Luận tạng Tây Tạng (Tengyur) — Tập 22

ོ་དབང་པོ་རྣམས་ཀྱི་ནི། །རབ་འཇུག་གནས་པ་ཐམས་ཅད་དུ། །སོ་སོར་སྡུད་པ་ཞེས་བརྗོད་དེ། །འདོད་པའི་
བསྡུས་པ་སོ་སོའོ། །འདོད་པ་ལྔ་རྣམས་བསྡུས་པ་ཡིས། །སངས་རྒྱས་ལྔ་ནི་རབ་སྦྱོར་བས། །བརྟགས་པ་བསམ་གཏན་དུ་བརྗོད་དེ། །བསམ་གཏན་རྣམ་པ་ལྔར་འགྱུར་ཏེ། །རྣམ་པར་རྟོག་དང་རྣམ་པར་དཔྱོད། །དགའ་དང་དེ་བཞིན་བདེ་བ་དང་། །སེམས་ཀྱི་རྩེ་གཅིག་ཉིད་
དང་ནི། །ལྔ་པོ་འདི་རྣམས་བསམ་གཏན་བསྡུས། །གསང་རྒྱུད་སྐུ་རྣམས་ཐམས་ཅད་ལ། །རྣམ་པ་སྣ་ཚོགས་ཡོངས་སུ་གྲགས། །གསང་གསུམ་འབྱུང་བ་རྟོག་པ་ཡིན། །རྣམ་དཔྱོད་ཡོངས་སུ་དེ་ལོངས་སྤྱོད། །གསུམ་པ་ཡིད་བདེ་དགའ་བ་སྟེ། །བཞི་པ་བདེ་བས་བསྡུས་

པའོ། །སེམས་ཀྱི་ལྔ་པ་ཤེས་པར་བྱ། །ཤེས་དང་ཤེས་བྱའི་སྐྱེ་བ་ཉམས། །སངས་རྒྱས་ཐམས་ཅད་རང་བཞིན་ཞི། །ཐམས་ཅད་འདོད་པ་སོ་སོར་གནས། །ཡེ་ཤེས་ལྔ་ཡི་རང་བཞིན་དབུགས། །འབྱུང་བ་ལྔ་ཡི་ངོ་བོ་ཉིད། །འགྲིལ་བའི་ཚུལ་གྱིས་ཕབ་ནས་
སུ། །སྣ་ཡི་རྩེ་མོར་རབ་རྟོག་བྱ། །ཁ་དོག་ལྔ་ལྡན་རིན་ཆེན་ཆེ། །སྲོག་རྩོལ་ཞེས་བྱ་དྲན་པ་ཡིན། །རང་སྔགས་སྙིང་གར་བསམས་ནས་ནི། །སྲོག་ནི་ཐིག་ལེར་གྱུར་པར་གཞག །རང་དབང་རིན་ཆེན་དགག་པ་ཡི། །གཟུང་བ་འཛིན་པ་ཡིན་པར་བཤད། །འགོག་པའི་རྡོ་རྗེ་
གནས་སེམས་ལ། །རྟགས་ཀྱི་འབྱུང་བ་རབ་ཏུ་སྐྱོ། །དེ་ཡི་རྟགས་ཀྱང་རྣམ་པ་ལྔ། །བྱང་ཆུབ་རྡོ་རྗེ་ལས་བྱུང་བ། །དང་པོ་སྨིག་རྒྱུའི་རྣམ་པ་ཅན། །དུ་བའི་རྣམ་པ་གཉིས་པ་སྟེ། །གསུམ་པ་སྲིན་བུ་མེ་ཁྱེར་བཞིན། །བཞི་པ་མར་མེས་གསལ་བྱེད་པ། །ལྔ་པ་རྟག་ཏུ་གསལ་
བྱེད་དེ། །སྤྲིན་མེད་ནམ་མཁའ་ལྟ་བུའོ། །བརྟན་པ་རྡོ་རྗེའི་ལམ་གྱིས་སུ། །ནམ་མཁའི་ཁམས་ལ་དགྲམ་པར་བྱ། །བསྒོམས་ནས་རྗེས་སུ་དྲན་པ་གང་། །དེ་ཡི་རྣམ་པ་ཅན་ཡང་དགྲམ། །རྗེས་སུ་དྲན་ཞེས་ཤེས་པར་བྱ། །དེ་ལ་རབ་ཏུ་གསལ་བར་སྐྱེ། །ཤེས་རབ་
ཐབས་དང་སྙོམས་ཞུགས་པས། །ཐམས་ཅད་དངོས་པོ་ཐམས་ཅད་དུ། །འགྲིལ་བའི་ཚུལ་གྱིས་བསྡུས་ནས་ནི། །ཐིག་ལེའི་དབུས་སུ་རྣམ་པར་བསྒོམ། །སྐད་ཅིག་ཡེ་ཤེས་རྫོགས་པ་ནི། །ཏིང་ངེ་འཛིན་ཞེས་མིང་ཅན་ནོ། །ཚིག་ལེའུར་བྱས་པ་འདི་རྣམས་ལས་རྟོགས་པར་
དཀའ་བའི་ཚིག་རྣམ་པར་བཤད་དེ། བཅུ་པོ་ཞེས་བྱ་བ་ནི་མིག་ལ་སོགས་པའི་དབང་པོ་ལྔ་དང་། གཟུགས་ལ་སོགས་པའི་ཡུལ་རྣམས་ཀྱིའོ། །དེའི་ཕྱིར་འདི་ཁོ་ན་གསུངས་ཏེ། དབང་པོ་རྣམས་ཀྱི་རང་འཇུག་གནས། །ཞེས་པའོ། །དབང་པོ་རྣམས་ནི་མིག་ལ་སོགས་པའི་
དབང་པོ་རྣམས་སོ། །ཡང་རང་འཇུག་པར་གནས་པ་ནི་རང་རང་གི་ཡུལ་ལ་འཇུག་པ་ནི་རབ་ཏུ་འཇུག་པ་སྟེ། རང་གི་འཇུག་པ་ལ་གནས་པའི་ཕྱིར་རང་འཇུག་གནས་པ་ནི་མིག་ལ་སོགས་པའི་ཤེས་པ་ལྔ་ཞེས་བྱ་བའི་དོན་ཏོ། །འདི་ཡང་བསྡུས་པ་སོ་སོ་ཞེས་པ་ནི། འདོད་པར་བྱེད་པ་ནི་

མངོན་པར་ཞེན་པར་བྱེད་པའི་ཕྱིར་འདོད་པའི་གཟུགས་དང་སྒྲ་ལ་སོགས་པའི་ཡུལ་ལྔ་སྟེ། དེ་རྣམས་ལས་གཟུགས་ལ་སོགས་པའི་ཤེས་པ་ལྔ་རིམ་པ་བཞིན་དུ་སྡུད་པ་ནི་འགུགས་པར་བྱེད་པའི་ཕྱིར་སྡུད་པ་སྟེ། ཡུལ་དང་བྲལ་བའི་ཡིད་ནི་འདོད་པའི་བསྡུས་པའོ། །དེ་ལ་སོ་སོ་ཞེས་བྱ་བ་ནི་འདོད་
པའི་བསྡུས་པ་ཐོབ་ནས་ཞེས་བྱ་བའི་དོན་ཏོ། །རང་འཇུག་པའི་གནས་གང་ཤེས་པ་ལྔ་དེ་ཁོ་ན་རིམ་གྱིས་རང་འཇུག་པ་དང་བྲལ་ཞིང་སོ་སོར་སྡུད་པར་བརྗོད་དོ། །འདོད་པ་ལྔ་རྣམས་ནི་ཡུལ་ལྔ་སྟེ། དེ་རྣམས་ལ་ལྷའི་ཚུལ་གྱིས་ཡོངས་སུ་རྟོག་པ་ཞེས་ཉེ་བར་མཚོན་པ་ཙམ་ཡིན་ཏེ། ཐམས་ཅད་
ནང་གི་ཕུང་པོ་དང་ཁམས་དང་སྐྱེ་མཆེད་རྣམས་དཔལ་བདེ་མཆོག་ལ་སོགས་པའི་ལྷ་ཉིད་ཀྱི་རབ་ཏུ་སྦྱོར་བས་ཡོངས་སུ་རྟོགས་པ་ཡང་བསམ་གཏན་ནོ། །ཡིད་ཀྱི་དབང་པོ་དང་དེའི་རྣམ་པར་ཤེས་པ་དག་ནི་སྐུ་གསུང་ཐུགས་ཀྱི་གསང་བའི་བདག་ཉིད་ལྷ་རྣམས་གསལ་བའི་ཚུལ་དུ་བྱུང་བ་ནི་གསང་
གསུམ་དབྱུང་སྟེ། དེ་ཁོ་ན་རྣམ་པར་རྟོག་པའོ། །ཤེས་དང་ཤེས་བྱའི་སྐྱེ་བ་ཉམས། །ཞེས་པ་ནི་ལོག་པའི་ཀུན་རྫོབ་ཀྱི་ངང་ཚུལ་ཅན་ཤེས་པ་དང་ཤེས་བྱའི་རྣམ་པར་རྟོག་པའི་སྐྱེ་བ་མེད་དོ། །རིན་ཆེན་ཆེ་བ་ཞེས་བྱ་བ་ནི་འབྲས་བུའི་མཆོག་སྦྱིན་པའི་ཕྱིར་རོ། །འགོག་པའི་རྡོ་རྗེ་ནི་འོད་གསལ་
བ་སྟེ་དེ་ལ་གནས་པའི་སེམས་ནི་དེའི་རང་བཞིན་དུ་གྱུར་པའོ། །བརྟན་པ་རྡོ་རྗེའི་ལམ་གྱིས་སུ། །ནམ་མཁའི་ཁམས་ལ་དགྲམ་པར་བྱ། །ཞེས་བྱ་བ་ནི། བརྟན་ཞིང་རྡོ་རྗེའི་ལམ་གྱིས་རྗེས་སུ་དྲན་པས་ནམ་མཁའི་ཁམས་རྣམས་སུ་དགྲམ་པར་བྱ་སྟེ། ཕུང་པོ་ཁམས་དང་སྐྱེ་མཆེད་
ཀྱི་རང་བཞིན་འོད་ཟེར་དང་ལྡན་པའི་ལྷ་ཚོགས་རྣམས་སོ། །ཤེས་རབ་ཐབས་དང་སྙོམས་འཇུག་པས། །ཐམས་ཅད་དངོས་པོ་ཐམས་ཅད་དུ། །ཞེས་བྱ་བ་ནི་ཤེས་རབ་དང་ཐབས་སྙོམས་པར་འཇུག་པ་ནི་སྟོང་ཉིད་སྙིང་རྗེ་ཐ་མི་དད་པའི་ཚུལ་གྱིས་སོ། །ཐམས་ཅད་དངོས་པོ་ཞེས་བྱ་བ་
ནི་ཕུང་པོ་ཁམས་དང་སྐྱེ་མཆེད་ཀྱི་རང་བཞིན་འོད་ཟེར་དང་བཅས་པའི་ལྷ་ཉིད་ཚོགས་རྣམས་སོ། །འགྲིལ་བའི་ཚུལ་གྱིས་ཞེས་པ་ནི་སྟོང་པ་དང་སྙིང་རྗེ་ཐ་མི་དད་པའི་ཚུལ་གྱིས་དེ་རྣམས་རང་གི་ལུས་ལ་བསྒོམས་པ་གང་ཡང་རུང་བའི་ཐིག་ལེའི་དབུས་སུ་ཉེ་བར་བསྡུས་ནས་ཐིག་ལེ་དེ་ཁོ་

ན་བསྒོམ་པར་བྱའོ། །ཐིག་ལེ་ཞེས་བྱ་བར་ཉེ་བར་མཚོན་པ་སྟེ། རིམ་པ་འདི་བཞིན་དུ་ཨཱ་ལི་ཀཱ་ལིའི་སྦྱོར་བ་ལ་སོགས་པ་ཡང་ངོ་། །སྐད་ཅིག་ཡེ་ཤེས་རྫོགས་པ་ནི། །ཞེས་བྱ་བ་སྐད་ཅིག་གིས་རང་རིག་སྐྱེ་བས་བྱེད་པ་དེ་ཁོ་ན་ཉིད་མཐོང་བ་ཡང་ངོ་། །བྱེ་བྲག་ཏུ་གང་
གི་ཚེ་ཡང་འདི་སྨིན་མ་དག་གི་དབུས་སུ་སོ་སོར་སྡུད་པའི་གོ་རིམས་ཀྱིས་ཐིག་ལེ་བསྒོམས་པ་དེའི་ཚེ་ཡང་སྲོག་རྩོལ་དང་འཛིན་པ་དང་རྗེས་སུ་དྲན་པ་དང་ཏིང་ངེ་འཛིན་ཕུན་སུམ་ཚོགས་པ་འབྱུང་ངོ་། །ཡང་གསུངས་པ་རྩ་བའི་རྒྱུད་ལས་སྨིན་མའི་དབུས་སུ་ཨ་ཝ་དྷཱུ་ཏཱིའི་གནས་གཞག་པར་བྱའོ་
ཞེས་བྱའི་འདི་ཁོ་ན་གསུངས་པ་རི་གི་ཨ་ར་ལླིའི་རྒྱུད་ལས་དེ་བཞིན་དུ་ཡང་། ཨར་ལླིས་ཞུས་ལྷ་མོ་ལ། །ཡེ་ཤེས་མཆོག་ཀྱང་ཇི་ལྟ་བུ། །གང་ཞིག་རྣམ་པར་ཤེས་ཙམ་གྱིས། །སྒྲུབ་པ་པོ་ཡིས་དངོས་གྲུབ་ཐོབ། །ལྷ་མོ་རིགས་ཀྱིས་ཡང་དག་གསུངས། །ཡེ་ཤེས་ཆེན་པོ་བདེ་
བ་མཆོག །ཀུན་མཁྱེན་ཡེ་ཤེས་ལས་བྱུང་བ། །བསྲུབ་བྱ་སྲུབ་བྱེད་ལས་བྱུང་བ། །བསམ་པ་ཐམས་ཅད་ཡོངས་སྤངས་ཏེ། །དབང་པོ་ཐམས་ཅད་དེས་བཀག་ནས། །སྐྱེ་འགྲོ་མེད་པའི་དབེན་ཕྱོགས་སུ། །གཉིས་པ་ཐམས་ཅད་དང་བྲལ་བའི། །མིག་གཉིས་མ་ཕྱེ་མ་
བཙུམས་པར། །སྨིན་མའི་མཚམས་སུ་སེམས་གཏད་ནས། །མུན་པ་མི་བཟད་ཚུལ་ཡང་ནི། །སྒྲུབ་པ་པོ་ཡིས་དང་པོར་མཐོང་། །དེ་ནས་གཡོན་པའི་རྣ་བ་ནི། །དལ་བུས་དལ་བུས་གཡོ་བར་བྱེད། །ཤེས་རབ་མ་ཡི་བདེ་བ་གང་། །དེ་བཞིན་ཕྱག་རྒྱ་ཆེན་པོའི་བདེ། །ཉེས་པའི་
རང་བཞིན་མི་ཕྱག་རྒྱ། །དེ་ཡིས་ཤེས་པའང་ཉམས་པ་ཡིན། །དེ་ཕྱིར་ཡེ་ཤེས་ཕྱག་རྒྱ་བསྒོམ། །བདེ་བ་ཆེན་པོ་བསྒྲུབ་བྱའི་ཕྱིར། །ཡེ་ཤེས་ཆེན་པོ་འདི་ཁོ་ན། །རང་གི་རིག་བྱའི་རང་བཞིན་ཏེ། །གཞན་ལ་བསྟན་པར་མི་ནུས་པ། །གཞོན་ནུ་མ་ཡིས་བདེ་མྱོང་བཞིན། །སྦྱོར་བ་འདི་
དང་བཅས་པ་ཡི། །སེམས་ཅན་མགུ་བྱེད་སེམས་ཀྱིས་སུ། །སྙིང་རྗེས་སེམས་ཅན་ཐམས་ཅད་ལ། །སྦྱོར་བ་འདི་ནི་བདེ་བར་བྱེད། །འདི་ལ་གོམས་པའི་སྦྱོར་བ་ཡིས། །མཁའ་དང་མཉམ་པའི་སེམས་ཀྱིས་སུ། །སྙིང་རྗེ་ཆེན་པོའི་རྫུ་འཕྲུལ་ཅན། །རྣལ་འབྱོར་གྲུབ་འགྱུར་ཐེ་ཚོམ་

མེད། །དང་པོར་མུན་པ་བྱེད་པ་མཐོང་། །གཉིས་པ་དཀར་པོ་དུ་བ་བཞིན། །གསུམ་པ་སྲིན་བུ་མེ་ཁྱེར་མཚུངས། །བཞི་པ་ཛ་བའི་མེ་ཏོག་ལྟར། །ལྔ་པ་སྤྲིན་མེད་ནམ་མཁའ་སྟེ། །བདག་དང་གཞན་གྱི་ཚོར་བ་བྲལ། །ཐམས་ཅད་མཁྱེན་པའི་རྒྱུ་དེ་ཡང་། །སྤྲིན་མེད་ནམ་མཁའི་དཔེ་དང་ལྡན། །
རྒྱུན་དུ་གོམས་པའི་སྦྱོར་བ་ཡིས། །རྩེ་གཅིག་སེམས་དཔའ་འདི་ལྟར་བྱོས། །རྟག་ཏུ་ཡེ་ཤེས་བདུད་རྩི་ཡིས། །བཏུང་བས་བཀྲེས་པའི་དགག་བྱ་མེད། །རྒ་དང་ནད་ཀྱིས་གདུང་བ་མེད། །ཐབས་ཀྱི་སྦྱོར་བ་འདི་ཡིས་ནི། །རིམ་གྱིས་ཐམས་ཅད་མཁྱེན་པར་འགྱུར། །ཞེས་སོ། །དེ་ལྟར་
དམ་ཚིག་སེམས་དཔའི་ཐུགས་ཀར་པདྨ་དང་ཟླ་བའི་དཀྱིལ་འཁོར་ལ་དམ་ཚིག་སེམས་དཔའ་ལྟ་བུར་གནས་པ་ཤེས་རབ་མ་དང་བཅས་པ། ཡེ་ཤེས་སེམས་པའི་ཐུགས་ཀྱི་པདྨ་དང་། ཟླ་བ་ལ་ཧཱུྃ་ཡིག་ཏིང་ངེ་འཛིན་སེམས་དཔའ་ལའམ། ཐིག་ལེ་ལ་སྣོད་དང་བཅུད་ཀྱི་ཚུལ་ཅན་སངས་
རྒྱས་ཀྱི་ཚོགས་ཀྱི་འོད་ཟེར་ས་ཡ་འཕྲོ་ཞིང་གནས་དང་འཚམ་པ་ཉིད་ཀྱིས་ཤིན་ཏུ་ཕྲ་བ་བདེ་མཆོག་གི་དཀྱིལ་འཁོར་འཁོར་ལོ་རྣམ་པར་བསྒོམ་པར་བྱའོ། །དེ་ལ་འོད་ཟེར་རྣམ་པར་སྤྲོས་ཏེ་དེ་ཁོ་ན་ལ་རབ་ཏུ་བཅུག་ནས། རིགས་མཐུན་པའི་ས་བོན་ཡོངས་སུ་གྱུར་པ་རིགས་དང་མཐུན་
པ་ཕྲ་བའི་ཕྱག་མཚན་ལ་དཀྱིལ་འཁོར་དང་བཅས་པའི་ཧཱུྃ་གྱུར་ནས་རྡོ་རྗེ་གཅིག་ཏུ་བསྒོམ་མོ། །དེ་ཁོ་ན་བཞིན་དུ་འོད་ཟེར་དང་བཅས་པ་ཤིན་ཏུ་ཕྲ་བ་དཔལ་སྡོམ་པའི་དཀྱིལ་འཁོར་གྱི་འཁོར་ལོ་སོ་སོར་སྡུད་པ་ལ་སོགས་པའི་རིམ་པས་ཞག་བདུན་གྱི་བར་དུ་བར་མ་ཆད་པར་བསམ་
པར་བྱའོ། །དེ་ནས་སྲོག་རྩོལ་འཛིན་པ་རྗེས་སུ་དྲན་པ་ཏིང་ངེ་འཛིན་རྣམས་འབྱུང་བར་འགྱུར་རོ། །འདར་བ་དང་། གཡོ་བ་དང་། ཕྲ་བ་དང་། དབབ་པ་མཆོད་པའི་ཚུལ་རྣམས་ཏིང་ངེ་འཛིན་གྱི་རྟགས་ཀྱང་ཡང་དག་པར་འབྱུང་ངོ་། །ཡང་མངོན་པར་བརྗོད་པའི་རྒྱུད་བླ་མ་
ལས། སྙིང་གར་རྟག་ཏུ་གནས་པ་ཡི། །ཐིག་ལེ་གཅིག་པ་ཡི་གེ་མེད། །དེ་ཡང་སྒོམ་པའི་སྐྱེས་བུ་ལ། །ངེས་པར་ཡེ་ཤེས་སྐྱེ་བར་འགྱུར། །ཞེས་སོ། །ཁྱད་པར་དུ་སྦྱོར་བ་འདི་སྒྲུབ་པར་བྱེད་པ་མདོར་བསྟན་པ་དང་བཅས་པའི་གསུང་རབ་རིག་པའི་རྒྱ་མཚོའི་རྒྱུད་ལས་

གསལ་བ་དྲངས་ཏེ་སྒྲུབ་ཐབས་ཀྱི་བང་མཛོད་དུ་བྲིས་པ་དེ་ལྟར་ཡང་། སེམས་ནི་ཁམས་གསུམ་བདག་ཉིད་ཅན། །གཞལ་ཡས་ཁང་བརྟེན་བསམས་ནས་སུ། །ས་ཡའི་འོད་ཀྱིས་ཀུན་ཁྱབ་ནས། །སངས་རྒྱས་སྤྲིན་ནི་སྤྲོ་བ་ཅན། །ཐིག་ལེའི་སྦྱོར་བས་བསྡུས་
ནས་ཀྱང་། །ཕྲ་བའི་སྦྱོར་བ་རྣམ་པར་བསྒོམ། །རིགས་དང་མཐུན་པའི་ཧཱུྃ་ལས་བྱུང་། །ཕྱག་མཚན་ནང་དུ་དཀྱིལ་འཁོར་ཏེ། །ནམ་མཁའ་དང་མཚུངས་འོད་རྒྱས་པ། །རྒྱལ་བ་རིན་ཆེན་རྟེན་པ་ཆེ། །བདེ་བ་ཆེན་པོའི་ཕྲ་བ་ཡང་། །ཕྲ་རབ་རྡུལ་གྱི་ཚུལ་འདུས་པ། །མ་ལུས་
སེམས་ཅན་དམ་ཚིག་ནི། །མཁའ་འགྲོ་ཉིད་ཀྱང་རབ་ཏུ་གནས། །སྤྲོས་ཤིང་ཡེ་ཤེས་ཚོགས་ཕྲེང་བ། །རྣམ་པ་སྣ་ཚོགས་དུ་མའི་སྐུ། །སྲོག་རྩོལ་གྱིས་ནི་མནན་པ་ཡིས། །བརྟན་པའི་སེམས་ཀྱི་རང་བཞིན་འཇུག །གཡོ་དང་འདར་བ་ཉིད་དང་ནི། །མཆོད་དང་དབབ་པ་དེ་བཞིན་
འཕར། །རྟགས་ནི་མངོན་སུམ་ཉིད་དུ་འགྱུར། །ངེས་པར་མཚན་མོ་བདུན་གྱིས་ཏེ། །ཁྱོད་ལ་འཁོར་ལོ་འདི་རྒྱས་སྟོན། །རྡོ་རྗེ་སྙིང་པོ་ཆེ་བའི་ཆེ། །ཞེས་སོ། །སོ་སོར་སྡུད་པ་ལ་སོགས་པ་རྣམས་ཀྱིས་འབྲས་བུ་ཡང་གསུངས་ཏེ་གསང་བ་འདུས་པའི་རྒྱུད་ཕྱི་མ་བླ་མ་ལས། སོ་སོར་
སྡུད་པ་རབ་ཐོབ་ནས། །སངས་རྒྱས་ཐམས་ཅད་བྱིན་གྱིས་རློབ། །བསམ་གཏན་ཡེ་ཤེས་ཐོབ་ནས་ནི། །མངོན་པར་ཤེས་པ་ལྔ་ཐོབ་འགྱུར། །ངེས་པར་སྲོག་དང་རྩོལ་བ་ཡིས། །བྱང་ཆུབ་སེམས་དཔའ་རྣམས་ཀྱིས་གཟིགས། །འཛིན་པའི་དོན་གྱི་སྟོབས་ཀྱིས་ངེས། །རྡོ་རྗེ་སེམས་
དཔའ་ཀུན་ནས་འཇུག །རྗེས་སུ་དྲན་པའི་སྦྱོར་བ་ལས། །འོད་ཟེར་དཀྱིལ་འཁོར་སྐྱེ་བར་འགྱུར། །ཏིང་ངེ་འཛིན་དབང་ཉིད་ཙམ་གྱིས། །སྒྲིབ་པ་རྣམས་དང་བྲལ་བར་འགྱུར། །ཞེས་སོ། །རྣལ་འབྱོར་ཆེན་པོ་ལས་སྐྱོན་བྱ་བ་གང་བྱེད་ཅེ་ན་དེ་གསུངས་པ་སྐད་ཅིག་ལ་སོགས་པའོ། །
ཡུད་ཙམ་གྱིས་དཀྱིལ་འཁོར་འཁོར་ལོ་མོས་ནས་ལྟེ་བའི་འཁོར་ལོ་ཧཱུྃ་ཡིག་དམར་རམ། ནཱ་ད་བལྟས་ནས་ཡི་གེ་གསུམ་བརྗོད་ཅིང་། ནཱ་ད་དེ་ལ་གདམས་ངག་ཇི་ལྟ་བ་བཞིན་དུ་འཐོན་པའི་རླུང་གི་འཁོར་ལོ་ལྔ་རབ་ཏུ་སྤྲོས་ནས་འགྲོ་བའི་དོན་བྱས་ཏེ་ཡང་བརྗོད་པའི་སྔགས་དང་བཅས་པས།

ཕྲེང་བའི་སྐུད་པ་འཐོན་པའི་རིགས་འཇུག་པའི་རླུང་གིས་ནཱ་ད་དེ་ཁོ་ན་ལ་རབ་ཏུ་འཇུག་པར་བྱའོ། །དེ་བཞིན་དུ་ཡང་དང་ཡང་དུ་བྱའོ་ཞེས་བྱ་བ་ནི་རྡོ་རྗེའི་བཟླས་པའོ། །དེ་ཁོ་ན་བཞིན་དུ་ནཱ་ད་དེ་ཁོ་ན་ལས་སྙིང་པོ་དང་ཉེ་བའི་སྙིང་པོའི་སྔགས་བརྗོད་ཅིང་། འཁོར་ལོ་སྡོམ་པའི་ལྷ་ཚོགས་སྤྲོ་བ་དང་
བསྡུ་བས་སྔར་བཞིན་དུ་སྙིང་པོ་དང་ཉེ་བའི་སྙིང་པོའི་སྔགས་བཟླས་པ་བྱ་སྟེ། ལྷ་སོ་སོའི་སྔགས་བརྗོད་པས། ཡོངས་སུ་རྫོགས་པ་ལ་སོ་སོར་སྤྲོ་བ་དང་བསྡུ་བ་ཞེས་པ་ནི་དམ་ཚིག་གི་བཟླས་པའོ། །ཆོས་ཐམས་ཅད་མཉམ་པ་ཉིད་ཀྱི་ང་རྒྱལ་གྱིས་ཕྲེང་བ་རང་གི་ཁར་ཞུགས་ནས་རྡོ་རྗེའི་ལམ་ནས་
པདྨར་སོང་ནས་ཨ་བ་དྷཱུ་ཏཱིའི་ལམ་ནས་གྱེན་དུ་འོངས་ཏེ་བཅོམ་ལྡན་འདས་མའི་ཞལ་དུ་འཐོན་ཏེ། རང་གི་ཞལ་གྱི་སྒོ་ནས་དེ་ཁོ་ན་བཞིན་དུ་བསྐོར་བར་བསྒོམ་ཞིང་ཕྲེང་བའི་སྔགས་བརྗོད་ཅེས་པ་དོ་ལིའི་བཟླས་པའོ། །རང་བཞིན་གྱིས་གྲུབ་པའི་སྤྲུལ་པ་དང་། བདེ་བ་ཆེན་པོ་གཉིས་ཀྱི་འཁོར་
ལོར་གནས་པའི་ཨ་ཡིག་དང་ཧཾ་ཡིག་གི་ས་བོན་གཉིས་ཀྱི་བཟླས་པ་ནི་རང་བཞིན་གྱི་བཟླས་པའོ། །ཏིང་ངེ་འཛིན་སེམས་དཔའི་ཐིག་ལེ་ལས། སྔགས་ཀྱི་ཕྲེང་བ་འོད་དུ་འབར་བའི་རྣམ་པ་དང་ལྡན་པ། སེམས་དཔའ་གཉིས་ཀྱི་ཞལ་ནས་འཐོན་ནས་སེམས་མ་གཉིས་ཀྱི་ཞལ་དུ་རབ་ཏུ་
ཞུགས་ནས་ཐུར་དུ་སེལ་བའི་རླུང་གིས་ཐུར་གྱི་རིམ་པས་རང་དང་ཕྱག་རྒྱ་ལ་མུ་ཏིག་གི་ཕྲེང་བ་བཞིན་དུ་བསྐོར་བར་བསྒོམ་པར་བྱའོ་ཞེས་བྱ་བ་ཡེ་ཤེས་ཀྱི་བཟླས་པའོ། །ཕུང་པོ་ལྔའི་བདག་ཉིད་ཅན་གྱི་ལུས་འདི་ལ་ས་ཆུ་མེ་རླུང་གི་ཁམས་ཀྱི་རང་བཞིན། རང་བཞིན་དུ་གྲུབ་པ་དྲུག་ཅུ་རྩ་
བཞི། བརྒྱད་ཅུ་དྲུག་སུམ་ཅུ་རྩ་གཉིས་ཀྱི་རྩའི་འདབ་མ་ཅན། འཁོར་ལོ་བཞིའི་རྣམ་པར་བསྒོམས་ནས་རིམ་པ་ཇི་ལྟ་བ་བཞིན་དུ་དབྱངས་ཡིག་དང་པོ་ཨཱ་ལི་ཀཱ་ལིས་ཡོངས་སུ་བསྐོར་བ་དང་ལྡན་པ་ཧཱུཾ་ཡིག །བྷྲཱུཾ་ཨཱྃ་ཛྲཱྀྃ་ཁྃ་ལཱྃ་མཱྃ་པཱྃ་ཏཱྃ་ཞེས་པའི་ས་བོན་གྱིས་བསྐོར་བ། ཨོཾ་ཆ་གསུམ་པ་
ཨཱ་ཨཱི་ཨུ་ཨེ་ས་བོན་གྱིས་བསྐོར་བ་དང་། ཧཾ་ཡིག་ལ་དབྱངས་ཡིག་ཉིས་འགྱུར་གྱི་ཕྲེང་བ་ཡོངས་སུ་བསྐོར་བ། འཁོར་ལོ་དེ་རྣམས་ལ་རྣམ་པར་བསམས་ནས་སྔགས་ཀྱི་ཡི་གེ་རྣམས་ཀྱང་མར་མེའི་རྩེ་མོ་དངས་པ་ལྟར་བལྟས་ནས། དེ་ལས་བྱུང་བའི་འོད་ཟེར་རྣམས་ཀྱིས་

ལུས་ཐམས་ཅད་གསལ་བར་བྱས་ནས་གནས་པ་ཞེས་བྱ་བ་སྔགས་ཀྱི་ཨཱ་ལིའོ། །འདི་ལ་ཨཱ་ལི་ཀཱ་ལིས་ཡོངས་སུ་བསྐོར་བ་ཞེས་བྱ་བའི་བཤད་པ་འདི་ཡིན་ཏེ། སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་རྫོགས་པར་བྱེད་པ་དང་། སེམས་ཅན་ཐམས་ཅད་ཀྱི་
ཉོན་མོངས་པའི་གདུང་བཞི་བར་བྱེད་པ་དང་། དགེ་བ་ཉེ་བར་འཕེལ་བར་བྱེད་པ་མེ་ལོང་ལྟ་བུའི་ངོ་བོ་ཉིད་ཉིས་འགྱུར་དང་དབྱངས་ཡིག་བཅུ་དྲུག །དེ་བཞིན་དུ་སེམས་ཅན་མ་ལུས་པའི་རྒྱུད་ལ་གནས་པའི་མ་རིག་པའི་མུན་པ་འཇོམས་པར་བྱེད་པ་མི་དགེ་བའི་འདམ་རྫབ་སྐེམ་པར་བྱེད་ཅིང་།
བྱང་ཆུབ་སེམས་ཀྱི་མྱུ་གུ་ཡོངས་སུ་སྨིན་པར་བྱེད་པ་དཔེ་བྱད་བརྒྱད་ཅུ་རྫོགས་པར་བྱེད་པ། ད་དྷ་ཡ་ལའི་ཡི་གེ་དྲུག་བསྣན་པས་ཡི་གེ་བཞི་བཅུ་ཉིས་འགྱུར་གྱིས་ཡོངས་སུ་བསྐོར་བའོ། །སྔགས་ལ་མངོན་པར་ཞེན་པའི་རྟོག་པ་དང་བཅས་པས་དེ་སྤོང་བའི་ཕྱིར་སྲུབ་པ་དང་བསྲུབ་པའི་
སྦྱོར་བས་ཡེ་ཤེས་ཀྱི་མེ་ལས་ཀྱི་རླུང་གིས་བསྐྱོད་པ་ལྟེ་བའི་དཀྱིལ་འཁོར་ལ་དུ་བར་འཐུལ་ཞིང་འབར་བའི་རང་གི་འོད་ཟེར་རྣམས་ཀྱིས་ཨ་ཡིག་དབྱེ་བར་བྱས་ནས་མེ་དང་རླུང་གི་སྦྱོར་བས་སྤྲུལ་པའི་འཁོར་ལོ་བསྲེགས་ནས་དབུ་མའི་རྩ་ནས་གྱེན་དུ་སོང་སྟེ་རིམ་གྱིས་ཆོས་དང་ལོངས་སྤྱོད་
བདེ་བ་ཆེན་པོའི་འཁོར་ལོ་རྣམས་ཀྱང་མི་སྣང་བར་བྱས་ནས། རྣ་བ་གཡས་པའི་ཨོ་ཌི་ཡ་ནའི་ལམ་ནས་འཐོན་ནས་ཕྱོགས་བཅུར་གནས་པའི་སེམས་ཅན་བསྡུས་པའི་དེ་བཞིན་གཤེགས་པ་ཐམས་ཅད་ཀྱི་གསེར་གྱི་སྒོ་ཛཱ་ལནྡྷ་རའི་མིང་ཅན་སྤྱི་གཙུག་གི་བུ་གར་རབ་ཏུ་ཞུགས་ནས་བདེ་བ་ཆེན་
པོའི་འཁོར་ལོ་ནས་བརྩམས་ཏེ། སྤྲུལ་པའི་འཁོར་ལོའི་བར་དུ་ཐུར་དུ་འོངས་པའི་རིམ་པས་མི་སྣང་བར་བྱས་ནས། རང་གི་ལྟེ་བའི་ནམ་མཁའ་ལ་ཐིམ་ཞིང་། སྐྲའི་རྩེ་མོ་བརྒྱ་སྟོང་གི་ཚད་དུ་མཐོང་བ་ནི་རྒྱུད་ཀྱི་ཨཱ་ལིའོ། །འདི་ལྟར་རང་བཞིན་གྱི་སེམས་སྟོང་པ་ཉིད་
དུ་བསྒོམ་པ་ཆད་པའི་ཚུལ་ཉིད་དུ་འགྱུར་ཞེ་ན་སྐྱོན་དེ་བསལ་བའི་ཕྱིར། དེ་བཞིན་གཤེགས་པ་ཐམས་ཅད་ཀྱི་ལྟེ་བའི་ནམ་མཁའ་ལས་ཡེ་ཤེས་ཀྱི་མེ་དེ་ཉིད་གྱེན་དུ་སྲོག་རླུང་རྒྱུ་བའི་ལམ་ལས་དེ་རྣམས་ཀྱི་བདེ་བ་ཆེན་པོའི་འཁོར་ལོ་ཐོབ་ནས་དེ་ལ་གནས་པའི་ཧཾ་ཡིག་གི་

ཡེ་ཤེས་ཀྱི་བདུད་རྩི་བཞུ་ནས་དེ་རྣམས་ཁོ་ནའི་ཨོ་ཌི་ཡ་ནའི་ལམ་ནས་འཐོན་ནས། རང་ཉིད་ཀྱི་ཛཱ་ལནྡྷ་རའི་ལམ་ལ་རབ་ཏུ་ཞུགས་ཏེ་དེ་བཞིན་གཤེགས་པ་ཐམས་ཅད་བསྲེགས་པ་རྣམས་ཀྱིས་ཀྱང་དགའ་བར་བྱེད་ཅེས་གསུངས་པའི་ཕྱིར་བདེ་བ་ཆེན་པོའི་འཁོར་ལོ་ནས་བརྩམས་
ཏེ། སྤྲུལ་པའི་འཁོར་ལོའི་བར་དུ་སྔགས་དང་བཅས་པའི་འཁོར་ལོ་བཞི་ལ་གསོས་བཏབ་ནས་སྔར་བཞིན་དུ་གྱེན་གྱི་རིམ་པས་དེ་ཁོ་ནའི་ལམ་ལས་འཐོན་ནས་ཡང་དེ་བཞིན་གཤེགས་པ་རྣམས་ཀྱི་ཡང་ལམ་དེ་ཁོ་ན་ཉིད་ནས་རབ་ཏུ་ཞུགས་ནས་འཁོར་ལོ་བཞི་གསོས་འདེབས་པར་
བྱེད་པ་ནི་ཡེ་ཤེས་ཀྱི་ཨཱ་ལིའོ། །འདི་ལྟར་ཡེ་ཤེས་ཀྱི་སྐུར་བསྒོམས་པས་རྟག་པ་ཉིད་དུ་འགྱུར་ཞེ་ན་དེའི་སྐྱོན་ཡོངས་སུ་བསལ་བའི་ཕྱིར། རྣལ་འབྱོར་པ་དེས་ཀུན་རྫོབ་དང་དོན་དམ་པ་དབྱེར་མེད་པའི་རང་བཞིན་ཟུང་འཇུག་གི་ངོ་བོ་ཉིད་གསང་བའི་ཨཱ་ལི་བསྒོམ་པར་བྱ་སྟེ། རིམ་
པ་འདིས་རྡོ་རྗེ་དང་པདྨ་སྙོམས་པར་ཞུགས་པས་བདེ་བ་ཆེན་པོའི་འཁོར་ལོ་ཞུ་བའི་བྱང་ཆུབ་སེམས་ཀྱི་པུལླཱི་ར་མཱ་ལ་ཡར་དབང་དུ་བྱེད་པ། །ཛཱ་ལནྡྷ་རར་ལོངས་སྤྱོད་པ་ཨོ་ཌི་ཡ་ནར་ཐིམ་པ་ཞེས་བྱ་བ་ལ་སོགས་པའི་རིམ་པས་གནས་ཉི་ཤུ་རྩ་བཞི་རེ་རེ་ལ་ཡང་བསྣུར་བ་གསུམ་
བྱས་ནས། ཡན་ལག་ཐམས་ཅད་ལ་ཐིམ་པ་ཞེས་བྱ་བ་གསུངས་པའི་གཙོ་བོ་ཉིད་ཀྱི་ཕྱིར་ཡན་ལག་ཐམས་ཅད་བསྡུས་པའི་གནས་རྡོ་རྗེ་ནོར་བུའི་རྩེ་མོར་ཐིག་ལེའི་ཚུལ་རྣམ་པར་བསྒོམས་ནས་རྟོག་པ་མེད་པའི་ཚུལ་གྱིས་ཆོས་ཉིད་ལ་ལྷན་ཅིག་སྐྱེས་པའི་དགའ་བའི་ཚུལ་གྱི་
རྣམ་པ་ཅན་ཉམས་སུ་མྱོང་ནས་འགྲོ་འོང་དང་བྲལ་བ་དབང་པོའི་སྒོ་བཀག །གཟུང་བ་དང་འཛིན་པ་དང་བྲལ་བར་གནས་པར་བྱའོ་ཞེས་བྱ་བ་གསང་བའི་ཨཱ་ལིའོ། །ཁྲུས་བྱེད་པའི་དུས་སུ་དབང་བསྐུར་བའི་ཆོ་ག་བྱའོ། །གཏོར་མའི་དེ་ཉིད་བརྗོད་པ་ཡྃ་རྃ་ལས་བྱུང་བ་ཞེས་བྱ་
བ་ནི། དཔལ་བདེ་མཆོག་གི་སྦྱོར་བ་དང་ལྡན་པའི་སྔགས་པས་ཟན་ལ་སོགས་པ་མདུན་དུ་བཞག་ནས་དག་པར་བྱ་སྟེ། དེ་ལ་མདུན་དུ་ཡྃ་ཡིག་ལས་བྱུང་བ། རླུང་གི་དཀྱིལ་འཁོར་དེའི་སྟེང་དུ་རྃ་ཡིག་ལས་མེའི་དཀྱིལ་འཁོར་དེ་ལ་ཨོཾ་ཨཱཿཧཱུཾ་ལས་བྱུང་བའི་མི་མགོ་གསུམ་

ལས་བྱས་པའི་སྒྱེད་པོ་ལ་ཨ་ཡིག་དཀར་པོ་ལས་བྱུང་བ་པདྨའི་སྣོད་དཀར་པོ་དེ་ལ་ཟན་ལ་སོགས་པ་དང་། ཨོཾ་ཏྲཱྃ་ཨྃ་ཁྃ་ཧཱུྃ་ལྃ་མཱྃ་པཱྃ་ཏཱྃ་བྃ་ཞེས་པའི་ཡི་གེ་ལས་བྱུང་བ་དང་། དེའི་བྱིན་གྱི་རླབས་ཀྱིས་བདུད་རྩི་ལྔ་སྒྲོན་མ་ལྔའི་ཚུལ་དུ་རྫོགས་པར་བྱས་ནས་རླུང་
གིས་བསྐྱོད་པའི་མེའི་དྲོད་ཀྱིས་རབ་ཏུ་བཞུ་ནས་ས་བོན་གྱི་ཡི་གེ་ལ་སོགས་པ་ཞུ་བར་གྱུར་ཏེ་ཉི་མའི་མདོག་ཅན་དུ་བསྒོམ་པར་བྱའོ། །དེ་ནས་དངུལ་ཆུའི་ཁ་དོག་ཧཱུྃ་ལས་བྱུང་བ། ཁ་ཐུར་དུ་བསྟན་པ་བདུད་རྩིའི་རང་བཞིན་ཁ་ཊྭཱཾ་ག་དཀར་པོ་ཞུ་ནས་ཞུ་བ་དེ་ཡང་དངུལ་ཆུའི་ཁ་དོག་ཅན་བསིལ་
བར་བལྟས་ཏེ། དེའི་སྟེང་དུ་ཨཱ་ལི་ཀཱ་ལི་ཡོངས་སུ་གྱུར་པ་ལས་ཨོཾ་ཨཱཿཧཱུཾ་ཞེས་པའི་ཡི་གེ་གསུམ་གོ་རིམས་བཞིན་དུ་སྟེང་དང་སྟེང་དུ་གནས་པ་ལས་འཁོར་ལོ་གསུམ་གྱི་ལྷ་དང་འོད་ཟེར་རྣམས་སྤྲོས་ཏེ་འགྲོ་བའི་དོན་བྱས་ནས་ཕྱོགས་བཅུར་གནས་པའི་དཔའ་བོ་དང་དཔའ་མོའི་དབང་ཕྱུག་མ་རྣམས་
དང་། རྒྱ་མཚོ་ལ་སོགས་པའི་ཡེ་ཤེས་ཀྱི་བདུད་རྩི་བླངས་ནས་སྙོམས་པར་ཞུགས་པ་སྔོན་དུ་འགྲོ་བས་ཞུ་བར་གྱུར་ནས་སོ་སོ་རང་གི་ས་བོན་རྣམས་ལ་རབ་ཏུ་ཞུགས་སོ། །དེ་ནས་ཨོཾ་ཡིག་ལ་སོགས་པ་ཡང་རིམ་པས་རབ་ཏུ་ཐིམ་པར་བལྟ་སྟེ། ཇི་ཙམ་འདོད་པ་བཞིན་དུ་ཡི་གེ་གསུམ་གྱི་བྱིན་གྱིས་
བརླབས་ནས་འབར་བའི་ཕྱག་རྒྱ་དང་དེའི་སྔགས་དག་གིས་བཀུག་པས་དཀྱིལ་འཁོར་འཁོར་ལོ་ཡོངས་སུ་རྫོགས་པ་མདུན་དུ་གནས་པར་བྱ་སྟེ། ཨརྒྷ་ལ་སོགས་པ་སྔོན་དུ་འགྲོ་བས་མཆོད་ནས། ཨཱ་ལི་དང་ཀཱ་ལི་ཡོངས་སུ་གྱུར་པའི་ཟླ་བ་དེ་ཉི་མའི་རང་བཞིན་ཕྱག་གཉིས་ཀྱི་ནང་དུ་གནས་
པའི་ཧཱུྃ་ཡིག་བལྟས་ནས་ཨ་ནྱོ་ནྱ་ལ་སོགས་པའི་སྔགས་བརྗོད་པ་སྔོན་དུ་འགྲོ་བས་ཟླ་བ་ཉི་མ་ཧཱུྃ་ཡིག་ཡོངས་སུ་གྱུར་པས་རྡོ་རྗེའི་ཐལ་མོ་སྦྱར་བའི་ཕྱག་གཉིས་ལ་བདུད་རྩིའི་སྣོད་དེ་བཞག་ནས་སམ་མངོན་པར་བསམས་ནས། གཏོར་མ་དེ་བདག་གིར་བྱ་བའི་དོན་དུ་ལྷ་མོ་ཚད་མ་ལ་སོགས་པ་
བཀླག་ཅིང་། དེ་ནས་མཆོད་བྱ་མཆོད་བྱེད་མཆོད་རྫས་རྣམས་དབྱེར་མེད་དུ་བལྟས་ཤིང་བདུད་རྩིའི་སྣོད་དེ་ཕྱོགས་རྣམས་ཀྱི་ཤར་ཕྱོགས་ནས་བརྩམས་ཏེ་གཡོན་སྐོར་དུའོ། །མཚམས་རྣམས་ཀྱི་མེ་མཚམས་ནས་བརྩམས་ཏེ་གཡས་སྐོར་དུ་སྐོར་བར་བྱེད་ཅིང་ཧཱུྃ་ལས་བྱུང་བའི་

ལྗགས་དཀར་པོ་ཅན། འཁོར་ལོ་གསུམ་གྱི་ལྷ་རྣམས་ལ་ཨོཾ་ཀ་ར་ལ་སོགས་པའི་སྔགས་ཀྱིས་ལན་ཅིག་བརྗོད་པས་གཏོར་མ་དབུལ་བར་བྱའོ། །བཅོམ་ལྡན་འདས་ཤེས་རབ་མ་དང་བཅས་པ་དང་མཁའ་འགྲོ་མ་ལ་སོགས་པ་རྣམས་དང་། ཁྭ་གདོང་མ་ལ་སོགས་པ་རྣམས་ལ་ཅི་
རིགས་སུ་སྐོར་བར་བྱེད་ཅིང་། བཛྲཱ་རལླི་ལ་སོགས་པའི་སྔགས་ལན་གཅིག་གཉིས་གསུམ་བཞི་ལྔ་བརྗོད་པས་དྲངས་ནས་ཞལ་བསིལ་བ་དང་། གདོང་ཕྱིས་དང་གོ་ལ་ལ་སོགས་པ་ཕུལ་ཏེ། པི་ཝང་མ་ལ་སོགས་པ་རྣམས་ཀྱིས་མཆོད་ནས། སྲིད་ཞི་ལ་སོགས་པའི་བསྟོད་པས་བསྟོད་
དེ། མངོན་པར་འདོད་པའི་དོན་གྲུབ་པར་གསོལ་བ་གདབ། དེ་ནས་དུར་ཁྲོད་བརྒྱད་ན་གནས་པའི་ཕྱོགས་སྐྱོང་རྣམས་ལ། སྔར་བཞིན་དུ་ཕྱོགས་དང་མཚམས་སུ་ཨོཾ་ཁ་ལ་སོགས་པའི་སྔགས་ཀྱིས་གཏོར་མ་སྦྱིན་པར་བྱའོ། །ལྷག་མ་དག་ནི་གོ་སླའོ། །ཨོཾ་བཛྲ་ཧེ་རུ་ཀ་ས་མ་ཡ།
མ་ནུ་པཱ་ལ་ཡ། ཧེ་རུ་ཀ་ཏྭེ་ནོ་པ་ཏིཥྛ་དྲྀ་ཌྷོ་མེ་བྷ་བ། སུ་ཏོ་ཥྱོ་མེ་བྷ་བ། སུ་པོཥྱོ་མེ་བྷ་བ། ཨ་ནུ་རཀྟོ་མེ་བྷ་བ། སརྦ་སིདྡྷིམྨེ་པྲ་ཡཙྪ། སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿཀུ་རུ་ཧཱུཾ་ཧ་ཧ་ཧ་ཧ་ཧོཿ། བྷ་ག་བཱན་བཛྲ་ཧེ་རུ་ཀ་མཱ་མེ་མུཉྩ་ཧེ་རུ་ཀོ་བྷ་བ་མ་ཧཱ་ས་མ་ཡ་སཏྭ་ཨཱཿཧཱུཾ་ཕཊ། ཅེས་
བྱ་བ་ཡི་གེ་བརྒྱ་པའི་སྔགས་བརྗོད་དོ། །དེ་ནས་ཨོཾ་ཡོ་ག་ཤུདྡྷཿསརྦ་དྷརྨཱ་ཡོ་ག་ཤུདྡྷོ྅ཧཾ། ཞེས་བརྗོད་ཅིང་པད་ཀོར་གྱི་ཕྱག་རྒྱས་དགྱེས་པར་བྱ་སྟེ། ཕྱག་རྒྱ་བཏུལ་ནས་མངོན་པར་འཁྱུད་པའི་སྟངས་སྔོན་དུ་འགྲོ་བའི་སྲིན་ལག་དང་མཐེ་བོང་གི་སེ་གོལ་གཏོགས་ནས་ཨོཾ་བཛྲ་མུཿ།
ཞེས་བརྗོད་ཅིང་གཤེགས་སུ་གསོལ་ནས་འཁོར་ལོ་དེ་བདག་ཉིད་ལ་གཞུག་པར་བྱའོ། །ལག་པའི་མཆོད་པའི་ཆོ་ག་ཡང་ཀུན་དུ་སྤྱོད་པའི་རྒྱུད་ལས་རྟོགས་པར་བྱའོ། །གསུངས་པའི་ཆོ་ག་ཇི་ལྟ་བ་བཞིན་དུ་དག་པར་བྱས་པའི་ལག་པ་གཡོན་པའི་མིང་མེད་ཀྱི་རཾ་གནས་དང་ཉེ་བའི་
གནས་ལ་སོགས་པ་བརྗོད་ཅིང་། ཆོ་ག་ཇི་ལྟ་བ་བཞིན་དུ་དག་པར་བྱས་པའི་མྱོས་པར་བྱེད་པས་དཀྱིལ་འཁོར་གྲུ་གསུམ་པ་གཉིས་བྱུགས་ཏེ། དེའི་དབུས་སུ་ཟླུམ་པོ་དེ་ལ་ཐུགས་ཀའི་ས་བོན་ལས་བྱུང་བའམ། དེའི་འོད་ཟེར་གྱིས་བཀུག་པའི་སྣོད་དང་བཅུད་ཀྱི་དཀྱིལ་འཁོར་

གྱི་བཅོམ་ལྡན་འདས་རྣམ་པར་བསམས་ནས། དེ་ལ་བདུད་རྩི་ལྔ་ལ་སོགས་པའི་རང་བཞིན་དུ་རྫོགས་པར་བྱས་པའི་བཟའ་བཏུང་ལ་སོགས་པ་ཡི་གེ་གསུམ་མམ། རྐང་པ་བརྒྱད་པའི་སྔགས་ཀྱིས་ཕུལ་ནས། པདྨའི་སྣོད་ན་ཡོད་པའི་བདུད་རྩིར་བྱས་པའི་མྱོས་
བྱེད་མཐེ་བོང་དང་སྲིན་ལག་གིས་བླངས་ནས། བཅོམ་ལྡན་འདས་དང་བཅོམ་ལྡན་འདས་མ་གཉིས་ལ་རང་རང་གི་སྙིང་པོ་དང་ཉེ་བའི་སྙིང་པོ་དག་གིས་དབུལ་ལོ། །དང་པོ་མཁའ་འགྲོ་མ་ནས་གཤིན་རྗེ་འཇོམས་མའི་བར་རྣམས་ལ། དེ་རྣམས་ཀྱི་སོ་སོའི་སྔགས་རྣམས་ཀྱིས་བསྟབ་སྟེ་
མཉེས་པར་བྱའོ། །དེ་ནས་ཡང་དག་པར་མཆོད་དེ་ཆོ་གའི་ཆད་ལྷག་ཁ་བསྐང་བར་བྱ་བའི་ཕྱིར་ཡི་གེ་བརྒྱ་པ་བརྗོད་དེ། ཚོགས་བྱིན་གྱིས་བརླབ་པར་གསོལ་བ་བཏབ་ནས། ཨོཾ་ཡོ་ག་ཤུདྡྷཿསརྦ་དྷརྨཱ་ཡོ་ག་ཤུདྡྷོ྅ཧཾ། ཞེས་བརྗོད་ཅིང་པད་ཀོར་གྱི་ཕྱག་རྒྱས་དགྱེས་པར་བྱས་ནས་
ཕྱག་རྒྱ་དེ་བཏུལ་ལ་འཁྱུད་པའི་སྟངས་སྔོན་དུ་འགྲོ་བས་རྡོ་རྗེའི་ཚོགས་ཌི་ཀས་དེ་ཁོ་ན་བཞིན་དུ། ཨོཾ་བཛྲ་མུཿཞེས་པ་གཤེགས་སུ་གསོལ་ཏེ། འཁོར་ལོ་དེ་བདག་ཉིད་ལ་རབ་ཏུ་གཞུག་པར་བྱའོ། །དེ་དང་དེའི་ས་ལ་གནས་པའི་མྱོས་བྱེད་ཀྱང་མིང་མེད་ཀྱིས་བླངས་ཏེ། སྙིང་དང་། ལྕེ་
དང་། སྤྱི་བོར། ཧཱུཾ་ཨཱཿཨོཾ་གྱི་ཡི་གེ་བརྗོད་པ་སྔོན་དུ་འགྲོ་བས་བྱུགས་ནས་ལག་པ་དེ་ལ་གནས་པའི་ལྷའི་འཁོར་ལོ་ཡང་བདག་ཉིད་ལ་རབ་ཏུ་ཞུགས་པར་བལྟ་བར་བྱའོ། །ཨོཾ་ན་མོ་བྷ་ག་བ་ཏཱི་བཛྲ་བཱ་རཱ་ཧཱི་བཾ། ཨཱརྱ་ཨ་པ་རཱ་ཛི་ཏི་ཏྲཻ་ལོཀྱ་མཱ་ཏེ་མ་ཧཱ་བིདྱེ་ཤྭ་རི་སརྦ་བྷཱ་ཏ་བྷ་ཡཱ་པ་ཧེ་མ་ཧཱ་བཛྲེ།
བཛྲེ་ས་ནེ་ཨ་ཛི་ཏེ། ཨ་པ་རཱ་ཛི་ཏེ་བ་ཤྱཾ་ཀ་རི་ནི་ནོ་ཏྲ་བྷྲ་མ་ཎི། ཤོ་ཥ་ཎི། རོ་ཥ་ཎི། ཀྲོ་དྷ་ཀ་རཱ་ལི་ནི། ཏྲ་ས་ནི། མཱ་ར་ཎི། བྲ་བྷེ་ད་ནི། ཨ་པ་རཱ་ཛ་ཡེ། བི་ཛ་ཡེ། ཛམྦྷ་ནི། སྟམྦྷ་ནི། མོ་ཧ་ནི། བཛྲ་བཱ་རཱ་ཧཱི། མ་ཧཱ་ཡོ་གི་ནཱི། ཀཱ་མེ་ཤྭ་རི་ཁ་གེ །ཏདྱ་ཐཱ། པྲོ་ཏང་
གེ། པྲོ་ཏང་གེ །ཧ་ན། ཧ་ན། པྲཱ་ཎཱཾ་ཀིཾ་ཀི་ནི། ཁིཾ་ཁི་ནི། དྷུ་ན། དྷུ་ན། བཛྲ་ཧཱསྟེ། ཤོ་ཥ་ཡ། ཤོ་ཥ་ཡ། བཛྲ་ཁ་ཊྭཱཾ་ག །ཀ་པཱ་ལ། མཱ་ལ་དྷཱ་རི་ཎི། མ་ཧཱ་པི་ཤི་ཏ་མཱཾ་ས་ཤི་རོ་མ་ནུ་ཥྱཱནྟྲཾ་པྲཱ་བྲྀཏྟ། སཾ་ནི་དྷྱཾ་ན་ར་ཤི་རོ་མཱ་ལ་གྲཾ་ཐི་ཏ་དྷཱ་རི་ཎི། སུམྦྷ་ནི། སུམྦྷ།

ཧ་ན་ཧ་ན། པྲཱ་ཎཱ་ན། སརྦ་པཱ་པཾ་ས་ཏྭ་ནཱཾ་སརྦ་པ་ཤུ་ནཱཾ་མ་ཧཱ་མཱཾ་སཙྪེ་ད་ནི། ཀྲོ་དྷ་མཱུརྟི། དཾཥྚྲཱ་ཀ་རཱ་ལི་ནི། མ་ཧཱ་མུ་དྲེ། ཤྲཱི་ཧེ་རུ་ཀ །དེ་བ་སྱ་ཨཱ་གྲ་མ་ཧི་ཥི་ས་ཧ་སྲ་ཤི་རེ། ས་ཧ་སྲ་བཱ་ཧ་བེ། ཤ་ཏ་ས་ཧ་སྲ་ཨཱ་ན་ནི། ཛྭ་ལི་ཏ་ཏེ་ཛ་སེ། ཛྭ་ལ་མུ་ཁི་པིཾ་ག་ལ་ལོ་ཙ་ནེ་བཛྲ་ཤ་རཱི་
རེ། བཛྲཱ་ས་ནེ། མི་ལི་མི་ལི། ཏི་མི་ལི། ཏི་མི་ལི། ཙི་ལི་ཏ། ཧེ་ཧེ། ཧ་ཧ། ཧཱུཾ་ཧཱུཾ། ཁ་ཁ། དྷུ་དྷུ། རུ་རུ། དྷུ་རུ་དྷུ་རུ། མུ་རུ་མུ་རུ། མུཉྩ་མུཉྩ། ཨཱ་དྭཻ་ཏེ་མ་ཧཱ་མོ་གི་ནི་པ་ཋི་ཏ་སིདྡྷ། དྲེཾ་དྷཾ། དྲེཾ་དྷཾ། གྲཾ་གྲཾ། ཧེ་ཧེ། ཧ་ཧ། བྷཱི་མེ། ཧ་ས་ཧ་ས་བཱི་རེ།
ཧཱ་ཧཱ། ཧོཿཧོཿཧཱུཾ་ཧཱུཾ། ཏྲཻ་ལོཀྱ་བི་ནཱ་ཤ་ནི། ཤ་ཏ་ས་ཧ་སྲ་ཀོ་ཊི། ཏ་ཐཱ་ག་ཏ་པ་རི་བཱ་རེ་ཏེ་ཧཱུཾ་ཧཱུཾ་ཕཊ། སིཾ་ཧ་རཱུ་པེ་ཁ་ག་ཛ་རུ་པེ་གཿ། ཏྲཻ་ལོ་ཀྱོ་ད་རི། ས་མུ་དྲ་མེ་ཁ་ལེ། གྲ་ས་གྲ་ས་ཧཱུཾ་ཧཱུཾ་ཕཊ་བཱི་ར་དྭེ་ཏེ། ཧཱུཾ་ཧཱུྃ་ཧ་ཧ། མ་ཧཱ་པ་ཤུ་མོ་ཧ་ནི། མ་ཧཱ་ཡོ་གི་ཤྭ་རི་ཏྭཾ་ཌཱ་ཀི་ནཱི་
བནྡ་ནི་སརྦ་ལོ་ཀཱ་ནི། སདྱ་པྲ་ཏྱ་ཡ་ཀཱ་རི་ཎི་ཧཱུཾ་ཧཱུཾ་ཕཊ། བྷཱུ་ཏ་ཏྲཱ་ས་ནི། མ་ཧཱ་བཱི་རེ་པ་ར་མ་སིདྡྷེ། ཡོ་གེ་ཤྭ་རི་ཕཊ། ཧཱུཾ་ཧཱུཾ་ཕཊ། ཧཱུཾ་ཧཱུཾ་ཕཊ། སྭཱ་ཧཱ། ཞེས་བྱ་བ་བཅོམ་ལྡན་འདས་མ་རྡོ་རྗེ་ཕག་མོའི་ཕྲེང་བའི་སྔགས་སོ། །བླ་མ་རྣམས་ཀྱི་བརྒྱུད་པའི་ལོ་རྒྱུས་ནི། ཕྱི་དང་ནང་གི་རིག་
པ་ཐམས་ཅད་ལ་སྦྱངས་པའི་ཐུགས་རྒྱུད་དང་ལྡན་པ་དཔལ་དཔེ་མེད་འཚོ་ཞེས་བྱ་བ་དེས་མི་དམིགས་པ་དེ་ཁོ་ན་ཉིད་ཀྱི་གདམས་ངག་བསྒོམས་ཤིང་ལོ་བཅུ་གཉིས་སུ་ཁར་ས་པ་ཎི་རྩ་འདབ་ལ་སོགས་པ་ཇི་ལྟར་གནས་པ་ཤེས་ཏེ་བཞུགས་པས་དེ་ལས་ཀྱང་ཁྱད་པར་གྱི་རྟོག་པ་མ་བྱུང་ནས་ཤིན་
ཏུ་ཐུགས་མུག་པར་གྱུར་ནས་མནལ་བར་གྱུར་པ་ལ་རྡོ་རྗེ་རྣལ་འབྱོར་མས་བཀའ་བསྒོ་བ་བུ་བི་ཀྲ་མ་པུ་རར་སོང་ཤིག །དེར་ཁྱོད་ཀྱིས་ཁྱད་པར་རྟོགས་པར་འགྱུར་རོ་ཞེས་ལུང་བསྟན་ནས་དེས་ཀྱང་དེའི་བཀའ་སྤྱི་བོས་བླངས་ཏེ། དེའི་དུས་ཀྱི་སློབ་མ་ཕྱི་བཞིན་འབྲང་བ་ཚོང་དཔོན་གྱི་
བུ་པཎྜི་ཏ་ཆེན་པོ་དཔལ་འཛིན་དང་གཉིས་བི་ཀྲ་མ་པུ་རར་གཤེགས་སོ། །དེར་ཡང་དུས་མཆོད་ཆེན་པོ་ཞིག་གི་ཚེ་མཚན་མོ་ཕྱེད་ཀྱི་དུས་སུ། བཅོམ་ལྡན་འདས་ཨཱ་བ་དྷཱུ་ཏཱི་ཅིག་གི་ཆ་བྱད་དུ་མཛད་ནས་བུ་དེ་ཁོ་ན་ཉིད་འདི་ཡིན་ཞེས་མངོན་སུམ་དུ་གདམས་སོ། །དེས་ཀྱང་གདམས་པ་དེ་

ཐོབ་པ་ཙམ་གྱི་ཏིང་ངེ་འཛིན་ལ་མཉམ་པར་གཞག་པར་གྱུར་པ་དང་། དེའི་ཚེ་ཁོ་ནར་བཅོམ་ལྡན་འདས་མི་སྣང་བར་གྱུར་ཏོ། །དེའི་བར་དུ་མཚན་མོ་འདས་ནས་དེས་ཀྱང་ཏིང་ངེ་འཛིན་ལས་བཞེངས་ཏེ། དཔལ་ལྡན་བླ་མ་ཐུགས་རྗེ་ཆེན་པོ་མཆོག་གི་བདག་ཉིད་ཆེན་
པོ་དེས་སྣོད་དང་ལྡན་པར་དགོངས་ནས་རང་གིས་རྟོགས་པ་དེ་པཎྜི་ཏ་ཆེན་པོ་དཔལ་འོད་མཛད་ལྷ་ལ་གནང་། སྐྱོན་མེད་ཅིང་བརྗོད་ཀྱིས་མི་ལང་བའི་ཡོན་ཏན་རིན་པོ་ཆེའི་འབྱུང་གནས་ཀྱི་དཔལ་བླ་མ་དེ་ལས་པཎྜི་ཏ་ཆེན་པོ་ཆོས་ཀྱི་འབྱུང་གནས་ཞི་བས་ཞུས་སོ། །དེ་ལ་ཡང་གྲགས་པའི་
ལྷས་ཞུས། དེ་ལ་པཎྜི་ཏ་ཆེན་པོ་ཆོས་འཕགས་ཀྱིས་ཞུས། དེ་ལས་དེ་བཞིན་གཤེགས་པའི་རྡོ་རྗེ་བདག་གིས་ཞུས་ནས་རང་གི་དྲན་པ་གསོ་བའི་ཕྱིར་ཅུང་ཟད་བྲིས་སོ། །ཉན་ཐོས་ཕྱི་རོལ་ཡོད་པར་སྨྲ། །རྣལ་འབྱོར་སྤྱོད་པས་སེམས་རང་བཞིན། །འགྲོ་བ་སྟོང་པ་དབུ་མ་བས། །གསང་
སྔགས་པ་ཡང་འོད་གསལ་བཞེད། །ཁ་ཅིག་ཡུལ་རྣམས་སྤངས་ནས་ཏེ། །འགའ་ཞིག་ཡུལ་རྣམས་དགག་བྱས་པ། །ཁ་ཅིག་ཡུལ་རྣམས་ཉིད་ཁོ་ནས། །མི་ཡི་ཁྱུ་མཆོག་བྱང་ཆུབ་སྒྲུབ། །རྟོག་པ་ཉམས་པས་བློ་ཉེས་འགྱུར། །བློ་ངན་འདི་ལྟར་རྟོག་པར་བྱེད། །བློ་ལྡན་འདི་ཉིད་ཁོ་
ན་ཡིས། །ནམ་མཁའ་བས་ལྷག་ཅི་ཡང་འཆར། །ཞེས་དཔལ་ས་ར་ཧ་པས་གསུངས་སོ། །ཇི་ལྟར་ཁྱིམ་ཐབ་མོ་ནི་སྐྱེས་བུ་འཕྱོན་མ་ལ། །རྗེས་སུ་ཆགས་གྱུར་རང་གི་ཁྱོ་ལའང་ཆགས་པ་ལྟར་བྱེད་པ། །དེ་བཞིན་རྣལ་འབྱོར་རྟོགས་པའི་ཡུལ་ལ་ཆགས་པ་ཡིས། །སླར་ཡང་ཡུལ་ལ་ལོངས་
ནི་སྤྱོད་པར་བྱེད་པའོ། །གྲོགས་ངན་ནང་ནས་རྣལ་འབྱོར་གང་། །བསྟན་པ་བསྲུང་ཕྱིར་འཇིགས་པ་ཡིས། །བཟང་པོའི་སྤྱོད་པ་བརྩམ་བྱའི་ཕྱིར། །དེ་ནི་སེམས་ཀྱི་རྣལ་འབྱོར་རྩོམ། །རྙོག་བཅས་ཡིད་ལྡན་ལས་ཀྱི་ཕྱག་རྒྱ་རབ་སྤངས་ནས། །རྟོག་པ་ལས་བྱུང་ཡེ་ཤེས་ཕྱག་རྒྱ་ནི། །ཡང་དག་
རྫོགས་པའི་བྱང་ཆུབ་ཆེད་དུ་རྒྱས་བའི་མཆོག །དེ་སྐྱེད་བྱེད་པས་ཕྱག་རྒྱ་མཆོག་དེ་བསྒོམ་པར་བྱ། །རྒྱུད་དང་སྒྲུབ་ཐབས་ཊཱི་ཀཱ་ལས། །ཚིག་རྐང་རེ་རེ་རྙེད་པ་གང་། །དེ་རྣམས་བསྡུས་ནས་ཡིག་སྣ་འདི། །རང་ལ་ཕན་ཕྱིར་བདག་གིས་བྱས། །སོ་སོ་སྐྱེ་བོ་ཉིད་ཕྱིར་དང་། །རྒྱུན་ཆགས་ཏིང་

འཛིན་མེད་པའི་ཕྱིར། །འདི་ལ་མི་གསལ་མི་དག་པ། །དེ་ལ་མཁས་རྣམས་བཟོད་པར་མཛོད། །སྡོམ་པ་འབྱུང་བའི་ཡིག་སྣ་འདི། །དེ་བཞིན་གཤེགས་པའི་རྡོ་རྗེ་ཡིས། །བྱས་པའི་དགེ་བ་ཐོབ་པ་གང་། །དེ་ཡིས་སྐྱེ་བོ་རྒྱལ་གྱུར་ཅིག །དཔལ་ཨུ་རྒྱན་གྱི་གནས་ཆེན་པོ་ལས་བྱུང་བ། དཔལ་
བདེ་མཆོག་གི་མངོན་པར་རྟོགས་པའི་འགྲེལ་པའི་ཊཱི་ཀཱ་ཁྱད་པར་གསལ་བྱེད་ཅེས་བྱ་བ་པཎྜི་ཏ་ཆེན་པོ་དེ་བཞིན་གཤེགས་པའི་རྡོ་རྗེས་མཛད་པ་རྫོགས་སོ།། །།རྒྱ་གར་ཤར་ཕྱོགས་ཛ་ག་ཏ་ལའི་པཎྜི་ཏ་ཆེན་པོ་བི་བྷཱུ་ཏི་ཙནྡྲས་བོད་ཡུལ་གྱི་དབུས་དྲང་སྲོང་སྲིན་པོའི་རིར་རང་འགྱུར་དུ་མཛད་པའོ།། །།
༄༅༅། །རྒྱ་གར་སྐད་དུ། ཤྲཱི་སམྦ་ར་མཎྜ་ལ་བི་དྷིཿ། བོད་སྐད་དུ། དཔལ་བདེ་མཆོག་གི་དཀྱིལ་འཁོར་གྱི་ཆོ་ག །དཔལ་འཁོར་ལོ་བདེ་མཆོག་ལ་ཕྱག་འཚལ་ལོ། །ནམ་མཁའ་ལས་རྒྱས་མཁའ་འགྲོ་མའི། །འཁོར་ལོ་སྡོམ་པ་ལ་བཏུད་ནས། །དེ་ཡི་དཀྱིལ་འཁོར་སོགས་ཆོ་
ག །བླ་མ་ལས་རྙེད་བྲི་བར་བྱ། །དེ་ལ། སློབ་དཔོན་གཡོན་ན་ཁ་ཊྭཱཾ་ག །ཧཱུཾ་སྒྲོགས་གཡས་ན་ཌ་མ་རུ། །ཡང་དག་ཡེ་ཤེས་རྒྱུད་ཤེས་ཤིང་། །ཧེ་རུ་ཀ་དཔལ་གསང་སྔགས་ཞེས། །ཁྲོ་མེད་གཙང་སྦྲ་བརྩོན་འགྲུས་ལྡན། །སྦྱོར་ཤེས་ཡེ་ཤེས་ཕ་རོལ་སོན། །མགོ་སྐྱེས་ལ་ནི་ཐོད་
པས་བརྒྱན། །ཐལ་བ་ཡིས་ནི་ལུས་ལ་བྱུགས། །ཞེས་པ་དང་། གསང་བ་རབ་ཏུ་བསྟན་པ་ལས་ཀྱང་། བླ་མ་རྣམ་པ་གཉིས་རབ་བཤད། །རྒྱུ་ཐོབ་པ་དང་འབྲས་བུ་འཆར། །རྒྱུ་ཡི་ཚུལ་གྱིས་མདོར་སྟོན་ཅིང་། །འབྲས་བུའི་ཚུལ་དུ་རྒྱས་པར་འཆད། །མདོར་བསྟན་ལུས་ངག་ངོ་བོ་
སྟེ། །རྒྱས་པར་འཆད་པ་སེམས་ཉིད་དོ། །དཀྱིལ་འཁོར་སློབ་དཔོན་ཚུལ་གྱིས་ནི། །ཕྱི་རོལ་དང་ནི་ནང་དུ་གནས། །འདི་ནི་སེམས་ཅན་ཐམས་ཅད་ཀྱི། །བླ་མ་བླ་མེད་རྣམ་པ་གཉིས། །ལོངས་སྤྱོད་གྲོལ་བའི་འབྲས་སྟེར་བ། །རབ་ཏུ་འབད་དེ་མཆོད་པར་བྱ། །ཞེས་གསུངས་པ་ནི་
སློབ་དཔོན་གྱི་མཚན་ཉིད་དོ། །དུང་དང་། འདབ་མའི་ཀོང་བུ་དང་། ཟངས་ལ་སོགས་པ་ལས་བྱས་པའི་ཞབས་བསིལ་དང་བསང་གཏོར་དང་། ཞལ་བསིལ་དང་། མཆོད་ཡོན་གྱི་སྣོད་རྣམས་སུ་ནས་དང་འོ་མ་དང་། མེ་ཏོག་དཀར་པོ་དང་། རྩྭ་ཀུ་ཤ་དང་། ཏིལ་དང་། བདུད་རྩི་ལྔ་

ལ་སོགས་པ་བླུགས་ཏེ་ཡི་གེ་གསུམ་དང་རང་གི་བདག་པོ་དང་ལས་ཐམས་ཅད་པའི་སྔགས་ཀྱིས་བརྒྱ་རྩ་བརྒྱད་དང་ལན་བདུན་དུ་བསྔགས་ལ། སྣོད་དེ་གསུམ་རང་གི་གཡོན་དུ་མན་ཇིའི་སྟེང་དུ་བཞག་ཅིང་། དེའི་མདུན་དུ་ཡང་བཟེད་ཞལ་གསུམ་མན་ཇིའི་སྟེང་དུའོ། །
དེ་ལ་ཞབས་བསིལ་གྱི་སྣོད་ཀྱི་ཆུ་གཡས་པའི་ཁུ་ཚུར་གྱིས་མཐེ་བོ་དང་མཛུབ་མོའི་སྐམ་པས་མེ་ཏོག་བཟུང་ལ་རོལ་པས་སོར་མོ་རྣམས་བསྐོར་ཞིང་མཛུབ་མོ་ལ་སོགས་པའི་སོར་མོ་རྣམས་རིམ་གྱིས་བརྐྱང་སྟེ། ཨོཾ་ཨཱཿཧྲཱི་པྲ་བ་ར་ས་ཏ་ཀཱ་རཾ་པཱ་དྱཾ་པྲ་ཏཱིཙྪ་ཧཱུཾ་སྭཱ་ཧཱ། ཞེས་པ་གསུམ་གྱིས་བཟེད་
ཞལ་དབུལ་ལོ། །མཆོད་པ་བྱ་བའི་ཞབས་གཉིས་ལ་བསམས་ནས་སོ། །སྣོད་གཉིས་པའི་ཆུ་གཡས་ན་གནས་པའི་ཀུ་ཤའི་ཆུན་པོའི་རྩེ་མོས་བླངས་ནས་བཟེད་ཞལ་གཞན་དུ་མཆོད་བྱའི་སྐུ་ལ་བསང་གཏོར་བྱའོ། །དེ་ཉིད་ཀྱི་ཆུ་གཡས་པའི་ཁུ་ཚུར་གྱིས་མཐེ་བོ་དང་མཛུབ་མོའི་སྐམ་པས་མེ་
ཏོག་བཟུང་ལ་དེའི་བཟེད་ཞལ་དུ་ཁ་ཐུར་དུ་བསྟན་པའི་ཁུ་ཚུར་གྱིས་ཞབས་བསིལ་པའི་ཆེད་དུ་མཆོད་བྱའི་ཕྱག་ཏུ་མཐེ་ཆུང་ལ་སོགས་པ་རིམ་གྱིས་བརྐྱང་ཞིང་ལན་གསུམ་དུ་དབུལ་ལོ། །སྣོད་གསུམ་པའི་ཆུ་ལ་སོགས་པ་སྙིམ་པས་བཟུང་སྟེ་རྡོ་རྗེ་ཐལ་མོ་ཕྱེ་བས་བཟེད་ཞལ་གྱི་སྣོད་གསུམ་པར་
མཆོད་ཡོན་ལན་གསུམ་མོ། །དེ་ཐམས་ཅད་སྔགས་དེ་ཉིད་ཀྱིས་ཏེ་འོན་ཀྱང་པཱ་དྱཾ་གི་གནས་སུ་པྲོཀྵ་ཎཾ་དང་། ཨཱཉྩ་མ་ནཾ་དང་། ཨརྒྷཾ་ཞེས་བརྗོད་དོ། །མེ་ཏོག་དབུ་ལའོ། །བདུག་སྤོས་དང་། མར་མེ་དང་། མཆོད་ཡོན་ནི་མདུན་དུའོ། །ཞལ་ཟས་ཕྱག་ཏུའོ། །དྲི་ནི་མཆོད་བྱའི་ཐུགས་
ཀར་བསམ་པར་བྱའོ། །འདི་ནི་ཆོ་ག་ཐམས་ཅད་དུ་མཆོད་ཡོན་ལ་སོགས་པའི་ཆོ་གའོ། །ཐམས་ཅད་མཁྱེན་པའི་ལམ་ཤེས་པས། །སྔོན་དུ་བསྙེན་པ་ཚོགས་སོགས་ཅིང་། །བགེགས་ནི་རྣམ་པར་ཉམས་བྱེད་བྱ། །དངོས་གྲུབ་བསྙེན་པ་མེད་ན་མིན། །དེ་ཕྱིར་རིམ་གཉིས་དེ་ཉིད་རིག །
དབེན་པར་ཡང་དག་གནས་ནས་ནི། །བདེ་མཆོག་འཁོར་ལོ་བསྒོམ་པར་བྱ། །སྐྱོ་ན་དེ་ཡི་གསང་སྔགས་བཟླས། །འཁོར་ལོའི་བདག་པོའི་བཟླས་པ་འབུམ། །ཡང་ན་རང་གི་ལྷ་ཡི་འབུམ། །དཀྱིལ་འཁོར་པ་ཡི་ཁྲི་ཡིན་ཏེ། །འདི་ནི་སྔོན་དུ་བསྙེན་པར་བརྗོད། །རིམ་པ་གཉིས་

ཀྱི་རྣལ་འབྱོར་ནི། །ལཱུ་ཡི་པའི་མངོན་པར་རྟོགས་པ་ལ་སོགས་པར་ཤེས་པར་བྱའོ། །འདི་ནི་སྔོན་དུ་བསྙེན་པའོ། །དཀྱིལ་འཁོར་ལ་སོགས་པའི་བྱ་བ་ནི་རྒྱལ་དང་། ནག་པ་དང་། བྲ་ཉེ་དང་། བྱ་དབོའི་ཟླ་བ་མ་གཏོགས་པའི་ཟླ་བ་རྣམས་དང་། ཚེས་གཉིས་པ་དང་། གསུམ་པ་དང་། ལྔ་
པ་དང་། བདུན་པ་དང་། བཅུ་པ་དང་། བཅུ་གསུམ་པ་དང་། ཉ་དང་། གཟའ་ཟླ་བ་དང་། ལྷག་པ་དང་། ཕུར་བུ་དང་། པ་བ་སངས་རྣམས་སུའོ། །སྣར་མ་ལ་ནོར་རོ། །མགོ་ལ་ཞི་བའོ། །ལག་ལ་སྐལ་བ་བཟང་པོའོ། །རྒྱལ་ལ་རྒྱལ་བའོ། །དབོ་ལ་འཁོར་འཕེལ་ལོ། །མེ་བཞི་
ལ་དངོས་གྲུབ་པོ། །ལྷ་མཚམས་ལ་འདོད་པའོ། །སྣྲོན་ལ་བདེ་བའོ། །སྣྲུབས་དང་གྲོ་བཞིན་ལ་ལུང་ལ་མཁས་པར་འགྱུར་རོ། །ཆུ་སྟོད་ཆུ་སྨད་ལ་བུ་འཕེལ་ལོ། །ཁྲུམས་སྟོད་ཁྲུམས་སྨད་དག་ལ་བུ་མོ་འཕེལ་ལོ། །ཞི་བའི་གཟའ་ལ་བརྟེན་པའི་དུས་སྦྱོར་དང་རྣམ་པར་སེལ་བ་དང་། །ཤིན་
ཏུ་སྐྲག་པ་དང་། ཟུག་རྔུ་དང་། འབྲས་དང་། བྱ་བ་གྲུབ་དང་། རྡོ་རྗེ་དང་། ཀུན་ལྟུང་བ་དང་། ཡོངས་བསྣུན་དང་། ཤ་ཁོན་འཛིན་པ་མ་གཏོགས་པའི་སྦྱོར་བ་དང་། འཇུག་ཕོད་དང་བྲལ་བའི་བྱེད་པ་རྣམས་ལ་སྟེ། དེ་ནི་གཞན་གྱི་འདོད་པའོ། །རང་གི་བཞེད་པ་ནི། དབྱར་དུས་རབ་
གནས་གྲུབ་པའོ། །སྟོན་ནི་བདེ་བ་སྟེར་བར་འགྱུར། །དགུན་སྟོད་ཡེ་ཤེས་འཕེལ་བ་སྟེར། །དགུན་སྨད་དབང་ཕྱུག་ཐམས་ཅད་འབྱུང་། །དཔྱིད་ཀ་དཔལ་ནི་རབ་ཏུ་སྦྱིན། །སོས་ཀར་རྒྱལ་དང་ཞི་བ་སྟེར། །རབ་གནས་དུས་ནི་ཐམས་ཅད་དུ། །སངས་རྒྱས་བཞུགས་སུ་འཇུག་པར་བཞེད། །
ཅེས་པ་དང་། མཁའ་འགྲོ་མ་རྡོ་རྗེ་གུར་ལས་ཀྱང་། གཙུག་ཏོར་རྟག་ཏུ་སྦྱིན་པར་བྱ། །རྟག་ཏུ་སྦྱིན་སྲེག་བྱེད་དུ་གཞུག །རྟག་ཏུ་དཀྱིལ་འཁོར་བྲི་བར་བྱ། །རྟག་ཏུ་སངས་རྒྱས་རབ་གནས་བྱ། །ཟིན་པའི་དེ་མ་ཐག་པ་རུ། །རབ་ཏུ་གནས་པ་མཆོག་ཏུ་འགྱུར། །འཁོར་ལོས་
སྒྱུར་བའི་རྒྱལ་པོ་ཡི། །དབང་ཕྱུག་ཐོབ་པར་ཐེ་ཚོམ་མེད། །དེ་ལ་གཟའ་དང་རྒྱུ་སྐར་མེད། །བགེགས་དང་ལོག་པར་འདྲེན་པའང་མེད། །ཅུང་ཟད་ཡིད་ལ་གང་འདོད་པ། །སྐྱེ་ནས་སྐྱེ་བར་འགྲུབ་པར་འགྱུར། །ཞེས་པ་ནི་དུས་ཀྱི་ངེས་པའོ། །དེ་ནས་སློབ་དཔོན་ཁྲུས་བྱས་ཏེ་ལྷ་

མཆོད་པ་དང་གཏོར་མ་བྱས་ལ་གོས་གཙང་མ་རྒྱན་ལེགས་པར་བགོས་པའི་བདག་ཉིད་ཀྱིས་ཕྱི་དྲོའི་དུས་སུ་ས་དང་ལྕི་བས་དཀྱིལ་འཁོར་ཉེ་བར་བྱུགས་ལ། པུས་མོ་གཡས་པ་ས་ལ་བཙུགས་ཏེ་ཐལ་མོ་སྦྱར་ལ། ཕྱོགས་བཅུ་ན་གནས་པའི་སངས་རྒྱས་དང་བྱང་ཆུབ་
སེམས་དཔའ་དང་འཇིག་རྟེན་སྐྱོང་བ་རྣམས་ལས་ས་བསླང་བར་བྱ་སྟེ། ཁམས་འདི་ན་ནི་མགོན་གང་དག །ཆེན་པོས་མཆོད་པ་བཞུགས་རྣམས་དང་། །ལྷ་དང་ཀླུ་དང་གནོད་སྦྱིན་དང་། །དྲི་ཟ་དང་ནི་ལྷ་མིན་སོགས། །སེམས་ཅན་ཀུན་དོན་བསྒྲུབ་བྱའི་ཕྱིར། །དེ་དང་དེ་ལ་གསོལ་
བར་བགྱི། །གལ་ཏེ་ཁྱེད་ཀྱིས་གནང་བ་ན། །བགྱི་སྟེ་གཞན་དུ་མ་ཡིན་ནོ། །རྨི་ལམ་ལ་སོགས་མཚན་མ་ཡིས། །ས་བཟང་འདི་ནི་བདག་ལ་གསོལ། །ཞེས་ལན་གསུམ་བརྗོད་པར་བྱའོ། །དེའི་རྗེས་སུ་འཇིག་རྟེན་དབང་ཕྱུག་གི་མདུན་དུ་མཆོད་པ་བྱས་ལ། ཨོཾ་མུ་ཙི་ལི་སྭཱ་ཧཱ། ཨོཾ་མོ་ཧ་
ནི་སྭཱ་ཧཱ། ཨོཾ་ད་ཏ་ལི་སྭཱ་ཧཱ། ཞེས་བྱ་བའི་རྨི་ལམ་བརྟག་པ་འདིས་ལག་པ་གཡོན་པས་ཁ་ལ་ལན་ཉི་ཤུ་རྩ་གཅིག་བསྔགས་ལ་མགོ་ལྷོར་བསྟན་ཞིང་ཤར་དུ་ཁ་བལྟས་ལ་གཙང་སྦྲས་ཉལ་ལོ། །རྨི་ལམ་ངན་ན་ལས་ཐམས་ཅད་པ་བཟླས་པ་དང་། སྟོང་པ་ཉིད་ཀྱི་ཏིང་ངེ་འཛིན་གྱིས་བགེགས་
བཟློག་ནས་ལྷས་གནང་བའམ་མ་བཀག་པའི་ས་ལ་ཆོ་ག་བྱ་སྟེ། འོན་ཀྱང་སྲིད་ན་གྲོང་རྡལ་དང་། གྲོང་ཁྱེར་དང་། སྐྱེད་མོས་ཚལ་དང་། གཙུག་ལག་ཁང་ལ་སོགས་པའི་དབང་ལྡན་ཁོ་ནར་དང་། མེད་ན་གང་དུ་ཡི་རང་བར་རོ། །ལྷ་ཁང་མཆོད་རྟེན་ཁང་བཟངས་ཁང་བརྩེགས་དང་། །
རབ་གནས་དཀྱིལ་འཁོར་ལ་སོགས་བྱེད་འདོད་པས། །འདིར་ནི་ས་ཡི་ལྟོ་འཕྱེ་བརྟག་བྱ་སྟེ། །ས་གཞི་གང་ཡིན་དེ་ནི་གྲུ་བཞིར་བྱ། །ཟླ་བ་གསུམ་གྱི་ཉིན་མོའི་གྲངས་ཀྱིས་འདིར། །ཕྱོགས་ནི་སོ་སོར་ས་དེ་རྣམ་པར་དབྱེ། །དབང་ལྡན་ནས་ནི་མེ་ཡི་མཚམས་ཀྱི་བར། །ཤར་གྱི་
ས་དེ་དགུ་བཅུར་རྣམ་པར་དབྱེ། །མེ་ནས་བདེན་བྲལ་མཚམས་ཀྱི་བར་དང་ནི། །བདེན་བྲལ་ནས་ནི་རླུང་གི་མཚམས་བར་དང་། །རླུང་ནས་འབྱུང་པོའི་བདག་པོའི་མཚམས་ཀྱི་བར། །དེ་བཞིན་ཁོ་ནར་དགུ་བཅུར་རྣམ་དབྱེ་བྱ། །སྟོན་ཟླ་ར་བ་འབྲིང་དང་ཐ་མའི་བར། །དབང་ལྡན་

མཚམས་ལ་སོགས་པར་མགོ་བོ་གནས། །བདེན་བྲལ་མཚམས་ལ་སོགས་པར་མཇུག་མའི་ཆ། །གསང་བའི་གནས་ནི་ས་ཡི་དབུས་སུ་གཞག །ལྟེ་བའི་འོག་གི་ཆ་ནི་ལྟོ་འཕྱེའི་ལུས། །སྟེང་ཆ་གདེངས་ཀ་དང་ལྡན་མི་ཡི་གཟུགས། །ལྷོར་བལྟ་ལག་པ་གཡོན་པ་རྣ་བར་གཞག །གཡས་
པ་རིན་ཆེན་ཐོགས་པས་དཀུར་བཀབ་ནས། །ས་ཡི་ཆ་དགུ་ཁྱབ་པར་ཉལ་ནས་གནས། །ཀླུ་ཡི་རྒྱལ་པོ་ལུས་ཚད་མཐོ་བཅུའོ། །ཤར་དང་ནུབ་ཀྱི་མཐའ་མར་གནས་ན་ཡང་། །ས་ཡི་དུམ་བུ་དེ་ནི་འཇལ་བ་ལྟར། །ཉི་མའི་བགྲོད་པས་ཚེས་གཅིག་ལ་སོགས་པར། །ཉིན་ཞག་རེ་རེ་ཞིང་ནི་ཆ་རེ་
རེར། །ཇི་ལྟར་རིགས་པས་ཤར་གྱི་ཆ་རུ་རྒྱུ། །ལྷོ་དང་ནུབ་དང་བྱང་དུའང་དེ་བཞིན་ནོ། །དགུན་ཟླ་ར་བ་འབྲིང་དང་ཐ་མ་ཡི། །དཀར་ཕྱོགས་ལ་སོགས་ནུབ་ཏུ་ཁ་མིག་བལྟ། །མེ་ཡི་མཚམས་སུ་ཡན་ལག་མཆོག་བསྟན་ཏེ། །རླུང་གི་མཚམས་ལ་སོགས་པར་མཇུག་མ་གནས། །དཔྱིད་
ཟླ་ར་བ་འབྲིང་དང་ཐ་མ་དེའི། །གནོད་སྦྱིན་བདག་ཕྱོགས་ཁ་དང་མིག་གིས་བལྟ། །བདེན་བྲལ་མཚམས་ལ་སོགས་པར་མགོ་བོ་གནས། །དབང་ལྡན་མཚམས་ལ་སོགས་པར་མཇུག་མའི་ཆ། །དབྱར་ཟླ་ར་བ་འབྲིང་དང་ཐ་མ་རུ། །ཤར་ཕྱོགས་སུ་ནི་ཁ་དང་མིག་གིས་བལྟ། །རླུང་གི་
མཚམས་ལ་སོགས་པར་མགོ་བོ་གནས། །མེ་ཡི་མཚམས་ལ་སོགས་པར་མཇུག་མའི་ཆ། །ལོ་གཅིག་ན་ནི་ས་གཞི་མཐའ་དག་ཏུ། །འཁོར་གཅིག་གིས་ནི་འབད་པས་ཀུན་དུ་ཁྱབ། །ལྟོ་འཕྱེའི་རྒྱལ་པོའི་རྒྱུ་བའི་དབྱེ་བ་ནི། །ཟླ་བ་རེ་རེའི་བྱེ་བྲག་ཤེས་ནས་སུ། །མཐའ་ཡས་
བདག་ཉིད་དཀར་པོ་མཛེས་པའི་སྐུ། །མཇུག་མ་ལ་སོགས་རིམ་གྱིས་བསམས་ནས་སུ། །དེ་ཡི་ལུས་ལ་ཀླུ་ཡི་བདག་པོ་བརྒྱད། །འོ་མ་ལ་སོགས་ཉེ་བར་སྤྱོད་མས་མཆོད། །མཇུག་མའི་རྩེ་མོར་རིགས་ལྡན་ཤིན་ཏུ་སྔོ། །གསང་གནས་དཱུར་བ་ལྟར་ལྗང་སྟོབས་ཀྱི་རྒྱུ། །ལྟེ་
བར་དུང་སྐྱོང་པདྨའི་རྩ་བ་བཞིན། །དཔུང་པར་པདྨ་ཆེན་པོ་གསེར་དང་མཚུངས། །ནོར་རྒྱས་སྙིང་གར་གནས་པ་ལྗང་གུ་སྟེ། །འཇོག་པོ་ཞེས་བྱ་དམར་པོ་མགྲིན་པར་གནས། །རྣ་བར་པདྨ་དཀར་པོ་འོད་ཟེར་ཅན། །སྤྱི་བོ་རུ་ནི་མཐའ་ཡས་སྔོན་པོ་གནས། །མི་ནི་

བགེགས་མཐར་བྱེད་ཀྱི་རྣམ་པར་བསྒོམ། །དཔའ་བོའི་ལག་པ་ཏོག་ཙེ་རྡོ་རྗེས་མཚན། །ལག་པ་གཡོན་པ་འོག་ཏུ་བྱས་ནས་བཟུང་། །དེ་ཡིས་བདུད་ཀྱི་ཚོགས་ནི་སྐྲག་ཅིང་བཟློག །ཤར་དང་བྱང་གི་ཕྱོགས་སུ་ཁ་བལྟས་པས། །ཏོག་ཙེ་ཁམ་བཞི་བརྒྱབ་
པས་བླངས་པའི་ས། །ཞི་བའི་སེམས་ཀྱིས་གཏོར་མའི་ནང་དུ་ནི། །གཞག་པའམ་མེ་མཚམས་ལ་སོགས་ཕྱི་རོལ་དོར། །འབད་པས་དེ་ཡི་ཁམ་ལྔ་པ་ཡི་ས། །ས་གཞིའི་དབུས་སུ་ལེགས་པའི་ཡིད་ཀྱིས་དགྲམ། །ཁམ་ལྔ་པ་དེར་ལས་མིན་དུ་མ་ཡིན། །ཕྱོགས་དང་མཚམས་སུ་ཀུན་
ནས་བརྐོ་བར་བྱ། །ཤར་ནས་ཆ་ནི་ཉི་ཤུ་རྩ་གཅིག་དོར། །བྱང་ནས་ཕྱེད་དང་བཅུ་བཞིའི་ཆ་དོར་བས། །ཤར་ནུབ་ཆ་དགུ་ལྷོ་བྱང་ཕྱེད་དང་ལྔ། །འདི་ནི་མཆན་གྱི་མདུན་དུ་ཐོག་མར་བརྐོ། །དེ་ཡིས་ཆོས་ནོར་འདོད་དོན་འཕེལ་ཞིང་འགྲུབ། །གལ་ཏེ་ལྟོ་འཕྱེའི་རྒྱལ་པོ་གནས་པ་ཡི། །
ཆ་དགུའི་ས་ཡི་ཆ་ལ་བརྐོས་ན་ནི། །ཕ་མ་བུ་དང་བུ་མོ་སྤུན་ཆུང་མ། །མནའ་མ་རང་གི་སྐྱེ་བོ་མཛའ་བཤེས་འཆི། །གལ་ཏེ་རྒྱབ་ཏུ་བརྐོས་ན་རང་འཆི་ཞིང་། །ཡང་ན་རང་གནས་ནས་འཕོ་ནོར་བརླག་འགྱུར། །མཇུག་མར་གླང་ཆེན་རྟ་དང་མེ་ཧ་ར། །བ་ལང་འཆི་ཞིང་སྟོབས་ཀྱང་ཉམས་པར་
འགྱུར། །གལ་ཏེ་ཁམ་ལྔའི་ནང་དུ་ཤིང་དང་སྐྲ། །གྲོག་མཁར་སྐྲ་སེན་ཐལ་བས་གནོད་པ་འབྱུང་། །རྡོ་བས་རླུང་གིས་འཇིག་པ་ཕུབ་མ་དང་། །མགལ་དུམ་གྱིས་རིམས་རུས་པས་ཟུག་ཟེར་རོ། །དེའི་དོན་དུ་ཐིག་འདེབས་པ་ན་མཚན་མ་ཤེས་པར་བྱ་སྟེ། ཐིག་སྐུད་ཆད་ན་
སློབ་དཔོན་འཆིའོ། །ཁྱི་དང་། ཅེ་སྤྱང་དང་། བྱ་རྒོད་དང་བྱ་ཀཱ་ཀ་སྒྲ་སྒྲོགས་ན་ཡོན་བདག་གོ། །བྱི་ལས་ཐིག་སྐུད་ལ་འགོམ་ན་དེའི་འམ་བོང་བུའི་རུས་པ་ཡོད་དོ། །བོང་བུས་འགོམ་ན་དེ་ཉིད་ཀྱིའོ། །ཁྱིས་དེ་ཉིད་ཀྱིའོ། །ར་ལུག་གིས་ནི་དེ་དག་གིའོ། །རྟ་ཡིས་ནི་དེའི་རུས་པའོ། །
གླང་པོ་ཆེས་ནི་དེའི་འམ་རྔ་མོའིའོ། །མ་ཧེ་འམ་ཤ་བས་ནི་ཅེ་སྤྱང་གིའོ། །དོམ་གྱིས་ནི་དེའི་རུས་པའོ། །ཕག་གིས་ནི་སྟག་གིའོ། །སྟག་གིས་ནི་གླང་པོ་ཆེའིའོ། །བྱི་བས་ནི་དེའིའོ། །སྦྲུལ་གྱིས་ནི་དེའིའོ། །རུས་སྦལ་གྱིས་ནི་དེའི་རུས་པའོ། །གལ་ཏེ་སློབ་དཔོན་དང་། བཟོ་

བོ་དང་། ཡོན་བདག་དང་། དེའི་ལས་མིའི་ནང་ནས་གང་རུང་མགོ་བོ་ལ་འཕྲུག་ན་མི་གང་གི་འོག་ནས་སེལ་ཡོད་དོ། །སྨིན་མ་ལ་རེག་ན་གསེར་རམ་དོལ་གོང་ཁྲུ་གསུམ་གྱི་འོག་ནའོ། །མིག་ལ་རེག་ན་དེ་ཙམ་གྱི་འོག་ན་མུ་ཏིག་གོ། །ཁ་ལ་རེག་ན་སྐྲའམ་དོལ་གོང་སུམ་མདོའི་འོག་ཙམ་ནའོ། །
སོ་ལ་རེག་ན་ཁྲུ་གསུམ་གྱི་འོག་ན་སོའོ། །རྣ་བ་ལ་འཕྲུག་ན་དེ་མན་ཆད་ཀྱི་འོག་ན་གསེར་རམ་དངུལ་ལམ་བྱི་རུའོ། །རྐེ་ལ་རེག་ན་དེ་ཙམ་གྱི་འོག་ན་མགུལ་རྒྱན་ནམ་ལྕགས་སྒྲོག་གམ་དོལ་གོང་ངམ་སོལ་བ་ཁྲུ་གསུམ་གྱི་འོག་ནའོ། །ཕྲག་པ་ལ་རེག་ན་དེ་ཙམ་གྱི་འོག་ན་དེའི་རྒྱན་ནོ། །མཆན་
ཁུང་ལ་རེག་ན་དེ་ཙམ་གྱི་འོག་ན་ལྕགས་སོ། །ལག་པ་གཡས་པ་ལ་རེག་ན་དཀུའི་འོག་ན་རྒྱབ་ཀྱི་ཐོད་པའམ་ས་ལས་བྱས་པའོ། །ལག་པ་གཡོན་པ་ལ་རེག་ན་པུས་མོའི་འོག་ན་ཤིང་ཁྲིའི་རྐང་པའོ། །བྲང་ལ་རེག་ན་དཀུ་ཙམ་གྱི་འོག་ན་ཕྱུགས་ཀྱི་རུས་པའོ། །རྒྱབ་ལ་རེག་ན་དེ་ཙམ་
གྱི་འོག་ན་དེའི་རུས་པའོ། །དཀུ་ལ་རེག་ན་ཁྲུ་གཉིས་ཀྱི་འོག་ན་ལྕགས་ཀྱི་ཕུར་བུའོ། །རྟགས་ལ་རེག་ན་ཁྲུ་གང་གི་འོག་ན་ལྕགས་གསུམ་གྱི་སེལ་ལོ། །བྱིན་པ་ལ་རེག་ན་མཐོ་གང་གི་འོག་ན་བྱིན་པའི་རུས་པའོ། །ལོང་བུ་ལ་རེག་ན་སོར་མོ་བཅོ་བརྒྱད་ཀྱི་འོག་ན་རྟའི་རྨིག་པའོ། །
རྐང་པ་ལ་རེག་ན་མཐོ་གང་ཙམ་གྱི་འོག་ན་ཤིང་སཱ་ལ་མ་ལའི་ཚེར་མའོ། །རྐང་པའི་མཐེ་ཆུང་ལ་རེག་ན་སོར་བརྒྱད་ན་འཁར་བའོ། །གང་ཡང་རུང་བས་གང་གི་མིང་སྨོས་པ་དེའི་དེར་རུས་པའོ། །གང་དུ་བས་ལྕི་བ་འདོར་བ་དེར་གསེར་རོ། །གཞོན་ནུ་བཤང་བ་བཏོང་ན་དངུལ་ལོ། །
སྦལ་པ་སྒྲ་སྒྲོགས་ན་ཆུའི་འཇིགས་པའོ། །ངང་པ་དང་། ཁུ་བྱུག་དང་། རྨ་བྱ་དང་། ངུར་བ་དང་། གླང་སྒྲ་སྒྲོགས་ན་དགེ་བའོ། །འབྲུག་སྒྲ་སྒྲོགས་ན་ནོར་འོང་ངོ་། །དུང་དང་བཀྲ་ཤིས་ཀྱི་གླུ་དང་། བྱིས་པ་སྒྲ་སྒྲོགས་ན་ནོར་འཐོབ་པོ། །གདུགས་དང་། རྒྱལ་མཚན་
དང་། བ་དན་དང་། ཤ་གསར་པ་དང་། ཞོ་དང་། འབར་བ་དང་། ཉ་ཟུང་ལ་སོགས་པ་མཐོང་ན་ལེགས་པའོ་ཞེས་པ་ས་བརྐོ་བའི་ཆོ་གའོ། །དེ་ནས་རྡོ་བ་ལ་སོགས་པ་བསལ་ནས་ས་དེ་ཉིད་ཀྱིས་སམ་དེས་མི་ལྡང་ན་གཞན་གྱི་ས་ལ་ཡང་དྲི་བཟངས་ཀྱི་ཆུས་བཏབ་སྟེ་དོང་དགང་

བར་བྱའོ། །དེ་ལ། བྱང་ཤར་འབབ་པས་དངོས་གྲུབ་ནི། །སྔགས་པ་རྣམས་ལ་རྟག་ཏུ་འབྱུང་། །དཀྱིལ་མཐོ་བས་ནི་རྒྱལ་སྲིད་འབྱུང་། །རིག་པ་འཛིན་པའི་གོ་འཕང་ཡང་། །བྱང་མཐོ་བས་ནི་འཆི་བར་འགྱུར། །ཡང་ན་ནོར་ནི་བརླག་པར་འགྱུར། །ཇི་ལྟར་
བཤད་པའི་དམའ་བ་ནི། །མཐོ་ན་མྱུར་དུ་རིགས་ཟད་འགྱུར། །གལ་ཏེ་ས་ཡི་དབུས་དམའ་ན། །སྒྲུབ་པ་པོ་ལ་གནོད་པ་འབྱུང་། །དཀྱིལ་འཁོར་ཡང་། །ཁྲུ་གང་ནས་ནི་བརྩམས་ནས་སུ། །ཇི་སྲིད་ཁྲུ་ནི་སྟོང་གི་བར། །ཞེས་གསུངས་པས་བུམ་པའི་ཕྲེང་བས་བསྐོར་བའི་ཆེད་དུ་ཇི་སྲིད་
འདོད་པའི་ཚད་ཀྱིས་གྲུ་བཞིར་བྱས་ལ་དེའི་སྟེང་དུ་མཎྜལ་ཟླུམ་པོ་དཔངས་ལ་ཁྲུ་ཕྱེད་པ་དབུས་ཅུང་ཟད་མཐོ་བ་གཡས་སྐོར་དུ་འབབ་པ་དཀར་བ་དབང་ལྡན་གྱི་ཕྱོགས་དམའ་བར་བྱས་ལ་ཧཱུཾ་ཞེས་པ་དང་། དུམ་སྐྱེས་མ་བཟླས་པའི་དྲིའི་ཆུས་བཏབ་ལ་བཏུང་བར་བྱའོ། །དཀྱིལ་འཁོར་ཁང་པའི་
རྩ་བའི་སྒོ་ཡང་དབང་ལྡན་ཁོ་ནར་བྱའོ། །ཁང་བཟངས་རྡོ་སྟེང་བ་ལང་ལྷས། །དྲང་སྲོང་གནས་སོགས་ཆུ་བོའི་འགྲམ། །སྔོན་དུ་འདུས་བྱས་གནས་དག་ཏུའང་། །མ་བརྐོས་ན་ཡང་དག་པ་ཡིན། །ས་སེལ་ཉེས་པ་ཐམས་ཅད་ནི། །གལ་ཏེ་དབྱུང་བར་མ་ནུས་ན། །ལག་པས་རེག་ནས་
སྔགས་བཟླས་ཏེ། །དེ་ཉིད་དག་པ་ཆེན་པོ་ཡིན། །ཞེས་པ་དུམ་སྐྱེས་མའི་སྔགས་ཀྱིས་བགེགས་བསྐྲད་ནས་དེས་བསྔགས་པའི་ཡུངས་ཀར་དང་ཆུ་དང་ཐལ་བས་གཏོར་རོ། །བའི་རྣམ་པ་ལྔས་བྱུགས་ལ་དྲི་བཟངས་ཀྱི་ཆུས་གཏོར་ཏེ། ཨོཾ་བྷུ་ཁཾ་ཞེས་པ་འདིས་ནམ་མཁར་བྱའོ། །ཧཱུཾ་ལཾ་ཧཱུཾ་
ཞེས་པ་འདིས་རྡོ་རྗེའི་རང་བཞིན་དུ་བྱའོ། །ལས་ཐམས་ཅད་པ་བཟླས་པའི་རིན་པོ་ཆེ་དང་སྨན་དང་། འབྲུ་ལྔ་དཀྱིལ་འཁོར་གྱི་དབུས་ཀྱི་ནང་དུ་བཅུག་ལ་དྲི་བཟངས་ཀྱི་ཆུས་བྱུགས་ཏེ། ནམ་མཁའ་ལ་གནས་པའི་སའི་ལྷ་མོ་ནང་དུ་བསྟིམས་ལ་འགྲོ་བ་སྟོང་པ་ཉིད་དང་རོ་གཅིག་པར་ལྷག་
པར་མོས་ནས་ཡི་གེ་གསུམ་གྱི་བྱིན་གྱིས་བརླབ་ཅིང་དྲིལ་བུ་དཀྲོལ་ཞིང་ཡི་གེ་བརྒྱ་པ་གདོན་ནོ། །དེ་གསུངས་པ། དེ་ལ་ཆུ་དང་ལྕི་བ་ཡིས། །དཀྱིལ་འཁོར་ས་ནི་ཉེ་བར་བྱུགས། །དུར་ཁྲོད་ཐལ་བ་དང་ལྡན་པ། །བདུད་རྩི་ལྔ་དང་བཅས་པ་ཡིས། །དེ་ནས་ས་ནི་ཉེར་བྱུགས་

ནས། །དེ་ལ་དཀྱིལ་འཁོར་ཡང་དག་བྲི། །ཞེས་པ་འདི་ནི་ས་སྦྱོང་བའོ། །བདེ་མཆོག་མཉེས་པར་ནུས་པ་དང་། །སྡོམ་པ་ལས་གསུངས་བྱ་བར་ལྡན། །ཕག་མོ་ལ་གུས་མཉེས་གཤིས་པ། །གཙང་ཞིང་བརྩོན་ལྡན་བསོད་ནམས་འདོད། །དཀྱིལ་འཁོར་བྲི་བའི་ཕ་རོལ་སོན། །
ཆོག་ཤེས་སློབ་མར་འོས་པ་རྣམས། །བཏུས་ཏེ་སྒོ་ཡི་སློབ་དཔོན་བྱ། །ཞེས་གསུངས་པས་དཀྱིལ་འཁོར་གྱི་དབུས་སུ་འདུག་སྟེ་རྡོ་རྗེ་དང་དྲིལ་བུ་བཟུང་སྟེ། དཀྱིལ་འཁོར་གྱི་འཁོར་ལོའི་རྣལ་འབྱོར་དང་ལྡན་པས་སྲུང་བའི་འཁོར་ལོ་ལ་སོགས་པས་བགེགས་བསྐྲད་ནས་སྤོས་ཕོར་
ཐོགས་ཏེ་ཧཱུྃ་ལས་སྐྱེས་པའི་རྡོ་རྗེའི་ལྗགས་ཀྱིས། མ་ལུས་ཕྱོགས་ན་བཞུགས་པ་ཡི། །སངས་རྒྱས་བདག་ལ་དགོངས་སུ་གསོལ། །བདག་ནི་ཆེ་གེ་རྡོ་རྗེ་འཛིན། །འདིར་ནི་དཀྱིལ་འཁོར་བྲི་བར་བྱ། །སངས་རྒྱས་ལ་སོགས་ཀུན་བྱོན་འཚལ། །དངོས་གྲུབ་འདིར་ནི་ཡང་དག་སྩོལ། །
ཞེས་པས་སངས་རྒྱས་ལ་སོགས་པ་ལ་སྙན་གསན་ཕབ་ནས་ནམ་མཁའ་ལ་གནས་པའི་མཁའ་འགྲོ་མ་ལ་སོགས་པའི་ཕྱོགས་སུ་གནས་པ་རྡོ་རྗེ་དང་དྲིལ་བུ་ཐོགས་པ་མཁའ་འགྲོ་མ་ལ་སོགས་པའི་རྣལ་འབྱོར་ཅན་སློབ་མ་བཞི་ཡིས་སམ་གཅིག་གིས་ཀྱང་དེ་དང་དེར་རིམ་གྱིས་སོང་སྟེ་བླ་མའི་
མཎྜལ་སྔོན་དུ་འགྲོ་བས། དེ་བཞིན་གཤེགས་པ་ཀུན་ཞི་བ། །དེ་བཞིན་གཤེགས་པ་ཀུན་གྱི་གནས། །ཆོས་ཀུན་མཆོག་ནི་བདག་མེད་པ། །དཀྱིལ་འཁོར་མཆོག་ནི་བསྟན་དུ་གསོལ། །མཚན་ཉིད་ཐམས་ཅད་ཡང་དག་རྫོགས། །མཚན་མིན་ཐམས་ཅད་རྣམ་པར་
སྤངས། །ཀུན་དུ་བཟང་པོ་སྐུ་ཡི་མཆོག །དཀྱིལ་འཁོར་མཆོག་ནི་བཤད་དུ་གསོལ། །ཞི་བའི་སྤྱོད་མཆོག་ལས་བྱུང་བ། །ཡེ་ཤེས་སྤྱོད་པ་རྣམ་སྤྱོད་མཛད། །ཀུན་དུ་བཟང་པོ་གསུང་གི་མཆོག །དཀྱིལ་འཁོར་མཆོག་ནི་བཤད་དུ་གསོལ། །སེམས་ཅན་ཀུན་གྱི་
སེམས་ཆེན་པོ། །དག་པ་རང་བཞིན་དྲི་མ་མེད། །ཀུན་དུ་བཟང་པོ་ཐུགས་ཀྱི་མཆོག །དཀྱིལ་འཁོར་ཁ་ལོས་སྒྱུར་བཤད་གསོལ། །གསོལ་འདེབས་པ་མེད་ན་བསམ་གཏན་གྱིས་ཀྱང་བྱའོ། །དེ་ནས་སྤྲོ་བ་ལ་སོགས་པ་བྱས་ནས་བསྒོམས་པའི་དཀྱིལ་འཁོར་

རྡོ་རྗེ་ཁུ་ཚུར་གཉིས་ཀྱིས་མཛུབ་མོ་གཉིས་བརྐྱང་ལ་རྩེ་མོ་སྦྱར་བ་ཁ་འོག་ཏུ་བསྟན་ནས་སྤྱི་བོར་བཟུང་ཞིང་ཧཱུཾ་བཛྲོཏ་ཏིཥྛ་ཞེས་པས་ནམ་མཁའ་ལ་བཏེག་ལ་སྐྱིལ་ཀྲུང་བཤིགས་ནས་ལངས་ཏེ་ཁ་ལྷོར་ཕྱོགས་པས་རྐང་པ་མཉམ་པར་གནས་པས་སྤྱི་བོར་ཐལ་མོ་སྦྱར་བས་
དེ་བཞིན་གཤེགས་པ་རྣམས་ལ་ཕྱག་བྱས་ནས་སེམས་ཅན་མ་རིག་པས་ལོང་ཞིང་བདུད་ཀྱིས་བྱིན་གྱིས་བརླབས་པ་རྣམས་མཐོང་ནས་བདུད་བསྐྲད་པར་བྱ་སྟེ། དེ་གསུངས་པ། དཔལ་ཧེ་རུ་ཀ་དཔལ་རྣལ་འབྱོར་ཆེ། །བསྒོམས་ནས་བདུད་ནི་བརླག་པར་བྱ། །རབ་ཏུ་གདུག་པའི་
ཚོགས་ནི་བསྐྲད། །བགེགས་ཀྱི་དཀྱིལ་འཁོར་གཞན་ཡང་ངོ་། །འབར་བའི་ཧཱུྃ་ལས་བྱུང་བ་ཡི། །རྡོ་རྗེ་རྐང་པའི་འོག་ཏུ་དགོད། །མིག་གཡས་གཡོན་དུ་མ་ཊ་ལས། །སྐྱེས་པའི་ཉི་མ་ཟླ་བ་བསམ། །གཡོན་པས་རྡོ་རྗེ་དྲིལ་བུ་བླང་། །གཡས་པ་རྡོ་རྗེ་ཡང་དག་ལྡན། །སེམས་
ཅན་དོན་བརྩོན་ཁྲོས་པ་ཡིས། །བློ་དང་ལྡན་པས་ཕྱོགས་ཀུན་བལྟ། །དེ་རུ་གནས་པའི་གདུག་པ་གང་། །བདུད་དང་བགེགས་དང་ལོག་འདྲེན་རྣམས། །དེ་རྣམས་བསྐྲད་པར་བྱ་ཆེད་དུ། །ཚིག་ནི་འདི་དག་ཉེ་བར་བརྗོད། །གནས་ཀྱི་བདག་པོ་གང་རུང་རྣམས། །ཀླུ་དང་གནོད་
སྦྱིན་དྲི་ཟ་སོགས། །འབྱུང་པོ་འབྱུང་མོ་མཁའ་འགྲོ་མ། །སེམས་ཅན་དོན་དུ་བྱ་རྩོམ་པས། །ཤིན་ཏུ་མྱུར་བར་སོང་ཅིག་ཀྱེ། །ཁྱེད་རྣམས་ཀུན་ནས་ཕྱིར་དེངས་ཤིག །དཔལ་ཧེ་རུ་ཀའི་བཀའ་ཐོས་ནས། །མྱུར་བ་ཉིད་དུ་ཕྱིར་ཁྱེར་ཅིག །གང་ཞིག་འགྲོ་བར་མི་བྱེད་པ། །དེའི་མགོ་
བོ་བདག་གི་འབར་བའི་རྡོ་རྗེ་ཡིས། ཁ་ཊྭཱཾ་ག་འདིས་ཚལ་པ་བརྒྱར་དགས་པར་བྱའོ། །ཨོཾ་སུམྦྷ་ནི་སུམྦྷ་ཧཱུཾ་ཧཱུཾ་ཕཊ། ཨོཾ་གྲྀཧྞ་གྲྀཧྞ་ཧཱུཾ་ཧཱུཾ་ཕཊ། ཨོཾ་གྲྀཧྞཱ་པ་ཡ་གྲྀཧྞཱ་པ་ཡ་ཧཱུཾ་ཧཱུཾ་ཕཊ། ཨོཾ་ཨཱ་ན་ཡ་ཧོ་བྷ་ག་ཝཱན་བཛྲ་ཧཱུཾ་ཧཱུཾ་ཕཊ། མེ་ཡི་མཚམས་ནས་བརྩམས་ནས་སུ། །གཡོན་དུ་བསྐོར་བས་
བརྩོན་པ་ཡིས། །དཔའ་བོ་ཆེན་པོ་ཁྲོ་བོས་བསྐོར། །བསྐལ་པའི་མེ་ནི་ལངས་པ་ལྟར། །ཞེས་གསུངས་པས་པད་ཀོར་བྱ་ཞིང་རྡོ་རྗེ་བསོར་བ་དང་དྲིལ་བུ་དཀྲོལ་བས་རྡོ་རྗེའི་འགྲོས་ཀྱིས་མེ་མཚམས་སུ་སོང་ལ་དེ་ནས་བརྩམས་ཏེ། གཡོན་སྐོར་དུ་སློབ་མ་དང་བཅས་པས་དཀྱིལ་འཁོར་

དུ་རྡོ་རྗེའི་འགྲོས་ཀྱིས་གར་བྱའོ། །སྒོ་རེ་རེར་བདག་གི་གཡོན་དུ་གནས་པའི་སློབ་མའི་དྲིལ་བུའི་ནང་དུ་རྡོ་རྗེ་གཞུག་ཅིང་དེའི་རྡོ་རྗེ་ཡང་རང་གི་དྲིལ་བུའི་ནང་དུའོ། །དེ་ལྟར་མདུན་དང་རྒྱབ་ཏུའོ། །འདི་ནི་དེ་བཞིན་གཤེགས་པའི་རྒྱ། །འདི་ཡང་ཐབས་ནི་ཡང་དག་འབྱུང་། །དེ་དག་རབ་ཏུ་སྦྱར་བ་ཡིས། །
དངོས་གྲུབ་ཐམས་ཅད་ཡང་དག་འབྱུང་། །ཨོཾ་ཨཱཿཁ་བཛྲ་དྷྲྀ་ཀ་བཛྲ་ཧཱུཾ་ཀ་རེ་ཎ་ཧཱུཾ་ཞེས་བརྗོད་ཅིང་མིག་གིས་དབང་གི་ལྟ་སྟངས་བཞིན་ཤར་ཕྱོགས་སུ་དུས་མཉམ་པོར་གཡས་བརྐྱང་གིས་གནས་པ་དང་། སློབ་མས་ཀྱང་གཡས་བརྐྱང་གིས་གནས་པས་བརྗོད་པ་དང་བཅས་པའོ། །མྱ་ངན་ཁྲོ་བ་སྙིང་
སྟོབས་དང་། །དེ་བཞིན་དྲག་པོའི་བྱ་བ་གཉིས། །རང་བཞིན་གྱི་ནི་རོ་འདི་དག །དང་པོའི་ཞལ་ལ་གནས་པའོ། །མི་སྡུག་པ་དང་ངོ་མཚར་གཉིས། །འཇིགས་པ་དང་ནི་སྤྲོ་བ་དག །རང་བཞིན་གྱིས་གནས་རོ་འདིར་བཅས། །གཡོན་པའི་ཞལ་ནས་གནས་པའི་གསུང་། །དགོད་པ་དང་ནི་
དགའ་བ་དང་། །ལེ་ལོ་སྙོམ་དང་སྒེག་པ་དང་། །རང་བཞིན་གྱིས་གནས་རོ་འདི་དག །ནུབ་ཀྱི་ཞལ་ལ་ཡང་དག་གནས། །སྨོན་པ་དང་ནི་རྨད་བྱུང་གཉིས། །དེ་བཞིན་དཔའ་བོའི་དར་དཔྱངས་དང་། །དཔའ་བ་དང་ནི་འཇིགས་སུ་རུང་། །ལྷོ་ཡི་ཞལ་ལ་གནས་པའོ། །པདྨ་རྡོ་རྗེའི་བར་དུ་ནི། །
གང་ཞིག་སེམས་ནི་ཡང་དག་གནས། །ཞི་བ་དེ་ཉིད་ཡང་དག་དག །ལྷན་ཅིག་སྐྱེས་པའི་དགའ་བའི་གར། །དེ་ཉིད་ཤེས་ལ་གར་དང་འདིར། །གར་གྱི་ཡོད་ཆོས་ཐེ་ཚོམ་མེད། །འཇིག་རྟེན་པ་རྣམས་དགའ་བའི་ཕྱིར། །འཇིག་རྟེན་ཆོས་ཞེན་གར་བྱེད་དོ། །མགུལ་རྒྱན་ལ་སོགས་པའི་
སྟངས་བསྟན་པར་བྱ་སྟེ། མགུལ་རྒྱན་སྟངས་ནི་གཡོན་དུ་སྟེ། །གཡས་སུ་དེ་བཞིན་གདུ་བུའི་སྟངས། །རྣ་རྒྱན་རྣ་བར་རྣམ་པར་དགོད། །གཙུག་གི་ནོར་བུ་དེ་ཕྱོགས་སུ། །ཐལ་བའི་སྟངས་ནི་གཡས་སུའོ། །ཞེས་པ་ལ་སོགས་པའོ། །གང་ནི་ཟུར་མིག་ཅུང་བལྟ་ཞིང་། །ཧེ་རུ་ཀ་ཞལ་
འོ་བྱེད་པ། །ཕག་མོ་ཡང་ནི་གར་བྱེད་དེ། །ཀུནྡ་ཟླ་བའི་མདོག་ལྟར་ཚེམས། །དཀར་མོ་ཧཱུཾ་སྒྲོགས་ཁྲོ་མོ་ནི། །བགེགས་ནི་ཐམས་ཅད་ཉམས་བྱེད་མ། །ལྷན་ཅིག་སྐྱེས་པའི་དགའ་བས་རོལ། །སེམས་ཅན་དོན་ལ་བརྩོན་པར་བྱེད། །དེ་དང་ལྷན་ཅིག་དཔའ་བོ་ཆེ། །འཁོར་ལོ་

ས་ཡི་དབུས་སུ་གནས། །བྱེད་པའི་སྟངས་ལ་སོགས་པའི་ས། །བགེགས་རྣམས་ཐམས་ཅད་སྐྲོད་པར་བྱེད། །བདག་ཉིད་མཁའ་སྤྱོད་གུར་བྱས་ནས། །དེ་ལྟར་གོ་ཆའི་གོ་བགོས་ཏེ། །ལྷ་རྣམས་ཀྱིས་ཀྱང་འབྱེད་མི་ནུས། །ཧཱུྃ་བྱུང་ཁྲོ་མོ་དུ་མ་ཡིས། །ནམ་མཁའི་
དཀྱིལ་འཁོར་བཀབ་ནས་སུ། །རྡོ་རྗེའི་ལྟ་བས་བལྟ་བྱ་ཞིང་། །སྔགས་པས་ཡི་གེ་བདུན་པ་བརྗོད། །འདི་ནི་ས་ཡོངས་སུ་གཟུང་བའོ། །དཀྱིལ་འཁོར་གྱི་དབུས་སུ་འདུག་ལ་དྲིའི་མཎྜལ་བྱུགས་ཏེ་བཾ་ལས་སྐྱེས་པའི་སའི་ལྷ་མོ་རྣམ་པར་བསྒོམས་ཤིང་ལག་པ་གཡས་སུ་ཟླ་བ་ལ་ཧཱུཾ་གསུམ་
བསམས་ནས་སོར་མོའི་རྩེ་མོ་ས་ལ་ལན་གསུམ་བསྣུན་པ་དང་། དེའི་སྒྲ་དང་ཧཱུཾ་ཡིག་གི་འོད་ཟེར་གྱིས་བསྐུལ་བས་བཞེངས་པའི་ཡེ་ཤེས་སེམས་དཔའི་ཚུལ་དང་གཅིག་ཏུ་གྱུར་པ་སེར་མོ་ཞི་བ་ན་བཟའ་དཀར་པོ་ཅན་རྒྱན་དང་བཅས་པ་དགྱེས་པ་གཡོན་ན་གསེར་གྱི་བུམ་པ་བཟང་པོ་དང་། གཡས་པས་
མི་འཇིགས་པ་སྦྱིན་པ་ལ་མདུན་དུ་མཆོད་ཡོན་ལ་སོགས་པས་མཆོད་དེ་ལྷག་པར་མོས་པས། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དང་། །ས་དང་ཕ་རོལ་ཕྱིན་རྣམས་ལ། །ལྷ་མོ་ཁྱོད་ནི་དབང་དུ་གྱུར། །སྐྱོབ་པ་ཤཱཀྱ་སེང་གེ་ཡིས། །ཇི་ལྟར་བདུད་ཀྱི་སྡེ་
བཅོམ་པ། །དེ་ལྟར་བདག་གིས་བདུད་སྡེ་ལས། །རྒྱལ་བར་བྱས་ཏེ་དཀྱིལ་འཁོར་བྲི། །ཞེས་པ་ལན་གསུམ་བརྗོད་ནས་ལྷག་པར་གནས་པར་བྱའོ། །ལྷ་མོས་སྨྲས་པ། མགོན་པོ་བདག་གིས་ཅི་ཞིག་བྱ། །རྡོ་རྗེ་འཛིན་བཀའ་བདག་ལ་གསོལ། །ཁྱེད་ཀྱི་བཀྲ་ཤིས་དོན་དུ་
ནི། །བདག་གིས་བུམ་པ་འཛིན་པའོ། །ལན་གསུམ་བརྗོད་པ་ཙམ་གྱིས་ནི། །མཉེས་ནས་མཛེས་མ་འདི་སྐད་བརྗོད། །མགོན་པོ་ཁྱེད་ཀྱི་ཤེས་མོད་ཀྱི། །བསོད་ནམས་ཕུང་པོ་དྲི་མེད་པ། །ང་ནི་ཁྱེད་ཉིད་ལ་གཞོལ་ཞིང་། །ཀུན་ནས་ཁྱེད་ཀྱི་དཔང་དུ་གནས། །ཁྱེད་ཀྱིས་
བཀའ་ནི་གང་སྩལ་པ། །དེ་ནི་བདག་གིས་བྱེད་པར་བརྩོན། །ཞེས་བརྗོད་ནས་དེ་ཉིད་ལ་ཐིམ་པར་བསམ་མོ། །དེ་ནས་རྡོ་རྗེ་བསྡམས་པ་ནང་བཅིངས་ནས། །དེ་ཡིས་ས་ནི་མནན་ནས་སུ། །ཨོཾ་བཛྲཱི་བྷ་བ་ཧཱུཾ་ཞེས་པས་ལན་གསུམ་མངོན་པར་བསྔགས་ཏེ་རྡོ་རྗེ་བཅིངས་པ་ལས་འཐོན་

པའི་འབར་བའི་ཧཱུྃ་གི་ཚོགས་ཀྱིས་ས་འོག་གི་བར་རྡོ་རྗེར་གྱུར་པར་བསམས་ལ། ཨོཾ་བཛྲཱི་དྲྀ་ཌྷ་ཏིཥྛ་ཞེས་པ་ལན་གསུམ་བརྗོད་པས་བྱིན་གྱིས་བརླབ་བོ། །དེ་ནས་ས་གཞི་རང་དབང་དུ་འགྱུར་རོ་ཞེས་པ་ནོར་འཛིན་མ་ལྷག་པར་གནས་པའོ། །དེ་ནས་ཕྱི་དྲོ་སློབ་དཔོན་ཁྲུས་དང་དྲི་བཟངས་དང་གོས་
དམར་པོ་དང་རྒྱན་ཐམས་ཅད་དང་ལྡན་པས། ཨོཾ་བཛྲ་ཨུཥྞཱི་ཥ་ཧཱུཾ་ཕཊ། ཅེས་པས། ལན་བདུན་བསྔགས་པའི་གོས་དམར་པོའི་དབུ་རྒྱན་ཅན་དཀྱིལ་འཁོར་གྱི་དཀྱིལ་དུ་ཁ་ལྷོ་རུ་བསྟན་ནས་འདུག་སྟེ། དཀྱིལ་འཁོར་ལ་སོགས་པའི་བྱ་བ་ལ་དགོས་པའི་ཕྱིར་དང་པོ་རྡུལ་ཚོན་དཀར་
པོས་པདྨ་འདབ་བརྒྱད་བྲིས་པའི་ལྟེ་བ་རུ་རྣམ་པར་རྒྱལ་བའི་བུམ་པའམ། ལས་ཐམས་ཅད་པའི་བུམ་པ་བཞག་ལ་ཤར་གྱི་འདབ་མ་ལ་འཆད་པར་འགྱུར་བའི་ཆོ་གས་ལྷག་གནས་བྱས་པའི་ཚོན་སྣ་ལྔའི་སྐུད་པའི་སྣོད་དུ་གནས་པ་དང་། ལྷོར་རྡོ་རྗེ་དང་། བྱང་དུ་དྲིལ་བུ་དང་།
ནུབ་དང་མཚམས་བཞིའི་འདབ་མ་རྣམས་ལ་ཇི་ལྟར་རིགས་པར་ས་ཚོན་ལྔའི་སྣོད་རྣམས་སོ། །ཧེ་རུ་ཀ་དཔལ་རྒྱལ་པོ་ཆེའི། །རྣལ་འབྱོར་དབང་ཕྱུག་ངེས་བྱས་པ། །སེམས་ཅན་ཀུན་ལ་ཕན་དོན་དུ། །བུམ་པ་རྣམས་ལ་ལྷག་གནས་བྱ། །མགྲིན་པ་མཐོ་ཞིང་ལྟོ་བ་ཆེ། །མཆུ་
འཕྱང་རྩ་བ་མེད་པ་དང་། །ནག་པོ་ལ་སོགས་དང་བྲལ་བ། །ཞེས་གསུངས་པས་ཞི་བ་དང་རྒྱས་པའི་བུམ་པའི་ནང་ཟླུམ་པོའི་སོར་བཅུ་དྲུག་གོ། །ནང་གི་འོག་ནས་ཁའི་མཆུའི་བར་གྱི་དཔངས་ལ་སོར་མོ་ཉི་ཤུའོ། །ཁ་ནས་འཕྱང་བའི་མཆུ་ནི་སོར་གཉིས་སོ། །མགྲིན་པ་ནི་སོར་
དྲུག་གོ། །ཕྲག་པ་སོར་གཉིས་དམའ་བར་བྱས་ཏེ། དེ་གསུངས་པ། དུས་ཀྱི་འཁོར་ལོའི་དཀྱིལ་འཁོར་ཆོ་ག་ལས། །མ་ནུའི་སོར་གྱིས་དེ་ཡི་དཔངས་ཞེས་སོ། །ཁ་ནི་མཆུའི་མཐའ་ནས་མཆུའི་མཐའི་བར་དུ་སོར་བརྒྱད་དོ། །སོར་བརྒྱད་ཀྱི་ཆ་གཉིས་ནི་མགྲིན་པའི་བུ་
གའོ། །ཆ་གཅིག་གིས་ནི་མཆུ་གཉིས་ཀྱི་ཞིང་ངོ་། །གསེར་རམ་དངུལ་ལས་བྱས་པ་ཡི། །ཟངས་སམ་ས་ལས་བྱས་ཀྱང་རུང་། །ཇི་ལྟར་རྙེད་པ་བཟུང་ནས་ནི། །བརྟུལ་ཞུགས་ཅན་གྱིས་བུམ་པ་དགོད། །དེ་སྟོང་པ་ཉིད་དུ་བསྒོམས་ལ་པྃ་ལས་བྱུང་བའི་རིན་པོ་ཆེའི་རང་བཞིན་

ཙནྡན་ནམ་འབྲས་བཏགས་པའམ་ས་དཀར་གྱིས་དཀར་པོར་བྱས་ཏེ་མཚན་མ་བྲིས་ལ། བདུད་རྩི་ལྔ་དང་བཅས་པའི་དྲི་ལྔའི་ཆུ་དང་། རིན་པོ་ཆེ་དང་། སྨན་དང་། འབྲུ་ལྔ་ནང་དུ་བླུགས་ལ་འདབ་མས་ཁ་བརྒྱན་པ་ཕྲེང་བ་དང་བཅས་པ། རས་ཟུང་གིས་
མགུལ་པ་དཀྲིས་པ། དྲི་བཟངས་ཀྱི་མཎྜལ་གྱི་སྟེང་དུ་རྗེས་སུ་མཐུན་པའི་གདན་ལ། ཨོཾ་བཛྲ་ཤེ་ཁ་ར་རུ་ཊ་མ་ཊ་དཱི་ཤཾ་བནྡྷ་བནྡྷ་ཧཱུཾ་ཞེས་པ་བདུན་བཟླས་པའི་སྲད་བུ་དཀར་པོས་རས་ཀྱི་སྟེང་དུ་མགུལ་པ་བཅིངས་པའོ། །དེ་གསུངས་པ། བྱི་རུ་དངུལ་དང་གསེར་དང་ནི། །པདྨ་རཱ་ག་མུ་
ཏིག་གོ། །ནས་གྲོ་སྲན་ཆུང་ནག་མོ་དང་། །ཏིལ་དང་མུ་ཏིག་བུམ་པར་གཞུག །བྲྀ་ཧ་ཏི་ཀནྜ་ཀ་རི་དང། །ས་ཧ་དེ་བ་གཞན་མི་ཐུབ། །དཎ་ཌོཏྤ་ལའི་རྩ་བ་སྟེ། །སྨན་ནི་རྣམ་པ་ལྔ་གཞུག་བྱ། །ཨ་མྲ་ཨུ་དུམྺཱ་ར་དང་། །མྱ་ངན་མེད་དང་བྱང་ཆུབ་ཤིང་། །ཀླུ་ཤིང་ཡལ་ག་ལྔ་
བཟུང་ནས། །བུམ་པ་རྣམས་ཀྱི་ཁ་རྒྱན་བྱ། །རས་ནི་དཀར་པོ་ཆེ་བ་ཡིས། །བུམ་པའི་མགུལ་པ་དཀྲི་བར་བྱ། །ཆོ་ག་མཁས་པས་སྲད་བུ་ནི། །དཀར་པོ་རས་ཀྱི་སྟེང་དུ་དགོད། །དཀྱིལ་འཁོར་པ་ནི་ཐམས་ཅད་ཀྱི། །ས་བོན་ཡང་ན་ཕྱག་མཚན་ནི། །གུར་གུམ་ལ་སོགས་
འདུས་བྱས་ལས། །མཁས་པས་བུམ་པའི་ལོགས་ལ་དགོད། །དུ་རུ་ཀ་དང་ཨ་ཀ་རུས། །བདུག་ཅིང་དྲི་ལྔའི་ཆུ་ཡིས་དགང་། །ཞེས་སོ། །དེ་ལ་མཚན་མ་ནི་སྣ་ཚོགས་པདྨའི་ལྟེ་བའི་ཉི་མར་དཔལ་བདེ་མཆོག་གི་རྡོ་རྗེ་སྔོན་པོ་རྩེ་ལྔ་པ་ཁ་གྱེས་པའོ། །ལས་ཐམས་ཅད་པ་ལ་དུམ་སྐྱེས་མའི་
གྲི་གུག་གོ། །རྣམ་པར་རྒྱལ་བའི་བུམ་པའི་སྟེང་དུ། ཨོཾ་བཛྲ་ཨ་མྲྀ་ད་ཨུད་ཀ་ཋཿཧཱུཾ་ཞེས་པ་འདི་དང་ཡི་གེ་གསུམ་ལན་བདུན་བཟླས་པས་ཡེ་ཤེས་ཀྱི་བདུད་རྩིར་བྱས་ཏེ། རྡོ་རྗེའི་རྡུལ་ཕྲ་རབ་ཀྱི་རང་བཞིན་ཕྱི་ནང་གི་བདུད་རྩི་ལྔ་དང་། དྲི་བཟངས་ཀྱི་ཆུ་དང་ལྡན་པ་ཧཱུཾ་གིས་བསྔགས་པའི་
དུང་ངམ་པདྨའི་སྣོད་དང་མེ་ཏོག་གི་ཕྲེང་བས་བཅིངས་པའི་རྡོ་རྗེ་བཞག་ནས་དབུས་སུ། ཨོཾ་ཏཔྟེ་ཏཔྟེ་མ་ཧཱ་ཏཔྟེ་སྭཱ་ཧཱ། ཞེས་བྱ་བས་བཀུག་པའི་ལྷ་ཡུལ་གྱི་གངྒཱའི་ཆུའི་ངོ་བོའི་ཆུ་ལ་ལྷའི་འཁོར་ལོ་གདན་དང་བཅས་པ་སྐད་ཅིག་གིས་བསམས་ལ། མདུན་དུ་རང་གི་སྙིང་གའི་ས་བོན་གྱི་

འོད་ཟེར་གྱིས་ཡེ་ཤེས་ཀྱི་དཀྱིལ་འཁོར་སྤྱན་དྲངས་པ་ལ་ཞབས་བསིལ་དང་། ཞལ་བསིལ་དང་། མཆོད་ཡོན་ཕུལ་བས་དེ་ནས་དེ་དམ་ཚིག་གི་འཁོར་ལོ་ལ་བཅུག་ནས་འདོད་ཆགས་ཆེན་པོས་ཞུ་བར་གྱུར་ནས་བྱང་ཆུབ་སེམས་ཀྱི་ངོ་བོར་བླུགས་པའི་ཆུ་དང་རོ་གཅིག་ཏུ་གྱུར་པར་བསམ་མོ། །མཚན་
མ་ལ་ཡང་དམ་ཚིག་གི་ལྷ་ཡེ་ཤེས་ཀྱི་ལྷ་དང་གཅིག་ཏུ་གྱུར་པར་བསམ་མོ། །དེ་ནས་ཧཱུྃ་བརྗོད་ཅིང་རྡོ་རྗེ་དང་འབྲེལ་བའི་མེ་ཏོག་གི་ཕྲེང་བའི་མཐར་གཡོན་པའི་ཁུ་ཚུར་གྱིས་བཟུང་ནས་འཁོར་ལོའི་གཙོ་བོའི་སྙིང་པོ་དང་ལྷ་མོའི་སྙིང་པོས་བརྒྱ་རྩ་བརྒྱད་དུ་མངོན་པར་བསྔགས་པ། དེར་དུམ་སྐྱེས་མ་
བཟླས་པའི་མེ་ཏོག་དཀར་པོ་གསུམ་གཞུག་པར་བྱའོ། །དེ་ལྟར་བུམ་པ་གཞན་ཡང་རྡུལ་ཚོན་གྱི་དཀྱིལ་འཁོར་རྫོགས་པ་ན་ལྷག་པར་གནས་པར་བྱ་སྟེ། ཁྱད་པར་དུ་ནི་འཁོར་ལོ་ལྔ་ལ་སོ་སོར་རེ་རེ་སྟེ་ལྔའོ། །ཡང་ན་ནང་གི་རིམ་པར་གནས་པ་རྣམས་ཁོ་ནའི་ལྔའོ། །ཡང་ན་དེ་རྣམས་
ཀྱི་ལྔ་དང་འཁོར་ལོ་བཞིའི་བཞི་སྟེ་དགུའོ། །ཡང་ན་དབུས་ཀྱི་རིམ་པར་གནས་པའམ་དམ་ཚིག་འཁོར་ལོར་གནས་པ་རྣམས་ཀྱི་དང་བཅུ་གསུམ་མོ། །ཐུགས་ཀྱི་འཁོར་ལོའི་ཕྱོགས་སུ་གནས་པ་རྣམས་ཀྱི་གཅིག་དང་། མཚམས་སུ་གནས་པ་རྣམས་ཀྱི་གཅིག་དང་། དེ་བཞིན་དུ་
གསུང་གི་འཁོར་ལོ་དང་། སྐུའི་འཁོར་ལོ་ཡང་སྟེ་བཅུ་དགུའོ། །བརྗོད་པའི་ཕྱོགས་དང་ལྷ་སོ་སོའི་དགོད་པ་ལ་ཡང་ལས་ཐམས་ཅད་པ་དུམ་སྐྱེས་མའི་ལྷག་པར་དགོད་དོ། །མཚན་མ་ནི་ཕྱོགས་ཀྱི་འདབ་མ་ལ་མཁའ་འགྲོ་མ་ལ་སོགས་པ་བཞིའི་གྲི་གུག་གམ་བུམ་པ་ཐ་དད་པའི་
ཕྱོགས་ལ་རེ་རེའོ། །རབ་ཏུ་གཏུམ་མོ་ལ་སོགས་པ་རྣམས་ཀྱི་གྲི་གུག་ཉི་ཤུ་རྩ་བཞིའོ། །དཔའ་བོ་རྣམས་གཙོ་བོ་མ་ཡིན་པའི་ཕྱིར་མཚན་མ་མི་བྲིའོ། །ཁྭ་གདོང་མ་ལ་སོགས་པ་རྣམས་ཀྱི་གྲི་གུག་བརྒྱད་སྣ་ཚོགས་པདྨ་དང་ཉི་མ་ལའོ། །ལུས་ལ་ནི་བྱང་ཆུབ་ཀྱི་བདུད་རྩིས་གང་བའི་རྩ་
རྣམས་ཁོ་ན་བུམ་པ་སྟེ་སེམས་ཚིམ་པར་བྱེད་པའི་ཕྱིར་རོ། །དེ་གསུངས་པ། ཕྱི་ཡི་བུམ་པའི་མཚན་མ་གང་། །བཤད་པ་ཐམས་ཅད་ཇི་ལྟ་བར། །ལུས་ཀྱི་དཀྱིལ་འཁོར་བུམ་པ་ཡི། །མཚན་ཉིད་ལུས་ལ་ཡང་དག་འབྱུང་། །ཞེས་པ་བུམ་པ་ལྷག་པར་གནས་

པའོ། །སྔགས་པ་ལྷོ་རུ་ཁ་བལྟས་པ། །ལྷ་མོ་བཞི་དང་ཡང་དག་ལྡན། །ཧེ་རུ་ཀ་སྦྱོར་ཡང་དག་ཆགས། །འཛུམ་བཅས་དགའ་བར་བྱེད་པར་འདོད། །མི་ཤ་དང་བཅས་སྤོས་ཕོར་གཡོན་གྱིས་བཟུང་། །ཞེས་པ་ལ་སོགས་པ་གསུངས་པས་དཀྱིལ་འཁོར་དྲི་
བཟངས་ལ་སོགས་པས་བྱུགས་ཏེ། བདུད་རྩི་ལྔ་དང་བཅས་པའི་དྲི་བཟངས་ཀྱིས་ལྷ་དེ་དང་དེའི་གནས་སུ་མཎྜལ་ཟླུམ་པོ་བྱས་ཏེ། དེ་ལ་རང་གི་སྙིང་གའི་ས་བོན་གྱི་འོད་ཟེར་གྱིས་བཀུག་པའི་དཀྱིལ་འཁོར་གྱི་འཁོར་ལོ་ལ་ཞབས་བསིལ་ལ་སོགས་པ་སྔོན་དུ་འགྲོ་བས་ཡང་དག་པར་མཆོད་
ཅིང་བསྟོད་དེ། །བདུད་རྩི་མྱང་བ་བྱས་ལ་པུས་མོ་གཡས་པ་ས་ལ་བཙུགས་ཏེ། ཧཱུྃ་ལས་གྱུར་པ་རྡོ་རྗེ་རྩེ་གཅིག་པའི་ལྕེ་ལ་ཧཱུྃ་བཀོད་ལ་ལག་པ་གཡས་པར་སྤོས་ཕོར་ཐོགས་ཏེ་གཡོན་པས་དྲིལ་བུ་དཀྲོལ་ཞིང་། བཅོམ་ལྡན་བདེ་མཆོག་རྡོ་རྗེ་མཆོག །རིག་པའི་རྒྱལ་པོ་ཁྱོད་ལ་
འདུད། །སློབ་མ་རྣམས་ལ་བརྩེ་དོན་དང་། །ཁྱེད་རྣམས་ལ་ཡང་མཆོད་པའི་ཕྱིར། །མགོན་པོ་སྙིང་རྗེའི་བདག་ཉིད་ཀྱི། །དཀྱིལ་འཁོར་འདྲི་བར་བདག་འཚལ་ལོ། །དེ་ཕྱིར་བཅོམ་ལྡན་བདག་གུས་ལ། །རབ་ཏུ་དགྱེས་པར་མཛད་པའི་རིགས། །སངས་རྒྱས་འགྲོ་འཁོར་
བྱ་དོན་གསོལ། །འབྲས་གནས་བྱང་ཆུབ་སེམས་དཔའ་དང་། །གཞན་ཡང་གང་དག་སྔགས་ཀྱི་ལྷ། །ལྷ་དང་འཇིག་རྟེན་སྐྱོང་བ་དང་། །འབྱུང་པོ་བྱང་ཆུབ་བསྟན་གནས་དང་། །རྡོ་རྗེ་སྤྱན་ཅན་སེམས་དཔའ་ནི། །གང་དག་བསྟན་ལ་དགའ་བ་རྣམས། །བདག་ལ་ཡང་
དག་དགོངས་སུ་གསོལ། །བདག་ནི་ཆེ་གེ་རྡོ་རྗེ་ཅན། །བདེ་མཆོག་འབྱུང་བའི་དཀྱིལ་འཁོར་ནི། །ཇི་ལྟར་ནུས་པ་ཉེར་སྤྱོད་པས། །འགྲོ་བ་སྦྱང་ཕྱིར་བྲི་བར་བྱ། །དེ་ཕྱིར་བདག་ནི་སློབ་བཅས་ལ། །ཐུགས་རྗེས་ཉེ་བར་བཟུང་ནས་ནི། །འདུས་པར་གྱུར་པ་ཐམས་ཅད་ཀྱི། །
དཀྱིལ་འཁོར་ལ་ནི་ཉེར་བྱར་རིགས། །ཞེས་པས་ནི་མངོན་དུ་བྱེད་ཅིང་ལན་གསུམ་དུ་བརྗོད་པས་གསོལ་བ་གདབ་པར་བྱའོ་ཞེས་པ་ལྷ་ལྷག་པར་གནས་པའི་ཆོ་གའོ། །སྔ་དྲོ་དཔའ་བོ་ཆེན་པོ་ནི། །ལྷ་མོ་བཞི་དང་ཡང་དག་ལྡན། །ཕག་མོའི་སྦྱོར་བ་ཡིས་ནི་གནས། །

འཇིགས་སུ་རུང་བའི་དཀྱིལ་འཁོར་བྲི། །དམ་ཚིག་ཉམས་པའི་དོགས་པ་ཡིས། །སློབ་མིན་གཞུག་པར་མི་བྱའོ། །ཞེས་པས་རང་གིས་དབང་མ་བྱིན་ན་སློབ་དཔོན་གྱི་སྡོམ་པ་བྱིན་ལ་ལྷག་པར་གནས་པར་བྱས་པའི་སྒོའི་སློབ་དཔོན་བཞི་སྟེ་ཐ་ན་གཅིག་ཀྱང་རུང་ངོ་། །ལྔ་པ་ལས་ཀྱི་
རྡོ་རྗེར་བྱའོ། །ལྷག་པ་གནས་པར་བྱས་པའི་ལྷ་རྣམས་མཆོད་དེ་བློས་ནམ་མཁའ་ལ་གཞག་པར་བྱའོ། །དང་པོ་རུ་ནི་སྐྱ་ཐིག་སྟེ། །དེ་ཡི་རྗེས་ལ་ཡེ་ཤེས་ཐིག །ཕྱོགས་ཀུན་མཉམ་པ་ཉིད་བསམས་ནས། །རྣལ་འབྱོར་པ་ཡིས་ཆོ་གས་གདབ། །དེ་ནས་རོ་ཡི་སྲད་བུ་ནི། །
ཁྲག་ཆེན་པོ་ཡིས་བྱུགས་པ་ཡིས། །དཔལ་ཧེ་རུ་ཀའི་ཕོ་བྲང་མཆོག །དཀྱིལ་འཁོར་འཇིགས་སུ་རུང་བ་གདབ། །རབ་བྱུང་མེ་ཏོག་གིས་བྱུགས་ལ། །རྣལ་འབྱོར་རིག་པས་ཐོད་པར་གཞག །སྲད་བུ་དམ་པ་མངོན་པར་བསྔགས། །མཁའ་འགྲོ་མ་ཡི་སྔགས་ཀྱིས་
བསྲུང་། །བདུད་རྩི་ལྔ་དང་ཡང་དག་ལྡན། །ཆོ་ག་བཞིན་དུ་ཁ་དོག་ལྔ། །སྲད་བུ་དེ་ནི་གཅིག་ཏུ་དྲིལ། །སངས་རྒྱས་ལྔ་ཡི་བྱིན་གྱིས་བརླབ། །ཛཿཛཿཛཿཞེས་མདུན་གནས་པའི། སློབ་མ་ལ་ནི་གཏང་བར་བྱ། །དེ་ནས་སློབ་མས་ཀྱང་ནི་བརྗོད། །ཛཿཛཿཛཿཞེས་རང་མདུན་
དུ། །ཅུང་ཟད་ཡེ་ཤེས་དང་ལྡན་པས། །གཞོན་ནུ་གཞོན་ནུ་མ་མཆོག་ལ། །དཔའ་བོ་རྣལ་འབྱོར་མ་ཕབ་ནས། །ཐིག་འདེབས་པ་ནི་སྦྱར་བར་བྱ། །བདེ་མཆོག་འཁོར་ལོ་དེ་གཉིས་ཀྱིས། །ལེགས་པར་མཛད་པ་གསལ་བར་མཐོང་། །གནས་ལ་སོགས་པའི་ལྷ་མོ་རྣམས། །
ལྷན་ཅིག་སྐྱེས་པ་དང་ལྡན་པའོ། །རྡོ་རྗེའི་ཐིག་ནི་གདབ་པ་དང་། །རྡུལ་ཚོན་ཡང་ནི་གདབ་པ་དག །སེམས་ཅན་དམན་པས་མི་བྱ་སྟེ། །བྱས་ན་བྱང་ཆུབ་སྟོབས་མེད་དོ། །ཞེས་གསུངས་པས་ཁ་ལྷོར་ཕྱོགས་ཏེ་དཀྱིལ་འཁོར་གྱི་གཙོ་བོའི་རྣལ་འབྱོར་ཅན་མཚན་མ་ཐོབ་པས་
གཞོན་ནུ་མ་མ་ཉམས་པས་བཀལ་བའམ་དཔའ་བོའི་རིན་གྱིས་ཉོས་པའི་སྐུད་པ་ལྔ་པ་ལྔ་སྣོད་ལྔར་གནས་པ་རྣམས་དྲི་ཞིམ་པོའི་ཚོན་དཀར་པོ་དང་། སེར་པོ་དང་། དམར་པོ་དང་། ལྗང་གུ་དང་། ནག་པོ་རྣམས་དང་ཡུངས་ཀར་གྱི་ཕྱེ་མ་རྣམས་དང་བདུད་རྩི་ལྔ་བསྲེས་

པ་རྣམས་ཀྱིས་སོ་སོར་ཁ་བསྒྱུར་ཏེ་གཡོན་པའི་ལག་མཐིལ་དུ་སོར་མོའི་རྩེ་མོ་ནས་བརྩམས་ཏེ་མཐེ་བོང་གི་རྩ་བའི་བར་དུ་བཀོད་ནས། །བྷྲཱུཾ་ཨཾ་ཧྲཱིཿཁཾ་ཧཱུཾ་གི་ཡི་གེ་རྣམས་ལས་སྐྱེས་པའི་དེ་བཞིན་གཤེགས་པ་ལྔའི་ངོ་བོར་བསྒོམས་ནས་ནམ་མཁའ་ལ་བཞུགས་སུ་གསོལ་
བའི་རང་གི་ཕྱོགས་སུ་དེ་བཞིན་གཤེགས་པ་ལྔའི་ཐུགས་ཀར་བྷྲཱུཾ་ལ་སོགས་པ་ལས་སྐྱེས་པའི་ཡེ་ཤེས་ཀྱི་སྐུད་པ་འོད་ཟེར་དང་བཅས་པ་བལྟས་ནས། ཨོཾ་ཨཱཿཌཱ་ཀི་ནི་བཛྲ་སུ་ཏྲཾ་མེ་པྲ་ཡཙྪ་མ་ཧཱ་མཎྜ་ལ་སཱུ་ཏྲ་ཎཱ་ཡ་ཧཱུཾ་ཞེས་པ་དང་། མིང་བསྒྱུར་བས་གཞན་ལ་སྟེ། རྣམ་པར་སྣང་མཛད་ལ་
སོགས་པའི་བཞིན་མཁའ་འགྲོ་མ་ལ་སོགས་པ་ལ་གསོལ་བ་གདབ་བོ། །མིག་གཉིས་ཛཿལས་སྐྱེས་པའི་ཟླ་བ་དང་ཉི་མ་སེར་པོའི་རང་བཞིན་གྱི། ཨོཾ་དཱིཔྟ་དྲྀཥྚི་ཨངྐུ་ཤ་ཛཿཞེས་བརྗོད་ནས། མིག་རབ་ཏུ་མྱུར་བར་གཡོ་བའི་མིག་གི་རྫི་མས་འགུགས་ཤིང་འབར་བའི་ལྟ་བ་ལྕགས་ཀྱུ་
བཞིན་གྱིས་མཁའ་འགྲོ་མ་ལ་སོགས་པ་བཏང་བས་བཀུག་ནས་ལག་པ་ན་གནས་པའི་རང་རང་གི་ཁ་དོག་ཅན་གྱི་སྐུད་པའི་ནང་དུ་གཞུག་པར་བྱའོ། །མེ་ལོང་ལྟ་བུའི་ཡེ་ཤེས་ལ་སོགས་པ་རྣམས་ལ་ཡེ་ཤེས་བཞི་རྗེས་སུ་འགྲོ་བའི་ཕྱིར། ཉི་ཤུ་ལྔར་ཕྱེ་བའི་སྲད་བུ་མེའི་མཚམས་སུ་
གནས་པའི་སློབ་དཔོན་ལས་ཐམས་ཅད་པའི་གཟུགས་སྐུད་པ་བཟུང་བ་དང་ལྷན་ཅིག་དཀྱིལ་དུ་གནས་པའི་སློབ་དཔོན་གྱིས་དྲིལ་བར་བྱ་སྟེ་དེ་ནས་ལྔ་སྲད་བུ་གཅིག་ཏུའོ། །ཨོཾ་ཨཱཿཨ་ནྱོ་ནྱ་ཨ་ནུ་ག་ཏཱཿསརྦ་དྷརྨཱཿཔ་ར་སྤ་ར་ཨ་ནུ་པྲ་བིཥྚྲཱ་སརྦ་དྷརྨཱ་ཨ་ཏྱན་ཏ་ཨ་ནུ་པྲ་བཥྚིཿསརྦ་དྷརྨཱ་ཧཱུཾ་ཞེས་
བརྗོད་ཅིང་དྲིལ་བུ་སློབ་དཔོན་དང་སློབ་མའི་ལག་པ་གཡོན་པའི་མཛུབ་མོ་ནས་བརྩམས་ཏེ་སོར་མོ་བཞིའི་ནང་དུ་བཅུག་ལ་རྒྱབ་ནས་བསྐོར་ནས་ཡང་བཅུག་སྟེ་བསྐོར་ལ་དེ་དག་གིས་རྡོ་རྗེ་ཁུ་ཚུར་བྱས་པ་ཁོ་ནའི་མཛུབ་མོའི་རྒྱབ་ཀྱི་ས་ལ་བཞག་སྟེ་དམན་པའི་བར་དོར་ནས། ཇི་ལྟར་དཀྱིལ་འཁོར་
ལས་ཉིས་འགྱུར་དུ་རིང་བར་གྱུར་པ་ནས་ཀྱི་ཚད་ཀྱིས་སྦོམ་པ་བདུད་རྩི་ལྔ་དང་བའི་རྣམ་པ་ལྔས་སྤངས་པ་ཡི་གེ་གསུམ་ནང་དུ་ཆུད་པར་བྱས་ལ་སྣོད་གཙང་མར་བཞག་སྟེ་མཆོད་ལ་ལག་པས་བཀབ་སྟེ་ལས་ཐམས་ཅད་ལ་བཟླས་ཏེ། མིག་གཡས་པ་དང་གཡོན་པ་མ་དང་ཊ་ལས་ཉི་མ་

དང་ཟླ་བ་དག་གིས་སྔར་བཞིན་དུ་བཛྲ་དྲྀཥྚི་མ་ཊ་ཞེས་པས་བརྟན་པར་བྱས་ཏེ་ལས་ཐམས་ཅད་པ་བཟླས་པའི་བདུད་རྩིའི་ཆུ་དང་ཡུངས་ཀར་གྱིས་བྲན་ལ་རྡོ་རྗེ་དང་བཅས་པའི་ལག་པ་གཡས་པས་རེག་ལ། ཨོཾ་བཛྲ་ས་མ་ཡ་སཱུ་ཏྲཾ་མཱ་ཏི་ཀྲ་མ་ཧཱུཾ་ཞེས་བཟླས་ནས། ཡི་གེ་གསུམ་གྱིས་བརྒྱ་རྩ་བརྒྱད་
བཟླས་ཏེ་ལྷག་པར་གནས་པར་བྱའོ། །དཀྱིལ་འཁོར་གྱི་ས་གཞི་ཨོཾ་སརྦ་སཾ་ཤོ་དྷ་ནི་ཧཱུཾ་ཕཊ་ཅེས་པའི་སྔགས་ཀྱིས་བུམ་པ་ཐམས་ཅད་ཀྱི་ཆུས་གཏོར་ཏེ་དེ་དག་པར་བྱས་པ་སྟེ་དྲིས་བྱུགས་ལ། ཕྱི་རོལ་དུ་མེ་ཏོག་བཀྲམ་ལ་ནམ་མཁར་