Luận tạng Tây Tạng (Tengyur) — Tập 47

་རྒྱལ་པོས་རྒྱན་བྱེད་པ། །སྔོན་པོ་གྲངས་མེད་སྦྲུལ་རྒྱན་གྱིས། །ཤིན་ཏུ་འཇིགས་བྱེད་དབུ་སྐྲ་བཅིངས། །དམར་པོ་འཇོག་པོ་གླུ་ཡིས་ནི། །སྟོབས་ཆེན་རྣ་ཆའི་རྣ་རྒྱན་བྱེད། །རིགས་ལྡན་སེར་པོས་དཔུང་རྒྱན་ཏེ། །
སེར་པོ་ཡང་ནི་ཕྱག་གདུབ་འཛིན། །ཀླུ་རྒྱལ་དུང་སྐྱོང་ཀླུ་ཡིས་ནི། །ཤིན་ཏུ་དཀར་པོའི་པདྨ་འཛིན། །འཇོག་པོ་ལྗང་གུ་ཀླུ་རྒྱལ་གྱིས། །ལེགས་པར་ཚངས་སྐུད་བྱེད་པ་སྟེ། །ནོར་རྒྱས་ཀླུ་ཡི་རྒྱལ་པོས་ནི། །དེ་ཡི་སྐ་རགས་བྱས་པ་སྟེ། །པདྨ་ཆེན་པོ་ཀླུ་རྒྱལ་གྱིས། །པད་སྐུད་ཁ་དོག་
དཀར་པོ་བཞིན། །དེས་ནི་ཞབས་གདུབ་བྱས་པ་སྟེ། །ཐམས་ཅད་ཕུཊ་སྒྲ་དྲག་ཤུལ་ཅན། །མཆེ་གཉིས་སོ་ཕྲེང་ལྕེ་གཉིས་པའོ། །འདི་ནི་འཁོར་བྱང་རང་བཞིན་ཅན། །འདི་ལེགས་གཤིན་རྗེ་གཤེད་པོ་ཡིན། །ཤེས་ནས་རྣམ་རྟོག་མེད་པར་བྱ། །བརླབས་ཤིང་སྔགས་ཀྱིས་མཉམ་
བྱའོ། །ཨོཾ་དྷརྨ་དྷཱ་ཏུ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བྱ་བ་འདིས་ནི་རྗེས་སུ་རྣལ་འབྱོར་རོ། །རང་སྙིང་འོད་ཟེར་ལྕགས་ཀྱུས་དགུག །མཁའ་ཁྱབ་རྫོགས་པའི་སངས་རྒྱས་ཀུན། །ཐམས་ཅད་དེ་ནི་ཞལ་དུ་གཞུག །བདེ་ཞུགས་འབབ་ཅིང་སྙིང་གར་ཞུ། །བྱས་པས་བློ་ལྡན་རྣལ་འབྱོར་གྱིས། །
རྡོར་ལམ་ཁུ་བ་དེ་ཉིད་འཕྲོ། །རང་འོད་པདྨའི་ནང་གནས་པ། །ས་བོན་གཟུགས་ཀྱིས་དམིགས་པར་བྱ། །ས་བོན་འཁོར་ལོ་ཡང་དག་འབྱུང་། །ས་བོན་རྣམས་ཀྱི་བྱིན་རླབས་ཏེ། །ཚ་ཚ་འཕྲོ་ཞིང་འབར་བ་ཅན། །མཁས་པས་རིམ་པར་བསྒོམ་པ་སྟེ། །གསུངས་པའི་མཚན་ཉིད་ཇི་བཞིན་
པ། །ཡ་རྣམས་དབུས་སུ་སྔོན་པོ་བྱུང་། །དཀྱིལ་འཁོར་བདག་པོ་བཞེངས་པའོ། །ཤར་དུ་ཀྵེ་ཡིས་འཁོར་ལོ་རྫོགས། །རྟག་པ་ཕྱག་དྲུག་དཀར་པོ་སྟེ། །གཡས་པར་འཁོར་ལོ་རལ་གྲི་གནས། །གཡོན་པར་རིན་ཆེན་མཚོ་སྐྱེས་འཛིན། །མ་ཡིས་རྣམ་པས་ལྷོ་ཕྱོགས་སུ། །

རིན་ཆེན་འབྱུང་གནས་རིན་ཆེན་རྒྱལ། །གསེར་བསྲེགས་དང་ནི་མཚུངས་པའི་མདོག །གཡས་པས་རིན་ཆེན་རལ་གྲི་འཛིན། །གཡོན་པས་འཁོར་ལོ་པདྨ་གནས། །ནུབ་ཏུ་འདོད་ཆགས་རྡོ་རྗེ་སྟེ། །མི་ཡི་ས་བོན་པདྨ་རྫོགས། །པདྨ་རཱ་ག་མཉམ་མཚུངས་པ། །པདྨ་རལ་གྲི་གཡས་པར་
གནས། །ནོར་བུ་འཁོར་ལོ་གཡོན་པར་བཀོད། །ས་བོན་དེ་ལས་རལ་གྲི་སྐྱེས། །ལྗང་གུ་ཕྲག་དོག་གཤིན་དགྲ་སྟེ། །རལ་གྲི་འཁོར་ལོ་གཡས་པས་འཛིན། །པདྨ་ནོར་བུ་གཡོན་པར་བསྣམས། །ཐམས་ཅད་ཞེ་སྡང་གཤིན་དགྲ་ཡི། །མཚན་ཉིད་ཀྱིས་ནི་ཁྲོ་བོའི་གཟུགས། །རྩ་
བའི་ཕྱག་ནི་གཉིས་གཉིས་ཀུན། །གྲི་གུག་བྷནྡྷ་བསྒོམ་བྱ་སྟེ། །རང་གི་ཤེས་རབ་གཉིས་མེད་ལུས། །བདེ་བའི་གཟུགས་ཀྱིས་རང་བཞིན་ཅན། །ཉི་མའི་དཀྱིལ་འཁོར་ཀུན་གནས་པ། །དགེ་བ་ཟླ་བའི་དཀྱིལ་འཁོར་གནས། །སྣ་ཚོགས་རྡོ་རྗེ་རྩིབས་རྩེ་ལ། །སེམས་ཅན་དོན་
མཛད་བསྒོམ་པར་བྱ། །ཡ་རྣམས་ཤར་ཕྱོགས་སྒོ་རུ་བྱུང་། །ཐོ་བ་སྔོན་པོ་རང་བཞིན་ཏེ། །གཡས་པར་རལ་གྲི་ཐོ་བ་འཛིན། །གཡོན་ན་ནོར་བུ་པད་དཀར་གནས། །དེ་ཐོ་ཞེས་ནི་གཤིན་རྗེ་གཤེད། །ཙ་ལས་བྱུང་བ་བེ་ཅོན་ལྷོ་སྒོར་གནས། །བེ་ཅོན་གཤིན་དགྲ་ཁ་དོག་དཀར། །གཡས་
པས་བེ་ཅོན་རལ་གྲི་འཛིན། །གཡོན་པས་འདམ་སྐྱེས་འཁོར་ལོ་བསྣམས། །ནུབ་ཏུ་པདྨ་གཤིན་དགྲ་ནི། །དམར་པོ་ཞལ་གསུམ་ཕྱག་དྲུག་སྟེ། །ནི་ལས་སྐྱེས་པ་འདོད་ཆགས་རྒྱལ། །བྱང་དུ་རལ་གྲི་གཤིན་དགྲ་ནི། །ར་ལས་སྐྱེས་པའི་ཆ་བྱད་ནི། །རྒྱལ་པོ་ཕྲག་དོག་དབྱིབས་ཀྱིས་
གནས། །ཅུང་ཞིག་སྔོན་པོའི་དབྱེ་བ་ཡིས། །རབ་ཏུ་འཇིགས་བཞིན་བྱས་པ་སྟེ། །ཐམས་ཅད་ཁྲོས་པ་དང་ལྡན་པ། །ཡན་ལག་ལ་འགྲོགས་པ་ཡིས་བརྒྱན། །གཙིགས་པའི་ཞལ་གྱིས་བཞད་པ་སྟེ། །སྐྲ་ནི་སེར་སྐྱ་འབར་ཞིང་འགྲེང་། །ཉི་དཀྱིལ་ལ་ནི་ཡང་དག་གནས། །མཆེ་
བ་གཙིགས་ཤིང་སྟོབས་ཀྱི་ཞལ། །གྲི་གུག་བྷནྡྷ་འཛིན་པའོ། །སྣ་ཚོགས་རྡོ་རྗེ་གྲྭ་བཞི་རུ། །དེ་བཞིན་ལྷ་མོ་ཟླ་དཀྱིལ་གནས། །ཛ་འཁོར་རྡོ་རྗེ་ཙཱརྩི་ཀཱ། །ལྷ་མོ་དེ་ནི་ཤར་ལྷོར་གནས། །སྐེམས་མ་དཀར་མོ་ཁྲོ་ཆེན་མ། །གཏི་མུག་གཤིན་དགྲ་རང་བཞིན་བཞུགས། །དེ་ནས་ལྷོ་

ནུབ་ཕག་མོ་སྟེ། །ས་ལས་རྡོ་རྗེ་སྐྱེས་མ་ཡིན། །ཕག་པའི་གདོང་ཅན་ཁྲོ་ཆེན་མ། །ཞེ་སྡང་གཤིན་དགྲ་འདྲ་བའི་འོད། །རབ་ཏུ་ཞི་བའི་དབྱངས་ཅན་མ། །ནུབ་བྱང་གི་ནི་གྲྭ་རུ་གནས། །དོ་ལས་སྐྱེས་མ་མཆོག་དམར་མདོག །འདོད་ཆགས་གཤིན་དགྲའི་དབྱིབས་ཅན་
མ། །བྱང་ཤར་གྲྭ་རུ་ཡང་དག་གནས། །དཀར་མོ་ལྗང་གུ་འཇིགས་བྱེད་མ། །ཕྲག་དོག་གཤིན་དགྲའི་ཕྱག་མཚན་འཛིན། །རུ་ལས་སྐྱེས་པའི་ཕྲག་དོག་དབྱིབས། །སྔོན་པོའི་གཡས་པ་དཀར་པོ་སྟེ། །དཀར་པོའི་གཡས་པ་སྔོན་པོ་ཡིན། །དེ་གཉིས་གཡོན་ཞལ་དམར་པོ་སྟེ། །གཞན་
མའི་ཞལ་ནི་དཀར་པོའོ། །ཎ་ཡོ་ནི་ར་གྲྭ་བཞི་རུ། །དཀྱིལ་འཁོར་གྱི་ནི་བྷནྡྷ་སྟེ། །རང་སྔགས་རིག་པ་ཇི་བཞིན་གྱིས། །བློ་ལྡན་རྫོགས་ཤིང་འཕྲོ་བར་བྱ། །ཧཱུཾ་ཧྲཱིཿཥྚྲྀཿལ་སོགས་སྔགས་སྒྲ་ཡིས། །དཀྱིལ་འཁོར་མངའ་བདག་ཡང་དག་བསྐུལ། །གྲངས་མེད་སྤྲུལ་པ་རྣམ་འཕྲོས་ཏེ། །
བརྩོན་འགྲུས་སེམས་ཅན་དོན་མཛད་པ། །དངོས་པོ་ཐམས་ཅད་རང་ལུས་ལ། །ཁྲོ་བོའི་དཔའ་བོས་གཞུག་བྱའོ། །ཛི་ན་ཛིཀ་ཅེས་བྱ་བས་ནི། །ཤར་དུ་གཏི་མུག་གཤིན་དགྲ་སྟེ། །སྣ་ཚོགས་པད་ཟླ་དབྱིབས་རྩེ་རུ། །དེ་ལ་དེ་ནི་གནས་པར་བྱ། །རཏྣ་དྷྲྀཀ་ཅེས་བྱ་བས་ནི། །ལྷོ་ཡི་
པདྨའི་ཉི་དཀྱིལ་ལ། །བགེགས་མེད་དོན་དུ་དགུག་པ་སྟེ། །རིམ་པས་དེ་ལ་གཞུག་པར་བྱ། །ཨཱ་རོ་ལྀཀ་ཅེས་བྱ་སྔགས་ཀྱིས། །འདོད་ཆགས་གཤིན་དགྲ་སྐྱོན་མེད་པ། །ནུབ་ཀྱི་སྣ་ཚོགས་པད་ཉི་ལ། །རིམ་པས་དེ་ནི་རྣམ་བསྒོམ་བྱ། །པྲཛྙཱ་དྷྲྀཀ་ནི་དེ་ཉིད་ཀྱིས། །ཕྲག་དོག་དགྲ་ནི་
རྣམ་ཟིལ་བྱེད། །བྱང་གི་པདྨོ་རྣོན་པོ་ལ། །དེ་ནི་རིམ་པས་གནས་པར་བསམ། །མུངྒར་དྷྲྀཀ་ནི་དེ་ཉིད་ཀྱིས། །ཤར་ཕྱོགས་སྒོ་རུ་པདྨ་ལ། །ཉི་དཀྱིལ་ལ་ནི་འབར་ཞིང་གནས། །ཐོ་བ་མཐར་བྱེད་མིན་ཞེས་བྱ། །རིམ་པས་མཁས་པས་ཡང་དག་བསམ། །དཎྜ་དྷྲྀཀ་ཅེས་བྱ་སྔགས་
ཀྱིས། །ལྷོ་ཡི་སྒོ་རུ་ཡང་དག་གནས། །བེ་ཅོན་གཤིན་དགྲ་མི་བགྲུངས་པ། །སྣ་ཚོགས་པད་ཉི་ཟླ་འོད་བསམ། །པདྨ་དྷྲྀཀ་ཅེས་བྱ་བས་ནི། །པདྨ་དུས་མེད་གཤིན་དགྲ་སྟེ། །ནུབ་སྒོར་འདམ་སྐྱེས་ཉི་དཀྱིལ་ལ། །འཁྲུགས་པ་སྟོབས་ཆེན་བསམ་པར་བྱ། །ཁངྒ་དྷྲྀཀ་ནི་དེ་ཉིད་

ཀྱིས། །རལ་གྲི་དེ་ནི་དུས་མེད་པ། །སྣ་ཚོགས་པད་དང་ཉི་དཀྱིལ་ལ། །བདུད་མེད་བྱེད་པ་བྱང་སྒོར་སྒོམ། །སྣ་ཚོགས་རྡོ་རྗེ་གྲྭ་བཞི་རུ། །གཞན་ཡང་དེ་བཞིན་ལྷ་མོ་བསམ། །དྭེ་ཥ་ར་ཏི་ཞེས་སྔགས་ཀྱིས། །ཤར་ལྷོ་མཚམས་ཀྱི་ལྷ་མོ་སྟེ། །ཟླ་བ་དང་ནི་སྣ་ཚོགས་པད། །ཁྲོས་མ་ཙཱརྩི་
ཡང་དག་གནས། །དེ་ནས་ལྷོ་ནུབ་རྡོ་རྗེ་ཕག །རིགས་ཀྱི་བདག་མོ་ཕག་མོ་སྟེ། །མོ་ཧ་ར་ཏི་དེ་ཉིད་ཀྱིས། །པདྨ་ཟླ་བར་མཁས་པས་བསྒོམ། །དེ་ནས་ནུབ་བྱང་གྲྭ་ཉིད་ལ། །རཱ་ག་ར་ཏི་ཞེས་སྔགས་ཀྱིས། །པད་ཟླ་ལ་ནི་དབྱངས་ཅན་དགོད། །དེ་ནས་བྱང་ཤར་དཀར་མོ་སྟེ། །བཛྲ་ར་ཏི་ཞེས་
སྔགས་ཀྱིས། །ཟླ་པད་ལ་ནི་ལྷ་མོ་བསྒོམ། །དཀྱིལ་འཁོར་གྱི་ནི་གྲྭ་བཞི་རུ། །དེ་ཉིད་གསུམ་གྱི་བྷནྡྷ་རྣམས། །འདི་ནི་རྣམ་འཕྲོས་དག་པའི་འཁོར། །དམ་པར་བྱས་ན་བདེ་དང་ལྡན། །གོང་མའི་འཁོར་ལོ་དེ་ཐིམ་སྟེ། །མཉམ་ཉིད་པས་ནི་དམིགས་པ་སྟེ། །འདི་ནི་སྦྱོར་བ་དང་པོའོ། །
གཤིན་དགྲ་ནག་པོ་དུས་འཇིགས་པས། །དེ་ཡི་རང་བཞིན་དཀྱིལ་ལྷ་རྣམས། །མིག་དང་ལུས་སོགས་རང་བཞིན་ཏེ། །ལྷ་རྣམས་ཀྱིས་ནི་བྱིན་རླབས་བྱ། །གཏི་མུག་ཀྵིཾ་ལ་འཁོར་ལོ་སྐྱེས། །ཅུང་ཞིག་ཁྲོས་པ་མིག་ལ་གནས། །རྡོ་རྗེ་མིག་ཡིན་བློ་ལྡན་དམིགས། །རྣ་གཉིས་ཛྲྀ་ལས་རྡོ་རྗེ་བྱུང་། །
རྡོ་རྗེ་རྣ་བ་ཁ་དོག་གནག །དྲི་ལས་ཁཾ་སྐྱེས་རིན་ཆེན་འབྱུང་། །སེར་སྣ་དེ་ནི་ཟླ་བ་ལ། །རྡོ་རྗེ་དྲི་ནི་དེ་བཞིན་མཆོག །ལྗགས་ལ་གཾ་ལས་པདྨ་བྱུང་། །འདོད་ཆགས་དྲ་བ་རྡོར་ལྗགས་ཡིན། །ཀཾ་ལས་སྐྱེས་པ་རལ་གྲི་སྟེ། །རི་དགས་མཚན་པའི་རྡོར་ལུས་ཡིན། །ཕྲག་དོག་གཤིན་དགྲ་རང་
བཞིན་གཟུགས། །དཔྲལ་བར་ལུས་ཡིན་ཞེས་བྱ་སྟེ། །ལྟེ་སྟེངས་སཾ་ལས་རྡོ་རྗེ་ཡིན། །རྡོ་རྗེ་སེམས་ནི་དེ་བཞིན་མཆོག །སྒེག་པོ་ཁྲོ་བོ་རང་བཞིན་གཟུགས། །རྡོ་རྗེ་འཛིན་པ་དགོད་བྱ་སྟེ། །འདི་ནི་ཡན་ལག་དྲུག་དགོད་པའོ། །མངོན་སུམ་དོན་གྲུབ་ལས་སུ་གསུངས། །སྙིང་གར་ཧཱུཾ་རྡོར་
དབུས་སུ་གནས། །ཧཱུཾ་རྡོར་སྔོན་པོ་ལེགས་འོད་ཅན། །གཤིན་དགྲ་དང་འདྲ་ཕྱག་མཚན་མཚུངས། །སེམས་ལ་གནས་པའི་ཐུགས་རྡོར་བསྒོམ། །ཨོལ་གོང་ཨ་ལས་པདྨ་སྐྱེས། །དེ་དབུས་པུཾ་ལས་ཆགས་པ་བྱུང་། །འདོད་ཆགས་གཤིན་དགྲ་ལྟ་བུའི་ལུས། །དཔལ་ལྡན་

གསུང་རྡོར་རྣམ་བསྒོམ་བྱ། །སྤྱི་བོར་ཨོཾ་རྣམས་འཁོར་ལོ་དབུས། །དཀར་པོ་གཤིན་འབར་དེ་དབུར་འཁོར། །སྐུ་ཡི་རྡོ་རྗེ་སྐུ་དང་འདྲ། །ཕྱག་དང་ཕྱག་མཚན་ཁ་དོག་མཚུངས། །དེ་ནི་དེ་ཉིད་རྡོར་མཆོག་སྟེ། །རྫོགས་པས་མཁའ་གནས་སངས་རྒྱས་མཆོད། །སྔགས་
ཀྱིས་དེ་རྣམས་བྱིན་རླབས་བྱ། །ཨོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཝཱཀ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། རང་སྙིང་ས་བོན་འོད་ཟེར་གྱིས། །སྲས་དང་བཅས་པའི་སངས་རྒྱས་ཀུན། །སྣ་ཚོགས་ལ་གནས་དགུག་
བྱས་པས། །མདུན་དུ་དེ་ནི་བཞུགས་དམིགས་ཏེ། །དེས་ནི་ཡང་དག་སྤྲོས་པ་ཡི། །ཇི་སྲིད་ཙཱརྩི་ལ་སོགས་པ། །ཟླ་འོད་མཚུངས་པའི་བུམ་པ་ཡིས། །བཀྲ་ཤིས་ལ་སོགས་གླུ་རྣམས་ཀྱིས། །ཡང་ནི་དབང་བསྐུར་དམིགས་པར་བྱ། །བདག་ཉིད་དང་ནི་ཐམས་ཅད་ལ། །དབང་བསྐུར་བས་
ནི་ཅི་བྱུང་སྟེ། །སྤྱི་བོར་གཤིན་དགྲ་ནག་པོ་ཡི། །རྡོར་འཛིན་བདག་ཉིད་དེ་བཞིན་ནོ། །རང་སྙིང་ས་བོན་འོད་ཟེར་གྱིས། །བདག་མདུན་ཡེ་ཤེས་འཁོར་ལོ་དགུག །འཁོར་ལོ་དེ་ནི་དམིགས་ནས་ནི། །ཁྲོ་རྣམས་བགེགས་བསྐྲད་སྲུང་བར་བྱེད། །ཨརྒྷ་བསིལ་ཡབ་ཕུལ་བྱས་ནས། །ཨོཾ་
མུངྒ་ར་ཛཿ། འདི་སྔགས་ཀྱིས་ནི་དགུག་པ་སྟེ། །ཨོཾ་དཎྜ་ཧཱུཾ། འདི་སྔགས་ཀྱིས་ནི་རབ་ཏུ་གཞུག །ཨོཾ་པདྨ་བཾ། སྔགས་འདི་ཡིས་ནི་འཆིང་བ་སྟེ། །ཨོཾ་ཁཌྒ་ཧོཿསྔགས་འདི་ཡིས་ནི་དབང་བྱེད་དོ། །རང་སྙིང་ས་བོན་འོད་རྣམས་ཀྱིས། །སངས་རྒྱས་དགུག་ཅིང་གཞུག་པ་སྟེ། །སྙིང་གར་འོད་
ཞུ་དམིགས་ནས་ནི། །མ་ལུས་རྡོ་རྗེ་ལམ་ནས་དབྱུང་། །རང་འོད་རིག་མའི་པདྨ་ལ། །ཟླ་བ་ལས་བྱུང་ལྷ་མོ་རྣམས། །སྣ་ཚོགས་མེ་ཏོག་ལ་སོགས་རྫས། །ཕྱག་གི་ཡལ་གས་དེ་རྣམས་འཛིན། །སྒེག་ལྡན་དེ་ཡི་མཆོད་པ་སྟེ། །ཡིད་འཕྲོག་མཆོད་པའི་གླུ་དང་ནི། །སྣ་ཚོགས་གར་གྱི་
བྱེ་བྲག་གིས། །དེས་ནི་བདེ་ཆེན་རབ་ཡིན་ནོ། །ཀྱེ་ཀྱེ་གཤིན་རྗེ་དགྲ་ནག་པོ། །བླ་མ་སྲིན་པོའི་རང་བཞིན་ཅན། །ཁྱོད་མཐོང་བདག་ནི་རྣམ་འཇིགས་ཏེ། །བླ་མ་ཁྲོ་བོའི་རང་བཞིན་སྤོངས། །བདག་པོས་གར་བྱེད་པ་ཡིས་ནི། །སྟེང་རིས་མི་ཡུལ་ས་འོག་འདིར། །མིག་སྨན་བཅག་

བཞིན་ཁྲོས་པའི་ཡིད། །མིག་བགྲུངས་ཁྱོད་ནི་གར་བྱེད་དོ། །མི་ཐུང་ནག་པོ་གཤིན་དགྲ་སྟེ། །གཟུགས་ནི་རྣམ་པ་སྣ་ཚོགས་སྤྲུལ། །རྡོ་རྗེ་དབྱངས་ཅན་བདག་གིས་ཞུས། །བདེ་ཆེན་ཁྱོད་ནི་གར་མཛོད་ཅིག །ཧྲཱིཿཥྚྲྀཿསྔགས་ཀྱིས་ཁྱོད་གར་བྱེད། །ཁམས་གསུམ་ཐེ་ཚོམ་མེད་
པར་མཛོད། །གཤིན་རྗེ་ཁྲོ་བོ་རྗེ་བཙུན་ཁྱོད། །གར་བྱེད་འགྲོ་བས་མཐོང་བའོ། །ཨོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཐམས་ཅད་སྒྲ་བརྙན་ལྟ་བུའི་དཔེ། །སྒྲ་ཡུལ་བཞིན་དུ་རྣམ་དམིགས་བྱའོ། །འཁོར་ལོ་ལ་གནས་ལྷ་རྣམས་ཀྱིས། །འཁོར་ལོའི་བདག་པོ་བསྟོད་པ་སྟེ། །
གཏི་མུག་རྡོ་རྗེ་རང་བཞིན་ཁྱོད། །གཤིན་དགྲ་བདེ་བ་འཇིགས་པའོ། །སངས་རྒྱས་ཀུན་ལྡན་མགོན་པོ་སྟེ། །འཇིགས་མེད་རྡོ་རྗེ་ཕྱག་འཚལ་བསྟོད། །སེར་སྣ་རྡོ་རྗེ་རང་བཞིན་ཁྱོད། །ཡང་དག་གཤིན་དགྲ་འཇིགས་པ་པོ། །ཐུགས་ཀྱི་རྡོ་རྗེ་རབ་སྣང་བ། །རིན་ཆེན་རྡོ་རྗེ་ཕྱག་
འཚལ་བསྟོད། །འདོད་ཆགས་རྡོ་རྗེ་རང་བཞིན་ཁྱོད། །འདོད་ཆགས་རྒྱ་མཚོ་ཆོས་ཀྱི་བདག །ཐམས་ཅད་དབྱངས་ཀྱི་མཆོག་གི་མཆོག །གསུང་གི་རྡོ་རྗེ་ཕྱག་འཚལ་བསྟོད། །ཕྲག་དོག་རྡོ་རྗེ་རང་བཞིན་ཁྱོད། །གཤིན་དགྲ་ལས་ཀུན་ཐམས་ཅད་བྱེད། །སྐུ་ཡི་རྡོ་རྗེ་རབ་སྣང་བ། །
རལ་གྲི་ཕྱག་ལ་ཕྱག་འཚལ་བསྟོད། །སངས་རྒྱས་ཀུན་གྱི་རང་བཞིན་ཁྱོད། །སངས་རྒྱས་ཀུན་གཅིག་ཡང་དག་འདུས། །སངས་རྒྱས་ཐམས་ཅད་མཆོག་གི་མཆོག །དཀྱིལ་འཁོར་མངའ་བདག་ཕྱག་འཚལ་བསྟོད། །ཨ་ལས་སྐྱེས་པའི་དག་པད་དེ། །མགོ་གསུམ་སྟེང་
དུ་ཡང་དག་གནས། །རྣམ་རྫོགས་དེ་འོག་མེ་དཀྱིལ་འཁོར། །གྲུ་གསུམ་རཾ་བ་ལས་བྱུང་བའོ། །དེ་འོག་རླུང་གི་དཀྱིལ་འཁོར་ཏེ། །གཡོ་བ་སྔོན་པོ་གཞུ་དང་འདྲ། །ཡཾ་ལས་སྐྱེས་པ་བ་དན་དང་། །དེ་ལ་ཁ་དོག་མིང་དང་གཟུགས། །སྣང་མཛད་ལ་སོགས་གནས་པ་སྟེ། །དེ་ལ་
སོགས་པ་ཡང་དག་དབྱུང་། །རིགས་ངན་ལ་སོགས་རྣམ་པ་ལྔ། །ཧཱུཾ་ལས་རྡོ་རྗེ་རིམ་པ་ཡིས། །དེ་ནི་དགག་པ་བསྒོམ་པར་བྱ། །རླུང་གིས་མེ་ནི་རབ་སྦར་བས། །ཞུ་བཞིན་རྣམ་པར་དམིགས་པ་ཡིན། །རྡོ་རྗེ་རོ་མཉམ་བསྒྱུར་བ་སྟེ། །གཤིན་དགྲ་དྲི་མེད་དམིགས་པའོ། །དེ་ལ་ཨོཾ་

རྣམས་འོད་ཟེར་གྱིས། །སངས་རྒྱས་ཡེ་ཤེས་རང་བཞིན་དགུག །སྔགས་ཀྱི་གཟུགས་ཀྱིས་རབ་ཏུ་གཞུག །དམིགས་ནས་བདུད་རྩི་ལྔ་མཆོག་སྟེ། །དེ་ཉིད་གསུམ་གྱིས་བྱིན་བརླབས་ནས། །དཀྱིལ་འཁོར་བདག་པོ་ཚིམ་པར་བྱ། །ཞི་བ་རྡོ་རྗེ་ལྕེ་ལ་གནས། །ཧཱུཾ་
ལས་སྐྱེས་པ་དམིགས་ནས་ནི། །དེ་ལ་སྦུ་གུའི་རྣམ་པ་ཡིས། །དེས་ནི་མཉམ་པར་དགུག་པར་བྱ། །སྣ་ཚོགས་གནས་པའི་རྫོགས་སངས་རྒྱས། །དཀྱིལ་འཁོར་ལྷ་རྣམས་དེ་བཞིན་ནོ། །སྙིང་གའི་འོད་ཟེར་རྣམས་ཀྱིས་ནི། །རྣམ་རྟོག་སྤངས་པས་དམིགས་བྱའོ། །ཐོག་མ་
དབུས་མཐའ་དབྱེ་བ་ཡིས། །འདི་ལ་གཅིག་ཏུ་སྦྱོར་མེད་དེ། །རྡུལ་ཕྲན་ཆ་མེད་རྒྱུ་ཡིན་པས། །གྲངས་མེད་དེ་ནི་སྦྱོར་མི་བྱ། །གཅིག་དང་དུ་མའི་རང་བཞིན་གྱིས། །རྣམ་པར་བྲལ་བ་གང་ཡིན་དེ། །དེ་ནི་དེ་བཞིན་དེ་མ་ཡིན། །ཐེ་ཚོམ་དེ་ཉིད་ལས་བྱའོ། །གང་ཕྱིར་ཐེ་ཚོམ་
གཉིས་ལ་གནས། །བསམ་མི་ཁྱབ་ལ་ཐེ་ཚོམ་མེད། །སྤྲོ་དང་བསྡུ་བའི་སྐུ་ཡིན་ཏེ། །སེམས་ཅན་རོ་གཅིག་དོན་ལས་བྱུང་། །གཞན་ནི་རྒྱས་པར་དེ་ཉིད་མེད། །འདི་ནི་གསལ་བར་རབ་ཏུ་གསུངས། །ཡེ་ཤེས་ཞབས་ཀྱི་ཞལ་ནས་བྱུང་། །དཔལ་ལྡན་གསང་བ་འདུས་པར་
གསུངས། །འདི་ལ་བདག་གིས་རྒྱས་མ་སྨྲས། །དངོས་པོའི་བདག་ཉིད་དངོས་པོ་མེད། །ཁམས་མེད་རྣམ་པར་ཤེས་པའང་མེད། །ནམ་མཁའ་ཀུན་མཉམ་གནས་བཞིན་ཏེ། །ནམ་མཁའ་ཇི་བཞིན་བདག་མེད་པ། །འདི་ནི་ཆོས་མཆོག་བདེ་ཆེན་པོ། །ས་མིན་ཆུ་མིན་གཉི་ག་
མིན། །མེ་མིན་རླུང་མིན་མཁའ་མིན་ཏེ། །རྡོ་རྗེ་སེམས་དཔའ་རབ་སྦྱོར་བས། །སྐྱེ་བ་འདི་ནི་རབ་གནས་པའི། །དངོས་པོ་ཐམས་ཅད་དངོས་མིན་ཏེ། །དེའི་ཕྱིར་དངོས་མེད་གྲགས་པའོ། །རྣལ་འབྱོར་རྣལ་འབྱོར་གྱིས་ནི་འབྲེལ། །རྟག་དང་ཆད་པ་གཉིས་མིན་ཏེ། །ཞལ་
མེད་ཕྱག་མེད་ཁ་དོག་མེད། །མཆོག་གི་དགའ་བའི་མཚན་ཉིད་ལ། །དངོས་པོ་ཐམས་ཅད་ངེས་རྟག་མིན། །ཐོག་མ་དབུས་མཐའ་རྣམ་པར་སྤངས། །དེ་ལྟར་ཕོ་བྲང་ཤེས་གནས་པས། །རྣམ་རྟོག་ཐམས་ཅད་སྤངས་པ་སྟེ། །ཕུང་པོ་ཁམས་དང་བདག་མེད་པར། །དག་

པའི་བདེ་གཟུགས་བསྒོམ་པའོ། །འགྲོ་བ་གཤིན་རྗེ་གཤེད་བྱས་ནས། །རང་སྙིང་ས་བོན་འོད་རྣམས་ཀྱིས། །དེ་བཀུག་འོང་བར་དམིགས་ནས་ནི། །སྐུ་གསུང་ཐུགས་རྡོར་རང་བཞིན་ཅན། །རྡོ་རྗེའི་རང་བཞིན་ཆོས་ཡིན་ཏེ། །ཡེ་ཤེས་ལས་སྐྱེས་དགོད་པར་བྱ། །དེ་ལ་དེ་ཡི་ས་
བོན་རྣམས། །ཧྲཱིཿཥྚྲྀཿལ་སོགས་ཡེ་ཤེས་འབར། །ལྷག་རྟོག་སྤངས་པས་མཐོང་བ་སྟེ། །དག་པའི་བདེ་བའི་རྣམ་པ་ཅན། །འཕྲོ་བ་འདུས་པས་ཡང་དག་དགང་། །བདག་ཉིད་མཁས་པས་བསྒོམ་པ་ཡིན། །སྐུ་ལ་སོགས་པར་འཕྲོ་བྱ་སྟེ། །དུས་གཅིག་དང་ནི་རིམ་པ་
ཡིས། །ཁྲོ་གཟུགས་སྣ་ཚོགས་སྤྲུལ་པ་བྱེད། །ཧྲཱིཿཥྚྲྀཿལ་སོགས་སྔགས་ཀྱིས་ནི། །འགྲོ་བ་ཐམས་ཅད་བདེ་བྱེད་དོ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། བསམ་གཏན་བྱེད་པའི་རིམ་པ་འདིས། །འབད་ལ་སྔགས་ནི་དེ་བཞིན་བྱ། །གཞན་ཡང་བཟའ་བ་ལ་
སོགས་ལས། །བསམ་གཏན་ལྡན་ཞིང་ཐམས་ཅད་བྱའོ། །མཆོད་དང་བསྟོད་དང་བདུད་རྩི་ཟ། །སེམས་ཅན་དོན་བྱེད་ཡིད་ཀྱིས་བྱ། །དེ་ཉིད་གསུམ་གྱི་རིམ་པ་ཡིས། །ཡེ་ཤེས་འཁོར་ལོ་རྣམ་པར་དབྱུང་། །བདག་གི་འཁོར་ལོ་བདག་ཉིད་ལ། །ཇི་ལྟར་རིམ་པས་གནས་
པ་སྟེ། །བདག་གིས་བསོད་ནམས་བྱས་པ་གང་། །མངོན་པར་བྱང་ཆུབ་ལ་སྨོན་བྱ། །དེ་ནས་སྨོན་ལམ་བྱས་ནས་ནི། །ཨོཾ་ཨཱཿཧཱུཾ་མུཿའི་སྔགས་ཀྱིས་ནི། །ཡེ་ཤེས་འཁོར་ལོ་གཤེགས་སུ་གསོལ། །འདི་ནི་རྣལ་འབྱོར་ཆེན་པོའོ། །རང་བདག་རྣམ་པའི་རང་བཞིན་
བཞེངས། །དེ་ཡི་ང་རྒྱལ་ཡང་དག་བྱེད། །འབད་ལ་དངོས་པོ་ཐམས་ཅད་ནི། །དེ་བཞིན་དེ་ཡི་གཟུགས་ངེས་བྱ། །གཏི་མུག་གཤིན་དགྲའི་གཟུགས་ཀྱིས་ནི། །གནས་དང་འགྲོ་བ་བསྒོམ་པའོ། །གསུངས་པའི་དུས་ནི་དེ་རྣམས་ལ། །རྣལ་འབྱོར་རྣལ་འབྱོར་བཞི་བསྒོམས་
ཏེ། །དང་པོའི་རྣལ་འབྱོར་རྣལ་འབྱོར་ཆེ། །ཅུང་ཞིག་ཡེ་ཤེས་དེ་རྗེས་སྦྱོར། །སྦྱོར་བདག་ཡང་དག་རྣལ་འབྱོར་ཆེ། །ཡང་དག་ཡེ་ཤེས་དབང་གནས་སོ། །ཇི་ལྟར་གསུངས་པའི་རིམ་པ་གཅིག །དུས་གཅིག་ལ་ནི་སྔགས་བསྒོམ་བྱ། །རྣལ་འབྱོར་ཆེ་ལྡན་རྣལ་འབྱོར་

པ། །འཕྲོ་དང་འདུ་བའི་ལུས་ཉིད་དོ། །དེ་ཉིད་ཡེ་ཤེས་གཟུགས་ཅན་དག །དེ་ཕྱིར་བདག་ཉིད་གཤིན་རྗེ་གཤེད། །དབང་བསྐུར་རིམ་པ་བསམ་གཏན་གྱིས། །ཁྲུས་དང་བཟའ་བ་ཐམས་ཅད་བྱ། །དེ་བཞིན་བདུད་རྩིའི་རིམ་པ་ཡིས། །གཞན་མཆོད་པ་ལ་རྟོགས་པར་
བྱ། །བདག་ཉིད་དང་ནི་གཞན་མ་རྣམས། །རིམ་པ་ལྟར་ནི་རྟག་ཏུ་མཆོད། །དཔལ་ལྡན་གཤིན་དགྲའི་བདག་ཉིད་ཅན། །བྱང་ཆུབ་བསྒོམ་པས་རྟག་ཏུ་དམིགས། །བདག་གཞན་མཉམ་པ་བྱང་ཆུབ་ཡིན། །དེ་ཕྱིར་རང་བདག་སྦྱོར་བ་སྟེ། །དེ་མེད་བདག་ཉིད་བསྒྱུར་འདོད་པ། །རྣལ་
འབྱོར་ཆོས་སྒྲུབ་རྙེད་མིན་ནོ། །ཇི་ལྟར་སྣ་ཚོགས་རྣམ་པ་ལ། །དངོས་པོ་གཅིག་ལ་རྟོག་པ་སྟེ། །སྡུག་བསྔལ་བྲལ་ནས་བདེ་བ་སྐྱེ། །ལས་ཀྱི་དབྱེ་བས་དེ་དག་སྐྱེའོ། །བདག་ཉིད་སེམས་ལ་རྣམ་རྟོག་མེད། །དག་པའི་དགའ་བའི་རང་བཞིན་ཅན། །ཐབས་དང་ཤེས་རབ་རང་བཞིན་ལ། །
ནག་ཅེས་པ་ནི་དགའ་བའོ། །དེས་ནི་འཁོར་བའི་རྒྱ་མཚོ་ལ། །དེ་སྐྱེས་འཁྲིལ་བས་ཤི་དུས་སུ། །ཟབ་པ་སྟོབས་ཆེན་གཤིན་དགྲ་ནག །དེས་ནི་ཕན་བྱེད་གཞན་མིན་ནོ། །གཤིན་སྒྲུབ་ཞགས་པ་ལྕགས་ཀྱུ་འཛིན། །སྟོབས་ཆེན་འབྱུང་ཚོགས་འཇིགས་མེད་དེ། །དེ་རྣམས་དགུག་ཅིང་
ཕུར་པས་གདབ། །དེ་ནི་འཇིགས་ཅན་ཁྲོ་གཟུགས་སོ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ། འབྱུང་པོ་ཐམས་ཅད་འཁོར་དང་བཅས་པ་དགུག་པ་སྟེ་ཛཿཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ། འབྱུང་པོ་ཐམས་ཅད་འཁོར་དང་བཅས་པ་ཕུར་བུས་གདབ་པ་སྟེ་ཧཱུཾ་ཕཊ། འདིས་ནི་འོང་བར་
ཤེས་བྱས་ནས། །རང་གི་ཁ་དོག་བརྒྱན་པ་བརྟག །གཡས་པའི་ཕྱག་ལ་རང་མཚོན་འཛིན། །གཡོན་པའི་ཕྱག་ན་སྣ་ཚོགས་པའོ། །བརྒྱ་བྱིན་གཤིན་རྗེ་དབང་ལྡན་དང་། །ཧྲཱིཿཥྚྲྀཿཝི་ཀྲྀ་ས་བོན་གྱིས། །དེ་དག་ཐམས་ཅད་རྫོགས་པ་སྟེ། །མེ་དང་བདེན་བྲལ་རླུང་ལྷ་དང་། །ཧཱུཾ་
བྱུང་ལུས་ནི་ཤེས་བྱ་སྟེ། །ཉི་ཟླ་ས་ཡི་འཇིག་རྟེན་ལྷ། །ཧཱུཾ་ཕཊ་ཕཊ་སྭཱ་ཧཱ་ལས་སྐྱེས། །ལྷ་རྣམས་ཐམས་ཅད་ཁྱབ་འཇུག་ལྡན། །འདི་ནི་གཏོར་མའི་དེ་ཉིད་ཀྱིས། །མཉམ་པ་ཐམས་ཅད་ཡང་དག་སྐྱེས། །རིམ་པས་དམིགས་ནས་བྱིན་གྱིས་བརླབ། །དེ་ལ་རིམ་པས་དབང་

བསྐུར་སྦྱིན། །བདུད་རྩི་ལྔ་ཡི་རིམ་པ་ཡིས། །རཾ་གྱི་ས་བོན་གསེར་དང་མཚུངས། །མཆོད་དང་གཏོར་མ་དེ་རྣམས་དབུལ། །འདི་ནི་གཤིན་རྗེ་དགྲ་ནག་པོའི་སྒྲུབ་ཐབས། སློབ་དཔོན་ཀུན་དུ་བཟང་པོའི་ཞལ་སྔ་ནས་མཛད་པ་རྫོགས་སོ།། །།སློབ་དཔོན་དོན་ཡོད་རྡོ་རྗེ་
ཡིས། །ལེགས་པར་གསལ་བྱེད་སྒྲུབ་ཐབས་འདི། །བསྒྱུར་བའི་བསོད་ནམས་གྲངས་མེད་དང་། །གཞན་ཡང་སྨོན་ལམ་འདི་བཏབ་པས། །རྒྱུ་དང་སྒྲུབ་ཐབས་མི་འབྲལ་ཞིང་། །དེ་ཡི་མན་ངག་རྗེས་འབྲངས་པས། །བདག་དང་གཞན་དག་སེམས་ཅན་ཀུན། །གཤིན་རྗེ་
གཤེད་ཀྱི་ཞལ་མཐོང་ཤོག། ༄༅༅། །རྒྱ་གར་སྐད་དུ། ཡ་མཱ་རི་སཱ་དྷ་ན། བོད་སྐད་དུ། གཤིན་རྗེ་གཤེད་ཀྱི་སྒྲུབ་པའི་ཐབས། །འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དཔལ་ལྡན་མཐར་མཛད་ཐུགས་རྗེའི་རང་བཞིན་ཅན། །འགྲོ་བའི་དོན་
དུ་ཕྱི་རོལ་གཏུམ་ཆེན་སྐུ། །མགོན་པོ་གཤིན་རྗེ་གཤེད་ལ་མགོས་བཏུད་དེ། །དེ་ཡི་སྒྲུབ་ཐབས་འདོད་པའི་དོན་དུ་ནི། །སྔགས་པ་དང་པོ་སེམས་ཡོངས་མགུ་བ་དང་། །བདེ་བའི་སྟན་གནས་འོག་ཏུ་དམ་བཅའ་བྱས། །སྙིང་གར་ཧཱུཾ་བཀོད་པ་ལས་མཆོད་པའི་ཚོགས། །སྣ་ཚོགས་པ་
ཡི་མགོན་ལ་མངོན་པར་མཆོད། །དེ་ཡི་སྤྱན་སྔར་སྡིག་པ་བཤགས་ལ་སོགས། །བྱས་ནས་སྟོང་ཉིད་ཡོངས་སུ་བསྒོམས་ནས་ནི། །དང་པོར་རླུང་གི་དཀྱིལ་འཁོར་ཡཾ་ལས་བྱུང་། །དུ་བའི་མདོག་འདྲ་གཞུ་ཡི་དབྱིབས་ཅན་ལ། །རཾ་གྱི་ས་བོན་ལས་བྱུང་མེ་ཡི་ནི། །དཀྱིལ་འཁོར་གྲུ་
གསུམ་མདོག་ཀྱང་དམར་བ་ཡིན། །བཾ་ལས་བྱུང་བའི་ཆུ་ཡི་དཀྱིལ་འཁོར་ནི། །བུམ་པ་འདྲ་ཞིང་དཀར་ལ་ཐུར་ལྟས་པ། །ལཾ་ལས་བྱུང་བའི་དབང་ཆེན་དཀྱིལ་འཁོར་ནི། །ཟུར་བཞི་པ་ལ་ཀུན་ནས་རབ་ཏུ་སེར། །ཧཱུཾ་སུཾ་ཧཱུཾ་ལས་བྱུང་བའི་རི་རབ་ནི། །རི་རྒྱལ་རྩེ་མོ་བརྒྱད་པ་གོ་རིམས་
བཞིན། །སྔར་བཤད་རླུང་ལ་སོགས་པའི་དཀྱིལ་འཁོར་རྣམས། །གོང་ནས་གོང་མའི་རིམ་པ་བསམས་ནས་ནི། །དེ་འོག་ཧཱུཾ་ལས་བྱུང་བའི་རྡོ་རྗེའི་ས། །ར་བ་དྲ་བ་དམ་པ་དབུས་ཀྱི་ཆར། །ཨ་ལས་བྱུང་བའི་ཟླ་བའི་དཀྱིལ་འཁོར་གྱིས། །དབུས་ན་དྷཱིཿལས་བྱུང་བའི་འཇམ་རྡོ་རྗེ། །

དཔའ་བོ་ཕྱག་གཡས་རལ་གྲི་མཛེས་པ་དང་། །གཞོན་ནུའི་གཡོན་ན་ཐུགས་ཀར་གླེགས་བམ་བསྣམས། །སྐུ་ནི་དམར་སེར་ཟུར་ཕུད་ལྔ་གནག་ཅིང་། །རྡོ་རྗེ་སྐྱིལ་ཀྲུང་མཆོག་བཅས་ཤིན་ཏུ་ཞི། །བསམས་ལ་སླར་ཡང་དེ་ཡི་ཐུགས་ཟླ་བར། །ཧི་ལས་བྱུང་བའི་ཉི་མ་འཆར་ཀའི་
གཟུགས། །ཀུན་ནས་འོད་ཟེར་ནག་པོ་འཕྲོས་པ་ཡིས། །ཁམས་གསུམ་ཁྱབ་ནས་རྒྱལ་བ་བྱང་ཆུབ་སེམས། །ཁྲོ་བོ་རིག་པ་གནས་ན་ལེགས་བཞུགས་རྣམས། །ཡང་དག་བསྐུལ་ཏེ་བཀུག་ནས་ཉི་གཟུགས་ལ། །བཅུག་ལ་དེར་ནི་གཅིག་ཏུ་གྱུར་པ་ན། །སླར་ཡང་ཉི་མ་ཉིད་དུ་གྱུར་པ་ལས། །
འོད་ཟེར་དམར་པོ་རབ་ཏུ་རྒྱ་ཆེ་བ། །ཤིན་ཏུ་འབར་བ་སྤྲོས་ནས་དེ་རུ་ནི། །ཧཱུཾ་ལས་བྱུང་བའི་རྡོ་རྗེ་ཁ་གྱེས་གནག །ལྟེ་བར་ཧཱུཾ་བཅས་སྣ་ཚོགས་འོད་འདྲ་བ། །དེ་ལས་རྒྱལ་དང་བྱང་ཆུབ་སེམས་དཔའ་སྤྲོས། །སླར་ཡང་དེ་ཡིས་འགྲོ་བ་དྲུག་ལ་གནས། །སེམས་ཅན་བཏུལ་ཏེ་བྱང་ཆུབ་མཆོག་
བཀོད་ནས། །བཀུག་སྟེ་ཐམས་ཅད་རྡོ་རྗེ་ལ་རབ་གཞུག །དེ་འོག་རྡོ་རྗེ་ནཱི་ལ་ཡོངས་སུ་གྱུར་ནས། །གཤིན་རྗེ་གཤེད་པོ་ཞལ་གཅིག་ཕྱག་གཉིས་བསམ། །ཕྱག་གཡས་རྡོ་རྗེའི་དབྱིག་པ་འཕྱར་བ་དང་། །ཕྱག་གཡོན་སྡིགས་མཛུབ་རྡོ་རྗེ་ཞགས་པ་ཅན། །གཤིན་རྗེ་མ་ཧེའི་སྟེང་
ན་གན་རྐྱལ་གནས། །གཡས་བརྐྱང་གནས་པ་ཡིས་ནི་གནོན་པར་མཛད། །མི་ཐུང་ཞལ་ནི་རྣམ་འགྱུར་མཆེ་བ་གཙིགས། །གསུས་ཁྱིམ་ཆེ་ལ་ལྗགས་ནི་རྣམ་པར་རྐྱོང་། །དབུ་སྐྲ་སྨིན་མ་སྨ་ར་དམར་སེར་ནི། །གྱེན་དུ་བརྫེས་ཤིང་སྤྱན་གཉིས་རྣམ་པར་དམར། །གནག་ཅིང་ཁྲོ་
བཅས་གཉེར་མ་དཔྲལ་བར་བསྡུས། །ཕུས་འདེབས་ཀླུ་བརྒྱད་ཀྱིས་ནི་ཡན་ལག་བརྒྱན། །སྟག་ལྤགས་བསྣམས་ཞིང་ཐོད་པའི་རྩེ་བྲན་ཅན། །མགོ་བོའི་ཕྲེང་བའི་དོ་ཤལ་འཕྱང་མཛད་ཅིང་། །དུས་མཐའི་མེ་ལྟར་འཇིགས་འོད་རྣམ་པར་འབར། །འཇིགས་པར་བྱེད་པའང་འཇིགས་
པ་སྐྱེད་པར་མཛད། །གཏུམ་ཞིང་གཤིན་རྗེ་གཤེད་ཚོགས་སངས་རྒྱས་འཕྲོ། །འཇིག་རྟེན་ལྷ་མཆོག་ཚོགས་ཀྱིས་ཕྱག་བྱས་ཤིང་། །ཧ་ཧར་བཞད་པས་ལྷ་དང་ལྷ་མིན་ཚོགས། །ཀུན་ནས་ཡོངས་སུ་སྐྲག་པར་མཛད་པའོ། །ས་གསུམ་དག་ན་ཡོད་པའི་བདུད་ཀྱི་ཚོགས། །མ་ལུས་

པ་ཡང་རྣམ་པ་འབྱེར་བར་མཛད། །དེ་ལྟར་བསམ་གཏན་ལ་བརྩོན་གནས་པ་སྟེ། །དོགས་པ་མེད་པར་ཉིན་མཚན་སྔགས་ཟློས་ཤིང་། །དེ་ཉིད་སྦྱོར་བས་དུར་ཁྲོད་སོགས་པར་གནས། །དམ་ཚིག་རྣམ་དག་ངེས་པར་འགྲུབ་པར་འགྱུར། །དེ་ཡི་སྒྲུབ་ཐབས་འདི་ནི་ལེགས་བྲིས་ལས། །
བདག་གིས་བསོད་ནམས་གང་ཐོབ་དེས་འཇིག་རྟེན། །གཤིན་རྗེ་གཤེད་མཉམ་འགྲོ་ཀུན་སྡུག་བསྔལ་ནི། །མི་བཟད་ཚོགས་མཐར་བདུད་ཚོགས་མྱུར་ཟད་ཤོག །གཤིན་རྗེ་གཤེད་ཀྱི་སྒྲུབ་ཐབས་སློབ་དཔོན་འགྲོ་བཟངས་སྙིང་པོས་མཛད་པ་རྫོགས་སོ།། །།རྒྱ་གར་གྱི་མཁན་པོ་དཱི་པཾ་ཀ་
ར་ཤྲཱི་ཛྙཱ་ན་དང་། །ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་ཅིང་གཏན་ལ་ཕབ་པའོ།། ༄། །ནག་པོ་ཞལ་གསུམ་ཕྱག་དྲུག་པའི་སྒྲུབ་ཐབས་བཞུགས། ༄། །དཔལ་གཤིན་རྗེ་གཤེད་ནག་པོ་ལ་ཕྱག་འཚལ་ལོ། །གུས་པ་ཡིས་ནི་བླ་མ་ཡི། །ཞབས་ཀྱི་པདྨར་ཕྱག་འཚལ་ཏེ། །
བླ་མའི་ཞལ་སྔའི་བཀའ་དྲིན་གྱིས། །ནག་པོ་ཞལ་གསུམ་ཕྱག་དྲུག་པའི། །མདོར་བསྡུས་པ་ཡི་སྒྲུབ་ཐབས་བཤད། །དང་པོར་རྣལ་འབྱོར་དབང་ཕྱུག་གིས། །དབེན་པའི་གནས་སུ་འདུག་ནས་ནི། །སྟོང་པའི་སེམས་ལ་མཉམ་གཞག་སྟེ། །སྙིང་གར་པདྨ་འདབ་བརྒྱད་པ། །དེའི་
སྟེང་ཉི་མའི་དཀྱིལ་འཁོར་རོ། །དེ་ཡི་སྟེང་དུ་ཧཱུཾ་བསམས་ཏེ། །ཧཱུཾ་ལས་འོད་བྱུང་མདུན་དུ་ནི། །བླ་མ་མཁའ་འགྲོ་བཞུགས་པར་བསམ། །ཕྱག་འཚལ་བ་དང་མཆོད་བྱས་ལ། །སྡིག་བཤགས་ལ་སོགས་ཚོགས་སུ་འགྱུར། །དེ་ནས་སྙིང་གར་ཧཱུཾ་ལས་ནི། །འོད་བྱུང་ལུས་ངག་
བག་ཆགས་རྣམས། །བསྲེགས་ནས་སྟོང་པ་ཉིད་དུ་བསྒོམ། །དེ་ནི་ཡེ་ཤེས་ཚོགས་ཡིན་ནོ། །སེམས་ནི་ཧཱུཾ་གི་རྣམ་པར་བསམ། །ཧཱུཾ་ལས་རྡོ་རྗེ་རྩེ་ལྔར་གྱུར། །རྡོ་རྗེ་ལས་ནི་སྐུ་བསྐྱེད་དོ། །ཞལ་གསུམ་ཕྱག་དྲུག་སྐུ་མདོག་གནག །གཡས་དཀར་གཡོན་དམར་དབུས་མཐིང་
ཞལ། །སྤྱན་གསུམ་མཆེ་བ་གཙིགས་པའི་ཞལ། །དབུ་སྐྲ་ཁམ་ནག་གྱེན་དུ་བརྫེས། །གྲི་གུག་རྡོ་རྗེ་རལ་གྲི་གསུམ། །གཡས་པའི་ཕྱག་ན་བསྣམས་པ་ཡིན། །བྷནྡྷ་པདྨ་འཁོར་ལོ་གསུམ། །གཡོན་པའི་ཕྱག་ན་བསྣམས་པ་ཡིན། །གཡས་བསྐུམ་གཡོན་བརྐྱང་གསུས་པོ་

ཆེ། །ལྷ་མོ་ཕག་མོའི་མགུལ་ནས་འཁྱུད། །ཕག་མོ་ཞལ་གཅིག་ཕྱག་གཉིས་མ། །གྲི་གུག་དང་ནི་བྷནྡྷ་གཡོན། །གཙོ་བོའི་མགུལ་ནས་འཁྱུད་པའི་ཚུལ། །གཉིས་སུ་མེད་པའི་གནས་ན་བཞུགས། །མིག་དང་ལུས་སོགས་དབང་པོ་དྲུག །སངས་རྒྱས་དྲུག་
ཀྱང་ཡོད་པར་བསམ། །སྐུ་གསུང་ཐུགས་ཀྱིས་བྱིན་གྱིས་བརླབས། །སྙིང་གའི་ཧཱུཾ་ལས་འོད་བྱུང་བསམ། །ཡེ་ཤེས་མཁའ་འགྲོ་སྤྱན་དྲངས་ཏེ། །ཚིག་གི་དབང་ཡང་བླང་བར་བྱ། །བཅོམ་ལྡན་དེ་བཞིན་གཤེགས་པ་ཀུན། །བཅོམ་ལྡན་མངའ་བདག་ཆེན་པོ་རྣམས། །ཁྱོད་
ཀྱིས་བདག་ལ་དབང་བསྐུར་གསོལ། །དེ་སྐད་བདག་གིས་དབང་བླངས་པས། །ཡེ་ཤེས་རྡོ་རྗེ་ཆུ་རྒྱུན་གྱིས། །བདག་གི་སྤྱི་བོར་དབང་བསྐུར་བས། །རིགས་ལྔའི་ཅོད་པན་གྱུར་པར་བསམ། །མཆོད་དང་བསྟོད་དང་བདུད་རྩི་བཟའ། །དེ་ནས་བཟླས་པ་བྱ་བ་ནི། །བཟླས་པའི་སྔགས་
ནི་འདི་ཡིན་ནོ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཐམས་ཅད་གྲུབ་པའི་དོན་དུ་བཟླས། །གཏོར་མའི་སྔགས་ནི་འདི་ཡིན་ཏེ། །ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ། ཨཱདྱ་ནུཏྤནྣ་ཏྭཱཏ་ཨོཾ་ཨཱཿཧཱུཾ་ཕཊ་སྭཱ་ཧཱ། བར་ཆད་ཐམས་ཅད་བསྲུང་བའི་ཕྱིར། །དེས་ནི་གཏོར་མ་སྦྱིན་པར་
བྱ། །དེ་ནི་བསྐྱེད་པའི་རིམ་པའོ། །དེ་ནས་རྣལ་འབྱོར་ངལ་བསོ་བྱ། །སྙིང་གའི་ཧཱུཾ་གི་འོད་ཟེར་གྱིས། །ཁམས་གསུམ་མ་ལུས་ཀུན་ལ་ཁྱབ། །ཀུན་ཀྱང་སངས་རྒྱས་སྐུ་རུ་འགྱུར། །གྱུར་པ་ཀུན་ཀྱང་བདག་ལ་བསྡུ། །བདག་ཀྱང་ཧཱུཾ་ལ་བསྡུས་བྱས་ལ། །ཧཱུཾ་ཡང་ཐིག་ལེར་འགྲོ་བར་བསྒོམ། །
རྟོག་པ་ཡང་དག་སྤངས་པ་སྟེ། །ཡང་དག་བདེ་བའི་རྣམ་པའོ། །ཕྱག་མེད་ཞལ་མེད་ཁ་དོག་མེད། །མཆོག་ཏུ་དགའ་བའི་མཚན་ཉིད་དོ། །འདི་བྱས་བསོད་ནམས་གང་ཐོབ་པས། །སེམས་ཅན་ཐམས་ཅད་སངས་རྒྱས་ཤོག །ནག་པོ་ཞལ་གསུམ་ཕྱག་དྲུག་པའི་སྒྲུབ་ཐབས། སློབ་དཔོན་ལ་
ལི་ཏ་བཛྲས་མཛད་པ་རྫོགས་སོ།། ༄། །རྒྱ་གར་སྐད་དུ། ཀྵི་ར་སཱ་དྷ་ན། བོད་སྐད་དུ། འོ་མ་སྒྲུབ་པའི་ཐབས། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །རྒྱལ་མཚན་ངོས་ལྡན་དེ་ནས་བལྟ། །དེ་ལ་འོ་མ་རབ་ཏུ་སྒྲུབ། །འོ་མ་གོམས་པའི་སེམས་ཉིད་ཀྱིས། །ཕྱག་

རྒྱ་ཆེན་པོ་རབ་ཏུ་བསྒྲུབ། །རྡོ་རྗེ་ཕག་མོ་ལ་སོགས་པ་རིགས་སུ་བྱུང་བའི་བུད་མེད་ཕྱི་དང་ནང་གི་ཡོན་ཏན་གྱིས་བརྒྱན་པ། རྣལ་འབྱོར་པ་ཡེ་ཤེས་ཅུང་ཟད་དབང་བས་བཟུང་སྟེ། །ལེགས་པར་བཀྲུས་ཤིང་དྲི་ཞིམ་པོས་བྱུགས་ལ་རྒྱན་མ་ལུས་པས་བརྒྱན་ཏེ། དེ་ནས་བདག་མེད་པ་སྔོན་དུ་སོང་བས། ས་
བོན་གྱི་ཡི་གེ་ས་དང་རྡོ་རྗེ་ལས་བྱུང་བའི་རྡོ་རྗེ་ཕག་མོར་བསམས་ཏེ། །བདག་ཉིད་ཀྱང་རྡོ་རྗེ་སེམས་དཔར་བྱའོ། །དེ་ནས་རང་གི་ཕྱག་རྒྱའི་ལུས་ལ་དཀྱིལ་འཁོར་ལྔ་བསྒོམས་ཏེ། །དེའི་གསང་བའི་བྷ་ག་ཧྲཱིཿལས་པདྨ་འདབ་མ་བརྒྱད་པའོ། །ལྟེ་བ་བྲུཾ་ལས་མུ་ཏིག་ལྟ་བུའོ། །བདག་ཉིད་ཀྱི་གསང་
བ་ཡང་ཧཱུཾ་ལས་རྩེ་ལྔ་པའོ། །ནོར་བུའི་ཡི་གེ་ཨོཾ་ལས་སོ། །ཡི་གེ་ཕཊ་སེར་པོ་བུ་གར་རོ། །དེ་ནས་ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་པས་སྙོམས་པར་འཇུག་སྟེ། སེན་མོས་གདབ་པ་བྱས་ལ། མྱོས་བྱེད་ཀྱི་ལག་པས་ཡང་དང་ཡང་དུ་བྲུད་ཅིང་ལྕེ་རྩེའི་ཐུར་མས་ཡང་ཡང་། དེ་
ནས་ས་གསུམ་གྱི་དབང་ཕྱུག་མ་རྒྱས་པ་ནས་སྔར་བཤད་པའི་སྔགས་ཀྱིས་སྙོམས་པར་ཞུགས་ཏེ། དལ་བུས་དལ་བུས་བསྐྱོད་པ་ན་འོ་མ་འབབ་པར་འགྱུར་རོ། །བབས་པ་ན་ཡི་གེ་ཕཊ་ཀྱིས་བསྡམས་ཏེ། སྣང་བ་མེད་པ་ལ་འཇུག་པར་བྱའོ། །དེ་ལྟར་ཡང་དང་ཡང་འོ་མ་འབབ་པ་གོམས་པས་
ནི། །སྐད་ཅིག་ལ་བབ་པ་ན་སྣང་བ་མེད་པ་ལ་སྐད་ཅིག་ལ་འཇུག་པ། དེའི་ཚེ་ཕྱག་རྒྱ་ཆེན་པོའི་དངོས་གྲུབ་ཐོབ་པར་འགྱུར་ཏེ། ཇི་ལྟར་དཔལ་མཁའ་འགྲོ་མ་རྡོ་རྗེ་དྲ་བའི་རྟོག་པ་ལས་གསུངས་པ། ཆུ་རྒྱུས་དྲ་བ་དང་བཅས་ཤིང་། །ཡན་ལག་ཀུན་ལྡན་བུ་ག་ཅན། །ལུས་དེ་མེད་པར་སྣང་གྱུར་པ། །
དེ་ཡི་སྐད་ཅིག་དེ་ལ་ནི། །དགྱེས་པའི་རྡོ་རྗེའི་སྐུ་འཛིན་འགྱུར། །ཞེས་སོ། །འདི་དགྱེས་པའི་རྡོ་རྗེ་ནི་མཚན་པ་སྟེ། །ཕྱག་རྒྱ་ཆེན་པོ་གྲུབ་པའི་ཚུལ་ཐམས་ཅད་འདི་ལྟར་མན་ངག་ལས་ཤེས་སོ། །དོན་འདི་ཉིད་དཔལ་གསང་བ་འདུས་པ་ལ་སོགས་པས་ཀྱང་གསུངས་ཏེ། རྡོ་རྗེ་ཉི་མ་ནུབ་པ་ན། །
སྒྲུབ་པ་ཀུན་དུ་བརྩམ་པར་བྱ། །སྐྱ་རེངས་འཆར་བའི་དུས་དག་ཏུ། །འགྲུབ་འགྱུར་འདི་ལ་ཐེ་ཚོམ་མེད། །ཅེས་པ་དང་། སོར་མོ་དང་ནི་ལྕེའི་ཐུར་མས། །ཡང་ནས་ཡང་དུ་ཅུང་ཟད་བསྐུལ། །རྩ་ནི་རྣམ་པར་རྒྱས་འགྱུར་ཏེ། །མཆོག་གཅིག་པུ་ནི་འབྱུང་བར་འགྱུར། །སྔགས་པས་

བར་ཆད་མེད་པར་ནི། །སྲ་བ་ཅུང་ཟད་ཅུང་ཟད་བསྐུལ། །ནོར་བུར་གནས་པ་ཡིད་ལས་བྱུང་། །ཡི་གེ་ཕཊ་ཀྱིས་བསྡམ་པར་བྱ། །བྱང་ཆུབ་སེམས་ནི་མ་ཤོར་ན། །བདེ་བ་དམ་པ་སྐྱེ་བ་སྟེ། །དེ་ཡི་རང་བཞིན་སྤྲོས་པ་ཡིས། །མ་ལུས་ཆད་པ་མེད་པར་སྣང་། །ཁྱབ་ཅིང་ཞི་ལ་
བདེ་བ་ཡིས། །གོ་འཕང་དམ་པ་ངེས་པར་ཐོབ། །བྱང་ཆུབ་སེམས་ནི་ཤི་བ་ནི། །བརྒྱལ་བས་འདིར་ནི་ཐོབ་མ་ཡིན། །ཞེས་སོ། །འདི་ལྟ་བུའི་བྱ་བ་ནི་རྣལ་འབྱོར་པ་ལམ་རྣམ་པ་གཉིས་ལས། ཕོ་ཉའི་ལམ་ལ་དགའ་བ། དེ་ཉིད་ཀྱི་གསུང་དང་ཐུགས་ལ་དབང་ཐོབ་པ། ལས་དང་པོ་པའི་ས་
ལས་འདས་པ། ཡེ་ཤེས་ལ་དབང་ཐོབ་པ་དང་། ཡེ་ཤེས་ལ་ཡང་དག་པར་དབང་ཐོབ་པ་མ་ཡིན་པ། ཡེ་ཤེས་ལ་ཅུང་ཟད་དབང་བས་སྤྱད་པར་བྱའོ། །དེ་ལས་གཞན་པ་ནི་མ་ཡིན་ཏེ། ལས་དང་པོ་པ་ནི་དེས་ཉམས་ལ། གསུམ་པ་དང་བཞི་པ་ནི་དེ་མི་འབད་པའི་ཕྱིར་རོ། །དཔལ་ཀྲྀཥྞ་ཡ་མཱ་
རིའི་རྒྱུད་ལས། འོ་མ་སྒྲུབ་པའི་མན་ངག་ཏུ་བྱས་ལ། ཨཱ་ཙརྱ་ཛི་མུ་ད་བཱ་ཏཱ་ལས་མཛད་པ། འོ་མ་སྒྲུབ་པའི་མན་ངག་རྫོགས་སོ།། །།ཨཱ་ཙཱརྱ་བཛྲ་པཱ་ཎི་དང་། ལོ་ཙཱ་བ་དགེ་སློང་ཆོས་ཀྱི་ཤེས་རབ་ཀྱིས་བསྒྱུར་བའོ།། ༄། །གཤིན་རྗེ་གཤེད་ནག་པོའི་འཁོར་ལོའི་མན་ངག་བཞུགས།། ༄༅༅། །འཇམ་
དཔལ་གཤིན་རྗེ་གཤེད་ལ་ཕྱག་འཚལ་ལོ། །ལས་གང་བྱེད་ཀྱང་དང་པོ་བསྙེན་པ་ལ་འཇུག་པར་བྱ་སྟེ། དེ་ཡང་གནས་དབེན་པར། རང་ཉིད་རིམ་པ་བཞིན་དུ་ཧཱུཾ་ལ་གཤིན་རྗེའི་རྒྱལ་པོ་གཟུགས་ཁྲོ་བོ་འཇིགས་བྱེད་ཆེན་པོ་ཞལ་གསུམ་པ། ཕྱག་དྲུག་པ། སྐུ་མདོག་སྔོན་པོ། ཞལ་དབུས་མ་སྐུ།
དང་མཐུན། གཡས་ཟླ་བ་ལྟ་བུ་དཀར་པོ། གཡོན་པདྨ་དམར་པོ་ལྟ་བུའོ། །ཕྱག་གཡས་དང་པོ་ན་རྡོ་རྗེ། གཉིས་པ་རལ་གྲི། གསུམ་པ་ནི་གྲི་གུག་འཛིན་པའོ། །ཕྱག་གཡོན་གྱི་དང་པོ་ན་འཁོར་ལོ། བར་མ་ན་པདྨ། ཐ་མ་ན་བྷནྡྷའོ། །ཐོད་པ་རློན་པའི་དོ་ཤལ་དང་། ཐོད་དང་ཐོད་
དུམ་གྱི་གདུ་བུ་དང་། དབུ་རྒྱན་དང་། མགུལ་དོ་དང་། རྣ་ཆ་དང་། སྐ་རགས་དང་། རྐང་གདུབ་བྱས་ཤིང་། མ་ཧེའི་སྟེང་ན་ཉི་མའི་གདན་ལ་གཡས་བསྐུམ། གཡོན་བརྐྱང་བས་བཞུགས་པ། གསུས་པ་ཐུར་དུ་བཤལ་བ། ཞལ་གདངས་ཤིང་ལྗགས་འདྲིལ་བ་སྟེ། འཇིགས་པའི་ཚོགས་ཀུན་

འཇིགས་པར་བྱེད་པ། སྐྲ་ཁམ་སེར་མེ་དཔུང་འབར་བ་ལྟ་བུ་གྱེན་དུ་འཁྱིལ་བ་སྨ་ར་དང་སྨིན་མ་སེར་པོ་དང་ལྡན་ཞིང་མཆེ་བ་གཙིགས་པ། སྤྱན་དམར་པོ་ཤིན་ཏུ་འཇིགས་པར་བཟློག་པ་བ་སྤུའི་བུ་ག་ཐམས་ཅད་ནས་མི་བསྐྱོད་པའི་གཟུགས་དཔག་ཏུ་མེད་པ་རྒྱུན་དུ་འཕྲོ་བ། འོད་དང་འོད་ཟེར་
དུས་མཐའི་བསྐལ་པའི་མེ་ལྟར་འབར་བ་དང་ལྡན་པ་བསྒོམས་ལ། དེ་ནས་ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་པ་འཕྲོ་འདུ་དང་བཅས་པའམ། ལྷ་ལ་མ་ཡེངས་པ་ཙམ་གྱིས་ཟློས་ཀྱང་རུང་སྟེ། གྲངས་འབུམ་མམ། མཚན་མ་བཟང་པོ་ཡང་ཡང་མཐོང་བའི་བར་དུ་
བཟླས་སོ། །དེ་ནི་བསྙེན་པ་སྟེ། ལས་ཀུན་ལ་དེ་ལྟར་བྱེ་བྲག་མེད་པར་དང་པོར་མཐུན་པར་བྱའོ། །དེ་ལྟར་ལས་སུ་བྱེད་པའི་དུས་སུ་བྱེ་བྲག་ཏུ་བྱ་སྟེ། འདི་ལྟར་ཞི་བར་བྱེད་ན་རང་ལྷའི་གཟུགས་སུ་བསྒྱུར་ཏེ། མདོག་དཀར་པོར་བསྒྱུར་བ་དང་། བྱམས་པའི་སེམས་དང་ལྡན་པར་བྱས་ལ། བདུད་
རྩིའི་རྒྱུད་ལས་འབྱུང་བ་ལྟར་སྔ་དྲོའི་དུས་སུ། ཤིང་ལོའམ་གྲོ་གའི་ཤུན་པ་གསལ། །སྐྱེས་པ་ཞི་བར་བྱེད་པ་གུར་ཀུམ་གྱིས་བྲི། བུད་མེད་ཞི་བར་བྱེད་པའི་གི་ཝང་གིས་བྲི་བ་ནི། འཁོར་ལོ་རིམ་པ་བཞི་བྲིས་ལ། དབུས་ལ་རེ་མིག་དགུ་དགུར་བྱ་སྟེ། །དེ་ཡི་ཕྱི་རིམ་བཅུ་གཉིས་མིག །དེ་
ཡི་ཕྱི་རིམ་བཅུ་དྲུག་མིག །ཐ་མ་ཐོད་པས་བསྐོར་བ་བ་བྲི། །དབུས་ཀྱི་རེའུ་མིག་དགུར་དགོད་པ། །དབུས་ཆར་ཡ་དང་ཤར་ཆར་ཀྱེ། །ལྷོ་ཡི་མིག་ལ་མ་བྲིའོ། །ནུབ་མིག་མི་བྲི་ཤར་དུའོ། །དེ་དག་གཡས་སྐོར་དག་ཏུ་འདོད། །དེ་མཚམས་རེའུ་མིག་བཞི་པོ་ལ། །ས་བོན་གཉིས་པར་མིག་
བཅུག་ལ། །གཡོན་སྐོར་དུ་ནི་བྲི་བར་བྱ། །ཞི་བའི་ས་བོན་ཨོཾ་སྭཱ་ཧཱ། །རྒྱས་པའི་ས་བོན་བཽ་ཥཊ། རྨོངས་པའི་ས་བོན་ལཾ་ཡིན་ནོ། །དབང་གི་ཧོ་སྟེ་མངོན་སྤྱོད་ཧཱུཾ། ཕོ་དགུག་ཛཿལ་མོ་དགུག་ཧྲཱིཿ། །དེ་ལྟར་བྱེ་བྲག་ཤེས་བྱས་ལ། །མ་ནོར་བར་ནི་ལེགས་པར་བྲི། །དེ་ཡི་ཕྱི་མར་འཁོར་ལོ་ནི། །རེའུ་
མིག་བཅུ་གཉིས་པ་དེ་ལ། །ཡི་གེ་གཡོན་སྐོར་དུ་བཀོད་པ། །ཤར་གྱི་རེའུ་མིག་ནས་བཟུང་བའོ། །ཡ་ཙ་ན་རི། ཛ་ས་དོ་རུ། ཎ་ཡོ་ནི་ར་རྣམས་སོ། །དེ་ཡི་ཕྱི་རིམ་འཁོར་ལོ་ནི། །རེའུ་མིག་བཅུ་དྲུག་པ་དེ་ལ། །ཤར་གྱི་རེའུ་མིག་ནས་བརྩམས་ནས། །གཡས་སྐོར་དུ་ནི་བྲི་བར་བྱ། །

སྔགས་དང་མིང་དང་བསྐུལ་ཚིག་དང་། །ལྡན་པར་ཤར་གྱི་རེའུ་མིག་ལའོ། །དེ་ཡི་འོག་མའི་རེའུ་མིག་ལ། །ས་བོན་གཉིས་དང་མིང་བཅུག་བྲི། །དེ་བཞིན་རེའུ་མིག་བཅུ་དྲུག་ལ། །སྤེལ་ཞིང་སྤེལ་ཞིང་བྲ་བར་བྱའོ། །དེ་ལྟར་བྲིས་པའི་འཁོར་ལོ་དེ། །ལུགས་དང་ལུགས་མིན་
གཉིས་སུ་བྱ། །ཆུ་ཞིང་མཉམ་པོ་གཉིས་སུ་བྱའོ། །ཁྱད་པར་དུ་ནི་འོག་མ་ལ། །སྔགས་ཀྱི་མཐའ་རུ་ཕཊ་གཞག་གོ། །དེ་བཞིན་ཁ་སྦྱར་བྱ་ལུགས་ནི། །སྟེང་འོག་སོ་སོའི་ཡིག་སྔགས་དག །མཐུན་མཐུན་སོ་སོར་མགོ་སྤྲད་སྦྱར། །དེ་ནི་ཟླུམ་པོར་དྲིལ་བྱ་ལ། །དྲག་མིན་དག་ལ་སྤྲ་ཚིལ་
གྱིས། །ཕྱི་རོལ་གཡོགས་པ་རབ་བྱས་ལ། །དེ་ནས་ཁམ་ཕོར་མཉམ་པོ་གཉིས། །བྱས་པས་གཅིག་ཏུ་རྩི་མར་དང་། །སྦྲང་རྩི་བསྲེས་པས་བཀང་བ་ཡི། །ནང་དུ་ཁ་སྦྱར་འཁོར་ལོ་གཞུག །དེ་ནས་ཁམ་ཕོར་གཅིག་གིས་ནི། །སྟེང་ནས་ཁ་ནི་དགབ་པར་བྱའོ། །དེ་ལ་ལས་ཀྱི་མདོག་
མཐུན་པའི། །སྐུད་པའི་ཁྲིས་ནི་མདུན་དུ་དཀྲི། །དེ་ནས་རང་ལྷའི་ལས་མཐུན་པའི། །གཟུགས་སུ་རང་ཉིད་རབ་བྱས་ཏེ། །འཁོར་ལོ་ཁ་སྦྱར་སྟེང་དུ་ཡང་། །དེ་འདྲའི་གཤིན་རྗེ་རུ་བསམས་ལ། །དེ་ལ་མེ་ཏོག་དྲི་ཆབ་མདོག་དང་མཐུན་པ་ཡི། །བདུག་སྤོས་ལ་སོགས་མཆོད་བྱས་ལ། །བསྒྲུབ་
བྱ་ཟླ་བ་ལ་བཞག་སྟེ། །རང་ཉིད་ཟླ་བའི་རྡོ་རྗེ་ཡིས། །ལྟེ་བའི་ཧཱུཾ་ལས་རང་འདྲ་བའི། །ཁྲོ་བོ་དུ་མ་ཡེ་ཤེས་ཀྱི། །ཆུས་གང་བུམ་པ་ལས་མཐུན་མདོག །འཛིན་པ་སྤྲོས་པ་སླར་བསྡུས་ཏེ། །བསྒྲུབ་བྱའི་སྤྱི་བོར་དབང་བསྐུར་བས། །གང་འདོད་འབྲས་བུ་ཐོབ་བསམས་ལ། །ཐུན་མཚམས་
བཞི་ལ་གསང་སྔགས་ནི། །མིང་དང་བསྐུལ་ཚིག་བཅས་པ་བཟློག །དབང་ལ་བྱེ་བྲག་ཏུ་བྱ་བ། །ཙནྡན་དམར་དང་སྲིན་ལག་ཁྲག །རྒྱ་སྐྱེགས་ཁུ་བ་བཙག་ཀྱང་རུང་། །དམར་པོའི་རྫས་ཀྱིས་བྲི་བར་བྱ། །བུད་མེད་དགུག་ལ་ཁྱད་པར་ནི། །དུར་ཁྲོད་ཀྱི་ནི་རས་མ་ལ། །པདྨའི་རཀྟས་
བྲི་བྱ་སྟེ། །བུད་མེད་བྷནྡྷ་ཁ་སྦྱར་གཞུག །རྨོངས་ལ་ཁྱད་པར་དུར་རས་ལ། །ལྡོང་རོས་ཀྱིས་བྲིས་ཁམ་ཕོར་གཞུག །དེ་སྟེངས་སུཾ་ལས་རི་རབ་དང་། །ལཾ་སེར་སྣ་ཚོགས་རྡོ་རྗེ་ཡི། །སྟེང་དུ་ལྷ་བསྐྱེད་ཀུན་ལ་སྦྱར། །རྨོངས་རྒྱས་སེར་པོ་དབང་དགུག་དམར། །དྲག་དང་ཚར་གཅད་

གནག་ཞི་དཀར། །དེ་ལྟར་ཁ་དོག་བྱེ་བྲག་སྦྱར། །དྲག་པོ་ཁྱད་པར་དབྱེ་བ་ནི། །དུར་ཁྲོད་རས་ལ་འཁོར་ལོ་ནི། །གོང་དང་མཐུན་པར་བྲི་བར་བྱ། །སྣག་ཚ་སྐེ་ཚེ་ཚྭ་དང་དུག །ནིམ་པ་སྒ་དང་པི་པི་ལིང་། །ན་ལེ་ཤམ་ཡུངས་ཀར་ནག་དམར། །ཤིང་ནག་ཆེན་པོའི་ས་བོན་དང་། །ཙི་ཏྲ་
ཀ་ཡི་ཁུ་བ་དང་། །སྲིན་ལག་ཁྲག་དང་དུར་ཁྲོད་སོལ། །དེ་རྣམས་རྙེད་ཚད་བསྲེས་པས་བྱ། །སྙུ་གུ་བྱ་རོག་སྒྲོ་རྩེས་བྱ། །དེས་ནི་འཁོར་ལོ་ལེགས་བྲིས་ལ། །ཁ་སྦྱར་དྲིལ་ཏེ་རྒྱུ་རྣམས་ལ། །བྱས་པའི་གཟུགས་བརྙན་སྙིང་གར་གཞུག །དེ་ནས་གཞན་ཡང་རི་རྩེ་ཡི། །ས་ནི་ཤིན་ཏུ་སྐམ་
པོ་ལ། །རིགས་ངན་ཁ་ནས་ཆུ་བླངས་སྦྲུ། །སྦྲུས་པའི་འདག་པ་དེ་ལས་ནི། །གཤིན་རྗེའི་རྒྱལ་པོའི་གཟུགས་བྱས་ཏེ། །གཡས་བསྐུམ་གཡོན་བརྐྱང་བགྲད་པ་ལ། །གཡས་པ་ཐོ་བ་ཞགས་པ་གཡོན། །གསུས་པ་ཆེ་ལ་ཐུར་བཤལ་བ། །བྱས་ལ་མདུན་དུ་གཞག་པར་བྱའོ། །མར་ངོའི་ཚེས་
བརྒྱད་བཅུ་བཞི་ལ། །ལས་དག་ཉིན་ཕྱེད་ནམ་ཕྱེད་ནའོ། །རང་ཉིད་ཁྲོ་གཟུགས་ཁྲོ་སེམས་ཀྱིས། །ལྷོ་རུ་ཁ་བལྟས་སྟན་པ་དེར་འདུག །དེ་ནས་རང་སྙིང་ཧཱུཾ་ཡིག་ལས། །ཁྲོ་རྒྱལ་མདོག་ནག་ཞལ་གཅིག་པ། །ཕྱག་གཉིས་འཁོར་ལོ་ལྕགས་ཀྱུ་ཐོགས། །མཚོན་ཆ་སྣ་ཚོགས་འཛིན་སྤྲོས་ལ། །བསྒྲུབ་
བྱའི་གོ་ཆ་མཚོན་ཆ་ཀུན། །ཕྲོགས་ཏེ་དྲངས་ནས་རང་སྙིང་གི། །ས་བོན་ཧཱུཾ་ལ་ཐིམ་པར་བསམ། །ཚུལ་དེས་དེ་ཡི་ཁྱིམ་སྟོང་བསམ། །དེ་ནས་ཡང་ནི་རང་སྙིང་ལས། །གོང་ལྟར་ཁྲོ་བོ་རབ་སྤྲོས་པས། །བསྒྲུབ་བྱ་དྲངས་ནས་སྔགས་པ་ཡིས། །མདུན་དུ་ཁ་དོག་ནག་པོ་རུ། །གཟུགས་བརྙན་ལ་
བསྟིམ་གསལ་པོ་རུ། །དེ་ལ་སྣ་ཚོགས་ནད་རྣམས་ཀྱིས། །མནར་བར་བསམ་ཞིང་གཅེར་བུ་དང་། །རབ་ཏུ་འདར་ཞིང་སེམས་གདུང་དང་། །ལུས་ནི་ཤིན་ཏུ་སྡུག་བསྔལ་ཞིང་། །ལུས་ལ་ཤུ་བ་རལ་གྲི་མདའ། །སྟ་རེ་ལ་སོགས་མཚོན་རྣམས་ཀྱིས། །ཚབས་ཆེར་གཟེར་བར་བསམ་པར་
བྱའོ། །དེ་ཡང་རླུང་ནག་ཆེས་གཡེངས་པས། །ཤིན་ཏུ་གྲང་བས་འཁྱགས་པར་བསམ། །མེ་ཆེན་རབ་འབར་བས་བསྐོར་ཏེ། །རབ་ཚ་བས་ཀྱང་གདུང་བར་བསམ། །དེ་ལའང་ཁྱི་དང་སེང་གེ་ཝ། །སྟག་དང་བྱ་རོག་བྱ་རྒོད་དང་། །མཆུ་རིངས་སོགས་པ་རྔམ་ཚུལ་དུ། །བསྒྲུབ་བྱའི་

ལུས་དེ་བཟའ་བར་བལྟ། །དེ་ནས་གཟུགས་བརྙན་དེ་ལ་ནི། །ཚེར་མ་རྣོན་པོ་རབ་བླངས་ལ། །བར་མཚམས་མེད་པར་རབ་ཕུག་ལ། །ཚ་བའི་ལྡེ་གུས་རབ་བསྐུས་ལ། །དེ་ནས་གཤིན་རྗེའི་ལྟོ་བར་གཞུག །དེ་གསུས་བསྒྲུབ་བྱ་རབ་བསམས་ལ། །རང་སྙིང་ཁྲོ་བོ་མཚོན་ཐོགས་
སྤྲོ། །དེ་ཡིས་གཤིན་རྗེའི་གཟུགས་གནས་པའི། །བསྒྲུབ་བྱ་དེ་བསད་དེའི་ཤ་ཁྲག །ཟོས་འཐུངས་རུས་ཆོག་རྐང་གཞིབས་བསམ། །སྤྲུལ་པ་བྱ་རྒོད་གཟུགས་ཅན་གྱིས། །ནང་ཁྲོལ་ཕྱུང་ཁྱེར་ཁར་སོང་བསམ། །ལས་ངན་བྱེད་དེ་དམྱལ་བར་འགྲོ། །མི་གདུང་བྱ་ཕྱིར་དེ་ཡི་སེམས། །རྒྱལ་
བའི་གཟུགས་སུ་རང་སྙིང་གི། །འོད་ཀྱིས་བསྡུས་ཏེ་རྒྱལ་བ་ཡི། །ཞིང་སར་ཁྱེར་ནས་བཀོད་པར་བསམ། །དེ་ལྟར་ལས་ཀྱི་ཚུལ་དེ་ཉིད། །སྡིག་པ་ཅན་ལ་དགོངས་པས་གསུངས། །ཡང་ན་གཤིན་རྗེའི་སྒོམ་ལུགས་གཞན། །ཞལ་གཅིག་ཕྱག་གཉིས་གཡས་ཞགས་པ། །གཡོན་པ་སྡིགས་
མཛུབ་ལྡན་པ་ལ། །དབུ་རྒྱན་རང་རང་རིགས་བདག་གོ། །སོ་སོའི་སྔགས་ཀྱི་དབྱེ་བ་ནི། །གསལ་བར་བྲིས་པ་འདི་ཡིན་ནོ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཆེ་གེ་མོ་ཤཱནྟིང་ཀུ་རུ་སྭཱ་ཧཱ། འདི་ནི་ལས་ཀྱི་བཟླས་པ་དང་། །འཁོར་ལོ་རྩིབས་བཅུ་དྲུག་པ་སྤེལ་ལ། དགོད་པའི་
སྔགས་སོ། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་བཽ་ཥཊ་ཆེ་གེ་མོ་པུཥྚིཾ་ཀུ་རུ་བཽ་ཥཊ་དང་། །ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ། ཧོ་ཆེ་གེ་མོ་ཛཿཛ་ཧྲཱི་ཝ་ཤཾ་ཀུ་རུ་ཧོཿ། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ། བཽ་ཥཊ་ཆེ་གེ་མོ་བ་ཤ་ན་ཡ་བ་ཤ་ན་ཡ། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ། ཧྲཱིཿ
བུད་མེད་ཆེ་གེ་མོ་ཨཱ་ཀཪྵ་ཡ་ཧྲཱིཿ། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་ཛཿ། སྐྱེས་པ་ཆེ་གེ་མོ་ལ་ཨཱ་ཀཪྵ་ཡ་ཛཿ། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ། ལཾ་ཆེ་གེ་མོ་རང་གི་གནས་དང་བཅས་པ། སྟཾ་བྷ་ཡ་ལཾ། དྲག་པོའི་འཁོར་ལོ་འོག་མའི། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ་ཧཱུཾ་ཆེ་གེ་མོ་
མཱ་ར་ཡ་ཕཊ། སྟེང་མའི། ཨོཾ་ཧྲཱིཿཥྚྲྀཿཝི་ཀྲྀ་ཏཱ་ན་ན་ཧཱུཾ་ཧཱུཾ་ཕཊ་ཕཊ། ཧཱུཾ་ཆེ་གེ་མོ་མཱ་ར་ཡ་ཧཱུཾ། ཨོཾ་ཆེ་གེ་མོ་སྭཱ་ཧཱ། བཽ་ཥཊ་ཆེ་གེ་མོ་བཽ་ཥཊ། ལཾ་ཆེ་གེ་མོ་ལཾ། ཧོ་ཆེ་གེ་མོ་ཧོ། །ཛཿཆེ་གེ་མོ་ཛཿཧྲཱིཿཆེ་གེ་མོ་ཧྲཱིཿ། དབུས་ཀྱི་རེའུ་མིག་གྲྭ་བཞི་དང་། །གསུམ་པ་བཅུ་དྲུག་པ་ལ་ནི། །སྤེལ་བའི་སྔགས་

སུ་ཤེས་པར་བྱ། །རིང་པོ་དག་ནི་སྤེལ་བ་སྟེ། །ལས་དུས་བཟླས་པ་དེ་ལྟར་རོ། །གྲུ་བཞི་དང་གསུམ་པའི་ཕྱོགས་བཅུ་དྲུག་སྤེལ་ལོ། །གཤེད་ནག་འཁོར་ལོའི་མན་ངག །སློབ་དཔོན་ཆེན་པོ་ནཱ་ག་བོ་དྷིས་མཛད་པ་རྫོགས་སོ།། །།ལོ་ཙཱ་བ་དགེ་སློང་ཆོས་རབ་ཀྱིས་བསྒྱུར།། ༄། །སྦྱིན་སྲེག་གི་ཆོ་ག་
བཞུགས། ༄༅༅། །དཔལ་གཤིན་རྗེ་གཤེད་ལ་ཕྱག་འཚལ་ལོ། །སྦྱིན་སྲེག་གི་རིམ་པ་ནི། སའི་ཆོ་ག་དང་སྟ་གོན་དང་། ཐིག་རྣམས་ཚུལ་བཞིན་བྱས་ལ། ཐབ་ཁུང་ཡང་ལུགས་མཐུན་པར་བྲུས་ཏེ། ས་ནག་པོས་བྱུག་གོ། །རྔ་མོ་དང་བོང་བུའི་སྦངས་དང་། །ཕུབ་མ་དང་། མེ་ཏོག་ནག་
པོ་དྲི་མི་ཞིམ་པས་བྱུགས་ལ། ཤིན་ཏུ་རྩུབ་པ་དང་ཚ་བ་དང་དུར་ཁྲོད་ཀྱི་ཐལ་བས་ཀྱང་བྱུགས་ལ། །ཡམ་ཤིང་ཡང་དེ་ཉིད་ལས་བྱུང་བ། རྩེ་མོ་ཁྲག་དང་དུག་དང་ཡུངས་མར་ལ་སོགས་པ་དང་། དྲག་པོའི་སྲེག་རྫས་ཇི་ལྟར་འོས་པ་བསག །བདག་ཉིད་ཀྱི་ཆས་གོས་ཀྱང་དུར་རས་དང་གཡང་གཞི་དང་གོས་
ནག་ལ་སོགས་པ་བཤམ། དེ་ནས་རྫས་རྣམས་གཡོན་དུ་གཞག །མཆོད་ཡོན་ལ་སོགས་པ་གཡས་སུ་གཞག །དེ་ནས་བདག་ཉིད་སྟན་མེད་ཅིང་སྲ་བ་ལ་རུས་སྦལ་གྱི་འདུག་སྟངས་ཀྱིས་འདུག་ལ། །ཁ་ལྷོར་བལྟས་ཏེ། རྒྱན་ཆ་གྱོན་ཏེ། ཁྲོས་པའི་སེམས་ཀྱིས་སོ་བཅའ་ཞིང་རྣལ་འབྱོར་གཉིས་བྱས་
ལ། །རྗེས་སུ་རྣལ་འབྱོར་ལ་རང་འདྲ་གཞུག །རྫོགས་པའི་རྣལ་འབྱོར་བྱ་བ་དེ་ལ། རྣལ་འབྱོར་ཆེན་པོ་རྫོགས་བྱས་ལ། །དེ་ནས་ཐབ་ཡིག་ཨ་ལས་བྱུང་བ་ནག་པོ་འོད་ནག་པོ་འཕྲོ་བ། མཐོང་བ་ཙམ་གྱིས་ཀྱང་གསོད་པར་ནུས་པར་བསམ། ཡོ་བྱད་ཀུན་ཀྱང་ཡ་ཡིས་བྱིན་གྱིས་བརླབས་ལ། རྫས་རེ་རེ
འང་འོད་ནག་པོ་འཕྲོ་བ། གང་གིས་མཐོང་བའམ། རེག་ནའང་གསོད་ཅིང་འཇིགས་པ། ལྷ་རྣམས་ལ་ཕུལ་བས་ཀྱང་ཁྲོ་བ་དང་གཏུམ་པར་འགྱུར་བར་བསམ། ཡི་གེ་བཅུ་བཞི་པས་ཐབ་དང་རྫས་ཀུན་བསངས་ལ། ཐབ་ཏུ་ཤིང་བརྩིག །དེ་ནས་མེ་གཉེར་ཏེ། རིགས་ངན་གྱི་ཁྱིམ་ནས་བྱུང་བ་
འམ། རྡོ་དྲུད་པ་ལས་བྱུང་བ། ཡམ་ཤིང་ལ་མེ་སྦར་ཏེ། ཡི་གེ་བཅུ་བཞི་པས་བསངས་ལ་ཐབ་ཏུ་སྦར་དེ་ལ་ཡུངས་མར་གང་ཕུལ་ལ་རླུང་གཡབ་ཀྱིས་གཡབ་ཅིང་། བཟླས་ཏེ། ཛྭཱ་ལ་རཾ་ཛྭཱ་ལ་རཾ། དེ་ནས་མཚན་མ་བརྟག་པར་བྱ། །ལྟས་བཟང་བ་དང་མེ་ལྷ་བསྐྱེད་དེ་དང་པོར་མངོན་པར་བྱང་ཆུབ་པས་རྡོ་རྗེ་

སེམས་དཔའ་བསྐྱེད་དེ་འོད་དུ་ཞུ་བའི་གོང་བུ་ལས་ལྷ་མོ་བཞི་ཆད་དེ། དེས་བསྐུལ་བས། རཾ་ནག་པོ་དེ་ལས་བྱུང་བའི་རྡོ་རྗེ་ལས། མེ་ལྷ་འཁྲོས་པས་ཞེས་བྱ་བ་ཞལ་ལ་སོགས་པ་གཙོ་བོ་གཉིས་འདྲ་བ་ཅིག་བསམ། དེ་ནས་ཡེ་ཤེས་ཀྱི་མེ་ལྷ་ཙཱརྩི་ཀཱས་དགུག་སྟེ། དད་པ་དང་
ནི་དམ་ཚིག་གིས། །ཚུར་གཤེགས་ཚུར་གཤེགས་འབྱུང་པོ་ཆེ། །ལྷ་<ཡ་ཡི་>དྲང་སྲོང་བྲམ་ཟེའི་མཆོག །སྲེག་བླུགས་ཞལ་ཟས་བཞེས་སླད་དུ། །འབར་བའི་ནང་དུ་བཞུགས་སུ་གསོལ། །སྔགས་ནི། ཀྲོ་དྷ་ཨགྣེ་ཆེ་གེ་མོ་མཱ་ར་ཡ་ཧཱུཾ་ཕཊ། དེ་ལ་ཞབས་བསིལ་ཕུལ་ལ། ཡི་གེ་བཅུ་བཞི་པའི་
གཞུག་ལ། ཨརྒྷཾ་པྲ་ཏཱིཙྪ་ཆེ་གེ་མོ་མཱ་ར་ཡ་ཧཱུཾ་ཕཊ་ཅེས་སོ། །ཞབས་བསིལ་ཡང་སྔགས་ཀྱི་མཇུག་ལ། ནི་རི་ཁཾ་ཆེ་གེ་མོ་མཱ་ར་ཡ་ཧཱུཾ་ཕཊ། འཐོར་འཐུང་ཡང་སྔགས་ཀྱི་མཇུག་ལ། པྲ་ཝ་ར་སཏྐཱ་ར་པྲ་ཏཱིཙྪ་ཆེ་གེ་མོ་མཱ་ར་ཡ་ཧཱུཾ་ཕཊ་ཅེས་བརྗོད་དོ། །དེ་ནས་སྒོ་བ་བཞིས་དགུག་གཞུག་བྱ། དེ་ནས་
མིག་ལ་སོགས་པ་བྱིན་གྱིས་བརླབ་པ་དང་། ལུས་ངག་སེམས་ཀྱང་བྱིན་གྱིས་བརླབ། །དེ་ནས་དབང་བྱིན། དེ་ནས་ཞབས་བསིལ་ལ་སོགས་པ་དང་། །རྣམ་པ་ལྔ་དང་། རང་གི་སྔགས་ཀྱི་མཇུག་ལ་བསྐུལ་ཚིག་དང་བཅས་པས་སོ། །དེ་ནས་མར་དང་། ཡམ་ཤིང་དེ་ནས་ཏིལ། དེ་ནས་འབྲས།
དེ་ནས་དུག་དང་། རྫས་ཀུན་ཡི་གེ་བཅུ་བཞི་པའི་མཇུག་ལ་བསྐུལ་ཚིག་དང་བཅས་པས་སོ། །དེ་ནས་མཆོད་དང་བསྟོད། །བདུད་རྩི་མྱང་བ་བྱ། དེ་ནས་ཁ་ལག་བཤལ། དེ་ནས་མེ་ལྷ་མེ་འབར་བའི་རྣམ་པར་འགྱུར་བར་བསམས་ལ། ཡང་ཐབ་དང་རྫས་བསངས་ལ། འབར་བའི་ནང་དུ་དཀྱིལ་འཁོར་རྫོགས་པའི་
རྣལ་འབྱོར་གྱི་ཚུལ་དུ་སྟོན་ཏེ། དེའི་མིག་ལ་སོགས་པ་བྱིན་གྱིས་བརླབ་པ་དང་། ལུས་ལ་སོགས་པ་བྱིན་གྱིས་བརླབས་ཏེ། དབང་བསྐུར་ལ་ཡེ་ཤེས་འཁོར་ལོ་དགུག་གཞུག་བྱས་ལ་དང་པོ་ཞེ་སྡང་རྡོ་རྗེ་ལ་ཐུན་མོང་གི་མཆོད་པ་བྱས་ལ། དེ་ནས་སྲེག་རྫས་ཀུན་ཡི་གེ་བཅུ་བཞི་པའི་སྔགས་བསྐུལ་ཚིག་
དང་བཅས་པས་འབུལ་ཏེ། དེ་ནས་མཆོད་བསྟོད། བདུད་རྩི་མྱང་བ་བྱ། དེ་ནས་ཡང་ཐབ་བསངས་ལ། ཡང་གཏི་མུག་རྡོ་རྗེ་དང་། དེ་དེ་བཞིན་དུ་རིམ་པས་དབུལ། ཐ་མར་ལིངྒ་ལ་བཀུག་འདྲེན་བྱས་ལ། དེ་ནས་གཏུབ་ཅིང་སྲེག །དེ་ནས་ཡེ་ཤེས་པ་གཤེགས་སུ་གསོལ། དམ་ཚིག་བདག་ལ་བསྡུ། ཡང་

མེ་ལྷ་བསྐྱེད། སྲེག་རྫས་ལྷག་མ་ཀུན་དབུལ་ཏེ། དེ་ནས་ཁ་ལག་བཤལ། ཡེ་ཤེས་ཀྱི་མེ་ལྷ་གཤེགས། བསྐྱེད་པ་བདག་ལ་བསྡུ། དེ་ནས་བསྔོ་བ་དང་སྨོན་ལམ་བྱ། སྦྱིན་སྲེག་གི་ཆོ་ག་སློབ་དཔོན་ཆེན་པོ་ལ་ལི་ཏ་བཛྲས་མཛད་པ་རྫོགས་སོ།། ༄། །འཆི་བདག་ཡི་དྭགས་རྒྱལ་པོའི་སྒྲུབ་ཐབས་
བཞུགས། ༄༅༅། །འཆི་བདག་ཡི་དྭགས་རྒྱལ་པོ་ནི། །འཆི་བདག་བདུད་ཅེས་བྱ་བ་སྟེ། །འགྲོ་བ་ཀུན་གྱི་ལུས་ཀྱི་བདུད། །ལུས་དང་གྲིབ་མའི་ཚུལ་བཞིན་དུ། །འགྲོ་བ་ཀུན་ལ་སྣང་བ་སྟེ། །ཕུང་པོ་ཉིང་མཚམས་སྦྱོར་བ་པོ། །འཇིགས་པ་དེ་ཡི་གཟུགས་མཐོང་ན། །ཡ་མ་དེ་ཡི་དྲི་ངན་འབྱུང་། །
དེ་ནས་རང་གི་སྲོག་གི་བདུད། །ལྷག་པའི་ཕྱོགས་ན་གནས་པ་སྟེ། །གཙིགས་པ་ཅན་ལ་ཕྱག་འཚལ་ལོ། །དེ་ལ་འཆི་བདག་སྐྱེས་བུའི་གཟུགས། །ཁྲུ་གང་ཡི་དྭགས་གོས་ལ་བྲི། །ནག་པོ་ཞལ་གཅིག་ཕྱག་གཉིས་པ། །འཇིགས་པ་རལ་པ་མཆེ་བཞི་གཙིགས། །རྒྱན་མེད་རུས་པའི་ཕྲེང་བ་ཅན། །
གཡས་པ་ཡ་མའི་དབྱུག་པ་འཛིན། །སྡིགས་མཛུབ་ཞགས་པ་གཡོན་ན་བསྣམས། །མ་ཧེ་དག་ལ་གནས་པ་བྲི། །དེ་ལ་རྣལ་འབྱོར་ཆེན་པོ་ཡི། །མདུན་དུ་གནས་ལ་ཞི་གནས་བྱ། །ཡང་ན་སཾ་དྷི་རྣམ་གསུམ་ལས། །ཧཱུཾ་ལས་ནག་པོ་ཆེན་པོ་སྟེ། །ཡི་གེ་བཅུ་གཅིག་བརྗོད་བྱས་ལ། །རས་ལ་བྲིས་པ་བཞིན་
དུ་བསྒོམ། །ཨོཾ་ཀཱ་ལ་རཱུ་པ་ཡ་མ་རཱ་ཛ་ཧཱུཾ་ཕཊ། དེ་ནས་བསྙེན་པ་བྱ་བ་གསུངས། །དུར་ཁྲོད་ནགས་ཚལ་སོང་བྱས་ལ། །བཟླས་བརྗོད་བྱས་པའི་ཚུལ་དག་གིས། །ཧ་ཧ་བཞད་ཅིང་འོང་བར་རིགས། །མངོན་དུ་གྱུར་ནས་བ་ལིཾ་སྦྱིན། །དེ་ལ་བསྙེན་པའི་སྙིང་པོ་འདིའོ། །ཨོཾ་ཀཱ་ལ་རཱུ་པ་བྷཱི་མ་ཡཀྵ་
ཧཱུཾ། མ་ཧཱ་རོ་ཥ་ཎཾ། ན་ར་སིདྡྷ་ཡེ། སརྦ་བྷཱུ་ཏ་ཨ་དྷི་པ་ཏ་ཡེ། ཡ་མ་རཱ་ཛཱ་ཡ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཐོག་མ་དབུས་མཐའ་ཡང་དག་ལྡན། །བཅུ་བཞི་ཕྱེ་བ་བསྙེན་པ་ཡིན། །རིམ་པ་བཞིན་དུ་མ་བྱེ་བ། །ཉེ་བའི་བསྙེན་པ་ཡིན་པར་ཤེས། །གྲུབ་སྟེ་མངོན་དུ་གྱུར་པ་ན། །ཤ་ཆེན་གཏོར་མ་ཆེན་པོ་སྦྱིན།
ཨོཾ་ཀཱ་ལ་རཱུ་པ་ཡ་མ་རཱ་ཛ་ཧཱུཾ་ཨི་དཾ་བ་ལིཾ་གྲྀཧྞ་ཁ་ཁ་ཁཱ་ཧི་ཁཱ་ཧི། ཚོགས་ལ་སོགས་པ་མངོན་དུ་སྦྱིན། །དེ་ལྟར་གྲུབ་ན་ལས་བྱ་སྟེ། །བྷནྡྷ་མཚན་ངན་བཟང་པོ་བཙལ། །དུམ་བུ་གཅིག་གམ་གཉིས་པ་ལ། །དཔྲལ་བའི་ངོས་ནས་ལྟག་པར་དྲང་། །མི་ཐོད་དག་པ་རོ་རས་ལ། །གནོད་སྦྱིན་བཻ་བ་སྭ་

ཏཱའི་གཟུགས། །སྣག་ཚ་བྱ་རོག་ཁྲག་དང་ནི། །དུར་ཁྲོད་སོལ་བ་བོང་བུའི་ཆུས། །མི་རྐང་སྙུ་གུས་ལེགས་པར་བྲི། །སྤྱི་བོའི་ངོས་ཀྱི་ཕྱོགས་དག་ལ། །རས་ལ་འཁོར་ལོ་བྲི་བར་བྱ། །རིམ་པ་སྐོར་གསུམ་ལྡན་པ་ལ། །རིམ་པ་གཉིས་པ་དག་ལ་ནི། །རྩིབས་གཉིས་གཉིས་ཀྱི་
ཚད་ལ་བྲི། །དེ་ལ་གསང་སྔགས་དགོད་པ་ནི། །མ་མ་ཤ་ཏྲཱུཾ་ཨ་མུ་ཀཾ། འཁོར་ལོ་ལྟེ་བའི་དབུས་སུ་བྲི། །ཤར་ནས་བརྩམས་ནས་འདི་ལྟ་སྟེ། །ཏྲཱ་ས་ཡ་ཏྲཱ་ས་ཡ། ཨཱ་ཀཌྜྷྱ་ཨཱ་ཀཌྜྷྱ། ཤོ་ཥ་ཡ་ཤོ་ཥ་ཡ། ཧ་ན་ཧ་ན། ད་ཧ་ད་ཧ། པ་ཙ་པ་ཙ། བནྡྷ་བནྡྷ། ཙཱུ་རྞ་ཙཱུརྞ། རིམ་པ་ཐ་མ་དག་ལ་ནི། །
ཤར་ནས་བརྩམས་ནས་འདི་ལྟར་བྲི། །ཙཀྵ་བཛྲ་ན་གྷོ་ར་བ་ཏྲ་མ་ཀྵེ་ཏྲ་པཱ་ལ་ཡ། ཙྪིནྡྷ་ཙྪིནྡྷ་མི། བྷིནྡ་བྷིནྡ། ཐཱ་ཀཾ་བཛྲ་བཱ་དྷི། རུ་དྷི་ར་ཨརྒྷ་ས། ཨོཾ་མཱ་ར་ཡ་བཛྲ་ཡེ་སྟཾ་བྷ་ཡ་ཧཱུཾ་ཕཊ། བར་དུ་དགྲ་ཡི་མིང་རུས་བྲི། །རྒྱབ་སྲུབས་དག་ལ་གསང་སྔགས་བྲི། །སྐུད་པ་སྔོན་པོ་ནག་པོ་ཡིས། །ཐོད་པ་དེ་ནི་
བསྡམ་པར་བྱ། །རོ་ཤིང་མེ་ལ་བྷནྡྷ་བསྲོ། །དེ་ལ་ཞག་གསུམ་བྱས་ནས་ཀྱང་། །ལས་ཀྱི་འཆི་བདག་ཁྲུ་གང་ལ། །ཞལ་གཅིག་མཆེ་གཙིགས་ཕྱག་གཉིས་པ། །བདུན་པོར་ས་དང་རྣམ་སྣང་དང་། །དུར་ཁྲོད་སོལ་བའི་རྒྱུ་དག་ལ། །བོང་བུའི་ཆུ་ཡིས་གཟུགས་བྱས་ཏེ། །དེ་ཡི་སྙིང་གར་ཐོད་
པ་གཞུག །འཁོར་ལོ་ལ་བྲིས་སྔགས་བཟླས་ཏེ། །མར་ཚེས་བཅུ་བཞི་དང་བརྒྱད་ལ། །དུར་ཁྲོད་རོ་ཁང་དག་ཏུ་མནན། །དེ་ལྟར་ལས་ནི་རྫོགས་གྱུར་ནས། །གང་ལ་བྱ་བའི་དངོས་པོ་དེ། །རང་གི་བདུད་ཀྱི་དབང་དུ་གྱུར། །འཆི་བདག་ཡི་དྭགས་རྒྱལ་པོ་དེ། །མ་དྲོས་མཚོ་ཡི་འབྲི་
དཀྱིལ་ལ། །རི་ནག་པོ་ཡི་ཕ་མཐའ་སྟེ། །སྤོས་དང་རི་བོའི་བར་དག་ན། །ཆུ་དང་ཞེང་དུ་ཆ་མཉམ་མཚོ། །དེ་འོག་དཔག་ཚད་ལྔ་བརྒྱའི་འོག །འཆི་བདག་ཡི་དྭགས་རྒྱལ་པོའི་གནས། །འགྲོ་བའི་ལྟག་པའི་ཕྱོགས་ན་གནས། །དེ་ཡི་ཡུམ་དེ་ཙ་མུཎྜཱི། །རབས་ཆད་ཕོ་མོའི་ཐོད་པ་
ལ། །ཡ་གཉིས་དག་གི་བར་དུ་ཡང་། །རོ་རས་དག་ལ་གཟུགས་བྲི་བ། །ཞལ་དང་ཕྱག་ཞབས་སྔོན་བཞིན་བྲི། །དེ་ལ་འཆི་བདག་ཙ་མུཎྜཱི། །ནག་མོ་མིག་གསུམ་ཁྲོ་གཉེར་ཅན། །ཁ་གདངས་སྐྲ་བརྫེས་ནུ་མ་འཕྱང་། །གསུས་ཆེན་དུས་འགྲོའི་གོས་གྱོན་མ། །གཡས་ན་ཏྲི་ཤཱུལ་གཡོན་ཐོད་

པ། །མི་ཡི་ཐོད་པ་དང་སྦྱར་བ། །མི་ཡི་རྒྱུས་པས་བསྡམས་པ་ཡི། །བར་དུ་འཁོར་ལོ་གཞུག་པར་བྱ། །དེ་ལ་འཆི་བདག་འཁོར་ལོ་ནི། །སྔ་མ་བཞིན་དུ་བྲི་བར་བྱ། །དེ་ལ་མ་མོའི་འཁོར་ལོ་ནི། །རས་ལ་འཆི་བདག་ཚུལ་བཞིན་དུ། །རྩིབས་བརྒྱད་གཉིས་དང་ལྡན་པ་ལ། །དབུས་ནས་བརྩམས་ཏེ་
དེ་བཞིན་བྲི། །མ་མ་སརྦ་ཤ་ཏྲཱུཾ། ལྟེ་བའི་དབུས་སུ་བྲི་བར་བྱ། །ཤར་ནས་རིམ་པ་འདི་བཞིན་དུ། །ཨ་མུ་ཀ་སྱ། དྷུ་ན་དྷུ་ན། བནྡྷ་བནྡྷ། མ་ཐ་མ་ཐ། པྲ་མ་ཐ་པྲ་མ་ཐ། ཧཱུཾ་ཛྭ་ར་ཛ། ཛ་རེ་ན་བྱ། དྷི་རི་གེ་ནཾ། རིམ་པ་ཐ་མ་དག་ལ་ནི། །ཤར་ནས་བརྩམས་ནས་འདི་ལྟ་སྟེ། །ནི་ག་ན་ཤི་བཾ་ཧཾ་ཡཾ་རི་ཚུ་ས་ཡ། ཨ་
བི་ཤ་ཡ། ཛཾ་བཾ་ཧྲྀ་ད་ཡཾ། ཚིནྡ་མ་དེ་པ་ཤི་གཾ་མཱ་ར་ཡ་ནཱ་ཤ་ཡ་ཧཱུཾ་ཕཊ། འཁོར་ལོ་གཉིས་ཀྱི་བར་དུ་ཡང་། །གང་ལ་བྱ་བའི་མིང་གཟུགས་གཞུག །བླ་མས་འཆི་བདག་བསམས་བྱས་ཏེ། །སྲོག་གི་སྙིང་པོ་བཟླས་པར་བྱ། །གོས་སྔོན་གྱོན་པ་དེ་བཞིན་དུ། །ཡུམ་མམ་ལས་མཁན་དཔའ་བོ་བཞིན། །ཡུམ་གྱི་
སྲོག་སྙིང་བཅུ་པོ་དགོད། །ཨོཾ་ཧྲཱིཿཙ་མུཎྜཱི་ཡེ་ཧཱུཾ་ཕཊ་སྭཱ་ཧཱ། ཡབ་ཡུམ་འཁོར་ལོ་གང་ཡིན་པ། །གོང་གི་ཐོད་པར་གཞུག་པར་བྱ། །ཤི་བའི་སྐྲ་ཡི་སྐུད་པ་ལ། །མི་རྒྱུས་དག་གི་སྐུད་པས་བསྡམས། །མི་ཡི་རྒྱུ་མས་གཟུངས་ཐག་བྱས། །གཙོ་དང་གཟུངས་ཀྱིས་གཟུང་བྱས་ནས། །མཎྜལ་
སྟེང་བཞག་བཟླས་པ་བྱ། །འཁོར་ལོ་སྟེང་འོག་ལས་སྔགས་ལ། །གཙོ་དང་གཟུགས་ཀྱི་འབུམ་ཕྲག་བཟླས། །དེ་ནས་བཟླས་པ་རྫོགས་ནས་ཀྱང་། །དུར་ཁྲོད་ལྷ་ཁང་རོ་ཁང་ངམ། །ལྷ་ཀླུ་དྲག་པོའི་གནས་སུ་མནན། །ལྷ་ལ་སོགས་པ་ཤི་བར་བསྟན། དེ་ཡི་སྒྲུབ་པའི་གནས་རྣམས་ཀྱང་། །
དབེན་པའི་གནས་སུ་བྱས་ནས་ནི། །བླ་མ་ཕ་མ་མཆོད་པ་ཡིན། །གང་བྱུང་ཡང་ནི་བསྒྲལ་བ་ཡིན། །དེ་ཚེ་བསྒྲལ་བ་མ་བྱས་ན། །དེ་ཚེ་རང་ཉིད་འཆི་བར་འགྱུར། །གསང་བ་གཞན་ལ་བསྟན་མི་བྱ། །འཆི་བདག་ཡི་དགས་རྒྱལ་པོའི་སྒྲུབ་ཐབས་རྫོགས་སོ།། ༄༅། །བཅོམ་
ལྡན་འདས་གཤིན་རྗེ་གཤེད་དམར་པོ་ལ་ཕྱག་འཚལ་ལོ། །ལག་པའི་མཆོད་པ་ནི། ཡང་རང་ཉིད་ཡི་དམ་དུ་བསྒོམས་ལ། ལག་པའི་མཐིལ་ལས་ནི། པདྨ་འདབ་མ་བརྒྱད་པ་བསམས་ལ། དེ་ལ་གཤིན་རྗེའི་ལྷ་ཚོགས་བསམས་ལ། དེ་ལ་དགུག་གཞུག་བྱས་ལ། །དེ་ལ་ལག་

པ་གཡས་པ་བདག་གི་ཐུགས་ཀ་ནས་བཏོན་ལ། སྲིན་མཐེབ་ཀྱིས་བདུད་རྩི་གཏོར་ཞིང་། ཨོཾ་ཨཱཿཧཱུཾ་བརྗོད་པས་ལྷ་མཉེས་པར་བསམ། དེ་ནས་ལྷ་རྣམས་རང་གི་སྤྱི་བོ་ན་མར་ཐིམ་པར་བསམ། ལག་པའི་ཆང་དེ་སྣོད་དུ་གཏིགས་སོ། །ཚོགས་ཀྱི་ཕུད་རྣམས་ལ་གཏོར་མ་བྱ་ཞིང་།
ལྷག་མ་རྣམས་ལ་བདུད་རྩིར་གྱུར་པའི་ཆོ་ག་བྱས་ལ། གཏོར་མ་རྣམས་འབྱུང་པོ་རྣམས་ལ་དབུལ་ལོ། །དེ་ནས་རྣལ་འབྱོར་ཕོ་མོ་རྣམས་རང་རང་གི་ཐུགས་དམ་མཆོད་ཅིང་བསྒོམ་པ་དང་། བཟླས་པ་བྱས་ནས་ལས་ཀྱི་སློབ་དཔོན་གྱིས་གཟིགས་ཤིག་ལ་སོག་པའི་བ་དན་དང་། ལྕགས་ཀྱུས་འདྲེན་
པར་བྱའོ། །དེ་ནས་ཚོགས་ལ་རོལ་ལོ། །དེའི་བར་དུ་གླེང་མོ་དང་། འཐབ་རྩོད་དང་། དྲི་བར་མི་བྱའོ། །འགྲོ་ན་ཕྱག་གསུམ་བཙལ་ལ་ཞུས་ལ་འགྲོའོ། །དེ་ནས་ལྷག་གཏོར་གཏང་ངོ་། །ལག་པའི་མཆོད་པ་དཱ་ན་ཤཱི་ལས་བསྒྱུར་བ་རྫོགས་སོ།། ༄༅༅། །རྒྱ་གར་སྐད་དུ། ཀྲྀཥྞ་
ཡ་མཱ་རི་མཎྜལ་སྟུ་ཏེ་ནཱ་མ། བོད་སྐད་དུ། གཤིན་རྗེ་གཤེད་ནག་པོའི་དཀྱིལ་འཁོར་གྱི་བསྟོད་པ་ཞེས་བྱ་བ། བཅོམ་ལྡན་འདས་གཤིན་རྗེའི་གཤེད་ནག་པོ་ལ་ཕྱག་འཚལ་ལོ། །ཙཱརྩི་ཀཱ་སོགས་བྱམས་སོགས་པས། །འཁོར་ལོའི་གཙོ་བོ་སྐུལ་བར་བྱེད། །རྡོ་རྗེ་གླུ་ཡི་ངོ་ཉིད་དུ། །ཕུན་
ཚོགས་ཉམས་འབྲལ་མཐོང་ནས་ནི། །ཁུ་བའི་གཟུགས་ནི་ཡོངས་གྱུར་ནས། །མཾ་སྔོན་ཉི་མ་ལས་བྱུང་བ། །མི་བཟད་ཁྲོ་བཅས་མདོག་སྔོན་པོ། །རུས་པའི་རྒྱན་གྱིས་རྣམ་པར་བརྒྱན། །རྭ་རྣོ་འབར་ཞིང་སྤུ་རེ་སྐྱ། །རྨིག་པས་བརྐོ་ཞིང་འཇིགས་སྦྱིན་པས། །མ་ཧེ་ཡི་ནི་རྒྱབ་གནས་པ། །རྡོ་རྗེ་
སྔོན་པོ་འོད་དང་བཅས། །ས་བོན་བཅས་པ་དང་ཉིད་ཀྱིས། །མ་ལུས་དུས་ནི་འཇིགས་བྱས་ནས། །བདག་ཉིད་ལ་ནི་ཡང་དག་བསྡུས། །འཇིགས་ཆེན་པོ་ཡང་འཇིགས་པར་བྱེད། །མ་ཧེ་རྡོ་རྗེའི་རྣལ་འབྱོར་ཏེ། །རྣམ་ཤེས་ཕུང་པོ་རྣམ་དག་ལས། །དཀྱིལ་འཁོར་གཙོ་བོ་གཤིན་རྗེ་གཤེད། །
འཇིག་རྟེན་གསུམ་གྱི་བདུད་ཀྱི་འཁོར། །འོད་ཟེར་དྲག་པོ་སྤྲོས་པས་སྐྲོད། །དྲག་པོ་མུན་འདྲའི་གཟུགས་དྲག་པོ། །འགྲོ་བ་ཀུན་གྱི་ཉོན་མོངས་པའི། །དྲི་མ་བསྡུས་པས་ནག་པོ་ཉིད། །རྟག་པའི་འཁོར་བ་མྱ་ངན་འདས། །གཤིན་རྗེ་དེས་འདུལ་གཤིན་རྗེ་གཤེད། །ཞི་བས་མི་འདུལ་

དེས་འདུལ་བས། །དེས་ན་ཁྲོ་བོ་ཆེན་པོའོ། །ལྕེ་འདྲིལ་བ་ལ་འོད་འབྱིན་པ། །མཆེ་བ་ཤིན་ཏུ་གཙིགས་པ་སྟེ། །སྨིན་མ་སྨ་ར་མགོ་སྐྱེས་སེར། །གཡོན་བརྐྱང་བ་ཡི་གནས་པ་ཡིས། །འཇིག་རྟེན་དྲན་པ་མེད་པར་བྱེད། །རྣམ་པར་ཐར་པའི་སྒོ་གསུམ་ཉིད། །རྣམ་པར་དག་པས་ཞལ་གསུམ་སྟེ། །
རྩ་བའི་ཞལ་ནི་ནག་པོ་ཆེ། །གཡས་པ་ཟླ་བའི་འོད་དང་འདྲ། །གཡོན་པ་ཁྲག་དང་རབ་ཏུ་འདྲ། །རྡོ་རྗེའི་རྒྱན་གྱིས་རྣམ་པར་བརྒྱན། །ཐུང་ཞིང་གསུས་པ་འཕྱང་ལ་སྦོམ། །མགོ་བོའི་ཕྲེང་བས་རྣམ་པར་བརྒྱན། །ཕ་རོལ་ཕྱིན་དྲུག་ཡོངས་སུ་ནི། །རྫོགས་པར་བསྒོམས་པས་ཕྱག་དྲུག་སྟེ། །སེམས་
ཅན་དག་ནི་ཐམས་ཅད་ཀྱི། །ཇི་སྙེད་སྡིག་པ་ཡི་ནི་ལས། །དེ་གཅོད་གྲི་གུག་གཡས་པས་བསྣམས། །བདེ་བ་སྐྱོང་པ་ཉིད་ཀྱི་ནི། །གཡོན་གྱི་ཕྱག་ན་ཐོད་པ་བསྣམས། །ཚོགས་གཉིས་རྫོགས་པ་ཉིད་ཀྱི་ནི། །ཉིད་མཚུངས་ཤེས་རབ་ཀྱིས་འཁྱུད་ཅིང་། །བདེ་བར་འཁྱུད་ཅིང་གཞན་དོན་འདོད། །
ལྷན་ཅིག་སྐྱེས་པའི་ངོ་བོ་ཉིད། །གཡས་པའི་ཕྱག་གི་ལྷག་མ་ལ། །རྡོ་རྗེས་སེར་སྣ་ལ་སོགས་འཇོམས། །ཉོན་མོངས་དགྲ་རྣམས་རྣམ་འཇོམས་པས། །རལ་གྲི་འབར་བ་བསྣམས་པ་སྟེ། །གཡོན་པའི་ཕྱག་གི་ལྷག་མ་ལ། །གཏུབ་ཅིང་སྦྱོང་བའི་འཁོར་ལོ་དང་། །སྐྱོན་གྱིས་མ་གོས་ཆུ་
སྐྱེས་བསྣམས། །ཞེ་སྡང་ཉོན་མོངས་འཇོམས་མཛད་པས། །སྦྲུལ་གྱི་དབང་པོས་རྒྱན་དུ་བྱས། །ཀླུ་རྒྱལ་སྔོན་པོ་དགའ་བོ་ཡིས། །སྐྲ་བཅིངས་ཤིན་ཏུ་འཇིགས་པར་བྱེད། །ཏཀྵ་ཀ་ཀླུ་དམར་པོ་ཡིས། །རྣ་ཆ་གདུབ་སྐོར་བྱས་པས་འཇིགས། །རིགས་ལྡན་ཁྲ་བོས་དཔུང་རྒྱན་ཏེ། །དུང་སྐྱོང་
ཞེས་པའི་ཀླུ་དེ་ནི། །སེར་པོ་ལག་པའི་གདུ་བུར་བྱས། །པདྨ་དཀར་པོས་དོ་ཤལ་བྱས། །ཀརྐོ་ཊ་ནི་ལྗང་གུ་སྟེ། །སེ་རལ་ཁ་རུ་བྱས་པས་མཛེས། །བདུད་རྩི་མདོག་དང་འདྲ་བའི་ཀླུ། །ནོར་རྒྱས་བུས་ནི་སྐ་རགས་བྱས། །པདྨ་ཟླ་བ་ལྟར་དཀར་མདོག །པདྨ་ཆེན་པོ་རྐང་གདུབ་ཡིན། །ཀུན་ཀྱང་
ཕུཊ་སྒྲ་དྲག་པོ་སྒྲོགས། །ལྕེ་གཉིས་མཆེ་བའི་ཕྲེང་བ་ཅན། །ཆོས་སྐུའི་རང་བཞིན་ཉིད་ཕྱིར་དུ། །ལོངས་སྤྱོད་རྫོགས་དང་སྤྲུལ་པ་ཡིས། །གཟུགས་སུ་མཛད་པའི་རང་བཞིན་ཏེ། །ཆོས་དབྱིངས་ཡེ་ཤེས་རང་བཞིན་གྱིས། །ཞེ་སྡང་འཇོམས་མཛད་ཕྱག་འཚལ་བསྟོད།། །།ཤར་དུ་ཀྵེ་དང་

འཁོར་ལོ་ལས། །གཟུགས་ཀྱི་ཕུང་པོ་རྣམ་དག་པས། །རྟག་པ་ཕྱག་དྲུག་དཀར་པོ་སྟེ། །རྩ་བའི་ཞལ་ནི་དཀར་པོ་ལ། །གཡས་པ་གནག་ཅིང་གཡོན་པ་དམར། །གཡས་པ་འཁོར་ལོ་རལ་གྲི་ཕྱག །གཡོན་པ་རིན་ཆེན་ཆུ་སྐྱེས་འཛིན། །ཟླ་བའི་དཀྱིལ་འཁོར་མཉམ་པར་
གནོན། །མེ་ལོང་ལྟ་བུའི་ཡེ་ཤེས་ཀྱིས། །གཏི་མུག་འཇོམས་མཛད་ཕྱག་འཚལ་བསྟོད། །ལྷོ་རུ་མ་དང་རིན་ཆེན་ལས། །ཚོར་བའི་ཕུང་པོ་རྣམ་དག་པས། །བྱུང་བ་ཕྲ་མ་གཤིན་རྗེ་གཤེད། །བཙོ་མ་གསེར་གྱི་མདོག་འདྲ་མ། །རྩ་བའི་ཞལ་ནི་སེར་པོ་སྟེ། །གཡས་པ་གནག་ཅིང་གཡོན་
པ་དཀར། །གཡས་ན་རིན་ཆེན་རལ་གྲི་བསྣམས། །གཡོན་ན་འཁོར་ལོ་ཆུ་སྐྱེས་ཉིད། །མཉམ་པ་ཉིད་ཀྱི་ཡེ་ཤེས་ཀྱིས། །ཕྲ་མ་འཇོམས་མཛད་ཕྱག་འཚལ་བསྟོད། །མེ་དང་པདྨ་ལས་བྱུང་བ། །ནུབ་ཏུ་འདོད་ཆགས་རྡོ་རྗེ་ཅན། །འདུ་ཤེས་ཕུང་པོ་རྣམ་དག་ཉིད། །པདྨ་རཱ་ག་འདྲ་བའི་
འོད། །རྩ་བའི་ཞལ་ནི་དམར་ལ་གདངས། །གཡས་པ་གནག་ཅིང་གཡོན་པ་དཀར། །གཡས་ན་པདྨ་རལ་གྲི་བསྣམས། །ཕྱག་གཡོན་རིན་ཆེན་འཁོར་ལོ་སྟེ། །སོ་སོར་རྟོག་པའི་ཡེ་ཤེས་ཀྱིས། །འདོད་ཆགས་འཇོམས་མཛད་ཕྱག་འཚལ་བསྟོད། །ད་དང་རལ་གྲི་ལས་བྱུང་བ། །འདུ་བྱེད་
ཕུང་པོ་རྣམ་དག་པས། །བྱང་དུ་ཕྲག་དོག་གཤིན་རྗེ་གཤེད། །མརྒད་ཨུཏྤལ་ལྟ་བུའི་འོད། །རྩ་བའི་ཞལ་ནི་ལྗང་གུ་སྟེ། །གཡས་པ་གནག་ཅིང་གཡོན་པ་དཀར། །གཡས་ན་རལ་གྲི་འཁོར་ལོ་བསྣམས། །མཛེས་པའི་ནོར་བུ་པདྨ་ལས། །བྱ་བ་ནན་ཏན་ཡེ་ཤེས་ཀྱིས། །ཕྲག་དོག་འཇོམས་
མཛད་ཕྱག་འཚལ་བསྟོད། །ཁྲོ་བོའི་གཟུགས་ཅན་ཐམས་ཅད་ཀྱང་། །ཞེ་སྡང་གཤིན་རྗེའི་མཚན་ཉིད་མཚུངས། །དེ་དག་པ་ཡི་ཕྱག་གཉིས་ལ། །གྲི་གུག་དང་ནི་ཐོད་པ་བསྣམས། །རང་གི་ཤེས་རབ་ལུས་དག་དང་། །བདེ་བའི་དངོས་པོ་གཉིས་མེད་རོལ། །ཉི་མའི་དཀྱིལ་འཁོར་མཉམ་
པར་གནོན། །རྡོ་རྗེ་རྩིབས་ཀྱི་རྩར་བཞུགས་ཤིང་། །མྱ་ངན་འདས་པའི་མཐའ་འཇོམས་ཤིང་། །སེམས་ཅན་དོན་མཛད་ཕྱག་འཚལ་བསྟོད། །ཤར་སྒོར་ཡ་དང་ཐོ་བ་ལས། །བྱུང་བ་སྔོན་པོའི་གཟུགས་ཅན་ཏེ། །འཇིག་ཚོགས་ལྟ་བ་རྣམ་དག་ཉིད། །གཡས་དཀར་གཡོན་དམར་དབུས་

སྔོན་ཞལ། །གཡས་ན་ཐོ་བ་རལ་གྲི་འཛིན། །ནོར་བུ་མཆོག་དང་པདྨ་གཡོན། །ཐོ་བ་ཞེ་སྡང་གཤིན་རྗེ་གཤེད། །བརྩོན་འགྲུས་སྟོབས་ཀྱི་རང་བཞིན་གྱིས། །ཕུང་པོའི་བདུད་འཇོམས་ཕྱག་འཚལ་བསྟོད། །ཙ་དང་དབྱུག་པ་ལས་བྱུང་ལྷོར། །དབྱུག་པ་གཤིན་རྗེ་གཤེད་མདོག་དཀར། །མཐར་
འཛིན་ལྟ་བ་རྣམ་དག་ཉིད། །གཡས་སྔོ་གཡོན་དམར་དབུས་དཀར་ཞལ། །གཡས་ན་དབྱུག་པ་རལ་གྲི་བསྣམས། །ཆུ་སྐྱེས་འཁོར་ལོ་གཡོན་གྱི་ཕྱག །དབང་པོའི་སྟོབས་ཀྱི་རང་བཞིན་གྱིས། །ཉོན་མོངས་བདུད་འཇོམས་ཕྱག་འཚལ་བསྟོད། །ནི་དང་པདྨ་ལས་བྱུང་ནུབ། །པདྨ་གཤིན་རྗེ་
གཤེད་ཉིད་ནི། །ལོག་པར་ལྟ་བ་རྣམ་དག་ཉིད། །གཡས་གནག་གཡོན་དཀར་དབུས་ཞལ་དམར། །གཡས་ན་པདྨ་རལ་གྲི་བསྣམས། །ཕྱག་གཡོན་རིན་ཆེན་འཁོར་ལོ་སྟེ། །དྲན་པའི་སྟོབས་ཀྱི་རང་བཞིན་གྱིས། །འཆི་བདག་བདུད་འཇོམས་ཕྱག་འཚལ་བསྟོད། །ར་དང་རལ་གྲི་ལས་
བྱུང་བ། །བྱང་དུ་རལ་གྲི་གཤིན་རྗེ་གཤེད། །ལྟ་བ་མཆོག་འཛིན་རྣམ་དག་ཉིད། །གཡས་གནག་གཡོན་དཀར་དབུས་ལྗང་ཞལ། །གཡས་ན་རལ་གྲི་འཁོར་ལོ་བསྣམས། །མཛེས་པའི་ནོར་བུ་པདྨ་གཡོན། །ཏིང་འཛིན་སྟོབས་ཀྱི་རང་བཞིན་གྱིས། །ལྷ་ཡི་བདུད་འཇོམས་ཕྱག་འཚལ་
བསྟོད། །ཀུན་ཀྱང་སྦྲུལ་གྱིས་རྣམ་པར་བརྒྱན། །རྣམ་འཇིགས་དགོད་པས་འཇིགས་བྱེད་པ། །སྐྲ་ནི་འབར་བ་གྱེན་དུ་འགྲེང་། །བསྐལ་བའི་མེ་ལྟར་འབར་ཞིང་འཕྲོ། །ཉི་མའི་དཀྱིལ་འཁོར་ལ་གནས་པ། །མཆེ་བ་གཙིགས་ཤིང་འཇིགས་པའི་ཞལ། །གྲི་གུག་ཐོད་པ་འཛིན་པར་མཛད། །
འཁོར་བ་བརྟགས་པའི་མཐའ་འཇོམས་ཤིང་། །མི་གནས་སྒྲོལ་མཛད་ཕྱག་འཚལ་བསྟོད། །སྣ་ཚོགས་རྡོ་རྗེའི་མཚམས་བཞི་རུ། །ལྷ་མོ་ཟླ་བའི་གདན་ལ་བཞུགས། །ཤར་ལྷོར་ཛ་དང་འཁོར་ལོ་ལས། །ལྷ་མོ་རྡོ་རྗེ་ཙཱ་རྩི་ཀཱ། །ས་ཁམས་རྣམ་དག་ཐབས་ཀྱི་བདག །སྒེག་མོ་དཀར་མོ་
ཆེར་ཁྲོ་མ། །གཏི་མུག་གཤིན་རྗེ་གཤེད་དང་མཚུངས། །བྱམས་པ་ཆེན་པོའི་ངོ་བོ་ཡིས། །ཉོན་མོངས་སྒྲིབ་འཇོམས་ཕྱག་འཚལ་བསྟོད། །དེ་བཞིན་ལྷོ་རུ་ས་དང་ནི། །རྡོ་རྗེ་ལས་བྱུང་རྡོ་རྗེ་ཕག །ཆུ་ཁམས་རྣམ་དག་སྟོབས་ཀྱི་བདག །ཁྲོ་ཞིང་ཕག་གི་གདོང་པ་ཅན། །ཞེ་སྡང་

གཤིན་རྗེ་གཤེད་དང་མཚུངས། །སྙིང་རྗེ་ཆེན་པོའི་ངོ་བོ་ཡིས། །ལས་ཀྱི་སྒྲིབ་འཇོམས་ཕྱག་འཚལ་བསྟོད། །ནུབ་དང་བྱང་གི་མཚམས་སུ་ནི། །དོ་སྐྱེས་གཙོ་མོ་རབ་ཏུ་དམར། །མེ་ཁམས་རྣམ་དག་སྨོན་ལམ་བདག །རབ་ཏུ་ཞི་བའི་དབྱངས་ཅན་མ། །འདོད་ཆགས་
གཤིན་རྗེ་གཤེད་དང་མཚུངས། །དགའ་བ་ཆེན་པོའི་ངོ་བོ་ཡིས། །ཤེས་བྱའི་སྒྲིབ་འཇོམས་ཕྱག་འཚལ་བསྟོད། །བྱང་དང་ཤར་གྱི་མཚམས་སུ་ནི། །རུ་སྐྱེས་གཽ་རཱི་ལྗང་གུ་མ། །རླུང་ཁམས་རྣམ་དག་ཡེ་ཤེས་བདག །འཇིགས་བྱེད་ཕྲག་དོག་གཤིན་རྗེ་གཤེད། །གཟུགས་དང་མཚན་མ་མཆོག་
ཏུ་འཛིན། །བཏང་སྙོམས་ཆེན་པོའི་ངོ་བོ་ཡིས། །སྐྱེ་བའི་སྒྲིབ་འཇོམས་ཕྱག་འཚལ་བསྟོད། །མཐའ་གཉིས་རབ་ཏུ་སྒྲོལ་མཛད་དེ། །རང་རིག་གཙོ་ལ་ཕན་འདོགས་ཤིང་། །ཐབས་དང་ཤེས་རབ་དབྱེར་མེད་བདག །ལྷ་མོའི་ཚོགས་ལ་ཕྱག་འཚལ་བསྟོད། །མཚམས་བཞིར་ཎ་ཡོ་ནི་ར་
ལས། །ཕྱི་རོལ་གཟུགས་རྫོགས་རྣམ་དག་ལས། །དཀྱིལ་འཁོར་དུ་ནི་ཐོད་པ་གནས། །ཆོས་དབྱིངས་ཀུན་དུ་འགྲོ་བའི་ཕྱིར། །བདུད་རྩི་རྣམ་པ་ལྔ་ཡིས་བཀང་། །དེ་ལྟར་མི་མཐུན་ཚོགས་བཅོམ་ནས། །རབ་ཏུ་རྒྱལ་བའི་རྟགས་མཚན་ཉིད། །ཐོད་པ་བཞི་ཡི་ངོ་བོ་སྟེ། །བདེ་བ་ཆེན་པོ་ཕྱག་
འཚལ་བསྟོད། །བསོད་ནམས་ཡེ་ཤེས་ཆེན་པོ་ལས་བྱུང་སྐུ་གསུང་ཡེ་ཤེས་ལྔར་ལྡན་འཇིགས་གཟུགས་ལ། །བདག་ཉིད་དད་པའི་མཐུ་ཡིས་སྐུ་ཡི་ཡོན་ཏན་ཙམ་མཐོང་དད་པའི་དབྱངས་ཀྱིས་བསྟོད་པ་ཡིས། །ཁམས་གསུམ་འཁོར་བའི་རྒྱ་མཚོར་དོང་རྣམས་རྣམ་རྟོག་རླུང་གིས་ཕྱོགས་བཅུར་
གཡེངས་པས་སྡུག་བསྔལ་རྣམས། །སྐྱེ་རྒས་ན་འཆི་སྤངས་ནས་འཁོར་བའི་རྒྱ་མཚོ་ལས་རྒལ་བླ་མེད་བྱང་ཆུབ་ཐོབ་པར་ཤོག །སློབ་དཔོན་དཔལ་འཛིན་གྱི་དགོངས་པ་ཉེ་བར་བསྡུས་པ་ལས། །གཤིན་རྗེ་གཤེད་ནག་པོའི་དཀྱིལ་འཁོར་གྱི་བསྟོད་པ། ཨཱ་ཙཱརྱ་ཀཱིརྟིའི་ཞལ་སྔ་ནས་
མཛད་པ་རྫོགས་སོ།། ༄༅༅། །རྒྱ་གར་སྐད་དུ། ཡ་མཱ་རི་ཏུ་ནོ་ཏནྟ་བཛྲ་དྷྲྀཀ །བོད་སྐད་དུ། རྡོ་རྗེ་འཛིན་པས་གཤིན་རྗེ་གཤེད་པོ་ལ་བསྟོད་པའི་རྒྱུད། བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །དེ་ནས་འོག་མིན་གྱི་གནས་བཙུན་མོའི་བྷ་ག་

ལ། །ཁྲོ་བོའི་རྒྱལ་པོ་གཤིན་རྗེ་གཤེད་རང་གི་ཆེ་བ་བསྟོད་ཅིང་བཞུགས་སོ། །དེའི་ཚེ་རྡོ་རྗེ་འཛིན་པས་བཙུན་མོའི་བྷ་ག་རྒྱས་པར་བྱས་ཏེ། གཤིན་རྗེ་གཤེད་པོ་ལ་བསྟོད་པ། །ཧཱུཾ་ཁྲོ་བོའི་རྒྱལ་པོ་ཞེ་སྡང་གཤིན་རྗེ་གཤེད། །རང་བཞིན་སྤྲོས་བྲལ་ཆོས་ཀྱི་དབྱིངས་ལ་གནས། །མཚན་མའི་རྟོག་
མེད་རང་བཞིན་ལྷུན་གྱིས་གྲུབ། །འཆི་བདག་སྡང་འཇོམས་ཡེ་ཤེས་གཉིས་མེད་སྐུ། །དྲི་མེད་རྣམ་དག་ཐུགས་རྗེ་ཤུགས་ལས་སྐྱེས། །འབར་བའི་སྐུ་མཆོག་བཅོམ་ལྡན་གཤིན་རྗེ་གཤེད། །ལོངས་སྤྱོད་བདེ་བ་ཆེན་པོ་གཉིས་མེད་འཁྲིལ། །ཁ་སྦྱོར་འདོད་ཆགས་སྐྱོན་གྱིས་མ་
གོས་ཤིང་། །ཐུགས་རྗེའི་ཐབས་ཀྱིས་འགྲོ་བ་འདུལ་མཛད་པ། །དྲག་པོ་འདུལ་ཕྱིར་མི་བཟད་དྲག་པོའི་གཟུགས། །ཁྲོ་བོའི་རྒྱལ་པོ་གཞན་གྱིས་ཁྱོད་མཐོང་ནས། །ངོ་མཚར་རབ་ཏུ་འཇིགས་ཤིང་འབྲོས་པར་འགྱུར། །ཁྱོད་ཀྱི་ཐུགས་ནི་ཞེ་སྡང་འཆི་བདག་འཇོམས། །ཉོན་
མོངས་བདུད་མཛད་འགྲོ་བའི་མགོན་པོ་ཁྱོད། །མ་གཡོས་མི་རྟོག་ཆོས་ཀྱི་སྐུ་ལ་གནས། །རྣམ་རྟོག་དྲ་བ་གཅོད་མཛད་གཤིན་རྗེ་གཤེད། །ཞེ་སྡང་ཐུགས་ཀྱི་རིགས་ལ་ཕྱག་འཚལ་ལོ། །སྤྲོས་མེད་ཆོས་ཀྱི་དབྱིངས་ལས་མ་གཡོས་ཀྱང་། །ཞེ་སྡང་དྲག་པོས་གདུལ་ཕྱིར་འབར་བའི་
སྐུ། །འཆི་བདག་གཤིན་རྗེ་ཕོ་མོ་གདན་དུ་བཏིང་། །མ་ཧེའི་ཐོག་ན་ཞབས་གཉིས་བརྐྱང་བསྐུམ་བཞུགས། །སྟོབས་ལྡན་མ་ཧེ་དྲག་བརྒྱུག་ལྕགས་རྨིག་ཅན། །ཨོག་ཡུ་འབར་ཞིང་རྭ་རྣོ་ཉི་མའི་གདན། །ཁྱོད་ཀྱི་སྐུ་ནི་ཆར་སྤྲིན་ལྟ་བུ་སྟེ། །ཞལ་གསུམ་པ་ལ་ཕྱག་དྲུག་རྣམ་པར་
མཛེས། །མགོ་སྐྱེས་ཁམ་པ་སྨ་ར་གྱེན་དུ་འགྲེང་། །རིགས་བཞིའི་ཀླུ་དང་ཕྱག་རྒྱ་ལྔ་ཡིས་ནི། །ཁྱོད་ཀྱི་དབུ་ནི་མཛེས་པར་བརྒྱན་པ་ཡིན། །སྨིན་མཚམས་བར་ནི་མཐོང་ནས་ངེས་པར་འཇིགས། །མེ་མདག་ལྟ་བུའི་སྤྱན་དགུ་གྱེན་དུ་བཟློག །གྱེན་འབུད་ཤངས་ནས་ཞེ་སྡང་གདུག་པའི་
སྦྲུལ། །ཁྲག་གིས་བརླན་པའི་ཞལ་ནི་ཤིན་ཏུ་བགྲད། །མཆེ་བ་ཟླ་ཚེས་ཟང་ཡག་འབར་བ་གཙིགས། །རྔམ་པའི་ཧཱུཾ་སྒྲོགས་ལྗགས་ནི་གྱེན་དུ་འདྲིལ། །ཤ་ཟའི་མགོ་བཅད་ལུས་ཀྱི་རྒྱན་དུ་ཐོགས། །ང་རྒྱལ་ཀུན་འཕྲོག་མི་ཐུང་འཇིགས་པའི་གཟུགས། །བདུད་བཞི་འཇོམས་མཛད་

འཁོར་ལོ་འབར་བ་སྟེ། །ཤེས་རབ་གཉིས་མེད་རལ་གྲི་ཐབས་ཀྱིས་གདེངས། །ལས་ཀྱི་དབྱུག་པ་དག་གིས་འཆི་བདག་འཇོམས། །ཉོན་མོངས་བསྲེག་མཁས་ཕྱག་གིས་འཁོར་བ་བསྡིགས། །ཉོན་མོངས་གཅོད་མཛད་ཤེས་རབ་དགྲ་སྟ་གདེངས། །ལོག་པར་
ལྟ་བ་བདེ་བ་ཆེན་པོར་འཆིང་། །རིགས་དང་ཤེས་རབ་ཕ་རོལ་ཕྱིན་པར་ལྡན། །གསུས་པ་ཆེ་ལ་ཐུར་དུ་བཤལ་བ་དང་། །མཚམས་ཐུང་རྔམ་ཆེན་ཁྱོད་ནི་མཐོང་བས་འཇིགས། །གཅན་གཟན་རྒན་པོ་སྟག་གི་ན་བཟས་བརྒྱན། །ཡན་ལག་ལྔ་ནི་ཀླུ་ལྔས་ལེགས་པར་དཀྲིས། །ཟག་པ་མེད་
པའི་བདེ་བས་ཀུན་ལ་ཁྱབ། །བསྐལ་པ་འཇིགས་པའི་མེ་ཡི་ནང་ན་བཞུགས། །རབ་ཏུ་མཛེས་པའི་སྐུ་འབར་འོད་ཚོགས་ཅན། །ཐབས་དང་ཤེས་རབ་བདེ་བས་གཉིས་མེད་འཁྲིལ། །རབ་བརྗིད་གཤིན་རྗེ་གཤེད་པོའི་སྐུ་མཐོང་ན། །ཁྲོ་བོའི་རྒྱལ་པོ་གཞན་གྱི་ལག་ཆ་འཆོར། །དུས་གསུམ་
སངས་རྒྱས་རྣམས་ཀྱང་ཁྱོད་ལ་བསྟོད། །རྔམ་པའི་འཁོར་ཚོགས་རབ་ཏུ་འཇིགས་མཛད་པ། །འཇམ་དཔལ་གཤིན་རྗེའི་སྐུ་ལ་ཕྱག་འཚལ་བསྟོད། །འཁོར་ལོ་བཞི་ཡི་བདེ་བ་ཁྱོད་ལ་གནས། །དྲི་མེད་རྣམ་དག་གསུང་ནི་ཡང་དག་སྒྲོགས། །ཧྲཱིཿཥྚྲྀཿསྔགས་ཀྱིས་སྲིད་གསུམ་གདུག་
པ་འདུལ། །རྡོ་རྗེ་ཕག་མོ་རབ་ཏུ་དགྱེས་མཛད་མ། །ཧ་ཧ་བཞད་པའི་དྲེགས་པས་དགྱེས་མཛད་ཅིང་། །གདུག་པ་ཟ་བྱེད་རྒྱལ་བའི་གསུང་མཆོག་ལ། །ཕྱོགས་བཅུའི་རྒྱལ་བ་རྣམས་ཀྱིས་མགྲིན་གཅིག་བསྟོད། །རྒྱལ་བ་གསུང་བ་འཁོར་ལོ་རྣམ་པར་དག །མགོན་པོ་གཤིན་རྗེ་གཤེད་ལ་
ཕྱག་འཚལ་བསྟོད། །ནམ་མཁའི་མཐའ་དང་མཉམ་པའི་འགྲོ་དོན་མཛད། །ཕྲིན་ལས་ཐོགས་པ་མེད་པ་ཕྱོགས་བཅུར་ཁྱབ། །ལས་ཀྱི་འཁྲུལ་འཁོར་ཁྱོད་ཀྱིས་གཅོད་མཛད་ཅིང་། །ཕྲིན་ལས་བཞི་ཡི་འཁོར་ལོ་རྫོགས་མཛད་པ། །ཁྲོ་བོའི་རྒྱལ་པོ་ཞེ་སྡང་གཤིན་རྗེ་གཤེད། །སྐུ་གསུང་
རྫོགས་མཛད་འཇམ་དཔལ་གཤིན་རྗེ་གཤེད། །གདུག་པ་ཟ་བྱེད་འཇམ་དཔལ་གཤིན་རྗེའི་སྐུ། །ཕྲིན་ལས་མཐར་ཕྱིན་ཁྱོད་ལ་ཕྱག་འཚལ་བསྟོད། །གང་ཞིག་དུས་གསུམ་དག་ཏུ་འདི་དག་གིས། །རྟོག་མེད་གུས་པ་སེམས་ཀྱིས་གང་བསྟོད་པ། །དེ་ནི་རྒྱལ་བ་ཐམས་ཅད་བསྟོད་པས་

ན། །ཚེ་གཅིག་གིས་ནི་གཤིན་རྗེ་གཤེད་འདྲར་འགྱུར། །རྡོ་རྗེ་འཛིན་པས་གཤིན་རྗེ་གཤེད་པོ་ལ་བསྟོད་པ་ལེའུའི་རྒྱུད་ལས་བསྟོད་པའི་ལེའུའོ། །རྫོགས་སོ།། ༄༅༅། །རྒྱ་གར་སྐད་དུ། ཤྲཱི་བཛྲ་བྷ་ར་བ་ཏནྟྲ་ཊཱི་ཀཱ། བོད་སྐད་དུ། དཔལ་རྡོ་རྗེ་འཇིགས་བྱེད་ཀྱི་རྒྱུད་ཀྱི་
དཀའ་འགྲེལ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །བླ་མའི་ཞབས་ལ་དད་པས་བཏུད་ནས་ནི། །དཔལ་ལྡན་གཤིན་རྗེ་གཤེད་ཀྱི་རྟོག་པ་འདིར། །མན་ངག་གང་ཡོད་བདག་ཉིད་དྲན་ཕྱིར་ནི། །དཀའ་བའི་གནས་ཙམ་བདག་གིས་བྲི་བར་བྱ། །བླ་མ་
མཆོག་རྣམས་ལེགས་པར་ཡུན་རིངས་དུས་སུ་དཀའ་བས་མཉེས་བྱེད་མི་ནུས་པ། །དབུལ་པོས་གཏེར་ཆེན་ངོ་ཤེས་བརྐོ་བའི་བྱ་བས་ངལ་ཏེ་ཡོངས་སུ་དོར་བ་བཞིན། །དེ་ལྟར་དབུལ་པོ་འདྲ་བའི་བློ་ངན་རང་ལ་འཚེ་བ་དེ་ལ་ལུང་གི་ཚོགས། །ལེགས་བསྲུབས་ལས་བྱུང་མར་གྱི་སྙིང་ཁུ་ལྟ་བུ་
སླར་ཡང་བླུད་མི་བྱ། །ཇི་ལྟར་ཞག་གི་རིམ་པས་ཟླ་བའི་ཆ་ཤས་འཕེལ་ཞིང་བཅོ་ལྔར་མཐར་ཐུག་པ། །བཅུ་དྲུག་ནས་བརྩམས་འདྲི་ཞིང་འཕེལ་མེད་མཁས་པའི་འགྲོ་བའི་ཤེས་པ་མངོན་སུམ་ལྟར། །ཡུན་རིངས་བསྙེན་བཀུར་དུས་སུ་དེ་ཡི་སྣོད་ནི་རིམ་གྱིས་བླ་མས་སྦྱར་བྱས་ཏེ། །དད་བརྟན་བསྙེན་
བཀུར་བྱས་ལ་བླ་མ་དུས་སུ་བྱིན་གྱིས་མ་བ