Luận tạng Tây Tạng (Tengyur) — Tập 22

་ལ་ཨྃ་སེར་པོའོ། །འདུ་ཤེས་ཀྱི་ཕུང་པོ་ནི་མིག་གི་རྣམ་པར་ཤེས་པ་ལ་སོགས་པ། ཁམས་བཅོ་བརྒྱད་ཀྱི་ཁྱད་པར་འཛིན་པའི་སྒོ་ནས་མིང་གི་སྦྱོར་བ་རྣམས་ཀྱིས་སེམས་ལས་བྱུང་བ་གང་སྐྱེས་པ་
དེ་རྣམས་འདུ་ཤེས་སོ། །དེ་ཡང་མཐའ་ཡས་པ་ཡིན་ཏེ་ཡུལ་མཐའ་ཡས་པའི་ཕྱིར་རོ། །མིག་ལ་སོགས་པ་དབང་པོ་རྣམས་ཀྱི་ཕལ་ཆེར་རྩ་བར་གྱུར་པ་མགྲིན་པ་ཡིན་པས་དེར་ཧྲཱིཿདམར་པོའོ། །རྣམ་པར་ཤེས་པའི་ཕུང་པོ་ཞེས་བྱ་བ་ནི། མིག་གི་རྣམ་པར་ཤེས་པ་ལ་སོགས་པ་ལྔ་
དང་། ཀུན་གཞི་དང་། ཡིད་དང་ཉོན་མོངས་པ་ཅན་གྱི་ཡིད་དང་། རྣམ་པར་ཤེས་པ་བརྒྱད་དོ། །འདི་ལ་རྣམ་པར་ཤེས་པ་ཐམས་ཅད་ཀྱི་རྩ་བར་གྱུར་པ་ཀུན་གཞི་རྣམ་པར་ཤེས་པ་དང་། ཡིད་ཀྱི་དབང་པོའི་རྟེན་སྲོག་རླུང་ཡིན་པས་དེའི་གནས་ནི་སྙིང་ག་སྟེ་དེ་ལ་ཧཱུཾ་དཀར་པོའོ། །
བཞི་པོ་རྣམས་ལས་གཞན་འདུ་བྱེད་ཀྱི་ཕུང་པོ་ཞེས་བྱ་བ་ནི་སེམས་ལས་བྱུང་བ་རྣམས་ཏེ། དེ་ཡང་མ་རིག་པ་ཐེ་ཚོམ་ལོག་པར་ལྟ་བ། འཇིག་ཚོགས་སུ་ལྟ་བ་མཐར་འཛིན་པའི་ལྟ་བ་དང་། ལྟ་བ་ལ་མཆོག་ཏུ་འཛིན་པ་དང་། ཚུལ་ཁྲིམས་དང་། བརྟུལ་ཞུགས་མཆོག་ཏུ་འཛིན་
པའི་ལྟ་བ་དང་། འདོད་ཆགས་ང་རྒྱལ་ཕྲག་དོག་སེར་སྣ་ཁོང་ཁྲོ་ལ་སོགས་མང་བའོ། །དེའི་ཁོངས་སུ་ཆུད་པའི་སེམས་བྱུང་རྣམས་ཀྱི་ཡང་རྟེན་རླུང་སྟེ། དེའི་གནས་རྐང་པ་གཉིས་ཀྱི་ཁྲོང་མོའི་འོག་ཡིན་ཏེ། དེ་དག་ལ་གཟུགས་བརྙན་ལྟར་གཉིས་སུ་གྱུར་པའི་ཧོཿལྗང་གུའོ། །

ཕུང་པོ་ལྔ་པོ་རྣམས་ཀྱི་དེ་བཞིན་ཉིད་ལ་སྤྱི་གཙུག་ཧྲཱིཿམཐིང་གའོ། །དེ་བཞིན་དུ་མིག་ལ་སོགས་པར་བྱང་ཆུབ་སེམས་དཔའ་ཀུན་གྱི་ས་བོན་ཨོཾ་དཀར་པོ་དང་། ཧཱུཾ་མཐིང་ག །ཏྲཾ་སེར་པོ། ཨ་དམར་པོ། ཧཾ་ལྗང་གུ། ཧཱུཾ་དཀར་པོ་ལྟེ་བ་ལ་སོགས་པར་ལྟུང་བྱེད་མ་ལ་སོགས་པའི་ལཾ་སེར་པོ།
མཾ་མཐིང་ག །པཾ་དམར་མོ། ཏཾ་ལྗང་གུ། །བཾ་དུང་མདོག་བསྒོམ་པར་བྱའོ། །རྒྱུད་གཞན་ལས་དྲངས་པའི་མཚན་ལ་སོགས་པར་ཚིགས་སུ་བཅད་པས་བསྙད་པ། རྣམ་སྣང་རིན་ཆེན་འབྱུང་གནས་ཏེ། །འོད་དཔག་མེད་དང་དོན་ཡོད་གྲུབ། །རྡོ་རྗེ་སེམས་དང་མི་བསྐྱོད་པ། །འདི་དྲུག་
རྒྱལ་བའི་ཁྱུ་མཆོག་ཡིན། །བརྐྱང་བསྐུམ་སྤྱན་གསུམ་ལྡན་པ་རྣམས། །དཀར་སེར་དམར་པོ་ལྗང་གུ་དང་། །དཀར་མཐིང་དེ་བཞིན་གཤེགས་པ་རྣམས། །དང་པོ་གཡས་ན་འཁོར་ལོ་འཕྱར། །གཡོན་པ་དྲིལ་བུ་དཀུར་བརྟེན་པ། །གསུམ་པོ་རིན་ཆེན་པདྨ་དམར། །སྣ་ཚོགས་
རྡོ་རྗེ་འཕྱར་བས་རོལ། །གཡོན་རྣམས་དྲིལ་བུ་ཐུགས་ཀར་བསྣམས། །ལྔ་པ་ཐུགས་ཀར་ཕྱག་གཡས་ན། །རྡོ་རྗེ་གཡོན་པས་དྲིལ་བུ་དཀུར། །བརྟེན་པའོ་དེ་བཞིན་གཡོན་པ་གཞན། །མི་བསྐྱོད་པ་ནི་ཕྱག་གཡས་ཀྱིས། །ས་གནོན་ཕྱག་རྒྱས་རྡོ་རྗེ་འཛིན། །ས་སྙིང་ཕྱག་ན་
རྡོ་རྗེ་དང་། །མཁའ་སྙིང་འཇིག་རྟེན་དབང་ཕྱུག་དང་། །སྒྲིབ་པ་ཐམས་ཅད་རྣམ་སེལ་བ། །ཀུན་དུ་བཟང་པོ་རྒྱལ་སྲས་རྣམས། །དཀར་པོ་མཐིང་ག་སེར་པོ་དམར། །སྔོན་པོ་དཀར་རྣམས་གོ་རིམས་བཞིན། །དང་པོ་གཡས་པས་འཁོར་ལོ་འཕྱར། །གཡོན་པས་
ཐུགས་ཀར་དྲིལ་བུ་བསྣམས། །ཕྱག་རྡོར་ཐུགས་ཀར་རྡོ་རྗེ་གཡས། །གཡོན་གྱི་དྲིལ་བུ་དཀུར་བརྟེན་པ། །གཞན་གསུམ་གཡས་པས་རིན་ཆེན་དང་། །པདྨ་དམར་དང་རྡོ་རྗེ་འཕྱར། །གཡོན་པ་དྲིལ་བུ་ཐུགས་ཀར་བསྣམས། །པད་དམར་སྣ་ཚོགས་རྡོ་རྗེ་འཕྱར། །དྲུག་པ་
ཐུགས་ཀར་རྡོ་རྗེ་གཡས། །གཡོན་པ་དྲིལ་བུ་དཀུར་བརྟེན་པའོ། །རང་རང་ས་བོན་ལས་བྱུང་བའི། །ཐམས་ཅད་ཞལ་གཅིག་ཕྱག་གཉིས་པའོ། །ལྟུང་བྱེད་མ་ལ་སོགས་པ་ཡང་། །སེར་དང་མཐིང་ནག་དམར་ལྗང་གུ། །ཞལ་གཅིག་ཕྱག་བཞི་པ་རྣམས་ཀྱིས། །འཁོར་

ལོ་རྡོ་རྗེ་པད་རལ་གྲི། །གཡས་པའི་གཞན་ན་གྲི་གུག་གོ། །གཡོན་རྣམས་ཐོད་པ་ཁ་ཊྭཱཾ་ག །ལྔ་པ་དུ་བའི་མདོག་ཅན་ཏེ། །ཞལ་གསུམ་དུ་མདོག་དཀར་དང་དམར། །ཕྱག་དྲུག་དེ་ཡི་གཡོན་པ་ལ། །ཐོད་པ་ཁ་ཊྭཱཾ་ཞགས་པ་འཛིན། །གཡས་ཀྱིས་ལྕགས་ཀྱུ་
ཚངས་པའི་མགོ། །གྲི་གུག་རྣམས་ནི་རིམ་པས་འཛིན། །གཅེར་བུ་སྐྲ་གྲོལ་ལྷ་མོ་རྣམས། །དེ་དག་ཐམས་ཅད་སྤྱན་གསུམ་པ། །ཞབས་གཉིས་བརྐྱང་བསྐུམ་ཡང་དག་གནས། །ཕྱག་རྒྱ་ལྔ་ཡིས་རྣམ་པར་བརྒྱན། །ལྟུང་བྱེད་མ་ལ་སོགས་རྣམས་ནི། །ལས་དང་རྗེས་སུ་མཐུན་
པའི་མིང་ཅན་ཏེ་སངས་རྒྱས་སྤྱན་དང་མཱ་མ་ཀཱི་གོས་དཀར་མོ་དང་སྒྲོལ་མ་ཆོས་ཀྱི་དབྱིངས་ཀྱི་རྡོ་རྗེ་མའི་རང་བཞིན་ནོ། །ལྟུང་བྱེད་མས་ནི་བདུད་ཐམས་ཅད་ལྟུང་བར་བྱེད་པས་ཞི་བར་བྱེད་པའོ། །པདྨ་གར་གྱི་དབང་ཕྱུག་མ་ནི་ལས་ཁ་ཚར་བ་ཐམས་ཅད་སྒྲུབ་པར་བྱེད་པས་གར་ཉིད་ནི་ལས་ཁ་ཚར་བ་
ལ་དབང་ཕྱུག་སྟེ་དོན་ཡོད་གྲུབ་པའི་རང་བཞིན་ཉིད་ཀྱི་ཕྱིར་རོ། །མེ་ལོང་ལྟ་བུའི་ཡེ་ཤེས་ཀྱི་རང་བཞིན་ནི་རྣམ་པར་སྣང་མཛད་དེ། དེ་བཞིན་དུ་མཉམ་པ་ཉིད་དང་། སོ་སོར་རྟོག་པ་དང་། བྱ་བ་གྲུབ་པ་དང་། ཤིན་ཏུ་རྣམ་པར་དག་པ་ཆོས་ཀྱི་དབྱིངས་དང་། ཆོས་ཀྱི་དབྱིངས་ཀྱི་རང་
བཞིན་དུ་གཞན་དེ་བཞིན་གཤེགས་པ་ལྔ་རིམ་པ་བཞིན་དུ་རྟོགས་པར་བྱའོ། །གཏི་མུག་རྣམ་པར་ཉམས་པས་གཏི་མུག་རྡོ་རྗེའོ། །གཞན་རྣམས་ཀྱང་དེ་བཞིན་ནོ། །ལྷག་མ་གོ་སླའོ། །གཟུགས་བརྙན་ལ་སོགས་པ་ནི་ཡང་ན་ཕུང་པོ་ལྔ་གོ་རིམས་བཞིན་དུ་གཟུགས་བརྙན་དང་། ཆུ་བུར་སྨིག་
རྒྱུ་ཆུ་ཤིང་དང་སྒྱུ་མ་བཞིན་དུ་ངེས་པར་བྱའོ། །དེ་ནས་ཞེས་པ་ནི་ཕུང་པོ་ལ་སོགས་པ་དག་པའི་མཇུག་ཐོགས་སུ་བར་མ་ཆད་པར་རྡོ་རྗེའི་གུར་བསྒོམ་པར་བྱའོ། །དེ་བཞིན་ཞེས་བྱ་བ་ནི་ནག་པོ། ལྗང་གུ། དམར་པོ། སེར་པོའོ། །མཉམ་པ་ཞེས་པ་ནི་དེ་དང་དུས་མཉམ་པ་ཁོ་ན་ལའོ། །
ཧཱུཾ་བྱུང་ཞེས་བྱ་བ་ནི་ཧཱུཾ་ཡིག་ལས་བྱུང་བ་དང་། ཧཱུཾ་ཡིག་གིས་མཚན་པའི་རྡོ་རྗེའོ། །ཨོཾ་མེ་དི་ནཱི་བཛྲཱི་བྷ་བ་བཛྲ་བནྡྷ་ཧཱུཾ་ཞེས་པའི་སྔགས་བརྗོད་ནས་སོ། །འོག་ཁྱབ་ནི་ས་འོག་གི་མཐའི་བར་དུའོ། །ཨོཾ་བཛྲ་པྲཱ་ཀཱ་ར་ཧཱུཾ་བཾ་ཧཱུཾ་ཞེས་པའི་སྔགས་ཀྱིས་རྡོ་རྗེ་རྩེ་ལྔའི་རང་བཞིན་རྩིག་པ་རྣམས་བསམ་

པར་བྱའོ། །ཨོཾ་བཛྲ་ཤ་ར་ཛཱ་ལ་ཏྲཱཾ་ཤཾ་ཏྲཱཾ་ཞེས་པ་འདིས་མདའི་དྲ་བ་ཡང་ངོ་། །ཨོཾ་བཛྲ་པཉྫ་ར་ཧཱུཾ་བཾ་ཧཱུཾ་ཞེས་བྱ་བའི་སྔགས་ཀྱིས་རྡོ་རྗེའི་གུར་བསྒོམ་པར་བྱའོ། །འོག་ཅེས་པ་ནི་རྡོ་རྗེའི་གུར་གྱི་འོག་ཏུ་ཨོཾ་བཛྲ་བི་དཱ་ན་ཧཱུཾ་ཁཾ་ཧཱུཾ་ཞེས་པའི་སྔགས་ཀྱིས་རྡོ་རྗེའི་བླ་རེ་བསྒོམ་པར་བྱའོ། །ཨོཾ་བཛྲ་ཛྭ་ལཱན་ལཱརྐ་ཧཱུཾ་
ཧཱུཾ་ཧཱུཾ་ཞེས་པ་འདིས་རྡོ་རྗེའི་དྲ་བ་འབར་བ་ཡང་ངོ་། །ཁྭ་གདོང་མ་ལ་སོགས་པ་ཞེས་བྱ་བ་ནི། སོགས་པའི་སྒྲས་འུག་གདོང་། ཁྱི་གདོང་། ཕག་གདོང་མ་ཡོངས་སུ་གཟུང་ངོ་། །གསང་སྔགས་བཞི་ཞེས་པ་ནི་སུམྦྷ་ལ་སོགས་པ་ཞལ་བཞི་པའི་སྔགས་སོ། །གཉིས་གཉིས་རང་རང་ཕྱོགས་འོད་
ལས་བྱུང་བ་ཞེས་པ་ནི་གསང་སྔགས་གཉིས་གཉིས་ཀྱི་འོད་ཟེར་ལས་སྐྱེས་པ་རྣམས་སོ། །གཤིན་རྗེ་བརྟན་མ་ལ་སོགས་ཞེས་པའི་སྒྲས་ནི་གཤིན་རྗེ་ཕོ་ཉ་མ། གཤིན་རྗེ་མཆེ་བ་མ། གཤིན་རྗེ་འཇོམས་མ་གཟུང་ངོ་། །ཁྭ་གདོང་མ་ལ་སོགས་པ་བརྒྱད་ཀྱིས་ཕྱོགས་མཚམས་སྲུང་བ་ཁོ་ན་
བཟུང་ན་གང་གིས་སྟེང་དང་འོག་སྲུང་ཞེ་ན། བརྗོད་པ་སྟེང་དང་འོག་གི་སྲུང་བ་ཡང་། རྒྱུད་འདི་ལ་དེ་རྣམས་ཁོ་ནས་བྱེད་དེ། ས་འོག་ཚངས་པའི་གནས་པར་ཞེས་གསུངས་པའི་ཕྱིར་རོ། །ཁྲོན་པར་ཞེས་པ་ནི་རྩིག་པའི་ཉེ་བར་བྱུང་བ་ལའོ། །དེ་བཞིན་ཉིད་དུ་རོ་གཅིག་གནས། །ཞེས་པ་ནི་
བགེགས་རྣམས་བསམ་པར་བྱའོ། །ཐིམ་ཞེས་པ་ནི་ཁྭ་གདོང་མ་ལ་སོགས་པ་རྣམས་སོ། །ཆུ་ལ་ཆུ་ཞེས་པ་ལ་སོགས་པ་ནི་ཁྭ་གདོང་མ་ལ་སོགས་པ་རབ་ཏུ་ཞུགས་པའི་དུས་ཁོ་ནར་ཆུ་ལ་ཆུ་བརྡབས་པས་ཐིམ་པ་བཞིན་དུ་བྱུང་བའོ། །དེའི་དུས་སུ་རྡོ་རྗེའི་རྩིག་པ་ལ་སོགས་པ་ཡང་བུ་ག་མེད་
པར་གཅིག་ཏུ་གྱུར་པ་དང་། རྣམ་པ་ཐམས་ཅད་ཀྱི་འགྲོ་བ་རྣམས་བགེགས་དང་བྲལ་བར་ལྷག་པར་མོས་པར་བྱའོ། །སྲུང་བའི་གུར་ལ་སོགས་པའི་མཇུག་ཐོགས་སུ་ཅིའི་དོན་དུ་འདི་ལ་སྟོང་པ་ཉིད་དུ་སྒོམ་ཞེས་པའི་ཀླན་ཀ་མེད་དེ། གང་གི་ཕྱིར་རྒྱུད་འདི་ཤེས་རབ་ཆེན་པོ་དང་ལྡན་པའི་
དབང་གིས་ཡིན་ཏེ། ཤེས་རབ་ཆེན་པོ་དང་ལྡན་པའི་ཡང་སྟོང་ཉིད་ཁོ་ན་སྲུང་བའི་མཆོག་གོ། །འོ་ན་བྲིས་པའི་དཀྱིལ་འཁོར་གྱི་ཕྱི་རོལ་དུ་རྡོ་རྗེའི་ཕྲེང་བ་ཡང་ཅིའི་ཕྱིར་ཞེས་པ་ཡང་མ་བརྗོད་ཅིག །གང་གི་ཚེ་ཁོ་ན་བཅོམ་ལྡན་འདས་ཀྱི་དཀྱིལ་འཁོར་བསྐྱེད་པའི་ཚེ་ཁོ་ནར་དམ་ཚིག་

འཁོར་ལོས་ཡོངས་སུ་བཅད་པའི་སྣ་ཚོགས་རྡོ་རྗེའི་ཕྲེང་བ་བསྐྱེད་པའི་ཕྱིར་རོ། །ཞལ་བཞི་པའི་སྔགས་ཀྱི་བཏུ་བའི་ཆོ་ག་ལ། རེ་ཁཱ་བརྒྱད་བརྒྱད་ཀྱིས་བྱས་པ་རེའུ་མིག་བཞི་བཅུ་ཞེ་དགུ་པར་འགྱུར་བ་ལ་ཨ་ཡིག་ཐོག་མར་ཧ་ཡིག་ཐ་མར་གནས་པ་ཡི་གེ་བཞི་བཅུ་ཞེ་དགུ་བྲི་
བར་བྱའོ། །དེ་ལ། བཅུ་གསུམ་ཟླ་ཚེས་ཐིག་ལེར་བཅས། །ཞེ་བརྒྱད་པ་ལ་ལྔ་པའི་ཞབས། །ཞེ་གཅིག་པ་ལ་བཞི་བཅུའི་གདན། །སོ་དྲུག་པ་ལ་གསུམ་པར་ལྡན། །ཞེ་བརྒྱད་པ་ལ་ལྔ་པའི་ཞབས། །ཞེ་གཅིག་པ་ལ་བཞི་བཅུའི་གདན། །ཞེ་དགུ་པ་ལ་ལྔ་པ་ཅན། །ཟླ་ཚེས་ཐིག་ལེ་དང་བཅས་
པ། །དེ་བཞིན་ཡི་གེ་གཞན་ཡང་ངོ་། །སོ་བརྒྱད་པ་དང་ཉེར་བདུན་པ། །ཞེས་བྱ་བ་ནི་ཐོག་མའི་སྔགས། །བཅུ་གསུམ་ཟླ་ཚེས་ཐིག་ལེ་ཅན། །བཅུ་དགུ་པ་ལ་ཞེ་གསུམ་གདན། །དབྱངས་ཡིག་གསུམ་པ་དང་ལྡན་པ། །ཞེ་དགུ་པ་ལ་སོ་དྲུག་གདན། །བཅུ་དགུ་ལ་སོགས་ཡང་དེ་
བཞིན། །ཞེ་དགུ་དབྱངས་ཡིག་ལྔ་པར་བཅས། །ཟླ་ཚེས་ཐིག་ལེར་ལྡན་པའོ། །ཞེ་དགུ་ལ་སོགས་ཡང་དེ་བཞིན། །སོ་བརྒྱད་པ་དང་ཉེར་བདུན་པ། །བཟུང་བས་གཉིས་པའི་སྔགས་ཡིན་ནོ། །བཅུ་གསུམ་ཟླ་ཚེས་ཐིག་ལེ་ཅན། །བཅུ་དགུ་ཞེ་གསུམ་པ་ཡི་གདན། །དབྱངས་ཡིག་
གསུམ་པ་དང་ལྡན་པ། །ཞེ་དགུ་པ་ལ་སོ་དྲུག་ལྡན། །དབྱངས་ཀྱི་ཡི་གེ་གཉིས་པ་ཅན། །སོ་བདུན་པ་དང་ཞེ་གཉིས་པ། །བཅུ་དགུ་ལ་སོགས་ཡང་དེ་བཞིན། །ཞེ་དགུ་པ་ལ་ལྔ་པ་དང་། །ཟླ་ཚེས་ཐིག་ལེར་བཅས་པའོ། །ཞེ་དགུ་པ་སོགས་ཡང་དེ་བཞིན། །སོ་བརྒྱད་པ་དང་ཉེར་
བདུན་པ། །ཞེས་བྱ་བ་ནི་གསུམ་པའི་སྔགས། །བཅུ་གསུམ་ཟླ་ཚེས་ཐིག་ལེར་ལྡན། །དབྱངས་ཀྱི་ཡི་གེ་གཉིས་པ་བླང་། །སོ་དྲུག་ཞེ་གཉིས་ཞེ་དགུ་པ། །དབྱངས་ཡིག་བཅུ་གསུམ་པ་ཡིས་བརྒྱན། །བཞི་བཅུ་བཅུ་དགུ་སོ་དགུ་པ། །གཉིས་པ་ཟླ་ཚེས་ཐིག་ལེར་ལྡན། །སོ་དགུ་
ཉེར་བཞི་ཞེ་གསུམ་གདན། །ཞེ་དགུ་པ་ལ་ལྔ་པ་དང་། །ཟླ་ཚེས་ཐིག་ལེར་ལྡན་པ་སྟེ། །ཞེ་དགུ་ལ་སོགས་ཡང་དེ་བཞིན། །སོ་བརྒྱད་པ་དང་ཉེར་བདུན་པ། །ཞེས་བྱ་བ་ནི་བཞི་པའི་སྔགས་སོ། །དེ་རྣམས་ཞེས་པ་ནི་སྲུང་བའི་གུར་བསྒོམ་པའི་མཇུག་ཐོགས་སུ། སྙིང་གར་ཞེས་

པ་ནི་སྲུང་བའི་གུར་གྱི་དབུས་སུ་གནས་པའི་ཐུགས་ཀར་རོ། །དེ་སྟེང་ཞེས་པ་ནི་ཟླ་བའི་དཀྱིལ་འཁོར་གྱི་དབུས་སུ་ཧཱུྃ་ཡིག་རྡོ་རྗེ་འཛིན་པའི་རང་བཞིན་འོད་ཟེར་ལྔ་འཕྲོ་བ་དང་ལྡན་པ་སྟེ། །ངོ་བོ་ཉིད་ཀྱི་ཁ་དོག་ཀྱང་ཧཱུཾ་ཡིག་གི་དངུལ་ཆུ་དང་འདྲ་བ་སྟེ་དབུས་སྔོ་བ་ཉིད་དང་། ཕྱི་རོལ་དཀར་བ་ཉིད་ཀྱི་
ཕྱིར་རོ། །དེའི་འོད་ཟེར་རྣམས་ཀྱིས་བཀུག་པ། མདུན་གྱི་ནམ་མཁའི་ཕྱོགས་སུ་གནས་པ་འཁོར་ལོ་སྡོམ་པ་ལ་ཕྱག་འཚལ་བ་སོགས་བླ་ན་མེད་པའི་ཡན་ལག་བདུན་པའི་མཆོད་པ་དང་བདག་ཉིད་དབུལ་བར་བྱ་སྟེ། དེ་ལ། རྡོ་རྗེ་མཁའ་འགྲོ་ཁྱོད་ལ་འདུད། །མཁའ་འགྲོ་མ་ཡི་འཁོར་
ལོས་སྒྱུར། །ཡེ་ཤེས་ལྔ་དང་སྐུ་གསུམ་ལྡན། །འགྲོ་བ་སྐྱོབ་ལ་ཕྱག་འཚལ་ལོ། །ཞེས་བྱ་བ་ཕྱག་འཚལ་བའོ། །སྙིང་གི་ས་བོན་འོད་བྱུང་ནས། །པི་ཝང་འཛིན་སོགས་མཛེས་རྣམས་ཀྱིས། །ཕྱི་ནང་དེ་ཉིད་གསང་བ་ཡི། །མཆོད་པས་མཆོད་པ་ཉིད་དུ་བརྗོད། །དེ་ལ་པི་ཝང་
མ། གླིང་བུ་མ། རྔ་ཟླུམ་མ། རྫ་རྔ་མ་རྣམས་སྔོ་སེར་དམར་ལྗང་གུ་རྣམས་ཏེ་རང་རང་གི་རོལ་མོ་ཁོ་ན་དཀྲོལ་བའི་ཕྱག་གཙོ་བོ་གཉིས་དང་ལྡན་པ་རྣམས་དང་། ཕྱག་གཞན་གཉིས་ཀྱིས་རྡོ་རྗེ་དང་དྲིལ་བུ་འཛིན་པ་རྣམས་སོ། །བཞད་མ། སྒེག་མོ། གླུ་མ། གར་མ་རྣམས་དམར་
སེར་སྔོན་མོ་ལྗང་གུ་རྣམས་སོ། །བཞད་མའི་གཙོ་མོའི་ཕྱག་གཉིས་ཀྱིས་བཞད་པའི་སྟངས་དང་ལྡན་པ། སྒེག་མོ་གཙོ་བོའི་ཕྱག་གིས་རྡོ་རྗེ་དང་དྲིལ་བུ་འཛིན་པའི་ཕྱག་གཙོ་བོ་གཉིས་ཀྱིས་སྒེག་པའི་སྟངས་དང་ལྡན་པའོ། །གླུ་མ་གཙོ་བོའི་ཕྱག་གཉིས་ཀྱིས་ཕེག་རྡོབ་འཛིན་མ། གར་མ་
གཙོ་བོའི་ཕྱག་གཉིས་ཀྱིས་པད་ཀོར་སྟངས་ཅན་ནོ། །འདི་རྣམས་ཕྱག་གཡས་དང་གཡོན་དག་ན་ཐོད་པ་དང་ཁ་ཊྭཱཾ་ག་དང་ལྡན་པའོ། །མེ་ཏོག་མ། བདུག་སྤོས་མ། མར་མེ་མ། དྲི་ཆབ་མ་རྣམས་དཀར་མོ་དུ་བ་མར་མེའི་རྩེ་མོ་ལྟ་བུ་དང་དམར་མོ་རྣམས་སོ། །འདི་རྣམས་ཀྱི་
གཙོ་བོའི་གཡས་པར་མེ་ཏོག་པོག་ཕོར་མར་མེའི་སྡོང་པོ་དང་དྲིའི་དུང་ཆོས་རྣམས་སོ། །ཕྱག་གཞན་གསུམ་རྣམས་ན་ཌ་མ་རུ་དང་ཐོད་པ་ཁ་ཊྭཱཾ་ག་རྣམས་སོ། །གཟུགས་མ་རོ་མ་རེག་མ་ཆོས་མ་རྣམས་དཀར་མོ། དམར་མོ། ལྗང་གུ། དཀར་མོ་རྣམས་ཏེ། གཙོ་བོའི་

ཕྱག་གཡས་པའི་ཕྱག་གཅིག་གིས་མེ་ལོང་སྦྲང་ཆང་གི་སྣོད་དང་། གོས་སྣ་ཚོགས་པ་དང་། ཆོས་འབྱུང་འཛིན་པ་རྣམས་ཏེ། ཕྱག་གཞན་རྣམས་ན་ཌ་མ་རུ་དང་ཐོད་པ་ཁ་ཊྭཱཾ་ག་རྣམས་སོ། །ཐམས་ཅད་ཞལ་གཅིག་ཕྱག་བཞི་པ་ལ་སོགས་པའི་དབྱངས་ཡིག་བཅུ་
དྲུག་གི་ས་བོན་ལས་བྱུང་བ་རྣམས་སོ། །དེའི་རྗེས་སུ་རྐང་པ་བརྒྱད་པའི་སྔགས་ཀྱིས་བསྟོད་པ་བྱའོ་ཞེས་པ་ནི་མཆོད་པའོ། །འདོད་ཆགས་ཞེ་སྡང་གཏི་མུག་གི །བདག་གི་ལུས་ངག་ཡིད་སྒོ་ནས། །སྡིག་བགྱིས་བགྱིད་སྩལ་ཡི་རང་གང་། །དེ་དག་རྒྱལ་བའི་མདུན་དུ་བཤགས། །
སྡིག་པ་བཤགས་པའོ། །དེ་བཞིན་གཤེགས་པ་ཐམས་ཅད་ཀྱི་ནི་བསོད་ནམས་གང་། །གཞན་ཡང་རྫོགས་པའི་བྱང་ཆུབ་ཡང་དག་བསྟེན་རྣམས་དང་། །རང་སངས་རྒྱས་དང་བླ་མ་དམ་པ་རྣམས་ཀྱི་ཡང་། །དེ་དག་ཐམས་ཅད་བསོད་ནམས་ཤིན་ཏུ་རྗེས་ཡི་རང་། །ཞེས་བྱ་བ་
བསོད་ནམས་ལ་རྗེས་སུ་ཡི་རང་བའོ། །དུས་གསུམ་བཞུགས་པའི་སངས་རྒྱས་མ་ལུས་ཐམས་ཅད་ནི། །མཐའ་ཡས་ཕྱོགས་ཁྱབ་ཐུགས་རྗེའི་ཡོན་ཏན་ཚོགས་རབ་ལྡན། །ཆོས་བཅས་སྐྱོན་བྲལ་འཕགས་པའི་ཚོགས་རྣམས་ཐམས་ཅད་ལའང་། །ཤེས་ནས་བདག་ཉིད་གུས་པས་རབ་
ཏུ་སྐྱབས་སུ་མཆི། །ཞེས་པ་ནི་སྐྱབས་སུ་འགྲོ་བའོ། །རྒྱལ་བའི་ཡོངས་སུ་དག་པའི་ཡང་དག་ལམ་བསྟེན་ནས། །ཚངས་དབང་དྲག་པོ་སོགས་ཀྱིས་རིན་ཐང་མེད་མི་རྙེད། །འདི་ལྟར་བདག་གིས་ཉེ་བར་བསགས་པའི་བསོད་ནམས་ཚོགས་ལས་ནི། །བྱང་ཆུབ་མཆོག་སེམས་དེ་ནི་རབ་
ཏུ་བསྐྱེད་པར་བགྱི། །རྒྱལ་བའི་ལམ་བསྟེན་པ་དང་བྱང་ཆུབ་མཆོག་ཏུ་སེམས་བསྐྱེད་པའོ། །བདག་གིས་འགྲོ་རྣམས་བསྒྲལ་བྱའི་ཕྱིར། །བགྲོད་དཀའ་སྲིད་པའི་རྒྱ་མཚོ་ལས། །རང་གི་བདག་ཉིད་སྐད་ཅིག་མ། །སངས་རྒྱས་རྣམས་ལ་དབུལ་བར་བགྱི། །ཞེས་བྱ་བ་བདག་ཉིད་
དབུལ་བའོ། །འདི་ལྟར་བསོད་ནམས་ཀྱི་ཚོགས་བརྗོད་ནས་ཧེ་རུ་ཀ་ལ་སོགས་པས་ནི་ཡེ་ཤེས་ཀྱི་ཚོགས་བརྗོད་དེ། མཆོད་པ་ལ་སོགས་པ་རྟེན་ཅིང་འབྲེལ་བར་འབྱུང་བ་ལ་སོགས་པའི་སེམས་ཙམ་ཉིད་དུ་མོས་པར་བྱ་སྟེ། རང་གི་མགོ་དང་མགྲིན་པ་སྙིང་གར་ཧེ་རུ་ཀ་ཞེས་པའི་ཡི་གེ་

གསུམ་བསྒོམས་ཏེ། ཆོས་རྣམས་རྒྱུ་དང་བྲལ་བ་དེ་ལྟར་རྟོག་པ་དང་བྲལ་བ་གང་དུའང་མི་གནས་པ་ཞེས་བྱ་བར་ངེས་པར་སྦྱར་ནས། ཆོས་རྣམས་ཀྱི་ཚུལ་འདི་ལྟར་མ་ཤེས་པས་སེམས་ཅན་རྣམས་ནི་བདག་དང་བདག་གི་བ་ལ་སོགས་པ་བཟུང་ནས་འཁོར་བར་འཁྱམས་ཏེ། དེ་ལ་བདག་གིས་
ཧེ་རུ་ཀར་བསྒྱུར་ནས་ཆོས་རྣམས་ཚུལ་འདི་ལྟར་སེམས་ཅན་ཐམས་ཅད་ཀྱིས་ཤེས་པར་བྱའོ་ཞེས་ཆོས་ལ་དམིགས་པའི་སྙིང་རྗེ་བསྐྱེད་པར་བྱས་ནས། ཨོཾ་སྭ་བྷཱ་བ་ཞེས་བྱ་བ་ལ་སོགས་པའི་སྔགས་བརྗོད་ཅིང་། ཁམས་གསུམ་སྟོང་བར་བསམ་པར་བྱའོ། །དེ་ལ་མཆོད་བྱ་མཆོད་བྱེད་
མཆོད་པ་ལ་སོགས་པ་རྣམས་ཀྱིས་སེམས་ཙམ་ཉིད་དུ་མངོན་པར་བསྒོམ་པ་ལ་ཨོཾ་ཡིག་གོ། །སྭ་བྷཱ་བ་ཤུདྡྷཿསརྦ་དྷརྨཱཿཞེས་བྱ་བ་ནི། གཟུང་བ་རྣམ་པར་དག་པའོ། །སྭ་བྷཱ་བ་ཤུདྡྷོ྅ཧཾ། ཞེས་བྱ་བ་ནི་འཛིན་པ་རྣམ་པར་དག་པའོ། །ཡང་སྨོན་ལམ་གྱི་དབང་གིས་སེམས་དེ་གོང་ནས་གོང་
དུ་གནས་པའི་དཀར་པོ། དམར་པོ། མཐིང་ག །ཨོཾ་ཨཱཿཧཱུཾ་གི་ཡི་གེའི་ཚུལ་དུ་གནས་པར་བྱའོ། །དེ་ནས་ཨོཾ་ཡིག་ལས་སྐུའི་འཁོར་ལོ་རྣམས་སྤྲོས་ཏེ་འགྲོ་བའི་དོན་བྱས་ནས་སྙོམས་པར་འཇུག་པ་སྔོན་དུ་འགྲོ་བས་ཞུ་བར་བྱས་ནས་དེ་ཉིད་ཁོ་ན་ལ་རབ་ཏུ་གཞུག་པར་བྱའོ། །དེ་བཞིན་དུ་
ཨཱཿཡིག་ལས་གསུང་གི་འཁོར་ལོའི་ལྷ་རྣམས་དང་། ཧཱུཾ་ཡིག་ལས་ཐུགས་ཀྱི་འཁོར་ལོའི་ལྷ་རྣམས་སོ། །དེ་ནས་ཨོཾ་ཡིག་ཨཱཿཡིག་ལ། ཨཱཿཡིག་ཧཱུཾ་ཡིག་ལ། ཞབས་ཀྱུ་ཧ་ཡིག་ལ། ཧ་ཡིག་མགོ་ལ། མགོ་ཟླ་ཚེས་ལ། ཟླ་ཚེས་ཐིག་ལེ་ལ། ཐིག་ལེ་ནཱ་ད་ལ་ཐིམ་པར་བྱས་ནས་
སྐྲའི་རྩེ་མོ་བརྒྱ་སྟོང་གི་ཆར་བཞག་ནས་ཆོས་ཉིད་མ་རྟོགས་ན་སེམས་ཅན་རྣམས་ཞེས་བྱ་བ་ལ་སོགས་པ་སྔར་བཞིན་དུ་སྙིང་རྗེ་ཆེན་པོ་དམིགས་པ་མེད་པའི་སྙིང་རྗེའི་ས་བོན་དུ་གྱུར་པར་རྣམ་པར་བསྒོམས་ནས། ཨོཾ་ཤཱུ་ནྱ་ཏཱ་ཛྙཱ་ན་བཛྲ་ཞེས་བྱ་བ་ལ་སོགས་པའི་སྔགས་བརྗོད་དེ། ནཱ་ད་ཙམ་
གྱིས་རྣམ་པར་རྟོག་པ་ཡང་སྤང་ངོ་ཞེས་བྱའོ། །ཆུང་དུས་ཀྱང་སྟོང་པ་ཉིད་ཀྱི་སྒོམ་པ་མེད་པར་རྡོ་རྗེའི་གུར་གྱི་དབུས་ཁོ་ན་ལ། ཆོས་ཀྱི་དབྱིངས་ཀྱི་རང་བཞིན་ཆོས་འབྱུང་ཨེ་ཡིག་གི་རྣམ་པ་སྟེང་ཡངས་པ་འོག་ཕྲ་བའི་རྣམ་པར་བསྒོམས་ནས། དབུས་སུ་གཞལ་ཡས་ཁང་

སྒོམ་པར་བྱེད་པ་ནི་ཁ་ཅིག་གིའོ། །དེའི་རྗེས་སུ་སྟོང་པ་ཉིད་ལས་ལྡང་བའི་རྣལ་འབྱོར་གྱིས་བྷཻ་རཾ་བ་རླུང་གི་དཀྱིལ་འཁོར་ལ་སོགས་པའི་རིམ་པས་སྣ་ཚོགས་རྡོ་རྗེ་མངོན་པར་རྫོགས་པར་བྱས་ནས། དེའི་སྟེང་དུ་སྣ་ཚོགས་པདྨ་བསྒོམ་སྟེ་དེའི་མཚན་ཉིད་བརྗོད་
པ། ཤར་སོགས་ཕྱོགས་སུ་གནས་པའི་འདབ་མ་སྐྱ་རེངས་ལྟར། རླུང་དང་མེའི་ཕྱོགས་སུ་འདབ་མ་སེར་པོའི་མདོག །ཡི་དགས་བདག་པོ་དབང་ལྡན་ཕྱོགས་སུ་ཡང་དཱུར་བ་སྔོན་པོ་སྤྲིན་མདོག་ངེས་པར་སྣ་ཚོགས་པདྨའོ། །འདིའི་དོན་ནི་འདི་ལྟ་སྟེ་ཤར་ལ་སོགས་པའི་ཕྱོགས་
ལ་གནས་པ་དམར་པོ་སྟེ། རླུང་མཚམས་དང་མེ་མཚམས་སུ་སེར་པོ། བདེན་བྲལ་མཚམས་སུ་སྔོན་པོ། དབང་ལྡན་མཚམས་སུ་མཐིང་གའོ། །དེའི་ལྟེ་བར་ཨཱ་ལི་ཀཱ་ལི་ལས་བྱུང་བའི་ཞེས་པ་ནི་གཡོན་དང་གཡས་སྐོར་དུ་གནས་པའི་ཨཱ་ལི་ཀཱ་ལིའི་ཕྲེང་བ་ཡོངས་སུ་གྱུར་པ་
ལས། ཨཱ་ལི་ཀཱ་ལིའི་དབྱིབས་གཟུགས་བརྙན་དུ་གྱུར་པའི་ཟླ་བ་དང་ཉི་མ་གཉིས་བསམ་པར་བྱའོ་ཞེས་བྱ་བ་རྣལ་འབྱོར་རོ། །དེ་ལ་ཞེས་བྱ་བ་ནི་མེ་ལོང་ལྟ་བུའི་ཡེ་ཤེས་ཀྱི་རང་བཞིན་ཟླ་བ་དང་། མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་ཉི་མ་དག་གི་ངོས་ཕྲད་པ་བདེ་བ་ཆེན་པོ་ཁ་
སྦྱར་བའི་དབུས་སུ་ཧཱུཾ་ལས་བྱུང་བའི་རྡོ་རྗེའི་ལྟེ་བའི་ནང་དུ་ཉི་མ་ལ་གནས་པའི་ས་བོན་ཧཱུྃ་སོ་སོར་རྟོག་པའི་ཡེ་ཤེས་ཀྱི་རང་བཞིན་དང་པོ་བཞག་པའི་ནཱ་ད་ལས་རིམ་པས་སྐྱེས་པ། རྡོ་རྗེ་འཛིན་པའི་རང་བཞིན་ནི་དེའི་རྒྱུ་ཡིན་པའི་ཕྱིར་རོ། །དེ་ལས་བྱུང་བའི་ཁ་དོག་ལྔ་པའི་འོད་ཟེར་ལས་
འཕྲོས་པའི་འཁོར་ལོ་ལྔའི་ལྷ་རྣམས་ཀྱིས་འགྲོ་བ་དེའི་རང་བཞིན་དུ་བྱས་ཏེ་བསྡུས་ནས། ཡང་ཕྱོགས་བཅུ་ན་བཞུགས་པའི་གྲུབ་པ་ཐོབ་པ་དཔའ་བོ་དང་རྣལ་འབྱོར་མ་ལ་སོགས་པ་ཐམས་ཅད་ཤེས་རབ་དང་ཐབས་ཀྱི་ཉམས་མཉམ་པར་སྦྱོར་བས་བྱ་བ་ནན་ཏན་གྱི་ཡེ་ཤེས་ཀྱི་རང་
བཞིན་གྱིས་ཞུ་བར་བྱས་ནས་རབ་ཏུ་གཞུག་པར་བྱའོ། །དེ་ནས་མཆོག་ཏུ་དགའ་བའི་རང་བཞིན་གྱི་ས་བོན་དེའི་དུས་སུ་མངོན་དུ་ཕྱོགས་པར་བྱས་ནས་བསྒོམ་པར་བྱའོ། །དེ་ཁོ་ནའི་ཕྱིར་བཅོམ་ལྡན་འདས་འདི་རྒྱུའི་རྡོ་རྗེ་འཛིན་པའི་རང་བཞིན་ནོ་ཞེས་བྱ་བ་རྗེས་སུ་རྣལ་འབྱོར་རོ། །

ཧཱུཾ་ལ་སོགས་པ་ལས་བསྐྱེད་ཅེས་པ་ནི། ཟླ་བ་དང་། ཉི་མ་དང་། ཕྱག་མཚན་དང་ས་བོན་ཡོངས་སུ་གྱུར་པས་ལྷན་ཅིག་སྐྱེས་པའི་དགའ་བའི་ཚུལ་རྫོགས་པ་དཔལ་ཧེ་རུ་ཀ །ཨོཾ་ཨཱཿཧཱུཾ་སརྦ་བཱིར་ཡོ་གི་ནཱི་ཀཱ་ཡ་ཝཱཀ་ཙིཏྟ་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཨོཾ་བཛྲ་ཤུདྡྷཿསརྦ་དྷརྨཱཿབཛྲ་
ཤུདྡྷོ྅ཧཾ། ཞེས་བྱ་བ་ལ་སོགས་པའི་སྔགས་འདི་གསུམ་བརྗོད་ཅིང་། བཅོམ་ལྡན་འདས་ཤིན་ཏུ་རྣམ་པར་དག་པ་ཆོས་ཀྱི་དབྱིངས་ཀྱི་ཡེ་ཤེས་ཀྱི་རང་བཞིན་བསྒོམ་པར་བྱའོ། །ཉི་མའི་འཁོར་ལོར་གནས་ཞེས་པ་ནི་མ་རིག་པའི་མུན་པ་སེལ་བའི་རྣམ་པར་དག་པའི་ཕྱིར་དང་།
ཁྲོ་བོའི་ཚུལ་ཉིད་ཀྱི་ཕྱིར་དང་། ཁྲོ་བོ་རྣམས་ཀྱི་ཡང་ཉི་མ་ལ་གནས་པ་དང་འོད་དང་ལྡན་པ་ཉིད་ཀྱི་ཕྱིར་རོ། །རྟག་པ་ཞེས་པ་ལ་སོགས་པ་ནི་རབ་ཏུ་མི་གནས་པའི་མྱ་ངན་ལས་འདས་པ་ཉིད་ཀྱི་ཕྱིར་རྟག་པའི་རྣམ་པར་རྟོག་པའི་རང་བཞིན་དབང་ཕྱུག་མནན་པ་དང་། ཆད་པའི་རྣམ་
པར་རྟོག་པའི་རང་བཞིན་ཨུ་མ་དེ་བ་མནན་པའོ། །དེ་ལ་དབང་ཕྱུག་ནི་འཇིགས་བྱེད་དེ་ས་བོན་གྱི་ཡི་གེ་ཨོཾ་ཡོངས་སུ་གྱུར་པ་ལས་མཐིང་ནག་སྤྱན་གསུམ་པ་ཕྱག་རྒྱ་ལྔ་དང་ལྡན་པ་གཡོན་དུ་བསྙེས་པ་ཞལ་གཅིག་ཕྱག་བཞི་པ་ཕྱག་དང་པོ་དག་གིས་ཐལ་མོ་སྦྱར་བ། གཞན་གཉིས་ཀྱིས་ཌ་
མ་རུ་དང་རལ་གྲི་འཛིན་པའོ། །ཨུ་མ་དེ་བ་ནི་དུས་མཚན་མོ་སྟེ་ས་བོན་ཧྲཱིཿཡོངས་སུ་གྱུར་པ་ལས་དམར་མོ་ཞལ་གཅིག་ཕྱག་བཞི་མ་ཕྱག་དང་པོ་དག་གིས་ཐལ་མོ་སྦྱར་བ། གཞན་དག་གིས་ཐོད་པ་དང་ཁ་ཊྭཱཾ་ག་འཛིན་པ། སྤྱན་གསུམ་པ་ཕྱག་རྒྱ་ལྔ་དང་ལྡན་པ་གཡས་སུ་བསྙེས་
པའོ། །འདི་ནི་སྤྱན་གསུམ་པར་བཤད་པའི་རྗེས་སུ་འཇུག་གོ། །འཁོར་ལོ་ལ་སོགས་པ་ནི། དེ་ལ་འཁོར་ལོ་ནི་སངས་རྒྱས་ཀྱི་ཆོས་ཐམས་ཅད་ཚངས་པའི་དཀྱིལ་འཁོར་གྱི་འཁོར་ལོའོ། །དུར་ཁྲོད་ནི་སྡུག་བསྔལ་དང་མི་རྟག་པ་ལ་སོགས་པའི་དགྲ་རྣམས་ལ་བདེ་བའི་མངོན་
པར་ཞེན་པ་དང་། རྟག་པ་རྒྱུ་མེད་པ་རྒྱུ་མི་མཐུན་པ་ལ་སོགས་པའི་མངོན་པར་ཞེན་པ་དང་། འཁོར་བ་ལ་མངོན་པར་ཞེན་པའམ་མ་ཡིན་པ་ལ་མངོན་པར་ཞེན་པ་ཟད་མི་ཤེས་པའི་མངོན་པར་ཞེན་པ། སྐྱེ་བའི་མངོན་པར་ཞེན་པ། བདག་ལ་མངོན་པར་ཞེན་པ། དེའི་རྗེས་སུ་འགྲོ་

བའི་མངོན་པར་ཞེན་པ། དེ་ཁོ་ན་ཉིད་ལ་མངོན་པར་ཞེན་པ། གོམས་པར་མ་བྱས་པ་སྟེ་ཆོས་བཅུའོ། །བཅུ་པོ་འདི་རྣམས་ཀྱི་རྣམ་པར་དག་པས་དབང་པོ་ལ་སོགས་པ་ཕྱོགས་སྐྱོང་བཅུ་རྟོགས་པར་བྱའོ། །ངེས་པའི་དོན་གྱིས་ཀྱང་རྩའི་བུ་ག་ནས་གྱེན་དུ་རྒྱུ་བའི་གཏུམ་
མོའི་ཡེ་ཤེས་ཀྱི་མེས་དེ་བཞིན་གཤེགས་པ་རྣམས་ཆོས་ཀྱི་འཁོར་ལོར་མི་སྣང་བར་བྱེད་པའི་ཕྱིར་དེ་ཉིད་ཁོ་ན་དུར་ཁྲོད་བརྒྱད་དོ། །དེ་བས་ན་གཞན་དུ་གསུངས་པ་དུར་ཁྲོད་ཅེས་བྱ་བ་ནི་འཇིག་རྟེན་གྱི་ཁམས་ཐམས་ཅད་འདུས་པའི་རྣམ་པར་ཤེས་པ་བརྒྱད་ཀྱི་བདག་མེད་པའི་རང་བཞིན་གྱིས་
བརྒྱད་དོ། །གཞལ་ཡས་ཁང་གི་ནང་ཞེས་བྱ་བ་ནི་གཞལ་ཡས་ཁང་གི་དབུས་སུ་གནས་པའོ། །གཞལ་ཡས་ཁང་དེ་ཡང་བྷྲཱུཾ་ཡིག་ལས་བྱུང་བ། རིག་མ་དང་བཅས་པ་རྣམ་པར་སྣང་མཛད་ཀྱི་བདག་ཉིད་དང་། དེ་བཞིན་གཤེགས་པ་དང་སོ་སོའི་སྐྱེ་བོ་དག་གི་དེ་བཞིན་ཉིད་དུ་
ཚུལ་གཅིག་པས་མི་མཉམ་པའི་དངོས་པོ་མེད་པའི་ཕྱིར་གྲུ་བཞི་པའོ། །དྲན་པ་ཉེ་བར་གཞག་པ། ཡང་དག་པར་སྤོང་བ། རྫུ་འཕྲུལ་གྱི་རྐང་པ་དང་། དབང་པོ་རྣམ་པར་དག་པས་སྒོ་བཞི་པའོ། །ལམ་གྱི་ཡན་ལག་བརྒྱད་རྣམ་པར་དག་པས་ཀ་བ་བརྒྱད་ཀྱིས་ཉེ་བར་མཛེས་
པར་བྱས་པ། དཔའ་བར་འགྲོ་བ་དང་། ནམ་མཁའ་མཛོད་དང་། དྲི་མེད་ཕྱག་རྒྱ་དང་སེང་གེ་རྣམ་པར་བརྩེ་བའི་ཏིང་ངེ་འཛིན་བཞིའི་རྣམ་པར་དག་པས་མདོ་ཁྱམས་བེ་དི་ཀ་ལྷའི་སྣམ་བུ་བཞིས་ཡོངས་སུ་བསྐོར་བའོ། །བསམ་གཏན་བཞི་རྣམ་པར་དག་པས་རྟ་བབས་བཞིས་
བརྒྱན་པ། བྱང་ཆུབ་ཀྱི་ཡན་ལག་བདུན་རྣམ་པར་དག་པས་དྲ་བ་དང་དྲ་བ་ཕྱེད་པ་དང་། ཟླ་བ་དང་། ཉི་མ་དང་། བ་དན་དང་། མེ་ལོང་དང་རྔ་ཡབ་བོ། །མདོར་ན་སངས་རྒྱས་ཀྱི་ཡོན་ཏན་དེ་དང་དེའི་རྣམ་པར་དག་པས་མཚན་དང་ལྡན་པའོ། །རྡོ་རྗེའི་ཕྲེང་བ་ཞེས་བྱ་བ་ནི་
ཡེ་ཤེས་ལྔའི་རང་བཞིན་ཉིད་ཀྱི་ཕྱིར་དཔྲལ་བར་རྡོ་རྗེ་ལྔ་ལས་བྱས་པའི་ཕྲེང་བ་འཛིན་པའོ། །ཤར་དང་བྱང་ལ་སོགས་པར་རིམ་པས་མཐིང་ནག་ལྗང་གུ་དམར་པོ་སེར་པོའི་མདོག །ཞལ་བཞི་པ་ཞེས་བྱ་བ་ནི་སྟོང་པ་ཉིད་དང་མཚན་མ་མེད་པ་སྨོན་པ་མེད་པ། མངོན་པར་

འདུས་མ་བྱས་པའི་མཚན་ཉིད་རྣམ་པར་ཐར་པའི་སྒོ་བཞི་རྣམ་པར་དག་པའོ། །བཅུ་གཉིས་ཞེས་པ་ནི་རྟེན་འབྲེལ་ཡན་ལག་བཅུ་གཉིས་འགོག་པའི་ཕྱིར་རོ། །རེ་རེ་ལ་སྤྱན་གསུམ་པ་ཞེས་པ་ནི་དུས་གསུམ་རྣམ་པ་ཐམས་ཅད་ཀྱི་སྒོ་ནས་གཟིགས་པའི་ཕྱིར་རོ། །བརྐྱང་དང་བསྐུམ་
པའི་ཞབས་ཞེས་པ་ནི་འགྲོ་བ་ཐམས་ཅད་སྟོང་པ་ཉིད་ཀྱིས་བསྡུས་པའི་ཕྱིར་རོ། །དེ་ཡང་ཞབས་གཡོན་པ་བསྐུམ་པ་ལས་མཐོ་ལྔར་གཡས་བརྐྱང་པའོ་ཞེས་བྱ་བ་ནི། དེ་ཁོ་ནར་ཕྱག་གཉིས་ཀྱིས་སོ། །སྟོང་པ་དང་སྙིང་རྗེ་དག་རོ་གཅིག་པའི་ཕྱིར་གཡས་པའི་རྡོ་རྗེ་ནི་ཡེ་ཤེས་ལ་རོ་
མཉམ་པའི་རང་བཞིན་ནོ། །གཡོན་ན་དྲིལ་བུ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ནོ། །གཏི་མུག་ལ་སོགས་པ་ནི་འགྲོ་བའི་གཏི་མུག་རྣམ་པར་ཉམས་པར་བྱས་པའི་ཕྱིར། དཀར་པོ་གཏི་མུག་གི་རང་བཞིན་ཁྲག་དང་བཅས་པ་བརྒྱངས་པ་རང་གི་རྒྱབ་ཏུ་འཛིན་
པའོ། །ཌ་མ་རུ་ལ་སོགས་པ་ནི་གཡས་པའི་གོང་མ་ཐོག་མར་བྱས་ནས་དེ་བཞིན་དུ་གཡོན་པའི་སྟེང་ཡང་ཐོག་མར་བྱས་ནས་ཁ་ཊྭཱཾ་ག་ལ་སོགས་པ་རིམ་པས་འཛིན་པའོ། །དེ་ལ་མཆོག་ཏུ་དགའ་བའི་སྒྲས་སངས་རྒྱས་ཐམས་ཅད་བསྐུལ་བ་ནི་ཌ་མ་རུའོ། །ལུས་ངག་ཡིད་གསུམ་གྱི་སྐྱོན་
གཅོད་པར་བྱེད་པས་དགྲ་སྟའོ། །དངོས་དང་དངོས་མིན་གྱི་རྣམ་པར་རྟོག་པ་གཅོད་པར་བྱེད་པའི་ཤེས་རབ་ནི་གྲི་གུག་གོ། །སྲིད་པ་གསུམ་གྱི་ཉོན་མོངས་པ་དྲལ་བར་བྱེད་པས་རྩེ་གསུམ་བསྒྲེང་བ་བྱང་ཆུབ་ཀྱི་སེམས་ཀྱི་རང་བཞིན་དཀར་པོ་དང་། སྐུ་གསུང་ཐུགས་རྣམ་པར་དག་པས་
དཀར་པོ་དམར་པོ་ནག་པོའི་མགོ་བོ་གསུམ་དང་ལྡན་པའི་ཁ་ཊྭཱཾ་གའོ། །བདེ་བ་ཆེན་པོ་དང་སྙིང་རྗེ་ཆེན་པོའི་རང་བཞིན་ཐོད་པའོ། །ཡང་དག་པའི་ཡེ་ཤེས་ཀྱི་རྣམ་པར་བཅིངས་པས་སྲུང་བ་ནི་རྡོ་རྗེའི་ཞགས་པའོ། །དངོས་དང་དངོས་མིན་གྱི་རྣམ་རྟོག་ཉམས་པ་དང་ཐར་པའི་རང་བཞིན་
ཚངས་པའི་མགོ་བོའོ། །བཅོམ་ལྡན་འདས་ལ་བྱང་ཆུབ་ཀྱི་སེམས་རྒྱུན་གཡོན་ངོས་སུ་འབར་བའི་ཕྱིར། དབུ་ལ་ཅུང་ཟད་གཡོན་དུ་ཡོ་བའི་ཟླ་བ་ཕྱེད་པའོ། །ཆོས་ཀྱི་དབྱིངས་ལས་ཀུན་ནས་སློང་བ་ཉིད་ཀྱི་ཕྱིར་དབུ་ལ་ཐོད་པ་ལྔའི་ཕྲེང་བ་དང་། འགྲོ་བ་ཐམས་ཅད་ཀྱི་དོན་བྱེད་

པའི་ཕྱིར་སྣ་ཚོགས་རྡོ་རྗེ་དང་ལྡན་པའོ། །བདུད་བཞི་རྣམ་པར་ཉམས་པའི་ཕྱིར་དབུ་ལ་རལ་པའི་ཐོར་ཅོག་གོ། །བློ་ལྡན་ལ་སོགས་པ་ནི་དེ་བཞིན་གཤེགས་པ་ལྔ་དང་། ལྷ་མོ་བཞིའི་རང་བཞིན་ཞི་གནས་དང་ལྷག་མཐོང་བསྒོམས་པའི་དགའ་བ་དང་སྦྱོར་བའི་ཕྱིར། སྒེག་དང་
དཔའ་བ་མི་སྡུག་པ། དྲེགས་དང་བཞད་མཛད་འཇིགས་སུ་རུང་། །སྙིང་རྗེ་རྔམ་པ་ཞི་རྣམས་ཀྱི། །གར་གྱི་ཉམས་དགུར་ལྡན་པའོ། །འདོད་ཆགས་ཞེ་སྡང་གཏི་མུག་གི་དྲི་མ་དང་བྲལ་བའི་ཕྱིར་སྟག་གི་པགས་པའི་ཤམ་ཐབས་ཅན་ནོ། །ཨཱ་ལི་ཀཱ་ལི་ལྔ་བཅུ་རྣམ་པར་དག་པས་མི་མགོ་
ཁྲག་དང་བཅས་པ་གང་གིས་དོ་ཤལ་དུ་འཛིན་པ་དེ་ནི་དེ་བཞིན་ནོ། །མགུལ་རྒྱན་དང་གདུ་བུ་སྙན་རྒྱན་སྤྱི་གཙུག་གི་ནོར་བུ་དང་མིའི་རྒྱུས་པའི་ཚངས་སྐུད་དང་ལྡན་པ། ལུས་ཐམས་ཅད་བྱང་ཆུབ་ཀྱི་སེམས་ཀྱིས་ཁྱབ་པས་ལུས་ཐམས་ཅད་ལ་ཐལ་བས་བྱུགས་པའོ། །མདུན་ནས་ཞེས་པ་ནི་
འཁྱུད་ནས་གནས་པའོ། །ཟླ་མཚན་དང་ལྡན་པའི་ཕྱིར་ཉི་མ་ལ་གནས་པ་དང་ཉི་མའི་འོད་ཟེར་ཅན་ནོ། །འདོད་ཆགས་དང་བྲལ་བའི་ཕྱིར་ཐོད་པ་སྐམ་པོའི་ཕྲེང་བ་འཛིན་པ། བདུད་ཁྲག་ལ་སོགས་པ་ནི་འཁྱུད་པའི་ཕྱག་གཡོན་པས་འཛིན་པའི་ཐོད་པ་ལས་འཛག་པའི་ཁྲག་གི་རྒྱུན་གྱིས་རྗེ་བཙུན་
ལ་སྟོབ་པ། །འཇིགས་བྱེད་ཅེས་བྱ་བ་ནི་གྱེན་དུ་བསྒྲེང་བའི་གཡས་པ་སྡིགས་མཛུབ་དང་བཅས་པའི་རྡོ་རྗེས་ཕྱོགས་བཅུར་གནས་པའི་གདུག་པའི་སེམས་ཅན་ཡང་དག་པར་འཇིགས་པར་བྱེད་པའོ། །བསྐལ་པའི་མེ་ལྟར་ཞེས་པ་ནི་སྟོང་པ་ཉིད་ཀྱིས་འགྲོ་བ་ལ་མི་དམིགས་པའི་མཉམ་པ་ཉིད་
ཀྱི་ཕྱིར་རོ། །གཟི་བརྗིད་ཆེ་བ་ཡང་རྣམ་པར་དག་པའི་ཡེ་ཤེས་ཀྱིས་གསལ་བར་སྦྱོར་བའི་ཕྱིར། ཁྲག་ཅེས་པ་ནི་ཟླ་མཚན་དང་ལྡན་པ་ཉིད་ཀྱི་ཕྱིར་རོ། །བརླ་གཉིས་ལ་ནི་བཅོམ་ལྡན་འདས་ཀྱིའོ། །བདེ་ཆེན་ཞེས་པ་ནི་ལྷག་མཐོང་གི་ཚུལ་གྱིས་བདེ་བ་ཆེན་པོ་ལ་སིམ་ན་ཡང་འགྲོ་བའི་དོན་
བྱེད་པའོ། །ཅུང་ཟད་དགོད་དང་ཡོངས་སུ་འཁྱུད། །གཅེར་བུ་ཉིད་དང་སྐྲ་གྲོལ་མ། །སྤུ་ལྡང་བ་དང་བདེ་ཆེན་པོའི། །ཕྱི་རོལ་དུ་ནི་རྟགས་ལྔའོ། །དངོས་སུ་རྟགས་གསུམ་བརྗོད་པའི་ཕྱིར། །དེ་ལ་རྟགས་གཉིས་རྟོགས་པར་བྱ། །འཁོར་ལོ་ལྔ་གནས་ལྷ་མོ་རྣམས། །

རྟགས་ལྔ་པོ་ལ་ཡང་དག་གནས། །ཞེས་སོ། །བྱང་ཆུབ་སེམས་ལ་སོགས་པ་ནི་སོགས་པའི་སྒྲས་བདུད་རྩི་ལྔ་སྒྲོན་མ་ལྔ་རྣམས་རོ་གྲུབ་པར་གྱུར་པ་འབྱུང་ངོ་། །འདི་ལྟར་འཁོར་དང་བཅས་པ་དམ་ཚིག་སེམས་དཔའི་ཐུགས་ཀའི་ཉི་མ་ལ་ཧཱུྃ་ཡིག་སྔོན་པོ་ཏིང་ངེ་འཛིན་སེམས་དཔའ་དང་། ལྟེ་
བར་འཆད་པར་འགྱུར་བའི་ཨཱ་ལི་ཀཱ་ལི་ལ་སོགས་པ་ཡེ་ཤེས་སེམས་དཔའ་ཞེས་སེམས་དཔའ་གསུམ་གྱི་བདག་ཉིད་ཅན་བསྒོམ་པར་བྱའོ། །ཡང་ན་སྙིང་གར་ཡེ་ཤེས་སེམས་དཔའ་དེའི་ཐུགས་ཀར་ཏིང་ངེ་འཛིན་སེམས་དཔའ། དེ་ནཱ་ད་དང་ཐིག་ལེ་བདེ་བ་ཆེན་པོའི་བདུད་རྩིའི་རང་བཞིན་དུ་
བསམ་པར་བྱའོ། །ཨོཾ་སརྦ་བཱི་ར་ཡོ་གི་ནཱི་ཀཱ་ཡ་ཝཱ་ཀཱ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་བཛྲ་ཤུདྡྷཿསརྦ་དྷརྨཱ་བཛྲ་ཤུདྡྷོ྅ཧཾ། ནམ་མཁའ་ལ་སྤྱོད་པ་རྣམས་ནི་གང་དེ་རྣམས་ཀྱི་གནས་ཀྱང་གང་ཞེ་ན། འདིར་བརྗོད་པ་རབ་ཏུ་གཏུམ་མོ་ལ་སོགས་པ་དཔའ་མོ་བརྒྱད་ནི། ནམ་མཁའ་ལ་སྤྱོད་
པ་ཅན་ཡིན་ནོ། །དེ་རྣམས་ཀྱི་གནས་ནི་ཇི་ལྟར་འདོད་པ་བཞིན། རྩིག་པ་ལ་སོགས་པ་ལ་མ་ཐོགས་པར་ནམ་མཁའ་ལ་འགྲོ་བ་ལ་སོགས་པ་དང་། འདོད་པའི་དོན་ཡིད་ཀྱིས་བསམ་པ་ཙམ་གྱིས་ཐོབ་པ་ཡང་ངོ་། །སྲིད་པའི་སྡུལ་བསྔལ་ཉམས་སུ་མི་མྱོང་བ་ཡང་ཞེས་བྱ་བ་ནམ་མཁའ་ལ་སྤྱོད་
པའི་གནས་སོ། །ས་ལ་སྤྱོད་པ་དང་ས་འོག་ན་གནས་པ་རྣམས་ཀྱི་གནས་ཀྱང་ནམ་མཁའ་ལ་སྤྱོད་པ་རྣམས་ཀྱིས་ཐོབ་པའོ། །སྒོམ་པ་རབ་ཏུ་གྱུར་པའི་དབང་དུ་བྱས་ནས་ཁྱད་པར་བརྗོད་དེ། མིག་དག་ལ་པདྨ་དང་ཟླ་བ་ལ་ཀྲཾ་ཡིག་ལས་བྱུང་བའི་གཏི་མུག་རྡོ་རྗེ་བསྒོམ་པར་བྱའོ། །དཀར་པོ་
གཟུགས་རྡོ་རྗེ་མས་ཀུན་ལ་འཁྱུད་པ། རྣ་བ་དག་ལ་པདྨ་དང་ཉི་མ་ལ་རྡོ་རྗེ་དང་ཧཱུཾ་ཡིག་ལས་བྱུང་བའི་ཞེ་སྡང་རྡོ་རྗེ་ནག་པོ་སྒྲ་རྡོ་རྗེ་མས་འཁྱུད་པ། སྣ་བུག་དག་ལ་པདྨ་དང་ཉི་མ་ལ་རིན་པོ་ཆེ་དང་ཏྲཾ་ཡོངས་སུ་གྱུར་པ་ལས་ཕྲག་དོག་རྡོ་རྗེའོ། །ཁ་ཅིག་ལ་སེར་སྣ་རྡོ་རྗེ་ཞེས་སོ། །སེར་པོ་དྲི་རྡོ་རྗེ་མས་
འཁྱུད་པ། ལྕེའི་རྩ་བར་པདྨ་དང་ཉི་མ་ལ་པདྨ་དམར་པོ་དང་ཨཿཡོངས་སུ་གྱུར་པ་ལས་འདོད་ཆགས་རྡོ་རྗེ་དམར་པོ་རོ་རྡོ་རྗེ་མས་འཁྱུད་པ། དཔྲལ་བར་ཉི་མ་དང་ཧཱུཾ་ཡོངས་སུ་གྱུར་པ་ལས་སེར་སྣ་རྡོ་རྗེ་ལྗང་གུ་རེག་བྱ་རྡོ་རྗེ་མ་དང་སྙོམས་པར་འཇུག་པ། ཐུགས་ཀར་པདྨ་དང་ཟླ་བ་ལ་རྡོ་རྗེ་དང་ཧཱུཾ་

ལས་བྱུང་བ་དབང་ཕྱུག་རྡོ་རྗེ་དཀར་པོ་ཆོས་ཀྱི་དབྱིངས་ཀྱི་རྡོ་རྗེ་མ་དང་སྙོམས་པར་འཇུག་པའོ། །གཏི་མུག་རྡོ་རྗེ་ལ་སོགས་པ་འདི་རྣམས་ནང་གི་སྐྱེ་མཆེད་ཀྱི་རྣམ་པར་དག་པའི་རང་བཞིན། ལྷའི་མིག་ལ་སོགས་པ་རྣམས་སྦྱིན་པ་པོ་རིམ་པ་བཞིན་དུ་སའི་སྙིང་པོ་ལ་སོགས་པའི་
མིང་གཞན་ཡང་ངོ་། །རྣམ་པར་སྣང་མཛད། མི་བསྐྱོད་པ། རིན་ཆེན་འབྱུང་ལྡན། འོད་དཔག་མེད། དོན་ཡོད་གྲུབ་པ་དང་། རྡོ་རྗེ་སེམས་དཔས་རྒྱས་བཏབ་པའོ། །རལ་པའི་ཅོད་པན་ཅན་སྤྱན་གསུམ་པ་ཕྱག་རྒྱ་ལྔ་དང་ལྡན་པ། ཞལ་གཅིག་ཕྱག་གཉིས་པ་རྣམས་ནི། ཕྱག་གཡས་
པས་འཁོར་ལོ། རྡོ་རྗེ་རིན་ཆེན། པདྨ་དམར་པོ། སྣ་ཚོགས་རྡོ་རྗེ་དང་རྡོ་རྗེ་དཀར་པོ་འཛིན་པ་རྣམས་ཏེ། གཡོན་གྱིས་རྡོ་རྗེ་དྲིལ་བུ་འཛིན་པ་ཞབས་བརྐྱང་བསྐུམ་པའོ། །འདི་རྣམས་ཀྱི་ཤེས་རབ་མ་ཡང་། ས་བོན་ཛཿཧཱུྃ་བྃ་ཧོཿཁྃ་རྃ་ལས་བྱུང་བ། ཕྱིའི་སྐྱེ་མཆེད་ཀྱི་རྣམ་པར་དག་པའི་
རང་བཞིན། རང་རང་གི་སྐུ་མདོག་དང་མཐུན་པ་བཟློག་པའི་བརྐྱང་བསྐུམ་ནི་ཁྱད་པར་རོ། །ཕྱག་གཡས་པས་མེ་ལོང་པི་ཝང་དྲིའི་དུང་ཆོས་རོའི་སྣོད། གོས་སྣ་ཚོགས་པ་ཆོས་འབྱུང་འཛིན་པ། གཡོན་པས་རྡོ་རྗེ་དྲིལ་བུ་འཛིན་པ་རྣམས་སོ། །སྒྲ་རྡོ་རྗེ་མ་ནི་གཡོན་གྱིས་ཀྱང་པི་ཝང་
འཛིན་པ། རིན་ཆེན་འབྱུང་ལྡན་གྱིས་རྒྱས་བཏབ་པའོ། །ལྟེ་བ། སྙིང་ག །མགྲིན་པ། དཔྲལ་བའི་པདྨ་དང་ཟླ་བ་རྣམས་ལ་ལྃ་མྃ་པྃ་ཏྃ་ལས་བྱུང་བའི་སངས་རྒྱས་སྤྱན། མཱ་མ་ཀཱི །གོས་དཀར་མོ། སྒྲོལ་མའི་རང་བཞིན། ལྟུང་བྱེད་མ། གསོད་བྱེད་མ། འགུགས་བྱེད་མ་
དང་གར་གྱི་དབང་ཕྱུག་མ་རྣམས་ཞལ་གཅིག་ཕྱག་བཞི་པ་ཕྱག་གཡས་གཉིས་ན་འཁོར་ལོ་དང་གྲི་གུག །རྡོ་རྗེ་དང་གྲི་གུག །པདྨ་དང་གྲི་གུག །རལ་གྲི་དང་གྲི་གུག་འཛིན་པ། ཕྱག་གཡོན་པ་གཉིས་ཀྱིས་ཐོད་པ་དང་ཁ་ཊྭཱཾ་ག་འཛིན་པའོ། །གསང་གནས་སུ་པདྨ་དང་ཟླ་བ་ལ་ཁྃ་
ལས་བྱུང་བའི་པད་འབར་མ་དུ་བའི་མདོག་ཅན་ཞལ་གསུམ་དཀར་པོ་དམར་པོའི་གཡས་དང་ཞལ་གྱི་ཞལ་ཅན། ཕྱག་གཡས་པ་གསུམ་གྱིས་ལྕགས་ཀྱུ་ཚངས་པའི་མགོ་བོ་གྲི་གུག་འཛིན་པ། ཕྱག་གཡོན་པ་གསུམ་གྱིས་ཐོད་པ་ཁ་ཊྭཱཾ་ག་ཞགས་པ་འཛིན་པའོ། །སྤྱན་གསུམ་

པ་ཕྱག་རྒྱ་ལྔ་དང་ལྡན་པ། སྐྲ་གྲོལ་བ་གཅེར་བུ་ཞབས་བརྐྱང་བསྐུམ་པ་འདི་རྣམས་ལྷ་མོ་ལྔ་རིམ་པ་བཞིན་དུ་ས་ཆུ་མེ་རླུང་ནམ་མཁའི་ཁམས་རྣམ་པར་དག་པའི་རང་བཞིན་རིམ་པས་བྷྲཱུྃ་ཧཱུྃ་ཧྲཱིཿཧོ། ཨོཾ་ལས་བྱུང་བའི་དཀར་པོ་མཐིང་ནག །དམར་པོ། ལྗང་གུ། སེར་པོ། རྣམ་པར་
སྣང་མཛད། མི་བསྐྱོད་པ། སྣང་བ་མཐའ་ཡས། དོན་ཡོད་གྲུབ་པ་རིན་ཆེན་འབྱུང་ལྡན་རྣམས་ཀྱི་གཟུགས་དང་རྣམ་པར་ཤེས་པ་འདུ་བྱེད་དང་ཚོར་བའི་ཕུང་པོ་རྣམ་པར་དག་པའི་རང་བཞིན་རྣམས་ཀྱིས་འཁྱུད་པ་དང་རྒྱས་བཏབ་པའོ། །གཟུགས་ལ་སོགས་པའི་དེ་བཞིན་ཉིད་ལ་རྡོ་རྗེ་
སེམས་དཔའ་དཀར་པོ་སྤྱི་གཙུག་ཏུ་པདྨ་དང་ཟླ་བ་ལ་ཧོ་ཡོངས་སུ་གྱུར་པ་ལས་བྱུང་བ་སྟེ། ཧཱུཾ་ལས་བྱུང་བ་རང་གི་མདོག་ཅན་རྡོ་རྗེ་འབར་མས་ཀུན་ནས་འཁྱུད་བ། དེ་ཡང་ཡེ་ཤེས་ཀྱི་ཁམས་རྣམ་པར་དག་པའི་རང་བཞིན་ནོ། །འདི་ལ་རྣམ་པར་སྣང་མཛད་ནི་འཁོར་ལོ་དང་བཅས་པའི་ཕྱག་གཡས་
པ་འཕྱར་བའོ། །ཧེ་རུ་ཀ་རྡོ་རྗེ་ནི་ཕྱག་གཡས་པ་ས་གནོན་གྱི་ཕྱག་རྒྱར་ལྡན་པ། འདི་གཉིས་དྲིལ་བུ་འཛིན་པར་བསྒོམས་ཤིང་བསྒྱིངས་པ་དང་བཅས་པའི་གཡོན་པས་དཀུར་བརྟེན་པའོ། །སྣང་བ་མཐའ་ཡས། དོན་ཡོད་གྲུབ་པ། རིན་ཆེན་འབྱུང་ལྡན་རྣམས་པདྨ་དམར་པོ་སྣ་ཚོགས་
རྡོ་རྗེ་རིན་པོ་ཆེ་འཕྱར་བ། རོལ་པ་དང་བཅས་པའི་ཕྱག་གཡས་པ་དང་ཕྱག་གཡོན་པས་དྲིལ་བུ་ཐུགས་ཀར་འཛིན་པ་རྣམས་སོ། །རྡོ་རྗེ་སེམས་དཔའ་ནི་རོལ་པ་དང་བཅས་པའི་ཕྱག་གཡས་པ་ཐུགས་ཀར་རྡོ་རྗེ་དྲིལ་བུ་འཛིན་པར་བསམས་ཤིང་འགྱིང་བ་དང་བཅས་པའི་གཡོན་པས་དཀུར་
བརྟེན་པའོ། །འདི་ལ་རྣམ་པར་ཤེས་པའི་ཕུང་པོ་ལ་རྡོ་རྗེ་སེམས་དཔའ་ཕུང་པོ་ལྔ་པོའི་དེ་བཞིན་ཉིད་ལ་མི་བསྐྱོད་པ་ཞེས་བྱ་བ་ཡང་ཤེས་པར་བྱ་སྟེ། ཕན་ཚུན་འདི་དག་ནི་ངོ་བོ་གཅིག་པར་རྟོགས་པའི་ཕྱིར་རོ། །དེ་ཉིད་ཀྱི་ཕྱིར་རྣམ་པར་སྣང་མཛད་ལ་རིགས་ཕན་ཚུན་རྒྱས་བཏབ་པ་
ནི། མི་བསྐྱོད་པའོ། །མགོ་དང་མགྲིན་པ་སྙིང་གར་རྟག་པ་སྣང་བ་མཐའ་ཡས་མི་བསྐྱོད་པ་རྣམས་ལུས་ངག་ཡིད་ཀྱི་དག་པའི་ངོ་བོ་ཤེས་རབ་མ་དང་བཅས་པ་རྣམས་སོ། །གཏི་མུག་རྡོ་རྗེ་ལ་སོགས་པ་དེ་དག་ཀྱང་། ཡང་དག་པར་སྦྱོར་བའི་བདེ་བ་ཆེན་པོར་ཞུ་ནས་སྐྱེ་མཆེད་དང་

ཁམས་དང་ཕུང་པོ་དང་ལུས་ལ་སོགས་པ་རྣམས་ལ་ཐིམ་པའོ། །ད་ནི་རྡོ་རྗེ་ལ་སོགས་དག་པ་བརྗོད་པར་བྱ་སྟེ། ལྷ་མོའི་ཨཱཿཡིག་ལས་བྱུང་བ་པདྨ་དམར་པོ་དང་པདྨ་གསུམ་པ་དྱཱ་ཡིག་ལས་བྱུང་བའི་ལྟེ་བ་དཀར་པོ་རྩེ་མོར་དྱཱ་ཡིག་སེར་པོས་བྱིན་གྱིས་བརླབས་པའི་
རྩེ་མོ་ཅན། དེ་ནས་ལྷ་མོའི་སྙིང་པོ་དང་ཉེ་བའི་སྙིང་པོའི་སྔགས་དག་གིས་ལྟེ་བ་དང་སྙིང་གར། རང་གི་སྙིང་པོ་དག་གིས་མགྲིན་པ་དང་དཔྲལ་བར་བཅོམ་ལྡན་འདས་མ་ལ། བཅོམ་ལྡན་འདས་ཀྱིས་འོ་བྱེད་པ། བཅོམ་ལྡན་འདས་མས་ཀྱང་བཅོམ་ལྡན་འདས་ལ་སྙིང་པོ་དང་ཉེ་བའི་སྙིང་
པོ་དག་གིས་བཅོམ་ལྡན་འདས་ཀྱི་མགྲིན་པ་དང་དཔྲལ་བར་འོ་བྱེད་པའོ། །དེ་ནས་ཡི་གེ་གསུམ་གྱིས་དགའ་བ་བརྩམ་པར་བྱའོ། །ཕྱི་རོལ་དུ་ཡང་དགའ་བ་བཟང་པོ་ལ་ཆོ་ག་འདི་ཁོ་ནའོ། །འདི་ཁོ་ནའི་ཕྱིར་རྒྱས་གདབ་པ་ཕན་ཚུན་རྣམ་པར་སྣང་མཛད་ལ་སོགས་པ་རྣམས་ཀྱི་མི་བསྐྱོད་པས་
སོ། །དཔྲལ་བ། མགྲིན་པ། སྙིང་གར། རྟག་པ། འོད་དཔག་མེད། མི་བསྐྱོད་པ་རྣམས་ཤེས་རབ་མ་དང་བཅས་པ་སྐུ་གསུང་ཐུགས་རང་བཞིན་རྣམ་པར་དག་པ་རྣམས་སོ། །འདི་རྣམས་ཀྱང་གཏི་མུག་རྡོ་རྗེ་མ་ལ་སོགས་པའི་ལྷ་རྣམས་སྦྱོར་བའི་བདེ་བས་ཞུ་ནས་སྐྱེ་མཆེད་ཁམས་
ཕུང་པོ་སྐུ་ལ་སོགས་པ་རྣམས་ལ་བསྟིམ་མོ། །ད་ནི་རྡོ་རྗེ་ལ་སོགས་པའི་དག་པ་བརྗོད་པར་བྱ་སྟེ། ཧཱུཾ་དཀར་པོ་ལས་བྱུང་བའི་རྡོ་རྗེ་ནག་པོ་བྱཱ་དམར་པོ་ལས་བྱུང་བ་དེའི་ནོར་བུ་དམར་པོ་སྟེ། བྱཱ་ཡིག་སེར་པོས་བྱིན་གྱིས་བརླབས་པའི་རྩེ་མོའོ། །རྡོ་རྗེའི་སྣ་ཡི་རྩེ་མོར་ནི། །ཐིག་ལེ་ཡུངས་
འབྲུ་ཙམ་ཅིག་བསམ། །དེ་བཞིན་དེ་ཡི་གནས་པ་ལ། །སྣོད་དང་བཅུད་ཀྱི་དཀྱིལ་འཁོར་བལྟ། །ཏིང་འཛིན་སེམས་པའི་ཐིག་ལེར་གནས། །དེ་བཞིན་དཀྱིལ་འཁོར་བསམ་པའམ། །ཡང་ན་ཕྱག་མཚན་དེའི་ས་བོན། །དེ་ན་གནས་པའི་དཀྱིལ་འཁོར་རོ། །ཡང་ན་ཕྲ་བ་སྨིན་མཚམས་
སུ། །ཧཾ་ཡིག་ཐིག་ལེའི་ནང་གནས་པ། །གཟུགས་བརྙན་ལྟ་བུར་བལྟ་བར་བྱ། །དཀྱིལ་འཁོར་བྱང་ཆུབ་སྒྲུབ་བྱེད་པའོ། །ཡང་ན། ཨཱ་ལི་ཀཱ་ལི་མཉམ་བྱས་ནས། །དེ་ལ་རི་མོ་ངེས་པར་སྦྱར། །ལྟེ་བ་སྲུབ་དང་བསྲུབ་སྦྱོར་ཕྱིར། །འབར་བ་ཡང་ནི་གྱེན་དུ་རྒྱུ། །གཟུགས་ལ་

སོགས་པ་ལྔ་བསྲེགས་ནས། །འབྱུང་བ་བཞི་བཅས་སྙིང་ག་རུའོ། །གཡས་སུ་ལན་གསུམ་རབ་ཏུ་བསྐོར། །ཐབས་ལ་མགྲིན་པའི་འཁོར་ལོ་རུའོ། །སྤྱི་བོའི་འཁོར་ལོར་ཐུར་བསྟན་ཁར། །ཧ་ཡིག་དེ་ནས་ཀྱང་ནི་བསྲེགས། །མཛོད་སྤུའི་བུ་གའི་གནས་ནས་འགྲོ། །བདུད་རྩིའི་
དོན་དུ་ཕྱོགས་བཅུར་ཡང་། །སྤྱི་བོའི་དབུས་གནས་བུ་ག་ཡིས། །སངས་རྒྱས་རྣམས་ཀྱི་ནང་རབ་ཞུགས། །སངས་རྒྱས་རྣམས་ཀྱི་ཐུགས་གནས་པའི། །ཡེ་ཤེས་བདུད་རྩི་བླངས་ནས་ནི། །དེ་རྣམས་མཛོད་སྤུའི་བུ་ག་ནས། །འཐོན་ནས་གློག་གི་འོད་ཟེར་མཚུངས། །ཤིན་ཏུ་ཕྲ་
བའི་ཕྱག་རྒྱ་ཆེ། །རྟག་ཏུ་དགའ་བའི་སྤྲོ་བ་ཆེ། །སྤྱི་བོའི་དབུས་གནས་སྒོ་ལས་ནི། །སྒྲུབ་པ་པོ་ལ་ཡང་འཇུག་གོ། །སོ་དང་མཚོག་མའི་ཕུ་ག་ནས། །མགྲིན་པའི་འཁོར་ལོར་ངལ་བསོ་ཏེ། །ཕུང་པོ་ཁམས་རྣམས་ཚིག་པ་ཡི། །སྙིང་གར་དགའ་བ་སྐྱེད་པར་བྱེད། །དེ་ནས་ལྟེ་
བའི་པདྨར་གནས། །དེ་བཞིན་སླར་ཡང་འགྲོ་དང་འོང་། །སོ་སོར་སྡུད་དང་བསམ་གཏན་དང་། །སྲོག་རྩོལ་དེ་བཞིན་འཛིན་པ་དང་། །རྗེས་དྲན་དང་ནི་ཏིང་ངེ་འཛིན། །རྣལ་འབྱོར་རེ་རེར་བསམ་པར་བྱ། །བསྟན་པ་ལས་བྱུང་མཚན་མ་ནི། །འདར་དང་འཕར་བ་སོགས་མཐོང་
ནས། །སེམས་ཅན་ཀུན་ལ་ཕན་གྱུར་པའི། །ལྷ་ཉིད་འཁོར་ལོ་སྤྲོ་བར་བྱ། །དེ་ལྟར་བསྒོམ་ཞིང་མྱུར་བར་ནི། །དྲོད་སོགས་རིམ་གྱིས་འབྲས་བུ་ཡི། །རབ་དགའ་ལ་སོགས་ས་རྣམས་ནི། །སྐྱེ་བ་འདི་ཉིད་ལ་ཐོབ་འགྱུར། །དེའི་རྗེས་སུ། སངས་རྒྱས་བྱང་ཆུབ་སེམས་རྣམས་
དང་། །མཁའ་འགྲོ་མ་རྣམས་རྣལ་འབྱོར་གྱིས། །གསང་སྔགས་དེ་རྣམས་སྤྱན་འདྲེན་གྱི། །མངོན་དུ་ཕྱོགས་པར་བྱེད་ཕྱིར་དགོངས། །ཇི་ལྟར་འགའ་ཞིག་སེམས་དཔའ་ཆེའི། །སྒྲ་ཆེན་འོ་དོད་འབོད་པ་སྟེ། །ཐོས་པ་ཙམ་གྱིས་བྱོན་པར་འགྱུར། །དེ་བཞིན་སངས་རྒྱས་རིམ་
པར་བྱོན། །དེ་ནས་གསང་སྔགས་རྒྱལ་པོ་ཡིས། །སེམས་ཀྱི་རྡོ་རྗེ་ནས་བསྐུལ་བས། །དབྱེ་བར་དཀའ་བའི་སྒྲུབ་པ་སྟེར། །ཟབ་མོ་ནམ་མཁའ་མཐོང་བ་ཅན། །འདི་ལྟར་ཐུབ་པའི་གསུང་ཤེས་ནས། །མཉམ་པར་བཞག་པས་གསང་སྔགས་བཟླས། །ཧཱུཾ་ཡིག་བདག་

ཉིད་ཅན་འབྱུང་བ། །ཨོཾ་གྱི་རང་བཞིན་འཇུག་པའོ། །གནས་པའི་བདག་ཉིད་ཨཱཿཡིག་སྟེ། །སྲོག་རྣམས་ཀྱི་ནི་རིམ་པར་དགོངས། །ཉིན་ཞག་གཅིག་ལ་རྒྱུ་བའི་རླུང་། །ཉི་ཁྲི་ཆིག་སྟོང་དྲུག་བརྒྱའོ། །རྩ་བའི་སྔགས་སོགས་སྔགས་རྣམས་ལས། །སྔགས་
པས་ཇི་ལྟར་འདོད་བཞིན་བཟླས། །དུང་ཆེན་ཕྲེང་བ་སྐུད་བརྒྱུས་པ། །སྲིན་ལག་མཐེ་བོང་སྦྱར་བས་སོ། །དེའི་རྗེས་སུ་ཕག་མོ་ལ་སོགས་པའི་ལྷ་ཉིད་ཀྱི་རྣམ་པར་མངོན་པར་ཞེན་པའི་ཕྱིར་དང་། ཐམས་ཅད་མཁྱེན་པ་ཉིད་ཐོབ་པར་བསྟན་པའི་ཕྱིར། བྱང་ཆུབ་ཀྱི་ཕྱོགས་
ཀྱི་ཆོས་དང་ས་བཅུ་གནས་ལ་སོགས་པ་དང་སྦྱར་བར་བྱའོ། །དེ་ལ་གཙང་བ་བདེ་བ་རྟག་པ་བདག་གི་ལོག་ཤེས་བཞིའི་གཉེན་པོ་ཉིད་ནི། དྲན་པ་ཉེ་བར་གཞག་པ་བཞི་སྟེ། དེ་ལ་ལུས་དྲན་པ་ཉེ་བར་གཞག་པ་ནི། གཟུགས་ཀྱི་ཕུང་པོའི་ཡོངས་སུ་ཤེས་པ་ལ་རབ་ཏུ་གཞོལ་པའོ། །ཚོར་
བ་དྲན་པ་ཉེ་བར་གཞག་པ་ནི། ཚོར་བའི་ཕུང་པོ་ཡོངས་སུ་ཤེས་པ་ལ་གཞོལ་བའོ། །ཆོས་དྲན་པ་ཉེ་བར་གཞག་པ་ནི། འདུ་ཤེས་དང་འདུ་བྱེད་དག་སྒྱུ་མ་ལྟ་བུར་ངེས་པར་གཟུང་ངོ་། །སེམས་རྗེས་སུ་དྲན་པར་ཉེ་བར་གཞག་པ་ནི་རྣམ་པར་ཤེས་པའི་ཕུང་པོའི་རང་བཞིན་སོ་སོར་བྱེད་
པའོ། །དེ་ལ་དྲན་པ་ནི་ཉམས་སུ་མྱོང་བའི་དངོས་པོ་ལ་སེམས་མི་རྨུགས་པའོ། །དེ་ཉེ་བར་གནས་པར་བྱེད་པའི་ཤེས་རབ་ཀྱི་ཁྱད་པར་ནི་དྲན་པ་ཉེ་བར་གཞག་པའོ། །འབྱུང་བ་འདུས་པ་ནི་ལུས་སོ། །བདེ་བ་ལ་སོགས་པ་ཉམས་སུ་མྱོང་བ་ནི་ཚོར་བའོ། །ཡང་དག་པའི་མཐའ་ནི་
ཆོས་སོ། །སོ་སོར་སྣང་བ་ཙམ་ནི་སེམས་སོ། །འདི་རྣམས་ལ་སྒྱུ་མ་ལྟ་བུ་ཉིད་ཀྱིས་རྗེས་སུ་དྲན་པ་ཉིད་ནི་དྲན་པ་ཉེ་བར་གཞག་པའོ། །རྫུ་འཕྲུལ་ནི་ཏིང་ངེ་འཛིན་ཕུན་སུམ་ཚོགས་པའོ། །དེའི་ཡན་ལག་རྣམས་ནི་རྫུ་འཕྲུལ་གྱི་རྐང་པ་བཞིའོ། །དེ་ལ་དམ་པའི་ཆོས་ཐོས་པ་ལ་སོགས་
པའི་མངོན་པར་ཞེན་པ་ཤིན་ཏུ་དང་བ་ནི་འདུན་པའི་རྫུ་འཕྲུལ་གྱི་རྐང་པའོ། །བརྩོན་འགྲུས་ལ་རྒྱུན་མ་ཆད་པར་གོམས་པ་ནི་བརྩོན་འགྲུས་ཀྱི་རྫུ་འཕྲུལ་གྱི་རྐང་པའོ། །ཤིན་ཏུ་རྣམ་པར་དཔྱོད་པ་ནི་དཔྱོད་པའི་རྫུ་འཕྲུལ་གྱི་རྐང་པའོ། །བྱང་ཆུབ་ཉིད་ནི་མངོན་སུམ་དུ་བྱེད་པ་ལ་ཁྱད་

པར་དུ་འཕགས་པ་ནི། སེམས་ཀྱི་རྫུ་འཕྲུལ་གྱི་རྐང་པའོ། །ཡང་ན་སྤོང་བའི་འདུ་བྱེད་དང་ལྡན་པ་དབེན་པ་འདོད་ཆགས་དང་བྲལ་བ་དང་། འགོག་པ་རྣམས་ལ་བརྟེན་པ་དང་རྣམ་པར་བྲལ་བ་ཡོངས་སུ་གྱུར་པ་ལྷག་པར་མོས་པའི་བསམ་པ་ནི་འདུན་པ་སྟེ་དེ་ལ་བདེན་པ་དང་ནི་ལམ་མོ། །ཉོན་
མོངས་པའི་སྒྲིབ་པ་སྤངས་པའི་འདོད་ཆགས་དང་བྲལ་བ་སྟེ་མྱ་ངན་ལས་འདས་པའོ། །ཟག་པ་དང་བཅས་པའི་དངོས་པོའི་སྦྱོར་བ་དང་བྲལ་བ་ནི་འགོག་པའོ། །འདི་རྣམས་ལ་བརྟེན་པ་ནི་དབེན་པ་དང་འདོད་ཆགས་དང་བྲལ་བ་དང་འགོག་པ་ལ་བརྟེན་པའོ། །རྣམ་པར་བྲལ་བ་ནི་འདུས་
བྱས་པའི་དངོས་པོ་ཐམས་ཅད་ཀྱི་སྦྱོར་བ་དང་བྲལ་བའོ། །དེ་ཡོངས་སུ་གྱུར་པ་ནི་དེའི་རྒྱུ་མཐུན་པའོ། །དེ་བཞིན་དུ་བརྩོན་འགྲུས་སེམས་དཔྱོད་པ་རྣམས་སོ། །འདི་ལ་ཤེས་པས་དབང་བྱེད་པའི་ཕྱིར་མིག་ལ་སོགས་པ་བཞིན་དུ་དད་པ་ལ་སོགས་པ་ཡང་དབང་པོ་སྟེ། དེ་ལ་བདེན་
པ་དང་དཀོན་མཆོག་དང་ལས་འབྲས་རྣམས་ལ་མངོན་པར་ཡིད་ཆེས་པ་ནི་དད་པ་སྟེ་དབང་པོའོ། །བརྩོན་འགྲུས་ཀྱི་དབང་པོ་ནི་ངེས་པར་བྱ་བ་ཉིད་ཀྱིས་ངེས་པར་གཟུང་བའོ། །དྲན་པའི་དབང་པོ་ནི་མི་རྨུགས་པའི་དྲན་པ་ཉིད་ཀྱིས་མ་རིག་པའི་སྐབས་མེད་པའོ། །ཏིང་ངེ་འཛིན་གྱི་དབང་
པོ་ནི་སེམས་རྩེ་གཅིག་པ་ལ་དབང་ཕྱུག་པ་ཉིད་དོ། །ཤེས་རབ་ཀྱི་དབང་པོ་ནི་སྤང་བྱ་དང་བླང་བྱ་དག་ལ་དེ་ཉིད་དུ་ངེས་པར་གཟུང་བའོ། །ཡང་ན་འཇིག་རྟེན་དང་འཇིག་རྟེན་ལས་འདས་པའི་ཡང་དག་པའི་ལྟ་བ་ལ་སེམས་རབ་ཏུ་དང་བ་ནི་དད་པའོ། །སེམས་མངོན་པར་སྤྲོ་བ་ནི་བརྩོན་
འགྲུས་སོ། །དད་པའི་དབང་པོ་ལ་བརྟེན་པའི་ཆོས་རྣམས་གང་གིས་ཉེ་བར་སོག་པར་བྱེད་པ་ནི། བརྩོན་འགྲུས་ཀྱི་དབང་པོའོ། །བརྩོན་འགྲུས་ཀྱི་དབང་པོས་བསྐྱེད་པའི་དོན་ལ་མི་རྨུགས་པ་ནི་དྲན་པའི་དབང་པོའོ། །དྲན་པའི་དབང་པོ་ལས་དོན་མ་ཉམས་པ་རྣམས་གང་གིས་
མངོན་དུ་ཕྱོགས་པར་བྱེད་པ་དེ་ཏིང་ངེ་འཛིན་གྱི་དབང་པོའོ། །ཏིང་ངེ་འཛིན་གྱི་དབང་པོས་རྩེ་གཅིག་ཏུ་བྱས་པའི་དོན་རྣམས་ཀྱིས་རྣམ་པར་འབྱེད་པ་དེ་ཤེས་རབ་ཀྱི་དབང་པོའོ། །མ་དད་པ་ལེ་ལོ་རབ་ཏུ་རྨུགས་པ་དང་བག་མེད་པ་དང་རྣམ་པར་གཡེང་པ་ལ་སོགས་པའི་གཉེན་པོ་

མཐར་ཐུག་པའི་དབང་པོ་རྣམས་ཁོ་ན་སྟོབས་དག་སྟེ། དད་པའི་སྟོབས་བརྩོན་འགྲུས་ཀྱི་སྟོབས་དྲན་པའི་སྟོབས་ཏིང་ངེ་འཛིན་གྱི་སྟོབས་དང་ཤེས་རབ་ཀྱི་སྟོབས་ཞེས་བྱའོ། །རང་ཉིད་ཁོ་ནས་ཡང་དག་པར་རྟོགས་པའི་ཕྱིར་ཡང་དག་བྱང་ཆུབ་སྟེ། སོམ་ཉི་དང་བྲལ་བའི་སེམས་
སོ། །དེའི་རྒྱུ་ནི་ཡང་དག་པའི་བྱང་ཆུབ་ཀྱི་ཡན་ལག་བདུན་ཏེ་དེ་ལ་སེམས་ཅན་ཀུན་གྱི་དོན་བྱ་བའི་ཕྱིར། ཡང་དག་པའི་བྱང་ཆུབ་ལ་སྨོན་ལམ་དང་ཐོས་པ་དང་རྟོག་པ་ཁོང་དུ་ཆུད་པ་ལ་མི་རྨུགས་པ་ནི་དྲན་པ་ཡང་དག་བྱང་ཆུབ་ཀྱི་ཡན་ལག་གོ། །ཆོས་ཅན་བདག་ལ་སོགས་པ་ཡོད་པ་མ་ཡིན་པ་དང་།
ཆོས་ཀྱི་ཕུང་པོ་ལྔ་ལ་སོགས་པ་ཁོ་ན་ཡོད་པ་ཞེས། །གང་ཆོས་རབ་ཏུ་རྣམ་པར་འབྱེད་པ་དེ་ནི་ཆོས་རབ་ཏུ་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་གོ། །ཡིད་ཆོས་ཉིད་དང་རོ་གཅིག་པ་ནི་དགའ་བ་ཡང་དག་བྱང་ཆུབ་ཀྱི་ཡན་ལག་གོ། །དགའ་བ་མི་མཐུན་པ་བདག་དང་བདག་གི་བའི་
བག་ཆགས་བཅད་པའི་ཕྱིར། ལུས་ངག་ཡིད་གསུམ་ལས་སུ་རུང་བ་ཉིད་ནི་ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་གོ། །ཚད་མེད་པ་བཞི་ནི་དེ་བཞིན་ཉིད་དང་ཡང་དག་པའི་མཐའ་དང་སྟོང་པ་ཉིད་དང་། ཆོས་ཀྱི་དབྱིངས་རྣམས་ལ་རྩེ་གཅིག་པ་ནི་ཏིང་ངེ་འཛིན་ཡང་དག་བྱང་
ཆུབ་ཀྱི་ཡན་ལག་གོ། །སོ་སོ་སྐྱེ་བོའི་ས་ལས་ངེས་པར་འབྱུང་བ་ནི། བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་གོ། །ཉོན་མོངས་པའི་གཉེན་པོར་གྱུར་པ་དང་མ་གྱུར་པ་ཉིད་ཀྱིས་ལུས་ངག་ཡིད་གསུམ་གྱི་འདུ་བྱེད་རྣམས་ཀྱི་འབད་རྩོལ་མེད་པའི་རྒྱུད་དང་བཏང་སྙོམས་མི་བྱེད་པ་དག་
ནི་བཏང་སྙོམས་ཡང་དག་བྱང་ཆུབ་ཀྱི་ཡན་ལག་གོ། །སྡིག་པ་ཁོ་ནའི་རྗེས་སུ་མཐུན་པ་ཉོན་མོངས་པའི་སྒྲིབ་པའི་གཉེན་པོར་གྱུར་པ་ཉིད་ཀྱི་ཕྱིར། འཕགས་པ་ཡང་ཡིན་ལ་ཡན་ལག་བརྒྱད་པ་ཡང་ཡིན་པས་འཕགས་པའི་ཡན་ལག་བརྒྱད་པ་སྟེ། ཤེས་བྱའི་སྒྲིབ་པ་སྤོང་བ་བསྒོམ་པའི་
ཆེད་དུ་ཚོལ་བས་ལམ་འཕགས་པའི་ཡན་ལག་བརྒྱད་ཀྱང་ཡིན་ལ་ལམ་ཡང་ཡིན་པས་འཕགས་པའི་ལམ་ཡན་ལག་བརྒྱད་དོ། །དེའི་ཡན་ལག་རྣམས་ནི་ཡང་དག་པའི་ལྟ་བ་ལ་སོགས་བརྒྱད་དེ། དེ་ལ་ཡང་དག་པའི་ལྟ་བ་ནི་ཆོས་ཐམས་ཅད་བདག་མེད་པའི་མཚན་ཉིད་ཅན་དང་འཇིག་རྟེན་

ཕ་རོལ་ཏུ་ལྟ་བའོ། །ཡང་དག་པའི་རྟོག་པ་ནི་སྤང་བྱ་དང་། བླང་བྱ་ཉེ་བར་ལེན་པ་དག་གིས་སྤང་བ་དང་། །མངོན་སུམ་དུ་བྱ་བར་ཡིད་ལ་བྱེད་པའོ། །དགེ་བའི་སེམས་འབའ་ཞིག་གིས་སེམས་ཅན་མི་སླུ་བར་བྱེད་པའི་དག་ནི་ཡང་དག་པའི་དག་གོ། །དགེ་བ་བཅུ་ལས་མི་
འདའ་བར་བྱ་བ་ནི་ཡང་དག་པའི་ལས་ཀྱི་མཐའོ། །སེམས་ཅན་ལ་ཚུལ་ཆོས་པ་མ་ཡིན་པ་ལ་སོགས་པའི་ཚུལ་གྱིས་འཚོ་བ་ནི་ཡང་དག་པའི་འཚོ་བའོ། །རང་དང་གཞན་གྱི་དོན་ཕུན་སུམ་ཚོགས་པའི་རྗེས་སུ་འབྲེལ་པ་ལུས་ངག་ཡིད་ཀྱི་ལས་ནི་ཡང་དག་པའི་སྩོལ་བའོ། །ཇི་ལྟ་བ་བཞིན་
དུ་རྟོགས་པའི་ཆོས་ཉིད་མ་རྨུགས་པ་ཉིད་ནི་ཡང་དག་པའི་དྲན་པའོ། །དཔལ་ཧེ་རུ་ཀའི་ཚུལ་དུ་དམིགས་པ་ནི་ཡང་དག་པའི་ཏིང་ངེ་འཛིན་ནོ། །འདི་རྣམས་ཀྱིས་སྒྲིབ་པ་རྣམས་སྤོང་བར་བྱེད་པའི་ཕྱིར་ཡང་དག་པའི་སྤོང་བ་རྣམས་སོ། །དེ་ལ་སྒྲིབ་པ་རྣམས་ནི་འདོད་ཆགས་ལ་སོགས་པའི་
ཉོན་མོངས་པ་དང་། སྙོམ་ལས་ལ་སོགས་པའི་ཉེ་བར་ཉོན་མོངས་པ་རྣམས་སོ། །གང་གི་ཕྱིར་འདི་རྣམས་སྤངས་ན་ཡང་དག་པར་སྤོང་བ་དེའི་ཕྱིར་ཐ་མར་རྒྱས་པར་བཤད་དོ། །ཡང་ན་ཐམས་ཅད་དུ་འདི་རྣམས་ཉེ་བར་སྦྱོར་བའི་ཕྱིར། ཐ་མར་ཤེས་རབ་ཀྱི་ཕ་རོལ་ཏུ་ཕྱིན་པ་དང་མི་མཐུན་
པར་བཤད་དེ། ཇི་སྲིད་རྣལ་འབྱོར་པ་ཧེ་རུ་ཀར་མ་གྱུར་པ་དེ་སྲིད་དུ་འདི་རྣམས་ཁོ་ནས་རྟག་ཏུ་སྤྱོད་དོ་ཞེས་ཤེས་པར་བྱ་བའི་དོན་དུའོ། །ཡང་དག་པར་སྤོང་བའི་རང་བཞིན་ཡང་འགྲེལ་བར་གསལ་ལོ། །ས་བཅུའི་རྣམ་པར་དག་པས་གནས་ལ་སོགས་པ་བཅུར་བརྗོད་པར་བྱའོ། །དེ་ལ་
གནས་དང་ཉེ་བའི་གནས་ལ་སོགས་པ་ནི་རིམ་པས། རབ་དགའ་དྲི་མེད་འོད་བྱེད་པ། །འོད་འཕྲོ་སྦྱངས་དཀའ་མངོན་དུ་གྱུར། །རིང་དུ་སོང་དང་མི་གཡོ་བ། །ལེགས་པའི་བློ་གྲོས་ཆོས་སྤྲིན་ནི། །པཱུ་ཛཱ་ཞེས་བྱ་བ་ལ་སོགས་པ་འདི་ལ་མན་ངག་ནི་འདི་ལྟ་སྟེ། པཱུཾ་ཛཱཾ་ཞེས་བྱ་བ་ལ་
སོགས་པ་ཐམས་ཅད་ཐིག་ལེ་དང་བཅས་པ་བལྟས་ཤིང་པཱུཾ་ཡིག་ལ་སོགས་པའི་ཡི་གེ་ཡོངས་སུ་གྱུར་པ་རྩིབས་མེད་པའི་འཁོར་ལོའི་རྣམ་པ་གནས་ལ་སོགས་པའི་གནས་རྣམས་མགོ་ནས་བརྩམས་ཏེ་སྐད་ཅིག་ཏུ་བལྟ་བར་བྱའོ། །དེ་གནས་ལ་སོགས་པ་རྣམས་ལ་དེ་དང་དེའི་གནས་ཀྱི་རྩ་

རྣམས་ནི་དེ་དང་དེའི་ལྷ་ཉིད་ཀྱི་ཚུལ་དུ་ཡོངས་སུ་གྱུར་ནས་ལྷར་གནས་པ་བསྒོམ་པར་བྱའོ། །རྣ་བ་ཞེས་པ་ནི་རྣ་བའི་བུ་གའི་ནང་དུའོ། །དེ་བཞིན་ལྟེ་བ་མཚན་མ་བཤང་ལམ་སྨིན་མའི་དབུས་མིག་སྣ་རྣམས་ལ་ཡང་གོ་བར་བྱའོ། །ཇི་ལྟར་ཕྱི་རོལ་དུ་གནས་ལ་སོགས་པའི་
ཉེ་བར་གནས་པའི་ཆུ་བོ་རྣམས་ཀྱི་ཆབ་ཀྱིས་གནས་ལ་སོགས་པ་གསོ་བར་བྱེད་པ་དེ་བཞིན་དུ་ལུས་ལ་ཡང་རྩ་རྣམས་ཀྱི་སེན་མོ་ལ་སོགས་པ་རྣམས་བསྐྱེད་པའི་ཕྱིར་ཕྱི་དང་མཉམ་པ་ཉིད་དོ། །ཕྱི་རོལ་དུ་རྡོ་རྗེའི་གནས་ནི་བྱང་ཆུབ་ཆེན་པོའི་མིང་ཅན་གྱི་གནས་དང་། ཆུ་བོ་ནཻ་རཉྫ་ནའོ། །ལུས་
ལ་བདེ་བ་ཆེན་པོའི་འཁོར་ལོ་རྡོ་རྗེའི་གནས་ཏེ། དབུ་མ་ནི་ནཻ་རཉྫ་ནའོ། །འདི་ལྟར་ཚངས་པའི་ལུས་ཀྱི་དཀྱིལ་འཁོར་གྱི་འཁོར་ལོ་བརྟན་པར་མོས་པར་བྱའོ། །སྐུ་ཞེས་བྱ་བ་ལ་སོགས་པ་ནི་སྔར་གསུངས་པ་ཁོ་ནའི་མཇུག་བསྡུ་བ་ཡིན་ཏེ་དེ་ལ་མཐོ་རིས་ལ་སོགས་པ་རྣམས་དང་དབྱེར་མི་ཕྱེད་
པའི་ལུས་སུ་འགྱུར་ཏེ། སྐུ་གསུང་ཐུགས་དང་མཐོ་རིས་མི་ཡུལ་ས་འོག་ཅེས་བྱ་བ་ནང་དང་ཕྱི་དང་རང་བཞིན་གཅིག་ཏུ་འགྱུར་ཞེས་བྱ་བའི་དོན་ཏོ། །ས་བོན་བརྗོད་དེ་ཡི་གེ་གསུམ་གྱི་རང་བཞིན་ལས་ཞེས་བྱ་ནི་ཡི་གེ་གསུམ་ལས་ནཱ་ད་ཡོངས་སུ་གྱུར་པའི་སྒོ་ནས་གང་ཧཱུྃ་རང་གི་ངོ་བོ་བསྐྱེད་པ་དེ་
དེ་བཞིན་ནོ། །རྒྱུ་དེ་ལས་ལྷན་ཅིག་སྐྱེས་པའི་དགའ་བའི་ཚུལ་གྱིས་ཞེས་བྱ་བའི་དོན་ཏོ། །སྐད་ཅིག་ལ་སོགས་པ་ནི་ཕྱག་མཚན་ལ་སོགས་པ་ལ་མ་ལྟོས་པར་ལྷ་མོ་དང་ལྷན་ཅིག་སྐྱེས་པའི་ཕྱིར་རོ། །སྐད་ཅིག་ཕྱག་རྒྱ་ཞེས་པ་ནི། རང་དང་དུས་མཉམ་པ་ཁོ་ནར་ཤེས་རབ་དང་སྦྱོར་བའོ། །
སྐད་ཅིག་དཀྱིལ་འཁོར་ལོ་ཞེས་པ་ནི། གཞལ་ཡས་ཁང་དང་དཔའ་བོ་དང་དཔའ་མོའི་དབང་ཕྱུག་མ་རྣམས་དང་ལྷན་ཅིག་ཏུ་དུས་སྐད་ཅིག་ལ་རྫོགས་པའི་ཕྱིར་རོ། །སྐད་ཅིག་གིས་ནི་གསང་སྔགས་ཞེས་བྱ་བ་ནི་བསྐྱེད་པ་དང་དུས་མཉམ་དུ་ཨོཾ་ཨཱཿཞེས་བྱ་བ་ལ་སོགས་པའི་སྔགས་བརྗོད་
དོ། །དེ་ནས་ཞེས་བྱ་བ་ལ་སོགས་པ་མདོར་བསྟན་པའི་ཚིགས་སུ་བཅད་པ་སྟེ། དེ་ནས་ནི་དེ་མ་ཐག་ཏུ་ཡེ་ཤེས་ཀྱི་འཁོར་ལོ་རྣམ་པར་བསྒོམས་ཏེ་འཆད་པར་འགྱུར་བའི་ཆོ་ག་སྟེ། ཅི་བྱས་ནས་ཤེ་ན། དེ་ལ་གསུངས་པ་ཆོ་ག་གཉིས་ཤེས་ནས་སོ། །གོ་ཆ་གཉིས་ཀྱིས་ལྷ་རྣམས་

དང་ལག་པའི་མཆོད་པ་དང་ཁྱད་པར་མེད་དོ། །པགས་པའི་ནང་དུ་གནས་པའི་རྡུལ་ཕྲ་རབ་དེ་སྔགས་ཀྱི་རང་བཞིན་ནམ་ལྷའི་རང་བཞིན་དུ་བལྟ་བར་བྱའོ། །མྱུར་ཞུགས་ཞེས་བྱ་བ་ནི་ཨརྒྷ་ལ་སོགས་པ་ལ་མ་ལྟོས་པར་རོ། །གོ་ཆ་གཉིས་ཞེས་བྱ་བ་ལ་སོགས་པ་ནི་རྒྱས་པར་བཤད་པའོ། །
སྙིང་གར་ཉི་གནས་ཞེས་པ་ནི་ཐུགས་ཀྱི་ཉི་མའི་དཀྱིལ་འཁོར་ལ་ཏིང་ངེ་འཛིན་སེམས་དཔའི་རང་བཞིན་ཧཱུྃ་ཡིག་བསྒོམས་ནས་དེའི་འོད་ཟེར་རྣམས་ཀྱིས་བཀུག་པའི་ཡེ་ཤེས་སེམས་དཔའ་ལ་པི་ཝང་འཛིན་པ་ལ་སོགས་པ་སྔར་གསུངས་པའི་ལྷ་མོ་བཅུ་དྲུག་གིས་མཆོད་ནས་འཁོར་ལོ་སྡོམ་པའི་
རྣལ་འབྱོར་པ་དེས་དམ་ཚིག་གི་འཁོར་ལོ་རབ་ཏུ་གཞུག་གོ། །དེ་ནས་དེའི་རྗེས་སུ་རྡོ་རྗེ་རྣལ་འབྱོར་མ་རྣམས་ཀྱིས་ཡེ་ཤེས་ཀྱི་བདུད་རྩིས་གང་བའི་ཐོད་པ་དང་ཌ་མ་རུ་འཛིན་པ་སྙིང་གའི་ས་བོན་ལས་བྱུང་བའི་པི་ཝང་མ་ལ་སོགས་ལྷ་མོ་བཅུ་དྲུག་གིས་མཆོད་ནས་ཅུང་ཟད་གཞོལ་བར་བྱས་
པའི་ཐོད་པའི་བདུད་རྩིས་བདག་ཉིད་ལས་དབང་བསྐུར་བར་བྱའོ། །དེའི་དུས་སུ་ཡང་ཤིན་ཏུ་བདེ་བ་ཆེན་པོའི་རང་བཞིན་དུ་བདག་ཉིད་བསམ་པར་བྱ་སྟེ་ལྷག་མ་གོ་སླའོ། །དེའི་རྗེས་སུ་ཡེ་ཤེས་ལྔའི་རང་བཞིན་སྐུ་གསུམ་གྱི་བདག་ཉིད་ཅན་དུ་བལྟ་བར་བྱ་སྟེ། དེ་ལ་གང་ཟག་དང་ཆོས་
ཀྱི་བདག་མེད་པས་ཉོན་མོངས་པ་དང་ཤེས་བྱའི་སྒྲིབ་པ་རྣམ་པར་སྤངས་ནས་སྒྲོ་འདོགས་ཐམས་ཅད་ཀྱི་སྤྲོས་པའི་རླུང་སྤངས་པས་དྲི་མ་མེད་པའི་སྣང་གསལ་རླུང་གིས་མ་བསྐྱོད་པའི་རྒྱུན་བཞིན་དུ་ཤིན་ཏུ་འོད་གསལ་བའི་ཡེ་ཤེས་ཀྱི་སྒྲོན་མ་མེ་ལོང་ལྟ་བུའི་ཡེ་ཤེས་ཀྱི་མིང་ཅན། །དོན་དམ་
པའི་བདེན་པ་ལ་དམིགས་པ་རང་ཉེ་བར་སྦྱོར་བའི་ཡེ་ཤེས་རབ་ཏུ་གསལ་བ། འཁོར་བ་གནས་པའི་བར་དུ་རབ་ཏུ་མི་གནས་པའི་མྱ་ངན་ལས་འདས་པའི་ཚུལ་གྱིས་རབ་ཏུ་གནས་ཏེ་རྣམ་པར་དག་པའི་ཡིད་བཞིན་གྱི་ནོར་བུ་བཞིན་དུ་དོན་ཐམས་ཅད་ཕུན་སུམ་ཚོགས་པར་བྱེད་པའོ། །
དེས་བྱིན་གྱིས་བརླབས་པ་ལས་མཉམ་པ་ཉིད་ཀྱི་ཡེ་ཤེས་ལ་སོགས་པ་གསུམ་ཀུན་རྫོབ་ཀྱི་བདེན་པ་ལ་དམིགས་པའི་གཞན་དོན་ལ་ངེས་པར་སྦྱོར་བ་སྟེ། གང་གི་དབང་ཐུན་མོང་དང་ཁྱད་པར་དག་གིས་སོ་སོར་བརྟགས་ནས་རང་རང་གི་ལྟ་བ་བཞིན་དུ་བྱ་བ་ནན་ཏན་གྱི་ཡེ་ཤེས་

ཀྱིས་སེམས་ཅན་ཐམས་ཅད་གདུལ་བྱར་རུང་བ་བཞིན་དུ་དགོད་པར་བྱེད་དོ། །མཉམ་པ་ཉིད་ཀྱི་ཡེ་ཤེས་ཀྱི་དངོས་པོ་ཐམས་ཅད་ལ་མི་རྟག་པ་ལ་སོགས་པ་ཐུན་མོང་གི་རྣམ་པས་ངེས་པར་སྤྱོད་དོ། །ཡུལ་དུས་གནས་སྐབས་ཀྱི་སྒོ་ནས་ཀྱང་དོན་གྱི་བྱ་བ་ཡང་ཐུན་མོང་གི་
ངེས་པས་སེམས་པར་བྱེད་དོ། །འདི་ལྟར་ངེས་པར་སྤྱད་ནས་བྱེ་བྲག་གི་ཚུལ་གྱིས་སོ་སོར་རྟོག་སྟེ། གང་དགེ་བའི་རྩ་བ་ཡོངས་སུ་སྨིན་པའམ། དད་པ་ལ་སོགས་པའི་ཚོགས་མངོན་དུ་ཕྱོགས་པར་འགྱུར་བ་དེའི་ཚེ་ཁོ་ནར་ཐར་པ་ཐོབ་པའམ་ཞེས་འདི་ལྟར་ཐམས་ཅད་ཀྱི་དོན་སྒྲུབ་པར་བྱེད་པ་
འདི་ཡེ་ཤེས་གསུམ་མོ། །ཀུན་གཞི་རྣམ་པར་ཤེས་པ་ཡང་ཤིན་ཏུ་རྣམ་པར་དག་པས་ཡོངས་སུ་གྱུར་པས་ནི་མེ་ལོང་ལྟ་བུའི་ཡེ་ཤེས་སུ་བརྗོད་དོ། །ཉོན་མོངས་པ་ཅན་གྱི་ཡིད་ཡོངས་སུ་གྱུར་པ་ལ་བདག་ཏུ་ལྟ་བ་ལ་སོགས་པ་དང་བྲལ་བས་ཤིན་ཏུ་རྣམ་པར་དག་པ་ནི་མཉམ་པ་ཉིད་ཀྱི་ཡེ་
ཤེས་སུ་འགྱུར་རོ། །ཡིད་ཀྱི་རྣམ་པར་ཤེས་པ་ཡོངས་སུ་གྱུར་པ་སོ་སོར་རྟོག་པའི་ཡེ་ཤེས་སུ་བརྗོད་དོ། །རབ་ཏུ་འཇུག་པའི་རྣམ་པར་ཤེས་པ་དབང་པོ་ལས་བྱུང་བ་ཡོངས་སུ་གྱུར་པ་ཡང་བྱ་བ་ནན་ཏན་དུ་བརྗོད་དོ། །རྟེན་ཐམས་ཅད་ཡོངས་སུ་གྱུར་པས་ཀྱང་ཐུབ་པའི་ཁྱབ་པ་ཉིད་ཐོབ་
པོ། །འདི་ལ་ཡང་སྒྲོ་འདོགས་པ་ཐམས་ཅད་ཀྱིས་དབེན་པས་ཤིན་ཏུ་རྣམ་པར་ཤེས་པ་ཆོས་ཀྱི་དབྱིངས་ལ་དམིགས་པས་མེ་ལོང་ལྟ་བུའི་ཡེ་ཤེས་ནི་ཆོས་སྐུའོ། །མཉམ་པ་ཉིད་དང་སོ་སོར་རྟོག་པའི་ཡེ་ཤེས་དག་ནི་ལོངས་སྤྱོད་རྫོགས་པའི་སྐུའོ། །བྱ་བ་གྲུབ་པའི་ཡེ་ཤེས་ནི་སྤྲུལ་པའི་
སྐུ་སྟེ། སྔོན་དུ་སོ་སོར་བརྟགས་ནས་སེམས་ཅན་གྱི་བྱ་བ་ལ་གཤེགས་པའི་ཕྱིར་རོ། །དེའི་དབང་གིས་གཞན་རྣམས་ལ་སངས་རྒྱས་ཀྱི་ཕྲིན་ལས་སྣང་བའི་ཕྱིར་རོ། །སྐྱེ་བ་ལ་སོགས་པར་སྟོན་པ་ཡང་སེམས་ཅན་ཡོངས་སུ་སྨིན་པའི་ཆེད་དུ་སྟེ། མི་ཡིན་པས་ཀྱང་འདི་ལྟ་བུའི་ཕུན་སུམ་
ཚོགས་པ་འཐོབ་ཅེས་བྱ་བ་ངེས་པ་སྐྱེད་པར་བྱེད་པའི་ཕྱིར་ཏེ། དེས་ཉེ་བར་བསྟན་པའི་ལམ་ཡང་བསམ་པ་ལ་སོགས་པའི་རིམ་པས་བསྒོམ་ཞིང་གྲོལ་བ་ཐོབ་བོ། །གཞན་རྣམས་ཀྱང་དེའི་ལམ་དུ་འཇུག་གོ། །ཤིན་ཏུ་རྣམ་པར་དག་པ་ཆོས་ཀྱི་དབྱིངས་ཀྱི་ཡེ་ཤེས་ནི་ཞེས་པ་ཡང་གོ་བར་

བྱའོ། །ཁཎྜ་ཀ་པཱ་ལ་ཞེས་པ་ནི་སེན་མོ་དང་སོ་ལ་སོགས་པ་ཁཎྜ་ཀ་པཱ་ལ་ལ་སོགས་པའི་རང་བཞིན་དུ་གོ་བར་བྱའོ། །བླ་མ་དང་སངས་རྒྱས་ལ་སོགས་པ་མཐོང་ན་སྡོམ་པ་ཉིད་དུ་མོས་པས་ཕྱག་ལ་སོགས་པ་བྱའོ་ཞེས་བྱ་བ་ཤིན་ཏུ་རྣལ་འབྱོར་རོ། །ད་ནི་རྣལ་འབྱོར་ཆེན་པོ་བརྗོད་པར་བྱ་སྟེ། ཨཱ་ལི་ཀཱ་
ལི་ཞེས་བྱ་བ་ལ་སོགས་ཏེ། ཨཱ་ལི་ཀཱ་ལི་གཉིས་འོད་ཟེར་ལྔ་དང་ལྡན་པ་ལས་འཁོར་ལོ་གསུམ་གྱི་ལྷ་ཉིད་ཀྱི་ཚོགས་སྤྲོས་པ་བརྗོད་ཅིང་སྣ་བུག་གཡས་པའི་རླུང་དང་བཅས་པ་འཐོན་ནས་འགྲོ་བ་འཁོར་ལོ་གསུམ་གྱི་རང་བཞིན་དུ་བྱས་ཏེ་ཐོག་མ་མེད་པ་ནས་གྲུབ་པའི་དཔའ་བོ་དང་རྣལ་འབྱོར་མ་
རྣམས་རོ་མཉམ་དུ་གྱུར་པས། །སྣ་བུག་གཡོན་དུ་རབ་ཏུ་ཞུགས་ནས་ལྟེ་བའི་དཀྱིལ་འཁོར་དུ་རང་གི་རྣམ་པའི་གཟུགས་བརྙན་ཅན་ཟླ་བའི་དཀྱིལ་འཁོར་དུ་གྱུར་པ་བསམས་ནས། སྐད་ཅིག་གིས་ཟླ་བའི་དཀྱིལ་འཁོར་གྱི་སྟེང་དུ་ཧཱུཾ་ཡིག་བསམ་པར་བྱའོ། །དེ་ནས་ཟླ་བ་དང་ས་བོན་ཡོངས་སུ་
གྱུར་པས་བཅོམ་ལྡན་འདས་སྐུ་མདོག་དཀར་པོ་རྡོ་རྗེ་དང་དྲིལ་བུ་འཛིན་པ་ཕྱག་གཉིས་ཀྱིས་རྡོ་རྗེ་དང་ཐོད་པ་འཛིན་པའི་ཕྱག་གཉིས་མ་ཞལ་གཅིག་མ་ཕག་མོ་དམར་པོ་འཁྱུད་པ་ནམ་མཁའི་རི་མོ་བཞིན་དུ་བལྟས་ལ་སྒྱུ་མ་ལྟ་བུའི་ཤིན་ཏུ་དགའ་བའི་སྒྲས་ཀུན་ནས་དྲངས་པའི་ཁམས་གསུམ་དང་དཀྱིལ་
འཁོར་རང་ལ་རིམ་པས་བསྟིམ་པར་བྱའོ། །རིམ་པ་ཡང་སྲིད་པ་ནི་སྣོད་དང་བཅུད་མཐའ་དག་སྟེ་དུར་ཁྲོད་རྣམས་ལའོ། །དུར་ཁྲོད་རྣམས་ཀྱང་སྲུང་བའི་ཕྱིའི་འཁོར་ལོ་ལའོ། །སྲུང་བའི་འཁོར་ལོ་སྐུའི་འཁོར་ལོ་ལ། །སྐུའི་འཁོར་ལོ་གསུང་གི་འཁོར་ལོ་ལ། །གསུང་གི་འཁོར་
ལོ་ཐུགས་ཀྱི་འཁོར་ལོ་ལ། །ཐུགས་ཀྱི་འཁོར་ལོ་བདེ་བ་ཆེན་པོའི་འཁོར་ལོར་ཏེ་དེ་ལ་ཐུགས་ཀྱི་འཁོར་ལོའི་ཕྱོགས་སུ་གནས་པ་རྣམས་མཁའ་འགྲོ་མ་ལ་སོགས་པ་རྣམས་ལའོ། །དབང་ལྡན་ལ་སོགས་པའི་མཚམས་སུ་གནས་པ་རྣམས་གཟུགས་མ་ལ་སོགས་པ་རྣམས་ལའོ། །མཁའ་
འགྲོ་མ་ལ་སོགས་པ་ཡང་བཅོམ་ལྡན་འདས་ཀྱི་ཞལ་རྣམས་ལའོ། །རྡོ་རྗེ་ཕག་མོ་དང་སྡོམ་པ་དག་ལྟེ་བ་ལ་གནས་པའི་རྡོ་རྗེ་ཕག་མོ་དང་སྡོམ་པ་དག་ལ་རབ་ཏུ་ཐིམ་པར་བསམ་མོ། །དེ་དག་རྡོ་རྗེ་ཕག་མོ་དང་སྡོམ་པ་ཡང་དགའ་བ་མཉམ་པའི་བདེ་བ་ཆེན་པོས་འདོད་ཆགས་ཆེན་པོས་

ཞུ་བར་གྱུར་ཏེ། ཞུ་བ་དེ་ཡོངས་སུ་གྱུར་པ་སིནྡྷཱུ་རས་བྱུགས་པའི་མུ་ཏིག་ལྟར་ཧཱུྃ་ཡིག་བདེ་བ་ཆེན་པོའི་རང་བཞིན་དུ་བསམ་པར་བྱའོ། །དེ་ནས་ཨཱུ་ཡིག་ཧ་ཡིག་ལ། ཧ་ཡིག་མགོ་ལ། མགོ་བོ་ཟླ་ཕྱེད་ལ། ཟླ་ཕྱེད་ཐིག་ལེ་ལ། ཐིག་ལེ་ནཱ་ད་ལ་རིམ་པས་
རབ་ཏུ་ཐིམ་པ་བསམ་པར་བྱའོ། །ནཱ་ད་ཙམ་སྐྲའི་རྩེ་མོ་བརྒྱ་སྟོང་གི་ཚུལ་དུ་ལུས་པར་བལྟའོ། །རབ་ཀྱིས་དེ་ཡང་མི་དམིགས་སོ། །ཡང་ན་ལྟེ་བའི་པདྨ་ལ་གནས་པའི་ཉི་མ་དང་ཟླ་བ་ཁ་སྦྱོར་བའི་ནང་ན་ཡོད་པའི་ས་བོན་ཧཱུྃ་ལས་བྱུང་བའི་པདྨའི་རྩ་ལག་ལྟར་འོད་ཟེར་གྱི་རི་མོ་ལ་སེམས་
རྟེན་པར་བྱེད་པའི་སྒོ་ནས། རྩ་གཉིས་ལ་སྲོག་རླུང་གི་རྒྱུ་བ་སྤངས་ནས། དབུས་མ་ལ་རབ་ཏུ་འཇུག་པས་གཏུམ་མོ་སྦར་བ་ལས་སྤྱི་བོའི་ཟླ་བ་ཞུ་ནས་འཁོར་ལོ་ལ་ཁྱབ་པའི་རིམ་པས་དགའ་བ་ལ་སོགས་པའི་དབྱེ་བའི་ཁྱད་པར་གྱིས་ལྷན་ཅིག་སྐྱེས་པའི་དགའ་བ་བྱུང་ནས་རྣམ་
པར་རྟོག་པ་ཐམས་ཅད་སྤངས་པས་དུས་གཅིག་ཏུ་དཀྱིལ་འཁོར་མི་དམིགས་པར་བྱ་བའམ། རིམ་པས་སྟོང་པ་ཉིད་དུ་བསྡུ་བར་བྱའོ། །རིམ་པ་ཡང་སྔར་ཁོ་ནའོ། །དེ་ལྟར་སྐད་ཅིག་རེ་རེར་རབ་ཏུ་འཇུག་པ་དང་ལྡན་པར་བྱའོ། །དེ་གསུངས་པ། ཇི་ལྟར་དབུགས་རླུང་
མེ་ལོང་ལ། །ཀུན་དུ་སིམ་ནས་འགྲོ་བ་ཉིད། །དེ་བཞིན་རྣལ་འབྱོར་ཡང་དག་མཐར། །སྐད་ཅིག་རེ་རེར་རབ་ཏུ་འཇུག །ཅེས་སོ། །ཡང་དང་ཡང་དུ་འཇུག་པ་དང་ལྡང་བ་རྣམས་ཀྱིས་ཀྱང་བདེན་པ་གཉིས་ཐ་མི་དད་པ་རྫོགས་པ་ཟུང་དུ་འཇུག་པའི་ཏིང་ངེ་འཛིན་ལ་རྣལ་འབྱོར་
མངོན་སུམ་དུ་བྱེད་པའོ་ཞེས་བྱ་བ་རྣལ་འབྱོར་ཆེན་པོ་རྫོགས་སོ།། །།དེ་ལྟར་མན་ངག་ཇི་ལྟ་བ་བཞིན་དུ་སྒྲུབ་ཐབས་བཤད་ནས་སྒྲུབ་ཐབས་འདི་ཁོ་ན་བསྐྱེད་པ་དང་། རྫོགས་པའི་རིམ་པས་མན་ངག་ཇི་ལྟ་བ་བཞིན་དུ་རྣམ་པར་འབྱེད་དེ། དེ་ལ་ཤིན་ཏུ་རྣལ་འབྱོར་མའི་མཐའི་བར་ནི་
བསྐྱེད་པའི་རིམ་པའོ། །རྣལ་འབྱོར་ཆེན་པོ་ནི་རྫོགས་པའི་རིམ་པ་སྟེ། བསྐྱེད་པ་དང་རྫོགས་རིམ་འདི་གཉིས་ནི། རིགས་པས་སྒྲུབས་པའི་ཡན་ལག་དྲུག་པའི་གོ་རིམས་ཁོ་ནས་བསམ་གཏན་བྱའོ། །གཞན་དུ་ན་ཡང་དག་པའི་སྒྲུབ་པ་ཐོབ་པར་མི་འགྱུར་རོ། །དེ་བཞིན་

དུ་གསུངས་པ་ཡང་དཔལ་གསང་བ་འདུས་པ་རྒྱུད་ཕྱི་མ་ལས། བསྙེན་དང་ཡན་ལག་དྲུག་སྦྱོར་བས། །གྲུབ་པའི་མཆོག་ནི་བྱས་ནས་སུ། །བསྒྲུབ་པར་བྱའོ་གཞན་དུ་ན། །གྲུབ་པའི་མཆོག་ནི་མི་ཐོབ་བོ། །ཞེས་སོ། །སོ་སོར་སྡུད་དང་བསམ་གཏན་དང་། །སྲོག་རྩོལ་དེ་བཞིན་
འཛིན་པ་དང་། །རྗེས་སུ་དྲན་དང་ཏིང་ངེ་འཛིན། །སྦྱོར་བ་ཡན་ལག་དྲུག་ཏུ་འདོད། །ཅེས་བྱ་བ་དེ་ལ་མིག་ལ་སོགས་པའི་འགྲེལ་བ་ཅན་རྣམ་པར་ཤེས་པ་ལྔ་རྣམས་གཟུགས་ལ་སོགས་པའི་ཡུལ་རྣམས་ལས་སོ་སོར་སྡུད་པ་ནི་བཀུག་ནས་ཡང་དག་པར་དུལ་བར་བྱེད་པ་གང་དེ་སོ་སོར་
བསྡུས་པའོ། །ཡང་ན་ལྷ་ཉིད་ཀྱི་ཚུལ་དུ་ཡུལ་གཟུང་བ་ནི་སོ་སོར་སྡུད་པའོ། །བསམ་གཏན་སོ་སོར་སྡུད་པའི་གོ་རིམས་ཀྱིས་ཡིད་ཀྱི་རྣམ་པར་ཤེས་པ་ལྷ་ཉིད་དུ་བསྒོམ་པའོ། །དེ་ཡང་རྣམ་པར་རྟོག་པ་རྣམ་པར་དཔྱོད་པ་དགའ་བ་བདེ་བ་སེམས་རྩེ་གཅིག་པའི་དབྱེ་བས་རྣམ་པ་ལྔའོ། །དེ་
ལ་སྣོད་དང་བཅུད་ཀྱི་དཀྱིལ་འཁོར་དང་བཅས་པ་བཅོམ་ལྡན་འདས་དཔལ་སྡོམ་པའི་ཡོངས་སུ་བརྟག་པ་ཉིད་ནི་རྣམ་པར་རྟོག་པ་སྟེ། དེ་ཁོ་ན་ལ་བསྟན་པ་ཉིད་ཀྱིས་ངེས་པ་ནི་རྣམ་པར་དཔྱོད་པའོ། །རྣམ་པར་དཔྱོད་པས་དེ་དང་དེའི་ལྷ་ཉིད་དུ་དམིགས་པས་ཡིད་བདེ་བ་དེ་ནི་དགའ་བའོ། །
དགའ་བ་བསྒོམས་པའི་ལྷ་ལ་སིམ་པ་དང་བཅས་པའི་སེམས་གང་ཡིན་པ་དེ་ནི་བདེ་བའོ། །བདེ་བ་དང་ལྡན་པའི་སེམས་ཏིང་ངེ་འཛིན་དུ་གྱུར་པའི་ཕྱིར་རྣམ་པ་སྣ་ཚོགས་པ་ལོག་པའི་ཀུན་རྫོབ་ཀྱི་ཡུལ་ཅན་གྱིས་མི་ཤེས་པའི་སྐྱེ་བ་ཟད་པས་འདོད་པའི་ལྷ་ཁོ་ན་ལ་དམིགས་པའི་སེམས་ནི་སེམས་
རྩེ་གཅིག་པ་ཉིད་དོ་ཞེས་བྱ་བ་བསམ་གཏན་ཡན་ལག་ལྔ་པའོ། །དེ་ལྟར་སྔ་དྲོའི་ཐུན་མཚམས་ལ་ཇི་ལྟར་གསུངས་པའི་གོ་རིམས་ཀྱིས་དཀྱིལ་འཁོར་འཁོར་ལོ་བསྒོམས་ནས་ནི་ཉི་མའི་གུང་ཐུན་ལ་ཡང་སྐད་ཅིག་ཏུ་དེ་ཁོ་ན་བཞིན་དུ། དཀྱིལ་འཁོར་འཁོར་ལོ་དམིགས་ནས་སོ་སོར་
སྡུད་པ་དང་། བསམ་གཏན་དག་གིས་ཇི་སྲིད་དུ་འདོད་པ་དེ་སྲིད་དུ་མངོན་པར་ཕྱོགས་པར་བྱེད་ཅིང་བསམ་གཏན་བྱའོ། །དེའི་རྗེས་ལ་ཐུན་མཚམས་ཀྱི་དུས་སུ་དངོས་སུའམ་མོས་པས་ཕྱག་རྒྱ་ལྔ་ལ་སོགས་པས་བརྒྱན་པ་ཐོད་པ་ཁ་ཊྭཱཾ་ག་ཌ་མ་རུ་འཛིན་པ། སངས་རྒྱས་ཐོད་

པ་ཅན་གྱི་བརྟུལ་ཞུགས་པའི་སྒྲུབ་པ་པོས་དཀྱིལ་འཁོར་ཁོ་ན་སྒོམ་ཞིང་བསྐོར་བ་དང་ཟ་བ་ལ་སོགས་པའི་ལས་བྱའོ། །ཡང་གསུངས་པ་ཐུན་གསུམ་དུ་བྱིན་གྱིས་བརླབས་པའི་སྒོམ་པ་རྣམ་པར་བསྒོམ་པ་ནས་ལངས་ཏེ་ལྷའི་གཟུགས་སུ་གཞག་གོ། །དོན་འདི་ཁོ་ན་ལ་
དཔལ་རྡོ་རྗེ་མཁའ་འགྲོའི་རྒྱུད་ཀྱི་ལེའུ་སོ་དགུ་པ་ལས། ཧེ་རུ་ཀ་དཔལ་ཚུལ་གྱིས་ནི། །ཁ་ཊྭཱཾ་ག་སོགས་སྒོམ་རྣམས་ཀྱིས། །ཐོད་པ་གཡོན་པའི་ཕྱག་གིས་ཏེ། །བརྟུལ་ཞུགས་ལྡན་པས་སྤྱོད་པ་སྤྱད། །ཅེས་སོ། །ཁྱད་པར་དུ་ལས་ཁ་ཚར་གྱི་དོན་དུ་ཤིང་སྡོང་ལ་སོགས་པ་བཙུགས་པ་
ན་ཚུལ་དེ་ཁོ་ནས་གཏོར་མ་སྦྱིན་པ་དང་སྲུང་བ་ཞག་རེ་རེ་ལ་བྱའོ་ཞེས་པའི་ངག་གིས་སྒྲུབ་ཐབས་ཀྱི་བང་མཛོད་ཅེས་བྱ་བའི་ཊཱི་ཀཱ་ལས་ཀྱང་གསུངས་པ། ཁ་ཊྭཱཾ་ག་སོགས་སྒོམ་རྣམས་ཀྱིས། །ཞེས་བྱ་བ་ནི་སོགས་པའི་སྒྲས་ཌ་མ་རུའོ། །ཆུས་བྲན་པ་ལ་སོགས་པ་ནི་ཉེ་བར་མཚོན་པ་ཙམ་སྟེ་སྐོར་
བ་དང་བཟའ་བ་ལ་སོགས་པའི་ལས་ཐམས་ཅད་ལ་ཚུལ་འདི་ལྟར་བྱའོ། །བྱེ་བྲག་ཏུ་ཕྱག་མཚན་གསུམ་པའི་ནང་ནས་དམ་ཚིག་གི་དབང་གིས་གང་ཉེ་བར་སྦྱོར་བ་དེ་འདོད་པ་ལྟར་གཟུང་བར་བྱའོ། །འགའ་ཞིག་ཏུ་རྡོ་རྗེ་དང་དྲིལ་བུ་ཡང་བཟུང་སྟེ་རྟག་ཏུ་འདི་གཟུང་གི་ངེས་པར་མི་བྱའོ། །དེ་ལྟར་
སངས་རྒྱས་ཐོད་པའི་བརྟུལ་ཞུགས་འཛིན་པ། ཕྱག་བཅུ་གཉིས་པ་ལ་སོགས་པའི་དཔལ་སྡོམ་པ་ལ་སོགས་པའི་ཏིང་ངེ་འཛིན་དངོས་སུ་བྱ་བའི་གོ་རིམས་ཀྱིས་འཇིག་རྟེན་གསུམ་གྱི་ཁོངས་སུ་ཆུད་པའི་སྒྲུབ་པ་དང་ཡོངས་སུ་མཐར་ཐུག་པ་ལ་ཕྱག་རྒྱ་ཆེན་པོའི་སྒྲུབ་པ་ཡང་བསྒྲུབ་པར་བྱའོ། །
འདི་ཡང་ཐོད་པ་འཆང་བའི་བརྟུལ་ཞུགས་ནི། །རྣལ་འབྱོར་མའི་རྒྱུད་དུ་དབང་བསྐུར་བའི་དུས་ཁོ་ནར་སྦྱིན་པར་བྱ་སྟེ། སྒྲུབ་པ་པོས་འདི་ཁོ་ན་མཚན་སུམ་ཅུ་རྩ་གཉིས་པ་ལ་སོགས་པའི་ཚུལ་གྱིས་སྟོང་པ་ཉིད་ལ་ལྡང་ཞེས་པ་འདི་ལ་ཐེ་ཚོམ་མི་བྱའོ། །འདི་ལ་ཡང་སྔ་དྲོའི་ཐུན་ནས་
མཚན་མོ་ཕྱེད་ཀྱི་ཐུན་གྱི་བར་དུ་ལྷ་ཁོ་ན་བསྒོམ་ཞིང་གནས་པར་བྱའོ། །དེ་ནས་སྟོང་པ་ཉིད་བསྒོམ་པར་བྱ་སྟེ། དེ་ལ་གསུང་རབ་ལས་གྲུབ་པའི་མན་ངག་འདི་ལྟ་སྟེ། ལྟེ་བའི་འཁོར་ལོ་ཟླ་བའི་དཀྱིལ་འཁོར་ལ་ཇི་ལྟར་གསུངས་པའི་ཧཱུྃ་ཡིག་དབུས་སུ་གནས་པའི་ཨཱ་ལི་

ཀཱ་ལིའི་སྦྱོར་བ་སྐད་ཅིག་ཏུ་མོས་ནས་དེ་དང་དེའི་ཡི་གེ་དང་བཅས་པའི་འོད་ཟེར་རྣམས་སྤྲོ་བར་བྱའོ། །འོད་ཟེར་དེའི་ངེས་པར་འབྱེད་པས་བྷཻ་རཾ་པ་ལ་སོགས་པ་ཐམས་ཅད་སྣོད་དང་བཅུད་ཀྱི་དཀྱིལ་འཁོར་འོད་ཀྱི་རང་བཞིན་དུ་བྱས་ནས་ཨཱ་ལི་ཀཱ་ལིའི་སྦྱོར་བ་དེ་ཁོ་ན་ལ་རབ་ཏུ་གཞུག་པར་བྱའོ། །ཡང་
དེ་བཞིན་དུ་འོད་ཟེར་རྣམ་པར་སྤྲོས་པས་འོད་ཟེར་དེའི་ངེས་པར་འབྱེད་པས་བཅོམ་ལྡན་འདས་མ་དང་བཅས་པའི་བཅོམ་ལྡན་འདས་འོད་ཟེར་གྱི་རང་བཞིན་དུ་བྱས་ནས་ཡང་དེ་ཁོ་ན་བཞིན་དུ་རབ་ཏུ་འཇུག་པར་བྱའོ། །དེ་ཁོ་ན་བཞིན་དུ་ཡང་འོད་ཟེར་རྣམས་སྤྲོས་ནས་དེའི་འོད་ཟེར་གྱི་ངེས་པར་
འབྱེད་པས་ཟླ་བའི་དཀྱིལ་འཁོར་ཧཱུྃ་ཡིག་དང་ཨཱ་ལི་ཀཱ་ལིའི་སྦྱོར་བ་འོད་ཀྱི་རང་བཞིན་དུ་བྱས་ནས། ཇི་ལྟར་དབུགས་རླུང་མེ་ལོང་ལ། །ཀུན་ནས་སིམ་པར་འགྲོ་བ་ཡི། །དེ་བཞིན་རྣལ་འབྱོར་ཡང་དག་མཐར། །སྐད་ཅིག་རེ་རེར་རབ་ཏུ་འཇུག །ཅེས་འདི་ལྟར་འོད་གསལ་མངོན་དུ་ཕྱོགས་
པར་བྱས་ནས་གལ་ཏེ་ངལ་བསོ་བའི་བློས་ཉལ་བར་འདོད་ན་དེའི་ཚེ་འདིའི་དམིགས་པ་ཁོ་ནས་ཉལ་བར་བྱའོ། །དེ་ནས་མ་བཅོལ་པའི་རང་བཞིན་ཁོ་ནས་སྒྲུབ་པོ་པོས་འོད་གསལ་གྱི་རྣམ་པར་དག་པ་ལས། མཚན་སུམ་ཅུ་རྩ་གཉིས་དང་དཔེ་བྱད་བརྒྱད་ཅུ་དང་ཕྱག་རྒྱ་ལྔ་ལ་སོགས་པས་བརྒྱན་
པ་ཐོད་པ་ཁ་ཊྭཱཾ་ག་ཌ་མ་རུ་བསྣམས་པ་ཉིད་གྱིས་རྡོ་རྗེ་ཐོད་ལྡན་གྱི་བརྟུལ་ཞུགས་འཆང་བ་ཁོ་ན་ཞལ་གཅིག་ཕྱག་གཉིས་པའི་དཔལ་བདེ་མཆོག་གི་མོས་པས་ཉལ་བ་ལས་ལངས་ལ། སྔ་དྲོའི་ཐུན་ལ་སྔར་བཞིན་དུ་སོ་སོར་སྡུད་པའི་རིམ་པས་སྒྲུབ་ཐབས་ཡན་ལག་དང་བཅས་པ་བསྒོམ་པར་
བྱའོ། །འདི་བཞིན་དུ་རིམ་པས་དད་པ་དང་བཅས་པ་བར་མ་ཆད་པར་ཡུན་རིང་པོར་སྒོམ་པ་དང་མ་བྲལ་བའི་སྒྲུབ་པ་པོ་ལ་དཔལ་བདེ་མཆོག་ལ་སོགས་པ་མཁའ་འགྲོ་དང་། མཁའ་འགྲོ་མ་རྣམས་ཀྱིས་རབ་ཏུ་འབད་པས་བདག་ཉིད་ཉེ་བར་སྟོན་པར་བྱེད་དེ། འདི་ཡང་མངོན་སུམ་དུ་མཐོང་
བ་དེ་རྣམས་ཀྱིས་ཀྱང་འདི་ལ་རྗེས་སུ་འཛིན་ཏོ་ཞེས་བྱ་བ་བསྐྱེད་པའི་རིམ་པའོ། །སྲོག་སྩོལ་བ་ལ་སོགས་པའི་རིམ་པས་རྫོགས་པའི་རིམ་པ་བསྒོམ་པར་བྱ་སྟེ། དེ་ལ་རིམ་པ་འདི་ལྟ་སྟེ། མེ་ལོང་ལྟ་བུ། མཉམ་པ་ཉིད། སོ་སོར་རྟོག་པ། བྱ་བ་གྲུབ་པ་ཤིན་ཏུ་རྣམ་པར་དག་

པའི་ཆོས་ཀྱི་དབྱིངས་ཞེས་བྱའི་ཡེ་ཤེས་ལྔའི་རྒྱུ་ཉིད་ཡིན་པས། ཡེ་ཤེས་ལྔའི་རང་བཞིན་མེ་རླུང་དབང་ཆེན་ཆུ་ནམ་མཁའི་རང་བཞིན་ཉིད་ཡིན་པས་འབྱུང་བ་ལྔའི་བདག་ཉིད་ཅན། སྲོག་རླུང་ཐུར་དུ་རྒྱུ་བར་བྱས་ནས་ཡུངས་འབྲུའི་ཚད་ཙམ་ཅིག་བྱང་ཆུབ་ཀྱི་སེམས་ཐིག་ལེ་
འགྲིལ་བའི་ཚུལ་གྱིས་རྡོ་རྗེ་སྣའི་རྩེ་མོར་ཕབ་ནས་གང་དུ་གསུངས་པའི་སོ་སོར་སྡུད་པ་དང་ཡན་ལག་ལྔའི་བསམ་གཏན་གྱིས་རིམ་པར་བསམ་པར་བྱའོ། །འདི་ཡང་ཐིག་ལེའི་སྦྱོར་བ་སྟེ་སྲོག་རྣམས་ཕྱི་རོལ་དུ་འགྲོ་བ་བཟློག་པའི་དོན་དུ་དེ་བས་ན་དེའི་རྒྱུ་ཉིད་ཀྱིས་གསང་བ་འདུས་པ་བླ་མའི་རྒྱུད་ལས་
སྲོག་རྩོལ་ཞེས་བྱ་བར་བརྗོད་དོ། །འདི་ཡང་ཉེ་བར་མཚོན་པ་ཙམ་སྟེ། ལྟེ་བར་ཕྲ་བའི་ཨཱ་ལི་ཀཱ་ལིའི་སྦྱོར་བའམ་ཐུགས་ལ་སོགས་པ་ལ་ཐིག་ལེ་ལ་སོགས་པའི་སྦྱོར་བའི་བསམ་གཏན་གང་དེ་ཡང་སྲོག་འཐོན་པ་བཟློག་པའི་དོན་ཉིད་ཀྱིས་སྲོག་རྩོལ་ཞེས་བརྗོད་དོ། །བྱེ་བྲག་ཏུ་བསམ་གཏན་
འདི་ལྟ་བུའི་སྟོབས་ཀྱིས་རོ་མ་དང་བརྐྱང་མ་དག་གིས་རྒྱུ་བ་ལས་བཟློག་ནས་དབུ་མར་སྲོག་རླུང་གི་རྩོལ་བ་ནི་རབ་ཏུ་རྒྱུ་བ་སྟེ། འདི་ལྟར་ཡང་སྲོག་རྩོལ་ཞེས་བརྗོད་དེ། དེ་ནས་ཐུགས་ཀར་ཉི་མ་དང་དཀྱིལ་འཁོར་མེད་པའི་ཧཱུྃ་ཡིག་རྐྱང་པ་བསྒོམས་ནས་དེའི་ཐིག་ལེ་ལ་སྲོག་རབ་ཏུ་འཇུག་པའི་སྒོ་ནས་
གཟུང་བ་དང་འཛིན་པ་སྲོག་རྩོལ་དང་བཅས་པ་ཉམས་ན་དེ་ཁོ་ནའི་ཕྱིར་སྟོང་པ་ཉིད་ཁོ་ནར་གནས་པ། སངས་རྒྱས་ཐམས་ཅད་ཀྱི་རང་བཞིན་ཞི་བ་སྣང་དམིགས་ཡོད་པ་ཙམ་པོ་སེམས་རིན་པོ་ཆེ་ནམ་མཁའ་དང་མཉམ་པའི་འོད་གསལ་ཉིད་དུ་གྱུར་པ་ལས་གང་སྲོག་རླུང་བརྟན་པར་གྱུར་པ་དེ་འཛིན་པའོ། །
འདི་ཡང་ཉེ་བར་མཚོན་པ་ཙམ་སྟེ་ལྟེ་བའི་རྩ་བར་གནས་པ་ཕྲ་བའི་ཨཱ་ལི་ཀཱ་ལིའི་སྦྱོར་བའམ། རྡོ་རྗེའི་སྣའི་རྩེ་མོ་ལ་བསྒོམས་པའི་ཐིག་ལེའི་སྦྱོར་བའམ། གཏུམ་མོ་ལ་སོགས་པའི་སྤྱོར་བ་གང་ཡང་རུང་བའམ། གསུངས་མ་ཐག་པའི་རིམ་པས་གང་སྲོག་རླུང་བརྟན་པར་གྱུར་པ་དེ་ཡང་འཛིན་
པའོ། །འཛིན་པ་འདིའི་མཇུག་ཐོགས་སུ་བར་མ་ཆད་པར་སྨིག་རྒྱུ་དུ་བ་སྲིན་བུ་མེ་ཁྱེར་མར་མེ་སྤྲིན་མེད་པའི་ནམ་མཁའ་ལྟ་བུའི་རྟགས་ལྔ་མཐོང་བར་འགྱུར་རོ། །དེ་ནས་སྲོག་རྩོལ་དང་ལྷན་ཅིག་ཏུ་འོད་གསལ་བའི་རང་བཞིན་ཉིད་ཀྱིས་གང་གི་ཚེ་སེམས་བརྟན་པར་གྱུར་པ་དེའི་ཚེ། སྨོན་

ལམ་གྱིས་རབ་ཏུ་འབྱེད་པའི་མཐུས་དང་པོ་བསྒོམས་པའི་ལྷ་ལ་རྗེས་སུ་དྲན་པ་འབྱུང་བ་དེ་ལ་ཡང་བསྒོམས་པའི་ཨཱ་ལི་ཀཱ་ལི་ལ་སོགས་པའི་ཕྲ་བའི་སྦྱོར་བ་ལས་སྒོམ་པ་པོས་འོད་ཟེར་སྤྲོས་པར་བྱས་པ་འདི་ནི་རྗེས་སུ་དྲན་པའོ། །འོད་དེ་དང་བཅས་པ་བ་སྤུའི་བུ་ག་རེ་རེ་རྣམས་ཀྱིས་ཕུང་པོ་ཁམས་དང་
སྐྱེ་མཆེད་ལ་སོགས་པ་ལྷའི་རང་བཞིན་སྤྲོས་པ་ནི་རྗེས་སུ་དྲན་པ་ཞེས་བྱ་བ་ནི་དགོངས་པ་ཅན་ཡིན་ནོ། །དེ་བཞིན་དུ་དཔལ་གསང་བ་འདུས་པ་ལས། བརྟན་པའི་རིན་ཆེན་སྤྲོ་བར་བྱེད། །མི་བརྟན་པས་ནི་སྤྲོ་མི་བྱ། །རབ་མཆོག་སྤྲིན་རྣམས་ཀྱིས་སྤྲོ་བྱ། །སངས་རྒྱས་ཡེ་ཤེས་མཉམ་
འོད་ཀྱིས། །ཞེས་བྱའོ། །དེ་ནས་ཕུང་པོ་ཁམས་དང་སྐྱེ་མཆེད་ལ་སོགས་པ་རང་བཞིན་གྱིས་སྤྲོས་པའི་དངོས་པོ་ཐམས་ཅད་ཀྱི་རང་བཞིན་གྱི་ལྷ་རྣམས་འོད་ཀྱི་རང་བཞིན་དུ་བྱས་ནས་འོད་ཟེར་རྣམས་ཀྱང་གསུངས་པའི་སྦྱོར་བ་རྣམས་ལས་རྒྱུད་ཐ་དད་པའི་ཕྱིར་སྒྲུབ་ཐབས་མི་གཅིག་པས་བསྒོམས་
པའི་གང་ཡང་རུང་བའི་ཕྲ་བའི་སྦྱོར་བ་ལ་སྟོང་པ་དང་སྙིང་རྗེ་དབྱེར་མི་ཕྱེད་པའི་རང་བཞིན་ལ་འགྲིལ་པའི་ཚུལ་དུ་བསྡུས་ནས་སྐད་ཅིག་གིས་རང་རིག་པའི་ཡེ་ཤེས་འབྱུང་བ་ནི་ཏིང་ངེ་འཛིན་ནོ། །འདི་ཁོ་ན་རྒྱུད་གཞན་ནས་འབྱུང་བ་དང་། བརྒྱུད་པའི་རིམ་པ་ལས་བྱུང་བའི་བཤད་པའོ། །འོད་གསལ་
ལས་ཡེ་ཤེས་ཀྱི་རང་བཞིན་གྱི་སྐུས་ཞེས་པ་དེ་ཡང་ཏིང་ངེ་འཛིན་ཞེས་བྱ་བ་ཡང་འགའ་ཞིག་ཏུ་བཤད་དོ། །དཔལ་གསང་བ་འདུས་པའི་རྒྱུད་ཕྱི་མར་ཡང་གསུངས་པ། བཅུ་པ