Kinh tạng Tây Tạng (Kangyur Đại Học) — 084_རྒྱུད་འབུམ།_ཉ

གཅིག་ནི་སྨྲ་བར་
བྱེད། །གཙོ་བོ་ཇི་བཞིན་མཐོང་འགྱུར་ཞིང་། །ཤིན་ཏུ་ངོ་མཚར་ཅི་ཞིག་སྣང་། །སླར་ཡང་ལྷ་ཡི་འཇིག་རྟེན་དག །སྲིད་པ་ནང་དུ་མཐོང་མི་འགྱུར། །འགྲོ་བ་ལྔ་ཡི་སེམས་ཅན་མིན། །རི་རབ་དང་ནི་རྒྱ་མཚོ་མིན། །ཟླ་བ་ཉི་མ་མ་མཐོང་ཞིང་། །རི་དང་ཁང་པ་དག་ཀྱང་
མིན། །ཅི་བདག་ཅག་ནི་རྨོངས་གྱུར་ཏམ། །ཡང་ན་མིག་ནི་ལོང་བར་གྱུར། །ཡང་ན་བདག་ཅག་སེམས་གཡེངས་པ། །སྒྱུ་མའི་རྣམ་འཕྲུལ་འདི་ཅི་ཞིག །བདག་ཅག་གིས་ནི་སྔར་འཇིགས་མཐོང་། །དྲག་ཅིང་བཀུག་ནས་ཐལ་བར་བྱས། །རི་རབ་རི་ཡི་རྩེ་མོ་རུ། །སྡུག་
བསྔལ་ཆེན་པོས་གཟིར་བར་གྱུར། །སླར་ཡང་རི་རབ་ཡོད་མ་ཡིན། །ཁྲོ་བོ་རྫུ་འཕྲུལ་ཆེན་པོ་མེད། །གཞན་དང་ཁྲོ་བོ་ཆེན་པོ་གཅིག །དབང་ཕྱུག་ཆེན་པོ་གནོད་པར་བྱེད། །གནས་ནི་ཆུང་ངུར་གྱུར་པ་ཡང་། །རྒྱ་ཆེན་པོ་རུ་འདི་རུ་སྣང་། །སྟོང་གསུམ་འདི་ཡང་མི་སྣང་
སྟེ། །བདག་ཅག་འཇིག་རྟེན་གཞན་དུ་ཕྱིན། །དེ་ལྟར་བརྗོད་པ་སྣ་ཚོགས་པ། །གཅིག་ལ་གཅིག་ནི་སྨྲ་བར་བྱེད། །མི་སྨྲ་བར་ནི་གནས་གྱུར་ནས། །རྡོ་རྗེ་ཅན་ལ་ལྟ་བར་བྱེད། །གནོད་སྦྱིན་འབྱུང་པོ་ཤ་ཟ་སོགས། །གདུག་པ་ཀུན་དང་གདོན་སོགས་ཀྱིས། །མུན་
པར་ཁྱབ་པ་བཞིན་དུ་ནི། །སྟོང་གསུམ་འདི་ནི་མཐོང་བར་གྱུར། །གཞན་ནི་ཅུང་ཟད་མ་མཐོང་སྟེ། །གཞན་དུ་ཕྱོགས་དག་མུན་པས་ཁྱབ། །རྡོ་རྗེ་ཁྲོ་བོ་འཁྲུལ་གྱུར་ཅིང་། །སྒྱུ་མ་ཡིས་ནི་རྨོངས་གྱུར་ཅིང་། །ཀུན་དུ་རྨོངས་པ་ཉིད་གྱུར་ཅིང་། །གཅིག་ལ་གཅིག་ནི་རྨོངས་
པར་གྱུར། །ཧ་ཧ་ཞེས་བྱའི་སྒྲ་སྒྲོགས་ཤིང་། །བདག་ཅག་འདིར་ནི་གང་དུ་ཕྱིན། །ཚིག་ནི་རབ་ཏུ་རྗོད་བྱེད་ཅིང་། །གཅིག་ལ་གཅིག་ནི་སྨྲ་བར་བྱེད། །འདི་ནི་སུ་ཞིག་བདག་ཅག་གང་། །འདི་ནི་སུ་ཡི་གམ་དུ་ཕྱིན། །བདག་ཅག་རང་གི་གནས་ན་ལྟུང་། །བདག་

ཅག་འཇིག་རྟེན་གཞན་དུ་ཕྱིན། །རྡོ་རྗེ་ཁྲོ་བོས་གསད་པར་གྱུར། །འོ་ན་འདི་ནི་ཅི་ཞིག་ཡིན། །ལྷ་ཡི་གནས་ཀྱང་མ་མཐོང་བཞིན། །རྡོ་རྗེ་ཅན་ཡང་མཐོང་མ་གྱུར། །སངས་རྒྱས་དཀྱིལ་འཁོར་འཁོར་ལོ་མིན། །བདག་ཅག་རྣམས་ནི་མུན་པར་གྱུར། །
རང་གི་གནས་ཀྱང་མ་མཐོང་ཞིང་། །རི་རབ་ཉིད་ཀྱང་མཐོང་མ་གྱུར། །མཚོ་དང་རྒྱ་མཚོ་དག་ཀྱང་མིན། །སྐར་མ་ཟླ་བ་ཉི་མ་མིན། །བདག་ཅག་ཐམས་ཅད་གང་ནས་འོངས། །ཡུལ་གང་ཞིག་ཏུ་འགྲོ་བར་བྱ། །འགྲོ་བ་ལྔ་ཡང་ཡོད་མ་ཡིན། །འཇིག་རྟེན་མེད་ཅིང་མ་མོ་མེད། །
མི་དང་མི་མ་ཡིན་པ་དག །རྣམ་པ་ཀུན་དུ་མཐོང་མ་གྱུར། །སྔོན་ནི་ཇི་ལྟར་དེ་བཞིན་ཕྱིས། །རྨད་དུ་བྱུང་བ་ཉིད་མ་གྱུར། །གཞན་དུ་ས་ནི་གཡོས་པར་གྱུར། །རླུང་དག་གིས་ནི་རྣམ་པར་བསྐྱོད། །འབྲུག་གི་སྒྲ་དང་ལོག་ཆེན་པོ། །སྡུག་བསྔལ་ཐམས་ཅད་ཡང་དག་
ལྡན། །བཀྲེས་སྐོམ་ལ་སོགས་སྡུག་བསྔལ་དང་། །བྲལ་མིན་ཀུན་དུ་སྡུག་བསྔལ་གྱུར། །དེར་ནི་ལྷ་ཆེན་རྫུ་འཕྲུལ་དག །ཅུང་ཟད་ཀྱང་ནི་མཐོང་མ་གྱུར། །དམྱལ་བ་ཡི་དགས་དུད་འགྲོ་དག །རྣམ་པར་ཉམས་ཤིང་བཤིག་པར་གྱུར། །སྡིག་པ་དྲལ་བའི་ཕྱག་རྒྱ་ཡིས། །
ངན་སོང་གསུམ་ནི་ཉེ་བར་ཞི། །ལྷ་གང་འདུ་ཤེས་མེད་པ་དང་། །གཟུགས་མེད་པ་ན་སྤྱོད་པར་གནས། །ཕུང་པོ་ལྔ་རུ་རང་བདག་ཉིད། །ངོ་མཚར་དེ་བཞིན་མཐོང་གྱུར་ནས། །རང་ཉིད་ལའང་རྟོག་པར་བྱེད། །གཅིག་ལ་གཅིག་ཀྱང་ལྟ་བར་བྱེད། །དེ་བཞིན་ཐམས་
ཅད་སྐྲག་ཅིང་འཇིགས། །ངོ་མཚར་གྱུར་པ་འདི་ཅི་ཞིག །ཚད་མེད་བསྐལ་པ་ཆེན་པོ་རུ། །བདག་ཅག་དག་པར་གནས་པར་གྱུར། །བདག་མཆོག་ལས་ནི་བདག་ཅག་གྲོལ། །སླར་ཡང་བདག་ཏུ་འཛིན་པར་གྱུར། །སྔོན་གྱི་བག་ཆགས་མངོན་འདོད་ལ། །
སྲིད་གསུམ་གནས་ནས་མཐོང་བར་གྱུར། །སྲིད་པ་གསུམ་ཡང་མཐོང་མ་ཡིན། །དེ་བཞིན་འགྲོ་བ་ལྔ་ཡང་མེད། །གཞན་དུ་ཤིན་ཏུ་དག་པར་གཅིག །ཆོས་དང་ལོངས་སྤྱོད་རྫོགས་པ་སྤྲུལ། །སངས་རྒྱས་ལྔ་ཉིད་མཐོང་བར་གྱུར། །སྲིད་གསུམ་

གནས་ནི་གཞན་དག་མིན། །ཚོགས་ལ་ཐམས་ཅད་མཉེས་པར་གྱུར། །གཅིག་ལ་གཅིག་ནི་སྨྲ་བར་བྱེད། །འདི་ནི་སུ་ཞིག་བདག་ཅག་གང་། །བདག་ཅག་འཇིག་རྟེན་གཞན་དུ་ཕྱིན། །སྔོན་ནས་བདག་གིས་འཇིག་རྟེན་འདི། །འགྲོ་བ་ལྔ་བཅས་དེ་
བཞིན་དུ། །རི་རབ་དང་ནི་རྒྱ་མཚོར་བཅས། །ལྷ་རྣམས་དྲུག་ནི་འཁོར་བཅས་མཐོང་། །སྲིད་པ་གསུམ་གྱི་ལྷ་རྣམས་ནི། །གང་ཞིག་འདི་ནི་མཐོང་མ་གྱུར། །གཞལ་ཡས་ཁང་དང་སེམས་ཅན་ནི། །གཙོ་བོ་ཇི་བཞིན་མཐོང་བར་གྱུར། །དེ་འདྲའི་ངོ་མཚར་
སྣ་ཚོགས་པ། །གནས་ཆེན་འདི་རུ་མཐོང་བར་གྱུར། །བྱང་ཆུབ་སེམས་ཀྱི་རྣམ་འཕྲུལ་འདི། །སངས་རྒྱས་ཀུན་གྱིས་རོལ་བ་ཡིན། །གང་ཞིག་སྟོང་གསུམ་འདི་ཡི་ནི། །རང་རྒྱལ་ཐམས་ཅད་མཆོག་གྱུར་པ། །དེ་ཡང་ཀུན་དུ་རྨོངས་གྱུར་ནས། །རྣམ་པར་འཕྲུལ་
པའང་མཐོང་མ་གྱུར། །སངས་རྒྱས་ཉིད་ཀྱང་མཐོང་མ་ཡིན། །རྒྱལ་དང་རྒྱལ་བའི་སྲས་ཀྱང་མིན། །ཆོས་ཀྱི་དབྱིངས་ནི་བརྟན་ཞི་བ། །གནས་ནི་དེ་རུ་མཐོང་མ་གྱུར། །གཞན་དུ་སྟོང་ནི་གསུམ་པོ་འདི། །རྣམ་པ་ཀུན་དུ་མ་མཐོང་ཉིད། །ས་དང་མེ་དང་ཆུ་ཁམས་མིན། །
གསེར་གྱི་དཀྱིལ་འཁོར་དག་ཀྱང་མིན། །འགྲོ་བ་ལྔ་ཡི་སེམས་ཅན་མིན། །ཟླ་བ་ཉི་མ་དག་ཀྱང་མིན། །སྐར་མ་གཟའ་དང་རྒྱུ་སྐར་མིན། །སེམས་ཅན་དག་ཀྱང་ཁམས་གསུམ་མིན། །འདི་དག་ཐམས་ཅད་སྟོང་པར་གྱུར། །གཞན་དུ་ནམ་མཁའ་དཀྱིལ་འཁོར་
མིན། །དེ་དག་ཐམས་ཅད་འཇིགས་སྐྲག་ནས། །མྱ་ངན་འདས་པ་ཉེ་བར་ཐོབ། །གང་ཡང་ཕྱོགས་རྣམས་བཅུ་པོ་ཡི། །ཉན་ཐོས་འཇིགས་པ་མེད་པ་རྣམས། །བྱང་སེམས་ཅན་ནི་ཆེན་པོ་ཡིས། །དེ་དག་ཀུན་ནས་སྐྲག་པར་གྱུར། །རང་རང་གི་ནི་ཞིང་དག་ཏུ། །
སངས་རྒྱས་ཉིད་ཀྱང་མཐོང་མ་གྱུར། །འདུས་པ་ཆེན་པོ་དག་དང་ནི། །ཆོས་རྣམས་སྟོན་པ་དག་ཀྱང་མིན། །ཞིང་དེ་ཡི་ནི་སེམས་ཅན་མིན། །ལྷ་དང་མི་རྣམས་དག་ཀྱང་མིན། །ཁང་པ་མེད་ཅིང་ཞིང་ཡང་མེད། །ས་དང་མེ་དང་རླུང་ཡང་མེད། །རང་གི་

ཞིང་ཡང་མ་མཐོང་ཞིང་། །རྡོ་རྗེ་སེམས་དཔའ་འཇིགས་པར་གྱུར། །སྐད་ཅིག་གིས་ནི་མི་དགར་གྱུར། །ཐང་ཅིག་ཏུ་ནི་རྨོངས་པར་གྱུར། །དེ་ལྟ་བུ་ཡི་རྣམ་འཕྲུལ་དུ། །བྱང་ཆུབ་སེམས་ནི་རབ་ཏུ་སྣང་། །སྔོན་གྱི་བསྐལ་བ་ཆེན་པོ་ལ། །འཁོར་ལོ་
རྣམ་པར་འཕྲུལ་པ་བསྟན། །བཅོམ་ལྡན་རྡོ་རྗེའི་རྣལ་འབྱོར་པས། །དེ་ལྟ་བུ་ནི་བྱིན་གྱིས་བརླབས། །སེམས་ཅན་གང་དག་འདི་ན་གནས། །ཉིན་དང་མཚན་མོ་མི་ཤེས་གྱུར། །དེ་ནས་དེ་ཉིད་གསང་བ་ཆེ། །ཆོས་ཀྱི་དབྱིངས་ནི་བརྟན་པའི་ཚོགས། །ཆོས་དང་ལོངས་
སྤྱོད་རྫོགས་སངས་རྒྱས། །དེ་ལྟ་བུ་ཡི་རྣམ་འཕྲུལ་བྱུང་། །སྟོང་གསུམ་ཡོངས་སུ་བསྡུས་པ་ཡི། །ལྷ་ཡི་གནས་ནི་བཀོད་པར་གྱུར། །སངས་རྒྱས་རྣམས་ཀྱི་གནས་གཅིག་པུ། །ཆོས་དང་ལོངས་སྤྱོད་རྫོགས་སྤྲུལ་པ། །ལ་ལར་སྔོན་པོས་རབ་ཏུ་མཛེས། །ས་ཡི་
ཕྱོགས་ནི་རབ་ཏུ་སྤྲས། །རྡོ་རྗེ་སྡོན་པོས་རབ་ཏུ་བརྒྱན། །ལ་ལར་གསེར་གྱི་མདོག་ཏུ་སྣང་། །ཁ་དོག་སེར་པོས་རྣམ་པར་བརྒྱན། །ས་ཡི་ཆ་ཡང་རབ་ཏུ་སྤྲས། །རྡོ་རྗེ་སེར་པོས་རབ་ཏུ་བརྒྱན། །ལ་ལར་ཁ་དོག་དམར་པོ་ནི། །བྱི་རུ་ལྟ་བུས་རབ་ཏུ་མཛེས། །ས་ཡི་
ཆ་ཡང་རབ་ཏུ་སྤྲས། །རྡོ་རྗེ་དམར་པོས་རབ་ཏུ་བརྒྱན། །ལ་ལར་བཙག་གི་མདོག་ཅན་གྱི། །བཻཌཱུརྱ་མཚུངས་རབ་ཏུ་མཛེས། །ས་ཡི་ཆ་ཡང་རྣམ་པར་སྤྲས། །རྡོ་རྗེ་བཙོད་ཀྱིས་རྣམ་པར་མཛེས། །ལ་ལར་ཤེལ་གྱི་མདོག་ཅན་གྱིས། །ཤིན་ཏུ་སྣང་བས་རབ་ཏུ་
མཛེས། །ས་ཡི་ཆ་ཡང་རྣམ་པར་སྤྲས། །རྡོ་རྗེ་ཤེལ་གྱིས་རྣམ་པར་བརྒྱན། །ཤར་དུ་སྔོན་པོ་ཆེན་པོ་སྟེ། །ལྷོར་ནི་སེར་པོ་ཡང་དག་ལྡན། །ནུབ་ཀྱི་ཆ་ནི་དམར་པོ་སྟེ། །བྱང་ནི་བཙོད་དང་ཡང་དག་ལྡན། །དབུས་ཀྱི་ས་ཡི་ཆ་དག་ནི། །ཤེལ་གྱི་མདོག་ཅན་
བླ་ན་མེད། །རྡོ་རྗེ་ཆེན་པོས་ཤིན་ཏུ་དག །ཚོན་རྩི་ལྔ་ཡི་རང་བཞིན་བཤད། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་རབ་ཏུ་མཛེས། །ཆ་མཉམ་ལེགས་པར་བགོས་པ་སྟེ། །གོ་རིམས་དང་ནི་ཡང་དག་ལྡན། །ཀུན་ནས་ཕྱི་རོལ་གནས་དག་ན། །རྡོ་

རྗེ་ཁ་ཁྱེར་ཡང་དག་ལྡན། །ཀུན་ནས་ཁ་ཁྱེར་དང་ལྡན་ཞིང་། །སྒོ་ཡི་ཁ་ཁྱེར་དག་གིས་སྤྲས། །རི་མོ་རྡོ་རྗེ་སྔོ་རང་བཞིན། །གཞན་ཡང་གསེར་གྱི་མདོག་ཅན་དང་། །ཁ་དོག་དམར་པོ་མཆོག་དང་ནི། །གཞན་ཡང་ཤེལ་ནི་བཟང་པོ་དག །རིན་ཆེན་ཀུན་གྱི་
རང་བཞིན་མཆོག །དཀྱིལ་འཁོར་སྣ་ཚོགས་མཛེས་གྱུར་པ། །སྣ་ཚོགས་གཟུགས་ནི་འཛིན་པའི་མཆོག །རྡོ་རྗེ་ལྷ་མོའི་ཚོགས་ཀྱིས་མཆོད། །དྲ་བ་དྲ་བ་ཕྱེད་པས་སྤྲས། །ཟླ་བ་ཕྱེད་པས་ཉེ་བར་མཛེས། །གཡེར་ཀའི་དྲ་བས་ཀུན་དུ་ཁེབས། །དྲིལ་
བུའི་མཆོག་ནི་ཀུན་དུ་འཕྱང་། །སྣ་ཚོགས་ཤིང་ནི་ཡིད་འོང་ལྡན། །དཔག་བསམ་ཤིང་ནི་ཡིད་འོང་ལྡན། །སྤོས་དང་མེ་ཏོག་དེ་བཞིན་དྲི། །སྣང་བའི་ཤིང་མཆོག་ཡང་དག་ལྡན། །སྣ་ཚོགས་བཀོད་པ་ཉེ་བར་ལྡན། །སྣ་ཚོགས་རྡོ་རྗེ་བདུད་རྩིའི་ཆུ། །མཚོ་མཆོག་
ཆུ་ཡིས་གང་བར་གྱུར། །རྡོ་རྗེ་རྒྱ་མཚོ་རྒྱ་ཆེན་ལྡན། །མེ་ཏོག་སྣ་ཚོགས་ཀུན་དུ་བཀྲམ། །སྣ་ཚོགས་བདུག་པ་དག་གིས་བདུགས། །སྣ་ཚོགས་དྲི་ཡི་ཆུ་ཡིས་གཏོར། །སྣ་ཚོགས་དྲི་ཡིས་ཀུན་དུ་ཁྱབ། །དྲག་པོ་ཆེན་པོ་སྲས་བཅུ་དག །དེ་ནས་ཉམས་དགའ་བ་
དག་བྱུང་། །ཤིང་དང་པད་སོགས་ཐམས་ཅད་ལས། །ཆོས་རྣམས་འབྱུང་བ་ཐོས་པར་གྱུར། །ཕྱོགས་རྣམས་ཀུན་དུ་རྣམ་ཕྱུང་ནས། །དག་པའི་ཞིང་དུ་སྟོང་ཉིད་བཅས། །རྣམ་པར་སྒྲ་ནི་གང་ཞིག་གྲག །ཆོས་ཀྱི་བདེ་བ་འབྱུང་བར་འགྱུར། །ཡྃ། ལྃ། ཤྃ། བཾ།
ཨོཾ་བཛྲ་ས་ཏྭ་ཀྲོ་དྷ་ཡ་ཧཱུྃ་ཕཊ། ཨོྃ་བཛྲ་ཀྲོ་དྷ་ཨཱ་ཀཪྵ་ཡ་ཧཱུྃ་ཕཊ། ཨོྃ་བཛྲ་ཀྲོ་དྷ་རཱ་ག་ཡ་ཧཱུྃ་ཕཊ། ཨོྃ་བཛྲ་དུཥྚི་ཀྲོ་དྷ་ཡ་སཱ་དྷུ་སཱ་དྷུ་ཧཱུྃ་ཕཊ། ཁྲོ་བོ་རྡོ་རྗེ་རིན་ཆེན་མཆོག །འབར་བའི་ཕྲེང་བ་བཀོད་དཀའ་བས། །ཁྲོ་བོ་རྡོ་རྗེ་བླ་ན་མེད། །མཆོག་ཏུ་གསང་བ་གསུངས་པར་
གྱུར། །ཨོྃ་བཛྲ་བྷྲྀ་ཀུ་ཊི་ཀྲོ་དྷ་ཧ་ན་ཧཱུྃ་ཕཊ། ཨོྃ་བཛྲ་སཱུརྱ་མ་ཧཱ་ཛྭ་ལ་མཱ་ལ་ཀྲོ་དྷ་ཛྭཱ་ལ་ཡ་སརྦ་ཧཱུྃ་ཕཊ། ཨོཾ་བཛྲ་ཀེ་ཏུ་མ་ཧཱ་ཀྲོ་དྷ་དྷེ་ན་ཧཱུྃ་ཕཊ། ཨོྃ་ཨཊྚ་ཧཱ་ས་བཛྲ་མཊྚ་ཧཱ་ས་ཀྲོ་དྷ་ཧ་ཧ་ཧ་ཧ་ཧཱུྃ་ཕཊ། ཁྲོ་བོ་ཆེན་པོ་རྡོ་རྗེ་ཆོས། །འབར་བའི་ཕྲེང་བས་ཁྱབ་གྱུར་པས། །

ཁྲོ་བོའི་རྒྱལ་པོ་རབ་བཟོད་དཀའ། །མཆོག་ཏུ་འཇིགས་སུ་རུང་བ་སྨྲས། །ཨོྃ་བཛྲ་དྷརྨ་བི་ཤོ་དྷ་ཡ་ཧཱུྃ་ཕཊ། ཨོྃ་ཏིཀྵྞ་ཀྲོ་དྷ་ཙྪིནྡ་ཧཱུྃ་ཕཊ། ཨོྃ་བཛྲ་ཧེ་ཏུ་ཀྲོ་དྷ་པྲ་བེ་ཤ་ཡ་མཎྜ་ལཾ་སརྦ་ཧཱུྃ་ཕཊ། ཨོྃ་བཛྲ་ཀྲོ་དྷ་བྷཱ་ཥ་ཏ་པཱ་ཏ་ཧཱུྃ་ཕཊ། རྡོ་རྗེ་ལས་ནི་རྒྱལ་
པོ་ཆེ། །གསང་བ་ཐམས་ཅད་ཀུན་བསྡུས་པས། །འབར་བ་གསལ་བས་ཁྱབ་པ་བྱུང་། །ཁྲོ་བོ་རྒྱལ་པོས་བརྗོད་པར་གྱུར། །ཨོྃ་བཛྲ་ཀརྨ་ཀྲོ་དྷ་ཧཱུྃ་ཕཊ། ཨོྃ་བཛྲ་ཀ་བ་ཙ་ཀྲོ་དྷ་རཀྵ་རཀྵ་ཧཱུྃ་ཕཊ། ཨོྃ་བཛྲ་ཡཀྵ་ཀྲོ་དྷ་ཁཱ་ད་ཁཱ་ད་ཧཱུྃ་ཕཊ། ཨོྃ་བཛྲ་ཀྲོ་དྷ་མུཥྚི་སཱ་དྷ་ཡ་ས་
མ་ཡ་ཧཱུྃ་ཕཊ། སེམས་དཔའ་འདི་རྣམས་གསང་བ་ཆེ། །ཞི་བའི་གཟུགས་ལས་རྣམ་པར་གྱུར། །རྡོ་རྗེ་ཁྲོ་བོ་དྲག་པོ་ཆེ། །འཁོར་ལོའི་དཀྱིལ་འཁོར་ལ་བཞུགས་གྱུར། །དེ་ནས་རྒྱལ་པོ་རྡོ་རྗེ་འཛིན། །ཁྲོ་བོ་ཆེན་པོ་སྟོབས་པོ་ཆེ། །གསང་བ་འདི་རྣམས་ཡོངས་
སུ་བརྗོད། །མཆོད་པའི་ལྷ་མོས་གསུངས་པར་གྱུར། །ཨོྃ་བཛྲ་ལཱ་སྱེ་རཱ་ག་ཡ་ཧཱུྃ་ཕཊ། ཨོྃ་བཛྲ་མཱ་ལཻ་ཨ་བྷི་ཥིཉྩ་ཡ་ཧཱུྃ་ཕཊ། ཨོྃ་བཛྲ་གཱི་ཏྱེ་གཱ་ཏ་ཡ་ཧཱུྃ་ཕཊ། ཨོྃ་བཛྲ་ནྲྀ་ཏྱེ་བ་ཤི་ཀུ་རུ་ཧཱུྃ་ཕཊ། ཨོྃ་བཛྲ་པུཥྤ་པཱུ་ཛཱ་སྥ་ར་ཎ་ས་མ་ཡེ་ཧཱུྃ་ཕཊ། ཨོྃ་བཛྲ་གན་དྷ་པཱུ་ཛཱ་སྥ་ར་ཎ་ས་
མ་ཡེ་ཧཱུྃཕཊ། ཨོྃ་བཛྲ་དྷཱུ་པ་པཱུ་ཛཱ་སྥ་ར་ཎ་ས་མ་ཡེ་ཧཱུྃ་ཕཊ། ཨོྃ་བཛྲ་ཨཱ་ལོ་ཀཻ་པཱུ་ཛཱ་སྥ་ར་ཎ་ས་མ་ཡེ་ཧཱུྃ་ཕཊ། དེ་ནས་རྒྱལ་པོ་རྡོ་རྗེ་འཛིན། །ཁྲོ་བོ་དྲག་པོ་ཤིན་ཏུ་གདུག །རྡོ་རྗེ་ཁྲོ་བོ་རབ་གཏུམ་པ། །སྒོ་སྲུང་དག་ནི་ཀུན་དུ་བྱུང་། །ཨོྃ་ཨཾ་ཀུ་ཤ་མ་ཧཱ་ཀྲོ་དྷ་ཨཱ་
ཀཪྵ་ཡ་སརྦ་ས་མ་ཡ་ཧཱུྃ་ཛཿ། ཨོྃ་བཛྲ་པཱ་ཤ་མ་ཧཱ་ཀྲོ་དྷ་པྲ་བེ་ཤ་ཡ་སརྦ་ས་མ་ཡ་ཧཱུྃ་ཧཱུྃ། ཨོྃ་བཛྲ་སྥོ་ཊ་མ་ཧཱ་ཀྲོ་དྷ་བན་དྷ་ཡ་སརྦ་ས་མ་ཡ་ཧཱུྃ་བྃ། ཨོྃ་བཛྲ་ཨཱ་བེ་ཤ་མ་ཧཱ་ཀྲོ་དྷ་ཨཱ་བེ་ཤ་ཡ་སརྦ་ས་མ་ཡ་ཧཱུྃ་ཕཊ། ཧོཿ། འཁོར་ལོ་ཡོངས་སུ་ཟླུམ་པོར་ནི། །རྡོ་རྗེ་འཛིན་
པ་ཆེན་པོར་གྱུར། །ཁྲོ་བོ་ཆེན་པོའི་ཚོགས་ཀྱིས་ཁྱབ། །དཀྱིལ་འཁོར་ཆེན་པོ་ཡང་དག་ལྡན། །གནས་ཆེན་པོ་དང་ཡང་དག་ལྡན། །དཀྱིལ་འཁོར་ཆེན་པོར་ཀུན་བསྡུས་པས། །ཤིན་ཏུ་གསང་བ་ཆོས་ཆེན་པོ། །ཆོས་དང་ལོངས་སྤྱོད་རྫོགས་སྤྲུལ་པ། །

དེ་ཉིད་སྙིང་པོ་གསང་བ་ཆེ། །ཐར་པ་ཆེན་པོ་གྲོང་ཁྱེར་མཆོག །དཀྱིལ་འཁོར་རྒྱལ་པོ་ཆེན་པོ་སྟེ། །སེམས་ཅན་དོན་ཀུན་ཡང་དག་ལྡན། །ཆོས་ཉིད་རྫོགས་པར་བྱང་ཆུབ་པ། །འདི་འདྲ་ཆོས་དང་ལོངས་སྤྱོད་རྫོགས། །རིགས་ལྔའི་གསང་བ་གང་ཡིན་
པ། །གདོན་མི་ཟ་བར་བྱེད་པ་ཡི། །དེ་བཞིན་གཤེགས་པའི་རིགས་ཞི་བ། །གང་ཕྱིར་དག་པའི་ཚོགས་ཆེན་པོ། །དེ་བཞིན་རྡོ་རྗེའི་རིགས་དྲག་པོ། །གང་ཕྱིར་ལྷ་ཆེན་རབ་འདུལ་བྱེད། །ལྷ་ཆེན་ལ་སོགས་སྤྲུལ་བྱེད་པ། །དེ་བཞིན་པདྨའི་རིགས་མཆོག་སྟེ། །
གང་ཕྱིར་གདུལ་བྱའི་སེམས་ཅན་རྣམས། །སྤྲུལ་པ་སྣ་ཚོགས་ཡང་དག་བྱུང་། །སྤྲུལ་པའི་འཁོར་ལོ་ཞི་བ་སྟེ། །དྲག་པོའི་མཆོད་པ་རབ་བསྐོར་བ། །སྣ་ཚོགས་རིགས་ཅན་འཁོར་ལོ་སྟེ། །རིགས་བཞི་དང་ནི་ཡང་དག་ལྡན། །དེ་བཞིན་གཤེགས་པའི་རིགས་
མཆོག་ནི། །ཤར་གྱི་འཁོར་ལོ་ཡང་དག་བྱུང་། །དེ་ནས་རྡོ་རྗེའི་རིགས་དྲག་པོ། །སེམས་ཅན་དོན་དུ་ཡང་དག་འཇིགས། །རྡོ་རྗེའི་རིགས་མཆོག་ཆེན་པོ་འདི། །དཀྱིལ་འཁོར་ཚོགས་ནི་ཀུན་བསྡུས་པ། །གསང་བའི་དབང་ཕྱུག་རྒྱལ་པོ་ཆེ། །གང་ཕྱིར་
གསང་བའི་བདག་པོར་བཤད། །རྡོ་རྗེ་ཐམས་ཅད་ཀུན་བསྡུས་པ། །རང་གི་རིགས་མཆོག་བཤད་ནས་ནི། །རྡོ་རྗེ་འཛིན་པ་རྒྱལ་པོ་ཆེས། །དཀྱིལ་འཁོར་ཆེན་པོ་ཀུན་དུ་སྤྲུལ། །ལྷ་ལ་སོགས་པ་གདུག་པ་ཀུན། །སྐད་ཅིག་དེ་ལ་ཡང་དག་བཀུག །སླར་ནི་
བཅུག་པར་བྱས་ནས་ཀྱང་། །སྐད་ཅིག་གིས་ནི་དམ་ཚིག་ཕོག །རྡོ་རྗེ་མཚན་མའི་དབང་བསྐུར་བ། །དམ་ཚིག་ལྡན་པ་བྱིན་ནས་ནི། །བཀུག་སྟེ་རབ་ཏུ་བཅུག་ནས་ཀྱང་། །དེ་བཞིན་བཅིངས་ཏེ་དབང་དུ་བྱས། །དམ་ཚིག་ལ་ནི་བརྩོན་བྱས་ཏེ། །དམ་ཚིག་སྡོམ་
པ་དེ་བཞིན་ནོ། །མི་རྣམས་ལ་ནི་ཕན་པའི་ཕྱིར། །དཀྱིལ་འཁོར་མཆོག་ནི་གསུངས་པར་གྱུར། །འཁོར་ལོ་ཆེན་པོ་གྲོང་ཁྱེར་ཆེ། །རྡོ་རྗེ་རིགས་མཆོག་ཆེན་པོ་སྟེ། །ཁམས་གསུམ་རྣམ་རྒྱལ་ཞེས་བྱ་བ། །དེ་ནས་ཡང་དག་བཤད་པར་བྱ། །འཇིག་རྟེན་གསུམ་

ཚོགས་ཕམ་བྱས་ནས། །ལྷ་ལ་སོགས་པ་རབ་བཅུག་གྱུར། །དེ་ནས་ཁམས་གསུམ་རྣམ་རྒྱལ་གནས། །འཁོར་ལོ་ཆེན་པོ་གྲོང་ཁྱེར་ཆེ། །གང་མིང་གཟུང་བ་ཙམ་ཉིད་ཀྱིས། །སེམས་ཅན་རབ་ཏུ་བཅོམ་ནས་ནི། །གདོན་ལ་སོགས་པ་འབྲོས་
པར་བྱེད། །རིམས་དང་གདོན་དང་དུག་དག་དང་། །དྲག་པོ་གདུག་པ་དམ་ཚིག་དང་། །མཚན་བཟང་བ་ཡི་མོད་ཉིད་ལ། །སྐྲག་པ་དང་ནི་གཡོ་བར་གྱུར། །སྐུ་ནི་ལོངས་སྤྱོད་རྫོགས་པའི་མཆོག །མི་གང་དག་ནི་གདུལ་བྱ་མིན། །དེ་བས་རྡོ་རྗེ་འཛིན་རྒྱལ་ནི། །དཀྱིལ་
འཁོར་ཆེན་པོ་སྤྲུལ་པར་གྱུར། །རྡོ་རྗེ་སློབ་དཔོན་སྐལ་བ་ཆེ། །ཤིན་ཏུ་བྱང་ཞིང་རབ་ཏུ་མཁས། །དགོངས་པ་ཡི་ནི་ཆོ་ག་ཤེས། །གཞུང་རྣམས་ཐོས་ཤིང་དོན་ལ་མཁས། །རབ་ཏུ་དང་ཞིང་བློ་ལྡན་བརྟན། །རིགས་དང་རིགས་མིན་རབ་ཏུ་ཤེས། །བྱང་ཆུབ་སེམས་
ལ་བརྩོན་པར་གྱུར། །ལྷ་གཞན་དག་ལ་འདོད་ལྡན་མིན། །གསང་བའི་སྙིང་པོ་མཆོག་མཐོང་བ། །སྙིང་རྗེ་བདག་ཉིད་བརྩེར་ལྡན་པ། །དག་ཅིང་དེས་ལ་རྣམ་པར་དུལ། །རང་གི་ངང་གིས་རྣམ་པར་གནས། །ཞེན་ཅིང་ཆགས་ལ་གདུག་པ་མིན། །རྨོངས་པ་མེད་
ཅིང་ལེ་ལོ་མེད། །བརྩེ་ལྡན་ཕན་པའི་བསམ་པ་ཅན། །རྟག་ཏུ་རྣམ་པར་ད་གོད་ལ་དགའ། །གཟུགས་སོགས་འདོད་པའི་ཡོན་ཏན་ལ། །ཆགས་ཤིང་ལྷག་པར་རྒྱལ་གྱུར་ནས། །སྲིད་ལ་སེམས་ནི་སྐྲག་པར་བྱེད། །སྲིད་ལ་མངོན་པར་ཆགས་པ་མེད། །ཐེག་
པ་ཆེན་པོའི་ཚུལ་ལ་བརྩོན། །ཐེག་པ་གཞན་ལ་འདོད་ལྡན་མིན། །སེམས་ཅན་ཀུན་གྱི་དོན་ལ་བརྩོན། །དཀོན་མཆོག་གསུམ་གྱི་མཆོག་བྱུང་བ། །ཉོན་མོངས་ཀུན་དུ་ཆགས་པ་སྤངས། །གཉེན་པོ་དག་ནི་རབ་ཏུ་བསྒོམ། །འདོད་ཆགས་ལ་སོགས་ཉོན་མོངས་
ཆེ། །མི་སྡུག་པ་ལ་སོགས་པ་བསྒོམ། །རིགས་དང་རིགས་མིན་ཆོ་ག་ཤེས། །སྔགས་དང་ཕྱག་རྒྱ་ཤིན་ཏུ་མཁས། །དགུག་དང་གཞུག་དང་བཅིང་བ་དང་། །དབང་དུ་བྱ་དང་གཤེགས་གསོལ་དང་། །ཇི་སྐད་རྡོ་རྗེ་དབྱིངས་བཤད་ཡིན། །སྔོན་དུ་རིག་

པའི་བརྟུལ་ཞུགས་བྱ། །ཁ་ན་མ་ཐོ་རྡུལ་ཙམ་ལ། །ཀུན་དུ་འཛེམ་པར་བྱ་བ་ཡིན། །ཚད་དང་ཚོན་རྩི་སྲད་བུ་དང་། །ཡོ་བྱད་ཆོ་ག་ཡང་དག་ལྡན། །བཅིང་དང་ཕུར་བུས་གདབ་པ་ཉིད། །སྔར་བཤད་རྡོ་རྗེ་དབྱིངས་བཞིན་དུ། །བཟའ་བ་དང་ནི་མི་བཟའ་བ། །རྡོ་རྗེ་
སྙེམས་ཚུལ་ཏིང་འཛིན་གྱིས། །རྡོ་རྗེ་དབྱིངས་སོགས་དཀྱིལ་འཁོར་དུ། །སྔར་ནི་ཇི་ལྟར་དེ་བཞིན་བྱ། །དེ་ནས་ཡང་དག་རབ་བཤད་བྱ། །དཀྱིལ་འཁོར་ཆེན་པོ་མཆོག་གྱུར་པ། །རྡོ་རྗེ་དབྱིངས་དང་རབ་ཏུ་མཚུངས། །དངོས་གྲུབ་ཐམས་ཅད་བྱེད་པའི་མཆོག །
གྲུ་བཞི་པ་ལ་སྒོ་བཞི་པ། །རྟ་བབས་བཞེས་ནི་རྣམ་པར་བརྒྱན། །ཐིག་བཞི་དང་ནི་ཡང་དག་ལྡན། །དར་གྱི་ཆུན་པོས་རྣམ་པར་བརྒྱན། །རྒྱ་ཆེར་ཇི་ལྟར་རིགས་པ་རུ། །ཇི་བཞིན་རྡོ་རྗེ་གྲོང་ཁྱེར་ཆེ། །རྡོ་རྗེ་དབྱིངས་དང་རབ་ཏུ་མཚུངས། །རྡོ་རྗེ་འཛིན་པའི་གྲོང་
ཁྱེར་བྲི། །འཁོར་ལོ་ལྔ་དང་ཡང་དག་ལྡན། །ཀ་བ་བརྒྱད་དང་ཡང་དག་ལྡན། །དེ་དབུས་རང་བཞིན་འཁོར་ལོ་ཡི། །དབུས་སུ་སངས་རྒྱས་དགོད་པར་བྱ། །རྣམ་པར་སྣང་མཛད་སྟོན་པ་ཆེ། །རྡོ་རྗེ་སེམས་དཔའ་འོད་པོ་ཆེ། །བྱང་ཆུབ་སེམས་དཔའ་རྒྱལ་པོ་
ཆེ། །སངས་རྒྱས་ལོངས་སྤྱོད་རྫོགས་དཀྱིལ་འཁོར། །སངས་རྒྱས་སྤྱན་སྔར་རྡོ་རྗེ་ནི། །འབར་བའི་དབུས་སུ་དགོད་པར་བྱ། །རྡོ་རྗེ་མེ་ལྟར་འབར་ཉིད་ནི། །ཕྱག་རྒྱ་འཇིག་རྟེན་གསུམ་འཇོམས་པ། །གཡས་སུ་རིན་ཆེན་ཕྱག་རྒྱ་ནི། །འབར་བའི་དབུས་སུ་
དགོད་པར་བྱ། །གཡོན་དུ་པདྨའི་ཕྱག་རྒྱ་བྲི། །རྒྱབ་ཏུ་རྡོ་རྗེ་རྣོན་པོ་ནི། །འབར་བའི་དབུས་སུ་དགོད་པར་བྱ། །ཕྱག་རྒྱ་ཡི་ནི་རྒྱལ་པོ་བཞི། །འབར་བའི་མེ་དང་རབ་ཏུ་ལྡན། །རྣམ་པར་སྣང་མཛད་དཀྱིལ་འཁོར་ཆེ། །ཆོས་དབྱིངས་གྲོང་ཁྱེར་ཆེན་པོ་
ལ། །འཁོར་ལོས་སྒྱུར་བ་བཞི་པོ་ཡི། །ཕྱག་རྒྱ་དག་ཀྱང་དགོད་པར་བྱ། །གང་དང་གང་གི་ཐིག་གྱུར་པ། །དཀྱིལ་འཁོར་ཤེས་རབ་ཅན་ཐིག་གདབ། །རྡོ་རྗེ་ཡི་ནི་སྔགས་འདི་ཡིས། །རྡོ་རྗེའི་ཐིག་ནི་ཡོངས་སུ་གཟུང་། །ཨོཾ་བཛྲ་ས་མ་ཡ་སཱུ་ཏྲཾ་མཱ་ཏི་ཀྲ་

མ་ཧཱུྃ། དཀྱིལ་འཁོར་ཆེན་པོ་བསྡུས་པ་ཡི། །རྡོ་རྗེ་ཤུགས་ཀྱིས་སོང་ནས་ཀྱང་། །རྡོ་རྗེའི་ཕྱག་རྒྱ་ཡོངས་བསྡུས་པ། །རྒྱལ་པོ་བྲི་ཞིང་དགོད་པར་བྱ། །ཨོྃ་བཛྲ་བེ་གཱ་ཀྲ་མ་ཧཱུྃ། ཚོན་རྩི་ཐམས་ཅད་ཡང་དག་ལྡན། །འབར་བའི་ལྟ་བས་ཐམས་ཅད་
བལྟ། །རྡོ་རྗེ་ཚོན་རྩི་བཀྱེ་བྱ་ཞིང་། །རྡོ་རྗེ་སྔགས་ནི་རབ་ཏུ་བསྐུལ། །ཨོྃ་བཛྲ་ཙི་ཏྲ་ས་མ་ཡ་ཧཱུྃ། ཕྱག་རྒྱ་གང་ཞིག་དགོད་པར་དུ། །སྙིང་པོ་ཐམས་ཅད་དགོད་པར་བྱ། །སྔར་ནི་དགོད་པ་གང་ཡིན་པ། །རྡོ་རྗེ་གཟུགས་ནི་སྐོར་བྱེད་པ། །རྡོ་རྗེ་ཧཱུྃ་མཛད་དཀྱིལ་འཁོར་དུ། །
རྡོ་རྗེ་ཤུགས་ཀྱིས་སོང་ནས་ཀྱང་། །རྡོ་རྗེ་རིག་པ་མཆོག་རྒྱལ་པོ། །མི་བསྐྱོད་ཤིན་ཏུ་མཉམ་བཞག་པ། །ཞལ་བཞི་པ་ལ་ཕྱག་བརྒྱད་པ། །མཆེ་བ་དག་ནི་ཅུང་ཟད་གཙིགས། །ཁྲོ་བོའི་རྒྱལ་པོ་འབར་བས་ཁྱབ། །ཕྱག་ན་ཕྱག་རྒྱ་དང་བཅས་མཚོན། །རྡོ་རྗེ་ཧཱུྃ་
མཛད་ཕྱག་རྒྱ་ནི། །སྟེང་དུ་ཕྱག་གཉིས་ཡང་དག་ལྡན། །དེ་བཞིན་ཁོ་ནར་ཕྱག་གཉིས་དག །ལྕགས་ཀྱུ་འཕྱར་བ་ཡང་དག་ལྡན། །ཕྱག་གཅིག་གིས་ནི་ཞགས་པ་བསྣམས། །གཅིག་གིས་རྡོ་རྗེ་ཡང་དག་བསྣམས། །མདའ་འགེངས་པ་ཡི་ཕྱག་རྒྱ་དང་། །ཕྱག་གཉིས་
དག་ནི་ཤིན་ཏུ་ལྡན། །རྡོ་རྗེ་ཧཱུྃ་མཛད་ཕྱག་རྒྱ་སྟེ། །དབང་ཕྱུག་ཆེན་པོ་ཀུན་དུ་མནན། །གཡས་པས་ལྷ་མོ་ཨུ་མ་ཡི། །ནུ་མའི་བར་དུ་གནོན་པར་བྱེད། །དེ་ཡི་ཕྱོགས་རྣམས་ཐམས་ཅད་དུ། །རྡོ་རྗེ་ཁྲོ་བོ་དགོད་པར་བྱ། །འབར་བའི་ཕྲེང་བས་ཁྱབ་ཅིང་འབར། །ཁྲོ་བོ་འཇིགས་
པར་བྱེད་པ་མཆོག །མདུན་དུ་རྡོ་རྗེ་སེམས་དཔའ་སྟེ། །གཡས་སུ་རྡོ་རྗེ་རྒྱལ་པོ་འོ། །གཡོན་དུ་རྡོ་རྗེ་ཆགས་པ་སྟེ། །རྒྱབ་ཏུ་རྡོ་རྗེ་ལེགས་པའོ། །རྡོ་རྗེ་ཤུགས་ཀྱིས་སོང་ནས་ཀྱང་། །ལྷོ་རུ་ཁྲོ་བོའི་དཀྱིལ་འཁོར་ནི། །ཁྲོ་བོའི་རྒྱལ་པོ་ཁྲོ་གཉེར་ཅན། །ཁྲོ་བོས་ཡོངས་སུ་
བསྐོར་བར་བྲི། །ཐམས་ཅད་འབར་བའི་ཕྲེང་བས་ཁྱབ། །གདོང་ནི་ཁྲོ་བཅས་བཞད་ལྡན་པ། །རྡོ་རྗེ་དབང་ཕྱུག་ཕྱག་རྒྱར་ལྡན། །ཁྲོ་གཉེར་ཅན་ནི་ཡོངས་སུ་བརྗོད། །དེ་ཡི་ཕྱོགས་རྣམས་ཐམས་ཅད་དུ། །རྡོ་རྗེ་ཁྲོ་བོ་བདག་ཉིད་ཆེ། །སྔགས་དང་ཕྱག་རྒྱ་ཡོངས་སུ་བསྡུ། །

རང་གི་གནས་སུ་ཡང་དག་བྲི། །མདུན་དུ་རྡོ་རྗེ་རིན་ཆེན་ཏེ། །གཡས་སུ་ཁྲོ་བོ་གཟི་བརྗིད་དོ། །གཡོན་དུ་རྒྱལ་མཚན་དྲག་པོ་སྟེ། །རྒྱབ་ཏུ་ཁྲོ་བོ་བཞད་པའོ། །རྡོ་རྗེ་ཤུགས་ཀྱིས་སོང་ནས་ཀྱང་། །ནུབ་ཀྱི་ཕྱོགས་སུ་དཀྱིལ་འཁོར་ནི། །ཁྲོ་བོ་ཆེན་པོ་
རྡོ་རྗེ་སྟེ། །ཁྲོ་བདག་ཆེན་པོ་རྣམས་ཀྱིས་བསྐོར། །རྡོ་རྗེ་ཆོས་ནི་མདུན་དུ་སྟེ། །རྡོ་རྗེ་རྣོན་པོ་གཡས་སུའོ། །དེ་བཞིན་གཡོན་དུ་རྡོ་རྗེ་རྒྱུ། །རྒྱབ་ཏུ་རྡོ་རྗེ་སྨྲ་བའོ། །རྡོ་རྗེ་ཤུགས་ཀྱིས་སོང་ནས་ཀྱང་། །དཀྱིལ་འཁོར་དག་ནི་མཆོག་བཞི་པ། །རྡོ་རྗེ་དབབ་པ་ལས་
ཆེན་པོ། །ཁྲོ་བོ་ཆེན་པོས་ཡོངས་སུ་བསྐོར། །རྡོ་རྗེ་ལས་ནི་མདུན་དུ་སྟེ། །གཡས་སུ་རྡོ་རྗེ་བསྲུང་བའོ། །གཡོན་དུ་རྡོ་རྗེ་གནོད་སྦྱིན་ཏེ། །རྒྱབ་ཏུ་རྡོ་རྗེ་ཁུ་ཚུར་རོ། །དབུས་ཀྱི་འཁོར་ལོའི་མཚམས་བཞི་རུ། །ལྷ་མོ་བཞི་ནི་ཡང་དག་བྲི། །མཚམས་སུ་ཟླ་བའི་
དཀྱིལ་འཁོར་ལ། །རྡོ་རྗེ་སྒེག་མོ་ལ་སོགས་བྲི། །ཕྱི་རོལ་དཀྱིལ་འཁོར་མཚམས་རྣམས་སུ། །རྡོ་རྗེ་མེ་ཏོག་ལ་སོགས་བྲི། །རྡོ་རྗེ་དབྱིངས་སོགས་དཀྱིལ་འཁོར་དུ། །ཇི་སྐད་སྔར་བཤད་ཆོ་ག་བཞིན། །སྒོ་བཞི་དག་ནི་ཐམས་ཅད་དུ། །སྒོ་སྲུང་རྣམས་ནི་
དགོད་པར་བྱ། །ལྕགས་ཀྱུ་ཞགས་པ་ལྕགས་སྒྲོག་དང་། །དྲིལ་བུ་དབབ་པ་བླ་ན་མེད། །རང་གི་ཕྱག་རྒྱ་སྙིང་གར་བཞག །རང་རང་གི་ནི་སྙིང་པོ་ཡིས། །རྡོ་རྗེ་དྲིལ་བུ་ཡིད་འོང་ལྡན། །རྣམ་པར་སྣང་མཛད་རྣམ་པར་དགོད། །བདག་ཉིད་རྡོ་རྗེ་ཁྲོ་བོ་ནི། །གཙོ་བོ་རྡོ་རྗེ་
རིག་པ་མཆོག །རྡོ་རྗེ་རྒྱལ་པོ་མཆོག་བྱིན་བརླབ། །རང་ཉིད་རྡོ་རྗེ་དཀྱིལ་འཁོར་མཆོག །དེ་ཡིས་དཀྱིལ་འཁོར་དེ་བྲིས་ནས། །རྡོ་རྗེ་ཏི་རིན་ཏི་རི་འཇུག །ཡང་དག་པར་ནི་བརྟག་བྱས་ལ། །ལན་བདུན་དུ་ནི་བསྐོར་བ་བྱ། །ཆད་པ་གང་ཡིན་ཡོངས་སུ་དག །
མཁས་པས་ལྷག་པར་དབྲི་བར་བྱ། །རྡོ་རྗེ་དྲིལ་བུ་རྟོགས་པར་བྱ། །གྲུབ་པར་གྱུར་ཏེ་ཉེས་པ་མེད། །རྡོ་རྗེ་ལྕགས་ཀྱུ་ལ་སོགས་ཀུན། །མཉམ་པར་བཞག་པས་ལས་རྣམས་བྱ། །འཁོར་ལོའི་དབུས་སུ་ཞུགས་ནས་ནི། །མཁས་པས་སྒོ་ནི་དབྱེ་བར་བྱ། །ཡིད་ཀྱིས་རྡོ་རྗེ་རི་

མོ་ནི། །བཏེག་ཅིང་ཀུན་ཏུ་ཕྱེ་ནས་ཀྱང་། །རྡོ་རྗེ་སྒོ་ནི་བཞི་པོ་དག །ཡིད་ཀྱིས་དབྱེ་བར་བྱ་བ་ཡིན། །དེ་ལ་སྙིང་པོ་ནི་འདི་ཡིན་ཏེ། ཨོྃ་བཛྲ་དྷ་ར་ཨུད་གྷ་ཊ་ཡ་པྲ་བེ་ཤ་ཡ་ས་མ་ཡ་ཧཱུྃ། དཀྱིལ་འཁོར་ཕྱི་རོལ་གནས་རྣམས་སུ། །ཕྱི་ཡི་རྡོ་རྗེ་རིགས་དག་
བྲི། །ཁྱབ་འཇུག་ལ་སོགས་ལྷ་རྣམས་ནི། །ཁ་ཁྱེར་གྱི་ནི་ཕྱེད་ལ་གནས། །འཁོར་ལོ་དང་བཅས་རིགས་བཅས་ཏེ། །སེམས་ཅན་གདུག་པ་གདོན་ལ་སོགས། །རིམས་དང་འབྱུང་པོ་ཤ་ཟ་དང་། །མཁའ་འགྲོ་འབྱུང་པོ་མ་མོ་དང་། །ལྷ་མོ་མཚོན་ཆ་དང་ལྡན་ཀུན། །
ཇི་ལྟར་མངོན་པར་འདོད་པ་བྲི། །ཕྱི་རོལ་ཁ་ཁྱེར་གནས་སུ་ནི། །རྡོ་རྗེ་ཁ་ཁྱེར་མཛེས་པ་རྣམས། །དེ་ནས་སྔོན་ལ་སློབ་དཔོན་ཆེས། །དཀྱིལ་འཁོར་དབུས་སུ་འདུག་ནས་ནི། །རྡོ་རྗེ་སྐྱིལ་མོ་ཀྲུང་བཅས་ཏེ། །ཏིང་ངེ་འཛིན་ལ་སྙོམས་འཇུག་བྱ། །ཇི་ལྟར་རྡོ་རྗེ་རིགས་བྱུང་བ། །དེ་
བཞིན་བདག་ཉིད་རྣམ་པར་བསམ། །རྡོ་རྗེ་རིག་པ་མཆོག་རྒྱལ་པོ། །བདག་ཉིད་ཡང་དག་བྱིན་གྱིས་བརླབ། །རྡོ་རྗེ་ཁྲོ་བོ་རྒྱལ་པོ་མཆོག །ཅེས་བྱ་དེ་འདྲའི་ཏིང་འཛིན་ལ། །རྡོ་རྗེ་སེམས་དཔའི་ཏིང་འཛིན་གྱིས། །སྐལ་བ་ཆེན་པོ་སྙོམས་ཞུགས་ནས། །ཇི་སྐད་གོང་དུ་གྲགས་
པ་བཞིན། །ཤེས་རབ་ཅན་གྱིས་ཐམས་ཅད་བསམ། །ཇི་ལྟར་རྡོ་རྗེ་རིགས་འབྱུང་བ། །ཇི་ལྟར་དཀྱིལ་འཁོར་རྫོགས་པར་ནི། །རྒྱ་ཆེན་གསང་བ་ཆེན་པོ་དང་། །རྡོ་རྗེ་སློབ་དཔོན་ཆོ་ག་མཆོག །རྒྱུད་ཆེན་གསང་བ་ཞེས་བྱ་བ། །རྟོག་པ་འདི་ལས་རབ་ཏུ་བཤད། །དེ་ནས་དབུས་
སུ་འདུག་བྱས་ནས། །རྡོ་རྗེ་སློབ་དཔོན་དཀའ་ཐུབ་ཆེས། །ཁྲོ་བོའི་ཕྱག་རྒྱ་བཅིངས་ནས་ནི། །ཕྱག་རྒྱ་ཐམས་ཅད་ཡོངས་སུ་བཅིངས། །ཁྲོ་བོ་རྡོ་རྗེ་ལྕགས་ཀྱུ་བཅིངས། །སངས་རྒྱས་ཐམས་ཅད་སྤྱན་དྲང་བྱ། །མཚན་བརྒྱ་རྩ་བརྒྱད་དམ་པ་ནི། །ལན་ཅིག་ཏུ་ནི་བརྗོད་པར་
བྱ། །རྡོ་རྗེ་མེ་ཏོག་སོགས་མཆོད་པས། །འདྲེན་པ་ཐམས་ཅད་མཆོད་པར་བྱ། །གསང་བའི་མཆོད་པ་གང་བྱ་བ། །ཕྱག་རྒྱ་ཐམས་ཅད་ཡོངས་སུ་བཅིང་། །ཕྱག་རྒྱ་ཉེ་བའི་ཕྱག་རྒྱ་ལྡན། །དེ་བཞིན་དུ་ནི་མཆོད་པ་ཉིད། །ཕྱག་རྒྱའི་ལན་ལ་སོགས་པ་ཀུན། །ཆོ་ག་རབ་ཏུ་ལྡན་པ་འབུལ། །

རྡོ་རྗེ་དྲིལ་བུ་དཀྲོལ་བྱ་ཞིང་། །གདུག་པའི་དཀྱིལ་འཁོར་བསྡིགས་པར་བྱ། །གདུག་པའི་སེམས་ནི་གདུལ་བྱ་ཞིང་། །ཉོན་མོངས་མཆོག་ཏུ་གསད་པར་བྱ། །དབབ་ཅིང་བརྗོད་པ་ཉིད་དུ་བྱ། །རྡོ་རྗེ་མཆོད་པས་མཆོད་པར་བྱ། །གླུ་དང་མཆོད་པ་ཡང་དག་ལྡན། །རྡོ་རྗེ་
གླུ་ནི་བླང་བར་བྱ། །རྡོ་རྗེ་ཡི་ནི་གླུ་འདི་དག །བླང་ཞིང་མཆོག་རྣམས་མཉེས་པར་བྱ། །བཏུད་ཅིང་དབུལ་བར་བྱ་བ་ཉིད། །རྡོ་རྗེ་གླུ་ནི་བླང་བར་བྱ། །ཤ་ཏ་ཤ་ཏ་མ་ཏས་ཏ་ཏི་རི། ཊ་ཏ་ཊ་ཏ་བྲི་ཏི་ཧ་ཏ། མ་ཏ་ཤ་ཏ་བྲ་ཏ་ཀ་ཏ། ཏ་བི་ཊ་བི་ཊ་ཊ་ཊ་ཊ། བ་ཊ་ཨི་ཏི་ཏ་ཊ་
ཊ་ཊ། ཀ་ར་ཊ་ར་ཊ་ར་ར་ཊ། རྡོ་རྗེ་ཏི་རིན་ཏི་རི་ཡི། །ཕྱག་རྒྱས་བདག་ཉིད་དབང་བསྐུར་བྱ། །ཇི་ལྟར་འདོད་པ་བཀའ་མནོས་ནས། །རྡོ་རྗེའི་སྔགས་ནི་རབ་ཏུ་བསྐུལ། །སྔོན་པོ་གོས་ཀྱིས་སྟོད་གཡོགས་བྱ། །སྔོན་པོ་ཡིས་ནི་མིག་དགབ་བྱ། །རྡོ་རྗེ་ཏི་རིན་ཏི་རི་ཡི། །
ཕྱག་རྒྱ་རྡོ་རྗེ་སློབ་མ་བཅིང་། །ཨོྃ་གྲྀཧྣ་བཛྲ་ས་མ་ཡ་ཧཱུྃ་བྃ། ཅི་རིགས་པར་ནི་གཞུག་བྱ་ཞིང་། །རྡོ་རྗེའི་སྔགས་ནི་བསྐུལ་བར་བྱ། །རྡོ་རྗེ་ཡི་ནི་སྔགས་འདི་ཡིས། །རྡོ་རྗེ་སློབ་མ་གཞུག་པར་བྱ། །ཨོྃ་བཛྲ་ས་མ་ཡ་པྲ་བེ་ཤེ་ཡཱ་མི། རྡོ་རྗེ་དབྱིངས་སོགས་དཀྱིལ་འཁོར་དུ། །
རྒྱས་པར་ཇི་ལྟར་སྔ་མ་བཞིན། །ཡེ་ཤེས་དབབ་པའི་ལས་དག་ནི། །མཁས་པ་དག་གིས་བྱ་ཉིད་དོ། །མཆོད་པ་དང་ནི་གཏོར་མ་ཉིད། །རྡོ་རྗེ་ཅན་གྱིས་སྔར་གསུངས་ཉིད། །ཤེས་རབ་ཅན་གྱིས་ཀུན་བསླབ་ཅིང་། །བདག་ཉིད་དང་བས་རབ་ཏུ་བྱ། །རྡོ་རྗེ་ཧཱུྃ་མཛད་
ཕྱག་རྒྱ་ཡིས། །ཤེས་རབ་ཅན་གྱིས་ཧཱུྃ་བསྒྲུབ་བྱ། །ལྷ་ལ་སོགས་པ་གདུག་པ་ཀུན། །བཀུག་ཅིང་དེ་རུ་གཞུག་པར་བྱ། །རྡོ་རྗེའི་རྣལ་འབྱོར་བསླབ་བྱ་ཞིང་། །བདག་ཉིད་དམ་ནི་གཞན་ཡང་རུང་། །རྡོ་རྗེ་ཕྲེང་བས་དབང་བསྐུར་བྱ། །རྡོ་རྗེ་མནའ་ཡི་ཕྱག་རྒྱ་ཡིས། །སྔོན་
ལ་མནའ་ནི་བསྒག་པར་བྱ། །རྡོ་རྗེ་ཡེ་ཤེས་ཡེ་ཤེས་ཆེ། །རྡོ་རྗེ་ཡེ་ཤེས་རབ་བསྒྲུབ་བྱ། །ལག་པས་རྡོ་རྗེ་མཚན་མ་བཟུང་། །རྡོ་རྗེ་སྔགས་ནི་རབ་བསྒྲུབ་བྱ། །རྡོ་རྗེ་ཡི་ནི་སྔགས་འདི་ཡིས། །རྡོ་རྗེ་མཚན་མ་རབ་ཏུ་སྦྱིན། །ཨོྃ་བཛྲ་པཱ་ཎི་ཀརྨ་ཀཱ་རོད་བྷཱ་བ། དེ་ནས་མིང་གི་དབང་བསྐུར་

ཞིང་། །རྡོ་རྗེ་སྔགས་ནི་རབ་ཏུ་བསྐུལ། །རྡོ་རྗེ་ཡི་ནི་སྔགས་འདི་ཡིས། །རྡོ་རྗེ་མིང་གི་དབང་བསྐུར་བྱ། །ཨོྃ་བཛྲ་ཀྲོ་དྷ་སྟྭྃ་ཨ་བྷི་ཥིཉྩཱ་མི། ཨོྃ་བཛྲ་ནཱ་མ་ཨ་བྷི་ཥེ་ཀ་ཏ་ཧེ་བཛྲ་ནཱ་མ། ཡེ་ཤེས་འབྱུང་བ་ཕུན་སུམ་ཚོགས། །མཁས་པ་ཡིས་ནི་བསྒོམ་པར་བྱ། །ཤེས་རབ་མཆོག་
གིས་བསླབ་བྱ་ཞིང་། །རྡོ་རྗེ་རྣལ་འབྱོར་རབ་ཏུ་བསྒྲུབ། །སྙིང་གར་རྡོ་རྗེ་བྲིས་ནས་ནི། །སྣ་ཚོགས་ལས་རྣམས་ཡང་དག་ལྡན། །འབར་བའི་ཕྲེང་བས་ཁྱབ་ཅིང་འབར། །སྙིང་གར་རྡོ་རྗེ་བསྒོམ་པར་བྱ། །རྡོ་རྗེ་རིག་པ་མཆོག་རྒྱལ་པོ། །བདག་ཉིད་ཡོངས་སུ་བསྒོམ་པར་
བྱ། །རྒྱལ་པོ་ལས་རྣམས་ཐམས་ཅད་འཛིན། །བདག་ཉིད་ཡོངས་སུ་བསྒོམ་པར་བྱ། །ཡང་ན་ཁྲོ་བོའི་ནང་ནས་གཅིག །བདག་ཉིད་ཡོངས་སུ་བསྒོམ་པར་བྱ། །རྡོ་རྗེ་ཁྲོ་བོ་སྙོམས་འཇུག་པས། །འགྲོ་བ་ཐམས་ཅད་དབབ་པར་བྱ། །ཧཱུྃ་སཏྭ་བཛྲ་ཀྲོ་དྷ་ཨཱ་བེ་ཤ་ཨཿ།
ཁྲོ་བོ་རིན་ཆེན་ཏིང་འཛིན་གྱིས། །རྡོ་རྗེ་རིན་ཆེན་ཡང་དག་བྲིས། །བདག་ཉིད་རྡོ་རྗེ་རིན་ཆེན་ཏེ། །སངས་རྒྱས་ཐམས་ཅད་དབང་དུ་བྱ། །རྡོ་རྗེ་པདྨ་མགྲིན་བཅིངས་ནས། །ལྐོག་མའི་ཕྱོགས་སུ་ཡང་དག་བྲི། །བདག་ཉིད་རྡོ་རྗེ་ཆོས་བསྒོམས་ནས། །དེས་ནི་ཉོན་མོངས་
ཐམས་ཅད་འཇོམས། །སྤྱི་བོར་རྡོ་རྗེ་བྲི་བྱ་ཞིང་། །རྡོ་རྗེ་འབར་བ་འཛིན་པ་དགོད། །བདག་ཉིད་རྡོ་རྗེ་ལས་བསྒོམས་ནས། །གདུག་པ་ཐམས་ཅད་བསལ་བར་བྱ། །ཧོ་བཛྲ་རཏྣ་ཀྲོདྷ་བ་ཤ་མཱ་ནཱ་ཡ་ཏྲ། ཧྲིཿབཛྲ་དྷ་རྨ་ཀྲོ་དྷ་ནཱ་ཤ་ཡ་ཕཊ། །ཧཱུྃ་ཀརྨ་བཛྲ་ཀྲོ་དྷ་རཀྵ། ལྷ་ཚོགས་
སངས་རྒྱས་ཐམས་ཅད་ནི། །ཕྱག་རྒྱ་དང་བཅས་དགུག་པར་བྱ། །ཡེ་ཤེས་བརླབ་ཅིང་དེ་ནས་བཟུང་། །དེ་བཞིན་ཁོ་ནར་ཡང་དག་བརླབ། །ལག་པར་རྡོ་རྗེ་ལྕགས་ཀྱུ་བྲིས། །སྡིགས་མཛུབ་ཡི་གེ་ཧཱུྃ་ལྡན་པ། །ཁྲོ་བོ་ཡིས་ནི་སོར་མོ་བསྐྱོད། །ལྷ་རྣམས་འགུགས་པར་
བྱེད་པའི་མཆོག །ཨོྃ་བཛྲ་ཀྲོ་དྷ་ཨཱ་ཀརྵ་ཡ་ཧཱུྃ་ཕཊ། དེ་བཞིན་འོག་ཏུ་རྐང་མཐིལ་ལ། །རྡོ་རྗེ་ལྕགས་ཀྱུ་ཡང་དག་བྲི། །དེ་ཡིས་ལྷ་ནི་གང་ཞིག་མནན། །དེ་ཡི་དགུག་པའི་མཆོག་ཡིན་ནོ། །ཨོྃ་བཛྲ་ཀྲོ་དྷ་ཨ་གྲ་ཨཾ་ཀུ་ཤ་ཨཱ་ཀརྵ་ཡ་ཧཱུྃ་ཕཊ། དཔུང་པ་བརྐྱང་དང་ཡང་དག་ལྡན། །

རྡོ་རྗེ་ལྕགས་ཀྱུ་ཡང་དག་བྲིས། །ལྷ་ནི་གང་དང་གང་ལ་མནན། །དེ་དང་དེ་ནི་དགུག་པའི་མཆོག །ཨོྃ་བཛྲ་ཀྲོ་དྷ་ན་ཨཱ་ཀརྵ་ཡ་ཧཱུྃ་ཕཊ། སྟན་ལ་རྡོ་རྗེ་ལྕགས་ཀྱུ་ནི། །ཡང་དག་བྲིས་པས་དེ་མནན་ཞིང་། །ལྷ་ནི་གང་ཞིག་ཀུན་ཏུ་མནན། །དེ་དང་དེ་ནི་དགུག་པའི་མཆོག །ཨོྃ་བཛྲ་ཀྲོ་དྷ་
ཨཱ་ས་ན་ཨཱ་གཙྪ་ཡ་ཨཱ་ཀརྵ་ཡ་མི་ཏེ་ཧེ་བཛྲ་སམ་ཡ་མ་ནུ་སྨ་ར་ཧཱུྃ་ཕཊ། ཕྱག་རྒྱ་དབབ་པར་ཡང་དག་དབབ། །མཁས་པས་ཡེ་ཤེས་བསླབ་པར་བྱ། །རྡོ་རྗེ་སྦྱོར་བ་ཐམས་ཅད་ཀྱིས། །སྒྲུབ་པ་དག་ཀྱང་ཡང་དག་བརྩམ། །གཡོན་བརྐྱང་བ་ཡིས་གནས་རྣམས་སུ། །བདག་ཉིད་ཁྲོ་བོར་
བསྒོམ་པར་བྱ། །མྱུར་དུ་སངས་རྒྱས་ཡེ་ཤེས་ནི། །རིང་པོར་མི་ཐོགས་ཡང་དག་དབབ། །ཨོྃ་བཛྲ་ཀྲོ་དྷ་ཀཱ་ཡ་ཨཱ་བེ་ཤ་ཧཱུྃ་ཕཊ། །རྡོ་རྗེ་ཧཱུྃ་མཛད་ཡང་དག་སྦྱོར། །ཁྲོ་བོ་བདག་ཉིད་བསྒོམ་པར་བྱ། །སངས་རྒྱས་བྱང་ཆུབ་ཡང་དག་དགུག །རྡོ་རྗེ་སྔགས་ནི་རབ་ཏུ་
བསྐུལ། །ཨོྃ་བཛྲ་བི་དྱོཏྟ་མ་མ་ཧཱ་ཀྲོ་དྷ་ཨཱ་ན་ཡ་ཧོ་བྷ་ག་བན་བཛྲ་ཧཱུྃ་ཕཊ། བདག་ཉིད་ཁྲོ་བོ་བསྒོམ་བྱ་ཞིང་། །ཁྲོ་བོའི་ལྟ་བས་བལྟ་བར་བྱ། །འཁོར་བའི་བཙོན་ར་འཇིགས་རུང་བར། །སེམས་ཅན་ཐམས་ཅད་གསད་པར་བྱ། །ཨོྃ་དྲྀཥྚ་མ་ཧཱ་ཀྲོ་དྷ་མ་ར་ཡ་སརྦ་སཏྭ་
ཧཱུྃ། རྟག་ཏུ་རང་ཉིད་གོ་བགོས་པར། །ཡིད་ཀྱིས་བདག་ཉིད་བསྒོམ་བྱ་ཞིང་། །གཞན་དག་ཀྱང་ནི་བསྒོམ་བྱས་ནས། །འགྲོ་བ་འདི་ཀུན་བསྲུང་བར་འགྱུར། །ཨོྃ་བཛྲ་རཀྵ་རཀྵ་སརྦ་ས་ཏྭ་ཧཱུྃ་ཕཊ། གསང་བའི་ཕྱག་རྒྱ་རྣལ་འབྱོར་ཆེ། །རྣམ་པ་བཞི་ནི་བསླབ་
པར་བྱ། །རྡོ་རྗེ་ཡེ་ཤེས་དེ་ཉིད་ཆེ། །སངས་རྒྱས་བྱང་ཆུབ་ཡེ་ཤེས་བསམ། །རྡོ་རྗེ་ཁྲོ་བོ་སྙོམས་འཇུག་པས། །སེམས་ཅན་གང་ཕྱིར་ཀུན་དུ་ཆགས། །ཡིད་ཀྱིས་གཟུགས་ནི་བསྒོམ་བྱ་ཞིང་། །ཡི་གེ་ཧཱུྃ་ནི་རབ་ཏུ་བརྗོད། །རྡོ་རྗེའི་སྦྱོར་བ་འདི་དག་ནི། །རྡོ་རྗེ་མཁའ་
འགྲོའི་ཕྱག་རྒྱ་ཡིས། །སེམས་ཅན་གང་ལ་ཡོངས་སུ་ཆགས། །དེ་ཡི་ཉོན་མོངས་རྣམ་པར་ཉམས། །ཊཀྐི་ཨ་ས་ལ་བེ། །ཨ་ལ་བེ་ཨཙྪ་ཊཀྐི་ཧཱུྃ་ཕཊ། འདི་ནི་ལན་ཅིག་བརྗོད་པས་ཀྱང་། །ཀུན་ནས་ཉོན་མོངས་ཞུ་ཞིང་གཡོ། །ཊཀྐི་ཛ། སེམས་ཅན་གང་གི་

རྒྱུད་ལ་ནི། །རྡོ་རྗེ་ཡི་ནི་ལྟ་བས་བལྟས། །རྡོ་རྗེ་རྣལ་འབྱོར་སྤྱན་ཆེན་པོས། །དེ་ཡི་སྡུག་བསྔལ་ཉམས་པར་གྱུར། །ཊཀྐི་ཧཱུྃ། ཡི་གེ་ཧཱུྃ་ནི་གྱུར་པ་ལས། །ཉེ་བའི་སེམས་ཅན་གང་ཡིན་པ། །དེ་ཡི་སྙིང་གར་རྡོ་རྗེ་ཡང་། །ཤེས་རབ་ཅན་གྱིས་ཡིད་
ཀྱིས་བསམ། །དེ་ནས་འཇིགས་པ་ཐམས་ཅད་ལས། །ཕྱིར་མི་ལྡོག་པའི་ཕྱག་རྒྱ་ཡང་། །རྡོ་རྗེ་རྣལ་འབྱོར་མཁའ་འགྲོ་དང་། །རྡོ་རྗེ་ཕྱག་རྒྱས་གདབ་པར་བྱ། །ཊཀྐི་ཧོ། རྡོ་རྗེ་རྣལ་འབྱོར་རྨད་བྱུང་ཆེ། །རྡོ་རྗེ་རྣལ་འབྱོར་རྡོ་རྗེ་གང་། །རྣལ་འབྱོར་མཁའ་འགྲོ་དཀྱིལ་
འཁོར་ནི། །ཤེས་རབ་ཅན་གྱིས་མཆོག་གསང་བརླབ། །དབང་པོ་གཉིས་ནི་སྙོམས་འཇུག་པས། །ཡན་ལག་ཀུན་ལ་ཡོངས་སུ་འཁྱུད། །ཡི་གེ་ཧཱུྃ་ནི་སྦྱོར་བྱེད་པ། །སྡུག་བསྔལ་རྣམ་པར་ཉམས་པར་འགྱུར། །རྡོ་རྗེ་ཁྲོ་བོ་རབ་དྲག་འཛིན། །རྟག་ཏུ་བདག་ཉིད་བསྒོམ་
པར་བྱ། །དེ་ཡི་ཁྲོ་བོའི་སྐུ་གང་ཡིན། །གཅིག་ཏུ་མཆོག་ཏུ་གསང་བ་བདག །སངས་རྒྱས་བྱང་ཆུབ་སེམས་དཔའང་རུང་། །བདག་ཉིད་དང་ནི་མཚུངས་པ་རུ། །ལུས་ནི་ཡང་དག་སྦྱོར་བ་ནི། །དབང་པོ་སྙོམས་འཇུག་བརྗོད་པར་བྱའོ། །སངས་རྒྱས་བྱང་ཆུབ་སེམས་
དཔའ་འམ། །རྡོ་རྗེ་ཁྲོ་བོའམ་སེམས་དཔའ་གཞན། །དེའི་ལུས་གང་ཡིན་པ་དང་། བདག་གི་ལུས་གང་ཡིན་པ་མཚུངས་པར་ཤེས་པ་ཉིད། འདི་ནི་དབང་པོ་གཉིས་སྙོམས་པར་འཇུག་པ་ཞེས་བྱའོ། །ཡང་ན་རྣམ་པར་བསྒོམ་པ་ཡིས། །ཇི་སྐད་བཤད་བཞིན་ཡན་ལག་
འཁྱུད། །རྡོ་རྗེ་སེམས་དཔའ་རྒྱལ་པོ་ཆེ། །དཔུང་པ་དམ་པོར་བསྡམ་པར་བྱ། །ཡན་ལག་ཀུན་ལ་ཡོངས་འཁྱུད་པས། །སངས་རྒྱས་བྱང་ཆུབ་རབ་གྲུབ་འགྱུར། །དབང་པོ་གཉིས་ནི་སྙོམས་འཇུག་པ། །འདོད་པའི་འདོད་ཆགས་བརྟག་མི་བྱ། །འདི་ཡིས་མཚུངས་
པར་བསྒོམས་པ་ཡིས། །མཚུངས་པ་ཉིད་ནི་དབང་པོ་ཡིན། །ཧྃ་ཏྲྃ་ཧཱུྃ་གི་སྦྱོར་བའི་སོ་དག་གིས། །མཆུ་བཟུང་ནས་ནི་འོ་བྱ་ཞིང་། །སེམས་ཅན་གང་ཞིག་རྣམ་བསྒོམ་པ། །དེས་ནི་བདེ་བ་དོན་ཡོད་ཐོབ། །ཧཱུྃ་ཛ། སེམས་ཅན་ཐམས་ཅད་བདེ་བྱེད་པ། །ཡི་གེ་ཧཱུྃ་དེ་རབ་

སྦྱོར་ཞིང་། །བདག་ཉིད་ཁྲོ་བོར་རྣམ་སྦྱངས་ནས། །དེ་ནས་བདེ་བ་ཐོབ་པར་འགྱུར། །ཧཱུྃ། གང་གིས་ཧཱུྃ་ནི་རབ་སྦྱོར་ཞིང་། །སེམས་ཅན་དག་ནི་གང་དག་གིས། །ཡན་ལག་ཐམས་ཅད་བསྡུས་བྱས་ན། །དེ་ཡི་ཉོན་མོངས་བསྲབས་པར་འགྱུར། །ཧཱུྃ་ཕཊ། ཡེ་ཤེས་
ཆེན་པོས་ཐབས་ལྡན་པ། །རྡོ་རྗེའི་རིགས་ནི་ཐམས་ཅད་ཉིད། །དེ་བཞིན་འཁོར་ལོའི་འཁོར་བཅས་པས། །མཁས་པ་ཡིས་ནི་བསླབ་པར་བྱ། །སངས་རྒྱས་སྦྱོར་བའི་ཏིང་འཛིན་གྱིས། །རྟག་ཏུ་བདག་ནི་བསྒོམ་པར་བྱ། །རྣམ་སྨིན་མཆོག་རྣམས་ཀུན་ལྡན་
པ། །སངས་རྒྱས་སྐུ་ནི་རྣམ་པར་བསྒོམ། །བསྒོམ་པའི་སྦྱོར་བ་དེ་ཡིས་ནི། །སྐད་ཅིག་སངས་རྒྱས་ཉིད་ཐོབ་འགྱུར། །ཨ། རྡོ་རྗེའི་རིག་པ་མཆོག་རྒྱལ་པོ། །བདག་ཉིད་ཡོངས་སུ་བསྒོམ་པར་བྱ། །ཧཱུྃ། རྡོ་རྗེ་ཁྲོ་བོ་ཁྲོ་གཉེར་ཅན། །མཁས་པ་ཡིས་ནི་བསྒོམ་
པར་བྱ། །ཏྲྃ། །རྡོ་རྗེ་སྡེ་རུ་རང་བདག་ཉིད། །སངས་རྒྱས་ཐམས་ཅད་བསྒོམ་པར་བྱ། །ཧྲཱིཿ། རྡོ་རྗེ་དབབ་པ་ཁྲོ་བོ་ཆེ། །མཁས་པ་ཡིས་ནི་བསྒོམ་པར་བྱ། །ཨ། བདག་ཉིད་རྡོ་རྗེ་སེམས་ལ་ནི། །རྡོ་རྗེ་སེམས་དཔར་རྣམ་པར་བསྒོམ། །ཧཱུྃ་བཛྲ་སཏྭ། རྡོ་རྗེ་རྒྱལ་པོ་བདག་
བསྒོམ་བྱ། །ཛ་བཛྲ་རཱ་ཛ། རྡོ་རྗེ་ཆགས་པར་བསམ་པར་བྱ། །ར་བཛྲ་རཱ་ག །ཁྲོ་བོ་ལེགས་པ་བསྒོམ་པར་བྱ། །ས་བཛྲ་སཱ་དྷུ། དེ་ནས་རྡོ་རྗེ་རིན་ཆེན་ནོ། །ཨོྃ་བཛྲ་རཏྣ། རྡོ་རྗེ་གཟི་བརྗིད་དེ་བཞིན་ནོ། །ཛྭཱ་ལ་ཡ། བདག་ཉིད་རྡོ་རྗེ་རྒྱལ་མཚན་བསྒོམ། །དྷེ་ཧེ། རྡོ་རྗེ་བཞད་པ་
རྣམ་པར་བསྒོམ། །ཧཱ་ས་བཛྲ་ཧཱ་ས། རྡོ་རྗེ་ཆོས་ནི་བསྒོམ་པར་བྱ། །ཤོ་དྷ་ཡ། རྡོ་རྗེ་རྣོན་པོ་རྣམ་པར་བསྒོམ། །ཙྪིན་ད། རྡོ་རྗེ་རྒྱུ་ནི་འཁོར་ལོ་ཆེ། །པྲ་བེ་ཤ་ཡ། རྡོ་རྗེ་སྨྲ་བ་རྣམ་པར་བསྒོམ། །བྷཱ་ཥ། རྡོ་རྗེ་ལས་ནི་བསྒོམ་པར་བྱ། །ཀརྨ། རྡོ་རྗེ་གོ་ཆ་རྣམ་པར་བསྒོམ། །རཀྵ། རྡོ་རྗེ་
གནོད་སྦྱིན་བསྒོམ་པར་བྱ། །ཁཱ་ད། རྡོ་རྗེ་ཁུ་ཚུར་རྣམ་པར་བསྒོམ། །བྃ། གང་དང་གང་ལ་འདོད་པ་ཉིད། །རིགས་ཀྱི་ལྷ་ནི་ཅི་འདྲ་བར། །རང་བདག་ཉིད་ནི་བསྒོམ་པར་བྱ། །དེ་ནི་འདི་ཡིས་སྐད་ཅིག་འགྲུབ། །ཧཱུྃ། རྡོ་རྗེ་ཕྱག་རྒྱས་ལན་ཅིག་བཅིང་། །མཁས་པས་རྡོ་རྗེ་བཟླས་

པ་བརྗོད། །ཇི་སྐད་བཟླས་པའི་རྒྱུད་དུ་བཤད། །གཞན་དུ་ཁྲོ་བོ་གཟུང་བར་བྱ། །ཡིད་ཀྱིས་ཀྱང་ནི་བརྗོད་བྱ་ཞིང་། །ལུས་ཀྱི་ཕྱག་རྒྱས་བསྐུལ་བར་བྱ། །དཀྱིལ་འཁོར་གསུམ་ནི་མཉམ་སྦྱོར་བས། །སྐད་ཅིག་དེ་ལ་མཁས་པས་བསྒྲུབ། །དེ་ནས་
ཉམས་དགའ་རྡོ་རྗེའི་རིགས། །ཕྱག་རྒྱ་ཆེན་པོ་གྲངས་མེད་པ། །ལུས་ཀྱི་ཕྱག་རྒྱ་ཡང་དག་ལྡན། །གང་ཕྱིར་སེམས་ཅན་སྣོད་མིན་པ། །དེ་ཡི་ཕྱིར་ན་ཉུང་བར་གསུངས། །ཕྱག་རྒྱ་ཆེན་པོ་ཡོངས་བསྡུ་བ། །ཐེག་པ་ཆེན་པོ་མངོན་བསྡུས་ལས། །རྒྱུད་ཆེན་གསང་བ་ཞེས་བྱ་བ། །
རྒྱུད་དེར་རབ་ཏུ་བཤད་པ་ཡིན། །གསང་བའི་ཆོ་ག་འདི་ཡིས་ནི། །རྣལ་འབྱོར་བྱ་བ་བསྒྲུབ་པར་བྱ། །རྡོ་རྗེ་རྣལ་འབྱོར་སྦྱོར་བ་ཡིས། །སྐད་ཅིག་གིས་ནི་སངས་རྒྱས་འགྲུབ། །འདིར་ནི་ཕན་ཡོན་མང་པོ་དག །རང་གི་ལས་ལ་ངེས་པར་སྦྱར། །གང་ཞིག་བཏུལ་ཞིང་
མངོན་པར་སྦྱོར། །སྐད་ཅིག་གིས་ནི་སངས་རྒྱས་འགྲུབ། །མཚམས་མེད་ལྔ་པོ་བྱེད་པ་ཡང་། །ཞུགས་ནས་མངོན་པར་བརྩོན་འགྱུར་ཞིང་། །རྣལ་འབྱོར་ཆོ་ག་སྒྲུབ་བྱེད་ན། །འགྲུབ་པར་འགྱུར་བར་ཐེ་ཙོམ་མེད། །ཚེ་འདི་ལ་ནི་རྣལ་འབྱོར་པས། །རབ་ཏུ་དགའ་བའི་ས་
ཐོབ་འགྱུར། །གང་གིས་རྡོ་རྗེ་ཅན་སྦྱོར་བས། །གདོན་མི་ཟ་བར་ས་ཐོབ་འགྱུར། །བསྐལ་པ་གྲངས་མེད་དཀའ་བ་ནི། །སྤྱོད་པའི་བདག་ཉིད་མེད་པར་མིན། །རྣལ་འབྱོར་འདི་ལ་མངོན་པར་བརྩོན། །དེ་བས་ས་ནི་རྙེད་དཀའ་མིན། །ཐེག་ཆེན་འདི་ནི་གསང་བ་སྟེ། །
སངས་རྒྱས་ཆོས་ཀྱི་ཚུལ་བསྟན་པ། །སངས་རྒྱས་བྱང་ཆུབ་སྙིང་པོ་ཆེ། །དེ་ལས་ས་ནི་ཐོབ་དཀའ་མིན། །གཡོན་བརྐྱང་ཆ་ལུགས་གནས་ནས་ནི། །ཁྲོ་བོའི་ཚིག་ནི་རབ་ཏུ་བརྗོད། །ཁྲོ་བོའི་ལྟ་བས་ཡང་དག་ཁྲོས། །ལས་རྣམས་ཐམས་ཅད་བསྒྲུབ་པར་བྱ། །དེ་
བཞིན་གཤེགས་པ་ཐམས་ཅད་ཀྱི་མདོ་སྡེའི་དབང་པོ་གསང་བའི་རྣལ་འབྱོར་གསང་བ་དེ་ཁོ་ན་ཉིད་དམ་པ་མཆོག་ཏུ་གསང་བའི་རྟོག་པའི་རྒྱལ་པོ་རྡོ་རྗེ་རྩེ་མོ་ལས་ཁམས་གསུམ་རྣམ་པར་རྒྱལ་བ་ཞེས་བྱ་བ་རྣམ་པར་བཤད་པ་སྟེ་ལེའུ་གསུམ་པ་རྫོགས་སོ།། །།རྡོ་རྗེའི་

རིགས་ལས་ལེའུ་དང་པོའོ།། །།དེ་ནས་གསང་བ་དག་ནི་ཀུན་བསྡུས་མཆོག །སེམས་ཀྱི་དགའ་བ་ཀུན་སྦྱོར་ཡང་དག་བྱུང་། །བྱ་བ་བྱས་ཤིང་མཆོག་ཏུ་རྣམ་པར་མཛེས། །རྡོ་རྗེ་དབང་ཕྱུག་ཐམས་ཅད་རྣམ་འཕྲུལ་ཚོགས། །དེ་ནས་སངས་རྒྱས་ཀྱི་ནི་རིགས་
ཆེན་མཆོག །རྡོ་རྗེ་སྙིང་པོའི་ཐུགས་བྱུང་བདེ་ལྡན་པ། །ཤིན་ཏུ་གསང་བའི་ཡོན་ཏན་མཆོག་བསྡུས་པ། །རྡོ་རྗེ་རྒྱལ་པོ་བུད་མེད་གཟུགས་ཅན་གྱུར། །ཨེ་མའོ་བུད་མེད་དགའ་བ་མཆོག་སྤྱོད་པ། །གསང་བ་ཀུན་ཏུ་བསྡུས་པ་ལས་བྱུང་བ། །རྡོ་རྗེ་སེམས་དཔའ་
མཆོག་ཏུ་འཇིགས་མི་མངའ། །དེ་ཡིས་གསུངས་ནས་ཅང་མི་གསུང་བཞུགས་སོ། །གཟུངས་ཀྱི་དམ་ཚིག་ཡང་དག་བྱུང་བ་མཆོག །ཏིང་འཛིན་གནས་ནས་ཆོས་ཉིད་གསང་བ་ནི། །སྤྱི་བོ་རྐང་མཐིལ་ཀུན་བསྡུས་བསྟན་པ་ལས། །དེ་ཡི་རིགས་ཀྱི་དཀྱིལ་འཁོར་ཚོགས་
དག་ཕྱུང་། །ཧྲཱིཿ། དེ་ནས་དགའ་བའི་མིང་ཅན་དག་ཀྱང་ཕྱུང་། །རྡོ་རྗེ་བུད་མེད་ཐུགས་ལས་བྱུང་བ་མཆོག །གཟུགས་ཁམས་མཆོག་གི་ལྷ་ལས་ཤིན་ཏུ་འདས། །རྡོ་རྗེའི་མཚམས་རྣམས་ལྷ་མོའི་ཚིག་དག་གྲག །དགའ་བཅས་འཛུམ་པ་དང་ལྡན་སྤྱན་མངའ་བ། །
བཞད་ཅིང་སྒེག་དང་བཅས་པའི་ཞལ་ལྡན་པ། །ཚངས་སོགས་རིགས་ཀྱི་ལྷ་ཡི་ལྷ་མོ་སྟེ། །ཡིད་འོང་དགའ་བ་ཆེན་པོས་རྒྱལ་འགྱུར་བ། །ལྷ་མོ་རྡོ་རྗེ་རྣལ་འབྱོར་མ་དེ་ཡང་། །འཁོར་ལོའི་དབུས་སུ་གནས་ནས་རྟོག་བྱེད་པ། །དེ་ཡི་རིགས་བསྡུས་མཛེས་ཤིང་ཡིད་དུ་
འོང་། །རྡོ་རྗེ་ཆེན་མོ་རྡོ་རྗེ་རྨོངས་བྱེད་མ། །ཨོྃ་སརྦ་ཏ་ཐཱ་ག་ཏ་མ་ཧཱ་རཱ་ག་མོ་ཧ་ན་ཡ་ཧི། སྙིང་པོ་སངས་རྒྱས་རྨོངས་པར་བྱེད་པས་གསུངས། །དེ་བཞིན་གཤེགས་པ་མཆོག་ཀྱང་རྨོངས་པར་འགྱུར། །སངས་རྒྱས་ཀུན་གྱི་དགའ་བ་རྨོངས་བྱེད་དགའ། །སངས་རྒྱས་
གཟུགས་དག་ཡོངས་སུ་སྒྱུར་བ་མཆོག །རྣམ་སྣང་ཐུབ་པའི་དབང་ཕྱུག་མཆོག་དེ་ནི། །བུད་མེད་གཟུགས་ཀྱི་སྤྲུལ་པ་ཉིད་དུ་འགྱུར། །དབང་ཕྱུག་རྫུ་འཕྲུལ་མཆོག་མངའ་གང་དེ་ནི། །འཁོར་གྱི་སྲིང་མོ་གང་ཡིན་བཞི་བོར་གྱུར། །ཨོྃ་བཛྲ་ཀྲོ་དྷ་ས་མ་ཡེ་སྠི། དེ་ནས་

གསང་བ་བརྟན་པའི་ཚོགས་ཞི་བ། །ཆོས་དང་ལོངས་སྤྱོད་རྫོགས་སྐུས་ཀུན་ཁྱབ་པ། །རྡོ་རྗེ་གསང་བའི་དབང་ཕྱུག་རྨོངས་བྱེད་བདག །སངས་རྒྱས་བཙུན་མོ་དག་པའི་ཆོས་ཉིད་བཞུགས། །ས་ནི་རྣམ་པ་དྲུག་ཏུ་གཡོས་པར་གྱུར། །འོད་ཟེར་སྣ་ཚོགས་
ཕྱོགས་བཅུ་དག་ཏུ་གསལ། །ལྷ་མོ་ལྷ་དང་བཅས་པའི་ལྷ་མོ་རྣམས། །ཟིལ་གྱིས་མནན་ཅིང་ཤིན་ཏུ་རྒྱས་པར་འགྱུར། །རིགས་ཀྱི་དཀྱིལ་འཁོར་དང་མཚུངས་ལྷ་མོའི་ཚོགས། །དེ་དག་རང་གི་གཞལ་ཡས་ཁང་ན་གནས། །དེ་ནས་སངས་རྒྱས་རིན་ཆེན་འབྱུང་བ་ཡི། །
གསང་བའི་དབང་ཕྱུག་དམ་པ་འདྲེན་པ་སྟེ། །རྡོ་རྗེ་དགའ་བ་ཆེན་པོ་རྣམ་པར་དགོད། །གདུག་པ་ཀུན་གྱི་དབང་ཕྱུག་ཡི་གེ་ནི། །སྙིང་པོ་ལས་བྱུང་ཆོས་ཉིད་དག་པ་སྟེ། །རྡོ་རྗེ་བཙུན་མོ་བཞི་དང་དབུས་མ་ལྔ། །དཀྱིལ་འཁོར་ཚོགས་ཀྱི་ཤར་ཕྱོགས་ཆ་ལ་གནས། །མི་
བསྐྱོད་པ་ཡི་དབང་ཕྱུག་དམ་པའི་མཆོག །དེ་ནས་རྡོ་རྗེའི་རིགས་ཅན་ལས་བྱུང་བའི། །ཤར་གྱི་དཀྱིལ་འཁོར་ཁྲོ་བཅས་དཀྱིལ་འཁོར་བཅས། །མི་བསྐྱོད་དམ་པའི་དམ་ཚིག་བདག་ཉིད་ཅན། །དེ་ཡིས་སྙིང་པོ་བསྐུལ་བ་གསུངས་པར་གྱུར། །སྙིང་པོ་རབ་མཆོག་འབྱུང་
བ་གསུངས་པར་གྱུར། །ཨོྃ་བཛྲ་ཀྲོ་དྷ་ས་མ་ཡེ་ཛི། ཨོྃ་བཛྲ་རོ་ཥ་ཨྃ་ཀུ་ཤ་ཨཱ་ན་ཡ་སརྦ་ཛི། ཨོྃ་བཛྲ་རོ་ཥ་ཀརྨ་བཛྲི་བ་ཤྃ་མེ་ཨཱ་ན་ཡ་དི་ཛི། ཨོྃ་བཛྲ་དུཥྚི་ཀྲོ་དྷ་ཏིཥྛ་ཡ་སརྦ་ཛི། རིན་ཆེན་འབྱུང་ལྡན་དེ་ནི་བུད་མེད་གཟུགས། །རིན་ཆེན་མཆོག་ཏུ་ཡིད་དུ་འོང་བ་དེས། །
འཁོར་གྱི་སྙིང་པོ་དག་ནི་བཞི་པོ་གསུངས། །ཨོྃ་བཛྲ་བྷྲྀ་ཀུ་ཊཱི་ཀྲོ་དྷ་ཧ་ར་ཧ་ར་སརྦ་གརྦྷ་ཛི། ཨོྃ་བཛྲ་ཛྭ་ལ་མཱ་ལ་པྲ་བེ་ཤ་མ་ཧཱ་ཀྲོ་དྷ་ཨགྣི་ཛྭཱ་ལ་ཡ་སརྦ་ར་བྷི་ཥ་ཛ་ཛི། ཨོྃ་བཛྲ་དྷྭ་ཛ་ཨ་གྲ་ཀེ་ཡུ་རི་མ་ཧཱ་ཀྲོ་དྷི་དེ་ཧི་སརྦ་ཛི། ཨོྃ་བཛྲ་ཨཊྚཱཊྚ་ཧ་སི་ནི་ཧཱ་ས་མ་ཡཱ་ཊྚཱཊྚ་ཧ་ར་ཧ་ར་ཛི། ཡི་གེ་
ཛི་ནི་ཤིན་ཏུ་བརྟན་པར་གནས། །སྙིང་པོ་མཆོག་ཏུ་ཤིན་ཏུ་གྱུར་པ་གསུངས། །རིན་ཆེན་དབང་ཕྱུག་དམ་པ་དེ་ཡིས་ནི། །སྙིང་པོ་བསྐུལ་བར་བྱེད་པའི་མཆོག་དག་གསུངས། །སྙིང་པོ་མཆོག་གསུངས་རྨད་བྱུང་གསུངས་པར་གྱུར། །འོད་དཔག་མེད་དེ་བུད་མེད་གཟུགས་གྱུར་

པ། །རྡོ་རྗེ་བཙུན་མོ་དམ་པ་འབྱུང་བའི་མཆོག །སྙིང་པོ་བཞི་པོ་དག་ནི་གསུངས་པར་གྱུར། །ཨོྃ་བཛྲ་ཤུད་དྷི་ཧ་ན་དུཥྚི་དྷི། ཨོྃ་ཏཱིཀྵྞ་ཀྲོ་དྷ་ཙྪིན་ད་ན་སརྦ་དྷི་རི། བཛྲ་ཧེ་ཏུ་མ་ཧཱ་ཀྲོ་དྷ་བྲ་བེ་ཤ་ཡ་སརྦ་དྷི། ཨོྃ་བཛྲ་ཛི་ཧྭཱ་མ་ཧཱ་ཀྲོ་དྷ་བྷཱ་ཥི་པ་ཙ་ཨུངྒ་ར་ཡ་དྷིཿ། སྙིང་པོ་རིག་མཆོག་
བརྟན་པ་གསུངས་པར་གྱུར། །པདྨའི་དཀྱིལ་འཁོར་དབང་དང་ལྡན་པ་མཆོག །འོད་དཔག་མེད་པའི་གསང་མཆོག་བསྟན་པ་སྟེ། །སྙིང་པོ་བསྐུལ་བའི་མཆོག་ནི་གསུངས་པར་གྱུར། །ཎི། དགའ་བ་ཆེན་པོས་མཚན་མ་དག་ཀྱང་ཕྱུང་། །དོན་ཡོད་གྲུབ་པ་བུད་མེད་གཟུགས་གྱུར་
པས། །ལས་ལ་ཤིན་ཏུ་བསྐུལ་བ་དང་ལྡན་ཏེ། །འཁོར་གྱི་སྲིང་མོ་དག་ནི་བཞི་པོ་གསུངས། །ཨོྃ་སརྦ་མུ་ཁེ་ཀརྨ་བཛྲི་ཎི་མ་ཧཱ་ཀྲོ་དྷ་ཀུ་རུ་སརྦ་ཎི། ཨོྃ་བཛྲ་ཀ་བ་ཙ་ཀྲོ་དྷི་རཀྵ་མ་ཎི། ཨོྃ་བཛྲ་ཀྲོ་དྷེ་མ་ཧཱ་ཡཀྵི་ཎི་བཛྲེ་དྃཥྚཱ་ཀ་རཱ་ལི་བི་ལཱ་ས་སརྦ་ཎི། ཨོྃ་བཛྲ་མུཥྚི་བཛྲ་ཀྲོ་དྷ་ནི། དེ་ནས་
ལས་ཀྱི་དཀྱིལ་འཁོར་སྣ་ཚོགས་དག །མཆོག་ཏུ་གསང་བ་བསྡུས་པ་དགའ་ཆེན་པོ། །དབུས་ཀྱི་གཙོ་བོའི་དཀྱིལ་འཁོར་སྐུལ་བྱེད་པ། །ལས་ཀྱི་བཙུན་མོའི་སྙིང་པོ་མཆོག་འདི་གསུངས། །ཧཱུྃ། དབུས་ཀྱི་གསང་བ་སྣ་ཚོགས་འབྱུང་འགྱུར་བ། །གཙོ་བོ་འདི་དག་རྣམ་པར་སྣང་མཛད་
གསུངས། །ཨོྃ་བཛྲེ་ཤྭ་རཱི་ཧཱུྃ། ཨོྃ་རཏྣེ་ཤྭ་རཱི་ཧཱུྃ། ཨོྃ་པདྨེ་ཤྭ་རཱི་ཧཱུྃ། ཨོྃ་ཀརྨེ་ཤྭ་རཱི་ཧཱུྃ། རྡོ་རྗེ་རྒྱལ་མོ་དང་བཅས་བསྐུལ་བ་ལས་བྱུང་གང་ཡིན་པ། །རྡོ་རྗེ་བཙུན་མོ་རྣལ་འབྱོར་བཞི་ཡིས་དབུས་ཀྱི་དབང་ཕྱུག་ཉིད་དུ་གནས། །རྡོ་རྗེ་རིན་ཆེན་ཆོས་ལྡན་བཙུན་མོ་ཡན་ལག་མཛེས་པ་དང་
ལྡན་པ། །འདི་ནི་གསང་བའི་ཚོགས་ལས་གཞན་དུ་རྣལ་འབྱོར་མཆོག་ནི་འགའ་ཡང་མེད། །རྡོ་རྗེ་སེམས་དཔའ་མཆོག་ཏུ་འཇིགས་མི་མངའ། །དེ་ནི་རང་གི་འཁོར་ཚོགས་དབུས་ན་བཞུགས། །དེས་ནི་བརྩེ་དང་ཕན་པའི་སེམས་ཀྱིས་ནི། །རྡོ་རྗེ་གསང་བའི་དཀྱིལ་འཁོར་མཆོག་
གསུངས་གྱུར། །དེ་ནས་འཁོར་ལོའི་གྲོང་ཁྱེར་བསྟན་བྱས་ནས། །ཁམས་གསུམ་རྣམ་པར་རྒྱལ་བའི་བདག་ཉིད་དེས། །རྡོ་རྗེ་རྣལ་འབྱོར་དབང་ཕྱུག་བཙུན་མོ་ཡི། །དཀྱིལ་འཁོར་གསང་བའི་རྣལ་འབྱོར་ཡང་དག་བྲི། །གྲོང་ཁྱེར་རྣམ་པ་གཉིས་སུ་ཡང་དག་བྲི། །འཁོར་ལོ་རྣམ་པ་

གཉིས་སུ་སྦྱར་བར་བྱ། །དེ་བཞིན་གྲོང་ཁྱེར་འདི་རུ་ཡང་དག་འོང་བ་དང་། །ཡང་ན་ཇི་ལྟར་འདོད་བཞིན་ཡང་དག་བྲི། །དེ་ཡང་ཕྱག་རྒྱ་དག་གི་ཚོགས་དང་བཅས། །བསྒོམ་པར་འོས་པ་རྡོ་རྗེ་ཡང་དག་བྲི། །ཡང་ན་གསང་བའི་ཆོས་ཀྱིས་མཆོད་གྱུར་པ། །
ད་ནི་གཟུགས་དང་ལྡན་པ་ཡང་དག་བྲི། །དབུས་ཀྱི་རིམ་པར་རྡོ་རྗེ་སེམས་དཔའ་བཞུགས། །ཞགས་པ་དང་ལྡན་འཁོར་གྱི་ཕྱག་རྒྱ་བཅས། །རྡོ་རྗེ་འབར་བ་ནོར་བུ་པདྨ་ལས། །འབར་བའི་དང་བཅས་མེ་དང་ལྡན་པར་གཞག །ཤར་གྱི་དཀྱིལ་འཁོར་འཁོར་ལོ་ལྔ་ཡི་
བདག་ཉིད་ཆེ། །རྡོ་རྗེའི་དཀྱིལ་འཁོར་གང་དུ་མི་བསྐྱོད་གཙོ། །རྡོ་རྗེའི་ཕྱག་རྒྱ་ཆེ་དང་རོལ་པར་གྱུར། །དབང་ཕྱུག་ཆེན་པོ་རྩེ་གསུམ་ལྡན་ནོན་མཆོག །དེ་ནས་ཕྱོགས་བཞིའི་གནས་དག་དང་། །རྡོ་རྗེ་ལྕགས་ཀྱུ་མདའ་དང་དགའ་བ་དག །འབར་བའི་མེ་ཡི་
འོད་ཟེར་ཡང་དག་ལྡན། །འབར་བའི་དབུས་ན་གནས་པའི་ཕྱག་རྒྱ་མངའ། །དེ་ནི་རིན་ཆེན་རིགས་ན་ཡིད་འོང་བ། །རྡོ་རྗེའི་དབུས་ན་རྡོ་རྗེ་རིན་ཆེན་བཞུགས། །དེ་ནས་ཕྱོགས་བཞིའི་གནས་དག་ཏུ། །རིན་ཆེན་གཟི་བརྗིད་རྒྱལ་མཚན་བཞད་ཕྱག་རྒྱ། །དེ་བཞིན་པདྨའི་
རིགས་ནི་ཡིད་འོང་ལ། །རྡོ་རྗེ་པདྨའི་ཕྱག་རྒྱ་སྟེ། །དེ་ནས་ཕྱོགས་བཞིའི་མཚམས་དག་ཏུ། །པདྨའི་རལ་གྲི་འཁོར་ལོ་དེ་བཞིན་སྨྲ། །དེ་བཞིན་ལས་ཀྱིས་བྱས་པའི་རིགས་དེ་ལས། །རྡོ་རྗེ་རྣོན་པོ་མེ་ཆེན་དང་ལྡན་པ། །དེ་ཡི་ཕྱོགས་བཞིའི་མཚམས་ནི་བརྟན་པ་རུ། །
ལས་དང་གནོད་སྦྱིན་བསྲུང་བ་ཁུ་ཚུར་རྣམས། །དེ་ལས་རྒྱ་ཆེར་གཟུགས་ཀྱི་ཚོགས་དག་ལ། །རྡོ་རྗེ་བཙུན་མོའི་མཆོག་དྲག་མཁའ་འགྲོ་མ། །འབར་བའི་མཆེ་བ་ཆེན་པོ་འཇིགས་རུང་མ། །དབུས་ན་རྡོ་རྗེ་ཉི་མ་འབར་བ་ལྡན། །ས་དག་བསྲུང་བའི་ཆོ་གར་བཅས། །
རྒྱ་ཆེར་གཞུང་མཆོག་རྟག་ཏུ་བལྟ་བར་བྱ། །སྦྱང་དང་དབབ་པའི་ལས་རྣམས་ཐམས་ཅད་ནི། །ཡན་ལག་མཆོག་ལྡན་དམ་པ་ལས་གཟུང་བྱ། །དེ་ནས་ཕྱག་རྒྱ་ཕྱག་རྒྱའི་ཡན་ལག་བསླབ། །མཆོད་པའི་ཕྱག་རྒྱས་མཆོད་པའི་ཕྱག་རྒྱར་བརྗོད། །དེ་ནས་སྒོ་དང་མཚམས་

བཅས་དཀྱིལ་འཁོར་དུ། །བཙུན་མོ་དག་བོས་གནམ་ལྕགས་གནོད་སྦྱིན་མཆོག །དེ་ནས་སྒོར་འཇུག་པ་ཡི་ཚོགས་ལ་ནི། །བཛྲ་ཛཿཛཿ། དགུག་པའི་ཕེག་རྡོབ་སྤྲིན་ནི་རྒྱ་ཆེ་བ། །བཛྲ་ཧཱུྃ་ཧཱུྃ། དེ་བཞིན་འཆིང་བའི་ཆོས་ནི་སྟེར་བྱེད་པ། །བཛྲ་བྃ་བྃ། དེ་ནས་ཡེ་ཤེས་
ཆོས་ཉིད་སྣ་ཚོགས་པ། །བཛྲ་ཨཿཨཿ། དེ་ནས་གསང་བའི་སྒེག་པ་དང་བཅས་མཆོད། །བཛྲ་ཧཱུྃ་ཁྃ། དེ་ནས་ཡན་ལག་ཕྲེང་བ་སྣ་ཚོགས་ལྡན། །བཛྲ་ཧཱུྃ་གྷུྃ། དེ་ནས་གླུ་བླང་བ་དང་རོལ་མོ་དག །བཛྲ་ཧཱུྃ་ཏྃ། དེ་བཞིན་གཞན་དག་དཀྱིལ་འཁོར་དབང་
ཕྱུག་མཆོག །བཛྲ་ཧཱུྃ་སྟེ། དེ་ནས་ཕྱི་རོལ་མེ་ཏོག་རྒྱ་ཆེན་པོ། །བཛྲ་ཏི་ཏེ། དེ་བཞིན་རོལ་ཆ་སྟོང་ཕྲག་དག་བརྡུངས་པ། །བཛྲ་ཊྲྃ་ཏ། སྤོས་དང་དྲི་ལྡན་རོལ་མོ་དག་བྲི་བ། །བཛྲ་དྷཱ་ཏུ། དེ་ནས་འོད་ཟེར་སྣང་བ་རབ་ཏུ་སྤྲོ། །བཛྲ་ཀྲོ་དྷ། དེ་ནས་རྡོ་རྗེ་ལྕགས་ཀྱུའི་
ཚོགས་ཀྱིས་དགུག་པར་བྱ། །དགའ་བས་མཉེས་བྱ་རྡོ་རྗེ་ཡང་དག་ལྡན། །ཨོྃ་སིད་དྷི་ཡ་བཛྲ། །ཨཱ་ན་ཡ་བཛྲ། དེ་ནས་ཆགས་པའི་ས་ནི་འདོད་ཆགས་པ། །རཱ་ག་ཡ་བཛྲ་ཨ་ཧི་བཛྲ། དེ་བཞིན་ཉི་མ་ལ་ལྟ་བ། །ཛྭཱ་ལ་ཡ་བཛྲ། རྒྱལ་མཚན་གྱི་ནི། དེ་ཧི་བཛྲ།
བཞད་པ་ཡི་ནི། །ཧཱ་ས་བཛྲ། དེ་བཞིན་རྗེས་སུ་ཆགས་པ་ནི། །ཀཱ་མ་ཡ་བཛྲ། རལ་གྲི་གཟུང་བར་བྱ་བ་ནི། །ཙྪེ་ད་ཡ་བཛྲ། གཞན་ཡང་བསྐོར་བ་ཡི་ནི། བྷྲ་མ་ཡ་བཛྲ། དེ་ནས་ཚིག་གི་ཚོགས་དབྱུང་བ། །བྲཱུ་ཧི་བཛྲ། ལས་ཀྱི་མཆོད་པའི་དཀྱིལ་འཁོར་བརྟན་པའི་
ཚོགས་ནི། ཏྱི་བཛྲ། དེ་ནས་ཆོ་གའི་ཆའི་ནི། རཀྵ་བཛྲ། དེ་བཞིན་དུ་བཟའ་བའི་ནི། ཁཱ་ཧི་བཛྲ། ཡིད་འོང་ལུས་ནི་བརྟན་པར་བཅིང་བར་བྱ། །བནྡྷ་ཡ་བཛྲ། དེ་ནས་ཡེ་ཤེས་ཀྱི་ནི་དེ་བཞིན་བརྐྱང་། །དེ་ནས་ཁྲོས་པའི་ཡིད་ཀྱིས་བསྐུལ་བར་བྱ། །སོ་དག་གིས་ནི་མ་མཆུ་
བསྡམ་པར་བྱ། །དེ་བཞིན་མིག་དག་ཀྱང་ནི་བཙུམ་པར་བྱ། །དེ་ནས་ཁྲོ་བོའི་ཏིང་འཛིན་རབ་ཏུ་བསྒོམ། །གསང་བའི་ཕྱག་རྒྱ་དག་གིས་བདུད་བཞི་བཅོམ། །དེ་ནས་རྡོ་རྗེའི་ཚིག་གི་སྙིང་པོ་བརྗོད། །ཕྱག་རྒྱའི་ཚོགས་ནི་རྣམ་པ་སྣ་ཚོགས་བསླབ། །ལུས་ཀྱི་ཕྱག་རྒྱའི་ཚོགས་དག་ནི། །ཐེག་པ་

ཆེན་པོ་མངོན་བསྡུས་ལས། །རྡོ་རྗེ་སེམས་དཔའི་བཀའ་བཞིན་དུ། །རྒྱས་པ་རུ་ནི་ཡོངས་སུ་བརྗོད། །གསང་བ་མཆོག་རྫོགས་སོ།། །།དེ་ནས་རྒྱལ་པོ་རྡོ་རྗེ་འཛིན། །ཀུན་མཆོག་གནས་ཀྱི་དབང་ཕྱུག་ནི། །རྡོ་རྗེ་ཕྲ་མོ་ལ་བཞུགས་ནས། །
རྡོ་རྗེ་ཕྲ་མོ་བརྗོད་པར་གྱུར། །ཨོྃ་སརྦ་ཏ་ཐཱ་ག་ཏ་སཱུཀྵྨ་བཛྲ་ཀྲོ་དྷ་ཀྲ་མ་ཧཱུྃ་ཕཊ། བདག་ཉིད་སངས་རྒྱས་གཟུགས་སུ་ནི། །ཕན་པའི་དོན་དུ་རྣམ་བསམ་བྱ། །རྡོ་རྗེ་ཕྲ་མོ་འདི་ཡིས་ནི། །སེམས་ནི་ཞི་བ་ཉིད་དུ་གྱུར། །ཨོྃ་སཱུཀྵྨ་བཛྲ་ཀྲོ་དྷ་ཀྲ་མ་ཧཱུྃ་ཕཊ། རྡོ་རྗེ་རིག་
པ་མཆོག་རྒྱལ་པོ། །བདག་ཉིད་ཡོངས་སུ་བསྒོམ་པར་བྱ། །རྡོ་རྗེ་ཕྲ་མོ་འདི་ཡིས་ནི། །རང་སེམས་སྐད་ཅིག་གིས་འདུལ་འགྱུར། །ཨོྃ་སཱུཀྵྨ་བཛྲ་རཏྣ་ཀྲོ་དྷ་ཀྲ་མ་ཀ་ཧཱུྃ་ཕཊ། རྡོ་རྗེ་རིན་ཆེན་རང་བདག་ཉིད། །མཁས་པ་ཡིས་ནི་བསྒོམ་པར་བྱ། །སངས་རྒྱས་
ཆོས་ནི་མྱུར་ཐོབ་ཅིང་། །རིན་ཆེན་ཀུན་མཆོག་གཙོ་བོར་འགྱུར། །ཨོྃ་སཱུཀྵྨ་བཛྲ་དྷརྨ་ཀྲོ་དྷ་ཀྲ་མ་ཧཱུྃ་ཕཊ། བདག་ཉིད་དག་ནི་རྡོ་རྗེ་ཆོས། །གཟོད་ནས་དག་པ་རྣམ་པར་བསྒོམ། །གསུང་གི་ཕྱག་རྒྱ་འདི་ཡིས་ནི། །རྡོ་རྗེ་ཆོས་དང་མཚུངས་པར་འགྱུར། །ཨོྃ་སཱུཀྵྨ་བཛྲ་
ཀརྨ་ཀྲོ་དྷ་ཀྲ་མ་ཧཱུྃ་ཕཊ། བདག་ཉིད་རྡོ་རྗེ་ལས་སུ་ནི། །ཡང་དང་ཡང་དུ་བསྒོམ་བྱ་ཞིང་། །རྡོ་རྗེ་སྔགས་ཀྱིས་བསྐུལ་ནས་ནི། །རྡོ་རྗེ་ལས་དང་མཚུངས་པར་འགྱུར། །དབང་བསྐུར་བ་ཡི་སེམས་དཔའ་ཆེ། །འཁོར་ལོས་སྒྱུར་བ་བཞི་བོ་རུ། །རྟག་ཏུ་བདག་ཉིད་
བསྒོམ་བྱས་ན། །དབང་བསྐུར་བ་ཡང་ཐོབ་པར་འགྱུར། །ཧཱུྃ་ཨོྃ་སཱུཀྵྨ་ཛྙཱ་ན་ཀྲོ་དྷ་ཧཱུྃ་ཕཊ། རྡོ་རྗེ་རྒྱལ་པོ་རང་བདག་ཉིད། །རྣམ་པར་བསྒོམས་ན་རེངས་པར་འགྱུར། །སྙིང་པོ་འདི་དག་ཉིད་ཀྱིས་ནི། །སངས་རྒྱས་ཐམས་ཅད་ཀུན་ཏུ་དགུག །ཨོྃ་སཱུ་ཀྵྨ་བཛྲ་ཨྃ་ཀུ་ཤ་ཨཱ་
ཀརྵ་ཡ་མ་ཧཱ་ཀྲོ་དྷ་ཧཱུྃ་ཕཊ། མདའ་འགེངས་པ་ཡི་སྦྱོར་བ་ཡིས། །རྡོ་རྗེ་ཆགས་པ་བསྒོམ་པར་བྱ། །སྙིང་པོ་འདི་དག་ཉིད་ཀྱིས་ནི། །སངས་རྒྱས་ཐམས་ཅད་རྗེས་ཆགས་པ། །ཨོྃ་སཱུཀྵྨ་བཛྲ་ཀྲོ་དྷ་ཨ་ནུ་རཱ་ག་ཡ་ཧཱུྃ་ཕཊ། སངས་རྒྱས་ཐམས་ཅད་མཉེས་བྱས་ཤིང་། །

བདག་ཉིད་ཀྱང་ནི་རྣམ་པར་བསྒོམ། །རྡོ་རྗེ་དགའ་བ་བདག་ཉིད་དེ། །རྡོ་རྗེ་དངོས་གྲུབ་ཐོབ་པར་འགྱུར། །ཨོྃ་སཱུཀྵྨ་བཛྲ་དུཥྚི་ཀྲོ་དྷ་ཧཱུྃ་ཕཊ། རྡོ་རྗེ་རིན་ཆེན་རྒྱལ་པོ་ང་། །དབང་བསྐུར་བ་ནི་བརྟན་པའི་མཆོག །རྡོ་རྗེ་སྔགས་ཀྱིས་བསྐུལ་བྱས་ནས། །རྡོ་རྗེ་རིན་ཆེན་མཚུངས་པར་འགྱུར། །ཨོྃ་
སཱུཀྵྨ་བཛྲ་བྷྲྀ་ཀུ་ཊཱི་ཀྲོ་དྷ་ཧ་ར་ཧ་ར་ཧཱུྃ་ཕཊ། རྡོ་རྗེ་གཟི་བརྗིད་ཏིང་འཛིན་གྱིས། །རྟག་ཏུ་བདག་ཉིད་འབར་བར་བྱ། །ཕྱོགས་རྣམས་ཀུན་ཏུ་ཡོངས་སྤྲོས་ནས། །རྡོ་རྗེ་སྔགས་ནི་རབ་ཏུ་བསྐུལ། །ཨོྃ་སཱུཀྵྨ་ཛྭཱ་ལ་མཎྜ་ལ་ཀྲོ་དྷ་སཱུརྱ་ཛྭ་ལ་ཧཱུྃ་ཕཊ། སྦྱིན་པ་རིན་ཆེན་རྒྱལ་མཚན་དུ། །རྟག་ཏུ་
བདག་ཉིད་རྣམ་པར་བསམ། །སེམས་ཅན་ཐམས་ཅད་དག་བྱ་ཞིང་། །རྡོ་རྗེ་སྔགས་ནི་རབ་བསྐུལ་ཞིང་། །ཨོྃ་སཱུཀྵྨ་བཛྲ་དྷྭ་ཛ་ཀྲོ་དྷ་ཡ་ཤོ་དྷ་སརྦ་ཨཱཿཧཱུྃ་མེ་པྲ་ཡཙྪ་ཧཱུྃ་ཕཊ། ཆོས་ཆེན་པོ་ཡི་བཞད་པ་བཞད། །རྡོ་རྗེ་བཞད་པ་བདག་བརྟན་པའི། །རྡོ་རྗེ་སྔགས་ཀྱིས་བསྐུལ་བྱ་ཞིང་། །
བདག་ཉིད་ཁོ་ན་ཆོས་ཀྱི་གསུང་། །ཨོྃ་སཱུཀྵྨ་བཛྲ་ཧ་ས་ཀྲོ་དྷ་ཧ་ཧ་ཧཱུྃ་ཕཊ་ཧ་ཧ། གཟོད་ནས་ཞི་བ་སྐྱེ་བ་མེད། །ཆོས་རྣམས་ཐམས་ཅད་རྣམ་དག་པ། །བདག་ཉིད་རྡོ་རྗེ་ཆོས་རྒྱལ་པོ། །རྡོ་རྗེ་ཚིག་གིས་ལན་ཅིག་བརྗོད། །ཨོྃ་སཱུཀྵྨ་བཛྲ་ཀྲོ་དྷ་ཡ་ཤོ་དྷ་ཧཱུྃ་ཕཊ། ཤུགས་ཅན་རལ་
གྲི་དག་གི་ཚོགས། །རྡོ་རྗེ་རྣོན་པོ་ཤིན་ཏུ་བརྟན། །ཨོྃ་སཱུཀྵྨ་བཛྲ་ཙྪེ་ད་ཀྲོདྷ་ཙྪིནྡ་ཙྪིནྡ་ཧཱུྃ་ཕཊ། ཆོས་ཀྱི་འཁོར་ལོ་བསྐོར་བྱས་ནས། །རྡོ་རྗེ་འཁོར་ལོ་དང་མཚུངས་འགྱུར། །ཨོྃ་སཱུཀྵྨ་བཛྲ་ཀྲོ་དྷ་མ་ཧཱྃ་ཙཀྲ་ཙྪིནྡ་པ་ཧཱ་ཨི་ཤྭ་རི། པྲ་བེ་ཤ་ཧྲྀ་ད་ཡཾ་ཙྪིནྡ་ཧཱུྃ་ཕཊ། ད་ནི་རྗོད་བྱེད་བརྗོད་བྱ་མིན། །བདག་
ནི་རྡོ་རྗེ་སྨྲ་བ་བརྟན། །ཆོས་འདོད་པ་ཉིད་བརྟན་བྱས་ནས། །རྡོ་རྗེ་སྨྲ་བ་ཐོབ་པར་འགྱུར། །ཨོྃ་སཱུཀྵྨ་བཛྲ་ཧཱུྃ་ཀཱ་ར་ཀྲོ་དྷ་ཧ་ར་པ་ཙ་ཡ་ཝ་མུ་དྲེ་ཎ་ཧཱུྃ་ཕཊ། སངས་རྒྱས་ཐམས་ཅད་མཆོད་བྱ་ཞིང་། །རྡོ་རྗེ་ལས་ནི་བརྟན་པར་བརྟག །རྡོ་རྗེ་ཚིག་གིས་ཆོས་བཤད་ན། །རྡོ་རྗེ་ལས་ནི་ཐོབ་པར་འགྱུར། །
ཨོྃ་སཱུཀྵྨ་བཛྲ་ཀརྨ་སརྦ་ཀཱརྱ་ཧྲྀ་ད་ཡ་ཧཱུྃ། བདག་ནི་རྒྱལ་པོ་བྱམས་པ་ཆེ། །རྡོ་རྗེ་སྲུང་བ་བརྟན་པའི་བདག །རྟག་ཏུ་བདག་ཉིད་བསྒོམ་བྱས་ནས། །ངན་འགྲོ་ཐམས་ཅད་ཉམས་པར་འགྱུར། །ཨོྃ་སཱུཀྵྨ་བཛྲ་ཀ་བ་ཙ་ཀྲོ་དྷ་རཀྵ་ཧཱུྃ་ཕཊ། སྡིག་པ་ཐམས་ཅད་བཟའ་བྱ་ཞིང་། །རྡོ་རྗེ་སྲུང་བ་

བསྒོམ་པར་བྱ། །རྡོ་རྗེ་སྔགས་ནི་བསྐུལ་བྱས་ན། །རྡོ་རྗེ་ཉོན་མོངས་ཐམས་ཅད་འཇོམས། །ཨོྃ་སཱུཀྵྨ་བཛྲ་ཡཀྵ་ཧ་ར་བྷཀྵ་སརྦ་དུཥྚ་བཛྲ་ཡཀྵ་ཧཱུྃ་ཕཊ། རྡོ་རྗེ་ཁུ་ཚུར་རྒྱལ་པོ་བདག །བྱང་ཆུབ་སེམས་ནི་རྗེས་སུ་དྲན། །བགེགས་རྣམས་ཐམས་
ཅད་བཅིང་བྱས་ན། །རྡོ་རྗེ་ཁུ་ཚུར་དང་མཚུངས་འགྱུར། །ཨོྃ་སཱུཀྵྨ་བཛྲ་མུཥྚི་བནྡྷ་བནྡྷ་ཧཱུྃ་ཕཊ། སྣ་ཡི་རྩེ་མོའི་སེམས་དེ་ནི། །བརྟན་པར་བྱས་ནས་ཡང་དག་བརྩམ། །ཡི་གེ་ཧཱུྃ་ཉིད་སྦྱོར་བྱས་ནས། །ཉོན་མོངས་ཐམས་ཅད་རྣམ་ཉམས་འགྱུར། །ཧཱུྃ། དང་
པོ་སྙིང་ག་སྣ་རྩེ་རུ། །བརྟན་པར་བྱས་ནས་དེ་རང་བཞིན། །མཚན་མ་དེ་ནི་སྤྲོ་བྱས་ན། །ནད་སོགས་དགྲ་ནི་འཇིག་པར་འགྱུར། །ནཱ་ཤ་ཡ་བཛྲཱི་ཧཱུྃ། སེམས་དེ་བརྟན་པར་བྱས་ནས་ཀྱང་། །རྣལ་འབྱོར་འཛིན་པས་སྤྲོ་བྱ་ཞིང་། །ཤེས་རབ་ཅན་གྱིས་ཁྲོ་བདག་
བརྩམ། །གནས་ངན་དག་ནི་ངེས་པར་འཇིག །བི་ནཱ་ཤ་ཡ་སརྦ་བཛྲ་ཧཱུྃ། རྣལ་འབྱོར་རིག་པས་ཇི་སྲིད་འདོད། །མཚན་མ་དེ་ནི་བསྡུ་བྱས་ན། །མ་ལུས་སྡིག་པ་ཐམས་ཅད་ནི། །ཉམས་ཤིང་འབྱུང་བར་མི་འགྱུར་རོ། ཨོྃ་སཱུཀྵྨ་བཛྲ་པྲ་ཏྱ་ཤཱི་གྷཱྃ་ཧཱུྃ། གསལ་
བར་ཕྱོགས་རྣམས་མ་ལུས་པར། །སེམས་ཅན་ཀུན་ལ་བྱམས་པ་སྤྲོ། །ཇི་སྲིད་རྡོ་རྗེ་སྤྲོ་བྱས་པ། །དེ་སྲིད་སེམས་ཅན་བདེ་བར་འགྱུར། །བྷེ་ར་བ་བཛྲ་ཀྲོ་དྷ་ཧཱུྃ་ཕཊ། ཀྱེ་མའོ་མགོན་མེད་སེམས་ཅན་འདི། །འཇིགས་པ་ལས་ནི་སྐྱོབ་པ་དག །སྙིང་རྗེའི་སེམས་
དེ་སྤྲོ་བར་བྱ། །རྡོ་རྗེ་ཡེ་ཤེས་ཐོབ་པར་འགྱུར། །ཀཱ་རུ་ཎཱ་བཛྲ་ཀྲོ་དྷ་ཧཱུྃ་ཕཊ། དེ་བཞིན་གཤེགས་པ་ཀུན་སྙིང་པོ། །སེམས་ཅན་ཐམས་ཅད་གཟོད་ནས་དག །ཨེ་མའོ་བདེ་བ་ཨེ་མའོ་ཆོས། །ཕྱོགས་རྣམས་ཀུན་ཏུ་ཡོངས་སུ་སྤྲོ། །ཧཱུྃ་ཀཱ་ར་བི་ཤུདྡྷ་ཧཱུྃ་ཕཊ། །
འཁོར་བའི་སེམས་ཅན་ལ་དམིགས་ནས། །བདེ་བ་དང་བཅས་བཏང་སྙོམས་བྱ། །བཏང་སྙོམས་སྦྱོར་བ་འདི་ཡིས་ནི། །སེམས་ཅན་རྣམས་ལ་ཡོངས་སུ་སྤྲོ། །ཨོྃ་བི་ཤོ་དྷ་ཡ་བཛྲ་ཀྲོ་དྷ་ཧཱུྃ་ཕཊ། རྡོ་རྗེའི་གཟུགས་ནི་ཡང་དག་བྲིས། །གང་གི་སྟེང་དུ་ངེས་བཞག་པ། །

དེ་ཉིད་ཀྱིས་ནི་དྲི་མའི་ཚོགས། །ཐམས་ཅད་རྣལ་འབྱོར་པ་ཡིས་འཇོམས། །ཧཱུྃ་བཛྲ་པྲ་བརྟ། གང་ལ་བྱང་ཆུབ་སེམས་ཉིད་ནི། །རྗེས་སུ་དྲན་པས་རབ་ཕབ་ན། །སེམས་ཅན་དེ་ཡིས་སངས་རྒྱས་ཀྱི། །བྱང་ཆུབ་ཉིད་ནི་ཐོབ་པར་འགྱུར། །ཧཱུྃ་བོ་དྷི་སཏྭ་པྲ་བརྟ། ཕྱག་
ན་རྡོ་རྗེ་རྗེས་དྲན་ནས། །དག་པའི་ཆོས་ཉིད་ཕབ་བྱས་ནས། །སེམས་ཅན་དེ་ཡིས་བདེ་བ་ནི། །དམ་པའི་ཐོབ་འགྱུར་ཐེ་ཚོམ་མེད། །ཧཱུྃ་བཛྲ་དྷཱ་ར་པྲ་བརྟ། རྣམ་པའི་མཆོག་རྣམས་ཀུན་ལྡན་པ། །སངས་རྒྱས་གཟུགས་ནི་རྣམ་པར་བསྒོམ། །སངས་རྒྱས་ཆོས་
རྣམས་ཕམ་བྱས་ན། །འཇིགས་པ་ངེས་པར་འབྱུང་མི་འགྱུར། །ཧཱུྃ་བུདྡྷ་པྲ་བརྟ། ཟླ་བ་རྡོ་རྗེ་རང་བཞིན་དངོས། །བསྐྱེད་པ་བཞིན་དུ་བསྒོམ་བྱས་ན། །བློ་བཟང་ཟླ་བ་རྡོ་རྗེ་མཚུངས། །མྱུར་དུ་མཁའ་ལ་འགྲོ་བར་འགྱུར། །བུདྡྷ་པྲ་བརྟ་ཡ་ཧཱུྃ། ཟླ་བའི་དབུས་སུ་རང་
བདག་ཉིད། །བསྒོམ་ཞིང་གང་ལ་ཕབ་བྱས་པ། །སེམས་ཅན་དེ་རྣམས་མི་ལྡོག་པར། །འགྱུར་བ་རུ་ནི་ཐེ་ཚོམ་མེད། །ས་ཏྭ་པྲ་བརྟ་ཡ་ཧཱུྃ། ཕྱག་ན་རྡོ་རྗེ་རང་བདག་ཉིད། །མཁས་པ་ཡིས་ནི་བསྒོམ་བྱ་ཞིང་། །གང་དུ་ཕབ་པའི་གནས་དེ་ནི། །དཔལ་དང་བདེ་
བ་འཕེལ་བར་འགྱུར། །མྱུར་བ་ཉིད་དུ་ཐེ་ཚོམ་མེད། །བཛྲ་སཏྭ་པྲ་བརྟ་ཡ་ཧཱུྃ། སངས་རྒྱས་གཟུགས་སུ་རང་བདག་ཉིད། །མཉམ་པར་བཞག་པས་བསྒོམ་བྱ་ཞིང་། །རྡོ་རྗེ་དེ་ནི་གར་ཕབ་པ། །རྫུ་འཕྲུལ་རྒྱ་ནི་ཆེན་པོར་གྱུར། །བུདྡྷ་པྲ་བརྟ་ཡ་ཧཱུྃ། རྡོ་རྗེ་
ཁྲོ་བོ་སྙོམས་འཇུག་པས། །རང་གི་ལུས་ནི་རབ་བསྐོར་བ། །གང་གི་མིང་གིས་བྱས་པ་དེ། །ཐེ་ཚོམ་མེད་པར་བྱང་ཆུབ་ཐོབ། །ཨོྃ་བཛྲ་བ་ལི་ཏ་ཀྲོ་དྷ་མཱ་ར་ཡ་ཧཱུྃ། དབུགས་ནི་དབྱུང་དང་རྔུབ་པ་ལ། །ཡི་གེ་ཧཱུྃ་ནི་རབ་སྦྱོར་ཞིང་། །རྡོ་རྗེ་ཁྲོ་བོ་སྙོམས་འཇུག་པས། །འདོད་
ཆགས་ལ་སོགས་ཉེས་པ་གཞོམ། །ཨོྃ་བཛྲ་ཤྭཱ་ས་བི་བཱ་ཏ་ལ་ཧཱུྃ་ཕཊ། རྡོ་རྗེ་ལྟ་བས་བལྟ་བྱ་ཞིང་། །རྡོ་རྗེ་ཁྲོ་བོ་རབ་སྦྱོར་བས། །སེམས་ཅན་གང་ལ་བལྟ་བྱས་ན། །དེ་ནི་འཁོར་བ་ལས་གྲོལ་འགྱུར། །ཨོྃ་བཛྲ་དྲྀཥཱི་བི་ནཱ་ཤ་ཡ་ཧཱུྃ་ཕཊ། ལུས་ངག་གི་ནི་བདག་ཉིད་གནས། །རང་སེམས་

འགྲོ་བར་འགྱུར་བ་དང་། །བྱང་ཆུབ་སེམས་ནི་རྗེས་དྲན་ན། །དེས་ཀྱང་སངས་རྒྱས་ཉིད་ཐོབ་འགྱུར། །ཧཱུྃ་ཧྲྀ་ད་ཡ་ཨཱ་ཀརྵ་ཡ་བཛྲ་ཀྲོ་དྷ་ཧཱུྃ་ཕཊ། རྡོ་རྗེ་རིག་པ་མཆོག་རྒྱལ་པོར། །མཁས་པ་ཡིས་ནི་བདག་ཉིད་བསྒོམ། །འབར་བ་ཡིས་ནི་ཁྱབ་པའི་སྐུ། །རྡོ་རྗེ་
བསྒོམ་པས་འགྲུབ་པར་འགྱུར། །ཧཱུྃ་གསང་བའི་བདག་པོ་ཀུན་གྱི་སྙིང་པོའི་སྔགས་ནི་གསུངས་པར་འགྱུར། །དེ་ནས་རྡོ་རྗེ་འཆང་བས་རྣལ་འབྱོར་དབང་པོ་རྟོག་པར་མཛད། །གདུལ་བྱ་མིན་ལ་ཤིན་ཏུ་འཕྲོག་ཅིང་གདུལ་བྱ་ལ་ཆགས་བློ། །ས་འཛིན་མཆོག་གི་དབང་
པོ་བསླབ་པ་རྣམ་པར་རོལ་པའི་ས། །སཱུཀྵྨ་རྫོགས་སོ།། །།གསང་བ་སྐར་མ་ཉི་ཟླ་སྟེ། །རྡོ་རྗེ་དམ་ཚིག་བརྗོད་པར་བྱ། །རྣམ་རྟོག་གིས་བརྟགས་མཛེས་གྱུར་པ། །དེ་ནས་མཆོད་པའི་ཆོ་ག་བཤད། །བདག་ཉིད་སངས་རྒྱས་གཟུགས་དང་ནི། །སངས་རྒྱས་
རྣམ་འཕྲུལ་རབ་ཏུ་བསྒོམ། །དང་པོ་སྦྱོར་བྱུང་ཇི་སྐད་བཤད། །སངས་རྒྱས་ཐམས་ཅད་མཆོད་པར་བྱ། །ཨོྃ་སརྦ་ཏ་ཐཱ་ག་ཏ་བཛྲ་ཀརྨེ་ཤྭ་རི་ཧཱུྃ། རང་གི་སྙིང་ཁར་བྱང་ཆུབ་སེམས། །སངས་རྒྱས་ཀུན་གྱི་ཚོགས་བསམས་ནས། །མཆོད་པ་ཡི་ནི་མཆོག་འདི་ཡིས། །
འདྲེན་པ་ཐམས་ཅད་མཆོད་པ་བྱ། །ཧཱུྃ། དབང་ཕྱུག་ཆེན་པོ་དང་བཅས་པ། །ལྷ་རྣམས་ཐམས་ཅད་དགུག་བྱ་ཞིང་། །བདག་ཉིད་རྡོ་རྗེ་ཁྲོ་བོ་ཡིས། །ཁྲོ་བོའི་མཆོད་པས་རབ་ཏུ་མཆོད། །ཨོྃ་སརྦ་ཏ་ཐཱ་ག་ཏ་པཱུ་ཛཱ་ཀརྨ་ས་མ་ཡ་བི་སྟི་བི་སྟྭར་ཏྲཻ་ལོ་ཀྱ་བི་ཛ་ཡེ་ཤྭ་སརྦ་
དུཥྚཱ་ན་མ་ཧཱ་ས་མ་ཡ་བཛྲཱི་ཧཱུྃ། ཁྲོ་གཉེར་ཅན་ཀུན་ང་བདག་ཉིད། །ཁྲོ་བོ་རིན་ཆེན་གྱིས་བསྒོམ་བྱ། །སངས་རྒྱས་ཐམས་ཅད་འཇིགས་བྱ་ཞིང་། །རིན་ཆེན་མཆོད་པས་རབ་ཏུ་མཆོད། །ཨོྃ་སརྦ་ཏ་ཐཱ་ག་ཏ་ཀ་པཱ་ཤ་ས་མ་ཡ་སྥ་ར་ཎ་མ་ཧཱ་པཱུ་ཛཱ་ཨཱ་ཀརྵ་ཡ་བི་དྷི་བི་སྟྭ་ར་ས་མ་ཡ་
ཧཱུྃ། ཆོས་ཀྱི་དབྱིངས་དང་མཚུངས་པར་སྣང་། །རྡོ་རྗེ་ཆོས་ནི་བརྟན་པ་བདག །ཆོས་ཀྱི་མཆོད་པས་རབ་མཆོད་པས། །སངས་རྒྱས་ཐམས་ཅད་མཆོད་པར་བྱ། །ཨོྃ་སརྦ་ཏ་ཐཱ་ག་ཏ་དྷརྨ་དྷཱ་ཏུ་སྥ་ར་ཎ་མ་ཧཱ་པཱུ་ཛཱ་བི་དྷི་བི་སྟྭ་ར་ས་མ་ཡ་ཧཱུྃ། བདག་ཉིད་རྡོ་རྗེ་ལས་ཉིད་

ནས། །སངས་རྒྱས་རྣམ་འཕྲུལ་བསྒོམ་པར་བྱ། །སངས་རྒྱས་ཐམས་ཅད་མཆོད་བྱ་ཞིང་། །ལས་ཀྱི་མཆོད་པས་རབ་ཏུ་མཆོད། །ཨོྃ་སརྦ་ཏ་ཐཱ་ག་ཏ་ལོ་ཀ་དྷཱ་ཏུ་ཛཱི་བི་ཏ་མ་ཧཱ་ཀརྨ་པཱུ་ཛཱ་བེ་དྷི་བི་སྟྭ་ར་ས་མ་ཡེ་ཧཱུྃ། ཕྱག་ན་རྡོ་རྗེ་བདག་རྡོ་རྗེ། །དེ་བཞིན་གཤེགས་རྣམས་
དགུག་པར་བྱ། །རྡོ་རྗེ་སེམས་དཔའ་རབ་མཆོད་པས། །མཆོད་པ་རུ་ནི་བསྒོམ་པར་བྱ། །ཨོྃ་བཛྲ་སཏྭ་སིདྡྷི་ཛྙཱ་ན་ས་མ་ཡེ་ཧཱུྃ་ཛཿ། རྡོ་རྗེ་ལྕགས་ཀྱུ་བརྟན་པའི་མཆོག །རྟག་ཏུ་བདག་ཉིད་བསྒོམ་པར་བྱ། །བསྒོམ་པ་བསྒྲུབ་པར་བྱ་བའི་ཕྱིར། །སངས་
རྒྱས་ཐམས་ཅད་དགུག་པར་བྱ། །ཨོྃ་བཛྲ་ཨཱ་ཀརྵ་ཛྙཱ་ན་ས་མ་ཡ་ཧཱུྃ་ཛཿ། རྡོ་རྗེ་ཆགས་པ་བདག་ཉིད་དེ། །བཀུག་པ་རྣམས་ནི་མཉེས་པར་བྱ། །རྡོ་རྗེ་ཆགས་པས་རབ་མཆོད་པས། །བསྒྲུབ་བར་བྱ་ཞེས་ཡང་དག་སྦྱར། །ཨོྃ་བཛྲ་ར་ཏི་རཱ་ག་ས་མ་ཡེ་ཧཱུྃ་
ཛཿ། རྡོ་རྗེ་ལེགས་པ་རང་བདག་ཉིད། །བསྒོམ་ཞིང་རྒྱལ་བ་མཉེས་པར་བྱ། །རྡོ་རྗེ་ལེགས་པས་རབ་མཆོད་པས། །སངས་རྒྱས་ཐམས་ཅད་དགུག་པར་བྱ། །ཨོྃ་བཛྲ་སཱ་དྷུ་ཀརྨ་ཛྙཱ་ན་ས་མ་ཡེ་ཧཱུྃ་ཛཿ། རྡོ་རྗེ་རིན་ཆེན་རྒྱལ་པོ་ཆེ། །རང་བདག་ཉིད་ནི་བསྒོམ་པར་
བྱ། །དེ་བཞིན་གཤེགས་རྣམས་དབང་བྱ་ཞིང་། །རིན་ཆེན་ཆར་ནི་ཀུན་ཏུ་དབབ། །ཨོྃ་བཛྲ་བྷྲྀ་ཀུ་ཊཱི་བ་ཤཱི་ཀུ་རུ་ཧཱུྃ། རྡོ་རྗེ་ཉི་མར་རང་བདག་ཉིད། །འོད་ཟེར་ཕྲེང་བ་དང་ལྡན་བསྒོམ། །སངས་རྒྱས་རྣམས་ནི་དབང་བྱ་ཞིང་། །ཕྱོགས་རྣམས་སུ་ནི་འོད་ཟེར་སྤྲོ། །
ཨོྃ་བཛྲ་སཱུརྱ་མཎྜ་ལ་བ་ཤཱིཾ་ཀུ་རུ་ཧཱུྃ། དེ་བཞིན་གཤེགས་རྣམས་དབང་བྱ་ཞིང་། །བདག་ནི་པདྨའི་རྒྱལ་པོ་ཉིད། །སེམས་ཅན་བསམ་ཀུན་རྫོགས་པར་བྱ། །རིན་ཆེན་རྒྱལ་མཚན་རབ་ཏུ་མཆོད། །ཨོྃ་བཛྲ་དྷྭ་ཛཱ་གྲ་ཀེ་ཡཱུ་རེ་བ་ཤཱིཾ་ཀུ་རུ་ཧཱུྃ། ཧ་ཧ་ཞེས་དགོད་བཞད་བྱ་
ཞིང་། །རྡོ་རྗེ་བཞད་པ་བདག་ཉིད་དེ། །སངས་རྒྱས་ཐམས་ཅད་དབང་དུ་བྱ། །བཞད་པའི་མཆོད་པས་རབ་ཏུ་མཆོད། །ཨོྃ་བཛྲ་ཨཊྚ་ཧཱ་ས་ན་བ་ཤཱིཾ་ཀུ་རུ་ཧཱུྃ། བདག་ནི་པདྨའི་རྒྱལ་པོ་ཉིད། །བཙུན་མོ་བརྟན་པར་རང་བྱུང་བ། །བདག་གིས་སངས་རྒྱས་རྗེས་ཆགས་བྱ། །

འདོད་ལ་ཆགས་པས་རབ་ཏུ་མཆོད། །ཨོྃ་བཛྲ་པདྨ་རཱ་ག་ཡ་ཧཱུྃ། བདག་ནི་རང་ཉིད་རྣོན་པོ་སྟེ། །ཤེས་རབ་ཕ་རོལ་ཕྱིན་པ་བརྟན། །བདག་གིས་ཉོན་མོངས་གཅད་བྱ་ཞིང་། །དེ་བཞིན་གཤེགས་རྣམས་ཆགས་པར་བྱ། །ཨོྃ་བཛྲ་ཏིཀྵྞ་རཱ་ག་ཡེ་ཧཱུྃ། ལྷ་མོ་རྡོ་རྗེ་
སྒྲོལ་མ་བདག །ཆོས་ཀྱི་འཁོར་ལོ་རབ་བསྐོར་བ། །བདག་གིས་རྡོ་རྗེ་ཅན་མཉེས་བྱ། །འདོད་ཆགས་བརྟན་པས་རབ་ཏུ་མཆོད། །ཨོྃ་བཛྲ་མཎྜལ་རཱ་ག་རཱ་ག་ཡ་ཧཱུྃ། ནམ་མཁའི་ལྷ་མོ་ཆོས་སྨྲ་བ། །བརྗོད་དུ་མེད་པའི་བདག་ཉིད་བསྟན། །དག་པའི་ཆོས་ལ་དགའ་བྱ་
ཞིང་། །དེ་བཞིན་གཤེགས་རྣམས་མཉེས་པར་བྱ། །ཨོཾ་བཛྲ་བཱ་ཀ་རཱ་ག་རཱ་ག་ཡ་ཧཱུྃ། བདག་ནི་རང་ཉིད་ལས་ཡིན་ཏེ། །ཕྱོགས་རྣམས་ཀུན་དུ་རབ་ཏུ་གྲགས། །བདག་ནི་ནམ་མཁའི་མཛོད་ཀྱང་ཡིན། །མཆོད་པའི་ཆར་གྱིས་རབ་ཏུ་མཆོད། །ཨོྃ་བཛྲ་ཀརྨ་ས་མ་ཡེ་པཱུ་
ཛཱ་ཧཱུྃ། བདག་ནི་རང་ཉིད་བསྲུང་བ་སྟེ། །སངས་རྒྱས་བྱམས་པ་བརྟན་པ་དག །བདག་གིས་སངས་རྒྱས་མཆོད་པར་བྱ། །ཆོས་ཀྱི་མཆོད་བས་ཀུན་དུ་མཆོད། །ཨོྃ་བཛྲ་ཀ་བ་ཙ་བནྡྷ་ར་ཀཱ་ཧཱུྃ། བདག་གིས་ཉོན་མོངས་བཟའ་བར་བྱ། །རྡོ་རྗེ་གནོད་སྦྱིན་བརྟན་པ་བདག །
བདག་གིས་སངས་རྒྱས་མཆོད་པར་བྱ། །ཆོས་ཀྱི་མཆོད་པས་རབ་ཏུ་མཆོད། །ཨོྃ་བཛྲ་ཡཀྵ་མཱ་ར་ཡ་བཛྲ་དྃཥྚྲ་ཧཱུྃ་ཕཊ། ང་ནི་སངས་རྒྱས་བྱང་ཆུབ་ཡིན། །རྡོ་རྗེ་ཁུ་ཚུར་རང་བདག་ཉིད། །ཕྱིར་མི་ལྡོག་པའི་འཁོར་ལོ་སྟེ། །ལས་ཀྱི་མཆོད་པས་རབ་ཏུ་མཆོད། །ཨོྃ་
བཛྲ་ཀརྨ་མུཥྚི་སིད་དྷྱ་སིད་དྷྱ་ཧཱུྃ་ཕཊ། འདི་འདྲའི་སྣ་ཚོགས་མཆོད་པ་ཀུན། །ཡེ་ཤེས་གསང་སྔགས་རབ་ཐོབ་བ་བྱེད། །མ་ལུས་ལྷ་མོ་སེམས་དཔའ་ཀུན། །རྒྱལ་པོ་ཇི་བཞིན་རབ་སྙིང་ཧཱུྃ། སྒེག་མོ་ཕྲེང་བ་དེ་བཞིན་གླུ། །གར་མ་མེ་ཏོག་སོགས་སྦྱོར་བས། །སེམས་དཔའ་ལ་
སོགས་ལྷ་མོ་དག །ཤིན་ཏུ་བསྲུང་བའི་མཆོད་པའི་མཆོད་པའོ། །དེ་ནས་ལས་ནི་ཐབས་ཆེན་པོ། །གང་གིས་མྱུར་དུ་རབ་གྲུབ་འགྱུར། །གང་གིས་དགའ་བ་ལ་སྦྱོར་བ། །སྦྱིན་སྲེག་ལས་ཀྱི་ཆོ་གའོ། །ཇི་ལྟར་སྦྱིན་སྲེག་དངོས་གྲུབ་ཀྱིས། །ལས་ནི་བླ་མེད་བྱེད་པ་ལྟར། །དེ་

བཞིན་རིག་པའི་ལས་རྣམས་ཀུན། །དེ་ལྟ་བུ་ནི་བྱེད་པ་མིན། །སྦྱིན་སྲེག་རྣམ་པ་མང་ལྡན་པ། །མདོ་རུ་བསྡུ་ན་རྣམ་པ་ལྔ། །རྒྱས་པར་རྣལ་འབྱོར་ཆེན་པོ་ཡི། །གསང་བའི་མདོ་ལས་རབ་ཏུ་བཤད། །རིག་པ་འཛིན་པའི་རྣམ་འཕྲུལ་བ། །ཇི་ལྟར་སྦྱིན་སྲེག་རྣམ་པ་
ཡིས། །རིགས་ཀྱི་དཀྱིལ་འཁོར་འགྲུབ་འགྱུར་བ། །མདོར་བསྡུས་རབ་ཏུ་བཤད་པར་བྱ། །སྦྱིན་སྲེག་ལས་ནི་རྣམ་པ་ལྔ། །རེ་རེ་ཞིང་ཡང་རྣམ་པ་མང་། །ཞི་བ་དང་ནི་རྒྱས་པ་ཉིད། །མངོན་སྤྱོད་ཀྱི་ནི་གསུམ་པ་སྟེ། །དགུག་པ་ཡང་ནི་བཞི་པ་ཡིན། །ལྔ་པ་དབང་
དང་ཡང་དག་ལྡན། །སྦྱིན་སྲེག་ལྔ་པ་དེ་རྣམས་ནི། །དབང་དུ་བྱེད་པ་མཆོག་ཡིན་ནོ། །དེ་ནས་ཐབ་ཁུང་རབ་བཤད་བྱ། །སྦྱོར་བ་ཇི་བཞིན་སྦྱོར་བར་བྱ། །ཞི་ལ་ཐབ་ཁུང་ཟླུམ་པོ་སྟེ། །ཀུན་ནས་ཡོངས་སུ་ཟླུམ་པོ་ཡིན། །རྒྱས་པ་ལ་ནི་གྲུ་བཞི་སྟེ། །མངོན་སྤྱོད་
ལ་ནི་གྲུ་གསུམ་ཡིན། །ཐབ་ཁུང་རྡོ་རྗེའི་རྣམ་པ་ཅན། །ཀུན་དུ་དགུག་པར་བྱེད་པའི་མཆོག །དེ་བཞིན་ཐབ་ཁུང་རིང་བོར་བྱ། །དབང་དུ་བྱེད་པའི་མཆོག་ཡིན་ནོ། །དེ་དག་རྣམ་པ་ལྔ་རུ་བཤད། །ཐབ་ཁུང་ལས་ནི་བླ་ན་མེད། །སྲོད་ཀྱི་དུས་སུ་ཞི་བ་བྱ། །སྔ་དྲོའི་
དུས་སུ་རྒྱས་པའི་ལས། །ཉི་མ་ཕྱེད་ན་མངོན་སྤྱོད་ཀྱི། །དྲག་པོའི་ལས་ནི་ངེས་པར་བྱ། །དགུག་པ་དུས་རྣམས་ཐམས་ཅད་དུ། །མཚན་མོ་དབང་དུ་བྱ་བ་ཡིན། །སྦྱོར་བ་ལྔ་པོ་འདི་ཡིས་ནི། །མཉམ་པར་གཞག་པས་ལས་རྣམས་བྱ། །ཤར་དུ་ཁ་བལྟས་ཞི་དོན་དུ། །
རྒྱས་པ་བྱང་དུ་ཡང་དག་གནས། །ལྷོ་རུ་ཁ་བལྟས་གྱུར་པ་ཡིས། །མངོན་སྤྱོད་ཀྱི་ནི་ལས་རྣམས་སོ། །སྟེང་དུ་ཁ་བལྟས་དེ་བཞིན་དགུག །ཕྱོགས་རྣམས་ཀུན་དུ་དབང་དུ་བྱ། །ཕྱོགས་མཚམས་ཐམས་ཅད་མཉམ་སྦྱོར་བསམ། །ཡང་ན་ནུབ་ཀྱི་ཕྱོགས་སུ་བཤད། །
ཞི་ལ་སངས་རྒྱས་ཕྱག་རྒྱ་སྟེ། །རྒྱས་ལ་ནོར་བུའི་མཚན་མས་སོ། །རྡོ་རྗེ་ཁྲོ་བོ་མངོན་སྤྱོད་ལ། །དབང་ལ་པདྨའི་རིགས་ཀྱིས་སོ། །ཤིན་ཏུ་དགུག་པ་དང་ལྡན་པ། །རྡོ་རྗེ་ལྕགས་ཀྱུས་དགུག་པ་ལ། །སྦྱོར་བ་ལྔ་པོ་འདི་ཡིས་ནི། །སྦྱིན་སྲེག་ལས་ནི་རབ་ཏུ་བསྒྲུབ། །

ཞི་བའི་ཤིང་ནི་མངར་བ་སྟེ། །རྒྱས་པ་དེ་བཞིན་འབྲས་བུར་བཅས། །ཚ་བ་མངོན་སྤྱོད་ལས་དག་ལ། །དགུག་པ་ལ་ནི་ཚེར་མ་ཅན། །དབང་ལ་མེ་ཏོག་བཅས་པར་བཤད། །དེ་རྣམས་ཡམ་ཤིང་གོ་རིམས་བཞིན། །སྔོན་ལ་ཡམ་ཤིང་
རྣམ་པ་ལྔ། །རྣལ་འབྱོར་པ་ཡིས་ཡང་དག་སྦྱར། །དེ་ལ་འདམ་གྱིས་བྱུགས་པ་ཡི། །ཤིང་ལ་ཤི་བ་རབ་ཏུ་བསྒྲགས། །གང་དུ་སྡིག་པ་རྣམ་འཇིག་ཅིང་། །ཀུན་དུ་འཁྲུག་པར་སྲེག་འགྱུར་བ། །བུད་ཤིང་མངར་བ་དག་གི་མེ། །མཉམ་པར་
གཞག་པས་རབ་སྦར་ནས། །ཏིལ་མར་གྱིས་ནི་སྦྱིན་སྲེག་བྱས། །སྡིག་པ་ཐམས་ཅད་སྲེག་པར་འགྱུར། །ཨོྃ་སརྦ་པཱ་པཾ་ད་ཧ་ན་བཛྲཱ་ཡ་སྭཱ་ཧཱ། བུད་ཤིང་མངར་བ་དག་གིས་ནི། །ཤིན་ཏུ་མཉམ་པར་གཞག་པས་སྦར། །འབྲས་ཀྱི་སྦྱིན་སྲེག་བྱས་ནས་ནི། །
བསོད་ནམས་ཚོགས་ནི་འཕེལ་བར་འགྱུར། །ཨོྃ་བཛྲ་པུཥྚ་ཡེ་སྭཱ་ཧཱ། བུད་ཤིང་མངར་པོ་དག་གིས་ནི། །མཉམ་པར་གཞག་པས་མེ་སྦར་ནས། །མར་སྨྱུགས་དཱུར་བའི་སྦྱིན་སྲེག་གིས། །རྡོ་རྗེ་ཚེ་ནི་མངོན་འཕེལ་འགྱུར། །ཨོཾ་བཛྲ་ཨཱ་ཡུ་ཥེ་སྭཱ་ཧཱ། ཡམ་
ཤིང་དེ་དག་ཉིད་ཀྱིས་ནི། །དགེ་བ་འབྱུང་བས་མེ་སྤར་ནས། །ཀུ་ཤའི་མྱུ་གུའི་ཏིལ་མར་གྱིས། །འཇིག་རྟེན་གསུམ་ཡང་སྲུང་བར་འགྱུར། །ཨོཾ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱ། སྔོན་ལ་ཞི་བ་སྦྱར་བར་བྱ། །དབུས་ཀྱི་གཉིས་ལ་རྒྱས་དེ་བཞིན། །ཞི་བ་དང་ནི་རྒྱས་པ་
ཡི། །སྦྱིན་སྲེག་ལས་ནི་དང་པོར་འགྱུར། །ཤིང་ནི་ཚ་བའི་ཡམ་ཤིང་གིས། །མངོན་སྤྱོད་ཀྱི་ནི་ལས་དག་ལ། །མངོན་སྤྱོད་དང་ནི་བཅས་པ་ཡི། །དགུག་པ་ལ་ཡང་དེ་ཉིད་ཀྱི། །རྡོ་རྗེ་ཁྲོ་བོའི་ཏིང་འཛིན་གྱིས། །སྔོན་ལ་ཚ་བའི་ཡམ་ཤིང་གིས། །ཁྲོས་པས་མེ་ནི་
རབ་སྦར་ནས། །མཁས་པས་ཚེར་མས་སྦྱིན་སྲེག་བྱ། །ཚེར་མ་དང་བཅས་ཤིང་དག་ཀྱང་། །ཚེར་མ་ཅན་གྱིས་ངེས་པར་དགུག །གང་དང་གང་ནི་འདོད་གྱུར་པ། །སངས་རྒྱས་རྣམས་ནི་ངེས་པར་འགུགས། །ཨོཾ་བཛྲ་ཨཱ་ཀརྵ་ཡ་ཛཿ། བུད་ཤིང་མེ་ཏོག་དམར་སོགས་

ཀྱིས། །རབ་ཏུ་འབར་བའི་མེ་སྦར་ནས། །མེ་ཏོག་འབྲས་བུ་དམར་པོ་ཡང་། །སྦྱིན་སྲེག་བྱས་ན་དབང་བྱེད་མཆོག །ཧཱུྃ་བཛྲ་པཱ་ཤཱ་ཡ་ཛ། ཚ་བའི་ཡམ་ཤིང་དག་བྱ་ཞིང་། །རབ་ཏུ་དྲག་པའི་མེ་སྤར་ནས། །འབྲས་བུ་ཁ་བ་བསྲེག་བྱས་ན། །མངོན་སྤྱོད་ཀྱི་ནི་མཆོག་ཡིན་ནོ། །ཧཱུྃ་
བཛྲ་མཱ་ར་ཡ་ཕཊ། གསང་བའི་སྦྱིན་སྲེག་ཐམས་ཅད་ནི། །དེ་ནས་གཞན་ཡང་རབ་བཤད་བྱ། །སྦྱིན་སྲེག་འཁོར་ལོ་ཆོ་ག་ཡིས། །དེ་ཉིད་དུ་ནི་ཇི་བཞིན་སྦྱར། །ཡམ་ཤིང་ཚ་བ་དག་གིས་ནི། །ཤིན་ཏུ་དྲག་པས་མེ་སྦར་ནས། །འཇིགས་རུང་ལྕགས་ཀྱུས་སྦྱིན་སྲེག་
བྱ། །གདུག་པ་ཐམས་ཅད་རབ་འཇིགས་འགྱུར། །ཨོྃ་བཛྲ་བནྡྷ་ཡ་ཕཊ། མེ་ཏོག་དང་བཅས་ཤིང་མེ་ལ། །རྡོ་རྗེ་ཁྲོ་བོའི་ཏིང་འཛིན་གྱིས། །སྔགས་སོགས་འབྲས་བུའི་སྦྱིན་སྲེག་ནི། །དབང་དུ་བྱེད་པ་མཆོག་ཡིན་ནོ། །ཨོྃ་བཛྲ་བ་ཤྃ་ཀ་རཱ་ཡ་སྭཱ་ཧཱ། ཁ་བ་དང་ནི་མངར་བ་
ཉིད། །ཡམ་ཤིང་མངར་པོ་སྦྱར་བྱ་ཞིང་། །འདོད་པའི་མེ་ཏོག་འབྲས་བསྲེགས་ན། །འདོད་པའི་གཟུགས་ཅན་མཆོག་ཏུ་འགྱུར། །ཨོྃ་བཛྲ་ཀརྨ་རཱུ་པ་ཎེ་སྭཱ་ཧཱ། དེ་ནས་བུད་ཤིང་དེ་དག་ཉིད་ཀྱིས་ནི། །རབ་ཏུ་ཁྲོས་པས་མེ་སྦར་ནས། །སྨྱུག་མའི་འབྲས་བུ་ཕྲ་མོ་བསྲེགས། །མྱུར་དུ་མི་
སྣང་ཉིད་དུ་འགྱུར། །ཨོྃ་བཛྲ་ཨ་ཏྲི་ཥ་ཡ་སྭཱ་ཧཱ། ཤེས་རབ་བུད་ཤིང་དེ་ཉིད་ཀྱིས། །དྲག་པོའི་མེ་ནི་རབ་སྦྱར་ནས། །ནམ་མཁའ་སྟོབས་ཀྱི་མེ་ཏོག་དང་། །བསྲེགས་ན་མཁའ་ལ་འགྲོ་བར་འགྱུར། །ཨོྃ་བཛྲ་ཁེ་ཙ་རེ་ན་སྭཱ་ཧཱ། དེ་ནས་མངག་གཞུག་པ་དང་གཡོག །བཀའ་བཞིན་
བྱེད་པ་རབ་ཏུ་བསྐུལ། །ཅི་ནས་ཀྱང་ནི་མྱུར་འགྲུབ་པའི། །གོ་རིམས་བཞིན་དུ་རབ་བཤད་བྱ། །ཤིང་ནི་ཁ་བོས་བུད་ཤིང་བྱ། །ཐག་ཁུང་རྡོ་རྗེའི་དབྱིབས་སུ་བརྐོ། །ཁྲོས་པས་རྡོ་རྗེ་མེ་ཏོག་སྲེག །ཡི་གེ་ཛ་ནི་ཡོངས་སུ་བརྗོད། །སྔགས་ཀྱི་སྦྱོར་བ་འདི་ཡིས་ནི། །རྡོ་རྗེའི་སྔགས་ནི་རབ་ཏུ