Luận tạng Tây Tạng (Tengyur) — Tập 22

གནས་པའི་ཡེ་ཤེས་འཁོར་ལོ་བལྟས་ལ་མཆོད་ཡོན་
ལ་སོགས་པས་མཆོད་ཅིང་བཏུང་ལ། རང་ཡང་དེའི་རྣལ་འབྱོར་ཅན་དང་ལས་ཐམས་ཅད་པའི་གཟུགས་ཀྱིས་སློབ་མའི་གཡོན་པ་དང་གཡས་པའི་མིག་དག་ལ་ཛཿལས་སྐྱེས་པའི་ཟླ་བ་དང་ཉི་མ་སེར་པོ་བསམས་ལ་རྡོ་རྗེའི་འགྲོས་ཀྱིས་ཐིག་སྐུད་དེ་གཡོན་པའི་རྡོ་རྗེ་ཁུ་ཚུར་གྱིས་
བཟུང་ནས་ལྟེ་བར་བཟུང་སྟེ། སྒྲུབ་པའི་གྲོགས་ཀྱིས་ཀྱང་དེ་བཞིན་དུ་བཟུང་བའི་སྐུད་པ་དེ་ཛཿཡིག་གསུམ་དང་། ཛཿཡིག་གསུམ་གྱིས་སྒྲུབ་པའི་གྲོགས་པོ་དེ་ལ་གཏད་པར་བསམས་ལ་སྔགས་དེས་དེ་བཞིན་དུ་བཀུག་པར་བསམས་ལ། སློབ་དཔོན་བྱང་དུ་གནས་ཤིང་ཁ་ལྷོར་
བལྟས་པ་དང་ནུབ་ཏུ་ཁ་བལྟས་ཏེ་ཤར་དུ་གནས་པས་རང་གི་མདུན་དུ་གནས་པའི་སློབ་མ་དང་བཅས་པས་ལྟེ་བ་དང་མཉམ་པའི་ནམ་མཁའ་ལ་གདབ་ཅིང་རྡོ་རྗེ་དང་བཅས་པའི་ལག་པའི་མཐེ་བོང་དང་མིང་མེད་ཀྱིས་ཐིག་སྐུད་བཟུང་སྟེ་གདབ་པའི་སྒྲ་བྱའོ། །ཐིག་གདབ་པ་ཐམས་
ཅད་དུ་ཡང་། ཨོཾ་བཛྲ་ས་མ་ཡ་སཱུ་ཏྲཾ་མ་ཏི་ཀྲ་མ་ཧཱུཾ་བྷྲཱུཾ་ཨོཾ་ཧྲཱིཿཁཾ་ཧཱུཾ་ཞེས་བརྗོད་དོ། །དེ་ཐམས་ཅད་ཐིག་སྐུད་དེའི་སྒྲས་ནམ་མཁའ་ཁྱབ་པའི་སངས་རྒྱས་རྣམས་བསྐུལ་ཏེ་དེ་དག་ཀྱང་བྱོན་ཏེ་ཐིག་སྐུད་ཀྱི་ནང་དུ་ཐིམ་པའོ། །དེའི་དུས་སུ་ནམ་མཁའི་ཐིག་བཞིན་དུ་ས་ལ་ཚངས་པའི་
ཐིག་གཉིས་ལག་པ་གཉིས་མཉམ་དུ་བབ་པས་གདབ་པར་བྱའོ། །དེ་གསུངས་པ། དང་པོ་གཤིན་རྗེར་ཁ་བལྟས་ཏེ། །འཁོར་ལོའི་ས་ཡི་བྱང་དུ་གནས། །མཁའ་དང་ས་ལ་ཐིག་གདབ་བྱ། །བློ་ལྡན་དང་བཅས་གཡོན་སྐོར་དུ། །ཤར་ནས་ནུབ་ཏུ་བལྟ་

བ་ཡིས། །སླར་ཡང་ཚངས་པའི་ཐིག་གཉིས་ལ། །མེར་གནས་ནུབ་ཏུ་ཁ་བལྟས་པས། །ལྷོ་ཡི་ཆར་ནི་ཐིག་གདབ་བྱ། །རླུང་ནས་ཤར་དུ་ཁ་བལྟས་པས། །བྱང་གི་ཆར་ནི་གདབ་པར་བྱའོ། །སློབ་དཔོན་བསྐོར་ཏེ་རླུང་གནས་ཤིང་། །ལྷོར་ནི་མངོན་
དུ་ཕྱོགས་པར་བྱའོ། །ནུབ་ཀྱི་ཆར་ནི་བཏབ་ནས་སུ། །སྔགས་པ་བྱང་དུ་མངོན་ཕྱོགས་ཤིང་། །མེ་ཡི་གནས་སུ་གནས་པ་ཡིས། །ཤར་གྱི་ཆ་ཐིག་བརྩམ་པར་བྱ། །མེ་ལ་སོགས་པར་གནས་པ་ཡིས། །མཚམས་ཀྱི་ཐིག་ནི་གདབ་པར་བྱ། །ཕྱོགས་སོགས་དབྱེ་བ་ཤེས་
ནས་སུ། །ཐིག་གདབ་པ་ནི་བརྩམ་པར་བྱ། །ཞེས་སོ། །དེ་ལ་ཐོག་མར་མཎྜལ་ཁྲུ་གང་བའི་དཀྱིལ་དུ་བཙུགས་པའི་གྲིབ་ཚོད་ཀྱི་ཤིང་བུ་མཐོ་གང་པའི་གྲིབ་མ་ཉིན་མཚན་མཉམ་པའི་དུས་སུ་ནང་དུ་འཇུག་པ་དང་། ཕྱིར་འབྱུང་བའི་རྩེ་མོ་དཀྱིལ་འཁོར་གྱི་རེ་ཁཱའི་དཀྱིལ་དུ་གང་
འཇུག་པ་དེར་ཐིག་ལེ་གཉིས་བྱས་པ་ནི་ནུབ་དང་ཤར་ཡིན་ནོ། །དེའི་སྟེང་དུ་སྐུད་པ་ཁྲུ་གང་པ་བཟུང་ལ་མཎྜལ་གཉིས་བྱས་པས་ཉེར་འབྱུང་ངོ་། །མཇུག་མ་དང་ཁའི་མཐར་བྱས་པའི་ཐིག་ལེ་ལྷོ་དང་བྱང་གི་སྟེང་དུ་སྲད་བུ་བཟུང་སྟེ་མཎྜལ་གཞན་གཉིས་བྱའོ། །དཀྱིལ་འཁོར་མ་
བྱས་པར་འཆར་བའི་དང་ནུབ་པའི་ཚེ་སོར་བཅུ་གཉིས་པའི་ཤིང་གི་གྲིབ་མའི་རྩེ་མོར་བྱས་པའི་ཐིག་ལེ་གཉིས་དུས་རྟག་ཏུ་ནུབ་དང་ཤར་ཡིན་ནོ་ཞེས་པ་མན་ངག་གོ། །ཐོག་ཡོད་པའི་ས་རུ་ཕྱོགས་བཞིར་ཐིག་ལེ་བཞི་བྱས་ལ་སྔར་བཞིན་མཎྜལ་བཞི་བྱས་ཏེ། དེ་ལ་ཕྱོགས་ཀུན་
དུ་ཉའི་ཁ་དང་མཇུག་མའི་དཀྱིལ་དུ་བཟུང་ནས་མེ་རིའི་མཐའི་བར་དུ་ཚངས་པའི་ཐིག་གཉིས་གཡོན་པ་སྐྱིལ་ཀྲུང་ཕྱེད་པ་བྱས་ཏེ་རྐང་པ་གཡས་པ་ས་ལ་བཙུགས་ཏེ། དེ་ལས་བཟློག་པར་གནས་པའི་སློབ་མ་དང་བཅས་པ་གཡོན་པའི་རྡོ་རྗེ་ཁུ་ཚུར་གྱིས་བཟུང་བའི་ཐིག་སྐུད་ཀྱིས་ཕྱིར་
བསྐྱེད་ཅིང་གདབ་པོ། །མཚན་མིན་གྱིས་ནི་གྲུབ་པ་མེད། །ཐིག་སྐུད་ཆད་ན་སློབ་དཔོན་འཆི། །ཕྲ་ཞིང་སྦོམ་པ་ལས་ནི་ནད། །ཕྱོགས་ལ་རྨོངས་ན་སློབ་མ་འཁྲུལ། །གཡས་སྐོར་གྱི་ནི་སྦྱོར་བ་ཡིས། །སློབ་མ་འཆི་བར་བཤད་པ་ཡིན། །འཁོར་ལོ་ཉིས་འགྱུར་རིང་བ་

ཡི། །སྒོ་ཡི་ཉི་ཤུ་ཡི་ནི་ཆའི། །སྐུད་པས་དཔལ་ལྡན་ཧེ་རུ་ཀའི། །བདག་ཉིད་ལུས་ཀྱིས་མཁས་པས་བྲི། །ཞེས་གསུངས་པས། འཁོར་དང་བཅས་པའི་རྩ་བའི་དཀྱིལ་འཁོར་ནི་འདིར་སྣ་ཚོགས་རྡོ་རྗེའི་ལྟེ་བའི་མཐའ་ཡོངས་སུ་བཅད་པ་རྩ་བའི་ཐིག་ལས་ཕྱི་རོལ་དུ་ཆ་ཆུང་བརྒྱད་
པའི་བར་དུ་སྟེ་ཆ་ཆུང་བཞི་བཅུ་རྩ་བརྒྱད་པའོ། །དེའི་ཕྱི་རོལ་དུ་ཆ་ཆུང་བཅུ་གཉིས་དང་། གཉིས་དང་། གཉིས་དང་། གཉིས་དང་། གཉིས་དང་། བཞི་ཉིད་དུ་རིམ་གྱིས་རྟ་བབས་དང་། གཉིས་ཆོས་ཀྱི་འཁོར་ལོ་དང་། གཉིས་རྭ་དང་། གཉིས་པདྨའི་འདབ་མ་དང་།
གཉིས་རྡོ་རྗེའི་ཕྲེང་བ་དང་། བཞི་འོད་ཟེར་གྱི་ཆ་རྣམས་ཏེ་ལོགས་གཅིག་ལ་ནི་ཆ་ཆུང་ཉི་ཤུ་རྩ་བཞི་དང་། ལོགས་གཉིས་པར་ཡང་དེ་ལྟར་རོ། །ཞེས་པས་ཐིག་སྐུད་ཆ་ཆུང་དགུ་བཅུ་རྩ་དྲུག་ཏུ་འགྱུར་རོ། །འཁོར་ལོའི་བརྒྱད་ཆ་ནི་སྒོ་སྟེ་དེའི་བཞི་ཆ་ཆུང་ངོ་། །ཚངས་
པའི་གཞོགས་གཉིས་སུ་ཆ་ཆུང་གཉིས་གཉིས་རྩ་བའི་ཐིག་གི་ས་དང་ལྷན་ཅིག་ཆ་ཆུང་བཞི་པའི་སྒོ་བཅོམ་ལྡན་འདས་ཀྱི་སྐུས་གཡོན་པ་དང་གཡས་པའི་མིག་གཉིས་ཀྱི་ཡི་གེས་ཟླ་བ་དང་ཉི་མར་བསྒོམས་ལ། ཁྲོ་བོའི་ལྟ་བས་ཀུན་དུ་བལྟ་ཞིང་ཧཱི་ཧཱི་ཞེས་བརྗོད་ཅིང་ཐར་པའི་སྒོའི་རྣམ་པར་
འཆིང་བའི་སྒྲིབ་པར་གྱུར་པ་དབྱི་བར་བྱའོ་ཞེས་ལྷག་པར་མོས་པས་དབྱི་བར་བྱའོ། །དེ་ནས། །རྩ་བའི་ཐིག་གི་ཕྱི་རོལ་དུ་གོ་རིམས་བཞིན་དུ་གཅིག་དང་། གཉིས་དང་། གཅིག་དང་། གཉིས་དང་། གཅིག་དང་། གཅིག་གི་བར་དོར་ནས་ཐིག་དྲུག་ནི་མཚམས་ཀྱི་
ཐིག་ལས་ཐད་ཀར་འཐོན་པ་སྟེ། དེ་ལ་དང་པོ་ནི་པཉྩ་རེ་ཁཱའིའོ། །གཉིས་པ་ནི་གར་གྱི་སྣམ་བུ་སྟེ་དེ་གཉིས་ཀྱི་རྩེ་མོ་ལ་རེག་པའི་ཆ་བཅུ་གཉིས་པའི་ཐིག་དང་ལྡན་པའི་ཚངས་ཐིག་ནས། ཆ་ཆུང་གསུམ་གྱི་བར་དུ་གནས་པའོ། །གསུམ་པ་ནི་རིན་ཆེན་ཕ་གུ་དང་དྲ་བ་དྲ་ཕྱེད་
དང་། རིན་ཆེན་ཤར་བུ་རྣམས་ཀྱི་ས་སྟེ་ཆ་ཆུང་བརྒྱད་སྤང་བར་རོ། །གཞན་ནི་ཟུར་ཐིག་གཞན་གྱི་བར་དུ་སྟེ་མདའ་ཡབ་ཀྱིའོ། །དེ་ནས་གར་གྱི་སྣམ་བུ་ལས་བྱུང་བའི་ཐིག་བཞི་སྟེ། །དེ་ལ་གཅིག་ནི་དར་དཔྱངས་ཀྱི་ས་སྟེ་ཐད་ཀའི་ཐིག་གསུམ་གྱི་རྩེ་མོ་ལ་རེག་པའོ། །དེའི་

གཞོགས་སུ་ཆ་ཆུང་རེ་རེའི་བར་དུ་རྟ་བབས་ཀྱི་ཀ་བ་དང་བར་སྣང་དང་རྡུལ་ཚོན་གྱིས་སྟེ་གསུམ་མོ། །བཞི་པོ་འདི་རྣམས་ལས་དང་པོ་གསུམ་ནི་སྲིད་དུ་ཆ་ཆུང་ལྔ་པའོ། །བཞི་པ་ནི་ཆ་ཆུང་བཞིའོ། །དཀྱིལ་འཁོར་དང་རྟ་བབས་ཀྱི་བར་སྣང་གི་ས་ནི་མུན་པའི་སྣམ་
བུར་ཡང་བརྗོད་དོ། །དེ་ནས་ཚངས་ཐིག་གི་ལོགས་སུ་ཆ་ཆུང་གཉིས་སྤངས་པར་རྩ་བའི་ཐིག་ནས་སྒོ་ཁྱུད་ཆ་ཆུང་བཞི་བཏབ་ནས་ཐད་ཀར་འགྲམ་པ་ཆ་ཆུང་གཉིས་སུ་སོང་ནས་སྟེང་དུ་ཆ་ཆུང་གཉིས་པའི་ལོགས་ཀྱི་ཐིག་གཅིག་གཉིས་འཁྱོག་པའོ། །དེའི་རྩེ་མོ་ནས་ཐད་ཀར་འཐོན་ཏེ་
ཚངས་ཐིག་ནས་ལོགས་གཞན་དུ་གནས་པའི་དེ་ལྟ་བུའི་ཀྱོག་པོའི་རྩེ་མོའི་བར་དུ་ཆ་ཆུང་བརྒྱད་པའི་གདུང་གི་ཐིག་གཅིག་གོ། །དེ་བཞིན་དུ་དེའི་ལོགས་ཀྱི་ཐིག་གི་རྩེ་མོ་ནས། །གཞན་དེའི་ལོགས་ཀྱི་ཐིག་གི་རྩེ་མོའི་བར་དུ་ཆ་ཆུང་བཅུ་པ་པཉྩ་རེ་ཁཱའི་ཐིག་གཅིག་གོ། །དེའི་ཕྱི་
ཆ་ཆུང་གཅིག་ནི་བར་སྣང་གི་སྣམ་བུའོ། །བྲི་བའི་དཀྱིལ་འཁོར་ལ་དར་དཔྱངས་ཐིག་ལ་ཐུག་པར་མདའ་ཡབ་བོ། །བསྒོམ་པའི་དཀྱིལ་འཁོར་ལ་ནི་ལོགས་ཀྱི་སྟེང་གི་བར་རོ། །གདུང་གི་འོག་ཏུ་ཡང་ཀ་བ་གཉིས་མ་བྲིས་ཀྱང་བསྒོམ་པའི་དཀྱིལ་འཁོར་ལ་ཤེས་པར་བྱ་སྟེ། ཀ་བ་
བརྒྱད་ཀྱིས་ཉེ་བར་མཛེས། །ཞེས་གསུངས་པའི་ཕྱིར་རོ། །ལོགས་ཀྱི་ཀ་བ་ནི་རྟ་བབས་རྣམས་ཁོ་ནའིའོ། །རྡུལ་ཚོན་གྱི་རྩིག་པ་ལ་ནི་རིན་པོ་ཆེ་དང་། དྲ་བ་དང་། དྲ་བ་ཕྱེད་པ་དང་། རིན་ཆེན་ཤར་བུ་དང་། མདའ་ཡབ་རྣམས་རིམ་གྱིས་སྟེང་ནས་སྟེང་དུ་གནས་པའོ། །
རིན་ཆེན་ཤར་བུ་ཐོག་གི་མཐའ་ནས་འཕྱང་བའོ། །ཀ་བའི་སྟེང་དུ་རྟ་བབས་ནི་ཆ་ཆུང་བཅུ་གཉིས་སོ། །དེ་ལ་ཀ་བའི་རྩེ་མོའི་ཕྱི་རོལ་དུ་ཐིག་བཅུ་གཅིག་སྟེ་བར་རྣམས་སུ་གསེར་དང་། རིན་པོ་ཆེའི་ཤར་བུ་དང་། རིན་ཆེན་དང་། རྨིག་པ་དང་། མུན་པ་དང་། བ་རན་
དང་། མུན་པ་དང་། རིན་པོ་ཆེའི་ཤར་བུ་དང་། རིན་པོ་ཆེ་དང་། རྨིག་པ་དང་། མདའ་ཡབ་ཀྱི་སྣམ་བུ་རྣམས་སོ། །དེ་རྣམས་ཀྱི་མུན་པའི་སྣམ་བུ་གཉིས་ནི་སོ་སོར་དཔངས་སུ་ཆ་ཆུང་ཕྱེད་དང་གཉིས་ཏེ་སྣམ་བུ་དགུ་ནི་སོ་སོར་ཆ་ཆུང་རེ་རེའོ། །བཅུ་གཅིག་པོ་འདིའི་ཐད་ཀའི་

ཚད་ནི། ཚངས་པའི་གཡས་དང་གཡོན་དུ་ནི། །ཆ་ཆུང་ཕྱེད་བཅས་མདའ་ཡི་མཐར། །སྣམ་བུ་ཆ་ཆུང་ཕྱེད་དང་གསུམ། །ཐིག་ནི་ཆ་ཆུང་ཕྱེད་དང་བཞི། །ཆ་ཆུང་དྲུག་མཐར་གཉིས་པ་དང་། །གསུམ་པ་ཆ་ཆུང་གསུམ་པའོ། །ཆ་ཆུང་བཞི་མཐར་བཞི་པ་ནི། །ཆ་ཆུང་ལྔ་སྟེ་
མདའ་ཕྱེད་བཅས། །གསུམ་དོར་ནས་ནི་ཕྱེད་དང་ལྔ། །གསུམ་ན་དུས་ནི་ཆ་ཆུང་ལྔ། །བཞི་ནི་ཆ་ཆུང་བདུན་རྣམས་ཏེ། །དྲག་པོའི་ཐིག་ནི་ཆ་ཆུང་མདའ། །སྣམ་བུ་ལྔ་པའི་སྟེང་གི་ནི། །ཐད་ཀར་ཆ་ཆུང་ཕྱེད་དང་བཞི། །བདུན་པའི་འོག་ལ་ཆ་ཆུང་གསུམ། །སྟེང་ནི་ཆ་ཆུང་དྲུག་
དེ་ནས། །སྣམ་བུ་རྣམ་མཐར་སྟེང་སོང་ཐིམ། །ནང་ནི་དེ་བཞིན་ལྷན་ཅིག་གོ། །ཀྱོག་པོ་གཅིག་གོ་འདི་ནང་དུའང་། །ཆ་ཆུང་ཕྱེད་ནས་དེ་བཞིན་གཞན། །ཞེས་བཤད་པས་ཚངས་ཐིག་གི་གཡས་དང་གཡོན་དུ་ཆ་ཆུང་ཕྱེད་དང་དྲུག་དོར་བར་སྣམ་བུ་དང་པོ་ཆ་ཆུང་ཕྱེད་དང་
གསུམ་པའོ། །དེའི་སྟེང་དུ་ཐིག་དང་པོ་ཆ་ཆུང་ཕྱེད་དང་བཞི་པའོ། །ཆ་ཆུང་དྲུག་གི་བར་དོར་བར་གཉིས་པ་དང་གསུམ་པའོ། །ཆ་ཆུང་བཞི་དོར་བར་བཞི་པ་ཆ་ཆུང་ལྔ་པའོ། །ཆ་ཆུང་ཕྱེད་དང་བཞི་དོར་བར་ལྔ་པ་ཆ་ཆུང་ཕྱེད་དང་ལྔ་པའོ། །ཆ་ཆུང་གསུམ་དོར་བར་དྲུག་པ་ཆ་ཆུང་
ལྔ་པའོ། །བདུན་པ་ལ་སོགས་པ་བཞི་ནི་ཆ་ཆུང་བདུན་པའོ། །བཅུ་གཅིག་པ་ནི་ཆ་ཆུང་ལྔ་པའོ། །འདིར་སྣམ་བུ་ལྔ་པའི་ཐད་ཀར་སྟེང་དུ་ཆ་ཆུང་ཕྱེད་དང་བཞི་པའོ། །བདུན་པའི་འོག་ལ་ཆ་ཆུང་གསུམ་སྟེ་སྟེང་ལ་ཆ་ཆུང་དྲུག་པའོ། །སྣམ་བུ་རྣམས་རེ་རེ་ཞིང་གི་ཕྱི་རོལ་གྱི་
མཐའི་གྱེན་དུ་ཇི་སྲིད་པའི་ཐིག་གཅིག་གོ། །ནང་གི་མཐར་ཡང་དང་པོའི་ཐིག་གི་ཆ་ཆུང་ཕྱེད་དོར་ནས་སྟེང་དུ་འགྲེང་བའི་ཐིག་གཅིག་གོ། །གཅིག་པོ་དེ་ནི་རྒྱུ་བའི་ཐིག་གཞན་དང་འབྲེལ་བས་འཁྱོག་པོར་མཐོང་སྟེ་ཇི་ལྟར་མཛེས་པར་བྲི་བར་བྱའོ། །འདིའི་ནང་རིན་པོ་ཆེ་ལ་སོགས་
པ་བྲི་བའི་དོན་དུ་ཆ་ཆུང་ཕྱེད་དོར་ནས་དེ་བཞིན་དུ་ཐིག་ཀྱོག་པོ་གཅིག་གོ། །སྟེང་དུ་ཆུ་སྲིན་གྱི་ཁ་ལས་འཐོན་པའི་པ་ཏྲ་ལ་སོགས་པ་ཇི་ལྟར་མཛེས་པའོ། །རྟ་བབས་ཀྱི་སྟེང་གི་ཚངས་ཐིག་ལ་ཆོས་ཀྱི་འཁོར་ལོ་རྩིབས་བཅུ་གཉིས་པའམ་བརྒྱད་པ་ཆ་ཆུང་གཉིས་པའོ། །དེའི་གདན་

ནི་པདྨ་དང་ཟླ་བའོ། །དེའི་ངོས་གཉིས་ལ་མདའ་ཡབ་ཀྱི་སྟེང་དུ་འཁོར་ལོ་ལ་མངོན་དུ་ཕྱོགས་པའི་རི་དགས་དང་རི་དགས་མོ་འཁོར་ལོ་ལས་ཆ་ཆུང་ཕྱེད་དུ་རིང་བར་གནས་པ་སྟེ། ཆ་ཆུང་གཅིག་ཏུ་མགྲིན་པ་དང་བཅས་པའི་གདོང་འགྲེལ་ཞིང་འཁོར་ལོའི་རྩེ་མོར་མིག་བལྟ་
བ་བྲི་བར་བྱའོ། །འཁོར་ལོའི་ཕྱི་རོལ་དུ་སྣ་ཚོགས་རྡོ་རྗེའི་རྩེ་མོ་ཆ་ཆུང་གཉིས་ཏེ་འཁོར་ལོའི་རྭའི་བར་དུ་མཐོང་བའོ། །གཡས་གཡོན་གྱི་རྭ་ནི་རྟ་བབས་ཀྱི་གཞོགས་རྣམས་སུ་དར་དཔྱངས་ཀྱི་སྣམ་བུའི་སྟེང་དུ་ཆུ་སྲིན་གྱི་ཁ་ནས་འཐོན་ཏེ། ཅུང་ཟད་ཐད་ཀར་སོང་ནས་ཕྱིར་བྱུང་བ་དབུས་
ཀྱི་རྒྱར་ཆ་ཆུང་གསུམ་པ་སྲིད་དུ་ཆ་ཆུང་བཅུ་དྲུག་པའོ། །དཀྱིལ་འཁོར་གྱི་ལྟེ་བར་སེང་ལྡེང་གི་ཕུར་པ་མགོ་རྩེ་གཅིག་པ་སྟེང་རྡོ་རྗེ་རྩེ་ལྔ་པའི་རྣམ་པ་ཧཱུྃ་ལས་སྐྱེས་པར་བསམས་ནས། ཕུར་བུ་གདབ་པའི་སྔགས་ཀྱིས་བརྒྱ་རྩ་བརྒྱད་དུ་བཟླས་ནས་བརྡུང་བའི་སྔགས་ཀྱིས་རྡོ་རྗེ་ཐོ་བས་
བརྡུངས་ཏེ། དེ་ལ་ཐིག་སྐུད་ཆ་ཆུང་དགུ་བཅུ་རྩ་དྲུག་པ་ཉིས་ལྟབ་ཏུ་བྱས་པ་བཏགས་ལ་མེའི་མཚམས་ནས་བརྩམས་ཏེ་གཡོན་སྐོར་དུ་རྭའི་རྩེ་མོ་ལས་ཕྱིར་པདྨའི་གེ་སར་གྱི་རི་མོ་ཟླུམ་པོས་བསྐོར་བར་བྱའོ། །དེའི་ཕྱི་རོལ་དུ་ཆ་ཆུང་གཉིས་པའི་པདྨའི་འདབ་མའི་ཕྲེང་བའི་ཐིག་ཟླུམ་
པོའོ། །དེའི་ཕྱི་རོལ་དུ་ཆ་ཆུང་གཉིས་པའི་རྡོ་རྗེ་ཕྲེང་བའི་ཐིག་སྟེ་སྲ་ཞིང་འཐས་པ་འཁོར་ས་ཆེན་པོའི་ངོ་བོའོ། །དེའི་ཕྱིར་ཆ་ཆུང་བཞི་པའི་མེ་རིའི་ཐིག་གོ། །ཁོར་ཡུག་དེའི་ཕྱི་རོལ་དུ་ནི་ཤིང་ལ་སོགས་པའི་དུར་ཁྲོད་བརྒྱད་དེ། འོན་ཀྱང་སྐལ་པ་དང་མི་ལྡན་པའི་གནས་སུ་མི་བྱའོ། །
སྒོ་དང་སྒོ་ཁྱུད་ཀྱི་མཚམས་སུ་ཆ་ཆུང་གཅིག་པའི་ཟླ་བའི་ཆ་ལ་གནས་པའི་རིན་པོ་ཆེ་དམར་པོའི་སྟེང་དུ་རྡོ་རྗེ་ཕྱེད་པས་མཚན་པའོ། །སྟེགས་བུ་གྲུ་བཞི་ལ་གནས་པའི་བུམ་པ་ལ་གནས་པའི་རྟ་བབས་ཀྱི་ཀ་བ་རྣམས་སོ། །དེ་རྣམས་ཀྱི་རྩ་བ་དང་རྩེ་མོ་ལ་ནོར་བུ་བཅིངས་པའི་དཀྱིལ་དུ་
གླང་པོ་ཆེའི་སྟེང་དུ་ལག་པ་བརྐྱང་པའི་སེང་གེའོ། །པདྨའི་འདབ་མ་ཕྱེད་པ་ལྟ་བུའི་མདའ་ཡབ་ལ་གསེར་གྱི་བུམ་པར་གནས་པ་ཕྱོགས་སུ་རྒྱལ་མཚན་དང་བ་དན་བརྒྱད་དོ། །རྟ་བབས་ལ་ཡང་ངོ་། །རྔ་ཡབ་དང་བཅས་པ་དྲིལ་ཆུང་གི་སྒྲ་སྒྲོགས་པའོ། །ཟུར་བཞི་

ལ་ནི་གདུགས་རྣམས་སོ། །རྟ་བབས་རྣམས་ལ་བླ་རེ་རྣམ་པ་སྣ་ཚོགས་པ་དང་། དྲ་བ་དང་། དྲ་བ་ཕྱེད་པའོ། །རྨིག་པ་དང་བ་རན་གྱི་མཐའ་རུ་རྒྱལ་མཚན་དང་བ་དན་ནོ། །རྟ་བབས་ཀྱི་ལོགས་ཀུན་དུ་བུམ་པ་བཟང་པོ་ལས་བྱུང་བའི་དཔག་བསམ་གྱི་ཤིང་གླང་པོ་ཆེ་ལ་སོགས་པ་རིན་པོ་
ཆེ་བདུན་དང་ལྡན་པ་རྣམས་སོ། །ཚངས་དང་ཟུར་ཐིག་གནས་པ་ལས། །གཞན་མིན་དེ་ཡི་ཚངས་ལས་ཕྱིར། །ཆ་ཆུང་གཉིས་དོར་རྩ་བའི་བར། །ཐིག་གདབ་ཟུར་གྱི་འགྲམ་དག་ཏུ། །དེ་བཞིན་ལྟེ་བའི་ལོགས་དག་ཏུ། །སྒོ་ནི་བཞི་བཞིར་དེ་ཡི་སྲིད། །ལྟེ་བའི་ཕྱི་རུ་ཆ་ཆུང་བཞི། །
དོར་བར་ཆ་ཆུང་བཞི་པའི་ཐིག །ཐད་ཀར་ཚངས་དང་ཟུར་ལ་གནས། །འདིར་ནི་ཡང་ན་ཐིག་ལྔ་ཡང་། །ཆ་ཆུང་གཉིས་གཉིས་དོར་བར་རོ། །དེ་བཞིན་དེ་རྣམས་དང་དྲུག་པ། །མཚམས་སུ་ཡང་དག་སོན་པ་ལའོ། །ཚངས་པ་དང་ནི་ཟུར་ཐིག་གི། །གཡས་དང་གཡོན་པའི་བདུན་
རྣམས་ལས། །ལྔ་པ་གསུམ་པའི་དང་པོ་ཡིན། །ཆ་ཆུང་གཅིག་གི་མཐའ་ལས་འཐོན། །རང་གི་གཉིས་པའི་རྩེར་སོན་ནས། །བདུན་པ་ཡི་ནི་དབུས་སུ་སོང་། །ཐིག་གཅིག་ཀྱོག་པོ་ལྔ་རུ་འགྱུར། །དེ་ཡི་ནང་དུའང་ཆ་ཆུང་ཕྱེད། །དོར་ནས་དེ་བཞིན་གཞན་ཡིན་ནོ། །ཚངས་
ལས་རིམ་བཞིན་རྒྱལ་པོ་དང་། །ཉི་ཀླུ་ཆུ་མིག་ཆ་ཆུང་ནི། །དོར་བར་ཟླུམ་པོའི་ཐིག་ལྔའོ། །དང་པོ་གསུམ་དང་ནང་དུ་ཡང་། །ཆ་ཆུང་ཕྱེད་ཕྱེད་དོར་ནས་ཐིག །ཟླུམ་པོ་གསུམ་པོ་རྩིབས་ཟླུམ་གྱི། །ཐིག་ལས་གཞན་ནི་དབྱི་བར་བྱ། །ཞེས་གསུངས་པས། རྩ་བའི་ཐིག་
གི་ནང་དུ་ལྟེ་བའི་ལོགས་གཉིས་སུ་ཚངས་པ་དང་ཟུར་གྱི་ཐིག་བཞི་བཞིའི་གཡས་གཡོན་དུ་ཆ་ཆུང་གཉིས་ཀྱི་བར་ནས་སྒོ་བཞི་བཞིའི་ཚད་དུ་ཐིག་རེ་རེ་གདབ་བོ། །དེ་ནས་ལྟེ་བའི་ཕྱི་རོལ་དུ་ཆ་ཆུང་བཞིའི་བར་ལས་འདབ་མའི་མཐའ་མའི་ཐིག་ལས་ཆ་ཆུང་གཉིས་ཀྱི་བར་དུ་ཐད་ཀའི་
ཐིག་ཚངས་པ་དང་ཟུར་དང་དེ་དག་གི་ཐིག་གི་སྟེང་དུ་སྒོའི་ཚད་དོ། །དེའི་ཕྱིར་དེ་བཞིན་དུ་ཐིག་ལྔའོ། །ཟུར་དང་དེའི་ཐིག་གི་སྟེང་དུ་དྲུག་པ་ཡང་ངོ་། །དེ་ལ་ཚངས་པའི་གཡས་སུ་དང་པོའི་ཆ་ཆུང་གཅིག་གི་མཐར་ཞུགས་ཏེ་བཞི་པའི་རྩེ་མོར་སོན་ནས་ལྔ་པའི་ཆ་ཆུང་

གཅིག་གི་མཐར་ཞུགས་ཏེ་དྲུག་པའི་རྩེ་མོར་སོན་ནས་བདུན་པའི་ཆ་ཆུང་གཅིག་གི་མཐར་ཞུགས་པའི་ཐིག་ཀྱོག་པོ་གཅིག་གོ །དེའི་ནང་དུ་ཆ་ཆུང་ཕྱེད་དོར་ནས་དེ་དང་འདྲ་བའི་ཀྱོག་པོའི་ཐིག་གཉིས་པའོ། །དེ་ལྟར་ཚངས་པའི་གཡོན་དང་གཞན་ཀུན་ལ་ཡང་ངོ་། །
མཚམས་ཐིག་ཀུན་ལ་ཡང་ངོ་། །དེ་ནས་ལྟེ་བར་ཐིག་སྐུད་བཟུང་སྟེ་རྩ་བའི་ཐིག་ནས་བརྩམས་ཏེ་ནང་དུ་སྒོ་རེ་རེའི་བར་དུ་ཟླུམ་པོའི་ཐིག་བཞིའོ། །དེ་གསུངས་པ། རྩ་བའི་ཐིག་ནས་ཉེར་བཟུང་སྟེ། །ཟླུམ་པོའི་ཐིག་ནི་རྣམ་པ་བཞི། །འཁོར་ལོ་གསུམ་ནི་སྒོ་ཚད་དུ། །
ཡང་དག་བསྐོར་བས་ཕྱིན་པའོ། །ལྷག་མ་པདྨ་འདབ་བརྒྱད་ཚད། །འདི་ལས་ལྷག་ཆད་ཅུང་ཟད་མེད། །ཐུགས་སོགས་འཁོར་ལོའི་མུ་ཁྱུད་ལ། །རྡོ་རྗེ་པདྨ་འཁོར་ལོའི་ཕྲེང་། །ཞེས་སོ། །དེ་ལ་དང་པོ་གསུམ་པོ་རྣམས་ཀྱི་ནང་དུ་ཆ་ཆུང་ཕྱེད་དོར་བར་ཟླུམ་པོའི་
ཐིག་གཅིག་གོ། །བཞི་པའི་ནི་ཐུགས་ཀྱི་འཁོར་ལོའི་ལྟེ་བའི་ནང་མཚོན་པ་སྟེ། དེའི་ནང་དུ་ཆ་ཆུང་གཅིག་གི་བཞི་ཆ་ནས་ཕ་རོལ་ཆ་ཆུང་ཕྱེད་དང་གསུམ་པའི་འདབ་མ་དོར་བར་ལྟེ་བའི་དོན་དུ་ཟླུམ་པོའི་ཐིག་གཅིག་གོ། །རྩིབས་ཀྱི་ལོགས་ཀྱི་སྟེང་དུ་རྡོ་རྗེ་དང་པདྨ་དང་འཁོར་
ལོའི་ཕྲེང་བའོ། །འདིར་ཕྱི་རོལ་གྱི་རྩིབས་ཀྱི་ཐིག་རྣམས་བསྲུངས་ལ་གཞན་ནི་དབྱི་བར་བྱའོ། །ནང་གི་ལུས་ལ་དེ་བཞིན་དུ། །ཧེ་རུ་ཀ་མཆོག་ཐིག་གདབ་བྱ། །ལྷན་སྐྱེས་རང་བཞིན་ཡང་དག་དག །དཔའ་བོ་དཔའ་མོའི་དབང་ཕྱུག་ལྡན། །ཞེས་པ་ཐིག་གདབ་པའོ། །
དེ་ནས་གཏོར་མ་བཏང་ལ། དུར་ཁྲོད་རུས་པ་ཡང་དག་བླང་། །ཐལ་བ་ལོ་མ་སོ་ཕག་རྣམས། །བ་བླ་དང་ནི་ཡང་དག་ལྡན། །ཧེ་རུ་ཀ་ཡི་འཁོར་ལོ་བྲི། །ཐོད་པར་ས་ཚོན་བཞག་ནས་སུ། །རྒྱུད་ལས་གསུངས་པའི་ཆོ་ག་བཞིན། །འབར་བའི་ལྟ་བས་ཡེ་ཤེས་ཀྱི། །འཁོར་
ལོའི་ཐུགས་གནས་བཀུག་ནས་སུ། །སངས་རྒྱས་ཐམས་ཅད་མཁའ་འགྲོ་མའི། །སྔགས་ཀྱི་མངོན་པར་བསྔགས་ནས་སུ། །ཧེ་རུ་ཀ་དཔལ་རྒྱལ་པོ་དང་། །འཁོར་ལོའི་དབུས་སུ་ཡང་དག་གནས། །ཞེས་པ་ལ་སོགས་པ་གསུངས་པས་པྃ་ལྃ་རྃ་ཧྃ་ཡྃ་གི་ས་བོན་ལས་བྱུང་

བའི་དཀར་པོ་དང་། སེར་པོ་དང་། དམར་པོ་དང་། ལྗང་གུ་དང་། ནག་པོའི་ཚོན་རྣམས་ཟླ་ཤེལ་ལ་སོགས་པ་ལས་བྱུང་བའམ། །ཁམས་ལས་བྱུང་བའམ། འབྲས་སཱ་ལུ་ལས་བྱུང་བ་བྷྲཱུྃ་ཨཾ་ཧྲཱིཿཁྃ་ཧཱུྃ་ལས་སྐྱེས་པའི་རྣམ་པར་སྣང་མཛད་ལ་སོགས་པའི་ཚུལ་དུ་བསམས་ནས།
ནམ་མཁའ་ལ་གནས་པའི་རྒྱལ་བ་ལྔའི་ཐུགས་ཀར་བྷྲཱུཾ་ལ་སོགས་པས་མངོན་པར་བསྔགས་ཏེ། ཨོཾ་བཛྲ་ཙི་ཏྲ་ས་མ་ཡ་ཧཱུཾ། ཞེས་པ་འདིས་ལན་བརྒྱ་རྩ་བརྒྱད་དུ་བཟླས་ཏེ་འབར་བའི་ལྟ་བས་ཡང་དག་པར་སྤོང་ཞིང་རེ་རེ་ཞིང་ལ་ཧཱི་བཀོད་ནས། བདེན་པ་གང་གིས་སེམས་ཅན་རྣམས་རྡུལ་
ཚོན་མང་ཞིང་སངས་རྒྱས་བཅོམ་ལྡན་འདས་རྣམས་སེམས་ཅན་རྣམས་ལ་ཆགས་པས་རྗེས་སུ་ཆགས་པའི་བདེན་པ་དེས་རྡུལ་ཚོན་རྣམས་འབར་བར་གྱུར་ཅིག་ཅེས་བདེན་པའི་བྱིན་གྱི་རླབས་ཀྱིས་སྤར་བར་བྱའོ། །ལྷ་བསྒོམ་པ་ཕུལ་དུ་བྱུང་བ་ལས་ནི་འབར་རོ། །དྲི་དང་མེ་ཏོག་ལ་སོགས་པས་
མཆོད་ནས་སྣོད་བརྟན་པར་གཞག་པར་བྱའོ། །དེ་ནས་དཀྱིལ་འཁོར་གྱི་ལྟེ་བ་ན་གནས་པའི་ཕུར་བུ། ཨོཾ་བཛྲ་ཀཱི་ལ་ཨུཏ་ཀཱི་ལཱ་ཡ་སརྦ་ཀཱི་ལན་བཛྲ་དྷ་ར་ཨཱ་ཛྙཱ་པ་ཡ་ཧཱུཾ་ཧཱུཾ་ཧཱུཾ་ཧཱུཾ་ཕཊ་ཧོ། །ཞེས་པ་ཧཱུཾ་བཞི་པའི་སྔགས་ཀྱིས་བཏོན་ལ། བློས་རང་གི་ལག་པའི་རྡོ་རྗེ་ལ་བསྟིམས་ཏེ་ཕུར་
བུའི་ཁུང་བུར་སྔར་མ་བཅུག་ན་རིན་པོ་ཆེ་དང་སྨན་དང་འབྲུ་ལྔ་བཅུག་ལ་རྡུལ་ཚོན་ལྔས་ཀུན་ནས་བཀང་སྟེ་མཉམ་པོར་བྱས་ནས། དྲིལ་བུའི་སྒྲ་དང་རྡོ་རྗེའི་གླུས་མཚན་མ་ངན་པ་བསལ་བར་བྱའོ། །འདི་ནི་ཆོས་དབྱིངས་དག་པ་སྟེ། །སེམས་ཅན་ཁམས་ནི་རབ་སྒྲོལ་མཛད། །རང་
ཉིད་རྒྱལ་པོ་རྡོ་རྗེ་འཆང་། །དེ་བཞིན་གཤེགས་པ་ཀུན་གྱི་གནས། །ཉེས་པ་ཀུན་ལས་རྣམ་པར་གྲོལ། །འཁོར་ལོའི་ནང་དུ་ཡང་དག་གནས། །ཞེས་པས་ཆོས་ཀྱི་དབྱིངས་རྣམ་པར་དག་པར་མོས་ནས་དང་པོར་དཀྱིལ་འཁོར་གྱི་ནང་དུ་འདུག་སྟེ། བློ་དང་ལྡན་པས་མེ་
མཚམས་ནས་ལག་པ་གཡོན་པས་གཡོན་སྐོར་གྱིས་དཀར་པོ་དང་། སེར་པོ་དང་། དམར་པོ་དང་། ལྗང་གུ་དང་། ནག་པོའི་ཚོན་རྣམས་ཕྱི་རོལ་ནས་བརྩམས་ཏེ་ཁ་ཤར་དུ་ཕྱོགས་པས་ཨོཾ་བཛྲ་ཙི་ཏྲ་ས་མ་ཡ་ཧཱུཾ་ཞེས་བརྗོད་ཅིང་བྲི་བར་བྱའོ། །རང་གིས་བརྩམས་ནས་རི་

མོ་མཁན་ལ་སོགས་པ་གཞན་གྱིས་ཀྱང་དགྱེ་བར་བྱའོ། །སྒོ་ཡི་ཉི་ཤུ་ཆ་རུ་ནི། །རེ་ཁཱ་མཉམ་པོར་དགྱེ་བར་བྱ། །སྦོམ་པོར་བཀྱེ་བས་ནད་འབྱུང་ཞིང་། །ཕྲ་མོ་ཡིས་ནི་ནོར་རྣམས་ཉམས། །ཡོན་པོ་ཡིས་ནི་རྣམ་པར་སྡང་། །ཆད་ན་བླ་མ་སློབ་དཔོན་
འཆི། །གཡས་སྐོར་དུ་ནི་བཀྱེ་བ་ཡིས། །ཚོན་རྣམས་ཕུར་བུས་བཏབ་པར་འགྱུར། །གྲུབ་པའི་རྒྱུར་མི་འགྱུར་པའོ། །ལྷོ་ཡི་ས་གཞི་ནག་པོ་ཤར། །ལྗང་གུ་དེ་བཞིན་བྱང་ནི་དམར། །ནུབ་ཏུ་ཡང་ནི་སེར་པོ་སྟེ། །ཐུགས་གསུང་སྐུ་ཡི་འཁོར་ལོ་རྣམས། །སྔོན་པོ་དམར་
པོ་དཀར་པོ་ཆེར། །གསང་སྔགས་རིག་པས་ཡིད་འོང་བྲི། །ཚོན་དགྱེ་བ་ལ་ཉེས་པ་གང་། །དེ་ཉིད་བསམས་པའི་སྦྱོར་རྣམས་ལ། །སུས་ཀྱང་བར་ཆད་བྱ་མི་ནུས། །རྡོ་རྗེའི་ཤུགས་ཀྱི་ཡེ་ཤེས་རྡུལ་ཚོན་གྱི་རེ་ཁཱ་ཡིད་ཀྱིས་ནམ་མཁའ་ལ་བཏེག་ནས་ཨོཾ་བཛྲ་བེ་ག་ཨ་ཀྲ་མ་ཧཱུཾ་ཞེས་
བརྗོད་ཅིང་ཐིག་ལ་སོགས་པ་ལ་འགོམས་ཀྱང་ཉེས་པ་མེད་དོ། །གར་གྱི་སྣམ་བུ་ནི་དམར་པོའོ། །རིན་ཆེན་སྣམ་བུ་ནི་ས་གཞི་དམར་པོ་ལ་རིན་པོ་ཆེ་སྣ་ཚོགས་པའོ། །ས་གཞི་ནག་པོ་ལ་དྲ་བ་དང་དྲ་བ་ཕྱེད་པའོ། །ས་གཞི་སྔོན་པོ་ལ་རིན་ཆེན་ཤར་བུ་དང་མདའ་ཡབ་དཀར་པོའོ། །རྨིག་
པ་དང་བ་རན་ནི་ཇི་ལྟར་མཛེས་པའོ། །མུན་པ་ནི་ནམ་མཁའི་མདོག་གོ། །འཁོར་ལོ་ནི་གསེར་རོ། །རི་དགས་ནི་གསེར་ལ་རིན་པོ་ཆེས་སྤྲས་པའོ། །སྣ་ཚོགས་རྡོ་རྗེའི་ར་ནི་ཕྱོགས་ཀྱི་མདོག་གོ། །བུམ་པ་བཟང་པོ་ནི་གསེར་རོ། །ལྟེ་བ་ལྗང་གུ་ལ་ཟེའུ་འབྲུ་སེར་པོའོ། །འདབ་
མ་ནི་སྣ་ཚོགས་པའོ། །དེའི་ས་ནི་དམར་པོ་ཤས་ཆེ་བའི་དཀར་པོའོ། །རྡོ་རྗེ་ནི་ནག་པོའོ། །རེ་ཁཱ་ནི་དཀར་པོའོ། །ས་གཞི་ཇི་ལྟར་མཛེས་པའོ། །འོད་ཟེར་གྱི་མེ་རི་ནི་རྒྱལ་བ་ལྔའི་མདོག་གོ། །དཀྱིལ་དུ་སྣ་ཚོགས་པདྨར་ཉི་མ་ལ་རྡོ་རྗེ་སྔོན་པོ་རྩེ་ལྔ་པ་ཁ་གྱེས་པའོ། །ཕྱོགས་ཀྱི་
འདབ་མ་རྣམས་ལ་གྲི་གུག་གོ། །མཚམས་ཀྱི་རྣམས་ལ་པདྨའི་སྣོད་རྣམས་སོ། །འཁོར་ལོའི་རྩིབས་རྣམས་ལ་ཟླ་བ་ལ་གྲི་གུག་ཉི་ཤུ་རྩ་བཞིའོ། །དཔའ་བོ་རྣམས་ནི་གཙོ་བོ་མ་ཡིན་པའི་ཕྱིར་མཚན་མ་མི་བྲིའོ། །སྒོ་དང་མཚམས་རྣམས་སུ་སྣ་ཚོགས་པདྨ་དང་ཉི་མ་ལ་གྲི་གུག་

བརྒྱད་དོ། །ཕྱིའི་ཟླུམ་པོའི་ཐིག་གི་ཕྱི་རོལ་མཚམས་ཀྱི་ལོགས་སུ་བུམ་པ་བརྒྱད་དོ། །གར་གྱི་སྣམ་བུའི་ལྷོ་སྒོའི་གཡོན་དུ་པི་ཝང་དང་གླིང་བུའོ། །གཡས་སུ་རྔ་ཟླུམ་དང་རྫ་རྔའོ། །དེ་བཞིན་དུ་བཅུ་དྲུག་གི་ཡང་མཚན་མའོ། །ནང་དུ་ནི། སེམས་ཤེས་ལས་ཀྱི་ཐིག་ལས་བྱུང་། །རྡུལ་
བཏབ་རིམ་པས་ཤར་བ་ཡི། །འགྲོ་བ་འདི་ཉིད་རང་བཞིན་གྱིས། །གྲུབ་པའི་དཀྱིལ་འཁོར་གཉིས་མེད་པའོ། །ཞེས་པ་རྡུལ་ཚོན་དགྱེ་བའོ། །དེ་ནས་ལྷག་གནས་བྱས་པའི་བུམ་པ་རྣམས་གཡོན་སྐོར་དུ་དགོད་དེ། དེ་ལ་རྣམ་པར་རྒྱལ་བ་དཀྱིལ་འཁོར་ལ་གཡོན་སྐོར་དུ་བསྐོར་ཏེ། རྡུལ་
ཚོན་གྱི་ཕྱི་ལྷོ་སྒོའི་ཚངས་ཐིག་གི་གཡོན་དུ་གཞག་པར་བྱའོ། །ལས་ཐམས་ཅད་པ་གཡས་སུའོ། །དེ་ལྟར་མཁའ་འགྲོ་མ་ལ་སོགས་པའི་བུམ་པ་རྣམས་རང་གི་ཕྱོགས་ཀྱི་དབྱེ་བས་དཀྱིལ་འཁོར་དུ་དགོད་དོ་ཞེས་བུམ་པ་དགོད་པའོ། །དཀྱིལ་འཁོར་གྱི་ཕྱོགས་བཞི་རུ་ཤེས་རབ་ཀྱི་ཕ་
རོལ་ཏུ་ཕྱིན་པ་དང་། ལང་ཀར་གཤེགས་པ་དང་། ཏིང་ངེ་འཛིན་རྒྱལ་པོ་དང་། སྡོང་པོ་བཀོད་པ་རྣམས་འདོན་དུ་གཞུག་གོ། །ག་བུར་དང་། ཨ་ཀ་རུ་དང་། དུ་རུ་ཀ་ལ་སོགས་པའི་སྤོས་ཕོར་བརྒྱད་གཞག་པར་བྱའོ། །རས་སྣ་ཚོགས་པ་སྟོང་ལ་སོགས་པའམ། གདུགས་
དང་། རྒྱལ་མཚན་དང་། བ་དན་ལ་སོགས་པ་ཧཱུྃ་དང་བདག་པོའི་སྔགས་ཀྱིས་བཟླས་པ། ཨོཾ་བཛྲ་སྥ་ར་ཎ་ཁཾ་ཞེས་བྱ་བས་ཕུལ་ནས། སྒོ་ཀུན་ལ་རས་བཟང་པོ་དང་། དྲིལ་བུ་དང་། རྔ་ཡབ་རྣམས་བཏགས་ཏེ་བུམ་པ་གང་བ་ཡང་གཞག་པར་བྱའོ། །ཁྲུས་བྱས་ཏེ་དྲི་བཟངས་
བྱུགས་ལ་སྟོད་གཡོགས་དང་། དབུ་རྒྱན་དང་བཅས་པས་ལས་ཐམས་ཅད་པས་བསྔགས་པའི་ཆུས་དཀྱིལ་འཁོར་གྱི་ལོགས་སུ་བསངས་ལ་ཡི་གེ་གསུམ་དང་ལས་ཐམས་ཅད་པས་བསྲུངས་ལ་རྡོ་རྗེ་དང་དྲིལ་བུ་བཟུང་སྟེ། ལྷོ་སྒོ་རུ་ནི་རྒྱུ་བྱེད་ཅེས། །བདེན་པ་སྨྲ་བས་གང་གསུངས་
པ། །ཀུན་རྫོབ་དོན་དུ་ཤེས་བྱ་སྟེ། །བྲི་བའི་དཀྱིལ་འཁོར་རྟོགས་པ་ལའོ། །ཕྱོགས་ཀྱི་རྣམ་དབྱེར་མཐའ་ཡས་པས། །ལྷོ་ལ་སོགས་པའི་རྟོག་པ་མེད། །དེ་ཕྱིར་གང་དུ་ཕྱོགས་པ་ཉིད། །ལྷོར་ནི་རྣལ་འབྱོར་ཀུན་གྱིས་དགོངས། །ཐོག་མར་གྲུབ་པའི་འཁོར་ལོ་དང་། །

དཔའ་བོ་དྲུག་གི་ལྷ་རྣམས་དགོད། །སྔགས་ཀྱི་གོ་ཆ་ཆོ་ག་བཞིན། །དེ་ནས་དཀྱིལ་འཁོར་བསྒྲུབ་པར་བྱ། །མར་མེ་བརྒྱད་ནི་དབུལ་བར་བྱའོ། །མར་ཁུ་ཆེན་པོའི་སྦྱོར་བ་ཡིས། །མེ་ཏོག་སྣ་ཚོགས་གཅལ་དུ་བཀྲམ། །སྣ་ཚོགས་དྲི་ཡིས་ལེགས་
པར་བསྒོས། །གྲུབ་པའི་དམ་ཚིག་འཁོར་ལོ་ནི། །ཡེ་ཤེས་འཁོར་ལོ་དང་ལྡན་པ། །སེམས་ཀྱིས་ཡང་དག་ལ་སྦྱར་ནས། །ལྟ་བ་གྱེན་དུ་རྒྱུ་བ་ཡིས། །སྔར་གྱི་སྤྱན་འདྲེན་ཕྱག་རྒྱ་དང་། །ཕེཾ་ཡིག་སྔགས་ཀྱི་སྦྱོར་བ་ཡིས། །ཡུལ་ནི་མཐའ་ཡས་ན་གནས་པའི། །
དགྱེས་ཤིང་གྲུབ་སྦྱིན་ལྷ་མོ་རྣམས། །དཔའ་བོ་དཔའ་མོའི་དབང་ཕྱུག་བཅས། །སྔར་གྱི་ཕྱག་མཚན་སོགས་ཀྱིས་བརྒྱན། །འཇིག་རྟེན་མགོན་པོ་ཐུགས་རྗེ་ལྡན། །རྫོགས་པའི་སངས་རྒྱས་བྱོན་པར་འགྱུར། །གཉིས་སུ་མེད་པའི་སྙོམས་འཇུག་པས། །ཧེ་རུ་ཀ་གནས་
དཀྱིལ་འཁོར་དུ། །ཉམས་དགའ་བྱིན་གྱིས་བརླབས་པའི་གནས། །མཛད་པར་འགྱུར་ཏེ་ཐེ་ཚོམ་མེད། །ཅེས་གསུངས་པས་འཁོར་ལོའི་དབང་ཕྱུག་གི་བདག་ཉིད་ཁོ་ནས་སྐད་ཅིག་གིས་བྲིས་པའི་དཀྱིལ་འཁོར་སྟོང་པར་བསམས་ལ། བསྒོམ་བྱའི་དཀྱིལ་འཁོར་གྱི་རང་
བཞིན་དུ་བལྟས་ནས་བསྒྲུབ་པའི་ཕྱི་རོལ་གྱི་ཕྱག་རྒྱའམ། ཡེ་ཤེས་ཀྱི་ཕྱག་རྒྱ་དང་སྙོམས་པར་འཇུག་པས་ཡང་དག་པར་བསྐྱོད་པའི་དགའ་བའི་སྒྲས་ཡེ་ཤེས་ཀྱི་འཁོར་ལོ་སྤྱན་དྲངས་ལ། ཞབས་བསིལ་དང་མཆོད་ཡོན་དབུལ་བ་སྔོན་དུ་འགྲོ་བས། རང་གི་ནང་དུ་བཅུག་
པས་འདོད་ཆགས་ཆེན་པོས་ཞུ་བར་གྱུར་ཏེ་རྡོ་རྗེའི་ལམ་ནས་ཕྱུང་སྟེ་པདྨ་ནས་ཡེ་ཤེས་ཀྱི་འཁོར་ལོའི་བདག་ཉིད་སྤྲོས་ཏེ། །དམ་ཚིག་གི་འཁོར་ལོ་ལ་གནས་ཇི་ལྟ་བར་བཞུགས་པར་བསམས་ནས། མིག་དང་སྐུ་ལ་སོགས་པ་བྱིན་གྱིས་བརླབས་པའི་དེ་མ་ཐག་ཏུ་རང་གི་སྙིང་གའི་ས་
བོན་གྱི་འོད་ཟེར་གྱིས་བཀུག་པའི་དེ་བཞིན་གཤེགས་པ་དང་ལྷ་མོ་རྣམས་ཀྱིས་དབང་བསྐུར་ནས་ཇི་ལྟར་རིགས་པར་རྒྱས་གདབ་པར་བྱའོ། །དེ་ནས་ལྷ་མོ་རྣམས་སྤྲོས་པའི་ཡིད་ཀྱིས་མཆོད་པས་མཆོད་དེ་བཀྲ་ཤིས་ཀྱི་རས་ཟུང་དང་། བླ་རེ་དང་། བཟའ་བ་དང་། བཅའ་བ་

དང་། བལྡག་པ་དང་། གཞིབ་པ་དང་། བཏུང་བ་དང་། པི་ཝང་མ་ལ་སོགས་པས་མཆོད་ལ། དྲིལ་བུ་དཀྲོལ་ཞིང་བསྟོད་ལ་རང་དང་ཤེས་རབ་མའི་བྱང་ཆུབ་ཀྱི་སེམས་པདྨའི་སྣོད་དུ་བཅུག་ལ་བདུད་རྩིར་བྱས་པ་དྲངས་ཏེ་མྱངས་པས་ཚིམ་པར་བྱས་པ་ལྷག་པར་མོས་ཏེ་བདག་
པོའི་སྔགས་བརྒྱ་རྩ་བརྒྱད་དང་། དཀྱིལ་འཁོར་པ་རྣམས་ཀྱི་སྔགས་ལན་ཉི་ཤུ་རྩ་གཅིག་བཟླས་ནས་ཨཱ་ལི་དང་ཀཱ་ལི་དང་ཡི་གེ་བརྒྱ་པ་བཟླ་བར་བྱའོ། །རང་གི་གཏོར་མ་ཕུལ་ནས་ཕྱི་རོལ་དུ་ཕྱོགས་ཀྱི་གཏོར་མ་གཞན་ལ་ཡང་དབུལ་དུ་བཅུག་སྟེ། སུམྦྷ་ལ་སོགས་པའི་སྔགས་
བཟླས་ཤིང་གཡོན་སྐོར་དུ་བསྐོར་བ་གསུམ་བྱའོ། །དཀྱིལ་འཁོར་ལ་སོགས་རྩོམ་པའི་ཚེ། །གལ་ཏེ་རླུང་སོགས་སྐྱེས་ན་ནི། །ཧེ་རུ་ཀ་དཔལ་བདག་ཉིད་ཀྱིས། །གདུག་པ་ཐམས་ཅད་བཟློག་པར་བྱ། །དཀྱིལ་འཁོར་གྱི་ཁང་པའི་ཕྱི་རོལ་དུ་ཕྱོགས་སྐྱོང་རྣམས་ལ་རང་རང་གི་མདོག་བ་
དན་དབུལ་ལོ་ཞེས་པ་དཀྱིལ་འཁོར་བསྒྲུབ་པའོ། །ཐབ་ཁུང་ཁྲུ་གང་ཙམ་ཡིན་ཏེ། །མཛེས་ཤིང་ཐོད་པའི་རྣམ་པ་ཅན། །དེ་འདྲའི་སྟེགས་བུས་བསྐོར་བ་གྲུབ། །ལྷོ་རུ་བལྟས་པའི་ཆོ་ག་ཡིས། །རི་བོའི་སྟེང་དུ་གནས་པ་ཡི། །དཀྱིལ་དུ་པདྨ་འདབ་བརྒྱད་པ། །འདབ་མར་
དགྲ་སྟ་ཞགས་པ་དང་། །རྩེ་གསུམ་པ་དང་ཁ་ཊྭཱཾ་ག །ལྟེ་བ་རུ་ནི་རྡོ་རྗེ་དགོད། །ཁྲོ་བོའི་རྣམ་པ་འཇིགས་སུ་རུང་། །ཕྱི་རུ་རྡོ་རྗེའི་ཕྲེང་བ་བྱ། །སྟེགས་བུ་པདྨའི་རྣམ་པ་ཅན། །རྣལ་འབྱོར་རྒྱུད་ཀྱི་དགང་གཟར་དང་། །བླུགས་གཟར་ཡང་ནི་དེ་བཞིན་ཏེ། །འོན་ཀྱང་ཁ་ནི་ཐོད་
པ་ལྟར། །དཀྱིལ་དུ་ཁྲོ་བོའི་རྡོ་རྗེ་བརྐོ། །ཨཱ་ལི་ཀཱ་ལི་ཡང་དག་བརྗོད། །ཇི་སྙེད་མར་སོགས་སྦྱོར་བ་ཡིས། །གཡོན་དུ་སྲེག་རྫས་ལ་སོགས་གཞག །གཡོན་གྱི་སྤྱོད་པས་བསྲེག་པར་བྱ། །གཉིས་མེད་ལ་སོགས་སྔགས་ཆེན་གྱིས། །མཆོད་པར་བྱ་སྟེ་ཆོ་ག་བཞིན། །
མེ་ནང་ཧེ་རུ་ཀ་སོགས་ལ། །སྦྱིན་སྲེག་བྱས་ནས་ཡོན་བླང་བྱ། །མི་དང་བ་གླང་ཁྱི་དང་ནི། །ཅེ་སྤྱང་རྟ་དང་གླང་ཆེན་གྱི། །ཤ་ཡིས་གྲུབ་པར་འདོད་པ་པོས། །རྣལ་འབྱོར་ཤེས་པས་སྦྱིན་པར་བྱ། །སྐྲ་གྲོལ་གཅེར་བུ་གསང་ནས་སུ། །ཙཱ་རུའི་བཟའ་བ་སྔོན་འགྲོ་བས། །

དཔལ་ལྡན་བདེ་མཆོག་རྣལ་འབྱོར་ཆེ། །སྦྱིན་སྲེག་ལས་ནི་བརྩམ་པར་བྱ། །དེ་ལ་ཐབ་ནི་ཆ་གསུམ་བྱས་ལ་ཆ་གཉིས་བརྐོས་ཏེ། བརྒྱད་ཆ་མཆུ་དང་མཆུའི་ཕྱེད་མུ་ཁྱུད་དེ་ཕྱི་དང་ནང་དུའོ། །དེའི་ཕྱིར་སྟེགས་བུ་མཆུའི་ཚད་དོ། །ཡི་གེ་གསུམ་ཞུ་བའི་རཾ་ལས་
སྐྱེས་པའི་མེ་ལྷ་དམར་པོ་དབྱུ་གུ་དང་སྤྱི་བླུགས་གཡོན་ན་སྟེ། གཡས་ན་བགྲང་ཕྲེང་དང་མི་འཇིགས་པ་སྦྱིན་པའོ། །རལ་པ་ཅན་ལྟོ་བ་འཕྱང་བ་རྒྱན་ཀུན་དང་ལྡན་པ་ཨོཾ་བཛྲ་ཧཱུཾ་གི་ཡི་གེས་ཐབ་ཁུང་གི་མེ་མཚམས་སུ་བཞུགས་ལ་དམ་ཚིག་སེམས་དཔའ་ལ་ཡེ་ཤེས་སེམས་དཔའ་བཅུག་ནས་
ཐབ་ཏུ། ཨོཾ་ཨ་གྣ་ཡེ་མ་ཧཱ་ཏེ་ཛ་དེ་བ་རྀ་ཥི་དྭི་ཛ་སཏྭ་མ་གྲི་ཧི་ཏྭཱ་ཧུ་ཏི་མ་ཧཱ་ར་ཨ་སྨིན་སནྣི་ཧི་ཏོ་བྷ་ཝ་ཞེས་པས་སྤྱན་དྲངས་ཏེ། ཛཿཧཱུཾ་བཾ་ཧོཿཞེས་པས་དགུག་པ་དང་། གཞུག་པ་དང་། ཐ་མི་དད་པ་དང་མཉེས་པར་བྱས་ལ། ཨརྒྷ་ལ་སོགས་པས་མཆོད་དེ་ལག་པ་གཡོན་པ་ཁ་
གྱེན་དུ་བྱས་ཏེ་བྱང་ཆུབ་མཆོག་གི་ཁུ་ཚུར་གྱིས་མར་གྱིས་གང་བའི་དགང་གཟར་བཟུང་ལ། དེའི་སྟེང་དུ་ལག་པ་གཡས་པ་ཡང་ཁ་གྱེན་དུ་བལྟ་བས་མར་གྱིས་གང་བའི་བླུགས་གཟར་བཟུང་ནས་དགང་གཟར་བླུགས་གཟར་གྱི་སྟེང་དུ་རང་གི་ཡི་དམ་གྱི་ས་བོན་ཡི་གེ་གསུམ་དང་སྤེལ་
བ་འོད་ཟེར་དང་ལྡན་པར་བསམས་ལ་མེའི་ཞལ་དུ་ཡི་གེ་རྃ་བལྟས་ཏེ། པུས་མོ་གཉིས་ཀྱི་བར་དུ་གྲུ་མོ་གཉིས་བཞག་ལ་དགང་གཟར་གྱི་ཁའི་སྟེང་དུ་ལག་པ་གཡས་པ་ཁ་ཐུར་དུ་བལྟས་པས་བླུགས་གཟར་ཁ་ཐུར་དུ་བྱས་ལ། དགང་གཟར་གཡས་སྐོར་དུ་ལན་གསུམ་བསྐོར་བས་མེ་
ལྷའི་ཞལ་ཅུང་ཟད་གདངས་པ་ལ་ལག་པའི་སྲེག་བླུགས་གསུམ་མམ་བདུན་ནམ་ཉི་ཤུ་རྩ་གཅིག །ཨོཾ་ཨགྣ་ཡེ་ཨཱ་དི་བྱ་ཨཱ་བི་ཤ་ཨཱ་བི་ཤ །མ་ཧཱ་ཤྲི་ཡེ་ཧ་བྱ་ཀ་བྱ་བཱ་ཧ་ན་ཡེ་སྭཱ་ཧཱ། ཨོཾ་ན་མཿས་མནྟ་བུདྡྷཱ་ནཱཾ། ཆེ་གེ་མོའི་ཤཱནྟིཾ་ཀུ་རུ། ཡང་ན་ཨོཾ་ཨགྣ་ཡེ་སྭཱ་ཧཱ། ཞེས་པས་དབུལ་
ལོ། །ཨོཾ་བཛྲ་ཨ་ན་ལ་མ་ཧཱ་བྷཱུ་ཏ་ཛྭ་ལ་ཡ་སརྦཾ་བྷསྨིཾ་ཀུ་རུ་སརྦ་དུཥྟཱ་ན་ཧཱུཾ་ཕཊ་དྲྀ་ཤྱ་ཛཿཧཱུཾ་བཾ་ཧོཿས་མ་ཡ་སྟྭཾ་ས་མ་ཡ་ཧོ། །ཞེས་དམ་ཚིག་ཀྱང་ལན་གསུམ་དུ་སྙན་དུ་གསོལ་ལོ། །མར་གྱི་སྦྱིན་སྲེག་གཞན་གྱི་སྔགས་ནི། །ཨོཾ་ཨགྣ་ཡེ་སྭཱ་ཧཱ། ཞེས་རྟོགས་པར་བྱའོ། །དེ་ནས་མེའི་

མཚན་མ་བལྟ་སྟེ། རྩེ་མོ་གཅིག་པ་ཕུན་སུམ་ཚོགས་པ་སྟེར་རོ། །རྩེ་མོ་གཉིས་པ་གཡོ་བ་མེད་པར་རོ། །རྩེ་མོ་བཞི་པ་མཉམ་པ་ཡིན་ན་རྒྱས་པ་དང་དངོས་གྲུབ་སྟེར་རོ། །དཀར་ཞིང་སྣུམ་པ་དུ་བ་མེད་ཅིང་དྲི་མ་མེད་པའི་མེས་ནི་ནད་མེད་པ་དང་རིགས་འཕེལ་ལོ། །དམར་པོ་དང་སེར་པོས་
ནི་རྒྱལ་སྲིད་སྟེར་རོ། །མེ་ཏོག་ཙམ་པ་ཀ་དང་། པདྨ་དང་། ཨུཏྤལ་དང་། མ་ལ་ཏིའི་དྲི་དང་ལྡན་པ་བསིལ་བ་དྲི་བཟངས་ནི་དགེ་བའོ། །པི་ཝང་ལ་སོགས་པ་དང་ཟངས་དུང་གི་སྒྲ་ཟབ་མོ་ཅན་ནི་མཐོང་བའི་ཆོས་ལ་བདེ་བ་སྟེར་རོ། །གདུགས་དང་། པདྨ་དང་། རྩེ་གསུམ་པ་ལ་
སོགས་པའི་རྣམ་པ་ཅན་ནི་སྒྲ་མེད་པ་དང་གཡས་སྐོར་བ་དང་གོང་བུ་གཅིག་པས་ནི་དོན་ཆེན་པོ་སྟེར་རོ། །འབར་བ་རྩེ་གསུམ་པ་འཕྲོ་བ་དང་བཅས་པ་གཡོ་ཞིང་གཡོན་དུ་ཕྱོགས་ན་ནད་མེད་དོ། །ལན་གསུམ་མམ་བདུན་དགང་བླུགས་དང་། མེ་ཏོག་དང་། གོ་ལ་དང་། རས་དང་།
བསྟོད་པས་མཆོད་ནས། ཨོཾ་བོ་དྷི་བྲིཀྵ་ཡ་སྭཱ་ཧཱ། བྱང་ཆུབ་ཤིང་གིའོ། །ཨོཾ་བཛྲ་ལ་ཏཱ་ཡ་སྭཱ་ཧཱ། པླ་ཀྵའིའོ། །ཨོཾ་བཛྲ་ཡཛྙཱ་ཡ་སྭཱ་ཧཱ། ཨུ་དུམྺཱ་རའིའོ། །ཨོཾ་བཛྲ་ཀུ་བེ་རཱ་ཡ་སྭཱ་ཧཱ། འོ་མ་ཅན་གྱི་ཤིང་རྣམས་ཀྱིའོ། །ཨོཾ་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ། ཏིལ་རྣམས་ཀྱིའོ། །
ཨོཾ་བཛྲ་པུཥྚ་ཡེ་སྭཱ་ཧཱ། འབྲས་མ་གྲུགས་པའིའོ། །ཨོཾ་སརྦ་སཾ་པ་དེ་སྭཱ་ཧཱ། ཞོ་ཟན་གྱིའོ། །ཨོཾ་བཛྲ་ཨཱ་ཡུ་ཥེ་སྭཱ་ཧཱ། དཱུར་བའིའོ། །ཨོཾ་བཛྲ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱ། ཀུ་ཤའིའོ། །དེ་ནས་མེ་ལྷའི་ཐུགས་ཀར་པདྨའི་གདན་དུ་ས་བོན་དང་ཕྱག་མཚན་ཡོངས་སུ་གྱུར་པ་ལས་
བཅོམ་ལྡན་འདས་ཀྱི་དམ་ཚིག་གི་འཁོར་ལོ་ལ་ཡེ་ཤེས་ཀྱི་འཁོར་ལོ་བཅུག་སྟེ། བསང་གཏོར་ལ་སོགས་པ་དང་མེ་ཏོག་ལ་སོགས་པས་མཆོད་དེ་དེའི་རང་གི་འདོད་ལྷའི་ས་བོན་བཟླས་པས་སྦྱིན་སྲེག་བྱའོ། །ལྷ་རེ་རེ་ལ་ཡང་ངོ་། །དེ་ལ་ཞུ་བ་ནི་མེ་ལྷའི་ཁ་ལའོ། །ཡམ་ཤིང་དང་
ཀུ་ཤ་ལ་སོགས་པ་འོང་ལའོ། །ཟན་དང་ཞབས་བསིལ་ལ་སོགས་པ་ཕྱག་ཏུའོ། །མེ་ཏོག་དབུ་ལའོ། །བདུག་སྤོས་ནི་འབར་བ་ལའོ། །དྲི་ནི་སྙིང་གར་རོ། །བསང་གཏོར་ལུས་ལའོ། །ཞབས་བསིལ་ནི་ཞབས་ལའོ། །མར་མེ་དང་། མཆོད་ཡོན་དང་། ཞལ་ཟས་ནི་

མདུན་དུ་ཞི་བའི་སེམས་ཀྱིས་ཇི་ལྟར་ནུས་པ་དབུལ་ལོ། །རྒྱས་པ་ལ་ནི་རྒྱས་པའི་སེམས་ཀྱིས་སོ། །ཞེས་པ་སྦྱིན་སྲེག་གི་ཆོ་གའོ། །ཐ་མར་ནི་འདོད་པའི་དོན་ཞུས་ལ་བཟོད་པར་གསོལ་ཏེ་རང་གི་གནས་སུ་གཤེགས་སུ་གསོལ་ལོ། །ཨོཾ་ཁཎྜ་རོ་ཧེ་ཧཱུཾ་ཧཱུཾ་
ཕཊ་ཅེས་པ་དང་། ཨོཾ་ཡིག་གིས་ལན་བདུན་བསྔགས་པའི་ཡུངས་ཀར་གཡས་གཡོན་གྱི་ཁུ་ཚུར་གྱིས་བཟུང་ལ་རེ་རེས་ལན་གཉིས་གཉིས་གཡོན་སྐོར་དུ། ཨོཾ་སརྦ་པཱ་པཾ་ད་ཧ་ན་བཛྲཱ་ཡ་བཛྲཱ་སཏྭཱ་སྱ་སརྦ་པཱ་པཾ་ད་ཧ་ན་སྭཱ་ཧཱ། ཞེས་པས་བྱུར་བསལ་ནས་ཡུངས་ཀར་དེ་མེར་དོར་རོ། །
དེ་བཞིན་དུ་གཡས་སྐོར་དང་གཉི་ག་གཡོན་སྐོར་གྱིས་སོ། །དེ་བཞིན་དུ་ཨོཾ་སརྦ་པཱ་པྃ་བི་ཤོ་དྷ་ནི་བཛྲཱ་ཡ་བཛྲཱ་སཏྭ་སྱ་སརྦ་པཱ་པཾ་བི་ཤོ་དྷ་ཡ་སྭཱ་ཧཱ། ཞེས་པ་ཆུ་དང་། ཁམ་ཕོར་དཀར་པོས་བྱུགས་པ་དང་། དཱུར་བའི་མྱུ་གུ་དང་བཅས་པའི་ལྕི་བའི་ཆང་བུ་རྣམས་དང་། མར་མེའི་
སྡོང་བུ་དང་བཅས་པའི་ཟན་གྱི་ཆང་བུ་རྣམས་ཀྱིས་སོ། །རས་ཀྱིས་བྱུར་བསལ་བ་ཡང་ངོ་། །འོན་ཀྱང་རྫ་ཕོར་ལ་སོགས་པ་ནི་མེ་ལ་མི་དོར་རོ། །ལག་པ་དག་གིས་ཉེ་རེག་བྱའོ། །དྲི་ལ་སོགས་པ་སྔོན་དུ་འགྲོ་ཞིང་ལས་ཐམས་ཅད་པ་དང་ཧཱུྃ་ཡིག་ལན་བདུན་བཟླས་པའི་མར་དང་
བཅས་པའི་སྤོས་དཀར་གྱིས་བདུག་པར་བྱའོ་ཞེས་པ། རབ་གནས་ལ་སོགས་པ་ཀུན་ལ་བྱུར་བསལ་བའི་ཆོ་གའོ། །དང་པོར་སྙིང་པོ་འབུམ་བཟླས་ན། །ཧེ་རུ་ཀ་ཡི་བཀའ་ཐོབ་ནས། །དབང་བསྐུར་སྦྱིན་པ་ལ་སོགས་བྱ། །གཞན་དུ་བཞད་གད་ཐོབ་པར་འགྱུར། །ནུས་པ་
མེད་པའི་རྣལ་འབྱོར་པས། །སྙིང་གའི་ས་བོན་དམར་འོད་ཀྱིས། །སློབ་མའི་ལུས་ལ་ཡང་དག་དགང་། །དབང་བསྐུར་སྦྱིན་པ་ཡང་དག་བརྩམ། །སྔགས་པས་རྣལ་འབྱོར་མ་དང་བཅས། །དཀྱིལ་འཁོར་ལྷོ་རུ་གནས་པ་ཡི། །སློབ་མ་ལྷོ་རུ་ཁ་བལྟས་ལ། །མཁས་པས་འདི་
སྐད་བརྗོད་པར་བྱ། །བུ་རྣམས་ངེས་པར་གནས་པ་ཡིས། །སྡོམ་པའི་མཆོག་ནི་བསྲུང་བར་མཛོད། །སྡོམ་པའི་དབང་ལས་ལྷག་པ་མེད། །ལྷན་སྐྱེས་ཐབས་ཀྱི་མཚན་ཉིད་དོ། །དེ་དག་གིས་མཎྜལ་བྱས་ཏེ་པུས་མོ་ས་ལ་བཙུགས་ཏེ་སྙིམ་པ་སྦྱར་བ་མེ་ཏོག་དང་བཅས་པ་རྣམས་

རང་གི་ཁ་ནས་ལུས་ལ་བཅུག་སྟེ་རྡོ་རྗེའི་ལམ་ནས་ཤེས་རབ་ཀྱི་པདྨ་ལ་གནས་པ་རྣམས་ལ། སྙིང་གའི་ས་བོན་གྱི་འོད་ཟེར་གྱིས་བཀུག་པའི་ཤེས་རབ་མ་དང་བཅས་པའི་དེ་བཞིན་གཤེགས་པ་རྣམས་ཁ་ནས་ཞུགས་ཏེ་ཞུ་བར་གྱུར་པ་རྣམས་ཀྱིས་དབང་བསྐུར་བར་བསྒོམས་ནས་བཏོན་ཏེ་ལྷོའི་
སྒོར་གནས་པ་རྣམས་ཀྱིས་གསོལ་བ་འདེབས་སུ་གཞུག་གོ། །བདག་གི་སྟོན་པ་དཔའ་བོ་ཆེ། །རྣལ་འབྱོར་མ་མཆོག་ཁ་སྦྱོར་ལ། །བྱང་ཆུབ་ཆེན་པོའི་ཚུལ་བརྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །
དཔའ་བོ་དཔའ་མོའི་དབང་ཕྱུག་རྣམས། །ཕག་མོ་དང་ནི་ཧེ་རུ་ཀའི། །གསང་བའི་གནས་སོགས་ཡང་དག་དགང་། །ལུས་ལ་ཡང་དག་གནས་པར་གསུངས། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །
མགོན་པོ་བདག་ནི་གཞུག་པར་མཛོད། །ཅེས་བརྗོད་དུ་བཅུག་ནས། བུ་ཚུར་ཤོག་ཅིག་ཚུལ་ཆེན་གྱི། །སྣོད་ནི་ཁྱོད་ཡིན་ཐེག་ཆེན་པའི། །གསང་སྔགས་སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བསྟན་པར་བྱ། །དུས་གསུམ་སངས་རྒྱས་འབྱུང་བ་ཡི། །སྐུ་གསུང་ཐུགས་ཀྱི་
རྡོ་རྗེ་ཅན། །རྡོ་རྗེ་སྔགས་ཀྱི་མཐུ་ཡིས་ནི། །ཡེ་ཤེས་མཉམ་མེད་ཡང་དག་བརྙེས། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །བླ་མ་མཆོག་དང་དེ་བཞིན་བྱམས། །སངས་རྒྱས་ལ་གུས་སྐྱེ་བོ་དགའ། །རྩ་བའི་ལྟུང་བ་ཡོངས་སྤངས་ཤིང་། །སྦོམ་
པོའི་ལྟུང་བ་སྤང་བར་བྱ། །སེམས་ཅན་རྣམས་ནི་མཉེས་པར་བྱ། །ཐེག་པ་དམན་ལ་འདོད་མི་བྱ། །ཞེས་ཡང་དག་པར་ལེན་དུ་བཅུག་ལ། དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་
རྒྱས་བྱང་ཆུབ་ཡིད་ཀྱིས་བཟུང་། །ཞེས་ལན་གསུམ་འདོན་དུ་གཞུག་གོ། །དེ་ལྟར་ཐུན་མོང་གི་སྡོམ་པ་ཅན་གྱི་སློབ་དཔོན་གྱི་སྡོམ་པ་འདོད་ན། ཕྱིར་མི་ལྡོག་པ་འཁོར་ལོའི་དབང་། །ཞེས་པ་ལ་སོགས་པས་གསོལ་བ་འདེབས་སུ་བཅུག་ལ། སངས་རྒྱས་དང་བྱང་ཆུབ་

སེམས་དཔའ་ཐམས་ཅད་བདག་ལ་དགོངས་སུ་གསོལ་ཞེས་པ་ལ་སོགས་པ་ལན་གསུམ་འདོན་དུ་གཞུག་གོ། །དེ་ནས་ལས་ཐམས་ཅད་པའི་སྔགས་ཀྱིས་བསྲུངས་ནས་དེ་རྣམས་ཀྱི་སྙིང་ག་དང་། མགྲིན་པ་དང་། མགོ་བོ་རྣམས་སུ་རྡོ་རྗེ་དང་པདྨ་དང་འཁོར་ལོའི་
སྟེང་དུ་ཧཱུྃ་ནག་པོ་དང་། ཨཱཿདམར་པོ་དང་། ཨོཾ་དཀར་པོ་རྣམས་བསམས་ནས་བརྗོད་ཅིང་དྲིའི་ཆུ་དང་བཅས་པའི་རྡོ་རྗེ་གཡས་པའི་ཁུ་ཚུར་གྱིས་དེའི་གནས་གསུམ་དུ་རེག་ནས་མགོ་བོ་ལ་མེ་ཏོག་དང་། མདུན་དུ་སྤོས་དང་། མར་མེ་དང་སྙིང་གར་དྲི་བྱིན་ནས་བྱང་ཆུབ་ཤིང་ལ་
སོགས་པའི་ཤིང་སོར་བཅུ་གཉིས་པ་དྲང་ཞིང་སྲོག་ཆགས་མེད་པ་མ་གས་པ་རྨ་མེད་པ། དྲི་བཟང་པོའི་ཆུས་བཀྲུས་པ་རྩེ་མོ་ལ་མེ་ཏོག་བཅིངས་པ། ཁ་བྱང་དུ་ཕྱོགས་པས་སློབ་མ་རྣམས་ལ་སྦྱིན་ནོ། །དེ་རྣམས་ཀྱིས་ཀྱང་དཀྱིལ་འཁོར་གྲུ་བཞི་པ་པའི་ལྕི་བས་བྱུགས་པར་བྱང་
ངམ་ཤར་དུ་ཕྱོགས་པས་སོ། །ཤིང་དེ་ཨོཾ་བཛྲ་ཧཱ་ས་ཧཾ་ཞེས་བརྗོད་ཅིང་རྩེ་མོ་འཆོས་ཏེ་གྱེན་དུ་བལྟ་ཞིང་མདུན་དུ་དོར་རོ། །དེའི་རྩེ་མོ་ལྟུང་བའི་རྗེས་སུ་འབྲངས་ནས། ཤར་རམ་བྱང་ངམ་ནུབ་བམ་ལྷོའམ་སྟེང་ངམ་འོག་ཏུ་བལྟས་ཏེ་བྱུང་ན་ཞི་བའམ་རྒྱས་པའམ་དབང་ངམ་མངོན་
སྤྱོད་དམ་རིག་པ་འཛིན་པའམ་ས་འོག་གི་དངོས་གྲུབ་རྣམས་གོ་རིམས་བཞིན་དུ་བརྗོད་དོ། །ཕྱི་རོལ་དུ་ལྷུང་ན་དངོས་གྲུབ་མེད་དོ། །དེ་ནས་པྃ་ལས་སྐྱེས་ཤིང་བྃ་བཟླས་པའི་ཆུ་ཁ་བཤལ་བའི་ཕྱིར་བྱིན་ནས། ལས་ཐམས་ཅད་པ་ལན་བདུན་བཟླས་པའི་དྲིའི་ཆུ་ཁྱོར་གསུམ། ཨོཾ་ཧྲཱིཿ
བི་ཤུདྡྷ་དྷརྨཱཿསརྦ་པཱ་པ་ནིཥྩ་སྱ་བི་ཤོ་དྷ་ཡ་སརྦ་བི་ཀལ་པན་ཨ་པ་ན་ཡ་ཧཱུཾ། ཞེས་བརྗོད་ཅིང་འཐུང་དུ་གཞུག་གོ། །ཕྱི་རོལ་དུ་འདུག་ཏུ་བཅུག་ལ་ཧཱུཾ་ལས་བྱུང་བ་ལས་ཐམས་ཅད་པ་བཟླས་པའི་ཀུ་ཤ་མ་ཉམས་པ་བཏིང་ནས་ཉལ་བའི་དོན་དུ་དང་། དྷི་ཡིག་ལས་སྐྱེས་པ་གཅིག་སྔས་
ཀྱི་དོན་དུ། ཨོཾ་བཛྲ་ཏཱིཀྵྞ་བཾ་ཞེས་པས་སྦྱིན་ནོ། །སྐུད་པ་དམར་པོ་སློབ་མའི་ལུས་ཀྱི་ཚད་ཙམ་པ་སུམ་ལྟབ་ཏུ་བྱས་ཏེ་ཧཱུྃ་ཡིག་དང་ལས་ཐམས་ཅད་པ་ལན་བདུན་དུ་བཟླས་ལ་མདུད་པ་གསུམ་དུ་བྱས་ཏེ་སློབ་མ་རྣམས་ཀྱི་དཔུང་པ་གཡོན་པར་ཨོཾ་བུདྡྷ་མཻ་ཏྲི་རཀྵ་སརྦཱ་ན་སྭཱ་ཧཱ། ཞེས་པས་

བཅིངས་ཏེ་ཡང་དག་པར་བསྲུངས་ལ་སྤྲོ་བ་བསྐྱེད་དེ། སྤྱོད་མཆོག་འདི་ལ་གང་རྣམས་ཀྱི། །བློ་གྲོས་ཤིན་ཏུ་དྲི་མ་མེད། །དེ་རྣམས་ངན་སོང་སྡུག་བསྔལ་ཀུན། །རབ་ཏུ་འབྱུང་བ་ཡང་དག་ཞི། །ཞེས་བརྗོད་ལ། །བཟླས་པའི་དོན་དུ་ལས་ཀུན་གྱི་སྔགས་བྱིན་ཏེ་བསྲུངས་ལ་སྔ་དྲོ་རྨི་ལམ་
བདག་ལ་སྨྲོས་ཤིག་བྱས་ལ་སེང་གེའི་ཉལ་སྟབས་ཀྱིས་ཉལ་དུ་གཞུག་གོ། །རང་ཡང་དེ་བཟླས་པ་ནི་སློབ་མ་ལྷག་པར་གནས་པའོ། །སྔ་དྲོ་གཏོར་མ་ཕུལ་ཏེ་དཀྱིལ་འཁོར་གྱི་ཁང་པ་ལས་བྱུང་སྟེ་སློབ་མ་རྣམས་ལ་རྨི་ལམ་དྲིས་ནས་རི་ལས་ལྷུང་བ་ལ་སོགས་པ་མི་དགེ་བའི་རྨི་ལམ་ཡིན་ན་
ལས་ཐམས་ཅད་པའི་སྔགས་ཀྱིས་བསྲུངས་ལ། དཀྱིལ་འཁོར་ཁང་པར་འཇུག་པའི་ཚེ་སློབ་མ་རྣམས་ཀྱིས་ཨོཾ་པྲ་བི་ཤ་བྷ་ག་ཝཱན་མ་ཧཱ་སུ་ཁ་མོཀྵ་པུ་རཾ་སརྦ་སིདྡྷི་སུ་ཁ་པྲ་ཏཾ་པ་ར་མ་སུ་ཁ་ཨུཏྟ་མ་སིདྡྷྱརྠཾ་ཛཿཧཱུཾ་བཾ་ཧོཿཔྲ་སིདྡྷྱ་སྭ་ཞེས་པས་གཟེངས་བསྟོད་ལ་བཞུགས། གཡས་སུ་བསྐོར་
ཞིང་འཁོར་ལོའི་དབང་ཕྱུག་གི་སྐུས་བྱང་ལ་སོགས་པའི་སྒོར་གནས་ནས། དཀྱིལ་འཁོར་གྱི་ལྷོ་ལ་སོགས་པའི་སྒོ། །ཨོཾ་བཛྲ་ཨུདྒྷ་ཊཱ་ཡ་ས་མ་ཡ་པྲ་བེ་ཤ་ཡ་ཧཱུཾ། ཞེས་བརྗོད་ཅིང་ཕྱེ་ནས། མེ་ཏོག་གི་ཕྲེང་བ་ཨོཾ་པ་ར་མ་སུ་ཁ་ཨཱ་ཤ་ཡ་སུ་ལ་ལི་ཏ་བི་ལཱ་ས་ན་མི་ཏྲེར་ན་མཱ་མི་བྷ་ག་ཝཱན་
ཏཾ་ཛཿཧཱུཾ་བཾ་ཧོཿཧི་ཧི་ཧི་ཧི་ཧཱིཿཔྲ་ཏཱི་ཙྪ་ཀུ་སུ་མ་ཨཉྫ་ལི་ནཱ་ཐ་ཧོ་ཞེས་པའི་སྔགས་ཀྱིས་དཀྱིལ་འཁོར་དུ་དོར་ནས། སླར་ཕྲེང་བའི་དབང་གི་བསམ་པས་རང་གི་མགོ་ལ་བཅིངས་ནས་མངོན་སུམ་དུ་གྱུར་པའི་འཁོར་ལོའི་དབང་ཕྱུག་བླ་མར་ལྷག་པར་མོས་པ་དེས་སྟེར་བཞིན་པའི་
ཕྲེང་བའི་དབང་ལ་སོགས་པ་འཆད་པར་འགྱུར་བའི་དབང་མ་ལུས་པ་ཆོ་ག་ཇི་ལྟ་བ་དང་། སློབ་དཔོན་གྱིས་ལས་ཐམས་ཅད་ལ་གནང་བ་ཐོབ་ནས་སློབ་མ་གཞུག་པའི་ཆེད་དུ་བདེ་བ་ཆེན་པོའི་བདག་ཉིད་ཤེས་རབ་དང་ཐབས་ཀྱི་རང་བཞིན་དེ་ཁོ་ན་ཉིད་ཀྱི་བསྟོད་པ་སྔོན་དུ་འགྲོ་བས་དཀྱིལ་
འཁོར་གྱི་དངོས་གྲུབ་འདོད་པར་བྱའོ། །བདེན་པའི་བྱིན་གྱི་རླབས་ཀྱང་བྱ་སྟེ། ནམ་མཁའ་སྐྱེ་བ་མཚན་ལྡན་ཕྱིར། །ཐོག་མ་ཐ་མ་མེད་པའི་མཆོག །སེམས་དཔའ་རྡོ་རྗེ་ཆེ་རང་བཞིན། །མི་བསྐྱོད་རྡོ་རྗེ་བདག་ལ་གསོལ། །དངོས་གྲུབ་འཛིན་པ་ཀུན་གྱི་མཆོག །དབང་

ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་པ་ཀུན་གྱི་རྒྱལ། །མི་འགྱུར་མཆོག་ཀུན་བདག་སྒྲུབས་ཤིག །ཉེས་པ་མེད་པ་རྟག་པ་སྟེ། །འདོད་ཆགས་ཀུན་གྱི་རྗེས་ཆགས་པ། །འདོད་ཆགས་ཆེན་པོ་དགའ་བ་ཆེ། །བཅོམ་ལྡན་དེ་ཉིད་བདག་སྒྲུབས་ཤིག །ཤིན་
ཏུ་དག་པ་ཆོས་ཀྱི་མཆོག །གདོད་ནས་གྲོལ་བའི་དེ་བཞིན་གཤེགས། །ཀུན་དུ་བཟང་པོ་ཀུན་བདག་ཉིད། །བྱང་ཆུབ་སེམས་དཔར་བདག་གྲུབ་མཛོད། །དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེན་པོ་ཕྱག་རྒྱ་མཆོག །གྲུབ་པའི་རྡོ་རྗེ་ཆེར་བསོར་བ། །རྡོ་རྗེ་སྙེམས་མ་
བདག་པོའི་བདག །སེམས་ཅན་ཀུན་གྱི་སྙིང་ལ་གནས། །སེམས་ཅན་ཀུན་གྱི་ཡབ་ཡིན་ཏེ། །དམ་ཚིག་མཆོག་གི་འདོད་པ་མཆོག །ཤེས་རབ་ཐབས་བདག་དཀྱིལ་འཁོར་འདི། །བདེན་པའི་བྱིན་རླབས་གང་ཡིན་པ། །བདེན་པ་དེ་ཡིས་མགོན་ཁྱོད་ཀྱིས། །བདག་གི་འདོད་པ་
ཡོངས་རྫོགས་མཛོད། །ཆོས་རྣམས་གཟུགས་བརྙན་ལྟ་བུ་སྟེ། །གསལ་ཞིང་དག་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་བྱུང་། །དེ་བཞིན་ཉིད་ལས་ཡང་དག་འབྱུང་། །བདེན་པ་དེ་ཡིས་དཀྱིལ་འཁོར་ནི། །གཟུགས་བརྙན་གསལ་བར་སློབ་
མ་རྣམས། །ཀུན་གྱིས་སྡིག་མེད་མཐོང་བར་ཤོག །ཅེས་བརྗོད་ཅིང་ནམ་མཁའ་སྐྱེ་བའི་མཚན་མ་གང་གི་ཡིན་པ་དེ་དེ་བཞིན་ནོ། །རྡོ་རྗེ་འཛིན་པ་ཀུན་ནི་སྐུ་རྡོ་རྗེ་ལ་སོགས་པའོ། །འདོད་ཆགས་ཀུན་ནི་འདོད་ཡོན་ལྔ་ཡིས་སེམས་ཅན་མཉེས་པར་བྱེད་པའོ། །འདོད་ཆགས་ཆེན་པོ་ནི་
དམིགས་པ་མེད་པའི་སྙིང་རྗེ་ཆེན་པོའོ། །གདོད་ནས་གྲོལ་བ་ནི་རང་བཞིན་གྱིས་ཡོངས་སུ་དག་པའོ། །ཀུན་བདག་ནི་ཆོས་ཉིད་ཀྱིས་སོ། །བྱང་ཆུབ་ཀྱི་བདག་ཉིད་ཀྱི་སེམས་ནི་བྱང་ཆུབ་སེམས་དཔའོ། །འདོད་བྱ་ཡིན་པས་འདོད་པ་ཡང་ཡིན་ལ་མཆོག་ཀྱང་ངོ་ཞེས་སློབ་དཔོན་
འཇུག་པའི་ཆོ་གའོ།། །།དེ་ནས་ལྷག་གནས་བྱས་པའི་སློབ་མ་ཁྲུས་དང་དྲིས་བྱུགས་ལ། གོས་གཙང་མ་ཅན་འཁོར་ལོའི་བདག་པོའི་ཚུལ་དུ་དམིགས་ལ། ཨོཾ་བཛྲ་རཀྵ་ཧཾ། ཞེས་པས་སྟོད་གཡོགས་བྱས་ཏེ། ཨོཾ་བཛྲ་ཨུཥྞཱི་ཥ་ཧཱུཾ་ཕཊ། ཅེས་པས་གཙུག་ཏོར་བྱས་ལ།

ལས་ཐམས་ཅད་པ་བཟླས་པའི་རས་དམར་པོས་ཨོཾ་ཙཀྵུར་བནྡྷ་བ་ར་མ་ན་ཡ་ཧཱུཾ། ཞེས་པའི་སྔགས་ཀྱིས་མིག་རས་བཅིངས་ལ་ཨཱཿཁཾ་བཱི་ར་ཧཱུཾ་ཞེས་བརྗོད་ཅིང་མེ་ཏོག་ཕྲེང་བ་བཟུང་བ་ཕུལ་བ་ལས་ཐམས་ཅད་པའི་ཆུས་བསངས་ལ་སྙིང་ག་དང་། མགྲིན་པ་དང་། སྤྱི་བོར་རྡོ་རྗེ་དང་། པདྨ་དང་འཁོར་
ལོ་ལ་གནས་པའི་ཉི་མ་དང་ཟླ་བའི་སྟེང་དུ་ཧཱུཾ་ནག་པོ་དང་། ཨཱཿདམར་པོ་དང་། ཨོཾ་དཀར་པོ་དང་། དེའི་འོད་ཟེར་གྱིས་ལུས་འོད་གསལ་བར་བྱས་ལ་ཧཱུཾ་ཞེས་བརྗོད་ནས་དཀྱིལ་འཁོར་གྱི་ལྷོ་སྒོར་བཞག་ལ་ལས་ཀྱི་རྡོ་རྗེས་བཟུང་ལ་དཀྱིལ་འཁོར་དུ་གཞུག་པའི་ཕྱིར་དྲི་བར་བྱ་སྟེ། ཀྱེ་དགའ་བ་
འདོད་པ་ཁྱོད་སུ་ཡིན། །ཞེས་གཅིག་གམ་གཉིས་སམ་གསུམ་སྟེ་བཞི་ནི་ལྷན་ཅིག་ཏུ་གཞུག་པར་མི་བྱ་སྟེ་དགེ་འདུན་ཚོགས་ཟུང་ཡིན་པའི་ཕྱིར་རོ། །སློབ་མས་ཀྱང་། ཀྱེ་བདེ་ཆེན་བདག་ནི་སྐལ་པ་བཟང་པོའོ། །ཞེས་སྨྲའོ། །དེ་ནས་སློབ་མ་ལ་ཨོཾ་སརྦ་ཡོ་ག་ཙིཏྟ་ཨུདྤཱ་ད་ཡཱ་མི་
ཞེས་བརྗོད་དུ་བཅུག་ཅིང་སེམས་བསྐྱེད་པར་བྱའོ། །མེ་ཏོག་དང་བཅས་པའི་རྡོ་རྗེ་སྙིང་གར་བཞག་སྟེ། དེ་རིང་ཁྱོད་ལ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབ་པར་འགྱུར་གྱི། དེ་བཞིན་གཤེགས་པ་ཐམས་ཅད་ཀྱི་གསང་ཆེན་དམ་པ་འདི་དཀྱིལ་འཁོར་དུ་མ་ཞུགས་པ་
རྣམས་ལ་སྨྲ་བར་མི་བྱ་ཞིང་མ་དད་པར་ཡང་མི་བྱའོ་ཞེས་བསྒོ་ནས། ཨོཾ་ཁཎྜ་རོ་ཧེ་ཧཱུཾ་ཧཱུཾ་ཕཊ་ཅེས་པས་བཀུག་སྟེ། ཡོལ་བའི་ནང་དུ་ཤྲཱི་ཧེ་རུ་ཀ་ཡ་བིད་མ་ཧེ་བིདྱཱ་རཱ་ཛ་ཡ་དྷཱིཿམ་ཧཱ་སྭཱ་ཧཱ། ཞེས་པ་གཱ་ཡི་ཏྲི་འདོན་དུ་གཞུག་གོ། །མཁའ་འགྲོ་མ་ཡི་དྲ་བས་འདྲེན། །གྲུབ་པའི་དཀྱིལ་
འཁོར་འཁོར་ལོ་འདིར། །བདེ་བ་མཆོག་གི་ཕོ་བྲང་དུ། །བུ་ཁྱོད་བདག་གིས་དྲངས་པའོ། །ཞེས་བསྒོ་ནས་ལྷོ་སྒོ་རུ་ཨོཾ་ན་མཿསྟེ་ཧཱུཾ། ན་མཿམི་ཧཱུཾ་ན་མོ་ན་མཿཧཱུཾ་སྭཱ་ཧཱ། ཞེས་འདོན་ཅིང་། མཁའ་སྤྱོད་ལ་སོགས་དབྱེ་བ་ཡིས། །ཕྱག་གསུམ་བྱེད་དུ་གཞུག་པར་བྱ། །ཐལ་མོ་སྤྱི་
བོར་བཞག་ནས་སུ། །ཡན་ལག་ཀུན་གྱིས་ཕྱག་བྱའོ། །ཨོཾ་སརྦ་བཱི་ར་ཡོ་གི་ནཱི་བྷྱཿཔཱུ་ཛོ་པསྠཱ་ནཱ་ཡ་ཨཱཏྨ་ནཱཾ་ནིརྱཱ་ཏ་ཡཱ་མི། སརྦ་ཏ་ཐཱ་ག་ཏ་བཱི་ར་ཡོ་གི་ནི། ཌཱ་ཀི་ནྱ་རྱ་ཨ་དྷི་ཏིཥྛནྟུ་མཱཾ། གཡོན་དུ་སྙིང་གར་ཐལ་མོ་སྦྱར་ཏེ་གཟུང་ངོ་། །ཨོཾ་སརྦ་བཱི་ར་ཡོ་གི་ནཱི་བྷྱཿཔཱུ་ཛཱ་བྷི་ཥེ་ཀཱ་ཡ་ཨཱཏྨ་

ནཱཾ་ནིརྱཱ་ཏ་ཡཱ་མི། སརྦ་ཏ་ཐཱ་ག་ཏ་བཱི་ར་ཡོ་གི་ནི་ལཱ་མཱ་དྱཱ་བྷི་ཥིཉྩ་ཏུ་མཱཾ། གཡོན་པའི་ཐལ་མོ་དཔྲལ་བར་བྱས་ཏེ་བྱང་དུའོ། །ཨོཾ་སརྦ་བཱི་ར་ཡོ་གི་ནཱི་བྷྱཿཔཱུ་ཛཱ་པྲ་བརྟ་ན་ཡ་ཨཱཏྨ་ནཱཾ་ནིརྱཱ་ཏ་ཡཱ་མི། སརྦ་ཏ་ཐཱ་ག་ཏ་བཱི་ར་ཡོ་གི་ནྱ་ཁཎྜ་རོ་ཧཱརྱཱ་པྲ་བརྟ་ཡནྟུ་མཱཾ། སྤྱི་གཙུག་ཏུ་ཐལ་མོ་
སྦྱར་ཏེ་ནུབ་ཏུའོ། །ཨོཾ་སརྦ་བཱི་ར་ཡོ་གི་ནཱི་བྷྱཿཔཱུ་ཛཱ་ཀརྨ་ཎེ་ཨཱཏྣ་ནཱཾ་ནིརྱཱ་ཏ་ཡཱ་མི། སརྦ་ཏ་ཐཱ་ག་ཏ་བཱི་ར་ཡོ་གི་ནི་རཱུ་པི་ནིརྱཱ་ཡ་ཀརྨ་ཀ་ཡནྟུ་མཱཾ། ཡང་ཤར་སྒོར། ཨོཾ་གུ་རུ་ཙ་ར་ཎ་ཨུ་པསྠ་ནཱ་ཡ་ཨཱཏྨ་ནཱཾ་ནིརྱཱ་ཏ་ཡཱ་མི། ཨོཾ་སརྦ་སཏྭ་པ་རི་ཏྲ་ཎ་ཡ་ཨཱཏྨ་ནཱ་ནིརྱཱ་ཏ་ཡཱ་མི། ཞེས་དོན་དང་ལྡན་པ་
འདོན་དུ་གཞུག་གོ། །དེ་ནས་ལྷོ་སྒོར་ལྷོར་ཁ་བལྟས་ཏེ། ཀྱེ་བུ་ཁྱོད་ཀྱང་རབ་ཏུ་གནས། །དེ་ཉིད་སྣང་བའི་རིགས་ལ་ནི། །དཔའ་བོ་ལྷ་མོ་རྣམས་སྐྱེ་བའི། །ཧེ་རུ་ཀ་ཡི་རྣམ་པས་མཛེས། །སྐྱེས་བུ་གང་ཞིག་སྐྱེས་ནས་སུ། །གོ་འཕང་མཆོག་ནི་ཐོབ་པར་འགྱུར། །ཡེ་ཤེས་སྡོམ་
པའི་དག་པ་སྟེ། །བདག་གིས་ཁྱེད་ལ་སྦྱིན་པ་ཡིན། །དཀྱིལ་འཁོར་མ་མཐོང་མི་རྣམས་ལ། །ཁྱོད་ཀྱིས་ཀྱང་ནི་སྨྲ་མི་བྱ། །གལ་ཏེ་སྨྲ་ན་དེའི་ཚེ་བུ། །དམ་ཚིག་ཉམས་པར་བྱེད་པར་འགྱུར། །མགོ་བོར་རྡོ་རྗེ་བཞག་སྟེ་དྲིལ་བུ་དཀྲོལ་ཞིང་། འདི་ནི་ཁྱོད་ཀྱི་དམ་ཚིག་གི་རྡོ་རྗེ་ཡིན་
ཏེ་ཚུལ་འདི་འགའ་ཞིག་ལ་སྨྲས་ན་འདིས་ཁྱོད་ཀྱི་མགོ་འགས་པར་བྱེད་དོ་ཞེས་ཉན་དུ་བཅུག་ལ་སྙིང་གར་རྡོ་རྗེ་བཟུང་ལ། དེ་རིང་ཕག་མོ་རང་ཉིད་དཔལ། །ཁྱོད་ཀྱི་སྙིང་གར་ཡང་དག་གནས། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཞེས་བཀའ་བསྒོ་
ནས། མིང་མེད་དང་མཐེ་བོས་བཟུང་བའི་དུང་གི་ཆུས་མནའི་ཚུལ་དུ། འདི་ནི་ཁྱོད་ཀྱི་དམྱལ་བའི་ཆུ། །དེ་ཚིག་འདས་ན་སྲེག་པར་བྱེད། །དེ་ཚིག་བསྲུངས་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འཐུང་ཅིག །ཨོཾ་པཉྩ་ཨ་མྲྀ་ཏ་ཨུ་ད་ཀ་ཋ་ཋ་ཧཱུཾ་ཞེས་པའི་ཚིགས་སུ་བཅད་པ་དང་
སྔགས་ཀྱིས་བདུད་རྩི་ལྔ་འཐུང་དུ་གཞུག་གོ། །དེ་རིང་ནས་བརྩམས་ཏེ་ཁྱོད་ཀྱི་དཔལ་རྡོ་རྗེ་ཕག་མོ་ང་ཡིན་གྱིས་ངས་གང་བསྒོ་བ་དེ་འབད་པར་གྱིས་ཤིག །ཁྱོད་ཀྱིས་ང་ལ་སྨད་པར་ཡང་མི་བྱ་སྟེ། ཁ་ན་མ་ཐོ་བ་མ་སྤངས་པར་ཚེའི་དུས་བྱས་ནས་དམྱལ་བར་ལྟུང་བར་གྱུར་

ཏ་རེ་ཞེས་བརྗོད་དོ། །དེ་ནས་སློབ་མ་དཀྱིལ་འཁོར་ལ་ཕྱོགས་པ་ལ་ཁྱོད་ཀྱི་མིག་ལ་ཅི་ལྟ་བུའི་སྣང་བ་མཐོང་ཞེས་དྲིས་ནས། དེས་སྨྲས་པ། དཀར་པོ་དང་། སེར་པོ་དང་། དམར་པོ་དང་། ནག་པོ་སྣང་བ་རྣམས་ཀྱིས་གོ་རིམས་བཞིན་དུ་ཞི་བ་དང་། རྒྱས་པ་དང་། དབང་དང་།
མངོན་སྤྱོད་ཀྱི་སྐལ་པ་དང་ལྡན་པར་ཤེས་པར་བྱས་ནས། དེ་མཐེ་བོང་གཉིས་ནས་གཡོན་པས་བཟུང་ནས་རྡོ་རྗེའི་འགྲོས་ཀྱིས་ལས་ཐམས་ཅད་པ་བཟླས་ཤིང་གཡོན་སྐོར་དུ་བསྐོར་བ་གསུམ་བྱེད་དུ་བཅུག་ནས་བདེན་པའི་བྱིན་གྱི་རླབས་འདི་བྱའོ། །བདག་གི་དཀྱིལ་འཁོར་འདི་
ལྟ་བུར། །སློབ་མ་འདི་ནི་ཡང་དག་གཞུག །ལྷ་རྣམས་རིགས་ཀྱི་རིམ་པ་ནི། །བསོད་ནམས་ཇི་ལྟར་འདི་ལ་ཤོག །ཅེས་པས་སློབ་མ་གཞུག་པའི་ཆོ་གའོ།། །།སྔར་བཟུང་བའི་ཕྲེང་བ་ཡི་གེ་ཧཱུཾ་གིས་བསྔགས་པ་ལས་མ་རྙིངས་ཤིང་ཡང་བའི་མེ་ཏོག་ཅིག་བླངས་ཏེ་
དེའི་ལག་པ་ཐལ་མོ་སྦྱར་བར་སྦྱིན་པར་བྱའོ། །དེའི་ཚེ་དེ་ཉིད་ཀྱང་ཡི་གེ་གསུམ་གྱིས་འོད་གསལ་ཞིང་སྡིག་པ་བཀྲུས་པར་མོས་ནས་བླ་མས་དེ་ལྟར་བྱིན་གྱིས་བརླབས་ནས་གུས་པ་སྔོན་དུ་འགྲོ་བས་དཀྱིལ་འཁོར་པ་དང་བཅས་པའི་དཀྱིལ་འཁོར་གྱི་དབང་ཕྱུག་མདུན་ན་
གནས་པ་བཞིན་དུ་དམིགས་ནས་དཀྱིལ་འཁོར་དེར་ཡིད་ཀྱིས་ཞུགས་ཏེ། ཨོཾ་ཏཥྛི་བཛྲ་དྲྀ་ཌྷོ་མེ་བྷ་ཝ་ཤཱ་ཤྭ་ཏོ་མེ་བྷ་བ་ཧྲྀ་ད་ཡཾ་མེ་ཨ་དྷི་ཏིཥྛ་སརྦ་སིདྡྷི་མྨེ་པྲ་ཡཙྪ་ཧཱུཾ་ཧ་ཧ་ཧ་ཧ་ཧོ། ཨཱཿཁཾ་བཱི་ར་ཧཱུཾ་པྲ་ཏཱིཙྪ་ཀུ་སུ་མ་ཨཉྩ་ལི་ནཱ་ཐ་ཧོཿ། ཞེས་བརྗོད་ཅིང་མིག་ལ་སོགས་པ་བསྡམས་ནས་
དེའི་དབུ་ལ་མེ་ཏོག་དོར་བར་བྱའོ། །རེ་ཁཱ་ལྔའི་ནང་དུ་མེ་ཏོག་ལྷུང་བའི་རྗེས་སུ་འབྲངས་ནས་རིགས་བསྟན་པར་བྱའོ། །དེའི་རྣལ་འབྱོར་ཀྱང་འདི་ལའོ། །མཛོད་སྤུའམ་དབུ་འམ་གཙུག་ཏོར་ལ་ལྷུང་ན་ཕྱག་རྒྱ་ཆེན་པོའི་དངོས་གྲུབ་པོ། །སྤྱན་ནམ་ཞལ་ལ་ནི་སྔགས་ཀྱི་དངོས་
གྲུབ་པོ། །འོག་གི་ཆ་ལ་དམན་པའོ། །ལྷ་རྣམས་ལས་རིང་ན་ཡུན་རིང་པོས་སོ། །མེ་ཏོག་དེ་ཨོཾ་པྲ་ཏི་གྲྀཧྞ་ཏཾ་ཨི་མཾ་སཏྭ་མ་ཧཱ་བ་ལ། ཞེས་པས་མགོ་ལ་བཅིང་ངོ་ཞེས་པ་ཕྲེང་བའི་དབང་ངོ་། །སློབ་མའི་སྙིང་གར་ཟླ་བ་ལ་བདག་པོ་དང་། དཔྲལ་བར་ར་དང་མིག་

གཉིས་ལ་འབར་བ་དང་བཅས་པའི་ཨོཾ་གཉིས་བསྒོམས་ནས། དཔལ་ལྡན་ཕག་མོ་རང་ཉིད་ཀྱིས། །ཁྱོད་ཀྱི་མིག་ནི་འབྱེད་པར་བརྩོན། །རྡོ་རྗེ་མིག་ནི་བླ་མེད་པ། །ཀུན་དུ་གཟིགས་པས་འབྱེད་པར་མཛོད། །ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་ཝརྞྞ་ནཱི་ཡེ་ཧཱུཾ་ཧཱུཾ་ཕཊ་སྭཱ་ཧཱ།
ཨོཾ་ཛྙཱ་ན་ཙཀྵུ་ཧཱུཾ་ཨཱཿསྭཱ་ཧཱ། ཞེས་བརྗོད་ཅིང་གདོང་གཡོགས་དགྲོལ་བར་བྱའོ། །ད་ནི་དད་པའི་ཤུགས་ཀྱིས་ནི། །དཀྱིལ་འཁོར་འདི་ནི་ཡང་དག་ལྟོས། །ཁྱོད་ནི་རྣལ་འབྱོར་མ་རིགས་སྐྱེས། །ཕྱག་རྒྱ་སྔགས་ཀྱིས་བྱིན་གྱིས་བརླབས། །ཡོན་ཕུལ་ཏེ་ཕྱག་བྱས་ནས་གཅིག་པུར་
འདུག་པའི་སློབ་མས་བླ་མ་ལ་གསོལ་བ་གདབ་སྟེ། བསམ་དུ་མེད་པའི་ཆོས་ཀྱི་སྣོད། །དབང་བསྐུར་བ་ནི་བདག་མཛོད་ཅིག །བླ་མ་ཡིས་ནི་ལྷོ་སྒོ་རུ། །ཧེ་རུ་ཀ་ཡི་བདག་ཉིད་སེམས། །སེང་གེའི་གདན་ལ་གཞག་པའམ། །སྣ་ཚོགས་པདྨའི་ཤིང་སྟེགས་ལ། །ཕྱག་རྒྱ་ལྔ་ལྡན་
སློབ་མ་དེ། །ཁ་ཊྭཱཾ་ག་ནི་ཐོགས་གནས་ལ། །སྟེང་དུ་ལྷ་མོས་གདུགས་བཟུང་བ། །གཡས་པ་ཌ་མ་རུ་ཐོགས་པ། །རྣལ་འབྱོར་མ་དང་དཔའ་ཚོགས་ཀྱིས། །བསྐོར་བའི་དཀྱིལ་དུ་གནས་པ་ནི། །གླུ་དང་བཀྲ་ཤིས་ལ་སོགས་པ། །འབད་པས་ཡང་དག་མཆོད་ནས་སུ། །
སྔར་བཤད་རིམ་པས་བྱུར་བསལ་བྱ། །རྣམ་རྒྱལ་བུམ་པ་ལ་སོགས་ཆུ། །བླངས་ནས་ཐོད་པར་བྱས་ནས་སུ། །ཧཱུྃ་ལས་སྐྱེས་པའི་རྡོ་རྗེ་དང་། །དེ་ལས་བྱུང་བའི་མི་བསྐྱོད་པ། །དེས་མཚན་པའི་རང་བཞིན་གྱི་ཆུ་བསམས་ལ་སྙིང་གའི་འོད་ཟེར་གྱིས་བཀུག་པའི་ཡེ་ཤེས་སེམས་དཔའ་
དེར་བཅུག་ལ། སྙིང་གའི་འོད་ཟེར་གྱིས་ཕྱོགས་མཐའ་ཡས་པ་ན་གནས་པའི་དེ་བཞིན་གཤེགས་པ་དང་། རིག་པའི་ལྷ་མོ་རྣམས་ཡང་དག་པར་མཆོད་ནས་སློབ་མ་ལ་དབང་བསྐུར་བའི་དོན་དུ། རྡོ་རྗེ་ཅན་གྱིས་སངས་རྒྱས་ལ། །འགྲོ་བ་བསྐྱབ་པའི་ཆེད་དུ་དབང་། །ཡོན་ཏན་འབྱུང་
གནས་ཇི་ལྟར་གསོལ། །དེ་ལྟར་འདི་ལ་སྩལ་དུ་གསོལ། །ཞེས་གསོལ་བ་བཏབ་ནས། དེ་དག་ཤེས་རབ་མ་དང་སྙོམས་པར་ཞུགས་ཏེ་འདོད་ཆགས་ཆེན་པོས་ཞུ་བར་གྱུར་ནས་རྣམ་པར་སྣང་མཛད་ཀྱི་སྒོ་ནས་ནང་དུ་ཞུགས་ནས་རྡོ་རྗེའི་ལམ་ནས་འཐོན་ཏེ་ཁུ་བ་དེ་ལྷ་མོའི་པདྨའི་

ཁ་ནས་ནང་དུ་བཅུག་པའི་སློབ་མ་སྐད་ཅིག་གིས་སྟོང་པ་ཉིད་ཀྱི་རྗེས་ལ་ཧཱུྃ་དང་རྡོ་རྗེ་ལས་བྱུང་བའི་ཡུམ་དང་བཅས་པའི་མི་བསྐྱོད་པའི་རང་བཞིན་ཡེ་ཤེས་སེམས་དཔའ་དང་ཐ་མི་དད་པ་ལ་དབང་བསྐུར་ནས། ཡང་ཕྱག་དང་ཞབས་ལ་སོགས་པའི་གཟུགས་ཀྱིས་པདྨ་ལས་འཐོན་ཏེ་གནས་
པའི་སློབ་མ་ལ་ནམ་མཁའ་གང་བར་གནས་པའི་ཡུམ་དང་བཅས་པའི་རྡོ་རྗེ་ཅན་རྣམས་ཀྱིས་གུར་ཀུམ་ལ་སོགས་པའི་ཆར་དང་། བྱང་ཆུབ་ཀྱི་སེམས་བདུད་རྩིས་གང་བའི་ཐོད་པ་རྣམས་ཕྱག་གིས་ཅུང་ཟད་གཞོལ་བས་དབང་བསྐུར་བར་བསམ་ཞིང་། མཁའ་འགྲོ་མ་ལ་སོགས་པས་བཀྲ་ཤིས་གང་
ཞིག་ཅེས་པ་ལ་སོགས་པའི་བཀྲ་ཤིས་བརྗོད་ཅིང་། དབང་བསྐུར་བ་ནི་རྡོ་རྗེ་ཆེ། །ཞེས་པ་ལ་སོགས་པ་དང་། ཨོཾ་ཤྲཱི་ཙཀྲ་བཱི་ར་ཏྭཾ་ཨ་བྷི་ཥཉྩཱི་མི། ཨོཾ་བཛྲ་ཨུད་ཀ་ཨ་བྷི་ཥཉྩི་ཧཱུཾ་སུ་ར་ཏ་སྟྭཾ་ཨ་ཧཱུཾ་ཞེས་པས་དབང་བསྐུར་རོ། །དེ་དེའི་ཚེ་བདེ་བ་ཆེན་པོའི་བདག་ཉིད་དུ་བསམ་པར་བྱའོ། །
ཆུའི་དབང་ངོ་། །གསོལ་བ་བཏབ་པ་དང་ལྡན་པའི་སློབ་མ་ཨོཾ་དང་རིན་པོ་ཆེ་ལས་སྐྱེས་པའི་རིན་ཆེན་འབྱུང་ལྡན་གྱི་གཟུགས་ཡེ་ཤེས་སེམས་དཔའ་དང་ཐ་མི་དད་པར་བསམས་ནས་ཆུའི་དབང་ལས་གསུངས་པའི་སྙིང་གའི་འོད་ཟེར་གྱིས་ཕྱོགས་མཐའ་ཡས་པ་ལ་སོགས་འདིར་ཡང་
ཤེས་པར་བྱ་སྟེ། རྡོ་རྗེ་དང་། དྲིལ་བུ་དང་། མིང་གི་དབང་དུ་ཡང་ངོ་། །འདིར་ཁྱད་པར་དུ་གསེར་ལ་སོགས་པ་ལས་བྱས་པའི་དབུ་རྒྱན་ཅོད་པན་རིན་ཆེན་འབྱུང་ལྡན་ལས་བྱས་པའི་ཡེ་ཤེས་སེམས་དཔའ་དང་ཐ་མི་དད་པ་སློབ་མའི་རིགས་ཀྱི་བདག་པོ་དབུས་ན་གནས་པའི་དེ་བཞིན་
གཤེགས་པ་ལྔས་བྱིན་གྱིས་བརླབས་པ་དེའི་མགོ་ལ་བསྐོན་ཞིང་སྟེང་དུ། ཨོཾ་བཛྲ་དྷཱ་ཏྭཱི་ཤྭ་རི་ཨ་བྷི་ཥིཉྩ་ཧཱུཾ། དཔྲལ་བར། ཨོཾ་སཏྭ་བཛྲི་ཨ་བྷི་ཥིཉྩ་བྷྲུཾ། གཡས་སུ། ཨོཾ་རཏྣ་བཛྲི་ཨ་བྷི་ཥིཉྩ་ཏྲཱཾ། རྒྱབ་ཏུ། ཨོཾ་དྷརྨཱ་བཛྲི་ཨ་བྷི་ཥིཉྩ་ཧྲཱིཿ། གཡོན་དུ། ཨོཾ་ཀརྨ་བཛྲི་ཨ་བྷི་
ཥིཉྩ་ཨཿ། ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་ཝརྞྞ་ནཱི་ཡེ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་ཨཱཿབཛྲ་མུ་ཀུ་ཊ་ཨ་བྷི་ཥིཉྩ་ཧཱུཾ་སུ་ར་ཏ་སྟྭཾ་ཨ་ཧཾ་ཞེས་བརྗོད་དོ། །ཅོད་པན་གྱི་དབང་ངོ་། །ཧྲཱིཿཡིག་ལས་སྐྱེས་ཤིང་དེས་མཚན་པའི་པདྨ་ཡོངས་སུ་གྱུར་པའི་སྣང་བ་མཐའ་ཡས་ཀྱི་རང་བཞིན་རྡོ་རྗེ་སློབ་མ་ཡང་དེ་

ལྟར་རྫོགས་པའི་སློབ་མའི་སྙིང་ག་དང་། མགྲིན་པ་དང་། མགོ་བོ་རྣམས་སུ་རྡོ་རྗེ་རེག་ནས། ཧེ་རུ་ཀ་དཔལ་དཔའ་སོགས་ཀྱིས། །དི་རིང་ཁྱོད་ལ་དབང་བསྐུར་རོ། །འདི་དེ་སངས་རྒྱས་ཐམས་ཅད་ཉིད། །རབ་ཏུ་གྲུབ་ཕྱིར་རྡོ་རྗེ་ཟུང་། །ཞེས་བརྗོད་ཅིང་
སྙིང་ག་དང་ལག་པ་གཡས་པར་སྦྱིན་ནོ། །རྡོ་རྗེའི་དབང་ངོ་། །ཁཾ་དང་རལ་གྲི་ལས་སྐྱེས་པའི་དོན་ཡོད་གྲུབ་པའི་ངོ་བོ་ཡེ་ཤེས་སེམས་དཔའ་དང་ཐ་མི་དད་པའི་སློབ་མ་དང་དྲིལ་བུ་བསམས་ཏེ། དེའི་ལག་པ་གཡོན་པར་དྲིལ་བུ། འདི་དེ་སངས་རྒྱས་ཐམས་ཅད་ཀྱི། །དྲིལ་བུ་
དབྱངས་ཀྱི་རྗེས་འགྲོར་ལྡན། །བྱང་ཆུབ་མཆོག་ཏུ་རྒྱལ་བ་བཞེད། །ཁྱོད་ཀྱིས་ཀྱང་ནི་རྟག་ཏུ་ཟུང་། །ཞེས་བརྗོད་ཅིང་སྦྱིན་ནོ། །རྡོ་རྗེ་དང་དྲིལ་བུ་ཐོགས་པའི་ལག་པ་གཉིས་འཁྱུད་པའི་སྟངས་བྱེད་དུ་བཅུག་ལ། ཨོཾ་ཤྲཱི་ཧེ་རུ་ཀ་ཨ་དྷི་པ་ཏི་སྟྭཾ་ཨ་བྷི་ཥིཉྩཱ་མི་ཏིཥྛ་བཱི་ར་
ས་མ་ཡ་སྟྭཾ་ཞེས་བརྗོད་དེ། ཨོཾ་བཛྲ་གྷཎྜེ་ཨ་ཨཿ། བཅོམ་ལྡན་བཟུང་ངོ་བདག་ལ་ནི། །ཡང་དག་ཉེ་བར་གྱུར་པར་མཛོད། །ཅེས་བརྗོད་དུ་གཞུག་གོ། །དྲིལ་བུའིའོ། །དེ་ལྟར་གསོལ་བ་བཏབ་པར་གྱུར་པ། ཨོཾ་དང་འཁོར་ལོ་ལས་བྱུང་བའི་རྣམ་པར་སྣང་མཛད་ཀྱི་རང་
བཞིན་ཡེ་ཤེས་དང་ཐ་མི་དད་པ་སྤྱི་བོར་རྡོ་རྗེ་དང་དྲིལ་བུ་མཉམ་པོར་འཛིན་དུ་བཅུག་ལ། ཨོཾ་ཤྲཱི་ཧེ་རུ་ཀ་ཨ་དྷི་པ་ཏི་སྟྭཾ། ཨ་བྷི་ཥཉྩཱི་མི་ཤྲཱི་ཧེ་རུ་ཀ་ནཱ་མ་ཨ་བྷི་ཥེ་ཀ་ཏ། ཞེ་སྡང་རྡོ་རྗེ་ཁྱོད་ཅེས་པ་དང་། གཏི་མུག་རྡོ་རྗེ་ཁྱོད་ཅེས་པ་ལ་སོགས་པའི་མེ་ཏོག་ལྷུང་བའི་རིགས་ཀྱི་མིང་
ངམ་རྣམ་པར་སྣང་མཛད་ཀྱི་བདག་ཉིད་ཀྱིས་དབང་བསྐུར་རོ། །དེ་ལ། རྡོར་སེམས་རྣམ་རྒྱལ་དཔེ་མེད་དང་། །ཡེ་ཤེས་སེམས་དཔའ་བདེ་བ་ཆེ། །ལྷན་སྐྱེས་ལུས་མེད་དགའ་བ་དང་། །དང་པོ་མཆོག་རྡོར་ཨ་ལ་ལ། །མི་བསྐྱོད་བཞད་པ་འགྱིང་བ་དང་། །རང་བྱུང་
ཞེ་སྡང་ཧཱུཾ་མཛད་དང་། །རྡོ་རྗེ་རོལ་པ་སྒེག་པ་དང་། །དགའ་བ་དགྱེས་པ་སེམས་རྡོ་རྗེ། །རྣམ་སྣང་སྐུ་དང་སངས་རྒྱས་གཟུགས། །སྒྱུ་མ་དེ་བཞིན་གཤེགས་པ་དང་། །རིན་ཆེན་ཡིད་བཞིན་ནོར་བུ་དང་། །ང་རྒྱལ་དང་ནི་གཟི་བརྗིད་དང་། །ནམ་མཁའ་འོད་

བྱེད་རྡོ་རྗེའོ། །པདྨ་དག་དང་འོད་དཔག་མེད། །འདོད་ཆགས་ཆོས་དང་སྤྱན་རས་གཟིགས། །དོན་ཡོད་ལས་དང་དམ་ཚིག་རླུང་། །ཕྲག་དོག་རེག་བྱ་ཕ་རོལ་བྱིན། །རྡོ་རྗེ་དབྱིངས་དབང་ཕྲེང་བ་མ། །མྱོང་མ་ཤུགས་མ་རྣམ་རོལ་མ། །བདག་མེད་ལག་མ་མཱ་མ་ཀཱི། །སྡང་
དང་དགའ་མ་ཕྲེང་མ་འོད། །སྤྱན་མ་དཀར་མོ་མཁའ་འགྲོ་མ། །སྒེག་མ་རྡོ་རྗེ་གཏི་མུག་དགའ། །འབར་མ་ཕྲེང་མ་ནམ་མཁའ་དགའ། །དོ་ཤལ་རྡོ་རྗེ་དབུགས་འབྱིན་མ། །གོས་དཀར་བཞད་མ་འདོད་ཆགས་དགའ། །གླུ་མ་འདོད་ཆགས་རོ་ལངས་མ། །རྡོ་རྗེ་ངོ་མཚར་
བརྡོ་བ་མ། །སྒྲོལ་མ་སྒྱུ་མ་གར་དབང་ཕྱུག །བསྒྱིངས་མ་རྡོ་རྗེ་དགའ་མའོ། །འདི་ནི་མིང་གི་དབང་ངོ་། །དབང་ལྔ་པོ་འདི་དག་ནི་མ་རིག་པའི་གཉེན་པོ་ཡིན་པས་རིག་པའི་དབང་སྟེ་ལུས་ཀྱི་རྣམ་པར་དག་པའོ། །འདི་དག་གིས་དབང་བསྐུར་བ་ནི་བྱ་བ་དང་སྤྱོད་པའི་
རྒྱུད་ཉན་པ་དང་བཤད་པ་དང་། སྔགས་བསྒྲུབ་པ་ལ་དབང་བར་འགྱུར་རོ། །དེ་སྐད་དུ་གསུངས་པ། ཆུ་ནི་ཤིན་ཏུ་རྣམ་དག་ཡིན། །ཅོད་པན་མཉམ་པ་ཉིད་དུ་འགྱུར། །རྡོ་རྗེ་རྟག་ཏུ་སོ་སོར་རྟོག །མིང་གི་མེ་ལོང་ཡེ་ཤེས་ཡིན། །དྲིལ་བུ་བྱ་བ་ནན་ཏན་ནོ། །ཞེས་
པའོ། །རང་གི་སྙིང་པོ་ལ་སོགས་པ་བརྒྱ་རྩ་བརྒྱད་བཟླས་ཏེ། བཅོམ་ལྡན་བདག་གིས་སྦྱིན་ལགས་ཀྱིས། །འདི་ལ་ཉེ་བར་མཛད་དུ་གསོལ། །ཞེས་བརྗོད་ཅིང་སྙིང་ག་ནས་ཁའི་སྒོ་ནས་བྱུང་སྟེ། རྣ་བ་གཡས་པ་ནས་སྙིང་གར་ཞུགས་པར་བསམ་ཞིང་སྔགས་སྦྱིན་ཏེ། སློབ་
མས་ཀྱང་། བཅོམ་ལྡན་བདག་གིས་བཟུང་ལགས་ཀྱིས། །བདག་ལ་ཉེ་བར་མཛད་དུ་གསོལ། །ཞེས་ལན་གསུམ་བརྗོད་དོ། །སྔགས་ཀྱི་དབང་ངོ་། །ཧཱུྃ་ལས་སྐྱེས་པའི་རྡོ་རྗེ་སེམས་དཔའི་རང་བཞིན་དུ་བསམས་ནས། འདི་དེ་སངས་རྒྱས་ཐམས་ཅད་ཉིད། །ཧེ་རུ་ཀ་
ཡི་ཕྱག་ན་གནས། །ཧེ་རུ་ཀ་དཔལ་བརྟུལ་ཞུགས་བརྟན། །ཁྱོད་ཀྱིས་ཀྱང་ནི་རྟག་ཏུ་ཟུང་། ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ། ཏིཥྛ་ཨེ་ཥ་ཏྭཾ་དྷ་ར་ཡཱ་མི་ཧི་ཧི་ཧི་ཧི་ཧཱིཿ། ཞེས་བརྗོད་ཅིང་དེ་ཉིད་ཀྱིས་གཟུང་དུ་གཞུག་གོ་ཞེས་པ་རྡོ་རྗེའི་བརྟུལ་ཞུགས་སོ། །དཔལ་བདེ་

མཆོག་གི་སྙིང་པོའི་སྔགས་ཀྱིས་ཁ་ཊྭཱཾ་ག་དང་ཅང་ཏེའུ་དང་པདྨའི་སྣོད་རྣམས་ལ་ལན་གསུམ་དུ་བཟླས་ལ། ཧེ་རུ་ཀ་དཔལ་ཕྱག་རྒྱ་འདི། །ཕྱི་ནང་ཡང་དག་གནས་པ་ཉིད། །དེ་ནས་ཁ་ཊྭཱཾ་ཅང་ཏེའུ་སྣོད། །སྦྱིན་པ་དཔའ་བོས་གཟུང་བར་གྱིས། །ཞེས་པས་འཛིན་དུ་
གཞུག་གོ་ཞེས་པ་སྤྱོད་པའི་བརྟུལ་ཞུགས་སོ། །དེ་བཞིན་གཤེགས་པའི་སྤྱོད་ལམ་གྱི་ཚུལ་དུ་བྱས་ནས་ཆོས་གོས་ཀྱི་གྲྭ་བཟུང་བའི་ཁུ་ཚུར་གཡོན་པ་སྙིང་གར་བཟུང་ཞིང་གཡས་པ་མི་འཇིགས་པའི་ཕྱག་རྒྱས། འདིར་བདག་འཁོར་ལོ་གསུམ་དབང་ཕྱུག །སངས་རྒྱས་ཀུན་གྱི་རང་
བཞིན་དངོས། །ཧེ་རུ་ཀ་དཔལ་མིང་ཅན་གྱི། །དེ་བཞིན་གཤེགས་པ་ཁྱོད་ལུང་བསྟན། །དཔལ་ཧེ་རུ་ཀ་ཞེས་བྱ་བའི་དེ་བཞིན་གཤེགས་པའི་གྲུབ་པ་སྟེ། མེ་ཏོག་ལྷུང་བའི་རིགས་ཀྱི་མིང་གི་དེ་བཞིན་གཤེགས་པའི་ཚུལ་ཅན་སློབ་མ་ཀྱེ་ཆེ་གེ་མོ་རྡོ་རྗེ་ཏ་ཐཱ་ག་ཏ་སིདྡྷྱཿས་མ་ཡ་སྟྭཾ་བྷུར་བྷུ་
བ་སྭཿ། ཁམས་གསུམ་གྱིས་ནི་རྒྱལ་པོ་ཆེ། །བདག་པོ་དཔལ་ལྡན་ཡོན་ཏན་གཏེར། །བདུད་ཀྱི་སྡེ་ཀུན་ཕམ་བྱས་ནས། །གྲོང་ཁྱེར་མཆོག་ཏུ་ཁྱོད་རབ་ཞུགས། །ཞེས་བརྗོད་དེ་ལུང་བསྟན་པར་བྱའོ། །དེ་ལྟར་ལུང་བསྟན་པ་ནི་དེ་བཞིན་གཤེགས་པ་ཐམས་ཅད་ཀྱིས་རྫོགས་པའི་
བྱང་ཆུབ་ཏུ་ལུང་སྟོན་ཏེ་དད་པར་བྱའོ་ཞེས་ལུང་བསྟན་པའོ། །མཚན་མ་མེད་པའི་འགྲོ་བའི་དོན། །ད་ལྟ་གང་གིས་བྱེད་འགྱུར་པ། །ཕྱིར་མི་ལྡོག་པའི་དབང་བསྐུར་ཆེ། །དཔའ་བོ་ཆེན་པོ་བདག་ལ་སྩོལ། །ཞེས་པས་གསོལ་བ་བཏབ་པའོ། །རྡོ་རྗེ་དང་ཧཱུྃ་ལས་བྱུང་བའི་རྡོ་རྗེ་སེམས་
དཔའི་ཚུལ་དུ་བསམས་ལ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་བདེ་བ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་སྙེམས་ཚུལ་བདག་པོའི་བདག །བཅོམ་ལྡན་འདས་དཔལ་མཆོག་དང་པོའི་སྐྱེས་བུའོ་ཞེས་བརྗོད་ཅིང་རྡོ་རྗེ་འཛིན་དུ་གཞུག་གོ། །
འདི་དེ་སངས་རྒྱས་ལ་སོགས་པས། །དྲིལ་བུ་དང་། ཕྱག་རྒྱ་འདི་ནི་དམ་ཚིག་བརྗོད། །ཡིད་ཀྱི་སྐུ་ནི་བརྟན་པའི་ཕྱིར། །གང་གི་སྐུ་ནི་མ་ལུས་བརྟན། །དེས་ནི་ཕྱག་རྒྱ་རབ་ཏུ་བརྗོད། །ཅེས་པ་སྟེ་རྡོ་རྗེ་དྲིལ་བུ་དང་བཅས་པའི་ལག་པ་གཉིས་ཀྱིས་ཡེ་ཤེས་ཀྱི་ཕྱག་རྒྱ་ལ་འཁྱུད་པ་ནས་གནས་པ་

རྡོ་རྗེ་སེམས་དཔའི་ཚུལ་དུ་བསམས་ཏེ་ཆུའི་དབང་ལས་གསུངས་པའི་ཆོ་གས། དབང་བསྐུར་བ་ནི་རྡོ་རྗེ་ཆེ། །ཁམས་གསུམ་པ་ཡིས་ཕྱག་བྱས་པ། །གསང་གསུམ་གནས་ལས་བྱུང་བ་ཡི། །སངས་རྒྱས་ཀུན་གྱིས་སྦྱིན་པར་བྱ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ས་མ་ཤྲི་ཡེ་ཧཱུཾ་སྭཱ་ཧཱ། ཞེས་
བརྗོད་དེ་དབང་བསྐུར་རོ། །སྤྱི་བོར་མི་བསྐྱོད་པ་བསམས་ལ་གཞན་རྒྱལ་བ་དང་ལྷ་མོ་རྣམས་དེ་ཉིད་ལ་ཡེ་ཤེས་སེམས་དཔའི་ཚུལ་དུ་ཐིམ་པར་བྱས་ནས། ཨོཾ་སུ་པྲ་ཏིཥྛ་བཛྲེ་སྭཱ་ཧཱ། ཞེས་པས་བྱིན་གྱིས་བརླབས་ནས་མེ་ཏོག་ལ་སོགས་པའི་མཆོད་པ་རྣམས་ཀྱིས་མཆོད་པར་བྱའོ་དེས་
གསུངས་པ། བཅུ་དྲུག་བདག་ཉིད་ཤེས་རབ་མ། །ལག་པ་གཉིས་ཀྱིས་བཟུང་ནས་ནི། །རྡོ་རྗེ་དྲིལ་བུ་སྦྱོར་བ་ལས། །སློབ་དཔོན་གྱི་ནི་དབང་དུ་འདོད། །ཅེས་སོ། །དེ་ནས། དཔའ་བོ་དཔའ་མོའི་དབང་ཕྱུག་གྲོང་། །རང་བཞིན་དག་པ་སངས་རྒྱས་བདག །ལུས་ཀྱི་དཀྱིལ་
འཁོར་རང་བཞིན་གྱིས། །དྲི་མ་མེད་པ་བུ་ཁྱོད་ལྟོས། །གནས་དང་ཉེ་བའི་གནས་ལ་སོགས་པ་བདག་ཉིད་ཀྱི་དཀྱིལ་འཁོར་ལ་གནས་པའི་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་གྱི་རང་བཞིན་རྩ་སུམ་ཅུ་རྩ་བདུན་དཀྱིལ་འཁོར་བའི་ལྷའི་འཁོར་ལོ་དཔལ་ཧེ་རུ་ཀའི་ཡན་ལག་དང་ཉིང་
ལག་ཉེ་བར་བསྟན་པར་བྱའོ། །ཕྱིར་མི་ལྡོག་པའི་དབང་ངོ་། །གསེར་རམ་དངུལ་གྱི་སྣོད་ལ་བཞག་པའི་མར་དང་སྤྲང་གི་མིག་སྨན་གསེར་གྱི་ཐུར་མས་སློབ་མའི་མིག་གཉིས་ལ་པྲཾ་བསམས་ཏེ། ཨོཾ་བཛྲ་ནེ་ཏྲ་ཨ་པ་ཧ་ར་པ་ཊ་ལཾ་ཧྲཱིཿ། ཞེས་བྱུག་པ་ནི་ཐུར་མའི་དབང་ངོ་། །ཨ་ཡིག་གིས་
བསྔགས་པའི་མེ་ལོང་སློབ་མ་ལ་བསྟན་ཞིང་། རྡོ་རྗེ་སེམས་དཔའ་མེ་ལོང་ལྟར། །དག་ཅིང་གསལ་ལ་དྲི་མ་མེད། །སངས་རྒྱས་ཀུན་བདག་རང་བཞིན་དུ། །ཀྱེ་བུ་ཁྱོད་ཀྱི་སྙིང་ལ་གནས། །ངོ་བོ་མེད་ཅིང་གནས་མེད་པའི། །ཆོས་རྣམས་དེ་ལྟར་ཤེས་པས་སུ། །སེམས་
ཅན་དོན་ནི་མཉམ་མེད་བྱོས། །སྟོན་པའི་ཐུགས་ལས་ཁྱོད་སྐྱེས་སོ། །ཞེས་བརྗོད་པ་ནི་མེ་ལོང་གི་དབང་ངོ་། །བླ་མ་ཆེན་པོ་འཁོར་ལོའི་གཙོ། །ཚོགས་འཁོར་བྱས་ཏེ་མཆོད་ནས་སུ། །དེ་ནས་དེ་ལ་ཕྱག་འཚལ་ནས། །དཔའ་བོས་གསང་བའི་དོན་གསོལ་གདབ། །སྐྱོབ་

དང་སྐྱབས་མེད་པ་ཡི་སྐྱབས། །མགོན་པོ་རྒྱུ་མེད་སྙིང་རྗེ་ཆེ། །མགོན་པོས་བདག་ལ་བཀའ་དྲིན་སྩོལ། །བདེ་མཆོག་འཁོར་ལོས་བདག་ལ་སྐྱོབས། །ཇི་ལྟར་ཁྱོད་ཉིད་བདག་ཉིད་ཆེ། །མངའ་བདག་བདག་ལའང་དེ་ལྟར་སྩོལ། །འཁོར་བ་འདམ་གྱི་ཚོགས་
དག་ཏུ། །བྱིང་བ་སྐྱབས་མེད་བདག་ལ་སྐྱོབས། །ཞེས་པས་གསོལ་བ་བཏབ་ལ། །ལང་ཚོ་ལ་བབ་པ་དམ་ཚིག་དང་ལྡན་པ་གསང་དབང་གི་དོན་དུ་བླ་མ་ལ་ཕུལ་ལ། བླ་མ་འཁོར་ལོའི་དབང་ཕྱུག་གི་རྣལ་འབྱོར་གྱིས་ཐ་མལ་པའི་བུད་མེད་ཀྱི་གཟུགས་སྟོང་པའི་རྗེས་སུ་ཕག་མོའི་གཟུགས་སུ་
བསྐྱེད་པ་དེ་དང་། རྡོ་རྗེ་དང་པདྨའི་འདུ་བྱ་བ་སྔོན་དུ་འགྲོ་བས་སྙོམས་པར་ཞུགས་ཏེ། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་བརྗོད་ཅིང་། སྙིང་གའི་ས་བོན་གྱི་འོད་ཟེར་གྱིས་སྤྱན་དྲངས་པ་ཤེས་རབ་དང་བཅས་པ། རྣམ་པར་སྣང་མཛད་ལ་སོགས་པ་རང་ལ་
ཁ་ནས་ནང་དུ་བཅུག་ལ་འདོད་ཆགས་ཆེན་པོས་ཞུ་བ་ཨ་ཝ་དྷཱུ་ཏཱི་ལས་འཐོན་པར་བསམས་ལ་རྡོ་རྗེ་ནོར་བུར་ལྷན་སྐྱེས་བརྟན་པར་བྱ་སྟེ། མཐེ་བོ་དང་མིང་མེད་དག་གིས་རྡོ་རྗེ་ནོར་བུ་བཟུང་ནས་པདྨ་ལས་ཕྱུང་སྟེ། དེ་བཞིན་གཤེགས་པ་ཞུ་བ་རང་གི་བྱང་ཆུབ་ཀྱི་སེམས་དང་ཐ་མི་
དད་པར་ལྷག་པར་མོས་པ་ལ་གསུང་རྡོ་རྗེའི་ཚུལ་གྱི་སློབ་མའི་ཁ་རུ། འདས་པའི་རྡོ་རྗེ་འཛིན་སོགས་ཀྱིས། །རྒྱལ་སྲས་ཇི་ལྟར་དབང་བསྐུར་བ། །དེ་བཞིན་དུ་ནི་བྱང་ཆུབ་སེམས། །ལེགས་པར་བུ་ཁྱོད་དབང་བསྐུར་རོ། །ཞེས་པ་དང་། དཀྱིལ་འཁོར་གྱི་བདག་པོའི་སྔགས་བརྗོད་
ཅིང་སྦྱིན་པར་བྱའོ། །དེས་ཀྱང་དེ་བཞིན་གཤེགས་ལ་འདུས་པའི་བློས་ཨ་ཧོ་མ་ཧཱ་སུ་ཁ། ཞེས་སྨྲ་ཞིང་བཏུང་བར་བྱའོ། །རྟེན་ཅིང་འབྲེལ་བར་འབྱུང་བ་ཀུན་རྫོབ་བྱང་ཆུབ་ཀྱི་སེམས་གཉིས་གསང་བས་དབང་བསྐུར་བས་ན་གསང་བའི་དབང་ངོ་། །བྱང་ཆུབ་རྡོ་རྗེས་ཞེས་པ་ལ་
སོགས་པས་གསོལ་བ་བཏབ་པའི་སློབ་མ་ལ་ཤེས་རབ་མ་དེ། འདི་ནི་ཁྱོད་ཀྱི་ཉམས་དགའི་གཟུགས། །སངས་རྒྱས་ཀུན་གྱིས་སྟེར་བྱར་གསུངས། །འཁོར་ལོའི་རིམ་པའི་རབ་སྦྱོར་བས། །བདེ་བ་དམ་པ་ཡང་དག་མྱོང་། །རྡོ་རྗེ་སྐྱིལ་ཀྲུང་གིས་སེམས་ནི། །ནོར་བུའི་

ནང་དུ་གནས་བལྟ་ཞིང་། །ཞེས་རབ་ཏུ་བསྟན་ནས་གཏད་དོ། །འཁོར་ལོ་ནི་སྐུ་ལ་སོགས་པའི་འཁོར་ལོ་གསུམ་གྱི་ལྷའི་ཚོགས་ཏེ། དེའི་རིམ་པས་སྦྱོར་བ་ནི་དགུག་པ་དང་། གཞུག་པ་དང་། རྡོ་རྗེའི་ལམ་ནས་འཐོན་པར་བྱེད་པའོ། །རྡོ་རྗེ་སྐྱིལ་ཀྲུང་ནི་སྣ་བུག་གཡོན་དང་གཡས་
པ་ལ་རྒྱུ་བ་བཀག་ནས་པདྨའི་ནང་དུ་བལྟས་པ་རྡོ་རྗེ་ནོར་བུའི་ནང་དུ་གནས་པའི་སེམས་ནི་བྱང་ཆུབ་ཀྱི་སེམས་ཏེ། ཤིན་ཏུ་ཕྲ་བར་བལྟ་ཞིང་འོད་གསལ་བའི་བདེ་བ་མྱོང་བར་མཛོད་ཅིག་ཅེས་པའོ། །བུད་མེད་ལ་དབང་བསྐུར་ན་ནོར་བུ་ནི་པདྨའི་ཡིན་ཏེ་ཁྱད་པར་རོ། །དེས་ཀྱང་གུར་ཀུམ་ལ་
སོགས་པས་དྲི་ཞིམ་པར་བྱས་པའི་ཆུ་སྐྱེས་གོས་མེད་པར་སློབ་དཔོན་ལ་སྟོན་ཅིང་། ཀྱེ་མ་བདག་གིས་པདྨ་འདི། །བདེ་བ་ཐམས་ཅད་ཡང་དག་ལྡན། །འགའ་ཞིག་ཆོ་གས་བསྟེན་པར་བྱེད། །དེ་ཡི་མདུན་ན་བདག་གནས་སོ། །སངས་རྒྱས་མཉེས་པ་ལ་སོགས་པ། པདྨར་
བྱ་བ་ཇི་བཞིན་གྱིས། །བདེ་ཆེན་རྒྱལ་པོ་རང་ཉིད་ནི། །འདི་ཉིད་དུ་ནི་རྟག་ཏུ་བཞུགས། །བྷཉྫ་མོ་ཀྵ་ཧོཿཞེས་བརྗོད་དོ། །ཆོ་ག་ནི་ཕག་མོའི་གཟུགས་སུ་བསྐྱེད་པའོ། །མོཀྵ་ཞེས་པ་ནི་སྤྲོས་པ་ཐམས་ཅད་དང་བྲལ་བ་སྟེ་དེ་སྟོན་ཞེས་པའོ། །དེས་ཀྱང་སྡོམ་པའི་སྐུ་དང་དེ་ཕག་
མོར་བསྐྱེད་ནས་རྡོ་རྗེ་ཧཱུྃ་ལས་བྱུང་བ་ནག་པོ་དེ་ནོར་བུར་ཅུང་ཟད་དམར་བའི་བྱཱ་ལས་བྱུང་བ་བྱཱ་དཀར་པོས་རྩེ་མོ་བྱིན་གྱིས་བརླབས་པ། པདྨ་འདབ་མ་གསུམ་པ་ཨ་དམར་པོ་ལས་བྱུང་བ་དྱཱ་དཀར་པོ་ལས་བྱུང་བའི་ལྟེ་བ་རྩེ་མོར་དྱཱ་སེར་པོས་བྱིན་གྱིས་བརླབས་པ་བསམས་ལ། གཡོན་
པའི་གཡོན་ངོས་སུ་གནས་པའི་རྩ་རྩེ་མོར་ཧྲཱིཿདམར་པོ་དང་ལྡན་པའི་མཛུབ་མོ་དང་ལྕེས་སིད་ཅེས་བྱ་ཞིང་བསྐུལ་ནས། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷ་ཝ་ཨཱཏྨ་ཀོ྅ཧཾ་ཞེས་པའི་སྔགས་བཟླས་ཤིང་། ནོར་བུའི་རྩ་བར་སེམས་ནི་དགའ་བ་ཙམ་སྐྱེས་ཏེ། །དེ་རྗེས་
ནོར་བུའི་དཀྱིལ་དུ་འདོད་བྱ་མ་ལུས་པར་ནི་འདོད། །དེ་སྟེང་རྩེ་མོའི་མཐར་ནི་ཞི་བ་མི་རྟོག་བཞིན། །གང་ཡང་ལྷན་ཅིག་སྐྱེས་རིགས་པདྨར་གནས་པ་སྟོན། །ཞེས་དགའ་བའི་དབྱེ་བ་རྟོགས་ནས་རང་གི་ས་བོན་གྱི་འོད་ཟེར་གྱིས་བཀུག་པའི་དཔའ་བོ་དང་དཔའ་མོ་རྣམས་ཀྱིས་བྱིན་

གྱིས་བརླབས་པའི་ལུས་བླ་མས་ཀྱང་རྒྱལ་བ་དཔག་ཏུ་མེད་པ་བཅུག་པ་དང་རོ་གཅིག་ཏུ་གྱུར་པར་དགའ་བར་བརྩམས་ཏེ། དེ་ལ་དགའ་བྲལ་གྱི་དང་པོ་མཆོག་དགའི་ཐ་མ་དེ་གཉིས་ཀྱི་བར་གྱི་སྐད་ཅིག་ཏུ་རིག་མའི་བདེ་བ་ལ་མ་ལྟོས་པར་མ་ཉམས་པའི་བདེ་བ་སྟེ། །
གང་ལ་ཐོག་མཐའ་བར་མ་མེད། །གཞན་ཡང་མེད་ཅིང་རང་ཡང་མེད། །སྲིད་དང་མྱ་ངན་འདས་པ་མེད། འདི་ཉིད་བདེ་བ་ཆེན་པོའི་མཆོག །ཅེས་དེ་ཁོ་ན་ཉིད་བསམ་དུ་མེད་པ་ཤེས་རབ་ཡེ་ཤེས་ཏེ་གཡོ་བ་མེད་པར་འགྱུར་ལ་ནུས་པ་ཇི་ལྟ་བས་བཟུང་ཞིང་ཉམས་སུ་མྱོང་བར་
གནས་སོ། །ཡང་ན་བཙན་ཐབས་ཀྱིས་དཔྲལ་བར་དྲང་ངོ་། །མ་ནུས་ན་དལ་བུས་བཏང་ནས་པདྨ་ལས་ལྕེས་བླངས་ཏེ་དེ་ཁོ་ན་ཉིད་དུ་བལྟས་ལ་དམ་ཚིག་གི་བྱང་ཆུབ་སེམས་བཏུང་ངོ་ཞེས་སོ། །ཤེས་རབ་ཡེ་ཤེས་སོ། །ཟབ་ཅིང་རྒྱ་ཆེའི་ལམ་ལ་ལྷག་མོས་ལ། ཚིག་ཉིད་ཀྱི་ནི་
དབང་བསྐུར་རིན་ཆེན་སྦྱིན། །ཞེས་པ་དང་། བཞི་པ་དེ་ནི་དེ་བཞིན་ནོ། །ཞེས་གསུངས་པས་ཤེས་རབ་ཡེ་ཤེས་དེ་ཉིད་བྱང་ཆུབ་ཀྱི་སེམས་ཀྱི་མྱུ་གུ་བྱུང་བ་ནི་སྒོམ་པ་རྒྱས་པར་བྱེད་པ་ནི་སྒྲིབ་པ་མེད་པ་གནས་པ་ནི་དེ་ཁོ་ན་ཉིད་ཆོས་ཐམས་ཅད་བསམ་དུ་མེད་པའི་རང་བཞིན་ཕྱག་རྒྱ་
ཆེན་པོའི་བདག་ཉིད་རྡོ་རྗེ་འཆང་གི་རང་བཞིན་བཞི་པར་བརྗོད་པར་བྱའོ་དབང་བཞི་པའོ། །ཞི་བའི་སྦྱིན་སྲེག་བྱས་ནས་རང་དང་སློབ་མ་ལ་སོགས་པས་དཀྱིལ་འཁོར་མཆོད་དེ། །ཚོགས་འཁོར་བྱས་ནས་མཚན་མོ་ཁྱེད་ཀྱིས་འཇུག་པ་འདི་བྱ་བ་འདི་ལྟ་བུ་ལ་ཡང་སྨྲ་བར་མི་བྱའོ་ཞེས་
བསྒྲགས་ལ། སློབ་མ་ལས་ཡོན་བླང་བར་བྱ་ཞིང་དེས་ཀྱང་བུ་དང་། ཆུང་མ་དང་། ལུས་དང་། ནོར་དང་། ས་གཞི་ལ་སོགས་པ་ཇི་ལྟར་ནུས་པ་དབུལ་ལོ། །བླ་མ་མཉེས་ན་དངོས་གྲུབ་འགྱུར། །གཞན་དུ་མིན་ཞེས་ཐུབ་པས་གསུངས། །ཞེས་གསུངས་པ་ཡིས་སོ། །
ཕྱི་རོལ་དུ་ཕྱོགས་ཀྱི་གཏོར་མ་ལ་སོགས་པ་བྱས་ཏེ་ནང་དུ་ཞུགས་ལ་ཕྱག་བྱས་ལ། མཆོད་ཡོན་ལ་སོགས་པས་མཆོད་དེ། དེ་ལས་བྱུང་བའི་དགེ་བ་བསྔོས་ལ་བསྐོར་བ་གསུམ་བྱས་ཏེ་ལྷོ་སྒོར་ཡི་གེ་བརྒྱ་པ་བརྗོད་ལ་བཟོད་པར་གསོལ་ལོ། །ཁྱེད་ཀྱིས་སེམས་ཅན་དོན་ཀུན་མཛད། །

ཅེས་པ་ལ་སོགས་པ་དང་། ཨོཾ་ཨཱཿཧཱུཾ་བཛྲ་མུཿ། ཞེས་པས་ཡེ་ཤེས་འཁོར་ལོ་གཤེགས་སུ་གསོལ་ཏེ། དམ་ཚིག་འཁོར་ལོ་རང་ལ་བཅུག་ནས། ཆོ