Luận tạng Tây Tạng (Tengyur) — Tập 22

༄༅༅། །རྒྱ་གར་སྐད་དུ། ཤྲཱི་བཛྲ་སཏྭ་ནཱ་མ་སཱ་དྷ་ནཾ། བོད་སྐད་དུ། དཔལ་རྡོ་རྗེ་སེམས་དཔའི་སྒྲུབ་ཐབས་ཞེས་བྱ་བ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །རྣལ་འབྱོར་
པ་དབང་རྣམ་པ་བཞི་ཚུལ་བཞིན་དུ་ཐོབ་ཅིང་། དམ་ཚིག་རྣམས་སྲོག་གི་ཕྱིར་ཡང་མི་གཏོང་བས། རི་སུལ་དང་། བྲག་ཕུག་དང་། ཆུ་ཀླུང་དང་། དུར་ཁྲོད་ལ་སོགས་པར་གནས་ལ། ནང་པར་
དང་པོར་ཌ་མ་རུའི་སྒྲས་ལྡང་བར་བྱའོ། །དེ་ནས་ལག་པ་གཡས་པ་ཁྲོ་བོའི་སྡིགས་མཛུབ་སྙིང་གར་བསྟན་ལ། ཨོཾ་སུམྦྷ་ནི་སུམྦྷ་ཧཱུཾ་ཧཱུཾ་ཕཊ། ཨོཾ་གྲྀཧྣ་གྲྀཧྣ་ཧཱུཾ་ཧཱུཾ་ཕཊ། ཨོཾ་གྲྀཧྞཱ་པ་ཡ་གྲྀཧྞཱ་པ་ཡ་
ཧཱུཾ་ཧཱུཾ་ཕཊ། ཨོཾ་ཨཱ་ན་ཡ་ཧོཿབྷ་ག་བཱན་བཛྲ་བིདྱཱ་རཱ་ཛ་ཧཱུཾ་ཧཱུཾ་ཕཊ། དེ་ནས་གདོང་བཀྲུ་བ་ལ་སོགས་པས་ཁྲུས་བྱས་ནས་སྟན་འཇམ་པ་ལ་འདུག་ལ། ཚད་མེད་པ་བཞི་བསྒོམ་པར་བྱ་སྟེ། བདེ་བ་མ་ཐོབ་
པའི་སེམས་ཅན་རྣམས་བདེ་བ་དཔག་ཏུ་མེད་པ་ལ་དགོད་པར་བྱའོ། །དེ་ལྟར་གཞན་གྱི་སེམས་ཅན་ཐམས་ཅད་གསལ་བའི་སེམས་ཀྱིས་སྙིང་རྗེ་བསྐྱེད་པར་བྱའོ། །དེ་ལྟར་གཞན་གྱི་དོན་བྱ་བའི་སྡུག་

བསྔལ་ལ་ཇི་མི་སྙམ་པའི་དགའ་བ་བསྒོམ་པར་བྱའོ། །ཕན་པ་དང་བདེ་བ་བསྐྱེད་པ་ལ་བཏང་སྙོམས་བསྒོམ་པར་བྱའོ། །དེ་ནས་རང་གི་བདག་པོའི་ས་བོན་ལས་འོད་བྱུང་ནས་ནམ་མཁར་འཁོར་དང་
བཅས་པ་བསམས་ལ་མཆོད་པ་དང་། སྡིག་པ་བཤགས་པ་ལ་སོགས་པ་བྱའོ། །སྨོན་པའི་སེམས་ཀྱིས་བདག་ཧེ་རུ་ཀར་བསྒྱུར་ལ། སེམས་ཅན་ཐམས་ཅད་ཧེ་རུ་ཀར་གྱུར་ཅིག་ཅེས་པས་སྨོན་ལམ་བྱའོ། །སྨོན་པའི་
སེམས་ཀྱིས་དེ་ནས་གཡོ་བ་དང་མི་གཡོ་བའི་ཆོས་ཐམས་ཅད་གཅིག་དང་དུ་མ་དང་བྲལ་བའི་ངོ་བོར་རང་བཞིན་གྱིས་འོད་གསལ་བར་བསྒོམ་མོ། །སེམས་བརྟན་པར་བྱ་བའི་ཕྱིར་སྔགས་འདི་བརྗོད་པར་བྱའོ། །ཨོཾ་ཤཱུ་ནྱ་ཏཱ་ཛྙཱ་ན་
བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་བརྗོད་དོ། །དེ་ནས་བདག་གི་སྡོམ་པ་དང་། བསོད་ནམས་དང་ཡེ་ཤེས་ཀྱི་སྟོབས་ཀྱིས་བགེགས་བསྐྲད་པར་བྱ་སྟེ། མདུན་གྱི་ནམ་མཁའ་ལ་ཉི་མའི་དཀྱིལ་འཁོར་བསམས་ལ། དེའི་སྟེང་དུ་
ཧཱུཾ་བསམས་ཏེ། དེ་ལས་འོད་འཕྲོས་པས་བགེགས་བསྐྲད་པར་བྱའོ། །དེ་ནས་རྡོ་རྗེའི་ར་བ་དང་བླ་རེ་དང་ཕུར་བུ་རྣམས་ཀྱིས་ཕྱོགས་བཅིང་ངོ་། །དེ་ནས་འཇུག་པའི་སེམས་ཀྱིས་ཤིན་ཏུ་ཡང་ཆ་ཕྲ་བའི་རང་བཞིན་གྱིས་ངོ་བོ་

མི་དམིགས་སོ། །ཨ་ཨཱ་ཨ་ཨཱི་ཨུ་ཨཱུ་ཨེ་ཨཻ་ཨོ་ཨཽ་ཨཾ་ཨཿ ཨ་ཀ་ཙ་ཊ་ཏ་པ་ཡ་ཧ་ཀྵ་ཧཱུཾ། དེ་དག་གྱུར་པ་ལས་ཧཱུཾ། དེ་ཆོས་འབྱུང་བའི་ཕྱག་རྒྱ་གྲུ་གསུམ་བརྩེགས་མར་བསམས་ལ། དེའི་དབུས་སུ་ཤྲཱི་ཧེ་རུ་ཀ། བཱ་རཱ་ཧཱི་དང་གཉིས་སུ་མེད་པར་བསྒོམ་པར་བྱ་སྟེ། དཔལ་ཧེ་རུ་
ཀ་ཕྱག་བཞི་པ་ཞབས་གཉིས་པ་འཇིགས་བྱེད་དང་དུས་མཚན་མནན་པ། ཞལ་གཡས་དཀར་གཡོན་ལྗང་དབུས་མཐིང་ནག །རྒྱབ་སེར་ལྗང་། ཞལ་བཞི་པ་སྤྱན་གསུམ་དང་ལྡན་པ། ཕྱག་དང་པོ་གཉིས་རྡོ་རྗེ་དང་དྲིལ་བུ་བཟུང་བས་འཁྱུད་པ། གཡས་ཀྱི་ཕྱག་གཉིས་པ་ན་ཁ་ཊྭཱཾ་ག །གཡོན་
གྱི་གཉིས་པ་ན་ཀ་པཱ་ལ་བསྣམས་པ། ཐོད་པའི་ཕྲེང་བས་དབུ་བརྒྱན་པ། སྣ་ཚོགས་རྡོ་རྗེས་སྤྱི་བོར་མཚན་པ། ཟླ་བ་ཕྱེད་པའི་གཟུགས་ཅན། སྤྱི་བོར་མི་བསྐྱོད་པ་བཞུགས་པ། ཐོད་པའི་ཕྲེང་བ་སེ་རལ་ཁར་ཐོགས་པ། སྟག་གི་པགས་པའི་ཤམ་ཐབས་ཅན། སྐ་རགས་སིལ་སིལ་འཁྲོལ་བ།
སྤྱི་བོར་ནོར་བུ་དང་། རྣ་ཆ་དང་། མགུལ་རྒྱན་དང་། གདུ་བུ་དང་། ཚངས་པའི་སྐུད་པ་དང་། ཐལ་བ་སྟེ། ཕ་རོལ་ཏུ་ཕྱིན་པ་དྲུག་དག་པའི་རྒྱན་དང་ལྡན་པ། ཤིན་ཏུ་འཇིགས་སུ་རུང་བའི་གཟུགས་ཅན། ཡུམ་བཱ་རཱ་ཧཱི་མདོག་མཐིང་ནག་ཞལ་གཅིག་ཕྱག་གཉིས་པ། སྤྱན་གསུམ་པ། གཅེར་བུ་སྐྲ་གྲོལ་
བ་འཇིགས་པའི་གཟུགས་ཅན། ཕྱག་གཉིས་ན་གྲི་གུག་དང་ཀ་པཱ་ལ་ཐོགས་ཏེ། གཙོ་བོ་ལ་འཁྱུད་པ། ཞབས་གཡོན་གྱིས་འཁྱུད་པ་གཡས་བརྐྱང་བའོ། །བརྒྱ་བྱིན་གྱི་ཕྱོགས་ཀྱི་འདབ་མར་མཁའ་འགྲོ་མ། ནོར་བདག་ཕྱོགས་སུ་ལཱ་མ། ཆུ་བདག་ཕྱོགས་སུ་དུམ་སྐྱེས་མ། གཤིན་
རྗེའི་ཕྱོགས་སུ་གཟུགས་ཅན་མ། ལྷ་མོ་དེ་རྣམས་ཀྱང་ཁ་དོག་ནག་མོ་དང་། སེར་མོ་དང་། དམར་མོ་དང་། ལྗང་གུའོ། །སྤྱན་གསུམ་པ་ཕྱག་བཞི་པ། ཕྱག་དང་པོ་ན་གྲི་གུག །གཉིས་པ་ན་ཐོད་པ། གཡོན་པ་ན་ཀ་པཱ་ལ། གཉིས་པ་ན་ཁ་ཊྭཱཾ་ག །གཅེར་བུ་སྐྲ་བཤིག་པ།
འཇིགས་པའི་གཟུགས་ཅན་མ། ཚངས་པ་དང་། བིཥྞུ་དང་། བརྒྱ་བྱིན་དང་། སྲིན་མོ་གདན་དུ་བཏིང་བས་གཡོན་བརྐྱང་བ་གཡས་བསྐུམ་པས་བཞུགས་པ། ཕྱག་རྒྱ་ལྔས་བརྒྱན་པ། ཐོད་པ་སེ་རལ་ཁར་འཕྱང་བའོ། །དེ་རྣམས་ཀྱི་རྣམ་པར་དག་པ་ནི། ཧེ་རུ་ཀའི་ཞལ་བཞི་ནི། བདེ་བ་

དང་། ཤིན་ཏུ་བདེ་བ་དང་། རྣམ་པར་བདེ་བ་དང་། བདེ་བ་ཆེན་པོའོ། །ཡང་རྣམ་པར་ཐར་པ་བཞི་སྟེ། སྟོང་པ་ཉིད་དང་། མཚན་མ་མེད་པ་དང་། སྨོན་པ་མེད་པ་དང་། རང་བཞིན་གྱིས་འོད་གསལ་བའོ། །ཕྱག་རྒྱ་བཞི་སྟེ། ཕྱག་རྒྱ་ཆེན་པོ་དང་། དམ་ཚིག་གི་ཕྱག་རྒྱ་དང་།
ཆོས་ཀྱི་ཕྱག་རྒྱ་དང་། ལས་ཀྱི་ཕྱག་རྒྱའོ། །མཁའ་འགྲོ་མ་རྣམས་ནི། ལ་ལ་ནཱ་དང་། ར་ས་ནཱ་དང་། ཨ་བ་དྷཱུ་ཏཱི་དང་། དམ་རྒྱ་ནའོ། ཕྱག་རྒྱ་བཞི་དང་སྦྱར་བའོ། །དཔལ་ཧེ་རུ་ཀའི་བཞུགས་གནས་དབུས་ཀྱི་ལྟེ་བ་ནི་ཡིད་བཞིན་གྱི་ནོར་བུའོ། །གྲུ་གསུམ་གྱི་འདབ་མ་བཞི་ལ་ནི་མཁའ་འགྲོ་མ་
བཞིའོ། བདེ་བ་ཆེན་པོའི་འཁོར་ལོ་རྩིབས་སྟོང་པ་གཉིས་སེམས་དང་། མཱཾ་ས་དང་། མེ་ཏོག་གིས་བཀང་བའི་དུང་ཆེན་པོ་གཉིས་གཞག་གོ། །བདག་ཉིད་ནི་མགོན་པོ་ཧེ་རུ་ཀ་སྟེ་བྱང་ཆུབ་སེམས་ཀྱི་གཟུགས་ཅན་ནོ། །དེ་ནས་བདག་གིས་ཡེ་ཤེས་སེམས་དཔའ་བསྒོམ་མོ། །དེ་ནས་ཌཱ་ཀི་ལ་
སོགས་པའི་རིགས་ལྔ་ལ་སོགས་པ་ནམ་མཁའ་ལ་བཞུགས་པའི་ཡེ་ཤེས་སེམས་དཔའ་སྤྱན་དྲངས་ནས་བདག་གི་ཁར་ཞུགས་ཏེ། སྙིང་གའི་ཡེ་ཤེས་སེམས་དཔའ་ལ་ཐིམ་སྟེ། གཉིས་སུ་མེད་པར་བསམ་མོ། །དེ་ཉིད་ལས་ཧེ་རུ་ཀའི་སྐུ་ཕྲ་མོ་འཕྲོས་པས། དེ་རྣམས་ཀྱི་དཔལ་གྱིས་རེག་པའི་
སེམས་ཅན་ཐམས་ཅད་ཤྲཱི་ཧེ་རུ་ཀའི་བདག་ཉིད་དུ་བཞུགས་པར་བསམས་ལ། དེ་ནས་གོ་ཆ་དྲུག་གིས་ལུས་བསྲུང་། ཨོཾ་ཧ་བཛྲ་སཏྭ། ན་མ་ཧི་བཻ་རོ་ཙ་ནཱི་སྭཱ་ཧཱ། སྭཱ་ཧཱ་ཧཱུ་པདྨ་ནརྟེ་ཤྭ་ར། བཽ་ཥཊ་ཧེ་ཧེ་རུ་ཀ །ཧཱུྃ་ཧཱུྃ་ཧོ་བཛྲ་སཱུ་རྱ། ཕཊ་ཧཾ་ཨ་མོ་གྷ། ཨོཾ་བཾ་བཛྲ་བཱ་རཱ་ཧཱི། ཧཾ་ཡོཾ་ཡ་མ་ནི། ཧྲཱིཾ་
མོཾ་མོ་ཧ་ནི། ཧྲེཾ་ཧྲིཾ་སནྟཱ་ས་ནི་ཧཱུྃ་ཧཱུྃ་སཉྩ་ལི་ནི། ཕཊ་ཕཊ་ཙཎྜི་ཀ །ཨོཾ་ཧྲཱིཿཧ་ཧ་ཧཱུྃ་ཧཱུྃ་ཕཊ། ཨོཾ་བཛྲ་བཻ་རོ་ཙ་ན་ཡེ་ཧཱུྃ་ཧཱུྃ་ཕཊ། ཨོཾ་བཛྲ་ཌཱ་ཀི་ནཱི་ཡེ་ཧཱུྃ་ཧཱུྃ་ཕཊ། ཨོཾ་བཛྲ་ལཱ་མ་ཡེ་ཧཱུྃ་ཧཱུྃཕཊ། ཨོཾ་བཛྲ་ཁཎྜ་རོ་ཧེ་ཧཱུཾ་ཧཱུཾ་ཕཊ། ཨོཾ་བཛྲ་རཱུ་པི་ཎཱི་ཧཱུྃ་ཧཱུྃ་ཕཊ། འདི་ནི་བཟླས་པའོ། །བདེ་བ་ཆེན་པོའི་གནས་འདི་ལ་
ཞལ་གཅིག་ལ་ཉི་མ་ཕྱེད་མ། སྔ་དྲོའམ་དེའི་ཕྱེད་ལ་སོགས་པར་བསྒོམ་པར་བྱའོ། །དེ་ནས་ལྡང་བར་འདོད་ན་གཏོར་མ་གཏང་བར་བྱའོ། །ཨོཾ་ཨ་རལླི་ཧོ། །བཛྲ་ཌཱ་ཀི་ནཱི་ས་མ་ཡ་སྟཾ་དྲྀ་ཤྱ་ཧོཿ། རྡོ་རྗེ་སྙིམ་པ་ཁ་ཕྱེ་སྟེ། མཚན་ཕྱེད་ན་གཏོར་མ་སྦྱིན་ནོ། །ཨོཾ་ཁ་ཁ་ཁཱ་ཧི་ཁཱ་ཧི། སརྦྦ་ཡཀྵ་

རཱཀྵ་ས་བྷཱུ་ཏ་པྲེ་ཏ་པི་ཤཱ་ཙ། ཨུཾ་མཱ་ད། ཨ་པ་སྨ་ར། བཛྲ་ཌཱ་ཀ་ཌཱ་ཀི་ནྱ་ད་ཡ། ཨི་དཾ་བ་ལིཾ་གྲྀཧྞཾ་ཏུ་ས་མ་ཡ་རཀྵནྟུ། མ་མ་སརྦ་སིདྡྷི་མྨེ་པྲ་ཡཙྪནྟུ། ཡ་ཐཻ་བཾ་ཡ་ཐེཥྚཾ། བྷུཉྫ་ཐ། པི་པ་ཐ། ཛི་གྷྲ་ཐ། མ་ཏི་ཀྲ་མ་ཐ། མ་མ་སརྦ་ཀཱརྟ་ཡ། ས་ཏ་སུ་ཁཾ་བི་ཤུདྡྷ་ཡེ། ས་ཧ་ཡི་ཀ་བྷ་བནྟུ་ཧཱུཾ་ཧཱུཾ་ཕཊ། ཅེས་བརྗོད་
ལ་གཏང་ངོ་། །འདི་ནི་གསང་བའི་མཆོག་ཉིད་ཀྱིས། །རྣལ་འབྱོར་མ་ཡི་མཁའ་ལ་འབྱུང་། །རྟག་ཏུ་སེམས་ནི་བཟང་པོ་ཡིས། །སྦྱོར་བའི་མཆོག་ནི་བསྒོམ་པར་བྱའོ། །འདི་ནི་རབ་ཏུ་གསང་བ་ཆེ། །གཞན་དུ་བསྟན་པར་མི་བྱ་སྟེ། །དབང་པོ་གཉིས་ནི་སྦྱོར་བ་དང་། །མཆོག་གི་བསྒོམ་
པ་སྦྱར་བར་བྱ། །རྟག་ཏུ་དམ་ཚིག་བསྲུང་བར་བྱ། །བཟའ་དང་བཟའ་མིན་གཉིས་མི་བྱ། །བགྲོད་དང་བགྲོད་མིན་མི་བྱ་སྟེ། །འཐུང་དང་འཐུང་མིན་སྦྱོར་བའི་ལས། །འདི་ལྟར་ཡེ་ཤེས་གོམས་པ་ལས། །སྔགས་པ་དངོས་གྲུབ་མྱུར་དུ་འགྲུབ། །བླ་མའི་ཞལ་ནས་རྙེད་པ་ནི། །རབ་ཏུ་གསང་
བའི་དངོས་གྲུབ་ནི། །གཞན་གྱིས་གསོལ་བཏབ་གསལ་བར་བྱས། །ཐམས་ཅད་མ་ལུས་འགྲུབ་པར་འགྱུར། །འདི་བྱས་བསོད་ནམས་གང་ཐོབ་པ། །དེས་ནི་སེམས་ཅན་མ་ལུས་པ། །དོན་རྟོགས་སྟོབས་དང་ཡེ་ཤེས་ནི། །བསམ་གྱིས་མི་ཁྱབ་ཐོབ་པར་ཤོག །བདེ་མཆོག་གི་སྒྲུབ་ཐབས་
སློབ་དཔོན་ཆེན་པོ་ལཱུ་ཡི་པས་མཛད་པ་རྫོགས་སོ།། ༄། །འཁོར་ལོ་བདེ་མཆོག་གི་རྒྱུན་བཤགས་བཞུགས། ༄༅༅། །བཅོམ་ལྡན་ཕྱོགས་ཀྱི་ཞལ་བཞི་ཕྱག་བཅུ་གཉིས། །བཅུ་གཉིས་ཕྱག་གིས་གླང་ཆེན་པགས་སོགས་བསྣམས། །བདེ་གཤེགས་དྲུག་འགྱུར་ཕྱག་རྒྱ་དྲུག་གིས་བརྒྱན། །རྡོ་རྗེ་
ཕག་མོ་སྐུ་རྒྱན་བདེ་བ་མཆོག་ལ་རོལ། །མཁའ་འགྲོ་ལ་སོགས་ཚོགས་ཀྱི་འཁོར་ལོ་བསྐོར། །མཁའ་སོགས་ས་དང་དེ་བཞིན་ས་འོག་བཅས། །འཇིག་རྟེན་གསུམ་མཆོག་འཁོར་བཅས་བཞུགས་སོ་འཚལ། །ཡེ་ཤེས་རྡོ་རྗེ་དམ་ཅན་དགོངས་སུ་གསོལ། །ཐོག་མ་མེད་ནས་སྐྱེ་བ་འདི་བར་དུ། །
ཤིན་ཏུ་མི་བཟང་འཁོར་བར་བདག་འཁྱམས་པས། །བསྐལ་བའི་དུས་མཐའ་བསྟན་པའི་སྙིགས་མ་ལ། །ཁྱེད་ཀྱི་ཞལ་གྱི་འོད་ཟེར་གློག་ཙམ་མཐོང་། །སྔོན་གྱི་འཕྲོ་དང་ཁྱེད་ཀྱི་ཐུགས་རྗེ་ཡིས། །ཐེག་པ་མཆོག་གྱུར་བླ་ན་མེད་པ་དང་། །གསང་སྔགས་རྡོ་རྗེ་ཐེག་པའི་དོན་ཆེན་འདི། །བློ་

ངན་བདག་གིས་སྤྱད་ཅིང་བསྒྲུབ་པའི་ཕྱིར། །བདག་གིས་ཁས་བླངས་དམ་བཅས་ཚུན་ཆད་དུ། །བསྒྲུབས་པའི་འབྲས་བུ་མངོན་དུ་མ་གྱུར་ཀྱང་། །དམ་ཚིག་མི་འདའ་བདེ་གཤེགས་བཀའ་མི་སླུ། །མངོན་སུམ་ཞལ་བཞིན་རྟག་ཏུ་ཁྱེད་ལ་དགོངས། །ཉོན་མོངས་རང་བཞིན་
རྣམ་ཤེས་མ་སྦྱངས་པར། །ཁྱེད་ཀྱི་སྐུ་གསུང་ཐུགས་ནི་མ་མཐོང་ཡང་། །ཁྱེད་ཀྱི་བཀའ་ལས་བདག་ནི་མི་འདའ་ན། །བཀའ་ཡི་བྱིན་རླབས་བདག་ལ་གྲུབ་པར་མཛོད། །བདག་གི་རང་བཞིན་ཁྱེད་དང་ཡོངས་སུ་མཉམ། །མ་ལུས་འགྲོ་ཚོགས་རྣམས་ཀྱང་དེ་བཞིན་ལགས། །བདག་གིས་
ལུས་ཀྱིས་ཉེས་པ་ཅི་སྤྱད་པ། །སྐུ་ཡི་དཀྱིལ་འཁོར་ཚོགས་ལ་བཟོད་པར་གསོལ། །བདག་མེད་ཚུལ་གྱིས་ངག་གིས་ཉེས་སྨྲས་པ། །རིག་སྔགས་ལྷ་ཡི་སྙིང་པོ་ཕྱག་རྒྱ་དག །རྒྱུན་མི་འཆད་པར་ཡོངས་སུ་སྤྱད་པ་ལས། །ཉམས་གྱུར་གསུང་གི་ཚོགས་ལ་བཟོད་པར་གསོལ། །བདག་
གི་ཡིད་ཀྱིས་གཞན་གྱི་ཉེས་བསམས་ཤིང་། །ཏིང་འཛིན་ལྟ་སྤྱོད་ལྷ་དང་སློབ་དཔོན་དང་། །རིག་སྔགས་ལྷ་ཡི་སྙིང་པོའི་ཕྱག་རྒྱ་དག །རྒྱུན་མི་འཆད་པར་ཚོགས་ལ་བཟོད་པར་གསོལ། །སློབ་དཔོན་བརྙས་ཤིང་བཀའ་ལས་འདས་པ་དང་། །སྤུན་ལ་ཉེས་སྨྲས་བྱམས་པ་ཆེན་པོ་སྤངས། །
བྱང་ཆུབ་སེམས་སྤངས་ཐེག་པ་གསུམ་སྤངས་སྨོད། །སྐལ་མིན་གསང་བསྒྲགས་བདག་ཉིད་ཕུང་པོ་སྨད། །ཆོས་ལ་ཡིད་གཉིས་སྡུག་ལ་ཆགས་བྲལ་བྱམས། །ཆོས་ལ་གཉིས་འབྱེད་དད་པའི་སེམས་ལ་སྨོད། །དམ་ཚིག་ཇི་བཞིན་བསྙད་པ་མི་བསྟེན་དང་། །བརྟགས་པའི་རིག་མ་སྨད་
པར་བྱེད་པ་དང་། །རྩ་བ་འདི་ཉམས་ཁྱེད་ལ་བཟོད་པར་གསོལ། །དམ་ཚིག་མི་ལྡན་རིག་མ་བསྟེན་པར་དགའ། །དཀྱིལ་འཁོར་ཚོགས་རྩོད་གསང་བའི་ཆོས་སྟོན་དང་། །སེམས་ཅན་དད་ལ་དམ་ཚིག་གཞན་དུ་སྟོན། །ཉན་ཐོས་དག་དང་ལྷན་ཅིག་གནས་བྱེད་ཅིང་། །སྦྱོར་བ་མ་བྱས་
སྣོད་མིན་གསང་བ་སྟོན། །ཕྱག་རྒྱ་མི་ཤེས་ཕྱག་རྒྱ་བསྟེན་པ་དང་། །བསྙེན་པ་དག་པར་མ་བྱས་དཀྱིལ་འཁོར་ཞུགས། །སྡོམ་པ་གཉིས་ཀྱི་བཅས་པ་དགོས་མེད་པས། །ཡན་ལག་དམ་ཚིག་འདི་ལས་འགལ་བགྱིས་པའི། །བཀའ་ཆད་གནས་སུ་གྱུར་པ་ཅི་མཆིས་པ། །བཟོད་པར་གསོལ་ལོ་

ཚངས་པར་སྩལ་དུ་གསོལ། །ད་ལྟའི་དུས་སུ་བསྟན་པ་འཇིག་དུས་སུ། །ཉོན་མོངས་ཤས་ཆེན་ཁྱེད་ཀྱིས་རབ་ཏུ་མཁྱེན། །སོ་སོར་ཐུགས་དམ་བཞིན་དུ་ཉེར་དགོངས་ལ། །ཇི་ལྟར་འཚལ་བ་བཞིན་དུ་ཕྲིན་ལས་མཛོད། །ཇི་ལྟར་བུ་ཡིས་རབ་ཏུ་མི་ཤེས་ཀྱང་། །ཕ་ཡིས་བརྩེ་བས་ལེགས་པར་སྐྱོང་བ་
ལྟར། །བདག་གིས་གཞུང་འདི་རབ་ཏུ་མ་ཤེས་ཀྱང་། །ཐུགས་རྗེ་ཆེན་པོས་ཡོངས་སུ་གཟུང་དུ་གསོལ། །དཔལ་འཁོར་ལོ་བདེ་མཆོག་གི་རྒྱུན་བཤགས་བསྡུས་པ། དཔལ་ཨཽ་ཌྱན་ལྷ་མོའི་གནས་པ་རྒྱལ་པོ་ཨིནྡྲ་བྷཱུ་ཏིས་མཛད་པ་རྫོགས་སོ།། ༄༅༅། །རྒྱ་གར་སྐད་དུ། ཤྲཱི་
ཙཀྲ་སཾ་བ་ར་གརྦྷ་ཏཏྟྭ་སིདྡྷི། བོད་སྐད་དུ། དཔལ་འཁོར་ལོ་སྡོམ་པའི་སྙིང་པོའི་དེ་ཁོ་ན་ཉིད་གྲུབ་པ། དཔལ་འཁོར་ལོ་སྡོམ་པ་ལ་ཕྱག་འཚལ་ལོ། །གང་དུ་ཐབས་དང་ཤེས་རབ་མཉམ་སྦྱོར་བས། །ཀུན་རྫོབ་དོན་དམ་དབྱེར་མེད་རང་བཞིན་ཅན། །བདེ་དང་སྟོང་པ་འདུས་པའི་རོས་
གང་བའི། །གཉུག་མའི་ཡེ་ཤེས་དེ་ལ་བདག་ཕྱག་འཚལ། །གང་ཞིག་གོམས་པར་གྱུར་པས་སྲིད་པ་ཡི། །བཙོན་རར་དཀྲིས་པའི་འཆིང་བ་ཀུན་གཅོད་པ། །སེམས་ཀྱི་དམ་པ་རང་རིག་རིན་ཆེན་མཆོག །གང་ལ་བརྟེན་ནས་རྟོགས་པའི་ཐབས་བཤད་བྱ། །དྲུག་དང་བརྒྱད་གཉིས་བཅུ་
ཕྲག་གཉིས་དང་ལྔ། །བཞིན་རྒྱས་མིག་ཡངས་གཟུགས་མཛེས་ལང་ཚོ་ལྡན། །དད་དང་ཐོས་དང་སྙིང་རྗེས་ཡིད་བརྒྱན་མ། །སྐྱབས་སོང་སེམས་བསྐྱེད་ཡང་དག་དབང་བསྐུར་བ། །ཉེས་བྲལ་དབེན་པར་གཡེང་བ་ཀུན་སྤངས་ཏེ། །ཁམས་དང་རྗེས་མཐུན་བཟའ་དང་བཏུང་བ་དང་། །དྲི་
ཞིམ་ཡིད་འོང་རྒྱན་མཛེས་སྤྱོད་དགུ་ལྡན། །གང་དང་ཐ་མལ་འཛིན་པ་རྣམས་སྤངས་ཏེ། །དབང་པོའི་གཞུ་ལྟར་སྣང་བ་ལྷ་ཡི་ལུས། །དེ་ལ་ཡི་གེ་དྱ་ནི་སྣ་རྩེ་དང་། །བྱིན་པ་མཚན་གྱི་ལྟེ་བར་རྣམ་དགོད་ཅིང་། །ལྟེ་བ་སྙིང་ག་ཁ་དང་དཔྲལ་བ་རུ། །སྔགས་ཀྱི་ཚོགས་དང་བཅས་པས་
བྱིན་གྱིས་བརླབ། །འཁྱུད་དང་འོ་བྱེད་སེན་མོས་འདེབས་པ་དང་། །མཆུ་འཇིབ་པ་དང་ནུ་མ་འཚིར་བ་དང་། །ཉེད་དང་རྡེབ་དང་སོར་མོ་བསྐྱོད་པ་ཡིས། །དབང་གཉིས་སྙོམས་པར་འཇུག་པའི་སྦྱོར་བ་བྱ། །གང་ཚེ་མཉམ་མེད་རིན་ཆེན་མཆོག་ལྟ་བུ། །སེམས་ཀྱི་དམ་པ་རང་རིག་བདེ་ཆེན་

པོ། །གང་དུ་རྟོགས་པ་དེ་ཚེ་སྲོག་རྩོལ་བ། །བཀག་པའི་སྦྱོར་བས་བདེ་ཆེན་རོ་མྱང་བྱ། །དངོས་དང་དངོས་མེད་མཐའ་གཉིས་རྣམ་སྤངས་ཤིང་། །སྟོང་དང་སྙིང་རྗེ་དབྱེར་མེད་རང་བཞིན་ཅན། །དུས་གསུམ་རྒྱལ་བའི་ཡེ་ཤེས་བསྐྱེད་པའི་རྒྱུ། །རང་རིག་བདེ་ཆེན་ཡེ་ཤེས་གཅིག་པུ་པ། །
གཉུག་མའི་རང་བཞིན་གང་དེར་མཚོན་པར་བྱ། །གང་དུ་མཚོན་བྱ་མཚོན་བྱེད་ཀྱིས་མཚོན་པ། །རྣམ་ཤེས་ཡེ་ཤེས་ཉིད་དུ་མཚོན་པ་དང་། །ཡེ་ཤེས་གང་དེས་ཤེས་བྱར་སྣང་བ་ཡི། །འགྲོ་བ་མ་ལུས་དེ་ཀུན་དེར་མཚོན་བྱ། །དེ་ཚེ་དབང་པོའི་ཡུལ་དུ་སྣང་བ་ཡང་། །གཟུགས་སྒྲ་དྲི་རོ་རེག་བྱར་
གྱུར་པ་ཡི། །དངོས་པོ་འདི་ཀུན་མ་ལུས་བདེ་ཆེན་པོ། །གང་དུ་དེ་ལས་གཞན་པའི་དངོས་མེད་ཅིང་། །བདེ་ཆེན་ཡེ་ཤེས་ཞེས་བྱ་གཅིག་པུ་པ། །གཅིག་པུའི་ཉམས་ཀྱིས་དུ་མར་གར་མཛད་དོ། །གང་གིས་རང་གི་ཡེ་ཤེས་མཆོག་བསྒོམས་པས། །སྲིད་པའི་འཆིང་བ་མ་ལུས་ཀུན་བཅད་དེ། །
བདག་གཞན་ཉེ་བར་འཚོ་བའི་འབྱུང་གནས་ཀྱིས། །མཉམ་མེད་མྱ་ངན་འདས་པའི་དབྱིངས་ལ་བརྟེན། །དཔལ་འཁོར་ལོ་སྡོམ་པའི་སྙིང་པོའི་དེ་ཁོ་ན་ཉིད་གྲུབ་པ། སློབ་དཔོན་ཆེན་པོ་ཛཱ་ལནྡྷ་རས་མཛད་པ་རྫོགས་སོ།། ༄། །དཔལ་ལྷན་ཅིག་སྐྱེས་པའི་མན་ངག་བཞུགས།
༄༅༅། །དཔལ་ཧེ་རུ་ཀ་ལ་ཕྱག་འཚལ་ལོ། །རང་བཞིན་རྣམ་དག་གཉིས་ཀྱིས་རྒྱུ་བྱས་པས། །བརྒྱད་པོ་འཇིག་རྟེན་པ་དང་ཐུན་མོང་སྟེ། །ལྔ་ཉིད་སྤང་བྱ་ལྔ་ཉིད་ལམ་ཡང་ཡིན། །དག་བྱེད་ངོ་བོ་སེམས་ཀྱི་རང་བཞིན་སྐུ། །བསམ་མི་ཁྱབ་པའི་རྟོག་པ་རང་ལ་འབྱུང་། །བཞི་དང་བྲལ་
ཏེ་གསུམ་དུ་རྟོག་ཏུ་མེད། །དག་བྱེད་རང་བཞིན་དག་པའི་ངང་དུ་སྣང་། །གཉིས་པོ་སྤངས་ཏེ་ལ་ཉིད་ལམ་དུ་བྱ། །ལྔ་ལ་མི་ཆགས་གླང་ཆེན་སྨྱོན་པ་འདྲ། །ཀུ་ཤ་རླུང་བསྐྱོད་སྤྱོད་འདི་བདག་ལ་གཅེས། །ཤ་འུ་སར་པ་འདྲ་བར་གསོ་བ་འདི། །ཀུན་ལ་གཅེས་པ་ཡིན་ཞེས་རི་ཁྲོད་གསུང་། །མ་
རྟོགས་རྟོགས་པའི་སྤྱོད་པ་སྨྱོན་པ་འདྲ། །རྟོགས་ནས་མི་སྤྱོད་བླུན་པོའི་སྤྱོད་པ་ཡིན། །གང་ཡང་མི་རྟོག་དེ་ཡི་ངང་ལ་གཞག །གྲོལ་བར་འགྱུར་ཏེ་དེ་ཉིད་ཐེ་ཚོམ་མེད། །གསུམ་པོ་སྤང་བར་གྱིས་ཤིག་རང་ལ་ལྟོས། །ཞེས་གདམས་སོ། །དཔལ་ལྷན་ཅིག་སྐྱེས་པའི་མན་ངག་བདག་བྱིན་གྱིས་

བརླབ་པ་ཞེས་བྱ་བ། རི་ཁྲོད་པ་ཆེན་པོའི་གསུང་རྗེ་མི་ཉག་ལོ་ཙཱ་བས་བསྒྱུར་བ་རྫོགས་སོ།། ༄༅༅། །རྒྱ་གར་སྐད་དུ། ཤྲཱི་ས་ཧ་ཛ་སཾ་བར་སྭ་ཏིཥྛ་ནཾ་ནཱ་མ། བོད་སྐད་དུ། དཔལ་ལྷན་ཅིག་སྐྱེས་པ་བདེ་བའི་མཆོག་བདག་བྱིན་གྱིས་བརླབ་པ་ཞེས་བྱ་བ། ཧེ་རུ་ཀ་ལ་ཕྱག་
འཚལ་ལོ། །ཀྱེ་ཧོ་སྒྲུབ་པའི་སྙིང་པོ་བདེ་ཆེན་རང་གི་སེམས། །འཁྲུལ་པའི་དབང་གིས་རྐྱེན་དང་བཅས་གྱུར་ཀྱང་། །རྒྱ་མཚོའི་ཆུ་ནི་དངས་མའི་རང་བཞིན་ཡིན། །རྙོག་མའི་རང་བཞིན་གློ་བུར་རྐྱེན་ལས་བྱུང་། །མ་བཅོས་རང་སར་བཞག་ན་རྒྱལ་བའི་ཐུགས། །འདི་ན་བླ་མའི་དུས་ཐབས་
བསྟེན་ལས་བྱུང་བ་སྟེ། །ཐབས་ཀྱི་རྒྱལ་པོ་བྱ་བ་ཐམས་ཅད་གཏང་བར་བྱའོ། །ཞེས་རི་ཁྲོད་པ་ཆེན་པོས་གསུངས་སོ། །ཕྱག་རྒྱ་ཆེན་པོའི་མན་ངག་རྫོགས་སོ།། ༄༅༅། །རྒྱ་གར་སྐད་དུ། ཤྲཱི་ས་ཧ་ཛ་སཾ་བ་ར་སྭ་ཏིཥྛ་ནཾ་ནཱ་མ། བོད་སྐད་དུ། དཔལ་ལྷན་ཅིག་སྐྱེས་
པ་བདེ་བའི་མཆོག །བདག་བྱིན་གྱིས་བརླབ་པ་ཞེས་བྱ་བ། ཧེ་རུ་ཀ་ཕྱག་འཚལ་ལོ། །རྣལ་འབྱོར་རྣམ་གསུམ་ཞེས་བྱ་སྟེ། །བྱིན་གྱིས་བརླབ་དང་རང་རྟགས་དང་། །རྫོགས་པའི་གཟུགས་བརྙན་བསམ་མེད་དོ། །སྣ་ཚོགས་གཟུགས་ཅན་ཡིད་དུ་འོང་། །ཡིད་བཞིན་ནོར་བུའི་
གཟུགས་འཆང་མ། །ཟིན་ན་དངོས་གྲུབ་ཆེན་པོ་འབྱུང་། །ཆོས་བཤད་ནས་ནི་དབང་དུ་བྱ། །ཡང་ན་རི་བའི་རིན་གྱིས་སླུ། །ཤིན་ཏུ་གསང་བའི་སྒྲུབ་པ་པོས། །དབང་གིས་ཡོངས་སུ་སྨིན་པ་དང་། །ལྷ་ལྟར་བལྟས་ལ་དངོས་གྲུབ་བླང་། །མེ་ལོང་ནང་གི་གཟུགས་བརྙན་ལྟར། །
གསལ་ལ་འཛིན་མེད་བདེ་བའི་སྐུ། །ཉི་ཤུ་རྩ་ལྔ་ཡུམ་རྣམས་རྫོགས། །བལྟས་དང་དགོད་དང་འཁྲིག་པ་ཡིས། །མཁའ་སྦྱོར་བདེ་བའི་ཕོ་བྲང་དུ། །དབང་གི་རྒྱལ་པོས་གར་བྱས་པས། །དཔའ་བོ་རྣལ་འབྱོར་མ་ཀུན་དགྱེས། །དཔའ་བོ་མཁའ་འགྲོ་དགྱེས་པའི་གླུ། །ཨཾ་དང་
ཧཾ་གི་སྒྲ་བརྗོད་པས། །ཚངས་པའི་རི་བོ་རྩེ་ནས་ཉིལ། །རྒྱ་མཚོའི་ལྦུ་བ་བལྟམས་པ་དང་། །གནས་པ་བཞི་ཡི་རིམ་པ་ཡིས། །རྡོ་རྗེ་སེམས་དཔའ་རང་ཉིད་འགྱུར། །དབང་ཕྱུག་དམ་པའི་གསང་གཏམ་འདིས། །ནམ་མཁའ་རྡོ་རྗེ་གྲོང་དུ་འཇུག །བདེ་ཆེན་དག་པའི་ཞིང་

ཁམས་མཐོང་། །ཐམས་ཅད་ལྷན་ཅིག་སྐྱེས་པའི་སྐུ། །ཤེས་རབ་རྡོ་རྗེ་རྣལ་འབྱོར་མ། །གཉིས་མེད་བདེ་བའི་རྣམ་པ་ཅན། །མ་ནིང་ཞེས་བྱར་བརྗོད་པ་སྟེ། །ཁ་ཅིག་ཟུང་འཇུག་ཅེས་བྱར་བརྗོད། །སྒྲིབ་པ་དང་བྲལ་ཆོས་སྐུ་འདིར། །རཀྟ་ལ་སོགས་
བྱང་སེམས་རྣམས། །རྟེན་དང་བརྟེན་པའི་མཚན་ཉིད་ཀྱི། །དཀྱིལ་འཁོར་ཐམས་ཅད་འདི་ཉིད་དོ། །དཔལ་ལྷན་ཅིག་སྐྱེས་པའི་སྒྲུབ་ཐབས་བདག་བྱིན་གྱིས་བརླབ་པ་ཞེས་བྱ་བ། རྒྱལ་པོ་ཨིནྡྲ་བྷཱུ་ཏི་འབྲིང་པོས་མཛད་པ། རྗེ་མི་ཉག་ཆེན་པོས་བསྒྱུར་བ་རྫོགས་སོ།།
༄༅༅། །རྒྱ་གར་སྐད་དུ། སཾ་བ་ར་བྱ་ཁྱཱ། བོད་སྐད་དུ། སྡོམ་པ་བཤད་པ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །དཔའ་བོ་རྣལ་འབྱོར་མ་འབྲེལ་ལས། །བདེ་མཆོག་བཤད་པ་འབྱུང་བ་སྟེ། ཨིནྡྲ་བྷཱུ་ཏིའི་གཞུང་ཉིད་དང་། །ཀུན་སྤྱོད་དཱ་རི་ཀ་གཞུང་གིས། །དཔའ་བོ་
དང་ནི་རྣལ་འབྱོར་མ། །ཞལ་གཅིག་ཕྱག་གཉིས་པ་རུ་གསུངས། །དཔལ་ལྡན་འབར་བ་འཛིན་ཞབས་སམ། །ཀ་ཙོ་ཏ་ཡི་གཞུང་རྣམས་ཀྱིས། །དཔའ་བོ་དང་ནི་རྣལ་འབྱོར་མ། །ཞལ་གཅིག་ཕྱག་གཉིས་པ་རུ་གྲགས། །མཁའ་འགྲོ་མ་སོགས་དཔའ་བོར་བཅས། །སྒོ་སྐྱོང་མ་དང་ཡང་དག་
ལྡན། །ཁྲོ་བོའི་གཟུགས་ནི་ཧཱུཾ་དང་བཅས། །ཞལ་གཅིག་པ་ལ་ཕྱག་བཞི་པ། །ལྷ་མོ་རབ་ཏུ་གཏུམ་སོགས་བཞིན། །སྐུ་མདོག་སྣ་ཚོགས་ཁྱད་པར་རོ། །བརྟུལ་ཞུགས་ཞལ་སྔ་ནས་ཀྱི་གཞུང་། །ཕྱག་གཉིས་དང་ནི་ཞལ་གཅིག་པ། །སྒེག་སོགས་རོ་ནི་ཐམས་ཅད་ཀྱིས། །དེ་རྣམས་འགྱིང་
བས་རོལ་བར་འགྱུར། །ཡང་ན་སེམས་ནི་རྣམ་དག་པ། །སྐུ་མདོག་སྔོན་པོ་རྣམ་པའི་དབྱིབས། །དཔའ་བོ་ལྷ་མོར་ཡང་དག་ལྡན། །ཁ་ཅིག་གིས་ནི་གཞུང་དུ་བརྗོད། །སྐུ་གསུང་ཐུགས་ཀྱི་དབྱེ་བ་ཡིས། །ཁ་དོག་གསུམ་དུ་ཡང་དག་གནས། །གང་ཕྱིར་འཁོར་ལོ་གསུམ་གསུངས་
པ། །དེ་ཕྱིར་ཁ་དོག་གསུམ་དུ་འགྱུར། །འདི་རྣམས་ནང་ནས་གང་འདོད་པ། །དེ་ཀུན་རྣལ་འབྱོར་པས་གུས་བྱ། །ཕྱག་གཉིས་ལ་སོགས་བརྩམས་ནས་ནི། །ཇི་སྲིད་ཕྱག་ནི་འབུམ་དེ་བཞིན། །ཕྱག་དང་ཞལ་ནི་གྲུབ་ཕྱིར་མིན། །བསམ་ཡས་སྦྱོར་བས་བསམ་པར་བྱ། །དེ་ལྟར་བློ་

བཟང་ཤེས་ནས་ནི། །གཉིས་མེད་ཡེ་ཤེས་བསྒོམ་པར་བྱ། །དད་པ་ཙམ་གྱིས་འཇུག་བྱ་བ། །དཔྱད་པ་ཉིད་དུ་སྦྱར་མི་བྱ། །མཆོག་ཏུ་དགའ་བས་འདི་དག་ཀུན། །གང་བསྒོམས་འབྲས་བུ་མཆོག་ཕན་ཏེ། །ལྷན་ཅིག་སྐྱེས་པར་ཐིམ་པ་ཡིས། །ཧེ་རུ་ཀ་ཉིད་རྣམ་པར་བསྒོམ། །བླ་
མའི་བཀའ་ལུང་བླངས་ནས་ནི། །དང་པོར་གུས་པའི་སེམས་ཀྱིས་སུ། །བརྟེན་པའི་སེམས་ཀྱིས་སྒོམ་བྱེད་ན། །དམ་པའི་ཕུན་ཚོགས་ཐོབ་པར་འགྱུར། །འབར་བའི་ཕྱག་རྒྱར་སྡོམ་པར་མིན། །སློབ་དཔོན་ཁ་ཅིག་སྨྲ་བར་བྱེད། །ཧེ་རུ་ཀ་འབྱུང་རྒྱུད་གསུང་ཡིན། །བདེ་མཆོག་ཉིད་དུ་མ་
ཡིན་པས། །དེ་ཕྱིར་བདག་གིས་མ་བྲིས་ཏེ། །དཔལ་ལྡན་རྡོ་རྗེས་བཟོད་པར་མཛོད། །མན་ངག་གིས་ནི་ཕག་མོ་ཡི། །རྒྱུད་དུ་ངེས་པར་རབ་ཏུ་གྲགས། །འབར་བ་ཡི་ནི་ཕྱག་རྒྱ་ཡིས། །དཀྱིལ་འཁོར་དགུག་པའི་དོན་དང་ནི། །བདེ་མཆོག་གཏོར་མའི་ལས་རྣམས་ཀྱང་། །ཧེ་རུ་ཀ་ནི་
འབྱུང་རྒྱུད་དུ། །ཧེ་རུ་ཀ་ཕྱག་ལ་གནས་པ། །ཧེ་རུ་ཀ་ཡི་རྒྱུད་དུ་གསུངས། །ན་བཟའ་དག་གི་ཁྱད་པར་ནི། །སྟག་གི་པགས་པ་མནབས་པ་སྟེ། །བདག་གི་བླ་མས་གསུངས་པ་ཡང་། །ལྷན་ཅིག་སྐྱེས་པས་སྨད་དཀྲིས་ན། །རྡོ་རྗེ་མཁའ་འགྲོ་ཡི་ནི་གཟུགས། །རྟག་ཏུ་དུ་བ་མཆོག་
གི་མཆོག །དཀར་བ་དང་ནི་ཁྲག་གི་མདོག །ཁམས་དྲུག་གིས་ནི་བསྡུས་པ་ཡི། །ཁ་དོག་ལ་སོགས་མཚུངས་པའི་གཟུགས། །དང་པོ་ཉི་མ་ལྟ་བུའི་ཞལ། །ལྷ་མོ་སྐྲ་ནི་གྲོལ་བ་ཉིད། །གཞུང་ནི་འདི་གཉིས་བགྲོས་ནས་ནི། །སྙིང་ག་རུ་ནི་བསྒོམ་བྱ་ཞིང་། །ཇི་ལྟར་འདོད་པའི་
དེ་ཉིད་བྱ། །གཞན་ཡང་ཁྲག་གི་རྩ་རྒྱུད་དུ། །ཤིན་ཏུ་དམར་བར་འབབ་པ་ཡང་། །བུད་མེད་མེ་ཏོག་གཡས་ནས་སོ། །གཡོན་དུ་ཁུ་བ་འབབ་པ་ནི། །ཆུ་ཡི་རྒྱ་མཚོ་ལྟ་བུ་སྟེ། །དེ་ནི་དཔའ་བོའི་རང་བཞིན་ནོ། །རྐང་དང་རུས་པ་རྩ་རྒྱུས་རླུང་། །ལྔ་པ་ཁུ་བ་དང་ལྡན་པ། །ཕ་ལས་གྱུར་པ་
འདི་རྣམས་ཡིན། །མ་ཡི་ཤ་པགས་ཁྲག་དང་ནི། །ཆུ་དང་མེ་དང་བཅས་པ་ཉིད། །དེ་ཉིད་ཀྱིས་ནི་གང་གྲུབ་པ། །འདི་ནི་མགོན་པོ་ཧེ་རུ་ཀ །བསྐྱེད་དང་སྐྱེད་པར་བྱེད་པ་པོ། །ཕ་མ་གཉིས་ནི་དབྱེར་མེད་པས། །དཔལ་ལྡན་བདེ་མཆོག་བཤད་པ་འདི། །ཡོན་ཏན་ཀུན་གྱི་གཏེར་གྱུར་པ། །དངོས་

པོ་ཀུན་གྱི་རང་བཞིན་ནོ། །དེ་ལྟར་ཤེས་ནས་དེ་ཡི་གཟུགས། །སྲིད་གསུམ་བདེ་བ་སྟེར་བ་ནི། །དེ་ཉིད་རྣལ་འབྱོར་པ་ཡིས་བསྒོམ། །སྒྲ་ཡི་ཚུལ་ལ་དེས་འབྱུང་བ། །ཞེས་བྱ་ལ་སོགས་གང་འདོད་དེ། །དེ་དོན་བདག་གིས་བཤད་པར་བྱ། །འཇུག་པ་ཡི་ཡང་མཚན་ཉིད་ནི། །
རབ་ཏུ་འཇུག་པའི་དཀྱིལ་འཁོར་སོགས། །ཕྱི་རོལ་རྣམ་གཅིག་མཚན་ཉིད་དོ། །སངས་རྒྱས་ཀུན་གྱི་རང་བཞིན་ཏེ། །སངས་རྒྱས་ཀུན་གྱིས་རབ་ཏུ་གསུངས། །ལྡོག་པ་བདག་གིས་བརྗོད་པར་བྱ། །འཁོར་ལོ་སྡོམ་པར་ཡང་དག་གནས། །ལྷན་ཅིག་སྐྱེས་པ་རྣམས་ཀྱི་གཟུགས། །དེ་ནི་
སྙིང་གར་རྟག་ཏུ་གནས། །ཕྱི་རོལ་ནང་དུ་མཉམ་པ་ཉིད། །དཀྱིལ་འཁོར་གྱི་ཡང་སེམས་ཀྱིས་ནི། །རྣམ་པར་དགོད་པ་བཤད་ནས་སོ། །དེ་ནི་ལུས་གནས་བཤད་པར་བྱ། །ཧེ་རུ་ཀ་ཡི་རོལ་པར་བརྗོད། །རྣམ་དག་དང་ནི་ཧེ་རུ་ཀ །ཡན་ལག་དག་དང་ཉིང་ལག་དང་། །ལྷན་ཅིག་སྐྱེས་པས་
མཉམ་བཞག་པས། །ཕྱིས་ནི་རྣལ་འབྱོར་པ་ཡིས་བསྒོམ། །གོ་རིམས་བཞིན་དུ་ལུས་སྐྱེས་ནི། །རྡོ་རྗེ་ཕུར་བུ་ལྷན་ཅིག་སྐྱེས། །བཅིངས་པ་ཐིག་སྐུད་རབ་ཏུ་ལྡན། །ཤིན་ཏུ་མཚམས་མེད་བརྟན་པར་བཅིངས། །གུར་ནི་རུས་པའི་ཕྲེང་བ་ཉིད། །མཆོད་པའི་ཆོ་ག་ཁྱད་པར་བཟང་། །
ཡན་ལག་ཕྱག་རྒྱས་བརྒྱན་པ་དང་། །གོ་མཚམས་མེད་པར་བཅིངས་པ་ནི། །དེ་ནི་གོ་ཆ་ཆེན་པོར་ལྡན། །གང་ཞིག་མི་དམིགས་པ་ཡིས་བརྩེ། །སེམས་ཅན་ཀུན་ལ་ཕན་མཛད་མ། །ལྷ་དང་ལྷ་མིན་མི་རྣམས་ལ། །འདི་དག་ཐམས་ཅད་དེ་ཡིས་ཁྱབ། །རྐང་པའི་མཐིལ་དུ་རྩོམ་པའི་
རླུང་། །ཡང་དག་གནས་ཤིང་ལྟེར་སོན་པར། །མེ་ཡི་དཀྱིལ་འཁོར་གཟི་བརྗིད་འབར། །ལྟོ་བར་ཆེས་ནི་དཀར་བ་ཡི། །ཆུ་ནི་མཛེས་པ་ཉིད་ཀྱི་གཟུགས། །བྲང་དུ་ཡང་ནི་དབང་ཆེན་ནི། །ཁ་དོག་སེར་པོས་རྣམ་པར་སྤྲས། །མགྲིན་པའི་སྟེང་དུ་བརྟེན་པ་ཡི། །རྩེ་བརྒྱད་ལྡན་
པའི་རི་རབ་པོ། །བདུན་ལྡན་ཉི་མ་ཨཱ་ལི་ཟླ། །དྲི་མེད་ཟླ་བའི་གཟི་བརྗིད་ཉིད། །ནང་དུ་འགྲོ་དང་འོང་བ་དང་། །ཆུ་སྐྱེས་འདབ་མ་སུམ་ཅུ་དྲུག །ལྡན་པར་རྡོ་རྗེའི་དབུས་སོན་པར། །ཨཱ་ལི་ཀཱ་ལི་ལས་བྱུང་གྲུབ། །མཛེས་པའི་སྤྱི་བོར་ཧཱུཾ་བྱས་ཏེ། །དེར་གནས་གསེར་གྱི་གནས་སུ་ནི། །

སྣ་ཚོགས་དབུས་སུ་དང་པོའི་མིང་། །ཞེས་བྱ་ལྷན་ཅིག་སྐྱེས་པ་ཡང་། །དྲི་མེད་ཟླ་བའི་གཟི་བརྗིད་ཉིད། །ཡན་ལག་ཀུན་གྱི་མཚམས་སུ་ནི། །རིམ་གྱིས་འགྲོ་བར་བྱེད་པདྨ། །སྣ་རྩེ་དབུས་ཀྱི་གནས་སུ་ཡང་། །རིམ་པས་སྐྱེད་པར་བྱེད་པ་ནི། །སུམ་ཅུ་རྩ་དྲུག་རོར་ལྡན་པའི། །ཤིན་ཏུ་
མཛེས་པའི་རྩ་རྣམས་ཀྱིས། །སྤྱི་སྐྱེས་ཐོག་མ་མེད་པ་ཡི། །སངས་རྒྱས་ཉིད་ནི་བསྐུལ་བར་བྱ། །མཁའ་འགྲོ་བྱ་བཞིན་རྣམ་དག་ཁམས། །མཁའ་འགྲོ་མ་ཡི་དྲ་བཞེས། །འདི་ཡི་དོན་ནི་ཡང་དག་གྲགས། །རྒྱ་མཚོ་ཤིན་ཏུ་སྣ་ཚོགས་པའི། །འགྲམ་དང་རི་ཡི་དབང་པོར་ལྡན། །ཟབ་
མོ་སྣ་ཚོགས་སྙིང་པོ་ཡང་། །གདོད་ནས་གྲུབ་པའི་དུར་ཁྲོད་ཉིད། །རྒྱལ་མཚན་བ་དན་སྣ་ཚོགས་དང་། །དྲི་ལ་བུ་དོ་ཤལ་ཤིན་ཏུ་མཛེས། །གསུམ་གྱིས་བསྐྱེད་པའི་དཀྱིལ་འཁོར་ནི། །དེ་ཡི་ལུས་སུ་དཀྱིལ་འཁོར་ཉིད། །སྲད་བུ་མཆོག་གིས་ཤིན་ཏུ་སྤྲས། །རྔ་ཡབ་ཀྱིས་ནི་གཡོབ་པ་
དང་། །སོ་ཕག་རྣམ་པར་དག་པ་ཡི། །རྡུལ་ཚོན་དྲི་མ་མེད་པ་དང་། །བུམ་པ་ལ་སོགས་གཞག་པ་དང་། །དེ་བྱུང་ལྡན་པར་གང་བས་ནི། །ལྷན་ཅིག་སྐྱེས་གནས་བྲི་བར་བྱ། །ཐལ་བ་རོ་བསྲེགས་ལས་བྱུང་བ། །པད་གནས་ཁྲོ་བ་མེད་པ་ཡིས། །སྦྱོར་བའི་ཡེ་ཤེས་ཤིན་ཏུ་མཛེས། །
ཕག་མོ་གཉིས་སུ་མེད་པའི་གཟུགས། །ཧེ་རུ་ཀ་དེ་སེམས་སུ་བརྗོད། །རྒྱུ་ལྔ་ཞེས་བྱའི་རིག་པ་ནི། །རྡོ་རྗེ་ཞེས་ནི་མངོན་པར་བརྗོད། །དེར་གནས་ས་བོན་རྫོགས་པ་ནི། །དེ་ནི་ཧེ་རུ་ཀ་དཔལ་བརྗོད། །གཉིས་མེད་དོན་གྱིས་ཤྲཱི་ཡི་སྒྲ། །ཧེ་ནི་རྒྱུ་ནི་རྣམ་སྤངས་པ། །རུ་ཡི་གཟུགས་ནི་འཇིགས་
པའི་དོན། །ཀ་ནི་གང་དུའང་མི་གནས་པའོ། །ཨཱ་ལི་ཀཱ་ལི་མཉམ་སྦྱོར་བས། །དཀར་ཞིང་དམར་བའི་རང་བཞིན་ཅན། །ཤྲཱི་ནི་ཡང་དག་བཤད་པ་ནི། །ཐམས་ཅད་སྐྱེད་པར་བྱེད་པའི་རྒྱུ། །ཤྲཱི་ནི་ཀླ་ཀློའི་སྐད་ཀྱིས་ནི། །བྷ་གའི་དོན་དུ་མངོན་པར་བརྗོད། །སེམས་ནི་ཧེ་རུ་ཀ་ཉིད་དེ། །
དཔལ་ཧེ་རུ་ཀར་རབ་ཏུ་བསྒྲགས། །བྷ་གའི་སྒྲ་ནི་ངག་ལམ་འདས། །རུ་ནི་དྲི་མ་རྣམ་པར་སྤངས། །ཧེ་ནི་རྒྱུ་ནི་རྣམ་འཇིག་པ། །ཕག་མོའི་སྒྲར་ནི་རབ་ཏུ་གྲགས། །སྐྱེས་པར་བྱེད་པའི་རྒྱུ་ཡི་ཕྱིར། །རལ་པའི་རྩ་བ་ཞེས་བྱར་བཤད། །སྣ་ཚོགས་སེམས་ཅན་དོན་བྱེད་ཕྱིར། །སྣ་ཚོགས་རྡོ་རྗེར་

རྣམ་པར་གནས། །བྱང་ཆུབ་སེམས་ནི་ཟླ་བར་གསུངས། །དཔལ་ལྡན་བདེ་ཆེན་འཁོར་ལོར་གནས། །དེར་གནས་རྟག་ཏུ་འཛག་པ་ནི། །རྡོ་རྗེ་པདྨར་ཡང་དག་གནས། །ཆ་ཀུན་དུ་ནི་ཡོངས་གང་བས། །རྒྱ་མཚོ་ཡི་ནི་ལམ་རྣམས་སུ། །འཛག་པ་ཡི་ནི་ལམ་པ་སྟེ། །ལྟེ་བའི་
འགྲམ་གནས་བདུད་རྩི་ནི། །སྔར་གསུངས་རྒྱལ་བའི་ཚོགས་རྣམས་སྐྱེས། །སྟོང་པའི་རྣམ་པར་སྦྱོར་བ་ལས། །ལྷ་དང་ལྷ་མིན་མི་རྣམས་ནི། །རང་བཞིན་གཅིག་པས་དག་པ་ནི། །ཤིན་ཏུ་དག་པས་བསྡིགས་པར་བྱེད། །བྱང་ཆུབ་སེམས་བྱུང་ཐལ་བ་ཡིས། །ཡན་ལག་ཀུན་ལ་རྣམ་པར་གནས། །ཐལ་
བའི་དག་པར་རྟག་ཏུ་བརྗོད། །ཕྱི་རོལ་ནང་དུ་ཡོངས་དག་གནས། །ཡན་ལག་བཅུ་གཉིས་ལས་བྱུང་ཕྱིར། །ཕྱག་ནི་བཅུ་གཉིས་རྣམས་དང་ལྡན། །ཞལ་བཞི་ཡང་དག་གསུངས་པ་ནི། །རྣམ་ཐར་བཞི་ནི་དག་པའོ། །ལྷ་མོ་གཟུགས་ཅན་མཁའ་འགྲོ་མ། །དུམ་སྐྱེས་མ་དང་ལཱ་མཱ་ཉིད། །
གྲུབ་པའི་རྣལ་འབྱོར་མ་རྣམ་བཞི། །རྒྱུ་དང་མི་རྒྱུ་སྐྱོང་བར་མཛད། །གཉིས་མེད་རྣམ་པའི་རྣལ་འབྱོར་གྱིས། །གང་ཚེ་དབང་སོགས་འཐུངས་པ་ནི། །དེ་ཚེ་བཟའ་བ་ཞེས་བྱར་བརྗོད། །ཕྱག་རྣམས་ཉིད་ཀྱི་མཚན་ཉིད་དོ། །རྩེ་གསུམ་སྐུ་གསུམ་དག་པའི་ཕྱིར། །གླང་པོ་གཏི་མུག་རྣམ་པར་
འཇིག །ལུས་ངག་ཡིད་གསུམ་ལས་བྱུང་བའི། །སྐྱོན་ནི་དགྲ་སྟས་གཅོད་པར་བྱེད། །གྲི་གུག་རྣོན་པོས་སེམས་ཅན་དོན། །བརྩོན་འགྲུས་ཡང་དག་ལྡན་ཕྱིར་འཕྱར། །རྟག་ཏུ་དགའ་བའི་རང་བཞིན་གྱིས། །སྒྲ་ནི་ཅང་ཏེའུ་བརྟག་པར་བྱ། །ཡེ་ཤེས་ལྔ་ཡི་རང་བཞིན་པས། །རྡོ་རྗེ་
སྟོང་པའི་མེས་བསྲེགས་པ། །བྱང་ཆུབ་སེམས་ཀྱི་རང་བཞིན་གྱི། །ཁ་ཊྭཱཾ་ག་ནི་ཡན་ལག་གནས། །ཐོད་འགྲོ་སྐྱོང་བ་ཐོད་པའི་སྐུ། །དེས་ན་དེ་ནི་ཐོད་པར་བརྗོད། །སྙིང་རྗེའི་རོ་ཡིས་གང་བ་ནི། །འཐུངས་པ་ཧེ་རུ་ཀ་ཉིད་རྒྱལ། །ཞགས་པས་སྐྱོན་ནི་རྣམ་པར་བཅིངས། །ལུས་ཅན་མ་
ལུས་གཞན་དབང་འགྱུར། །མགོ་བོ་ཚངས་པའི་རང་བཞིན་ཉིད། །དྲིལ་བུ་ཤེས་རབ་རང་བཞིན་ཕྱིར། །ཡིག་འབྲུ་ལྔ་བཅུའི་མགོ་བོ་རྣམས། །རང་བཞིན་གྱིས་ནི་རྣམ་པར་མཛེས། །མགུལ་གྱི་ནོར་བུ་ཕྲེང་བས་བརྒྱན། །གྲུབ་པའི་གནས་ནི་ཀུན་གྱི་བདག །མཆེ་བ་བཞི་དང་རབ་ལྡན་

པས། །བདུད་བཞི་རྣམ་པར་དྲལ་བར་མཛད། །ཚེམས་ཕྲེང་རྟག་ཏུ་གཉིས་མེད་པ། །མེ་སྟག་ཚོགས་དང་ཡང་དག་ལྡན། །ཕ་རོལ་ཕྱིན་དྲུག་རྣམ་དག་པ། །ཕྱག་རྒྱ་དྲུག་གིས་ལེགས་པར་བརྒྱན། །ནམ་མཁའི་གོས་ཀྱི་རང་བཞིན་གྱིས། །སྟག་གི་པགས་པ་ཆ་མེད་པར། །ཀུན་
གྱི་འགྲོ་བ་ཐམས་ཅད་ནི། །སྟོང་པའི་སྦྱོར་བས་གཡས་བརྐྱང་པ། །ཧེ་རུ་ཀ་ཡི་ཁྱད་པར་ལས། །དེས་ན་གཡས་བརྐྱང་བ་ཞེས་བཤད། །གཡོན་པའི་ཡན་ལག་བསྐུམ་པ་ཞེས། །ཚིག་ཏུ་བརྗོད་པས་གཡས་བརྐྱང་བ། །མཚན་ཉིད་ཡང་དག་ཐོབ་པ་ཡིན། །དཔལ་ལྡན་ཧེ་
རུ་ཀ་འབྱུང་བ། །འཁོར་ལོ་ཚོགས་ནི་ཀུན་དུའོ། །སློབ་དཔོན་གཞན་གྱི་ལུགས་དག་གིས། །གཡས་པའི་ཞབས་ནི་བསྐུམ་པར་འདོད། །བློ་བཟང་ཁ་ཅིག་གར་ཡང་བྱེད། །གཉིས་ཀ་འདོད་པ་མ་ཡིན་ཏེ། །གཡོན་ན་གཡོན་པ་སྐྱེ་བོས་མཛེས། །དོན་མཆོག་ཐམས་ཅད་སྦྱིན་པར་
ནུས། །གཡོན་གྱིས་རྟག་ཏུ་རྣལ་འབྱོར་པའི། །གནོད་པ་ཀུན་ལས་འཇིགས་རྒྱལ་བྱེད། །གང་ཕྱིར་སྡོམ་པ་གཙོ་བོ་ཡིས། །ངེས་པར་ཐམས་ཅད་གཡོན་ལས་འབྱུང་། །དེ་ཕྱིར་ཆོ་གས་ནུས་པ་ཀུན། །ལས་ནི་གཡོན་པས་རྟག་ཏུ་བྱ། །སེམས་དང་སེམས་མིན་འགོག་པའི་ལམ། །མཚོ་
སྐྱེས་སུ་ནི་བུས་གང་མཚོན། །རྡོ་རྗེ་མཐར་ནི་རྣམ་བྱུང་བའི། །རོ་མཉམ་རྩེ་གཅིག་དེ་ཡིན་ཏེ། །ཕག་མོ་སྦྱོར་མཆོག་སྐྱེས་འཛིན་རིག །གང་ཕྱིར་གཙོ་བོར་གནས་པ་ནི། །ལྷ་མོ་མཆོག་གནས་སྡོམ་པ་སྟེ། །དེ་ཕྱིར་གཡོན་པའི་ཆོ་གས་བརྒྱན། །ཉི་ཟླ་རྣམ་དག་སྲིད་ལས་སྐྱེས། །རང་བཞིན་གྱིས་
ནི་རོ་མཉམ་དེ། །པདྨ་མཆོག་གི་གནས་སུ་ལྷུང་། །རི་སྐྱེས་རང་བྱུང་ཡང་དག་ལྡན། །ཌེ་ནི་མཁའ་འགྲོ་མ་ཞེས་བྱ། །སངས་རྒྱས་ཁམས་སུ་རབ་ཏུ་བརྟགས། །ནམ་མཁའ་ཀུན་དུ་རྒྱུ་གྲུབ་པས། །མཁའ་འགྲོ་མ་ཞེས་བྱ་བར་བརྗོད། །དེ་ལས་སྐྱེས་པ་གཟུགས་ཇི་བཞིན། །གཟུགས་ཅན་
མ་ཞེས་མངོན་པར་བརྗོད། །གཟུགས་ལས་རིམ་པས་སྐྱེས་པ་ཉིད། །མཚོན་པར་ཡང་ནི་དུམ་སྐྱེས་མ། །གང་ཡང་མཛེས་པས་ཡོངས་གང་བ། །སྐྱེས་པ་བུད་མེད་ལས་བྱུང་བ། །མཚན་མ་ཀུན་ནི་ཡོངས་སུ་རྫོགས། །དེས་ན་ལཱ་མར་རབ་ཏུ་གྲགས། །ང་རྒྱལ་ལ་སོགས་ཀུན་བྲལ་བ། །དེས་ན་བླ་

རེ་རུ་ནི་གྲགས། །པདྨ་ཆོས་ཀྱི་དབྱིངས་ཡིན་ཏེ། །དེ་ནི་སངས་རྒྱས་ཀུན་གྱི་གནས། །འདོད་ཆགས་སྐྱོན་དང་བྲལ་བ་ནི། །བཞི་པའི་གནས་སྐབས་དང་ལྡན་པས། །རྣམ་པ་ཀུན་གྱི་མཆོག་ལྡན་པ། །དེ་ནི་དཔའ་བོ་ཞེས་བྱར་བརྗོད། །དེ་ནས་ཐམས་ཅད་ཡང་དག་ཐོབ། །
སྟོང་པ་སྙིང་རྗེའི་བདག་ཉིད་ཅན། །ལྷན་ཅིག་སྐྱེས་དགའི་ངོ་བོ་གང་། །དེ་ནི་དཔའ་མོའི་དབང་ཕྱུག་ཡིན། །འདི་ནི་དགའ་བའི་བརྗོད་མེད་པ། །འཁོར་ལོ་སྡོམ་པ་སྡེ་ཚན་མཐའ། །རྟག་ཏུ་ཁ་ནི་འོག་གིས་ནི། །ཡན་ལག་ཀུན་གྱི་ཡིད་འཕྲོག་འཇག །འདོད་ཆགས་ལ་སོགས་རྩྭ་དང་མཚུངས། །ཡེ་
ཤེས་སྲིན་བུས་ཟོས་པ་ནི། །མི་རྟོག་པ་ཡི་རང་བཞིན་གྱིས། །ཀུན་རྫོབ་ཏུ་ནི་དེ་མྱོང་ངོ་། །ནམ་མཁའ་པདྨའི་མཁའ་དབུས་སུ། །མཁའ་སྤྱོད་དུ་ནི་འགྲོ་བར་འདོད། །དེར་གནས་ཤིན་ཏུ་རྣམ་སྤྲོས་པ། །མཁའ་སྤྱོད་འཁོར་ལོར་ཡང་དག་བཤད། །ས་ཞེས་བྱ་བ་རབ་ཏུ་གནས། །ལྟེ་བའི་
པདྨར་སྐྱེ་དང་འཆི། །དེར་གནས་ཤིན་ཏུ་ལེགས་པར་བྱ། །ས་སྤྱོད་འཁོར་ལོར་ཡང་དག་བཤད། །ས་འོག་ཅེས་ནི་གང་གསུངས་པ། །པདྨར་བྱང་ཆུབ་སེམས་ལྷུང་བ། །དྲི་མེད་ཡིད་ཀྱི་ཕ་རོལ་ཏུ། །ས་ཡི་འོག་ཏུ་གནས་པའི་སེམས། །ཆོས་དང་ལོངས་སྤྱོད་སྤྲུལ་པ་ཡིས། །ཧེ་རུ་ཀ་ཡི་རྣམ་
པར་གནས། །ཨཱ་ལི་ཀཱ་ལི་མཉམ་ལྡན་པ། །ལྷན་ཅིག་སྐྱེས་པའི་དགའ་བས་མཛེས། །ཨཱ་ཁྱཱ་སྤྲུལ་པའི་འཁོར་ལོ་ནི། །པདྨའི་ནང་དུ་ཡང་དག་གནས། །ལྷན་ཅིག་སྐྱེས་པའི་རོལ་པ་སྟེ། །འཇིག་རྟེན་གསུམ་གྱི་རྒྱས་པར་བརྗོད། །ཨོཾ་ཏྲཱྃ་ཧྲཱིཿཁྃ་པདྨ་ཕྱོགས་ཕྱོགས་འདབ་མ་ལ། །
ལཱྃ་མཱྃ་པཱྃ་ཏཱྃ་མཚམས་ཆ་ལ། །དབུས་སུ་ཧེ་རུ་ཀ་ས་བོན། །ལྟེ་བ་མཆོག་ཏུ་པད་རང་གནས། །ཆོས་ཀྱི་ལྟེ་བ་པད་ཆེན་པོར། །སྟོང་པའི་རྡོ་རྗེ་འཆང་བ་གནས། །དེར་གནས་རྟག་ཏུ་འཛག་པ་སྟེ། །འདོད་པའི་དོན་ཀུན་གྲུབ་པར་བྱེད། །དེ་སྟེང་ལོངས་སྤྱོད་འཁོར་ལོ་ལ། །ཨོཾ་གྱི་ཡི་
གེས་མཚན་པ་ཡི། །ཁ་ནི་རྟག་ཏུ་གྱེན་ཏུ་བལྟ། །ཨ་ཨི་ལྷན་ཅིག་ཨུ་ཨེ་ནི། །རྣལ་འབྱོར་མ་མཆོག་དཔའ་བོར་ལྡན། །དེ་སྟེང་མགྲིན་པའི་གནས་སུ་ནི། །དེ་རུ་མཁའ་འགྲོ་མ་གནས་པ། །དེར་ནི་རྟག་ཏུ་གནས་པ་ནི། །མཆོག་ཏུ་དགའ་བ་ཉིད་དུ་འདོད། །བདེ་བ་ཆེན་པོའི་འཁོར་

ལོར་ཧཱུཾ། །ཟླ་བའི་འོད་ཟེར་ལྟར་འཛག་འདོད། །དེར་ནི་འགྲོ་དང་འོང་བར་ནི། །མིག་གིས་ཀྱང་ནི་མཐོང་མི་འགྱུར། །མྱུར་བ་སྟེང་དུ་རྣམ་པར་བཤད། །རླངས་པ་ངོས་སུ་རྣམ་པར་གནས། །འཆིང་བ་དབུས་སུ་ཡང་དག་གནས། །དལ་བ་རྟག་ཏུ་རབ་ཏུ་གྲགས། །རྒྱུ་མཐུན་དང་ནི་
རྣམ་སྨིན་དང་། །སྐྱེས་བུ་དེ་བཞིན་མཚན་ཉིད་མེད། །འདིར་ནི་འབྲས་བུ་རྣམ་པ་བཞི། །དགའ་བ་རྣམས་སུ་རབ་ཏུ་གྲགས། །ཆུང་ངུ་འབྲིང་དང་ཆེན་པོ་དང་། །ཆེན་པོ་ལས་ཀྱང་ཆེན་པོ་སྟེ། །སེམས་ཀྱི་དབྱེ་བ་རྣམ་པ་བཞི། །མིད་ལ་སོགས་པ་རྣམ་པར་འཕྲུལ། །ལུས་ལ་སྤྲུལ་པའི་
འཁོར་ལོ་ནི། །ངེས་པར་ལྟེ་བ་ལས་སྐྱེས་ཏེ། །དེ་ནི་སྣ་ཚོགས་སྐད་ཅིག་བཤད། །ཆོས་ཀྱི་རང་བཞིན་སྐྱེ་བ་ནི། །རྟག་ཏུ་སྡུག་བསྔལ་ཞི་བའོ། །རྣམ་པར་སྨིན་ཉིད་སྙིང་ག་ལས། །རྟག་པ་རུ་ནི་སྐྱེད་པར་བྱེད། །ལོངས་སྤྱོད་ཅེས་ནི་བྱ་བ་ལ། །དུ་མ་རྣམས་ཀྱི་ཆ་ཤེས་བྱ། །དེ་ནི་རྣམ་ཉེད་རང་
བཞིན་ནོ། །སྤྱི་བོར་ཤེས་དང་ཤེས་བྱ་གནས། །ཡིད་ལ་རྣམ་པར་སྤངས་པ་སྟེ། །དེ་ནི་མཚན་ཉིད་བྲལ་རང་བཞིན། །ལྷན་ཅིག་སྐྱེས་སོགས་དགའ་བ་བཞི། །ལྷན་ཅིག་སྐད་ཅིག་དག་ལས་སྐྱེས། །འཁོར་ལོའི་གཙོ་བོར་སྐད་ཅིག་ནི། །གཞན་ཡང་དགའ་བའི་མཚན་ཉིད་ནི། །ཕྲེང་བ་
ཙནྡན་བུད་མེད་སོགས། །གང་ཚེ་མཐོང་པས་བདེ་འཛིན་པ། །དེ་ཚེ་དགའ་བར་ཡང་དག་བཤད། །སེམས་ཅན་ཀུན་ལ་ཡང་དག་གནས། །རྡོ་རྗེ་པདྨར་མཉམ་སྦྱོར་བས། །ཇི་ལྟར་སེམས་ནི་རྣམ་པར་གནས། །དེ་ཡི་སེམས་གང་མཚོན་པ་ནི། །དེ་ཚེ་མཆོག་ཏུ་དགའ་བར་བརྗོད། །
སྦྱོར་བ་ལས་ནི་དགའ་བྲལ་སེམས། །བདེ་བའི་མཐར་ནི་ཡང་དག་གནས། །དེ་ནི་དགའ་བྲལ་ཞེས་བྱར་གསུངས། །སྐྱེ་དང་འཇིག་པར་རབ་ཏུ་གྲགས། །དགའ་དང་མཆོག་ཏུ་དགའ་བ་དང་། །དགའ་བྲལ་དང་ནི་རྣམ་གསུམ་མོ། །ལྷན་ཅིག་སྐྱེས་པའི་རང་བཞིན་འདི། །བརྟན་
གཡོ་ཀུན་སོགས་རང་བཞིན་ཏེ། །ལྷན་ཅིག་སྐྱེས་པས་ཐམས་ཅད་གང་། །བསམ་ཡས་སུ་ནི་རྒྱལ་བས་གསུངས། །གང་ཕྱིར་བརྗོད་མེད་ཀུན་འགྲོ་བ། །ཡེ་ཤེས་ཧེ་རུ་ཀ་རུ་བརྗོད། །ཤེས་རབ་གཞན་གྱི་གནས་སུ་བརྗོད། །གང་གི་གནས་འདི་ཐབས་ཉིད་དེ། །འདི་དག་གཉིས་སུ་མེད་

པས་ནི། །སྦྱོར་བའི་གནས་སུ་གནས་པ་ཡིན། །དེ་ལས་བྱུང་བ་དེ་ཉིད་གནས། །དེ་དང་བྲལ་བར་གང་གནས་པ། །ལྷན་ཅིག་སྐྱེས་ཞེས་ཡང་དག་བརྗོད། །ངག་གི་ལམ་འདས་སྤྱོད་ཡུལ་ཉིད། །བདག་གི་དེ་ཉིད་རྟག་སྔགས་དང་། །དཀྱིལ་འཁོར་དེ་ཉིད་ཡང་དག་ལྡན། །
ཆོས་དང་ལོངས་སྤྱོད་སྤྲུལ་པ་འདི། །འདི་ཡི་སྐུ་ལ་རྣམ་པར་གནས། །དམིགས་པ་ལས་ནི་སངས་རྒྱས་ཡིན། །དམིགས་པ་མེད་པ་རྡོ་རྗེ་འཛིན། །གནས་གཉིས་དག་ཏུ་མ་བརྟེན་པ། །ཤེས་རབ་གཉིས་མེད་ཉེ་བར་གསུངས། །གནས་བཅུ་ལ་སོགས་ས་དག་ནི། །ཕ་རོལ་ཕྱིན་མཆོག་བཅུ་
པོ་དེ། །ཉི་ཤུ་རྩ་བཞིར་ཕྱེ་བ་ཡིས། །ཐམས་ཅད་ལུས་ལ་རྣམ་པར་གནས། །འདི་རྣམས་རིམ་པ་ཇི་ལྟ་བར། །སྤྱི་བོ་སྤྱི་གཙུག་ལ་སོགས་དང་། །ཇི་སྲིད་པུས་མོ་གཉིས་དག་ཏུ། །འདི་རྣམས་ཀྱི་ནི་གནས་དག་ཏུ། །བདག་པོ་ལ་སོགས་བལྟ་བར་བྱ། །སྐྱེད་པ་དང་ནི་གནས་པ་དང་། །
རབ་ཏུ་ཐིམ་པ་ཞེས་བྱ་བ། །པུལླཱི་ར་ནི་བདག་པོ་སྟེ། །འབར་བ་འཛིན་པར་ལོངས་སྤྱོད་གནས། །ཨཽ་ཌྱན་དུ་ནི་ཐིམ་པར་གསུངས། །གནས་སོགས་ཞིང་དང་དུར་ཁྲོད་དུ། །ཡན་ལག་ཀུན་ལ་ཐིམ་པར་འགྱུར། །སྡོམ་པ་ཞེས་བྱའི་མཚན་ཉིད་དོ། །སྤྲུལ་པ་ཡིས་ནི་གང་དུ་སྐྱེས། །
ལོངས་སྤྱོད་རྫོགས་པའི་རྒྱུ་ཡི་གནས། །ཆོས་ཀྱི་སྐུ་ཡི་རང་བཞིན་གྱིས། །ཐིམ་པར་འགྱུར་བར་ཐེ་ཚོམ་མེད། །དེ་ལྟར་སྐུ་ཡི་ཆ་རྣམས་ཀྱི། །དབང་དང་ལོངས་སྤྱོད་དག་དང་ཐིམ། །ཇི་ལྟར་གནས་སུ་དེ་བཞིན་དུ། །དགའ་བ་རྟག་ཏུ་སྐྱེ་བར་འགྱུར། །སྐྱེ་བ་དང་ནི་གནས་པ་དང་། །རིམ་པ་
ཡིས་ནི་རབ་ཐིམ་འགྱུར། །རྡོ་རྗེ་མཁའ་འགྲོ་མ་བསྐུལ་བས། །གནད་ཀྱི་སྒོ་ནས་དབྱེ་བར་བྱ། །དཔལ་ལྡན་འབར་འཛིན་བུ་གར་ནི། །དེ་ཡི་སྐད་ཅིག་བདེ་འབྱུང་བས། །བདེ་བས་ཐིག་ལེ་སྐྱེས་འགྱུར་ཞིང་། །ཐིག་ལེ་བརྟན་དང་གཡོ་བའི་བདག །དེ་ནི་ཕག་མོ་དེ་སངས་རྒྱས། །དཔའ་བོ་གཉིས་
མེད་ལྡན་པ་ཡིན། །ཕུང་སོགས་སངས་རྒྱས་དེ་རྣམས་དང་། །ཁམས་ཀྱིའང་འབྱུང་ཁུངས་རྣམ་པར་བརྗོད། །བུད་མེད་སྐྱེས་པ་གཉིས་སུ་བརྟགས། །ལྷན་ཅིག་སྐྱེས་པ་རྣམ་པ་གཉིས། །ཐམས་ཅད་ཡུལ་དུ་བརྗོད་པ་ནི། །ནམ་མཁར་ཐིམ་པས་བདུད་རྩིར་འགྱུར། །དེ་ལ་གང་དག་སྤྱོད་པ་ནི། །

ཐམས་ཅད་མཁའ་ལ་སྤྱོད་པར་འགྱུར། །མཁའ་འགྲོ་ཀུན་གྱི་དྲ་བ་ཡི། །བདེ་བ་དག་གི་སྙིང་པོའོ། །འདིར་ནི་ཕྲེང་མེད་སྔགས་བཟླས་མེད། །ལྷན་ཅིག་སྐྱེས་པས་ཐམས་ཅད་གནས། །དེ་ཕྱིར་རྣམ་རྟོག་མེད་པ་ཡིས། །འབད་པས་གུས་པ་བསྐྱེད་པར་བྱ། །འཇིགས་དང་ངོ་ཚ་
རྟག་ཏུ་སྤང་། །རྣལ་འབྱོར་རོལ་པས་གནས་པར་བྱ། །འདི་ལྡན་བཟླས་བརྗོད་སྦྱིན་སྲེག་དང་། །མཆོད་སྦྱིན་བསམ་གཏན་དཀྱིལ་འཁོར་སོགས། །བུམ་པ་རྡུལ་ཚོན་ཐིག་ཆོ་ག །ལུས་ལ་ལྷན་ཅིག་སྐྱེས་གྲུབ་པས། །སྲུབ་དང་བསྲུབ་པའི་སྦྱོར་བ་ལས། །ཡེ་ཤེས་མེ་ནི་ཤིན་ཏུ་
འབར། །ལས་ཀྱི་རླུང་གིས་བསྐུལ་ནས་ནི། །ལྟེ་བའི་པདྨར་རྣམ་པར་གནས། །དུ་བ་འཐུལ་བ་འབར་བ་དང་། །ལྷན་ཅིག་སྐྱེས་པའི་རང་བཞིན་གསལ། །ཡེ་ཤེས་འཁོར་ལོར་སོན་པ་ཡིས། །སངས་རྒྱས་རྣམས་ནི་བསྲེགས་ནས་ནི། །ལོངས་སྤྱོད་རྫོགས་པའི་འཁོར་ལོར་ཞུགས། །
ཐབས་ལ་མཆོད་པ་བྱས་ནས་ནི། །མཛོད་སྤུར་ཡིད་ནི་ཞུགས་གྱུར་པས། །ཨཽ་ཌྱན་ཞེས་ནི་བྱ་བ་ཡི། །གནད་ཀྱི་སྒོ་ནས་འཐོན་ནས་ཀྱང་། །ཛཱ་ལནྡྷ་རར་རབ་ཏུ་ཞུགས། །བདེ་གཤེགས་ཐམས་ཅད་བསྲེགས་ནས་ནི། །ལྷ་མོ་ཡིད་ཀྱི་ཤུགས་ལྡན་ན། །དམིགས་ཀྱིས་མཐོང་བར་མི་
འགྱུར་རོ། །སངས་རྒྱས་ཐམས་ཅད་བསྐུལ་ནས་ནི། །བདུད་རྩི་ཕུང་པོར་བྱས་ནས་ཀྱང་། །འོ་མའི་རྒྱུན་ལྟར་འཛག་པར་འགྱུར། །གསེར་གྱི་སྒོར་ནི་ཞུགས་པར་འགྱུར། །ལོངས་སྤྱོད་འཁོར་ལོར་གནས་ནས་ཀྱང་། །ས་ཡི་བུ་གར་འཛག་པར་འགྱུར། །ཟོ་ཆུན་རྒྱུན་མོ་ལྟ་
བུ་ནི། །སེམས་ཀྱི་ངོ་བོར་ངལ་བསོ་ནས། །རྒྱུན་མི་འཆད་པར་བསྲེགས་ནས་ཀྱང་། །རྒྱལ་བ་རྣམས་ནི་མཉེས་པར་བྱེད། །ཡང་དག་ལས་ནི་རབ་ཏུ་འབྱུང་། །ལྟེ་བའི་པདྨར་ཡང་དག་གནས། །ཀུན་ནས་ཡང་ནི་འགྲོ་བ་དང་། །དེ་བཞིན་དུ་ནི་རྒྱུན་འོ་ཉིད། །མཁའ་འགྲོ་རྩ་ནི་ཀུན་
སྤྱོད་ནི། །བདེ་མཆོག་འཁོར་ལོར་བཤད་པའོ། །སྡོམ་པ་བཤད་པ་ཞེས་བྱ་བ། སློབ་དཔོན་ཆེན་པོ་བརྟུལ་ཞུགས་ཀྱི་སྤྱོད་པ་ལ་ཞུགས་པ་ནག་པོ་པས་མཛད་པ་རྫོགས་སོ།། །།ཛ་གོ་ཏ་ལར་འོར་སྟོན་ཆོས་འབྱུང་གིས་བསྒྱུར་བའོ།། ༄༅༅། །རྒྱ་གར་སྐད་དུ།

སཔྟ་ཨ་ཀྵར་སཱ་དྷ་ནཾ། བོད་སྐད་དུ། ཡི་གེ་བདུན་པའི་སྒྲུབ་ཐབས། དཔལ་རྡོ་རྗེ་མཁའ་འགྲོ་ལ་ཕྱག་འཚལ་ལོ། །བྱིས་པ་བུད་མེད་ཕལ་ཆེར་ནི། །རྒྱས་པར་གཟུང་དཀར་འགྱུར་བས་ན། །མདོར་བསྡུས་པའི་ཡང་མདོར་བསྡུས་ནས། །ཡི་གེ་བདུན་པ་བསྡུ་
བར་བྱ། །མཆོད་སོགས་སྟོང་ཉིད་བྱང་ཆུབ་ཀྱི། །སྔགས་ཀྱི་མཐར་ཐུག་འོག་ཏུ་ནི། །བརྩེར་ལྡན་ལུས་ཀྱི་དབུས་སོན་པའི། །རྡོ་རྗེ་མཁའ་འགྲོ་རབ་བསྒྲུབ་བྱ། །ཡཾ་རཾ་བཾ་ལཾ་འབྱུང་བ་བཞིའི། །དཀྱིལ་འཁོར་སྟེང་དུ་སུཾ་ལས་བྱུང་། །ལྷུན་པོ་རིན་ཆེན་སྣ་བདུན་དང་། །རྩེ་མོ་བརྒྱད་པ་བསམ་
པར་བྱ། །ཨོཾ་མེ་དི་ནཱི་བཛྲཱི་བྷ་པ་བཛྲ་བནྡྷ་ཧཱུཾ། ཨོཾ་བཛྲ་པྲཱ་ཀཱ་ར་ཧཱུཾ་བཾ་ཧཱུཾ། ཨོཾ་བཛྲ་པཉྫ་ར་ཧཱུཾ་བཾ་ཧཱུཾ། ཨོཾ་བཛྲ་བི་ཏཱ་ན་ཧཱུཾ་ཁཾ་ཧཱུཾ། ཨོཾ་བཛྲ་ས་ར་ཛཱ་ལ་ཏྲཱཾ་སཾ་ཏྲཱཾ། ཨོཾ་བཛྲ་ཛྭ་ལ་ཨ་ན་ལཱརྐ་ཧཱུཾ་ཧཱུཾ་ཧཱུཾ། རྡོ་རྗེ་ས་སོགས་དྲུག་བྱས་ནས། །འཁོར་ལོ་སྣ་ཚོགས་རྡོ་རྗེར་གནས། །སྣ་ཚོགས་རྡོ་རྗེའི་ཕྲེང་བས་
བསྐོར། །རྩིབས་དྲུག་ལ་ནི་བྲི་བར་བྱ། །འདིར་ནི་ཧཱུཾ་ལས་བྱུང་བ་ཡི། །རྡོ་རྗེ་མཁའ་འགྲོ་བདེ་ཆེན་པོ། །ཕྱག་དྲུག་ཞལ་གསུམ་སྤྱན་གསུམ་པ། །མཚན་ཀུན་གྱིས་མཚན་བསྒོམ་པར་བྱ། །དཔེ་བྱད་བརྒྱད་ཅུ་ཡང་དག་ལྡན། །ཁྱབ་བདག་ཨཱ་ལི་ཀཱ་ལིས་བྱུང་། །རྡོ་རྗེ་དྲིལ་བུས་སྙོམས་
པར་ཞུགས། །མི་ཡི་པགས་པ་རློན་པ་འཆང་། །གཡོན་པ་ཐོད་པ་ཁ་ཊྭཱཾ་ག །ཕྱག་གཡས་ན་ནི་མདུང་རྩེ་གསུམ། །ཐོད་པའི་ཕྲེང་བའི་ཅོད་པན་དང་། །རལ་པས་སྣ་ཚོགས་རྡོ་རྗེ་འཆང་། །ཟླ་བ་ཕྱེད་པའི་ཐོད་དང་ནི། །ཕྱག་རྒྱ་དྲུག་གིས་སྐུ་ལ་བཀླུབས། །མཐིང་དང་སེར་དང་ལྗང་གུའི་
ཞལ། །སྟག་གི་པགས་པའི་ན་བཟའ་གསོལ། །འཇིགས་བྱེད་དང་ནི་དུས་མཚན་མོ། །གཡས་བརྐྱང་བ་ཡིས་ཉི་མར་མནན། །མགོན་པོ་ཇི་ལྟ་དེ་བཞིན་དུ། །རྡོ་རྗེ་ཕག་མོའང་ཕྱག་ལ་སོགས། །ལྷ་མོ་བྱིན་པ་ཡང་དག་འཁྱུད། །མཆོག་ཏུ་དགའ་བས་མྱོས་པ་མོ། །ཛཿཧཱུཾ་བཾ་ཧོཿཡི་གེ་
འདིས། །ཡེ་ཤེས་དགུག་པ་ལ་སོགས་པ། །རྣལ་འབྱོར་མ་དྲུག་རྩིབས་དྲུག་ལ། །གཡོན་དུ་བསྐོར་བས་རྣམ་བསྐོར་བས། །དང་པོ་ལྷ་མོ་ཁྲག་འཐུང་མ། །གཉིས་པ་རྡོ་རྗེ་འཇིགས་བྱེད་མ། །གསུམ་པ་དྲག་གཏུམ་མ་དང་ནི། །བཞི་པ་རྡོ་རྗེ་སྣང་བྱེད་མ། །ལྔ་པ་རྡོ་རྗེ་དྲག་མོ་སྟེ། །

དྲུག་པ་རྡོ་རྗེ་མཁའ་འགྲོ་ཡིན། །སྔོན་མོ་སེར་མོ་ལྗང་གུ་དང་། །དམར་མོ་དུད་ཀ་དེ་བཞིན་དཀར། །སྐྲ་བཤིག་མ་ལ་དྲག་ཆེན་མ། །སྤྱན་གསུམ་མ་སྟེ་ཕྱོགས་ཀྱི་གོས། །ཕྱག་ནི་ཅིག་ཤོས་ཕྱག་གཉིས་ནི། །སྒྲ་སྒྲོགས་ཌ་མ་རུ་དྲིལ་བུས་མཚན། །མི་ཡི་པགས་པ་བསྣམས་པ་
སྟེ། །ཡི་དགས་ཉི་མའི་སྟེང་ན་གནས། །ཐོད་པའི་ཕྲེང་བའི་ཅོད་པན་ཅན། །གཡས་བརྐྱང་གདན་ལ་ཡང་དག་བཞུགས། །ལྷ་རྣམས་ཐམས་ཅད་གོ་རིམས་བཞིན། །ཡི་གེ་དྲུག་ལས་བྱུང་བ་བསྒོམ། །ལཱཾ་མཱཾ་པཱཾ་ཏཱཾ་ཁཾ་ཞེས་པས། །ཁམས་ལྔ་པོ་ནི་བྱིན་གྱིས་བརླབ། །ཨོཾ་ཨཱཾ་ཧྲི་ཧོ་ཧཱུཾ་ཧྲཱི་ཞེས། །
གཟུགས་སོགས་ཕུང་པོ་ལ་ཡང་ངོ་། བྷྲཱུཾ་ཧཱུཾ་ཁ་ཨཱ་ཧོ་ཧཾ་གིས། །སྐྱེ་མཆེད་རྣམས་ནི་སྦྱང་བར་བྱ། །ཨོཾ་ཧ་ན་མ་ཧི། སྭཱ་ཧཱ་ཧུ། བཽ་ཥཊ་ཧེ། ཧཱུཾ་ཧཱུཾ་ཧོ། ཕཊ་ཧཾ། བྲང་མགོ་སྤྱི་གཙུག་ཕྲག་པ་དང་། །མིག་ལ་སོགས་པར་སྦྱར་བར་བྱ། །ཨོཾ་བཾ་ཧཾ་ཡོཾ་ཧྲིཾ་མོཾ་ཧྲེ་ཧྲིཾ་ཧཱུཾ་ཧཱུཾ་ཕཊ་ཕཊ། ལྟེ་བ་སྙིང་ག་ཁ་དང་ནི། །
སྤྱི་བོ་སྤྱི་གཙུག་གཞན་ལ་དགོད། །ལུས་དང་ངག་ལམ་སེམས་ལ་ནི། །ཨོཾ་ཨཱཿཧཱུཾ་ནི་དགོད་པར་བྱ། །འཁོར་ལོས་སྒྱུར་དྲུག་འཁོར་ལོར་གནས། །ལྷ་མོའི་ཚོགས་ཀྱི་ལག་གནས་པའི། །བདུད་རྩི་ལྔ་ཡི་ཁུ་བས་གང་། །ཐོད་པ་རྣམས་ཀྱིས་དབང་བསྐུར་བྱ། །མཆོད་དང་བསྟོད་དང་བདུད་རྩི་
མྱང་། །བྱས་པར་གྱུར་པས་སྤྱད་པར་བྱ། །དོགས་པ་མེད་པའི་སེམས་ཀྱིས་ནི། །གསང་སྔགས་ཡི་གེ་བདུན་པ་བཟླས། །ཨོཾ་ཧྲཱིཿཧ་ཧ་ཧཱུཾ་ཧཱུཾ་ཕཊ། །བསམ་གཏན་བཟླས་པ་གང་ཚེ་སྐྱོ། །དེ་ཚེ་དག་པ་རྗེས་དྲན་བྱ། །དྲན་པ་ཡང་དག་བྱང་ཆུབ་ཀྱི་ཡན་ལག་ནི་དཔལ་ཧེ་རུ་ཀའོ། །ཆོས་རབ་ཏུ་
རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་ནི་ཁྲག་འཐུང་མའོ། །བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་ནི་རྡོ་རྗེ་འཇིགས་བྱེད་མའོ། །དགའ་བ་ཡང་དག་བྱང་ཆུབ་ཀྱི་ཡན་ལག་ནི་རབ་གཏུམ་མའོ། །ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་ནི་རྡོ་རྗེ་སྣང་བྱེད་མའོ། །ཏིང་ངེ་
འཛིན་ཡང་དག་བྱང་ཆུབ་ཀྱི་ཡན་ལག་ནི་རྡོ་རྗེ་དྲག་མོའོ། །མགུར་ཆུ་གདུ་བུ་རིན་ཆེན་དང་། །རྣ་ཆ་གདུབ་ཀོར་ཚངས་སྐུད་དེ། །དེ་དག་ཕ་རོལ་ཕྱིན་པ་དྲུག །ཕྱག་རྒྱའི་གཟུགས་སུ་སྦྱར་བ་ཡིན། །ཡི་གེ་བདུན་པའི་སྒྲུབ་ཐབས་སློབ་དཔོན་རྒྱལ་དཀའ་ཟླ་བས་བཏུས་པ་རྫོགས་སོ།། ༄༅༅། །རྒྱ་གར་སྐད་དུ།

ཤྲཱི་ཙཀྲ་སཾ་བ་ར་སཱ་དྷ་ན་ཨ་མྲྀ་ཏ་ཀྵ་ར་ནཱ་མ། བོད་སྐད་དུ། དཔལ་འཁོར་ལོ་སྡོམ་པའི་སྒྲུབ་ཐབས་བདུད་རྩི་འཛག་པ་ཞེས་བྱ་བ། བཅོམ་ལྡན་འདས་དཔལ་ཧེ་རུ་ཀ་ལ་ཕྱག་འཚལ་ལོ། །དབང་པོ་དགག་དཀའ་གླང་པོ་མཆོག །ནུས་པའི་སྟོབས་ཀྱི་ལྕགས་ཀྱུས་
འགུགས། །ཐིག་སྟོང་སངས་རྒྱས་ཉིད་མྱུ་གུ། །ཟླ་བའི་འོད་ཟེར་ལྟར་འཕྲོ་བ། །རང་སྙིང་པད་སྣང་དབུས་གནས་པའི། །ཟླ་བའི་གཟུགས་བརྙན་ནང་དམིགས་པ། །ས་ཆུ་མེ་རླུང་མཁའ་རང་བཞིན། །སྐྱེ་མེད་ཐིག་ལེ་ལ་ཕྱག་འཚལ། །བརྡ་འབའ་ཞིག་ནི་གཙོར་གྱུར་པ། །ཚིག་གི་སྡེབ་དང་
འབྲེལ་པ་དང་། །རྟགས་རྣམས་རང་དགའ་བ་ཡི་རྒྱུད། །དཔལ་ལྡན་འཁོར་ལོ་སྡོམ་པ་མཆོག །ཡུན་རིང་པ་རུ་རྟོགས་དཀའ་བ། །འབྲེལ་མེད་སྐད་ནི་མ་ལུས་གསུངས། །དེ་ཟབ་རྒྱ་མཚོ་ལྟར་གནས་པ། །ཟབ་མོ་སུ་ཡིས་ཤེས་པ་ཡིན། །དེ་ཕྱིར་བདག་གིས་རྩ་བ་ཡི། །བཤད་པ་ཕྱི་
མ་ཡོངས་ཤེས་པས། །འཁོར་ལོ་དག་པ་དེ་རིང་བརྩམས། །རི་དང་ནགས་ཚལ་ཕུག་རྣམས་དང་། །ཆུ་བོའི་འགྲམ་དང་བཞི་མདོ་དང་། །རྒྱ་མཚོ་ཆེན་པོ་ཉམས་དགའི་འགྲམ། །ཤིང་གཅིག་དྲུང་དང་བདེ་བའི་གནས། །གནས་ནི་ཉེ་བར་བསྟན་པ་ཡིན། །ཡང་ན་ཡིད་དང་མཐུན་པར་ཏེ། །
དེ་རུ་རྣལ་འབྱོར་བརྩམ་པར་བྱ། །འདོད་པ་ཀུན་གྱི་འབྲས་བུ་ཐོབ། །སྙིང་ག་ཆུ་སྐྱེས་དབུས་གནས་པར། །ཉི་མ་ཐོད་པ་བསྒོམ་པར་བྱ། །དེ་རུ་དེ་ཉིད་མཆོག་ལྟ་བ། །ཡེ་ཤེས་ལྔ་ཡི་རང་བཞིན་ཞི། །འོད་ཟེར་སྣ་ཚོགས་རང་བཞིན་མཆོག །ཀུན་ནས་རྣམ་པར་འཕྲོ་གྱུར་པ། །སེམས་ཙམ་ཉིད་དུ་
གནས་པ་སྟེ། །བྱང་ཆུབ་མཆོག་ནི་སྒྲུབ་པར་བྱེད། །ནམ་མཁའི་དབྱིངས་སུ་བསྒོམ་བྱ་བ། །དཀྱིལ་འཁོར་མཆོག་དགའ་བསྒོམ་པར་བྱ། །ཏིལ་གོང་གཏམས་འདྲའི་སངས་རྒྱས་དང་། །བྱང་ཆུབ་སེམས་དཔའ་མཆོད་པར་བྱ། །འགྲོ་བ་དྲུག་གི་སེམས་ཅན་རྣམས། །བླ་མེད་གོ་འཕང་ཐོབ་
བྱའི་ཕྱིར། །དེ་རུ་གསུམ་ལ་སྐྱབས་འགྲོ་བྱ། །དམ་བཅའ་ཡོངས་སུ་གཟུང་བྱ་སྟེ། །སེམས་ཅན་ཀུན་གྱི་དོན་གྱི་ཕྱིར། །སངས་རྒྱས་ཧེ་རུ་ཀ་རུ་ཤོག །དེ་ནས་ཚངས་པ་ཡི་ནི་གནས། །བཞི་པོ་རྣམས་ནི་བསྒོམ་པར་བྱ། །བསམ་གཏན་ཕ་རོལ་ཕྱིན་པ་དམིགས། །སེམས་ནི་མཆོག་སྟེ་

གཅིག་གྱུར་པས། །ཕྱི་རོལ་ནང་གི་ཆོས་རྣམས་ནི། །ཐམས་ཅད་སྟོང་པར་བལྟ་བར་བྱ། །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། །རྣམ་ཤེས་སོ་སོར་སྣང་བ་ཙམ། །སེམས་ཙམ་རྣམ་པར་བརྟག་པར་བྱ། །ས་ཡི་འོག་གི་མཐར་ཐུག་པར། །རླུང་གི་དཀྱིལ་འཁོར་བསམ་པར་བྱ། །
ཡི་གེ་ཡཾ་ལས་ཡང་དག་བྱུང་། །ཁ་དོག་སྔོན་པོ་གཞུ་རྣམ་པ། །དུ་བའི་ཕྲེང་བའི་ཚོགས་ཀྱིས་བསྐོར། །བ་དན་མཚན་པ་དེ་བསྒོམ་བྱ། །དེ་སྟེང་ཡི་གེ་རཾ་ལས་ནི། །མེ་ཡི་དཀྱིལ་འཁོར་མཆོག་བསམ་པ། །གྲུ་གསུམ་ཁ་དོག་དམར་པོ་ནི། །འབར་བའི་ཕྲེང་བའི་ཚོགས་ཆེན་པོ། །ཉི་མ་བྱེ་བ་
དང་མཚུངས་བསམ། །རྡོ་རྗེས་མཚན་པ་དེ་བསྒོམ་བྱ། །དེ་ཡི་སྟེང་དུ་ཆུ་ཉིད་ནི། །ཟླུམ་པོ་འོད་ཟེར་ཕྲེང་བ་ཅན། །བ་མོ་དང་ནི་མཚུངས་པ་ཉིད། །བཾ་སྐྱེས་བུམ་པས་མཚན་པའོ། །དེ་ཡི་སྟེང་དུ་ས་བསྒོམ་པ། །ཡི་གེ་ལཾ་ལས་བྱུང་བ་མཆོག །གྲུ་བཞི་རྡོ་རྗེས་མཚན་པ་ལ། །སེར་པོའི་འོད་ཀྱི་
ཚོགས་ཀྱིས་བསྐོར། །དེ་སྟེང་བསྒོམ་པར་བྱ་བ་ཉིད། །རི་ཡི་རྒྱལ་པོ་རི་རབ་མཆོག །རིན་ཆེན་བདུན་གྱི་རང་བཞིན་མཆོག །རྩེ་མོ་བརྒྱད་ཀྱིས་ཉེ་བར་བརྒྱན། །ཡི་གེ་སུཾ་ལས་ཡང་དག་བྱུང་། །འོད་ཟེར་སྣ་ཚོགས་ཀུན་དུ་འཁྲིགས། །དེ་རུ་ར་བ་དྲ་བ་དང་། །རྡོ་རྗེ་ས་གཞི་བླ་རེ་དང་། །
མདའ་ཡི་དྲ་བར་བྱིན་གྱིས་བརླབ། །མེ་ཡི་དྲ་བ་ཕྱི་རོལ་ཉིད། །ཨོཾ་མེ་དི་ནཱི་བཛྲཱི་བྷ་བ་བནྡྷ་ཧཱུཾ། ཨོཾ་བཛྲ་པྲཱ་ཀཱ་ར་ཧཱུཾ་བཾ་ཧཱུཾ། ཨོཾ་བཛྲ་པཉྫ་ར་ཧཱུཾ་ཡཾ་ཧཱུཾ། ཨོཾ་བཛྲ་བི་ཏཱ་ན་ཧཱུཾ་ཁཾ་ཧཱུཾ། ཨོཾ་བཛྲ་ས་ར་ཛཱ་ལ་ཏྲཱཾ་སཾ་ཏྲཱཾ། ཨོཾ་བཛྲ་ཛྭ་ལ་ཨ་ན་ལཱརྐ་ཧཱུྃ་ཧཱུྃ་ཧཱུྃ། དཔལ་ལྡན་ཧེ་རུ་ཀ་འཁོར་ལོ། །རྩིབས་བརྒྱད་
རབ་ཏུ་འབར་བའི་འོད། །འདིར་ཉིའི་གཟུགས་བརྙན་ལ་གནས་ལྟར། །རྡོ་རྗེ་སེམས་དཔའ་རྣམ་པར་བསྒོམ། །དེ་ནས་ལུགས་བྱུང་ལུགས་མིན་པས། །ཁྲོ་བོ་བརྒྱད་ནི་བསྒོམ་པར་བྱ། །རྡོ་རྗེ་གཏུམ་པོ་ཉི་མ་མེ། །རྡོ་རྗེ་གཙུག་ཏོར་དེ་བཞིན་ཏེ། །རྡོ་རྗེ་གནོད་སྦྱིན་བདུད་རྩི་འཁྱིལ། །རྡོ་རྗེ་
དུས་དང་སྟོབས་པོ་ཆེ། །རྡོ་རྗེ་འཇིགས་བྱེད་ཅེས་བྱ་བ། །ཁྲོ་བོ་འདི་དག་རྣམ་པར་དགོད། །སྔོན་པོ་སེར་པོ་དེ་བཞིན་དམར། །ལྗང་གུ་དུ་བའི་མདོག་འདྲ་དང་། །དཀར་པོ་ནག་པོ་དམར་འདྲ་བ། །འཇིགས་པ་ཐོད་པ་དང་ལྡན་གཙིགས། །དེ་བཞིན་ཞལ་གསུམ་ཕྱག་དྲུག་པ། །ཐམས་ཅད་མི་

རུས་རྒྱན་གྱིས་མཛེས། །གཡས་བརྐྱང་པ་ཡི་ཞབས་ཀྱིས་གནས། །སྣ་ཚོགས་པདྨ་ཉི་དཀྱིལ་བཞུགས། །འཇིག་རྟེན་སྐྱོང་བ་བརྒྱད་པོ་རྣམས། །ཞབས་ཀྱིས་གནོན་པ་རྣམ་པར་བསྒོམ། །ཐོད་པ་ཁ་ཊྭཱཾ་ག་དག་བསྣམས། །ཞགས་པ་ལྕགས་ཀྱུ་བསྣམས་པ་མཆོག །
དྲིལ་བུ་ཅང་ཏེའུ་ཐམས་ཅད་ལ། །ཤེས་རབ་འཁྱུད་པ་དམ་པ་བདེ། །སྐྲ་སེར་གྱེན་བརྫེས་ཞལ་འགྱུར་ཞིང་། །མཆེ་བ་གཙིགས་ལྡན་འཇིགས་བྱས་པ། །སྟག་གི་པགས་པའི་ན་བཟའ་བསྣམས། །སྦྲུལ་གྱི་རྒྱན་གྱིས་འཇིགས་མཛད་པ། །དེ་གྱུར་པ་ཡི་བདག་ཉིད་ལས། །རྡོ་རྗེ་ཧཱུཾ་མཛད་
རྣམ་པར་བསྒོམ། །དྲག་པོ་ཁྲོ་བོ་འབར་བས་བསྐོར། །ཞལ་འགྱུར་གཙིགས་ཤིང་འཇིགས་མཛད་པ། །རྒྱན་ཀུན་གྱིས་ནི་ཀུན་དུ་མཚན། །རྡོ་རྗེ་ལྕགས་ཀྱུ་ཞགས་པ་དང་། །དྲིལ་བུ་ཐོད་པ་ཁ་ཊྭཱ་ག །མགོ་བོའི་ཕྲེང་བས་ལུས་དྲག་པོ། །མགོ་བའི་སྐེ་རགས་དྲག་པོས་བཅིངས། །
གདུག་པ་ཐམས་ཅད་ཞབས་ཀྱིས་མནན། །ཤེས་རབ་དང་ནི་ཡང་དག་ལྡན། །རྡོ་རྗེ་སེམས་དཔའི་ཅོད་པན་ཅན། །རྡོ་རྗེ་ཧཱུཾ་མཛད་བསྒོམ་པར་བྱ། །སྟེང་དང་འོག་ཏུ་གནས་བསམ་པ། །ཁྲོ་བོ་གཉིས་ནི་རྣམ་པར་བསྒོམ། །གཙུག་ཏོར་རྡོ་རྗེ་ས་འོག་སྟེ། །དཀར་པོ་མིག་སྨན་སྔོན་
འདྲའི་འོད། །ཐོད་མཚན་ཁ་ཊྭཱཾ་ག་བསྣམས་པ། །ཕྱག་ན་འཁོར་ལོ་མདུང་ཞགས་པ། །ལྕགས་ཀྱུ་རྡོ་རྗེ་དྲིལ་བུ་བསྣམས། །གཡས་བརྐྱང་པ་ཡི་གནས་པས་གནས། །ཁྲོ་བོའི་རྣམ་པའི་ཕུར་བུ་ནི། །ཕྱོགས་བཅུ་པོ་འདིར་དགོད་པར་བྱ། །ཨོཾ་སུཾ་བྷ་ནི་སུཾ་བྷ་ཧཱུཾ་ཧཱུཾ་ཕཊ་ཕཊ། ཤར་དུའོ། །
ཨོཾ་གྲྀཧྞ་གྲྀཧྞ་ཧཱུཾ་ཧཱུཾ་ཕཊ་ཕཊ། བྱང་དུའོ། །ཨོཾ་གྲྀཧྞཱ་པ་ཡ་གྲྀཧྞཱ་པ་ཡ་ཧཱུཾ་ཧཱུཾ་ཕཊ་ཕཊ། ནུབ་ཏུའོ། །ཨོཾ་ཨཱ་ན་ཡ་ཧོ། བྷ་ག་བཱན་བཛྲ་རཱ་ཛ་ཧཱུཾ་ཧཱུཾ་ཕཊ་ཕཊ། ལྷོ་རུའོ། །གསང་སྔགས་རྒྱལ་པོ་འདི་ཡིས་ནི། །བགེགས་རྣམས་ཀུན་གྱི་མགོ་བོ་རུ། །ལུགས་སུ་འབྱུང་དང་ལུགས་མིན་པས། །ཁྲོ་བོའི་ཕུར་
བུ་དགོད་པར་བྱ། །ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ་སརྦ་དུཥྚཱཾ་བིགྷྣཱཾ་ཧཱུཾ་ཕཊ། ཨོཾ་ཀཱི་ལ་ཡ་ཀཱི་ལ་ཡ་སརྦ་པཱ་པཾ་ཧཱུཾ་ཕཊ། ཨོཾ་ཧཱུཾ་ཧཱུཾ་བཛྲ་ཀཱི་ལ་བཛྲ་དྷ་རོ་ཏ་ཨཱ་ཛྙཱ་པ་ཡ་ཏི། སརྦ་བི་གྷྣཱཾ་ཀཱ་ཡ་ཝཱ་ཀ་ཙིཏྟ་བཛྲ་ཀཱི་ལ་ཡ་ཀཱི་ལ་ཡ་ཧཱུཾ་ཕཊ། ཨོཾ་བཛྲ་མུངྒ་ར་བཛྲ་ཀཱི་ལ་ཨཱ་ཀོ་ཊ་ཡ་ཧཱུཾ་ཕཊ། རྡོ་རྗེ་བློ་མཆོག་

ཁྲོ་ཚིག་གིས། །ཕྱིས་ནི་གསང་སྔགས་འདི་བཟླས་བྱ། །ཨོཾ་ཁ་བཛྲ་དྷྲྀ་ཀ་བཛྲ་ཧཱུཾ་ཀ་ར་བཛྲ་ཧཱུཾ་ཕཊ། ཨོཾ་བཛྲ་ཙཎྜ་བཛྲ་ཧཱུཾ་ཕཊ། ཨོཾ་བཛྲ་ཨ་ན་ལཱརྐ་ཧཱུཾ་ཕཊ། ཨོཾ་བཛྲ་ཏིཥྛ་བཛྲ་ཧཱུཾ་ཕཊ། ཨོཾ་བཛྲ་ཀུཎྜ་ལི་བཛྲ་ཧཱུཾ་ཕཊ། ཨོཾ་བཛྲ་ཡཀྵ་བཛྲ་ཧཱུཾ་ཕཊ། ཨོཾ་བཛྲ་ཀ་ལ་བཛྲ་ཧཱུཾ་ཕཊ། ཨོཾ་བཛྲ་མ་ཧཱ་བ་ལ་ཧཱུཾ་
ཕཊ། ཨོཾ་བཛྲ་བྷི་ཥ་ན་བཛྲ་ཧཱུཾ་ཕཊ། ཨོཾ་བཛྲོཥྞཱི་ཥ་ཙཀྲ་བརྟི་བཛྲ་ཧཱུཾ་ཕཊ། ཨོཾ་བཛྲ་པ་ཏ་ལ་བཛྲ་ཧཱུཾ་ཕཊ། དེ་ལྟར་ང་རྒྱལ་ཉིད་ཀྱིས་གྲུབ། །སྐད་ཅིག་གིས་ནི་བགེགས་མེད་འགྱུར། །སྔོན་པོ་སེར་པོ་ལྗང་གུ་ནི། །རྡོ་རྗེ་ཧཱུཾ་ཀ་ར་རུ་བཤད། །སེར་པོ་དང་ནི་ནག་པོ་ལྗང་། །དུད་ཁ་སེར་པོ་དང་ལྗང་གུ། །
དཀར་པོ་དང་ནི་སེར་པོ་ལྗང་། །དམར་པོ་དང་ནི་སེར་ལྗང་གུ། །ལྗང་གུ་སེར་པོ་དང་ནག་པོ། །གཞན་རྣམས་ཀྱི་ནི་བདག་པོ་བཞིན། །མི་བསྐྱོད་ཅོད་པན་དམ་ཚིག་ཏུ། །བསྒོམས་པས་རྡོ་རྗེ་འཆང་བ་དགྱེས། །དེ་ལྟར་སྒོམ་པ་བྱེད་གྱུར་པས། །གལ་ཏེ་སྐྱོ་བ་
སྐྱེས་གྱུར་ན། །སྟོང་པ་ཉིད་ཀྱི་ཡེ་ཤེས་ནི། །དྲན་བྱ་དད་པས་མཉམ་པར་གཞག །ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཨོཾ་ཨ་ནི་མི་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཨོཾ་ཨ་པྲ་ཎི་ཧི་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཀུན་དུ་བཟང་པོ་ཀུན་གྱི་བདག །ཡོངས་སུ་གྱུར་པ་མཁའ་དབྱིངས་ཏེ། །
མཁའ་དབྱིངས་དེ་རུ་བསྒོམ་བྱ་བ། །ཡི་གེ་ཨོཾ་ནི་རྣམ་པར་བསྒོམ། །དེས་ནི་འཁོར་ལོ་གཉིས་ཀ་ལས། །རྣམ་པར་སྣང་མཛད་བསྒོམ་པར་བྱ། །དཀར་པོ་ཕྱག་བཞི་རིག་མས་འཁྱུད། །གཡས་དང་གཡོན་ལ་འཁོར་ལོ་དང་། །ཐོད་པ་དང་ནི་ཅང་ཏེའུ་དང་། །ཁ་ཊྭཱཾ་ག་ཡང་དེ་བཞིན་ནོ། །དེ་གྱུར་འཁོར་
ལོར་བཅས་པ་ཡི། །གཞལ་ཡས་ཁང་ནི་རྣམ་པར་བསྒོམ། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་བརྒྱན་བྱས་པ། །དྲ་བ་དྲ་ཕྱེད་དག་གིས་མཛེས། །དར་དཔྱངས་ཕྲེང་བ་དག་གིས་བརྒྱན། །ཟུར་ཀུན་གྱི་ནི་ཆ་རྣམས་སུ། །རྡོ་རྗེ་རིན་པོ་ཆེས་མཚན་པ། །ཕྱི་ཡི་དཀྱིལ་འཁོར་བསྒོམ་པར་
བྱ། །དེ་ཡི་ནང་དུ་འཁོར་ལོ་ལ། །རེའུ་མིག་དགུ་སྟེ་ཕྱིར་བཅུ་དྲུག །ནང་གི་རེའུ་མིག་དབུས་སུ་ནི། །ཤིན་ཏུ་མཛེས་པའི་པདྨ་ལྟར། །ལྟེ་བ་གེ་སར་ཉེ་བར་བརྒྱན། །ཁ་དོག་སྣ་ཚོགས་འདབ་བརྒྱད་པ། །རེའུ་མིག་རྣམས་ལ་རྡོ་རྗེ་ལྡན། །ས་གཞི་རྣམ་པ་སྣ་ཚོགས་འདོད། །འཁོར་ལོ་

པདྨ་རྡོ་རྗེ་ཡི། །ཕྲེང་བས་འཁོར་ལོ་གསུམ་ཡོངས་བསྐོར། །རིན་ཆེན་ཕྲེང་བས་པད་དེ་བཞིན། །རིན་ཆེན་འབར་བའི་འོད་གསལ་བའོ། །སྣ་ཚོགས་རྡོ་རྗེས་བསྐོར་བ་ཡི། །དམ་ཚིག་གི་ནི་འཁོར་ལོ་བྲིས། །ཡི་དགས་ཁ་དོག་ལྔ་རྣམས་ཀྱིས། །ཕྱི་རོལ་དཀྱིལ་
འཁོར་ཀུན་དུ་བསྐོར། །རྡོ་རྗེ་ཕྱེད་པས་སྒོ་ཟུར་གྱི། །ཀ་བའི་རྩེ་མོ་དབུས་ནས་མཚན། །ཕྱི་རུ་དུར་ཁྲོད་འཇིགས་པ་ཡི། །ཁ་དོག་སྣ་ཚོགས་མཆོག་གི་མཆོག །སྣ་ཚོགས་ཤིང་རྣམས་ཉམས་དགས་མཚན། །ཁྱི་དང་ཅེ་སྤྱང་དག་གིས་འཇིགས། །ཁྭ་དང་འུག་པ་བྱ་རྒོད་ཁྲ། །ཝ་
དང་ཙི་ལི་ཀ་དེ་བཞིན། །ཀེང་རུས་མདུང་གིས་ཕུག་པ་དང་། །འཕྱང་བ་དང་ནི་ཕྱེད་བསྲེགས་དང་། །སྤྱི་བོ་ཀོ་སྐོ་པུས་མོ་དང་། །ལག་པ་མགོ་བོ་རྣམས་ཀྱིས་བརྒྱན། །སྒྲ་སྒྲོགས་དེ་བཞིན་གླང་མགོ་དང་། །རྣམ་པ་སྣ་ཚོགས་སྤྲུལ་གྱིས་དགའ། །སེང་གེ་སྟག་དང་ཕག་རྒོད་
དང་། །དེ་བཞིན་དོམ་དང་ར་རྣམས་དང་། །དཔའ་བོ་དང་ནི་རྣལ་འབྱོར་མ། །རྣམ་པ་སྣ་ཚོགས་འདུས་པ་མཆོག །ཐོད་པ་ཁ་ཊྭཱཾ་ག་ནི་བསྣམས། །གྲི་གུག་ཅང་ཏེའུ་དེ་བཞིན་ནོ། །གནོད་སྦྱིན་རོ་ལངས་སྲིན་པོ་རྣམས། །དེ་ལྟར་སྣ་ཚོགས་དུར་ཁྲོད་དོ། །དེ་རུ་ཉི་མའི་དཀྱིལ་འཁོར་བལྟ། །
ཨཱ་ལི་ཀཱ་ལི་རང་ས་བོན། །དེ་བཞིན་ཉིད་དང་ཡང་དག་མཐའ། །སྟོང་པ་ཉིད་དང་ཆོས་ཀྱི་དབྱིངས། །མཉམ་པ་ཉིད་དང་སོ་སོར་རྟོག །བྱ་བ་གྲུབ་པ་བསྒོམ་པ་དང་། །ཤིན་ཏུ་རྣམ་པར་དག་པ་དམིགས། །རྣལ་འབྱོར་འདི་ནི་མཆོག་གི་མཆོག །རྡོ་རྗེ་སེམས་དཔའ་རང་རིག་བཅས། །རིམ་
པ་འདི་ཡིས་རྣམ་པར་བསམ། །དཀར་པོ་སེར་པོ་དེ་བཞིན་དམར། །ལྗང་གུ་དང་ནི་ཞལ་རྣམ་བཞི། །རྡོ་རྗེ་དྲིལ་བུས་ཡང་དག་འཁྱུད། །མདུང་དང་དགྲ་སྟ་ཅང་ཏེའུ་དང་། །གྲི་གུག་ཐོད་པ་ཁ་ཊྭཱཾ་ག །ཚངས་པའི་པགས་པ་ན་བཟར་མནབས། །ཞགས་པ་ཚངས་པའི་མགོ་དེ་བཞིན། །
ཕྱག་བཅུ་གཉིས་ཀྱིས་བརྒྱན་བྱས་པ། །སེམས་དཔའི་སྐྱིལ་ཀྲུང་གིས་བཞུགས་པ། །ཐོད་པའི་ཅོད་པན་གྱིས་མི་བཟད། །རྒྱན་རྣམས་ཀུན་གྱིས་ཡང་དག་རྫོགས། །མཚན་དང་དཔེ་བྱད་རྣམས་ཀྱིས་བརྒྱན། །སྙིང་ག་ཡེ་ཤེས་དམ་ཚིག་སྟེ། །རྡོ་རྗེ་འཆང་བའི་ཅོད་པན་ཅན། །ཐབས་

ཇི་བཞིན་དུ་ཤེས་རབ་སྟེ། །ཕྱག་རྒྱ་ལྔ་ཡིས་བརྒྱན་བྱས་པ། །བདེ་ཆེན་ཐབས་ཀྱི་སྦྱོར་བ་ཡིས། །སྐུ་གཉིས་ཡང་དག་ཞུ་བར་གྱུར། །འོད་ཟེར་དེ་ལས་ལྷ་མོ་རྣམས། །ལངས་ནས་སྣ་ཚོགས་གླུ་ཡིས་བསྐུལ། །ཁམས་གསུམ་བདེ་ཐོབ་ཀྱེ་གཙོ་བོ། །ཨ་ལ་ལ་ལ་ཧོ། །པདྨའི་བདག་པོ་
ཡོངས་རྡོ་རྗེ། །བདེ་ཆེན་རྒྱལ་བའི་ཚོགས་སྤྲོ་བ། །དེ་བཞིན་གཤེགས་པ་ཕྱོགས་བཅུའི་གཙོ། །རབ་སྤངས་ཨ་ལ་ལ་ལ་ཧོ། །གཙོ་བོ་དྲུག་པ་སེམས་དཔའ་སྙིང་། །བཙུན་མོ་རོལ་སྦྱོར་སྲིད་གསུམ་བདག །ཨ་ལ་ལ་ལ་ཧོ། །དགའ་བདག་སྤོང་ཞིང་རབ་སྤོང་བ། །བདེ་ཆེན་
རང་བཞིན་རྒྱལ་བའི་གཙོ། །གླུ་འདི་ཡིས་ནི་སྦྱོར་བ་ཡིས། །པདྨའི་རྣལ་འབྱོར་མ་ཡིས་བླང་། །པདྨའི་ཚོགས་ཀྱིས་བཞེངས་པ་ནི། །རྡོ་རྗེ་སྦྱོར་བ་བདེ་བས་སོ། །མགོན་པོ་ལ་ནི་འདི་ཡིས་བསྐུལ། །བདེ་བ་ཆེན་པོ་འདི་གནས་ལས། །བཞེངས་ནས་སངས་རྒྱས་ཐམས་
ཅད་དེ། །མ་ལུས་པ་ཡི་རྒྱལ་བ་སྤྲོས། །ཞལ་བཞི་ཕྱག་ནི་བཅུ་གཉིས་པ། །གཡས་བརྐྱང་པ་ཡི་གནས་པས་གནས། །ཞལ་གྱི་མཆེ་བ་གཙིགས་པ་དང་། །སྤྱན་གསུམ་ཞལ་ནི་རྣམ་པར་འགྱུར། །ཐོད་པའི་ཕྲེང་བའི་རྒྱན་དང་ལྡན། །སྐུ་ལ་ཕྱག་རྒྱ་དྲུག་གིས་བརྒྱན། །
འཇིགས་བྱེད་དང་ནི་དུས་མཚན་གྱི། །མགོ་བོ་དང་ནི་ནུ་མ་མནན། །སྟག་གི་པགས་པའི་ཤམ་ཐབས་མནབས། །སྙིང་རྗེའི་རོ་ཡིས་རྣམ་པར་ཁྱབ། །རྡོ་རྗེ་ཕག་མོ་ལ་ནི་འཁྱུད། །འཁྱུད་པ་ཡི་ནི་ཕྱག་གཉིས་ལ། །རྩེ་དགུ་ཁ་བྱེ་རྡོར་དྲིལ་བུ། །ཕྱག་གཞན་གཉིས་པོ་དག་ལ་ནི། །གླང་
ཆེན་པགས་པའི་ན་བཟའ་འཆང་། །གཡས་ཀྱི་ཕྱག་ནི་གསུམ་པ་ལ། །རྡོ་རྗེས་མཚན་པའི་མདུང་འཛིན་པའོ། །བཞི་པ་ལ་ནི་ལྕགས་ཀྱུ་སྟེ། །ལྔ་པ་ལ་ནི་གྲི་གུག་སྟེ། །དྲུག་པ་ལ་ནི་ཅང་ཏེའུའོ། །གཡོན་པའི་ཕྱག་ནི་གསུམ་པ་ལ། །ཐོད་པ་རྐང་གིས་བཀང་པའོ། །མཆོད་ཕྱིར་
ཐོགས་པའི་སྦྱོར་བ་ཡིས། །ཁ་ཊྭཱཾ་ག་ནི་བསྣམས་པའོ། །སྣ་ཚོགས་འཕན་ནི་རབ་ཏུ་འཕྱང་། །དེ་སྟེང་ཁ་བྱེ་རྩེ་ལྔ་པའི། །རྡོ་རྗེ་དང་ནི་དྲིལ་བུས་མཚན། །དབུས་སུ་སྣ་ཚོགས་རྡོ་རྗེས་མཚན། །འོག་ཏུ་རྡོ་རྗེ་རྩེ་གཅིག་པ། །བཞི་པ་ལ་ནི་རྡོ་རྗེ་ཞགས། །ལྔ་པ་ལ་ནི་ཚངས་པའི་མགོ། །དྲུག་པ་ལ་ནི་

སྟ་རེའོ། །སྔོ་སེར་དམར་པོ་ལྗང་གུའི་ཞལ། །དྲག་པོ་བཞད་སྒེག་དཔའ་བོ་དང་། །རྔམ་དང་ལྗགས་ནི་བསྐྱོད་པའི་ཞལ། །དེ་མདུན་རྡོ་རྗེ་ཕག་མོ་ནི། །ཞལ་བཞི་ཕྱག་བཞི་སྤྱན་གསུམ་པ། །ཁ་དོག་དཀར་པོ་སྐེ་རགས་ནི། །ཐོད་པའི་དུམ་བུས་མཚན་པའོ། །བཅོམ་ལྡན་
འདས་ཞལ་ཁ་དོག་ལྟར། །ལྷ་མོའི་ཕྱག་གི་ཁ་དོག་དེ། །དམར་པོ་ལྗང་གུ་སེར་པོ་དང་། །ཤིན་ཏུ་སྔོ་མདོག་ཞལ་གྱི་འོད། །སྐྲ་གྲོལ་གཅེར་བུ་གཡོན་པ་ཡིས། །ཕྱག་འཁྱུད་པ་ལ་མ་རུངས་པའི། །བདུད་ཀྱི་ཁྲག་བཀང་ཐོད་པའོ། །གཡས་པའི་སྡིགས་མཛུབ་ཕྱོགས་ཀུན་དུ། །གདུག་པ་
བསྡིགས་ཤིང་གྲི་གུག་འཆང་། །ཅང་ཏེའུ་ཚངས་པའི་མགོ་བསྣམས་ཕྱག །ཞལ་ནས་ཁྲག་ནི་འཛག་པ་སྟེ། །ཞབས་གཉིས་ཀྱིས་ནི་ཡང་དག་དཀྲིས། །བདེ་ཆེན་སྙིང་རྗེའི་བདག་ཉིད་མ། །སྙིང་གའི་ལྕགས་ཀྱུའི་སྦྱོར་བ་ཡིས། །ཡེ་ཤེས་འཁོར་ལོ་དགུག་པར་བྱ། །ཡེ་ཤེས་འཁོར་
ལོ་ལེགས་བཀུག་སྟེ། །མཆོད་བསྟོད་བྱས་ནས་གཞུག་པར་བྱ། །འདི་ཉིད་ཀྱིས་ནི་གནས་ཚོགས་རིམ། །དགོད་བྱ་ནང་གི་སྦྱོར་བ་མཆོག །པུལླཱི་ར་མཱ་ལ་ཡར་ཏེ། །སྤྱི་བོར་ཐོད་པའི་དུམ་བུ་དང་རབ་ཏུ་གཏུམ་མའོ། །ཛཱ་ལནྡྷ་ར་སྟེ་སྤྱི་གཙུག་ཏུ་ཀེང་རུས་ཆེན་པོ་དང་། །གཏུམ་མོའི་མིག་
ཅན་མའོ། །ཨཽ་ཌྱན་ཏེ་རྣ་བ་གཡས་པར་ཀེང་རུས་ཆེན་པོ་དང་འོད་ཅན་མའོ། །ཨརྦུ་ད་སྟེ་རྒྱབ་ཀྱི་ཆར་མཆེ་བ་གཙིགས་པ་དང་སྣ་ཆེན་མ་སྟེ་གནས་སོ། །གོ་དཱ་བ་རཱི་སྟེ། རྣ་བ་གཡོན་པར་སུ་ར་བཻ་རི་དང་། དཔའ་བོའི་བློ་ཅན་མའོ། །རཱ་མེ་ཤྭ་ར་སྟེ་སྨིན་མའི་དབུས་སུ་འོད་དཔག་མེད་དང་།
མི་ཐུང་མའོ། །དེ་བཱི་ཀོ་ཊཱི་སྟེ་མིག་གཉིས་སུ་རྡོ་རྗེ་འོད་དང་ལང་ཀའི་དབང་ཕྱུག་མའོ། །མཱ་ལ་བ་སྟེ། དཔུང་མགོར་རྡོ་རྗེ་སྐུ་དང་ཤིང་གྲིབ་མ་སྟེ་ཉེ་བའི་གནས་སོ། །འདི་དག་ནི་ཐུགས་ཀྱི་འཁོར་ལོ་སྟེ་ནམ་མཁའ་ལ་སྤྱོད་པའོ། །ཀཱ་མ་རཱུ་པ་སྟེ་མཆན་ཁུང་དག་ལ་མྱུ་གུ་ཅན་དང་ས་སྲུང་
མའོ། །ཨོ་ཊེ་སྟེ་ནུ་མ་གཉིས་སུ་རྡོ་རྗེ་རལ་པ་ཅན་དང་འཇིགས་བྱེད་ཆེན་མོ་སྟེ་ཞིང་ངོ་། །ཏྲི་ཤ་ཀུ་ནི་སྟེ། ལྟེ་བར་དཔའ་བོ་ཆེན་པོ་དང་རླུང་གི་ཤུགས་ཅན་མའོ། །ཀོ་ས་ལ་སྟེ་སྣ་རྩེར་རྡོ་རྗེ་ཧཱུཾ་མཛད་དང་ཆང་འཐུང་མ་སྟེ་ཉེ་བའི་ཞིང་ངོ་། །ཀ་ལིངྒ་སྟེ་ཁར་ནི་རབ་ཏུ་བཟང་པོ་དང་། ལྷ་མོ་སྔོ་

བསངས་མའོ། །ལམྦ་ཀ་སྟེ། མགྲིན་པར་རྡོ་རྗེ་བཟང་པོ་དང་རབ་བཟངས་མ་སྟེ་ཚནྡོ་ཧའོ། །ཀཱཉྩི་ཏེ་སྙིང་གར་འཇིགས་བྱེད་ཆེན་པོ་དང་རྟ་རྣ་མའོ། །ཧི་མཱ་ལ་ཡ་སྟེ། མདོམས་སུ་མིག་མི་བཟང་དང་ཁ་ག་ན་སྟེ་ཉེ་བའི་ཚནྡོ་ཧ་སྟེ་གསུང་གི་འཁོར་ལོ་ས་སྤྱོད་མའོ། །པྲེ་ཏ་པུ་རི་སྟེ།
མཚན་མ་ལ་སྟོབས་པོ་ཆེ་དང་འཁོར་ལོའི་ཤུགས་ཅན་མའོ། །གྲྀ་ཧ་དེ་བ་ཏཱ་སྟེ་བཤང་བའི་ལམ་དུ་ནི་རིན་ཆེན་རྡོ་རྗེ་དང་དུམ་སྐྱེས་མ་སྟེ་འདུས་པའོ། །སཽ་རཱཥྚ་སྟེ་བརླ་གཉིས་སུ་རྟ་མགྲིན་དང་མཆུ་ཅན་མའོ། །སུ་བརྞ་དཱི་པ་སྟེ་བྱིན་པ་གཉིས་ལ་ནམ་མཁའི་སྙིང་པོ་དང་འཁོར་ལོའི་
གོ་ཆ་མ་སྟེ་ཉེ་བའི་འདུས་པའོ། །ན་ག་ར་སྟེ། སོར་མོ་རྣམས་ལ་དཔལ་ཧེ་རུ་ཀ་དང་ཤིན་ཏུ་དཔའ་མོའོ། །སིན་དྷུའི་ཡུལ་ཏེ་རྐང་པའི་བོལ་དག་ལ་པདྨ་གར་གྱི་དབང་ཕྱུག་དང་སྟོབས་ཆེན་མ་སྟེ་དུར་ཁྲོད་དོ། །མ་རུའི་ཡུལ་ཏེ་མཐེ་བོང་གཉིས་ལ་རྣམ་པར་སྣང་མཛད་དང་འཁོར་ལོས་
སྒྱུར་མའོ། །ཀུ་ལུ་ཏཱ་སྟེ་པུས་མོ་གཉིས་ལ་རྡོ་རྗེ་སེམས་དཔའ་དང་བརྩོན་འགྲུས་ཆེན་མོ་སྟེ་ཉེ་བའི་དུར་ཁྲོད་དོ། །འདི་དག་ནི་ས་འོག་ན་གནས་པའོ། །མཁའ་འགྲོ་མ་ནི་རྡོ་རྗེ་ལའོ། །ལཱ་མ་ནི་དྲིལ་བུ་ལའོ། །དུམ་སྐྱེས་མ་དང་གཟུགས་ཅན་མ་ནི་གླང་པོ་ཆེའི་པགས་པ་འཛིན་པའི་ཁུ་ཚུར་མའོ། །
ཁྭ་གདོང་མ་ནི་རྡོ་རྗེ་མདུང་མའོ། །འུག་པའི་གདོང་ཅན་མ་ནི་རྡོ་རྗེ་ལྕགས་ཀྱུ་མའོ། །ཁྱིའི་གདོང་ཅན་མ་ནི་རྡོ་རྗེ་གྲི་གུག་མའོ། །ཕག་གི་གདོང་ཅན་མ་ནི་ཅང་ཏེའུ་མའོ། །གཤིན་རྗེ་བརྟན་མ་ནི་ཐོད་མཚན་ཁ་ཊྭཱཾ་ག་ལའོ། །གཤིན་རྗེ་ཕོ་ཉ་མ་ནི་ཞགས་པ་ལའོ། །གཤིན་རྗེ་མཆེ་བ་ཅན་ནི་ཚངས་པའི་མགོ་
ལའོ། །གཤིན་རྗེ་འཇོམས་མ་ནི་སྟ་རེ་ལའོ། །བྱང་ཆུབ་ཀྱི་སེམས་ཀྱི་སྣོད་རྣམས་ནི་ཞལ་བཞི་ལའོ། །པཱུ་ཛཱ་ཨོ་ཨ། གོ་རཱ་དེ་མ། ཀཱ་ཨོ་ཏྲི་ཀོ། ཀ་ལ་ཀཱ་ཧི། པྲེ་གྲྀ་སཽ་སུ་ན་སི་མ་ཀུ། འཁོར་ལོ་གསུམ་ནི་ཡོངས་དག་ཕྱིར། །ཉི་ཤུ་རྩ་བཞིའི་ཡི་གེ་བཞི། །ཕུང་པོ་ཁམས་དང་སྐྱེ་མཆེད་རྣམས། །
བྱིན་གྱིས་བརླབ་པར་བྱ་བ་སྟེ། །གཟུགས་ཀྱི་ཕུང་པོ་ལ་རྣམ་པར་སྣང་མཛད་ཁ་དོག་དཀར་པོ་ཨོཾ་ལས་བྱུང་བའོ། །ཚོར་བ་ལ་ནི་རིན་ཆེན་རྒྱལ་པོ་གསེར་བསྲེགས་པའི་མདོག་ལྟ་བུ་ཨོཾ་ལས་བྱུང་བའོ། །འདུ་ཤེས་ལ་པདྨ་གར་གྱི་དབང་ཕྱུག་ཁ་དོག་དམར་པོ་ཧྲཱིཿལས་བྱུང་བའོ། །འདུ་བྱེད་

ལ་རྡོ་རྗེ་རྒྱལ་པོ་ཁ་དོག་ལྗང་གུ་ཧོཿལས་བྱུང་བའོ། །རྣམ་ཤེས་ཉིད་ལ་རྡོ་རྗེ་སེམས་དཔའ་ཁ་དོག་དཀར་པོ་ཧཱུཾ་ལས་བྱུང་བའོ། །དེ་བཞིན་གཤེགས་པ་ཐམས་ཅད་ཉིད་དཔལ་ཧེ་རུ་ཀ་ཁ་དོག་ནག་པོ་ཧིཿལས་བྱུང་བའོ། །སྣ་ཚོགས་པདྨའི་གདན་ལ་བཞུགས་པ།
ཉི་ཟླའི་གཟུགས་བརྙན་དབུས་སུ་བཞུགས། །གླང་པོ་མྱུར་འགྲོ་རྨ་བྱ་དང་། །རྟ་དང་སེང་གེ་མཁའ་ལྡིང་སྟེ། །ཡི་དགས་ལ་བཞུགས་རིམ་པ་བཞིན། །རིགས་དྲུག་བདག་པོ་བསམ་པར་བྱ། །སྙིང་གར་རྡོ་རྗེ་ས་གནོན་ཡིན། །གཞན་རྣམས་ཀྱི་ནི་རིམ་པ་བཞིན། །འཁོར་ལོ་རིན་ཆེན་པདྨ་
དང་། །སྣ་ཚོགས་རྡོ་རྗེ་གཡས་ནའོ། །གཡོན་ན་དྲིལ་བུ་ང་རྒྱལ་བཅས། །ཐམས་ཅད་ལ་ཡང་སྤྱན་གསུམ་ཉིད། །མིག་དག་ལ་བྲུཾ་གཏི་མུག་རྡོ་རྗེ་དཀར་པོའོ། །རྣ་བ་དག་ལ་ཧཱུཾ་ཞེ་སྡང་རྡོ་རྗེ་ནག་པོའོ། །སྣ་ལ་ཁཾ་སེར་སྣ་རྡོ་རྗེ་སེར་པོའོ། །ཁ་ལ་ཨཾ་འདོད་ཆགས་རྡོ་རྗེ་དམར་པོའོ། །ལུས་ལ་
ཧོ་ཕྲག་དོག་རྡོ་རྗེ་ལྗང་གུའོ། །སྐྱེ་མཆེད་ཐམས་ཅད་ལ་ཧཾ། དབང་ཕྱུག་རྡོ་རྗེ་ཁ་དོག་དཀར་པོའོ། །སའི་ཁམས་ལ་ལཱཾ་ལྟུང་བྱེད་མ་སེར་པོའོ། །ཆུའི་ཁམས་ལ་མཱཾ་འཆིང་བྱེད་མ་ནག་པོའོ། །མེའི་ཁམས་ལ་ཏཱཾ་འགུགས་བྱེད་མ་གསེར་གྱི་མདོག་ཅན་ནོ། །རླུང་གི་ཁམས་ལ་པཱཾ་
པདྨ་གར་གྱི་དབང་ཕྱུག་མ་དམར་མོའོ། །ནམ་མཁའི་ཁམས་ལ་ཁཾ་པདྨ་འབར་མ་སྔོ་ནག་གོ། །ལྟུང་བྱེད་མ་དང་འཆིང་བྱེད་མ། །འགུགས་བྱེད་གར་དང་ལྡན་དེ་བཞིན། །རང་རང་དཀྱིལ་འཁོར་ལ་གནས་པ། །ཞལ་གཅིག་ཕྱག་བཞི་འཁོར་ལོ་དང་། །རྡོ་རྗེ་པདྨ་རལ་གྲི་དང་། །གྲི་
གུག་གཡས་ཀྱི་ཕྱག་ནའོ། །ཐོད་པ་ཉིད་དང་ཁ་ཊྭཱཾ་ག །འདི་རྣམས་ཀྱིས་ནི་གཡོན་པ་མཚན། །ཞལ་གསུམ་ཕྱག་དྲུག་ལྷ་མོ་ནི། །པདྨ་ཡི་ནི་འབར་མ་ཡང་། །ཐོད་པ་དེ་དྲན་ཁ་ཊྭཱཾ་ག །ཞགས་པ་ལྕགས་ཀྱུ་ཉིད་དང་ནི། །ཚངས་པའི་མགོ་དང་གྲི་གུག་ནི། །འདི་ཡི་ལག་པ་རྣམས་ལ་
བསམ། །ཨོཾ་ཧ་སྙིང་གར་རྡོ་རྗེ་སེམས་དཔའ་དཀར་པོ། །ན་མ་ཧི་སྤྱི་བོར་རྣམ་པར་སྣང་མཛད་སེར་པོའོ། །སྭཱ་ཧཱ་ཧུ་སྤྱི་གཙུག་ཏུ་པདྨ་གར་གྱི་དབང་ཕྱུག་དམར་པོའོ། །བཽ་ཥ་ཊ་ཧེ་དཔུང་པ་གཉིས་སུ་ཤྲཱི་ཧེ་རུ་ཀ་ནག་པོའོ། །ཧཱུཾ་ཧཱུཾ་ཧོ་མིག་གཉིས་སུ་རྡོ་རྗེ་ཉི་མ་དམར་པོའོ། །ཕཊ་ཕཊ་ཧཾ་ལུས་ཐམས་

ཅད་ལ་རྟ་མཆོག་ལྗང་གུའོ། །ཨོཾ་བཾ་ལྟེ་བར་རྡོ་རྗེ་ཕག་མོ་དམར་མོ། ཧཾ་ཡོཾ་སྙིང་གར་ཡ་མི་ནི་སྔོན་མོ། ཧྲིཾ་མོཾ་ཁ་ལ་རྨོངས་བྱེད་མ་དཀར་མོ། ཧྲེཾ་ཧྲིཾ་སྤྱི་བོར་སྐྱོད་་བྱེད་མ་སེར་མོ། ཧཱུཾ་ཧཱུཾ་སྤྱི་གཙུག་ཏུ་སྐྲག་བྱེད་མ་ལྗང་གུ། ཕཊ་ཕཊ་ལུས་ཐམས་ཅད་ལ་གཏུམ་བྱེད་མ་མཚོན་ཆ་དུ་མའི་མདོག་
འདྲ་བའོ། །ཞལ་གསུམ་ཕྱག་དྲུག་རྡོ་རྗེ་ཅན། །དེ་ལས་གཞན་པ་ཕྱག་བཞི་པ། །རྡོ་རྗེ་དྲིལ་བུ་ཐོད་པ་རྣམས། །ཁ་ཊྭཱཾ་ག་དང་ཅང་ཏེའུ་མགོ །འཁོར་ལོ་ལ་སོགས་མཚན་མ་རྣམས། །དྲིལ་བུ་ཐོད་པ་ཉིད་དང་ནི། །ཁ་ཊྭཱཾ་ག་དང་ཅང་ཏེའུ་ཉིད། །གཞན་གྱིས་ཕྱག་གི་མཚོན་ཆ་
ཡིན། །ཕག་མོ་ཞལ་གསུམ་ཕྱག་དྲུག་མ། །དམར་མོ་སྔོན་པོ་ལྗང་གུ་ཞལ། །གྲི་གུག་ཐོད་པ་ཉིད་དང་ནི། །ཞགས་པ་དང་ནི་ཁ་ཊྭཱཾ་ག །ལྕགས་ཀྱུ་དེ་བཞིན་ཚངས་པའི་མགོ །ལག་པ་རྣམས་ལ་འདི་བསམ་བྱ། །གཞན་ནི་ཕྱག་བཞིར་བསྒོམ་པར་བྱ། །ཞལ་གཅིག་ཕྱག་ནི་གསུམ་
པ་ཡིས། །གྲི་གུག་ཐོད་པ་ཁ་ཊྭཱཾ་དང་། །ཅང་ཏེའུ་དྲིལ་བུ་དེ་བཞིན་ནོ། །ཕག་མོ་རྡོ་རྗེ་སེམས་དཔའ་ཡིན། །རྣམ་སྣང་ཡ་མི་ནར་དྲན་བྱ། །པདྨ་གར་དབང་རྨོངས་བྱེད་མ། །སྐྱོང་བྱེད་མ་ནི་ཧེ་རུ་ཀ །རྡོ་རྗེ་ཉི་མ་སྐྲག་བྱེད་མ། །རྟ་ཡི་མཆོག་ནི་གཏུམ་བྱེད་མ། །ཐུགས་ལ་ཧཱུཾ་ཡིག་རྡོ་རྗེ་ཡིན། །
ཨ་ནི་ངག་གི་ལམ་དུ་གནས། །ཡི་གེ་ཨོཾ་ནི་སྐུ་རྡོ་རྗེ། །ནག་པོ་དམར་པོ་དཀར་པོ་རིམ། །དཔའ་བོ་རྣལ་འབྱོར་མ་རྣམས་ཀྱིས། །ནམ་མཁའ་ཀུན་དུ་ཁྱབ་བལྟས་ཏེ། །བདུད་རྩི་ལྔ་ཡིས་ཡོངས་གང་བའི། །ཐོད་པས་དབང་བསྐུར་ཚིག་འདི་ཡིས། །དབང་བསྐུར་བ་ནི་སྦྱིན་པར་བྱ། །ཇི་ལྟར་
བལྟམས་པ་ཙམ་གྱིས་ནི། །དེ་བཞིན་གཤེགས་ཀུན་ཁྲུས་གསོལ་བ། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་གསོལ་ལོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ། །ཕྱག་རྒྱ་རྡོ་རྗེ་སེམས་དཔར་འགྱུར། །བླ་ན་མེད་པའི་མཆོད་པས་མཆོད། །ཞིང་སྐྱེས་ལྷན་
ཅིག་སྐྱེས་ལྷ་མོ། །མཁའ་འགྲོ་རྣལ་འབྱོར་མ་དེ་བཞིན། །རིགས་སྐྱེས་མ་མོ་སྐྱེས་དེ་བཞིན། །མི་སྣང་མཁའ་སྤྱོད་དེ་བཞིན་ནོ། །དམའ་བར་སྐྱེས་དང་མཆོག་དེ་བཞིན། །བར་མ་རྣམ་པ་སྣ་ཚོགས་མཆོག །ས་སྤྱོད་མཁའ་སྤྱོད་དེ་བཞིན་ནོ། །ས་ཡི་འོག་ན་གནས་པ་དང་། །གནོད་

སྦྱིན་མོ་དང་ཀླུ་མོ་དང་། །དྲི་ཟ་མོ་དང་མི་འམ་ཅི། །རིག་པ་འཛིན་པ་སྔོན་གྲུབ་པ། །གང་ཡང་བདེ་གཤེགས་བརྟེན་པ་དང་། །དཀོན་མཆོག་གསུམ་ལ་མོས་གང་དང་། །དེ་དག་ཐམས་ཅད་དཀྱིལ་འཁོར་ལོ། །མཆོད་པ་རྣམ་པ་སྣ་ཚོགས་པ། །གླུ་དང་གར་གྱི་མཆོད་པ་
དང་། །སྣ་ཚོགས་གང་དང་འདོད་མཆོག་གིས། །ཧེ་རུ་ཀ་ལ་མཆོད་པ་བྱེད། །རླུང་དང་མེ་ཡི་དཀྱིལ་སྟེང་དུ། །ཨ་ལས་གྲུབ་པའི་ཐོད་པ་ལ། །ཡེ་ཤེས་ལྔ་ཡི་བདུད་རྩིས་བཀང་། །ཡི་གེ་བཅུ་དྲུག་བཾ་དང་ནི། །ཨོཾ་སོགས་ཡི་གེ་གསུམ་བྱིན་བརླབས། །འཁོར་གསུམ་ཡང་དག་སྤྲོས་བསྒོམ་བྱ། །མཁའ་
འགྲོ་མ་དང་ལཱ་མ་དང་། །དུམ་སྐྱེས་མ་དང་གཟུགས་ཅན་མ། །གཡོན་དུ་བསྐོར་ཞིང་རབ་བསྐོར་བས། །དངོས་གྲུབ་ཐམས་ཅད་རབ་སྒྲུབ་བྱེད། །ཤར་གྱི་འདབ་མར་མཁའ་འགྲོ་མ། །དེ་བཞིན་ལཱ་མ་བྱང་དུ་ཡིན། །ནུབ་ཏུ་དུམ་སྐྱེས་མ་ཉིད་དོ། །ལྷོ་རུ་གཟུགས་ཅན་མ་ཉིད་དོ། །མཁའ་འགྲོ་མ་ནི་
ཁ་དོག་ནག །ལཱ་མ་ཁ་དོག་སེར་མོར་བཤད། །དུམ་སྐྱེས་མ་ནི་དམར་མོ་ཡིན། །གཟུགས་ཅན་མ་ནི་ལྗང་གུའོ། །ཞལ་གཅིག་ཕྱག་རྒྱ་ལྔ་ཡིས་མཚོན། །བཞི་པོ་ཀུན་ཀྱང་ཕྱག་བཞི་མ། །སྤྱན་གསུམ་སྐྲ་ནི་གྲོལ་བ་དང་། །གྲི་གུག་ཐོད་པ་ཁ་ཊྭཱཾ་ག །ཅང་ཏེའུ་ཚངས་པའི་མགོ་བོ་
བསྣམས། །བདུད་བཞི་ཞབས་ཀྱིས་མནན་པའོ། །མཚམས་སུ་གསེར་དང་དངུལ་སོགས་ཀྱི། །བུམ་པའི་སྟེང་དུ་གཞག་བྱ་བ། །ཀུནྡ་ལྟ་བུའི་བདུད་རྩི་བཞི། །བྱང་ཆུབ་སེམས་ཀྱི་ཐོད་པའོ། །ཐུགས་ཀྱི་འཁོར་ལོའི་ཤར་ཕྱོགས་སུ། པུལླཱི་ར་མཱ་ལ་ཡར་ཐོད་པའི་དུམ་བུ་དང་རབ་ཏུ་གཏུམ་མོ་
དཀར་མོ་དང་། བྱང་དུ་ཛཱ་ལན་དྷ་རར་ཀེང་རུས་ཆེན་པོ་དང་། །གཏུམ་པའི་མིག་ཅན་མ་སེར་མོ། ནུབ་ཏུ་ཨཽ་ཌྱན་དུ་ཀེང་རུས་དང་འོད་ཅན་མ་དམར་མོ། ལྷོར་ཨརྦུ་དར་མཆེ་བ་གཙིགས་པ་དང་སྣ་ཆེན་མ་ལྗང་གུའོ། །མེའི་ཕྱོགས་གོ་དཱ་བ་རཱིར་ལྷ་དགྲ་དང་། །བརྟན་པའི་བློ་ཅན་མ་སྔོ་
སྐྱ་མའོ། །བདེན་བྲལ་དུ་རཱ་མེ་ཤྭ་རཱིར་དཔག་མེད་དང་མི་ཐུང་མ་དཀར་སེར་རོ། །རླུང་གི་ཕྱོགས་དེ་བཱི་ཀོ་ཊཱིར་རྡོ་རྗེ་འོད་དང་ལང་ཀའི་དབང་ཕྱུག་མ་ལྗང་གུའོ། །དབང་ལྡན་དུ་མཱ་ལ་བར་རྡོ་རྗེ་སྐུ་དང་ཤིང་གྲིབ་མ་པདྨའི་ཁ་དོག་སྟེ། ཐམས་ཅད་ཞལ་གཅིག་ཕྱག་གཉིས་པ། །སྐྲ་གྲོལ་སྤྱན་ནི་གསུམ་

པའོ། །འཁྱུད་པ་ཡིས་ནི་ཐོད་པ་འཛིན། །ག