Kinh tạng Tây Tạng (Kangyur Đại Học) — 084_རྒྱུད་འབུམ།_ཉ

འདས་དེ་བཞིན་
གཤེགས་པ་ཐམས་ཅད་ཡང་གཅིག་ཏུ་འདུ་བ་མཛད་དུ་གསོལ། དེ་ནས་ཡང་བཅོམ་ལྡན་འདས་དེ་བཞིན་གཤེགས་པ་ཐམས་ཅད་གཅིག་ཏུ་འདུས་ནས། བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་སུ་ཞུགས་སོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་
ཅད་རྣམ་པར་སྣང་མཛད་ཀྱིས་དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་རྡོ་རྗེར་བདག་ཉིད་དུ་གྱུར་པར་མཁྱེན་ནས་ཕྱག་ན་རྡོ་རྗེ་ལ་འདི་སྐད་ཅེས་གསུངས་སོ། །རིགས་ཀྱི་བུ་ཁྱེད་ཀྱང་ངའི་ཐུགས་དང་། དེ་བཞིན་གཤེགས་པ་ཐམས་ཅད་དང་། རིགས་ཐམས་
ཅད་དང་། དཀྱིལ་འཁོར་ཐམས་ཅད་དང་། དེ་བཞིན་གཤེགས་པ་ཐམས་ཅད་ཀྱི་ཐུགས་སུ་ཞུགས་ཤིག །དེ་ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེས་དེ་བཞིན་གཤེགས་པ་ཐམས་ཅད་ཀྱི་སྣང་བས་ཚིགས་སུ་བཅད་པ་འདི་གསུངས་སོ། །མདོར་ན་སངས་རྒྱས་ཐམས་
ཅད་ཀྱི། །སྐུ་གསུང་ཐུགས་ཀྱི་རྡོ་རྗེ་ནི། །ཞུགས་ནས་སེམས་ཅན་ཐམས་ཅད་ལ། །ཕན་པའི་ཕྱིར་ནི་བསྒྲུབ་པར་བྱ། །དེ་ནས་འདི་གསུངས་མ་ཐག་ཏུ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་མོ་དང་མཉམ་པའི་འཇིག་རྟེན་གྱི་ཁམས་ཐམས་ཅད་ན། དེ་བཞིན་

གཤེགས་པ་ཇི་སྙེད་བཞུགས་པ་རྣམས་ལས། དེ་བཞིན་གཤེགས་པ་རེ་རེས་ཀྱང་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཤིན་ཏུ་ཕྲ་མོ་དང་མཉམ་པའི་སྐུ་འཕྲོ་བ་མཛད་པ་རྣམས་ཀྱང་། བཅོམ་ལྡན་འདས་རྣམ་པར་སྣང་མཛད་ཀྱི་ཐུགས་སུ་ཞུགས་སོ། །དེ་
ནས་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེ་དེ་བཞིན་གཤེགས་པ་ཐམས་ཅད་དང་། བཅོམ་ལྡན་འདས་རྣམ་པར་སྣང་མཛད་ཀྱི་སྐུ་ཐམས་ཅད་དང་། གསུང་ཐམས་ཅད་འཇུག་པའི་གནས་དང་། སེམས་ཀྱི་རྒྱུད་འབྱུང་བ་ཐམས་ཅད་དང་། རྡོ་རྗེའི་ཚུལ་ཐམས་ཅད་དང་། ཡན་
ལག་དང་། ཉིང་ལག་ཐམས་ཅད་དང་། གནས་ཐམས་ཅད་དང་། མཚན་ཐམས་ཅད་དང་། དཔེ་བྱད་བཟང་པོ་ཐམས་ཅད་དང་། བ་སྤུའི་ཁུང་བུ་ཐམས་ཅད་དང་། རྡུལ་ཤིན་ཏུ་ཕྲ་མོ་སྙེད་ཀྱི་དཀྱིལ་འཁོར་ཐམས་ཅད་དང་། ཐུགས་རྣམས་སུ་ཞུགས་ནས་བཞུགས་སོ། །
དེ་ནས་བཅོམ་ལྡན་འདས་ཡང་དག་པར་རྫོགས་པར་སངས་རྒྱས་ནས་རིང་པོར་མ་ལོན་པ་ཞིག་ན། དེ་བཞིན་གཤེགས་པ་ཐམས་ཅད་ཀྱི་སྐུ་དང་། གསུང་དང་། ཐུགས་རྡོ་རྗེར་དེ་བཞིན་གཤེགས་པ་ཐམས་ཅད་དུ་བདག་ཉིད་གྱུར་པར་མཁྱེན་ནས། རི་རབ་རིའི་རྩེ་མོ་ནས་སྙིང་པོ་
བྱང་ཆུབ་པ་གང་ན་བ་དེར་གཤེགས་ནས་ཆེད་དུ་བཅོམ་ལྡན་འདས་ཀྱི་བྱང་ཆུབ་ཀྱི་ཤིང་དྲུང་དུ་འཇིག་རྟེན་པ་དང་མཐུན་པར་བྱ་བའི་ཕྱིར་རྩྭ་བླངས་ནས་ཆེད་དུ་བརྗོད་པ་འདི་ཆེད་དུ་བརྗོད་དོ། །ཨེ་མ་སེམས་ཅན་བརྟན་པ་ཡི། །སེམས་ཅན་དོན་ནི་བདག་དོན་མཆོག །གང་ཕྱིར་གདུལ་
དབང་བརྟན་པ་རྣམས། །མུ་སྟེགས་ལྟ་བས་གནས་བར་མཛད། །མདོར་ན་མི་འདུལ་འཇིག་རྟེན་པ། །ལྟ་བ་ངན་པས་ལྡོངས་པ་རྣམས། །ཡེ་ཤེས་སྣང་བས་དག་བྱའི་ཕྱིར། །སངས་རྒྱས་བྱང་ཆུབ་ཐོབ་པར་འགྱུར། །དེ་ནས་འདོད་པ་ན་སྤྱོད་པའི་ལྷ་རྣམས་ཀྱིས་བཅོམ་ལྡན་
འདས་ལ་དེ་ཁོ་ན་ཉིད་མི་ཤེས་པས་འདི་སྐད་དུ་ཀྱེ་དགེ་སྦྱོང་ཇི་བྱང་ཆུབ་ཀྱི་ཕྱིར། འདི་ལྟ་བུའི་སྡུག་བསྔལ་དྲག་ཅིང་མི་བཟད་པ་ལ་བཟོད་པར་མཛད་དམ་ཞེས་གསོལ་ཏོ། །དེ་ནས་བཅོམ་ལྡན་འདས་ཀྱིས་རྩྭ་དེ་བཏིང་སྟེ་སྟེང་དུ་བཞུགས་ནས་ལྷ་རྣམས་ལ་འདི་སྐད་ཅེས་བཀའ་སྩལ་ཏོ། །

གྲོགས་པོ་རྣམས། ཁོ་བོས་བྱང་ཆུབ་ཐོབ་པར་སྒྲུབས་ཤིག །དེ་ནས་འདོད་པ་ན་སྤྱོད་པའི་ལྷའི་བུ་རྣམས་ཀྱིས་བཅོམ་ལྡན་འདས་ཀྱིས་གསུངས་པའི་དོན་མ་རྟོགས་ནས། ལྷ་རྣམས་ཀྱི་དབང་པོ་བརྒྱ་བྱིན་གང་ན་བ་དེར་དོང་ནས་ཆེད་དུ་ལྷ་རྣམས་ཀྱི་དབང་པོ་བརྒྱ་བྱིན་ལ་དེ་ལྟར་གྱུར་བ་
འདི་བརྗོད་དོ། །དེ་ནས་ལྷའི་དབང་པོ་བརྒྱ་བྱིན་གྱིས་འདོད་པ་ན་སྤྱོད་པའི་ལྷ་རྣམས་ཀྱི་ཚོགས་ཀྱིས་བསྐོར་ཏེ། གཟུགས་ན་སྤྱོད་པའི་ལྷ་རྣམས་ཀྱི་བདག་པོ་ཚངས་པ་ཆེན་པོ་ལ་དེ་ལྟར་གྱུར་པ་འདི་དག་བརྗོད་དོ། །དེ་ནས་ཚངས་པ་ཆེན་པོ་འདོད་པ་ན་སྤྱོད་པ་དང་། གཟུགས་ན་
སྤྱོད་པའི་ལྷ་ཐམས་ཅད་དང་། ལྷན་ཅིག་ཏུ་འཇིག་རྟེན་གསུམ་པོ་ཐམས་ཅད་ཀྱི་བདག་པོ་དབང་ཕྱུག་ཆེན་པོ་ལ་དེ་ལྟར་གྱུར་པ་རྣམས་བརྗོད་དོ། །དེ་ནས་འཇིག་རྟེན་གསུམ་པོ་མཐའ་དག་གི་བདག་པོ་དབང་ཕྱུག་ཆེན་པོས་ལྷ་རྣམས་ཀྱི་བདག་པོ་མཐུ་བོ་ཆེ་ལ་སོགས་པ་ལ་འདི་སྐད་ཅེས་
སྨྲས་སོ། །གྲོགས་པོ་རྣམས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཇིག་རྟེན་དང་མཐུན་པར་མཛད་ཅིང་། ཡང་བླ་ན་མེད་པར་ཡང་དག་པར་རྫོགས་པའི་བྱང་ཆུབ་སྟོན་གྱིས། འདི་ལྟར་འཇིག་རྟེན་ན་དེ་བཞིན་གཤེགས་པ་མ་ཡིན་ནོ་སྙམ་དུ་
ཤེས་པར་མ་བྱེད་ཅིག །ལྷ་ཉིད་ལས་དེ་བཞིན་གཤེགས་པར་འགྱུར་གྱིས། ལྷ་དེ་དག་ཉིད་དུ་བསྒྲུབ་པར་བྱའི། དེ་བཞིན་གཤེགས་པ་ཉིད་དུ་ནི་མ་ཡིན་ནོ། །དེ་ལེགས་ཀྱིས་དེར་མཆོད་དུ་འདོང་བར་སྒྲུབ་བོ། །དེ་ནས་ལྷ་ཐམས་ཅད་ཀྱི་བདག་པོ་དབང་ཕྱུག་ཆེན་པོ་ལ་སོགས་
པ་སྙིང་པོ་བྱང་ཆུབ་གང་ན་བ་དང་། བཅོམ་ལྡན་འདས་དེ་བཞིན་གཤེགས་པའི་སྙིང་པོར་བྱང་ཆུབ་པར་བཞུགས་པ་གང་ན་བ་དེར་དོང་ནས། ཆེད་དུ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་
བདག་ཅག་ལ་ཐུགས་བརྩེ་བར་དགོངས་ཏེ། རན་གྱི་གདན་འདི་ལས་བཞེངས་ལ། ལྷ་རྫས་ཀྱི་གདན་ལ་བཞུགས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་མཛད་དུ་གསོལ། དེ་ནས་བཅོམ་ལྡན་འདས་ཀྱིས། ལྷའི་བདག་

པོ་དེ་དག་ལ་འདི་སྐད་ཅེས་བཀའ་སྩལ་ཏོ། །གྲོགས་པོ་རྣམས། ཁོ་བོ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྦྱིན་པར་སྒྲུབས་ཤིག །དེ་ནས་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་བསྩལ་བར་མི་ནུས་སོ། །
ཅི་སྟེ་བདག་ཅག་གིས་ནུས་པར་གྱུར་ན། བདག་ཅག་ཉིད་ཡང་དག་པར་རྫོགས་པར་སངས་རྒྱས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་དོན་དེ་ཉིད་གསལ་བར་མཛད་ཅིང་། ཡང་ཚིགས་སུ་བཅད་པ་འདི་གསུངས་སོ། །དེ་ནི་གཟུགས་མིན་གཟུགས་མིན་མིན། །བདེན་
མིན་བརྫུན་མིན་གཙང་བ་ཡི། །སངས་རྒྱས་བྱང་ཆུབ་ཡེ་ཤེས་འདི། །རྟོགས་ན་རྒྱལ་བ་ཉིད་དུ་འགྱུར། །དེ་ནས་ལྷའི་དབང་པོ་དེ་དག་གིས་ཅུང་ཟད་ཅིག་ཅང་མི་སྨྲ་བར་གནས་པར་གྱུར་ཏོ། །དེ་ནས་བཅོམ་ལྡན་འདས་རྩྭའི་གདན་ལས་བཞེངས་ཏེ། ལྷ་དེ་རྣམས་ལ་འདི་སྐད་ཅེས་བཀའ་
སྩལ་ཏོ། །གྲོགས་པོ་རྣམས། སངས་རྒྱས་ཀྱི་ཡེ་ཤེས་འདི་ལྟ་བུ་རྟོགས་པར་བྱ་བ་སྒྲུབས་ཤིག །དེ་དག་གིས་གསོལ་པ། བཅོམ་ལྡན་འདས། བདག་ཅག་གིས་རྔོ་མི་ཐོགས་སོ། །དེ་ནས་ཡང་བཅོམ་ལྡན་འདས་ཀྱིས་གདན་དེ་ཉིད་ལ་བཞུགས་བཞིན་དུ་ཚིགས་སུ་བཅད་པ་འདི་
གསུངས་སོ། །ཡིད་ཀྱིས་རབ་ཏུ་རྟོགས་པས་ན། །བྱང་ཆུབ་སེམས་ནི་བརྟན་པར་བྱོས། །སེམས་དཔའ་རྡོ་རྗེ་བརྟན་བྱས་ལ། །སངས་རྒྱས་སུ་ནི་བདག་སྒོམས་ཤིག །དེ་ནས་དེ་དག་གིས་འདི་སྐད་དུ། དེ་ལྟ་བུ་ལེགས་སོ་ཞེས་བྱ་བ་ཐམས་ཅད་ཀྱིས་སྨྲས་ནས་དོང་ངོ་། །དེ་
ནས་བཅོམ་ལྡན་འདས་ཀྱིས་མཚན་མོ་དེའི་ཐོ་རངས་འཇིག་རྟེན་དང་མཐུན་པར་བྱ་བའི་ཕྱིར། བདུད་སྡེ་དང་བཅས་པ་ཕམ་པར་བྱས་ནས། བླ་ན་མེད་པ་ཡང་དག་པར་རྫོགས་པའི་སངས་རྒྱས་སུ་མངོན་པར་སངས་རྒྱས་ནས། སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་ཐམས་
ཅད་ལ་ཕན་པར་མཛད་པ། འཕགས་པ་ཕྱག་ན་རྡོ་རྗེ་རང་གི་ཐུགས་ལ་ཞུགས་པ་ལ་མཚན་བརྒྱ་རྩ་བརྒྱད་པ་འདིས་མངོན་པར་བསྟོད་དོ། །རྡོ་རྗེ་སེམས་དཔའ་སེམས་དཔའ་ཆེ། །ཐེག་པ་ཆེན་པོ་བདག་ཉིད་ཆེ། །སྣང་བ་ཆེ་ཞིང་དག་པ་ཆེ། །མགོན་ཆེན་ཁྱོད་ལ་ཕྱག་འཚལ་ལོ། །

རྡོ་རྗེ་རྒྱལ་པོ་རྡོ་རྗེ་ཆེ། །རྡོ་རྗེ་དེ་བཞིན་གཤེགས་པ་ཀུན། །སེམས་དཔའ་ཆེན་པོ་བརྩོན་འགྲུས་ཆེ། །ཐབས་ཆེན་ཁྱོད་ལ་ཕྱག་འཚལ་ལོ། །རྡོ་རྗེ་འདོད་པ་དག་པ་ཆེ། །ཀུན་གྱི་བདེ་བ་བདེ་བ་ཆེ། །བདེ་མཆོག་ཐོག་མ་ཐ་མ་མེད། །བཞད་ཆེན་ཁྱོད་ལ་ཕྱག་འཚལ་ལོ། །རྡོ་རྗེ་ལེགས་པ་
དགྱེས་པ་ཆེ། །ལེགས་ཞེས་བྱ་བ་རབ་མཉེས་པ། །མཉེས་པ་ཆེ་ཞིང་དགྱེས་པ་ཆེ། །རབ་དགྱེས་ཁྱོད་ལ་ཕྱག་འཚལ་ལོ། །རྡོ་རྗེ་རིན་ཆེན་རྒྱལ་པོ་ཆེ། །དབང་བསྐུར་བཟང་པོ་བདག་པོ་ཆེ། །རིན་ཆེན་ཐམས་ཅད་མཛེས་པ་ཆེ། །རྣམ་རྒྱལ་ཁྱོད་ལ་ཕྱག་འཚལ་ལོ། །རྡོ་རྗེ་གཟི་བརྗིད་གཟི་བརྗིད་
ཆེ། །འོད་ཆེན་ལྷམ་པ་ཆེན་པོ་སྟེ། །རྒྱལ་བའི་འོད་དེ་འབར་བ་ཆེ། །སངས་རྒྱས་འོད་ཁྱོད་ཕྱག་འཚལ་ལོ། །རྡོ་རྗེ་རྒྱལ་མཚན་དབལ་ཆེ་བ། །རྒྱལ་མཚན་ཆེ་བས་ནོར་རབ་གཏོང་། །ནམ་མཁའི་རྒྱལ་མཚན་ཡུ་བ་ཆེ། །གཏོང་བའི་རྒྱལ་མཚན་ཁྱོད་ཕྱག་འཚལ། །རྡོ་རྗེ་བཞད་པ་བཞད་
པ་ཆེ། །དགྱེས་པ་ཆེ་ཞིང་རབ་དགྱེས་པ། །དགྱེས་པའི་ཤུགས་ཀྱིས་རོལ་ཅིང་དགྱེས། །ཆོས་དགྱེས་ཁྱོད་ལ་ཕྱག་འཚལ་ལོ། །རྡོ་རྗེ་ཆོས་ནི་ཆོས་ཆེ་བ། །སེམས་དཔའི་ཆོས་ནི་རབ་སྦྱོང་བ། །སངས་རྒྱས་ཆོས་ཏེ་ཆོས་རབ་མཆོག །འདོད་ཆོས་ཁྱོད་ལ་ཕྱག་འཚལ་ལོ། །རྡོ་རྗེ་རྣོན་
པོ་རལ་གྲི་ཆེ། །ཤེས་རབ་ཡེ་ཤེས་བློ་གྲོས་ཆེ། །སྡིག་གཅོད་རལ་གྲི་ཆེན་པོ་སྟེ། །སངས་རྒྱས་མཚོན་ཁྱོད་ཕྱག་འཚལ་ལོ། །རྡོ་རྗེ་རྒྱུ་སྟེ་འཁོར་ལོ་ཆེ། །སངས་རྒྱས་འཁོར་ལོ་གཏེར་ཆེན་པོ། །དཀྱིལ་འཁོར་ཀུན་ཏེ་ཆོས་ཀྱི་མཆོག །ཆོས་ཀྱི་དཀྱིལ་འཁོར་ཁྱོད་ཕྱག་འཚལ། །
རྡོ་རྗེ་གསུང་བ་གསུང་བ་ཆེ། །སྤྲོས་མེད་ཡི་གེ་ཆེན་པོ་སྟེ། །ཡི་གེ་མེད་པ་བཟླས་པ་ཆེ། །སངས་རྒྱས་གསུང་ཁྱོད་ཕྱག་འཚལ་ལོ། །རྡོ་རྗེ་ལས་ཏེ་ལས་རབ་མཆོག །ལས་ཆེན་ལས་རབ་བྱེད་པ་སྟེ། །གསང་བའི་མཆོད་པ་མཆོད་པ་ཆེ། །སངས་རྒྱས་མཆོད་ཁྱོད་ཕྱག་འཚལ་
ལོ། །རྡོ་རྗེ་བསྲུང་བ་གོ་ཆ་ཆེ། །གོ་ཆའི་མཆོག་སྟེ་བརྟན་པ་ཆེ། །བསྲུང་བ་ཆེ་ཞིང་སྙིང་པོ་ཆེ། །སངས་རྒྱས་བརྩོན་འགྲུས་ཕྱག་འཚལ་ལོ། །རྡོ་རྗེ་གནོད་སྦྱིན་ཁྲོ་བོ་ཆེ། །མ་རུངས་ཐམས་ཅད་སྐྲག་བྱེད་པ། །སངས་རྒྱས་ཀུན་གྱི་ཐབས་ཆེན་ཏེ། །བསྲུང་བ་མཆོག་ཁྱོད་ཕྱག་

འཚལ་ལོ། །རྡོ་རྗེ་བསྡམས་པ་ཕྱག་རྒྱ་ཆེ། །དམ་ཚིག་ཆེན་པོ་བཅིང་བ་ཆེ། །ཁུ་ཚུར་ཆེན་པོ་ཕྱག་རྒྱ་ཆེ། །རྡོ་རྗེ་ཁུ་ཚུར་ཁྱོད་ཕྱག་འཚལ། །དེ་བཞིན་གཤེགས་པ་ཕྱག་བྱ་ཞིང་། །བརྗོད་དེ་མཆོད་དེ་བསྟི་སྟང་བྱ། །གང་ཕྱིར་ཐོག་མ་ཐ་མ་མེད། །བྱང་ཆུབ་སེམས་ནི་
ཁྱོད་ཡིན་ཏེ། །ཁྱོད་ལ་བརྟེན་ནས་རྒྱལ་བ་དང་། །དཔའ་བོ་བྱང་ཆུབ་སེམས་དཔའ་ཀུན། །བྱུང་ཞིང་ཡང་དག་འབྱུང་འགྱུར་བས། །སངས་རྒྱས་བྱང་ཆུབ་མཆོག་གི་རྒྱུ། །རྡོ་རྗེ་སེམས་དཔའ་ཁྱོད་ཕྱག་འཚལ། །རྡོ་རྗེ་རིན་ཆེན་ཁྱོད་ཕྱག་འཚལ། །རྡོ་རྗེ་ཆོས་ཁྱོད་ཕྱག་འཚལ་ལོ། །རྡོ་རྗེ་ལས་
ནི་ཁྱོད་ཕྱག་འཚལ། །ཡང་དག་པར་ནི་ཕྱག་འཚལ་ཞིང་། །མཚན་མཆོག་གིས་ནི་ཁྱོད་བསྟོད་པའི། །བསོད་ནམས་གང་ཡིན་དེ་ཀུན་ཀྱང་། །སངས་རྒྱས་བྱང་ཆུབ་ཐོབ་པར་ཤོག །མཚན་བརྒྱ་རྩ་བརྒྱད་དམ་པ་ནི། །རབ་དད་པས་ནི་ལན་ཅིག་ཙམ། །གང་གིས་ལེགས་
པར་བརྗོད་པ་ནི། །ཀུན་ཀྱང་སངས་རྒྱས་ཉིད་དུ་འགྱུར། །ཞེས་སངས་རྒྱས་བཅོམ་ལྡན་འདས་ཀྱིས་གསུངས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱག་ན་རྡོ་རྗེ་ལ་དེ་བཞིན་གཤེགས་པ་ཐམས་ཅད་གཅིག་ཏུ་འདུས་ཏེ། གསུང་གཅིག་ཏུ་ལེགས་སོ་ཞེས་བྱ་བ་འདི་བྱིན་ནོ། །
རྡོ་རྗེ་ཐེག་པ་བླ་ན་མེད། །དེ་བཞིན་གཤེགས་པ་ཀུན་གྱི་གསང་། །ཐེག་པ་ཆེན་པོ་མངོན་འདུས་པའི། །མདོ་འདི་ལེགས་པར་བཤད་པས་ན། །རྡོ་རྗེ་སེམས་དཔའ་ཁྱོད་ལེགས་སོ། །རྡོ་རྗེ་རིན་ཆེན་ཁྱོད་ལེགས་སོ། །རྡོ་རྗེ་ཆོས་ཁྱོད་ལེགས་པ་སྟེ། །རྡོ་རྗེ་ལས་ནི་ཁྱོད་ལེགས་སོ། །བཅོམ་
ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། དེ་བཞིན་གཤེགས་པ་དང་འཕགས་པ་བྱང་ཆུབ་སེམས་དཔར་བཅས་པ་རང་གི་ཐུགས་ལ་ཞུགས་པ་ཐམས་ཅད་དགྱེས་ཤིང་མཉེས་ནས་བཅོམ་ལྡན་འདས་རྡོ་རྗེ་སེམས་དཔས་གསུངས་པ་ལ་མངོན་པར་དགྱེས་པར་གྱུར་ཏོ། །དེ་བཞིན་གཤེགས་
པ་ཐམས་ཅད་ཀྱི་དེ་ཁོ་ན་ཉིད་བསྡུས་པ་ཞེས་བྱ་བ་ཐེག་པ་ཆེན་པོའི་མདོ་རྒྱུད་ཉེ་བར་བསྡུས་པ་དང་བཅས་པ་རྫོགས་སྷོ།། །།རྒྱུད་འདི་ལ་འགྱུར་བྱང་མི་སྣང་ནའང་། པཎྜི་ཏ་ཤྲདྡྷཱ་ཀ་ར་ཝརྨྨ་དང་། བོད་ཀྱི་ལོ་ཙྪ་བ་རིན་ཆེན་བཟང་པོས་བསྒྱུར་བར་གྲགས།། །།

༄༅༅། །རྒྱ་གར་སྐད་དུ། བཛྲ་ཤི་ཁར་མ་ཧཱ་གུ་ཧྱ་ཡོ་ག་ཏནྟྲ། བོད་སྐད་དུ། གསང་བ་རྣལ་འབྱོར་ཆེན་པོའི་རྒྱུད་རྡོ་རྗེ་རྩེ་མོ། ཨོཾ་ཀུན་དུ་བཟང་པོ་ལ་ཕྱག་འཚལ་ལོ། །དེ་བཞིན་གཤེགས་པ་ཐམས་ཅད་ལ་ཕྱག་འཚལ་ལོ། །དེ་བཞིན་གཤེགས་པ་རྣམ་པར་སྣང་མཛད་ལ་
ཕྱག་འཚལ་ལོ། །དེ་ནས་རྒྱལ་པོ་རྡོ་རྗེ་འཆང་། །ཀུན་མཆོག་སྲིད་པའི་དབང་ཕྱུག་གིས། །འཁོར་ལོ་དེ་ནི་བརྟགས་བྱས་ནས། །རྣལ་འབྱོར་ཅན་ནི་མི་གསུང་བཞུགས། །མགོན་པོ་ཆེན་པོ་སངས་རྒྱས་ཀུན། །མ་ལུས་ཐུབ་པའི་སྐྱེས་མཆོག་གིས། །རྡོ་རྗེ་སེམས་དཔའ་རྒྱལ་
པོ་ཆེ། །ཐུབ་པའི་དབང་ཕྱུག་ལ་གསོལ་འདེབས། །རྣལ་འབྱོར་ཚུལ་ཆེན་སྒྲུབ་བྱེད་ཅིང་། །ཆོ་ག་སྣ་ཚོགས་ཡང་དག་འབྱུང་། །རིགས་ཀྱི་དཀྱིལ་འཁོར་སྦྱོར་འབྱུང་བའི། །འཁོར་ལོ་མཆོག་ནི་བཤད་དུ་གསོལ། །མགོན་པོ་ཁྱོད་ནི་སྐལ་ཆེན་ཏེ། །ཁྱོད་ནི་བྱ་བ་དོན་སེམས་བྱེད། །
གསང་བ་མཁྱེན་ཅིང་དགོངས་བཤད་མཁྱེན། །རྣལ་འབྱོར་རིག་པའི་མཆོག་གྱུར་གསུངས། །དེ་ཉིད་རྗེས་ཀྱི་དེ་ཉིད་ལྡན། །རྣལ་འབྱོར་བདག་ཉིད་རྣལ་འབྱོར་ཆེ། །རྡོ་རྗེ་ཆེན་པོ་བྱང་ཆུབ་སེམས། །གསུངས་ཤིག་གསུངས་ཤིག་ཚུལ་ཆེན་པོ། །རིགས་ཀྱི་དཀྱིལ་འཁོར་འཁོར་
ལོ་སྟེ། །རྡོ་རྗེ་རྣལ་འབྱོར་སྣ་ཚོགས་བདག །གསང་བའི་སྙིང་པོ་དཀྱིལ་འཁོར་ཆེ། །ཆོས་ཀྱི་ཚུལ་ནི་སྒྲུབ་བྱེད་པ། །རྟོག་པ་མེད་པའི་ཆོས་རྣམས་ཀྱི། །ཆོས་ཀྱི་དོན་འདི་ཅི་ཡིན་བརྗོད། །འདིར་ནི་རྟོག་པ་ཇི་ལྟ་བུ། །སྒྲུབ་པའི་དོན་ནི་ཇི་ལྟར་ལགས། །ཅི་ཕྱིར་འདི་ནི་རྒྱུད་
ཕྱི་མ། །རྒྱུད་དོན་ཅི་ཡིན་བརྗོད་པར་བགྱི། །ཅི་ཕྱིར་རྒྱུད་དང་ཕྱི་མ་ལགས། །རྒྱུད་ཀྱི་དོན་ནི་ཇི་ལྟར་བྱུང་། །རྡོ་རྗེ་འཆང་དྲག་འདི་ཅི་ཞིག །དྲག་པོའི་དོན་ནི་ཇི་ལྟར་བྱུང་། །རྡོ་རྗེ་ཞི་བ་འདི་ཅི་ཞིག །ཅི་ཡི་ཕྱིར་ན་ཞི་བར་བརྗོད། །ཕྱག་ན་རྡོ་རྗེ་ཅི་ཡི་ཕྱིར། །རྡོ་རྗེ་གཏུམ་པོའང་ཅི་ཞིག་ལགས། །
ཅི་ཡི་ཕྱིར་ན་གཏུམ་པོར་བརྗོད། །ཅི་ཡི་ཕྱིར་ན་ཁྲོ་བོར་བརྗོད། །རྡོ་རྗེ་རྡོ་རྗེ་ཞེས་གསུངས་པ། །ཅི་ཕྱིར་རྡོ་རྗེར་བརྗོད་པར་བགྱིད། །རྡོ་རྗེ་འཆང་ཞེས་གསུངས་འདི་ཅི། །དེ་ཡི་རྡོ་རྗེ་ཇི་ལྟ་བུ། །རྡོ་རྗེ་འཆང་བ་རྣམས་ནི་དུ། །རྡོ་རྗེ་རིགས་ཀུན་གང་གི་ལགས། །ཆེན་པོ་གནས་གང་ཞིག་ན་

གནས། །རིགས་ནི་རྣམ་པ་དུ་ཡིན་བརྗོད། །ཅི་ཡི་ཕྱིར་ན་རིགས་སུ་བརྗོད། །རིགས་བདག་རང་བཞིན་འདི་ཅི་ཞིག །ཅི་ཡི་ཕྱིར་ན་སེམས་དཔར་བརྗོད། །རྫོགས་པའི་བྱང་ཆུབ་རྣམ་པ་དུ། །ཅི་ཕྱིར་རྡོ་རྗེ་སེམས་དཔའ་ལགས། །རྡོ་རྗེ་རྒྱལ་པོ་ཅི་ཡིན་བརྗོད། །
རྡོ་རྗེ་ཆགས་པ་འདི་དོན་ཅི། །རྡོ་རྗེ་ལེགས་པ་ཅི་ཡིན་བརྗོད། །རྡོ་རྗེ་རིན་ཆེན་ཅི་ཡི་ཕྱིར། །རྡོ་རྗེ་གཟི་བརྗིད་ཅི་ཡིན་བརྗོད། །རྡོ་རྗེ་རྒྱལ་མཚན་བཞད་པ་ཆེ། །གསུངས་ཤིག་ཅི་ཡིན་བརྗོད་པ་གསུངས། །ཅི་ཡི་ཕྱིར་ན་རྡོ་རྗེ་ཆོས། །རྡོ་རྗེ་རྣོན་པོ་ཅི་ཡིན་བརྗོད། །རྡོ་རྗེ་རྒྱུ་ནི་འཁོར་ལོ་
ཆེ། །རྡོ་རྗེ་སྨྲ་བ་ཅི་ཡིན་བརྗོད། །རྡོ་རྗེ་ལས་དང་གནོད་སྦྱིན་ཆེ། །རྡོ་རྗེ་གནོད་སྦྱིན་དྲག་པོ་ཆེ། །རྡོ་རྗེ་སྲུང་བ་ཁུ་ཚུར་ཆེ། །གསུངས་ཤིག་ཅི་ཡིན་བརྗོད་པར་གསུངས། །སེམས་དཔའ་འདི་རྣམས་གང་ལས་བྱུང་། །དེ་བཞིན་ཕ་དང་མ་ནི་གང་། །དང་པོ་གང་ཞིག་གླེང་གཞི་གང་། །
དམིགས་པའི་རྐྱེན་ནི་གང་ཞིག་ལགས། །གསང་བ་འདི་ནི་གང་ལས་བྱུང་། །ཁྱབ་བདག་འདི་རྣམས་གང་ནས་བྱུང་། །ཐོག་མ་ཐ་མ་མེད་འདི་ཅི། །གསང་བའི་དབང་ཕྱུག་ཆེན་པོས་གསུངས། །རབ་ཏུ་དགའ་ཉིད་རབ་བཟང་ཉིད། །རྡོ་རྗེ་སྙིང་བདག་ཇི་ལྟ་བུ། །ཅི་ཡི་ཕྱིར་ན་
ཀུན་ཏུ་བཟང་། །དེ་བཞིན་རྡོ་རྗེ་རྡོ་རྗེ་འཆང་། །དང་པོའི་རིགས་ནི་ཇི་ལྟར་བྱུང་། །ཆོས་ཀུན་སྐྱེ་བ་མེད་པ་དང་། །འབྱུང་བ་ཇི་ལྟར་རུང་བར་འགྱུར། །བྱང་ཆུབ་སེམས་དཔའ་ཅི་ཡིན་བརྗོད། །ཅི་ཕྱིར་སངས་རྒྱས་བརྗོད་པར་བྱ། །དེ་བཞིན་གཤེགས་པ་ཅི་ཡིན་བརྗོད། །བཅོམ་
ལྡན་འདས་བཅོམ་ཅི་ཡིན་བརྗོད། །དེ་བཞིན་སྟོན་པའི་སྟོན་པ་ཅི། །ཅི་ཡི་ཕྱིར་ན་ཡེ་ཤེས་བརྗོད། །ཤེས་རབ་ཡེ་ཤེས་ཅི་ཡིན་བརྗོད། །ཅི་ཕྱིར་ཤེས་རབ་བརྗོད་པར་བྱ། །དེ་བཞིན་ཤེས་རབ་ཕ་རོལ་ཕྱིན། །ཚུལ་ནི་ཅི་ཞིག་ཏིང་འཛིན་གང་། །བསམ་གཏན་རྣལ་འབྱོར་རྣལ་འབྱོར་
ཅི། །སྲིད་གསུམ་འཇིག་རྟེན་གསུམ་དོན་ཅི། །ཅི་ཡི་ཕྱིར་ཡང་ཁམས་གསུམ་པ། །འཁོར་བའི་དོན་ནི་ཅི་ཞིག་ཡིན། །མྱ་ངན་འདས་པའང་ཅི་ཡིན་བརྗོད། །རྟག་དང་འཇིག་དང་དེ་བཞིན་དག །ཐེག་པ་ཆེན་པོ་ཅི་ཡིན་བརྗོད། །ནམ་མཁའ་ཡང་ནི་ཅི་ཡི་ཕྱིར། །ས་ཉིད་

ཀྱང་ནི་ཅི་ཡིན་བརྗོད། །འབྱུང་བ་ཆེན་པོ་གང་ལས་འབྱུང་། །འགོག་པ་ཅི་ཞིག་གང་གིས་བྱེད། །ཅི་ཡི་ཕྱིར་ན་ཕྱག་རྒྱར་བརྗོད། །ཅི་ཕྱིར་སྔགས་སུ་བརྗོད་པར་བྱ། །ཅི་ཡི་ཕྱིར་ན་རིག་སྔགས་བརྗོད། །དེ་བཞིན་ཁོ་ནར་གཟུངས་སྔགས་རྣམས། །ཕྱག་རྒྱ་ཡི་ནི་མཚན་ཉིད་གསུངས།
སྔགས་ཀྱི་མཚན་ཉིད་བརྗོད་པར་བྱ། །རིག་སྔགས་ཀྱི་ནི་མཚན་ཉིད་གསུངས། །དེ་བཞིན་ཁོ་ནར་གཟུངས་སྔགས་རྣམས། །རྩ་བའི་ཕྱག་རྒྱའི་གནས་ནི་གང་། །ཇི་ལྟར་བཅིང་བ་ཐུབ་ཆེན་པོ། །ཕྱག་རྒྱ་དག་ནི་འཆིང་བ་ན། །ཇི་ལྟར་རྡོ་རྗེ་ཅན་ཀུན་མཉེས། །རིག་སྔགས་ཇི་
ལྟར་བཟླས་པར་བགྱི། །ཐུབ་པ་ཆེན་པོ་དེ་གསུངས་ཤིག །རིག་སྔགས་དག་ནི་ཟློས་པ་ན། །ཇི་ལྟར་ཡིད་ཀྱིས་རྡོ་རྗེ་བཟླས། །དྲི་བའི་ཚོགས་མདོར་བསྟན་པའོ།། །།ཨོཾ་ནི་ཅི་ཞིག་ཡིན་པར་བཤད། །ཡི་གེ་ཧཱུྃ་ནི་ཅི་ཡིན་བརྗོད། །ཅི་ཡི་ཕྱིར་ན་ཡི་གེ་ཕཊ། །སྭཱ་ཧཱ་ཞེས་པ་ཅི་ཡིན་བརྗོད། །
མཆོད་པར་ཅི་ཕྱིར་བརྗོད་པར་བྱ། །དེ་བཞིན་དམ་ཚིག་ཤེས་ཉིད་ཀྱང་། །ཅི་ཡི་ཕྱིར་ན་དཀྱིལ་འཁོར་ཡིན། །དཀྱིལ་འཁོར་ཆོ་ག་ཇི་ལྟ་བུ། །དཀྱིལ་འཁོར་དང་པོར་ཞུགས་པ་ཡི། །སྐྱེས་པ་ཡང་ན་བུད་མེད་ཀྱི། །བྱ་བ་གང་ཞིག་བྱ་བ་ནི། །གསུངས་ཤིག་གསང་བའི་དབང་ཕྱུག་ཆེ། །
ཐུབ་པའི་དཀྱིལ་འཁོར་ཞུགས་པ་ལ། །སྡོམ་པ་ཇི་ལྟར་སྦྱིན་པར་བགྱི། །དེ་ཡིས་སྲོག་གི་ཕྱིར་ཡང་ནི། །དོར་བར་མི་བྱ་གང་ཞིག་ལགས། །ཁྲུས་ཀྱི་ལས་ནི་ཇི་ལྟར་བྱ། །དེ་བཞིན་ཁོ་ནར་ཕྱོགས་བཅིང་བ། །བགེགས་རྣམས་བཅིང་བ་དང་བཅས་པའི། །ལོག་འདྲེན་ཇི་ལྟར་བསྐྲད་
པར་བགྱི། །དགའ་བ་ཆེན་པོ་ཇི་ལྟ་བུར། །རབ་ཏུ་གུས་བཅས་ཕྱག་དག་བགྱི། །སྤོས་དང་མེ་ཏོག་དེ་བཞིན་དུ། །མར་མེ་མཆོད་སོགས་ཇི་ལྟར་ལགས། །དཀྱིལ་འཁོར་བརྟག་པ་ཇི་ལྟ་བུར། །གཞུག་པ་ཡང་ནི་ཇི་ལྟར་ལགས། །དམ་ཚིག་ཅི་ཞིག་ཡིན་པར་བཤད། །རྡོ་རྗེ་
སློབ་མའི་ཆོ་ག་གང་། །སྔོན་དུ་བསྙེན་པ་ཇི་ལྟར་བགྱི། །སྒྲུབ་པའི་དོན་ནི་ཇི་ལྟར་ལགས། །གསང་བའི་རྣལ་འབྱོར་ཇི་ལྟ་བུ། །སྙོམས་འཇུག་ཇི་ལྟ་བུ་ཞིག་ལགས། །མདུན་དུ་དགུག་པའི་དོན་ནི་ཇི་ལྟར་ལགས། །འདིར་ནི་རྗེས་སུ་ཆགས་པའང་ཇི་ལྟ་བུ། །བཅིང་བར་བྱ་བའི་ལས་

ནི་ཇི་ལྟ་བུ། །འདྲེན་པ་རྣམས་ནི་མཉེས་པར་ཇི་ལྟར་འགྱུར། །ཇི་ལྟར་འདིར་ནི་གཤེགས་སུ་གསོལ་བ་ལགས། །དཀྱིལ་འཁོར་མཆོག་ནི་ཇི་ལྟར་གདེག་པར་བགྱི། །འགྲོ་བའི་བྱ་བ་ཡང་ནི་ཇི་ལྟར་བགྱི། །ལས་ཀྱི་ཆོ་གའི་བྱ་བ་ཇི་ལྟར་བགྱི། །དགེ་བ་སྟུག་པོ་གསང་
ཆེན་ཇི་ལྟ་བུ། །ལས་རྣམས་ཐ་དད་བྱ་བ་ཇི་ལྟ་བུ། །ཕྱག་རྒྱ་ཕྱག་རྒྱའི་ལན་ནི་ཇི་ལྟར་བགྱི། །མཆོད་དང་མཆོད་པའི་ལན་ནི་ཇི་ལྟར་བླང་། །དཀྱིལ་འཁོར་གྱི་ནི་འཁོར་ལོ་ཇི་ལྟར་འབྱུང་། །འཁོར་ལོའི་རྣམ་པའི་བྱེ་བྲག་དུ་ཞིག་མཆིས། །དངོས་དང་དངོས་མེད་ཇི་ལྟར་སྤང་བ་
ལགས། །བླ་མ་གསང་བྱུང་འོད་ཟེར་གསང་བ་ཅི། །སྦྱིན་སྲེག་རྣམ་པ་དུ་རུ་བརྗོད། །ཐབ་ཁུང་ཇི་ལྟ་བུ་ཞིག་ལགས། །སྦྱིན་སྲེག་མདོར་བསྡུས་ཇི་ལྟ་བུ། །ལས་རྣམས་ཇི་ལྟར་འབྱུང་བ་ལ། །ལས་རྣམས་རྣམ་པ་དུ་རུ་བརྗོད། །གསང་བ་རྣམས་ནི་རྣམ་པ་དུ། །མཆོག་ཏུ་
གསང་བ་ཇི་ལྟར་བརྗོད། །དེ་ཉིད་ཇི་ལྟ་བུ་ཞིག་ལག་ལགས། །ཕྱག་རྒྱ་ཉེ་བའི་ཕྱག་རྒྱ་ཅི། །མཆོད་པའི་ཕྱག་རྒྱ་ཇི་ལྟར་ལགས། །རིགས་ཀྱི་ལྷ་ཡི་རྣལ་འབྱོར་གྱིས། །ཇི་ལྟར་བསྒྲུབ་བྱ་ཤིན་ཏུ་བསྒྲུབ། །རྡོ་རྗེ་ཕྲ་མོ་ཇི་ལྟར་བརྗོད། །བགེགས་ནི་ཇི་ལྟར་བསལ་བར་བགྱི། །མདོར་
ན་རིག་པ་འཛིན་པ་དང་། །སློབ་དཔོན་ཇི་ལྟ་བུ་ཞིག་ལགས། །དཀྱིལ་འཁོར་འཁོར་ལོ་དང་ལྡན་པའི། །འཁོར་ལོ་རྣམ་པ་དུ་རུ་བརྗོད། །དངོས་གྲུབ་མཚན་ཉིད་སྒྲུབ་བྱེད་པའི། །སྣ་ཚོགས་རྟོག་པ་ཇི་ལྟ་བུ། །ཐིག་རྣམས་རྟག་པ་ཉིད་དང་ནི། །དངོས་གྲུབ་ཇི་ལྟར་ཉེ་བར་བརྗོད། །
དངོས་གྲུབ་ཚོགས་ནི་ཇི་ལྟ་བུ། །གསང་བ་ཀུན་ནས་བཏུས་པ་གསུངས། །བདག་ཉིད་ལ་ནི་དབང་བསྐུར་བར། །བྱ་བའི་ཆོ་ག་ཇི་ལྟ་བུ། །ཡང་ན་གཞན་དག་ཉིད་ལ་ནི། །དབང་བསྐུར་བ་ནི་ཇི་ལྟར་ལགས། །ཇི་ལྟར་སེམས་ནི་བསྐྱེད་པར་བགྱི། །ཏིང་འཛིན་ཇི་ལྟ་བུ་ཞིག་ལགས། །
དེ་ཉིད་རིག་པ་འདི་རྟག་ཏུ། །རྡོ་རྗེ་ཡེ་ཤེས་ཇི་ལྟ་བུ། །གཞན་ཡང་དགོངས་པ་ཇི་ལྟ་བུ། །སྤྱོད་པ་ཇི་ལྟ་བུ་ཞིག་ལགས། །གང་ཡང་རུང་བའི་རྟགས་ལས་བྱུང་། །མིང་དང་མིང་མེད་ཤེས་པའི་མཚན། །ལས་འབྲས་མེད་པར་བྱེད་པོ་དང་། །འབྱིན་པར་བྱེད་པར་གང་ལས་

བཤད། །ལུས་ནི་ནམ་མཁའ་བཞིན་འབྱུང་བ། །གང་ལས་འབྱུང་བར་བརྗོད་པར་བྱ། །ཅི་ཡི་ཕྱིར་ན་ཐར་པར་བརྗོད། །རྣལ་འབྱོར་པ་དོན་ཅི་ཡིན་བརྗོད། །རྡོ་རྗེ་དབྱིངས་ནི་སྐྱེད་བྱེད་པའི། །རྡོ་རྗེ་ཕྲ་མོའི་རྣལ་འབྱོར་གང་། །གཞན་ཡང་རང་གི་རིགས་དག་ལས། །རྣལ་འབྱོར་
བརྟུལ་ཞུགས་ཇི་ལྟར་རྩོམ། །མདོར་ན་དབང་དུ་བྱ་བ་དང་། །དེ་ཉིད་གསང་བ་གང་ཞིག་ལགས། །ཐེག་པ་ཆེན་པོ་མངོན་བསྡུས་པའི། །གསང་བ་རྟོག་ཆེན་ལས་གསུངས་པ། །དགོངས་པ་རྣམ་པ་དུ་མ་ཡིས། །གསང་བ་གསུངས་ཤིག་བློ་གྲོས་ཆེ། །རྣལ་འབྱོར་རྣམ་པ་དུ་རུ་བརྗོད། །
རྡོ་རྗེ་རྣལ་འབྱོར་ལས་བྱུང་དུ། །ཇི་ལྟར་རྩ་བའི་རྒྱུད་དུ་བརྗོད། །གསང་བའི་རིགས་བྱུང་ཇི་ལྟ་བུ། །དེ་ནི་རང་བྱུང་ཉིད་ཡིན་ཏེ། །ཁམས་གསུམ་འཇིག་རྟེན་ས་འོག་དང་། །ས་སྟེང་ས་བླ་མྱ་ངན་འདས། །ཇི་སྐད་བཤད་པའི་གསང་བ་གཞན། །རྡོ་རྗེ་ཅན་ཉིད་ཁྱབ་འཇུག་རང་ཉིད་ཡིན། །
ཉི་མ་ཟླ་བ་གཤིན་རྗེ་དྲག་པོ་ཉིད། །རང་ཉིད་སྐྱེ་དགུའི་བདག་སྟེ་ཕ་མ་ཡིན། །འགལ་བའི་ཚིག་ནི་ཇི་ལྟར་རུང་བར་འགྱུར། །དྲི་བའི་ཚོགས་གཉིས་པ་མདོར་བསྟན་པའོ།། །།ཚངས་པ་འཇིག་རྟེན་གསུམ་ལུས་དབང་ཕྱུག་ཆེ། །གདུང་དྲུག་ཚོགས་བཙས་ལྷའི་རིགས་དཀྱིལ་འཁོར་རྣམས། །
གཞན་ཡང་གཟའ་དང་ཚོགས་སོགས་གང་ཡིན་པ། །ད་བདག་ཉིད་ཅེས་ཇི་ལྟར་རུང་བར་འགྱུར། །ང་ནི་འདོད་པ་ཐར་བ་དང་། །ང་ནི་དམྱལ་བའི་དམྱལ་བ་པ། །ང་ནི་ཡི་དགས་དུད་འགྲོ་བདག །ཚིག་དེ་ཇི་ལྟར་རུང་བར་འགྱུར། །དེ་ནས་གཞན་ཡང་འདོད་ལ་ཆགས་སེམས་ལྡན། །
ལྟ་བཅས་ཚིག་ལྡན་འཛིན་པའི་ལྟ་ལ་ཆགས། མུ་སྟེགས་ཐེག་དམན་མངོན་དགའ་སྐྱེ་དགུའི་རིགས། །ཇི་ལྟར་འདོད་བཞིན་དོན་རྣམས་རྟོགས་བྱེད་ཅིང་། །ཇི་སྐད་བཤད་པའི་སྣ་ཚོགས་རིགས་དཀྱིལ་འཁོར། །དག་པའི་ཆོས་ཀྱི་འབྱུང་གནས་དགོངས་མི་ཤེས། །རང་གི་འདོད་པས་
མུ་ངན་རྟོག་བྱེད་པ། །དེ་ལ་སྐྱེ་དགུའི་བདག་ཆེན་བརྩེ་བས་གསུངས། །མཆོད་འོས་ཆེན་པོ་མཆོག་དང་ལྡན་པའི་གནས། །གསང་བའི་དབང་མཆོག་མངོན་བསྡུས་དབྱེ་བར་གསོལ། །སྐྱེ་དགུའི་བདག་པོའི་དཀྱིལ་འཁོར་གསང་མདུན་དུ། །དམ་ཚིག་མཆོད་པས་ཇི་ལྟར་མཆོད་པར་

བྱ། །འདོད་ཡོན་ལྔར་བཅས་རོལ་བར་བྱེད་པ་ཡི། །དངོས་གྲུབ་ཚོགས་མཆོག་ཆེན་པོ་ཐོབ་པར་འགྱུར། །དམན་པའི་འདོད་ལས་རིགས་ཀྱི་དངོས་གྲུབ་འབྱུང་། །དགའ་བའི་ཚིག་དག་ཇི་ལྟར་རུང་བར་འགྱུར། །དེ་བཞིན་བྷ་ག་ཇི་ལྟར་རྟགས་ཅི་འདྲ། །དེ་ཡི་འཇུག་པ་
ཡང་ནི་ཇི་ལྟར་འགྱུར། །རྫས་དེ་དག་ནི་ཇི་ལྟར་རབ་ཏུ་བསྒྲུབ། །འཇིག་རྟེན་གསུམ་ན་དམན་པ་ཇི་ལྟར་འགྱུར། །དེ་ནས་འདོད་ཆགས་ཞེན་པས་དངོས་གྲུབ་ཐོབ། །འདོད་ཆགས་དག་ཕྱིར་དེ་ནི་ཇི་ལྟར་རུང་། །ཆགས་བྲལ་སྡིག་པས་ཆགས་དང་བྲལ་བ་ལ། །གསང་བ་བསྟན་པས་
སྡིག་དངོས་ཇི་ལྟར་འགྱུར། །གཏོར་མས་བསོད་ནམས་མཆོག་ཐོབ་ཇི་ལྟ་བུ། །སྐྱེ་དགུ་བསད་པས་བསོད་ནམས་ཇི་ལྟ་བུ། །མ་བྱིན་བླངས་བས་བསོད་ནམས་འགྱུར་ཞེས་པའི། །འགལ་བའི་ཚིག་དག་ཇི་ལྟར་རུང་བར་འགྱུར། །དགའ་བ་ཆེན་པོའི་བུད་མེད་བསྟེན་པ་ཡིས། །
ཚེ་འདི་ལ་ནི་སངས་རྒྱས་མཆོག་འགྲུབ་པ། །མི་གཙང་འདོད་པ་བསྟེན་པས་སངས་རྒྱས་དང་། །རྡོ་རྗེ་སེམས་དཔའ་འབྱུང་བར་ཇི་ལྟར་འགྱུར། །འདིར་ནི་བརྫུན་དང་མཚུངས་པའི་བསོད་ནམས་མེད། །ཇི་ལྟར་བརྫུན་ནི་བསོད་ནམས་ལྡན་པར་བརྗོད། །འདིར་ནི་སེམས་ཅན་
གཞན་བསད་བཟའ་བར་བྱ། །འགལ་བའི་ཚིག་ནི་ཇི་ལྟར་རུང་བར་འགྱུར། །འཁོར་བ་སྤངས་ཀྱང་ཆོས་མིན་འགྱུར་བ་དང་། །མྱ་ངན་འདས་ལ་གཞོལ་བ་ཆོས་མ་ཡིན། །སངས་རྒྱས་རྣལ་འབྱོར་གྱི་ནི་རྗེས་འཇུག་པ། །ཆོས་མིན་འགྱུར་ཞེས་ཇི་ལྟར་རུང་བར་འགྱུར། །དྲེགས་དང་
སེར་སྣ་སྡང་བའི་སེམས་ལྡན་པ། །ཆོས་མིན་སྤྱོད་ཅིང་བརྫུན་པའི་ཚིག་ལ་ཆགས། །སྲིད་གསུམ་མངོན་པར་ཆགས་པས་རྣལ་འབྱོར་སྒྲུབ། །འདོད་པའི་འདོད་ཆགས་བཅས་པས་ལྷག་པར་རྒྱལ། །རིགས་ཀྱི་རྣལ་འབྱོར་ལས་བྱང་ཇི་ལྟར་འགྲུབ། །བླ་མེད་གོ་འཕང་དངོས་གྲུབ་
འདོད་པ་ཡིས། །དག་ཅིང་ངོ་མཚར་རྣལ་འབྱོར་ལྷུར་བླང་བྱ། །སྐྱོར་གཅིན་འཐུང་དང་བཤང་བ་ཟ་བ་ཡིས། །དག་ཅིང་མཆོག་གྱུར་རྣལ་འབྱོར་དངོས་གྲུབ་འདོད། །མི་གཙང་བཤང་གཅི་ཟོས་ཤིང་འཐུངས་པ་ཡིས། །ཡིད་འདོད་དངོས་གྲུབ་ཇི་ལྟར་དངོས་གྲུབ་འདོད། །བུད་མེད་བཅས་

བར་ལྷན་ཅིག་ཆོས་སྤྱོད་ཅིང་། །གཉིས་ཀ་ལྷན་ཅིག་གྱུར་བས་དག་གཙང་མཆོད། །ཇི་ལྟར་བུད་མེད་ལྷན་ཅིག་དཀྱིལ་འཁོར་མཆོད། །དངོས་གྲུབ་དམ་པ་མཆོག་ཏུ་ཇི་ལྟར་འགྱུར། །གཞན་ཡང་རྡོ་རྗེ་རིགས་འབྱུང་ཀུན་ལྡན་ཞིང་། །མཆོག་ཏུ་མི་བཟད་དྲག་པོའི་ལས་ཅན་
ཏེ། །དག་ཅིང་ཤིན་ཏུ་སྡུག་ལ་མཐོ་བར་འགྲོ། །འགལ་བ་དེ་ནི་ཇི་ལྟར་རུང་བར་འགྱུར། །གཞན་ཡང་བརྡེག་དང་གསད་པ་ལྷུར་ལེན་ཅིང་། །བསྐྲད་དང་དྲག་པའི་ལས་ཅན་དེ་དག་ནི། །དག་ཅིང་ཤིན་ཏུ་སྡུག་ལ་མཐོ་བར་འགྲོ། །འགལ་བ་དེ་ནི་ཇི་ལྟར་རུང་བར་འགྱུར། །
གཞན་ཡང་བཟའ་དང་བཏུང་བ་ལྷུར་ལེན་ཅིང་། །སྙིང་འབྱིན་པ་ཡིས་དག་པར་འདོད་པ་ཉིད། །དེ་ནི་དག་ཅིང་སྡུག་ལ་མཐོ་བར་འགྲོ། །འགལ་བ་དེ་ནི་ཇི་ལྟར་རུང་བ་ཡིན། །གཞན་ཡང་ནོར་བུ་རིན་ཆེན་འཕྲོག་པ་ཡིས། །སྡུག་ཅིང་བསྟན་ལ་དག་ཅིང་མཐོར་འགྲོ་དང་། །གཞན་ཡང་
ང་རྒྱལ་སེར་སྣ་ལྷུར་ལེན་པས། །དག་པར་འགྱུར་བ་ཉིད་ནི་འགལ་བ་ཡིན། །གཞན་ཡང་ལས་ཀྱི་རིག་པ་བྱུང་བ་ཡིས། །མི་དགེ་བ་ཡི་ལས་རྣམས་ཐམས་ཅད་བྱ། །འཁྲིག་སོགས་ལས་ཀྱི་ཟེ་ཚོགས་རྣམ་མང་པོའི། །ལས་བྱེད་པ་ནི་ཇི་ལྟར་སྐྱེན་མི་འགྱུར། །གཞན་ཡང་
བརྫུན་ཚིག་དེ་བཞིན་འཁྲིག་པ་ཡིས། །དག་འདོད་འཕགས་པ་མིན་པས་གསང་བ་ཡི། །རྒྱལ་བའི་དབང་ཆེན་འདོད་པས་བདུད་རྩི་ལྟར། །སྡུག་ཅིང་མཐོར་འགྲོ་ཇི་ལྟར་རུང་བར་འགྱུར། །ཀྱེ་མགོན་ཁྱོད་ནི་དག་པའི་ཆོས་ཀྱི་ཚོགས་ཏེ་ཁྱོད་ནི་རྟག་ཏུ་རྣལ་འབྱོར་འགྱུར། །ཀྱེ་མགོན་
ཁྱོད་ནི་དགྱེས་ཆེན་བདུད་རྩི་འཆད་པ་དམ་ཆོས་གསང་བའི་འབྱུང་གནས་ཏེ། །ཀྱེ་རྒྱལ་ཁྱོད་ནི་དྲི་མེད་ཉི་མ་བཞིན་དུ་མི་ཤེས་ཀུན་དུ་སྦྱོང་མཛད་པ། །ཁྱབ་བྱེད་རྒྱལ་བའི་ངང་ཚུལ་འཇིག་རྟེན་གསུམ་གྱི་འདྲེན་ཆེན་བྱང་སེམས་དགའ་སྟོན་ཀྱེ། །མདོར་བསྡུས་པའོ།། །།ཀུན་མཆོག་
ཐམས་ཅད་རིག་པ་སྟེ། །ཀུན་མཁྱེན་དྲི་མ་གསུམ་སྤངས་པ། །བྱང་སེམས་སངས་རྒྱས་རྒྱལ་པོ་ཆེ། །དེ་བཞིན་གཤེགས་པ་དེ་ཉིད་ནི། །ཏིང་ངེ་འཛིན་ལས་བཞེངས་ནས་ཀྱང་། །ཕྱོགས་རྣམས་ཀུན་དུ་གཟིགས་མཛད་དེ། །ཐུབ་པས་མགོན་རྣམས་རབ་བཏུད་ནས། །སངས་

རྒྱས་ཀུན་ལ་འདི་སྐད་གསུངས། །ཀྱེ་མའོ་རྣམ་དག་ཡེ་ཤེས་བདག །ཀྱེ་མའོ་སངས་རྒྱས་ཉེར་ཐོབ་པ། །ཀྱེ་མའོ་གར་མཁན་འཁོར་ལོ་འདི། །རང་གི་ཡེ་ཤེས་འདྲི་བར་བྱེད། །རྟོག་པ་ཐམས་ཅད་ཀུན་བསྡུས་པའི། །མཆོག་ཏུ་གསང་བ་བཤད་པར་བྱ། །ཤིན་
ཏུ་རྙེད་དཀའ་དམ་པ་ཡི། །རིན་ཆེན་སྒྲོམ་གྱི་ཁ་དབྱེ་བྱ། །བླ་ན་མེད་པའི་ཡེ་ཤེས་ཀྱི། །རྒྱལ་མཚན་དམ་པ་བསྒྲེང་བར་བྱ། །རིན་ཆེན་སྒྲོམ་གྱི་ཁ་ཕྱེ་ནས། །ཤེས་རབ་ཀྱིས་ནི་སྣང་བར་བྱ། །དེ་ནས་གསང་བ་མཆོག་གྱུར་པ། །དམ་པ་ཡང་དག་བཤད་པར་བྱ། །བྱ་བ་བསྒྲུབ་པའི་
ཐབས་ཆེན་པོ། །རྟོག་པ་ཐམས་ཅད་བསྡུས་པ་དང་། །གསང་བའི་བྱེ་བྲག་འབྱེད་བྱེད་ཅིང་། །རྣལ་འབྱོར་དགོངས་པ་རྣམ་པར་འགྲོལ། །དེ་ཉིད་དམ་པ་ཤེས་བྱེད་པའི། །རྟོག་པ་ཐམས་ཅད་བསྡུས་པ་དང་། །རྡོ་རྗེ་རྣལ་འབྱོར་ཆོ་ག་དང་། །འཁོར་ལོའི་རྣལ་འབྱོར་ཆོ་ག་སྟེ། །
མཆོག་ཏུ་གསང་བ་ཞེས་བྱ་དེའི། །རྟོག་པ་ཐམས་ཅད་བསྡུས་པ་དང་། །དུས་གསུམ་ཁྱབ་པའི་བྱ་བར་ལྡན། །གསང་བ་རྣལ་འབྱོར་ཀུན་འབྱུང་ཞིང་། །བྱ་བ་ཀུན་གྱི་ཐབས་ཆེན་གྱི། །རྟོག་པ་ཐམས་ཅད་བསྡུས་པ་དང་། །སངས་རྒྱས་རྣལ་འབྱོར་ཆོ་གར་ལྡན། །རྡོ་རྗེ་ཆོས་ནི་རབ་
འཇུག་པ། །སྐུ་གསུམ་ཞེས་བྱ་གསང་ཆེན་གྱི། །རྟོག་པ་ཐམས་ཅད་བསྡུས་པ་དང་། །རྡོ་རྗེ་རྣལ་འབྱོར་ཆོ་གར་ལྡན། །མ་རུངས་ཐམས་ཅད་འདུལ་བྱེད་པ། །ཁམས་གསུམ་རྣམ་རྒྱལ་ཞེས་བྱ་བའི། །རྟོག་པ་ཐམས་ཅད་བསྡུས་པ་དང་། །ཆོས་ཀྱི་རྣལ་འབྱོར་ཆོ་གར་ལྡན། །པདྨ་
གར་མཁན་སྐྱེད་བྱེད་པ། །འགྲོ་བ་འདུལ་བ་ཞེས་བྱ་བའི། །རྟོག་པ་ཐམས་ཅད་བསྡུས་པ་དང་། །སྦྱིན་པ་བཞི་དང་ཡང་དག་ལྡན། །རིན་ཆེན་འཁོར་ལོ་སྐྱེད་བྱེད་ཅིང་། །བྱང་ཆུབ་སེམས་དཔའ་ཡིད་ཆེས་བྱེད། །རྟོག་པ་ཐམས་ཅད་བསྡུས་པ་དང་། །སངས་རྒྱས་ཀུན་གྱི་ཐབས་ཆེན་
པོ། །སྣ་ཚོགས་གར་མཁན་སྐྱེད་བྱེད་པ། །ལས་ཀྱི་རྣལ་འབྱོར་ཆོ་ག་ཡི། །རྟོག་པ་ཐམས་ཅད་བསྡུས་པ་དང་། །དེ་ཉིད་ཤེས་ཤིང་དགོངས་པ་ཤེས། །ཚུལ་ཆེན་མཆོག་ནི་ཤེས་བྱེད་ཅིང་། །མཆོག་གི་དང་པོ་སངས་རྒྱས་མཆོག །རྟོག་པ་ཐམས་ཅད་བསྡུས་པ་སྟེ། །

གོ་རིམས་བཞིན་དུ་འཇུག་བྱེད་པའི། །གཅིག་པར་སེམས་ཅན་བྱ་བ་བྱེད། །བྱ་བ་ཆེན་པོ་མཆོག་ཞི་བ། །ཆོས་དང་ལོངས་སྤྱོད་མཆོག་གྱུར་པས། །སངས་རྒྱས་གར་མཁན་འཁོར་ལོ་ནི། །མཆོག་ཏུ་ངོ་མཚར་གྱུར་པ་འདི། །སྐལ་བ་ཇི་བཞིན་གསང་ཇི་བཞིན། །ཇི་ལྟར་
སེམས་ཅན་འདུལ་འགྱུར་བཤད། །སྔོན་འགྱུར་འདས་པའི་དུས་སུ་ནི། །བྱང་ཆུབ་སེམས་ནི་ཡོངས་འཛིན་ཅིང་། །ཐབས་དང་ཤེས་རབ་ལྡན་པ་ཡི། །བྱང་ཆུབ་སེམས་དཔར་གྱུར་པ་ན། །སྤྲོ་བ་ཆེན་པོས་ངོ་མཚར་ཆེའི། །དཀའ་བ་དཔག་ཏུ་མེད་པ་སྤྱད། །གོ་རིམས་བཞིན་དུ་དེ་
ཡིས་ནི། །དབང་བསྐུར་བར་དུ་ལེགས་ཐོབ་འགྱུར། །ཤེས་རབ་ཆེན་པོས་ཕ་མཐར་ཕྱིན། །གོས་ཀྱི་དབང་ནི་ཐོབ་གྱུར་ནས། །འོག་མིན་སྟུག་པོ་ཉམས་དགའ་བར། །བློ་གྲོས་ཆེན་པོ་བཞུགས་པར་གྱུར། །བདག་ནི་སངས་རྒྱས་མཆོག་འགྱུར་ཞེས། །རྣལ་འབྱོར་པ་ཡིས་
བསམས་ནས་ནི། །བྱ་བ་མཐར་ཕྱིན་བདག་གིས་ནི། །སེམས་ཅན་དོན་འབྱུང་ཐོབ་བྱ་ཞེས། །བྱ་བ་དེ་ལ་དགོངས་ནས་ནི། །སྔོན་དང་ཕྱི་མར་བདེ་ཆེན་མེད། །ཆོས་ཀྱི་དགའ་བ་རྨད་ཆེན་པོའི། །དཀའ་བ་སྤྱད་པར་བྱ་སྙམ་སྟེ། །བྱང་ཆུབ་ཤིང་དྲུང་བཞུགས་གྱུར་ནས། །བྱ་དཀའི་བྱ་བ་
ཀུན་ལྡན་དེ། །དབུགས་འབྱུང་རྔུབ་པ་འགོག་པ་དང་། །སེམས་པ་མེད་ཅིང་གཡོ་བ་མེད། །ལུས་ནི་གང་ཡང་མི་འགུལ་ཞིང་། །ཡན་ལག་བསྐྱོད་པར་མི་བྱེད་དེ། །དེ་བས་གཡོ་བ་མེད་ཆོས་མ། །ཡུན་རིང་དུ་ནི་གནས་པར་གྱུར། །ཕྱོགས་བཅུ་ཡི་ནི་ཐུབ་དབང་པོ། །སངས་རྒྱས་ཀུན་
གྱིས་དགོངས་འགྱུར་བ། །འདི་ནི་རྫོགས་པའི་བྱང་ཆུབ་དུས། །སྡུག་བསྔལ་བྱ་བར་རིགས་པ་མིན། །དེ་བས་བདག་ཅག་ཀུན་ལྷན་ཅིག །བསྐུལ་བར་བྱ་ཕྱིར་འགྲོ་སྙམ་དུ། །དགོངས་ནས་ཐམས་ཅད་རབ་ཆས་ཏེ། །སྡུག་པོ་རུ་ནི་བྱོན་པར་གྱུར། །བྱོན་ནས་ཐུབ་པ་ཐམས་ཅད་ཀྱིས། །
བསྐུལ་བ་མཆོག་ནི་མཛད་པར་འགྱུར། །ཨོཾ་བཛྲ་ཨུཏ་ཏིཥྛ་ཅེས་པ་ཡི། །རིགས་པས་སེ་གོལ་བརྡབས་ནས་ནི། །བྱང་ཆུབ་སེམས་དཔའ་ཀུན་དུ་བསླང་། །ཕྱོགས་རྣམས་ཀུན་དུ་བལྟས་པ་ན། །སངས་རྒྱས་ཀྱི་ནི་རྒྱ་མཚོ་མཐོང་། །ཐུབ་པས་མགོན་རྣམས་ལ་བཏུད་དེ། །བཀའ་

སྩོལ་ཞེས་ནི་གསོལ་བ་བཏབ། །མགོན་ཆེན་སངས་རྒྱས་ཐམས་ཅད་ཀྱིས། །གསུང་གཅིག་གིས་ནི་བཀའ་སྩལ་པ། །སེམས་ཀྱི་སྤྱོད་ཡུལ་ཅི་འདྲ་ཞེས། །རང་གི་སེམས་ནི་སོ་སོར་རྟོག །སངས་རྒྱས་ཀུན་གྱི་གསུང་ཐོས་ནས། །རང་གི་སེམས་ལ་རྟོག་བཞིན་དུ། །ཡུན་
རིང་དུ་ནི་གནས་པ་ན། སེམས་ཀྱི་རྣམ་པ་མ་མཐོང་སྟེ། །ཡན་ལག་ཀུན་གྱིས་རབ་བཏུད་ནས། །ཞུས་པ་བཅོམ་ལྡན་དེ་བཞིན་གཤེགས། །སེམས་ཀྱི་རྣམ་པ་མ་མཐོང་སྟེ། །སེམས་ཀྱི་མཚན་ཉིད་ཇི་ལྟ་བུ། །དེ་ནས་སངས་རྒྱས་ཀུན་གསུངས་པ། །སེམས་ཀྱི་སྤྱོད་ཡུལ་ཤེས་པར་
དཀའ། །ཁྱོད་ལ་སྙིང་པོ་རབ་སྦྱིན་གྱིས། །ཕྲ་མོའི་བཟླས་པ་རབ་ཏུ་སྤྱོད། །ཨོཾ་ཙིཏྟ་པྲཏི་བེདྷཾ་ཀ་རོ་མི། སྙིང་པོ་དག་པ་བླངས་ནས་ནི། །རང་གི་སེམས་ལ་རྟོག་བཞིན་དུ། །ཐང་ཅིག་དེ་ལ་གནས་པ་ན། ཟླ་བའི་དཀྱིལ་འཁོར་བཞིན་དུ་མཐོང་། །དེ་ནས་སེམས་འདི་ཅི་ཞིག་ཡིན། །
ཉོན་མོངས་ས་བོན་ཅན་ནམ་ཅི། །དགེ་བའམ་མི་དགེ་བ་ཡི་སེམས། །ཀུན་གཞི་ས་བོན་ཅན་སེམས་སམ། །ཆོས་ཀྱི་རྒྱུ་མཐུན་རྟོགས་གྱུར་ནས། །ཕ་རོལ་ཕྱིན་པ་དྲུག་བསྟེན་པ། །འདི་ནི་སེམས་ཅན་དག་པ་སྟེ། །ཀུན་ནས་ཉོན་མོངས་གནས་མ་ཡིན། །ཡུན་རིང་དུ་ནི་བསོད་ནམས་
དང་། །ཡེ་ཤེས་ཚོགས་ཆེན་བས་གས་པ་སྟེ། །ཇི་ལྟར་ཟླ་བ་གང་བ་འདི། །དག་ཅིང་གསལ་ལ་རྙོག་མ་མེད། །དེ་བཞིན་ཚོགས་ནི་རྫོགས་པའི་ཕྱིར། །སེམས་ནི་ཟླ་བ་གང་དང་མཚུངས། །དངོས་པོ་ཡོད་དང་མེད་མིན་པ། །ཇི་ལྟར་ཟླ་བ་མཚུངས་ཉིད་ཡིན། །འོན་ཀྱང་བསོད་
ནམས་ཡེ་ཤེས་ཆེ། །རྫོགས་པ་ཟླ་བ་དང་མཚུངས་བས་བསྟན། །ལེགས་བྱས་ཚོགས་ལྡན་རང་སེམས་ཀྱི། །ཟླ་བའི་དཀྱིལ་འཁོར་མཐོང་ནས་ནི། །དགའ་ཞིང་མགུ་བ་སྐྱེས་ནས་ཀྱང་། །སླར་ཡང་ཚིག་ཏུ་རབ་སྨྲས་པ། །བཅོམ་ལྡན་མགོན་པོ་བདག་གིས་ནི། །ཉོན་མོངས་དྲི་མ་ཀུན་
དག་ཅིང་། །གཟུང་དང་འཛིན་པ་དང་བྲལ་བའི། །རང་སེམས་ཟླ་བའི་དཀྱིལ་འཁོར་མཐོང་། །སངས་རྒྱས་ཐམས་ཅད་ཀྱིས་གསུངས་པ། །ཐོག་མར་བྱུང་བའི་སེམས་འདི་བཟང་། །དང་པོར་བློ་བུར་ཉོན་མོངས་རྣམས། །བྱང་ཆུབ་སེམས་ཀྱིས་དག་པར་བྱེད། །དངོས་པོ་ཐམས་ཅད་རྣམ་

སྤངས་པའི། །དག་པ་ཡི་ནི་སྙིང་པོ་འདིས། །ཟླ་བའི་དཀྱིལ་འཁོར་དབུས་སུ་ནི། །བྱང་ཆུབ་ཀྱི་ནི་སེམས་ལ་རྟོགས། །ཨོཾ་བོདྷི་ཙིཏྟ་ཨུཏྦཱ་ད་ཡཱ་མི། སྙིང་པོ་དག་པ་བླངས་ནས་ནི། །སེམས་ཀྱི་དབུས་སུ་རྟོག་པ་ན། །ཟླ་བའི་དབུས་སུ་ཡང་ཟླ་བའི། །དཀྱིལ་འཁོར་གཉིས་པ་མཐོང་བ་ནི། །
ཐུབ་པ་རྣམས་ལ་ཚིག་སྨྲས་པ། །དཀྱིལ་འཁོར་གཉིས་པ་དག་མཐོང་ངོ་། །དེ་ནས་སངས་རྒྱས་ཀུན་གསུངས་པ། །བྱང་ཆུབ་སེམས་ཀྱི་རང་བཞིན་བརྟན། །བརྟན་པར་བྱ་བའི་ཆེད་དུ་ནི། །དེ་ནི་ལེགས་པར་བསྒྲུབ་པར་གྱིས། །ཁྱོད་ལ་སྙིང་པོ་སྦྱིན་བྱ་སྟེ། །ཟློས་ཤིང་དེ་ནི་བརྟན་པར་
དགོངས། །ཨོྃཏིཥྛ་བཛྲ། དཀྱིལ་འཁོར་གཉིས་པའི་དབུས་གནས་པའི། །རྡོ་རྗེ་ཆེན་པོ་སེམས་བྱེད་ཅིང་། །ཐང་ཅིག་སོ་སོར་བརྟགས་པ་ན། །ཤིན་ཏུ་བརྟན་པ་མཐོང་གྱུར་ནས། །སྨྲས་པ་རྫོགས་པའི་སངས་རྒྱས་རྣམས། །དཀྱིལ་འཁོར་དབུས་སུ་རྡོ་རྗེ་མཐོང་། །ཟླ་བའི་དཀྱིལ་
འཁོར་གཉིས་པ་ཡི། །དབུས་ན་རྡོ་རྗེ་དང་ལྡན་མཐོང་། །དེ་ནས་སངས་རྒྱས་ཀུན་གསུངས་པ། །ལྷ་རྣམས་ཀུན་གྱི་རྡོ་རྗེ་ཆེ། །རྡོ་རྗེ་དབྱིངས་ནི་སྐྱེད་པ་ཡི། །ཤིན་ཏུ་བརྟན་པ་འདི་སྨྲོས་ཤིག །ཨོཾ་བཛྲ་ཨཱཏྨ་ཀོ་྅ཧཾ། །སྙིང་པོ་དག་པ་བླངས་ནས་ནི། །རྡོ་རྗེའི་ལུས་ནི་རྣམ་བསྒོམས་
པ། །དེས་ནི་སྲ་བརྟན་ཁོང་སྟོང་མེད། །རྡོ་རྗེའི་སྐུ་ནི་ཐོབ་གྱུར་ནས། །སྨྲས་པ་རྫོགས་པའི་སངས་རྒྱས་རྣམས། །རང་བདག་རྡོ་རྗེའི་སྐུར་མཐོང་ངོ་། །དེ་ནས་སངས་རྒྱས་ཀུན་གསུངས་པ། །སངས་རྒྱས་གཟུགས་སུ་རྣམ་པར་བསྒོམ། །ཨོཾ་ཡ་ཐཱ་སརྦ་ཏ་ཐཱ་ག་ཏཱ་སྟ་ཐཱ་ཨ་ཧཾ། སྙིང་
པོ་དག་པ་བླངས་ནས་ནི། །སངས་རྒྱས་གཟུགས་སུ་རྣམ་བསྒོམས་པས། །རྣམ་པ་ཀུན་གྱི་མཆོག་ལྡན་པའི། །ཀུན་མཁྱེན་ཡེ་ཤེས་ཐོབ་པར་འགྱུར། །སངས་རྒྱས་ཀུན་ལ་རབ་བཏུད་ནས། །སྨྲས་པ་བཅོམ་ལྡན་དེ་བཞིན་གཤེགས། །མགོན་པོ་བདག་ལ་བྱིན་རློབ་
ཅིང་། །བདག་གི་བྱང་ཆུབ་བརྟན་པར་མཛོད། །གྲགས་ཆེན་སངས་རྒྱས་ཐམས་ཅད་ཀྱིས། །རྡོ་རྗེ་དབྱིངས་ཀྱི་ཚིག་ཐོས་ནས། །མགོན་རྣམས་ཐུགས་ཀར་ཞུགས་པར་གྱུར། །རྡོ་རྗེ་ཡི་ནི་རྣལ་འབྱོར་གསུངས། །ཨོཾ་སརྦ་ཏ་ཐཱ་ག་ཏ་ཨ་བྷི་ས་མ་བོདྷི་དྲྀ་ཌྷ་བཛྲ་བ་ན་དྷ། གྲགས་

ཆེན་སངས་རྒྱས་ཐམས་ཅད་ཀྱིས། །རིག་སྔགས་ཆེན་པོ་བརྗོད་པ་ན། །རྡོ་རྗེ་དབྱིངས་ནི་ཤིན་ཏུ་བརྟན། །དེ་ཉིད་ཡེ་ཤེས་མངོན་སངས་རྒྱས། །དེ་ནས་སངས་རྒྱས་ཐམས་ཅད་ནི། །རྡོ་རྗེ་ཐུགས་ཀ་ནས་བྱུང་སྟེ། །ཆོས་ཀྱི་དབང་བསྐུར་བཞི་པོ་ཡིས། །དེ་ཚེ་ཐུབ་པ་
དབང་བསྐུར་གྱུར། །རྡོ་རྗེ་སེམས་དཔའ་བྱས་པ་ཡི། །བྱང་ཆུབ་སེམས་ཀྱི་དབང་བསྐུར་བ། །འབྲས་བུ་བྱང་ཆུབ་སེམས་ལྡན་གང་། །རྡོ་རྗེ་སེམས་དཔའི་དབང་བསྐུར་ཡིན། །བསྐལ་པ་གྲངས་མེད་གསུམ་དག་གི །སྦྱིན་དང་སྦྱིན་པའི་འབྲས་བཟང་དང་། །མཁའ་མཚུངས་
རིན་ཆེན་ཐོབ་བྱེད་པ། །ནོར་བུ་རིན་ཆེན་དབང་བསྐུར་ཡིན། །བསྐལ་པ་གྲངས་མེད་གསུམ་དུ་ནི། །གཞན་གྱིས་དཀའ་བ་སྤྱད་པ་དང་། །བརྩོན་འགྲུབ་ཀྱིས་ནི་འབྲས་བསྒྲུབ་པ། །རྡོ་རྗེ་ལས་ཀྱི་དབང་བསྐུར་ཡིན། །དེ་བཞིན་གཤེགས་པའི་སྙིང་པོ་དག །ཆོས་ཀྱི་དབྱིངས་ཀྱི་ཚུལ་
ཆེན་ཏེ། །ཉོན་མོངས་འདམ་གྱིས་མ་གོས་པ། །རྡོ་རྗེ་པདྨའི་དབང་བསྐུར་ཡིན། །བྱང་ཆུབ་སེམས་རྫོགས་རྡོ་རྗེ་རྣལ་འབྱོར་གྱི། །དབང་བསྐུར་བཞི་པོ་དེ་རྣམས་ཆོས་ཀྱི་དབྱིངས། །དེ་ནས་གཞན་ཡང་གསང་བའི་དབང་བསྐུར་བ། །སངས་རྒྱས་རང་བཞིན་ཡོན་ཏན་དམ་པའི་ཚོགས། །
རྡོ་རྗེ་སེམས་དཔའི་དབང་བསྐུར་བས། །ངོ་བོ་ཉིད་ཀྱི་སྐུ་རུ་འདོད། །རྡོ་རྗེ་ཆོས་ཀྱི་དབང་བསྐུར་བས། །ལོངས་སྤྱོད་རྫོགས་པའི་སྐུ་རུ་འདོད། །རྡོ་རྗེ་རིན་ཆེན་དབང་བསྐུར་བས། །དེ་བཞིན་མཚན་དང་དཔེ་བྱད་དོ། །སངས་རྒྱས་ཀུན་གྱི་ཡེ་ཤེས་ཆེ། །མཁའ་མཚུངས་ཆོས་ཉིད་སྙིང་པོ་ཅན། །
རྡོ་རྗེ་ལས་ཀྱི་དབང་བསྐུར་བས། །སྤྲུལ་པ་ཡི་ནི་སྐུ་རུ་འདོད། །གསང་བ་བཞི་ཡི་དབང་བསྐུར་བས། །རྫོགས་སངས་རྒྱས་ཀྱི་བྱང་ཆུབ་ཐོབ། །དེ་ནས་མིང་གི་དབང་བསྐུར་བས། །ཐུབ་དེ་རྣམ་སྣང་མཛད་ཆེན་གྱུར། །ཆོས་ཉིད་ཀྱང་ནི་ཡང་དག་རྟོགས། །ཆོས་དང་ལོངས་སྤྱོད་རྫོགས་
པར་བརྟག །ཆོས་ཀུན་དངོས་པོ་མེད་པ་སྟེ། །མཚན་མ་མེད་ཅིང་གསལ་བྱེད་མེད། །མཚན་ཉིད་མེད་ཅིང་མཁའ་དང་མཚུངས། །དམིགས་པ་རྣམ་པར་སྤངས་པ་སྟེ། །རང་བཞིན་མེད་ཅིང་བརྗོད་དུ་མེད། །ཆོས་ཀུན་ཚིག་གི་སྤྱོད་ཡུལ་མིན། །གཞན་ཡང་གསང་བར་བརྟགས་

པ་སྟེ། །དེ་ཕྱིར་འདིར་ནི་རྟོགས་པར་བརྗོད། །རྟོག་པ་མེད་པའི་ཆོས་རྣམས་ཀྱི། །ཆོས་ཀྱི་དོན་འདི་ཅི་ཡིན་བརྗོད། །བདག་མེད་དངོས་པོ་ཡོད་པ་མིན། །ཆོས་རྣམས་མེད་ཅིང་རྟོག་པ་མེད། །འོན་ཀྱང་ཆོས་ཉིད་ཡང་དག་རྟོགས། །ཆོས་དང་ལོངས་སྤྱོད་རྫོགས་པར་རྟོགས། །
རྟོགས་པ་ཉམས་སུ་མྱོང་བར་བརྗོད། །འདིར་ནི་ངོ་མཚར་ཉིད་དུ་རྟོགས། །ཆོས་ཀུན་གཟུགས་ཅན་མིན་པ་དང་། །གཟུགས་ཅན་དུ་ཡང་འདི་རུ་བསྟན། །ཆོས་ཀུན་ཚིག་གི་སྤྱོད་ཡུལ་མིན། །སྒྲ་རུ་ཡང་ནི་འདིར་བསྟན་ཏེ། །དེ་བས་ངོ་མཚར་ཆོས་འདི་རུ། །རྟོག་པ་རྟོག་པ་ཡིན་
པར་བརྗོད། །ཅི་ཕྱིར་འདི་ནི་ངོ་མཚར་ཆོས། །དེ་ཉིད་གསང་བ་བསྒྲུབ་པའི་ཕྱིར། །ལས་རྣམས་དྲུག་པོ་ཉིད་དང་ནི། །གཟུགས་ཅན་ཚིག་གི་མཐུ་དག་དང་། །འབྲས་ཕྱིར་སྡོམ་པའི་ངོ་མཚར་ཏེ། །དེ་ཕྱིར་འདི་ནི་ངོ་མཚར་ཆོས། །དེ་ཕྱིར་འདི་ནི་རྟོག་པར་བརྗོད། །དེ་བས་ངོ་མཚར་
ཆོས་འདི་རུ། །རྟོག་པ་འབའ་ཞིག་རྟོག་པ་ཡིན། །ཡང་འདིར་རྟོག་པ་ཇི་ལྟ་བུ། །སེམས་ཅན་ཀུན་གྱི་དོན་བྱའི་ཕྱིར། །བྱང་ཆུབ་ཏུ་ནི་སེམས་བསྐྱེད་ནས། །ཕ་རོལ་ཕྱིན་དྲུག་སྤྱོད་པ་དག །སྟེན་པ་རྟོག་པ་ཉིད་ཡིན་ནོ། །སྒྲུབ་པའི་དོན་ནི་ཇི་ལྟ་བུ། །གང་ཟག་ཆོས་ལ་
བདག་མེད་དང་། །གཟུང་དང་འཛིན་པ་སྤངས་པ་ཡི། །རབ་ཏུ་དགའ་བའི་ས་སྒྲུབ་པ། །དེ་ཚེ་སྒྲུབ་པའི་དོན་ཡིན་ནོ། །ཅི་ཕྱིར་འདི་ནི་རྒྱུད་ཕྱི་མ། །རྒྱུད་ནི་རྒྱུན་ཆགས་ཞེས་བྱ་སྟེ། །འཁོར་བ་རྒྱུད་དུ་འདོད་པ་ཡིན། །ཕྱི་མ་ཞེས་བྱ་ཕ་རོལ་ཏེ། །རྒྱུད་ནི་ཕྱི་མར་བརྗོད་པ་ཡིན། །རྒྱུད་རྒྱུན་
ཆགས་ཞེས་བྱ་སྟེ། །ཕྱི་མ་སྔ་མ་ལས་བྱུང་བའི། །དེ་ཉིད་གསང་བ་སྦས་ཞེས་པ། །རྒྱུད་ནི་ཕྱི་མར་བརྗོད་པ་ཡིན། །ཅི་ཕྱིར་རྒྱུད་དང་ཕྱི་མ་ལགས། །ས་མཐར་ཕྱིན་པའི་རྒྱལ་བ་མཆོག །སྲིད་པའི་བཙོན་ར་ལས་རྒལ་ཡིན། །ཡང་ན་གང་ཞིག་རྒལ་གྱུར་པ། །རྒྱུད་ནི་ཕྱི་མ་ཡིན་པར་
བཤད། །རྒྱུད་ཀྱི་དོན་ནི་ཇི་ལྟར་བྱུང་། །སེམས་ཅན་ཀུན་ལ་ཕན་པའི་ཕྱིར། །སངས་རྒྱས་རྣམས་ཀྱི་ཆོས་ལོངས་སྤྱོད། །སངས་རྒྱས་ཐུགས་རྗེས་བསྐུལ་བ་ནི། །རྒྱུད་དོན་ཡང་དག་བྱུང་བ་ཡིན། །སངས་རྒྱས་རྣམས་ཀྱི་ཐུགས་བྱུང་བའི། །ཆོས་དང་ལོངས་སྤྱོད་བྱུང་བ་སྟེ། །

སངས་རྒྱས་ཀུན་གྱི་གསང་ཆེན་ནི། །རྒྱུད་དོན་ཡང་དག་བྱུང་བ་ཡིན། །རྡོ་རྗེ་འཆང་དྲག་འདི་ཅི་ཞིག །སངས་རྒྱས་གཟུགས་ཀྱིས་མི་འདུལ་བའི། །སེམས་ཅན་གདུག་ཚོགས་དེ་ཡི་ཕྱིར། །རང་གི་ཡེ་ཤེས་བྱང་ཆུབ་སེམས། །རྡོ་རྗེ་དྲག་པོར་ཡང་དག་འབྱུང་། །དྲག་
པོའི་དོན་ནི་ཇི་ལྟར་འབྱུང་། །དྲག་པོ་དྲག་པོའི་མིག་གིས་ནི། །དྲག་པོའི་ཁྲོ་བོ་ཞེས་སུ་བསྟན། །དྲག་པོའི་ལས་ནི་སྤྱོད་བྱེད་རྣམས། །འཆོས་ཤིང་བཟློག་པར་བྱ་བ་ཡིན། །རྡོ་རྗེ་ཞི་བ་འདི་ཅི་ཞིག །གདུག་པ་དེ་ཀུན་བཏུལ་ནས་ནི། །སླར་ཡང་ཞི་བར་ཡང་དག་བྱུང་། །དེ་ཉིད་རྒྱལ་པོ་རྡོ་རྗེ་
འཆང་། །སེམས་ཅན་དོན་གྱི་ཐབས་སྟོན་མཛད། །བཅོམ་ལྡན་རྣམ་པར་སྣང་མཛད་ནི། །ཁྲོ་བོའི་དབང་ཕྱུག་དག་ཏུ་བསྟན། །དེ་ཉིད་ཞི་དང་དྲག་པོ་དང་། །ཕྱག་ན་རྡོ་རྗེ་རྫུ་འཕྲུལ་ཆེ། །ཅི་ཡི་ཕྱིར་ན་ཞི་བར་བརྗོད། །སྣ་ཚོགས་གཟུགས་ཅན་རྣལ་འབྱོར་ཆེ། །སེམས་ཅན་སྨིན་བྱ་འབའ་
ཞིག་ཕྱིར། །ཉོན་མོངས་གདུག་ལ་བརྩེར་དགོངས་ཤིང་། །ཞི་བའི་དོན་ནི་ཡང་དག་བྱུང་། །ཕྱག་ན་རྡོ་རྗེ་ཅི་ཡི་ཕྱིར། །ཉོན་མོངས་གདུག་པ་ཉེས་གཞོམ་ཕྱིར། །བྱང་ཆུབ་སེམས་ཀྱི་རང་བཞིན་བཟང་། །རྡོ་རྗེ་ཕྱག་ན་བསྣམས་མཛད་པ། །དེ་ནི་ཕྱག་ན་རྡོ་རྗེར་བརྗོད། །དུས་གསུམ་
བདུད་རྣམས་དེ་བཞིན་དུ། །མི་མཐུན་ཕྱོགས་ཀྱིས་མི་ཤིགས་པ། །བྱང་སེམས་རང་བཞིན་རྡོ་རྗེ་ནི། །སངས་རྒྱས་ཀུན་གྱི་བསྟན་པའི་ཚོགས། །དེ་ནས་སངས་རྒྱས་ཀུན་དང་ལྡན། །གསང་ཆེན་རྡོ་རྗེ་དེ་ལྟ་བུ། །ཕྱག་ན་རྟག་ཏུ་བསྣམས་པས་ན། །དེ་ནི་ཕྱག་ན་རྡོ་རྗེར་བརྗོད། །རྡོ་རྗེ་
གཏུམ་པའི་དོན་ཅི་ཞིག །རྡོ་རྗེ་གཏུམ་པོ་གནོད་སྦྱིན་ཆེ། །རྡོ་རྗེ་གནོད་སྦྱིན་ཤིན་ཏུ་བརྟན། །ང་རྒྱལ་ཉོན་མོངས་ཞགས་པ་ཟ། །བྱང་ཆུབ་སེམས་དཔའ་རང་བྱུང་བ། །ཅི་ཡི་ཕྱིར་ན་གཏུམ་པོར་བརྗོད། །གཏུམ་གདུག་དྲག་པོ་ཆེན་པོ་ནི། །རང་བྱུང་ང་ཉིད་ཁོ་ན་སྟེ། །སྲིད་པའི་
ཞགས་པ་གཅོད་བྱེད་ཅིང་། །དྲག་པོའི་དོན་ནི་གཏུམ་པོ་ཡིན། །རྡོ་རྗེ་ཁྲོ་བོ་ཅི་ཡིན་བརྗོད། །གསོད་དང་སྐྲོད་པ་དྲག་པོ་སྟེ། །དེ་ནི་ཁྲོ་བོའི་དོན་དུ་བརྗོད། །ང་ནི་རྡོ་རྗེ་མེ་ལྟར་འབར། །ཉོན་མོངས་ཕྱོགས་རྣམས་སྲེག་བྱེད་ཡིན། །རྡོ་རྗེ་རྡོ་རྗེ་ཞེས་གསུངས་པ། །ཅི་ཕྱིར་རྡོ་རྗེར་བརྗོད་པར་བྱ། །སྲ་

ཞིང་སྙིང་པོ་ཁོང་སྟོང་མེད། །གཅད་དང་གཞིག་པར་བྱ་བ་མིན། །བསྲེག་པར་བྱ་མིན་འཇིག་མེད་པས། །སྟོང་ཉིད་རྡོ་རྗེར་བརྗོད་པར་བྱ། །འགྲོ་དྲུག་འཁོར་ལོ་སྤོང་བྱེད་ཅིང་། །སྡིག་པ་དྲལ་བར་བྱེད་པ་ཡི། །བྱང་ཆུབ་སེམས་གང་དེ་རྡོ་རྗེ། །ཉོན་མོངས་ཐམས་ཅད་སེལ་བར་བྱེད། །
རྡོ་རྗེ་འཆང་ཞེས་གསུངས་འདི་ཅི། །སངས་རྒྱས་ཀུན་གྱི་ཡེ་ཤེས་དང་། །བྱང་སེམས་བརྟན་པ་གང་ཡིན་པ། །དེ་ནི་རྒྱལ་པོ་རྡོ་རྗེ་འཛིན། །དེ་བཞིན་གཤེགས་པ་ཀུན་གྱི་བདག །དེ་ཡི་རྡོ་རྗེ་ཇི་ལྟ་བུ། །རྟོག་པ་ཐམས་ཅད་དང་བྲལ་ཞིང་། །ཆོས་སུ་འཛིན་པ་རྣམས་སྤངས་པ། །ཆོས་
རྣམས་ཀུན་གྱི་དེ་བཞིན་ཉིད། །སྟོང་པ་ཉིད་ནི་རྡོ་རྗེར་བརྗོད། །གཟུགས་སོགས་ཆོས་ཀྱི་རང་བཞིན་གང་། །འགྱུར་བ་མེད་པའི་དེ་བཞིན་ཉིད། །ཆོས་ཀྱི་དབྱིངས་ནི་བརྟན་པ་གང་། །དེ་ལྟ་བུ་ནི་འདི་རྡོ་རྗེ། །རྡོ་རྗེ་རིགས་ཀྱི་དོན་འདི་ཅི། །བདེན་ཞིང་དོན་ཡོད་དེ་བཞིན་ཉིད། །འགྱུར་བ་
མེད་ཅིང་སྐྱེ་བ་མེད། །འགག་མེད་དེ་ཁོ་ན་ཉིད་གང་། །དེ་ལྟ་བུ་ནི་རྡོ་རྗེ་ཡིན། །དོན་ཡོད་འགྱུར་བ་མེད་པ་ཡི། །དེ་ལྟ་བུ་ཡི་རིགས་གྱུར་པ། །བྱང་ཆུབ་སེམས་དཔའི་རིགས་སུ་བརྗོད། །དེ་ནི་རྡོ་རྗེའི་རིགས་ཞེས་བྱ། །ཐོག་མ་ཐ་མ་མེད་པའི་ཆོས། །བྱང་ཆུབ་སེམས་དཔའ་ཞེས་སུ་
བརྗོད། །བདེན་ཞིང་སླུ་བ་མེད་པ་ཡི། །བྱང་ཆུབ་སེམས་གང་དེ་རིགས་ཡིན། །རྡོ་རྗེ་འཆང་བ་རྣམས་ནི་དུ། །ཕྱོགས་རྣམས་ཐམས་ཅད་ཀུན་ཁྱབ་པའི། །བྱང་ཆུབ་སེམས་དཔའ་མཁས་པ་ནི། །ཆོས་དབྱིངས་དང་མཉམ་ཐུག་པ་མེད། །རྡོ་རྗེ་འཆང་རྣམས་དེ་སྙེད་དོ། །རྡོ་རྗེའི་
རིགས་ཀུན་གང་གི་ཡིན། །ཆོས་ཀྱི་བདག་པོ་བླ་མེད་པ། །རྣམ་པར་སྣང་མཛད་རྫོགས་སངས་རྒྱས། །མགོན་དེས་ཡོངས་སུ་བཟུང་བ་དེའི། །དེ་ཡི་དཀྱིལ་འཁོར་ཡིན་གསུངས་བ། །སྟོན་པ་གང་ཞིག་འདི་རྣམས་སུའི། །རྗེས་སུ་སྟོན་པར་བྱེད་པ་གང་། །དེ་ཡི་སྤྱོད་ལམ་བྱ་
བ་ཅི། །གསང་བ་ཀུན་དུ་བསྡུས་པས་གསུངས། །འདི་ཡི་སྟོན་པ་བྱང་ཆུབ་སེམས། །རྗེས་སུ་སྟོན་བྱེད་ཤེས་རབ་ཐབས། །ཕྱག་རྒྱ་རྣམས་ནི་སྤྱོད་ལམ་སྟེ། །སྔགས་རྣམས་དེ་ཡི་བྱ་བ་ཡིན། །རྡོ་རྗེ་འཆང་གི་རིགས་གང་ཡིན། །རྡོ་རྗེ་འཆང་བ་དེ་ཀུན་གྱི། །རིགས་ནི་བྱང་ཆུབ་

སེམས་ཡིན་ཏེ། །བྱང་ཆུབ་སེམས་དཔའ་བརྟུལ་ཞུགས་བཟང་། །སངས་རྒྱས་ཀྱི་ཡང་དེ་ཉིད་ཡུལ། །ཆེན་པོ་གནས་གང་ཞིག་ན་གནས། །ཆོས་རྣམས་ཀུན་ལ་གནས་མེད་དེ། །རྩ་བ་མེད་སེམས་སྤྱོད་ཡུལ་ལོ། །ཆོས་རྣམས་ཐམས་ཅད་གཟུགས་ཅན་མིན། །ཆོས་
ཀྱི་དབྱིངས་ཏེ་སྤྱོད་ཡུལ་མེད། །རིགས་ནི་རྣམ་པ་དུ་ཡིན་བརྗོད། །རྟག་དང་མི་འཁྲུགས་རིན་ཆེན་དབང་། །འོད་དཔག་མེད་པ་དངོས་གྲུབ་རྣམས། །རིགས་ནི་རྣམ་པ་བརྒྱར་གསུངས་ཏེ། །མདོ་རུ་བསྡུ་ན་རྣམ་པ་ལྔ། །སངས་རྒྱས་རྡོ་རྗེ་རིན་ཆེན་དང་། །ཆོས་དང་ལས་དང་རྣམ་པ་ལྔ། །
ཅི་ཡི་ཕྱིར་ན་རིགས་སུ་བརྗོད། །མཆོག་དང་དམན་པའི་བྱེ་བྲག་གིས། །རིགས་ཞེས་བྱ་བ་དེ་རྣམས་གཉིས། །སེམས་ཅན་ལམ་ངན་ཞུགས་པ་ཡི། །རིགས་ནི་དམན་པ་ཡིན་པར་བརྗོད། །ལམ་ངན་འགྲོ་བ་སྤངས་ནས་ནི། །བྱང་ཆུབ་སེམས་ལ་འཇུག་པ་ཆོས། །དེ་བས་རྡོ་རྗེ་
རིགས་བརྗོད་པ། །རིགས་དེ་ཡང་ནི་ལྔ་པ་ཡིན། །རིགས་བདག་རང་བཞིན་འདི་ཅི་ཞིག །བྱང་ཆུབ་སེམས་ནི་རྒྱལ་པོ་ཆེ། །རྡོ་རྗེ་སེམས་དཔའ་འཇིགས་པ་མེད། །མགོན་པོ་ཆེན་པོ་རིགས་ཀྱི་བདག །དེ་ནི་རིགས་ཀྱང་ལྔ་པ་ཡིན། །ཅི་ཡི་ཕྱིར་ན་སེམས་དཔར་བརྗོད། །སེམས་
དཔའ་ཞེས་བྱ་རྣམ་གསུམ་སྟེ། །བྱིས་པ་དེ་བཞིན་མཁས་པ་དང་། །དེ་བཞིན་བྱང་ཆུབ་སེམས་དཔའ་དང་། །རྣམ་གསུམ་སེམས་དཔའ་བརྗོད་པར་བྱ། །ཡང་གསུངས་པ། ཅི་ཡི་ཕྱིར་ན་སེམས་དཔའ་བརྗོད། །སེམས་དཔའ་ཅི་ཡིན་བྱིས་པ་བརྗོད། །སེམས་དཔའ་མཁས་པ་
ཅི་ཡི་ཕྱིར། །བྱང་ཆུབ་སེམས་དཔའ་ཅི་ཡིན་བརྗོད། །གནས་གང་ཞིག་ཏུ་བརྗོད་བྱ་བ། །དེ་ནི་དེ་ཡི་སེམས་དཔར་བརྗོད། །ཆོས་སམ་ཡང་ན་ཆོས་མིན་དང་། །ལེགས་བྱས་ཉེས་པར་བྱས་པ་ལ། །མི་ཤེས་མུན་པས་བསྒྲིབས་གྱུར་ཅིང་། །ཆོས་ལ་ཉོན་མོངས་བདག་ཉིད་འཛིན། །
དམན་ཞིང་གཏི་མུག་རིགས་ཅན་གྱུར། །དེ་ལྟ་བུ་ནི་བྱིས་པར་བརྗོད། །ཉོན་མོངས་ཀུན་ལ་ཆགས་པ་དང་། །དེ་བཞིན་སྲིད་པ་ངན་སོང་གསུམ། །མི་ཤེས་མུན་པ་ལ་ཆགས་པ། །དེ་འདིར་བྱིས་པར་བརྗོད་པར་བྱ། །སེམས་དཔའ་མཁས་པ་གང་ཞིག་ཡིན། །དྲི་མ་ལས་འདས་

ཉོན་མོངས་སྤོང་། །རྣལ་འབྱོར་ལྡན་ཞིང་བརྟུལ་ཞུགས་ཆེ། །མི་ཤེས་ལིང་ཏོག་འཇོམས་བྱེད་པ། །དེ་ནི་སེམས་དཔའ་མཁས་པར་བརྗོད། །འདིར་ནི་བྱང་ཆུབ་སེམས་དཔའ་གང་། །ཆོས་ཀྱི་དེ་ཉིད་རྟོགས་གྱུར་ཅིང་། །འཁོར་བའི་གནས་ནས་སད་འགྱུར་ཏེ། །སེམས་
ཅན་རྣམས་ནི་སད་བྱེད་པ། །དེ་ནི་བྱང་ཆུབ་སེམས་དཔར་བརྗོད། །རྫོགས་པའི་བྱང་ཆུབ་རྣམ་པ་དུ། །དེ་ལ་བྱང་ཆུབ་རྣམ་གསུམ་སྟེ། །དམན་དང་མཆོག་དང་བར་མའོ། །དམན་པ་ཉན་ཐོས་སེམས་ཡིན་ཏེ། །བར་མ་རང་རྒྱལ་བྱང་ཆུབ་བོ། །མཆོག་ནི་བྱང་ཆུབ་སེམས་
ཡིན་ཏེ། །དེ་ནི་མི་འགྱུར་རྡོ་རྗེ་ཡིན། །སྐུ་གསུང་ཐུགས་རྣམས་གཞག་པ་གང་། །བྱང་ཆུབ་མཆོག་ཏུ་བརྗོད་པར་བྱ། །ཅི་ཕྱིར་རྡོ་རྗེ་སེམས་དཔའ་ཡིན། །བྱང་ཆུབ་མཆོག་གི་ཡེ་ཤེས་གང་། །དེ་ནི་རྡོ་རྗེ་ངེས་པར་བརྗོད། །ཡེ་ཤེས་རྡོ་རྗེ་ལས་བྱུང་བ། །དེ་ནི་རྡོ་རྗེ་སེམས་དཔར་
བརྗོད། །རྡོ་རྗེ་འཆང་བ་ཀུན་གྱི་རྒྱལ། །ཅི་ཡི་ཕྱིར་ན་སེམས་དཔར་བརྗོད། །རྡོ་རྗེ་སེམས་དཔའ་མགོན་པོ་ཆེ། །དགའ་ཆེན་དེ་ནི་ཆགས་སམ་ཅི། །སེམས་ཅན་ཐམས་ཅད་དགྲོལ་བའི་ཕྱིར། །སེམས་ཅན་རྣམས་ལ་ཆགས་པ་སྟེ། །དེ་ནི་རྡོ་རྗེ་འཛིན་རྒྱལ་པོ། །རྡོ་རྗེ་སེམས་
དཔའ་ཞེས་སུ་བསྒྲགས། །བྱང་ཆུབ་སེམས་ཀྱི་འབྲས་བུ་སྟེ། །སངས་རྒྱས་ཡེ་ཤེས་བླ་མེད་གང་། །དེ་ནི་རྡོ་རྗེ་སེམས་རང་བཞིན། །ཆོས་དང་ལོངས་སྤྱོད་སྤྲུལ་པའོ། །རྡོ་རྗེ་རྒྱལ་པོ་ཅི་ཡིན་བརྗོད། །རྡོ་རྗེ་རིགས་ཀུན་རྒྱལ་པོ་སྟེ། །རྡོ་རྗེ་ལྕགས་ཀྱུ་ཞེས་སུ་བརྗོད། །
དགུག་དང་དབབ་པའི་རྡོ་རྗེ་ནི། །དེ་ནི་རྡོ་རྗེ་རྒྱལ་པོར་བརྗོད། །བསྡུ་བ་ཡི་ནི་དངོས་པོ་བཞི། །བཅོམ་ལྡན་འདས་ཀྱིས་གང་སྤྱད་པ། །སེམས་ཅན་དགུག་པའི་ཐབས་ཞེས་པ། །རྡོ་རྗེ་རྒྱལ་པོར་ཡང་དག་བྱུང་། །རྡོ་རྗེ་ཆགས་པ་འདི་དོན་ཅི། །སངས་རྒྱས་ཐམས་ཅད་མཉེས་བྱེད་པ། །
རྗེས་སུ་ཆགས་པ་ཞེས་སུ་བརྗོད། །རྡོ་རྗེ་ཆགས་པ་བདུད་ཆེན་པོ། །དེ་ནི་རྡོ་རྗེ་ཆགས་པར་བརྗོད། །སེམས་ཅན་སྨིན་ཕྱིར་བཅོམ་ལྡན་ཀྱིས། །གང་ཚེ་བྱང་ཆུབ་སྤྱོད་པ་སྤྱད། །བྱང་ཆུབ་སྤྱོད་པ་རྗེས་ཆགས་པ། །རྡོ་རྗེ་ཆགས་པར་ཡང་དག་འབྱུང་། །རྡོ་རྗེ་ལེགས་པ་ཅི་ཡིན་

བརྗོད། །སངས་རྒྱས་ཐམས་ཅད་མཉེས་བྱེད་ཅིང་། །ལེགས་སོ་ཞེས་བྱ་རབ་སྟེར་བྱེད། །བྱང་ཆུབ་སེམས་དཔའ་ཀུན་མགུ་བྱེད། །དེ་ནི་རྡོ་རྗེ་ལེགས་པར་བརྗོད། །སེམས་ཅན་དག་པ་མགུ་བྱེད་ཅིང་། །རྡོ་རྗེ་འཆང་རྣམས་སྒྲུབ་པར་བྱེད། །སེམས་ཅན་
མཁས་རྣམས་དགའ་བྱེད་ཅིང་། །གསང་བ་འཛིན་པ་རངས་པར་བྱེད། །ཆོས་དང་ལོངས་སྤྱོད་རྫོགས་སྐུའི་ཕྱིར། །བཅོམ་ལྡན་འདས་འདི་ཆོས་རྣམ་དྲུག །གང་གི་ཚེ་ནི་སྔོན་བསྒྲུབས་པ། །རྡོ་རྗེ་ལེགས་པར་ཡང་དག་བྱུང་། །རྡོ་རྗེ་རིན་ཆེན་ཅི་ཡི་ཕྱིར། །བྱང་ཆུབ་སེམས་
དཔའི་སྦྱིན་པ་གང་། །མཁའ་མཉམ་རིན་ཆེན་ལྟ་བུ་སྟེ། །རྡོ་རྗེ་རིན་ཆེན་སྐལ་བ་ཆེ། །དེ་ནི་རྡོ་རྗེ་རིན་ཆེན་བརྗོད། །སེམས་དཔའ་ཆེན་པོའི་དབང་བསྐུར་ཏེ། །སེམས་ཅན་ཀུན་གྱི་དབང་བསྐུར་བ། །བྱང་ཆུབ་སྙིང་པོའི་དབང་བསྐུར་གྱིས། །རྒྱལ་བའི་སྲས་རྣམས་འཛིན་པར་བྱེད། །
སངས་རྒྱས་ཀུན་གྱི་སྦྱིན་པ་གང་། །མཁའ་མཚུངས་རྡོ་རྗེ་ཡང་དག་བྱུང་། །དེ་ནི་རིན་ཆེན་དོན་ཡོད་དེ། །དེ་ནི་རྡོ་རྗེ་རིན་ཆེན་བརྗོད། །རྡོ་རྗེ་གཟི་བརྗིད་ཅི་ཡིན་བརྗོད། །མ་རིག་ལིང་ཏོག་འཁོར་བ་ཡི། །མི་ཤེས་མུན་པ་འཇོམས་བྱེད་ཅིང་། །ཐར་བའི་སྣང་བ་གཟི་བརྗིད་ཆེ། །དེ་ནི་རྡོ་རྗེ་
གཟི་བརྗིད་བརྗོད། །ཅི་ཕྱིར་རྡོ་རྗེ་རྒྱལ་མཚན་ཡིན། །རྒྱལ་མཚན་སངས་རྒྱས་ཀུན་རང་བཞིན། །ཐར་པའི་ལམ་འགྲོ་རྒྱལ་མཚན་ཏེ། །ཆོས་ཀྱི་རྒྱལ་མཚན་རྒྱལ་མཚན་ཆེ། །དེ་ནི་རྡོ་རྗེ་རྒྱལ་མཚན་བརྗོད། །རྡོ་རྗེ་བཞད་པ་ཅི་ཡིན་བརྗོད། །རྣལ་འབྱོར་ཆེན་པོ་རྡོ་རྗེ་བཞད། །སངས་
རྒྱས་ཐམས་ཅད་བཞད་བྱེད་ཅིང་། །བྱང་ཆུབ་སེམས་དཔའ་ཀུན་དབུགས་འབྱིན། །དེ་ནི་རྡོ་རྗེ་བཞད་པར་བརྗོད། །ཅི་ཡི་ཕྱིར་ན་རྡོ་རྗེ་ཆོས། །རྣལ་འབྱོར་ཆེན་པོ་སངས་རྒྱས་ཆོས། །སངས་རྒྱས་སེམས་ཅན་རྟོགས་བྱེད་པ། །དག་པ་དེ་བཞིན་གཤེགས་སྙིང་པོ། །དེ་ནི་རྡོ་རྗེ་ཆོས་སུ་
བརྗོད། །རྡོ་རྗེ་རྣོན་པོ་ཅི་ཡིན་བརྗོད། །ཤེས་རབ་རྣོན་པོ་ཡེ་ཤེས་ཆེ། །ཤིན་ཏུ་སྡུག་པའི་ཉོན་མོངས་གཅོད། །ཤེས་བྱའི་སྒྲིབ་པའང་གཅོད་པས་ན། །དེ་ནི་རྡོ་རྗེ་རྣོན་པོར་བརྗོད། །རྡོ་རྗེ་རྒྱུ་ཡི་དོན་ཅི་ཞིག །འཁོར་ལོ་སངས་རྒྱས་གར་བྱེད་པས། །ཆོས་ཀྱི་འཁོར་ལོ་ཤིན་ཏུ་བརྟེན། །

དམ་ཆོས་རོ་ཡི་བཅུད་ལས་བྱུང་། །དེ་ནི་རྡོ་རྗེ་རྒྱུ་ཞེས་བྱ། །རྡོ་རྗེ་སྨྲ་བ་ཅི་ཡིན་བརྗོད། །སངས་རྒྱས་ཀུན་གྱི་ཆོས་ཆེན་པོ། །མཁའ་མཚུངས་ཚིག་དང་བྲལ་བ་སྟེ། །ཚིག་མེ་ཚིག་ལས་ཡང་དག་བྱུང་། །དེ་ནི་རྡོ་རྗེ་སྨྲ་བར་བརྗོད། །ཅི་ཡི་ཕྱིར་ན་རྡོ་རྗེ་ལས། །སེམས་ཅན་སྨིན་དང་
གྲོལ་བ་ཡི། །སངས་རྒྱས་ཀུན་གྱི་ལས་གང་དང་། །སངས་རྒྱས་ལས་ནི་བདག་མེད་པ། །དེ་ནི་རྡོ་རྗེ་ལས་ཞེས་བྱ། །རྡོ་རྗེ་སྲུང་བ་ཅི་ཡིན་བརྗོད། །བྱང་ཆུབ་སེམས་དཔའི་སྲུང་བ་སྟེ། །ཐེག་པ་དམན་པ་སྤོང་བྱེད་ཅིང་། །རྩེ་མོ་ནས་ལྟུང་སྲུང་བྱེད་པ། །དེ་ནི་རྡོ་རྗེ་སྲུང་བར་བརྗོད། །
རྡོ་རྗེ་གནོད་སྦྱིན་འདི་དོན་ཅི། །སྡིག་པ་ཐམས་ཅད་ཟད་བྱེད་ཅིང་། །ཉོན་མོངས་ཐམས་ཅད་ངེས་པར་གཅོད། །སྲིད་པ་ཟ་བྱེད་གནོད་སྦྱིན་ཆེ། །དེ་ནི་རྡོ་རྗེ་གནོད་སྦྱིན་བརྗོད། །རྡོ་རྗེ་ཁུ་ཚུར་ཅི་ཡིན་བརྗོད། །བདེན་ཞིང་གཞན་མིན་དེ་བཞིན་ཉིད། །འགྱུར་མེད་དེ་ཁོ་ན་ཉིད་གང་། །
སངས་རྒྱས་དེ་བཞིན་ཉིད་ཡེ་ཤེས། །དེ་ནི་རྡོ་རྗེ་ཁུ་ཚུར་བརྗོད། །སྔོན་དུ་བྱང་ཆུབ་སེམས་འགྱུར་གང་། །རྡོ་རྗེ་སེམས་དཔའ་ཡང་དག་བྱུང་། །བསྡུ་བའི་དངོས་པོ་བཞི་པོ་ནི། །རྡོ་རྗེ་རྒྱལ་པོར་ཡང་དག་བྱུང་། །སེམས་ཅན་སྨིན་བྱེད་ཆགས་པའོ། །བྱང་ཆུབ་སྤྱོད་པ་ལེགས་པ་སྟེ། །
དེ་ཉིད་ཅེས་བྱ་དམ་ཚིག་ཆེ། །བྱང་ཆུབ་སེམས་ལས་ཡང་དག་བྱུང་། །སྔོན་གྱི་སྦྱིན་པའི་སྤྱོད་གྱུར་གང་། །དེ་ནི་རྡོ་རྗེ་རིན་ཆེན་བརྗོད། །སེམས་ཅན་ཀུན་ལ་མི་འཇིགས་སྦྱིན། །དེ་ནི་རྡོ་རྗེ་གཟི་བརྗིད་བརྗོད། །འབྱུང་པོ་ཀུན་ལ་བྱམས་པ་ནི། །རྡོ་རྗེ་རྒྱལ་མཚན་ཡང་དག་བྱུང་། །
ཆོས་ཀྱི་སྦྱིན་པ་བཞད་པ་སྟེ། །དབང་བསྐུར་བཞི་པོར་བསྟན་པ་ཡིན། །རྫོགས་སངས་རྒྱས་ཀྱི་ཏིང་འཛིན་གང་། །རྡོ་རྗེ་ཆོས་ནི་དེ་ལས་བྱུང་། །ཉོན་མོངས་གཅོད་བྱེད་རྡོ་རྗེ་ཆེ། །རྡོ་རྗེ་རྣོན་པོར་ཡང་དག་བྱུང་། །མངོན་ཤེས་དང་ནི་མཐུ་ལ་སོགས། །དེ་ནི་རྡོ་རྗེ་རྒྱུ་རུ་བརྗོད། །གསུངས་ལ་
སོགས་པ་གྲུབ་པ་ནི། །རྡོ་རྗེ་སྨྲ་བར་ཡང་དག་བྱུང་། །ཡེ་ཤེས་ཆེན་པོ་ཆོས་ཆེན་པོ། །དམ་ཚིག་ཅེས་བྱའི་དགའ་ཆེན་པོ། །ཡེ་ཤེས་མངོན་པར་རྟོགས་ཏེ་དག །རྡོ་རྗེ་ཆོས་ལས་ཡང་དག་བྱུང་། །བརྩོན་འགྲུས་ཕ་རོལ་ཕྱིན་རྒྱལ་པོ། །རྡོ་རྗེ་ལས་སུ་ཡང་དག་བྱུང་། །ཐེག་པ་

དམན་པ་སྤོང་བྱེད་པ། །དེ་ཕྱིར་རྡོ་རྗེ་སྲུང་བར་བརྗོད། །ཉོན་མོངས་སྲིད་པའི་གདོན་ཆེན་པོ། །རྡོ་རྗེ་གནོད་སྦྱིན་ཡང་དག་བྱུང་། །དེ་ཉིད་ཡེ་ཤེས་མངོན་བྱང་ཆུབ། །དེ་ཉིད་རྡོ་རྗེ་ཁུ་ཚུར་བརྗོད། །ལས་ཀྱི་དམ་ཚིག་བཞི་པོ་སྟེ། །ལས་ཀྱི་སེམས་དཔའ་བདག་ཉིད་ཆེ། །ལས་
ཀྱི་འཁོར་ལོ་ལས་བྱུང་བའི། །རྡོ་རྗེ་ལས་ནི་དེ་ལས་བྱུང་། །གཞན་ཡང་བྱང་ཆུབ་སེམས་ནི་བསྐྱེད་པ་ལས། །རྡོ་རྗེ་སེམས་དཔའ་ཡང་དག་བྱུང་། །རྡོ་རྗེ་རང་བཞིན་སེམས་དེ་ཡང་། །རྣམ་པ་བཞི་རུ་བྱུང་བ་སྟེ། །སྒྲོལ་བ་དང་ནི་གྲོལ་བ་དང་། །དབུགས་འབྱིན་མྱ་ངན་འདས་འགོད་
བྱེད། །སེམས་དཔའ་རྒྱལ་པོ་ཆགས་པ་ཆེ། །རྡོ་རྗེ་ལེགས་པར་ཡང་དག་བྱུང་། །བསོད་ནམས་ཡེ་ཤེས་ཚོགས་ཉིད་ལས། །རྡོ་རྗེ་རིན་ཆེན་རབ་ཏུ་བསྒྲགས། །བསོད་ནམས་རང་བཞིན་རིན་ཆེན་དེ། །རྣམ་བཞི་ཇི་སྐད་བཤད་པ་བཞིན། །ཡེ་ཤེས་ཀྱི་ནི་ཚོགས་བརྗོད་པ། །དེ་ནི་རྡོ་རྗེ་
ཆོས་ཞེས་བྱ། །ཡེ་ཤེས་རང་བཞིན་ཆོས་དེ་ཡང་། །རྣམ་པ་བཞིར་ནི་ཡང་དག་བྱུང་། །བརྩོན་འགྲུས་ཕ་རོལ་ཕྱིན་པ་ཉིད། །དེ་ནི་རྡོ་རྗེ་ལས་སུ་བརྗོད། །བརྩོན་འགྲུས་རང་བཞིན་ལས་དེ་ཡང་། །རྣམ་པ་བཞིར་ནི་ཡང་དག་བྱུང་། །རྩོམ་དང་སྦྱོར་བ་ཞེས་བྱ་དང་། །སོ་སོར་རྟོག་དང་སྒྲུབ་
པ་སྟེ། །བརྩོན་འགྲུས་དེ་བཞིན་ལས་བཞི་པོ། །དེ་ལས་མཐར་གྱིས་བྱུང་བ་ཡིན། །སེམས་དཔའ་འདི་རྣམས་གང་ལས་བྱུང་། །རྡོ་རྗེ་སེམས་སོགས་དེ་བཞིན་དུ། །བྱང་ཆུབ་སེམས་ལས་ཡང་དག་བྱུང་། །ཕ་རོལ་ཕྱིན་དྲུག་སྤྱོད་པ་ལས། །རྡོ་རྗེ་ཅན་རྣམས་བྱུང་བར་འདོད། །དེ་བཞིན་
ཕ་དང་མ་ནི་གང་། །མ་ནི་ཤེས་རབ་ཕ་རོལ་ཕྱིན། །ཕ་ནི་ཐབས་ལ་མཁས་པ་སྟེ། །པདྨ་ལས་ནི་སངས་རྒྱས་སྲས། །རྡོ་རྗེ་ཅན་རྣམས་གང་ལས་བྱུང་། །རྡོ་རྗེ་རྒྱལ་པོ་དེ་བཞིན་ཆགས། །རྡོ་རྗེ་རིན་ཆེན་རྒྱལ་མཚན་དང་། །རྡོ་རྗེ་ཆོས་དང་དེ་བཞིན་རྣོ། །དེ་རྣམས་ཤེས་རབ་གཙོ་བོར་བསྟན། །
རྡོ་རྗེ་སེམས་དཔའ་རྡོ་རྗེ་ལེགས། །གཟི་བརྗིད་དེ་བཞིན་བཞད་པ་ཉིད། །རྒྱུ་དང་སྨྲ་བ་སེམས་དཔའ་ཆེ། །དེ་རྣམས་ཐབས་ལས་བྱུང་བ་ཡིན། །རྡོ་རྗེ་ལས་དང་རྡོ་རྗེ་བསྲུང་། །གནོད་སྦྱིན་དེ་བཞིན་ཁུ་ཚུར་ཉིད། །ཤེས་རབ་ཐབས་སུ་གྲགས་པ་སྟེ། །བརྟན་པ་ཆེན་པོ་ཚོགས་སུ་བཤད། །རྡོ་

རྗེའི་རིགས་རྣམས་ཀུན་གྱི་གཙོ། །རྡོ་རྗེ་ལྕགས་ཀྱུ་མ་རུ་བཤད། །རྡོ་རྗེ་རིན་ཆེན་མཆོག་གྱུར་པ། །རྡོ་རྗེ་སེམས་དཔའ་དེ་བཞིན་ཕ། །ཕ་ནི་རྡོ་རྗེ་རྒྱལ་པོ་རྒྱུ། །མ་ནི་རྡོ་རྗེ་རྣོན་པོ་སྟེ། །པདྨའི་རིགས་ཆེན་བཟང་པོ་ཡི། །པད་འཛིན་གང་ལས་བྱུང་བའོ། །རྡོ་རྗེ་གཟི་བརྗིད་རིན་ཆེན་
པ། །རྒྱལ་མཚན་མ་ནི་ཡིན་པར་བསྟན། །ནོར་བུ་རིན་ཆེན་བཟང་པོ་ཡི། །རིན་ཆེན་གང་ལས་བྱུང་བའོ། །ཕ་ནི་རྒྱལ་པོ་རྡོ་རྗེ་ལས། །མ་ནི་གནོད་སྦྱིན་སྲུང་བ་སྟེ། །ལས་ཀྱི་རིགས་ཅན་བཟང་པོ་ཡི། །ལས་རྣམས་གང་ལས་བྱུང་བའོ། །དང་པོ་གང་ཞིག་ཅི་ཞེ་ན། །དངོས་ཀུན་དང་
པོ་ས་བོན་ཏེ། །རྡོ་རྗེ་ཅན་ཀུན་དང་པོ་སེམས། །འདུན་དང་དྲན་དང་ཏིང་ངེ་འཛིན། །རིགས་རྣམས་ཀུན་གྱི་དང་པོར་བཤད། །ཡང་གླེང་གཞི་ཅི་ཡིན་ཞེ་ན། །རིགས་བཞི་ལས་ནི་ཡང་དག་བྱུང་། །ཚངས་བའི་གནས་ཆེན་དང་ལྡན་པའི། །སྙིང་རྗེའི་བདག་ཉིད་ཅན་རྣམས་ཀྱི། །སྙིང་རྗེ་
ཆེན་པོ་གླེང་གཞི་ཡིན། །དམིགས་པ་གང་ཞིག་ཡིན་ཞེ་ན། །རྟོག་པ་མེད་ཅིང་དམིགས་པ་མེད། །དང་པོར་བྱང་ཆུབ་སེམས་བྱུང་བའི། །ཕ་རོལ་ཕྱིན་པ་མཆོག་དྲུག་ནི། །དེ་ཡི་དམིགས་པ་ཡིན་པར་བཤད། །རྐྱེན་གང་ཞེ་ན། རྟག་ཏུ་སྲིད་གསུམ་མངོན་དགའ་བ། །སེམས་
ཅན་སྡུག་བསྔལ་གྱུར་བལྟས་ནས། །སྙིང་རྗེ་དང་ནི་ལྡན་པ་ཡི། །བྱང་ཆུབ་སེམས་ཀྱིས་བསྐུལ་བའོ། །གསང་བ་འདི་ནི་གང་དུ་བྱུང་། །འོག་མིན་སྟུག་པོ་ཉམས་དགའ་ཞིང་། །སྟུག་པོའི་ཞིང་ཁམས་འཇིགས་མེད་པ། །དེ་ནས་སངས་རྒྱས་རྣམས་ཀྱི་ཆོས། །རྫོགས་པར་
ལོངས་སྤྱོད་ཚུལ་འདི་བྱུང་། །ཁྱབ་བདག་འདི་རྣམས་གང་ནས་བྱུང་། །རྡོ་རྗེ་རིན་ཆེན་མཆོག་ཆེན་གྱི། །གཞལ་ཡས་ཁང་པ་ཡིད་འོང་ཞིང་། །སངས་རྒྱས་རྣམས་ཀྱི་ཆོས་ལྡན་པ། །དེ་ནས་ཁྱབ་བདག་འདི་རྣམས་བྱུང་། །ཐོག་མ་ཐ་མ་མེད་འདི་ཅི། །གསང་བའི་དབང་ཕྱུག་ཆེན་པོ་
གསུང་། །སེམས་ཅན་ཀུན་གྱི་ཤེས་པ་དང་། །དེ་བཞིན་གཤེགས་པའི་སྙིང་པོ་དང་། །ཆོས་དབྱིངས་རྡོ་རྗེ་ཆེན་པོ་སྟེ། །ཐོག་མ་ཐ་མ་མེད་པར་བཤད། །རབ་ཏུ་དགའ་བ་ཉིད་འདི་ཅི། །བདེ་ཆེན་རབ་ཏུ་གྲུབ་བྱའི་ཕྱིར། །སངས་རྒྱས་བྱང་ཆུབ་བླ་ན་མེད། །རྡོ་རྗེ་སེམས་དཔའ་རྒྱལ་པོ་ཆེ། །

རབ་ཏུ་དགའ་བ་ཉིད་ཅེས་བཤད། །རབ་བཟང་ཉིད་ནི་ཇི་ལྟ་བུ། །དངོས་པོ་ཀུན་མཆོག་རྡོ་རྗེ་ནི། །བྱང་ཆུབ་ཀྱི་ནི་སེམས་ཞེས་བརྗོད། །སངས་རྒྱས་སྐྱེད་བྱེད་བཟང་པོ་ཡི། །རྡོ་རྗེ་རབ་བཟང་ཉིད་ཅེས་བཤད། །རྡོ་རྗེ་སྙིང་བདག་ཇི་ལྟ་བུ། །གདུལ་བྱ་འཕགས་པའི་སྐྱེས་
མཆོག་ཉིད། །དེ་ནི་རྡོ་རྗེ་སྙིང་པོར་བརྗོད། །དེ་རྣམས་བདག་པོ་རྒྱལ་པོ་ནི། །རྡོ་རྗེ་སྙིང་པོ་བདག་པོར་བཤད། །ཅི་ཡི་ཕྱིར་ན་ཀུན་དུ་བཟང་། །བྱང་ཆུབ་སེམས་དཔའི་གནས་ལྡན་པའི། །འགྲོ་བ་སྲིད་པའི་སྐྱེ་གནས་གང་། །དེ་ཀུན་རྟག་ཏུ་བཟང་བས་ན། །ཀུན་དུ་བཟང་པོར་བརྗོད་པར་བྱ། །
རྡོ་རྗེ་རྡོ་རྗེ་འཆང་བ་གང་། །བྱང་ཆུབ་སེམས་གང་དེ་རྡོ་རྗེ། །རྡོ་རྗེ་གང་དེ་རྡོ་རྗེ་འཆང་། །རྡོ་རྗེ་སེམས་དཔའ་རྒྱལ་པོ་ཆེ། །རྡོ་རྗེ་རྡོ་རྗེ་འཆང་བར་བརྗོད། །དང་པོའི་རིགས་ནི་ཇི་ལྟར་བྱུང་། །སངས་རྒྱས་ཀུན་གྱི་བྱང་ཆུབ་ཀྱིས། །གྲགས་ཆེན་རྫོགས་པར་བྱང་ཆུབ་པ། །དེ་ནི་དང་པོའི་རིགས་
བྱུང་སྟེ། །དེ་ཁོ་ན་ཉིད་རིགས་ལས་སོ། །ཡང་ན་རབ་ཏུ་མཁས་པ་རྣམས། །བསྐལ་པ་གྲངས་མེད་འདས་ནས་ནི། །རབ་ཏུ་དགའ་བའི་ས་ཐོབ་གང་། །དེ་ནི་དང་པོའི་རིགས་བྱུང་ཡིན། །ཆོས་ཀུན་སྐྱེ་བ་མེད་པ་དང་། །འབྱུང་བ་ཇི་ལྟར་རུང་བར་འགྱུར། །དེ་ཉིད་རྟོགས་ཤིང་ཤེས་པ་ཡིས། །
ཆོས་རྣམས་ཐམས་ཅད་རྟོག་པ་མེད། །ཆོས་དང་གང་ཟག་བདག་མེད་ལས། །རིགས་དེ་བྱུང་བ་ཉིད་དུ་འདོད། །ཆོས་རྣམས་འགའ་ཡང་སྐྱེ་བ་མེད། །ཆོས་རྣམས་འགག་པར་འགྱུར་བ་མེད། །རྣམ་པར་རྟོག་པ་ཉེར་ཞི་གང་། །དེ་ཉིད་སངས་རྒྱས་རིགས་ཆེན་ཡིན། །བྱང་ཆུབ་སེམས་
དཔའ་ཅི་ཡིན་བརྗོད། །ཆོས་རྣམས་ཐམས་ཅད་རྟོགས་པ་དང་། །འཁོར་བའི་གནས་ལས་སད་གྱུར་ཅིང་། །སེམས་ཅན་རྣམས་ཀྱིས་རྟོགས་བྱེད་པ། །དེ་ནི་བྱང་ཆུབ་སེམས་དཔར་བརྗོད། །ཅི་ཕྱིར་སངས་རྒྱས་བརྗོད་པར་བྱ། །དེ་བཞིན་ཉིད་བདེན་ཤིན་ཏུ་བརྟན། །དེ་ཁོ་ན་ཉིད་གང་
རྟོགས་ནས། །ཆོས་ཀུན་རྟོགས་པ་ཞེས་བྱ་གང་། །དེ་ནི་རྟོགས་པས་སངས་རྒྱས་བརྗོད། །དེ་བཞིན་གཤེགས་པ་ཅི་ཡིན་བརྗོད། །ཆོས་ཀྱི་དེ་ཉིད་ཡང་དག་གནས། །སླར་ཡང་གཞན་དུ་མི་འགྱུར་ཞིང་། །དེ་ཉིད་ལམ་ནི་སྟོན་བྱེད་པ། །དེ་ནི་དེ་བཞིན་གཤེགས་ཞེས་བྱ། །བཅོམ་

ལྡན་འདས་ནི་ཅི་ཡིན་བརྗོད། །ལས་དང་ཉོན་མོངས་དེ་བཞིན་སྐྱེ། །དེ་བཞིན་ཉོན་མོངས་ཤེས་བྱའི་སྒྲིབ། །མི་མཐུན་ཕྱོགས་ཀྱི་ཆོས་རྣམས་གང་། །དེ་བཅོམ་པས་ན་བཅོམ་ལྡན་བརྗོད། །དེ་ཡི་བཅོམ་པ་ཅི་ཡིན་བརྗོད། །བཅོམ་ལྡན་དེ་བཞིན་བཅོམ་པར་བརྗོད། །འདོད་པའི་
འདོད་ཆགས་གཅོད་བྱེད་ཅིང་། །ཉོན་མོངས་འཇོམས་ཤིང་ཕམ་བྱེད་པ། །དེ་ནི་དེ་ཡི་བཅོམ་པར་བརྗོད། །དེ་བཞིན་སྟོན་པའི་སྟོན་པ་ཅི། །ཉོན་མོངས་བདུད་སོགས་གཅོད་བྱེད་ཅིང་། །སྐྱེ་དགུ་མ་ལུས་ཐབས་ཆེན་གྱིས། །ངན་འགྲོ་སྲིད་ལས་སྐྱོབ་བྱེད་པ། །སྟོན་པའི་སྟོན་པར་བརྗོད་པ་
ཡིན། །ཅི་ཡི་ཕྱིར་ན་ཡེ་ཤེས་བརྗོད། །དེ་ཉིད་ཤེས་པས་ཡེ་ཤེས་ཏེ། །སླར་ཡང་ཆོས་སུ་རྟོག་པ་མིན། །རྟག་དང་ཆད་པ་སྤོང་བྱེད་ཅིང་། །འཆི་མེད་དེ་བཞིན་ཡེ་ཤེས་ནི། །ཤེས་རབ་ཡེ་ཤེས་ཅི་ཡིན་བརྗོད། །རྣམ་པ་མང་པོ་ཤེས་བྱེད་ཅིང་། །རྟོགས་པས་སྡུག་བསྔལ་ལས་གྲོལ་
བྱེད། །ཀུན་ནས་ཉོན་མོངས་ཆོས་སྤོང་པ། །ཤེས་རབ་ཡེ་ཤེས་ཞེས་སུ་བརྗོད། །ཅི་ཕྱིར་ཤེས་རབ་བརྗོད་པར་བྱ། །རབ་སྦྱོར་སྦྱོར་བ་ཤེས་འགྱུར་ཞིང་། །ཁྱད་པར་དུ་ནི་རྟོགས་པར་བྱེད། །བདེན་པ་དེ་བཞིན་ཉིད་ཤེས་པའི། །ཤེས་རབ་ཤེས་རབ་ཤེས་སུ་བཤད། །ཤེས་རབ་ཕ་རོལ་ཕྱིན་དོན་
ཅི། །ཉན་ཐོས་རང་རྒྱལ་ཕྱི་རོལ་གྱི། །ཤེས་རབ་ལས་ནི་བླ་མར་བརྗོད། །དེ་བཞིན་ཉིད་གཞོལ་ཕ་རོལ་ཕྱིན། །ཤེས་རབ་ཕ་རོལ་ཕྱིན་ཞེས་བཤད། །ཚུལ་ཞེས་བྱ་དོན་ཅི་ཡིན་བརྗོད། །ན་ནི་དགག་པའི་དོན་ཆེན་ཏེ། །དངོས་མེད་དངོས་པོ་མེད་མིན་པས། །གང་དུ་དྲི་མ་མེད་གྱུར་པ། །དེ་ནི་
དེ་ཡི་ཚུལ་དུ་བརྗོད། །ཏིང་འཛིན་དོན་འདི་ཅི་ཡིན་བརྗོད། །ཆོས་ཀུན་དངོས་པོ་མེད་ཅེས་པའི། །མཉམ་པ་ཉིད་དུ་རབ་གནས་པའི། །ཤེས་རབ་ཅན་གྱིས་ལྷག་པར་བསྟེན། །སེམས་ལ་དམིགས་པར་བརྗོད་པར་བྱ། །ཅི་ཡི་ཕྱིར་ན་བསམ་གཏན་བརྗོད། །སྡུག་བསྔལ་ཐམས་ཅད་སྤོང་བྱེད་
ཅིང་། །ཉོན་མོངས་དྲ་བ་རབ་འཇོམས་པའི། །ཤེས་རབ་བཅས་པར་སེམས་པ་ནི། །སྲིད་པ་འཇོམས་པར་བྱེད་པའི་མཆོག །རྣལ་འབྱོར་དོན་ནི་ཅི་ཡིན་བརྗོད། །ཆོས་རྒྱ་ཆེན་པོ་དམ་པ་དང་། །ཟབ་མོའི་མཆོག་ཏུ་གྱུར་པ་དེས། །ཀུན་ཤེས་ཀུན་རིག་ལྡན་འབྱོར་པའི། །རྣལ་འབྱོར་དུ་ནི་བརྗོད་

པར་བྱ། །རྣལ་འབྱོར་པ་ནི་ཅི་ཡིན་བརྗོད། །ཤེས་རབ་ཀྱི་ན་དེས་སེམས་པ། །རྣལ་འབྱོར་རྣལ་འབྱོར་དོན་སེམས་ཤིང་། །སེམས་ཅན་ཀུན་གྱི་དོན་སེམས་གང་། །དེ་ནི་རྣལ་འབྱོར་པ་དོན་བརྗོད། །ང་ནི་ཀུན་གྱི་རྒྱལ་པོ་ཆེ། །ཐམས་ཅད་རིག་ཅིང་ཐམས་ཅད་སྟེར། །
རྡོ་རྗེ་འཆང་ཆེན་དང་པོ་སྟེ། །བདེ་བ་ཡི་ནི་རྒྱུ་འདི་ཡིས། །དེ་བཞིན་ང་ནི་འཇིག་རྟེན་གསུམ། །ཁམས་གསུམ་རྣལ་འབྱོར་རིག་པའི་མཆོག །དེ་བཞིན་འཁོར་བ་མྱ་ངན་འདས། །བདེ་འགྲོ་དང་ནི་ངན་འགྲོ་དང་། །འདོད་པ་ལྔ་ལ་ལོངས་སྤྱོད་ཡི་ན། །སྲིད་གསུམ་འདི་ཡི་དོན་ཅི་
ཞིག །སེམས་ཅན་ཀུན་གྱི་སེམས་གང་ཡིན། །སྲིད་པ་གསུམ་དུ་བརྗོད་པར་བྱ། །འདོད་དང་གཟུགས་དང་གཟུགས་མེད་ལས། །འདི་ལྟར་ཐམས་ཅད་རིག་པ་མཆོག །བདག་མེད་བྱེད་པ་པོ་ཡང་མེད། །ཆོས་ཀྱང་ཡོད་པ་མ་ཡིན་ཏེ། །དགེ་དང་མི་དགེ་བྱེད་པ་ཡི། །བག་ཆགས་
ཀྱིས་ནི་ཀུན་དུ་བསྒྲིབས། །ཆོས་ནི་ཐོག་མེད་དུས་ཅན་ཏེ། །བྱེད་པ་པོ་ནི་ཡོད་མ་ཡིན། །རྟོག་པས་ཉམས་པའི་སེམས་ལྡན་པས། །རྒྱུ་དང་འབྲས་བུར་མཐོང་བར་འགྱུར། །ཀུན་གཞི་ས་བོན་ཐམས་ཅད་པ། །དེ་ནི་ཆོས་ཀུན་སྐྱེད་པར་བྱེད། །བསྒོས་ཤིང་བག་ཆགས་དང་ལྡན་
པ། །དེ་ནི་སྲིད་པ་གསུམ་ཞེས་བྱ། །འདོད་པའི་ལས་སྐྱེས་ཁམས་གསུམ་གྱི། །རྒྱུར་ནི་ཀུན་གཞི་དེ་ཉིད་སྣང་། །གཟུགས་དང་གཟུགས་མེད་འགྲོ་བ་ཡི། །ཆོས་རྣམས་ཀུན་གྱི་གནས་ཀྱང་ཡིན། །ཆོས་ཀུན་རྣམ་པར་དག་པའི་ཕྱིར། །ཉེས་པ་ཀུན་དང་བྲལ་བ་སྟེ། །ཐོག་མ་
མེད་འབྱུང་ཆོས་སྙིང་པོ། །བློ་བུར་དྲི་མས་ཉོན་མོངས་འགྱུར། །ང་ནི་ཁོ་ན་ཆོས་ཆེན་པོ། །ང་ནི་ཆོས་ཀྱི་སྙིང་པོར་བ་ཤད། །དེ་བས་ང་ནི་རྒྱལ་པོ་ཆེ། །ང་ནི་སྲིད་པ་གསུམ་དུ་བསྒྲགས། །འཇིག་རྟེན་གསུམ་ནི་ཅི་ཡིན་བརྗོད། །འདོད་པ་འཇིག་རྟེན་དེ་བཞིན་གཟུགས། །གཟུགས་མེད་
པ་ཡི་སྐྱེ་དགུ་རྣམས། །འཇིག་རྟེན་གསུམ་པོ་ཞེས་པ་སྟེ། །རང་བྱུང་ང་ཉིད་ཁོ་ན་ཡིན། །འདོད་པ་ཞེས་བྱ་ཆོས་ཆེན་ཏེ། །དག་པ་བཙལ་བར་བྱ་བའི་ཕྱིར། །གཟུང་འཛིན་ཆོས་རྣམས་ཞེས་བྱ་བའི། །དེ་བཞིན་ཉིད་ལས་སོ་སོར་རྟོག །ཆོས་ཀྱི་དབྱིངས་དང་དབྱེར་མེད་ཕྱིར། །ང་ནི་

ཆོས་དེ་དག་པར་བྱེད། །དེ་བས་ང་ནི་རྒྱལ་པོ་ཆེ། །འཇིག་རྟེན་གསུམ་གྱི་བདག་པོར་བསྟན། །ཇི་ལྟར་འདོད་པ་དེ་བཞིན་གཟུགས། །དེ་བཞིན་གཟུགས་མེད་རབ་ཏུ་བསྒྲགས། །སྟོང་པ་ཉིད་དང་དབྱེར་མེད་པའི། །ང་ནི་སྙིང་པོའི་བདག་པོར་བཤད། །ཁམས་གསུམ་པ་ཡི་དོན་ཅི་
ཞིག །འདོད་ཁམས་དེ་བཞིན་གཟུགས་ཁམས་དང་། །གཟུགས་མེད་པ་ནི་ཉིད་དག་དང་། །ཁམས་གསུམ་བཟང་པོ་འདི་དག་ནི། །རང་བྱུང་ང་ཉིད་ཁོ་ན་ཡིན། །འདི་ནི་ཁམས་དང་རྒྱུ་དང་དོན། །ཁམས་གསུམ་གྱི་ནི་རྒྱུ་སེམས་པ། །སྟོང་དང་མཚན་མ་མེད་བཤད་ཅིང་། །སྨོན་
པ་མེད་པ་ང་ཉིད་བསྟན། །འཁོར་བའི་དོན་ནི་ཅི་ཞིག་ཡིན། །བྱིས་པ་རྣམས་ནི་ཀུན་དུ་འབྱུང་། །དེ་བཞིན་ཡང་དང་ཡང་དུ་འཁོར། །འཁོར་བ་དག་པའི་བདག་ཉིད་དེ། །རང་བྱུང་ང་ཉིད་ཁོ་ན་ཡིན། །གང་ལ་འཁོར་བ་ཡོད་པ་ཡི། །ཆོས་ནི་རྡུལ་ཙམ་ཡོད་མ་ཡིན། །ཡང་དག་མ་
ཡིན་ཀུན་བརྟགས་ཕྱིར། །དེ་ནི་ཐོག་མཐའ་མེད་པ་ཡིན། །མེད་གང་དེ་ནི་སྟོང་པ་སྟེ། །སྟོང་པ་ཉིད་གང་ང་ཉིད་དོ། །དེ་བས་འཁོར་བ་དེ་ཉིད་ནི། །རྡོ་རྗེ་འཆང་རྒྱལ་ང་ཉིད་བསྒྲགས། །མྱ་ངན་འདས་པ་ཅི་ཡིན་བརྗོད། །གང་ཞིག་དེ་བཞིན་ཉིད་རྟག་སྟོང་། །བདེན་བཞི་རང་བཞིན་
བཟང་པོ་ཉིད། །མཚན་ཉིད་དང་ནི་དངོས་པོ་གཟུགས། །མཚན་མ་ཉིད་ཀྱང་རྣམ་པར་སྤངས། །ཚིག་དང་སྒྲ་ཡིས་གཟུང་བྱ་མིན། །རྣམ་པར་རྟོག་པ་ཡོད་མ་ཡིན། །དེ་བས་མྱ་ངན་འདས་སྒྲ་རུ། །ང་ཉིད་ཁོ་ན་རབ་ཤེས་བྱ། །དེ་ཡི་རྟག་པའི་དོན་ཅི་ཞིག །རྟག་ཉིད་རྟག་ལ་
འབྱུང་གནས་ཏེ། །རྣམ་པར་རྟོག་པ་དང་བྲལ་གང་། །རྟག་པ་དེ་ཉིད་ཁོ་ན་ནི། །མྱ་ངན་འདས་པའི་སྒྲ་རུ་བསྒྲགས། །འཇིག་པ་ཡང་ནི་ཅི་ཡིན་བརྗོད། །གང་ཞིག་འཁོར་བར་མི་འཇུག་ཅིང་། །ཐམས་ཅད་མི་རྟག་པ་ཉིད་དང་། །སྡུག་བསྔལ་འབྱུང་བ་འགོག་བྱེད་པའི། །འཇིག་
པ་མྱ་ངན་འདས་སྒྲ་ཡིན། །དག་པ་ཡང་ནི་ཅི་ཡིན་བརྗོད། །ཡོད་པའང་མ་ཡིན་མེད་པའང་མིན། །དངོས་པོའང་མ་ཡིན་དངོས་མེད་མིན། །བརྗོད་བྱ་རྗོད་བྱེད་མ་ཡིན་མིན། །དག་པ་མྱ་ངན་འདས་ཉིད་ཡིན། །ཐེག་པ་ཆེན་པོ་ཅི་ཡིན་བརྗོད། །སངས་རྒྱས་ཐམས་ཅད་གཤེགས་

གྱུར་ཅིང་། །ཐེག་པ་ཀུན་ལས་ངེས་རྒྱལ་བ། །ཡང་དག་གྱུར་པའི་སེམས་ཅན་ནི། །ཐེག་པ་ཆེན་པོ་ཞེས་སུ་བསྟན། །མཐུ་དང་ལས་རྣམས་འཇུག་པ་དང་། །ཚོགས་རྣམས་རྣལ་འབྱོར་ངོ་མཚར་རྣམས། །རྒྱ་ཆེ་ཞེས་པ་ཐེག་ཆེན་ཏེ། །སངས་རྒྱས་ཀུན་གྱི་ངོ་
མཚར་མཆོག །ནམ་མཁའི་དོན་ནི་ཅི་ཞིག་ཡིན། །ས་ཉིད་ཀྱང་ནི་ཅི་ཡིན་བརྗོད། །འབྱུང་བ་མེད་ཅིང་རྫས་ཀྱང་མེད། །སྐྱེ་བ་མེད་ཅིང་འཆི་བ་མེད། །དུས་གསུམ་དངོས་པོ་དང་བྲལ་མཆོག །ནམ་མཁའ་ཞེས་པའི་སྒྲ་རུ་བསྟན། །ཡང་དང་ཡང་དུ་སྐྱེ་བ་དང་། །དེ་བཞིན་ཉོན་མོངས་ཀུན་
བདག་ཉིད། །གྲངས་མེད་དཔག་མེད་དང་བྲལ་བ། །དེ་ནི་ས་ཉིད་བརྗོད་པར་བྱ། །འབྱུང་བ་ཆེན་པོ་གང་ལས་བྱུང་། །འགོག་པ་ཅི་ཡིན་གང་གིས་བྱེད། །མ་རིག་ཉོན་མོངས་ལ་སོགས་ལས། །འབྱུང་བ་ཆེན་པོ་ཡང་དག་འབྱུང་། །ས་བོན་ཀུན་ལྡན་ཀུན་གཞི་ནི། །ཕྱི་དང་ནང་གི་བདག་
ཉིད་འདོད། །གནས་ནི་ཡོངས་སུ་གྱུར་པ་དང་། །ཀུན་གཞི་ས་བོན་མི་འབྱུང་ཞིང་། །རྟོག་པ་ཐམས་ཅད་དང་བྲལ་བ། །འབྱུང་བ་ཆེན་པོ་འགོག་པ་ཡིན། །རྟོག་པ་ཆེན་པོའི་རྒྱལ་པོ་མཆོག་ཏུ་གསང་ཞིང་སྦས་པ་རྣལ་འབྱོར་ཆེན་པོའི་རྒྱུད། རྡོ་རྗེ་རྩེ་མོ་ལས་ཤིན་ཏུ་གསང་བ་སྟུག་
པོའི་ཚོགས་ཀྱི་ལས་ཐམས་ཅད་བསྡུས་པ་སྟེ། དྲུག་པ་ལས་སེམས་དཔའ་བཅུ་དྲུག་གི་བཤད་པ་ཞེས་བྱ་བ་བཤད་པའི་དང་པོ་རྫོགས་སྟོ།། །།ཅི་ཡི་ཕྱིར་ན་ཕྱག་རྒྱར་བརྗོད། །གང་གིས་ཕྱག་རྒྱ་བཅིངས་གྱུར་པ། །དེས་ནི་སྲོག་ཆགས་གདུག་ཀུན་དང་། །འགྲོ་བ་སྡིག་ཅན་ཐམས་
ཅད་དང་། །རྟག་ཏུ་རྒྱས་ནི་བཏབ་པར་འགྱུར། །ཅི་ཕྱིར་སྔགས་སུ་བརྗོད་པར་བྱ། །གསང་སྔགས་རྣམས་ནི་འབོད་བྱེད་ཅིང་། །གདུག་པ་ཐམས་ཅད་སྐྲོད་པར་བྱེད། །ཉོན་མོངས་སྔགས་རྣམས་འཇོམས་བྱེད་ཅིང་། །སངས་རྒྱས་ཆོས་ནི་སྤྱན་འདྲེན་ཡིན། །ཅི་ཕྱིར་ཞེ་ན་རིག་སྔགས་བརྗོད། །
འདོད་ཆགས་མུན་པ་རྣམས་འདུལ་ཞིང་། །ཉོན་མོངས་རྣམས་ཀྱང་རྣམ་པར་འདུལ། །མ་རིག་པ་ནི་ཟློག་བྱེད་པ། །ང་ནི་རིག་སྔགས་ལེགས་པར་བརྗོད། །གཟུངས་སྔགས་རྣམས་ནི་ཅི་ཡིན་བརྗོད། །ཆོས་རྣམས་ཀྱི་ནི་རྟེན་བྱེད་ཅིང་། །སྲིད་པའི་ཕྱོགས་ནི་རབ་འཇོམས་བྱེད། །

སངས་རྒྱས་ཆོས་རྣམས་ཐོབ་བྱེད་ཅིང་། །དགེ་བ་ལ་རྟེན་སྦྱིན་པའང་ཡིན། །ཕྱག་རྒྱ་ཡི་ནི་མཚན་ཉིད་བརྗོད། །སངས་རྒྱས་ཀུན་དང་བརྟུལ་ཞུགས་ལྡན།