Kinh tạng Tây Tạng (Kangyur Đại Học) — 084_རྒྱུད་འབུམ།_ཉ

་ཅད་བོས་ནས་འདི་སྐད་ཅེས་གསུངས་སོ། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་མ་འཚལ་ལོ། །དེ་བཞིན་གཤེགས་པ་ཐམས་ཅད་ཀྱིས་བཀའ་སྩལ་པ། ཅིའི་ཕྱིར། རྡོ་རྗེ་འཛིན་པས་སྨྲས་པ། བཅོམ་ལྡན་འདས་དབང་ཕྱུག་ཆེན་པོ་ལ་སོགས་པ་མ་རུངས་
པའི་སེམས་ཅན་དག་ཀྱང་མཆིས་ཏེ། དེ་བཞིན་གཤེགས་པ་ཐམས་ཅད་ཀྱིས་ཀྱང་ཞི་བས་འདུལ་བར་མི་སྤྱོད་པ་དེ་དག་ལ་བདག་གིས་ཇི་ལྟར་བསྒྲུབ་པར་བགྱི། དེ་ནས་བཅོམ་ལྡན་འདས་རྣམ་པར་སྣང་མཛད་དེ་བཞིན་གཤེགས་པ་ཐམས་ཅད་ཀྱི་བྱིན་གྱི་བརླབས་ཀྱིས། དེ་བཞིན་
གཤེགས་པ་ཐམས་ཅད་ཀྱི་ཐབས་ཆེན་པོའི་ཡེ་ཤེས་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། སྙོམས་པར་ཞུགས་མ་ཐག་ཏུ་དེ་བཞིན་གཤེགས་པ་ཐམས་ཅད་ནམ་མཁའི་དབྱིངས་ཐམས་ཅད་ཀྱི་རྡུལ་ཤིན་དུ་ཕྲ་མོ་དང་མཉམ་པར་འཕྲོས་ནས། རི་རབ་རིའི་རྩེ་མོ་ནི་རྩེ་
མོ་རྡོ་རྗེ་དང་། ནོར་བུ་དང་། རིན་པོ་ཆེ་ལས་བྱས་པའི་ཁང་བུ་བརྩེགས་པར་ཡང་གཅིག་ཏུ་འདུས་ཏེ། དེ་བཞིན་གཤེགས་པ་ཐམས་ཅད་ཀྱིས་མཉམ་ཉིད་དུ་དམིགས་ནས། བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་ཀྱི་དཔལ་བེའུར་ཞུགས་སོ། །དེ་ནས་ཡང་བཅོམ་ལྡན་
འདས་དེ་བཞིན་གཤེགས་པ་རྣམ་པར་སྣང་མཛད་དེ་བཞིན་གཤེགས་པ་ཐམས་ཅད་ཀྱི་ཐུགས་སུ་བདག་བྱིན་གྱིས་བརླབས་ཏེ། དེ་བཞིན་གཤེགས་པ་ཐམས་ཅད་རྡོ་རྗེ་མཉམ་པ་ཉིད་ཀྱིས་མ་ལུས་ཤིང་ལུས་པ་མེད་པའི་སེམས་ཅན་གྱི་ཁམས་ཡོངས་སུ་བསྐྱབ་པ་དང་། ཕན་པ་དང་། བདེ་

བའི་དམ་པ་ཐམས་ཅད་འགྲུབ་པ་དང་། མ་རུངས་པ་ཐམས་ཅད་འདུལ་བའི་ཕྱིར། དེ་བཞིན་གཤེགས་པ་ཐམས་ཅད་ཀྱི་སྙིང་རྗེ་ཆེན་པོའི་ཐབས་ཀྱི་ཏིང་ངེ་འཛིན་གྱི་ཡེ་ཤེས་ལ་དམིགས་ཏེ། དེ་བཞིན་གཤེགས་པ་ཐམས་ཅད་ཀྱི་སྙིང་རྗེ་ཆེན་པོའི་ཐབས་ཁྲོ་བོ་ཆེན་པོའི་དམ་ཚིག་རྡོ་རྗེ་ཞེས་
བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། སྙོམས་པར་ཞུགས་མ་ཐག་ཏུ་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས། དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་དམ་ཚིག་ཅེས་བྱ་བ། དེ་བཞིན་གཤེགས་པ་ཐམས་ཅད་ཀྱི་སྙིང་པོ་འདི་བྱུང་ངོ་། ཧཱུྃ། དེ་ནས་དེ་བྱུང་མ་ཐག་
ཏུ་ཕྱག་ན་རྡོ་རྗེའི་ཐུགས་ཀའི་རྡོ་རྗེ་ལས། བཅོམ་ལྡན་འདས་རྡོ་རྗེ་འཛིན་པ་དེ་ཉིད་དེ། ཀུན་དུ་འབར་བའི་སྙིང་པོ་ཁྲོ་གཉེར་ཅན་སྨིན་མ་བཅུམ་ཞིང་དཔྲལ་བར་གཉེར་བ། མཆེ་བ་ལྷག་གེར་བྱུང་ཞིང་སོ་གཙིགས་པ། རྡོ་རྗེ་དང་། ལྕགས་ཀྱུ་དང་། རལ་གྲི་དང་། ཞགས་པ་ལ་སོགས་པ་རྡོ་རྗེ་
མེ་ལྕེ་འབར་བའི་མཚོན་ཆ་ལག་ན་ཐོགས་པ། རྣམ་པ་དུ་མའི་ཁ་དོག་དང་རྒྱན་རྣམས་ཀྱི་ཆ་ལུགས་ཅན་ཕྱག་ན་རྡོ་རྗེའི་སྐུ་བྱུང་ནས། འཇིག་རྟེན་གྱི་ཁམས་ཐམས་ཅད་དུ་ཤིན་དུ་མ་རུངས་པ་ཐམས་ཅད་གདུལ་བར་བྱས་ནས། བཅོམ་ལྡན་འདས་རྣམ་པར་སྣང་མཛད་ཀྱི་ཕྱོགས་ཀུན་དུ་རྡོ་
རྗེ་དབྱིངས་ཀྱི་དཀྱིལ་འཁོར་ཆེན་པོའི་ཚུལ་དུ་ཟླ་བའི་དཀྱིལ་འཁོར་ལ་འདུག་སྟེ་ཆེད་དུ་བརྗོད་པ་འདི་ཆེད་དུ་བརྗོད་དོ། །ཨེ་མའོ་ཐབས་ཀྱིས་འདུལ་བ་ཡི། །ཐབས་ཆེན་ལྡན་པ་བདག་ཡིན་ཏེ། །གང་ཕྱིར་སེམས་ཅན་འདུལ་ཐབས་ཕྱིར། །དྲི་མ་མེད་པའི་ཁྲོ་བོར་གྱུར། དེ་ནས་དེ་བཞིན་
གཤེགས་པ་རྣམ་པར་སྣང་མཛད་དེ་བཞིན་གཤེགས་པ་ཐམས་ཅད་ཀྱི་སྤྲོས་པ་མེད་པའི་ཆོས་ཉིད་ལ་དམིགས་ནས། དེ་བཞིན་གཤེགས་པ་ཐམས་ཅད་ཀྱི་ཁྲོ་བོ་ཆེན་པོ་རྡོ་རྗེའི་དམ་ཚིག་རྡོ་རྗེ་བྱིན་གྱིས་བརླབས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་བཞིན་གཤེགས་པ་
ཐམས་ཅད་ཀྱི་རྡོ་རྗེ་ཧཱུྃ་ཞེས་བྱ་བ་དེ་བཞིན་གཤེགས་པ་ཐམས་ཅད་ཀྱི་སྙིང་པོ་རིག་པའི་མཆོག་འདི་སྨྲས་པ། ཨོཾ་སུམྦྷ་ནི་སུམྦྷ་ཧཱུྃ། གྲྀ་ཧྞ་གྲྀཧྞ་ཧཱུྃ། གྲྀཧྞཱ་པ་ཡ་གྲྀཧྞཱ་པ་ཡ་ཧཱུྃ། ཨཱ་ན་ཡ་ཧོཿབྷ་ག་བཱཾ་བཛྲ་ཧཱུྃ་ཕཊ། དེ་ནས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ལས་བྱུང་མ་ཐག་པ་བཅོམ་

ལྡན་འདས་ཕྱག་ན་རྡོ་རྗེར་གྱུར་ཏེ་བྱུང་ནས་འཇིག་རྟེན་གྱི་ཁམས་རབ་འབྱམ་རྒྱ་མཚོའི་སྤྲིན་ཐམས་ཅད་ན། དེ་བཞིན་གཤེགས་པ་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དང་བཅས་པ་ཐམས་ཅད་ཀྱི་བྱིན་གྱིས་བརླབས་ཏེ། སྤྱན་དྲངས་ནས་རྡོ་རྗེའི་དམ་ཚིག་གི་
དཀྱིལ་འཁོར་ཆེན་པོར་བཅུག་སྟེ། དམ་ཚིག་གིས་བཅིངས་ནས་ཡང་གཅིག་ཏུ་འདུས་ཏེ་རྡོ་རྗེ་ཁྲོ་བོའི་ལུས་སུ་གྱུར་ནས། བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་ཀར་འདུག་སྟེ། ཆེད་དུ་བརྗོད་པ་འདི་ཆེད་དུ་བརྗོད་དོ། །ཨེ་མའོ་བྱང་ཆུབ་སེམས་འདི་ནི། །ཀུན་དུ་བཟང་ཞིང་སྡིག་
མེད་དེ། །གང་ཕྱིར་སེམས་ཅན་འདུལ་དོན་དུ། །ཁྲོ་བོ་ཡང་ནི་ཡིད་འོང་འགྱུར། །དེ་ནས་རྡོ་རྗེ་ཁྲོ་བོའི་སྐུ་དེ་བཅོམ་ལྡན་འདས་ཀྱི་ཐུགས་ཀ་ནས་བབས་ནས། དེ་བཞིན་གཤེགས་པ་ཐམས་ཅད་ཀྱི་སྤྱན་སྔར་ཟླ་བའི་དཀྱིལ་འཁོར་ལ་གནས་ཏེ་ཡང་བཀའ་ནོད་ཅིང་བཞུགས་སོ། །དེ་ནས་
བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་དམ་ཚིག་གིས་འགུགས་པའི་རྡོ་རྗེ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ། དེ་བཞིན་གཤེགས་པ་ཐམས་ཅད་ཀྱི་དམ་ཚིག་གི་ལྕགས་ཀྱུ་ཞེས་བྱ་བ་དེ་བཞིན་གཤེགས་པ་ཐམས་ཅད་ཀྱི་སྙིང་པོ་འདི་ཉིད་ཀྱི་ཐུགས་ཀ་ནས་བྱུང་
ངོ་། །ཧཱུྃ་ཌཀྐིཛཿ། དེ་ནས་དེ་བྱུང་མ་ཐག་ཏུ་འཇིག་རྟེན་གྱི་ཁམས་རབ་འབྱམ་སྤྲིན་རྒྱ་མཚོའི་སྤྲིན་ཐམས་ཅད་ན། འཇིག་རྟེན་གསུམ་གྱི་དབང་པོ་དབང་ཕྱུག་ཆེན་པོ་ལ་སོགས་པ་ཇི་སྙེད་པ་དེ་དག་ཐམས་ཅད་འཇིག་རྟེན་ཐམས་ཅད་ན་གནས་པའི་ཚོགས་ཀྱིས་བསྐོར་བ་མ་ལུས་ཤིང་ལུས་
པ་མེད་པ་རྣམས། དེ་བཞིན་གཤེགས་པ་ཐམས་ཅད་ཀྱི་དམ་ཚིག་གི་རྡོ་རྗེའི་ལྕགས་ཀྱུས་བཀུག་ནས། རི་རབ་རིའི་རྩེ་མོ་རྡོ་རྗེ་དང་། ནོར་བུ་དང་། རིན་པོ་ཆེ་ལས་བྱས་པའི་ཁང་བུ་བརྩེགས་པ་གང་ན་བ་དེར་ལྷགས་ནས། བཅོམ་ལྡན་འདས་ཀྱི་ཁང་བུ་བརྩེགས་པ་རྩེ་མོ་རྡོ་རྗེ་དང་།
ནོར་བུ་དང་། རིན་པོ་ཆེ་ལས་བྱས་པ་ཐམས་ཅད་དུ་བསྐོར་ནས་འཁོད་པར་གྱུར་ཏོ། །དེ་ནས་ཕྱག་ན་རྡོ་རྗེ་རང་གི་ཐུགས་ཀ་ནས་རྡོ་རྗེ་དེ་བླངས་ཏེ། གསོར་ཞིང་ཁམས་གསུམ་པ་ཇི་སྙེད་པ་ཐམས་ཅད་ཀྱི་འཇིག་རྟེན་གསུམ་གྱི་འཁོར་ལོ་ལ་བལྟས་ཏེ་འདི་སྐད་ཅེས་བཀའ་སྩལ་ཏོ། །གྲོགས་

པོ་རྣམས་དེ་བཞིན་གཤེགས་པ་ཐམས་ཅད་ཀྱི་བསྟན་པ་ལ་ཞུགས་ལ་ངའི་བཀའ་ལ་ཡང་ཉོན་ཅིག །དེ་ནས་དེ་དག་གིས་འདི་སྐད་ཅེས་གསོལ་ཏོ། །བདག་ཅག་གིས་ཇི་ལྟར་བསྒྲུབ་པར་བགྱི། བཅོམ་ལྡན་འདས་ཕྱག་ན་རྡོ་རྗེས་གསུངས་པ། །སངས་རྒྱས་ཆོས་དང་དགེ་འདུན་ལ། །
སྐྱབས་སུ་འགྲོ་བར་བསྒྲུབ་པར་བྱོས། །ཀུན་མཁྱེན་ཡེ་ཤེས་ཐོབ་བྱའི་ཕྱིར། །གྲོགས་པོ་རྣམས་ཀྱིས་བསྒྲུབ་པར་གྱིས། དེ་ནས་འཇིག་རྟེན་གྱི་ཁམས་འདི་ན་འཇིག་རྟེན་གསུམ་པོ་མཐའ་དག་གི་བདག་པོ་ལྷ་ཆེན་པོ་འཇིག་རྟེན་གསུམ་པོ་ཐམས་ཅད་ཀྱི་བདག་པོར་གྱུར་པ་དྲེགས་ཏེ་
ཆེར་ཁྲོས་པར་སྟོན་ཅིང་འདི་སྐད་ཅེས་སྨྲས་སོ། །ཀྱེ་གནོད་སྦྱིན་ང་ནི་འཇིག་རྟེན་གསུམ་པོ་མཐའ་དག་གི་གཙོ་བོ་དབང་ཕྱུག་ཆེན་པོ་བྱེད་པ་པོ་འཇིག་པ་པོ་འབྱུང་པོ་ཐམས་ཅད་ཀྱི་དབང་པོ་ལྷའི་ཡང་ལྷ་ཆེན་པོ་ཡིན་ན། གནོད་སྦྱིན་ཁྱོད་ཀྱི་ངག་ང་ཅི་ཕྱིར་ཉན། དེ་ནས་ཡང་ཕྱག་ན་རྡོ་རྗེས་རྡོ་རྗེ་
གསོར་ཞིང་བཀའ་སྩལ་པ། ཀྱེ་སེམས་ཅན་མ་རུངས་པ་དཀྱིལ་འཁོར་དུ་མྱུར་དུ་ཞུགས་ལ་དའི་དམ་ཚིག་ལ་ཡང་དག་པར་གནས་པར་གྱིས་ཤིག །དེ་ནས་ལྷའི་ཡང་ལྷ་ཆེན་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟ་བུའི་སེམས་ཅན་དབང་ཕྱུག་
ལ་འདི་སྐད་ཅེས་བཀའ་སྩལ་པ་འདི་སུ་ཞིག །དེ་ནས་བཅོམ་ལྡན་འདས་ཀྱིས་དབང་ཕྱུག་ཆེན་པོ་ལ་སོགས་པ་འཇིག་རྟེན་གསུམ་གྱི་ཚོགས་ཐམས་ཅད་ལ་བོས་ནས་འདི་སྐད་ཅེས་གསུངས་སོ། །གྲོགས་པོ་རྣམས་དཀོན་མཆོག་གསུམ་ལ་སྐྱབས་སུ་འགྲོ་བ་དང་། དམ་ཚིག་དང་སྡོམ་
པ་ལ་བསྒྲུབ་པར་གྱིས་ཤིག །ཕྱག་ན་རྡོ་རྗེ་འདི་སྐད་གནོད་སྦྱིན་ཁྲོ་བོ་མ་རུངས་པའི་བྱང་ཆུབ་སེམས་དཔའ་ཆེན་པོ་སྟེ། རྡོ་རྗེ་འབར་བས་ཁམས་གསུམ་པོ་འདི་དག་ཐམས་ཅད་བརླག་པར་བྱས་ཏ་རེ། དེ་ནས་དབང་ཕྱུག་ཆེན་པོ་འཇིག་རྟེན་གསུམ་པོ་མཐའ་དག་གི་དབང་པོར་གྱུར་པ་དང་།
རང་གི་ཤེས་པའི་དབང་གིས་འཁོར་མང་པོ་དང་བཅས་པས། བཅོམ་ལྡན་འདས་ཕྱག་ན་རྡོ་རྗེ་འཇིགས་པར་བསྟན་པའི་ཕྱིར། ཁྲོ་བོ་གཏུམ་པ་ཆེན་པོར་རབ་ཏུ་འཇིགས་པའི་གཟུགས་འབར་བ་ཆེན་པོ་གཏོང་ཞིང་། མ་རུངས་པ་ཆེན་པོས་རྟ་སྐད་དུ་དགོད་པ་རྣམས་བསྟན་ནས་འདི་

སྐད་ཅེས་སྨྲས་སོ། །ཀྱེ་ང་ནི་འཇིག་རྟེན་གསུམ་པོ་མཐའ་དག་གི་བདག་པོ་ཡིན་ན། ཁྱོད་ཀྱིས་ང་ལ་ཅིའི་ཕྱིར་བཀའ་སྩལ་པ། དེ་ནས་ཕྱག་ན་རྡོ་རྗེས་རྡོ་རྗེ་དེ་བསྙེམས་པ་དང་བཅས་པར་རྡོ་རྗེ་གསོར་ཞིང་འཛུམ་སྟེ་འདི་སྐད་ཅེས་སྨྲས་སོ། །ཀྱེ་ལུས་སྲུལ་པོའི་
མིའི་ཤ་ཟ་བ་ཟས་སུ་རོ་བསྲེགས་པའི་ཐལ་བ་ཟ་ཞིང་ཁ་ཟས་དང་མལ་དང་། གོས་ཀྱང་དེ་ལས་བྱེད་པ་ངའི་བཀའ་བཞིན་བྱོས་ཤིག །དེ་ནས་ལྷ་ཆེན་པོ་དབང་ཕྱུག་ཆེན་པོས་འཇིག་རྟེན་གསུམ་པོ་མཐའ་དག་དང་ནམ་མཁའི་ཁམས་རྣམས་ཁྲོ་བ་ཁྲོ་བ་ཆེན་པོས་ནོན་པར་བྱིན་གྱིས་བརླབས་ཏེ་འདི་
སྐད་ཅེས་སྨྲས་སོ། །ཁྱོད་ཀྱང་དེའི་བཀའ་ཉོན་ལ་དམ་ཚིག་ཀྱང་ལོང་ཤིག །དེ་ནས་ཕྱག་ན་རྡོ་རྗེ་ཁྲོ་བོ་ཆེན་པོའི་རྒྱལ་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལྷ་ཆེན་པོ་ཞེས་བགྱི་བའི་ལྷ་འདི་ནི། རང་གི་འཚལ་བའི་སྟོབས་ཀྱིས་དྲེགས་པ་དང་
དབང་ཕྱུག་ཆེན་པོའི་དབང་གིས། དེ་བཞིན་གཤེགས་པ་ཐམས་ཅད་ཀྱི་བསྟན་པ་ལ་འདུད་དུ་མི་བཏུབ་ན་འདི་ལ་ཇི་ལྟར་བགྱི་བའི་རིགས། དེ་ནས་བཅོམ་ལྡན་འདས་ཀྱིས་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ནས་བྱུང་བའི་རྡོ་རྗེ་ཆེན་པོའི་དམ་ཚིག་དྲན་པར་བྱས་སོ། །ཨོཾ་ནི་
སུམྦྷ་བཛྲ་ཧཱུྃ་ཕཊ། དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་རྡོ་རྗེའི་སྙིང་པོ་འདི་བརྗོད་དོ། །ཧཱུྃ། དེ་ནས་དེ་བརྗོད་མ་ཐག་ཏུ་ཁམས་གསུམ་པ་ཐམས་ཅད་ནས་འདུས་པའི་ལྷ་ཆེན་པོ་ལ་སོགས་པ་འཇིག་རྟེན་གསུམ་པོའི་དབང་པོ་ཐམས་ཅད་ཁ་བུབ་ཏུ་འགྱེལ་ཏེ། ཉམ་ཐག་
པའི་ཚིག་འབྱིན་ཅིང་། བཅོམ་ལྡན་འདས་ཕྱག་ན་རྡོ་རྗེ་ལ་སྐྱབས་སུ་དོང་ངོ་། །ལྷ་ཆེན་པོ་ཞེས་བྱ་བའི་ལྷ་དེ་ནི་ས་ལ་འགྱེལ་ཏེ་དྲན་པ་མེད་པར་གྱུར་ནས་ཤིའོ། །དེ་ནས་བཅོམ་ལྡན་འདས་ཀྱིས་མཁྱེན་བཞིན་དུ་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །
ཕྱག་ན་རྡོ་རྗེ་འཇིག་རྟེན་གསུམ་པོའི་འཁོར་ལོ་འདི་ཐམས་ཅད་ལ་སྐྱབས་སྦྱིན་པ་བྱོས་ཏེ་མ་བསད་ཅིག །དེ་ནས་ཕྱག་ན་རྡོ་རྗེ་ཁྲོ་བོ་ཆེན་པོའི་རྒྱལ་པོས་བཅོམ་ལྡན་འདས་ཀྱིས་བཀའ་སྩལ་པ་ཐོས་ནས། ལྷ་ཐམས་ཅད་བོས་ནས་འདི་སྐད་ཅེས་གསུངས་སོ། །གལ་ཏེ་ཁྱོད་རང་གི་

སྲོག་འདོད་ན། སངས་རྒྱས་དང་ཆོས་དང་དགེ་འདུན་ལ་སྐྱབས་སུ་དེང་ལ་ངའི་བཀའ་ཡང་ཉོན་ཅིག །དེ་ནས་དེ་དག་གིས་འདི་སྐད་ཅེས་གསོལ་ཏོ། །སངས་རྒྱས་དང་ཆོས་དང་དགེ་འདུན་ཕྱག་རྒྱའི་ཚོགས་དང་བཅས་པ་ལ་སྐྱབས་སུ་མཆིའོ། །ཁྱོད་ཀྱིས་བསྟན་པའི་བཀའ་ནི་བདག་
ཅག་གིས་མ་འཚལ་ལོ། །དེ་ནས་བཅོམ་ལྡན་འདས་རྣམ་པར་སྣང་མཛད་དེ་བཞིན་གཤེགས་པས་དེ་དག་ལ་བོས་ནས་འདི་སྐད་བཀའ་སྩལ་ཏོ། །ཀྱེ་ལྷ་རྣམས་འདི་ནི་ངེད་དང་དེ་བཞིན་གཤེགས་པ་ཐམས་ཅད་ཀྱི་བདག་པོའོ། །དེ་བཞིན་གཤེགས་པ་ཐམས་ཅད་ཀྱི་ཡབ། དེ་བཞིན་གཤེགས་
པ་ཐམས་ཅད་ཀྱི་བཀའ་བཞིན་བྱེད་པ། དེ་བཞིན་གཤེགས་པ་ཐམས་ཅད་ཀྱི་སྲས་ཀྱི་ཐུ་བོ། བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་སྟེ། སེམས་ཅན་ཐམས་ཅད་གདུལ་བའི་དོན་བྱས་པའི་ཕྱིར། ཁྲོ་བོའི་རྒྱལ་པོ་ཆེན་པོར་དབང་བསྐུར་ཏོ། །
དེ་ཅིའི་ཕྱིར་ཞེ་ན། ཁྱེད་ཀྱི་ནང་ན་ཡང་ལྷ་ཆེན་པོ་ལ་སོགས་པ་མ་རུངས་པའི་སེམས་ཅན་ཡོད་དེ། དེ་རྣམས་དེ་བཞིན་གཤེགས་པ་ཐམས་ཅད་ཀྱིས་ཀྱང་ཞི་བར་མཛད་པས། སྡིག་པ་ལས་བཟློག་པར་མི་སྤྱོད་པའི་སྡིག་པའི་སེམས་ཅན་དེ་དག་རྣམས་ཚར་གཅད་པའི་ཕྱིར་བྱིན་གྱིས་བརླབས་སོ། །
དེ་བས་ན་ཁྱེད་རྣམས་འདིའི་དམ་ཚིག་ལ་གནས་པར་བྱོས་ཤིག་པར་བཀའ་སྩལ་ཏོ། །དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གི་སྲོག་ཡལ་བ་ལས་བསྐྱབ་ཏུ་གསོལ། བདག་ཅག་ཀྱང་བཀའ་སྩལ་པ་བགྱིད་ཅིང་མཆིས། བཅོམ་ལྡན་འདས་ཀྱིས་བཀའ་སྩལ་པ།
ཀྱེ་གྲོགས་པོ་རྣམས་འདི་ཉིད་ལ་སྐྱབས་སུ་དོང་དང་འདི་ཉིད་ཀྱིས་ཀུན་དུ་སྐྱོབ་སྟེ་གཞན་གྱིས་ནི་མ་ཡིན་ནོ། །དེ་ནས་ཁམས་གསུམ་ཀུན་ནས་འདུས་པ་སྲིད་པ་གསུམ་གྱི་བདག་པོ་དེ་རྣམས་བཅོམ་ལྡན་འདས་རྡོ་རྗེ་འཛིན་པ་ག་ལ་བ་དེ་ལོགས་སུ་བལྟས་ནས། ཉམ་ཐག་པ་ཆེན་པོའི་སྒྲ་མགྲིན་གཅིག་
ཏུ་ཕྱུང་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་འཆི་བའི་སྡུག་བསྔལ་འདི་ལས་ཀུན་དུ་བསྐྱབ་པར་གསོལ། བདེ་བར་གཤེགས་པ་ཀུན་དུ་བསྐྱབ་པར་གསོལ། དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་ལྷ་ལ་སོགས་པ་དེ་རྣམས་ལ་བོས་ཏེ་འདི་སྐད་ཅེས་བཀའ་སྩལ་ཏོ། །

ཀྱེ་མ་རུངས་པ་རྣམས་ངའི་བསྟན་པ་ལ་ཞུགས་ཤིག །རྡོ་རྗེ་འབར་བ་འདིས་གཅིག་ཏུ་འབར་བར་བྱས་ནས་ཐམས་ཅད་ཀྱང་ཐལ་བར་བྱས་ཏ་རེ། འདི་སྐད་ཅེས་གསོལ་ཏོ། །ཁྱོད་ནི་བཅོམ་ལྡན་འདས་ཀུན་དུ་བཟང་པོ་དེ་བཞིན་གཤེགས་པ་ཐམས་ཅད་ཀྱི་ཐུགས་བསྐྱེད་པ་
ཞི་བ་དུལ་པ་སེམས་ཅན་ཐམས་ཅད་ལ་ཕན་པར་བཞེད་པ། སེམས་ཅན་ཐམས་ཅད་ལ་མི་འཇིགས་པ་སྩོལ་བ་ལགས་ན། ཅིའི་སླད་དུ་བཅོམ་ལྡན་འདས་ཀྱིས་བདག་ཅག་བསྲེགས་པར་འགྱུར། དེ་ནས་ཕྱག་ན་རྡོ་རྗེ་ཁྲོ་བོའི་རྒྱལ་པོ་ཆེན་པོས་དེ་དག་ལ་འདི་སྐད་ཅེས་བཀའ་སྩལ་
ཏོ། །ཀྱེ་གྲོགས་པོ་དག་གང་གིས་དེ་བཞིན་གཤེགས་པ་ཐམས་ཅད་ཀྱི་བཀའ་བཞིན་བྱེད་པ་དེའི་ཕྱིར་ང་ནི་ཀུན་དུ་བཟང་པོ་སྟེ། ཁྱེད་ལྟ་བུའི་སེམས་ཅན་མ་རུངས་པའི་ངང་ཚུལ་ཅན་སྡིག་པའི་སེམས་རྣམ་པར་སྦྱང་བའི་ཕྱིར། གལ་ཏེ་ངའི་དམ་ཚིག་ལ་མི་གནས་ན་ཆུད་གསན་པར་བྱའོ།
གསོལ་པ། དེ་བཞིན་དུ་བགྱིའོ། །དེ་ནས་ཕྱག་ན་རྡོ་རྗེ་ཁྲོ་བོའི་རྒྱལ་པོ་ཆེན་པོས་དབང་ཕྱུག་ཆེན་པོ་མ་གཏོགས་པའི་ལྷ་དེ་དག་གཞན་དབུགས་དབྱུང་ཞིང་བསླང་བའི་ཕྱིར། དེ་བཞིན་གཤེགས་པ་ཐམས་ཅད་ཀྱི་སྙིང་པོ་རྡོ་རྗེའི་བསླང་བ་ཞེས་བྱ་བ་འདི་སྨྲས་སོ། །ཨོཾ་བཛྲོ་ཏྟི་ཥྛ། དེ་ནས་དེ་
སྐད་སྨྲས་མ་ཐག་ཏུ་དབང་ཕྱུག་ཆེན་པོ་མ་གཏོགས་པར་ཁམས་གསུམ་པ་འདུས་པ་སྲིད་པ་གསུམ་གྱི་བདག་པོ་འཁོར་དང་བཅས་པ་དེ་དག་ཐམས་ཅད་ཀུན་བརྒྱལ་བ་ལས་སེམས་དབུགས་ཕྱུང་སྟེ། ལྷའི་བདེ་བ་མྱོང་ཞིང་འཇིགས་ཤིང་བག་ཚ་བ་དང་སྤུ་ལངས་པ་མེད་པར་གྱུར་ནས་བཅོམ་
ལྡན་འདས་ཕྱག་ན་རྡོ་རྗེ་ལ་ལྟ་ཞིང་ལངས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཕྱག་ན་རྡོ་རྗེ་ལ་བཀའ་སྩལ་པ། སེམས་དཔའ་ཆེན་པོ་ལྷའི་བདག་པོ་ལྷ་ཆེན་པོ་འདི་མ་བསླང་ན་འདི་སྲོག་དེ་ཆུད་གསན་པར་བྱས་ཏེ་ཅི་རུང་། གསོས་ན་འདི་ཡང་སྐྱེས་བུ་དམ་པར་འགྱུར་
རོ། །དེ་ནས་ཕྱག་ན་རྡོ་རྗེས་དེ་བཞིན་དུ་བྱའོ་སྙམ་ནས་ཤི་བ་གསོ་བའི་སྙིང་པོ་འདི་སྨྲས་སོ། །བཛྲ་ཨཱ་ཡུཿ། དེ་ནས་དེ་སྨྲས་མ་ཐག་ཏུ་ལྷ་ཆེན་པོ་ལྷའི་བདག་པོ་ཤི་བ་ལས་གསོས་ཏེ་ལྡང་འདོད་ན་ཡང་ལྡང་མ་ནུས་སོ། །དེ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ

ལྡན་འདས་ཅི་བདག་ཅག་འདི་ལྟ་བུས་འདུལ་ལམ། བཅོམ་ལྡན་འདས་ཀྱིས་བཀའ་སྩལ་པ། ཁྱོད་སྐྱེས་བུ་ཆེན་པོ་འདི་བཀའ་ཉན་པར་མི་འཇུག་ན། ཁྱོད་ལ་འདུལ་བ་འདི་ཉིད་ཡིན་གྱི་ངམ་ཡིན་ནོ། །དབང་ཕྱུག་ཆེན་པོས་གསོལ་པ། ཅི་བཅོམ་ལྡན་འདས་ཁྱོད་ཀྱིས་མ་རུངས་
པའི་སེམས་ཅན་དེ་ལས་སྐྱབས་མཛད་པར་མི་སྤྱོད་དམ། བཅོམ་ལྡན་འདས་ཀྱིས་བཀའ་སྩལ་པ། ངས་འདི་ལས་སྐྱབས་མི་ནུས་སོ། །གསོལ་པ། ཅིའི་སླད་དུ། བཀའ་སྩལ་པ། དེ་བཞིན་གཤེགས་པ་ཐམས་ཅད་ཀྱི་བདག་པོ་ཡིན་པའི་ཕྱིར་རོ། །གསོལ་པ། བཅོམ་ལྡན་འདས་
ཀྱིས་བཀའ་སྩལ་པའི་དོན་བདག་གིས་མ་འཚལ་ཏོ། །ཅིའི་སླད་དུ་ཞེ་ན། ཁམས་གསུམ་གྱི་བདག་པོ། དེ་བཞིན་གཤེགས་པ་རྣམས་ལས་གཞན་པའི་བདག་པོ་མཆིས་པར་མ་འཚལ་ན། འདི་སུ་ལགས། དེ་ནས་བཅོམ་ལྡན་འདས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་
ཡང་ལྷ་ཆེན་པོ་ལ་བོས་ཏེ་འདི་སྐད་ཅེས་གསུངས་སོ། །ཀྱེ་མ་རུངས་པའི་སེམས་ཅན་ངའི་བཀའ་མི་ཉན་ཏམ། དེ་ནས་ལྷ་ཆེན་པོས་རྡོ་རྗེ་སེམས་དཔའི་ཚིག་ཐོས་ནས་འཁྲུགས་ཤིང་ཁྲོས་པར་གྱུར་ཏེ། དེ་ལྟར་བསྒྱེལ་བཞིན་དུ་ཡང་འཇིགས་པ་ཆེན་པོའི་གཟུགས་བསྟན་ཏེ། འདི་སྐད་
ཅེས་སྨྲས་སོ། །ང་ཤི་བར་བཟོད་ཀྱི། ཁྱོད་ཀྱི་ངག་ང་མི་ཉན་ནོ། །དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེ་རབ་ཏུ་ཁྲོས་པར་སྟོན་ཅིང་རང་གི་རྐང་པའི་མཐིལ་ནས་རྗེས་སུ་སྤྱོད་པ་འདི་བྱུང་ངོ་། །ཨོཾ་པ་ཏ་ཀརི་ཥ་ཎ་བཛྲ་ཧཱུྃ། དེ་ནས་བཅོམ་ལྡན་འདས་ཀྱི་ཞབས་མཐིལ་ནས་ཀུན་དུ་འབར་བའི་རྡོ་
རྗེའི་སྙིང་པོ་ཁྲོ་གཉེར་བྱས་ནས། མཆེ་བ་ལྷག་གེར་བྱུང་བ་གདོང་ཆེན་པོ་རྡོ་རྗེའི་རྗེས་སུ་སྤྱོད་པ་བྱུང་ནས་བཅོམ་ལྡན་འདས་ཕྱག་ན་རྡོ་རྗེའི་སྤྱན་སྔ་ན་བཀའ་ནོད་ཅིང་འདུག་པར་གྱུར་ཏོ། །དེ་ནས་ཕྱག་ན་རྡོ་རྗེས་དབང་ཕྱུག་ཆེན་པོ་སྦྱང་བའི་ཕྱིར་འདི་སྐད་ཅེས་གསུངས་སོ། །ཨོཾ་པ་ཏ་ཀ་རི་ཥ་ཎ་བཛྲ་ཧཱུྃ།
ཨོཾ་པ་ཏ་ཀ་རི་ཤ། སརྦ་བཛྲ་དྷར་ཨ་ནུ་ཙ་ར་ཀ་ཏ་བཛྲ་ཧཱུྃ་ཛཿ། དེ་ནས་དེ་སྐད་སྨྲས་པ་དང་། ལྷ་ཆེན་པོ་དང་ལྷ་མོ་ཨུ་མར་བཅས་ཏེ་རྐང་བ་གྱེན་ཀར་བསྟན་ནས་གཅེར་བུར་ཕྱུང་སྟེ་སྐྱེ་བོ་ཐམས་ཅད་ཀྱིས་གད་མོས་བཏབ་ཅིང་རྐང་པས་འགུགས་པའི་རྗེས་སུ་སྤྱོད་པས་དེ་བཀུག་སྟེ། བཅོམ་ལྡན་འདས་

ཕྱག་ན་རྡོ་རྗེའི་སྤྱན་སྔར་ཞབས་ཀྱི་དྲུང་དུ་བཞག་གོ། །དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སེམས་ཅན་མ་རུངས་པ་རྗེས་འབྲང་དང་བཅས་པ་འདི་ཇི་ལྟར་བགྱི། བཅོམ་ལྡན་འདས་
ཀྱིས་བཀའ་སྩལ་པ། ཨོཾ་བཛྲ་ཀྲ་མ་ཧོ། དེ་ནས་དེ་སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་ལྷ་ཆེན་པོ་ཞབས་གཡོན་པས་མནན་ཞབས་གཡས་པས་ལྷ་མོ་ཨུ་མའི་སྟེང་དུ་མནན་ནས། རང་གི་སྙིང་པོ་འདི་སྨྲས་པ། ཨོཾ་བཛྲ་ཨཱ་བེ་ཤ་ཧ་ན་པ་ཏཾ་
ཏྲཊ། དེ་ནས་དེ་སྨྲས་མ་ཐག་ཏུ་ལྷ་ཆེན་བབས་ནས་རང་གི་ལག་སྟོང་གིས་རང་གི་གདོང་སྟོང་ལ་འཚོག་གོ། །དེ་ནས་རྡོ་རྗེའི་ནོར་བུ་རིན་པོ་ཆེའི་རྩེ་མོའི་རྡོ་རྗེ་དང་། ནོར་བུ་དང་། རིན་པོ་ཆེ་ལས་བྱས་པའི་ཁང་བུ་བརྩེགས་པའི་ཕྱི་རོལ་ན་སྲིད་པ་གསུམ་པ་ཐམས་ཅད་ཀྱིས་ངེད་ཀྱི་དབང་པོ་འདི་བདག་
ཉིད་ཆེན་པོ་དེས་བཏུལ་ལོ་ཞེས་སྒྲ་ཆེན་པོ་བྱུང་ངོ་། །དེ་ནས་བཅོམ་ལྡན་འདས་ཀྱིས་ལྷ་ཆེན་པོ་ལ་ཐུགས་རྗེ་ཆེན་པོ་བསྐྱེད་པའི་སངས་རྒྱས་ཐམས་ཅད་ཀྱི་བྱམས་པའི་སྙིང་པོ་འདི་གསུངས་སོ། །ཨོཾ་བུདྡྷ་མཻ་ཏྲི་བཛྲ་རཀྵ་ཧཾ། དེ་ནས་དེ་སྐད་ཅེས་སྨྲས་མ་ཐག་ཏུ། ལྷ་ཆེན་པོ་ལ་བབས་པའི་སྡུག་
བསྔལ་དེ་ཀུན་ཞི་བར་གྱུར་ཏོ། །དེ་ནས་ཡང་ཕྱག་ན་རྡོ་རྗེའི་ཞབས་ཀྱི་མཐིལ་གྱིས་རེག་པས། བླ་ན་མེད་པའི་གྲུབ་པའི་དབང་དང་། ཏིང་ངེ་འཛིན་དང་། རྣམ་པར་ཐར་པ་དང་། གཟུངས་དང་ཡེ་ཤེས་དང་མངོན་པར་ཤེས་པ་རྣམས་ཐོབ་པ་ནས། དེ་ནས་དེ་བཞིན་གཤེགས་པ་ཉིད་དུ་འགྲུབ་པའི་བར་
དུ་གྱུར་ཏོ། །དེ་ནས་ལྷ་ཆེན་པོ་བཅོམ་ལྡན་འདས་ཕྱག་ན་རྡོ་རྗེའི་ཞབས་མཐིལ་གྱིས་རེག་པས་དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་དང་། གཟུངས་དང་རྣམ་པར་ཐར་པའི་བདེ་བ་མྱོང་སྟེ་ལྷ་ཆེན་པོའི་ལུས་ཕྱག་ན་རྡོ་རྗེའི་ཞབས་ལ་ཕུལ་ནས། འོག་གི་འཇིག་རྟེན་གྱི་ཁམས་གང་
གཱའི་ཀླུང་སུམ་ཅུ་རྩ་གཉིས་ཀྱི་བྱེ་མ་སྙེད་ཀྱི་འཇིག་རྟེན་ཁམས་ཀྱི་རྡུལ་ཕྲ་རབ་སྙེད་ཀྱི་འཇིག་རྟེན་གྱི་ཁམས་འདས་པ་ན། ཐལ་བས་ཁེབས་པ་ཞེས་བྱ་བའི་འཇིག་རྟེན་གྱི་ཁམས་དེར་ཐལ་བའི་དབང་པོའི་དབྱངས་ཞེས་བྱ་བའི་དེ་བཞིན་གཤེགས་པར་སྐྱེས་སོ། །དེ་ནས་ལྷ་ཆེན་པོའི་ལུས་དེ་ལས་

ཆེད་དུ་བརྗོད་པ་འདི་བྱུང་ངོ་། །ཨེ་མའོ་སངས་རྒྱས་ཐམས་ཅད་ཀྱི། །སངས་རྒྱས་ཡེ་ཤེས་བླ་ན་མེད། །ཡི་གེའི་ཚོགས་ཀྱིས་མནན་ནས་སུ། །མྱ་ངན་ལས་ནི་འདས་པར་གཞག །དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས། དེ་ལས་གཞན་པ་མཐུ་བོ་ཆེ་ལ་སོགས་
པ་འཇིག་རྟེན་གསུམ་གྱི་བདག་པོ་ཐམས་ཅད་ལ་འདི་སྐད་ཅེས་བཀའ་སྩལ་ཏོ། །གྲོགས་པོ་རྣམས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་དམ་ཚིག་གི་དཀྱིལ་འཁོར་ཆེན་པོ་འདིར་ཞུགས་ཤིག །ཞུགས་ནས་ཀྱང་དེ་བཞིན་གཤེགས་པ་ཐམས་ཅད་ཀྱི་དམ་ཚིག་སྲུངས་ཤིག །དེ་དག་
གིས་འདི་སྐད་ཅེས་གསོལ་ཏོ། །བཀའ་ཇི་སྐད་སྩལ་བ་བཞིན་དུ་བགྱིའོ། །དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་སྲིད་པ་གསུམ་འདུས་པ་དེ་རྣམས་བོས་ཏེ་འདི་སྐད་ཅེས་གསུངས་སོ། །གྲོགས་པོ་རྣམས་ཡང་གསུམ་ལ་སྐྱབས་སུ་འགྲོ་བ་དང་བསླབ་པ་དང་དམ་ཚིག་དང་
སྡོམ་པ་ཟུང་ལ་ངའི་དམ་ཚིག་ལ་ཡང་གནས་པར་གྱིས་ཤིག །དེ་དག་གིས་གསོལ་པ། དེ་བཞིན་དུ་འཚལ་ན་བདག་ཅག་གིས་བཅོམ་ལྡན་འདས་ཀྱི་བཀའ་དང་དམ་ཚིག་གློ་བར་མ་ཆུད་དོ། །དེ་ནས་ཕྱག་ན་རྡོ་རྗེས་རང་གི་དམ་ཚིག་འདི་བྱིན་ནོ། །བྱང་ཆུབ་སེམས་ནི་རིམ་བཞིན་དུ། །བསྐྱེད་
ནས་དེ་ཡི་འོག་ཏུ་ནི། །བྱང་ཆུབ་ཆེན་པོར་ཅི་ནུས་པར། །ཤིན་ཏུ་མཉམ་བཞག་འབད་པར་བྱ། །དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེས། ལྷ་ལ་སོགས་པ་དེ་རྣམས་འཇུག་པའི་དམ་ཚིག་ཆེན་པོའི་ཕྱག་རྒྱ་བཅིང་བ་ལ་སོགས་པ་བྱས་ནས། དམ་ཚིག་ཆེན་པོའི་ཕྱག་རྒྱ་སྙིང་པོ་འདིས་
འཆིང་དུ་གཞུག་གོ། །ཨོཾ་བཛྲ་ས་མ་ཡ་གྲྀ་ཧྞ་སྟྭཾ་བནྡྷ་སམ་ཡ། བཛྲ་ས་ཏྭ་ས་མ་ཡ། མ་ནུ་སྨ་ར། སརྦ་ཏ་ཐཱ་ག་ཏ་ས་མ་ཡ་སྟྭཾ། དྲྀ་ཌྷོ་མེ་བྷ་བ། སྠི་རོ་མེ་བྷ་བ། ཨཱ་ཧཱརྱོ་མེ་བྷ་བ། ཨ་པྲ་ཏི་ཧཱ་རྱོ་མེ་བྷ་བ། སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿ། ཀུ་རུ་ཧཱུྃ་ཧ་ཧ་ཧ་ཧ་ཧོཿ། དེ་ནས་དེ་སྨྲས་མ་ཐག་ཏུ་
ཁམས་གསུམ་གྱི་སྲིད་པ་གསུམ་གྱི་སྐྱེ་བོ་འདུས་པ་ཐམས་ཅད་རྡོ་རྗེ་ཁྲོ་བོ་ཏི་རིནྟི་རིའི་ཕྱག་རྒྱ་ལག་ཏུ་བབས་ནས་དམ་དུ་བཅིངས་པར་གྱུར་ཏོ། །དེ་ནས་ཕྱག་ན་རྡོ་རྗེས་ཚུལ་བཞིན་དུ་བཙུད་ནས་དཀྱིལ་འཁོར་ཆེན་པོ་ཐམས་ཅད་གོ་རིམས་བཞིན་དུ་བསྟན་ཏེ་རྡོ་རྗེ་རིན་པོ་ཆེའི་དབང་བསྐུར་བས་དབང་

བསྐུར་ནས། རྡོ་རྗེའི་མཚན་མའང་ལག་ཏུ་བྱིན་ཏེ། རྡོ་རྗེ་མིང་གིས་དབང་བསྐུར་བས་དབང་བསྐུར་ནས་དེ་ནས་དེ་བཞིན་གཤེགས་པ་ཐམས་ཅད་ཀྱིས་སེམས་ཅན་གྱི་དོན་ལ་བཀོད་དོ། །དེ་ནས་འཇིག་རྟེན་གསུམ་པོའི་བདག་པོ་རྣམས་ཡིན་ཏེ། འདི་ལྟ་སྟེ། དབང་ཕྱུག་
ཆེན་པོ་ནི་ཁྲོ་བོའི་རྡོ་རྗེའོ། །མཐུ་བོ་ཆེ་ནི་སྒྱུ་མའི་རྡོ་རྗེའོ། །ཀརྞི་ཀ་སྒྲ་གཞོན་ནུ་ནི་རྡོ་རྗེ་དྲིལ་བུའོ། །ཚངས་པ་ནི་ཐུབ་པའི་རྡོ་རྗེའོ། །དབང་པོ་ནི་རྡོ་རྗེའི་མཚོན་ཆ་སྟེ། དེ་ལ་སོགས་པ་ནི་རིག་པའི་རྒྱལ་པོ་རྣམས་སུ་ཞེས་བྱ་བར་དབང་བསྐུར་ཏོ། །དེ་ནས་བར་སྣང་ལ་སྤྱོད་པའི་ལྷའི་དབང་པོ་
ཐམས་ཅད་ལ་རྗེས་སུ་བྱིན་པ་ནི་འདི་ལྟ་སྟེ། ཉི་མ་ནི་རྡོ་རྗེ་འཁྱིལ་བའོ། །ཟླ་བ་ནི་རྡོ་རྗེའི་འོད་དོ། །དབྱུག་པ་ཆེན་པོའི་གཙོ་བོ་ནི་རྡོ་རྗེ་དབྱིག་པའོ། །སེར་སྨུག་ནི་རྡོ་རྗེ་སེར་སྨུག་སྟེ། དེ་ལ་སོགས་པ་ནི་རྡོ་རྗེ་ཁྲོ་བོ་ཞེས་བྱ་བར་དབང་བསྐུར་ཏོ། །དེ་ནས་ནམ་མཁའ་ལ་སྤྱོད་པའི་ལྷའི་དབང་པོ་ཐམས་
ཅད་ལ་བྱིན་པ་འདི་ལྟ་སྟེ། སྦྲང་རྩིས་མྱོས་པ་ནི་རྡོ་རྗེའི་གླང་པོའི་སྣའོ། །སྦྲང་རྩི་བྱེད་པ་ནི་རྡོ་རྗེའི་ཕྲེང་བའོ། །རྒྱལ་པོ་ནི་རྡོ་རྗེའི་དབང་ངོ་། །རྒྱལ་བར་བྱེད་པ་ནི་རྣམ་པར་རྒྱལ་བའི་རྡོ་རྗེ་སྟེ། དེ་ལ་སོགས་པ་ནི་ཚོགས་ཀྱི་གཙོ་བོ་ཞེས་བྱ་བར་དབང་བསྐུར་ཏོ། །དེ་ནས་ས་བླའི་དབང་པོ་ཐམས་
ཅད་ལ་བྱིན་པ་འདི་ལྟ་སྟེ། མཛོད་སྐྱོང་ནི་རྡོ་རྗེ་ཐོ་བའོ། །མེ་ནི་རྡོ་རྗེའི་མེའོ། །རླུང་ནི་རྡོ་རྗེའི་རླུང་ངོ་། །ཀུ་བེར་ནི་རྡོ་རྗེ་འཇིགས་པའོ། །དེ་ལ་སོགས་པ་ནི་རྡོ་རྗེ་ཕོ་ཉ་ཞེས་བྱ་བར་དབང་བསྐུར་ཏོ། །དེ་ནས་སའི་འོག་གི་དབང་པོ་ལྷ་ཐམས་ཅད་ལ་བྱིན་པ་འདི་ལྟ་སྟེ། ཕག་ནི་རྡོ་རྗེ་ལྕགས་ཀྱུའོ། །གཤིན་
རྗེ་ནི་རྡོ་རྗེ་དུས་སོ། །གཙུག་ཕུད་ས་ནི་རྡོ་རྗེ་བགེགས་ཀྱི་གཙོ་བོའོ། །བ་རུ་ཎ་ནི་ཀླུ་རྡོ་རྗེ་སྟེ། དེ་དག་ལ་སོགས་པ་ནི་རྡོ་རྗེ་བྲན་ཞེས་བྱ་བར་དབང་བསྐུར་ཏོ། །དེ་ནས་འཇིག་རྟེན་གསུམ་གྱི་བདག་པོའི་ལྷ་མོ་ཐམས་ཅད་རྡོ་རྗེ་རིན་པོ་ཆེའི་དབང་བསྐུར་བས་དབང་བསྐུར་ཏེ། རང་གི་མཚན་མ་རྡོ་རྗེར་བྱིན་
གྱིས་བརླབས་ནས། རྡོ་རྗེ་མིང་གི་དབང་བསྐུར་བས་དབང་བསྐུར་ཅིང་། དེ་བཞིན་གཤེགས་པ་ཐམས་ཅད་ཀྱི་སེམས་ཅན་གྱི་དོན་ལ་རབ་ཏུ་བཀོད་པ་ལ་འདི་ལྟ་སྟེ། ཨུམ་ནི་ཁྲོ་བོ་རྡོ་རྗེ་མའོ། །གསེར་ལྡན་མ་ནི་རྡོ་རྗེ་གསེར་རོ། །དྲུག་ལྡན་མ་ནི་རྡོ་རྗེ་གཞོན་ནུ་མའོ། །ཚངས་མ་ནི་རྡོ་རྗེ་ཞི་མའོ། །

དབང་མོ་ནི་རྡོ་རྗེ་ཁུ་ཚུར་མ་སྟེ། དེ་ལ་སོགས་པ་ནི་རྡོ་རྗེའི་རྒྱལ་མོར་དབང་བསྐུར་ཏོ། །དེ་ནས་ནམ་མཁའ་ལ་སྤྱོད་པའི་བུད་མེད་ཐམས་ཅད་ལ་བྱིན་པ་ནི་འདི་ལྟ་སྟེ། མི་འཆི་བ་ནི་རྡོ་རྗེ་མི་འཆི་མའོ། །རོ་ཧི་ན་ནི་རྡོ་རྗེ་མདངས་མའོ། །དབྱུག་འཛིན་མ་ནི་རྡོ་རྗེ་དབྱུག་མཆོག་མའོ། །སྐྱེ་བ་འཕྲོག་
མ་ནི་རྡོ་རྗེའི་རྐེད་ཆིངས་མ་སྟེ། དེ་ལ་སོགས་པ་ནི་ཁྲོ་མོ་ཞེས་བྱ་བར་དབང་བསྐུར་ཏོ། །དེ་ནས་བར་སྣང་ལ་སྤྱོད་པའི་བུད་མེད་ཐམས་ཅད་ལ་བྱིན་པ་ནི་འདི་ལྟ་སྟེ། གསོད་མ་ནི་རྡོ་རྗེ་འཇུ་མའོ། །ཟ་བ་ནི་རྡོ་རྗེ་ཟབ་མའོ། །བགོ་བ་ནི་རྡོ་རྗེ་བགོ་བ་མའོ། །དགའ་བ་ནི་རྡོ་རྗེ་དགའ་བ་མའོ། །དེ་ལ་
སོགས་པ་ནི་ཚོགས་ཀྱི་གཙོ་མོར་དབང་བསྐུར་ཏོ། །དེ་ནས་ས་ལ་སྤྱོད་པའི་བུད་མེད་ཐམས་ཅད་ལ་བྱིན་པ་ནི་འདི་ལྟ་སྟེ། ཞི་བ་མ་ནི་རྡོ་རྗེ་ཕོ་ཉ་མོའོ། །རླུང་ནི་མགྱོགས་མ་རྡོ་རྗེ་མའོ། །མེ་ནི་རྡོ་རྗེ་འབར་མའོ། །ཀུ་བེར་མ་ནི་རྡོ་རྗེའི་འཁོར་མ་སྟེ། དེ་ལ་སོགས་པ་ནི་རྡོ་རྗེའི་ཕོ་ཉ་མོར་དབང་བསྐུར་
ཏོ། །དེ་ནས་སའི་འོག་ན་གནས་པའི་བུད་མེད་ཐམས་ཅད་ལ་བྱིན་པ་ནི་འདི་ལྟ་སྟེ། ཕག་མོ་ནི་རྡོ་རྗེ་ཁའོ། །ཙ་མུཎྜི་ནི་རྡོ་རྗེ་དུས་མའོ། །སྣང་ཆེན་པོ་ནི་རྡོ་རྗེ་རུལ་པ་མའོ། །བ་རུ་ཎ་མ་ནི་རྡོ་རྗེ་ཆུ་སྲིན་མ་སྟེ། དེ་ལ་སོགས་པ་ནི་རྡོ་རྗེ་བྲན་མོར་དབང་བསྐུར་ཏོ། །དེ་ནས་བྱང་ཆུབ་སེམས་དཔའ་ཆེན་
པོ་ཕྱག་ན་རྡོ་རྗེས་ཞུགས་པ་དེ་དག་ཐམས་ཅད་སངས་རྒྱས་ཀྱི་ཡེ་ཤེས་རྣམས་བསྐྱེད་ནས་ཕྱག་རྒྱ་བཅིང་བ་ཐམས་ཅད་བསླབས་ཏེ། རྡོ་རྗེའི་དམ་ཚིག་མནའི་སྙིང་པོ་འདི་བྱིན་ནོ། །རྡོ་རྗེ་འདི་ནི་རྡོ་རྗེ་ཆེ། །སངས་རྒྱས་ཀུན་གྱིས་བྱིན་གྱིས་བརླབས། །དམ་ཚིག་འདི་ལས་འདས་ན་ནི། །རིགས་རྣམས་
མྱུར་དུ་ཐལ་བར་བྱེད། །ཨོཾ་ཧ་ན་ས་མ་ཡ་ཧཱུྃ་ཕཌ། དེ་ནས་སྙིང་པོ་གཟུང་བར་བྱ་བའི་ཕྱག་རྒྱ་འདི་བྱིན་ཏོ། །རྡོ་རྗེ་ཕྱག་རྒྱ་གཉིས་བཅིངས་ཏེ། །མཛུབ་མོ་ལྕགས་ཀྱུར་བཅིངས་ནས་ནི། །གཅུ་ཞིང་ཕྱིར་ཡང་གཅུ་བར་བྱ། །དགོས་པ་དོན་སེམས་གང་ཡིན་པ། །དེ་ཡི་མདུན་དུ་ཁྱེད་རྣམས་ནི། །
དགོས་པར་གྲུབ་ཕྱིར་འདུག་པར་བྱོས། །ཁྱེད་ཀྱི་སྲོག་ནི་མ་རུངས་པར། །དམ་ཚིག་དེས་ནི་གྱུར་ཏ་རེ། །རྡོ་རྗེ་བཅིང་བ་དམ་བྱས་ཏེ། །མཛུབ་མོ་བཀུག་ནས་རབ་ཏུ་མནན། །མཐེ་བོང་གཉི་ག་མཚམས་སྦྱར་བས། །གུང་མོ་གཉི་ག་རབ་ཏུ་མནན། །རྡོ་རྗེ་རིག་པ་འཛིན་པ་ཡིན། །དམ་ཚིག་ཕྱག་

རྒྱ་བཅིངས་བ་ལས། །གལ་ཏེ་འགའ་ཡིས་འདས་གྱུར་ན། །དམ་ཚིག་འདིས་ནི་ཁྱེད་གསོད་དོ། །རྡོ་རྗེའི་ཕྱག་རྒྱ་གཉི་ག་ཡི། །མཐེའུ་ཆུང་སོར་མོ་བཅིངས་ནས་ནི། །མཛུབ་མོ་སོར་མོའི་རྒྱབ་ནས་མདུད། །བཟློག་སྟེ་མགོ་བོར་གཞག་པར་བྱ། །བདག་ཉིད་ཆེ་བའི་དམ་
ཚིག་སྟེ། །རྡོ་རྗེ་རིག་འཛིན་བཅིངས་ནས་ནི། །ཁྲོས་ཏེ་གང་ལ་བལྟས་ན་ནི། །དེ་ཡི་མདུན་དུ་དེ་བཞིན་འདུག །རྡོ་རྗེ་བསྡམས་པའི་རྡོ་རྗེ་ཡིས། །བསྲུང་བ་དམ་བཅིངས་མནན་པ་ནི། །དེ་ནི་སྲུང་བའི་དམ་ཚིག་སྟེ། །སེམས་ཅན་ཐམས་ཅད་སྲུང་བའོ། །གང་ཞིག་ལ་ལ་བསྐྱབ་པའི་ཕྱིར། །ཁྲོ་
བོར་ལྡན་པ་བཅིངས་ནས་ནི། །སེམས་ཅན་གང་ལ་བསྲུང་བ་ཡི། །དེ་ཡི་རྒྱབ་ཏུ་འདུག་པར་བྱས། །རྡོ་རྗེའི་ཕྱག་རྒྱ་གཉིས་བཅིངས་ཏེ། །གཡོན་པའི་རྡོ་རྗེ་མཛུབ་མོ་ལ། །མཐེའུ་ཆུང་གིས་ནི་བསྡམ་བྱས་ཏེ། །གཅུ་ཞིང་སླར་གཅུ་དྲ་བཀྲོལ་ནས། །ཁྲོ་བོར་མཉམ་གཞུག་ཡིན་པ་ཡི། །དམ་
ཚིག་དེ་ཡང་སྦྱར་བྱས་ནས། །ཁྱེད་ཀྱིས་དེ་ཡི་མདུན་དུ་ནི། །དངོས་གྲུབ་ཀུན་གྱི་མཆོག་ཕྱིར་འཁོད། །རྡོ་རྗེ་བཅིང་བ་སྦྲེལ་བ་ནི། །མཛུབ་མོ་གཉི་ག་དམ་པོར་སྦྱར། །མཐེ་བོང་གུང་མོ་རྩེ་མོ་གཉིས། །རྡོ་རྗེ་ཕྱག་རྒྱར་བཅིངས་ནས་ཀྱང་། །བཟློག་སྟེ་དཔྲལ་བར་གཞག་པར་བྱ། །གལ་ཏེ་
གསོན་པར་འདོད་ན་ནི། །འགུགས་པར་བྱེད་པ་གང་ཡིན་པ། །དེ་ཡི་མདུན་དུ་རྟག་པར་འདུག །དེ་ནས་འཇིག་རྟེན་གསུམ་པོ་མཐའ་དག་གི་སྙིང་པོ་འཛིན་པའི་དམ་ཚིག་གི་ཕྱག་རྒྱའི་དམ་ཚིག་འཛིན་པའི་སྙིང་པོ་འདི་ཡིན་ནོ། །ཨོཾ་བ་ལི་ཏོད་བ་ལི་ཏ་བཛྲ་ཨཱ་ཀར་ཥ་ཡ་ཧཱུྃ་ཛ་ཛ། །རྡོ་རྗེ་
གཅུ་བའི་ཕྱག་རྒྱས་ལྷ་དགུག་པའི་སྙིང་པོའོ། །ཨོཾ་བཛྲ་ཨ་གྲ་དྷི་པ་ཡ་ས་མ་ཡེ་ཧཱུྃ། བར་སྣང་ལ་སྤྱོད་པ་རྣམས་ཀྱིའོ། །ཨོཾ་བཛྲ་མཱ་ལ་ཨ་གྲ་བཾ། ཕྲེང་བ་ཅན་རྣམས་ཀྱིའོ། །ཨོཾ་བཛྲ་བནྡྷ་ཧཾ། ས་ལ་སྤྱོད་པ་རྣམས་ཀྱིའོ། །ཨོཾ་བཛྲ་པཱ་ཏཱ་ལ་བྷ་ཉྫ་བྷ་ཉྫ་ཧཱུྃ་ཕཊ། སའི་འོག་ན་གནས་པ་
རྣམས་ཀྱིའོ། །ཨོཾ་ཧེ་རུ་ཀ་བཛྲ་ས་མ་ཡ་སརྦ་དུཥྚ་ས་མ་ཡ་མུ་དྲཱ་བྷཉྗ་ཀ་ཧཱུྃ་ཕཌ། བུད་མེད་རྣམས་ཀྱིའོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ནི་དེ་བཞིན་གཤེགས་པ་ཐམས་ཅད་ཀྱིས་མ་རུངས་པ་འདུལ་བ་

པོར་དབང་བསྐུར་ན། བཅིངས་པའི་དཀྱིལ་འཁོར་མ་རུངས་པ་དེ་དག་ཐམས་ཅད་ཇི་ལྟར་བསྒྲུབ་པར་བགྱི་བ་ལེགས་པར་བཀའ་སྩལ་པར་གསོལ། དེ་ནས་བཅོམ་ལྡན་འདས་ཀྱིས་དེ་སྐད་གསན་ནས་འདི་སྐད་བཀའ་སྩལ་ཏོ། །ཨོཾ་བཛྲ་སུམྦྷ་ནི་སུམྦྷ་ཧཱུྃ་ཕཊ། དེ་ནས་བྱང་ཆུབ་སེམས་
དཔའ་སེམས་དཔའ་ཆེན་པོ་ཕྱག་ན་རྡོ་རྗེས་སེམས་ཅན་ཐམས་ཅད་ལ་བསྐྱབ་པའི་ཕྱིར། དཀྱིལ་འཁོར་ཐམས་ཅད་དགུག་པའི་སྙིང་པོ་འདི་གསུངས་སོ། །ཨོཾ་བཛྲ་སམ་ཡ་ཨཱ་ཀརྵ་ཡ་སརྦ་མཎྜ་ལ། བཛྲ་དྷཱ་ར་སཏྱ་མཱ་ཏི་ཀྲ་མ་ཧཱུྃ་ཕཊ། རྡོ་རྗེ་ལྕགས་ཀྱུས་གཉིས་བཅིངས་ཏེ། །སྙིང་
གར་ཡོངས་སུ་བསྐོར་བར་བྱ། །མཛུབ་གཉིས་ལྕགས་ཀྱུས་ཕྱི་རོལ་གྱི། །དཀྱིལ་འཁོར་དགུག་པའི་མཆོག་ཡིན་ནོ། །དེ་ནས་དེ་བཤད་མ་ཐག་ཏུ་དཀྱིལ་འཁོར་ཐམས་ཅད་རི་རབ་རིའི་རྩེ་མོ་ཕྱི་རོལ་ཀུན་དུ་བསྐོར་ཏེ་འཁོད་དོ། །དེ་ནས་བཅོམ་ལྡན་འདས་ཕྱག་ན་རྡོ་རྗེས་དཀྱིལ་འཁོར་འདུས་པ་
དེ་དག་ཐམས་ཅད་ལ་བོས་ཏེ་འདི་སྐད་ཅེས་གསུངས་སོ། །ཀྱེ་གྲོགས་པོ་དག་སྲོག་གཅོད་པ་སྤངས་ཤིང་དམ་ཚིག་གཟུང་བ་ལ་བསྒྲུབ་པར་གྱིས། དེ་ནས་ཕྱི་རོལ་གྱི་དཀྱིལ་འཁོར་གྱི་དམ་ཚིག་གི་སེམས་ཅན་དེ་དག་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་
འདས་བདག་ཅག་ཤ་འཚལ་བ་མ་རུངས་པའི་སེམས་ཅན་ལགས་པས་མདངས་འཕྲོག་པ་ལ་སྲོག་ལྟོས་ན། བཅོམ་ལྡན་འདས་བདག་ཅག་ཇི་ལྟར་འཚོ་བར་བགྱི་བ་དེ་བཀའ་སྩོལ་ཅིག །དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེས་མ་རུངས་པའི་རྡོ་རྗེ་ཁྲོ་བོ་འདི་གསུངས་སོ། །ཨོཾ་དུཥྚ་
བཛྲ་ཀྲོ་དྷ་ཧ་ན་ད་ཧ་པ་ཙ་བི་དྷྭ་ནས་ཡ་བི་ཀ་རི། སརྦ་དུཥྚ་ས་མ་ཡ་མུ་དྲཱ་མཎྜལ། བྷཉྫ་བྷཉྫ། མརྡྷ་མརྡྷ། ཁཱ་ད་ཁཱ་ད། བར་མནྟྲ་བཛྲ་ས་མ་ཡ་ཧཱུྃ་ཕཊ། རྡོ་རྗེ་ཁྲོ་མཛུབ་ལེགས་པར་ནི། །སེན་མོ་སྤྲད་དེ་དཀྲིས་ནས་ཀྱང་། །རྩེ་མོ་གཉིས་ནི་དམ་སྦྱར་བ། །ཕྱག་རྒྱ་དེ་ནི་མ་རུངས་འཇོམས། །དེ་ནས་
དེ་སྨྲས་མ་ཐག་ཏུ་མ་རུངས་པའི་དཀྱིལ་འཁོར་ཐམས་ཅད་གཅིག་ཏུ་འདུས་པ་དུ་མས་གཙེ་ཞིང་དྲལ་བ་དང་། དམ་ཚིག་གི་ཕྱག་རྒྱ་བཅིངས་པ་དྲལ་ཏོ། །མ་རུངས་པའི་དམ་ཚིག་གི་སེམས་ཅན་དེ་རྣམས་ཡང་སྲེག་ཅིང་ཤིན་ཏུ་བཙོས་པས་འོ་དོད་ཆེན་པོ་འབོད་ཅིང་ཕོངས་པའི་སྒྲ་བྱུང་སྟེ།

བཅོམ་ལྡན་འདས་རྡོ་རྗེ་འཛིན་ཆེན་པོ་ག་ལ་བ་དེར་ཐལ་མོ་སྦྱར་ཏེ་འདི་སྐད་གསོལ་ཏོ། །བཅོམ་ལྡན་འདས་བདག་ཅག་སྲོག་དང་མི་འབྲལ་བར་སྐྱབས་མཛད་དུ་གསོལ། དེ་ནས་ཕྱག་ན་རྡོ་རྗེས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་
མ་རུངས་པའི་དཀྱིལ་འཁོར་དེ་རྣམས་ཇི་ལྟར་བགྱི་བ་བདག་ལ་བཀའ་སྩལ་དུ་གསོལ། དེ་ནས་བཅོམ་ལྡན་འདས་ཀྱིས་བཀའ་སྩལ་པ། ཨོཾ་ནི་སུམྦྷ་ཧ་ན་ད་ཧ་པ་ཙ་གྲྀཧྞ་བནྡྷ་ཧཱུྃ་ཕཊ། དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་རྡོ་རྗེ་ཁྲོ་བོ་མི་བཟད་པ་འདི་གསུངས་སོ། །ཨོཾ་མ་ཧཱ་
བཛྲ་ཁུ་ར་ཀྲོ་དྷ་བ་ཏ་ཡ། སརྦ་དུཥྚ་མཎྜ་ལཾ་བི་ནཱ་ཤ་ཡ་སརྦ་དུཥྚ་སམ་ཡཾ་བྷི་ག་ཀི་ར་བི་དྷྭན་ས་ཡ་སྥོ་ཊ་ཡ་བྷཉྫ་ཡ་སརྦ་དུ་ཥྚ་ས་མ་ཡ་མུ་དྲཱ་བནྡྷ་གྲྀཧྞ་ཧ་ན་ད་ཧ་པ་ཙ་སརྦ་དུཥྚ་ས་མ་ཡ་ས་ཏྭཾ་བཛྲ་ས་མ་ཡ་ཧཱུྃ་ཕཊ། དེ་ནས་དེ་སྨྲས་མ་ཐག་ཏུ་མ་རུངས་པའི་དམ་ཚིག་དང་ཕྱག་རྒྱ་དང་དཀྱིལ་འཁོར་ཐམས་ཅད་ཡང་
གཅིག་ཏུ་འདུས་ཏེ་རྒྱ་མཚོ་ཆེན་པོར་དོང་ངོ་། །དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བདག་ལ་མ་རུངས་པ་ཐམས་ཅད་ཐུལ་ཅིག་ཅེས་བཀའ་སྩལ་ན། ཕྲ་མེན་མ་དང་གདོན་ལ་སོགས་པ་གདོན་དེ་དག་
ཐམས་ཅད་ལ་བདག་གིས་ཇི་ལྟར་བགྱི། དེ་ནས་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །ཨོཾ་ཧ་ན་ཧ་ན་བཛྲ་ཧཱུྃ་ཕཊ། དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་ཡང་ཕྲ་མེན་མ་ལ་སོགས་པ་གདོན་མ་རུངས་པ་ཐམས་ཅད་དགུག་པའི་སྙིང་པོ་འདི་གསུངས་སོ། །ཨོཾ་བཛྲ་
ཨཱ་ཀརྵ་ཡ་ཤཱི་གྷྲཾ་སརྦ་དུཥྚ་གྲ་ཧཾ་བཛྲ་དྷ་ར་སཏྭ་ན་ཧཱུྃ་ཛ། དེ་ནས་དེ་སྨྲས་མ་ཐག་ཏུ་ཕྲ་མེན་མ་ལ་སོགས་པ་གདོན་མ་རུངས་པ་ཐམས་ཅད་རི་རབ་ཀྱི་རྩེ་མོའི་ཕྱི་རོལ་བསྐོར་ཏེ་འཁོད་དོ། །དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་ཕྲ་མེན་མ་ལ་སོགས་པ་གདོན་མ་རུངས་པ་ཐམས་ཅད་ལ་
བོས་ནས་འདི་སྐད་ཅེས་གསུངས་སོ། །ཀྱེ་བཟོད་ལྡན་རྣམས་སྲོག་གཅོད་པ་སྤང་བའི་བསླབ་པ་དང་། དམ་ཚིག་དང་སྡོམ་པ་གཟུང་བར་བྱོས་ཤིག །རྡོ་རྗེ་འོད་འཕྲོ་བ་གཅིག་ཏུ་འབར་བར་གྱུར་བས་ཁྱེད་ཀྱི་རིགས་རྣམས་མ་ལུས་ཤིང་བསྲེགས་ཏ་རེ། དེ་ནས་ཕྲ་མེན་མ་ལ་སོགས་པ་གདོན་མ་རུངས་པ་

ཐམས་ཅད་བཅོམ་ལྡན་འདས་ག་ལ་བ་དེར་ཐལ་མོ་སྦྱར་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ཤ་འཚལ་བ་ནི། ཇི་ལྟར་བགྱི་བཀའ་སྩལ་དུ་གསོལ། དེ་ནས་བཅོམ་ལྡན་འདས་ཀྱིས་ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །
ཕྱག་ན་རྡོ་རྗེ་སེམས་ཅན་དེ་རྣམས་ལ་སྙིང་རྗེ་ཆེན་པོ་བསྐྱེད་ལ། ཐབས་སྦྱིན་པར་བྱོས་ཤིག །དེ་ནས་ཕྱག་ན་རྡོ་རྗེ་ཆེན་པོས་སེམས་ཅན་ཐམས་ཅད་འཆི་བའི་མཚན་མ་ཤེས་པའི་ཕྱག་རྒྱ་དང་སྙིང་པོ་འདི་གསུངས་སོ། །ཨོཾ་བཛྲ་པྲ་ཏི་གྲྀཧྞ་ཧྲྀ་ད་ཡ་མཱ་ཀརྵ་ཡ་ཡདྡྱ་ཡཾ་མ་ཏོ་མཱ་མདྡཱ་ར་དྷེན་མི་ཡ་ཏེ་
ཏདྱ་སྱ་ཧྲྀ་ད་ཡཾ་ནི་སྐྲ་མི་ཏུ་ས་མ་ཡ་ཧཱུྃ་ཛཿ། དེ་ནས་དེའི་ཕྱག་རྒྱ་བཅིང་བ་བཤད་དོ། །སྙིང་གར་རྡོ་རྗེ་ལག་ངར་གཉིས། །ཤིན་ཏུ་དམ་པར་བཅིངས་ནས་ནི། །རྡོ་རྗེ་མཛུབ་མོ་རྩེ་མོ་ཡིས། །རང་གི་མཆན་ཁུང་བྲུད་པར་བྱ། །ཁྱོད་རྣམས་ཀྱིས་ཕྱག་རྒྱ་དེས་སེམས་ཅན་ཐམས་ཅད་ཀྱི་སྙིང་རུས་
ལ་ཟོ་ཤིག །དེ་ནས་ཕྲ་མེན་མ་ལ་སོགས་པ་མ་རུངས་པའི་གདོན་ཐམས་ཅད་དགའ་བའི་སྒྲ་ཐོས་ནས་མཆོངས་རྒལ་བྱས་ཏེ། རང་གི་གནས་སུ་དོང་ངོ་། །དེ་ནས་བཅོམ་ལྡན་འདས་ཕྱག་ན་རྡོ་རྗེས། བཅོམ་ལྡན་འདས་ལ་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་
པ་ཐམས་ཅད་ཀྱིས་མ་རུངས་པ་འདུལ་བ་ལགས་པར་བཀའ་སྩལ་ན། བཅོམ་ལྡན་འདས་རིམས་ལ་སོགས་པ་ནད་དེ་རྣམས་ལ་ཅི་ལྟར་བགྱི་བདག་ལ་བཀའ་སྩོལ་ཅིག །དེ་ནས་བཅོམ་ལྡན་འདས་ཀྱིས་བཀའ་སྩལ་པ། ཨོཾ་ཧཱུྃ་ཕཊ། དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་
རྗེས་རིམས་ལ་སོགས་པའི་ནད་དགུག་པའི་སྙིང་པོ་སྨྲས་པ། ཨོཾ་བཛྲ་ས་མ་ཡ་ཨཱ་ན་ཡ་སརྦ་དུཥྚ་ཛྭ་ར་དྷ་ནི་ནཱ་ཤ་ཡ་ཧཱུྃ་ཕཊ། དེ་ནས་དེ་སྨྲས་མ་ཐག་ཏུ་རིམས་ལ་སོགས་པའི་ནད་རྣམས་ཐམས་ཅད་རི་རབ་རིའི་རྩེ་མོའི་ཕྱི་རོལ་དུ་བསྐོར་ཏེ་འཁོད་དོ། །དེ་ནས་ཕྱག་ན་རྡོ་རྗེས་རིམས་ལ་སོགས་
པའི་ནད་རྣམས་ལ་བོས་ཏེ་འདི་སྐད་ཅེས་གསུངས་སོ། །ཀྱེ་བཟོད་ལྡན་དག་སེམས་ཅན་གསོད་པ་ལས་ལྡོག་པའི་བསླབ་པ་གཟུང་བའི་སྡོམ་པ་ལོང་ཤིག །དེ་དག་གིས་གསོལ་བ། བཅོམ་ལྡན་འདས་བདག་ཅག་ནི་སེམས་ཅན་གྱི་མདངས་འཕྲོག་སྟེ་འཚོ་བར་བགྱིད་ནད་བཅོམ་ལྡན་འདས་

བདག་ཅག་ཇི་ལྟར་བགྱི་ལེགས་པར་བཀའ་སྩོལ་ཅིག །དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་རང་གི་ལས་རྣམས་དག་པར་འགྱུར་བའི་ཡེ་ཤེས་ཀྱི་ཕྱག་རྒྱའི་སྙིང་པོ་འདི་གསུངས་སོ། །ཨོཾ་བཛྲ་ཀརྨ་བི་ཤོདྷ་ཡ་སརྦ་ཨཱ་པར་ཎཱ་ནི་བུདྡྷ་སཏྟྱེ་ན་ས་མ་ཡ་ཧཱུྃ། དེ་ནས་ཕྱག་
རྒྱ་བཅིང་བ་བཤད་དོ། །རྡོ་རྗེ་ཐལ་མོ་དམ་བཅས་ཏེ། །མཛུབ་མོ་གཉིས་ཀ་བཀུག་ནས་ཀྱང་། །མཐེ་བོ་མཉམ་སྟེ་སྦྱར་ནས་ནི། །མནན་པ་དེ་ནི་སྡིག་འཕྲོག་པ། །ཕྱག་རྒྱ་དེ་རིམས་ལ་སོགས་པའི་ནད་ཐམས་ཅད་ཀྱིས་གང་ལ་བཏབ་པ་ལ་ལས་བྱས་ལ་བསྟན་ན། དེ་ཁྱེད་རྣམས་ཀྱིས་
ཐོང་ཤིག །ཁྱེད་ཅག་སྲོག་དང་བྲལ་ལ་རེ། དེ་ནས་དེ་རྣམས་དེ་བཞིན་དུ་བགྱིའོ་ཞེས་གསོལ་ཏེ་སླར་དོང་ངོ་། །དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས། དེ་བཞིན་གཤེགས་པ་ཐམས་ཅད་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྣམས་ཀྱིས་བདག་སྒྲིབ་པ་
ཐམས་ཅད་བསལ་བ་དང་ལས་ཀྱི་སྒྲིབ་པ་ཐམས་ཅད་རྣམ་པར་སྦྱང་བའི་སླད་དུ། ཉིད་ཀྱི་ཐུགས་ཀ་ནས་བྱུང་ན་དེ་ནས་བཅོམ་ལྡན་འདས་སེམས་ཅན་དམྱལ་བ་ལ་སོགས་པ་ངན་སོང་དེ་རྣམས་ཐམས་ཅད་ཇི་ལྟར་བགྱི་བདག་ལ་བཀའ་སྩལ་དུ་གསོལ། བཅོམ་ལྡན་འདས་ཀྱིས་བཀའ་
སྩལ་པ། ཨོཾ་ཀྵ་པ་ཡ་བཛྲ་སྭཱ་ཧཱ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེས། ངུ་འབོད་ལ་སོགས་པ་ངན་སོང་གི་འགྲོ་བའི་འཁོར་ལོ་ཐམས་ཅད་དགུག་པའི་སྙིང་པོ་འདི་གསུངས་སོ། །ཨོཾ་སརྦ་ཨ་བཱ་ཡ་ཨཱ་ཀརྵ་ཎ་བི་ཤོདྷ་ན་བཛྲ་སམ་ཡ་ཧཱུྃ་ཕཊ། དེ་ནས་དེ་སྨྲས་
མ་ཐག་ཏུ་ངུ་འབོད་དང་ངུ་འབོད་ཆེན་པོ་ལ་སོགས་པ་ངན་སོང་ན་གནས་པ་རྣམས་རི་རབ་རིའི་རྩེ་མོའི་ཕྱི་རོལ་དུ་བསྐོར་ཏེ་འཁོད་དོ། །དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེས་ངན་སོང་གི་སར་ལྟུང་བའི་སེམས་ཅན་ཐམས་ཅད་ལ་བོས་ནས་འདི་སྐད་གསུངས་སོ། །ཀྱེ་བཟོད་ལྡན་རྣམས་དཀོན་
མཆོག་གསུམ་ལ་སྐྱབས་སུ་འགྲོ་བ་དང་། དམ་ཚིག་དང་སྡོམ་པ་དང་ངན་སོང་ཐམས་ཅད་ལས་ཐར་བའི་ཕྱག་རྒྱ་དང་སྙིང་པོ་ཟུང་ཤིག །དེ་ནས་དེ་དག་གིས་མགྲིན་གཅིག་ཏུ་འདི་སྐད་གསོལ་ཏོ། །བཅོམ་ལྡན་འདས་བདག་ཅག་སྡུག་བསྔལ་གྱིས་གཟིར་བ་འདི་ལས་བསྐྱབ་པར་གསོལ།

བདག་ཅག་རྣམས་སངས་རྒྱས་དང་ཆོས་དང་དགེ་འདུན་དང་ཁྱོད་ལ་སྐྱབས་སུ་མཆིའོ། །དེ་ནས་ཕྱག་ན་རྡོ་རྗེས་ངན་སོང་ཐམས་ཅད་འཇོམས་པ་ཞེས་བྱ་བའི་སྙིང་པོ་འདི་གསུངས་སོ། །ཨོཾ་བཛྲ་པཱ་ཎི་བི་སྥོ་ཊ་ཡ་སརྦ་ཨ་པཱ་ཡ་བྷནྡྷ་ནཱ་ནི་པྲ་མོཀྵ་ཡ་ས་རྦཱ་པཱ་ཡ་ག་ཏེ་བྷྱཿ། སརྦ་སཏྭཾ་སརྦ་
ཏ་ཐཱ་ག་ཏ་བཛྲ་ས་མ་ཡ་ཏྲཱཊ། དེ་ནས་དེའི་ཕྱག་རྒྱ་བཅིང་བ་བཤད་དོ། །རྡོ་རྗེ་བཅིང་བ་དམ་བྱས་ཏེ། །གུང་མོ་གཉི་ག་སྦྱར་ནས་སུ། །ཐ་མ་བཞི་ནི་རྩེ་མོར་སྦྱར། །སྡིག་པ་འཇོམས་པར་གྲགས་པ་ཡིན། །དེ་ནས་ངན་སོང་གསུམ་གྱི་འཁོར་ལོ་ན་གནས་པའི་སེམས་ཅན་ཐམས་ཅད་
ཕྱག་ན་རྡོ་རྗེའི་ཕྱག་རྒྱ་དེ་མཐོང་ནས་ངན་སོང་ཐམས་ཅད་ལས་ཤི་འཕོས་ནས་བཅོམ་ལྡན་འདས་རྣམ་པར་སྣང་མཛད་ཀྱི་ཞབས་དྲུང་དུ་སྐྱེས་སོ། །ངན་སོང་དེ་རྣམས་ནི་རྒྱ་མཚོ་ཆེན་པོར་བོར་རོ། །དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེས་བཅོམ་ལྡན་འདས་ལ་འདི་སྐད་ཅེས་གསོལ་
ཏོ། །བཅོམ་ལྡན་འདས་སེམས་ཅན་གྱི་ཁམས་མ་ལུས་ཤིང་ལུས་པ་མེད་པའི་སྐྱབས་དང་ཕན་པ་དང་བདེ་བ་ཐམས་ཅད་མྱོང་བར་བགྱི་བ་ནས། དེ་བཞིན་གཤེགས་པ་ཐམས་ཅད་ཀྱི་གྲུབ་པ་དམ་པའི་འབྲས་བུ་ཐོབ་པར་བགྱི་བའི་བར་དུ་ཚོལ་ཅིག་པར་བདག་ལ་བཅོམ་ལྡན་འདས་དེ་བཞིན་
གཤེགས་པ་ཐམས་ཅད་ཀྱི་གྲུབ་པའི་རྡོ་རྗེ་སྩལ་ཏེ། དེ་བཞིན་གཤེགས་པ་ཐམས་ཅད་ཀྱིས་བཀའ་སྩལ་ན། མི་དེ་རྣམས་ཇི་ལྟར་བགྱི་བ་དེ་བཞིན་གཤེགས་པ་ཐམས་ཅད་ཀྱིས་བཀའ་སྩོལ་ཅིག །དེ་བཞིན་གཤེགས་པ་ཐམས་ཅད་ཡང་གཅིག་ཏུ་འདུས་ནས་འདི་སྐད་ཅེས་བཀའ་སྩལ་ཏོ། །
ཨོཾ་བཛྲ་པཱ་ཎི་མ་ཧཱ་མནྜ་ལཾ་པྲ་བེ་ཤ་ཡ་སརྦ་དུཥྚ་རོ་དྲནྣི་བར་ཡ་པྲ་བེ་བྱ་པྲ་མ་ཤ་ཡ་ཏྲུ་ར་དྲྀཥྚ་པརྱྭ་པཾ་མཾ་བི་ཤོ་དྷ་ཡ་ནཱ་ཤ་ཡ་བི་ནཱ་ཤ་ཡ་ཧ་ཧ་ཧ་ཧ་ཧཱུྃ། དེ་ནས་དེ་བཞིན་གཤེགས་པ་ཐམས་ཅད་ཀྱིས་བཀའ་སྩལ་པའི་ཚིག་དེ་ཐོས་ནས་སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་བསྐྱབ་པ་དང་ཕན་
པ་དང་བདེ་བ་ཐམས་ཅད་དང་དངོས་གྲུབ་དམ་པ་ནས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་དང་མངོན་པར་ཤེས་པའི་འབྲས་བུ་ཐོབ་པར་བགྱི་བའི་བར་དུ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ཆེན་པོའི་དམ་ཚིག་ལས་བྱུང་བ་འཇིག་རྟེན་གསུམ་ལས་རྣམ་པར་རྒྱལ་བ་ཞེས་བྱ་བའི་དཀྱིལ་འཁོར་

ཆེན་པོ་འདི་བཤད་དོ། །དེ་ནས་རབ་ཏུ་བཤད་བྱ་བ། །དཀྱིལ་འཁོར་ཆེན་པོ་དམ་པ་སྟེ། །རྡོ་རྗེ་དབྱིངས་དང་འདྲ་བ་ཡི། །དངོས་གྲུབ་ཐམས་ཅད་བྱེད་པའི་མཆོག །འཇིག་རྟེན་གསུམ་ལས་རྒྱལ་ཞེས་བྱ། །རྡོ་རྗེ་དམ་ཚིག་ལས་བྱུང་བ། །སངས་རྒྱས་བྱང་ཆུབ་འབྱིན་
བྱེད་པ། །མ་རུངས་ཐམས་ཅད་རྣམ་པར་འཇིག །དེ་ལ་སྔགས་འདིས་སྲད་བུ་བྲི་བར་བྱའོ། །ཨོཾ་བཛྲ་ས་མ་ཡ་སཱུ་ཏྲཾ་མཱ་ཏི་ཀྲ་མ་ཧོ། །གྲུ་བཞིར་བྱ་ཞིང་སྒོ་བཞི་པ། །རྟ་བབས་བཞེས་ཀྱང་རབ་ཏུ་བརྒྱན། །སྲད་བུ་བཞི་དང་ལྡན་པ་སྟེ། །དར་དང་ཕྲེང་བས་ཤིན་ཏུ་བརྒྱན། །དཀྱིལ་འཁོར་
ཀུན་གྱི་གྲྭ་རྣམས་དང་། །སྒོ་ཡི་མུ་ཁྱུད་ནང་རྣམས་སུ། །རྡོ་རྗེ་རིན་ཆེན་བརྒྱན་བྱ་བ། །དཀྱིལ་འཁོར་ཕྱི་རིམ་སྲད་བུ་བྲེ། །ཤེས་རབ་ཅན་གྱིས་དེ་ནང་དུ། །གྲུ་བཞི་ལ་ནི་སྒོ་བཞི་པ། །ཀ་བ་བརྒྱད་དང་རྟ་བབས་བཅས། །རྡོ་རྗེ་ཀ་བའི་གནས་མཆོག་ཏུ། །དཀྱིལ་འཁོར་ལྔ་ཡིས་བརྒྱན་པ་
སྟེ། །དེ་ལྟར་དཀྱིལ་འཁོར་སྲད་བུ་བྲེ། །སྲད་བུ་བྲེས་པར་ཚོན་གྱིས་དགང་། །དེ་ལ་ཚོན་ལ་བཟླས་པ་ནི་འདིའོ། །ཨོཾ་བཛྲ་ཙི་ཏྲ་ས་མ་ཡ་ཧཱུྃ། དེ་ནས་དབུས་སུ་འདུག་ནས་ནི། །རྡོ་རྗེ་སློབ་དཔོན་མཉམ་བཞག་པས། །རྡོ་རྗེ་སྒོ་ནི་རྣམ་བཞི་པོ། །ཡིད་ཀྱིས་སུ་ནི་དབྱེ་བར་བྱ། །དེ་
ལ་སྒོ་རྣམས་དབྱེ་བའི་སྔགས་ནི་འདིའོ། །ཨོཾ་བཛྲོ་དྒྷཊ་ཡ་ས་མ་ཡ་པྲ་བེ་ཤ་ཡ་ཧཱུྃ། གསེར་རམ་དངུལ་ལས་བྱས་པའམ། །ས་ཡང་རུང་སྟེ་ལེགས་བྲིས་པའི། །ཕ་གུ་གྲུ་བཞིར་བྱས་པའི་སྟེང་། །སངས་རྒྱས་གཟུགས་ནི་གཞག་པར་བྱ། །དེ་ལ་དེ་བཞིན་གཤེགས་པ་ཐམས་ཅད་སྤྱན་དྲང་
བའི་སྙིང་པོ་ནི་འདི་ཡིན་ནོ། །ཨོཾ་བཛྲ་ཛྭཱ་ལ་ཨགྣི་པྲདྲཱི་པྟ་ཨཱཀརྵ་ཡ་སརྦ་ཏ་ཐཱ་ག་ཏཱ་ནཱ་མ་ཧཱ་བཛྲ་ས་མ་ཡེ་ཧཱུྃ་ཛཿ། །སངས་རྒྱས་སྤྱན་སྔར་རྡོ་རྗེ་ནི། །འབར་བར་བསྐོར་བས་གཞག་པར་བྱ། །དེ་བཞིན་རིན་ཆེན་འོད་སྐོར་བ། །པདྨ་རྡོ་རྗེ་ཀུན་དེ་བཞིན། །དེ་ནས་རྡོ་རྗེ་དམ་ཚིག་ཕྱག་རྒྱ་རྣམས་དགོད་
པའི་སྙིང་པོ་འདི་ཡིན་ནོ། །ཨོཾ་སཏྭ་བཛྲཱ་ཛྭཱ་ལ་མཱ་ལ་ཧཱུྃ་ཕཌ། ཨོཾ་རཏྣ་བཛྲཱི་ཛྭཱ་ལ་མཱ་ལ་ཧུྃ་ཏྲཱཾ། ཨོཾ་དྷརྨ་བཛྲཱི་ཛྭཱ་ལ་མཱ་ལ་ཧཱུྃ་ཧྲཱིཿ། ཨོཾ་ཀརྨ་བཛྲཱ་ཛྭཱ་ལ་མཱ་ལ་ཧཱུྃ་ཨཿ། རྡོ་རྗེ་ཤུགས་ཀྱིས་བརྒལ་ནས་ནི། །སངས་རྒྱས་སྤྱན་སྔར་དེ་བཞིན་དུ། །ཤེས་པས་ཆོ་ག་བཞིན་བྲི་བ། །རྡོ་རྗེ་ཧཱུྃ་ཞེས་དཀྱིལ་

འཁོར་རོ། །དེ་ལ་རྡོ་རྗེ་ཤུགས་ཀྱི་སྙིང་པོ་ནི་འདི་ཡིན་ནོ། །ཨོཾ་བཛྲ་བེ་གཱ་ཀྲ་མ་ཧཱུྃ། དེ་བཞིན་དུ་རྡོ་རྗེ་དབྱིངས་ཀྱི་དཀྱིལ་འཁོར་ལ་སོགས་པའི་དཀྱིལ་འཁོར་ཐམས་ཅད་ལ་ཡང་སྲད་བུ་ལ་བརྒལ་ཏེ་ཐམས་ཅད་དུ་འགྲོ་བར་བྱའོ། །དེ་ནས་འདིའི་སྙིང་པོ་བཤད་དོ། །ཡིད་ཀྱིས་རི་མོ་བཏེག་
ནས་ནི། །རྡོ་རྗེ་སྲད་བུའམ་གཞན་ཡང་རུང་། །ཕྱིར་བྱུང་ནང་དུ་ཞུགས་ཀྱང་ནི། །དམ་ཚིག་འགལ་བར་དེ་མི་འགྱུར། །དེ་ཡི་དབུས་སུ་སེམས་དཔའ་ཆེ། །ཕྱག་ན་རྡོ་རྗེ་བྲི་བ་ནི། །ཨུཏྤལ་ཆེ་སྔོ་འཚེར་བའི་མདོག །རྡོ་རྗེ་ཧཱུྃ་ཞེས་བྱ་བར་འདུས། །མཆེ་བ་ཅུང་ཟད་ཕྱུང་བའི་ཞལ། །ཁྲོ་དང་
བཅས་པར་འཛུམ་པའི་ཞལ། །བརྐྱང་བསྐུམ་ཚུལ་དུ་བཞུགས་པ་སྟེ། །འབར་བའི་ཕྲེང་བས་དཀྲིགས་པའི་འོད། །ཞབས་གཡོན་པ་ཡི་མཐིལ་གྱིས་ནི། །དབང་ཕྱུག་ཆེན་པོ་མནན་པར་བྱ། །ཞབས་གཡས་པ་ཡིས་ཨུ་མ་ཡི། །ནུ་མའི་སྟེང་དུ་མནན་པར་བྲི། །དེའི་སྙིང་པོ་ནི་འདི་ཡིན་
ནོ། །ཧཱུྃ། དེ་ཡི་ཕྱོགས་ནི་ཐམས་ཅད་དུ། །རྡོ་རྗེ་ཁྲོ་བོ་བཞག་པ་ནི། །ཁྲོས་པས་མཆེ་བ་ཕྱུང་བ་ནི། །འབར་བའི་ཕྲེང་བས་དཀྲིགས་པའི་འོད། །དེ་ནས་དེ་དག་གི་སྙིང་པོ་རྣམས་ནི་འདི་ཡིན་ནོ། །ཨོཾ་བཛྲ་སཏྭ་ཀྲོདྷ་ཧཱུྃ་ཕཌ། ཨོཾ་བཛྲ་ཀྲོ་དྷ་ཨཱ་བེ་ཤ་ཡ་ཧཱུྃ་ཕཊ། ཨོཾ་བཛྲ་ཀརྨ་ཀྲོ་དྷ་རཱ་ག་ཡ་ཧཱུྃ་
ཕཊ། ཨོཾ་བཛྲ་དུཥྚི་ཀྲོ་དྷ་སཱ་དྷུ་སཱ་དྷུ་ཧཱུྃ་ཕཊ། དཀྱིལ་འཁོར་དམ་པ་གཉིས་པར་ནི། །རྡོ་རྗེ་ཤུགས་ཀྱིས་བརྒལ་ནས་ཀྱང་། །དེར་ནི་རྡོ་རྗེ་དབང་བསྐུར་བ། །རྡོ་རྗེ་ཁྲོ་བོས་བསྐོར་བར་བྲི། །དེ་ནས་དེ་རྣམས་ཀྱི་སྙིང་པོ་འདི་བཤད་དོ། །ཏྲཾ་ཨོཾ་བཛྲ་བྷྲྀ་ཀུ་ཌཱི་ཀྲོ་དྷ་ཧ་ར་ཧ་ར་ཧུྃ་ཕཊ། ཨོཾ་བཛྲ་སཱུརྱ་མ་ཧཱ་ཛྭ་
ལ་མཱ་ལ་ཀྲོ་དྷ་ཛྭ་ལ་ཡ་སརྦཾ་ཧཱུྃ་ཕཊ། ཨོཾ་བཛྲ་ཀྲོ་དྷ་ཀེ་ཏུ་དེ་ཧི་ཧཱུྃ་ཕཊ། ཨོཾ་བཛྲ་ཧཱ་ས་ཀྲོ་དྷ་ཧ་ཧ་ཧ་ཧ་ཧཱུྃ་ཕཊ། དཀྱིལ་འཁོར་དམ་པ་གསུམ་པར་ནི། །རྡོ་རྗེ་ཤུགས་ཀྱིས་བརྒལ་ནས་ཀྱང་། །རྡོ་རྗེ་སྡེ་ནི་བྲི་བར་བྱ། །ཁྲོ་བོ་བདག་ཉིད་ཆེན་པོར་བསྐོར། དེ་ནས་དེ་རྣམས་ཀྱི་སྙིང་པོ་བཤད་དོ། །ཧྲཱིཿ
ཨོཾ་བཛྲ་དྷརྨ་ཀྲོདྷ་བི་ནཱ་ཤ་ཡ་བཱི་ཤོ་དྷ་ཡ་ཧཱུྃ་ཕཊ། ཨོཾ་བཛྲ་ཏཱི་ཀྵྞ་ཀྲོ་དྷ་ཙྪིནྡ་ཙྪིནྡ་ཧཱུྃ་ཕཊ། ཨོཾ་བཛྲ་ཧེ་ཏུ་ཀྲོ་དྷ་པྲ་བེ་ཤ་ཡ་མཎྜ་ལེ་སརྦཾ་ཧཱུྃ་ཕཊ། ཨོཾ་བཛྲ་ཀྲོདྷ་བྷཱ་ཥ་བ་ཏ་བ་ཏ་ཧཱུྃ་ཕཊ། དཀྱིལ་འཁོར་དམ་པ་བཞི་པར་ནི། །རྡོ་རྗེ་ཤུགས་ཀྱིས་བརྒལ་ནས་ཀྱང་། །རྡོ་རྗེ་དབབ་པ་བྲི་བྱ་བ། །རྡོ་རྗེ་

ཁྲོ་བོའི་ཚོགས་ཀྱིས་བསྐོར། །དེ་ལ་དེ་རྣམས་ཀྱི་སྙིང་པོ་འདི་བཤད་དོ། །ཨཿཧཱུྃ་བཛྲ་ཀརྨ་ཧཱུྃ་ཕཊ། ཨོཾ་བཛྲ་ཀ་བ་ཙ་ཀྲོ་དྷ་རཀྵ་ཧཱུྃ་ཕཊ། ཨོཾ་བཛྲ་ཡཀྵ་ཀྲོ་དྷ་ཁཱ་དཱ་ཁ་ད་ཧཱུྃ་ཕཊ། ཨོཾ་བཛྲ་ཀྲོ་དྷ་མུཥྚི་སཱ་དྷ་ཡ་ས་མ་ཡ་ཧཱུྃ་ཕཊ། དཀྱིལ་འཁོར་གྱི་ནི་གྲྭ་རྣམས་སུ། །རྡོ་རྗེ་དབྱིངས་
ཀྱི་ཚུལ་བཞིན་དུ། །ཇི་ལྟར་གོ་རིམས་བཞིན་དུ་ནི། །གསང་བའི་མཆོད་པ་ཀུན་བྲིའོ། །དེ་ནས་དེ་དག་གི་སྙིང་པོའི་ཕྱག་རྒྱ་འདི་ཡིན་ནོ། །ཨོཾ་བཛྲ་རཱ་སྱེ་རཱ་ག་ཡ་ཧཱུྃ་ཕཊ། ཨོཾ་བཛྲ་མཱ་ལེ་ཨ་བྷི་ཥིཉྩ་ཧཱུྃ་ཕཊ། ཨོཾ་བཛྲ་གཱི་ཏེ་ག་ད་ག་ད་ཧཱུྃ་ཕཊ། ཨོཾ་བཛྲི་ནྲྀ་དྱེ་བ་ཤི་ཀུ་རུ་ཧཱུྃ་ཕཊ། དཀྱིལ་འཁོར་
དམ་པའི་ཕྱི་རོལ་དུ། །རྡོ་རྗེ་ཤུགས་ཀྱིས་བརྒལ་ནས་ཀྱང་། །དེ་ཡི་གྲྭ་རྣམས་ཉིད་དུ་ནི། །མཆོད་པའི་ལྷ་མོ་བཞི་རྣམས་བཞག །དེ་ནས་དེ་རྣམས་ཀྱི་སྙིང་པོ་ནི་འདི་རྣམས་སོ། །ཨོཾ་བཛྲ་དྷུ་པེ་པཱུ་ཛཱ་སྥ་ར་ཎ་ས་མ་ཡེ་ཧཱུཾ་ཕཊ། ཨོཾ་བཛྲ་བུཥྤ་པཱུ་ཛཱ་སྥ་ར་ཎ་ས་མ་ཡེ་ཧཱུྃ་ཕཊ། ཨོཾ་བཛྲ་ཨཱ་ལོ་ཀེ་
པཱུ་ཛཱ་སྥ་ར་ཎ་ས་མ་ཡེ་ཧཱུྃ་ཕཊ། ཨོཾ་བཛྲ་གནྡྷེ་པཱུ་ཛཱ་སྥ་ར་ཎ་ས་མ་ཡེ་ཧཱུྃ་ཕཊ། སྒོ་རྣམས་བཞི་ཡི་དབུས་སུ་ནི། །ལྕགས་ཀྱུ་ལ་སོགས་གཞག་པར་བྱ། །དཀྱིལ་འཁོར་ཕྱི་རོལ་གནས་རྣམས་སུ། །ཕྱི་ཡི་རྡོ་རྗེའི་རིགས་རྣམས་སོ། །དེ་ནས་དེ་དག་གི་སྙིང་པོ་རྣམས་བཤད་དོ། །ཨོཾ་བཛྲ་
ཨཾ་ཀུ་ཤ་མ་ཧཱ་ཀྲོ་དྷ་ཨཱ་ཀརྵ་ཡ་སརྦ་ས་མ་ཡཾ་ཧཱུྃ་ཛཿ། ཨོཾ་བཛྲ་པཱ་ཤ་མ་ཧཱ་ཀྲོ་དྷ་པྲ་པེ་ཤ་ཡ་སརྦ་ས་མ་ཡ་ཧཱུྃ་ཧཱུྃ། ཨོཾ་བཛྲ་སྥོ་ཊ་མ་ཧཱ་ཀྲོདྷ་བནྡྷ་བནྡྷ་སརྦ་ས་མ་ཡ་ཧཱུྃ་བཾ། ཨོཾ་བཛྲ་ཨཱ་བེ་ཤ་མ་ཧཱ་ཀྲོ་དྷ་ཨཱ་བེ་ཤ་ཡ་སརྦ་ས་མ་ཡེ་ཧཱུྃ་ཨཿ། དེ་ནས་འདིར་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་
འཁོར་ཆེན་པོའི་ཆོ་ག་རྒྱས་པར་བཤད་དོ། །དེ་ལ་དང་པོ་ཉིད་དུ་རྡོ་རྗེ་སློབ་དཔོན་བདག་ཉིད་རྡོ་རྗེ་ཁྲོ་བོ་ཏི་རིནྟི་རིའི་ཕྱག་རྒྱ་བཅིངས་ཏེ་ཞུགས་ཤིག །ཞུགས་ནས་དེ་བཞིན་གཤེགས་པ་ཐམས་ཅད་ལ་གསོལ་བ་བཏབ་སྟེ། བཅོམ་ལྡན་འདས་བདག་ནི་དེ་བཞིན་གཤེགས་པ་ཐམས་ཅད་ཀྱི་ཁྲོ་
བོའི་དབང་དུ་མཆིས་ཏེ། ཚར་གཅད་པའི་རིགས་པ་རྣམས་ནི་ཚར་གཅད་དོ། །བསྡུ་བའི་རིགས་པ་རྣམས་ནི་བསྡུ་བ་ནི་ཇི་ལྟར་བགྱི་བ་བཅོམ་ལྡན་འདས་རྣམས་ཀྱིས་བདག་ལ་བཀའ་སྩལ་དུ་གསོལ་ཞེས་བྱས་ནས། རྡོ་རྗེ་ཁྲོ་བོ་ཏི་རིནྟི་རིའི་ཕྱག་རྒྱ་རང་གི་སྙིང་གར་ཇི་ལྟ་བ་བཞིན་དུ་བཞག་སྟེ། རྡོ་རྗེ་

ལྕགས་ཀྱུ་ལ་སོགས་པས་ལས་བྱས་ནས་ཡང་དམ་ཚིག་ཐམས་ཅད་ཀྱི་ཕྱག་རྒྱ་བཅིངས་ཤིག་དང་དེས་ན་ཐམས་ཅད་བྱོན་པར་འགྱུར་རོ། །དེ་ནས་ཡང་གསང་བའི་མཆོད་པ་བཞི་བྱས་ནས་བདུག་པ་ལ་སོགས་པ་ཡང་དེ་བཞིན་ནོ། །དེ་ནས་ཆོ་ག་འདིས་རྡོ་རྗེ་སློབ་མ་ཆུག་ཅིག །རྡོ་རྗེ་སློབ་དཔོན་
རང་གིས་རྡོ་རྗེ་ཁྲོ་བོ་ཏི་རིནྟི་རིའི་ཕྱག་རྒྱ་བཅིངས་ཏེ། སློབ་མ་ཡང་སྙིང་པོ་འདི་དག་འཆིང་དུ་ཆུག་ཅིག །ཨོཾ་གྲྀཧྞ་བཛྲ་ས་མ་ཡ་ཧཱུྃ་བཾ། དེ་ནས་གོས་སྔོན་པོ་བགོས་ལ་མགོ་ལ་གཙུག་ཏོར་སྔོན་པོས་བཅིངས་ཏེ། དར་སྔོན་པོས་གདོང་དཀྲིས་ལ་སྔགས་འདིས་ཆུག་ཅིག །ཨོཾ་བཛྲ་སམ་ཡཾ་པྲ་བེ་ཤཱ་མེ། དེ་ནས་
བཅུག་སྟེ་རྡོ་རྗེ་དབབ་པའི་དམ་ཚིག་གི་ཕྱག་རྒྱ་དང་སྙིང་པོ་འདིས་དེ་ལ་དབབ་པར་གྱིས་ཤིག །ཨོཾ་བཛྲ་ཨཱ་བེ་ཤ་ཨཱཿ། དེ་ནས་བབས་ནས་དེ་ལྟར་བབས་པའི་ཕྱིར་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་སོ། །འདས་པ་དང་མ་འོངས་པ་དང་ད་ལྟར་ཐམས་ཅད་ཀྱང་སྐད་ཅིག་གིས་ཤེས་
སོ། །གནོད་པ་ཡང་མེད་པར་གྱུར་ཏོ། །དེ་ཐམས་ཅད་ཀྱིས་མི་ཚུགས་པར་གྱུར་ཏོ། །ཧཱུྃ་ཞེས་བྱ་བས་ཀྱང་སེམས་ཅན་ཐམས་ཅད་ཚར་གཅད་པ་དང་ཕན་གདགས་པར་བྱེད་ནུས་པར་གྱུར་ཏོ། །ཕྱག་ན་རྡོ་རྗེ་ཡང་རྟག་ཏུ་དེའི་དགོས་པ་ཐམས་ཅད་སྒྲུབ་བོ། །དེ་ནས་མནའི་སྙིང་པོ་བྱིན་ཅིག །དེ་ནས་
གདོང་གཡོགས་པ་བཀྲོལ་ཏེ། དཀྱིལ་འཁོར་ཆེན་པོ་ཇི་ལྟ་བ་བཞིན་དུ་སྟོན་ཅིག །དཀྱིལ་འཁོར་ཆེན་པོ་མཐོང་བ་ཙམ་གྱིས་སྡིག་པ་ཐམས་ཅད་ལས་གྲོལ་བར་གྱུར་ཏོ། །འཇིག་རྟེན་གསུམ་པོ་མཐའ་དག་ལས་རྣམ་པར་རྒྱལ་བར་ནུས་པར་གྱུར་ཏོ། །ཧཱུྃ་ཞེས་བྱ་བས་ལྷ་ཆེན་པོ་ལ་སོགས་པ་
ལྷ་ཐམས་ཅད་དགུག་པ་དང་གཞུག་པ་དང་བཅིང་བ་དང་དབང་དུ་བྱ་བ་དང་མནན་པ་ནུས་པར་གྱུར་ཏོ། །དེ་བཞིན་གཤེགས་པ་ཐམས་ཅད་ཀྱི་བྱིན་གྱིས་བརླབས་ཀྱིས་ཀྱང་། བཅོམ་ལྡན་འདས་བྱང་ཆུབ་སེམས་དཔའ་ཕྱག་ན་རྡོ་རྗེ་རྟག་ཏུ་འབྲང་ཞིང་རང་གི་དངོས་གྲུབ་སྦྱིན་པར་མཛད། དེ་ནས་དེ་
ལ་རྡོ་རྗེའི་དབང་བསྐུར་བས་དབང་བསྐུར་ཏེ། རང་གི་མཚན་མ་རྡོ་རྗེ་རྣོན་པོ་ཇི་ལྟ་བ་བཞིན་དུ་སྔགས་འདིས་ལག་པ་གཉིས་སུ་སྦྱིན་ནོ། །ཨོཾ་བཛྲ་པཱ་ཎི་བཛྲ་ཀརྨ་ཀ་རོད་བྷ་བ། དེ་ནས་སྔགས་འདིས་རྡོ་རྗེ་མིང་གི་དབང་བསྐུར་ཏོ། །བཛྲ་ཀྲོ་དྷ་ཏྭཾ་ཨ་བྷི་ཥིཉྩཱ་མི། བཛྲ་ནཱ་མ་ཨ་བྷི་ཥེ་ཀ་ཏ་ཧེ་བཛྲ་ནཱ་མ། དེ་ནས་

གང་ལ་མིང་གང་བཏགས་པ་དེ་ལ་ཀྱེ་ཞེས་བྱ་བའི་སྒྲ་དང་སྦྱར་བར་བྱའོ། །དེ་ནས་ཡེ་ཤེས་རྣམས་བསྐྱེད་དེ། །རྡོ་རྗེ་ཁྲོ་བོར་མཉམ་བཞག་ནས། །འབར་བ་མང་པོའི་འོད་ཅན་གྱི། །རྡོ་རྗེའི་དབྱིབས་ནི་སྟིང་གར་བསམ། །སྐྱེ་བོ་ཀུན་ལ་འབེབས་པར་བྱེད། །རྡོ་རྗེ་ཁྲོ་བོར་མཉམ་
བཞག་ནས། །དཔྲལ་བར་རྡོ་རྗེ་རིན་ཆེན་ཡང་། །དེ་བཞིན་དུ་ནི་བསམ་བྱས་ནས། །སེམས་ཅན་ཐམས་ཅད་དབང་དུ་བྱེད། །རྡོ་རྗེ་ཁྲོ་བོར་མཉམ་བཞག་ནས། །འབར་བའི་ཕྲེང་བ་མང་པོའི་འོད། །རྡོ་རྗེ་པདྨ་མགུལ་དུ་བསམ། །སེམས་ཅན་ཐམས་ཅད་རླག་པར་བྱེད། །རྡོ་རྗེ་ཁྲོ་བོར་མཉམ་
བཞག་ནས། །འབར་བའི་ཕྲེང་བ་མང་པོའི་འོད། །རྡོ་རྗེ་ཐམས་ཅད་སྤྱི་བོར་བཞག །སྐྱེ་བོ་དེ་དག་ཐམས་ཅད་སྲུང་། །དེ་ནས་ཡེ་ཤེས་ཀྱི་ཕྱག་རྒྱ་དེ་རྣམས་ཀྱི་སྙིང་པོ་ནི་འདི་དག་ཡིན་ནོ། །ཧུྃ་སརྦ་བཛྲ་ཀྲོ་དྷ་ཨཱ་བེ་ཤ་ཨཿ། ཧོ་རཏྣ་བཛྲ་ཀྲོ་དྷ་བྷཱ་ཥ་མཱ་ན་ཡ་ཏྼཾ་ཧཱུྃ། བཛྲ་དྷརྨ་ཀྲོ་དྷ་ནཱ་ཤ་ཡ་ཕཊ། ཧཱུྃ་
ཀརྨ་བཛྲ་ཀྲོདྷ་རཀྵ། དེ་ནས་ལྷ་རྣམས་དགུག་པའི་ཡེ་ཤེས་ཀྱི་ཕྱག་རྒྱ་བསླབ་པོ། །ཧཱུྃ་ཞེས་བྱ་བ་བཅིངས་ནས་ནི། །ལག་པ་རྡོ་རྗེ་ལྕགས་ཀྱུར་བསམ། །ཁྲོས་ནས་མཛུབ་མོ་བསྐུལ་བ་ནི། །ལྷ་རྣམས་དགུག་པའི་མཆོག་ཏུ་འགྱུར། །རང་གི་རྐང་མཐིལ་དབུས་སུ་ནི། །རྡོ་རྗེ་ལྕགས་ཀྱུ་
བྲིས་ནས་སུ། །དེ་ཉིད་ཀྱིས་ནི་རྟག་མནན་ན། །ལྷ་རྣམས་ངེས་པ་ཉིད་དུ་དགུག། །རྡོ་རྗེ་ལྕགས་ཀྱུ་ཉིད་ཕྱག་རྒྱ། །ལེགས་པར་ཕྱེ་སྟེ་བཞག་ནས་སུ། །བསྐུལ་ནས་ཨུ་མ་ལ་སོགས་པ། །བུད་མེད་ཐམས་ཅད་འགུགས་པར་བྱེད། །རྡོ་རྗེ་ལྕགས་ཀྱུ་བཞག་པ་ནི། །མཛུབ་མོ་ཉིད་དུ་དེ་བཞིན་དེ། །
དེས་མནན་ལྷ་ཡི་གང་ཡིན་པ། །དེ་ནི་འགུགས་པའི་དམ་པའོ། །དེ་དག་གི་སྙིང་པོ་ནི་འདི་ཡིན་ནོ། །ཨོཾ་བཛྲ་ཀྲོ་དྷ་ཨཱ་ཀརྵ་ཡ་ཧཱུྃ་ཕཊ། ཨོཾ་བཛྲ་ཀརྨ་ཨཾ་ཀུ་ཤ་ཀྲོདྷ་ཨཱ་ཀརྵ་ཡཾ་ཧུྃ་ཕཊ། ཨོ་བཛྲ་ཀྲོདྷ་དཎྜ་ཨཱ་གྲ་ཨཱ་ཀཪྵ་ཡ་ཧཱུཾ་ཕཊ། ཨོཾ་བཛྲ་ཀྲོ་དྷ་སི་གཙྪ་ཨཱ་ཀརྵ་ཡ་མི་ཏེ་བཛྲ་ས་མ་ཡ་མ་ནུ་སྨ་ར་ཧཱུྃ་
ཕཊ། དེ་ནས་ཕྱག་རྒྱ་རྣམ་བཞིའི་ཡེ་ཤེས་བསླབ་བོ། །བརྐྱང་ཞིང་བསྐུམ་པར་གནས་པ་ནི། །རྡོ་རྗེ་དབབ་པའི་ཚུལ་གྱིས་ནི། །ཧཱུྃ་ཙམ་གྱིས་ཀྱང་སྐད་ཅིག་གིས། །སྐྱེ་བོ་ཐམས་ཅད་འབེབས་པར་བྱེད། །རྡོ་རྗེ་དག་ནི་ལེགས་པར་སྨྲས། །ཧཱུྃ་ཞེས་བྱ་བ་བཞི་ལྡན་པས། །སངས་རྒྱས་ཀུན་གྱི་སྙིང་པོ་ཡིས། །

ཐམས་ཅད་ཀྱང་ནི་ངེས་པར་འགུགས། །རྡོ་རྗེ་ཁྲོ་བོར་མཉམ་བཞག་ནས། །རྡོ་རྗེ་ཁྲོ་བོའི་ལྷ་མཆོག་གིས། །སྐྱེ་བོ་ཐམས་ཅད་གསོད་བྱེད་ཅིང་། །རྡོ་རྗེ་ཧཱུྃ་གི་རྣལ་འབྱོར་ཏོ། །ཡིད་ཀྱིས་ལུས་ལ་གོ་བགོ་བ། །བདག་གམ་ཕ་རོལ་རྣམས་ལ་སྟེ། །གོ་ཆ་ཆེན་པོའི་སྦྱོར་བས་ནི། །སྐྱེ་བོ་དེ་དག་ཐམས་
ཅད་བསྲུང་། །དེ་ནས་དེ་དག་གི་སྙིང་པོ་ནི་འདི་དག་ཡིན་ནོ། །ཨོཾ་བཛྲ་ཀྲོ་དྷ་ཀཱ་ཡ་ཨཱ་བེ་ཤ་ཡ་ཧཱུྃ་ཕཊ། ཨོཾ་བཛྲ་བི་དྱོཏྟ་མ་མ་ཧཱ་ཀྲོ་དྷ་ཨཱ་ན་ཡ་ཧོ་བྷ་ག་བཱན་བཛྲ་ཧཱུྃ་ཕཊ། ཨོཾ་བཛྲ་ཀྲོ་དྷ་ཏིཥྛ་ཧ་ན་ད་ཧ་པ་ཙ་བི་ནཱ་ཤ་ཡ་ཧཱུྃ་ཀ་རེ་ཎ་པཱ་ཏ་ཡ་བཛྲ་ས་མ་ཡ་ཧཱུྃ་ཕཊ། ཨོཾ་མ་ནོ་དྲྀ་ཌྷ་བཛྲ་ཀ་བ་ཙ་ཀྲོ་དྷ་རཀྵ་ཧཱུྃ་ཕཌ།
དེ་ནས་སེམས་ཅན་ཐམས་ཅད་རྒྱས་བཏབ་པའི་ཕྱག་རྒྱའི་ཡེ་ཤེས་དང་། རྡོ་རྗེ་ཁྲོ་བོར་མཉམ་བཞག་ནས། །བཛྲ་ཧཱུྃ་ཞེས་བཟླས་པ་ཡིས། །གང་དང་གང་ལ་ཀུན་ཞུགས་པ། །ཕྱག་རྒྱས་བཏབ་པར་དེ་གྱུར་ཏོ། །སྒྲ་ཆེན་དུ་ནི་བརྗོད་པར་བྱ། ཌཀྐི་ཧཱུྃ་ཕཌ། ཁྲོས་ནས་ལན་ཅིག་གང་ལ་སྨྲས། །
རྡོ་རྗེ་འབར་བས་དེ་མངོན་བཀུག །རྡོ་རྗེ་ཁྲོ་བོའི་ཏིང་འཛིན་ཅིང་། །རྡོ་རྗེའི་ལྟ་བས་བལྟས་པ་ཡིས། །སེམས་ཅན་གང་དང་གང་ཡིན་པ། །དེ་དང་དེ་ནི་འཆི་བར་འགྱུར། །གསོད་སྙོམ་ཡིད་ལ་བསམས་ནས་སུ། །སྙིང་གར་རྡོ་རྗེ་སྒོམ་པར་བྱེད། །ཧཱུྃ་ཞེས་བྱ་བ་ཡིད་ཀྱིས་སུ། །རང་གི་རྒྱས་ནི་
འདེབས་པར་དགོངས། །སེམས་ཅན་གང་ལ་གང་གིས་སུ། །ཡིད་ཀྱི་རྒྱས་ནི་འདེབས་པ་འདི། །ཕྱག་རྒྱ་འདིས་ནི་ཤིན་ཏུ་ཡང་། །ལས་རྣམས་ཐམས་ཅད་བསྒྲུབ་པར་བྱ། །དེ་ནས་དེ་དག་གི་སྙིང་པོ་ནི་འདི་དག་གོ། །ཊཀྐིཨ། ཊཀྐི་ཛ། ཊཀྐི་ཧཱུྃ། ཌཀྐི་ཧྃ། ཕྱག་རྒྱ་རེ་རེས་ཀྱང་ལས་བཞི་རྣམས་ལ་ཕྱག་
རྒྱའི་སྙིང་པོ་བཞིས་སྦྱར་རོ། །དེ་ནས་གསང་བ་ཁྲོ་བོའི་ཕྱག་རྒྱའི་ཡེ་ཤེས་བསླབ་བོ། །ཡན་ལག་ཀུན་གྱིས་འཁྱུད་ནས་ནི། །ཧཱུྃ་ཞེས་ཡུལ་ལ་སྦྱར་བྱ་བ། །དབང་པོ་གཉིས་ནི་སྤྲད་བྱས་ནས། །དེ་ཡི་སྲོག་ནི་མ་རུང་འགྱུར། །ཧཱུྃ་ཞེས་བྱ་བར་ལྡན་པ་ཡིས། །མཆུ་སྤྲད་སོས་ནི་མཆུ་བཟུང་ནས། །
དབང་པོ་གཉིས་ནི་རབ་སྤྲད་པ། །གང་ཡིན་དེ་ནི་མངོན་སུམ་འགྱུར། །ཧཱུྃ་ཞེས་སྦྱོར་བ་གང་ཡིན་པ། །དེ་ནི་བདེ་བ་མྱོང་བར་འགྱུར། །དབང་པོ་གཉིས་ནི་སྤྲད་གྱུར་ན། །གང་ཡིན་དེ་ནི་སྡུག་བསྔལ་འཐོབ། །ཧཱུྃ་ཞེས་བྱ་བ་རབ་སྦྱོར་ཞིང་། །དབང་པོ་གཉིས་ནི་སྤྲད་ནས་ཀྱང་། །ཡན་ལག་ཀུན་གྱིས་

བཙིར་གྱུར་ན། །དེ་ཡི་ལུས་ནི་བསྲུངས་པར་འགྱུར། །དེ་ནས་དེ་དག་གི་སྙིང་པོ་ནི་འདི་དག་གོ། །ཧཱུྃ་ཨ། ཧཱུྃ་ཛ། ཧཱུྃ་ཧོ། ཧཱུྃ་ཧཾ། ཧཱུྃ་ཧེ། དེ་ནས་འཇིག་རྟེན་གསུམ་ལས་རྒྱལ་བའི་དཀྱིལ་འཁོར་ཆེན་པོའི་དམ་ཚིག་དེ་ཉིད་ཀྱི་ཕྱག་རྒྱའི་ཡེ་ཤེས་བསླབ་བོ། །གང་གིས་སེམས་ཅན་ཕན་
པའི་ཕྱིར། །རྡོ་རྗེ་དབྱིངས་ཀྱི་ཚུལ་གྱིས་ནི། །སངས་རྒྱས་རྗེས་སུ་དྲན་བྱས་ན། །དེ་ནི་སངས་རྒྱས་འཐོབ་པར་འགྱུར། །དབང་ཕྱུག་དང་ནི་ཨུ་མ་ཡང་། །ས་ལ་བྲིས་ཏེ་དེ་ལྟར་གནན། །ཇི་ལྟར་བྲིས་པའི་གོ་རིམས་བཞིན། །སེམས་དཔའི་ཕྱག་རྒྱ་བཅིང་བར་བྱ། །དེ་ནི་བཅིངས་པ་ཙམ་གྱིས་
ཀྱང་། །དེ་ནི་འཇིག་རྟེན་གསུམ་རྒྱལ་བ། །རྡོ་རྗེ་ཧཱུྃ་དང་འདྲ་བ་ཡི། །དངོས་གྲུབ་རྫུ་འཕྲུལ་མྱུར་དུ་འགྲུབ། །ཇི་ལྟར་རི་མོར་བྲིས་པ་བཞིན། །འབར་བས་བསྐོར་བའི་དབུས་བཞུགས་པ། །སྐུ་གསུང་ཐུགས་ནི་རྡོ་རྗེ་ཡིས། །སེམས་དཔའི་ཕྱག་རྒྱ་བཅིང་བར་བྱ། །དེ་ནས་དེ་རྣམས་ལས་བཤད་
དེ། །རྡོ་རྗེ་ལས་ནི་བླ་ན་མེད། །སངས་རྒྱས་རྗེས་སུ་དྲན་གྲུབ་པས། །མྱུར་དུ་སངས་རྒྱས་ཉིད་འཐོབ་བོ། །འཇིག་རྟེན་གསུམ་ལས་རྒྱལ་བཅིངས་ན། །འཇིག་རྟེན་གསུམ་ལས་རྣམ་རྒྱལ་འགྱུར། །རྡོ་རྗེ་ཆེ་དང་ཀུན་དུ་འགྲོ། །རྡོ་རྗེ་ཧཱུྃ་ཞེས་བྱ་བ་འདྲ། །རྡོ་རྗེ་དབང་གིས་རྒྱལ་པོར་འགྱུར། །
ཆོས་བཟང་ལྡན་པས་འཇིག་རྟེན་དབང་། །ལས་ཀྱི་རྡོ་རྗེ་ཁྲོ་བོ་ཆེ། །རྡོ་རྗེ་ལས་ནི་བྱེད་པར་འགྱུར། །སེམས་དཔའ་ཁྲོ་བོར་རབ་ཏུ་བརྟན། །ཁྲོ་བོའི་ལྕགས་ཀྱུས་ཡང་དག་འགུགས། །ཁྲོ་བོ་ཆགས་པས་ཆགས་པར་བྱེད། །ཁྲོ་བོ་ལེགས་པས་དགའ་བ་སྟེར། །ཁྲོ་གཉེར་གྱིས་ཀུན་མ་རུངས་
བྱེད། །ཁྲོ་བོ་ཉི་མས་གཟི་བརྗིད་མཆོག །དཔལ་གྱི་ཁྲོ་བོ་དོན་རྣམས་སྡུད། །ཧ་ཧ་དགོད་པས་བདུད་བྱེད་དོ། །ཆོས་ཀྱི་ཁྲོ་བོས་ཆོས་རྣམས་བདུད། །རྡོ་རྗེ་རལ་གྲིས་གཅོད་པ་སྟེ། །རྒྱུ་ཡི་ཁྲོ་བོ་སྡུག་བསྔལ་འཕྲོག །ཁྲོ་བོ་སྨྲ་བས་ཚིག་འཕྲོག་གོ །ལས་ཀྱི་ཁྲོ་བོ་ལས་རབ་སྟེ། །སྲུང་བ་ཡིས་
ནི་སྲུང་བར་བྱེད། །ཁྲོ་བོ་གནོད་སྦྱིན་དགྲ་ཡང་ཟ། །ཁྲོ་བོའི་ཁུ་ཚུར་དངོས་གྲུབ་སྟེར། །དེ་ནས་རྡོ་རྗེ་དམ་ཚིག་གི་ཕྱག་རྒྱ་བཅིང་བ་བཤད་དོ། །རྡོ་རྗེ་གཉིས་སུ་གྱུར་བ་སྟེ། །དམ་ཚིག་མཆོག་ཏུ་གྲགས་པ་ཡིན། །དེ་དག་བཅིང་བ་བཤད་པར་བྱ། །ཁྲོ་བོའི་བཅིང་བ་བླ་ན་མེད། །ལག་ངར་རྡོ་རྗེར་བྱས་ནས་

ནི། །མཐེའུ་ཆུང་ལྕགས་ཀྱུར་བཅིང་བར་བྱ། །མཛུབ་མོ་གཉིས་ཀྱིས་བསྡིགས་པ་ནི། །འཇིག་རྟེན་གསུམ་ལས་རྒྱལ་ཞེས་བྱ། །དེ་བཞིན་མཛུབ་མོ་ངོས་སྦྱར་ཏེ། །ནོར་བུ་འདྲ་བར་རབ་ཏུ་དགུག །གུང་མོ་མཉམ་བསྒྲེང་པདྨར་བྱ། །གུང་མོ་མཛུབ་མོ་གཉིས་ཀས་བསྡིགས། །མཛུབ་མོ་གཉིས་
ཀ་རྡོ་རྗེར་བྱ། །གཡས་པ་ལྕགས་ཀྱུར་དགུག་པར་བྱ། །དེ་ཉིད་ཧཱུྃ་ཞེས་བྱ་བར་མདུད། །ལེགས་པ་སྦྱིན་པར་དེ་བཞིན་ཏེ། །མཛུབ་གཉིས་དཔྲལ་བའི་གཉེར་མར་བཞག །སྙིང་གར་མཛུབ་མོས་ཉི་མར་བསྐོར། །ལག་པ་བརྐྱང་སྟེ་སྤྱི་བོར་བཞག །མཛུབ་མོ་ཁ་ནས་དགོད་ལྟར་བྱ། །མཛུབ་
མོའི་སེན་མོ་སྦྱར་བ་སྟེ། །གཡས་པས་རལ་གྲི་བཅིངས་པའོ། །གུང་མཛུབ་མཉམ་བསྒྲེང་འཁོར་ལོ་ཡི། །ཁ་ཡི་ནང་ནས་དབྱུང་བ་དང་། །མཛུབ་མོ་གུང་མོ་རྡོ་རྗེར་བྱ། །མཛུབ་མོ་གཉིས་ནི་མཆེ་བ་ཆེ། །མཛུབ་མོ་བཀུག་པ་རྡོ་རྗེར་བཅིངས། །རྡོ་རྗེ་ལཱ་སྱེ་ལ་སོགས་པ། །སེམས་མའི་
ཕྱག་རྒྱས་དེ་ཉིད་ཧཱུྃ། །ཞེས་དབྱེ་ཆོས་ཀྱི་ཕྱག་རྒྱ་དེ། །ཧཱུྃ་ཞེས་བྱ་བར་ལྷན་ཅིག་གོ། །དེ་ནས་རྡོ་རྗེའི་དམ་ཚིག་གི་ཆོས་ཀྱི་ཕྱག་རྒྱ་རྣམས་བཤད་དོ། །ཧཱུྃ་ནི་སངས་རྒྱས་རྡོ་རྗེ་ཡི། །ཏཱཾ་ནི་རྡོ་རྗེ་སྙིང་པོ་ཡི། །ཧྲཱི་ནི་རྡོ་རྗེ་སྡེ་ཡིའོ། །ཨ་ནི་རྡོ་རྗེ་ཐམས་ཅད་ཀྱི། །ཧཱུྃ་ཧེ། ཏྲཾ། ཏྃ། ཧི་ཧི་དེ་ཧ། བྷིཀ་
དྷི་ཧཱུྃ། གྲཱ། ཀྲིཔཾ། དྲྀ་ཨ། རྡོ་རྗེ་ཁྲོ་བོ་མང་པོ་ཡི། །ཆོས་ཀྱི་ཕྱག་རྒྱ་རབ་འགྲུབ་པའོ། །དེ་ནས་རྡོ་རྗེ་དམ་ཚིག་གི་ལས་ཀྱི་ཕྱག་རྒྱ་རྣམས་བཤད་དོ། །རྡོ་རྗེའི་རིགས་ནི་ཆེན་པོ་ཡི། །ལས་ཀྱི་ཕྱག་རྒྱ་མདོར་བསྡུས་ན། །རྡོ་རྗེ་འགྱིང་ལ་སོགས་ཚུལ་གྱིས། །ཁྲོ་བོའི་ཁུ་ཚུར་གཉིས་སུ་བཤད། །གང་
དང་གང་གི་ཕྱག་རྒྱ་རྣམས། །ལས་ཀྱི་ཕྱོགས་ནི་གང་དུ་བྱ། །དེ་དང་དེར་ནི་བསྒྱུར་ནས་ཀྱང་། །ཕྱག་རྒྱ་དེ་ནི་སྦྱར་བར་བྱ། །ཕྱག་རྒྱ་ཐམས་ཅད་ཀྱི་ཆོ་གའོ། །དེ་ནས་འདིར་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོའི་སྤྱིའི་ཕྱག་རྒྱ་བཅིང་བ་བཤད་དོ། །འཇིག་རྟེན་
གསུམ་རྒྱལ་ཕྱག་རྒྱ་ནི། །རྡོ་རྗེ་མཛུབ་མོ་དམ་ཚིག་གི། །རྡོ་རྗེ་ཧཱུྃ་ཞེས་སྔགས་ཀྱི་སྟེ། །དངོས་གྲུབ་ཐམས་ཅད་ཡུད་ཀྱིས་འཐོབ། །མཐེའུ་ཆུང་གཉི་ག་ལྕགས་ཀྱུར་བཅིང་། །རྡོ་རྗེ་གཉི་གའི་བླ་འོག་ཏུ། །དམ་ཚིག་ལྕགས་ཀྱུའི་ཕྱག་རྒྱ་དེ། །སྐད་ཅིག་གིས་ནི་ཐམས་ཅད་འགུགས།

རིག་པ་དམ་པ་ཐམས་ཅད་ཀྱི། །འཇིག་རྟེན་གསུམ་ལས་རྒྱལ་ཞེས་བཤད། །ཐམས་ཅད་ཀྱང་ནི་གནོད་པ་སྟེ། །དེ་བཞིན་ལས་རྣམས་ཐམས་ཅད་བྱེད། །རྡོ་རྗེ་མཛུབ་སོར་གཉིས་ལེགས་པར། །རབ་མཉམ་བཞག་པས་མཉམ་ནས་ནི། །ཤི་བ་ཐམས་ཅད་སློང་བ་
སྟེ། །རྡོ་རྗེ་སློང་བ་ཞེས་བྱའོ། །རྡོ་རྗེ་གཉིས་ཀ་ལེགས་པར་ནི། །རྡོ་རྗེ་བཅིང་བས་བཅིངས་ནས་སུ། །བཟློག་སྟེ་གཙུག་ཏུ་བཞག་པ་ནི། །ཚེ་དང་ནད་མེད་འཕེལ་བའོ། །རྡོ་རྗེ་བཅིང་བ་དམ་བྱས་ཏེ། །མཐེ་བོ་བསྙམས་ནས་ནང་དུ་གཞུག །མཛུབ་མོ་དམ་པོར་བཀུག་ནས་སུ། །བཅུག་
པ་རྐང་པར་འགུགས་པའོ། །འཇིག་རྟེན་གསུམ་རྒྱལ་བཅིངས་ནས་སུ། །གང་གི་གཟུགས་ལ་རྐང་གཡོན་པས། །ལེགས་པར་མནན་པའི་སེམས་ཅན་དེ། །ཟླ་བ་ཕྱེད་ཀྱིས་གྲུབ་པར་འགྱུར། །རྡོ་རྗེ་ཕྱག་རྒྱ་གཉིས་བཅིངས་ཏེ། །གཅིག་ལ་གཅིག་ནི་བརྡབས་ན་ནི། །སེམས་ཅན་
གང་གི་ལུས་ལ་ནི། །བབས་ན་དེ་ཡང་རྡོབ་པར་བྱེད། །རྡོ་རྗེ་ཕྱག་རྒྱ་གཉིས་བཅིངས་ཏེ། །བདག་གམ་ཕ་རོལ་གོ་ཆར་བྱ། །མཛུབ་མོ་གཉིས་ཀྱིས་བཅིངས་བྱས་ན། །ངེས་པ་ཉིད་དུ་སྲུང་བར་འགྱུར། །རྡོ་རྗེ་མཐིལ་དུ་བཅིངས་ནས་ཀྱང་། །ཡིད་ཀྱིས་ཁྲོས་ནས་དགབ་བྱ་བ། །མཐེ་བོ་རྡོ་
རྗེ་དམ་པོ་སྟེ། །རྡོ་རྗེ་རིགས་ཆེན་གྲུབ་པར་འགྱུར། །སེམས་དཔའ་རྡོ་རྗེ་སྲར་བྱ་སྟེ། །མཐེ་བོ་གཉིས་ཀས་གུང་མོ་མནན། །མཐེའུ་ཆུང་རྡོ་རྗེ་རྩེ་མོ་ནི། །རྣོན་པོར་དམ་ཚིག་འཛིན་པའོ། །རྡོ་རྗེ་ཕྱག་རྒྱ་གཉིས་བཅིངས་ཏེ། །མཛུབ་མོ་གཉིས་བཀུག་བཅིངས་ནས་སུ། །གཅུ་ཞིང་ཕྱིར་གཅུ་
བྱས་པ་ནི། །ལྷ་དགུག་པ་ཡི་དམ་པ་ཡིན། །རྡོ་རྗེ་བཅིང་བ་དམ་བྱས་ཏེ། །མཛུབ་མོ་གཉིས་བཀུག་རབ་ཏུ་མནན། །མཐེ་བོ་གཉིས་ཀ་སྦྱར་བ་ཡིས། །དབུས་སུ་བཅིང་བ་བར་སྣང་གིའོ། །རྡོ་རྗེ་ཕྱག་རྒྱ་གཉི་ག་ལས། །མཐེའུ་ཆུང་གཉི་ག་བཅིངས་ནས་སུ། །རྒྱབ་སྦྱོར་མཛུབ་མོ་གཉིས་སྦྲེལ་ཏེ། །
བསྒྱུར་བ་མཁའ་ལ་སྤྱོད་པའིའོ། །རྡོ་རྗེ་བཅིངས་པ་བསྡམས་ནས་སུ། །རྡོ་རྗེ་སྲུང་བས་བཅིང་བར་བྱ། །དེ་ནི་ས་པའི་དམ་ཚིག་སྟེ། །ཐམས་ཅད་བྱེད་པས་འདའ་བར་དཀའ། །རྡོ་རྗེ་ཕྱག་རྒྱ་གཉིས་བཅིངས་ཏེ། །གཡོན་པའི་རྡོ་རྗེ་མཛུབ་མོ་ལ། །མཐེའུ་ཆུང་འཁྱུད་ཅིང་རྟག་ཏུ་གཏོགས། །

དེ་ནི་ས་འོག་འགུགས་པའོ། །རྡོ་རྗེ་བཅིངས་པས་སྦྲེལ་བ་ནི། །མཛུབ་མོ་གཉིས་ཀ་དམ་པོ་སྟེའོ། །གུང་མོ་མཐེ་བོ་རྡོ་རྗེར་ནི། །གདུག་པའི་ཕྱག་རྒྱ་འཇོམས་པའོ། །རྡོ་རྗེ་ཕྱག་རྒྱ་གཉིས་བཅིངས་ཏེ། །མཉམ་བཞག་སྟེ་ནི་སྙིང་གར་བཞག །ཁྲོ་བོ་ཁུ་ཚུར་གྱིས་བཙིར་བ། །
ཕྱི་རོལ་དཀྱིལ་འཁོར་འཇིག་པའོ། །གཡོན་པའི་རྡོ་རྗེ་མཛུབ་མོ་ལ། །གཡས་པའི་མཛུབ་མོ་བཀུག་པས་བཟུང་། །རབ་ཏུ་ཁྲོས་ནས་དྲག་གཏོགས་ན། །རི་རབ་ཀྱང་ནི་ལྷུང་བར་བྱེད། །གཡོན་པའི་རྡོ་རྗེ་མཛུབ་མོ་ལ། །གཡས་པའི་མཛུབ་མོ་ལྕགས་ཀྱུས་བཟུང་། །རབ་
ཏུ་ཁྲོས་ཤིང་བཀུག་པ་ཡིས། །གདོན་རྣམས་ཀུན་ལ་དབང་དུ་བྱེད། །རྡོ་རྗེ་བཅིང་བ་བྱས་ནས་སུ། །ལག་ངར་སྙིང་གར་ཤིན་ཏུ་བསྡམས། །རྡོ་རྗེ་མཛུབ་མོས་ཉིད་མཆན་ཁུང་། །བྲུད་པ་ཡིས་ནི་སྙིང་སྦྱིན་ནོ། །མཛུབ་མོ་གཉིས་ཀྱི་རྩེ་མོ་ཡིས། །མཐེ་བོང་གཉིས་ཀྱི་དྲུང་དུ་ནི། །ཡིད་
ཀྱིས་ཁྲོས་ནས་བཙིར་བ་བྱ། །རིམས་ལ་སོགས་དགུག་དམ་པའོ། །རྡོ་རྗེ་ཐལ་མོ་དམ་སྦྱར་ཏེ། །མཛུབ་མོ་གཉི་ག་བཀུག་ནས་སུ། །མཐེ་བོ་རབ་ཏུ་མཉམ་སྦྱར་བས། །མནན་པ་དེ་ནི་སྡིག་འཕྲོག་པའོ། །རྡོ་རྗེའི་ཕྱག་རྒྱ་གཉིས་ནང་དུ། །མཛུབ་མོ་གཉིས་ནི་སྦས་ནས་ཀྱང་། །
ལེགས་པར་གྱེན་དུ་འཕངས་པ་ནི། །ལྷུང་བ་སློང་བའི་དམ་པའོ། །རྡོ་རྗེ་བཅིང་བ་དམ་བྱས་ཏེ། །གུང་མོ་གཉིས་ཀ་ངོས་སྦྱར་ཏེ། །ཐ་མ་བཞི་ཡི་ངོས་སྤྲད་པ། །སྐད་ཅིག་ཏུ་ནི་སྡིག་འདྲལ་ལོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་ཆེན་པོ་བསྒྲུབ་པའི་ཕྱག་རྒྱ་
བཅིང་བ་བཤད་དོ། །རྡོ་རྗེའི་ཕྱག་རྒྱས་བཟུང་ནས་ནི། །དཀྱིལ་འཁོར་དང་པོར་སྲད་བུ་བྲེ། །སྲད་བུ་བྲེས་ལ་ཕྱི་ནས་ནི། །སྲད་བུ་ཇི་བཞིན་བྲེ་བ་བཤད། །རྡོ་རྗེ་ཕྱག་རྒྱ་གཉི་ག་ཡིས། །མཛུབ་མོའི་རྩེ་མོར་རབ་སྦྱར་བ། །བྱས་ནས་མཚོན་རྣམས་ཐམས་ཅད་ལ། །འབར་བའི་ལྟ་བས་
དགུག་པར་བྱ། །རྡོ་རྗེའི་མཛུབ་མོས་ལེགས་པར་ནི། །སྦྱར་ལ་བཀན་ཏེ་བསྡམས་ནས་སུ། །རབ་ཏུ་ཁྲོས་ནས་དབྱེ་བ་ནི། །སྒོ་དབྱེ་བ་ཡི་མཆོག་ཡིན་ནོ། །དེ་ནས་རྡོ་རྗེ་རིགས་རྣམས་ཀྱི་ཕྱག་རྒྱ་ཐམས་ཅད་བསྒྲུབ་པ་བཤད་དོ། །གཡོན་བརྐྱང་བ་ཡི་ཚུལ་བྱས་ཏེ། །ཁྲོ་བོ་ཡི་ནི་སྐད་འབྱིན་ཅིང་།།

ཁྲོ་བའི་བལྟ་བས་བལྟས་ན་ནི། །ལས་རྣམས་ཐམས་ཅད་སྒྲུབ་པར་བྱེད། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་དམ་ཚིག་གི་རྟོག་པ་ཆེན་པོའི་རྒྱལ་པོ་ལས་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོའི་ཆོ་ག་རྒྱས་པ་རྫོགས་སྷོ།། །།
བམ་པོ་ལྔ་པ། དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་གཟུངས་ཀྱི་དམ་ཚིག་འབྱུང་བའི་རྡོ་རྗེའི་བྱིན་བརླབས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་རང་གི་རིག་པའི་དམ་པ་འདི་གསུངས་སོ། །ཨོཾ་སརྦ་བཛྲི་ཎི། བཛྲ་མཱ་ཏེ་ཨཱ་ན་ཡ། སརྦ་བཛྲ་
སཏྱེ་ན་ཧཱུྃ་ཛ། དེ་ནས་དེ་གསུངས་པ་ཙམ་གྱིས་ཕྱག་ན་རྡོ་རྗེའི་ཐུགས་ཀ་ནས། བཅོམ་ལྡན་འདས་ཕྱག་ན་རྡོ་རྗེ་དེ་ཉིད་ཕྱག་ན་རྡོ་རྗེ་དྲ་བ་བདག་གིས་ལུས་ཐམས་ཅད་འབར་བའི་སྒོ་ནས། རྡོ་རྗེ་ཁྲོ་བོ་གསང་བའི་དམ་ཚིག་གི་ཕྱག་རྒྱའི་ལྷ་མོ་རྣམས་སུ་གྱུར་ནས་བྱུང་སྟེ། འཇིག་རྟེན་
གྱི་ཁམས་ཐམས་ཅད་དུ། དེ་བཞིན་གཤེགས་པ་ཐམས་ཅད་ཀྱི་དོན་བསྒྲུབས་ནས། བཅོམ་ལྡན་འདས་རྡོ་རྗེ་སེམས་དཔའི་བཙུན་མོ་གསང་བ་སྦ་བའི་ཕྱིར། སྐུ་དང་གསུང་དང་ཐུགས་རྡོ་རྗེའི་ཕྱག་རྒྱའི་གཟུགས་སུ་གྱུར་ནས། བཅོམ་ལྡན་འདས་རྣམ་པར་སྣང་མཛད་ཀྱི་འཇིག་རྟེན་གསུམ་
ལས་རྣམ་པར་རྒྱལ་བའི་དཀྱིལ་འཁོར་ཆེན་པོའི་ཚུལ་གྱིས་ཟླ་བའི་དཀྱིལ་འཁོར་ལ་འདུག་ནས་ཆེད་དུ་བརྗོད་པ་འདི་ཆེད་དུ་བརྗོད་དོ། །ཨེ་མའོ་སངས་རྒྱས་ཐམས་ཅད་ཀྱི། །གསང་བའི་ཡེ་ཤེས་བླ་ན་མེད། །དེ་བཞིན་གཤེགས་པ་བདེ་བའི་ཕྱིར། །བཙུན་མོ་ཉིད་དུ་གྱུར་པ་ཡིན། ཧྲཱིཿ།
དེ་ནས་ཡང་ཕྱག་ན་རྡོ་རྗེ་རང་གི་རིགས་ཀྱི་དམ་ཚིག་ཕྱག་རྒྱའི་དཀྱིལ་འཁོརརྡོ་རྗེ་གསང་བའི་དམ་ཚིག་ཅེས་བྱ་བ་འདི་གསུངས་སོ། །དེ་ནས་རབ་ཏུ་བཤད་བྱ་བ། །རྡོ་རྗེའི་དཀྱིལ་འཁོར་དམ་པ་སྟེ། །རྡོ་རྗེ་དབྱིངས་དང་འདྲ་བས་ན། །ཁྲོ་བོའི་གསང་བ་ཞེས་བཤད་དོ། །དཀྱིལ་འཁོར་
ཆེན་པོའི་ཚུལ་དུ་ནི། །དཀྱིལ་འཁོར་ཐམས་ཅད་སྲད་བུ་བྲེ། །དཀྱིལ་འཁོར་ལྔ་ཡི་གནས་རྣམས་སུ། །གསང་བའི་ཕྱག་རྒྱ་གཞག་པར་བྱ། །རྡོ་རྗེ་དཀྱིལ་འཁོར་དབུས་སུ་ནི། །སངས་རྒྱས་སྐུ་རྣམས་གཞག་པར་བྱ། །སངས་རྒྱས་ཁྲོ་བོ་དམ་ཚིག་ཀྱང་། །ཇི་བཞིན་པར་ནི་མཁས་

པས་བྲི། །རྡོ་རྗེ་ཤུགས་ཀྱིས་བརྒལ་ནས་ནི། །ཕྱག་ན་རྡོ་རྗེའི་དཀྱིལ་འཁོར་དེར། །དབུས་སུ་མདུང་རྩེ་མཆུར་བྲིས་ལ། །རྡོ་རྗེ་རབ་ཏུ་གཞག་བྱ་ཞིང་། །འོད་འབར་དབུས་སུ་བྲི་བར་བྱ། །དེ་ཡི་གོ་རིམས་ཇི་བཞིན་ཏེ། །རྡོ་རྗེ་རྡོ་རྗེ་ལྕགས་ཀྱུ་དང་། །མདའ་དང་དགའ་བ་དེ་བཞིན་
ནོ། །རྡོ་རྗེ་ཤུགས་ཀྱིས་བརྒལ་ནས་ནི། །དཀྱིལ་འཁོར་དམ་པ་གཉིས་པ་ཡང་། །འཁོར་ལོའི་དབུས་ན་གནས་པ་ཡི། །རྡོ་རྗེ་རིན་ཆེན་བྲི་བར་བྱ། །ཁྲོ་གཉེར་དབུས་སུ་རྡོ་རྗེ་བྲི། །དེ་བཞིན་རྡོ་རྗེ་ཉི་རྒྱལ་མཚན། །དེ་བཞིན་སོ་ཡི་ཕྲེང་བ་དེའི། །དངོས་སུ་རྡོ་རྗེ་བྲི་བར་བྱ། །རྡོ་རྗེ་
ཤུགས་ཀྱིས་བརྒལ་ནས་ནི། །དཀྱིལ་འཁོར་དམ་པ་གསུམ་པ་ཡང་། །པདྨའི་དབུས་སུ་གནས་པ་ཡི། །རྡོ་རྗེ་པདྨ་ལྷ་རྫས་བྲི། །འབར་བའི་དབུས་སུ་པདྨ་བྲི། །རལ་གྲི་འཁོར་ལོ་དེ་བཞིན་ནོ། །རྡོ་རྗེའི་ལྕེ་ཡང་ཚུལ་བཞིན་དུ། །རྟག་ཏུ་དེ་ཡི་ཕྱོགས་སུ་གཞག །རྡོ་རྗེ་ཤུགས་
ཀྱིས་བརྒལ་ནས་ནི། །དཀྱིལ་འཁོར་བཞི་པ་དམ་པར་ཡང་། །རྡོ་རྗེ་བསྙལ་ལ་རྡོ་རྗེ་བྲི། །རྡོ་རྗེའི་འོད་ནི་ཆེན་པོས་བསྐོར། །དེ་ཡི་ཕྱོགས་ནི་ཐམས་ཅད་དུ། །འབར་བ་ཀུན་གྱིས་དཀྲིགས་པའི་འོད། །རྡོ་རྗེ་ཐམས་ཅད་གོ་ཆ་མཆོག །རྡོ་རྗེ་མཆེ་བ་ཁུ་ཚུར་མཆོག །གྲྭ་དང་ཕྱི་ཡི་
གནས་རྣམས་ལ། །ཚུལ་བཞིན་དུ་ནི་བྲི་བར་བྱ། །དེ་ནས་རབ་ཏུ་བཤད་བྱ་བ། །ཕྱག་རྒྱ་རིག་པ་མདོར་བསྡུ་ན། ཛྷིཿ། ཨོཾ་བཛྲ་ཀྲོ་དྷེ་ས་མ་ཡེཛྷིཿ། ཨོཾ་བཛྲ་ཀྲོ་དྷེ་རོཥ་ཨཾ་ཀུ་ཤཨྭ་ན་ཡ་སརྦ་ན་ཛྷིཿ། ཨོཾ་བཛྲ་རོ་ཥེ་ཀཱ་མ། བཛྲི་ཎི་བ་ཤམྨེ་ཨཱ་ན་ཡ་ཧི་ཛྷིཿ། ཨོཾ་བཛྲ་དུཥྚ་ཀྲོ་དྷེ་ཏོ་ཥ་ཡ་སརྦ་
ན་ཛྷིཿ། རྡོ་རྗེ་ཛྷིཿཞེས་བྱ་བའི་དཀྱིལ་འཁོར་རོ། །ཛིཿ། ཨོཾ་བཛྲ་བྷྲྀ་ཀུ་ཤཱི་ཀྲོ་དྷེ་ཧ་ར་སརྦ་ཨརྠ་ན་ཛིཿ། ཨོཾ་བཛྲ་ཛྭཱ་ལ་མཱ་ལཱ་པྲ་བེ་ཤ་མ་ཧཱ་ཀྲོ་དྷ་ཨགྣི་ཛྭཱ་ལ་ཡ་སརྦ་ན་ར་བི་རོ་ཥེ་ཛིཿ། ཨོཾ་བཛྲ་དྷྭ་ཛ་ཨ་གྲེ་ཀེ་ཡཱུ་ར་མ་ཧཱ་ཀྲོདྷེ་དེ་ཧི་མེ་སརྦ་ཨ་རྠ་ན་ཛིཿ། ཨོཾ་བཛྲ་ཨཊྚཱ་ཧཱ་ས་ནི་ཧཱ་ས་ཧཱ་ས་ཨ་ཊྚཱ་ཏྚེ་ཧཱ་སེ་ན་མཱ་ར་
ཡ་ཛིཿ། རྡོ་རྗེ་ཛིཿཞེས་བྱ་བའི་དཀྱིལ་འཁོར་རོ། དིཿ། ཨོཾ་བཛྲ་ཤུདྡྷ་ཀྲོ་དྷེ་ཧ་ན་ཧ་ན་མཱ་ར་ཡ་དུཥྚ་ན་དིཿ། ཨོཾ་བཛྲ་ཏཱི་ཀྵྞ་ཀྲོ་དྷེ་ཙྪིནྡ། བཛྲ་ཀོ་ཥེ་ན། སརྦ་ནི་དེཿ། ཨོཾ་བཛྲ་ཧེ་ཏུ་མ་ཧཱ་ཀྲོ་དྷེ་པྲ་བེ་ཤ་ཙ་ཀྲ་པྲ་བེ་ཤ་ཡ་སརྦན་དིཿ། ཨོཾ་བཛྲ་ཛི་ཧཱ་མ་ཧཱ་ཀྲོདྷེ་བ་ཤེ་བ་ཙ་མུཉྩ་དིཿ། རྡོ་རྗེ་དིཿཞེས་བྱ་བའི་དཀྱིལ་འཁོར་

རོ། ཧྲཱིཿ། ཨོཾ་བཛྲ་སརྦན་མུ་ཁེ་ཀརྨ་བཛྲ་ཎི་མ་ཧཱ་ཀྲོ་དྷེ་ཀུ་རུ་ཀུ་རུ་སརྦ་ན་ཧྲཱིཿ། ཨོཾ་བཛྲ་ཀ་བཙ་ཀྲོ་དྷེ་ར་ཀྵ་མ་མ་ཧིཿ། ཨོཾ་བཛྲ་ཙཌྞ་ཀྲོ་དྷེ་མ་ཧཱ་ཡ་ཀྵི་ནི་བཛྲ་དཾཥྚ་ཀཱ་རཱ་ལ་བྷཱིཥ་ནེ་པ་ཡ་ཧིཿ། ཨོཾ་བཛྲ་ཀྲོ་དྷེ་མུཥྜི་བནྡྷ་ཧིཿ། རྡོ་རྗེ་ཧིཿཞེས་བྱ་བའི་དཀྱིལ་འཁོར་རོ། །དེ་ནས་དཀྱིལ་
འཁོར་གྱི་གྲྭ་རྣམས་སུ། རྡོ་རྗེ་གར་ལ་སོགས་པ་གསང་བའི་མཆོད་པའི་རིག་པའི་སྙིང་པོ་རྣམས་གསུངས་པ། ཨོཾ་བཛྲ་ཧཱུྃ་ཁེ། བཛྲ་ཧཱུྃ་གྷཱཾ། བཛྲ་ཧཱུྃ་ཏེ། བཛྲ་ཧཱུྃ་ཏྭཾ། ཕྱི་རོལ་གྱི་གྲྭ་རྣམས་སུ་སིལ་སྙན་གྱི་མཆོད་པའི་སྙིང་པོ་རྣམས་བརྗོད་པར་བྱའོ། །ཨོཾ་བཛྲ་ཏྲི་ཏེ། བཛྲ་ཌཾ་ཌ། བཛྲ་
དྷཱ་ཏུ། བཛྲ་ཌཽ་མྨུ་དྷ། དེ་ནས་སྒོ་བའི