Kinh tạng Tây Tạng (Kangyur Đại Học) — 066_མདོ་སྡེ།_ཟ

་གི་བྱེ་མ་སྙེད་འདས་ནས། བྱང་ཆུབ་སེམས་དཔའ་གཅིག་མཚན་མར་བཞག་ཀྱང་། སངས་རྒྱས་ཀྱི་ཞིང་རྣམས་དེ་བཞིན་གཤེགས་པ་དག་གིས་དེ་ཙམ་དུ་སྟོང་ན། ཕྱོགས་བཅུའི་སངས་རྒྱས་ཀྱི་ཞིང་གང་དེ་བཞིན་གཤེགས་པའི་ཤའི་སྤྱན་ཐ་མལ་པས་གཟིགས་པར་
འགྱུར་བའི་སངས་རྒྱས་ཀྱི་ཞིང་དེ་དག་དུ་སྐྱེས་པའི་སེམས་ཅན་དེ་དག་གི་སེམས་དེ་བཞིན་གཤེགས་པས་མཁྱེན་པའི་དེ་བཞིན་གཤེགས་པ་དེ་དག་གིས་སྟོང་པ་ལྟ་ཅི་སྨོས། དེ་ནས་ཉན་ཐོས་ཆེན་པོ་དེ་དག་དང་། ཐམས་ཅད་དང་ལྡན་པའི་འཁོར་དེ་ངོ་མཚར་དུ་གྱུར་ནས། ཚིག་
འདི་སྐད་དུ་བདག་ཅག་གི་སྟོན་པ་དེ་དག་དེ་ལྟར་རྫུ་འཕྲུལ་ཆེ། དེ་ལྟར་མཐུ་ཆེ་བ། དེ་ལྟར་ཡེ་ཤེས་གཟིགས་པ་ཆེན་པོ་དང་ལྡན་ཏེ། བདག་ཅག་གིས་རྙེད་པ་ལེགས་པར་རྙེད་དོ། །ཞེས་སྨྲས་སོ། །དེ་ནས་བྱང་ཆུབ་སེམས་དཔའ་གང་ཕྱོགས་བཅུའི་འཇིག་རྟེན་གྱི་ཁམས་

ནས་འདུས་པ་སྟེང་གི་བར་སྣང་ལ་འཁོད་པ་དེ་དག་བར་སྣང་དེ་ལས་བབས་ནས། བཅོམ་ལྡན་འདས་དང་འཇམ་དཔལ་གཞོན་ནུར་གྱུར་པའི་ཞབས་ལ་མགོ་བོས་ཕྱག་འཚལ་ཏེ། བསྐོར་ནས་ཕྱོགས་བཅུར་དོང་ངོ་། །དེ་ནས་འཇམ་དཔལ་གཞོན་ནུར་
གྱུར་པ་ལ་ལྷའི་བུ་དཔལ་བཟངས་ལྡན་གྱིས་འདི་སྐད་ཅེས་སྨྲས་སོ། །འཇམ་དཔལ་ཁྱོད་ཀྱིས་མཛད་པ་མཛད་ཅིང་སེམས་ཅན་ཚད་མེད་པ་བྱང་ཆུབ་ཏུ་ཡོངས་སུ་སྨིན་པར་མཛད་པ་ལེགས་སོ་ལེགས་སོ། །འཇམ་དཔལ་ཁྱོད་ཀྱིས་བྱང་ཆུབ་སེམས་དཔའ་རྣམས་ཀྱི་བྱང་ཆུབ་
ཡོངས་སུ་སྨིན་པར་བགྱིད་པའི་ཆོས་ལས་བརྩམས་ཏེ་སྤོབས་པར་མཛོད་ཅིག །འཇམ་དཔལ་གྱིས་སྨྲས་པ། ལྷའི་བུ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཡོངས་སུ་སྨིན་པར་བྱེད་པའི་ཆོས་ནི་སུམ་ཅུ་རྩ་ལྔའོ། །སུམ་ཅུ་རྩ་ལྔ་གང་ཞེ་ན། འདི་ལྟ་སྟེ། དུས་སུ་སྐུལ་
བ་དང་། ཚོད་ལ་སྐུལ་བ་དང་། རན་པར་སྐུལ་བ་དང་། དབང་པོ་ལ་སྐུལ་བ་དང་། བརྟན་པར་སྐུལ་བ་དང་། ཕ་རོལ་ཏུ་ཕྱིན་པ་ལ་སྐུལ་བ་དང་། ཐབས་ལ་སྐུལ་བ་དང་། ལྷག་པའི་བསམ་པ་ལ་སྐུལ་བ་དང་། བྱམས་པ་ཆེན་པོ་ལ་སྐུལ་བ་དང་། སྙིང་རྗེ་ཆེན་པོ་ལ་
སྐུལ་བ་དང་། ཐེག་པ་ཆེན་པོ་ལ་སྐུལ་བ་དང་། ཐེག་པ་དམན་པ་ལ་སྐུལ་བ་དང་། བདེན་པ་ལ་སྐུལ་བ་དང་། དེ་བྱ་བ་ལ་སྐུལ་བ་དང་། ཆོས་སྲུང་བར་སྐུལ་བ་དང་། ཐོས་པ་བསྟན་པར་སྐུལ་བ་དང་། སེམས་ཅན་སྣ་ཚོགས་སུ་མི་དབྱེ་བར་སྐུལ་བ་དང་། ཚུལ་ཁྲིམས་
འཆལ་པ་དང་། ཚུལ་ཁྲིམས་དང་ལྡན་པ་ལ་སྦྱིན་པའི་གནས་སུ་མཚུངས་པར་སྐུལ་བ་དང་། བདུད་ཀྱི་ལས་བསྟན་པར་སྐུལ་བ་དང་། དམ་བཅས་པ་ཉམས་འོག་ཏུ་ཆུད་པར་སྐུལ་བ་དང་། འཁོར་བས་ཡོངས་སུ་མི་སྐྱོ་བར་སྐུལ་བ་དང་། བདུད་གདུལ་བར་སྐུལ་བ་དང་།
བྱས་པ་ཤེས་པ་དང་། བྱས་པ་གཟོ་བར་སྐུལ་བ་དང་། རྒྱུ་ཟད་པ་ལ་འཇུག་པར་སྐུལ་བ་དང་། རྣམ་པར་ཐར་པའི་སྒོ་ལ་མི་འཇིགས་པར་སྐུལ་བ་དང་། དེ་བཞིན་གཤེགས་པ་ལ་མཆོད་པ་དང་། རིམ་གྲོ་བྱ་བར་སྐུལ་བ་དང་། སེམས་ཅན་ཐམས་ཅད་ལ་ཅི་བྱ་སྙམ་པ་ལ་སྤྲོ་

བར་སྐུལ་བ་དང་། འཇིག་རྟེན་གྱི་ཆོས་དང་མ་འདྲེས་པར་སྐུལ་བ་དང་། དགོན་པ་ལ་དགའ་བར་སྐུལ་བ་དང་། འདོད་པ་ཆུང་ཞིང་ཆོག་ཤེས་པར་སྐུལ་བ་དང་། འདས་པ་དང་མ་འོངས་པ་མ་གྲོལ་བ་དགྲོལ་བ་དང་། དབུགས་མ་ཕྱིན་པ་དབུགས་དབྱུང་བ་དང་། ཡོངས་སུ་
མྱ་ངན་ལས་མ་འདས་པ་ཡོངས་སུ་མྱ་ངན་ལས་བཟླ་བར་སྐུལ་བ་དང་། དཀོན་མཆོག་གསུམ་གྱི་གདུང་མི་འཆད་པར་སྐུལ་བ་དང་། སངས་རྒྱས་ཀྱི་ཞིང་གི་ཡོན་ཏན་བཀོད་པ་ཡོངས་སུ་དག་པར་བླང་བར་སྐུལ་བ་སྟེ། ལྷའི་བུ་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཡོངས་
སུ་སྨིན་པར་བྱེད་པའི་ཆོས་ནི་སུམ་ཅུ་རྩ་ལྔ་པོ་དེ་དག་གོ། །ལྷའི་བུ་དེ་ལྟར་བྱང་ཆུབ་སེམས་དཔའ་ཡོངས་སུ་སྨིན་པར་བྱས་པ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་བསྐྱོད་དུ་མེད་པ་ཡིན་ཏེ། དེ་ནི་ཕས་ཀྱི་རྒོལ་བ་ཐམས་ཅད་ཀྱིས་ཐུལ་བར་མི་ནུས་སོ། །དེ་ནི་ཕྱིན་
ཆད་ཀྱང་བྱང་ཆུབ་སེམས་དཔའི་དྲེགས་པ་བཅུས་དྲེགས་པར་མི་འགྱུར་རོ། །བཅུ་གང་ཞེ་ན། ཚུལ་ཁྲིམས་ཀྱིས་དྲེགས་པ་དང་། ཐོས་པས་དྲེགས་པ་དང་། སྤོབས་པས་དྲེགས་པ་དང་། རྙེད་པ་དང་། བཀུར་སྟི་དང་། ཚིགས་སུ་བཅད་པས་དྲེགས་པ་དང་། དགོན་པར་
གནས་པས་དྲེགས་པ་དང་། སྦྱངས་པའི་ཡོན་ཏན་དང་། ཡོ་བྱད་བསྙུངས་པས་དྲེགས་པ་དང་། གཟུགས་དང་། ལོངས་སྤྱོད་དང་། དབང་ཕྱུག་དང་། གཡོག་འཁོར་གྱིས་དྲེགས་པ་དང་། བརྒྱ་བྱིན་དང་ཚངས་པ་དང་འཇིག་རྟེན་སྐྱོང་བ་བསྙེན་བཀུར་བྱེད་པས་དྲེགས་པ་དང་།
བསམ་གཏན་དང་། མངོན་པར་ཤེས་པས་དྲེགས་པ་དང་། སངས་རྒྱས་དང་། ཆོས་དང་། དགེ་འདུན་ལ་དད་པའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དག་འདོད་པ་དང་བསྟོད་པ་
དང་བསྔགས་པར་བྱེད་པ་དེས་ཀྱང་སྙེམས་པ་མེད་པ་ཡིན་ཏེ། ལྷའི་བུ་བྱང་ཆུབ་སེམས་དཔའི་དྲེགས་པ་བཅུ་པོ་དེ་དག་གིས་མི་སྙེམས་རབ་ཏུ་མི་སྙེམས་སོ། །དེ་ནས་འཇམ་དཔལ་གཞོན་ནུར་གྱུར་པ་ལ་ལྷའི་བུ་དཔལ་བཟངས་ལྡན་གྱིས་འདི་སྐད་ཅེས་སྨྲས་སོ། །འཇམ་དཔལ་

ཁྱོད་ཕྱོགས་གང་ན་གནས་པ་དང་། ཆོས་ཀྱི་རྣམ་གྲངས་འདི་གང་ན་སྤྱོད་པ་དེར་ནི་སངས་རྒྱས་འབྱུང་བར་བལྟའོ། །དེ་ན་ནི་ཆོས་ཀྱི་འཁོར་ལོ་སྐོར་བར་བལྟའོ། །བཅོམ་ལྡན་འདས་ཀྱིས་བཀའ་སྩལ་པ། དེ་དེ་བཞིན་ནོ། །ལྷའི་བུ་དེ་དེ་བཞིན་ཏེ། ཇི་
སྐད་སྨྲས་པ་བཞིན་ནོ། །ཕྱོགས་གང་ན་འཇམ་དཔལ་གཞོན་ནུར་གྱུར་པ་གནས་པ་དེ་ནི་སྟོང་པ་མ་ཡིན་པར་མངོན་ནོ། །གང་ན་ཆོས་ཀྱི་རྣམ་གྲངས་འདི་སྤྱོད་པར་འགྱུར་བ་དེ་ནི་དེ་བཞིན་གཤེགས་པ་ཆོས་ཀྱི་བདག་པོ་ཉིད་བརྩོན་པར་མཛད་དོ། །གང་ཆོས་ཀྱི་རྣམ་གྲངས་འདི་ལ་
ཉན་པར་བྱེད། མོས་པར་བྱེད་པའི་སེམས་ཅན་དེ་དག་ནི་ངའི་ཡིན་པར་འགྱུར་རོ། །གང་དག་ཆོས་ཀྱི་རྣམ་གྲངས་འདི་ཉན་པ་དང་། མོས་པའི་སེམས་ཅན་དེ་དག་ནི་དེ་བཞིན་གཤེགས་པས་འདུལ་བར་བལྟའོ། །གང་དག་ཆོས་ཀྱི་རྣམ་གྲངས་འདི་འཛིན་པ་དང་། དེ་བཞིན་
ཉིད་དུ་ནན་ཏན་བྱེད་པ་དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཡིན་ནོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་བྱམས་པ་དང་། གནས་བརྟན་འོད་སྲུང་ཆེན་པོ་དང་། ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། སྐྱེས་བུ་
དམ་པ་དག་ཇི་ཙམ་དུ་ཆོས་ཀྱི་རྣམ་གྲངས་འདི་བླང་བ་དང་། གཟུང་བ་དང་། བཤད་པ་དང་། ཀུན་ཆུབ་པར་བྱེད་པའི་ཕྱིར་ཁྱེད་ལ་གཏད་དོ། །ང་ནི་རིང་པོར་མི་ཐོགས་པར་ཡོངས་སུ་མྱ་ངན་ལས་འདའ་བར་འགྱུར་གྱིས། དེའི་ཕྱིར་ཁྱེད་ཀྱིས་སེམས་ཅན་ཐམས་ཅད་ལ་སངས་རྒྱས་
ཀྱི་བྱ་བའི་ཆོས་ཀྱི་རྣམ་གྲངས་འདིས་གནས་པར་གྱིས་ཤིག །བྱམས་པས་གསོལ་པ། བཅོམ་ལྡན་འདས་བདག་གིས་ཆོས་ཀྱི་རྣམ་གྲངས་འདི་གཟུང་ལགས་ན། བཅོམ་ལྡན་འདས་ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་གཟུང་བར་བགྱི། བཅོམ་ལྡན་འདས་ཀྱིས་
བཀའ་སྩལ་པ། བྱམས་པ་དེའི་ཕྱིར་ཁྱོད་ཀྱིས་ཆོས་ཀྱི་རྣམ་གྲངས་འདི་བཞི་པ་སྒྲུབ་པ་དང་། བྱང་ཆུབ་སེམས་དཔའི་ལམ་དང་། བྱང་ཆུབ་སེམས་དཔའ་ཡོངས་སུ་སྨིན་པར་བྱེད་པ་ཞེས་བྱ་བར་ཟུང་ཤིག །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བྱང་ཆུབ་སེམས་དཔའ་

བྱམས་པ་དང་། ཚེ་དང་ལྡན་པ་འོད་སྲུང་ཆེན་པོ་དང་། ཚེ་དང་ལྡན་པ་ཀུན་དགའ་བོ་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་
བཞི་པ་སྒྲུབ་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ། །༄༅༅། །རྒྱ་གར་སྐད་དུ། ཏྲི་དྷརྨ་ཀ་ནཱ་མ་སཱུ་ཏྲ། བོད་སྐད་དུ། ཆོས་གསུམ་པ་ཞེས་བྱ་བའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་
ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན། དགེ་སློང་གི་དགེ་འདུན་ཆེན་པོ་དང་ཐབས་ཅིག་ཏུ་བཞུགས་ཏེ། དེ་ནས་བཅོམ་ལྡན་འདས་ཀྱིས་དགེ་སློང་རྣམས་
ལ་བཀའ་སྩལ་པ། དགེ་སློང་དག་འདི་ན་མི་བླུན་པོ་ལ་ལ་དམ་པའི་ཆོས་མ་ཡིན་པ་གསུམ་དང་ལྡན་ན་སྦྱིན་པ་དག་མི་སྦྱིན་ཞིང་བསོད་ནམས་དག་མི་བྱེད་ལ། ཚུལ་ཁྲིམས་ཡང་དག་པར་བླངས་ནས་གནས་པར་མི་བྱེད་དོ། །གསུམ་གང་ཞེ་ན། འདི་ལྟ་སྟེ། འདོད་ཆགས་
དང་། སེར་སྣ་དང་། བག་མེད་པ་སྟེ། དགེ་སློང་དག་འདི་ན་མི་བླུན་པོ་ལ་ལ་དམ་པའི་ཆོས་མ་ཡིན་པ་གསུམ་པོ་དེ་དག་དང་ལྡན་པས་སྦྱིན་པ་དག་མ་བྱིན་ཞིང་བསོད་ནམས་དག་མ་བྱས་ལ། ཚུལ་ཁྲིམས་ཡང་དག་པར་བླངས་ཏེ་གནས་པར་མ་བྱས་པས། ལུས་ཞིག་སྟེ་ཤི་བའི་
འོག་ཏུ་ངན་སོང་ངན་འགྲོ་ལོག་པར་ལྟུང་བ་སེམས་ཅན་དམྱལ་བ་རྣམས་སུ་སྐྱེ་བར་འགྱུར་རོ། །དགེ་སློང་དག་སྐྱེས་བུ་དམ་པ་དམ་པའི་ཆོས་གསུམ་དང་ལྡན་པ་ནི་སྦྱིན་པ་དག་སྦྱིན་ཞིང་བསོད་ནམས་དག་བྱེད་ལ། ཚུལ་ཁྲིམས་ཡང་དག་པར་བླངས་ཏེ་གནས་པར་བྱེད་དོ། །གསུམ་
པོ་གང་ཞེ་ན། འདི་ལྟ་སྟེ། མ་ཆགས་པ་དང་། སེར་སྣ་མེད་པ་དང་། བག་ཡོད་པའོ། །དགེ་སློང་དག་དམ་པའི་ཆོས་གསུམ་པོ་དེ་དག་དང་ལྡན་ན་སྐྱེས་བུ་དམ་པ་སྦྱིན་པ་དག་བྱིན་ཞིང་བསོད་ནམས་དག་བྱེད་ལ་ཚུལ་ཁྲིམས་ཡང་དག་པར་བླངས་ཏེ་གནས་པར་བྱས་པས་ལུས་

ཞིག་སྟེ་ཤི་བའི་འོག་ཏུ་བདེ་འགྲོ་མཐོ་རིས་ཀྱི་འཇིག་རྟེན་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས། སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། །གང་
ཕྱིར་སེར་སྣ་བག་མེད་པས། །སྦྱིན་པ་སྦྱིན་པར་མི་བྱེད་དེ། །དེ་ཕྱིར་བསོད་ནམས་འདོད་པ་ཡི། །མཁས་པས་སྦྱིན་པ་སྦྱིན་པར་བྱ། །སེར་སྣ་ཅན་གྱིས་འཇིགས་པ་ནི། །བཀྲེས་དང་སྐོམ་པ་འདི་ཡིན་ན། །གང་གིས་འཇིགས་པས་འདིར་མ་བྱིན། །དེ་ཉིད་མི་ཡི་
འཇིགས་པ་ཡིན། །གང་གིས་སེར་སྣའི་དབང་གིས་ན། །ཡོད་མ་བྱིན་པ་འཇིགས་པ་སྟེ། །འཇིག་རྟེན་འདི་དང་ཕ་རོལ་དུ། །དེ་ཡིས་བྱིས་པ་བགོས་པར་འགྱུར། །གང་དག་སེར་སྣ་སྤངས་ནས་ཀྱང་། །དུས་སུ་སྦྱིན་པ་སྦྱིན་བྱེད་ན། །ཤི་ཡང་དེ་ནི་ཤི་མ་ཡིན། །
རྒྱགས་བཟང་པོ་ཡི་འགྲོན་པོ་བཞིན། །གང་དག་ཤིན་ཏུ་གཏང་དཀའ་བ། །ཉུང་ངུའམ་མང་པོ་གཏོང་བྱེད་ན། །གཏང་དཀའ་གཏོང་བ་དེ་དག་ནི། །དཀའ་བའི་ལས་དག་བྱེད་པ་ཡིན། །དམ་པ་མིན་པས་མི་རྟོགས་ཏེ། །དམ་པ་ཆོས་ལས་འདའ་མི་བྱེད། །དེ་ཕྱིར་
དམ་པ་དམ་པ་མིན། །འདི་ནས་ཤི་བར་འགྱུར་བ་ན། །དམ་པ་མིན་པ་དམྱལ་བར་འགྲོ། །དམ་པ་དག་ནི་མཐོ་རིས་འགྲོ། །རྒ་བས་གཙེས་པ་ལ་ནི་སྐྱབས་མེད་དེ། །ཚེ་ཐུང་བས་ནི་སྲོག་ཁྱེར་དུས་ཀྱང་ཉེ། །འཆི་བའི་འཇིགས་པ་འདི་མཐོང་རྣམས་ཀྱིས་ནི། །བསོད་ནམས་
བདེ་སྦྱོར་དག་ནི་བྱ་བའི་རིགས། །བུད་མེད་སྤངས་འདིར་སྦྱོར་བས་འཚོ་བ་གང་། །དཀའ་བས་བྱིན་པ་ཉུང་ངུ་བྱིན་ན་ཡང་། །སྟོང་གི་མཆོད་སྦྱིན་བརྒྱ་སྟོང་བྱེད་པ་ནི། །དེ་ཡི་བཅུ་དྲུག་ཆར་ཡང་མི་ཕོད་དོ། །ཅི་ཕྱིར་མཆོད་སྦྱིན་ཡངས་ཤིང་རྒྱ་ཆེ་བ། །མཆོད་སྦྱིན་འཐུན་པ་
དེ་ཡི་ལམ་མི་འགྲོ། །ཇི་ལྟར་སྟོང་གི་མཆོད་སྦྱིན་ཆེ་རྣམས་ཀྱང་། །དེ་ཡི་བཅུ་དྲུག་ཆར་མི་འགྱུར་ཞེ་ན། །བྱིས་པ་ལ་ལ་གསོད་ཅིང་འཆིང་བྱེད་འདིར། །གཞན་ནོར་མ་བྱིན་ལེན་བྱེད་བརླག་པར་འགྱུར། །མཆི་མའི་གདོང་བཅས་ཆད་པར་བཅས་པ་ཡི། །ཡོན་དེའི་མཆོད་

སྦྱིན་འཐུན་པའི་ལམ་མི་འགྲོ། །དེ་ལྟར་མཆོད་སྦྱིན་ཡངས་ཤིང་རྒྱ་ཆེ་བ། །མཆོད་སྦྱིན་འཐུན་པའི་ལམ་དུ་མི་འགྲོ་ལ། །དེ་ལྟར་སྟོང་གི་མཆོད་སྦྱིན་སྟོང་རྣམས་ཀྱང་། །དེ་ཡི་བཅུ་དྲུག་ཆར་ཡང་མི་ཕོད་དོ། །ལ་ལ་གང་དག་གཟུ་ལུམས་མ་ཡིན་པ། །ཆོས་བཞིན་
ནོར་རྣམས་ཐོབ་པ་གཏོང་བྱེད་པ། །དེ་དག་གཏང་དཀའ་དེ་རྣམས་བཏང་བས་ན། །རང་གི་བསོད་ནམས་ཀྱིས་ནི་ལྷ་གནས་འགྲོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། དགེ་སློང་དེ་དག་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་
པར་བསྟོད་དོ།། །།ཆོས་གསུམ་པ་ཞེས་བྱ་བའི་མདོ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང་། ཞུ་ཆེན་གྱི་ལོ་ཙྪ་བ་བན་དེ་དེ་བ་ཙན་དྲས་བསྒྱུར། ལོ་ཙྪ་བ་དཔལ་བརྩེགས་ཀྱིས་ཞུས་ཏེ་གཏན་ལ་ཕབ་པ།། །།
༄༅༅། །རྒྱ་གར་སྐད་དུ། ཨཱརྱ་དྷརྨ་ཀེ་ཏུ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་ཆོས་ཀྱི་རྒྱལ་མཚན་གྱི་མདོ་ཐེག་པ་ཆེན་པོའོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་
ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཏེ། དེའི་ཚེ་འཁོར་དེར་བྱང་ཆུབ་སེམས་དཔའ་ཆོས་ཀྱི་རྒྱལ་མཚན་ཞེས་བྱ་བ་འདུག་པ་སྟན་ལས་ལངས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་
བྱང་ཆུབ་སེམས་དཔའ་ཆོས་དུ་དང་ལྡན་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་སངས་རྒྱས་སུ་འགྱུར་བ་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་བྱང་ཆུབ་སེམས་དཔའ་ཆོས་བཅུ་དང་ལྡན་ན་མྱུར་དུ་བླ་ན་མེད་པ་ཡང་དག་པར་རྫོགས་པའི་སངས་
རྒྱས་སུ་འགྱུར་རོ། །བཅུ་གང་ཞེ་ན། འདིར་བྱང་ཆུབ་སེམས་དཔའ་དད་པ་དང་ལྡན་པར་བྱ་བ་དང་། བྱང་ཆུབ་ཀྱི་སེམས་དང་ལྡན་པར་བྱ་བ་དང་། དགེ་བའི་བཤེས་གཉེན་ཡོངས་སུ་མི་གཏང་བ་དང་། དགོན་པར་བསྟེན་ཅིང་འདུ་འཛི་སྤང་བ་དང་། བླ་མ་དང་མཁན་པོའི་

གདམས་ངག་ཡོངས་སུ་སྩལ་བ་དང་། སྙིང་རྗེ་དང་ལྡན་པ་དང་། མང་དུ་ཐོས་པ་དང་ལྡན་པ་དང་། ཏིང་ངེ་འཛིན་དང་ལྡན་པ་དང་། ཚུལ་ཁྲིམས་དང་ལྡན་པ་དང་། བརྩོན་འགྲུས་ཕུན་སུམ་ཚོགས་པས་དོན་མ་ལུས་པར་བསྒྲུབ་པའོ། །བཅོམ་ལྡན་འདས་ཀྱིས་དེ་
སྐད་ཅེས་བཀའ་སྩལ་པ་དང་། བྱང་ཆུབ་སེམས་དཔའ་ཆོས་ཀྱི་རྒྱལ་མཚན་དང་། ཐམས་ཅད་དང་ལྡན་པའི་འཁོར་དེ་དག་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།འཕགས་པ་ཆོས་ཀྱི་རྒྱལ་མཚན་གྱི་མདོ་རྫོགས་སོ།། །།
༄༅། །རྒྱ་གར་སྐད་དུ། དྷརྨ་ས་མུ་དྲ་ན་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། ཐེག་པ་ཆེན་པོའི་མདོ་ཆོས་རྒྱ་མཚོ་ཞེས་བྱ་བ། འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱ་མཚོའི་གླིང་ཕྲན་པོ་ཏ་ལ་ཀའི་རི་ལ་རྒྱལ་བའི་སྲས་མི་ལྡོག་པ་ཕལ་པོ་ཆེས་བསྐོར་
ཅིང་མདུན་དུ་བྱས་ཏེ་བཞུགས་སོ། །དེ་ནས་བཅོམ་ལྡན་འདས་ཀྱིས་འཇིག་རྟེན་གྱི་དབང་པོ་བྱང་ཆུབ་སེམས་དཔའ་སེམས་དཔའ་ཆེན་པོ་ལ་བཀའ་སྩལ་པ། སྐྱེས་བུ་དམ་པ་ཆོས་ཀྱི་གཏམ་ཅི་འདོད་པ་དྲི་བར་གྱིས་ཤིག །ཅེས་པ་དང་། བརྩེ་བ་ལ་བསྒྲིབས་པ་མེད་པས་རྣམ་
པར་གྲོལ་བ་ཐོབ་པ། འཇིག་རྟེན་གྱི་དབང་པོ་བྱང་ཆུབ་སེམས་དཔས་བཅོམ་ལྡན་འདས་ལ་གསོལ་པ། བཙུན་པ་ཇི་ལྟར་ན་གཞོན་ནུར་གྱུར་པས་བདུད་ལས་རྒྱལ་བ་ལགས། གང་གིས་བྱང་ཆུབ་ཀྱི་སེམས་བསྐྱེད་མ་ཐག་པས་འདོད་པ་ལ་རྟོག་ཅིང་མི་སྟེན་པ་དང་། མི་འཆང་བ་དང་།
ང་རྒྱལ་མེད་པ་དང་། ཤེས་རབ་དང་། ཐབས་ལ་མཁས་པ་དང་། སྟོང་པ་ཉིད་ལ་ཤིན་ཏུ་མོས་པ་དང་ལྡན་ཏེ། ཡོད་པ་དང་མེད་པ་སྤངས་པ་དང་། ཡང་དག་པ་མ་ཡིན་པ་ལ་བརྟགས་པས་གྲངས་མེད་པར་ཡང་འཁོར་བར་འགྱུར། ཇི་ལྟར་ན་དགེ་བར་གསུངས་པའི་ཆོས་དང་འདུལ་བ་
ལ་རབ་ཏུ་བྱུང་ཞིང་ཡང་དག་པར་རྫོགས་པའི་བསྙེན་པར་རྫོགས་པ་ལགས། འགྲོ་བ་ཐ་དད་པའི་ཆོས་རྣམས་ལས་འདས་པ་དང་། གནས་ངན་ལེན་ལ་རྟེན་ཅིང་འཇུག་པའི་སེམས་དང་། ཡིད་དང་། ཡིད་ཀྱི་རྣམ་པར་ཤེས་པ་ལས་འདས་ཏེ། མི་གཉིས་པའི་ཆོས་ཐོས་པ་ནི་ཤིན་ཏུ་རབ་

ཏུ་བྱུང་བའོ། །སེམས་ཅན་གང་ཐ་དད་པ་འདི་ལྟ་བུས་རབ་ཏུ་བྱུང་བ་དེ་ནི་ཡང་དག་པར་རབ་ཏུ་བྱུང་བའོ། །གང་རབ་ཏུ་བྱུང་ཡང་ཚུལ་ཁྲིམས་དང་། སྤྱོད་ཡུལ་དང་། འཚོ་བ་དང་། ལྟ་བ་དང་། བསམ་པ་ཉམས་པ་སྟེ། དེ་ནི་མགོ་དང་། ཁ་སྤུ་བྲེགས་ཀྱང་དོན་མེད་པ་སྟེ། རྙོག་པ་
འཆང་བས་ན་རྙོག་པ་དེས་ངན་སོང་དུ་གཞོལ་བ་ཡིན་ནོ། །ངས་དད་པས་བྱིན་པ་སྤྱོད་དུ་གནང་བ་ནི་རིགས་པས་གྲོལ་བ་སྟེ། དགེ་སློང་གང་བརྩོན་པ་མི་འདོར་བ་དེས་གཟུགས་མི་འདོར། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་མི་འདོར། ཕུང་པོ་ལྔ་
ཐ་དད་པ་དང་། རིལ་གྱིས་བརྟགས་པའི་རང་བཞིན་བས་ན། མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པར་ལྟ་བ་དེ་དག་ཀྱང་མི་དམིགས་པའི་ཚུལ་གྱིས་ཁམས་དང་། སྐྱེ་མཆེད་ཀྱི་ལྷ་རྣམས་མ་ཡིན་པར་སྤྲོ་བ་དམ་པར་བྱེད་པས་རྟག་ཏུ་སྒོམ་མོ། །སྙིང་
པོ་མེད་པ་དང་། འབྲུམ་པ་ཅན། ཟུག་རྔུ་ཅན་དང་ལྡན་པ། སྐྱོན་ཅན། ཕ་རོལ་པོ་སླུ་བའི་ཆོས་ཉིད་ཅེས་སུན་འབྱིན་པ་དེ་དག་ཀྱང་མི་དམིགས་པའི་ཚུལ་དུ་སྦྱོར་བས། གང་ལུས་ཀྱིས་ལུས་ལ་སྲེད་པ་དང་། ལུས་ལ་བྱམས་པ་དང་། ལུས་ལ་བདག་ཡིད་ཆེས་པ་དང་། ལུས་ལ་
ཞེན་པ་དེ་དག་རབ་ཏུ་སྤོང་ངོ་། །གང་འདི་ལྟ་བུའི་དགེ་སློང་ནི་དགེ་བར་གསུངས་པའི་ཆོས་དང་འདུལ་བ་ལ་རབ་ཏུ་བྱུང་བར་གྱུར། དད་པས་བསྙེན་པར་རྫོགས་པའི་ཡང་དག་པར་རྫོགས་པ་ཡིན་ཏེ། འདི་ལྟ་བུའི་དགེ་སློང་ནི་ལྷ་དང་འཇིག་རྟེན་དུ་བཅས་པ་རྣམས་ཀྱི་སྦྱིན་གནས་སུ་གྱུར་
པའོ། །དེ་ནས་བྱམས་པ་བྱང་ཆུབ་སེམས་དཔས་འཇིག་རྟེན་གྱི་དབང་པོ་བྱང་ཆུབ་སེམས་དཔའ་ལ་སྨྲས་པ། བཅོམ་ལྡན་འདས་ཀྱིས་ཅི་ལས་དགོངས་ཏེ་འགྲོ་བ་ཐ་དད་པའི་ཆོས་རྣམས་ལ་འདས་ཤིང་འཇིག་རྟེན་ལས་འདས་པའི་ཆོས་རྣམས་ཐོབ་པ་དེ་ནི་དགེ་བར་གསུངས་པའི་ཆོས་
དང་འདུལ་བ་ལ་རབ་ཏུ་བྱུང་བར་གྱུར། བསྙེན་པར་རྫོགས་པའི་ཡང་དག་པར་རྫོགས་པ་ཞེས་གསུངས། གཞན་གང་ཞིག་རབ་ཏུ་བྱུང་ཞིང་བསྙེན་པར་རྫོགས་ཀྱང་བདག་བསླུས་པ་སྟེ། ཕ་བོང་ལྟར་བྱི་བ་ཡང་མ་ཡིན། བྱ་ཡང་མ་ཡིན་པ་བཞིན་དུ་དེ་ནི་ཁྱིམ་པ་ཡང་མ་ཡིན། རབ་ཏུ་

བྱུང་བ་ཡང་མ་ཡིན་པས་ན་གླེན་པའི་སྐྱེས་བུ་དེ་དེ་ལྟ་བུའི་ཚུལ་དུ་ཟུང་ཤིག །སྐྱེས་བུ་དམ་པ་འགྲོ་བ་ཐ་དད་པའི་ཆོས་དེ་དག་ནི་སྒྱུ་མ་ལྟ་བུ་སྟེ། དེ་ལས་འདའ་བར་ཡང་མི་ནུས། འགྲོ་བ་ཐ་དད་པའི་ཆོས་ནི་ཡོངས་སུ་མ་རྫོགས་པས་ན་དེ་ལས་འདའ་བར་ཡང་དཀའ།
སེམས་ཅན་གྱི་ཁམས་ནི་ཕྱི་ན་ཡང་མེད། ནང་ན་ཡང་མེད་དེ། གཉིས་ཀར་ཡང་དམིགས་སུ་མེད་པས་ན། གང་སེམས་ཅན་གྱི་ཁམས་ཀྱི་དངོས་པོ་དེ་ནི་འགྲོ་བ་ཐ་དད་པའི་ཆོས་ཀྱི་དངོས་པོ་སྟེ། དེ་ལས་འདའ་བར་ཡང་དཀའ་བ་དེ་ལ་ཀྱེ་རྒྱལ་བའི་སྲས་བཅོམ་ལྡན་འདས་ཀྱིས་འགྲོ་
བ་ཐ་དད་པའི་ཆོས་ལས་འདས་ཤིང་འཇིག་རྟེན་ལས་འདས་པའི་ཆོས་ཐོབ་པའི་དགེ་སློང་དེ་ནི་རབ་ཏུ་བྱུང་བར་གྱུར། བསྙེན་པར་རྫོགས་པར་ཡང་དག་པར་རྫོགས་པ་སྟེ། དེ་ནི་དད་པས་བྱིན་པ་སྤྱོད་པའི་མཆོད་གནས་སུ་གྱུར་པའོ་ཞེས་གསུངས་པ་ཡང་ཀྱེ་རྒྱལ་བའི་སྲས་རྟེན་པའི་
གནས་མེད་ན། དེ་ལ་འཐོབ་པ་གང་ཅི་སྟེ་འཇིག་རྟེན་ལས་འདས་པའི་ཆོས་རྣམས་འཐོབ་པར་འགྱུར་ན་དེ་ནི་དམིགས་པར་གྱུར་པའོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་ཆོས་ཉིད་ནི་མི་དམིགས་པ་སྟེ། བཅོམ་ལྡན་འདས་ཀྱིས་ཀྱང་འདི་ལྟར་
དགོངས་ནས་འགྲོ་བ་ཐ་དད་པའི་ཆོས་ལས་འདས་ཤིང་འཇིག་རྟེན་ལས་འདས་པའི་ཆོས་ཐོབ་པ་དེ་ནི་དགེ་སློང་ཡང་དག་པར་གྱུར་པ་སྟེ། དད་པས་བྱིན་པ་སྤྱོད་པའི་མཆོད་གནས་སོ། །དེ་ནས་བྱམས་པ་བྱང་ཆུབ་སེམས་དཔས་འཇིག་རྟེན་གྱི་དབང་པོ་བྱང་ཆུབ་སེམས་དཔའ་ལ་སྨྲས་པ།
བཅོམ་ལྡན་འདས་ཀྱིས་ཅི་ལས་དགོངས་ཏེ། བརྩོན་པ་མི་འདོར་བའི་དགེ་སློང་གང་གིས་གཟུགས་མི་འདོར། ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་མི་འདོར་བ་དེ་ནི་རབ་ཏུ་བྱུང་བའི་དགེ་སློང་སྟེ། དེ་ནི་དགེ་བར་གསུངས་པའི་ཆོས་ཀྱིས་འདུལ་བ་ལ་ཤིན་ཏུ་
རབ་ཏུ་བྱུང་བར་གྱུར་པས་ན་འདི་ལྟ་བུའི་དགེ་སློང་ནི་དད་པས་བྱིན་པ་སྤྱོད་པའི་མཆོད་གནས་སུ་གྱུར་པའོ་ཞེས་གསུངས། འཇིག་རྟེན་གྱི་དབང་པོས་སྨྲས་པ། ཀྱེ་རྒྱལ་བའི་སྲས་བཅོམ་ལྡན་འདས་ཀྱིས་ཆོས་ཉིད་ལ་དགོངས་ཏེ་ཆོས་ཀྱི་དབྱིངས་ནང་ན་ཡང་མེད། ཕྱི་ན་ཡང་མེད་དེ། གཉི་

གར་ཡང་དམིགས་སུ་མེད་པས་ན་ནད་མེད་པར་བཏགས་པ་དང་། མི་སྐྱེ་བར་བཏགས་པ་དང་། མི་འགག་པར་བཏགས་པ་རྣམས་གདགས་སུ་མེད་པ་སྟེ། སེམས་ཅན་གྱི་ཁམས་མཉམ་པ་བཞིན་དུ་ཆོས་ཀྱི་དབྱིངས་མཉམ་པ་ཉིད། ཆོས་ཀྱི་དབྱིངས་མཉམ་པ་བཞིན་དུ་
སེམས་ཅན་གྱི་ཁམས་མཉམ་པ་ཉིད་དེ། སེམས་ཅན་གྱི་ཁམས་མཉམ་པ་ཉིད་དང་། ཆོས་ཀྱི་དབྱིངས་མཉམ་པ་ཉིད་དུ་མི་གཉིས་ཏེ། གཉིས་སུ་མེད་དོ། །དེ་མི་གཉིས་ཏེ་གཉིས་སུ་མེད་པས་ན་དེ་ལ་དོར་བ་ཡང་མེད། མི་དོར་བ་ཡང་མེད། གང་དོར་བ་ཡང་མེད། མི་དོར་བ་ཡང་མེད་
པས་ན་དེ་ལ་འདའ་བ་དང་། ཐོབ་པར་མི་ནུས་ཏེ་བཅོམ་ལྡན་འདས་ཀྱིས་ཀྱང་འདི་ལྟར་དགོངས་ནས་གདགས་སུ་མེད་པའི་དགེ་སློང་བཏགས་པ་ལ་མི་འཇུག་གོ། །གང་ཡི་གེ་མེད་པའི་དགེ་སློང་ཡི་གེ་ལས་འདས་པ་སྟེ། དེ་ལ་གྲངས་ཀྱིས་བསྟན་པར་ཡང་མི་རུང་སྟེ། དེ་ནི་མི་འོང་མི་འགྲོ་མི་
གནས་མི་འདུག་ཉལ་བར་ཡང་མི་རྟོག་གོ། །ཞི་བ་དང་ཉེ་བར་ཞི་བ་རྣམས་མི་དམིགས་པའི་དགེ་སློང་ལ་བརྟགས་པ་སྟེ། སྤྱོད་པ་རྣམས་ཀྱང་བརྟགས་པའོ། །ལོག་པ་ལ་རྣམ་པ་མང་དུ་རྟོག་པའི་དགེ་སློང་སྤྱོད་པ་ནི་མ་བརྟགས་པའོ། །བཅོམ་ལྡན་འདས་ཀྱིས་འདི་ལྟར་དགོངས་ནས་འདི་
ལྟ་བུའི་དགེ་སློང་ནི་དད་པས་སྦྱིན་པ་སྤྱོད་པའི་སྦྱིན་གནས་སུ་གྱུར་པའོ། །དེ་ནས་བཅོམ་ལྡན་འདས་ཀྱིས་སྤྱན་རས་གཟིགས་དབང་པོ་བྱང་ཆུབ་སེམས་དཔའ་ལ་དགེ་བ་བྱིན་ཏེ་ངས་དགོངས་ཏེ་བཤད་པ་བཞིན་དུ་སྐྱེས་བུ་དམ་པ་ཁྱོད་ཀྱིས་བསྟན་པ་ནི་དགེའོ་དགེའོ། །དགེ་བར་གསུངས་
པའི་ཆོས་ཀྱི་འདུལ་བ་ལ་རབ་ཏུ་བྱུང་བ་འདི་བླ་ན་མེད་པ་དམ་པའི་ཆོས་ཀྱི་ཕྱག་རྒྱ་སྟེ། འདི་ཚུལ་ཁྲིམས་ཉམས་པ་དང་། མ་དུལ་བ་དང་། ང་རྒྱལ་མངོན་པར་བྱེད་པ་རྣམས་ཀྱི་མདུན་དུ་མི་བཤད་པར་གྱིས་ཤིག །དེ་ལྟ་བུ་དེ་དག་རྣམས་ཀྱི་སྙེམས་པ་སྤང་བའི་ཕྱིར་ཕྱག་རྒྱ་འདི་ལ་གང་
གིས་ཡང་དག་པ་ཇི་ལྟ་བ་བཞིན་དུ་ཤེས་རབ་ཀྱིས་བལྟས་ཤིང་མི་དམིགས་པའི་ལུས་མངོན་དུ་བྱས་ན། དེས་ཡིད་ཀྱི་ལུས་མྱུར་དུ་འཐོབ་བོ། །གང་གི་ཡིད་ཀྱི་ལུས་དེས་གྲངས་མེད་པའི་སེམས་ཅན་རྣམས་བྱང་ཆུབ་ཏུ་སྨིན་པར་བྱེད་དོ། །དེ་ནས་ཆོས་ཀྱི་གཞུང་འདི་བཤད་པའི་ཚེ་དགེ་སློང་

བདུན་སྟོང་ཟག་པ་མེད་པར་མི་སྐྱེ་བའི་སེམས་རྣམ་པར་གྲོལ་བར་གྱུར། བྱང་ཆུབ་སེམས་དཔའ་སྟོང་ཕྲག་བཅུ་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར། དམིགས་པ་ཅན་གྱི་དགེ་སློང་ལྔ་བརྒྱ་ཆོས་ཀྱི་གཞུང་འདི་མི་སྒྲུབ་ཅིང་མི་འཇུག་པ་དང་། མ་དད་པས་ན་སྟན་ལས་
ལངས་ཏེ་དོང་ངོ་། །བཅོམ་ལྡན་འདས་ངས་དགོངས་ཏེ་གསུངས་པ་འདི་དག་འཇིག་རྟེན་ཐམས་ཅད་ཡིད་མི་ཆེས་པའི་གཉེན་པོ་ཡིན་པས་ན་ཆོས་ཀྱི་གཞུང་འདི་དམིགས་པ་དང་བཅས་པ་རྣམས་མི་འཐུན་པའོ། །ཡོད་པ་མ་ཡིན་པ་ལ་བརྟེན་པ་རྣམས་དང་མི་འགལ་ཏེ། དགེ་བའི་བཤེས་
གཉེན་གྱིས་བཟུང་བ་རྣམས་དང་། ཟབ་མོའི་ཆོས་ལ་མོས་པ་རྣམས་དང་། སྐྱོ་ཞིང་ཆོག་ཤེས་པས་བསྙུངས་ཏེ་དབེན་པ་ལ་མངོན་པར་དགའ་བ་རྣམས་དང་། སྔོན་གྱི་སངས་རྒྱས་རྣམས་ལ་དགེ་བའི་རྩ་བ་བསྐྲུན་པ་རྣམས་ཀྱིས་ངའི་ཆོས་ཀྱི་གཞུང་འདི་ལ་སྟོན་པར་ཤེས་སོ། །ཀྱེ་རྒྱལ་
བའི་སྲས་འདི་ལྟ་སྟེ། དཔེར་ན་སྐྱེས་བུ་གང་ཞིག་གཉིད་ཀྱིས་ལོག་པའི་རྨི་ལམ་ན་འགྲོ་བ་མང་པོའི་མདུན་ན་སྨྲ་ཞིང་ཆོས་འཆད་ཀྱང་ཆོས་དེ་འཇིག་རྟེན་ཐམས་ཅད་ལས་མ་གྲགས་ན། ཀྱེ་རྒྱལ་བའི་སྲས་ཅི་འགྲོ་བ་མང་པོ་དེ་རྣམས་ཡོད་དེ། གང་དེས་སངས་རྒྱས་ཀྱི་ཆོས་བཤད་པ་དང་མི་འགལ་
བ་སྙམ་དུ་སེམས་སམ། བྱམས་པས་སྨྲས་པ། རྨི་ལམ་ནི་ཡང་དག་པར་མ་མཆིས་པ་སྟེ། འཁྲུལ་པ་ཙམ་ཞིང་མཆིས་པར་བས་ན་དེ་ངན་འགྲོ་ཕལ་པོ་ཆེ་ལ་ཆོས་འཆད་པར་གྱུར་པ་ལྟ་ག་ལ་ཞིག་མཆིས། ཀྱེ་རྒྱལ་བའི་སྲས་དེ་ལྟར་དེ་བཞིན་དུ་ཆོས་ཐམས་ཅད་ནི་རྨི་ལམ་དང་མཚུངས་ཏེ།
ཡང་དག་པ་མ་ཡིན་པར་འབྱུང་བར་བྱུང་ནས་ཀྱང་མེད་པར་གྱུར་པ་སྟེ། ཀུན་རྫོབ་ཀྱང་འཁྲུལ་པ་ཙམ་ཞིག་ཡོད་ཀྱི་དོན་དམ་པར་ནི་མ་ཡིན་ནོ། །འཕགས་པའི་ཤེས་རབ་ཀྱིས་ཇི་ལྟ་བ་མངོན་དུ་བྱས་ན་བསམ་གཏན་སེམས་པའི་བསམ་གཏན་པ་ཡང་མི་དམིགས་པ་སྟེ། དེ་ལ་ཆོས་ཀྱི་ཚུལ་
ཙམ་ཞིག་ཡོད་ཀྱི་ཀུན་ཏུ་བརྟགས་པ་དང་། གཞན་གྱི་དབང་ལས་ཀྱི་རྣམས་ནི་ཡོད་པ་མ་ཡིན་ནོ། །དེ་ལྟར་དེ་བཞིན་དུ་ཆོས་འདི་ནི་འཇིག་རྟེན་པ་ཐམས་ཅད་དང་མི་འཐུན་པའོ། །ཆོས་འདི་དག་ལ་དམིགས་པ་རྣམས་ཀྱིས་ནི་དོན་དམ་པར་འཛིན་གྱི་འཕགས་པའི་རྣམས་ནི་མི་དམིགས་

སོ། །བྱིས་པ་རྣམས་མི་ཤེས་པས་དེ་ལ་མངོན་པར་ཞེན་པས་ན་དམྱལ་བ་དང་། ཡི་དགས་རྣམས་ཀྱི་སྡུག་བསྔལ་གྱིས་ཉོན་མོངས་པ་མྱོང་བར་འགྱུར་རོ། །ཆོས་ཀྱི་གཞུང་འདི་ཇི་ལྟ་བ་དེ་ནི་དམིགས་པའོ། །ཇི་ལྟར་དམིགས་པ་དེ་ནི་ཆོས་ཐམས་ཅད་དོ། །དེ་ལྟར་དུས་གསུམ་
གྱི་ཆོས་ཐམས་ཅད་མཉམ་པ་ཉིད་དེ། མི་དམིགས་པས་ན་གང་དམིགས་པ་དེ་ནི་རྟོགས་པའོ། །གང་རྟོགས་པ་དེ་ནི་ཐོབ་པ། གང་ཐོབ་པ་དེ་ནི་བྱང་ཆུབ། གང་བྱང་ཆུབ་པ་དེ་ནི་དེ་བཞིན་ཉིད། གང་དེ་བཞིན་ཉིད་པ་དེ་ནི་ཡང་དག་པའི་མཐའ། གང་ཡང་དག་པའི་མཐའ་དེ་ནི་
སྟོང་པ་ཉིད། གང་སྟོང་པ་ཉིད་དེ་ནི་མཚན་མ་མེད་པ། གང་མཚན་མ་མེད་པ་དེ་ནི་སྨོན་པ་མེད་པ། གང་སྨོན་པ་མེད་པ་དེ་ནི་དོན་དམ་པ། གང་དོན་དམ་པ་དེ་ནི་ཆོས་ཀྱི་དབྱིངས། གང་ཆོས་ཀྱི་དབྱིངས་དེ་ནི་གཉིས་སུ་མེད་པའི་མཐའ། གང་གཉིས་སུ་མེད་པའི་མཐའ་དེ་ནི་དབུ་མར་
སྒྲུབ་པ། གང་དབུ་མར་སྒྲུབ་པ་དེ་ནི་ཡང་དག་པར་རྫོགས་པའི་སངས་རྒྱས་ཀྱི་ཆོས་ཀྱི་སྐུ་རྟག་པ། བརྟན་པ། མི་འགྱུར་བ་སྟེ། རྟག་པ་ཡང་མ་ཡིན། མི་རྟག་པ་ཡང་མ་ཡིན་ཏེ། དེ་ནི་གདགས་པ་ཡང་མ་ཡིན། མི་གདགས་པ་ཡང་མ་ཡིན། གང་གདགས་པ་ཡང་མ་ཡིན། མི་གདགས་
པ་ཡང་མ་ཡིན་པ་དེ་ནི་འཇིག་རྟེན་པ་ཡང་མ་ཡིན། འཇིག་རྟེན་ལས་འདས་པ་ཡང་མ་ཡིན། གང་འཇིག་རྟེན་པ་ཡང་མ་ཡིན། འཇིག་རྟེན་ལས་འདས་པ་ཡང་མ་ཡིན་པ་དེ་ནི་བརྗོད་དུ་མེད་པ། གང་བརྗོད་དུ་མེད་པ་དེ་ནི་ཆུང་ཟད་ཀྱང་མེད་པ། གང་ཆུང་ཟད་ཀྱང་མེད་པ་དེ་ནི་སེམས་ཅན་
རྣམས་ཀྱི་བསོད་ནམས་ཀྱི་ཞིང་། གང་སེམས་ཅན་རྣམས་ཀྱི་བསོད་ནམས་ཀྱི་ཞིང་དེ་ནི་སྟོན་པ། གང་སྟོན་པ་དེ་ནི་རྣམ་པར་མི་རྟོག་པ། གང་རྣམ་པར་མི་རྟོག་པ་དེ་ནི་དམིགས་པ་མེད་པ། གང་དམིགས་པ་མེད་པ་དེ་ནི་མི་འགྱུར་བ་གྲུབ་པ། གང་མི་འགྱུར་བ་གྲུབ་པ་དེ་ནི་ཡིད་བཞིན་
གྱི་ནོར་བུ་རིན་པོ་ཆེ་སྟེ། འདུལ་བའི་སེམས་ཅན་རྣམས་ཀྱི་བསམ་པ་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་ཇི་ལྟར་མོས་པ་ཐམས་ཅད་བྱེད་དོ། །དེ་ནས་བྱང་ཆུབ་སེམས་དཔའ་མང་པོ་དེ་དག་གིས་ཚིག་འཐུན་པར་སྨྲས་པ། ཆོས་ཀྱི་གཞུང་འདི་གང་ན་སྤྱོད་པའི་ས་ཕྱོགས་དེ་རྡོ་རྗེ་ལྟ་བུ་སྟེ།

སངས་རྒྱས་དང་བྱང་ཆུབ་སེམས་དཔའ་རྣམས་བཞུགས་པས་ན་སེམས་ཅན་དེ་མྱུར་དུ་མངོན་པར་ཤེས་པ་དང་། དབང་པོ་རྣོན་པོར་འགྱུར་བར་རིག་པར་བྱའོ། །གང་ཞིག་ཆོས་ཀྱི་གཞུང་འདི་ལ་བརྗོད་དམ། འཛིན་ཏམ། ཀློག་གམ། ཆུབ་པར་བྱེད་དམ། ཁ་ཏོན་
དུ་བྱེད་དམ། ཚུལ་བཞིན་དུ་ཡིད་ལ་བྱེད་ན་དེ་བདུད་ཀྱི་དབང་དུ་མི་འགྱུར་རོ། །བཅོམ་ལྡན་འདས་ཀྱིས་དགོངས་པ་འདི་བཤད་ནས་འཇིག་རྟེན་གྱི་དབང་པོ་དང་། བྱམས་པ་ལ་སོགས་པ་བྱང་ཆུབ་སེམས་དཔའ་རྣམས་དང་། ཉན་ཐོས་ཆེན་པོ་རྣམས་དང་། ལྷ་དང་མིར་བཅས་པ་དང་།
ལྷ་མ་ཡིན་དང་། དྲི་ཟའི་འཇིག་རྟེན་རྣམས་བཅོམ་ལྡན་འདས་ཀྱིས་བཤད་པ་ལ་མངོན་པར་དགའོ། །ཐེག་པ་ཆེན་པོའི་མདོ་ཆོས་རྒྱ་མཚོ་ཞེས་བྱ་བ་རྫོགས་སོ།། །།རྒྱ་ལས་འགྱུར་བ་སྐད་གསར་ཆད་ཀྱིས་གཏན་ལ་ཕབ་པའོ།། །།
༄༅༅། །ཆོས་ཀྱི་རྒྱ་མོ། སངས་རྒྱས་རྣམ་པར་སྣང་མཛད་ཀྱིས་བྱང་ཆུབ་སེམས་དཔའི་སེམས་ཀྱི་གནས་བཤད་པ་ལེའུ་བཅུ་སྟེ། བམ་པོ་དང་པོ། སངས་རྒྱས་ཀྱི་བུ་ཐམས་ཅད་ཐལ་མོ་སྦྱོར་ལ་སངས་རྒྱས་ཐམས་ཅད་ཀྱི་ཚུལ་ཁྲིམས་ཆེན་པོ་བཤད་པ་སེམས་ཐག་པ་ནས་ཉོན་ཅིག །མང་པོ་ཚོགས་
པ་ཡིད་བསྡུས་ཏེ་ཉོན་ཅིག །བདག་ལ་ཀུན་ཏུ་ལྟུང་བ་ཡོད་པར་ཤེས་ན་མཐོལ་ཚངས་བྱོས་ཤིག །མཐོལ་ཚངས་བྱས་ན་བདེ་བར་འགྱུར་རོ། །མཐོལ་ཚངས་མ་བྱས་ན་སྡིག་ཕྱིར་ཞིང་ཟབ་ཏུ་སྐྱེའོ། །ཀུན་ཏུ་ལྟུང་བ་མེད་ན་མ་སྨྲ་བར་འཁོད་ཅིག་དང་། ཀུན་ཀྱང་གཙང་མར་མངོན་ནོ། །
ལེགས་པ་ཆེན་པོ་ཡོད་པའི་རྣམས་དང་། དགེ་བསྙེན་དང་། དགེ་བསྙེན་མ་ལ་སོགས་པ་བརྟག་པར་ཉོན་ཅིག །སངས་རྒྱས་མྱ་ངན་ལས་འདས་པའི་ཕྱིར་ན་མཆོད་རྟེན་ལས་ཆོས་བྱེད་པའི་ཚེ་སོ་སོར་ཐར་པ་ལ་བཙུད་ཅིང་ལྕི་བ་དང་། གུས་ཤིང་རིན་ཆེར་བྱོས་ཤིག །སོ་སོར་ཐར་པ་ཞེས་
བྱ་བའི་ཚུལ་ཁྲིམས་ནི་འདི་ཡིན་ནོ། །ཚུལ་ཁྲིམས་འདི་བཟུང་ན་མུན་པ་ལས་སྣང་བར་ཕྲད་པ་དང་མཚུངས་སོ། །མི་དབུལ་པོ་ལས་ནོར་ཆེན་པོ་ཐོབ་པ་དང་མཚུངས་སོ། །ནད་པ་སྨན་རྙེད་པ་དང་མཚུངས་སོ། །བཙོན་ཁྲི་མུན་ནས་ཕྱུང་བ་དང་མཚུངས་སོ། །ལམ་རིང་པོར་སོང་བ་ལས་

སླར་འཁོར་བ་དང་མཚུངས་ཏེ། འདི་ནི་ཀུན་གྱི་མཁན་པོ་ཆེན་པོ་ཡིན་པར་མངོན་པས་སངས་རྒྱས་འཇིག་རྟེན་ན་བཞུགས་པ་དང་མི་མཚུངས་པ་མེད་དོ། །འཇིགས་པའི་སེམས་ནི་སྐྱེ་དཀའ། དགེ་བའི་སེམས་ནི་གཡོ་དཀའ་བས་ན་ཁ་ན་མ་ཐོ་བ་ལས་བརྙས་ཏེ་མེད་སྙམ་དུ་བྱས་ན་
ཆུའི་ཐིགས་པ་ཆུང་མོད་ཀྱི་རྒྱུན་གྱིས་ན་སྣོད་ཆེན་པོ་འགང་ངོ་། །ཡུད་ཙམ་གྱི་བར་དུ་སྡིག་བྱས་པས་ན་བསྟིར་མེད་པའི་སེམས་ཅན་དམྱལ་བར་ལྟུང་ངོ་། །རེ་ཞིག་མི་ལུས་སྟོར་ན་བསྐལ་པ་ཁྲིའི་བར་དུ་ཡང་སླར་མི་ལུས་མི་ཐོབ་བོ། །དར་བའི་ཚེ་མི་སྡོད་དོ། །དཔེར་ན་ནི་རྟ་
རྒྱུགས་པ་དང་འདྲ། མིའི་ཚེ་ཡང་རྟག་པ་མེད་དེ། དབའ་རྒལ་གྱི་ཆུ་འབབ་པ་བས་ཀྱང་མྱུར་ཏེ། དེ་རིང་གསོན་མོད་ཀྱི། སང་གི་གཉའ་ཡང་དཀའོ། །ད་དུས་ཁོ་ན་ལ་བབ་ཀྱིས་མང་པོའི་རྣམས་སོ་སོ་ནས་སེམས་གཅིག་ཏུ་འགྲུས་ཤིང་འབོགས་པ་བཙལ་བའི་རིགས་སོ། །
བག་བྱས་ལ་ལེ་ལོ་བླ་ཁྱད་དང་། ཉལ་བ་དང་། གཉིད་ཀྱིས་ལོག་ཅིང་རང་ཉམས་ཀྱི་ཡིད་མི་བྱའོ། །མཚན་ཞིང་ནི་སེམས་བསྡུས་ལ་རྟག་པར་དཀོན་མཆོག་གསུམ་གཟུངས་སུ་བཟུང་ལ་ཕྱལ་བ་དོན་མེད་པ་ལ་ཉོན་མོངས་ངལ་ཆད་ཅིང་ཚེ་ཕྱི་མ་ལ་ཡང་རབ་ཏུ་འགྱོད་པ་མཐར་
ཇིའང་ཐོབ་པ་མེད་པར་མི་བྱའོ། །མང་པོའི་རྣམས་གཅིག་ནས་གཅིག་ཏུ་ཚུལ་ཁྲིམས་འདི་བཞིན་ལེགས་པར་བྱོས་ཤིག །དེའི་ཚེ་ན་སངས་རྒྱས་རྣམ་པར་སྣང་མཛད་ཀྱིས་མང་པོའི་ཕྱིར་ཆུ་བོ་གང་གཱའི་བརྒྱ་སྟོང་གི་བྱེ་མ་སྙེད་ཀྱིས་བརྗོད་དུ་མེད་པའི་ཆོས་ཀྱི་སྒོ་མོའི་མདོ་ཕྱེ་སྟེ། དེའི་
ནང་ནས་སེམས་ཀྱིས་གནས་སྤུ་ཉག་མའི་མགོ་རྙེད་དོ། །སྔ་མ་འདས་པའི་སངས་རྒྱས་ཐམས་ཅད་ལ་ཡང་བཤད་དོ། །ད་ལྟར་གྱི་སངས་རྒྱས་ལ་ཡང་དེ་བཞིན་འཆད་དོ། །མ་འོངས་པའི་སངས་རྒྱས་ཐམས་ཅད་ལ་ཡང་དེ་བཞིན་དུ་འཆད་པར་འགྱུར་རོ། །དུས་གསུམ་གྱི་
བྱང་ཆུབ་སེམས་དཔའ་ལོབས་པ་དང་། སློབ་པ་དང་། སློབ་པར་འགྱུར་རོ། །ངས་བསྐལ་པ་བརྒྱའི་བར་དུ་སེམས་ཀྱི་གནས་འདི་བྱས་པས་ན་ངའི་མཁན་པོ་རྫོགས་ལོངས་སྤྱོད་པའི་སྐུ་ཞེས་བྱའོ། །ཁྱེད་སངས་རྒྱས་ཐམས་ཅད་ཀྱིས་ངས་བཤད་དོ་ཅོག་གཅིག་ནས་གཅིག་ཏུ་

སེམས་ཅན་ཐམས་ཅད་ལ་སེམས་ཀྱི་གནས་ལམ་ཕྱེ་ཤིག །དེ་ནས་པད་མོའི་སྙིང་པོའི་སྣོད་ཀྱི་ཁམས་ན་གནམ་གྱི་འོད་ལྷམ་མེ་ལྷང་ངེ་བའི་སེང་གེའི་གདན་གྱི་སྟེང་ནས་སངས་རྒྱས་རྣམ་པར་སྣང་མཛད་ཀྱིས་འོད་བཏང་སྟེ། འོག་གི་མེ་ཏོག་སྟོང་གི་ཐོག་གི་སངས་རྒྱས་
ལ་སྦྲན་ཏེ། ངའི་སེམས་ཀྱི་གནས་ཀྱི་ཆོས་ཀྱི་སྒོ་མོའི་ལེའུ་གཟུངས་སུ་ཟུང་ལ་དེང་ཤིག །ཡང་གཅིག་ནས་གཅིག་ཏུ་འབུམ་ཕྲག་བརྒྱའི་ཡང་ཕྲག་སྟོང་གི་ཤཱཀྱ་ཐུབ་པས་སེམས་ཅན་ཐམས་ཅད་ལ་མཐར་གྱིས་ངའི་ཡན་ཆད་ཀྱི་སེམས་ཀྱི་གནས་ཀྱི་ཆོས་ཀྱི་སྒོ་མོའི་ལེའུ་ཤོད་དེ། ཁྱོད་
ལ་སོགས་པ་སེམས་གཅིག་ཏུ་གཟུངས་སུ་ཟུང་ལ་བྱོས་ཤིག །དེ་ནས་མེ་ཏོག་སྟོང་གི་ཐོག་གི་སངས་རྒྱས་འབུམ་ཕྲག་བརྒྱའི་ཡང་ཕྲག་སྟོང་གི་ཤཱཀྱ་ཐུབ་པ་པད་མོའི་སྣོད་ཀྱི་ཁམས་ན་ལྷམ་མེ་ལྷང་ངེ་བའི་སེང་གེའི་ཁྲི་ལས་ལངས་ཏེ། སོ་སོ་ནས་མཆི་ཕྱག་འཚལ་ཏེ། ཕྱིར་ནུར་ནས་ལུས་ཀུན་
གྱིས་བསམ་གྱིས་མི་ཁྱབ་པའི་འོད་བཏང་སྟེ། ཀུན་འོད་ཀྱི་ནང་ནས་གྲངས་མེད་པའི་སངས་རྒྱས་ཕྱུང་སྟེ། ཅིག་ཅར་གྲངས་མེད་པའི་མེ་ཏོག་སྔོན་པོ། སེར་པོ། དམར་པོ། དཀར་པོས་རྫོགས་ལོངས་སྤྱོད་པའི་སྐུ་སངས་རྒྱས་ལ་ཡོན་དུ་གསོལ་ནས་ཡན་ཆད་སེམས་ཀྱི་ཕྱི་མོའི་ལེའུ་བཤད་
པ་ཡང་ཁོང་དུ་ཆུད་ནས་སོ་སོར་པད་མོའི་སྣོད་ཀྱི་ཁམས་ཀྱི་ནང་དུ་ནུབ་སྟེ། རང་བཞིན་གྱིས་བསྐལ་པ་སྟོང་པ་ཉིད་ཀྱི་ནང་དུ་ནུབ་ནས་མེ་ཏོག་འོད་ཀྱི་ཏིང་ངེ་འཛིན་ཐོག་མར་བྱུང་བའི་གནས་སུ་སླར་སོང་སྟེ། འཛམ་བུའི་གླིང་བྱང་ཆུབ་ཀྱི་ཤིང་དྲུང་དུ་ཕྱིན་ནས། རང་བཞིན་གྱི་བསྐལ་པ་མེ་ཏོག་
འོད་ཀྱི་ཏིང་ངེ་འཛིན་ལས་བྱུང་སྟེ། གདོད་རྡོ་རྗེའི་རྒྱལ་པོའི་གདན་དང་། འོད་ཤིན་ཏུ་བཟང་པོའི་ཁང་པར་འདུག་ནས་ཕྱོགས་བཅུའི་ཆོས་རྒྱ་མཚོ་དང་མཚུངས་པར་བཤད་དོ། །དེ་ནས་ཡང་སེང་གེའི་ཁྲི་ལས་ལངས་ཏེ་སུམ་ཅུ་རྩ་གསུམ་གནམ་གྱི་ཕོ་བྲང་དུ་ཕྱིན་ནས་གྲལ་བཅུའི་ཆོས་བཤད་
དོ། །དེ་ནས་ཟུང་མའི་གནམ་དུ་ཕྱིན་ཏེ་ལས་སུ་བྱ་བ་བཅུ་བཤད་དོ། །དེ་ནས་ཡང་ཁྲི་ལས་ལངས་ཏེ་རྒྱལ་ཆེན་རིས་བཞིའི་གནམ་དུ་ཕྱིན་ནས་ཕྱོགས་ཤིང་ལྟ་བ་བཅུ་བཤད་དོ། །དེ་ནས་ཡང་འདུག་པའི་ས་ནས་ལངས་ཏེ། འཕྲུལ་དགའི་གནམ་དུ་ཕྱིན་ནས་བསམ་གཏན་མི་འགྱུར་བ་

བཅུ་བཤད། དེ་ནས་ཡང་འདུག་པའི་ས་ནས་ལངས་ཏེ་གནམ་བདེན་གནམ་དུ་ཕྱིན་ནས་ས་བཅུའི་ཆོས་བཤད། དེ་ནས་ཡང་བསམ་གཏན་གཅིག་གི་ནང་དུ་ཕྱིན་ནས་རྡོ་རྗེ་བཅུ་བཤད། དེ་ནས་ཡང་བསམ་གཏན་གཉིས་ཀྱི་ནང་དུ་ཕྱིན་ནས་བཟོད་པ་བཅུའི་ཆོས་བཤད། དེ་ནས་ཡང་
བསམ་གཏན་གསུམ་གྱི་ནང་དུ་ཕྱིན་ནས་སྨོན་ལམ་བཅུ་བཤད། དེ་ནས་ཡང་བསམ་གཏན་བཞི་པའི་ནང་ཆེན་པོ་ཆེ་བ་དབང་མཆོག་འདུ་མཆེད་གནམ་གྱི་རྒྱལ་པོའི་ཕོ་བྲང་དུ་ཕྱིན་ཏེ། ངའི་ཐོག་མའི་ཕྱི་མོའི་པད་མོ་མེ་ཏོག་སྣ་ཚོགས་ཀྱི་ཁམས་རྫོགས་ལོངས་སྤྱོད་པའི་སྐུའི་སངས་རྒྱས་
ཀྱིས་སེམས་ཀྱི་གནས་ཀྱི་ཆོས་ཀྱི་ཕྱི་མོའི་ལེའུ་བཤད་པ་བཤད་དོ། །གཞན་འབུམ་ཕྲག་བརྒྱའི་ཡང་ཕྲག་སྟོང་གི་ཤཱཀྱ་ཐུབ་པ་ཡང་དེ་བཞིན་ཏེ། གཉིས་སུ་མེད་དོ། །ཐ་དད་པ་ཡང་མེད་དོ། །བསམ་གཏན་བསྐལ་པའི་ལེའུའི་ནང་ནས་ཀྱང་ཞིབ་ཏུ་བཤད་དོ། །དེའི་
ཚེ་ཤཱཀྱ་ཐུབ་པ་པད་མོའི་མེ་ཏོག་སྣོད་ཀྱི་ཁམས་ཀྱི་ཤར་ཕྱོགས་ནས་བྱུང་ནས་ལྡིང་བའི་ཁང་བུའི་ནང་དུ་ཞུགས་ནས་བདུད་ཀྱིས་ཆོས་མནོས་པ་བཞིན་དུ་བཤད་ཟིན་ནས། ཡས་བབས་ཏེ་འཛམ་བུའི་གླིང་གི་ཀ་པི་ལར་སྐྱེས་ནས་ཡུམ་གྱི་མཚན་ནི་ལྷ་མཛེས་ཆེན་མོ། ཡབ་ཀྱི་མཚན་ནི་
ཟས་གཙང་མ། ང་བདག་གི་མིང་ནི་སིདྡྷཱརཐ་ཞེས་བྱ་སྟེ། ལོ་བདུན་ན་རབ་ཏུ་བྱུང་། ལོ་སུམ་ཅུ་ནས་སངས་རྒྱས་སུ་ཕྱིན་ནས་ངའི་མཚན་ནི་ཤཱཀྱ་ཐུབ་པ་ཞེས་བྱ་སྟེ། མི་འགྱུར་བའི་གཙང་མའི་སར་རྡོ་རྗེའི་མེ་ཏོག་གི་ཁྲི་ལ་འདུག་ནས། དབང་པོ་ཆེན་པོའི་གནམ་གྱི་རྒྱལ་པོའི་ཕོ་བྲང་དུ་
ཕྱིན་ཏེ། དེའི་ནང་གི་འདུག་པ་བཅུའི་གནས་མཐར་གྱིས་བཤད། དེའི་ཚེ་སངས་རྒྱས་ཀྱིས་རུས་གཙང་མ་ཆེན་པོའི་གནམ་གྱི་རྒྱལ་པོ་དྲ་བའི་རྒྱལ་མཚན་མཐོང་བའི་ཕྱིར་གྲངས་མེད་པའི་ཁམས་དཔེར་ན་དྲ་བའི་བུ་གུ་དང་མཚུངས་པར་བཤད་ན། ཁམས་གཅིག་ནས་གཅིག་སོ་སོ་མི་
འཐུན་ཏེ་ཐ་དད་པའི་གྲངས་མེད་དོ། །སངས་རྒྱས་ཀྱི་ཆོས་ཀྱི་སྒོ་མོ་བཤད་པའང་དེ་དང་འདྲའོ། །ངས་ཁམས་འདིར་ལན་བརྒྱད་སྟོང་ཕྱིན་ཏེ། ཁམས་འཛམ་བུའི་གླིང་འདིའི་ཕྱིར་རྡོ་རྗེའི་ཁྲི་སྟེང་དུ་འདུག་སྟེ། དབང་པོ་ཆེན་པོའི་གནམ་གྱི་རྒྱལ་པོའི་ཕོ་བྲང་དུ་ཕྱིན་ནས་དེའི་ནང་གི་མང་པོ་

ཐམས་ཅད་སེམས་ཀྱི་གནས་ཀྱི་མདོ་ཆེའོ། །དེ་ནས་གནམ་གྱི་ཕོ་བྲང་ནས་མར་བབས་ཏེ་འཛམ་བུའི་གླིང་བྱང་ཆུབ་ཀྱི་ཤིང་དྲུང་དུ་ཕྱིན་ནས་དེའི་སའི་སྟེང་གི་སེམས་ཅན་བླུན་པོ་མ་རབས་རྣམས་ཀྱི་ཕྱིར་ཐོག་མ་ཕྱི་མོ་རྫོགས་ལོངས་སྤྱོད་པའི་སྐུ་སངས་རྒྱས་ཀྱིས་སེམས་ཀྱི་གནས་
ཀྱི་ནང་བཤད་དོ། །སེམས་ཐོག་མ་གཡོས་པ་ནི་རྟག་པར་འོད་སྣང་བའི་ཚུལ་ཁྲིམས་གཅིག་ཁ་ཏོན་དུ་ཀློག་གོ། །རྡོ་རྗེ་རིན་པོ་ཆེའི་ཚུལ་ཁྲིམས་ནི་སངས་རྒྱས་ཐམས་ཅད་ཀྱི་ཐོག་མའི་ཕྱི་མོ་ཡིན་ནོ། །བྱང་ཆུབ་སེམས་དཔའ་ཐམས་ཅད་ཀྱི་ནི་ཐོག་མའི་ཕྱི་མོ་སངས་རྒྱས་ཐམས་ཅད་ཀྱི་ངོ་
བོ་ཉིད་ཀྱི་ས་བོན་ནོ། །སེམས་ཅན་ཐམས་ཅད་ལ་ཡང་སངས་རྒྱས་ཀྱི་ངོ་བོ་ཉིད་ཀྱི་སྐལ་བ་ཡོད་དོ། །ཐམས་ཅད་ཀྱི་ཤེས་པ་དང་། ཁ་དོག་དང་། སེམས་དང་། ཡིད་དང་། སེམས་སོ་ཅོག་ཐམས་ཅད་ཀུན་ཀྱང་སངས་རྒྱས་ཀྱི་ངོ་བོ་ཉིད་ཀྱི་ནང་དུ་འདུས་སོ། །ཚུལ་ཁྲིམས་ཀྱི་ནང་
ན་རྟག་པ་ཡུན་དུ་རྟག་པར་བསོད་ནམས་ཡོད་དོ། །རྟག་པ་ཡུན་དུ་རྟག་པར་ཆོས་ཀྱི་ལུས་ཡོད་དོ། །སོ་སོར་ཐར་པ་འདི་རྣམས་བཅུ་ནི་སངས་རྒྱས་ཀྱི་དབྱིངས་ནས་བྱུང་ནས་ཆོས་ཀྱི་ཚུལ་ཁྲིམས་བྱས་ཏེ། དུས་གསུམ་གྱི་སེམས་ཅན་ཐམས་ཅད་ཀྱིས་གཟུངས་སུ་འཛིན་ཏོ། །ངས་ད་
མང་པོ་འདིའི་ཕྱིར་ཟད་པའི་མཐའ་མེད་པའི་ཚུལ་ཁྲིམས་ཀྱི་ལེའུ་བཅུ་བསླབས་ཏེ་བཤད་དོ། །རྫོགས་ལོངས་སྤྱོད་པ་ང་བདག་སྟེ། །པད་མོའི་དབུས་སུ་གདོད་བཞུགས་ནས། །མཐའ་བཞིའི་མེ་ཏོག་སྟོང་གི་སྟེང་། །ཤཱཀྱ་ཐུབ་པ་སྟོང་དུ་བཞུགས། །མེ་ཏོག་གཅིག་ཁམས་འབུམ་
ཕྲག་བརྒྱ། །ཁམས་དེ་གཅིག་ཀྱང་སྤྲུལ་པ་གཅིག །ཀུན་ཀྱང་བྱང་ཆུབ་ཤིང་དྲུང་བཞུགས། །མཉམ་པར་སངས་རྒྱས་གནས་སུ་སོན། །དེ་ཡང་འབུམ་ཕྲག་བརྒྱ་པ་སྟོང་། །རྫོགས་ལོངས་སྤྱོད་པ་རང་བཞིན་ལུས། །སྤྲུལ་པ་འབུམ་ཕྲག་བརྒྱ་སྟོང་པོ། །ཀུན་ཀྱང་རྡུལ་ཕྲན་
མང་པོར་འདྲེན། །ཅིག་ཅར་ང་ཡི་གནས་སུ་འོང་། །སངས་རྒྱས་ང་ཡི་ཚུལ་ཁྲིམས་ཉོན། །ཟིལ་དངར་སྒོ་མོ་དེ་ནས་བྱེ། །འུང་ནས་འབུམ་ཕྲག་བརྒྱ་སྟོང་པོ། །སླད་དུ་གཙང་མའི་གནས་སུ་ཕྱིན། །ཀུན་ཀྱང་བྱང་ཆུབ་ཤིང་དྲུང་བཞུགས། །ང་ཡི་མཁན་པོ་ཚུལ་ཁྲིམས་ཁ་ཏོན་

ལྷོགས། །ཚུལ་ཁྲིམས་ཆེན་པོ་རྟོགས་པར་ལྔ་བཅུ་བརྒྱད། །ཚུལ་ཁྲིམས་སྣང་ཁྱད་ཉི་ཟླ་བཞིན། །གཅིག་ཏུ་ནོར་བུ་ཡང་ཉོ་འདྲ། །བྱང་ཆུབ་སེམས་དཔའ་རྡུལ་ཕྲན་བཞིན། །འདི་ཡི་ཡོན་གྱིས་ཡང་དག་འགྲུབ། །གདོད་མ་རྫོགས་ལོངས་སྤྱོད་པ་ཉིད་ཀྱིས་བླགས། །ངས་ཀྱང་དེ་བཞིན་ཁ་
ཏོན་བླགས། །བྱང་ཆུབ་སེམས་དཔའ་གསར་སློབ་པ། །ཀླད་ལ་ཁྱེར་ཞིང་ཁྲིམས་བཟུང་བཞིན། །ཐུབ་བཞིན་གཅིག་ཏུ་སེམས་ཅན་སྟོན། །ང་ཡི་བདེ་བླག་རྟག་པར་ཉོན། །སངས་རྒྱས་ཆོས་རྣམས་ཚུལ་ཁྲིམས་སྣོད། །སོ་སོར་ཐར་པ་ཤེས་རབ་བཞིན། །མང་པོ་ཡིད་ཀུན་བརྟགས་པར་
ཆེས། །ཁྱེད་རྣམས་སངས་རྒྱས་ཕྱིན་པར་འོང་། །ང་ཡི་སངས་རྒྱས་ཕྱིན་ཟིན་ཀྱང་། །རྟག་པར་འདི་བཞིན་ཡིད་ཆེས་བྱེད། །ཚུལ་ཁྲིམས་ལེའུ་ཀུན་ཆོག་གཙང་ཟིན། །ཡིད་སེམས་ཡོད་པ་ཐམས་ཅད་ནི། །ཀུན་ཀྱང་སངས་རྒྱས་ཁྲིམས་ཀྱིས་བས་བསྡུ། །སེམས་ཅན་སངས་རྒྱས་ཁྲིམས་
མནོད་པ། །དེ་ནས་སངས་རྒྱས་ས་རུ་ཕྱིན། །ཚོར་ཆེན་ས་དང་མཚུངས་ཟིན་ཏེ། །སངས་རྒྱས་ཀུན་གྱི་བུ་ཡང་དག །མང་པོ་ཀུན་གྱིས་གུས་པར་བྱས། །སེམས་གཅིག་བརྟུལ་ཏེ་ང་ཀློག་ཉོན། །དེའི་ཚེ་ན་ཤཱཀྱ་ཐུབ་པའི་སངས་རྒྱས་ཐོག་མ་བྱང་ཆུབ་ཤིང་དྲུང་བཞུགས་བླ་ན་མེད་པའི་གཡུང་
དྲུང་རྫོགས་པའི་བྱང་ཆུབ་བོ། །བྱང་ཆུབ་སེམས་དཔའི་ཐོག་མ་སོ་སོར་ཐར་པའི་འདུད་པ་ནི་ཕ་མ་དང་། དགེ་འདུན་དང་། དཀོན་མཆོག་གསུམ་ལ་སྲི་ཞུ་དང་། ཡིད་དང་མི་འགལ་བར་བྱའོ། །སྲི་ཞུ་བྱས་ཏེ་བླ་མའི་ཡིད་དང་མི་འགལ་བ་ནི་ཆོས་ཟབ་མོར་ཐོབ་པའི་གཞུང་སྟེ། སྲི་ཞུའི་མིང་
ནི་ཚུལ་ཁྲིམས་སོ། །མིང་གཅིག་ཏུ་ནི་སྡོམ་པ་དང་གཏོང་བའོ། །དེ་ནས་འོད་སྣང་བ་གྲངས་མེད་པ་འབྱུང་ངོ་། །དེའི་ཚེ་འབུམ་ཕྲག་བརྒྱ་སྟོང་མང་པོ་ཚོགས་པ་བྱང་ཆུབ་སེམས་དཔའ་རྣམས་དང་། གཟུགས་ཡོད་པའི་ཁམས་ཀྱི་གནམ་བཅྭ་བརྒྱད་དང་། འདོད་པའི་ཁམས་ཀྱི་གནམ་རིམ་
པ་དྲུག་གི་ལྷ་དང་། རྒྱལ་པོ་ཆེན་པོ་རྣམས་ཐལ་མོ་སྦྱར་ཏེ། སེམས་གཅིག་ཏུ་མཉན་ནས་སངས་རྒྱས་ཀྱི་ཚུལ་ཁྲིམས་ཆེན་པོ་བླགས་ཏེ། བྱང་ཆུབ་སེམས་དཔའ་རྣམས་ལ་བཀའ་སྩལ་པ། ང་ད་ལྟར་ཟླ་བ་ཕྱེད་ཕྱེད་ཅིང་བདག་གིས་སངས་རྒྱས་ཐམས་ཅད་ཀྱི་ཚུལ་ཁྲིམས་ཁ་ཏོན་དུ་ཀློག་གོ། །

ཁྱེད་ལ་སོགས་པ་ཐོག་མ་སེམས་བསྐྱེད་པའི་བྱང་ཆུབ་སེམས་དཔའ་ཐམས་ཅད་ཀྱིས་ཀྱང་ཁ་ཏོན་དུ་ལྷོགས་ཤིག །སེམས་གཡོས་ཏེ་ཕྱོགས་པ་བཅུ་དང་། གཡོ་ཞིང་བསྐྱེད་པ་བཅུ་དང་། རྡོ་རྗེ་བཅུ་པ་དང་། ས་བཅུའི་བྱང་ཆུབ་སེམས་དཔའ་རྣམས་ཀྱིས་ཀྱང་ཁ་ཏོན་དུ་ལྷོགས་
ཤིག །འུང་ན་ཚུལ་ཁྲིམས་ཀྱི་འོད་ཁ་ནས་བྱུང་སྟེ་རྒྱུ་ཡོད། རྐྱེན་མེད་པའི་འོད་མ་ཡིན་ཏེ། འོད་སྔོན་པོ་དང་། དམར་པོ་དང་། སེར་པོ། དཀར་པོ། ནག་པོ་ཡང་མ་ཡིན། ཁ་དོག་ཀྱང་མ་ཡིན། སེམས་ཀྱང་མ་ཡིན། ཡོད་པ་ཡང་མ་ཡིན། མེད་པ་ཡང་མ་ཡིན། རྒྱུ་རྐྱེན་གྱི་ཆོས་
ཀྱང་མ་ཡིན་ཏེ། སངས་རྒྱས་ཐམས་ཅད་ཀྱི་ནི་གདོད་མ་ཕྱི་མོ་བྱང་ཆུབ་སེམས་དཔའ་ཐམས་ཅད་ཀྱི་ནི་ལམ་གྱི་རྩ་བ་བས་ན་མང་པོ་ཐམས་ཅད་དང་། སངས་རྒྱས་ཀྱི་བུ་རྣམས་ཀྱི་རྩ་བའི་ཕྱི་མོ་ཞེས་བྱའོ། །འདི་ལྟ་སྟེ། སངས་རྒྱས་ཀྱི་བུ་རྣམས་ཀྱིས་ཀྱང་གཟུངས་སུ་གཟུང་བའི་རིགས་སོ། །
ལེགས་པར་བསླབས་པའི་རིགས་སོ། །སངས་རྒྱས་ཀྱི་བུ་རྣམས་བརྟགས་པར་ཉོན་ཅིག །སངས་རྒྱས་ཀྱི་ཚུལ་ཁྲིམས་ནོད་ན་ནི་རྒྱལ་པོ་དང་། རྒྱལ་བུ་དང་། བློན་པོ་ཆེ་ཕྲ་དང་། དགེ་སློང་ཕོ་སྨོས་དང་། གཟུགས་ཀྱི་ཁམས་ཀྱི་གནམ་བཅྭ་བརྒྱད་དང་། འདོད་པའི་ཁམས་གནམ་
དྲུག་དང་། གདོལ་པ་དང་། ཉིང་གྲུམ་དང་། ཕོ་གཡེམ་དང་། མོ་གཡེམ་དང་། བྲན་ཕོ་སྨོས་དང་། ལྷ་མ་སྲིན་སྡེ་བརྒྱད་དང་། ཕྱག་བརྙན་དང་། བྱོལ་སོང་དང་། འཕྲུལ་ཞིང་འགྱུར་བའི་མི་ལ་སོགས་ཏེ་ཆོས་ཀྱི་མཁན་པོའི་ཚིག་བརྡ་ཕྲད་པའི་རྣམས་ཐམས་ཅད་ཚུལ་ཁྲིམས་མནོད་
དུ་རུང་སྟེ། ཀུན་ཀྱང་མིང་རབ་ཏུ་གཙང་མ་ཞེས་བྱའོ། །སངས་རྒྱས་ཀྱིས་སངས་རྒྱས་ཀྱི་བུ་རྣམས་ལ་བཀའ་སྩལ་པ། སོ་སོར་ཐར་པ་ལ་ཕས་ཕམ་པ་བཅུ་ཡོད་དོ། །སངས་རྒྱས་ཀྱི་ཚུལ་ཁྲིམས་མནོས་པ་ནི་ཚུལ་ཁྲིམས་འདི་ཁ་ཏོན་དུ་མ་བླགས་ན་བྱང་ཆུབ་སེམས་དཔའ་ཡང་མ་ཡིན།
སངས་རྒྱས་ཀྱི་ས་བོན་ཡང་མ་ཡིན། ང་ཡང་འདི་བཞིན་དུ་ཁ་ཏོན་དུ་ཀློག་གོ། །ལོབས་ཟིན་པའི་བྱང་ཆུབ་སེམས་དཔའ་ཐམས་ཅད་དང་། ཕྱིས་སློབ་པའི་བྱང་ཆུབ་སེམས་དཔའ་ཐམས་ཅད་དང་། ད་ལྟར་སློབ་པའི་བྱང་ཆུབ་སེམས་དཔའ་ཐམས་ཅད་ལ་ངས་སོ་སོར་ཐར་པའི་གཟུངས་ཀྱི་

མདོ་ཙམ་ཞིག་བཤད་ཀྱིས་བསླབ་ཅིང་གཟུངས་སུ་གཟུང་བའི་རིགས་སོ། །སངས་རྒྱས་ཀྱིས་སངས་རྒྱས་ཀྱི་བུ་རྣམས་ལ་བཀའ་སྩལ་པ། བདག་གིས་བསད་པ་དང་། མི་གཞན་གསོད་དུ་བཅུག་པ་དང་། ཐམས་ཅད་ཀྱིས་གསོད་པ་གསོད་པ་ལ་སྡོད་པ་གསོད་པ་མཐོང་ན་དགའ་བར་
སེམས་པ། སྔགས་དང་། རྔད་མོ་བྱས་ཏེ་བསད་པ། གསད་པའི་རྒྱུ། གསད་པའི་རྐྱེན། གསད་པའི་ཆོས་བྱེད་པ། གསོད་པའི་ལས་བྱེད་པ་ལ་སོགས་ཏེ། སེམས་ཡོད་དོ་ཅོག་ལ་ཆེད་ཀར་གསད་དུ་མི་རུང་། འདི་ལྟ་སྟེ། བྱང་ཆུབ་སེམས་དཔའ་དེ་ནི་རྟག་པར་སྙིང་རྗེ་བ་དང་། སྲི་ཞུ་
ཆེ་ཞིང་མི་འགལ་བའི་སེམས་རྟག་པར་གཡོས་ཏེ་བགས་ཀྱིས་སེམས་ཅན་ཐམས་ཅད་ཀྱི་ར་མདའ་དང་། འོར་བ་བྱ་བའི་རིགས་སོ། །བདག་གིས་རང་ཉམས་བྱས་ཏེ་སྙིང་ཚིམ་པར་སེམས་ཅན་བསད་ན། དེ་ནི་བྱང་ཆུབ་སེམས་དཔའི་ཕས་ཕམ་པའོ། །སངས་རྒྱས་ཀྱི་བུ་བདག་
གིས་མ་བྱིན་པར་བླངས་སམ། ཕ་ལོག་པོ་མ་བྱིན་པར་ལེན་དུ་བཅུག་གམ། ཐབས་ཀྱིས་མ་བྱིན་པར་བླངས་སམ། མ་བྱིན་པར་ལེན་པའི་རྒྱུ། མ་བྱིན་པར་ལེན་པའི་རྐྱེན། མ་བྱིན་པར་ལེན་པའི་ལས་བྱེད་པ། སྔགས་སྒྱུ་མ་བྱས་ཏེ་ནོར་ཁྱེར་བ་ལ་སོགས་ཏེ། ལྷ་མ་སྲིན་དང་།
བདག་པོ་ཡོད་པ་དང་། ཡང་བློའི་ནོར་རྫས་དང་། ནོར་རྫས་སོ་ཅོག་ལ་ཁབ་དང་། རྩྭ་ཉག་མ་གཅིག་ལ་ངས་ཆེད་ཀར་མ་བྱིན་པར་བླངས་སུ་མི་རུང་ངོ་། །བྱང་ཆུབ་སེམས་དཔའ་ནི་སངས་རྒྱས་ཀྱི་རང་བཞིན་སྐྱེད་ལ། སྲི་ཞུའི་ཡིད་དང་མི་འགལ་ཞིང་། བྱམས་ཞིང་སྙིང་རྗེ་བར་བྱས་ཏེ་རྟག་
པར་སེམས་ཅན་ནོ་ཅོག་གི་ཡོན་ཏན་དང་བསོད་ནམས་བསྐྱེད་པའི་རིགས་སོ། །དེ་ལ་སླར་ལོག་པར་མིའི་ནོར་རྫས་མ་བྱིན་པར་བླངས་ན་བྱང་ཆུབ་སེམས་དཔའི་ཕས་ཕམ་པའོ། །སངས་རྒྱས་ཀྱི་བུ་བདག་མི་ཚངས་པར་སྤྱོད་དམ། གཞན་མི་ཚངས་པར་སྤྱོད་པར་བསྟན་ནམ། བུད་མེད་དོ་
ཅོག་ལ་མི་ཚངས་པར་སྤྱོད་པར་བྱེད་པ་དང་། གཞན་ལ་མི་ཚངས་པར་སྤྱོད་པ་དང་། མི་ཚངས་པར་སྤྱོད་པའི་རྒྱུ་དང་། མི་ཚངས་པར་སྤྱོད་པའི་རྐྱེན་དང་། མི་ཚངས་པར་སྤྱོད་པའི་ཆོས་བྱེད་པ་དང་། མི་ཚངས་པར་སྤྱོད་པའི་ལས་བྱེད་པ་དང་། བྱོལ་སོང་དང་། ལྷ་དང་། ལྷ་མ་སྲིན་གྱི་

བུ་མོ་ལ་མི་ཚངས་པར་སྤྱོད་པ་དང་། ཆོས་དང་འགལ་བའི་མི་ཚངས་པར་སྤྱོད་ན་བྱང་ཆུབ་སེམས་དཔའ་ནི་སྲི་ཞུ་དང་མི་འགལ་བའི་སེམས་ཀྱིས་སེམས་ཅན་ཐམས་ཅད་ཐར་པའི་ར་མདའ་བྱ་ཞིང་ཆོས་གཙང་མ་གཞན་ལ་སྦྱིན་པའི་རིགས་སོ། །དེ་ལ་སླར་མིའོ་ཅོག་ལ་མི་
ཚངས་པར་སྤྱོད་པ་བསྐྱེད་དེ། བྱོལ་སོང་དང་། མ་དང་། བུ་མོ་དང་། སྲིང་མོ་ལ་སོགས་ཏེ་གཉེན་པ་དྲུག་ལ་མི་ཚངས་པར་སྤྱོད་པ་བྱས་ཏེ། བྱམས་ཤིང་སྙིང་རྗེ་བ་མེད་ན་དེ་ནི་བྱང་ཆུབ་སེམས་དཔའི་ཕས་ཕམ་པའོ། །སངས་རྒྱས་ཀྱི་བུ་བདག་གིས་བརྫུན་བྱས་སམ། ཕ་རོལ་པོ་
བརྫུན་ཟེར་བར་བསྟན་ཏམ། ཐབས་ཀྱིས་བརྫུན་བྱས་པ་དང་། བརྫུན་གྱི་རྒྱུ་བྱས་པ་དང་། བརྫུན་གྱི་རྐྱེན་བྱས་པ་དང་། བརྫུན་གྱི་ཆོས་བྱེད་པ་དང་། བརྫུན་གྱི་ལས་བྱེད་པ་དང་། མཐོང་བ་ལ་མ་མཐོང་ཞེས་ཟེར་བ་དང་། མ་མཐོང་བ་ལ་མཐོང་ཞེས་ཟེར་བ་དང་། ལུས་དང་སེམས་
ཀྱིས་བརྫུན་བྱས་པ་དང་། བྱང་ཆུབ་སེམས་དཔའ་ནི་རྟག་པར་ཚིག་དྲང་པོ་སྐྱེ་ཞིང་གཅིག་ཏུ་ན་སེམས་ཅན་གྱི་ཚིག་དྲང་པོ་བསྐྱེད་པ་ཡིན་ན། དེ་ལ་སླར་ལོག་པར་སེམས་ཅན་ཐམས་ཅད་ཀྱི་ཚིག་མི་དྲང་བ་དང་། ཡོན་པོ་ལ་ལྟ་བ་དང་། ཡོན་པོའི་ལས་བྱེད་པར་བསྐྱོད་ན་དེ་ནི་བྱང་ཆུབ་
སེམས་དཔའི་ཕས་ཕམ་པའོ། །སངས་རྒྱས་ཀྱི་བུ་སྨྱོ་བའི་ཁུ་བ་བདག་འཚོང་ངམ། ཕ་ལོག་པོ་སྨྱོ་བའི་ཁུ་བ་འཚོང་བར་བསྟན་ཏམ། ཐབས་ཀྱིས་སྨྱོ་བའི་ཁུ་བ་འཚོང་ངམ། སྨྱོ་བའི་ཁུ་བ་འཚོང་བའི་རྒྱུ་བྱེད་དམ། སྨྱོ་བའི་ཁུ་བ་འཚོང་བའི་རྐྱེན་བྱེད་དམ། སྨྱོ་བའི་ཁུ་བ་འཚོང་བའི་
ཆོས་བྱེད་དམ། སྨྱོ་བའི་ཁུ་བ་འཚོང་བའི་ལས་བྱེད་པ་ལ་སོགས་ཏེ། སྨྱོ་བའི་ཁུ་བའོ་ཅོག་འཚོང་དུ་མི་རུང་། སྨྱོ་བའི་ཁུ་བའི་རྐྱེན་གྱིས་ཁ་ན་མ་ཐོ་བ་སྐྱེའོ། །བྱང་ཆུབ་སེམས་དཔའ་ནི་སེམས་ཅན་ཐམས་ཅད་ལ་སྣང་ཞིང་དྲང་བའི་ཤེས་རབ་བསྐྱེད་པའི་རིགས་ན། སླར་ལོག་པར་སེམས་
ཅན་ཐམས་ཅད་ཀྱི་ཕྱིན་ཅི་ལོག་གི་སེམས་བསྐྱེད་ན་བྱང་ཆུབ་སེམས་དཔའི་ཕས་ཕམ་པའོ། །སངས་རྒྱས་ཀྱི་བུ་རབ་ཏུ་བྱུང་བ་དང་། མ་བྱུང་བ་དང་། བྱང་ཆུབ་སེམས་དཔའ་དང་། དགེ་སློང་དང་། དགེ་སློང་མའི་ཉེས་པ་བདག་གིས་འཕྱས་སུ་བྱས་སམ། གཞན་འཕྱས་བྱེད་པར་བསྟན་

ཏམ། འཕྱ་བའི་རྒྱུ་བྱས་སམ། འཕྱ་བའི་རྐྱེན་བྱས་སམ། འཕྱ་བའི་ཆོས་དང་། འཕྱ་བའི་ལས་བྱེད་ན་བྱང་ཆུབ་སེམས་དཔའ་ནི་མུར་འདུག་དང་། ཐེག་པ་ཆུང་ངུ་རྣམ་གཉིས་བྱེད་པའི་མི་སངས་རྒྱས་ཀྱི་ཆོས་ཀྱི་ནང་ན་ཆོས་མ་ཡིན། ཚུལ་ཁྲིམས་མ་ཡིན་ཞེས་ཟེར་ན། རྟག་པར་སྙིང་
རྗེ་བསྐྱེད་དེ་ངན་པའི་རྣམས་ཐེག་པ་ཆེན་པོ་ལ་ཡིད་དགའ། ཡིད་ཆེས་པར་བསྟན་ཅིང་བསླབ་པའི་རིགས་ན། དེ་ལ་བྱང་ཆུབ་སེམས་དཔའ་སླར་ལོག་པར་སངས་རྒྱས་ཀྱི་ཆོས་ལ་ངེས་ཤེས་བཤད་ན། དེ་ནི་བྱང་ཆུབ་སེམས་དཔའི་ཕས་ཕམ་པའོ། །སངས་རྒྱས་ཀྱི་བུ་ལ་ལ་ཞིག་
བདག་གིས་བདག་བསྟོད་ཅིང་ཕར་སྨོད་པ་དང་། གཞན་ལ་བདག་བསྟོད། ཕར་སྨོད་པར་སྟོན་པ། སྨོད་པའི་རྒྱུ། སྨོད་པའི་རྐྱེན་བྱེད་པ། སྨོད་པའི་ཆོས་དང་། སྨོད་པའི་ལས་བྱེད་ན། བྱང་ཆུབ་སེམས་དཔའ་ནི་སེམས་ཅན་ཐམས་ཅད་ཀྱི་སྐྱིན་པར་སྨ་དབབ་ཅིང་ངན་སེམས་
པ་ནི་བདག་གིས་བླངས་ཏེ། དགེ་ཞིང་ལེགས་པ་ནི་གཞན་ལ་སྦྱིན་པའི་རིགས་ན་ལ་ལ་ཞིག་གིས་བདག་གི་ལེགས་པ་ནི་བསྙད། གཞན་གྱི་ལེགས་པ་ནི་བཅབས་ཏེ། གཞན་ལ་སྨ་དབབ་པར་བྱས་ན་དེ་ནི་བྱང་ཆུབ་སེམས་དཔའི་ཕས་ཕམ་པའོ། །སངས་རྒྱས་ཀྱི་བུ་བདག་སེར་སྣ་
ཆེའམ། གཞན་སེར་སྣ་ཆེ་བར་སྟོན་ཏམ། སེར་སྣ་ཆེ་བའི་རྒྱུ་བྱེད་དམ། སེར་སྣ་ཆེ་བའི་རྐྱེན་བྱེད་དམ། སེར་སྣའི་ཆོས་བྱེད་དམ། སེར་སྣའི་ལས་བྱེད་ན། བྱང་ཆུབ་སེམས་དཔའ་ནི་དབུལ་པོ་འོངས་སོ་ཅོག་དང་། གཞན་ཇི་འདོད་པ་བཞིན་དགོས་སོ། །བྱང་ཆུབ་སེམས་
དཔའི་སེམས་ལ་ངན་དུ་སེམས་ཤིང་སེམས་ལ་གཤེ་བ་དང་། དོང་ཚེ་གཅིག་གམ། ཁབ་གཅིག་གམ། རྩྭ་ཉག་མ་གཅིག་མི་སྟེར་རམ། ཆོས་འདོད་པ་ཞིག་འོངས་ན་ཚིག་གཅིག་ལེའུ་གཅིག །རྡུལ་ཙམ་གྱི་ཆོས་ཀྱང་མ་བཤད་ལ། སླར་ངག་ངན་པས་སྤྱོས་ཏེ་སྨ་ཕབ་ན་དེ་ནི་
བྱང་ཆུབ་སེམས་དཔའི་ཕས་ཕམ་པའོ། །སངས་རྒྱས་ཀྱི་བུ་བདག་ཁྲོའམ། མི་ཕ་ལོག་པོ་ཁྲོ་བར་སྟོན་ཏམ། ཁྲོ་བའི་རྒྱུ་བྱེད་དམ། ཁྲོ་བའི་རྐྱེན་བྱེད་དམ། ཁྲོ་བའི་ཆོས་བྱེད་དམ། ཁྲོ་བའི་ལས་བྱེད་ན། བྱང་ཆུབ་སེམས་དཔའ་ནི་ཐམས་ཅད་ཀྱི་ནང་ན་དགེ་བའི་རྩ་བ་བསྐྱེད་

ཅིང་འཐབ་ཅིང་རྩོད་པ་མེད་པར་བྱས་ལ་རྟག་པར་སྙིང་རྗེ་བསྐྱེད་ཅིང་བྱ་བའི་རིགས་ཀྱི། ཕྱིར་ལོག་པར་སེམས་ཅན་ཐམས་ཅད་ཀྱི་ནང་ན་སེམས་ཅན་མ་ཡིན་པ་ལ་ཁ་ངན་པས་གཤེ་ཞིང་ལག་པས་འཚོག་པ་དང་། རལ་གྲི་དང་། དབྱིག་པས་གདབ་ཅིང་བརྡེགས་ཀྱང་སྙིང་
བརྩེ་མ་བྲི་སྟེ། ཕ་ལོག་པོ་འགྱོད་ཅིང་ཚིག་འཇམ་པོས་འཆགས་ཤིང་གནོང་བསྐུར་ཀྱང་ཁྲོ་བའི་མདུད་པ་མ་བཀྲོལ་ན་དེ་ནི་བྱང་ཆུབ་སེམས་དཔའི་ཕས་ཕམ་པའོ། །སངས་རྒྱས་ཀྱི་བུ་ལ་ལ་ཞིག་གིས་དཀོན་མཆོག་གསུམ་ལ་མ་ཡིན་ཞེས་ཟེར་རམ། གཞན་དཀོན་མཆོག་གསུམ་
ལ་མ་ཡིན་ཞེས་ཟེར་བར་བསྟན་ཏམ། མ་ཡིན་ཞེས་ཟེར་བའི་རྒྱུ་དང་། རྐྱེན་བྱེད་དམ། མ་ཡིན་པའི་ཆོས་བྱེད་དམ། མ་ཡིན་པའི་ལས་བྱེད་ན། བྱང་ཆུབ་སེམས་དཔའ་ནི་མུར་འདུག་དང་མ་རབས་ཀྱི་ངན་ཚིག་གཅིག་སངས་རྒྱས་ཀྱི་སྒྲ་སྐད་མ་ཡིན་ཞེས་ཟེར་བ་ཞིག་མཐོང་ངམ་ཐོས་ན་མདུང་རྩེ་ཁ་
གསུམ་པ་སུམ་བརྒྱས་སྙིང་ལ་ཟུག་པ་དང་མཚུངས་ན། བདག་གི་ཁ་ནས་མ་ཡིན་ཞེས་ཟེར་བ་ལྟ་སྨོས་ཀྱང་ཅི་དགོས་ཏེ། ཡིད་ཆེས་པའི་སེམས་སྲི་ཞུ་དང་མི་འགལ་བའི་སེམས་བསྐྱེད་པའི་རིགས་ན། སླར་ལོག་པར་མ་རབས་ལོག་པ་ལ་ལྟ་ཞིང་མ་ཡིན་ཞེས་ཟེར་བའི་གྲོགས་བྱེད་ན་དེ་ནི་བྱང་
ཆུབ་སེམས་དཔའི་ཕས་ཕམ་པའོ། །དགེ་ཞུགས་སྤྱོད་པའི་རྣམས་ནི་བྱང་ཆུབ་སེམས་དཔའི་སོ་སོར་ཐར་པ་འདི་བསླབས་པའི་རིགས་སོ། །འདིའི་ནང་ནས་རྡུལ་ཕྲ་མོ་ཙམ་ཡང་གཞིག་ཏུ་མི་རུང་ན་ཚུལ་ཁྲིམས་བཅུ་ཚང་བར་བཤིག་པ་ལྟ་སྨོས་ཀྱང་ཅི་དགོས། ལ་ལ་ཞིག་གིས་ཚུལ་ཁྲིམས་
བཤིག་པ་ཞིག་ན་ད་ལྟར་གྱི་ལུས་ལ་བྱང་ཆུབ་སེམས་དཔའི་སེམས་བསྐྱེད་པའི་ལས་མ་ནུས་ཏེ། རྒྱལ་པོའི་གྲལ་ཡང་སྟོར། འཁོར་ལོ་བསྐོར་བའི་རྒྱལ་པོའི་གྲལ་ཡང་སྟོར། དགེ་སློང་དང་། དགེ་སློང་མའི་གྲལ་ཡང་སྟོར། གཡོས་ཤིང་ཕྱོགས་པ་བཅུ་དང་། བསྐྱེད་ཅིང་གསོལ་བ་བཅུ་
དང་། ཆོས་རྡོ་རྗེ་དང་མཚུངས་པ་བཅུ་དང་། ས་བཅུའི་སངས་རྒྱས་ཀྱི་ངོ་བོ་ཉིད་རྟག་པའོ། །ཡོན་ཏན་ཟབ་མོ་ལ་སོགས་པ་ཟད་པར་སྟོར་ནས་ངན་སོང་གསུམ་དུ་ལྟུང་སྟེ། བསྐལ་པ་གཉིས་གསུམ་གྱི་བར་དུ་ཕ་མ་དང་། དཀོན་མཆོག་གསུམ་གྱི་མིང་མཁན་ཀྱང་མི་ཐོས་ཏེ། དེ་བས་ན་

གཅིག་ཀྱང་གཞིག་ཏུ་མི་རུང་ངོ་། །ཁྱེད་ལ་སོགས་པ་བྱང་ཆུབ་སེམས་དཔའ་ལོབས་པ་དང་། སློབ་པ་དང་། སློབ་པར་འགྱུར་བའི་རྣམས་ཚུལ་ཁྲིམས་འདི་བཅུ་བསླབས་ལ་གུས་པར་བྱོས་ཏེ་རྟག་པར་གཟུངས་སུ་གཟུང་བའི་རིགས་སོ། །གསལ་བར་ནི་ལེའུ་བརྒྱད་ཁྲི་པའི་ནང་
ནས་རྒྱ་ཆེར་བཤད་དོ། །སངས་རྒྱས་ཀྱིས་བྱང་ཆུབ་སེམས་དཔའ་རྣམས་ལ་བཀའ་སྩལ་པ། ཕས་ཕམ་པ་བཅུ་ནི་བཤད་ཟིན་ཏོ། །ལྟུང་བ་བཞི་བཅུ་རྩ་བརྒྱད་ནི་སངས་རྒྱས་ཀྱི་བུ་རྒྱལ་པོའི་གྲལ་ཐོབ་པའི་ཚེ་དང་། འཁོར་ལོས་བསྐོར་བའི་རྒྱལ་པོའི་གྲལ་ཐོབ་པའི་ཚེ་དང་། བློན་པོའི་
གྲལ་ཐོབ་པའི་ཚེ་དང་། སྔར་བྱང་ཆུབ་སེམས་དཔའི་ཚུལ་ཁྲིམས་མནོད་པའི་རིགས་སོ། །འུང་ཏང་ལྷ་མ་སྲིན་ཐམས་ཅད་ཀྱང་རྒྱལ་པོའི་ལུས་དང་། བློན་པོའི་ལུས་ཀྱི་རིམ་གྲོ་དང་སྐྱབས་བྱེད་དོ། །སངས་རྒྱས་ཐམས་ཅད་ཀྱང་དགྱེས་སོ། །ཚུལ་ཁྲིམས་ཐོབ་ཟིན་ན་སྲི་ཞུ་དང་མི་
འགལ་བའི་སེམས་དང་། སེམས་ལ་གུས་པར་བྱས་པའི་སེམས་བསྐྱེད་དེ། གྲལ་མཐོན་པོ་ན་འདུག་པའི་མཁན་པོ་དང་། སློབ་དཔོན་དང་། ཐེག་པ་ཆེན་པོ་ལ་ཚངས་པར་སྤྱོད་དུ་མཚུངས་པ་དང་། མཚུངས་པར་མཐོང་བ་དང་། ལས་འཐུན་པར་བྱེད་པ་མཐོང་ན་ལངས་ཏེ་བསུ་
ལ་ཕྱག་འཚལ་ཏེ་ནད་དྲི་བའི་རིགས་སོ། །བྱང་ཆུབ་སེམས་དཔའ་སླར་དྲེགས་པའི་སེམས་དང་། ལེ་ལོའི་སེམས་དང་། གླེན་པའི་སེམས་བསྐྱེད་དེ། མ་ལངས། མ་བསུ། ཕྱག་མ་བྱས་ཏེ། ཇི་ལའང་ཆོས་བཞིན་དུ་ཞེ་ས་དང་། རི་མོ་དང་། བདག་གི་ལུས་དང་། ཡུལ་མཁར་
དང་། ཕོ་སྨོས་དང་། ནོར་རིན་པོ་ཆེ་བདུན་ལ་སོགས་ཏེ་ནོར་རོ་ཅོག་བཙོངས་ལ་དགོས་སོ་ཅོག་མ་སྦྱར་ཏེ། དེ་ལྟར་མ་ནུས་ན་ལྟུང་བའོ། །སངས་རྒྱས་ཀྱི་བུ་ལ་ལ་ཆེད་ཀར་ཆང་འཐུང་ན་ཆང་གི་ཉེས་པ་སྐྱེས་ཏེ། དགེ་བའི་བསོད་ནམས་གྲངས་མེད་པ་སྟོར་ཏོ། །ལ་ལ་ཞིག་གིས་བདག་
གིས་ལུས་དང་ལག་གིས་ཆང་སྣོད་བླངས་ཏེ་མི་ཕ་རོལ་པོ་ལ་བྱིན་ཏེ་བླུད་ན་ཚེ་རབས་ལྔ་བརྒྱའི་བར་དུ་ལག་པ་མེད་པར་འོང་ན། བདག་འཐུང་བ་ལྟ་སྨོས་ཀྱང་ཅི་དགོས། འདི་ལྟ་སྟེ། མིའོ་ཅོག་ཐམས་ཅད་དང་། སེམས་ཅན་ཐམས་ཅད་ལ་ཆང་འཐུང་བར་བསྟན་དུ་མི་རུང་ངོ་། །བདག་

རང་འཐུང་བ་ལྟ་སྨོས་ཀྱང་ཅི་དགོས་ཏེ། བདག་ཆེད་ཀར་འཐུངས་པ་དང་། ཕ་རོལ་པོ་ལ་བདར་བ་ནི་ལྟུང་བའོ། །སངས་རྒྱས་ཀྱི་བུ་ཤ་ཆེད་ཀར་ཟོས་པ་དང་། ཤའོ་ཅོག་བཟར་མི་རུང་སྟེ། ཟོས་ན་སྙིང་རྗེ་ཞིང་བྱམས་པའི་རང་བཞིན་གྱི་ས་བོན་ཆད་པས་སེམས་ཅན་
ཐམས་ཅད་ཀྱིས་མཐོང་ནས་འཇིགས་ནས་སྤོང་ངོ་། །དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་སེམས་ཅན་གྱི་ཤ་བཟར་མི་རུང་ངོ་། །ཤ་ཟོས་པ་ནི་སྡིག་གྲངས་མེད་དེ་ཤ་ཟོས་ན་ལྟུང་བའོ། །སངས་རྒྱས་ཀྱི་བུ་དཀུ་བ་རྣམ་ལྔ་བཟར་མི་རུང་ངོ་། །སྒོག་པ་དང་། བཙོང་དང་།
རྒྱ་སྒོག་དང་། རི་སྒོག་རྣམས་དང་། ཤིང་ཀུན་དང་། འདི་རྣམ་ལྔ་ཁ་ཟས་སོ་ཅོག་གི་ནང་དུ་བཟར་མི་རུང་ངོ་། །ལ་ལ་ཞིག་ཆེད་ཀར་ཟོས་ན་ལྟུང་བའོ། །སངས་རྒྱས་ཀྱི་བུ་སེམས་ཅན་ཐམས་ཅད་ཀྱིས་ཚུལ་ཁྲིམས་བརྒྱད་དང་། ཚུལ་ཁྲིམས་ལྔ་དང་། ཚུལ་ཁྲིམས་བཅུ་དང་།
རྩ་བ་རྣམ་པ་བཞི་བཤིག་པ་དང་། ལོག་པ་བདུན་དང་། གནོད་པ་བརྒྱད་ཀྱི་ཚུལ་ཁྲིམས་བཤིག་པའི་སྡིག་བྱེད་པ་མཐོང་ན་མཐོལ་ཚངས་བྱེད་དུ་གཞུག་པའི་རིགས་སོ། །དེ་ལས་བྱང་ཆུབ་སེམས་དཔའ་མ་བསྟན་ཏེ་མཐོལ་ཚངས་བྱེད་དུ་མ་བཅུག་ན། ལྷན་ཅིག་འདུག་འདུག་
ཅིང་ཚངས་པར་སྤྱོད་དུ་མཚུངས་པའི་དགེ་འདུན་གྱི་རྣམས་གཅིག་ཏུ་ཚོགས་ཏེ་ཚུལ་ཁྲིམས་བཤད་པའི་ཚེ་སྡིག་དངོས་སུ་བྱུང་གིས་ཉེས་པ་མཐོལ་ཚངས་བྱེད་དུ་ཆུག་ཤིག །མ་བཅུག་ན་ལྟུང་བའོ། །སངས་རྒྱས་ཀྱི་བུ་མཁན་པོ་ཐེག་པ་ཆེན་པོ་ལ་ལྷན་ཅིག་ཏུ་ལྟ་བ་ལྷན་ཅིག་ཏུ་ལས་
བྱེད་པ། དགེ་འདུན་གྱི་ཁང་ཁྱིམ་དང་། མཁར་དུ་འོངས་པ་མཐོང་ན་རྒྱང་གྲགས་སྟོང་གི་ལམ་ན་ཚུར་འོངས་ན་ནི་བསུ། འགྲོ་བ་ནི་བསྐྱལ་ཅིང་ཕྱག་འཚལ་ཏེ། བཀུར་སྟི་དང་། རི་མོ་དང་། ཉིན་གཅིག་ཅིང་དུས་གསུམ་དུ་རི་མོ་བྱ། ཉི་མ་གཅིག་གི་ཟན་དུ་གསེར་སྲང་གསུམ་གྱི་ཁ་
ཟས་དང་། ཁྲི་སྟན་དང་། ཆོས་ཀྱི་མཁན་པོ་ཅི་འདོད་དོ་ཅོག་དགོས་ཀྱང་ཀུན་སྦྱོར་ཏེ་བྱིན་ལ་རྟག་པར་ཆོས་ཀྱི་མཁན་པོ་གཉེར་ཏེ། དུས་གསུམ་དུ་ཆོས་བཤད་དེ། ཉིན་གཅིག་ཅིང་དུས་གསུམ་དུ་ཕྱག་གུས་པར་འཚལ་ལ་ཁྲོ་བའི་སེམས་དང་། མྱ་ངན་གྱི་སེམས་མི་སྐྱེ་བར་བགྱིས་སོ། །

ཆོས་ཀྱི་ཕྱིར་ལུས་དང་བསྔོས་ཏེ་ཆོས་གསོལ་ལོ། །དེ་ལྟར་མ་བྱས་ན་ལྟུང་བའོ། །སངས་རྒྱས་ཀྱི་བུ་གང་ལ་ཡང་རུང་སྟེ། ཚུལ་ཁྲིམས་དང་མདོ་སྡེ་འཆང་བའི་ཁང་ཁྱིམ་ཆེན་པོའི་ནང་ན་ཆོས་འཆད་པ་ཡོད་ན་བྱང་ཆུབ་སེམས་དཔའ་གསར་དུ་སློབ་པ་ཚུལ་ཁྲིམས་ཀྱི་གླེགས་བམ་ཁྱེར་
ཏེ། ཆོས་ཀྱི་མཁན་པོའི་གནས་སུ་སོང་ལ་གསོལ་ཏེ། དྲི་ཞིང་མནོད་པའི་རིགས་སོ། །ལ་ལ་ཞིག་རི་དང་། ཚལ་དང་། ཤིང་གི་དྲུང་དང་། དགེ་འདུན་གྱི་ས་དང་། ཁྱིམ་གྱི་ནང་དང་། ཆོས་འཆད་དོ་ཅོག་གི་སར་བྱིན་པར་བྱས་ཏེ། མཉན་ཅིང་འདོད་དོ། །དེའི་གནས་སུ་
སོང་སྟེ་མ་མཉན། མ་མནོས་ན་ལྟུང་བའོ། །སངས་རྒྱས་ཀྱི་བུ་སེམས་ནི་ཐེག་པ་ཆེན་པོ་དང་འགལ་ཞིང་རྟག་པར་སངས་རྒྱས་ཀྱི་ཡི་གེ་དང་། ཚུལ་ཁྲིམས་ལ་འདུག་ཀྱང་ཁར་སྨྲ་ན་སངས་རྒྱས་ཀྱིས་བཤད་པ་མ་ཡིན་ཞེས་ཟེར་ན། རྟག་པར་ཐེག་པ་ཆུང་ངུ་རྣམ་གཉིས་དང་། མུར་
འདུག་གི་ཆོས་ལ་ལྟ་ཞིང་ལོག་པར་ལྟ་བའོ་ཅོག་གི་ཚུལ་ཁྲིམས་དང་། ཆོས་ཀྱི་ཡི་གེ་གཟུངས་སུ་བཟུང་ན་ལྟུང་བའོ། །སངས་རྒྱས་ཀྱི་བུ་མི་ནད་ཀྱིས་བཏབ་བོ་ཅོག་རྟག་པར་རིམ་གྲོ་བྱས་ཏེ། གསོས་ལ་སངས་རྒྱས་དང་མཚུངས་པར་བྱས་ན་དགེ་བའི་བསོད་ནམས་རྣམ་པ་བརྒྱད་
ཀྱི་ནང་ན་ནད་པ་ལ་ལྟ་ཞིང་གསོས་པའི་དགེ་བའི་བསོད་ནམས་ནི་བསོད་ནམས་ཀྱི་དམ་པའོ། །ཕ་མ་དང་། མཁན་པོ་དང་། དགེ་འདུན་དང་། སློབ་མའམ། དབང་པོ་མ་ཚང་བ་ནད་དོ་ཅོག་གིས་བཏབ་ཅིང་ཉོན་མོངས་ན་ཀུན་ཀྱང་གསོས་ཏེ་སོས་པར་བྱའོ། །དེ་ལ་བྱང་ཆུབ་
སེམས་དཔའ་སེམས་ཅན་ལ་ལྟ་གཤེ་ཞིང་ངན་སེམས་ཀྱིས་དགེ་འདུན་གྱི་ཁྱིམ་དང་། ཡུལ་མཁར་དུ་མ་ཕྱིན་པ། དབྱེ་དང་། རི་ལུང་དང་། མཁར་དང་། ཚལ་ན་ནད་པ་འདུག་པ་མཐོང་སྟེ་ར་མདའ་དང་། རིམ་གྲོ་མ་བྱས་ན་ལྟུང་བའོ། །སངས་རྒྱས་ཀྱི་བུ་རལ་གྲི་དང་། མདའ་
གཞུ་དང་། མདུང་དང་། སྟ་རེ་ལ་སོགས་ཏེ་ཐབ་མོའི་སྤྱད་མཚོན་ཆ་དང་། སེམས་ཅན་གསོད་པའི་སྤྱད་དང་འདྲ་བ་རྒྱ་རྒྱ་མོ་ལ་སོགས་པ་འཆང་དུ་མི་རུང་ངོ་། །བྱང་ཆུབ་སེམས་དཔའ་ནི་ཕ་མ་གཞན་གྱིས་བསད་ཀྱང་ཤ་མི་གླན་ན། སེམས་ཅན་ཐམས་ཅད་གསད་པ་ལྟ་སྨོས་ཀྱང་

ཅི་དགོས། མཚོན་ཆ་ཆེད་ཀར་འཆང་བ་ན་ལྟུང་བའོ། །འདི་ལྟ་བུའི་ཚུལ་ཁྲིམས་རྣམ་བཅུ་ནི་བསླབས་ཏེ། རྟག་པར་གཟུངས་སུ་གཟུང་བའི་རིགས་སོ། །འོག་མ་ལེའུ་དྲུག་གི་ནང་ན་རྒྱ་ཆེར་བཤད་དོ། །སངས་རྒྱས་ཀྱིས་སངས་རྒྱས་ཀྱི་བུ་རྣམས་ལ་བཀའ་སྩལ་པ།
སངས་རྒྱས་ཀྱི་བུ་ཁེ་འདོད་པའི་ཕྱིར་སེམས་ངན་པ་བསམས་ཏེ། ཉི་འོག་གི་ཡུལ་དུ་ཕོ་ཉར་འདྲུལ་བ་དམག་གི་གཡུལ་བཤམས་ཏེ། དམག་བསྐྱོད་ནས་འཐབས་ཏེ་སེམས་ཅན་མང་པོ་བསད་ན་བྱང་ཆུབ་སེམས་དཔའ་དམག་གི་ནང་དུ་སོང་ཞིང་ཕན་ཚུན་དུ་འདྲུལ་ཡང་མི་རུང་ན་ཆེད་
ཀར་ཡུལ་གྱི་དགྲ་བྱེད་པ་ལྟ་སྨོས་ཀྱང་ཅི་དགོས། དེ་ལ་ཆེད་ཀར་བྱེད་པ་ནི་ལྟུང་བའོ། །སངས་རྒྱས་ཀྱི་བུ་བླ་འབངས་དང་། བྲན་ཕོ་སྨོས་དང་། ཕྱུགས་བདག་སྣ་དྲུག་དང་། གཤིན་སྒྲོམ་རོ་གཞུག་པའི་སྣོད་ལ་སོགས་པ་ཁེ་དང་ཚོང་སྤོགས་བདག་གིས་ཀྱང་བགྱི་བའི་མི་རིགས་
ན་གཞན་ལ་བྱེད་པར་བསྟན་པ་ལྟ་སྨོས་ཀྱང་ཅི་དགོས་ཏེ། དེ་ལ་ཆེད་ཀར་བྱེད་པ་ནི་ལྟུང་བའོ། །སངས་རྒྱས་ཀྱི་བུས་ངན་སེམས་བསྐྱེད་དེ་ཕ་ལོག་པོ་དག་པ་ངེས་པ། ཆོས་ཀྱི་མཁན་པོ། དགེ་འདུན་རྒྱལ་པོ། ཡ་རབས་བཙུན་པ་ལ་མ་ཉེས་པར་ལོག་པ་བདུན་དང་། ཕམ་པ་
བཅུ་དང་། ཕ་མ་དང་། ཕུ་བོ་ནུ་བོ་དང་། གཉེན་པ་རྣམ་དྲུག་གི་ཚུལ་ཁྲིམས་བཤིག་གོ་ཞེས་སྐུར་ན་སྲི་ཞུ་དང་མི་འགལ་ཞིང་བྱམས་ཤིང་སྙིང་རྗེ་བའི་སེམས་བསྐྱེད་པའི་རིགས་ཀྱི། དེ་ལ་སླར་ལོག་པའི་གནོད་པ་བསྐྱེད་ན་མི་བདེ་བའི་གནས་སུ་ལྷུང་ན་ལྟུང་བའོ། །སངས་རྒྱས་
ཀྱི་བུ་ངན་སེམས་བསྐྱེད་དེ། ཆེད་ཀར་མེ་ཆེན་པོ་བཏང་ལ་རི་དང་ཚལ་དབྱེ་དང་། རི་ལུང་དབྱར་ཟླ་ར་བ་མན་ཆད། སྟོན་ཟླ་ཐ་ཆུངས་ཡན་ཆད་བསྲེགས་སམ། ལ་ལ་ཞིག་གིས་མེ་བཏང་སྟེ། གཞན་གྱི་ཁང་ཁྱིམ་དང་། མཁར་དང་། གྲོང་དང་། དགེ་འདུན་གྱི་ཁྱིམ་དང་། ཞིང་
དང་། བསྐྱེད་ཤིང་དང་། ལྷ་མ་སྲིན་དང་། བླའི་དཀོར་ལ་སོགས་ཏེ་བདག་པོ་ཡོད་དོ་ཅོག་གི་ནོར་རྫས་བསྲེག་ཏུ་མི་རུང་ངོ་། །ལ་ལ་ཞིག་གིས་ཆེད་ཀར་བསྲེགས་ན་ལྟུང་བའོ། །སངས་རྒྱས་ཀྱི་བུ་སངས་རྒྱས་ཀྱི་སློབ་མ་བདག་དང་། མུར་འདུག་དང་། གཉེན་རྣམ་དྲུག་ལ་

སོགས་ཏེ། དགེ་བའི་བཤེས་གཉེན་ནོ་ཅོག་ཀུན་ཀྱང་ཅི་ཡང་ཐེག་པ་ཆེན་པོའི་ཡི་གེ་དང་། ཚུལ་ཁྲིམས་ནོད་ཅིང་གཟུངས་སུ་འཛིན་པར་བསྟན་པའི་རིགས་སོ། །གཞུང་དང་ལུགས་ཤེས་ཤིང་བྱང་ཆུབ་སེམས་དཔའི་སེམས་བསྐྱེད་པ་དང་། བསྐྱེད་ཅིང་གསོལ་བའི་སེམས་བཅུ་དང་།
རྡོ་རྗེའི་ཆོས་ཀྱི་སེམས་གཡོ་བར་བསྟན་ཏེ། གཅིག་ནས་གཅིག་ཏུ་གོ་རིམས་དང་། ཆོས་ཀྱིས་ཆོ་ག་ཤེས་པར་བྱའོ། །བྱང་ཆུབ་སེམས་དཔའ་ལ་བྱང་ཆུབ་སེམས་དཔས་ངན་སེམས་དང་། ཞེ་སྡང་བསྐྱེད་དེ། གཞན་ཉན་ཐོས་ཀྱི་ཐེག་པ་ཆུང་ངུ་རྣམ་གཉིས་ཀྱི་ཚུལ་ཁྲིམས་དང་།
ཡི་གེ་དང་། མུར་འདུག་དང་། ལོག་པར་ལྟ་བའི་བཤད་པ་བསྟན་པ་ན་ལྟུང་བའོ། །སངས་རྒྱས་ཀྱི་བུ་ལེགས་པའི་སེམས་ཀྱིས་སྔར་ཐེག་པ་ཆེན་པོའི་གོ་ཆ་དང་། ཚུལ་ཁྲིམས་དང་། ཡི་གེ་བསླབས་ནས་རྒྱ་ཆེར་ཕྱེ་ནས་གཞུང་གི་རོ་ཅི་བྲོ་བ་ཤེས་ནས་བྱང་ཆུབ་སེམས་དཔའ་གསར་
དུ་སློབ་པ་རྒྱང་གྲགས་བརྒྱ་སྟོང་གི་ལམ་ནས་ཐེག་པ་ཆེན་པོའི་ཡི་གེ་དང་། ཚུལ་ཁྲིམས་འདོད་ཅིང་འོང་བ་མཐོང་ན་ཆོས་ཀྱི་ཕྱིར་དཀའ་ཐུབ་སྤྱོད་པ་ཆོས་བཞིན་བཤད་པའི་རིགས་སོ། །དཀའ་ཐུབ་ཅེས་བྱ་བ་ནི་ལུས་བསྲེགས་པ། ལག་ངར་བསྲེགས་པ་སོར་མོ་བསྲེགས་པའོ། །
དེ་ལ་ལུས་དང་། ལག་ངར་དང་། སོར་མོ་བསྲེགས་ཏེ། སངས་རྒྱས་ཐམས་ཅད་ལ་ཡོན་དུ་མ་གསོལ་ན། དེའི་རབ་ཏུ་བྱུང་བའི་བྱང་ཆུབ་སེམས་དཔའ་མ་ཡིན་ནོ། །སྟག་དང་། སྤྱང་ཀི་དང་། སེང་གེ་ལྟོགས་པ་ལ་སོགས་པ་དང་། འདྲེ་ལྟོགས་པ་ལ་སོགས་པ་ཐམས་ཅད་
ལ་ལུས་ཀྱི་ཤ་དང་། རྐང་ལག་གཏོང་ཕོད་པར་བྱས་ཏེ། བྱིན་ལ་དེ་ནས་གཅིག་ནས་གཅིག་ཏུ་མཐར་གྱིས་ཡང་དག་པའི་ཆོས་བཤད་དེ། སེམས་ནི་ཕྱེ། ཡིད་ནི་གོལ་བར་བྱའོ། །དེ་ལ་བྱང་ཆུབ་སེམས་དཔའ་དེ་དག་གསོ་བའི་ཁེ་འདོད་པའི་ཕྱིར་ལན་བླན་པའི་རིགས་པ་ནི་
མ་བླན་གྱི། ཡི་གེ་དང་། ཚུལ་ཁྲིམས་རི་མོ་དང་། འབྲུ་ཕྱིན་ཅི་ལོག་ཏུ་བཤད་ནས་སྔ་ཕྱི་མེད་པར་དཀོན་མཆོག་གསུམ་ལ་འཕྱ་ཞིང་འཆད་པ་ནི་ལྟུང་བའོ། །སངས་རྒྱས་ཀྱི་བུ་བདག་ཁ་ཟས་དང་། ནོར་རྫས་དང་། གསོ་བའི་ཁེ་དང་། མིང་སྙན་པའི་ཕྱིར་རྒྱལ་པོ་དང་། རྒྱལ་

བུ་དང་། བློན་པོ་ཆེན་པོ་ལ་སོགས་པ་གཉེན་ཞེས་ཟེར་ཏེ། སྙེམས་ཤིང་ནན་གྱིས་ནོར་སློང་ལ། བཙན་ངག་གིས་བསྡིགས་ཏེ་ནན་གྱིས་ནོར་དང་། ཁེ་ཚོལ་ལོ་ཅོག་གི་མིང་ནི་ངན་པ་མང་པོ་ཚོལ་ཞེས་བྱའོ། །གཞན་ལ་ཡང་སྙིང་རྗེ་མེད་ཅིང་སྲི་ཞུ་དང་མི་འགལ་བའི་
སེམས་ཡོང་མེད་པར་བསྟན་པ་ནི་ལྟུང་བའོ། །སངས་རྒྱས་ཀྱི་བུ་ཚུལ་ཁྲིམས་ཁ་ཏོན་དུ་ཀློག་པ་སློབ་པ་ན་ཉིན་གཅིག་ཅིང་དུས་དྲུག་ཏུ་བྱང་ཆུབ་སེམས་དཔའི་ཚུལ་ཁྲིམས་བཟུང་ལ། དེའི་གཞུང་དང་། དོན་སངས་རྒྱས་ཀྱི་ངོ་བོ་ཉིད་ཤེས་པར་བྱའོ། །བྱང་ཆུབ་སེམས་དཔའ་ཚུལ་
ཁྲིམས་ཀྱི་ཡོན་ཏན་ཚིག་གཅིག་ལེའུ་གཅིག་ཀྱང་མི་ཤེས་པར་སྒྱུ་མའི་ཚིག་ཏུ་ནུས་ཞེས་ཟེར་བ་ནི་བདག་ལ་བརྙས་ཤིང་བསླུས། གཞན་ལ་ཡང་བརྙས་ཏེ་ཆོས་སོ་ཅོག་རྣམ་པ་གཅིག་ཀྱང་མི་ཤེས་པར་གཞན་ལ་མཁན་པོ་བྱེད་ཅིང་ཚུལ་ཁྲིམས་སྟོན་པ་ནི་ལྟུང་བའོ། །སངས་རྒྱས་ཀྱི་བུ་
ངན་སེམས་བསྐྱེད་དེ། ཚུལ་ཁྲིམས་འཛིན་པའི་དགེ་བའི་ལག་ན་པོག་སྣོད་ཁྱེར་ཏེ། བྱང་ཆུབ་སེམས་དཔའི་ལས་བྱེད་པ་ལ་མཐོང་ནས་ཕན་ཚུན་གཉིས་ཀྱིས་བར་དུ་བར་བཅུག་སྟེ། འཕགས་པའི་མི་ལ་བརྙས་མ་ཤིན་བྱེད་ཅིང་ངན་མི་བྱེད་པ་མེད་དོ་ཞེས་སྐུར་ཏེ། དེ་ལྟ་བུ་ཆེད་
ཀར་བྱས་ན་ལྟུང་བའོ། །སངས་རྒྱས་ཀྱི་བུ་སྙིང་རྗེ་སྤྱད་དེ་ཅིའང་མི་གསད་པར་བཏང་བའི་ལས་བྱེད་ཅིང་ཕོའོ་ཅོག་ནི་བདག་གི་ཕ་ཡིན། མོའོ་ཅོག་ནི་བདག་གི་མ་ཡིན། བདག་སྔན་ཆད་ཀྱི་ཚེ་རབས་ལ་གར་སྐྱེས་སོ་ཅོག་ན་ཡང་དེ་དག་ལས་མ་སྐྱེས་པ་མེད་པས་ན་འགྲོ་བ་དྲུག་
གི་སེམས་ཅན་བདག་གི་ཕ་མ་ཡིན་ཏེ། དེ་བསད་ཅིང་ཟོས་ན་བདག་གི་ཕ་མ་བསད་དོ། །གཅིག་ཏུ་ན་བདག་གི་ལུས་རྙིང་པ་བསད་དོ། །ས་དང་ཆུ་ཐམས་ཅད་ནི་བདག་གི་ལུས་སྔ་མ་ཡིན་ནོ། །མེ་དང་རླུང་ངོ་ཅོག་ནི་བདག་གི་གཟུགས་ཀྱི་ཕྱི་མོ་ཡིན་པས་རྟག་པར་གསོན་པོར་
བཏང་བའི་ལས་བྱེད། གར་སྐྱེས་གར་སྐྱེས་ཀྱང་སེམས་ཅན་གསོད་པ་མཐོང་ན་ཐབས་སྤྱད་དེ། བདག་གིས་འོར་ཚོས་ཀྱི་རྒྱ་མོ། བ་དང་ར་མདའ་བྱས་ཏེ། ཉོན་མོངས་ཤིང་ཕོངས་པ་ཐར་བར་བྱའོ། །རྟག་པར་བྱང་ཆུབ་སེམས་དཔའི་ཚུལ་ཁྲིམས་བཤད་དེ། བསྟན་བསླབས་ནས་སེམས་

ཅན་ཐར་པའི་ར་མདའ་བྱའོ། །ཕ་མ་དང་། བུ་ཕོ་དང་། ནུ་བོ་ཞིག་ཤི་ན་དེ་ཉིན་པར་ཆོས་ཀྱི་མཁན་པོ་གཉེར་ཏེ། བྱང་ཆུབ་སེམས་དཔའི་ཚུལ་ཁྲིམས་བཤད་ན་དེའི་བསོད་ནམས་ཀྱིས་ཤི་བ་དེ་སངས་རྒྱས་ཐམས་ཅད་དང་ཕྲད་དེ་མཐོ་རིས་སུ་སྐྱེའོ། །དེ་ལྟར་མ་བྱས་ན་
ལྟུང་བའོ།། །།ཆོས་ཀྱི་རྒྱ་མོ། བམ་པོ་གཉིས་པ་སྟེ་ཐ་མ། འདི་ལྟ་སྟེ། ཚུལ་ཁྲིམས་འདི་བཅུ་བསླབས་ན་སེམས་གུས་པར་གཟུངས་སུ་གཟུང་བའི་རིགས་སོ། །སྡིག་བཀྲུ་བའི་ལེའུའི་ནང་ནས་ཀྱང་ཚུལ་ཁྲིམས་གཅིག་པུ་གཅིག་ནས་རྒྱ་ཆེ་ཞིང་གསལ་
བར་བཤད་དོ། །སངས་རྒྱས་ཀྱིས་སངས་རྒྱས་ཀྱི་བུ་ལ་བཀའ་སྩལ་པ། ཁྲོས་པའི་ལན་ཁྲོས་པས་མི་བླན། བརྡེག་པའི་ལན་བརྡེག་པས་མི་བླན། ཕ་མ་དང་། ཕུ་ནུ་བོ་གཉེན་རྣམ་དྲུག་བསད་ཀྱང་ཤ་བླན་དུ་མི་རུང་ངོ་། །གཞན་ཞིག་གིས་བདག་གི་རྒྱལ་པོ་གསད་ཀྱང་
ཤ་བླན་དུ་མི་རུང་ངོ་། །སྲོག་གཅོད་ཅིང་ཤ་བླན་ན་སྲི་ཞུའི་ཆོས་དང་འགལ་ལོ། །བྲན་ཕོ་སྨོས་ལ་ངག་ངན་པས་སྤྱོས་ཤིང་བརྡེགས་ལ་ཉིན་གཅིག་ཅིང་ལས་ངན་པ་རྣམ་གསུམ་སྤྱོད་པ་ལ་ཡང་སྡིག་གྲངས་མེད་ན་ཆེད་ཀར་ལོག་པ་སྣ་བདུན་གྱི་སྡིག་བྱས་པ་ལྟ་སྨོས་ཀྱང་ཅི་
དགོས་ཏེ། རབ་ཏུ་བྱུང་བའི་བྱང་ཆུབ་སེམས་དཔའ་ལ་སྙིང་རྗེ་མེད། གཉེན་རྣམ་དྲུག་ལ་སོགས་པའི་ཤ་བླན་པ་ཆེད་ཀར་བྱེད་ན་ལྟུང་བའོ། །སངས་རྒྱས་ཀྱི་བུ་གདོད་མ་དང་པོ་རབ་ཏུ་བྱུང་སྟེ། ཇིའང་མི་ཤེས་པར་བདག་དབང་པོ་རྣོ་ལ་མཛངས་པར་རློམ་ཞིང་ལ་ལ་ནི་ལོ་གྲངས་
རྒན་ཞིང་ཕྱུག་བཙན་སྙེམས་ཏེ། ལ་ལ་རུས་ཆེ་ཞིང་ཐབས་མཐོ་བ་དང་། མང་དུ་ཤེས་པ་དང་། དབང་ཆེ་བ་དང་། ནོར་རིན་པོ་ཆེ་སྣ་བདུན་མང་དུ་བདོག་པས་རྒྱགས་དྲེགས་སྔན་ཆད་ཆོས་ཤེས་པའི་མཁན་པོ་ལ་ཡི་གེ་དང་། ཚུལ་ཁྲིམས་མི་གསོལ། མི་ནོད། ཆོས་ཀྱི་
མཁན་པོ་ལ་ལ་ནི་རུང་ཆུང་། ལ་ལ་ནི་ནས་གཞོན། ལ་ལ་ནི་ཐབས་ཆུང་། ལ་ལ་ནི་དབུལ། ལ་ལ་ནི་དབང་པོ་མ་ཚང་ཡང་ལེགས་པའི་ཆོས་དབེན་པ་ཡོད་དེ། ཆོས་ཀྱི་ཡི་གེ་དང་། ཚུལ་ཁྲིམས་སོ་ཅོག་ཟད་པར་ཤེས་ན་བྱང་ཆུབ་སེམས་དཔའ་གསར་དུ་སློབ་བོ། །ཆོས་

ཀྱི་སློབ་དཔོན་མ་རིག་པ་དང་། ཐབས་ལ་འཕྲལ་གང་དུ་བལྟས་ཤིང་ཆོས་ཀྱི་མཁན་པོ་ལ་ཡང་དག་པའི་བདེན་པ་གཞུང་ངོ་ཅོག་གསོལ་ཞིང་ནོད་དུ་མ་འོངས་ན་ལྟུང་བའོ། །སངས་རྒྱས་ཀྱི་བུ་སངས་རྒྱས་འདས་པའི་ཕྱི་ན་སེམས་དགེ་བས་སངས་རྒྱས་ཀྱི་ཚུལ་
ཁྲིམས་འདོད་ཅིང་ནོད་ན་སངས་རྒྱས་དང་། བྱང་ཆུབ་སེམས་དཔའི་གཟུགས་ཀྱི་སྤྱན་སྔར་བདག་གི་སེམས་ལ་ཡི་དམ་བཅས་ཏེ། ཞག་བདུན་གྱི་བར་དུ་སངས་རྒྱས་ཀྱི་སྤྱན་སྔར་མཐོལ་ཚངས་བྱས་ལ། ལྟས་བཟང་པོ་མཐོང་བ་ནི་ཚུལ་ཁྲིམས་ཐོབ་བོ། །ལྟས་བཟང་པོ་མ་མཐོང་
བ་ནི་ཞག་བདུན་གཉིས། བདུན་གསུམ། ལོ་གཅིག་གི་བར་དུ་ལྟས་བཟང་པོ་མཐོང་བའི་དྲོད་ཀྱིས་གཟུང་ངོ་། །ལྟས་བཟང་པོ་མཐོང་ནས་སངས་རྒྱས་དང་། བྱང་ཆུབ་སེམས་དཔའི་གཟུགས་ཀྱི་སྤྱན་སྔར་ཚུལ་ཁྲིམས་མནོད་དོ། །ལྟས་བཟང་པོ་མ་མཐོང་ན་སངས་རྒྱས་
དང་། བྱང་ཆུབ་སེམས་དཔའི་གཟུགས་ཀྱི་སྤྱན་སྔར་ཚུལ་ཁྲིམས་མནོད་ཀྱང་མིང་ཚུལ་ཁྲིམས་ཐོབ་པ་ཞེས་མི་བྱའོ། །ལ་ལ་ཞིག་གིས་སྔོན་ཆད་བྱང་ཆུབ་སེམས་དཔའི་ཚུལ་ཁྲིམས་མནོས་པའི་མདུན་དུ་ནོད་ན་ལྟས་བཟང་པོ་མི་དགོས་སོ། །དེ་ཅིའི་ཕྱིར་ཞེ་ན། ཆོས་ཀྱི་
མཁན་པོ་གཅིག་ནས་གཅིག་ཏུ་བསྟན་པས་ན་ལྟས་བཟང་པོ་མི་དགོས་ཏེ། ཆོས་ཀྱི་མཁན་པོ་དེའི་མདུན་དུ་ཚུལ་ཁྲིམས་མནོས་ན་ཚུལ་ཁྲིམས་ཀྱང་ཐོབ་སྟེ། གུས་པའི་སེམས་སྐྱེའོ། །རྒྱང་གྲགས་སྟོང་ལམ་ཚུན་ཆད་ཚུལ་ཁྲིམས་སྦྱིན་ནུས་པའི་མཁན་པོ་མེད་ལ་སངས་རྒྱས་
དང་། བྱང་ཆུབ་སེམས་དཔའི་གཟུགས་ཀྱི་སྤྱན་སྔར་ཚུལ་ཁྲིམས་ནོད་ན་ལྟས་བཟང་པོ་མཐོང་བར་དགོས་སོ། །ཆོས་ཀྱི་མཁན་པོ་ལ་ལ་ཞིག་བདག་ཐེག་པ་ཆེན་པོའི་ཡི་གེ་དང་། ཚུལ་ཁྲིམས་ཤེས་པ་དང་། རྒྱལ་པོ་དང་། རྒྱལ་བུ་དང་། བློན་པོ་རྣམས་བྱམས་ཤིང་མཛའ་བ་
སྙེམས་ཏེ། བྱང་ཆུབ་སེམས་དཔའ་གསར་དུ་སློབ་པ་ཆོས་ཀྱི་ཡི་གེའི་ལུགས་དང་། ཚུལ་ཁྲིམས་ཀྱི་གཞུང་འདྲིར་འོངས་པ་ལ་བརྙས་པའི་སེམས་དང་། ངན་སེམས་དང་། ལེ་ལོའི་སེམས་ཀྱིས་གཅིག་པུ་གཅིག་པུ་ནས་འདྲི་བའི་ལན་མ་བླན་ན་ལྟུང་བའོ། །སངས་རྒྱས་ཀྱི་བུ་

སངས་རྒྱས་ཀྱི་ཆོས་དང་། ཚུལ་ཁྲིམས་ཀྱི་ཡི་གེ་དང་། ཐེག་པ་ཆེན་པོའི་དྲང་པོའི་ཆོས། དྲང་པོར་མཐོང་བ། དྲང་པོའི་ངོ་བོ་ཉིད། དྲང་པོའི་ཆོས་ཀྱི་ལུས་ཀྱིས་འགྲུས་པར་སློབ་ཅིང་སྤྱོད་སྒོམ་མི་ནུས་པ་རྣམས་ནི་དཀོན་མཆོག་བདུན་བདུན་བཏང་སྟེ། སླར་ལོག་པར་བལྟས་ཏེ་ཐེག་པ་
ཆུང་ངུ་རྣམ་གཉིས་དང་། མུར་འདུག་གི་ཆོས་དང་། མ་རབས་ཀྱི་གཞུང་ལ་བསྟེན་པ་དང་། ཨ་བྷི་དྷརྨ་བཤད་པ་སློབ་པ་དང་། ཐེག་པ་ཆུང་ངུའི་ཡི་གེ་དང་། འདུག་པར་སློབ་ན་དེ་ནི་སངས་རྒྱས་ཀྱི་ངོ་བོ་ཉིད་ཀྱི་ས་བོན་ཆད་པས་ལམ་འགོག་པས་བསྒྲིབས་པའི་རྒྱུ་རྐྱེན་གྱིས་བྱང་
ཆུབ་སེམས་དཔའི་ལམ་མ་ཡིན་ནོ། །དེ་ལྟ་ན་ཆེད་ཀར་བྱས་པ་ནི་ལྟུང་བའོ། །སངས་རྒྱས་ཀྱི་བུ་སངས་རྒྱས་འདས་པའི་ཕྱི་ན་ཆོས་འཆད་པ་བདག་པོ་བྱེད་པ་དང་། དགེ་འདུན་གྱི་ཁྱིམ་བདག་པོ་དང་། སྟོན་ཅིང་འཕྲུལ་པའི་བདག་པོ་དང་། བསམ་གཏན་དུ་འཇུག་པའི་
བདག་པོ་དང་། འགྲོ་ཞིང་འོངས་པའི་བདག་པོ་དང་། དེ་ལྟ་བུ་བྱེད་ན་བྱམས་པའི་སེམས་བསྐྱེད་ལ་མི་མཛའ་སྟེ། འཐབ་ཅིང་རྩོད་པ་ཡང་དགེ་བར་བསྡུམ་པའི་རིགས་སོ། །དཀོན་མཆོག་གསུམ་གྱི་ནོར་ཡང་དགེ་བར་བསྲུངས་ཏེ་མ་འོས་པར་མི་སྤྱད། བདག་གིས་བདག་
གི་སྒོར་བབ་པ་དང་མཚུངས་པར་བྱའོ། །དེ་ལ་ལས་ལོག་པར་མང་པོ་འགྲུབ་ཅིང་འབད་པ་དང་། རང་ཉམས་ཀྱི་སེམས་ཀྱིས་དཀོན་མཆོག་གསུམ་གྱི་ནོར་སྤྱད་ན་ལྟུང་བའོ། །སངས་རྒྱས་ཀྱི་བུ་སྔན་ཆད་དགེ་འདུན་གྱི་ཁྱིམ་གྱི་ནང་ན་འདུག་ལ་བྱང་ཆུབ་སེམས་དཔའ་དང་།
དགེ་སློང་འདྲོན་པ་ཞིག་ཕྱིས་དགེ་འདུན་གྱི་ཁང་ཁྱིམ་དང་། མཁར་དང་། གྲོང་དང་། རྒྱལ་པོའི་ཁྱིམ་དང་། དབྱར་ཚུལ་དུ་ཞུགས་པའི་ཚེ་དང་། འཁོར་གྱི་ནང་དུ་འོངས་པ་མཐོང་ན་སྔ་ན་འདུག་པའི་དགེ་འདུན་གྱིས་འོང་ན་ནི་བསུ། འགྲོ་ན་ནི་བསྐྱལ་ཏེ། ཟས་ཀྱི་བསྟི་སྟང་
དང་། ཁང་ཁྱིམ་དང་། ཉལ་བའི་མལ་ཆ་དང་། ཁྲི་དང་། སྣ་སྣ་ནས་སྦྱར་ཏེ་སྦྱིན་ནོ། །ལ་ལ་ཞིག་བདག་ལ་ནོར་མེད་ན་བདག་གི་ལུས་དང་། བུ་ཕོ་དང་། བུ་མོ་དག་བཙོངས་ཏེ། ཅི་འདོད་པ་ཀུན་སྦྱར་ཏེ་སྦྱིན་དགོས་སོ། །སྦྱིན་བདག་ལ་ལ་ཞིག་འོངས་ཏེ། དགེ་འདུན་

ཕལ་དང་། དགེ་འདུན་གྱི་འདྲོན་པ་ཞིག་གཉེར་ཏེ། ཡོན་གྱི་ནོར་སྐལ་བ་ཡོད་པའི་སར་དག