Luận tạng Tây Tạng (Tengyur) — Tập 47

ི་གཤིན་རྗེ་གཤེད། །ཨིནྡྲ་ནཱི་ལའི་མདོག་འདྲ་བ། །གཡས་དཀར་གཡོན་དམར་ཕག་མོས་འཁྲིལ། །མ་ཧེ་སེར་སྐྱ་ལ་བསྐུམ་བརྐྱང་། །གཡས་པ་གྲི་
གུག་གཡོན་ཐོད་པ། །རྡོ་རྗེ་རལ་གྲི་འཁོར་ལོ་པད། །ཐོད་པ་ལྔ་ཡིས་དབུ་བརྒྱན་ཅིང་། །དབུ་སྐྱེས་གྱེན་འགྲེང་བརྒྱད་ཀྱིས་བརྒྱན། །རློན་པ་ཁྲག་འཛག་ལྔ་བཅུ་འཕྱང་། །མེ་དཔུང་ནང་ན་གནས་པར་བསྒོམ། །རང་མཚུངས་ཡེ་ཤེས་སེམས་དཔའ་ནི། །ཆོ་ག་གསུམ་དང་ལྡན་པས་
སོ། །ཡི་གེ་ལྔ་རྫོགས་དེ་བཞིན་གཤེགས། །རིགས་ཀྱི་མདོག་དང་མཚུན་མར་ལྡན། །སྐུ་ནི་མཐོ་གང་ཚད་ཡིན་ཏེ། །ཕྲ་མོ་ལྔ་ནི་ཚོན་གང་ངོ་། །སྐུ་གསུམ་རབ་ཏུ་ཐོབ་བྱའི་ཕྱིར། །ལུས་ངག་ཡིད་གསུམ་བྱིན་བརླབ་བྱ། །སྤྱི་གཙུག་རྟག་པའི་རྒྱལ་པོ་སྟེ། །མགྲིན་པར་རྡོ་རྗེ་ཉི་
མ་བསྒོམ། །སྙིང་གར་མི་བསྐྱོད་རྡོ་རྗེ་འཆང་། །ཨོཾ་ཨཱཿཧཱུྃ། མིག་ལ་ས་ཡི་སྙིང་པོ་སྟེ། །རྣ་བ་ལ་ནི་རྡོ་རྗེ་འཛིན། །སྣ་ལ་ནམ་མཁའི་སྙིང་པོ་མཆོག །ལྕེ་ལ་འཇིག་རྟེན་དབང་ཕྱུག་མགོན། །སྒྲིབ་པ་རྣམ་སེལ་ལུས་ལ་དགོད། །ཀུན་དུ་བཟང་པོ་ཡིད་ཀྱིའོ། །ཀྵིཾ་ཛིཾ་ཁཾ་གཾ་ཀཾ་སཾ། །ཆོ་ག་
གསུམ་དང་ལྡན་པ་ལ། །ཨོཾ་དང་ཧཱུྃ་གིས་སྤེལ་བར་བྱ། །རྡོ་རྗེ་ལྔ་ནི་མཆོད་བྱས་ལ། །གསོལ་བཏབ་དབང་གིས་མི་བསྐྱོད་འགྱུར། །མི་བཟད་རྡོ་རྗེ་འཁོར་ལོ་ཉིད། །མཆོད་བསྟོད་བྱས་ལ་དགུག་གཞུག་བྱ། །ཨོཾ་བཛྲ་ས་ཏྭ་ས་མ་ཡ། ཙཀྲ་མཎྜལ་དྷཱ་ཏུ་ཛཿཧཱུྃ་བཾ་ཧོཿས་མ་ཡ་སྟྭཾ་ཨ྅ཧཾ། ཨ་ལ་

ལ་ལ་ལ་ཧོ། ཨ་ཨ་ཨ་ཨ། རྡོ་རྗེ་ནམ་མཁའ་བྱིན་རླབས་ལ། །བསྐྱོད་པས་ལྔ་འགྱུར་བྱང་ཆུབ་སེམས། །མཁའ་ཡི་པདྨར་རྫུས་སྐྱེས་ནས། །ས་དགུར་བསྐྱེད་ལ་རབ་རྒྱས་སྐུ། །བ་སྤུའི་བུ་ག་ཆེ་ནས་སྤྲོ། །སངས་རྒྱས་སྤྲིན་ཡང་རྗེས་བསམས་ནས། །རིགས་ཀྱི་
དོན་ཡང་བསྒྲུབ་པར་བྱ། །ཨོཾ་བཛྲ་དྷྲྀཀ་ཡ་ཧཱུྃ། ཨོཾ་ཛི་ན་ཛིཀ་ཀྵེ་ཧཱུྃ། ཨོཾ་རཏྣ་དྷྲྀཀ་མ་ཧཱུྃ། ཨོཾ་ཨཱ་རོ་ལྀཀ་མེ་ཧཱུྃ། ཨོཾ་པྲཛྙཱ་དྷྲྀཀ་ད་ཧཱུྃ། ཤར་དུ་གཏི་མུག་གཤེད་པོ་སྟེ། །ལྷོ་རུ་ང་རྒྱལ་གཤེད་པོའོ། །ནུབ་ཏུ་འདོད་ཆགས་གཤེད་པོ་སྟེ། །བྱང་དུ་ཕྲག་དོག་གཤེད་པོའོ། །ཤར་ལ་འོད་ཟེར་གཞན་
རྣོན་པོ། །དཀར་སེར་དམར་ལྗང་རང་འོད་རིག །རིགས་ཀྱི་བདག་པོའི་ཕྱག་རྒྱ་འཛིན། །གཞན་ནི་གོ་རིམས་སྦྱོར་ཤེས་པའོ། །ཎ་ཡོ་ནཱི་ར་འཕྲོས་པ་ལས། །བྱང་ཆུབ་སེམས་ཀྱིས་རབ་རྒྱས་པའི། །ཙརྩི་ཀཱ་སོགས་ལྷ་མོ་ཡིས། །མཆོད་པས་རབ་ཏུ་མཉེས་པར་བྱ། །དེ་ནས་རྡོ་རྗེ་དྲིལ་འཆང་བས། །
བསྟོད་པ་ཡང་ནི་ཆེད་དུ་བརྗོད། །དམ་ཚིག་བཟང་པོ་བྱིན་བརླབས་ནས། །རྡོ་རྗེ་ཧཱུྃ་གིས་མྱང་བར་བྱ། །སྤྲོ་བ་ཆེན་པོ་འཇིག་རྟེན་ཁམས། །ཐོག་མ་མེད་པས་བསྡུས་བྱས་ནས། །དུ་མར་བརྩོན་འགྲུས་ལྡན་ཡིད་ཀྱིས། །ཡང་དང་ཡང་དུ་གོམས་པར་བྱ། །རྡོ་རྗེ་སྙིང་གའི་དཀྱིལ་འཁོར་ལ། །ཡིད་སྐྱོབ་བཀོད་
ནས་བཟླས་པར་བྱ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ། རིམ་དང་ཅིག་ཅར་སྦྱོར་བ་ཡི། །སེམས་ཅན་དོན་དུ་བཟླས་པར་བྱ། །ཟླ་བའོ་ཅོག་གི་བཅུ་བཞི་ལ། །དྲི་ཆུས་བྱུགས་པའི་དཀྱིལ་འཁོར་ནི། །གྲུ་གསུམ་ལྡན་ཞིང་མེ་ཏོག་སྤྲས། །མཆོད་པ་བཟང་ལྡན་གཏོར་མས་བཀང་། །མི་རུས་
ལྔ་བཅུ་ཐམ་པ་ལ། །ཁྲག་གི་སྤགས་པའི་མགོ་བོར་བསྒོམ། །རི་ལུ་རེ་ལ་གཤེད་ནག་པོས། །བརྒྱན་པ་ཁྲི་ཡི་བར་དུ་བཟླས། །མཆོད་པ་རྣམས་ཀྱིས་མཉེས་བྱས་ལ། །གསོལ་བཏབ་གཏོར་མ་དུར་ཁྲོད་སྦྱིན། །ཨོཾ་ཨིནྡྲཱ་ཡ་ཧྲཱིཿ། ཡ་མ་ཡ་ཥྚྲྀཿ། བ་རུ་ཎཱ་ཡ་ཝི། ཀུ་བེ་རཱ་ཡ་ཀྲྀ། ཨཱི་ཤྭཱ་ནཱ་ཡ་ཏ།
ཨགྣ་ཡེ་ཨ། ནཻ་ཪྼྀ་ཏ་ཡེ་ན། བཱ་ཡེ་བེ་ཡ་ན། ཙནྡཱ་ཡ་ཧཱུྃ། སཱུརྱཱ་ཡ་ཧཱུྃ། བྲཧྨ་ཎཱ་ཡ་ཕཊ། བ་སུ་དྷ་རཱ་ཡ་ཕཊ། བེ་མ་ཙི་ཏྲ་ཡ་སྭཱ། སརྦ་བྷུ་ཏེ་བྷྱོ་ཧཱ། ཧི་ཧི་ཧི་ཧི་ཧཱུྃ། ཕེཾ་ཕེཾ་ཕེཾ་ཕེཾ་ཕཊ་སྭཱ་ཧཱ། གད་མོ་ཆེན་མོ་བརྒྱད་བརྒད་ནས། །གནང་བ་བྱིན་ནས་གཤེགས་པར་བསམ། །འདི་ནི་བསྙེན་

པའི་ཆོ་གའོ། །སྲིད་པ་གསུམ་གྱི་འཁོར་ལོ་ནི། །དབང་པོ་སྐྱེ་མཆེད་སྟོང་པ་ཡི། །ལྕགས་ཀྱི་ཁང་པ་བཅུ་བདུན་གྱི། །རྡོ་རྗེ་སྙིང་པོ་དགོད་པར་བྱ། །ཆུ་ཡི་དཀྱིལ་འཁོར་ཤིང་རྟ་དང་། །ཅེ་སྤྱང་རྒྱུག་པ་ལྟ་བུའོ། །སྦྱོར་ལྡན་མན་ངག་དམ་པ་ནི། །དམ་པའི་ཞལ་ལས་ཤེས་པར་
བྱ། །ལས་དང་རྗེས་མཐུན་འཁོར་ལོ་ནི། །གཞན་དུ་རྒྱ་ཆེར་བཤད་པས་ན། །འདིར་ནི་མང་དུ་མ་སྨོས་སོ། །ཡ་མ་རཱ་ཛ་ས་དོ་མེ་ཡ། ཡ་མེ་དོ་རུ་ཎ་ཡོ་ད་ཡ། ཡ་ད་ཡོ་ནི་ར་ཡཀྵེ་ཡ། ཡཀྵེ་ཡཙྪ་ནི་རཱ་མ་ཡ། ཞི་བའི་མཐར་ནི་སྭཱ་ཧཱ། རྒྱས་དང་དབང་ལ་ཨོཾ་དང་ཧོ། །དྲག་པོ་ཕཊ་ཀྱིས་བརྟན་པར་བྱ། །
ཕྲིན་ལས་བཞི་ནི་འགྲུབ་པར་འགྱུར། །རྒྱུད་དང་བསྟན་བཅོས་མཁས་པ་བདག་མིན་ཏེ། །དམ་པ་བླ་མའི་ཞབས་ལ་བརྟེན་ནས་ཆོས་འདི་བྱས། །རྒྱུད་ཀྱི་མངོན་རྟོགས་ངེས་པར་བྱིན་པའི་ཡོན་ཏན་དཔལ། །དད་དང་ཤེས་རབ་སྙིང་རྗེར་བཅས་རྣམས་ངེས་སྒྲོལ་ཤོག །བསྙེན་དང་སྒྲུབ་པའི་
ཆོ་གའི་རིམ། །ཟབ་མོའི་སྒྲུབ་པ་རྙེད་དཀའ་བ། །ནོར་བུ་ལྟ་བུའི་གཞུང་འདི་ཡིས། །འགྲོ་ཀུན་གཤིན་རྗེ་གཤེད་ནག་ཤོག །ཁྲོ་བོའི་རྒྱལ་པོ་གཤིན་རྗེ་གཤེད་ནག་པོའི་དུས་མཐར་ཕྱིན་པའི་སྒྲུབ་པའི་ཐབས་ཞེས་བྱ་བ་རྫོགས་སོ།། །།རྒྱ་གར་གྱི་མཁན་པོ་ཤྲཱི་པཎྜི་ཏས་མཛད་པའོ། །རྣལ་
འབྱོར་པ་བསོད་སྙོམས་པ་པྲཛྙཱ་ཤྲཱི་ཛྙཱ་ན་ཀཱིརྟིས་རང་འགྱུར་དུ་བསྒྱུར་བའོ།། ༄༅༅། །རྒྱ་གར་སྐད་དུ། ཀྲྀཥྞ་ཡ་མཱ་རི་སཱ་དྷ་ནཾ་ནཱ་མ། བོད་སྐད་དུ། གཤིན་རྗེ་གཤེད་ནག་པོའི་སྒྲུབ་ཐབས་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །རྗེ་བཙུན་རྡོ་རྗེ་སེམས་བདག་
སྔགས། །འཇིགས་བྱེད་དཔའ་བོ་དགྲ་ནག་ལ། །བཏུད་དེ་བརྒྱུད་རིམ་ལས་རྙེད་པ། །དངོས་གྲུབ་འབྱུང་ཕྱིར་བཤད་པར་བྱ། །རང་གཟུགས་རྫོགས་པའི་སྙིང་ག་རུ། །ཡ་ཡིག་ལས་ནི་འགྲོ་བར་སྦྱང་། །བདུན་པོ་ཡིས་ཀྱང་སྦྱང་བྱས་ནས། །ཚངས་པའི་གནས་ལ་གཞག་པར་བྱ། །སྟོང་པའི་
སྙིང་པོ་གསལ་བར་བསམ། །བསྲུང་བ་པདྨར་ལྡན་པའི་ནང་། །ཆུ་སྐྱེས་རི་བོང་ཅན་རྣོན་པོ། །བྱང་ཆུབ་རྒྱུ་ཡི་གཤིན་རྗེ་གཤེད། །རྩ་བའི་ཞལ་གྱི་ཁྱད་པར་ཅན། །ཞུ་བའི་ཐིག་ལེ་བྱང་ཆུབ་སེམས། །ཡ་ལས་མཚན་མ་བསྡུ་བར་བྱ། །དེ་ལས་འཇམ་དཔལ་གཤིན་རྗེ་གཤེད། །ཨིནྡྲ་ནཱི་ལ་

ལྟ་བུ་སྟེ། །གཡས་དང་གཡོན་པ་དཀར་དང་དམར། །ཕག་མོ་དེ་མཚུངས་དམ་འཁྱུད་པ། །གྲི་གུག་ཐོད་པ་རྩ་བའི་ཕྱག །རྡོ་རྗེ་བར་དང་ཐ་མ་གྲི། །གཞན་ན་འཁོར་ལོ་པདྨ་འཛིན། །ཐོད་པ་ལྔ་ཡི་དབུ་རྒྱན་ཅན། །སེར་བརྫེས་སྤྱན་དགུ་བཟློག་ཅིང་འགྱུར། །ལྔ་བཅུའི་དོ་
ཤལ་མཉམ་དུ་དཔྱངས། །གདུག་པ་བརྒྱད་ཀྱིས་སྐུ་བརྒྱན་ཅིང་། །རུས་པས་བརྒྱན་ཅིང་དུམ་བུས་སྒེག །མཚོན་ཆ་བཅུ་གཉིས་འཁྲུག་པར་བསམ། །མ་ཧེ་ལ་བཞུགས་སྲིད་རྩེར་འབར། །སྐུ་གསུང་ཐུགས་དང་སྐྱེ་མཆེད་དང་། །དབང་དང་བྱིན་རླབས་མཆོད་དང་བསྟོད། །བདུད་
རྩི་མྱོང་དང་སྤྲོ་བསྡུ་དང་། །བཟླས་པའི་རིམ་པའི་མན་ངག་ལས། །ཤེས་པས་དངོས་གྲུབ་འགྲུབ་པར་འགྱུར། །ཨོཾ་ཀཱ་ལ་རཱུ་པ་ཧཱུྃ། ཨོཾ་ཡ་མ་རཱ་ཛ། ས་དོ་མེ་ཡ། ཡ་མེ་དོ་རུ། ཎ་ཡོ་ད་ཡ། ཡ་ད་ཡོ་ནི། ར་ཡཀྵེ་ཡ། ཡཀྵེ་ཡཙྪ། ནི་རཱ་མ་ཡ། ཧཱུཾ་ཧཱུྃ་ཕཊ་ཕཊ་སྭཱ་ཧཱ། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་
ཧཱུྃ་ཧཱུྃ་ཕཊ་ཕཊ་སྭཱ་ཧཱ། དྲུག་པས་གཏོར་མ་བསྙེན་པར་བྱ། །སུམ་ཅུ་བརྒྱད་པས་ཉེ་བར་བསྙེན། །བཅོ་ལྔ་པས་ནི་ཐམས་ཅད་བསྒྲུབ། །ལས་ཀྱི་འཁོར་ལོ་བསྐོར་བར་བྱ། །གཤེད་ནག་རྒྱུད་དང་འབྱུང་བ་ལས། །རྙེད་དེ་སྒྲུབ་ཐབས་འདི་བྲིས་པས། །བློ་ནི་རབ་དག་གྱུར་ནས་ཀྱང་། །གཤིན་
རྗེ་གཤེད་དུ་འགྱུར་བར་ཤོག །གཤིན་རྗེ་གཤེད་ནག་པོའི་སྒྲུབ་ཐབས། སློབ་དཔོན་མཁས་པ་ཆེན་པོ་དཔལ་མར་མེ་མཛད་ཀྱིས་མཛད་པ་རྫོགས་སོ།། །།རྣལ་འབྱོར་པ་པྲཛྙཱ་ཤྲཱི་ཛྙཱ་ན་ཀཱིརྟིས་རང་འགྱུར་དུ་མཛད་པའོ།། ༄༅༅། །རྒྱ་གར་སྐད་དུ། བཻ་རོ་ཙ་ན་ཡ་མཱ་རི་ནོ་པི་ཀ་ནཱ་མ། བོད་སྐད་དུ།
གཤིན་རྗེ་གཤེད་རྣམ་པར་སྣང་མཛད་ཀྱི་མངོན་པར་རྟོགས་པ་ཞེས་བྱ་བ། རྡོ་རྗེ་སེམས་དཔའ་ལ་ཕྱག་འཚལ་ལོ། །སངས་རྒྱས་རྡོ་རྗེ་རྟག་པའི་དཔལ། །མེ་ལོང་ཡེ་ཤེས་བྱང་ཆུབ་སེམས། །འོད་གསལ་རྡོ་རྗེ་ཀུན་ཞི་བ། །གཏི་མུག་རྡོ་རྗེ་ལ་ཕྱག་འཚལ། །ས་རྣམས་ཕ་རོལ་བགྲོད་པའི་ལམ། །
རྟག་པའི་སྒྲུབ་ཐབས་བཤད་པར་བྱ། །དང་པོར་སྔགས་པས་སྙིང་རྗེ་དྲན་པས་རང་ལུས་རྫོགས་པ་དང་། །སྙིང་གར་ས་བོན་གསལ་བ་ལས་ནི་དམ་པ་རྣམས་བསམས་ནས། །སངས་རྒྱས་ཆོས་དང་དགེ་འདུན་གསུམ་གྱི་ཡོན་ཏན་བསམ་བྱས་ནས། །བསོད་ནམས་རྒྱ་ཆེར་རབ་ཏུ་རྒྱས་པའི་ཚོགས་རབ་

བསག་པར་བྱ། །བྱམས་དང་སྙིང་རྗེ་དགའ་དང་བཏང་སྙོམས་ལྡན་པས་སྟོང་པ་བསྒོམ། །སྲུང་བའི་འཁོར་ལོ་བྱས་ནས་པདྨ་ཟླ་བ་རྒྱས་པའི་སྟེང་། །ཀྵེ་ཡིག་གྱུར་པས་ཆོས་ཀྱི་འཁོར་ལོ་དམར་ཞིང་འོད་འཕྲོ་བ། །བསྡུ་བའི་དེ་ཉིད་ལས་ནི་རྟག་པའི་སྐུར་གྱུར་པ་དེ་ཁྲོ་ལ་སྒེག །རྩ་བའི་ཞལ་དང་གཞན་
གཉིས་དཀར་སྔོ་དམར་ཞིང་ཕྱག་དྲུག་ཡུམ་དང་བཅས། །གྲི་གུག་འཁོར་ལོ་རལ་གྲི་པདྨ་རིན་ཆེན་ཆུ་སྐྱེས་རབ་ཏུ་འཁྲུགས། །གླང་ཆེན་སྟག་གི་པགས་པས་སྟོད་དང་སྨད་དཀྲིས་མི་མགོ་རློན་འཛག་པ། །ཐོད་པ་དྲུག་ལྡན་སྐྲ་ནི་དམར་སེར་གྱེན་བརྫེས་སྤྲུལ་བརྒྱད་ཡན་ལག་སྤྲས། །མེ་དཀྱིལ་ན་
བཞུགས་ཡེ་ཤེས་སེམས་དཔའ་གསལ་ནས་ཡན་ལག་དྲུག་བྱས་ཏེ། །རླུང་དང་མེ་དང་ཐོད་པ་སྣོད་མཆོག་སྒྲོན་མ་བཅུ་ཡིས་ཁ་བཀབ་ནས། །བསྐྱོད་དང་འབར་བས་གླང་པོ་ལ་སོགས་བཅུར་གྱུར་སྦྱོར་བའི་སེམས་བབ་ནས། །ཨོཾ་ཨཱཿཧཱུྃ། བྱིན་རླབས་རྡོ་རྗེའི་སྦུ་གུས་རབ་དྲངས་མཉེས་བྱས་སྤྲོ་
བསྡུས་ཐིམ། །རྡོ་རྗེ་རྟག་པ་རིམ་གྱིས་བསྐྱོད་ལ་རབ་ཐིམ་ནས་ནི་ལྷན་ཅིག་སྐྱེས་པའི་དགའ་བ་བསམ། །ཡོད་དང་མེད་པ་ལས་འདས་སྤྲོས་བྲལ་ནམ་མཁའ་ལྟ་བུའི་བྱང་ཆུབ་སེམས་དྲན་ནས། །རྨི་ལམ་སད་པའི་རྣལ་འབྱོར་ཕུང་པོ་ཁམས་རྣམས་ཀུན་སྤངས་དེར་ཞི་ནས་ནི་ལྡང་བ་བརྩམ། །
ཁམས་སོགས་བདེ་བ་ཆེན་པོར་མདོག་གྱུར་གཟུགས་བརྙན་ལྟ་བུར་རབ་རྟོགས་འདི་ནི་རྒྱལ་སྲས་བདག །སྙིང་པོ་ཉི་ཟེར་ལྟ་བུར་རྡོ་རྗེའི་བཟླས་པ་འགྲོ་བ་ཀུན་ལ་ཕན་པར་བྱ་ཕྱིར་འབུམ་དུ་བཟླས། །རྣལ་འབྱོར་སྒྱུ་མའི་གཟུགས་ཀྱིས་སྟེང་འོག་ལ་སྤྱོད་འཇིག་རྟེན་དོན་འགྱུར་ཐམས་ཅད་གཤིན་
རྗེ་གཤེད་ཐོབ་ཤོག །ཨོཾ་ཛི་ན་ཛིཀ་མོ་ཧ་ར་ཏི། ཧཱུྃ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། གཤིན་རྗེ་གཤེད་པོ་རབ་འཇིགས་པ། །གཏི་མུག་རྡོ་རྗེའི་ངོ་བོ་ཁྱོད། །སྟོན་པ་སངས་རྒྱས་ཀུན་རང་བཞིན། །རྡོ་རྗེ་མི་འཇིགས་ཕྱག་འཚལ་བསྟོད། །སྒྲུབ་ཐབས་སངས་རྒྱས་ལ་འཇུག་པ། །བསྐྱེད་པ་དང་ནི་རྫོགས་
པའི་རིམ། །གོང་མའི་གོ་འཕང་སྟོན་པ་པོ། །སྔགས་རྣམས་སྒྲིབ་པ་གྲོལ་གྱུར་ཅིག །གཤིན་རྗེ་གཤེད་རྣམ་པར་སྣང་མཛད་ཀྱི་མངོན་རྟོགས་ཞེས་བྱ་བ། རྒྱ་གར་གྱི་མཁན་པོ་མཁས་པར་གྲགས་པ། དཔལ་མར་མེ་མཛད་ཀྱིས་མཛད་པ་རྫོགས་སོ།། །།རྣལ་འབྱོར་པ་པྲཛྙཱ་ཤྲཱི་ཛྙཱ་ན་ཀཱིརྟིས་རང་

འགྱུར་དུ་མཛད་པའོ།། ༄༅༅། །རྒྱ་གར་སྐད་དུ། རཏྣ་སཾ་བྷཱ་ཝ་ཡ་མཱ་རི་སཱ་དྷ་ནཾ་ནཱ་མ། བོད་སྐད་དུ། གཤིན་རྗེ་གཤེད་རིན་ཆེན་འབྱུང་ལྡན་གྱི་སྒྲུབ་ཐབས་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །གཞན་དོན་ཡིད་བཞིན་འབྱུང་གནས་རིན་
པོ་ཆེ། །རེ་འདོད་སྐོང་མཛད་རིན་ཆེན་འབྱུང་གནས་རྒྱལ། །ཀུན་རྟོག་བྲལ་བ་མཉམ་པ་ཉིད་ཡེ་ཤེས། །སེར་སྣ་འཇོམས་མཛད་དེ་ལ་ཕྱག་འཚལ་ཏེ། །ང་རྒྱལ་རབ་རྒྱས་སེར་སྣ་དེ་དོན་དུ། །ཕྲ་མ་མཐར་མཛད་རབ་ཏུ་བཤད་པར་བྱ། །བྱང་ཆུབ་སེམས་དང་ཤེས་རབ་ནི། །སྙོམས་འཇུག་དྲན་པའི་སྔགས་
པ་ཡིས། །སྐད་ཅིག་ལྷ་ཡི་རྣལ་འབྱོར་པས། །སྤྲོ་དང་བསྡུ་བ་རབ་ཏུ་བྱ། །བླ་མ་རྗེ་དཔལ་མགོན་པོ་དང་། །སྡུ་གུ་ལྷ་སོགས་རབ་དམིགས་ཏེ། །ཕྱག་འཚལ་ལ་སོགས་ཁྱད་པར་ནི། །མ་ལུས་ལུས་པ་མེད་པར་བྱ། །སངས་རྒྱས་ཀུན་གྱི་ལམ་གྱུར་པའི། །གོ་རིམས་ཚངས་པའི་གནས་
རྣམས་བསྒོམ། །རང་བཞིན་སྟོང་པ་རྐྱེན་གྱིས་ཏེ། །ཡེ་ཤེས་ཚོགས་རབ་བསག་པར་བྱ། །མ་ཡིག་ཧཱུྃ་གིས་སྣ་ཚོགས་ལས། །སྲུང་བའི་འཁོར་ལོ་འབར་བའོ། །ཆུ་སྐྱེས་ཐབས་དང་ཤེས་རབ་སྟེ། །མ་ལས་རིན་ཆེན་ཟུར་བརྒྱད་པ། །སྤྲོ་བསྡུའི་ང་རྒྱལ་གསལ་བར་བྱ། །ཨོཾ་རཏྣ་སཾ་བྷཱ་ཝ་
ཨཱཏྨ་ཀོ྅ཧོ། དེ་ལས་གྱུར་པའི་རྡོ་རྗེ་ནི། །བཙོ་མ་གསེར་གྱི་མདངས་མངའ་ཞིང་། །རང་འོད་དང་མཚུངས་རིག་མར་ལྡན། །ཞལ་གསུམ་གཡས་གཡོན་སྔོ་དང་དཀར། །སྤྱན་དགུ་མཆེ་གཙིགས་ཕྱག་དྲུག་པ། །གྲི་གུག་ཐོགས་པ་རྩ་བའི་ཕྱག །རིན་ཆེན་རལ་གྲི་འཁོར་ལོ་པད། །གཡས་དང་གཡོན་
ལ་རིམ་གྱིས་སྦྱར། །དབུ་སྐྲ་སེར་བརྫེས་གདུག་པའི་རྒྱན། །ལྔ་བཅུའི་ཕྲེང་དང་དུར་ཁྲོད་སྤྲས། །འོད་ཟེར་རྣོ་དང་མེ་དཔུང་འབར། །མི་ཕྱེད་རབ་ཏུ་འཁྱུད་པའོ། །ས་བོན་རྫོགས་དང་མིག་ལ་སོགས། །ཀྵིཾ་ཛིཾ་ཁཾ་གཾ་ཀཾ་སཾ་ལས། །རྫོགས་པ་དྲུག་ནི་བྱང་ཆུབ་སེམས། །ཨོཾ་ཨཱཿཧཱུྃ་ལས་སྐུ་གསུང་ཐུགས། །
འཕྲོས་པས་རིན་དབང་གཤིན་རྗེ་གཤེད། །རབ་གནས་རང་ཛཿཧཱུྃ་བཾ་ཧོཿ། །རྣམ་འཕྲུལ་མཆོད་པ་བྱང་ཆུབ་སེམས། །བསྟོད་པ་རྒྱུད་རྒྱལ་ཇི་སྙེད་བཞིན། །རླུང་མེ་ཐོད་པ་སྒྲོན་མེ་བཅུ། །བྱིན་རླབས་བདུད་རྩི་མྱངས་ནས་ཀྱང་། །སྤྲོ་བསྡུ་བྱས་ནས་བཟླས་པ་བརྩམ། །ཨོཾ་རཏྣ་དྷྲྀཀ་དྭེ་ཥ་ར་ཏི།

ཧཱུྃ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། སྟོང་གི་ནུས་པ་ཁྱད་པར་རྙེད། །མཁའ་འགྲོ་མ་ཡང་དེ་དབང་འགྱུར། །ཁྲི་ཡིས་འབྱུང་པོ་ལས་ཀུན་བྱེད། །བྱེ་བས་རྒྱས་དང་བརླག་འགྱུར་ཏེ། །བྱེ་བ་ལྔ་བཟླས་ཚད་དང་བྲལ། །ཤིན་ཏུ་རབ་ཞི་བསྡུས་པ་ནི། །ཆུ་ཡི་སྙིང་པོ་དེ་བཞིན་དུ། །ཆུར་འགྱུར་རང་གི་གདོས་
དང་བྲལ། །དངོས་མེད་མཉམ་པར་བསྒོམ་པར་བྱ། །བདག་གིས་རབ་ཕྱེ་ལ་སོགས་མ་བཤད་དང་། །བྱང་ཆུབ་ལ་མོས་སྒྲུབ་པོ་འགའ་ཙམ་ལས། །ང་རྒྱལ་གཤིན་རྗེ་གཤེད་ཀྱི་སྒྲུབ་པ་བརྩམས། །འདིར་མོས་རྡོ་རྗེའི་ས་ལ་ཐོགས་མེད་ཤོག །གཤིན་རྗེ་གཤེད་རིན་ཆེན་འབྱུང་ལྡན་གྱི་སྒྲུབ་
ཐབས་ཞེས་བྱ་བ། སློབ་དཔོན་ཆེན་པོ་དཔལ་མར་མེ་མཛད་ཀྱིས་མཛད་པ་རྫོགས་སོ།། །།རྣལ་འབྱོར་པ་པྲཛྙཱ་ཤྲཱི་ཛྙཱ་ན་ཀཱིརྟིས་རང་འགྱུར་དུ་མཛད་པའོ།། ༄༅༅། །རྒྱ་གར་སྐད་དུ། ཨ་མི་ཏཱ་བྷཱ་ཧྲྀ་ད་ཡ་རཱ་ག་ཡ་མཱ་རི་སཱ་དྷ་ནཾ་ནཱ་མ། བོད་སྐད་དུ། འོད་དཔག་ཏུ་མེད་པའི་སྙིང་པོ་འདོད་
ཆགས་གཤིན་རྗེ་གཤེད་སྒྲུབ་པའི་ཐབས་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །སྐུ་གསུང་ཐུགས་དབྱེར་མེད་པ་ཡི། །འདོད་ཆགས་ཆེ་ལ་ཕྱག་འཚལ་ཏེ། །གང་ཞིག་མངོན་ཞེན་འཇིགས་བྱེད་པ། །འདོད་ཆགས་རྡོ་རྗེའི་སྒྲུབ་ཐབས་བཤད། །དད་ལྡན་ཤེས་རབ་སྙིང་རྗེ་
ཡིས། །དོན་བཅས་གཞན་དོན་གཙོར་འཛིན་པས། །སྦྱིན་པ་ལ་སོགས་ལེགས་སྦྱངས་ཏེ། །ཡིད་སྐྱོབ་སྔགས་འདི་བརྩམ་པར་བྱ། །དང་པོར་སྔགས་པས་ཁྲུས་བྱས་ནས། །ནང་ཚངས་ཅན་གྱི་སྟན་བཏིང་ལ། །རང་གི་སྙིང་ཉིད་བསྐུལ་བར་བྱ། །ཕྱག་འཚལ་ལ་སོགས་འདུས་བྱས་དང་། །ཐེག་
ཆེན་ཆོ་ག་བཞི་དག་དང་། །སྟོང་པའི་རང་བཞིན་དེ་ཉིད་ཀྱིས། །བདག་རྒྱུད་ཡོངས་སུ་དག་པར་བྱ། །བདུད་རྣམས་ཞི་བར་བྱ་ཕྱིར་དང་། །སངས་རྒྱས་ཞིང་རྣམས་དག་པའི་ཕྱིར། །བསྲུང་དང་ཆུ་སྐྱེས་བསྒོམ་པར་བྱ། །མཚོན་ཆ་རྒྱས་དང་འོད་ཟེར་སྣ། །བཾ་དང་རཾ་ལས་བྱུང་བ་ཡི། །ཉི་མ་ས་བོན་
མེ་ཡིག་ལས། །བཅུ་དྲུག་མདའ་བཅས་ལྔ་འོད་ཟེར། །བསྡུས་ནས་བྱིན་གྱིས་བརླབ་པར་བྱ། །ཨོཾ་ཨ་མི་ཏཱ་བྷཱ་ཧྲྀ་ད་ཡ་རཱ་ག་ཡ་མཱ་རི་ཨཱཏྨ་ཀོ྅ཧཾ། གྱུར་པས་རྡོ་རྗེ་སྣང་མཐའ་ཡས། །པདྨ་རཱ་གའི་མདངས་དང་མཉམ། །གཡས་གཡོན་ཞལ་ནི་སྔོ་དང་དཀར། །རང་རིག་ཡུམ་ནི་ཐབས་དང་

མཚུངས། །སྟོད་སྨད་སྟོབས་འཇིགས་པགས་པ་གཉིས། །གྲི་གུག་ཐོད་པ་རལ་གྲི་དང་། །འཁོར་ལོ་རིན་ཆེན་ཤིན་ཏུ་འཁྲུག །སྦྲུལ་དང་རུས་པས་རྣམ་བརྒྱན་པ། །དབུ་སྐྲ་མཛེས་ལ་སྤྱན་མིག་འཁྲུག །མཆེ་གཙིགས་འབར་བའི་མེ་དཔུང་བསྒོམ། །རྡོ་རྗེ་མིག་དང་
རྣ་སྣ་ལྕེ། །ལུས་ཡིད་ལ་ནི་ས་སྙིང་སོགས། །རྡོ་རྗེ་ལུས་དང་ངག་ཡིད་ལ། །རྡོ་རྗེ་སྐུ་གསུང་ཐུགས་ལྡན་བསམ། །མི་བསྐྱོད་ལ་ནི་དབང་བླང་སྟེ། །དབུ་ལ་གཤིན་རྗེ་གཤེད་པོ་བསྒོམ། །སྒོ་བཞིའི་སྔགས་ཀྱིས་བཅུག་ནས་ཀྱང་། །ཙརྩི་ཀཱ་སོགས་རྣམ་འཕྲུལ་མཆོད། །གཤིན་རྗེ་གཤེད་པོ་རབ་
འཇིགས་པ། །འདོད་ཆགས་རྡོ་རྗེའི་ངོ་བོ་ཁྱོད། །འདོད་ཆགས་ཆོས་ཀྱི་འབྱུང་གནས་བརྙེས། །དབྱངས་མཆོག་གསུང་ལ་ཕྱག་འཚལ་བསྟོད། །ཨོཾ་ཨཱཿཧཱུྃ་གིས་བྱིན་གྱིས་བརླབ། །བདུད་རྩི་མྱངས་ལ་སྤྲོ་བསྡུ་བྱ། །སྔགས་པས་ཇི་སྲིད་མི་སྐྱོའི་བར། །བཟླས་ཞིང་སྤྲོ་བསྡུ་རྒྱས་པར་བྱ། །ཨོཾ་ཨཱ་རོ་
lལྀཀ་རཱ་ག་ཏི་ཧཱུྃ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། །ཐམས་ཅད་འདོད་ཆགས་རྗེས་དྲན་ནས། །འདོད་ཆགས་ཆེན་པོར་རབ་དམིགས་ཏེ། །ཚད་མེད་ཡི་གེ་སྤངས་པ་ཡིས། །ཨ་དོན་བསམ་མི་ཁྱབ་པ་བསྒོམ། །སྙིང་རྗེ་སད་པས་ལངས་ནས་ཀྱང་། །ཕྱག་རྒྱ་བཀྲོལ་ལ་སྤྱོད་ལམ་བྱ། །ཐམས་ཅད་དུ་ནི་ང་རྒྱལ་
བདག །སྤངས་ནས་དམ་ཚིག་ཉམས་པ་ཡིན། །བདག་གི་འདོད་ཆགས་རྒྱ་མཚོར་ནུབ་རྣམས་ལ། །འཁོར་བའི་མཚོ་ལ་བདེ་བའི་གྲུ་བཙུགས་ཏེ། །གསུང་གི་དབང་ཕྱུག་སྒྲུབ་ཐབས་འདི་བྱས་པས། །འགྲོ་ཀུན་པདྨ་བཞིན་དུ་དྲི་མེད་ཤོག །འོད་དཔག་ཏུ་མེད་པའི་སྙིང་པོ་འདོད་ཆགས་གཤིན་
རྗེ་གཤེད་ཀྱི་སྒྲུབ་ཐབས་ཞེས་བྱ་བ། སློབ་དཔོན་མར་མེ་མཛད་ཀྱིས་མཛད་པ་རྫོགས་སོ།། ༄༅༅། །རྒྱ་གར་སྐད་དུ། བཛྲ་ཏཱི་ཀྵྞ་ཡ་མཱ་རི་སཱ་དྷ་ནཾ་ནཱ་མ། བོད་སྐད་དུ། གཤིན་རྗེ་གཤེད་རྡོ་རྗེ་རྣོན་པོ་ཞེས་བྱ་བའི་སྒྲུབ་ཐབས། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དམ་ཚིག་སེམས་
ཅན་དོན་བྱེད་ཅིང་། །ནན་ཏན་ཡེ་ཤེས་ཕྱིར་མི་ལྡོག །མར་གད་ལྗང་གུའི་མདོག་འདྲ་ལ། །རབ་ཏུ་དང་བས་བཏུད་བྱས་ཏེ། །བརྟུལ་ཞུགས་ཐོགས་པ་མེད་པ་ཡིས། །ལས་ཀྱི་དོན་ཀུན་རབ་འགྲུབ་ཕྱིར། །དགྲ་ནག་རྒྱུད་ལ་ཉེར་བསྟེན་ནས། །ཕྲག་དོག་རྡོ་རྗེའི་སྒྲུབ་ཐབས་བཤད། །དཔལ་ལྡན་གཡོ་སྒྱུ་

མེད་པ་ཡིས། །བླ་མ་མགོན་ལ་བཏུད་སྦྱངས་ཏེ། །བུམ་སོགས་དབང་ནི་ཐོབ་ནས་ཀྱང་། །དམ་བཅས་ནས་ནི་བསྒྲུབ་པར་བྱ། །རང་ཉིད་ལྷག་པའི་ལྷར་དམིགས་ཏེ། །སྙིང་གར་རི་བོང་ཅན་གྱི་དཀྱིལ། །དྷཱིཿཡིག་འོད་ཟེར་ལྔ་ལྡན་ལས། །ཞིང་གཉིས་མ་ལུས་སྦྱང་བར་བྱ། །ཁྱད་པར་ཡུལ་ལ་བརྟེན་
ནས་ཀྱང་། །ཕྲ་རབ་ལུས་ཀྱི་ཕྱག་འཚལ་བྱ། །ཙརྩི་ལ་སོགས་རྣམ་འཕྲུལ་གྱིས། །ཕྱི་ནང་གསང་བའི་མཆོད་པ་བྱ། །སྡིག་སོགས་དག་པར་བྱས་ནས་ཀྱང་། །རྗེ་བཙུན་པ་ནི་མཁའ་ལ་གཤེགས། །དོན་དམ་ཀུན་རྫོབ་བྱང་ཆུབ་སེམས། །ཚངས་པའི་གནས་དང་སྟོང་པ་བསྒོམ། །ཨོཾ་ཤཱུ་ནྱ་ཏཱ་
ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཉི་དཀྱིལ་འོད་ཟེར་ལྔ་ལྡན་པའི། །ཧཱུྃ་ལས་སྲུང་བའི་འཁོར་ལོ་བསམ། །པདྨའི་སྟེང་དུ་ཉི་མ་སྟེ། །དྷཱིཿལས་ཨུཏྤལ་རལ་གྲིར་གྱུར། །སྤྲོ་བསྡུས་སྐུ་གསུང་ཐུགས་བཅུག་སྟེ། །གྱུར་པས་ཕྲག་དོག་གཤིན་རྗེ་གཤེད། །མར་གད་ལྗང་གུ་ལྟ་བུར་མཛེས། །སྔོ་དང་
དཀར་བ་གཡས་གཡོན་ཞལ། །རང་འདྲ་ཡུམ་ནི་ཅུང་ཟད་སྐེམ། །འཁྱུད་ཅིང་ཡང་དག་མཛེས་པར་ལྡན། །གྲི་གུག་རལ་གྲི་འཁོར་ལོ་དང་། །ཐོད་པ་རིན་ཆེན་ཆུ་སྐྱེས་འབར། །སྟོད་སྨད་གླང་ཆེན་སྟག་ལྤགས་བསྣམས། །རྟོག་མེད་གོ་ཆ་ཕྲེང་བར་དཔྱངས། །གླུ་བརྒྱད་ཕུཊ་སྒྲ་མཆེ་བ་གཙིགས། །
མེ་དཀྱིལ་ནང་ན་བཞུགས་པ་ལ། །སྐུ་གསུང་ཐུགས་ལ་རྡོ་རྗེ་གསུམ། །སྐྱེ་མཆེད་དྲུག་ལ་བྱང་ཆུབ་སེམས། །དབང་བསྐུར་སྤྱི་བོར་གཤིན་རྗེ་གཤེད། །སྒོ་བཞིའི་སྔགས་ཀྱི་བྱིན་གྱིས་བརླབས། །རྣམ་འཕྲུལ་མཆོད་པ་བསམ་མི་ཁྱབ། །ཕྲག་དོག་རྡོ་རྗེའི་ངོ་བོ་ཁྱོད། །གཤིན་རྗེ་གཤེད་པོ་
ལས་ཀུན་བྱེད། །སྐུ་ཡི་རྡོ་རྗེ་རབ་འདྲ་བ། །རལ་གྲི་ཕྱག་ལ་ཕྱག་འཚལ་བསྟོད། །རླུང་དང་མེས་ནི་པདྨ་སྦྱངས། །ཡེ་ཤེས་ཞུ་བ་གསུམ་བྱིན་བརླབ། །རྡོ་རྗེ་སྦུ་གུས་མཆོད་བྱས་པས། །སངས་རྒྱས་ཐམས་ཅད་མཉེས་པར་འགྱུར། །སྤྲོ་དང་བསྡུ་བའི་རྣལ་འབྱོར་ནི། །ཀུན་རྫོབ་བདེན་པ་བླ་མེད་ཡིན། །
ཁབ་ལེན་རྡོ་ཡི་རྣམ་པ་ལྟར། །བདེ་བའི་ཡེ་ཤེས་འཛིན་བྱེད་པ། །ཆོས་ཀུན་རོ་གཅིག་པ་ཡིན་ཏེ། །ནན་ཏན་ཡེ་ཤེས་ཞེས་བྱའོ། །རྒྱུད་རྒྱལ་གསང་བ་འདུས་སོགས་ཀྱི། །དགོངས་པ་བསྐྱེད་དང་རྫོགས་པའི་རིམ། །རྒྱུད་གཞུང་ཐམས་ཅད་འགལ་མེད་འདིས། །འགྲོ་རྣམས་ཉེ་བར་འཚོ་གྱུར་ཅིག །

གཤིན་རྗེ་གཤེད་རྡོ་རྗེ་རྣོན་པོ་ཞེས་བྱ་བའི་སྒྲུབ་ཐབས། སློབ་དཔོན་ཆེན་པོ་མར་མེ་མཛད་ཀྱིས་མཛད་པ་རྫོགས་སོ།། །།རྣལ་འབྱོར་པ་པྲཛྙཱ་ཤྲཱི་ཛྙཱ་ན་ཀཱིརྟིས་རང་འགྱུར་དུ་མཛད་པའོ།། ༄༅༅། །རྒྱ་གར་སྐད་དུ། བཛྲ་ཙརྩི་ཀཱ་སཱ་དྷ་ནཾ་ནཱ་མ། བོད་སྐད་དུ། རྡོ་རྗེ་སེམས་མ་
བདེ་བའི་སྒྲུབ་ཐབས་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཐབས་ཀྱི་རྒྱལ་པོ་ལ་འདུད་ཤེས་རབ་གོ་ཆ་ཅན། །བྱམས་པ་རྣམ་པར་དག་པས་སེམས་ཅན་བརྩེ་སྐྱོང་བ། །ཐབས་ཆེན་སད་པའི་མདའ་ཡིས་མ་རིག་སྲོག་གཅོད་ཅིང་། །གཏི་མུག་རྣམ་པར་དག་པ་ཡེ་ཤེས་ཡུལ་
ཅན་ལ། །བཏུད་དེ་ཞེ་སྡང་ཐམས་ཅད་རྣམ་པར་མཐར་བྱེད་ཅིང་། །སྙིང་པོ་འཁོར་ལོ་བསྒྲུབ་ཕྱིར་རབ་ཏུ་བཤད་པར་བྱ། །དང་པོ་སྔགས་པས་ཐོ་རངས་ཆ། །ཁྲུས་ཀྱི་བུམ་པ་ལེགས་བྱུགས་ནས། །གུར་གུམ་ཆུས་བྱུགས་རྡོ་དག་གིས། །སྒོ་དགུ་ལ་ནི་བརྡེག་པར་བྱ། །དེ་ནས་གོས་སོགས་ཚུལ་
བསྡམས་ནས། །ཤུ་ཀྲ་དཀར་པོའི་མཎྜལ་བྱ། །བདག་ཉིད་ལྷ་རུ་གསལ་བ་ཡིས། །རྣམ་དག་བདུན་དང་ཚད་མེད་བཞི། །བྱས་ནས་ཕྱི་ནང་ཆོས་ལ་བལྟ། །སྔགས་རྐྱེན་གྱིས་ནི་རྣམ་ཐར་བསྒོམ། །བདག་བསྲུང་བ་ནི་ཡེ་ཤེས་ལ། །གཞན་བསྲུང་འཁོར་ལོ་ཆེན་པོའོ། །མ་ཆགས་དང་ནི་འོད་
ཟེར་བསིལ། །ཛ་ལས་ཆོས་ཀྱི་འཁོར་ལོ་བསྐོར། །སྤྲོ་བསྡུས་ང་རྒྱལ་བརྩམ་པར་བྱ། །ཨོཾ་བཛྲ་ཙརྩི་ཀཱ་ཨཱཏྨ་ཀོ྅ཧཾ། གྱུར་པས་སྐུ་མདོག་དཀར་ལ་ཞི། །ཅུང་ཟད་སྐེམ་ཞིང་ཕྲ་ལ་འཇམ། །དཀར་སྔོ་དམར་བའི་ཞལ་གསུམ་མ། །གྲི་གུག་འཁོར་ལོ་རལ་གྲི་དང་། །ཐོད་པ་རིན་ཆེན་ཆུ་སྐྱེས་
འཛིན། །སྟག་གི་པགས་པས་སྨད་དཀྲིས་ཏེ། །དབུ་སྐྲ་སེར་བརྫེས་ཐོད་པ་ལྔ། །དབུ་རྒྱན་ལྔ་བཅུའི་ཕྲེང་བ་ཅན། །ཞི་ཞིང་སྒེག་པ་མེ་དབུས་དཀྱིལ། །གཡོན་བསྐུམ་གཡས་པ་བརྐྱང་བས་གནས། །རང་སྙིང་ས་བོན་རྫོགས་པ་དང་། །ཡིག་འབྲུ་གསུམ་ལ་རྡོ་རྗེ་གསུམ། །སྐྱེ་མཆེད་ལ་ནི་
རྡོ་རྗེ་དྲུག །རིག་པའི་དབང་བསྐུར་གཤིན་རྗེ་གཤེད། །ཛཿཧཱུྃ་བཾ་ཧོཿརབ་ཐིམ་ནས། །བ་སྤུ་བུ་ག་ཆེན་པོའམ། །ཡང་ན་སྙིང་གའི་རྣམ་འཕྲུལ་དང་། །ཕྱི་ནང་གསང་བའི་མཆོད་པ་བྱ། །ལག་པ་རྡོ་རྗེ་དྲིལ་ལྡན་པས། །རྡོ་རྗེ་ཞི་བ་བྱང་ཆུབ་སེམས། །གཏི་མུག་རྡོ་རྗེ་ཉིད་དབྱེར་མེད། །ཆོས་ཀྱི་

དབྱིངས་ཀྱི་བདག་ཆེན་པོ། །རྡོ་རྗེ་སེམས་དཔའ་ཕྱག་འཚལ་བསྟོད། །སྤྲོ་དང་བསྡུ་བ་བྱེད་པའམ། །ཇི་སྲིད་མི་སྐྱོའི་བར་དུ་བྱ། །ཞི་རྒྱས་དབང་དང་དྲག་པོ་ཡིས། །ཕྲིན་ལས་མཐུན་པར་གསང་སྔགས་བསྒྲུབ། །ཨོཾ་མོ་ཧ་ར་ཏི་བཛྲ་ཧཱུྃ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། རྡོ་རྗེ་ཚིག་ནི་མི་གསལ་ཞིང་། །སྔགས་
པའི་ཡིད་གསལ་བཟླས་པར་བྱ། །གལ་ཏེ་སྤྲོས་པའི་རྣལ་འབྱོར་གྱིས། །ངལ་བ་གསོ་བ་འདི་ལྟ་སྟེ། །ཆོས་ཀུན་ཞི་བ་རིམ་བཞིན་དུ། །པདྨ་ཆོས་འབྱུང་ལ་ཐིམ་བྱ། །ཆོས་ཀུན་ཡི་གེ་གསུམ་ལྡན་པས། །གོ་རིམས་ཨ་ཡི་སྒྲས་བསྐུལ་ཏེ། །སྐྱེ་མེད་འོད་གསལ་བསྒོམ་པར་བྱ། །
གཏི་མུག་རབ་ཏུ་རྨོངས་པའི་མུན་ཆེན་དང་། །ང་བདག་འཆིང་ཆེན་རབ་ཏུ་གཅད་པའི་ཕྱིར། །རྒྱུད་ཆེན་ལས་བྱུང་བཅོམ་ལྡན་མངོན་སུམ་དུ། །ཐོས་ནས་བྲིས་པའི་གཞུང་འདིས་ཀུན་གྲོལ་ཤོག །རྡོ་རྗེ་སེམས་མ་བདེ་བ་སྒྲུབ་པའི་ཐབས་ཞེས་བྱ་བ་སློབ་དཔོན་མཁས་པ་ཆེན་པོ་མར་མེ་མཛད་ཀྱིས་མཛད་
པ་རྫོགས་སོ།། །།རྣལ་འབྱོར་པ་པྲཛྙཱ་ཤྲཱི་ཛྙཱ་ན་ཀཱིརྟིས་རང་འགྱུར་དུ་མཛད་པའོ།། ༄༅༅། །རྒྱ་གར་སྐད་དུ། བཛྲ་ཌཱ་ཀི་ཡོ་གི་ནི་སཱ་དྷ་ནཾ་ནཱ་མ། བོད་སྐད་དུ། རྡོ་རྗེ་མཁའ་འགྲོ་མ་རྣལ་འབྱོར་མའི་སྒྲུབ་ཐབས་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །སྐུ་མདོག་རང་བཞིན་
རྣམ་དག་བདེ་བ་ལ་སྤྱོད་ཅན། །རྣམ་པར་རྟོག་པ་བྲལ་བས་ཕག་མོའི་ཞལ་མངའ་བ། །བཏུད་དེ་རྡོ་རྗེ་མཁའ་འགྲོ་མ་ནི་རབ་བསྒྲུབ་ཕྱིར། །ལྷན་ཅིག་སྐྱེས་པའི་ཡེ་ཤེས་བདེ་རྙེད་བཤད་པར་བྱ། །སྔགས་པ་ཤེས་རབ་སྙིང་རྗེར་ལྡན། །ས་བོན་ལས་ནི་རྐྱེན་གྱིས་བསྐྱེད། །མྱུ་གུ་རང་གི་ལྷར་ལྡན་པས། །
ཚོགས་བསགས་འབྲས་བུ་རྫོགས་པའི་ཕྱིར། །དཀྱིལ་འཁོར་ཆང་གིས་བྱུགས་ནས་ཀྱང་། །རང་བྱུང་མེ་ཏོག་ཐིག་ལེ་དགོད། །བསྐུས་པའི་མེ་ཏོག་སྔོན་པོ་དགྲམ། །ཕྱག་སོགས་བདག་གིས་ཅི་ནུས་བྱ། །དང་པོ་བྱམས་པ་བསྒོམ་བྱ་སྟེ། །གཉིས་པ་སྙིང་རྗེའི་རྣམ་པ་བསྒོམ། །གསུམ་པ་དགའ་
བ་བསྒོམ་བྱ་སྟེ། །གསུམ་གྱི་ཐ་མ་བཏང་སྙོམས་སོ། །ཆོས་ཀུན་སྟོང་པ་ཉིད་དག་ཏུ། །ཤེས་པའི་རྣལ་འབྱོར་རིག་པའི་རྒྱུན། །ཡི་གེ་མ་རུ་གནས་པ་དག །ཉི་མའི་དཀྱིལ་འཁོར་སྟེང་ཉིད་དུ། །ཐུགས་ཀྱི་ཡི་གེ་བསྲུང་བ་བསམ། །པདྨའི་འོད་ཟེར་བསིལ་བའི་སྟེང་། །ས་ལ་རྡོ་རྗེ་སྔོན་པོ་སྟེ། །སྤྲོ་བསྡུས་ང་

རྒྱལ་དྲན་པར་བྱ། །ཨོཾ་དྭེ་ཥ་ར་ཏི་བཛྲ་ཨཱཏྨ་ཀོ྅ཧཾ། གྱུར་པས་རྡོ་རྗེ་ཕག་མོ་སྟེ། །ཨིནྡྲ་ནཱི་ལའི་མདོག་འདྲ་བ། །རྩ་བ་ཕག་གདོང་རབ་སྔོ་ཞིང་། །དེ་ལས་གཞན་པ་དཀར་དང་དམར། །གྲི་གུག་ཐོད་པ་རྩ་བའི་ཕྱག །རྡོ་རྗེ་རལ་གྲི་འཁོར་ལོ་པད། །རིམ་བཞིན་བཀོད་པའི་སྐུ་མཆོག་ནི། །
གཡོན་བསྐུམ་གཡས་པ་བརྐྱང་བས་གནས། །དབུ་དང་སྐུ་ནི་དུར་ཁྲོད་དང་། །ཀླུ་ཡིས་མཛེས་ཤིང་ཕྲེང་བ་ལྡན། །མེ་དཔུང་ནང་ན་གཟི་བརྗིད་ཆེ། །བསྐྱེད་པ་གསུམ་ལ་རྡོ་རྗེ་ཆེ། །དྲུག་ལ་བྱང་ཆུབ་སེམས་དཔའ་དྲུག །རིག་པའི་དབང་བསྐུར་གཤིན་རྗེ་གཤེད། །ཡེ་ཤེས་ཕག་མོས་བྱིན་གྱིས་
བརླབ། །མཆོད་པའི་རྣམ་འཕྲུལ་སྙིང་ལས་སྤྲུལ། །མི་བསྐྱོད་རྡོ་རྗེ་ཡེ་ཤེས་ཆེ། །ཞེ་སྡང་བདག་པོ་ཐུགས་དབྱེར་མེད། །མི་ཕྱེད་རྣམ་རྟོག་རབ་གཅོད་པ། །རྡོ་རྗེ་ཕག་མོ་ཁྱོད་ཕྱག་འཚལ། །འཕྲོས་པས་སྙིང་གའི་ས་བོན་ཏེ། །སྦྱངས་པ་རང་ཡིད་དང་བའི་ལྷར། །བྱས་ནས་བསྡུ་བ་དག་ཀྱང་བྱ། །
གལ་ཏེ་སྐྱོ་ན་གསང་སྔགས་བཟླས། །ཡེ་ཤེས་སེམས་དཔའི་དཀྱིལ་ཉི་སྟེ། །རྡོ་རྗེ་སྔགས་ནི་འབར་བར་བསམ། །ཨོཾ་དྭེ་ཥ་ར་ཏི་བཛྲ་ཧཱུྃ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། སྟོང་དང་ཁྲི་དང་བྱེ་བར་བཟླས། །སྔགས་པས་དངོས་གྲུབ་ཐོབ་པར་འགྱུར། །རབ་ཏུ་ཞི་བའི་བྱང་ཆུབ་སེམས། །ཡི་གེ་ཁ་དོག་དབྱིབས་
ཀྱང་མེད། །རྣམ་པར་རྟོག་པ་ཀུན་སྤངས་པའི། །སྐྱེ་འཇིག་མེད་པ་བསྒོམ་པར་བྱ། །དེ་ལ་རྟེན་ཅིང་འབྲེལ་འབྱུང་སྟེ། །ཕྱག་རྒྱ་བཀྲོལ་ལ་སྤྱོད་ལམ་བྱ། །ཨོཾ་ཨཱཿཧཱུྃ་མུཿ། བདག་གིས་རྗེ་བཙུན་ཕ་ལ་རྒྱུ་རྙེད་པ། །རྟོག་བྲལ་ཆོས་སྐུ་གཟུགས་སྐུ་སྣང་སྒྲུབ་ཐབས། །ཕག་མོ་རྣལ་འབྱོར་མ་ཡི་
སྒྲུབ་ཐབས་བྱས། །འདི་ཡིས་དགེ་ཐོབ་ཐམས་ཅད་གྲོལ་གྱུར་ཤོག །རྡོ་རྗེ་མཁའ་འགྲོ་རྣལ་འབྱོར་མའི་སྒྲུབ་ཐབས་སློབ་དཔོན་མར་མེ་མཛད་ཀྱིས་མཛད་པ་རྫོགས་སོ།། ༄༅༅། །རྒྱ་གར་སྐད་དུ། བཛྲ་གཱི་ཏི་སུ་ཁ་ར་ད་སཱ་དྷ་ནཾ་ནཱ་མ། བོད་སྐད་དུ། རྡོ་རྗེ་བདེ་རྒྱས་དབྱངས་ཅན་མའི་སྒྲུབ་ཐབས་
ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཤེས་རབ་ཕ་རོལ་ཕྱིན་པ་རྒྱལ་བ་ཀུན་གྱི་ཡུམ། །དྲི་མ་མེད་པའི་གསུང་ཆེན་རྡོ་རྗེ་དབྱངས་ཅན་མ། །བཏུད་དེ་སངས་རྒྱས་བདེ་ཆེན་རབ་ཏུ་འཕེལ་བྱའི་ཕྱིར། །གསུང་གི་པདྨ་དྲི་མ་མེད་པའི་སྒྲུབ་ཐབས་བཤད། །ནགས་ཚལ་མི་མེད་དབེན་

པའི་གནས། །ཉམས་དགའ་བཀྲ་ཤིས་དང་བ་རུ། །འཇམ་པའི་སྟན་ལ་འདུག་ནས་ནི། །ཆུ་བུར་ལྟ་བུའི་ཚུལ་གྱིས་བསྒོམས། །སེམས་ཅན་ཀུན་དོན་ལེགས་བྱས་ནས། །དམ་པའི་འཁོར་ལོ་བསྒོམ་པར་བྱ། །ཕྱག་འཚལ་བསྟོད་དང་བཤགས་པ་དང་། །རྗེས་སུ་ཡི་རང་བསྐུལ་
གསོལ་གདབ། །བསྔོ་དང་སྨོན་ལམ་བཏབ་བྱས་ནས། །ཡིད་ཀྱིས་གཤེགས་གསོལ་ཚད་མེད་བཞི། །སྔོན་འགྲོ་སྟོང་པ་བསྒོམ་པར་བྱ། །སྲུང་བའི་འཁོར་ལོ་འཇིགས་ཆེན་པོ། །མཚོན་ཆ་འཁྲུག་པ་ཤིན་ཏུ་བསྒོམ། །པདྨ་ཟླ་བའི་སྟེང་ཉིད་དུ། །བྱུ་རུ་བཅག་འདྲའི་ངོ་དག་ལས། །ཆུ་སྐྱེས་
འདབ་བརྒྱད་མཚན་མར་ལྡན། །འཕྲོས་ནས་བསྡུ་བ་བྱ་བ་ནི། །རིགས་ཀྱི་འཁོར་ལོ་མ་ལུས་པའོ། །ཨོཾ་བཛྲ་རཱ་ག་ར་ཏི་ཨཱཏྨ་ཀོ྅ཧཾ། གྱུར་པས་པདྨ་རཱ་གའི་མདོག །ཞལ་གསུམ་གཡས་གཡོན་སྔོ་དང་དཀར། །ཕྱག་དྲུག་གྲི་གུག་པདྨ་དང་། །རལ་གྲི་ཐོད་པ་འཁོར་ལོ་དང་། །ནོར་བུ་ཡིས་
ནི་ཤིན་ཏུ་མཛེས། །དབུ་ལ་ཐོད་པ་ལྔས་བསྐོར་ཞིང་། །རློན་པ་བརྒྱ་ཕྱེད་ཕྲེང་བར་ལྡན། །རིན་ཆེན་ཀླུ་དང་རུས་པས་སྤྲས། །ཤིན་ཏུ་ཞི་ཞིང་སྒེག་པ་སྟེ། །སྟག་ལྤགས་བསྣམས་ནས་མེ་དཔུང་དཀྱིལ། །གཡོན་བསྐུམ་གཡས་པ་བརྐྱང་བས་གནས། །ཨོཾ་དྷརྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། ཧཱུྃ་
ལས་ཐུགས་ཀྱི་རྡོ་རྗེ་སྟེ། །ཨཱཿལས་གསུང་དང་ཨོཾ་ལས་སྐུ། །ཀྵིཾ་ལས་ས་སྙིང་རྡོ་རྗེ་མིག །ཛིཾ་ལས་རྡོ་རྗེ་ཅན་རྣ་བར། །ཁཾ་ལས་ནམ་མཁའི་སྙིང་པོ་སྣར། །གཾ་ལས་འཇིག་རྟེན་དབང་ཕྱུག་ལྕེར། །ཀཾ་ལས་སྒྲིབ་པ་རྣམ་སེལ་ལུས། །སཾ་ལས་ཀུན་དུ་བཟང་པོ་ཡིད། །རིག་པའི་དབང་བསྐུར་
གཤིན་རྗེ་གཤེད། །དགུག་གཞུག་བཅིང་དང་དབང་དུ་བྱ། །མཆོད་པ་བྷ་གའི་བྱང་ཆུབ་སེམས། །རྡོ་རྗེ་གསུང་གི་ཡེ་ཤེས་ཆེ། །པདྨ་ཤེས་རབ་ཕ་རོལ་ཕྱིན། །འདོད་ཆགས་ཆེན་པོ་ཉིད་སྦྱོར་བ། །རྡོ་རྗེ་མཐར་མཛད་ཁྱོད་ལ་བསྟོད། །རྡོ་རྗེ་སྦུ་གུས་བདུད་རྩི་མྱང་། །ས་བོན་འཕྲོས་པས་འགྲོ་བ་
སྦྱང་། །རྡོ་རྗེ་བཟླས་པ་བརྩམ་པར་བྱ། །ཡིད་གསལ་བ་ནི་མཆོག་ཏུ་གཅེས། །ཨོཾ་བཛྲ་རཱ་ག་ར་ཏི་ཧཱུྃ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། མ་ནིང་རྡོ་རྗེ་བཟླས་ནས་ཀྱང་། །སྙིང་པོ་ཅན་དངོས་བསྒོམ་པར་བྱ། །འདོད་ཆགས་ཆེན་པོ་སྦྱོར་བ་བཟློག་པའི་ཕྱིར། །བདེ་བ་སེམས་དྲན་སྒྲུབ་ཐབས་འདི་བརྩམས་

པས། །གཟུང་དང་འཛིན་པའི་དྲི་མ་དག་ནས་ཀྱང་། །དགའ་བ་རྣམ་དག་སྨོན་ལམ་སྟོབས་འགྱུར་ཤོག །རྡོ་རྗེ་བདེ་རྒྱས་དབྱངས་ཅན་མའི་སྒྲུབ་ཐབས་ཞེས་བྱ་བ་རྫོགས་སོ།། ༄༅༅། །རྒྱ་གར་སྐད་དུ། ཀརྨ་བཛྲ་ཎི་གཽ་རཱི་སཱ་དྷ་ནཾ་ནཱ་མ། བོད་སྐད་དུ། ལས་ཀྱི་རྡོ་རྗེ་གཽ་རཱིའི་
སྒྲུབ་ཐབས་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །བཏང་སྙོམས་རྣམ་པར་དག་པ་ཕྱག་རྒྱ་ཆེ། །ཡེ་ཤེས་ཕ་རོལ་ཕྱིན་མ་ལ་ཕྱག་འཚལ། །བརྩོན་འགྲུས་ཐོགས་པ་མེད་པས་སེམས་ཅན་དོན། །འགྲུབ་ཕྱིར་གཽ་རཱིའི་སྒྲུབ་ཐབས་བཤད་པར་བྱ། །ཁྲུས་དང་རྒྱན་དང་
གོས་དང་བྱུག་པ་རྣམས། །ཕྱི་ནང་རྣམ་པར་དག་པ་ཤེས་པར་བྱ། །རང་གི་རྣལ་འབྱོར་དམ་པ་མཆོད་ནས་ཀྱང་། །བདེ་བའི་འཁོར་ལོ་བདག་ལ་གཞུག་པར་བྱ། །ཚད་མེད་བཞི་ལ་རྣལ་འབྱོར་སེམས་གནས་ནས། །ཆོས་ཀུན་སྙིང་པོ་འོད་ཉིད་གསལ་བར་བསྒོམ། །བདག་རྒྱུད་སྐུ་གསུང་ཐུགས་ཀྱི་
ཡི་གེ་ནི། །རོ་གཅིག་ཐིག་ལེའི་ངོ་བོ་གྱུར་པ་ལས། །ཆད་པ་ཉི་མའི་སྟེང་གི་རྡོ་རྗེ་ཉིད། །འཕྲོས་པས་སྲུང་བའི་འཁོར་ལོ་གསལ་བར་བྱ། །པདྨ་ཟླ་བའི་སྟེང་དུ་རུ་དག་ལས། །གྱུར་པས་ཨུཏྤལ་རལ་གྲི་ལྗང་མདོག་གི། །དཀྱིལ་ནས་འཕྲོས་ཤིང་འདུས་ནས་ང་རྒྱལ་བྱ། །ཨོཾ་བཛྲ་གཽ་རི་སྭ་བྷཱ་
ཝ་ཨཱཏྨ་ཀོ྅ཧཾ། གྱུར་པའི་སྐུ་ནི་མ་རྒད་ལྗང་མདོག་སྟེ། །གཡས་དང་གཡོན་པའི་ཞལ་ནི་དཀར་དང་དམར། །གྲི་གུག་རལ་གྲི་འཁོར་ལོ་ཐོད་པ་དང་། །རིན་ཆེན་ཆུ་སྐྱེས་རྣམས་ཀྱིས་མཛེས་པའི་ཕྱག །དབུ་སྐྲ་གྱེན་འགྲེང་ཐོད་པ་ལྔས་བརྒྱན་ཅིང་། །ཚངས་པ་བརྒྱ་བྱིན་མགོ་བོ་ལྔ་བཅུས་དཔྱངས། །ཀླུ་
དང་མརྒད་རུས་པའི་རྒྱན་འཇིགས་པས། །སྟག་ལྤགས་བསྣམས་པའི་ཞབས་ནི་གཡས་བརྐྱང་སྟེ། །གཟི་བརྗིད་མེ་ཡི་དཀྱིལ་ན་ཆེར་འབར་བའི། །སྐུ་གསུང་ཐུགས་དང་སྤྱན་སོགས་བྱིན་བརླབས་ལ། །ཡི་གེ་མཚན་མ་སྐུ་ནི་གང་འདོད་བརྩམ། །སྙིང་གའི་ས་བོན་འཕྲོས་པས་འཁོར་ལོ་
བཟང་། །གསོལ་བཏབ་རིག་པའི་སྐྱེས་བུ་མི་བསྐྱོད་པ། །རྗེས་སུ་མཐུན་པའི་ལྷ་ནི་སྤྱན་དྲངས་ནས། །མཆོད་བསྟོད་མཉེས་པར་བྱས་ནས་རང་ལ་ཐིམ། །མཆོད་པའི་རྣམ་གྲངས་ནམ་མཁའ་རྒྱས་གང་བ། །བྷ་གའི་རྣམ་འཕྲུལ་དག་གིས་ཅི་བདེར་མཆོད། །སྔགས་པ་རྡོ་རྗེ་དྲིལ་བུར་ལྡན་པ་ཡིས། །སྙན་

པའི་གླུ་དང་ལྡན་པས་མཆོད་པར་བྱ། །རྡོ་རྗེ་ལས་ནི་ཀུན་གྲོལ་བ། །ཕྲག་དོག་རྡོ་རྗེ་དབྱེར་མེད་སྐུ། །ཐམས་ཅད་རྡོ་རྗེ་བཏང་སྙོམས་འདི། །རྡོ་རྗེ་ལས་མ་ཕྱག་འཚལ་བསྟོད། །ཡི་གེ་གསུམ་གྱིས་བྱིན་གྱིས་བརླབས་པའི་རྫས། །རྒྱལ་བ་ཐམས་ཅད་མཆོད་ཕྱིར་མྱང་བར་བྱ། །སེམས་ཅན་ཐམས་
ཅད་རྡོ་རྗེའི་སྐུར་བྱས་ནས། །སྔགས་ཀྱི་འཁོར་ལོ་ཇི་ལྟར་འདོད་པས་བཟླས། །ཨོཾ་བཛྲ་ར་ཏི་ཧཱུྃ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། རྒྱལ་མཚན་ཅན་གྱི་ཁམས་སུ་འོ་མ་སྒྲུབ། །ཐབས་ཀྱི་གཟུགས་ལས་རྟག་ཏུ་དང་འགྱུར་བས། །རྟག་པའི་རྒྱལ་པོ་གཤིན་རྗེ་གཤེད་ནག་ལས། །མཐོང་བའི་སྒྲུབ་ཐབས་
བདག་གིས་འདི་བྱས་པས། །འགྲོ་ཀུན་སྤྲོས་བྲལ་ཞི་བ་ལ་གནས་ཏེ། །སངས་རྒྱས་ཡེ་ཤེས་མངོན་དུ་རྟོགས་པར་ཤོག །རྡོ་རྗེ་གཽ་རཱིའི་སྒྲུབ་ཐབས་ཞེས་བྱ་བ་རྫོགས་སོ།། ༄༅༅། །རྒྱ་གར་སྐད་དུ། བྷཊྚཱ་ཀ་མཉྫུ་ཤྲཱི་ཡ་མཱ་རི་པཱུ་ཛ་ཀྲ་མ་བིདྷི་ནཱ་མ། བོད་སྐད་དུ། རྗེ་བཙུན་འཇམ་དཔལ་གཤིན་
རྗེ་གཤེད་མཆོད་པའི་ཆོ་གའི་རིམ་པ་ཞེས་བྱ་བ། བླ་མ་རྗེ་བཙུན་དམ་པ་རྣམས་ལ་ཕྱག་འཚལ་ལོ། །ཤེས་རབ་སྙིང་རྗེར་ལྡན་ཞིང་དད་པ་ལེགས་བརྟན་དང་། །སངས་རྒྱས་སྙིང་པོ་འདོད་ཕྱིར་གང་ཟག་དབང་ཐོབ་པས། །བསྙེན་དང་སྒྲུབ་པའི་རིམ་པ་ཁོང་དུ་ཆུད་བྱས་ནས། །རྗེ་བཙུན་རྣམས་ལ་བཏུད་དེ་རྒྱུད་
འདིས་སྦྱང་བར་བྱ། །བདག་ཉིད་དྲན་པ་གཅིག་པའི་འགྲོ་བློར་ལྡན། །བདག་མེད་པ་ལས་བཟློག་ཅིང་འབྱོར་པ་གསུམ་དག་པས། །བསྙེན་དང་སྒྲུབ་ལ་རབ་ཏུ་མཁས་བྱས་ཏེ། །ཉིན་དང་མཚན་མོ་ཐམས་ཅད་གཡེང་མེད་ཚུལ་གྱིས་འབད། །སྐུ་གསུང་ཐུགས་ཀྱི་འཁོར་ལོ་རྡོ་རྗེ་ཅན་བཅས་དང་། །དྲི་
མེད་སྙིང་པོ་མཐར་མཛད་བླ་མ་རྡོ་རྗེ་འཛིན། །དགྲ་ལས་རྒྱལ་བ་གཤིན་རྗེ་གཤེད་ནག་ལྷ་ཡི་ཚོགས། །ཐུགས་རྗེས་ཐུགས་ཆུད་སྤྱན་རས་ཉིད་འཚོ་དགོངས་སུ་གསོལ། །ཆོས་སྐུ་ལོངས་སྤྱོད་རྫོགས་དང་སྤྲུལ་སྐུའི་རང་བཞིན་ཅན། །རྒྱལ་བའི་རང་བཞིན་ཕུང་པོས་སེམས་ཅན་རེ་འདོད་སྐོང་། །འབྱོར་
ལྡན་ཕུན་སུམ་ཚོགས་པས་ནད་གསོས་སྨན་པའི་མཆོག །བླ་མ་མགོན་པོ་དེ་ལ་བདག་ནི་ཕྱག་འཚལ་ལོ། །ཕུང་པོ་ལྔ་ལས་རྒྱལ་ཞིང་ཉོན་མོངས་ལྔ་རྣམས་དག །རང་གཞན་དོན་རྫོགས་གང་ཞིག་ཕག་མོ་ལ་སོགས་འཁྲིལ། །ཡེ་ཤེས་རིགས་མཚུངས་ལྔ་ལྡན་རིན་ཆེན་ལྔ་ཡི་མདོག །རྣམ་ཐར་ཕ་རོལ་

ཕྱིན་ཞལ་ཕྱག་ལྡན་ཁྱོད་ལ་འདུད། །བདུད་བཞི་ལས་རྒྱལ་ལྟ་བའི་ངེས་སྒྲོལ་བཅོམ་ནས་ཀྱང་། །དད་སོགས་རྣམ་དག་ཁྲོ་བོའི་རྟགས་སུ་ངེས་འབྱུང་བ། །ཐབས་ཀྱིས་ཕྱག་རྒྱས་སྒྲིབ་པ་ཐམས་ཅད་མཐར་སྤངས་པའི། །འཇིགས་ཤིང་རབ་གཏུམ་ཕྱག་མཚན་རྟགས་ལྡན་ཕྱག་འཚལ་
བསྟོད། །ས་ཆུ་མེ་རླུང་འབྱུང་བ་བཞི་ནི་རྣམ་དག་སྐུ། །བྱམས་དང་སྙིང་རྗེ་དགའ་དང་བཏང་སྙོམས་ཉིད། །ཐབས་དང་སྨོན་ལམ་ཡེ་ཤེས་རྫོགས་མཛད་པ། །ཙརྩི་ཕག་མོ་གཽ་རཱིའི་དབྱངས་ལྡན་ཕྱག་འཚལ་བསྟོད། །མཆོད་ཡོན་གདན་མཆོག་ཞབས་བཀྲུ་ལྡན་པ་དང་། །སྤོས་དང་མེ་ཏོག་མར་མེ་
ཞལ་ཟས་ཚོགས། །རོལ་མོའི་སིལ་སྙན་མེ་ཏོག་ཕྲེང་དང་ལྡ་ལྡི་དང་། །མཆོད་སྡོང་བྱེ་བས་བརྒྱན་པས་རབ་ཏུ་མཆོད་པར་བགྱི། །གཟུགས་སྒྲ་དྲི་རོ་རེག་བྱ་འདོད་པའི་ཡོན་ཏན་ཚོགས། །དུ་མར་སྤྱད་ཀྱང་ཚིམ་པ་མེད་ཅིང་ངོ་མཚར་བ། །ཡིད་ལྡན་སེམས་ཀྱིས་ངལ་བསོ་ཁྱད་པར་གྱུར་པ་རྣམས། །མོས་
བློ་དད་པའི་མཐུ་ཡིས་བདེ་གཤེགས་འཁོར་ལོ་མཆོད། །འཁོར་ལོ་རིན་ཆེན་རྟ་དང་གླང་པོ་རབ་མཚན་ལྡན། །རྒྱལ་པོ་བཙུན་མོ་བློན་པོ་མཆོག་ནི་ཞི་ཞིང་མཛེས། །འབྱོར་ལྡན་ཕུན་སུམ་ཚོགས་པ་འཁོར་ལོས་སྒྱུར་བ་ཡི། །ཁྱད་པར་རྫས་ཀྱིས་བདེ་གཤེགས་འཁོར་ལོ་དམ་པ་མཆོད། །གདུགས་དང་
ཉེར་ལྡན་དུང་དང་པདྨས་རབ་ཏུ་མཛེས། །གུནྡྷེ་དཔལ་བེའུ་རྒྱལ་མཚན་འཁོར་ལོ་མཛེས་པའི་མཆོག །འཇིག་རྟེན་དག་ན་གྲགས་ཤིང་སྙན་པར་གང་བརྗོད་པའི། །བླ་མེད་རྣམས་ཀྱིས་བདེ་གཤེགས་འཁོར་ལོ་དམ་པ་མཆོད། །དྲི་ཆེན་རྡོ་རྗེ་ཆུར་ལྡན་བྱང་ཆུབ་སེམས་དཀར་དམར་དང་
བཅས། །མི་ཤ་རྟ་དང་བ་ལང་གླང་ཆེན་ཁྱི་ཤ་དང་། །སྒྲོན་མ་ཆེ་དང་ལྡན་པས་དུར་ཁྲོད་མཛེས་བྱས་པས། །རྣམ་པར་རྟོག་བྲལ་བདེ་གཤེགས་ཁོར་ལོ་དམ་པ་མཆོད། །བདེ་གཤེགས་ཁྱེད་ལ་ཇི་སྙེད་གནས་པའི་ཡོན་ཏན་ནི། །བདག་གིས་བསྐལ་པའི་མཐའ་བར་བརྗོད་པས་མི་ལང་བས། །
སྐུ་གསུང་ཐུགས་ཀྱི་དཀྱིལ་འཁོར་ནམ་མཁའ་ཙམ་མོས་འདིས། །རྒྱལ་བ་གཅིག་བཞིན་སངས་རྒྱས་འཁོར་ལོ་ཐམས་ཅད་བསྟོད། །འདོད་ཆགས་ཞེ་སྡང་གཏི་མུག་དུག་མང་གིས་བསྐྱེད་ཅིང་། །ལུས་ངག་ཡིད་གསུམ་སྒོ་རུ་སྨིན་པའི་མི་དགེ་བཅུ། །སོ་སོ་ཐར་དང་བྱང་ཆུབ་སེམས་དང་རིག་པ་

འཛིན། །ཚུལ་ཁྲིམས་སྡོམ་དང་དམ་ཚིགས་ཉམས་པ་ཇི་སྙེད་བཤགས། །བདག་གིས་བགྱིས་དང་དེ་བཞིན་བགྱིད་དུ་སྩལ། །ཉན་ཐོས་རང་རྒྱལ་ཐེག་པ་ཆེན་པོའི་དགེ་བའི་ཚོགས། །སློབ་དང་མི་སློབ་སེམས་ཀྱིས་གྲོགས་སུ་གང་གྱུར་པ། །འདས་དང་མ་འོངས་ད་ལྟར་དགེ་ལ་རྗེས་ཡི་
རང་། །སངས་རྒྱས་ཞིང་ལ་བཞུགས་པའི་སྟོན་པ་རྫོགས་སངས་རྒྱས། །གདུལ་བྱའི་སྣང་བ་རབ་ཏུ་ཚིམ་མཛད་ཁྲོ་དང་ཞི། །འགྲོ་བ་མིག་ལྡོངས་ཤེས་རབ་སྨན་གྱིས་གསོལ་བའི་ཕྱིར། །ཆོས་ཀྱི་ཕུང་པོ་བརྒྱད་ཁྲི་བཞི་སྟོང་བསྐོར་བར་བསྐུལ། །རྒྱལ་བ་བཅོམ་ལྡན་མྱ་ངན་འདའ་བར་བཞེད་
པ་རྣམས། །ཁྱོད་མི་བཞུགས་ན་འཇིག་རྟེན་འདི་དག་མགོན་མེད་པས། །ནམ་མཁས་གར་ཁྱབ་སེམས་ཅན་ཇི་སྲིད་མཆིས་པ་རུ། །དེ་སྲིད་རྒྱལ་བ་སྲས་དང་བཅས་པ་བཞུགས་སུ་གསོལ། །བདག་གི་ལུས་ངག་ཡིད་ཀྱི་དགེ་བའི་ཚོགས་ཇི་སྙེད། །སྦྱིན་དང་ཚུལ་ཁྲིམས་བསྒོམས་པ་ཉིད་
དུ་ངས་བསྡུས་ཏེ། །བདག་གིར་བཟུང་བ་མེད་ཅིང་སེམས་ཅན་ཀུན་དོན་དུ། །དམིགས་པ་མེད་པའི་སེམས་ཀྱིས་ཡོངས་སུ་བསྔོ་བར་བགྱི། །བདག་གིས་རྗེ་བཙུན་རྣམས་ལ་ཤིན་ཏུ་དད་སེམས་ཀྱིས། །སེམས་ཅན་ཀུན་ལ་ཕན་ཕྱིར་བསོད་ནམས་ཡེ་ཤེས་ཚོགས། །འདས་དང་མ་འོངས་ད་ལྟར་
གསུམ་དུ་བསྡུས་བྱས་ཏེ། །དཔལ་ལྡན་བླ་མ་རྗེ་བཙུན་མཆོག་གི་ཞབས་དྲུང་ཤོག །ཉོན་མོངས་ཚོགས་རྣམས་དག་ཅིང་སེམས་རྟོགས་ནས། །རྒྱལ་བ་མགོན་པོ་བཅོམ་ལྡན་འདས་ཀྱི་སྐུར་གྱུར་ཤོག །མེ་ཏོག་ཤུ་ཀྲ་ལེན་ཅིང་སྤྲོས་པ་ཉིད་སྤངས་ཏེ། །ཉོན་མོངས་མངལ་དུ་མི་འཇུག་བདེ་བ་ལེན་
པར་ཤོག །ཡིད་ཆེས་སེམས་ཀྱིས་ལྷན་ཅིག་སྐྱེས་པ་རྙེད་གྱུར་ཏེ། །འབྱོར་པའི་ནུས་པས་རྡོ་རྗེ་ལྟ་བུའི་ལུས་ཐོབ་ཤོག །ཆོས་རྣམས་རོ་གཅིག་བསམ་མི་ཁྱབ་ཀྱི་རོ་ཐོབ་ནས། །རིག་དང་ཚོགས་ཀྱི་སྤྱོད་པས་སེམས་ཅན་འདུལ་གྱུར་ཅིག །ཞི་རྒྱས་དབང་དང་དྲག་པོའི་ཕྲིན་ལས་ཉེར་ཐོབ་སྟེ། །གདུག་པ་
ཅན་རྣམས་གཤིན་རྗེ་གཤེད་ལ་མངོན་གཞོལ་ཤོག །ཐུན་མོང་དངོས་གྲུབ་ཐོགས་པ་མེད་པར་ཐོབ་ནས་ཀྱང་། །བློ་སྟོབས་དམན་པའི་རྣལ་འབྱོར་དེ་ཉིད་ཀྱིས་འཚོ་ཤོག །ནམ་མཁའ་དང་མཚུངས་བདེ་བ་ཆེན་པོའི་ས་ཐོབ་ནས། །བདག་དང་སེམས་ཅན་གཤིན་རྗེ་གཤེད་པོ་ཉིད་གྲུབ་ཤོག །སྒྲུབ་པོ་དད་

ལྡན་ལུས་ངག་ཡིད་གསུམ་རབ་སྦྱང་ཕྱིར། །རྗེ་བཙུན་པ་རྣམས་མཆོད་པའི་ཆོ་ག་འདི་བྱས་པས། །ཉོན་མོངས་སྒྲིབ་དང་ཤེས་བྱའི་སྒྲིབ་པ་བྱང་གྱུར་ཏེ། །རྒྱུན་ཆད་མེད་དང་ཕུན་སུམ་ཚོགས་སྐུ་ཐོབ་པར་ཤོག །འགྲོ་བ་ཐིབས་པོ་ཉོན་མོངས་ལམ་ལ་རབ་ཏུ་གཞོལ། །སྡིག་པའི་དབའ་
ཀློང་འཁྲུག་པའི་ནང་དུ་རྟག་ཏུ་ཞུགས། །རྣམ་སྨིན་ཆུ་སྲིན་གདུག་པ་ཅན་གྱི་ཁར་ཞུགས་ནས། །གཡེང་བས་ངལ་བ་དོན་མེད་མ་བྱེད་དགེ་བ་སྦྱོངས། །རྗེ་བཙུན་འཇམ་དཔལ་གཤིན་རྗེ་གཤེད་མཆོད་པའི་ཆོ་གའི་རིམ་པ་ཞེས་བྱ་བ། སློབ་དཔོན་ཆེན་པོ་ཀྲྀཥྞ་པཎྜི་ཏས་མཛད་པ་རྫོགས་སོ།། །།
༄༅༅། །རྒྱ་གར་སྐད་དུ། ཀྲྀཥྞ་ཡ་མཱ་རི་བུདྡྷ་སཱ་དྷ་ནཾ་ནཱ་མ། བོད་སྐད་དུ། སངས་རྒྱས་གཤིན་རྗེ་གཤེད་ནག་པོ་སྒྲུབ་པའི་ཐབས་ཞེས་བྱ་བ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །བླ་མ་རྗེ་བཙུན་བླ་མེད་དང་། །སྐུ་གསུམ་མགོན་པོ་གཤེགས་ཉིད་ལས། །བཏུད་དེ་དེ་ཉིད་སྒྲུབ་
པའི་ཐབས། །བློ་དམན་བདག་གིས་བཤད་པར་བྱ། །སྔགས་པ་བློ་དང་ལྡན་པ་ཡིས། །སྙིང་རྗེ་ཆེན་པོ་རབ་བསྐྱེད་དེ། །སྐད་ཅིག་དྲན་པས་གསལ་བར་བྱ། །གཉིས་པས་རྫོགས་པ་ཐིག་ལེ་ཆེ། །བཟང་པོ་ཉིད་དང་དཔལ་གྱི་མགོན། །སོ་སོ་ལས་ཀྱང་བཞི་འབྱུང་བྱ། །རྫོགས་དང་རབ་ཏུ་གནས་
པ་དང་། །མངོན་པར་བཏུད་ལ་མཆོད་བྱས་ཏེ། །ཡ་ཡིག་སྤྲུལ་པའི་ལས་བྱའོ། །བཤགས་དང་རྗེས་སུ་ཡི་རང་དང་། །བསྐུལ་དང་གསོལ་བ་གདབ་པ་དང་། །སྐྱབས་སུ་འགྲོ་དང་སེམས་བསྐྱེད་ཆེ། །ལུས་དབུལ་ཡོངས་སུ་བསྔོ་བ་བྱའོ། །སྨོན་ལམ་གདབ་དང་གཤེགས་སུ་གསོལ། །ཚངས་པའི་
གནས་བཞི་སྔོན་སོང་བས། །རྣམ་ཐར་གསུམ་གྱི་བདག་ཉིད་བསྒོམ། །ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། གནས་དང་དག་པའི་ངོ་བོ་དང་། །བདེ་བ་བཟང་པོ་འདི་བསྒོམ་བྱ། །ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧྃ། སྐུ་གསུང་ཐུགས་ཀྱི་བདག་ཉིད་ནི། །ཡི་གེ་གསུམ་གྱི་ངོ་བོར་བལྟ། །དག་པའི་
ཐིག་ལེ་ནམ་མཁའ་ཡི། །རྒྱུན་གྱིས་གནས་པའི་ཉི་མ་ཧཱུྃ། །གྱུར་པ་རྡོ་རྗེ་གཞལ་མེད་ཁང་། །ཟླ་བ་རྡོ་རྗེའི་སྦྱོར་བ་ཡིས། །ཆོས་ཀྱི་འབྱུང་གནས་རྣམ་པར་གནས། །སྣ་ཚོགས་པདྨའི་དཀྱིལ་ཉིད་དུ། །ཟླ་བ་ཡི་གེ་བཅུ་དྲུག་བཅས། །རེ་ཕ་ལས་བྱུང་གཉིས་པ་ལས། །གསལ་བྱེད་ཡི་གེ་ཁོར་ཡུག་བལྟ། །

རོ་མཉམ་པ་ལ་ས་བོན་ཉིད། །ནོར་བུ་རྡོ་རྗེ་སྤྲོ་དང་བསྡུ། །ང་རྒྱལ་གྱུར་པས་རྡོ་རྗེ་སེམས། །དཀར་དང་གནག་དང་དམར་བའི་ཞལ། །ཤེས་རབ་གཉིས་མེད་སྒེག་དང་སྟངས། །གདུག་དང་དུར་ཁྲོད་རྒྱན་གྱིས་སྤྲས། །གྲི་གུག་ཐོད་པ་རྩ་བའི་ཕྱག །རྡོ་རྗེ་རལ་གྲི་གཡས་ན་བསྣམས། །གཡོན་ན་འཁོར་ལོ་
ཆུ་སྐྱེས་སོ། །ས་བོན་འོད་ཀྱི་བདག་ཉིད་དཔལ། །རྗེས་སུ་གྱུར་པས་ཁུ་བར་བལྟ། །སྐུ་གསུང་ཐུགས་ཀྱི་རྡོ་རྗེ་གནས། །ཉི་མ་དམར་པོ་ཡ་གཅིག་བཅས། །གྱུར་པས་རྡོ་རྗེ་སྔོན་པོ་སྟེ། །ས་བོན་འོད་ལས་གཤིན་རྗེ་གཤེད། །ཆར་སྤྲིན་གཞོན་ནུ་ལྟ་བུའི་མདོག །གཡས་པ་ཟླ་བ་ལྟ་བུ་སྟེ། །
གཡོན་པ་པདྨ་རཱ་གའི་མདོག །རང་གི་ཡུམ་དང་ལྡན་པའི་སྐུ། །རྩ་བའི་ཕྱག་གིས་འཁྱུད་པའི་སྟངས། །རྡོ་རྗེ་རལ་གྲི་འཁོར་ལོ་དང་། །པདྨ་འོད་ཟེར་ཆེན་པོ་འབར། །གྲི་གུག་རྡོ་རྗེ་མཚན་པ་དང་། །ཐོད་པ་བྱང་ཆུབ་སེམས་བཀང་བ། །ཡུམ་དང་མཚུངས་པར་འཛིན་པ་སྟེ། །གཅེར་བུ་རྒྱན་
བྲལ་སྐྲ་གྲོལ་བའོ། །སྙོམས་པར་འཇུག་པའི་སྟངས་དང་ལྡན། །བརྒྱ་ཕྱེད་མགོ་བོའི་ཕྲེང་བ་ཅན། །པདྨ་ཟླ་བའི་གདན་སྟེངས་སུ། །མ་ཧེ་ཉི་མ་གནས་པའི་སྟེངས། །རྡོ་རྗེ་གཤེད་པོ་བསྒོམ་པར་བྱ། །སྐུ་གསུང་ཐུགས་དང་ལྡན་པ་ཡིས། །སེམས་དཔའི་རྡོ་རྗེ་བདེ་བར་བསྒོམ། །སྐྱེ་མཆེད་ཟླ་བའི་
དཀྱིལ་འཁོར་ཏེ། །སེམས་དཔའི་ཡི་གེ་གསལ་བར་བྱ། །ཀྵིཾ་ཛིཾ་ཁྃ་གྃ་ཀྃ་སྃ། །སྤྱི་གཙུག་མགྲིན་པ་སྙིང་གའི་སྟེང་། །ཟླ་བ་པདྨ་ཉི་མའི་དཀྱིལ། །དཀར་དམར་གནག་པའི་ཡི་གེ་དགོད། །ཨོཾ་ཨཱཿཧཱུྃ། ས་བོན་ལས་འཕྲོས་གཤིན་རྗེ་གཤེད། །ཡབ་ཡུམ་གཉིས་མེད་སྦྱོར་བ་ཡིས། །བདེ་ཆེན་བྱང་ཆུབ་
སེམས་ཀྱི་རྒྱུན། །ཕབ་སྟེ་སྤྱི་གཙུག་བབ་གྱུར་པས། །དྲི་མེད་དག་པས་རྡོ་རྗེ་སེམས། །སྤྲོས་དང་བསྡུས་པས་དེ་ཉིད་དོན། །མཉེས་པར་བྱས་ལ་རྒྱུད་ལ་བསྟིམ། །ངེས་དང་གསལ་དང་བརྟན་པ་དང་། །ཕབ་ལ་ཐིག་ལེ་ཐིག་ལེ་ཆེ། །བྱེད་པ་སྦྱོར་དང་ཕྲ་མ་དང་། །གོ་རིམས་ནམ་མཁའི་རྡོ་རྗེའོ། །འདི་ནི་
འགྲུབ་མེད་འགྲུབ་པ་མེད། །རང་བཞིན་ཉིད་ནས་རྡོ་རྗེ་སེམས། །རྡོ་རྗེ་ནམ་མཁའི་ཁམས་སྦྱོར་བས། །གཉིས་མེད་ཡེ་ཤེས་ཆོས་ཀྱི་སྐུ། །འདི་ནི་རྣམ་པར་དག་པའོ། །ལྡང་བ་སཱ་ལུའི་འབྲས་ལྟར་དུ། །གནས་པ་རྒྱལ་པོའི་དབང་བསྒྱུར་ཞིང་། །དབྱིངས་ཀྱི་རྡོ་རྗེ་ཐ་མི་དད། །སྦྱོར་བའི་བྱང་ཆུབ་

སེམས་ཕབ་པས། །ས་སྟེངས་ས་འོག་ས་བླ་ཡི། །གནས་སུ་སྐུ་གསུང་ཐུགས་བསམས་ཏེ། །མ་ཡེངས་དོན་གྲུབ་བཟླས་པར་བྱ། །ཨོཾ་ཀཱ་ལ་རཱུ་པ་ཧཱུྃ། འདིས་ནི་བརྒྱ་བྱིན་ལ་སོགས་པ་བརྒྱལ་བར་བྱེད་པའོ། །ཨོཾ་ཡ་མ་རཱ་ཛ། ས་དོ་མེ་ཡ། ཡ་མེ་དོ་རུ། ཎ་ཡོ་ད་ཡ། ཡ་ད་ཡོ་
ནི། ར་ཡཀྵེ་ཡ། ཡཀྵེ་ཡཙྪ་ནི་རཱ་མ་ཡ། ཧཱུྃ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། འདིས་ནི་དངོས་གྲུབ་ཆེན་པོ་ཡང་ཐོབ་པར་འགྱུར་རོ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་སྭཱ་ཧཱ། འདིས་ནི་ལས་ཐམས་ཅད་འགྲུབ་བོ། །ཧ་ཅང་དྲག་མིན་དལ་བ་མིན། །ཅུང་ཟད་རིང་བ་མ་ཡིན་ཏེ། །ཐུང་དང་མི་གསལ་རྣམས་
སྤངས་ཏེ། །ཚིག་གི་བར་དུ་མ་ཆོད་པའི། །ཆེན་པོས་བཟླས་པ་འགྲུབ་པར་འགྱུར། །འདི་ནི་བསྒྲུབ་པའི་དོན་དུ་བྱས། །ལས་ཀུན་བླ་མ་བརྒྱུད་ཤེས་བྱ། །མི་ཤེས་པ་དག་དགྲོལ་བའི་ཕྱིར། །བདག་གིས་རྟོགས་པར་གྱུར་པ་བརྩམས། །འདི་ལས་འབྱུང་བའི་བསོད་ནམས་ཀྱིས། །
དཔལ་ལྡན་གཤིན་རྗེ་གཤེད་འགྱུར་ཤོག །སངས་རྒྱས་གཤིན་རྗེ་གཤེད་ནག་པོའི་སྒྲུབ་ཐབས། ནཱ་ད་ཀུ་བེ་ར་ལས་བྱུང་བའི་དོན། ཀུན་ད་ནཀྵེ་རི་ན་བཞུགས་པའི་མཁས་པ་ཆེན་པོ་རྣལ་འབྱོར་པ་ནག་པོ་ཞབས་ཀྱིས་མཛད་པ་རྫོགས་སོ།། །།རྣལ་འབྱོར་པ་པྲཛྙཱ་ཤྲཱི་ཛྙཱ་ན་ཀཱིརྟིས་རང་འགྱུར་
དུ་མཛད་པའོ།། ༄༅༅། །རྒྱ་གར་སྐད་དུ། ཀྲྀཥྞ་ཡ་མཱ་རི་སཱ་དྷ་ནཾ་ནཱ་མ། བོད་སྐད་དུ། གཤིན་རྗེ་གཤེད་ནག་པོའི་སྒྲུབ་པའི་ཐབས་ཞེས་བྱ་བ། མགོན་པོ་གཤིན་རྗེ་གཤེད་ལ་ཕྱག་འཚལ་ལོ། །བླ་མ་ལ་གུས་དེ་རྗེས་ལ། །གཤིན་རྗེ་གཤེད་ནག་རྡོ་རྗེ་ནི། །རང་འོད་ཡན་ལག་
འདུས་པ་ཡི། །བདེ་བ་རྒྱས་ལ་ཕྱག་འཚལ་ཏེ། །གཤིན་རྗེ་གཤེད་ནག་སྒྲུབ་པའི་ཐབས། །དེ་ཉིད་བློ་ཡིས་བཤད་པར་བྱ། །བདེ་བའི་སྟན་ལ་འདུག་ནས་ནི། །སྙིང་རྗེས་སྐད་ཅིག་ལྷར་བསྐྱེད་ལ། །སྙིང་གར་པདྨ་ཡ་ཡིག་དགོད། །འོད་འཕྲོས་སྦྱངས་ཏེ་བླ་མ་དགུག །བཀོད་པ་
བསམས་ལ་ཕྱག་དང་ནི། །མཆོད་པ་ལ་སོགས་ཚོགས་བསགས་ཏེ། །བློ་ཡིས་མཁའ་ལ་གཤེགས་སུ་གསོལ། །དེ་ནས་ཚངས་པའི་གནས་བཞི་བསྒོམ། །རང་བཞིན་རྣམས་དང་བྲལ་བས་རྒྱུ། །འདི་ལྟར་ཡང་ན་མཚན་མ་ནི། །རྣམ་པར་དཔྱད་པ་མེད་པས་ན། །འདི་ལྟར་སྨོན་

ལམ་རྣམ་པར་སྤངས། །ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་ཝ་ཤུདྡྷོ྅ཧཾ། དེ་ལྟར་བརྟན་པར་བསམས་ནས་ནི། །མ་ཡིག་ལས་བྱུང་ཉི་མ་ལས། །སྣ་ཚོགས་ཧཱུྃ་ལས་རྒྱ་གྲམ་བསམ། །ཧཱུྃ་ལས་འོད་འཕྲོས་ར་བའོ། །དེ་དཀྱིལ་པྃ་ལས་པདྨ་ནི། །དམར་པོའི་སྟེང་དུ་ཟླ་བ་སྟེ། །དེ་ལས་དབྱངས་ཡིག་རྣམ་
པར་བསམ། །དེ་སྟེང་རྃ་ལས་ཉི་མ་སྟེ། །གསལ་བྱེད་བཀོད་ལ་གསལ་བར་བྱས། །དེ་ལས་གོང་བུ་ཧཱུྃ་དུ་གྱུར། །དེ་ལས་རྡོ་རྗེ་ཧཱུྃ་ལྡན་བསམ། །དེ་ལས་རྡོ་རྗེ་སེམས་དཔའ་ནི། །ཞལ་གཞན་གཤིན་རྗེ་གཤེད་དང་འདྲ། །རྩ་བའི་ཞལ་ནི་དཀར་བར་བསྒོམ། །ཐུགས་ཀར་ས་བོན་གསལ་བ་
ལས། །འོད་འཕྲོས་བཀུག་ལ་ཞལ་ཞུགས་པས། །སྙིང་གར་ཞུ་ནས་ཐིམ་བྱས་ལ། །མཁའ་གསང་སྦྱངས་ལ་གཏོར་མ་བསམ། །ཞུ་བས་སྐར་མདའ་ལམ་ཞུགས་བཞིན། །མཁའ་གསང་ནང་དུ་བབས་གྱུར་པས། །བདག་ཉིད་ཡུམ་དང་བཅས་པ་ཞུ། །དེ་ལས་ཐིག་ལེ་བཞི་འཕྲོས་པས། །
ལྷ་མོ་བཞི་ཡིས་བསྐུལ་བར་བསམ། །རྗེ་བཙུན་སྟོང་ཉིད་ལ་བཞེངས་ལ། །ཁམས་གསུམ་ཀུན་གྱི་གཏི་མུག་སེལ། །རྗེ་བཙུན་ཆོས་ཉིད་ལ་བཞེངས་ལ། །སྙིང་རྗེས་སེམས་ཅན་དོན་མཛོད་ཅིག །དེ་རྗེས་དེ་ཡང་ཐིམ་གྱུར་པས། །ཐིག་ལེའི་ངོ་བོར་བལྟ་བྱས་ལ། །ཞུ་བས་ཡོངས་སུ་གྱུར་པ་སྐྱེས། །
ཡ་ཡིག་སྔོན་པོ་ཉི་དཀྱིལ་འཁོར། །དེ་ལས་རྡོ་རྗེ་ས་བོན་བཅས། །འོད་འཕྲོས་བསྟིམས་ཏེ་གྱུར་པ་ལས། །བདག་ཉིད་འཇམ་དཔལ་གཤིན་རྗེ་གཤེད། །རྩ་བའི་ཞལ་ནི་སྔོན་པོ་ལ། །གཡས་དཀར་གཡོན་པ་དམར་བ་སྟེ། །རང་གི་ཡུམ་དང་ལྡན་པའི་ལུས། །རྡོ་རྗེ་རལ་གྲི་འཁོར་ལོ་དང་། །ཆུ་སྐྱེས་
གྲི་གུག་ཐོད་པའི་ཕྱག །མ་ཧེ་གདན་བཅས་གསུས་པོ་ཆེ། །གླང་པོ་སྟག་གི་པགས་པ་མནབས། །མཆེ་གཙིགས་སྦྲུལ་གྱི་ཆས་ལྡན་བསྐྱེད། །སེམས་ལྡན་འོད་འཕྲོས་ཡེ་ཤེས་དགུག །ཛཿཧཱུྃ་པྃ་ཧོཿ། དེ་ནས་མིག་དང་རྣ་བ་སྣ། །ལྕེ་དང་ལུས་ཡིད་རྣམས་ལ་ཡང་། །མངོན་ཤེས་བསྒྲུབ་ཕྱིར་ལྷ་
བསྒོམ་བྱ། །ཀྵིྃ་ཛིཾ་ཁྃ་གྃ་ཀྃ་སྃ། །དེ་ནས་སྐུ་གསུང་ཐུགས་གསུམ་ལ། །ཨོཾ་ཨཱཿཧཱུྃ་གསུམ། བཀོད་པ་ལྷ་རུ་དམིགས་པར་བྱ། །དེ་ནས་མེ་ལྷ་སྤྱན་དྲངས་ཏེ། །མཆོད་བཅས་པ་ཡིས་ཡམ་ཤིང་གིས། །སྔགས་པའི་དངོས་གྲུབ་འཇིག་པར་བྱེད། །ཡམ་ཤིང་དབང་དུ་བྱས་པ་ཡི། །སྲེག་རྫས་མཆོད་

རྫས་རྣམ་པ་ནི། །དཀར་གསུམ་མངར་གསུམ་ཐུག་པ་དང་། །འབྲས་ཆན་ནས་ཆན་ཅན་གྱི་ཚོགས། །སྨན་གྱི་ཚོགས་ནི་ལ་དུ་དང་། །དེ་སོགས་རྫས་དང་ཏིལ་དག་ནི། །གཡས་ཀྱི་ཕྱོགས་སུ་གཞག་པར་བྱ། །སྤོས་དང་མེ་ཏོག་མར་མེ་དང་། །དྲི་དང་ཞལ་ཟས་མཆོད་པའི་ཚོགས། །
གཡོན་གྱི་ཕྱོགས་སུ་གཞག་པར་བྱ། །ཀུ་ཤ་ཡོན་ཆབ་གཡས་ཡིན་ཏེ། །མར་དང་རྡོ་རྗེ་དྲིལ་བུ་དང་། །དགང་གཟར་བླུགས་གཟར་མདུན་དུའོ། །སྲེག་རྫས་མཆོད་རྫས་རིམ་པའོ། །མངོན་པར་རྟོགས་པའི་བྱ་བ་ནི། །དག་པའི་ཁྲུས་བྱས་ལུས་དྲིས་བྱུག །གོས་དང་རྒྱན་ནི་བགོ་བྱ་སྟེ། །ཀུ་ཤ་བདེ་བའི་
སྟན་ཉིད་ལ། །ཤར་དུ་ཁ་བལྟས་འདུག་བྱས་ཏེ། །སྙིང་བརྩེ་བ་ཡི་བསམ་པ་ཡིས། །ལས་ཀྱི་བུམ་པ་བྱིན་བརླབས་ནས། །རྫས་རྣམས་དག་པར་བསང་བར་བྱ། །ཨོཾ་ཁཌྒ་དྷྲྀཀ །དེ་ནས་མཆོད་པ་སོ་སོ་ཡི། །ཕྱག་རྒྱ་བཅིང་ཞིང་སྔགས་བཟླས་ཏེ། །ཚུལ་བཞིན་བྱིན་གྱིས་བརླབ་པར་བྱ། །ཨོཾ་ཧྲཱིཿཥྚྲྀཿ
ཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ། མཆོད་ཡོན་ལའོ། །ཨོཾ་བཛྲ་དྷཱུ་པེ་ཨཱཿཧཱུྃ། བདུག་པའིའོ། །ཨོཾ་བཛྲ་པུ་ཥེ་ཨཱཿཧཱུྃ། མེ་ཏོག་ལའོ། །ཨོཾ་བཛྲ་དྷཱུ་པེ་ཨཱཿཧཱུྃ། མར་མེ་ལའོ། །ཨོཾ་བཛྲ་གཎྡྷེ་ཨཱཿཧཱུྃ། དྲི་ལའོ། །ཨོཾ་བཛྲ་ནཻ་ཝི་ཏྱེ་ཨཱཿཧཱུྃ། ཞལ་ཟས་ལའོ། །ཨོཾ་བཛྲ་ཤཔྟ་ཨཱཿཧཱུྃ། རོལ་མོ་ལའོ། །དེ་ནས་དངོས་མེད་
ངང་ཉིད་ལས། །སྐྱེ་བ་མེད་ལ་པདྨ་ཡི། །གཞལ་ཡས་ཁང་པ་ཆུ་གདན་ཅན། །བསམ་པ་བྲམ་ཟེའི་ཁྱིམ་དང་ནི། །དགེ་འདུན་རྒྱུན་བཞག་མེ་དག་ལས། །བླང་ལ་མེ་ནི་སྦར་བྱས་ཏེ། །བསངས་ལ་གཟི་བསྐྱེད་མེ་པྲ་བརྟག །དེ་ནང་བྱང་ཆུབ་ལྔ་དག་ལས། །གྱུར་པའི་པདྨའི་གདན་སྟེང་དུ། །གྲུ་གསུམ་
མེ་ལས་བྱུང་བ་ཡི། །མེ་ལྷ་དཀར་པོ་ཞལ་གསུམ་པ། །རང་གི་རིགས་དང་ལྡན་པའི་ལུས། །གཡས་ན་སྤྱི་བླུགས་མི་འཇིགས་སྦྱིན། །གཡོན་ན་དབྱུག་པ་ཕྲེང་བ་འཛིན། །གྲི་གུག་ཐོད་པ་རྩ་བའི་ཕྱག །གཡས་བརྐྱང་བ་ཡི་ཕྱག་གིས་མནན། །ཁྲོ་བོའི་རྒྱན་གྱིས་བརྒྱན་པའོ། །དེ་ནས་ཐུགས་ཀྱི་
ས་བོན་ལས། །ཡེ་ཤེས་མེ་ནི་དགུག་པར་བྱ། །ཨོཾ་ཊཱཀྐི་ཧཱུྃ་ཛཿ། བསངས་ལ་དམ་ཚིག་གཞུག་པར་བྱ། །ཨོཾ་མུངྒ་ར་ཛཿ། ཨོཾ་དཎྜ་ཧཱུྃ། ཨོཾ་པདྨ་པྃ། ཨོཾ་ཁཌྒ་ཧོཿ། དེ་ནས་སྐྱེ་མཆེད་སྐུ་གསུང་ཐུགས། །བྱིན་བརླབས་དབང་བསྐུར་མཆོད་པ་འབུལ། །བསྟོད་པ་ཞལ་དུ་རེ་ཕ་བཀོད། །སྲེག་རྫས་

བྱུར་བུར་དབུལ་བར་བྱ། །ཡཀྵེ་མ་མེ་ད། ཡཙྪ་ནི་རཱ་ཛ་ས་རུ། ཎ་ཡོ་ནི་ར། རྡོ་རྗེ་འཁོར་ལོ་རིན་ཆེན་པད། །རལ་གྲི་ཐོ་བ་དབྱུག་པ་དང་། །པདྨ་དང་ནི་རལ་གྲི་ཆེ། །འཁོར་ལོ་རྡོ་རྗེ་པད་རལ་གྲི། །སོ་སོར་སྔགས་ཀྱིས་ལྷར་བསྐྱེད་བྱ། །དེ་ནས་སྐྱེ་མཆེད་བྱིན་བརླབས་ཏེ། །མིག་ནི་ས་ཡི་སྙིང་པོ་ལ། །རྣ་བ་ཕྱག་
ན་རྡོ་རྗེའི་ཚུལ། །སྣ་ནི་ནམ་མཁའི་སྙིང་པོ་དགོད། །ལྕེ་ལ་འཇིག་རྟེན་དབང་ཕྱུག་བཞག །སྒྲིབ་པ་རྣམ་སེལ་ལུས་ལ་བཤད། །ཡིད་ལ་ཀུན་དུ་བཟང་པོའོ། །ཀྵིཾ་ཛིཾ་ཁྃ་གྃ་ཀྃ་སྃ། །ཐུགས་ལ་ཞེ་སྡང་རྡོ་རྗེ་སྟེ། །གསུང་ལ་འདོད་ཆགས་རྡོ་རྗེ་དགོད། །གཏི་མུག་རྡོ་རྗེ་སྐུ་ལའོ། །ཨོཾ་ཨཱཿཧཱུྃ། དེ་ནས་དབང་
བསྐུར་དགུག་གཞུག་བྱ། །གསང་བའི་མཆོད་པས་མཆོད་བྱས་ལ། །རྡོ་རྗེ་དྲིལ་བུ་ལྡན་པ་ཡིས། །གཤིན་རྗེའི་དགྲ་ལ་བསྟོད་པ་བྱ། །དེ་ནས་སྲེག་རྫས་བསངས་ནས་ནི། །བདུད་རྩིའི་ངོ་བོར་བསྒྲུབས་ནས་ཀྱང་། །བདུད་རྩི་མེ་ལྷའི་ཞལ་ཉིད་དུ། །སྲེག་རྫས་རྣམས་ནི་ཕུལ་བར་བྱ། །དཀྱིལ་
འཁོར་བཟང་པོ་མཉེས་པར་བྱ། །གཙོ་བོ་ལ་འབུམ་འཁོར་ལ་ཁྲི། །དེ་བཞིན་སྟོང་དང་བརྒྱ་རྩ་བརྒྱད། །ལྔ་བཅུ་ཉི་ཤུ་རྩ་གཅིག་བདུན། །གཙོ་དང་འཁོར་གྱི་བྱེ་བྲག་གིས། །གོ་རིམས་བཞིན་དུ་དབུལ་བར་བྱ། །སོ་སོ་རྩ་བའི་སྔགས་དག་ལ། །གསོལ་བ་གདབ་ལ་དབང་བསྐུར་བས། །རྡོ་རྗེ་
འཛིན་པ་སྤྱི་བོར་བལྟ། །དེ་ལས་ས་བོན་ཡི་གེ་ལས། །འཕྲོས་པས་ཡི་གེ་ཉི་མར་བསྡུ། །དེ་ནས་རྡོ་རྗེའི་བཟླས་པ་ནི། །ཞི་རྒྱས་དབང་དང་དྲག་ཚུལ་དུ། །གཏོར་མ་ལྡན་པས་བཟླས་པ་བྱ། །དེ་ནས་ལྡང་བར་བརྩམ་པ་ནི། །སེམས་ཅན་དོན་ལ་སེམས་པ་ཡི། །ཡེ་ཤེས་སེམས་དཔའ་
གཤེགས་སུ་གསོལ། །ཨོཾ་ཨཱཿཧཱུྃ་མུཿ། ཡིད་བཞིན་འཁོར་དང་རྡོ་རྗེ་བཟླས། །གཙོ་མོ་ཁྲོ་ཚུལ་ལོ་མ་གཙིགས། །ཕྲ་བའི་ཚུལ་གྱིས་བཟླས་པར་བྱ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་སྭཱ་ཧཱ། འདིས་ནི་ལས་ཀུན་བྱེད་པ་སྟེ། །འདོད་པ་ཐམས་ཅད་ཡིད་བཞིན་འགྱུར། །ཡྃ་ལས་རླུང་སྟེ་རྃ་
ལས་མེ། །ཀྃ་ལས་ཐོད་པ་ཨ་ལས་སྣོད། །འདབ་བརྒྱད་ཤ་ལྔ་བདུད་རྩི་ལྔ། །ཧཱུྃ་ལས་ཁ་དགབ་ཨོཾ་ཨཱཿཧཱུྃ། །བསམས་ཏེ་མེ་སྦར་ཞུ་བས་བསྡུ། །སྦྱངས་ཏེ་ཨོཾ་ལསས་འོད་འཕྲོས་པས། །ཡེ་ཤེས་བཀུག་ལ་བསྟིམ་བྱིན་བརླབ། །སྦུ་གུས་དྲངས་ནས་གསོལ་སྦྱིན་བྱ། །ལྷ་ལ་སོགས་པའི་

ཚོགས་བཅས་རྣམས། །ལྷ་རྫས་རྡོ་རྗེ་ཡོངས་སུ་དག་པའི་གཏོར་མ་འདི། །གྲྀཧྞ་ཁཱ་ཧི་གྲྀཧྞ་ཁཱ་ཧི་མ་མ་ཤཱནྟིང་ཀུ་རུ་སྭཱ་ཧཱ། འགྲོ་འཆག་ཉལ་འདུག་ལ་སོགས་ལ། །དཔའ་བོ་ང་རྒྱལ་བཏང་མི་བྱ། །དངོས་པོ་དངོས་བྲལ་སྐྱེ་དང་བྲལ། །གཡོ་བ་གཡོ་མེད་བདེ་བ་ཅན། །ཐབས་དང་
ཤེས་རབ་ལས་འབྱེད་ཅིང་། །དོན་གསུམ་གཉིས་སུ་མེད་ལ་བཞག །བདག་གི་སྒྲུབ་ཐབས་སྦྱར་བ་འདིས། །འགྲོ་ཀུན་གཤིན་རྗེ་གཤེད་ཐོབ་ཤོག །དཔལ་གཤིན་རྗེ་གཤེད་ནག་པོ་སྒྲུབ་པའི་ཐབས་ཞེས་བྱ་བ། རྒྱ་གར་གྱི་མཁན་པོ་ཆེན་པོ་ཀ་མ་ལ་རཀྵི་ཏས་མཛད་པ་རྫོགས་སོ།། །།
རྣལ་འབྱོར་པ་བསོད་སྙོམས་པ་པྲཛྙཱ་ཤྲཱི་ཛྙཱ་ན་ཀཱིརྟིས་རང་འགྱུར་དུ་མཛད་པའོ།། ༄༅༅། །རྒྱ་གར་སྐད་དུ། མུངྒ་ར་ཀྲོ་དྷ་ཡ་མཱ་རི་སཱ་དྷ་ནཾ་ནཱ་མ། བོད་སྐད་དུ། ཁྲོ་བོ་ཐོ་བ་གཤིན་རྗེ་གཤེད་ཀྱི་སྒྲུབ་ཐབས་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཨིནྡྲ་ནཱི་
ལའི་འོད་མངའ་ཞིང་། །འཇིག་ཚོགས་བདུད་ལས་རྣམ་རྒྱལ་ནི། །མཐར་བྱེད་ཆེ་ལ་ཕྱག་འཚལ་ཏེ། །དེ་ཡི་སྒྲུབ་ཐབས་བཤད་པར་བྱ། །སྐད་ཅིག་ལྷ་ཡི་རྣལ་འབྱོར་གནས། །སྐྱེས་པའི་འོད་ཀྱིས་འགྲོ་བ་སྦྱངས། །འཁོར་ལོ་ཆེན་པོ་སྤྱན་དྲངས་ནས། །རྣམ་དག་དགུ་ཡི་ཚོགས་བསག་བྱ། །
བྱམས་དང་སྙིང་རྗེ་དགའ་བཏང་སྙོམས། །ཚངས་པའི་རྒྱུན་དང་ལྡན་པ་ཡི། །སྟོང་པ་ཆེན་པོ་བསྒོམ་པར་བྱ། །བདུད་ཀྱི་ཕྱོགས་རྣམས་འཇིག་བྱེད་ཕྱིར། །སྲུང་བའི་འཁོར་ལོ་བསྒོམ་པར་བྱ། །ཆུ་སྐྱེས་ཉི་མའི་སྟེང་ཉིད་དུ། །ཡ་ལས་རྡོ་རྗེ་ཐོ་བ་ནི། །རྩེ་མོ་ཉི་ཤུར་ལྡན་པ་ཡི། །ལྟེ་བར་ས་བོན་རབ་
བཞག་ནས། །སྤྲོ་བསྡུ་བྱས་ནས་ང་རྒྱལ་བསམ། །ཨོཾ་སརྦ་བུདྡྷ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། གྱུར་པས་ཐོ་བ་གཤིན་རྗེ་གཤེད་དུ་བསྒོམ། །སྐུ་མདོག་སྔོན་པོ་འཇིགས་ཆེན་པོ། །རང་གི་རིག་མས་འཁྱུད་ཅིང་མཛེས། །གཡས་གཡོན་ཞལ་ནི་དཀར་དང་དམར། །གྲི་གུག་ཐོ་བ་རལ་གྲི་དང་། །ཐོད་པ་
འཁོར་ལོ་རིན་ཆེན་མཛེས། །སྟག་གི་པགས་པ་ཤམ་ཐབས་སུ། །མནབས་ཤིང་གཡས་བསྐུམ་གཡོན་བརྐྱང་བ། །ཀླུ་དང་དུར་ཁྲོད་འཁྲུགས་པས་བརྒྱན། །མཆེ་གཙིགས་སྤྱན་དགུར་འཇིགས་པའི་མདངས། །མེ་དཔུང་དཀྱིལ་དུ་གནས་པ་བསྒོམ། །སྐུ་གསུང་ཐུགས་དང་སྐྱེ་མཆེད་

དྲུག །རྡོ་རྗེ་གསལ་བར་བསྐྱེད་པར་བྱ། །དབང་རྟགས་གཤིན་རྗེ་གཤེད་ཀྱིས་བརྒྱན། །ཡིག་འབྲུ་བཞི་ཡིས་དགུག་གཞུག་བྱ། །བུ་ག་ཆེན་པོ་སྤྲོས་པས་མཆོད། །རྡོ་རྗེ་དྲིལ་བུ་ལྡན་པས་བསྟོད། །ཧཱུྃ་ཧཱུྃ་རྡོ་རྗེ་སྟོབས་པོ་ཆེ། །རབ་འཇིགས་མི་མཐུན་ཟད་མཛད་པ། །རྡོ་རྗེ་སྐུ་དབྱེར་མེད་པའི་
ལྷ། །ཐོ་བ་རྡོ་རྗེ་ཕྱག་འཚལ་བསྟོད། །སྒྲོན་མ་འོ་མར་ལྡན་པ་ཡིས། །ཁ་ཡི་བུ་ག་དག་པར་བསམ། །སངས་རྒྱས་རྣམས་ཀྱི་ཐུགས་བསྐུལ་བས། །འགྲོ་བ་མ་ལུས་སྦྱང་བར་བྱ། །སྔགས་ཀྱི་རྒྱལ་པོ་རྗེས་དྲན་པས། །ཁྲི་དང་འབུམ་དུ་བཟླས་པར་བྱ། །ཨོཾ་མུངྒ་ར་དྷྲྀཀ་ཧཱུྃ་ཧཱུྃ་ཧཱུྃ་ཕཊ་ཕཊ་
སྭཱ་ཧཱ། ཕྱག་རྒྱ་བཀྲོལ་ནས་ངལ་བསོ་བ། །གཅིག་དང་དུ་མ་ལས་གྲོལ་བ། །རང་བཞིན་མེད་པའི་སྙིང་པོ་ཅན། །ཆོས་ཀུན་གྱི་ནི་བདག་པོ་ཅན། །སེམས་ཀྱི་བསྐལ་པར་བསྒོམ་པར་བྱ། །བདག་གིས་རྒྱུད་དང་བླ་མ་ལས། །རྙེད་པའི་དྲིན་འདི་ཐོབ་པ་དེས། །བསྐུལ་ནས་སྒྲུབ་ཐབས་འདི་བྱས་པས། །
ཐམས་ཅད་འབྲས་བུ་མངོན་རྙེད་ཤོག །ཁྲོ་བོ་ཐོ་བ་གཤིན་རྗེ་གཤེད་ཀྱི་སྒྲུབ་ཐབས་ཞེས་བྱ་བ། རྒྱ་གར་གྱི་མཁན་པོ་མར་མེ་མཛད་ཀྱིས་མཛད་པ་རྫོགས་སོ།། ༄༅༅། །རྒྱ་གར་སྐད་དུ། དཎྜ་དྷྲྀཀ་བི་དཱ་ར་ཡ་མཱ་རི་སཱ་དྷ་ནཾ་ནཱ་མ། བོད་སྐད་དུ། དབྱུག་པ་གཤིན་རྗེ་གཤེད་རྣམ་
པར་འཇོམས་པ་ཞེས་བྱ་བའི་སྒྲུབ་ཐབས། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །ཐུགས་ཀྱི་དེ་ཉིད་གཙོ་དང་མཚུངས་པ་ཡི། །ལྷ་ནི་བདུད་དགྲ་དབྱུག་པ་གཤིན་རྗེ་གཤེད། །ལས་རྣམས་ཐམས་ཅད་མཐར་མཛད་ལ་བཏུད་དེ། །མཆོག་གི་དངོས་གྲུབ་བསྒྲུབ་ཕྱིར་བཤད་པར་བྱ། །
རང་ལུས་ཕྱག་རྒྱ་ཆེན་པོར་དྲན། །ཐེག་པ་ཆེན་པོའི་བློར་བྱས་ནས། །བླ་མ་རྗེ་བཙུན་རྣམས་ལ་ནི། །བསོད་ནམས་ཚོགས་རབ་བསག་པར་བྱ། །གཉིས་མེད་སངས་རྒྱས་གཉིས་སུ་མེད། །རྐྱེན་སྐྱེས་ཆོས་ཀུན་ཆུ་ཟླ་འདྲ། །དེ་ཉིད་སྐྱེ་མེད་ཤེས་བྱའི་ཕྱིར། །དག་པའི་སྔགས་ཀྱིས་བསྐུལ་ལ་བསྒོམ། །
ཚད་མེད་རྒྱུན་ཆད་མེད་པའི་སེམས། །ནམ་མཁའི་ཐིགས་པ་དེ་ཉིད་ལས། །སྲུང་བའི་འཁོར་ལོ་གདན་བསམས་ཏེ། །ཛ་ལས་དབྱུག་པ་དཀར་དང་སྐུ། །རྩ་ཞལ་དཀར་ལ་སྔོ་དམར་ཞལ། །རང་གི་རིག་མར་མཚུངས་པའི་ལུས། །གྲི་གུག་དབྱུག་པ་རལ་གྲི་དང་། །ཐོད་པ་འཁོར་ལོ་ཆུ་སྐྱེས་འཛིན། །

གཡས་བསྐུམ་གཡོན་བརྐྱང་བ་ཡི་ཞབས། །ཆུ་སྐྱེས་འོད་ཟེར་རྣོན་པོ་མནན། །མི་མགོའི་ཕྲེང་དཔྱངས་སྟག་ལྤགས་མནབས། །ཀླུ་དང་རུས་རྒྱན་དབུས་མཛེས་པ། །བསྐྱེད་ལ་ལུས་ངག་ཡིད་གསུམ་དང་། །སྐྱེ་མཆེད་རྣམས་ལ་འདིས་བྱིན་བརླབ། །ཨོཾ་ཨཱཿཧཱུྃ། ཀྵིཾ་ཛིཾ་ཁྃ་
གྃ་ཀྃ་སྃ། །དབང་བསྐུར་ཅོད་པན་མི་བསྐྱོད་བསམ། །ཛཿཧཱུྃ་བཾ་ཧོཿས་བྱིན་གྱིས་བརླབ། །བྱང་ཆུབ་སེམས་ཀྱི་སྤྲུལ་པས་མཆོད། །དེ་ནས་རྡོ་རྗེ་དྲིལ་ལྡན་པས། །བསྟོད་པའི་རྒྱལ་པོ་བརྗོད་པར་བྱ། །སངས་རྒྱས་རྡོ་རྗེ་ཀུན་དུ་བཟང་། །མཉམ་པའི་རྡོ་རྗེ་མི་བསྐྱོད་པ། །རྡོ་རྗེ་གསང་བ་དབྱིངས་ཆེན་པོ། །ཡེ་
ཤེས་རྡོ་རྗེ་ཕྱག་འཚལ་བསྟོད། །ཡིག་འབྲུ་གསུམ་གྱིས་བྱིན་བརླབས་པའི། །བདུད་རྩི་རྡོ་རྗེ་ལྕེ་ཡིས་མྱང་། །སྤྲོ་དང་བསྡུ་བ་བྱས་ནས་ཀྱང་། །གསང་སྔགས་ཁྲི་རུ་བཟླས་པ་བྱ། །ཨོཾ་བཛྲ་དཎྜ་དྷྲྀཀ་ཧཱུྃ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ས་ཆུ་མེ་རླུང་འབྱུང་བའི་རིམ། །ཡེ་ཤེས་ཐིག་ལེར་བྱས་ནས་ཀྱང་། །
གཟུགས་ནི་སྒྲ་ཉིད་རང་བཞིན་དག །བདག་མེད་སྙིང་པོ་བསྒོམ་པར་བྱ། །མ་རིག་མུན་པ་འཇོམས་བྱེད་སྒྲོན་མའི་མཆོག །བདུད་དགྲ་ཁྲོ་བོའི་རྒྱལ་པོའི་སྒྲུབ་ཐབས་འདིས། །འགྲོ་བའི་འཇིགས་ཆེན་ངེས་དགྲ་བཅོམ་ནས་ཀྱང་། །ཐམས་ཅད་གཤིན་རྗེ་གཤེད་པོ་ཉིད་མཚུངས་ཤོག །དབྱུག་
པ་གཤིན་རྗེ་གཤེད་རྣམ་པར་འཇོམས་པ་ཞེས་བྱ་བའི་སྒྲུབ་ཐབས། སློབ་དཔོན་ཆེན་པོ་དཱི་པཾ་ཀ་རས་མཛད་པ་རྫོགས་སོ།། །།རྣལ་འབྱོར་པ་པྲཛྙཱ་ཤྲཱི་ཛྙཱ་ན་ཀཱིརྟིས་རང་འགྱུར་དུ་མཛད་པའོ།། ༄༅༅། །རྒྱ་གར་སྐད་དུ། ཙཎྜ་ཁཌྒ་ཡ་མཱ་རི་སཱ་དྷ་ནཾ་ནཱ་མ། བོད་སྐད་དུ། རལ་གྲི་
གཤིན་རྗེ་གཤེད་གཏུམ་པོའི་སྒྲུབ་ཐབས་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །སྟོང་པ་ཞི་བ་ལས་ནི་རྡོ་རྗེའི་སྐུ། །བདུད་མཐར་མཛད་པ་རབ་ཏུ་གཏུམ་པའི་ཞལ། །སེམས་ཅན་རྗེས་འཛིན་ཐུགས་རྗེ་ཆེན་པོར་ལྡན། །རལ་གྲི་ཆེ་ལ་བཏུད་དེ་བཤད་པར་བྱ། །སྐད་ཅིག་
དྲན་པའི་ལྷར་བསྐྱེད་ནས། །དམ་པ་དམིགས་ལ་ཚོགས་བསག་བྱ། །ཚངས་པའི་གནས་བཞི་སྔོན་འགྲོ་བས། །སྟོང་པ་དང་ནི་འཁོར་ལོ་བསྒོམ། །པདྨ་འོད་ཟེར་རྣོན་པོ་སྟེ། །རཾ་ལས་ཤུགས་ཅན་གྱུར་པའི་སྐུ། །མརྒད་ལྗང་གུའི་མདོག་འདྲ་བ། །སྔོ་དང་དཀར་པོ་གཡས་གཡོན་ཞལ། །

གྲི་གུག་རལ་གྲི་འཁོར་ལོ་དང་། །ཐོད་པ་རིན་ཆེན་ཆུ་སྐྱེས་འཛིན། །དཔའ་བོའི་རྒྱན་དང་ཀླུ་ཡིས་སྤྲས། །དབུ་སྐྲ་གྱེན་འགྲེང་མེ་དཔུང་དཀྱིལ། །སྟག་ལྤགས་མནབས་ཤིང་གཡོན་བརྐྱང་བ། །བསྐྱེད་པའི་སྐུ་ལ་འདི་ལྟ་སྟེ། །སྙིང་གར་ཧཱུཾ་ལས་རྡོ་རྗེ་ཐུགས། །མགྲིན་པར་ཨཱཿལས་རྡོ་རྗེ་
གསུང་། །སྤྱི་བོར་ཨོཾ་ལས་སྐུ་རྡོ་རྗེ། །མཐིང་དམར་དཀར་ཞིང་མཚོན་ཆར་ལྡན། །ས་སྙིང་དཀར་པོ་མིག་ལ་ཀྵིྃ། །རྡོ་རྗེ་འཛིན་སྔོན་རྣ་བར་ཛིཾ། །ནམ་སྙིང་སེར་པོ་སྣ་ལ་ཁྃ། །འཇིག་དབང་དམར་པོ་ལྕེ་ལ་གྃ། །སྒྲིབ་སེལ་ལྗང་གུ་དཔྲལ་བར་ཀྃ། །ཀུན་བཟང་དཀར་པོ་ལྷེན་སྣར་སྃ། །
སྤྱན་དྲངས་མཆོད་བསྟོད་བྱིན་རླབས་བྱ། །ཨོཾ་སརྦ་ཏ་ཐཱ་ག་ཏ་ཀཱ་ཡ་ཝཱཀ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། རྡོ་རྗེ་སེམས་མ་ལ་སོགས་ཀྱིས། །དབང་བསྐུར་སྤྱི་བོ་གཤིན་རྗེ་གཤེད། །སྒོ་བཞིའི་སྔགས་ཀྱིས་འདོད་ལྷ་བསྐུལ། །རང་གི་ལུས་ལ་གཞུག་པར་བྱ། །མུངྒ་རཱ་ཛཿ། དཎྜ་ཧཱུཾ། པདྨ་བྃ།
ཁཌྒ་ཧོཿ། སྙིང་གར་ཡེ་ཤེས་ཞུ་བའི་རྒྱུན། །བ་སྤུའི་ཁུང་ནས་སྤྲུལ་པས་མཆོད། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧྃ། ཧཱུྃ་རྡོ་རྗེ་ལས་ནི་བརྩོན་འགྲུས་ཆེ། །སངས་རྒྱས་རྡོ་རྗེ་བརྟུལ་ཞུགས་འཛིན། །ལས་མཐར་མཛད་པའི་ཐུབ་པ་པོ། །རྡོ་རྗེ་བརྩོན་འགྲུས་ཁྱོད་ཕྱག་འཚལ། །བདུད་
རྩི་མྱང་བ་བྱས་ནས་ཀྱང་། །སྤྲོ་བསྡུ་ལྡན་པས་བཟླས་པར་བྱ། །ཨོཾ་བཛྲ་ཁཌྒ་་དྷྲྀཀ་ཧཱུྃ་ཧཱུྃ་ཧཱུྃ་ཕཊ་ཕཊ་སྭཱ་ཧཱ། འབྱུང་བ་རིམ་གྱིས་ཐིམ་པ་ལ། །ཡི་གེ་གསུམ་དུ་སྦྱངས་ནས་ཀྱང་། །བདེ་དང་སྡུག་བསྔལ་མི་དམིགས་པའི། །རྡོ་རྗེ་ལྟ་བུའི་ཏིང་འཛིན་བསྒོམ། །བདག་གིས་རྙེད་དང་བཀུར་སྟི་ལ། །
མ་བལྟས་སེམས་ཅན་ལ་བརྩེའི་ཕྱིར། །རལ་གྲི་རྡོ་རྗེའི་སྒྲུབ་ཐབས་བྱས། །འདི་ཡིས་ངེས་འབྱུང་རྙེད་གྱུར་ཅིག །རལ་གྲི་གཤིན་རྗེ་གཤེད་གཏུམ་པོའི་སྒྲུབ་ཐབས་ཞེས་བྱ་བ་རྫོགས་སོ།། ༄༅༅། །རྒྱ་གར་སྐད་དུ། པྲཛྙཱ་སུ་ཁ་ཡ་པདྨ་ཡ་མཱ་རི་སཱ་དྷ་ནཾ་ནཱ་མ། བོད་སྐད་དུ།
པདྨ་གཤིན་རྗེ་གཤེད་ཤེས་རབ་བདེ་བ་ཅན་གྱི་སྒྲུབ་ཐབས་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །སེམས་ཅན་རྗེས་སུ་དྲན་ལྡན་ཞིང་། །དེ་འདྲེན་ཐུགས་རྗེའི་རྟགས་མངའ་བ། །མཚོ་སྐྱེས་ཞལ་ལ་ཕྱག་འཚལ་ཏེ། །དེ་ཡི་སྒྲུབ་ཐབས་བཤད་པར་བྱ། །དང་པོར་སྔགས་པས་

ཁྲུས་བྱས་ནས། །ཀུ་ཤའི་སྟན་ལ་ལེགས་འདུག་སྟེ། །ལུས་ངག་ཡིད་གསུམ་བག་ལྡན་པས། །ཅུང་ཟད་འགྲོ་འོང་ལྡན་པས་བྱ། །རང་གི་ལྷག་པའི་ལྷར་ལྡན་པས། །ཅོད་པན་རྗེ་བཙུན་གཟུང་བར་བྱ། །དེ་ནས་རྗེ་བཙུན་སྤྱན་དྲངས་ཏེ། །སྐྱབས་འགྲོ་བྱང་ཆུབ་སེམས་
བསྐྱེད་དེ། །དེ་ནས་མཎྜལ་བསྟར་བ་སྟེ། །མེ་ཏོག་དགྲམ་ཞིང་མཆོད་ཚོགས་བཤམ། །དེ་ནས་སེམས་ཅན་ཀུན་གྱི་ཕྱིར། །བསོད་ནམས་ཚོགས་བསགས་གཤེགས་སུ་གསོལ། །བུ་གཅིག་ལྟར་དྲན་བྱམས་པ་དང་། །སྡུག་བསྔལ་བྲལ་འདོད་སྙིང་རྗེ་དང་། །བདེ་བ་ཐོབ་པའི་དགའ་བ་དང་། །
ཕུན་སུམ་ཚོགས་པའི་བཏང་སྙོམས་སོ། །སྙིང་རྗེ་ཐབས་ཀྱི་རང་བཞིན་དང་། །ལྡན་པའི་སྟོང་པ་བསྒོམ་པར་བྱ། །སྲུང་འཁོར་པདྨ་ཉི་མའི་སྟེང་། །ནི་ལས་ཆུ་སྐྱེས་གྱུར་པའི་སྐུ། །པདྨ་རཱ་གའི་མདོག་འདྲ་ལ། །གཡས་དང་གཡོན་ནི་སྔོ་དང་དཀར། །གྲི་གུག་ཆུ་སྐྱེས་རལ་གྲི་དང་། །ཐོད་པ་འཁོར་
ལོ་རིན་ཆེན་འཛིན། །ཐོད་པ་ལྔ་ཡིས་དབུ་བསྐོར་ཅིང་། །ཕྲེང་བ་ཀླུ་དང་དུར་ཁྲོད་བརྒྱན། །མེ་དཔུང་སྐྱིལ་ཀྲུང་སྟག་ལྤགས་མནབས། །བསྐྱེད་པ་ཅུང་ཟད་འཇམ་པའི་མདངས། །སྐུ་གསུང་ཐུགས་དང་སྐྱེ་མཆེད་དྲུག །རང་ལུས་ངོ་བོ་བྱིན་གྱིས་བརླབ། །དབང་བསྐུར་རྟགས་དང་ལྡན་པ་ལ། །
མཆོད་ལ་བསྟོད་པ་འདིས་མཉེས་བྱ། །ཧཱུྃ་རྡོ་རྗེ་དམ་ཚིག་རྡོ་རྗེ་གསུང་། །རྡོ་རྗེ་དབྱངས་ནི་ཟབ་མོ་ཆེ། །འདོད་ཆགས་རྡོ་རྗེ་ཉིད་མཚུངས་པ། །སྐྱོན་བྲལ་རྗེ་ལ་ཕྱག་འཚལ་བསྟོད། །བདུད་རྩི་མྱང་ཞིང་སྤྲོ་བསྡུ་བཟླས། །བྱས་ནས་ཕྱག་རྒྱ་བཀྲོལ་བར་བྱ། །ཨོཾ་བཛྲ་པདྨ་དྷྲྀཀ་ཧཱུྃ་ཧཱུྃ་ཧཱུྃ་ཕཊ་ཕཊ་སྭཱ་ཧཱ།
རིག་པའི་ཤེས་རབ་མདའ་དག་གིས། །ལྟོང་ལྡན་འབེན་ལ་ཐུག་པ་ན། །གཅིག་ཀྱང་མི་གནས་བདེ་བ་ཆེ། །བསྒོམ་བྱ་སྒོམ་བྱེད་མེད་པ་ཡི། །རྗེ་བཙུན་གསུང་གི་དྲིན་དག་དང་། །རྒྱུད་ལས་མཐོང་བ་བྲིས་པ་འདིས། །འགྲོ་ཀུན་དྲི་མ་མེད་པ་ཡི། །སངས་རྒྱས་ས་ལ་གནས་པར་ཤོག །པདྨ་གཤིན་རྗེ་གཤེད་
ཤེས་རབ་བདེ་བ་ཅན་གྱི་སྒྲུབ་ཐབས་ཞེས་བྱ་བ། རྒྱ་གར་གྱི་མཁན་པོ་དཱི་པཾ་ཀ་ར་ཞེས་བྱ་བས་མཛད་པ་རྫོགས་སོ།། །།རྣལ་འབྱོར་པ་པྲཛྙཱ་ཤྲཱི་ཛྙཱ་ན་ཀཱིརྟིས་རང་འགྱུར་དུ་མཛད་པའོ།། ༄༅༅། །རྒྱ་གར་སྐད་དུ། ཀྲིཥྞ་ཡ་མཱ་རི་སཱ་དྷ་ནཱཾ་མཎྜ་ལ་བི་དྷི་ནཱ་མ། བོད་སྐད་དུ། གཤིན་རྗེ་གཤེད་ནག་པོའི་

སྒྲུབ་ཐབས་ཀྱི་མཎྜལ་གྱི་ཆོ་ག་ཞེས་བྱ་བ། དཔལ་གཤིན་རྗེ་གཤེད་ལ་ཕྱག་འཚལ་ལོ། །བླ་མ་རྡོ་རྗེ་ཡེ་ཤེས་དང་། །རྗེ་བཙུན་མགོན་ལ་ཕྱག་འཚལ་ལོ། །དངོས་གྲུབ་སློབ་དཔོན་མཉེས་བྱའི་ཕྱིར། །རྗེ་བཙུན་དཀྱིལ་འཁོར་དམ་པ་ཡི། །ཆོ་ག་བདག་གིས་བཤད་པར་བྱ། །ཡིད་དུ་འོང་བའི་ས་ཕྱོགས་
སུ། །ས་གཞི་བཟང་པོ་ཡིད་འོང་ལ། །རིན་ཆེན་སྤོས་ཆུས་ལེགས་བཀྲུས་ཏེ། །མཉམ་པའི་ས་ལ་དྲི་སོགས་སྦྱིན། །མཛེས་པའི་གཞི་ལ་ཐིག་ལེ་བཞག །ཏཱ་མ་ལ་ཡི་འོ་མའམ། །རས་བལ་གཙང་མས་དགོད་པར་བྱ། །སེམས་ཅན་ཀུན་ལ་རྗེས་བརྩེ་བས། །ཕྱི་ནང་ཁྲུས་ལ་གནས་ནས་
ཀྱང་། །སྐད་ཅིག་བསྐྱེད་ལ་ཚོགས་བསག་བྱ། །སྲུང་དང་ཆོས་འབྱུང་གཞལ་ཡས་ཁང་། །བསྐྱེད་ལ་དེ་ཡི་ནང་དུ་ནི། །མེ་ཏོག་བཟང་པོ་དགྲམ་པར་བྱ། །ཞེ་སྡང་རྡོ་རྗེ་ལས་བརྩམས་ཏེ། །རལ་གྲི་རྡོ་རྗེ་རབ་ཏུ་བསྐྱེད། །ཚོམ་བུ་རེ་ལ་ལན་བདུན་ཏེ། །བཟླས་པ་པདྨ་ཉི་ཟླའི་སྟེང་། །བདེ་
གཤེགས་སྲས་བཅས་བསམ་པར་བྱ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུྃ་ཧཱུྃ་ཕཊ་ཕཊ་སྭཱ་ཧཱ། ཨོཾ་ཛི་ན་ཛྀཀ །ཨོཾ་རཏྣ་དྷྲྀཀ །ཨོཾ་ཨཱ་རོ་ལྀཀ །ཨོཾ་པྲཛྙཱ་དྷྲྀཀ །ཨོཾ་མུངྒ་ར་དྷྲྀཀ །ཨོཾ་དཎྜ་དྷྲྀཀ །ཨོཾ་པདྨ་དྷྲྀཀ །ཨོཾ་ཁཌྒ་དྷྲྀཀ །ཨོཾ་མོ་ཧ་ར་ཏི། ཨོཾ་དྭེ་ཥ་ར་ཏི། ཨོཾ་རཱ་ག་ར་ཏི། ཨོཾ་བཛྲ་ར་ཏི། སོ་སོའི་སྐུ་མདོག་ཕྱག་
མཚན་དང་། །རྒྱན་དང་བཞུགས་པའི་ཕྱག་རྒྱ་རྣམས། །མངོན་པར་རྟོགས་པའི་ཆོ་ག་ལས། །འབྱུང་བ་བཞིན་དུ་གསལ་བར་བསྐྱེད། །ཚོགས་བསགས་དཀྱིལ་འཁོར་བསྟིམ་པ་དང་། །སྐྱེ་མཆེད་སྐུ་གསུང་ཐུགས་བྱིན་བརླབ། །དབང་བླང་བ་དང་དགུག་གཞུག་བྱ། །མཆོད་བསྟོད་
བདུད་རྩི་མྱང་བ་དང་། །སྤྲོ་བསྡུ་དང་ནི་བཟླས་པ་རྣམས། །རྣལ་འབྱོར་པ་ཡིས་ལེགས་བྱས་ཏེ། །འདོད་པའི་དོན་རྣམས་གསོལ་བ་གདབ། །གཤེགས་དང་བཟོད་པ་གསོལ་བྱས་ཏེ། །དེ་ཉིད་གསུམ་གྱི་ཆོ་ག་ཡིས། །ཡེ་ཤེས་འཁོར་ལོ་གཤེགས་སུ་གསོལ། །དམ་ཚིག་བསྐྱེད་པའི་ལྷ་རྣམས་ནི། །
སྙིང་ག་ཉིད་དུ་རྣམ་པར་བསྟིམ། །གཉིས་དོན་དམ་པ་བདེན་པ་ཡི། །ཆོས་ཀྱི་ཚུལ་ལ་གནས་པར་བྱ། །སེམས་ཅན་ཀུན་གྱི་དོན་གྱི་ཕྱིར། །བྱང་ཆུབ་ཏུ་ནི་བསྔོ་བ་དང་། །སྨོན་ལམ་ཆེན་པོ་གདབ་པར་བྱ། །དེ་ལྟར་ཉིན་མཚན་དུས་དྲུག་ཏུ། །སྙིང་བརྩེ་བརྩོན་པས་དབུལ་བར་བྱ། །གཡེང་བ་རྣམ་པར་

ཞི་དོན་དུ། །ཚོགས་བསགས་མཎྜལ་ཏིང་འཛིན་ནི། །སྦྱོར་བའི་ཆོ་ག་སྔོན་སོང་བས། །གསེར་དང་པད་ཟླ་རྣམ་བསམས་ཏེ། །གོང་བཞིན་རིམ་པར་དགོད་པར་བྱ། །ཨོཾ་བཛྲ་རེ་ཁེ་ཧཱུྃ། མཎྜ་ལ་ཧཱུྃ། ཨོཾ་བཛྲ་རེ་ཁེ་ཧཱུྃ། པདྨ་མཎྜ་ལ་ཧཱུྃ། ཨོཾ་བཛྲ་རེ་ཁེ་ཧཱུཾ། ཨ་ཙནྡྲ་མཎྜ་ལ་ཧཱུྃ།
བསྙེན་པར་བྱ་བའི་གོང་བཞིན་དུ། །གཤེགས་སུ་གསོལ་དང་བསྡུ་བ་མིན། །ཁྱད་པར་བསྡུས་པའི་མཎྜལ་ནི། །ལས་ཀྱི་སྔགས་ཀྱིས་བྱིན་བརླབས་ཏེ། །མཛེས་པའི་སྔགས་ཀྱིས་དགྲམ་པར་བྱ། །རས་སམ་བཟང་པོའི་གཞི་དག་ལ། །ཐིག་ལེ་འབྲུ་སོགས་བཀོད་ནས་ཀྱང་། །བདེ་གཤེགས་
སྲས་བཅས་སྤྱན་དྲངས་ཏེ། །གདན་གྱི་ཚུལ་དུ་དབུལ་བར་བྱ། །ཤིན་ཏུ་བསྡུས་པ་འདི་ལྟ་སྟེ། །ཚོམ་བུ་གཅིག་ལ་མངོན་བརྟེན་ཏེ། །གཞལ་ཡས་ཁང་དུ་དམིགས་ནས་ཀྱང་། །དེ་ནས་སྤྱན་དྲངས་བཞུགས་སུ་གསོལ། །བསོད་ནམས་ཚོགས་ཀྱིས་རྒྱུད་སྦྱངས་ནས། །གསོལ་བཏབ་
བསྔོས་ལ་གཤེགས་སུ་གསོལ། །མ་ཆགས་བརྟེན་པའི་སྙིང་གར་བསྡུ། །སྒྱུ་མའི་བློ་ཡིས་ཟིན་པར་བྱ། །བླ་ན་མེད་པའི་མཎྜལ་ནི། །སྙིང་གའི་པདྨ་རྣམ་དག་ནང་། །ཡེ་ཤེས་ཆེན་པོའི་ཐིག་ལེ་ནི། །ལྔ་ཕྲག་གཉིས་དང་དྲུག་ཕྱེད་ཀྱི། །ཡིག་འབྲུ་མཆོག་ཏུ་རྣམ་བསམས་ཏེ། །མཚན་དང་
རྫོགས་པའི་སྐུར་གྱུར་ནས། །དུས་གསུམ་ཚོགས་ཀྱི་མཆོད་པ་བྱ། །རྟག་ཏུ་བསྡུ་བ་མ་ཡིན་ཏེ། །དུས་མེད་རྟག་ཏུ་བརྩོན་པས་འགྲུབ། །བསམ་གྱིས་མི་ཁྱབ་མཎྜལ་ནི། །ཆོས་ཉིད་ཟུང་དུ་འཇུག་པ་ལས། །རང་གི་དེ་ཉིད་རྣམ་བསམས་པའི། །སྐྱེ་མེད་མྱ་ངན་འདས་པའི་གནས། །རྟོག་དང་བྲལ་བའི་དེ་
བཞིན་ཉིད། །རྡོ་རྗེ་ལྟ་བུའི་ཕོ་བྲང་ཡིན། །དུས་གསུམ་རྟག་ཏུ་སངས་རྒྱས་ནས། །སྐྱེ་མེད་དེ་བཞིན་ཉིད་ཀྱིས་བདག །ཆགས་སྡང་བྲལ་བས་དབུལ་བར་བྱ། །མཎྜལ་ཀུན་གྱི་མཆོག་ཡིན་ནོ། །བསོད་ནམས་ཚོགས་ཀྱི་མཎྜལ་ལས། །ཡེ་ཤེས་མཎྜལ་རྣམ་པར་སྐྱེ། །དེ་ཕྱིར་ཐབས་ཀྱི་མཎྜལ་ནི། །
རྣལ་འབྱོར་པ་ཡིས་དབུལ་བར་བྱ། །ཐུན་མོང་དངོས་གྲུབ་བསྒྲུབ་པ་དང་། །མཆོག་གི་དངོས་གྲུབ་ཐོབ་བྱའི་ཕྱིར། །བདག་གི་བསམ་པ་བཟང་པོ་ཡིས། །མཎྜལ་བྱས་པའི་དགེ་བ་གང་། །དེས་ནི་སེམས་ཅན་ཐམས་ཅད་ཀྱིས། །སངས་རྒྱས་ཞིང་ཁམས་དག་ཐོབ་ཤོག །གཤིན་རྗེ་གཤེད་ནག་པོའི་སྒྲུབ་

ཐབས་ཀྱི་མཎྜལ་གྱི་ཆོ་ག་ཞེས་བྱ་བ་རྫོགས་སོ།། །།ཟངས་གླིང་རྣལ་འབྱོར་ནཱ་ག་པཱུ་ར་ཡིས། །རྣལ་འབྱོར་ཀ་མ་རཀྵི་ཏ་ཉིད་ལ། །གུ་ཚ་རྒྱལ་བུའི་བུ་ཉིད་བཏད་ནས་ཀྱང་། །ཏ་རུ་པ་རི་དུར་ཁྲོད་ཚལ་ཉིད་དུ། །རྣལ་འབྱོར་འདུས་པའི་ཚོགས་ཀྱི་འཁོར་ལོ་ནང་། །གསོལ་བཏབ་རྣལ་འབྱོར་རྣམས་ཀྱི་
ཞལ་ངོ་རུ། །མཎྜལ་ཆོ་ག་བསོད་སྙོམས་པ་ཡིས་བྱས། །དེང་སང་རྣལ་འབྱོར་ལྟ་སྤྱོད་ལྡན་པ་ཡིས། །དུས་རྣམས་རྟག་ཏུ་མཎྜལ་འབད་པར་རིགས།། ༄༅༅། །རྒྱ་གར་སྐད་དུ། དྷརྨ་ཀཱ་ཡ་དཱི་པཾ་བི་དྷི་ནཱ་མ། བོད་སྐད་དུ། ཆོས་ཀྱི་སྐུའི་སྣང་བའི་ཆོ་ག་ཞེས་བྱ་བ། དཔལ་
གཤིན་རྗེ་གཤེད་ལ་ཕྱག་འཚལ་ལོ། །དང་པོ་སྙིང་རྗེའི་བདག་ཉིད་པས། །སྲིད་པའི་བདེ་ལ་མ་ཆགས་ཤིང་། །བདག་འཛིན་དག་ལ་རྒྱབ་ཀྱིས་ཕྱོགས། །བདག་འཛིན་ཡོངས་སུ་དོར་བྱས་ཏེ། །བདག་དང་གཞན་དུ་མཉམ་པ་དང་། །རང་དང་གཞན་གྱིས་བླང་བའི་ཕྱིར། །ཕྱི་ནང་བར་ཆད་སེལ་བའི་
མཆོག །ཆོས་སྐུ་རྟེན་མཆོག་གདབ་པའི་ཕྱིར། །གཤིན་རྗེ་གཤེད་ལ་གུས་བཏུད་དེ། །མཆོད་རྟེན་ཆོ་ག་བཤད་པར་བྱ། །ཟུང་དུ་འཇུག་པའི་རྣལ་འབྱོར་པས། །ཡིད་དགའ་བ་ཡི་ས་ཕྱོགས་སུ། །དུར་ཁྲོད་དགོན་པའི་གནས་མཆོག་ཏུ། །བཀྲ་ཤིས་ས་ནི་བཟང་པོ་ལ། །བད