Kinh tạng Tây Tạng (Kangyur Đại Học) — 066_མདོ་སྡེ།_ཟ

་ཡང་སེམས་ཅན་
ཐམས་ཅད་ཚུལ་གཅིག་ཅིང་དད་པ་གཅིག་ལ་བསམ་པ་གཅིག་པར་འགྱུར་དུ་ནི་འདི་ལྟར་སེམས་ཅན་རྣམས་བསམ་པ་ཐ་དད་པའི་ཕྱིར་ཏེ། དེ་ལྟ་བས་ན་དེ་བཞིན་གཤེགས་པ་ཚིག་ཐ་དད་པའི་ཆོས་ཀྱི་སྒོ་བསྟན་པ་དང་བརྗོད་པ་རྣམས་ཀྱིས་ཆོས་སྟོན་ཏོ། །བཅོམ་ལྡན་འདས་ཀྱིས་སེམས་ཅན་
འདུ་ཤེས་ཐ་དད་པ་ཕྱིན་ཅི་ལོག་པ་རྣམས་ལ་བཀའ་སྩལ་པ། ཁྱེད་ཀྱི་མི་རྟག་པའི་འདུ་ཤེས་ཀྱང་རུང་། སྡུག་བསྔལ་གྱི་འདུ་ཤེས་ཀྱང་རུང་། བདག་མེད་པའི་འདུ་ཤེས་ཀྱང་རུང་། རྣམ་པར་བམ་པའི་འདུ་ཤེས་ཀྱང་རུང་། རྣམ་པར་རྣགས་པའི་འདུ་ཤེས་ཀྱང་རུང་། རྣམ་པར་སྔོས་པའི་འདུ་ཤེས་
ཀྱང་རུང་། རྣམ་པར་ཟོས་པའི་འདུ་ཤེས་ཀྱང་རུང་། རྣམ་པར་འཐོར་བའི་འདུ་ཤེས་ཀྱང་རུང་སྟེ། དེ་ཐམས་ཅད་དོན་ནི་འདིར་གསུངས་པ་ཡིན་ནོ། །ཀུན་ཤེས་ཀཽ་ཌི་ནྱས་གསོལ་པ། བཅོམ་ལྡན་འདས་ཇི་ལྟར་མངོན་པར་མི་དགའ་བའི་འདུ་ཤེས་བསྒོམ་པར་བགྱི་བ་དང་། ཇི་ལྟར་ཟས་ལ་
མི་འཐུན་པའི་འདུ་ཤེས་བསྒོམ་པར་བགྱི་བ་བཤད་པར་གསོལ། བཅོམ་ལྡན་འདས་ཀྱིས་བཀའ་སྩལ་པ། ཀཽ་ཌི་ནྱ་ཆོག་གོ། །ཞིང་འདི་ན་བྱང་གྲོལ་གྱི་བདེ་བ་ཐོབ་པར་བྱ་བའི་ཕྱིར་ཆོས་ཀྱི་རྗེས་སུ་འཐུན་པའི་ཆོས་སྒྲུབ་པ་ཡང་གཞན་དུ་ཡིན་ལ། འཇིག་རྟེན་གྱི་ཁམས་དེ་དག་ན་སེམས་ཅན་རྣམས་བྱང་
གྲོལ་གྱི་བདེ་བ་ཐོབ་པར་བྱ་བའི་ཕྱིར་ཆོས་ཀྱི་རྗེས་སུ་འཐུན་པའི་ཆོས་སྒྲུབ་པའི་སེམས་ཅན་གྱི་བསམ་པ་དག་ཀྱང་གཞན་དུ་ཞུགས་པ་ཡིན་ཞིང་སྤྱོད་པ་གཞན་དང་སྦྱོར་བ་གཞན་གྱི་མངོན་པར་རྟོགས་པ་ཡིན་ནོ། །ཀཽ་ཌི་ནྱ་གལ་ཏེ་ངས་བཤད་ན་ཚུལ་དེ་ལྟ་བུ་དེ་རབ་ཏུ་ཤེས་པར་འགྱུར་བའི་སྐྱོན་མེད་པ་དག་
ལ་ཞུགས་པ་དག་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་མ་གཏོགས་པར་སེམས་ཅན་གཞན་གང་དག་ཡོད་པ་དེ་དག་འདི་ལ་ཀུན་ཏུ་རྨོངས་པར་འགྱུར་རོ། །ཀཽ་ཌི་ནྱས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་

ཤེས་དང་ཟས་ལ་མི་འཐུན་པའི་འདུ་ཤེས་བཤད་པར་གསོལ། བཙུན་པ་བདེ་བར་གཤེགས་པ་བཤད་པར་གསོལ། དེ་ཐོས་པས་སེམས་ཅན་རྣམས་དགེ་བའི་རྩ་བ་རྣམ་པ་སྣ་ཚོགས་སྐྱེད་པར་འགྱུར་ལགས་སོ། །སེམས་ཅན་མ་རིག་པས་བསྒྲིབས་པ་རྣམས་དང་། སྲེད་པའི་ཀུན་
ཏུ་སྦྱོར་བ་ཅན་རྣམས་དང་། སྲེད་པའི་ལྟུང་བ་ཐོགས་པ་རྣམས་དང་། འཁོར་བར་ཀུན་ཏུ་རྒྱུག་ཅིང་འཁོར་བ་རྣམས་ཀྱི་སྔོན་གྱི་མཐའ་མི་མངོན་ལགས་ཏེ། དེར་དེ་དག་མངོན་པར་དགའ་ལགས་སོ། །དེ་ཅིའི་སླད་དུ་ཞེ་ན། ཟས་ཀྱི་ཀུན་ཏུ་སྦྱོར་བའི་རྒྱུ་དང་འཁྲིག་པ་དང་ལྡན་པའི་ཀུན་ཏུ་སྦྱོར་
བའི་སླད་དུ་སྟེ། ཆོས་ཀྱི་ཚུལ་དེ་ལྟ་བུ་དེ་མ་ཐོས་པས་འགྲོ་བ་ལྔའི་འཁོར་བར་བྱིང་ཞིང་རྟག་ཏུ་སྡུག་བསྔལ་གྱིས་ཉེན་པར་གནས་ལགས་སོ། །བཅོམ་ལྡན་འདས་ནི་སེམས་ཅན་ཐམས་ཅད་ལ་བདེ་བར་བཞེད་པ། སེམས་ཅན་ཐམས་ཅད་ལ་ཐུགས་བརྩེ་བ་ཐུགས་རྗེ་ཆེན་པོ་བརྙེས་པ་ལགས་ན།
བཙུན་པ་བཅོམ་ལྡན་འདས་དེ་བཞིན་གཤེགས་པ་ཡེ་ཤེས་དཔལ་བརྩེགས་རྒྱལ་པོ་དེས་གང་སྐྱེ་བོ་མང་པོ་ལ་སྨན་པ་དང་། ལྷ་དང་མི་རྣམས་ཀྱི་བར་ལ་སྨན་པའི་སླད་དུ་བསྐུར་བ་སྨོན་པ་མ་མཆིས་པ་དང་རྗེས་སུ་འཐུན་པའི་གཟུངས་སྔགས་ཀྱི་དོན་ཐམས་ཅད་ཡོངས་སུ་རྫོགས་པར་བཤད་པར་གསོལ།
བཙུན་པ་བཅོམ་ལྡན་འདས་འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་བཤད་པར་གསོལ། སེམས་ཅན་རྣམས་ཀྱིས་དེ་ཐོས་པས་འདོད་པ་རྣམས་ལས་ལྡོག་པར་འགྱུར་ལགས་སོ། །བཙུན་པ་བཅོམ་ལྡན་འདས་ཟས་ལ་མི་འཐུན་པའི་འདུ་ཤེས་བཤད་པར་གསོལ། དེ་ཐོས་པས་
སེམས་ཅན་གང་དག་རོ་ལ་ཆུམས་པ་རྣམས་ལྡོག་པར་འགྱུར་ལགས་སོ། །སེམས་ཅན་གང་དག་གིས་འདོད་པ་རྣམས་ལ་ཉེས་དམིགས་སུ་འཚལ་བ་དང་། རོ་རྣམས་ལ་ཉེས་དམིགས་སུ་འཚལ་བའི་སེམས་ཅན་དེ་དག་འཁོར་བའི་ཕ་རོལ་ཏུ་དགའ་བ་དག་པ་དང་། སྲིད་པའི་འཆིང་བ་ལས་གྲོལ་
བར་བལྟ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀཽ་ཌི་ནྱ་དེ་དེ་བཞིན་ནོ། །ཇི་སྐད་ཁྱོད་ཀྱིས་སྨྲས་པ་དེ་བཞིན་ཏེ། ཇི་ལྟར་བྱང་ཆུབ་སེམས་དཔའ་སྣང་བ་དཔལ་གྱི་སྙིང་པོས་ང་ལ་ཡིད་ལ་བྱེད་པ་བརྗོད་པ་བཞིན་ལྷ་དང་བཅས་པའི་འཇིག་རྟེན་གྱི་མདུན་དུ་འཇིག་རྟེན་ཐམས་ཅད་ལ་

མངོན་པར་མི་དགའ་བའི་འདུ་ཤེས་ངས་བཤད་པར་བྱའོ། །ཟས་ལ་མི་འཐུན་པའི་འདུ་ཤེས་ཀྱང་ངས་བཤད་པར་བྱའོ། །ཀཽ་ཌི་ནྱ་དེའི་ཕྱིར་ཁྱོད་ཀྱིས་ཉོན་ལ་ཞེས་བྱ་བ་ནས་བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ་ཞེས་བྱ་བའི་བར་དུའོ། །ཀཽ་ཌི་ནྱ་གང་དུ་མངོན་པར་
མི་དགའ་བ་དེ་བསྐྱེད་པར་བྱ་བའི་འཇིག་རྟེན་གང་ཞེ་ན། འཇིག་རྟེན་ནི་གཉིས་ཏེ། སེམས་ཅན་གྱི་འཇིག་རྟེན་དང་། འདུ་བྱེད་ཀྱི་འཇིག་རྟེན་ནོ། །དེ་ལ་སེམས་ཅན་གྱི་འཇིག་རྟེན་གང་ཞེ་ན། སེམས་ཅན་རྣམས་ཞེས་བྱ་བ་ནི་གང་དག་འགྲོ་བ་ལྔ་པོ་སེམས་ཅན་དམྱལ་བ་དང་། དུད་འགྲོ་དང་། ཡི་དགས་དང་། ལྷ་དང་།
མི་རྣམས་ཀྱི་ནང་དུ་སྐྱེས་པ་རྣམས་སོ། །འདོད་པའི་ཁམས་ན་ནི་སྲིད་པ་མངོན་པར་གྲུབ་པ་ཉི་ཤུའོ། །གཟུགས་ཀྱི་ཁམས་ན་ནི་བཅུ་དྲུག་གོ། །གཟུགས་མེད་པའི་ཁམས་ན་ནི་སྲིད་པ་མངོན་པར་གྲུབ་པ་བཞི་སྟེ། སེམས་ཅན་གྱི་འཇིག་རྟེན་ནི་དེ་ཙམ་མོ། །དེ་ལ་འདོད་པའི་ཁམས་ཀྱི་སྲིད་པ་མངོན་པར་
གྲུབ་པ་ཉི་ཤུ་གང་ཞེ་ན། སེམས་ཅན་དམྱལ་བ་ཆེན་པོ་བརྒྱད་དེ་རེ་རེ་ལ་ཡང་འཁོར་བཅུ་དྲུག་གོ། །བརྒྱད་གང་ཞེ་ན། དུས་གསུམ་པའི་ཡང་སོས་ཞེས་བྱ་བ་འཁོར་བཅུ་དྲུག་པ་དང་། ཐིག་ནག་དང་། བསྡུས་གཞོམ་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དང་། སེམས་ཅན་
དམྱལ་བ་མནར་མེད་པ་ཞེས་བྱ་བ་འཁོར་བཅུ་དྲུག་པའོ། །སེམས་ཅན་གང་དག་ལུས་དང་། ངག་དང་། ཡིད་ཀྱིས་ཉེས་པར་སྤྱད་པའི་རྒྱུས་དེ་དག་ཏུ་སྐྱེས་ཤིང་སྐྱེ་བར་འགྱུར་བ་དེ་དག་དེར་སྡུག་བསྔལ་གྱི་ཚོར་བ་རྩུབ་པ་མི་བཟད་པ་ཚ་བ་ཆེན་པོ་མྱོང་བར་འགྱུར་རོ། །དེ་དག་གིས་དེར་མིག་གིས་
གཟུགས་གང་ཅི་མཐོང་ཡང་རུང་། ཐམས་ཅད་ཡིད་དུ་མི་འོང་བར་མཐོང་གི་ཡིད་དུ་འོང་བར་མ་ཡིན། ཡིད་དུ་མི་འཐད་པར་མཐོང་གི་ཡིད་དུ་འཐད་པར་མ་ཡིན། གཟུགས་མི་སྡུག་པར་མཐོང་གི་གཟུགས་སྡུག་པར་མ་ཡིན། གཟུགས་མི་ལེགས་པར་མཐོང་གི་གཟུགས་ལེགས་པར་མི་མཐོང་སྟེ། དེ་
ལྟ་བས་ན་གཞི་དེས་དེ་དག་དེར་སྡུག་བསྔལ་གྱི་ཚོར་བ་རྩུབ་པ་མི་བཟད་པ་ཚ་བ་ཆེན་པོ་མྱོང་བར་འགྱུར་རོ། །དེ་དག་གིས་དེར་རྣ་བས་སྒྲ་གང་ཅི་ཐོས་ཀྱང་རུང་ཞེས་བྱ་བ་ནས་སྣས་དྲི་གང་ཅི་མནམས་ཀྱང་རུང་ཞེས་བྱ་བ་དང་། ལྕེས་རོ་གང་ཅི་མྱངས་ཀྱང་རུང་ཞེས་བྱ་བ་དང་། ལུས་ཀྱིས་རེག་བྱ་གང་ཅི་རེག་ཀྱང་རུང་

ཞེས་བྱ་བ་དང་། ཡིད་ཀྱིས་ཆོས་རྣམས་གང་ཅི་རྣམ་པར་ཤེས་ཀྱང་རུང་ཞེས་བྱ་བའི་བར་ཐམས་ཅད་ཡིད་དུ་མི་འོང་བར་ཡིན་གྱི་ཡིད་དུ་འོང་བར་མ་ཡིན། ཡིད་དུ་མི་འཐད་པར་ཡིན་གྱི་ཡིད་དུ་འཐད་པར་མ་ཡིན། གཟུགས་མི་སྡུག་པར་ཡིན་གྱི་གཟུགས་སྡུག་པར་མ་ཡིན། གཟུགས་མི་
ལེགས་པར་ཡིན་གྱི་གཟུགས་ལེགས་པར་མ་ཡིན་ནོ། །ལུས་རབ་ཏུ་འབར་བ་དང་། ལྕགས་ཀྱི་ཐུ་ལུམ་ཟ་བ་དང་། ལྕགས་དང་ཟངས་འཐུང་བ་དག་ཡིན་ཏེ། གཞི་དེས་དེ་དག་དེར་སྡུག་བསྔལ་གྱི་ཚོར་བ་རྩུབ་པ་མི་བཟད་པ་ཚ་བ་ཆེན་པོ་མྱོང་བར་འགྱུར་རོ། །ཇི་སྲིད་དུ་གང་འདིར་སྔོན་ཆད་
མི་རྣམས་ཀྱི་ནང་དུ་མིར་གྱུར་པ་དང་། འཐུན་པའི་ལུས་ཀྱིས་ཉེས་པར་སྤྱོད་པ་སྤྱད་པ་དང་། ངག་དང་། ཡིད་ཀྱིས་ཉེས་པར་སྤྱོད་པ་སྤྱད་པ་དེ་དག་གི་སྡིག་པའི་ལས་དེ་ཟད་པར་མ་གྱུར་ཅིང་སྦྱངས་པར་མ་གྱུར་པ་དེ་སྲིད་དུ་དེ་དག་དེ་ནས་ཤི་འཕོ་བར་མི་འགྱུར་རོ། །ཀཽ་ཌི་ནྱ་ལྟོས་སེམས་ཅན་
བདེ་བ་འདོད་པར་གྱུར་ལ་སྡུག་བསྔལ་དང་མི་འཐུན་པར་བྱེད་པ་སུ་ཞིག་སེམས་ཅན་དམྱལ་བ་དེ་ལ་དགའ་བར་སེམས་ཤིང་འདོད་པ་སྐྱེད་པར་བྱེད། འདི་ནི་ཉེས་པར་སྤྱད་པ་སྤྱོད་པའི་འགྲོ་བ་དང་པོ་སྟེ། དེ་ལ་མཁས་པས་མངོན་པར་མི་དགའ་བའི་འདུ་ཤེས་བསྐྱེད་པར་བྱའོ། །ཀཽ་ཌི་ནྱ་དེ་ལ་
མཁས་པས་ཇི་ལྟར་དུད་འགྲོའི་སྐྱེ་གནས་ལ་མངོན་པར་མི་དགའ་བའི་འདུ་ཤེས་བསྐྱེད་པར་བྱ་ཞེ་ན། ཀཽ་ཌི་ནྱ་དུད་འགྲོ་རྣམས་ཀྱི་ལུས་འདི་ལྟར་མཆོག་ཏུ་ཕྲ་མོ་ཐོབ་པ་དག་ཡོད་དེ། འདི་ལྟ་སྟེ། སྐྲའི་རྩེ་མོའི་མཐའ་ལྔ་བཅུའི་ཆར་ཕྱེ་བ་ཙམ་མོ། །ཁ་ཅིག་ནི་ཉི་ཟེར་གྱི་རྡུལ་ཙམ་མོ་ཞེས་བྱ་བ་ནས་
ཁ་ཅིག་ནི་རྒྱ་ཤུག་གི་ཚད་དོ་ཞེས་བྱ་བའི་བར་དུའོ། །ཁ་ཅིག་ནི་ལུས་དཔག་ཚད་ཁྲིའི་བར་དུ་ཐོབ་པ་དང་ཐོབ་པར་འགྱུར་བ་དག་གོ། །ཁ་ཅིག་གི་སྲོག་ནི་ཡུད་ཙམ་ཅིག་ཐུབ་བོ་ཞེས་བྱ་བ་ནས་ཁ་ཅིག་གི་ཚེ་བསྐལ་པ་གཅིག་ཐུབ་བོ་ཞེས་བྱ་བའི་བར་དུའོ། །དེར་དེ་དག་ལ་ཆོས་བྱེད་པ་མེད་དོ། །དགེ་བ་བྱེད་
པ་མེད་དོ། །དེར་དེ་དག་ངོ་ཚ་ཤེས་པ་དང་། ཁྲེལ་ཡོད་པ་སྤངས་པ་དག་དང་། སྙིང་རྗེ་མེད་པར་ཞུགས་པ་དག་དང་། སྙིང་བརྩེ་བ་མེད་པ་དག་དང་། རྟག་པར་སྡུག་བསྔལ་གྱིས་གཟིར་བ་དག་དང་། རྟག་ཏུ་སྐྲག་པ་དག་དང་། གཅིག་ལ་གཅིག་ཟ་བ་དག་དང་། མི་དགེ་བའི་ལས་ཀྱི་ལམ་ཐམས་

ཅད་དང་ཡང་དག་པར་ལྡན་པ་དག་དང་། གཏི་མུག་གི་མུན་ཁྲོད་དུ་ཞུགས་པར་གྱུར་པས་ངན་འགྲོར་འགྲོ་བ་དག་དང་བདེ་འགྲོར་འགྲོ་བ་དག་ཀྱང་སྤྱོད་ཡུལ་མ་ཡིན་པ་ལ་དགེ་བའི་ལས་བྱེད་པར་སེམས་ཕྱིན་ཅི་ལོག་ཏུ་གྱུར་པ་དག་ཡིན་ནོ། །མཁས་པ་སུ་ཞིག་
དེ་ལྟ་བུའི་གཏི་མུག་གི་མུན་ཁྲོད་དུ་རྟག་པར་སྡུག་བསྔལ་གྱིས་གཟིར་བའི་དུད་འགྲོའི་སྐྱེ་གནས་དེ་ལ་དགའ་བར་སེམས་ཤིང་འདོད་པ་སྐྱེད་པར་བྱེད། འདི་ནི་ཉེས་པར་སྤྱད་པ་སྤྱོད་པའི་འགྲོ་བ་གཉིས་པ་སྟེ། དེ་ལ་མཁས་པས་མངོན་པར་མི་དགའ་བའི་འདུ་ཤེས་བསྐྱེད་པར་བྱའོ། །ཀཽ་ཌི་ནྱ་
དེ་ལ་མཁས་པས་ཇི་ལྟར་ཡི་དགས་ཀྱི་འགྲོ་བའི་སྐྱེ་གནས་ལ་ཡང་མངོན་པར་མི་དགའ་བའི་འདུ་ཤེས་བསྐྱེད་པར་བྱ་ཞེ་ན། ཀཽ་ཌི་ནྱ་གང་དག་གི་ལུས་མཐོ་གང་ཙམ་ཡོད་པའི་ཡི་དགས་དག་ཡོད་དེ། ཁ་ཅིག་ནི་མི་གང་ཙམ་མོ། །ཁ་ཅིག་ནི་དཔག་ཚད་སྟོང་ཡོད་པའི་བར་གྱི་ལུས་ཐོབ་ལ་དེ་
དག་ཀྱང་གཅེར་བུ་དང་། རྩུབ་པ་དག་དང་། ནག་པོ་དག་དང་། ལུས་མཆོག་ཏུ་སྐེམ་ཞིང་ཤ་ཁྲག་དང་བྲལ་བ་དག་དང་། རྟག་པར་བཀྲེས་ཤིང་སྐོམ་པས་གཟིར་བ་དག་དང་། བཟའ་བཏུང་དང་བྲལ་བ་དག་དང་། མེའི་དབུགས་རྔུབ་པ་དང་དབུགས་འབྱུང་བ་དག་དང་། གཅིག་ལ་
གཅིག་རབ་ཏུ་སྡང་བའི་སེམས་དང་ལྡན་པ་དག་དང་། སྙིང་རྗེ་མེད་པར་ཞུགས་པ་དག་དང་། རྟག་པར་ལུས་དུབ་པ་དང་། སྤྲིན་བསིལ་བ་དང་བྲལ་བ་དག་ཡིན་ནོ། །ཁ་ཅིག་གི་ཟས་ནི་ལྕགས་དང་ཟངས་ཡིན་ནོ། །ཁ་ཅིག་གི་ནི་ལྕགས་ཀྱི་ཐུ་ལུམ་རྣམས་སོ། །ཁ་ཅིག་གི་ནི་རྣག་
ཁྲག་ཚ་བའོ། །ཁ་ཅིག་གི་ནི་རྡུལ་ཀུན་ཏུ་ཚ་བའོ། །ཁ་ཅིག་གི་ནི་ཕྱི་ས་ཀུན་ཏུ་ཚ་བའོ། །ཁ་ཅིག་གི་ནི་གཅིན་བསྐོལ་བའོ། །ཁ་ཅིག་གི་ནི་རླུང་ཀུན་ཏུ་ཚ་བའོ། །ཁ་ཅིག་ནི་རྩ་བ་དང་། འདབ་མ་དང་། མེ་ཏོག་དང་། འབྲས་བུ་དང་། ཤིང་ལས་བྱས་པའི་ཁ་ཟས་རབ་ཏུ་འབར་བའོ། །
དེ་ཡང་དཀའ་བས་རེས་འགའ་ནན་གྱིས་རྙེད་པར་འགྱུར་རོ། །ཡི་དགས་ཁ་ཅིག་གི་ཚེའི་ཚད་ནི་ལོ་སྟོང་ཐུབ་བོ། །ཁ་ཅིག་གི་ཚེའི་ཚད་ནི་ལོ་སྟོང་ཕྲག་བརྒྱའི་བར་དུ་ཐུབ་སྟེ། རྟག་པར་བདེ་བ་དང་བྲལ་བ་དག་དང་། སྡུག་བསྔལ་གྱིས་གཟིར་བ་དག་དང་། མ་རིག་པའི་མུན་པར་ཞུགས་

པ་དག་ཡིན་ན་མཁས་པ་སུ་ཞིག་ཡི་དགས་རྣམས་ལ་དགའ་བ་སྐྱེད་པར་བྱེད། འདི་ནི་ཉེས་པར་སྤྱད་པ་སྤྱོད་པའི་འགྲོ་བ་གསུམ་པ་སྟེ། དེ་ལ་མཁས་པས་མངོན་པར་མི་དགའ་བའི་འདུ་ཤེས་བསྐྱེད་པར་བྱའོ། །ཀཽ་ཌི་ནྱ་དེ་ལ་མཁས་པས་ཇི་ལྟར་མིའི་འཇིག་རྟེན་འདི་ལ་མངོན་པར་
མི་དགའ་བའི་འདུ་ཤེས་བསྐྱེད་པར་བྱ་ཞེ་ན། མིའི་འཇིག་རྟེན་འདི་ནི་སེམས་ཅན་རྣམས་སྡུག་བསྔལ་གྱིས་གཟིར་བ་དག་ཡིན་ཏེ། རྒ་བའི་སྡུག་བསྔལ་དང་། ན་བའི་སྡུག་བསྔལ་དང་། འཆི་བའི་སྡུག་བསྔལ་དང་། མི་སྡུག་པ་དང་ཕྲད་པའི་སྡུག་བསྔལ་དང་། སྡུག་པ་དང་བྲལ་བའི་
སྡུག་བསྔལ་དང་། རྣམ་པ་སྣ་ཚོགས་ཡོངས་སུ་ཚོལ་བའི་སྡུག་བསྔལ་དང་། འཁྲུག་པ་དང་། ཁྲོ་བ་དང་། ཕྲག་དོག་དང་། སེར་སྣ་དང་། ཕྲ་མ་སྨྲ་བ་དང་། ཚིག་རྩུབ་པོ་སྨྲ་བ་དང་། བརྣབ་སེམས་དང་། གྲང་བ་དང་། དྲོ་བ་དང་། གཅིག་ལ་གཅིག་ཀུན་ཏུ་གནོད་པར་བྱེད་པའི་སྡུག་
བསྔལ་གྱིས་གཟིར་བ་དག་ཡིན། དུས་རྟག་ཏུ་མིའི་འཇིག་རྟེན་འདི་ན་སེམས་ཅན་རྣམས་འཆི་བ་རྗེས་སུ་དྲན་པས་སྡུག་བསྔལ་བ་དང་། ཚེ་ཐུང་བ་ཉིད་ཀྱི་སྡུག་བསྔལ་དང་། འཇིག་རྟེན་ཕ་རོལ་དུ་འགྲོ་བ་རྗེས་སུ་དྲན་པའི་སྡུག་བསྔལ་གྱིས་གཟིར་བ་དག་ཡིན་ན་མཁས་པ་སུ་ཞིག་མིའི་
འཇིག་རྟེན་ལ་འདོད་པ་སྐྱེད་པར་བྱེད་ཅིང་དགའ་བར་སེམས། འདི་ནི་སྤེལ་མའི་འགྲོ་བ་བཞི་པ་སྟེ། དེ་ལ་མཁས་པས་མངོན་པར་མི་དགའ་བའི་འདུ་ཤེས་བསྐྱེད་པར་བྱའོ། །ཀཽ་ཌི་ནྱ་དེ་ལ་མཁས་པས་ཇི་ལྟར་ལྷའི་འཇིག་རྟེན་ལ་མངོན་པར་མི་དགའ་བའི་འདུ་ཤེས་བསྐྱེད་པར་བྱ་ཞེ་ན། འདོད་པ་
ན་སྤྱོད་པའི་ལྷ་དྲུག་པོ་དེ་དག་ན་ཡང་སེམས་ཅན་རྣམས་འདོད་པ་ལ་སྲེད་པའི་སྡུག་བསྔལ་རྣམས་ཀྱིས་གཟིར་བདག་ཡིན། འགེད་པ་དང་། ལོངས་སྤྱོད་དང་། ཉེ་བར་སྤྱོད་པའི་སྡུག་བསྔལ་རྣམས་ཀྱིས་གཟིར་བ་དག་ཡིན། སྔོན་ཆད་དགེ་བའི་རྩ་བ་བསགས་པ་མཐར་གྱིས་ཡོངས་སུ་ཟད་
པའི་སྡུག་བསྔལ་རྣམས་ཀྱིས་གཟིར་བ་དག་ཡིན། ཡོངས་སུ་ཚོལ་བའི་སྡུག་བསྔལ་རྣམས་ཀྱིས་གཟིར་བ་དག་ཡིན། སྡུག་པ་དང་བྲལ་བའི་སྡུག་བསྔལ་རྣམས་ཀྱིས་གཟིར་བ་དག་ཡིན། བསོད་ནམས་ཡོངས་སུ་ཟད་པས་འཆི་འཕོ་བའི་སྡུག་བསྔལ་རྣམས་ཀྱིས་གཟིར་བ་དག་ཡིན།

ཡང་དང་ཡང་དུ་ངན་སོང་གི་སྡུག་བསྔལ་རྣམས་ཀྱིས་གཟིར་བ་དག་ཡིན་ཏེ། འདི་ནི་འདོད་པ་ན་སྤྱོད་པའི་ལྷ་རྣམས་ལ་མངོན་པར་མི་དགའ་བའི་འདུ་ཤེས་ལྔ་པ་ཡིན་ནོ། །འདི་ནི་རྣམ་པ་ལྔ་པ་ཡིན་ཏེ། མཁས་པས་འདོད་པའི་ཁམས་འདི་ཐམས་ཅད་ལ་མངོན་པར་མི་
དགའ་བའི་འདུ་ཤེས་བསྐྱེད་པར་བྱའོ། །ཀཽ་ཌི་ནྱ་དེ་ལ་མཁས་པས་ཇི་ལྟར་གཟུགས་ན་སྤྱོད་པའི་ལྷ་རྣམས་ལ་མངོན་པར་མི་དགའ་བའི་འདུ་ཤེས་བསྐྱེད་པར་བྱ་ཞེ་ན། སེམས་ཅན་གང་དག་གཟུགས་ན་སྤྱོད་པ་བཅུ་དྲུག་ཡོད་པ་དེ་དག་ཀྱང་ལྷའི་རིས་རྣམས་ཀྱི་ནང་ན་འཇིག་རྟེན་པའི་བསམ་
གཏན་དག་སྒོམ་པར་བྱེད་དེ། དེ་དག་ཐམས་ཅད་ཟག་པ་དང་བཅས་པའི་སྡུག་བསྔལ་རྣམས་ཀྱིས་ཡོངས་སུ་མ་གྲོལ་བ་ཡིན། སྡུག་བསྔལ་མང་པོས་གཟིར་བ་ཡིན། ལྷག་མ་དང་བཅས་པའི་འགྲོ་བ་ཉིད་ཀྱི་སྡུག་བསྔལ་རྣམས་ཀྱིས་གཟིར་བ་ཡིན། ཕ་རོལ་ལ་མི་ལྟ་བ་རྣམས་ཡིན།
ངེས་པར་འབྱུང་བར་མི་ལྟ་བ་རྣམས་ཡིན། ངན་སོང་གི་སྡུག་བསྔལ་རྣམས་ལས་ཡོངས་སུ་མ་གྲོལ་བ་ཡིན་ཏེ། སྡུག་བསྔལ་དེ་དག་གིས་གཟིར་བ་ཡིན་ན་མཁས་པ་སུ་ཞིག་དེ་དག་ལ་དགའ་བར་སེམས་ཤིང་འདོད་པ་སྐྱེད་པར་བྱེད། མཁས་པས་དེ་ལྟར་གཟུགས་ཀྱི་ཁམས་དེ་ལ་མངོན་
པར་མི་དགའ་བའི་འདུ་ཤེས་བསྐྱེད་པར་བྱའོ། །གཞན་ཡང་གཟུགས་ཀྱི་ཁམས་དེ་ན་སེམས་ཅན་གང་དག་ཟག་པ་མེད་པའི་བསམ་གཏན་དང་ཡང་དག་པར་ལྡན་ཞིང་ཡོངས་སུ་གྲོལ་བ་མ་ཡིན་པར་གནས་པ་འཕགས་པའི་ལམ་གྱི་ཚེ་སྡུག་བསྔལ་རྣམས་ཀྱིས་གཟིར་བ་ཡིན་ཞིང་། དེ་ཡོངས་
སུ་རྫོགས་པ་ཀུན་ཏུ་ཚོལ་བའི་སྡུག་བསྔལ་རྣམས་ཀྱིས་གཟིར་བ་ཡིན། ས་མ་ལུས་པ་ཐམས་ཅད་ཀྱི་ཏིང་ངེ་འཛིན་ལ་དབང་མི་བྱེད་པའི་སྡུག་བསྔལ་རྣམས་ཀྱིས་གཟིར་བ་དག་ཡིན་ཏེ། དེ་དག་རང་རྒྱལ་བ་དང་ཐུན་མོང་བའི་ཏིང་ངེ་འཛིན་ལ་དབང་སྒྱུར་བ་མེད་པ་ཉིད་ཀྱི་སྡུག་བསྔལ་
རྣམས་ཀྱིས་གཟིར་བ་ཡིན་ནོ། །དེ་དག་དེ་བཞིན་གཤེགས་པའི་སྤྱོད་ཡུལ་ལ་དབང་སྒྱུར་བ་མེད་པ་ཉིད་ཀྱི་སྡུག་བསྔལ་རྣམས་ཀྱིས་གཟིར་བ་ཡིན་ནོ། །དེ་ན་གང་དག་མགོ་མཉམ་དུ་ཡོངས་སུ་མྱ་ངན་ལས་འདས་པར་བྱེད་པ་དེ་དག་ཐམས་ཅད་སྡུག་བསྔལ་དེ་རྣམས་ཀྱིས་གཟིར་བ་ཡིན་

ནོ། །མཁས་པས་དེ་ལྟར་གཟུགས་ཀྱི་ཁམས་དེ་ལ་མངོན་པར་མི་དགའ་བའི་འདུ་ཤེས་བསྐྱེད་པར་བྱའོ། །ཀཽ་ཌི་ནྱ་དེ་ལ་མཁས་པས་ཇི་ལྟར་གཟུགས་མེད་པའི་ཁམས་ལ་མངོན་པར་མི་དགའ་བའི་འདུ་ཤེས་བསྐྱེད་པར་བྱ་ཞེ་ན། གཟུགས་མེད་པའི་རིས་ཀྱི་ལྷའི་གནས་བཞི་པོ་དེ་དག་ན་ཡང་
སེམས་ཅན་རྣམས་ཟག་པ་དང་བཅས་པའི་ཏིང་ངེ་འཛིན་རྣམས་དང་ལྡན་པ་ཡིན་ཏེ། དེ་དག་ཐམས་ཅད་ཟག་པ་དང་བཅས་པའི་སྡུག་བསྔལ་རྣམས་ལས་ཡོངས་སུ་མ་གྲོལ་བ་དག་ཡིན། སྡུག་བསྔལ་དེ་རྣམས་ཀྱིས་གཟིར་བ་དག་ཡིན། དེ་དག་སློབ་པ་དང་མི་སློབ་པའི་ས་ཐམས་ཅད་
ལ་དབང་སྒྱུར་བ་མེད་པ་དག་ཡིན། སྡུག་བསྔལ་དེ་རྣམས་ཀྱིས་གཟིར་བ་དག་ཡིན། ཆོས་མི་ཐོས་པའི་སྡུག་བསྔལ་རྣམས་ཀྱིས་གཟིར་བ་དག་ཡིན། སྲེད་པ་ཐམས་ཅད་གཏན་དུ་བཅད་པ་ལ་དབང་སྒྱུར་བ་མེད་པ་ཉིད་ཀྱི་སྡུག་བསྔལ་རྣམས་ཀྱིས་གཟིར་བ་དག་ཡིན། དེ་ནས་འཆི་འཕོ་
བའི་ཆོས་ཀྱི་རྣམ་པ་དང་། ལྷག་མ་དང་བཅས་པར་འགྲོ་བ་ཉིད་ཀྱི་སྡུག་བསྔལ་རྣམས་ཀྱིས་གཟིར་བ་དག་ཡིན། ངན་སོང་ཐམས་ཅད་ཀྱི་སྡུག་བསྔལ་རྣམས་ལས་ཡོངས་སུ་མ་གྲོལ་བ་དག་ཡིན་ནོ། །སྡུག་བསྔལ་དེ་རྣམས་ཀྱིས་གཟིར་བ་དག་ཡིན་ཏེ། མཁས་པས་དེ་ལྟར་གཟུགས་
མེད་པའི་ཁམས་དེ་ལ་མངོན་པར་མི་དགའ་བའི་འདུ་ཤེས་བསྐྱེད་པར་བྱའོ། །རྣམ་པ་བརྒྱད་པོ་དེ་དག་གིས་སྲིད་པ་གསུམ་གྱི་བཙོན་ར་ཐམས་ཅད་དུ་སྲིད་པ་མངོན་པར་གྲུབ་པ་ཡིན་ནོ། །མཁས་པས་དེ་ལྟ་བུ་དང་ཡང་དག་པར་ལྡན་པའི་མངོན་པར་མི་དགའ་བའི་འདུ་ཤེས་བསྐྱེད་པར་བྱ་ཞིང་འདུན་པ་
དྲག་པོས་འཕགས་པའི་ལམ་ཡན་ལག་བརྒྱད་པ་བསྒོམ་པར་བྱ་སྟེ། ཀཽ་ཌི་ནྱ་འདི་ནི་འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་སོ། །འདུ་བྱེད་ཀྱི་འཇིག་རྟེན་ལ་མངོན་པར་མི་དགའ་བའི་འདུ་ཤེས་གང་ཞེ་ན། འདུ་བྱེད་གསུམ་ཞེས་བྱ་སྟེ། འདི་ལྟ་སྟེ། ལུས་ཀྱི་འདུ་བྱེད་དང་། ངག་གི་
འདུ་བྱེད་དང་། ཡིད་ཀྱི་འདུ་བྱེད་དོ། །དེ་ལ་ལུས་ཀྱི་འདུ་བྱེད་གང་ཞེ་ན། དབུགས་རྔུབ་པ་དང་། དབུགས་འབྱུང་བ་རྣམས་ནི་ལུས་ཀྱི་འདུ་བྱེད་རྣམས་ཞེས་བྱའོ། །དེ་ལ་ངག་གི་འདུ་བྱེད་གང་ཞེ་ན། རྟོག་པ་དང་། དཔྱོད་པ་རྣམས་ནི་ངག་གི་འདུ་བྱེད་རྣམས་ཞེས་བྱའོ། །དེ་ལ་ཡིད་ཀྱི་འདུ་བྱེད་རྣམས་གང་

ཞེ་ན། རྣམ་པར་ཤེས་པ་དང་སེམས་པའོ། །འདི་དག་ནི་ཡིད་ཀྱི་འདུ་བྱེད་རྣམས་ཞེས་བྱའོ། །འདུ་བྱེད་གསུམ་པོ་འདི་དག་ནི་སེམས་ཅན་རྣམས་ཀྱི་མཚན་ཉིད་མཉམ་པ་རྣམས་སོ། །མཁས་པས་ཇི་ལྟར་འདུ་བྱེད་རྣམས་ལ་མངོན་པར་མི་དགའ་བའི་འདུ་ཤེས་བསྐྱེད་པར་བྱ་ཞེ་ན། མཁས་
པས་གང་དབུགས་རྔུབ་པ་དང་། དབུགས་འབྱུང་བ་རྣམས་ཀྱི་མཚན་མ་ལ་གསར་པ་དང་རྙིང་པའི་ཚུལ་དང་། བསིལ་བའི་རྣམ་པ་དང་། དྲོ་བའི་རྣམ་པ་དང་མི་འཐུན་པའི་ཚུལ་གྱིས་ཉེ་བར་རྟོག་པར་བྱའོ། །ལུས་འབྱུང་བ་ཐམས་ཅད་ཀྱི་དབུགས་རྔུབ་པ་དང་། ལུས་ཐམས་ཅད་ཀྱི་དབུགས་འབྱུང་
བ་དང་། རྨའི་སྒོ་རྣམས་ཀྱི་མཚན་མ་ལ་ཡང་ཉེ་བར་བརྟགས་ནས་འདུ་བྱེད་འདི་རྣམས་ནི་མ་བྱུང་བ་ལས་ཡང་དག་པར་བྱུང་བ་དག་གོ། །བྱུང་ནས་མེད་པར་གྱུར་པ་དག་གོ། །ཐམས་ཅད་གློག་ལྟ་བུ་དག་གོ་སྙམ་ཞིང་ཐམས་ཅད་དུ་ཟད་པར་འདུ་ཤེས་པར་ཡིད་ལ་བྱེད་ཅིང་དངོས་པོ་མེད་པར་འདུ་ཤེས་
པར་ཡིད་ལ་བྱེད་དོ། །གང་དུ་ཐ་དད་པར་རྟོག་པར་བྱེད་ན་རྣམ་པར་རྟོག་པ་ཐམས་ཅད་འབྱུང་སྟེ། རྟོག་པ་རྣམས་ལ་ཟད་པའི་འདུ་ཤེས་དང་དངོས་པོ་མེད་པའི་འདུ་ཤེས་འབྱུང་ངོ་། །ཆོས་དེ་ཉིད་ལ་གང་བསིལ་བའི་འདུ་ཤེས་དང་། དྲོ་བའི་འདུ་ཤེས་དང་། མི་འཐུན་པའི་འདུ་ཤེས་དང་། དེ་བཞིན་དུ་
སར་པ་དང་རྙིང་པའི་འདུ་ཤེས་ཀྱང་རུང་འདུ་ཤེས་དང་སེམས་པ་དེ་དག་ལས་འབྱུང་སྟེ། ཐམས་ཅད་དུ་ཟད་པར་འདུ་ཤེས་པ་དང་དངོས་པོར་འདུ་ཤེས་པར་འགྱུར་རོ། །དེ་འདུ་བྱེད་ཐམས་ཅད་ལ་ཟད་པར་འདུ་ཤེས་པ་དང་། འཇིག་པར་འདུ་ཤེས་པ་དང་། འདོད་ཆགས་དང་བྲལ་བར་འདུ་ཤེས་པ་
དང་། འགོག་པ་ལ་དམིགས་པར་འདུ་ཤེས་པར་འགྱུར་རོ། །དེ་འདུ་བྱེད་ཐམས་ཅད་ཀྱི་སྔོན་གྱི་མཐའ་དང་ཕྱི་མའི་མཐའ་མཐོང་བས་ཐམས་ཅད་དུ་ཟད་པར་འདུ་ཤེས་པ་ཞེས་བྱ་བ་ནས་འགོག་པ་ལ་དམིགས་པར་འདུ་ཤེས་པའི་བར་དུ་འགྱུར་རོ། །སུས་དེ་ལྟར་འདུ་བྱེད་རྣམས་ལ་དམིགས་
པ་ཤིན་ཏུ་ཡོངས་སུ་སྦྱང་བ་བྱས་པར་གྱུར་པ་དེ་འདུ་བྱེད་ཐམས་ཅད་ལ་མི་བརྟན་པར་འདུ་ཤེས་པ་དང་། རབ་ཏུ་འཇིག་པར་འདུ་ཤེས་པ་དང་། ཡིད་མི་བརྟན་པར་འདུ་ཤེས་པ་དང་། མི་རྟག་པར་འདུ་ཤེས་པ་དང་། དངོས་པོ་མེད་པར་འདུ་ཤེས་པ་དང་། བདག་མེད་པར་འདུ་ཤེས་པར་འགྱུར་རོ། །དེ་ལྟ་བུར་

ཡང་དག་པར་བརྩོན་པའི་སེམས་དང་ལྡན་པ་དེ་ཡང་དག་པ་ཇི་ལྟ་བ་བཞིན་ཤེས་ནས་འདུ་བྱེད་ཐམས་ཅད་ལ་མངོན་པར་མི་དགའ་བར་འདུ་ཤེས་པར་འགྱུར་རོ། །དེ་བཞིན་དུ་ཡང་སོ་སོར་བརྟགས་པའི་འགོག་པ་ལ་དམིགས་པའམ་སོ་སོར་བརྟགས་པ་མ་ཡིན་པའི་འགོག་པ་ལ་དམིགས་པས་
དུས་གསུམ་ལ་རྗེས་སུ་སེམས་པར་བྱེད། ཀུན་ཏུ་སྦྱོར་བ་ཐམས་ཅད་སྤོང་བར་བྱེད། མཐོང་བ་རྣམ་པར་དག་པར་བྱེད། འཁོར་བའི་རྒྱུན་སྤོང་བར་བྱེད་ཅིང་ཡང་དག་པ་ཉིད་སྐྱོན་མེད་པར་ཞུགས་ནས་རྒྱུན་དུ་ཞུགས་པའི་འབྲས་བུ་ཐོབ་པར་བྱེད་དོ། །ཀཽ་ཌི་ནྱ་མཁས་པ་ནི་དེ་ལྟར་རྣམ་པ་ཐམས་
ཅད་དུ་འདུ་བྱེད་ཀྱི་འཇིག་རྟེན་ལ་མངོན་པར་མི་དགའ་བའི་འདུ་ཤེས་སྐྱེད་པར་བྱེད་དོ། །ཀཽ་ཌི་ནྱ་འདི་ནི་མངོན་པར་མི་དགའ་བའི་འདུ་ཤེས་ཀྱི་སྦྱོར་བའི་དམིགས་པའོ། །དེ་ལ་ཆོས་གོས་ལ་མི་འཐུན་པའི་འདུ་ཤེས་གང་ཞེ་ན། ཀཽ་ཌི་ནྱ་མཁས་པས་གང་གི་ཚེ་ཆོས་གོས་མཐོང་ངམ། རེག་གམ།
ཤམ་ཐབས་སུ་བྱེད་དམ། གྱོན་པར་བྱེད་དམ། བཞག་གམ། སྦས་ཀྱང་རུང་སྟེ་དེ་ཐམས་ཅད་དུ་འདི་ནི་མིའི་པགས་པའོ། །དེ་ལ་ཁྲག་གིས་བསྐུས་པའོ། །ཁྲག་འཛག་པའོ། །མཆོག་ཏུ་དྲི་མི་ཞིམ་པའོ། །ཐམས་ཅད་ཀྱིས་སྐྱོན་བགྲང་བར་བྱའོ། །སྲིན་བུ་དང་སྦྲང་བུས་གང་བའོ། །མཛངས་པ་
རྣམས་ཀྱིས་མངོན་པར་དགའ་བར་བྱ་བ་མ་ཡིན་པའོ་ཞེས་དེ་ལྟ་བུར་འདུ་ཤེས་པར་འགྱུར་རོ། །མཁས་པ་དེ་ལྟར་ཆོས་གོས་ལ་མངོན་པར་མི་དགའ་བའི་འདུ་ཤེས་སྐྱེད་དོ། །ཀཽ་ཌི་ནྱ་མཁས་པས་ཇི་ལྟར་ཟས་ལ་མི་འཐུན་པའི་འདུ་ཤེས་བསྐྱེད་པར་བྱ་ཞེ་ན། མཁས་པས་གང་ཟས་བླངས་
པར་གྱུར་ན་དེ་ཟས་འདི་ཡང་ནང་གྲོལ་ལོ། །སྐྲ་དང་པགས་པ་མེད་ཅིང་རྣག་དང་ཁྲག་གིས་བསྐུས་པ་སྲིན་བུ་དང་། སྦྲང་བུས་ཡོངས་སུ་བསྐོར་བའོ། །སྣོད་འདི་ནི་མི་མགོའི་ཐོད་པ་མཆོག་ཏུ་དྲི་ང་བ་སྐྱོན་དུ་བགྲང་བར་བྱའོ་ཞེས་དེ་ལྟ་བུར་འདུ་ཤེས་སྐྱེད་དེ། གལ་ཏེ་འབྲས་ཅན་ཞིག་ལེན་ན་མི་རོ་སྲིན་
བུས་གང་བའོ། །ཞེས་དེ་ལྟ་བུར་འདུ་ཤེས་པར་འགྱུར་རོ། །གལ་ཏེ་ཆུ་ཞིག་ལེན་ན་དེ་འདི་ནི་མིའི་ཁྲག་མཆོག་ཏུ་སྐྱོན་དུ་བགྲང་བར་བྱའོ་ཞེས་བྱ་བ་དང་། དེ་བཞིན་དུ་ཕྱེ་དག་ལ་འདི་ནི་མིའི་རུས་པའི་ཕྱེ་མའོ་ཞེས་བྱ་བ་དང་། དེ་བཞིན་དུ་ཁུར་སྐྱལ་འདི་ནི་མིའི་པགས་པའོ་ཞེས་དེ་ལྟར་འདུ་ཤེས་པར་འགྱུར་རོ། །

དེ་བཞིན་དུ་ཤ་ཁུ་དང་། ཐུག་པ་དང་། ཚོད་མ་དང་། སྲན་ཚོད་ཀྱང་རུང་སྟེ། དེ་ལ་འདི་ནི་མིའི་ཁྲག་གོ། །འདི་ནི་མིའི་ཀླད་པའོ་ཞེས་བྱ་བ་དང་། དེ་བཞིན་དུ་སྔ་སྔོ་ལ་འདི་ནི་མིའི་སྐྲའོ། །འདི་ནི་མིའི་སོའོ་ཞེས་བྱ་བ་དང་། དེ་བཞིན་དུ་ཤ་ལ་འདི་ནི་མིའི་ཤའོ་ཞེས་བྱ་བ་དང་། དེ་བཞིན་དུ་
ལི་ཁར་དང་། བུ་རམ་དང་། རྒུན་ཆང་དང་། བལ་པོ་སེའུའི་ཁུ་བ་ལ་འདི་ནི་མིའི་ཁྲག་གོ། །མིའི་ཀླད་པའོ། །མིའི་བད་ཀན་ནོ། །མིའི་རུས་པའི་རྐང་ངོ་ཞེས་བྱ་བ་དེ་ལྟ་བུར་འདུ་ཤེས་སྐྱེད་དེ། ཀཽ་ཌི་ནྱ་མཁས་པས་དེ་ལྟར་ཟས་ལ་མི་འཐུན་པའི་འདུ་ཤེས་བསྐྱེད་པར་བྱའོ། །ཀཽ་ཌི་ནྱ་མཁས་
པས་ཇི་ལྟར་ཁྱིམ་མམ། གནས་ཁང་ངམ། ཁང་པ་བརྩེགས་མར་འཇུག་པའི་ཚེ་འཇིགས་པའི་འདུ་ཤེས་བསྐྱེད་པར་བྱ་ཞེ་ན། གྲོང་ཁྱེར་ཆེན་པོ་སྒོ་བཞི་པ་འདིར་ཞུགས་པས་བདག་སྲེག་གོ། །འཇུག་པ་ན་ཤིང་ལ་མེར་འདུ་ཤེས་པ་དང་། འཇིམ་པ་ལ་མིའི་ཤར་འདུ་ཤེས་པ་དང་། རི་མོ་ལ་
མིའི་ཁྲག་ཏུ་འདུ་ཤེས་པ་དང་། མལ་ཆ་ལ་མིའི་པགས་པ་ཉིད་དུ་འདུ་ཤེས་པ་དང་། སྟན་ལ་མིའི་རུས་གོང་གི་ཕུང་པོ་འམ། མི་རོར་བྱིན་གྱིས་རློབ་པར་བྱེད་པ་དེ་ལྟ་བུར་འདུ་ཤེས་པ་འཇུག་པར་བྱའོ། །རྩིའི་རྣམ་པ་དེ་ལྟ་བུ་ལ་སོ་སོར་སྟེན་པར་བྱེད་པ་ན་ཡང་ཆོས་དེ་དག་ཡིད་ལ་བྱའོ། །
ཀཽ་ཌི་ནྱ་མཁས་པ་དེ་ལྟ་བུར་འདུ་ཤེས་པ་ནི་འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་ཐོབ་པར་འགྱུར་རོ། །སུ་འཇིག་རྟེན་ཐམས་ཅད་ལ་མངོན་པར་མི་དགའ་བར་འདུ་ཤེས་པར་འགྱུར་བ་དེ་ཡོན་ཏན་དང་ཕན་ཡོན་ཅི་ཐོབ་ཅེ་ན། དེ་རྗེས་སུ་འཐུན་པའི་བཟོད་པ་
གསུམ་ཐོབ་པར་འགྱུར་རོ། །གསུམ་གང་ཞེ་ན། སྨོན་པ་མེད་པ་དང་རྗེས་སུ་འཐུན་པའི་བཟོད་པ་དང་། སྟོང་པ་ཉིད་དང་རྗེས་སུ་འཐུན་པའི་བཟོད་པ་དང་། མཚན་མ་མེད་པ་དང་རྗེས་སུ་འཐུན་པའི་བཟོད་པའོ། །འཇིག་རྟེན་གྱི་བཟོད་པ་གསུམ་པོ་དེ་དག་ཐོབ་པས་ཕན་ཡོན་ཐོབ་པར་བྱེད་
དེ། དེའི་སེམས་སྟོང་པ་ཉིད་ཀྱི་ལྟ་བ་ལ་འཇུག་པར་བྱེད་དོ། །དེ་སྐྱེ་བ་དང་འཇིག་པའི་ཚུལ་གྱིས་མངོན་པར་འདུ་བྱེད་པ་མེད་པ་ལ་ཡིད་འཇུག་པར་བྱེད་དོ། །དེ་ཕུང་པོའི་རང་བཞིན་ལ་མི་རྟག་པ་དང་། སྡུག་བསྔལ་བ་དང་། སྟོང་པ་ཉིད་དང་བདག་མེད་པའི་སྟོང་པ་ཉིད་ཡང་དག་པར་རྗེས་སུ་མཐོང་

ངོ་། །ཁམས་རྣམས་ཞེས་བྱ་བ་ནས་སྐྱེ་མཆེད་རྣམས་ཞེས་བྱ་བའི་བར་ཡང་དག་པར་རྗེས་སུ་མཐོང་ངོ་། །བདེན་པ་རྣམས་ཞེས་བྱ་བའི་བར་དང་། རྟེན་ཅིང་འབྲེལ་བར་འབྱུང་བ་ཞེས་བྱ་བའི་བར་ལ་ཆོས་ཐམས་ཅད་ཀྱི་རང་བཞིན་དང་མི་རྟག་པ་ཉིད་ཡང་དག་པར་རྗེས་སུ་མཐོང་ངོ་། །སྡུག་
བསྔལ་ཉིད་དང་བདག་མེད་པ་ཉིད་ཀྱི་སྟོང་པ་ཉིད་ཡང་དག་པར་རྗེས་སུ་མཐོང་ངོ་། །དེ་རྒྱུན་དུ་ཞུགས་པའི་འབྲས་བུ་འཐོབ་བོ་ཞེས་བྱ་བ་ནས་དགྲ་བཅོམ་པ་ཉིད་ཀྱི་བར་འཐོབ་སྟེ། ཀཽ་ཌི་ནྱ་འདི་ནི་མི་སློབ་པའི་རྣམ་པར་གྲོལ་བ་མཉམ་པར་གཞག་པའོ། །ཀཽ་ཌི་ནྱ་འཇིག་རྟེན་ཐམས་
ཅད་ལ་མངོན་པར་མི་དགའ་བའི་འདུ་ཤེས་འདི་ནི་སེམས་ཅན་རྣམས་ཀྱི་གཅེས་སྤྲས་བྱེད་པའོ། །འདོད་པའི་འདོད་ཆགས་ཐམས་ཅད་ཡང་དག་པར་སྤོང་བར་བྱེད་པའོ། །གཟུགས་ཀྱི་འདོད་ཆགས་ཐམས་ཅད་དང་། གཟུགས་མེད་པའི་འདོད་ཆགས་ཐམས་ཅད་ཡང་དག་པར་སྤོང་
བར་བྱེད་པའོ། །ང་རྒྱལ་དང་། རྒོད་པ་དང་། ཐེ་ཙོམ་དང་། མ་རིག་པའི་མུན་པ་ཐམས་ཅད་སྤོང་བར་བྱེད་པའོ། །ལྷག་མ་མེད་པའི་སའི་བར་ལ་འཇོག་པར་བྱེད་པའོ། །དོན་ཐམས་ཅད་ཡོངས་སུ་རྫོགས་པ་སྨོན་པ་མེད་པ་དང་རྗེས་སུ་འཐུན་པའི་གཟུངས་སྔགས་དེ་བཞིན་གཤེགས་
པ་ཡེ་ཤེས་དཔལ་བརྩེགས་རྒྱལ་པོས་གང་ང་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སྣང་བ་དཔལ་གྱི་སྙིང་པོའི་ལག་ནས་བསྐུར་ཞིང་། འདུས་པ་ཆེན་པོ་འདི་ལ་ངས་བཤད་པ་ལ་དད་པ་སྦྱིན་པར་མཛད་པ་འདི་ནི་མཐུ་ཆེ་བ་ཕན་ཡོན་ཆེ་བའོ། །འདོད་པའི་འདོད་ཆགས་ཐམས་
ཅད་དང་གཟུགས་ཀྱི་འདོད་ཆགས་ཐམས་ཅད་དང་། གཟུགས་མེད་པའི་འདོད་ཆགས་ཐམས་ཅད་ཡང་དག་པར་ཟད་པར་བྱེད་པའོ། །ང་རྒྱལ་ཐམས་ཅད་ཡང་དག་པར་ཟད་པར་བྱེད་པའོ། །ཟད་པ་ཤེས་པ་དང་མི་སྐྱེ་བ་ཤེས་པའི་བར་དུ་བྱེད་པའོ། །མི་སྐྱེ་བའི་ཡེ་ཤེས་མཐོང་བར་
བྱེད་པའོ། །མ་རིག་པའི་མུན་པའི་ཕུང་པོ་ཐམས་ཅད་རབ་ཏུ་འཇོམས་པར་བྱེད་པའོ། །རྣམ་པར་འཇིག་པར་བྱེད་པའོ། །སྡུག་བསྔལ་གྱི་ཁུར་ཐམས་ཅད་འདོར་བར་བྱེད་པའོ། །བདུད་རྣམས་ཚར་གཅོད་པར་བྱེད་པའོ། །ཕས་ཀྱི་རྒོལ་བ་རྣམས་ཕམ་པར་བྱེད་པའོ། །ལྷ་རྣམས་

ཐམས་ཅད་དགའ་བར་བྱེད་པའོ། །གནོད་སྦྱིན་ཐམས་ཅད་མགུ་བར་བྱེད་པའོ། །ལྷ་མ་ཡིན་རྣམས་རྣམ་པར་འཇོམས་པར་བྱེད་པའོ། །ནམ་མཁའ་ལྡིང་རྣམས་དངང་བར་བྱེད་པའོ། །མི་འམ་ཅི་རྣམས་དད་པར་བྱེད་པའོ། །ལྟོ་འཕྱེ་ཆེན་པོ་རྣམས་དངང་བར་བྱེད་པའོ། །
ཕས་ཀྱི་རྒོལ་བ་རྣམས་ངེས་པར་ཐུལ་བར་བྱེད་པའོ། །རྒྱལ་རིགས་རྣམས་མངོན་པར་དད་པར་བྱེད་པའོ། །བྲམ་ཟེ་རྣམས་འཇུག་པར་བྱེད་པའོ། །རྗེའུ་རིགས་རྣམས་དགའ་བར་བྱེད་པའོ། །དམངས་རིགས་རྣམས་མཆོག་ཏུ་དགའ་བར་བྱེད་པའོ། །བུད་མེད་རྣམས་འདོད་ཆགས་དང་བྲལ་
བར་བྱེད་པའོ། །མང་དུ་ཐོས་པ་རྣམས་སྐྱོ་བར་བྱེད་པའོ། །རྣལ་འབྱོར་སྤྱོད་པ་རྣམས་མངོན་པར་དགའ་བར་བྱེད་པའོ། །འཇིག་རྟེན་ཐམས་ཅད་རབ་ཏུ་ཞི་བར་བྱེད་པའོ། །འཐབ་པ་དང་། ཐབ་མོ་དང་། མུ་གེ་དང་། ནད་དང་། དུས་མ་ཡིན་པའི་ཕ་རོལ་གྱི་དམག་ཚོགས་དང་། དུས་མ་ཡིན་
པའི་རླུང་དང་། ཆར་པ་དང་། ཆུ་བོ་དང་། གྲང་བ་དང་། དྲོ་བ་དང་། ཁ་བ་དང་། ཚ་བ་དང་། རྩུབ་པ་དང་། རོ་མི་བྲོ་བ་དང་། རེག་པར་དཀའ་བའི་དངོས་པོ་ཐམས་ཅད་རྣམ་པར་ཞི་བར་བྱེད་པའོ། །ཆོས་ཀྱི་ཚུལ་འབར་བར་བྱེད་པའོ། །དཀོན་མཆོག་གསུམ་གྱི་གདུང་རྒྱུན་མི་འཆད་པར་བྱེད་པའོ། །
སངས་རྒྱས་ཀྱི་བསྟན་པ་སྟོན་པར་བྱེད་པའོ། །འཁོར་བས་སྐྲག་པ་རྣམས་དབུགས་འབྱིན་པར་བྱེད་པ་སྟེ། འདི་ནི་སྨོན་པ་མེད་པ་དང་། རྗེས་སུ་འཐུན་པའི་གཟུངས་སྔགས་ཡིན་ནོ། །བསྟན་པ་འདི་བཤད་པ་ན་སེམས་ཅན་ལྷ་དང་མི་གྲངས་མེད་དཔག་ཏུ་མེད་པ་ནི་ཆོས་རྣམས་ལ་ཆོས་ཀྱི་
མིག་རྡུལ་མེད་ཅིང་དྲི་མ་དང་བྲལ་བ་ཐོབ་པར་གྱུར་ཏོ། །དཀྲིགས་ཕྲག་དགུ་བཅུ་རྩ་བརྒྱད་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེའི་ཚེ་ཁྲི་ཕྲག་བརྒྱད་ནི་སྨོན་པ་མེད་པ་དང་རྗེས་སུ་འཐུན་པའི་གཟུངས་སྔགས་འདི་ཐོབ་པར་གྱུར་ཏོ། །དེའི་ཚེ་སེམས་ཅན་
གྲངས་མེད་དཔག་ཏུ་མེད་པས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ཅིང་ཕྱིར་མི་ལྡོག་པར་གྱུར་ཏོ། །དེའི་ཚེ་འབུམ་ཕྲག་ལྔ་བཅུ་རྩ་བརྒྱད་ནི་མི་སྐྱེ་བའི་ཆོས་རྣམས་ལ་བཟོད་པ་ཐོབ་པར་གྱུར་ཏོ། །ལྷ་དང་། ཀླུ་དང་། གནོད་སྦྱིན་དང་། སྲིན་པོ་དང་། ལྷ་མ་ཡིན་དང་། ནམ་མཁའ་ལྡིང་དང་།

མི་འམ་ཅི་དང་། ལྟོ་འཕྱེ་ཆེན་པོ་དང་། ཡི་དགས་དང་། ཤ་ཟ་དང་། གྲུལ་བུམ་དང་། མི་དང་། མི་མ་ཡིན་པ་ཐམས་ཅད་ཀྱིས་ལེགས་སོ་ཞེས་བྱ་བ་གསོལ་ཏེ། བཙུན་པ་བཅོམ་ལྡན་འདས་ལེགས་སོ་ལེགས་སོ། །སངས་རྒྱས་བཅོམ་ལྡན་འདས་རྣམས་ཀྱི་ཐོགས་པ་མ་མཆིས་པའི་ཡེ་ཤེས་གཟིགས་
པ་ནི་ངོ་མཚར་ལགས་སོ། །མཆོག་ཏུ་ངོ་མཚར་ལགས་སོ། །བཙུན་པ་བཅོམ་ལྡན་འདས་འདི་ལྟར་དེ་བཞིན་གཤེགས་པ་རྣམས་སེམས་ཅན་ཐམས་ཅད་ཀྱི་བསམ་པ་མཁྱེན་པ་ལགས་སོ། །དབང་པོ་ལ་མཁས་པའི་ཕ་རོལ་ཏུ་ཕྱིན་པ་ལགས། སེམས་ཅན་ཐམས་ཅད་ལ་ཆོས་ཀྱི་རོས་ཚིམ་པར་
མཛད་པ་ལགས། འཕགས་པའི་ལམ་ཡན་ལག་བརྒྱད་པ་སྟོན་པར་མཛད་པ་ལགས། སྡུག་བསྔལ་ཐམས་ཅད་ཉེ་བར་ཞི་བར་མཛད་པ་ལགས་པས་སུ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འདི་ལ་དད་པ་མི་སྐྱེད་པ་ལགས། ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་
མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་རྣམས་ཀྱིས་ཐལ་མོ་རབ་ཏུ་སྦྱར་ནས་མགྲིན་གཅིག་ཏུ་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་གང་དང་གང་དུ་བདེན་པ་དང་རྗེས་སུ་འཐུན་པའི་གཟུངས་སྔགས་འདི་བསྟན་པ་ཐ་ན་གླེགས་བམ་དུ་ཆུད་པ་ལ་ཡང་རུང་སྟེ། དེ་
དང་དེར་བདག་ཅག་གིས་བརྩོན་པ་ལྷུར་བླང་བའི་ཐབས་ཐམས་ཅད་ཀྱིས་བཀུར་སྟིར་བགྱིའོ། །རི་མོར་བགྱིའོ། །མཆོད་པར་བགྱིའོ། །ཆོས་སྨྲ་བ་དང་ཆོས་ཉན་པ་དེ་དག་དང་། གནས་དེ་དག་ལ་སླར་རྒོལ་བ་ཐམས་ཅད་ཀྱིས་མི་རྫི་བར་ཡོངས་སུ་བསྐྱང་བར་བགྱིའོ། །བསྲུང་བར་
བགྱིའོ། །སྦ་བར་བགྱིའོ། །ནོར་གྱི་ཕུང་པོ་ཐམས་ཅད་ཀྱིས་མི་ཕོངས་པར་བགྱིའོ། །རྟག་པར་སྣོད་དུ་གྱུར་ཅིང་སྦྱིན་གནས་སུ་གྱུར་ལ། ཚོགས་པ་རྣམས་ནད་མ་མཆིས་པ་དང་། ལོངས་སྤྱོད་དང་ཉེ་བར་སྤྱོད་པས་དགའ་ཞིང་རྩེ་སྟེ། མཆོག་ཏུ་དགའ་བ་མང་ལ་ཆོས་འཚལ་ཞིང་ཆོས་ཀྱིས་
གནས་པ་དག་དང་། ཆོས་རྗེས་སུ་བསྲུང་བར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། ཁྱེད་གང་དག་ཆོས་ཀྱི་ཚུལ་དང་དཀོན་མཆོག་གསུམ་གྱི་གདུང་རྒྱུན་མི་གཅད་པར་བྱ་བའི་ཕྱིར་ཞུགས་པ་ནི་སངས་རྒྱས་ཀྱི་བསྟན་པ་ལ་སྦྱིན་བདག་ཁྱེད་ལེགས་སོ་ལེགས་སོ།། །།

འཕགས་པ་ཤིན་ཏུ་རྒྱས་པ་ཆེན་པོའི་སྡེ་ཉི་མའི་སྙིང་པོ་ཞེས་བྱ་བའི་མདོ། བམ་པོ་བརྒྱད་པ། ཡང་དེའི་ཚེ་ཚེ་དང་ལྡན་པ་ཤཱ་རིའི་བུས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་རབ་ཏུ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་
ཏོ། །བཙུན་པ་བཅོམ་ལྡན་འདས་དེ་བཞིན་གཤེགས་པ་དཔལ་མེ་ཏོག་གི་སྙིང་པོ་དེས་གང་བྱང་ཆུབ་སེམས་དཔའ་ནམ་མཁའི་སྙིང་པོའི་ལག་ནས་འདིར་ཡིད་ལ་བྱེད་པ་བསྐུར་ཞིང་། ལུང་བསྟན་པ་ཆེན་པོ་ཉི་མའི་སྙིང་པོ་ལ་དད་པ་སྦྱིན་པར་མཛད་པ། རིག་པ་མཆིས་
པའི་སྦུབས་ཞི་བ་སྡང་བ་གཉིད་ཀྱིས་ལོག་པར་བགྱིད་པའི་གཟུངས་སྔགས་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་ལྷ་དང་བཅས་པའི་འཇིག་རྟེན་གྱི་མདུན་དུ་བཤད་པར་བྱའོ། །ཤཱ་རིའི་བུ་དེའི་ཕྱིར་ཁྱོད་ཉོན་ལ་ཞེས་བྱ་བ་ནས་བཅོམ་
ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ་ཞེས་བྱ་བའི་བར་དུའོ། །ཤཱ་རིའི་བུ་འདི་ལྟར་དེ་བཞིན་གཤེགས་པ་དཔལ་མེ་ཏོག་གི་སྙིང་པོ་དེ་དེ་ལྟ་བུའི་ཐག་རིང་པོ་ནས་འདིར་ཁྱེད་ཀྱི་བསམ་པ་དང་བག་ལ་ཉལ་བ་མཁྱེན་ནས་འདིར་སངས་རྒྱས་ཀྱི་ཞིང་འདི་ན་
ཁྱེད་བདག་ཏུ་འདུ་ཤེས་པ་དང་། སེམས་ཕྱིན་ཅི་ལོག་པ་དང་། འཁོར་བའི་འདམ་ལ་ཀུན་ཏུ་རྨོངས་པ་དང་། ལམ་ཡན་ལག་བརྒྱད་པ་ལ་རྣམ་པར་རྨོངས་པས་གཟུངས་སྔགས་དེ་ལྟ་བུ་འདིར་བསྐུལ་བ་ཡིན་ནོ། །ཇི་ལྟར་བདག་མེད་པ་ཡིན་ཡང་འོན་ཀྱང་འདི་ན་
སེམས་ཅན་བྱིས་པ་རྣམས་བདག་ཡོངས་སུ་བཙལ་བར་སེམས་ཕྱིན་ཅི་ལོག་པ་དག་ཡིན་ནོ། །ཤཱ་རིའི་བུ་མཁས་པ་ཇི་ལྟར་བདག་ཡོངས་སུ་ཚོལ་བར་བྱེད་ཅེ་ན། ཇི་ལྟར་བདག་མེད་པ་བཞིན་དུ་བདག་ཉིད་ཀྱིས་མངོན་སུམ་དུ་འགྱུར་རོ། །ཤཱ་རིའི་བུ་མཁས་པས་འདི་
ལ་འདི་ལྟར་བདག་ཡོངས་སུ་བཙལ་བར་བྱ་སྟེ། སེམས་ཅན་འདི་རྣམས་ནི་རང་གི་ལུས་ལ་བདག་ཏུ་འདུ་ཤེས་པ་དག་ཡིན་པས་ལུས་འདི་ཉིད་ལ་ཚུལ་བཞིན་དུ་སོ་སོར་བརྟག་པར་བྱའོ། །ཇི་ལྟར་ཞེ་ན། དབང་པོ་ཁོ་ནར་མིག་ལ་སོ་སོར་བརྟག་པར་བྱའོ། །འདི་ལྟར་ཡང་

དག་པར་བརྟག་པར་བྱ་སྟེ། འདི་ལྟར་གནས་མལ་སྣ་ཚོགས་ལ་སྐྱིལ་མོ་ཀྲུང་དུ་འདུག་ནས་དབང་པོ་ཐམས་ཅད་བསྡམས་པའི་རང་གི་སེམས་ཀྱིས་འདི་ལྟར་བརྟག་པར་བྱའོ། །བདག་གི་མིག་གཡས་པ་འདི་ནི་འབྱུང་བ་ཆེན་པོ་བཞི་ལས་གྱུར་པ། རྒྱུས་པས་འབྲེལ་
པ་ཆུས་གང་བ་ཡིན་ཏེ། སྒྱུར་བར་བྱེད་པ་གཞན་གང་ཡང་མེད་ཀྱི་རླུང་རྣམས་ཡིན་ནོ། །གང་དག་མིག་གི་དབང་པོར་ཞུགས་ནས་སྐོར་བར་བྱེད་ཅིང་སྒྱུར་བར་བྱེད་པ་དེ་དག་ཀྱང་རླུང་རྣམས་སོ། །ཡོངས་སུ་སྦྱོང་བར་བྱེད་ཅིང་འབྱུང་བར་བྱེད་པ་དེ་དག་ནི་ནམ་མཁའ་
ལ་རྟེན་པ་དག་གོ། །ནམ་མཁའ་དེ་ཡང་གཟུང་བ་མེད་པ། བརྗོད་དུ་མེད་པ། བདག་མེད་པའོ། །ཇི་ལྟར་ནམ་མཁའ་བདག་མེད་པ་དེ་བཞིན་དུ་རླུང་དེ་དག་ཀྱང་བདག་མེད་པའོ། །གང་དག་མིག་གི་དབང་པོ་ལ་འཇུག་ཅིང་སྐོར་བར་བྱེད། སྒྱུར་བར་བྱེད། ཡོངས་སུ་སྦྱོང་
བར་བྱེད། འབྱུང་བར་བྱེད་པ་དེ་དག་ཀྱང་གཟུང་བ་མེད་པ། བརྗོད་དུ་མེད་པ། བདག་མེད་པ། དམིགས་པ་དང་བྲལ་བ་དག་གོ། །དེ་བཞིན་དུ་གང་མིག་གི་དབང་པོ་ལ་སའི་ཁམས་སྲ་བ་ཉིད་ཤིང་ནྱ་གྲོ་དྷའི་ས་བོན་ཙམ་ཡོད་པ་ཡང་མིག་ཐམས་ཅད་ལ་ཚུལ་བཞིན་དུ་
ཡིད་ལ་བྱེད་པ་སྐྱེ་བས་སོ་སོར་བརྟགས་ནས་དེ་བདག་ཏུ་མི་དམིགས་སོ། །དེ་ལ་བདག་ཉིད་ཀྱིས་ནེམ་ནུར་མེད་པར་འགྱུར་རོ། །དེ་ལ་སའི་ཁམས་ལ་བདག་མེད་དེ། ཁམས་དེ་ཡང་གཟུང་བ་མེད་པ་བདག་མེད་པར་དམིགས་སོ། །དེ་བཞིན་དུ་དེ་ལ་ཆུའི་ཁམས་ལ་སོ་སོར་
རྟོག་པར་བྱེད་དོ་ཞེས་བྱ་བ་ནས་དེ་བཞིན་དུ་མེའི་ཁམས་ཀྱི་བར་ལ་སོ་སོར་རྟོག་པར་བྱེད་དོ། །དེ་ལྟར་མིག་གི་བར་ལ་སོ་སོར་བརྟགས་པས་མིག་གི་འབྱུང་བ་ཆེན་པོ་རྣམས་ལ་བདག་མེད་པར་བདག་ཉིད་ཁོ་ནས་ནེམ་ནུར་མེད་པར་འགྱུར་རོ། །དེ་འདི་སྙམ་དུ་ཡང་སེམས་
ཏེ། མིག་དང་གཟུགས་ལ་བརྟེན་ནས་རེག་པའི་བདག་ཏུ་གྱུར་ན་མི་རུང་ངོ་སྙམ་ནས་དེ་རླུང་དེ་ཡང་ནམ་མཁའི་ངོ་བོར་ཡང་ཚུལ་བཞིན་དུ་སོ་སོར་བརྟགས་ཏེ་དེ་ཐམས་ཅད་དུ་གང་དུ་ཡང་བདག་མི་དམིགས་སོ། །བརྟེན་ནས་རྣམ་པར་ཤེས་པ་འབྱུང་བ་ཡང་རྐྱེན་རྣམས་མེད་ན་མི་འབྱུང་སྟེ། མིག་དང་

གཟུགས་ལ་རྟེན་ཅིང་མིག་གི་རྣམ་པར་ཤེས་པ་འབའ་ཞིག་འབྱུང་ཞིང་གཟུགས་རྣམས་ཀྱི་རྐྱེན་གྱིས་འབྱུང་ངོ་། །གྲོགས་རྣམ་པར་ཤེས་པས་མིང་དང་གཟུགས་སོ། །དེ་ལས་བྱུང་བའི་སྐྱེ་མཆེད་དྲུག་ལས་རེག་པ་དང་། ཚོར་བ་མྱོང་བ་དང་།
སྲེད་པ་ལྷག་པར་ཆགས་པ་དང་། ལེན་པ་དང་། སྲིད་པ་དང་། སྐྱེ་བ་དང་། རྒ་ཤིའོ། །དེས་ཆོས་འདི་དག་ཐམས་ཅད་ནི་མིག་གི་རྣམ་པར་ཤེས་པ་ལ་ཡང་དག་པར་བརྟེན་པའོ། །མིག་གི་རྣམ་པར་ཤེས་པ་དེ་ཡང་ཤར་ཕྱོགས་ནས་འོངས་པ་མ་ཡིན། ལྷོ་
ཕྱོགས་ནས་མ་ཡིན། ནུབ་ཕྱོགས་ནས་མ་ཡིན། བྱང་ཕྱོགས་ནས་མ་ཡིན། སྟེང་ནས་མ་ཡིན། འོག་ནས་མ་ཡིན་ཏེ། སྐད་ཅིག་མ་གང་ལ་མིག་གི་རྣམ་པར་ཤེས་པ་བྱུང་བའི་སྐད་ཅིག་དེ་ཡང་འགགས་སོ། །སྐད་ཅིག་མ་གཉིས་ལ་ཉེ་བར་མི་གནས་
ཏེ། འགགས་པས་གང་དུ་ཡང་འགྲོ་བ་མེད་དོ། །བསགས་པ་མེད་དོ། །ཆོས་དེ་དག་དང་འདི་དག་ཐམས་ཅད་ནི་རྐྱེན་ལས་འབྱུང་བར་སྐྱེའོ། །རྐྱེན་མ་ཚང་བས་འགག་གོ། །གང་རྐྱེན་ལ་རག་ལས་པ་དེ་བདག་མེད་དོ། །རྐྱེན་དེ་དག་ཀྱང་བྱེད་པ་པོ་མེད་པ།
ཚོར་བ་པོ་མེད་པ། སློང་བ་པོ་མེད་པ། ཀུན་ནས་སློང་བ་པོ་མེད་པའོ། །དེ་བདག་མེད་པ་ཡིན་ཏེ། གང་བདག་མེད་པ་དེ་བདག་དང་བདག་གིས་སྟོང་པའོ། །དེ་ཅིའི་ཕྱིར་ཞེ་ན། མིག་གི་རང་བཞིན་དེ་ཡིན་པའི་ཕྱིར་ཏེ། ཐེར་ཟུག་ཏུ་གནས་པ་མ་ཡིན་པ་དང་།
འཇིག་པ་མེད་པའི་ཕྱིར་དེ་ལ་བདག་གམ་བདག་གི་མེད་དོ་སྙམ་མོ། །འདི་ལ་ཇི་ལྟར་ཆོས་ཐམས་ཅད་ལེན་པ་མེད་པ་དང་། འདོར་བ་མེད་པ་དང་། ཉན་ཐོས་རྣམས་ཀྱིས་བྱས་པ་མ་ཡིན་པ་དང་། རང་རྒྱལ་བ་རྣམས་ཀྱིས་མ་ཡིན་པ་དང་། དེ་བཞིན་གཤེགས་པ་རྣམས་
ཀྱིས་མཛད་པ་མ་ཡིན་ཏེ། ངོ་བོ་ཉིད་ཐམས་ཅད་ཀྱི་མིག་བདག་མེད་པའོ། །གང་བདག་མེད་པ་དེ་སྟོང་པའོ། །མི་དམིགས་པའི་ཚུལ་གྱིས་ཆོས་ཐམས་ཅད་སྟོང་པའོ། །དེ་བཞིན་དུ་མཚན་མ་མེད་པའི་རྣམ་པར་ཐར་པའི་སྒོའི་བར་དུ་བསྒོམས་པས་ཆགས་པའི་གཞི་

སྤོང་བར་འགྱུར་ཞིང་དེའི་རྒྱུ་ལས་བྱུང་བ་ཉོན་མོངས་པ་ཐམས་ཅད་ཀྱང་སྤོང་བར་འགྱུར་རོ། །དེའི་ཚེ་ཁ་ཅིག་ནི་བདེན་པ་དང་པོ་མངོན་པར་རྟོགས་པར་འགྱུར་རོ། །ཁ་ཅིག་ནི་བདེན་པ་བཞི་པའི་བར་མངོན་པར་རྟོགས་པར་འགྱུར་རོ། །རྣ་བ་ཞེས་བྱ་བ་ནས་སྣ་དང་ལྕེའི་བར་ལ་ཡང་
དེ་བཞིན་ནོ། །ཡང་དེ་ལུས་ཐམས་ཅད་ལ་ཚུལ་བཞིན་དུ་ཡིད་ལ་བྱེད་པས་སོ་སོར་རྟོག་པར་བྱེད་དེ། ཁ་ཅིག་ནི་དང་པོར་སྤུ་གཅིག་ལ་ལྔ་བཅུར་རྣམ་པར་བཅད་དེ། བཅུར་བཤིག་པ་ལའོ། །གང་དག་རྟེན་པའི་སྤུ་ཐམས་ཅད་ལ་ཡང་དེ་བཞིན་ཏེ། དེ་ལ་བདག་ཉིད་
ཀྱིས་ནེམ་ནུར་མེད་པར་འགྱུར་རོ། །སྤུ་གང་ལ་ཡང་བདག་མི་དམིགས་སོ། །མདོག་གི་པགས་པ་དང་། ཤ་དང་། ཁྲག་དང་། བད་ཀན་དང་། རྒྱུས་པ་དང་། རྒྱུ་མ་དང་། ཀླད་པ་དང་། རུས་པ་དང་། རྐང་དང་། དྲོ་བ་ཉིད་ལ་ཡང་དེ་བཞིན་ནོ། །རླུང་
གྱེན་དུ་རྒྱུ་བ་དག་དང་། ཐུར་དུ་རྒྱུ་བ་དག་དང་། བླང་བ་མེད་པ་དང་། དོར་བ་མེད་པའི་རླུང་རྣམས་ལ་ཡང་དེ་བཞིན་དུ་ཇི་ལྟར་སྔར་བཤད་པ་བཞིན་དུ་དམིགས་པ་ཡིད་ལ་བྱེད་པ་སྟེ། ལུས་འདི་ལ་དེ་ལྟར་སོ་སོར་རྟོག་པར་བྱེད་དོ། །སེམས་ཀྱི་བར་ལ་ཚུལ་བཞིན་དུ་ཡིད་
ལ་བྱེད་པས་དེ་ལྟར་སོ་སོར་རྟོག་པར་བྱེད་དོ། །ཇི་ལྟ་ཞེ་ན། ཡིད་ལ་རྟེན་ལ་ཆོས་རྣམས་ལ་ཡང་རྟེན་ཅིང་ཡིད་འབྱུང་ངོ་། །གྲོགས་རྣམ་པར་ཤེས་པས་མིང་དང་། གཟུགས་དང་། སྐྱེ་མཆེད་དང་། འདུས་པའི་རེག་པ་དང་། ཚོར་བ་མྱོང་བ་དང་། སྲེད་པ་ལྷག་པར་
ཆགས་པ་ཉིད་དང་། ལེན་པ་དང་། སྲིད་པ་དང་། སྐྱེ་བ་དང་། རྒ་ཤིའོ། །ཆོས་འདི་དག་ཐམས་ཅད་ནི་ཡིད་ཀྱི་རྣམ་པར་ཤེས་པ་ལ་ཡང་དག་པར་རྟེན་ནས་འབྱུང་ངོ་། །ཡིད་ཀྱི་རྣམ་པར་ཤེས་པ་དེ་ཡང་ཤར་ཕྱོགས་ནས་འོངས་པ་མ་ཡིན་ནོ་ཞེས་བྱ་བ་ནས་འོག་ནས་
འོངས་པ་མ་ཡིན་ནོ་ཞེས་བྱ་བའི་བར་ཡིན་ཏེ། སྐད་ཅིག་མ་གང་ཁོ་ན་ལ་རྐྱེན་གྱི་འདུ་འཕྲོད་ཀྱི་རྒྱུས་ཡིད་ཀྱི་རྣམ་པར་ཤེས་པ་བྱུང་བའི་སྐད་ཅིག་དེ་ཡང་འགག་གོ། །སྐད་ཅིག་མ་གཉིས་པ་ལ་ཉེ་བར་མི་གནས་ཏེ། འགགས་པ་གང་དུ་ཡང་འགྲོ་བ་མེད་དོ། །བསགས་

པ་མེད་དོ། །ཆོས་འདི་དག་ཐམས་ཅད་ནི་རྐྱེན་ལས་ཡང་དག་པར་བྱུང་བར་སྐྱེའོ། །རྐྱེན་མ་ཚང་བས་འགག་གོ། །ཐམས་ཅད་རྐྱེན་ལ་རག་ལས་པ་ཡིན་ཏེ། དེ་དག་བདག་མེད་དོ། །རྐྱེན་དེ་ཡང་བྱེད་པ་པོ་དང་། ཚོར་བ་པོ་དང་། སློང་བ་པོ་དང་། ཀུན་
ནས་སློང་བ་པོ་མི་དམིགས་པ་ཉིད་པས་དེས་ན་དེ་དག་བདག་མེད་པ་ཡིན་ཏེ། གང་བདག་མེད་པ་དེ་བདག་དང་བདག་གིས་སྟོང་པའོ། །དེ་ཅིའི་ཕྱིར་ཞེ་ན། ཡིད་ཀྱི་རང་བཞིན་དེ་ཡིན་པའི་ཕྱིར་ཏེ། ཐེར་ཟུག་ཏུ་གནས་པ་མ་ཡིན་པ་དང་། འཇིག་པ་མེད་པའི་ཕྱིར་དེ་ལ་
བདག་གམ་བདག་གི་མེད་དོ་སྙམ་མོ། །ཆོས་ཐམས་ཅད་སྐྱེ་བ་དང་འཇིག་པའི་ཆོས་ཉིད་ཡིན་ཏེ། འདི་ལ་ལེན་པ་མེད་དོ། །འདོར་བ་མེད་དོ། །དེ་ཉན་ཐོས་རྣམས་ཀྱིས་བྱས་པ་མ་ཡིན་ནོ། །རང་སངས་རྒྱས་རྣམས་ཀྱིས་མ་ཡིན་ནོ། །དེ་བཞིན་གཤེགས་པ་རྣམས་
ཀྱིས་མཛད་པ་མ་ཡིན་ཏེ། རང་བཞིན་དང་ངོ་བོ་ཉིད་ཀྱིས་ཡིད་བདག་མེད་པའོ། །གང་བདག་མེད་པ་དེ་སྟོང་པའོ། །མི་དམིགས་པའི་ཚུལ་གྱིས་ཆོས་ཐམས་ཅད་བདག་མེད་པའོ། །གང་བདག་མེད་པ་དེ་སྟོང་པའོ། །དེ་བཞིན་དུ་མཚན་མ་མེད་པའི་རྣམ་པར་ཐར་
པའི་སྒོའི་བར་དུ་བསྒོམས་པས་ཆགས་པའི་གཞི་རྣམས་སྤོང་བར་འགྱུར་ཞིང་དེའི་རྒྱུ་ལས་བྱུང་བ་ཉོན་མོངས་པ་རྣམས་སྤོང་བར་འགྱུར་རོ། །དེའི་ཚེ་ཁ་ཅིག་ནི་བདེན་པ་དང་པོ་མངོན་པར་རྟོགས་པར་འགྱུར་རོ། །ཁ་ཅིག་ནི་བདེན་པ་བཞི་པའི་བར་མངོན་པར་རྟོགས་པར་འགྱུར་
རོ། །མཁས་པས་འདིར་དེ་ལྟར་བདག་ཡོངས་སུ་བཙལ་ནས་མི་དམིགས་པའི་ཕྱིར་ཇི་ལྟར་བདག་མེད་པ་བཞིན་རང་གི་མངོན་སུམ་དུ་འགྱུར་རོ། །ཤཱ་རིའི་བུ་མཁས་པ་སྟོང་པ་ཉིད་ཀྱིས་གནས་པས་གནས་ཤིང་སྨོན་པ་མེད་པ་དང་། མཚན་མ་མེད་པའི་གནས་པས་
གནས་ནས་དབང་པོ་བརྒྱ་བྱིན་ཐམས་ཅད་ཀྱིས་ཕྱག་བྱ་བའི་འོས་སུ་གྱུར་པ་དང་། མཆོད་པའི་འོས་སུ་གྱུར་པ་དང་། མངོན་པར་སྲུང་བའི་འོས་སུ་གྱུར་པ་དང་། རྗེས་སུ་དྲན་པར་བྱ་བའི་འོས་སུ་གྱུར་པ་དང་། དད་པར་བྱ་བའི་འོས་སུ་གྱུར་པ་ཡིན་ནོ། །དབང་པོ་ཚངས་

པ་ཞེས་བྱ་བ་ནས་ལྷའི་དབང་པོ་ཞེས་བྱ་བའི་བར་དང་། ཀླུའི་དབང་པོ་དང་། གནོད་སྦྱིན་གྱི་དབང་པོ་དང་། ལྷ་མ་ཡིན་གྱི་དབང་པོ་དང་། ནམ་མཁའ་ལྡིང་གི་དབང་པོ་དང་། མི་འམ་ཅིའི་དབང་པོ་དང་། ལྟོ་འཕྱེ་ཆེན་པོའི་དབང་པོའི་བར་རྣམས་ཀྱིས་ཕྱག་བྱ་བའི་འོས་
སུ་གྱུར་པ་དང་། མཆོད་པའི་འོས་སུ་གྱུར་པ་དང་། མངོན་པར་བསྲུང་བའི་འོས་སུ་གྱུར་པ་དང་། རྗེས་སུ་དྲན་པར་བྱ་བའི་འོས་སུ་གྱུར་པ་ཡིན་ནོ། །མིའི་དབང་པོ་ཐམས་ཅད་ཀྱིས་ཀྱང་དད་པར་བྱ་བའི་འོས་སུ་གྱུར་པའི་བར་དུ་ཡིན་ནོ། །ཤཱ་རིའི་བུ་རིག་པ་ཡོད་
པའི་སྦུབས་ཞི་བའི་གཟུངས་སྔགས་དེ་ནི་དེ་བཞིན་གཤེགས་པ་དཔལ་མེ་ཏོག་གི་སྙིང་པོས་ང་ལ་གང་བྱང་ཆུབ་སེམས་དཔའ་ནམ་མཁའི་སྙིང་པོའི་ལག་ནས་བསྐུར་ཞིང་འདུས་པ་ཆེན་པོ་ཉི་མའི་སྙིང་པོ་ངས་བཤད་པ་ལ་དད་པ་སྦྱིན་པར་མཛད་པ་ཡིན་ནོ། །རིག་པ་ཡོད་
པའི་སྦུབས་ཞི་བའི་གཟུངས་སྔགས་དེ་ནི་མཐུ་ཆེ་བ་ཕན་ཡོན་ཆེ་བའོ། །སེམས་ཅན་ཐམས་ཅད་ལ་ཕན་པར་བྱེད་པའོ། །ནད་ཐམས་ཅད་རབ་ཏུ་ཞི་བར་བྱེད་པའོ། །ཉོན་མོངས་པ་ཐམས་ཅད་འདུལ་བར་བྱེད་པའོ། །ཕུང་པོ་དང་། ཁམས་དང་། སྐྱེ་མཆེད་ཐམས་ཅད་
ཡོངས་སུ་ཤེས་པར་བྱེད་པའོ། །ཆོས་ཐམས་ཅད་རྣམ་པར་འབྱེད་པར་བྱེད་པའོ། །ཐབས་ཐམས་ཅད་ཡང་དག་པར་སྟོན་པར་བྱེད་པའོ། །བྱང་གྲོལ་གྱི་བདེ་བ་ཐམས་ཅད་ཡོངས་སུ་འབྱེད་པར་བྱེད་པའོ། །སེམས་ཅན་ཐམས་ཅད་དད་པར་བྱེད་པའོ། །ཆོས་ཐམས་
ཅད་ཀྱི་བདེ་བ་ལ་འཇུག་པར་བྱེད་པའོ། །བདུད་དང་ཕས་ཀྱི་རྒོལ་བ་ཐམས་ཅད་ཆོས་དང་འཐུན་པས་ངེས་པར་ཐུལ་བར་བྱེད་པའོ། །བདུད་ཀྱི་ཡུལ་ཐམས་ཅད་འཇིག་པར་བྱེད་པའོ། །བདུད་རྣམས་ཚར་གཅོད་པར་བྱེད་པའོ། །ཕས་ཀྱི་རྒོལ་བ་རྣམས་ཕམ་པར་བྱེད་
པའོ། །ལྷ་རྣམས་དགའ་བར་བྱེད་པའོ། །གནོད་སྦྱིན་རྣམས་ཡང་དག་པར་མགུ་བར་བྱེད་པའོ། །ལྷ་མ་ཡིན་རྣམས་རྣམ་པར་འཇོམས་པར་བྱེད་པའོ། །ནམ་མཁའ་ལྡིང་རྣམས་མགུ་བར་བྱེད་པའོ། །མི་འམ་ཅི་རྣམས་དད་པར་བྱེད་པའོ། །ལྟོ་འཕྱེ་ཆེན་པོ་རྣམས་

རྒྱབ་ཀྱིས་ཕྱོགས་པར་བྱེད་པའོ། །རྒྱལ་རིགས་རྣམས་མངོན་པར་དགའ་བར་བྱེད་པའོ། །བྲམ་ཟེ་རྣམས་འཇུག་པར་བྱེད་པའོ། །རྗེའུ་རིགས་རྣམས་རབ་ཏུ་སིམ་པར་བྱེད་པའོ། །དམངས་རིགས་རྣམས་མཆོག་ཏུ་དགའ་བར་བྱེད་པའོ། །བུད་མེད་
འདོད་ཆགས་དང་བྲལ་བར་བྱེད་པའོ། །བུད་མེད་སྦྲུམ་མ་བདེ་ལེགས་སུ་ཡོངས་སུ་ཐར་བར་བྱེད་པའོ། །མང་དུ་ཐོས་པ་རྣམས་དྲན་པར་བྱེད་པའོ། །རྣལ་འབྱོར་སྤྱོད་པ་རྣམས་མངོན་པར་དགའ་བར་བྱེད་པའོ། །ནད་ཐམས་ཅད་རབ་ཏུ་ཞི་བར་བྱེད་པའོ། །འཐབ་
པ་དང་། ཐབ་མོ་དང་། མུ་གེ་དང་། མི་ངས་དང་། ནད་དང་ཕ་རོལ་གྱི་དམག་ཚོགས་དང་། དུས་མ་ཡིན་པའི་རླུང་དང་། ཆར་པ་དང་། ཆུ་བོ་དང་། གྲང་བ་དང་། དྲོ་བ་ཐམས་ཅད་དང་། ཁ་བ་དང་། ཚ་བ་དང་། ཧྲུད་ཧྲུད་པོ་དང་། རྩུབ་པ་དང་། རེག་
པར་དཀའ་བའི་དངོས་པོ་ཐམས་ཅད་རྣམ་པར་ཞི་བར་བྱེད་པའོ། །ཆོས་ཀྱི་ཚུལ་འབར་བར་བྱེད་པའོ། །སངས་རྒྱས་ཀྱི་བསྟན་པ་སྟོན་པར་བྱེད་པའོ། །དཀོན་མཆོག་གསུམ་གྱི་གདུང་རྒྱུན་མི་འཆད་པར་བྱེད་པའོ། །འཁོར་བས་སྐྲག་པ་རྣམས་དབུགས་འབྱིན་པར་བྱེད་པའོ། །
ཟད་པ་ཤེས་པ་སྐྱེད་པར་བྱེད་པའོ། །མི་སྐྱེ་བ་ཤེས་པ་རང་གི་མངོན་སུམ་དུ་བྱེད་པའོ། །མ་རིག་པའི་མུན་པའི་ཕུང་པོ་རྣམ་པར་འདུལ་བར་བྱེད་པའོ། །སྡུག་བསྔལ་གྱི་ཁུར་འདོར་བར་བྱེད་པའོ། །ཞི་བ་རིག་པ་ཡོད་པའི་སྦུབས་ལུང་བསྟན་པ་ཆེན་པོ་འདི་ནི་སེམས་
ཅན་རྣམས་ཀྱི་ལས་འབྱང་བ་དང་། བདུད་ཀྱི་ལམ་ལས་ཡང་དག་པར་འདས་པ་དང་། སངས་རྒྱས་ཀྱི་ཡུལ་ལ་འཇུག་པར་བྱེད་པའོ། །ཆོས་ཐམས་ཅད་ལ་དབང་སྒྱུར་བར་བྱེད་པའོ། །སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཀྱི་བར་གྱི་ཕ་རོལ་ཏུ་འགྲོ་བ་དང་
ཆོས་ཀྱི་འཁོར་ལོ་རབ་ཏུ་སྐོར་བར་བྱེད་པའོ། །ཆོས་ཀྱི་ཆར་རབ་ཏུ་འབེབས་པར་བྱེད་པའོ། །སེམས་ཅན་ཐམས་ཅད་ཡོངས་སུ་སྨིན་པར་བྱེད་པའོ། །བླ་ན་མེད་པའི་ཡོངས་སུ་མྱ་ངན་ལས་འདས་པར་བྱེད་པ་སྟེ། འདི་ནི་རིག་པ་ཡོད་པའི་སྦུབས་ཞི་བ་ལུང་བསྟན་པ་

ཆེན་པོ་ཡིན་ནོ། །བཅོམ་ལྡན་འདས་ཀྱིས་བསྟན་པ་འདི་བཤད་པ་ན་གང་དུ་སེམས་ཅན་དེ་ལྟ་བུ་རྣམས་ཀྱི་ལས་ཀྱི་སྒྲིབ་པ་སྔོན་འཕངས་ཤིང་ཡོངས་སུ་མ་ཟད་པའི་ལྷ་དང་མི་གྲངས་མེད་པ་དཔག་ཏུ་མེད་པ་དག་ནི་དེར་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་
བྲལ་བ་ཐོབ་པར་གྱུར་ཏོ། །སེམས་ཅན་དཀྲིགས་ཕྲག་འབུམ་གྱིས་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེའི་ཚེ་ཁྲི་ཕྲག་བདུན་ཅུ་ནི་ཞི་བ་རིག་པ་ཡོད་པའི་སྦུབས་ཀྱི་གཟུངས་སྔགས་འདི་ཐོབ་པར་གྱུར་ཅིང་ཐེག་པ་གསུམ་ལས་
ཕྱིར་མི་ལྡོག་པར་ཡང་གྱུར་ཏོ། །དེའི་ཚེ་ལྷ་དང་མི་གྲངས་མེད་དཔག་ཏུ་མེད་པ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་ཤིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་ཡང་གྱུར་ཏོ། །དེའི་ཚེ་བརྒྱད་
ཁྲི་བཞི་སྟོང་ནི་མི་སྐྱེ་བའི་ཆོས་རྣམས་ལ་བཟོད་པ་ཐོབ་པར་གྱུར་ཏོ། །སངས་རྒྱས་ཀྱི་ཞིང་མི་མཇེད་ཐམས་ཅད་ཀྱི་སེམས་ཅན་རྣམས་ཀྱིས་གཟུངས་སྔགས་བཞི་པོ་བདེན་པ་དང་། རྗེས་སུ་འཐུན་པ་དང་། སྟོང་པ་ཉིད་དང་རྗེས་སུ་འཐུན་པ་དང་། སྨོན་པ་
མེད་པ་དང་རྗེས་སུ་འཐུན་པ་དང་། ཞི་བ་རིག་པ་ཡོད་པའི་སྦུབས་ཀྱི་གཟུངས་སྔགས་དེ་དག་གི་དོན་བསྟན་པ་ཐོབ་ནས་དེའི་ཚེ་སེམས་ཅན་གྲངས་མེད་དཔག་ཏུ་མེད་པ་དག་གི་འདོད་པའི་འདོད་ཆགས་ཐམས་ཅད་དང་། གཟུགས་ཀྱི་འདོད་ཆགས་ཐམས་ཅད་
དང་། དབྱིབས་ཀྱི་འདོད་ཆགས་དང་། རེག་པའི་འདོད་ཆགས་དང་། མོས་པའི་འདོད་ཆགས་དང་། གཟུགས་མེད་པའི་འདོད་ཆགས་ཐམས་ཅད་ཡོངས་སུ་ཟད་དོ། །འདོད་ཆགས་པ་རྣམས་ཀྱི་ཉེས་དམིགས་ཀྱང་རང་གི་མངོན་སུམ་དུ་གྱུར་ཏོ། །ཁ་
ཅིག་གིས་ནི་མི་སྡུག་པའི་དགེ་བའི་རྩ་བ་བསྐྱེད་དོ། །ཁ་ཅིག་གིས་ནི་སྐྱེ་མཆེད་དྲུག་གོ། །ཁ་ཅིག་གིས་ནི་ཟིལ་གྱིས་གནོན་པའི་སྐྱེ་མཆེད་དོ། །ཁ་ཅིག་གིས་ནི་ཟད་པར་གྱི་སྐྱེ་མཆེད་དོ། །ཁ་ཅིག་གིས་ནི་དབུགས་རྔུབ་པ་དང་དབུགས་འབྱུང་བ་དྲན་པའོ། །ཁ་ཅིག་གིས་

ནི་ཞི་གནས་སོ། །ཁ་ཅིག་གིས་ནི་ལྷག་མཐོང་ངོ་། །ཁ་ཅིག་གིས་ནི་བསམ་གཏན་དང་པོའོ། །ཁ་ཅིག་གིས་ནི་བསམ་གཏན་ཁྱད་པར་ཅན་ནོ། །ཁ་ཅིག་གིས་ནི་བསམ་གཏན་བཞི་པའི་བར་རོ། །ཁ་ཅིག་གིས་ནི་གཟུགས་མེད་པའི་སྙོམས་
པར་འཇུག་པ་རྣམས་སོ། །ཁ་ཅིག་གིས་ནི་བདེན་པ་དང་རྗེས་སུ་འཐུན་པའི་བཟོད་པའོ། །ཁ་ཅིག་གིས་ནི་རིགས་ཀྱི་སའོ། །ཁ་ཅིག་གིས་ནི་བརྒྱད་པའི་ཆོས་རྣམས་སོ། །ཁ་ཅིག་གིས་ནི་ཉན་ཐོས་དང་ཐུན་མོང་བའི་དགེ་བའི་རྩ་བ་རྣམས་སྐྱེད་དོ། །
ཁ་ཅིག་གིས་ནི་རང་སངས་རྒྱས་དང་ཐུན་མོང་བའོ། །ཁ་ཅིག་གིས་ནི་ཐམས་ཅད་མཁྱེན་པའི་ཡེ་ཤེས་དང་། ཐུན་མོང་བའི་ཏིང་ངེ་འཛིན་དང་། བཟོད་པ་དང་། གཟུངས་ཀྱི་དགེ་བའི་རྩ་བ་རྣམས་སྐྱེད་དོ། །དེའི་ཚེ་བུད་མེད་གང་དག་སེམས་རྩེ་གཅིག་པ་
དང་། བུད་མེད་ཀྱི་དངོས་པོ་སྐྱོན་དུ་བགྲང་བའི་སེམས་ཀྱིས་ཚུལ་བསྟན་པ་འདི་ཐོས་པ་དེ་ལས་མིའི་བུད་མེད་དཀྲིགས་ཕྲག་དགུ་བཅུ་རྩ་གཅིག་གི་མོ་མཚན་ནུབ་པར་གྱུར་ཅིང་ཕོ་མཚན་ཡང་བྱུང་བར་གྱུར་ཏོ། །ལྷའི་བུ་མོ་བྱེ་བ་ཕྲག་དགུ་བཅུ་རྩ་དགུ་དང་། ཀླུའི་བུ་མོ་
བརྒྱད་ཁྲི་བཞི་སྟོང་སྙེད་དང་། གནོད་སྦྱིན་གྱི་བུ་མོ་བརྒྱད་ཁྲི་དྲུག་སྟོང་སྙེད་དང་། ལྷ་མ་ཡིན་གྱི་བུ་མོ་བརྒྱད་ཅུ་རྩ་བཞི་སྙེད་དང་། ནམ་མཁའ་ལྡིང་གི་བུ་མོ་བདུན་ཁྲི་སྙེད་དང་། མི་འམ་ཅིའི་བུ་མོ་དཀྲིགས་ཕྲག་བཅུ་གཉིས་སྙེད་དང་། ལྟོ་འཕྱེ་ཆེན་པོའི་བུ་མོ་
སྟོང་སྙེད་དང་། ཡི་དགས་མོ་དཀྲིགས་ཕྲག་དགུ་བཅུ་སྙེད་དང་། ཤ་ཟ་མོ་དཀྲིགས་ཕྲག་བཞི་བཅུ་རྩ་གཉིས་སྙེད་ཀྱི་བུ་མོ་མོ་མཚན་ནུབ་པར་གྱུར་ཅིང་ཕོ་མཚན་བྱུང་བར་གྱུར་ཏོ། །གང་བུད་མེད་སྦྲུམ་པ་དེ་ཡང་ངས་ལུས་དང་སེམས་ཀྱི་བདེ་བ་མཆོག་ལ་ཡང་དག་པར་གཏད་དེ། ཐ་ན་དུད་
འགྲོའི་སྐྱེ་གནས་སུ་གཏོགས་པ་ཡང་རུང་། ཐོ་འཚམ་པ་མེད་པའི་ལུས་དང་ལྡན་པ་དང་། འཁྲུག་པ་མེད་པའི་སེམས་དང་ལྡན་པར་ཁྱེའུའམ་བུ་མོ་བཙས་པར་གྱུར་ཏོ། །བཙས་ནས་ཀྱང་དབང་པོ་ཚང་བ་དང་། གཟུགས་མཆོག་དང་ལྡན་པ་དང་། དྲན་

པ་དང་ལྡན་པ་དང་། ཚེ་རབས་དྲན་པ་དང་། དཔའ་བ་དང་། སྲན་ཐུབ་པ་དང་། ཤེས་རབ་དང་ལྡན་པར་གྱུར་ཏོ། །གང་སྦྲུམ་པ་བཙའ་བར་མི་བྱེད་པ་དེའི་ནད་ཐམས་ཅད་ངས་རབ་ཏུ་ཞི་བར་བྱས་སོ། །མངལ་ན་ཡོད་པ་དེ་ཡང་ཚུལ་དེ་ལྟ་བུའི་བདེ་བ་དང་ཡང་
དག་པར་ལྡན་པར་བྱས་ཏེ། ལུས་དང་སེམས་ཀྱི་བདེ་བ་དང་ཡང་དག་པར་ལྡན་པར་བྱས་ནས་ཀྱང་དེ་ཕྱིས་བདེ་བ་མཆོག་གིས་ཁྱེའུ་དང་བུ་མོ་བཙས་ཏེ། གཟུགས་མཆོག་དང་ལྡན་པ་དང་། དྲན་པ་མཆོག་དང་ལྡན་པ་དང་། ཚེ་རབས་དྲན་པ་དང་། དཔའ་བ་དང་། སྲན་
ཐུབ་པ་དང་། ཤེས་རབ་དང་ལྡན་པའི་བར་དུ་གྱུར་ཏོ། །དེ་ནས་ལྷ་དང་། ཀླུ་དང་། གནོད་སྦྱིན་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། ཡི་དགས་དང་། ཤ་ཟ་དང་། གྲུལ་བུམ་དང་། སྲུལ་པོ་དང་།
མི་དང་། མི་མ་ཡིན་པ་དེ་དག་ཐམས་ཅད་ཀྱིས་ཀྱང་ལེགས་སོ་ཞེས་བྱ་བ་གསོལ་ཏེ། བཅོམ་ལྡན་འདས་ལེགས་སོ་ལེགས་སོ། །དེ་བཞིན་གཤེགས་པས་ད་ལྟར་སྔོན་མ་ཐོས་པའི་ཆོས་ཀྱི་འཁོར་ལོ་རབ་ཏུ་བསྐོར་བ། སེམས་ཀྱི་ཡོངས་སུ་རྟོག་པའི་ལས་ཀྱི་
སྒྲིབ་པ་ཡང་དག་པར་འབྱང་བ། འཁོར་བ་ལས་སྒྲོལ་བ། སྲིད་པར་འགྲོ་བ་ཐམས་ཅད་ཡོངས་སུ་འབྱང་བ། བདུད་རྩིའི་བྱང་གྲོལ་གྱིས་ཡང་དག་པར་ཚིམ་པར་མཛད་པ་ནི་མཆོག་ཏུ་ངོ་མཚར་ལགས་སོ། །སེམས་ཅན་ཡོངས་སུ་སྨིན་པ་ཐམས་ཅད་ཀུན་ཏུ་
སྲུང་བ་དང་། རྙོག་པའི་དངོས་པོ་ཐམས་ཅད་ཡོངས་སུ་འབྱང་བ་དང་། ཤེས་རབ་མཆོག་གི་མིག་ཐོབ་པར་བགྱི་བ་དང་། དཀོན་མཆོག་གསུམ་གྱི་གདུང་རྒྱུན་མི་གཅད་པའི་སླད་དུ། དེ་བཞིན་གཤེགས་པས་ད་ལྟར་སངས་རྒྱས་ཀྱི་ཡུལ་ཐམས་ཅད་
སྣང་བར་མཛད་པའི་ཆོས་ཀྱི་ཆར་རབ་ཏུ་ཕབ་ལགས་ཏེ། དེ་བཞིན་གཤེགས་པ་ལ་བདག་ཅག་གིས་རྔོ་ཅི་ཐོགས་པར་མཆོད་པ་བགྱི་ལགས་སོ། །བཅོམ་ལྡན་འདས་ལ་མཆོད་པའི་ལས་བྱ་བའི་ཕྱིར་ཏིང་ངེ་འཛིན་ལ་བརྩོན་པ་རྣམས་མ་གཏོགས་པར་ལྷ་ཐམས་

ཅད་ཅེས་བྱ་བ་ནས་ལུས་སྲུལ་པོའི་བར་གྱིས་ཀྱང་ལྷ་རྫས་ཀྱི་རོལ་མོའི་སྒྲ་དང་ཕེག་རྡོབ་པའི་སྒྲ་འབྱུང་བར་བྱེད་དོ། །ལྷ་རྫས་ཀྱི་གསེར་གྱི་ཕྱེ་མའི་ཆར་མངོན་པར་རབ་ཏུ་ཕབ་བོ་ཞེས་བྱ་བ་ནས་ལྷ་རྫས་ཀྱི་མེ་ཏོག་དང་། སྤོས་དང་། བདུག་པ་དང་།
རས་བཅོས་བུ་དང་། ཆོས་གོས་དང་། རྒྱན་དང་། ལྷ་རྫས་ཀྱི་མེ་ཏོག་ཕྲེང་གི་བར་གྱི་ཆར་མངོན་པར་རབ་ཏུ་ཕབ་བོ། །བཅོམ་ལྡན་འདས་ཇི་ལྟར་ཉི་མ་ཤར་བ་ལ་ཡང་མཆོད་པའི་ལས་བྱ་བའི་ཕྱིར་རིན་པོ་ཆེའི་མེ་ཏོག་དང་། སྤོས་དང་། བདུག་པ་དང་། རས་
བཅོས་བུ་དང་། ཕྲེང་བ་རྣམས་གཏོར་ཏོ། །འཕགས་པ་འདུས་པ་ཆེན་པོ་ཐེག་པ་ཆེན་པོའི་མདོ་ཉི་མའི་སྙིང་པོའི་ལེའུ་བཅུ་གཅིག་པ་ལས་ལས་འབྱང་བའི་ལེའུ་སྟེ་བཞི་པའོ།། །།དེ་ནས་དེ་སྙེད་ཀྱི་ལྷའི་དབང་པོ་འཁོར་དང་བཅས་པ་ཐམས་ཅད་དང་། ཀླུའི་
དབང་པོ་འཁོར་དང་བཅས་པ་ཐམས་ཅད་དང་། གནོད་སྦྱིན་གྱི་དབང་པོ་འཁོར་དང་བཅས་པ་ཐམས་ཅད་དང་། ལྷ་མ་ཡིན་གྱི་དབང་པོ་དང་། ནམ་མཁའ་ལྡིང་གི་དབང་པོ་དང་། མི་འམ་ཅིའི་དབང་པོ་དང་། ལྟོ་འཕྱེ་ཆེན་པོའི་དབང་པོ་དང་། ཡི་དགས་ཀྱི་
དབང་པོ་དང་། ཤ་ཟའི་དབང་པོ་འཁོར་དང་བཅས་པ་ཐམས་ཅད་དང་། ལུས་སྲུལ་པོའི་དབང་པོ་འཁོར་དང་བཅས་པ་ཐམས་ཅད་ཀྱིས་བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་རབ་ཏུ་བཏུད་ནས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་གང་
དང་གང་དུ་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། དད་པ་དང་ལྡན་པའི་རིགས་ཀྱི་བུའམ། རིགས་ཀྱི་བུ་མོ་མི་སྡུག་པ་སྔོན་དུ་གཏོང་བ་ཚུལ་དེ་ལྟ་བུས་ཞེས་བགྱི་བ་ནས་འགོག་པའི་སྙོམས་པར་འཇུག་པའི་བར་གྱི་ཚུལ་གྱིས་
གནས་པར་བགྱིད་ལ། ཇི་ལྟར་སྔར་བཤད་པའི་དགེ་བའི་ཕྱོགས་ཡིད་ལ་བགྱིས་པས་གནས་པར་བགྱིད་ན་དད་པ་དང་ལྡན་པའི་རིགས་ཀྱི་བུ་མོའི་བར་འཁོར་དང་བཅས་པ་ཐམས་ཅད་ལ་ཡང་རང་གི་རིས་ཀྱི་སྟོན་པའི་འདུ་ཤེས་གཟུང་བར་བགྱིའོ། །ལུས་དང་སེམས་དང་ཡིད་ཀྱིས་

སེམས་ཅན་ཐམས་ཅད་ལ་རིམ་གྲོའི་སྤྱོད་པ་བགྱིའོ། །ཆོས་གོས་དང་། བསོད་སྙོམས་དང་། མལ་ཆ་དང་། ན་བའི་གསོས་སྨན་དང་། ཡོ་བྱད་རྣམས་ཀྱིས་མི་བྲེལ་བར་བགྱིའོ། །ཀུན་ཏུ་འཁྲུག་པའི་འཇིགས་པ་བཅྭ་ལྔ་ལས་ཡོངས་སུ་ཐར་བར་བགྱིའོ། །
བཅྭ་ལྔ་གང་ཞེ་ན། ལུས་ཀྱི་ཀུན་ཏུ་འཁྲུག་པའི་འཇིགས་པ་ལས་ཡོངས་སུ་ཐར་བར་བགྱིའོ། །བོང་བ་དང་། དབྱུག་གུ་དང་། མཚོན་ཆ་དང་། དུག་དང་། རྡོ་དང་། སེམས་ཅན་སྡང་བ་དང་། རྩུབ་པ་དང་། དད་པ་མ་མཆིས་པ་རྣམས་ལས་ཡོངས་སུ་
ཐར་བར་བགྱིའོ། །ཁམས་ཀུན་ཏུ་འཁྲུག་པའི་འཇིགས་པ་ལས་བསྲུང་བར་བགྱིའོ། །ཇི་ལྟར་འཐུན་པའི་བཟའ་བ་དང་། བཏུང་བ་དང་། སྨན་དང་། ཡོ་བྱད་ཀྱི་གཞི་ལས་རིམ་གྲོ་བ་དང་། ཉེ་དུ་དང་། སྦྱིན་པ་པོ་དང་། སྦྱིན་བདག་ཡོངས་སུ་མི་ཉམས་པའི་ཆོས་
ཅན་རྣམས་ནད་དང་དགྲའི་ཀུན་ཏུ་འཁྲུག་པའི་འཇིགས་པ་དང་། འབྱུང་པོ་ཐམས་ཅད་དང་། དགྲ་ཐམས་ཅད་ཀྱི་ཀུན་དུ་འཁྲུག་པའི་འཇིགས་པ་ལས་བསྲུང་བར་བགྱིའོ། །དུག་གི་ཀུན་ཏུ་འཁྲུག་པའི་འཇིགས་པ་དང་། རྒྱལ་པོའི་ཀུན་ཏུ་འཁྲུག་པའི་འཇིགས་པ་དང་།
ནང་གི་དམག་ཚོགས་དང་། ཕ་རོལ་གྱི་དམག་ཚོགས་དང་། མུ་གེའི་ཀུན་ཏུ་འཁྲུག་པའི་འཇིགས་པ་ལས་ཡོངས་སུ་བསྲུང་བར་བགྱི་སྟེ། ཀུན་ཏུ་འཁྲུག་པའི་འཇིགས་པ་བཅྭ་ལྔ་པོ་དེ་དག་གོ། །གང་དག་ད་ལྟར་དང་མ་འོངས་པའི་དུས་ན་དམ་པའི་ཆོས་ལྟར་བཅོས་
པ་ལ་གནས་པའི་བར་གྱི་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། དད་པ་དང་ལྡན་པའི་རིགས་ཀྱི་བུའམ། རིགས་ཀྱི་བུ་མོ་དེ་དག་དང་། གང་དག་མི་སྡུག་པ་སྔོན་དུ་གཏོང་བའི་ཚུལ་དེ་ལྟ་བུས་ཞེས་བགྱི་བ་ནས་འགོག་པའི་
སྙོམས་པར་འཇུག་པའི་བར་གྱི་ཚུལ་གྱིས་གནས་པར་བགྱིད་ལ། ཇི་སྐད་སྔར་བཤད་པ་བཞིན་ནམ་གྱི་ཆ་སྟོད་དང་ནམ་གྱི་ཆ་སྨད་ལ་མི་ཉལ་བར་སྦྱོར་བ་ལ་རྗེས་སུ་བརྩོན་པར་གནས་པར་བགྱིད་པ་འཁོར་དང་བཅས་པ་དེ་དག་ཐམས་ཅད་དང་། གང་དུ་གནས་པའི་ཡུལ་

འཁོར་དང་། གྲོང་རྡལ་དང་། ལྗོངས་དང་། རི་འོར་དང་། གྲོང་དང་། རྒྱལ་པོའི་ཕོ་བྲང་འཁོར་དེ་དག་དང་། དགོན་པའི་གནས་དེ་དག་རང་གི་རིས་ཀྱི་ཁྱིམ་ཁོལ་གྱི་ཁྱིམ་གྱི་བར་བཞིན་དུ་གཟུང་བར་བགྱིའོ། །ཀུན་ཏུ་འཁྲུག་པའི་འཇིགས་
པ་བཅྭ་ལྔ་པོ་དེ་དག་ལས་ཡོངས་སུ་བསྲུང་བར་བགྱིའོ། །སླར་བཟློག་པར་བགྱིའོ། །གང་དུ་དེ་ལྟ་བུའི་དགེ་བ་ལ་བརྩོན་པ་ཐ་ན་གང་ཟག་གཅིག་ཅིག་གནས་པར་བགྱིད་ཀྱང་རུང་། དེར་ཐ་ན་ཉིན་ཞག་གཅིག་ཅིག་གནས་པར་བགྱིད་ཀྱང་རུང་སྟེ། ཡུལ་འཁོར་
དེ་དག་རང་གི་རིས་ཀྱི་ཁྱིམ་ཁོལ་གྱི་ཁྱིམ་གྱི་བར་བཞིན་དུ་གཟུང་བར་བགྱིའོ། །ཀུན་ཏུ་འཁྲུག་པའི་འཇིགས་པ་བཅྭ་ལྔ་ལས་ཡོངས་སུ་བསྲུང་བར་བགྱིའོ། །ཡོངས་སུ་བསྐྱང་བར་བགྱིའོ། །སྦྱིན་པ་པོ་དང་། སྦྱིན་བདག་རྒྱལ་རིགས་དང་། བྲམ་ཟེ་དང་། རྗེའུ་
རིགས་དང་། དམངས་རིགས་དང་། སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དེ་དག་ཀྱང་རང་གི་རིས་ལགས་པར་གཟུང་བར་བགྱིའོ། །ཀུན་ཏུ་འཁྲུག་པའི་འཇིགས་པ་བཅྭ་ལྔ་པོ་དེ་དག་ལས་རྗེས་སུ་བསྲུང་བར་བགྱིའོ། །ཡོངས་སུ་བསྐྱང་བར་བགྱིའོ། །
གང་དག་དེ་ལྟ་བུའི་དགེ་བའི་ཕྱོགས་ལ་བརྩོན་པའི་གང་ཟག་རྣམས་ལ་གནས་ཁང་དང་། གཙུག་ལག་ཁང་དང་། ཀུན་དགའ་ར་བ་དང་། གནས་དང་། ཆོས་གོས་དང་། བསོད་སྙོམས་དང་། མལ་ཆ་དང་། ན་བའི་གསོས་སྨན་དང་། ཡོ་བྱད་རྣམས་ཀྱིས་
བཀུར་སྟི་དང་། མཆོད་པ་དང་། རིམ་གྲོ་བགྱིད་པ་དག་ཀྱང་ཀུན་ཏུ་འཁྲུག་པའི་འཇིགས་པ་དེ་ལྟ་བུ་དེ་དག་ལས་བསྲུང་བར་བགྱིའོ། །ཡོངས་སུ་བསྐྱང་བར་བགྱིའོ། །གང་ཡང་བུད་མེད་སྦྲུམ་པ་གང་ཟག་དེ་ལྟ་བུ་དག་ལ་བཀུར་སྟི་བགྱིད་པ་དེ་ལ་དུས་རྟག་ཏུ་རྣམ་པར་
མི་འཚེ་བའི་ཆོས་ཅན་དང་། ནད་མ་མཆིས་པ་དང་། མཆོག་ཏུ་དགའ་བ་མང་བར་བདག་ཅག་གིས་བསྲུང་བར་བགྱིའོ། །ཡོངས་སུ་བསྐྱང་བར་བགྱིའོ། །ཡང་གང་དང་གང་དུ་དེ་ལྟ་བུར་ཚུལ་བཞིན་ཡིད་ལ་བགྱིད་པ་ལ་བརྩོན་པའི་གང་ཟག་ལ་སྙིང་བརྩེ་བར་གསོལ་

བ་འདེབས་པར་བགྱིད་པ་དག་དང་། དེའི་མིང་བརྗོད་པར་བགྱིད་པ་དག་དང་། སྐུད་པ་བཏགས་པའམ། ཀུན་ཏུ་བསྲུང་བ་བགྱིད་པའམ། མི་དགེ་བ་ལས་སླར་བཟློག་པའམ། དགེ་བ་ལ་སྦྱོར་དུ་སྩལ་བ་འང་རུང་སྟེ། སེམས་ཅན་དེ་དག་ཀྱང་ཀུན་
ཏུ་འཁྲུག་པའི་འཇིགས་པ་བཅྭ་ལྔ་པོ་དེ་དག་ལས་བདག་ཅག་གིས་རྗེས་སུ་བསྲུང་བར་བགྱིའོ། །ཡོངས་སུ་བསྐྱང་བར་བགྱིའོ། །མི་དང་མི་མ་ལགས་པའི་སེམས་ཅན་གང་དག་དེ་ལྟ་བུའི་དགེ་བའི་ཕྱོགས་ལ་ཚུལ་བཞིན་དུ་ཡིད་ལ་བགྱིད་པར་བརྩོན་པའི་གང་ཟག་
རྣམས་ཀྱི་ཚིག་མི་ཉན་ཞིང་། མི་བགྱི་བར་སེམས་པ་དག་དང་། གང་དག་དེ་དག་ལ་གཤེ་བར་བགྱིད་པའམ། ཕན་པ་མ་ལགས་པ་དང་། དོན་མ་ལགས་པ་དང་། བར་དུ་ཉམས་པ་དང་། གནོད་སེམས་སུ་བགྱི་བའི་སླད་དུ་རྟུལ་བར་བགྱིད་པའི་སེམས་ཅན་
དེ་དག་གི་ཐད་དུ་བདག་ཅག་གིས་མི་དང་མི་མ་ཡིན་པ་དག་གཏང་བར་བགྱིའོ། །དེ་ལ་བཟོད་པར་མི་བགྱིའོ། །གང་དག་དེ་ལྟ་བུའི་དགེ་བའི་ཕྱོགས་ལ་ཚུལ་བཞིན་དུ་ཡིད་ལ་བགྱིད་པར་བརྩོན་པའི་གང་ཟག་རྣམས་ཀྱི་ཚིག་མི་མཉན་ཞིང་མི་བགྱི་བར་སེམས་པ་དག་དང་།
གང་དག་དེ་དག་ལ་གཤེ་བར་བགྱིད་པའམ། དོན་མ་ལགས་པ་དང་། ཕན་པ་མ་ལགས་པ་དང་། གནོད་སེམས་དང་། བར་དུ་ཉམས་པར་བགྱི་བའི་སླད་དུ་རྟུལ་བར་བགྱི་བའི་སེམས་ཅན་དེ་དག་ནི་གནོད་པ་བཅྭ་ལྔ་པོ་འདི་དག་དང་ལྡན་པར་འགྱུར་ལགས་སོ། །
བཅྭ་ལྔ་གང་ཞེ་ན། མྱུར་དུ་ནད་ཀྱི་སྡུག་བསྔལ་དང་། ལོངས་སྤྱོད་ཀྱི་སྡུག་བསྔལ་དང་། ཉེ་བར་སྤྱོད་པ་ལས་ཡོངས་སུ་ཉམས་པའི་སྡུག་བསྔལ་དང་། ཡན་ལག་དང་ཉིང་ལག་གཅོད་པའི་སྡུག་བསྔལ་དང་། འཁོར་སྡུག་པ་དང་བྲལ་བའི་སྡུག་བསྔལ་དང་།
དབང་ཕྱུག་ལས་རྒུད་པའི་སྡུག་བསྔལ་དང་། གནས་ཀྱི་སྡུག་བསྔལ་དང་། དགྲས་རྫི་བའི་སྡུག་བསྔལ་དང་། རྟག་ཏུ་སེམས་ཀུན་ཏུ་འཁྲུག་པའི་སྡུག་བསྔལ་དང་། ཡུལ་འཁོར་གྱི་སྡུག་བསྔལ་དང་། རྒྱལ་རིགས་ཀྱི་ཀུན་ཏུ་འཁྲུག་པའི་སྡུག་བསྔལ་དང་།

ཆོམ་རྐུན་གྱི་ཀུན་ཏུ་འཁྲུག་པའི་སྡུག་བསྔལ་དང་། བུད་མེད་ཀྱི་ཀུན་ཏུ་འཁྲུག་པའི་སྡུག་བསྔལ་དང་། མྱུར་དུ་ཚེ་ཟད་པ་དང་། འཆི་བའི་སྡུག་བསྔལ་ལགས་སོ། །སེམས་ཅན་དེ་དག་ནི་གནོད་པ་དེ་དག་དང་མྱུར་དུ་ལྡན་པར་འགྱུར་ལགས་
སོ། །སེམས་ཅན་གང་དག་དེ་ལྟ་བུའི་ཚུལ་བཞིན་དུ་ཡིད་ལ་བགྱིད་པ་ལ་བརྩོན་པ་རྣམས་ཀྱི་ཚིག་མི་མཉན་ཞིང་། མི་བགྱིད་པར་སེམས་པ་དང་། དེ་དག་ལ་ཡང་གཤེ་བར་བགྱིད་པའམ། དོན་མ་ལགས་པ་དང་། ཕན་པ་མ་ལགས་པ་དང་། གནོད་
སེམས་དང་། བར་དུ་ཉམས་པར་བགྱི་བའི་སླད་དུ་བརྟུལ་བར་བགྱིད་པའི་སེམས་ཅན་དེ་དག་སྐྲག་ནས་བདག་ཅག་ལ་སྐྱབས་སུ་མཆིས་ཀྱང་རུང་། གསང་སྔགས་སྣ་ཚོགས་སྒྲུབ་པའི་ཡོ་བྱད་ཀྱིས་རིམ་གྲོ་བགྱི་བར་བརྩོན་པར་བགྱིས་སུ་ལགས་ཀྱང་དེ་དག་གི་དོན་
དུ་བདག་ཅག་གིས་རིམ་གྲོའི་བསྙེན་བཀུར་བླང་བར་མི་བགྱིའོ། །དེ་དག་གི་སྐྱབས་མི་བགྱིའོ། །དེ་དག་གི་བགྱི་བ་མི་སྒྲུབ་པོ། །དོན་བསྒྲུབ་པར་མི་བགྱིའོ། །ཕུང་ཀྲོལ་གྱི་ལྷའམ། ཀླུ་ནས་ལུས་སྲུལ་པོའི་བར་སྡང་བ་སྙིང་བརྩེ་བ་མ་མཆིས་པ། བགྱིས་པ་མི་
གཟོ་བ། འཇིག་རྟེན་ཕ་རོལ་ལ་འཇིགས་པར་མི་ལྟ་བ་གང་དག་འབྱུང་བར་འགྱུར་བ་དེ་དག་དེ་ལྟ་བུའི་དགེ་བའི་ཕྱོགས་ལ་ཚུལ་བཞིན་དུ་ཡིད་ལ་བགྱིད་པར་བརྩོན་པ་དགོན་པ་དང་། ནགས་དང་། བས་མཐའ་དང་། རི་ཁྲོད་དང་། དུར་ཁྲོད་དང་། ཤིང་དྲུང་དང་། ཀུན་
དགའི་ར་བ་དང་། གཙུག་ལག་ཁང་དང་། གནས་ཁང་དང་། འཆག་སའི་གནས་ན་གནས་པའི་གང་ཟག་རྣམས་ཀྱི་ཐ་དད་དུ་སྡང་བའི་སེམས་དང་ལྡན་པ་དང་། རྣམ་པར་ཐོ་འཚམ་པའི་སེམས་དང་ལྡན་པ་དང་ཉེ་བར་མཆི་བར་བགྱིད་ཅིང་། དེ་ལྟ་བུའི་གང་ཟག་
རྣམས་ཀྱི་ལུས་ཀུན་ཏུ་འཁྲུག་པའམ་སེམས་ཀུན་ཏུ་འཁྲུག་པར་བགྱིད་ལ། མདངས་འཕྲོག་པར་བགྱིད་ཅིང་ཐ་ན་དེ་ལྟ་བུའི་གང་ཟག་རྣམས་ཀྱི་རིམ་གྲོ་པ་དང་། སྦྱིན་བདག་གང་དག་ལགས་པ་དེ་དག་ལ་ཡང་ལྷའམ། ཀླུ་ནས་ལུས་སྲུལ་པོའི་བར་སྡང་བ། བགྱིས་པ་མི་གཟོ་

བ། འཇིག་རྟེན་ཕ་རོལ་ལ་འཇིགས་པར་མི་ལྟ་བ་དག་གིས་ལུས་ཀུན་དུ་འཁྲུག་པ་དང་། སེམས་ཀུན་ཏུ་འཁྲུག་པར་བགྱིད་ཅིང་མདངས་འཕྲོག་པར་བགྱིད་ལ། སྔོན་གྱི་ལས་ཀྱི་རྐྱེན་མ་གཏོགས་ལགས་ཏེ། གལ་ཏེ་ལྷ་དང་། ཀླུ་ནས་ལུས་སྲུལ་པོའི་བར་དེ་དག་
བདག་ཅག་གིས་སོ་སོར་མ་བཟློག་གམ། སླར་མ་བཟློག་གམ། ནོངས་པ་ཅི་མཆིས་པའི་ཆད་པ་ལ་མ་བཀོད་པར་གྱུར་ན་དུས་གསུམ་དུ་གཤེགས་པའི་དེ་བཞིན་གཤེགས་པ་ཐམས་ཅད་བདག་ཅག་གིས་བསླུས་པར་གྱུར་ཅིག །བདག་ཅག་འཁོར་བ་ན་འཁོར་བའི་
ཚེ་དེ་ལྟ་བུའི་ཉན་ཐོས་ཀྱི་སྤྱོད་ཡུལ་ལམ། རང་རྒྱལ་བའི་སྤྱོད་ཡུལ་ལམ། དེ་བཞིན་གཤེགས་པའི་སྤྱོད་ཡུལ་གྱི་ཡང་རུང་སྟེ་སྣོད་དུ་མ་གྱུར་ཅིག །བྱང་གྲོལ་གྱི་བདེ་བ་ཐོབ་པར་མ་གྱུར་ཅིག །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དག་འདི་ལྟར་
ཡང་ཁྱེད་དུས་གསུམ་དུ་གཤེགས་པའི་དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་ཚུལ་འབར་བར་བྱེད་པ་དང་། དཀོན་མཆོག་གསུམ་གྱི་གདུང་རྒྱུན་མི་གཅད་པར་བྱ་བའི་ཕྱིར་ཞུགས་པ་ལེགས་སོ་ལེགས་སོ། །ཁྱེད་ཀྱིས་དེ་ལྟར་བྱོས་ཤིག །དེ་ལྟར་བྱས་ན་དུས་གསུམ་དུ་
གཤེགས་པའི་དེ་བཞིན་གཤེགས་པ་ཐམས་ཅད་ལ་ཁྱེད་ཀྱིས་མཆོད་པ་དང་། རིམ་གྲོ་བྱས་པར་འགྱུར་རོ། །རིགས་ཀྱི་བུ་དག་གང་ལ་ལ་བརྩོན་པ་དང་བརྟུལ་བ་དེ་ལྟ་བུས་ལེགས་པར་གསུངས་པའི་ཆོས་འདུལ་བ་རྗེས་སུ་སྲུང་བར་བྱེད་པ་དང་། དེ་ལྟར་ཞུགས་ཤིང་ཆོས་
ཀྱིས་གནས་པའི་གང་ཟག་རྣམས་ལ་རྗེས་སུ་སྲུང་བར་བྱེད་པའི་རིགས་ཀྱི་བུ་དེ་འཁོར་བར་འཁོར་བ་ན་དཔལ་དམ་པ་ལ་ཉེ་བར་སྤྱོད་པར་འགྱུར་རོ། །དེ་ལ་འཁོར་བའི་སྡུག་བསྔལ་འབྱུང་བར་མི་འགྱུར་ཞིང་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་
པར་འཚང་རྒྱ་བར་འགྱུར་རོ། །དེ་ལྟ་བས་ན་སྡུག་བསྔལ་དང་མི་འཐུན་པ་བདེ་བ་འདོད་པ་ཁྱེད་ཀྱིས་དེ་ལྟར་བྱོས་ཤིག །འདི་ལྟར་ཁྱེད་ལེགས་པར་བྱས་པའི་ལས་ཀྱི་མཐའ་ལ་ཞུགས་པ་ནི་ཁྱེད་ཡང་ལེགས་སོ་ལེགས་སོ། །ཡང་དེའི་ཚེ་མི་མ་ཡིན་པའི་འབྱུང་པོ་མདངས་དང་

ཁྲག་ཟ་བ་གང་དག་ཡིན་པ་གྲངས་མེད་དཔག་ཏུ་མེད་པ་དེ་དག་གིས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་ཅག་ནི་མི་མ་ལགས་པ། མདངས་འཚལ་བ། ཤ་ཁྲག་འཚལ་བ་དག་ལགས་ཏེ། བདག་ཅག་གིས་དེ་
བཞིན་གཤེགས་པའི་ཉན་ཐོས་རྣམས་ལ་རྣམ་པར་ཐོ་བཙམ་པར་མི་བགྱིའོ། །བཙུན་པ་བཅོམ་ལྡན་འདས་ད་ལྟར་བཅོམ་ལྡན་འདས་ཀྱིས་ཇི་སྐད་བསྟན་པ་བཞིན་ཉན་ཐོས་གང་དག་དེ་ལྟ་བུའི་མི་སྡུག་པའི་སྦྱོར་བ་རྣལ་འབྱོར་ཡིད་ལ་བགྱིད་པས་གནས་པའི་གང་ཟག་
དེ་ལྟ་བུ་དག་གལ་ཏེ་བདག་ཅག་གིས་རྣམ་པར་ཐོ་བཙམས་པར་གྱུར་ན་བདག་ཅག་དད་པ་ཅན་མ་ལགས་པར་གྱུར་ཅིག །དབང་པོ་ཐམས་ཅད་ཀྱི་སྤྱོད་ཡུལ་རྣམས་སུ་མཆི་བར་མི་ནུས་པར་གྱུར་ཅིག །གང་ཟག་དེ་ལྟ་བུ་དག་ནི་བདག་ཅག་གིས་ཀྱང་བསྲུང་བར་བགྱིའོ། །
དེ་དག་གི་རིམ་གྲོ་པ་དང་སྦྱིན་བདག་གང་དག་ལགས་པ་དེ་དག་ཀྱང་བསྲུང་བར་བགྱིའོ། །ཡོངས་སུ་བསྐྱང་བར་བགྱིའོ། །དེ་བཞིན་གཤེགས་པའི་ཉན་ཐོས་ཆོས་ཀྱིས་གནས་པ་མི་སྡུག་པའི་སྦྱོར་བ་ཡིད་ལ་བགྱིད་པས་གནས་པ་དག་ཡང་དག་པར་འཛིན་པར་
བགྱིད་པ་གཙུག་ལག་ཁང་དང་། གནས་དང་། ཀུན་དགའི་ར་བ་དང་། ཆོས་གོས་དང་། བསོད་སྙོམས་དང་། མལ་སྟན་དང་། བྲོ་འཚལ་བའི་གསོས་སྨན་གྱི་ཡོ་བྱད་རྣམས་ཀྱིས་ཡང་དག་པར་འཛིན་པར་བགྱིད་པ་གང་དག་ལགས་པ་དེ་དག་བདག་ཅག་གིས་
བསྲུང་བ་དང་། བསྐྱབ་པ་དང་། སྦ་བར་བགྱིའོ། །ཡོངས་སུ་བསྐྱང་བར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། བཞིན་བཟངས་དག་ལེགས་སོ་ལེགས་སོ། །ཁྱེད་ཀྱིས་དེ་ལྟར་བྱོས་ཤིག །ཡང་དེའི་ཚེ་སའི་ལྷ་མོ་བརྟན་མས་འདི་སྐད་ཅེས་
གསོལ་ཏོ། །བཙུན་པ་བཅོམ་ལྡན་འདས། བཅོམ་ལྡན་འདས་ཀྱི་ཉན་ཐོས་ཆོས་ཀྱིས་གནས་པ་དེ་ལྟ་བུའི་མི་སྡུག་པའི་སྦྱོར་བས་རྣལ་འབྱོར་ལ་བརྩོན་པར་གནས་པར་བགྱིད་པ་གང་དག་ལགས་པ་དེ་དག་གི་ལུས་ལ་བདག་གིས་རྒྱ་ཆེན་པོའི་སའི་བཅུད་ཀྱི་མདངས་

གཏང་བར་བགྱི་སྟེ། དེས་ཆོས་ཀྱིས་གནས་པ་དེ་ལྟ་བུའི་ཏིང་ངེ་འཛིན་ལ་མངོན་པར་བརྩོན་པ་དེ་དག་ཤིན་ཏུ་གཟི་བརྗིད་དང་ལྡན་པ་དང་། ཁ་དོག་དང་ལྡན་པ་དང་། དྲན་པ་དང་ལྡན་པ་དང་། བརྩོན་འགྲུས་དང་ལྡན་པ་དང་། ཤེས་རབ་དང་ལྡན་པར་འགྱུར་ལགས་སོ། །
བཅོམ་ལྡན་འདས་ཀྱིས་བཀའ་སྩལ་པ། སྦྱིན་པ་ཆེན་པོ་དང་ལྡན་མ་གང་ཁྱོད་ངའི་སྲས། ཐུགས་ཀྱི་སྲས། ཞལ་ནས་སྐྱེས་པ། ཆོས་དང་ལྡན་པ། ཆོས་ཀྱི་སྤྲུལ་པ་དག་དེ་ལྟ་བུའི་བསོད་སྙོམས་ཀྱིས་ཡང་དག་པར་ཚིམ་པར་བྱེད་པ་ལེགས་སོ་ལེགས་སོ། །
སྦྱིན་པ་ཆེན་པོ་དང་ཡང་དག་པར་ལྡན་པ་དེས་ཁྱོད་ཐེག་པ་ཆེན་པོ་ཡོངས་སུ་རྫོགས་པར་བྱེད་པར་འགྱུར་རོ། །ཡང་དེའི་ཚེ་དཔལ་ལྷ་མོ་ཆེན་མོས་འདི་སྐད་ཅེས་གསོལ་ཏོ། །བཙུན་པ་བཅོམ་ལྡན་འདས་བདག་གིས་ཀྱང་དེ་ལྟ་བུའི་ཆོས་ཀྱིས་གནས་པ་རྣམས་ཀྱིས་སྦྱིན་
པ་པོ་དང་། སྦྱིན་བདག་གང་དག་ལགས་པའི་སྦྱིན་པ་པོ་དང་། སྦྱིན་བདག་དེ་དག་གི་དགའ་སྟོན་དང་། ནོར་དང་། འབྲུ་དང་། ཤིང་ཏོག་དང་། ཉེ་བར་སྤྱོད་པ་དང་། ལོངས་སྤྱོད་རྣམས་མ་ཚང་བ་མ་མཆིས་པར་བགྱིའོ། །མི་སྡུག་པའི་སྦྱོར་བས་ཞེས་
བགྱི་བ་ནས་འགོག་པའི་སྙོམས་པར་འཇུག་པ་ཡིད་ལ་བགྱིད་པའི་བར་གྱིས་ཉིན་མཚན་འདའ་བར་བགྱིད་པ་གང་དག་ལགས་པ་དེ་དག་གཙུག་ལག་ཁང་དང་། གཞི་དང་། གནས་དང་། ཆོས་གོས་དང་། བསོད་སྙོམས་དང་། མལ་སྟན་དང་། བྲོ་འཚལ་བའི་
གསོས་སྨན་གྱི་ཡོ་བྱད་རྣམས་ཀྱིས་འཛིན་པར་བགྱིད་པ་དང་། ཡང་དག་པར་འཛིན་པར་བགྱིད་པ་དང་། ཡོངས་སུ་སྐྱོང་བར་བགྱིད་པ་དེ་དག་གི་ཡོ་བྱད་ཐམས་ཅད་ཕུན་སུམ་ཚོགས་པ་དང་། ཉེ་བར་སྤྱོད་པ་དང་། ལོངས་སྤྱོད་པ་དང་། ལུས་དང་སེམས་ཀྱི་བདེ་
བ་དང་། ཡིད་བདེ་བ་དང་། མཆོག་ཏུ་དགའ་བ་མང་བར་བདག་གིས་ཡང་དག་པར་གཟུང་བར་བགྱིའོ། །སྣོད་དུ་གྱུར་པའི་སྦྱིན་གནས་རྣམས་དང་མ་བྲལ་ཞིང་ལྷན་ཅིག་འགྲོགས་སུ་སྩལ་བར་བགྱིའོ། །ཆོས་ལ་མངོན་པར་དགའ་བའི་སེམས་དང་ལྡན་པ་

དང་། སྙིང་བརྩེ་བའི་སེམས་དང་ལྡན་པ་དང་། ལོག་པར་མི་ལྟུང་བའི་སེམས་དང་ལྡན་པ་དང་། བྱམས་པའི་སེམས་དང་ལྡན་པ་དང་། སྙིང་རྗེའི་སེམས་དང་ལྡན་པ་དང་། མི་ཉམས་པའི་ཆོས་ཅན་དུ་ཡང་དག་པར་བསྒྲུབ་པར་བགྱིའོ། །
བཅོམ་ལྡན་འདས་ཀྱིས་བཀའ་སྩལ་པ། སྦྱིན་པ་ཆེན་པོ་ལ་ཡང་དག་པར་རྟེན་པ་ལེགས་སོ་ལེགས་སོ། །ཁྱོད་བརྩོན་པའི་བརྟུལ་བ་དེས་ཐེག་པ་ཆེན་པོ་རྣམ་པར་འཕེལ་བར་བྱེད་པར་འགྱུར་རོ། །ཡང་དེའི་ཚེ་གསང་བ་པའི་བདག་པོ་ལག་ན་རྡོ་རྗེས་འདི་སྐད་ཅེས་གསོལ་
ཏོ། །བཙུན་པ་བཅོམ་ལྡན་འདས་འདུས་པ་ཆེན་པོའི་ལེའུ་འདི་བཤད་པ་ན། བཅོམ་ལྡན་འདས་ཀྱིས་བསྟན་པ་ཡང་དག་པར་འཛིན་པ་ཡོངས་སུ་སྐྱོང་བ་དང་། ཡོ་བྱད་དང་ཡང་དག་པར་ལྡན་པའི་སྦྱིན་པ་པོ་དང་། སྦྱིན་བདག་མང་པོ་གང་དག་མཆིས་པའི་རྐྱེན་དེས་
སངས་རྒྱས་ཀྱི་ཞིང་འདིར་ཆོས་ཀྱི་ཚུལ་ལ་ཡུན་རིང་དུ་འབར་ཞིང་མི་ཉམས་པའི་ཆོས་ཅན་དུ་འགྱུར་ལགས་སོ། །བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་སྨྲས་པ། ཀྱེ་གསང་བ་པའི་བདག་པོ་ཅི་ནམ་མཁའ་ཡོངས་སུ་ཉམས་པ་མངོན་ནམ། སྨྲས་པ། གནས་
ལ་སྒྲོ་བཏགས་པ་མེད་པའི་ཕྱིར་རོ། །སྨྲས་པ། ཅི་ཆོས་རྣམས་ཀྱི་ཡང་དག་པར་འདུ་བ་མངོན་ནམ། སྨྲས་པ། ཅི་ཡང་དག་པའི་མཐར་ཐུག་པའི་ཕྱིར་མི་མངོན་ནོ། །སྨྲས་པ་ཅི་ཡང་དག་པའི་མཐའ་དང་ནམ་མཁའ་མི་འདྲ་བར་མངོན་ནམ། སྨྲས་པ། འདི་ནི་ཐ་མི་དད་པ་
ཉིད་དེ། ཐ་མི་དད་པ་ཉིད་ཀྱི་ཕྱིར་མི་འདྲ་བའོ། །སྨྲས་པ་ཅི་ནམ་མཁའ་དང་ཆོས་རྣམས་མི་འདྲའམ། སྨྲས་པ་ཅི་མི་གཡོ་བ་དང་མི་སྐྱེ་བའི་ཆོས་ཀྱི་དབྱིངས་སུ་འཇུག་པས་མི་འདྲ་བ་མེད་པ་ཉིད་དོ། །སྨྲས་པ་རིགས་ཀྱི་བུ་ཅི་འདུས་བྱས་དང་འདུས་མ་བྱས་ཀྱི་ཆོས་རྣམས་ཀྱི་ཐ་
དད་པ་ཉིད་མི་མངོན་ནམ། སྨྲས་པ། ཇི་ལྟར་ཡང་དག་པའི་མཐའ་དང་དེ་བཞིན་ཉིད་ཐ་མི་དད་པ་ཉིད་ཡིན་པ་དེ་བཞིན་དུ་འདུས་བྱས་ཀྱི་ཆོས་རྣམས་ནམ་མཁར་སྒྲོ་བཏགས་པ་ཉིད་ཀྱི་ཕྱིར་ཐ་མི་དད་པ་ཉིད་དོ། །སྨྲས་པ་ཅི་ཡང་དག་པའི་མཐའ་དེ་བཞིན་དུ་འདུས་བྱས་ཀྱི་ཆོས་རྣམས་

ཡིན་ནམ། འོན་ཏེ་འདུས་མ་བྱས་ཀྱི་ཆོས་རྣམས་ཡིན། སྨྲས་པ། སྟོང་པ་ཉིད་སྒྲོ་བཏགས་པ་ཉིད་ཀྱི་ཕྱིར་ཡང་དག་པའི་མཐའ་དང་། དེ་བཞིན་ཉིད་དུ་འདུས་བྱས་ད