། །
གང་གཞན་ལྷག་པའི་སེམས་མེད་ཀྱང་། །བརྩེ་བའི་སྟོབས་ཀྱིས་འདི་བྲིས་པའོ། །བསོད་ནམས་དེ་ཡིས་འགྲོ་བ་རྣམས། །འཇམ་དཔལ་དབྱངས་དང་མཚུངས་པར་ཤོག །དཔལ་རྡོ་རྗེ་འཇིགས་བྱེད་ཀྱི་སྒྲུབ་ཐབས་རྫོགས་སོ།། །།གྲུབ་པའི་སློབ་དཔོན་ལ་ལི་ཏས་མཛད་པའོ།། །།

༄༅༅། །རྒྱ་གར་སྐད་དུ། ཤྲཱི་བཛྲ་བྷཻ་ར་ཝ་བ་ལིཾ་བི་དྷིཿ། བོད་སྐད་དུ། དཔལ་རྡོ་རྗེ་འཇིགས་བྱེད་ཀྱི་གཏོར་མའི་ཆོ་ག །དཔལ་རྡོ་རྗེ་འཇིགས་བྱེད་ཁྲོས་པའི་རྒྱལ་པོ་ལ་ཕྱག་འཚལ་ལོ། །གདོད་ནས་དག་པའི་རང་བཞིན་གྱིས། །རྡོ་རྗེ་འཇིགས་བྱེད་ཕྱག་འཚལ་འདུད། །བར་ཆད་ཞི་ཕྱིར་
གཏོར་མ་ནི། །འབད་དེ་ཡང་དག་བཤད་པར་བྱ། །དཔལ་ལྡན་རྡོ་རྗེ་འཇིགས་བྱེད་ཀྱི། །གཏོར་མ་བྱེད་པར་འདོད་པ་ཡིས། །བདུད་རྩི་ལྔ་ལ་སོགས་པ་ཡི། །རྫས་ཀྱི་གཏོར་མ་བཤམ་པར་བྱ། །སྒྲུབ་པོ་ལྷོ་ཕྱོགས་ཁ་བལྟས་ལ། །སྐད་ཅིག་ཙམ་གྱིས་འཇིགས་པར་བསྐྱེད། །མདུན་དུ་ཡཾ་དང་
རཾ་ལས་ནི། །རླུང་དང་མེ་ཡི་དབྱིབས་ཅན་བསྐྱེད། །དེ་ཡི་སྟེང་དུ་སྒྱེད་གསུམ་བསམ། །དེ་སྟེང་ཨ་ལས་ཐོད་པའི་སྣོད། །ནང་དུ་ཤ་ལྔ་བདུད་རྩི་ལྔ། །སྐད་ཅིག་ཙམ་གྱིས་བསམ་པར་བྱ། །སྟེང་དུ་ཨོཾ་ཨཱཿཧཱུཾ་ཡིག་རྣམས། །གོ་རིམས་ཇི་བཞིན་བསམ་པར་བྱ། །འོད་སྤྲོས་སྐུ་སོགས་རིམ་བཀུག་
ལ། །རིམ་པ་བཞིན་དུ་བསྟིམ་པ་དང་། །དེ་ཉིད་གསུམ་ནི་བརྗོད་པ་ཡིས། །གཏོར་མ་དག་པར་བསྒོམ་པར་བྱ། །དེ་ནས་རང་གི་སྙིང་གའི་ཧཱུཾ། །འོད་སྤྲོས་རྡོ་རྗེ་འཇིགས་བྱེད་སོགས། །ལྷ་རྣམས་སྤྱན་དྲངས་མདུན་དུ་བསམ། །ཧཱུཾ་བརྗོད་ལྕེ་ནི་བྱིན་གྱིས་བརླབ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཕཊ། བཛྲ་བྷཻ་ར་ཝ་ཨ་
དྷི་པ་ཏི། ཨི་མཾ་བ་ལིཾ། ཁ་ཁ་ཁཱ་ཧི་ཁཱ་ཧི་ཧཱུཾ་ཕཊ་སྭཱ་ཧཱ། ཞེས་པས་དབུལ་བའི་སྔགས་བརྗོད་བྱ། །དེ་རྣམས་གསོལ་བར་བསམས་ནས་ནི། །ལས་ཀྱི་བྱེ་བྲག་ཕྲིན་ལས་བཅོལ། །ཅི་འདོད་པ་ཡི་དངོས་གྲུབ་བླང་། །ཁྱད་པར་དྲག་པོ་བཅོལ་བ་ནི། །བླ་མ་སྨོད་པར་བྱེད་པ་དང་། །དཀོན་མཆོག་གསུམ་ལ་གནོད་
བྱེད་དང་། །བསྟན་པ་ལ་གནོད་བྱེད་པ་དང་། །སེམས་ཅན་ཀུན་ལ་གནོད་བྱེད་དང་། །སྔགས་རྒྱུད་ལ་གནོད་བྱེད་པའི་མི། །འདི་རྣམས་ཁྱེད་ཀྱིས་གསད་དུ་གསོལ། །ཞེས་པས་ཕྲིན་ལས་བཅོལ་ལོ། །དེ་ནས་གནང་བ་བྱིན་པར་བསམ། །དེ་ནས་ཡི་གེ་བརྒྱ་པ་བརྗོད། །ཨོཾ་ཨཱཿཧཱུཾ་མུཿས་མགྲོན་རྣམས་
ནི། །རང་བཞིན་གནས་སུ་གཤེགས་སུ་གསོལ། །དེ་ལྟར་བྱས་པའི་ཕན་ཡོན་ནི། །བར་དུ་གཅོད་པ་ཞི་བ་དང་། །མི་མཐུན་ཕྱོགས་རྣམས་འཇོམས་པ་དང་། །དངོས་གྲུབ་དམ་པ་ཐོབ་པར་གྱུར། །གཞན་ཡང་རབ་ཏུ་སྦྱོར་བ་ན། །ནད་དང་དགྲ་ལ་སོགས་པ་ཡི། །ཚར་གཅོད་རྗེས་གཟུང་ཐམས་ཅད་ནི། །དེ་མ་

ཐག་ཏུ་འགྲུབ་པར་འགྱུར། །རྡོ་རྗེ་འཇིགས་བྱེད་གཏོར་མ་ཡི། །ཆོ་ག་ཕུན་སུམ་ཚོགས་པ་བརྩམས། །གང་ཡོད་བསོད་ནམས་དེ་ཡིས་ནི། །སེམས་ཅན་མ་ལུས་དགྲ་ལས་རྒྱལ་བར་ཤོག །སློབ་དཔོན་ཆེན་པོ་ལ་ལི་ཏ་བཛྲས་མཛད་པ་རྫོགས་སོ།། ༄༅༅། །དཔལ་རྡོ་རྗེ་འཇིགས་བྱེད་ལ་ཕྱག་
འཚལ་ལོ། །ཞི་བའི་ལས་ཀྱི་བྱ་བ་བདུན་བཤད་པར་བྱ་སྟེ། དེ་ལ་དང་པོ་མཆོད་སྦྱིན་བྱ་སྟེ། དེ་ལ་བཀྲ་ཤིས་པའི་གནས་སུ་མཎྜལ་བྱི་དོར་བྱ་སྟེ། མེ་ཏོག་དང་བདུག་པ་དང་། མར་མེ་དང་། དྲི་དང་ལྷ་བཤོས་རྣམས་རབ་ཏུ་གཙང་མར་བྱ། ཁ་ཟས་བཟང་པོའི་སྦྱིན་གཏོར་ཇི་ལྟར་འབྱོར་པ་དང་འཕགས་མ་སོ་སོར་
འབྲང་མ་ལ་སོགས་པའི་མདོ་བཀླག་པ་དང་། ཇི་ལྟར་ནུས་པ་རྣམས་བྱ་སྟེ། མི་རྣམས་ལ་ཡང་ཁ་ཟས་ཀྱིས་དགའ་བར་བྱས་ནས། ཁྱད་པར་དུ་ཡང་བླ་མ་དང་མཁན་པོ་ལ་ཡོན་ཕུལ་ཏེ། སྨོན་ལམ་གདབ་པར་བྱའོ། །མཆོད་སྦྱིན་བྱ་བའི་ཆོ་ག་སྟེ་དང་པོའོ།། །།དེ་ནས་གཏོར་མའི་ལས་བཤད་དེ།
དེ་ནས་ཉི་མ་གཉིས་པ་ལ་མེ་ཏོག་ལ་སོགས་པ་དང་། ཁ་ཟས་བཟང་པོའི་གཏོར་མ་དུ་འབྱོར་པ་དང་། འབྲས་ཆན་དཀར་པོ་དང་། རྡུལ་ཕྱེ་དང་དཀར་གསུམ་སྦྱར་བའི་ལས་ཀྱི་གཏོར་མ་ཆ་གཅིག་དང་བཤམས་ཏེ། སྔགས་པས་ཆས་གོས་གྱོན་ལ་ཀུ་ཤའི་སྟེང་དུ་འདུག་ལ་ཁ་ཤར་དུ་བལྟས་ཏེ། བྱམས་
པའི་སེམས་དང་། ཞི་བའི་ལྟ་སྟངས་དང་ལྡན་པས་གཏོར་མ་སྦྱིན་པར་བྱའོ། །དེ་ལ་དང་པོར་སྔགས་པས། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཿསྭ་བྷཱ་ཝ་ཤུདྡྷོ྅ཧཾ། ཞེས་བརྗོད་དེ། ཆོས་ཐམས་ཅད་བདག་མེད་པ་མངོན་དུ་བྱའོ། །དེ་ནས་ནམ་མཁའི་དཀྱིལ་དུ། ཡཾ་ལས་རླུང་གི་དཀྱིལ་འཁོར་ཟླ་
གམ་དུ་བསྐྱེད་དེ། ཨ་ལས་ཟླ་བའི་དཀྱིལ་འཁོར་དུ་བསམས་ནས། དེ་ལ་ཡི་གེ་དྷཱིཿལས་འཇམ་དཔལ་གཞོན་ནུའི་སྐུ་དཀར་པོ་ཨུཏྤལ་སྔོན་པོ་བསྣམས་པ་ཅིག་བསྐྱེད་དོ། །དེའི་ཐུགས་ཀར་ཨ་ལས་ཟླ་བའི་དཀྱིལ་འཁོར་བསྐྱེད་དོ། །དེའི་འོད་ཟེར་གྱིས་ཕྱོགས་བཅུའི་རྒྱལ་བ་སྲས་དང་
བཅས་པ་རྣམས་བཀུག་ནས། དེ་ཉིད་དུ་ཞུགས་པས་ཐམས་ཅད་ཉི་མའི་དཀྱིལ་འཁོར་ཉིད་དུ་འགྱུར་བར་བྱའོ། །དེའི་སྟེང་དུ་ཧཱུཾ་ལས་རྡོ་རྗེ་འབར་བར་འགྱུར་ཏེ། དེ་ལས་འོད་འཕྲོས་དཔལ་རྡོ་རྗེ་འཇིགས་བྱེད་བསྐྱེད་དོ། །ཚུལ་ཞི་བ་ཁ་དོག་དཀར་པོ་བསྐྱེད་དོ། །ལུས་དང་འོད་ཀྱི་ཚུལ་དུ་གཞལ་

ཡས་ཁང་བསྐྱེད་དོ། །ལྕགས་ཀྱུའི་ཕྱག་རྒྱ་བཅས་ལ་སྔགས་འདིས་སྤྱན་དྲང་ངོ་། །ཨོཾ་ཧྲཱིཿབྷོ་བྷོ་མ་ཧཱ་ཀྲོ་དྷ་ཨཱ་གཙྪ་ཨཱ་གཙྪ་ཨསྨ་ཏ་པཱུ་ཛ་པྲ་ཏི་གྲྀཧྞནྟུ་པྲ་སཱ་དྷཾ་མེ་དྷི་མཾ་ཀུ་རུ་སྭཱ་ཧཱ། ཞེས་སྤྱན་དྲངས་ལ། ཨོཾ་ཧཱུཾ་ཧཱུཾ་ཕཊ་ཕཊ་ཅེས་བསང་གཏོར་བྱས་ནས་མཆོད་པ་དབུལ་བར་བྱའོ། །
ཨོཾ་ཧྲཱིཿཥྚྲྀཿཨ་ཞེས་པ་ན་ཨརྒྷཾ་གྱིའོ། །ཨོཾ་ཝི་ཀྲྀ་ཏཱ་ན་ན་སརྦ་དུཥྚྲ་སཏྭ་ད་མ་ཀ་གཿགཿདྲིའིའོ། །ཨོཾ་ཀུ་མཱ་རཱུ་པི་ཎི་ཛ་ཛ་ཧཱུཾ། མེ་ཏོག་གིའོ། །ཨོཾ་ཧྲཱིཿཧ་ཧ་ཧེ་ཧེ་བདུག་པའོ། །ཨོཾ་དཱིབྟ་ལོ་ཙ་ནེ་བི་ཀྲྀ་ཏ་ཨ་ན་ན་མ་ཧཱ་ཨཊྚཱཊྚ་ཧ་ས་ན་དི་དཱིཔྟཱ་ཡ་སྭཱ་ཧཱ། མར་མེའིའོ། །ལྷ་བཤོས་ཀྱང་ཡོན་ཆབ་ཀྱིས་འབུལ་ལོ། །
དེ་ནས་ཡེ་ཤེས་སྦྱིན་གཏོར་གྱི་ཡེ་ཤེས་བདུད་རྩིའི་འོད་ཟེར་ལས་འདས་པའི་ཡོན་ཏན་ལྔར་གྱུར་པར་དམིགས་ཏེ་འབྱུང་པོའི་ཚོགས་རྣམས་ལ་སྔགས་འདིས་སྦྱིན་པར་བྱའོ། །ཨོཾ་ཀཱ་ལ་རཱུ་པ་སརྦ་སཏྭ། ད་མ་ཀ་མ་ཧཱ་ཀཱ་མ་བྷཱ་ཏ་ཨ་དྷི་པ་ཏི། ཨི་དཾ་བ་ལིཾ། གྲྀཧྞ་གྲྀཧྞཱ་པ་ཡ་སྭཱ་ཧཱ། ཞེས་བདུན་ནམ་ཉེར་གཅིག་
གིས་བཟླས་ནས་སྦྱིན་ནོ། །དེ་ནས་ལས་ཀྱི་གཏོར་མ་ལ། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ། ཆེ་གེ་མོ་ཤཱནྟིཾ་ཀུ་རུ་སྭཱ་ཧཱ། ཞེས་བཟླས་ཤིང་ཕྱོགས་བཅུར་གཏོར་བས། བདག་གི་སྙིང་གའི་ཡི་གེ་དང་། གཏོར་མ་ལས་འོད་དཀར་པོ་འཕྲོས་པས་བསྒྲུབ་བྱའི་ལུས་ངག་ཡིད་གསུམ་པ་ཐིམ་པས་དེ་དག་
ཐམས་ཅད་བྱམས་པ་དང་། སྙིང་རྗེ་ཕྱོགས་མེད་པར་གྱུར་པར་བྱའོ། །འདི་ལྟ་བུ་ནི་ཇི་ལྟར་འགྱུར་བར་བྱས་ན་གཏོར་མའི་ལས་ཡིན་ཏེ་གཉིས་པའོ།། །།དེ་ནས་བཟླས་པའི་ལས་བཤད་དེ། ཉི་མ་གསུམ་པ་ལ་བཟླས་པ་བྱ་བ་ནི། དང་པོར་བདག་ཉིད་དཔལ་འཇིགས་བྱེད་ཆེན་པོར་བསྐྱེད་དེ། མཆོད་པའི་ཆོ་
ག་དང་སྦྱིན་གཏོར་བསྔོས་ཏེ། བདག་གི་སྙིང་གར་ཨ་ལས་ཉི་མའི་དཀྱིལ་འཁོར་གྱི་སྟེང་དུ་བཟླས་པའི་ཡི་གེ་རྣམས་དམིགས་ལ་རྡོ་རྗེའི་ལྕེ་དང་ལྡན་པས་སྔགས་བཟླས་པས་ཡི་གེ་ཡེ་ཤེས་ཀྱི་འོད་ཟེར་གྱིས། བསྒྲུབ་བྱའི་ལུས་དང་སེམས་ལ་ཐིམ་པས་དེ་དག་བྱང་ཆུབ་སེམས་དང་ལྡན་པར་བསམ་མོ། །
དེ་ལ་སྔགས་ནི་འདི་ཡིན་ཏེ། ཨོཾ་ཡ་མ་རཱ་ཛ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་ར་ཡཀྵེ་ཡ། ཡཀྵེ་ཡཙྪ་ནི་རཱ་མ་ཡ། ཆེ་གེ་མོ་ཤཱནྟིཾ་ཀུ་རུ་སྭཱ་ཧཱ། ཞེས་བྱ་བས་ནི་རྩ་བའི་སྔགས་སོ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཆེ་གེ་མོ་ཤཱནྟིཾ་ཀུ་རུ་སྭཱ་ཧཱ། ཞེས་བྱ་བ་ནི་ལས་ཀྱི་སྔགས་ཏེ། དེ་དག་

བཟླས་པར་བྱའོ། །དེའི་དུས་སུ་ཡང་ཆོས་གོས་དང་འདུག་སྟངས་ལ་སོགས་པ་ནི་སྔ་མ་བཞིན་ཏེ། ཐམས་ཅད་དུ་ཡང་ཤིན་ཏུ་ཤེས་པར་བྱའོ། །བཟླས་པའི་ལས་ཏེ་གསུམ་པའོ།། །།ད་ནི་སྦྱིན་སྲེག་གི་ལས་བཤད་དེ། དེ་ལ་ཉི་མ་བཞི་པ་ལ་སྦྱིན་སྲེག་གི་ལས་བྱ་བ་ནི། དང་པོར་བཀྲ་ཤིས་པའི་
གནས་སུ་སྦྱིན་སྲེག་གི་མཎྜལ་བྱ་སྟེ། དེ་ལ་བདག་ཉིད་དཔལ་རྡོ་རྗེ་འཇིགས་བྱེད་ཀྱི་ཏིང་ངེ་འཛིན་དང་ལྡན་པའི་རྣལ་འབྱོར་པས་ཁ་ཤར་དུ་བལྟས་ཏེ། འདུག་ནས་སའི་བདག་པོ་ལ་གཏོར་མ་བྱིན་ཏེ། དེ་ནས་ཧཱུཾ་རབ་ཏུ་འབར་བས་ས་གཞིའི་སྐྱོན་ཐམས་ཅད་དག་པར་བྱའོ། །དེ་ནས་ཐབ་ཁུང་བརྩིགས་
ཏེ། དེ་ཡང་རྒྱར་ཁྲུ་གང་པ་ལ་དཔངས་ཟབས་སུ་ཁྲུ་ཕྱེད་པ་ཀུན་ནས་ཟླུམ་པོར་བསྐོར་ཏེ། སོར་བཞི་དོར་བའི་ཕྱི་རོལ་དུ་ཁ་ཁྱེར་སོར་བརྒྱད་པ་བྱའོ། །དེའི་དབུས་སུ་རྡོ་རྗེ་དཀར་པོ་སྲིད་དུ་སོར་བརྒྱད་པ། རྔམས་སུ་སོར་བཞི་པ་བྱས་ཏེ་གཞག །ཐབ་ཁུང་གི་ནང་ས་ཚོན་དཀར་པོས་བཀང་ལ་ཁ་ཁྱེར་
གྱི་རྩར་མེ་རི་བཏང་། སྟེང་དུ་རྡོ་རྗེ་དཀར་པོས་བསྐོར། དེའི་ཕྱི་རོལ་དུ་འོད་ཟེར་དཀར་པོས་བསྐོར་ཏེ། ཐབ་ཀྱི་མཚན་ཉིད་དོ། །དེ་ནས་རྫས་བསོག་སྟེ། བུད་ཤིང་དཀར་པོ་མཐོ་གང་ཚད་ལ་ཙནྡན་དཀར་པོ་དང་འོ་མས་སྦྱངས་ཏེ་གཞག །མཆོད་སྦྱིན་གྱི་ཤིང་མཛུབ་གང་གི་ཚད་ལ་འདབ་མ་
དང་བཅས་པའི་རྩེ་མོ་ལས་བཅད་པ་སྔ་མ་བཞིན་དུ་ཆུ་གཙང་ལ་སྦང་། གཞན་ཡང་དཀར་གསུམ་མངར་གསུམ་དང་། འབྲུ་སྣ་ཚོགས་དང་། ཀུ་ཤ་དང་ཡོན་ཆབ་རྣམས་གཡས་སུ་གཞག །མེ་ཏོག་ལ་སོགས་པའི་མཆོད་པ་ལྔ་དང་། བསང་གཏོར་དྲི་ཆབ་དང་། ཞལ་བསིལ་བའི་
ཆུ་གཙང་རྣམས་གཡོན་དུ་གཞག །མར་གསར་པ་ཞུ་བའི་ཁུ་བ་དང་། དགང་གཟར་བླུགས་གཟར་རྣམས་མདུན་དུ་གཞག་གོ། །རྫས་བསགས་པའོ། །དེ་ནས་སྔགས་པས་ཆས་གོས་དཀར་པོ་དང་ལྡན་པར་བྱ་སྟེ། རབ་ཏུ་དང་བའི་ཡིད་དང་ལྡན་པས་ཀུ་ཤའི་སྟེང་དུ་སེམས་དཔའི་
སྐྱིལ་ཀྲུང་གི་ཁ་ཤར་དུ་བལྟས་ཏེ། འདུག་ལ་ཞི་བའི་ལྟ་སྟངས་དང་ལྡན་པར་བྱའོ། །སྔགས་པས་འདུག་པའི་རིམ་པའོ། །དེ་ནས་ཐབ་ཁུང་གི་ཁོ་ར་ཁོར་ཡུག་ཏུ་ཙནྡན་དཀར་པོའི་ཆུས་གཏོར་ཏེ། ཐབ་ཀྱི་ནང་དུ་ཤིང་མགོ་མཇུག་མ་ལོག་པར་རྩེ་མོ་གྱེན་དུ་བསྟན་ཏོ། །ཀུན་ནས་ཟླུམ་

པོར་རབ་བརྩིག་གི། །ཤིང་བརྩིག་པའོ། །དེ་ནས་ཀུ་ཤ་ལ་ཨ་མྲྀ་ཏེ་ཀུཎྜ་ལི། སརྦ་བིགྷྣཱ་ནཱ་ཤ་ཡ་ཧཱུཾ་ཕཊ། ཅེས་བྱ་བའི་ལས་ཐམས་ཅད་པའི་སྔགས་འདིས་བསང་གཏོར་བྱས་ནས་ཐབ་ཀྱི་ཁོར་ཡུག་ཏུ་རྩེ་མོ་ཕྱིར་བསྟན་ཏེ་བཤམ་པར་བྱའོ། །ཀུ་ཤ་དགྲམ་པའི་རིམ་པའོ། །
དེ་ནས་རང་ལྷའི་རྣལ་འབྱོར་བསྒོམ་པར་བྱའོ། །རེ་ཞིག་དང་པོར་ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། ཞེས་བརྗོད་པས་ཆོས་ཐམས་ཅད་སྟོང་ཞིང་བདག་མེད་པར་བསྒོམ། དེ་ལྟར་སྟོང་པའི་ངང་ལས་འོག་ཕྱོགས་སུ་ཡི་གེ་ཡཾ་ལས་རླུང་གི་དཀྱིལ་འཁོར་དུ་གྱུར། དེའི་སྟེང་དུ་ཟླ་བའི་
དཀྱིལ་འཁོར་གྱི་སྟེང་དུ་ཡི་གེ་དྷཱིཿལས་འཇམ་དཔལ་གཞོན་ནུར་བསྐྱེད་པར་བྱའོ། །དེའི་ཐུགས་ཀར་ཨཱ་རིང་པོ་ཉི་མའི་དཀྱིལ་འཁོར་བསམ་སྟེ། དེའི་འོད་ཀྱིས་རྒྱལ་བ་སྲས་དང་བཅས་པ་སྤྱན་དྲངས་ཏེ་སླར་འདུས་པ་ཐམས་ཅད་ཉི་མའི་དཀྱིལ་འཁོར་དུ་གྱུར་པར་བྱའོ། །དེའི་སྟེང་དུ་ཧཱུཾ་གི་འཕྲོ་འདུ་
ལས་རྡོ་རྗེ་དཀར་པོར་གྱུར་ཏེ། དེ་ལས་འཕྲོ་འདུ་ལས་དཔལ་རྡོ་རྗེ་འཇིགས་བྱེད་སྐུ་མདོག་དཀར་པོ་ཞི་བའི་ཚུལ་ཅན་བསམས་ཏེ། ཐབ་ཀྱི་ནང་དུ་བྷྲཱུཾ་ལས་གཞལ་ཡས་ཁང་དུ་གྱུར་པར་བསམ་མོ། །ལྷའི་རྣལ་འབྱོར་གྱི་རིམ་པའོ། །དེ་ནས་མེ་སྦར་ཏེ་ཤིང་དཀར་པོ་ལས་བྱུང་བའི་གཙུབ་ཤིང་གི།
མེའམ། བྲམ་ཟེའི་ཁྱིམ་ནས་མེ་བླངས་མ་ཐག་ཏུ་བླུགས་ནས་རླུང་ཡབ་ཀྱིས་གཡབས་ཏེ་སྦར་རོ། །ལས་ཐམས་ཅད་པས་བསང་གཏོར་བྱས་ནས། ཐབ་ཀྱི་ནང་དུ་རྡོ་རྗེ་ལས་མེ་ལྷ་དཀར་པོ་ཚུལ་ཞི་བ་དྲང་སྲོང་གི་ཆ་བྱད་ཅན། ཚངས་པའི་སྐུད་པ་དཀར་པོ་དང་ལྡན་པ་ཕྱག་ན་དབྱུག་པ་དང་
བགྲང་ཕྲེང་དང་སྐྱབས་སྦྱིན་དང་། གུནྡྷེ་བསྣམས་པ་ཅིག་བསྐྱེད་དོ། །དེ་ནས་བདག་གི་ཐུགས་ཀ་ནས་འོད་འཕྲོས་པས་ཤར་ལྷོ་མཚམས་ནས་ཡེ་ཤེས་ཀྱི་མེ་ལྷ་ཚུལ་སྔ་མ་དང་མཐུན་པ་ཅིག་སྤྱན་དྲང་བར་བྱ་སྟེ། ཨོཾ་པཱ་པ་ཨགྣི་ཨ་ཀ་ཙ་མ་མ་ཤཱནྟིཾ་ཀུ་རུ་སྭཱ་ཧཱ། ཞེས་བརྗོད་ཅིང་རླུང་ཡབ་ཀྱིས་
གཡབས་པས་ཤར་ལྷོའི་མཚམས་སུ་འབྱོན་པར་བསམས་ལ་ཆུ་གཙང་དབུལ་ལོ། །ཨོཾ་ཨགྣ་ཡེ་ཨཱ་གཙྪ་ཨཱ་གཙྪ་ཨོཾ་ཨགྣ་ཡེ་སྭཱ་ཧཱ། ཞེས་ཕུལ་བས་ཕྱག་ཞལ་བསིལ་བར་བྱའོ། །དེ་ནས་ཡོན་ཆབ་དང་ཨགྣ་ཡེ་སྭཱ་ཧཱ། ཞེས་བྱ་བས་ཕུལ་ནས་ས་མ་ཡ་སྟྭཾ་ཞེས་བྱ་བས་དམ་ཚིག་གི་མེ་

ལྷ་དང་གཉིས་སུ་མེད་པར་བཞུགས་པར་བསམ་མོ། །དེ་ནས་ལས་ཐམས་ཅད་པས་བསང་གཏོར་བྱས་ལ་སྔ་མ་བཞིན་དུ་དབུལ་ལོ། །དེ་ནས་མཆོད་པ་ལྔ་དབུལ་ལོ། །ཨོཾ་ཨགྣ་ཡེ་དེ་ཝ་ཏ་བཛྲ་པུཥྤེ་ཧཱུཾ། ཞེས་པས་མེ་ཏོག་དབུལ་ལོ། །ཨོཾ་ཨགྣ་ཡེ་བཛྲ་དྷཱུ་པེ་ཧཱུཾ། ཞེས་པས་བདུག་པོས་ཤངས་
ལ་དབུལ་ལོ། །ཨོཾ་ཨགྣ་ཡེ་དེ་ཝ་ཏ་བཛྲ་ཨཱ་ལོ་ཀེ་ཨཱཿཧཱུཾ་ཞེས་པས་མར་མེ་མདུན་དུ་དབུལ་ལོ། །ཨོཾ་ཨགྣ་ཡེ་དེ་བ་ཏ་བཛྲ་གནྡྷེ། ཞེས་དྲི་ཆབ་ཐུགས་ཀར་དབུལ་ལོ། །ཨོཾ་ཨགྣ་ཡེ་དེ་ཝ་ཏ་ནཻ་ཝི་དྱེ། ཞེས་པས་བཤོས་གཙང་ཞལ་དུ་དབུལ་ལོ། །ཨོཾ་ཨགྣ་ཡེ་དེ་བ་ཏ་བཛྲ་ཞེས་པས་སྔ་མ་བཞིན་དུ་
ཞལ་བསིལ་ཞལ་དུ་དབུལ་ལོ། །དེ་ནས་སྲེག་རྫས་རྣམས་ལ་བསང་གཏོར་བྱས་ཏེ། དང་པོར་མར་གྱིས་བླུགས་གཟར་བཀང་སྟེ། ན་མཿས་མནྟ་བུདྡྷ་ནཱཾ་ཨགྣ་ཡེ་སྭཱ་ཧཱ། བདུན་ནམ་ཉི་ཤུ་རྩ་གཅིག་གམ། བརྒྱ་རྩ་བརྒྱད་དུ་དབུལ་ལོ། །དེ་ནས་ཏིལ་དང་མར་བསྲེས་ཏེ། ཨོཾ་སརྦ་ད་ཧ་ན་བཛྲ་སྭཱ་ཧཱ།
ཞེས་དེ་བཞིན་དུ་དབུལ་ལོ། །དེ་ནས་དཱུར་བ་རེ་རེ་ནས་མར་ལ་བསྙུགས་ལ། ཨོཾ་བཛྲ་ཨཱཿཡུ་ཥེ་སྭཱ་ཧཱ། ཞེས་དབུལ་ལོ། །དེ་ནས་འབྲས་ལ་སོགས་པའི་འབྲུ་རྣམས་མར་ལ་བཅུག་སྟེ། བཛྲ་པུཥྚ་ཡེ་སྭཱ་ཧཱ། ཞེས་དབུལ་ལོ། །དེ་ནས་ཀུ་ཤ་དང་། མཆོད་སྤྲིན་གྱི་ཤིང་རྣམས་རེ་རེ་རྩེ་མོ་
མར་ལ་བསྙུགས་ཤིང་དབུལ་ཏེ། ཨོཾ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱ། ཞེས་དབུལ་ལོ། །དེ་ནས་ཡོན་ཆབ་ལ། ཨོཾ་པྲ་ཝ་ར་སཏྐཱ་ར། ཨརྒྷཾ་པྲ་ཏཱིཙྪ་སྭཱ་ཧཱ། ཧཱུཾ་ཞེས་དབུལ་ལོ། །དེ་ནས་རྡོ་རྗེ་དྲིལ་བུ་བླངས་ཏེ་ཚིགས་སུ་བཅད་པ་འདི་བརྗོད་དོ། །སྲིད་པ་རང་བཞིན་གྱིས་དག་ཕྱིར། །ངོ་བོ་ཉིད་
ཀྱིས་དག་པར་བྱེད། །རང་བཞིན་དག་པའི་སེམས་ཅན་རྣམས། །དམ་པ་སྲིད་པའི་བྱེད་པའོ། །བརྗོད་དེ། ཨོཾ་ཀཱ་པ་ཀ་ཨགྣ་ཡེ་མ་མ་ཤཱནྟིཾ་ཀུ་རུ་སྭཱ་ཧཱ། ཞེས་བརྗོད་ཅིང་ཐབ་ཏུ་གཏོར་རོ། །ཕྲིན་ལས་བཅོལ་ཏེ་མེ་ལྷ་ཉིད་མེ་འབར་བའི་རང་བཞིན་དུ་གྱུར་པར་བྱའོ། །དེ་ལ་བྷི་ཏ་ཧོ་ཐབ་
ལ་བསྐོར་བ་ལན་གསུམ་དུ་བྱའོ། །ཕྱག་ཀྱང་བྱའོ། །དེ་ནས་ལས་ཐམས་ཅད་པས་མེ་བསང་གཏོར་བྱས་ཏེ་ཐབ་ཀྱི་དབུས་སུ་དཔལ་རྡོ་རྗེ་འཇིགས་བྱེད་རང་དང་འདྲ་བར་སྔོན་གྱི་རིམ་པས་བསྐྱེད་པས་རང་གི་སྙིང་གའི་ས་བོན་གྱི་འོད་ཟེར་གྱིས་ཡེ་ཤེས་ཀྱི་འཇིགས་བྱེད་སྤྱན་དྲང་བར་བྱ་

སྟེ། ཨོཾ་ཧྲཱིཿབྷོ་བྷོ་མ་ཧཱ་ཀྲོ་དྷ། ཨཱ་གཙྪ་ཨཱ་གཙྪ་ཨསྨ་ཏ་པཱུ་ཛ་པྲ་ཏི་གྲྀཧྨ་བྲ་སཱ་དྷཾ་མེ་དྷཱིཿམཾ་ཀུ་རུ་སྭཱ་ཧཱ། ཞེས་པས་སྤྱན་དྲངས་ལ། ཨོཾ་ཧཱུཾ་ཧཱུཾ་ཕཊ་ཕཊ་ཕྱག་དང་ཞབས་བསིལ་གསོལ་ནས། མཆོད་པ་དབུལ་བར་བྱའོ། །ཨོཾ་ཧྲཱིཿཥྚྲྀཿཨ་ཨརྒྷའིའོ། །ཨོཾ་ཀུ་མཱ་ར་རཱུ་པི་ཎ་
ཛཿཛཿཧཱུཾ། མེ་ཏོག་གིའོ། །ཨོཾ་ཧྲཱིཿཧ་ཧ་ཧེ་ཧེ་ཕཊ། བདུག་པའོ། །ཨོཾ་དཱིཔྟ་ལོ་ཙ་ནི་བི་ཀྲྀ་ཏ་ཨཱ་ན་ན་མ་ཧཱ་ཨཊྚཱཊྚ་ཧ་ས་ན་དི་ནི་དཱིཔྟཱ་ཡ་སྭཱ་ཧཱ། མར་མེའོ། །ཨོཾ་ཝི་ཀྲྀ་ཏཱ་ན་ན་དུཥྚ་སཏྭ་ད་མ་ཀ་གཿགཿདྲིའིའོ། །ཨོཾ་ཧྲཱིཿཥྚྲྀཿཧཿབཤོས་གཙང་གིའོ། །དེ་ནས་སྲེག་རྫས་རྣམས་དབུལ་བར་བྱ་སྟེ།
དེ་ལ་དང་པོ་མར་ལས་དགང་བླུགས་བརྒྱ་རྩ་བརྒྱད་དུ་དབུལ་བར་བྱ་སྟེ། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཆེ་གེ་མོ་ཤཱནྟིཾ་ཀུ་རུ་སྭཱ་ཧཱ། ཞེས་དབུལ་ཏེ། དེ་ནས་ཡམ་ཤིང་ལ་སོགས་པའི་རྫས་ཐམས་ཅད་ལ་སྔགས་འདི་ཉིད་ཀྱིས་བརྒྱ་རྩ་བརྒྱད་དབུལ་ལོ། །དེ་ནས་རྡོ་རྗེ་དྲིལ་བུ་ལག་ཏུ་བླངས་ལ། སྲིད་པ་
རང་བཞིན་དག་པའི་ཚིག་བརྗོད་དེ། ཡུངས་ཀར་ལ་སྔགས་འདི་ཉིད་ཀྱིས་བཟླས་ཏེ་ཕྲིན་ལས་བཅོལ་ལ་བསྐོར་བ་བྱའོ། །དེ་ནས་རྫས་ལྷག་མ་ཐམས་ཅད་མེ་ལྷ་ལ་དབུལ་ཏེ་གསང་སྔགས་འདིས་སླར་གཤེགས་སུ་གསོལ་ལོ། །ཨོཾ་ཛ་ཡ་ཛ་ཡ་སུ་ཛ་ཡ་བི་ཤྭ་རཱུ་པ་དྷ་རི་ཎི་གཙྪ་གཙྪ་སྭ་སྠཱ་ན་ཀྲྀ་ཏཾ་ཏེ་ན།
ཏ་ཐཱ་ག་ཏ་ནཱཾ་སརྦ་བུདྡྷ་ཤྩ་བི་སརྫ་ཡ་མ་མ་ཀཱརྱཾ་ཀུ་རུ་སྭཱ་ཧཱ། ཞེས་བརྗོད་དེ། ཨོཾ་མུཿཞེས་བརྗོད་པས་ཏིང་ངེ་འཛིན་བསྡུས་ཏེ་ཐབ་ཁུང་སྦས་ཏེ་གཞག་གོ། །ཞི་བའི་སྦྱིན་སྲེག་གི་ཆོ་ག་སྟེ་བཞི་པའོ།། །།ད་ནི་ཞི་བའི་འཁོར་ལོའི་ལས་བཤད་དེ། དེ་ནས་ཉི་མ་གཉིས་པ་ལ། བྲམ་ཟེ་ལ་
སོགས་པ་དགེ་བའི་རས་བླངས་ལ། གུར་གུར་དང་གི་ཝང་གིས་གཤིན་རྗེའི་འཁོར་ལོ་ལེ་ཚེ་བཅུ་དྲུག་པ། ཕྱི་རོལ་དུ་མུ་ཁྱུད་གསུམ་གྱིས་བསྐོར་བ་བྲིས་ཏེ། མུ་ཁྱུད་ཕྱི་རོལ་ལ་ཨོཾ་ཡིག་གི་ཕྲེང་བ་བྲི། མུ་ཁྱུད་བར་པ་ལ་ཀ་ཡིག་གི་ཕྲེང་བ་བྲིའོ། །ལེ་ཚེ་བཅུ་དྲུག་དབུས་དང་བཅུ་བདུན་དུ་ཡི་གེ་
སུམ་ཅུ་རྩ་གཉིས་ཀྱི་འཁོར་ལོ་བྲིའོ། །དབུས་ཀྱི་ཡའི་ནང་དུ་ཆེ་གེ་མོ་ཤཱནྟིཾ་ཀུ་རུ་ཞེས་པ་ཡང་བྲིའོ། །དེའི་ཕྱི་རོལ་ལེ་ཚེ་ལ་སོགས་པ་ལ་ཧཱུཾ་རེ་རེ་སྤེལ་ལ་བྲིའོ། །དེའི་ཕྱི་རོལ་གྱི་ལེ་ཚེ་བཅུ་གཉིས་པ་ལ་ཡི་གེ་བཅུ་པའི་སྔགས་དང་སྤེལ་ཏེ་བྲིའོ། །དེ་ལྟར་བྲིས་ནས་སྤྱན་དྲངས་པ་དང་། མཆོད་པ་དབུལ་

བར་བྱ་སྟེ། བདེན་པའི་བྱིན་རླབས་དམིགས་པར་བྱའོ། །དེ་ལྟ་བུ་གཉིས་བྱ། ལྟོ་སྦྱར་གྱི་ནང་དུ་གཞག་པར་བྱའོ། །དེ་ཡང་ས་སྐོར་རིམ་པ་བཞིན་དུ་བྲི། གནམ་སྐོར་ལྡོག་སྟེ་བྲིའོ། །དེ་ལ་མཎྜལ་དཀར་པོ་བྱ་སྟེ། དེའི་སྟེང་དུ་བཞག་ལ་ཐལ་བ་དཀར་པོས་དཀྲིས་ཏེ། མེ་ཏོག་དཀར་པོ་གཏོར་ནས།
བདག་ཉིད་དཀར་པོའི་ཆས་གོས་དང་ལྡན་པས་ཁ་ཤར་དུ་བལྟས་ཏེ། དཔལ་གཤིན་རྗེ་འཇིགས་བྱེད་ཀྱི་ཏིང་ངེ་འཛིན་དང་ལྡན་པས་དང་བའི་སེམས་ཀྱིས་གསང་སྔགས་བཟླས་པར་བྱའོ། །དེ་ལ་གསང་སྔགས་ནི། ཨོཾ་ཡ་མ་རཱ་ཛ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་ར་ཡ་ཀྵེ་ཡ། ཡཀྵེ་ཡཙྪ་
ནི་རཱ་མ་ཡ་ཆེ་གེ་མོ་ཤཱནྟིཾ་ཀུ་རུ་སྭཱ་ཧཱ། ཞེས་པ་ནི་རྩ་སྔགས་སོ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཆེ་གེ་མོ་ཤཱནྟིཾ་ཀུ་རུ་སྭཱ་ཧཱ། ཞེས་པ་འདི་ནི་ལས་ཀྱི་སྔགས་ཏེ། འདི་དག་བཟླས་པར་བྱའོ། །དེ་ནས་གསང་སྔགས་བརྗོད་པ་དང་། འཁོར་ལོ་དེ་ཁྱིམ་གང་ཞི་བར་བྱེད་པའི་གནས་སམ། བཀྲ་ཤིས་གསང་
བའི་གནས་སུ་སྦ་བར་བྱས་ན་ཞི་བར་འགྱུར་རོ། །འདི་ཡང་ཞི་བ་ཉིད་གཙོར་བསྒྲུབ་པའི་དུས་ན་ཉི་མ་བཞི་པ་ཡིན་ལ། གཞན་གྲངས་ཙམ་ཡིན། ཉིན་གཅིག་གིས་ཡིན་ནོ། །ཞི་བའི་འཁོར་ལོའི་ལས་ཀྱི་རིམ་པ་སྟེ་ལྔ་པའོ།། །།ད་ནི་ཞི་བའི་བསམ་གཏན་གྱི་ལས་བཤད་པར་བྱ་སྟེ།
འདི་ཡང་སྔ་མ་བཞིན་དུ་ཉི་མ་དྲུག་པ་ལ་ཆས་གོས་དཀར་བ་དང་ལྡན་པས་ཁ་ཤར་དུ་བལྟས་ཏེ། འདུག་ནས་དཔལ་རྡོ་རྗེ་འཇིགས་བྱེད་ཀྱི་ཏིང་ངེ་འཛིན་དུ་བྱས་ཏེ། དེའི་ཐུགས་ཀར་ཨ་ལས་ཟླ་བའི་དཀྱིལ་འཁོར་གྱི་སྟེང་དུ་པདྨ་དཀར་པོ་འདབ་མ་བརྒྱད་པ་གེ་སར་ལ་པདྨ་ཡི་གེ་ཨ་དཀར་པོ་དང་ལྡན་
པར་བསམ་མོ། །མདུན་དུ་ཟླ་བའི་དཀྱིལ་འཁོར་གྱི་སྟེང་དུ་བསྒྲུབ་བྱ་བསམས་ཏེ། དེ་ནས་ཐུགས་ཀའི་ཨ་ལས་ཡེ་ཤེས་ཀྱི་བདུད་རྩིའི་འོད་ཟེར་འཕྲོས་པས་བསྒྲུབ་བྱའི་ལུས་ངག་ཡིད་ལ་ཐིམ་སྟེ། དེ་ལ་ལུས་ངག་ཡིད་གསུམ་གྱི་སྐྱོན་ཐམས་ཅད་བྱང་ནས། བྱང་ཆུབ་ཀྱི་སེམས་དང་ལྡན་
པར་བསམ་མོ། །ཞི་བའི་བསམ་གཏན་གྱི་ལས་ཀྱི་རིམ་པ་སྟེ་དྲུག་པའོ།། །།དེ་ནས་ཉི་མ་བདུན་པ་ལ་ལས་ཀྱི་ལྷག་ཆད་ཁ་བསྐང་བར་བྱ་སྟེ། གཏོར་མ་དང་སྦྱིན་སྲེག་གི་བྱ་བ་དང་། སོ་སོར་བཤགས་པའི་མདོ་གདོན་པ་དང་། སྡིག་པ་བཤགས་ཤིང་སྨོན་ལམ་གདབ་པར་

བྱའོ། །བྷི་ར་བའི་ཞི་བའི་བྱ་བ་བདུན་པ། པཎྜི་ཏ་ཨ་མོ་གྷ་ཆུང་བས་མཛད་པ་རྫོགས་སོ།། །།དཔལ་རྡོ་རྗེ་འཇིགས་བྱེད་ལ་ཕྱག་འཚལ་ལོ། །དྲག་པོའི་ལས་ཀྱི་བྱ་བ་བདུན་བཤད་པར་བྱ་སྟེ། དེ་ལ་དང་པོར་མཆོད་སྦྱིན་བྱ་སྟེ། འཕགས་པ་མཆོད་པ་དང་། འགྲོ་བ་ལ་
སྦྱིན་གཏོང་བཏང་བ་དང་། བླ་མ་ལ་སོགས་པ་སྤྱན་དྲངས་ཏེ། ཇི་ལྟར་འབྱོར་པའི་ཡོན་ཏན་ཕུལ་ནས། བཀའི་གནང་བ་དང་། སྨོན་ལམ་ནོད་པར་བྱའོ། །མཆོད་སྦྱིན་བྱ་བའི་ཆོ་ག་སྟེ་དང་པོའོ།། །།ད་ནི་གཏོར་མའི་ལས་བཤད་དེ། དེ་ནས་ཉི་མ་གཉིས་པ་ལ་མེ་ཏོག་ནག་པོ་དང་།
ཤ་ཆེན་པོའི་བདུག་སྤོས་དང་། ཏིལ་ཆེན་པོའི་མར་མེ་དང་། བདུད་རྩི་རྣམ་ལྔ་དང་ལྡན་པའི་དྲི་ཆབ་དང་། བཤོས་གཙང་ཀྱང་མི་ལ་སོགས་པའི་གདོང་པ་ཅན་གྱི་ཤ་དང་། རྟ་དང་བོང་བུ་དང་། རྔ་མོ་ལ་སོགས་པ་ཕྱུགས་སྣ་ཚོགས་ཀྱི་ཤ་དང་། ཁྱི་དང་ཝ་ལ་སོགས་པ་གཅན་གཟན་སྣ་
ཚོགས་ཀྱི་ཤ་དང་། གང་ན་བྱ་རྒོད་དང་འུག་པ་ལ་སོགས་ཏེ། འདབ་ཆགས་སྣ་ཚོགས་ཀྱི་ཤ་ལས་བྱས་པའི་བཤོས་གཙང་དང་། གཏོར་མ་དུ་འབྱོར་པ་བྱའོ། །གཞན་ལས་ཀྱི་གཏོར་མ་ཆ་གཅིག་འབྲུ་ནག་པོ་དུག་སྣ་ཚོགས་དང་། མི་དང་ཁྱི་དང་རའི་ཁྲག་དང་། ལྕགས་ཕྱེ་དང་། རྡོ་ཕྱེ་
དང་། སྐྱེ་ཚེ་དང་། ལན་ཚྭ་དང་སྦྱར་བ་དག་ཀྱང་གཞག་གོ། །དེ་ནས་སྔགས་པ་བདག་ཉིད་ཆས་གོས་ནག་པོ་གོན་ནས་ཁ་ལྷོ་ཕྱོགས་སུ་བལྟས་ཏེ། ལྷའི་ཏིང་ངེ་འཛིན་ཁྲོ་བོར་བསྒོམ་པ་མ་གཏོགས་པ་མཆོད་པའི་རང་བཞིན་ལས་བདུན་བཞིན་བསྒོམ་པར་བྱའོ། །དེ་ལ་རེ་ཞིག་དང་པོར་ཨོཾ་སྭ་བྷཱ་
ཝ་ཤུདྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། ཞེས་བརྗོད་དེ། ཆོས་ཐམས་ཅད་བདག་མེད་པའི་བདག་ཉིད་དུ་བསྒོམ་པར་བྱའོ། །དེ་ནས་ནམ་མཁའི་དཀྱིལ་དུ་ཡི་གེ་ཡཾ་ལས་གྲུབ་པ་རླུང་གི་དཀྱིལ་འཁོར་དུ་གྱུར་པའི་སྟེང་དུ་ཡི་གེ་ཨ་ལས་ཟླ་བའི་དཀྱིལ་འཁོར་དུ་བསམས་ཏེ། དེའི་སྟེང་དུ་ཡི་གེ་
ལཾ་ལས་འཇམ་དཔལ་གཞོན་ནུ་སྐུ་མདོག་སེར་པོ་ཨུཏྤལ་བསྣམས་པ་ཞིག་ཏུ་བསྐྱེད་དོ། །དེའི་ཐུགས་ཀར་ཨཱ་རིང་པོ་ལས་ཉི་མའི་དཀྱིལ་འཁོར་བསྐྱེད་དེ། དེའི་འོད་ཟེར་གྱིས་ཕྱོགས་བཅུ་མཐའ་ཡས་པའི་རྒྱལ་བ་སྲས་དང་བཅས་པ་སྤྱན་དྲངས་ནས། སླར་དེ་ཉིད་ལ་ཞུགས་པས་ཐམས་ཅད་

ཀྱང་ཉི་མའི་དཀྱིལ་འཁོར་འོད་ཟེར་འབར་བས་དཔག་ཚད་བརྒྱ་སྟོང་དུ་ཁྱབ་པར་བསམ་མོ། །དེའི་སྟེང་དུ་ཧཱུཾ་ནག་པོ་འོད་ཟེར་ལྔ་དང་ལྡན་པ་འཕྲོས་པས་སྔ་མ་བཞིན་དུ་དེ་ཉིད་ལ་ཞུགས་པས། རྡོ་རྗེ་ཆེན་པོ་ཁ་གདེངས་པ་འོད་ཟེར་འཕྲོ་བ་ཅིག་ཏུ་གྱུར་ཏེ། སྐུ་མདོག་བསྡུས་པ་སྦྱོར་བས་འཇིགས་
བྱེད་ཆེན་པོའི་སྐུར་གྱུར་པར་བྱ་སྟེ། འདི་ལྟར་འཇིགས་བྱེད་ཆེན་པོ་ཞལ་དགུ་པ། ཕྱག་སུམ་ཅུ་རྩ་བཞི་པ། ཞབས་བཅུ་དྲུག་པ། སྐུ་ལས་བསྐལ་པའི་མེ་འབར་བ། ཞལ་ནས་འཇིགས་པ་ཆེན་པོའི་ཕེཾ་སྐད་གནམ་དུ་འདོན་ཅིང་། བསྐལ་པའི་འབྲུག་ལྟ་བུའི་གདངས་སྐད་ཅན། རྐང་པའི་
སྟབས་ཀྱིས་ས་གཞི་གནོན་པ། མི་མགོའི་ཕྲེང་བ་དང་ཐོད་པའི་དབུ་རྒྱན་ཅན་གཅེར་བུ་མཚན་མ་གྱེན་དུ་བགྲེང་བ། ཞལ་དགུ་ལ་མ་ཧེ་དང་། གཡས་ཀྱི་ཞལ་གསུམ་ནི་མཐིང་ག་དང་། དམར་པོ་དང་སེར་པོ་སྟེ་ཁྲོས་པའོ། །གཡོན་པའི་ཞལ་གསུམ་ནི་དཀར་པོ་དང་། དུད་ཀ་དང་ནག་
པོའོ། །རྭ་གཉིས་ཀྱི་དབུས་ཀྱི་ཞལ་དམར་པོའོ། །དེའི་སྟེང་དུ་ཀུན་དུ་བཟང་པོ་སེར་བའོ། །ཕྱག་གཡས་པ་ན་ཀཱརྟ་རི་དང་། བྷི་ཏི་པ་ལ་དང་གཏུན་ཤིང་དང་། ཆུ་གྲི་དང་ཀ་ན་ཡ་དང་། སྟ་རེ་དང་མདུང་དང་། མདའ་དང་ལྕགས་ཀྱུ་དང་། དབྱུག་ཏོ་དང་། ཁ་ཊྭཱཾ་ག་དང་འཁོར་ལོ་དང་རྡོ་རྗེ་དང་།
རྡོ་རྗེ་ཐོ་བ་དང་རལ་གྲི་དང་རྔེ་ཆུང་བསྣམས་པའོ། །ཕྱག་གཡོན་ན་པཱ་ལ་དང་མགོ་བོ་དང་། ཕུབ་དང་རྐང་པ་དང་། ཞགས་པ་དང་གཞུ་དང་། རྒྱུ་མ་དང་དྲིལ་བུ་དང་། ལག་པ་དང་དུར་ཁྲོད་ཀྱི་རས་དང་། དཔལ་རྩེས་ཕུག་པའི་སྐྱེས་བུ་དང་། མེ་ཐབ་དང་ཐོད་ཚལ་དང་། སྡིགས་མཛུབ་དང་
བ་དན་ལྕེ་གསུམ་པ་དང་། རླུང་གི་རས་བསྣམས་པ། ཕྱག་གཉིས་གླང་པོ་ཆེའི་ལྤགས་རློན་འཛིན་པའོ། །གཡས་ཀྱི་ཞབས་རྣམས་ཀྱིས་མི་དང་མ་ཧེ་དང་། ཁྱུ་མཆོག་དང་བོང་བུ་དང་རྔ་མོ་དང་ཁྱི་དང་། ལུག་དང་ཝ་རྣམས་བརྫིས་པའོ། །གཡོན་གྱི་ཞབས་རྣམས་ཀྱིས་བྱ་རྒོད་དང་
འུག་པ་དང་། བྱ་རོག་དང་སུ་ཀར་དང་། ཁྲ་དང་། བྱ་རྒོད་ཆེན་པོ་དང་། མ་དྲི་དང་། བཞད་རྣམས་བརྫིས་པ་སྟེ། དེ་ལྟ་བུ་བསམ་མོ། །དེ་ནས་བདག་གི་སྙིང་གའི་འོད་ཟེར་གྱིས་ཡེ་ཤེས་ཀྱི་གནས་ནས་སྤྱན་དྲང་བར་བྱ་སྟེ། ཨོཾ་ཧྲཱིཿབྷོ་བྷོ་མ་ཧཱ་ཀྲོ་དྷ་ཨཱ་གཙྪ་གཙྪ། ཨསྨ་ཏ་པཱུ་ཛ་པྲ་ཏི་གྲྀཧྞཱ་

པྲ་སཱ་དྷཾ། མེ་དྷཱིཿམཾ་ཀུ་རུ་སྭཱ་ཧཱ། ཞེས་སྤྱན་དྲངས་ཏེ། མངོན་སུམ་དུ་དམིགས་ལ། ཨོཾ་ཧཱུཾ་ཧཱུཾ་ཕཊ་ཕཊ་ཅེས་བྱ་བས་བདུད་རྩི་ལྔ་དང་ལྡན་པའི་ཆུས་སྐུ་ཁྲུས་གསོལ་ལོ། །དེ་ནས་དམར་གྱི་ཨརྒྷ་དབུལ་ལོ། །ཨོཾ་ཧྲཱིཿཥྚྲྀཿཧ་ཞེས་སོ། །དེ་ནས་མེ་ཏོག་ལ་སོགས་པ་དབུལ་ཏེ། ཨོཾ་ཀུ་མཱ་
ར་རཱུ་པི་ཎི་ཛིཿཛཿཧཱུཾ་ཧོ་ཞེས་བརྗོད་དེ། མེ་ཏོག་ནག་པོ་འབུལ་ལོ། །ཨོཾ་ཧྲཱིཿཧ་ཧ་ཧེ་ཧེ་ཕཊ་ཅེས་ཤ་ཆེན་པོ་བདུག་སྤོས་དབུལ་ལོ། །ཨོཾ་དཱིཔྟ་ལོ་ཙ་ནི་ཝི་ཀྲྀ་ཏཱ་ན་ན་མ་ཧཱ་ཨཊྚཱཊྚ་ཧཱ་ས་ན་དི་ནི་དཱིཔྟ་དཱིཔྟཱ་ཡ་སྭཱ་ཧཱ། ཞེས་ཏིལ་ཆེན་པོའི་མར་མེ་དབུལ་ལོ། །ཨ་ཧྲཱིཿཧ་ཧ་ཧེ་ཧེ་ཕཊ་ཕཊ་ཅེས་སྣ་ཚོགས་ཀྱིས་བཤོས་
གཙང་དབུལ་ལོ། །ཨོཾ་ཝི་ཀྲྀ་ཏཱ་ན་ན་དུཥྚ་སཏྭ་ད་མ་ཀ་གཿགཿཞེས་བདུད་རྩི་ལྔ་དང་ལྡན་པའི་དྲི་ཆབ་དབུལ་ལོ། །མཉེས་པར་བསམ་མོ། །དེ་ནས་བདག་གི་འཁོར་ཡུག་ཐམས་ཅད་དུ། གཤིན་རྗེ་དང་རོ་ལངས་དང་། མཁའ་འགྲོ་མ་དང་ཕོ་ཉ་མོ་ལ་སོགས་པས་ཡོངས་སུ་གང་བར་དམིགས་ལ། གསང་སྔགས་
འདིས་གཏོར་མ་སྦྱིན་ནོ། །ཨོཾ་ཀཱ་ལ་རཱུ་པ་སརྦྦ་སཏྭ་ད་མ་ཀ་མ་ཧཱ་བྷཱུ་ཏ་པ་ཏི་ཨི་དཾ་བ་ལིཾ་གྲྀཧྞ་གྲྀཧྞཱ་པ་ཡ་སྭཱ་ཧཱ། ཞེས་སྦྱིན་ནོ། །དེ་ནས་ལས་ཀྱི་གཏོར་མ་ལ། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་སརྦ་ཤ་ཧཱུཾ་ནཱ་ཤ་ཡ་སྟཾ་བྷ་ཡ་ཧཱུཾ་ཕཊ་ཅེས་བརྗོད་ཅིང་བསྒྲུབ་བྱ་སྔོན་དུ་དམིགས་ནས་དེ་ལ་གཏོར་མ་ཞིང་དེས་ཟོས་
པར་དམིགས་ལ་གཏོར་མ་དང་། སྔགས་ཀྱི་འོད་ཟེར་ཡང་དུད་པ་འདྲ་བ་ལ་འོད་སྔོན་དམར་དུ་འཁྱུད་པ། དུག་གི་རང་བཞིན་དུ་གྱུར་པ་དེ་ལ་ཐིམ་པས། ཤ་རུལ་པ་བཞིན་བསམ་ཞིང་གཏོར་མ་གཏང་བར་བྱའོ། །དྲག་པོའི་གཏོར་མའི་ལས་ཏེ་གཉིས་པའོ།། །།ད་ནི་དྲག་
པོའི་བཟླས་པའི་ལས་བཤད་དོ། །དང་པོར་རྡོ་རྗེ་འཇིགས་བྱེད་ཀྱི་སྦྱོར་བ་ཇི་ལྟར་སྔོན་དུ་བརྗོད་པ་བཞིན་དམིགས་ཏེ། མེ་ཏོག་ལ་སོགས་པའི་མཆོད་པ་ལྔ་དང་། སྦྱིན་གཏོང་སྦྱིན་ནས་བཟླས་པ་ལ་འཇུག་པར་བྱའོ། །དེར་བདག་ཉིད་རྡོ་རྗེ་འཇིགས་བྱེད་སྔོན་དུ་བརྗོད་པའི་རིམ་པས་བསྐྱེད་པའི་
སྙིང་གར་ཨཱ་རིང་པོ་ལས་ཉི་མའི་དཀྱིལ་འཁོར་དུ་གྱུར་པའི་སྟེང་དུ་བཟླས་པའི་ཡི་གེ་བསྒོམ་པར། དེ་ལས་འོད་ཟེར་མེ་སྔོ་ནག་ཏུ་འབར་བ་རླུང་ནག་པོས་རབ་ཏུ་བུས་པ་འདྲ་བ། རབ་ཏུ་རྣོ་བ་ལྕགས་ཀྱི་ཕ་བོང་ཡང་སྐད་ཅིག་ཙམ་གྱིས་མེད་པར་བྱེད་པ་རབ་ཏུ་འཕྲོ་བ་བསྒོམ་མོ། །དེས་བསྒྲུབ་པར་

བྱ་བ་བདག་གི་མདུན་ན་མདངས་བྲལ་བ་ལྷ་དང་བྲལ་བ་གོས་མེད་པ་གཅེར་བུ་སྐྲ་ལྷུག་པར་འདུག་པ། ཡན་ལག་ཐམས་ཅད་གནམ་ལྕགས་འབར་བས་བཅིངས་པ། རྨ་དང་ཤུ་བའི་ཕྲེང་བས་རྒྱུས་པ། དེ་ལྟ་བུ་བསམས་ནས། དེའི་ལུས་ཐལ་བའི་ཕུང་པོ་བཞིན་དུ་བསྲེགས་ཏེ། སེམས་མར་
མེ་ཆུས་བསད་པ་བཞིན་བསམ་ཞིང་གསང་སྔགས་བརྗོད་པར་བྱའོ། །དེ་ལ་གསང་སྔགས་འདིའོ། །ཨོཾ་ཡ་མ་རཱ་ཛ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་ར་ཡ་ཀྵེ་ཡ། ཡཀྵེ་ཡཙྪ་ནི་རཱ་མ་ཡ། ཆེ་གེ་མོ་མཱ་ར་ཡ་ཕཊ་ཕཊ། འདི་ནི་རྩ་བའི་སྔགས་ཏེ། ལས་ཐམས་ཅད་པའོ། །
ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཆེ་གེ་མོ་མཱ་ར་ཡ་ཧཱུཾ་ཕཊ། འདི་ནི་ལས་ཀྱི་སྔགས་ཏེ། ལས་ཐམས་ཅད་པའོ། །བཟླས་པ་བརྗོད་ནས་ཡང་མཆོད་པ་ཕུལ་ལ། མི་དམིགས་པའི་དབྱིངས་སུ་བསྡུ་བར་བྱའོ། །འདི་དག་ཞིང་ཆེན་གྱི་སྟེང་ན་འདུག་སྟེ། ཁ་ལྷོ་ཕྱོགས་སུ་བལྟས་ནས་ལུས་དྲི་ཆེན་
གྱིས་བྱུགས་ཏེ། མིག་ཚུགས་སྡང་མིག་མི་འགྱུར་བར་བསྒྲུབ་པར་བྱ་སྔོན་དུ་དམིགས་པ་ལྟ་ཞིང་མ་ཧེ་ཁྲོས་པ་བཞིན་དུ་འདུག་སྟེ། དུང་ཆེན་པོའི་ཕྲེང་བ་ཐོགས་ཏེ། ཆས་གོས་ནག་པོ་གོན་ནས་གསང་སྔགས་བཟླས་པར་བྱའོ། །དྲག་པོའི་བཟླས་པའི་ལས་ཏེ་གསུམ་པའོ།། །།
ད་ནི་དྲག་པོའི་སྦྱིན་སྲེག་གི་ལས་བཤད་དེ། དུར་ཁྲོད་དམ་ལམ་གྱི་བཞི་མདོའམ་ཤིང་རྐང་གཅིག་གི་དྲུང་ངམ། འཐབ་མོའི་གནས་ལ་སོགས་པར་མར་གྱི་ངོ་བོ་ནམ་ཕྱེད་ན་སོང་སྟེ། དང་པོར་སྦྱང་བར་བྱའོ། །རེ་ཞིག་དང་པོར་ལྷའི་ཏིང་ངེ་འཛིན་དང་ལྡན་པས་གཏོར་མ་བསྔོས་ཏེ།
བཀའ་བསྒོ་བར་བྱའོ། །དེ་ནས་ཡི་གེ་ཧཱུཾ་རབ་ཏུ་འབར་བའི་འོད་ཟེར་གྱིས་ས་སྐྱོན་ཐམས་ཅད་དག་པར་བསམ་ཞིང་ས་སྦྱང་བའི་རིམ་པའོ། །དེ་ནས་ཐབ་བརྩིག་པར་བྱ་སྟེ། ཐབ་ཁུང་གྲུ་གསུམ་ཁྲུ་གང་པ་ཟབས་སུ་ཁྲུ་ཕྱེད་པར་བགོས་ཏེ། ཁ་ཁྱེར་སོར་བཞི་པར་བྱས་ལ། དབུས་
སུ་རྡོ་རྗེ་ནག་པོ་འབར་བ་སོར་བརྒྱད་པ་གཅིག་དགོད། ནང་འཁོར་ཡུག་ཏུ་དུར་ཁྲོད་ཀྱི་སོལ་བ་དང་། ཐལ་ཆེན་དང་རཀྟ་བསྲེས་ཏེ་བྱུག །ཁ་ཁྱེར་རྡོ་རྗེ་ར་བ་དང་། མི་ཐོད་ཀྱིས་བསྐོར། ཁོར་ཡུག་ཏུ་སྔོ་ནག་གི་ཕྲེང་བས་བསྐོར་རོ། །ཐབ་བརྩིག་པའི་རིམ་པའོ། །དེ་ནས་

སྲེག་རྫས་བསོགས་ཏེ་མེ་ཏོག་ནག་པོ་ལ་སོགས་པའི་སྔོན་དུ་བསོགས་པའི་མཆོད་པ་ལྔ་དང་། བདུད་རྩི་རྣམ་པ་ལྔ་དང་ལྡན་པའི་བསང་གཏོར་དང་། དུར་ཁྲོད་ཀྱི་མགལ་དུམ་གྱི་བུད་ཤིང་དང་། ཤིང་གདུག་པ་ཚེར་མ་ཅན་གྱི་རྩ་བ་ལས་བྱས་པའི་ཤ་ཀ་ཏེའུ་སོར་བཞི་པ་ལ་
ཡོན་པོར་བཞོགས་པ་དང་། ཁྲག་དང་ཐལ་ཆེན་དང་ཚ་བའི་རྫས་ཀྱི་ནང་དུ་སྦངས་ལ། འབྲུ་ཚྭ་བ་ནག་པོ་ལས་བྱུང་བའི་མར་ཁུ་དང་། མི་རུས་དང་དྲི་ཆེན་དང་། བོང་བུའི་རྟུགས་པ་དང་། ཚེར་མ་དང་སྐྲ་དང་སེན་མོ་རྣམས་མར་ནག་པོ་དང་སྦྱར་ཏེ་བསག་གོ། །རྫས་བསག་པའི་རིམ་
པའོ།། །།དེ་ནས་སྔགས་པས་ཆས་གོས་ནག་པོ་དང་ལྡན་པས། ཁ་ལྷོ་ཕྱོགས་སུ་བལྟས་ཏེ། དུར་ཁྲོད་ཀྱི་མགལ་དུམ་གྱི་ཤིང་གིས་ཐབ་ཁུང་གྲུ་གསུམ་དུ་བརྩིགས་སོ། །རཀྟ་དང་ཚ་བའི་མར་གྱིས་ཀྱང་བྲན་པར་བྱའོ། །ཤིང་གི་བརྩིག་པའི་རིམ་པའོ།། །།དེ་ནས་སྔགས་པ་བདག་
ཉིད་དཔལ་རྡོ་རྗེ་འཇིགས་བྱེད་ཀྱི་ཏིང་ངེ་འཛིན་སྔོན་དུ་བརྗོད་པའི་རིམ་པ་བཞིན་དུ་ཞུགས་ཏེ། རིགས་ངན་གྱི་མེའམ། རྡོ་རྗེ་ནག་པོ་ལས་བྱུང་བའི་མེ་བླངས་ཏེ་རླུང་ཡབ་ཀྱིས་སྦར་བར་བྱའོ། །དེའི་དབུས་སུ་རཾ་ནག་པོ་ལས་མེ་ལྷ་མདོག་ནག་པོ་མེ་གྲུ་གསུམ་གྱི་སྟེང་ན་འདུག་པ་ཞལ་གཅིག་ཕྱག་
བཞི་པ། མིག་གསུམ་པ། སྐྲ་གྱེན་དུ་བརྫེས་པ། རླུང་ནག་པོ་འཚུབ་པའི་ནང་དུ་བཞུགས་པ། ལུས་ལས་མེ་ནག་པོ་འཕྲོ་བ། ཚངས་སྐུད་ནག་པོ་ཅན། ཕྱག་ན་རྡོ་རྗེ་དང་བགྲང་ཕྲེང་དང་དབྱུག་པ་དང་གུནྡྷེ་བསྣམས་པ་བཞི་བསྐྱེད་དོ། །ལྕགས་ཀྱུའི་ཕྱག་རྒྱ་བཅིངས་ལ། ཨོཾ་ཀྲོ་དྷ་
ཨགྣ་ཡེ་ཨ། དེ་ནས་བདག་གི་ཐུགས་ཀ་ནས་འོད་ཟེར་ལྕགས་ཀྱུ་དང་འདྲ་བ་འཕྲོས་ཏེ། ཡེ་ཤེས་ཀྱི་མེ་ལྷ་དེ་དང་འདྲ་བ་ཅིག་སྤྱན་དྲངས་ལ། ཤར་ལྷོ་མཚམས་སུ་གཞུག་པར་བྱ་སྟེ། ལྕགས་ཀྱུའི་ཕྱག་རྒྱ་བཅངས་ལ། ཨོཾ་ཀྲོ་དྷ་ཨགྣ་ཡེ་ཨཱ་གཙྪ་མ་མ་སརྦ་ཤ་ཏྲཱུཾ་མཱ་ར་ཡ་ཧཱུཾ་ཕཊ། ཅེས་
བརྗོད་པས་ཞལ་བསིལ་གསོལ་ནས། དམ་ཚིག་གི་མེ་ལྷ་དང་གཉིས་སུ་མེད་པར་གཞུག་པར་བྱའོ། །དེ་ནས་མེ་ཏོག་ལ་སོགས་པའི་མཆོད་པ་ལྔ་དབུལ་ཏེ། ཨོཾ་ཀྲོ་དྷ་ཨགྣ་ཡེ་བཛྲ་གནྡྷེ་ཧཱུཾ་དྲིའོ། །ཨོཾ་ཀྲོ་དྷ་ཨགྣ་ཡེ་བཛྲ་ནཻ་བི་དྱེ་ཧཱུཾ། བཤོས་གཙང་གིའོ། །དེ་ནས་སྲེག་རྫས་རྣམས་

དབུལ་ཞིང་། ཨོཾ་ཀྲོ་དྷ་ཨགྣ་ཡེ་མ་མ་སརྦ་ཤ་ཏྲཱུཾ་མ་ར་ཡ་ཧཱུཾ་ཕཊ། ཅེས་བྱ་བའི་སྔགས་ཀྱིས་བརྒྱ་རྩ་བརྒྱད་དུ་སྦྱིན་སྲེག་བྱའོ། །དེ་ནས་ཡུངས་ཀར་ཐབ་ཏུ་གཏོར་ལ་གསང་སྔགས་དེ་ཉིད་ཀྱིས་ཕྲིན་ལས་བཅོལ་ལོ། །དེ་ནས་རྡོ་རྗེ་དྲིལ་བུ་བླངས་ཏེ། ཚིགས་སུ་བཅད་པ་འདི་བརྗོད་དོ། །
སྲིད་པ་རང་བཞིན་གྱིས་དག་ཕྱིར། །ངོ་བོ་ཉིད་ཀྱིས་དག་པར་བྱེད། །རང་བཞིན་དག་པའི་སེམས་དཔའ་རྣམས། །དག་པའི་སྲིད་པ་བྱེད་པའོ། །ཞེས་བརྗོད་ནས་མེ་ཐབ་ལན་གསུམ་བསྐོར་བར་བྱའོ། །མེ་ལྷ་མཆོད་པའི་རིམ་པའོ།། །།དེ་ནས་མེ་ལྷ་དེ་མེ་འབར་བའི་རང་བཞིན་དུ་
གྱུར་པར་བསམས་ཏེ། དེའི་དཀྱིལ་དུ་ཡི་གེ་ཧཱུཾ་ནག་པོ་ལས་དཔལ་རྡོ་རྗེ་འཇིགས་བྱེད་རབ་ཏུ་འཁྲུགས་པ་ཞལ་རབ་ཏུ་གདངས་པ། གྲུ་གསུམ་དུ་འདུག་པ། སྐུ་དང་ཞལ་གསུམ་དུ་མེ་སྨུག་ནག་འབར་བ་ཅིག་ཆུ་བསམ་མོ། །དེ་ནས་བདག་གི་སྙིང་ནས་འོད་ཟེར་ལྕགས་ཀྱུ་འདྲ་བ་འཕྲོས་
པས། ཡེ་ཤེས་ཀྱི་དཔལ་རྡོ་རྗེ་འཇིགས་བྱེད་སྤྱན་དྲངས་ཏེ། ལྕགས་ཀྱུའི་ཕྱག་རྒྱ་བཅངས་ལ། ཨོཾ་ཧྲཱིཿབྷོ་བྷོ་མ་ཧཱ་ཀྲོ་དྷ་ཨཱ་གཙྪ་ཨཱ་གཙྪ་པཱུ་ཛ་པྲ་ཏི་གྲྀཧྞཱ་པྲ་ས་དྷཤྩ་མེ་དྷཱི་མཾ་ཀུ་རུ་སྭཱ་ཧཱ། ཞེས་བརྗོད་པས་ཐབ་ཀྱི་དཀྱིལ་དུ་གཉིས་སུ་མེད་པར་བསམ་པར་བྱའོ། །དེ་ནས་བདུད་རྩི་ལྔ་དང་ལྡན་
པའི་ཞལ་བསིལ་དབུལ་ཏེ། ཨོཾ་ཧཱུཾ་ཧཱུཾ་ཕཊ་ཕཊ་ཅེས་སྐུ་ཁྲུས་གསོལ་ཏེ། ཨོཾ་ཧྲཱིཿཥྚྲྀཿཨ་ཞེས་དམར་གྱི་ཨརྒྷ་ཕུལ་ནས། དེ་ནས་མཆོད་པ་རྣམ་ལྔ་དབུལ་ཏེ། ཨོཾ་ཀུ་མཱ་རཱ་རུ་པི་ཎི་ཛཿཛཿཧཱུཾ་ཧ། མེ་ཏོག་ནག་པོའིའོ། །གཏོར་རོ། །ཨོཾ་ཧྲཱིཿཧ་ཧ་ཧེ་ཧེ་ཕཊ་ཕཊ། ཤ་ཆེན་པོའི་བདུག་པའིའོ། །
ཨོཾ་དཱིཔྟ་ལོ་ཙྪ་ནི་ཝི་ཀྲྀ་ཏཱ་ན་ན་མ་ཧཱ་ཨཊྚཊྚ་ཧཱ་ས་ན་དི་ནི་དཱིཔྟ་དཱིཔྟཱ་ལ་སྭཱ་ཧཱ། ཏིལ་ཆེན་པོའི་མར་མེའོ། །ཝི་ཀྲྀ་ཏཱ་ན་ན་དུཥྚ་སཏྭ་ད་མ་ཀ་གཿགཿབདུད་རྩི་ལྔ་དང་སྦྱར་བའི་དྲིའོ། །དེ་ནས་ཤ་ལ་སོགས་པའི་བཤོས་གཙང་དབུལ། ཨོཾ་ཧྲཱིཿཥྚྀཿཡ་དེ་ནས་མར་ལ་སོགས་པའི་སྲེག་རྫས་དབུལ་བར་
བྱ་སྟེ། ཨོཾ་ཧྲཱིཿཥྚྀཿཝི་ཀྲྀ་ཏཱ་ན་ན་ཧཱུཾ། ཆེ་གེ་མོ་མཱ་ར་ཡ་ཕཊ། ཅེས་བརྒྱ་རྩ་བརྒྱད་དབུལ་བར་བྱའོ། །ཡུངས་ཀར་ལ་སྔགས་དེ་ཉིད་ཀྱིས་བཟླས་ཏེ་ཕྲིན་ལས་བཅོལ་ལོ། །དེ་ནས་རྡོ་རྗེ་དྲིལ་བུ་བླངས་ཏེ། ཚིགས་སུ་བཅད་པ་འདིས་བསྟོད་པ། །སྲིད་པའི་རང་བཞིན་གྱིས་དག་ཕྱིར། །ངོ་བོ་ཉིད་ཀྱིས་

དག་པར་བྱེད། །རང་བཞིན་དག་པའི་སེམས་དཔའ་རྣམས། །དམ་པའི་སྲིད་པ་བྱེད་པའོ། །ཞེས་བྱ་བ་དང་། ཆོས་སྐུ་ངོ་བོ་ཉིད་ཀྱི་ཐུགས། །སངས་རྒྱས་རྣམས་ཀྱི་རང་བཞིན་སྐུ། །ཆོས་ཉིད་འཇམ་པ་གསུང་གི་བདག །གདོད་ནས་གྲོལ་བའི་རང་བཞིན་ཏེ། །བློ་གྲོས་ཆེན་
པོའི་བདག་ཉིད་ལ། །གུས་པས་མཆོད་དེ་བསྟོད་ཕྱག་འཚལ། །སྙིང་རྗེ་ཆེན་པོའི་ཐུགས་ལྡན་པས། །འཇིགས་བྱེད་ཆེན་པོའི་ཚུལ་སྟོན་པ། །རྔམ་པའི་གསུང་ནི་འཇིགས་པ་ལ། །མི་འཇིགས་སེམས་ཀྱིས་རབ་ཏུ་གུས། །ཞེས་བསྟོད་ནས། དེ་ནས་སྲེག་རྫས་ལྷག་མ་རྣམས་མེ་ལྷ་ལ་
ཕུལ་ནས། བསྐོར་བར་བྱ་སྟེ། གསང་སྔགས་འདིས་གཤེགས་སུ་གསོལ་ལོ། །ཨོཾ་ཛ་ཡ་ཛ་ཡ་སུ་ཛ་ཡ། བི་ཤྭ་རཱུ་པ་དྷ་རི་ཎྀ་གཙྪ་སྭ་སྠཱ་ནཾ་ཀྲི་ཏཾ་ཏེ་ན། ཏ་ཐཱ་ག་ཏ་ན། སརྦ་བྷུ་ཏཥྩ་བི་སརྫ་ཡ། མ་མ་ཀཱརྱཾ་ཀུ་རུ་སྭཱ་ཧཱ། དེ་ནས་ཨོཾ་མུཿཞེས་པས་ཏིང་ངེ་འཛིན་བསྡུས་ཏེ། ཐབ་ཁུང་ལེགས་
པར་སྦས་ཏེ་གཞག་གོ། །དྲག་པོའི་སྦྱིན་སྲེག་གི་ལས་ཏེ་བཞི་པའོ།། །།དེ་ནས་དྲག་པོའི་འཁོར་ལོའི་ལས་བྱས་ཏེ། དུར་ཁྲོད་ཀྱི་རས་ལ་དུག་དང་ཁྲག་དང་། སྐེ་ཚེ་དང་ལན་ཚྭ་དང་དྲི་ཆེན་ལ་སོགས་པའི་བདུག་པའི་རྫས་ཀྱིས་ལེགས་པར་བྱུགས་ལ་སྣག་ཚ་ཡང་རྫས་དེ་རྣམས་དང་།
ཤིང་ད་དུ་ར་དང་། ཀ་ན་ཀའི་ཁུ་བ་དང་། དུར་ཁྲོད་ཀྱི་སོལ་བ་སྦྱར་ཏེ་བྱའོ། །བདག་ཉིད་ཁ་ལྷོར་བལྟས་ཏེ་ལྷའི་རྣལ་འབྱོར་དང་ལྡན་པས་འཁོར་ལོ་བྲི་སྟེ། དབུས་སུ་ལེ་ཚེ་བཅུ་དྲུག་དང་། མུ་ཁྱུད་གསུམ་གྱིས་བསྐོར་བ། མུ་ཁྱུད་དེ་དག་རེ་རེ་ལ་ཡང་། རེ་མིག་སུམ་ཅུ་རྩ་གཉིས་དང་
ལྡན་པར་བྲིའོ། །དེ་ལ་ཡི་གེ་དགོད་པ་ནི་དབུས་སུ་ཡ་ཆེན་པོ་ཅིག་བྲིས་ཏེ། དེའི་ནང་དུ་གང་ལ་བྱ་བའི་མིང་བསྐུལ་ཚིག་ཅན་གྱིས་བསྐོར། དེའི་དབུས་སུ་མིང་གི་ཡི་གེ་དང་པོ་བྲིའོ། །དེ་ནས་རིམ་པ་གཉིས་པ་ལ་ཕྱོགས་བཞིར་མར་མེ་དཀྵེ་བཞི་བྲི། དེ་ནས་རིམ་པ་གསུམ་པ་ལ། རཱ་ཛ་
ས་དོ་རུ་ཎ་ཡོ་ནི་རཱ་ཡ་ཙ་ནི། འདི་རྣམས་བྲིའོ། །ཕྱག་རྒྱ་བེ་ཅོན་བཅས་ཏེ་བྱ་རོག་གི་སྒྲོ་འམ་རུས་ཆེན་བྲི་བར་བྱའོ། །ཡི་གེ་བཅུ་པའི་གསང་སྔགས་དྲན་པར་བྱའོ། །མུ་ཁྱུད་ཀྱི་ཡི་གེ་ནི་དང་པོར་དབྱངས་ཡིག་ལན་གཉིས་དགོད། མུ་ཁྱུད་བར་མ་ལ་ཀ་ཡིག་དང་། ང་ཉ་བོར་བ་སུམ་ཅུ་རྩ་

གཉིས་དགོད། ཐ་མ་ལ་ཕཊ་ཤ་སྟག་དགོད་དོ། །དབུས་ཀྱི་རིམ་པ་གཉིས་པ་ལ་མ་ལ་སོགས་པ་ཡི་གེ་བཞིའི་གཡས་གཡོན་དུ་ཧཱུཾ་རེ་རེ་དང་སྤེལ། དེའི་ཕྱི་རིམ་དུ་ར་ལ་སོགས་པའི་ཡི་གེ་བཅུ་གཉིས་ཀྱི་གནས་སུ་ཡི་གེ་བཅུ་གཉིས་པ་དང་བསྒྲུབ་བྱའི་མིང་སྤེལ་ཏེ་བྲིའོ། །དེ་ལྟ་བུའི་འཁོར་ལོ་
གཉིས་བྲིས་ཏེ། དེ་ཡང་ས་སྐོར་ལོག་པར་བྲི། གནམ་སྐོར་རིམ་པ་བཞིན་བྲི། དེ་ཡང་གཤིན་རྗེའི་ལྟོ་བར་ཚུད་པར་བྲིའོ། །དེ་ནས་མཆོད་པ་དབུལ་ཏེ། བདེ་བའི་བྱིན་རླབས་དམིགས་པར་བྱས་ནས། དེ་དག་ཁ་སྦྱར་ཏེ་ཐོད་པའམ་ཁམ་ཕོར་སར་པའི་གའུ་ཁ་སྦྱར་དུ་གཞག་གོ། །གའུ་
འོག་མའི་ནང་དུ་རླུང་གི་དཀྱིལ་འཁོར་ལ། ཨོཾ་ཆེ་གེ་མོ་ཨཱ་བེ་ཤ་ཨ་ཨ་ཞེས་བྲི། རྒྱབ་ཏུ་སྣ་ཚོགས་རྡོ་རྗེ་བྲི། གོང་མའི་ནང་དུ་མེའི་དཀྱིལ་འཁོར་རཾ་གྱིས་མཚན་པ་བྲི། རྒྱབ་ཏུ་རི་རབ་འཁོར་དང་བཅས་པ་རྩེ་བརྒྱད་ཀྱིས་མཚན་པ། དབུས་སུ་སྣ་ཚོགས་རྡོ་རྗེས་མཚན་པ་བྲིའོ། །གའུ་གཉིས་
ཀྱི་བར་དུ་སྒོ་ཅུང་ཟད་ཅིག་བྱ་སྟེ་བཞག་ལ། ཕྱིས་གའུ་མདར་རམ་ཞུགས་པ་མཐོང་ནས་ཁ་གཅད། སྐུད་པ་ནག་པོས་དཀྲིས་ཤིང་བཏག་ནས་མན་འཇིའི་སྟེང་དུ་བཞག་སྟེ། དུག་སྣ་ཚོགས་ཀྱི་མེ་ལ་ཚ་བར་གྱུར་པ་ཙམ་དུ་བསྲོས་ཤིང་ལྷའི་རྣལ་འབྱོར་དང་ལྡན་པས་ཁ་ལྷོར་བལྟས་ཏེ་
གསང་སྔགས་བཟླས་པར་བྱའོ། །དེ་ལ་དང་པོར་སྔོན་དུ་བརྗོད་པ་བཞིན་དུ། སྔོན་དུ་དཔལ་རྡོ་རྗེ་འཇིགས་བྱེད་ཆེན་པོར་བསྐྱེད་ལ་སྤྱན་དྲང་བ་དང་། མཆོད་པ་དང་གཏོར་མ་བསྔོ་བ་སྔ་མ་བཞིན་བྱས་ནས། སྐུད་པ་ལག་པས་བཟུང་ནས་དུང་ཆེན་པོའི་ཕྲེང་བ་ཐོགས་ཏེ་བཟླས་པར་བྱའོ། །དམིགས་
པ་ནི་བདག་གི་གསང་སྔགས་དང་། འཁོར་ལོའི་སྔགས་ལས་འོད་ཟེར་དུག་གི་མི་ནག་པོ་འཕྲོས། བསྒྲུབ་བྱ་དེ་ན་གནས་པ་བསྲེས་ཏེ། དུར་ཁྲོད་ཀྱི་ཐལ་ཆེན་ལྟར་གྱུར་ཅིང་། དེའི་སེམས་ཆུས་མར་མེ་གསད་པ་ལྟར་གྱུར་པར་བསམ་མོ། །དེ་ཡང་ཉི་མ་དང་པོ་ལ། ཨོཾ་ཡ་མ་ར་ཛ་
ས་དོ་མེ་ཡ། ཆེ་གེ་མོ་པྲ་མ་ཡ་ཀུ་རུ་ཧཱུཾ་ཕཊ། ཅེས་བར་ཆད་མེད་པར་ཁྲི་ཕྲག་གཅིག་བཟླས་སོ། །ཉི་མ་གཉིས་པ་ལ། ཡ་མེ་དོ་རུ་ཎ་ཡོ་ད་ཡ་ཆེ་གེ་མོ་རཀྟ་ཙརྦ་ཡ་ཧཱུཾ་ཕཊ། ཅེས་ཁྲི་ཕྲག་གཅིག་གོ། །གསུམ་པ་ལ་ཡ་ད་ཡོ་ནི་ར་ཡཀྵེ་ཡ་ཆེ་གེ་མོ་མུརྩ་པ་ཡ་ཧཱུཾ་ཕཊ། ཅེས་ཁྲི་ཕྲག་

གཅིག་གོ། །བཞི་པ་ལ་ཡཀྵེ་ཡཙྪ་ནི་རཱ་མ་ཡ། ཆེ་གེ་མོ་མཱ་ར་ཡ་ཧཱུཾ་ཕཊ། ཅེས་ཁྲི་ཕྲག་གཅིག་གོ། །སྒྲུབ་པའི་གྲོགས་མཆོག་གིས་དུས་གསུམ་དུ་མཆོད་པ་དང་གཏོར་མ་སྦྱིན་པར་བྱའོ། །དེ་ནས་ཉི་མ་བཞི་པའི་མཚན་ཕྱེད་ན་དུར་ཁྲོད་དམ། འབྱུང་པོ་དྲག་པོ་གནས་
པའི་སར་ཁྲུ་གང་བརྐོས་ཏེ་སྦས་ནས་གཤིན་རྗེ་ལ་གཏད་དོ། །དེའི་སྦྱོར་བ་ནི་འདི་ཡིན་ཏེ། གྲོག་མཁར་གྱི་ས་ལས་གཤིན་རྗེའི་མི་ཁྲུ་གང་གི་ཚད་ལ། ཁ་ཅིག་ལག་ན་རལ་གྲི་དང་ཞགས་པ་ཐོག་པ་ཅིག་བྱ་སྟེ། དེའི་ལྟོ་བར་གའུ་བཅུག་ནས་དེ་ལ་གཏོར་མ་དང་། དམར་གྱི་ཨརྒྷ་བྱིན་ཏེ་
འདི་སྐད་ཅེས་བསྒོའོ། །ཆོས་ཀྱི་རྒྱལ་པོ་ཁྱོད་ཀྱིས་ལྟ་ན་སྲིད་པ་གསུམ་གྱི་སེམས་ཅན་མི་གནས་པ་མེད་དོ། །དེང་དཀོན་མཆོག་མཆོག་གསུམ་གྱི་བཀས། སེམས་ཅན་འདི་ཟུང་ཤིག །སེམས་ཅན་འདི་ནི་དུས་གསུམ་གྱི་རྒྱལ་བ་རྣམས་ཀྱི་བསྟན་པ་འཇིག་པར་བྱེད་པས། འཇིག་རྟེན་དུ་
ཐར་པའི་ལམ་ནི་འགེགས་ཤིང་། ངན་འགྲོའི་ལམ་འབྱེད་པ་སྟེ། དེ་བས་འདི་ཁྱོད་ཀྱིས་ཟུང་ཤིག །དེ་ལ་བཅོམ་ལྡན་འདས་འཇམ་དཔལ་གཞོན་ནུ་དང་། དཔལ་རྡོ་རྗེ་འཇིགས་བྱེད་ཀྱང་དགྱེས་པར་འགྱུར་རོ་ཞེས་བརྗོད་དོ། །དེ་དང་དེར་ཁ་སྦུབ་ཏུ་མགོ་བོ་ལྷོ་ཕྱོགས་སུ་བསྟན་ཏེ་
སྦ་བར་བྱའོ། །དེ་ནས་རང་གི་གནས་སུ་འོངས་ཏེ། གསང་སྔགས་རྗེས་སུ་བསྐུལ་བར་བྱའོ། །ལས་གྲུབ་པ་དང་དེ་ནས་ཕྱུང་སྟེ། འོ་མ་དང་ཆུས་བཀྲུས་ཏེ་མཆོད་པ་གཙང་མས་བཤགས་པ་དང་། བཟོད་པར་གསོལ་ཏེ་བཏང་ངོ་། །ལས་ཀྱི་སྐབས་འདིར་ཆས་གོས་ནག་པོ་དང་།
ཁྲོ་བོའི་ལྟ་སྟངས་དང་། ཁྲོས་པའི་ཡིད་དང་། དབུགས་འབུད་པ་ལ་སོགས་པ་དང་ལྡན་པར་བྱའོ། །དྲག་པོའི་འཁོར་ལོའི་ལས་རྫོགས་སོ།། །།ད་ནི་དྲག་པོའི་བསམ་གཏན་གྱི་ལས་བཤད་དེ། དེ་ལ་དང་པོ་དཔལ་རྡོ་རྗེ་འཇིགས་བྱེད་ཆེན་པོ་སྔ་མ་བཞིན་དུ་བསྐྱེད་དེ།
མཆོད་པ་དང་གཏོར་མ་བསྔོས་ཏེ། སྔོན་དུ་བསྒྲུབ་བྱ་རླུང་ནག་པོའི་སྟེང་ན། མེ་སྨུག་ནག་འབར་བའི་དཀྱིལ་ན་གོས་དང་བྲལ་བ། ལྷ་དང་བྲལ་བ། ཡན་ལག་ལྕགས་ཀྱིས་ཐག་པས་བཅིངས་པ། སྐྲ་ནག་པ་མེས་བསྲེགས་པ་བཞིན་དུ་གནས་པ་ལ། བདག་གི་ཐུགས་ཀ་ནས་སྲིན་པོ་

རབ་ཏུ་རྔམ་པ་དང་། ཁྲ་དང་འུག་པ་ལ་སོགས་པ་དང་། ཝ་དང་། ཅེ་སྤྱང་ལ་སོགས་པ་ཟ་ཞིང་། རྒྱུ་མ་དང་། ནང་ཁྲོལ་ནམ་མཁའ་ལ་ཀུན་དུ་ཁྱེར་བར་བསྒོམས་ན་འཆི་བར་འགྱུར་རོ། །བསམ་གཏན་གྱི་ལས་རྫོགས་སོ།། །།དེ་ནས་ལས་ཀྱི་ཁ་བསྐང་བར་བྱས་ཏེ། མཆོད་པ་དང་
སྦྱིན་སྲེག་དང་སོ་སོར་བཤགས་པའི་མདོ་གདོན་པ་དང་། སྨོན་ལམ་གདབ་བོ། །དཔལ་རྡོ་རྗེ་འཇིགས་བྱེད་ཀྱི་དྲག་པོའི་ལས་ཀྱི་བྱ་བ་བདུན་པ་དང་། རིམ་པ་བཞིན་དུ་བྱ་བའི་ཆོ་ག །དཔལ་ཨུ་རྒྱན་ཡུལ་དུ་འདུག་པ། དྲེགས་པ་ཅན་འདུལ་བའི་ཐབས་ཉི་ཚེ་བ། བྱང་ཆུབ་ཀྱི་སེམས་དང་ལྡན་པས་
བསྒྲུབ་པར་བྱའོ།། །།རྫོགས་སྷོ།། །།དེ་ནས་གཞན་ཡང་བཤད་པ་ནི། །ལས་ཀྱི་གྲོགས་ཀྱིས་བྱེད་པ་སྟེ། །ཞི་བའི་ལས་ནི་ཟླ་བ་ཡིན། །རྒྱས་པ་དེ་བཞིན་མིག་ཏུ་བསྒྲགས། །དབྱེ་བ་ཡོན་ཏན་ཞེས་བྱ་སྟེ། །དབང་དུ་བྱ་བ་རིག་བྱེད་ཡིན། །དགུག་པ་ཡིད་ལས་དེ་བཞིན་མདའ། །བསྐྲད་
དང་མནན་པ་དབང་པོ་བཞིན། །མནན་པའི་རྗེས་སུ་འབྲང་བ་ཡིས། །གསད་པའི་ལས་ནི་རྒྱ་མཚོར་འདོད། །ལས་རྣམས་དེ་དག་རེ་རེ་ཡང་། །འཕགས་ཚོགས་མཆོད་སྦྱིན་དང་པོ་སྟེ། །ཉི་མ་གཉིས་པར་གཏོར་མ་སྦྱིན། །གསུམ་པ་བཟླས་པ་རྣམ་པར་འབད། །བཞི་པ་སྦྱིན་སྲེག་
འཆང་བར་བྱ། །ལྔ་པ་ལས་ཀྱི་འཁོར་ལོ་བསྐོར། །དྲུག་པ་བསམ་གཏན་རྩེ་གཅིག་བྱ། །བདུན་པ་ལས་ཀྱི་ལྷག་ཆད་བསྐང་། །གྲངས་ཀྱི་ལས་ལ་ཁྱད་པར་དུ། །ལས་ཀྱི་གཙོར་ནི་གང་བསྒྲུབ་དེའི། །འཁོར་ལོ་སྐོར་བ་ཉི་མ་བཞི། །ལས་ཀྱི་བྱེ་བྲག་འདི་ཤེས་ན། །ཞི་བས་
འཇིགས་པ་བརྒྱད་ལས་སྐྱོབ། །རྒྱས་པས་ཡོན་ཏན་དྲུག་དང་འབྱོར། །དབང་གིས་མོས་པ་རྣམས་བཞིར་བསྒྱུར། །དབྱེ་བས་གསང་སྡེ་བརྒྱད་དང་འབྱེད། །མནན་པས་དབང་པོ་དྲུག་འཆིང་བྱེད། །གཞན་ཡང་ཇི་ལྟར་དེ་བཞིན་དུ། །སྔགས་དང་རྫས་ཀྱི་སྦྱོར་བ་ལ། །དཔྱད་ན་དངོས་
གྲུབ་མི་འགྲུབ་སྟེ། །གལ་ཏེ་ཡིད་གཉིས་ཟ་གྱུར་ཏམ། །བསམ་པར་འགྱུར་རམ་དད་པ་ཉམས། །དེ་ཚེ་དངོས་གྲུབ་ཉེ་བ་ཡང་། །ཕྱིར་བཟློག་འགྱུར་བར་གདོན་མི་ཟ། །དད་པ་བརྟན་པར་བསྒྲུབས་པས་ན། །ནམ་མཁའ་མེད་པར་གྱུར་ན་ཡང་། །སྔགས་ཀྱི་དངོས་གྲུབ་མེད་མེད་སྲིད། །

ལྷ་དང་དྲང་སྲོང་གིས་བཤད་པའི། །རིག་སྔགས་སླུ་བ་མི་སྲིད་ན། །འདོད་ཆགས་བྲལ་བ་བཤད་པ་ཡིས། །གསང་སྔགས་སྦྱོར་བས་སླུ་བ་ནི། །མ་བྱུང་འབྱུང་བར་མི་འགྱུར་རོ། །ཆོས་ཉིད་བསམ་གྱིས་མི་ཁྱབ་པའི། །དོན་ལ་ཐེ་ཚོམ་མེད་པ་ཡིས། །མཁས་པ་
ལ་ནི་དངོས་གྲུབ་ཉེ། །རྟོག་ཅིང་དཔྱོད་པའི་རྟོག་གེ་པ། །དེ་ལ་བསྒྲུབ་པའི་དངོས་གྲུབ་རིང་། །མན་ངག་དམ་པ་བསྟན་བྱས་ཀྱང་། །སློབ་མ་ཡིད་གཉིས་ཟ་གྱུར་ན། །དེ་ལ་དངོས་གྲུབ་རིང་བར་བཤད། །བླ་མས་མན་ངག་སྦས་བྱས་ཀྱང་། །སློབ་མ་ཡིད་གཉིས་མི་ཟ་ཞིང་། །
བླ་མའི་མན་ངག་དམ་པ་ཞེས། །གཅེས་སྤྲས་བྱས་ན་འགྲུབ་པར་ངེས། །དེ་ཡི་ཕྱིར་ན་སྔགས་པ་ཡིས། །རང་གི་ཡིད་གཉིས་སྤང་བའི་ཕྱིར། །བླ་མ་མཉེས་པར་བྱ་བ་གཅེས། །རང་གི་ཡིད་པས་ནུས་མཐུ་ཆེ། །གསང་སྟེ་བརྗོད་པས་བར་ཆད་མེད། །ཡོན་ཏན་ཕུལ་བ་བྱས་
པས་ནི། །རང་སེམས་རིན་ཆེན་རྣམ་གཉིས་འགྱུར། །རིན་ཆེན་གཉིས་ལས་གྲུབ་པར་འབྱུང་། །དཀོན་པར་གྱུར་ན་སྔགས་པ་བརྗོད། །བསྔགས་ན་ཡོན་ཏན་འབྱུང་འགྱུར་ཏེ། །བསྔགས་པ་དག་ནི་མ་བྱས་ན། །ཇི་ལྟར་ཡིད་བཞིན་ནོར་བུ་ཡང་། །གང་གིས་བསྔགས་པ་མ་བྱས་
ན། །དེ་ལ་འདོད་ན་མི་སྟེར་རོ། །དད་པ་སངས་རྒྱས་དད་པ་ཆོས། །དད་པ་དགེ་འདུན་དད་པ་མ། །དད་པ་བླ་མ་དད་པ་ཕ། །དད་པ་ལམ་ཆེན་དད་པ་གྲུ། །དད་པ་ཡིད་བཞིན་ནོར་བུ་སྟེ། །དད་པ་གསང་སྔགས་དངོས་གྲུབ་ཉིད། །དད་པ་བསོད་ནམས་ནོར་ཡིན་ཏེ། །དེ་ཡི་ཕྱིར་
ན་སྔགས་པ་ཡིས། །རང་སེམས་དད་པ་བསྐྱེད་པའི་ཕྱིར། །གཞན་ལ་གུས་པས་མཆོག་ཏུ་བསྐུར། །རྫོགས་སོ།། །།དེ་ནས་གཞན་ཡང་བཤད་པར་བྱ། །སྔགས་པས་རྟག་ཏུ་བསྟེན་པ་ནི། །རུས་སྦལ་འོ་མ་ཞེས་བྱ་བ། །དེ་བཞིན་འོད་ཀྱི་ལོ་མ་དང་། །འཇིམ་པ་སྐམ་
པོ་ཉིད་དང་ནི། །དེ་བཞིན་མེ་ཡི་ཁུ་བ་དང་། །སྒྲ་སྣང་གི་ནི་རྫས་དག་དང་། །འདི་རྣམས་རྟག་ཏུ་སྦྱར་ན་ནི། །རང་བཞིན་གྱིས་ནི་ནད་མེད་ཅིང་། །ཚེ་རིང་དབང་པོ་རྒྱས་པ་དང་། །རྟག་ཏུ་ལང་ཚོ་དར་ལ་བབ། །ལྷ་རྣམས་ཀུན་གྱིས་བྱིན་གྱིས་རློབས། །འདི་ལ་སྤྱད་པར་མི་བྱ་སྟེ། །

ཡང་ན་ཉི་མའི་སྦུ་གུས་བཏུང་། །ཏིང་འཛིན་སྔགས་ཀྱིས་བྱིན་བརླབས་ན། །ལས་ཀྱི་རྣམ་སྨིན་སྦྱོང་བར་བྱེད། །རིག་པ་འཛིན་པའི་ས་ལ་གནས། །དེ་བཞིན་ཆོ་ག་བཞིན་དུ་བསྟེན། །ཚེས་གཅིག་སྐྱ་རེངས་ཤར་བ་ནི། །སྣོད་ལ་མ་རེག་རུས་སྦལ་ཞོ། །དྲོད་མ་ཡལ་བར་བཏུང་བ་
འམ། །ཡང་ན་ཉི་མའི་སྦུ་གུས་བཏུང་། །མར་གྱི་ངོ་ཡི་ཚེས་གཅིག་ལ། །འོད་ཀྱི་ལོ་མ་བཙལ་ནས་ནི། །དེ་ཉིད་ནས་ནི་གཟུང་བར་བྱ། །ཞག་གསུམ་ཆུ་ཡི་ཆར་པ་གཏང་། །ལོ་མ་དེ་བཅད་བཟའ་བར་བྱ། །ཡང་ན་ཉི་མའི་སྦུ་གུས་བཏུང་། །འཇིམ་པ་སྐམ་པོ་སྦྱར་ནས་ནི། །ཞག་
གསུམ་ཆུ་ཡི་ནང་དུ་སྦང་། །དེ་བླངས་ནས་ནི་ཡང་སྐམས་ནས། །ཕྱེ་མ་བྱི་ལའི་སྤར་ཚད་རེ། །བ་ཡི་འོ་མ་དང་སྦྱར་ནས། །སྔགས་པས་རྟག་ཏུ་བཏུང་བར་བྱ། །མེ་ཡི་སྡོང་པོ་སེར་པོ་ནི། །ས་ཡི་མར་གྱིས་དྲིལ་ནས་ནི། །ཁ་སྦྱར་སྦྱོར་དང་ལྡན་བྱས་ནས། །མེ་ཆུ་ས་ཡིས་
བཙིར་ནས་ནི། །བཏུང་བའམ་ཉི་མའི་སྦུ་གུས་བཏུང་། །ལན་ཚྭ་བྲལ་བ་དག་ལ་ནི། །ཞག་གསུམ་འཆི་བའི་སྒྲ་བརྙན་རྫས། །ནམ་གྱི་དུས་ལ་སྔགས་པས་བླངས། །ཆ་གསུམ་སྣོད་དུ་ཞག་གསུམ་གཞག །ཁ་ཡི་ཆ་ནི་བྱུག་པ་སྟེ། །དབུས་མའི་ཆ་ནི་བདུད་རྩི་ཉིད། །རྩ་བའི་ཆ་ནི་དོར་
བ་སྟི། །འདི་རྣམས་སོ་སོར་བསྟན་པ་ན། །ཐ་མལ་འབྲས་བུ་གསུམ་གྱི་ཕྱེ། །བྱི་ལའི་སྦར་ཚད་དེ་དང་སྦྱར། །མ་སྦྱར་ན་ཡང་ཉེས་པ་མེད། །ཚོགས་པར་བསྟན་ནས་བཟླ་བར་བྱ། །རེ་རེ་བསྟེན་ཡང་ཉེས་པ་མེད། །དམ་རྫས་རྨད་དུ་བསྒྱུར་ཏེ་བསྟན་པའི་ཆོ་ག་རྫོགས་སོ།། །།
དཔལ་རྡོ་རྗེ་འཇིགས་བྱེད་ལ་ཕྱག་འཚལ་ལོ། །དེ་ནས་ཡང་དག་བཤད་བྱ་བ། །བཅོམ་ལྡན་ཉིད་ཀྱི་སྐུ་གསུང་ཐུགས། །རྡོ་རྗེ་རྣམས་ལས་བྱུང་བ་ཡི། །རྡོ་རྗེ་འཇིགས་བྱེད་ཆེན་པོ་ཡིས། །ལྷོ་ཕྱོགས་རྒྱ་མཚོ་ཕ་རྒལ་ནས། །དེ་ནས་གཤིན་རྗེའི་གྲོང་ཁྱེར་ནི། །ག་ལ་བ་ཡི་གནས་སུ་བྱོན། །
མི་བཟད་ཞབས་ནི་བཅུ་དྲུག་གི །ལྕགས་མཁར་སྒོ་མེད་བཅུ་དྲུག་བརྫིས། །ཡེ་ཤེས་རྩེ་གཅིག་མཚན་མ་ཡི། །དབུས་ཀྱི་ལྕགས་མཁར་ཆེན་པོ་བརྫིས། །དེ་ཚེ་བདུད་ཆེན་ལས་རྒྱལ་ནས། །ཧ་ཧ་ཧི་ཧི་སྒྲ་སྒྲོགས་པ། །ཆོས་ཀྱི་རྒྱལ་པོ་ལ་སོགས་པ། །གཟིར་བཞིན་དུ་ནི་རབ་སྨྲས་པ། །དཔའ་

བོ་ཆེན་པོ་ག་ལ་ཅི། །དཔའ་བོའི་དགོངས་པ་བདག་གིས་བགྱི། །བདག་ཅག་སྲོག་ལ་སྙིང་པོ་རྣམས། །ཚུལ་བཞིན་འབུམ་གྱིས་དཔའ་བོ་བཞེས། །ལྷ་མ་ཡིན་སྡེ་བརྒྱད་ཀྱི་སྲོག་གི་ཡང་སྙིང་ཕུལ་བ་ནི། །གཤིན་རྗེའི་ཡ་ཕུལ་མ་མོས་མ། །སྲིན་པོས་ར་ཕུལ་གནོད་སྦྱིན་ཀྵེ། །
མི་ཡིས་ན་ཕུལ་ས་བདག་སྭ། །བཙན་གྱིས་ཙ་ཕུལ་བདུད་ཀྱིས་ད། །དེ་རྣམས་གཅིག་ཏུ་དྲིལ་བ་ནི། །བྲན་དུ་ཡང་ནི་ཁས་བླངས་སོ། །གཏན་ཚིགས་ཆེན་པོ་དེ་ཡི་ཕྱིར། །ཡེ་ཤེས་ལྷ་ཡིས་དགོངས་པ་དང་། །བསྙེན་པ་ཉམས་འོག་རབ་ཆུད་ནས། །ལྷ་ཡི་བསྙེན་པ་རབ་ཆུད་ནས། །སྔོན་གྱི་
ཐུགས་དམ་ལས་མི་འདའ། །མི་འགྲུབ་པ་ནི་མི་སྲིད་དོ། །ཨོཾ་ཡ་མ་རཱ་ཛཿས་དོ་མེ་ཡ། ཡ་མེ་དོ་རུ། ཎ་ཡོ་ད་ཡ། ཡ་ད་ཡོ་ནི་ར་ཡཀྵེ་ཡ། ཡཀྵེ་ཡཙྪ་ནི་རཱ་མ་ཡ། ཧཱུཾ་ཧཱུཾ་ཕཊ་ཕཊ། དེ་སྐད་སྨྲས་པ་དང་། རྡོ་རྗེ་འཇིགས་བྱེད་ཆེན་པོ་ཡིས། །ཆོས་ཀྱི་རྒྱལ་པོ་ལ་སོགས་པ། །གཤིན་རྗེའི་ཕོ་ཉ་ལ་སོགས་
ཀུན། །སྒྲོལ་བའི་གིང་དུ་བྱིན་གྱིས་བརླབས། །མ་དང་སྲིང་མོ་བུ་མོ་དང་། །འཁོར་བཅས་ཀུན་ལ་བཀའ་བསྒོ་བ། །ལྔ་བརྒྱ་དུས་ཀྱི་ཐ་མ་ལ། །ང་ཡི་བསྟན་པ་འབྱུང་བའི་ཚེ། །རྣལ་འབྱོར་རིག་འཛིན་ལྡན་པ་ལ། །བཀའ་བསྒོ་བ་ཡི་ལས་རྣམས་ཚུལ་བཞིན་གྱིས། །ཞེས་བྱས་དམ་
བཅས་པ་དང་། མནན་བཞིན་དུ་མནན་བོར་རོ། །གཏམ་རྒྱུད་ཀྱི་རྟོགས་པ་རྫོགས་སོ།། ༄༅༅། །རྒྱ་གར་སྐད་དུ། ཤྲི་བཛྲ་བྷཻ་ར་བ་པཱ་ནི་ན་ཨ་པ་ན་ཤུདྡྷ་ནཱ་མ། བོད་སྐད་དུ། དཔལ་རྡོ་རྗེ་འཇིགས་བྱེད་ཀྱི་ཕྱག་མཚན་གྱི་རྣམ་པར་དག་པ་ཞེས་བྱ་བ། བཅོམ་ལྡན་འདས་འཇིག་
རྟེན་དབང་ཕྱུག་སེང་གེའི་སྒྲ་ལ་ཕྱག་འཚལ་ལོ། །མ་རིག་པ་གཅོད་པས་གྲི་གུག །གཟུང་འཛིན་གྱི་རྣམ་པར་རྟོག་པ་འཇོམ་པས་རྡོ་རྗེ་རྩེ་གཅིག་པ། དྲན་པའི་ཉོན་མོངས་པ་འཇོམས་པར་བྱེད་པས་གཏུན་ཤིང་། སྲེད་པ་གཅོད་པར་བྱེད་པས་ཆུ་གྲིའོ། །ལུས་ངག་གི་ཉེས་པ་འཇོམས་པས་
རྡོ་རྗེ་རྩེ་གཅིག་པའོ། །ཕྲག་དོག་འཇོམས་པས་སྟ་རེའོ། །ལྟ་བ་ངན་པ་འཇོམས་པས་མདུང་ངོ་། །དབང་གི་ལས་བྱེད་པས་མདའ་འོ། །འགུགས་པས་ལྕགས་ཀྱུའོ། །ལས་ཀྱི་སྒྲིབ་པ་འཇོམས་པར་བྱེད་པས་དབྱུག་ཏོའོ། །ཁ་ཊྭཱཾ་ག་ནི་བྱང་ཆུབ་སེམས་ཀྱི་ངོ་བོ་ཉིད་དོ། །ཤེས་བྱའི་

སྒྲིབ་པ་གཅོད་པ་ནི་འཁོར་ལོའོ། །ཡེ་ཤེས་ལྔ་རོ་མ་ཉམས་པར་གྱུར་པས་བདག་ཉིད་རྡོ་རྗེའོ། །མི་ཤེས་པའི་སྒྲིབ་པ་འཇོམས་པས་རྡོ་རྗེ་ཐོ་བའོ། །རལ་གྲིའི་དངོས་གྲུབ་སྟེར་བས་ན་རལ་གྲིའོ། །མཆོག་ཏུ་དགའ་བའི་སྒྲས་སངས་རྒྱས་ཐམས་ཅད་ཡང་དག་པར་བསྐུལ་བས་ཅང་ཏེའུའོ། །བདེ་
བ་ཆེན་པོ་དང་སྙིང་རྗེ་ཆེན་པོའི་རང་བཞིན་ནི་སྣ་ཚོགས་ཀྱིས་བཀང་བའི་ཐོད་པའོ། །སྒྲིབ་པ་ཐམས་ཅད་འཇོམས་པས་ཚངས་པའི་མགོ་བོའོ། །བདུད་ལས་རྒྱལ་བའི་རང་བཞིན་གྱི་ཕུབ་པོ། །སེམས་ཅན་ཐམས་ཅད་དང་ཆོས་ཐམས་ཅད་དུ་རྟོགས་པའི་རང་བཞིན་མེད་པས་རྐང་པའོ། །ཡང་
དག་པའི་ཡེ་ཤེས་འཆིང་བས་ཞགས་པའོ། །འཇིག་རྟེན་གསུམ་ལས་རྒྱལ་བས་ན་གཞུའོ། །སྟོང་པ་ཉིད་ཀྱིས་ན་རྒྱུ་མའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ནི་དྲིལ་བུའོ། །ཆོས་ཐམས་ཅད་བྱེད་པ་པོ་ཉིད་ཀྱིས་ལག་པའོ། །ཆོས་ཐམས་ཅད་བདག་མེད་པ་ཉིད་ཀྱིས་ན་དུར་ཁྲོད་ཀྱི་
རས་སོ། །ཆོས་ཐམས་ཅད་སྟོང་པ་ཉིད་ཀྱིས་ཕུག་པ་ཉིད་ཀྱིས་སྐྱེས་བུ་གསལ་ཤིང་ལ་བཙུགས་པའོ། །ཆོས་ཐམས་ཅད་འོད་གསལ་བ་ཉིད་ཀྱིས་ན་མེ་ཐབ་བོ། །དམ་ཚིག་དག་པ་ཉིད་ཀྱིས་ན་ཐོད་པ་བཏུང་བས་བཀང་བའོ། །བདུད་རྣམས་བསྡིགས་པ་ཉིད་ཀྱིས་སྡིགས་མཛུབ་བོ། །སྐུ་གསུང་
ཐུགས་རྣམས་རོ་གཅིག་པ་ཉིད་ཀྱིས་འཕན་རྩེ་གསུམ་པའོ། །ཆོས་ཐམས་ཅད་འོད་གསལ་སྒྱུ་མ་ལྟ་བུ་ཉིད་ཀྱིས་ན་རླུང་གིས་བསྐྱོད་པའི་བ་དན་ནོ། །རྨོངས་པའི་གླང་པོ་དྲལ་བས་ན། གླང་པོའི་པགས་པའོ། །ཞབས་གཡས་ཀྱི་གདན་བརྒྱད་ནི་དངོས་གྲུབ་ཆེན་པོ་བརྒྱད་རྣམ་པར་དག་
པའོ། །མིག་སྨན་རི་ལུ། རལ་གྲི་གསེར་འགྱུར། བཅུད་ལེན་རྐང་བྱུག །ས་འོག །ཕྱག་རྒྱ་ཆེན་པོའོ། །ཞབས་གཡོན་རྣམས་ཀྱི་གདན་ནི་བྱ་རྒོད་ལ་སོགས་པ་བརྒྱད་ནི་དབང་ཕྱུག་བརྒྱད་རྣམ་པར་དག་པ་སྟེ། འདོད་པ་རྨོངས་པ། ཁྲོ་བ་སེར་སྣ། འཇིགས་པ་གྲགས་གཙང་སྨྲེ།
ངོ་ཚ་བ་ཕྲ་མ། ཁམས་གསུམ་གྱི་མངའ་བདག་ཉིད་ཀྱིས་མ་ཧེའི་གདོང་པ་ཅན་ནོ། །རྭ་གཉིས་ཀྱིས་བདེན་པ་གཉིས་རྣམ་པར་དག་པའོ། །མཁས་པ་ཆེན་པོ་ཏ་ཐཱ་ག་ཏ་རཀྵི་ཏས་མཛད་པའོ། །ཨུ་ཏོ་པོ་པ་ཏི་དང་། བོད་ཀྱི་ལོ་ཙཱ་བ་མལ་གྱོ་བློ་གྲོས་ཀྱིས་བསྒྱུར་བ་རྫོགས་སོ།། །།

༄༅༅། །རྒྱ་གར་སྐད་དུ། ཤྲཱི་བཛྲ་མ་ཧཱ་བྷཻ་ར་བ་སཱ་དྷ་ན། བོད་སྐད་དུ། དཔལ་རྡོ་རྗེ་འཇིགས་བྱེད་ཆེན་པོའི་སྒྲུབ་ཐབས། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །མུན་ནག་ལྟ་བུའི་སྐུ་འཛིན་ཞིང་། །ཉི་མ་འབུམ་གྱི་གཟི་བརྗིད་ཅན། །གདུག་པའི་མཚོན་ཆ་སྣ་ཚོགས་
བསྣམས། །བདུད་དགྲ་ཁྱོད་ལ་ཕྱག་འཚལ་ལོ། །བདེ་གཤེགས་བཀའ་ནི་བསྲུང་བ་དང་། །གདུག་པ་གདུལ་བར་བྱ་བ་དང་། །ཐར་པ་ཐོབ་པར་བྱ་བའི་ཕྱིར། །སྒྲུབ་ཐབས་འདི་ནི་བརྩམ་པར་བྱ། །དུར་ཁྲོད་དང་ནི་ཆུ་བོའི་འགྲམ། །ཤིང་གཅིག་དང་ནི་མཚན་གཅིག་སོགས། །དབང་དང་
དགུག་སོགས་གནས་དེར་བྱ། །དང་པོར་རང་སྙིང་ཟླ་བ་ལ། །རང་གི་ས་བོན་བསམ་པར་བྱ། །འོད་ཟེར་བླ་མར་རང་ལྷ་རྣམས། །གསལ་བྱས་ཕྱག་འཚལ་མཆོད་སོགས་བྱ། །ཚངས་པའི་བཞི་ཡི་བསམ་གཏན་ནི། །བྱམས་པས་དགྲ་ཟུན་མཉམ་པོར་དམིགས། །སྙིང་རྗེས་སྡུག་བསྔལ་
བྲལ་བར་བསྒོམ། །དགའ་བས་ཐར་པ་ཐོབ་པར་དགའ། །བཏང་སྙོམས་ཡལ་བར་མི་འདོར་རོ། །དེ་ནས་སྟོང་པའི་བྱང་ཆུབ་བསྒོམ། །ར་བ་དྲ་བ་སྦྱོར་བར་བྱ། །མ་ཡི་བུ་ལས་སྐྱེས་པ་ལ། །སེམས་ཀྱི་ས་བོན་བསམ་པར་བྱ། །སྣ་ཚོགས་རྡོ་རྗེ་བསམ་གཏན་བྱ། །དེ་སྟེང་ཧཱུཾ་ལས་
གསལ་སྤྲོས་པས། །གདུང་རྣམས་བགེགས་ནི་སེལ་བྱེད་པ། །རྡོ་རྗེ་ར་དང་བླ་རེ་ནི། །སྔགས་འདི་ཡིས་ནི་བསྒོམ་པར་བྱ། །ཨོཾ་སུམ་བྷ་ནི་སུམ་བྷ་ཧཱུཾ་ཕཊ། གྲྀཧྞ་གྲྀཧྞ་ཧཱུཾ་ཕཊ། གྲྀཧྞཱ་པ་ཡ་གྲྀཧྞཱ་པ་ཡ་ཧཱུཾ་ཕཊ། ཨོཾ་ཨཱ་ན་ཡ་ཧོཿབྷ་ག་བཱན་བིདྱཱ་རཱ་ཛ་ཧཱུཾ་ཕཊ། རྡོ་རྗེའི་ས་ལ་ནམ་མཁའ་ནི། །བྷ་གའི་
དབྱིངས་སུ་བསྒོམ་པར་བྱ། །དབུས་སུ་ཡཾ་རཾ་བཾ་དང་ལཾ། །འབྱུང་བ་བཞི་ཡི་དཀྱིལ་འཁོར་རོ། །དེ་སྟེང་སུཾ་ལས་རི་བོ་སྟེ། །བྷྲཱུཾ་ལས་གཟུགས་ཀྱི་བདག་པོ་བསྒོམ། །དེ་ཡོངས་གྱུར་ལས་གཞལ་མེད་ཁང་། །གྲུ་བཞི་པ་ལ་སྒོ་བཞི་པ། །རྟ་བབས་བཞི་དང་ལྡན་པ་ལ། །དྲ་བ་དྲ་བ་
ཕྱེད་པ་དང་། །ཀ་བ་བརྒྱད་ཀྱིས་ཡང་དག་སྤྲས། །ཕྱི་རོལ་དུར་ཁྲོད་བརྒྱད་ཀྱིས་བསྐོར། །ཤིང་བརྒྱད་ཀྱིས་ཀྱང་མཛེས་པར་བྱས། །ཚིག་པ་དང་ནི་མ་ཚིག་པ། །དུམ་བུར་གྱུར་དང་མ་གྱུར་པ། །འཇིགས་པར་བྱེད་དང་འཇིགས་པ་དང་། །ཙང་ཆེན་བཙུགས་དང་ཤིང་ལ་སྦྱངས། །

བནྡྷ་པུ་ཏ་ལི་ལ་སོགས། །ཤིང་བརྒྱད་ལ་ནི་གནས་པའོ། །སྲིན་པོ་རོ་ལངས་མཁའ་འགྲོའི་ཚོགས། །ཤ་ཟའི་གདོན་ཅན་བརྒྱད་པོ་ནི། །བྱ་རོག་འུག་པ་ཚོགས་ཀྱིས་བསྐོར། །གཞལ་ཡས་ཁང་གི་དབུས་སུ་ནི། །དང་པོའི་ཡི་གེ་སོགས་པ་ལ། །ཟླ་བས་བརྒྱན་པའི་ཆུ་སྐྱེས་
བསམ། །དབུས་སུ་བཞི་པའི་བཞི་པ་ལ། །དབྱངས་ཡིག་བཞི་པས་བརྒྱན་པ་བསམ། །དེ་ལ་རལ་གྲིར་གྱུར་པ་དང་། །རལ་གྲི་ལྟེ་བར་དེ་ཉིད་བསམ། །དེ་ཡོངས་གྱུར་པས་འཇམ་དཔལ་བསམས། །གུར་ཀུམ་མདོག་ནི་གཞོན་ཚུལ་ཅན། །རལ་གྲི་གཡས་ལ་ཨུཏྤལ་གཡོན། །
རྒྱན་རྣམས་ཀུན་གྱིས་རབ་མཛེས་པ། །སེམས་དཔའི་སྐྱིལ་མོ་ཀྲུང་གིས་བཞུགས། །དེ་ལྟར་བྱང་ཆུབ་ལྔ་བསྐྱེད་ནས། །མ་ལས་བསྐྱེད་པའི་ཉི་མ་ནི། །དེ་ཡི་སྙིང་གར་བསྒོམ་པར་བྱ། །དེ་ལས་འོད་འཕྲོས་ཕྱོགས་བཅུ་ཡི། །རྒྱལ་བ་སྲས་དང་བཅས་པ་རྣམས། །རིག་པའི་
ལྷ་མོ་ཁྲོ་ཚོགས་ཀུན། །སྤྱན་དྲངས་ཉི་མ་ལ་བཞུགས་བསམས། །དེ་ནས་འཇམ་དཔལ་དེ་ཉིད་དང་། །དེ་བཞིན་གཤེགས་ཀུན་གཅིག་ཏུ་གྱུར། །འོད་ཀྱི་གོང་བུ་དེ་ལས་ནི། །འབར་བ་དཔག་ཚད་བརྒྱད་སྟོང་ཁྱབ། །དེ་གྱུར་སེམས་ཀྱི་ས་བོན་ལས། །འོད་ཟེར་ལྔ་ལྡན་ཁ་དོག་ནག །
འོད་ཟེར་སྤྲོ་དང་བསྡུ་བ་བྱ། །དེ་གྱུར་རྡོ་རྗེ་གདེངས་པ་ནི། །ཁ་དོག་ནག་པོར་གྱུར་པར་བསམ། །དེ་ལས་འོད་འཕྲོས་སངས་རྒྱས་དང་། །རྒྱལ་སྲས་གཙོ་བོ་ལ་སོགས་ཀྱིས། །ནམ་མཁའི་ཁམས་ཀུན་གང་བ་ནི། །ཉི་མའི་དཀྱིལ་འཁོར་ལ་གནས་བསམས། །སེམས་ཅན་ཁམས་ནི་
རྣམས་སྦྱངས་ནས། །སླར་བྱོན་རྡོ་རྗེའི་གཟུགས་ལ་ཞུགས། །རྡོ་རྗེ་ཆེན་པོ་ཡོངས་གྱུར་ནས། །རྡོ་རྗེ་འཇིགས་བྱེད་ཆེན་པོའི་གཟུགས། །མ་ཧེའི་གདོང་ཅན་ཞལ་དགུ་པ། །ཕྱག་ནི་སུམ་ཅུ་རྩ་བཞི་ཕུག །གཡོན་བརྐྱང་གཡས་བསྐུམ་བརྒྱད་གཉིས་ཞབས། །ཕཊ་ཀྱི་སྒྲ་ཅན་གསུས་
པ་འཕྱང་། །སྤྱི་གཙུགས་ཐོད་པའི་ཕྲེང་བས་བརྒྱན། །སྟག་གི་པགས་པས་སྨད་དཀྲིས་ཤིང་། །ཀླུ་བརྒྱད་ཀྱིས་ནི་རྒྱན་དུ་བྱས། །འཇིགས་པའི་དུས་ཀྱི་མེ་ལྟར་འབར། །ཧ་ཧ་ཞེས་དགོད་ལྗགས་བསྐྱོད་ཅིང་། །འཇིགས་པའི་ཁྲོ་གཉེར་མེ་ལྟར་འབར། །འཇིགས་པའི་སྤྱན་ནི་ཉི་

ཤུ་བདུན། །ཚངས་པ་བརྒྱ་བྱིན་ཚོགས་ཟ་བ། །རྩ་ཞལ་མ་ཧེའི་གདོང་ཅན་ཁྲོ། །རྭ་ཡི་བར་ན་གནས་པའི་ཞལ། །དམར་པོ་འཇིགས་བྱེད་ཁྲག་འཛག་པ། །སྟེང་ཞལ་སེར་པོ་ཅུང་ཟད་ཁྲོ། །རལ་པ་ཟུར་ཕུད་ལྔ་དང་ལྡན། །གཞོན་ནུའི་ཆ་ལུགས་འཆང་བ་པོ། །
གཡས་པའི་རྭ་ལ་བརྟེན་པའི་ཞལ། །དང་པོ་མཐིང་ག་འཇིགས་པར་བྱེད། །གཉིས་པ་མདོག་དམར་ཁྲོ་བོའི་ཞལ། །གསུམ་པ་སེར་པོ་ཅུང་ཟད་ཁྲོ། །གཡོན་པའི་རྭ་ལ་བརྟེན་པའི་ཞལ། །དང་པོ་དཀར་པོ་རྨོངས་པར་བྱེད། །གཉིས་པ་དུད་ཀ་ཁྲོ་བོའི་ཞལ། །གསུམ་པ་ནག་པོ་ལྗགས་
དྲིལ་བ། །གཡས་གཡོན་གཉིས་ཀྱིས་གླང་པོ་ཆེའི། །པགས་པ་བརྒྱངས་ཏེ་འཛིན་པའོ། །གཡས་པའི་ཕྱག་གིས་རིམ་པ་བཞིན། །ཀར་ཏརི་དང་བྷིཎྜི་པ་ལ་དང་། །གཏུན་ཤིང་ཆུ་གྲི་ཀ་ཎ་ཡ། །སྟ་རེ་མདུང་དང་མདའ་དང་ནི། །ལྕགས་ཀྱུ་དབྱུག་ཏོ་ཁ་ཊྭཱཾ་ག །འཁོར་ལོ་རྡོ་རྗེ་ཐོ་བ་དང་། །
རལ་གྲི་དང་ནི་ཅང་ཏེའུ་འཛིན། །གཡོན་པའི་ཕྱག་གིས་གོ་རིམས་བཞིན། །ཐོད་པ་ཚངས་པའི་མགོ་བོ་དང་། །ཕུབ་ཆུང་རྐང་པ་ཞགས་པ་དང་། །གཞུ་དང་རྒྱུ་མ་དྲིལ་བུ་དང་། །ལག་པ་མི་ལྤགས་རྩེ་གསུམ་མེ་ཡི་ཐབ། །ཐོད་ཚལ་སྡིགས་མཛུབ་བ་དན་རླུང་རས་འཛིན། །གཡས་ཀྱི་ཞབས་
ཀྱིས་གོ་རིམས་བཞིན། །མི་དང་མ་ཧེ་གླང་བོང་དང་། །རྔ་མོ་ཁྱི་ལུག་ཝ་བརྒྱད་མནན། །གཡོན་པའི་ཞབས་ཀྱི་གོ་རིམས་བཞིན། །བྱ་རྒོད་འུག་པ་བྱ་རོག་དང་། །སེང་གེ་ཁྲ་དང་བྱ་རྒོད་ཆེན་པོ་དང་། །ནེ་ཙོ་ཀྲུང་ཀྲུང་བརྒྱད་པོ་མནན། །འཇམ་དཔལ་ཡེ་ཤེས་སེམས་དཔའ་ནི། །ཞལ་
གཅིག་ཕྱག་གཉིས་སྐུ་མདོག་སེར། །རང་གི་སྙིང་གར་བཞུགས་པ་ཡི། །སྙིང་ལ་ཉི་མའི་ལྟེ་བ་ལས། །འོད་འཕྲོས་དགྲ་མགོན་སྤྱན་དྲངས་ཏེ། །རྡོ་རྗེ་བསྡུ་བཅིངས་བྱས་ནས་ནི། །གསང་སྔགས་འདི་ཡང་བརྗོད་པར་བྱ། །ཨོཾ་ཨེ་ཧྱ་ཧི་བྷ་ག་བཱན། ཡ་མཱནྟ་ཀ་ཨཱ་གཙྪ་ཡ། ཨོཾ་ས་མཱ་ཛ་ཧཱུཾ།
མདུན་དུ་བྱོན་པར་མོས་ནས་ནི། །རང་གི་སྔགས་བཏབ་མཆོད་མ། །སྤོས་དང་མེ་ཏོག་བྱུག་པ་དང་། །མར་མེ་ལ་སོགས་མཆོད་བསྟོད་བྱ། །ཨོཾ་ཡ་མཱནྟ་ཀ་ཨརྒྷཾ་པྲ་ཏཱིཙྪ་ཧཱུཾ་སྭཱ་ཧཱ། ཨོཾ་བཛྲ་དྷཱུ་པེ་ཧཱུཾ། ཨོཾ་བཛྲ་པུཥྤེ་ཧཱུཾ། ཨོཾ་བཛྲ་གནྡྷེ་ཧཱུཾ། ཨོཾ་བཛྲ་དཱི་པེ་ཧཱུཾ། ཨོཾ་བཛྲ་ནཻ་བིདྱེ་ཧཱུཾ། སྙིང་པོའི་

མཇུག་ལ་བཏགས་ལ་དབུལ། །ཛཿཧཱུཾ་བཾ་ཧོཿཞེས་བརྗོད་ཅིང་། །དགུག་ཅིང་གཞུག་ལ་དབང་དུ་བྱ། །གཤིན་རྗེ་གཤེད་པོའི་ང་རྒྱལ་བྱ། །མིག་དང་རྣ་བ་སྣ་དང་ལྕེ། །ལུས་དང་དེ་བཞིན་ཡིད་རྣམས་ལ། །ས་སྙིང་ཕྱག་ན་རྡོ་རྗེ་དང་། །ནམ་མཁའི་སྙིང་པོ་སྤྱན་རས་གཟིགས། །སྒྲིབ་ཀུན་
སེལ་དང་ཀུན་དུ་བཟང་། །མིང་གི་ཡི་གེ་དང་པོ་བསྐྱེད། །རྡོ་རྗེ་གསུམ་ནི་གནས་གསུམ་བསམ། །ཨོཾ་ཨཱཿཧཱུཾ། རང་སྙིང་ས་བོན་ལས་འོད་འཕྲོ། །བདེ་གཤེགས་རྣམས་ནི་སྤྱན་དྲངས་མཆོད། །བདུད་རྩི་ལྔས་གང་བུམ་པ་ཡིས། །སྤྱི་བོར་བླུགས་ནས་དབང་བསྐུར་བྱ། །རྣམ་པར་སྣང་
མཛད་ཕྱག་རྒྱ་ཆེ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཡཾ་དང་རཾ་བསྐྱེད་རླུང་མེའི་སྟེང་། །ཐོད་པ་ཨ་ལས་བསྐྱེད་པ་ཡིན། །ནང་ན་བདུད་རྩི་ལྔས་གང་བ། །ཧཱུཾ་ཞེས་པས་ནི་དག་པར་བསམ། །ཨཱཿཡིས་རྟོགས་བྱ་ཨོཾ་གྱིས་བར། །ལུས་ཀྱི་དཀྱིལ་འཁོར་མཉེས་
པར་བསམས། །རྡོ་རྗེ་ལྕེ་ཡིས་འཇིབ་པར་བསམ། །འཁོར་བཅས་འཁོར་ལོ་འདུས་པ་ཡིས། །སྟོང་པའི་སྒྲ་བརྙན་ཚུལ་དུ་བྱ། །སྔགས་ཀྱི་བཟླས་པ་བྱ་བ་ནི། །སྙིང་གར་ཉི་མའི་དཀྱིལ་འཁོར་ལ། །རྩ་བའི་སྙིང་པོ་ཉེ་སྙིང་བསམ། །དུས་བཞི་ཡི་ནི་སྦྱོར་བ་ཡིས། །གཡེང་
བ་མེད་པར་བསམ་གཏན་བྱ། །སྐབས་སུ་སྟོན་མོ་བཟའ་བར་བྱ། །ལྷ་རྣམས་མཉེས་པར་བྱ་བའི་རིམ་པའོ།། །།སྔགས་པ་གཞན་ལ་ཕན་བརྩོན་པས། །དབང་དང་དགུག་དང་བསད་པ་དང་། །བསྐྲད་དང་དབྱེ་བ་རྨོངས་ལ་སོགས། །རྒྱུད་ལས་བྱུང་བ་བཞིན་དུ་བྱ། །དེ་
ལས་འདིར་ནི་དྲག་པོའི་ལས། །འཁོར་ལོའི་ལས་དང་སྦྱིན་སྲེག་དང་། །བསམ་གཏན་གྱི་ནི་སྦྱོར་བ་རྣམས། །ལས་འདི་དག་གིས་བརྩམ་པར་བྱ། །བླ་མ་སྨོད་སོགས་དམ་ཚིག་མེད། །ཐེག་པ་ཆེན་པོ་སྨོད་པ་དང་། །སྔགས་ཀྱི་རྒྱུད་ལ་འཕྱ་བ་དང་། །བསད་དང་བསྐྲད་དམ་རིངས་
པར་བྱེད། །སྙིང་རྗེ་ཡིས་ནི་ངན་སོང་ལས། །བཟློག་པར་བྱ་བ་གཞན་ལས་མིན། །སྔགས་པས་སྔོན་དུ་བསྙེན་པ་ནི། །བྱེ་བ་བཟླས་ནས་ལས་རྣམས་བརྩམས། །ཡང་ན་མཚན་མ་ཐོབ་ནས་བྱ། །གཞན་དུ་བྱས་ན་འཇིག་རྟེན་བཅས། །དཀྱིལ་འཁོར་བྲིས་སྐུ་མདུན་དུ་ནི། །དང་

པོར་མཆོད་པ་བྱས་ནས་ནི། །སྣང་མཛད་ཀྱིས་ནི་ལུས་ལ་བྱུགས། །ཞིམ་པའི་ཆང་ནི་བཏུང་བར་བྱ། །སྐྲ་བཤིག་གཅེར་བུ་བྱས་ནས་ནི། །ནམ་ཕྱེད་ཌ་མ་རུ་དཀྲོལ་བྱ། །བརྐྱང་བསྐུམ་ཚུལ་དུ་གནས་ནས་ཀྱང་། །ལྷ་ཡི་ང་རྒྱལ་ལྡན་པ་ཡིས། །ཧ་ཧ་ཞེས་དགོད་རྩེ་གཅིག་
པས། །མ་ཡེངས་པ་ཡིས་གསང་སྔགས་བཟླས། །དེ་ནས་འཇིགས་པ་ཆེན་པོ་སྐྱེ། །སྔགས་པས་འཇིགས་པར་མི་བྱའོ། །འཇིགས་པར་གྱུར་ན་བར་ཆད་འགྱུར། །དེས་ན་འཇིགས་པར་མི་བྱའོ། །དངོས་གྲུབ་གང་འདོད་ཅེས་གསུངས་པ། །ཡིད་ལ་གང་འདོད་གསོལ་བ་གདབ། །དེ་
ནས་ལས་རྣམས་བརྩམ་པར་བྱ། །མར་གྱི་ངོ་ལ་སྔགས་པ་ཡིས། །དུར་ཁྲོད་རས་ནི་བླངས་ནས་སུ། །དག་པར་བཀྲུས་ཏེ་བརྐྱང་བར་བྱ། །སུམ་པའི་སྦྱོར་བས་མཚམས་བཅད་ནས། །ཝ་ཡིས་རྟོགས་པའི་ལྷག་མ་ལ། །སྣང་མཛད་དུར་ཁྲོད་ཐལ་བ་དང་། །འབྲས་ཐུག་བཅས་པར་
རང་ལ་བྱུགས། །བརྒྱངས་ནས་མདུན་དུ་བཞག་ནས་ནི། །སྐྲ་བཤིག་གཅེར་བུར་བྱུང་ནས་སུ། །ལྷོ་ཕྱོགས་སུ་ནི་ཁ་བལྟས་ལ། །མ་ཧེའི་གདོང་གི་སྦྱོར་བ་ཡིས། །རས་དང་སྣག་ཚའི་རྫས་རྣམས་ལ། །ལག་པ་རེག་ནས་གསང་སྔགས་ནི། །འབུམ་ཕྲག་གཉིས་སུ་བཟླས་པ་བྱ། །
ཉི་མ་ཕྱེད་ནས་བཟུང་ནས་སུ། །འཁོར་ལོ་བྲི་བར་བརྩམ་པར་བྱ། །བྱ་རོག་སྒྲོ་རྩའི་སྙུ་གུ་ཡིས། །བཅུ་དྲུག་རྩིབས་ཅན་གཉིས་བྱས་ཏེ། །གཡས་དང་གཡོན་སྐོར་ཚུལ་གྱིས་ནི། །སུམ་ཅུ་གཉིས་དང་བཅུ་པས་བསྐོར། །བགེགས་དགྲའི་སྦྱོར་བས་དེ་ལྟར་བྲི། །བདག་ལས་སྤྲུལ་པའི་
ཁྲོ་བོ་ཡིས། །བསྒྲུབ་བྱ་ལྷ་དང་བྲལ་ནས་ནི། །རྣམ་ཤེས་བསྡུས་ལ་འཁོར་ལོར་གཞུག །ཞུགས་པར་གྱུར་ནས་འཁོར་ལོ་དྲིལ། །ཐོད་པ་གཉིས་ཀྱི་བར་དུ་གཞུག །ཤི་བའི་སྐྲ་ཡི་སྐུད་པས་དཀྲི། །རོ་བསྲེགས་སར་ནི་བསྲེག་ཤིང་གིས། །མེ་སྦར་ནས་ནི་ཐོད་པ་བསྲོ། །སྔགས་
པས་འགྲེང་སྟེ་རྐང་གཡོན་གྱིས། །མནན་ནས་ཡི་གེ་བཅུ་པ་བཟླས། །རོ་བསྲེགས་ལ་སོགས་ས་འོག་གཞུག །རིམ་གྱིས་ཐེབས་ནས་འཆི་བར་འགྱུར། །ཡང་ན་ལས་འདི་བརྩམ་པར་བྱ། །བསྙེན་པ་ལ་སོགས་སྔར་བཞིན་བྱ། །དུར་ཁྲོད་གཞི་མདོ་ཤིང་གཅིག་དྲུང་། །སྔགས་

པས་གནས་ནས་ལས་འདི་བྱ། །གྲོག་མཁར་ཆུ་འགྲམ་གཉིས་ཀྱི་ས། །སྣང་མཛད་མི་བསྐྱོད་རུས་ཕྱེ་དང་། །ཕུབ་མ་དུར་ཁྲོད་སོལ་བ་ལ། །བསྒྲུབ་བྱའི་གཟུགས་བརྙན་སོར་བརྒྱད་བྱ། །སྙིང་ག་ལྟེ་བ་གསང་བ་དང་། །ལྐོག་མ་དང་ནི་སྨིན་མཚམས་སུ། །ནི་རང་སུ་ཡི་ཕུར་བུས་གདབ། །
ཚིགས་རྣམས་ཚེར་མ་རྣོན་པོས་དགང་། །ཐོད་པ་གཉིས་ཀྱི་དབུས་སུ་གཞུག །གནས་བདུན་གྲོག་མཁར་ས་དང་དུར་ཁྲོད་ཐལ་བ་ལ། །གཤིན་རྗེའི་སྐྱེས་བུ་ཁྲུ་གང་ཙམ་ལ་ཞལ་གཅིག་པ། །མཆེ་བ་གཙིགས་པ་ཕྱག་གཉིས་རལ་གྲི་སྡིགས་མཛུབ་ཞགས། །གཅེར་བུ་སྐྲ་གྲོལ་དེ་ཡི་
ཐུགས་ཀར་ཐོད་པ་གཞུག །མར་གྱི་བརྒྱད་དང་བཅུ་བཞི་ཡི། །རོ་བསྲེགས་དུར་ཁྲོད་ས་དག་ལ། །ཁ་སྦུབ་བཟློག་ལ་ལྷོ་རུ་ཁ་བསྟན་འཕྲེད་ཉལ་གཞག །ཁྱིམ་དུ་འོངས་ནས་ཁྲོས་ནས་ཡི་གེ་བཅུ་པ་བཟླས། །ཞག་གསུམ་གྱིས་ནི་འཆི་བར་འགྱུར། །ཕྱུང་ནས་འོ་མས་བཀྲུས་ན་འཚོ། །
འཁོར་ལོའི་རིམ་པ་ཕྱེ་བའོ། །ལས་དེ་བྱེད་པའི་དུས་སུ་ནི། །བསམ་གཏན་གྱིས་ནི་འདི་ལྟར་བྱ། །འཁོར་ལོ་མེད་ཀྱང་འགྲུབ་པར་འགྱུར། །གང་ལ་བྱ་བའི་བསྒྲུབ་བྱ་སྟེ། །ར་ལས་བསྐྱེད་པའི་དཀྱིལ་འཁོར་དུ། །སྐྲ་བཤིག་གཅེར་བུ་བྱས་ནས་ནི། །ཏིལ་མར་གྱིས་ནི་ལུས་བསྐུས་ནས། །
འདར་ཞིང་མདུན་ན་འདུག་པར་བསམ། །ལུས་ལས་སྤྲུལ་པའི་ཁྲོ་བོ་ཡིས། །བསྒྲུབ་བྱ་བཅད་ཅིང་བཅོམ་ནས་ནི། །ལྷ་རྣམས་དག་གིས་ལུས་ལ་བཟའ། །སླར་ཡང་ཁྲོ་བོར་གྱུར་ནས་སྤྲོ། །རལ་གྲི་དབྱུག་པ་གཏུན་ཤིང་དང་། །འཁོར་ལོ་ཏྲི་ཤཱུ་ལ་སོགས་པས། །དུམ་བུར་བཅད་
ཅིང་གཏུབ་པ་དང་། །ཟ་ཤིང་ཁྲག་རྣམས་འཐུང་བར་བསམ། །གཤིན་རྗེ་ཡིས་ནི་ཟོས་པར་བསམ། །གཞན་ཡང་སྲིན་པོ་སྣ་ཚོགས་དང་། །ཀང་ཀ་བྱ་རྒོད་འུག་པ་དང་། །སྟག་དང་སེང་གེ་ཝ་དང་ཁྱི། །དེ་རྣམས་ཀྱིས་ཀྱང་ཟོས་པར་བསམ། །བསྟོད་པ་སྣ་ཚོགས་བྱས་ནས་སུ། །
ཚིག་གིས་ཀྱང་ནི་འདི་སྐད་བསྒོ། །དཀོན་མཆོག་གསུམ་ལ་སྨོད་པ་དང་། །དགེ་འདུན་འདུ་བའི་སྒོ་འཕྲོགས་པ། །དམ་ཚིག་འཇིགས་པར་བྱེད་པ་དང་། །སྐྱེ་བོ་ཡོངས་ལ་འཚེ་བ་འདི། །ངན་སོང་གསུམ་དུ་ངེས་པར་འགྲོ། །ཐུགས་རྗེས་སྒྲོལ་བའི་དུས་ལ་བབ། །ངན་སོང་གསུམ་གྱི་

སྡུག་བསྔལ་དང་། །ནད་དང་གནོད་པའི་སྡུག་བསྔལ་གྱིས། །ཚེ་འདི་ཉིད་ལ་བྲལ་བར་མཛོད། །བསམ་གཏན་གྱི་རིམ་པ་ཕྱེ་བའོ། །བླ་མའི་ཞལ་གྱི་བཀའ་དྲིན་གྱིས། །འདི་བྱས་བསོད་ནམས་གང་ཐོབ་པ། །འགྲོ་རྣམས་གཤིན་རྗེ་གཤེད་ལྟ་བུ། །འཁོར་བ་
ལས་ནི་ཐར་བར་ཤོག། །།སློབ་དཔོན་ཛྙཱ་ནཱ་ཀཱ་རས་མཛད་པ་རྫོགས་སོ།། །།ཟླ་བའི་འོད་ཟེར་གྱིས་བསྒྱུར་བའོ།། ༄༅༅། །རྒྱ་གར་སྐད་དུ། ཤྲཱི་བཛྲ་བྷཻ་ར་བ་སྟུ་ཏི། བོད་སྐད་དུ། དཔལ་རྡོ་རྗེ་འཇིགས་བྱེད་ཀྱི་བསྟོད་པ། དཔལ་རྡོ་རྗེ་འཇིགས་བྱེད་ལ་ཕྱག་འཚལ་ལོ། །ཧཱུཾ་འཇམ་དཔལ་མཁའ་ལས་
བྱུང་བའི་གསེར་མདོག་ཅན། །འཇམ་དཔལ་ཐུགས་ལ་ཆོས་ཀུན་རང་བཞིན་གསལ། །འཇམ་དཔལ་གསུང་གི་དབང་ཕྱུག་འཇམ་དཔལ་དབྱངས། །འཇམ་དཔལ་བདག་ནི་རེ་བའི་སེམས་ཀྱིས་འདུད། །ཐུགས་མཆོག་འཇམ་པའི་ངང་ལས་མ་གཡོས་ཀྱང་། །ཐུགས་རྗེས་
གདུག་པ་འདུལ་ཕྱིར་གཤིན་རྗེའི་གཤེད། །འཇིགས་བྱེད་ཆེན་པོ་འཇིགས་པའི་ཆར་བསྟན་ནས། །མི་བཟད་དུས་མཐའི་བསྐལ་པའི་མེ་ལྟར་འབར། །ཞལ་གདངས་ཁྲོ་གཉེར་སྨིན་མ་གློག་ལྟར་འགྱུ། །སྤྱན་བགྲད་མཆེ་བ་གཙིགས་ཤིང་རབ་ཏུ་འབར། །རྡོ་རྗེའི་རྟ་གད་དྲག་པོ་ཧ་
ཧར་བཞད། །མཁའ་འགྲོ་སྡུད་པའི་ཕེཾ་སྐད་གནམ་དུ་འདོན། །ཁྲོས་པའི་ཞབས་ཆེན་བརྡབས་པས་ཁམས་གསུམ་གནོན། །སྡིགས་མཛུབ་གནམ་དུ་བསྒྲེངས་ཤིང་ལྷ་ཆེན་འདུལ། །ལྗགས་འདྲིལ་ཚེམས་ཆེན་གཙིགས་ཤིང་ཁྲག་གིས་མྱོས། །ལྷ་དང་བཅས་པའི་འཇིག་རྟེན་
ཞལ་དུ་གསོལ། །གླང་ཆེན་ཀོ་རློན་ཐོད་པའི་ཕྲེང་བ་ཞགས། །གཅེར་བུ་འཇིགས་བྱེད་དབང་ཕྱུག་ཆེན་པོའི་ཚུལ། །འཇིགས་བྱེད་མ་ཧེ་ཁྲོས་པའི་ཞལ་གདངས་ཤིང་། །ཞལ་དགུ་འབར་བས་སྲིད་པ་ཟད་པར་རྔུབ། །འགྲོ་བ་སྣ་ཚོགས་འདུལ་བའི་ཕྱག་རྒྱ་འབར། །བདུད་བཞི་
གནོན་པའི་ཞབས་ནི་བརྐྱང་བསྐུམ་གནས། །འཇིགས་བྱེད་ཆེན་པོའི་སྐུ་ལ་རྟག་ཏུ་འདུད། །དབུ་དགུ་འབར་བའི་དཀྱིལ་འཁོར་ནས། །གཡས་ཀྱི་ཞལ་གསུམ་བགྲད་པ་ནི། །མཐིང་ག་དམར་དང་སེར་བའི་ཞལ། །གཡོན་གྱི་ཞལ་གསུམ་གདངས་པ་ནི། །དཀར་དང་དུད་ཀ་

གནག་པའི་ཞལ། །དབུས་ཀྱི་ཞལ་གསུམ་འབར་བ་ནི། །ཁྲོ་དང་ཆགས་དང་ཞི་བའི་ཚུལ། །ཕྱག་རྒྱ་འོད་ཟེར་འབར་བ་ལས། །གཡས་ཀྱི་ཕྱག་མཚན་བཅུ་དྲུག་ནི། །རྡེག་ཅིང་འཇོམས་པས་མཚོན་ཆ་གདེངས། །གཡོན་གྱི་ཕྱག་མཚན་བཅུ་དྲུག་ནི། །རོལ་ཅིང་སྟོབ་པའི་མཚན་
མས་མཛེས། །བརྗིད་རྔམ་ཞབས་ཀྱི་ཚམ་ངམ་ལས། །གཡས་ཀྱི་ཞབས་བརྒྱད་བསྐུམ་པ་ནི། །དྲེགས་པའི་ལྷ་བརྒྱད་ཐབས་ཀྱིས་འདུལ། །གཡོན་གྱི་ཞབས་བརྒྱད་བརྐྱང་བ་ནི། །དྲེགས་པའི་ལྷ་མོ་བརྒྱད་ལ་རོལ། །འདོད་ཆགས་ཆེན་པོ་གདུལ་བའི་ཕྱིར། །རྟག་ཏུ་ལིངྒ་
རྒྱས་པའི་ཚུལ། །དྲག་པོའི་ཚུལ་གྱིས་ཞེ་སྡང་འདུལ། །འདུལ་སྐུ་ཁྱོད་ལ་ཕྱག་འཚལ་ལོ། །དུར་ཁྲོད་ཆེན་པོའི་དཀྱིལ་འཁོར་ནས། །བདུད་དང་གཤིན་རྗེ་ཐབས་ཀྱིས་འདུལ། །མ་མོ་མཁའ་འགྲོ་དབང་དུ་སྡུད། །དབང་སྡུད་ཁྱོད་ལ་ཕྱག་འཚལ་ལོ། །དབང་ཕྱུག་ཆེན་
པོའི་དཀྱིལ་འཁོར་ནས། །དབང་མེད་དད་པས་འདུས་པ་དང་། །ཡེ་ཤེས་སྤྲུལ་པའི་འཁོར་གྱིས་བསྐོར། །འཁོར་བཅས་ཁྱོད་ལ་ཕྱག་འཚལ་ལོ། །ཡེ་ཤེས་ཐུགས་ཀྱི་དཀྱིལ་འཁོར་ནས། །ཇི་ལྟ་བུར་ནི་སྤྲུལ་གྱུར་ཀྱང་། །རྣམ་དག་དབྱིངས་ལས་མ་གཡོས་པའི། །
མཉམ་ཉིད་སྐུ་ལ་ཕྱག་འཚལ་ལོ། །རྫོགས་སོ།། ༄༅༅། །རྒྱ་གར་སྐད་དུ། པཉྩ་ཏཏ་སྟོ་ཏྲ། བོད་སྐད་དུ། དེ་ཉིད་ལྔ་པའི་བསྟོད་པ། དཔལ་རྡོ་རྗེ་འཇིགས་བྱེད་ལ་ཕྱག་འཚལ་ལོ། །ཧཱུཾ་ཆོས་དབྱིངས་མ་བཅོས་མཁྱེན་པའི་ཐུགས། །འཇམ་དཔལ་
རྒྱུ་ཡི་བྱང་སེམས་སྐུ། །ཨུཏྤལ་རལ་གྲི་རབ་བསྣམས་ཤིང་། །ཟུར་ཕུད་ལྔ་ལྡན་གུར་ཀུམ་མདོག །ཟླ་གདན་ལ་བཞུགས་ཡེ་ཤེས་ཀྱི། །སྐུ་མཆོག་ཁྱོད་ལ་ཕྱག་འཚལ་ལོ། །ཉི་མའི་དཀྱིལ་འཁོར་བདུད་འཇོམས་ལ། །སངས་རྒྱས་སྲས་བཅས་འདྲེན་པ་ཡི། །
འཇམ་དབྱངས་ཐུགས་ཁྲོས་ཧཱུཾ་ནག་པོ། །དངོས་གྲུབ་ཁྱོད་ལ་ཕྱག་འཚལ་ལོ། །རྡོ་རྗེ་ཁྲོས་པས་སྲིད་གསུམ་སྦྱོར། །སྤྲོ་ཞིང་བསྡུས་པས་མ་ཧེའི་ཞལ། །ལྗགས་འདྲིལ་ཕེཾ་གྱི་འབྲུག་སྒྲ་སྒྲོགས། །ཧཱུཾ་ཥྚྲྀཿའི་གསུང་འཇིགས་ལ་ཕྱག་