Kinh tạng Tây Tạng (Kangyur Đại Học) — 040_དཀོན་བརྩེགས།_ཁ

། ཁྲུང་ཁྲུང་དང་། ནེ་ཙོ་དང་། རྨ་བྱ་དང་། ཀ་རི་ཀ་ལ་སོགས་པ་བྱའི་ཚོགས་མང་པོ་རྣམས་དེ་བཞིན་གཤེགས་པ་མཐོང་བ་དང་། རབ་ཏུ་དགའ་བའི་སེམས་བསྐྱེད་ནས་སྒྲ་སྙན་ཅིང་ཡིད་དུ་འོང་བ་མཆོག་དམ་པ་
ཕྱུང་སྟེ། གང་གིས་སྒྲ་དེ་དག་ཐོས་པ་ཡང་ཡིད་ཤིན་ཏུ་བདེ་བར་གྱུར་ཏོ། །གཞན་ཡང་དེ་བཞིན་གཤེགས་པས་རྫུ་འཕྲུལ་གྱི་སྟོབས་ཀྱིས་ཙམ་པ་ཀའི་ལྗོན་ཤིང་ཚད་མེད་པ་སྙེད་མངོན་པར་སྤྲུལ་པས། སེམས་ཅན་བརྒྱ་སྟོང་མང་པོ་རྣམས་མེ་ཏོག་ཡོངས་སུ་དག་པ་དེ་དག་དང་། གཞན་ཡང་སྤོས་
མཆོག་དམ་པ་ཐོགས་ནས་བཅོམ་ལྡན་འདས་ལ་མངོན་པར་གཏོར་ཏེ་མཆོད་པ་བྱས་སོ། །གཞན་ཡང་ལྷ་མ་ཡིན་གྱི་བུ་མོ་དབང་ཕྱུག་ཐོབ་པ་བརྒྱ་སྟོང་དུ་མ་མུ་ཏིག་དམར་པོ་དང་། ཙན་དན་གྱི་ཕྱེ་མ་ཐོགས་ནས་དེ་བཞིན་གཤེགས་པ་ལ་རབ་ཏུ་དགའ་བས་མངོན་པར་གཏོར་ཏོ། །ལྷ་མ་
ཡིན་མང་པོ་དང་། གཞན་ཡང་ལྷ་མང་པོ་རྣམས་རིན་པོ་ཆེའི་གདུགས་གསེར་དང་། དངུལ་གྱིས་རབ་ཏུ་བརྒྱན་པ་ཐོགས་ནས་བར་སྣང་ལ་འདུག་སྟེ། དེ་བཞིན་གཤེགས་པའི་སྟེང་དུ་ཁེབས་པར་གཡོགས་སོ། །གཞན་ཡང་བཅོམ་ལྡན་འདས་ཀྱི་རྫུ་འཕྲུལ་གྱི་སྟོབས་ཀྱིས་ཙན་དན་

གྱི་ལྗོན་ཤིང་དང་། གསེར་གྱི་ལྗོན་ཤིང་དང་། རིན་པོ་ཆེའི་སྣོད་དང་། གོས་ལ་སོགས་པའི་ལྗོན་ཤིང་བརྒྱ་སྟོང་ཚད་མེད་དཔག་ཏུ་མེད་པ་རིན་པོ་ཆེ་རྣམས་ཀྱིས་བརྒྱན་པ། མེ་ཏོག་དང་། ལོ་མ་ཕུན་སུམ་ཚོགས་ཤིང་རྒྱས་པ། སེམས་ཅན་ཚད་མེད་པའི་བསོད་ནམས་ཀྱི་རྣམ་པར་སྨིན་པའི་འབྲས་བུ་
ཐུན་མོང་དུ་མངོན་པར་གྲུབ་པ། རླུང་གི་ངད་ལངས་པ་ཙམ་གྱིས་སྤོས་མཆོག་དམ་པའི་དྲིས་སངས་རྒྱས་ཀྱི་ཞིང་ཚད་མེད་པ་རྣམས་ཀུན་ཏུ་ཁྱབ་པར་གང་བ་མངོན་པར་སྤྲུལ་ཏོ། །སེམས་ཅན་བརྒྱ་སྟོང་ཚད་མེད་པ་རྣམས་ཀྱིས་ཀྱང་དུས་གཅིག་ཏུ་མེ་ཏོག་ཐོགས་ནས་བཅོམ་ལྡན་འདས་ལ་མངོན་པར་
གཏོར་ཏོ། །དེ་བཞིན་དུ་སེམས་ཅན་མ་ཡིན་པ་ཚད་མེད་པ་རྣམས་ཀྱང་དེ་བཞིན་གཤེགས་པའི་རྫུ་འཕྲུལ་གྱི་སྟོབས་ཀྱིས་མངོན་པར་སྤྲུལ་པ་ཤ་སྟག་གོ །གང་དག་ཅི་དང་ཅི་སྨོན་པ་དེ་དག་ཀྱང་རྫུ་འཕྲུལ་གྱི་དབང་གིས་དེ་དག་གི་བསམ་པ་ཇི་ལྟ་བ་བཞིན་དུ་རེ་བ་ཡོངས་སུ་རྫོགས་པར་གྱུར་
ཏོ། །བཅོམ་ལྡན་འདས་གྲོང་ཁྱེར་དུ་གཤེགས་པའི་ཚེ་འཁོར་འདུས་པ་ཐམས་ཅད་ནམ་མཁའ་ལ་ཁྱད་པར་དུ་འཕགས་པའི་སྒྲ་བསམ་གྱིས་མི་ཁྱབ་པར་ཡང་དག་པར་སྟོན་པའི་སྒྲ་ཐོས་པར་གྱུར་ཀྱང་དེ་གང་ནས་བྱུང་བ་ཤེས་པར་ཡང་མ་གྱུར་ལ་ཚིགས་སུ་བཅད་པ་བརྒྱ་སྟོང་དུ་མས་ཀྱང་
ཆོས་རྣམས་ཡང་དག་པར་བསྟན་པར་གྱུར་ཏོ། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། མཁའ་ལས་སྒྲ་ནི་འདི་སྐད་གྲགས་པར་གྱུར། །འདོད་ཆགས་ཟད་མཐའ་སྟོང་དབེན་གང་རྟོགས་པ། །ཡང་དག་ཉིད་རྟོགས་བྱང་ཆུབ་ཐོབ་པར་འགྱུར། །བཅོམ་ལྡན་འདས་ནི་གྲོང་ཁྱེར་
ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །འདོད་ཆགས་སྐྱེ་མཐའ་སྟོང་དབེན་གང་རྟོགས་པ། །ཡང་དག་ཉིད་རྟོགས་བྱང་ཆུབ་ཐོབ་པར་འགྱུར། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །འདོད་ཆགས་མཐའ་ནི་
སྟོང་དབེན་གང་རྟོགས་པ། །ཡང་དག་ཉིད་རྟོགས་བྱང་ཆུབ་ཐོབ་པར་འགྱུར། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །འདོད་ཆགས་རབ་ཞི་སྟོང་དབེན་གང་རྟོགས་པ། །ཡང་དག་ཉིད་རྟོགས་བྱང་ཆུབ་ཐོབ་པར་འགྱུར། །བཅོམ་

ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །འདོད་ཆགས་འཇུག་པ་སྟོང་དབེན་གང་རྟོགས་པ། །ཡང་དག་ཉིད་རྟོགས་བྱང་ཆུབ་ཐོབ་པར་འགྱུར། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །
འདོད་ཆགས་མེད་ཅིང་སྟོང་དབེན་གང་རྟོགས་པ། །ཡང་དག་ཉིད་རྟོགས་བྱང་ཆུབ་ཐོབ་པར་འགྱུར། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །འདོད་ཆགས་སྐྱེ་མེད་སྟོང་དབེན་གང་རྟོགས་པ། །ཡང་དག་ཉིད་རྟོགས་བྱང་ཆུབ་ཐོབ་པར་འགྱུར། །
བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །འདོད་ཆགས་རབ་འགོག་སྟོང་དབེན་གང་རྟོགས་པ། །ཡང་དག་ཉིད་རྟོགས་བྱང་ཆུབ་ཐོབ་པར་འགྱུར། །ཞེ་སྡང་གཏི་མུག་ཁོང་ཁྲོ་འཆབ་སེར་སྣ། །གཡོ་སྒྱུ་ཁེངས་དང་ང་རྒྱལ་མྱ་ངན་དང་། །སྡུག་
བསྔལ་ཀུན་འབྱུང་འགོག་པ་ལམ་སེམས་ཅན། །ཁྱེའུ་དང་བུ་མོ་བུད་མེད་དག་དང་ནི། །སྐྱེས་པ་གསོ་བ་དག་དང་དབང་པོ་དྲུག །ཡུལ་དྲུག་འབྱུང་ཆེན་བཞི་ཡི་དངོས་པོ་དང་། །འཇིག་རྟེན་སྡུག་བསྔལ་ཕུང་པོ་ཁམས་དག་དང་། །འཇིག་རྟེན་སྐྱེ་སྒྲ་མིང་སོགས་ཀྱང་དེ་བཞིན། །ཆོས་རྗེ་དམ་
པའི་ཆོས་ནི་བསྟན་པས་ན། །སེམས་ཅན་ཐམས་ཅད་རབ་ཏུ་དགའ་བར་གྱུར། །ལྷ་ཡི་འཇིག་རྟེན་ཀུན་ཀྱང་ཐོས་གྱུར་ནས། །དེ་བཞིན་གཤེགས་པའི་ཐེག་ལ་གནས་པར་མོས། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །བཅོམ་ལྡན་སྦྱིན་སྟོབས་དག་ལ་
རབ་མོས་པས། །སྦྱིན་པའི་སྟོབས་ཀྱིས་བྱང་ཆུབ་བརྙེས་པར་གྱུར། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །བཅོམ་ལྡན་ཚུལ་ཁྲིམས་རྣམ་དག་རབ་མོས་པས། །ཚུལ་ཁྲིམས་རྣམ་དག་སྟོབས་ཀྱིས་བྱང་ཆུབ་བརྙེས། །བཅོམ་ལྡན་འདས་ནི་གྲོང་
ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །བཅོམ་ལྡན་བཟོད་པ་དག་ལ་རབ་མོས་པས། །བཟོད་པའི་སྟོབས་ཀྱིས་བྱང་ཆུབ་བརྙེས་པར་གྱུར། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །བཅོམ་ལྡན་བརྩོན་

འགྲུས་དག་ལ་རབ་མོས་པས། །བརྩོན་འགྲུས་སྟོབས་ཀྱིས་བྱང་ཆུབ་བརྙེས་པར་གྱུར། །བཅོམ་ལྡན་འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །བཅོམ་ལྡན་བསམ་གཏན་དག་ལ་རབ་མོས་པས། །བསམ་གཏན་སྟོབས་ཀྱིས་བྱང་ཆུབ་བརྙེས་པར་གྱུར། །བཅོམ་ལྡན་
འདས་ནི་གྲོང་ཁྱེར་ཞུགས་པའི་ཚེ། །མཁའ་ལས་སྒྲ་ནི་འདི་སྐད་གྲགས་པར་གྱུར། །བཅོམ་ལྡན་ཤེས་རབ་དག་ལ་རབ་མོས་པས། །ཤེས་རབ་སྟོབས་ཀྱིས་བྱང་ཆུབ་བརྙེས་པར་གྱུར། །རྫུ་འཕྲུལ་མངོན་ཤེས་ཡོན་ཏན་གནས་ཤེས་སྟོབས། །ཐབས་དང་གཟུངས་ཀྱི་སྟོབས་དང་གྲགས་པའི་སྟོབས། །
ལས་དང་རྟེན་འབྱུང་ཡན་ལག་དད་དང་ཐོས། །སྟོང་དང་འཐུན་པའི་སྟོབས་དང་རབ་ཞི་སྟོབས། །རབ་དུལ་ཡང་དག་མཐའ་དང་དབེན་མཁས་སྟོབས། །འཇིགས་དང་དགའ་དང་ཕན་འདོགས་ལ་མོས་དང་། །བྱམས་དང་སྙིང་རྗེ་དགའ་སྙོམས་བཟོད་འཚེ་མེད། །སྟོང་དང་མཚན་མ་མེད་སོགས་ཀྱང་དེ་བཞིན། །
སྟོབས་བཅུ་འཕགས་པའི་མངའ་བདག་ལྷ་ཡི་གཙོ། །ཡོན་ཏན་གྲགས་པ་དཔེ་ཟླ་མ་མཆིས་པ། །གྲོང་ཁྱེར་མཆོག་གཤེགས་ཞབས་ནི་བཞག་པའི་ཚེ། །སེམས་ཅན་རྣམས་ལ་རྒྱ་ཆེར་ཕན་པ་མཛད། །སྔོན་ཆད་སྲིད་གསུམ་ལས་དགེ་རབ་བསྒྲུབས་པས། །ལྷ་ཡི་དགེ་བ་སྣ་ཚོགས་འཕེལ་བར་མཛད། །
འཇིག་རྟེན་ཐམས་ཅད་ཀྱིས་ནི་རབ་ཏུ་བཀུར། །ང་ཡི་བསྟན་པ་འདི་ཐོས་ཐམས་ཅད་དགའ། །བཅོམ་ལྡན་གྲོང་ཁྱེར་གཤེགས་ནས་ཞབས་བཞག་ཚེ། །གྲོང་ཁྱེར་ས་ཆེན་དག་ནི་རབ་ཏུ་གཡོས། །བཅོམ་ལྡན་རྣམ་དག་འོད་ཟེར་མཐོང་བས་ན། །ངོ་མཚར་མི་འཛིན་མི་དགའ་གང་ཡང་མེད། །བཅོམ་ལྡན་གྲོང་
གཤེགས་ཕན་པ་ཆེར་མཛད་པས། །ལྷ་མིའི་འཁོར་རྣམས་སེམས་ནི་དགའ་བར་གྱུར། །ས་དང་མཁའ་འགྲོ་དག་གིས་སྲིད་གསུམ་ན། །བཅོམ་ལྡན་ཤིན་ཏུ་བདེ་ཞེས་བསྔགས་པར་གྱུར། །བཅོམ་ལྡན་ཞབས་ཀྱི་འཁོར་ལོ་ས་བཞག་ཚེ། །རྣམ་དག་འོད་ཟེར་ཀུན་གསལ་ངོ་མཚར་གྱུར། །རྟ་ནི་ཅང་
ཤེས་གྲོང་ཁྱེར་སྒྲ་སྙན་ཕྱུང་། །བྱ་ཚོགས་དག་ཀྱང་མཁའ་ལས་རབ་ཏུ་དགའ། །གཞན་ཡང་རབ་དང་བུད་མེད་མང་པོ་ཡི། །ལག་དང་རྐང་དང་གདུབ་འཁོར་ཕྲེང་བ་དང་། །དེ་བཞིན་རིན་ཆེན་རྒྱན་ནི་སྣ་ཚོགས་ལས། །མ་དཀྲོལ་བ་ཡང་རང་ལས་སྒྲ་སྙན་བྱུང་། །སོ་སོར་ཕན་ཚུན་དགའ་བའི་གཏམ་

བརྗོད་ཅིང་། །སྐད་འཐུན་བཀྲ་ཤིས་མཆོག་གིས་བསྔགས་པ་བརྗོད། །འོན་ལོང་དབང་པོ་མ་ཚང་དབང་པོ་ཐོབ། །ཐམས་ཅད་བཅོམ་ལྡན་ཁྱད་འཕགས་འབྲས་བུ་དབང་། །བཅོམ་ལྡན་གྲོང་ཁྱེར་གཤེགས་ཚེ་ཀུན་དགའ་བས། །ལྷ་མིས་མེ་ཏོག་མངོན་པར་མཆོད་པ་བྱས། །མཁའ་ལས་
ཀུན་དུ་སྒྲ་སྙན་བྱུང་བས་ན། །ལྷ་ཚོགས་ཚད་མེད་རབ་ཏུ་དགའ་བར་གྱུར། །གཞན་ཡང་སེམས་ཅན་དྲན་པ་ཉམས་པ་དག །སྨྱོས་འཁྲུགས་རབ་ཞི་ཕན་ཚུན་གཏམ་སྙན་བརྗོད། །བུད་མེད་གང་སྦྲུམ་མྱ་ངན་འཇིགས་གྱུར་པ། །འོད་ཟེར་བྱིན་གྱིས་བདེ་བ་ཐོབ་པར་གྱུར། །སྐྱེས་པ་བུད་མེད་ངོ་ཚ་ཁྲེལ་
བཅས་ལ། །དྲི་མ་སྤངས་པའི་ཆོས་དག་རབ་བཤད་པས། །ཐམས་ཅད་དགའ་ནས་དག་པའི་སེམས་བསྐྱེད་དེ། །ཐུབ་མཆོག་ཞབས་ལ་སྤྱི་བཏུད་ཕྱག་བྱས་ནས། །ཁ་ཅིག་བཅོམ་ལྡན་བླ་མེད་ལམ་རབ་ཚོལ། །ཁ་ཅིག་བྱང་ཆུབ་སེམས་དཔའ་ཉན་ཐོས་ཚོལ། །བཅོམ་ལྡན་གྲོང་ཁྱེར་མཆོག་ཏུ་
གཤེགས་པས་ན། །བཅོམ་ལྡན་ཞལ་དུ་ལྟ་ཞིང་རང་ཉིད་དགའ། །བཅོམ་ལྡན་མཁྱེན་པས་ས་ཡི་སྤྱོད་རྟོགས་པས། །འཇིག་རྟེན་རྗེས་འཐུན་ཕན་པ་རབ་ཏུ་མཛད། །ཆོས་ཀྱི་ནོར་མཆོག་བྱང་ཆུབ་སེམས་དཔའ་བྱིན། །རིན་ཆེན་མཆོག་ནི་སེམས་ཅན་རྣམས་ལ་བཏང་། །བཅོམ་ལྡན་གྲོང་ཁྱེར་གཤེགས་
པའི་ཚེ། །མཁའ་ལས་སྒྲ་ནི་འདི་སྐད་བྱུང་། །གང་ཞིག་མིག་ཟད་མཐའ་སྲེད་པ། །སངས་རྒྱས་ལ་ནི་གུས་པ་ཡིན། །བཅོམ་ལྡན་གྲོང་ཁྱེར་གཤེགས་པའི་ཚེ། །མཁའ་ལས་སྒྲ་ནི་འདི་སྐད་བྱུང་། །གང་ཞིག་མིག་སྐྱེ་མཐའ་སྲེད་པ། །སངས་རྒྱས་ལ་ནི་གུས་པ་ཡིན། །གང་ཞིག་མིག་ཟད་མཐའ་སྲེད་
པ། །སངས་རྒྱས་ཡིད་ཆེས་མི་འཇིགས་འཐོབ། །མིག་ཟད་མཐར་ནི་ལྟ་བས་ན། །ཤིན་ཏུ་དང་བ་རྒྱུན་མི་འཆད། །གང་ཞིག་མིག་ཟད་མཐའ་སྲེད་པ། །ཆོས་ལ་ཡིད་ཆེས་མི་འཇིགས་འཐོབ། །མིག་ཟད་མཐར་ནི་ལྟ་བས་ན། །ཤིན་ཏུ་དང་བ་རྒྱུན་མི་འཆད། །གང་ཞིག་མིག་ཟད་མཐའ་སྲེད་པ། །
དགེ་འདུན་ཡིད་ཆེས་མི་འཇིགས་འཐོབ། །མིག་ཟད་མཐར་ནི་ལྟ་བས་ན། །ཤིན་ཏུ་དང་བ་རྒྱུན་མི་འཆད། །གང་ཞིག་མིག་ཟད་མཐའ་སྲེད་པ། །ཚུལ་ཁྲིམས་འཛིན་མེད་ཐོབ་པར་འགྱུར། །མིག་ཟད་མཐར་ནི་ལྟ་བས་ན། །ཤིན་ཏུ་དང་བ་རྒྱུན་མི་འཆད། །གང་ཞིག་མིག་ཟད་མཐའ་སྲེད་པ། །

ངན་འགྲོའི་འདོད་ཆགས་སྤོང་བར་འགྱུར། །མིག་ཟད་མཐར་ནི་ལྟ་བས་ན། །འདོད་ཆགས་རྒྱུན་ནི་སྤོང་བར་བྱེད། །གང་ཞིག་མིག་ཟད་མཐའ་སྲེད་པ། །ངན་འགྲོའི་ཞེ་སྡང་སྤོང་བར་འགྱུར། །མིག་ཟད་མཐར་ནི་ལྟ་བས་ན། །ཞེ་སྡང་རྒྱུན་ནི་སྤོང་བར་བྱེད། །གང་ཞིག་མིག་ཟད་མཐའ་སྲེད་པ། །ངན་འགྲོའི་གཏི་མུག་སྤོང་བར་འགྱུར། །
མིག་ཟད་མཐར་ནི་ལྟ་བས་ན། །གཏི་མུག་རྒྱུན་ནི་སྤོང་བར་བྱེད། །གང་ཞིག་མིག་ཟད་མཐའ་སྲེད་པ། །བྱང་ཆུབ་ཡེ་ཤེས་དག་ལ་གནས། །མིག་ཟད་མཐར་ནི་ལྟ་བས་ན། །བྱང་ཆུབ་ཡེ་ཤེས་རྒྱུན་མི་འཆད། །མིག་སྐྱེ་མཐའ་དང་མིག་གི་མཐའ། །འཇུག་པ་དང་ནི་རབ་དབེན་དང་། །ཡོད་པ་ཉིད་དུ་མི་འགྱུར་དང་། །
མི་སྐྱེ་རབ་ཏུ་ཞི་བ་དང་། །འདི་ལ་སོགས་པའི་སྒོ་རྣམས་ཀྱང་། །ཐམས་ཅད་མིག་ཟད་འདྲ་བར་བསྟན། །གང་ཞིག་མིག་ཟད་མཐར་སྲེད་པ། །དེ་ནི་རྟག་ཏུ་ཐེ་ཚོམ་མེད། །དེ་ལྟར་ཐེ་ཚོམ་མེད་པའི་ཕྱིར། །སངས་རྒྱས་རྫུ་འཕྲུལ་ཐོབ་པར་འགྱུར། །གང་ཞིག་མིག་སྐྱེ་མཐའ་སྲེད་པ། །དེ་ནི་རྟག་ཏུ་ཐེ་ཚོམ་མེད། །དེ་
ལྟར་ཐེ་ཚོམ་མེད་པའི་ཕྱིར། །སངས་རྒྱས་རྫུ་འཕྲུལ་འཐོབ་པར་འགྱུར། །གང་ཞིག་མིག་གི་མཐའ་སྲིད་པ། །དེ་ནི་རྟག་ཏུ་ཐེ་ཚོམ་མེད། །དེ་ལྟར་ཐེ་ཚོམ་མེད་པའི་ཕྱིར། །སངས་རྒྱས་རྫུ་འཕྲུལ་འཐོབ་པར་འགྱུར། །གང་ཞིག་མིག་གི་འཇུག་སྲེད་པ། །དེ་ནི་རྟག་ཏུ་ཐེ་ཚོམ་མེད། །དེ་ལྟར་ཐེ་ཚོམ་མེད་པའི་ཕྱིར། །
སངས་རྒྱས་རྫུ་འཕྲུལ་འཐོབ་པར་འགྱུར། །གང་ཞིག་མི་དབེན་རབ་སྲེད་པ། །དེ་ནི་རྟག་ཏུ་ཐེ་ཚོམ་མེད། །དེ་ལྟར་ཐེ་ཚོམ་མེད་པའི་ཕྱིར། །སངས་རྒྱས་རྫུ་འཕྲུལ་འཐོབ་པར་འགྱུར། །གང་ཞིག་མིག་མི་སྐྱེ་སྲེད་པ། །དེ་ནི་རྟག་ཏུ་ཐེ་ཚོམ་མེད། །དེ་ལྟར་ཐེ་ཚོམ་མེད་པའི་ཕྱིར། །སངས་རྒྱས་རྫུ་འཕྲུལ་འཐོབ་པར་འགྱུར། །
གང་ཞིག་མིག་མེད་ལ་སྲེད་པ། །དེ་ནི་རྟག་ཏུ་ཐེ་ཚོམ་མེད། །དེ་ལྟར་ཐེ་ཚོམ་མེད་པའི་ཕྱིར། །སངས་རྒྱས་རྫུ་འཕྲུལ་འཐོབ་པར་འགྱུར། །གང་ཞིག་མིག་ཞི་ལ་སྲེད་པ། །དེ་ནི་རྟག་ཏུ་ཐེ་ཚོམ་མེད། །དེ་ལྟར་ཐེ་ཚོམ་མེད་པའི་ཕྱིར། །སངས་རྒྱས་རྫུ་འཕྲུལ་འཐོབ་པར་འགྱུར། །རྣ་བ་སྣ་ལྕེ་ལུས་དང་ཡིད། །གཟུགས་
སྒྲ་དྲི་རོ་རེག་བྱ་ནས། །སྒྲ་དང་མིང་གི་བར་དུ་ཡང་། །ཐམས་ཅད་དེ་བཞིན་སྦྱར་བར་བྱ། །མིག་སྐྱེ་དཔག་མེད་གང་སྐྱེད་པ། །ཡེ་ཤེས་དཔག་མེད་སྐྱེད་པར་བྱེད། །ཡེ་ཤེས་དཔག་ཏུ་མེད་པའི་ཕྱིར། །ཆོས་འདི་བསྟན་པའང་དེ་བཞིན་ནོ། །མིག་ཟད་དཔག་མེད་གང་ཤེས་པ། །མིག་ལ་སྒྲིབ་པ་མེད་པར་འགྱུར། །དེ་ལྟར་སྒྲིབ་

པ་མེད་པའི་ཕྱིར། །སངས་རྒྱས་མཁྱེན་པ་ཐོགས་མེད་འཐོབ། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་གི་བར་དུ་ཡང་། །ཐམས་ཅད་དེ་བཞིན་སྦྱར་བར་བྱ། །བཅོམ་ལྡན་གྲོང་ཁྱེར་གཤེགས་པའི་ཚེ། །སེམས་ཅན་དག་ནི་བརྒྱ་སྟོང་སྙེད། །མཁའ་ལས་ཆོས་བཤད་སྒྲ་
ཐོས་པས། །སངས་རྒྱས་ཡོན་ཏན་ཐེ་ཚོམ་མེད། །ཁ་ཅིག་འདོད་ཆགས་སེམས་བྱུང་ཡང་། །སངས་རྒྱས་ཡེ་ཤེས་འཇིགས་མི་བྱེད། །གང་ཞིག་འདོད་ཆགས་སེམས་བྱུང་ཡང་། །སངས་རྒྱས་ཡོན་ཏན་སྟོར་མ་གྱུར། །ཁ་ཅིག་འདོད་ཆགས་སེམས་བྱུང་ཡང་། །བླ་མེད་ཡེ་ཤེས་ཚོལ་བྱེད་ཅིང་། །མ་འདྲེས་ཆོས་ནི་
བསྒྲུབ་པ་དང་། །ཉན་ཐོས་ཐེག་པ་མོས་མི་བྱེད། །བྱིས་པ་བསམ་གཏན་སྒོམ་བྱེད་ཀྱང་། །བསམ་གཏན་བདེ་ལ་མོས་པས་ན། །མངོན་པའི་ང་རྒྱལ་རབ་བསྐྱེད་ནས། །དགེ་སྦྱོང་འབྲས་བུ་ཐོབ་སྙམ་སེམས། །བྱིས་པ་བསམ་གཏན་སྒོམ་བྱེད་ཀྱང་། །མི་ཟད་མཐའ་ཡི་ཤེས་མེད་ན། །བསྐལ་པ་བརྒྱ་སྟོང་སྒོམ་
བྱེད་ཀྱང་། །དེ་ལ་རྣམ་གྲོལ་ཅི་ཡང་མེད། །སྐྱེ་བ་ལེན་པ་ཐམས་ཅད་ནི། །དེ་ལ་ཞེན་ཆགས་སྐྱེད་པར་བྱེད། །གལ་ཏེ་སྐྱེ་ཉིད་སྟོང་རིག་ན། །མཐོང་བ་རྣམས་ནི་རྣམ་དག་འགྱུར། །གང་ཞིག་བསམ་གཏན་བཞི་བསྒྲུབས་ཀྱང་། །མིག་ཟད་མཐའ་ཤེས་མེད་གྱུར་ན། །བསྐལ་པ་བརྒྱ་སྟོང་ལོན་ཡང་ནི། །བསམ་གཏན་
ཡོངས་སུ་དག་མི་འགྱུར། །གང་ཞིག་ཉེར་བསྡོགས་ཐོབ་གྱུར་ཀྱང་། །ཟད་མཐའ་ཤེས་པ་འཐོབ་མི་འགྱུར། །ཟད་པ་ཐོབ་པ་མ་ཤེས་ཕྱིར། །ཟག་པ་ཐོབ་ལ་རྟག་ཏུ་སྤྱོད། །གང་ཞིག་འདུ་ཤེས་ཞེན་བྱེད་པ། །འདུ་ཤེས་ཟད་མཐའི་ཤེས་པ་མེད། །འདུ་ཤེས་ཟད་པ་མ་ཤེས་ཕྱིར། །རྟག་ཏུ་འདུ་ཤེས་ཟག་ལ་སྤྱོད། །
གང་ཞིག་འཇིག་རྟེན་ཞེན་ཆགས་པ། །འཇིག་རྟེན་ཟད་མཐའ་ཤེས་པ་མེད། །འཇིག་རྟེན་ཟད་མཐའ་མ་ཤེས་ཕྱིར། །རྟག་ཏུ་འཇིག་རྟེན་ཟག་ལ་སྤྱོད། །གང་ཞིག་ཟག་བཅས་སེམས་ལ་གནས། །སེམས་ཟད་མཐའ་ཡི་ཤེས་པ་མེད། །སེམས་ཟད་པ་ནི་མ་ཤེས་ཕྱིར། །རྟག་ཏུ་སེམས་ནི་ཟག་ལ་སྤྱོད། །གང་
ཞིག་ཟག་བཅས་ཆོས་ལ་གནས། །ཆོས་ཟད་མཐའ་ཡི་ཤེས་པ་མེད། །ཆོས་ཟད་པ་ནི་མ་ཤེས་ཕྱིར། །རྟག་ཏུ་ཟག་བཅས་ཆོས་ལ་སྤྱོད། །སྦྱངས་པའི་ཆོས་ལ་གནས་གྱུར་ཀྱང་། །མིག་ཟད་མཐའ་ཡི་ཤེས་མེད་ན། །མིག་ཟད་པ་ནི་མ་ཤེས་ཕྱིར། །ཡང་དག་སྦྱངས་ལ་གནས་པ་མིན། །ཁ་དོག་སྒྱུར་བའི་

གོས་བགོས་ཀྱང་། །མིག་ཟད་མཐའ་ཡི་ཤེས་མེད་ན། །མིག་ཟད་པ་ནི་མ་ཤེས་ཕྱིར། །ཡང་དག་ཆོས་གོས་བགོས་མ་ཡིན། །ཡ་རབས་རིགས་སུ་སྐྱེས་གྱུར་ཀྱང་། །མིག་ཟད་མཐའ་ཡི་ཤེས་མེད་ན། །མིག་ཟད་པ་ནི་མ་ཤེས་ཕྱིར། །དེ་ནི་དག་པའི་རིགས་མ་ཡིན། །འཁོར་མང་དག་ནི་བདོག་གྱུར་ཀྱང་། །མིག་ཟད་མཐའ་ཡི་
ཤེས་མེད་ན། །མྱུར་དུ་ངན་འགྲོར་ལྷུང་འགྱུར་ཏེ། །འཁོར་དག་གིས་ནི་སྐྱོབ་མི་ནུས། །སྒྲ་ཡི་རིག་པ་མཁས་གྱུར་ཀྱང་། །མིག་ཟད་མཐའ་ཡི་ཤེས་མེད་ན། །མིག་ཟད་པ་ནི་མ་ཤེས་ཕྱིར། །སྒྲ་ཡི་རིག་པ་རྟོགས་མ་ཡིན། །བཟོ་རྣམས་ལ་ནི་མཁས་གྱུར་ཀྱང་། །མིག་ཟད་མཐའ་ཡི་ཤེས་མེད་ན། །མིག་ཟད་པ་ནི་མ་ཤེས་ཕྱིར། །
དེ་ནི་བཟོ་ལ་མཁས་མ་ཡིན། །འདྲི་བ་མང་ལ་མཁས་གྱུར་ཅིང་། །ཡི་གེ་གཅིག་གིས་རྣམ་འབྱེད་ཀྱང་། །མིག་ཟད་མཐའ་ཡི་ཤེས་མེད་ན། །དེ་ནི་དོན་འཐུན་བཤད་མ་ཡིན། །མཁས་པའི་རྗེས་སུ་སློབ་བྱེད་ཀྱང་། །གསང་དང་གསང་མིན་མི་ཤེས་ཤིང་། །མིག་ཟད་མཐའ་ཡི་ཤེས་མེད་ན། །ཆོས་འདི་རྟོགས་པར་མི་འགྱུར་
རོ། །བརྗོད་པ་སྣ་ཚོགས་རྒྱང་པན་དང་། །ཆོས་རྣམས་རབ་ཏུ་ཤེས་གྱུར་ཀྱང་། །མིག་ཟད་མཐའ་ཡི་ཤེས་མེད་ན། །འཁྲི་ཤིང་སྟུག་པོར་ལྷུང་བ་འདྲ། །སྒྲ་ཡི་རིག་པ་མཁས་གྱུར་ཅིང་། །དགེ་དང་མི་དགེའི་རྟགས་སྟོན་དང་། །ཚིག་འབྲུ་ཡི་གེ་སྒྲ་སྐད་དང་། །ཀློག་དང་འདོན་པའི་མཐར་ཐུག་ཀྱང་། །མིག་ཟད་མཐའ་ནི་མ་ཤེས་
ན། །དེ་དག་རྣམས་ནི་ཤེས་མེད་ཡིན། །བུད་མེད་དག་གི་མཚན་མ་དང་། །ཚིག་མཁན་རྨོངས་པར་བྱེད་པ་དང་། །ལུས་མཉེས་ངལ་སོས་ཆོས་རྣམས་དང་། །མཁྱུད་དཔྱད་དག་ལ་མཁས་གྱུར་ཀྱང་། །མིག་ཟད་མཐའ་ནི་མ་ཤེས་ན། །དེ་དག་རྣམས་ནི་ཤེས་མེད་ཡིན། །གཞུང་ལུགས་བརྒྱ་མང་སྟོན་བྱེད་ཅིང་། །ཡི་གེ་འབྲུ་གཅིག་མི་བརྗེད་ཀྱང་། །
མིག་ཟད་མཐའ་ནི་མ་ཤེས་ན། །བཤད་པ་དེ་ནི་དོན་མེད་ཡིན། །དེ་བཞིན་མིག་སྐྱེ་མཐའ་དག་དང་། །མིག་མཐའ་དང་ནི་འཇུག་པ་ནས། །རབ་ཏུ་ཞི་བའི་བར་དུ་ཡང་། །དེ་བཞིན་དུ་ནི་རིག་པར་གྱིས། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་གི་བར་དུ་ཡང་། །ཐམས་ཅད་དེ་བཞིན་སྦྱར་བར་བྱ། །སྒྲ་ཡི་རིག་པ་ཀློག་འདོན་ཅིང་། །
དེ་ཡི་དོན་ནི་རྟོགས་གྱུར་ཀྱང་། །མིག་ཟད་མཐའ་ནི་མ་ཤེས་ན། །དེ་ནི་ནམ་ཡང་དམན་པ་ཡིན། །སྨྲང་གཞི་དག་ནི་འདོན་བྱེད་ཅིང་། །གསང་སྔགས་དག་ནི་རྟོགས་གྱུར་ཀྱང་། །མིག་ཟད་མཐའ་ནི་མ་ཤེས་ན། །དེ་ནི་ནམ་ཡང་དམན་པ་ཡིན། །དེ་བཞིན་མིག་སྐྱེ་མཐའ་དག་དང་། །མིག་གི་མཐའ་དང་འཇུག་པ་ནས། །རབ་ཏུ་ཞི་བའི་བར་

དུ་ཡང་། །དེ་བཞིན་དུ་ནི་རིག་པར་གྱིས། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་གི་བར་དུ་ཡང་། །ཐམས་ཅད་དེ་བཞིན་སྦྱར་བར་བྱ།། །།བམ་པོ་བཞི་པ། བཅོམ་ལྡན་གྲོང་ཁྱེར་གཤེགས་པའི་ཚེ། །སེམས་ཅན་དག་ནི་ཚད་མེད་སྙེད། །མཁའ་ལས་ཆོས་བསྟན་སྒྲ་
ཐོས་པས། །མིག་ཟད་མཐའ་ཡི་ཤེས་པ་ཐོབ། །བཅོམ་ལྡན་གྲོང་ཁྱེར་གཤེགས་པའི་ཚེ། །སེམས་ཅན་དག་ནི་ཚད་མེད་སྙེད། །མཁའ་ལས་ཆོས་བསྟན་སྒྲ་ཐོས་པས། །མིག་གི་རང་བཞིན་རྟོགས་པར་གྱུར། །སྟོང་དང་བདག་མེད་རབ་རྟོགས་པས། །ཐམས་ཅད་རྣམ་དག་མིག་ཐོབ་འགྱུར། །རྣ་བ་སྣ་ལྕེ་ལུས་
དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་གི་བར་དུ་ཡང་། །ཐམས་ཅད་དེ་བཞིན་སྦྱར་བར་བྱ། །འདོད་སྡང་གཏི་མུག་ཁོང་ཁྲོ་དང་། །ང་རྒྱལ་ཁེངས་དང་གཡོ་སྒྱུ་ནས། །བག་མེད་པ་ཡི་བར་དུ་ཡང་། །དེ་བཞིན་དུ་ནི་རིག་པར་གྱིས། །བཅོམ་ལྡན་གྲོང་ཁྱེར་གཤེགས་པའི་ཚེ། །སེམས་ཅན་དག་ནི་ཚད་མེད་
སྙེད། །སྟེང་གི་ནམ་མཁའ་དག་ལས་ནི། །སངས་རྒྱས་མཚན་ནི་སྣ་ཚོགས་ཐོས། །ཁ་ཅིག་འདོད་ཆགས་འཇིགས་པ་ཡི། །དཔེ་ཟླ་མེད་པ་མིང་ཡང་ཐོས། །ཁ་ཅིག་ཞེ་སྡང་འཇིགས་བྱེད་ཅིང་། །འཇིག་རྟེན་ཕན་འདོགས་མིང་དག་ཐོས། །ཁ་ཅིག་གཏི་མུག་རབ་རྟོགས་ཤིང་། །ང་རྒྱལ་འདུལ་བའི་མིང་
དག་ཐོས། །ཁ་ཅིག་འཇིག་རྟེན་དག་ལ་ནི། །རབ་ཞི་སྟོན་པའི་འདྲེན་མིང་ཐོས། །ཁ་ཅིག་ཤེས་རབ་དག་བསྟན་ནས། །འཇིག་རྟེན་ཕན་འདོགས་མིང་དག་ཐོས། །ཁ་ཅིག་ཐབས་དག་རབ་བསྟན་ནས། །སེམས་ཅན་ཕན་འདོགས་མིང་དག་ཐོས། །ཁ་ཅིག་བདུད་ནི་རབ་བཏུལ་ཀྱང་། །འཁོན་འཛིན་མེད་པའི་མིང་
དག་ཐོས། །ཁ་ཅིག་གསུང་རབ་ཆོས་དག་གིས། །རྣམ་གྲོལ་བསྟན་པའི་མིང་དག་ཐོས། །ཁ་ཅིག་སེམས་ཅན་སྡུག་བསྔལ་བ། །རྒྱ་ཆེར་སྒྲོལ་བའི་མིང་དག་ཐོས། །ཁ་ཅིག་མི་ཡི་གཙོ་བོ་ཡིས། །འཇིག་རྟེན་སྒྲོལ་བའི་མིང་དག་ཐོས། །མིང་ནི་དེ་དག་ཐོས་གྱུར་ནས། །ཐམས་
ཅད་རྣམ་དག་མིག་ཐོབ་གྱུར། །ནམ་མཁའ་དང་ནི་རྒྱ་མཚོའི་ཆུ། །རི་རབ་ལྷུན་པོའི་བར་དུ་ཡང་། །ཐམས་ཅད་གཞལ་དུ་རུང་སྲིད་ཀྱི། །སངས་རྒྱས་མཁྱེན་པ་ཐུབ་མི་འགྱུར། །གང་ཞིག་མིག་ཟད་ངེས་པ་ཐོབ་གྱུར་ན། །ཆོས་སྐུ་མངོན་པར་འགྲུབ་པ་དཀའ་མི་འགྱུར། །

གང་ཞིག་ཆོས་སྐུ་མཆོག་ནི་གྲུབ་གྱུར་ན། །ཀུན་འཛིན་ཡེ་ཤེས་དཔག་མེད་ཐོབ་པར་འགྱུར། །གང་ཞིག་ཀུན་འཛིན་ཡེ་ཤེས་དཔག་མེད་ཐོབ། །དེས་ནི་མདོ་སྡེ་དཔག་མེད་གོ་བར་འགྱུར། །གང་ཞིག་མདོ་སྡེ་དཔག་མེད་གོ་གྱུར་པས། །སངས་རྒྱས་རྫུ་འཕྲུལ་འཐོབ་པ་དཀའ་མི་འགྱུར། །
གང་ཞིག་མིག་སྐྱེ་ངེས་པ་ཐོབ་གྱུར་ན། །ཆོས་སྐུ་མངོན་པར་འགྲུབ་པ་དཀའ་མི་འགྱུར། །གང་ཞིག་ཆོས་སྐུ་མཆོག་ནི་གྲུབ་གྱུར་ན། །ཀུན་འཛིན་ཡེ་ཤེས་དཔག་མེད་འཐོབ་པར་འགྱུར། །གང་ཞིག་ཀུན་འཛིན་ཡེ་ཤེས་དཔག་མེད་ཐོབ། །དེས་ནི་མདོ་སྡེ་དཔག་མེད་གོ་བར་འགྱུར། །
གང་ཞིག་མདོ་སྡེ་དཔག་མེད་གོ་གྱུར་པས། །སངས་རྒྱས་རྫུ་འཕྲུལ་ཐོབ་པ་དཀའ་མི་འགྱུར། །དེ་བཞིན་རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ཆོས་དག་ནས། །སྒྲ་རྣམས་དང་ནི་མིང་གི་བར་དུ་ཡང་། །ཐམས་ཅད་དེ་བཞིན་དུ་ནི་སྦྱར་བར་བྱ། །དེ་ཚེ་ས་ཆེན་དག་ནི་རབ་
ཏུ་གཡོས། །རྒྱ་མཚོ་རི་རྣམས་ཀྱང་ནི་དེ་བཞིན་ནོ། །ལྷ་མ་ཡིན་དང་ལྷ་ནི་མང་པོ་རྣམས། །ཐམས་ཅད་རབ་ཏུ་དགའ་བ་སྐྱེས་པར་གྱུར། །བདུད་དང་བདུད་དཔུང་གཡོ་སྒྱུ་རབ་བཅོམ་ནས། །ཐམས་ཅད་སངས་རྒྱས་བཀོད་པ་བསྒྲུབ་པར་མོས། །ལྷ་རྣམས་སོ་སོར་གཞལ་མེད་ཁང་
ཞུགས་ནས། །ཕན་ཚུན་དགའ་བའི་གཏམ་ནི་འདི་སྐད་སྨྲས། །འདྲེན་པ་དེང་ནི་འཇིག་རྟེན་བྱུང་བས་ན། །ལྷ་མི་ཐམས་ཅད་ལ་ནི་ཕན་པ་མཛད། །ས་བླའི་ལྷ་འཁོར་གཞལ་མེད་ཁང་གནས་ནས། །དང་བའི་སེམས་ཀྱིས་དགའ་ནས་འདི་སྐད་དུ། །འདྲེན་པ་འཇིག་རྟེན་དེང་བྱུང་
ཤིན་ཏུ་ལེགས། །འཇིག་རྟེན་ཀུན་བདེ་རྒྱུ་ནི་རབ་ཏུ་མཛད། །མཁའ་ལ་སྤྱོད་པའི་ལྷ་རྣམས་དེ་ཐོས་ནས། །ཐམས་ཅད་དགའ་ནས་རབ་ཏུ་དང་བ་སྐྱེས། །ཁྱད་འཕགས་སྒྲ་སྙན་སངས་རྒྱས་བསྔགས་བརྗོད་ནས། །འདྲེན་པ་བྱུང་བས་འཇིག་རྟེན་ཕན་མཛད་ཟེར། །རྒྱལ་ཆེན་
རིགས་བཞིའི་ལྷ་རྣམས་དེ་ཐོས་ནས། །ཐམས་ཅད་དགའ་ནས་ཤིན་ཏུ་དང་བ་སྐྱེས། །ཁྱད་འཕགས་སྒྲ་སྙན་སངས་རྒྱས་བསྔགས་བརྗོད་ནས། །འདྲེན་པ་བྱུང་བས་འཇིག་རྟེན་ཕན་མཛད་ཟེར། །སུམ་ཅུ་རྩ་གསུམ་ལྷས་ནི་དེ་ཐོས་ནས། །ཐམས་ཅད་དགའ་ནས་ཤིན་དུ་དང་བ་

སྐྱེས། །ཁྱད་འཕགས་སྒྲ་སྙན་སངས་རྒྱས་བསྔགས་བརྗོད་ནས། །འདྲེན་པ་བྱུང་བས་འཇིག་རྟེན་ཕན་མཛད་ཟེར། །འཐབ་བྲལ་ལྷ་དག་དེ་སྐད་ཐོས་ནས་ནི། །ཐམས་ཅད་དགའ་ནས་ཤིན་དུ་དང་བ་སྐྱེས། །ཁྱད་འཕགས་སྒྲ་སྙན་སངས་རྒྱས་བསྔགས་བརྗོད་ནས། །
འདྲེན་པ་བྱུང་ནས་འཇིག་རྟེན་ཕན་མཛད་ཟེར། །བདག་ཅག་བྱང་ཆུབ་སེམས་ནི་རབ་བསྐྱེད་ནས། །བཅོམ་ལྡན་བླ་མེད་མཁྱེན་པ་ཉེ་བར་བགྱི། །ལྷ་མིའི་གཙོ་མཆོག་ལ་ནི་བརྟེན་ནས་སུ། །སེམས་ཅན་ཐམས་ཅད་སྒྲོལ་བར་བགྱིད་ཅེས་ཟེར། །དགའ་ལྡན་ལྷ་རྣམས་དེ་སྐད་ཐོས་
ནས་ཀྱང་། །ཐམས་ཅད་དགའ་ནས་ཤིན་དུ་དང་བ་སྐྱེས། །ཁྱད་འཕགས་སྒྲ་སྙན་སངས་རྒྱས་བསྔགས་བརྗོད་ནས། །འདྲེན་པ་བྱུང་བས་འཇིག་རྟེན་ཕན་མཛད་ཟེར། །བཅོམ་ལྡན་འདས་ཀྱིས་བསྐལ་པ་བྱེ་བར་ནི། །སྤྱོད་མཆོག་ཁྱད་འཕགས་དཔག་མེད་མངོན་བསྒྲུབས་ནས། །
སེམས་ཅན་སྡུག་བསྔལ་བ་ལ་བདེ་ལམ་བསྟན། །འཁོར་བ་བསྒྲལ་ནས་མྱ་ངན་འདས་ལ་བཀོད། །འཕྲུལ་དགའི་ལྷ་རྣམས་དེ་སྐད་ཐོས་ནས་ནི། །ཐམས་ཅད་དགའ་ནས་ཤིན་དུ་དང་བ་སྐྱེས། །ཁྱད་འཕགས་སྒྲ་སྙན་སངས་རྒྱས་བསྔགས་བརྗོད་ནས། །འདྲེན་པ་བྱུང་བས་འཇིག་
རྟེན་ཕན་མཛད་ཟེར། །གཞན་འཕྲུལ་དབང་བྱེད་ལྷས་ནི་དེ་ཐོས་ནས། །ཐམས་ཅད་དགའ་ནས་ཤིན་དུ་དང་བ་སྐྱེས། །ཁྱད་འཕགས་སྒྲ་སྙན་སངས་རྒྱས་བསྔགས་བརྗོད་ནས། །འདྲེན་པ་བྱུང་ནས་འཇིག་རྟེན་ཕན་མཛད་ཟེར། །དེ་བཞིན་གཤེགས་པ་སྐྱེ་ཤི་འདས་པས་ན། །བདུད་
དང་མུ་སྟེགས་མང་པོ་ཕམ་པར་མཛད། །བླ་མེད་བྱང་ཆུབ་དག་ནི་ཡོངས་རྫོགས་ནས། །སྐྱེ་དགུ་དྲངས་ནས་ཕ་རོལ་འཇོག་ཅེས་ཟེར། །ཚངས་རིས་ལྷ་རྣམས་དེ་སྐད་ཐོས་ནས་ཀྱང་། །ཐམས་ཅད་དགའ་ནས་ཤིན་དུ་དང་བ་སྐྱེས། །ཁྱད་འཕགས་སྒྲ་སྙན་སངས་རྒྱས་བསྔགས་བརྗོད་
ནས། །འདྲེན་པ་བྱུང་བས་འཇིག་རྟེན་ཕན་མཛད་ཟེར། །དེ་བཞིན་གཅིག་ནས་གཅིག་ཏུ་སྒྲ་ཐོས་པས། །ཚངས་པའི་འཁོར་རྣམས་དགའ་ནས་འདི་སྐད་དུ། །འདྲེན་པ་བྱུང་བས་འཇིག་རྟེན་ཕན་པ་མཛད། །བདུད་དཔུང་འཇིགས་སྐྲག་མྱ་ངན་བྱེད་ཅེས་ཟེར། །སྲིད་པའི་རྩེ་མོའི་ལྷ་ཡི་

བར་དུ་ཡང་། །སངས་རྒྱས་བྱུང་ནས་འཇིག་རྟེན་ཕན་མཛད་ཐོས། །དེ་བཞིན་སྒྲ་ནི་ཀུན་དུ་གྲགས་པས་ན། །ལྷ་མ་ཡིན་དག་འགྲིབས་ཤིང་ལྷ་རྣམས་འཕེལ། །བདུད་ཀྱི་ཁང་པ་དག་ནི་ཡོངས་སྟོངས་ཤིང་། །ལྷ་རྣམས་འཁོར་ནི་རབ་ཏུ་རྒྱས་པར་གྱུར། །མི་འཇིགས་སྟོབས་ཀྱིས་ལོག་
པ་རབ་བཏུལ་ནས། །བྱང་ཆུབ་ཆེན་པོ་མཆོག་ནི་མྱུར་དུ་བརྙེས། །དེ་བཞིན་སྐད་ཅིག་ཡུད་ཙམ་ལྷ་རྣམས་ཀྱིས། །བཅོམ་ལྡན་བྱུང་ནས་ཕན་མཛད་ཐོས་གྱུར་ནས། །འཇིག་རྟེན་འདྲེན་པར་མཛད་པ་ཤིན་དུ་ལེགས། །རྣམ་དག་མིག་ནི་སེམས་ཅན་སྦྱིན་ཞེས་ཟེར། །བཅོམ་ལྡན་གྲོང་ཁྱེར་
གཤེགས་པའི་ཚེ། །འདོད་པས་ཡོངས་སུ་གདུངས་པ་རྣམས། །མི་གཙང་བསྒོམ་པ་བཤད་ཐོས་པས། །འདོད་ཆགས་ཞི་སྟེ་མ་ལུས་སྤངས། །བཅོམ་ལྡན་གྲོང་ཁྱེར་གཤེགས་པའི་ཚེ། །ཞེ་སྡང་དག་གིས་གདུངས་པ་རྣམས། །བྱམས་པ་བསྟན་པའི་ཆོས་ཐོས་པས། །ཞེ་སྡང་ཞི་
སྟེ་མ་ལུས་སྤངས། །བཅོམ་ལྡན་གྲོང་ཁྱེར་གཤེགས་པའི་ཚེ། །གཏི་མུག་དག་གིས་གདུངས་པ་རྣམས། །ཤེས་རབ་ཆོས་ནི་བསྟན་ཐོས་པས། །གཏི་མུག་ཞི་སྟེ་མ་ལུས་སྤངས། །བཅོམ་ལྡན་གྲོང་ཁྱེར་གཤེགས་པའི་ཚེ། །ང་རྒྱལ་དག་གིས་གདུངས་པ་རྣམས། །ང་རྒྱལ་སྤངས་
པའི་ཆོས་ཐོས་པས། །ང་རྒྱལ་ཞི་སྟེ་མ་ལུས་སྤངས། །བཅོམ་ལྡན་གྲོང་ཁྱེར་གཤེགས་པའི་ཚེ། །ཕྲག་དོག་དག་གིས་གདུངས་པ་རྣམས། །ཕྲག་དོག་སྤངས་པའི་ཆོས་ཐོས་པས། །ཕྲག་དོག་ཞི་སྟེ་མ་ལུས་སྤངས། །བཅོམ་ལྡན་གྲོང་ཁྱེར་གཤེགས་པའི་ཚེ། །ཁོང་ཁྲོ་དག་གིས་གདུངས་པ་
རྣམས། །ཁོང་ཁྲོ་སྤངས་པའི་ཆོས་ཐོས་པས། །ཁོང་ཁྲོ་ཞི་སྟེ་མ་ལུས་སྤངས། །བཅོམ་ལྡན་གྲོང་ཁྱེར་གཤེགས་པའི་ཚེ། །སེར་སྣ་དག་གིས་གདུངས་པ་རྣམས། །སེར་སྣ་སྤངས་པའི་ཆོས་ཐོས་པས། །སེར་སྣ་ཞི་སྟེ་མ་ལུས་སྤངས། །གང་ཞིག་དུལ་བའི་སྤྱོད་གྲུབ་པ། །
དཔག་མེད་ཆོས་ནི་འདི་ཐོས་པས། །མང་དུ་ཐོས་པའི་མཚོར་ཞུགས་ནས། །ཀུན་འཛིན་སྒོ་ནི་སྒྲུབ་པར་བྱེད། །གཞན་ཡང་མཁའ་ལས་སྒྲ་ཐོས་པས། །མེ་ཏོག་དག་གིས་སངས་རྒྱས་མཆོད། །ཡོན་ཏན་ཁྱད་པར་འཕགས་སྒྲུབ་ཅིང་། །སྙིང་རྗེ་ཆེན་པོའི་རྫུ་འཕྲུལ་སྟོན། །གཞན་ཡང་

མཁའ་ལས་སྒྲ་ཐོས་པས། །བཅོམ་ལྡན་སྐུ་དང་སྐྱེ་གནས་དང་། །གདུང་རྒྱུད་དང་ནི་གསུང་སྒྲ་རྣམས། །ཁྱད་པར་འཕགས་པའི་བསྔགས་པ་བརྗོད། །སེམས་ཅན་འགྲོ་བ་ཇི་ལྟ་བར། །རྫུ་འཕྲུལ་དག་ཀྱང་ཅི་རིགས་བཤད། །མིག་དང་རྣ་བ་སྣ་ལྕེ་ལུས། །
གཟུགས་དང་སྒྲ་ལ་སོགས་པ་དང་། །བསྐུམ་པ་དང་ནི་བརྐྱང་བ་དག །སྟོན་པར་མཛད་པ་ཁྱད་པར་འཕགས། །བཅོམ་ལྡན་འཇིག་རྟེན་འདས་པས་ན། །འཇིག་རྟེན་སྒྲོན་མ་རབ་མཛད་ཅིང་། །གཟུགས་ནི་མང་པོ་སྟོན་པ་ཡང་། །ཐམས་ཅད་སངས་རྒྱས་རྫུ་འཕྲུལ་ཡིན། །
སྣོད་དང་སྣོད་མིན་དེ་རྗེས་སུ། །མི་འཐུན་ཆོས་ནི་སྟོན་མཛད་པས། །སེམས་ཅན་ཚེ་རབས་ཚད་མེད་ནས། །སངས་རྒྱས་མཆོད་པ་མ་བྱས་ཤིང་། །དམུ་རྒོད་གདུལ་བར་དཀའ་བ་ལ། །སེམས་ཅན་དམྱལ་བར་བཤད་པར་མཛད། །གང་ཞིག་ལས་ལམ་རྨོངས་གྱུར་ཅིང་། །
ལྟ་ལ་བརྟེན་ནས་སྤྲོས་དགའ་བ། །བཅོམ་ལྡན་དེ་དག་ལྟ་བ་དང་། །སྤྲོས་པ་ཞི་བའི་སྒྲ་ཐོས་མཛད། །གཞན་ཡང་མཁའ་ལས་ངོ་བོ་ཉིད། །ངེས་པ་ཉིད་དུ་སྟོང་པ་དང་། །འགྲོ་འོང་མེད་ཅིང་མཚན་མེད་དང་། །ཅི་ཡང་མེད་པའི་སྒྲ་ཡང་ཐོས། །གཞན་ཡང་སེམས་ཅན་བརྒྱ་
སྟོང་དག །མཁའ་ལས་ཤ་དང་ཤེས་རབ་སྤྱན། །དེ་བཞིན་ཆོས་ཀྱི་སྤྱན་བར་དུ། །ཡང་དག་སྟོན་པའི་སྒྲ་ཡང་ཐོས། །བཅོམ་ལྡན་རྫུ་འཕྲུལ་སྟོབས་ཀྱིས་ནི། །ཚུལ་ཁྲིམས་ཏིང་འཛིན་ཤེས་རབ་སྒྲ། །རྣམ་གྲོལ་རྣམ་གྲོལ་མཐོང་བའི་སྒྲ། །སྟོན་པ་དག་ཀྱང་ཐོས་པར་
གྱུར། །སེམས་ཅན་དག་ནི་ཇི་སྙེད་ལ། །ཇི་བཞིན་རྫུ་འཕྲུལ་རབ་བསྟན་ནས། །ཇི་ལྟར་རྗེས་འཐུན་སྒྲ་སྐད་ཀྱིས། །ཡང་དག་ཆོས་ནི་བསྟན་པར་མཛད། །སེམས་ཅན་ལ་ལ་གང་ཞིག་ནི། །སྦྱིན་དང་ཚུལ་ཁྲིམས་བཟོད་བསྒྲུབ་མོས། །རྫུ་འཕྲུལ་མོས་པ་ཇི་ལྟ་བཞིན། །
སྦྱིན་དང་ཚུལ་ཁྲིམས་བཟོད་སྒྲ་སྟོན། །བཅོམ་ལྡན་རྫུ་འཕྲུལ་སྟོབས་ཀྱིས་ནི། །སེམས་ཅན་དབང་པོ་ཇི་ལྟ་བཞིན། །རྒྱ་ཆེར་ཡང་དག་འབྱེད་མཛད་པས། །ལེན་འཛིན་སྟོན་ལ་དགོད་པར་མཛད། །བཅོམ་ལྡན་རྫུ་འཕྲུལ་སྟོབས་ཀྱིས་ནི། །ཕུང་པོ་ཁམས་དང་སྐྱེ་མཆེད་

ཀྱི། །བཅིངས་དང་གྲོལ་དང་ཉེ་རིང་དང་། །ས་ཡི་གནས་སྐབས་བྱེ་བྲག་གི། །མཚན་ཉིད་སྟོན་པ་ཐོས་པར་གྱུར། །གཞན་ཡང་ས་དང་ཡེ་ཤེས་ཀྱི། །འོད་ཟེར་ཚད་མེད་སྟོན་པ་དང་། །ཉོན་མོངས་བག་ཆགས་སྤངས་པ་དང་། །སྤངས་མིན་སྟོན་པ་ཐོས་པར་གྱུར། །བཅོམ་
ལྡན་རྫུ་འཕྲུལ་སྟོབས་ཀྱིས་ནི། །ལྷ་དང་མི་ཡི་ངོ་བོ་ཉིད། །ལས་དང་འབྲས་བུ་མི་མཚུངས་པས། །སྐྱེ་ལེན་ཐ་དད་ཐོས་པར་གྱུར། །རེས་འགའ་བུད་མེད་མདུན་དག་ཏུ། །བུད་མེད་བརྒྱན་པའི་ལུས་སྤྲུལ་ནས། །མཁའ་ལས་སྐྱོ་སྟོན་སྒྲ་བསྒྲགས་པས། །གང་ཐོས་འདོད་
ཆགས་སེལ་བར་མཛད། །ཤཱ་རིའི་བུ་ནི་ཇི་ལྟ་བཞིན། །ཤིན་དུ་དང་བ་སྐྱེས་གྱུར་པ། །ཐུགས་རྗེས་མོས་པ་ཇི་བཞིན་དུ། །བླ་མེད་ཆོས་ནི་སྟོན་པར་མཛད། །མཽད་གལ་བུ་དང་འོད་སྲུང་དང་། །ཀ་པི་ན་དང་ཀུན་དགའ་དང་། །འོད་སྲུང་ཆེན་པོ་དག་དང་ནི། །ཀུན་ཤེས་
ཀཽ་དི་ནྱ་ལ་སོགས། །དེ་དག་མོས་པ་ཇི་བཞིན་དུ། །ཉན་ཐོས་ཆོས་སྟོན་ཐོས་པར་གྱུར། །ལྷ་རྣམས་དང་ནི་ལྷ་མ་ཡིན། །གནོད་སྦྱིན་དག་ནི་མང་པོ་དང་། །བེ་རོ་ཀ་ནི་འཁོར་བཅས་དང་། །གྲུལ་བུམ་དག་ནི་ཚད་མེད་རྣམས། །བཅོམ་ལྡན་རྫུ་འཕྲུལ་སྟོབས་ཀྱིས་ནི། །གཟུངས་
སྔགས་སྒྲ་ནི་ཐོས་པར་གྱུར། །ཨི་དི་སི། བི་དི་སི། ཨི་ར་སུ། ཨི་ར། ཨཽ་ན་སི། །མ་ན་སི། ཨུ་ཁྱི། ཨ་ནོ་ཁྱི། ཨཱ་ཁི་ཙ་ལ་མང་ནཾ་ཡེ། དར་ནི་ཤྠ་ནི་མི། ཏ་ཀ་ནི། ཨེ་མི་མན་ཏྲ། ནི་ཧ་ར། ཨ་བུ་རེ། བུད་དྷེ། ནི་རེ། ཨ་ཁི་ཚ་ར། བི་ཡ་ཀི་རི་ཡ་ཏེ། ཨ་ཁི་ཚ་ར་བ་ར་མི་ཏེ།
ཀ་ལཱ་བ་ཧི་ནི། སརྦོ་བིང་ཤི་ནི་ར་དྷེ་པཽ་ན། པ་ར་ཤ་སད་ཏེ། ཤ་ས་ཏ། པ་ར་ཤ་སད་ཏ། ཏ་ར་སད་ཏ། བྷཱུ་མི། ཨཱ་མ་བྷ་ར། ལི་ལ་བྷ་ན། ཤི་ཙ་ཙིད་ཏ། པི་བ་མ་ཏི། ཙིད་ཏ་ཨ་ནན་ཏ། ཨོ་བེ་ར་ཧ་བ་མི་ཏ་བྷུ་མི། ན་ན་མ་ཀཱ་ནི། ཨ་ཀ་ནི་བི་བྷི་མིད་ཏེ། ཤ་རི་བི་ཤྠ། ཨ་མ་ལ་ནི་མ་
ལཱ། བཱུ་ལི་ཏེ་ན་ར་ཤི་ཙ། ཧ་ཧ་རི། མ་མ་ལཱི། བྷ་ར་ནི་ཏི་ཤྠ། ཙ་ཀྵུ་ནིར་ཧ་ར། ཨུ་དྷ་རི་ཏ་པ་ཙི། ཨན་ཏ་རི། ཀུ་ཏ་རི། ཀེ་ཏུ་སུ་ཀེ་ཏུ་སུ་པ་རི་ནི། ཀ་ར་ནི། ཀུ་སུ་མ་ནི་ཡཻ། ཀ་ཀ་རི། ཀ་ཁ་རི། ཨུ་པ་ལ་མཱུ་རི། ཏི་ཤྠང་ར་ནི། ནཱག་ནི་ར་ཧ་རེ། པ་ར་ལད་ཏེ། ཨ་ཏེ་པ་ར་ཡ་ཏེ། ཨན་

ཏ་རབྷན་དྷེ། ཨན་ཏ་ར་ཏ་བྷ་ཏི་ཤི་ཙ། ཧ་སི་ར། མ་ཁ་ལི། ཨཱི་ནི་སམ་བྷ་རེ། ཏི་ཤྠ་སིཏྟ་ར་ནི། ཀུ་བྷུ་ལོ་ཙ་ཏེ། གཞན་ཡང་རྒྱལ་པོ་རྣམ་ཐོས་བུ། །ཡུལ་འཁོར་སྲུང་ནི་ལ་སོགས་པས། །ཁྱད་འཕགས་སྒྲ་ནི་གྲངས་མེད་ཀྱིས། །བདེན་པའི་སྔགས་ཚིག་རབ་ཏུ་
སྨྲས། །ཚད་མེད་སྒྲ་ནི་དེ་དག་ཀྱང་། །བདེ་གཤེགས་རྫུ་འཕྲུལ་དབང་གིས་བྱུང་། །རྫུ་འཕྲུལ་དག་ནི་ཚད་མེད་པས། །བསྟན་པ་དག་ཀྱང་ཚད་མེད་པས། །རེས་འགའ་སངས་རྒྱས་མེད་ཞིང་དུ། །རྫུ་འཕྲུལ་རོལ་བའི་སྟོབས་དག་གིས། །འཁོར་བསྐོར་སངས་རྒྱས་སྐུ་སྟོན་པ། །
ད་ལྟར་མཐོང་བ་ཇི་བཞིན་ནོ། །བསམ་གྱིས་མི་ཁྱབ་ཞིང་དག་ཏུ། །སྤྲུལ་པ་ཚད་མེད་སྟོན་མཛད་པས། །བལྟམས་ནས་གོམ་པ་བདུན་གཤེགས་དང་། །རྒྱལ་སྲིད་སྤངས་ནས་རབ་བྱུང་དང་། །བྱང་ཆུབ་སྙིང་པོར་སངས་རྒྱས་ནས། །བརྙེས་པའི་ཆོས་དག་རབ་དགོངས་ཏེ། །ཆོས་
ཀྱི་འཁོར་ལོ་སྐོར་མཛད་དང་། །མྱ་ངན་འདས་པ་སྟོན་པར་མཛད། །རྫུ་འཕྲུལ་གྱི་ནི་སྟོབས་དག་གིས། །སྣ་ཚོགས་ཆོས་ནི་སྟོན་མཛད་པས། །སེམས་ཅན་དག་ནི་ཚད་མེད་རྣམས། །ཁྱད་འཕགས་ཡེ་ཤེས་གྲུབ་པར་མཛད། །དེ་ཚེ་ཐུགས་རྗེ་ཆེན་པོ་ཡིས། །ཚངས་པའི་འཁོར་
གྱིས་ཡོངས་བསྐོར་ནས། །བྱམས་ཆོས་བསྒོམ་པ་བཤད་བསྟན་པས། །བྱམས་པའི་སེམས་ནི་འཕེལ་བར་མཛད། །དེ་ཚེ་ཐུགས་རྗེ་ཆེན་པོ་ཡིས། །ལྷ་རྣམས་ཀྱིས་ནི་ཡོངས་བསྐོར་ནས། །བསྡུ་བའི་དངོས་བཞི་བསྟན་མཛད་པས། །བསྡུ་བའི་སྤྱོད་བཞི་འཕེལ་
བར་མཛད། །དེ་ཚེ་ཐུགས་རྗེ་ཆེན་པོ་ཡིས། །ཀླུ་རྣམས་ཀྱིས་ནི་ཡོངས་བསྐོར་ནས། །ཞེ་སྡང་ཉེས་དམིགས་བཤད་བསྟན་པས། །ཞེ་སྡང་སེམས་ནི་སྤངས་པར་གྱུར། །དེ་ཚེ་ཐུགས་རྗེ་ཆེན་པོ་ཡིས། །གནོད་སྦྱིན་རྣམས་ཀྱིས་ཡོངས་བསྐོར་ནས། །རྣམ་འཚེ་ཉེས་དམིགས་བཤད་བསྟན་
པས། །རྣམ་འཚེ་སེམས་ནི་སྤངས་བར་གྱུར། །དེ་ཚེ་ཐུགས་རྗེ་ཆེན་པོ་ཡིས། །ལྷ་མ་ཡིན་གྱིས་ཡོངས་བསྐོར་ནས། །འཐབ་པའི་ཉེས་དམིགས་བཤད་བསྟན་ཏེ། །བཟོད་པ་བསྒོམས་པའི་བསྔགས་པ་བརྗོད། །དེ་ཚེ་ཐུགས་རྗེ་ཆེན་པོ་ཡིས། །ནམ་མཁའ་ལྡིང་གིས་ཡོངས་བསྐོར་

ནས། །འགལ་བྱས་ཉེས་དམིགས་བཤད་བསྟན་ཏེ། །འདུམ་པའི་སེམས་ཀྱིས་བསྔགས་པ་མཛད། །དེ་ཚེ་ཐུགས་རྗེ་ཆེན་པོ་ཡིས། །དྲི་ཟའི་འཁོར་གྱིས་ཡོངས་བསྐོར་ནས། །དགའ་བའི་ཚིག་ནི་དཔག་མེད་ཀྱིས། །དེ་བཞིན་གཤེགས་པའི་བསྔགས་བརྗོད་བསྟན། །དེ་
ཚེ་ཐུགས་རྗེ་ཆེན་པོ་ཡིས། །ལྟོ་འཕྱེ་འཁོར་གྱིས་ཡོངས་བསྐོར་ནས། །མུ་སྟེགས་ཆོས་ལ་སྨོད་མཛད་ཅིང་། །བཅོམ་ལྡན་གསུང་རབ་བསྔགས་བརྗོད་བསྟན། །དེ་ཚེ་ཐུགས་རྗེ་ཆེན་པོ་ཡིས། །འདྲེ་སྲིན་འཁོར་གྱིས་ཡོངས་བསྐོར་ནས། །དེ་བཞིན་གཤེགས་པའི་ཡོན་ཏན་
མཆོག །རྒྱ་ཆེར་བསྔགས་པ་བསྟན་པར་མཛད། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་ཟད་མཐའ་བསྟན་ཐོས་པས་ན། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་
སྟོང་སྙེད། །མིག་སྐྱེ་མཐའ་ནི་བསྟན་ཐོས་པས། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་གི་མཐའ་ནི་བསྟན་ཐོས་པས། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་
པས། །སེམས་ཅན་དག་ནི་བརྒྱ་སྟོང་སྙེད། །མིག་འཇུག་བསྟན་པ་ཐོས་གྱུར་ནས། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་དབེན་བསྟན་པ་ཐོས་པས་ན། །མཐར་ཕྱིན་དོན་ནི་རྟོགས་པར་
གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་ལ་སྐྱེ་མེད་བསྟན་ཐོས་པས། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་མེད་བསྟན་པ་ཐོས་པས་ན། །
མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་ནི་ཉེར་ཞི་བསྟན་ཐོས་པས། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །

མིག་ལ་བདག་མེད་བསྟན་ཐོས་པས། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་ལ་གང་ཟག་མེད་ཐོས་པས། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་
འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་ལ་སེམས་ཅན་མེད་ཐོས་པས། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་ལ་སྲོག་མེད་ཐོས་པས་ན། །མཐར་ཕྱིན་དོན་
ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་དག་ནི་བརྒྱ་སྟོང་སྙེད། །མིག་ལ་གསོ་བ་མེད་ཐོས་པས། །མཐར་ཕྱིན་དོན་ནི་རྟོགས་པར་གྱུར། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་རྣམས་ལ་རྒྱ་ཆེར་ནི། །འཇིག་རྟེན་
ཞེན་པ་རབ་སྨད་དེ། །ཞེན་པ་མི་སྐྱེད་ཉིད་དུ་མཛད། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་རྣམས་ལ་རྒྱ་ཆེར་ནི། །འཇིག་རྟེན་རྙེད་པ་རབ་སྨད་དེ། །འདུས་མ་བྱས་ཀྱི་བསྔགས་བརྗོད་མཛད། །ཐུགས་རྗེ་ཆེན་པོས་འཕྲུལ་བསྟན་པས། །
སེམས་ཅན་རྣམས་ལ་རྒྱ་ཆེར་ནི། །ཟག་བཅས་ཤེས་པ་རབ་སྨད་དེ། །ཟག་མེད་ཤེས་རབ་བསྔགས་པར་མཛད། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་རྣམས་ལ་རྒྱ་ཆེར་ནི། །འཇིག་རྟེན་བསམ་གཏན་རབ་སྨད་དེ། །འཇིག་རྟེན་འདས་པའི་ཏིང་
འཛིན་བསྔགས། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་རྣམས་ལ་རྒྱ་ཆེར་ནི། །ཟག་བཅས་ཚུལ་ཁྲིམས་རབ་སྨད་དེ། །ཟག་མེད་བསླབ་གནས་བསྔགས་པར་མཛད། །ཐུགས་རྗེ་ཆེན་པོས་འཕྲུལ་བསྟན་པས། །སེམས་ཅན་རྣམས་ལ་རྒྱ་ཆེར་ནི། །
སེམས་རྒྱ་ཆུང་ངུའི་སྐྱོན་བརྗོད་དེ། །སེམས་རྒྱ་ཆེན་པོའི་ཡོན་ཏན་བསྔགས། །ཐུགས་རྗེ་ཆེན་པོས་འཕྲུལ་བསྟན་ནས། །ལུས་ཀྱི་ཚུལ་ཁྲིམས་སེམས་ཤེས་རབ། །ཟག་མེད་རྟེན་པ་མེད་པ་ཡི། །བསྔགས་པ་དག་ནི་བརྗོད་པར་མཛད། །ཐུགས་རྗེ་ཆེན་པོས་འཕྲུལ་

བསྟན་ནས། །སྡུག་བསྔལ་འགོག་པའི་ལམ་བསྔགས་ཤིང་། །སྤྲོས་ལ་དགའ་ཞིང་ཞེན་པ་དག །སངས་རྒྱས་སྨད་པར་རབ་ཏུ་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །མིག་ཟད་སྐྱོན་ནི་རབ་འབྱེད་ཅིང་། །རབ་ཞི་མཚན་
ཉིད་བསྟན་པར་མཛད། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་གི་བར་དུ་ཡང་། །ཐམས་ཅད་དེ་བཞིན་སྦྱར་བར་བྱ། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །དར་ལ་བབ་ཅིང་གཞོན་པ་ལ། །ཉེས་
དམིགས་དཔག་མེད་ཡོད་པར་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །ཆོ་རིགས་དག་ནི་སྙེམས་པ་ལ། །ཉེས་དམིགས་དཔག་མེད་ཡོད་པར་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་
ཆེར་ནི། །ལོངས་སྤྱོད་བག་མེད་གྱུར་པ་ལ། །ཉེས་དམིགས་དཔག་མེད་ཡོད་པར་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །རང་དབང་བག་མེད་གྱུར་པ་ལ། །ཉེས་དམིགས་དཔག་མེད་ཡོད་པར་བསྟན། །ཐུགས་རྗེ་
ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །གཟུགས་ཀྱིས་བག་མེད་གྱུར་པ་ལ། །ཉེས་དམིགས་དཔག་མེད་ཡོད་པར་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །བུད་མེད་བག་མེད་གྱུར་པ་ལ། །ཉེས་
དམིགས་དཔག་མེད་ཡོད་པར་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །གོས་ཀྱིས་བག་མེད་གྱུར་པ་ལ། །ཉེས་དམིགས་དཔག་མེད་ཡོད་པར་བསྟན། །ཐུག་རྗེ་ཆེན་པོ་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་
ནི། །ཆང་གིས་བག་མེད་གྱུར་པ་ལ། །ཉེས་དམིགས་དཔག་མེད་ཡོད་པར་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །རྒྱལ་པོ་བག་མེད་གྱུར་པ་ལ། །ཉེས་དམིགས་དཔག་མེད་ཡོད་པར་བསྟན། །ཐུགས་རྗེ་ཆེན་པོས་འཕྲུལ་

བསྟན་ནས། །སེམས་ཅན་རྣམས་ལ་རྒྱ་ཆེར་ནི། །ཚུལ་ཁྲིམས་སྙེམས་པར་གྱུར་པ་ལ། །ཉེས་དམིགས་དཔག་མེད་ཡོད་པར་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་རྣམས་ལ་རྒྱ་ཆེར་ནི། །ཤེས་རབ་སྙེམས་པར་གྱུར་པ་ལ། །ཉེས་
དམིགས་དཔག་མེད་ཡོད་པར་བསྟན། །དེ་བཞིན་རྟོགས་དང་རྫུ་འཕྲུལ་དང་། །བསམ་གཏན་མཁས་པའི་ང་རྒྱལ་དང་། །ནོར་དང་བཤད་དང་རིགས་དང་འཁོར། །རོལ་མོ་གླུ་དང་ལྕེ་རྒྱང་དང་། །གྲགས་པ་ཕུན་ཚོགས་བསྔགས་པ་དང་། །བཀུར་སྟི་དང་ནི་རྙེད་པ་དང་། །
མཛེས་དང་གཡོ་སྒྱུ་ང་རྒྱལ་དང་། །ངོ་ཚ་མེད་དང་ཁྲེལ་མེད་དང་། །ཁེངས་དང་ཕུན་ཚོགས་ང་རྒྱལ་དང་། །བག་མེད་འདོད་ཆགས་དེ་བཞིན་ནོ། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་གང་ཞིག་སེམས་དང་ཡིད། །དམན་པར་གྱུར་པ་དེ་དག་ལ། །ཁྱད་པར་
འཕགས་པའི་འདུ་ཤེས་བསྟན། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་གང་ཞིག་རབ་ཞུམ་ཞིང་། །རྩོལ་བར་མི་བྱེད་དེ་དག་ལ། །བརྩོན་འགྲུས་སྟོབས་ནི་སྟོན་པར་མཛད། །ཐུགས་རྗེ་ཆེན་པོས་འཕྲུལ་བསྟན་ནས། །སེམས་ཅན་གང་ཞིག་ནོར་རྣམས་ལ། །
ཆགས་པར་གྱུར་པ་དེ་དག་ལ། །ཆོག་ཤེས་ཆོས་ནི་སྟོན་པར་མཛད། །གཞན་ཡང་སྤོས་ཀྱི་དྲི་གཙང་ཁང་། །མེ་ཏོག་དག་ནི་གཞལ་མེད་ཁང་། །ཁང་པ་བརྩེགས་མ་མཆོག་སྤྲུལ་ནས། །སྤྲུལ་པའི་སངས་རྒྱས་བཞུགས་པར་བསྟན། །གཞན་ཡང་ལྷ་ཡི་བུ་མོ་རྣམས། །མེ་
ཏོག་ཙམ་པ་ཁང་པ་ན། །གནས་པའི་ལུས་ཕྱེད་མངོན་སྤྲུལ་ནས། །མེ་ཏོག་ཕྲེང་ཐོགས་མཆོད་བྱེད་བསྟན། །གཞན་ཡང་ལྷ་མིན་བུ་མོ་དག །མེ་ཏོག་མ་ལི་ཁང་པ་ན། །གནས་པ་ལུས་ཕྱེད་བསྟན་སྤྲུལ་ནས། །མེ་ཏོག་ཕྲེང་ཐོགས་མཆོད་བྱེད་བསྟན། །གཞན་ཡང་ལྷ་ཡི་བུ་རྣམས་
དག །པད་མ་སྔོན་པོའི་ཁང་པ་ན། །གནས་པ་ལུས་ཕྱེད་བསྟན་སྤྲུལ་ནས། །སངས་རྒྱས་ཡོན་ཏན་བསྔགས་པ་བསྟན། །གཞན་ཡང་ཚངས་པ་རྣམས་ཀྱི་ལྷ། །གསེར་གྱི་གཞལ་མེད་ཁང་པ་ན། །གནས་པ་ལུས་ཀུན་བསྟན་སྤྲུལ་ནས། །སྒྲ་སྙན་སངས་རྒྱས་བསྔགས་པ་

བསྟན། །གཞན་ཡང་ལྷ་ཡི་བུ་མོ་དག །སྣ་ཚོགས་རྒྱན་གྱིས་ལུས་བརྒྱན་ཅིང་། །རྒྱན་ནི་ཕན་ཚུན་རེག་པ་ལས། །སྒྲ་སྙན་དག་ནི་རབ་བྱུང་ནས། །འདུས་བྱས་རྣམས་ཀྱི་ཆོས་དག་ནི། །འགྱུར་ཞིང་མི་བརྟན་ཡིན་ན་ཡང་། །བྱིས་པ་མི་བདེན་རྟོག་པ་ཡིས། །ཡང་དག་
ཇི་བཞིན་མི་ཤེས་ཟེར། །རྒྱན་གྱི་སྒྲ་ནི་དེ་དག་ཀྱང་། །ལུས་དང་སེམས་ལས་བྱུང་མ་ཡིན། །འགྲོ་བ་མེད་ཅིང་འོང་བ་མེད། །ཕྱོགས་ཀྱང་ཡོད་པ་མ་ཡིན་ཏེ། །གཟུགས་དང་སེམས་ཀྱི་བར་དུ་ཡང་། །ཐམས་ཅད་དེ་བཞིན་སྦྱར་བར་བྱ། །བྱིས་པ་རྣམས་ནི་མི་ཤེས་པས། །
འདི་ལ་ཐེ་ཚོམ་སྐྱེ་བར་འགྱུར། །རྒྱན་གྱི་རྣམ་པ་དེ་དག་ལས། །སྒྲ་སྙན་བྱུང་བ་དེ་ཡིས་ནི། །སངས་རྒྱས་ཞིང་ཀུན་གྲགས་པས་ན། །སེམས་ཅན་ཚད་མེད་གྲོལ་བར་གྱུར། །དེ་ལྟ་བས་ན་ཁྱོད་རྣམས་ཀྱིས། །འདྲེན་པའི་རང་བྱུང་ཡེ་ཤེས་དང་། །ཡོན་ཏན་དཔག་མེད་སྐུ་དག་ནི། །སྲེད་
པའི་སྤྲོས་ལས་འདས་པ་དང་། །རབ་དབེན་སྐྱོན་ནི་མེད་པ་དང་། །ལྟ་བྲལ་སེམས་ནི་རབ་སྦྱངས་དང་། །མཚན་དང་དཔེ་བྱད་བརྒྱན་པ་དང་། །སྐུ་དང་ཐུགས་ནི་དག་པར་ལྟོས། །ཁྱེད་ཀྱིས་བཅོམ་ལྡན་གྲོང་གཤེགས་ཚེ། །གོམ་པ་དག་ནི་སེང་གེ་འདྲ། །གཤེགས་སྟབས་ངང་པ་
གླང་ཆེན་འདྲ། །སེམས་ཅན་རེ་བ་སྐོང་བར་མཛད། །བསོད་ནམས་ཁྱད་འཕགས་ཡོངས་སུ་རྫོགས། །ཡང་དག་མཚན་གྱིས་རབ་ཏུ་བརྒྱན། །སེམས་ཅན་དག་ནི་ཐམས་ཅད་ཀུན། །ལྟ་བས་མི་ངོམས་ཉིད་དུ་ལྟོས། །ཁྱོད་ཀྱིས་རྐང་གཉིས་གཙོ་ཡི་མཆོག །ཐུགས་རྗེ་ཆེན་པོ་ལྡན་
པས་ན། །དངོས་པོ་ཆུང་ངུས་མཆོད་བྱས་ཀྱང་། །ཡོན་ཏན་ཚད་མེད་འཐོབ་མཛད་པས། །སེམས་ཅན་དག་ནི་མང་པོ་རྣམས། །བསྐལ་པ་བརྒྱ་སྟོང་མང་པོར་ནི། །མྱ་ངན་འདས་པ་འཐོབ་པར་དུ། །རྣམ་སྨིན་ཐུག་པ་མེད་པར་ལྟོས། །ཁྱེད་ཀྱིས་རྐང་གཉིས་གཙོ་མཆོག་ནི། །ཟག་
མེད་ཚུལ་ཁྲིམས་རྫོགས་པས་ན། །སེམས་ཅན་དག་ནི་མང་པོ་རྣམས། །གུས་པས་སྤྱི་བོས་ཕྱག་བྱེད་དང་། །ལྷ་ཡི་འཁོར་ནི་མང་པོ་རྣམས། །སོ་སོའི་གཞལ་མེད་ཁང་སྤངས་ནས། །རྩེ་བ་དག་ལ་ཆགས་མེད་པར། །འདྲེན་པ་ལ་ནི་རྟེན་བྱེད་ལྟོས། །ཁྱེད་ཀྱིས་བདུད་དང་བདུད་ཀྱི་འཁོར། །

བཅོམ་ལྡན་འདས་ལ་དད་སྐྱེས་ནས། །གསེར་གྱི་རླུང་ཡབ་དག་ཐོགས་ཏེ། །གཡས་གཡོན་དུ་ནི་འཁོད་པ་དང་། །བདུད་ཀྱི་བུ་ནི་ལྔ་བརྒྱ་ཡིས། །ལྷ་ཡི་མེ་ཏོག་ཡིད་འོང་བས། །དེ་བཞིན་གཤེགས་ལ་མངོན་གཏོར་ནས། །བླ་མེད་ཡེ་ཤེས་ཚོལ་ལ་ལྟོས། །འདས་
པའི་སངས་རྒྱས་རྣམས་ལ་ནི། །བསྔགས་པ་བརྗོད་ཅིང་མཆོད་པས་ན། །དེང་ནི་བཅོམ་ལྡན་ཕྲད་གྱུར་ནས། །སོ་སོར་དགའ་བར་གྱུར་པ་ཡིན། །སྤོབས་པ་དག་ནི་ཚད་མེད་ཀྱིས། །དེ་བཞིན་གཤེགས་པའི་བསྔགས་པ་བརྗོད། །དེ་ཡི་ཚེ་ན་བདུད་ཀྱི་བུ། །སྲིད་པ་སྤངས་པ་ཞེས་བྱ་བ། །
ཐོག་མར་བཅོམ་ལྡན་བསྔགས་བརྗོད་ནས། །མིག་ཟད་མཐའ་ནི་ཤེས་པར་གྱུར། །མིག་གི་སྐྱེ་མཐའ་ཤེས་པ་ནས། །རབ་ཞི་མཚན་ཉིད་བར་དུ་རྟོགས། །གཞན་ཡང་མིག་ཟད་ལ་སོགས་པའི། །མིག་དོན་དག་ནི་དཔག་མེད་རྟོགས། །དེས་ན་ཚིག་མཁས་དག་གིས་ནི། །སེམས་
ཅན་རྣམས་ལ་ཡང་དག་བསྟན། །མིང་དང་དོན་རྣམས་ལ་ཡང་ནི། །ཞེན་དང་ཐེ་ཚོམ་མེད་པས་ན། །འགྲོ་འོང་མེད་པར་རབ་རྟོགས་ཤིང་། །བླང་དོར་མེད་པ་ཉིད་དུ་གྱུར། །རང་བཞིན་དག་ནི་སྟོང་དབེན་པས། །ཡི་གེ་རྣམས་ནི་སྤངས་པ་དང་། །ལེན་དང་འཛིན་དང་ཀློག་པ་དང་། །ཁ་
ཏོན་འདོན་ཅིང་སྒྲུབ་མེད་རྟོགས། །འདས་པའི་དེ་བཞིན་གཤེགས་རྣམས་ཀྱིས། །སྔོན་ཡང་རབ་ཏུ་ཕྱེ་སྟེ་བསྟན། །བཏགས་པའི་མིང་ཙམ་ཡིན་པས་ན། །ཡང་དག་བརྗོད་དུ་ཅི་ཡང་མེད། །རང་བཞིན་སྟོང་པ་དེ་དག་ནི། །ཕུང་པོ་ཁམས་དང་སྐྱེ་མཆེད་འདས། །བརྫུན་པ་མེད་ཅིང་བདེན་པའང་
མེད། །གནས་དང་གནས་པ་ཡོད་པ་མིན། །ཚིག་གིས་སྨྲ་བའི་ལམ་ཆད་ཅིང་། །སེམས་ཀྱི་སྤྱོད་པའང་རབ་ཏུ་ཞི། །སྐྱེ་བོའི་མཚན་མ་ཞེན་པའི་ཕྱིར། །བཅོམ་ལྡན་གྲོང་ཁྱེར་གཤེགས་པར་མཐོང་། །བཅོམ་ལྡན་མཚན་མ་ཡོངས་སྤངས་ཀྱང་། །བྱིས་པ་ཡང་དག་མ་ཡིན་རྟོག །
བཅོམ་ལྡན་གྲོང་ཁྱེར་གཤེགས་པའི་ཚེ། །གང་ཞིག་དགའ་བ་སྐྱེ་འགྱུར་བ། །དེ་ནི་མཚན་མར་རྟོག་པ་སྟེ། །མྱ་ངན་གདུང་བ་དང་བཅས་པར་འགྱུར། །གང་གིས་མཚན་མའི་རྟོག་སྤངས་པ། །གྲོང་ཁྱེར་གཤེགས་པ་མཐོང་མི་འགྱུར། །གཤེགས་ཤིང་བསྐྱོད་པའི་མཚན་མ་ལ། །

རྣམ་རྟོག་མེད་པའི་ཤེས་རབ་འཐོབ། །གང་གིས་མཚན་མར་སངས་རྒྱས་མཐོང་། །དེས་ནི་གྲོང་ཁྱེར་གཤེགས་པ་མཐོང་། །སྐྱེ་ཞིང་འཁོར་བའི་ཆོས་དག་ལ། །རྣམ་པར་རྟོག་པ་སྐྱེད་པར་བྱེད། །གང་གིས་སངས་རྒྱས་མཚན་མར་མཐོང་། །དགའ་བ་དག་ནི་སྐྱེ་འགྱུར་བ། །དེ་
ནི་བདུད་ཀྱི་སྤྱོད་ལ་གནས། །བདུད་ཀྱི་སྤྱོད་ཡུལ་སྣང་བ་ཡིན། །གང་གིས་མཚན་མར་སངས་རྒྱས་མཐོང་། །དེ་ནི་འགྱུར་བ་མཐོང་བ་ཡིན། །དེ་ནི་མྱ་ངན་གདུངས་བཅས་པས། །མཁས་པས་སྙིང་བརྩེར་བྱ་བ་ཡིན། །ཆོས་ལ་ཐོབ་པར་གང་ལྟ་བ། །དེ་ལ་ཆོས་སྟོར་མྱ་ངན་ཡོད། །
སངས་རྒྱས་མཐོང་བ་སྐྱེས་པ་ལ། །མྱ་ངན་འདས་པའི་སྡུག་བསྔལ་ཡོད། །བསྐལ་པ་མང་པོ་གང་བསྒོམས་པས། །མཚན་མ་ཐམས་ཅད་རྟོགས་པས་ན། །གྲོང་ཁྱེར་གཤེགས་པར་མི་རྟོག་ཅིང་། །མྱ་ངན་འདའ་བའི་འདུ་ཤེས་མེད། །སེམས་ཀྱི་མཚན་ཉིད་སྟོང་རྟོགས་པ། །
སངས་རྒྱས་སྤྱོད་ལ་གནས་པས་ན། །གྲོང་ཁྱེར་གཤེགས་པར་མི་རྟོག་ཅིང་། །མྱ་ངན་འདས་པའི་འདུ་ཤེས་མེད། །གང་གིས་དེ་ལྟར་རབ་ཤེས་པ། །སངས་རྒྱས་རྣམས་ནི་མཐོང་འགྱུར་ཞིང་། །ངོ་བོ་ཉིད་ཀྱང་སྟོང་རྟོགས་པས། །མཐར་ནི་སྐྱེ་འགག་ཅི་ཡང་མེད། །བཅོམ་ལྡན་
བསྐལ་པ་དཔག་མེད་ནས། །དཀའ་བ་རྣམས་ནི་རབ་སྤྱད་ནས། །ངོ་བོ་ཉིད་ནི་སྟོང་མཁྱེན་ན། །བྱིས་པ་རྣམས་ཀྱིས་མི་རྟོགས་སོ། །བཅོམ་ལྡན་གྲོང་ཁྱེར་གཤེགས་པའི་ཚེ། །འཁོར་ནི་བརྒྱ་སྟོང་མང་གིས་བསྐོར། །མི་དང་མི་མ་ཡིན་ལ་སོགས། །དང་བའི་སེམས་ཀྱི་མཆོད་
པ་བས། །གང་གིས་སྐད་ཅིག་ཙམ་དུ་ནི། །མིག་ཟད་མཐའ་ནི་རབ་སེམས་ཤིང་། །མཚན་མ་རྣམས་ནི་སྟོང་རྟོགས་ན། །འདི་ཡི་བསོད་ནམས་དེ་བས་འཕགས། །བགྲང་བ་དང་ནི་གྲངས་ཀྱི་ཆ། །རྒྱུ་ཙམ་དུ་ཡང་མི་བཟོད་དོ། །དེ་བཞིན་མིག་གི་སྐྱེ་མཐའ་དང་། །མིག་གི་མཐའ་
དང་འཇུག་པ་ནས། །རབ་ཏུ་ཞི་བའི་བར་དུ་ཡང་། །དེ་བཞིན་དུ་ནི་རིག་པར་བྱ། །རྣ་བ་སྣ་ལྕེ་ལུས་དང་ཡིད། །གཟུགས་སྒྲ་དྲི་རོ་རེག་བྱ་ནས། །སྒྲ་དང་མིང་གི་བར་དུ་ཡང་། །ཐམས་ཅད་དེ་བཞིན་སྦྱར་བར་བྱ། །དེ་ནས་དེ་ཚེ་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །

ཞབས་ནི་ས་ལ་རེག་ཙམ་གྱིས། །ས་ནི་ཀུན་ཏུ་རབ་ཏུ་གཡོས། །རི་རྣམས་གང་ཡིན་དེ་དག་ཀྱང་། །ཐམས་ཅད་བཅོམ་ལྡན་འདས་ལ་ཕྱོགས། །ལྷ་དང་མི་ནི་ཆོས་ཀྱི་ཕྱིར། །ཐམས་ཅད་འོངས་ནས་གུས་མཆོད་བྱས། །དེ་ནས་དེ་ཚེ་བཅོམ་ལྡན་འདས། །གྲོང་ཁྱེར་
དུ་ནི་གཤེགས་པའི་ཚེ། །ལྷ་ཡི་དབང་པོ་མི་ཡི་རྒྱལ། །ལྷ་མ་ཡིན་ནི་མང་པོ་དང་། །གནོད་སྦྱིན་དག་ནི་མང་པོ་རྣམས། །རང་གི་གྲོང་ཁྱེར་སྤངས་ནས་ནི། །བཅོམ་ལྡན་སྤྱན་སྔར་འདུས་གྱུར་ཏེ། །རབ་ཏུ་དགའ་བས་མཆོད་པ་བྱས། །དེ་ནས་དེ་ཚེ་བཅོམ་ལྡན་འདས། །གྲོང་ཁྱེར་
དུ་ནི་གཤེགས་པའི་ཚེ། །གཞན་ཡང་རྣམ་པ་ཐ་དད་པའི། །བྱ་ཡི་ཚོགས་ནི་ཚད་མེད་པ། །ནེ་ཙོ་དང་ནི་རྨ་བྱ་དང་། །ཀ་ལ་པིང་ཀ་བྱ་ཡི་རྣམས། །བཅོམ་ལྡན་དེ་བཞིན་གཤེགས་པ་ཡི། །ཡོན་ཏན་མཆོག་ནི་མཐོང་བས་ན། །ཐམས་ཅད་ནམ་མཁའ་དག་ལ་ནི། །རབ་ཏུ་དགའ་བས་རྣམ་
པར་རྩེ། །ཐམས་ཅད་རྣམ་པ་སྣ་ཚོགས་ཀྱི། །སྒྲ་སྙན་དག་ནི་རབ་ཏུ་ཕྱུང་། །དེ་ནས་དེ་ཚེ་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །བཅོམ་ལྡན་འདས་ཀྱི་ཡོན་ཏན་དང་། །རྫུ་འཕྲུལ་གྱི་ནི་སྟོབས་དག་གིས། །སེམས་ཅན་ཚད་མེད་བརྒྱ་སྟོང་སྙེད། །ལྡོངས་པ་དག་
ནི་མཐོང་བར་གྱུར། །འོན་པ་རྣམས་ནི་ཐོས་པར་གྱུར། །དབང་པོ་མ་ཚང་གང་ཡིན་པ། །ཐམས་ཅད་དབང་པོ་ཚང་བར་གྱུར། །སྡུག་བསྔལ་ལ་ནི་གནས་པ་དག །ཐམས་ཅད་བདེ་བ་ཐོབ་པར་གྱུར། །དེ་ནས་དེ་ཚེ་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །ནམ་
མཁའ་བར་སྣང་དག་ལས་ནི། །འདི་སྐད་སྨྲ་བ་ཐོས་པར་གྱུར། །གང་གིས་མཚན་མ་རྣམས་ཀྱིས་ནི། །དེ་བཞིན་གཤེགས་པ་རྟོགས་བྱེད་པ། །དེ་ཡིས་བཅོམ་ལྡན་འདས་ལ་ནི། །མཆོད་པ་བྱས་ཞེས་བརྗོད་མི་བྱ། །མིག་ཟད་མཐའ་ཡི་ངོ་བོ་ཉིད། །རྟོགས་པར་ཡང་ནི་མི་
འགྱུར་རོ། །མཚན་མ་རྣམས་ནི་གང་སྤངས་པ། །ཡོན་ཏན་བཞི་ནི་བསགས་པས་ན། །མིག་ཟད་མཐའ་ཡི་ངོ་བོ་ཉིད། །རབ་ཏུ་རྟོགས་པར་ཡང་འགྱུར་རོ། །འདི་ལྟར་མིག་ནི་ཟད་པའི་མཐའ། །རབ་ཏུ་རྟོགས་པར་གྱུར་པའི་ཕྱིར། །སངས་རྒྱས་རྣམས་ཀྱི་ཡོན་ཏན་ཡང་། །རབ་

ཏུ་རྟོགས་པར་ཁོང་དུ་ཆུད། །མིག་ནི་ཟད་པའི་མཐའ་དག་ལ། །མི་འཛིན་སྦེད་པ་མེད་པ་དང་། །མིག་ནི་སྐྱེ་བའི་མཐའ་དག་ལ། །རྟེན་ཅིང་གནས་པ་མེད་པ་དང་། །མིག་ནི་རབ་ཏུ་དབེན་པ་ལ། །གཡོ་བའི་བསམ་པ་མེད་གྱུར་པ། །དེས་ནི་དེ་བཞིན་གཤེགས་པ་རྣམས། །མཐོང་
བ་ཉིད་དུ་གྱུར་པ་ཡིན། །མིག་ནི་སྐྱེ་བའི་མཐའ་དག་ལ། །རྣམ་པར་རྟོག་པ་མེད་པ་དང་། །མིག་གི་མཐའ་ནི་གང་ཡིན་པ། །དེ་ལ་ཡིད་ཀྱི་རྟོག་མེད་དང་། །མིག་ནི་རྣམ་པར་འཇིག་པ་ལ། །བསྟན་པར་བྱ་བ་མེད་གྱུར་པ། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་
དུ་གྱུར་པ་ཡིན། །མིག་ནི་མེད་པར་གྱུར་པ་ལ། །མངོན་པར་ཞེན་པ་མེད་པ་དང་། །མིག་ནི་སྐྱེ་བ་མེད་པ་ལ། །ཡོངས་སུ་སྡུད་པ་མེད་པ་དང་། །མིག་ནི་རབ་ཏུ་ཞི་བ་ལ། །འཛིན་པ་དག་ནི་མེད་གྱུར་པ། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །
མིག་ནི་ཟད་པར་ཤེས་པའི་ཕྱིར། །མཚན་རྣམས་མངོན་པར་བསྒྲུབ་པ་དང་། །མིག་གི་མཐའ་ནི་ཤེས་པའི་ཕྱིར། །དབང་པོ་དག་ནི་ངེས་གྱུར་དང་། །མིག་ནི་སྐྱེ་བ་ཤེས་པའི་ཕྱིར། །དབང་པོ་རང་དབང་ཐོབ་གྱུར་པ། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་
གྱུར་པ་ཡིན། །མིག་ནི་མེད་པར་རྟོགས་གྱུར་ནས། །གཟུགས་ནི་ཁོང་དུ་ཆུད་པ་དང་། །མིག་ནི་འཇིག་པར་རབ་ཤེས་ནས། །ཆོས་ལ་སོ་སོར་རྟོག་པ་དང་། །མིག་ནི་སྐྱེ་མེད་ཤེས་གྱུར་ནས། །ལམ་ནི་སྒྲུབ་པར་གང་བྱེད་པ། །དེས་ནི་དེ་བཞིན་གཤེགས་པ་རྣམས། །མཐོང་
བ་ཉིད་དུ་གྱུར་པ་ཡིན། །མིག་ཟད་མཐའ་ནི་གང་ཡིན་པ། །ཡང་དག་ཇི་བཞིན་རྟོགས་པའི་ཕྱིར། །ལས་ཀྱི་བྱེ་བྲག་ཐ་དད་པ། །དེ་ཡང་རབ་ཏུ་རྟོགས་པར་འགྱུར། །ལས་ཀྱི་བྱེ་བྲག་ཐ་དད་པ། །རབ་ཏུ་རྟོགས་པར་གྱུར་པའི་ཕྱིར། །དེས་ནི་དེ་བཞིན་གཤེགས་པ་རྣམས། །
མཐོང་བ་ཉིད་དུ་གྱུར་པ་ཡིན། །མིག་སྐྱེ་མཐའ་ནི་གང་ཡིན་པ། །ཡང་དག་ཇི་བཞིན་རྟོགས་པའི་ཕྱིར། །སྡུག་བསྔལ་བྱེ་བྲག་ཐ་དད་པ། །དེ་ཡང་རབ་ཏུ་རྟོགས་པར་འགྱུར། །སྡུག་བསྔལ་བྱེ་བྲག་ཐ་དད་པ། །རབ་ཏུ་རྟོགས་པར་གྱུར་པའི་ཕྱིར། །དེས་ནི་དེ་བཞིན་གཤེགས་

པ་རྣམས། །མཐོང་བ་ཉིད་དུ་གྱུར་པ་ཡིན། །མིག་གི་འཇིག་པ་གང་ཡིན་པ། །ཡང་དག་ཇི་བཞིན་རྟོགས་པའི་ཕྱིར། །སྡུག་བསྔལ་འཇིག་པ་གང་ཡིན་པ། །དེ་ཡང་རབ་ཏུ་རྟོགས་པར་འགྱུར། །སྡུག་བསྔལ་འཇིག་པ་གང་ཡིན་པ། །རབ་ཏུ་རྟོགས་
པར་གྱུར་པའི་ཕྱིར། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །མིག་གི་མེད་པ་གང་ཡིན་པ། །ཡང་དག་ཇི་བཞིན་རྟོགས་པའི་ཕྱིར། །མཚན་མ་སྤངས་པ་གང་ཡིན་པ། །དེ་ཡང་རབ་ཏུ་རྟོགས་པར་འགྱུར། །མཚན་མ་སྤངས་པ་གང་ཡིན་པ། །
རབ་ཏུ་རྟོགས་པར་གྱུར་པའི་ཕྱིར། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །མིག་གི་སྐྱེ་མེད་གང་ཡིན་པ། །ཡང་དག་ཇི་བཞིན་རྟོགས་པའི་ཕྱིར། །བག་ཆགས་སྤངས་པ་གང་ཡིན་པ། །དེ་ཡང་རབ་ཏུ་རྟོགས་པར་འགྱུར། །བག་ཆགས་སྤངས་
པ་གང་ཡིན་པ། །རབ་ཏུ་རྟོགས་པར་གྱུར་པའི་ཕྱིར། དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །གཞན་ཡང་མིག་གི་མི་རྟོག་ཉིད། །ཡང་དག་ཇི་བཞིན་རྟོགས་པའི་ཕྱིར། །སྒྲིབ་པ་སྤངས་པ་གང་ཡིན་པ། །དེ་ཡང་རབ་ཏུ་རྟོགས་པར་འགྱུར། །
སྒྲིབ་པ་སྤངས་པ་གང་ཡིན་པ། །རབ་ཏུ་རྟོགས་པར་གྱུར་པའི་ཕྱིར། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །གཞན་ཡང་མིག་ལ་ཡི་གེ་མེད། །ཡང་དག་ཇི་བཞིན་རྟོགས་པའི་ཕྱིར། །སངས་རྒྱས་ཡེ་ཤེས་སྟོབས་དག་ཀྱང་། །རབ་ཏུ་རྟོགས་
པར་གྱུར་པ་ཡིན། །སངས་རྒྱས་ཡེ་ཤེས་སྟོབས་དག་ནི། །རབ་ཏུ་རྟོགས་པར་གྱུར་པའི་ཕྱིར། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །གཞན་ཡང་མིག་གི་མི་འོང་ཉིད། །ཡང་དག་ཇི་བཞིན་རྟོགས་པའི་ཕྱིར། །འདོད་རྣམས་སྤངས་པ་གང་
ཡིན་པ། །དེ་ཡང་རབ་ཏུ་རྟོགས་པར་འགྱུར། །འདོད་རྣམས་སྤངས་པ་གང་ཡིན་པ། །རབ་ཏུ་རྟོགས་པར་གྱུར་པའི་ཕྱིར། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །གཞན་ཡང་བསམ་གཏན་བསྒོམ་པ་དག །ཡང་དག་ཇི་བཞིན་རྟོགས་པའི་ཕྱིར། །ཉོན་མོངས་

སྤངས་པ་གང་ཡིན་པ། །དེ་ཡང་རབ་ཏུ་རྟོགས་པར་འགྱུར། །ཉོན་མོངས་སྤངས་པ་གང་ཡིན་པ། །རབ་ཏུ་རྟོགས་པར་གྱུར་པའི་ཕྱིར། །དེས་ནི་དེ་བཞིན་གཤེགས་པ་རྣམས། །མཐོང་བ་ཉིད་དུ་གྱུར་པ་ཡིན། །གང་ཟག་དེས་ནི་དེ་བཞིན་དུ། །མིག་གི་སྔོན་མཐའ་ཤེས་པ་དང་། །མིག་
གི་མི་གནས་ཤེས་པ་དང་། །མིག་གི་སྐྱེ་བ་ཤེས་པ་དང་། །སངས་རྒྱས་རྫུ་འཕྲུལ་ཤེས་པ་དང་། །མིག་གི་དམན་པ་ཤེས་པ་དང་། །མིག་གི་ཁྱད་པར་འཕགས་ཤེས་དང་། །ཡེ་ཤེས་དམན་པ་ཤེས་པ་དང་། །རྣམ་དག་ཡེ་ཤེས་ཤེས་པ་དང་། །ཚུལ་ཁྲིམས་རྣམ་དག་ཤེས་
པ་དང་། །ལུས་ཀྱི་སྡོམ་པའི་ཤེས་པ་དང་། །རྣམ་དག་སྒྲ་ཡི་ཤེས་པ་དང་། །ངག་གི་སྡོམ་པའི་ཤེས་པ་དང་། །རྣམ་དག་སེམས་ཀྱི་ཤེས་པ་དང་། །གནས་ཀྱི་བྱེ་བྲག་ཤེས་པ་དང་། །སེམས་ཀྱི་ཆོས་ཀྱི་ཤེས་པ་དང་། །སེམས་སྐྱོན་ཤེས་པའི་ཤེས་པ་དང་། །རྣམ་དག་
ལས་ཀྱི་ཤེས་པ་དང་། །སེམས་ཀྱི་སྡོམ་པའི་ཤེས་པ་དང་། །ཉེས་དམིགས་ཤེས་པའི་ཤེས་པ་དང་། །རྣམ་དག་སྒྲ་ཡི་ཤེས་པ་དང་། །ཕུང་པོའི་བྱེ་བྲག་ཤེས་པ་དང་། །ཕུང་པོའི་རྒྱུ་རྐྱེན་ཤེས་པ་དང་། །མིག་ནི་ཡོངས་ཤེས་ཤེས་པ་དང་། །སྡུག་བསྔལ་འབྱུང་གནས་ཤེས་
པ་དང་། །ཟག་མེད་ཚུལ་ཁྲིམས་ཤེས་པ་དང་། །ཚུལ་ཁྲིམས་རྒྱུ་རྐྱེན་ཤེས་པ་དང་། །སྡུག་བསྔལ་རྒྱུ་རྐྱེན་ཤེས་པ་དང་། །སྡུག་བསྔལ་ཟད་པའི་རྒྱུ་ཤེས་དང་། །འདུས་བྱས་རྣམས་ཀྱི་ཤེས་པ་དང་། །ཟག་པ་ཟད་པའི་ཤེས་པ་དག །ཡོངས་སུ་རྫོགས་པར་བྱེད་པ་ཡིན། །
གཞན་ཡང་རྒྱུ་རྐྱེན་བཅུ་གཉིས་ཀྱི། །སྤྱོད་དང་བཅས་པའི་ཤེས་པ་དང་། །སྤྱོད་པ་མེད་པའི་ཤེས་པ་དང་། །མཚན་མ་བཅས་དང་མཚན་མ་མེད། །འདུས་བྱས་དང་ནི་འདུས་མ་བྱས། །རྣམ་པར་གཞག་དང་ཡོངས་སྡུད་དང་། །བདག་དང་གཞན་གྱི་སེམས་ཤེས་པ། །ཡང་དག་
ཇི་བཞིན་ཤེས་པ་ཡིན། །གཞན་ཡང་མིག་ཟད་སྐྱེ་མཐའ་དང་། །མིག་གི་མཐའ་དང་རབ་དབེན་དང་། །འཇུག་པ་དང་ནི་མེད་པ་དང་། །མི་སྐྱེ་བ་དང་ཉེར་ཞི་ཉིད། །ཡང་དག་ཇི་བཞིན་ཤེས་པས་ན། །སེམས་ཅན་དག་ནི་མང་པོ་རྣམས། །རྣམ་པར་དག་པའི་ཡེ་ཤེས་དང་། །མཐུ་

དང་བཅས་པའི་ཡེ་ཤེས་དང་། །བརྩོན་འགྲུས་ཡེ་ཤེས་འཐོབ་པར་བྱེད། །གཞན་ཡང་གཅིག་དང་ཐ་དད་ཤེས། །སེམས་ཅན་དག་ནི་ཐམས་ཅད་ཀྱི། །མོས་པའི་ཤེས་པ་གང་ཡིན་པ། །ཡང་དག་ཇི་བཞིན་ཤེས་པ་ཡིན། །གཞན་ཡང་སེམས་ཅན་
ཐམས་ཅད་ཀྱི། །མོས་པ་ཁྱད་པར་འཕགས་པ་དང་། །རྣམ་དག་སེམས་ཀྱི་ཤེས་པ་དང་། །ལས་དང་རྣམ་སྨིན་ཤེས་པ་དང་། །དབང་པོ་ཁམས་ཀྱི་ཤེས་པ་དང་། །སེམས་ཀྱི་འགྱུར་བ་ཤེས་པ་དང་། །ཤེས་རབ་མོས་པའི་ཤེས་པ་དང་། །ཤིན་ཏུ་རྣམ་གྲོལ་ཤེས་པ་
དང་། །སྤོབས་པ་མཆོག་གི་ཤེས་པ་དག །ཡང་དག་ཇི་བཞིན་ཤེས་པ་ཡིན། །གཞན་ཡང་སེམས་ཅན་མ་རུངས་དང་། །ཆོས་ལ་མོས་པ་མེད་གྱུར་པ། །ཡང་དག་ཇི་བཞིན་ཤེས་པས་ན། །མོས་པའི་ཤེས་པ་སྐྱེད་པར་བྱེད། །གཞན་ཡང་དོན་གྱི་ཚུལ་དག་ནི། །ཡང་
དག་ཇི་བཞིན་ཤེས་པས་ན། །ལེ་ལོ་མེད་པའི་ཤེས་པ་དག །དུས་ཤེས་སྒྲུབ་པར་བྱེད་པ་ཡིན། །གཞན་ཡང་རྫུ་འཕྲུལ་སྟོབས་དག་གིས། །ཆོས་རྣམས་རབ་ཏུ་འབྱེད་པ་དང་། །ཐོགས་པ་མེད་པའི་ཡེ་ཤེས་དག །ཡང་དག་ཇི་བཞིན་ཤེས་པ་ཡིན། །གཞན་ཡང་
རྒྱ་ཆེན་དོན་དག་དང་། །ཚིག་གིས་བསྟན་པ་གང་ཡིན་པ། །རྗེས་སུ་ཤེས་པའི་ཤེས་པ་དག །ཡང་དག་ཇི་བཞིན་ཤེས་པ་ཡིན། །གཞན་ཡང་གྲོགས་བཟང་འཐུན་གནས་དང་། །གོས་དང་ཟས་དང་བཏུང་བ་དག །ཚོད་ཤེས་པ་ཡི་ཤེས་པ་རྣམས། །ཡང་དག་ཇི་
བཞིན་ཤེས་པ་ཡིན། །གཞན་ཡང་བྱ་བ་མེད་པ་ཡི། །གཟུགས་ཀྱི་ཆོས་ནི་གང་ཡིན་པ། །ནན་ཏན་བསྒྲུབ་པའི་ཤེས་པ་དག །ཡང་དག་ཇི་བཞིན་ཤེས་པ་ཡིན། །གཞན་ཡང་ལུས་སེམས་སྐྱོན་མེད་ཅིང་། །སྒྲོ་འདོགས་སྐུར་འདེབས་ཡོངས་སྤངས་ནས། །བླ་མེད་
ཡེ་ཤེས་གང་ཚོལ་བ། །ཡང་དག་ཇི་བཞིན་ཤེས་པ་ཡིན། །གཞན་ཡང་རྫུ་འཕྲུལ་སྟོབས་དག་གིས། །ནམ་མཁའ་བར་སྣང་དག་ལས་ནི། །སྤྲུལ་པའི་སྐུ་ནི་རབ་བསྟན་ནས། །སེམས་ཅན་དག་ནི་བརྒྱ་སྟོང་སྙེད། །ཡོངས་སུ་སྨིན་པར་མཛད་པས་ན། །ཐམས་ཅད་རབ་ཏུ་

དགའ་གྱུར་ནས། །དད་པ་སྐྱེས་པའི་ཤེས་པ་དང་། །དེ་བཞིན་གཤེགས་པ་རྣམས་ལ་ཡང་། །མོས་ཤིང་གུས་པའི་ཤེས་པ་དང་། །འདོད་ཆགས་སྤངས་པའི་ཆོས་དག་ལ། །རབ་མོས་བསྒྲུབ་པའི་ཤེས་པ་དང་། །འཕགས་པའི་དགེ་འདུན་ཚོགས་ལ་ཡང་། །མཆོད་པར་
མོས་པའི་ཤེས་པ་དང་། །བྱང་ཆུབ་ཆེན་པོ་དག་ལ་ཡང་། །རབ་མོས་བསྔོ་བའི་ཤེས་པ་དང་། །གཟུངས་རྣམས་ཀྱི་ནི་སྒོ་དག་ལ། །རབ་མོས་སྟོན་པའི་ཤེས་པ་དང་། །མོས་པ་རྣམས་ནི་གང་ཡིན་པ། །སོ་སོར་རབ་རྟོགས་ཤེས་པ་དང་། །འཕགས་པའི་ཏིང་འཛིན་གང་ཡིན་
པ། །ལེགས་པར་རྟོགས་པའི་ཤེས་པ་དང་། །བསྲུང་དང་རྗེས་སུ་དྲན་རྣམས་ལ། །ངེས་པར་བྱེད་པའི་ཤེས་པ་དང་། །དཔག་ཏུ་མེད་པའི་སེམས་དག་ལ། །ལེགས་པར་འཇུག་པའི་ཤེས་པ་དང་། །ཚིགས་སུ་བཅད་པ་ཚད་མེད་རྣམས། །ཡང་དག་སྟོན་པའི་ཤེས་པ་དང་། །
འདོད་པའི་མཚམས་སྦྱོར་གང་ཡིན་པ། །རྟོགས་ཤིང་གོ་བའི་ཤེས་པ་དང་། །འགྲོ་བ་དམན་པ་དེ་དག་ཏུ། །ལྟུང་བར་མི་འགྱུར་ཤེས་པ་དང་། །མི་དགེ་བཤེས་གཉེན་གང་ཡིན་པ། །ཡོངས་སུ་སྤོང་བྱེད་ཤེས་པ་དང་། །དགེ་བའི་བཤེས་གཉེན་གང་ཡིན་པ། །སྟེན་པར་
བྱེད་པའི་ཤེས་པ་དང་། །འདྲི་ཞིང་ལན་ལྡོན་གང་ཡིན་པ། །རབ་ཏུ་རྣམ་འབྱེད་ཤེས་པ་དང་། །གནས་དང་གནས་མིན་གང་ཡིན་པ། །ལེགས་པར་རྟོགས་པའི་ཤེས་པ་དང་། །ས་དང་ས་མིན་གང་ཡིན་པ། །ལེགས་པར་རྟོགས་པའི་ཤེས་པ་དང་། །རབ་འབྲིང་ཐ་མ་གང་
ཡིན་པ། །རྣམ་པར་འབྱེད་པའི་ཤེས་པ་དང་། །འདུས་བྱས་ཤེས་པ་གང་ཡིན་དང་། །འདུས་མ་བྱས་ཀྱི་ཤེས་པ་དང་། །དངོས་པོ་དང་ནི་རྫས་ཀྱི་ཤེས། །དངོས་དང་རྫས་མིན་ཤེས་པ་དང་། །ཡོངས་སུ་སྡུད་བྱེད་ཤེས་པ་དང་། །ཡོངས་སུ་སྡུད་མིན་ཤེས་པ་དང་། །
མངོན་པར་སྒྲུབ་པའི་ཤེས་པ་དང་། །ཡང་དག་སྒྲུབ་མིན་ཤེས་པ་དང་། །མིག་དང་མིག་མིན་ཤེས་པ་དང་། །མིག་དང་ལྷན་ཅིག་ཤེས་པ་དང་། །མིག་གི་བྱེ་བྲག་ཤེས་པ་དང་། །མིག་གི་རང་བཞིན་ཤེས་པ་དང་། །ཡང་དག་ཇི་བཞིན་ཤེས་པ་ཡིན། །རྣ་བ་སྣ་ལྕེ་ལུས་

ནས་ནི། །སྒྲ་དང་མིང་ལ་སོགས་པའི་བར། །ཆོས་ནི་རྣམ་པ་ཉི་ཤུ་ལྔ། །ཐམས་ཅད་དེ་བཞིན་སྦྱར་བར་བྱ། །གང་ཞིག་མིག་གི་རྒྱུ་རྐྱེན་ཉིད། །ཡང་དག་སྟོང་ཞིང་དབེན་པ་དང་། །མཐར་ནི་བདག་ཡོད་མ་ཡིན་པར། །སེམས་པར་བྱེད་པ་གང་ཡིན་པ། །
གང་ཟག་དེས་ནི་དེ་བཞིན་དུ། །ཡང་དག་ངེས་པ་ཁོ་ནར་ནི། །སེམས་ཀྱི་ཏིང་འཛིན་གང་ཡིན་པ། །ཡོངས་སུ་རྫོགས་པར་བྱེད་པར་འགྱུར། །གང་ཞིག་མིག་གི་རྟེན་འབྲེལ་དང་། །མིག་མི་རྟག་པའི་མཚན་ཉིད་དག །ངེས་པ་ཉིད་དུ་རྟོགས་གྱུར་ནས། །སེམས་པར་བྱེད་
པ་གང་ཡིན་པ། །གང་ཟག་དེས་ནི་དེ་བཞིན་དུ། །མིག་གི་རྒྱུ་རྐྱེན་གང་ཡིན་དང་། །མཐར་ནི་ཡོད་པ་མ་ཡིན་པ། །ཡང་དག་ཇི་བཞིན་རྟོགས་པར་འགྱུར། །རྣ་བ་སྣ་ལྕེ་ལུས་ནས་ནི། །སྒྲ་དང་མིང་ལ་སོགས་པའི་བར། །ཆོས་ནི་རྣམ་པ་ཉི་ཤུ་ལྔ། །ཐམས་ཅད་དེ་བཞིན་
སྦྱར་བར་བྱ། །དེ་ཡི་ཚེ་ན་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །ཞབས་ནི་ས་ལ་རེག་ཙམ་གྱིས། །དངོས་པོ་ངོ་མཚར་རབ་བསྟན་པ། །དེང་འདིར་བདག་གི་མདོར་བསྡུས་ནས། །ཡོན་ཏན་ཕྱོགས་ནི་ཅུང་ཟད་ཅིག །སེམས་ཅན་དགའ་བ་བསྐྱེད་
པའི་ཕྱིར། །ཡང་དག་པར་ནི་བསྟན་པར་བྱ། །དེ་ཚེ་ལྷ་མི་འདྲེན་པ་ཡིས། །སྤུ་ཡི་ཁུང་བུ་གཅིག་ནས་ནི། །འོད་ཟེར་བརྒྱ་སྟོང་ཚད་མེད་སྙེད། །རབ་ཏུ་བཀྱེ་བར་གྱུར་པས་ན། །འོད་ཟེར་དག་ནི་རེ་རེས་ཀྱང་། །ཞིང་ནི་ཚད་མེད་གསལ་མཛད་ནས། །སེམས་ཅན་མང་པོ་ཀུན་
གྱི་ཕྱིར། །སངས་རྒྱས་མཛད་པ་རབ་ཏུ་མཛད། །གང་ཞིག་འདས་པའི་དུས་སུ་ནི། །སངས་རྒྱས་རྣམས་ལ་མཆོད་པ་དང་། །ཡུན་རིང་སྦྱིན་དང་ཚུལ་ཁྲིམས་དག །མངོན་པར་བསྒྲུབས་པ་གང་ཡིན་པ། །དེ་ལྟ་བུ་ཡི་གང་ཟག་དག །དེས་ནི་ཇི་སྐད་བསྟན་པ་ཡི། །རྫུ་
འཕྲུལ་དངོས་པོ་ཐོས་གྱུར་ན། །རབ་ཏུ་དགའ་ཞིང་མོས་པར་འགྱུར། །གང་ཞིག་སངས་རྒྱས་རྫུ་འཕྲུལ་རྣམས། །ཉན་ཐོས་དང་ནི་རང་རྒྱལ་གྱི། །སྤྱོད་ཡུལ་མིན་པར་རབ་ཤེས་ནས། །དེ་ལྟ་བུ་ཡི་གང་ཟག་དག །དེས་ནི་ཇི་སྐད་བསྟན་པ་ཡི། །རྫུ་འཕྲུལ་དག་ནི་ཐོས་གྱུར་

ན། །མོས་པ་དག་ནི་སྐྱེ་འགྱུར་ཞིང་། །ངོ་མཚར་འཛིན་པའི་སེམས་ཀྱང་སྐྱེད། །ལྷ་དང་མི་ནི་འདྲེན་པ་ཡིས། །བསམ་གྱིས་མི་ཁྱབ་མཐུ་དག་གིས། །དེ་ལྟ་བུ་ལ་སོགས་པ་ཡི། །རྫུ་འཕྲུལ་སྣ་ཚོགས་རབ་བསྟན་པས། །སེམས་ཅན་དག་ནི་བརྒྱ་སྟོང་དང་། །ཚད་མེད་གྲངས་
མེད་པ་རྣམས་ཀྱིས། །དེ་བཞིན་གཤེགས་པ་རྣམས་ལ་ནི། །བསྟེན་ཅིང་རིམ་གྲོ་མཆོད་པ་བྱས། །ལྷ་དང་མི་ནི་འདྲེན་པ་ཡིས། །བསམ་གྱིས་མི་ཁྱབ་མཐུ་དག་གིས། །མདོ་སྡེ་དག་ནི་བརྒྱ་སྟོང་དང་། །ཚད་མེད་གྲངས་མེད་རབ་བཤད་པས། །སེམས་ཅན་དག་ནི་མང་པོ་
རྣམས། །བསྟན་པ་དེ་ནི་ཐོས་པས་ན། །ཐམས་ཅད་དང་བས་རབ་བླངས་ཏེ། །སེམས་ནི་རབ་ཏུ་དགའ་བར་གྱུར། །དེ་ཡི་ཚེ་ན་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །རྫུ་འཕྲུལ་གྱི་ནི་མཐུ་དག་གིས། །ནམ་མཁའ་ལས་ནི་འདི་སྐད་དུ། །
མིག་ཟད་མཐའ་ནི་ཤེས་པ་ནས། །ལྷ་མིག་ནི་ཉེ་བར་ཞི་བ་དང་། །མིག་ཉིད་རྒྱུ་ཡི་བར་དུ་ཡང་། །འགྲོ་བ་མེད་ཅིང་འོང་མེད་དང་། །མཐར་ནི་སྟོང་དབེན་ཤེས་པར་གྱིས། །དེ་སྐད་དུ་ནི་ཐོས་པར་གྱུར། །རྣ་བ་སྣ་ལྕེ་ལུས་ནས་ནི། །སྒྲ་དང་མིང་ལ་སོགས་པའི་བར། །ཆོས་
ནི་རྣམ་པ་ཉི་ཤུ་ལྔ། །ཐམས་ཅད་དེ་བཞིན་སྦྱར་བར་བྱ། །དེ་ཡི་ཚེ་ན་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །ནམ་མཁའ་བར་སྣང་དག་ལས་ནི། །སྒྲ་སྙན་དམ་པ་མཆོག་བྱུང་ནས། །དེ་བཞིན་གཤེགས་པའི་མཚན་སྣ་ཚོགས། །བསྔགས་པ་བརྗོད་
པར་གྱུར་པས་ན། །འཁོར་ནི་འདུས་པ་ཆེན་པོ་རྣམས། །ཐམས་ཅད་དད་མོས་སེམས་ཀྱང་སྐྱེས། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་བདུད་དང་བདུད་དཔུང་དག །ཕམ་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་
བུ་ཡི་མཚན། །ཐོས་པར་གྱུར་པ་དེ་དག་ནི། །ལོག་པར་ལྟ་བའི་ཚོགས་ཐམས་ཅད། །རབ་ཏུ་འདུལ་བར་ནུས་ཤེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་འདོད་ཆགས་གཞོམ་པ་དང་། །ཞི་མཛད་ཆོས་ཀྱི་རྒྱལ་ཞེས་

བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་བ་དེ་དག་ནི། །འདོད་པའི་འདོད་ཆགས་གང་ཡིན་པ། །ཐམས་ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་ཞེ་སྡང་གཞོམ་
པ་དང་། །ཞི་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ཞེ་སྡང་དག་ནི་གང་ཡིན་པ། །ཐམས་ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་གཏི་མུག་
གཞོམ་པ་དང་། །ཞི་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །གཏི་མུག་དག་ནི་གང་ཡིན་པ། །ཐམས་ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །
མཚན་ནི་ང་རྒྱལ་གཞོམ་པ་དང་། །ཞི་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ང་རྒྱལ་དག་ནི་གང་ཡིན་པ། །ཐམས་ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་
ཡིན་པ། །མཚན་ནི་ཁོང་ཁྲོ་གཞོམ་པ་དང་། །ཞི་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ཁོང་ཁྲོ་དག་ནི་གང་ཡིན་པ། །ཐམས་ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་
སེང་གེ་གང་ཡིན་པ། །མཚན་ནི་ཕྲག་དོག་གཞོམ་པ་དང་། །ཞི་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ཕྲག་དོག་དག་ནི་གང་ཡིན་པ། །ཐམས་ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །
མི་ཡི་སེང་གེ་གང་ཡིན་པ། །མཚན་ནི་མི་བདེན་གཞོམ་པ་དང་། །ཞི་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །མི་བདེན་དག་ནི་གང་ཡིན་པ། །ཐམས་ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །

མི་ཡི་སེང་གེ་གང་ཡིན་པ། །མཚན་ནི་ལྟ་རྣམས་གཞོམ་པ་དང་། །ཞི་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ལྟ་བ་དག་ནི་གང་ཡིན་པ། །ཐམས་ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །
མི་ཡི་སེང་གེ་གང་ཡིན་པ། །མཚན་ནི་སྤྲོས་པ་གཞོམ་པ་དང་། །ཞི་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །སྤྲོས་པ་དག་ནི་གང་ཡིན་པ། །ཐམས་ཅད་སྤོང་བར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །
མི་ཡི་སེང་གེ་གང་ཡིན་པ། །མཚན་ནི་ཡང་དག་པ་ཡི་ཆོས། །རྣམ་དག་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །རྣམ་དག་ཆོས་ནི་གང་ཡིན་པ། །རབ་ཏུ་རྟོགས་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །
མི་ཡི་སེང་གེ་གང་ཡིན་པ། །མཚན་ནི་ལས་རྣམས་རྟོགས་པ་ཡི། །ཆོས་ཀྱི་རྒྱལ་ཞེས་བྱ་བ་ཡིན། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ལས་རྣམས་ཐམས་ཅད་གང་ཡིན་པ། །རབ་ཏུ་རྟོགས་པར་འགྱུར་ཞེས་ཟེར། །ད་ལྟར་འཇིག་རྟེན་
བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་རྫུ་འཕྲུལ་ཕུན་ཚོགས་པའི། །ཆོས་ཀྱི་རྒྱལ་ཞེས་བྱ་བ་ཡིན། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །རྫུ་འཕྲུལ་ཡོན་ཏན་གང་ཡིན་པ། །ཡོངས་སུ་རྫོགས་པར་འགྱུར་ཞེས་ཟེར། །ད་
ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་ཕ་རོལ་ཕྱིན་པ་རྣམས། །ཕུན་ཚོགས་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ཕ་རོལ་ཕྱིན་དྲུག་གང་ཡིན་པ། །ཡོངས་སུ་རྫོགས་པར་འགྱུར་
ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་འདུ་བྱེད་གང་ཡིན་པ། །རབ་རྟོགས་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །འཛིན་པར་བྱེད་པ་དེ་དག་ནི། །འདུ་བྱེད་དག་ནི་ཐམས་ཅད་ཀུན། །རབ་ཏུ་རྟོགས་

པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་རྣམ་པར་དག་པ་ཡི། །འོད་ཟེར་ཀུན་འཛིན་སྐྱེད་ཅེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ཁྱད་པར་འཕགས་པའི་
སྐྱེ་ལེན་དག །ཡོངས་སུ་རྫོགས་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་ཁ་དོག་དག་པ་ཡི། །འོད་ཟེར་ཀུན་འཛིན་ཞེས་ཀྱང་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །
ཁྱད་པར་འཕགས་པའི་གཟུགས་དམ་པ། །ཡོངས་སུ་རྫོགས་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་སྐུ་ཉིད་དག་པ་ཡི། །འོད་ཟེར་ཀུན་འཛིན་ཞེས་ཀྱང་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་
དེ་དག་ནི། །ཁྱད་པར་འཕགས་པའི་གཟུགས་སྐུ་དག །ཡོངས་སུ་རྫོགས་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་གདུང་ཉིད་དག་པ་ཡི། །འོད་ཟེར་ཀུན་འཛིན་ཞེས་ཀྱང་བྱ། །གང་གིས་འདི་ལྟ་བུ་ཡི་མཚན། །
ཐོས་པར་གྱུར་པ་དེ་དག་ནི། །ཁྱད་པར་འཕགས་པའི་རུས་རིགས་རྣམས། །ཡོངས་སུ་རྫོགས་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་རྒྱ་ཆེར་གྲགས་པ་ཡི། །འོད་ཟེར་ཀུན་འཛིན་ཞེས་ཀྱང་བྱ། །གང་གིས་
འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །རྒྱ་ཆེར་གྲགས་པའི་གྲགས་པ་རྣམས། །ཡོངས་སུ་རྫོགས་པར་འགྱུར་ཞེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་སྦྱིན་པ་གཏོང་བ་དང་། །ཚུལ་ཁྲིམས་ཅན་དང་བཟོད་
བསྒོམས་དང་། །བརྩོན་འགྲུས་བརྩམས་དང་བསམ་གཏན་དང་། །ཤེས་རབ་ཀུན་འཛིན་ཞེས་ཀྱང་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །སྦྱིན་པ་དང་ནི་ཚུལ་ཁྲིམས་ནས། །ཤེས་རབ་ཕ་རོལ་ཕྱིན་པ་དང་། །གཟུངས་ཀྱི་སྒོ་ནི་གང་ཡིན་པ། །

ཡོངས་སུ་རྫོགས་པར་འགྱུར་ཞེས་ཟེར། །ད་ལྟར་འཇིག་